ཁམས་གསུམ་དབང་དུ་སྡུད་པར་བྱེད་པའི་སྤྱན་རས་གཟིགས་ཀྱི་སྒྲུབ་ཐབས།
ཁམས་གསུམ་དབང་དུ་སྡུད་པར་བྱེད་པའི་སྤྱན་རས་གཟིགས་ཀྱི་སྒྲུབ་ཐབས་ནི། པད་ཉིའི་སྟེང་དུ་ཧྲཱིཿལས་རང་ཉིད་འཕགས་པ་སྤྱན་རས་གཟིགས་སྐུ་མདོག་དམར་པོ། ཡིད་ཙམ་ཁྲོ་ཞིང་ཆགས་པའི་ཉམས་ཅན། སྤྱན་གསུམ་གདངས་པ། རལ་པའི་ཅོད་པན་འཕྱང་བ། གཡས་ལྕགས་ཀྱུ་དང༌། གཡོན་རྡོ་རྗེའི་ཞགས་པ་འཛིན་པ། སྲིད་པ་གསུམ་གྱི་རང་བཞིན་ལུགས་གཉིས་ཞགས་པས་བཅིངས་པའི་སྟེང་དུ། པད་ཉི་ལ་རྡོ་རྗེ་སྐྱིལ་ཀྲུང་གིས་བཞུགས་པ། རིན་པོ་ཆེ་དང་རུས་པའི་རྒྱན་གྱིས་སྤྲས་པ། གཅེར་བུའམ་སྟག་ལྤགས་ཅན་ནམ། དར་གྱི་སྨད་དཀྲིས་ཅན་ཇི་ལྟར་མོས་པར་བསྒོམ། རྡོ་རྗེ་རྣལ་འབྱོར་མ་རྣམས་ཀྱིས་དབང་བསྐུར་བ་སྦྱིན་པ། བྱང་ཆུབ་སེམས་དཔའ་རྒྱན་སྣ་ཚོགས་དང་ལྡན་པ་རྣམས་ཀྱིས་མཆོད་པར་བྱེད་པ།
རིག་པ་འཛིན་པ་དང༌། ཁྱབ་འཇུག་དང༌། བདེ་བྱེད་དང༌། ཚངས་པ་ལ་སོགས་པས་གར་དང་རོལ་མོ་སྣ་ཚོགས་བྱེད་ཅིང༌། མགོ་འཕྲེང་དང་རུས་པས་བརྒྱན་པའི་འབྱུང་པོ་སྣ་ཚོགས་རྣམས་ཀྱིས་གདུགས་དང་རྔ་ཡབ་ལ་སོགས་པས་བཀུར་བསྟི་བྱེད་པའི་སྐུ་ཅན་ནོ། །རིགས་བདག་ནི་འོད་དཔག་མེད། སྔགས་ནི། ཧཱུཾ་ཧྲཱིཿཨ།། །།