སྒྲུབ་ཐབས་རིན་ཆེན་འབྱུང་གནས་ལས་ཐ་མར་དགེ་བའི་དོན་དུ་ཉེར་མཁོའི་སྒྲུབ་ཐབས་འགའ་ཞིག་བཤད་པའི་སྐབས་ཏེ་ཉེར་བཞི་པ།
སྒྲུབ་ཐབས་བརྒྱ་རྩའི་ལག་ལེན་གསལ་བྱེད།
སྒྲུབ་ཐབས་བརྒྱ་རྩའི་ལག་ལེན་གསལ་བྱེད་བཞུགས།
ཨོཾ་སྭཱ་སྟི། ན་མོ་བུདྡྷཱ་ཡ། སྒྲུབ་ཐབས་བརྒྱ་རྩའི་ལག་ལེན་གསལ་བྱེད་ཅེས་བྱ་བ། བླ་མ་དང་ལྷག་པའི་ལྷ་རྣམས་ལ་ཕྱག་འཚལ་ལོ། །རྒྱལ་བ་སྟོན་པ་ཤཱཀྱའི་ཏོག།དེ་ལ་དད་པས་རབ་བཏུད་ནས། །སྒྲུབ་ཐབས་བརྒྱ་རྩ་ཡོན་ཏན་གྱི། །འབྱུང་གནས་རྨད་བྱུང་འདིར་འཇུག་བྱ། །དེ་ལ་སྒྲུབ་ཐབས་བརྒྱ་རྩའི་རྗེས་གནང་བྱེད་ཚུལ་ལག་ལེན་ནི་འདི་ཡིན་ཏེ། ཐོག་མ་ཐུབ་པ་རྡོ་རྗེ་གདན་གྱི་མངོན་རྟོགས་དང་རྗེས་གནང་གི་ཆོ་ག་ཤེས་པར་བྱ་སྟེ། དུས་བཟང་པོ་ལ་སློབ་དཔོན་བཟང་པོས་སློབ་མ་བཟང་པོ་ལ་སྦྱིན་ཏེ་དེ་ཡང་སྟེགས་བུ་གྲུ་བཞི་པ་རས་བཟང་པོས་གཡོགས་པའི་དབུས་སུ་མཎྜལ་གུར་གུམ་གྱིས་བྱུགས་པར། རྡོ་རྗེ་གདན་གཙོ་འཁོར་གསུམ་གྱི་ཚོམ་བུ་དབུས་མ་ཆེ་བ། གཡས་གཡོན་དུ་ཆུང་བ་རེ་རེ་མཚར་དུ་བསྒྲིགས། བྱང་ཤར་དུ་མཚམས་འཛིན་གྱི་མེ་ཏོག །ཤར་དུ་མཆོད་ཡོན། ཤར་
ལྷོར་ཞབས་བསིལ། ལྷོར་མེ་ཏོགལྷོ་ནུབ་ཏུ་བདུག་སྤོས། ནུབ་ཏུ་མར་མེ། ནུབ་བྱང་དུ་དྲི་ཆབ། བྱང་དུ་ལྷ་བཤོས། ཇི་ལྟར་བདེ་བར་གཏོར་མ་བཤམས། རྗེས་གནང་དུ་མ་ཞིག་རྗེས་ལ་སྦྲེལ་ནས་བྱེད་ན། ཇི་ཙམ་བྱེད་པའི་ལྷ་བཤོས་ཀྱི་གྲངས་དང༌། གཏོར་གསོས་ཀྱི་མཐེབ་ཀྱུ། མེ་ཏོག་གསོ་ཆས། སྤོས་འབུལ་རྒྱུ། མཆོད་ཡོན། ཞབས་བསིལ། དྲི་ཆབ་གསོ་བ་དང༌། གཏོར་མ་སྦྱངས་ཆས་ཀྱི་ཆུ་རྣམས་སྟ་གོན་བྱ། སློབ་དཔོན་གྱི་མདུན་དུ་ལྕོག་རྩེའི་སྟེང་དུ་ཏིང་ཤག་དང་རྡོར་དྲིལ་གང་འོས། སློབ་མ་རྣམས་ལ་འཐོར་རྒྱུའི་མེ་ཏོག་ཏིང་ཕོར་དང༌། སློབ་མ་རྣམས་ལ་འགྱེད་རྒྱུའི་མེ་ཏོག་ཀ་ཏོ་ར་རེ་ལས་ཀྱི་རྡོ་རྗེའི་མདུན་དུ་མཎྜལ་དང༌། དེ་ལ་བྱུགས་པའི་ཆུ་དང་བཅས་པ་བཤམས། དེ་ནས་སློབ་དཔོན་གྱིས་འདི་སྐད་ཅེས། ནམ་མཁའ་དང་མཉམ་པའི་སེམས་ཅན་ཐམས་ཅད་
བླ་མ་ལ་སྐྱབས་སུ་མཆིའོ། །སངས་རྒྱས་ལ༴ ཆོས་ལ༴ དགེ་འདུན་ལ༴ ལན་བདུན་མཛད། སངས་རྒྱས་ཆོས་དང་ཚོགས་ཀྱི་མཆོག་བཅས་ལ། །བྱང་ཆུབ་བར་དུ་བདག་ནི་སྐྱབས་སུ་དམཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག ཉེ་རིང་ཆགས་སྡང་དང་བྲལ་བའི་བཏང་སྙོམས་ཚད་མེད་པ་ལ་གནས་པར་གྱུར་ཅིགརང་སྐད་ཅིག་གིས་ཐུབ་པ་རྡོ་རྗེ་གདན་དུ་གསལ་བའི་སྙིང་གར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཡི་གེ་ཧཱུཾ་གསེར་གྱི་མདོག་ཅན། དེ་ལས་འོད་འཕྲོས་མདུན་གྱི་ནམ་མཁར་ཐུབ་པ་ཆེན་པོ་གཙོ་འཁོར་གསུམ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་བཛྲ་ས་མཱ་ཛཿ ཨོཾ་ཤཱཀྱ་མུ་ནི་ས་པ་རི་ཝ་ར་ཨརྒྷཾ་པྲ་ཏཱིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷུ་པེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾབཛྲ་ནཻ་ཝེ་ཏེ་ཨཱཿཧཱུཾ། ཨོཾ་བཛྲ་ཤཔྟ་ཨཱཿཧཱུཾ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་
བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་རིན་པོ་ཆེའི་ཁྲི་ཕྱོགས་བཞིར་བདུད་བཞི། མཚམས་བཞིར་སེང་གེ་བཞིས་བཏེག་པའི་སྟེང་དུ། པདྨ་དང་ཟླ་བའི་དཀྱིལ་འཁོར་ལ་ཧཱུཾ་ལས་རྡོ་རྗེ་སེར་པོ་ཧཱུཾ་གིས་མཚན་པ་དེ་ཡོངས་སུ་གྱུར་པ་ལས་བདག་ཉིད་ཐུབ་པ་རྡོ་རྗེ་གདན་སྐུ་མདོག་གསེར་བཙོ་མ་ལྟ་བུ། ཞལ་གཅིག་ཕྱག་གཉིས་པ། གཡས་ས་གནོན། གཡོན་ཏིང་ངེ་འཛིན་གྱི་ཕྱག་རྒྱ་ཅན། ཞབས་རྡོ་རྗེའི་སྐྱིལ་ཀྲུང་གིས་བཞུགས་ཤིང༌། ན་བཟའ་ཆོས་གོས་ངུར་སྨྲིག་གསོལ་བ། དབུ་གཙུག་ཏོར་དང་བཅས་པ། ཚངས་པར་སྤྱོད་པའི་ཆ་ལུགས་ཅན། དེའི་གཡས་སུ་བྱམས་པ་སེར་པོ་གཡས་རིན་པོ་ཆེའི་རྔ་ཡབ། གཡོན་ཀླུ་ཤིང་གི་ཡལ་ག་མེ་ཏོག་དང་བཅས་པ་བསྣམས་པ། གཡོན་ན་སྤྱན་རས་གཟིགས་དཀར་པོ་གཡས་རིན་པོ་ཆེའི་རྔ་ཡབ། གཡོན་པདྨ་བསྣམས་པ། གཉིས་ཀའང་རིན་པོ་ཆེའི་རྒྱན་དང་དར་སྣ་ཚོགས་ཀྱི་ཤམ་ཐབས་ཅན། བཅོམ་ལྡན་འདས་ཀྱི་ཞལ་རས་ལ་བལྟ་བའོ། །དེ་རྣམས་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་
སེམས་དཔའ་ཐམས་ཅད་ཐུབ་པ་རྡོ་རྗེ་གདན་གཙོ་འཁོར་གསུམ་གྱི་རྣམ་པར་བཛྲ་ས་མཱ་ཛཿ ཨོཾ་བཛྲ་ཨངྐུ་ཤ་ཛཿ ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨཱ་བེ་ཤ་ཨཱཿ གཉིས་སུ་མེད་པར་ཐིམ། དེ་དག་གི་ཕྱག་རྒྱ་སྤྱི་འགྲོ་ལྟར་མཛད། ཡང་སྙིང་གའི་ཧཱུཾ་ལས་འོད་འཕྲོས། དེ་བཞིན་གཤེགས་པ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ ཁྱེད་རྣམས་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་གསུངས་ཤིང་དབང་བསྐུར་བས། བཅོམ་ལྡན་འདས་ལ་མི་བསྐྱོད་པ། བྱམས་པ་ལ་རྣམ་སྣང་། སྤྱན་རས་གཟིགས་ལ་འོད་དཔག་མེད་ཀྱིས་དབུ་བརྒྱན། ཨོཾ་ཨཱཿབཛྲ་ཧཱུཾ་སྭཱཧཱ། ཞེས་བཟླས་ལ། མཐར་སྐུ་གསུང་ཐུགས་ཡོན་ཏན་འཕྲིན་ལས་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། ཛཿཧཱུཾ་བཾ་ཧོཿ འཁོར་གཉིས་རང་ལ་ཐིམ་མོ། །ཨོཾ་ཨ་མྲྀ་ཏེ་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོགབདུག་སྤོས། མར་མེ། དྲི། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ། འཕགས་པ་ཀུན་དུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་དཔག་ཏུ་མེད་པར་གྱུར། ཨོཾ་ཨརྒྷཾ་ཨཿཧཱུཾ། ཨོཾ་པཱ་དྱཾ་ཨཱཿཧཱུཾ། ཨོཾ་བཛྲ་པུཥྤེ་ཨཱཿཧཱུཾ་ནས་ཤཔྟ་ཨཱཿཧཱུཾ།
ཨོཾ་བཛྲ་སྥ་ར་ཎ་ཁཾ། ཨོཾ་སྭ་བྷཱ་ཝ་ཤུདྡྷ་སོགས། སྟོང་པའི་ངང་ལས་དྲིའི་མཎྜལ་གྱི་དབུས་སུ་རིན་པོ་ཆེའི་ཁྲི་ཞེས་པ་ནས་མདུན་བསྐྱེད་ཡིན་པས་བདག་ཉིད་མི་ཟེར། ཁྱེད་ཀྱིས་འདི་ལ་དབང་བསྐུར་ཞེས་འདོན་པ་སྤོ། གཞན་དབུ་བརྒྱན་པའི་བར་གོང་གི་བདག་བསྐྱེད་དང་འདྲ་བར་མཛད་ནས། ཨོཾ་ཤཱཀྱ་མུ་ནི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ་ནས། ཤཱཀྱ་མུ་ནི་ས་པ་རི་ཝ་ར་ཤཔྟ་ཨཱཿཧཱུཾ་གི་བར་དང༌། ན་མཿསརྦ་བུདྡྷ་བོ་དྷི་སཏྭ་ནཱཾ། ཨོཾ་སརྦ་བིད་པུ་ར་པུ་ར། སུ་ར་སུ་ར། ཨཱ་ཝརྟ་ཡ་བྷྱཿསྭཱཧཱ། མཆོད་ཡོན་སོགས་ཀྱི་ཕྱག་རྒྱ་བཅིང༌། སརྦ་བིད་ལ་གང་བའི་ཕྱག་རྒྱ་མཛད། ཐབས་མཁས་ཐུགས་རྗེ་ཆེ་སོགས་དང༌། བྱམས་ཆེན་མེ་སོགས་དང༌། སྐྱོན་གྱིས་མ་གོས་སོགས་ཀྱིས་བསྟོད། བཟླས་པ་བདུན་ཙམ་གྱིས་མཉེས་པར་བྱས། ཨོཾ་ཨཱཿཧཱུཾ་གིས་གཏོར་མ་བྱིན་གྱིས་བརླབས། ཨོཾ་ཤཱཀྱ་མུ་ནི་ས་པ་རི་ཝཱ་ར་ཨ་ཀཱ་རོ་སོགས་ལན་གསུམ་གྱིས་ཕུལ། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་དངོས་གྲུབ་མ་ལུས་པ་སྩལ་དུ་གསོལ། ཞེས་བརྗོད། དེ་ནས་མཆོད་གཡོག་པ་གཅིག་གིས། ཐམས་ཅད་ལ་ཁྲུས་ཀྱི་ཕྱིར་ཆབ་བཏང༌། ནང་གི་མཆོད་གཡོག་པས་མེ་ཏོག་འགྱེད་སྡུད་སྐབས་ཆ་གཉིས་བྱས་ལ། མེ་ཏོག་ཕྱེད་ཕྱེད་སློབ་མ་སོ་སོ་རང་གིས་ཚགས་བྱེད་དུ་འཇུགགསོལ་བཏབ་ཀྱི་དུས་སུ་ཐལ་མོ་སྟོང་པར་མ་སོང་བ་བྱེད། ཕྱེད་བསྡུས་ལ་མཎྜལ་ཕུལ། གྲལ་དང་མེ་ཏོག་བཀྲམ་བསྡུ་ཟིན་པ་དང༌། འདི་སྐད་ཅེས། འོ་ན་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་དམ་པའི་ཆོས་ཟབ་མོ་གསན་དགོངས་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་
གསལ་བཏབ་ནས་གསན་པ་ཞུ། འདིར་རྒྱུད་སྡེ་བཞི་ལས་སྒྲུབ་ཐབས་དུ་མ་གསུངས་པ་རྣམས་ལ། རྒྱ་གར་གྱི་སློབ་དཔོན་སོ་སོས་སྒྲུབ་ཐབས་མཛད་པ་རྣམས་ཕྱོགས་གཅིག་ཏུ་བསྡུས་པའི་སྒྲུབ་ཐབས་རྒྱས་འབྲིང་བསྡུས་གསུམ་བཞུགས་པ་ཡིན་ལ། བསྡུས་པ་འདི་བྷ་ག་ལའི་པཎྜི་ཏ་གཞོན་ནུ་སྦས་པས་བསྡུས་པ་སྟེ། བ་རི་ལོ་ཙཱ་བས་བསྒྱུར་བ་འདི་ལ་སྒྲུབ་ཐབས་གཟུངས་དང་བཅས་པ་དཔེ་སྣ་དགུ་བཅུ་གོ་དྲུག་ཡོད། ས་སྐྱ་བ་གོང་མ་རྣམས་ལས་བརྒྱུད་ཅིང་ཐུགས་རྩིས་སུ་མཛད་པ་ཡིན་ལ། རྒྱ་གཞུང་རྣམས་ལ་ས་བཅད་དང་དཀའ་གནས་ལ་དཔྱོད་པའི་མཆན་བུ་དང་ཊཱི་ཀ་རྣམས་ཡོད་པས་འདི་ནི་གཞུང་ཡང་ལེགས་པར་བཤད་ནུས་ཤིང༌། ཤིན་དུ་ཡིད་ཆེས་པའི་གནས་ཡིན་པས། དེའི་ལུགས་ཀྱི་རྗེས་གནང་གི་ཆོ་ག་སྒྲུབ་པར་བགྱིད་པ་ལ། དང་པོ་ཐུབ་པ་རྡོ་རྗེ་གདན་གྱི་རྗེས་གནང་སྒྲུབ་པར་བྱེད་པ་ལ། སློབ་དཔོན་གྱི་བདག་བསྐྱེད་བཟླས་པ་དང་བཅས་པ། མདུན་དུ་དྲིའི་མཎྜལ་གྱི་དབུས་སུ་བཅོམ་ལྡན་འདས་བསྐྱེད་པ་ལ་མཆོད་བསྟོད་བཟླས་པས་མཉེས་པར་བྱ་བ་དང༌། གཏོར་མ་རྣམས་སྔོན་དུ་སོང་ཟིན་པ་ནས། རྗེས་གནང་ཞུ་བའི་ཡོན་དུ་མཎྜལ་ཕུལ་མཛོད་ཅེས་བྱ། སློབ་མས་འདིར་མཎྜལ་ཕུལ། ཡང་བླ་མས་འདི་སྐད་ཅེས་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་གསུངས་ཤིགདུས་གསུམ་སངས་རྒྱས་ཐམས་ཅད་དང༌། །ལྷག་པའི་ལྷ་ཡི་ངོ་བོ་ཉིད། །དཔལ་ལྡན་བླ་མའི་བཀའ་དྲིན་གྱིས། །བདག་ལ་རྗེས་གནང་སྩལ་དུ་གསོལ། །ལན་གསུམ། རྒྱུད་དག་པར་བྱ་བའི་ཕྱིར།
མདུན་བསྐྱེད་ཀྱི་ལྷ་དང་སངས་རྒྱས་བྱང་སེམས་རྣམས་ཀྱི་དྲུང་དུ་རྒྱུན་བཤགས་དང་སྐྱབས་གསུམ་སྔོན་དུ་འགྲོ་བའི་བྱང་ཆུབ་ཀྱི་སེམས་བཟུང་བ་ལ་སོགས་པ་བགྱིད་སྙམ་པའི་བསམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །སོགས་གསུམ་དང༌། ཁྱད་པར་དུ་ཐུབ་པ་རྡོ་རྗེ་གདན་གྱི་རྗེས་གནང་སྩལ་དུ་གསོལ་སྙམ་པའི་འདུན་པས་འདིའི་རྗེས་ཟློས་ཀྱང་གསུངས་ཤིགསློབ་དཔོན་དགོངས་སུ་གསོལ། བདག་ལ་བཅོམ་ལྡན་འདས་ཐུབ་པ་རྡོ་རྗེ་གདན་གྱི་རྗེས་གནང་མ་ལུས་པ་སྩལ་དུ་གསོལ། ཞེས་ལན་གསུམ་གྱི་གསོལ་བ་བཏབ་ནས། ད་སྦྱོར་བ་རྗེས་གནང་གི་གཞི་དགོད་པའི་སླད་དུ་དམིགས་པ་འདི་བཞིན་མཛད་པ་ཞུ། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཕྱི་ནང་གི་དངོས་པོ་ཐམས་ཅད་མི་དམིགས་པ་སྟོང་པ་ཉིད་དུ་གྱུར་པའི་ངང་ལས། རིན་པོ་ཆེའི་ཁྲི་སོགས་དང༌། ཁྱེད་རང་རྣམས་བཅོམ་ལྡན་འདས་ཐུབ་པ་ཞེས་སོགས་ནས། བལྟ་བའོ། །ཞེས་པའི་བར་གཙོ་འཁོར་གསུམ་བདག་བསྐྱེད་བཞིན་གསལ་བཏབ་བོ། །དེ་ནས་སློབ་དཔོན་ཡང་རང་གིས་བསྒོམ་པ་དང་འདྲ་བའི་ཐུབ་པ་རྡོ་རྗེ་གདན་དངོས་ཡིན་སྙམ་པའི་མོས་གུས་བྱས་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ལྷའི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྒྱུད་བསྐུལ་བས། སློབ་དཔོན་དང་མདུན་བསྐྱེད་ཀྱི་ལྷ་དང༌། ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་
ཐམས་ཅད་ཀྱི་ཐུགས་ཀ་ནས་ཐུབ་པ་རྡོ་རྗེ་གདན་འཁོར་དང་བཅས་པའི་སྐུ་ཆེ་ཆུང་མ་ངེས་པ་དཔག་ཏུ་མེད་པ་བྱོན། ཁྱེད་རང་རྣམས་ཀྱི་སྤྱི་གཙུག་ལ་སོགས་པ་དང་བ་སྤུའི་བུ་ག་རྣམས་ནས་ཆར་བབས་པ་བཞིན་དུ་སིབ་སིབ་ཐིམ་པར་མོས་པ་མཛོད། ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། དེ་དག་ནི་རྗེས་གནང་གི་གཞི་དགོད་པའོ། །རྗེས་གནང་དངོས་ལ་ལུང་གསུམ་ལས། དང་པོ་རྗེས་སུ་བཟླས་པའི་ལུང་བླང་བའི་ཕྱིར། སློབ་དཔོན་གྱི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་སེར་པོ། དེ་ལས་སྔགས་ཀྱི་འཕྲེང་བ་བྱུང༌། སློབ་དཔོན་གྱི་ཁ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀར་ཟླ་བའི་སྟེང་དུ་ཧཱུཾ་སེར་པོ་གནས་པ་ལ་ཐིམ། དེའི་དུས་སུ་ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་རྣམས་ཀྱི་མཁྱེན་བརྩེ་ནུས་མཐུ་ཐམས་ཅད་འོད་ཟེར་གྱི་རྣམ་པར་སྔགས་འཕྲེང་དང་ལྷན་ཅིག་ཞལ་དུ་ཞུགས། སྙིང་གའི་ཧཱུཾ་ལ་ཐིམ་པའི་མོས་པ་མཛོད་ལ། སྔགས་འདིའི་རྗེས་ཟློས་ལན་གསུམ་གསུངས་ཤིག ཨོཾ་ཨཱཿབཛྲ་ཧཱུཾ་སྭཱཧཱ་གསུམ། དང་པོས་བྱིན་གྱིས་བརླབས། གཉིས་པས་དབྱེར་མེད་དུ་འདྲེས། གསུམ་པས་བརྟན་པར་བྱས་པའི་མོས་པ་མཛོད། གཉིས་པ་བྱིན་གྱིས་བརླབས་པའི་ལུང་ནི། སློབ་དཔོན་ལ་མེ་ཏོག་འཐོར་བཞིན་དུ་འདིའི་རྗེས་ཟློས་མཛོད་ཅིག བཅོམ་ལྡན་བདག་གིས་བཟུང་ལགས་ཀྱི། །བདག་ལ་འགོ་བར་མཛད་དུ་གསོལ། །ཞེས་ལན་གསུམ། དེ་ལྟར་ཕུལ་བའི་མེ་ཏོག་དེ་ཉིད་སླར་ཡང་བྱིན་གྱིས་བརླབས་ཏེ། ཁྱེད་རང་གི་སྤྱི་བོར་ཕུལ་བར་མོས་པ་
མཛོད་ཅིག སློབ་དཔོན་གྱིས་མེ་ཏོག་གཏོར་ཞིང༌། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རིག་པ་འཛིན་པ་འདི་རྣམས་ལ་བཅོམ་ལྡན་འདས་ཐུབ་པ་རྡོ་རྗེ་གདན་འཁོར་དང་བཅས་པའི་སྐུ་གསུང་ཐུགས་ཀྱི་བྱིན་རླབས་མ་ལུས་པ་འཇུག་པར་གྱུར་ཅིག། གསུམ་པ་དམ་བཅའ་བའི་ལུང་གི་ཕྱིར། བཅོམ་ལྡན་འདས་ཐུབ་པ་རྡོ་རྗེ་གདན་འདི་ཉིད་ཇི་སྲིད་བྱང་ཆུབ་མ་ཐོབ་བར་གྱི་ཡི་དམ་དུ་བཟུང་ངོ༌། །བདག་ཐུགས་ཀྱིས་མ་བཏང་ཞིག་སྙམ་པའི་བསམ་པས་འདིའི་རྗེས་ཟློས་གསུངས་ཤིགསློབ་དཔོན་དགོངས་སུ་གསོལ། བདག་རིག་པ་འཛིན་པ་མིང་འདི་ཞེས་བགྱི་བ། དུས་འདི་ནས་གཟུང་ནས། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། བཅོམ་ལྡན་འདས་ཐུབ་པ་རྡོ་རྗེ་གདན་འཁོར་དང་བཅས་པ་ཡི་དམ་གྱི་ལྷར་བཟུང་ནས། འདིའི་གསང་སྔགས་ཉི་མ་རེ་རེ་བཞིན་འདི་ཙམ་རེ་འདོན་པར་དམ་བཅའ་ལགས་སོ། །ཞེས་ལན་གསུམ་བརྗོད། དེའི་དངོས་གཞི་ལུང་གསུམ་སོང༌། ད་ནི་རྗེས་བྱིན་གྱིས་བརླབ་པའི་ཕྱིར། མདུན་བསྐྱེད་ཀྱི་ལྷ་ལ་མོས་གུས་དུང་དུང་བ་དང༌། བདག་གི་རྒྱུད་བྱིན་གྱིས་བརླབ་ཏུ་གསོལ་སྙམ་པ་མཛད་པས། མདུན་གྱི་ལྷའི་ཐུགས་ཀ་ནས། ཐུབ་པ་རྡོ་རྗེ་གདན་གྱི་སྐུ་སོར་ཚད་ཙམ་ཞིག་རྒྱངས་ཏེ་བྱོན། ཁྱེད་རང་རྣམས་ཀྱི་སྙིང་གའི་ས་བོན་དང་དབྱེར་མེད་དུ་འདྲེས། རྒྱུད་བྱིན་གྱིས་བརླབས་པའི་མོས་པ་མཛོད། འདི་ཡིག་རྙིང་ན་མེད་ནའང་ཕྱག་ལེན་ལ་མཛད།
དེ་ནས་འདིའི་རྒྱ་གཞུང་སྒྲུབ་ཐབས་ཀྱི་ལུང་ཡང་སྤྲོ་ན་བྱའོ། །དེ་དག་ནི་ཐུབ་པ་རྡོ་རྗེ་གདན་གྱི་རྗེས་གནང་ལུང་དང་བཅས་པའོ། །འདི་གཅིག་པུ་ཡིན་ན། གཙོ་བོས་ཇི་ལྟར་འོག་ནས་འབྱུང་བ་བཞིན་བྱ། གཞན་དང་སྤྲེལ་ནས་བྱེད་ན། སློབ་མ་རྣམས་ཀྱིས། སློབ་དཔོན་ཆོ་ག་སྒྲུབ་པའི་བར་ལ་མདོ་འདོན་པ་སོགས་བྱེད་དོ། །སློབ་དཔོན་གྱིས་ཨོཾ་བཛྲ་མུཿ ཚོམ་བུའི་ཡེ་ཤེས་པ་གཤེགས། ཛཿཧཱུཾ་བཾ་ཧོཿ དམ་ཚིག་པ་རང་ལ་ཐིམ། ཆོས་ཐུན་རེ་ལ་རྗེས་གནང་མང་པོ་སྦྲེལ་ནས་མཛད་ན། སྤྱིར་སློབ་དཔོན་གྱི་བྱ་བ་ལ་སྐྱབས་འགྲོ་སེམས་བསྐྱེད་ཀུན་ལ་འདྲ། ཚོགས་ཞིང་དང༌། ཚད་མེད་རྟིང་མ་རྣམས་ལ་མི་མཛད་པར། སྟོང་ཉིད་ལས་དམ་ཚིག་པ་བསྐྱེད་པ་སོགས་འགྲེ། གནས་གསུམ་བྱིན་རླབས་འདྲ། ཡེ་ཤེས་པ་ལྷ་དེ་དང་དེའི་རྣམ་པར་སྤྱན་འདྲེན། དབང་བསྐུར་འདྲ། རིགས་བདག་སོ་སོར་ཡོད་དེ་འགྲེ། བཟླས་པ་སོ་སོ། འདོད་དོན་གསོལ་བཏབ་འདྲ། འཁོར་ཡོད་ན་གཙོ་བོ་ལ་བསྡུད་པའང་འདྲ། མཆོད་པ་བྱིན་རླབས། མཎྜལ་བསངས་སྦྱངས་འདྲ། སྟོང་པའི་ངང་ལས་དྲིའི་མཎྜལ་གྱི་དབུས་སུ་དམ་ཚིག་པ་བསྐྱེད་པ་ལས་བདག་ཉིད་ཙམ་པ་འཇོག །གཞན་སོ་སོའི་བསྐྱེད་ཆོག་བཞིན་བསྐྱེད་རྗེས་སོ་སོའི་ཡེ་ཤེས་པ་སྤྱན་འདྲེན་ཏེ། གཞན་འགྲེ། བཟླས་ལུང་སོ་སོར་འབྱུང༌། དམ་བཅའ་ལུང་ལ་འདོན་པ་སྤོ། བྱིན་གྱིས་བརླབས་པ་ལ་སོ་སོའི་ལྷ་བྱོན་པའི་དམིགས་པ་སྤོ། སྔ་མ་ཚོ་ལ་ལུང་གསུང་ཚར་རྗེས། དེ་དག་གིས་ནི་ལྷ་འདི་ཞེས་བྱ་བའི་རྗེས་གནང་གི་ཆོ་གའོ། །ཞེས་བརྗོད། མདུན་བསྐྱེད་ཀྱི་ཡི་དམ་གཤེགས་བསྡུ་ཡང་འདྲ། རྗེས་ལུང་ཚར་ཚར་བཞུགས་སུ་བཅུག་སྟེ། མཆོད་པ་འབུལ། ཉིན་གཅིག་གི་རྗེས་གནང་རྟིང་མ་ལ། དེ་ནས་གཙོ་བོས་
ཇི་ལྟར་སོགས་གསུམ་གྱིས་དམ་ཚིག་བཟུང༌། གཏང་རག་གི་མཎྜལ་དང༌། དེང་ནས་བརྩམས་ཏེ་སོགས་ཚར་གསུམ་བྱ། འདིར་སྒྲུབ་ཐབས་བརྒྱ་རྩའི་རྗེས་གནང་ལས། བཅོམ་ལྡན་འདས་ཐུབ་པ་རྡོ་རྗེ་གདན་གྱི་རྗེས་གནང་ཞེས་སམ། རྡོ་རྗེ་གདན་ལ་སོགས་པ་ལྷ་ཁྱད་པར་དུ་འཕགས་པ་འགའ་ཞིག་གི་རྗེས་གནང་གསན་པ་ཡིན་པས། དེས་རང་གཞན་གྱི་དོན་རྒྱ་ཆེན་པོ་མཛོད། ཅེས་བྱས་ནས་བླ་མས་རྗེས་གནང་རྟིང་མའི་ལྷ་ཚོགས་སངས་རྒྱས་བྱང་སེམས་རྣམས་ལ་མཆོད་པ་གོང་མདུན་བསྐྱེད་སྒྲུབ་པའི་སྐབས་ཀྱིས་འགྲེ་ཞིང༌། འདི་སྐབས་རྔ་བརྡུང༌། བསྟོད་པ་མཉམ་ཉིད་མི་གཡོ་བ་བྱེད། དགོས་འདོད་ཀྱི་དངོས་གྲུབ་བླང༌། ཡིག་བརྒྱ་བརྗོད། བཟོད་པར་གསོལ། ཡེ་ཤེས་པ་གཤེགས། དམ་ཚིག་པ་བསྡུ། བཀྲ་ཤིས་བརྗོད་པའི་ཚིགསྟོན་མཆོག་དམ་པ་སོགས་ཏེ་རོལ་མོ་རྒྱ་ཆེར་མཛད་དོ། །དེ་ལྟར་སྒྲུབ་ཐབས་ཐོག་མ་ཐུབ་པ་རྡོ་རྗེ་གདན་གྱི་སྒྲུབ་ཐབས། རྗེས་གནང་སྤྱི་ཆིངས་དང་བཅས་པ་བཤད་ཟིན་པ་ལྟར། ལེགས་པར་ངེས་ནས་འོག་མ་འདི་རྣམས་ལ་འཇུག་པར་བྱའོ། །སྒྲུབ་ཐབས་ཀྱི་རྒྱ་གཞུང་དོན་གཅིག་པ་རྣམས་ནི་སྒྲུབ་ཐབས་དཔེ་ཚན་དུ་མ་ཡོད་ཀྱང་རྗེས་གནང་གཅིག་གིས་ཆོག་ཅིང༌། ཆོ་གའི་ཡན་ལག་ལ་རྒྱས་བསྡུས་དང་མི་འདྲ་བ་ཡོད་དུ་ཟིན་ཀྱང་རྒྱུ་ས་བོན་གཅིག་ཅིང༌། འབྲས་བུ་ལྷའི་རྣམ་པ་རྒྱས་འདེབས་རིགས་བདག་ཀྱང་གཅིག་ཅིང༌། བཟླས་བྱའི་སྔགས་ཀྱང་གཅིག་ན། སྒྲུབ་ཐབས་དོན་གཅིག་པར་འཇོག་པས་རྗེས་གནང་གི་སྐབས་འདིར་གཅིག་ཏུ་བསྡུས་པས་ཆོག་གོ །ཡང་སྒྲུབ་ཐབས་ཀྱི་གཞུང་གཅིག་གི་ནང་ནས། ལྷ་ངོ་བོ་གཅིག་ལ་ཞལ་ཕྱག་མང་ཉུང་དང༌། ཕྱག་མཚན་འདམ་ཁ་ཡོད་པ་སོགས་ལ་
དོན་ལ་རྗེས་གནང་གཅིག་གིས་ཆོག་མོད་ཀྱང༌། སོ་སོར་མཛད་པའི་ཕྱག་ལེན་ཡོད་པ། འགྲུབ་ན་རྗེས་གནང་རྐང་ཚུགས་རེ་རེ་བྱ། བསྡུ་ན་འདམ་ཁའི་ལྷ་གཉིས་ཀར་དུས་གཅིག་ཏུ་བསྐྱེད་ནས། བཟླས་ལུང་སོགས་གཅིག་གིས་ཆོག་པ་བྱས་ཀྱང་རུང༌། ཡང་ན་འདམ་ཁ་ཡོད་པ་རྣམས་ལ་རྒྱས་བསྡུས་ཡོད་ན་རྒྱས་པའི་ཕྱོགས་དེ་ལ་རྗེས་གནང་བྱ། རྒྱས་བསྡུས་ཀྱི་ཁྱད་མེད་ན་གང་ཡང་རུང་བ་ཞིག་གི་རྗེས་གནང་བྱས་པ། གཞན་དེ་རྣམས་ལ་ཡང་ན་བཅོམ་ལྡན་འདས་འདི་ཞལ་ཕྱག་རྣམ་པ་འདི་དག་འདི་ལྟ་བུར་བསྒོམ་པར་རུང་བ་ཡིན་ནོ། །ཞེས་བརྗོད་ནའང་ལེགས་སོ། །གཞང་ཡང་སྤྱིར་བཏང་གི་དབང་དུ་བྱས་ནས། ཞི་བ་རྣམས་ལ་ལྷ་རྫས་ཀྱི་དར་སྣ་ཚོགས་པས་སྨད་དཀྲིས་དང་སྟོད་གཡོགས་གསོལ་བ། རིན་པོ་ཆེའི་དབུ་རྒྱན་སྙན་རྒྱན་མགུལ་རྒྱན། དོ་ཤལ་དཔུང་རྒྱན་ཕྱག་གདུབ་ཞབས་གདུབ་ལ་སོགས་པ་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། སྒེག་ཅིང་ལང་ཚོ་ལ་བབ་པ། མཚར་སྡུག་ཕུན་སུམ་ཚོགས་པ། འོད་དང་འོད་ཟེར་དཔག་ཏུ་མེད་པ་འབར་ཞིང་འཕྲོ་བ་ཞེས་པ་དང༌། དེའི་ནང་ཚན་ལྷ་ཕོ་ལ། དབུ་སྐྲ་རལ་པའི་ཐོར་ཚུགས་སམ། རིན་པོ་ཆེའི་ཐོར་ཚུགས་ཅན། མཚན་དང་དཔེ་བྱད་ཐམས་ཅད་ཡོངས་སུ་རྫོགས་པ་ཞེས་ལྷག་པོར་བརྗོད། ལྷ་མོ་ལ་སྐེད་སྐབས་ཕྲ་ཞིང༌། ནུ་འབུར་རྒྱས་པ། དབུ་སྐྲ་ལྟག་པར་བཅིངས་པ། འཛུམ་ཞིང་ཡིད་དུ་འོང་པའི་རྣམ་པ་ཞེས་ལྷག་པོར་བརྗོད། ཁྲོ་བོ་རྣམས་ལ་སྦོམ་ཞིང་ཐུང་ལ་གསུས་ཁྱིམ་ཆེ་བ། ཞལ་གདངས་ཤིང་མཆེ་བ་གཙིགས་པ་ལྗགས་འགྲིལ་བ་དམར་ལ་ཟླུམ་པའི་སྤྱན་གསུམ་སྡང་མིག་བགྲད་པ། སྨ་ར་དང་སྨིན་
མ་དང་དབུ་སྐྲ་སེར་པོའམ་དམར་པོའམ། དམར་སེར་རམ། ཁམ་སེར་གྱེན་དུ་བརྫེས་པ། སྟག་གི་པགས་པའི་ཤམ་ཐབས་ཅན་གདུག་པའི་སྦྲུལ་ཆེན་པོ་བརྒྱད་ཀྱིས་སྐུ་ལ་བརྒྱན་པ་ཞེས་དང༌། ཁྲོ་མོ་ལ་ཡང་དེ་དང་འདྲ་བ་ལས། སྨ་ར་སེར་པོ་ཞེས་པ་སྤངས་ལ། ནུ་འབུར་ལྷག་པར་རྒྱས་པ་ཞེས་ལྷག་པོར་བརྗོད། འདི་རྣམས་འོག་གི་སྒྲུབ་ཐབས་སོ་སོའི་སྐབས་ཐམས་ཅད་དུ་མ་རྗེད་ཅིང་དྲན་པ་གལ་ཆེའོ། །དམིགས་གསལ་ཡོད་པ་རྣམས་སོ་སོའི་སྐབས་སུ་ཤེས་པར་བྱའོ། །ད་ནི་སོ་སོའི་སྒྲུབ་ཐབས་བརྗོད་པར་བྱ་སྟེ། འཕགས་པ་འཇམ་དབྱངས་བརྟན་པའི་འཁོར་ལོའི་སྒྲུབ་ཐབས་གསུམ་ལ་རྗེས་གནང་གཅིག་བྱ་སྟེ། སྟོང་པའི་ངང་ལས་པཾ་ལས་པདྨ་དང༌། ཨཱཿལས་ཟླ་བའི་གདན་གྱི་སྟེང་དུ་ཡི་གེ་མུཿ དམར་པོ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སླར་འདུས་པ་ཡོངས་སུ་གྱུར་པ་ལས། རང་ཉིད་འཕགས་པ་འཇམ་དཔལ་བསྟན་པའི་འཁོར་ལོ། སྐུ་མདོག་དམར་པོ་ཞལ་གཅིག་ཕྱག་གཉིས། གཡས་ཤེས་རབ་ཀྱི་རལ་གྲི་ནམ་མཁར་འཕྱར་བ། གཡོན་པོ་ཏི་ཐུགས་ཀར་བཟུང་བ། ཞབས་རྡོ་རྗེའི་སྐྱིལ་ཀྲུང་ཅན། རལ་བའི་ཟུར་ཕུད་ལྔ་དང་ལྡན་པའོ། །གནས་གསུམ་བྱིན་རླབས། ཡེ་ཤེས་སྤྱན་འདྲེན། དབང་བསྐུར་རྒྱས་བཏབ་རྣམས་ཐུབ་པ་རྡོ་རྗེ་གདན་གྱི་སྐབས་དང་འདྲ། མི་བསྐྱོད་པས་དབུ་བརྒྱན། སྔགས་ནི། ཨོཾ་ཨ་ར་པ་ཙ་ན་མུཿ བསྟོད་པ་ལ། གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་བརྒྱན་ཞིང༌། །འཇིག་རྟེན་གསུམ་གྱི་མུན་སེལ་བ། །འཇམ་པའི་
དབྱངས་ལ་ཕྱག་འཚལ་ལོ། །ཞེས་པ་སྟེ། འོག་ནས་འབྱུང་བའི་འཇམ་དབྱངས་ཀྱི་སྒྲུབ་ཐབས་ཐམས་ཅད་ལ་ཡང་བསྟོད་པ་འདི་ཁོ་ན་སྦྱར་རོ། །འདི་ལ་རྒྱ་གཞུང་གསུམ་ཡོད་པའི་ནང་ནས། སློབ་དཔོན་བྷ་བ་སྐན་དྷས་མཛད་པའི་སྒྲུབ་ཐབས་ཚིགས་བཅད་མའི་དཀྱུས་སུ་སྐུ་མདོག་མཆོད་བརྗོད་ལས། འོད་ཟེར་དཀར་པོ་གྱེན་དུ་འཕྲོ་ཞིང་འབར་བ་ཡི། ཞེས་འབྱུང་བ་ལ་བསམས་ནས། བརྟན་པའི་འཁོར་ལོ་དཀར་པོ་ཡིན་པར་འདོད་པ་ནི། ས་བོན་གྱི་སྐབས་སུ་སྟེང་དུ་སྒྲོན་མེའི་འོད་གསལ་གུར་གུམ་དམར་པོ་སྟེ། དེ་ལ་ཡང་ནི་སྔགས་པས་མུཿཡིག་བལྟ་བར་བྱ། ཞེས་སོགས་རྒྱུའི་ས་བོན་དང༌། སྔགས་འཁོར་གྱི་ས་བོན་དང༌། སྔགས་འཁོར་ཉིད་ཀྱང་དམར་པོར་བཤད་པ་མ་གོ་ཞིང་སྒྲུབ་ཐབས་ཚིག་ལྷུག་པ་ལས་གུར་གུམ་མདོག་ཏུ་གསལ་བར་བཤད་པ་དང༌། ཚིག་ལྷུག་པའི་སྒྲུབ་ཐབས་འདི་ཚིགས་བཅད་པའི་གསལ་བྱེད་ཀྱི་མན་ངག་ཡིན་པ་མ་ཤེས་པར་ཟད་དོ། །སྒྲུབ་ཐབས་གསུམ་པ་བརྟན་པའི་འཁོར་ལོའི་སྒྲུབ་ཐབས་རྒྱས་པ་ལོ་ཆེན་འགྱུར་ལས་ཀྱང༌། བན་དྷུ་ཀའི་མེ་ཏོག་ལྟར་དམར་བ་ཆེན་པོ་ཞེས་འབྱུང་ལ། སྒྲུབ་ཐབས་གསུམ་དགོངས་པ་གཅིག་ཏུ་སྣང་བའི་ཕྱིར། དམར་པོ་ཉིད་ཡིན་ལ། གུར་གུམ་ལྟ་བུ་ཞེས་དམར་སེར་གཅིག་ཏུ་མི་འགལ་མོད། ཁ་ཆེའི་ཡུལ་པལ་པུར་གྱི་རི་ལ་རང་སྐྱེས་པའི་གུར་གུམ་མེ་ཏོག་རྒྱས་པའི་སྐབས་ཤིན་ཏུ་དམར་ཤས་ཆེ་བ་ལ་བསམ་པར་སྣང་ལ། འདིའི་སྐུ་འདྲ་རྒྱ་གར་གྱི་བྲིས་སྐུ་དངོས་ལ་མཚལ་མདོག་ཏུ་སྣང་ངོ༌། །འདིའི་ཆོ་གའི་ཡན་ལག་རྣམས་སྐབས་འོག་མ་རྣམས་ལ་ཡང་རིགས་འགྲེ་བར་བྱ་སྟེ། ཐུན་མོང་མ་ཡིན་པའི་ཁྱད་ཆོས་རྣམས་སོ་སོའི་སྐབས་སུ་བརྗོད་པར་བྱའོ།། །།
ཨ་ར་པ་ཙ་ན་ལྷ་ལྔའི་སྒྲུབ་ཐབས།
ཨ་ར་པ་ཙ་ན་ལྷ་ལྔའི་སྒྲུབ་ཐབས་གཉིས་ལ་རྗེས་གནང་གཅིག་སྟེ། པད་ཟླའི་སྟེང་དུ་དྷཱིཿལས་རང་ཉིད་འཇམ་པའི་དབྱངས་སྐུ་མདོག་དཀར་པོ། ཕྱག་གཡས་རལ་གྲི་དཔུང་པའི་ཐད་ཀར་འཕྱར་ཞིང༌། གཡོན་ཤེས་རབ་ཀྱི་ཕ་རོལ་དུ་ཕྱིན་པའི་པོ་ཏི་ཐུགས་ཀར་འཛིན་པ། ཞབས་རྡོ་རྗེའི་སྐྱིལ་ཀྲུང༌། ན་བཟའ་དར་དམར་པོའི་སྟོད་གཡོགས་དང་སྨད་གཡོགས་བསྣབས་པ། སྙིང་གར་ཨ་ལས་འཁོར་ལོ་དཀར་པོ་རྩིབས་བརྒྱད་པ། ལྟེ་བ་དང་ཕྱོགས་ཀྱི་རྩིབས་རྣམས་ལ་ཟླ་བའི་གདན་རེ་རེ། དེ་རྣམས་ཀྱི་སྟེང་དུ་དབུས་སུ་ཨཱཿལས་རང་དང་འདྲ་བའི་འཕགས་པ་འཇམ་དཔལ། ཤར་དུ་ར་ལས་དྲ་བ་ཅན་གྱི་འོད་མ། རྒྱབ་ཏུ་པ་ལས་ཟླ་འོད་མ། གཡས་སུ་ཙ་ལས་སྐྲ་ཅན་མ། གཡོན་དུ་ན་ལས་ཉེ་བའི་སྐྲ་ཅན་མ་རྣམས་ལྷ་མོའི་མཚན་ཉིད་རྫོགས་ཤིང༌། སྐུ་མདོག་ཕྱག་མཚན་བཞུགས་ཚུལ་རྒྱན་གོས་རྣམས་གཙོ་བོ་དང་མཚུངས་པ། ལྷ་ལྔ་པོའི་ཐུགས་ཀར་ཡང་རང་རང་གི་ས་བོན་དང༌། མཚམས་ཀྱི་རྩིབས་བཞི་ལ་ཤར་ལྷོ་ནས་གཡས་སྐོར་གྱིས། ནི་པྲ་པ་ཙ་ཞེས་པའི་ཡི་གེ་བཞིའོ། །དབུ་བརྒྱན་ནི་མི་བསྐྱོད་པའོ། །སྔགས་ནི། ཨོཾ་ཨ་ར་པ་ཙ་ན་དྷཱིཿ འདི་ལ་སྒྲུབ་ཐབས་གཉིས་ཡོད་པ་ལས། ཚིགས་བཅད་མ་མི་ཕམ་བཤེས་གཉེན་གྱི་མཛད་ལ། ཚིག་ལྷུག་པ་པདྨ་འབྱུང་གནས་ཀྱིས་མཛད་པའོ།། །།
རྣམ་སྣང་སྒྱུ་འཕྲུལ་དྲྭ་བ་ལས་བྱུང་བའི་འཇམ་དཔལ་གྱི་སྒྲུབ་ཐབས།
རྣམ་སྣང་སྒྱུ་འཕྲུལ་དྲྭ་བ་ལས་བྱུང་བའི་འཇམ་དཔལ་གྱི་སྒྲུབ་ཐབས་ནི། པད་ཟླའི་སྟེང་དུ་ས་བོན་ཡི་གེ་མུཿལས། རང་ཉིད་འཇམ་དཔལ་གཞོན་ནུར་གྱུར་པ་ཞལ་གསུམ་ཕྱག་དྲུག་པ། རྩ་ཞལ་གུར་གུམ་བཟང་པོ་ལྟ་བུ། གཡས་ཞལ་སྔོ་
ཞིང་གཡོན་ཞལ་དཀར་བ། ཕྱག་གཡས་གསུམ་ན་རལ་གྲི། མདའ། མཆོག་སྦྱིན། གཡོན་གསུམ་ན་ཤེར་ཕྱིན་གྱི་པོ་ཏི་དང༌། ཨུཏྤལ་ལ་སྔོན་པོ་དང༌། གཞུ་འཛིན་པ། གཡས་གཡོན་རྒྱབ་རྣམས་སུ་འཆང་བའི་དབུ་སྐྲ་ལྕང་ལོ་གསུམ་དང་ལྡན་པ། སེམས་དཔའི་སྐྱིལ་མོ་ཀྲུང་དུ་བཞུགས་ཤིང༌། མེ་ཏོག་གི་རྒྱན་དང་ལྡན་པ། རིགས་བདག་ནི་རྡོ་རྗེ་སེམས་དཔའ་འོ། །སྔགས་ནི་ཨོཾ་མུཿཞེས་པའོ།། །།
འཇམ་པའི་རྡོ་རྗེ་གཙོ་འཁོར་ལྔ་པའི་སྒྲུབ་ཐབས།
འཇམ་པའི་རྡོ་རྗེ་གཙོ་འཁོར་ལྔ་པའི་སྒྲུབ་ཐབས་ནི། པཾ་ལས་པདྨ་དམར་པོ་འདབ་མ་བཞི་པའི་ལྟེ་བ་དང་འདབ་མ་རྣམས་ལ་རྨ་བྱ་ཉམས་རྩལ་རྒྱས་པ་རེ་རེ། དེ་རྣམས་ཀྱི་སྟེང་དུ་ཟླ་བའི་གདན་རེ་རེ། དབུས་སུ་མཾ་ལས་རང་ཉིད་འཇམ་པའི་རྡོ་རྗེ་དམར་པོ་ཞལ་གཅིག་ཕྱག་གཉིས། རྡོ་རྗེ་དང་དྲིལ་བུ་ཐུགས་ཀར་བསྣོལ་བ། ཤར་དུ་གཏི་མུག་གཞོན་ནུ་མ། ལྷོར་འདོད་ཆགས་གཞོན་ནུ་མ། ནུབ་ཏུ་ཕྲག་དོག་གཞོན་ནུ་མ། བྱང་དུ་རིགས་ཀྱི་གཞོན་ནུ་མ་རྣམས། གཡས་རྡོ་རྗེ་དང༌། གཡོན་རལ་གྲི་འཛིན་པས་ཐུགས་ཀར་བསྣོལ་བ། གཙོ་འཁོར་ཐམས་ཅད་རྡོ་རྗེའི་སྐྱིལ་ཀྲུང་གིས་བཞུགས་པ། རིགས་བདག་ནི་འོད་དཔག་མེད། སྔགས་ནི། ཨོཾ་ཧྲཱིཿམཾ་ཧོ་མཾ་ཧཱུཾ།། །།
འཇམ་དཔལ་ངག་གི་རྒྱལ་པོའི་སྒྲུབ་ཐབས།
འཇམ་དཔལ་ངག་གི་རྒྱལ་པོའི་སྒྲུབ་ཐབས་ནི། པད་ཟླའི་གདན་ལ་མུཾཿལས་རང་ཉིད་འཇམ་དཔལ་གསེར་བཙོ་མ་ལྟ་བུ། ཞལ་གཅིག་ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱ་མཛད་པ། གཡོན་པས་ཨུཏྤ་ལ་སྔོན་པོ་སྙན་གྱི་ཐད་ན་ཁ་བྱེ་བའི་སྟེང་ན་པོ་ཏི་དང་བཅས་པ་འཛིན་པ།
དབུ་སྐྲ་རལ་པའི་ཟུར་ཕུད་གསུམ་དང་ལྡན་པ། སེང་གེ་སྔོན་པོ་རལ་པ་དམར་སེར་གདོང་གྱེན་དུ་ཕྱོགས་པའི་སྟེང་དུ། པད་མ་དང་ཟླ་བའི་གདན་ལ་ཞབས་གཡོན་བརྐྱང་བའི་རོལ་པས་བཞུགས་པ། ཞེས་མནའ་ཆན་ལས་བཤད་ཀྱང༌། དེ་ལྟར་ན་གཤིན་རྗེ་གཤེད་ཀྱི་ཕྱག་རེག་སྟབས་མི་བདེ་བས་གཡོན་བརྐྱང་ཉིད་གཞུང་གི་དགོངས་པར་མངོན་ནོ། །གཡོན་གྱི་འོག་ཟུར་དུ་གཤིན་རྗེ་མཐར་བྱེད་ནག་པོ། ཕྱག་གཡས་འཕགས་པ་འཇམ་དཔལ་གྱི་ཞབས་ཀྱི་ངར་གདོང་གཡོན་པ་ལ་རེག་ཅིང༌། ཕྱག་གཡོན་དབྱུག་པ་ཨོམ་ཚུགས་སུ་མཛད་པ། ཐོད་སྐམ་གྱི་ཕྲེང་བས་དབུ་ལ་བརྒྱན་པ། ཁྲོ་བོའི་ཆ་བྱད་ཡོངས་སུ་རྫོགས་པ། རིགས་བདག་ནི་མི་བསྐྱོད་པ། སྔགས་ནི། ཨོཾ་དྷརྨ་དྷཱ་ཏུ་ཝཱ་གཱི་ཤྭ་རི་མུཾ།། །།
འཇམ་དཔལ་རྒྱལ་པོ་རོལ་པའི་སྒྲུབ་ཐབས།
འཇམ་དཔལ་རྒྱལ་པོ་རོལ་པའི་སྒྲུབ་ཐབས་ནི། པད་ཟླའི་སྟེང་དུ། མཾ་ལས་རང་ཉིད་འཕགས་པ་འཇམ་དཔལ་སྐུ་མདོག་དཀར་པོ། ཞལ་གཅིག་ཕྱག་གཉིས་གཡས་ཀྱི་ཕྱག་མཐིལ་པུས་མོ་གཡས་ལ་བཀབ་པའི་ཚུལ་གྱིས་འགྱིང་བག་དང་བཅས་པ། གཡོན་པ་གདན་ལ་བརྟེན་པས་ཨུཏྤ་ལའི་སྡོང་པོ་སྙན་གྱི་ཐད་ཀར་ཁ་ཕྱེ་བ་འཛིན་པ། དབུ་སྐྲ་ཟུར་ཕུད་ལྔ་དང་ལྡན་པ། ཞབས་གཉིས་རྒྱལ་པོ་རོལ་པའི་སྟབས་ལས། གཡས་རོལ་གྱིས་བཞུགས་པ། རིགས་བདག་ནི་རྣམ་སྣང་ངོ༌། །སྔགས་ནི། ཨོཾ་ཝ་གཱི་ཤྭ་རི་མུཾཿ ། །
རིག་པ་འཛིན་པའི་སྡེ་སྣོད་ལས་འབྱུང་བ་འཇམ་དཔལ་གྱི་སྒྲུབ་ཐབས།
རིག་པ་འཛིན་པའི་སྡེ་སྣོད་ལས་འབྱུང་བ་འཇམ་དཔལ་གྱི་སྒྲུབ་ཐབས་གཉིས་ལ་རྗེས་གནང་གཅིག་ནི། པད་ཟླའི་སྟེང་དུ་དྷཱིཿཡིག་ཞུ་བ་ལས་ཐིག་ལེ་
དཀར་པོ། དེ་ལས་རང་ཉིད་རྗེ་བཙུན་འཇམ་པའི་དབྱངས་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་རལ་གྲི་འཕྱར་ཞིང༌། གཡོན་ཨུཏྤལ་ལ་གནས་པའི་པོ་ཏི་འཛིན་པ། ཞབས་གཡས་བརྐྱང་པའི་རོལ་པས་བཞུགས་པ། རིགས་བདག་རྣམ་སྣང༌། སྔགས་ནི། ཨོཾ་དྷཱིཿསྭཱཧཱ། རྒྱ་གཞུང་གི་གླེགས་བམ་ལས་བར་སྐབས་འདིར་འབར་འཛག་གི་སྒོ་ནས་ཤེས་རབ་བསྐྱེད་པའི་གཞུང་ཅིག་ཡོད་དེ། རྗེས་གནང་མི་དགོས་སོ།། །།
མཚན་བརྗོད་ལས་འབྱུང་བའི་འཇམ་དཔལ་ཡེ་ཤེས་སེམས་དཔའི་སྒྲུབ་ཐབས།
མཚན་བརྗོད་ལས་འབྱུང་བའི་འཇམ་དཔལ་ཡེ་ཤེས་སེམས་དཔའི་སྒྲུབ་ཐབས་ནི། ཧྲཱིཿལས་པདྨ། ཨ་ལས་ཟླ་བ་ལ་ས་བོན་མུཿ དམར་སྐྱ་ལས། རང་ཉིད་འཇམ་དཔལ་ཡེ་ཤེས་སེམས་དཔའ་སྐུ་མདོག་དམར་སྐྱ། རྩ་ཞལ་སྐུ་ལུས་དང་མཚུངས་ཤིང༌། གཡས་སྔོན་གཡོན་དཀར་བའི་ཞལ་གསུམ། ཕྱག་དང་པོ་གཉིས་ཀྱིས་རལ་གྲི་དང་པོ་ཏི། འོག་མ་གཉིས་ཀྱིས་མདའ་དང་གཞུ་འཛིན་པ། ཞབས་རྡོ་རྗེའི་སྐྱིལ་ཀྲུང༌། སྙིང་གར་སེམས་མ་རྡོ་རྗེ་མ། དཔྲལ་བར་རིན་ཆེན་རྡོ་རྗེ་མ། མགྲིན་པར་པདྨ་རྡོ་རྗེ་མ། སྤྱི་བོར་ལས་ཀྱི་རྡོ་རྗེ་མ། རིགས་བདག་ནི་མི་བསྐྱོད་པ། སྔགས་ནི་མཚན་བརྗོད་ཀྱི་སྔགས་འོག་མ་ཡོངས་རྫོགས་སམ་བསྡུ་ན། ཨོཾ་ཧཱུཾ་ཧྲཱིཿབྷ་ག་ཝཱན་ཛྙཱ་ན་མུརྟི་ཝ་གཱི་ཤྭ་ར་མཧཱ་ཝཱ་ཙ། སརྦ་དྷརྨཱ། ག་ག་ན་ཨ་མ་ལ་སུ་པ་རི་ཤུདྡྷ། དྷརྨ་དྷཱ་ཏུ་ཛྙཱ་ན་གརྦྷ་ཨ།། །།
མཚན་བརྗོད་ལས་འབྱུང་བ་ཆོས་དབྱིངས་གསུང་དབང་གི་སྒྲུབ་ཐབས།
མཚན་བརྗོད་ལས་འབྱུང་བ་ཆོས་དབྱིངས་གསུང་དབང་གི་སྒྲུབ་ཐབས་ནི། པད་ཟླ་ལ་ཨ་ཡིག་ལས་དཔལ་ཆོས་ཀྱི་དབྱིངས་གསུང་གི་དབང་ཕྱུག་སྐུ་མདོག་དཀར་པོ་ཞལ་
བཞི་ཆར་ཡང་དཀར་བ། ཕྱག་བརྒྱད་ཀྱི་དང་པོ་གཉིས་ཆོས་འཆད། ལྷག་མ་གཡས་གསུམ་གྱིས་རལ་གྲི། མདའ། རྡོ་རྗེ། གཡོན་གསུམ་གྱིས། པོ་ཏི་གཞུ། དྲིལ་བུ་བསྣམས་པ། ཞབས་རྡོ་རྗེའི་སྐྱིལ་ཀྲུང༌། སྙིང་གར་ཧཱུཾ། དཔྲལ་བར་ཏྲཱཾ། མགྲིན་པར་ཧྲཱིཿ སྤྱི་བོར་ཨ་རྣམས་ལས་བྱུང་བའི། རྡོ་རྗེ་རིན་པོ་ཆེ། པདྨ་རྒྱ་གྲམ་རྣམས་ཕྱག་རྒྱ་བཞིའི་བདག་ཉིད་དོ། །རིགས་བདག་ནི་དེ་བཞིན་གཤེགས་པ་རིགས་ལྔས་དབུ་ལ་བརྒྱན་པའོ། །སྔགས་ནི། ཨོཾ་བཛྲ་ཏིཀྵ་ཎ་དུཿཁ་ཚེ་ད་པྲཛྙཱ་ཛྙཱ་ན་མུར་ཏ་ཡེ། ཛྙཱ་ན་ཀཱ་ཡ་ཝ་གཱི་ཤྭ་ར་ཨ་ར་པ་ཙ་ན་ཡ་ཏེ་ན་མཿ
རྡོ་རྗེ་གུར་ལས་གསུངས་པ་འཇམ་དཔལ་ཡན་ལག་མེད་པའི་རྡོ་རྗེའི་སྒྲུབ་ཐབས།
རྡོ་རྗེ་གུར་ལས་གསུངས་པ་འཇམ་དཔལ་ཡན་ལག་མེད་པའི་རྡོ་རྗེའི་སྒྲུབ་ཐབས་ནི། པད་ཟླ་ལ་ཧཾ་ལས་མདའ་གཞུ་ཧཾ་གིས་མཚན་པ་ལས། རང་ཉིད་ཡན་ལག་མེད་པའི་རྡོ་རྗེ་སྐུ་མདོག་སེར་པོ་ཞལ་གཅིག་ཕྱག་དྲུག་གི་དང་པོ་གཉིས་ཀྱིས་ཨུཏྤལ་དམར་པོའི་མདེའུ་ཅན་གྱིས་མདའ་དང༌། མེ་ཏོག་དམར་པོའི་གཞུ་རྣ་བའི་བར་དུ་འགེངས་པར་མཛད་པ། ལྷག་མ་གཡས་གཉིས་ཀྱིས་རལ་གྲི་དང་མེ་ལོང༌། གཡོན་གཉིས་ཀྱིས་ཨུཏྤལ་སྔོན་པོའི་སྡོང་པོ་དང་མྱ་ངན་མེད་དམར་པོའི་ཤིང་གི་ཡལ་ག་མེ་ཏོག་དང་བཅས་པ་བསྣམས་པ། ཞབས་གཡོན་བརྐྱང་པའི་སྟབས་ཀྱིས་བཞུགས་ཤིང༌། རལ་བའི་ཅོད་པན་ཅན། ལོ་བཅུ་དྲུག་ལོན་པ་ལྟ་བུའི་ན་ཚོད་དོ། །སྔགས་ནི། ཨོཾ་མཉྫུ་གྷོ་ག་ཧྲཱིཿཛཿ ཞེས་པའོ། །ཡང་ན་འདི་ཕྱག་བཞི་པ་བསྒོམ་སྟེ། མེ་ལོང་དང་། མྱ་ངན་མེད་པའི་ཡལ་ག་འཛིན་པའི་ཕྱག་སྤངས་པའོ།། །།
འཇམ་དཔལ་དཔའ་བོ་ཆིག་གྲུབ་ཀྱི་སྒྲུབ་ཐབས།
འཇམ་དཔལ་དཔའ་བོ་ཆིག་གྲུབ་ཀྱི་སྒྲུབ་ཐབས་ནི། པདྨའི་སྟེང་དུ་ཨ་ལས་ཟླ་བ་ལ། མཾ་ལས་རང་ཉིད་འཇམ་པའི་དབྱངས་སྐུ་མདོག་དཀར་པོ་ཟུར་ཕུད་ལྔ་དང་ལྡན་པ། ཕྱག་གཡས་མཆོག་སྦྱིན་དང་གཡོན་ཨུཏྤལ་སྔོན་པོའི་སྡོང་བུ་འཛིན་པ། ཞབས་སེམས་དཔའི་སྐྱིལ་ཀྲུང་གིས་བཞུགས་པ། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཝཱ་ཀྱེ་དཱ་ན་ན་མཿ
འཇམ་དཔལ་ཤེས་རབ་འཁོར་ལོའི་སྒྲུབ་ཐབས།
འཇམ་དཔལ་ཤེས་རབ་འཁོར་ལོའི་སྒྲུབ་ཐབས་ནི། པད་ཟླའི་སྟེང་དུ་ཨ་ལས་རལ་གྲི་ཨས་མཚན་པ་ལས། འཇམ་དབྱངས་ཨ་ར་པ་ཙ་ནའི་སྒྲུབ་ཐབས་དང་འདྲ་བ་ལས། ཞབས་སེམས་དཔའི་སྐྱིལ་ཀྲུང་དང་ན་བཟའ་དར་སྣ་ཚོགས། རིགས་བདག་ནི་རྡོ་རྗེ་སེམས་དཔའོ། །སྔགས་ནི། ཨོཾ་བཛྲ་ཏིཀྵྞ་དྷཱཾ། ཞེས་པ་སྟེ། རྗེས་གནང་སྐབས་མངོན་རྟོགས་དེ་ཙམ་གྱིས་ཆོག་ལ། འདི་ཉིད་ཉམས་སུ་ལེན་ན་སྔགས་འཁོར་བསྒོམ་པ་གལ་ཆེའོ། །དེ་ཡང་ལྟེ་འོག་ཏུ་བྷྲཱུཾ་ལས་ཟླ་བ་བྱང་ཆུབ་ཤིང་གི་ལོ་མ་ལྟ་བུ་དེའི་སྟེང་དུ་ཧྲི་ལས་པད་སྡོང་པདྨ་ཁ་ཟུམ་པའི་ལྟེ་བར་ཧཱུཾ་སྟེ་དེའི་འོད་ཀྱིས་ཡིད་ཙམ་ཁ་བྱེ་བ། དེའི་སྟེང་དུ་ཨ་ལས་ཟླ་བ། དེ་ལ་སོར་གཅིག་ཙམ་མ་རེག་པར་འཁོར་ལོ་རྩིབས་དྲུགལྟེ་བར་དྷཱིཿརྩིབས་ལ་མ་ནིང་སྤངས་པའི་དབྱངས་བཅུ་གཉིས་ཀྱི་ཡི་གེ་གཉིས་གཉིས། དེ་དག་གི་སྟེང་དུ་ཡི་གེ་དྲུག་གི་ཡི་གེ་རེ་རེ་ཡོད་པ། མུ་ཁྱུད་ལ་སྣ་ལྡན་སྤངས་པའི་ཨཱ་ལི་ཀཱ་ལི། འཁོར་ལོ་འདི་མི་འཁོར་ལོ། དེ་ནས་སོར་དོ་ཙམ་དྷཱིཿལ་མ་རེག་པར། ཟླ་བ་ལ་འཁོར་ལོ་རྩིབས་བཞི་པ་ལ་ཨ་ར་པ་ཙ་ནའོ། །འདི་དྲག་ཏུ་འཁོར་བའོ། །
འཕྲལ་དུ་ཉམས་སུ་མྱོང་བར་བྱེད་པའི་ཨ་ར་པ་ཙ་ནའི་སྒྲུབ་ཐབས་ནི། པད་ཟླའི་གདན་གྱི་སྟེང་དུ་ལྷ་བསྐྱེད་པའི་རྒྱུ་ཨཿལས་བྱུང་བའི་ཟླ་བ་ལ་གནས་པའི་དྷཱིཿལས་བྱུང་བའི་རལ་གྲིའོ། །རལ་གྲིའི་རྩེ་མོར་ཨ་ལས་ཟླ་བ་ལ་གནས་པའི་དྷཱིཿའོ། །དེ་ཡོངས་སུ་གྱུར་པ་ལས་འཇམ་དཔལ་ཨ་ར་པ་ཙ་ན་སྒྲུབ་ཐབས་གོང་བཞིན་བསྐྱེད། ཐུགས་ཀར་ལྷ་ལྔའི་གཙོ་བོ་ཡང༌། ཨ་ལས་ཟླ་བ་དྷཱིཿལས་རལ་གྲི། དེའི་རྩེ་མོར་ཨ་ལས་བྱུང་བའི་ཟླ་བ་ལ་གནས་པའི་དྷཱྀཿའི་འོད་ཟེར་འཕྲོ་འདུ་ལས་བསྐྱེད། འཁོར་བཞི་པོ་ཡང་དེས་རིགས་འགྲེ་སྟེ། ཨ་ལས་ཟླ་བ་ལ་ར་ལས་རལ་གྲི། རྩེ་མོར་ཨ་ལས་ཟླ་བ་ལ་གནས་པའི་རས་མཚོན་པ། དེ་ཡོངས་སུ་གྱུར་པ་ལས། དྲ་བ་ཅན་གྱི་འོད་དུ་བསྐྱེད་པ་སོགས་སོ། །རིགས་བདག་ནི་རྡོ་རྗེ་སེམས་དཔའོ། །སྔགས་ནི། ཨ་ར་པ་ཙ་ན་དྷཱིཿ ཆོ་ག་ལྷག་མ་རྣམས་ཨ་ར་པ་ཙ་ན་གོང་མ་དང་འདྲའོ། །དེ་ཡན་ཆད་ཀྱིས་འཇམ་དཔལ་གྱི་སྒྲུབ་ཐབས་རྣམས་བསྟན་ཟིན་ཏོ། །འོག་ནས་འབྱུང་བའི་རྡོ་རྗེ་ཆོས་འཇམ་དཔལ་གྱི་རིགས་སུ་བསྡུ་བའི་འདོད་པ་ལྟར་ན། འཇམ་དཔལ་ཞི་བའི་སྒྲུབ་ཐབས་ཀྱི་སྐབས་སུ་བླངས་ན་ལེགས་སོ།། །།
གཤིན་རྗེ་གཤེད་ནག་པོའི་སྒྲུབ་ཐབས།
གཤིན་རྗེ་གཤེད་ནག་པོའི་སྒྲུབ་ཐབས་གསུམ་ཡོད་ལ། དེའི་ནང་ནས་ཕྱག་མང་གི་སྒྲུབ་ཐབས་གཉིས་ལས་འབྱུང་བ་ནི། སྒྲུབ་ཐབས་ཀྱི་གནད་གཅིག་ཀྱང་རྣམ་གྲངས་ཀྱི་དབང་དུ་བྱས་ན་ནང་སེལ་གྱི་དབྱེ་བས་སྒྲུབ་ཐབས་གསུམ་མམ་བཞིར་ཡང་འགྱུར་མོད། འདིར་གཤིན་རྗེ་གཤེད་ཕྱག་དྲུག་པའི་སྒྲུབ་ཐབས་དང་པོ་རྐང་ཚུགས་དང༌། ཕྱི་མའི་འདམ་ཁ་ཞིག་གི་ལུགས་ནི་འདི་ཡིན་ཏེ། པཾ་ལས་པདྨ། དེའི་སྟེང་དུ་ཨཾ་ལས་ཟླ་བ་དང་རཾ་ལས་ཉི་མ་འདམ་ཁ་ཡིན། དེའི་སྟེང་དུ་ཧཱུཾ་ལས་ཁྲོ་བོ་ཆེན་པོ་གཤིན་
རྗེ་གཤེད་པོ། སྐུ་མདོག་ནག་པོ་ཞལ་དྲུགཕྱག་དྲུག་ཞབས་དྲུག་པ་ཞལ་དྲུག་ཀར་ཡང་གནག་པ། ཕྱག་གཡས་པ་གསུམ་གྱིས་རལ་གྲི། ཐོ་བ། རྡོ་རྗེ། གཡོན་པས་གསུམ་གྱིས་གཏུན་ཤིང༌། ཞགས་པ་དྲིལ་བུ་བསྣམས་པ། རྡོ་རྗེ་དང་དྲིལ་བུ་འཛིན་པའི་ཕྱག་གཉིས་འཁྱུད་རྒྱ་མཛད་པ་ཞབས་རྣམས་གཡས་བསྐུམ་གཡོན་བརྐྱང་ལ་སོགས་པའི་སྟབས་སྣ་ཚོགས་པས། པད་ཉི་དང་མ་ཧེའི་སྟེང་དུ་གཤིན་རྗེ་བརྫིས་པ། མི་མགོ་སྐམ་པོའི་དབུ་རྒྱན་དང༌། རློན་པའི་དོ་ཤལ་ཅན་སྦྲུལ་གྱིས་བརྒྱན་པ། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཧྲཱིཿཥྟཱིཿབི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱཧཱ། བསྟོད་པ་ནི། དུར་ཁྲོད་རྒྱན་གྱིས་ལེགས་བརྒྱན་པའི། །ཞེ་སྡང་གཤིན་རྗེ་གཤེད་པོ་ནི། །སྤྲོས་མེད་ནམ་མཁའ་ལྟ་བུ་ལ། །ཐུགས་རྗེས་སྤྲུལ་པའི་སྐུར་སྟོན་པའི། །ཡེ་ཤེས་ཁྲོ་རྒྱལ་རབ་འཇིགས་པ། །དུད་ཁ་མུན་ཆེན་ཁྱོད་ལ་འདུད། །ཅེས་པ་སྟེ། གཞན་གཉིས་ལའང་བསྟོད་པ་འདིས་འགྲེའོ། །འདི་ནི་གཤིན་རྗེ་གཤེད་གདོང་དྲུག་གི་རྒྱུད་དུ་གྲགས་པ། གཤིན་རྗེ་གཤེད་ནག་པོའི་འཁོར་ལོའི་ལས་གྲུབ་པ་ཞེས་བྱ་བའི་རྒྱུད་ཅེས་ཀྱང་བྱ། སྡོམ་གསུམ་པ་ཞེས་ཀྱང་གྲགས་པ་ལས་འབྱུང་བའི་དཀྱིལ་འཁོར་གྱི་གཙོ་བོའི་སྒྲུབ་ཐབས་ཁོ་ནའོ། །འདི་ལ་འདམ་ཁའི་ཚུལ་དུ་ཞལ་གསུམ་ཕྱག་དྲུག་ཞབས་གཉིས་པ། ཞལ་གསུམ་ཀར་ནག་པ། གཡས་གསུམ་འཁོར་ལོ། རལ་གྲི། གཏུན་ཤིང༌། གཡོན་གསུམ་རོ་ལངས་མོ་དང༌། དགྲ་སྟ་དང་ཞགས་པ་འཛིན་པ་སྟེ། འདི་ནི་མན་ངག་ལས་འབྱུང་བའམ། གདོང་དྲུག་གི་རྒྱུད་རྒྱས་པ་ལས་འབྱུང་བའོ།། །།
གཤིན་རྗེ་གཤེད་ཕྱག་གཉིས་པའི་སྒྲུབ་ཐབས་ནི། པཾ་ལས་པདྨ་ཨཾ་ལས་ཉི་མ་ཧཱུཾ་ལས་རྡོ་རྗེས་མཚན་པའི་དབྱུག་པ་ཧཱུཾ་གིས་མཚན་པ་ཡོངས་སུ་གྱུར་པ་ལས། ཁྲོ་རྒྱལ་གཤིན་རྗེ་གཤེད་པོ་སྐུ་མདོག་སྔོ་ནག་ཞལ་གཅིག་ཕྱག་གཉིས་གཡས་རྡོ་རྗེས་མཚན་པའི་དབྱུག་པ་སྔོན་པོ་འཕྱར་བ། གཡོན་ཞགས་པ་དང་བཅས་པའི་སྡིགས་མཛུབ་ཐུགས་ཀར་གཏོད་པ། ཞབས་གཡས་བསྐུམ་གཡོན་བརྐྱང་བས་པདྨ་ཉི་མ་མ་ཧེ་ཁྲོས་པའི་གདན་ལ་གནས་པ། ལྷག་མ་རྒྱན་ཆ་ལུགས་རིགས་བདག་སྔགས་རྣམས་གོང་བཞིན་ནོ། །འོག་ནས་འབྱུང་བའི་གཤིན་རྗེ་གཤེད་དམར་པོ་ཡང་སྐབས་འདིར་བླངས་ནས་རྗེས་གནང་བྱས་ན་ལེགས་སོ།། །།
རྡོ་རྗེ་ཆོས་ཀྱི་སྒྲུབ་ཐབས།
རྡོ་རྗེ་ཆོས་ཀྱི་སྒྲུབ་ཐབས་ནི། པདྨ་དང་ཨཾ་ལས་ཟླ་བའི་སྟེང་དུ་ཧྲཱིཿལས་རང་ཉིད་རྡོ་རྗེ་ཆོས་སྐུ་མདོག་དམར་པོ། ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱ་མཛད་པའི་སྟེང་ན། པདྨ་དམར་པོ་འདབ་མ་བཅུ་དྲུག་པ་འཛིན་པ། ཞབས་རྡོ་རྗེའི་སྐྱིལ་ཀྲུང་གིས་རྡོ་རྗེ་སེང་གེའི་ཁྲི་དང་པད་ཟླ་ལ་བཞུགས་པ། དེའི་ཐུགས་ཀར་པད་ཟླ་ལ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ཧཱུཾ་ཡིག་དེ་སངས་རྒྱས་ལྔའི་ངོ་བོའོ། །ལྕེ་རྡོ་རྗེ་དམར་སྐྱ་རྩེ་མོའི་ཆ་ལ་ཧྲཱིཿས་མཚན་པ། རིགས་བདག་ནི་འོད་དཔག་མེད་དོ། །སྔགས་ནི། ཨོཾ་ཧྲཱིཿསྭཱཧཱ། སྒྲུབ་ཐབས་འདི་བློ་བཟང་སྙིང་པོའི་མན་ངག་འགྲོ་བཟང་སྙིང་པོས་མཛད་པའོ།། །།
འཕགས་པ་སྤྱན་རས་གཟིགས་དབང་ཕྱུག་སེང་གེ་སྒྲའི་སྒྲུབ་ཐབས།
འཕགས་པ་སྤྱན་རས་གཟིགས་དབང་ཕྱུག་སེང་གེ་སྒྲའི་སྒྲུབ་ཐབས་ནི། པཾ་ལས་པདྨ་དམར་པོའི་སྟེང་དུ་སིཾ་ལས་སེང་གེ་དཀར་པོ། རལ་པ་དམར་པོ་ཅན། གདོང་གྱེན་དུ་ཕྱོགས་
པ། དེའི་རྒྱབ་ཏུ་ཟླ་གདན་ལ་ཧྲཱིཿལས་རང་ཉིད་འཕགས་པ་སྤྱན་རས་གཟིགས་དབང་ཕྱུག་རྗེ་བཙུན་སེང་གེ་སྒྲ་སྐུ་མདོག་དཀར་པོ། རལ་པའི་ཐོར་ཚུགས་ཀྱི་རྩེ་མོར་རིན་པོ་ཆེའི་ཏོག་ཅན། ཞི་བའི་སྤྱན་གསུམ་པ། རྒྱན་སྤངས་པ། དཀའ་ཐུབ་ཀྱི་ཆ་ལུགས་ཅན། ཞབས་གཡས་བརྐྱང་གི་རོལ་པས་བཞུགས་ཤིང༌། ཕྱག་གཡས་པ་ཞབས་ཀྱི་པུས་མོའི་སྟེང་དུ་བཀབ་པ། གཡོན་པ་གདན་ལ་བརྟེན་པ། སྐུའི་གཡས་ངོས་སུ་མདུང་རྩེ་གསུམ་ལ་སྦྲུལ་དཀར་པོས་དཀྲིས་པ། གཡོན་ངོས་སུ་ཐོད་པ་དྲི་ཞིམ་མེ་ཏོག་སྣ་ཚོགས་ཀྱིས་གང་བ་དང༌། པདྨའི་སྡོང་པོ་མེ་ཏོག་སྙན་གྱིས་ཐད་ཀར་ཁ་བྱེ་བ་ལ། རལ་གྲི་འབར་བས་མཚན་པ་དང་བཅས་པ། སྐུ་ལས་དེ་བཞིན་གཤེགས་པ་ལྔ་སྤྲོ་བར་མཛད་པའོ། །སྒྲུབ་ཐབས་འདིར་མ་བཤད་ཀྱང་ཚངས་པའི་སྐུད་པ་དང་བཅས་པ། དར་དམར་པོའམ་སྟག་ལྤགས་ཀྱི་སྨད་དཀྲིས་ཅན་དུ་བྱ་ཞིང༌། རི་དྭགས་ཀྲིཥྞའི་པགས་པས་སེ་རལ་ཁར་བྱས་པ། ཡང་ལུགས་འགའ་ཞིག་ལ་ཡོད་པ་ལྟར་འདིར་ཡང་མི་འགལ་ལོ། །རིགས་བདག་ནི་འོད་དཔག་མེད་དོ། །སྔགས་ནི། ཨོཾ་ཨཱ་ཧྲཱིཿསིང་ཧ་ནཱ་ད་ཧཱུཾ་ཕཊ། བསྟོད་པ་ནི། སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་གྱི་གཞི། །སྤྱན་རས་གཟིགས་ཞེས་མཚན་གསོལ་བ། །རྟག་པར་བརྩེ་ལ་ཕྱག་འཚལ་བསྟོད། སྤྱན་རས་གཟིགས་ཀྱི་སྒྲུབ་ཐབས་འོག་མ་རྣམས་ལའང་བསྟོད་པ་འདི་ཁོ་ནས་ཆོག་གོ། །།
འཕགས་པ་སྤྱན་རས་གཟིགས་ཧཱ་ལ་ཧཱ་ལའི་སྒྲུབ་ཐབས།
འཕགས་པ་སྤྱན་རས་གཟིགས་ཧཱ་ལ་ཧཱ་ལའི་སྒྲུབ་ཐབས་དཀྱུས་མ་ནི། པད་ཟླའི་སྟེང་དུ་ཧྲཱིཿལས་རང་ཉིད་འཕགས་པ་ཧཱ་ལ་ཧཱ་ལ་སྐུ་མདོག་དཀར་པོ། རྩ་ཞལ་དཀར་གཡས་སྔོ་གཡོན་སེར་བའི་ཞལ་གསུམ། ཞལ་རེ་རེ་བཞིན་སྤྱན་གསུམ་གསུམ་པ། ཕྱག་གཡས་པ་གསུམ་གྱིས་མཆོག་སྦྱིན། འཕྲེང་བ། མདའ། གཡོན་པ་གསུམ་གྱིས་ལྷ་མོའི་ནུ་མ། པདྨ་དཀར་པོ་གཞུ་རྣམས་འཛིན་པ། གཡོན་ཕྱོགས་ནས་ལྷ་མོ་འདོད་ལྡན་མས་འཁྱུད་པ། སྟག་ལྤགས་ཀྱི་ཤམ་ཐབས་ཅན་ཐོད་སྐམ་ལྔའི་དབུ་རྒྱན་དང་རལ་པའི་ཅོད་པན་ལ་ཟླ་བ་བྱེད་པས་མཛེས་པ་ཡིད་ཙམ་ཁྲོ་བ། གཡས་སུ་རྩེ་གསུམ་ལ་སྦྲུལ་གྱིས་དཀྲིས་པ་དང༌། གཡོན་དུ་ཐོད་པ་མེ་ཏོག་སྣ་ཚོགས་ཀྱིས་གང་བ་དང་བཅས་ཤིང༌། རིན་པོ་ཆེ་མི་གཡོ་བའི་བྲག་ཕུག་ན་བཞུགས་པའོ། །རིགས་བདག་ནི་འོད་དཔག་མེད། སྔགས་ནི། ཨོཾ་ཧཱ་ལ་ཧཱ་ལ་ཧྲཱིཿ།། །།
འཕགས་པ་ཁ་སཪྤ་ཎའི་སྒྲུབ་ཐབས་སློབ་དཔོན་རྙོག་པ་མེད་པའི་ལུགས།
འཕགས་པ་ཁ་སཪྤ་ཎའི་སྒྲུབ་ཐབས་སློབ་དཔོན་རྙོག་པ་མེད་པའི་ལུགས་ནི། ཧྲཱིཿལས་རང་ཉིད་འཕགས་པ་སྤྱན་རས་གཟིགས་སྐུ་མདོག་དཀར་པོ། རལ་པའི་ཅོད་པན་ཅན། ཕྱག་གཡས་མཆོག་སྦྱིན་དང༌། གཡོན་པས་པདྨ་དཀར་པོའི་སྡོང་བུ་ཐུགས་ཀར་འཛིན་པ། ཞབས་གཡས་བརྐྱང་བའི་སྐྱིལ་ཀྲུང་ཕྱེད་པའི་སྟབས་ཀྱིས་བཞུགས་པ། རལ་བའི་ཐོར་ཚུགས་ཅན། གཡས་སུ་སྒྲོལ་མ་ལྗང་ཁུ་མཆོག་སྦྱིན་དང་ཨུཏྤལ་ཅན་བཞེངས་པ། ནོར་བཟང་སེར་པོ་པུས་བཙུགས་ཐལ་མོ་སྦྱར་བ། མཆན་ཁུང་དུ་པོ་ཏི་ཅན། གཙོ་བོའི་གཡོན་དུ་ཁྲོ་གཉེར་ཅན། དཀར་ལ་སེར་བའི་མདངས་ཅན་བཞེངས་པ། ཕྱག་གཡས་གཉིས་ཐལ་མོ་དང་
དབྱུག་གུ། གཡོན་གཉིས་ཕྲེང་བ་དང་སྤྱི་བླུགས། རྟ་མགྲིན་དམར་པོ་ཁྲཽ་བོའི་ཆ་བྱད་རྫོགས་པ། དབུའི་སྟེང་དུ་རྟ་མགོ་ལྗང་ཁུ་ཅན། ཕྱག་གཡས་གཙོ་བོའི་པུས་མོ་ལ་རེག་ཅིང༌། གཡོན་དབྱུག་པ་ཨོམ་ཚུགས་ཅན། རོལ་པས་བཞུགས་པའོ། །གཞུང་ལས་མི་གསལ་ཡང༌། གཙོ་བོའི་སྐུ་གཞོགས་སུ་ནོར་བཟང་དང་རྟ་མགྲིན་གཉིས་དང༌། དེའི་གཡས་གཡོན་དུ་གཞན་གཉིས་བཞུགས་པ་ཡིན་པར་གསལ་ལོ། །རིགས་བདག་ནི་འོད་དཔག་མེད། སྔགས་ནི། ཨོཾ་ཧྲཱིཿསྭཱ ཧཱ།། །།
འཕགས་པ་ཡེ་གེ་དྲུག་པའི་སྒྲུབ་ཐབས་ལྷན་སྐྱེས་རོལ་པའི་ལུགས།
འཕགས་པ་ཡེ་གེ་དྲུག་པའི་སྒྲུབ་ཐབས་ལྷན་སྐྱེས་རོལ་པའི་ལུགས་ནི། པད་ཟླའི་སྟེང་དུ་ཧྲཱིཿལས། དབུས་སུ་རང་ཉིད་འཕགས་པ་སྤྱན་རས་གཟིགས་གཡས་གཡོན་དུ་སྐད་ཅིག་གིས་གྲུབ་པའི་ཚུལ་གྱིས། སྲས་ནོར་བུ་འཛིན་པ་དང༌། ཡུམ་ཡི་གེ་དྲུག་མ་སྟེ་གསུམ་ཀར་ཡང་སྐུ་མདོག་དཀར་པོ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་འོག་མས་འཕྲེང་བ་དང༌། གཡོན་འོག་མས་པདྨ་འཛིན་པ། སོ་སོར་པད་ཟླའི་གདན་རེ་རེ་ལ་རྡོ་རྗེའི་སྐྱིལ་ཀྲུང་གིས་བཞུགས་པ། རིགས་བདག་ནི་འོད་དཔག་མེད་དོ། །སྔགས་ནི། ཨོཾ་མ་ཎི་པདྨེ་ཧཱུཾ།། །།
ཧ་རི་ཧ་རི་ཧ་རི་ལ་ཞོན་པའི་སྤྱན་རས་གཟིགས་ཀྱི་སྒྲུབ་ཐབས།
ཧ་རི་ཧ་རི་ཧ་རི་ལ་ཞོན་པའི་སྤྱན་རས་གཟིགས་ཀྱི་སྒྲུབ་ཐབས་ནི། སྟོང་པའི་ངང་ལས་ཡཾ་ལས་རླུང༌། རཾ་ལས་མེ། པཾ་ལས་ཆུ། ལཾ་ལས་ས་སྟེ་འབྱུང་བཞིའི་དཀྱིལ་འཁོར་དང༌། སུཾ་ལས་བྱུང་བའི་རི་རབ་རྣམས་བརྩེགས་པའི་སྟེང་དུ། ཧྲཱིཿལས་རང་ཉིད་འཕགས་པ་སྤྱན་རས་གཟིགས་སུ་གྱུར་པ་ནི། སྐུ་མདོག་དཀར་པོ་ཞལ་གཅིག་ཕྱག་དྲུག་པ། གཡས་གསུམ་སངས་རྒྱས་ལ་དཔང་
པོར་གསོལ་བའི་ཐལ་མོ་དང་བགྲང་འཕྲེང་དང༌། ངན་འགྲོའི་སེམས་ཅན་ལ་ཐར་པའི་ལམ་སྟོན་པའི་ཕྱག་རྒྱ་ས་གནོན་ལྟ་བུ་མཛད་པ། གཡོན་གསུམ་ན་དབྱུག་ཏོ་དང༌། རི་དྭགས་ཀྲིཥྞའི་པགས་པ་དང༌། སྤྱི་བླུགས་རྣམས་འཛིན་པ། རླུང་མེ་གནས་གྱུར་པའི་སེང་གེ་དཀར་པོ་ལྷ་ཚངས་པའི་ངོ་བོ་དང༌། ཆུ་གནས་གྱུར་པའི་བྱ་ཁྱུང་ཁ་དོག་ལྔ་པ་དྲག་པོའི་ངོ་བོ་དང༌། ས་དང་རི་རབ་གནས་གྱུར་པའི་ཁྱབ་འཇུག་ཆེན་པོ་དང་གཟུགས་ཉིད་དེ། ལྷ་ཆེན་པོ་གསུམ་གྱི་གདན་ལ་བཞུགས་པའོ། །རིགས་བདག་ནི་སྣང་བ་མཐའ་ཡས་སོ། །སྔགས་ནི། ཨོཾ་ཧྲཱིཿསྭཱཧཱ། རྗེས་གནང་བྱེད་པའི་བདག་བསྐྱེད་ཀྱི་སྒྲུབ་ཐབས་འདི་ཙམ་གྱིས་ཆོག་ལ། སྒྲུབ་པ་ཉམས་ལེན་ལ་བསྐྱེད་ཆོག་གི་རིམ་པ་གཞན་ཡོད་པ་གཞུང་བཞིན་བྱེད་དགོས་ཏེ། སྔ་ཕྱིའི་སྒྲུབ་ཐབས་གཞན་མང་པོ་ཞིག་ལའང་དེ་ལྟར་གོ་དགོས་སོ།། །།
འཕགས་པ་ཧཱ་ལ་ཧཱ་ལ་རྡོ་རྗེ་ཆོས་ཀྱི་སྒྲུབ་ཐབས།
འཕགས་པ་ཧཱ་ལ་ཧཱ་ལ་རྡོ་རྗེ་ཆོས་ཀྱི་སྒྲུབ་ཐབས་ནི། གཞན་ཐམས་ཅད་ཧཱ་ལ་ཧཱ་ལ་སྔ་མ་དང་འདྲ་བ་ལས། གཡོན་ཞལ་དམར་པོའོ། །སྔགས་ནི། ཨོཾ་བཛྲ་དྷརྨ་ཧྲཱིཿཧཱ་ལ་ཧཱ་ལའི་སྒྲུབ་ཐབས་འདི་གཉིས་ཀ །སློབ་དཔོན་ལྷན་སྐྱེས་རོལ་པས་མཛད་ཅེས་འབྱུང་ལ། ལྷ་མོ་ནི་བྲིས་སྐུ་རྙིང་པ་ཡིད་ཆེས་ཅན་ལས་སྐུ་མདོག་ལྗང་ཁུར་བྲིས་སྣང་ལ་གཞུང་ཕྱི་མ་འདི་ལས་ཡུམ་སྐྱིལ་ཀྲུང་གིས་བཞུགས་པར་བཤད་པ་འདྲ་རུང་ཞིག་བྱུང་ཀྱང༌། འགྱུར་སྐྱོན་ཡིན་པར་མངོན་པས་ཇི་ལྟར་བདེ་བར་བྱའོ།། །།
པདྨ་གར་གྱི་དབང་ཕྱུག་གི་སྒྲུབ་ཐབས།
པདྨ་གར་གྱི་དབང་ཕྱུག་གི་སྒྲུབ་ཐབས་ནི། སྣ་ཚོགས་པདྨ་འདབ་བརྒྱད་ཀྱི་ལྟེ་བར་ཟླ་བ་ལ་ཧྲཱིཿལས་རང་ཉིད་འཇིག་རྟེན་མགོན་པོ་པདྨ་གར་དབང་སྐུ་མདོག་དམར་པོ། ཕྱག་
གཡོན་པས་སྐུའི་གཡོན་ཕྱོགས་སུ་གནས་པའི་ཡུམ་གོས་དཀར་མོ་ལ་འཁྱུད་པའི་ཚུལ་གྱིས་པདྨ་དམར་པོའི་སྡོང་བུ་འཛིན་ཞིང༌། གཡས་པ་ཁབ་ཀྱི་ཕྱག་རྒྱ་དང་གར་གྱི་ཚུལ་གྱིས་ཐུགས་ཀར་པདྨ་ཁ་འབྱེད་པར་མཛད་པ། ཞབས་སེམས་དཔའི་སྐྱིལ་མོ་ཀྲུང་གིས་བཞུགས་པ། ཤིན་ཏུ་ཆགས་པའི་ཉམས་ཅན། འདབ་མ་བརྒྱད་ལ་ཤར་དུ་རྣམ་གཟིགས་མ་དཀར་མོ་པད་དམར་འཛིན་པ། ལྷོར་སྒྲོལ་མ་ལྗང་ཁུ་པད་ལྗང་འཛིན་པ། ནུབ་ཏུ་དབང་ཕྱུག་མ་སེར་མོ་ཨུཏྤལ་སྔོན་པོ་འཛིན་པ། བྱང་དུ་ཁྲོ་གཉེར་མ་དཀར་མོ་པད་སེར་འཛིན་པ། ཤར་ལྷོར་པདྨ་ལ་གནས་པ་མོ་སེར་མོ་པད་དམར་འཛིན་པ། ལྷོ་ནུབ་ཏུ་པདྨའི་དབང་ཕྱུག་མ་སྔོ་སངས་པད་དཀར་འཛིན་པ། ནུབ་བྱང་དུ་སྣ་ཚོགས་པདྨ་དཀར་མོ་པདྨ་ནག་པོ་འཛིན་པ། བྱང་ཤར་དུ་སྣ་ཚོགས་རྡོ་རྗེ་མ་ཁྲ་མོ་སྣ་ཚོགས་པདྨ་འཛིན་པ། ཐམས་ཅད་ཀྱང་སེམས་དཔའི་སྐྱིལ་ཀྲུང་ཕྱག་གཡོན་པ་གདན་ལ་བརྟེན་པའམ། ཡང་ན་གཙོ་བོ་དང་མཚུངས་པའོ། །རིགས་བདག་ནི་འོད་དཔག་མེད་དོ། །སྔགས་ནི། ཨོཾ་ཧྲཱིཿཔདྨ་ན་ར་ཏེ་ཤྭ་ར་ཧཱུཾ།། །།
སྒྱུ་འཕྲུལ་དྲྭ་བའི་རྒྱུད་རྒྱས་པ་ལས་འབྱུང་བ་འཕགས་པ་སྤྱན་རས་གཟིགས་དྲག་པོ་ཆེན་པོའི་སྒྲུབ་ཐབས།
སྒྱུ་འཕྲུལ་དྲྭ་བའི་རྒྱུད་རྒྱས་པ་ལས་འབྱུང་བ་འཕགས་པ་སྤྱན་རས་གཟིགས་དྲག་པོ་ཆེན་པོའི་སྒྲུབ་ཐབས་ནི། སྟོང་པའི་ངང་ལས་རཾ་ལས་ཉི་མའི་སྟེང་དུ། ཧཱུཾ་ལས་སྣ་ཚོགས་རྡོ་རྗེ། དེ་ལས་རྡོ་རྗེའི་ས་གཞི་ར་གུར་དང་བཅས་པའི་བསྲུང་འཁོར་རོ། །དེའི་ནང་དུ་མི་བཟད་པའི་དུར་ཁྲོད་ཆེན་པོའི་དབུས་སུ། པདྨ་དམར་པོ་འདབ་བརྒྱད་དང༌། རཾ་ལས་ཉི་མའི་སྟེང་དུ། ཧྲཱིཿལས་སྤྱན་རས་གཟིགས་སྐུ་
མདོག་བུང་བ་ལྟར་གནག་པ། གཅེར་བུ་གཡས་བརྐྱང་བའི་སྟབས་ཀྱིས་བཞུགས་པ། ཞལ་ལྔ་ཕྱག་བཅུ་གཉིས་པ། རྩ་ཞལ་མཐིང་ནག།གཡས་ཞལ་དཀར་པོ་དང་དམར་པོ། གཡོན་ཞལ་སེར་པོ་དང་ལྗང་ཁུ། གཡས་རྣམས་ན་ཌཱ་མ་རུ་དང༌། ཁ་ཊྭཱཾ་ག་དང༌། ལྕགས་ཀྱུ་དང༌། ཞགས་པ་དང༌། རྡོ་རྗེ་དང༌། མདའ་རྣམས་སོ། །གཡོན་རྣམས་ན་སྡིགས་མཛུབ་དང༌། ཐོད་པ་དང༌། པདྨ་དམར་པོ་དང༌། ནོར་བུ་དང༌། འཁོར་ལོ་དང༌། གཞུ་བསྣམས་པའོ། །ཞལ་ཐམས་ཅད་རབ་ཏུ་ཁྲོས་པ། རུས་པའི་ཕྱག་རྒྱ་དྲུག་དང༌། ཐོད་སྐམ་གྱི་དབུ་རྒྱན་དང༌། ཐོད་རློན་གྱི་དོ་ཤལ་དང་ལྡན་པ། དབུ་རྒྱན་ནི་རྡོ་རྗེ་སེམས་དཔའོ་ཞེས་འདོད་མོད། འོད་དཔག་མེད་ཀྱང་རུང་ངོ༌། །སྔགས་ནི། ཨོཾ་ཨཱཿཧཱུཾ་ཨི་ཏི་མུ་ནི་ཝ་ར་བཛྲ་ཧྲཱིཿཧཱུཾ་ཛཿ སྒྲུབ་ཐབས་འདི་སློབ་དཔོན་ཛེ་ཏཱ་རིས་མཛད། རྒྱ་གཞུང་གི་དཔེ་འགའ་རེ་ལས་འདི་གླེགས་བམ་གྱི་གཞུག་རང་ན་འདུག་ཅིང༌། བླ་མ་གོང་མའི་ཡིག་སྣ་ནའང༌། ཀུན་གྱི་ཐ་མར་འབུད་པ་མཛད་མོད་ཀྱི། སྡེ་ཚན་བསྒྲིགས་པའི་ཕྱིར་འདིར་བླངས་པ་ཉིད་ལེགས་ཤིང༌། འོག་གི་ཁམས་གསུམ་དབང་སྡུད་ཀྱི་སྒྲུབ་ཐབས་ཀྱང༌། སྐབས་འདིར་བླངས་ན་སྡེ་ཚན་བསྒྲིག་པའི་ཕྱིར་ལེགས་སོ། །དེ་འདིར་བླངས་ན་དེ་ཡན་ཆད་ཀྱིས་སྤྱན་རས་གཟིགས་དབང་གི་སྡེ་ཚན་རྣམས་རྫོགས་སོ།། །།
འཕགས་མ་སྒྲོལ་མའི་སྒྲུབ་ཐབས།
དེ་ནས་འཕགས་མ་སྒྲོལ་མའི་སྒྲུབ་ཐབས་རྣམས་འབྱུང་སྟེ། སློབ་དཔོན་རྡོ་རྗེ་མྱུ་གུས་མཛད་པ་ལ། པད་ཟླ་ལ་ཏཱཾ་ལས་ཨུཏྤ་ལ་ཏཱཾ་གིས་མཚན་པ་ལས། རང་ཉིད་འཕགས་མ་སྒྲོལ་མ་ལྗང་ཁུ། ཕྱག་གཡས་མཆོག་སྦྱིན་
དང༌། གཡོན་ཨུཏྤལ་སྔོན་པོ་འཛིན་པ། ཞབས་རྡོ་རྗེའི་སྐྱིལ་ཀྲུང་ངམ། སེམས་དཔའི་སྐྱིལ་ཀྲུང་གིས་བཞུགས་པ། རིགས་བདག་ནི་དོན་ཡོན་གྲུབ་པའོ། །སྔགས་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཾ་ཝ་ཤ་མ་ན་ཡེ་སྭཱཧཱ། སྒྲུབ་ཐབས་འདི་སློབ་དཔོན་རྡོ་རྗེ་མྱུ་གུས་མཛད་དོ། །འདིའི་ཆན་བུ་རྙིང་པ་ལས། ཞབས་ཀྱི་བཞུགས་སྟངས་བཞེངས་བཞུགས་གང་བྱས་ཀྱང་འདྲ་ཞེས་བཤད་ལ། མན་ངག་ལས་དམར་མོར་ཡང་འདོད་སྐད་དོ། བསྟོད་པ་ནི། ལྷ་དང་ལྷ་མིན་ཅོད་པན་གྱི་སོགས་བྱ་སྟེ། སྒྲོལ་མའི་སྒྲུབ་ཐབས་འོག་མ་རྣམས་ལ་ཡང་དེས་རིགས་འགྲེའོ།། །།
སྒྲོལ་དཀར་གཙོ་འཁོར་གསུམ་པའི་སྒྲུབ་ཐབས།
སྒྲོལ་དཀར་གཙོ་འཁོར་གསུམ་པའི་སྒྲུབ་ཐབས་ནི། སུཾ་ལས་བྱུང་བའི་རི་རབ་ཀྱི་སྟེང་དུ། པད་དཀར་ཟླ་བའི་གདན་ལ་ཧཱུཾ་ལས་རང་ཉིད་སྒྲོལ་མ་དཀར་མོ་ཞལ་གཅིག་སྤྱན་གསུམ་ཕྱག་བཞིའི་དང་པོ་གཉིས་ཨུཏྤ་ལའི་ཕྱག་རྒྱ་ཐུགས་ཀར་མཆིང་བ། དེ་ནི་སྲིན་ལག་མཐེ་བོས་མནན། མཐེའུ་ཆུང་བསྒྲེངས་ཏེ་གཤིབས། གུང་མོ་བསྒྲེང་བའི་རྒྱབ་ཏུ་མཛུབ་མོ་བརྟེན་པའོ། །གཡས་འོག་མས་རིན་པོ་ཆེ་དང་བཅས་པའི་མཆོག་སྦྱིན། གཡོན་འོག་མས་ཨུཏྤ་ལའི་སྙེ་མ་འཛིན་པ། གཡས་སུ་འོད་ཟེར་ཅན་མ་སེར་མོ་ཤ་འགག་དམར་པོ་དང་སྟོད་གོས་སྔོན་པོ་ཅན། གཡས་རྔ་ཡབ་གཡོན་མྱ་ངན་མེད་པའི་ཡལ་གསྐུའི་གཡོན་དུ་རྨ་བྱ་ཆེན་མོ་ལྗང་ཁུ། གཡས་རྔ་ཡབ། གཡོན་རྨ་བྱའི་མཇུག་སྒྲོ། རིགས་བདག་ནི་འོད་དཔག་ཏུ་མེད་པའམ། ཡང་ན་རིགས་ལྔ་ཆར་གྱིས་དབུ་བརྒྱན་ནོ། །སྔགས་ནི། ཨོཾ་ན་མཿཏཱ་རེ་མ་ནོ་ཧ་རེ་ཧཱུཾ་ཧ་རེ་སྭཱཧཱ།། །།
སེང་ལྡེང་ནགས་སྒྲོལ་གྱི་སྒྲུབ་ཐབས།
སེང་ལྡེང་ནགས་སྒྲོལ་གྱི་སྒྲུབ་ཐབས་ནི། པད་ཟླའི་སྟེང་དུ་ཏཱཾ་ལས་ཨུཏྤལ་ཏཱཾ་གིས་མཚན་པ་ལས། འཕགས་མ་སྒྲོལ་མ་ལྗང་ཁུ། ཕྱག་གཡས་མཆོག་སྦྱིན་དང༌། གཡོན་ཨུཏྤལ་སྔོན་པོའི་སྡོང་བུ་འཛིན་པ། ཞབས་གཡས་བརྐྱང་བའི་སྐྱིལ་ཀྲུང་ཕྱེད་པའི་རོལ་པས་བཞུགས་པ། གཡས་སུ་འོད་ཟེར་ཅན་མ་སེར་མོ་རྡོ་རྗེ་དང་མྱ་ངན་མེད་པའི་ཡལ་ག་འཛིན་པ། གཡོན་དུ་རལ་གཅིག་མ་ནག་མོ་ཁྲོ་མོའི་ཆ་བྱད་ཅན་གྲི་གུག་ཐོད་ཁྲག་བསྣམས་པའོ། །ཡིག་སྣ་ལས་གཙོ་འཁོར་གསུམ་ཀ་རྣམ་པ་འདྲ་བར་བཤད་ནའང༌། འདིར་སྒྲུབ་ཐབས་ཁུངས་མ་གཞན་ནས་འབྱུང་བ་ལྟར་བཀོད་ལ། མནའ་ཆན་རིགས་གཅིག་ལས་གཉིས་པོའི་ཕྱག་གཡས་ན་རྔ་ཡབ་འཛིན་པ་དང༌། གཞན་དཀྱུས་དང་འདྲ་བ་ཡང་བྱས་འདུག་པ་ཇི་ལྟར་འོས་པར་སྦྱར་རོ། །རིགས་བདག་ནི་དོན་གྲུབ་བོ། །སྔགས་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ།། །།
འཆི་བ་བླུ་བའི་སྒྲོལ་མའམ་སྒྲོལ་དཀར་ཡིད་བཞིན་འཁོར་ལོ།
འཆི་བ་བླུ་བའི་སྒྲོལ་མའམ། སྒྲོལ་དཀར་ཡིད་བཞིན་འཁོར་ལོ་ནི། པད་དཀར་ཟླ་བའི་གདན་ལ། ཏཱཾ་ལས་རང་ཉིད་སྒྲོལ་མ་དཀར་མོ། ཕྱག་གཡས་མཆོག་སྦྱིན་དང༌། གཡོན་ཨུཏྤལ་དཀར་པོའི་སྡོང་བུ་འཛིན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དབུ་རྒྱན་ནི་བ་རིའི་ལུགས་འདི་ལ་འོད་དཔག་མེད་ཡིན་ལ། སྔགས་ནི་ཡི་གེ་བཅུ་པ་ཉིད་དོ། །སྤེལ་ཚིག་སྦྱོར་ན། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཨཱ་ཡུར་པུཎྱེ་ཛྙཱ་ན་པུཥྟིཾ་ཀུ་རུ་སྭཱཧཱ། འོག་ནས་འབྱུང་བ་རྡོ་རྗེ་སྒྲོལ་མའི་སྒྲུབ་ཐབས་ཀྱང་སྐབས་འདིར་བླངས་ཏེ་རྗེས་གནང་བྱས་ན་ཤིན་ཏུ་ལེགས་ལ། ཐ་མར་འབྱུང་བའི་
སྒྲོལ་དཀར་ཞལ་གསུམ་ཕྱག་དྲུག་པ་ནི་སྐབས་འདིར་བླངས་ན་ལེགས་མོད་ཀྱང༌། འཇུག་གི་རྟེན་འབྲེལ་བཀྲ་ལེགས་པའི་ཕྱིར་དུ། ཐམས་ཅད་ཀྱི་ཐ་མར་མཛད་པ་ཉིད་ལག་ལེན་ཡིན་ནོ། །སྐབས་འདིར་སྒྲོལ་མའི་སྡེ་ཚན་དེ་ཙམ་ཞིག་ཡིན་ལ། སྤྱིར་ཀུ་ལུ་ཀུལླེ་དང༌། ཁྲོ་གཉེར་ཅན་མ་དང༌། རལ་གཅིག་མ་སོགས་ཀྱང་སྒྲོལ་མའི་རིགས་སུ་འདོད་ཅིང༌། སྒྲོལ་མའི་ཕྱོགས་གཏོགས་ཐམས་ཅད་ཀྱང་སྤྱན་རས་གཟིགས་ཀྱི་རིགས་ཀྱི་རྗེས་འབྲང་གི་སྡེ་ཚན་ནོ།། །།
ཨོ་ཌི་ཡ་ནའི་འོད་ཟེར་ཅན་མའི་སྒྲུབ་ཐབས།
ད་ནི་འོད་ཟེར་ཅན་མའི་སྡེ་ཚན་རྣམས་བཤད་པ་ལས། ཐོག་མར་ཨོ་ཌི་ཡ་ནའི་འོད་ཟེར་ཅན་མའི་སྒྲུབ་ཐབས་ནི། མྱ་ངན་མེད་པའི་ཤིང་གི་སྡོང་པོས་སྐོར་བའི་མཆོད་རྟེན་གྱི་ནང་དུ། པད་ཟླའི་གདན་ལ་ཨོཾ་ལས་ཉི་མའི་དཀྱིལ་འཁོར་རོ། །ཉི་མའི་སྟེང་དུ་མཾ། ཉི་མ་མཾ་དང་བཅས་པ་ཡོངས་སུ་གྱུར་པ་ལས་རང་ཉིད་འོད་ཟེར་ཅན་མ་དམར་མོ་ཆེར་ཁྲོས་པ། ཁྲོ་མོའི་ཆ་བྱད་རྫོགས་པ། རྩ་ཞལ་དམར། གཡས་ནག་པོ་དང་ལྗང་ཁུ། གཡོན་སེར་པོ་དང་དཀར་པོ། སྟེང་ཞལ་ཕག་གདོང་ནག་པོ་སྟེ་ཞལ་དྲུགཕྱག་གཡས་དྲུག་ན་རལ་གྲི། རྡོ་རྗེ་གཏུན་ཤིང༌། མདའ། མཚོན་རྩེ་གཅིག་པ། དགྲ་སྟའོ། །གཡོན་དྲུག་ན་སྡིགས་མཛུབ་དང་བཅས་པའི་ཞགས་པ། ཐོད་ཁྲགམྱ་ངན་མེད་པའི་ཡལ་གཚངས་པའི་མགོ་བོ། གཞུ། རྩེ་གསུམ་རྣམས་འཛིན་པ། ཞབས་གཡོན་བརྐྱང་བའི་སྟབས་ཀྱིས། པད་ཟླའི་སྟེང་དུ་བགེགས་ཚོགས་མནན་པའི་ཕག་གི་སྟེང་ན་གནས་པ། དེའི་མདུན་དུ་ཕོ་ཉ་མོ་དམར་མོ་སྡིགས་མཛུབ་དང་བཅས་པའི་ཞགས་པ་དང༌། ཤིང་ཨ་ཤོ་ཀའི་
ཡལ་ག་བསྣམས་པ། ཕག་གིས་དྲངས་པའི་ཤིང་རྟ་ལ་ཞོན་པའོ། །འདི་གཞུང་གི་དངོས་བསྟན་ལྟར་ན་དེ་ལྟར་ཡིན་ལ། མནའ་ཆན་ལས་ནི་གཙོ་མོ་ཉིད་ཕག་བདུན་གྱིས་དྲངས་པའི་ཤིང་རྟའི་དབུས་སུ་བཞུགས་པ་དང༌། ཕོ་ཉ་མོ་གཙོ་མོའི་ཞབས་གཉིས་ཀྱི་བར་ན་གནས་མར་བཤད་དོ། །རིགས་བདག་ནི་རྣམ་སྣང་སེར་པོའོ། །སྔགས་ནི། ཨོཾ་མ་རི་ཙྱཻ་ཨཾ་ཨཾ་ཧཱུཾ་ཧཱུཾ་ཕཊ་ཕཊ་སྭཱཧཱ། བསྟོད་པ་ནི། གང་གི་མཚན་ཙམ་འཛིན་ཞིང་དྲན་པས་ཀྱང༌། སོགས་ཏེ་འོད་ཟེར་ཅན་མའི་སྒྲུབ་ཐབས་འོག་མ་རྣམས་ལའང་བསྟོད་པ་དེ་ཁོ་ནའོ།། །།
རྟོག་པ་ལས་འབྱུང་བ་འོད་ཟེར་ཅན་མ་སེར་མོའི་སྒྲུབ་ཐབས།
རྟོག་པ་ལས་འབྱུང་བ་འོད་ཟེར་ཅན་མ་སེར་མོའི་སྒྲུབ་ཐབས་ནི། པད་ཉིའི་སྟེང་དུ་མཾ་ལས་རང་ཉིད་འོད་ཟེར་ཅན་མར་གྱུར་པ་ནི། མྱ་ངན་མེད་པའི་ཤིང་གི་སྡོང་པོས་བསྐོར་བའི་དབུས་སུ། རྣམ་པར་སྣང་མཛད་ཀྱི་ངོ་བོ་མཆོད་རྟེན་ཡངས་ཤིང་རྒྱ་ཆེ་བའི་བུམ་པའི་ནང་དུ། ཡཾ་ལས་རླུང་གི་དཀྱིལ་འཁོར་གྱི་སྟེང་དུ། ཧཾ་ལས་གཟའ་ཆེན་པོ་རཱ་ཧུ་ལ་སྲིན་པོའི་ལུས་ཅན་རོ་སྨད་མེད་པ་ལག་ཏུ་ཉི་ཟླ་འཛིན་པ་དེ་ལྟ་བུ་རྨིག་པས་བརྫི་བར་བྱེད་པ། ཕག་པ་བདུན་གྱིས་དྲངས་པའི་རིན་པོ་ཆེའི་ཤིང་རྟའི་སྟེང་དུ། པད་ཉི་ལ་གནས་པའི་བཅོམ་ལྡན་འདས་མ་སྐུ་མདོག་སེར་མོ། ཞི་མ་ཁྲོ། རྩ་ཞལ་སེར་བ། གཡས་དམར་བ། གཡོན་ཕག་གདོང་སྔོན་པོ་ཆེར་ཁྲོས་པ། དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། ཕྱག་གཡས་བཞི་ན་རྡོ་རྗེ། ལྕགས་ཀྱུ། མདའ། ཁབ། གཡོན་བཞི་ན་ཤིང་ཨ་ཤོ་ཀའི་ཡལ་གགཞུ། སྐུད་པ། ཞགས་པ་འཛིན་པའི་
སྡིགས་མཛུབ་བོ། །ཞབས་གཡས་བརྐྱང་བས་རོལ་པས་བཞུགས་པའམ། བཞེངས་པ་ཇི་ལྟར་འོས་པར་བྱ། དབུ་སྐྲ་རལ་པའི་ཐོར་ཚུགས་ཅན། དར་དམར་པོ་ཤ་འགགས་སྦུ་གུ་ཅན་དང་སྟོད་གཡོགས་གསོལ་བ། ཤར་དུ་བད་ཏ་ལི་དཀར་མོ། ཁབ། ལྕགས་ཀྱུ། ཞགས་པ། ཨ་ཤོ་ཀ་རྣམས་འཛིན་པ། ལྷོར་བཱ་ད་ལི་སེར་མོ་མྱ་ངན་མེད་པ། ཁབ་དང༌། རྡོ་རྗེ་ཞགས་པ་རྣམས་འཛིན་པ། ནུབ་ཏུ་བ་ར་ལི་དཀར་མོ་རྡོ་རྗེ། ཞགས་པ། ཁབ་དང༌། མྱ་ངན་མེད་འཛིན་པ། བྱང་དུ་བཱ་རཱ་ཧཱ་མུ་ཁི་དམར་མོ། རྡོ་རྗེ། མདའ་དང༌། ཞགས་པ། ཨ་ཤོ་ཀ་འཛིན་པ། ཐམས་ཅད་ཀྱང་ཕག་གི་གདོང་ཅན་གཡོན་བརྐྱང་གིས་གནས་པ། ལྷག་མ་གཙོ་མོ་དང་མཚུངས་པའོ། །རིགས་བདག་ནི་རྣམ་སྣང་ངོ༌། །ཨོཾ་མཱ་རི་ཙྱཻ་མཾ་ཧཱུཾ་ཧཱུཾ་ཕཊ་ཕཊ་སྭཱཧཱ། ཡང་རྟོག་པའི་འོད་ཟེར་ཅན་མ་སེར་མོ་དེ་ཁོ་ན་འདྲ་བ་ལས། སྔགས་ཨོཾ་མ་རི་ཙྱཻ་སྭཱཧཱ། ཞེས་པ་སྟེ་ཡང་ན་སྒྲུབ་ཐབས་འདི་གཉིས་གཅིག་ཏུ་སྡོམས་ཀྱང་རུང་བར་བཞེད་དོ།། །།
རྟོག་པ་ལས་འབྱུང་བ་འོད་ཟེར་ཅན་མ་དཀར་མོའི་སྒྲུབ་ཐབས།
རྟོག་པ་ལས་འབྱུང་བ་འོད་ཟེར་ཅན་མ་དཀར་མོའི་སྒྲུབ་ཐབས་ནི། པད་ཟླ་ལ་མཾ་ལས། རང་ཉིད་བཅོམ་ལྡན་འདས་མ་དཀར་མོ་རྩ་ཞལ་དཀར་བ། གཡས་ནག་པ། གཡོན་ཕག་གདོང་དམར་བ། རྒྱབ་ཞལ་ལྗང་ཁུ། སྟེང་ཞལ་སེར་པོ། ཕྱག་གཡས་ལྔ་ན་ཉི་མའི་དཀྱིལ་འཁོར། རྡོ་རྗེ་སྔོན་པོ། མདའ། ལྕགས་ཀྱུ་དང༌། ཁབ་རྣམས་སོ། །གཡོན་པ་ལྔ་ན་ཟླ་བའི་དཀྱིལ་འཁོར། གཞུ། མྱ་ངན་མེད་པ། ཞགས་པ་འཛིན་པའི་སྡིགས་མཛུབ། སྐུད་པའོ། །དར་དཀར་པོའི་སྟོད་གཡོགས་དང༌། ཤ་འགག་སྦུ་གུ་ཅན་གསོལ་བ། ཞབས་བཞི་བརྐྱང་བསྐུམ་
དང༌། གར་སྟབས་ཀྱིས་ཁྱབ་འཇུག་བརྒྱ་བྱིན་ཚངས་པ་རྣམས་མནན་པ། གཞན་སེར་མོ་ཕྱག་བརྒྱད་ཀྱི་སྐབས་དང་འདྲ་བ་ལ། གཟའ་ཆེན་པོ་དགུ་དང་ནད་ཀྱི་བདག་པོ་ཐམས་ཅད་མིའི་གཟུགས་ཅན་དུ་གནས་པ་རྣམས་བརྗི་ཞིང་ཐ་བར་བྱེད་པའི་ཕག་བདུན་གྱིས་དྲངས་པའི་ཤིང་རྟ་ལ་གནས་ཤིང༌། མཆོད་རྟེན་གྱི་བུམ་པའི་ཁོངས་སུ་རྒྱུ་བ། གཙོ་མོའི་མདུན་དུ་ཕོ་ཉ་མོ་ནག་མོ་ཆུ་སྲིན་ལ་ཞོན་པ། གཡས་རྡོ་རྗེ། གཡོན་སྡིགས་མཛུབ། གཡས་སུ་ཕོ་ཉ་དམར་མོ་ཕྱག་བཞི། ལྕགས་ཀྱུ། ཁབ་དང་ཞགས་པ། སྐུད་པ་འཛིན་པ། གཡོན་དུ་ཕོ་ཉ་དམར་མོ་ཕྱག་བཞི། མདའ་གཞུ་བཀར་ཞིང་རྡོ་རྗེ་དང༌། མྱ་ངན་མེད་པ་འཛིན་པ། ཕོ་ཉ་གསུམ་ཀར་ཡང་ཕག་གི་གདོང་ཅན་གཡོན་བརྐྱང་གི་སྟབས་ཀྱིས་བཞུགས་པ། རིགས་བདག་སྔར་དང་འདྲ། སྔགས་ནི། ཨོཾ་མཱ་རི་ཙྱཻ་མཾ་ཧཱུཾ་ཧཱུཾ་ཕཊ་ཕཊ་སྭཱཧཱ།། །།
མྱ་ངན་མེད་པའི་འོད་ཟེར་ཅན་མའི་སྒྲུབ་ཐབས།
མྱ་ངན་མེད་པའི་འོད་ཟེར་ཅན་མའི་སྒྲུབ་ཐབས་ནི། ཕག་སེར་པོའི་སྟེང་དུ་པད་ཟླ་ལ། མཾ་ལས་འོད་ཟེར་ཅན་མ་སེར་མོ་ཞལ་གཅིག་ཕྱག་གཉིས། རབ་ཏུ་ཞི་བ་སེམས་དཔའི་སྐྱིལ་ཀྲུང་གིས་བཞུགས་པ། མྱ་ངན་མེད་པའི་སྡོང་པོ་ལ་རྒྱབ་བརྟེན་ཞིང༌། ཕྱག་གཡོན་པས་དེའི་ཡལ་ག་འཛིན་པ། གཡས་མཆོག་སྦྱིན་ནོ། །དབུ་རྒྱན་གོང་བཞིན། སྔགས་ནི། ཨོཾ་མཱ་རི་ཙྱཻ་མཾ་སྭཱཧཱ།། །།
ཡང་ཨོ་ཌི་ཡ་ནའི་འོད་ཟེར་ཅན་མའི་སྒྲུབ་ཐབས་ལྷན་སྐྱེས་རོལ་པས་མཛད་པའི་ལུགས།
ཡང་ཨོ་ཌི་ཡ་ནའི་འོད་ཟེར་ཅན་མའི་སྒྲུབ་ཐབས་ལྷན་སྐྱེས་རོལ་པས་མཛད་པའི་ལུགས་ནི། དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་དབུས་སུ། མཆོད་རྟེན་གྱི་བུམ་པའི་ནང་དུ། ཕག་བདུན་གྱིས་དྲངས་པའི་ཤིང་རྟའི་སྟེང་པད་ཉི་ལ། མཾ་ལས་འོད་ཟེར་ཅན་དམར་མོ་ཆེར་ཁྲོས་པ། རྩ་ཞལ་དམར། གཡས་ནག་པོ་དང་དཀར་པོ། གཡོན་སེར་པོ་དང་ལྗང་ཁུ། སྟེང་ཕག་གདོང་ནག་པོ། ཕྱག་གཡས་དྲུག་རལ་གྲི། འཁོར་ལོ། གཏུན་ཤིང༌། མདའ། དགྲ་སྟ། རྩེ་གཅིགགཡོན་ཞགས་པར་བཅས་པའི་སྡིགས་མཛུབ། ཁ་ཊྭཱཾ་གཐོད་པ། ཨ་ཤོ་ཀ ཚངས་མགོ གཞུ། རྩེ་གསུམ་མོ། །མི་མགོ་སྐམ་པོ་བརྒྱད་བརྒྱད་ཀྱི་དབུ་རྒྱན་དང༌། མགོ་འཕྲེང་དང༌། སྦྲུལ་དང༌། རིན་པོ་ཆེས་བརྒྱན་པ། རོལ་སྟབས་ཀྱིས་བཞུགས་པའོ། །མདུན་དུ་ཕོ་ཉ་མོ་དཀར་མོ་ཕག་གདོང་ཅན། ཕྱག་བཞི་རྡོ་རྗེ། ཁབ། ཨ་ཤོ་ཀ སྡིགས་མཛུབ་མཛད་པ། ཤ་འགགས་སེར་པོའི་སྟེང་དུ། སྟག་ལྤགས་ཀྱི་སྨད་དཀྲིས་ཅན། རིགས་བདག་ནི་འདྲ། སྔགས་ནི། ཨོཾ་མཱ་རི་ཙྱཻ་མཾ་ཧཱུཾ་ཧཱུཾ་ཕཊ་ཕཊ་སྭཱཧཱ།། །།
ཨོ་རྒྱན་རིམ་པའི་འོད་ཟེར་ཅན་མ་རྡོར་དབྱིངས་དབང་ཕྱུག་མའམ་རོ་ལངས་འོད་ཟེར་ཅན་མའི་སྒྲུབ་ཐབས།
ཨོ་རྒྱན་རིམ་པའི་འོད་ཟེར་ཅན་མ་རྡོར་དབྱིངས་དབང་ཕྱུག་མའམ། རོ་ལངས་འོད་ཟེར་ཅན་མའི་སྒྲུབ་ཐབས་ནི། ཧཱུཾ་ལས་སྣ་ཚོགས་རྡོ་རྗེ་ཡོངས་སུ་གྱུར་པ་ལས། བསྲུང་འཁོར་དུ་གྱུར་པའི་ནང་དུ། མཚན་ཉིད་ཐམས་ཅད་ཡོངས་སུ་རྫོགས་པའི་དུར་ཁྲོད་ཆེན་པོས་བསྐོར་བའི་དབུས། ཨོ་ཌི་ཡ་ནའི་གནས་གྲུ་གསུམ་དཀར་ལ་དམར་བའི་གནས་ཀྱི་གཞལ་མེད་ཁང་པའི་ནང་དུ། ཉི་མ་ལ་རྡོ་རྗེ་ཧཱུཾ་གིས་མཚན་པ་དེ་ལས་འོད་ཟེར་ཅན་མ་དམར་མོ་ཆེར་ཁྲོས་པ། རྩལ་ཞལ་དམར་བ། གཡས་གཉིས་དཀར་པོ་དང་ནག་པོ། གཡོན་གཉིས་སེར་པོ་དང་ནག་པོ།
སྟེང་ཕག་ཞལ་ནག་པོ། ཕྱག་གཡས་དྲུག་ན་རལ་གྲི། སྣ་ཚོགས་རྡོ་རྗེ། ཀ་ཎ་ཡ། དགྲ་སྟ། མདའ། གཏུན་ཤིང༌། གཡོན་དྲུག་ཁབ་དང་བཅས་པའི་སྡིགས་མཛུབ། རྩེ་གསུམ། ཨ་ཤོ་ཀ །གཞུ། ཞགས་པ། ཚངས་མགོའོ། །ཞབས་བཞི་གཡོན་བརྐྱང་བས་བདུད་བཞི་མནན་པ། རུས་པའི་རྒྱན་ལྔ་དང༌། ཡན་ལག་ཉིང་ལག་ཐམས་ཅད་ལ་མི་མགོ་རློན་པའི་འཕྲེང་བས་མཛེས་པ། ཁྲོ་མོའི་ཆ་བྱད་རྫོགས་པ། རིགས་བདག་ནི་རྣམ་སྣང་ངོ༌། །སྔགས་ནི། ཨོཾ་བཛྲ་དྷ་ཏྲི་ཤྭ་རཱི་སརྦ་དུཥྟན་ཧ་ན་ཧ་ན་ཧ་ད་ཧ་ད་ཧ་པ་ཙ་པ་ཙ་ཨོཾ་མཱ་རི་ཙྱཻ་མཾ་ཧཱུཾ་ཧཱུཾ་ཕཊ་ཕཊ་སྭཱཧཱ།། །།
ལྷ་མོ་བསྐུལ་བྱེད་མའི་སྒྲུབ་ཐབས།
ལྷ་མོ་བསྐུལ་བྱེད་མའི་སྒྲུབ་ཐབས་ནི། པད་ཟླ་ལ་ཙུཾ་ཡིག་ལས། ལྷ་མོ་ཙུན་ད་དཀར་མོ་ཕྱག་བཞི། གཡས་དང་པོ་མཆོག་སྦྱིན། གཡོན་དང་པོ་ཤེར་ཕྱིན་གྱི་པོ་ཏིས་མཚན་པའི་པདྨ་དཀར་པོ། འོག་མ་གཉིས་མཉམ་བཞག་གི་སྟེང་ན་བདུད་རྩིས་གང་བའི་ལྷུང་བཟེད་འཛིན་པ། རྡོ་རྗེའི་སྐྱིལ་ཀྲུང་གིས་བཞུགས་པ། རིགས་བདག་ནི་རྣམ་སྣང་ངོ༌། །སྔགས་ནི། ཨོཾ་ཙ་ལེ་ཙུ་ལེ་ཙུན་དེ་སྭཱཧཱ། བསྟོད་པ་ནི། རྒྱལ་བ་ཐམས་ཅད་མཉེས་མཛད་པ། །འགྲོ་བའི་དོན་ཆེན་བསྒྲུབ་པའི་ཕྱིར། །རིགས་སྔགས་ལྷ་མོའི་ཚུལ་འཛིན་པ། །དེ་ལ་བསྟོད་དེ་ཕྱག་ཀྱང་འཚལ། །ཞེས་པས་བསྟོད་དེ། འཆད་པ་འགྱུར་བའི་ལྷ་མོའི་སྒྲུབ་ཐབས་སྒོས་སུ་བསྟོད་པ་མེད་པ་ཀུན་ལ་ཚིགས་བཅད་འདི་ཁོ་ནས་བསྟོད་པར་བྱའོ།། །།
འཕགས་པ་ཛམྦྷ་ལ་སེར་པོའི་སྒྲུབ་ཐབས།
འཕགས་པ་ཛམྦྷ་ལ་སེར་པོའི་སྒྲུབ་ཐབས་ནི། པད་ཟླ་ལ་ཛཾ་ཡིག་ལས་འཕགས་པ་ཛམྦྷ་ལ་སྐུ་མདོག་སེར་པོ་ཤ་ཉམས་རྒྱས་པ། ཞལ་གཅིག་ཕྱག་གཉིས་སྤྱན་གདངས་པ། གཡས་མཆོག་སྦྱིན་གྱི་མཐིལ་ན་ཤིང་ཐོག་བི་ཛ་པཱུ་ར་ཀ་འཛིན་པ། གཡོན་པས་རིན་པོ་ཆེ་སྣ་ཚོགས་ཀྱིས་གང་བའི་ནེའུ་ལེའི་རྐྱལ་པ་བསྣམས་པས་ནོར་བུའི་ཆར་འབེབས་པ། ཞབས་གཉིས་གཡས་བརྐྱང་བའི་སྐྱིལ་ཀྲུང་ཕྱེད་པའི་རོལ་པས་དུང་གི་ཚོགས་དང་པདྨའི་ཚོགས་ལ་སོགས་པའི་གཏེར་མནན་པ། ཨུཏྤལ་སྔོན་པོའི་དོ་ཤལ་ཅན། གཞན་ཞི་བ་སྤྱི་དང་མཚུངས་པ་རིགས་བདག་ནི་རིན་ཆེན་འབྱུང་ལྡན་ནོ། །སྔགས་ནི། ཨོཾ་ཛམྦྷ་ལ་ཛ་ལེན་དྲ་ཡེ་སྭཱཧཱ། བསྟོད་པ་ནི། ནོར་གྱི་དབང་ཕྱུག་སོགས་སོ།། །།
ཛམྦྷ་ལ་ནག་པོའི་སྒྲུབ་ཐབས།
ཛམྦྷ་ལ་ནག་པོའི་སྒྲུབ་ཐབས་ནི། པད་ཉི་ལ་ཧཱུཾ་ལས་ཛམྦྷ་ལ་ནག་པོ་མིའུ་ཐུང་གི་གཟུགས་རིགས་ངན་གྱི་ཆ་བྱད་རྣ་བ་མ་ཕུག་པ། གཅེར་བུ་ཕྱག་གཡས་ཐོད་ཁྲག་ཐུགས་ཀར་འཛིན་པ། སྦྲུལ་གྱིས་བརྒྱན་པ། གཡོན་ནེའུ་ལེ་ནོར་བུ་སྐྱུག་པ་འཛིན་ཞིང་བརླ་ལ་བརྟེན་པ། རྟགས་གྱེན་དུ་ལངས་པ། ཞབས་གཡས་བསྐུམ་གཡོན་བརྐྱང་བས་ནོར་བདག་སེར་པོ་རིན་པོ་ཆེའི་སྙེ་མ་སྐྱུག་པ་མནན་པ། ལྷག་མ་ཁྲོ་བོའི་ཆ་བྱད་རྫོགས་ཤིང་ཉི་མའི་དཀྱིལ་འཁོར་ལ་རྒྱབ་བརྟེན་པ། རིགས་བདག་ནི་མི་བསྐྱོད་པ། སྔགས་ནི་གོང་བཞིན་ནམ་ཨོཾ་སྭཱཧཱ། བསྟོད་པ་ཡང་གོང་བཞིན་ནམ། མགོན་པོ་ནམ་མཁའི་རང་བཞིན་སོགས་སོ།། །།
ནོར་རྒྱུན་མའི་སྒྲུབ་ཐབས།
ནོར་རྒྱུན་མའི་སྒྲུབ་ཐབས་ནི། པད་ཟླ་ལ་བཾ་ལས་ལྷ་མོ་ནོར་རྒྱུན་མ་སེར་མོ། ཕྱག་གཡས་མཆོག་སྦྱིན་དང༌། གཡོན་འབྲས་ཀྱི་སྙེ་མ་དང་གཏེར་གྱི་བུམ་པ་ལྷན་ཅིག་འཛིན་པ། ཞབས་སེམས་དཔའི་སྐྱིལ་ཀྲུང་གིས་བཞུགས་པ། འཁོར་གནོད་སྦྱིན་མཛའ་བོ་ཐམས་ཅད་ཀྱིས་ཡོངས་སུ་བསྐོར་བའོ། །མཛའ་མོའི་སྐྱེ་
འགྲོས་བསྐོར་ཟེར་བའང་ཡོད། རིགས་བདག་ནི་རིན་འབྱུང༌། སྔགས་ནི། ཨོཾ་ཤྲཱི་བ་སུ་ནི་དྷ་ན་ཀྵེ་ཏྲེ་སྭཱཧཱ། བསྟོད་པ་ནི། གང་སྟོན་སྦྱིན་པ་རྒྱ་མཚོ་སོགས་སོ། །འོག་ནས་འབྱུང་བའི་ཛམྦྷ་ལྷ་མང་གི་སྒྲུབ་ཐབས་ཡང་སྐབས་འདིར་བླངས་ལ་རྗེས་གནང་བྱའོ།། །།
འཕགས་མ་ཁྲོ་གཉེར་ཅན་གྱི་སྒྲུབ་ཐབས།
འཕགས་མ་ཁྲོ་གཉེར་ཅན་གྱི་སྒྲུབ་ཐབས་ནི། པད་ཟླ་ལ་ཡི་གེ་བྷྲིཾ་ལས། རང་ཉིད་ཁྲོ་གཉེར་ཅན་མ་སེར་མོ་ཞི་བ་རལ་བའི་ཅོད་པན་ཅན། ཕྱག་གཡས་གཉིས་མཆོག་སྦྱིན་དང༌། འཕྲེང་བ། གཡོན་གཉིས་དབྱུག་པ་དང་རིལ་པ། སེམས་དཔའི་སྐྱིལ་ཀྲུང་གིས་བཞུགས་པ། རིགས་བདག་ནི་འོད་དཔག་མེད། སྔགས་ནི། ཨོཾ་བྷྲིཾ་སྭཱཧཱ།། །།
སྒྱུ་དྲྭ་ལས་གསུངས་པ་འཕགས་པ་བྱམས་པའི་སྒྲུབ་ཐབས།
སྒྱུ་དྲྭ་ལས་གསུངས་པ་འཕགས་པ་བྱམས་པའི་སྒྲུབ་ཐབས་ནི། པད་ཟླ་ལ་མཻཾ་ལས་རང་ཉིད་མགོན་པོ་བྱམས་པ་གསེར་གྱི་མདོག་ཅན། ཞལ་གསུམ་ཆར་སེར་བའམ། སེར་དཀར་སྔོ་བའི་ཞལ་གསུམ་གང་རིགས་བྱ། ཕྱག་དང་པོ་གཉིས་ཆོས་འཆད། གཡས་འོག་མ་མཆོག་སྦྱིན། གཡོན་འོག་མས་ཀླུ་ཤིང་གི་ཡལ་ག་མེ་ཏོག་དང་བཅས་པ་འཛིན་པ། རྡོ་རྗེའི་སྐྱིལ་ཀྲུང་གིས་བཞུགས་པ། རིགས་བདག་ནི་རྣམ་སྣང་ངོ༌། །སྔགས་ནི། ཨོཾ་མཻཾ་མེ་ཏྲྀ་ཡེ་སྭཱཧཱ། བསྟོད་པ་ནི། བྱམས་ཆེན་མེ་ཡི་སོགས་སོ།། །།
རྡོ་རྗེ་གུར་ལས་འབྱུང་བ་ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས།
རྡོ་རྗེ་གུར་ལས་འབྱུང་བ་ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས་ནི། པད་དཀར་ཟླ་བའི་གདན་ལ། ཨཾ་ལས་རང་ཉིད་ཤེར་ཕྱིན་དཀར་མོ་ཕྱག་གཉིས་ཆོས་འཆད་ཀྱི་ཕྱག་རྒྱ་མཛད་པ། གཞུང་གི་དངོས་བསྟན་ལྟར་ན་ཆོས་འཆད་ཁོ་ནས་གཡས་ན་པདྨ་དམར་པོ་དང༌། གཡོན་ན་པོ་ཏི་བསྣམས་པ་ཡིན་ལ། མན་ངག་ལྟར་ན། ཕྱག་མཐིལ་ལས་
གྱེས་པའི་གཡས་སུ་པད་དཀར་དང༌། གཡོན་དུ་པད་དམར་སྙན་གྱི་ཐད་ཀར་ཁ་ཕྱེ་བའི་སྟེང་ན་ཤེར་ཕྱིན་གྱི་པོ་ཏི་རེ་དང་བཅས་པ་རྡོ་རྗེའི་སྐྱིལ་ཀྲུང་གིས་བཞུགས་པ། རིགས་བདག་ནི་མི་སྐྱོད་པའོ། །སྔགས་ནི། ཨོཾ་པི་ཙུ་པི་ཙུ་པྲཛྙཱ་ཝརྡྷ་ནི། ཛྭ་ལ་ཛྭ་ལ་མེ་དྷ་ཝརྡྷ་ནི། དྷི་རི་དྷི་རི་བུདྡྷི་ཝརྡྷ་ནི་སྭཱཧཱ། བསྟོད་པ་ནི། སྨྲ་བསམ་བརྗོད་མེད་སོགས་ཏེ། ཤེར་ཕྱིན་གྱི་སྒྲུབ་ཐབས་འོག་མ་རྣམས་ལའང་རིགས་འགྲེའོ།། །།
གདན་བཞིའི་རྒྱུད་ལས་འབྱུང་བའི་ཤེར་ཕྱིན་དཀར་མོའི་སྒྲུབ་ཐབས།
གདན་བཞིའི་རྒྱུད་ལས་འབྱུང་བའི་ཤེར་ཕྱིན་དཀར་མོའི་སྒྲུབ་ཐབས་སློབ་དཔོན་དགེ་འདུན་བྱིན་གྱིས་བུས་མཛད་པའི་ལུགས་ནི། པད་ཟླ་ལ་པྲཾ་ལས་ཤེར་ཕྱིན་དཀར་མོ་སྔ་མའི་མན་ངག་དང་མཚུངས་པ་བསྐྱེད་དེ། སྔགས་ནི། ཨོཾ་པྲཾ་སྭཱཧཱ། ཞེས་པའོ།། །།
ཤེར་ཕྱིན་སེར་མོའི་སྒྲུབ་ཐབས།
ཤེར་ཕྱིན་སེར་མོའི་སྒྲུབ་ཐབས་ནི། པད་ཟླ་ལ་དྷཱིཿལས་རང་ཉིད་བཅོམ་ལྡན་འདས་མ་ཤེས་རབ་ཀྱི་ཕ་རོལ་དུ་ཕྱིན་པ་སེར་མོ་ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱ་མཛད་པ། གཡོན་གྱི་མཐིལ་ནས་གྱེས་པའི་པད་མ་སྔོན་པོའི་སྡོང་བུ་པོ་ཏིས་མཚན་པ་འཛིན་པ། ཞབས་རྡོ་རྗེའི་སྐྱིལ་ཀྲུང་ངོ༌། །དབུ་རྒྱན་ནི་རྣམ་སྣང་ངོ༌། སྔགས་ནི། ཨོཾ་པྲཛྙོ་མཧཱ་པྲཛྙོ་ཤྲུ་ཏྲི་སྨྲྀ་ཏི་བི་ཛ་ཡ་དྷཱིཿསྭཱཧཱ། ཡང་ཤེར་ཕྱིན་སེར་མོའི་སྒྲུབ་ཐབས་ནི། བཤད་མ་ཐག་པ་དང་འདྲ་བ་ལས། པད་མའི་ཚབ་ཏུ་ཨུཏྤལ་སྔོན་པོ་འཛིན་པ་དང༌། སྔགས་ནི། ཨོཾ་ཨཱཿདྷཱིཿཧཱུཾ་སྭཱཧཱ། ཞེས་བཟླ་བ་ནི་ཁྱད་པར་རོ། །འོག་གི་གསེར་མདོག་ཅན་གྱི་ཤེར་ཕྱིན་མའི་སྒྲུབ་ཐབས་ནི། ཕྱག་ན་པདྨ་འཛིན་པ་ཡིན། གཞན་དེ་ཁོ་ན་དང་འདྲ་སྟེ། འདི་ལ་པདྨ་དང་ཨུཏྤལ་འདམ་ཁ་ཡིན། གཞན་ཁྱད་མེད་པས། སྒྲུབ་ཐབས་འདི་གཉིས་ལ་རྗེས་གནང་གཅིག་གིས་ཆོག་པར་བཞེད་དོ།། །།
མདོར་བསྡུས་པའི་ཤེར་ཕྱིན་སོར་མོའི་སྒྲུབ་ཐབས།
མདོར་བསྡུས་པའི་ཤེར་ཕྱིན་སོར་མོའི་སྒྲུབ་ཐབས་ནི། གཞན་ཐམས་ཅད་དེ་དང་འདྲ་བ་ལས། གདན་པདྨ་དམར་པོ་དེས་གཟུངས་ཅན་དང༌། སྔགས་ནི། ཨོཾ་དྷཱིཿཤྲུ་ཏྲི་སྨྲྀ་ཏི་བི་ཛ་ཡེ་སྭཱཧཱ། སྒྲུབ་ཐབས་བརྒྱ་རྩའི་གླེགས་བམ་འདིར་ཁྲོ་རྒྱལ་མི་གཡོ་བ་སྔོན་པོའི་སྒྲུབ་ཐབས་མཛད་བྱང་མེད་པ་ཞིག་ལ་དཔེ་ཚན་གཅིག་དང༌། མངོན་རྟོགས་མེད་པའི་ལས་ཚོགས་རྐྱང་པ་ལ་འོད་ཟེར་འབྱུང་གནས་གྲགས་པའི་མཛད་བྱང་འབྱར་བ་ཞིག་དང༌། སྒྲུབ་ཐབས་གཞོན་ནུ་སྦས་པས་མཛད་པ་སྟེ། ཆོས་ཚན་གསུམ་ཡོད་ཅིང༌། ཐོག་མ་དེ་ལ་ཛེ་ཏཱ་རིས་མཛད་ཟེར་བ་མཆན་བུ་རྙིང་པ་ན་སྣང༌། འོན་ཀྱང་སྒྲུབ་ཐབས་རྒྱ་མཚོ་ན་ཆོས་ཚན་སྔ་མའི་གཞུག་གི་དགེ་བ་བྱང་ཆུབ་ཏུ་བསྔོ་བ་དེ་མེད་པར། ཐོག་མ་དང་བར་པའི་དཔེ་ཚན་གཉིས་པོ་སྦྲེལ་ནས། འོད་ཟེར་འབྱུང་གནས་གྲགས་པས་མཛད་པར་བཤད་པ་ལྟར་ལེགས་པར་མངོན་ནོ། །འོན་ཀྱང་གཞུང་འདིར་ད་ལྟ་འབྱུང་བ་ལྟར་ན། ཆོས་ཚན་བར་པ་ནི་ལས་ཚོགས་ཁོ་ན་སྟོན་བྱེད་ཡིན་པས་རྗེས་གནང་མེད་ལ། ཐོག་མཐའ་གཉིས་ལ་རྗེས་གནང་གཅིག་གིས་ཆོག་གོ །དེ་ཡང་པད་ཉི་ལ་ཧཱུཾ་ལས་རང་ཉིད་ཁྲོ་རྒྱལ་མི་གཡོ་བ་སྐུ་མདོག་ཟར་མའི་མེ་ཏོག་ལྟར་སྔོ་བ། རོལ་པའི་ཁྲོ་བོ་ཞེས་བྱ་བ་ཞི་མ་ཁྲོའི་ཆ་བྱད་ཅན། སྐུ་ལུས་འཁྲང་ཞིང་གྲིམས་པ། སྤྱན་གཉིས་གཡས་པ་གྱེན་དང་གཡོན་པ་ཐུར་ལ་གཟིགས་པ། སྐྲ་སེར་གྱེན་དུ་བརྫེས་ཤིང༌། སྨ་ར་ཨག་ཚོམ་སྤངས་པ། ཡ་སོས་མ་མཆུ་མནན་ཞིང༌། ཕྱག་གཡས་རལ་གྲི་འཕྱར་བ། གཡོན་ཞགས་པ་དང་བཅས་པའི་སྡིགས་མཛུབ་སྙིང་གར་གཏོད་པ།
ཞབས་གཡས་ཀྱི་མཐིལ་དང༌། གཡོན་གྱི་པུས་མོ་ཉི་མའི་དཀྱིལ་འཁོར་ལ་བརྟད་དེ་ཕྱེད་ཙམ་བཞེངས་པ། དེར་དམར་པོའི་འདོམ་དཀྲིས་དང༌། སྦྲུལ་གྱི་དོ་ཤལ་དང༌། རིན་པོ་ཆེའི་རྒྱན་རྣམས་ཀྱིས་བརྒྱན་པའོ། །རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཙཎྜ་མཧཱ་རོ་ཥ་ཎ་ཧཱུཾ་ཕཊ། བསྟོད་པ་ནི། གང་གི་རང་བཞིན་ཁྲོ་དང་རྣམ་བྲལ་ཡང༌། །ཞེ་སྡང་ཅན་ལ་ཁྲོ་བའི་རྣམ་པ་དང༌། །མཐུན་པར་བསྟན་པས་ཁྲོ་སོགས་ཞི་མཛད་པའི། །བྱང་ཆུབ་འདི་བརྙེས་མཛད་ལ་ཕྱག་འཚལ་ལོ། །བསྟོད་པ་འདི་ནི་ཁྲོ་བོའི་སྒྲུབ་ཐབས་སྒོས་ཀྱི་བསྟོད་པ་མེད་པ་ཀུན་ལའང་སྦྱར་བར་བྱའོ།། །།
རི་ཁྲོད་མ་ལོ་མ་གྱོན་མའི་སྒྲུབ་ཐབས།
རི་ཁྲོད་མ་ལོ་མ་གྱོན་མའི་སྒྲུབ་ཐབས་ནི། པད་ཟླ་ལ་བཾ་ཡིག་ལས་འཕགས་མ་རི་ཁྲོད་མ་ལོ་མ་གྱོན་མ་སེར་མོ། ཞལ་གསུམ་ཕྱག་དྲུག་རྩ་ཞལ་སེར། གཡས་དཀར། གཡོན་དམར་བ། དྲག་ཅིང་མཆེ་བ་གཙིགས་པ། སྤྱན་གསུམ་གསུམ་དང་ལྡན་པ། ཕྱག་གཡས་གསུམ་རྡོ་རྗེ། དགྲ་སྟ། མདའ། གཡོན་གསུམ་རྡོ་རྗེ་ཞགས་པ་དང་བཅས་པའི་སྡིགས་མཛུབ་དང༌། ཤིང་ལོའི་སྦྲང་ཡབ་དང༌། གཞུ་འཛིན་པ། སྐྲ་སེར་གྱེན་བརྫཻས་ཤིང་ལོའི་ན་བཟའ་དང༌། རིན་པོ་ཆེའི་རྒྱན་ཅན། བགེགས་རྣམས་བསྒྱེལ་བའི་གདན་ལ་གཡོན་བརྐྱང་གིས་བཞུགས་པ། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་པི་ཤཱ་ཙཱི་པརྞ་ཤཱ་བཱ་རཱི་སརྦ་མ་རི་པྲ་ཤ་མ་ནཱ་ཡ་སྭཱཧཱ། བསྟོད་པ་ནི། རྒྱལ་བ་ཀུན་གྱི་ཡེ་ཤེས་སོགས་པར་འདིར་རི་ཁྲོད་མའི་གཟུངས་རིང་ལ་ཆོས་ཚན་གཅིག་ཡོད་ཀྱང༌། རྗེས་གནང་ལོགས་པ་མི་དགོས་སོ། །
གཤིན་རྗེ་གཤེད་ནག་པོའི་རྒྱུད་ལས་གསུངས་པའི་རྡོ་རྗེ་དབྱངས་ཅན་མའི་སྒྲུབ་ཐབས།
གཤིན་རྗེ་གཤེད་ནག་པོའི་རྒྱུད་ལས་གསུངས་པའི་རྡོ་རྗེ་དབྱངས་ཅན་མའི་སྒྲུབ་ཐབས་ནི། པད་ཟླའི་སྟེང་དུ། ས་བོན་དོ་ཡིག་ལ་རང་ཉིད་རྡོ་རྗེ་དབྱངས་ཅན་མ། དམར་ནག་དཀར་བའི་ཞལ་གསུམ་ཕྱག་དྲུག་གི མདུན་མ་གཉིས་གྲི་གུག ཐོད་ཁྲག་ཐུགས་ཀར་འཁྱུད་རྒྱ་མཛད་པ། ལྷག་མ་གཡས་གཉིས་པད་མ་དང་རལ་གྲི། གཡོན་གཉིས་རིན་པོ་ཆེ་དང་འཁོར་ལོ་འཛིན་པ། གཡོན་བརྐྱང་གི་སྟབས་ཀྱིས་བཞུགས་ཤིང༌། སྤྱན་གསུམ་པ་ཡིད་ཙམ་ཁྲོ་བ་ལས། གཞན་ལྷ་མོ་ཞི་བའི་མཚན་ཉིད་རྫོགས་པ། རིགས་བདག་ནི་འོད་དཔག་མེད་དོ། །སྔགས་ནི། ཨོཾ་པི་ཙུ་པི་ཙུ་སོགས་ཤེར་ཕྱིན་དཀར་མོའི་སྐབས་དང་འདྲ། སྒྲུབ་ཐབས་འདི་སློབ་དཔོན་དཔལ་འཛིན་གྱིས་མཛད་པའོ།། །།
ཁྲོ་རྒྱལ་རྡོ་རྗེ་ཧཱུཾ་མཛད་ཀྱི་སྒྲུབ་ཐབས།
ཁྲོ་རྒྱལ་རྡོ་རྗེ་ཧཱུཾ་མཛད་ཀྱི་སྒྲུབ་ཐབས་ནི། པད་ཉིའི་སྟེང་དུ་ཧཱུཾ་ལས་རང་ཉིད་ཧཱུཾ་མཛད་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་རང་གི་ཕྱག་རྒྱས་འཛིན་པ། གད་རྒྱངས་ཆེན་པོ་བརྒྱད་ཀྱིས་བཞད་པ། ཞབས་གཡོན་བརྐྱང་བས་དྲག་པོ་དབང་ཕྱུག་ཆེན་པོ་མནན་པ། ཁྲོ་བོའི་ཆ་བྱད་རྫོགས་པའོ། །རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཧཱུཾ་ཧཱུཾ་ཧཱུཾ་ཕཊ་སྭཱཧཱ།། །།
ཁྲོ་བོ་བགེགས་མཐར་བྱེད་ཀྱི་སྒྲུབ་ཐབས།
ཁྲོ་བོ་བགེགས་མཐར་བྱེད་ཀྱི་སྒྲུབ་ཐབས་ནི། པད་ཉི་ལ་ཧཱུཾ་ལས་རང་ཉིད་ཁྲོ་རྒྱལ་བགེགས་དགྲ་སྔོ་སངས། ཕྱག་གཡས་རྡོ་རྗེ་འཕྱར་ཞིང་གཡོན་ཞགས་པ་དང་བཅས་པའི་སྡིགས་མཛུབ་མཛད་པ། གཡོན་བརྐྱང་གི་སྟབས་ཀྱིས་བཞུགས་པའོ། །རིགས་བདག་ནི་མི་བསྐྱོད་པ། སྔགས་ནི། ཨོཾ་ཨཱཿབིགྷྣཱན་ཏ་ཀྲིཏ་ཧཱུཾ་ཧཱུཾ་ཕཊ། རལ་གཅིག་མའི་སྒྲུབ་ཐབས་ནི། པད་ཉིའི་སྟེང་དུ་ཊཱཾ་ལས་ཐོད་པའི་ནང་དུ་མི་རོའི་གདན་ལ།
ཧཱུཾ་ལས་རང་ཉིད་བཅོམ་ལྡན་འདས་མ་རལ་གཅིག་མ་སྔོ་ནག་ཆེར་ཁྲོས་པ། ཕྱག་བཞིའི་དང་པོ་གཉིས་གྲི་གུག་དང་ཐོད་ཁྲག །འོག་མ་གཉིས་རལ་གྲི་དང་ཨུཏྤལ་འཛིན་པ། ནུ་འབུར་སྟེང་དུ་ལངས་པ། གཡོན་བརྐྱང་གི་སྟབས་ཀྱིས་བཞུགས་ཤིང༌། ཁྲོ་མོའི་ཆ་བྱད་རྫོགས་པའི་སྟེང་དུ། གཡེར་ཁ་དང་མེ་ཏོག་གི་འཕྲེང་བས་བརྒྱན་པ། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཧྲཱིཾ་ཧྲཱིཾ་ཧཱུཾ་ཕཊ། འོག་ནས་གསུངས་པའི་རྒྱ་ནག་རིམ་པའི་སྒྲོལ་མའི་སྒྲུབ་ཐབས་ཀྱང༌། གཞན་ནི་བཤད་མ་ཐག་པ་དེ་ཁོ་ན་བཞིན་ཡིན་ལ། ཁ་ཅིག་སྔགས་ལ། ཨོཾ་མེད་པས་རྗེས་གནང་ཐ་དད་དུ་དགོས་ཟེར་བ་དང༌། ལ་ལ་དག་ཨོཾ་ཡོད་མེད་འདམ་ཁ་ཡིན་པས། སྒྲུབ་ཐབས་དེ་གཉིས་ལ་རྗེས་གནང་གཅིག་གིས་ཆོག་པར་འདོད་པའང་ཡོད་པ། ཇི་ལྟར་རིགས་པར་བྱའོ། །བསྟོད་པ་ནི། གང་གི་རང་བཞིན་ཁྲོ་དང་རྣམ་བྲལ་ཡང༌། །ཞེས་པ་དེ་ཉིད་ཀྱིས་ཆོག་སྟེ། ཁྲོ་མོ་གཞན་རྣམས་ལ་ཡང་འདྲའོ།། །།
འཕགས་མ་དུག་སེལ་མའི་སྒྲུབ་ཐབས།
འཕགས་མ་དུག་སེལ་མའི་སྒྲུབ་ཐབས་ནི། པད་ཉི་ལ་ཛཱཾ་ལས་རང་ཉིད་དུག་སེལ་མ་སེར་མོ། ཞལ་གསུམ་ཀར་སེར་ཞིང་སྤྱན་གསུམ་གསུམ་མངའ་བ། སྦྲུལ་མགོའི་གདེངས་ཀ་བདུན་དང་ལྡན་པ། ཁྲོ་ཞིང་བཞད་པ། ཕྱག་གཡས་གསུམ་ན་རྡོ་རྗེ། རལ་གྲི། མདའ། གཡོན་གསུམ་ན་ཞགས་པ་དང་བཅས་པའི་སྡིགས་མཛུབ། མེ་ཏོག་དང་བཅས་པའི་དུག་གི་ཡལ་ག་དང་གཞུ་འཛིན་པ། དུག་གི་མེ་ཏོག་གིས་བརྒྱན་པའི་སྐེ་རགས་ཅན། དར་གྱི་ན་བཟའ་དང་སྦྲུལ་གྱིས་བརྒྱན་པ། གཡོན་བརྐྱང་གི་སྟབས་ཀྱིས་བཞུགས་པ། རིགས་བདག་ནི་མི་
བསྐྱོད་པའོ། །སྔགས་བསྡུས་པ་ནི། ཨོཾ་ཛཱཾ་སྭཱཧཱ། སྔགས་རིང་དག་པོ་བྱུང་ན་ཆེས་བཟང་ཡང༌། འདིའི་སྔགས་དག་པོ་དཀོན་པར་སྣང་ངོ༌། །དེའི་རྗེས་སུ་དུག་སེལ་མའི་གཟུངས་མདོ་ཆུང་བ་ལ་ཆོས་ཚན་གཅིག་ཡོད་དེ། རྗེས་གནང་ལོགས་པ་མི་དགོས་སོ།། །།
རྟོག་པ་ལས་གསུངས་པའི་ཀུ་རུ་ཀུལླེ་རིགས་གཅིག་གི་སྒྲུབ་ཐབས།
རྟོག་པ་ལས་གསུངས་པའི་ཀུ་རུ་ཀུལླེ་རིགས་གཅིག་གི་སྒྲུབ་ཐབས་ནི། པད་ཉིའི་སྟེང་དུ་ཏཱཾ་ལས། རང་ཉིད་ཀུ་རུ་ཀུལླེ་སྐུ་མདོག་དཀར་ལ་དམར་བའི་མདངས་ཆགས་པ། ཕྱག་བཞིའི་གཡས་ཀྱི་དང་པོས་མདའ། གཉིས་པ་སྐྱབས་སྦྱིན། གཡོན་གྱི་དང་པོས་གཞུ། གཉིས་པས་ཨུཏྤ་ལའི་སྡོང་བུ་འཛིན་པ། བདུད་དང་བདུད་ཀྱི་ལྷ་མོ་དགའ་མ་གཉིས་འགྱེལ་བའི་སྟེང་དུ་པད་ཉི་ལ་རྡོ་རྗེའི་སྐྱིལ་ཀྲུང་གིས་བཞུགས་པ། ཤ་འགག་དང༌། སྟོད་གཡོགས་དར་དམར་པོ་ཅན། རིགས་བདག་ནི་དོན་ཡོན་གྲུབ་པའོ། །སྔགས་ནི། ཨོཾ་ཀུ་རུ་ཀུལླེ་སྭཱཧཱ། བསྟོད་པ་ནི། ལྷ་མོ་སྒྲོལ་མ་ལས་སྤྲུལ་པ། །དུག་འཇོམས་དབང་འགུགས་ལས་མཛད་ཅིང༌། ཁམས་གསུམ་གཡོ་མཛད་རྣལ་འབྱོར་མ། །རིག་བྱེད་མ་ལ་ཕྱག་འཚལ་བསྟོད། །ཅེས་པ་སྟེ། ཀུ་རུ་ཀུལླེ་འོག་མ་རྣམས་ལའང་རིགས་འགྲེའོ། །སྒྲུབ་ཐབས་འདི་ལ་སྤྱི་མིང་བྱེ་བྲག་ལ་ཐོག་པའི་ཚུལ་གྱིས། སྒྲོལ་མ་ཀུ་རུ་ཀུལླེའི་སྒྲུབ་ཐབས་ཞེས་ཟེར་རོ།། །།
རྟོག་པ་ལས་འབྱུང་བའི་ཀུ་རུ་ཀུལླེའི་སྒྲུབ་ཐབས་ཀླུ་སྒྲུབ་ཀྱིས་མཛད་པའི་ལུགས།
རྟོག་པ་ལས་འབྱུང་བའི་ཀུ་རུ་ཀུལླེའི་སྒྲུབ་ཐབས་ཀླུ་སྒྲུབ་ཀྱིས་མཛད་པའི་ལུགས་ནི། པད་ཟླ་ལ་ཧྲཱིཿལས་རང་ཉིད་ཀུ་རུ་ཀུལླེ་སྐུ་མདོག་དམར་མོ་ཕྱག་གཡས་དང་པོ་སྐྱབས་སྦྱིན། གཡོན་དང་པོ་ཨུཏྤལ་དམར་པོ། ཕྱག་རྒྱབ་མ་གཉིས་ཀྱིས་མེ་ཏོག་གི་མདའ་གཞུ་
རྒྱབ་ཀྱི་ཆ་ནས་འགེངས་པ། ན་བཟའ་དམར་པོ་ཅན། འོད་ཟེར་དམར་པོ་འབར་བ། ཀུ་རུ་ཀུལླེའི་རི་ཕུག་ན་སྒྲ་གཅན་གྱི་མགོ་ལ་གནས་པའི་འདོད་ལྷ་ཆུང་མ་དང་བཅས་པའི་སྟེང་དུ། པད་ཟླ་ལ་སྐྱིལ་ཀྲུང་ངམ། གཡས་བརྐྱང་གི་རོལ་པས་བཞུགས་པའོ། །རིགས་བདག་ནི་སྣང་བ་མཐའ་ཡས་སོ། །སྔགས་ནི། ཨོཾ་ཀུ་རུ་ཀུལླེ་ཧྲཱིཿཧཱུཾ་སྭཱཧཱ།། །།
ཡང་རྟོག་པ་ལས་འབྱུང་བའི་ཀུ་རུ་ཀུལླེའི་སྒྲུབ་ཐབས་གཞན།
ཡང་རྟོག་པ་ལས་འབྱུང་བའི་ཀུ་རུ་ཀུལླེའི་སྒྲུབ་ཐབས་གཞན་ནི། ཕལ་ཆེར་དེ་དང་འདྲ་བ་ལས། ཕྱག་མདུན་མ་གཉིས་ཀྱིས་མདའ་གཞུ། རྒྱབ་མ་གཉིས་གཡས་མཆོག་སྦྱིན་དང༌། གཡོན་ཨུཏྤལ་འཛིན་པ། སྒྲ་གཅན་དང་བདུད་ཕོ་མོའི་གདན་སྤངས་པ། སྔགས་ནི་ཨོཾ་ཀུ་རུ་ཀུལླེ་ཧྲཱིཿསྭཱཧཱ། ཞེས་པའོ། །འདི་དང་གོང་མ་གཉིས་བསྲེས་ནས། གཅིག་ཏུ་བྱེད་པ་མི་ལེགས་སོ། །ཀུ་རུ་ཀུལླེ་གསུམ་པོ་དེ་ནི་ལྷ་མོ་ཞི་བ་ཁོ་ན་ཡིན་ནོ།། །།
ཨོ་ཌི་ཡ་ན་ལས་འབྱུང་བའི་ཀུ་རུ་ཀུལླེའི་སྒྲུབ་ཐབས།
ཨོ་ཌི་ཡ་ན་ལས་འབྱུང་བའི་ཀུ་རུ་ཀུལླེའི་སྒྲུབ་ཐབས་ནི། ཧཱུཾ་ལས་བྱུང་བའི་བསྲུང་འཁོར་གྱི་དབུས་སུ། ཨེ་ལས་ཆོས་འབྱུང་ངོ༌། །དེའི་ནང་དུ་ཧྲཱིཿལས་པདྨ། རཾ་ལས་ཉི་མ་མི་རོའི་གདན་དང་བཅས་པའི་སྟེང་དུ། ཧྲཱིཿལས་རང་ཉིད་ཀུ་རུ་ཀུལླེ་དམར་མོ། རོལ་པའི་ཁྲོ་མོ་ཆེན་མོ། མཆེ་བ་གཙིགས་ཤིང་སྤྱན་གསུམ་དམར་བ། དབུ་སྐྲ་སེར་པོ་གྱེན་དུ་བརྫེས་པ། ཕྱག་དང་པོ་གཉིས་ཀྱིས་ཨུཏྤལ་དམར་པོའི་མདེའུ་ཅན་གྱི་མདའ་དང༌། མེ་ཏོག་དམར་པོའི་གཞུ་འགེངས་པ། གཡས་འོག་མས་མེ་ཏོག་དམར་པོའི་ལྕགས་ཀྱུ་དང༌། གཡོན་འོག་མས་ཨུཏྤལ་དམར་པོའི་སྡོང་བུ་ཞགས་པའི་ཚུལ་དུ་འཛིན་པ། སྟག་གི་པགས་པའི་སྨད་དཀྲིས་དང༌། རུས་པའི་ཕྱག་
རྒྱ་ལྔ་དང༌། ཐོད་སྐམ་གྱི་དབུ་བརྒྱན། ཐོད་རློན་གྱི་དོ་ཤལ་དང་བཅས་པ། གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་མི་རོའི་སྙིང་གར་མནན་པ། མེ་དཔུང་འབར་བའི་དབུས་ན་བཞུགས་པའོ། །དབུ་བརྒྱན་ནི་སྣང་མཐའ། སྔགས་ནི། ཨོཾ་ཀུ་རུ་ཀུལླེ་ཧྲཱིཿསྭཱཧཱ། ཞེས་པ་ཉིད་དོ། །འོག་ནས་འབྱུང་བའི་ཀུ་རུ་ཀུལླེ་ཐོད་པ་ཅན་གྱི་སྒྲུབ་ཐབས་ཀྱང༌། སྐབས་འདིར་བླངས་ན་ལེགས་ཏེ། དེ་ལྟར་ན་ཀུ་རུ་ཀུལླེའི་སྒྲུབ་ཐབས་ལྔའོ། །སྒྲུབ་ཐབས་བརྒྱ་རྩའི་དཔེ་འགའ་ཞིག་ལས། རྟོག་པ་ནས་འབྱུང་བ་ཀུ་རུ་ཀུལླེ་ཕྱི་མ་དེ་དང་དོན་འདྲ་བ་ལ། སྔགས་ཆེ་གེ་མོ་ཝ་ཤ་མ་ནཱ་ཡ་ཞེས་སྤེལ་ཚིག་བཅུག་པའི་སྒྲུབ་ཐབས་ཤིན་ཏུ་བསྡུས་པ་ཞིག་ཀྱང་སྣང་སྟེ། དེང་སང་དེ་ལ་རྗེས་གནང་གི་ལག་ལེན་མེད་དོ།། །།
ཁམས་གསུམ་དབང་དུ་སྡུད་པར་བྱེད་པའི་སྤྱན་རས་གཟིགས་ཀྱི་སྒྲུབ་ཐབས།
ཁམས་གསུམ་དབང་དུ་སྡུད་པར་བྱེད་པའི་སྤྱན་རས་གཟིགས་ཀྱི་སྒྲུབ་ཐབས་ནི། པད་ཉིའི་སྟེང་དུ་ཧྲཱིཿལས་རང་ཉིད་འཕགས་པ་སྤྱན་རས་གཟིགས་སྐུ་མདོག་དམར་པོ། ཡིད་ཙམ་ཁྲོ་ཞིང་ཆགས་པའི་ཉམས་ཅན། སྤྱན་གསུམ་གདངས་པ། རལ་པའི་ཅོད་པན་འཕྱང་བ། གཡས་ལྕགས་ཀྱུ་དང༌། གཡོན་རྡོ་རྗེའི་ཞགས་པ་འཛིན་པ། སྲིད་པ་གསུམ་གྱི་རང་བཞིན་ལུགས་གཉིས་ཞགས་པས་བཅིངས་པའི་སྟེང་དུ། པད་ཉི་ལ་རྡོ་རྗེ་སྐྱིལ་ཀྲུང་གིས་བཞུགས་པ། རིན་པོ་ཆེ་དང་རུས་པའི་རྒྱན་གྱིས་སྤྲས་པ། གཅེར་བུའམ་སྟག་ལྤགས་ཅན་ནམ། དར་གྱི་སྨད་དཀྲིས་ཅན་ཇི་ལྟར་མོས་པར་བསྒོམ། རྡོ་རྗེ་རྣལ་འབྱོར་མ་རྣམས་ཀྱིས་དབང་བསྐུར་བ་སྦྱིན་པ། བྱང་ཆུབ་སེམས་དཔའ་རྒྱན་སྣ་ཚོགས་དང་ལྡན་པ་རྣམས་ཀྱིས་མཆོད་པར་བྱེད་པ།
རིག་པ་འཛིན་པ་དང༌། ཁྱབ་འཇུག་དང༌། བདེ་བྱེད་དང༌། ཚངས་པ་ལ་སོགས་པས་གར་དང་རོལ་མོ་སྣ་ཚོགས་བྱེད་ཅིང༌། མགོ་འཕྲེང་དང་རུས་པས་བརྒྱན་པའི་འབྱུང་པོ་སྣ་ཚོགས་རྣམས་ཀྱིས་གདུགས་དང་རྔ་ཡབ་ལ་སོགས་པས་བཀུར་བསྟི་བྱེད་པའི་སྐུ་ཅན་ནོ། །རིགས་བདག་ནི་འོད་དཔག་མེད། སྔགས་ནི། ཧཱུཾ་ཧྲཱིཿཨ།། །།
གང་བ་བཟང་པོའི་རྒྱུད་ལས་འབྱུང་བ་ཛམྦྷ་ལའི་སྒྲུབ་ཐབས་རྒྱས་པ།
གང་བ་བཟང་པོའི་རྒྱུད་ལས་འབྱུང་བ་ཛམྦྷ་ལའི་སྒྲུབ་ཐབས་རྒྱས་པ་ནི། ཟླ་བའི་སྟེང་དུ་གནོད་སྦྱིན་གྱི་གནས་ས་ག་ཊ་ཞེས་བྱ་བ། དཀྱིལ་འཁོར་དམར་པོ་གྲུ་གསུམ་གྱི་དབུས་སུ། པདྨ་འདབ་བརྒྱད། ཕྱི་རོལ་གཞལ་མེད་ཁང་གྲུ་བཞི་སྒོ་བཞི་དང་བཅས་པའོ། །དབུས་སུ་པདྨའི་ལྟེ་བར་བཾ་ལས་ནོར་རྒྱུན་མ་སེར་མོ། གཡས་མཆོག་སྦྱིན་དང༌། གཡོན་འབྲས་ཀྱི་སྙེ་མ་འཛིན་པ། རྒྱན་ཐམས་ཅད་ཀྱིས་བརྒྱན་པ། རོལ་བས་བཞུགས་པ། དེའི་གསང་བར་ཛཾ་ལས་འཕགས་པ་ཛམྦྷ་ལ་སྐུ་མདོག་སེར་པོ། བི་ཛ་པུ་ར་དང༌། གཏེར་གྱི་ནེའུ་ལེ་འཛིན་པ། དུང་དང་པདྨ་ལ་སོགས་པའི་གཏེར་ལ་ཞབས་བརྟེན་པས་འཁྱུད་པ། འདབ་མ་རྣམས་ལ་ཤར་ནས་གཡས་སྐོར་གྱིས་སྦས་མ། རབ་སྦས་མ། བཟང་མོ། རབ་བཟང་མོ། མེ་ནས་གཡས་སྐོར་གྱིས། ལྷ་མོ་དང༌། དབྱངས་ཅན་མ། འཕགས་མ་དང༌། ཟླ་ཤེལ་མ་རྣམས་ནོར་རྒྱུན་མ་དང་མཚུངས་པ། དེ་རྣམས་ལ་འཁྱུད་པའི་གནོད་སྦྱིན་བརྒྱད་ནི། གང་བཟང་སྔོན་པོ། རྣམ་ཐོས་སེར་པོ། ནོར་སྦྱིན་དམར་པོ། ནོར་བཟང་ལྗང་སེར། པི་ཙི་ཀུཎྜ་ལི་དམར་པོ། ཀི་ལི་མ་ལི་
སྔོན་པོ། ཙ་རེནྟྲ་དང་མུ་ཁེནྡྲ་ལེནྟྲ་སེར་པོ། དེ་རྣམས་རྣམ་པ་ལ་ཛམྦྷ་ལ་དང་འདྲའོ། །ཤར་སྒོར་ནོར་སྦྱིན་དང་ནོར་སྦྱིན་ཆེན་པོ། ལྷོ་སྒོར་པདྨ་དང༌། པདྨ་ཆེན་པོ། ནུབ་སྒོར་ཀི་ལི་དང༌། ཀི་ལི་ཆེན་པོ། བྱང་སྒོར་གང་བ་དང༌། གང་བ་བཟང་པོ་སྟེ། དེ་རྣམས་མདོག་སེར་སྐྱ། ཕྱག་གཡོན་ནེའུ་ལེ་འཛིན་པ། གཡས་པས་ནོར་བུའི་ཆར་འབེབས་པ། སྐུ་མདོག་སེར་སྐྱ། གཅེར་བུ་དབང་པོ་འཕྱང་བའོ། །རིགས་བདག་ནི་རིན་ཆེན་འབྱུང་ལྡན་ནོ། །སྔགས་ནི། ཨོཾ་བླུཾ་ས། བསྟོད་པ་ནི། གོང་གི་ཛམྦྷ་ལ་དང་ནོར་རྒྱུན་མའི་བསྟོད་པས་བྱའོ།། །།
རྡོ་རྗེ་གུར་ལས་འབྱུང་བ་དཔལ་རྡོ་རྗེ་སྒྲོལ་མའི་སྒྲུབ་ཐབས།
རྡོ་རྗེ་གུར་ལས་འབྱུང་བ་དཔལ་རྡོ་རྗེ་སྒྲོལ་མའི་སྒྲུབ་ཐབས་ནི། སྟོང་པའི་ངང་ལས་བསྲུང་འཁོར་གཞལ་ཡས་ཁང་དང་བཅས་པའི་དབུས་སུ། པདྨ་འདབ་བརྒྱད་ཀྱི་ལྟེ་བར་ཟླ་བ་ལ་ཏཱཾ་ལས། རང་ཉིད་རྡོ་རྗེ་སྒྲོལ་མ་གསེར་གྱི་མདོག་ཅན། རྩ་ཞལ་སེར། གཡས་ནགརྒྱབ་དཀར། གཡོན་དམར་བ་ཞི་བའི་སྤྱན་གསུམ་གསུམ་དང་ལྡན་པ་ཞབས་རྡོ་རྗེའི་སྐྱིལ་ཀྲུང་ཅན། འོད་ཟེར་དམར་པོ་འབར་བ། ཕྱག་གཡས་བཞི་ན་རྡོ་རྗེ། མདའ། དུང་དཀར། མཆོག་སྦྱིན། གཡོན་བཞི་ན་ཨུཏྤལ། གཞུ། ལྕགས་ཀྱུ། ཞགས་པ་འཛིན་པ། འདབ་མ་བརྒྱད་ལ། ཤར་དུ་མེ་ཏོག་སྒྲོལ་མ་དཀར་མོ་མེ་ཏོག་གི་འཕྲེང་བ་འཛིན་པ། ལྷོར་བདུག་སྤོས་སྒྲོལ་མ་ནག་མོ་སྤོས་ཕོར་འཛིན་པ། ནུབ་ཏུ་མར་མེ་སྒྲོལ་མ་སེར་མོ་མར་མེའི་ཀོང་བུ་འཛིན་པ། བྱང་དུ་དྲིའི་སྒྲོལ་མ་དམར་མོ་དྲི་བཟང་གི་དུང་ཆོས་འཛིན་པ། དེ་རྣམས་སྐྱིལ་ཀྲུང་
གིས་བཞུགས་པ་ཤིན་དུ་ཞི་བའོ། །ཤར་སྒོར་ལྕགས་ཀྱུ་མ་དཀར་མོ། ལྷོ་སྒོར་ཞགས་པ་མ་ནག་མོ། ནུབ་སྒོར་ལྕགས་སྒྲོག་མ་སེར་མོ། བྱང་སྒོར་དྲིལ་བུ་མ་དམར་མོ་རྣམས་མིང་དང་མཐུན་པའི་ཕྱག་མཚན་ཅན། སྟེང་དུ་རྣམ་རྒྱལ་མ་སེར་མོ་འཁོར་ལོ། འོག་ཏུ་གནོད་མཛེས་མ་སྔོན་མོ་སྦྲུལ་ཞགས་ཏེ། དྲུག་པོ་དེ་རྣམས་ཡིད་ཙམ་ཁྲོ་བ། གཡོན་སྡིགས་མཛུབ། གཡོན་བརྐྱང་གིས་བཞུགས་པ། སྟག་ལྤགས་དང་སྦྲུལ་རྒྱན་ཅན་ནོ། །མཚམས་བཞིར་བུམ་པ། རི་རབ་མེ་ཐབ། རྒྱལ་མཚན་རྣམས་སོ། །རིགས་བདག་ནི་མི་བསྐྱོད་པ་གཙོ་བོར་གྱུར་པའི་རིགས་ལྔའོ། །སྔགས་ནི་ཡི་གེ་བཅུ་པ་ཉིད་དམ། འགྲུབ་ན་རྩ་སྔགས་ཀྱང་བཟླའོ།། །།
གཤིན་རྗེ་གཤེད་དམར་པོའི་སྒྲུབ་ཐབས།
གཤིན་རྗེ་གཤེད་དམར་པོའི་སྒྲུབ་ཐབས་ནི། ཨཾ་ལས་བྱུང་བའི་ཉི་མའི་སྟེང་དུ། ཧཱུཾ་ལས་རང་ཉིད་བཅོམ་ལྡན་འདས་གཤིན་རྗེ་གཤེད་དམར་པོ། ཕྱག་གཡས་པས་མི་མགོ་རློན་པ་སེར་པོས་མཚན་པའི་དབྱུག་པ་དཀར་པོ་རྡོ་རྗེའི་རྩེ་མོ་ཅན་འཕྱར་ཞིང༌། གཡོན་པས་བདུད་བཞིའི་ཁྲག་གིས་གང་བའི་ཐོད་པ་ཐུགས་ཀར་འཛིན་པས་ཡུམ་ལ་འཁྱུད་པ། དབུ་སྐྲ་སེར་པོ་གྱེན་དུ་བརྫཻས་ཤིང༌། ཞལ་གདངས་མཆེ་གཙིགས་ལྗགས་འགྲིལ་བ། དམར་ལ་ཟླུམ་པའི་སྤྱན་གསུམ་ལྡང་མིག་བགྲད་པ། པད་ཉི་མ་ཧེ་གཤིན་རྗེའི་གདན་ལ། གཡོན་བརྐྱང་གི་སྟབས་ཀྱིས་བཞུགས་ཤིང༌། རང་སྣང་གི་ཡུམ་གྲི་ཐོད་འཛིན་པས་འཁྱུད་པ། ཁྲོ་བོ་ཆེན་པོ་སྤྱིའི་མཚན་ཉིད་རྫོགས་པའོ། །རིགས་བདག་ནི་རྡོ་རྗེ་སེམས་དཔའ། །
སྔགས་ནི་ཡི་གེ་བཅུ་པ། ཨོཾ་ཡ་མཱནྟ་ཀ་ཧཱུཾ། བསྟོད་པ་ནི། སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཀུན་གྱི་གཅིག་བསྡུས་པ། །སངས་རྒྱས་ཀུན་རབ་མཆོག་གི་མཆོག།དཀྱིལ་འཁོར་གཙོ་ལ་ཕྱག་འཚལ་བསྟོད། །གཞུང་འདི་ཉིད་རང་ལུས་ཡུམ་གྱི་ཕྱག་མཚན་དང་གཤིན་རྗེའི་གདན་མི་གསལ་ཡང་དོན་ལ་དགོས་སོ།། །།
སོ་སོར་འབྲང་མའི་སྒྲུབ་ཐབས།
སོ་སོར་འབྲང་མའི་སྒྲུབ་ཐབས་ནི། པད་ཟླ་ལ་པྲཾ་ལས་སོ་སོར་འབྲང་མ་ཞལ་བཞི་ཕྱག་བརྒྱད་པ། གསེར་གྱི་མདོག་ཅན། སེར་དཀར་སྔོ་དམར་བའི་ཞལ་བཞི། ཞི་བའི་སྤྱན་གསུམ་གསུམ་དང་ལྡན་པ། གཡས་བཞི་ན་རལ་གྲི། འཁོར་ལོ། རྩེ་གསུམ། མདའ། གཡོན་བཞི་ན་རྡོ་རྗེ། ཞགས་པ། དགྲ་སྟ། གཞུ། ཞབས་གཡོན་བརྐྱང་བས་རོལ་པས་བཞུགས་པ། དབུ་བརྒྱན་ནི་རྡོ་རྗེ་སེམས་དཔའོ། །སྔགས་ནི། ཨོཾ་མ་ཎི་དྷ་རི་བཛྲཱི་ཎི་མཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱཧཱ།། །།
རྨ་བྱ་ཆེན་མོའི་སྒྲུབ་ཐབས།
རྨ་བྱ་ཆེན་མོའི་སྒྲུབ་ཐབས་ནི། པད་ཟླའི་གདན་ལ་མཾ་ལས་རྨ་བྱ་ཆེན་མོ་སྐུ་མདོག་ལྗང་ཁུ། ལྗང་ནག་དཀར་བའི་ཞལ་གསུམ། ཕྱག་གཡས་པ་རྣམས་ཀྱིས་རྨ་བྱའི་མཇུག་སྒྲཽ། མདའ། མཆོད་སྦྱིན། གཡོན་པ་རྣམས་ཀྱིས་རྔ་ཡབ། གཞུ། མཉམ་བཞག་གི་སྟེང་དུ་བུམ་པ་འཛིན་ཞིང༌། སྐྱིལ་ཀྲུང་ཕྱེད་པས་བཞུགས་པ་་པད་ཟླའི་རྒྱབ་ཡོལ་ཅན། དབུ་རྒྱན་ནི་དོན་ཡོད་གྲུབ་པའོ། །སྔགས་ནི། ཨོཾ་མཧཱ་མཱ་ཡུ་རི་བིདྱ་རཱ་ཛྙཱི་ཧཱུཾ་ཧཱུཾ་ཕཊ་ཕཊ་སྭཱཧཱ།། །།
སྟོང་ཆེན་མོ་རབ་ཏུ་འཇོམས་པའི་སྒྲུབ་ཐབས།
སྟོང་ཆེན་མོ་རབ་ཏུ་འཇོམས་པའི་སྒྲུབ་ཐབས་ནི། པད་ཟླ་ལ་བྷྲཱུཾ་ལས། སྟོང་ཆེན་རབ་འཇོམས་དཀར་མོ་ཞལ་གཅིག་སྤྱན་གསུམ་མ། ཕྱག་དྲུག་གི་གཡས་ན་རལ་གྲི། མདའ། མཆོག་སྦྱིན། གཡོན་ན་ཞགས་པ། གཞུ༌། དགྲ་སྟ་འཛིན་པ། རོལ་སྟབས་ཀྱིས་བཞུགས་པ། རིགས་བདག་ནི་རྣམ་སྣང་ངོ༌། །སྔགས་ནི། ཨོཾ་བྷྲཱུཾ་སྭཱཧཱ། ཡང་ན། ཨོཾ་ཨཱཿམཧཱ་ས་ཧཱ་སྲ་པྲ་མརྡ་ནི་ཡེ་སྭཱཧཱ།། །།
གསང་སྔགས་རྗེས་འཛིན་གྱི་སྒྲུབ་ཐབས།
གསང་སྔགས་རྗེས་འཛིན་གྱི་སྒྲུབ་ཐབས་ནི། པད་ཉི་ལ་ཧཱུཾ་ལས་གསང་སྔགས་རྗེས་འཛིན་མཐིང་ནག།ཕྱག་བཞིའི་གཡས་ན་རྡོ་རྗེ་དང་མཆོག་སྦྱིན། གཡོན་ན་དགྲ་སྟ་དང་ཞགས་པ། ཞབས་རོལ་སྟབས། ཉི་མའི་དཀྱིལ་འཁོར་གྱི་རྒྱབ་ཡོལ་ཅན། རྣམ་པ་ནི་ཞི་བ་ཡིན། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཧཱུཾ་སྭཱཧཱ། ཞེས་པ་དང༌། མཚན་སྔགས་ཀྱང་སྦྱར་རོ།། །།
བསིལ་བ་ཚལ་ཆེན་མོའི་སྒྲུབ་ཐབས།
བསིལ་བ་ཚལ་ཆེན་མོའི་སྒྲུབ་ཐབས་ནི། པད་ཉི་ལ་ཛྲིཾ་ལས་བསིལ་བ་ཚལ་ཆེན་མོ་དམར་མོ། ཕྱག་བཞིའི་གཡས་འཕྲེང་བ་དང༌། མདའ། གཡོན་ལྕགས་ཀྱུ་དང་པོ་ཏི་འཛིན་པ། ཉི་མའི་རྒྱབ་ཡོལ་ཅན། སྐྱིལ་ཀྲུང་ཕྱེད་པས་བཞུགས་པ། ཞི་བའི་སྐུ་ཅན་ཏེ། རིགས་བདག་ནི་འོད་དཔག་ཏུ་མེད་པའོ། །སྔགས་ནི། ཨོཾ་ཛྲིཾ་སྭཱཧཱ་དང༌། མཚན་སྔགས་སོ།། །།
གཙུག་ཏོར་རྣམ་པར་རྒྱལ་མའི་སྒྲུབ་ཐབས།
གཙུག་ཏོར་རྣམ་པར་རྒྱལ་མའི་སྒྲུབ་ཐབས་ནི། པད་ཟླ་ལ་བྷྲཱུཾ་ལས། རང་ཉིད་རྣམ་པར་རྒྱལ་མ་སྐུ་མདོག་དཀར་མོ། དཀར་སེར་སྔོ་བའི་ཞལ་གསུམ། གཡོན་ཞལ་ཡིད་ཙམ་ཁྲོ་བ། ཞལ་རེ་རེ་ལ་ཞི་བའི་སྤྱན་
གསུམ་གསུམ་དང་ལྡན་པ། ཕྱག་བརྒྱད་ཀྱི་གཡས་རྣམས་ན། སྣ་ཚོགས་རྡོ་རྗེ། སངས་རྒྱས་ཀྱི་སྐུ་གཟུགས་པདྨ་ལ་གནས་པ། མདའ། མཆོག་སྦྱིན། གཡོན་པ་རྣམས་ཀྱིས་གཞུ། ཞགས་པ་དང་བཅས་པའི་སྡིགས་མཛུབ། སྐྱབས་སྦྱིན། བདུད་རྩིས་གང་བའི་བུམ་པ་ཐུགས་ཀར་གཏོད་པ་རྣམས་སོ། །མཆོད་རྟེན་གྱི་ནང་དུ་པད་ཟླ་ལ་རྡོ་རྗེའི་སྐྱིལ་ཀྲུང་གིས་བཞུགས་པ། རིགས་བདག་ནི་རྣམ་སྣང་ངོ༌། །སྔགས་ནི། ཨོཾ་བྷྲཱུཾ་སྭཱཧཱ། བསྟོད་པ་ནི། དཔལ་ལྡན་ལྷ་མོ་སྟོན་ཀའི་ཟླ་བའི་མདོག།སོགས་སོ།། །།
ཕྱིར་ཟློག་མ་ཆེན་མོའི་སྒྲུབ་ཐབས།
ཕྱིར་ཟློག་མ་ཆེན་མོའི་སྒྲུབ་ཐབས་ནི། པད་ཉི་ལ་ཧཱུཾ་ལས་རང་ཉིད་ཕྱིར་བཟློག་མ་ཆེན་མོ་སྐུ་མདོག་ནག་མོ། ཕྱག་དྲུག་གི་གཡས་གསུམ་རལ་གྲི། ལྕགས་ཀྱུ། མཆོག་སྦྱིན། གཡོན་གསུམ་པདྨ་དམར་པོ། མདུང་རྩེ་གསུམ། ཞགས་པ་དང་བཅས་པའི་སྡིགས་མཛུབ་སྙིང་གར་གཏོད་པ། དར་དང་རིན་པོ་ཆེའི་རྒྱན་གྱིས་བརྒྱན་པ། ལྷག་མ་ཁྲོ་མོའི་ཆ་བྱད་དོ། །ཞབས་གཡོན་བརྐྱང་གི་སྟབས་ཀྱིས་བཞུགས་པའོ། །རིགས་བདག་ནི་མི་བསྐྱོད་པའོ། །སྔགས་ནི་ཨོཾ་ཨཱཿཧཱུཾ་སྭཱཧཱ།
གཙུག་ཏོར་གདུགས་དཀར་མོའི་སྒྲུབ་ཐབས།
གཙུག་ཏོར་གདུགས་དཀར་མོའི་སྒྲུབ་ཐབས་ནི། པད་ཟླ་ལ་ཨོཾ་ལས་གཙུག་ཏོར་གདུགས་དཀར་ཅན་དཀར་མོ། དཀར་ནག་དམར་བའི་ཞལ་གསུམ། ཕྱག་གཡས་གསུམ་ན་འཁོར་ལོ། ལྕགས་ཀྱུ། གཞུ། གཡོན་གསུམ་ན་རྡོ་རྗེ། མདའ། སྡིགས་མཛུབ་དང་བཅས་པའི་ཞགས་པ། ཁྲོ་མོའི་ལྟ་སྟངས་ཀྱིས་གཟའ་ཐམས་ཅད་འཇོམས་པ། དབུ་སྐྲ་ཐོར་ཚུགས་ཅན། ཞི་མ་ཁྲོའི་ཆ་བྱད་རྫོགས་པ། དར་དང་རིན་པོ་ཆེའི་
རྒྱན་གྱིས་བརྒྱན་པའོ། །རིགས་བདག་ནི་རྣམ་སྣང་ངོ༌། །སྔགས་ནི། ཨོཾ་སཱི་ཏ་ཏ་པ་ཏྲེ་ཨ་པ་ར་ཛི་ཏཱ་སརྦ་གྲ་ཧ་ཨ་ནུ་ཏ་ཏྲཱ་ས་ཡ་ཏྲཱ་ས་ཡ། ཧ་ན་ཧ་ན། དྲཱུཾ་དྲཱུཾ་ཧཱུཾ་ཧཱུཾ་ཕཊ་ཕཊ་སྭཱཧཱ།། །།
རྒྱལ་མཚན་རྩེ་མོའི་དཔུང་རྒྱན་གྱི་སྒྲུབ་ཐབས།
རྒྱལ་མཚན་རྩེ་མོའི་དཔུང་རྒྱན་གྱི་སྒྲུབ་ཐབས་ནི། པད་ཉི་ལ་ཧཱུཾ་ལས་རང་ཉིད་རྒྱལ་མཚན་རྩེ་མོའི་དཔུང་རྒྱན་ནག་མོ་ནག་དམར་ལྗང་བའི་ཞལ་གསུམ། ཕྱག་གཡས་གཉིས་ན་རལ་གྲི་དང་ཞགས་པ། གཡོན་གཉིས་ན་ཁ་ཊྭཱཾ་ག་དང་འཁོར་ལོ་འཛིན་པ། མི་མགོ་སྐམ་པོའི་འཕྲེང་བས་དབུ་ལ་བརྒྱན་ཞིང༌། སྐྲ་བརྫེས་པ། སྟག་ལྤགས་དང་ཤ་འགག་སེར་པོ་ཅན། གཡོན་བརྐྱང་གི་སྟབས་ཀྱིས་བཞུགས་པ། ཁྲོ་མོའི་ཆ་བྱད་ཡོངས་སུ་རྫོགས་པའོ། །རིགས་བདག་ནི་མི་བསྐྱོད་པ། སྔགས་ནི་ཨོཾ་ཧཱུཾ་སྭཱཧཱ། ཞེས་པའམ། མཚན་སྔགས་སོ།། །།
རྣམ་རྒྱལ་སེར་མོ་ཞེས་བྱ་བ་འཕགས་མ་གཞན་གྱིས་མི་ཐུབ་མའི་སྒྲུབ་ཐབས།
རྣམ་རྒྱལ་སེར་མོ་ཞེས་བྱ་བ་འཕགས་མ་གཞན་གྱིས་མི་ཐུབ་མའི་སྒྲུབ་ཐབས་ནི། པད་ཉི་ལ་ཨོཾ་ལས་གཞན་གྱིས་མི་ཐུབ་མ་སེར་མོ། སྤྱན་གསུམ་མཆེ་བ་གཙིགས་མ། མཛེས་ཤིང་ཤ་རྒྱུད་གྲིམ་ལ་ཁྲོས་པ་ལྷ་མོའི་ཆ་བྱད། དར་དང་རིན་པོ་ཆེས་བརྒྱན་པ། ཕྱག་གཡས་ཐལ་མོ་བརྡེག་པའི་ཚུལ་དུ་འཕྱར་ཞིང་གཡོན་ཞགས་པ་དང་བཅས་པའི་སྡིགས་མཛུབ་སྙིང་གར་གཏོད་པ། གཡས་བརྐྱང་གི་སྟབས་ཀྱིས་ཚོགས་བདག་གླང་སྣ་མནན་པ། ཚངས་པ་ལ་སོགས་པ་གདུག་པའི་ལྷ་ཐམས་ཅད་ཀྱིས་མཆོད་ཅིང༌། གདུགས་ལ་སོགས་པ་ཐོགས་ནས་སྐོར་བ་བྱེད་པ། མེ་དཔུང་གི་དབུས་ན་བཞུགས་པའོ། །དབུ་རྒྱན་ནི་རྣམ་སྣང་ངོ༌། །སྔགས་ནི། ཨོཾ་ཨཾ་སྭཱཧཱ།། །།
རྡོ་རྗེ་གནྡྷ་རིའི་སྒྲུབ་ཐབས།
རྡོ་རྗེ་གནྡྷ་རིའི་སྒྲུབ་ཐབས་ནི། པད་ཉི་ལ་ཧཱུཾ་ལས་རྡོ་རྗེ་གནྡྷ་རི་ནག་མོ། རྩ་ཞལ་ནག་པ། ལྷག་མ་དཀར་སེར་དམར་ལྗང་སྔོ་བའི་ཞལ་གཡས་བསྐོར་རམ། སྔོན་པོ་སྟེང་ཞལ་དུ་བྱས་ཀྱང་རུང་ངོ༌། །གཡས་ཀྱི་ཕྱག་དྲུག་ན། རྡོ་རྗེ། རྡོ་རྗེ་དྲིལ་བུ། རལ་གྲི། རྩེ་གསུམ། མདའ། འཁོར་ལོ། གཡོན་དྲུག་ན། ཁ་ཊྭཱཾ། ལྕགས་ཀྱུ། གཞུ། དགྲ་སྟ། ཞགས་པ། ཐུགས་ཀར་སྡིགས་མཛུབ་གཏོད་པའོ། ཁྲོ་མོའི་ཆ་བྱད་ཡོངས་སུ་རྫོགས་པ་སྟེ། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་གཾ་སྭཱཧཱ། གཟུངས་ཀྱི་ལྷ་མོ་འདི་རྣམས་ལ་གཟུངས་མདོ་ནས་བཤད་པའི་གཟུངས་སྔགས་རྒྱས་པ་དེ་དག་ཅི་ནུས་སུ་བཟླ་བ་ཡིན་ལ། དེ་ལྟར་མི་ནུས་ན་གོང་དུ་བཤད་པའི་ས་བོན་གྱི་སྔགས་རྣམས་བཟླས་པས་ཆོག་གོ། །།
རྡོ་རྗེ་ལྕགས་སྒྲོག་མའི་སྒྲུབ་ཐབས།
རྡོ་རྗེ་ལྕགས་སྒྲོག་མའི་སྒྲུབ་ཐབས་ནི། པད་ཟླ་ལ་ཧཱུཾ་ལས་ལྕགས་སྒྲོག་མ་ལྗང་ཁུ་ལྗང་ནག་དཀར་བའི་ཞལ་གསུམ། ཕྱག་དྲུག་གི་གཡས་པ་རྣམས་ཀྱིས་རྡོ་རྗེ་དང༌། ལྕགས་སྒྲོག་དང༌། མདའ་གསོར་བ། གཡོན་གསུམ་གྱིས་སྡིགས་མཛུབ་དང༌། ཞགས་པ་དང༌། གཞུ་བརྡུང་བའོ། །ཞབས་གཡོན་བརྐྱང་ཁྲོ་མོའི་ཆ་བྱད་ཡོངས་སུ་རྫོགས་པ་ལས་རིན་པོ་ཆེས་བརྒྱན་པའོ། རིགས་བདག་ནི་མི་བསྐྱོད་པ། སྔགས་ནི། ཨོཾ་བཛྲ་ཤྲིཾ་ཁ་ལེ་ཧཱུཾ་ཕཊ་སྭཱཧཱ།། །།
རྡོ་རྗེ་ལྕགས་སྒྲོག་མའི་སྒྲུབ་ཐབས།
རྡོ་རྗེ་གུར་ལས་འབྱུང་བ་ནག་པོ་ཆེན་པོའི་སྒྲུབ་ཐབས་ནི། པད་ཉི་ལ་ཧཱུཾ་ལས་རང་ཉིད་རྗེ་བཙུན་ནག་པོ་ཆེན་པོ། ཕྱག་གཡས་གྲི་གུག་འབར་བ་དང༌། གཡོན་ཐོད་ཁྲག་འཛིན་པ། མི་རོའི་གདན་ལ་ཞབས་མཉམ་པར་བཞེངས་པ། ཞལ་གྱི་གྲ་ནས་ཁྲག་འཛག་པ། བོང་ཐུང་བ། ཁྲོ་བོའི་ཆ་བྱད་ཡོངས་སུ་རྫོགས་པ། ཁྱད་པར་མི་མགོའི་དབུ་རྒྱན་དང་དོ་ཤལ་ཅན། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཤྲཱི་མཧཱ་ཀཱ་ལ་ཧཱུཾ་ཧཱུཾ་ཕཊ་ཕཊ་སྭཱཧཱ། བསྟོད་པ་ནི། སྲིན་པོའི་གཟུགས་ཀྱི་གདུག་པ་ཅན། །ཞེས་སོགས་སོ།། །།
ཁྲོ་བོ་སྟོབས་པོ་ཆེའི་སྒྲུབ་ཐབས།
ཁྲོ་བོ་སྟོབས་པོ་ཆེའི་སྒྲུབ་ཐབས་ནི། པདྨ་དཀར་པོ་དང་ཉི་མ་ལ་ཧཱུཾ་ལས་སྟོབས་པོ་ཆེ་སྐུ་མདོག་དམར་པོ། དབུ་སྐྲ་ཁམ་པ་གྱེན་དུ་བཅིངས་པ་ལ་སྦྲུལ་གྱིས་མཛེས་པ། ཕྱག་བཞིའི་གཡས་ཀྱི་དང་པོ་ན་དབྱུག་པ་དཀར་པོ། གཉིས་པ་ན་རྔ་ཡབ་དཀར་པོ། གཡོན་གྱི་དང་པོས་ཕྱག་འཚལ་བའི་ཚུལ། གཉིས་པས་སྡིགས་མཛུབ་དང་བཅས་པའི་ཞགས་པ། ཞབས་གཡོན་བརྐྱང་བ། ཁྲོ་བོའི་ཆ་བྱད་ཡོངས་སུ་རྫོགས་པ། རིགས་བདག་ནི་ཁ་ཅིག་འོད་དཔག་མེད་དུ་འདོད་ཀྱང་མི་བསྐྱོད་པར་ཀ་འཐད། སྔགས་ནི། ཨོཾ་མཧཱ་བ་ལ་སྭཱཧཱ།། །།
སྒྱུ་འཕྲུལ་དྲྭ་བ་ལས་འབྱུང་བ་རྟ་མགྲིན་གྱི་སྒྲུབ་ཐབས།
སྒྱུ་འཕྲུལ་དྲྭ་བ་ལས་འབྱུང་བ་རྟ་མགྲིན་གྱི་སྒྲུབ་ཐབས་ནི། པད་ཉི་ལ་ཧཾ་ལས་རང་ཉིད་འཕགས་པ་ཁྲོ་བོའི་རྒྱལ་པོ་རྟ་མགྲིན་སྐུ་མདོག་དམར་པོ། རྩ་ཞལ་དམར་པོ་བཞད་པ། གཡས་སྔོན་པོ་ལྗགས་འགྲིལ་བ། གཡོན་དཀར་པོ་ཡ་སོས་མ་མཆུ་མནན་པ། རྡོ་རྗེ་དང༌། དབྱུག་ཐོ་དང༌། ཕྱག་འཚལ་བའི་ཚུལ་དང༌། མདའ་འཕྱར་བ་གཡས་ཀྱི་ཕྱག་བཞི་ནའོ། །སྡིགས་མཛུབ་དང་རང་སྣང་གི་ལྷ་མོའི་ནུ་མ་དང༌། པད་མ་དང༌། གཞུ་འཕྱར་བ་ནི་གཡོན་གྱི་ཕྱག་བཞི་ནའོ། །ཞབས་གཡས་བསྐུམ། གཡོན་བརྐྱང་བ་ཁྲོ་བོའི་ཆ་བྱད་ཡོངས་སུ་རྫོགས་པ། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཧ་ཡ་གྲི་བ་ཧཾ་སྭཱ་ཧཱ།། །།
གཤིན་རྗེ་གཤེད་ནག་པོའི་རྒྱུད་ལས་འབྱུང་བ་ཧེ་རུ་ཀ་ཕྱག་གཉིས་པའི་སྒྲུབ་ཐབས།
གཤིན་རྗེ་གཤེད་ནག་པོའི་རྒྱུད་ལས་འབྱུང་བ་ཧེ་རུ་ཀ་ཕྱག་གཉིས་པའི་སྒྲུབ་ཐབས་ནི། དུར་ཁྲོད་བརྒྱད་ཀྱི་དབུས་སུ་པད་ཉི་ལ་ཧཱུཾ་ལས། རང་ཉིད་དཔལ་ཧེ་རུ་ཀ་སྐུ་མདོག་
སྔོན་པོ། ཕྱག་གཡས་འབར་བའི་རྡོ་རྗེ་གསོར་ཞིང༌། གཡོན་ཐོད་ཁྲག་ཐུགས་ཀར་འཛིན་པ། མཆན་ཁུང་དུ་ཁ་ཊྭཱཾ་ག་བ་དན་དང་བཅས་པ། རོལ་པའི་ཁྲོ་བོ་ཆེན་པོ་སྤྱན་གསུམ་དབུ་སྐྲ་ཁམ་ནག་གྱེན་དུ་འཁྱིལ་བ། མཆེ་བའི་མྱུ་གུ་གཙིགས་པ། རུས་པའི་ཕྱག་རྒྱ་ལྔ་དང་ཐལ་བས་བརྒྱན་པ། མི་ལྤགས་ཀྱི་ན་བཟའ་དང་ཐོད་པ་སྐམ་རློན་གྱི་དབུ་རྒྱན་དོ་ཤལ་ཅན། གཡོན་བརྐྱང་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་མི་རོ་མནན་ཞིང་མེ་དཔུང་འབར་བའི་དབུས་ན་འགྱིང་བའོ། །གཞུང་ན་མི་གསལ་ཡང༌། སྟག་ལྤགས་ཀྱི་ཤམ་ཐབས་དགོས་པར་མངོན། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཧཱུཾ་ཕཊ་སྭཱཧཱ། བསྟོད་པ་ནི། མཆེ་བ་གཙིགས་ཤིང་འཇིགས་པ་ཆེ། །སྔགས་ཀྱི་མེ་ཏོག་འཕྲེང་བས་བརྒྱན། །ཤ་ཆེན་རབ་ཏུ་གསོལ་མཛད་པའི། །ཧེ་རུ་ཀ་དཔལ་ཕྱག་འཚལ་བསྟོད།། །།
བདག་མེད་མ་གཅིག་པུའི་སྒྲུབ་ཐབས།
བདག་མེད་མ་གཅིག་པུའི་སྒྲུབ་ཐབས་གཉིས་ལ། རྗེས་གནང་གཅིག་ཏུ་བྱ་སྟེ། དེ་ཡང་ཟླ་བའི་གདན་ལ་ཨཾ་ལས། རང་ཉིད་རྡོ་རྗེ་བདག་མེད་མ་སྐུ་མདོག་སྔོན་མོ། ཕྱག་གཡས་གྲི་གུག་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པ། མཆན་ཁུང་དུ་ཁ་ཊྭཱཾ་ག་སྐྲ་སེར་གྱེན་དུ་བརྫཻས་པ། དྲག་མོ་ཆེན་མོ་སྤྱན་གསུམ་དམར་བ། སྟག་ལྤགས་ཀྱི་སྨད་དཀྲིས། ཕྱག་རྒྱ་ལྔ་ཐོད་སྐམ་གྱི་དབུ་རྒྱན། ཐོད་རློན་གྱི་དོ་ཤལ་ཅན། ཟླ་བའི་འོད་ཟེར་འཕྲོ་ཞིང༌། ཕྱི་རོལ་མེ་དཔུང་གིས་སྐོར་བའོ། །དབུ་རྒྱན་ནི་མི་བསྐྱོད་པའོ། །སྔགས་ནི། ཨོཾ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཱ་
སྭཱ་ཧཱ། བསྟོད་པ་ནི། འགྲོ་བ་བུད་མེད་འདུལ་གཟིགས་ནས། །བདག་མེད་རྣལ་འབྱོར་མང་གྱུར་གང༌། །ཕྱག་འཚལ་ཕ་རོལ་ཕྱིན་ཐུབ་ལ། །སྒྱུ་མའི་ཕྱག་རྒྱ་ཕྱག་འཚལ་བསྟོད།། །།
རྗེ་བཙུན་རྡོ་རྗེ་རྣལ་འབྱོར་མ་རྡོ་རྗེ་ཕག་མོའི་སྒྲུབ་ཐབས།
རྗེ་བཙུན་རྡོ་རྗེ་རྣལ་འབྱོར་མ་རྡོ་རྗེ་ཕག་མོའི་སྒྲུབ་ཐབས་ནི། གྲུ་གསུམ་དམར་པོ་མེའི་དཀྱིལ་འཁོར་གྱི་དབུས་སུ་པད་དམར་འདབ་བརྒྱད་ཀྱི་གདན་ལ། ཧྲཱིཾཿཧཾ་ཞེས་པ་ཡོངས་སུ་གྱུར་པ་ལས། བཅོམ་ལྡན་འདས་མ་རྡོ་རྗེ་ཕག་མོ། སྐུ་མདོག་དམར་མོ། ཕྱག་གཡས་རྡོ་རྗེ་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པ། མཆན་ཁུང་དུ་ཁ་ཊྭཱཾ་ག །མི་རོའི་གདན་ལ་གཡོན་བརྐྱང་བས་གནས་པ། སྐྲ་ཁམ་པ་གྱེན་དུ་འགྲེང་ཞིང༌། སྤྱན་གསུམ་སྡང་མིག་ཏུ་ལྟ་བ། སྟག་ལྤགས་མགོ་འཕྲེང་ཕྱག་རྒྱ་ལྔ་དང་མེ་ཏོག་གི་འཕྲེང་བས་བརྒྱན་པ། མེ་དཔུང་འབར་བའི་དབུས་ན་བཞུགས་པ། རིགས་བདག་ནི་རྣམ་སྣང་ངོ༌། །སྔགས་ནི། ཨོཾ་བཛྲ་ཝ་ར་ཧི་ཨཱ་བེ་ཤ་ཡ་ཨཱ་བེ་ཤ་ཡ་ཨཱ་བེ་ཤ་ཡ་སརྦ་ཛྭ་ར་ཎ་ཧྲིཿསྭཱཧཱ། ཞེས་པ་དང༌། ཨོཾ་ཧྲཱིཿཧཱུཾ་ཧཱཿསྭཱཧཱ། བསྟོད་པ་ནི། དཔལ་ལྡན་རྡོ་རྗེ་མཁའ་འགྲོ་དང༌། །མཁའ་འགྲོ་མ་ཡི་འཁོར་ལོ་བསྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་ལ་ཕྱག་འཚལ་ལོ། །ཞེས་པའོ།། །།
ཀུ་རུ་ཀུལླེ་ཐོད་པ་ཅན་གྱི་སྒྲུབ་ཐབས།
ཀུ་རུ་ཀུལླེ་ཐོད་པ་ཅན་གྱི་སྒྲུབ་ཐབས་ནི། ལྟེ་བར་མེའི་དཀྱིལ་འཁོར་གྱི་སྟེང་དུ། པདྨ་དམར་པོ་འདབ་མ་བཞི་པ་ལ་ཧྲཱིཿདེ་ལས་འོད་འཕྲོས་འདུས་པ་ལས་རང་ཉིད་རྗེ་བཙུན་རིག་བྱེད་མ། ཕྱག་དང་པོ་གཉིས་ཀྱིས་མདའ་གཞུ། འོག་མ་གཉིས་ཀྱིས་ལྕགས་ཀྱུ་དང་ཨུཏྤལ་དམར་པོའི་སྟེང་དུ་ཐོད་པ་ཁྲག་གིས་གང་བ་འཛིན་པ། དར་
དམར་པོའི་སྟོད་གཡོགས་དང་རིན་པོ་ཆེས་བརྒྱན་པ། ལྷག་མ་རོ་གདན། སྐྲ་སེར་ཞབས་ཕྱེད་ཀྲུང་བཞེངས་པ། མགོ་འཕྲེང་སྟག་ལྤགས། རུས་རྒྱན། རིགས་བདག་སྔགས་སོགས་ཨོ་རྒྱན་ནས་འབྱུང་བ་དང་འདྲ། ཨོཾ་ཨཱཿཧྲིཿཧཱུཾ་ཧྲཱིཿཧཱུཾ་ཛཿ ཞེས་པའི་སྔགས་ལྷག་པོའང་ཡོད་དོ།། །།
དཀར་བའི་ལས་ཉེ་བར་སྟོན་མའི་སྒྲོལ་མེའི་སྒྲུབ་ཐབས།
དཀར་བའི་ལས་ཉེ་བར་སྟོན་མའི་སྒྲོལ་མེའི་སྒྲུབ་ཐབས་ནི། དངོས་གྲུབ་འབྱུང་བའི་དུར་ཁྲོད་ཀྱི་ནང་བསྲུང་བའི་འཁོར་ལོས་བསྐོར་བའི་དབུས་སུ། པད་ཟླ་ལ་ཧཱུཾ་ལས་སྒྲོལ་མ་དཀར་མོ་ཞལ་གསུམ་ཕྱག་དྲུག་མ། རྩ་ཞལ་དཀར། གཡས་སེར། གཡོན་སྔོ། ཞལ་རེ་རེ་ལ་སྤྱན་གསུམ་གསུམ་དང་ལྡན་པ། དབུ་ལ་ཐོད་སྐམ་ལྔ་དང༌། རལ་པའི་ཅོད་པན་ལ་ཟླ་བ་ཕྱེད་པས་བརྒྱན་པ། ཕྱག་དང་པོ་གཉིས་ཀྱིས་མཆོག་སྦྱིན་དང་ཨུཏྤལ། བར་པ་གཉིས་ཀྱིས་འཕྲེང་བ་དང་པདྨ་དཀར་པོ། ཐ་མ་གཉིས་ཀྱིས་མདའ་གཞུ་བསྣམས་པ། ཁྲོ་ཆགས་འདྲེས་པའི་ཆ་བྱད་ཅན། སྟག་ལྤགས་ཀྱི་སྨད་དཀྲིས་དང༌། དར་གྱི་ན་བཟའ་དང༌། རིན་པོ་ཆེའི་རྒྱན་དང་ཟླ་བའི་རྒྱབ་ཡོལ་ཅན། སྐྱིལ་ཀྲུང་ཕྱེད་པའི་རོལ་པས་བཞུགས་པ། མ་ལུས་པའི་སེམས་ཅན་རྣམས་ལ་དཀར་བའི་ལས་ཉེ་བར་སྟོན་པའི་སྐུ་ཅན་དུ་གྱུར། རིགས་བདག་ནི་མི་བསྐྱོད་པ་གཙོ་བོར་གྱུར་བའི་རིགས་ལྔའོ། །སྔགས་ནི། ཨོཾ་ཨ་ཙ་ལ་ཨ་ནི་མི་ཏི་ཝཱ་རེ་ཧཱུཾ་ཧཱུཾ་ཕཊ་སྭཱཧཱ། ཞེས་པའོ། །དེ་ལྟར་ན། ཐུབ་པ་རྡོ་རྗེ་གདན། འཇམ་དབྱངས་བརྟན་པའི་འཁོར་ལོ། འཇམ་དབྱངས་ཨ་ར་པ་ཙ་ན། སྒྱུ་དྲྭ་ལས་འབྱུང་བའི་འཇམ་དབྱངས།
འཇམ་པའི་རྡོ་རྗེ་གཙོ་འཁོར་ལྔ་པ། ངག་གི་རྒྱལ་པོ། རྒྱལ་པོ་རོལ་པ། རིག་འཛིན་གྱི་སྡེ་སྣོད་ཅེས་བྱ་བའི་རྒྱུད་ལས་འབྱུང་བའི་འཇམ་དཔལ། འཇམ་དཔལ་ཡེ་ཤེས་སེམས་དཔའ་ཆོས་དབྱིངས་གསུང་དབང༌། ཡན་ལག་མེད་པའི་རྡོ་རྗེ། དཔའ་བོ་ཆིག་སྒྲུབ། འཕྲལ་དུ་ཉམས་སུ་མྱོང་བའི་ཨ་ར་པ་ཙ་ན། གཤིན་རྗེ་གཤེད་ནག་པོ་ཞལ་གསུམ་པ། གཤེད་ནག་གདོང་དྲུག་པ། གཤེད་ནག་ཕྱག་གཉིས་པ། རྡོ་རྗེ་ཆོས། སྤྱན་རས་གཟིགས་སེང་གེ་སྒྲ། ཧཱ་ལ་ཧཱ་ལ་དཀྱུས་མ། ཁ་སཪྤ་ཎི། ཡི་གེ་དྲུག་པ། ཧ་རི་ཧ་རི་ཧ་རི་ལ་ཞོན་པ། ཧཱ་ལ་ཧཱ་ལ་རྡོ་རྗེ་ཆོས། པདྨ་གར་དབང༌། དྲག་པོ་ཆེན་པོ། དབང་བྱེད་སྒྲོལ་མ། སྒྲོལ་དཀར་གཙོ་འཁོར་གསུམ་པ། སེང་ལྡེང་ནགས་སྒྲོལ། ཡིད་བཞིན་འཁོར་ལོ། ཨོ་ཌི་ཡ་ཎ་ལས་འབྱུང་བའི་འོད་ཟེར་ཅན་མ་རིགས་གཅིགརྟོག་པ་ནས་འབྱུང་བ་འོད་ཟེར་ཅན་མ་སེར་མོ་དང༌། དཀར་མོ། མྱ་ངན་མེད་པའི་འོད་ཟེར་ཅན། ཨོ་རྒྱན་རིམ་པ་ལྷན་སྐྱེས་རོལ་པས་མཛད་པར། རོ་ལངས་འོད་ཟེར་ཅན་མ། བསྐུལ་བྱེད་མ། ཛམྦྷ་ལ་སེར་པོ། ནག་པོ། ནོར་རྒྱུན་མ། ཁྲོ་གཉེར་ཅན་མ། བྱམས་པ། གུར་ལས་འབྱུང་བའི་ཤེར་ཕྱིན་དཀར་མོ། གདན་བཞི་ལས་འབྱུང་བའི་ཤེར་ཕྱིན་དཀར་མོ། ཤེར་ཕྱིན་སེར་མོ་རིགས་གསུམ། མི་གཡོ་བ་སྔོན་པོ། རི་ཁྲོད་མ། རྡོ་རྗེ་དབྱངས་ཅན་མ། ཧཱུཾ་མཛད། བགེགས་མཐར་བྱེད། རལ་གཅིག་མ། དུག་སེལ་མ། སྒྲོལ་མ་ཀུ་རུ་ཀུལླེ། རྟོག་པ་ལས་འབྱུང་བའི་ཀུ་རུ་ཀུལླེའི་སྒྲུབ་ཐབས་རིགས་གཉིས། ཨོ་རྒྱན་ལས་འབྱུང་བའི་ཀུ་རུ་ཀུལླེ། ཁམས་གསུམ་དབང་སྡུད་ཀྱི་སྤྱན་རས་གཟིགས། གནོད་སྦྱིན་ཕོ་མོའི་སྒྲུབ་ཐབས་རྒྱས་པ། རྡོ་རྗེ་སྒྲོལ་མ། གཤེད་དམར། སྲུང་བ་ལྔ་པོ་རིམ་ཅན་དུ་རེ་རེ། གཙུག་
ཏོར་རྣམ་རྒྱལ། ཕྱིར་བཟློག་མ། གཙུག་ཏོར་གདུགས་དཀར། རྒྱལ་མཚན་རྩེ་མོའི་དཔུང་རྒྱན། གཞན་གྱིས་མི་ཐུབ་མ། གནྡྷ་རི། ལྕགས་སྒྲོག་མ། མགོན་པོ་ནག་པོ། སྟོབས་པོ་ཆེ། རྟ་མགྲིན་ཧེ་རུ་ཀ བདག་མེད་མ། རྡོ་རྗེ་ཕག་མོ། ཀུ་རུ་ཀུལླེ་ཐོད་པ་ཅན། དཀར་བའི་ལས་ཉེ་བར་སྟོན་པའི་སྒྲོལ་བ་སྟེ་རྗེས་གནང་བརྒྱད་ཅུ་གྱ་གཅིག་ཏུ་འདུས་སོ། །དེ་རྣམས་ཀྱི་བརྒྱུད་པ་ནི། རྡོ་རྗེ་འཆང་ནས་བརྩམས་ཏེ། རྒྱ་གར་གྱི་སློབ་དཔོན་ཐ་དད་པ་སྣ་ཚོགས་ལས་བརྒྱུད་པ་རྣམས། སློབ་དཔོན་གཞོན་ནུ་སྦས་པ་ལས་བརྒྱུད། རྡོ་རྗེ་གདན་པ་དང༌། བཻ་རོ་ཙ་ན་རཀྵི་ཏ་དང༌། དཱ་བྱང་ཆུབ་སེམས་དཔའ་དང༌། དོན་ཡོད་རྡོ་རྗེ་བཞི་ལ་བ་རི་ལོ་ཙཱ་བས་ཞུས། དེ་ནས་ས་སྐྱ་བ་ཆེན་པོ། སློབ་དཔོན་རིན་པོ་ཆེ། རྗེ་བཙུན་རིན་པོ་ཆེ། ས་སྐྱ་པཎྜི་ཏ། མ་ཚོགས་སྒོམ་པ། ཉན་ཆེན་པ། རིན་ཆེན་སེང་གེ་བ། གངས་ཁྲོད་པ། ཐེག་ཆེན་པ། བློ་གྲོས་ཆོས་སྐྱོང་བ། པཎ་ཆེན་རིན་པོ་ཆེ་ཤཱཀྱ་མཆོག་ལྡན། རྗེ་ཀུན་དགའ་རྒྱལ་མཚན་པ། རྗེ་སངས་རྒྱས་འོད་ཟེར་བ། རྗེ་བཙུན་གྲོལ་མཆོགརྡོ་རྗེ་འཆང་ལྷ་དབང་གྲགས་པ། དེས་བདག་ལའོ། །ངོར་ལུགས་ཀྱི་རྒྱུད་པ་ལ་མོས་ན། ཉན་ཆེན་པའི་རྗེས་སུ། བླ་མ་བསོད་ནམས་སྐྱབས། གཟུངས་ཀྱི་དཔལ་བ། དཔལ་ལྡན་ཚུལ་ཁྲིམས་པ། ཤར་ཆེན། ངོར་ཆེན། པཎ་ཆེན་ཆོས་རྗེ་མན་ཆད་གོང་བཞིན། འདིའི་གཞུང་རྣམས་སྔོན་དུས་དར་རྒྱས་ཆེ་ཞིང༌། ཁོལ་འདོན་མང་བས། གླེགས་བམ་གྱི་སྨད་ཀྱི་ཆ་རྣམས་ལ། སྒྲུབ་ཐབས་མང་ཉུང་མི་འདྲ་བ་ཡང་ཅུང་ཟད་སྣང་ལ། གོ་རིམ་མི་འདྲ་བ་ཤིན་དུ་མང་བ་འདུག་ཀྱང༌། དཔེ་ཤས་ཆེ་བ་དང༌། གྲངས་མང་བའི་ཕྱོགས་གཙོ་བོར་བཟུང་སྟེ། གླེགས་བམ་གྲངས་ཆེ་བ་རྣམས་དང་མཐུན་པར་བཀོད་པ་ཡིན་ནོ།། །།
ཞེས་པ་འདི་ཡང་སྔ་མོ་ནས་དོན་གཉེར་མང་པོས་བསྐུལ་བ་དང༌། ཁྱེད་ཀོང་པོ་རབ་འབྱམས་པ་དཀོན་མཆོག་བཟང་པོ་དང་བམ་པ་ཡང་སྟོད་རབ་འབྱམས་པ་བློ་གྲོས་བསྟན་འཛིན་ཞེས་བྱ་བ་ལ་སོགས་པ་དོན་གཉེར་དུ་མས་བསྐུལ་ནས། ཏཱ་ར་ནཱ་ཐས་སྨྲས་པའོ། །ཞུས་དག །དགེ་ལེགས་འཕེལ། མངྒ་ལཾ། །
རྒྱུད་སྡེ་བཞི་ལས་གསུངས་པའི་ཡི་དམ་རྒྱ་མཚོའི་སྒྲུབ་ཐབས་རིན་ཆེན་འབྱུང་གནས།
རྒྱུད་སྡེ་བཞི་ལས་གསུངས་པའི་ཡི་དམ་རྒྱ་མཚོའི་སྒྲུབ་ཐབས་རིན་ཆེན་འབྱུང་གནས་ཞེས་བྱ་བ་བཞུགས་སོ། །
ཨོཾ་སྭཱ་སྟི། རྣམ་དག་ལེགས་ལམ་སྟོན་པ་ཡི། །མཚན་ལྡན་བླ་མའི་ཞབས་བཏུད་ནས། །བསྟན་པ་འདི་ཡི་ཆོས་སྐྱོང་བ། །ཐུན་མོང་མིན་པའི་སྒྲུབ་ཐབས་བཤད། །འོག་ནས་འབྱུང་བ་ལྟར་གཏོར་མ་རྒྱས་པའམ། དཀར་གཏོར་ཆེན་པོ་བཞིའམ། བཞི་སྒྲིལ་གྱི་གཏོར་མ་བཤམ། འཇིག་རྟེན་འདས་པའི་མཆོད་པ་ཚར་གཅིག་དང༌། འཇིག་རྟེན་པའི་མཆོད་པ་ཇི་ལྟར་འོས་པ་བཤམ། ཡི་དམ་གང་རུང་གི་བདག་བསྐྱེད་སྔོན་དུ་འགྲོ་བའི་མཆོད་པ་སྤྱི་དང་མཐུན་པར་བྱིན་གྱིས་བརླབས། རང་གི་སྙིང་གའི་འོད་ཀྱིས་གསང་བའི་བདག་པོའམ། བཅོམ་ལྡན་འདས་ཤཱཀྱ་ཐུབ་པ་ལ་སངས་རྒྱས་བྱང་ཆུབ་སེམས་དཔའི་ཚོགས་ཀྱིས་བསྐོར་བ། བཛྲ་ས་མཱ་ཛཿ མ་ལུས་སེམས་ཅན་སོགས་བརྗོད། ཨརྒྷཾ་ནས་ཤཔྟའི་བར་གྱིས་མཆོད། དབུས་སུ་རིན་པོ་ཆེའི་གདན་ལ་བཞུགས་པར་གྱུར། སླར་ཡང་མཆོད་བསྟོད་ཚར་གཅིག་
བྱས་ལ་སྙིང་པོ་ཅུང་ཟད་བཟླས། ཡི་དམ་གཞན་གྱི་མདུན་བསྐྱེད་དང་འབྲེལ་བའི་ཚེ་འདི་མི་དགོས་སོ། །བསངས་སྦྱངས། སྟོང་པའི་ངང་ལས་འཇིག་རྟེན་འདས་པའི་དཀྱིལ་འཁོར་གྱི་བྱང་ཕྱོགས་སུ། བཻ་ལས་རྒྱལ་པོ་རྣམ་ཐོས་སྲས་གསེར་མདོག་ནོར་བུས་མཚན་པའི་བེ་ཅོན་དང༌། གཏེར་གྱི་ནེའུ་ལེ་འཛིན་པ། སྐུ་ལུས་སྦོམ་ཞིང་རབ་ཏུ་བཞད་པ། གཡས་གཡོན་ན་གཏེར་གྱི་བུམ་པ་དང༌། རིན་པོ་ཆེའི་ཆུ་བོ་འབབ་པ། རིན་པོ་ཆེའི་ཁྲི་དང་སེང་གེ་ལ་བཞུགས་པ། ཤར་དུ་དྷྲི་ལས་རྒྱལ་པོ་ཆེན་པོ་ཡུལ་འཁོར་བསྲུང་སྐུ་མདོག་དཀར་ལ་ལྗང་བའི་མདངས་ཅན། པི་ཝང་བརྡུང་ཞིང་ཞི་བའི་ཚུལ། རིན་པོ་ཆེའི་ཁྲི་དང་གླང་པོའི་གདན་ལ་གནས་པ། ལྷོ་རུ་བི་ལས་རྒྱལ་པོ་ཆེན་པོ་འཕགས་སྐྱེས་པོ་སྐུ་མདོག་སྔོ་སངས་རལ་གྲི་འབར་བ་
འཛིན་པ། ཅུང་ཟད་ཁྲོ་བའི་ཉམས་ཅན་རིན་པོ་ཆེའི་ཁྲི་དང་མ་ཧེའི་གདན་ལ་བཞུགས་པ། ནུབ་ཏུ་ཀྵ་ལ་རྒྱལ་པོ་ཆེན་པོ་མིག་མི་བཟང་སྐུ་མདོག་དམར་པོ་འཛུམ་པ། ཕྱག་གཡས་པས་སྦྲུལ་ཞགས་དང༌། གཡོན་པས་རིན་པོ་ཆེའི་མཆོད་རྟེན་འཛིན་ཞིང་དེ་ལ་གཟིགས་པ། སྤྱན་དམར་ཞིང་ལྟ་ཟེར་འབར་བ་སྦྲུལ་མགོའི་གདེངས་ཀ་བདུན་དང་ལྡན་པ། རིན་པོ་ཆེའི་ཁྲི་དང་ཀླུའི་གདན་ལ་བཞུགས་པ། ཐམས་ཅད་ཀྱང་དར་དང་རིན་པོ་ཆེའི་རྒྱན་ཐམས་ཅད་ཀྱིས་རྣམ་པར་བརྒྱན་ཞིང༌། དཔའ་ཞིང་བརྗིད་ལ་བཟོད་པར་དཀའ་བའི་གཟི་འོད་ཅན་རབ་ཏུ་དགྱེས་པའི་སྤྱན་ཟླུམ་པོ་གདངས་པ། རིན་པོ་ཆེའི་ཡ་ལད་གསོལ་བ། ཡིད་བཞིན་ནོར་བུའི་ཅོད་པན་དང་བཅས་པའི་ཟེའུ་ཁ་ལ་སོགས་པ་འཁོར་ལོས་བསྒྱུར་བའི་ཆ་ལུགས་ཡོངས་སུ་རྫོགས་པའོ། །རང་གི་སྙིང་ག་ནས་འོད་ཟེར་འཕྲོས། རི་རབ་ཀྱི་བང་རིམ་ནས་རྒྱལ་པོ་ཆེན་པོ་བཞི་འཁོར་དང་བཅས་པ་བསྐུལ་ཞིང་སྤྱན་དྲངས་པར་གྱུར། རྒྱས་པར་སྤྲོ་ན་རེ་རེ་ཞིང་སྤྱན་དྲངས། མཆོད་བསྟོད། དམ་བཞགབཞུགས་གསོལ་རྣམས་རིམ་པས་བྱ། བསྡུ་ན། ཨོཾ་བཻ་ཤྲ་ཝ་ཎ་ཡ། དྷྲི་ཏ་རཥྟ་ཡ། བི་རུ་ཌྷ་ཀ་ཡ། བི་རུ་པཀྵ་ཡ། ས་པ་རི་ཝཱ་ར་བཛྲ་ས་མཱ་ཛཿ ཞེས་སྤྱན་དྲངས། མཚན་སྔགས་དེ་ཉིད་ལ་ཨརྒྷཾ་སོགས་སྦྱར་བས་མཆོད། རྒྱལ་པོ་ཆེན་པོ་དཔལ་ལྡན་པ་སོགས་ཀྱིས་བསྟོད་དོ། །ལས་ཀུན་སྒྲུབ་
པའི་མཐུ་བོ་ཆེ། །རྒྱས་མཛད་ངལ་གསོས་པོ་ལ་བསྟོད། །ཞི་ཞིང་བསྲུང་བའི་ལས་མཛད་པ། །གནས་སྲུང་པོ་ལ་ཕྱག་འཚལ་ལོ། །ཡམས་ཀུན་ཞི་ཞིང་འཆི་བ་བཟློག།དགྲ་འཇོམས་ལུས་འཕགས་པོ་ལའང་བསྟོད། །སྨན་དང་ལོ་ཏོག་རྒྱས་མཛད་ཅིང༌། །དབང་བྱེད་མིག་མི་བཟང་ལ་འདུད། །ཅེས་པའམ། བསྡུ་ན་དད་ལྡན་རྒྱལ་བའི་བཀའ་སྡོད་སོགས་ཀྱིས་བསྟོད། མཚན་སྔགས་ཀྱི་མཐར་ས་མ་ཡ་སྟྭཾ། ཞེས་རྡོ་རྗེ་རྩེ་ལྔ་པའི་ཕྱག་རྒྱ་བསྟན་ཏེ་དམ་ལ་བཞགམཚན་སྔགས་ཀྱི་མཐར་པདྨ་ཀ་མ་ལ་ཡེ་སྟྭཾ། ཞེས་བཞུགས་སུ་གསོལ། སླར་ཡང་མཆོད་བསྟོད་གཅིག་བྱས་ལ་སོ་སོའི་མཚན་སྔགས་སམ། ཨོཾ་བཻ་སྭཱཧཱ། ཨོཾ་དྷྲི་སྭཱཧཱ། ཨོཾ་བི་སྭཱཧཱ། ཨོཾ་ཀྵ་སྭཱཧཱ། ཞེས་ཅི་ནུས་བཟླ་བ་དང༌། ལས་རེ་རེ་སྒྲུབ་པའི་ཚེ། ཞི་བ་ལ་སྭཱཧཱའི་མཐའ་ཅན་དང༌། རྒྱས་པ་ལ་ན་མཿ དང༌། དབང་ལ་ཝ་ཥཊ་དང༌། དྲག་པོ་ལ་ཧཱུཾ་གི་མཐའ་ཅན་དུ་བྱེད། བཞི་ཆར་ཆ་མཉམ་དུ་སྒྲུབ་ན། ཨོཾ་བཻ་ན་མཿབོ་ཥཊ། ཨོཾ་དྷྲི་སྭཱཧཱ་ཨོཾ། ཨོཾ་བི་མ་ར་ཡ་ཧཱུཾ་ཕཊ། ཨོཾ་ཀྵ་ཝ་ཥཊ་ཧོ། ཞེས་པ་རྣམས་བཟླའོ། །གཏོར་མ་བདག་བསྐྱེད་དང་མཐུན་པར་བྱིན་གྱིས་བརླབས་ལ། མཐར་རེ་རེ་བཞིན་སྔགས་དྲུག་ཕྱག་རྒྱ་དྲུག་གིས་རྒྱས་འདེབས་པའམ། བསྡུ་ན་ནམ་མཁའ་མཛོད་ཀྱི་སྔགས་རྒྱས་རྒྱ་ཆེར་སྤེལ། ཨོཾ་བཻ་ཤྲ་མ་ཎ་ཡ་ཨོཾ་ཨ་ཀཱ་རོ་མུ་ཁཾ་སོགས་རེ་རེའི་མཚན་སྔགས་ཀྱི་མཐར་ཨ་ཀཱ་རོ་བཏགས་པ་ལན་གསུམ་གསུམ་གྱིས་
འབུལ། ཨོཾ་བཛྲ་ཡཀྵ་ཎི་གྲྀ་ཧ་ཏ་སྭཱཧཱ། ཨོཾ་མ་ཐ་མ་ཐ་བཛྲ་གནྡྷརྦྷ་ཧྲི་ད་ཡེ་སྭཱཧཱ། ཨོཾ་ཁུ་ཁུ་ཎི་གྷི་ཧ་བཱ་ལིཾ་སྭཱཧཱ། ཨོཾ་ཧ་ར་ཧ་ར་ནཱ་ག་བཛྲ་སྭཱཧཱ། ཞེས་པ་རྣམས་ལ་ཨ་ཀཱ་རོ་བཏགས་པ་ལན་གསུམ་གསུམ་གྱིས་འཁོར་རྣམས་ལ་ཕུལ། ཨོཾ་བྷ་ཝ་ཁཱ་ཧི་ཁཱ་ཧི། གྲྀཧྞ་གྲྀཧྞ་གྲྀཧྞ་ཧཱུཾ། སརྦ་བྷུ་ཏ་བཱ་ལིཾ་སྭཱཧཱ། ཞེས་ལན་ཉི་ཤུ་རྩ་གཅིག་གིས་འཁོར་འབྱུང་པོ་སྤྱི་ལ་ཕུལ། ཨོཾ་སརྦ་ཨ་མི་ཤི་བྷྱཿ ཝ་ཧ་རི་ཎེ་སྭཱཧཱ། ཞེས་པས་འཆོལ་བའི་རིགས་རྣམས་ལ་རྨེ་གཏོར་སྦྱིན། མཆོད་བསྟོད། མཆོད་སྦྱིན་གཏོར་མ་འདི་བཞེས་ལ་སོགས་འདོད་དོན་གསོལ་བ་བཏབ། ཡིག་བརྒྱ། བཟོད་གསོལ། གཤེགས་བསྡུ་སྨོན་ལམ་བཀྲ་ཤིས་རྣམས་སྤྱི་དང་འདྲ། ལག་ལེན་གྱི་སྙིང་པོ་འདི་ཁོ་ནས་ཆོག་ལ། སྤྱན་འདྲེན། བཞུགས་གསོལ། མཆོད་འཕྲེང༌། བསྟོད་པ། འཕྲིན་བཅོལ་རྣམས་རྒྱས་པ་ལ་དགའ་ན་གཞན་དུ་ཤེས་པར་བྱའོ། །འདིའི་བཀའ་གཏད་བྱ་བར་འདོད་ན། གཏོར་མ་རྒྱས་པའི་ལུགས་བྱེད་དེ། དབུས་སུ་སྟེགས་བུ་མཐོ་བ་ལ་མཎྜལ་ཚོམ་བུར་བཅས་པ་མཆོད་པས་བསྐོར་བ་ཞིག་བཤམ། བྱང་དུ་གཏོར་མ་རི་རབ་གླིང་བཞིའི་རྣམ་པ་ཅན་ཤིང་ཐོག་དང་ནོར་སྣས་བརྒྱན་པ། ཤར་དུ་ཟླུམ་གཏོར་དྲི་སྣ་ཚོགས་ཀྱིས་བརྒྱན་ཞིང༌། ཁྲག་སྣའི་མཆོད་ཡོན་ཅན། ལྷོ་རུ་གྲུ་གསུམ་ཉ་དང་ཤ་ཁྲག་ཅན། ནུབ་ཏུ་ཟླ་གམ་འོ་མ་དང་མེ་ཏོག་ཅན་སོ་སོའི་མཐེབ་ཀྱུ་མང་པོས་བསྐོར་བ། འབྱུང་པོ་སྤྱིའི་གཏོར་མ་དང༌། རྨེ་གཏོར་ཆང་བུའི་ཚུལ་ཅན་ཀྱང་བཤམ། རེ་རེ་བཞིན་མཆོད་པ་ཆ་ཚང་རེ་ལས་མི་ཉུང་བར་བྱེད།
གཏོར་མའི་རྩེ་མོ་ལ་སོ་སོའི་ཙ་ཀ་ལི་རྣམས་འཛུགས། བགེགས་གཏོར་བཏང༌། སྲུང་འཁོར་བསྒོམ། གནས་ཡོ་བྱིན་རླབས་བྱ། དེ་ནས་གོང་དུ་བཤད་པ་བཞིན་འདོད་དོན་གསོལ་བཏབ་ཡན་ཆད་སློབ་དཔོན་གྱིས་རྫོགས་པར་སྒྲུབས། སློབ་མས་མཎྜལ་ཕུལ། རྡོ་རྗེ་འཛིན་པ་སོགས་ཀྱིས་གསོལ་བ་བཏབ། སྐྱབས་འགྲོ་སེམས་བསྐྱེད་རྒྱས་བསྡུས་གང་རུང་རེ་འབོགས། རྒྱུན་བཤགས་ཡན་ལག་བདུན་པའང་གང་རུང་རེ་བྱར་བཅུགསློབ་མའི་བློ་ངོར་མདུན་བསྐྱེད་རྫོགས་པར་གསལ་འདེབས། སློབ་མ་ཉིད་ཡི་དམ་གང་རུང་གི་ངོ་བོར་གསལ་བཏབ། རོལ་མོའི་སྒྲ་དང་བཅས་རྒྱལ་ཆེན་བཞི་སྤྱན་འདྲེན་པ་ནས། མཆོད་བསྟོད། གདན་འབུལ། དམ་ཡེ་བསྲེ་བའི་བར་གོང་བཞིན། སློབ་མའི་སྙིང་གར་ཡི་དམ་གྱི་ས་བོན་ལ་སྙིང་པོས་བསྐོར་བ། དེའི་མཐར་སྔགས་འཕྲེང་འཁོར་བའི་དམིགས་པ་དང་བཅས་པའི་བཟླས་ལུང་སྤྱི་དང་མཐུན་པར་སྦྱིན། སློབ་མས་ཕུལ་བར་མོས་ཏེ། གཏོར་མ་ཁ་གསོས་སོ་སོར་འབུལ། མཆོད་པའང་ཁ་གསོས་ཏེ་བྱིན་གྱིས་བརླབས་ལ་མཆོད་བསྟོད་བྱ། རེ་རེ་བཞིན་གཏོར་མ་ལག་ཏུ་རིམ་པས་གཏད་ལ་བཀའ་བསྒོ་དྲག་ཏུ་བྱ། རྗེས་ཀྱི་བྱ་བ་ནི་སྤྱི་དང་མཐུན། དགེ་བསྙེན་སྔགས་པ་མ་ཡིན་པའི་ཁྱིམ་པ་ཕལ་བ་ལ་བྱེད་ན། སློབ་མ་ཡི་དམ་དུ་མ་བསྐྱེད་པར་གཏོར་མ་མགོ་བོར་བཞག་སྟེ་གཏོར་དབང་བསྐུར་ན་ལེགས་པར་གསུང་སྟེ། སྤྱིར་དེ་འདྲ་བ་ལ་སྔགས་སྦྱྀན་པ་རྒྱུད་སྡེའི་དགོངས་པ་མིན་ཡང༌། ཡུལ་ཆོས་ཀྱི་དེང་སང་ཐམས་ཅད་བྱེད་པ་ལྟར་ན། དེ་ལྟར་ཤིས་པ་ཡིན་ཏེ། འདིས་གཞན་ཐམས་ཅད་ལའང་རིགས་འགྲེའོ། །ཡང་འདི་ལ་བུམ་པ་
བཅས་ཏེ་ལྷ་མི་བསྐྱེད་པར་སོ་སོའི་སྔགས་བཟླས་ལ། བཟླས་ལུང་གི་སྔོན་དུ་བུམ་པའི་ཆུས་དབང་བསྐུར་ཏེ། སྔགས་དབང་བསྐུར་བའི་ཐ་སྙད་དུ་མཛད་པའི་ཕྱག་ལེན་ཡང་གདའ་བ་ཤིན་ཏུ་ལེགས་པར་མངོན་ནོ། །དེས་སང་མཐུ་དང་དཔལ་འདོད་ཀུན༵། །ཡུལ་འདྲེ་གདུགས་ཅན་སྒྲུབ་ལ་དག༵འ། །སྙིང༵་ནས་ཆོས་འབྱོར་རྒྱས་འདོད་ན། །བཟང་པོ༵འི་ལྷ་ནི་སྒྲུབས་ཤིག་ཀྱེ། །རྒྱལ་པོ་ཆེན་པོ་བཞིའི་སྒྲུབ་ཐབས་ཀྱི་ལེ་ཚན་ནོ།། །།དགེའོ། །
ཚེ་རིང་མཆེད་ལྔའི་སྒྲུབ་ཐབས།
ཨོཾ་སྭཱ་སྟི། བླ་མ་ཡི་དམ་སངས་རྒྱས་ལ། །བཏུད་ནས་སྔགས་རིག་ཐམས་ཅད་ཀྱི། །ལེགས་པར་སྒྲུབ་ལ་ཉེར་མཁོ་བའི། །སྒྲུབ་ཐབས་ཅུང་ཟད་ཙམ་ཞིག་བྲི། །བདག་ཉིད་གསང་སྔགས་ནང་གི་ཡི་དམ་གང་ཡང་རུང་བའི་བདག་བསྐྱེད་ལ་གནས་པས། རང་གི་མདུན་གྱི་ནམ་མཁར་ཧཱུཾ་ལས་བྱུང་བའི་བསྲུང་འཁོར་དང༌། ཆོས་འབྱུང་ནམ་མཁའི་ཁམས་ཀྱི་དབུས་སུ་གཞལ་མེད་ཁང་དངོས་གྲུབ་འབྱུང་བའི་དུར་ཁྲོད་དང་བཅས་པའི་དབུས་སུ་པདྨའི་གདན་ལྔ་ཚོམ། དབུས་སུ་ཟླ་བ་ལ་ཨོཾ་ལས་སངས་རྒྱས་མཁའ་འགྲོ་མ་དཀར་མོ་རྣམ་སྣང་གི་དབུ་རྒྱན་ཅན། ཞི་བའི་ཉམས་ལྡན། ཤར་དུ་ཉི་མ་ལ་ཧཱུཾ་ལས་རྡོ་རྗེ་མཁའ་འགྲོ་མ་སྔོན་མོ་མི་བསྐྱོད་པའི་དབུ་རྒྱན་ཅན། ཁྲོ་བའི་ཉམས་ལྡན། ལྷོ་རུ་ཟླ་བ་སེར་པོ་ལ་ཏྲཾ་ལས་རིན་ཆེན་མཁའ་འགྲོ་མ་སེར་མོ་རིན་ཆེན་འབྱུང་གནས་གྱི་དབུ་རྒྱན་ཅན། དགྱེས་པའི་ཉམས་ལྡན། ནུབ་ཏུ་ཉི་མ་དམར་པོ་ཟེར་དང་བྲལ་བ་ལ་ཧྲཱིཿལས་པདྨ་མཁའ་འགྲོ་མ་དམར་མོ་
འོད་དཔག་མེད་ཀྱི་དབུ་རྒྱན་ཅན། ཆགས་པའི་ཉམས་ལྡན། བྱང་དུ་སྣ་ཚོགས་རྡོ་རྗེ་ལ་ཨ་ལས་སྣ་ཚོགས་མཁའ་འགྲོ་མ་ལྗང་ཁུ་དོན་གྲུབ་ཀྱི་དབུ་རྒྱན་ཅན། ཁྲོ་ཞིང་བཞད་པ་སོགས་ཉམས་སྣ་ཚོགས་པ། ཐམས་ཅད་ཀྱང་གཡས་ཅང་ཏེ་འཁྲོལ་ཞིང༌། གཡོན་པས་ཐོད་པ་བདུད་རྩིས་གང་བ་ཐུགས་ཀར་འཛིན་པ། མི་མགོ་སྐམ་པོ་ལྔའི་དབུ་རྒྱན། རློན་པ་ལྔ་བཅུའི་དོ་ཤལ་རུས་པའི་ཕྱག་རྒྱ་ལྔ་དང་བཅས་པ། དབུ་སྐྲ་ནག་པོ་ཕྱེད་བཅིངས་སུ་གནས་པ། མཆན་ཁུང་གཡོན་དུ་ཐབས་ཀྱི་རང་བཞིན་གྱི་ཁ་ཊཱཾ་ག་ལ་རིམ་པ་བཞིན་དུ་འཁོར་ལོ་རྡོ་རྗེ་རིན་པོ་ཆེ་པདྨ་རལ་གྲི་རྣམས་ཀྱིས་མཚན་པ། འོད་ཟེར་སྣ་ལྔ་འབར་བའི་དབུས་ན་བཞུགས་ཤིང༌། རང་མཚུངས་ཀྱི་མཁའ་འགྲོ་མ་གཙོ་མོ་འབུམ་འབུམ་དང་འཁོར་མཁའ་འགྲོ་གྲངས་མེད་པས་ཡོངས་སུ་བསྐོར་བའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ག་ནས་འོད་ཟེར་དཔག་ཏུ་མེད་པ་འཕྲོས། རང་བཞིན་གྱི་གནས་དང་ཕྱོགས་མཚམས་ཐམས་ཅད་ནས་གཙོ་མོ་ཡེ་ཤེས་མཁའ་འགྲོ་ལྔ་ལ་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་གྲངས་མེད་པས་བསྐོར་བ་བཛྲ་ས་མཱ་ཛཿ རྡོ་རྗེ་རྩེ་ལྔ་པའི་ཕྱག་རྒྱ་གཡབ་ཅིང༌། ཨོཾ་ཤྲཱི་ཧེ་རུ་ཀ་མཧཱ་བཛྲ་ཨ་ཀརྡྷ་ཡ། ཨ་ཀརྡྷ་ཡ། པྲ་བེ་ཤ་ཡ། པྲ་བེ་ཤ་ཡ། བནྡྷ་ཡ།
བནྡྷ་ཡ། ཏོ་ཥ་ཡ། ཏོ་ཥ་ཡ། སརྦ་བཛྲ་ཌཱ་ཀི་ནཱཾ། ཧྲི་ད་ཡཾ་ཧཱུཾ་ཧཱུཾ་ཕཊ་ཕཊ། ལན་གསུམ་གྱིས་སྤྱན་དྲངས། ཛཿཧཱུཾ་བཾ་ཧོཿ ལན་ལྔ། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་ཧཱུཾ་ཏྲཾ་ཧྲཱིཿཨ། ཨོཾ་ཨཱཿཧཱུཾ། དཔལ་ལྡན་རྡོ་རྗེ་མཁའ་འགྲོ་མ་སོགས་ཤོ་ལོ་ཀ་གཉིས་ཀྱིས་བསྟོད། ཨོཾ་བུདྡྷ་ཌཱ་ཀི་ནཱི་ཨཱཿཧྲི་ཨོཾ་ཧཱུཾ་ཕཊ་སྭཱཧཱ། ཨོཾ་བཛྲ་ཌཱ་ཀི་ནཱི་ཨཱཿཧྲི་ཧཱུཾ་ཧཱུཾ་ཕཊ་སྭཱཧཱ། ཨོཾ་རཏྣ་ཌཱ་ཀི་ནཱི་ཨཱཿཧྲི་ཏྲཾ་ཧཱུཾ་ཕཊ་སྭཱཧཱ། ཨོཾ་པདྨ་ཌཱ་ཀི་ནཱི་ཨཱཿཧྲི་ཧྲཱིཿཧཱུཾ་ཕཊ་སྭཱཧཱ། ཨོཾ་ཀརྨ་ཌཱ་ཀི་ནཱི་ཨཱཿཧྲི་ཨ་ཧཱུཾ་ཕཊ་སྭཱཧཱ། སྤྱི་དྲིལ་གྱི་སྔགས་ནི། ཨོཾ་ཨཱཿཨོཾ་ཧཱུཾ་སྭཱ་ཨ་ཧཱ་ཧཱུཾ་ཕཊ་སྭཱཧཱ། ཞེས་པ་རྣམས་བཟླས་པ་བྱའོ། །མཆོད་གཏོར་བདག་བསྐྱེད་དང་མཐུན་པར་བྱིན་གྱིས་བརླབས་ནས། ཕུད་ཀྱི་དང་པོའི་གཏོར་མ། ཨོཾ་ཤྲཱི་ཧེ་རུ་ཀ་མཧཱ་བཛྲ་པྲ་ཏཱིཙྪ་ཨི་མཾ་བཱ་ལིང་ཧཱུཾ་ཕཊ། ལན་བདུན་གྱིས་ཕུལ། དེ་ནས་མཁའ་འགྲོ་ལ་འབུལ་བ་ནི། ཨོཾ་བུདྡྷ་ཌཱ་ཀི་ནཱི་པྲ་ཏཱིཙྪ་ཨི་མཾ་བཱ་ལིཾ་ཨོཾ་ཕཊ། ཨོཾ་བཛྲ་ཌཱ་ཀི་ནཱི་པྲ་ཏཱིཙྪ་ཨི་མཾ་བཱ་ལིང་ཧཱུཾ་ཕཊ། ཨོཾ་རཏྣ་ཌཱ་ཀི་ནཱི་པྲ་ཏཱིཙྪ་ཨི་མཾ་བཱ་ལིཾ་ཏྲཾ་ཕཊ། ཨོཾ་པདྨ་ཌཱ་ཀི་ནཱི་པྲ་ཏཱིཙྪ་ཨི་མཾ་བཱ་ལིཾ་ཧྲི་ཕཊ། ཨོཾ་བི་ཤྭ་ཌཱ་ཀི་ནཱི་པྲ་ཏཱིཙྪ་ཨི་མཾ་བ་ལིཾ་ཨ་ཕཊ། ཨོཾ་སརྦ་ཌཱ་ཀི་ནཱི་པྲ་ཏཱིཙྪ་ཨི་མཾ་བཱ་ལིཾ་ཧོ་ཕཊ། ཅེས་ལན་གསུམ་སོགས་ཀྱིས་ཕུལ། རྒྱས་པར་ན་ཚིགས་བཅད་དང་བཅས་པ་དང༌། བསྡུ་ན་སྔགས་ཙམ་གྱིས་ཕྱི་མཆོད་ནང་མཆོད་གསང་མཆོད་རྣམས་ཕུལ། མི་བསྐྱོད་རྡོ་རྗེ་ཡེ་ཤེས་ཆེ། །སོགས་དེ་ཉིད་ལྔ་པས་བསྟོད། ཆོས་རྣམས་གཟུགས་བརྙན་ལྟ་བུ་སྟེ། །ནས། སངས་རྒྱས་རིགས་སུ་སྐྱེ་ཞེས་པའི་བར་བརྗོད། མཆོད་སྦྱིན་གཏོར་
མ་འདི་བཞེས་ལ་སོགས་འདོད་དོན་གསོལ་བ་བཏབ། ཡིག་བརྒྱ་བཟོད་གསོལ། གཤེགས་གསོལ། དམ་ཚིག་པ་རང་ལ་བསྡུ་བ། བདག་བསྲུང་སྨོན་ལམ་བཀྲ་ཤིས་རྣམས་བྱའོ། །གོང་གི་གཏོར་ཆོག་དེ་ཉིད་ཀྱིས་ལན་བརྒྱ་རྩ་བརྒྱད་འབུལ་བ་དང༌། ལྔ་ཚན་ལྔ་པའི་གཏོར་མ་ཐུན་བཞིར་འབུལ་བ་གཏོར་མ་བརྒྱ་པ་དང༌། བཞི་ཚན་བཅུ་དྲུག་ཏུ་འབུལ་བ་དབྱུ་གུའི་གཏོར་མ་སྟེ། རྒྱས་པ་དང༌། ཞི་བ་དང༌། དབང་དྲག་གི་ལས་ལ་བསྔགས་སོ། །དེ་དག་གི་ལག་ལེན་དང༌། ལས་བྱང་གཞན་དུ་ཤེས་པར་བྱའོ། །འདིའི་གཏོར་དབང་ནི། ཆོས་འབྱུང་གི་དངོས་སུ་ཚོམ་བུ་ལྔ་བཀོད། དེའི་སྟེང་དུ་གཏོར་མ་ལྔ་ལ་མཁའ་འགྲོ་སྡེ་ལྔའི་གཟུགས་སམ། སྔགས་བྱང་འཛུགས། སྟེགས་བུ་མཐོ་བ་ཞིག་ལ་ཕུད་གཏོར་ཆུང་བ་ཞིག་བཤམ། མཆོད་པ་རྣམས་སྤྱི་བདེར་བསྒྲིགས་ནས་གོང་བཞིན་ཉམས་སུ་བླངས་པས་སློབ་དཔོན་གྱི་བྱ་བ་གྲུབ་པ་ཡིན། སློབ་མས་མཎྜལ་ཕུལ། ཀུན་མཁྱེན་ཡེ་ཤེས་ཕུང་པོ་ཅན། །སོགས་ཀྱིས་གསོལ་བ་བཏབ། རྒྱུན་བཤགས་ཡན་ལག་ལྔ་པའམ་བདུན་པ་གང་རུང་བྱ། སློབ་མའི་སྙིང་གར་མཁའ་འགྲོ་སྡེ་ལྔ་བསྐྱེད་ཅིང་མཆོད་བསྟོད་བྱ་བའི་བར་གོང་བཞིན་དམིགས་པ་ཕོགདེ་ནས་གཏོར་མ་ཁ་གསོས་ལ། གཏོར་ཆོག་བཞིན་བསྔོས་ནས། གཏོར་དབང་སྤྱི་དང་མཐུན་པར་བསྐུར་བ་ཡིན། རྗེས་ཀྱི་བྱ་བ་སྤྱི་དང་འདྲའོ། །ཀུན་ནས་ཉམས་ཆགས་བསྐང་པ་དང༌། །ལས་སྒྲུབ་གང་ལའང་ཤིས་ཤིང་དག༵འ། །སྒྲུབ་པོ་ཀུན་ལ་མཁོ་བ་འདི། །སྙིང༵་ནས་བརྩེ་བའི་མྱུར་པོ༵ར་བྲིས། །མཁའ་འགྲོ་སྡེ་ལྔའི་སྒྲུབ་ཐབས་
གྱི་ལེ་ཚན་ནོ།། །།སྐྱེ་བོ་འགའ་ལ་ཕན་གདགས་ཕྱིར། །ཚེ་རིང་མཆེད་ལྔའི་སྒྲུབ་ཐབས་བཤད། ༈ ཨོཾ་སྭཱ་སྟི། བླ་མ་མཆོག་དང་རྗེ་བཙུན་མ། །རྣལ་འབྱོར་མ་དཔལ་ཞབས་བཏུད་ནས། །སྐྱེ་བོ་འགའ་ལ་ཕན་གདགས་ཕྱིར། །ཚེ་རིང་མཆེད་ལྔའི་སྒྲུབ་ཐབས་བཤད། །ལྷན་ཅིག་སྐྱེས་མ་ལ་སོགས་པ་གང་ཡང་རུང་བའི་བདག་བསྐྱེད་སྔོན་དུ་འགྲོ་བས། མཆོད་པ་དང་གཏོར་མ་བྱིན་རླབས་སྤྱི་དང་མཐུན་པར་བྱ། སྭ་བྷཱ་ཝས་སྣོད་བཅུད་སྟོང་པར་སྦྱངས། སྟོང་པའི་ངང་ལས་རང་གི་མདུན་དུ་གཙོ་མོ་བཀྲ་ཤིས་ཚེ་རིང་མ་སྐུ་མདོག་དཀར་མོ་འཛུམ་ཞིང་ཡིད་ཙམ་ཁྲོ་བ། ཞལ་གཅིག་ཕྱག་གཉིས་སྤྱན་གསུམ་མ། གཡས་གསེར་གྱི་རྡོ་རྗེ་རྩེ་དགུ་འཕྱར་བ། གཡོན་བདུད་རྩིས་གང་བའི་བུམ་པ་ཐུགས་ཀར་འཛིན་པ། དུང་གི་ཐོར་ཚུགས་ཅན་སེང་གེ་དཀར་མོ་ལ་ཆིབས་པ། མདུན་དུ་མཐིང་གི་ཞལ་བཟང་མ་སྔོན་མོ་འཕྲུལ་གྱི་མེ་ལོང་དང༌། ཁ་ནང་དུ་གཡོབ་པའི་བ་དན་དཀར་པོ་འཛིན་པ། ཨིནྡྲ་ནཱི་ལའི་ཐོར་ཚུགས་ཅན་རྐྱང་བུ་ཁ་དཀར་ལ་ཞོན་པ། གཡས་སུ་མི་གཡོ་གླང་བཟང་མ་སེར་མོ་གཡོན་ཟས་མཆོག་གིས་གང་བའི་སྣོད་འཛིན་ཞིང༌། གཡས་པའི་མཐེབ་སྲིན་གྱིས་གཞན་ལ་སྟེར་བའི་ཚུལ་ཅན། གསེར་གྱི་ཐོར་ཚུགས་ཅན་སྟག་མོ་བྲུས་མ་ལ་ཞོན་པ། རྒྱབ་ཏུ་ཅོད་པན་མགྲིན་བཟང་མ་དམར་མོ། ནོར་བུའི་སྒྲོམ་བུ་ནོར་སྣ་ཚོགས་ཀྱིས་གང་བ་འཛིན་པ། བྱི་རུའི་ཐོར་ཚུགས་ཅན་ཤྭ་བ་ཡུ་མོ་ལ་ཞོན་པ། གཡོན་དུ་གཏད་དཀར་འགྲོ་བཟང་མ་ལྗང་ཁུ་དུར་བའི་
ཆུན་པོ་དང་སྦྲུལ་ཞགས་འཛིན་པ། གཡུའི་ཐོར་ཚུགས་ཅན་གཡུ་འབྲུག་སྔོན་མོ་ལ་ཞོན་པ། གཙོ་འཁོར་གསུམ་ལྷ་མོ་དང༌། གཉིས་མི་མོའི་རྣམ་པ་དར་དང་མེན་ཏྲི་སྣ་ཚོགས་བརྩེགས་པའི་ན་བཟའ་ཅན། གསེར་གཡུ་སོགས་རིན་པོ་ཆེ་སྣ་ཚོགས་པའི་ཕོ་རྒྱུད་དང༌། འགྱིང་ཐོད་སོགས་རྒྱན་ཐམས་ཅད་ཀྱིས་བརྒྱན་པའོ། །དེ་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་གའི་ཧཱུཾ་ལས་འོད་ཟེར་འཕྲོས། ཚེ་རིང་མཆེད་ལྔ་འཁོར་དང་བཅས་པ་བཛྲ་ས་མཱ་ཛཿ སྔོན་ཚེ་དུར་ཁྲོད་བསིལ་ཚལ་དུ། །མཁའ་འགྲོ་སེང་གེའི་གདོང་ཅན་དང༌། །བར་དུ་ཁ་ལ་རོང་སྒོ་རུ། །སློབ་དཔོན་པདྨ་འབྱུང་གནས་དང༌། །ཐ་མ་སྨན་ལུང་ཆུ་བར་དུ། །དཔལ་ལྡན་བཞད་པ་རྡོ་རྗེ་ཡི། །སྤྱན་སྔར་ཁས་བླངས་དམ་བཅས་པ། །མཁའ་འགྲོ་ལྔ་པོ་གནས་འདིར་གཤེགས། །ཕྱི་ལྟར་ལྷ་སྨན་ཆེན་མོ་ལྔ། །ནང་ལྟར་ཞིང་སྐྱོང་མཁའ་འགྲོ་ལྔ། །གསང་ལྟར་རིགས་ཀྱི་ཡུམ་ཆེན་ལྔ། །མཆོད་པའི་གནས་འདིར་གཤེགས་སུ་གསོལ། །ཨེ་ཨ་རལླྀ་ཧྲིཾ་ཧྲིཾ་ཛཿ ཛཿཧཱུཾ་བཾ་ཧོཿ དེ་ནས་འདོད་དོན་གསོལ་བཏབ་དྲག་ཏུ་བྱ་ཞིང༌། བྱ་ཁྱུང་གི་ཕྱག་རྒྱ་བཅའོ། །དེ་ནས་འདི་སྐད་ཅེས། ཉི་མ་ནུབ་ཕྱོགས་ཕ་གི་ན། །གངས་དཀར་དགུང་དུ་རྩེ་མཐོ་བ། །མཐོ་ལ་གཉན་ནོ་ཚེ་
རིང་མ། །དེ་ལ་བརྟེན་པའི་ལྷ་མོ་ནི། །གཙོ་མོ་བཀྲ་ཤིས་ཚེ་རིང་མ། །འཁོར་དུ་འཇིག་རྟེན་དམན་མོ་བཞི། །ཅོད་པན་མགྲིན་བཟང་མ་དང་ནི། །མཐིང་གི་ཞལ་བཟང་མ་དང་བཅས། །མི་གཡོ་གླང་བཟང་མ་དང་ནི། །གཏད་དཀར་འགྲོ་བཟང་མ་དང་བཅས། །གཙོ་མོ་འཁོར་བཅས་ཐམས་ཅད་ནི། །སྐུ་ལ་དར་དཀར་ན་བཟའ་གསོལ། །རྫུ་འཕྲུལ་ཆེན་པོ་མངའ་བ་རྣམས། །བསྟན་མ་བཅུ་གཉིས་འཁོར་དང་བཅས། །དེ་རིང་གནས་འདིར་སྤྱན་འདྲེན་ན། །མཆོད་གཏོར་འདི་བཞེས་དངོས་གྲུབ་སྩོལ། །ཨོཾ་བཛྲ་ས་མཱ་ཡ་ཌཱ་ཀི་ནཱི་པཉྩ་མ་མ་སརྦ་ཀརྨ་སིདྡྷི་ཛྙཱ་ན་ཨི་དཾ་བཱ་ལིཾ་ཁ་ཁ་ཁཱ་ཧི་ཁཱ་ཧི། ཞེས་ལན་བདུན་གྱིས་འབུལ། ཧཱུཾ། རྡོ་རྗེ་གདན་གྱི་བྱང་ཕྱོགས་ན། །བལ་བོད་གཉིས་ཀྱི་ས་མཚམས་ན། །གངས་དཀར་ཤེལ་གྱི་ཅོད་པན་ཅན། །ཕུ་ཆུ་སྙན་པའི་རྒྱུན་སྒྲ་ཅན། །ནགས་ལ་མེ་ཏོག་ཤམ་བུ་ཅན། །གཡའ་སྤང་གསེར་གཡུའི་སྐེད་བཅིངས་ཅན། །གནས་མཆོག་དེ་འདྲའི་གཡོན་མགུལ་ན། །དར་དཀར་གུར་གྱི་ནང་ཤེད་ན། །སྨན་མོ་བཀྲ་ཤིས་ཚེ་རིང་མ། །གདུང་བ་དྲག་པོས་ཁྱོད་འབོད་ན། །དེ་རིང་སྒྲུབ་པའི་གནས་མཆོག་འདིར། །ལྷབ་ལྷུབ་ན་བཟའ་རྒྱན་དང་བཅས། །སིལ་སྙན་རོལ་མོའི་སྒྲ་དང་བཅས། །ནམ་མཁའི་མཐོངས་ནས་སྤྱན་འདྲེན་ན། །འཁོར་དང་བཅས་
ཏེ་གཤེགས་སུ་གསོལ། ཁྱོད་ཀྱི་ཆོ་དང་འབྲང་སྨོས་ན། །ཡབ་ནི་ལྷོ་ལྷ་འཐེང་པོ་ཡིན། །ཡུམ་ནི་འབྲང་ཡུམ་སྨན་གཅིག་མ། །མིང་པོ་བདུན་ལ་སྲིང་མོ་ལྔ། །ལྔ་ཚིགས་དབུས་ཀྱི་གཙོ་མོ་སྟེ། །ཞལ་བཟང་ཟླ་བ་ཉ་གང་འདྲ། །ལྷ་མོ་རྣམས་ཀྱང་ཟིལ་གྱིས་གནོན། །མགྲིན་པ་གཅིག་ལ་གླུ་རྟ་སྟོང༌། །ཚངས་པའི་དབྱངས་ཀྱང་ཟིལ་གྱིས་གནོན། །དབུ་སྐྲ་ཉག་མ་རེ་རེ་ལ། །གཡུ་ཕྲན་སྟོང་སྟོང་ལན་ཚར་བཅས། །ན་བཟའ་དར་དཀར་གོ་ཟུ་གསོལ། །ཉིན་གསུམ་གངས་དཀར་རྩེ་ལ་བཞུགས། །སྨན་མོ་རྣམས་དང་ལྷན་ཅིག་རོལ། །མཚན་གསུམ་རྒྱ་གར་ཡུལ་དུ་བཞུགས། །ཤིན་ཏུ་འཇིགས་པའི་དུར་ཁྲོད་དུ། །ཌཱ་ཀི་རྣམས་དང་ཚོགས་ལ་རོལ། ཁྱེད་ལ་མཆོད་པ་འབུལ་བ་ནི། །བདུད་རྩི་སྨན་གྱི་རྩེ་ཕུད་དང༌། །མེ་ཏོག་ཡིད་འོང་མཛེས་པའི་ཚལ། །དྲི་ཞིམ་ཕུན་ཚོགས་བདུག་སྤོས་དང༌། །འོད་དང་དྲི་མཆོག་བཤོས་གཙང་དང༌། །སྒྲ་སྙན་གསང་བའི་རྔེའུ་ཆུང་རྣམས། །ཐུགས་རྗེས་བརྩེར་དགོངས་བཞེས་ནས་ཀྱང༌། །ཡིད་ལ་འདོད་པའི་དོན་གྲུབ་སྩོལ། །སྔོན་ཚེ་དབེན་གནས་ཡང་རྫོང་དུ། །དཔལ་ལྡན་བཞད་པ་རྡོ་རྗེ་ལ། །རང་རྟགས་སྲོག་གི་སྙིང་པོ་ཕུལ། །བཀའ་འབངས་བགྱིད་པར་རྩིས་ལ་ཕབ། །དངོས་གྲུབ་སྟེར་
བར་གཡར་དམ་བཅས། །དེ་རིང་མོ་བཙུན་རྒྱལ་མོ་ལ། །མིང་བོས་གསོལ་བ་འདེབས་ལགས་ན། །སྲིད་བསྲུང་རིགས་བརྒྱུད་དངོས་གྲུབ་དང༌། །བང་མཛོད་ནོར་གྱི་དངོས་གྲུབ་དང༌། །སྣང་གསལ་པྲའི་དངོས་གྲུབ་དང༌། །རྨ་གཡང་ཟས་ཀྱི་དངོས་གྲུབ་དང༌། །རྐང་བཞི་དུད་འགྲོའི་དངོས་གྲུབ་དང༌། །གཞན་ཡང་ཕྱི་ནང་གསང་བ་ཡི། །དངོས་གྲུབ་ཐམས་ཅད་བདག་ལ་སྩོལ། །གཞན་ཡང་གསོལ་བ་འདེབས་པ་ནི། །རྣལ་འབྱོར་བདག་གི་ལུས་མདངས་བསྐྱེད། །ནང་གི་རླུང་སེམས་དབང་དུ་བསྡུས། །ཕྱིའི་སྣང་བ་དབང་དུ་གྱིས། །འཕྲིན་ལས་ཐབས་ཀྱི་བསྟན་པ་སྤེལ། །ཚེ་རིང་དཔལ་བསྐྱེད་འཁོར་གཡོག་སྐྱོངས། །བསྟན་ལ་སྡང་བའི་དགྲ་བོ་རྣམས། །གཏོར་མ་འདི་དང་མཉམ་པོར་བཞེས། །བཅོལ་བའི་ལས་ཀྱི་འབྲས་བུ་དེ། །མཆིས་པར་མཛོད་ཅིག་མཐུ་རྩལ་ཅན། །ཞེས་བརྗོད་དེ། བསྟོད་པ་མཆོད་འཕྲེང༌། འཕྲིན་བཅོལ་ཐུགས་རྒྱུད་བསྐུལ་བ་རྣམས་དེ་ལ་ཚང་བ་ཡིན་ནོ། །བཟླས་པ་མི་བྱེད་ན། དེར་རྗེས་གཤེགས་གསོལ་བྱ། བཟླས་པ་བྱེད་ན། ཨོཾ་མ་མ་རུ་རུ་ཞེས་སོགས་འོག་ནས་འབྱུང་བ་ལྟར་བཟླས་པའི་མཐར། ཨརྒྷཾ་ནས་ཤཔྟའི་བར་གྱིས་མཆོད། མཁའ་འགྲོ་ཆེན་མོ་ལྔ་པོ་ནི། །རྫུ་འཕྲུལ་སྣ་ཚོགས་སྟོན་མཛད་པ། །ལས་རྣམས་ཐམས་ཅད་སྒྲུབ་མཛད་མ། །འཁོར་
དང་བཅས་ལ་ཕྱག་འཚལ་བསྟོད། །ཅེས་བསྟོད་ནས། བཟོད་གསོལ། གཤེགས་གསོལ། སྨོན་ལམ། བཀྲ་ཤིས་རྣམས་སྤྱི་དང་མཐུན་པར་བྱའོ། །འདིའི་རྗེས་གནང་བྱ་བར་འདོད་པས་ཡི་དམ་དང་འདི་ཉིད་ཀྱི་བྲིས་སྐུ་ཡོད་ན་བཀྲམ། དེའི་མདུན་དུ་གཏོར་མ་སོ་སོའི་གངས་རིའི་གཟུགས་ཅན་ནམ། ཟླུམ་གཏོར་བཤོས་བུ་རྩེ་རིང་ངམ། འབྲང་རྒྱས་ལྔ་ཚོམ་གྱི་རྣམ་པར་བྱས་ཀྱང་རུང་ངོ༌། །སོ་སོའི་ཙ་ཀ་ལི་ཡོད་ནའང་འཛུགས། རས་དཀར་པོའི་སྟེང་འབྲས་དཀར་གྱི་གཡུང་དྲུང་རིས་ཞིག་བྲིས། དེའི་སྟེང་དུ་མཉྫི་ལ་གཏོར་མ་བཀོད། འདི་ཉིད་ཀྱི་སྒྲུབ་པའི་སྐབས་ཀྱི་མཆོད་རྫས་རྣམས་འབྱོར་ན་ལེགས། མིན་ན་མཆོད་གཏོར་སྤྱི་དང་མཐུན་པར་བཤམ། གོང་དུ་བཤད་པ་ལྟར་གྱི་བདག་བསྐྱེད་ནས་བརྩམས། འཕྲིན་ལས་བཅོལ་ཞིང་བསྐུལ་བའི་བར་དུ་བྱས་ལ། སྙིང་པོ་ཅི་འགྲུབ་བཟླའོ། །དེ་ཡང༌། ཨོཾ་མ་མ་རུ་རུ་ཙིཏྟ་དྷ་ར་མེ་ཛུ་ཏི་ཧཱུཾ་བྷྱོཿཛཿ ཨོཾ་བཛྲ་བྷི་ཀྱཻ་མུ་ཏ་ཧཱུཾ་བྷྱོཿཛཿ ཨོཾ་བཛྲ་ཡ་ཏྲ་སིང་སིང་ཧཱུཾ་བྷྱོཿཛཿ ཨོཾ་ཨ་ཝི་ར་ནི་ཧཱུཾ་བྷྱོཿཛཿ ཨོཾ་ས་རི་ཏིང་ཏིང་ཁ་ཏི་ཛྙ་ན་ཧཱུཾ་བྷྱོཿཛཿ ཞེས་པ་རྣམས་སོ། །ཚེ་རིང་མཆེད་ལྔ་གནད་ལ་འབོད་པའི་སྲོག་སྔགས་རྣམས་བཟླ་བར་ཁ་ཅིག་འདོད་ཀྱང༌། སློབ་མ་ལ་བཀའ་གཏད་བྱེད་པའི་ཚེ། དེ་དག་བཟླ་དགོས་པའི་རྒྱུ་མཚན་མེད་ལ། གཉན་ཆ་ཆེ་ཞིང་མི་ཤེས་པར་འགྱུར་བའི་ཉེན་ཡོད་པས་མི་བཟླའོ། །དེ་ལྟར་བཟླས་པ་ཟིན་པའི་རྗེས་སུ་བུམ་པ་མཚན་དང་ལྡན་པ་བཅུད་སྣ་ཚོགས་ཀྱིས་གང་བ་ཁ་རྒྱན་ཅན་ཞིག་དང༌། གཡས་སུ་ཚེ་རིལ་དང༌། གཡོན་དུ་ཚེ་ཆང་རྣམས་བཤམས། བྷྲཱུཾ་ལས་བྱུང་
བའི་བུམ་པའི་ནང་དུ་རྒྱལ་བ་ཚེ་དང་ཡེ་ཤེས་དཔག་ཏུ་མེད་པ་མཚན་ཉིད་ཐམས་ཅད་ཡོངས་སུ་རྫོགས་པ་བཞུགས་པར་གྱུར། དེ་ལ་དམིགས་ཏེ། ཨོཾ་ཨ་མ་ར་ཎི་ཛཱི་ཝནྟཱི་ཡེ་སྭཱཧཱ། ཞེས་པ་ཅི་ནུས་བཟླ། ཚེ་དཔག་མེད་ཀྱི་སྐུ་ལས་བྱུང་བའི་བདུད་རྩིས་བུམ་པ་ཁེངས་ཤིང་ཆིལ་ཆིལ་ལུད་པ་ཀ་པཱ་ལའི་བདུད་རྩི་དང་འདྲེས། ཨོཾ་བཛྲ་ཨཱ་ཡུ་ཥེ་ཛྙཱ་ན་ཨ་མ་ར་ཎི་ཛཱི་ཝནྟཱི་ཡེ་སྭཱཧཱ། ཞེས་པ་བརྒྱ་རྩའམ། ཉེར་གཅིག་ཙམ་བཟླས། ཚེ་རིལ་ཤ་ལྔ་བདུད་རྩི་ལྔའི་རང་བཞིན་ཡེ་ཤེས་ཀྱི་བདུད་རྩིའི་ངོ་བོར་གནས་པ། མཾ་ཨཾ་ཙཾ་ཨ་ཏཾ་ཞེས་པ་རྣམས་ཞུ་བ་ལས་བྱུང་བའི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་མང་དུ་བཟླས། འོག་ཏུ་དགོས་པའི་དབང་རྫས་སོ་སོའི་བྲིས་སྐུ་ཙ་ཀ་ལི་དང༌། རྡོ་རྗེ། མེ་ལོང༌། ཟས་མཆོག་གི་སྣོད། ནོར་བུས་གང་བའི་གཞོང་པ། རྩྭ་རན་པ་མྱུ་གུ་དང་བཅས་པ་རྣམས་ཚང་བར་བྱས་ལ། སློབ་མ་རྣམས་ལ་ཆོས་བཤད་དང༌། འདི་ཉིད་ཀྱི་ལོ་རྒྱུས་ཅུང་ཟད་བྱ། སློབ་མས་མཎྜལ་འབུལ། ཕུན་ཚོགས་དངོས་གྲུབ་མ་ལུས་པ། །མྱུར་དུ་ཐོབ་པར་བྱ་བའི་ཕྱིར། །བདག་ལ་ཚེ་རིང་མཆེད་ལྔ་ཡི། །རྗེས་སུ་གནང་བ་སྩལ་དུ་གསོལ། ཞེས་ལན་གསུམ། གུར་ནས་འབྱུང་བའི་ཡན་ལག་བདུན་པ་ཚར་གསུམ། དེ་ནས་སློབ་དཔོན་གྱིས་འདི་སྐད་ཅེས་བརྗོད་དེ། ཁྱེད་རང་རྣམས་སྐད་ཅིག་ཙམ་གྱིས་རྗེ་བཙུན་མ་ལྷན་ཅིག་སྐྱེས་མ་སྐུ་མདོག་དམར་པོ་ཞལ་གཅིག་ཕྱག་གཉིས་སྤྱན་གསུམ་སྐྲ་གྲོལ་བ། གཡས་གྲི་གུག་
ནམ་མཁའ་ལ་འཕྱར་བ། གཡོན་ཐོད་ཁྲག་ཐུགས་ཀར་གཏོད་པ། མཆན་ཁུང་དུ་ཐབས་ཀྱི་རང་བཞིན་གྱི་ཁ་ཊྭཱཾ་ག་བཅུག་པ། ཞབས་གཡོན་བརྐྱང་པའི་གར་སྟབས་ཀྱིས་པད་ཉི་དང་མི་རོའི་གདན་ལ་འགྱིང་བ། གཅེར་བུ་ཐོད་སྐམ་གྱི་དབུ་རྒྱན། ཐོད་རློན་གྱི་དོ་ཤལ། རུས་པའི་ཕྱག་རྒྱ་ལྔས་བརྒྱན་པ། མེ་དཔུང་འབར་བའི་ཀློང་ན་བཞུགས་པའོ། །རང་གི་རྩ་བའི་བླ་མ་རྗེ་བཙུན་མི་ལ་བཞད་པ་རྡོ་རྗེ་སྐུ་ཤ་སྔོ་སངས། རས་དཀར་གྱི་ཤར་བུ་གསོལ་བ། ཆོས་འཆད་ཀྱི་ཕྱག་རྒྱ་ཅན་སྐྱིལ་ཀྲུང་དུ་བཞུགས་པ་ཞིག་གསལ་བཏབ་ཟེར་ཡང༌། རྗེ་བཙུན་བཞད་པ་དང་ཁོ་རང་གི་ཡི་དམ་དབྱེར་མེད་པ་དགྱེས་རྡོར་ཕག་མོ་གང་རུང་བསྒོམ་ན་ལེགས། དེའི་སྤྱི་བོར་བཅོམ་ལྡན་འདས་རྒྱལ་བ་ཚེ་དཔག་མེད་སྐུ་མདོག་དམར་པོ་མཉམ་བཞག་གི་ཕྱག་རྒྱ་མཛད་པ། འཆི་མེད་ཡེ་ཤེས་ཀྱི་བདུད་རྩིས་གང་བའི་བུམ་པ་བསྣམས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ་ཞིག་བཞུགས་པར་མོས། དེའི་ཐུགས་ཀར་ཟླ་བ་ལ་ཧྲཱིཿཡིག་གི་མཐར་སྔགས་ཀྱི་འཕྲེང་བས་བསྐོར་བ་ཞིག་མོས། དེ་རྣམས་ལ་མོས་གུས་དུང་བ་བྱས་པས་ས་བོན་སྔགས་འཕྲེང་དང་བཅས་པ་དེ་ལས་འོད་འཕྲོས། སངས་རྒྱས་བྱང་སེམས་ཐམས་ཅད་ཀྱི་ཐུགས་རྗེ་བྱིན་རླབས་མ་ལུས་པ་
ཐམས་ཅད་དང༌། ཁམས་གསུམ་སྣོད་བཅུད་ཐམས་ཅད་ཀྱི་བཀྲག་མདངས་བཅུད་མི་ཤིགས་པ་ཐམས་ཅད་ཡེ་ཤེས་ཀྱི་བདུད་རྩིའི་རྣམ་པར་ཚུར་བསྡུས། ཕྱག་གི་བདུད་རྩིའི་བུམ་པར་ཞུགས། འཆི་མེད་ཡེ་ཤེས་ཀྱི་བདུད་རྩིར་གྱུར་པ་གཞིར་གནས་ཀྱི་བདུད་རྩི་དང་འདྲེས། བུན་ཆིལ་གྱིས་ལུད་པ། རྩ་བའི་བླ་མའི་ངོ་བོ་རྗེ་བཙུན་བཞད་པ་རྡོ་རྗེའི་དབུ་གཙུག་ནས་ཞུགས་སྐུ་ལུས་གང༌། བླ་མ་ཡི་དམ་མཐའ་དག་གི་བྱིན་རླབས་ཀྱི་ངོ་བོ་བདུད་རྩི་གསང་བའི་སྒོ་ནས་བྱུང༌། ཁྱེད་རང་རྣམས་དང་མདུན་བསྐྱེད་ལྷ་མོའི་ལྔའི་སྤྱི་བོ་ནས་ཞུགས། ལུས་ཐམས་ཅད་གང་བར་མོས་པར་མཛོད། བུམ་པའི་ཆུས་དབང་བསྐུར་བཞིན་དུ། ཇི་ལྟར་བལྟམས་པ་ནས་སྐུ་ཁྲུས་གསོལ། ཨོཾ་ཨ་མ་ར་ཎིའི་མཐར་ཨཱ་ཡུར་པུཎྱེ་ཛྙཱ་ན་སིདྡྷི་ཏྭཾ་མེ་བྷ་ཝ་ཧཱུཾ། ཞེས་བརྗོད། བཀྲ་ཤིས་ཚེ་ཟན་དཔལ་གྱི་ཟས། །ཞེས་སོགས་ཀྱི་མཐར། ཨོཾ་མཾ་ཨཾ་ཙཾ་ཨ་ཏཾ་ཞེས་བརྗོད་ལ་ཚེ་རིལ་སྦྱིན། ཨ་མ་ར་ཎིའི་སྔགས་ཀྱིས་ཚེ་ཆང་སྦྱིན། དེ་ལྟར་ཁྱེད་རང་རྣམས་ལ་དབང་བསྐུར་བས་དྲེགས་པ་མཐའ་དག་དབང་དུ་འདུས་པའི་ནུས་པ་ཐོབ། མདུན་བསྐྱེད་ལྷ་མོ་ལྔ་ལ་དབང་བསྐུར་བས་དམ་ལ་གནས་ཤིང༌། ཁྱེད་རང་རྣམས་ལ་སེམས་ཤིན་དུ་འདུན་པར་གྱུར་སྙམ་པའི་མོས་པ་མཛོད། དེ་ནས་གཙོ་མོའི་གཏོར་མ་ཙ་ཀ་ལི་དང་བཅས་
པའམ། ཙ་ཀ་ལི་ཁོ་ན་གཏད་དེ། ཇོ་མོ་བཀྲ་ཤིས་ཚེ་རིང་མ། །དཔལ་འབར་བཀྲ་ཤིས་གཟི་བརྗིད་ཆེ། །མི་འགྱུར་ཡོན་ཏན་ཀུན་རྫོགས་མ། །སྲིད་བསྲུང་ཚེ་ཡི་དངོས་གྲུབ་སྩོལ། །ཞེས་བཀའ་བསྒོས་ཤིང༌། དམ་ཚིག་གི་ལག་སྦྲེལ་བས་དབུས་ཀྱི་ལྷ་མོ་དེ་ཉིད་བཞེངས་ཏེ། རང་ཉིད་རྡོ་རྗེ་ཕག་མོ་ལྷན་ཅིག་སྐྱེས་མར་གསལ་བ་ལ་གུས་པ་ཆེན་པོས་གཡས་སྐོར་དུ་བསྐོར་བ་ལན་གསུམ་དུ་བྱས་ནས། ཁྱེད་རང་རྣམས་ཀྱི་ལག་ཏུ་རང་རྟགས་གསེར་གྱི་རྡོ་རྗེ་གཏད་ཅིང་དངོས་གྲུབ་འབུལ་བར་གཡར་དམ་བཅས་པའི་མོས་པ་མཛོད། རྡོ་རྗེ་སློབ་མའི་ལག་ཏུ་གཏད་ལ། བཞད་པ་རྡོ་རྗེའི་སྤྱན་སྔ་རུ། །ཇི་ལྟར་ཁས་བླངས་དམ་བཅའ་བཞིན། །སྐལ་ལྡན་རིགས་ཀྱི་བུ་ཁྱོད་ལ། །སྲིད་བསྲུང་ཚེ་ཡི་དངོས་གྲུབ་འབུལ། །ཨོཾ་མངྒ་ལ་ཨཱ་ཡུར་པུཎྱེ་ཨ་ཛི་དྷ་ར་སྭཱཧཱ། ཞེས་བརྗོད། རིམ་པ་དེ་ཁོ་ནས་འོག་མ་རྣམས་ལ་ཡང་རིགས་འགྲེ་སྟེ། ཤར་གྱི་ཙ་ཀ་ལི་གཏད་ལ། ཇོ་མོ་མཐིང་གི་ཞལ་བཟང་མ། །དཔལ་འབར་བཀྲ་ཤིས་ཞེས་པ་ནས། ཀུན་རྫོགས་མ། །སྣང་གསལ་པྲའི་དངོས་གྲུབ་སྩོལ། །ཞེས་དང༌། ཤར་གྱི་ལྷ་མོ་བཞེངས་ནས། ཞེས་དང༌། སྐལ་ལྡན་རིགས་ཀྱི་བུ་ཁྱོད་ལ། །སྣང་གསལ་པྲའི་དངོས་གྲུབ་འབུལ། །ཨོཾ་ཨཾ་ཨིནྡྲ་ནཱི་ལ་མུ་ཁ་བྷ་དྲ་ཨ་ཛི་དྷ་ར་སྭཱཧཱ། ཞེས་འདོན་པ་སྤོ་ཞིང༌། མེ་ལོང་ལག་ཏུ་གཏོད་པ་རྣམས་
ཁྱད་པར་རོ། །དེ་བཞིན་དུ། ཇོ་མོ་མི་གཡོ་གླང་བཟང་མ། །ཞེས་དང༌། རྨ་གཡང་ཟས་ཀྱི་དངོས་གྲུབ་སྩོལ། །ཞེས་དང༌། རྨ་གཡང་ཟས༴ ཨོཾ་ཨ་ཨ་ཙ་ལ་ཧ་ས་ཨ་ཛི་དྷ་ར་སྭཱཧཱ། ཞེས་འདོན་པ་སྤོ་ཞིང༌། ལྷོའི་ཙ་ཀ་ལི་དང་ཟས་མཆོག་གི་སྣོད་གཏད། དེ་བཞིན་དུ། མཁའ་འགྲོ་ཅོད་པན་མགྲིན་བཟང་མ། ཞེས་དང༌། བང་མཛོད་ནོར་གྱི་དངོས་གྲུབ་སྩོལ། །ཞེས་དང༌། བང་མཛོད་ནོར་གྱི་དངོས་གྲུབ་འབུལ། །ཨོཾ་ཙ་མུ་ཀུ་ཊ་མ་དྷུ་ར་བྷ་དྲ་ཨ་ཛི་དྷ་ར་སྭཱཧཱ། ནུབ་ཀྱི་ཙ་ཀ་ལི་དང་ནོར་གཞོང་གཏད། དེ་བཞིན་དུ། ལྷ་མོ་གཏད་དཀར་འགྲོ་བཟང་མ། །ཞེས་དང༌། རྐང་བཞི་འཕེལ་བའི་དངོས་གྲུབ་སྩོལ། །ཞེས་དང༌། རྐང་བཞི་འཕེལ་བའི་དངོས་གྲུབ་འབུལ། ཨོཾ་ཏཾ་གཏད་བྷ་ཝ་ཛ་གད་བྷ་དྲ་ཨ་ཛི་དྷ་ར་སྭཱཧཱ། བྱང་གི་ཙ་ཀ་ལི་དང་རན་པའི་ཆུན་པོ་གཏད། དེ་ནས་གཏོར་མ་ལག་ཏུ་གཏད་ལ། རོལ་མོའི་སྒྲ་དང་བཅས། ཉི་མ་ནུབ་ཕྱོགས་ཕ་གི་ན། །ཞེས་པ་ནས། དེ་རིང་གནས་འདིར་སྤྱན་འདྲེན་ན། །སློབ་བུ་འདི་ཡི་ཕྱི་བཞིན་འབྲོངས། །ཕྱི་ནང་གསང་བའི་འགལ་རྐྱེན་སོལ། །སྤྱི་དང་ཁྱད་པར་དངོས་གྲུབ་སྩོལ། །བཅོལ་བའི་ལས་རྣམས་ཐམས་ཅད་སྒྲུབས། །ཞེས་བཀའ་བསྒོ་བྱས་པའི་མཐར། ཨོཾ་མ་མ་རུ་རུ་སོགས་སྙིང་པོ་མང་དུ་བཟླ། རྗེས་ཀྱི་བྱ་བ་སྤྱི་དང་འདྲའོ། །འདིའི་གཏོར་ཆོག་གི་ཚིག་ཆ་རྣམས་འདི་ལས་བསྡུས་པར་སྦྱར་ཀྱང་རུང་ཞིང༌། འདི་
ལས་ཆེས་མང་པོར་སྤེལ་བ་ནི། ཚེགས་ཆེ་བ་མ་གཏོགས་དོན་མེད་པའི་ཕྱིར་མི་དགོས་ལ། ཚིགས་བཅད་ཀྱང་ཕྱིས་ཀྱི་མཁས་པར་གྲགས་པས་སྦྱར་བའི་ལེགས་ལེགས་ལྟར་སྣང་བ་རྣམས་ལས། འདི་རྣམས་ཁོ་ན་སྣང་སྲིད་ཀྱི་དམ་ཅན་མགུ་བའི་ནུས་པ་ཆེ་བ་ཡིན་ལ། འདི་དག་འཇིག་རྟེན་དྲེགས་པ་ཕོ་མོའི་བཀའ་གཏད་ཀྱི་ལུགས་ཡིན་པས་ཟབ་པ་ལྟར་བཅོས་པའི་དམིགས་པ་དང་ཆོ་གའི་ཁྱད་པར་གཞན་མང་པོ་སྤེལ་བ་ལ་དགོས་པ་གཅིག་ཀྱང་མེད་དོ། །དེ་ནས་འདིའི་ཕྱི་ནང་གསང་གསུམ་གྱི་སྒྲུབ་པ་དང༌། སྤྱི་དང་སོ་སོའི་ལས་ཚོགས་ལ་ཞིབ་མོར་ངེས་པ་ཞིག་དོན་དུ་གཉེར་ན་རུང་གི གཏོར་ཆོག་དང་བཀའ་གཏད་ཀྱི་ཆོ་ག་འདི་ཙམ་ཁོ་ནས་ཆོག་པར་ཤེས་པར་བྱའོ། །ཀུན༵་ལས་ཟབ་མོར་བྱའོ་ཞེས། །དག༵འ་བར་བསྔགས་པའི་ཡི་གེ་ཡང༌། །མང་མོད་དལ་བའི་རྒྱུར་ཤེས་ནས། །སྙིང༵་པོ༵་ཙམ་ཞིག་སྦྱར་བ་ལགས། །ཚེ་རིང་མཆེད་ལྔའི་སྒྲུབ་ཐབས་ཀྱི་ལེ་ཚན་ནོ།། །།སྒྲུབ་ཐབས་རིན་ཆེན་འབྱུང་གནས་ལས། ཐ་མར་དགེ་བའི་དོན་དུ་ཉེར་མཁོའི་སྒྲུབ་ཐབས་འགའ་ཞིག་བཤད་པའི་སྐབས་ཏེ་ཉེར་བཞི་པའོ།། །།དར་རྒྱས་འཕེལ། །