cover

ཏཱ་ར་ནཱ་ཐའི་གསུང་འབུམ།

པོད། ཙ༽

ཏཱ་ར་ནཱ་ཐ།

Nitartha international

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

བཀའ་བབས་བདུན་ལྡན་གྱི་བརྒྱུད་པའི་རྣམ་ཐར།


TNT17_Page_0005
[མ་དཔེ་གཟིགས་ན་འདིར་གནོན།]

བཀའ་བབས་བདུན་ལྡན་གྱི་བརྒྱུད་པའི་རྣམ་ཐར་ངོ་མཚར་རྨད་དུ་བྱུང་བ་རིན་པོ་ཆེའི་ཁུངས་ལྟ་བུའི་གཏམ་ཞེས་བྱ་བ་བཞུགས།


TNT17_Page_0006
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟ། ན་མོ་གུ་རུ་ཝེ། བཀའ་བབས་བདུན་ལྡན་གྱི་བརྒྱུད་པའི་རྣམ་ཐར་ངོ་མཚར་རྨད་དུ་བྱུང་བ་རིན་པོ་ཆེའི་ཁུངས་ལྟ་བུའི་གཏམ་ཞེས་བྱ་བ། བླ་མ་དམ་པའི་ཞབས་ལ་ཕྱག་འཚལ་ལོ། །འགྲོ་བ་ཀུན་ལ་རྡོ་རྗེ་འཆང་གི་ལམ། །གསལ་མཛད་རྩ་བརྒྱུད་བླ་མའི་ཚོགས་རྣམས་ལ། །གུས་པའི་ཡིད་ཀྱིས་ཡང་ཡང་ཕྱག་འཚལ་ནས། །མཛད་པའི་ཚུལ་རྣམས་མདོ་ཙམ་བརྗོད་པར་བྱ། །གྲུབ་པའི་སྐྱེས་བུ་གཅིག་ཉིད་ཁོ་ན་ཡ། །ངོ་མཚར་སྤྱོད་པའང་རྫུ་འཕྲུལ་ལྗགས་ལྡན་པས། །བསྐལ་བརྒྱའི་བར་དུ་བརྗོད་པར་མི་ནུས་མོད། །འོན་ཀྱང་བླ་མའི་གསུང་ལས་འབྱུང་བཞིན་བྲི། །དེ་ལ་ཁོ་བོ་ཅག་གི་བླ་མ་དམ་པ་སངས་རྒྱས་སྦས་པའི་མགོན་པོ་ཞེས་བྱ་བའི་ཞལ་སྔ་ནས། དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་དང༌། གསུང་དབྱངས་ཡན་ལག་རྒྱ་མཚོ་ལ་སྐད་ཅིག་རེ་རེ་བཞིན་ཡང་འཇུག་


TNT17_Page_0007
[མ་དཔེ་གཟིགས་ན་འདིར་གནོན།]

པར་མཛད་པའི་འཕྲིན་ལས་ཅན་ཡིན་པའི་ཕྱིར། དམ་པའི་ཆོས་ཀྱི་བཀའ་ཇི་ཙམ་མངའ་བའི་ཚད་གཟུང་བར་ནི་ག་ལ་སྤྱོད། འོན་ཀྱང་རྗེ་ཉིད་ཀྱི་རྩ་བའི་བླ་མ་གྲུབ་ཆེན་ཞི་བའི་ཞལ་སྔ་ནས། བྱིན་རླབས་ཀྱི་བཀའ་བབས་བདུན་དང་ལྡན་པར་གྲགས་ཤིང༌། དེ་ཉིད་ཀྱི་གདམས་པ་མ་ལུས་པ་ཡང་རྗེ་ཉིད་ཀྱིས་ལེགས་པར་གསན་པ་ཡིན་ནོ། །དེ་ལ་བཀའ་བབས་དང་པོ་ན། ཕྱག་རྒྱ་ཆེན་པོའི་གདམས་ངག་ཡིན་ཏེ། དེ་ཡང་སློབ་དཔོན་ཆེན་པོ་བྲམ་ཟེ་སྒྲ་གཅན་འཛིན་ཞེས་བྱ་བ་ཡུལ་ཨོ་ཌི་བི་ཤར་འཁྲུངས། རིགས་ནི་བྲམ་ཟེ། གཞོན་ནུ་ནས་རིག་བྱེད་ཡན་ལག་དང་བཅས་པ་དང༌། རིག་པའི་གནས་བཅོ་བརྒྱད་བརྟག་པ་བརྒྱད་ལ་སོགས་པ་ཐམས་ཅད་ལ་མཁས་པར་གྱུར། བྲམ་ཟེའི་ཁྱེའུ་ལྔ་བརྒྱ་ལ་གསང་ཚིག་ཀློག་པར་བྱེད་ཅིང་ཡོད་པ་ལས། རྡོ་རྗེ་རྣལ་འབྱོར་མ་ཆང་འཚོང་མའི་གཟུགས་ཀྱིས་འོངས་ནས། སློབ་དཔོན་


TNT17_Page_0008
[མ་དཔེ་གཟིགས་ན་འདིར་གནོན།]

ལ་དོན་དམ་ཡེ་ཤེས་ཀྱི་བདུད་རྩི་རྣམ་པ་མྱོས་བྱེད་དུ་སྣང་བ་དག་ཡང་དང་ཡང་དུ་སྩལ་བས། རྣམ་པར་རྟོག་པ་མེད་པར་གསོལ་བ་ན། ནང་དུ་ཏིང་ངེ་འཛིན་མཆོག་བརྙེས་ཀྱང༌། བྲམ་ཟེའི་རིགས་ཉམས་པར་བྱས་ཞེས་གྲགས་པ་ངན་པ་བྱུང༌། དེར་བྲམ་ཟེ་རྣམས་ཀྱིས་དམའ་དབབ་པར་འདོད་པ་ལ། སློབ་དཔོན་ནི་ནང་གི་རྣལ་འབྱོར་གྱི་མཐུས་ནུས་པ་རྙེད་པ་ཡིན་པས། བྲམ་ཟེ་རྣམས་ལ་ཆང་སྐྱུག་པའི་སྦྱོར་བ་མཛད། རྡོ་ཆེན་པོ་རྒྱ་མཚོའི་སྟེང་དུ་འཕངས་ཏེ། གལ་ཏེ་ངས་ཆང་འཐུངས་ན་རྡོ་འདི་བྱིང་བར་གྱུར་ཅིག ཅི་སྟེ་ཁྱེད་རྣམས་ཀྱིས་འཐུངས་ལ། ངས་མ་འཐུངས་ན་འཕྱོ་བར་གྱུར་ཅིག ཅེས་གསུངས་པས། ཆུའི་སྟེང་དུ་འཕྱོ་བར་གྱུར་ཏོ། །དེར་བྲམ་ཟེ་རྣམས་ནུས་པས་ཚར་བཅད་ཡུལ་དབུས་སུ་སོང་སྟེ། སངས་རྒྱས་ཀྱི་བསྟན་པ་ལ་རབ་ཏུ་བྱུང༌། རིམ་གྱིས་དགེ་སློང་སྡེ་སྣོད་གསུམ་པ་ཆེས་མཆོག་ཏུ་གྱུར་ཏོ། །སློབ་དཔོན་འདིའི་མཁན་པོ་ན། གནས་བརྟན་ནག་པོ་ཞེས་བྱ་བ་ཡིན། དེའི་མཁན་པོ་བཙུན་པ་རྟ་སྐད་ཅེས་བྱ། དེའི་ཡང་མཁན་པོ་ཉེར་སྦས་ཡིན་ཞེས་བླ་མ་གསུང་ཡང་མཁན་བརྒྱུད་རྙིང་པ་འདི་དག་བརྟག་པར་དཀའོ། བོད་ཀྱི་སྡོམ་རྒྱུན་ལ་ནི་སྲས་སྒྲ་གཅན་འཛིན་གྱི་དངོས་ཀྱི་སློབ་མ་ཡིན་པར་གྲགས་ནའང༌། དཔྱད་པ་མེད་པར་བཞག་ན་ལེགས་སོ། །དེ་ནས་ནཱ་ལནྡྲ་ཡི་མཁན་པོར་གྱུར། བསྟན་པའི་བྱ་བ་རྒྱ་ཆེར་མཛད་ཅིང༌། ཐེག་པ་ཆེན་པོའི་མདོ་སྡེ་ཆེས་དར་རྒྱས་སུ་གྱུར་པ་ཡང༌། སློབ་དཔོན་འདིའི་དུས་ཡིན་པར་གྲགས། དེ་ནས་རིག་པ་བརྟུལ་ཤུགས་ཀྱི་སྤྱོད་པ་བྱ་བར་དགོངས་ཏེ། ཐུགས་མཚན་མ་མེད་པའི་ཏིང་ངེ་འཛིན་ལས་མ་གཡོས་བཞིན་དུ་ཡུལ་སྣ་ཚོགས་སུ་རྒྱུ་བ་ན་མཐར་གྱིས་ལྷོ་


TNT17_Page_0009
[མ་དཔེ་གཟིགས་ན་འདིར་གནོན།]

ཕྱོགས་མ་ར་ཧ་ཊ་ཞེས་བྱ་བར་བདག་ཉིད་ཀྱི་རྒྱུད་གྲོལ་བར་བྱེད་པ་ཞིང་གི་རྣལ་འབྱོར་མ་མདའ་མཁན་གྱི་བུ་མོའི་ཚུལ་ཅན་ཞིག་གཟིགས་ཏེ། དེའི་མདའ་སྲོང་བ་ལ་སོགས་པས་ཀྱང༌། གནས་ལུགས་ཀྱི་དོན་བརྡ་ཐབས་ཀྱིས་མཚོན། ངོ་སྤྲད་པ་བཞིན་དུ་གྱུར་ཏེ། ཆོས་ཉིད་མངོན་སུམ་དུ་གཟིགས་ཤིང༌། མདའ་མཁན་གྱི་བུ་མོ་དེ་ཉིད་ཕྱག་རྒྱར་ཁྲིད་ནས། ཡུལ་སྣ་ཚོགས་སུ་སྤྱོད་ཅིང་མདའ་བཟོ་བའི་བྱ་བ་མཛད། ཡེ་ཤེས་གོང་ནས་གོང་དུ་འཕེལ་བས། མཚན་ཡ་ས་ར་ཧ་སྟེ། མདའ་བསྣུན་ཞེས་གྲགས། སྔོན་དགེ་འདུན་ཐམས་ཅད་ཀྱི་གནས་བརྟན་ཡིན་པས་ཧ་ཅང་ཡང་མ་རིགས་ཏེ། རྒྱལ་པོ་ལ་སོགས་པ་སྐྱེ་བོ་མཐའ་ཡས་པ་ཞིག་གིས་བལྟ་བར་འོངས་ཤིང༌། འཕྱས་པས། སློབ་དཔོན་མདའ་སྲོང་བཞིན་དུ། ཀྱཻ་ལགས་ང་ནི་བྲམ་ཟེ་སྟེ། །སྨིན་མཁན་མོ་དང་ལྷན་ཅིག་སྤྱོད། །རིགས་དང་རིགས་མིན་ངས་མ་མཐོང༌། །དགེ་སློང་མགོ་བྲེག་བརྟུལ་ཞུགས་འཛིན། །ཆུང་མར་བཅས་ཏེ་ལྷན་ཅིག་རྒྱུ། །ཆགས་དང་ཆགས་བྲལ་དབྱེར་ཡོད་མིན། །མི་གཙང་འདིར་ནི་རྣམ་རྟོག་སྟེ། འདི་ལྟ་གཞན་གྱིས་མི་ཤེས་སོ། །སྦྲུལ་གདུག་ལྟ་བུའི་སྐྱེ་བོ་ན། །ཞེས་སོགས་དོ་ཧ་རྡོ་རྗེའི་གླུ་མང་དུ་བླངས་པས། རྒྱལ་པོ་ལ་སོགས་པ་སྟོང་ཕྲག་ལྔ་ནི་གནས་ལུགས་ཀྱི་དོན་མངོན་སུམ་དུ་མཐོང༌། ལུས་ཀྱང་རིག་པ་འཛིན་པར་གྱུར་ནས། རྫུ་འཕྲུལ་གྱིས་ནམ་མཁའ་ལ་འགྲོ་ཞིང༌། མཐར་གྱིས་མི་སྣང་བར་གྱུར་སྐད། གཞན་ཡང་ཕྱག་རྒྱ་ཆེན་པོ་སེམས་རྣལ་དུ་མཚོན་པ་ནི་བརྒྱ་སྟོང་དུ་མ་ཞིག་བྱུང་བས། ཕྱོགས་ཐམས་ཅད་དུ་གྲགས་པས་ཁྱབ་པར་གྱུར། འགྲོ་བ་མང་པོའི་དོན་མཛད་ནས་སྐུ་ལུས་དེ་ཉིད་ཀྱིས་སངས་རྒྱས་ཀྱི་ཞིང་གཞན་དུ་བཞུད་པ་ཡིན་གསུང༌།


TNT17_Page_0010
[མ་དཔེ་གཟིགས་ན་འདིར་གནོན།]

འདི་ནི་བོད་རྣམས་དང་མཐུན་པར་བྱས་པ་ཡིན། ཕྱིས་སངས་རྒྱས་ཐོད་པའི་ཟིན་བྲིས་རྒྱ་དཔེ་འཐོར་བ་གཅིག་ན། བར་དུ་རབ་ཏུ་བྱུང་བའི་སྐོར་དེ་མེད་ཅིང༌། བྲམ་ཟེ་སྒྲ་གཅན་འཛིན་དང༌། གནས་བརྟན་སྒྲ་གཅན་འཛིན་ཐ་དད་པར་འདོད་པའང་སྣང༌། མི་ཉག་ལོ་ཙཱ་བའང་དེ་བཞིན་འདོད་པར་མངོན་ཏེ་དེ་ངོས་མི་འཐད་རྒྱུའང་མེད་དོ། །དེའི་སློབ་མ་ནི་སློབ་དཔོན་ཀླུ་སྒྲུབ་ཡིན་ཏེ། དེ་ཡང་ལྷོ་ཕྱོགས་བཻ་དརྦྷར་སྐུ་འཁྲུངས། རིགས་ནི་བྲམ་ཟེའོ། །བཙས་པ་ན་ལྟས་མཁན་རྣམས་ཀྱིས་དགེ་སློང་བརྒྱ། བྲམ་ཟེ་བརྒྱ། སྐྱེ་བོ་ཕལ་པ་བརྒྱ་རྣམས་ལ་སྟོན་མོ་དྲངས་ན། རིམ་པས་ལོ་བདུན། ཟླ་བ་བདུན། ཞག་བདུན་འཚོ། དེ་ལས་ལྷག་པའི་ཐབས་མེད་ཟེར་ཕ་མས་ཀྱང་དེ་བཞིན་བྱས། དུས་དེ་རྣམས་རྫོགས་སུ་ཉེ་བ་ན། གཡོག་དང་བཅས་ཡུལ་གཞན་དུ་འཁྱམ་དུ་བཏང་བས། མཐར་ནཱ་ལནྡྲར་སླེབ། མཁན་པོ་སྒྲ་གཅན་འཛིན་གྱིས་ཚེ་དཔག་མེད་ཀྱི་རིག་སྔགས་བཟླར་བཅུག་པས། ལེགས་པར་འཚོ་ཐུབ། དེར་རབ་ཏུ་བྱུང་ནས། ཐེག་པ་ཆེ་ཆུང་གི་སྡེ་སྣོད་མཐའ་དག་དང༌། རིག་པའི་གནས་སུ་གྱུར་པ་གང་ཡང་མི་མཁྱེན་པ་མེད་པར་བྱས་སོ། །དེ་ནས་རྨ་བྱ་ཆེན་མོ་དང༌། ཀུ་རུ་ཀུལླེ་དང༌། གནོད་སྦྱིན་མོ་དགུ་དང༌། ནག་པོ་ཆེན་པོ་རྣམས་བསྒྲུབས་པས། རི་ལུ་མིག་སྨན་རལ་གྲི་རྐང་མགྱོགས་བཅུད་ལེན་གཏེར་ལ་སོགས་པ་དངོས་གྲུབ་མང་པོ་དང༌། ཚར་གཅོད་པ་དང༌། སླར་གསོ་བ་ལ་སོགས་པའི་ནུས་པ་ཐམས་ཅད་གྲུབ་བོ། །གནོད་སྦྱིན་དང་ཀླུ་ལ་སོགས་པ་མི་མ་ཡིན་ཐམས་ཅད་མངག་གཞུག་ཏུ་སོང༌། ཁྱད་པར་བཅུད་ལེན་གྲུབ་པས་རྡོ་རྗེའི་སྐུར་གྱུར། རྫུ་འཕྲུལ་དང་མངོན་ཤེས་ཆེན་པོར་གྱུར་སྐད། ནག་


TNT17_Page_0011
[མ་དཔེ་གཟིགས་ན་འདིར་གནོན།]

པོ་ཆེན་པོའི་རིག་སྔགས་གྲུབ་ནས། དྷ་ནྱ་ཀ་ཊ་ཀའི་གླིང་ན། ནག་པོ་ཆེན་པོའི་རྒྱུད་བཞུགས་པ་སྤྱན་འདྲེན་པར་དགོངས། གླིང་དེར་མི་གཡོ་བ་ལ་བརྟེན་ཏེ་སྒྱུ་མ་བསྒྲུབས་ནས། སྒྱུ་མས་མཁའ་འགྲོ་མ་རྣམས་མགོ་འཁོར་བའི་བར་ལ། ལྷ་མོ་ནག་མོ་དང༌། ནག་པོ་ཆེན་པོའི་རྒྱུད་བརྒྱད་དེ་ཕྱག་གཉིས་གཉིས་པ་ནས་ཕྱག་བཅོ་བརྒྱད་ཀྱི་བར་གྱི་རྒྱུད་དང༌། ཀུ་རུ་ཀུལླེའི་རྟོག་པ་ལ་སོགས་པ་སྤྱན་དྲངས། ཡེ་ཤེས་ཀྱི་མཁའ་འགྲོ་མ་རྣམས་ལ་ཞལ་གྱི་གདམས་པ་ཐོབ། སྒྲུབ་ཐབས་མི་གཅིག་པ་བརྒྱ་དྲུག་ཅུ་སྤྱན་དྲངས་ཟེར། རལ་གྲི་དངུལ་ཆུ་སོགས་ཐུན་མོང་གི་དངོས་གྲུབ་བརྒྱད་ཆར་ལ་རིགས་མི་གཅིག་པ་མཐའ་ཡས་པ་བསྒྲུབས་སོ། །དགེ་འདུན་ལ་འཚོ་བ་སྦྱར་བའི་ལོ་རྒྱུས་ན། མཁན་པོ་སྒྲ་གཅན་འཛིན་བཟང་པོ་རྗེ་བཙུན་མ་འཕགས་མ་སྒྲོལ་མ་བསྒྲུབ་ཅིང་བཞུགས། ཀླུ་སྒྲུབ་མཁན་པོར་བྱོན་ནས་དགེ་འདུན་ལྔ་བརྒྱ་ལ་ལུང་འབོགས་པའི་བྱ་བ་སོགས་མཛད་ཅིང་ཡོད་པ་ན། མུ་གེ་ལོ་བཅུ་གཉིས་སུ་བྱུང་བས། མ་ག་དྷའི་ཡུལ་རྣམས་སྟོངས་པ་ཙམ་བྱུང་བ་ན། སེམས་ཅན་གྱི་ལས་སུ་གཟིགས་ནས། སློབ་དཔོན་གྱིས་གསེར་འགྱུར་གྱི་རྩི་མཛད་དེ། གསེར་རྣམས་ཡུལ་ཐག་རིང་པོ་མུ་གེ་མེད་པ་རྣམས་སུ་འབྲུ་དང་བསྒྱུར་ནས། དགེ་འདུན་རྣམས་འཚོ་བས་མི་བྲེལ་བར་བྱས། སློབ་དཔོན་སྒྲ་གཅན་འཛིན་སྒྲུབ་པ་ཐོན་པ་ན། ཡུལ་རྣམས་སྟོངས་པར་གཟིགས་ནས། རྒྱུ་མཚན་དྲིས་པས། སློབ་དཔོན་གྱི་སྒྲུབ་པའི་བར་ཆད་དུ་གྱུར་དོགས་ཞུ་བར་མ་ནུས། མུ་གེ་བྱུང་ནས་ལོ་བཅུ་གཉིས་ལོན་


TNT17_Page_0012
[མ་དཔེ་གཟིགས་ན་འདིར་གནོན།]

ཞུས་པས། སློབ་དཔོན་ན་རེ། མ་ལེགས་ཟས་ཀྱི་ཆར་འབེབས་པའི་ནུས་པའང་ང་ལ་ཡོད་པ་ལ། ཁྱོད་སེམས་ཅན་ལ་སྙིང་རྗེ་ཆུང༌། བྱང་ཆུབ་སེམས་དཔའི་སྤྱོད་པ་དང་འགལ། ད་ནི་དེའི་སྡིག་སྦྱོང་ལ་གཙུག་ལག་ཁང་བརྒྱ་རྩ་བརྒྱད། ལྷ་ཁང་སྟོང༌། མཆོད་རྟེན་ཁྲི་ཕྲག་བཞེངས་དགོས་གསུང༌། དེ་དགེ་སློང་གཅིག་ཁོ་ནས་འགྲུབ་དཀའ་བར་གཟིགས་ནས། ཡོ་བྱད་གནོད་སྦྱིན་ཛམྦྷ་ལ་ལས་ནོར་བསླངས། ལས་གྲོགས་ཀླུ་རྣམས་ལ་འཚོལ་དགོས་པས། རེ་ཞིག་ཀླུ་རྣམས་དད་པར་བྱེད་དགོས་དགོངས་ཏེ། ཀུ་རུ་ཀུལླེའི་རིག་སྔགས་ཀྱིས་ཀླུའི་རྒྱལ་པོ་འཇོག་པོའི་བུ་མོ་འཁོར་དང་བཅས་པ་བཀུག་པས། ཆོས་གསུང་བའི་ཚོགས་སུ་མིའི་བུ་མོའི་རྣམ་པ་གཉིས་འཁོར་མང་པོ་དང་བཅས་བྱུང་བས། དཔག་ཚད་ཙམ་ཙནྡན་ས་མཆོག་གི་དྲིས་ཁྱབ་བོ། །ཡང་དེ་སོང་བ་ན་དྲི་དེ་སངས་འགྲོ། དེ་འདྲ་ལན་མང་དུ་བྱུང༌། དེར་ཅི་ཡིན་ཞེས་དྲི་བ་ལྟར་མཛད་པས། ངེད་ཀླུ་འཇཽག་པོའི་བུ་མོ་ཡིན། མིའི་གྲིབ་མ་སྲུང་བ་ལ་ཙནྡན་ས་མཆོག་གིས་ལུས་ལ་བྱུགས་པ་ཡིན་ཟེར། འོ་ན་ཙནྡན་དེ་ལ་སྒྲོལ་མའི་སྐུ་བཞེང་བར་འདོད་པས་ཙནྡན་ཡང་སྦྱིན་དགོས། ཁོ་བོས་གཙུག་ལག་ཁང་བཞེངས་པའི་ལས་གྲོགས་ཀྱང་བྱེད་དགོས་གསུངས་པས། ཕ་ལ་བཟླས་ནས་འོང་ཟེར་བ། དེའི་ནང་པར་དེ་གཉིས་ན་རེ། ཀླུའི་རྒྱལ་པོའི་མཆིད་ནས་སློབ་དཔོན་ཉིད་ཀླུ་ཡུལ་དུ་ཕེབས་ན་བཀའ་བཞིན་བྱེད། གཞན་སྒྲུབ་མི་ནུས་ཟེར། དེ་ནས་ཤེར་ཕྱིན་འབུམ་པ་སྤྱན་འདྲེན་པ་སོགས་ཀླུ་དང་མིའི་དོན་རྒྱ་


TNT17_Page_0013
[མ་དཔེ་གཟིགས་ན་འདིར་གནོན།]

ཆེན་པོ་གཟིགས་ནས། རེ་ཤིག་ཀླུའི་ཡུལ་དུ་བྱོན་ནོ། །ལོ་རྒྱུས་ཁ་ཅིག་ལས། འདས་པའི་སངས་རྒྱས་འོད་སྲུང་དང་གསེར་ཐུབ་ལ་སོགས་པའི་ཞལ་མཐོང་བའི་དགེ་སློང་ཡིན་ཟེར་བ། ལུས་གཞན་པས་ཆེ་བ་མང་པོས་གཟིགས་ཟེར་ཏེ་ཆེ་བ་ཙམ་ཡིན་ནོ། བཅོམ་ལྡན་འདས་ཤཱཀྱ་ཐུབ་པའི་བསྟན་པ་འདིའི་དགྲ་བཅོམ་པ་མང་པོ་ཀླུ་རྣམས་ཀྱི་མཆོད་གནས་སུ་འདུག་པ་རྣམས་ན་རེ། ངེད་རྣམས་ནི་དགྲ་བཅོམ་པ་ཡིན་ལ། ཁྱོད་དུག་གསུམ་དང་བཅས་པའི་མི་ཞིག་འདིར་འོངས་པ་ལ་ཀླུའི་དུག་གིས་གནོད་པ་མི་འོང་བའི་རྒྱུ་ཅི་ཡིན་འདྲི་བ་ལ། ངས་ནི་རྨ་བྱ་ཆེན་མོའི་རིག་སྔགས་གྲུབ་པ་ཡིན་གསུངས། ཡང་ལོ་རྒྱུས་འགའ་ལས། དེ་རྣམས་ལ་རྒྱལ་བའི་བཀའ་ལས་ནི་ཆོས་ཐམས་ཅད་ངོ་བོས་གྲུབ་པ་མེད་པར་གསུངས་ལ། སའི་སྟེང་གི་དགེ་སློང་ཤས་ཆེ་བ་རྣམས་ན། དེ་ལས་བཟློག་སྟེ་སྨྲ་ན། ཁྱེད་རྣམས་ཀྱིས་ཇི་ལྟར་རྟོགས་ཞེས་དྲིས་པས། ཆོས་རྣམས་ཀྱི་རང་བཞིན་ནི་ཁྱེད་ཀྱི་ལྟར་ཡིན། ཕྱིས་དམིགས་པའི་ལྟ་བ་ཅན་གྱི་ཉན་ཐོས་འབའ་ཞིག་འབྱུང་བར་སངས་རྒྱས་ཀྱིས་ལུང་བསྟན་གསུང་སྐད་དེ། དབུ་མ་པ་རྣམས་ཀྱིས་བཅོས་པ་མིན་ན་རུང་ངོ༌། །དེ་ནས་ཀླུ་རྣམས་ལ་ཆོས་གསུངས་ཤིང་ཡུན་རིང་པོར་བཞུགས། ཤེར་ཕྱིན་རྒྱས་པ་དང༌། གཟུངས་དང་རྟོག་པའི་རིགས་དུ་མ་སྤྱན་དྲངས། འབུམ་གྱི་ཞབས་ནས་བག་ཙམ་ཀླུས་མ་བསྐུར་བ་ཡིན་ཡང་ཟེར། དམ་པའི་ཆོས་ལ་དགྲ་ལན་གསུམ་བྱུང་བའི་ཚེ་མ་ཚང་བ་ཡིན་ཡང་ཟེར་ཏེ་ཕྱི་མ་དག་གསུང༌། འབུམ་རྒྱ་ནག་པའི་ཞབས་ཀྱི་


TNT17_Page_0014
[མ་དཔེ་གཟིགས་ན་འདིར་གནོན།]

ལེའུ་གསུམ་ནི་ཉི་ཁྲི་ནས་དྲངས་པའོ། །དེ་ནས་ས་སྟེང་དུ་བྱོན། རིག་ཚོགས་ལ་སོགས་པའི་བསྟན་བཅོས་ཀྱང་མང་དུ་བརྩམས། དགེ་སློང་བདེ་བྱེད་ལ་སོགས་པ་ཐེག་པ་ཆེན་པོ་ལ་སྡང་བ་ཐམས་ཅད་རྩོད་པས་སུན་ཕྱུང༌། ལར་ཉན་ཐོས་སེན་དྷ་པས་བརྩམས་པའི་རྟོག་གེ་ཐེག་ཆེན་ལ་རྩོད་པའི་གཞུང་མང་པོ་བྱུང་བ་དེ་དག་གི་དཔེ་ཐམས་ཅད་བསྡུས་ནས་ས་འོག་ཏུ་སྦས་སོ། །ཡང་ཕྱི་ཞིག་ན་ལྷོ་ཕྱོགས་ཛ་ཊ་སཾ་གྷ་ར། རལ་པ་འཇཽམས་པ་ཟེར་བའི་གནས་དེར། མུ་སྟེགས་ཀྱི་རྒོལ་བ་འདུས་པ་ལྔ་བརྒྱ་ཙམ་དང་བརྩད་ནས་ཚར་བཅད་དེ་ཐམས་ཅད་བསྟན་པ་ལ་བཅུག་གོ །དེ་དག་གི་སྐབས་སུ་ལྷ་ཁང་དང་མཆོད་རྟེན་ཡང་གྲུབ། སློབ་དཔོན་འདིས་བཞེངས་པའི་མཆོད་རྟེན་གྱིས་ཕྱོགས་ཐམས་ཅད་ཁྱབ་ཡོད་གསུང༌། དེ་ལྟར་ཐེག་ཆེན་གྱི་བསྟན་པ་ཉི་མ་ལྟར་མཛད། དྲིལ་བུ་བྲག་དང་བྱང་ཕྱོགས་དྷིང་ཀོ་ཊ་སོགས་རི་མང་པོ་གསེར་དུ་བསྒྱུར་བར་བཞེད་པ་ལ། རྗེ་བཙུན་མ་སྒྲོལ་མས་མ་འོངས་པ་ན་རྩོད་པར་འགྱུར་གསུངས་པས་བཟློག འོན་ཀྱང་གསེར་གྱི་འབྱུང་ཁུངས་མང་པོ་བྱུང༌། རྡོ་རྣམས་གསེར་མདོག་ཏུ་གྱུར་པ་ཙམ་ཡོད་གསུང༌། དེ་ནས་ལམ་གཅིག་ན་བྱིས་པ་མང་པོ་རྩེ་བ་ལ་གཅིག་རྒྱལ་པོར་འགྱུར་བར་ལུང་བསྟན་ནས། བྱང་སྒྲ་མི་སྙན་དུ་བཞུད། གླིང་གཞན་དང་མི་མ་ཡིན་གྱི་གནས་སུ་ལོ་བཅུ་གཉིས་ཙམ་སོང༌། སླར་འཛམ་བུ་གླིང་དུ་ཕེབས་ཙམ་ན་སྔར་གྱི་བྱིས་པ་དེ། རྒྱལ་པོར་གྱུར་པ་བདེ་སྤྱོད་ཅེས་བྱ་བར་སོང༌། སློབ་དཔོན་ལ་གུས་པས་མཆོད། རྒྱལ་པོའང་སློབ་དཔོན་གྱི་གདམས་པ་


TNT17_Page_0015
[མ་དཔེ་གཟིགས་ན་འདིར་གནོན།]

ལ་བརྟེན་ནས་བཅུད་ལེན་དང་གནོད་སྦྱིན་གྱི་མངག་གཞུག་གྲུབ། དགེ་འདུན་བཞུགས་པའི་གཙུག་ལག་ཁང་ལྔ་བརྒྱ་བཞེངས་སོ། །ཕྱིས་དཔལ་གྱི་རིར་ལོ་ཉིས་བརྒྱ་ཙམ་གནོད་སྦྱིན་མོ་རྣམས་ཀྱི་འཁོར་དང་བཅས་ཏེ། སྔགས་ཀྱི་སྤྱོད་པས་བཞུགས། མཚན་བཟང་པོ་སོ་གཉིས་ཀྱང་སྐུ་ལ་འགྲུབ། ཕྱིས་དབུ་སྦྱིན་པར་བཏང་བའི་རྐྱེན་གྱིས་ལོ་ཕྱེད་ལོའི་ལོ་དྲུག་བརྒྱར་བདུན་ཅུ་དོན་གཅིག་གིས་མ་ཚང་སྐད་དེ། དེ་ཡང་རྒྱལ་པོ་བདེ་སྤྱོད་ཀྱི་བུ་ཆུང་ངུ་སུ་ཤཀྟ། རྒྱལ་བུ་རབ་ནུས་སམ། རྒྱལ་བུ་ནུས་ལྡན་ཡང་ཟེར་ཏེ་དེ་རྒྱལ་སྲིད་ལ་དགའ་བས་ལ་མ་ན་རེ། ཡབ་སློབ་དཔོན་དང་སྐུ་ཚེ་མཉམ་པར་བྱིན་གྱིས་རླབས་འདུག སློབ་དཔོན་རྡོ་རྗེའི་སྐུ་ཡིན་པས་འགྲོང་པ་མེད། རྒྱལ་པོའི་སྲས་པོ་སྔ་མ་རྣམས་ཀྱང་རྒྱལ་སྲིད་མ་ཐོབ་པ་འདས་ཤིང༌། །བུ་དང་ཚ་བོའི་བར་ཡང་འདས་ཟེར་བས། ཤིན་ཏུ་ཡིད་མི་དགའ་བ་ལ། མ་ན་རེ། འོ་ན་ཐབས་ཡོད། སློབ་དཔོན་བྱང་ཆུབ་སེམས་དཔའ་ཡིན་པས་དབུ་བསླངས་ན་སྟེར་བས། སློབ་དཔོན་འདས་པའི་ཚེ་ཡབ་ཀྱང་འདའ་བས་ཁྱོད་ལ་རྒྱལ་སྲིད་འབྱུང་ཟེར། རྒྱལ་བུས་དཔལ་གྱི་རིར་ཕྱིན་དབུ་བསླངས་པས། མཚོན་ཆས་མ་ཆོད་པར་སྔོན་རྩྭ་སྔོན་པོས་སྲོག་ཆགས་ཀྱི་སྐེ་བཅད་པའི་ལས་གཟིགས་ནས། ཀུ་ཤས་བཅད་ནས་གནང༌། ང་ནི་འདི་ནས་བདེ་བ་ཅན་དུ་འགྲོ། ཕྱིན་ནས་ལུས་འདི་ལ་ཡང་འཇུག་པར་འགྱུར། ཞེས་སྒྲ་བྱུང༌། དེར་ས་གཡོས། མུ་གེ་ལོ་བཅུ་གཉིས་ཀྱི་བར་དུ་བྱུང་སྐད།


TNT17_Page_0016
[མ་དཔེ་གཟིགས་ན་འདིར་གནོན།]

རྒྱལ་བུས་སློབ་དཔོན་བཅུད་ལེན་གྲུབ་པས། སླར་འགྲིག་གི་དོགས་ནས་དབུ་དཔག་ཚད་མང་པོས་ཆོད་པའི་སར་ཁྱེར། དེར་གནོད་སྦྱིན་མོས་ཕྲོགས། དབུ་ཕ་བོང་གི་ཁར་བཞག་པས་ཕ་བོང་གས་པའི་ས་དེར་འཕགས་པ་སྤྱན་རས་གཟིགས་ལྷ་ལྔའི་རྡོ་སྐུ་རང་བྱོན་དུ་བྱོན། དབུ་དང་སྐུ་ལུས་གཉིས་ལ་ཡོན་བདག་གནོད་སྦྱིན་མོས་སོ་སོར་ལྷ་ཁང་བརྩིགས། དེ་གཉིས་ཀྱི་བར་དུ་སྔོན་དཔག་ཚད་བཞི་ཙམ་ཡོད་སྣང་བ། ད་ལྟར་རྒྱང་གྲགས་གཅིག་ཀྱང་བར་མི་སྣང་གསུང༌། དེ་ནི་བདག་གི་བླ་མས་ཀྱང་མཇལ་ཏེ། རྡོའི་རྩིག་པ་རྣམས་འབྲེལ་ཏེ་བྲག་ལྟ་བུར་སོང་པའི་ལྷ་ཁང་ཆོ་འཕྲུལ་དང༌། གཉན་ཆ་ཆེ་བ། སྒོ་ནི་མེད། དཀར་ཁུང་ནས་བལྟས་པ་ལ། གཉིས་ཀའང་ཁྲིའི་སྟེང་ན་རྡོ་སྐུའི་དུམ་བུ་འདྲ་བ་རེ་འདུག་གསུང༌། དེའི་སློབ་མ་གྲུབ་ཆེན་ཤཱ་བཱ་རི་ཡིན་ཏེ། ཤར་ཕྱོགས་ན་གར་མཁན་མིང་སྲིང་གསུམ་གྱིས། ཀླུ་སྒྲུབ་བྷ་ག་ལར་བཞུགས་པ་ལ་རོལ་མོ་ཕུལ་བས། ནང་དུ་བོས་སྐལ་བ་དང་ལྡན་པར་མཁྱེན་ནས། བྱང་ཆུབ་སེམས་དཔའ་བློ་གྲོས་རིན་ཆེན་ཀྱི་སྐུ་གཅིག་བསྟན་པས་ངས་ཀྱང་འདི་མཐོང་བ་ཅིག་ཞུ་ཟེར། མེ་ལོང་ཞིག་བསྟན་པས་ཁོ་རང་དམྱལ་བ་ན་མེ་ལ་འཚེད་པ་མཐོང༌། ཤིན་ཏུ་བྲེད་ནས་འདི་ལས་ཐར་བའི་ཐབས་གཅིག་ཀྱང་ཞུ་བྱས་པས། བདེ་མཆོག་ཏུ་དབང་བསྐུར། བསྒོམས་པས་སྙིང་པོའི་དོན་མངོན་དུ་གྱུར། བྱང་ཆུབ་སེམས་དཔའ་བློ་གྲོས་རིན་ཆེན་གྱི་ཞལ་མཐོང༌། ཟུང་འཇུག་གྲུབ་ནས་ཁྱོད་ལྷོ་ཕྱོགས་ཀྱི་རི་ལ་རི་དྭགས་བཤོར་


TNT17_Page_0017
[མ་དཔེ་གཟིགས་ན་འདིར་གནོན།]

བ་ལྟར་གྱིས་ལ་སེམས་ཅན་གྱི་དོན་གྱིས་གསུང༌། ལྕམ་གཉིས་ལ། ལོ་གི་དང༌། གུ་ནི་ཟེར་བ། ཕྱིས་མཁའ་འགྲོ་མ་པདྨ་ཝརྟི་དང༌། ཛྙཱ་ན་ཝརྟི་ཡིན་ཅེས་ཕྱག་ཆེན་བརྡ་སྐོར་བ་དང༌། དོ་ཧ་འཆད་མཁན་བོད་རྣམས་ཟེར་ཏེ། ལྕམ་གཉིས་དང་ལྷན་ཅིག་ལྷོ་ཕྱོགས་དཔལ་གྱི་རི་ལ་བཞུགས། རྔོན་པའི་བྱ་བ་བྱེད་པ་ལྟར་མཛད་དོ། །རྡོ་རྗེ་འཆང་གི་གོ་འཕང་བརྙེས་པས། གྲུབ་ཆེན་ཤཱ་བཱ་རི་པ་ཞེས་གྲགས། རི་དྭགས་བཤོར་བ་ལ་སོགས་པ་འདི་དག་ནི་འཕགས་པའི་སྤྱོད་པ་དང༌། ཟུང་འཇུག་གི་སྤྱོད་པ་ཡིན་གྱ། གཞན་རྟོགས་པ་མཐོ་ཡང་མི་རུང་བ་ཡིན་ནོ། སློབ་དཔོན་འདི་ལ་ས་ར་ཧ་ཆུང་བ་ཟེར། དེའི་སློབ་མ་ནི་ལཱུ་ཡི་པ་སྟེ། དེའི་སློབ་མ་ཌེཾ་གི་པ། དེའི་སློབ་མ་ཏིལ་ལོ་པ། དེའི་སློབ་མ་ནཱ་རོ་པ། དེའི་སློབ་མ་ཌོཾ་བྷི་པ་ཆུང་བ། དེའི་སློབ་མ་ཀུ་ས་ལ་བྷ་ད། འདི་ཡང་བརྒྱུད་པའི་ལུགས་གཅིག་ཡིན། ལཱུ་ཡི་པ། དཱ་རི་ཀ་པ། ཨནྟར་པ། ཏིལ་ལོ་པ་ནས་བརྒྱུད་པའང་ཡོད། དེ་ལ་ལཱུ་ཡི་པ་ན། ནུབ་ཕྱོགས་ཨོ་རྒྱན་གྱི་རྒྱལ་པོའི་ཡིག་མཁན་ཀུན་ཏུ་དགེ་བ་ཞེས་བྱ་བ་ཞིགལན་ཅིག་གྲུབ་ཐོབ་ས་ར་ཧ་ཆུང་བ་ཤཱ་བཱ་རི་པ་དེ་དོ་ཧ་གླུར་ལེན་པ་དང་མཇལ། དབང་བསྐུར་དང་གདམས་ངག་གནང༌། དེ་བསྒོམ་ཞིང་ཡིག་མཁན་ཡང་བྱེད་ཅིང་ཡོད་པ་ལ། རེས་ཅིག་དུར་ཁྲོད་དུ་ཕྱིན་པས། མཁའ་འགྲོ་མའི་ཚོགས་གྲལ་དུ་སླེབ། སྐྱེ་བ་བདུན་པ་ཞིག་གི་ཤ་འགྱེད་པའི་ལག་བདེ་བ་ཡང་བྱས། རྡོ་རྗེ་ཕག་


TNT17_Page_0018
[མ་དཔེ་གཟིགས་ན་འདིར་གནོན།]

མོས་སྤྲུལ་པའི་དཀྱིལ་འཁོར་དུ་དབང་བསྐུར་ཞིང༌། རྐང་པ་བརྐྱང་པ་སྤངས་ནས་སུ། །འཁོར་བའི་མངག་གཞུག་དོར་ནས་ཀྱང༌། །རྡོ་རྗེ་སེམས་དཔའ་རྒྱལ་པོ་ཆེ། །ཡང་དང་ཡང་དུ་བསྐུལ་བར་བྱ། །ཞེས་གདམས་པས། གཡེང་བ་མེད་པར་བསྒོམ་དགོས་པར་ཤེས་ཏེ། སྔར་གྱི་ལས་བྱས་ན་གཡེང་བས་འཁྱེར། ཤིང་ཏོག་སོགས་ལའང་འབད་རྩོལ་དགོས། བསོད་སྙོམས་ཀྱང་ཆགས་སྡང་སྐྱེ། འཚོ་བ་གང་ལས་བསྒྲུབ་དགོས་དགོངས་རིགས་གསངས་ནས། ཤར་ཕྱོགས་བྷང་ག་ལར་སོང༌། གང་གཱའི་འགྲམ་ན་ཉའི་རྒྱུ་ལྟོ་རི་ལྟར་སྤུངས་པ་གཟིགས་པས། དེར་ཉ་ལྟོ་གསོལ་ཞིང་ལོ་བཅུ་གཉིས་བསྒོམས་པས། ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ། ཨོ་ཌི་བི་ཤའི་རྒྱལ་པོ་དང༌། བློན་པོ་སོགས་འདུལ་བའི་དུས་ཡིན་པར་མཁྱེན་ནས། རྒྱལ་པོ་དེ་ལ་ལྷོ་ཕྱོགས་ཀྱི་རྒྱལ་པོ་ཞིག་མཇལ་དུ་བྱུང་བ་ལ། སྐྱེད་མོས་ཚལ་དུ་ཁྲི་སོགས་བཤམས། ལམ་སྲང་ཐམས་ཅད་མཆོད་རྫས་སྣ་ཚོགས་ཀྱིས་བཀང༌། རྒྱལ་པོ་རང་གི་སྔོན་དུ་ཤིས་བརྗོད་ཀྱི་བྲམ་ཟེ་རྣམས་འོངས་པས། ཁྲིའི་སྟེང་ན་མི་སྔོན་པོ་ཉི་ལྷག་ཀྱིས་ཁྱེར་བ་སྐྲ་འཛིངས་པ་ཞིག་ཉལ་ནས་འདུག་པ་ལ། ཁྱོད་ལོངས་བྱས་པས་ལན་མེད། བྲམ་ཟེ་སུམ་ཅུས་འཐེན་པས་གཡོ་འགུལ་མ་བྱུང༌། དེར་བྲམ་ཟེ་རྣམས་རང་སྟོབས་མེད་པ་ལ་གད་མོ་ཤོར་བས། སློབ་དཔོན་ན་རེ། མ་ལུས་ས་འདི་ཇི་ཙམ་ཡིན་ཏེ་འཇིག་རྟེན་གསུམ་འདི་ཇི་ཙམ་ཡིན། དེ་ཆ་ཉིད་ཀྱིས་གཅིག་ནི་མི་བདག་གཞན་ནི་དེ་ཡི་གཡོག་ཡིན་ན།


TNT17_Page_0019
[མ་དཔེ་གཟིགས་ན་འདིར་གནོན།]

བློ་བཟང་དེ་ཡང་གཞན་གྱི་དམ་པའི་སྤྱོད་ལ་བཞད་གད་བྱེད་པ་ན། ཨེ་མ་འཁོར་བ་ངོ་མཚར་རེ་ཆེ་འདི་ལ་སྨྲ་མང་ཅི་ཞིག་དགོས་གསུང༌། དེ་རྒྱལ་པོ་ལ་བརྗོད་པས། དེ་ཆོམས་ཤིག་ཟེར། དམག་རྣམས་འོངས་པས་སློབ་དཔོན་གྱིས་ཧ་ཧ་ཧི་ཧི་ཞེས་བཞད་པས། དམག་མི་ཐམས་ཅད་རེངས། དེར་གཅིག་གིས་གྲུབ་ཐོབ་ཏུ་ཤེས་ནས་གུས་པ་བྱས་པས་རེངས་པ་ལས་གྲོལ། དེས་བསྟན་ཏེ་གཞན་ཀུན་ཀྱང་གྲོལ། རྒྱལ་པོ་ངོ་མཚར་སྐྱེས་ནས་འོངས་ཏེ། ཁྱོད་སུ་ཡིན་བྱས་པས། ཁྱོད་ཀྱང་སུ་ཡིན་གསུང༌། ང་རྒྱལ་པོ་ཡིན་བྱས་པས། ང་ཡང་རྒྱལ་པོ་ཡིན་གསུང༌། ཁྱོད་ལ་རྒྱལ་པོའི་ཡོ་བྱད་མི་འདུག་བྱས་པས། ས་གཞི་མལ་སྟན་ཆེན་པོ་ཡིན་ཏེ་བྱིན་པའི་སྟན་བཏིང་ལག་ངར་གློ་སྟན་འབོལ་བ་འཁྲིལ། ཟླ་བའི་འོད་ཟེར་སྒྲོན་མེ་རབ་གསལ་བསིལ་ཡབ་རྗེས་སུ་མཐུན་པའི་རླུང༌། རྒྱ་ཆེན་ནམ་མཁའི་བླ་རེ་ཆགས་བྲལ་སྟེང་པའི་བུད་མེད་ལ་སྤྱོད་དེ། ཨ་རེ་རྒྱལ་ལྟར་སྲིད་ན་འཇིགས་མེད་བདེར་ཉལ་རྣལ་འབྱོར་རྒྱལ་པོ་ཡིན། བྱས་པས་རྒྱལ་པོ་དང༌། རྒྱལ་བློན་གཉིས་ལ་བདེ་མཆོག་ཏུ་དབང་བསྐུར། གདམས་པ་གནང༌། དཔལ་མངོན་རྟོགས་ཀྱང་མཛད། རྒྱལ་པོ་ལ་ཁྱོད་ལྷོ་ཕྱོགས་ཀུ་མ་ར་ཀྵེ་ཏྲ་ན། སྨད་འཚོང་མ་འདི་ལྟ་བུ་ཡོད་པས་དེའི་གཡོག་གྱིས་གསུང༌། བློན་པོ་བྲམ་ཟེ་ལ་ཁྱོད་ཤར་ཕྱོགས་པ་ན་བཀན་ན་ག་ར་ན་ཆང་འཚོང་མ་འདི་ལྟ་བུ་ཞིག་ཡོད་པས་དེའི་གཡོག་གྱིས་ཁྱེད་གཉིས་ཀྱིས་དེ་ལྟར་ན་ལོ་བཅུ་གཉིས་ནས་མཆོག་གི་


TNT17_Page_0020
[མ་དཔེ་གཟིགས་ན་འདིར་གནོན།]

དངོས་གྲུབ་ཐོབ་གསུང༌། དེ་གཉིས་ཀྱིས་ཀྱང་སྲིད་སྤངས་ནས་དེ་བཞིན་བྱས། རྒྱལ་པོས་སྨད་འཚོང་མའི་གཡོག་བྱས་ཏེ། དེར་འོངས་པའི་སྐྱེས་པ་རྣམས་ཀྱི་རྐང་པ་བཀྲུ་བ་སོགས་བྱེད་ཅིང་ཏིང་ངེ་འཛིན་བསྒོམས་པས། ལན་གཅིག་ནམ་ཕྱེད་ན་སྐྱེས་པ་གཅིག་གིས་ལྡོག་ཕྱིན་པས། ཁོལ་པོའི་སྤྱིལ་པོ་ན་མེ་འབར་བར་མཐོང༌། བལྟས་པས། དེའི་ལུས་ཀྱི་འོད་དུ་འདུགགྲུབ་པ་ཐོབ་པར་ཤེས། དེ་དང་སྨད་འཚོང་མས་ཀྱང་བཟོད་པར་གསོལ། དེར་སློབ་དཔོན་གྱིས་ཡུལ་དེར་རྡོ་རྗེ་ཐེག་པ་རྒྱ་ཆེར་བཤད། ལན་གཅིག་དྲིལ་བསྒྲགས་ཏེ་ཚོགས་ཀྱི་འཁོར་ལོ་མཛད། འཁོར་བུད་མེད་སྟོང་ཕྲག་བཅུ་དྲུག་དང་བཅས་པ་ཐམས་ཅད་མཁའ་ལ་གཤེགས་ཤིང༌། མཆོག་གི་དངོས་གྲུབ་ཐོབ་བོ། །སྔར་གྱི་སྐྱེས་པ་དེས་གསོལ་བ་བཏབ་པས། གྲོང་ཁྱེར་གྱི་ཤར་ཕྱོགས་ན་རྡོ་རིང་ཞིག་ཡོད། དེའི་སྟེང་ན་གླང་པོ་ཆེའི་གཟུགས་ཁ་ཤར་བསྟན་ཅིག་ཡོད། ལོ་རེ་ལ་ཡུངས་ཀར་གྱི་ཚད་རེ་ཆུགས་ཀྱིན་ཡོད་ནམ་ཁ་ནུབ་ཏུ་བསྟན་པ་ན་གྲུབ་པ་ཐོབ་པར་ལུང་བསྟན། གྲུབ་ཐོབ་དཱ་རི་ཀ་པའམ་དཱ་རི་པ་སྟེ་སྨད་འཚོང་མའི་གཡོག་ཅེས་བྱ་བ་ཡིན་ནོ། །བླཽན་པོས་ཀྱང་ཆང་འཚོང་མའི་གཡོག་བྱས་པ་ལ་འབྲས་སྦྲུ་བའི་རྐྱེན་གྱིས་རང་སེམས་ཀྱི་གནས་ལུགས་མངོན་སུམ་དུ་མཐོང༌། དེར་ཏིང་ངེ་འཛིན་གྱི་ངང་དུ་བག་ཙམ་ཞིག་འབྱམས་པའི་སྐབས། འབྲས་རྣམས་ཕུག་རོན་གྱིས་ཟོས་པས། ཆང་འཚོང་མས་འཐབས། ཡང་དུས་གཞན་ཞིག་ན། རྡོ་རྗེའི་གླུ་བླངས་པས། སྐྱེ་བོ་ཐམས་ཅད་ཀྱིས་གྲུབ་པ་ཐོབ་པར་ཤེས། རྡོ་རྗེ་ཐེག་པ་


TNT17_Page_0021
[མ་དཔེ་གཟིགས་ན་འདིར་གནོན།]

མང་དུ་བཤད་པས། སྐྱེ་བོ་དཔག་ཏུ་མེད་པ་ཡང་གྲོལ་ལོ། །འབྲས་བརྡུང་བའི་ཌེངྒི་ལ་སེམས་ཟིན་པས་ཌེངྒི་བར་གྲགས་སོ། །ཡང་ཤཱ་བཱ་རིའི་སློབ་མ་དུས་ཕྱིས་བྱུང་བ་ན། མངའ་བདག་ཆེན་པོ་མཻ་ཏྲི་པ་སྟེ། མཚན་ནི་མཻ་ཏྲི་གུཔྟའོ། །དེ་ཡང་བྲམ་ཟེ་མུ་སྟེགས་ཀྱི་པཎྜི་ཏ། ཕྱིས་ནཱ་རོ་པ་དང་མཇལ་ནས་ནང་པར་གྱུར་ཏེ། དབང་དང་གདམས་ངག་ཞུས། ནཱ་ལནྡྲར་རབ་ཏུ་བྱུང་སྟེ་རཏྣ་ཨཱ་ཀ་ར་ཤནྟི་པ་སོགས་མཁས་གྲུབ་ཀྱི་བླ་མ་མང་པོར་བསྟེན་པས་པཎ་ཆེན་དུ་སོང་ནས། བི་ཀྲ་མ་ལ་ཤཱི་ལ་རྣམ་གནོན་ཚུལ་གྱི་གཙུག་ལག་ཁང་དུ་བཞུགས། པཎྜི་ཏའི་བྱ་བ་དང་སྒྲུབ་པ་སྤེལ་མར་མཛད་ཅིང་ཡོད་པ་ལས། རྡོ་རྗེ་རྣལ་འབྱོར་མ་ཞལ་གཟིགས་ཤིང༌། ཏིང་ངེ་འཛིན་གྱི་གྲོགས་སུ་འགྲོ་བའི་དུས་ཡིན་པར་མཁྱེན་ནས། ནང་གི་ཀུན་ཏུ་སྤྱོད་པ་གསང་ཞིང་སྤྱོད་པ་ཡིན་པ་ལས། དགེ་ཚུལ་ཞིག་གིས་སློབ་དཔོན་བུད་མེད་དང་ལྷན་ཅིག་ཆང་གསོལ་བ་མཐོང་ནས། ཚོགས་སུ་རྒོལ་དུ་བྱུང་བ་ལ། སློབ་དཔོན་གྱིས་འོ་མ་སྐྱུགས་དགེ་ཚུལ་དེ་རང་ལ་ཆང་སྐྱུག་པའི་སྦྱོར་བ་བྱས་པས། ཆང་སྐྱུགས་རེ་ཞིག་གླེང་བ་མེད། ཡང་ལན་ཅིག་དགེ་བསྐོས་ལ་སོགས་པས་རིག་ནས་བརྫིར་འོངས་པ་ན། ཆང་འོ་མར་བསྒྱུར་བུད་མེད་མི་སྣང་བར་བྱས་སམ་དྲིལ་བུར་བསྒྱུར་ཟེར་བའང་ཡོད། ཡང་ཕྱིས་ལན་ཅིག་འཇབས་ནས་བརྫིས་པས། སྔགས་ཀྱིས་བསྒྱུར་ལོང་མ་བྱུང་བས། དགེ་འདུན་གྱིས་གནས་དབྱུང་བྱས། ཆུ་བོ་གངྒཱ་ལ་ལྤགས་གདན་བཏིང་ནས་བཞུད། དེ་དུས་དགེ་བསྐོས་ཇོ་བོ་རྗེ་ཡིན་སྐད། དེའི་སྒྲིབ་


TNT17_Page_0022
[མ་དཔེ་གཟིགས་ན་འདིར་གནོན།]

སྦྱོང་ལ་མངའ་བདག་རང་ལ་ཆོས་གསན་པ་དང༌། བོད་དུ་བྱོན་ཡང་ཟེར། སཱ་ཚ་འཆག་མེད་མཛད་ཀྱང་ཟེར། དེར་ནུས་པ་ནི་དཔག་ཏུ་མེད་པ་བརྙེས་ཀྱང༌། དེ་ཁོ་ན་ཉིད་ཅུང་ཟད་མ་རྟོགས་པ་ལ། ཡི་དམ་གྱི་ལུང་བསྟན་བྱུང་ནས། དཔལ་གྱི་རི་ལ་ཤཱ་བཱ་རི་པ་འཚོལ་དུ་བཞུད་པ། ལྷོ་ཕྱོགས་ཀྱི་ལམ་དུ་རྒྱལ་བུ་ས་ཀ་ར་དང་འཕྲད། དེ་དང་ལྷན་ཅིག་དཔལ་གྱི་རིར་ཕྱིན་པས། དེ་དང་ཉེ་བའི་མི་རྣམས་ན་རེ། ཤཱ་བཱ་རི་པ་སྔོན་གྱི་གྲུབ་ཐོབ་ཡིན། ད་ལྟ་ག་ལ་རྙེད་ཟེར་ཡང༌། རྩེ་གཅིག་ཏུ་གསོལ་བ་བཏབ་པས། ཟླ་བ་དྲུག་ན་མཇལ་ཏེ། ཤཱ་བཱ་རིའི་དབུའི་རལ་པ་བཤིག་པས། སྲོ་ཤིག་ཉིལ་གྱི་བྱུང་བ། ཡུམ་གཉིས་ཀྱིས་གསོལ་བར་འདུག་པས་མཻ་ཏྲི་བ་ཅུང་ཟད་ཐུགས་མ་དད། རྒྱལ་བུ་དེས་ཞབས་ལ་ཕྱག་བྱས་པས། ཨ་ཡ་ཛ་ར་ཝ་ལ་ཧུ་གསུངས་པས་དེ་ཉིད་དུ་གྲོལ་ཞིང་འཇའ་ལུས་སུ་གྱུར་པས་ཐུགས་དད་པ་འཁྲུངས། ཡང་བཙུན་མོ་གཉིས་ཀྱིས་ཕག་དང་རི་དྭགས་དང་རྨ་བྱ་གསོད་པ་གཟིགས་པས་ཅུང་ཟད་མ་དད་པ་སེ་གོལ་ཏོགས་པས། དེར་མི་སྣང་བར་གྱུར། འོན་ཀྱང་དབང་བསྐུར་ཞིང་གདམས་པ་དང་རྗེས་སུ་གདམས་པས་གནས་ལུགས་གཟིགས་པའི་ཡེ་ཤེས་སྐྱེས། དཔའ་བོ་མཁའ་འགྲོ་མཐའ་ཡས་པའི་གཙོ་བོར་གྱུར། ད་ནི་རལ་གྲི་ལ་སོགས་པ་གྲུབ་པ་བརྒྱད་བསྒྲུབས་ནས། ཚེ་བསྐལ་པར་གནས་པའི་རིག་པ་འཛིན་པ་བྱ་སྙམ་རྫས་བསྒྲུབས་པས་གྲུབ་པའི་ལྟས་བྱུང་བ་ན། ཤཱ་བཱ་རིས་སྡིགས་འཛུབ་མཛད་པས་ཐལ་བར་སོང༌། ད་ཁྱོད་སྒྱུ་མ་དེས་ཅི་བྱ་གནས་ལུགས་ཀྱི་དོན་རྒྱ་ཆེར་ཤོད་ཅེས་གསུང་བ་བཞིན།


TNT17_Page_0023
[མ་དཔེ་གཟིགས་ན་འདིར་གནོན།]

སླར་ཡུལ་དབུས་སུ་བྱོན་ནོ། །བོད་རྣམས་དེ་རྗེས་ཤཱནྟི་པ་དང་རྩོད་པ་བྱས་པ་སོགས་ཀྱི་ལོ་རྒྱུས་འཆད་པ་ནི་དོན་ལ་ཡང་མི་རིགས་པར་སྣང་ཞིང༌། འཕགས་པའི་ཡུལ་ན་ཁ་སྐད་ཙམ་ཡང་མེད་གསུང༌། བོད་ན་དེ་ལྟར་གྲགས་ཞུས་པས། བྷོཊྚ་སྭ་ན་བཱཀྟྱསཱ་མ་ཡ་ཚོ་ཌེ་ཀ་སིདྡྷི་སཱ་དྷ་ཀ་ཀྱཱ། ཞེས་གསུངས་ཏེ་བོད་པ་ཁྱིའི་ལབ་དམ་ཚིག་སྤངས་པའི་གྲུབ་ཐོབ་དང་སྒྲུབ་པ་པོ་གང་ཞེས་པའོ། །དེས་ན་དེ་ནི་བོད་བླུན་པོ་རྣམས་ཀྱི་བརྫུན་ཕལ་ཀ་སྒྲིགས་སུ་ཤེས་པར་བྱའོ། །སློབ་དཔོན་འདིས་ཡུལ་དབུས་སུ་ཡིད་ལ་མི་བྱེད་པ་གསུངས་པས། འགའ་ཞིག་ཡིད་མ་ཆེས་པ་ལ། གཞུང་གི་ཁུངས་གྲུབ་རྙིང་གི་སྐོར་རྒྱ་ཆེར་གསུངས། རྒྱུད་ཀྱི་དགོངས་པ་མིན་ཟེར་བ་དགྱེས་རྡོར་དང་འདུས་པ་གཙོ་བོར་གྱུར་པའི་ལུང་གིས་བསྒྲུབས་སུ་ལས་ཐོབ་དྲིས་པ་ལ། དབང་ངེས་བསྟན་བརྩམས་ཏེ་རི་ཁྲོད་པའི་མན་ངག་ཉམས་སུ་མྱོང་བར་བསྟན་ཞེས་བོད་རྣམས་ཟེར། དུར་ཁྲོད་བསིལ་བ་ཚལ་དུ་གྲོང་འཇུག་གི་ཚུལ་མང་པོ་བསྟན། ཇི་ལྟར་བཞེད་པ་ཐམས་ཅད་ནག་པོ་ཆེན་པོ་བསྒྲུབས་པས། དཔག་ཚད་བརྒྱ་ཕྲག་མང་པོའི་ཕ་རོལ་ནས་བརྟན་གཡོའི་དངོས་པོ་ནམ་མཁའ་ལས་ཁྱེར་འོངས་ཏེ། མ་ལ་བའི་རྒྱལ་པོའི་བུ་མོ་ནམ་མཁའ་ལས་ཁྱེར་འོངས་པ། ཕྱིས་མཁའ་འགྲོ་གཾ་ག་དྷ་ར་ཞེས་པར་གྲགས། ཕལ་ཆེར་ནི་ཤར་ཕྱོགས་ཀུ་ས་ལའི་ནགས་སུ་གཙོ་བོར་བཞུགས། མཁའ་འགྲོ་ལྕེ་སྤྱང་དུ་སྤྲུལ་ནས་གཏོར་མ་ལེན་པ་དང༌། ལྟ་སྟངས་གྲུབ་པ་དང༌། སྐུ་ལུས་གཟུགས་སྣ་ཚོགས་སུ་སྤྲུལ་པ་སོགས་ངོ་མཚར་དཔག་ཏུ་མེད་


TNT17_Page_0024
[མ་དཔེ་གཟིགས་ན་འདིར་གནོན།]

པ་མངའ། སྔོན་ཤཱ་བཱ་རི་པ་ལ་མ་དད་པ་གཉིས་པོ་དེས་སྐུ་ལུས་གནས་མ་གྱུར། དགུང་ལོ་བདུན་ཅུ་ཙམ་ན་སྐུ་འདས་ཏེ། བར་དོར་ཕྱག་རྒྱ་ཆེན་པོ་མཆོག་འགྲུབ་བོ། །ཇོ་བོ་ནཱ་རོ་པ་སྐུ་འདས་པ་ཙམ་ན། སློབ་དཔོན་འདིའི་འགྲོ་དོན་འགོ་ཚུགས་པ་ཡིན། ནཱ་རོ་པ་ཙམ་རང་གི་སྙན་གྲགས་དང་སློབ་མ་འདུ་འཚོགས་ནི་བག་ཙམ་མ་བྱུང་མོད། ཐོག་མཉམ་ལ་གཞན་ཕན་ཆེ་ཤོས་ཡིན། འཕགས་ཡུལ་རང་དུ་དེ་དུས་རྗེས་འབྲང་མང་ཡང་ཕྱིས་མང་རྒྱུ་མེད། བལ་པོ་དང་བོད་སོགས་བྱང་ཕྱོགས་ན་ཆེས་དར་བར་གྱུར་ཏོ། །མཻ་ཏྲི་པའི་སློབ་མ་ལ། སྔར་གྱི་བོད་རྙིང་པ་རྣམས། ཆེ་བཞ། འབྲིང་བདུན། ཆུང་བ་བཅུ་ཟེར། འབྲིང་དང་ཆུང་གི་ངོས་འཛིན་གྲངས་ངེས་རྒྱ་གར་བ་ལ་མ་གྲགས། སྤྱིར་རྣལ་འབྱོར་པའི་སློབ་མ་མཁས་པ་དང་ནུས་པ་ཐོབ་པ་མང་ངོ༌། །ཆེ་བ་བཞི་པོ་དེ་ཀུན་ནས་གྲགས་པ་ཡིན། ལྷན་སྐྱེས་རྡོ་རྗེ། སྟོང་ཉིད་ཏིང་འཛིན། རཱ་མ་པཱ་ལ། བཛྲ་པཱ་ཎིའོ། །དང་པོ་ལ་ན་ཊེ་ག་ན་ཟེར། དེ་ཁོ་ན་ཉིད་བཅུ་པའི་འགྲེལ་པ་དང་གནས་པ་བསྡུས་པ་མཛད། གཉིས་པ་དེ་བ་ཨཱ་ཀ་ར་ཙནྡྲ་ཟེར། ཤེས་རབ་ཡེ་ཤེས་གསལ་བའི་གཞུང་བརྩམས། བཞི་པ་རྒྱ་གར་ཕྱག་ན་རུ་གྲགས་པ་དེ་ཡིན་རྡོ་རྗེའི་ཚིག་བསྡུས་མཛད། དེ་གསུམ་སྐུ་ལུས་ཀྱི་རིག་འཛིན་མ་ཐོབ། འདིར་རཱ་མ་པཱ་ལ་སྟེ་དགའ་བ་སྐྱོང་ངམ། དགའ་བྱེད་སྐྱོང་ལ་བརྒྱུད་པ་སྟེ་དབང་ངེས་བསྟན་གྱི་འགྲེལ་པ་མཛད་མཁན་དེ་ཡིན་ནོ། །རིག་མ་ནུས་པ་ཐོབ་པ་རྣལ་འབྱོར་མ་རིན་ཆེན་ལྷ་མོ་མངའ་བདག་ཉིད་དང་མཁྱེན་རྟོགས་མཉམ་པར་གྲགས། གདྒ་དྷ་རི་ཕྱེད་ཀྱི་གོ་འཕང་


TNT17_Page_0025
[མ་དཔེ་གཟིགས་ན་འདིར་གནོན།]

ཅན་ཡིན་པར་གྲགས་སོ། །དེ་ནི་རིགས་རྒྱལ་རིགས་ལྷོ་ཕྱོགས་ཀརྞ་ཊ་ཀར་འཁྲུངས། ཆུང་ངུ་ནས་རིག་པའི་གནས་མང་པོ་མཁྱེན། མངའ་བདག་མཻ་ཏྲི་པ་ལོ་བཅུ་གཉིས་སུ་བསྟེན། མཻ་ཏྲི་པ་སྐུ་གཤེགས་ནས། མཆོད་རྟེན་དཔལ་ཡོན་ཅན་དུ་ལོ་གསུམ་བླ་མའི་མྱ་ངན་བྱེད་ཅིང་གཏམ་ཡང་མི་གསུང༌། རྩེ་གཅིག་ཏུ་སྒྲུབ་པ་མཛད་ཅིང་བཞུགས། དེ་ནས་སྙིང་པོའི་དོན་ཐམས་ཅད་མངོན་དུ་གྱུར་ནས། ལྷོ་ཕྱོགས་སུ་སེམས་ཅན་གྱི་དོན་མཛད་ཅིང་བཞུགས། ནག་པོ་ཆེན་པོས་རལ་གྲིའི་དངོས་གྲུབ་བྱིན་ཏེ། སྐུ་ལུས་དེ་ཉིད་མ་སྤངས་པར་ས་འོག་ཏུ་དཔལ་གྱི་སྒོར་བཞུད་ནས། ལྷ་མ་ཡིན་གྱི་གནས་ན་ད་ལྟ་ཡང་བཞུགས་ཟེར། དེ་ལ་ནི་སློབ་དཔོན་ཀུ་ས་ལ་བྷ་དྲ་ཆུང་བ་དང༌། ཨ་སི་ཏ་གྷ་ནས་ཀྱང་ཕྱག་རྒྱ་ཆེན་པོའི་གདམས་ངག་རྣམས་ཞུས་སོ། ཁྱད་པར་ཡེ་ཤེས་བཤེས་གཉེན་གྱིས་གསན་ནོ། །སློབ་དཔོན་ཆེན་པོ་ཞི་བའི་བརྒྱུད་འཛིན་རྣམས་མཻ་ཏྲི་ཉིད་ལ་བསྔགས་པ་ཆེ། ཨ་མ་ན་སི་ལ་མཆོག་དམན་གྱི་དབྱེ་བ་བག་ཙམ་མཛད་དོ། །རིན་པོ་ཆེ་འབྱུང་ཁུངས་ལྟ་བུའི་གཏམ་ལས། ཕྱག་རྒྱ་ཆེན་པོའི་བརྒྱུད་པའི་སྐབས་ཏེ་དང་པོའོ། །བཀའ་བབས་གཉིས་པ་ནི་གཏུམ་མོ་ཡིན་ཏེ། དེ་ཡང་སྔ་རོལ་ནས་ཀྱང་གཏུམ་མོའི་གདམས་པ་མེད་པ་ནི་ག་ལ་ཡིན། བི་རཱུ་བས་ཀྱང་བླ་མ་གཞན་ལ་མ་གསན་པར་མ་ངེས་མོད། འདི་པའི་ལུགས་ཀྱིས་རེ་ཞིག་སློབ་དཔོན་བི་རཱུ་བས་རྡོ་རྗེ་རྣལ་འབྱོར་མ་ལ་མངོན་སུམ་དུ་ཞུས་པ་ཡིན་ནོ། །སློབ་དཔོན་དེ་ནི་ནཱ་ལནྡྲའི་པཎྜི་ཏ་དགེ་སློང་


TNT17_Page_0026
[མ་དཔེ་གཟིགས་ན་འདིར་གནོན།]

ཞིག་ཡིན་པ་ལས། དེར་ཆང་ཡང་གསོལ་བ་དང༌། བུད་མེད་དང་ལྷན་ཅིག་སྤྱོད་པས་དགེ་འདུན་གྱིས་གནས་ནས་ཕྱུང༌། དེ་ནས་གངྒཱའི་འགྲམ་དུ་གྲུ་པ་ལ་གྲུ་གཏོང་དགོས་བྱས་པས། གླ་དགོས་ཟེར་བ་ལ་གླ་སྟེར་རྒྱུ་མེད་དེ་གངྒཱ་ལ་སྡིག་འཛུབ་བསྟན་པས། གངྒཱ་གྱེན་དུ་བཟློག་ནས་ཕ་རོལ་ཏུ་སོང༌། དེ་ནས་ཨོ་ཌི་ཤར་ཆང་འཚོང་མ་གཅིག་ལ་ཆང་ཉོ་བྱས་པས་རིན་དགོས་ཟེར། ཉི་གྲིབ་མཚམས་ལ་རི་མོ་བྱས་ཏེ་འདི་ལས་མ་འདས་གོང་དུ་སྦྱིན་བྱས་ནས། ཉི་མ་ལ་མཛུབ་མོ་བསྟན་ནས་བཏོད་ལ་མནན་ཏེ་ཆང་གསོལ། དེ་ནས་གཏོང་མ་འདོད་དེ་དབྱུག་ཚོད་དང་མེལ་ཚོ་ཐམས་ཅད་འཆུགས། རྣལ་འབྱོར་པས་ནུས་པ་བསྟན་པར་ཤེས་ཏེ། རྒྱལ་པོས་ཆང་རིན་བྱིན་ནས་བཏང་བར་ཞུས་པས། ཞག་གསུམ་གྱི་ཐོ་རངས་སུ་སོང་ཡང་ཟེར། དེ་ནས་ཏྲི་ལིངྒའི་རྒྱལ་པོའི་མཆོད་གནས་བྱས། མུ་སྟེགས་ཀྱི་མཆོད་པ་ཀུན་གྱི་ཕུད་ཟོས། ཕྱག་མི་འཚལ་བས། རྒྱལ་པོ་སོགས་ཀྱིས་རྒོལ་བ་ལ། སློབ་དཔོན་གྱིས་ཕྱག་བྱས་པས་མུ་སྟེགས་ཀྱི་ལྷ་ཐམས་ཅད་གས། ལྷའི་གཙོ་བོ་ནི་བི་ཤྭ་ནཱ་ཐ་བྱ་བ་འཇིག་སྡེས་བཞེངས་པ་ལིང་ག་གདོང་བཞིས་མཚན་པ་གཅིག་ཡོད་པ་དེ་བཞི་ཚལ་དུ་གས་ཡོད་གསུང༌། དེ་ནས་ཌཱ་ཀི་ནཱི་པ་ཊར་མུ་སྟེགས་པའི་ཚོགས་ཁང་དུ་བྱོན། དེར་མི་ཕལ་པ་སུ་བྱུང་བ་ལ་ཏྲི་ཤུ་ལ་རང་ཟུག་སྟེ་ཤི་བའི་ཤ་ལ་ཕྲ་མེན་མ་རྣམས་ཚོགས་བྱེད་པ་ཡིན་པ་ལ། སློབ་དཔོན་གྱིས་ཐལ་མོ་བརྡབས་པས་ཏྲི་ཤུ་ལ་ཆགཙནྜི་ཀའི་རྡོ་སྐུ་རང་བྱུང་གུལ་གུལ་བྱེད་པ་ལ། མགོ་ལྕག་བསྣུན་པས་མགོ་བྲང་ན་མར་སླེབ། རྣ་བ་ཡ་གར་ལུས་པས་ཀྲོང་ངཻ་བ་ད་


TNT17_Page_0027
[མ་དཔེ་གཟིགས་ན་འདིར་གནོན།]

ལྟའང་འདུག་གསུང༌། ཕྱིན་ཆད་སེམས་ཅན་ལ་གནོད་པ་མི་བྱེད་པར་བཀའ་བསྒོས། ཌཱ་ཀི་ནཱི་པ་ཊ་ཞེས་པ་འདི་བོད་རྣམས་ལྷོ་ཕྱོགས་ཡིན་ཟེར་ནའང༌། ཡོད་ནི་ཤར་ཕྱོགས་ན་ཡོད་པར་གདའོ། །ཡང་ལྷ་མོ་འདི་འདུལ་བ་པོ་གོ་རཀྵ་ཡིན་ཟེར་བའང་ཡོད། དེ་ནས་སཽ་རཥྟར་བྱོན་ནས་སོ་བ་ནཱ་ཐ་ཞེས་བྱ་བ། ལྷ་དབང་ཕྱུག་ཆེན་པོའི་རྡོ་སྐུ་རང་བྱུང་གཅིག་ཡོད། ཆོ་འཕྲུལ་ཤིན་ཏུ་ཆེ། དེ་ལ་སྡིགས་འཛུབ་བསྟན་ཀྱང་འགས་སུ་མ་འདོད་ནས། ཅི་ཡིན་བརྟགས་པས། སྟེང་ན་སྤྱན་རས་གཟིགས་ཀྱི་སྐུ་ཞིག་སྣང་སྐད། ཁ་ཅིག་འོད་ཟེར་ཅན་མའི་སྐུ་ཡིན་ནམ་ཡང་ཟེར། དེ་བསལ་བས་དངོས་སུ་གཟུགས་བསྟན་ནས་བཀའ་བཞིན་བྱེད་པར་ཞུས་པ་ལ། སློབ་དཔོན་གྱིས་ཁྱོད་ཀྱི་མཆོད་གནས་སུ་དགེ་འདུན་བརྒྱ་རྩ་ཞིག་མཆོད་ཅིགསྲོག་བཅད་པའི་མཆོད་པ་མ་ལེན། ཕུད་ཀྱིས་ངའི་སྐུ་ལ་མཆོད་པ་གྱིས་གསུང༌། ཁོ་ན་རེ། སངས་རྒྱས་ཀྱི་བསྟན་པ་མྱུར་དུ་འཇྀག་ལ། ང་ལ་མཆོད་པ་རྟག་ཏུ་འོང་མོད། འོན་ཀྱང་བསྟན་པ་ནམ་གནས་ཀྱི་བར་དགེ་འདུན་མཆོད་ཟེར། སློབ་དཔོན་རང་རྡོ་སྐུ་གསེར་འགྱུར་རྩི་ཕྱག་ཏུ་བསྣམ་པ་ཅིག་ཏུ་སོང་ཟེར། རེ་ཤིག་དངོས་སུ་མི་སྣང་བར་ཐལ། ཉིན་རེ་བཞིན་རྡོ་སྐུའི་ཕྱག་གི་གསེར་འགྱུར་རྩི་དེ་བླངས་ཏེ། ལྕགས་ཟངས་མང་པོ་ལ་རེག་པ་ཙམ་གྱིས་གསེར་དུ་འགྲོ་བས། དེ་ལ་བརྟེན་ཏེ་དགེ་འདུན་གྱི་འཚོ་བ་སྦྱོར། ཕྱི་ཞིག་ན་ཛོ་ན་གྷ་ཊའི་རྒྱལ་པོ་ཞིག་གིས། གསེར་སྲང་ཁྲི་ཕྲག་གཉིས་ཞུས་ནས། ད་དུང་ཞུ་སྙམ་པ་ལ་རྡོ་སྐུའི་སྤར་བ་བསྡམས།


TNT17_Page_0028
[མ་དཔེ་གཟིགས་ན་འདིར་གནོན།]

ཡང་བྲམ་ཟེ་དབུལ་པོ་ཞིག་གིས་ས་ཐེ་བཙུགས་ནས་གསོལ་བ་བཏབ་པས། གསེར་འགྱུར་རྩི་གནང༌། ཞག་བདུན་ནས་ཁྱེར་ཤོག་གསུང༌། དེས་ཞག་གསུམ་གྱི་བར་དུ་ཡོ་བྱད་གསེར་དུ་ཅི་འགྱུར་བྱས་པས། རྒྱལ་པོའི་མི་གཉིས་བྱུང་ནས་ལེན་པར་བརྩམས་པ་ལ། བྲམ་ཟེས་རྡོ་སྐུའི་ཕྱག་ཏུ་ཕུལ་བས། ཡང་སྤར་བ་བསྡམས། རྒྱལ་པོའི་མི་གཅིག་གིས་ཕྱག་ལ་དབྱུག་པ་བསྣུན་པས་རང་ལག་པ་ཆད་ནས་ཤ། གཅིག་གིས་ལག་པ་ཆོག་བྱས་པས་ཁ་ལྐུགས། རྒྱལ་པོ་ཡང་སེམས་སྨྱོ་བྱུང་ནས་འདས་པས། ཤིན་ཏུ་གཉན་པར་གྲགས། ད་ལྟ་དེ་ན་དགེ་འདུན་ནི་མེད། ནགས་ཚལ་དགྲོད་དཀའ་བ་ཅིག་གི་དཀྱིལ་ན་རྡོ་སྐུ་སྨུག་ནག་ཞལ་གདངས་པ་ཟིལ་ཆེ་བ་ཅིག་ཡོད་གསུང༌། ཡང་བར་སྐབས་རྒྱལ་པོ་རཱ་མ་པཱ་ལའི་དུས་སུ་རྣལ་འབྱོར་པ་སི་རོ་པ་ཞེས་པར་མཚན་བཏགས་ནས་ཀྱང༌། ཡུལ་དབུས་སུ་འགྲོ་བའི་དོན་ཅི་རིགས་མཛད། ཞབས་བཀྲུས་པའི་ཁུ་བ་རྒྱལ་པོ་རཱ་མ་པཱ་ལའི་གླང་པོ་ཆེ་བྷ་ནཱ་ད་ལ་བླུད་ནས་གཡུལ་འཐབ་པས་ཀླ་ཀློའི་རྒྱལ་པོ་བརྒྱད་ཙམ་ཐུལ། དུས་ཕྱིས་ཤར་ཕྱོགས་གཽ་རའི་ཡུལ་དུ་སྟག་གཟིག་གི་རྒྱལ་པོ་ཞིག་གཉིད་སད་པའི་རྔས་མགོ་ན། རྣལ་འབྱོར་པ་ཞིག་འདུག ཆུ་བོ་ལ་བསྐུར་བས་ཡང་ཡང་ལྡོག མེ་ལ་བསྲེགས་པས་ཀྱང་མ་ཚིག མཚོན་ཆ་སྣ་ཚོགས་བསྣུན་ཀྱང་མ་བསྣད་ཅིང་མཚོན་ཆ་རྣམས་ཆག དུག་ཁལ་དྲུག་གསོལ་དུ་བཅུག ཉིན་ཞག་ཕྲུགས་ཅིག་མི་མང་པོས་བསྲུངས་པས། སློབ་དཔོན་སྟོབས་དང་མདངས་རྒྱས་པར་མཐོང་ནས། གྲུབ་པ་ཐོབ་པར་ཤེས་ཏེ། སུ་ཡིན་


TNT17_Page_0029
[མ་དཔེ་གཟིགས་ན་འདིར་གནོན།]

ཞུས་པས། བི་རཱུ་པ་ཡིན་ཞེས་གསུང༌། དེར་ཡང་སྐལ་ལྡན་འགའ་ལ་གདམས་ངག་གནང་བ་དང༌། གུས་པར་བསྟེན་པ་ལ་བདེན་ཚིག་ཙམ་བརྗོད་པས། ཐུན་མོང་གི་དངོས་གྲུབ་ཐོབ་པ་མང་དུ་བྱུང༌། བྷ་ག་ལར་ཟླ་བ་བཞི་ཙམ་དངོས་སུ་ཀུན་གྱིས་མཇལ་དུ་རུང་བར་བཞུགས། ཕྱིས་གར་གཤེགས་ཆ་མེད། རྒྱ་ནག་ཏུ་དངོས་སུ་བྱོན་པའང་འདི་སྐབས་ཀ་ཡིན། བི་རཱུ་པ་མི་ཡུལ་དུ་ལན་གསུམ་འབྱོན་པར་གྲགས་པ། གསུམ་ཆར་སྔར་སོང་ངོ༌། །སློབ་དཔོན་འདི་ལ་ཤྲཱི་དྷརྨ་པཱ་ལ་ཟེར་ཡང༌། གནས་བརྟན་དྷརྨ་པཱ་ལ་ཞེས་བྱ་བ་ནཱ་ལནྡྲའི་མཁན་པོ་མཛད་པ་དེ་དང་མི་གཅིག་གོ །དེའི་སློབ་མ་ནི་ཨོ་ཌི་ཡ་ཎར་བྱུང་བའི་ནག་པོ་བི་རཱུ་པ་ཡིན་ཏེ། དེ་ནི་བྲམ་ཟེའི་རིགས་བཙས་ཙམ་ན་བྲམ་ཟེ་ལྟས་མཁན་རྣམས་ཀྱིས་སྡིག་པ་བཞི་བྱེད་པར་ལུང་བསྟན་སྐད། མིང་ནི་ནག་པོ་ཞེས་བྱའོ། །དེར་ལོ་བདུན་ཙམ་ན། སྡིག་པ་བཞི་པོ་མི་འབྱུང་བར་བྱ་བའི་ཕྱིར། ཡུལ་གཞན་དུ་འཁྱམས་སུ་བཏང་བ་ལས། དུས་ཡུན་རིང་མོ་འདས་ཏེ་མ་བྲམ་ཟེ་མོ་ལཀྵྨི་ཞེས་པ་དེ་ཡང་ཁྱིམ་ཐབ་དང༌། གྱོས་རྒྱུག་རྣམས་ཤི་བས། ཡུལ་གཞན་དུ་འཁྱམས་ཤིང་སོང་བ་རིགས་ཉམས་ཏེ། ཤར་ཕྱོགས་ཨོ་ཌི་བི་ཤའི་ཡུལ་དུ་ཆང་འཚོང་ཞིང་ཡོད་པ་ལས། ཕྱི་ཞིག་ན་བུ་ཡང་ཨོ་ཌི་བི་ཤར་སླེབ། མའི་ཁྱིམ་དུ་ཕྱིན་པ་ན། ཕན་ཚུན་མ་དང་བུ་ངོ་མ་ཤེས་པའི་སྐྱོན་གྱིས་མ་དང་འདུས། རྫིའུ་ནས་ཆུ་འདོད་པས་སྐོམ་འཐུངས་པ་མྱོས་བྱེད་དུ་འདུག ཁྲོས་ཏེ་རྫིའུ་ཤོད་དུ་འཕངས་པས་བ་ཞིག་ལ་ཕོག་སྟེ་ཤ། དེ་གསང་བར་བསམས་ཏེ། མཚན་


TNT17_Page_0030
[མ་དཔེ་གཟིགས་ན་འདིར་གནོན།]

མོ་ཡང་ཐོག་ནས་ཅེ་སྤྱང་གི་བཟར་འཕངས་པས། སྲང་ཀ་ན་བྲམ་ཟེ་ཞིག་རྒྱུ་བའི་མགོ་ལ་ཕོག་བྲམ་ཟེ་ཤི །དེར་ཐེ་ཚོམ་ཟོས་ནས་གཏམ་དྲིས་པས་ཆང་འཚོང་མ་དེ་རང་གི་མ་ཡིན་པར་ཤེས། དེ་ཡང་སྔོན་ལུང་བསྟན་པའི་སྡིག་པ་བཞི་ན། བྲམ་ཟེ་གསོད་པ། བ་གླང་གསོད་པ། མ་དང་འདུས་པ། ཆང་འཐུང་བ་སྟེ་རིག་ཕྱེད་ནས་བཤད་པའི་བྲམ་ཟེ་ཉམས་བྱེད་ཀྱི་སྡིག་པར་གྲགས་པ་བཅུ་དྲུག་གི་ནང་ནས་བཞི་པོ་དེ་ཡིན་ལ། དེ་རྣམས་ནུབ་གཅིག་ལ་བྱུང་བས་སྡིག་པ་དེ་སྦྱང་བའི་དོན་དུ། ཕྱི་ནང་གི་གནས་ཐམས་ཅད་དུ་སོང་ནས་དྲིས་ཀྱང་གཞན་ཡིད་ཆེས་པ་མ་བྱུང༌། སློབ་དཔོན་ཛ་ལནྡྷ་ར་པ་དང་མཇལ། རྡོ་རྗེ་ཕག་མོའི་གདམས་ངག་ཅིག་གནང་སྟེ། དེས་སྡིག་པ་འབྱང་གསུང༌། དེ་ནས་ཀོངྐུ་ནའི་ཡུལ་དུ་ཆུ་ནང་དུ་མགྲིན་པ་མན་ཆད་ནུབ་པར་བྱས་ནས། ཟླ་བ་དྲུག་ཏུ་བསྒྲུབས་པས། རྟགས་ཅི་ཡང་མ་བྱུང་སྟེ། འཕྲེང་བ་བཅད་དེ་ཆུ་ལ་དོར། སློབ་དཔོན་ལ་དྲིར་སོང་བས། ད་དུང་སྒྲུབས་ཤིགདངོས་གྲུབ་མྱུར་དུ་འོང་གསུང༌། དེར་སྔ་མ་བཞིན་དུ་བསྒྲུབས་པས། ཞག་བདུན་སོང་བའི་ཐོ་རངས། རྡོ་རྗེ་རྣལ་འབྱོར་མ་མིའི་བུ་མོའི་རྣམ་པར་བྱུང་སྟེ། ཨཥྟ་སཻ་ཁ་ཊ། ན་བ་སཻ་ཛ་ལ་ན། ཀཾ་ཨཱ་ཡི་བུ་ཏྲ། ཏུཾ་ཧི་ཀོངྐུ་ན་མཱ་ར་ཎ། དེ་ཡང་རྒྱ་མཚོའི་ལག་བརྒྱད་བརྒྱ་དང༌། ཆུ་བོ་དགུ་བརྒྱ་འདས་ཏེ་བུ་ག་ནས་འོངས། ཀོངྐུའི་ཡུལ་དུ་ཁྱོད་འཆི་བར་བྱེད་དམ་ཞེས་པ་ཡིན་པ་ལ། ཚིག་དང་པོ་གཉིས་འདྲ་བ་ལ། ཨ་ཡི་མཱ་ཏ་བཛྲ་ཡོ་གི་ནཱ། ཏེ་རི་ས་ར་ཎ། ཡུམ་རྣལ་འབྱོར་མ་ཁྱོད་ལ་སྐྱབས་སུ་མཆིར་འོངས་ཞེས་པའོ། །དེ་ཉིད་དུ་ཕྱག་སྤྱི་


TNT17_Page_0031
[མ་དཔེ་གཟིགས་ན་འདིར་གནོན།]

བོར་བཞག་པས། ཏིང་ངེ་འཛིན་མཆོག་ཏུ་གྱུར་པ་ཐོབ་ཅིང༌། ཁྱོད་ཀྱི་སྐྱེ་བ་མང་པོར་ལས་ཀྱི་འབྲེལ་བ་ཡོད་པ་ནི་བི་རཱུ་པ་ཡིན་པས། དེ་མ་ར་ཧ་ཊ་ན་ཡོད་ཀྱི་དེར་སོང་གསུང༌། དེར་ཡང་བི་རཱུ་པས་རྡོ་རྗེ་ཐོད་བཅིངས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས། དུར་ཁྲོད་རྣམས་སུ་བརྟུལ་ཞུགས་ཀྱི་སྤྱོད་པས་རྒྱུ་ཞིང་གཤེགས་སོ། །རྡོ་རྗེ་ཐོད་བྱས་ཀྱང་ཞྭ་ཆུང་སྔོན་པོ་གཅིག་ཡོད་དོ། །ད་ལྟ་ཡང་སྐུ་ལུས་མ་སྤངས་པར་ཨོ་རྒྱན་གྱི་གནས་ན་བཞུགས་པར་གྲགས། བི་རཱུ་པ་ཆེ་ཆུང་འདི་གཉིས་གཤིན་རྗེ་གཤེད་དང༌། ཕག་མོའི་ལམ་ལ་བརྟེན་ནས་གྲུབ་པ་བརྙེས་པར་བྱེད་གསུང༌། བི་རཱུ་པ་ཆུང་བ་ལ་བྱ་དཱ་ལི་པས་ཞུས་ཏེ། དེ་ནི་སྔོན་བྱ་གསོད་པའི་རིགས་ཡིན་པ་ལ། ལན་ཅིག་ནེ་ཙོ་ཞིག་ཤིང་ཏོག་ཁར་ཐོགས་ནས་ནམ་མཁའ་ལ་འཕུར་བ་མཐོང་སྟེ། དེར་ཁྱོད་ཅི་ཞིག་བྱེད་དྲིས་པ་ན། ཕྱོགས་འདི་ན་གྲུབ་ཐོབ་བི་རཱུ་པ་བཞུགས་པས། དེ་ལ་མཆོད་པ་བྱེད་དུ་འགྲོ་ཞེས་ཟེར་བས་དེས་བསམ་པ། དུད་འགྲོ་འདི་ལྟ་བུ་ཡང་དགེ་བའི་སེམས་དང་ལྡན་ན། ཁོ་བོ་ཅག་མིར་གྱུར་པ་དགེ་བ་བྱེད་པ་ལྟ་སྨོས་ཀྱང་ཅི་དགོས་སྙམ་སྟེ། ཤིང་ཏོག་འགའ་ཟུང་དེ་ལ་བསྐུར་ཏེ། ཁྱོད་ཀྱིས་འདི་ཡང་གྲུབ་ཐོབ་དེ་ལ་ཕུལ་ཞིག་ཅེས་བྱས་སོ། །ནེ་ཙོས་ཀྱང་རྔོན་པའི་ཤིང་ཏོག་ཕུལ་བ་ན། བི་རཱུ་པས་དེ་མ་བླངས་ཏེ། ཀྭ་ཡེ་ནེ་ཙོ། ཕྱིན་ཆད་ཀྱང་སྡིག་པ་ཅན་དེ་ལྟ་བུའི་ཡོ་བྱད་ཁུར་མ་འོང་ཞེས་གསུང་ངོ༌། །དེ་ནས་ནེ་ཙོ་དེས་ཤིང་ཏོག་སླར་ཁོ་རང་ལ་གཏད། དེ་ལ་ཁྱོད་ཀྱིས་ཅིའི་ཕྱིར་མ་ཕུལ་ཞེས་དྲིས་པས། གྲུབ་ཐོབ་དེ་འདི་ལྟར་གསུང་ཞེས་སྔ་


TNT17_Page_0032
[མ་དཔེ་གཟིགས་ན་འདིར་གནོན།]

མ་ལྟར་བསྙད་དོ། །དེ་ནས་ཤིན་ཏུ་འགྱོད་པར་གྱུར་ནས་སྡིག་པ་བཤགས། ནགས་ཚལ་དེ་ཉིད་དུ་ཡང་དང་ཡང་དུ་འཁོར་ཞིང་འཚོལ་དུ་སོང་བ་ན། ཕྱི་ཞིག་ན་མཇལ། དབང་བསྐུར་གདམས་པ་ཡང་གནང་བས། དེ་ཉིད་བསྒོམ་བཞིན་དུ་རྩེ་གཅིག་ཏུ་འདུག་པ་ན། བྱ་རྔོན་པའི་བྱ་བ་ལ་སེམས་ཡེངས་ཏེ། བླ་མ་ལ་ཞུས་པས། ཤིན་ཏུ་དགག་དཀའ་བའི་རྣམ་རྟོག་འདི་བཀག་ཀྱང་ཏིང་ངེ་འཛིན་སྐྱེ་མི་ཐུབ་ཀྱ། དེ་བས་ན་འཇིམ་པ་དང༌། ཟན་དག་ལ་བྱའི་གཟུགས་ཆོས་ལ། དེ་དག་གི་སྐེ་ཆོད་ཅིང་ཏིང་ངེ་འཛིམ་སྒོམས་ཤིག་ཅེས་གསུངས། དེས་ཀྱང་དེ་བཞིན་དུ་བྱེད་ཅིང་བསྒོམས་པས། མཐར་གྱི་ལོ་བཅུ་གཉིས་ན་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱང་ཐོབ་ཅིང༌། གྲོང་ཁྱེར་རྣམས་སུ་བྱ་སྣ་ཚོགས་གསོད་པའི་སྤྲུལ་པ་སྟོན། ཤ་ཡང་གསོལ། དེར་མི་རྣམས་ཀྱིས་རྣལ་འབྱོར་པའི་གཟུགས་བཟུང་ནས། སེམས་ཅན་ལ་གནོད་པ་འདི་ལྟ་བུ་བྱས་སོ་ཞེས་འཕྱ་བར་བྱས་པ་ན། སྔར་བསད་པ་ཐམས་ཅད་སླར་གསོས། དེ་ལྟར་ལོ་བཅུ་གཉིས་སུ་བྱ་རྔོན་པའི་བྱ་བ་བྱེད་པར་སྤྲུལ་ནས། རིག་པ་བརྟུལ་ཞུགས་ཀྱི་སྤྱོད་པ་སྤྱད་པ་ན། མཚན་ཡང་གྲུབ་ཐོབ་བྱ་དཱ་ལི་པ་ཞེས་གྲགས་ཏེ། བྱ་དཱ་ལི་པ་ནི་བྱ་རྔོན་པ་ཞེས་བྱ་བ་ཡིན་ནོ། །དེས་ཀུ་ས་ལི་བྷ་དྲ་ལ་བཤད་དེ། གཏུམ་མོའི་བརྒྱུད་པ་ལུགས་གཅིག་གོ །ཡང་བི་རཱུ་པས་ཌོམྦི་ཧེ་རུ་ཀ་ལ་གདམས་ཏེ་སློབ་དཔོན་དེ་ནི་ཀོ་མཁན་ཡིན་པར་བོད་ན་གྲགས་ཀྱང༌། ཤར་ཕྱོགས་ཏི་པུ་རིའི་ཡུལ་གྱི་རྒྱལ་པོ་ཞིག་ཡིན་གསུང༌། དེར་སློབ་དཔོན་བི་རཱུ་པ་བྱོན་ཏེ།


TNT17_Page_0033
[མ་དཔེ་གཟིགས་ན་འདིར་གནོན།]

རྒྱལ་པོ་དེ་ཡང་ལྷག་པར་དད་ནས་རྗེས་སུ་འཛིན་པར་ཞུས་པས་དབང་བསྐུར་ཞིང་གདམས་པ་ཡང་གནང་ངོ༌། །རྒྱལ་པོས་ཀྱང་དེ་ཉིད་བསྒོམ་བཞིན་དུ་འདུག་པ་ན། རིམ་པ་གཉིས་ཀྱི་རྟོགས་པ་ཡང་རྒྱ་ཆེར་སྐྱེས་པས། སྤྱོད་པ་བྱ་བའི་དུས་ཡིན་པར་མཁྱེན་ནས་གསངས་ཏེ་སྤྱོད་པ་ཅུང་ཟད་སྤྱད་པ་ན། ཕྱག་རྒྱ་མོ་ལུང་བསྟན་པ་བྱུང་སྟེ། གཡུང་མོའི་རིགས་ཀྱི་བུ་མོ་པདྨ་ཅན་དུ་གྱུར་པ་ཞིགའཇིག་རྟེན་པའི་མངོན་དུ་བསྟེན་པས། རྒྱལ་པོའི་རིགས་ཉམས་ཞེས་བླཽན་པོ་ལ་སོགས་པའི་འབངས་རྣམས་ཀྱིས་རྒྱལ་སྲིད་ལས་བཏོན་ཏེ་ཕྱིར་བསྐྲད་དོ། །དེ་ནས་རིག་པ་བརྟུལ་ཞུགས་ཀྱི་སྤྱོད་པ་སྤྱོད་ཅིང༌། ཡུལ་དང་ནགས་ཚལ་རྣམས་སུ་རྒྱུ་བ་ན། རྒྱལ་པོ་ཌོམྦི་པ་ཞེས་གྲགས་སོ། །དེ་ཡང་ཌོམྦི་ཞེས་པ་ནི་གཡུང་པོ་སྟེ། གྲོང་ཁྱེར་གྱི་ཕྱི་རོལ་ཏུ་གནས་པ། ཉ་དང་བྱ་དང་རི་དྭགས་གསོད་ཅིང་ཟ། ཤ་འཚོང་དུ་མེད། གླུ་གར་བྱེད། རྩ་བ་འབྲས་བུ་འཚོང་བ་ལ་སོགས་པ། ངན་པའི་ལས་གཅིག་ཏུ་མ་ངེས་པ་སྤྱོད་པའི་རིགས་ངན་གྱི་ཁྱད་པར་ཟུར་བ་ཞིག་ཡིན་ནོ། སློབ་དཔོན་རང་ཌོམྦི་མིན་ཡང༌། བཙུན་མོ་ཌིམྦི་ནཱི་ཡིན་པས་ཌོམྦི་པར་ཐོགས། ཌོམྦི་ཞེས་པ་ནི་གཡུང་མོ་ཅན་ཞེས་པ་ཡིན་ནོ། །སློབ་དཔོན་འདི་ནི་ཤིན་ཏུ་དབངཔོ་རྣོ་བས། སྔོན་བི་རཱུ་པས་དབང་བསྐུར་ནས། དེ་བར་དུ་ལོ་དྲུག་ལས་མ་ལོན་སྐད། དེ་ནས་ཡུལ་སྣ་ཚོགས་སུ་སྤྱོད་ཅིང༌། རིང་ཞིག་ལོན་པ་ན་སྔར་གྱི་ཡུལ་དེར་ནད་ཡམས་དང་མུ་གེ་ལ་སོགས་པ་སྣ་ཚོགས་པས་སྡུག་བསྔལ་བར་གྱུར། ལྟས་མཁན་རྣམས་ཀྱིས་བརྩིས་པས། རྒྱལ་པོ་བསོད་ནམས་


TNT17_Page_0034
[མ་དཔེ་གཟིགས་ན་འདིར་གནོན།]

ཅན་ཡུལ་གཞན་དུ་བསྐྲད་པས་ཡིན་པར་ཤེས་ནས། སླར་ཡང་སྤྱན་དྲངས་པ་ན། སློབ་དཔོན་རིག་མ་དང་བཅས་པ་སྟག་མོ་གྲུས་མ་ལ་ཆིབས། དུག་སྦྲུལ་ཕྱག་ཏུ་བསྣམས་ཏེ་བྱོན་པ་ན། ཐམས་ཅད་ཀྱིས་རྒྱལ་པོ་གྲུབ་པ་ཐོབ་པ་ཡིན་པར་ཤེས། ཞབས་ལ་ཕྱག་བཙལ། ཡུལ་གྱི་གནོད་པ་ཐམས་ཅད་ཀྱང་ཞ། ཡུལ་མི་སྐལ་བ་དང་ལྡན་པ་རྣམས་ཀྱིས་རྗེས་སུ་བཟུང་བར་ཞུས་ཏེ། གདམས་པ་མཐའ་དག་གིས་ཉེ་བར་གདམས་པས། དེར་ཡང་དངོས་གྲུབ་ཐོབ་པ་དང༌། སྒྲུབ་པ་པོ་མཆོག་ཏུ་གྱུར་པ་མང་དུ་བྱུང༌། དེ་ནས་ཡུལ་ར་དྷ་ཞེས་པའམ་ཕལ་སྐད་དུ་རར་ཞེས་བྱ་བའི་རྒྱལ་པོ་དེ་ན། སངས་རྒྱས་པའི་བསྟན་པ་ལ་གནོད་པ་བྱེད་པ་ཞིག་སྟེ། འོན་ཀྱང་སྟག་དང་སྦྲུལ་ལ་ནི་ཤིན་ཏུ་སྐྲག་པ་ཞིག་ཡོད། དེ་འདུལ་བའི་དོན་དུ་སློབ་དཔོན་གྱིས་དེའི་ཕོ་བྲང་དང་ཉེ་བའི་ནགས་ཚལ་ཞིག་ཏུ་བཞུགས་པ་ན། རྒྱལ་པོས་རྣལ་འབྱོར་པ་ངན་པ་དེ་མ་འདུག་ཟེར། དེ་ནས་སློབ་དཔོན་གྱིས་ཆོ་འཕྲུལ་གཞན་སྔ་མ་དང་འདྲ་བ་ལ། སྦྲུལ་རེག་པའི་དུག་ཅན་གྱིས་རྒྱན་མཛད། མཐོང་དུག་ཅན་ནི་ལྕག་གི་ཚུལ་དུ་བསྣམས། ཁ་རླང་གི་དུག་ཅན་བདུན་གྱིས་དབུ་ལ་གདེངས་ཀ་བྱས། རྒྱལ་པོའི་མདུན་ན་ཕར་གཤེགས་པ་ན། རྒྱལ་པོ་གྲོང་ཁྱེར་གྱི་མི་དང་བཅས་པ་འཇིགས་ཤིང་སྐྲག་ནས། གསེར་དང་དངུལ་གྱི་མེ་ཏོག་གཏོར་ཏེ། སློབ་དཔོན་གཞན་དུ་གཤེགས་པར་ཞུ་ཞུས་པས། སློབ་དཔོན་ཉིད་ཧེ་རུ་ཀ་ཕྱག་གཉིས་པའི་རྣམ་པར་གྱུར། སྟག་མོ་ཡང་མི་གང་ཙམ་གྱི་ས་ལ་མ་རེག་པར་ནམ་མཁའ་ལ་འགྲོ་ཞིང༌། ཁྱེད་རྣམས་སངས་རྒྱས་ཀྱི་བསྟན་པ་ལ་མི་འཇུག་ན།


TNT17_Page_0035
[མ་དཔེ་གཟིགས་ན་འདིར་གནོན།]

སྦྲུལ་གདུག་པ་ཅན་འདི་རྣམས་གཏོང་ངོ་ཞེས་བསྡིགས་པས། ཐམས་ཅད་སངས་རྒྱས་ཀྱི་བསྟན་པ་ལ་ཞུགས། ར་རའི་ཡུལ་དུ་རེ་ཞིག་མུ་སྟེགས་རྒྱུན་ཆད་སྐད། དེ་ནས་ལྷོ་ཕྱོགས་ཀརྞ་ཊ་ཀའི་ཡུལ་དུ་བྱོན་ནས། ནགས་ཚལ་ཞིག་ཏུ་འཁོར་མང་པོ་དང་བཅས་ཤིང་ཏིང་ངེ་འཛིན་དུ་བཞུགས། རེ་ཞིག་ན། ཨཊྚ་ཊྚ་ཧཱ་ས་ཞེས་བྱ་བའི་དུར་ཁྲོད་ཅིག་ཏུ་རྒྱལ་པོ་ས་མུཙྪ་ཡ་ཞེས་བྱ་བས་སྦྱིན་བདག་བྱས་ཏེ། རྣལ་འབྱོར་ཕོ་མོ་ལྔ་བརྒྱའི་འཁོར་གྱིས་བསྐོར་ནས། ཟླ་བ་དྲུག་ཏུ་ཚོགས་ཀྱི་འཁོར་ལོ་བསྐོར་བ་ན། བྲམ་ཟེའི་དགེ་སློང་སུ་སིདྡྷ་ཀ་ར་ཞེས་བྱ་བ་ཚོགས་ཀྱི་སྤྱོད་པ་ལ་མ་དད་ནས། སློབ་དཔོན་ལ་གནང་བ་མ་ཞུས་པར་ཕྱིར་སོང་ངོ༌། །དེ་ཉིད་ནི་བཀའི་ཆད་པས་ཤ། གཞན་ལྔ་བརྒྱ་པོ་ཐམས་ཅད་ཀྱི་དངོས་གྲུབ་སྣ་རེ་མ་ཐོབ་པ་མ་བྱུང་སྐད། དེ་དང་ཉེ་བ་ན་མུ་སྟེགས་ཀྱི་རྒྱལ་པོ་ཞིག་གིས། མུ་སྟེགས་པའི་ལུགས་ཀྱི་མཆོད་རྟེན་བརྒྱ་རྩ་བརྒྱད་བཞེངས། རལ་པ་ཅན་ཁྲི་ཙམ་འཚོགས་ནས་རབ་གནས་བྱེད་པ་ན། སྲོག་ཆགས་སྣ་ཚོགས་བསད་པའི་སྙིང་གི་ཕུང་པོ་འབའ་ཞིག་རང་ལ་ཡང་མི་འགྲེང་གསུམ་ཙམ་གྱི་དཔངས་ཡོད་པའི་གཏོར་མ་བྱས་སོ། །དེར་སློབ་དཔོན་གྱི་གཡོག་མོ་ཞིག་སོང་བ་དེ་རྣམས་ཀྱིས་བརྡུངས་པས། སློབ་དཔོན་གྱིས་དགོངས་པ་བཏང་བས་ནུབ་མོ་མཆོད་རྟེན་ཐམས་ཅད་མགོ་གཞུག་ལོག གཏོར་མ་སོགས་མཆོད་པ་ཐམས་ཅད་ཕྱོགས་བཅུར་འཐོར། ནང་པར་མུ་སྟེགས་རྒྱལ་པོ་དང་བཅས་པ་འཇྀགས་ཤིང་སྐྲག་ནས་སློབ་དཔོན་གྱི་དྲུང་དུ་བྱུང་སྟེ་བཟོད་པར་གསོལ། མཆོད་རྟེན་རྣམས་རྣལ་དུ་གནས་པར་ཞུས། དེར་སློབ་དཔོན་གྱིས་ཁྱེད་རྣམས་


TNT17_Page_0036
[མ་དཔེ་གཟིགས་ན་འདིར་གནོན།]

ཕྱིན་ཆད་ལྷ་མཆོད་པའི་དོན་དུ་སྲོག་ཆགས་གཅིག་ཀྱང་མ་གསོད་ཅིག གལ་ཏེ་གསོད་ན་མཆོད་རྟེན་ཐམས་ཅད་འགས་པར་འགྱུར་རོ། །སངས་རྒྱས་པའི་ནུས་པ་བསྟན་པའི་ཕྱིར། མཆོད་རྟེན་གཅིག་མིན་པ་ཐམས་ཅད་རྣལ་དུ་གནས་པར་འགྲོ་གསུང༌། དེ་རྣམས་ཀྱིས་སླར་ལྡོག་སྟེ་བལྟས་པ་ན་དེ་བཞིན་དུ་སོང༌། དུས་ཕྱིས་ཡུལ་དེའི་རྒྱལ་པོ་ཞིག་གིས་སྲོག་གི་མཆོད་པ་བྱས་པས། མཆོད་རྟེན་བརྒྱ་དང་བདུན་པོ་ཐམས་ཅད་ཉིས་ཚལ་གསུམ་ཚལ་དུ་གས། ད་ལྟ་ལྕགས་ཀྱིས་བསྡམས་ནས་འདུག མུ་སྟེགས་ཀྱི་མཆོད་རྟེན་ཟེར་ཡང་ལིང་གའི་རིགས་ཅན་ཞིག་ཡིན་གསུང༌། དེར་ཡུན་རིང་དུ་འགྲོ་བའི་དོན་མཛད་ནས། སྐུ་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ། །དེའི་སློབ་མ་གྲུབ་པ་བརྙེས་པའི་གཙོ་བོ་ན། ཌོམྦི་རིགས་ཀྱི་རྣལ་འབྱོར་མ། སློབ་དཔོན་ཨ་ལ་ལ་བཛྲ། ཧེ་མ་ལ་བཛྲ་སྟེ་གསེར་འཆང་རྡོ་རྗེ། ཡུལ་དབུས་ཀྱི་ར་ཏ་བཛྲ་སྟེ་བཞིའོ། །གཞན་ཡང་ནགས་ཁྲོད་པ་དང༌། སློབ་དཔོན་གརྦ་རི་པ་དང༌། ཛ་ཡ་ཤྲཱི་དང༌། མི་ཐུབ་ཟླ་བ་དང༌། སྒྲ་གཅན་འཛིན་རྡོ་རྗེ་ལ་སོགས་པ་ཡང༌། སློབ་དཔོན་འདིའི་ཞབས་ལ་རེག་པས་དངོས་གྲུབ་ཕྲ་མོ་ཐོབ་པ་ཡིན་ནོ། །དེ་ལ་གྲུབ་ཐོབ་ཆེན་པོ་ཌོམྦི་པས་གཡུང་མོ་རྣལ་འབྱོར་མ་ལ་གདམས། དེས་ར་ཏ་བཛྲ་ལ། དེས་ནག་པོ་སྤྱོད་པ་ལ་གདམས་ཏེ་བརྒྱུད་པའི་ལུགས་གཅིག་གོ །ཡང་གཡུང་མོ་རྣལ་འབྱོར་མས། སྤྱོད་པ་པ་ལ་གདམས་པའང་ལུགས་གཅིག་ཡིན་མོད་ཀྱ། གཏུམ་མོའི་བཀའ་བབས་ནི་བར་པ་གཙོ་ཆེ་བ་ཡིན་ནོ། །དེའི་གཡུང་མོ་རྣལ་འབྱོར་མ་ནི་ལྟ་སྟངས་བཞིས་འགྲོ་བའི་མཛད་པ། ལས་བཞིའི་སྔགས་དང་སྦྱོར་བ་མང་པོ་


TNT17_Page_0037
[མ་དཔེ་གཟིགས་ན་འདིར་གནོན།]

ཁོང་ཉིད་ཀྱིས་མཛད་པ་ཤིན་ཏུ་ནུས་པ་ཆེ་བ་མང་པོ་ད་ལྟ་ཡང་ཡོད་གསུང༌། དེས་རྡོ་རྗེའི་གླུ་མང་དུ་བླངས་ཤིང་སེམས་ཅན་གྱི་དོན་བྱས་ཏེ། མཁའ་སྤྱོད་དུ་བཞུད་དེ། ཌོམྦི་པ་ཉིད་ལ་ཧེ་རུ་ཀས་ལུང་བསྟན་པའི་ཕྱག་རྒྱ་དེ་ཡིན་ནོ། །དེ་ལ་མི་ཐུབ་ཟླ་བས་ཞལ་གཟིགས་ཀྱི་སྒོ་ནས་ཞུས་སོ། །དེ་ནི་པཎྜི་ཏ་ཤིན་ཏུ་མཁས་པ་ཡིན། ཌོམྦིའི་སློབ་བརྒྱུད་མང་པོ་ལ་ཐོས་པ་མཛད། ཕྱིས་ཌོམྦི་རྣལ་འབྱོར་མའི་སློབ་བརྒྱུད་གཅིག་ལ་གདམས་ངག་ཞུས། ཨོ་རྒྱན་དུ་རྩེ་གཅིག་ཏུ་བསྒོམས་པས་ཌོམྦི་པ་ཡུམ་དང་བཅས་པ་མཇལ། གདམས་པ་སྩལ། དེར་དུར་ཁྲོད་དུ་ཐོད་སྐམ་གྱི་སྤྱིལ་བུ་ཆུང་ངུ་བརྩིགས། རྣལ་འབྱོར་མ་གཅིག་གིས་སྒྲུབ་གཡོག་བྱས། སློབ་མ་གཅིག་གིས་འཚོ་བ་བསྐྱལ་གྱིན་བསྒྲུབ་པས། མཐར་རྟོགས་པ་ཁྱད་པར་ཅན་སྐྱེས། ཧེ་རུ་ཀའི་ཞལ་མཐོང༌། ཐུན་མོང་གི་དངོས་གྲུབ་ཐོབ། དེ་ནས་ལན་ཅིག་ཚོགས་འཁོར་ཆེན་པོ་བྱས། མཁའ་འགྲོ་མ་དང་ཕྲ་མེན་མ་ཀུན་ཚོགས་ལ་བཀུག །ལ་ཧོར་གྱི་ཡུལ་ན་གཟུགས་ཅན་མ་གཅིག ཁྱིམ་གྱི་ཤིང་འབྲས་བུ་ཅན་ཐམས་ཅད་རྩ་བ་བཏོན་ནས་ཁྱེར་ཚོགས་འཁོར་ལ་ཡང་ཕྱིན་པ་ན། དེའི་ཁྱོས་ནུབ་མོ་མི་སྡོད་པར་ཤེས། སྐྱེད་ཚལ་གྱི་ཨ་མྲའི་ཡལ་གའི་ཕག་ཏུ་གབ་ནས་བསྡད་པས། ཤིང་དེ་རང་ཡང་རྩ་བ་ནས་བཏོན་ནས་ཁྱེར། དེ་ལྟར་ཚོགས་གྲལ་དུ་ཤ་ཆེན་སོགས་བཟའ་བ་དང༌། རྣལ་འབྱོར་ཅན་རྣམས་དང་ལྷན་ཅིག་སྤྱོད་པར་ཤེས་ནས། མི་དེ་ཁྱིམ་ཐབ་དང༌། ཚོགས་པ་ལ་མ་མགུ། སློབ་དཔོན་ན་རེ། རང་རེའི་ཚོགས་འདི་ན་གསང་བ་ལ་འཁུ་བ་ཡོང་པས་སྒྲོལ་དགོས་གསུང༌།


TNT17_Page_0038
[མ་དཔེ་གཟིགས་ན་འདིར་གནོན།]

ཐོ་རངས་མོས་ཤིང་ཁྱེར་ནས་རང་གནས་སུ་བཙུགས། ནང་པར་བདག་པོ་ལ་ཁྱོད་ལ་སློབ་དཔོན་སུ་དུརྫ་ཡ་ཙནྡྲའི་བཀའ་གཅིག་ཡོད་དེ་ཁྱོད་བསྒྲལ་ཟིན་བྱས་པས་དེར་ཤ། དེ་སོགས་ནུས་པ་དཔག་ཏུ་མེད། དེ་ལ་དེའི་རིག་མ་སུ་བྷོ་གས་ཞུས། དེ་ལ་དཱ་ན་ཤྲཱིས་ཞུས། དེ་ལ་རྡོ་རྗེ་གདན་པ་བར་པས་ཞུས། དེ་ལ་ཀུ་ས་ལིས་ཞུས་པའང་ཡོད་མོད། ཚིག་བརྒྱུད་གཙོ་ཆེ། ཡང་སྤྱོད་པ་བས་སིང་ག་ལའི་རྣལ་འབྱོར་མ་ལ་བཤད། དེ་ལ་མི་ཐུབ་ཟླ་བས་ཞུས། དེ་ལ་རཱ་ཧུ་ལ་བཛྲ་གྱིས་ཞུས་པའང་ཡིན། དེ་ནི་ཆུང་ངུ་ནས་ཡི་དམ་ཞལ་གཟིགས་རིགས་རྒྱལ་རིགས། བི་ཀྲ་མའི་དགེ་སློང་པཎྜི་ཏ་ཡིན། དེར་གསང་སྔགས་སྒོམ་ཞིང༌། བླ་མས་ཀུན་སྤངས་གྱིས་ཤིག་གསུང༌། འོན་ཀྱང་ང་རྒྱལ་གྱི་དབང་ལས་བཀའ་བཅག་སྟེ་རེ་ཞིག་ཀུན་སྤངས་མ་མཛད། ཕྱིས་དེའི་སྡིག་པ་སྤྱོད་པ་ལ་རྩེ་གཅིག་ཏུ་བསྒྲུབས་ཀྱང་ཅང་མ་འགྲུབ། བླ་མ་གུ་ཎ་ཨ་ཀ་ར་ན་རེ། ལྕེ་དང་ཡན་ལག་ཆོད་གསུང༌། ལྗགས་དང་ཡན་ལག་བཞི་བཅད་པས། སྤྱན་རས་གཟིགས་དང་རྡོ་རྗེ་རྣལ་འབྱོར་མ། ནག་པོ་ཆེན་པོ། སྒྲོལ་མ་སྟེ་བཞིས་དངོས་སུ་ཞལ་བསྟན། བྱིན་གྱིས་བརླབས། དེ་ནས་བླ་མ་ཛྙ་ནས་ག་ར་ན་རེ། ཁྱོད་ཆུ་འདིར་ཞག་བདུན་ལུས་སྤྱིངས་ལ་སྡོད་གསུང༌། དེ་ལྟར་བྱས་པས། ལུས་ཀྱི་ཁྲག་སྲིན་བུ་པད་པ་མང་པོས་འཇིབས་ནས། འཆི་ལ་ཁད་པར་སོང༌། དེ་གཉིས་ཀྱིས་བླ་མའི་བཀའ་བཅག་པའི་སྒྲིབ་པ་དག་སྐད། དེ་ནས་ལྷོ་ཕྱོགས་སུ་བསྒོམས་པས་ཕྱག་རྒྱ་ཆེན་པོའི་དངོས་གྲུབ་ཐོབ། ཤིང་གི་རི་ཟེར་བ། རི་ནག་པོའི་ཁོང་སེང་ན་བཞུགས་སྐད། ཤིང་གི་རི་ཞེས་པ་མོན་མཚམས་ཀྱི་འདི་མིན་ལྷོ་ཕྱོགས་


TNT17_Page_0039
[མ་དཔེ་གཟིགས་ན་འདིར་གནོན།]

ན་ཡོད་དོ། །དེ་ལ་དཱ་ན་ཤྲཱིས་ཞུས་པས་ན་གོང་བཞིན་ཡིན་མོད། འདི་དགྱེས་རྡོར་གྱི་གཏུམ་མོ་ཁོ་ན་ཡིན་ཡང་གསུང༌། ད་ཏ་བཛྲ་ནི་ནཱ་ལནྡའི་པཎྜི་ཏ་ཅིག་ཡིན་སྣང་ཡང༌། རྣམ་ཐར་རྒྱས་པར་མི་གསུང༌། ཡང་ཙརྱ་པ་ཁ་གཅིག བི་རཱུ་པ་ཆུང་པ། ནག་པོ་སྤྱོད་པ། ཌོམྦི་ཧེ་རུ་ཀ མི་ཐུབ་ཟླ་བ། ཀུ་ས་ལི་བྷ་དྲ་ཞེས་བརྒྱུད་པ་འདེད་པའང་ཡོད་མོད་ཀྱ། དེ་ནི་མ་དག་གསུང༌། རིན་པོ་ཆེའི་འབྱུང་ཁུངས་ལྟ་བུའི་གཏམ་ལས། གཏུམ་མོ་བརྒྱད་པའི་གཏམ་གྱི་སྐབས་ཏེ་གཉིས་པའོ།། །།གསུམ་པ་ནི་ལས་ཀྱི་ཕྱག་རྒྱའི་བཀའ་བབས་ཡིན་ནོ། །དེ་ཡང་སངས་རྒྱས་དངོས་ཀྱི་ཞལ་མཐོང་བའི་རྒྱལ་པོ་ཨིནྡྲ་བྷུ་ཏི་ཆེན་པོ་དེ་ན། ངོ་བོ་གསང་བདག་ཕྱག་ན་རྡོ་རྗེ་ཡིན་གསར་བརྙེས་དང་གདོད་མ་གང་ཡིན་བསམ་པར་མི་ནུས། བསྟན་པ་འདི་ལ་གསང་སྔགས་པ་ཐམས་ཅད་ཀྱི་གཙོ་བོ་ཡིན། དེ་ཡང་ཨོ་རྒྱན་གྱི་རྒྱལ་པོ་སྟེ་རྒྱལ་སྲིད་འབྱོར་ཞིང་བདེ་བར་ཡོད་པའི་སྐབས། སྟོན་པའི་འཁོར་དགྲ་བཅོམ་པ་རྣམས་གླིང་གཞན་ལ་འཕུར་ཏེ་འགྲོ་འོང་བྱེད་པ་རྒྱལ་པོ་ཨིནྡྲ་བྷུ་ཏིས་གཟིགས་པ་ན་ཐག་རིང་པས་ཆ་མ་ཕྱེད་དེ། བློན་པོ་རྣམས་ལ་བྱ་དམར་པོའི་ཁྱུ་འདི་རྣམས་ཅི་ཡིན་དྲིས་པས། བློན་པོ་རྣམས་ན་རེ། ལྷ་ཅིགའདི་ནི་བྱ་མ་ལགས། དྲང་སྲོང་ཆེན་པོ་སངས་རྒྱས་བཅོམ་ལྡན་འདས་ཀྱི་ཉན་ཐོས་ལགས་སོ་བྱས་པས། རྒྱལ་པོ་སངས་རྒྱས་ལྟ་འདོད་པ་ལ། བློན་པོ་རྣམས་ཀྱིས་ཐག་རིང་བས་མི་འབྱོན་ཟེར་བ་ན། རྒྱལ་པོས་གསོལ་བ་བཏབ་པས། ནང་པར་གདུགས་ཚོད་ལ་སངས་རྒྱས་འཁོར་དགྲ་བཅོམ་པ་ལྔ་བརྒྱ་དང་བཅས་པ་བྱོན་པ་ལ་རྒྱ་ཆེར་མཆོད་ནས། སངས་རྒྱས་ཐོབ་པའི་


TNT17_Page_0040
[མ་དཔེ་གཟིགས་ན་འདིར་གནོན།]

ཐབས་ཞུས་པས། རྒྱལ་པོ་འདོད་ཡོན་སྤངས་ལ་བསླབ་པ་གསུམ་དང་ཕ་རོལ་ཏུ་ཕྱིན་པ་དྲུག་ལ་བརྟེན་ཅིག་གསུངས་པས། རྒྱལ་པོས་བདག་བུད་མེད་ཀྱི་ཚོགས་དང་ལྷན་ཅིག་འདོད་པ་ལྔ་ལ་ལོངས་སྤྱད་པས་སངས་རྒྱས་ཐོབ་པའི་ཐབས་ཅིག་འཚལ་ལོ། །ཛམྦུའི་ཚལ་ནི་ཉམས་དགའ་བར། །ཝ་སྐྱེས་ཉིད་དུ་གྱུར་ཀྱང་བླའ། །འདོད་ཡོན་སྤངས་པའི་ཐར་པ་ན། །ནམ་ཡང་མི་འདོད་གཽ་ཏ་མ། །ཞེས་ཞུས་པས། དེར་ཉན་ཐོས་ཀྱི་ཚོགས་རྣམས་མི་སྣང་བར་ཐལ་ཏེ། འདི་ན་གང་ཟག་བརྒྱད་མེད་ཅིང༌། །ཉན་ཐོས་རང་རྒྱལ་འགའ་ཡང་མེད། །བྱང་ཆུབ་སེམས་དཔའ་རྫུ་འཕྲུལ་ཆེ། །དེ་དག་དེ་ཡི་གཟུགས་སུ་སྤྲུལ། །ཞེས་ནམ་མཁའ་ནས་སྒྲ་ཡང་བྱུང༌། དེར་དཀྱིལ་འཁོར་ཆེན་པོ་མཐའ་ཡས་པར་གྱུར། རྒྱལ་པོ་ལ་དབང་བསྐུར་བས། དེ་ཉིད་དུ་ཟུང་འཇུག་གི་སྐུ་འགྲུབ་སྟེ། དེ་ལ་བཅོམ་ལྡན་འདས་ཀྱིས་ཀྱང་རྒྱུད་ཐམས་ཅད་གཏད་དོ། །དེས་ཀྱང་ཨོ་རྒྱན་གྱི་སྐྱེ་བོ་ཐམས་ཅད་ལ་རྒྱ་ཆེར་བསྟན། རྒྱུད་རྣམས་གླེགས་བམ་དུ་བྱས། མཐར་བཙུན་མོའི་ཚོགས་དང་ལྷན་ཅིག་མི་སྣང་བར་གྱུར་ཏེ། ལོངས་སྤྱོད་རྫོགས་པའི་སྐུར་གྱུར་མོད། སངས་རྒྱས་ཀྱི་ཞིང་ནས་ཞིང་དུ་སྤྱོད་ཅིང་གསང་སྔགས་ཐམས་ཅད་ཀྱི་སྡུད་པ་པོའི་ཚུལ་མཛད་དོ། །དེའི་དུས་རྒྱལ་པོ་འཁོར་བཅས་སུ་མ་ཟད་ཨོ་རྒྱན་གྱི་ཡུལ་མི་དང༌། འབྱུང་པོ་དང༌། སྲོག་ཆགས་དུད་འགྲོར་གྱུར་པ་འབུ་སྲིན་ཡན་ཆོད་ཐམས་ཅད་བདེ་བ་ཆེན་པོའི་ལམ་གྱིས་དངོས་གྲུབ་ཐོབ་ཅིང་འཇའ་ལུས་སུ་སོང་ངོ༌། །དེ་དངོས་ཀྱི་ཞལ་མཐོང་བའི་མཁའ་འགྲོ་མ་ཕྱིས་བཞུགས་པ་ནི་དཔལ་ལྡན་བདེ་བའི་རོལ་པ་མོ་ཡིན། དེ་ཡང་ས་ཧཱ་ཛ་སིདྡྷི་ལྷན་ཅིག་སྐྱེས་གྲུབ་ཀྱི་རོལ་པ་མོ་གཅིག་


TNT17_Page_0041
[མ་དཔེ་གཟིགས་ན་འདིར་གནོན།]

གསུང༌། འོན་ཀྱང་བརྒྱུད་པའི་ཁྱད་པར་མི་འདྲ་བ་ན། བྱིན་རླབས་ཀྱི་བརྒྱུད་པ་ཐ་དད་པ་དང༌། གདམས་ངག་མི་གཅིག་པས་ཡིན་གསུང༌། དེ་ལ་རྣལ་འབྱོར་མ་དེའི་ལོ་རྒྱུས་ན། ལྷན་ཅིག་སྐྱེས་གྲུབ་ཀྱི་འགྲེལ་བ་ལྟར་ན། དེ་ནི་ཨོ་རྒྱན་གྱི་ཡུལ་ཕྱོགས་ཞིག་གི་རྒྱལ་པོའི་བུ་མོ་སྟེ། དེ་ཡང་ཆེར་སྐྱེས་པ་ན། འཁོར་བུ་མོ་ལྔ་བརྒྱ་དང་ལྷན་ཅིག་ནགས་ཚལ་རྣམས་སུ་རྒྱུ་བ་ན། ཨོ་རྒྱན་གྱི་ཕྱོགས་ཞིག་ན། བྱང་ཆུབ་སེམས་དཔའ་ཕྱག་ན་རྡོ་རྗེ་དེ་དྲང་སྲོང་འགྲོ་བ་དབུགས་འབྱིན་པ་ཞེས་བྱ་བར་སྤྲུལ་ཏེ་བཞུགས་པ་ལས། བུ་མོ་རྣམས་ཀྱིས་དེ་མཐོང་བ་ན། དྲང་སྲོང་སྐྲ་འཛིངས་པ་འཇྀགས་འཇྀགས་ལྟར་འདུག་ནས། འདྲེ་ཡིན་ནོ་སྙམ་ཕྱིར་བྲོས་པ་ན། རོལ་པ་མོས་ཁྱེད་རྣམས་མ་འཇིགས་ཤིག འདི་ནི་མཐོང་བ་ཙམ་གྱིས་ངའི་ཡིད་ལ་དགའ་བ་དེའི་ཏིང་ངེ་འཛིན་ཁྱད་པར་ཅན་སྐྱེས་པས་ན་འདི་ནི་བདག་ཉིད་ཆེན་པོ་ཞིག་གོ །དེ་ནས་འཁོར་ལྔ་བརྒྱ་དང་བཅས་ཏེ་དེའི་ཞབས་ལ་ཕྱག་བྱས་ཏེ། དྲང་སྲོང་དེས་ཀྱང་བུ་མོ་བདེ་བའི་རོལ་བ་མོའི་མགོ་བོར་ཕྱག་བཞག་པས། སྔོན་སྐྱེ་བ་གཞན་དུ་དབང་བསྐུར་བའི་ཡེ་ཤེས་ཀྱང་དྲན། རང་གི་སེམས་ཉིད་ལྷན་ཅིག་སྐྱེས་པ་མངོན་སུམ་དུ་རྟོགས་ཏེ། རང་གི་འཁོར་རྣམས་ལ་ཡང་བསྟན་པས། དེ་ཐམས་ཅད་ཀྱང་རྣལ་འབྱོར་མ་ཆེན་མོར་གྱུར་ཅེས་འབྱུང་སྟེ། དེ་ཐམས་ཅད་མཐོང་པའི་ཆོས་དེ་ཉིད་ལ་ས་བཅུ་གང་རུང་རེ་ཐོབ་པ་ཡིན་ཏེ། དེས་པདྨ་བཛྲ་ཆེན་པོ་ལ་བཤད། དེས་ཡན་ལག་མེད་པའི་རྡོ་རྗེ་ཕག་ཚངས་པ་ལ་བཤད་དོ། །དེས་པདྨ་བཛྲ་བར་བ་མཚོ་སྐྱེས་ལ་བཤད། དེས་ཨིནྡྲ་བྷུ་ཏི་འབྲིང་པོ་ལ་བཤད། དེས་ཛ་ལནྡྷ་རི་པ་ལ་བཤད། དེས་ནག་


TNT17_Page_0042
[མ་དཔེ་གཟིགས་ན་འདིར་གནོན།]

པོ་སྤྱོད་པ་བ་ལ་བཤད། དེས་དགེ་བའི་མགོན་པོ་ལ་བཤད། དེས་དཔག་མེད་རྡོ་རྗེ་ལ་བཤད། དེས་ཀུ་ས་ལ་བྷ་དྲ་ལ་བཤད་དོ། །དེ་ལ་པདྨ་བཛྲ་ཆེན་པོ་ན། ནུབ་ཕྱོགས་མ་རུའི་ཡུལ་དུ་རིགས་བྲམ་ཟེར་འཁྲུངས། སྡེ་སྣོད་གསུམ་དང་བསྟན་བཅོས་ཐམས་ཅད་ལ་ཤིན་ཏུ་མཁས་པར་སྦྱངས་པ་ཞིག་ཡིན་ལ། ཨོ་རྒྱན་གྱི་ཡུལ་དུ་སོང་ནས། གསང་སྔགས་ཕྱིའི་རྒྱུད་མང་དུ་བསླབས་ཤིང་མཁས་པར་མཁྱེན་པ་ལ། དེ་རྣམས་བསྒོམས་པས། གནོད་སྦྱིན་མོ་དང་བཅུད་ལེན་ལ་སོགས་པ་ཐུན་མོང་གི་དངོས་གྲུབ་ཐོབ་ཀྱང༌། དེ་ཁོ་ན་ཉིད་མ་ཤེས་པར། ཨོ་རྒྱན་གྱི་ཕྱོགས་ཤིག་ཏུ་སོང་ནས། དེ་འབའ་ཞིག་སེམས་པར་བྱེད་པ་ལ། རྡོ་རྗེ་སེམས་དཔའི་ཞལ་མངོན་སུམ་དུ་མཐོང་བའི་སློབ་དཔོན་ཞིག་གིས་དབང་བསྐུར་པས། རང་བཞིན་གྱི་གནས་ཚུལ་མཐོང་ནས། ཕྱག་རྒྱའི་དབང་གི་ཡེ་ཤེས་ནི་དེ་ཁོ་ན་ཉིད་མཚོན་པར་བྱེད་པར་མཁྱེན་མོད་ཀྱ། འོན་ཀྱང་འདི་ཉིད་གཙོ་བོར་སྟོན་པར་བྱེད་པའི་སྡེ་སྣོད་ཅིག་མཐོང་ན་ཅི་མ་རུང་སྙམ་དུ་དེ་ཉིད་སེམས་པར་བྱེད་པ་ན། བུ་མོ་བདེ་བའི་རོལ་པ་མོ་འཁོར་རྣལ་འབྱོར་མ་བརྒྱ་སྟོང་དུ་མ་དང་ལྷན་ཅིག་ཏུ་སློབ་དཔོན་གྱི་དྲུང་དུ་བྱོན་ཏེ། ཕྱག་རྒྱ་བཞིའི་མན་ངག་དང༌། གསང་བ་འདུས་པ་གཙོ་བོར་གྱུར་པའི་བླ་མེད་ཀྱི་རྒྱུད་སྡེ་དུ་མ་བཤད་པས། དེ་རྣམས་ཀྱི་དོན་མངོན་སུམ་དུ་རྟོགས་ཏེ། དེ་ཉིད་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་གྱུར་ཅིང༌། མཐར་གྱི་ཟླ་བ་བཅུ་གཉིས་ན། རྡོ་རྗེ་འཆང་ཆེན་པོའི་གོ་འཕང་བརྙེས་པ་ཡིན་གསུང༌། དེས་ཀྱང་གདམས་ངག་བསྟན་པས་ཨོ་རྒྱན་གྱི་ཡུལ་དུ་སྐྱེ་བོ་དཔག་ཏུ་མེད་པ་མཆོག་དང་ཐུན་མོང་གི་དངོས་གྲུབ་ལ་བཀོད། གསང་བ་


TNT17_Page_0043
[མ་དཔེ་གཟིགས་ན་འདིར་གནོན།]

གྲུབ་པ་ཞེས་བྱ་བའི་བསྟན་བཅོས་ཀྱང་མཛད་དོ། །ཡན་ལག་མེད་པའི་རྡོ་རྗེ་ན། རིགས་ངན་སྐལ་བ་དང་ལྡན་པ་ཞིག་ཡིན་པ་ལ། སློབ་དཔོན་པདྨ་བཛྲ་གྱིས་ལེགས་པར་གདམས་པ་བཞིན་ལོ་བཅུ་གཉིས་སུ་གོ་ཏཾ་པའི་རི་ལ་བསྒོམས་པས། ཕྱག་རྒྱ་ཆེན་པོ་མཆོག་གི་དངོས་གྲུབ་ཉམས་སུ་ཆུད་ཀྱང་བདག་ཉིད་ཀྱི་བྱ་བ་སློབ་དཔོན་ལ་ཞུ་དགོས་པར་ཤེས་ཏེ། ཞུས་པས། ཁྱོད་ཕག་རྫི་མོ་བསྟེན་ཅིང༌། ཕག་རྫིའི་སྤྱོད་པས་རིམ་གྱིས་རྡོ་རྗེ་སེམས་དཔར་འགྱུར་གསུང༌། དེ་ནས་ཨོ་རྒྱན་གྱི་བྱང་ཕྱོགས་གྲོང་ཁྱེར་ཞིག་ཏུ་ཕག་རྫིའི་སྤྱོད་པས་སེམས་ཅན་གྱི་དོན་མཛད་ཅིང༌། སྐལ་བ་དང་ལྡན་པ་རྣམས་ལ་དབང་བསྐུར་ནས། ཕྱག་རྒྱ་བཞིའི་གདམས་ངག་བསྟན་པས་སྨིན་ཅིང་གྲོལ་བར་མཛད་པ་ཡིན་ནོ། །དཔལ་ཕག་ཚང་པ་ཞེས་གྲགས་སོ། དེའི་སློབ་མ་ནི་སློབ་དཔོན་ས་རོ་རུ་ཧ་ཞེས་པ་བོད་སྐད་མཚོ་སྐྱེས་ཞེས་པ་ཡིན་ཏེ། དེ་ཡང་རིགས་རྒྱལ་རིགས། རིག་པའི་གནས་ཐམས་ཅད་ལ་མཁས་པའི་པཎྜི་ཏ་ཆེན་པོ་གསང་སྔགས་ཀྱི་རྒྱུད་མང་པོ་མཁྱེན་པ་ཞིག་ཡིན། དེ་རྒྱལ་པོའི་མཆོད་གནས་མཛད། འཁོར་མཐའ་ཡས་པ་ལ་ཆོས་སྟོན་ཅིང་ཡོད་པ་ལ། ཤིང་ཐུན་རྒན་མོ་ཞིག ཕྱོགས་དེར་ཤིང་འཐུ་བའི་ཞར་ལ་འོང་བས། རེས་དགོད། རེས་ངུ་བ་ཞིག་མཐོང༌། ཕྱི་ཞིག་ན་སློབ་དཔོན་གྱིས་དེའི་ཁྱིམ་དུ་སོང་སྟེ་དྲིས་པས། རྒོད་པ་ནི་ཁྱོད་ཆོས་སྟོན་པ་རྡོ་རྗེ་འཆང་ཆོས་གསུང་བ་འདྲ་བས་རྒོད་པ་ཡིན། ངུ་བ་ནི་རྡོ་རྗེ་འཆང་གི་དགོངས་པ་ལྟར་མི་འཆད་པས་ངུ་བ་ཡིན་ཞེས་ཟེར་བ་ལ། འོ་ན་བདག་གི་ཐེ་ཚོམ་


TNT17_Page_0044
[མ་དཔེ་གཟིགས་ན་འདིར་གནོན།]

གཅོད་པར་ཞུ་ཞུས་པས། ངས་གཅོད་པར་མི་ནུས་ཀྱ། དཔལ་ཕག་ཚང་པ་ལ་ཞུས་གསུང༌། དེ་ག་ན་བཞུགས་དྲིས་པས། བྱང་ཕྱོགས་ཀྱི་གྲོང་ཁྱེར་ངན་པ་ཞིག་ན་ཡོད་གསུང༌། དེར་སློབ་དཔོན་གྱིས་འཚོལ་དུ་བཞུད་པས། བྱང་ཕྱོགས་ཀྱི་གྲོང་ཁྱེར་རེ་རུལ་ཞིག་ནས། དཔལ་ཕག་ཚོང་པ་དེ་ཕག་གི་ཁྱུ་ཆེན་པོ་གཅིག་གདོང་དུ་དེད། རིགས་ངན་མོ་དང་ལྷན་ཅིག་ཏུ་ཤིང་ཁུར་ཆེན་པོ་གཅིག་ཁུར་ནས་བྱུང་བ་དང་མཇལ་ནས། དེ་དག་ཀྱང་བརྡ་རུ་ཤེས་ཏེ། ཤིང་ཁུར་ཐོགས་པ་ནི་ཞེ་སྡང་མ་སྤངས་རང་གནས་སུ་དག་པའི་བརྡ། རིག་ངན་མོ་དང་བཅས་པ་ནི་འདོད་ཆགས་དག་པ་དང༌། ཕག་ཁྱུ་བདས་པ་ནི་གཏི་མུག་དག་པའི་བརྡར་གོ་སྟེ། རྗེས་སུ་བཟུང་བར་ཞུ་ཞུས་པས། ང་རིགས་ངན་ཀློག་ཀྱང་མི་ཤེས་པ་ལ། གདམས་ངག་དགོས་ཞེས་སྨྲ་བ་སྙད་འཚོལ་བ་ཡིན་ཞེས་གསུང༌། ཁྲོ་ཞིང་བརྡེག་གོ །གྲོང་ཁྱེར་བའི་ཕག་ཀུན་འཇུག་པའི་ར་བའི་ཕུག་བཙོག་བཙོག་ལྟར་སྣང་བ་ཞིག་ཏུ་བཞུད་དོ། །དེར་མཚན་མོ་ཐེམ་པ་ལ་མགོ་བརྟད་ནས། སྒོ་དྲུང་དུ་ས་ཐེ་བཙུགས་ཏེ་འདུག་པ་ན། ནུབ་ཀྱི་རིང་ལ་ཕག་རྣམས་འཐབ་པ་དང༌། སློབ་དཔོན་གྱི་ཆུ་ལ་གནོད་པ་བསྐྱལ་བས། ཕག་རྣམས་བརྡུངས། ཇོ་མོ་རིགས་ངན་རྒན་མོས་བཟློག་པར་བྱེད་ཅིང༌། ཤིན་ཏུ་དམན་པའི་སྤྱོད་པ་ལྟར་བཅོས་པས་སོ་མ་སོད་དོ། དེར་ཉིན་ཞག་མང་པོའི་བར་དུ་འདུག་པ་ན། ལན་ཅིག་ཐོ་རངས་ཀྱི་ཚེ་སློབ་དཔོན་ན་རེ། སྒོ་དྲུང་ན་ཡོད་པའི་མི་འདི་ཅི་ཞིག་དོན་དུ་གཉེར། ཇོ་མོ་ན་རེ། དེ་ཁོ་ན་ཉིད་ཀྱིས་རྗེས་སུ་བཟུང་བར་ཞུ་ཟེར་གྱིན་འདུག་ཟེར་


TNT17_Page_0045
[མ་དཔེ་གཟིགས་ན་འདིར་གནོན།]

པ་ལ། སློབ་དཔོན་གྱིས། འདི་ཀུན་པཎྜི་ཏ་བྱ་བ་ང་རྒྱལ་ཆེ་བས་དེ་ཁོ་ན་ཉིད་ཀྱི་སྣོད་དུ་མི་རུང་གསུང༌། དེར་བདག་གི་དོན་རྣམས་ངེས་པར་གྲུབ་པོ་སྙམ་སྟེ། ཡང་དང་ཡང་དུ་གསོལ་བ་བཏབ་པས་དབང་བསྐུར་ཞིང༌། གདམས་པ་དང་རྗེས་སུ་གདམས་པ་མཐའ་དག་རྩལ། སློབ་དཔོན་ཉིད་ཀྱི་སྲས་མོ་ངན་ངོན་ལྟར་སྣང་བ་ཞིག་སྩལ་ནས་འདི་རིག་མར་གྱིས་ལ་སྒོམས་ཤིག་གསུང༌། དེ་ནས་སློབ་དཔོན་ཡང་སྔར་གྱི་རྒྱལ་པོའི་མཆོད་གནས་ཀྱི་བྱ་བ་ཡང་མཛད་ཅིང༌། ཡིད་གཞན་དུ་མ་གྱུར་པར་རྩེ་གཅིག་ཏུ་བསྒོམ་པས། ལོ་བཅུ་གཉིས་ན་ཕྱག་རྒྱ་ཆེན་པོ་མཆོག་གི་དངོས་གྲུབ་ཉམས་འོག་ཏུ་ཆུད་དོ། །དེ་ཡན་ཆད་དུ་གསང་སྟེ་སྤྱོད་པས་གནས་པ་ལ། དེ་ཕྱིན་ཆད་འཇྀག་རྟེན་པའི་མངོན་དུ་ཡང་སྤྱོད་པས། སྐྱེ་བོ་ཀུན་གྱིས་རིགས་ངན་མོ་བསྟེན་པས་སློབ་དཔོན་མ་དག སློབ་དཔོན་མ་དག་ན་རྒྱལ་པོ་མ་དག་པར་འགྱུར། དེས་ཡུལ་ཕྱོགས་ཐམས་ཅད་མ་དག་ཅིང་ཉམས་པར་འགྱུར་བས། གང་མ་དག་པ་འབྱུང་བའི་གཞི་སློབ་དཔོན་རང་དང་རིགས་ངན་མོ་མེ་ལ་བསྲེགས་ན་དག་པར་འགྱུར་ཞེས། རྒྱལ་པོ་ལ་ཡང་དང་ཡང་དུ་ཞུས། དུས་ལན་གཅིག་ཁང་བཟང་གི་རྩེ་མོ་ནས་བལྟས་པས། སློབ་དཔོན་ཁང་པ་ནས་རིགས་ངན་གྱི་བུ་མོ་དང་བཅས་པ་ཕྱིར་བྱུང་བ་མཐོང༌། དེར་རྒྱལ་པོས་ཆད་པ་བྱེད་པར་བརྩམས་ཏེ། ཤིང་གི་ཕུང་པོ་ཆེན་པོ་ཡང་བྱས། དེ་ལ་སློབ་དཔོན་ཡབ་ཡུམ་བཞག སླར་ཡང་ཤིང་སྤུངས་ཏེ་མེ་བུས་པས། ཞག་བདུན་དུ་མེ་ལྕེ་འབར་བ་རྒྱུན་མ་ཆད་ཅིང༌། བརྒྱད་པའི་ཉིན་པར་ཐལ་བའི་ཕུང་པོ་གྱུར་པ་མི་རྣམས་ཀྱིས་ཐལ་བ་


TNT17_Page_0046
[མ་དཔེ་གཟིགས་ན་འདིར་གནོན།]

བསལ་བས་དབུས་ན་མཚོ་ཆུང་ངུ་ཞིག་གི་གུང་དུ་པདྨ་ཤིན་ཏུ་རྒྱས་པ་ལ། སློབ་དཔོན་ཡབ་ཡུམ་ཧེ་རུ་ཀ་ཡབ་ཡུམ་གྱི་སྐུ་གཟི་བརྗིད་དང་ལྡན་པར་མཐོང༌། དེར་ཐམས་ཅད་ངོ་མཚར་དུ་གྱུར་ཅིང༌། ཨོ་ཌི་ཡ་ཎའི་ཡུལ་གྱི་མི་དེ་དག་ཐམས་ཅད་ཀྱང་རྡོ་རྗེ་ཐེག་པ་ལ་བཀོད་དེ། རྒྱལ་པོ་འཁོར་ལྔ་བརྒྱ་དང་བཅས་པས་ཀྱང་དངོས་གྲུབ་ཐོབ་ཅེས་གྲགས་སོ། །དུས་གཞན་ཅིག་ན་མ་རུའི་ཡུལ་གྱི་ཕྱོགས་ཤིག་ཏུ་བྱོན་ཏེ། དེར་མི་ཞིག་གིས་ཉིན་གུང་བྱེ་ཚན་གྱི་ཐང་ལ་རི་དྭགས་ཤིན་ཏུ་གྲང་བས་ཉེན་པ་མཐོང་བས། དེར་ཙནྡན་ས་མཆོག་ཡོད་པར་ཤེས་ནས་གྲུས་པས། ཙནྡན་གྱི་སྡོང་དུམ་ཆེན་པོ་བྱུང་བ་སློབ་དཔོན་ལ་ཕུལ་བས། དེ་ལ་ཧེ་རུ་ཀའི་སྐུ་ཞིག་བྱས་ན་ལེགས་པར་མཁྱེན་ནས། དེ་བརྡར་བ་དང༌། བརྡུང་བའི་ལས་བྱེད་པ་ཡང༌། བུད་མེད་པདྨ་ཅན་གྱི་རིགས་ཡོན་ཏན་སུམ་ཅུ་རྩ་གཉིས་དང་ལྡན་པ་ཞིག་དགོས་པ་ལས། དེ་ཡང་གཞན་ན་མེད་དེ། ཡུལ་དེའི་རྒྱལ་པོ་མུ་སྟེགས་ཀྱི་ལུགས་འཛིན་པ་ཞིག་གི་ཀླས་ཀྱི་བཙུན་མོ་ཞིག་ཁོ་ན་ལ་ཡོད་པར་མཁྱེན་ནས། དེ་མཚན་རེ་བཞིན་ཏིང་ངེ་འཛིན་གྱིས་བཀུག་ནས། ཙནྡན་བརྡར་དུ་བཅུག་པ་ན། ལན་ཅིག་རྒྱལ་པོས་དེའི་ལག་པ་གས་པར་མཐོང་ནས། ཁྱོད་སྐྱིད་དེ་བར་འདུག་པ་ལ། ལུས་ཀྱང་རིད་ལག་པ་སེར་ཀར་སོང་བ་ཅི་ཡིན་དྲིས་པས་རྒྱལ་པོས་མི་ཤེས་སམ། ནུབ་རེ་བཞིན་རེའི་ཕུག་ཅིག་ཏུ་བཙུན་པ་ཞིག་གིས་ཙནྡན་གྱི་སྡེ་གུའི་ལས་ཁོ་ན་ལ་བཀོལ། ནམ་ལངས་སུ་ཉེ་བ་ན། སླར་འདི་ཉིད་དུ་སྐྱེལ་ཟེར། དེ་ཕྱོགས་གང་ན་ཡོད་དྲིས་པས། མགོ་འཁོར་ཏེ་ཕྱོགས་ནི་མི་ཤེས་ཟེར། དེར་རྒྱལ་པོས་ཀྱང་བརྟགས་པས། མུན་


TNT17_Page_0047
[མ་དཔེ་གཟིགས་ན་འདིར་གནོན།]

སྲོས་ཙམ་ན་རྒྱལ་པོ་ཉིད་ཀྱང་སེམས་མྱོས་ཤིང་མགོ་འཁོར་བ་ལྟར་འདུག་པ་ལ། བཙུན་མོ་དེ་ནི་མཁའ་ལ་ཡེར་གྱིས་སོང་ནས། ནང་པར་གང་ནས་བྱུང་མེད་པར་ཁྱིམ་དུ་སླེབ་པོ། །ཕྱི་ནུབ་སིནྡྷུ་རའི་རྐྱལ་པ་ཞིག་ལག་ཏུ་གཏད་ནས། ཅི་ལྕོགས་ལྕོགས་ལམ་དུ་གཏོར་ཅིག་བྱས་གཏོར་པས། ནང་པར་རྒྱལ་པོས་སིནྡྷུ་རའི་རྗེས་བཅད་པས། སློབ་དཔོན་གྱི་དྲུང་དུ་སླེབ། རྒྱལ་པོ་ཁྲཽས་ཏེ་འཁོར་དང་བཅས་པ་ཆད་པ་གཅོད་དུ་འོངས། དེར་སློབ་དཔོན་གྱིས་རྡོ་རྗེ་གྲི་གུག་གི་སྦྱོར་བ་བྱས་པས། རྫའི་སྤྱི་བླུགས་ཀྱི་མགྲིན་པ་བསྐོར་བ་ན། རྒྱལ་པོ་འཁོར་བཅས་ཀྱི་གདོང་ལྟག་པར་བལྟ་བར་སོང༌། དེར་འཇྀགས་ནས་ཞབས་ལ་ཕྱག་བཙལ་བས། སློབ་དཔོན་གྱིས་ཁྱོད་སངས་རྒྱས་ཀྱི་བསྟན་པ་ལ་ཞུགས་ཤིག ཅི་སྟེ་མི་འཇུག་ན། ཁྱེད་རྣམས་ཀྱི་མགོ་བོ་བཅད་པར་བྱའོ་ཞེས་གསུངས་པས། རྒྱལ་པོ་ཡང་སངས་རྒྱས་ཀྱི་བསྟན་པ་ལ་ཞུགས། ཧེ་རུ་ཀའི་ལྷ་ཁང་བཞེངས་པ་གཉན་ཅིང་བྱིན་རླབས་ཆེ་བར་གྲགས་པ། དམ་ཚིག་ཉམས་པས་སྐུ་དེའི་ཞལ་རས་མཐོང་ན་ཁྲག་སྐྱུགས་ཏེ་འཆི་བ་དང༌། དུས་ཕྱིས་རང་སྟག་གཟིག་གི་དམག་གིས་བཤིག་པར་བརྩམས་པས། སྟག་གཟིག་གི་རྟ་བ་བཅུ་གཉིས་དུས་གཅིག་ཏུ་ཤི་བས། ད་ལྟ་ཡང་ཤིན་ཏུ་གཉན་གསུང༌། སློབ་དཔོན་དེས་སེམས་ཅན་དཔག་ཏུ་མེད་པའི་དོན་མཛད་དེ། ཧེ་བཛྲ་དངོས་ཀྱི་གོ་འཕང་ཐོབ་པ་ཡིན་གསུང༌། དེའི་སློབ་མ་རྒྱལ་པོ་ཨིནྡྲ་བྷུ་ཏི་བར་པ་ན། གོང་དུ་བཤད་མ་ཐག་པའི་སློབ་དཔོན་ཉིད་མེ་ལ་སྲེག་མཁན་དེ་ཡིན་ཏེ། འོན་ཀྱང་འདིའི་ལོ་རྒྱུས་རྒྱས་པར་མི་གསུང༌། ཟུར་


TNT17_Page_0048
[མ་དཔེ་གཟིགས་ན་འདིར་གནོན།]

ཙམ་ཞིག་གསུངས་པ་ལྭ་བ་པའི་སྐབས་སུ་འཆད། ཡང་བརྒྱུད་པ་ལུགས་གཅིག་ལ། ཨིནྡྲ་བྷུ་ཏི་དེས་ཞལ་བསྟན་ཏེ་པདྨ་ཀ་ར་ལ་གདམས། དེ་ལ་སློབ་དཔོན་ཀུ་ས་ལས་ཞུས། འདི་ལ་ནི་ཀུ་ས་ལ་བྷ་དྲ་ཆུང་བས་ཞུས་པ་ཡིན་ནོ། །འོན་ཀྱང་བརྒྱུད་པ་དེའི་ལོ་རྒྱུས་ན། འོག་ཏུ་ཤེས་པར་བྱའོ། །རིན་པོ་ཆེའི་འབྱུང་ཁུངས་ལྟ་བུའི་གཏམ་ལས། ལས་རྒྱ་བརྒྱུད་པའི་གཏམ་གྱི་སྐབས་ཏེ་གསུམ་པའོ།། །། བཀའ་བབས་བཞི་པ་ན། འོད་གསལ་གྱི་གདམས་ངག་ཡིན་ཏེ། དེ་ཡང་སློབ་དཔོན་རྡོ་རྗེ་དྲིལ་བུ་པས། ཨོ་རྒྱན་དུ་རྡོ་རྗེ་མཁའ་འགྲོ་མ་རྣམས་ལ་དངོས་སུ་ཞུས་པ་དང༌། ཡང་རིང་བརྒྱུད་ཀྱི་དབང་དུ་བྱས་ན། སློབ་དཔོན་ཆེན་པོ་རྟ་མཆོག་ཅེས་བྱ་བ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ། འོད་གསལ་བསམ་མི་ཁྱབ་ཀྱི་ཏིང་ངེ་འཛིན་བསྒོམ་ཞིང་ཨོ་རྒྱན་གྱི་གྲོང་ཁྱེར་ཞིག་གི་སྒོ་དྲུང་དང་ཉེ་བར་སྤྱིལ་པོ་བྱས་ནས་བཞུགས་པ་ལ། རྒྱལ་པོའི་མི་རྣམས་ཀྱིས་ཐོ་ཅོའི་སྤྱོད་པས་ཡང་ཡང་བརྙས་པས། དུས་ལན་ཅིག་ཨོ་རྒྱན་གྱི་ཡུལ་དེ་ཙམ་དུ་ཆེ་བ་ཡང་རི་ཀླུང་མེད་པ་རྟས་ཁྱབ་ནས། ཞིང་དང་སྐྱེད་མོས་ཚལ་ཐམས་ཅད་ཟོས་པས། རྒྱལ་པོའི་མི་རྣམས་ཀྱིས་རྟ་རྣམས་དེད་པས། ཟིན་དུ་ཉེ་བ་ཉེ་བ་ལ་མི་ཟིན་པ་འབའ་ཞིག་བྱུང༌། མཐར་རྟ་འགའ་ཞིག་ཡོད་པ་ཡང༌། སློབ་དཔོན་གྱི་སྤྱིལ་པོར་ཞུགས་པ་མཐོང་ནས་སྤྱིལ་པོ་ལ་བལྟར་སོང་བ་ན་རྟ་གཅིག་ཀྱང་མེད་དེ། དེར་སྤྲུལ་པ་ཡིན་པར་ཤེས། སློབ་དཔོན་གྲུབ་པ་ཐོབ་པར་ཡང་ཤེས་མོད་ཀྱ། འོན་ཀྱང་སློབ་དཔོན་དེ་རྫུ་འཕྲུལ་གྱིས་མི་མ་ཡིན་གྱི་གནས་སུ་འཕུར་ནས་བཞུད་དོ། །འོན་ཀྱང་རྒྱལ་པོ་ལ་སོགས་པས་དེའི་


TNT17_Page_0049
[མ་དཔེ་གཟིགས་ན་འདིར་གནོན།]

སློབ་མ་བི་ནཱ་བ་སྟེ་པི་ཝཾ་ཞབས་ལ་གདམས་ངག་ཞུས། སློབ་དཔོན་དེ་ན། དང་པོ་རྒྱལ་རིགས་ཡིན་པ། སློབ་དཔོན་རྟ་མཆོག་གིས་དབང་བསྐུར་ཞིང་གདམས་པ་གནངབ་ན། བདག་གིས་རྒྱལ་རིགས་ཀྱི་བྱ་བ་ནི་སྤངས་པར་ནུས་ན། འོན་ཀྱང་པི་ཝཾ་གི་སྒྲ་སྤང་བར་མི་ནུས་པས། ཇྀ་ལྟར་བགྱི་ཞུས་པས། པཾ་ཝཾ་གི་སྒྲ་ཉིད་ལ་སེམས་འཛིན་པའི་གདམས་ངག་གནང་སྟེ། དེས་ཀྱང་བསམ་མི་ཁྱབ་ཀྱི་དངོས་གྲུབ་ཐོབ་པ་ཡིན་སྐད། དེའི་སློབ་མ་ནི་ཆང་འཚོང་མ་བི་ལ་སྱ་བཛྲ་ཡིན་ཏེ། བོད་སྐད་དུ། སྒེག་མོ་རྡོ་རྗེ་ཞེས་བྱའོ། །དེ་ནི་ཨོ་རྒྱན་ཡུལ་གྱི་རྒྱལ་པོ་ཞིག་གི་ཆང་སྦྱོར་མཁན་ཡིན་པས། དེས་ལོ་བཅུ་དྲུག་ལོན་པའི་ཚེ། སློབ་དཔོན་ཌོམྦི་ཧེ་རུ་ཀ་ཕྱོགས་དེར་བྱོན་ནས་ཆོས་གསུང་བ་ན། རྒྱལ་པོ་དེ་མུ་སྟེགས་ལ་དགའ་བས་ཐུལ་བར་མ་གྱུར་པ་ལ། སློབ་དཔོན་གྱིས་ཆང་འཚོང་མ་དེའི་སར་བྱོན་དེ་ལ་དྲིས་པས། སྦྲུལ་གྱིས་བསྡིགས་ན་ཐུལ་ཟེར། དེར་སློབ་དཔོན་གྱིས་དགོངས་པ་བཏང་བས། སྦྲུལ་གདུག་རེག་པ་དུག་ཅན་གྱིས་རྒྱལ་པོའི་ཁྱིམ་བསྐོར་བ་ན། རྒྱལ་པོ་འཇིགས་ཏེ་སྐྱབས་གཞན་མེད་པ་ལ། ཆང་འཚོང་མ་ན་རེ། མུ་སྟེགས་ཀྱི་སློབ་དཔོན་འདི་རྣམས་ཀྱིས་སྐྱོབ་པར་མི་ནུས་ཀྱ། ཌོམྦི་པ་ལ་གསོལ་བ་ཐོབ་ཅེས་སྨྲས། རྒྱལ་པོས་ཀྱང་སྙིང་ནས་གསོལ་བ་བཏབ་པས། སློབ་དཔོན་དེར་བྱོན་པ་ན། སྦྲུལ་གདུག་པ་ཐམས་ཅད་ས་འོག་ཏུ་སོང༌། རྒྱལ་པོ་འཁོར་དང་བཅས་ལ་ཡང་སངས་རྒྱས་པ་ལ་དད་པར་གྱུར། སློབ་དཔོན་ལ་ཡང་ཡུན་རིང་དུ་མཆོད་པ་བྱས་སྐད། དེར་ཆང་འཚོང་མ་དེ་སྣོད་དང་ལྡན་པར་གཟིགས་ནས། ཌོམྦི་པ་དང༌།


TNT17_Page_0050
[མ་དཔེ་གཟིགས་ན་འདིར་གནོན།]

བཱི་ན་པ་གཉིས་ཀྱིས་དབང་བསྐུར་ཞིང་གདམས་པ་ཡང་གནང༌། ནུས་པ་ཐོབ་པའི་རྣལ་འབྱོར་མར་གྱུར་པ་ན། ལྕམ་ལཀྵྨི་ཀ་རས་བདེ་བ་ཆེན་པོའི་གདམས་ངག་བསྟན། སློབ་དཔོན་བཱི་ན་པས་བསམ་མི་ཁྱབ་ཀྱི་གདམས་ངག་བསྟན་པས། འོད་གསལ་རྡོ་རྗེའི་སེམས་དང་ལྡན་པའི་རྣལ་འབྱོར་མ་རྣམས་ཀྱི་གཙོ་མོར་གྱུར། འགྲོ་བའི་དོན་དཔག་ཏུ་མེད་པ་མཛད་དེ། རྣལ་འབྱོར་མ་ཙིནྟོ་ཞེས་ཀྱང་གྲགས་སོ། །དེས་ནི་རྡོ་རྗེ་དྲིལ་བུ་པ་ལ་གདམས་པ་ཡིན་ཏེ། སློབ་དཔོན་དེ་ནི་ཨོ་ཌི་ཤ་དང་ཉེ་བའི་རྒྱལ་རིགས་ཤིག་ནཱ་ལནྡར་རབ་ཏུ་བྱུང༌། བློ་གྲོས་སྙིང་པོའི་དཔལ་ཞེས་མཚན་བཏགས། ཕྱིས་མཁས་པ་ཆེན་པོར་གྱུར་ནས། མུ་སྟེགས་ཀྱི་རྒོལ་བ་ཚར་བཅད་པས། དགྲ་ལས་རྣམ་པར་རྒྱལ་བའི་ལྷ་ཞེས་གྲགས། ནཱ་ལནྡའི་མཁན་པོར་ཡང་ལན་ཅིག་མངའ་གསོལ་སྐད། དེ་ནས་གྲུབ་ཐོབ་དཱ་རི་ཀ་པ་དང་མཇལ། དབང་བསྐུར་དང་དེ་ཁོ་ན་ཉིད་ཞུས་ནས་བསྒོམ་ཞིང་ཡོད་པ་ལ། ཨོ་རྒྱན་དུ་སོང་དངོས་གྲུབ་འབྱུང་ཞེས་ལུང་བསྟན་པ་བྱུང་ནས། ཨོ་རྒྱན་དུ་སོང་བས། དེར་རྣལ་འབྱོར་མ་བི་ལ་སྱ་བཛྲ་ཕག་རྫི་མའི་ཚུལ་བཟུང་བ་དང་མཇལ་ནས། དེས་ཀྱང་ཕྱག་ཆེན་པོ་བསམ་གྱིས་མི་ཁྱབ་པ་འདོད་ཆགས་ཆེན་པོའི་ཚུལ་བསྟན་པས། དེ་ཁོ་ན་ཉིད་ཐམས་ཅད་ཁོང་དུ་ཆུད་ནས། ཤར་ཕྱོགས་ཨོ་ཌི་ཤིའི་ནགས་ཁྲོད་དུ་བསྒོམས་པས། རིམ་པ་གཉིས་ཀྱི་རྟོགས་པ་ཁྱད་པར་ཅན་སྐྱེས་པ་ན། ཡུལ་གྱི་རྒྱལ་པོ་དེ་ནགས་ལ་རི་དྭགས་བཤོར་དུ་འོངས་པས་མཐོང་སྟེ། དགེ་སློང་འཚོ་བ་མེད་པ་སྙིང་རེ་རྗེ་སྙམ་ནས་གྲོང་ཁྱེར་དུ་འབྱོན་པར་ཞུས་པས། དངོས་རྣམས་རབ་ཏུ་ཤེས་པའི་མཁས་པ་དག་ལ་བརྙས་པར་


TNT17_Page_0051
[མ་དཔེ་གཟིགས་ན་འདིར་གནོན།]

མི་བྱ་སྟེ། །དེ་ནི་རྩྭ་རྩེ་ཆུང་ངུ་བས་ཀྱང་ཆུང་བའི་འབྱོར་བས་འཆིང་བར་ནུས་མ་ཡིན། །རྒྱུན་མི་འཆད་པར་ཆང་འཛག་པ་ཡི་འགྲམ་ལང་ནག་པོར་གྱུར་པ་ཡ། །གླང་ཆེན་རྣམས་ནི་པདྨའི་སྐུད་པ་ཕྲ་མོས་འཁྱིག་པར་མི་ནུས་བཞིན། །ཞེས་སློབ་དཔོན་གྱིས་བརྗོད་པ་ལས། དེར་རྒྱལ་པོས་དགེ་སློང་འདིས་ང་ལ་བརྙས་སོ། །འདི་ལ་ལན་དམའ་དབབ་པོ་སྙམ་ནས་གྲོང་ཁྱེར་དུ་དྲིལ་བསྒྲགས་ཏེ། ནགས་སེབ་ཀྱི་དགེ་སློང་འདི་ལྟ་བུ་སུ་ཞིག་གིས་འབེབས་པར་ནུས་པ་དེ་ལ་བྱ་དགའ་ཆེན་པོ་སྟེར་བྱས་པས། དེར་ཆང་འཚོང་མ་ཞིག་གིས་ཁས་བླངས་སོ། །དེ་ནས་དེས་སློབ་དཔོན་ལ་རྟག་ཏུ་འཚོ་བ་སྐྱེལ་བར་བྱེད། དུས་གཞན་ཞིག་ན། ཆང་འཚོང་མའི་བུ་མོ་པདྨ་ཅན་ཞིང་སྐྱེས་ཀྱི་མཚན་ཉིད་ཐམས་ཅད་ཚང་བ་ཞིག་ཡོད་པ་ཕྱག་རྒྱ་མོར་བཟུང་སྟེ་བསྒོམས་པས། ལོ་བཅུ་གཉིས་ན་སློབ་དཔོན་དེ་ནི་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕང་ཐོབ་བོ། །དེར་གྲོང་ཁྱེར་པ་རྣམས་མ་མོས་པ་བཟློག་པའི་ཕྱིར་དང༌། མ་འོངས་པའི་སེམས་ཅན་གྱི་བསོད་ནམས་ཀྱི་ཞིང་དུ་སྤྱན་རས་གཟིགས་ཀྱི་རྡོ་སྐུ་རང་བྱུང་བཞག་པ་དང༌། གསང་སྔགས་ཀྱི་བསྟན་པ་རྒྱ་ཆེར་སྤེལ་བའི་ཕྱིར། ལན་གཅིག་ཁྱེའུ་གཅིག་དང་བུ་མོ་ཞིག་ཀྱང་སྤྲུལ་ལོ། །རྒྱལ་པོས་གཏམ་དེ་ཐོས་ནས་ཆང་འཚོང་མ་ལ་སློབ་དཔོན་གྲོང་ཁྱེར་དུ་བོས་ཤིག་ཅེས་བསྒོས། གྲོང་ཁྱེར་གྱི་ཤར་སྒོར་སྐྱེ་བོ་མང་པོ་བསགས། སློབ་དཔོན་ནགས་ཚལ་ནས་གྲོང་ཁྱེར་དུ་བྱོན་པ་ན། ལམ་དུ་ཆང་བུམ་མང་པོ་བསྟར་དུ་བཅུགཡུམ་གྱིས་དེ་ནས་རྭ་བཤོར་དུ་འདྲེན་གྱིན། སྤྲུལ་པའི་ཁྱེའུ་ནི་གཡས་ནས་རྒྱུག བུ་མོ་ནི་གཡོན་ནས་རྒྱུག་གོ །


TNT17_Page_0052
[མ་དཔེ་གཟིགས་ན་འདིར་གནོན།]

དེ་ནས་གྲོང་ཁྱེར་གྱི་ཤར་སྒོར་སླེབ་པ་ན། ཡུལ་མི་རྣམས་ཀྱིས་སྔོན་རྒྱལ་པོ་ལ་བརྙས་པའི་ཚིག་དེ་གླུར་བླངས་ཤིང༌། རྒྱལ་པོས་སྤྱན་དྲངས་ན་མི་འོང༌། ཆང་འཚོང་མས་བོས་པ་ན་འོང་བ་འདི་ཅི་ཟེར་གྱི་ཐལ་མོ་བརྡབས་པས། དེར་སློབ་དཔོན་གྱིས་རྭའི་བཤོར་ཞལ་ས་ལ་འཕངས་པས། ས་འོག་བདུན་ཕུག་སྟེ་ཆུ་ཆེན་པོ་བྱུང་ངོ༌། །སློབ་དཔོན་ཡབ་ཡུམ་ནི་ཧེ་རུ་ཀ་ཡབ་ཡུམ་དུ་གྱུར། ཁྱེའུ་དང་བུ་མོ་ནི་རྡོ་རྗེ་དང་དྲིལ་བུར་གྱུར་པ་ཕྱག་ཏུ་བསྣམས་ཏེ་ནམ་མཁའ་ལ་བཞུད། སྐྱེ་བོ་རྣམས་ཀྱང་ཆུས་ནུབ་པ་ཙམ་དུ་སོང་བ་ན། སློབ་དཔོན་ལ་གསོལ་བ་བཏབ་པས། སྤྱན་རས་གཟིགས་ལ་གསོལ་བ་ཐོབ་གསུང༌། སྐྱེ་བོ་ཐམས་ཅད་ཀྱིས་ན་མོ་ལོ་ཀེ་ཤྭ་རཱ་ཡ། ཞེས་བརྗོད་པ་ན། ཆུའི་དབུས་སུ་སྤྱན་རས་གཟིགས་ཀྱི་རྡོ་སྐུ་རང་བྱུང་དུ་བྱུང༌། ཆུ་ཡང་དེ་ལ་ལན་བདུན་དུ་བསྐོར་བ་བྱས་ནས་ས་འོག་ཏུ་སོང་ངོ༌། །དེར་སློབ་དཔོན་གྱིས། ཡུལ་དེ་ན་གནས་པ་རྣམས་ལ་རྡོ་རྗེ་ཐེག་པ་རྒྱ་ཆེར་བཤད་དེ། དངོས་གྲུབ་ཐོབ་པའི་སློབ་མ་ཡང་དཔག་ཏུ་མེད་པ་བྱུང་ངོ༌། །དེས་ནི་ལྭ་བ་པ་ལ་གདམས་པ་ཡིན་ཏེ། སློབ་དཔོན་དེ་ནི་རྒྱལ་པོའི་སྲས་ཤིག་ཡིན་པ། འདིའི་ཡུལ་ཡང་ཨོ་རྒྱན་གྱི་ནང་ཚན་ཞིག་ཡིན་གསུང༌། འགའ་ཞིག་ཨོ་ཌི་བི་ཤ་ཡིན་ཡང་ཟེར། ཆེར་སྐྱེས་པ་ན། གཙུག་ལག་ཁང་ཞིག་ཏུ་རབ་ཏུ་བྱུང་ཞིང༌། སྡེ་སྣོད་གསུམ་ལ་ཡང་མཁས་པར་གྱུར། ཕྱི་ཞིག་ན་ཤར་ཕྱོགས་སུ་འོངས་པས། སློབ་དཔོན་རྡོ་རྗེ་དྲིལ་བུ་པ་དང་མཇལ་ཏེ། འཁོར་ལོ་སྡོམ་པ་ལ་སོགས་པའི་དཀྱིལ་འཁོར་དུ་དབང་བསྐུར། ཇི་ལྟར་གདམས་པ་བཞིན་དུ་བསྒོམས་པས། ཡེ་ཤེས་མཆོག་ཐོབ་པར་གྱུར་ནས། ནུབ་ཕྱོགས་ཨོ་རྒྱན་གྱི་


TNT17_Page_0053
[མ་དཔེ་གཟིགས་ན་འདིར་གནོན།]

མཁའ་འགྲོ་མའི་གནས་སུ་སོང་བ་ན། མུ་སྟེགས་ཀྱི་མཁའ་འགྲོ་རྣམས་ཀྱིས། མེ་ཏོག་གི་འཕྲེང་བ་ཞིག་ལག་ཏུ་གཏད་དེ། དེ་བླངས་པ་ན། སངས་རྒྱས་པའི་མཁའ་འགྲོ་མ་རྣམས་བྱུང་སྟེ། བུ་མེ་ཏོག་བླངས་པ་མ་ལེགས། དེ་མུ་སྟེགས་ཀྱི་རྣལ་འབྱོར་མ་ཡིན། གང་མེ་ཏོག་བླངས་པ་དེའི་རྗེས་སུ་འཇུག་དགོས་ཟེར། འོ་ན་ཁྱེད་རྣམས་ཀྱི་སྲུང་བ་བྱེད་དགོས་བྱས་པས། གནས་འདི་ན་ཕྱི་རོལ་པ་དང༌། ནང་པའི་མཁའ་འགྲོ་མ་རྣམས་མེ་ཏོག་ཕོག་པ་སུ་སྔ་བ་དེའི་རྗེས་སུ་འཇུག་དགོས་པའི་ཆད་མདོ་བྱས་པ་ཡིན་ཟེར། དེར་སློབ་དཔོན་གྱིས་ཏིང་ངེ་འཛིན་བསྒོམ་ཞིང་བཞུགས་པས། ནམ་ཕྱེད་ཀྱི་དུས་ན། ཐུག་ཆཽམ་གྱི་སྒྲ་ཆེན་པོ་བྱུང་ནས་བལྟས་པ་ན། མུ་སྟེགས་ཀྱི་མཁའ་འགྲོ་མ་རྣམས་ཀྱིས་ཕ་བོང་གི་ཆར་ཆེན་པོ་ཕབ། བསྐྱེད་རིམ་བསྒོམས་པས་བསྲུང་འཁོར་ཇི་ཙམ་བསྒོམ་པའི་བར་གནོད་པ་མ་བྱུང་པས། བསྐྱེད་རིམ་གྱི་མཐུ་ཡང་འདི་འདྲ་ན། རྫོགས་པའི་རིམ་པའི་མཐུ་བསྟན་པར་བྱའོ་སྙམ་སྟེ། མཚན་མ་མེད་པའི་ཏིང་ངེ་འཛིན་ལ་མཉམ་པར་བཞག་པས། རྡོ་ཐམས་ཅད་ནམ་མཁའ་ལ་ཆགས་སོ། །ནམ་མཁའ་ལ་རྟེན་མེད་པར་ཕ་བོང་ཞིག་དང༌། བྲག་མེ་ལོང་ལྟར་འཇམ་པའི་ངོས་ལ་རྡོ་དམ་དུམ་མང་པོ་རྟེན་མེད་པར་ཆགས་པ་ད་ལྟའང་ཡོད། དེར་མཁའ་འགྲོ་མ་རྣམས་ཀྱི་བར་ཆད་ཀྱིས་མ་ཚུགས་སོ། །དེ་ནས་བསོད་སྙོམས་སྤྱོད་ཅིང་བཞུགས་པ་ན། གྲོང་ཁྱེར་གྱི་སྒོ་དྲུང་དུ་ཡང་ཡང་རྒྱལ་པོ་དང་འཕྲད་པ་ན། འཕྲད་རེས་བཞིན་རྒྱལ་པོས་དྲི་བ་རེ་བྱས་པ་ལ། སློབ་དཔོན་གྱིས་ལན་ཅི་ཡང་མ་བཏབ་བོ། །ལན་ཅིག་


TNT17_Page_0054
[མ་དཔེ་གཟིགས་ན་འདིར་གནོན།]

རྒྱལ་པོས་དགེ་སློང་བླུན་པོ་མི་ཤེས་པ་ཁྱོད། ཡང་ཡང་འགྲོ་ཞིང་འདུག་པས་ཅི་བྱེད། དེ་བས་རིང་དུ་གཉིད་ལོག་ན་རུང་བྱས་པ་ན། སློབ་དཔོན་གྱིས་རྒྱལ་པོའི་སྒོ་དྲུང་དུ་ལོ་བཅུ་གཉིས་སུ་གཉིད་ཐུན་གཅིག་གིས་འཁྱོངས་པ་ལོག་བཞིན་འདུག་པ་ན། དེར་འགྲོ་བའི་མི་ཀུན་ཡང་སློབ་དཔོན་ལ་ཕྱག་མ་བྱས་ན་བྱིན་པ་རེངས་འགྲོ་བས། རྒྱལ་པོ་ལ་སོགས་པ་ཐམས་ཅད་ཕྱག་འཚལ་ཞིང་འགྲོ་འོང་བྱེད་དོ། །ལོ་བཅུ་གཉིས་ན་སད་དེ། རྒྱལ་པོས་སློབ་དཔོན་དེ་ཙམ་ཅིའི་ཕྱིར་གཉིད་ལོག སློབ་དཔོན་ན་རེ། ལྷ་ཉིད་གསུང་ངོ་ཞེས་གསུང༌། དེ་ནས་རྒྱལ་པོ་ཡང་ཤིན་ཏུ་དད་པར་གྱུར་ཅིང༌། ཡུལ་གྱི་སྐྱེ་བོ་མང་པོ་རྡོ་རྗེ་ཐེག་པ་ལ་བཀོད། རྒྱལ་པོ་དེ་ནི་ཨིནྡྲ་བྷུ་ཏི་བར་པ་ཡིན་གསུང༌། དེ་ནས་སློབ་དཔོན་དུར་ཁྲོད་ན་ཀུན་ཏུ་སྤྱོད་པའི་ཚེ། ཨོ་རྒྱན་གྱི་ཡུལ་གྱི་སྔགས་འཆང་མའི་གཙོ་མོ་ལྔ་བརྒྱ་དུར་ཁྲོད་ཉུལ་དུ་སོང་ངོ༌། །དེ་ལ་སྔགས་འཆང་མ་ཞེས་པ་ནི་མནྡྲ་བཱ་དི་ཏེ། ལྷན་ཅིག་སྐྱེས་པ་དང༌། བྱིན་གྱིས་བརླབས་པའི་སྔགས་ཀྱི་མཐུ་ཅན། དམོད་པ་གྲུབ་པའི་ཕྲ་མེན་མ་ཡིན་ནོ། །དེས་ན་དེ་རྣམས་ཀྱིས་སློབ་དཔོན་ལ་བར་ཆད་བྱེད་པར་འདོད་ནས་སློབ་དཔོན་བཙལ་བ་ན། སློབ་དཔོན་གྱི་ཤུལ་ན་ན་བཟའ་ལྭ་བ་གཅིག་མ་གཏོགས་གཞན་མ་མཐོང་ནས། ཀྱེ་མ་དགེ་སློང་འདིའི་སྒྱུ་མ་ལ་ལྟོས། རང་གི་ལུས་ལྭ་བར་སྒྱུར་རོ། །དེ་བས་ན་འདི་གཏུབས་ནས་སོ་སོར་བཟའ་བར་བྱའོ་ཞེས་ཟེར་ཏེ། ལྭ་བ་དུམ་བུ་ལྔ་བརྒྱར་བགོས་ནས་སོ་སོར་མིད་དོ། །དེར་སློབ་དཔོན་གྱིས་ལུས་སྣང་བར་བྱས་ཏེ་དེ་རྣམས་ལ་དམོད་པ་བོར་བས། སྔགས་འཆང་མོ་ལྔ་བརྒྱ་པོ་ལུག་མ་མོ་ལྔ་བརྒྱར་སོང་ངོ༌། །དེར་ལུག་མ་མོ་རྣམས་


TNT17_Page_0055
[མ་དཔེ་གཟིགས་ན་འདིར་གནོན།]

རྒྱལ་པོའི་དྲུང་དུ་སོང་སྟེ། དགེ་སློང་དུར་ཁྲོད་པས་བདག་ཅག་འདི་ལྟར་དུ་བྱས་པས། རྒྱལ་པོས་སྒྲོལ་བའི་ཐབས་མཛོད་ཅེས་ཟེར་རོ། །དེར་རྒྱལ་པོས་སློབ་དཔོན་ལ་ཞུས་པས་སློབ་དཔོན་གཅེར་བུར་བྱུང་ཞིང༌། རྒྱལ་པོ་ཁྱོད་ཀྱི་ཡུལ་གྱི་སྔགས་འཆང་མ་རྣམས་ཀྱིས། དགེ་སློང་གི་ནོར་ལྭ་བ་ཅིག་ཡོད་པའང་ཟོས་སོ། དེ་བས་ན་སྔགས་འཆང་མ་རྣམས་ཁུག་ཅིག་གསུང༌། དེར་གསུམ་མ་གཏོགས་ཐམས་ཅད་བཀུག་ནས། རེ་རེ་བཞིན་ཐམས་ཅད་ལ་སྡིགས་འཛུབ་རེ་བྱས་པས། མགོ་བརྙན་སྣ་ཚོགས་སུ་སོང་ནས། ལྭ་བའི་དུམ་བུ་སོ་སོར་སྐྱུགས། དེ་དག་ཚེམ་བུ་བྱས་པས། ཅུང་ཟད་མ་འགྲིག་སྟེ། ད་དུང་གསུམ་ཡོད་པས་ཁུག་ཅིག་གསུང༌། དེར་བཙུན་མོའི་འཁོར་གྱི་ནང་ན་གསུམ་ཡོད་པ་ཡང་དེར་འོངས་པ་ལ། སྔ་མ་ལྟར་ལྭ་བ་སྐྱུག་ཏུ་བཅུག དེ་ཉིད་སྐུ་ལ་གསོལ་བས་རྗེ་བཙུན་ལྭ་བ་པ་ཞེས་ཡོངས་སུ་གྲགས་སོ། །དེར་རྒྱལ་པོ་ཨིནྡྲ་བྷཱུ་ཏི་ལ་དབང་བསྐུར་ཏེ། དེའི་གདམས་པ་བསྒོམས་པས་རྒྱལ་པོའང་དངོས་གྲུབ་ཐོབ། དེ་ནས་སློབ་དཔོན་བྲག་ཕུག་གཅིག་ཏུ་ལོ་བཅུ་གཉིས་སུ་མཚན་མ་མེད་པའི་ཏིང་ངེ་འཛིན་བསྒོམ་བཞིན་དུ་འོད་གསལ་གྱི་ལམ་གྱིས་འགྲོ་བའི་དོན་མཛད་པ་ན། སྐྱེ་བོ་རྣམས་སྨོད་པར་བྱེད་དེ། གཏི་མུག་ཆོས་སུ་སྨྲ་བ་ཞེས་ཟེར། རྒྱལ་པོ་ཨིནྡྲ་བྷཱུ་ཏི་དེ་ཞག་རེ་བཞིན་བུད་མེད་ལྔ་བརྒྱ་དང་ལྷན་ཅིག་སྤྱོད་པས། མི་རྣམས་སྨོད་པར་བྱེད་པ་ལ། དུས་གཞན་ཞིག་གི་ཚེ། རྒྱལ་པོས་བཙུན་མོ་ཞིག་གི་ལག་ཏུ་ཚོད་མ་ཀུ་བ་གང་གཏད། འདི་མ་གྲང་པ་ལ་སློབ་དཔོན་ལྭ་བ་པ་ལ་ཕུལ་ཞིག་བྱས་པ་ན། དེས་ཉི་མ་མང་པོ་ཆོད་པའི་ལམ་དུ་ཚོད་མ་མ་གྲང་པ་ག་ལ་འོང་བྱས་པས།


TNT17_Page_0056
[མ་དཔེ་གཟིགས་ན་འདིར་གནོན།]

རྒྱལ་པོ་ན་རེ་དེ་ལ་ནི་སྔགས་ཡོད་དེ། ཁྱོད་མིག་ཚུམ་ལ་འདི་སྐད་སྨོས་ཤིག སློབ་དཔོན་ལྭ་བ་པ་གཉིད་སྤངས་པའི་དཀའ་ཐུབ་ལ་གནས་པ་འདི་བདེན་ན། ད་ལྟ་ཉིད་དུ་ཀོ་ཏཾ་བྷ་རིའི་བྲག་ཕུག་ཏུ་ཕྱིན་པར་གྱུར་ཅིག །ཅེས་བརྗོད་ཅིག་གསུང༌། དེས་ཀྱང་དེ་བཞིན་བྱས་པས། མིག་གདངས་ཙམ་ན། སློབ་དཔོན་གྱི་མདུན་དུ་སླེབ་འདུག་སྐད། དེར་སློབ་དཔོན་ནི་སློབ་མ་འགའ་ལ་ལུང་འབོགས་པའི་བྱ་བས་གཡེངས་ནས་ཡུན་རིང་རབ་ཅིག་འདྲེན་རྒྱུ་མ་བྱུང༌། སླར་དྲངས་པ་ཕལ་ཆེར་གསོལ་ནས། ལྷག་མ་ཅུང་ཟད་དྲོད་ཡོད་པ་ཉུང་ཤས་ཤིག་གཏད་ནས། འདི་དྲོད་མ་ཡལ་བ་རྒྱལ་པོ་ལ་ཐེངས་པ་གྱིས་གསུང༌། དཔག་ཚད་བཅུ་གཉིས་ཀྱི་ལམ་ཡོད་པས་མ་གྲང་བ་ག་ལ་འོང་བྱས་པས། སློབ་དཔོན་ན་རེ། རྒྱལ་པོ་ཨིནྡྲ་བྷཱུ་ཏི་ཚངས་པར་སྤྱོད་པའི་མཆོག་ཡིན་པ་བདེན་ན། ད་ལྟ་ཉིད་དུ་རྒྱལ་པོའི་དྲུང་དུ་ཕྱིན་པར་གྱུར་ཅིག །ཅེས་བརྗོད་ཅིག་དང་མྱུར་དུ་སླེབ་འོང་གསུང༌། དེས་བསམས་པ། སློབ་དཔོན་འདི་ཡང་རྫུན་དུ་སྨྲ་བ་ཞིག་སྟེ། འདི་ལྟར་སྐྱེ་བོ་ཐམས་ཅད་ཀྱི་མངོན་སུམ་དང་འགལ་བའི་ཚིག་འདི་ལ་སུ་ཞིག་ཡིད་ཆེས་སྙམ་མོ། །འོན་ཀྱང་དེ་བཞིན་དུ་བྱས་པས། ཡུད་ཙམ་གྱིས་ལམ་རྣམས་ཆོད་འགྲོ་ཡིན་འདུག་ནས། ངན་རྟགས་རྣམས་ཁྱེར་ཞིང་འོངས་ནས། རྒྱལ་པོ་མདུན་ཁང་དུ་སྐྱེ་བོ་བརྒྱ་སྟོང་གི་དབུས་ན་ཡོད་པའི་དྲུང་དུ་སླེབ་སྟེ། ཚོད་མའི་ལྷག་མ་གཏད། དེར་སྔར་གྱི་ལོ་རྒྱུས་བྱས། ཀོ་ཏཾ་བྷཾ་རིའི་བྲག་ཕུག་གི་བཙག་དང༌། གྲུབ་པའི་ཆུ་བོ་ཞེས་བྱ་བ་ཆུ་དམར་སེར་འབབ་པ་ཅིག་ཡོད་པ་ལས་རྐང་གདུབ་གང་དང༌། ཨི་ལོའི་རི་ལ་ཡོད་པའི་གྲུབ་པའི་སྨན་སྣ་ཚོགས་པ་དང༌། གཱ་ཛ་ཁ་ཛུ་རའི་ནགས་ནས་འབྲས་བུ་གསུམ།


TNT17_Page_0057
[མ་དཔེ་གཟིགས་ན་འདིར་གནོན།]

སྐྱུ་རུ་རའི་ནགས་ནས་ཀྱང་འབྲུ་གསུམ། གྲུབ་པའི་མཚོའི་ནང་ནས་མེ་ཏོག་པདྨ་གཅིག་རྣམས་བདེན་པའི་རྟགས་ཅན་དུ་ཁྱེར་བའང་སྐྱེ་བོ་རྣམས་ལ་བསྟན་པས། ཐམས་ཅད་ངོ་མཚར་དུ་གྱུར་ཅིང༌། སྡོད་རྒྱལ་པོ་ཡང་དངོས་གྲུབ་ཐོབ་པར་ཤེས་སོ། །སླད་ཀྱིས་རྒྱལ་པོ་དང་སློབ་དཔོན་གཉིས་ཀྱིས་ཨོ་རྒྱན་གྱི་མི་རྣམས་ལ་གདམས་པ་བསྟན་པས། དངོས་གྲུབ་ཐོབ་པ་དང་རྣལ་འབྱོར་ཅན་ཤ་སྟག་ཏུ་གྱུར་ཏེ། ཨོ་རྒྱན་གྱི་ཡུལ་དེ་ཙམ་དུ་ཆེ་བ་ཡང་སྟོངས་སུ་ཉེ་བར་གྱུར་སྐད། གཏམ་འདི་ས་ཧ་ཛ་སིདྡྷི་འགྲེལ་པ་བོད་ན་ཡོད་པ་འདིའི་གཏམ་རྒྱུད་དང་ཅུང་ཟད་མི་མཐུན་མོད། དཔེར་ན་མདོ་ལས་ཐམས་ཅད་སྒྲོལ་གྱི་ལོ་རྒྱུས་འདྲ་མིན་མང་པོ་འབྱུང་བ་བཞིན། ཨིནྡྲ་བྷཱུ་ཏི་ལྭ་བ་པར་གྱུར་པ་མཛད་སྤྱོད་ཕྱོགས་མཐུན་པ་གཞན་ཅིག་བྱུང་ན་ནི་མི་འགལ་ལོ། །ཡང་བོད་རང་ན་ཡོད་པ་ལྷན་ཅིག་སྐྱེས་གྲུབ་ཀྱི་འགྲེལ་པའི་དཔེ་འགའ་ན། གཏམ་རྒྱུད་དེ་མེད་པའང་སྣང་བས། རྒྱ་དཔེ་ལ་ལ་ན་ཡང་མེད་པར་སྣང་ཞིང༌། ལར་རྒྱ་གར་ན་ཡང་བསྟན་བཅོས་ཁ་འཕངས་དང༌། ཚིག་སྣ་རིང་ཐུང་འདྲ་མིན་མང་བས་དེབ་ཐེར་སྔོན་པོ་སོགས་ན་དགག་སྒྲུབ་ཡོད་དེ་སྙིང་པོ་མེད་དོ། །རིན་པོ་ཆེའི་འབྱུང་ཁུངས་ལྟ་བུའི་གཏམ་ལས། འོད་གསལ་བརྒྱུད་པའི་གཏམ་གྱི་སྐབས་ཏེ་བཞི་པའོ།། །།སློབ་དཔོན་ཨིནྡྲ་བྷཱུ་ཏི་དང༌། ལྭ་བ་པ་སྟེ་སློབ་དཔོན་དེ་གཉིས་ཅར་ལ། གྲུབ་ཐོབ་ཛ་ལནྡྷ་རི་པས་འོད་གསལ་དང་བདེ་བ་ཆེན་པོའི་གདམས་ངག་ཞུས་ཏེ། སློབ་དཔོན་དེ་གང་དུ་འཁྲུངས་པའི་ཡུལ་ན། ནུབ་ཕྱོགས་སིནྡྷུའི་གྲོང་ཁྱེར་ན་ག་ར་ཐ་ཋ་ཞེས་བྱ་བ་ཞིག་ཏུ་རིགས་དམངས་རིགས་སུ་སྐྱེས་ཏེ། འོན་ཀྱང་བསོད་ནམས་ཀྱི་མཐུས་


TNT17_Page_0058
[མ་དཔེ་གཟིགས་ན་འདིར་གནོན།]

ལོངས་སྤྱོད་ཆེན་པོ་དང་ལྡན་ནོ། །ཕྱི་ཞིག་ན་གཙུག་ལག་ཁང་ཞིག་ཏུ་དགེ་སློང་བྱས། སློབ་དཔོན་ལྭ་བ་པ་ལ་གདམས་ངག་ཞུས་ནས་བསྒོམ་ཞིང་ཡོད་པའི་ཚེ། ནམ་མཁའ་ལས་སྒྲ་བྱུང་སྟེ། ཁྱོད་ཨོ་རྒྱན་དུ་སོང་ལ་སྒོམས་ཤིག དེར་འདོད་པའི་དངོས་གྲུབ་ཐོབ་པར་འགྱུར་ཞེས་འབྱུང་པས། ཨོ་རྒྱན་དུ་སོང་སྟེ་རྒྱལ་པོ་ཨིནྡྲ་བྷཱུ་ཏི་དང༌། ལྕམ་ལཀྵྨི་ཀ་ར་དང༌། སློབ་དཔོན་ཀཙྪ་པཱ་ད་རྣམས་ལ་རྒྱུད་ཐམས་ཅད་ཀྱི་གདམས་ངག་ཐོས་ཤིང༌། དེར་བསྒོམས་པའི་ཚེ། ཚེས་བཅུའི་དུས་ཤིག་ན་དུར་ཁྲོད་དུ་སོང་བས། དེར་དཔལ་ཧེ་རུ་ཀའི་དཀྱིལ་འཁོར་མངོན་སུམ་དུ་མཇལ་ཞིང༌། རྡོ་རྗེ་མཁའ་འགྲོ་མ་མང་པོས་དབང་བསྐུར་བས། དེ་ཉིད་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕང་ཐོབ་བོ། །དེ་ནས་རིང་ཞིག་ཏུ་ཡུལ་དེ་ཉིད་དུ་འདུག་ནས་སེམས་ཅན་གྱི་དོན་ཅི་རིགས་པར་མཛད་དོ། །ལན་ཅིག་ཀོ་ཏཾ་བྷ་ར་ཞེས་པའི་གྲོང་ཁྱེར་ཞིག་ན་ཡོད་པ་ན། གྲོང་ཁྱེར་གྱི་མི་རྣམས་ཀྱིས་སློབ་དཔོན་ལ་ཡང་ཅོ་དྲིས་པས། ཡུན་རིང་པོའི་བར་དུ་སློབ་དཔོན་ཁྲོ་བར་མི་བྱེད། དུས་གཞན་ཞིག་ན། གྲོང་ཁྱེར་གྱི་རིགས་ཀྱི་གཙོ་བོ་གསུམ་ཞིག་བཞི་མདོར་སོང༌། སློབ་དཔོན་ཏིང་ངེ་འཛིན་ལ་བཞུགས་པ་མཐོང་བ་ན། གཅིག་ན་རེ། རྣལ་འབྱོར་བ་འདི་ལོང་བ་ཞིག་ཟེར། གཞན་གཅིག་ན་རེ། འདི་ནི་རྣལ་འབྱོར་པ་མ་ཡིན་ལྐུགས་པ་ཞིག་གོ །ཡང་གཅིག་ན་རེ། འདི་ནི་ཤི་བའི་རོ་ཞིག་གོ་ཟེར་བ་ལ། སློབ་དཔོན་གྱིས་ཁྱེད་རྣམས་དེ་བཞིན་དུ་གྱུར་ཅིག་ཅེས་དམོད་པ་བོར་བས། གཅིག་ནི་མིག་ལོང༌། གཅིག་ནི་ངག་ལྐུགས། གཅིག་དེ་ཉིད་དུ་ཤིའོ། །དེར་སྐྱེ་བོ་ཐམས་ཅད་འཇྀགས་ཤིང༌། གྲུབ་པ་ཐོབ་པར་གྲགས་སོ། །དེ་རྣམས་ཀྱི་གཉེན་རྣམས་འོངས་


TNT17_Page_0059
[མ་དཔེ་གཟིགས་ན་འདིར་གནོན།]

ཤིང་གསོལ་བ་བཏབ་པས། སླར་ཡང་གསོལ། དེ་ནས་སློབ་དཔོན་ཡུལ་ཛ་ལནྡྷ་ར་རྡོ་དང་ཆུ་ལ་མེ་འབར་བའི་གནས་སུ་བཞུགས་ཏེ། ཡུན་རིང་པོ་ལོན་པ་ན་མཚན་ཡར་ཡུལ་གྱི་མིང་ཐོགས་ཏེ། གྲུབ་ཐོབ་ཛ་ལནྡྷ་རི་པ་ཞེས་ཟེར་རོ། །དུས་གཅིག་ན་རང་བྱུང་གི་མཆོད་རྟེན་དང་ཉེ་བའི་བལ་ཡུལ་གྱིས་ཕྱོགས་ཤིག་ན། དབང་ཕྱུག་གི་ལིང་ག་ཆོ་འཕྲུལ་ཤིན་ཏུ་ཆེ་བ། ཞག་བདུན་དུ་ས་ཐེ་བཙུགས་ནས་གསོལ་བ་བཏབ་ན། མིག་མཐོང་གི་མངོན་ཤེས་དང༌། དབང་དང་རྒྱས་པའི་ལས་ཕྲ་མོ་མང་པོ་དང༌། ཁྱད་པར་དྲག་ཤུལ་སྤྱོད་པའི་ལས་འཕྲལ་དུ་འགྲུབ་པ་ཞིག་ཡོད་པས། སངས་རྒྱས་ཀྱི་བསྟན་པ་ལ་བར་དུ་གཅོད་པ་ཞིག་བྱུང་བ། དེ་འདུལ་བའི་དོན་དུ་ས་ཕྱོགས་དེར་བྱོན། རེས་གཅིག་ཙ་ན་ལིང་ག་དེ་མཆོད་པ་ལ་རྒྱལ་པོ་ཡང་གསུམ་ཙམ་འདུས་ཤིང༌། སྐྱེ་བོ་བརྒྱ་སྟོང་དུ་མ་ཚོགས་པའི་དབུས་སུ། སློབ་དཔོན་ཡང་བྱོན་ཏེ། ལིང་ག་ལ་སྡིགས་འཛུབ་བསྟན་པས་མགོ་ཞབས་ལོག ཕུས་བཏབ་པས་ཆ་དུ་མར་ཞིག་གོ །དེར་ཡང་སྐྱེ་བོ་ཐམས་ཅད་ཀྱིས་གྲུབ་པ་ཐོབ་པར་ཤེས་ཏེ་ཞབས་ལ་ཕྱག་བྱས། དེ་ནས་ལན་ཅིག་ཡུལ་ཙམ་པཱརྞར་བཞུད་དེ། དེ་ན་སྡིག་སྤྱོད་ཀྱི་རྒྱལ་པོ་ཞིག་གིས། གཙུག་ལག་ཁང་མང་པོ་བཤིག་པར་བརྩམས་པ་ན། རྒྱལ་པོའི་སྒོ་དྲུང་ན་པི་ཝཾ་མཁན་མཁས་པ་ཞིག་བྱུང༌། པི་ཝཾ་མཁན་ཞིག་རྒྱལ་པོ་ལ་སེམས་ཤིང་འདུག་ཅེས་བསྒོ་བས་རྒྱལ་པོ་ལ་སྦྲན་པས། ནང་དུ་བོས་པ་ན། གླུ་དང་པི་ཝཾ་གི་སྦྱོར་པ་མང་པོ་བྱས་པས། རྒྱལ་པོ་འཁོར་བཅས་དགའ་བར་གྱུར་པ་ལ། པི་ཝཾ་མཁན་དེ་ནི་རྣལ་འབྱོར་པར་འགྱུར་ནས་སོང་ངོ༌། །དེར་རྒྱལ་པོས་སངས་རྒྱས་པ་འདི་


TNT17_Page_0060
[མ་དཔེ་གཟིགས་ན་འདིར་གནོན།]

ཀུན་སྒྱུ་མས་སླུ་བར་བྱེད་ཅིང༌། ཞེས་སྨྲས་པ་ལ། སློབ་དཔོན་གྱིས་སངས་རྒྱས་པའི་བསྔགས་པ་བརྗོད། མུ་སྟེགས་པ་རྣམས་དང༌། ཁྱད་པར་རྒྱལ་པོ་དེ་རང་ལ་སྨད་པས། རྒྱལ་པོས་འཁོར་རྣམས་ལ་འདི་མགོ་ཆོད་ཅེས་བྱས་སོ། །དེར་མཚོན་ཆ་སྣ་ཚོགས་བསྣུན་པས། སློབ་དཔོན་གྱི་སྐུ་ལ་གཅིག་ཀྱང་མ་གནོད། མི་ལྔ་བརྒྱས་འཆིང་བར་བརྩམས་པས་ཀྱང༌། སྐུ་འགུལ་པ་ཡང་མ་བྱུང༌། སློབ་དཔོན་གྱིས་ཐལ་མོ་བརྡབས་པས། རྒྱལ་པོའི་ཕོ་བྲང་ཕྱེད་མར་གས། རྒྱལ་པོའི་འཁོར་རྣམས་ཀྱང་ལྟ་སྟངས་ཀྱིས་རེངས་པར་བྱས་པས་ཤིན་ཏུ་འཇིགས་ཤིང༌། རྒྱལ་པོ་ཉིད་ཀྱིས་སློབ་དཔོན་གྱི་ཞབས་ལ་ཕྱག་བཙལ་ཏེ། བདག་གིས་ཅི་ཞིག་བགྱི་ཞེས་ཞུས་པས། སྔར་གྱི་སྡིག་པ་བཤགས་པའི་དོན་དུ་གཙུག་ལག་ཁང་སྔར་བས་ཉིས་འགྱུར་དུ་གྱིས། དེར་གནས་པའི་དགེ་འདུན་ཡང་ཉིས་འགྱུར་གྱི་ལྷག་པ་ཚུགས། མ་ཤི་བར་དུ་དགེ་འདུན་ལ་མཆོད་པ་གྱིས། བུ་ལ་སོགས་པ་བདུན་བརྒྱུད་ཀྱི་བར་དུ་དགེ་འདུན་ལ་མཆོད་པ་གྱིས་ཤིག །ཅེས་ཟངས་ཀྱི་གླེགས་བུ་གྱིས་གསུང༌། དེས་ཀྱང་དེ་བཞིན་དུ་བྱས་སོ། །ཡང་ལན་ཅིག་ཡུལ་མ་ལ་བ་ན། རྒྱལ་པོ་ལེགས་སྦྱར་ལ་བྷརྟཱ་ཧ་རི་ཞེས་བྱ། ད་ལྟ་འཕྲལ་སྐད་བྷར་ཐཱ་རི་ཞེས་བྱ་བ། རྟ་འབུམ་ཕྲག་བཅོ་བརྒྱད་དང༌། བུད་མེད་སྟོང་དང་བཅས་པ་འབྱོར་ཞིང་རྒྱས་པར་གནས་པ་ལ། དེ་འདུལ་བའི་དུས་ཡིན་པར་མཁྱེན་ནས། གྲོང་ཁྱེར་དང་མི་རིང་བའི་ཕྱོགས་ཤིག་ཏུ་བཞུགས་པ་ན། མཚན་མོའི་དུས་ཤིག་ཆོམ་རྐུན་པ་མང་པོ་བྱུང༌། དེ་རྣམས་ཀྱིས་སློབ་དཔོན་ལ་བསྐོར་བ་བྱས། གྲོང་ཁྱེར་འཇོམས་པ་ལ་སོང་


TNT17_Page_0061
[མ་དཔེ་གཟིགས་ན་འདིར་གནོན།]

བས། ནོར་མང་པོ་ཐོབ། དེ་རྣམས་ཕན་ཚུན་དུ་དེང་གནོད་པ་མེད་པར་ནོར་མང་པོ་ཐོབ་པ་ན། རྣལ་འབྱོར་པ་དེའི་མཐུ་ལས་ཡིན་གྱི་དེ་བས་ན་ཐམས་ཅད་ཀྱིས་མཆོད་པ་བྱའོ་ཞེས་མུ་ཏིག་གི་དོ་ཤལ་སྲང་བརྒྱ་སྟོང་རི་བ་ལ་སོགས་པ་མཆོད་པ་དུ་མས་མངོན་པར་མཆོད་ནས་སོང་ངོ༌། །དེར་མི་རྣམས་ཀྱིས་རྒྱལ་པོ་ལ་ཞུས་པས། རྒྱལ་པོས་ཀྱང་རྟོག་པའི་མི་བཏང་བས། སློབ་དཔོན་ནོར་མང་པོ་དང་བཅས་པ་མཐོང་བས། སློབ་དཔོན་རྐུན་པོ་ཡིན་ནོ་སྙམ་ནས་རྒྱལ་པོ་ལ་ཕུལ། དེས་ཀྱང་མ་བརྟགས་པར་ཤིང་གི་གསལ་ཤིང་ལ་བསྐྱོན་ནོ། །དེར་ཉིན་བར་ནི་སྐུ་ལུས་གསལ་ཤིང་གིས་ཕུག་པའི་ཚུལ་དུ་འདུག མཚན་མོ་ནི་དེ་ལས་བབས་ཏེ་ཏིང་ངེ་འཛིན་བསྒོམ་ཞིང་བཞུགས། དེ་ལྟར་ཞག་བདུན་ཐལ་བ་ན། རྒྱལ་པོ་ཡང་དེའི་དྲུང་དུ་སོང་ངོ༌། །དེར་གསལ་ཤིང་གིས་ཕུག་བཞིན་པ་ལ་གསལ་ཤིང་བཅག་ནས་ཆུ་ཀླུང་གི་འགྲམ་དུ་ཁྲུས་མཛད་དུ་བྱོན་པས། རྒྱལ་པོའང་ངོ་མཚར་སྐྱེས་ཏེ། བཟོད་པར་གསོལ་ནས་རྗེས་སུ་བཟུང་བར་ཞུས་པས། རྒྱལ་སྲིད་སྤོངས་ལ་ཨ་ཝ་དྷཱུ་ཏཱི་གྱིས་ཤིག དེའི་ཚེ་གདམས་ངག་བྱིན་པར་བྱའོ་གསུང་བ་བཞིན་དུ་རྒྱལ་སྲིད་ཀྱང་ཡོངས་སུ་སྤངས་ཏེ། སློབ་དཔོན་གྱི་ཕྱི་བཞིན་དུ་འབྲང་སོང་བ་ན། དུས་གཞན་ཞིག་ན་སློབ་དཔོན་གྱིས་གདམས་ངག་ཀྱང་གནང་སྟེ་བསྒོམས་པས་རིང་པོ་མི་ཐོགས་པར་རྣལ་འབྱོར་གྱི་དབང་ཕྱུག་ཏུ་གྱུར་ཏེ། ཕྱིས་འཁོར་ལྔ་བརྒྱ་དང་བཅས་ནས་མཁའ་སྤྱོད་དུ་གཤེགས་སོ། །སྔར་གྱི་འཕྲོས་ལ། སློབ་དཔོན་ཛ་ལནྡྷ་རི་པ་ནི་ཕལ་ཆེར་བྱིས་པ་ལྟ་བུའི་སྤྱོད་པ་མཛད་པས། བཱ་ལི་བཱ་ཏ་ཏེ། བྱིས་པའི་ཞབས་ཞེས་གྲགས་སོ། །དེ་ནས་


TNT17_Page_0062
[མ་དཔེ་གཟིགས་ན་འདིར་གནོན།]

དུས་ཕྱིས་ཤར་ཕྱོགས་པ་རྣམས་འདུལ་བར་བཞེད་ནས། བྷང་ག་ལའི་ཙཱ་ཊི་གྲ་མ་ཞེས་པའི་གྲོང་ཁྱེར་གྱི་སྲང་ཁ་འཆག་པའི་ཧ་ཌི་བའི་ཚུལ་བཟུང་ཞིང་ཡོད་པ་ལས། ཡུལ་དེའི་རྒྱལ་པོ་གཞོན་ནུ་གོ་བི་ཙནྡྲ་ཞེས་བྱ་བ་རྒྱལ་སྲིད་ལ་འཁོད་ནས་རིང་པོ་མ་ལོན་པ་ཞིག་ཡོད་པ། རང་གི་གཟུགས་མཛེས་པ་ལ་ཡོངས་སུ་ཆགས་ཏེ། མེ་ལོང་ལ་བལྟ་ཞིང་བྱི་བྱད་འཆོས་པ་ལ། ལན་ཅིག་གི་ཚེ། རྒྱལ་པོ་དེའི་མས་ཐོ་རངས་བལྟས་པ་ན། སློབ་དཔོན་རྒྱལ་པོའི་བཟའ་ཤིང་གི་ར་བར་སོང་ནས། ཤིང་རྣམས་ཀྱི་རྩ་བར་འདུག་ནས། ན་རི་ཀེ་ལ་བྷིཀྵ་ཨ་ཝོ་ཞེས་བརྗོད་པས། ཤིང་འབྲས་རྣམས་སློབ་དཔོན་གྱི་དྲུང་དུ་བྱུང༌། ཁུ་བཅུད་གསོལ་ཟིན་པ་ན། ན་རི་ཀེ་ལ་ཨུ་པ་ར་ཛ་ཧ། ཞེས་གསུངས་པས། ཤིང་འབྲས་རྣམས་སྔ་མ་བཞིན་དུ་འབྱར་ནས་འགྲོ་བ་ཡང་ཡང་མཐོང་བས། རྒྱལ་པོའི་མས། གྲུབ་པ་ཐོབ་པར་ཤེས་ནས། འདིས་རྒྱལ་པོ་འདུལ་བར་འགྱུར་རོ་སྙམ་སྟེ། ལན་ཅིག་བུའི་དྲུང་དུ་མཆི་མ་ཕྱུང་བ་ན། རྒྱལ་པོས་སྨྲས་པས་ཡུམ་ཅི་ཞིག་ཉེས། དེས་སྨྲས་པ། ཁྱོད་ཀྱི་ཕ་གཟུགས་དང་སྟོབས་དང་བློ་གྲོས་ཐམས་ཅད་ཁྱོད་པས་བཅུ་འགྱུར་གྱིས་ལྷག་ཀྱང༌། མི་རྟག་པའི་རང་བཞིན་བསྟན། ཁྱོད་ཀྱང་འཆི་བའི་ཆོས་ལས་མ་འདས་ཟེར། རྒྱལ་པོས་སྨྲས་པ། འོ་ན་མི་འཆི་བའི་ཐབས་མ་མཆིས་སམ། མས་སྨྲས་པ། རང་རེའི་ཧ་ཌི་བ་འདི་ལ་ཡོད་ཅེས་སྨྲས་སོ། །རྒྱལ་པོ་ཧ་ཌི་བའི་དྲུང་དུ་སོང་སྟེ་ཁྱོད་ཀྱིས་ང་ལ་མི་འཆི་བའི་གདམས་པ་སྟེར་དགོས་བྱས་པ་ན། དེས་གདམས་པ་ཡོད་དེ། རྒྱལ་སྲིད་མ་སྤངས་ན་མི་འགྲུབ་ཅེས་གསུང༌། དེར་རྒྱལ་པོས་སྨྲས་པ། འོ་ན་ཐོག་མར་གདམས་ངག་ཞུས་ལ་ཕྱིས་རྒྱལ་སྲིད་སྤོང་ངོ་


TNT17_Page_0063
[མ་དཔེ་གཟིགས་ན་འདིར་གནོན།]

ཞེས་བྱས་ནས། ནགས་ཚལ་དབེན་པ་ཞིག་ཏུ། རྒྱལ་པོ་དང་སློབ་དཔོན་གཉིས་ཁོ་ན་སོང་སྟེ། སློབ་དཔོན་གྱིས་རྒྱལ་པོ་ལ་རྫའི་བུམ་པ་སྟོང་པ་ཞིག་གཏད་དེ། དེར་ལག་པ་ཆུག་གསུང་བཅུག་པ་ན། ཅི་འདུག་མྱུར་བ་མྱུར་བ་སྨྲོས་གསུང༌། དེར་རྒྱལ་པོས་ཅང་མི་འདུག་བརྗོད་པ་ན། དེ་ཁོ་ན་འཆི་བ་མེད་པའི་ལམ་ཡིན་གསུང༌། ལན་གསུམ་དུ་རྒྱལ་པོས་དྲིས་པས་ཀྱང༌། དེ་བཞིན་དུ་གསུངས་ནས། རྒྱལ་པོ་ཡིད་མ་ཆེས་པར་འདི་ནི་གཡོ་ཅན་ཞིག་གོ །ཞེས་སའི་དོང་གཏིང་རིང་པོ་བཅུག ཚེར་མའི་ཤིང་གིས་བསྐོར། གླང་པོ་ཆེའི་ལྕི་བ་དང༌། རྟའི་སྦངས་ཀྱིས་བཀངས་ཏེ་སྦས་ནས་བཞག་གོ །དེ་ཡང་སློབ་དཔོན་གྱི་སྐུའི་བཀོད་པ་གཉིས་བསྟན་པ་ཡིན་ཏེ། ཡུལ་ཛ་ལནྡྷ་ར་ན་ཡང་ཀུན་སྤངས་ཀྱི་སྤྱོད་པས་སེམས་ཅན་གྱི་དོན་མཛད། བྷང་ག་ལར་ཡང་དེ་ལྟར་བསྟན་པ་ཡིན་ནོ། །དེ་ནས་ཕྱི་ཞིག་གི་ཚེ། སློབ་དཔོན་ནག་པོ་སྤྱོད་པ་ལྷོ་ཕྱོགས་ཀ་ཏ་ལི་ཀྵེ་ཏྲ་ཆུ་ཤིང་གི་ཞིང་ཞེས་བྱ། ཕལ་སྐད་དུ་ཀ་ཙ་ལི་ཞེས་ཟེར་བར་བྱོན་པ་ན། སློབ་དཔོན་ནག་པོ་སྤྱོད་པའི་སློབ་མ་རྣམས་ཀྱིས། ལམ་དུ་རྣལ་འབྱོར་པ་མང་པོ་འདུག་པ་རྣམས་ལ། ལོངས་ལོངས་གྲུབ་ཐོབ་ནག་པོ་སྤྱོད་པ་པ་ཕེབས་ཀྱི་ཡོད་བྱས་པས། གཞན་རྣམས་ཀྱིས་ལངས། གྲུབ་ཐོབ་གཽ་རཀྵ་ནི་ལྡང་བ་མི་མཛད་དོ། །དེར་སློབ་དཔོན་ཡང་བྱོན་ཏེ། གཽ་རཀྵ་དང་གཏམ་མཛད་པ་ན། ཇི་ཞིག་ན་གཽ་རཀྵས། ཁྱེད་ཀྱི་བླ་མ་གང་ཡིན་དྲིས་པས། ཛ་ལནྡྷ་རི་པ་ཡིན་གསུང༌། གཽ་རཀྵས། འོ་ན་ཛ་ལནྡྷ་རི་པ་ནི་རྒྱལ་པོ་གོ་བི་ཙནྡྲས་ས་དོང་དུ་བསྐྱུར་ནས་ལོ་བཅུ་གཉིས་ལོན་ཞེས་གསུངས་པས། སྤྱོད་པ་པ་འཁོར་


TNT17_Page_0064
[མ་དཔེ་གཟིགས་ན་འདིར་གནོན།]

སྟོང་བཞི་བརྒྱ་དང་བཅས་པ་ཤར་ཕྱོགས་སུ་སོང་ནས། གོ་བི་ཙནྡྲའི་སྒོ་དྲུང་དུ་ཁྲོས་ནས་བཞུགས་སོ། །དེར་རོལ་མོ་རྣམས་ལ་ཡང་སྒྲ་མ་བྱུང༌། རྟ་དང་གླང་པོ་ཆེ་ཡང་རྩྭ་ཤིང་མི་ཟ། བུ་ཆུང་རྣམས་ཀྱང་འོ་མ་མི་འཐུང་ངོ༌། །དེ་སློབ་དཔོན་གྱི་མཐུ་ཡིན་པར་ཤེས་ནས། རྒྱལ་པོ་བཅོམ་ཆུང་དུས་ཕྱིར་ཕྱུང་ནས། སློབ་དཔོན་འཁོར་དང་བཅས་པ་ནང་བར་ཟས་ལ་འབྱོན་པར་ཞུ་ཞུས་པས། སློབ་དཔོན་ན་རེ། ང་ལ་འཁོར་སྟོང་དང་བཞི་བརྒྱ་ཡོད་པས་ཚིམས་པར་བྱ་མི་ནུས་གསུང༌། རྒྱལ་པོ་ན་རེ། ངས་དམག་མི་འབུམ་ཕྲག་དུ་མ་ལ་རྟག་ཏུ་འཚོ་བ་སྦྱོར་ནུས་ན། སློབ་དཔོན་འཁོར་བཅས་ལ་ཅིའི་ཕྱིར་མི་ནུས། སློབ་དཔོན་ན་རེ། འོ་ན་ངའི་སློབ་མ་མ་ཧི་ལ་དང༌། བྷ་ད་ལ་གཉིས་སྔོན་ལ་གཏོང་གི་ཚིམས་པར་གྱིས་ཤིགདེ་ཚིམས་ན་ཕྱིས་ཁོ་བོ་ཅག་ཀྱང་འོང་ངོ་ཞེས་གསུངས་པས། རྒྱལ་པོས་ཀྱང༌། འབྲས་ཁལ་ལྔ་བརྒྱ་ཙམ་བྱན་དང་བཅས་པར་སྦྱར་རོ། །དེར་མ་ཧི་ལ་དང༌། བྷ་ད་ལ་གཉིས་བྱོན། ཟས་དེ་དག་ཐམས་ཅད་ཁོང་གཉིས་ཀྱི་ཀུ་བར་བླུག་ཀྱང་མ་ཁེངས་པས། རྒྱལ་པོ་ངོ་མཚར་སྐྱེས་ཏེ། སློབ་དཔོན་གྱི་དྲུང་དུ་སོང་ནས། འཆི་བ་མེད་པའི་ལམ་འཚལ་ལོ་ཞུས་པས། དེར་སློབ་དཔོན་གྱིས་གླང་པོ་ཆེ་བཅུ་གཉིས་ཀྱི་རྒྱབ་ཁལ་ནོན་པའི་དཀྱིལ་འཁོར་གྱི་ཡོ་བྱད་བླངས་ཏེ། རྒྱལ་པོ་ལ་དབང་བསྐུར་བའི་ཐ་མར། སྔར་ཧ་ཌི་པས་བསྟན་པའི་གདམས་ངག་དེ་ཉིད་བསྟན་པས། རྒྱལ་པོས་འདི་ནི་བདག་གིས་སྔར་ཡང་ཐོས་ཞེས་སྔར་གྱི་ལོ་རྒྱུས་བཤད་དོ། །དེར་སློབ་དཔོན་ན་རེ། འོ་ན་ཁྱོད་ལ་འཆི་བ་མེད་པའི་གྲུབ་ཐོབ་ག་ལ་འོང༌། དེ་ནི་ངའི་བླ་མ་ཛ་ལནྡྷ་རི་བ་ཡིན་ནོ་


TNT17_Page_0065
[མ་དཔེ་གཟིགས་ན་འདིར་གནོན།]

གསུང༌། དེར་རྒྱལ་པོ་གྲུབ་ཐོབ་ཀྱིས་དམོད་པ་འོང་ཟེར་ཤིན་ཏུ་འཇིགས་པས། སློབ་དཔོན་གྱིས་ཐབས་བྱའོ་གསུང༌། རིན་པོ་ཆེ་སྣ་བརྒྱད་བསྲེས་པའི་འཇོན་དམར་ལ། རྒྱལ་པོའི་གཟུགས་བརྙན་གསུམ་བྱས་སོ། །དེར་ནག་པོ་སྤྱོད་པའི་སློབ་མ་རྣམས་ཀྱིས། ས་སོགས་ཉལ་ཉིལ་ཐམས་ཅད་བསལ། རྒྱལ་པོའི་གཟུགས་དོང་གི་ཁར་ཁྱེར་ནས། གྲུབ་ཐོབ་ཧ་ཌི་པའི་ཞབས་ལ་ཕྱག་འཚལ་དུ་བཅུག་པས། བླ་མའི་ཞལ་ནས་འདི་སུ་ཡིན་གསུང༌། རྒྱལ་པོ་གོ་བི་ཙནྡྲ་ཡིན་ཞུས་པས། ཕི་ཊུ་མ་རོ་ཐལ་བར་གྱུར་ཅིག་གསུངས་པས། གཟུགས་དེ་ཐལ་བར་སོང༌། ཡང་གཟུགས་གཉིས་པ་ཕྱག་འཚལ་དུ་བཅུག་པས་ཀྱང༌། སྔ་མ་ལྟར་སོང་ངོ༌། །དེ་བཞིན་དུ་གསུམ་པ་ཡང་སོང་ངོ༌། །དེར་རྒྱལ་པོ་འཇིགས་ཏེ་འཁོར་དང་བཅས་པ་སྙིང་འགས་པ་ཙམ་དུ་གྱུར་སྐད། སླར་སློབ་དཔོན་གྱིས་རྒྱལ་པོ་ཁྲིད་དེ། བཟོད་པ་གསོལ་དུ་བཅུག་གོ དེར་གྲུབ་ཐོབ་ཛ་ལནྡྷ་རི་པའི་གསུང་གིས། བུ་ཀ་ཧྣི་པ་ཁྱོད་ལ་སློབ་མ་དུ་ཡོད་གསུང༌། སྟོང་དང་བཞི་བརྒྱ་ཡོད་ཞུས་པས། འོ་ན་ང་ལ་ཚ་བོ་མང་དུ་ཡོད་པ་འདུགང་ལོ་བཅུ་གཉིས་སུ་མ་ཟོས་མ་འཐུངས་བཀྲེས་ཤིང་སྐོམ་པས་ན་ནང་པར་གཉིས་ཁྲུས་ཀྱི་ལ་ཤོག་ཟ་བ་ཡིན་གསུང༌། ནང་པར་སློབ་མ་གསར་པ་བདུན་ཅུ་ཙམ་ཁྲུས་བྱེད་དུ་བཅུག་པ་ལས། གཞན་རྣམས་ཁྲུས་ཐོན་པ་ན་བྲོས། དྷ་མ་པ་དང་དྷུ་མ་པ་གཉིས་འདུག་པ་ལས། དེ་གཉིས་ཛ་ལནྡྷ་རི་པའི་དྲུང་དུ་ཁྲིད་དེ་མདུན་དུ་སྡོད་དུ་བཅུག་ནས། ཆུ་གྲིས་ཡན་ལག་གི་ཤ་རྣམས་གཅོད་པར་བཟས་ཏེ། བླ་མ་གང་ནས་གསོལ་ཞུས་པས། གྲུབ་ཐོབ་ཛ་ལནྡྷ་རི་པ་རྒྱ་ཆེར་


TNT17_Page_0066
[མ་དཔེ་གཟིགས་ན་འདིར་གནོན།]

བཞད་དེ། ཧ་ཧ་ང་སྡོམ་བརྩོན་མི་ཤ་ཅི་ལ་ཟ། མིག་འཕྲུལ་མཁན་འདྲ་བ་ཀུན་བཞུད་ཅིག་གསུང༌། དེར་ཕྱག་གཉིས་དྷ་མ་དྷུ་མའི་མགོ་བོར་བཞག་པས། དེ་གཉིས་ཀྱིས་ཀྱང་མཆོག་གི་དངོས་གྲུབ་ཐོབ་བོ། །དེ་ནས་རྒྱལ་པོས་སློབ་དཔོན་དཔོན་སློབ་གཉིས་ཡུན་རིང་དུ་བསྟེན་ཅིང༌། རང་གི་སེམས་རྒྱུད་ཀྱི་དྲི་མ་ཡང་རིམ་གྱིས་བྱང༌། ཟླ་བ་དྲུག་ཏུ་ཚོགས་ཀྱི་འཁོར་ལོ་བསྐོར་བའི་མཐར། གྲུབ་ཐོབ་ཛ་ལནྡྷ་རི་པས། རྒྱལ་པོ་ལ་དོ་ཧ་རྡོ་རྗེའི་གླུས་གདམས་པས། རྒྱལ་པོ་འཁོར་སྟོང་དང་བཅས་པ་སེམས་རྣལ་དུ་གནས་པ་མཚོན་ནས། ཐམས་ཅད་ཀྱང་སྲིད་བོར་ཏེ་ཀུན་སྤངས་ཀྱི་སྤྱོད་པས་རྒྱུ་ཞིང་རྣལ་འབྱོར་པ་ཆེན་པོར་གྱུར་ཏོ། །དེ་ལ་རྒྱལ་པོ་བྷ་རྟ་ཧ་རི་ནི་རྒྱལ་པོ་གོ་བི་ཙནྡྲའི་ཞང་པོ་ཡིན་ནོ། །དེ་ནས་རེ་ཞིག་ན་ཛ་ལནྡྷ་རིའི་ཕུག་པ་ཞིག་ཏུ་སློབ་མ་རྣམས་ལ་ཞལ་མི་སྟོན་པར་བཞུགས། ལན་ཅིག་གི་ཚེ། སློབ་མ་བླུན་པོ་མང་པོ་ཕུག་དེར་འཚངས་ནས་འོངས་པ་ལ། སློབ་དཔོན་ཧཱུཾ་ཞེས་གསུང་བཞིན་ཕུག་གི་སྟེང་ཕུག་སྟེ་མི་སྣང་བར་བཞུད། ནམ་མཁའ་ནས་སླར་ཡང་མིའི་ཡུལ་དུ་ལན་དྲུག་འབྱུང་ངོ་ཞེས་པའི་སྒྲ་བྱུང་ངོ༌། །ཕུག་དེ་ད་ལྟ་ཡང་བྱིན་རླབས་ཆེ་གསུང༌། ཡང་དུས་ཕྱིས་ཤིག ལྷོ་ཕྱོགས་རསྨི་ཤྭ་ར་དང་ཉེ་བའི་ནགས་ཚལ་ཞིག་ཏུ། མ་མོའི་རྟེན་རང་བྱུང་ཞིག་བྱུང་བ། དེར་མཁའ་འགྲོ་མ་དང་ཤ་ཟ་མང་པོ་འདུས་ཏེ། ཕྱོགས་དེའི་ལམ་ལ་འགྲོ་བའི་སྐྱེ་བོ་ཐམས་ཅད་ཀྱི་བླ་ཚེ་རྐུ་བར་བྱེད་པ་ལ། ལན་ཅིག་གི་ཚེ། ཚོང་པ་ལྔ་བརྒྱ་རྣལ་འབྱོར་པ་གཅིག་དང་བཅས་པ་ཕྱོགས་དེར་སོང་བ་ན། བུད་མེད་དང་བྲམ་ཟེ་འགའ་ཞིག་བྱུང་ནས་ཁྱེད་རྣམས་དོ་ནུབ་གཞན་དུ་མི་སླེབ་ཀྱ། ནགས་ཚལ་འདིར་འདུག་ན་རྩྭ་དང་ཤིང་འཛོམ་ལ། གཅན་


TNT17_Page_0067
[མ་དཔེ་གཟིགས་ན་འདིར་གནོན།]

གཟན་དང་སྦྲུལ་གྱི་གནོད་པ་ཡང་མེད། དེ་བས་ན་འདི་དང་འདིར་འདུག་ཅེས་མི་རེ་ཤིང་རེའི་རྩར་བཞག་གོ །དེ་རྣམས་དེ་ན་ཡོད་པའི་ཚེ། ཡང་བུད་མེད་གཞན་གཉིས་བྱུང་ནས། ཁྱེད་རྣམས་འདིར་སྡོད་ཅེས་སྟོན་པ་དེ་མི་ཤེས་སམ། མི་ཤེས་བྱས་པས། དེ་དག་ནི་མཁའ་འགྲོ་མ་དང་སྲིན་པོ་ཡིན་ཏེ། དེས་ཁྱེད་རྣམས་བཅིངས་སོ། །དེ་བས་ན་དོ་ནུབ་ཟ་བར་འགྱུར་བས། དེའི་ཐབས་སོམས་ཤིག་ཅེས་དེ་ཉིད་དུ་མི་སྣང་བར་སོང་ངོ༌། །དེར་རྣལ་འབྱོར་པ་གཅིག་པོ་དེ་ཛ་ལནྡྷ་རི་པའི་སློབ་བརྒྱུད་ཡིན་པས། དེས་སློབ་དཔོན་ཛ་ལནྡྷ་རི་པ་ལ་སྐད་ཕྱུང་ཞིང་གསོལ་བ་བཏབ་པས། ནམ་ཞིག་ན་ཕྱོགས་དེར་འགྲོན་བཙུན་ཤིག་བྱུང་ངོ༌། །དེ་ཡང་དེར་འདུག་པ་ལ། ཁོང་རྣམས་ཀྱིས་སྔར་གྱི་ལོ་རྒྱུས་བཤད་པས། རེ་ཞིག་འགྲོན་བཙུན་དེ་ཅང་མི་སྨྲའོ། །ནམ་སྲོད་པ་ན་ཤ་ཟའི་མཁའ་འགྲོ་མ་དང་སྲིན་པོ་རྣམས་མངོན་དུ་བྱུང་བས། རེ་རེས་མི་རེ་བཅིངས་ནས་ཁྲིད་ནས་མ་མོའི་གནས་སུ་བཞག་སྟེ་ཟ་བར་བརྩམས་པ་ན། འགྲོན་བཙུན་དེས་ཕཱ་ཊ་ཞེས་ཟེར་ཞིང་གར་བྱས་པས། མཁའ་འགྲོ་མ་དང་སྲིན་པོ་རྣམས་བརྒྱལ་ཞིང་འགྱེལ། མ་མོའི་རྟེན་ཡང་དུམ་བུ་གསུམ་དུ་གྱེས་ཏེ། དེར་སློབ་དཔོན་གྱིས་ཕྱིན་ཆད་སེམས་ཅན་ལ་གནོད་པ་མི་བྱེད་པར་བཀའ་བསྒོས། འགྲོན་བཙུན་དེ་ནི་གྲུབ་ཐོབ་ཛ་ལནྡྷ་རི་པར་སྣང་སྟེ། ཚོང་པ་ལྔ་བརྒྱ་པོ་དེ་ཐམས་ཅད་ཀྱང་རྣལ་འབྱོར་པ་བྱས་ཏེ་བསྒོམས་པས། མཐར་ལྔ་བརྒྱ་པོ་ཐམས་ཅད་དངོས་གྲུབ་ཐོབ་པ་ཡིན་ཟེར་སྐད། དེར་སློབ་དཔོན་གྱིས་ལོ་གསུམ་ཙམ་དུ་ལྷོ་ཕྱོགས་ཀྱི་ཡུལ་དུ་འགྲོ་བའི་དོན་མཛད་པར་གྲགས། དུས་དེར་


TNT17_Page_0068
[མ་དཔེ་གཟིགས་ན་འདིར་གནོན།]

གསུངས་པའི་གདམས་ངག་ཀྱང་མང་དུ་ཡོད་པར་སྣང་ངོ༌། །ཡང་དུས་ཕྱིས་ཤིག་ནུབ་ཕྱོགས་མ་རུའི་ཡུལ་དུ་སློབ་དཔོན་ཛྙཱ་ན་གུ་པ་ཏ་ཞེས་བྱ་བ། འཁོར་མང་པོ་ལ་ཆོས་གསུང་ཞིང་ཡོད་པའི་སྐབས་ཤིག དེར་རྣལ་འབྱོར་པ་ངོ་མཚར་ཅན་ཞིག་བྱུང་ནས། སུ་ཡིན་དྲིས་པས། ཛ་ལནྡྷ་རི་པ་ཡིན་གསུང༌། ཡིད་ཀྱིས་དྲི་བ་མང་པོ་བྱས་པས། དེ་ཐམས་ཅད་ཀྱི་ལན་ཤར་ཤར་བཏབ་བྱུང་བས། ཡིད་ཆེས་ནས་རྗེས་སུ་གཟུང་བར་ཞུས་པས། ཐོད་པ་རྣམ་སྣང་གིས་གང་བ་ཞིག་གནང་བ། སློབ་དཔོན་ཛྙཱ་ན་གུ་པ་ཏས་རྣམ་རྟོག་མེད་པར་གསོལ་བས། དེ་ཉིད་དུ་མི་སྣང་བར་ཡལ། དེར་དགེ་འདུན་རྣམས་ཀྱིས་ཡང་དང་ཡང་དུ་གསོལ་བ་བཏབ་པས། ཟླ་བ་གསུམ་ཙམ་དུ་དེ་ཉིད་དུ་བཞུགས་ཏེ། དེ་རྣམས་ལ་རྗེས་སུ་གདམས་པ་བསྟན། དེ་ནས་རབ་ཏུ་བྱུང་བ་དང་དགེ་བསྙེན་ཕོ་མོ་ཡན་ཆད་ཡོ་བསྡོམས་པས་སྟོང་ཙམ་ཡོད་པ་ལས། ཐམས་ཅད་རྡོ་རྗེ་ཐེག་པའི་སྣོད་དུ་གྱུར་པ་ཡིན་པས། དེ་རྣམས་ལ་ཁྱོད་རྣམས་ལོ་གསུམ་དུ་གསང་སྟེ་ཉམས་སུ་ལོང༌། ལོ་གསུམ་ནས་ཐམས་ཅད་ཀྱང་སྔགས་ཀྱི་སྤྱོད་པ་སྤྱོད་བཞིན་འཚོ་བ་ཅི་བདེ་བར་སོང་ཞིག ཐམས་ཅད་ཀྱང་དངོས་གྲུབ་ཐོབ་པར་འགྱུར་རོ། །ཞེས་གསུངས་ཏེ་མི་སྣང་བར་གྱུར་ཏོ། །དེར་ཤར་ཕྱོགས་ནས་རྣལ་འབྱོར་པ་དྲུག་གིས་སློབ་དཔོན་ཛ་ལནྡྷ་རི་པ་དངོས་སུ་བཞུགས་ནས་ཆོས་སྟོན་ཞེས་ཐོས་པས། གཙུག་ལག་ཁང་དེར་འོངས་པའི་ཚེ། སློབ་དཔོན་གཤེགས་ནས་མི་འདུག ཡང་དེར་ས་ཐེ་བཙུགས་ཏེ་གསོལ་བ་བཏབ་པས། ཟླ་བ་དྲུག་ནས་དངོས་སུ་ཞལ་བསྟན་ནས་གདམས་པ་དང་རྗེས་སུ་གདམས་པ་སྩལ་ཏེ། ཞག་བདུན་སོང་བ་ན་ཉན་ཐོས་སེནྡྷ་པ་ཞིག་


TNT17_Page_0069
[མ་དཔེ་གཟིགས་ན་འདིར་གནོན།]

དེར་འོངས། གང་ཞིག་རྟོག་གེ་ལ་དགའ་བ། །གང་དག་དགེ་སློང་དངོས་གནས་དང༌། །མི་གང་རྒན་པོར་གྱུར་པ་སྟེ། །དེ་ལ་དེ་ཉིད་བསྟན་མི་བྱ། །ཞེས་གསུངས་ནས་མི་སྣང་བར་གྱུར་སྐད། གཙུག་ལག་ཁང་དེར་ཉན་ཐོས་སེནྡྷ་པ་མང་དུ་འོངས་ཤིང་གནས་པ་ལ། སྔར་གྱི་དགེ་འདུན་རྣམས་ལོ་གསུམ་འདས་པའི་རྗེས་སུ། སྔགས་ཀྱི་སྤྱོད་པས་ཕྱོགས་གཞན་དུ་རྒྱུ་ཞིང་སོང་བ་ན། ཉན་ཐོས་རྣམས་ཀྱིས་ཡོངས་སུ་སྨོད་པར་བྱེད་དོ། །འོན་ཀྱང་རིང་པོ་མི་ཐོགས་པར་ཐམས་ཅད་ཀྱིས་དངོས་གྲུབ་སྣ་རེ་ཐོབ་པས། གྲགས་པ་མ་ཡིན་པ་སངས་སྐད། རྣལ་འབྱོར་པ་དྲུག་པོ་དེས་འཆི་བ་མེད་པའི་དངོས་གྲུབ་ཐོབ། རྒན་ཤོས་ནི་བི་བྷཱུ་ཏི་དཱ་ས་ཡིན་གསུང༌། འདིས་བོད་ལ་ཡང་བྱོན་ཏེ། བུ་སྟོན་རིན་པོ་ཆེས་ཀྱང་ཆོས་ཞུས་སོ། །ད་དུང་སློབ་དཔོན་མིའི་འཇིག་རྟེན་དུ་ལན་བཞི་འབྱོན་པར་གྲགས། སློབ་དཔོན་འདིའི་སློབ་མ་གྲུབ་པ་བརྙེས་པ་ན། ཉི་ཟླ་ལྟར་ཡོངས་སུ་གྲགས་པ་དང་པོར་བྱུང་བ་ནག་པོ་སྤྱོད་པ་དང༌། ཕྱིས་བྱོན་པ་སངས་རྒྱས་ཡེ་ཤེས་ཞབས་གཉིས་ཡིན། གཞན་ཡང་གྲུབ་ཆེན་ཏནྟི་པ། བི་རཱུ་པ་ཆུང་བ། རྒྱལ་པོ་བྷར་ཐཱ་ར། གོ་བི་ཙནྡྲ་སོགས་ཡོངས་སུ་གྲགས་པ་མཐའ་ཡས་པ་ཞིག་ཡོད་དོ། །སྐབས་འདིར་སློབ་དཔོན་དེ་ཉིད་ཀྱི་སློབ་མའི་མཆོག དུས་འཁོར་རྒྱུད་ཕྱི་མར། ཁ་ཊྭཱཾ་ག་དང་རུས་པའི་རྒྱན་ཆ་ཆང་སྣོད་ཅང་ཏེ་ཐོགས་པ་ནག་པོའི་མིང་ཅན་ནོ། །ཞེས་པ་ལུང་བསྟན་པ། ནག་པོ་སྤྱོད་པ་པའི་ལོ་རྒྱུས་ན། སྔོན་གྱི་བོད་རྣམས་ཡུལ་ཀརྞར་འཁྲུངས་པ་ཡིན་ཞེས་གསུང་པ་དང༌། ད་ལྟ་ཡང་རྒྱ་གར་བའི་རྣལ་འབྱོར་པ་རྣམས་ཀྱི་ཁ་སྐད་ལ། བཱི་དྱ་


TNT17_Page_0070
[མ་དཔེ་གཟིགས་ན་འདིར་གནོན།]

ན་ག་རར་འཁྲུངས་ཞེས་ཟེར་ཏེ། དེ་ཡང་བཱི་དྱ་ན་ག་ར་དང༌། ཀརྞ་ནི་འཁྲིས་ནས་འཁྲིས་ཀྱི་ཡུལ་ཡིན་པས། སྔ་རབས་ཀྱི་གཏམ་དེ་དེ་ཡང་རྒྱ་གར་བའི་ཁ་སྐད་ཙམ་ཡིན་ནོ། །གསུང་ལས་རིགས་བྲམ་ཟེ་ཡིན་གསུང་ཞིང༌། རྒྱ་གར་ལ་ཁ་སྐད་ཀྱང་དེ་བཞིན་དུ་གྲགས། བོད་སྔ་མ་རྣམས་རྗེ་རིགས་ཡིན་ཟེར་ཡང༌། སློབ་དཔོན་ཉིད་ཀྱི་དོ་ཧ་ལས། རེག་གིན་རེག་གིན་འགྲོ་སྟེ་བྲམ་ཟེའི་བུ། །ཞེས་བྲམ་ཟེའི་རིགས་སུ་གསལ་དེ་ནང་དོན་ལ་སྦྱོར་ཡང་ཕྱི་དང་མཐུན་པའི་བརྡ་མཛད་པ་ཡིན་པས་སོ། སངས་རྒྱས་ཉིད་ཀྱིས་ལུང་བསྟན་པ་ཡང་ཡུལ་ཨུ་རུ་བི་ཤ་ཡིན་ལ། ཁོ་བོའི་བླ་མ་གསུང་པ་ཡང་ཡུལ་ཨུ་རུ་བི་ཤ་དེ་ནི་བྷང་ག་ལ་དང་ཉེ་བར་ཡོད་གསུང༌། ལུང་བསྟན་ནི་ནག་པོ་ཆེན་པོའི་རྒྱུད། མགོན་པོ་མངོན་འབྱུང་རྩོལ་བྲལ་རྭ་ཆོས་རབ་ཀྱིས་བསྒྱུར་བ་ལས། དེ་ལྟར་ཡུལ་ཨུ་རུ་བི་སར་ཡང་མཚུངས་པར་ངེས་པའོ། །དེར་སྐྱེས་བུ་བརྩོན་འགྲུས་ཆེན་པོའི་སྦྱོར་བ་དང་ལྡན་པ། རཱ་མ་ཎའི་བཀའ་དང་མཚུངས་པ། སྡེ་ཚན་དང་པོའི་དང་པོ་ལ་དབྱངས་ཡིག་དང་པོས་བརྒྱན་པ། སྡེ་ཚན་བདུན་པའི་བཞི་པ། ཅུང་ཟད་ན་ལ་ཞོན་པའི་མིང་ཅན་རྣལ་འབྱོར་དབང་པོ་གཅིག་པུ་འདིས་དངོས་གྲུབ་བརྒྱད་ཐོབ་པར་འགྱུར་རོ། །ཛམ་བུའི་གླིང་དུ་མ་བྱུང་ཞིང་འབྱུང་བར་མི་འགྱུར་རོ། །དེའི་སློབ་མ་དྲུག་གིས་ལུས་དངོས་པོ་སྤངས་པའི་ཕྱག་རྒྱ་ཆེན་པོ་ཐོབ་པར་འགྱུར་རོ། །ཞེས་ཡུལ་དང་མཚན་དང་དངོས་གྲུབ་དང་སློབ་མ་རྣམས་ཞིབ་པོར་གསུངས་པའོ། །སློབ་དཔོན་ཆེན་པོ་འདིའི་ལོ་རྒྱུས་ནི་རྣམ་ཐར་ལོགས་སུ་འབྱུང་བ་ལས་བལྟ་བར་བྱའོ། །སློབ་དཔོན་དེ་ལ་སངས་རྒྱས་ཀྱིས་ལུང་བསྟན་


TNT17_Page_0071
[མ་དཔེ་གཟིགས་ན་འདིར་གནོན།]

པའི་སློབ་མ་དྲུག་ན། བཟང་པོའི་ཞབས། མ་ཧི་ལ། བྷ་ད་ལ། དགེ་ཚུལ་ཚིམ་བུ་པ། དྷ་མ་པ། དྷུ་མ་པ་རྣམས་སོ། ཁ་ཅིག་བྷ་ད་ལ། བྷ་དྲ་པ་བཟང་པོ་པ་དང་གཅིག་ཟེར་ནས་ལོགས་སུ་མི་བགྲོང༌། འདིར་བགྲོང་རྒྱུ་ཨེ་ཡ་ལ་པར་འདོད། རྣལ་འབྱོར་མ་ཡང་མེ་ཁ་ལ་དང༌། ཀ་ན་ཁ་ལ་དང༌། བན་དྷེ་པ་ལ་སོགས་པ་དེ་རྣམས་ན། སློབ་དཔོན་ཉིད་བཞུགས་པའི་དུས་སུ་མཆོག་གི་དངོས་གྲུབ་ཐོབ་པ་ཡིན་གསུང༌། བློན་པོ་ཀུ་ཤ་ལ་ནཱ་ཐ། རྒྱལ་པོ་ལི་ལ་ཙནྡྲ་དང༌། དཔག་མེད་རྡོ་རྗེ། རྒྱལ་བུ་ལ་བ་ཡི་ལ་སོགས་པ་རྣལ་འབྱོར་གྱི་དབང་ཕྱུག་བསམ་གྱིས་མི་ཁྱབ་པ་བྱུང༌། བྲམ་ཟེ་དཔལ་འཛིན་ལ་སོགས་པ་དུས་ཕྱིས་མཇལ་བའི་དངོས་གྲུབ་བརྙེས་པ་ཡང་བྱུང་ངོ༌། །སློབ་དཔོན་བྷ་དྲ་པས་ཨནྟར་པ་ལ་གདམས། དེས་ནག་པོ་སྤྱོད་པ་ཆུང་བ་ཞེས་ཀྱང་གྲགས་པ་ལ་གདམས། དེས་བྷུ་བ་རི་པ་ལ་གདམས། དེས་བོད་དུ་འཁྲུངས་པ་བྷུ་བ་བློ་ལྡན་ལ་གདམས། དེས་ཀུ་ས་ལི་བྷ་དྲ་ཆུང་བ་ལ་གདམས་པའི་ལུགས་ཀྱང་ཡོད། ཡང་ནག་པོ་སྤྱོད་པས་གུ་ཧྱ་པ་ཞེས་གྲགས་པ་བཟང་པོའི་ཞབས་ལ་གདམས། སློབ་དཔོན་འདིས་བླ་མ་ལ་བར་ཆད་བྱེད་པའི་མཁའ་འགྲོ་མ་བཱ་ཧུ་རཱི་ཞེས་པ་དེ་ཞིང་ཐམས་ཅད་དུ་མངོན་ཤེས་ཀྱིས་བཙལ་ཡང་རེ་ཞིག་མ་རྙེད། ཕྱི་ཤིག་ན་དེ་ཝཱི་ཀོ་ཊ་ཉིད་ན་ཤིང་ཤིམ་པི་ལའི་སྡོང་པོ་ཞིག་གི་ཁོག་ནང་ན། རྡུལ་གཅིག་ཏུ་བརྫུས་ནས་འདུག་པ་མཁྱེན་ནས། དེའི་ཅོ་ཏོ་ནས་བཟུང༌། ཤིང་སྡོང་གི་ནང་ནས་ཕྱིར་ཕྱུང་སྟེ་གྲུབ་པའི་རལ་གྲིས་བསྣུན་ནས་ཚར་བཅད་དོ། །དེས་སློབ་དཔོན་ཏིལླི་པ་ལ་


TNT17_Page_0072
[མ་དཔེ་གཟིགས་ན་འདིར་གནོན།]

བཤད་གསུང༌། བོད་ན་སྔར་གྲགས་པ་ལ་གུ་ཧྱ་པས་ཨནྟ་རྦ་ལ་གདམས། དེས་ཏིལླི་པ་ལ་གདམས་པར་འདོད། སྐབས་འདིར་མི་གསུང་ཡང༌། སྤྱིར་གྱི་དུས་བསྒྲིགས་པ་དང་བརྒྱུད་པའི་བབས་ལ་དེ་ངོས་འཐད་པར་སྣང་ངོ༌། །ཡང་སྤྱོད་པ་པས་དགེ་བའི་མགོན་པོ་ལ་བཤད་དེ། དེ་ནི་རེ་ཞིག་བློན་པོའི་བྱ་བ་བྱེད་ཅིང་བསྒོམས་པས། མངོན་ཤེས་ཅུང་ཟད་ཐོབ་སྟེ། རྒྱལ་པོའི་དྲུང་དུ་འདུག་པའི་ཚེ། རང་གི་ལྷ་ཁང་དུ་ཞོའི་རྫིའུ་ཞིག་བཞག་པ། བྱི་ལས་ལྡགས་པ་མངོན་ཤེས་ཀྱིས་མཐོང་ནས་དེ་སྐྲོད་པའི་བརྡའ་བྱས་པ། རྒྱལ་པོས་ཅི་ཡིན་དྲིས་པ་ན། དྲང་པོར་སྨྲས་པས། དངོས་གྲུབ་ཐོབ་པར་ཤེས་ཏེ། མཆོད་གནས་སུ་བཀུར། རིངཔོར་མི་ཐོགས་པ་རྒྱལ་པོས་ཀྱང་མངོན་ཤེས་ལྔ་གྲུབ། བློན་པོ་ནི་རྣལ་འབྱོར་གྱི་དབང་ཕྱུག་ཆེན་པོར་གྱུར་ཏོ། །དེས་ཀྱང་ཏིལླི་པ་ལ་བཤད་དོ། །སློབ་དཔོན་ཏིལླི་པ་ན། ཤར་ཕྱོགས་ཙ་ཊི་གྷ་པོ་ཞེས་བྱ་བའི་གྲོང་ཁྱེར་དུ་བྲམ་ཟེའི་རིགས་སུ་སྐྱེས་ཏེ། ཆེར་སྐྱེས་པ་ན་བྲམ་ཟེའི་ལུགས་ཀྱི་བསྟན་བཅོས་ཐམས་ཅད་ཤེས་ཤིང༌། ཡུལ་འགའ་ཞིག་ཏུ་སློང་མོ་ལ་ཕྱིན་པའི་ཚེ། མཐར་གཙུག་ལག་ཁང་ཞིག་ན། དགེ་འདུན་རྣམས་སྤོང་བས་གནས་པ་མཐོང་ནས། དེར་དད་དེ་རབ་ཏུ་བྱུང༌། སྡེ་སྣོད་གསུམ་གྱི་ཚུལ་ཡང་ཤེས། སྔར་སྨོས་པའི་སློབ་དཔོན་གཉིས་ལ་དཀྱིལ་འཁོར་དུ་དབང་བསྐུར་བ་དང༌། གདམས་པ་མཐའ་དག་མནོས་ནས་བསྒོམས་པས་རིང་པོ་མི་ཐོགས་པར་ཡེ་ཤེས་ཁྱད་པར་ཅན་སྐྱེས་ཏེ། གྲུབ་པའི་སྐྱེས་བུ་མཐའ་ཡས་པའི་ཞལ་ཡང་མཐོང༌། དེ་རྣམས་


TNT17_Page_0073
[མ་དཔེ་གཟིགས་ན་འདིར་གནོན།]

དང་གཏམ་འདྲེ་ཞིང་རྗེས་སུ་གདམས་པ་ཡང་ཐོབ། དཔལ་ཧེ་རུ་ཀ་དང་མཁའ་འགྲོ་མའི་ཚོགས་རྟག་ཏུ་ཞལ་མཐོང་བས། དེ་རྣམས་ཀྱིས་བྱིན་གྱིས་བརླབས་པའི་རྐྱེན་གྱིས་ཀྱང༌། ཡེ་ཤེས་གོང་ནས་གོང་དུ་འཕེལ་བར་གྱུར་ཏེ། ཞིང་གི་རྣལ་འབྱོར་མ་ཏིལ་བརྡུང་མཁན་གྱི་བུ་མོ་ཞིག་དང་ལྷན་ཅིག་ཏུ་སྤྱོད་པས། དགེ་འདུན་རྣམས་ཀྱིས་གནས་གཞི་ནས་བསྐྲད། གྲོང་ཁྱེར་དུ་ཏིལ་བརྡུང་གི་བྱ་བ་མཛད་པས། སྔར་བྲམ་ཟེའི་པཎྜི་ཏ་དགེ་སློང་དུ་གྱུར་པ་ཡིན་པས། རྙེད་བཀུར་ཆེན་པོ་ཡོད་པ་ཡང་ཉམས་ཏེ། ཏིལ་བརྡུང་མའི་བདག་པོར་གྱུར་པས་ཏིལླི་པ་སྟེ། ཏིལ་བརྡུང་མཁན་ཞེས་མིང་ཡང་འགྱུར་རོ། །དེ་ནས་ཞིང་སྣ་ཚོགས་སུ་སྤྱོད་ཅིང་གནས་པས། ཨོ་རྒྱན་ལ་སོགས་པའི་ཡུལ་རྣམས་སུ་མཁའ་འགྲོ་མ་རྣམས་ཀྱི་གདམས་པ་ཐམས་ཅད་ཐོབ། དེས་ན་ཏིལ་བརྡུང་བའི་བྱ་བ་མཛད་པས། ཏིལ་ལ་མར་ཁུ་འབྱུང་བ་བཞིན། བླ་མའི་མན་ངག་གིས་ལུས་ལ་གནད་དུ་བསྣུན་པས། ལྷན་ཅིག་སྐྱེས་པའི་ཡེ་ཤེས་འབྱུང་བར་མཁྱེན་པ་སོགས་བྱ་བ་ཐམས་ཅད་ཀྱིས་ཀྱང་རང་ལ་ངོ་སྤྲད་པར་སོང་སྟེ་མཆོག་གི་དངོས་གྲུབ་ཐོབ། ཕྱོགས་བཅུའི་སངས་རྒྱས་ཐམས་ཅད་ཀྱི་ཞལ་ཡང་གཅིག་ཅར་མཐོང་ངོ༌། །དེར་རང་གི་རྟོགས་པ་དེ་གཞན་ལ་སྟོན་པར་བཞེད་ནས། དུས་གཞན་ཅིག་ན། གྲོང་ཁྱེར་གྱི་ཚོང་འདུས་རྣམས་སུ་རྟོགས་པ་གླུར་བླངས་པས། སྐྱེ་བོ་ཐམས་ཅད་ཐེ་ཚོམ་དུ་གྱུར། ལན་ཅིག་བྷང་ག་ལའི་གྲོང་ཁྱེར་ཅིག་ཏུ་སྐྱེ་བོ་བརྒྱ་སྟོང་དུ་མ། སློབ་དཔོན་ལ་བལྟར་འོངས་


TNT17_Page_0074
[མ་དཔེ་གཟིགས་ན་འདིར་གནོན།]

པ་ལ། སློབ་དཔོན་རིག་མ་དང་ལྷན་ཅིག་མི་གང་ཙམ་གྱི་ནམ་མཁའ་ལ་ཏིལ་བརྡུང་བཞིན་འདུག་གོ །མི་རེས་དྲི་བ་རེ་བྱས་པ་ལ། ལན་དུ་རྟོགས་པའི་གླུ་རེ་བླངས་པས། དེར་འཚོགས་པའི་སྐྱེ་བོ་ཕལ་ཆེར་གྱིས་ཀྱང་དོན་རྟོགས་ནས་དངོས་གྲུབ་ཐོབ་པ་ཡིན་སྐད། དེར་གྲུབ་ཐོབ་ཏིལླི་པ་ཞེས་གྲགས་ཤིང༌། ཡུན་རིང་པར་འགྲོ་བའི་དོན་མཛད་ནས། སྐུ་ལུས་མ་སྤངས་པར་མཁའ་སྤྱོད་དུ་བཞུད་པ་ཡིན་ནོ། །འདིའི་སློབ་མ་ནི་རོལ་པའི་རྡོ་རྗེ་དང༌། ནཱ་རོ་པ་གཉིས་ཡིན། སྔ་མའི་གཏམ་རྒྱུད་འདིར་མི་གསུང་སྟེ། མི་ཏྲ་ཛོ་གིའི་ཆོས་སྐོར་ན་འདུག་པ་དེ་ཡིན་པར་མངོན། མར་དོ་དང༌། པུ་རངས་ལོ་ཆུང་གི་ལུགས་ཀྱི་བདེ་མཆོག་གི་ལོ་རྒྱུས་དང༌། དཔྱལ་པའི་དགེས་རྡོར་ལོ་རྒྱུས་ན། གཽ་ཏ་མ་ཤི་ཥྱ་ཡང་སློབ་མ་མཆོག་ཏུ་བཤད་དོ། །ནཱ་རོ་པ་ནི་ཁ་ཆེའི་ཡུལ་དུ་བྲམ་ཟེའི་རིགས་སུ་འཁྲུངས། ཆུང་ངུ་ནས་མུ་སྟེགས་ཀྱི་པཎྜི་ཏར་གྱུར་པ་ལ། དེར་མུ་སྟེགས་པའི་གསང་སྔགས་པ་བྱས་ནས། བྲམ་རིགས་ཀྱི་སྤྱོད་པ་བོར། ཨ་བ་དྷུ་ཏི་བྱས་སོ། ལན་ཅིག་ཆང་འཚོང་མ་ཞིག་གི་ནང་དུ་ཕྱིན་པས། དེ་ན་སངས་རྒྱས་པའི་བཎ་ཆུང་ཞིག་ཡོད་པ། ནཱ་རོ་པའི་ཟིལ་མ་བཟོད་པར་བྲོས་སོང་བ། དེའི་ཤུལ་དུ་མདོའི་དཔེ་ཞིག་ལུས་འདུག་པ་གཟིགས་པས། ཆོས་ལ་ཤིན་ཏུ་མོས་ཏེ། ཡུལ་དབུས་སུ་སོང་ནས། སངས་རྒྱས་ཀྱི་བསྟན་པ་ལ་རབ་ཏུ་བྱུང་སྟེ། པཎྜི་ཏ་ཆེས་ཆེན་པོར་གྱུར་པ་ན། ནཱ་ལེནྡྲ་དང༌། བི་ཀྲ་མ་ཤཱི་ལའི་བྱང་སྒོ་བསྲུང་བ་མཛད། དེར་མུ་སྟེགས་རྣམས་ཚར་བཅད་ཀྱིན་ཉན་བཤད་རྒྱ་ཆེར་མཛད་པ་ལས། རང་སེམས་བ་འཇོ་བའི་


TNT17_Page_0075
[མ་དཔེ་གཟིགས་ན་འདིར་གནོན།]

ཡུན་ཙམ་ཡང་མི་གནས་པར་འདུག་ནས། མཚན་རེ་བཞིན་འཁོར་ལོ་བདེ་མཆོག་རྟག་ཏུ་བསྒོམས་པས། མཁའ་འགྲོ་མ་མང་པོས་ཞལ་བསྟན་ཏེ། ཤར་ཕྱོགས་ན་སློབ་དཔོན་ཏིལླི་པ་ཞེས་བྱ་བ་ཡོད་པས་དེའི་དྲུང་དུ་སོངས་ཤིགདངོས་གྲུབ་ཐོབ་པར་འགྱུར་རོ་ཞེས་བསྐུལ། ཤར་ཕྱོགས་སུ་སོང་ནས་ཕྱོགས་ཐམས་ཅད་དུ་ཏིལླི་པ་བཙལ་བས་མ་རྙེད། ལན་ཅིག་གཙུག་ལག་ཁང་ཞིག་ན་དགེ་འདུན་རྣམས་ཟས་ལ་འདུས་ཏེ་སྒོ་ནང་ནས་བསྡམས། ནཱ་རོ་པ་རུང་ཁང་ན་ཡོད་ཙ་ན། མི་སྔོན་པོ་བཙོག་བཙོག་འདྲ་བ་ཞིག་བྱུང་ནས། ཉ་གསོན་པོ་མང་པོ་མེ་མདག་ལ་བསྲེག་གིན་འདུག་ནས། དེར་ནཱ་རོ་པས་བཟློག་མ་ཐུབ། དེ་རྗེས་དགེ་འདུན་རྣམས་བྱུང་ནས་གཤེ་བ་ལ། དེ་ན་རེ། ཁྱེད་རྣམས་མི་དགའ་ན་སླར་ཡང་ཆུ་ལ་བཏང་བས་ཆོག་གསུང་སྟེ། ཉ་མེས་ཚོས་པ་རྣམས་ཆུ་ལ་ཕོ་བས་འཕྱོང་ཞིང་སོང་སྐད། ནཱ་རོ་པས་དེ་གྲུབ་ཐོབ་ཡིན་པར་ཤེས་ནས། ཕྱི་བཞིན་སོང་སྟེ་ཞབས་ལ་ཕྱག་བྱས་གསོལ་བ་བཏབ་པས། ཁྲོ་ཞིང་བརྡེག་པ་ལས། ཚིག་རྣལ་མ་ཙམ་ཡང་མི་གསུང༌། ཏིལླི་པ་ཡིན་ནམ་སྙམ་པའི་ཚེ་ཡིན་ཡིན་གསུང༌། མིན་ནམ་སྙམ་པའི་ཚེ་མིན་མིན་གསུང༌། དེར་གཞན་སེམས་མཁྱེན་པ་དང༌། ཏིལླི་པ་ཡིན་པར་ཤེས། ཡང་རེས་འགའ་རྣལ་འབྱོར་པའི་སྤྱོད་པ་ལྟར་སྟོན། རེས་འགའ་སྨྱོན་པར་བརྫུ་ཡིན་སྣང༌། དེར་ཡང་ནཱ་རོ་པ་ལ་རྣམ་རྟོག་མ་སྐྱེས། ལན་ཅིག་གྲོང་ཁྱེར་ན་བག་མ་ལེན་པའི་ས་ཤིག་ནས་ཚོད་མ་མང་པོ་བླངས་ཏེ། སློབ་དཔོན་ལ་དྲངས་པ་ན། སློབ་དཔོན་དེ་ལ་ཞེན་ཞེན་ལྟར་མཛད་ཅིང་འདུག་པས།


TNT17_Page_0076
[མ་དཔེ་གཟིགས་ན་འདིར་གནོན།]

བླ་མ་འདི་ལ་མཉེས་སོ་སྙམ་སྟེ། སླར་ཡང་སྔར་གྱི་སར་སོང༌། དེ་ཡང་རྒྱ་གར་ན་ཉི་མ་གཅིག་ལ་མགྲོན་དུ་ལན་གཉིས་སྐྲུ་བའི་སྲོལ་མེད་པས། ཚོད་མའི་སྣོད་བརྐུས་ཏེ་ཁྱེར་འོངས་པ། མི་རྣམས་ཀྱིས་དེད་པས། དབྱུགས་པ་དང་རྡོ་མང་པོ་ལུས་ལ་ཕོག་ཀྱང༌། སྣོད་མ་ཤོར་བར་ཚོད་མ་རྣམས་བླ་མ་ལ་དྲངས། ཡང་ལན་ཅིགསྲིན་བུ་ཛ་ལུ་ཀ་སྟེ་པད་པ་མང་པོ་ཡོད་པའི་ཆུ་ཁ་ཞེང་ཆུང་ངུ་ཞིག་གི་འགྲམ་ན། བླ་མ་ཕར་ཙམ་ཚུར་ཙམ་མཛད། དེར་ནཱ་རོ་པས། བདག་ཆུའི་དབུས་སུ་ཞུགས་ནས་ཟམ་པ་བགྱིའམ་ཞུས་པས། རུང་གསུང༌། དེ་ལྟར་བྱས་པས། ནཱ་རོ་པའི་མགོ་བོར་ཞབས་བཞག་ནས་མཆོངས་ཏེ་ཕར་བྱོན། ང་མྱུར་དུ་ལྡོག་འོང་བས་དེ་ཁར་སྡོད་ཅིག་གསུང༌། བླ་མ་ཡུན་རིང་རབ་མ་བྱུང༌། ཚུར་ལམ་ཡང་བླ་མས་སྔ་མ་བཞིན་བྱོན། དེར་སྲིན་བུ་པད་པས་ལུས་ཀྱི་ཁྲག་ཐམས་ཅད་འཇིབས་ཏེ་འཆི་བ་ལ་ཐུག་པར་སོང༌། ཡང་རིམ་གྱིས་གསོས་ནས། བླ་མའི་ཕྱི་བཞིན་སོང་བ་ན། ལམ་དུ་རྒྱལ་པོའི་བུ་མོ་མདོ་ལི་ལ་བཏེགས་ནས་བྱུང་བ་དང་འཛོམ་པས། ཏིལླི་པ་ན་རེ། རྒྱལ་པོའི་བུ་མོ་འདི་ཕྲོགས་ཤིག་གསུང༌། ན་རོ་པས་བྲམ་ཟེར་བརྫུས་ཏེ། ཤིས་པ་བརྗོད་པ་ལྟར་བྱས་ནས། བུ་མོའི་མགོ་བོར་མེ་ཏོག་བཞག་སྟེ། སྟོབས་ཀྱིས་ཁྲིད་ནས་བྲོས་པས། གཡོག་རྣམས་ཀྱིས་ནཱ་རོ་པ་བརྡུངས་ཏེ་ལྡང་མི་ཐུབ་པར་ས་ལ་རོ་བཞིན་སོང༌། དེ་སློབ་དཔོན་གྱི་ཐབས་ཀྱིས་གསོས་ནས། ཡང་ལམ་དུ་སོང་བ་ལས། བློན་པོའི་ཆུང་མ་འགྲོ་བ་དང༌། བག་མ་ཞིག་འགྲོ་ཡིན་འདུག་པ་ལ་ཡང་སྔ་མ་ལྟར་གསུང་ནས། གསོས་


TNT17_Page_0077
[མ་དཔེ་གཟིགས་ན་འདིར་གནོན།]

པའི་བར་གོང་བཞིན། དེར་བླ་མ་བུད་མེད་བཞེད་པར་འདུག་སྙམ་སྟེ། རིགས་མཐོ་བའི་བུ་མོ་ཞིག་ཕ་མ་ལ་རིན་སྦྱིན་ཏེ་ནཱ་རོ་པ་རང་གིས་བླངས་ནས། ནང་པར་བླ་མ་ལ་འབུལ་སྙམ་སྟེ། དེ་ནུབ་རང་གིས་བསྟེན་པས། ནང་པར་བླ་མས་ནཱ་རོ་པའི་རྟགས་རྡོའི་བར་དུ་བཅེར། དེར་ཉིན་ཞག་མང་པོར་ཤིན་ཏུ་ན་པར་གྱུར་པ་ན། བླ་མས་སྔགས་བཏབ་པས་གསོས། དེར་བུད་མེད་དེ་སློབ་དཔོན་ལ་ཕུལ་པ་ལས། ལན་ཅིག་བུ་མོ་དེ་ནཱ་རོ་པ་ལ་བལྟ་རྒོད་བྱེད་པ་ལ། བླ་མས་ཁྱོད་ང་ལ་མི་དགའ་བར་འདི་ལ་དགའ་བ་ཞེས་དེ་དང་ནཱ་རོ་པ་གཉིས་ཅར་བརྡུངས་སོ། །དེ་དག་ཀྱང་ནཱ་རོ་པའི་དད་པ་བརྟན་མི་བརྟན་བརྟགས་པ་ཡིན་པ་ལས་ནཱ་རོ་པ་མ་དད་པ་མ་སྐྱེས་པར་མ་ཟད་དད་པ་ཕྱིར་ཞིང་འཕེལ་ལོ། །ཡང་ལན་ཅིག་དཔོན་སློབ་གཉིས་ཁང་བཟང་གི་རྩེ་མོ་ཞིག་ན་ཡོད་པ་ལ། འདི་ན་མར་མཆོངས་ནུས་པ་གཅིག་བྱུང་ན་ང་དགའ་སྟེ་གསུང་པ་ལ། བླ་མའི་ཐབས་ཀྱིས་མྱུར་དུ་གསོས་འོང་སྙམ་སྟེ། ནཱ་རོ་པས་མཆོངས་པས་ཡན་ལག་རྣམས་ཆགདེར་བླ་མ་ཉིན་ཞག་མང་པོར་བྱོན་མ་བྱུང༌། ད་ཡོངས་འཆི་བ་ལས་འོས་མེད་སྙམ་པ་ལ། བླ་མ་བྱོན་ཏེ་སྔགས་བཏབ་པས་གསོས། དེ་ལྟར་ལོ་བཅུ་གཉིས་སུ་དཀའ་བ་དཔག་ཏུ་མེད་པས་བླ་མ་བསྟེན་ཀྱང༌། ཐ་ན་ཚིག་ལེགས་པ་གཅིག་ཀྱང་མ་གསུངས་སྐད། དེ་ནས་ལན་ཅིག་ཐང་སྟོང་པ་ཅིག་ཏུ། ད་ངས་གདམས་ངག་བསྟན་གྱི་མཎྜལ་ཕུལ་གསུང༌། འདི་ན་ཆུ་དང་མེ་ཏོག་མི་འདུག་ཞུས་པས། ཁྱོད་ཀྱི་ལུས་ལ་ཁྲག་དང་སོར་མོ་ཡང་མེད་དམ་གསུང༌། ཁྲག་གཏར་ཏེ་ཁྲག་གིས་ཆག་ཆག་བཏབ། སོར་མོ་


TNT17_Page_0078
[མ་དཔེ་གཟིགས་ན་འདིར་གནོན།]

རྣམས་བཅད་དེ་ཚོམ་བུར་བཀོད། དེར་ཏིལླི་པས། ནཱ་རོ་པའི་སོར་མོ་རྣམས་བསྡུས་ནས། འཇིམ་པ་དང་མཆིལ་ལྷམ་ན་རོ་པའི་གདོང་ལ་རྒྱབ་པས། ཡུག་ཅིག་དྲན་མེད་དུ་སོང༌། །སངས་ཙ་ན་ཆོས་ཐམས་ཅད་ཀྱི་དེ་ཁོ་ན་ཉིད་མངོན་སུམ་དུ་མཐོང༌། སོར་མོའང་གསོས་སོ། །སླར་ཡང་གདམས་པ་དང་རྗེས་སུ་གདམས་པ་མཐའ་དག་སྩལ། དེར་ནཱ་རོ་པ་རྣལ་འབྱོར་གྱི་དབང་ཕྱུག་ཏུ་གྱུར་པ་ལ། ཏིལླི་པ་ན་རེ། ད་ཁྱོད་རྩོད་པ་མ་བྱེད། སློབ་མ་མ་བསྟེན། བཤད་པ་མ་བྱེད། དེ་ལྟར་ན་མྱུར་དུ་མཆོག་ཐོབ་པར་འགྱུར་གསུང༌། དེ་ནས་ཕུ་ལཱ་ཧ་རིར་སྤྲོས་མེད་ཀྱི་ཏིང་ངེ་འཛིན་ལ་གནས་པའི་ཚེ། ལན་ཅིག་མུ་སྟེགས་དང་རྩོད་པ་བྱེད་དགོས་བྱུང་སྟེ། དེ་ཡང་དགེ་འདུན་གྱི་སྡེ་ཅིག་ཏུ་མུ་སྟེགས་ཀྱི་རྒོལ་བ་མཁས་པོ་ཞིག་རྩོད་པར་བྱུང༌། དེ་དང་རྩོད་ནུས་པ་མ་བྱུང་པའི་སྐབས་རྒན་མོ་ཞིག་ན་རེ། དཔལ་སྙན་གྲགས་བཟང་པོ་གཾ་ཡོ་ན་འདུག་པ་ལ་ཟེར་བ། དགེ་འདུན་རྣམས་ཀྱིས་བཙལ་པས་རྙེད། རྩོད་པར་ཞུས་པས་སངས་རྒྱས་པའི་བསྟན་པ་ལ་ཕན་པར་དགོངས་ནས། དེའི་ནང་པར་རྩོད་པ་མཛད་ཙ་ན། རྩོད་པ་ཅུང་ཟད་ཕམ་པས། ང་ལྟ་བུའི་སྨྲ་བའི་དབང་ཕྱུག་ཅི་ཕྱིར་ཕམ་སྙམ་བསམས་པས། བླ་མའི་བཀའ་དྲན་ཏེ། བླ་མ་ལ་གསོལ་བ་བཏབ་པས། དེ་མ་ཐག་རྩོད་པ་ཡང་རྒྱལ། ཏིལླི་པ་མི་ཐོད་ཁྲག་འཛག་པ་ཐོགས་ནས་འཇིགས་འཇིགས་འདྲ་བ་སྤྲང་པོའི་རྣམ་པར་མངོན་སུམ་དུ་བྱོན། ནཱ་རོ་པས་ཞབས་ལ་ཕྱག་བྱས། མུ་སྟེགས་ན་རེ། ཁྱོད་སངས་རྒྱས་པ་སྙིང་རྗེ་ཅན་ཡིན་ཟེར་ཡང༌། སྙིང་རྗེ་མེད་པའི་སྲིན་པོ་འདི་ལ་ཕྱག་འཚལ་བ་


TNT17_Page_0079
[མ་དཔེ་གཟིགས་ན་འདིར་གནོན།]

རང་གིས་ཁྱོད་ཕམ་པ་ཡིན་བྱས་པས། ཏིལླི་པས་མུ་སྟེགས་པའི་ལྷ་ཁང་ལ་སྡིགས་འཛུབ་མཛད་དེ། ཕམ་མོ་ཕམ་མོ་ཞེས་བྲོ་བརྡུངས་པས། ལྷ་ཁང་ཞིག་སྟེ། དེར་རྩོད་པ་དང་ནུས་པ་གཉིས་ཀ་སངས་རྒྱས་པ་རྒྱལ་ལོ། །བླ་མའི་བཀའ་ཅུང་ཟད་བཅག་པ་དེས། སྐུ་ཚེ་དེ་ལ་མཆོག་གི་དངོས་གྲུབ་མ་ཐོབ། སྐུ་ལུས་བོར་མ་ཐག་ཏུ་སངས་རྒྱས་པ་ཡིན་གསུང༌། སློབ་དཔོན་འདི་ནི་ཕལ་ཆེར་ཕུལླ་ཧ་རི་ཉིད་དུ་བཞུགས། སྐབས་སྐབས་སུ་ཡུལ་སྣ་ཚོགས་སུ་རྒྱུ་ཞིང་དབང་བསྐུར་བ་དང༌། རྒྱུད་དང་གདམས་ངག་གསུང་པ་དང༌། མུ་སྟེགས་ཅན་རྩོད་པས་ཚར་གཅོད་པ་ལ་སོགས་པ་མཁས་པའི་བྱ་བ་མང་པོའང་མཛད། གཙོ་བོར་ལས་ཆེན་བཅུ་གཉིས་ཐོགས་མེད་དུ་གྲུབ་པའི་སྒོ་ནས་སེམས་ཅན་གྱི་དོན་མཛད། ཡི་དམ་གྱི་ལྷ་ཐམས་ཅད་ཀྱི་ཞལ་རྟག་ཏུ་གཟིགས་པ། ཐུན་མོང་གི་དངོས་གྲུབ་ཉམས་འོག་ཏུ་ཆུད་པའི་སྒྲུབ་པ་པོ་ཆེན་པོ་ཡིན་ནོ། །སློབ་དཔོན་འདིའི་སློབ་མ་ན། རྩོད་དུས་ཀྱི་ཐམས་ཅད་མཁྱེན་པ་ཤཱནྟི་པ་ལ་སོགས་པ་སྒོ་བསྲུངས་ཀྱི་པཎྜི་ཏ་དང༌། ཇོ་བོ་རྗེ་ཨ་ཏི་ཤ་ལ་སོགས་པ་བསྟན་པའི་མངའ་བདག་མང་པོ་ཡོད། ཐུན་མོང་མ་ཡིན་པའི་སློབ་མའང༌། བཤད་རྒྱུད་འཛིན་པ་ལ་ཕ་རྒྱུད་ལ་མཁས་པ་བཞ། མ་རྒྱུད་ལ་མཁས་པ་བཞི་སྟེ་བརྒྱད་དོ། །དང་པོ་བཞི་ན། ནག་པོ་འཇིགས་མེད་རྡོ་རྗེ། པི་ཊོ་ཧ་དུ། ཛ་ཡཱ་ཀ་ར། ཁ་ཆེ་ཨ་ཀ་ར་སིདྡྷིའོ། །ཕྱི་མ་བཞི་ན། མ་ན་ཀ་ཤྲཱ། དྷརྨ་མ་ཏ། ཕཾ་ཏིང་པ་ཆེན་པོ། པྲཛྙཱ་རཀྵི་ཏའོ། །དེ་རྣམས་ཀྱང་ནུས་པ་ལ་མངའ་བརྙེས་པ་ཤ་སྟག་གོ


TNT17_Page_0080
[མ་དཔེ་གཟིགས་ན་འདིར་གནོན།]

ཡང་ཁ་ཅིག་པི་ཊྭ་ཧ་དུ། དྷརྨ་མ་ཏི་དང་གཅིག སྔ་མ་བཞི་ལ། ཛྙཱ་ན་གརྦྷ་བགྲོང་ཟེར། གྲུབ་པ་བརྙེས་པའི་སློབ་མ་བཞི་སྟེ། དཔལ་མཆོག་ཌོཾ་བི་པ། རི་རི་པ། ཀནྡྷ་པ། ཀ་སོ་རི་པ་སྟེ་ཐམས་ཅད་ཀྱང་དངོས་གྲུབ་ཐོབ་པའོ། །སློབ་མ་བཞི་གསུམ་བཅུ་གཉིས་འདི་བོད་ན་སྔར་གྲགས་པ་ལྟར་བཀོད་པ་ཡིན་ནོ། །དཔལ་མཆོག་ཌོཾ་བི་པ་ན། དང་པོ་རྒྱལ་པོའི་བ་གླང་མང་པོའི་རྫི་བོ་ཡིན་ཏེ། ཀློག་ཀྱང་མི་ཤེས་པ་ཡིན་པ་ལ། ནཱ་རོ་པ་དགོན་པ་ཞིག་ན་བཞུགས་པ་ལ་མོས་པ་སྐྱེས་ནས། ཡང་ནས་ཡང་དུ་འོ་མ་དང་མར་དྲངས་སོ། །དེ་ནས་སློབ་དཔོན་ནཱ་རོ་པས། སེམས་བསྐྱེད་པ་ཞིག་ཀྱང་བསླབས། དགེས་པ་རྡོ་རྗེའི་དཀྱིལ་འཁོར་དུ་དབང་བསྐུར་ནས་སྒོམ་ཐབས་ཤིག་ཀྱང་བསླབས། དེས་ཀྱང་བསྒོམ་བཞིན་ཡོད་པའི་ཚེ། ལན་ཅིག་ཆུས་ཁྱེར་པས། ཉ་ཞིག་གིས་མིད། ཉའི་ཁོག་ནང་དུ་ཧེ་རུ་ཀའི་དཀྱིལ་འཁོར་ཞལ་མཐོང་སྟེ་གནོད་པ་མེད་པར་ཕྱིར་ཕྱུང༌། དེ་ནས་སློབ་དཔོན་གྱི་དྲུང་དུ་ཀུན་སྤངས་ཀྱི་སྤྱོད་པ་བྱས་ཏེ། རྩེ་གཅིག་ཏུ་བསྒོམས་པས། མཆོག་གི་དངོས་གྲུབ་ཉམས་འོག་ཏུ་ཆུད་དེ། ཆོས་ཐམས་ཅད་དང༌། ཁྱད་པར་རྡོ་རྗེའི་ཐེག་པ་ཐམས་ཅད་ལ་བློ་གྲོས་ཀྱི་སྣང་བ་རྒྱས། སློབ་མ་མང་པོ་ལ་ཡང་བཤད་པས། དངོས་གྲུབ་ཐོབ་པ་བྱུང༌། དེར་བསྟན་བཅོས་མང་པོ་རྩོམ་དགོས་པ་བྱུང་ནས། ཡི་གེ་སླར་བསླབས་པས་མུ་སྟེགས་དང༌། ནང་པའི་པཎྜི་ཏ་ཐམས་ཅད་ཅོ་འདྲི་བ་ཆོས་ཀྱི་གཏམ་གྱིས་ཚར་བཅད། ཕྱོགས་ཐམས་ཅད་དུ་སྙན་པའི་གྲགས་པས་ཁྱབ། ཨ་ཏི་ཤའི་ཡང་བླ་


TNT17_Page_0081
[མ་དཔེ་གཟིགས་ན་འདིར་གནོན།]

མ་ཡིན། བོད་རྣམས་ཇོ་བོས་དངོས་སུ་མ་མཇལ་ཟེར་ཡང༌། མི་གཡོ་བ་དོན་དམ་པ་སྒྲུབ་པ་ཞེས་པ་ཇོ་བོས་མཛད་པར་ཡང༌། ཌོམྦི་པ་ལ་དངོས་སུ་གསན་པར་བཤད་ཅིང༌། དེས་མཛད་པའི་བསྟན་བཅོས་དེ་ཉིད་བཞི་པ་ལ། ཇོ་བོས་མཛད་པའི་འགྲེལ་པ་ཡང་སྣང་བ་དེར་ཡང་ཆོས་དེ་དག་དངོས་སུ་ཐོབ་པའི་ཚིག་སྣང་བ་དང༌། རྒྱ་གར་མཁས་པ་རྣམས་མཇལ་བར་མཛད་ཀྱིན་འདུགའགྲེལ་པ་དེའི་གླེགས་བམ་གྱི་རྒྱ་དཔེ་ཡང༌། སློབ་དཔོན་ནིརྦཱ་ཎ་ཤྲཱིའི་ཕྱག་ན་འདུག་པ་ཁོ་བོས་ཀྱང་མཐོང་ངོ༌། །སློབ་དཔོན་ཌོམྦི་ཆུང་བ་དེ་ལ་ཀུ་ས་ལ་བྷ་དྲ་ཆུང་བས་ཞུས་པ་ཡིན་ནོ། །སློབ་དཔོན་དེ་ནི་རྒྱ་གར་ནུབ་ཕྱོགས་མེ་བར་ཞེས་བྱ་བར་འཁྲུངས། ཆུང་ངུ་ནས་རིག་པའི་གནས་མང་པོ་མཁྱེན། མུ་སྟེགས་ཀྱི་བླ་མ་ཆེན་པོ་ཅིག་ལ་རབ་ཏུ་བྱུང་བར་ཞུས་པས། དེས་མ་ཁྲིད། འོ་ན་མུ་སྟེགས་འདི་རྣམས་ཐམས་ཅད་སུན་ཕྱུང་དགོས་སྙམ་ནས། དཔལ་རྡོ་རྗེའི་གདན་པའི་དྲུང་དུ་རབ་ཏུ་བྱུང༌། སྡེ་སྣོད་ཐམས་ཅད་ལ་ཤིན་ཏུ་མཁས་པར་སྦྱངས། སླར་ཀ་མ་རུའི་ཡུལ་དུ་བྲམ་ཟེར་བརྫུས་ཏེ་ཕྱིན་ནས། མུ་སྟེགས་ཀྱི་པཎྜི་ཏ་དང་བྲམ་ཟེ་དྲུག་ཙམ་ལ། མུ་སྟེགས་ཀྱི་གྲུབ་མཐའ་ཐམས་ཅད་མཁས་པར་བསླབས། ཀ་མ་རུའི་ཡུལ་གྱི་སྒྱུ་མ་དང༌། བི་ཛེ་གི་རི་པའི་ལུགས་ཀྱི་སྔགས་མང་པོ་དང༌། མཁའ་འགྲོ་མའི་ངན་སྔགས་མང་པོ་དང༌། ཤྱང་ང་རའི་སྔགས་ཀྱི་རིགས་མང་པོ་བསླབས་ཤིང་གྲུབ་པར་བྱས། སྔར་གྱི་ནུབ་ཕྱོགས་ན་ཡོད་པའི་མུ་སྟེགས་ཀྱི་པཎྜི་ཏ་རྣམས་ཀྱི་རྩ་རུ་སོང༌། རྒྱལ་པོ་ཀརྞ་ཞེས་བྱ་བ་གཅིག་ཡོད་པས། དཔང་


TNT17_Page_0082
[མ་དཔེ་གཟིགས་ན་འདིར་གནོན།]

པོར་བཞག སངས་རྒྱས་པའི་རྣལ་འབྱོར་པ་དང་པཎྜི་ཏ་ནི་ཉིས་སྟོང་ཙམ་འདུས། མུ་སྟེགས་ནི་བརྒྱད་སྟོང་ཙམ་འདུས་ནས་རྩོད་པ་བྱས་པས། སློབ་དཔོན་རིག་པ་བཟང་ཞིང་མུ་སྟེགས་ཀྱི་རྒྱུས་ཡོད་པས། རེ་རེ་བཞིན་དུ་ཐམས་ཅད་སུན་ཕྱུང༌། དེར་ཆོ་འཕྲུལ་འགྲན་པར་བྱས་པས། མུ་སྟེགས་པའི་རྣལ་འབྱོར་པ་ཞིག་གིས་ནམ་མཁའི་སྐར་མ་གཉིས་ས་ལ་ཕབ་པ་ལྟར་སྣང་བ་ན། མི་མགོའི་གཟུགས་ཅན་ཁང་པ་ཙམ་ནག་པོ་གཉིས་འདུག་སྐད། དེ་ནི་སློབ་དཔོན་གྱིས་མིག་འཕྲུལ་ཡིན་པར་ཤེས་ནས། དེ་བཤིག་པའི་སྔགས་བཟླས་པས། དེ་གཉིས་སོལ་བ་རྡོག་པོ་གཉིས་སུ་སོང༌། མི་ཐམས་ཅད་ཀྱིས་མིག་འཕྲུལ་དུ་གོ །མུ་སྟེགས་འགའ་རེས་ལུས་ལ་མེ་འབར་བ་སོགས་སྟོན་པ་ལ། དེར་ཆུ་ཕབ་པས་མེ་རྣལ་བ་སོགས་རེ་རེ་ནས་སུན་ཕྱུང་སྟེ་ཐམས་ཅད་སྒྱུ་མས་སྒྱུ་མ་བཅོམ་པ་ཡིན་གསུང༌། མཐར་མུ་སྟེགས་ཀྱི་གཙོ་བོ་བཞི་སློབ་དཔོན་གྱིས་སྔགས་བཏབ་པས་བྱི་ལར་སོང༌། ཤྱང་ང་རིའི་སྔགས་ཀྱིས་དེར་ཚོགས་པའི་མུ་སྟེགས་ཐམས་ཅད་ཀྱི་ཁྱིམ་གྱི་ཡོ་བྱད་ཐམས་ཅད་ས་རྡོར་བཏང༌། དེར་མུ་སྟེགས་རྣམས་ཕམས་ཏེ། རེ་ཞིག་ཡུལ་དེར་སངས་རྒྱས་པ་ཤིན་དུ་དར་བར་བྱུང༌། ད་ལྟར་ཡང་མང་བར་ཡོད་གསུང༌། དེར་སློབ་དཔོན་གྱིས་བསམས་པ། ངའི་འདི་ཀུན་རྫུ་འཕྲུལ་ནི་མ་ཡིན། རིག་སྔགས་སྣ་ཚོགས་ཀྱིས་མི་རྣམས་ཀྱི་མགོ་བསྐོར་བ་ཡིན་པས་ཉེས་པ་ཆེ་ཞིང༌། སྔོན་ཆད་ཐོས་བསམ་ཐམས་ཅད་ཆགས་སྡང་གི་དབང་དུ་གྱུར་པས། ད་ནི་ཀུན་སྤངས་བྱའོ་སྙམ་ནས་ཙར་ཡ་པའི་རྣལ་འབྱོར་པ་བྱས་ཐུགས་དམ་མཛད་ཀྱིན་ཡོད་པ་ལས། སློབ་དཔོན་དཔལ་མཆོག་


TNT17_Page_0083
[མ་དཔེ་གཟིགས་ན་འདིར་གནོན།]

ཌོམྦི་པ་དང་མཇལ། བདེ་དགེས་ཀྱི་དཀྱིལ་འཁོར་དུ་དབང་བསྐུར་བ་ཞུས་ནས། གདམས་ངག་ཐམས་ཅད་ཀྱང་ཐོབ་པར་བྱས། དེ་བཞིན་དུ་གོང་དུ་བརྒྱུད་པ་སོ་སོའི་སྐབས་སུ་སྨོས་པའི་བླ་མ་ཐམས་ཅད་ཀྱི་དྲུང་དུ་སོང་སྟེ། སྔ་མ་བཞིན་དུ་བླ་མ་ཐམས་ཅད་མཉེས་ཤིང༌། གདམས་ངག་ཀྱང་ཐོབ་ཡུན་རིང་དུ་བསྒོམས་པས། གྲུབ་ཆེན་ནག་པོ་སྤྱོད་པ་དང༌། བི་རཱུ་པ་དང༌། བྱཱ་ད་པ་ལ་སོགས་པ། སྔོན་བྱོན་གྱི་གྲུབ་ཆེན་མང་པོ་དང་ཡང་མཇལ་ཏེ། དེ་རྣམས་ཀྱིས་ཀྱང་གདམས་པ་རེ་ཡང་གནང༌། ཁོང་ཉིད་ཀྱིས་ལོ་བཅུ་གཉིས་སུ་ཤར་ཕྱོགས་ས་ར་བྷང་གའི་ནགས་ཚལ་དུ་འདུག་སྟེ་ཁ་ཟས་ཀྱི་འཁྲི་བ་བཅད་ནས་ཆུ་ཁོ་ན་གསོལ་ཞིང་བསྒྲུབས་པས། རྟོགས་པ་ནམ་མཁའ་དང་མཉམ་པ་སྐྱེས། གཡང་ས་ལ་བྱ་བཞིན་དུ་བཞུད་པ་དང༌། ཟླ་བ་ཙམ་གྱི་ལམ་ཆུ་ཚོད་གཅིག་གིས་བགྲོད་པ་དང༌། གཅན་གཟན་གཏུམ་པོ་རྣམས་ཀྱིས་རྙེད་བཀུར་བྱེད་པ་དང༌། འབྱུང་པོ་བྲན་དུ་འཁོལ་པ་དང༌། ཡི་དམ་གྱི་ལྷ་དུ་མའི་ཞལ་གཟིགས་པ་དང༌། སེམས་ཅན་རྣམས་ཀྱི་བསམ་པ་ཤེས་པས། དེ་དང་མཐུན་པར་ཆོས་སྟོན་པ་ཡིན་ནོ། །དུས་དེ་ཙམ་ན་རྒྱ་གར་ཙམ་ན་ཡང་གདམས་ངག་ཆེ། གྲུབ་པ་ཐོབ་པར་གྲགས། ལན་ཅིག་སློབ་དཔོན་ནག་པོ་སྤྱོད་པ་དང་དངོས་སུ་མཇལ་ནས། ཁྱོད་སྤྲོས་བཅས་ཀྱི་སྤྱོད་པ་གྱིས། ངའི་རྗེས་སུ་འབྲང་བ་ཙརྻ་པ་ཐམས་ཅད་ཀྱི་གཙོ་བོར་འགྱུར། ངས་བྱིན་གྱིས་རློབ་པོ་ཞེས་ལུང་བསྟན། འཁོར་རིག་མ་ཉི་ཤུ་ཙམ་དང་བཅས་ཏེ་ཡུལ་སྣ་ཚོགས་སུ་སྤྲོས་བཅས་ཀྱི་སྤྱོད་པ་ལོ་བཅུ་གསུམ་མཛད། ཙརྻ་པའི་རྣལ་འབྱོར་པ་ཐམས་ཅད་ཀྱིས་ཞབས་ལ་གཏུགས། མཐར་དེ་ཝཱི་ཀོ་ཊའི་དགོན་


TNT17_Page_0084
[མ་དཔེ་གཟིགས་ན་འདིར་གནོན།]

པར་ལོ་བདུན་ཅུ་དོན་གཉིས་བཞུགས། སླར་སློབ་དཔོན་འདིས་ལོ་བརྒྱ་ལྔ་བཅུ་རྩ་བདུན་བཞུགས་པ་ཡིན་གསུང༌། ཕྱིས་ཀྱི་ཙརྻ་པ་རྣམས་ཀྱི་སྡེ་སྒྲིགས་བཀོད་ཅན་འདི་འཛུགས་མཁན་སློབ་དཔོན་འདི་ཡིན་ནོ། །དེའི་སློབ་མ་ནི་མང་ཡང༌། འདིར་སློབ་དཔོན་ཨ་སི་ཏ་གྷ་ན་ཡིན་ཏེ། དེ་ཡང་ཐོག་མ་མུ་སྟེགས་ཀྱི་རྣལ་འབྱོར་པ་ཞིག་ཡིན། ཡུལ་ནི་པྲ་ཡ་ག་ར་འཁྲུངས། སྒྲ་དང་རྟོག་གེ་ལ་མཁས། ལྷ་དབང་ཕྱུག་ཆེན་པོ་བསྒྲུབས་པས་གྲུབ་པའི་དངུལ་ཆུ་བྱིན། དེས་མི་མ་ཡིན་གྱི་གནས་མང་པོར་འགྲོ་བ་དང༌། ལུས་མི་རྒས་པ་ལ་སོགས་པ་བྱུང༌། མ་མོ་དང་འབྱུང་པོའི་སྔགས་མང་པོས་དྲག་ཤུལ་སྤྱོད་པ་གྲུབ། དེར་ང་རྒྱལ་ཆེ་བར་ཡོད་པ་ལ། ཙརྻ་པའི་རྣལ་འབྱོར་པ་ཞིག་དང་ནུས་པ་འགྲན་པས། དངུལ་ཆུའི་དངོས་གྲུབ་ཀྱང་ནུས་པས་ཕྲོགས། ཁོང་གི་དྲག་ཤུལ་སྤྱོད་པའི་མཐུ་གཅིག་ཀྱང་མ་སོང་བས་དེར་སངས་རྒྱས་པ་ལ་མོས་ནས། པཎྜི་ཏ་པྲ་བྷ་བར་མ་དང། སློབ་དཔོན་ཆེན་པོ་རཏྣ་རཀྵི་ཏ་དང༌། བི་བྷུ་ཏི་ཙནྡྲ་དང༌། དེ་ཝ་ཨཱ་ཀ་ར་ལ་སོགས་པ་མང་པོ་ལ་གདམས་ངག་ཞུས། རྒྱུད་ཀྱང་བདེ་དགེས་འཇིགས་བྱེད་གདན་བཞི་འདུས་པ་སྡེ་ལྔ་ཞུས་ཤིང་མཁྱེན། སླར་སློབ་དཔོན་ཀུ་ས་ལི་བྷ་དྲ་ཆུང་བ་དང་མཇལ། བཀའ་བབས་ཀྱི་གདམས་ངག་ཐམས་ཅད་ཀྱང་གནང༌། རྩེ་གཅིག་ཏུ་བསྒོམས་པས། འདོད་ཡོན་གྱིས་སེམས་ལ་གནོད་པར་བྱུང་ནས། ནགས་སུ་ལོ་བདུན་དཀའ་བ་སྤྱོད་ཅིང་བསྒོམས། དེར་ལཱུ་ཡི་པ་དང༌། བྱཱ་ད་ལི་པ་ལ་སོགས་པ་སྔོན་གྱི་གྲུབ་ཐོབ་མང་པོ་དང་དངོས་སུ་མཇལ་ཏེ་གདམས་པ་ཡང་ཐོབ། ཁྱོད་གྲོང་ཁྱེར་དུ་སོངས་ཤིག་འདོད་པའི་དོན་འགྲུབ་པར་འགྱུར་


TNT17_Page_0085
[མ་དཔེ་གཟིགས་ན་འདིར་གནོན།]

རོ་ཞེས་གསུངས་ཏེ། ནང་པར་གྲོང་ཁྱེར་དུ་སོང་བས། དེ་ན་གླུ་གར་མཁན་མང་པོ་གླུ་གར་རྩེ་བ་མཐོང་བས་རྐྱེན་བྱས་ཏེ། སེམས་རྒྱུད་ཡོངས་སུ་གྲོལ་ནས་དངོས་གྲུབ་ཐོབ། དེར་རྫུ་འཕྲུལ་གྱིས་བཞུད་ནས་སྐྱེ་བོ་རྣམས་ལ་ཆོས་མང་དུ་བསྟན། དེ་ནས་ཡུལ་སྣ་ཚོགས་སུ་སྐལ་བ་དང་ལྡན་པ་རྣམས་ལ་ངོ་མཚར་བའི་ལྟས་ཅུང་ཟད་སྟོན་ཅིང་སྙིང་པོའི་དོན་བཤད་པས། སྐྱེ་བོ་རྒྱུད་གྲོལ་བ་བསམ་གྱིས་མི་ཁྱབ་པ་བྱུང་ངོ༌། །ལོ་ཉིས་བརྒྱ་ཙམ་སྐུ་ལུས་དེ་ཀས་བཞུགས། སློབ་དཔོན་འདིས་རྟོགས་པ་དོན་གྱི་གླུ་བླངས་པ་དང༌། རྒྱུད་སྡེའི་བསྟན་བཅོས་ཆུང་ངུ་མཛད་པ་ཡང་མང་དུ་སྣང་ངོ༌། །དེས་ཡེ་ཤེས་བཤེས་གཉེན་ལ་གདམས་ཏེ། པཎྜི་ཏ་མཁས་བརྒྱུད་བྱས་ན་རྣམ་གྲངས་མང་མོད་ཀྱང་ཞིབ་པར་མི་གསུང༌། བྱིན་རླབས་བཀའ་བབས་ཀྱི་བརྒྱུད་པ་འདིའི་དབང་དུ་བྱས་ན། སློབ་དཔོན་ཀུ་ས་ལི་ཆུང་བ་དང༌། ཨ་སི་ཏ་གྷ་ན་དང༌། ཡེ་ཤེས་བཤེས་གཉེན་གསུམ་གྱི་རིང་ལ་པཎྜི་ཏའི་བརྒྱུད་པ་དེད་ན། བླ་བརྒྱུད་བཅོ་ལྔ་ཉི་ཤུ་ཡོང་བར་སྣང་ངོ༌། །སློབ་དཔོན་དེ་ནི་རིགས་དམངས་རིགས། ཡུལ་ཏི་པུ་ར། ཤར་ཕྱོགས་ཛ་གད་ད་ལའི་གཙུག་ལག་ཁང་དུ་རབ་ཏུ་བྱུང༌། སྡེ་བ་ནི་མང་པོས་བཀུར་བ་ཡིན། དེའི་ལུགས་ཀྱི་འདུལ་བ་དང༌། མངོན་པའི་སྡེ་སྣོད་ཀྱང་མཁྱེན། ཐེག་པ་ཆེན་པོའི་གཞུང་ལུགས་ཀྱང་མང་དུ་མཁྱེན། ཁྱད་པར་གསང་སྔགས་ལ་མཁས་པའི་སློབ་དཔོན་མང་པོ་ལ་ཐུགས་ནས། འདུས་པ་གཤིན་རྗེ་གཤེད། བདེ་དགྱེས། ཟླ་གསང་ཐིག་ལེ། ཕྱག་ཆེན་ཐིག་ལེ། དུས་ཀྱི་འཁོར་ལོ་རྣམས་མཁས་པར་མཁྱེན། ཡང་དྷརྨ་པའི་སློབ་བརྒྱུད་ཀྱང་ཡིན། ཙརྻ་པ་ཡང་ཡིན་པ་


TNT17_Page_0086
[མ་དཔེ་གཟིགས་ན་འདིར་གནོན།]

ཞིག་ལ་མཧཱ་མཱ་ཡ་དང་གདན་བཞི་ཞུས། དེ་རྣམས་ཅི་རིགས་རིགས་བསྒོམ་ཞིང་ཡོད་པའི་ཚེ། གྲུབ་ཐོབ་ཨ་སི་ཏ་གྷ་ན་དང་མཇལ། བཀའ་བབས་གསུམ་གྱི་གདམས་ངག་མ་ལུས་པ་གནང༌། དེར་རྫོགས་རིམ་གྱི་རྟོགས་པ་ཁྱད་པར་ཅན་སྐྱེས་ཤིང་བླ་མ་ལ་ཞུས་པས། ད་སྟེ་ལོ་བཅུ་གཉིས་ན་ཡེ་ཤེས་གྲུབ་པའི་སློབ་དཔོན་ཞིག་ཟླ་བའི་གླིང་དུ་འབྱུང༌། ངའི་གདམས་ངག་གིས་རྒྱུ་བྱས། དེའི་གདམས་ངག་གིས་རྐྱེན་བྱས་ཏེ། ཁྱོད་ཀྱིས་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་གསུངས་ནས། སློབ་དཔོན་ནི་ཨོ་རྒྱན་དུ་འགྲོ་གསུང་སྟེ་ནམ་མཁའ་ལ་གྱ་གྱུར་བཞུད་དོ། །བར་དེར་ལོ་བཅུ་གཉིས་བསྒོམས་པས་རྟོགས་པ་བཟང་པོ་སྐྱེས་ཏེ། ད་ནི་སྤྱོད་པ་ཅིག་བྱ་སྙམ་པ་ལ་ད་ལྟ་མུ་སྟེགས་མང་བས་མི་ཀུན་གྱིས་ཐོ་ཅོར་མཐོང་ན་བསྟན་པ་ལ་གནོད་སྙམ་སྟེ་རེ་ཞིག་བཤོལ། དེར་ལན་ཅིག་ཟླ་བའི་གླིང་དུ་བྱོན་པ་ཞིག་ལ། སློབ་དཔོན་དགའ་བྱེད་སྐྱོང་དེ་ས་འོག་དཔལ་གྱི་སྒོ་ནས་ཐོན་ཏེ་གླིང་དེར་བྱོན་པ་དང་མཇལ། དེར་ཕྱག་རྒྱ་བཞིའི་གདམས་ངག་ཞུས་པས། ཕྱག་རྒྱ་གཞན་གསུམ་གྱི་སྐབས། གདམས་ངག་ང་རང་ཆེ་སྙམ། དེ་ནས་ཕྱག་རྒྱ་ཆེན་པོ་བཤད་པས། བླ་མ་དེ་ཡེ་ཤེས་ཀྱི་སྐུར་གཟིགས། སེམས་རང་བཞིན་གྱི་ལྷན་སྐྱེས་བདེ་ཆེན་གྱི་དོན་མངོན་སུམ་དུ་མཐོང༌། ཐེ་ཚོམ་ཐམས་ཅད་ཆོད་ཅིང་ཆོས་ཐམས་ཅད་ཀྱི་གཏིང་སླེབ། སློབ་དཔོན་དགའ་སྐྱོང་དཔལ་གྱི་སྒོར་བཞུད་ནས། ལོ་ཕྱེད་དང་ཉིས་བརྒྱ་ན་ཤར་ཕྱོགས་སུ་འཐོན། ཨ་སི་ཏ་གྷ་ན་དང་མཇལ། དེ་ནས་ལོ་ཉིས་བརྒྱར་ཉེ་བའི་མཚམས་སུ་སློབ་དཔོན་འདི་དང་མཇལ་བ་ཡིན། དེ་ནས་སློབ་


TNT17_Page_0087
[མ་དཔེ་གཟིགས་ན་འདིར་གནོན།]

དཔོན་འདི་སྤྱོད་པ་སྤྱོད་པར་བཞེད་དེ། སྔར་གྱི་དགེ་འདུན་གྱི་གནས་དེར་མ་བཞུགས། ཙརྻ་པའི་གནས་རྣམས་སུ་སྤྱོད་ཅིང་རབ་ཏུ་བྱུང་བའི་རྟགས་ནི་མ་བསྒྱུར། སྤྱོད་པ་ནི་སྤྲོས་བཅས་ཀྱི་སྤྱོད་པ་གཙོ་བོར་ལོ་གསུམ་མཛད་ཅིང༌། སྤྲོས་མེད་ཀྱི་སྤྱོད་པ་ཡུལ་སྣ་ཚོགས་སུ་རྒྱུ་བ་ཤིན་ཏུ་སྤྲོས་མེད་ཀྱི་སྤྱོད་པ་དང་བསྲེས་ཀྱིན་ལོ་དྲུག་ཙམ་མཛད་དེ། ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕངས་གྲུབ། ལན་ཅིག་ཨོ་ཌི་ཤ་ན། མུ་སྟེགས་ཀྱི་ལྷ་ཁང་ཛ་གད་ནཱ་ཐ་ཞེས་བྱ་བ། ལྷ་ཁྱབ་འཇུག་གི་རྡོ་སྐུ་རང་བྱོན་ཆོ་འཕྲུལ་ཤིན་ཏུ་ཆེ་བ་ཡིན་པ་ལ། སློབ་དཔོན་རྣལ་འབྱོར་མ་བཞི་དང་བཅས་ནས་ལྷ་ཁང་གི་སྒོ་དྲུང་ན་བཞུགས་ནས། དཀོན་གཉེར་ལ་ལྷ་ཁང་མཇལ་བར་ཞུས་པས། དེས་ཀྱང་གནས་གཞིའི་བདག་པོ་མུ་སྟེགས་ཀྱི་བླ་མ་ཞིག་ལ་སྨྲས་པས། དེ་ན་རེ། སངས་རྒྱས་པ་འདི་ཀུན་འོ་སྐོལ་གྱི་ལྷ་ལ་མ་དད་མོད་ཀྱ། དེ་ཁྱིམ་བཙུན་ཞིག་ཡིན་སྣང་བས་ཡུལ་ལྷའི་འདུ་ཤེས་ཀྱིས་མཇལ་བ་ཡིན་ཡོང༌། དེ་ཐོང་ཟེར། དེར་སློབ་དཔོན་ལྷ་ཁང་དུ་བྱོན་པ་ན། སློབ་དཔོན་རི་མོ་ལ་བལྟ་བཞིན་དུ་ཡུན་རིང་དུ་འདུག་གོ །དཀོན་གཉེར་བས་དབྱུག་པ་བརྡེགས་པས། དེར་སློབ་དཔོན་གྱིས་རྭ་དུང་བུས་པ་ན། ཛ་གད་ནཱ་ཐ་ལ་སོགས་པ་ལྷ་ཁང་དེའི་རྡོ་སྐུ་ཐམས་ཅད་ཡན་ལག་དང་དབང་པོ་ཐམས་ཅད་བྲུལ་ཏེ། སྔར་གྱི་ཆོ་འཕྲུལ་རྣམས་ཆུང་དུ་སོང༌། སྔོན་གྱི་སངས་རྒྱས་པའི་སྡེ་ཞིག་པ་རྣམས་ཀྱང་སླར་གསོར་བཏུབ་པ་བྱུང་སྟེ། བར་སྐབས་སུ་རྒྱལ་པོ་གསུམ་ཙམ་གྱི་བར་ལ། ལོ་བརྒྱ་ཙམ་དུ་ཨོ་ཌི་ཤར་སངས་རྒྱས་


TNT17_Page_0088
[མ་དཔེ་གཟིགས་ན་འདིར་གནོན།]

ཀྱི་བསྟན་པ་ཤིན་ཏུ་དར་བར་བྱུང༌། ད་ལྟ་ཡང་ཐོ་རེ་བ་ཡོད་གསུང༌། སློབ་དཔོན་འདི་ཡང་ལྟ་སྟངས་བཞི་ཐོགས་པ་མེད་པར་གྲུབ་ནས་སེམས་ཅན་གྱི་དོན་མཛད་ཅིང༌། ཁྱད་པར་གནས་ལུགས་ཀྱི་དོན་མངོན་སུམ་དུ་གཟིགས་ནས་རྒྱ་ཆེར་བཤད་པས་རྩོད་པའི་དུས་ཀྱི་ཐ་མར་གྱུར་པ་ཡིན་ཀྱང༌། ནམ་མཁའ་ལྟ་བུའི་རྟོགས་པ་བརྙེས་པ་སྟོང་དུ་ལོངས་བ་བྱུང་སྐད། ཐུན་མོང་གི་དངོས་གྲུབ་ཐོབ་པ་ཡང་མང་དུ་བྱུང༌། མཆོག་གི་དངོས་གྲུབ་མངོན་གྱུར་དུ་ཐོབ་པ་ནི་སློབ་དཔོན་དྷརྨ་ཀ་ར་ཞེས་བྱ་བ་ཟངས་གླིང་དུ་འཇའ་ལུས་ཐོབ་པ་ཞིག་དང༌། རྣལ་འབྱོར་མ་ཟླ་འོད་ཅེས་བྱ་བ་དང༌། རྣལ་འབྱོར་མ་བྷ་ཛ་རུ་རུ་ཞེས་བྱ་བ་སྟེ་སྔ་སློབ་གསུམ་མོ། ཕྱི་སློབ་གྲུབ་ཆེན་ཞི་བ་སྦས་པ་སྟེ་བཞིའོ། །རིན་པོ་ཆེའི་འབྱུང་ཁུངས་ལྟ་བུའི་གཏམ་ལས། འོད་གསལ་ལ་སོགས་པ་བཀའ་བབས་བཞི་གཅིག་ཏུ་འདྲེས་པའི་གཏམ་གྱི་སྐབས་ཏེ་ལྔ་པའོ། །བཀའ་བབས་ལྔ་པ་ན། བསྐྱེད་པའི་རིམ་པ་འཕྲིན་ལས་དང་བཅས་པ་ཡིན་ཏེ། དེ་ཡུལ་དབུས་ཁ་བི་ཞེས་པའི་ནང་ཚན། གྲོང་ཁྱེར་རྡོ་འཇོག་ཅེས་པར། བྲམ་ཟེའི་སློབ་དཔོན་ཤིན་ཏུ་མཁས་པ་ཞིག་ཡོད་པ། སངས་རྒྱས་ཀྱི་བསྟན་པ་ལ་ལྷག་པར་དད་དེ། ནཱ་ལེནྡར་དགེ་འདུན་ཕལ་ཆེན་པོའི་སྡེ་ལ་རབ་ཏུ་བྱུང་སྟེ། བུདྡྷ་ཤྲཱི་ཛྙཱ་ན་ཞེས་བྱ་བ་སངས་རྒྱས་དཔལ་ཡེ་ཤེས་ཞེས་མཚན་བཏགས་སོ། ཁ་ཅིག་ན། སློབ་དཔོན་འདི་རྒྱལ་རིགས་ཀློག་པ་པོ་ཅིག་ཡིན་ཟེར་བའང་འདུགདེར་སློབ་དཔོན་སེང་གེ་བཟང་པོ་ལ་ཐེག་པ་ཆེ་ཆུང་གི་ཆོས་མཐའ་དག་ལེགས་པར་བསླབས། གུ་ཎ་མི་ཏྲཱ་ཞེས་བྱ་བས་གསོལ་བ་བཏབ་སྟེ།


TNT17_Page_0089
[མ་དཔེ་གཟིགས་ན་འདིར་གནོན།]

ཤེས་རབ་ཀྱི་ཕ་རོལ་ཏུ་ཕྱིན་པ་བསྡུད་པའི་འགྲེལ་པ་སོགས་བསྟན་བཅོས་ཀྱང་མང་དུ་བྱས། གུ་ཎ་མི་ཏྲཱ་འདི་བོད་པའི་ཕར་ཕྱིན་གྱི་ཆོས་བརྒྱུད་ལ་བཞུགས། དགེ་སློང་མ་ཡིན་པར་ཞལ་ལུང་འགྲེལ་པ་ལས་བཤད་དོ། །དེ་ནས་ནུབ་ཕྱོགས་ཨོ་རྒྱན་དུ་སོང༌། སློབ་དཔོན་སྒེག་པའི་རྡོ་རྗེ་དང༌། རྣལ་འབྱོར་མ་གུ་ནེ་རུ་ཞེས་བྱ་བ་ལ་གསང་སྔགས་ཕྱི་ནང་གི་ཆོས་མང་དུ་ཞུས། ཏིང་ངེ་འཛིན་བཟང་པོ་ཐོབ། ཨོ་རྒྱན་གྱི་བྱང་ཕྱོགས་ན་གདོལ་པའི་བུ་མོ་ཛཱ་ཏི་ཛ་ལ་ཞེས་བྱ་བ། ལྕམ་དཔལ་མོ་དང་རྒྱུད་གཅིག་པ་ཞིག་ལ་ཟླ་བ་བརྒྱད་བརྟེན། ཛམ་བྷ་ལའི་ལུང་ཐོབ་པ་ཙམ་གྱིས་རིག་སྔགས་གྲུབ། ཡུལ་ཛ་ལནྡྷ་རར་སློབ་དཔོན་བྱིས་པའི་ཞབས་ཏེ། བཱ་ལི་པ་ད་ཞེས་བྱ་བ་ལ་ཤེས་རབ་ཀྱི་རྒྱུད་ཞུས། འདི་གྲུབ་ཐོབ་ཛ་ལནྦྷ་རི་པའི་སྐུའི་རྣམ་འགྱུར་ཀ་ཡིན་པར་གྲགས། དེར་ཤེས་རབ་བརྒྱུད་ལ་ཆུ་བོ་རྒྱུན་གྱི་ཏིང་ངེ་འཛིན་ཐོབ། དེ་ནས་ལྷོ་ཕྱོགས་ཀོང་ཀ་ན་ཞེས་བྱ་བ་ཤིང་ནམ་མཁའ་ན་སྐྱེ་བ་ཞིག་ན། སློབ་དཔོན་པཱ་ལི་ཏ་པ་ད་སྟེ། སློབ་དཔོན་བསྲུང་བའི་ཞབས་ཞེས་བྱ་བ། རྫུ་འཕྲུལ་དང་ལྡན་པའི་སློབ་མ་རྣལ་འབྱོར་ཕོ་མོ་བཅོ་བརྒྱད་ཙམ་དང་བཅས་པ་ལ། ཡོ་བྱད་ཐམས་ཅད་ནི་ནོར་རྒྱུན་མས་སྦྱོར། དེ་ལ་གསང་བ་འདུས་པ་ཞུ་ཞིང་ལོ་དགུ་བསྟེན། རྒྱུད་ཚར་བཅོ་བརྒྱད་ཉན། འོན་ཀྱང་དེ་ཁོ་ན་ཉིད་ཅུང་ཟད་མ་རྟོགས་ནས། བླ་མ་ལ་ཞུས་པས། ཁོ་བོས་ཀྱང་མ་རྟོགས་གསུང༌། དེར་མཱ་ལ་མོ་དི་ཞེས་བྱ་བའི་ཕྱག་རྒྱ་ཞིག་ཡོད་པ་འདུས་པའི་གླེགས་བམ་དུ་བསྒྱུར་ཏེ་མགུལ་དུ་བཏགས་ནས། རྡོ་རྗེ་གདན་གྱི་རྒྱབ། ཀུ་པའི་ཚལ་


TNT17_Page_0090
[མ་དཔེ་གཟིགས་ན་འདིར་གནོན།]

ཞེས་བྱ་བར་སྒྲུབ་པ་ལན་གསུམ་སྤྱད་པས་ཟླ་བ་བཅོ་བརྒྱད་དང༌། དྲག་ཤུལ་སྤྱོད་པ་ཟླ་བ་དྲུག་ཏུ་བསྒྲུབས་པས། ལུང་བསྟན་པ་བྱུང་སྟེ། འཕགས་པ་འཇམ་དཔལ་ལ་ཐེ་ཚོམ་ཆོད་ཟེར། འོ་ན་འཇམ་དཔལ་རྒྱ་ནག་རི་བོ་རྩེ་ལྔ་ན་བཞུགས་པས་དེར་འགྲོ་དགོངས་ཏེ། དཔག་ཚད་བཅུ་ཙམ་བྱང་ཤར་དུ་སོང་བ་ན། ཉི་མ་མ་ཕྱེད་ཙམ་གྱི་དུས་ཤིག་ཏུ་ཁང་པ་དཀར་པོ་ཞིག་གི་དྲུང་ན། ཁྱིམ་བཙུན་རྒན་པོ་ཤམ་ཐབས་བྱེ་བ། ཆོས་གོས་ཀྱི་ཐོད་བྱས་པ་ཞིག་བུད་མེད་ངན་མ་གཅིག་དང་ལྷན་ཅིག་ཞིང་རྨོད་པ་མཐོང་སྟེ་ཅུང་ཟད་མ་དད། དེ་དང་ཉེ་བ་ནི་ཁྱི་མོ་དཀར་མོ་ངན་མ་གཅིག་ཀྱང་ཉལ་ནས་འདུག་གོ །དེར་ཉིན་མོའི་དུས་ཚོད་བསོད་སྙོམས་ཀྱི་དུས་ལ་བབས་པས་ན། ཁ་ཟས་བསླངས་པས། ཡུར་བ་ནས་ཉ་ཞིག་བཟུང་ཁྱི་མོ་ལ་བྱིན། དེར་སྐྱུགས་པ་སློབ་དཔོན་ལ་དྲངས་པས་རྣམ་རྟོག་གིས་མ་གསོལ། དེར་ཁྱིམ་བཙུན་ན་རེ། འཛམ་བུ་གླིང་པ་རྣམ་རྟོག་ཆེ། ཟས་བཟང་པོ་དྲོངས་ཟེར་ནས་གཞན་ཞིག་ཏུ་སོང་ངོ༌། །དེར་བུད་མེད་དེས་འབྲས་ཆན་དང༌། ཞོ་བཟང་པོ་དྲངས་པ་གསོལ་ནས་འབྱོན་པར་ཆས་ཙ་ན། དེ་རིང་གྲོང་དུ་མི་སླེབ་ནང་བར་སོང་ཟེར་བས་དེར་བཞུགས་ཏེ། གསང་བ་འདུས་པའི་རྒྱུད་བཏོན་པས། ཐེ་ཚོམ་གྱི་གནས་གང་ཡིན་པ་དེར། བུད་མེད་དེ་མི་དགའ་བའི་རྣམ་འགྱུར་རེ་བྱེད་ཀྱིན་འདུག་ནས། འདི་གཞན་སེམས་ཤེས་པའོ་དགོངས་ནས། བདག་གི་ཐེ་ཚོམ་གཅོད་པ་ཞུ་བྱས་པས། ངས་མི་ཤེས། ད་ཅིའི་ཁྱིམ་བཙུན་དེ་འདུས་པ་ལ་ཤིན་ཏུ་མཁས། ཉི་མ་ཕྱི་ཕྲཻད་ན་སླེབ་འོང་དེ་ལ་ཐེ་ཚོམ་ཆོད་ཟེར་བ་ལྟར། ཕྱི་ཕྲེད་


TNT17_Page_0091
[མ་དཔེ་གཟིགས་ན་འདིར་གནོན།]

ན་ཆང་གིས་བཟི་ནས་འཁྱོར་བཞིན་བྱུང༌། དེར་སྔགས་ཀྱི་སྤྱོད་པ་ཅན་དུ་ཤེས་ཏེ་མ་དད་པ་སྤངས་ཏེ་ཞབས་ལ་ཕྱག་བཙལ་ནས་ཐེ་ཚོམ་རྣམས་ཞུས་པས། དབང་བསྐུར་དགོས་གསུང༌། སྔར་གཞན་ལ་ཐོབ་ཞུས་པས་ངའི་ཆོས་སྟོན་པ་ལ་ང་རང་གིས་དབང་བསྐུར་དགོས་གསུང༌། དཀྱིལ་འཁོར་ཁང་པ་ཞིག་ཏུ་ཞུགས་སོ། །ནམ་སྲོད་ཀྱི་དུས་སུ་སློབ་དཔོན་ནང་དུ་བོས་པ་ལ། འཇམ་པའི་རྡོ་རྗེ་ལྷ་བཅུ་དགུའི་དཀྱིལ་འཁོར་མངོན་སུམ་དུ་བཞུགས་པའི་དྲུང་ན། སྔར་གྱི་སྤྲུལ་པའི་དགེ་སློང་བུད་མེད་དང་ཁྱི་མོར་བཅས་པ་ཡང་སྣང་སྟེ། སུ་ལ་དབང་ལེན་གསུང༌། དེ་རྣམས་ངོ་བོ་གཅིག་པར་ཤེས་ཀྱང༌། རྣམ་པ་དཀྱིལ་འཁོར་ལ་མོས་ནས། དཀྱིལ་འཁོར་ལས་འཚལ་ཞུས་པས། འོ་ན་ལོང་གསུང་སྟེ། དེ་གསུམ་ཁང་ཆུང་གཞན་ཞིག་ཏུ་སོང༌། དཀྱིལ་འཁོར་ཡང་མི་སྣང་བར་གྱུར། དེར་སློབ་དཔོན་ཐུགས་སྐྱོ་བས་ཐོ་རངས་ཀྱི་དུས། ཁྱོད་ནི་སེམས་ཅན་ཀུན་གྱི་ཡབ་སྟེ་ཞེས་སོགས་གསོལ་བ་བཏབ་པས། དཀྱིལ་འཁོར་སྔ་མ་བཞིན་དུ་སྤྲུལ་ཏེ་དབང་བསྐུར་ནས། འཇམ་དཔལ་ཞལ་ལུང་བཤད། དེར་སློབ་དཔོན་དགོངས་པ་ནི་ནམ་མཁའ་དང་མཉམ་པར་གྱུར། ཆོས་ཐམས་ཅད་ཀྱི་གཏིང་སླེབ། དང་པོར་ཟས་ཉ་ཤ་ཁྱིས་སྐྱུགས་པ་དང༌། ཁྱིམ་བཙུན་གྱི་སྤྱོད་པ་གཉིས་དང༌། རྗེས་སུ་རྣམ་པ་ཁྱིམ་བཙུན་རྒན་པོ་ལ་མ་དད་པས་འཇའ་ལུས་མ་གྲུབ། བར་དོར་དངོས་གྲུབ་མཆོག་བརྙེས་པར་འགྱུར་བའོ། དེ་ནས་རང་གི་རྟོགས་པ་ཐབས་རིམ་གཉིས་ཁྱད་པར་ཅན་དང་བཅས་པ་རྒྱ་ཆེར་སྤེལ་བར་བཞེད་ནས། ཆོས་ཀྱི་མྱུ་གུ་ཞེས་བྱ་བའི་གནས། སྐྱེ་བོ་


TNT17_Page_0092
[མ་དཔེ་གཟིགས་ན་འདིར་གནོན།]

མང་པོ་འདུ་བར་རུང་ལ། བསམ་གཏན་ཡང་མཐུན་པ། སྔོན་གྱི་བྱང་ཆུབ་སེམས་དཔས་བསྟེན་པ་ཞིག་ཡོད་དེ། དེར་ཛམ་བྷ་ལས་ཡོན་བདག་བྱས། སྣོད་དང་ལྡན་པ་མང་པོ་ལ་ཆོས་བཤད་པས། ཕྱོགས་བཞིའི་མཁས་པ་པཎྜི་ཏ་ལ་སོགས་པའི་སློབ་མ་མང་དུ་འདུས་པ་ལ། འཇམ་དཔལ་གྱི་དགོངས་པ་རྒྱ་ཆེར་བཤད་པས། སྙན་པའི་གྲགས་པས་ས་སྟེང་ཐམས་ཅད་ཁྱབ། ལུང་དང་མཐུན་པའི་ཆོས་བཅུ་བཞི་མཛད། སློབ་དཔོན་པཱ་ལི་པ་དེས་ཀྱང༌། འཇམ་དཔལ་གྱི་ལུང་གི་གདམས་ངག་རྣམས་ཞུས་པས་མཆོག་གི་དངོས་གྲུབ་ཐོབ་བོ། །རྡོ་རྗེ་གདན་མཆོད་པའི་ལོ་རྒྱུས་ན། ལན་ཅིག་སློབ་དཔོན་རྡོ་རྗེ་གདན་དང་ཉེ་བ་ན་སྤྱིལ་པོ་མཛད་ནས་བཞུགས་པའི་ཚེ། རྒྱལ་པོ་དྷརྨ་པཱ་ལ་རྡོ་རྗེ་གདན་ལ་མཆོད་པ་ལ་འོངས་པས། སངས་རྒྱས་པའི་སློབ་དཔོན་གཞན་ཐམས་ཅད་མཆོད་པ་ལ་བྱོན། སློབ་དཔོན་འདི་མཆོད་པ་མི་བྱེད་པར་མཐོང་ནས་ཆད་པས་གཅོད་དགོས་སྙམ་སྟེ། སློབ་དཔོན་གྱི་སྤྱིལ་པོར་ཞུགས་པས། དེ་ན་སློབ་དཔོན་མི་བཞུགས་པར་འཕགས་པ་འཇམ་དཔལ་གྱི་སྐུ་ཞིག་མཐོང༌། ཕྱིར་འོངས་ཏེ་འཁོར་རྣམས་ལ་དྲིས་པས། འདི་ཉིད་ན་ཡོད་ཟེར། ཡང་ནང་དུ་འོངས་པས་སློབ་དཔོན་དུ་སྣང༌། དེར་ཁྱོད་མཆོད་པ་མི་བྱེད་པ་ཅི་ཡིན་དྲིས་པས། ང་འདི་ཉིད་ནས་མཆོད་པའི་འབུལ་གསུང༌། དེས་ཇི་ལྟར་འབུལ་དྲིས་པས། སློབ་དཔོན་གྱི་དགོངས་པ་ལ་མཉམ་པར་བཞག་པས། རྡོ་རྗེ་གདན་གྱི་ལྷ་སྐུ་ཐམས་ཅད་མངོན་སུམ་དུ་སློབ་དཔོན་གྱི་དྲུང་དུ་མགྲོན་དུ་བོས་པ་ལྟར་བྱུང་སྟེ། སློབ་དཔོན་གྱིས་དེ་ལ་རྒྱ་ཆེན་པོའི་མཆོད་པ་བྱེད་པར་མཐོང༌།


TNT17_Page_0093
[མ་དཔེ་གཟིགས་ན་འདིར་གནོན།]

དེར་རྒྱལ་པོ་ཡིད་ཆེས་ནས། དབང་བསྐུར་བ་ཞུས་ཏེ་ཡོན་གཞན་མེད་ནས། རང་ཉིད་བཙུན་མོ་དང་བཅས་པ་འབངས་སུ་ཕུལ། ནང་པར་ཕོ་བྲང་ནས་ཁོང་རང་ཐམས་ཅད་ཀྱི་ལུས་ཚད་དང་མཉམ་པའི་གསེར་བསླུས་མར་ཕུལ་ལོ། །བི་ཀྲ་མ་ཤཱི་ལའི་རབ་གནས་ཀྱི་ལོ་རྒྱུས་ན། ཡང་བི་ཀྲ་མ་ཤཱི་ལ་དང༌། ཨོ་ཏནྟ་པུ་རི་དང༌། ཤྲཱི་ནཱ་ལནྡ་དང༌། སོ་མ་པུ་རི་སྟེ། གཙུག་ལག་ཁང་བཞི་པོ་དེ། སོ་སོའི་བར་བར་ན་ཉིན་ལམ་མང་པོས་ཆོད་པ་ཡིན་ཅིང༌། བི་ཀྲ་མ་གསར་བཞེངས་ཡིན། སོ་མ་པུ་རི་ཞིག་གསོས་ཡིན་ཟེར། གཞན་གཉིས་ནའང་རྒྱལ་པོས་ལྷ་ཁང་གསར་དུ་བཞེངས་པ་མང་དུ་ཡོད་པ་རྣམས་ལ་རབ་ཏུ་གནས་པར་ཞུས་པས། སློབ་དཔོན་གྱིས་སྐུའི་བཀོད་པ་བཞི་སྤྲུལ་ཏེ། གཙུག་ལག་ཁང་བཞི་ཅར་ལ་རབ་ཏུ་གནས་པ་དུས་གཅིག་ཏུ་མཛད། དེ་སྐབས་བི་ཀྲ་མ་ཤཱ་ལར། རབ་གནས་ཀྱི་ཞལ་བསྲོ་ཆེན་པོ་ཡོད་པའི་སྐབས། མུ་སྟེགས་ཀྱི་རྣལ་འབྱོར་མ་དཔོན་གཡོག་གཉིས་ཀྱིས་སྐྲུར་འོངས་པས། དགེ་ཚུལ་མ་རུངས་པ་རྣམས་ཀྱིས་བརྡུངས་སོ། །གཡོག་མོས་འདི་ལ་ནུས་པ་སྟོན་དགོས་ཞེས་ཡང་ཡང་གསོལ་བ་བཏབ་པས། དཔོན་མོས་སྔགས་བཟླས་པས། རབ་གནས་ཀྱི་དཀྱིལ་འཁོར་གྱི་འོག་ནས་ཆུ་བརྡོལ། དེར་སློབ་དཔོན་གྱིས་རྡུལ་ཚོན་གྱི་དཀྱིལ་འཁོར་ནམ་མཁའ་ལ་བཏེགས་པས། དེས་ཆར་དྲག་པོ་ཕབ་བོ། །དེ་ཡང་སློབ་དཔོན་གྱིས་ཕྱག་བཀབ་སྟེ་བསྲུངས་པས། དཀྱིལ་འཁོར་ལ་གནོད་པ་ནི་མ་བྱུང་ཞིང༌། རབ་གནས་ལེགས་སོ། །ཕྱིས་ཀྱང་ལོ་རེའི་དུས་ལ་དེའི་ཉིན་པར་མུ་སྟེགས་ཀྱི་གནོད་པ་རེ་ཡོང༌། ཚུགས་ནི་མི་ཚུགས་སོ། །


TNT17_Page_0094
[མ་དཔེ་གཟིགས་ན་འདིར་གནོན།]

ནཱ་ལེནྡྲ་བཏུལ་བའི་ལོ་རྒྱུས་ན། དེར་སློབ་དཔོན་ཆེན་པོ་དེས། ནཱ་ལེནྡྲ་དང༌། བི་ཀྲ་མ་ལ་ཤཱི་ལའི་གནས་ཀྱི་བདག་པོ་ཡང་མཛད། དེ་སྐབས་ཨོ་ཏནྟ་པུ་རི་ན་གནས་པའི་ཉན་ཐོས་སེནྡྷ་པ་རྣམས་དང༌། རྣམ་པར་རྟོག་པས་གཡེངས་པའི་དགེ་སློང་རྣམས་ཀྱིས་ངན་དུ་ཟེར་ཞིང༌། སློབ་དཔོན་ནཱ་ལེནྡྲར་བཞུགས་པའི་སྐབས་ཤིག་ན། དགེ་སློང་དེ་རྣམས་ཀྱིས། སངས་རྒྱས་ཡེ་ཤེས་ཚུལ་ཁྲིམས་དང་མི་ལྡན་པས་དགེ་འདུན་གྱི་མཁན་པོར་རུང་པ་མ་ཡིན་ཞེས་ཡང་ཡང་རྒོལ་བ་དང༌། གསང་སྔགས་ལ་གཤེ་ཞིང༌། རྡོ་རྗེ་གདན་གྱི་སེནྡྷ་པ་སིང་གྷ་ལ་པ་མང་པོས། ཧེ་རུ་ཀའི་སྐུ་བརྙན་དངུལ་ལས་བསྒྲུབས་པ་བཤིག་སྟེ་རྙེད་པར་བྱས་སོ། །རྒྱལ་པོས་རྡོ་རྗེ་གདན་གྱི་སིང་གྷ་ལ་པ་མང་པོ་བསད། སེནྡྷ་པ་གཞན་རྣམས་ལའང་ཆད་པ་གཅོད་པར་བརྩམས་པ་ན། སློབ་དཔོན་གྱིས་ཐུགས་རྗེ་ཆེན་པོས། དེ་རྣམས་རྒྱལ་པོའི་གནོད་པ་ལས་ལེགས་པར་བསྐྱབས་སོ། །མ་དད་པ་བཟློག་པའི་ཕྱིར་དུ། ས་འོག་ཏུ་རྫུ་འཕྲུལ་གྱིས་གཤེགས་པ་དང༌། ཡང་སྐབས་འགར། མི་མ་ཡིན་མང་པོ་སློབ་དཔོན་ལ་མཆོད་པ་དང༌། ཡ་མ་ཟུང་གི་ཆོ་འཕྲུལ་མང་དུ་བསྟན། དེར་སྔགས་ཀྱི་སྤྱོད་པ་མཆོག་གི་བསྟན་བཅོས་ཀྱང་མང་དུ་མཛད་པ་ལས། ཉན་ཐོས་ཀྱི་སྡེ་སྣོད་དང་ཡང་མི་འགལ་བ་བསྒྲུབས་སོ། །སྔོན་འཇམ་དབྱངས་སྤྲུལ་པ་ཨ་བ་དྷུ་ཏིའི་སྤྱོད་པ་ཅན་དེ་ལ། མ་དད་པ་གཏན་ནས་མ་སྐྱེས་ན། དེ་ཉིད་དུ་འཇའ་ལུས་རྡོ་རྗེའི་སྐུར་གནས་འགྱུར་བ་ཡིན་པ་ལས། དེར་མ་གུས་པའི་རྣམ་པར་རྟོག་པ་ཅུང་ཟད་སྐྱེས་པས། དགུང་ལོ་བརྒྱད་ཅུ་ལྷག་ཅིག་བཞེས་པ་ན། རྣམ་པར་སྨིན་པའི་སྐུ་ལུས་བོར་


TNT17_Page_0095
[མ་དཔེ་གཟིགས་ན་འདིར་གནོན།]

ཏེ། ཟུང་འཇུག་གི་སྐུ་བརྙེས་པ་ཡིན་ནོ། །དེའི་སློབ་མ་ན། མཐོང་བའི་ཆོས་ལ་མྱ་ངན་ལས་འདས་པའི་སློབ་མ་བཞ། རྒྱལ་ཚབ་ཀྱི་ས་ལ་གནས་པ་ཞེས་བྱ་བ་སྐྱེ་བ་གཅིག་གིས་ཐོགས་པ་དང༌། བར་དོར་སངས་རྒྱ་བའི་རིགས་ཅན་བཅོ་བརྒྱད། མཁས་པ་པཎྜི་ཏ་དང༌། རྣལ་འབྱོར་པ་ཀུ་ས་ལི་གྲངས་ལས་འདས་པ་བྱུང་ངོ༌། །སློབ་དཔོན་འདིའི་རྡོ་རྗེའི་སྤུན་གྲོགས་སློབ་མར་གྱུར་པ་ནི་ཀོང་ཀ་ནའི་ཆོས་ཀྱི་འབྱུང་གནས་དང༌། རི་བོ་ས་ཧྱ་ཀྱི་གཙུག་ཏོར་རྡོ་རྗེའོ། །ཞེས་དཔལ་འབྲས་རྡོ་རྗེས་བཤད། སློབ་མའི་མཆོག་བཞི་པོ་ན། མར་མེ་མཛད་བཟང་པོ། རབ་ཞི་བཤེས་གཉེན། བདེ་བ་ཆེན་པོར་པདྨ་ཀ་ར། རྒྱལ་རིགས་སྒྲ་གཅན་འཛིན་ནོ། །སློབ་དཔོན་ཆེན་པོ་འདིའི་དངོས་སློབ། ཡང་སློབ། ཉིད་སློབ་ཀྱི་བར་དུ་ཛམ་བྷ་ལ་གྲུབ་པས་ཡོ་བྱད་སྦྱོར་བ་དང༌། ནོར་རྒྱུན་མས་ཡོ་བྱད་སྦྱོར་བ་དང༌། རྒྱུད་ལས་འབྱུང་བ་ལྟར་ཁྱེའུ་དང་བུ་མོ་ལ་ཡེ་ཤེས་ཕེབ་ནས་དཀྱིལ་འཁོར་འབྲི་བ་དང༌། རྡུལ་ཚོན་གྱི་དཀྱིལ་འཁོར་ཡང་དཀྱིལ་འཁོར་དངོས་སུ་སྟོན་ནུས་པ་དང༌། བདེན་སྟོབས་བརྗོད་པས་རྡུལ་ཚོན་གང་དགོས་སུ་འཕེལ་བ་སོགས་ཡོད་དོ། །དེ་རྗེས་རྒྱལ་པོ་མཧཱ་པཱ་ལའི་གཞུག་གཅིག་ལ་དགེ་སློང་གི་རྟེན་དང་ཆ་བྱད་ཅན་ལ། སྔགས་སྤྱོད་མངོན་གྱུར་པ་བཀག་པས་དེ་ཕྱིན་ཆད་དེ་འདྲ་མང་པོ་མ་བྱུང་ངོ༌། །དེ་ལ་མར་མེ་མཛད་བཟང་པོ་ནི་རྒྱ་གར་ནུབ་ཕྱོགས་སུ་སྐུ་འཁྲུངས། རིགས་པའི་གནས་ཐམས་ཅད་ལ་ཐོགས་པ་མེད་པའི་བློ་གྲོས་བརྙེས། རྟེན་ནི་དགེ་སློང༌། སྡེ་པ་ནི་འདི་ཡང་དགེ་འདུན་ཕལ་ཆེན་པ་ཡིན་གསུང༌། དེ་ཡང་དཔལ་ནཱ་


TNT17_Page_0096
[མ་དཔེ་གཟིགས་ན་འདིར་གནོན།]

ལེནྡྲར་མཁས་པ་ཐམས་ཅད་ཀྱིས་བཀུར་བ་ཡིན། སློབ་དཔོན་ཆེན་པོ་སངས་རྒྱས་ཡེ་ཤེས་ཞབས་དང་མཇལ་ནས། རྣལ་འབྱོར་དང་རྣལ་འབྱོར་མའི་རྒྱུད་ཀྱི་དཀྱིལ་འཁོར་ཐམས་ཅད་དུ་ཞུགས། རྒྱུད་སྡེ་ཡང་མཐའ་ཡས་པ་གསན། འོན་ཀྱང་མན་ངག་ཐོབ་དཀའ་བར་བྱུང་ནས། རེ་ཞིག་ལྷོ་ཕྱོགས་ཀྱི་ཡུལ་དུ་བྱོན་ནས་ལོ་གཉིས་གསུམ་དུ་སྔགས་རྒྱུད་སྦྱོར་བས་སེམས་ཅན་ལ་ཕན་བཏགས། དེར་འདུ་བ་དང་ལོངས་སྤྱོད་རྒྱ་ཆེན་པོ་བྱུང་བ། དེ་ཐམས་ཅད་སློབ་དཔོན་ལ་མཆོད་པའི་ཡོ་བྱད་དུ་དྲིལ་ནས། སློབ་དཔོན་གྱི་དྲུང་དུ་ལྷ་འབངས་ཀྱི་ཁྱིམ་དྲུག་ཅུ་དང༌། གསེར་སྲང་སྟོང༌། མུ་ཏིག་གི་དོ་ཤལ་སུམ་བརྒྱ་ལ་སོགས་པ་ཡོ་བྱད་དཔག་ཏུ་མེད་པས་མཆོད་ཅིང༌། ཁྱད་པར་བདག་ཉིད་སློབ་དཔོན་གྱི་བྲན་དུ་ཁས་བླངས་ཏེ། སློབ་དཔོན་གྱི་དྲུང་དུ་ལོ་གསུམ་ཙམ་དུ་ཐ་ན་གྲོང་ཁྱེར་ནས་དམ་རྫས་ཤ་ཆང་ལེན་པ་ཚུན་ཆད་ཀྱི་བྱ་བའང་མཛད། དེར་སློབ་དཔོན་གྱིས་མན་ངག་ཐམས་ཅད་ཀྱང་གནང༌། ཕྱོགས་གཞན་ཞིག་ཏུ་སོང་ནས་བསྒོམས་པས། རྟོགས་པ་ཁྱད་པར་ཅན་སྐྱེས་ཏེ་སློབ་དཔོན་གྱི་དྲུང་དུ་འོངས་པ་བླ་མས་ཀྱང་དབང་བསྐུར་བས། དེ་ཉིད་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕང་ཐོབ་སྟེ། སློབ་དཔོན་སངས་རྒྱས་ཡེ་ཤེས་ཞབས་ལས་ཀྱང་རྟོགས་པ་མཐོ་བ་ཡིན་ནོ་སྐད། སློབ་དཔོན་འདིས་དྲག་པོའི་ལས་ཀྱི་སྒོ་ནས་མུ་སྟེགས་ཀྱི་རྒྱལ་པོ་ཚར་བཅད་པའི་གཏམ་རྒྱུད་སྣང་སྟེ། རྒྱ་གར་མཐའ་འཁོབ་སིནྡྷུའི་ཡུལ་དུ་བཞུགས་པའི་སྐབས་ཤིག ཡུལ་དེའི་རྒྱལ་པོས་སློབ་དཔོན་གྱི་སློབ་མ་རྣམས་ལ་རྟག་ཏུ་འཚེ་བ་བྱེད་པ་ཞིག་ཡོད། གཞན་ཡང་རྒྱལ་


TNT17_Page_0097
[མ་དཔེ་གཟིགས་ན་འདིར་གནོན།]

པོ་དེས་སངས་རྒྱས་ཀྱི་བསྟན་པ་ལ་ཤིན་ཏུ་གནོད་པ་བྱེད་པ་ཞིག་ཡོད་པ། ལན་ཅིག་སློབ་དཔོན་དང་ལམ་གཅིག་ཏུ་མཇལ་བས། རྒྱལ་པོས་སློབ་དཔོན་ལ་མདུང་ཐུང་འཕངས་པས་སྐུ་ལ་མ་གནོད། སློབ་དཔོན་གྱིས་སྡིགས་འཛུབ་མཛད་པས། རྒྱལ་པོ་ཡོ་བྱད་དང་བཅས་པ་ཐུལ་གྱིས་ཚིག་ནས་ཐལ་བར་སོང༌། དེར་རྒྱལ་པོའི་མི་མུ་སྟེགས་ལ་དགའ་བ་ཐམས་ཅད་འཇིགས་ཏེ། དགེ་སློང་མགོ་བྲེགས་འདི་ཀུན་ནུས་པ་འདི་ཙམ་ཞིག་ཅེས་ཕྱིན་ཆད་མི་རབས་མང་པོར་ནང་པའི་གཙུག་ལག་ཁང་རྣམས་ལ་འཚེ་བ་མི་བྱེད་དོ། །ལོ་རྒྱུས་འགའ་ལས་རྒྱལ་པོ་དེ་ཏུ་རུཥྐའི་རྒྱལ་པོ་བྷཱུ་ཥཱ་ན་ཞེས་པ་ཡིན་ཏེ། དེ་དུས་ཡུལ་དབུས་ན་ཏུ་རུཥྐ་མེད་པས། ལྟ་བ་ལོག་པ་རྣམས་ལ་མུ་སྟེགས་ཞེས་ཟེར་བའི་སྟབས་ནས་མུ་སྟེགས་ཀྱི་རྒྱལ་པོ་ཟེར་བ་བྱུང་བ་ཡིན་གསུང༌། ཡང་ནུབ་ཕྱོགས་མ་ལ་བའི་ཡུལ་ན། མུ་སྟེགས་ཀྱི་རྒྱལ་པོ་ཁྱབ་འཇུག་ཆེན་པོ་ལ་ལྷར་འཛིན་པ་ཞིག་ཡོད་པ། དེས་སངས་རྒྱས་པའི་ལྷ་ཁང་མང་པོ་བཤིག དགེ་སློང་རྣམས་ཡུལ་དབུས་སུ་བསྐྲད། དགེ་བསྙེན་རྣམས་ལ་ཡང་སྡུག་བསྔལ་སྣ་ཚོགས་པ་སྟེར་བས། ལན་ཅིག་སློབ་དཔོན་ཡང་དེའི་ཡུལ་དུ་བྱོན་པ་ཞིག་ལ། སློབ་དཔོན་ཡེ་ཤེས་ཞབས་ཀྱིས་བྱིན་རླབས་མཛད་པའི་ལྷ་ཁང་ཞིག་ཡོད་པ་དེར་བཞུགས། དེར་སློབ་དཔོན་ལ་རྒྱལ་པོ་དེས་སྙད་མང་པོ་བཏགས། སློབ་དཔོན་གྱིས་ཕྱིས་ཉིན་པར་དགོངས་པ་ཞིག་བཏང་བས་རྒྱལ་པོ་ཆུང་མར་བཅས་པ་ནད་ཀྱིས་བཏབ། ཡང་བློན་པོ་མུ་སྟེགས་ལ་དགའ་བ་ཞིག་དང༌། སློབ་དཔོན་ལམ་དུ་མཇལ་བས། བློན་པོ་ན་རེ། རྒྱལ་པོ་


TNT17_Page_0098
[མ་དཔེ་གཟིགས་ན་འདིར་གནོན།]

ལ་ངན་ཐབས་བྱས་པས་ཁྱོད་ལ་ཆད་པས་གཅོད་ཟེར་བ་ལ། སློབ་དཔོན་གྱིས་མཆན་ཁུང་ནས་རས་ལ་བྲིས་པའི་ལིང་ག་ཞིག་བཏོན་ཏེ། ངན་པ་དེ་ད་རུང་མ་ཤིའམ་གསུང་ནས་ལིང་ག་དེ་ཕྱེད་མར་བཤགས་པས། རྒྱལ་པོ་ལུས་ཚལ་པར་གས་ནས་ཤ། བློན་པོ་དེ་ལ་སྔགས་བཏབ་པས་རེངས། ཡང་མུ་སྟེགས་ཀྱི་སློབ་དཔོན་ས་ག་ར་ནནྡ་ཞེས་བྱ་བ་ཞིག་ཡོད་པ་ལས། དེས་ཕྲ་མེན་མའི་རིག་སྔགས་མང་པོ་བསྒྲུབས་ཏེ། སངས་རྒྱས་པ་མང་པོ་ལ་གནོད་པ་བྱེད་པ་ཞིག་ཡིན་པ་ལས། ལན་ཅིག་ལམ་སྲང་དོག་པོ་ཞིག་ཏུ་སློབ་དཔོན་དང་འཕྲད་པས། ལམ་བཟུར་རེས་མ་བྱུང༌། དེར་མུ་སྟེགས་ན་རེ། ནང་པར་ཁྱེད་རྣམས་མ་ཤི་ན་ཁོ་བོ་ཅག་གི་ལུགས་མི་བདེན་ཞེས་ངན་སྔགས་ཀྱི་དུས་བཏབ་ནས་སོང༌། ནམ་སྲོད་ཀྱི་དུས་སུ་སོང་བ་ན། སློབ་དཔོན་གྱི་གནས་རྣམས་སུ་ཐུག་ཚོམ་ཆེན་པོ་བྱུང༌། སློབ་དཔོན་གྱིས་དགོངས་པ་ལ་མཉམ་པར་བཞག་པས། མུ་སྟེགས་དེ་རྣམས་ཉིད་ཀྱི་ལྷ་ཁང་སྤྱིལ་པོ་དང་བཅས་པ་ཐམས་ཅད་ཞིག་སྟེ། དེར་ས་ག་ར་འཁོར་དང་བཅས་པ་ཡང་དེ་ཉིད་དུ་དུས་གཅིག་ལ་ཤ། དུས་དེའི་ཚེ་ས་ག་ར་ནི་མུ་སྟེགས་ཀྱི་སྔགས་མཁན་ཐམས་ཅད་ཀྱི་གཙོ་བོ་ཡིན་ནོ། །སློབ་དཔོན་དེས་སྨན་པ་ཞབས་ལ་གདམས་ཏེ། སློབ་དཔོན་དེ་ནི་མཐའ་འཁོབ་ཞིག་ཏུ་བྲམ་ཟེའི་རིགས་སུ་སྐྱེས་ནས། མུ་སྟེགས་ཀྱི་ཆོས་ལུགས་ལ་མཁས་ཤིང་ནུས་པ་ཡང་གྲུབ་པ་ཡིན་པ་ལ། ཕྱིས་སངས་རྒྱས་ཀྱི་བསྟན་པ་ལ་དད་ནས། ཡུལ་དབུས་ནཱ་ལེནྡྲར་སློབ་དཔོན་མར་མེ་མཛད་བཟང་པོ་དང༌། མར་མེ་མཛད་བཟང་པོའི་ཡང་བླ་མ་དཔལ་སངས་རྒྱས་ཡེ་ཤེས་གཉིས་ལ་ཕ་རོལ་ཏུ་ཕྱིན་པ་ནས་བརྩམས་ཏེ།


TNT17_Page_0099
[མ་དཔེ་གཟིགས་ན་འདིར་གནོན།]

གསང་སྔགས་ཕྱི་ནང་གི་བར་གྱི་ཐོས་པས་རྒྱུད་སྦྱངས། དབང་བསྐུར་ཞིང་གདམས་པ་མཐའ་དག་གནང༌། ཁྱད་པར་འདུས་པ་དང་ཧེ་རུ་ཀའི་དཀྱིལ་འཁོར་དུ་དབང་བསྐུར་བའི་ཚེ། མེ་ཏོག་ཁྲོ་བོ་ཧཱུཾ་མཛད་ལ་ཕོགཡུན་རིང་དུ་བསྒོམས་པས་རིམ་གཉིས་ཀྱི་ཏིང་ངེ་འཛིན་ཁྱད་པར་ཅན་སྐྱེས། ཁྱད་པར་ཟླ་བ་དྲུག་ཏུ་སྒྲུབ་པ་བྱས་པས་དངོས་གྲུབ་ཐོབ་པར་ཤེས་ནས། དེའི་སྒྲུབ་པའི་རྟེན་དུ་གདོལ་བའི་བུ་མོ་ཨུཏྤལ་སྔོན་པོའི་ཁ་དོག་ལྟ་བུ་རྡོ་རྗེའི་རིགས་ཀྱི་ཕྱག་རྒྱའི་མཚན་ཉིད་ཚང་བ་ཞིག་དགོས་པ། ཕྱོགས་ཞིག་ནས་བཙལ་བས་རྙེད་ནས། ཕ་མ་ལ་བསླངས་པས། དེ་རྣམས་ན་རེ། བྲམ་ཟེའི་སློབ་དཔོན་ཁྱོད་སྨྱོ་བ་ཡིན་ནམ། ངེད་གདོལ་པའི་རིགས་ཡིན་པས། ཁྱོད་ཉིད་དང་ངེད་རྣམས་ལ་ཡང་ཆད་པ་མི་འོང་ངམ་ཟེར་བ་ལ། ང་ལ་སྒྲུབ་པའི་རྟེན་དུ་དགོས་པས། ཐ་མལ་གྱི་རིགས་ཉམས་པ་སོགས་ཀྱི་ཆད་པ་མི་འོང་བྱས་པས། འོ་ན་བུ་མོའི་ལུས་དང་མཉམ་པའི་གསེར་དང་དངུལ་དགོས་ཟེར། དེར་སློབ་དཔོན་གྱིས་སྐད་ཅིག་ལ་ས་འོག་གི་གཏེར་ཕྱུང་སྟེ། དེ་རྣམས་ལ་བྱིན། དེ་ནས་སློབ་དཔོན་ཕྱག་རྒྱར་བཅས་པ་རི་ཕུག་ཅིག་ཏུ་ཟླ་བ་དྲུག་སྒྲུབ་པ་བྱས་པས་ཡར་ངོའི་ཚེས་བརྒྱད་ཀྱི་ཐོ་རངས་ཀྱི་དུས་སུ་ནམ་མཁའ་ལ་ཧཱུཾ་གི་སྒྲ་ཆེན་པོ་གྲགས། དཔལ་ཧེ་རུ་ཀ་ལ་སོགས་པ་དཀྱིལ་འཁོར་ཐམས་ཅད་ཀྱང་མངོན་སུམ་དུ་མཐོང༌། ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕང་ཡང་ཐོབ། འདུས་པ་གཙོ་བོར་གྱུར་པའི་ལམ་གྱིས་འགྲོ་བ་མང་པོ་ལ་ཕན་བཏགས། བསྟན་བཅོས་ཀྱང་མང་དུ་མཛད་ནས། མཐར་སྐུ་ལུས་དེ་ཉིད་ཀྱིས་སངས་རྒྱས་མི་འཁྲུགས་པའི་ཞིང་དུ་ཁྱུང་གི་རྒྱལ་པོ་འཕུར་བ་


TNT17_Page_0100
[མ་དཔེ་གཟིགས་ན་འདིར་གནོན།]

ལྟར་བཞུད་དོ། །འདི་རྙིང་མ་བ་ལ་གྲགས་པའི་སློབ་དཔོན་ཧཱུཾ་ཀ་ར་དང་གཅིག་པར་གྲགས། དེ་ལྟ་ན་འཁྲུངས་ཡུལ་བལ་པོ་ཡིན། རྒྱལ་པོ་སད་ན་ལེགས་ཀྱི་དུས་བོད་དུ་ཡང་བྱོན་པར་རིག་གོ །དེ་ལ་སློབ་དཔོན་ཨ་བ་དྷུ་ཏི་པ་ཞེས་བྱ་བ་ཞིག་གིས་ཞུས། དེ་ལ་རཏྣ་ཨཱ་ཀ་ར་ཤཱནྟི་པས་ཞུས། དེ་ལ་རྡོ་རྗེ་གདན་པ་ཆེན་པོས་ཞུས། དེ་ལ་ཀུ་ས་ལི་པས་ཞུས་པའི་བརྒྱུད་པའང་ཡོད་གསུང༌། འོན་ཀྱང་བཀའ་བབས་གཙོ་བོར་གྱུར་པ་ན། སྨན་པ་ཞབས་ལ་ཨོ་རྒྱན་གྱི་སློབ་དཔོན་སངས་རྒྱས་དཔལ་ཞི་བས་ཞུས། དེ་ལ་རྡོ་རྗེ་གདན་པ་ཆེན་པོས་ཞུས། དེ་ལ་རྡོ་རྗེ་གདན་པ་ས་སཽ་རི་པ་ཡང་ཟེར། རཏྣ་ཨཱ་ཀ་ར་གུཔྟ་ཡང་ཟེར། རྡོ་རྗེ་གདན་པ་བར་པས་ཞུས། ཡང་སློབ་དཔོན་ཆེན་པོ་སངས་རྒྱས་ཡེ་ཤེས་ཞབས་ཀྱིས་སློབ་དཔོན་ཆེན་པོ་པདྨ་འབྱུང་གནས་ལ་བཤད། འདི་ལ་པདྨ་བཛྲ་ཕྱི་མའམ་ཆུང་བར་གྲགས། རྣམ་ཐར་རྒྱས་པ་ལོགས་སུ་ཡོད་པ་ལས་ཤེས་སོ། །པདྨ་པ་ཆེ་ཆུང་དུ་གྲགས་པ་ནི་དུས་སྔ་ཕྱི་ལ་བཏགས་པ་ཡིན་ནོ། །སློབ་དཔོན་དེས་ཀཱ་མ་རུའི་ཡུལ་གྱི་ཨ་བ་དྷཱུ་ཏཱིའི་རྣལ་འབྱོར་པ་རཏྣ་ཤཱི་ལ་ཞེས་བྱ་བ་ལ་གདམས། དེ་ལ་ཀ་ཡསྠ་བྲིདྡྷ་སྟེ། ཡིག་མཁན་རྒན་པོ་ཞེས་བྱ་བས་ཞུས་ཏེ། སློབ་དཔོན་ཀ་ཡསྠ་བགྲེས་པོ་དེ་ན། རྒྱལ་པོ་དྷརྨ་པཱ་ལའི་ཡིག་མཁན་ཡིན་པ་ལ། ལོ་བརྒྱད་ཅུ་ལོན་ནས་ནཱ་ལེནྡྲར་རབ་ཏུ་བྱུང༌། གསུང་རབ་བསླབས་པས། དེ་དང་ཉེ་བ་ན་རྒྱལ་པོ་མ་ཧི་པཱ་ལས་ལམ་དུ་འགྲོ་བ་མཐོང་སྟེ། ཤིང་གི་ཡལ་ག་སྐམ་པོ་ཞིག་སློབ་དཔོན་ལ་བསྟན་ཏེ། ཁྱོད་ཀྱི་སྡེ་སྣོད་རྣམས་ཤེས་པའི་ཚེ། ཤིང་འདི་ལའང་མེ་ཏོག་འབྱུང་ངེས་ཞེས་དཔྱས་སོ། །སློབ་དཔོན་གྱིས་བསམས་པ།


TNT17_Page_0101
[མ་དཔེ་གཟིགས་ན་འདིར་གནོན།]

དེ་ནི་སྒྲུབ་པ་བྱའོ་སྙམ་ནས། ཀཱ་མ་རུའི་ཨ་བ་དྷཱུ་ཏཱི་པ་ལ་གསང་བ་འདུས་པ་འཇམ་པའི་རྡོ་རྗེའི་དཀྱིལ་འཁོར་དུ་དབང་བསྐུར་ཞུས་ནས་བསྒོམས་པས། ལོ་གསུམ་ནས་བསྐྱེད་རིམ་གྱི་ལམ་མཐའ་དག་རྫོགས། ཆུ་གླིང་ཞིག་ཏུ་མཎྜལ་བྱས་ནས་སྒྲུབ་པ་མཛད་པས། ཞག་བདུན་སོང་བའི་ཐོ་རངས་འཇམ་པའི་རྡོ་རྗེ་རྨ་བྱ་ལ་ཆིབས་པ་མངོན་སུམ་དུ་ཞལ་བསྟན་ནས་བྱིན་གྱིས་བརླབས་པས། ཆོས་ཐམས་ཅད་ཀྱང་སྐད་ཅིག་གིས་ཤེས། དངོས་གྲུབ་ཀྱང་ཐོབ་པར་གྱུར། རྒྱལ་པོའི་དྲུང་དུ་སོང་སྟེ། ངས་ནི་སྡེ་སྣོད་གསུམ་ཤེས་ན། རྒྱལ་པོས་སྔར་གྱི་ཤིང་དེ་ལ་མེ་ཏོག་སྟོན་དགོས་བྱས་པས། རྒྱལ་པོ་ཡང་ངོ་མཚར་སྐྱེས་ནས་བླ་མར་བཟུང༌། སློབ་དཔོན་དེས་གསང་སྔགས་ཀྱི་ལྷ་ཁང་ཡང་མང་དུ་བཞེངས། གཙོ་བོར་བསྐྱེད་རིམ་དང་སྒྲུབ་ཐབས་བཤད། ཀྱཻ་རྡོ་རྗེའི་འགྲེལ་པ་ཁ་སྦྱོར་དྲི་མེད་མཛད་མཁན་དེ་ཡིན་ནོ། །འགྲེལ་པ་འདི་ལ་སྔ་འགྱུར་ཁྱུང་པོ་རྣལ་འབྱོར་གྱིས་ཞུས་ནས། གླན་དར་མ་བློ་གྲོས་ཀྱིས་བསྒྱུར་བ་ལ་མཛད་བྱང་ལ་ཡང་ཀ་ཡསྠ་བགྲེས་པོས་མཛད་ཅེས་འབྱུང་ལ། ཤོང་བློ་བརྟན་གྱི་འགྱུར་ལ་ནི་ཌཾ་ག་ད་ཤས་མཛད་ཅེས་འབྱུང་སྟེ། སློབ་དཔོན་གཅིག་པོ་དེའི་མཚན་གྱི་རྣམ་གྲངས་ཡིན་པར་སེམ་མོ། འགྲེལ་པ་དེ་ནི་སློབ་དཔོན་དེའི་གསུང་རྒྱུན་སློབ་མས་བཀོད་པ་ཡིན་ནམ་སེམས། འདི་དང་སློབ་དཔོན་བྷ་བ་སྐནྡྷ་གཅིག་པར་གྲགས་སོ། །སློབ་དཔོན་དེས་དུར་ཧ་རི་ཞེས་བྱ་བ་ལ་བཤད། དེས་རྡོ་རྗེ་གདན་པ་སྔ་མ་ལ་བཤད། དེ་ལ་རྡོ་རྗེ་གདན་པ་བར་བས་ཞུས་སོ། །སློབ་དཔོན་རྡོ་རྗེ་གདན་པ་ཆེན་པོ་ན། ཡུལ་མ་ལ་བར་སྐུ་འཁྲུངས།


TNT17_Page_0102
[མ་དཔེ་གཟིགས་ན་འདིར་གནོན།]

རིགས་བྲམ་ཟེ་རིག་པའི་གནས་ཐམས་ཅད་ལ་ཤིན་ཏུ་མཁས། ཕྱིས་ནཱ་ལེནྡྲར་རབ་ཏུ་བྱུང༌། གསང་སྔགས་ཕྱི་ནང་ཐམས་ཅད་ལ་མཁས་ཤིང༌། ཁྱད་པར་གདམས་ངག་ཤིན་ཏུ་ཆེ། བྱང་ཆུབ་ཀྱི་ཐུགས་འབྱོངས་པས། མ་ག་ཏ་པ་ལ་ཤིན་ཏུ་བཀྲ་ཤིས་ཤིང་འགྲོ་དོན་ཆེ་བ་བྱུང༌། ཨ་ཏི་ཤ་བཞུགས་པའི་དུས་ཙམ་ན་རྡོ་རྗེ་གདན་གྱི་མཁན་པོར་མངའ་གསོལ་བ་ཡིན་ནོ། །ཕྱིས་བི་ཀྲ་མ་ཤཱི་ལའི་མཁན་པོ་ཡང་མཛད། དེའི་སློབ་མ་རྡོ་རྗེ་གདན་པ་པར་པ་རཏྣ་ཨཱ་ཀ་ར་གུཔྟ་ན། ཤར་ཕྱོགས་གཽ་རའི་ཡུལ་དུ་འཁྲུངས། རིགས་ནི་བྲམ་ཟེ། ཆུང་ངུ་ནས་མདོ་སྔགས་ཐམས་ཅད་ལ་མཁས་ཤིང༌། བསྙེན་པ་ཡང་གྲུབ་པས། རྡོ་རྗེ་སློབ་དཔོན་དུ་བྱེད་ཅིང༌། རྟེན་དགེ་བསྙེན་ཡིན་ཡང༌། དགེ་སློང་མང་པོས་མཐའ་བསྐོར་ཏེ་ཆོས་སྟོན་ཅིང་ཡུལ་དབུས་སུ་འོངས་པས། རྒྱལ་པོའི་བློན་པོ་དད་པ་ཅན་ཞིག་ན་རེ། ཁྱེད་དགེ་སློང་གྱིས་ཤིག །གཞན་དུ་ན་དགེ་སློང་སྡེ་སྣོད་གསུམ་པས་དགེ་བསྙེན་ལ་ཕྱག་འཚལ་བ་འད། བསྟན་པ་ལ་གནོད་པ་ཡིན་ཟེར། ང་ལ་མ་རྒན་མོ་ཞིག་གསོ་དགོས་པ་ཡོད་པས། དགེ་སློང་མི་བྱེད་བྱས་པས། དེས་མའི་འཚོ་བ་ལ་གསེར་སྲང་དྲུག་ཅུ་བྱིན། དེ་ནས་སློབ་དཔོན་བི་ཀྲ་མ་ལ་ཤཱི་ལར་དགེ་སློང་མཛད། དེར་པཎྜི་ཏ་དང་རྣལ་འབྱོར་པ་གདམས་ངག་ཆེ་ཚད་ལ་གཏུགས། སློབ་དཔོན་རྡོ་རྗེ་གདན་པའི་དབང་རྒྱུད་གདམས་ངག་ཐམས་ཅད་ཀྱང་ཐུགས་སུ་ཆུད། ཕྱིས་རྡོ་རྗེ་གདན་གྱི་མཁན་པོ་རྒྱུན་རིང་དུ་མཛད། དེ་ནས་ལྷོ་ཕྱོགས་ཀྱི་རྒྱུད་དུ་འབྱོན་པར་བཞེད་ནས། དཔོན་སློབ་སུམ་ཅུ་ཙམ་གྱིས་སཽ་རིར་བྱོན། སཽ་རིའི་རྒྱལ་པོའི་རྨི་ལམ་དུ་རྡོ་རྗེ་གདན་གྱི་མཧཱ་


TNT17_Page_0103
[མ་དཔེ་གཟིགས་ན་འདིར་གནོན།]

བོ་དྷིའི་ཞལ་ནས། ངའི་བསྟན་པ་ལྷོ་ཕྱོགས་སུ་མ་གཏོང་ཞེས་གསུང་བ་རྨིས་པ་ལ། ནང་བར་སློབ་དཔོན་འཁོར་བཅས་ལྷོ་ཕྱོགས་སུ་འབྱོན་པའི་པོ་ཏི་དང༌། སྐུ་གཟུགས་སོགས་གདན་འདྲེན་པའི་འུ་ལག་དགོས་ཞེས་བྱུང་བས། རྨི་ལམ་གྱི་དོན་གོ་ནས། དེར་རྒྱལ་པོས་བཞུགས་པར་ཡང་ཡང་གསོལ་བ་བཏབ་པས། སློབ་དཔོན་ཤིན་ཏུ་ཐུགས་རྗེ་ཆེ་བས་སཽ་རི་ཉིད་དུ་བཞུགས་པས་མཚན་ཡང་སཽ་རི་པར་གྲགས། སློབ་དཔོན་འདི་ཡང་བསྐྱེད་རིམ་མཐར་ཕྱིན། ཡི་དམ་གྱི་ལྷ་མང་པོའི་ཞལ་མཐོང༌། ཁྱད་པར་རྒྱ་གར་གྱི་ཡུལ་རང་ན་གདམས་ངག་ཆེ་བར་བྱེད། དེས་སློབ་དཔོན་འཇིགས་མེད་འབྱུང་གནས་ལ་གདམས་པ་ཡིན། དེས་ཤུ་བྷཱ་ཀ་ར་གུཔྟ་ལ། དེས་ད་ཤཱ་པཱ་ལ་ལ། དེས་རྣལ་འབྱོར་པ་བཛྲ་ཤྲཱི་ལ། དེས་རྩོད་པའི་དུས་ཀྱི་སློབ་དཔོན་ཐམས་ཅད་མཁྱེན་པར་གྲགས་པ་ཆོས་འབྱུང་དཔལ། དེས་སངས་རྒྱས་གྲགས་པ་ལ། དེས་རིན་ཆེན་གྲགས་པ། དེས་རཱ་ཏི་གུཔྟ་ལ་གདམས་ཏེ། དེ་དག་གི་བར་གྱི་ལོ་རྒྱུས་རྒྱས་པར་མི་གསུང༌། རིན་པོ་ཆེའི་འབྱུང་ཁུངས་ལྟ་བུའི་གཏམ་ལས། བསྐྱེད་རིམ་བརྒྱུད་པའི་གཏམ་གྱི་སྐབས་ཏེ་དྲུག་པའོ།། །། བཀའ་བབས་དྲུག་པ་ནི་ཚིག་གི་བརྒྱུད་པ་ཡིན་ཏེ། དེ་ཡང་ཚིག་གི་བརྒྱུད་པ་བྱས་ཀྱང༌། རྒྱུད་ཀྱི་བཤད་པའི་བརྒྱུད་པ་ཡིན་གསུང༌། དེ་ལ་རྒྱུད་མང་པོ་ཞིག་གི་བཤད་བཀའ། ནཱ་རོ་པ་དང༌། མཻ་ཏྲི་པ་གཉིས་ལ་བཞུགས། ཡང་འགའ་ཞིག་ནི་ཀླུ་སྒྲུབ་ཀྱིས་ཨཱརྱ་དེ་བ་ལ་བཤད། དེས་སྒྲ་གཅན་འཛིན་ལ་བཤད། དེས་ཟླ་བ་གྲགས་པ་ལ་བཤད། དེས་འོད་ཟེར་


TNT17_Page_0104
[མ་དཔེ་གཟིགས་ན་འདིར་གནོན།]

འབྱུང་གནས་ལ་བཤད། དེས་ཡེ་ཤེས་གྲགས་པ་ལ་བཤད། དེས་ཤཱནྟི་པ་ལ་བཤད། ཡང་རྒྱུད་ཀྱི་བཤད་པ་མང་པོ་ཞིག་ནི་འཇམ་དཔལ་བཤེས་གཉེན་གྱིས། བྲམ་ཟེ་ཡེ་ཤེས་རྡོ་རྗེ་ལ་བཤད་ནས་དེ་ལས་བརྒྱུད་པ་དང༌། བྱང་ཆུབ་རྡོ་རྗེ་ལས་བརྒྱུད་པ་དང༌། ཡང་དཔལ་ཡེ་ཤེས་ཞབས་ཀྱིས་རབ་ཞི་བཤེས་གཉེན་ལ་བཤད། དེས་དཔལ་སྡེ་དང༌། ཙི་ལུ་བ་དང༌། ནག་པ་སྐྱེས་དང༌། སྨན་པ་ཞབས་ཏེ་བཞི་ལ་བཤད། དེ་ལ་བཞི་ལ་འཇམ་དཔལ་ཡེ་ཤེས་ཀྱིས་ཞུས། དེ་ལ་དོན་ཡོད་རྡོ་རྗེ་ཆེན་པོས་ཞུས། དེ་ལ་སིདྡྷི་བི་རས་ཞུས། དེ་ལ་ཨ་ཏི་ཤས་ཞུས། དེ་ལ་བཤེས་གཉེན་གསང་བས་ཞུས། དེ་ལ་རྡོ་རྗེ་གདན་པ་ཆེ་བས་ཞུས་པའི་སྐོར་དང༌། ཡང་མང་པོ་ཞིག་ན། ཙི་ལུ་པ། ཐ་ག་ན། ཤནྟི་པ། ཛྙཱ་ན་ཤྲཱི་མི་ཏྲ། ཇོ་བོ་རྗེ། རྡོ་རྗེ་གདན་པ་སྔ་ཕྱི་རྣམས་ནས་བརྒྱུད་པའང་ཡོད་ལ། ཡང་སློབ་དཔོན་ལ་ལི་ཏ་བཛྲ་སྟེ་རོལ་བའི་རྡོ་རྗེས་ཨོ་རྒྱན་ནས་རྒྱུད་མང་པོ་སྤྱན་དྲངས། སློབ་དཔོན་ལི་ལ་བཛྲ་ལ་བཤད། དེས་འཇམ་དཔལ་ཡེ་ཤེས་ལ་བཤད། སློབ་དཔོན་འདིས་རྡོ་རྗེ་འཇིགས་བྱེད་ཀྱི་རྣལ་འབྱོར་གྱིས་བརྡུང་སྟངས་བྱས་པས་སྟག་གཟིག་གི་རྒྱལ་པོ་གླང་པོ་ཆེ་དང་བཅས་པ་ཕྱེད་མར་སོང་བའི་གཏམ་རྒྱུད་ཡོད། དེས་ནི་དོན་ཡོད་རྡོ་རྗེ་ཆེན་པོ་ལ་གདམས་པ་ཡིན་ནོ། །ཡང་སློབ་དཔོན་སྤྱོད་པ་པ་དང༌། སློབ་དཔོན་བྲམ་ཟེ་དཔལ་འཛིན་ཞེས་བྱ་བ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ། ལྷོ་ཕྱོགས་བཻ་དརྦྷ་ན་དགེ་སློང་སྡེ་སྣོད་གསུམ་པ་ཆོས་སྨྲ་བ་ཆེན་པོ་ཞིག །མུ་སྟེགས་ཀྱི་རྒྱལ་པོ་གཅིག་གིས་མགོ་གཅོད་པར་རྩོམ་པ་


TNT17_Page_0105
[མ་དཔེ་གཟིགས་ན་འདིར་གནོན།]

ལ། སློབ་དཔོན་རྒྱལ་པོའི་དྲུང་དུ་བྱོན་ཏེ། འདི་མགོ་མ་གཅོད་བྱས་པས། འོ་ན་ཁྱོད་རང་གི་མགོ་སླུས་མར་ཐོང་ཟེར་བས། སློབ་དཔོན་གྱིས་དབུ་བཅད་ནས་བྱིན། དེར་མ་ཧའི་མགོ་ཅིག་བསླན་པས་འབྱར་བའི་ཆོ་འཕྲུལ་བསྟན། སློབ་དཔོན་མ་ཧེའི་དབུ་ཅན་དུ་གྲགས་སོ། །དེས་ཧ་རི་ཀེ་ལ་ལ་གདམས། འདིས་ནི་ཕྱག་རྒྱ་བྱི་ལར་བསྒྱུར་བས། བྷི་ར་ཌི་བ་ཞེས་གྲགས། དེས་ཀྱང་འཇམ་དཔལ་ཡེ་ཤེས་ལ་གདམས་སོ། །ཡང་རྒྱུད་ཁ་ཅིག་ནི་སློབ་དཔོན་ཀུ་ཀུ་རི་པས་སྤྱན་དྲངས་པ་ཡིན་ཏེ། དེ་ཡང་ཤར་ཕྱོགས་བྷང་ག་ལའི་ཡུལ་དུ་འཁྲུངས། ནཱ་ལེནྡྲའི་པཎྜི་ཏ་དགེ་སློང་ཞིག་ཡིན་པ། ནགས་ཚལ་དབེན་པ་ཞིག་ཏུ་རྩེ་གཅིག་ཏུ་བསྒོམས་པས། དེར་ཐུན་མོང་གི་དངོས་གྲུབ་མང་པོ་ཡང་ཐོབ། བསྐྱེད་རིམ་ཡང་བརྟན་པར་གྱུར། ནང་གཅིག་ཕུག་པའི་ནང་དུ་ཁྱི་གུ་མོ་ཞིག་བྱུང༌། ཉིན་ཞག་འགའ་རེ་ཟས་ཀྱིས་གསོ་ཞིང་ཡོད། དེར་ལྷ་རྣམས་ཀྱིས་སློབ་དཔོན་སྤྱན་དྲངས་ཏེ་སུམ་ཅུ་རྩ་གསུམ་དུ་འདུག་པ་ལ། ཇི་ཞིག་ན་སྔར་གྱི་ཁྱི་གུ་དེ་དྲན་ཏེ། ལྷ་རྣམས་ལ་ང་འཛམ་བུ་གླིང་དུ་འགྲོ་བྱས་པས། ཅི་ཡིན་ཟེར། ཁྱི་གུ་དེ་ལྟོགས་ཏེ་འཆི་བ་ཡོད་བྱས་པས། ལྷ་རྣམས་ན་རེ། ཁྱེད་ཡུན་རིང་དུ་ཏིང་ངེ་འཛིན་བསྒོམ་ན། ད་དུང་ཡང་ཁྱི་གུའི་རྣམ་རྟོག་ཀྱང་མ་ཞིའམ་ཞེས་ཟེར་བས། བདེན་སྙམ། སློབ་དཔོན་གྱིས་ལོ་བཅུ་གཉིས་ལྷའི་གནས་སུ་བཞུགས། དེ་ནས་རང་གི་གནས་སུ་འོངས་པ་ན། སྔར་གྱི་ཁྱི་གུ་དེ་ནི་ཆེ་རུ་མ་སོང་པར་འདུག་སྐད། བྲག་གི་ཕུག་ལ་ཁྱིས་གྲུས་པས་ཆུ་མིག་ཀྱང་བརྡོལ་སྣང་བ། ཁྱི་གུ་ལག་ཏུ་བླངས་པས་


TNT17_Page_0106
[མ་དཔེ་གཟིགས་ན་འདིར་གནོན།]

བུད་མེད་རྒྱན་ཐམས་ཅད་ཀྱིས་བརྒྱན་པ་ཅིག་ཏུ་གྱུར་སྐད། དེ་ནི་རྡོ་རྗེའི་རྣལ་འབྱོར་མ་ཡིན་ཏེ། དེ་དང་ལྷན་ཅིག་ཏུ་སྤྱོད་པ་སྤྱོད་ཅིང༌། སྐྱེ་བོའི་མངོན་དུ་ཁྱི་མོར་སྤྲུལ་པས། སློབ་དཔོན་ཀུ་ཀུ་རི་པ་ཞེས་གྲགས། དེས་མཁའ་འགྲོ་མའི་གནས་ལས་རྒྱུད་མང་དུ་སྤྱན་དྲངས། པདྨ་བཛྲ་ཞེས་པ་ལ་བཤད། དེས་ཏིལླི་པ་ལ། དེས་ནཱ་རོ་པ་ལ། དེས་ཤནྟི་པ་ལ། སློབ་དཔོན་དེ་ན། མ་ག་དྷུའི་ཡུལ་དུ་བྲམ་ཟེའི་རིགས་ལས་འཁྲུངས་ཏེ། རིག་བྱེད་དང༌། རིག་བྱེད་ཀྱི་ཡན་ལག་རྣམས་དང༌། བརྟག་པ་བརྒྱད་ལ་སོགས་པ་ལ་ཆུང་ངུ་ནས་མཁས་པར་སྦྱངས་སོ། ཁ་ཅིག་རྗེ་རིགས་སུ་འདོད་པའང་ཡོད་གསུང༌། ཨོ་ཏནྟ་པུ་རིར་ཐམས་ཅད་ཡོད་སྨྲའི་སྡེ་ལ་རབ་ཏུ་བྱུང༌། ཉན་ཐོས་ཀྱི་སྡེ་སྣོད་གསུམ་པོ་ཐམས་ཅད་ཐུགས་སུ་ཆུད། བི་ཀྲ་མ་ཤཱི་ལར་བྱོན་ཏེ། ཛེ་ཏ་རི་ཆེན་པོ་ལ་སོགས་པ་མཁས་པ་མང་པོ་ལ་ཐེག་པ་ཆེན་པོའི་མདོ་དང་བསྟན་བཅོས་ཕལ་ཆེར་གསན། གནས་བརྟན་སློབ་དཔོན་ཆེན་པོར་གྱུར་ཏེ། སོ་མ་པུ་རིའི་མཁན་པོར་ཡང་མངའ་གསོལ། ལོ་འགའ་གཙུག་ལག་ཁང་དེ་ཉིད་ཀྱི་གནས་བརྟན་མཛད་དོ། །དེ་ནས་རིན་ཆེན་གྲགས་པ་དང༌། ནག་པོ་དམ་ཚིག་རྡོ་རྗེ་དང༌། ཐ་ག་ན་ལ་སོགས་པ་བླ་མ་མང་པོ་བསྟེན་ཅིང༌། རྒྱུད་བརྒྱ་རྩ་གསན་ཅིང་ཐུགས་ལ་བཞུགས་པར་གྲགས་སོ། །དེ་ནས་མ་ལ་བར་ཕེབས་ཏེ། ལོ་བདུན་དུ་ཐུགས་དམ་ལ་བཞུགས་པས། འཇམ་དབྱངས་དང༌། སྒྲོལ་མ་དང༌། མི་ཕམ་མགོན་པོ་རྣམས་ཀྱི་ཞལ་གཟིགས་ཤིང༌། དམ་པའི་ཆོས་ཀྱི་བདུད་རྩི་གསོལ་བ་ལས། དེ་ཀུན་ཡང་ཐོགས་མེད་ཀྱི་གཞུང་ལུགས་དང་མཐུན་པར་གསུང་བ་བྱུང་བས། སློབ་དཔོན་


TNT17_Page_0107
[མ་དཔེ་གཟིགས་ན་འདིར་གནོན།]

འདི་འཕགས་པ་ཐོགས་མེད་ཀྱི་ལུགས་མཐར་ཐུག་ཏུ་མཛད་དོ། །དེ་སྐབས་སློབ་དཔོན་གྱི་མནལ་ལམ་དུ་འཕགས་མ་སྒྲོལ་མས། སིང་གའི་གླིང་དུ་བཞུད་ཅིག་པར་ལུང་བསྟན་ཏོ། །སིང་ག་ལའི་རྒྱལ་པོའི་རྨི་ལམ་དུ་ཡང༌། འཛམ་བུའི་གླིང་ན་སློབ་དཔོན་རིན་ཆེན་འབྱུང་གནས་ཞི་བ་ཡོད་པས། དེ་སྤྱན་དྲོངས་ཤིག ཁྱོད་ཀྱི་ཡུལ་དུ་ཐེག་པ་ཆེན་པོ་དར་བར་འགྱུར་རོ། །ཞེས་ལུང་བསྟན་པ་བྱུང་བས། སློབ་དཔོན་བྷང་ག་ལར་ཕེབས་པ་དང༌། སིང་ག་ལའི་ཕོ་ཉས་བྷང་ག་ལར་སླེབས་པ་དུས་མཚུངས་བྱུང༌། ཐེག་པ་ཆེན་པོའི་མདོ་སྡེ་ཉིས་བརྒྱ་ཙམ་སྤྱན་དྲངས་ཏེ། སིང་ག་ལར་ལོ་བདུན་ཆོས་གསུངས། ཐེག་པ་ཆེན་པོའི་དགེ་འདུན་ལྔ་བརྒྱ་ཙམ་བྱུང༌། མདོ་སྡེ་དེ་དག་ཤིན་ཏུ་དར་བར་གྱུར་ཏོ། །དེ་སྔོན་སིང་ག་ལར་གྲུབ་ཆེན་ནི་མང་དུ་བྱོན་མོད་ཀྱ། དགེ་འདུན་ཐམས་ཅད་ཉན་ཐོས་ཡིན་པར་མངོན་ནོ། །དེ་ནས་འཛམ་བུ་གླིང་དུ་ཕེབས་པའི་ལམ་དུ་རྒྱ་མཚོའི་རླབས་འཁྲུགས་པ་དང༌། གཟིངས་ལ་སྐྱོད་པའི་ཆོམ་རྐུན་བྱུང་བ་རྣམས། སྔགས་བཟླས་པའི་བྱེ་མ་གཏོར་བ་ཙམ་གྱིས་ཆོམ་རྐུན་རྣམས་དབང་དུ་འདུས། རྒྱ་མཚོའི་རླབས་ཞ། དེ་ནས་རྒྱ་གར་ལྷོ་ཕྱོགས་ཀྱི་ཡུལ་ཐ་དད་བརྒྱུད། རིམ་པས་རྡོ་རྗེ་གདན་དུ་ཕེབས། ཕྱིས་རྒྱ་ནག་རི་བོ་རྩེ་ལྔར་སྒྲུབ་པ་ལ་བཞུད་པར་དགོངས་པའི་ཚེ། རྒྱལ་པོའི་རྨི་ལམ་དུ་སངས་རྒྱས་དངོས་དང་མཇལ་བ་ཞིག་རྨི་བ། ནང་པར་སློབ་དཔོན་བྱོན་པས། རྒྱལ་པོས་བི་ཀྲ་མར་བཞུགས་པར་གསོལ་བ་བཏབ་པས། བི་ཀྲ་མ་ཤཱི་ལའི་ཤར་སྒོ་བ་མཛད་པ་ཡིན་ནོ། །ལོ་རྒྱུས་འགའ་ཞིག་ཏུ།


TNT17_Page_0108
[མ་དཔེ་གཟིགས་ན་འདིར་གནོན།]

རྒྱལ་པོ་འདི་མ་ཧི་པཱ་ལ་ཡིན་ཟེར་བ་དང༌། ཁ་ཅིག་ལས་དེའི་ཚ་བོ་རྒྱལ་པོ་ཙ་ན་ཀ་ཡིན་ཟེར་བ་གཉིས་ལས། ཕྱི་མ་དག་པར་མངོན་ནོ། །དེར་མུ་སྟེགས་ཀྱི་པཎྜི་ཏ་ཉིས་བརྒྱ་ཙམ་དང་སྔ་ཕྱིར་རྩོད་པ་མཛད་པས། ཐམས་ཅད་ལས་རྒྱལ་ཏེ། སྙན་པའི་གྲགས་པས་ཕྱོགས་ཐམས་ཅད་དུ་ཁྱབ། སངས་རྒྱས་པའི་ནང་དུ་ཡང་མཁས་པ་ལ་འགྲན་ཟླ་མེད་དེ། རྒྱལ་པོའི་བླ་མར་བཀུར། རྩོད་དུས་ཀྱི་ཐམས་ཅད་མཁྱེན་པ་ཞེས་མཚན་དུ་གསོལ། ལྷ་ཡུལ་ནས་དགྲ་བཅོམ་པ་དངོས་སུ་བྱོན་ནས་ཆོས་ཉན་པར་གྲགས། དེ་ལྟར་ཉིན་མཚན་དུ་དམ་པའི་ཆོས་ཀྱི་བྱ་བས་དུས་འདའ་བར་མཛད་ཅིང༌། ནམ་ཞིག་ན། ནཱ་རོ་པ་ཆེན་པོས་དངོས་གྲུབ་བརྙེས་པས། དེ་ལ་གདམས་པ་ཅུང་ཟད་གསན། དགུང་ལོ་བརྒྱར་ཉེ་བའི་གནས་སྐབས་ཀྱི་ཚེ། ཉན་བཤད་ཀྱི་བྱ་བ་མ་ལྕོགས་ནས། གསོལ་ཟས་རགས་པ་སྤངས་ཏེ། དབེན་པ་ཞིག་ཏུ་བཞུགས་པ་ན། སྔོན་རང་གི་སློབ་མ་ཞིང་པ་ཞིགདུས་དེར་གྲུབ་པ་ཐོབ་ནས་རྫུ་འཕྲུལ་གྱིས་ནམ་མཁའ་ལ་འོངས་ནས་ཕྱག་བྱས་པ་བླ་མས་མ་མཁྱེན། དེ་ནས་ལུས་སྣང་བར་བྱས་ཏེ། སློབ་དཔོན་ཕྱག་འཚལ་ལོ་ཞུས་པས། ཁྱོད་སུ་ཡིན་གསུང༌། དངོས་ཞིང་པ་ཏོག་རྩེ་པ་ལགས་ཞུས་པས། ངས་དེ་ཡང་བརྗེད་ནས་མི་དྲན་མོད་ཀྱ། ད་ཁྱོད་ཀྱི་གདམས་པ་དེ་ང་ལ་བྱིན་ཅེས་གསུང་པས། ཏོག་རྩེ་པ་དེས་གདམས་པ་ཕུལ། དེའི་དོན་བསྒོམས་པས་རྡོ་རྗེ་ཕག་མོས་ཞལ་བསྟན་ཏེ་གྲུབ་པ་ཐོབ་བོ། །དེ་ནས་སྐུ་ལུས་ཀྱང་ཉམས་སྟོབས་དང་ལྡན་པར་གྱུར་ཏེ། སློབ་མ་རྣམས་ལ་ཆོས་ཀྱང་ཅི་རིགས་པར་གསུང་ཞིང་བཞུགས་


TNT17_Page_0109
[མ་དཔེ་གཟིགས་ན་འདིར་གནོན།]

པ་ལས། ལན་ཅིག་སྲོད་ཀྱི་དུས་ན། བུད་མེད་བཞིས་གདན་གྱི་མཐའ་ནས་བཏེག་སྟེ་ཡུད་ཙམ་པ་ཞིག་ལ་ཨོ་རྒྱན་གྱི་གནས་སུ་དངོས་སུ་སྤྱན་དྲངས། ཞག་མང་དུ་བཞུགས་ཏེ་དཔའ་བོ་དང་མཁའ་འགྲོ་མའི་དབུས་སུ་ཚོགས་ཀྱི་འཁོར་ལོ་རྒྱ་ཆེན་པོ་མཛད། རྡོ་རྗེའི་གླུ་མང་དུ་བླངས། ཚོགས་ཀྱི་གཙོ་བོ་རྡོ་རྗེ་ཕག་མོས་མདོ་རྒྱུད་ཀྱི་དགོངས་པ་འགྲེལ་བའི་མཆོག་ཏུ་དབུགས་དབྱུང་བ་མཛད། དེ་སྐབས་མ་ག་དྷའི་སློབ་མ་དང་སྐྱེ་བོའི་ཚོགས་ཀྱིས་སློབ་དཔོན་གར་བྱོན་ཆ་མེད། མི་སྣང་བར་གྱུར་པ་ཡིན་ནམ་སྙམ་སྟེ། དུས་ཀྱི་མཆོད་པ་བྱ་བར་བརྩམས་པ་ལས། སླར་ཡང་ཁྲིའི་སྟེང་དུ་སློབ་དཔོན་ཉིད་གང་ནས་བྱོན་ཆ་མེད་པར་ཕེབས། སློབ་མ་རྣམས་ལ་རྟོགས་པ་བརྗོད་པ་དང༌། ལོ་རྒྱུས་གསུང་བར་མཛད་པས། ཕལ་ཆེར་ངོ་མཚར་དུ་གྱུར་ཅིང༌། འགའ་ཞིག་ཡིད་མ་ཆེས་པར་ཡོད་པ་ལས། དུས་ནམ་ཞིག་ན་ཨོ་རྒྱན་གྱི་མི་མང་པོ་ཞིགརྡོ་རྗེ་གདན་དུ་མཆོད་པ་དང་ཚོང་བྱེད་པ་ལ་བྱུང་བ་ལ། མ་ག་དྷ་པ་རྣམས་ཀྱི་གཏམ་དྲིས་པས། ཨོ་རྒྱན་གྱི་དྷུ་མ་ཥྛི་རར་དངོས་སུ་ཕེབས། ཡུན་རིང་དུ་བཞུགས། ཆོས་ཀྱང་མང་དུ་བསྟན་ཅིང༌། ངེད་རྣམས་ཀྱིས་ཀྱང་ཆོས་ཐོས་ཞེས་ཟེར་བས་རྩོད་མེད་དུ་གྱུར་ཏོ། །དེ་ནས་ཀྱང་འགྲོ་བའི་དོན་ཅི་རིགས་པ་མཛད། དགུང་ལོ་བརྒྱ་བརྒྱད་ལྷག་ཙམ་ན་སྐུ་འདས་ཏེ། སློབ་མ་རྣམས་ཀྱིས་བསིལ་བ་ཚལ་དུ་སྐུ་གདུང་ཞུགས་ལ་བཞེན་པར་བརྩམས་པ་ན། མེ་ཅུང་ཟད་འབར་བ་ན་སྐུ་གདུང་མི་སྣང་བར་གྱུར་སྐད། སློབ་དཔོན་འདིས་རྒྱུད་སྡེ་མང་པོ་ལ་རང་སྟོབས་ཀྱིས་འགྲེལ་པ་མཛད་ཅིང༌།


TNT17_Page_0110
[མ་དཔེ་གཟིགས་ན་འདིར་གནོན།]

འཁོར་ལོ་སྡོམ་པ་ལ་མཛད་པར་རྩོམ་པ་ན། རྡོ་རྗེ་ཕག་མོས་བཀའ་མ་གནང་ངོ༌། །ཨོ་རྒྱན་གྱི་གནས་སུ་ཚོགས་ཀྱི་འཁོར་ལོར་གཤེགས་པ་ན། གྲུབ་ཐོབ་གཞན་ཡང་ལྔ་བཅུ་རྩ་གསུམ་ཙམ་འདུས་ཏེ། དེ་ཐམས་ཅད་དང་ཆོས་ཀྱི་འགྲོ་བ་མཛད་པར་གྲགས་སོ། །ཡང་རྒྱལ་པོ་ཨིནྡྲ་བྷཱུ་ཏི་བར་པས། སློབ་དཔོན་ཀུ་ཀུ་རཱ་ཛ་ཞེས་པ་ཉིན་མོ་ཁྱི་སྟོང་ལ་ཆོས་འཆད་པར་བྱེད་ཅིང༌། མཚན་མོ་དམ་ཚིག་གི་ཀུན་ཏུ་སྤྱོད་པ་ཞིག་ཡོད་དེ། དེ་ལ་སློབ་དཔོན་པདྨ་འབྱུང་གནས་ཀྱིས་ཞུས་པ་སོགས་རྒྱུད་མང་པོའི་བཤད་རྒྱུན་བྱུང་མོད་ཀྱ། ད་ལྟ་ནི་བཀླགས་ལུང་ཙམ་ལས་ཆེར་མེད་གསུང༌། ཡང་འདིར་ཨ་ཏི་ཤའི་ལོ་རྒྱུས་ཀྱང་གྲགས་ཆེ་བས་མ་བཀོད་དོ། །ཡང་དུས་འཁོར་སོགས་རྒྱུད་སྡེ་མང་པོ་ཞིག་ན། སློབ་དཔོན་པི་ཏོ་པ་སྟེ་བསོད་སྙོམས་པ་བྱ་བ་ཞིག་ལ་ཕྱག་ན་རྡོ་རྗེས་ལུང་བསྟན་ཏེ། རྫུ་འཕྲུལ་གྱིས་ཤམ་བྷ་ལར་བྱོན། རྒྱུད་མང་པོ་སྤྱན་དྲངས། རཏྣ་གི་རིར་སློབ་མ་མང་པོ་ལ་བཤད། པི་ཊོ་པ་ཉིད་མཐར་མི་སྣང་བའི་དངོས་གྲུབ་བརྙེས་སོ། །སློབ་མ་དྲུག་ཡོད་པ་ལས། གསུམ་གྱིས་རྡོ་རྗེའི་སྐུ་གྲུབ་སྟེ་མི་སྣང་བར་གྱུར། དགེ་སློང་ཨ་བ་དྷཱུ་ཏཱི་པ་དང༌། བོ་དྷི་ཤྲཱི་དང༌། ནཱ་རོ་པ་གསུམ་གྱིས་དར་བར་མཛད་དོ། །ཡང་ཨ་བ་དྷཱུ་ཏཱི་པས་སཽ་རི་པ་ལ་བཤད་དོ། །དེ་ལ་པི་ཊོ་པ་ནི་རྒྱལ་པོ་མ་ཧི་པཱ་ལའི་དུས་སུ་བྱོན་ཡང༌། ཨ་བྷི་ཡུཀྟ་ཀ་ནས་ཀྱང་བརྒྱུད་དེ། དེ་དག་གི་བརྒྱུད་པ་འདིའི་དབང་དུ་བྱས་པའོ། །དེ་ལྟར་བླ་མ་སྣ་ཚོགས་ལས་བརྒྱུད་ནས་བཤད་པའི་རྒྱུན་དེ་དག་ཐམས་ཅད་སློབ་དཔོན་ཆེན་པོ་སྙིགས་དུས་ཀྱི་སངས་རྒྱས་འཇིགས་མེད་འབྱུང་གནས་སྦས་པ་ལ་མངའོ། །སློབ་དཔོན་དེ་ནི་རྒྱ་གར་ལྷོ་ཕྱོགས་ཨོ་ཌི་བི་ཤ་དང་ཉེ་


TNT17_Page_0111
[མ་དཔེ་གཟིགས་ན་འདིར་གནོན།]

བ་ཛ་རི་ཁཎྜ་ཞེས་བྱ་བར་ཕ་རྒྱལ་རིགས་དང༌། མ་བྲམ་ཟེའི་རིགས་ཏེ། གཞོན་ནུ་ནས་རིག་བྱེད་ཡན་ལག་དང་བཅས་པ་དང༌། སྒྲ་དང་རྟོག་གེ་ལ་ཤིན་ཏུ་མཁས་ཤིང༌། ཆེན་པོར་གྱུར་པ་ན་མུ་སྟེགས་ཀྱི་རྒྱུད་དང་གཞུང་ལུགས་ཐམས་ཅད་མཁྱེན། སྐྱེད་མོས་ཚལ་ཞིག་ཏུ་སྔགས་བཟླ་བཞིན་ཡོད་པ་ན། རང་གི་མདུན་དུ་བུ་མོ་མཛེས་མ་ཞིག་བྱུང༌། ང་གདོལ་པའི་བུ་མོ་ཡིན། ཁྱོད་དང་ལྷན་ཅིག་སྤྱོད་པར་འདོད་ཟེར་བ་ལ། དེ་ལྟར་ག་ལ་རུང་ཞེས་བཟློག་ནས། ང་རིགས་མཐོན་པོར་གྱུར་པ་ཡིན་པས་གྲགས་པ་མ་ཡིན་པ་འབྱུང༌། འདིར་མ་འདུག་བྱས་པས། དེ་ཡང་ཕྱིར་སོང་སྟེ་བརྟགས་པ་ན་སྒོ་རྣམས་རང་གིས་ནང་ནས་བསྡམས་པ་དེ་ཁོ་ན་མ་ཞིག་པར་འདུག་ནས། ལྷ་མོའམ་གནོད་སྦྱིན་མོའམ་སུ་ཡིན་སྙམ་པ་ལས། རང་གི་གྲོགས་མཆེད་སངས་རྒྱས་པའི་རྣལ་འབྱོར་པ་ཞིག་ཡོད་པ་ལ་དྲིས་པས། དེ་ནི་རྡོ་རྗེ་རྣལ་འབྱོར་མ་ཡིན་པ་ལ། དངོས་གྲུབ་མ་བླངས་པ་མ་ལེགས་ཀྱ། ཁྱོད་སངས་རྒྱས་པའི་རིགས་སུ་འདུག་པས། ཤར་ཕྱོགས་སུ་སོང་ལ་སངས་རྒྱས་པ་གྱིས་གསུང་ནས། དེ་བཞིན་དུ་བྱས། བྷང་ག་ལའི་ཡུལ་དུ་མདོ་སྔགས་ཐམས་ཅད་ལ་མཁས་པར་སྦྱངས། སློབ་དཔོན་སོ་སོ་ལ་དབང་བསྐུར་བ་ཡང་མང་དུ་ཞུས། དགེ་སློང་སྡེ་སྣོད་འཛིན་པ་ཆེན་པོར་སོང་ནས། འདུལ་བ་འཛིན་པ་ཐམས་ཅད་ཀྱི་སློབ་དཔོན་དུ་བསྐོས། ལན་ཅིག་ལྷ་ཁང་གི་འཁྱམས་ཅིག་ན་འདུག་པ་ལ། བུ་མོ་གཞོན་ནུ་ཞིག་གིས། བ་གླང་གི་ཤ་ཁྲག་འཛག་པ་ཅིག་ཁྱེར་བྱུང་སྟེ། དེ་སློབ་དཔོན་ལ་གཏད་


TNT17_Page_0112
[མ་དཔེ་གཟིགས་ན་འདིར་གནོན།]

དེ། ང་གདོལ་པའི་བུ་མོ་ཡིན། འདི་ཁྱོད་ཀྱི་དོན་དུ་བསད་པ་ཡིན་པས་ཟོ་ཟེར་བ་ལ། ང་གཙང་མའི་རིགས་ཀྱི་དགེ་སློང༌། ཕྱེད་དུ་བརྡོས་པའི་བ་གླང་གི་ཤ་ག་ལ་ཟ་གསུངས་པས། དེ་ཕྱིར་ལྡོག་ནས་འཁྱམས་སྨད་དུ་མི་སྣང་བར་སོང༌། དེ་ཡང་རྡོ་རྗེ་རྣལ་འབྱོར་མས་དངོས་གྲུབ་གནང་པ་མ་བླངས་པ་ཡིན་ནོ། །དེར་སློབ་དཔོན་སྡེ་སྣོད་གསུམ་གྱི་མངའ་བདག་ཡིན་ཡང༌། མན་ངག་གིས་ཡིད་མ་ཚིམས་པར། མཐར་ཐུག་པའི་མན་ངག་གི་བདག་པོར་གྲགས་པ་ཐམས་ཅད་ལ་མན་ངག་སྣ་ཚོགས་གསན་ཅིང་ཡུལ་ཐམས་ཅད་དུ་བྱོན། ནཱ་ལནྡར་ཡང་མང་དུ་བཞུགས། སྡེ་པ་བཞིའི་འདུལ་བ་ཐམས་ཅད་དང༌། ཉན་ཐོས་ཀྱི་སྡེ་སྣོད་གཞན་ཡང་ཤས་ཆེ་བ་རྣམས་དང༌། ཐེག་ཆེན་སྡེ་གཉིས་ཀྱི་མདོ་དང༌། བསྟན་བཅོས་རིགས་མི་གཅིག་པ་ཐམས་ཅད་ལ་ཤིན་ཏུ་མཁྱེན་པ་རྒྱས་ཤིང༌། ནང་པའི་རྟོག་གེ་ལ་སོགས་པ་ཐུན་མོང་གི་རིག་པའི་གནས་རྒྱ་མཚོ་ལ་མཁས། ཁྱད་པར་དུ་གསང་སྔགས་ཙམ་ལ་ཆེས་མཁས། མན་ངག་དང་བཅས་པ་ཡང་ཐོབ། དེ་ནས་དཔལ་སཽ་རི་པའི་དྲུང་དུ་ཕེབས། ཁོང་ལ་མངའ་བའི་སྔགས་ཀྱི་ཆོས་ཐམས་ཅད་ཞུས། རྩ་བའི་བླ་མ་ཡང་འདི་ལ་མཛད། སློབ་དཔོན་ཉིད་ཀྱིས་སྔོན་རབ་ཏུ་བྱུང་བའི་མཁན་པོ་ཡང་འདི་ཡིན་ཟེར། སཽ་རིའི་དགོན་པ་དེར་བླ་མའི་མན་ངག་བསྒོམ་བཞིན་བཞུགས་པའི་སྐབས་ཤིག ཚེས་བརྒྱད་ཀྱི་དུས་ནམ་སྲོད་ཅིག་ལ། སློབ་དཔོན་སཽ་རི་པའི་ཆུ་ལེན་གཡོག་མོ་བུ་མོ་དགེ་བསྙེན་མ་ཞིག་ཡོད་པ་དེ་ཁོ་ན་འདྲ་བ་ཞིག །སློབ་དཔོན་གྱི་མུན་ཁང་དུ་བྱུང་སྟེ། སྣོད་ཆུང་ངུ་ཅིག་ནས་ཚོགས་རྫས་མང་


TNT17_Page_0113
[མ་དཔེ་གཟིགས་ན་འདིར་གནོན།]

པོ་བཏོན་ནས། ང་སློབ་དཔོན་གྱིས་བཏང་བ་ཡིན། ཁྱེད་དང་ལྷན་ཅིག་ཚོགས་ཀྱི་འཁོར་ལོ་བྱ་ཟེར། ངས་ཚོགས་འཁོར་སྔར་མ་བྱས་གསུངས་པས། དེ་ལྟར་ཡང༌། ད་རེས་གྱིས་ཟེར། དེར་སློབ་དཔོན་གྱིས་རྣམ་པར་རྟོག་པས་མ་མཛད་པས། དེ་ན་རེ། ཁྱེད་རྒྱུད་སུམ་བརྒྱ་ཤེས་ཤིང༌། དེ་རྣམས་ཀྱི་མཐར་ཐུག་པའི་མན་ངག་ཐོབ་ནས། སྔགས་ཀྱི་སྤྱོད་པ་ལ་རྟོག་པ་བྱར་ག་ལ་རུང་ཟེར། ཚོགས་རྫས་རྣམས་ཁྱེར་ནས་ཕྱིར་སོང༌། དེར་མུན་ནག་ཏུ་གྱུར་པ་ན། སྒྲུབ་ཁང་གི་སྒོ་རིམ་པ་གསུམ་ལ་གཟིགས་སུ་བྱོན་པ་ན། སྒོ་ནི་རང་གིས་ནང་ནས་བསྡམས་པ་དེ་ཁོ་ནར་འདུག་ནས། ཐེ་ཚོམ་སྐྱེས་ཏེ། ནང་པར་བླ་མ་ལ་མདང་གཡོག་མོ་བདག་ལ་ཚོགས་སྐྱེལ་དུ་བཏང་ངམ་ཞུས་པས། ཁྱོད་རྣམ་རྟོག་ཤས་ཆེ་བས་མ་བཏང༌། ཁྱོད་ཀྱིས་ཅི་མཐོང་གསུང༌། ལོ་རྒྱུས་ཞུས་པས། བླ་མ་ན་རེ། འོ་ན་རྡོ་རྗེ་རྣལ་འབྱོར་མས་དངོས་གྲུབ་བསྟབས་པ་མ་བླངས་པར་འདུག་པ་གསུང༌། དེར་ཡི་མུག་ནས་ཞག་བདུན་དུ་ཁ་ཟས་བཅད་དེ་གསོལ་བ་བཏབ་པས། བདུན་པའི་ནུབ་མོ་རྨི་ལམ་དུ་ཐོག་མར་བུད་མེད་རྒན་མོ་ཞིག་བྱུང༌། དེ་རྡོ་རྗེ་ཕག་མོར་ཤེས་ཏེ་བཤགས་པ་ཕུལ་གསོལ་བ་བཏབ་པས། རྡོ་རྗེ་ཕག་མོ་དངོས་སུ་གྱུར་ནས་ཁྱོད་ཀྱི་སྐྱེ་བ་མང་པོར་ང་ལ་བཟླས་པ་དང་མཆོད་པ་བྱས་པས། ད་རེས་དངོས་གྲུབ་ལན་གསུམ་བྱིན་ཡང་དེ་མ་བླངས་པ་ཡིན་པས། ཚེ་འདིར་མཆོག་མི་ཐོབ། ད་ནི་བསྟན་བཅོས་མང་དུ་རྩོམས། གཞན་ལ་ཆོས་མང་དུ་ཤོད། བར་དོར་མཆོག་འགྲུབ་པོ་གསུང༌། དེ་ནས་དུར་ཁྲོད་སྣ་ཚོགས་སུ་བསྒོམ་བཞིན་བཞུགས།


TNT17_Page_0114
[མ་དཔེ་གཟིགས་ན་འདིར་གནོན།]

དེར་རྒྱལ་པོ་རཱ་མ་པཱ་ལའི་བཙུན་མོ་ཞིག་གིས་ཨེ་ཌ་པུ་ར་ཞེས་བྱ་བའི་གཙུག་ལག་ཁང་ཞིག་བཞེངས་ནས་ཕུལ་བ། དེར་ཡང་ཏིང་ངེ་འཛིན་བསྒོམ་ཞིང་བཞུགས་པས། ཟླ་བ་དྲུག་ཏུ་ཏིང་ངེ་འཛིན་ཐུན་གཅིག་ལ་གནས་པ་ཡང་བྱུང༌། དུར་ཁྲོད་བསིལ་བའི་ཚལ་དུ་བཞུགས་དུས། བུ་གཅིག་པོ་གཅེས་པོ་ཞིག་གི་རོ་སྐྱེལ་དུ་བྱུང་བ། ཉེ་དུ་རྣམས་སྡུག་བསྔལ་ཆེན་པོ་འདུག་ནས། བར་དོའི་རྣམ་ཤེས་བཀུག་སྟེ་ལུས་དེ་ལ་བཅུག་ནས་སླར་གསོས། དེ་ནས་བྱང་ཆུབ་སེམས་དཔའ་ནུས་པ་ཅན་དུ་གྲགས་ནས། རྡོ་རྗེ་གདན་གྱི་མཁན་པོར་སྤྱན་དྲངས། དེར་ཡང་ཕྱོགས་བཞིའི་སློབ་མ་རྣམས་ལ་ཆོས་མང་དུ་གསུངས། རྩིས་ཀྱིས་བརྟགས་པས་མཁྱེན་ཏེ། བྲམ་ཟེ་དབུལ་པོ་ཞིག་གི་ཐབ་ཀྱི་འོག་ནས་གཏེར་བཏོན་ཏེ་བྱིན། ཆོམ་རྐུན་བསྲུང་པ་དང༌། དུག་ཞི་བ་དང༌། དམག་བཟློག་པ་དང༌། གཞན་ཡང་རྒྱུད་ནས་གསུངས་པ་བཞིན་གྱི་ལས་ཚོགས་འགྲུབ། སབྟ་ན་ག་ར་ཞེས་བྱ་བའི་གྲོང་ཁྱེར་ཆེན་པོ་ཞིག་ལ་མེ་ཤོར་བ་བདེན་སྟོབས་བརྗོད་པས་ཞ། དེ་ནས་ནཱ་ལེནྡྲ་དང༌། བི་ཀྲ་མ་ལ་ཤཱི་ལའི་མཁན་པོར་སྤྱན་དྲངས། རྒྱལ་པོས་ཀྱང་བླ་མར་བཀུར། དེར་རྨི་ལམ་དུ་རྡོ་རྗེ་ཕག་མོས་བསྟན་བཅོས་རྩོམ་པར་སླར་ཡང་བསྐུལ་བས། བདག་ལྟ་བུའི་བསྟན་བཅོས་ཀྱིས་སེམས་ཅན་ལ་ཕན་མི་ཐོགས་ཞུས། ཁྱོད་བསྟན་བཅོས་རྩོམ་པའི་ཚེ་ང་ཉིད་ལུས་ལ་འཇུག་གོ་གསུང༌། དེ་ནས་སློབ་མ་སོ་སོས་གསོལ་བ་བཏབ་པའི་ངོར། བརྒྱད་སྟོང་པའི་འགྲེལ་པ་བརྩམས་པས། ཕྱོགས་བཅུའི་སངས་རྒྱས་ཐམས་ཅད་ཀྱིས་ཤིས་པ་བརྗོད། འཕྲེང་


TNT17_Page_0115
[མ་དཔེ་གཟིགས་ན་འདིར་གནོན།]

བ་སྐོར་གསུམ་ལས། དཀྱིལ་ཆོག་རྡོ་རྗེ་འཕྲེང་བ་བརྩམས་པའི་ཚེ། མེ་ཏོག་གི་ཆར་བབས། མན་ངག་སྙེ་མ་བརྩམས་པའི་ཚེ། ཐོག་མཐའ་བར་གསུམ་དུ་བདེ་དགྱེས་དུས་འཁོར་གསུམ་གྱིས་ཤིས་པ་བརྗོད། སྙན་པའི་གྲགས་པས་ཕྱོགས་ཐམས་ཅད་དུ་ཁྱབ། གཞན་ཡང་ཕར་ཕྱིན་ལ་ཐུབ་པ་དགོངས་རྒྱན་དང༌། མངོན་པ་ལ་འཇིག་རྟེན་བསྡུས་པ་དང༌། འདུལ་བ་ལ་དགེ་སློང་གི་རིག་བྱེད་འགྲེལ་པ་དང་བཅས་པ་དང༌། འདུལ་བ་སྣང་བ་དང༌། དབུ་མ་ལ་དབུ་མའི་སྙེ་མ་དང༌། གཞན་ཡང་ཡོ་གའི་རྒྱུད་འགྲེལ་པ་མེད་པ་འགའ་རེ་ལ་འགྲེལ་པ་དང༌། སྒྲུབ་ཐབས་གྲགས་པ་ཅན་བཞི་དང༌། སངས་རྒྱས་ཐོད་པའི་འགྲེལ་པ་དང༌། མ་རྒྱུད་མང་པོའི་རྒལ་ལན་དང༌། འཇིགས་མེད་ལམ་རིམ་དང༌། མདོར་བྱས་དང༌། རིམ་ལྔའི་འགྲེལ་པ། རྩིས་ལ་འཇུག་པ། དུས་འཁོར་གྱི་རྒལ་ལན། དུས་འཁོར་གསལ་བྱེད། གཞན་ཡང་བསྟན་བཅོས་ཐོར་བུ་དང༌། སྒྲུབ་ཐབས་ཕྲ་མོ་ཤིན་ཏུ་མང་བ་མཛད། སྒྲུབ་ཐབས་སྣ་ཚོགས་བསྡུས་པ་ཡང་བསྒྲིགས། ནུབ་ཕྱོགས་ཀྱི་ཡུལ་དུ་གཙུག་ལག་ཁང་བཞེངས་པའི་ཚེ། ལྷུང་བཟེད་ནམ་མཁར་བཟེད་པས་ཟས་སྐོམ་གྱིས་ཁེངས་ཡོང་བ་སོགས་མཐུན་རྐྱེན་ཐམས་ཅད་ཛམ་བྷ་ལས་སྦྱར། གཞན་ཡང་ཁྲི་མོན་དུ་བཅུག་པའི་སྐྱེ་བོ་འབུམ་ཕྲག་དུ་མ་ཐར་བར་མཛད། སློབ་མ་ཡང་རྒྱ་བོད་ཀྱི་མཁས་གྲུབ་བསམ་གྱིས་མི་ཁྱབ་པ་བྱུང་སྟེ། འདི་ཕྱིན་ཆད་ཕྱིས་བྱུང་བའི་རྒྱ་གར་བའི་ཐེག་ཆེན་པ་ཐམས་ཅད་སློབ་དཔོན་འདི་ལ་ཚད་ལྡན་དུ་རྩི་བར་སྣང༌། དེས་ཤུ་བྷཱ་ག་ར་གུཔྟ་སྟེ་དགེ་བའི་འབྱུང་གནས་སྦས་པ་ལ་བཤད།


TNT17_Page_0116
[མ་དཔེ་གཟིགས་ན་འདིར་གནོན།]

དེས་ད་ཤ་པཱ་ལ་བཤད། དེས་རྣམ་པར་གྲགས་པའི་ལྷ་ལ་བཤད། འདི་ནི་བྷང་ག་ལའི་པཎྜི་ཏ་ཤིན་ཏུ་མཁས་པ་ཞིག་ཡིན་པ། ནཱ་ལེནྡྲར་བྱོན་ཏེ། ཆོས་དང་གདམས་ངག་ཐམས་ཅད་ལ་ཤིན་ཏུ་འདྲིས་པར་བྱས། ཡུལ་ནས་འབྱོན་དུས་རྩ་བའི་བླ་མས་རབ་ཏུ་བྱུང་གསུངས་ཡང༌། ཕྱིས་སྲེད་པ་ཤས་ཆེ་བའི་སྐྱོན་གྱིས་རབ་ཏུ་མ་བྱུང༌། ཆུང་མ་བླངས་པས། བུ་ཚ་མིང་སྲིང་གསུམ་སྐྱེས། ལན་ཅིག་རྨི་ལམ་དུ་སྤྱན་རས་གཟིགས་ཀྱི་གསུང་ནས་ཁྱོད་ཀྱི་བླ་མའི་བཀའ་བཅག་པས་ད་སྟེ་ལོ་གསུམ་ནས་ཚད་རིམས་ཀྱིས་ཤི་ནས་དམྱལ་བར་འགྲོ་གསུང༌། དེར་ཤིན་ཏུ་སྐྲག་སྟེ་མཚམས་བཅད་ནས་ཐུགས་དམ་མཛད། ལུང་བསྟན་ནི་ཐོག་ཏུ་བབས་ཏེ། ལོ་གསུམ་ནས་ཚད་རིམས་ཀྱིས་བཏབ་སྐུ་འདས། སློབ་དཔོན་རང་གི་སྣང་བ་ལ། གཤིན་རྗེའི་སྐྱེས་བུས་ཐག་རིང་དུ་ཁྲིད་པ་ན། འཕགས་པ་སྤྱན་རས་གཟིགས་ལྷ་ལྔ་ནམ་མཁར་བྱོན་ནས། རྟ་མགྲིན་གྱིས་གཤེད་མ་རྣམས་བརྡུངས། འཕགས་པས་སྤྱན་ཆབ་ནར་གྱིས་ཕྱུང་ནས་འདི་རང་གི་ལུས་ལ་སྐྱོལ་གསུང༌། འཕགས་པའི་འཁོར་རྣམས་ཀྱིས་ཚུར་བསྐྱལ་བའི་སྣང་བ་ལ། སླར་ཡང་རང་གི་ལུས་ལ་ཞུགས་ཏེ། དེ་ཕྱིན་ཆད་རྟག་ཏུ་སྤྱན་རས་གཟིགས་ཀྱིས་ཞལ་གཟིགས་ཤིང༌། ནུས་པ་ཡང་ཆེ། རྟོགས་པ་ཡང་བཟང་པོ་བརྙེས། གྲུབ་པ་ཐོབ་པ་ཡིན། གྲགས་པ་ཡང་ཆེ་བར་བྱུང༌། དེས་ཁ་ཆེའི་པཎྜི་ཏ་ཤཱཀྱ་ཤྲཱིབྷ་དྲ་དང༌། བུདྡྷ་ཤྲཱི་བྷ་དྲ་དང༌། རཏྣ་རཀྵི་ཏ་རྣམས་ལ་བཤད། དེ་དག་ལ་མུ་ནི་ཤྲཱི་བྷ་དྲས་ཞུས། དེས་ཀཱ་རུ་ཎ་ཤྲཱི་བྷ་དྲ་ལ་བཤད། དེས་ཤཱཀྱ་རཀྵི་ཏ་ལ་བཤད། དེས་སུ་ཛ་ཏ་བརྨ་ལ་བཤད།


TNT17_Page_0117
[མ་དཔེ་གཟིགས་ན་འདིར་གནོན།]

དེས་ཀིམྦི་ལའི་པཎྜི་ཏ་བི་མུཀྟ་དེ་བ་སྟེ། རྣམ་གྲོལ་ལྷ་ལ་བཤད། དེས་ཛ་ན་གུཔྟ་ལ་བཤད། དེས་ར་ཏི་གུཔྟ་ལ་བཤད། དེས་ད་ལྟ་སའི་སྟེང་ན་འགྲན་ཟླ་ཐམས་ཅད་དང་བྲལ་བའི་གྲུབ་ཆེན་ཞི་བ་སྦས་པ་ལ་བཤད་དོ། །རིན་པོ་ཆེའི་འབྱུང་ཁུངས་ལྟ་བུའི་གཏམ་ལས། རྒྱུད་བཤད་བརྒྱུད་པའི་གཏམ་གྱི་སྐབས་ཏེ་བདུན་པའོ། །བདུན་པ་མན་ངག་ཐོར་བུ་སྣ་ཚོགས་ཀྱི་བཀའ་བབས་ན། གྲུབ་ཆེན་གཽ་རཀྵའི་མན་ངག་རྣམས་ཀྱི་བཀའ་བབས་ཡིན་ཏེ། དེ་ཡང་སྡེ་ཚན་བཅུ་གཉིས་ཀྱི་ཛོ་གི་རྣམས་ན་རེ། མཱི་ན་པས་ལྷ་དབང་ཕྱུག་ཆེན་པོ་ལ་བརྟེན་ཏེ། ཐུན་མོང་གི་དངོས་གྲུབ་ཐོབ། དེ་ལ་གཽ་རཀྵས་རླུང་གི་གདམས་ངག་ཞུས་ཏེ་བསྒོམས་པས། ཕྱག་རྒྱ་ཆེན་པོ་ཡེ་ཤེས་རང་བྱུང་དུ་སྐྱེས་པ་ཡིན་ཞེས་ཟེར་བ་སོགས་ཁུངས་མེད་གཏམ་སྣ་ཚོགས་ཡོད་ཀྱང༌། རེ་ཞིག་བཞག་གོ །འདིར་གྲུབ་ཆེན་ཞི་བ་སྦས་པ་ལ་སོགས་པ་པཎྜི་ཏ་ཁུངས་མ་རྣམས་ཀྱི་གསུང་དང༌། ཁོ་བོའི་བླ་མ་སངས་རྒྱས་སྦས་པའི་ཞལ་སྔ་ནས་ཀྱིས་བླ་མ་གཽ་རཀྵའི་གདམས་པ་མ་ལུས་བའི་མཛོད་དུ་གྱུར་པ་གྲུབ་ཐོབ་མང་པོ་དངོས་སུ་ཞལ་མཇལ། ནུས་མཐུ་དང་བྱིན་རླབས་དཔག་ཏུ་མེད་པ་མངའ་བའི་སློབ་དཔོན་འབབ་སྟེགས་མགོན་པོ་དང༌། ནག་པོ་མགོན་པོ་དང༌། བྲམ་ཟེ་མགོན་པོ་སྟེ། གཽ་རཀྵའི་རྗེས་འབྲང་རྣམ་པ་གསུམ་པོ་དེའི་བཞེད་པ་མཐུན་པར་བྱུང་བས་ཁོ་བོའི་བླ་མ་ཡང་འདི་ཁོ་ན་འཐད་གསུང༌། དེ་ཡང་རྒྱ་གར་ཤར་ཕྱོགས་སུ་བྲམ་ཟེའི་སློབ་དཔོན་བྱཱ་ལི་པ་ཞེས་བྱ་བ་ཞིག་གིས། ཡོ་བྱད་མང་པོ་བསགས་ཏེ་ལོ་བཅུ་གཉིས་སུ་དངུལ་ཆུའི་བཅུད་ལེན་བསྒྲུབས་པས།


TNT17_Page_0118
[མ་དཔེ་གཟིགས་ན་འདིར་གནོན།]

འགྲུབ་པའི་ལྟས་ཅིག་ཀྱང་མ་བྱུང༌། ཡོ་བྱད་ཀྱང་ཟད། དེར་དངུལ་ཆུའི་སྒྲུབ་ཐབས་ཀྱི་པོ་ཏི་ཆུ་བོ་གངྒཱ་ལ་འཕངས་ཏེ་རང་ཉིད་ལྡུམ་བུ་སྤྱོད་ཅིང་སོང་བ་ན། ཇི་ཞིག་ན། ཨོ་ཌི་བི་ཤའི་ཡུལ་དུ་སླེབ་པའི་ཚེ། ཆུ་གཅིག་ལ་ཁྲུས་བྱས་པས། སྔར་པོ་ཏི་བསྐྱུར་བ་དེར་མ་གོད་པར་རྙེད། དེ་དངོས་གྲུབ་ཐོབ་པའི་ལྟས་སུ་ཤེས་ནས། སླར་རང་ཡུལ་དུ་ཕྱིན་པ་ན། དངུལ་ཆུ་ནི་གཡས་སུ་འཁོར་ཞིང་སྒྲ་སྙན་པོ་ཡང་གྲགས། མེ་ཏོག་གི་ཆར་ཡང་འབབ་པར་མཐོང་ནས། ནང་མི་རྣམས་ལ་ཅི་ཡིན་དྲིས་པས་སུས་ཀྱང་མ་ཤེས། རང་གི་བུ་མོ་གླེན་མ་ཞིག་ན་རེ། ཁང་པ་འདིར་ཁོ་མོ་རྡུལ་དང་ལྡན་པར་གྱུར་ཏེ། ཁྲུས་ཤིག་བྱས། དེ་ཕྱིན་ཆད་འདི་ལྟར་བྱུང༌། ཅི་ཡིན་ནི་མ་ཤེས་ཟེར། དེ་བརྟགས་པས། སྔོན་སྐྱུ་རུ་ར་དམར་པོ་ངོ་མ་ཤེས་ཏེ། དེ་ནི་གཞོན་ནུ་མའི་རང་བྱུང་གི་རྡུལ་ཡིན་པ་ལས། སྐྱུ་རུ་ར་མདོག་དམར་པོ་འབའ་ཞིག་བཏབ་པས་མ་གྲུབ། དུས་དེར་ཁྲུས་བྱས་པའི་ཁྲག་གི་ཟེར་མ་ཞིག་སོང་བས་དངུལ་ཆུ་གྲུབ་པ་ཡིན་ནོ། །དེ་ནས་དངུལ་ཆུའི་ཆོ་གའི་ལྷག་མ་རྣམས་ཟླ་བ་དྲུག་ཏུ་བྱས་ནས་ཟོས་པས། བྱཱ་ལི་པ་རང་དང་ཆུང་མ་དང༌། བུ་དང་བུ་མོ་དང་མནའ་མ་སྟེ་ལྔ། རྟ་གཅིག་དང་དྲུག་གིས་རྫས་ཀྱི་རིག་པ་འཛིན་པ་ཐོབ་སྐད། དེར་དངོས་གྲུབ་ལ་སེར་སྣ་བྱས་ཏེ། ལྷོ་ཕྱོགས་ཀྱི་རྒྱ་མཚོའི་གླིང་གི་གནས་ཤིག་ན། ཕྱོགས་བཞི་ཅར་འདམ་གྱིས་བསྐོར་བའི་དབུས་ན་བྲག་རི་ཆེན་པོ་ཞིག་ཡོད་པ་དེར་འདུག་སྐད། དངུལ་ཆུའི་རྫས་གསེར་འགྱུར་རྩི་དེ་གཞན་སློང་དུ་བྱུང་དོགས་ཏེ། མིས་མི་ཐར་པའི་སར་བྲོས་པ་ཡིན། དངོས་གྲུབ་སྒྲུབས་པ་ནི་ནག་པོ་ཆེན་


TNT17_Page_0119
[མ་དཔེ་གཟིགས་ན་འདིར་གནོན།]

པོའི་རིགས་སྔགས་ལ་བརྟེན་ནས་གྲུབ་པ་ཡིན་སྐད། གཏམ་དེ་སློབ་དཔོན་ཀླུ་སྒྲུབ་ཀྱིས་གསན་ཏེ། ཀླུ་སྒྲུབ་ལ་མཁའ་འགྲོ་མའི་རིག་སྔགས་ཤིག་ལ་བརྟེན་ནས་མཁའ་ལ་འགྲོ་ཐུབ་པའི་ཤིང་ལོའི་ལྷམ་གཉིས་ཡོད་པ་ལས། གཅིག་སྦས་ཤིང༌། གཅིག་གྱོན་ནས་ནམ་མཁའ་ལ་འཕུར་ཏེ་བྱཱ་ལི་པའི་དྲུང་དུ་སླེབ། དེར་སློབ་དཔོན་གྱིས་གསེར་འགྱུར་གྱི་རྩི་སྟེར་དགོས་བྱས་པས། དེས་ཀྱང་ཁྱེད་ཀྱི་ལྷམ་དེ་ང་ལ་བྱིན་ཞིགགསེར་འགྱུར་གྱི་རྩི་སྦྱིན་དུ་རུང་ངོ་ཟེར། དེར་དངུལ་ཆུའི་གདམས་ངག་མང་པོ་དང༌། བཅུད་ལེན་གྱི་རིགས་བྱེ་བ་བརྒྱ་སྟོང་དུ་མ་དང༌། གསེར་འགྱུར་གྱི་རྩི་གྲུབ་ཟིན་པ་དེ་ནས་ཀྱང་བྱིན། ལྷམ་གཅིག་པོ་དེ་ཡང་དེ་ལ་ཕུལ། ལྷམ་སྦས་པ་དེ་གྱོན་ཏེ་ནམ་མཁའི་ལམ་ནས་འཛམ་བུའི་གླིང་དུ་འོངས། བཅུད་ལེན་གྱི་གདམས་ངག་རྒྱ་ཆེར་སྤེལ་བ་ཡིན་ནོ། །དེ་ནས་ལྗོངས་མུ་ནིནྡྲ་ཞེས་བྱ་བ་རྒྱ་གར་བྱང་ཕྱོགས་ཡུལ་ས་འཛིན་ན། རི་དྷི་ཀོ་ཊ་ཞེས་བྱ་བ་ཡོད། རི་དེ་གསེར་དང་དངུལ་དུ་བསྒྱུར་བར་བཞེད་པ་ལ། འཕགས་མ་སྒྲོལ་མས། མ་འོངས་པའི་སེམས་ཅན་རྣམས་འཐབ་རྩོད་དུ་འགྱུར་བར་མཁྱེན་ནས། གསེར་དངུལ་དུ་བསྒྱུར་བ་བཀག་ནས་ལན་ཚྭར་འགྱུར་བར་བྱིན་གྱིས་བརླབས་པར་གྲགས། དེང་སང་ཡུལ་ས་འཛིན་ལ་ཊི་ལ་ཟེར། དེར་བྱཱ་ལི་བས་ད་ནི་སེར་སྣ་བྱས་ཀྱང་དོན་མེད་དོ་སྙམ་ནས་འཛམ་བུའི་གླིང་དུ་འོངས་སོ། །དེའི་ལུས་ནི་རིག་པ་འཛིན་པ་ཐོབ་ཀྱང༌། སྔར་ནང་གི་མངོན་པར་རྟོགས་པ་ནི་ཅུང་ཟད་ཀྱང་མེད་པས། སློབ་དཔོན་ཙར་པ་ཊི་པ་ཞེས་བྱ་བ་ཕྱག་རྒྱ་ཆེན་པོ་མཆོག་གི་


TNT17_Page_0120
[མ་དཔེ་གཟིགས་ན་འདིར་གནོན།]

དངོས་གྲུབ་ཐོབ་པ་ཞིག་ལ། གདམས་ངག་ཞུས་ཏེ་བསྒོམས་པས། རིང་པོར་མི་ཐོགས་པར་ཡེ་ཤེས་ཁྱད་པར་ཅན་རྒྱུད་ལ་སྐྱེས་ཏེ། རྟོགས་པ་དོན་གྱི་གླུ་ཡང་བླངས། སེམས་ཅན་གྱི་དོན་ལྔ་ཅི་རིགས་པ་བྱས་སྐད་དོ། ཁོང་གི་བཅུད་ལེན་གྱི་གདམས་པ་ཐམས་ཅད་སློབ་དཔོན་ཙར་པ་ཊི་པ་ལ་དྲིན་ལན་གྱི་ཚུལ་དུ་ཕུལ། བླ་མ་དེས་ཀྱང་དངུལ་ཆུའི་བཅུད་ལེན་གྱི་ཆོ་ག་དེ་ཅུང་ཟད་བྱས་པས་འཕྲལ་དུ་གྲུབ། དེས་སེམས་ཅན་མང་པོ་ལ་ཕན་གདགས་པར་བཞེད་དེ། ཙམྤརྞའི་ཕྱོགས་གཅིག་ན་འབྲོག་པའི་རིགས་ཤིན་ཏུ་མང་བ་ཡོད་ཅིང༌། དེ་ན་འབྲོག་པ་གཅིག་ཤིན་ཏུ་ནོར་ཆེ་བ། མ་ཧེ་དང༌། བ་མེན། བ་གླང༌། རྟ་ལུགས་སོགས་སྟོང་ཕྲག་དུ་མ་ཡོད། དེར་བུ་ལ་མནའ་མ་ཞིག་བླངས་པ་དེ་ལའང་ཁྱེའུ་ཞིག་བཙས། ལན་ཅིག་ཡུལ་དུ་སྟོན་མོ་ཆེན་པོ་ཞིག་བྱུང་བའི་སྐབས། མནའ་མ་དང་བུ་ཆུང་དེར་འདུག གཞན་རྣམས་སོང་བ་ལ། གྲུབ་ཐོབ་ཙར་པ་ཊི་བས་ཟས་སློང་བ་ལ་བྱོན། དེར་སློབ་དཔོན་ལ་ཟས་ཐམས་ཅད་དྲངས། སློབ་དཔོན་ན་རེ། ནང་མི་རྣམས་མི་ཁྲོ་ན་ཁྱོད་སྡོད་ལ་ནང་པར་ནས་ཀྱང་ང་ལ་ཟས་མང་པོ་བྱིན་ཞིགགལ་ཏེ་ཁྲོ་ན། ང་ནགས་ཚལ་ཡ་གིར་མེ་གཏོང་གིན་སྡོད་པས། ངའི་ཙར་བྲོས་ལ་ཤོག་གསུང༌། དེར་ནང་མི་རྣམས་འཁོར་བ་ན། སྣོད་ཐམས་ཅད་འཕྲོ་ཅན་དུ་མཐོང་ནས། དེ་ཐམས་ཅད་ཀྱིས་མནའ་མ་ལ་འཐབས་པས། དེས་བུ་ཆུང་ཐོགས་ཏེ་བྲོས། སློབ་དཔོན་གྱི་དྲུང་དུ་བྱུང་བ་ལ། སློབ་དཔོན་གྱིས་བཅུད་ལེན་གཏོར་བས། མ་སྨད་གཉིས་རིག་པ་འཛིན་པའི་ལུས་སུ་གྱུར། དེའི་རྗེས་


TNT17_Page_0121
[མ་དཔེ་གཟིགས་ན་འདིར་གནོན།]

བསྙེགས་ལ་སྐྱེ་བོ་མང་པོ་བྱུང་བ། དེ་རྣམས་ལ་ཡང་སློབ་དཔོན་གྱིས་བཅུད་ལེན་གཏོར་བས། སྐྱེ་བོ་སུམ་བརྒྱ་ཙམ་རིག་པ་འཛིན་པའི་ལུས་སུ་གྱུར་ཏེ། དོན་ཆེན་པོ་དང་འཕྲད་སྐད། དེར་ཙམ་པའི་རྒྱལ་པོས་གཏམ་དེ་ཐོས་པས། སྐྱེ་བོ་མང་པོ་དང་བཅས་ཏེ་སློབ་དཔོན་གྱི་དྲུང་དུ་སོང༌། རྒྱལ་པོས་ཕྱག་བྱས་པས། སློབ་དཔོན་ཁྲོས་པ་ལྟར་བྱས་ནས། ཟས་ཀྱི་སྣོད་ས་ལ་བརྡབས་པས། ས་འོག་ནས་ཀླུའི་རྒྱལ་པོའི་བུ་མོ་བྱུང་སྟེ། དེས་ཡོ་བྱད་མང་པོ་རྒྱལ་པོ་ལ་བསྟབས་པས། རྒྱལ་པོས་ཀྱང༌། སློབ་དཔོན་གྲུབ་པ་ཐོབ་པར་ཤེས། བྲག་རིའི་ཕུག་ལྷ་ཁང་གི་རྣམ་པ་ཅན་གཉིས་བཅོས་ཏེ། གཅིག་ཏུ་ནི་སློབ་དཔོན་དང་མ་སྨད་གཉིས་ཏེ་གསུམ་བཞུགས་པར་བྱས། གཅིག་ཏུ་ནི་སུམ་བརྒྱ་པོ་གནས་པར་བྱས་སོ། ཁྱེའུ་དེས་ཀྱང་དངོས་གྲུབ་མང་དུ་སྦྱིན་ནུས་པ་ཡིན་ཏེ། མིག་ནས་མིག་སྨན། རྣ་བ་ནས་རི་ལུ། ཁ་ནས་རལ་གྲི སྣ་ནས་རྐང་མགྱོགས། རྡོ་རྗེ་ནས་གསེར་འགྱུར་རྩ། འོག་སྒོ་ནས་བཅུད་ལེན་རྣམས་འབྱུང༌། དེ་གསུམ་པོ་སྟན་གཅིག་ལ་འདུག་སྟེ། ཇི་སྲིད་བྱམས་པ་མ་བྱོན་གྱི་བར་དུ་འགྲོ་བའི་དོན་བྱེད་དེ་གནས་དེ་ལ་ཡང་ཙམྤ་ཙརྤ་ཊི་ཟེར། ད་ལྟ་ཡང་གསོལ་བ་བཏབ་ན་དངོས་གྲུབ་མྱུར་བ་ཡིན་སྐད། དེའི་སློབ་མ་ནི་གྲུབ་ཐོབ་ཀཀྐུ་ཊི་པ་ཡིན་ཏེ། དེ་ཡང་སློབ་དཔོན་ཆེན་པོ་ལཱུ་ཡི་པ་ལ་ཕྱིའི་དབང་བསྐུར་བ་རྣམས་ཐོབ་ཀྱང་ཟེར། ལཱུ་ཡི་པ་ཡིན་པར་གཅིག་ཏུ་ཡང་མ་ངེས་པར་སྣང༌། དེ་ནས་གྲུབ་ཐོབ་ཙརྤ་ཊི་པ་ལ་གདམས་པ་དང་རྗེས་སུ་གདམས་པ་མཐའ་དག་ཐོབ་ནས། དུར་ཁྲོད་རྣམས་སུ་སྤྱོད་པ་སྤྱོད་ཅིང་བཞུགས་ལ། རིག་མ་


TNT17_Page_0122
[མ་དཔེ་གཟིགས་ན་འདིར་གནོན།]

བཅུ་གཉིས་ཡོད་པ་གྲོང་ཁྱེར་དུ་འགྲོ་བ་ན་ཁྱིམ་བྱར་བསྒྱུར་ཏེ་བཞུད་པས། ཀཀྐུ་ཊི་པ་ཞེས་གྲགས། ལར་ཀཀྐུ་ཊི་པ་ཡང་མི་གཅིག་པ་གཉིས་བྱུང་གསུང༌། དེའི་སློབ་མ་ནི་མཱི་ན་པ་ཡིན་ཏེ། དེ་ནི་རྒྱ་གར་ཤར་ཕྱོགས་ཀཱ་མ་རུའི་ཉ་པ་ཡིན། ཉ་པའི་རླུང་ཅུང་ཟད་གོམས་པས། ལན་ཅིག་ཉ་ལ་ལྕགས་ཀྱུ་བཏབ་སྟེ་དྲངས་པ་ལ། ཉས་ཁོང་ཕར་དྲངས་ཏེ་མིད། དེར་ལས་ཀྱི་མཐུ་དང་ཉ་པས་རླུང་བསྒོམས་པས་མ་ཤི་བ་ལ། ཆུ་བོ་རོ་ཧི་ཏ་ཞེས་བྱ་བ་ད་ལྟའི་བོད་ཀྱི་གཙང་པོ་འད། ཀཱ་མ་རུར་སླེབ་པ་དེ་ཡིན་པ། དེ་ལ་ཨུ་མ་གི་རི་ཞེས་བྱ་བའི་རི་དེའུ་ཅིག་ཡོད་པ་ལ། ལྷ་དབང་ཕྱུག་གིས་ཨུ་མ་ལ་རླུང་གི་རྣལ་འབྱོར་གྱི་གདམས་ངག་བཤད་པ། ཆུ་དེ་ལ་ཉ་སོང་བས། ཉའི་ཁོག་གི་ཉ་པས་ཐོས་ཏེ་བསྒོམས་པས་ཡོན་ཏན་དུ་མ་ཐོབ། ལན་ཅིག་ཉ་པ་རྣམས་ཀྱིས་ཉ་དེ་བཟུང་ནས་བཤས་པས་མི་གཅིག་བྱུང༌། དེར་སྔར་གྱི་རྒྱལ་པོ་ཡང་འདས། སྔོན་རང་གི་བུ་བཙས་མ་ཐག་པ་ཡང་དེར་ལོ་བཅུ་གསུམ་ལོན། ལར་ཉའི་ཁོག་ཏུ་ལོ་བཅུ་གཉིས་བསྡད། དེ་ནས་སློབ་དཔོན་ཙར་པ་ཊི་པའི་དྲུང་དུ་སོང་སྟེ། ཕ་བུ་གཉིས་ཀས་གདམས་ངག་ཞུས་ཏེ་བསྒོམས་པས། གཉིས་ཀས་ཀྱང་གྲུབ་པ་ཐོབ་སྟེ། ཕ་ནི་གྲུབ་ཐོབ་མཱི་ན་པ་ཞེས་གྲགས། བུ་ནི་གྲུབ་ཐོབ་མ་ཚིན་དྲ་བ་ཞེས་བྱའོ། །གྲུབ་ཐོབ་མཱི་ན་པའི་སློབ་མ་ནི་ཧ་ལི་བ་སྟེ་ཞིང་རྨོད་མཁན། མཱ་ལི་པ་སྟེ་སྐྱེད་མོས་ཚལ་མཁན་དང༌། ཏཾ་པོ་ལི་བ་སྟེ། སོ་རྩི་མཁན་ཏེ་གྲུབ་ཐོབ་གསུམ་བྱུང༌། མཆིན་དྲའི་སློབ་མ་ན། ཙཽ་རང་གི་པ་དང༌། གཽ་རཀྵ་ནཱ་ཐ་གཉིས་ཡིན། དེ་ཡང་དང་པོ་ནི་རྒྱལ་པོའི་བུ་ཞིག་ཡིན། ལན་ཅིག་རྒྱལ་པོ་ཡུལ་གཞན་དུ་སོང་


TNT17_Page_0123
[མ་དཔེ་གཟིགས་ན་འདིར་གནོན།]

བའི་དུས་ཤིག་ན། བཙུན་མོ་ཆུན་མ་ཞིག་ཡོད་པ། རྒྱལ་བུ་གཟུགས་མཛེས་པ་ལ་ཆགས་ཏེ། རྒྱལ་བུའི་དྲུང་དུ་ཡང་ཡང་འོངས་ཀྱང༌། རྒྱལ་བུས་འདོད་པ་དང་དུ་མ་བླངས་པས་དེ་ཁྲོས་ཏེ་རྒྱལ་པོ་བྱུང་བའི་ཚེ། གོས་ནི་བྲལ། མགོ་ནི་ཐལ་བས་གཡོགས། ཡན་ལག་ནས་ཁྲག་བྱུང་སྟེ་འདུག་པ་ལ། རྒྱལ་པོས་ཅི་ཉེས་དྲིས་པས། འདི་ནི་ལྷའི་སྲས་ཀྱིས་བྱས་ཏེ། ད་ཁོ་མོའི་དྲུང་དུ་འདོད་པ་དོན་དུ་གཉེར་བར་བྱུང་བ་ལ། ཁོ་མོས་འདོད་པ་དང་དུ་མ་བླངས་པས་འདི་ལྟར་བགྱིས་སོ་ཟེར། དེ་ནས་རྒྱལ་པོས་མ་བརྟགས་པར་རང་གི་བུ་ཉེས་པ་མེད་པ་རྐང་ལག་བཅད་དེ་ས་ཕྱོགས་ཤིན་ཏུ་དམའ་བ་སྐྱེ་བོ་མང་པོ་འགྲོ་བའི་ལམ་གྱི་འོག་ཅིག་ཏུ་ཤིང་དྲུང་གཅིག་གི་རྩ་བར་བོར། དེར་སློབ་དཔོན་མ་ཚིན་དྲ་པ་བྱུང་སྟེ། དེ་ལ་ལོ་རྒྱུས་བཤད་པས། འཚོ་བ་ནི་ངས་སྦྱོར་ནུས་ན། ཁྱོད་ཀྱིས་ལོ་བཅུ་གཉིས་སྒོམ་ནུས་སམ་གསུངས་པས། དེས་ཀྱང་ནུས་པར་ཁས་བླངས། དེ་ནས་སློབ་དཔོན་མ་ཚིན་དྲ་པས། རང་གི་སློབ་མ་བ་གླང་རྫི་ཕྱུག་པོ་ཞིག་ཡོད་པ་ལ་ཕ་གིའི་ཤིང་དྲུང་ཅིག་ན་མི་ཡན་ལག་བཅད་པ་ཞིག་ཡོད་ཀྱ། དེ་ལ་ཁྱོད་ཀྱིས་ལོ་བཅུ་གཉིས་སུ་ཟས་སྐྱོལ་གསུང༌། དེས་ཀྱང་དེ་བཞིན་དུ་བྱས། མཐར་ལོ་བཅུ་གཉིས་སོང་བའི་དུས་ཤིག་ན། ལམ་དེ་ལ་ཚོང་པ་མང་པོ་མཚན་མོ་འགྲོ་བ་ལ། ཙཽ་རང་གི་པས་ཁྱེད་རྣམས་སུ་ཡིན་དྲིས་པས། དེ་རྒྱལ་པོའི་ཤོ་གམ་པ་ཡིན་གྱི་དོགས་ནས། ངེད་རྣམས་སོལ་བ་འཚོང་མཁན་ལགས་བྱས་པས། དེ་ན་རེ། འོ་ན་ཁྱེད་རྣམས་ཀྱི་ཡོ་བྱད་ཐམས་ཅད་སོལ་བར་གྱུར་ཅིག་གསུང༌། ཚོང་པ་རྣམས་


TNT17_Page_0124
[མ་དཔེ་གཟིགས་ན་འདིར་གནོན།]

ཚོང་འདུས་སུ་སླེབ་ནས་ཟོང་བཀྲམ་པ་ན། ཐམས་ཅད་སོལ་བར་སོང་འདུག་སྟེ། ཕན་ཚུན་དུ་ཅི་ཉེས་ཞེས་བརྟགས་པ་ན། ཙཽ་རང་གིའི་ཚིག་གི་ནུས་པ་ཡིན་པར་ཤེས་ནས། ཚོང་པ་དེ་རྣམས་ཀྱིས་སླར་སོང་ནས་ཙཽ་རང་གི་པ་ལ་བཟོད་པར་གསོལ་ཞིང༌། གསོལ་བ་བཏབ་པས། ཙཽ་རང་གི་པ་ན་རེ། འོ་ན་སྔར་བཞིན་གྱུར་ཅིག་བྱས་པས། ཚོང་པ་རྣམས་སླར་ལྡོག་ནས་བལྟས་པའི་ཚེ། ཡོ་བྱད་ཐམས་ཅད་སྔ་མ་བཞིན་དུ་ཐམས་ཅད་བཟང་པོར་གྱུར་ནས་འདུག །དེ་སློབ་དཔོན་གྱི་དྲིན་ཡིན་པར་ཤེས་ནས། ཟོང་གི་ཕུད་སློབ་དཔོན་ལ་ཕུལ་བ། སློབ་དཔོན་མ་འདོད་དེ། སླར་ཁོང་རྣམས་ཉིད་ལ་གཏད་དོ། །དེར་རང་གི་ཡན་ལག་སྔར་བཞིན་དུ་གྱུར་ཅིག་བྱས་པས། དེ་བཞིན་དུ་སོང་ངོ༌། །འགྲོ་བའི་དོན་ཡང་ཅི་རིགས་པ་མཛད་དེ། མཁའ་སྤྱོད་དུ་བཞུད་སྐད། གྲུབ་ཐོབ་གཽ་རཀྵ་ནི་ཟས་སྦྱོར་བའི་བ་གླང་རྫི་དེ་ཉིད་ཡིན་ཏེ། མཚིན་དྲའི་གདམས་ངག་གིས་རྣལ་འབྱོར་ཐོབ་ནས། ཕྱི་རོལ་ཀྱི་བྱ་བ་གཞན་སྤངས་ཏེ་བསྒོམས་པས། རྫུ་འཕྲུལ་དང་དངོས་གྲུབ་ཐམས་ཅད་ཐོབ། དེས་བསམས་པ། ངའི་རྟོགས་པ་འདི་གཞན་ལ་སྤོ་སྙམ་སྟེ། ཡུལ་ཐམས་ཅད་དུ་སྐྱེ་བོ་མང་པོ་ལ་གདམས་པ་བསྟན་པས་ཐམས་ཅད་གྲོལ། སེམས་ཅན་བྱེ་བ་ཕྲག་གཅིག་མ་གྲོལ་གྱི་བར་དུ་མཁའ་སྤྱོད་དུ་མི་འགྲོ་བར་དམ་བཅས། སེམས་ཅན་དཔག་ཏུ་མེད་པ་གྲོལ་བར་མཛད་བཞིན་པའོ། །འདིའི་ལོ་རྒྱུས་མཐའ་ཡས་པ་ནི་བྲི་བར་མ་ལང་ངོ༌། །དེ་ལ་སློབ་མའི་གཙོ་བོ་ཡང་བཅུ་གཉིས་ཡོད་མོད་ཀྱ། འདིར་བཀའ་བབས་པ་ན། གྲུབ་ཐོབ་ཀརྞ་རི་པ་ཡིན་ཏེ། དེ་ནི་ཡུལ་མེ་བ་རའི་རྒྱལ་པོ་ཡིན། འདིའི་བཙུན་མོ་


TNT17_Page_0125
[མ་དཔེ་གཟིགས་ན་འདིར་གནོན།]

པིང་གཱ་ལ་ཞེས་བྱ་བ་ཞིག་ཡོད་སླེབ་ནས་ལོ་འགའ་སོང་བ་ན། རྒྱལ་པོ་ལ་ཤིན་ཏུ་སྙིང་ཉེ་བ་ཡིན་ཡང༌། རྒྱལ་པོས་བརྟག་པའི་ཕྱིར་རང་ཉིད་སྐྱེད་མོས་ཚལ་དུ་སོང༌། སྟག་གིས་ཟོས་སོ་ཞེས་ཤི་བརྫུན་བྱས་པས། སྡུག་བསྔལ་གྱིས་དེ་མ་ཐག་བཙུན་མོ་པིང་གཱ་ལ་ཤི་ནས་ལུས་དུར་ཁྲོད་དུ་བསྐྱལ། རྒྱལ་པོ་ཡང་གྲོང་ཁྱེར་དུ་མི་འགྲོ་བར་དུར་ཁྲོད་དེ་ཉིད་དུ་བཙུན་མོ་ཤི་བའི་རོའི་དྲུང་དུ་ཧཱ་ཧ་བ་པིང་ག་ལཱ་ཞེས་ཟེར་ཞིང་འདུག་གོ །དེ་ལྟར་ལོ་བརྒྱད་ཐལ་ཀྱང་སྐད། བཅུ་གཉིས་ཐལ་ཀྱང་ཟེར་ཏེ། དེར་གྲུབ་ཐོབ་གཽ་རཀྵ་བྱོན་ཏེ། རྫའི་ཆུ་སྣོད་ཌེ་པི་གཅིག་ལག་ནས་ལྷུངས་མ་ཐབས་སུ་བྱས་ནས་བཅག་སྟེ། དེའི་མྱ་ངན་བྱེད་ཅིང་ཧཱ་ཧ་བ་ཌེ་པི་ཞེས་ཟེར་ཞིང་བསྡད་པས། རྒྱལ་པོ་ན་རེ། རྣལ་འབྱོར་པ་བླུན་པོ་ཆུ་སྣོད་ཆག་པ་ལ་ཅིའི་ཕྱིར་མྱ་ངན་བྱེད། གཞན་ཞིག་བཅོས་པས་ཆོག་མོད་བྱས་པས། སློབ་དཔོན་ན་རེ། འོ་ན་ཁྱེད་ཉིད་བླུན་གྱ། ངའི་ཆུ་སྣོད་ཆག་པ་ད་ལྟར་ཤུལ་ཡོད་ལ། ཁྱོད་ཀྱི་པིང་གཱ་ལ་ན། ད་ལྟར་རྡུལ་ཙམ་དུ་སོང་སྟེ་མི་སྣང་ན། ད་དུང་ཁྱོད་ཉིད་མྱ་ངན་བྱེད་པས་སོ། །དེར་སློབ་དཔོན་གྲུབ་ཐོབ་གྲཽ་རཀྵར་ཤེས་ནས། རྗེས་སུ་བཟུང་བར་ཞུས་པས། རྒྱལ་སྲིད་སྤོངས་གསུང༌། དེས་ཀྱང་རྒྱལ་སྲིད་སྤངས་ནས་ཕྱི་བཞིན་དུ་འབྲངས། ལན་ཅིག་གི་ཚེ། སློབ་དཔོན་ཤ་ཆང་ལ་དགའ་བ་ལྟར་མཛད་པས། དེས་གྲོང་ཁྱེར་དུ་ཤ་ཆང་ཉེ་བར་སོང་བ་ན། བུད་མེད་གཅིག་གིས་ཕག་གི་ཤ་དྲུག་དང༌། ཆང་གི་བུམ་པ་དྲུག་བསྒྲིགས་ཏེ། རིན་དུ་ཁྱོད་ཀྱི་མིག་གཡས་པ་སྦྱིན་ན་འཚོང་གི་གཞན་ཟོང་རྣམས་མི་དགོས་ཟེར། དེར་སློབ་དཔོན་ལ་


TNT17_Page_0126
[མ་དཔེ་གཟིགས་ན་འདིར་གནོན།]

མཆོད་པའི་དོན་དུ་མིག་གཡས་པ་ཚམ་ཚོམ་མེད་པར་བཏོན་ཏེ་བྱིན་ནོ། །དེ་ནས་ཤ་ཆང་དེ་རྣམས་སློབ་དཔོན་གྱི་དྲུང་དུ་ཕུལ་བས། ཁྱོད་ཀྱི་མིག་གཡས་པ་གང་དུ་སོང་གསུང༌། སློབ་དཔོན་ལ་མཆོད་པའི་དོན་དུ་འདི་རྣམས་ལ་བཙོངས་པ་ཡིན་བྱས་པས། ཁྱོད་ཀྱི་དེ་བདེན་ན་མིག་གཡོན་པ་ཡང་ང་ལ་བྱིན་གསུངས་པ་ལས། གཡོན་པ་ཡང་ཕྱུང་སྟེ་ཕུལ་ལོ། །དེར་སློབ་དཔོན་མཉེས་ཏེ་བྱིན་གྱིས་བརླབས་པ་ལོ་གསུམ་ནས་མིག་གཉིས་ཀྱང་སྔོན་བཞིན་དུ་གྱུར། དེ་རྗེས་ལོ་གསུམ་ནས་གྲུབ་ཐོབ་ཆེན་པོར་གྱུར་ཏོ། །འདི་ལ་བེ་ར་གི་ནཱ་ཐ་ཞེས་ཀྱང་ཟེར། དེའི་སློབ་མ་ན། ནཱ་གཽ་པ་སྟེ། བོད་སྐད་གཅེར་བུ་པ་ཞེས་བྱ་བ་ཡིན་ནོ། །ད་ལྟའི་ཛོ་གི་མང་པོ་རྒྱལ་པོ་ཀ་ཎ་རི་པ་དང༌། རྒྱལ་པོ་བྷརྠ་རི་གཅིག་པར་འདོད་པ་ཤིན་ཏུ་འཁྲུལ་གསུང་ངོ༌། །དེ་ལ་གྲུབ་ཐོབ་ནཱ་གོ་པ་ན། སྐུ་ལ་སྣལ་མ་གཅིག་ཀྱང་མ་གསོལ་བས་གཅེར་བུ་པ་ཞེས་གྲགས་པ་ཡིན་ནོ། །དེས་ལྷོ་ཕྱོགས་ཀྱི་ཡུལ་དུ་བཞུགས་ཙ་ན། ལན་ཅིག་ཀོང་ཀུ་ནའི་རྒྱལ་པོའི་བཙུན་མོའི་འཁོར་གྱི་ནང་དུ་བྱོན་ཏེ་གདམས་ངག་གསུངས་པས། རྒྱལ་པོ་ཁྲོས་ཏེ། སློབ་དཔོན་གྱི་ཡན་ལག་ལྔ་བཅད་ནས་ཕྱོགས་བཞིར་བོར་རོ། །དེར་འགྲིག་པ་ལ་ཡང་བཅད། དེ་ལྟར་ལན་བདུན་སོང་བའི་ཐ་མར། སློབ་དཔོན་གྱིས་དམོད་པ་བོར་བས་རྒྱལ་པོ་ཡན་ལག་ལྔ་རང་ཆད་དེ་ཤི །ཡང་ཀུན་གྱིས་གསོལ་བ་བཏབ་པས་གསོས་སོ། །དེ་ལྟ་བུའི་ནུས་པ་ཡང་བསྟན། དེ་ནས་རི་བོ་བྷིན་ད་པ་ལ་བཞུད་དེ། ད་ལྟ་ཡང་ལུས་མ་སྤངས་པར་ཡོད་སྐད། དེའི་སློབ་མ་ན། བི་རུ་པ་ཆུང་བའི་སློབ་བརྒྱུད་གོ་ལེན་ནཱ་ཐ་ཏེ་རྫ་མཱི་མགོན་པོ་ཞེས་བྱ་བ་ཡིན་ནོ། །དེ་ཡང་དང་


TNT17_Page_0127
[མ་དཔེ་གཟིགས་ན་འདིར་གནོན།]

པོ་འདུལ་བ་མང་པོས་གཡེངས་པ་ལ། ཞེ་བཅད་བྱས་ཏེ། རྫ་མ་ཆེན་པོ་གཅིག་གི་ནང་དུ་ཞུགས་ནས། དངོས་གྲུབ་མ་ཐོབ་བར་དུ་འདི་ནས་མི་ལྡང་ངོ་ཞེས་དམ་བཅས་ནས། རྩེ་གཅིག་ཏུ་བསྒོམས་པས་ལོ་བཅུ་གཉིས་ན་གྲུབ་པ་ཐོབ་སྟེ། སྐལ་བ་དང་ལྡན་པ་ལ་གདམས་ངག་ཅི་རིགས་པ་བསྟན་ནས། བླ་མ་གཅེར་བུ་པ་བཞུགས་པའི་དྲུང་དུ་སོང་སྟེ་མི་སྣང་བར་གྱུར་སྐད། དེའི་སློབ་མ་ནི་ཨོ་ཀོ་ར་ནཱ་ཐ་ཡིན་ཏེ། ཡུལ་དབུས་ན་རྒྱལ་རིགས་ཀྱི་བུ་ཆུང་ཞིགཆུང་ངུ་ནས་ཕ་འདས་ཤིང༌། ཕུ་བོའི་ཁྱིམ་དུ་གསོ་བ་ལས། གོ་ལེན་ནཱ་ཐས། རྣལ་འབྱོར་མའི་སྒྲུབ་ཐབས་ཤིག་བྱིན་ནོ། །དེ་ཙམ་མ་གཏོགས་ལོ་བཅོ་བརྒྱད་ལོན་གྱི་བར་དུ་རིག་པ་གཅིག་ཀྱང་མ་བསླབས་པས། ཕུ་བོ་དང་ཁྱིམ་བདག་མོས་བླུན་པོ་ཁྱོད་ཀྱིས་ཅི་རུང་ཞེས་སྤྱོས་ནས་ཕྱིར་ཕྱུང་བས། ཡིད་འབྱུང་ནས་གཞན་གྱི་ཡུལ་དུ་སློང་མོས་འཚོ་ཞིང་རྡོ་རྗེ་རྣལ་འབྱོར་མ་སྒྲུབ་པར་བྱེད། མཐར་གྱི་ལོ་བཅུ་དྲུག་སོང་བ་ན། ཏིང་ངེ་འཛིན་བཟང་པོ་ཡང་སྐྱེས་ནས། ནུབ་ཕྱོགས་ཧིཾ་ག་ལཱ་ཙི་ལྷ་མོ་ཨུ་མའི་གནས་སུ་སོང་ནས། ལྷ་མོའི་རྡོ་སྐུའི་སྟེང་དུ་ཟླ་བ་དྲུག་གཉིད་ཀྱི་འོད་གསལ་ཐུན་གཅིག་བསྒོམས་པས། ལྷ་མོ་སྐྲག་ནས། རྣལ་འབྱོར་པ་རིད་དྷི་དེ་ཧི་ཀི་ནི་དྷི་དེ་ཞེས་ཟེར་བ་ན། རྣལ་འབྱོར་པས་རྫུ་འཕྲུལ་དང་གཏེར་གྱིས་ཅི་བྱེད། ཡེ་ཤེས་ཀྱི་དངོས་གྲུབ་སྦྱིན་ན་བླང་མོད། ལྷ་མོས་བདག་ལ་གྲུབ་ཐོབ་སྦྱིན་དུ་མེད། གཽ་རཀྵ་ལས་ལོང་ཟེར་བ་ལ། དེས་གཽ་རཀྵ་འཚོལ་དུ་སོང་བ་ན། ཡུལ་གོ་དཱ་བ་རི་ན་


TNT17_Page_0128
[མ་དཔེ་གཟིགས་ན་འདིར་གནོན།]

རྣལ་འབྱོར་པ་གྲངས་མེད་པ་འདུག་པའི་གྲལ་གྱི་ཐ་མ་ཞིག་ན། བཞིན་ཤིན་ཏུ་མི་སྡུག་པ། ཡན་ལག་ལས་རྣག་ཁྲག་ལྷུང་བ་ཞིག་འདུག་པས་དེ་ཡིན་པར་ཤེས་ནས། ཕྱག་བཙལ་ཞིང་གསོལ་བ་བཏབ་པས། དེས་བྱིན་གྱིས་བརླབས་པའི་ཚོད་མ་ཕུལ་གང་གནང་བ་འཐུངས་པས། དེ་ཉིད་དུ་ཤེས་བྱའི་ཡུལ་ཀུན་ལ་མངའ་བརྙེས། ཆོས་ཉིད་མངོན་སུམ་དུ་མཐོང་བའི་གྲུབ་ཐོབ་ཆེན་པོར་གྱུར་ནས་ཆོས་བཤད་དོ། །དེས་པཎྜི་ཏ་ཆེན་པོ་རཱ་ཏི་གུཔྟ་ལ་གདམས་པ་ཡིན་ནོ། །དེ་ནི་རྒྱ་གར་ལྷོ་ཕྱོགས་སུ་སྐུ་འཁྲུངས། རིགས་ནི་ཚོང་དཔོན་གྱི་བུ། ཆེར་སྐྱེས་པ་ན་སངས་རྒྱས་པའི་སྡེ་ལ་རབ་ཏུ་བྱུང་སྟེ། སྡེ་པ་ནི་ཐམས་ཅད་ཡོད་པར་སྨྲ་བ་ཡིན་གསུང༌། བློ་ཤིན་ཏུ་རྣོ་བས་འདུལ་བ་འབུམ་སྡེ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་འབུམ་སྡེ་ཡང་ཐུགས་ལ་གཟུང༌། ཕྱི་རོལ་ཀྱི་རིག་པའི་གནས་ལ་ཤིན་ཏུ་མཁས། གསང་སྔགས་རྡོ་རྗེ་ཐེག་པའི་ཆོས་འཚོལ་བར་བཞེད་ནས། ཤར་ཕྱོགས་དང༌། རྒྱ་མཚོའི་གླིང་ཕྲན་དང༌། ནུབ་ཕྱོགས་ཀྱི་གནས་མང་པོར་བྱོན། སློབ་དཔོན་ཆེན་པོ་རིན་ཆེན་གྲགས་པ་ལས་དཀྱིལ་འཁོར་བཅུ་གསུམ་དུ་དབང་བསྐུར་བ་ཞུས། ཡང་སློབ་དཔོན་ཆེན་པོ་ཛྙཱ་ན་གུཔྟ་ལ། ར་ཁང་གི་ཡུལ་དུ་དཀྱིལ་འཁོར་དྲུག་ཅུར་དབང་བསྐུར་བ་ཞུས། བལ་པོའི་ཡུལ་གྱི་པཎྜི་ཏ་དཱ་ཤ་བ་ལཱ་ལ་པིང་ཧ་ཞེས་བྱ་བ་ལ་དབང་དང་གདམས་ངག་མང་པོ་ཞུས། རྒྱུད་ཀྱི་བཤད་པ་ཡང་སློབ་དཔོན་དེ་གསུམ་ལ་ཞུས་པ་ཤས་ཆེ། ལན་ཅིག་རྒྱ་གར་ཤར་ཕྱོགས་སུ་སྟོན་མོ་ཆེན་པོ་ཞིག་གི་ས་ན། མུ་སྟེགས་རལ་པ་ཅན་འདྲ་བའི་རྣལ་འབྱོར་པ་ཧྲུལ་


TNT17_Page_0129
[མ་དཔེ་གཟིགས་ན་འདིར་གནོན།]

པོ་གཅིག་འདུག་པ་ལ། དེ་དང་གཏམ་འདྲ་བྱས་པས། གཞན་སེམས་ཤེས་པར་འདུག་ནས་སུ་ཡིན་དྲིས་པས། གྲུབ་ཐོབ་ཨ་སི་ཏ་གྷ་ན་ཡིན་གསུང༌། དེར་ཟླ་བ་ཙམ་བསྟེན་ཏེ་གདམས་ངག་ཀྱང་མང་དུ་གསན་སྐད། གྲུབ་ཐོབ་ཨོ་ཀོ་ར་ནཱ་ཐ་ལ་ཡང་གདམས་པ་དཔག་ཏུ་མེད་པ་གསན། དེ་ནས་ཡུལ་རུ་ལུ་ར་ཏི་ལ་སོགས་པ་ལྷོ་ཕྱོགས་ཀྱི་ཡུལ་གྱི་གཙུག་ལག་ཁང་སུམ་ཅུ་ཙམ་གྱི་གནས་བརྟན་མཛད། བསྐྱེད་པའི་རིམ་པ་ལ་བརྟན་པ་ཐོབ། རྒྱུད་སྡེ་ལྔ་བཅུ་ཙམ་མཁྱེན་པ་ཡིན་ནོ། །རིན་པོ་ཆེའི་འབྱུང་ཁུངས་ལྟ་བུའི་གཏམ་ལས། གདམས་ངག་སྣ་ཚོགས་བརྒྱུད་པའི་གཏམ་གྱི་སྐབས་ཏེ་བརྒྱད་པའོ།། །།དེ་ལྟར་བཀའ་བབས་དེ་ཐམས་ཅད་ནི་གྲུབ་པའི་དབང་ཕྱུག་ཆེན་པོ་ཞི་བ་སྦས་པ་ལ་མངའ་བ་ཡིན་ཏེ། དེ་ལ་སློབ་དཔོན་འདི་ནི་ལྷོ་ཕྱོགས་ཀྱི་གྲོང་ཁྱེར་ཛ་ལ་མཎྜལ་ཏེ་ཆུའི་དཀྱིལ་འཁོར་ཞེས་བྱ་བར་འཁྲུངས། རིགས་ནི་རྒྱལ་རིགས། གཞོན་ནུ་ནས་རིག་པའི་གནས་ཕྲ་མོ་མང་པོ། སྒྲ་དང་རྟོག་གེ་ཡན་ལག་དང་བཅས་པ་རྣམས་ལ་སྦྱངས། ཡབ་ཀྱང་རྗེ་བཙུན་མ་སྒྲོལ་མ་ཉམས་ལ་ཞལ་མཐོང་བའི་སྔགས་པ་ཡིན། དེ་ལ་སྒྲོལ་མའི་དབང་བསྐུར་བ་དང༌། སྒྲུབ་ཐབས་ཀྱང་གསན། དགུང་ལོ་ཉི་ཤུ་རྩ་གཉིས་པ་ལ་རྒྱ་མཚོའི་འགྲམ་ཀོང་ཀུ་ནའི་ཡུལ་དུ་གསེར་གྱི་རྒྱལ་མཚན་ཞེས་བྱ་བའི་གནས་གཞི་གཅིག་དུས་དེ་ཙམ་ན་བཙུན་ཚུགས་བཟང་བ། ཆོས་གྲྭ་དར་བ། དགེ་སློང་ལྔ་བཅུ་ཙམ། དགེ་བསྙེན་ཡན་ཆད་ལ་འདུས་ཆེ་དུས་སྟོང་ཕྲག་ཙམ་འོང་བ་ཅིག་ཡོད་པ་དེར་མཁན་པོ་རཱ་ཏི་གུཔྟ་ལ་བསྙེན་པར་རྫོགས། དང་པོར་


TNT17_Page_0130
[མ་དཔེ་གཟིགས་ན་འདིར་གནོན།]

ཉན་ཐོས་ཀྱི་སྡེ་སྣོད་རྣམས་དང༌། དེ་ནས་དབུ་སེམས་ཀྱི་གཞུང་ལུགས་ཐམས་ཅད་ལ་མཁས་པར་སྦྱངས། ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་དང༌། སེམས་ཙམ་མདོ་བཞིར་གྲགས་པ་ལ་སོགས་པ་གསུང་རབ་དུ་མ་ཐུགས་ནས་བཤད། མཁན་པོ་ལ་ཡོན་དབུལ་བ་དང༌། རྙེད་བཀུར་ཆེན་པོ་བྱ་བར་བཞེད་ནས། སིང་ག་ལའི་གླིང་དུ་ཡུག་ཅིག་བྱོན། དེར་ནག་པོ་ཆེན་པོའི་རིག་སྔགས་ཅུང་ཟད་གྲུབ་པ་དང༌། ཆོས་བཤད་པའི་མཐུས་རྙེད་བཀུར་དཔག་ཏུ་མེད་པ་བྱུང༌། དེ་རྣམས་བླ་མའི་དྲུང་དུ་བསྣམས་ཏེ་རིན་པོ་ཆེ་སྣ་བདུན་གྱི་ཕུང་པོ་ཆེན་པོ་བྱས་ཏེ་ཕུལ། དབང་དང་གདམས་ངག་རྣམས་ཞུས་པས། ཐུན་མོང་གི་དབང་ཐམས་ཅད་བསྐུར། རྒྱུད་ལྔ་བཅུ་ཙམ་གྱི་བཤད་པ་ཕལ་ཆེར་ཡང་གནང༌། འོན་ཀྱང་ཐུན་མོང་མ་ཡིན་པའི་དབང་དང་གདམས་ངག་རྣམས་ནི་མ་ཐོབ་བོ། །དེ་ནས་ལོ་མང་པོར་བླ་མའི་ཐ་ན་ཐལ་བ་འཕྱག་པ་ཚུན་ཆད་ཀྱི་གཡོག་མཛད་ཅིང༌། རང་གི་ལོངས་སྤྱོད་ཆོས་གོས་གསུམ་མ་གཏོགས་བླ་མ་ལ་ཕུལ། རང་གི་ཟས་ནི་གྲོང་ཁྱེར་གྱི་བསོད་སྙོམས་ཀྱིས་མཛད། དེ་ལྟར་ལོ་དྲུག་སོང་བའི་རྗེས་སུ། བླ་མས་ཀྱང་ཐུན་མོང་མ་ཡིན་པའི་དབང་གོང་མ་རྣམས་དང༌། བྱིན་རླབས་སྣ་ཚོགས་པ་དང༌། གདམས་ངག་ཐམས་ཅད་གནང༌། དེ་དག་བསྒོམས་པས་ཉམས་བཟང་པོ་ཡང་སྐྱེས། དེར་མཁན་པོ་སྐུ་འདས་ཏེ། གཙུག་ལག་ཁང་དེ་ཐམས་ཅད་ཀྱི་བདག་པོ་ཡང་མཛད། དགེ་འདུན་གྱི་གནས་བརྟན་ལོ་དགུའི་བར་དུ་མཛད། དེ་དག་ཏུ་ཡང་མཚན་མོ་ཏིང་ངེ་འཛིན་འབའ་ཞིག་བསྒོམ་བཞིན་བཞུགས། འོན་ཀྱང་ཉིན་མོ་དགེ་


TNT17_Page_0131
[མ་དཔེ་གཟིགས་ན་འདིར་གནོན།]

འདུན་གྱི་བྱ་བ་སྣ་ཚོགས་པ་དེས་ཡེ་ཤེས་མི་འཕེལ་བར་མཁྱེན་ནས། དགེ་འདུན་ལ་ཡང་ཡང་གནང་བ་ཞུས་ཀྱང༌། དགེ་འདུན་རྣམས་ཀྱིས་མ་གནང་བ་ལ་དེར་སློབ་དཔོན་གྱིས་ཆང་གསོལ། གྲོང་ཁྱེར་གྱི་སྲང་ཁ་རྣམས་སུ་སྐད་རིགས་སྣ་ཚོགས་ཀྱིས་གླུ་བླངས་སྒོ་དང་སྒོ་རུ་གར་སྣ་ཚོགས་མཛད་པ། དགེ་འདུན་རྣམས་ན་རེ། མཁན་པོ་ཆོས་མང་པོ་ལ་མཁས་པ་ཡིན་པས་ཆད་པ་མི་བྱེད་ཀྱ། ད་ཁྱེད་འཚོ་བ་གང་བདེ་བར་སོང་ཞེས་ཟེར་བས། ད་ནི་དོན་ཐམས་ཅད་འགྲུབ་སྙམ་སྟེ། ཡུལ་སྣ་ཚོགས་སུ་བརྒྱུད། ཡུལ་ཙི་བ་ལའི་གྲོང་ཁྱེར་གཅིག་གི་འདབས་སུ་སྤྱིལ་པོ་ཞིག་ཏུ། ལོ་གསུམ་སྒྲུབ་པ་མཛད། དེ་ནས་ནུབ་ཕྱོགས་ཨུ་རྒྱན་གྱི་ཡུལ་དུ་བཞུད། དེར་ཡང་ལོ་གསུམ་ཙམ་བཞུགས། ལན་ཅིག་ཆུ་འགྲམ་ཞིག་ན་སྨད་འཚོང་མ་དྲུག་ཁྲུས་བྱེད་ཅིང་འདུགཇི་ཞིག་ན་དེ་རྣམས་རྩིག་པ་ཞིག་གི་ཕག་ཏུ་སོང༌། འདི་རྣམས་ཅི་ཟེར་དགོངས་ཏེ་གསན་པས། གཅིག་གིས་གཅིག་ལ་གཏམ་གྱི་ཚུལ་གྱིས་ཕྱིར་བཟློག་མན་ངག་དྲུག་བཤད་ཀྱིན་འདུགདེ་ལ་སོགས་པ་ངོ་མཚར་དུ་མ་གཟིགས་ཤིང༌། རྡོ་རྗེ་མཁའ་འགྲོ་མ་རྣམས་ཀྱིས་གྲོགས་མཛད་པས། ཡེ་ཤེས་གོང་ནས་གོང་དུ་འཕེལ་ཡང༌། དེ་ཁོ་ན་ཉིད་ཀྱི་གནས་མ་རྟོགས་ནས། དེ་ཁོ་ན་ཉིད་སྟོན་པའི་སློབ་དཔོན་སེམས་བཞིན་ཡོད་པ་ལ། དེར་ཆང་འཚོང་མ་ཞིག་གི་སྒོར་བྱོན་པས། དེ་རྡོ་རྗེ་རྣལ་འབྱོར་མའི་རྣམ་པར་གྱུར་ནས། ཤར་ཕྱོགས་ཀྱི་ཡུལ་ན་སློབ་དཔོན་ཡེ་ཤེས་བཤེས་གཉེན་ཞེས་བྱ་བ་བཞུགས་ཏེ། དེས་ཁྱོད་ལ་འདོད་པའི་དངོས་གྲུབ་སྟེར་བར་འགྱུར་གསུང༌།


TNT17_Page_0132
[མ་དཔེ་གཟིགས་ན་འདིར་གནོན།]

དེ་ནས་སློབ་དཔོན་རིམ་གྱིས་ཤར་ཕྱོགས་སུ་བྱོན། གྲོང་ཁྱེར་གྱི་མི་ཐམས་ཅད་དང༌། ཕྱི་ནང་གི་གནས་ཐམས་ཅད་དུ་སོང་སྟེ་ཡེ་ཤེས་བཤེས་གཉེན་དྲིས་པས་ཀྱང་བཤད་རྒྱུ་མི་འདུགཙརྻ་པའི་སྡེ་རྣམས་ཀྱི་ནང་དུ་ཕྱིན་ཏེ་དྲིས་པས་ཀྱང་གཞན་སུ་ལའང་བཤད་རྒྱུ་མེད། ལན་ཅིག་དེ་ན་རྣལ་འབྱོར་པ་རྒན་པོ་ཞིག་ན་རེ། དེ་ནི་ངེད་ཙརྻ་པའི་སློབ་དཔོན་ནུས་མཐུ་ཆེན་པོ་ཞིག་ཡིན་པ་ལ། ད་གར་གཤེགས་ཆ་མེད་ནས་ལོ་མང་པོ་ལོན་ཟེར། དེ་ནས་ཀྱང་ཡང་ཡང་བཙལ་བས། ལན་ཅིག་ནགས་ཀྱི་གྲོང་དང་ཉེ་བའི་མཆོད་རྟེན་གཅིག་གི་གྲིབ་མ་ལ་འགྲོན་བཙུན་ཁྱིམ་བཙུན་གྱི་ཆ་བྱད་གཅིག་ཉལ་ནས་འདུགདེ་ལ་ཡེ་ཤེས་བཤེས་གཉེན་ཁྱེད་ཀྱིས་མཐོང་ངམ་དྲིས་པས། དེའི་ཞལ་ནས། ཤེས་ཏེ་ང་ཡང་དེའི་དྲུང་དུ་འགྲོ་བ་ཡིན། འདི་ནས་ཤར་ཕྱོགས་ན་ཏི་པུ་ར་ཞེས་བྱ་བའི་གྲོང་ཁྱེར་ན་ཡོད་གསུང༌། བསྟན་པར་ཞུ་བྱས་པས། ངའི་ནོར་འདི་རྣམས་ནགས་འདི་ལ་ཁྱོད་ཀྱིས་འཁྱེར་ཐུབ་ན་བསྟན་གསུང༌། དེར་ཁུར་ལྕི་མོ་ཞིག་བདུག་པ་བསྣམས་ཏེ་བྱོན། འགྲོན་བཙུན་དེ་ནི་སྔོན་ལ་སོང༌། ཞི་བ་སྦས་པ་ནི་ལམ་དུ་ཆོམ་པོས་བཟུང༌། ཁུར་བཤིག་པས་རྡོ་འབའ་ཞིག་བྱུང་སྟེ། རྐུན་པོ་རྣམས་ཚིག་པ་ཟོས་ཏེ། སླར་ཡང་ཆེར་བརྡུངས། ས་ལ་རོ་བཞིན་འགྱེལ་བ་ན། ཡང་སློབ་དཔོན་དེ་བྱུང་སྟེ། ཆུས་བཀྲུས་ཤིང་སྔགས་བཏབ་པས་འཕྲུལ་དུ་གསོས་ཏེ་འགྲོ་ཐུབ་པར་བྱུང༌། ཏི་པུ་རར་བྱོན་པའི་ཚེ་བླ་མ་བསྟན་པར་ཞུ་བྱས་པས། མཚེའུ་གཅིག་གི་འགྲམ་དུ་ཁྲིད་ནས། དེར་བླ་མ་རང་གི་གཟུགས་བརྙན་ཤར་བ་ལ། ཡེ་ཤེས་བཤེས་གཉེན་ནི་འདི་ཡིན་ཞེས་གསུངས།


TNT17_Page_0133
[མ་དཔེ་གཟིགས་ན་འདིར་གནོན།]

དེས་ཀྱང་ངོ་སྤྲད་པ་བཞིན་དུ་སོང་ནས། ཏིང་ངེ་འཛིན་བཟང་པོ་ཞིག་ཀྱང་སྐྱེས། འོ་ན་བདག་རྗེས་སུ་བཟུང་བར་ཞུ་བྱས་པས། ཁྱོད་ཅི་བརྟོལ་ཆེ། རྙེད་བཀུར་མེད་པར་རྗེས་སུ་བཟུང་བར་ཞུ་ཟེར་བ་གསུང་ནས། ཁྲོས་ཤིང་མང་དུ་བརྡུངས། དེར་ཁྱིམ་བདག་ནོར་ཆེན་པོ་ཞིག་ལ། ངས་ཁྱོད་ཀྱི་ལས་ཀྱི་གཡོག་བྱས་ན། ང་ལ་གླ་ཇི་ཙམ་སྟེར་བྱས་པས། དེ་ན་རེ་ཉི་མ་རེ་ལ་གསེར་དི་ནར་རེ་རེ་སྦྱིན་ཟེར། དེའི་གཡོག་ལོ་གཅིག་མཛད། རྒྱ་གར་བའི་ཞིང་ལས་ཀྱི་ཁོལ་བོ་ནི་ཤིན་ཏུ་སྡུག་གསུང༌། དེར་གཞན་ཡང་ཡོ་བྱད་མང་དག་སྟེར་མཁན་བྱུང་བ། དེ་ཐམས་ཅད་སློབ་དཔོན་ལ་ཕུལ། ཡང་བླ་མའི་ཕྱི་བཞིན་སོང་བ་ན། ལན་ཅིག་ནགས་གསེབ་ཞིག་ན་མ་ཧེ་མོ་སྣ་ཐག་བཏགས་པ་ཞིག་འདུག འདི་ཁྲིད་ཅིག་གསུངས། བླ་མ་སྔོན་ལ་གཤེགས། ཞི་བས་དེ་ཁྲིད་ནས་ཕྱིན་པས། བདག་པོས་ཕྱི་བཞིན་བསྙེགས་པས་ཟིན་ནས། དེས་ཤིན་ཏུ་བཏགས་ཏེ། ཐང་ལ་རོ་བཞིན་སོང་བ་ལ། བླ་མ་བྱོན་ནས་ཐབས་མཛད་པས་གསོས། ཡང་ལན་ཅིག་བླ་མའི་རྫས་འདྲ་རྩྭ་ཁྱིམ་པ་འདྲ་ལ་བཅོལ་ཏེ་བཞག དཔོན་སློབ་གཉིས་གྲོང་ཁྱེར་ལ་བྱོན་ཏེ་ལྡོག་ཕེབས་པས། རྩྭ་ཁྱིམ་ཐམས་ཅད་ལ་མེ་འུར་འུར་འབར་གྱིན་འདུག དེར་བླ་མ་རང་གི་རྫས་ལ་ཐུགས་ཁྲལ་ཆེ་ཆེ་ལྟར་མཛད་ཀྱིན་འདུག་པས། འོ་ན་བདག་གིས་བླང་ངམ་ཞུས་པས། ལོང་གསུང༌། དེར་མེའི་དབུས་སུ་ཚམ་ཚོམ་མེད་པར་ཞུགས་ཏེ་བླ་མའི་རྫས་རྣམས་བླངས་པས། རྐང་ལག་ཐམས་ཅད་རུས་པ་ལ་ཐུག་གི་བར་དུ་ཚིག ལུས་ཐམས་ཅད་ཀྱང་


TNT17_Page_0134
[མ་དཔེ་གཟིགས་ན་འདིར་གནོན།]

ཆུ་བུར་དུ་གྱུར། དེ་ལ་ཤི་ཡང་བླ་མའི་རྫས་ཀྱི་ཕྱིར་ཡིན་སྙམ་སྟེ། འགྱོད་པའི་སེམས་ནི་སྐད་ཅིག་ཀྱང་མ་བྱུང༌། དེ་ཡང་རྫས་འགངས་ཆེ་བ་ནི་མེད་དེ་ཆུ་སྣོད་གཅིག ན་རི་ཀེ་ལེའི་ཕོར་པ་གཅིག ཤིང་གི་མཎྜལ་གཅིག ཀ་པཱ་ལ་གཅིག་རྣམས་ཡིན་གསུང༌། དེར་ངེས་པར་འཆིའམ་སྙམ་པ་ལ། བླ་མས་སྔགས་དང་སྨན་མཛད་པས་རིང་པོར་མི་ཐོགས་པར་གསོས། དེར་ཞི་བ་སྦས་པའི་ཐུགས་ལ། བདག་གི་ལུས་ངན་པ་འདི་གསོ་བའི་ཕྱིར་དུ་སློབ་དཔོན་གྱི་སྨན་ཟད་པར་བྱས་པ་ནི་མ་ལེགས། ད་ཡོང་སློབ་དཔོན་གྱི་ཕྱིར་དུ་བདག་ཉིད་དཀའ་བ་དུ་མ་བྱེད་པ་ནི་རང་གི་དོན་འབའ་ཞིག་ཡིན་པས། དེ་ལ་སློབ་དཔོན་ལས་སྔགས་དང་སྨན་བླང་བ་ཤིན་ཏུ་མི་རུང་བས། སློབ་དཔོན་ངའི་གཡོག་ཏུ་མི་བཀོལ་ཞེས་དམ་བཅས། ཡང་ལན་ཅིག་སློབ་དཔོན་ར་ཁང་གི་ཡུལ་དུ་འབྱོན་པར་བཞེད་ནས། གྲུར་ཞུགས་པ་ན། ཇི་ཞིག་ལྟར་ན། ཆུའི་དཀྱིལ་ནས་ཉ་མཆེ་བ་ཅན་ཞིག་ཉང་གིས་བྱུང༌། དེས་སློབ་དཔོན་ལ་གནོད་པར་གྱུར་གྱི་དོགས་ནས། དེ་ལ་མདུང་ཐུང་ཞིག་བསྣུན། ཉ་དེས་ཞི་བ་སྦས་པའི་ཞབས་ལ་རྨུགས། ཆུའི་དཀྱིལ་དུ་ཉས་འཁྱེར་ལ་ཁད་པ་ལ། བླ་མ་དྲན་པར་བྱས་པས། ཉའི་ཁ་ནས་བཏང་སྟེ་ཉ་ཆུ་ལ་སོང་ངོ༌། །དེར་རྨས་སྡུག་བསྔལ་བར་གྱུར་ཀྱང་སློབ་དཔོན་གྱི་རིམ་གྲོ་བྱེད་པ་ལ་མ་གཡེལ་བར་བྱས་པས། ཞག་བདུན་སོང་བའི་ཐོ་རངས་ཤིག ཅི་བྱས་མེད་པར་ཟུག་རྔུ་རྣམས་ཞ། ཡང་ཤར་ཕྱོགས་ར་ཁང་གི་ཡུལ་དེར་སློབ་དཔོན་བྲག་ཕུག་ཅིག་ཏུ་


TNT17_Page_0135
[མ་དཔེ་གཟིགས་ན་འདིར་གནོན།]

བཞུགས། ཞི་བ་སྦས་པས་གྲོང་ཁྱེར་སྣ་ཚོགས་ནས་ཡོ་བྱད་འཚོལ་བ་སོགས་དོན་མང་པོ་ལ་འགྲོ་དགོས། ཡུལ་དེ་ནི་ཆུ་ཀླུང་ཤིན་ཏུ་མང་བས། ཡང་ཡང་རྐྱལ་ཞིང་བརྒལ་དགོས་པ་ལས། སྲོག་ཆགས་སི་སཱ་ར་ཏེ་འཛིན་ཁྲིའི་རིགས་སུ་གཏོགས་པ། བོད་ལ་ཆུ་སྲིན་སྤར་དུ་གྲགས་པས་ཀྱང་ལན་གསུམ་བཟུང་མོད་ཀྱ། སློབ་དཔོན་རང་གིས་ཀྱང་ནུས་པ་བརྙེས་པ་དང༌། བླ་མ་དྲན་པར་བྱས་པས་དེས་ཀྱང་བཏང་བ་འབའ་ཞིག་བྱུང༌། གཞན་ཡང་སྲོག་ཆགས་ཀཱིཾ་ཀ་ར་དང༌། ཉ་དང་ཆུའི་སྦྲུལ་ལ་སོགས་པས་ཟོས་ཤིང་ཕུག་པས། རྨས་པ་ནི་བགྲང་དུ་མེད་གསུང༌། དེ་ཐམས་ཅད་ལ་བླ་མའི་སྔགས་དང་སྨན་གཅིག་ཀྱང་མ་བླངས་ཏེ། སྔགས་དང་སྨན་སོགས་ཕན་པའི་ཐབས་ཐམས་ཅད་གཞན་ལས་བསླངས། ཡུལ་དེར་སློབ་དཔོན་ལོ་གསུམ་བཞུགས་པ། འཁོར་མཆོག་གི་རྣལ་འབྱོར་པ་ལྔ། རིག་མ་བཅུ་གཉིས་དང་བཅས་ཏེ། ཚོགས་ཀྱི་འཁོར་ལོ་ཡང་དང་ཡང་དུ་སྤྱད་པས། ཞི་བ་སྦས་པ་ནི་རྒྱུ་འགྲུལ་གཞན་པས་མང་པ་མཛད་དགོས་ཤིང༌། ཡུལ་དེའི་ཆུའི་སྲོག་ཆགས་གཞན་པས་གདུག་པ་ཆེ་བས། ལོ་གསུམ་དུ་ལུས་ཤིན་ཏུ་སྦྱོངས་སྤྱོད་ཆེ་ཡང༌། ཐུགས་ལ་སྐྱོ་དུབ་གཅིག་ཀྱང་མ་བྱུང་ངོ༌། །དེ་དུས་ཀྱི་འཁོར་དེ་ཀུན་ཕྱིས་དངོས་གྲུབ་ཐོབ་པ་ཤ་སྟག་བྱུང་གསུང༌། དེ་ནས་དཔོན་སློབ་གཉིས་གྲུ་ལ་བརྟེན་ཏེ་བྷང་ག་ལར་བྱོན། དང་པོ་མཇལ་ནས་དེ་བར་གདམས་ངག་ཚིག་གཅིག་ཀྱང་མ་གནང་བས། དེར་གདམས་ངག་གནང་བར་ཞུས་པ་ན། རྙེད་བཀུར་མེད་པར་རྗེས་སུ་བཟུང་


TNT17_Page_0136
[མ་དཔེ་གཟིགས་ན་འདིར་གནོན།]

མཛོད་ཅེས། དེ་ཉིད་ཐོབ་མ་ཐག་ཏུ་སློབ་དཔོན་ལ། ལྷག་པའམ་མཉམ་ཞེས་འགྲན་བྱེད་མི་དེ་ལ། དཔལ་ཆེན་རྡོ་རྗེ་སེམས་དཔའང་འཇིགས་ཞེས་གསུང༌། ཞེས་བྱ་བ་ཡིན་གསུང་སྟེ། ཁྲོས་ཤིང་མ་མཉེས་པའི་ཚུལ་བསྟན་ཏེ་བྲོས་ནས་བཞུད་དོ། །དེར་བང་ཐག་པ་ནས་རྒྱུགས་ཀྱང་རྗེས་མ་ཟིན། ཞག་བདུན་དུ་ཡུལ་དེའི་ཕྱོགས་ཐམས་ཅད་དུ་བཙལ་ཡང་མ་རྙེད། དེ་ནས་ཐག་རིང་པོར་སོང་ནས། གྲོང་ཁྱེར་སྣ་ཚོགས་སུ་མི་རྣམས་ལ་དྲིས་ཀྱང་ཆ་མེད། དེ་ལྟར་ཟླ་བ་གཉིས་སུ་བཙལ་ཡང་མ་རྙེད་པས། གྷོ་ར་ཊཾ་ཌ་ཞེས་པའི་གྲོང་ཁྱེར་ཞིག་ཏུ་ཞག་བདུན་ངུ་བཞིན་གསོལ་བ་འདེབས་ཀྱིན་བསྡད། དེར་ཡང་མ་བྱོན་པས། ད་ནི་ཚེ་འདིར་སྐལ་བ་མེད་པ་ཡིན། འདི་ཉིད་དུ་ཤི་བར་བྱ་སྙམ་སྟེ། བྲག་དེའུ་གཅིག་གི་རྩེ་ནས་མཆོངས་པས་ཀྱང་ཡན་ལག་བསྣད་པ་སོགས་མེད་ཅིང༌། གནོད་པ་ཅང་མ་བྱུང༌། དེར་ཡིད་སྐྱོ་བས་ཅུང་ཟད་ཅིག་བསྡད་པ་ན། རིག་མ་ངོ་ཤེས་པ་ཅིག་ཕྱོགས་དེར་བྱུང་སྟེ། སློབ་མ་བཟང་པོ་ཅི་བྱེད་ཀྱིན་ཡོད་གསུང༌། སློབ་དཔོན་གྱི་རིག་མ་བླ་མ་ཡིན་པས། ཞབས་ལ་སྤྱི་བོས་གཏུགས་ཏེ། ཁོ་བོ་ནི་སྐལ་བ་མེད་དེ། བླ་མས་བོར་བས་འཆི་བར་སེམས་བྱས་པས། དེ་ན་རེ། ཁྱོད་སློབ་དཔོན་གྱིས་ངེས་པར་རྗེས་སུ་འཛིན་པར་འདུག་གསུང༌། དེར་ཡིད་ཅུང་ཟད་སྤྲོ་བ་སྐྱེས་ཏེ། སློབ་དཔོན་གང་ན་བཞུགས་དྲིས་པས། བླ་མ་ནི་ངའི་ཁྱིམ་དུ་བྱོན་ནས་ཞག་འགའ་བཞུགས་ཏེ་ད་ལྟ་བལ་པོར་བཞུད་གསུང༌། བུད་མེད་དེ་མི་སྣང་བར་ཐལ་ལོ། །དེར་ཞི་བ་སྦས་པས་ལམ་དུ་ཞུགས་བྱོན་པ་ན། བྲག་རྩེ་


TNT17_Page_0137
[མ་དཔེ་གཟིགས་ན་འདིར་གནོན།]

ནས་མཆོངས་པ་མཐོང་བའི་མི་རྣམས་ཀྱིས། ཅིའི་ཕྱིར་མཆོངས་ཞེས་འདྲི་བ་མང་དུ་བྱུང་བ་ལ། ལན་ནི་མ་སྨྲས། ཁོ་བོ་བླ་མ་མ་རྙེད་པས་སྡུག་བསྔལ་བ་ལ། འདི་ཀུན་སོས་རེ་དལ་ན་སྙམ་ཚིག་པ་ཟ་བར་བྱུང་སྐད། དེ་ནས་བལ་པོའི་ཡུལ་དུ་བྱོན་ཏེ། གྲོང་ཁྱེར་དང་གནས་གཞི་སོ་སོར་དྲིས་པས། གཞན་རྣམས་སུ་ཤོད་མཁན་མ་བྱུང༌། ཡཾ་བུའི་ནག་པོ་ཆེན་པོའི་ལྷ་ཁང་གི་དཀོན་གཉེར་ན་རེ། དེ་འདིར་བྱུང་སྟེ་ཞག་འགའ་ཐོ་ཅོའི་སྤྱོད་པ་འདྲ་བྱས་ནས་ཀཱ་མ་རུར་སོང་ཟེར། དེ་མ་ཐག་ཀཱ་མ་རུ་ལ་བསྟད་ནས་བྱོན་པས། ནགས་ཀྱི་ལམ་རྣམས་སུ་ཆོམ་རྐུན་དང༌། སྟག་དང༌། མ་ཧེ་དང༌། བསེ་རུ་ལ་སོགས་པ་འཇིགས་པ་ཇི་སྙེད་བྱུང་ཡང༌། བླ་མ་འབའ་ཞིག་དྲན་པར་བྱས་པས་གནོད་པ་མ་བྱུང༌། ཀཱ་མ་རུའི་གྲོང་ཁྱེར་ག་རུ་ཌ་གྷ་ཊ་ན་སློབ་དཔོན་བཞུགས་པ་དང་མཇལ། དགའ་ཆེས་ཏེ་ལུས་ས་ལ་བརྡབས་པའི་ཕྱག་བརྒྱ་སྟོང་དུ་མ་བྱས་སོ། །དེར་བླ་མ་ན་རེ། གལ་ཏེ་ཁྱོད་གདམས་ངག་འདོད་ན། ངའི་བླ་མ་ཨ་སི་ཏ་གྷ་ན་མཁའ་སྤྱོད་དུ་གཤེགས་པའི་ས། ཧེ་རཾ་པའི་བྲག་གི་རྩེ་དེ་ཡིན་པས། དེར་སོ་ཕག་གི་མཆོད་རྟེན་མི་འགྲེང་ལྔ་ཡོད་པ་ཞིག་བཞེངས་ཤིག་གསུང༌། དེ་ནས་ཡུལ་དེར་ཕྱིན་ནས་གོས་ཞིག་ཡོད་པ། ཕག་བྲེའི་རིན་ལ་སྤྲད་ནས། ཕ་གུ་བརྡེག་པ་དང༌། སོ་གཏོང་བ་ཐམས་ཅད་ཀྱང་ཞི་བ་སྦས་པ་གཅིག་པས་མཛད། དེ་ནས་ཁྱིམ་བདག་དད་པ་ཅན་གཅིག་གིས་གྲོགས་ཅུང་ཟད་བྱས་ནས། ཧེ་རཾ་པའི་རྩེ་མོར་མཆོད་རྟེན་བཞེངས་ཟིན་ནས། བླ་མའི་དྲུང་དུ་འོངས་པ་ན་ཁྱིམ་བདག་ལ་གྲོགས་བཅོལ་བ་དེས་མི་རུང་ཞེས་


TNT17_Page_0138
[མ་དཔེ་གཟིགས་ན་འདིར་གནོན།]

གསུངས་ཏེ། དེ་ནས་ཀྱང་ལོ་གཅིག་གི་བར་གདམས་ངག་མ་གནང༌། དེ་རྗེས་ཨོ་ཌི་ཤའི་གྲོང་ཁྱེར་ཀ་ཊ་ཀ་བྷ་ན་ར་སི་ན་བཞུགས་པའི་དུས་སུ། བླ་མའི་ཞལ་ནས། ཁྱིམ་ཞིག་བསྟན་ཏེ་ཁྱིམ་འདི་ན་གསེར་མང་དུ་ཡོད་པ་བརྐུས་ནས་ང་ལ་ཕུལ་ཞིག་གསུངས། དེ་ཡང་ཁྱིམ་དེ་ནི་མགར་བ་ནོར་ཆེ་ཞིང་སེར་སྣ་དམ་པ། ཕྱི་ནང་གི་རབ་ཏུ་བྱུང་བ་གང་ལ་ཡང་སྡང་བ་ཞིག་ཡིན་ཏེ། དང་པོར་དེའི་ཁྱིམ་དུ་ཞི་བ་སྦས་པས་ཞུགས་ཕྱིན་པ་ན། དེའི་སྒོ་བསྲུང་གིས་བརྡུངས་རྡེག་མང་པོ་བྱུང༌། དེར་སློབ་དཔོན་སྐུའི་སྟོབས་ཆེ་བས། སྒོ་བསྲུང་དེ་ཕྱག་གཅིག་གིས་མནན་ཏེ། ནང་དུ་ཚངས་ཀྱིས་ཞུགས་པས། མགར་བ་དེ་ལྕགས་ཀྱི་ལས་བྱེད་པ་དང་ཐུག་སྟེ། དེ་ཤིན་ཏུ་ཁྲོས་ནས་ལྕགས་གོང་དམར་འབར་བ་ཞིག་ཞི་བ་སྦས་པའི་སྐུ་ལ་འཕངས་པས་ན་བཟའ་ཡང་མ་ཚིགསྐུ་ལ་ཡང་གནོད་པ་མ་བྱུང་སྟེ། དེར་ཁྱི་མཆེ་བ་དུག་ཅན་མང་པོ་རྦད་བྱུང་བ་དེ་རྣམས་ཀྱིས་སློབ་དཔོན་ལ་རྨུགས་ཀྱང་སྐུ་ལ་གནོད་པ་མ་བྱུང་ཞིང༌། ཐུགས་ཀྱང་གཡོ་བ་མེད་པར་འདུག་པ་དེས་མཐོང་ནས་ཅུང་ཟད་དད་པར་གྱུར་ཏེ། དེ་ན་རེ། ཁྱོད་དེར་འདུག་ཟས་དྲངས་ཀྱི་ཟེར། ཟས་ངན་ངོན་ཞིག་དྲངས། དེར་ཤིན་ཏུ་དགྱེས་པ་ལྟར་གསོལ་བས། དེ་ཡང་ཅུང་ཟད་ངོ་མཚར་སྐྱེས་ཤིང༌། ཁྱེད་ཟས་འདི་ཙམ་གྱིས་ཚིམས་ན་ནང་པར་ནས་ཀྱང་ཤོག་ཅིག་ཟེར། དེར་ཡང་དང་ཡང་དུ་བྱོན་པས་འདྲིས་པར་གྱུར་པའི་མཚམས་ཤིགདེའི་ཁྱིམ་དང་ཡོ་བྱད་ཀྱི་གནས་ཚུལ་ཐམས་ཅད་ཀྱང་སློབ་དཔོན་གྱིས་ཤེས་ནས། དེས་སྡིག་པས་བསྒྲུབ་པའི་གསེར་སྲང་སྟོང་ཕྲག་ཙམ་ཡོད་


TNT17_Page_0139
[མ་དཔེ་གཟིགས་ན་འདིར་གནོན།]

པ་སུ་ལ་ཡང་སྦྱིན་པར་མི་ནུས་པ་དེ། ལན་ཅིག་ཁོང་རྣམས་ཡེངས་པ་ཞིག་ལ། སློབ་དཔོན་གྱིས་བརྐུས་ནས་འོངས་སྟེ་བླ་མ་ལ་ཕུལ་བས། བླ་མ་ན་རེ། བུ་དེ་ལེགས། སེར་སྣ་ཅན་གྱི་ནོར་འདི་གཞན་ལ་སྦྱིན་དགོས་གསུངས་ཏེ། ར་ཁང་གི་ཡུལ་གྱི་དགེ་འདུན་རྣམས་ལ་ཕུལ་ཞིག་གསུང་བ་ལྟར་འབུལ་བར་བྱོན། ཕྱིས་ཞི་བ་དུས་གཞན་ལན་ཅིག་གྲོང་ཁྱེར་དུ་སོང་བ་ལ། སྔར་གྱི་མགར་བ་དེས་ཟིན་ཏེ། ཡུལ་དེའི་རྒྱལ་པོ་མུ་ཀུནྡ་དེ་བ་ལ་གཏད་ནས། སྔར་གྱི་ལོ་རྒྱུས་རྣམས་བསྙད། དེར་སྟེས་དབང་གིས་སྐྱེ་བོ་མང་པོ་ཡང་འདུས། རྒྱལ་པོས་སློབ་དཔོན་ཉིད་ལ་དྲིས་པ་ལ། སློབ་དཔོན་གྱིས་སེར་སྣ་ཅན་གྱི་ལོངས་སྤྱོད་ནི་བརྐུས་པའམ་ཕྲོགས་ཏེ་གཞན་ལ་བྱིན་ན། དེ་ཉིད་བསོད་ནམས་འཕེལ་བ་ཡིན་གསུངས་པས། དེར་མི་ཐམས་ཅད་ཀྱིས་གད་མོས་བཏབ་སྟེ། འདི་ནི་རྐུན་པོ་ཆེན་པོ་ཞིག་སྟེ། འདིའི་སྤྱི་བརྟོལ་ལ་ལྟོས། འདི་ལྟར་རྐུན་མོ་བྱས་པ་ཡང་ཡོན་ཏན་དུ་རྩིའོ་ཟེར། དེར་རྒྱལ་པོས་རེ་ཞིག་བཙོན་ཁང་དུ་ཞོག་ཅིག་ཕྱིས་བརྟགས་ལ་ཆད་པས་གཅོད་དོ་ཞེས་རྒྱལ་པོ་སྐྱེ་བོ་དང་བཅས་པ་སོ་སོར་གྱེས་སོ། །བར་དེར་སློབ་དཔོན་ཡེ་ཤེས་བཤེས་གཉེན་གྱིས་དགོངས་པ་མཛད་པས། བཙོན་ཁང་གི་སྟེང་དུ་བྱ་རྣམ་པ་སྣ་ཚོགས་པ་འདུས། མཐའ་ཁོ་ར་ཁོར་ཡུག་ཏུ་ཁྱི་དང་ཅེ་སྤྱང་སྣ་ཚོགས་པས་ཉིན་མཚན་བྱེ་བྲག་མེད་པར་བསྐོར་ཞིང་སྐད་འབྱིན་པ་བྱུང་པས། ཐེ་ཚོམ་དུ་གྱུར་པ་ལ། དེའི་ཕྱི་དེའི་ཉིན་བར་དེ་ཕོ་བྲང་ལ་ཡང་དེ་བཞིན་དུ་བྱུང་བས་དེར་རྩིས་པས། རྣལ་འབྱོར་པ་བཙོན་ཁང་དུ་


TNT17_Page_0140
[མ་དཔེ་གཟིགས་ན་འདིར་གནོན།]

བཅུག་པ་ཞིག་གི་ནུས་པ་ཡིན་ཞེས་བྱུང༌། དེ་ནས་ཞག་འགའ་ཞིག་ལོན་པ་ན། བཙོན་ཁང་གི་སྒོར་ཡེ་ཤེས་བཤེས་གཉེན་བྱོན་ནས་བཙོན་བསྲུང་རྣམས་ལ་བྱེ་མ་གཏོར་བས་ཐམས་ཅད་རེངས། སྒོ་ལྕགས་ཀྱང་རང་བྱེ་ནས་ཞི་བ་སྦས་པ་དང་བཙོན་ལྔ་སྟོང་ལྷག་ཅིག་ཐར། ཞི་བ་སྦས་པས་བཙོན་ཁང་དུ་ཟླ་བ་ཕྱེད་སོང༌། གསེར་བླངས་པས་བླ་མ་མཉེས་པ་རེ་དགའ་སྙམ་པ་མ་གཏོགས་མི་དགའ་བ་དང་ཡི་མུག་སོགས་གཏན་ནས་མ་བྱུང་ངོ༌། །དེ་ནས་སློབ་དཔོན་གྱི་ཕྱི་བཞིན་དུ་འབྲངས་ཏེ་ཡུལ་ཏྲི་ལིང་ག་ཞེས་བྱ་བའི་གྲོང་ཁྱེར་ཞིག་ཏུ་བྱོན། གྲོང་ཁྱེར་དེར་ཕེབས་ཙམ་ཉིད་ནས་བླ་མས་ཀྱང་གདམས་ངག་མང་དུ་གསུངས། དེ་ནས་ལོ་གཉིས་ཙམ་སོང་བ་ན་བླ་མ་ན་རེ། ད་དབང་བསྐུར་བར་བྱ་དགོས་པས། ཆུ་བོའི་ཕ་རོལ་ཀྱི་ཁྱིམ་ཕ་གི་ན། རིགས་དང་ལྡན་པའི་སྔགས་ཅན་མ་འདི་ལྟ་བུ་ཞིག་ཡོད། དེ་འདིར་ཁྲིད་ལ་ཤོག་གསུང༌། ནང་བར་འགྲོའམ་ཞུས་པས་དོ་ནུབ་ཉིད་ཁྲིད་ལ་ཤོག་གསུང༌། དེར་ཆུ་བོ་ཆེན་པོ་ཞིག་ཡོད་པ་ལ་རྐྱལ་ནས་སོང་སྟེ། ཉི་མ་ནུབ་ཏུ་ཉེ་བ་ན་ཁྱིམ་དེར་སླེབ། ཁྱིམ་དེ་ནི་རྒྱལ་རིགས་རྒྱལ་པོའི་གླང་ཆེན་གནས་པ་ཞིག་ཡིན། གྲོང་ཁྱེར་གྱི་མིང་ཡང་ལཉྫ་ཀ་ར་ཞེས་བྱ་བ་ཡིན་གསུང༌། ཁྱིམ་དེར་ཁོ་བོ་འགྲུལ་བ་ཞིག་ཡིན་ཡུད་ཙམ་གནས་གཡར་གསུངས་པས། དེས་ཀྱང་ནང་དུ་བྱོན་ཟེར་ཏེ་བྱོན། དེར་སློབ་དཔོན་གྱིས་སྟེང་འོག་ཀུན་ཏུ་བརྟགས་པ་ན། བླ་མས་ལུང་བསྟན་པ་དེ་ནི་ཁྱིམ་བདག་དེའི་བུ་མོ་ཡིན་ཏེ། དེ་ནི་ཤིན་ཏུ་སྲུངས་པ་ཡིན་པས་ཐབས་ཅི་ཞིག་གིས་ཐོབ་པར་འགྱུར་སེམ་མོ། །དེ་ནས་སྲོད་


TNT17_Page_0141
[མ་དཔེ་གཟིགས་ན་འདིར་གནོན།]

ཀྱི་དུས་སུ་སྐྱེ་བོའི་རྒྱུ་འགྲུལ་ཆད་པ་ན། སློབ་དཔོན་གྱིས་རིག་སྔགས་ཀྱིས་ངག་བཅིངས་ཏེ། བུད་མེད་དེ་རེ་ཞིག་ཅང་མི་སྨྲ་བ་བྱས་ནས། སྟོབས་ཆེན་པོས་ཕྲག་པ་ལ་བཀལ་ཏེ། སྒོ་རྣམས་ཀྱང་སྟོབས་ཀྱིས་ཕྱེས་ནས་བྲོས་སོ། །གྲོང་ཁྱེར་གྱི་ཕྱི་རོལ་ཏུ་སླེབ་པ་ན། ནང་གི་མི་རྣམས་ཀྱིས་རྗེས་བསྙེགས་ཀྱང་མ་ཟིན། ནུབ་མོ་དེ་ཉིད་ལ་ཆུ་བོ་ལ་རྐྱལ་ནས་འོངས། བླ་མའི་དྲུང་དུ་ནམ་ཕྱེད་ཀྱི་དུས་སུ་སླེབ། བླ་མ་ན་རེ། དུས་ཀྱང་ལ་ཉེ་ལེགས་པ་ཡིན་གསུང༌། དེར་ཐོ་རངས་ཀྱི་དུས་སུ་དབང་བསྐུར། ཞག་བདུན་གྱི་བར་དུ་བྱིན་གྱིས་བརླབས་པ་དང༌། ཐུན་མོང་མ་ཡིན་པའི་ཞལ་གྱི་གདམས་པ་མཐའ་དག་སྩལ། གནས་དེ་ཡང་བྲག་དེའུ་གཅིག་ལ་ཡོད་དེ། སྔོན་སློབ་དཔོན་ཀླུ་སྒྲུབ་ཀྱི་ཕུག་པ་ཡིན་གསུང༌། གླང་ཆེན་གནས་ཀྱི་རྗེས་གཅོད་ཀྱི་མི་རྣམས་ཀྱང་ཁོང་གཉིས་ཆུས་ཁྱེར་བར་བསམ་སྟེ། ཕྱོགས་དེར་ཕྱིས་མ་བྱུང༌། དེ་ནས་བླ་མ་སྦྱིན་སྲེག་གཅིག་མཛད་པའི་སྐབས། སློབ་དཔོན་གྱིས་ལས་ཀྱི་རྡོ་རྗེ་མཛད་པ་ལ། བྱ་བ་ཅུང་ཟད་ཅིག་འཁྲུལ་བས། བླ་མ་ཁྲོས་ནས་ཐབ་ཀྱི་མེ་མང་པོ་གཏོར་བས། དེས་རྐྱེན་བྱས་ཏེ་བསམ་གྱིས་མི་ཁྱབ་པའི་ཡེ་ཤེས་ནམ་མཁའ་ལྟ་བུ་མཐའ་དབུས་མེད་པ་མཉམ་ཉིད་ཁྱབ་བརྡལ་གྱི་ཡེ་ཤེས་མངོན་དུ་གྱུར་ནས་ཆོས་ཐམས་ཅད་ཀྱི་གཏིང་སླེབ། དེར་རྣལ་འབྱོར་གྱི་དབང་ཕྱུག་ཆེན་པོར་གྱུར་ཏོ། །བུད་མེད་དེས་ཀྱང་རྣལ་འབྱོར་མ་བྱས་ཏེ། སྤྱོད་པ་པའི་སྡེ་རྣམས་སུ་སོང་བས། རྣལ་འབྱོར་མ་མེ་ན་ཀ་ཞེས་བྱ་བར་གྲགས། རྟོགས་པ་ནམ་མཁའ་དང་མཉམ། ལྟ་སྟེངས་བཞི་


TNT17_Page_0142
[མ་དཔེ་གཟིགས་ན་འདིར་གནོན།]

གྲུབ། ཆུ་ལ་མི་བྱིང༌། ཕྱིས་དངོས་གྲུབ་ཀྱང་ཐོབ་བོ། །དེར་བླ་མ་ཡེ་ཤེས་བཤེས་གཉེན་ན་རེ། ཞི་བ་སྦས་པ། ངས་ཁྱོད་ལ་གདམས་ངག་ཐམས་ཅད་ནི་བསྟན་ཟིན། དོན་ཆེན་པོ་ཡང་གྲུབ། ད་ཁྱོད་སཽ་རཥྟར་སོང་ལ། ཐོག་མར་སྤྲོས་མེད་ཀྱི་སྤྱོད་པ་གྱིས། དེ་ནས་གསངས་ཏེ་སྤྱོད་པ་གྱིས། དེ་ནས་སྤྲོས་བཅས་ཀྱི་སྤྱོད་པ་བྱེད་པར་ཞིག་བསྐུལ་བར་འོང་བས། དེའི་ཚེ་སྤྲོས་བཅས་ཀྱི་སྤྱོད་པ་གྱིས་ཤིགཚེ་འདི་ཉིད་ལ་རྡོ་རྗེ་འཆང་ཆེན་པོའི་གོ་འཕངས་ཐོབ་པོ་གསུང༌། དེར་ཞི་བ་སྦས་པས། བདག་འདི་ལྟར་ཆོས་ཐམས་ཅད་ཀྱི་གཏིང་སླེབ་པ་ནི་བླ་མའི་སྐུ་དྲིན་ལགས་པས་ཚེ་འདིར་དངོས་གྲུབ་མཆོག་མ་ཐོབ་ཀྱང་སླའ། བླ་མ་ཉིད་ཀྱི་རྗེས་སུ་འབྲང་ཞུས་པས། བླ་མ་ན་རེ། ངས་ཁྱོད་གཅིག་པུའི་ཕྱིར་ལོ་དེ་སྙེད་ཅིག་མིའི་ཡུལ་དུ་གནས་པ་ཡིན། དེ་བས་ན་ངའི་རྟོགས་པ་འདི་སྐལ་བ་དང་ལྡན་པ་ཐམས་ཅད་ལ་ཁྱོད་ཀྱིས་སྤོས་ཤིག་ཅེས་གསུང་སྟེ། དེ་ཉིད་དུ་མི་སྣང་བར་གྱུར་ཏོ། །དེར་བླ་མའི་ཐུགས་གཉིས་སུ་མེད་པའི་ཡེ་ཤེས་ནི་བདག་ཉིད་ཀྱི་མངོན་དུ་གྱུར་པས། སོམ་ཉི་ཐམས་ཅད་ནི་ཆོད་མོད་ཀྱང༌། བླ་མའི་གཟུགས་ཀྱི་སྐུ་དེ་མི་སྣང་བར་སོང་བས། ཐུགས་རབ་ཏུ་གདུང་བར་གྱུར་ཏེ་གླུ་བླངས་སོ། །དེར་སློབ་དཔོན་ཡེ་ཤེས་བཤེས་གཉེན་དེ་ལོ་བཅུ་ཙམ་བསྟེན་པ་ཡིན་གསུང༌། དེ་ནས་གདུང་བའི་གླུ་ལེན་པའི་ཚུལ་གྱིས་ཟབ་མོའི་དོན་སྟོན་བཞིན་དུ་རིམ་གྱིས་རྒྱ་གར་ནུབ་ཕྱོགས་སཽ་རཥྟར་བྱོན། ཛོ་ན་གྷ་ཊ་ཞེས་བྱ་བའི་གྲོང་ཁྱེར་ཞིག་དང་མི་རིང་པའི་ཕྱོགས་ཤིག་ཏུ་སྨྲ་བ་ཐམས་ཅད་སྤངས། ཡང་ནས་ཡང་དུ་མནལ་ཞིང་སད་པ་ན་ཡང་


TNT17_Page_0143
[མ་དཔེ་གཟིགས་ན་འདིར་གནོན།]

མཉམ་པར་བཞག་པ་ཁོ་ནས་བཞུགས། ལམ་དུ་ལན་ཅིག་སྟག་གཟིག་མོང་གོལ་ཞིག་གིས་ཕྱག་ཞབས་མེ་ལ་བསྲེགས་པས་ཀྱང༌། རྡོ་སྐུའམ་ཤིང་སྐུ་མེ་ལ་བསྲེགས་པ་བཞིན་དུ་ཚོར་བ་མེད་པ་ལྟར་བཞུགས། ཡང་ཧེན་དུའི་རྟ་པ་ཞིག་སློབ་དཔོན་ལ་དད་དེ། གསེར་དང་དངུལ་གྱི་མེ་ཏོག་བྲེ་གང་སྐུ་ལ་གཏོར་བས་ཀྱང་སྔ་མ་ལྟར་ཚོར་བ་མེད་པ་ལྟར་འདུག བདག་གི་བླ་མའི་ཞལ་ནས་གཏན་མ་ཚོར་བ་ནི་མིན། སྟོང་པ་ཉིད་དུ་གཟིགས་པ་ཡིན་གསུང༌། དེ་ལྟར་ལོ་གཉིས་འདས་སམ་ཡང་ཟེར། ཕྱེད་དང་གཉིས་སོང་ངམ་ཡང་ཟེར། ཕྱི་མ་དག་སྟེ་སྤྱོད་པ་ཟླ་བ་དྲུག་ཏུ་སྤྱོད་དགོས་པ། ད་ལྟར་གྱི་དུས་འགྲུབ་དཀའ་བ་ཡིན་པས། ལན་གསུམ་དུ་བསྐྱར་བ་ཡིན་གསུང༌། དེ་ནི་ཤིན་ཏུ་སྤྲོས་མེད་ཀྱི་སྤྱོད་པའོ། །དེ་ལས་གྲོལ་ཏེ་གྲོང་ཁྱེར་དང་ནགས་ཚལ་རྣམས་སུ་རྒྱུ་ཞིང༌། གསང་སྟེ་སྤྱོད་པ་ཅུང་ཟད་མཛད་པ་ལ། ཇི་ཞིག་ནས་ཨ་བ་དྷཱུ་ཏཱི་འཇིག་རྟེན་པའི་མངོན་དུ་སྤྱོད་པ་སྨྱོན་པའི་བརྟུལ་ཞུགས་ཟླ་བ་དྲུག་ཏུ་མཛད་དེ། བར་བར་དུ་སྐྱེ་བོ་རྣམས་ལ་ཆོས་ཀྱང་བསྟན་པས་ཡེ་ཤེས་མཆོག་སྐྱེས་པ་མང་དུ་བྱུང༌། གྲོང་ཁྱེར་གྱི་མི་མང་པོས་ཀྱང༌། སློབ་དཔོན་ཡེ་ཤེས་ཅན་དུ་ཤེས་ནས་ཅི་རིགས་པར་མཆོད་པ་ལ། ཡུལ་དེའི་རྒྱལ་པོ་སྟག་གཟིག་གི་རིགས། སྔོན་སངས་རྒྱས་པ་རྣམས་ལ་སྙད་འཚོལ་བ་ཞིག་ཡོད་པ་ཡུལ་དེ་དགེ་སློང་མང་བས། ཕྱིས་དགེ་སློང་རྣམས་ཀྱི་བཙུན་ཚུགས་ལ་དད་དེ། སངས་རྒྱས་པ་ལ་མཆོད་པ་མང་པོ་བྱེད་པ་ཞིག་ཡིན་པས། སློབ་དཔོན་གྱི་སྔགས་ཀྱི་སྤྱོད་པ་བྱས་པ་ལ་ཡིད་མ་ཆེས་


TNT17_Page_0144
[མ་དཔེ་གཟིགས་ན་འདིར་གནོན།]

ཏེ། སློབ་དཔོན་གྱི་དྲུང་དུ་བྱུང་ནས། ཀྭ་ཡེ་ཁྱོད་རྫུན་དུ་སྨྲ་བའམ། བདེན་པར་སྨྲ་བ་ཞིགརབ་ཏུ་བྱུང་བ་རྣམས་སུན་འབྱིན་པར་བྱེད་དམ་ཞེས་ཟེར་བ་ལ། སློབ་དཔོན་གྱིས་ཁོ་བོ་ཅག་ནི་འདོད་པ་ལ་ལོངས་སྤྱོད་བཞིན་དུ་ཡིད་གཞན་དུ་གྱུར་པ་མེད་དོ། །རྒྱལ་པོ་ན་རེ་དེ་བརྟག་པར་བྱའོ་ཞེས་སློབ་དཔོན་ཕོ་བྲང་གི་ནང་དུ་སྤྱན་དྲངས། ཡང་ཐོག་ཤིན་ཏུ་དབེན་པ་ཞིག་ཏུ་བཞགསྐུ་ལུས་ལ་ན་བཟའ་མེད་པས། རྫས་སྦེད་པའི་གནས་མེད། ཉེ་འཁོར་དུ་རྟོག་པའི་མི་ནི་ཉིན་དང་མཚན་དུ་གནས། ཟས་སྐོམ་གཅིག་ཀྱང་མ་དྲངས་པར་ཉིན་ཞག་བདུན་འདས་ཀྱང༌། སྐུ་ལུས་སྔ་མ་བཞིན་དུ་འདུག་ལ། དེར་རྒྱལ་པོས་ཡུལ་ཁམས་ཀྱི་བཞིན་བཟང་མ་སྟོང་ལྷག་གཅིག་ཀྱང་ཟེར། ལྔ་བརྒྱ་ཡང་ཟེར། དེ་ཙམ་བསྡུས། ཁྱེད་སྔགས་ཀྱི་སྤྱོད་པ་ཅན་ཡིན་ན། འདི་རྣམས་ཉིན་ཞག་གཅིག་ཏུ་སྤྱོད་ནུས་སམ་ཞེས་སློབ་དཔོན་ལ་གཏད་པ་ན། སྤྲོས་བཅས་ཀྱི་སྤྱོད་པ་སྤྱོད་པར་བསྐུལ་བ་འབྱུང་ཞེས་བླ་མས་ལུང་བསྟན་པ་དེ་ཡིན་པར་མཁྱེན་ནས་དེ་རྣམས་དང་ལྷན་ཅིག་ཏུ་རིག་པ་བརྟུལ་ཞུགས་ཀྱི་སྤྱོད་པ་སྤྱོད་ཅིང༌། བདག་ཉིད་ཀྱི་ནུས་པ་བསྟན་པའི་ཕྱིར་དེ་རྣམས་ཀྱི་ལུས་རོ་བཅུད་དང་བྲལ་བར་མཛད་ཅིང༌། བདག་ཉིད་ཉིན་བྱེད་ལྟ་བུའི་གཟི་བརྗིད་དང་ལྡན་པས་ཉི་མ་གཉིས་པ་ལ་ཕོ་བྲང་གི་ཡང་ཐོག་ནས་རྒྱང་གྲགས་ཙམ་མཁའ་ལ་གྱ་གྱུར་གཤེགས་ཏེ་ཐག་རིང་པོའི་སྐྱེད་མོས་ཚལ་ཞིག་ཏུ་བཞུགས་སོ། །ཡུལ་ཕྱོགས་དེ་ཡང་ཞིང་མཆོག་ཏུ་གྱུར་པ་ཡིན་པས། ཕོ་ཉ་མོ་ཡང་ཤིན་ཏུ་མང་བ་ཡིན་ཏེ་ཚོགས་ཀྱི་འདུ་བ་ཁྱད་པར་ཅན་གྱི་སྤྲོས་


TNT17_Page_0145
[མ་དཔེ་གཟིགས་ན་འདིར་གནོན།]

བཅས་ཀྱི་སྤྱོད་པ་ཡང་ཟླ་བ་དྲུག་མཛད། གྷིར་ན་རི་ཞེས་བྱ་བའི་རི་ལ་བཞུགས་པའི་དུས་ཤིག་ཏུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕངས་ཉམས་འོག་ཏུ་ཆུད་པར་གྱུར་ལ། དེའི་དུས་ནམ་ཐོ་རངས་ཀྱི་ཚེ། ས་གཡོས་སྒྲ་ཆེན་པོ་བྱུང༌། དྲི་བཟང་པོས་ཁྱབ། མེ་ཏོག་གི་ཆར་བབས། ནམ་མཁའ་ནས་རོལ་མོའི་སྒྲ་བསྒྲགས་པ་ན། སྐྱེ་བོ་ཐམས་ཅད་ཀྱི་མངོན་སུམ་དུ་བྱུང༌། ཕྱོགས་བཅུའི་སངས་རྒྱས་ཀྱི་ཞལ་གཅིག་ཅར་གཟིགས། ཡི་དམ་སྣ་ཚོགས་པ་དང༌། གྲུབ་པ་ཐམས་ཅད་མངོན་སུམ་དུ་བྱོན་ནས་ཤིས་པ་བརྗོད། ཞག་བདུན་དུ་གནས་གསུམ་ཀྱི་མི་མ་ཡིན་དང༌། དཔའ་བོ་མཁའ་འགྲོས་མཆོད་པ་བསམ་གྱིས་མི་ཁྱབ་པ་རྒྱུན་མ་ཆད་པར་བྱུང༌། རི་དེ་ལ་སླར་ཡང་ཟླ་བ་དྲུག་ཏུ་མཚན་མ་མེད་པའི་ཏིང་ངེ་འཛིན་འབའ་ཞིག་ལ་བཞུགས། དེ་ནས་ལྷོ་ཕྱོགས་ཁ་གེན་དྲ་ཞེས་བྱ་བའི་རི་ལ་བཞུགས་པའི་སྐབས་ཤིགཡུལ་བྷཾ་དྭ་གྱི་རྒྱལ་པོ་དགའ་བྱེད་གཏུམ་པོ་ཞེས་བྱ་བ་རི་དྭགས་བཤོར་དུ་འོངས་པ་ན། རིའི་ཟུར་ཞིག་ན་རི་དྭགས་ཧ་རི་ཎ་གཅིག་འདུག་པ་མཐོང༌། དེའི་རྗེས་བསྙེགས་ཏེ་ཕྱིན་པ་ན། ཧ་རི་ཎ་དེ་ནི་སྟག་གཅིག་ཏུ་གྱུར། དེར་ཡང་ཅུང་ཟད་བརྟགས་པས། དེ་ཡང་མེ་ཞིག་ཏུ་དམར་ཁྱུག་སྟེ་སོང༌། ལོ་མའི་སྤྱིལ་པོ་ཞིག་གི་ནང་དུ་ཞུགས་སོ། །རྒྱལ་པོས་དེ་ལ་བལྟ་རུ་སོང་བ་ན། དགེ་སློང་གི་གཟུགས་གཟི་བརྗིད་ཆེ་བ་ཞིག་འདུག་ནས། ཁྱེད་སུ་ཡིན་དྲིས་པས། ལན་གཉིས་སུ་སློབ་དཔོན་ཅང་མི་གསུང༌། ལན་གསུམ་པ་དྲིས་པས། སྡིག་སྤྱོད་ཀྱི་རྒྱལ་


TNT17_Page_0146
[མ་དཔེ་གཟིགས་ན་འདིར་གནོན།]

པོ་ཅི་ཞིག་སྨྲ། ཁོ་བོ་རྣལ་འབྱོར་པ་ཞིག་ཡིན་གསུང༌། དེར་ལྟ་སྟངས་ཀྱིས་ཟིལ་གྱིས་མནན་པས་རྒྱལ་པོ་ལྷག་པར་དད་ནས་ཞབས་ལ་ཕྱག་བྱས་ཏེ། ཡང་དག་པའི་གཏམ་ཅི་རིགས་པ་གླེང་ཞིང་ཡོད་པའི་ཚེ། འཁོར་རྣམས་ཀྱང་དེར་འོངས་ཏེ། སློབ་དཔོན་གྱི་ཞབས་ལ་ཕྱག་འཚལ། ཆོས་ཀྱི་གཏམ་གྱིས་དགའ་བར་མཛད། བྲམ་ཟེའི་ཁྱེའུ་ཞིག་ལ་སྙིང་པོའི་དོན་བསྟན་པས། གླུ་དང་གར་མང་དུ་བྱས་ཤིང་མི་སྣང་བར་གྱུར་སྐད། དེའི་མིང་ནི་ཛ་ན་མ་དེ་བ་ཞེས་ཟེར་ཏེ། སློབ་དཔོན་འདིའི་སློབ་མ་གྲུབ་པ་ཐོབ་པ་སྔོན་མ་ནི་དེ་ཡིན་སྐད། དེར་དགེ་ཚུལ་པཎྜི་ཏ་གཾ་བྷི་ར་མ་ཏི་ཞེས་བྱ་བ་ཞིགསློབ་དཔོན་གྱི་དྲུང་དུ་བྱུང་སྟེ། ཤིན་ཏུ་དད་ནས་སློབ་མར་ཁས་བླངས་ཏེ། རིམ་གྲོ་ཐམས་ཅད་བྱེད་ཅིང་གནས་སོ། །དེ་ཡང་སྣོད་དང་ལྡན་པར་མཁྱེན་ནས། དབང་བསྐུར་ཞིང་གདམས་པ་གནང༌། དེས་ཀྱང་བསྒོམས་པས་རིང་པོར་མི་ཐོགས་པར་རྐང་མགྱོགས་ཀྱི་དངོས་གྲུབ་ཐོབ། སློབ་དཔོན་རྫུ་འཕྲུལ་གྱིས་གང་དུ་གཤེགས་པ་དེར། དེས་ཀྱང་བླ་མའི་རིམ་གྲོ་བྱེད་པ་ལ་འབྱོན་ནུས་པ་ཡིན་ནོ། །དེ་ནས་སློབ་དཔོན་མ་རུའི་ཡུལ་དུ་བྱོན་ནས། མུ་སྟེགས་དང༌། ཏུ་རུཥྐ་སྟེ། ཀླ་ཀློ་སྟག་གཟིག་རྣམས་ལ་རེངས་པའི་ལྟ་སྟངས་ཀྱིས་རེངས་པར་མཛད། ཡུལ་གྱི་མི་དང་གཙོ་བོ་རྣམས་དབང་དུ་བྱེད་པའི་ལྟ་སྟངས་ཀྱིས་དབང་དུ་མཛད། སྐྱེ་བོ་རྣམས་ལ་ཆོས་ཀྱང་བསྟན་པས་ཡེ་ཤེས་ཁྱད་པར་དུ་གྱུར་པའང་མང་དུ་བྱུང་ཞིང༌། ཡུལ་འདི་ནང་པ་ལྷག་པར་མང་


TNT17_Page_0147
[མ་དཔེ་གཟིགས་ན་འདིར་གནོན།]

བས། དགེ་འདུན་ཕལ་ཆེར་གྱི་ཞབས་ལ་གཏུགས། ཐུན་མོང་མ་ཡིན་པའི་གདམས་པ་གནང་པའི་སློབ་མ་ནི་དྲུག་ཡོད་དེ། པཎྜི་ཏ་བི་མ་ལ་ས་ཧྱ་དང༌། ཙནྡྲ་ཨ་ཀ་ར་དང༌། རཏྣ་ཀ་ར་སྟེ་དགེ་སློང་པཎྜི་ཏ་གསུམ་དང༌། དགེ་བསྙེན་པཎྜི་ཏ་སུ་ག་ཏ་དང༌། རྣལ་འབྱོར་མ་ཨུ་མ་པ་ཏི་དང༌། རྣལ་འབྱོར་མ་ཏཱ་རཾ་ག་རྣམས་སོ། །དེ་ལ་དང་པོ་གསུམ་ཡང་བསྐྱེད་རྫོགས་ཀྱི་རྟོགས་པ་ཁྱད་པར་ཅན་བརྙེས། ངག་གི་དམོད་པ་དང་བདེན་ཚིག་འགྲུབ་པ་ཡིན། འདི་གསུམ་ཀས་རྡོ་རྗེ་རྣལ་འབྱོར་མའི་ཞལ་མངོན་སུམ་དུ་གཟིགས། དགེ་བསྙེན་སུ་ག་ཏས་ལས་བཞི་དང༌། ཁྱད་པར་མངོན་སྤྱོད་ཐོགས་མེད་དུ་འགྲུབ། སློབ་དཔོན་འདི་བཞིས་ལྷན་ཅིག་ཤར་ཕྱོགས་ཀྱི་ལྗོངས་བལྟ་ཞིང་བྱོན་པ་ལ། ཤར་ཕྱོགས་ཀྱི་ཀླ་ཀློ་པ་ཋཱ་ན་རྣམས་ཀྱིས་ཡུལ་འཁོར་རྣམས་ལ་ཆེས་སྡུག་བསྔལ་སྟེར་ཞིང༌། ཕྱི་ནང་གི་ལྷ་ཁང་ཐམས་ཅད་ཀྱང་བཤིག་པ་གཟིགས། ཁྱད་པར་རྒྱ་མཚོའི་འགྲམ་གྱི་དེ་བ་གི་རེ་ཞེས་བྱ་བའི་རི་ལ་སངས་རྒྱས་ཀྱི་ལྷ་ཁང་མང་པོ་ཡོད་པ་དེ་སྐབས་མེ་ལ་བསྲེགས། ཁ་སརྤ་ཎིའི་གཙུག་ལག་ཁང་ལའང་མེ་བཏང་མོད། མེས་མ་ཚིག །སློབ་དཔོན་གྲོགས་མཆེད་རྣམས་བྱོན་པ་ལ་ཡང༌། ངའི་ཡུལ་དུ་མགོ་བྲེགས་གོས་དམར་ཅན་འདི་ལྟ་བུ་སྔར་མེད་པ་ལས་ད་ལྟར་འོངས་པ་མ་ལེགས་ཞེས་སློབ་དཔོན་བཞི་པོ་བཙོན་དོང་དུ་བཅུག །གཤེད་མ་བསྐོས་ཏེ་བགྲོང་པར་བསམ་པ་ལས། གཤེད་མ་དང་བཙོན་སྲུང་རྣམས་ལ་ཉུངས་ཀར་གཏོར་བས། དེ་རྣམས་དྲན་མེད་དུ་མྱོས་


TNT17_Page_0148
[མ་དཔེ་གཟིགས་ན་འདིར་གནོན།]

པའི་བར་ལ་བྲོས་ནས་བྱོན་ཏེ། བྱང་ཆུབ་ཆེན་པོ་ལ་གསོལ་བ་བཏབ་པས། དྲག་པོའི་འཕྲིན་ལས་འགྲུབ་ཅིང་བྱ་བའི་དུས་ཡིན་པར་ལུང་བསྟན། དེ་ནས་ཛ་རི་ཁཎྜར་སློབ་དཔོན་འདི་བཞི་ཞལ་འཛོམ་སྟེ། གཤིན་རྗེ་གཤེད་ཀྱི་འཁོར་ལོ་བསྐོར་བས། ཟླ་བ་དྲུག་ཙམ་ན་པ་ཋཱ་ན་དང༌། མོ་ཁོལ་ནང་འཁྲུགས་ཏེ་ཤར་ཕྱོགས་ཀྱི་ཏུ་རུཥྐའི་རིགས་ཐམས་ཅད་གཡུལ་ངོར་བརླགཧེནྟུའི་རྒྱལ་པོ་མ་ན་ཤིང་ཞེས་བྱ་བས་འཛིན་པ་བྱུང་ངོ༌། །ཨུ་མ་པ་ཏིས་འཇའ་ལུས་གྲུབ། རྣལ་འབྱོར་མ་མཱཏཱ་རཾ་གས་ལྟ་སྟངས་བཞི་ཐོགས་མེད་དུ་གྲུབ། དེར་སློབ་དཔོན་ཉིད་ཀྱི་རྗེས་སུ་འབྲང་བའི་སློབ་མ་རྣལ་འབྱོར་ཕོ་མོ་ཉི་ཤུ་ཙམ་བྱུང༌། དེ་ནས་ལྷོ་ཕྱོགས་ཀརྞ་ཊར་བཞུགས་ཙམ་ན། དེའི་ཡུལ་གྱི་རྒྱལ་པོ་ནི་མུ་སྟེགས་པ་ཡིན་པས། དེ་འདུལ་བའི་ཕྱིར་རྒྱལ་པོའི་ཕོ་བྲང་དུ་བྱོན། ཕོ་བྲང་ནང་ན་སྔོན་སྲིད་སྒྲུབ་ཀྱིས་བཞེངས་པའི་ལིང་ག་འཇིགས་སུ་རུང་པ་གཅིག་ཡོད་པའི་སྟེང་དུ་བྱོན་ཏེ་གར་མཛད་པས། ཞབས་རྗེས་བྱུང༌། རྒྱལ་པོས་གླང་པོ་ཆེ་ཁྲོས་པ་དྲུག་རྦད་པས། གླང་པོ་ཆེ་དྲུག་ཀར་ཕྱག་གིས་མནན་པས་གཡོ་བ་མེད། ཙཎྜི་ཀའི་རྡོ་སྐུ་ཆོ་འཕྲུལ་ཆེ་བ་ཞིག་ཡོད་པ་ལ་སྡིགས་འཛུབ་མཛད་པས་མར་གྱི་གོང་བུ་ལ་ཉི་མ་ཕོག་པ་བཞིན་དུ་མེར་གྱིས་ཞུ། ད་ལྟ་སྐུ་དེ་ཡ་ཆ་བ་གཅིག་ཏུ་སོང་འདུག་གསུང༌། དེར་རྒྱལ་པོས་ཀྱང་གྲུབ་པ་ཐོབ་པར་ཤེས་ནས་ཕྱག་བྱས། སློབ་དཔོན་གྲུབ་པ་བརྙེས་པའི་གྲགས་པ་ཕྱོགས་ཐམས་ཅད་དུ་ཁྱབ་པས། མ་ར་ཧ་ཊ་དང༌། ཀོངྐུ་ནའི་དགེ་འདུན་རྣམས་


TNT17_Page_0149
[མ་དཔེ་གཟིགས་ན་འདིར་གནོན།]

ཀྱིས་སྤྱན་དྲངས་ཏེ་དེའི་གཙུག་ལག་ཁང་ཐམས་ཅད་དུ་ཕེབས། དབང་བསྐུར་པ་དང༌། གདམས་ངག་སྦྱིན་པ་དང༌། རྒྱུད་བཤད་པ་ལ་སོགས་པས་རྡོ་རྗེ་ཐེག་པའི་བསྟན་པ་ཆེར་གསལ་བར་མཛད། པཎྜི་ཏ་སུམ་ཅུ་ཙམ་དང༌། གཞན་ཡང་འཁོར་རྣམ་བཞིར་གཏོགས་པ་དྲུག་ཅུ་ལྷག་གཅིག་དང་གྲོང་ཁྱེར་གྱི་མི་བཅུ་གཅིག་ཙམ་གྱིས་ཕྲ་མོ་རྣམས་གྲུབ། གཞན་ཡང་ཏིང་ངེ་འཛིན་མཆོག་ཐོབ་པ་མང་དུ་བྱུང་ཞིང༌། དེ་ཉིད་དུ་དངོས་གྲུབ་མཆོག་ཐོབ་ནས་མི་སྣང་བར་གྱུར་པ་མང་དུ་བྱུང༌། དེ་ནས་བྷཾ་དྭ་གྱི་རྒྱལ་པོས་སྤྱན་དྲངས་ཏེ་ཡུན་རིང་དུ་མཆོད་པ་བྱས་ཤིང༌། དེར་གསེར་གླིང་དང༌། དྷ་ན་ཤྲཱི་གླིང་དང༌། པཻ་གུའི་གླིང་དང༌། ར་ཁང་དང༌། པུ་ཀང་ལ་སོགས་པ་ཐག་རིང་པོའི་གླིང་རྣམས་དང༌། གཞན་ཡང་འཛམ་བུ་གླིང་གི་དགེ་སློང་རྣམས་དང༌། པཎྜི་ཏ་ཇི་སྙེད་འདུས་ཏེ། རྒྱལ་པོས་ཀྱང་དེ་ཐམས་ཅད་ལ་ལོ་གསུམ་དུ་མཆོད་པ་བྱས། རབ་ཏུ་བྱུང་བ་ནི་སྟོང་ཕྲག་གསུམ་ཙམ། དགེ་བསྙེན་དང༌། དགེ་བསྙེན་མ་ཇི་སྙེད་ཅིག་དང༌། གཞན་ཡང་ཕྱོགས་བཞིའི་རྣལ་འབྱོར་པ་བརྒྱ་སྟོང་དུ་མ་རྣམས་ལ་ལ་ནི་སྒྲུབ་ཐབས་ཞུ། ལ་ལ་ནི་གདམས་ངག་ཞུ། ལ་ལ་ནི་དབང་དང་བྱིན་རླབས་ཞུ་བར་བྱེད། ཁ་ཅིག་ནི་ཞབས་ལ་ཕྱག་འཚལ་ཞིང་སྐོར་བ་ལ་སོགས་པས་ལས་འབྲེལ་འཇོག་པར་བྱེད་དེ། ལྷོ་ཕྱོགས་ཀ་ལིང་ཀའི་པཎྜི་ཏ་ཆེན་པོ་བཻ་ད་ཏིཀྵྞ་དང༌། སང་ག་ཤཱི་ལ་དང༌། མ་ལྱཱ་རའི་ཡུལ་གྱི་སློབ་དཔོན་ཆེན་པོ་བཱི་ར་བནྡྷུ་དང༌། ཨ་སང་ག་བོ་དྷི་དང༌། པཉྩ་དྷར་བ་ལིའི་ཡུལ་གྱི་སློབ་དཔོན་


TNT17_Page_0150
[མ་དཔེ་གཟིགས་ན་འདིར་གནོན།]

ཨ་ནནྟ་མཱ་ཏི་དང༌། བེ་དཱ་ནནྡ་དང༌། པུ་ཀང་གི་ཡུལ་གྱི་མཁས་པ་ཆེན་པོ་དྷརྨ་ཀྵ་གྷོ་ཥ་དང༌། པར་ཧེ་ཏ་གྷོ་ཥ་དང༌། རྡོ་རྗེ་གདན་པ་སུ་མེ་གྷ་ལ་སོགས་པ་རྣམས་ཀྱིས་སློབ་དཔོན་ཆེན་པོ་ཉིད་དང༌། རྣལ་འབྱོར་མ་དཱི་ན་ཀ་ར་དང༌། སློབ་དཔོན་ཆེན་པོ་གཾ་བྷི་ར་མཱ་ཏི་ལ་སོགས་པ་སློབ་དཔོན་གྱི་ཐུགས་ཀྱི་སྲས་རྣམས་ལ་རྒྱུད་སྡེ་ཟབ་མོ་ཐམས་ཅད་ཞུས། དེ་ལྟར་སློབ་དཔོན་འདིའི་བཀའ་དྲིན་གྱིས་འཕགས་པའི་ཡུལ་གྱི་དགེ་འདུན་སོགས་ནང་པ་ཐམས་ཅད་ལ་རྡོ་རྗེ་ཐེག་པའི་བཀའ་དྲིན་བསྩལ་བ་ཡིན་ནོ། །ནས་གླིང་དང་གསེར་གླིང་དང་ཟངས་གླིང་ལ་སོགས་པའི་དགེ་འདུན་རྣམས་ནི་ཉན་ཐོས་སེནྡྷ་པ་ཁོ་ན་ཡིན་པའི་ཕྱིར་སློབ་དཔོན་འདིའི་བཀའི་གནང་བས་མ་ཁྱབ་སྟེ། གུ་རུ་ཤར་ཕྱོགས་པ་ནིར་པ་ཎ་ཤྲཱི་སློབ་དཔོན་གྱི་དྲུང་དུ་བཞུགས་པའི་ཚེ། སློབ་དཔོན་ཆེན་པོ་ཏྲི་ལིང་གའི་ཚོང་འདུས་ཆེན་པོ་གཅིག་ན་བཞུགས། སྐྱེ་བོ་བརྒྱ་སྟོང་དུ་མ་ཕྱག་འཚལ་ཞིང་ཡོད་པ་ལ། མཧཱ་བོ་དྷི་མཇལ་དུ་འགྲོ་བའི་ནས་གླིང་པའི་དགེ་སློང་མང་པོ་འདུག་པ་དེ་ཀུན་གསང་སྔགས་ལ་ངན་དུ་ཟེར་ཞིང༌། སློབ་དཔོན་ལ་ཕྱག་མི་འཚལ་བར་འདུག་གསུང༌། དེ་ནས་ཏྲི་ལིང་གའི་ཡུལ་དེར་རྒྱལ་པོ་བི་ཀ་ཊ་ཞེས་པ་ན་བའི་ལྟོ་བཅོས་ལ་མི་མང་པོ་དང་མ་ཧེ་ལྔ་སྟོང༌། བྱ་དང་ར་ལུག་འབུམ་ཕྲག་མང་པོ་བསད་པའི་མཆོད་སྦྱིན་བྱེད་དགོས་ཟེར་ཏེ། དེར་ཆོ་ག་བྱེད་པའི་མུ་སྟེགས་དང་བྲམ་ཟེ་བརྒྱ་སྟོང་འདུས། སྲོག་ཆགས་ཐམས་ཅད་བཅིངས་ནས་ཡོད་པའི་སྐབས་ཤིགསློབ་དཔོན་ནི་གང་ནས་བྱུང་ཆ་མེད་པར་དེ་རྣམས་ཀྱི་མཆོད་སྦྱིན་ཁང་པར་བྱོན། བྲམ་ཟེ་དང་མུ་སྟེགས་ཐམས་


TNT17_Page_0151
[མ་དཔེ་གཟིགས་ན་འདིར་གནོན།]

ཅད་ལ་ལྟ་སྟངས་མཛད་པས་ཐམས་ཅད་རེངས། དེར་རྒྱལ་པོ་ངོ་མཚར་སྐྱེས་ནས་འོངས་པས། སློབ་དཔོན་ན་རེ། སྲོགས་ཆགས་འདི་སྙེད་ཅིག་བསད་ན་ཁྱོད་མྱུར་དུ་འཆ། ཤི་ནས་ཀྱང་དམྱལ་བར་སྐྱེ། འདི་རྣམས་ཐོང་ཞིག་གསུང༌། དེ་རྣམས་བཀྲོལ་ཏེ་བཏང་མ་ཐག་ཏུ་སློབ་དཔོན་གྱིས་རྒྱལ་པོའི་མགོ་བོར་ཕྱག་བཞག་པས་ནད་ལས་གྲོལ། དེར་མཆོད་སྦྱིན་གྱི་མི་རྣམས་ཀྱང་རྣལ་འབྱོར་པ་འབའ་ཞིག་བྱས། ཡེ་ཤེས་ཁྱད་པར་ཅན་སྐྱེས་པ་མང་དུ་ཡོད་གསུང༌། དེར་ཡུལ་ཙཉྩའི་ཏུ་རུཥྐའི་རྒྱལ་པོ་ཞིག་སློབ་དཔོན་བཞུགས་པ་དང་ཉེ་བའི་ལམ་ལ་སོང་བས། དེར་སློབ་དཔོན་ལ་ངན་དུ་བརྗོད་པ་མང་དུ་བྱས་པ། སློབ་དཔོན་གྱི་སློབ་མ་ཞིག་གིས་ཐོས་པས། ཁྱེད་རྣམས་ལྐུགས་པར་གྱུར་ཅིག་ཅེས་དམོད་པ་བཏབ་པས། རྒྱལ་པོ་འཁོར་དང་བཅས་པ་དེ་ཉིད་དུ་ལྐུགས། དེར་ཤིན་ཏུ་སྐྲག་ནས་སློབ་དཔོན་ལ་གསོལ་བ་བཏབ་པས། སངས་རྒྱས་པ་རྣམས་ཀྱི་ནུས་པ་བསྟན་པའི་ཕྱིར། གཅིག་མ་གཏོགས་པ་ཐམས་ཅད་སྨྲ་ནུས་པར་གྱུར་ཅིག་ཅེས་གསུངས་པས་དེ་བཞིན་དུ་གྱུར། ཡང་ཡུལ་དབུས་སུ་བྱོན་ཝཱ་ར་ཎ་སིར། མུ་སྟེགས་ཀྱི་པཎྜི་ཏ་ཡེ་ཤེས་ཅན་དུ་འདོད་པ། མ་ད་སུ་ད་ན་སྭར་སྭསྟ། འཁོར་མང་པོའི་དབུས་སུ་ཁྲི་མཐོན་པོར་གནས་པ་ལ་སྡིགས་འཛུབ་མཛད་པས་ཁྲི་དེ་ལས་ལྷུང༌། མ་ཐུ་རའི་ཡུལ་དུ་སྔོན་ནང་པའི་རྣལ་འབྱོར་པ་ཅུང་ཟད་བྱས་པས། ཕྱིས་མུ་སྟེགས་པའི་རྣལ་འབྱོར་པ་བྱས་པའི་མུ་ཀུནྡ་ཝརྟི་ཞེས་པ་དེས་ཨ་ཧུ་ཋ་ཙཎྜ་ལཱི་བསྒྲུབས་ནས་སྐྱེ་བོ་མང་པོ་དབང་དུ་བྱེད་པ་གྲུབ་ཐོབ་ཏུ་གྲགས་པ་དེ།


TNT17_Page_0152
[མ་དཔེ་གཟིགས་ན་འདིར་གནོན།]

ལྟ་སྟངས་ཀྱིས་ཚར་བཅད་དེ། དེ་ཡང་མཐར་བཅོམ་བརླག་གི་གྲོང་ཁྱེར་དུ་སློབ་དཔོན་དཔོན་སློབ་གསུམ་ཙམ་ཕེབས་པ་ཞིག་ལ། མུ་ཀུནྡ་ཝརྟི་འཁོར་དང་བཅས་པ་ཡང་དེར་འོངས་པ་འཛོམ། གྲོང་ཁྱེར་གྱི་སྐྱེ་བོ་དཔག་ཏུ་མེད་པ་ཡང་དེར་འཚོགས་ཏེ། འདི་གཉིས་ཀྱི་གྲུབ་རྟགས་བལྟའོ་ཞེས་ཟེར་རོ། །དེར་མུ་ཀུནྡ་དེ་མིག་འཕྲུལ་གྱི་རིག་སྔགས་གྲུབ་པ་ཡིན་པས། སྔར་སྟག་གཟིག་གི་རྒྱལ་པོ་ཆེན་པོ་ཧ་མེ་ཧུ་བཱ་ཙ་པ་དང༌། དེའི་བུ་ཨ་ཀ་པ་ར་སོགས་ཀྱང་དད་པར་བྱས་པ་ཞིག་ཡིན། དུས་དེར་སློབ་དཔོན་གྱི་ཏིང་ངེ་འཛིན་གྱི་ནུས་པས། མིག་འཕྲུལ་གཅིག་ཀྱང་སྤྲུལ་མ་ནུས་ཤིང༌། སློབ་དཔོན་གྱིས་འདི་ལ་ལྟ་སྟངས་མཛད་མ་ཐགསྨྱོ་ནས་ཧ་ཧ་ཞེས་རྒྱུག་ཅིང༌། ཞག་བདུན་དུ་མ་སངས། དེའི་སློབ་མ་རྣམས་ཀྱིས་སློབ་དཔོན་ལ་གསོལ་པ་བཏབ་པས་སླར་གསོས་སོ། །བྷཾ་དྭཾ་གྱི་རྒྱལ་པོ་སྔ་མ་ནི་དུས་དེར་འདས། དེའི་བུ་སྟོབས་བཟང་པོ་ཞེས་བྱ་བས། སྔར་ཕ་དང་ཐོག་མར་མཇལ་བའི་གནས་དེ་དང་ཉེ་བ་ན་སློབ་དཔོན་ཉིད་ཡང་དང་ཡང་དུ་བཞུགས་པའི་ཕུག་པ་ཞིག་ཡོད་པ་དེའི་སྒོར་ལྷ་ཁང་ཆེན་པོ་བཞེངས་ཏེ་ཕུལ། ལྷ་འབངས་ཀྱི་ཁྱིམ་ལྔ་བརྒྱ་ཡང་ཕུལ། རྣལ་འབྱོར་ཕོ་མོ་མཆོག་ཏུ་གྱུར་པ་ལྔ་སྟོང་ཙམ་འདུས་པའི་དུས་ཤིག་བྱུང་བས། དེ་རྣམས་ལ་ཟླ་བ་གསུམ་དུ་ཚོགས་ཀྱི་འཁོར་ལོ་མཛད་པའི་ཡོ་བྱད་རྒྱལ་པོས་ཕུལ་ཏེ་ཚོགས་ཀྱི་འཁོར་ལོ་རྒྱ་ཆེན་བསྐོར། སློབ་མ་རྣམས་སེམས་རྒྱུད་གྲོལ་བ་ཡང་འདི་དུས་ཁོ་ན་མང་བ་བྱུང༌། དེའི་བྱིན་རླབས་ཀྱིས་རྒྱལ་པོ་དེ་ལ་མངའ་ཞབས་སྔོན་གྲོང་འབུམ་ཙམ་ཡིན་པ་ལ།


TNT17_Page_0153
[མ་དཔེ་གཟིགས་ན་འདིར་གནོན།]

ད་ལྟར་འབུམ་ཕྲག་བཞི་བཅུ་རྩ་ལྔའི་བདག་པོར་སོང༌། གུ་རུ་ལྷོ་ཕྱོགས་པའི་ཞལ་སྔ་ནས་ཀྱང༌། ལན་ལྔ་མཇལ་བའི་རྟིང་མ་འདི་དུས་ཡིན་གསུང༌། དེ་ནས་ཕལ་ཆེར་གནས་འདི་ཉིད་དུ་བཞུགས། འགྲོ་བ་དཔག་ཏུ་མེད་པ་སྨིན་ཅིང་གྲོལ་བར་མཛད་ནས། དེ་རྗེས་སློབ་མ་རྙིང་པ་མཆོག་རྣམས་མ་གཏོགས་མི་མཇལ་བར་ལོ་བདུན་ཙམ་སོང་བ་ན་རྣམ་སྨིན་གྱི་སྐུ་འཇའ་ཚོན་ལྟར་ཡལ་ཏེ། ཡེ་ཤེས་ཀྱི་སྐུ་མཁའ་ཁྱབ་ཏུ་བཞུགས་པར་གྱུར་ཏོ། སྤྱིར་རྒྱ་བོད་གཉིས་མི་འདྲ་སྟེ། བོད་ན་ནི་དཔྱོད་ལྡན་རྣམས་ཀྱང་བསྐྱེད་རྫོགས་སམ་ལྟ་བའི་རྟོགས་པ་བཟང་ཙམ་ཡོད་པ་དང༌། ཉམས་བན་བུན་ཤར་བ་དང༌། ཡི་དམ་ཆོས་སྐྱོང་ཅི་རིགས་ཞལ་མཐོང་བ་དང༌། རྫུ་འཕྲུལ་དང་མངོན་ཤེས་ཅི་རིགས་ཤར་བ་དང༌། ལས་ཚོགས་དང་ནུས་མཐུ་ཐན་ཐུན་ཐོབ་པ་ཙམ་ལ་གྲུབ་ཐོབ་ཏུ་མིང་འདོགས་ལ། བླུན་པོ་རྣམས་ཀྱིས་ནི་ཁྲེལ་དང་ཚུལ་ལུགས་བཏང་བའི་ཟོག་པོ་འགལ། སྦྱིན་འབྲས་ཀྱི་དབང་ཐང་ཆེ་བ་ཙམ་ལའང་གྲུབ་རྟགས་སུ་འཛིན་ཅིང༌། གྲུབ་ཐོབ་ཡིན་ཅེས་ཟེར་ལ། རྒྱ་གར་ན་ནི་རྒྱུད་ནས་གསུངས་པའི་འཕགས་ལམ་གྱི་ས་ཐོབ་པའི་ཡོན་ཏན་མངོན་དུ་གྱུར་པའམ། ལུས་འཇའ་ལུས་སུ་གྱུར་པ་སོགས་ཐུན་མོང་གི་རིག་འཛིན་ཚད་ལྡན་ཅིག་ཐོབ་ན་གྲུབ་ཐོབ་ཏུ་འཛིན་གྱ། གཞན་ནི་ཇི་ཙམ་བཟང་ཡང་སྒྲུབ་པ་པོ་ཞེས་པ་ལས་གྲུབ་ཐོབ་ཅེས་མི་ཟེར་རོ། །སློབ་དཔོན་ཆེན་པོ་འདི་ནི་ལྟ་སྟངས་དང༌། ཇི་ཙམ་གསུངས་པ་ཐམས་ཅད་འགྲུབ་པར་འགྱུར་བའི་ཚིག་ཁོ་ནས་འཕྲིན་ལས་རྣམ་བཞི་སྒྲུབ་པར་མཛད། ཅུང་ཟད་དག་


TNT17_Page_0154
[མ་དཔེ་གཟིགས་ན་འདིར་གནོན།]

པའི་འཁོར་གྱི་དབུས་སུ་ངོ་མཚར་བའི་ལྟས་རྒྱུན་མི་འཆད་པར་འབྱུང༌། ཚོགས་ཀྱི་འཁོར་ལོ་གོང་བུ་དང་ཁུ་བ་དང་ཆང་དང་ཁྲག་དང་ནགས་ཚལ་གྱི་ཤིང་ཏོག་ལ་སོགས་པ་དངོས་སུ་དགུག་པར་མཛད། ས་སྟེང་གི་འདྲེན་པ་གཅིག་པུ་པར་གྱུར་པས། མཚན་ཡང་ཤྲཱི་ས་ཏྭ་ནཱ་ཐ་སྟེ། དཔལ་སེམས་ཅན་གྱི་མགོན་པོ་ཞེས་ཆེ་བའི་ཚིག་ཏུ་སྐྱེ་བོ་རྣམས་བརྗོད་པར་བྱེད་དོ། །རྗེ་བཙུན་དེ་ཉིད་ལ་ཁོ་བོའི་བླ་མ་རྒྱ་གར་བ་གསུམ་ཅར་གྱིས་ཆོས་གསན་ཅིང༌། གུ་རུ་ལྷོ་ཕྱོགས་པ་ནི་ཆོས་ཀྱི་སྲས་མཆོག་ཏུ་གྱུར་པའང་ཡིན་མོད་ཀྱ། འོན་ཀྱང་བླ་མ་གསུམ་ཀས་ཞལ་ལུང་རྒྱས་པ་རྣམས་བླ་མ་ཆེན་པོ་ཉིད་ལ་གསན། སློབ་དཔོན་གཾ་བྷི་ར་མ་ཏི་དང༌། རྣལ་འབྱོར་མའི་དབང་ཕྱུག་མ་ཆེན་མོ་དཱི་ན་ཀ་ར་གཉིས་ལ་དབང་དང་བྱིན་རླབས་དང་བཤད་པ་མང་དུ་གསན་འདུགདོགས་པ་གཅོད་པ་ནི་སློབ་མའི་གཙོ་བོ་བཅུ་ཙམ་ལ་མཛད་པར་སྣང་མོད་ཀྱ། སློབ་མའི་གཙོ་བོ་རྣམ་པ་གཉིས་པོ་དེའི་རྣམ་ཐར་མདོར་བསྡུས་བརྗོད་ན། དང་པོ་ན། ཡུལ་གུ་ཛི་ར་ཐ་ཞེས་བྱ་བ་ན། རྒྱལ་རིགས་ཀྱི་བུ་གྷ་གྷ་ཞེས་བྱ་བ་ཞིག་བློ་ཤིན་ཏུ་རྣོ་བར་གྱུར་ནས། སྒྲ་དང་རྟོག་གེ་ཡན་ལག་དང་བཅས་པ་ལ་མཁས་པར་གྱུར། ཨ་བྷཱུའི་གཙུག་ལག་ཁང་དུ་རབ་ཏུ་བྱུང༌། མིང་གཾ་བྷིར་མ་ཏིར་བཏགས། སྡེ་སྣོད་གསུམ་གྱི་ཚུལ་ཡང་མང་དུ་ཤེས། འོན་ཀྱང་ལོ་ཚིགས་མ་རྫོགས་པས་རྟེན་ནི་དགེ་ཚུལ་ཡིན། དགུང་ལོ་བཅུ་དགུ་པ་ལ་སློབ་དཔོན་གྱི་དྲུང་དུ་བསྙེན། ལོ་གསུམ་དུ་དབང་དང་གདམས་ངག་ནི་མ་གནང༌། བླ་མ་བསྟེན་ཚུལ་ནི་རྒྱུད་དང་མཐུན་པར་མཛད། དེ་ནས་


TNT17_Page_0155
[མ་དཔེ་གཟིགས་ན་འདིར་གནོན།]

བླ་མས་དབང་བསྐུར་ཞིང་གདམས་པ་གནང༌། ལོ་གཉིས་ནས་བསྐྱེད་པའི་རིམ་པ་ལ་བརྟན་པ་ཐོབ། རྫོགས་པའི་རིམ་པའི་ཡེ་ཤེས་ཀྱང་ཅི་རིགས་པ་སྐྱེས། སློབ་དཔོན་ཉིད་ཀྱི་རྙེད་བཀུར་བྱ་བའི་ཕྱིར་དུ་རྐང་མགྱོགས་ཀྱི་དངོས་གྲུབ་བསྒྲུབས་པས་འཕྲལ་དུ་གྲུབ། བླ་མ་བསྟེན་ཚུལ་མཁས་པས་སློབ་དཔོན་གྱི་དབང་རྒྱུད་གདམས་ངག་ཐམས་ཅད་ཐོབ། ཐོག་མར་སྤྱན་རས་གཟིགས་དང་རྟ་མགྲིན་ཞལ་གཟིགས། དེ་ནས་འཇམ་དཔལ་དང་གཤིན་རྗེ་གཤེད། དེ་ནས་དགེས་པ་རྡོ་རྗེ་དང་ཀུ་རུ་ཀུལླེ་ཞལ་གཟིགས། ནག་པོ་ཆེན་པོ་རྟག་ཏུ་བྲན་བཞིན་དུ་བྱེད། འཇིག་རྟེན་པའི་ལྷ་མོ་དྲུག་གིས་བཀའ་ཐམས་ཅད་སྒྲུབ་པ་ཡིན། མནལ་ཐམས་ཅད་འོད་གསལ་དུ་ཚུད། མངོན་པར་ཤེས་པ་རྒྱ་ཆེན་པོ་མངའ་ཡང༌། བླ་མའི་རིམ་གྲོ་སྒྲུབ་པའི་བྲན་མཛད་པ་ཡིན་ནོ། །རྣལ་འབྱོར་མ་དཱི་ན་ཀ་ར་ན། ལྷོ་ཕྱོགས་ཀྱི་གྲོང་ཁྱེར་ཤཾ་བྷ་ད་ཏ་ཞེས་བྱ་བ་ཞིག་ན། པི་སི་ལའི་རིགས་རྒྱལ་པོ་གཞོན་ནུ་འཕྲོག་བྱེད་འོད་ཅེས་བྱ་བ་ཞིག་ཡོད། དེ་ལ་སྲིང་མོ་ཆུང་ངུ་ནས་བློ་རྣོ་ཞིང་དགེ་བ་ལ་དགའ་བ་ཞིག་ཡོད་པ། ལོ་དགུ་ལོན་པའི་དུས་ཤིག་ན། སྒོ་དྲུང་དུ་དགེ་སློང་མཛེས་པ་གཟི་བརྗིད་ཆེ་བ་ཞིག་བྱུང༌། དེ་ལ་བསོད་སྙོམས་སྐྱེལ་དུ་ཕྱིན། དེར་ཁྱེད་མི་བཟང་བཟང་འདྲ་བ་ཞིག་བསོད་སྙོམས་སྤྱོད་པ་འདི་སྡུག་བསྔལ་བྱས་པས། དེ་ན་རེ། ང་ནི་མི་སྡུག་ན་ཁྱོད་ཉིད་སྡུག་བསྔལ་ཏེ། འཁོར་བ་རུ་འཁྱམས་འདུག་པ་གསུང་ནས། འཁོར་བའི་ཉེས་དམིགས་མང་དུ་གསུངས། དེ་ལས་ཐར་བའི་ཐབས་ཅིག་ཞུ་བྱས་


TNT17_Page_0156
[མ་དཔེ་གཟིགས་ན་འདིར་གནོན།]

པས། སེམས་ཀྱི་བཞག་ཐབས་དང༌། བྱང་ཆུབ་སེམས་དཔའི་སྤྱོད་པའི་གནད་ཁྱད་པར་ཅན་བསླབས་པས། དེས་ཀྱང་ལེགས་པར་ཤེས། ལོ་བཅུ་ལོན་པའི་དུས་སུ་ཡུལ་ཙཻ་བ་ལར་རྒྱལ་རིགས་རྒྱལ་ཕྲན་ཞིག་ལ་བག་མར་བཏང༌། ལོ་བཅུ་གསུམ་ལོན་པའི་དུས་སུ། འཁོར་བ་ལ་ཡིད་ངེས་པར་འབྱུང་སྟེ། ཁྱིམ་ཐབ་དང་གྱོས་སྒྱུག་སོགས་ལ། ཁོ་མོ་ནགས་ཚལ་རྣམས་སུ་ཏིང་ངེ་འཛིན་བསྒོམ་པ་ཞིག་བྱུང་ན་ཅི་མ་རུང༌། ཁྱེད་རྣམས་ཀྱིས་གནང་བ་མཛོད་ཅེས་ཡང་ཡང་སྨྲས་པས། དེ་བཟློག་པའི་ཕྱིར་དུ་ཁྱིམ་གྱི་བདག་མོར་བསྐོས། སློང་བ་པོ་ཅི་བྱུང་པ་ཐམས་ཅད་ལ་སྦྱིན་པ་རྒྱ་ཆེར་བཏང་བས། ནང་མི་དང་གཉེན་ཚན་རྣམས་ཀྱིས་སྨོད། སློང་མོ་བ་དང་སྐྱེ་བོ་རྣམས་ནི་བསྟོད་པ་ཞིག་བྱུང༌། དེ་ནས་དུས་གཞན་ཞིག་ན་སྨྱོ་རྫུ་བཏབ། སྤྱོད་པ་སྣ་ཚོགས་པ་བྱས་པས། དེར་གཡོག་མོ་ཞིག་དང་ལྷན་ཅིག་དབེན་པ་ཞིག་ཏུ་བཞག སྔ་མ་ལས་ཀྱང་སྨྱོ་བ་ཆེ་ཆེ་ལྟར་རྫུས་པས། ཁྱིམ་ཐབ་དང་བྲལ། དེ་ཡང་སྔོན་བཙས་པའི་ཚེ། འདིའི་རྐང་ལག་ལ་པདྨ་དང་འཁོར་ལོ་ཕྱེད་ཕྱེད་ཀྱིས་མཚན་པ་འདུག་པས་ནགས་སུ་གནས་ན་ནི་བདག་ཉིད་ཆེན་མོར་འགྱུར་ཞེས་ལུང་བསྟན་པ་ལྟར་ཐོག་ཏུ་བབས་པ་ཡིན་གསུང༌། ཙཻ་བ་ལ་དང་ཉེ་བ་མ་ར་ཧ་ཊིའི་གྲོང་ཁྱེར་ཞིག་ན། སློབ་དཔོན་ཆེན་པོ་ཞི་བ་སྦས་པ་བཞུགས་པ་ཐོས་ནས། མཚན་ཐོས་པ་ཙམ་གྱིས་ཏིང་ངེ་འཛིན་སྐྱེ་བ་སྙམ་བྱུང༌། ཞལ་མཐོང་མ་ཐག་ཏིང་ངེ་འཛིན་ཁྱད་པར་ཅན་སྐྱེས། དུས་དེའི་ཚེ་ན་ལོ་ཉི་ཤུ་ཙམ་ལོན་པ་ཡིན་སྐད། བུད་


TNT17_Page_0157
[མ་དཔེ་གཟིགས་ན་འདིར་གནོན།]

མེད་ཡིན་ཡང་བློ་ནི་ཤིན་ཏུ་རྣོ་སྟེ། དེ་གོང་དུ་ཙནྡྲ་བྱཱ་ཀ་ར་ཎ་ཡོངས་སུ་རྫོགས་པ་ཤེས། མངོན་བརྗོད་དང༌། སྨན་དཔྱད་དང༌། རྟོག་གེ་ཡང་ཅི་རིགས་པ་མཁྱེན། སྔོན་གྱི་བག་ཆགས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་བདུན་བརྒྱ་པ་དང༌། སུམ་བརྒྱ་པ་དང༌། བསྡུད་པའི་ཚིགས་སུ་བཅད་པ་རྣམས་བཀླགས་པ་ཙམ་གྱིས་ཟིན། དགེ་སློང་མ་དང༌། དགེ་བསྙེན་མ་འདྲ་ལ་དྲིས་པས་དོན་ཡང་ལེགས་པར་ཤེས། དེ་ནས་སློབ་དཔོན་ཆེན་པོ་ཞི་བའི་ཞལ་སྔ་ནས་ལ་ཐོག་མར་བྱང་ཆུབ་ཏུ་སེམས་བསྐྱེད་པ་ལ་སོགས་པ་ཞུས་ཤིང༌། སྐལ་བ་དང་ལྡན་པར་མཁྱེན་ནས། རིམ་གྱིས་དབང་བསྐུར་བ་དང་གདམས་པ་མཐའ་དག་གནང༌། སློབ་དཔོན་གྱི་དྲུང་དུ་ལོ་བདུན་དུ་རྡོ་རྗེ་ཐེག་པ་ལ་ཐོས་སྒོམ་གཅིག་ཅར་བྱས་པས། རྒྱུད་ཐམས་ཅད་ཀྱི་དོན་ལེགས་པར་མཁྱེན། དེ་ནས་ལོ་ལྔའི་བར་དུ་བླ་མའི་རིམ་གྲོ་དང་སྒོམ་པ་རྩེ་གཅིག་ཏུ་བྱས་པས། ཡེ་ཤེས་ཁྱད་པར་ཅན་སྐྱེས་ཏེ། རྟོགས་པ་ནམ་མཁའ་དང་མཉམ་པར་གྱུར། རླུང་གི་རྣལ་འབྱོར་གྱི་ནུས་པས། གླང་པོ་ཆེ་བརྒྱས་ཀྱང་སྟོབས་འགྲན་དུ་མེད་པ་དང༌། དཔག་ཚད་ཙམ་དུ་ནམ་མཁའ་ལ་འགྲོ་བར་བྱེད། ལྟ་སྟངས་དང་ངག་གི་བདེན་པ་ཡང་གྲུབ། དེར་བླ་མའི་ཞལ་ནས། ད་ནི་ཁྱོད་རིག་བརྟུལ་གྱི་སྤྱོད་པ་གྱིས་ཤིག དེ་ཁོ་ན་ཉིད་ཀྱི་རྟོགས་པ་ཡང་སེམས་ཅན་ལ་སྟོན་ཅིག དེང་ནས་ལོ་ཉི་ཤུ་རྩ་གཉིས་འདས་པ་ན་ང་དང་མཉམ་པར་འགྱུར་རོ། །ཞེས་ལུང་བསྟན་སྐད། ཟླ་བ་དྲུག་ཏུ་སྤྱོད་པ་


TNT17_Page_0158
[མ་དཔེ་གཟིགས་ན་འདིར་གནོན།]

སྤྱད་པས། ཐུན་མོང་གི་དངོས་གྲུབ་བརྒྱད་ལ་སོགས་པ་ཐམས་ཅད་ཉམས་འོག་ཏུ་ཆུད། དྲུང་དུ་བྱུང་བ་ཐམས་ཅད་ལ་གདམས་ངག་བསྟན། རྟོགས་པ་མཆོག་ཏུ་གྱུར་པའི་རྣལ་འབྱོར་མ་ལྔ་བརྒྱའི་འཁོར་དང་བཅས་ནས། ཡུལ་སྣ་ཚོགས་སུ་འགྲོ་བའི་དོན་སྤྱོད་ཅིང༌། སློབ་དཔོན་གྱི་དྲུང་དུ་མཆོད་པའི་ཕྱིར་དང༌། རྟོགས་པའི་ཚད་འབུལ་བར་ཡང་དང་ཡང་དུ་འབྱོན་པར་གནང་གསུང༌། ལན་ཅིག་རྫུ་འཕྲུལ་གྱིས་ཁ་གེན་དྲ་ནས། རང་ག་ནཱ་ཐ་ཞེས་བྱ་བའི་གནས་སུ་བྱོན། དེ་ན་ཕྱིན་ན་ང་གཉིས་ཀའི་གནས་ཡོད་པ་ལ། དེའི་ཕྱི་རོལ་པའི་གནས་རྣམས་སུ་ཡང་དང་ཡང་དུ་འཁྱམས་པ་ལྟར་མཛད། དེ་ནས་ཛཾ་གྷ་མ་དབང་ཕྱུག་ཆེན་པོ་དང༌། བྷཻ་ར་བ་གྲུབ་པར་གྲགས་པ་ལྟ་སྟངས་དང་ཁུ་ཚུར་གྱི་རིག་པ་གྲུབ་པས། སངས་རྒྱས་པའི་རྣལ་འབྱོར་པ་རྣམས་ལ་བར་དུ་གཅོད་པ་ཞིག་ཡོད། མིང་ནི་བྷིཾ་ག་དེ་བ་ཟེར། དེས་རྣལ་འབྱོར་མ་ལ་ལྟ་སྟངས་བྱས་པས་མ་གནོད། རྣལ་འབྱོར་མས་དེ་ལ་ལྟ་སྟངས་བྱས་པས། ས་ལ་འགྱེལ་ཏེ་དབུགས་འགྱུ་བ་ཆད། དེར་རིང་ཞིག་བཞག་པས། གནས་དེའི་མུ་སྟེགས་པ་རྣམས་ཀྱིས་ཡང་ཡང་གསོལ་བ་འདེབས་པར་བྱུང་བས། སླར་ཡང་ལྟ་སྟངས་ཀྱིས་གསོས། དེ་ཡང་སངས་རྒྱས་ཀྱི་བསྟན་པ་ལ་དད། རྗེས་སུ་འཛིན་པ་ཞུས་པས། སློབ་དཔོན་གྱི་དྲུང་དུ་བརྫངས། ཡང་འདིས་དམ་ཚིག་ཉམས་པའི་རྣལ་འབྱོར་པ་གྷ་མ་ལ་ཝརྨ་ཞེས་བྱ་བ། སྔོན་ནུས་པ་ཅུང་ཟད་ཐོབ་པས་གྲུབ་ཐོབ་ཏུ་རྫུ་བ་ཞིག་དང༌། ཨོ་ཌི་ཤར་འཕྲད། ལྟ་སྟངས་མཛད་པས་གསུས་པ་བརྡོལ་ཏེ་ཁྲག་ཟགས།


TNT17_Page_0159
[མ་དཔེ་གཟིགས་ན་འདིར་གནོན།]

དེས་ཐོད་པར་བཟེད་པས་དེ་ཡང་བརྡོལ། དེ་ལྟར་དམ་ཚིག་ཉམས་པ་ཚར་བཅད་གསུང༌། དཔལ་ཧེ་རུ་ཀ་དང༌། ཁྲོ་བོ་བཅུ། རྡོ་རྗེ་རྣལ་འབྱོར་མ་སུམ་ཅུ་རྩ་བདུན་ལ་སོགས་པ་ཐམས་ཅད་ནམ་བལྟ་འདོད་པའི་ཚེ་ཞལ་གཟིགས། འོན་ཀྱང་དེ་སྐབས་མཆོག་གི་དངོས་གྲུབ་ནི་མ་ཐོབ་པར་གྲགས། དེ་ལྟར་སློབ་དཔོན་ཞི་བ་སྦས་པ། སློབ་མའི་མཆོག་གཉིས་དང་བཅས་པས་ཁོ་བོའི་བླ་མ་གསུམ་ལ་ལེགས་པར་གདམས། དེ་ལ་ཁོ་བོས་རྡོ་རྗེ་ཐེག་པ་ལམ་མན་ངག་གོ་བབས་དང་བཅས་པའི་བཀའ་དྲིན་ཐོབ་པ་ཡིན་ནོ། །སྤྱིར་རྒྱ་གར་དུ་གསང་སྔགས་ལ་རིག་པ་འཛིན་པ་འབུམ་ཕྲག་ཐོག་མར་བྱུང༌། དེ་ནས་དཔལ་ས་ར་ཧ་བྱོན་པ་ནས་གཟུང༌། རྒྱལ་པོ་དྷརྨ་པཱ་ལ་འདས་པའི་བར་དུ། གྲུབ་ཐོབ་རྒྱུན་མ་ཆད་པར་མ་ཟད་གྲུབ་ཐོབ་མང་པོ་དུས་གཅིག་ཏུ་བཞུགས་པ་བྱུང་བ་ཡིན། དེ་ནས་ཨ་བྷ་ཡཱ་ཀ་ར་སྐུ་འདས་བར་ལའང༌། གྲུབ་ཐོབ་རྒྱུན་མ་ཆད་པར་བྱུང་ལ། དེ་མན་ཆད་དུ་རེས་འགའ་ན་ལན་རེ་རེ་ལས་མ་བྱུང༌། ཁྱད་པར་དུས་ཕྱིས་གྲུབ་ཐོབ་གཞན་མེད་པར་ཡུན་རིང་རབ་ཞིག་ན། ཡེ་ཤེས་བཤེས་གཉེན་དང༌། ཨོ་ཀ་ར་ནཱ་ཐ་བྱོན་ཀྱང་སངས་རྒྱས་ཀྱི་བསྟན་པ་ལ་ཕན་ཆེ་བ་ཙམ་མ་བྱུང༌། ཨོ་ཀ་ར་སྐུ་འདས་ནས། ལོ་བརྒྱད་ཅུ་ལོན་ཙ་ན་གྲུབ་ཆེན་ཞི་བ་སྦས་པས་གྲུབ་པ་བརྙེས་ཏེ། དུས་ཀྱི་དབང་ལས་སངས་རྒྱས་པ་མང་ཉུང་གིས་གཞན་ཕན་ཆེ་ཆུང་མ་གཏོགས་ཇོ་བོ་ན་རོ་པ་ཆེན་པོ་དང་གཞན་ཕན་ཆེ་ཆུང་འདྲ་བ། གོ་འཕངས་སློབ་དཔོན་


TNT17_Page_0160
[མ་དཔེ་གཟིགས་ན་འདིར་གནོན།]

འདི་མཐོ་བ་ཡིན་ནོ། །རིན་པོ་ཆེའི་འབྱུང་ཁུངས་ལྟ་བུའི་གཏམ་ལས། བཀའ་བབས་ཐམས་ཅད་གཅིག་ཏུ་འདྲེས་པའི་གཏམ་གྱི་སྐབས་ཏེ་དགུ་པའོ།། །།བཀའ་བབས་བདུན་པོ་དེ་དག་ནི་དངོས་སུ་བྱིན་གྱིས་བརླབས་པའི་བརྒྱུད་པ་འབའ་ཞིག་ཡིན་ཅིང༌། དེའི་ནང་གི་ཡང་དྲུག་པོ་དེ་དག་ནི་དོན་གྱི་བརྒྱུད་པ་ཁོ་ན་ལགས། གདམས་ངག་ཕྲ་མོ་རེ་རེ་ཞིང་གི་བླ་མ་བརྒྱུད་པ་མི་འདྲ་བ་རྣམས་ནི་བརྒྱུད་པའི་ཡི་གེ་ལས་ཤེས་པར་བྱ་ཞིང༌། རྣམ་པར་ཐར་པ་མཐའ་ཡས་པ་ནི་ཡི་གེར་འབྲི་བར་ག་ལ་ལང༌། རྒྱུད་པའི་བླ་མ་འགའ་ཞིག་གི་རྣམ་པར་ཐར་པ་ནི་མི་གསུང་བས་རེ་ཞིག་དེ་ཙམ་ཡིན་ནོ། །འདིར་ད་ལྟ་རྒྱ་གར་དུ་གྲགས་པའི་ལོ་རྒྱུས་གང་ཐོས་པ་རྣམས་ཀྱི་སྟེང་དུ་སྔོན་གྱི་སློབ་དཔོན་གྱི་ལོ་རྒྱུས་བོད་ན་ཡོད་པའང་ཡིད་ཆེས་ངེས་པ་རྣམས་ཀྱིས་ཅུང་ཟད་ཁ་བསྐང་ནས་བཤད་པ་ཡིན་ནོ། །སྤྱིར་རྒྱ་གར་དུ་བྱོན་པའི་ཤིང་རྟ་ཆེན་པོ་རྣམས་དང༌། བརྒྱུད་པའི་རྣམ་ཐར་ཅི་རིགས་པ་ད་དུང་གཞན་དུ་བཤད་པར་བྱའོ། །བླ་མའི་རྣམ་ཐར་བརྗོད་པ་ལས། །བསོད་ནམས་ཅུང་ཟད་གང་ཐོབ་པ། །དེས་ནི་འགྲོ་བ་མ་ལུས་པའང༌། །དེ་འདྲའི་ཚུལ་གྱིས་སངས་རྒྱས་གྱུར། །བདག་ཀྱང་སྐྱེ་བ་ཐམས་ཅད་དུ། །བརྒྱུད་ལྡན་བླ་མ་ཐམས་ཅད་ཀྱ། །བྲན་དང་བྲན་དུ་སྐྱེ་བ་དང༌། །ཐུགས་ཀྱི་གསང་བ་འཛིན་པར་ཤོག །ངོ་མཚར་བཀའ་བབས་བདུན་ལྡན་རྡོ་རྗེ་འཆང་གི་ལམ། །ཕྱོགས་ཀུན་སྐྱེ་བོ་རྣམས་ཀྱི་ཉེར་སྤྱོད་རྒྱ་ཆེན་དང༌། མན་ངག་རིན་ཆེན་གྱིས་གང་བདག་སེམས་ཤིང་རྟ་ཡ། །བགྲོད་བྱར་གྱུར་ཏེ་སྲིད་


TNT17_Page_0161
[མ་དཔེ་གཟིགས་ན་འདིར་གནོན།]

གསུམ་དབུལ་བ་སེལ་བར་ཤོག །ཅེས་བཀའ་བབས་བདུན་ལྡན་གྱི་བརྒྱུད་པའི་རྣམ་ཐར་ངོ་མཚར་རྨད་དུ་བྱུང་བ་རིན་པོ་ཆེའི་འབྱུང་ཁུངས་ལྟ་བུའི་གཏམ་ཞེས་བྱ་བ། རྗེ་བཙུན་བླ་མ་དམ་པ་རྣམས་ཀྱི་བཀའི་འབངས་ཀྱི་ཐ་ཆུང་དུ་གྱུར་པ་ཏཱ་ར་ནཱ་ཐ་ཞེས་བྱ་བས་རང་ལོ་ཉེར་དྲུག་པ་ལ་ཉེ་བ་ན། གྲུབ་པའི་གནས་མཆོག་དཔལ་སྟག་ལུང་ཐང་དང་ཉེ་བ་རྣམ་རྒྱལ་རབ་བརྟན་ཞེས་བྱ་བར་ལེགས་པར་སྦྱར་བའི་ཡི་གེ་པ་ནི་བློ་ལྡན་ཀུན་དགའ་རྣམ་རྒྱལ་ལོ།། །།ཕྱིས་ཀྱང་ཞུས་དག་ཅུང་ཟད་བྱས་པའོ།། །།རྗེ་བཙུན་པད་དཀར་འཆང་བའི་རྣམ་འཕྲུལ་མགོན། །སྨྲ་བའི་དབང་ཕྱུག་ཡོན་རན་བཟང་པོ་ཡིས། །སྤྱི་ལོ་༡༩༩༥བར། །བསྟན་པ་སྤྱི་དང་ཁྱད་པར་ཇོ་ནང་བའི། །བཤད་སྒྲུབ་སླར་གསོ་བྱ་བ་སྤེལ་བའི་ཆེད། །འཇམ་མགོན་ཏཱ་ར་ནཱ་ཐའི་གསུང་འབུམ་གྱི། །ནུ་ཟད་ཆོས་སྦྱིན་དཔལ་ལྡན་འཛམ་ཐང་གི །གཙང་བའི་ཆོས་གྲྭར་བསྐུར་པའི་དགེ་བ་ཡིས། །མ་གྱུར་འགྲོ་ལ་གནས་སྐབས་བདེ་བ་དང་། །མཐར་ཐུག་གཏན་བདེ་བླ་མེད་བྱང་ཆུབ་མཆོག །མྱུར་དུ་ཐོབ་པའི་དཔུང་གཉེན་དམ་པ་རུ། །གཞི་དབྱིངས་མཆོག་གསུམ་དམ་པས་ཤིས་པ་རྩོལ། །འདི་ཡང་པུཎྱཻ་ཤྲཱིས་བྲིས་པ་དགེ། །དགེའོ། །


TNT17_Page_0162
[མ་དཔེ་གཟིགས་ན་འདིར་གནོན།]

ཤོག་སྟོང་།

སློབ་དཔོན་ཆེན་པོ་སྤྱོད་འཆང་དབང་པོའི་རྣམ་ཐར་ངོ་མཚར་སྙན་པའི་སྒྲ་དབྱངས།


TNT17_Page_0163
[མ་དཔེ་གཟིགས་ན་འདིར་གནོན།]

སློབ་དཔོན་ཆེན་པོ་སྤྱོད་འཆང་དབང་པོའི་རྣམ་ཐར་ངོ་མཚར་སྙན་པའི་སྒྲ་དབྱངས་ཞེས་བྱ་བ་བཞུགས། །


TNT17_Page_0164
[མ་དཔེ་གཟིགས་ན་འདིར་གནོན།]

ན་མོ་བཛྲ་སཏྭ་ཡ། ཉི་གཞོན་བྱེ་བ་ཕྲག་བརྒྱས་མི་དཔོགས་པའི། །ཡེ་ཤེས་གཟི་འོད་རྒྱས་པས་འགྲོ་མུན་སེལ། །བརྟུལ་ཞུགས་སྤྱོད་པའི་རྦ་རླབས་རབ་གཡོས་པས། །བདུད་དང་མུ་སྟེགས་ཟིལ་གནོན་གང་དེ་རྒྱལ། །གང་ལས་ངོ་མཚར་གཏམ་གྱི་ཕུལ། །རྣམ་པ་སྣ་ཚོགས་གྲགས་དེ་ལས། ཡིད་ཆེས་ཁུངས་དང་ལྡན་པ་དག །མདོ་ཙམ་མཆོག་ཏུ་གསལ་བར་སྡེབ། །འདིར་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱོན་པའི་རྗེས་སུ་མི་ལོ་ཆེན་པོ་སྟོང་དང་ལྔ་བརྒྱར་ཉེ་བ་ན། གྲུབ་པའི་དབང་ཕྱུག་སློབ་དཔོན་ནག་པོ་སྤྱོད་པ་ཞེས་བྱ་བ་འཇིག་རྟེན་དུ་བྱུང་ངོ༌། །དེ་ཡང་སློབ་དཔོན་ཀླུ་སྒྲུབ་ཀྱིས་དཔལ་ལྡན་འབྲས་སྤུངས་ནས་སྤྱན་དྲངས་པའི་དཔལ་མགོན་པོའི་རྒྱུད་བརྒྱད་ཡོད་པ་ལས། གཞན་བདུན་གྱི་སྙིང་པོ་ནག་པོ་ཆེན་པོ་མངོན་པར་འབྱུང་བ་ཞེས་


TNT17_Page_0165
[མ་དཔེ་གཟིགས་ན་འདིར་གནོན།]

པ། མགོན་པོ་ཕྱག་གཉིས་པ་དང༌། བཞི་པ་དང༌། དྲུག་པ་དང༌། བརྒྱད་པ་དང༌། བཅུ་གཉིས་པ་དང༌། བཅུ་དྲུག་པའི་དཀྱིལ་འཁོར་སྟོན་པ། ཁ་བ་ཅན་གྱི་ཕྱོགས་འདིར་རྭ་ལོ་ཙཱ་བ་ཆོས་རབ་ཀྱིས་བསྒྱུར་ངེས་པ་རྒྱ་དཔེ་ཅན་དེ་ལས་དེ་ལྟར་ཡུལ་ཨུ་རུ་བི་ཤར་ཡང་མཚུངས་པར་ངེས་པའོ། །དེར་སྐྱེས་བུ་བརྩོན་འགྲུས་ཆེན་པོ་དང་ལྡན་ཞིང་སྦྱོར་བ་ལ་བརྩོན་པ་རཱ་མ་ཎའི་བཀའི་འཇུག་པ་དང་མཚུངས་པ། སྡེ་ཚན་དང་པོའི་དང་པོ་དབྱངས་ཡིག་དང་པོས་བརྒྱན་པ། བདུན་པའི་བཞི་པ་ཅུང་ཟད་ན་ལ་ཞོན་པའི་མིང་ཅན་རྣལ་འབྱོར་དབང་པོ་སྐྱེས་བུའི་མཆོག་གཅིག་པོ་འདིས་རལ་གྲི་ལ་སོགས་པའི་དངོས་གྲུབ་ཆེན་པོ་བརྒྱད་ཐོབ་པར་འགྱུར་རོ། །ཛམ་བུའི་གླིང་དུ་མ་བྱུང་ཞིང་འབྱུང་བར་མི་འགྱུར་རོ། །དེའི་སློབ་མ་རྣལ་འབྱོར་པ་དྲུག་གིས་


TNT17_Page_0166
[མ་དཔེ་གཟིགས་ན་འདིར་གནོན།]

ལུས་ཀྱི་དངོས་པོ་སྤངས་པའི་ཕྱག་རྒྱ་ཆེན་པོ་ཐོབ་པར་འགྱུར་རོ། །ཞཻས་གསུངས་པ་དང༌། དཔལ་དུས་ཀྱི་འཁོར་ལོའི་རྒྱུད་ཕྱི་མ་འགྱུར་རྙིང་ལས། ཁ་ཊྭཱཾ་ག་དང་རུས་རྒྱན་ཅང་ཏེ་ཆང་སྣོད་ཐོགས་པ་ནག་པོའི་མིང་ཅན་འབྱུང་བར་འགྱུར། །ཞེས་ལུང་བསྟན་པ་སྟེ། ལུང་དང་པོའི་དོན་ནི་དེར་ཞེས་པས་གང་དུ་འཁྲུངས་པའི་ཡུལ་དང༌། བརྩོན་འགྲུས་དང་ལྡན་ཞིང་སྦྱོར་བ་ལ་བརྩོན་པ་ནི། རིག་པ་བརྟུལ་ཞུགས་ཀྱི་སྤྱོད་པ་རྒྱ་ཆེར་སྤྱོད་པའི་དོན་དང༌། རཱ་མ་ཎའི་བཀའི་འཇུག་པ་དང་མཐུན་པ་ནི་ལང་ཀའི་གླིང་ལ་སོགས་པར་གདུག་པ་ཅན་རྣམས་ཚར་གཅོད་པའི་དོན་དང༌། སྡེ་ཚན་དང་པོའི་དང་པོ་ཀ་ཡིག །བདུན་པའི་བཞི་པ་ཧ་ཡིག །ཅུང་ཟད་ན་ལ་ཞོན་པ་ནི་ཧཱ་ཡིག་དེ་ཉིད་ན་ཡིག་དང་བརྩེགས་པ་སྟེ། དེ་ལྟར་ན་ཀཧྣ་ཞེས་པ་མཚན་བསྟན་པ་ཡིན་ནོ། །ནག་པོའི་སྐད་དོད་མང་དུ་ཡོད་ཀྱང༌། ཀཧྣ་ཞེས་པ་སློབ་དཔོན་འདིའི་ཐུན་མོང་མ་ཡིན་པའི་མཚན་ཏེ། ཀཧྣ་ཙརྱའམ། འཕྲལ་སྐད་དུ། ཀཧྣི་པ་ཞེས་གྲགས་སོ། །རལ་གྲི་ལ་སོགས་པའི་དངོས་གྲུབ་བརྒྱད་ཅེས་པས། ཐུན་མོང་གི་གྲུབ་པ་བརྒྱད་ལ་མངའ་བརྙེས་པ་སྟེ་གཞན་ལ་སྦྱིན་ནུས་པའོ། །མ་བྱུང་ཞིང་འབྱུང་བར་མི་འགྱུར་ཞེས་པ་ནི། སློབ་དཔོན་འདི་ལྟ་བུ་གཞན་དུས་གསུམ་ཁེགས་པར་བསྔགས་པ་སྟེ། དེ་ཡང་སློབ་དཔོན་འདིས་འགྲོ་བའི་དོན་སྤྱད་པ་ན། གསུང་གདམས་ངག་དངོས་ཀྱི་ཁྱབ་པ་དང༌། མ་


TNT17_Page_0167
[མ་དཔེ་གཟིགས་ན་འདིར་གནོན།]

ཡིན་ཀྱང་དེའི་མིག་རྐྱེན་ལ་བརྟེན་པའི་གྲོང་ཁྱེར་ཆེན་པོ་བཅུ་གསུམ་ཙམ་གྱི་སྐྱེས་པ་བུད་མེད་ཁྱེའུ་བུ་མོ་ཚུན་ཆོད་འཇིག་རྟེན་གྱི་བྱ་བ་སྤངས་ཏེ་རྣལ་འབྱོར་ཕོ་མོ་འབའ་ཞིག་ཏུ་གྱུར་པས་གྲོང་ཁྱེར་དེ་དག་རེ་ཞིག་སྟོངས་སོ། །དེ་དག་ཀུན་ཀྱང་རབ་ཀྱིས་དངོས་གྲུབ་མཆོག་དང༌། འབྲིང་གིས་ཐུན་མོང་གི་དངོས་གྲུབ་དང༌། ཐ་མ་རྣམས་ཀྱིས་ཀྱང་ཕྲ་མོའི་ལས་མ་གྲུབ་པ་མེད་སྐད་དེ། ཐམས་ཅད་ཀྱང་ཏིང་ངེ་འཛིན་ཐོབ་པ་ཤ་སྟག་གོ །དེའི་སློབ་མ་དྲུག་ཅེས་བྱ་བ་ནི། སྐྱེས་པའི་རྟེན་ཅན་སློབ་དཔོན་ཉིད་ཀྱི་དྲུང་དུ་བསྙེན་ཅིང་བཞུགས་པའི་འཁོར་རྣམས་ཀྱི་ནང་ནས་སློབ་དཔོན་ཉིད་སྐུ་བཞུགས་པའི་དུས་སུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ་ནི་དྲུག་སྟེ། ཨེ་ཡ་ལ་པ་དང༌། མ་ཧི་ལ་པ་དང༌། བྷ་དྲ་པ་དང༌། དྷ་མ་པ་དང༌། དྷུ་མ་པ་དང༌། ཚིམ་བུ་པ་རྣམས་སོ། །ལུས་ཀྱི་དངོས་པོ་སྤངས་པ་ཞེས་བྱ་བ་ནི་འཆི་སྲིད་ཀྱིས་ལུས་བོར་བའི་དོན་མ་ཡིན་ཏེ། རྣམ་པར་སྨིན་པའི་ལུས་འདི་གནས་གྱུར་ནས། འཇའ་ལུས་རྡོ་རྗེའི་སྐུར་སོང་བའོ། །ལུང་ཕྱི་མའི་དོན་ནི། ཁ་ཊྭཱཾ་ཞེས་ཕྱག་མཚན་དང་རྒྱན་བསྟན་པ་ནི། སློབ་དཔོན་འདིས་སྤྲོས་བཅས་ཀྱི་སྤྱོད་པ་གཙོ་བོར་མཛད་པས། ཕལ་ཆེར་ལྷའི་ཆས་སུ་ཞུགས་པར་སྟོན། ནག་པོ་ཞེས་པའི་མཚན་ཡང་བསྟན་ཏོ། །ཀྲྀཥྞ་ཨཱ་ཙརྱ་ཞེས་པ་ཡང་སློབ་དཔོན་འདིའི་མཚན་གྱི་རྣམ་གྲངས་ཡིན་མོད་ཀྱི། ཀྲྀཥྞ་པའི་མཚན་ཅན་གཞན་ཡང་ཤིན་ཏུ་


TNT17_Page_0168
[མ་དཔེ་གཟིགས་ན་འདིར་གནོན།]

མང་ངོ༌། །སློབ་དཔོན་འདི་ལ་ཀཧྣཱ་ཙརྱ་སྟེ་སློབ་དཔོན་ནག་པོ་དང༌། ཀྲྀཥྞཱ་ཙརྱ་པ་ཡང་སློབ་དཔོན་ནག་པོའོ། །ཀཧྣ་ཀྲྀཥྞ་དང་ཐུང་ངུའི་མཐར་ཙརྱ་པ་སྦྱར་ན། ཀཧྣ་ཙརྱ་པ་ཀྲྀཥྞ་ཙརྱ་པ་སྟེ་ནག་པོ་སྤྱོད་པ་བ་ཞེས་དང༌། ཡང་ཙརྱཱ་ཙརྱ་པ་སྟེ་སློབ་དཔོན་སྤྱོད་པ་བ་དང༌། དེ་བཞིན་དུ་ཙརྱ་བཛྲ་ཏེ་སྤྱོད་པའི་རྡོ་རྗེ་དང༌། ཨཱ་ཙརྱ་ཙརྱ་དྷ་རི་པ་སྟེ་སློབ་དཔོན་སྤྱོད་འཆང་དབང་པོ་ལ་སོགས་པར་གྲགས་སོ། །དེ་ཡང་འཕགས་ཡུལ་ཤར་ཕྱོགས་གཽ་རའི་རྒྱལ་ཁམས་ཀྱི་ནང་ཚན་ཨོ་རུ་བི་ཤ་ཞེས་བྱ་བ། བྷ་དྒ་ལ་དང་ཅུང་ཟད་ཉེ་བའི་ཕྱོགས་ཤིག་ཡིན། ཡུལ་དེར་མི་རིགས་ཆེན་པོ་བཞི་ལས་བྲམ་ཟེའི་རིགས་སུ་སྐུ་འཁྲུངས་སོ། །བོད་ཀྱི་ལོ་རྒྱུས་རྙིང་པ་འགའ་ན། རྗེ་རིགས་སུ་འཆད་པ་ཡོད་ཀྱང༌། སློབ་དཔོན་ཉིད་ཀྱི་དོ་ཧ་ལས། རེག་གིན་རེག་གིན་འགྲོ་སྟེ་བྲམ་ཟེའི་བུ། ཞེས་གསུངས་པ། དེ་ལ་མཚོན་དོན་རྫོགས་རིམ་ལ་སྦྱར་བའི་བཤད་པ་ཡོད་ཀྱང༌། མཚོན་བྱེད་བརྡ་དེ་ཡང་ཀུན་རྫོབ་དངོས་པོ་དང་འགྲིག་དགོས་པས། སློབ་དཔོན་བྲམ་ཟེའི་རིགས་ཡིན་པར་ལུང་དེས་གྲུབ། རྒྱ་གར་ན་སྔོན་ནས་ད་ལྟའི་བར་དུ་ཡང་སློབ་དཔོན་འདི་ཕྱི་ནང་ཐམས་ཅད་ལ་གྲགས་ཆེ་ཞིང༌། ཐམས་ཅད་མགྲིན་གཅིག་པར་བྲམ་ཟེའི་རིགས་ཡིན་པར་ཀུན་ལ་གྲགས་སོ། །ཡང་སློབ་དཔོན་འདི་བོད་དུ་མ་བྱུང་རྒྱ་གར་དུ་བྱུང་བ་ཡིན་ལ། འདིའི་རིགས་ལ་ཆ་རྒྱུས་ཡོད་དུ་རུང་བའི་ཡུལ་རྒྱ་གར་དུ་ཀུན་ལ་མཐུན་པར་


TNT17_Page_0169
[མ་དཔེ་གཟིགས་ན་འདིར་གནོན།]

གྲགས་པ་དེ་བཀག་ནས། ཆ་རྒྱུས་མེད་པའི་རྒྱལ་ཁམས་བོད་ལྟ་བུར་དེ་དང་འགལ་བར་སྨྲ་བ་དག་ལ་འདི་ནི་བདེན་ཏེ། སྨྲ་བ་པོ་དེ་སྐྱེས་བུ་བཟང་པོ་ཡིན་པའི་ཕྱིར་རོ། །ཞེས་སྨྲ་བ་ནི་ལེགས་པ་མ་ཡིན་ཏེ། གཡེམ་མ་མུ་ཅོར་གྱི་རྒྱལ་ལོ་ཞེས་པའི་དོན་དང་མཚུངས་པར་འགྱུར་བའི་ཕྱིར་རོ། །དེ་ནས་ཆུང་ངུའི་དུས་ནས་བློ་རྣོ་ཞིང་སྒྲ་དང༌། སྨན་དཔྱད་དང༌། བཟོའི་གནས་ཐམས་ཅད་ལ་མཁས་པར་བྱས། དེར་སྔོན་གྱི་ལས་འཕྲོ་སད་པས། ཡེ་ཤེས་ཀྱི་རྣལ་འབྱོར་མ་དུ་མས་ཞལ་མངོན་སུམ་དུ་བསྟན། དེ་ནས་རིམ་གྱིས་ཡུལ་དབུས་མ་ག་དྷའི་ཆ་ཤས། དཔལ་ན་ལེནྡྲ་ཞེས་བྱ་བ། པཎྜི་ཏ་ལྔ་བརྒྱ་གནས་ཤིང་ཆོས་གྲྭ་ཤིན་ཏུ་དར་བས་དེར་བྱོན་ཏེ་དགེ་སློང་མཛད་ཅིང་ལོ་མང་དུ་བཞུགས་ནས་སྡེ་སྣོད་གསུམ་དང༌། རྒྱུད་སྡེ་བཞིའི་ཐོས་བསམ་གྱིས་རྒྱུད་བྱང་བར་མཛད་ཅིང༌། སྔགས་དང་བསམ་གཏན་ཡང་ཅི་རིགས་པ་གྲུབ་པར་གྱུར་ཏོ། །དེར་དབེན་པ་བསྟན་ཏེ། བསྒོམ་ཞིང་བཞུགས་པའི་སྐབས་ཤིག །གྲུབ་པའི་རྣལ་འབྱོར་མ་ཆེན་མོ་ལྕམ་ལ་ཀྵྨཱི་ཀ་རས་ཞལ་བསྟན་རྒྱུད་བྱིན་གྱིས་བརླབས་ཏིང་ངེ་འཛིན་ཁྱད་པར་ཅན་བརྙེས་སོ། །དེར་རྡོ་རྗེ་མཁའ་འགྲོ་མ་འགའ་ཞིག་གིས་ནམ་མཁའ་ནས་གསུང་གི་སྣང་བ་ཕྱུང་སྟེ། བྱང་ཕྱོགས་ཀྱི་གྲོང་ཁྱེར་ཛ་ལན་དྷ་ར་ན། བླ་མ་ཛ་ལནྡྷ་རི་པ་ཞེས་པ་ཡོད་ཀྱི། ཁྱོད་ཀྱིས་དེ་བསྟེན་ན་འདོད་


TNT17_Page_0170
[མ་དཔེ་གཟིགས་ན་འདིར་གནོན།]

པའི་དངོས་གྲུབ་ཏུ་འགྱུར་རོ། །ཞེས་གྲགས་པས་བདག་ཉིད་གཅིག་པུ་ཡུལ་ཛ་ལན་དྷ་རར་བཞུད་དོ། །དེར་གྲུབ་ཐོབ་ཛ་ལན་དྷ་རི་པ་དང་མཇལ། སློབ་དཔོན་དེ་ནི་རང་བྱུང་གདོད་ནས་གྲུབ་པའི་རྣལ་འབྱོར་གྱི་དབང་ཕྱུག་ཆེས་ཆེ་བ་ཡིན་ཅིང༌། སྐུ་ལུས་ཀྱི་བཀོད་པ་ཡང་ཅིག་ཅར་མང་དུ་སྟོན་པས་ཡུལ་ཐ་དད་སྣ་ཚོགས་ན་སྐུ་དུ་མས་དུས་གཅིག་ཏུ་བཞུགས་ཤིང༌། སློབ་མ་དངོས་གྲུབ་ཐོབ་པའང་མང་མོད་ཀྱི། ཡུལ་དེར་དུས་སྐབས་གདུལ་བྱ་འདུལ་བའི་དབང་གིས། དམངས་རིགས་ཀྱི་རྣལ་འབྱོར་པ་རྟག་ཏུ་སློང་མོ་ལ་སྤྱོད་པ་ཕལ་པའི་ཚུལ་འཛིན་པ་ཅིག་ཡོད་སྐད། དེར་མཁས་པའི་ང་རྒྱལ་སྤངས་ནས་ཞབས་ལ་གུས་པས་བཏུད་དེ་རྗེས་སུ་གཟུང་བར་གསོལ་བ་བཏབ་པས། སྐལ་བ་དང་ལྡན་པར་མཁྱེན་ནས། ཡང་དག་པར་དབང་བསྐུར་ཞིང་གདམས་པ་དང་རྗེས་སུ་གདམས་པ་མཐའ་དག་བསྩལ་ཏོ། །དེ་ནས་ཛ་ལན་དྷ་རའི་ཡུལ་དེའི་ཕྱོགས་གཅིག་ཏུ་རྡོ་རྗེ་ཐེག་པའི་དོན་བསྒོམ་ཞིང་བཞུགས་པའི་ཚེ། ལན་ཅིག་འདོད་ན་རྩིག་པ་ལ་ཡང་ཐོགས་མེད་དུ་འབྱོན་ནུས་པ་དང༌། བྲག་རི་ལ་ཡང་ཞབས་བྱིང་ཞིང་བཞེད་ན་ཐལ་བྱུང་དུ་བཞུད་ནུས་པ་དང༌། ནམ་ཏིང་ངེ་འཛིན་བསྒོམས་པའི་ཚེ་བདག་ཉིད་དཔལ་ཧེ་རུ་ཀའི་དཀྱིལ་འཁོར་དུ་གསལ་བར་གཟིགས་ཤིང༌། ལྷ་དེ་རྣམས་ཀྱིས་དྲི་ལན་མཛད་པའི་ཚུལ་གྱིས་སློབ་དཔོན་ཉིད་ཀྱི་ཐེ་ཚོམ་གཅོད་པ་དང༌། བསྟོད་པ་དང་རྡོ་རྗེ་གླུ་ནམ་བླངས་པ་ན། ས་གཡོ་


TNT17_Page_0171
[མ་དཔེ་གཟིགས་ན་འདིར་གནོན།]

བའམ། མེ་ཏོག་གི་ཆར་འབབ་པའམ། སྒྲ་འབྱིན་པའམ། འོད་སྣང་བར་བྱེད་པ་འབྱུང་ངོ༌། །དེར་སྤྱོད་པ་བྱ་བའི་དུས་ཡིན་ནམ་དགོངས་པ་ན། རྡོ་རྗེ་མཁའ་འགྲོ་མ་འགའ་ཞིག་མངོན་སུམ་དུ་བྱོན་ཏེ་བཟློག་པར་མཛད་དོ། །ཡང་བསྒོམ་ཞིང་བཞུགས་པ་ན། ཕྱུགས་འཚོ་བའི་བྱིས་པ་འགའ་ཞིག་རྩེ་མོ་རྩེ་ཞིང་སོང་བའི་ཤུལ་དུ་ཤིང་ཨ་ཤོ་ཀ་ལ་རལ་གྲིའི་གཟུགས་བྱས་པ་འགའ་ཞིག་དག་བོར་ཏེ་འདུག་པ་ལ། གཅིག་ཕྱག་ཏུ་བསྣམས་ཏེ་བྱོན། ཤིང་དྲུང་ཞིག་ཏུ་དེ་མདུན་དུ་བཞག་སྟེ་ཏིང་ངེ་འཛིན་བསྒོམ་ཞིང་བཞུགས་པ་ན། རལ་གྲི་དེ་ལས་མེ་རང་འབར་བར་གྱུར་ཏེ། དེ་ཕྱག་ཏུ་ཐོགས་པ་ན་ནམ་མཁའ་ལ་འཕགས་ཤིང་མངོན་ཤེས་དང་ལྡན་པར་གྱུར་ཏོ། །དེར་དགོངས་པ་བླ་མའམ་ལྷག་པའི་ལྷས་བཀས་མ་གནང་བར་དངོས་གྲུབ་ཀྱི་རོལ་པ་མི་བྱའོ་དགོངས་ཏེ། རེ་ཞིག་མི་སྣང་བར་སྦས་སོ། །ཡང་ལན་ཅིག་ལམ་དུ་བཞུད་པ་ན་བྲག་རིའི་ཁོངས་ན་གྲུབ་པའི་དངུལ་ཆུའི་གཏེར་ཡོད་པ་གཟིགས་ཤིང༌། དེའི་སྒོ་ཡང་རང་བྱེ་བ་དང༌། ཡང་ས་གཞི་ལ་རིན་པོ་ཆེའི་གཏེར་ཡོད་པ་གཟིགས་ཤིང་སྒོ་ཡང་བྱེ་བ་དང༌། ཡང་སྒྲུབ་པ་པོ་གཅིག་གིས་ནགས་ཀྱི་མཐོངས་ཤིག་ཏུ་མི་གཞན་མེད་དོ་སྙམ་དབེན་པའི་འདུ་ཤེས་ཀྱིས་རིལ་བུ་ལྕགས་གསུམ་གྱིས་དཀྲིས་པ་ཞིག་བཅོས་ཏེ། ལྗོན་ཤིང་ཅིག་གི་རྩ་བར་སྦས་སོ། །དེ་ནགས་གསེབ་ན་གནས་པའི་གཡོ་ཅན་ཞིག་རྩྭའི་གསེབ་ན་ཡིབ་ནས་བསྡད་པས་མཐོང༌།


TNT17_Page_0172
[མ་དཔེ་གཟིགས་ན་འདིར་གནོན།]

སྒྲུབ་པ་པོ་དེ་གྲོང་ཁྱེར་དུ་སོང་བ་ན། གཡོ་ཅན་དེས་རིལ་བུ་དེ་བརྐུས་ཏེ་སོང་བ་ན། གཞན་ལ་བཙོངས་ཀྱང་མ་བྲིན། རང་ལ་མཁོ་མེད་ནས། འདི་སུ་དང་ཕྲད་པ་ལ་སྦྱིན་ནོ་སྙམ་ཙ་ན། སློབ་དཔོན་འདི་ལམ་གྱི་གཞི་མདོ་ན་བསྒོམ་ཞིང་བཞུགས་པ་དང་ཕྲད་དེ། སྐུ་མདུན་དུ་བོར་ཏེ་སོང་ངོ༌། །དེ་ལ་སྤྱན་གྱིས་གཟིགས་ཤིང་ཐུགས་བརྟད་པ་ན། ཆུ་ཚོད་གཅིག་ཙམ་ན་སྒྲ་དང་འོད་ཟེར་བྱུང་ངོ༌། །དེ་ཞལ་དུ་བཅུག་པས་ལྷ་དང་གནོད་སྦྱིན་གྱི་གནས་རྣམས་ཀྱང་གཟིགས་ཤིང༌། བཞེད་ན་སྐད་ཅིག་ལ་དེར་འབྱོན་པའི་ནུས་པ་ཐོབ། འོན་ཀྱང་སྔ་མ་བཞིན་དུ་དགོངས་ནས། རེ་ཞིག་མི་སྣང་བར་སྦས་སོ། །ཡང་ལན་ཅིག་ལམ་དུ་བཞུད་པ་ན་ས་འོག་གི་འཇིག་རྟེན་དུ་འགྲོ་བའི་དཔལ་གྱི་སྒོར་རང་བྱེ་བར་གཟིགས་ནས། ལམ་དེ་ལ་ཞུགས་ནས་ཡུད་ཙམ་ཞིག་གིས་ས་འོག་གི་འཇིག་རྟེན་རྣམས་གཟིགས་ཤིང་ཉམས་འོག་ཏུ་ཆུད་པར་བྱས། སླར་རང་ཉིད་ཀྱི་སྒྲུབ་གནས་སུ་འཁོར་རོ། །དེ་དག་ལ་སོགས་པ་ཐུན་མོང་གི་དངོས་གྲུབ་མང་པོ་ཆེད་དུ་མ་སྒྲུབས་ཀྱང་རང་གི་ངང་གིས་གྲུབ་པར་གྱུར་ཏོ། །དེར་དགོངས་པ་ད་ནི་ངེས་པར་སྤྱོད་པ་བྱ་བའི་དུས་ལ་བབ་པོ་སྙམ་ནས། བླ་མ་ཛ་ལན་དྷ་རི་པ་ལ་སྣང་བ་ཞུས་པས། ཀྱེ་མ་མིག་འཕྲུལ་མཁན་ཁྱོད་དེ་ཙམ་ངོ་མཚར་ཅི་ཆེ། ད་ལྟ་ཁྱོད་ཀྱིས་སྤྱོད་པ་བྱ་བར་མི་ནུས་ཀྱི། དེ་བས་འདི་ནས་བྱང་ཕྱོགས་ན་དཔག་ཚད་ལྔ་བརྒྱ་ཙམ་ན། ཡུལ་པྲེ་ཏ་པུ་རི་ཡོད། དེ་ན་མཁའ་འགྲོ་མ་


TNT17_Page_0173
[མ་དཔེ་གཟིགས་ན་འདིར་གནོན།]

སྐལ་བ་བཟང་མོ་ཞེས་བྱ་བ་ཡོད། དེ་གསང་རྒྱུད་མཐའ་དག་འཛིན་པ་ཡིན་པས། དེའི་ལག་ནས་གསང་བ་ཀུན་བསྡུས་པ་ཞེས་ཀྱང་བྱ། ཁ་སྦྱོར་ཐིག་ལེ་ཞེས་བྱ་བའི་རྒྱུད་ཡོད་པས། དེ་སྤྱན་དྲོངས་ལ་ཤོགསེམས་ཅན་མང་པོ་ལ་ཕན་པར་འགྱུར། དེ་ཡང་ཁྱོད་ཀྱིས་གསོལ་བ་བཏབ་པ་ཙམ་གྱིས་མི་སྟེར་གྱི། ངས་ལེན་དུ་བཏང་བ་ཡིན་བྱས་ན་སྟེར་བར་འགྱུར་རོ་གསུང༌། དེ་ནས་དེའི་ནང་པར་ནག་པོ་སྤྱོད་པ་བྱང་ཕྱོགས་སུ་བཞུད་པས། ཉི་མ་དེ་ཉིད་ཀྱི་ཐུན་ཐ་མ་ལ་བབ་པ་ཙམ་ན། བྱེ་མའི་ཐང་སྐྱ་བོ་ཞིག་གི་དབུས་གད་པའི་ཁུགས་ཤིག་ན། ཁྱིམ་ངན་པ་རེ་ཧྲུལ་འདྲ་བ་ཞིག་འདུག །དེ་དང་ཉེ་བར་ཕྱིན་པ་ན། བུད་མེད་ངན་མ་ཞིག་ཆུ་ལེན་དུ་བྱུང་བ་དང་འཕྲད་ནས། དེ་ནུབ་གནས་གཡར་དགོས་བྱས་པས། དེ་ལན་ཅིག་ནང་དུ་སོང་ནས་སླར་ཡང་འབོད་དུ་བྱུང༌། དེ་ནས་སློབ་དཔོན་ཁྱིམ་གྱི་ནང་དུ་བྱོན་ཙ་ན། དེ་ན་བུད་མེད་གཞན་ཞིག་འདུག་པ་དང༌། དེས་རྣལ་འབྱོར་པ་གང་དུ་འགྲོ་ཟེར། སློབ་དཔོན་གྱིས་སྔར་གྱི་གཏམ་བཤད་པས། དེ་ན་རེ། ཡུལ་པྲེ་ཏ་པུ་རི་ཡང་འདི་ཀ་ཡིན། མཁའ་འགྲོ་མ་སྐལ་བ་བཟང་མོ་ཡང་ང་ཡིན་ཟེར། སློབ་དཔོན་གྱི་དགོངས་པ་ལ། དེ་རང་མིན་ལས་ཆེ་དགོངས་ཏེ། དེའི་ནང་པར་བྱང་ཕྱོགས་སུ་གཤེགས་པས། ཉི་མ་ནུབ་ལ་ཁད་ཙ་ན་སྔར་གྱིས་དེ་ཀར་འཁོར། དེའི་ཡང་ནང་པར་བཞུད་པས་ཀྱང་སྔར་བཞིན་


TNT17_Page_0174
[མ་དཔེ་གཟིགས་ན་འདིར་གནོན།]

ད་ནང་འོངས་པའི་གནས་དེ་ཉིད་དུ་འཁོར། དེ་ནས་སློབ་དཔོན་གྱིས་མཁའ་འགྲོ་མ་དེ་ལ་ཕྱག་འཚལ་ཏེ། ཁྱེད་ཀྱི་ཕྱག་ན་དཔལ་སམྦུ་ཊ་ཁ་སྦྱོར་ཐིག་ལེའི་རྒྱུད་ཡོད་པ་འདུག་པ། སློབ་དཔོན་ཛ་ལནྡྷ་རི་པས་རྒྱུད་དེ་ལེན་པར་བདག་བཏང་བ་ཡིན་པས། རྒྱུད་དེའི་གླེག་བམ་ཡང་བསྩལ་བར་ཞུ། གདམས་པ་དང་རྗེས་སུ་གདམས་པ་ཡང་གནང་བར་ཞུ་ཞུས་པས། གནས་ཁང་དེ་ཡང་ཁང་བཟང་རྒྱན་གྱིས་བརྒྱན་པར་གྱུར། བུད་མེད་དེ་ཡང་གཟི་བརྗིད་འོད་དུ་འབར་བ་རྒྱན་ཐམས་ཅད་ཀྱིས་བརྒྱན་པ། གསེར་གྱི་ཁྲི་ལ་འདུག་པ་ཅིག་ཏུ་གྱུར་ནས། སམྦུ་ཊའི་རྒྱུད་ཀྱི་གླེགས་བམ་ནི་གཏད། ཛ་ལནྡྷ་རི་པ་ནི་འདི་མི་འདོད་དེ་འོང༌། འོན་ཀྱང་སྐལ་བ་དང་ལྡན་པ་འགའི་དོན་གྱིས་ཤིག་ཅེས་གནང་བ་བསྩལ་ལོ། །འདིར་བོད་རྙིང་པ་རྣམས་ལས་མཁའ་འགྲོ་མ་སྐལ་བ་བཟང་མོ་ཡིན་ཅེས་རྭ་བ་དང་ལོ་ཆུང་བའི་ཕྱོགས་རྣམས་ཟེར་བ་ལེགས་པར་མངོན་ཏེ་རྒྱ་གཞུང་འགའ་རེར་བླ་མ་བརྒྱུད་པ་ལ་དེ་ལྟར་བགྲངས་པས་སོ། །དེ་རྡོ་རྗེ་ཕག་མོ་དང༌། བདག་མེད་མའི་སྤྲུལ་པར་འདོད་པ་སྣ་ཚོགས་ཡོད་དེ་དོན་ལ་མི་འགལ་ལོ། །མར་དོ་ལུགས་ཀྱི་ལོ་རྒྱུས་ན། མཁའ་འགྲོ་མ་འགྲོ་བ་བཟང་མོ་ཡིན་ཟེར་བ་ཡོད་དེ། འགྲོ་བཟང་མོ་ཞེས་པ་དེ་ནི་མཁའ་འགྲོ་མ་གསང་བ་ཡེ་ཤེས་ཀྱི་མཚན་གྱི་རྣམ་གྲངས་ཡིན་པར་གྲགས་སོ། །དེ་ལའང་འགལ་བ་མེད་དོ། །སྔོན་བོད་དུ་བྱུང་པའི་འདི་སྐབས་ཀྱི་ལོ་རྒྱུས་རྣམས་ན། དབང་བསྐུར་ཞིང་གདམས་པ་དང་རྗེས་སུ་གདམས་པ་མཐའ་དག་བསྩལ་


TNT17_Page_0175
[མ་དཔེ་གཟིགས་ན་འདིར་གནོན།]

ཅེས་པ་ནི། སོ་སོའི་སྐྱེ་བོའི་སློབ་དཔོན་གྱིས་སློབ་མ་ཕལ་པ་ཅིག་ལ་བྱེད་པ་བཞིན་དུ། རྡུལ་ཚོན་བཞེངས། དབང་རྫས་བསགས། ཆོག་འདོན་བཏང༌། ཉིན་མོ་བསྒྲུབས་མཚན་མོ་བསྐུར། དེབ་ཆ་སྒྲོག་པ་དང༌། གཞུང་གི་འབྲུ་བཤད་འཛུག་འཁྲིད་བྱེད་པ་དང༌། འཛིན་ཆོས་བཏང་བ་མ་ཡིན་གྱི། སློབ་དཔོན་ནག་པོ་སྐལ་ལྡན་གྱི་གང་ཟག་དེ་ལ། སྤྲུལ་པའི་སྐུ་ཡེ་ཤེས་ཀྱི་མཁའ་འགྲོ་མ་དེས། དགོངས་པ་བརྟད་དེ་ཐུགས་རྒྱུད་བྱིན་གྱིས་བརླབས་པ་ཙམ་གྱིས། སྐད་ཅིག་དེ་ལ་ཡེ་ཤེས་ཁྱད་པར་ཅན་བརྙེས། རྒྱུད་དོན་མ་ལུས་པ་ཐུགས་སུ་ཆུད། བཀའི་སྣང་བ་བསྩལ་པ་ཙམ་གྱིས་སེམས་ཅན་གྱི་དོན་རྒྱ་ཆེར་སྤྱོད་པའི་ནུས་པ་ཐོབ་པ་དེ་ཀ་དབང་བསྐུར་བ་དང༌། གདམས་ངག་རྗེས་གདམས་བླ་ན་མེད་པ་ཡིན་ནོ། །འདིས་མཚོན་པའི་སྔོན་གྱི་གྲུབ་ཐོབ་ཆེན་པོ་རྣམས་ཀྱི་རྣམ་ཐར་ན། གཅིག་གིས་གཅིག་ལ་གདམས་ཚུལ་ཡོད་པ་རྣམས། ཕལ་ཆེར་དེ་བཞིན་ཡིན་ལ། རང་ཅག་བོད་འདི་ན་གོ་བ་འདི་ཙམ་ལ་ཡང་མཐའ་གཉིས་གང་རུང་གཅིག་ཏུ་ལྷུང་བར་སྣང་སྟེ། བླུན་པོ་རྣམས་དང༌། བླུན་པོའི་རྗེས་འབྲང་མཁས་འདོད་ཡོད་པ་ཕལ་ཆེར་ཞིག་ནི། གྲུབ་ཐོབ་རྣམས་ལ་དེ་ལྟར་ཡིན་པའི་གོ་བ་རབ་རིབ་ཅིག་ཤར་བ་རྒྱུ་མཚན་དུ་བྱས་ནས། ད་ལྟའི་བླ་མ་དང༌། སློབ་མ་ཕལ་བ་ལམ་སྣ་ཙམ་ཡང་མ་ཟིན་པ་སྒབ་སྒོབ་རྣམས་ལ་ཡང་གྲུབ་ཐོབ་གྱི་རིགས་འགྲེ་འགྲན་འདོད་བྱས་ཏེ། དབང་བསྐུར་རྒྱུད་བཤད་མན་ངག་ཐམས་ཅད་རྩ་བས་བཅད། པོ་ཏི་མགོ་ལ་འཇོག་པ་དང༌།


TNT17_Page_0176
[མ་དཔེ་གཟིགས་ན་འདིར་གནོན།]

དགོངས་པ་བརྟད་པས་ཆོག་པ་སོགས་མི་ཤེས་པ་དང༌། མ་ལྕོགས་པ་ལ་བཟང་བཟང་མོ་དང་དཔའ་དཔའ་མོ་བྱེད་དོ། །དེ་རིགས་ལ་བླ་མས་མ་བཤད། སློབ་མས་མ་གོ དཔོན་སློབ་གཉིས་ཀར་གྱིས་ཅི་ཡང་མི་ཤེས་པ་ལ། ཤེས་པ་དག་བྱེད་པ་ལས་མི་ཡོང་བར་འདུག་པ་འདི་ཆད་པའི་མཐའ་ཡིན། ཡང་སྔགས་གཞུང་དང༌། ཆོ་ག་ལ་རྩིས་སུ་བྱེད་པ་རྣམས་ཀྱང༌། ད་ལྟ་ལས་དང་པོ་པ་གང་བྱེད་པའི་རྒྱས་བཀབ་སྟེ། འཕགས་པ་དང༌། གྲུབ་ཐོབ་དང༌། སྒྲུབ་པ་པོ་མཆོག་རྣམས་ལའང་བྱེད་པ་ནི། སྒྲིགས་བཀོད་དམ་དམ་མོ་དང་མཁས་འདོད་བྱས་པས་ཏི་ཐུག་ཏུ་སོང་སྟེ། འདི་ཀ་ལ་ལྟོས་པའི་རྟག་པའི་མཐའ་ཡིན་ནོ། །དེས་ན་ལས་དང་པོ་པ་ལ་བརྒྱུད་པ་ཁུངས་ལ་ཐུག་པའི་ཆོས་བཀའ་མ་ཆད་པ་ཅིག་དགོས། ཆོ་ག་ལག་ལེན་བྱང་ལ་མ་ནོར་བ་ཞིག་དགོས། བསྙེན་སྒྲུབ་ལ་སོགས་པ་ཚད་དུ་ཕྱིན་པ་ཅིག་དགོས། རང་རང་གི་གཞུང་བཤད་ཐེ་ཚོམ་ཆོད་ངེས། བློ་རྩེ་བརྟད་འཚམ་ཡོང་ངེས་ཤིག་དགོས་མན་ངག་རྣམས་ལག་ལེན་དུ་བཏབ་ན་ཐེབས་རེས་པ་ཅིག་དགོས་སོ། །གྲུབ་པ་ཐོབ་པ་རྣམས་ཀྱི་སྤྱོད་ཡུལ་ནི་གཞན་ཡིན་པས། དེ་འདྲིའི་ངེས་ཁྲིགས་མེད་ཀྱང༌། དེ་ལ་ལོག་ལྟ་དང་ཐེ་ཚོམ་མི་བྱ། གུས་པས་གསོལ་བ་ཐོབ་ཅིག ད་ནི་དཀྱུས་ལ་འཇུག་པར་བྱ་སྟེ། དེ་ནས་སློབ་དཔོན་གྱིས་ཚུར་ལམ་ཡང་ཡུད་ཙམ་ཞིག་གིས་བགྲོད་ནས། རྒྱུད་ཀྱི་གླེགས་བམ་མཁའ་འགྲོའི་ཕྱག་ནས་སྤྱན་དྲངས་པ་དེ་སློབ་དཔོན་ལ་ཕུལ་བས། ཁྱོད་ཀྱིས་མཁའ་འགྲོ་མ་དེ་ལ་རྟོག་དཔྱོད་མེད་པར་གསོལ་བ་


TNT17_Page_0177
[མ་དཔེ་གཟིགས་ན་འདིར་གནོན།]

བཏབ་ན། དེ་ཉིད་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འགྱུར་བ་ཡིན་པས་དེའི་དོན་དུ་བཏང་བ་ཡིན་ཀྱང༌། རྣམ་པར་རྟོག་པས་བསྒྲིབས་ཀྱི། ད་ང་ལ་གླེགས་བམ་གྱི་དགོས་པ་མེད་པས་ཁྱོད་ཉིད་ཁྱེར་ཞིག་ཅེས་བོར་ནས། གཞན་ལའང་སྟོན་ཅིག །འདི་སྔོན་ཉིད་ངས་ཤེས་གསུང༌། རྒྱུད་དེའི་ཚིག་དོན་མཐའ་དག་སྐད་ཅིག་དེ་ལ་བླ་མས་གསུངས་སོ། །དེ་ནས་ཀྱང་བསྒོམ་ཞིང་བཞུགས་པ་ན། མི་རིང་པའི་སྐབས་ཤིག་འབྱུང་པོ་གཞན་གྱིས་མི་ཐུབ་པ་དང༌། གསེར་གྱི་ཕུག་ན་གནས་པའི་གནོད་སྦྱིན་མོ་ལ་སོགས་པ། གནོད་སྦྱིན་མོ་མང་པོ་དག་འོངས་ནས། རང་རང་གི་སྔགས་དང༌། རྒྱུད་ཀྱི་སྦྱོར་བ་དང་དངོས་གྲུབ་དག་འབུལ་བར་བྱེད་དོ། །འོན་ཀྱང་རིག་པའི་བརྟུལ་ཞུགས་སྤྱད་ནས། ཕྱག་རྒྱ་ཆེན་པོའི་དངོས་གྲུབ་ཐོབ་པར་བཞེད་པ་ཡིན་པས། རེ་ཞིག་དེ་དག་བོར་ཏེ་བཞུགས་སོ། །དེ་རྗེས་ཡང་ལན་ཅིག་བླ་མ་ཛ་ལནྡྷ་རི་པའི་གསུང་ལས། ཁྱོད་དཔལ་ཨོ་རྒྱན་གྱི་གནས་སུ་སོང་ལ། ཕྱག་རྒྱ་དྲུག་པོ་འདི་རྣམས་ལ་རྡོ་རྗེ་མཁའ་འགྲོ་མའི་བྱིན་རླབས་ཞུས་ལ་མྱུར་དུ་ཤོག་ཅིག །དེ་ཡང་ཨོ་རྒྱན་གྱི་གནས་དེ་ན། རྡོ་རྗེ་མཁའ་འགྲོ་མ་མང་པོ་ཡོད་པ་རྣམས་ཀྱི་ནང་ན། གཞན་རྣམས་དང་རྣམ་པ་མི་འདྲ་བ་ཞིག་ཡོད་པ་དེ་ལ་ཞུས་གསུང༌། མི་རུས་ཀྱི་རྒྱན་དྲུག་ཕྲ་མོ་ངན་དོན་ཞིག་སློབ་དཔོན་ལ་གཏད་དོ། །ཡུལ་ཛ་ལནྡྷ་ར་ནས་ཨོ་རྒྱན་གྱི་བར་ལ་དཔག་ཚད་བརྒྱ་དང་ཉི་ཤུ་ཡོད་སྐད། དེ་ཡང་ཉིན་ཞག་


TNT17_Page_0178
[མ་དཔེ་གཟིགས་ན་འདིར་གནོན།]

གཅིག་གམ་གཉིས་ཀྱིས་བཅད་ནས། ཨོ་རྒྱན་གྱི་གནས་དེར་བྱོན་ཞིང༌། དཔའ་བོ་དང་རྣལ་འབྱོར་མ་དཔག་ཏུ་མེད་པ་དང་མཇལ། དེ་རྣམས་ཀྱི་ཆོ་འཕྲུལ་ཡ་མཚན་ཅན་མང་པོ་ཡང་གཟིགས། ལན་ཅིག་མཁའ་འགྲོ་མ་རྣམས་ཀྱི་ཚོགས་ཀྱི་འཁོར་ལོའི་བཀོད་པ་རྒྱ་ཆེན་པོའི་གྲྭར་ཞུགས་ཏེ། ལྷན་ཅིག་ཚོགས་ཀྱི་འཁོར་ལོའི་དགའ་སྟོན་ཉམས་སུ་མྱོང་བར་མཛད་པ་ན། ཀུན་གྱི་གྲལ་གཤམ་ན་གནས་པའི་མཁའ་འགྲོ་མ་ཞིག་བཞིན་མི་སྡུག་པ། མིག་ཤེལ་མིག་ཏུ་འདུག་པ། སོ་མི་མཉམ་པ། ལུས་ཁ་དོག་ངན་ཞིང་རྩུབ་པ། གོས་ཧྲུལ་བ་ཞིག་འདུག་གོ །སློབ་དཔོན་གྱིས་ལུང་བསྟན་པའི་མཁའ་འགྲོ་ནི་དེ་ཡིན་པར་མཁྱེན་ནས། བདག་སློབ་དཔོན་ཛ་ལནྡྷ་རི་པས་བཏང་བ་ཡིན། རུས་རྒྱན་འདི་བྱིན་གྱིས་རློབ་པར་ཞུ་ཞུས་པས། དེས་ཀྱང་སྔགས་བཏབ་སྟེ་རེ་རེ་བཞིན་མདུད་རྒྱ་རེ་བྱས་ཏེ། སློབ་དཔོན་ནག་པོ་པ་ལ་ཚུར་གཏད་དོ། །དེ་ནས་སློབ་དཔོན་ཚུར་བྱོན་ཏེ། ལམ་དབེན་པ་ཞིག་ཏུ་ཐུགས་ཙེག་ཙེག་བྱེད་དེ། མཁའ་འགྲོ་མའི་མདུད་རྒྱ་བཀྲོལ་ཏེ། རུས་རྒྱན་དེ་སྐུ་ལ་གསོལ་བས། སྲིད་པ་གསུམ་མཐོང་བའི་མངོན་ཤེས་སྐྱེས། ས་འོག་ས་སྟེང་ས་བླ་གསུམ་ལ་ཐོགས་མེད་དུ་འགྲོ་བའི་ནུས་པ་ཐོབ་བོ། །ཡང་རྒྱན་རྣམས་བཀྲོལ་ཏེ་སྣོད་དུ་བསྣམས་ནས། འདི་འདྲ་གདའ་ཞེས་སློབ་དཔོན་ལ་ཕུལ་བས། མཁའ་འགྲོའི་རྒྱ་དེ་བཤིག་ཏུ་མི་རུང་པ་ལ། ཞེས་ཅུང་ཟད་མ་མཉེས་པའི་ཚུལ་མཛད་སྐད་དེ། དོན་ལ་མཁའ་འགྲོའི་རྒྱ་མ་བཤིག་པར་བླ་མ་ལ་ཕུལ་ན། རུས་རྒྱན་དེ་བླ་མས་


TNT17_Page_0179
[མ་དཔེ་གཟིགས་ན་འདིར་གནོན།]

དེ་མ་ཐག་གནང་བར་འགྱུར་ཞིང༌། དེ་སྐུ་ལ་གསོལ་བ་ཙམ་གྱིས་མཆོག་བརྙེས་པར་འགྱུར་རྒྱུ་ཡིན་པར་སྣང་ངོ༌། །དེ་ནས་གནས་དེར་ཅི་རིགས་པར་བཞུགས་ཏེ། སྔར་མཁའ་འགྲོ་མ་སྐལ་བ་བཟང་མོ་དང༌། བླ་མ་ཛ་ལནྡྷ་རི་པས་བཀའི་གནང་པ་ཡོད་པ་ལ་བརྟེན་ནས། སྐལ་ལྡན་གྱི་སློབ་མ་ཅི་རིགས་ཅི་རིགས་ཙམ་གྱིས་འདུས་པ་ལ། རྡོ་རྗེ་ཐེག་པའི་ཆོས་དག་བསྟན་ཏོ། །སློབ་མ་དེ་རྣམས་ཀྱིས་ཀྱང་ཏིང་ངེ་འཛིན་རེ་ལ་བསྟན་པ་ཐོབ་ཅིང༌། ནུས་པ་སྣ་རེ་ཡང་བྱུང་ངོ༌། །དེ་ནས་སློབ་དཔོན་ཉིད་ཀྱིས། རི་ལུ་མིག་སྨན་རལ་གྲི་དང༌། །རྐང་མགྱོགས་བཅུད་ལེན་གནོད་སྦྱིན་མོ། །རོ་ལངས་དང་ནི་ས་འོག་སྟེ། །གྲུབ་པ་རྣམ་པ་བརྒྱད་ཡིན་ནོ། །ཞེས་པ་ལྟར་གྱི་རྫས་ཀྱི་དངོས་གྲུབ་དེ་དག །སྒྲུབ་པའི་ཆོ་ག་ཅུང་ཟད་ཙམ་རེས་ཚེགས་མེད་པར་གྲུབ་པ་མང་དུ་མཛད་ནས། སློབ་མ་དེ་དག་རྣམས་ལའང་སྐལ་བ་དང་འཚམས་པར་དངོས་གྲུབ་རེ་རེ་བྱིན། དེ་རྣམས་ཀྱིས་ཀྱང་ཆོ་ག་ལྷག་མ་སྒྲུབས་པས་དངོས་གྲུབ་ཕྲ་མོ་སྣ་རེ་ཐོབ་སྟེ། དེའི་ཚེ་སློབ་མ་བདུན་ཅུ་རྩ་གཉིས་ཡོད་སྐད་ལ། སུམ་ཅུ་སོ་བདུན་རྣལ་འབྱོར་མ་ཡིན། རྣལ་འབྱོར་པ་སུམ་ཅུ་སོ་ལྔ་ཡོད་སྐད། དེ་ནས་སྐབས་ཤིག་ན་སློབ་དཔོན་རང་ཉིད་ཀྱིས་དྲོད་ཚད་གཟིགས་ཏེ། བྲག་དེའུ་ཅིག་ལ་ལྟ་སྟངས་བྱས་པས་ཞིག་པ་དང༌། གསོ་བའི་ལྟ་སྟངས་མཛད་པས་འབྱོར་རོ། །ཡང་ཤིང་ནྱ་གྲོ་དྷའི་སྡོང་པོ་ལ་ལྟ་སྟངས་མཛད་པས་བསྐམས་ཤིང་ཚིག །ཡང་གསོ་པའི་ལྟ་སྟངས་མཛད་པས་སྔར་བཞིན་སོས་སོ། །


TNT17_Page_0180
[མ་དཔེ་གཟིགས་ན་འདིར་གནོན།]

དེ་ནས་གཞན་ཐམས་ཅད་ཀྱང་ཅི་འདོད་འོང་བར་འདུག་ནས། ད་ནི་ངེས་པར་རིག་པ་རྟུལ་ཞུགས་ཀྱི་སྤྱོད་པ་བྱའོ་དགོངས་ནས། བླ་མ་ཛ་ལནྡྷ་རི་པའི་དྲུང་དུ་ད་ནི་བདག་གིས་སྤྱོད་པ་ལ་འཇུག་པར་ནུས་པས། བླ་མས་ཅིས་ཀྱང་བཀས་གནང་བར་ཞུ། བདག་གི་འཁོར་འདི་ཀུན་གྱིས་ཀྱང་ནུས་པ་སྣ་རེ་ཐོབ་ལགས་པ། འདི་དག་ཀྱང་ཁྲིད་དུ་རུང་བའི་གནང་བ་སྩོལ་ཞེས་ཞུས་པས། བླ་མ་ན་རེ། ད་དུང་ཁྱོད་ལ་ནུས་པ་མེད་པ་འདྲ། ཡོད་ན་སྟོན་ཅིག་གསུང༌། སྟག་ལ་རེངས་པའི་ལྟ་སྟངས་མཛད་པས་དེ་མ་ཐག་ཤིང་བཞིན་དུ་རེངས། ལྗོན་ཤིང་འབྲས་བུས་རྒྱན་པ་ལ་ལྟུང་བའི་ལྟ་སྟངས་མཛད་པས། འབྲས་བུ་ཐམས་ཅད་ས་ལ་ལྷགས། རི་དྭགས་ཀྲྀཥྞ་ས་ར་ལ་དགུག་པའི་ལྟ་སྟངས་མཛད་པས། སྐད་ཅིག་ལ་དྲུང་དུ་རྒྱུགས་ཏེ་ཞབས་ལ་ལྡག་པར་བྱེད། ཡུལ་གནྡྷ་རའི་རྒྱལ་པོ་ལ་དབང་དུ་བྱེད་པའི་ལྟ་སྟངས་མཛད་པས་རྒྱལ་པོ་འཁོར་དང་བཅས་པ་དེར་འོངས་ཏེ་ཞབས་ལ་ཕྱག་འཚལ་ནས། སློབ་དཔོན་གྱི་བཞེད་པ་ཇི་ལྟ་བུ་བཀའ་སྩོལ་ཅིག་ཅེས་ཞུའོ། །གཞན་ཡང་གོང་བུ་དགུག་པ་དང༌། རྐང་པ་དགུག་པ་སོགས་མང་དུ་བསྟན་ཏོ། །གནྡྷ་རིའི་རྒྱལ་པོ་མ་གཏོགས་གཞན་རྣམས་ལ་བླ་མས་ད་ནི་ཁྲོལ་ཞིག་ཅེས་གསུང་པ་ལ། སློབ་དཔོན་སྤྱོད་པ་པ་ཉིད་ཀྱིས་འགྲོལ་བར་བརྩམས་པ་ལ། འགའ་ཞིག་ཅུང་ཟད་ཙམ་རེ་མ་གཏོགས་དགྲོལ་མ་ནུས། དེ་ཡང་བླ་མ་ཛ་ལནྡྷ་རི་པས་ཟིལ་གྱིས་མནན་པ་ཡིན། དེ་རྗེས་ཁོང་ཉིད་ཀྱིས་སླར་


TNT17_Page_0181
[མ་དཔེ་གཟིགས་ན་འདིར་གནོན།]

གསོས་ནས། ཁྱེད་ཀྱིས་ད་དུང་སྤྱོད་པ་སྔས། གསོ་ནུས་པ་དགོས་པ་ཡིན་གསུང༌། དེ་ནས་ཀྱང་ཅུང་ཞིག་བཞུགས་ཤིང་བསྒོམས་ནས་སྐབས་དེར་ལྗོན་ཤིང་ལ་འགགས་ཏེ་དཔྱངས་པའི་མི་རོ་མཚན་ལྡན་ཞིག་ལ། ལྟ་སྟངས་མཛད་པས་འགགས་ཐག་ཆད། ས་ལ་ལྷུང་པ་ལ་ཐུགས་བརྟད་པས་རོ་ལངས་ཆེན་པོ་ཕེབས་ཏེ། སློབ་དཔོན་གྱི་དྲུང་ན་འདུག་ཅིང་གཡོག་བྱེད་དོ། །སྐྱེ་བོ་ཕལ་གྱིས་ལན་རེ་ཙམ་མཐོང༌། ཕལ་ཆེར་མི་མཐོང་ངོ༌། །དེར་སྔ་མ་ལས་ཀྱང་ནུས་པ་ཆེར་འཕེལ་བས། འཁོར་རྣམས་ཀྱི་ནང་དུ་དྲིལ་བསྒྲགས་ཏེ། ཁོ་བོ་ནི་རིག་པ་བརྟུལ་ཞུགས་ཀྱི་སྤྱོད་པ་སྤྱོད་པས། ཁྱེད་ནུས་པ་ཐོབ་པ་རྣམས་ཀྱང་ང་དང་ལྷན་ཅིག་རྒྱུ་བར་བྱའོ་གསུང༌། དེ་རྗེས་བླ་མའི་དྲུང་དུ་ཕྱག་འཚལ་ནས། སྔར་ནི་བླ་མའི་ནུས་པས་ཟིལ་གྱིས་མནན་པ་ལགས། ཡོང་ནས་བདག་གིས་ཚར་བཅད་རྗེས་གཟུང་གཉིས་ཀ་ནུས་པ་ལགས་པས། ངེས་པར་གནང་བ་ཞུ་ཞེས་ཞུས་པ་ལ། སློབ་དཔོན་ཛ་ལནྡྷ་རི་པས། མཁའ་འགྲོ་མས་བྱིན་གྱིས་བརླབས་པའི་རུས་པའི་རྒྱན་དྲུག་དེ་ཡང༌། སློབ་དཔོན་ནག་པོ་ལ་གནང་ནས། འོ་ན་ད་ཁྱོད་རིག་པའི་བརྟུལ་ཞུགས་ཀྱི་སྤྱོད་པ་གྱིས་ཤིག །འོན་ཀྱང་ཡུལ་དེ་ཝི་ཀོ་ཊིར་མ་འགྲོ་ཞིག །ལྷག་མ་དུར་ཁྲོད་བརྒྱད་དང༌། ཡུལ་ཆེན་གཞན་ཐམས་ཅད་དུ་ཅི་བདེར་རྒྱུར་བར་གྱིས་ཞེས་བཀས་གནང་ངོ༌། །དེ་ནས་བརྩམས་ཏེ་སློབ་དཔོན་སྤྱོད་པ་པ་ནི་ལམ་གྱི་སྤྱོད་ཡུལ་དུ་རྒྱུ་བའི་ཚེ། གདུགས་བདུན་ནི་འཛིན་པ་མེད་པ་རང་འཁོར། ཌཱ་མ་རུ་


TNT17_Page_0182
[མ་དཔེ་གཟིགས་ན་འདིར་གནོན།]

བདུན་ནི་འཁྲོལ་བ་པོ་མེད་པར་རང་འཁྲོལ། རེས་འགའ་ནི་ཞབས་ཁྲི་གང་གི་ས་ལ་མི་རེགས་པར་བཞུད། རེས་འགའ་ནི་རོ་ལངས་མེ་ཏོག་གི་འཕྲེང་བ་ཅན་ལ་ཆིབས་ཏེ་འབྱོན། ལྟ་སྟངས་བརྒྱད་དམ་བཅུའི་སྒོ་ནས་ཉིན་རེ་བཞིན་སེམས་ཅན་མང་པོའི་དོན་མཛད་དོ། །དུས་ལན་འགའ་ནི་གདུགས་བདུན་བདུན་བརྒྱར་འཕེལ་བ་དང༌། ཌཱ་མ་རུ་བདུན་ཡང་བདུན་བརྒྱར་འགྲོ་བ་དང༌། འཁོར་ཚོགས་རྣམས་ཀྱང་རང་རང་གི་ཆོ་འཕྲུལ་དང་བཅས་ཏེ་བཞུད་པ་དང་བཞུགས་པར་ཡང་མཛད་དོ། །དེ་ནས་ཡུལ་མཱ་ལ་པ་དང་མཧཱ་རཥྟ་དང༌། ཀ་ཏ་ལི་ཀྵེ་ཏྲ་སྟེ་ཆུ་ཤིང་གི་ཞིང་ཞེས་པ་རྣམས་སུ་ཡང་ཅི་རིགས་པར་བཞུགས་ཤིང་སེམས་ཅན་གྱི་དོན་མཛད། ཡུལ་དེར་གྲུབ་ཐོབ་གོ་རཀྵ་དང་མཇལ་ཏེ། དེ་ན་རེ། ཁྱོད་ཛ་ལནྡྷ་རིའི་སློབ་མ་ཡིན་ན། ཛ་ལནྡྷ་རི་པ་ནི། ཤར་ཕྱོགས་ཀྱི་རྒྱལ་པོ་གོ་བི་ཙནྡྲས་ས་དོང་དུ་སྦས་ནས་ལོ་བཅུ་གཉིས་ཀྱང་ལོན་ན་ཞེས་འཕྱ་བ་ལྟར་བྱུང་བས། སློབ་དཔོན་སྤྱོད་པ་འཁོར་སྟོང་བཞི་བརྒྱ་དང་བཅས་པ་ཤར་ཕྱོགས་སུ་བྱོན་ནས། རྒྱལ་པོ་གོ་བི་ཙནྡྲའི་ཕོ་བྲང་གི་སྒོ་དྲུང་དུ་བཞུགས་སོ། །དེར་གྲོང་ཁྱེར་གྱི་རྟ་དང་གླང་པོ་ཆེ་རྣམས་རྩྭ་མི་ཟ། བུ་ཆུང་རྣམས་ཀྱང་མའི་ནུ་ཞོ་མི་འཐུང༌། རོལ་མོ་ཐམས་ཅད་ལ་ཡང་སྒྲ་མ་བྱུང་ངོ༌། །དེར་རྣལ་འབྱོར་པས་ནུས་པ་བསྟན་པར་ཤེས་ནས། རྒྱལ་པོ་དེ་སྤྱོམ་ཆུང་ངུས་ཕྱིར་ཕྱུང༌། སློབ་དཔོན་གྱི་ཞབས་ལ་ཕྱག་བྱས་ཏེ། ནང་བར་སློབ་དཔོན་འཁོར་བཅས་བདག་གི་ཁྱིམ་དུ་འབྱོན་པར་ཞུ་གདན་ནོན་པར་བགྱིད་ཞུས་པས། ང་ལ་འཁོར་སྟོང་དང་བཞི་བརྒྱ་ཡོད་པས།


TNT17_Page_0183
[མ་དཔེ་གཟིགས་ན་འདིར་གནོན།]

ཁྱོད་ཀྱིས་ཚིམ་པར་བྱ་མི་ནུས་གསུང་བ་ལ། ངས་དམག་མི་འབུམ་ཕྲག་མང་པོ་ལ་རྟག་ཏུ་ཟན་སྦྱོར་ན། སློབ་དཔོན་འཁོར་བཅས་ལ་ཅིའི་ཕྱིར་མི་ནུས་ཞུས། སློབ་དཔོན་ན་རེ། འོ་ན་དང་པོར་ངའི་སློབ་མ་གཉིས་ཚིམས་པར་གྱིས་ཤིག དེ་ཚིམས་ན་ངེད་གཞན་རྣམས་ཀྱང་རིམ་པས་འོང་ངོ་གསུང༌། དེ་ནས་དེའི་སང་ཉིན་སྔ་དྲོ་མི་སྟོང་དང་བཞི་བརྒྱ་ཚིམས་པར་ནུས་པའི་ཁ་ཟས་ཁྱད་པར་རྣམ་པ་མང་པོ་དག་སྦྱར་བ་ན། རྣལ་འབྱོར་པ་མ་ཧི་ལ་དང༌། བྷ་ད་ལ་གཉིས་དེར་བྱུང་ངོ༌། །དེར་དེ་གཉིས་ཀྱི་ཀུ་བའི་ལྷུང་བཟེད་དུ་ཁ་ཟས་དེ་དག་ཡོངས་སུ་རྫོགས་པར་བླུག་ཀྱང༌། སྣོད་ཀྱང་མ་ཁེངས་ལ། རྣལ་འབྱོར་པ་དེ་གཉིས་ཀྱིས་ཐམས་ཅད་གསོལ་ཀྱང་ད་དུང་མ་ཚིམ་མོ་ཞེས་གསུངས། དེར་ནུས་པའི་རྟགས་བསྟན་པར་ཤེས་ནས། རྒྱལ་པོ་འཁོར་དང་བཅས་པ་ཐམས་ཅད་ཀྱིས་སློབ་དཔོན་འཁོར་བཅས་རྣམས་ལ་མཆོད་པ་དུ་མས་མཆོད། ཞབས་ལ་གཏུགས་ཏེ་རྗེས་སུ་བཟུང་བར་ཞུས་པས། སྤྲོས་པ་དང་བཅས་པའི་དབང་བསྐུར་ཞིང༌། གདམས་པ་དང༌། རྗེས་སུ་གདམས་པ་ཡང་བསྩལ་ནས། མཐར་རྫའི་བུམ་པ་སྟོང་པ་ལག་པར་གཏད་པའི་བརྡ་ཐབས་ཀྱིས། དེ་ཁོ་ན་ཉིད་འཆི་བ་མེད་པའི་ལམ་བསྩལ་པ་ན། རྒྱལ་པོ་ན་རེ། འདི་ནི་སྔར་གཞན་ལ་ཐོས་ཟིན་ནོ་ཞུས། སུ་ལ་ཐོས་གསུངས། ཧ་ཌི་བ་ལ་ཐོས་ཞུས་པས། དེ་ནི་གྲུབ་ཐོབ་ཛ་ལནྡྷ་རི་པ་ཡིན་ན། ཁྱོད་ཀྱིས་སྡིག་བསགས་པས་ཁྱོད་ལ་འཆི་བ་མེད་པའི་ལམ་ག་ལ་འོང༌། འཁོར་བཅས་ཐལ་བར་འགྱུར་གྲང་གསུངས། དེར་རྒྱལ་པོ་


TNT17_Page_0184
[མ་དཔེ་གཟིགས་ན་འདིར་གནོན།]

འགྱོད་པས་གདུངས་ཤིང་ཤིན་ཏུ་སྐྲག་ལ། སྤྱོད་པ་བའི་སློབ་མ་རྣམས་ཀྱིས་ནི་དོང་གི་ས་དང་ཉལ་ཉིལ་རྣམས་བསལ་ནས། ཨཥྟ་དྷཱ་ཏུ་ལ་རྒྱལ་པོའི་གཟུགས་བརྙན་གསུམ་བྱས་ཏེ། རེ་རེ་བཞིན་གྲུབ་ཐོབ་ཛ་ལནྡྷ་རའི་ཞབས་ལ་གཏུགས་པ་ན། སྨོད་པ་མཛད་པས་ཐལ་བར་སོང༌། དེ་མཐོང་པས་རྒྱལ་པོ་ཆེས་འཇིགས་ཤིང་སྐྲག་ནས། དྲན་མེད་དུ་རྒྱལ་ཞིང་འགྱེལ་ལོ། །དེ་ལྟར་བསྡིགས་པས་རྒྱལ་པོའི་སེམས་ཀྱི་དྲི་མ་བྱང༌། ཕྱིས་བཟོད་པ་གསོལ་དུ་བཅུག་ནས་རྗེས་སུ་གཟུང༌། སློབ་དཔོན་གྲུབ་བརྙེས་དཔོན་སློབ་རྣམ་པ་གཉིས་ཀར་གྱིས་གདམས་པ་བསྟན་པས། དུས་གཞན་མི་རིང་པ་ཞིག་ན་རྒྱལ་པོས་ཀྱང་གྲུབ་པ་ཐོབ་བོ། །དེ་སྐབས་བྷངྒ་ལར་ཚུལ་དེ་ལྟར་བསྟན་མོད། ཡུལ་ཛ་ལནྡྷ་ར་ན་ནི་སྔོན་བཞིན་བཞུགས་པ་ཁོ་ནའོ། །དེ་ནས་སློབ་དཔོན་སྤྱོད་པ་བ། ཡུལ་ཤར་ལྷོ་ཨོ་ཌི་བི་ཤ་དང༌། དེ་དང་ཉེ་བ་ཀ་ལིང་ཀའི་ཡུལ་དུ་ཅི་རིགས་པར་བཞུགས་ནས་འགྲོ་བའི་དོན་མཛད། དེ་ནས་སིང་ག་ལའི་གླིང་དུ་གཤེགས་པར་བཞེད་ནས། སློབ་དཔོན་རང་ཉིད་རྒྱ་མཚོའི་སྟེང་དུ་ཞབས་བཞག་ནས་མི་བྱིང་བར་བཞུད་དོ། །འཁོར་ནུས་པ་ཐོབ་པ་རྣམས་ཀྱང་རང་རང་གི་འཕྲུལ་གྱིས་འགྲོ་སྟེ། ཁ་ཅིག་ནི་རྒྱ་མཚོ་ལ་ལྤགས་གདན་བཏིང་ནས་འགྲོ། ཁ་ཅིག་ནི་རྒྱ་མཚོར་མཁར་བ་བསྒྱུར་པ་ལ་རྐང་པ་བཞག་ནས་འགྲོ། ཁ་ཅིག་ནི་བྱིའུ་ཟུལ་བྱེད་ཅིང་འགྲོ ཁ་ཅིག་ནི་ཉའི་སྟེང་དུ་འདུག་ཅིང་འགྲོ ཁ་ཅིག་ནི་ཆུ་ལ་མ་རེག་པར་བར་སྣང་ལ་འགྲོ་བ་སོགས་སྣ་ཚོགས་པ་དག་གོ །ཀ་ལིང་ཀ་


TNT17_Page_0185
[མ་དཔེ་གཟིགས་ན་འདིར་གནོན།]

ནས་སིང་གྷ་ལའི་བར་ལ་རྒྱ་མཚོ་ཁ་ཞེང་དཔག་ཚད་བརྒྱ་ཕྲག་དུ་མ་ཡོད་པ། ཆུ་ཚོད་གཅིག་གམ་གཉིས་ཀྱི་བར་ལ་སྤྱད་ནས་སིང་གྷ་ལར་ཕེབས་སོ། །དེར་རྒྱལ་པོ་ར་ཐ་བ་ལ་ཞེས་བྱ་བ་ཡོད་དེ། དེ་འཁོར་དང་བཅས་པ་ཆོ་འཕྲུལ་གྱི་བཀོད་པ་དེ་མཐོང་བས་ལྷག་པར་དད་དེ། ཞབས་ལ་ཕྱག་འཚལ་ཞིང༌། མཆོད་པ་རྒྱ་ཆེན་པོས་ཡུན་རིང་དུ་མཆོད་དོ། །གླིང་དེ་ན་དེའི་སྔོན་དུ་གསང་སྔགས་གྱི་ཐེག་པ་མ་དར་པ་ལས། སྐབས་དེར་རྡོ་རྗེ་ཐེག་པའི་བསྟན་པ་དར་བར་མཛད། གྲུབ་པ་ཐོབ་པ་ཡང་མང་དུ་བྱུང་ངོ༌། །རྒྱལ་པོ་དང༌། བློན་པོ་དང༌། ཁྱིམ་བདག །ཚོང་དཔོན་ལ་སོགས་པས་ལྷ་ཁང་གསར་དུ་བཞེངས་པ་མང་པོ་དག་ལ་བྱིན་རླབས་རབ་ཏུ་གནས་པ་མཛད་དོ། །དེ་ནས་རྒྱལ་པོ་ལ་ཡང་དབང་བསྐུར་ཞིང༌། གསང་སྔགས་ཀྱི་ལྷ་ཁང་ཡང་བཞེངས། དེ་ལ་ཀྲྀཥྞ་བི་ཧ་ར་ཟེར། ད་ལྟའི་བར་དུ་བྱིན་རླབས་ཆེ། རང་གི་སྐལ་བ་དང་འཚམས་པར་ཞག་བདུན་ནས་ཟླ་བ་གཅིག་གི་བར་དུ་ས་ཐེ་བཙུགས་ནས་གསོལ་བ་འདེབས་ནུས་ན། ལོང་བར་གྱུར་པས་ཀྱང་མིག་སྐྱོན་མེད་པ་ཐོབ་པ་དང༌། བུད་མེད་མོ་གཤམ་ཡང་དུས་ལྡན་མར་གནས་འགྱུར་བ་སོགས་ཡོད་དོ། །གླིང་དེར་དེ་སྔོན་དུ་ཚངས་པའི་སྲིན་པོ་ཞེས་བྱ་བའི་གདོན་གྱིས་འཚེ་བ་རྟག་ཏུ་ཡོང་ཞིང༌། དེ་ཡང་ཉིན་བར་གྱི་དུས་འཚུབ་མ་སྒོར་རླུང་གི་རྣམ་པར་འོངས་ནས། བྱིས་པ་ཕོ་མོ་དང༌། རྟ་དང་གླང་པོ་དང་ཕྱུགས་སོགས་ལ་དེས་སྐོར་བ་ཙམ་གྱིས་སྐད་ཅིག་ལ་མང་པོ་འཆི་བར་འགྱུར་བ་དང༌། མཚན་མོའི་དུས་ན་ཁྱིམ་སྐྱོད་ཅིང་


TNT17_Page_0186
[མ་དཔེ་གཟིགས་ན་འདིར་གནོན།]

འོད་འབྱིན་པས་མི་ཕྱུགས་དག་གསོད་པར་བྱེད་པ་དང༌། སྐབས་འགར་བྲམ་ཟེ་དང་བཙུན་པའི་གཟུགས་སུ་བསྒྱུར་ནས་མིའི་སྲོག་འཕྲོག་པ་དག་ཡོད་དེ། དེར་སློབ་དཔོན་གྱིས་དེ་དག་བསྐྲད་ཅིང་དམ་ལ་བཞག་པས་གནོད་པ་དེ་ད་ལྟའི་བར་དུ་རྒྱུན་ཆད་ཅིང༌། ཡང་མཁའ་འགྲོ་སྲིན་མོའི་རིགས་ཀྱི་གནོད་པ་སྣ་ཚོགས་པ་འབྱུང་བ་ཡང་དེ་ཕྱིན་ཆད་མེད་དོ། །དེ་ནས་གླིང་ཌ་མི་ཌོ་ཞེས་བྱ་བ་གདུག་པའི་མཁའ་འགྲོ་མ་མང་པོས་གང་བའི་གནས་ཤིག་ན། མཁའ་འགྲོའི་རིགས་ཀྱི་སྲིན་མོ་ཆེན་མོ། བི་ཤྭ་རུ་བི་ཏེ། སྣ་ཚོགས་གཟུགས་ཅན་མ་ཞེས་པ་འཁོར་སྲིན་མོ་ལྔ་བརྒྱ་དང་བཅས་མི་མོའི་གཟུགས་སུ་བསྒྱུར་ཏེ་གནས་ལ། དེ་རྣམས་ཀྱི་སྤྲུལ་པས་ཉིན་རེ་བཞིན་དུ། འཛམ་བུ་གླིང་དང་གླིང་ཕྲན་རྣམས་ཀྱི་མི་དང་དུད་འགྲོ་བརྒྱ་སྟོང་དུ་མ་ཟ་བར་བྱེད་པ་ཅིག་ཡོད་དོ། །དེ་འདུལ་བའི་དོན་དུ་སློབ་དཔོན་འཁོར་བཅས་རྒྱ་མཚོ་ལ་ཆོ་འཕྲུལ་སྣ་ཚོགས་པས་བཞུད་དེ། གླིང་དེའི་འགྲམ་དུ་ཕེབས་པ་ན། གཙོ་མོ་སྣ་ཚོགས་གཟུགས་ཅན་ཉིད་ལྷ་མོ་དང་འདྲ་བའི་བུད་མེད་ཀྱི་གཟུགས་སུ་བསྒྱུར་ནས་ལམ་ཁ་ན་འདུག་གོ །སློབ་དཔོན་དེར་བྱོན་པ་ན། དེ་ན་རེ། རྣལ་འབྱོར་བ་གང་གི་ཕྱིར་འགྲོ་ཟེར། བི་ཤྭ་རུ་པི་ནི་འདུལ་བའི་ཕྱིར་རོ་གསུངས་པས། དེ་ན་རེ། དེ་ནི་གཟུགས་དང་ཡན་ལག་མཆོག་དང་ལྡན་པ། ཡིད་གཞུངས་པ། སེམས་ཅན་མང་པོ་ལ་ཕན་པར་བྱེད་པ་ཡིན་ན། དེ་ལ་གནོད་པ་བྱར་མི་རུང་ངོ་ཟེར། སློབ་དཔོན་ན་རེ་མ་ཡིན་ཏེ། ཉིན་རེ་བཞིན་སྐྱེ་བོ་བརྒྱ་སྟོང་དུ་མ་ལ་འཚེ་བར་


TNT17_Page_0187
[མ་དཔེ་གཟིགས་ན་འདིར་གནོན།]

བྱེད་པའི་ཕྱིར་ངེས་པར་འདུལ་ལོ། །ཡང་དེ་ནི་རྫུ་འཕྲུལ་ཆེ་བ་ཡིན་ན། ཁྱོད་ཀྱིས་འདུལ་བར་ག་ལ་ནུས་ཟེར། སློབ་དཔོན་གྱིས་དེ་མཐོང་བར་འགྱུར་རོ་གསུང་པས། སྐད་ཅིག་དེ་ཉིད་ལ་སྲིན་མོའི་འཁོར་ལྔ་བརྒྱ་པོ་ཡང་སྣང་བར་གྱུར། གཙོ་མོ་རང་ཡང་འཇིགས་འཇིགས་ལྟར་སྣང་བ་ཤིན་ཏུ་ཆེ་བའི་གཟུགས་སུ་གྱུར་ཏེ་རྔམས་པའི་ཚུལ་གྱིས་འོངས་པ་ན། སློབ་དཔོན་གྱིས་དེ་རྣམས་ལ་སྡིགས་འཛུབ་བསྟན་པས་སྲིན་མོའི་གཙོ་མོ་དེ་སྒོ་ཐམས་ཅད་ནས་ཁྲག་ལྷུང་བར་གྱུར། ལྷུ་ཚིགས་ཐམས་ཅད་ཞིག་དྲན་མེད་དུ་བརྒྱལ་ཞིང་མྱོས། འཁོར་ཐམས་ཅད་ཀྱང་བརྒྱལ་བོག་ཚོར་བ་དྲག་པོས་གནད་དུ་གཟིར་རོ། །དེར་སློབ་དཔོན་གྱིས་བཀའ་བསྒོས་ཤིང་དམ་ལ་བཞག །སེམས་ཅན་ལ་འཚེ་བ་མི་བྱེད་པར་མནའ་དོར། སྲིན་མོ་སྣ་ཚོགས་གཟུགས་ཅན་མ་ཉིད་ཀྱིས་སློབ་དཔོན་གྱི་ཞབས་ལ་ཕྱག་འཚལ་ཏེ། སློབ་དཔོན་ལམ་དུ་བཞུད་པའི་ཚེ་བཞེད་ན་སྐྱེ་བོ་ཀུན་གྱིས་མཐོང་བར་བདག་གཞོན་པ་ཆིབས་ཀྱི་ཚུལ་དུ་འགྲོ་བར་བགྱིད། བཞུགས་པའི་ཚེ་གདན་གྱི་ཚུལ་དུ་ཡང་གནས་པར་བགྱིད། ཕལ་ཆེར་དུ་མི་སྣང་བའི་ཚུལ་གྱིས་རྗེས་སུ་སོང་སྟེ། ཆོ་འཕྲུལ་སྣ་ཚོགས་པ་སྟོན་པ་དང༌། མ་རུང་པ་རྣམས་ཚར་བཅད་པར་བགྱིའོ། །ཞེས་ཞུས་ཤིང་སློབ་དཔོན་གྱིས་ཀྱང་གནང་ངོ༌། །དེ་ནས་ལྷོ་ཕྱོགས་ཀྱི་རྒྱུད་དུ་ཡུལ་ཏུཎྜ་མཎྜལ་ཏེ། བྱ་མཆུའི་དཀྱིལ་འཁོར་ཞེས་བྱ་བ་ན། ལྷ་མོ་སིང་ག་ལ་ཏེ། དམར་སེར་མའི་རྡོ་སྐུ་རང་བྱུང་ཞིག་བྱུང་སྟེ་མི་རིང་བའི་དུས་ཡིན། དེར་མུ་སྟེགས་ཀྱིས་རྣལ་འབྱོར་མ་འཕྲུལ་དང་


TNT17_Page_0188
[མ་དཔེ་གཟིགས་ན་འདིར་གནོན།]

ལྡན་པ་རྣམས་འདུས་ཏེ། ནུབ་རེ་བཞིན་དུ་རིགས་སྔགས་ཀྱི་མཐུས་མི་རེ་བཀུག་སྟེ་ཚོགས་སུ་ཟ་བར་བྱེད་དོ། །དེར་ལན་ཅིག་མི་མང་པོ་ཞིག་དུས་གཅིག་ཏུ་བཟུང་ནས་དུས་སྟོན་ལ་ཟ་བར་བྱེད་འདོད་པ་ལ། སློབ་དཔོན་དེར་བྱོན་ཏེ་རྣལ་འབྱོར་མ་རྣམས་ལྟ་སྟངས་དང་ཕྱག་རྒྱས་གཟིར་བས། ཐང་ལ་མི་རོ་བཞིན་དུ་འགྱེལ། རྡོ་སྐུ་ཡང་ཁ་བུབ་ཏུ་གྱུར་པ་ལ་ཞབས་ཀྱིས་བསྣུན་པས། ཕྱེད་འཁྱོགས་པར་སོང༌། དེ་རྣམས་དམ་ལ་བཞག་སྟེ་སྲོག་ཆགས་ལ་གནོད་པ་མི་བྱེད་པར་བྱས་སོ། །འདི་འདྲའི་རིགས་ཀྱི་མ་མོའི་སྐུ་རང་བྱུང་དུ་གྲགས་པ་ཕལ་ཆེར་སྐྱེ་གནས་ཀྱི་ཕྱག་རྒྱར་ཡོད་ཞལ་ཕྱག་གི་རྣམ་པ་ཅན་ཉུང་ཡང༌། འདི་ཞལ་ཕྱག་གི་རྣམ་པ་ཅན་དུ་གྲགས། ཡང་ལྷོ་ཕྱོགས་ཏམྤ་ལ་ཞེས་བྱ་བའི་ཡུལ་དུ་བརྟུལ་ཞུགས་ཀྱི་སྤྱོད་པས་བཞུགས་པ་ན། ཕྱོགས་དེ་ན་མུ་སྟེགས་ཀྱི་རྣལ་འབྱོར་པ་ཀྲིཥྞ་བྷི་མ་ཞེས་བྱ་བ་གྲུབ་པར་གྲགས་པ་ཅིག་ཡོད་དེ། དེས་སློབ་དཔོན་དང་ནུས་པ་འགྲན་ནོ་ཞེས་བྱས་པ་ན། རྒྱལ་པོ་ལ་སོགས་པ་སྐྱེ་བོ་དཔག་ཏུ་མེད་པ་འདུས་སོ། །དེ་ན་སངས་རྒྱས་པའི་ལྷ་ཁང་གནས་གཞི་ཙརྨ་བི་ཧ་ར་ཞེས་བྱ་བ་གཅིག་དང༌། མུ་སྟེགས་པའི་གནས་གཞི་སུ་ཀ་ནཱ་ཐ་མཱ་ཐུ་ར་ཞེས་བྱ་བ་ཞིག་ཡོད་པ། བར་ཐག་རྒྱང་གྲགས་ཙམ་མོ། །དེར་ཀྲྀཥྟ་བྷི་མས་ནང་བའི་གནས་གཞི་དེའི་ལྷ་ཁང་ལ་རྫས་ཀྱིས་གཏོར་ཞིང་སྔགས་བཏབ་པས་ཁྲུམ་གྱིས་ཞིག་ལ་ཁང་པ་ལ། སློབ་དཔོན་གྱིས་ལྟ་སྟངས་མཛད་པས་སླར་འབྱོར་ཏེ་འདུག་གོ །སླར་ཡང་མུ་སྟེགས་ཀྱིས་རྫས་སྔགས་བཏབ་ཀྱང་ཅི་ཡང་མ་གནོད་དོ། །མུ་སྟེགས་ཀྱི་གནས་གཞི་དེ་ནི་དྲུང་ཅིག་ན་ཡོད་པ་དེའི་ལྟག་གི་བྲག་རི་ལ། སློབ་དཔོན་སྤྱོད་པ་པས་ལྟ་སྟངས་མཛད་པས། རིའི་རྩེ་མོ་ཉིལ་ནས་མུ་སྟེགས་པའི་ལྷ་ཁང་བརྒྱ་རྩ་བརྒྱད་ནོན་ནོ། །


TNT17_Page_0189
[མ་དཔེ་གཟིགས་ན་འདིར་གནོན།]

དེས་སློབ་དཔོན་ལ་ལྟ་སྟངས་དང༌། སྡིགས་འཛུབ་དང༌། ཁུ་ཚུར་ལ་སོགས་པ་རྣམ་འགྱུར་སྣ་ཚོགས་བྱས་ཀྱང་གནོད་པ་མེད་ལ། སློབ་དཔོན་གྱིས་དེ་ལ་ཕར་ལྟ་སྟངས་མཛད་པས། དེ་ཉིད་ཞག་གཅིག་ཏུ་ལུས་རེངས་ཏེ་འཇིམས་གཟུགས་ལྟར་སོང་ཞིང་འགྱེལ། ངག་རེངས་ཏེ་སྨྲ་མ་ཐུབ། ཡིད་རེངས་ཏེ་དྲན་མེད་དུ་བརྒྱལ་ཞིང་མྱོས་སོ། །དེ་ནས་སྐྱེ་བོ་ཐམས་ཅད་རབ་ཏུ་འཇིགས་ཤིང་ངོ་མཚར་བར་ཡང་གྱུར། མི་མང་པོས་གསོལ་བ་འདེབས་པར་བྱེད་ཅིང༌། སློབ་དཔོན་གྱིས་སླར་ཡང་གསོ་བའི་ལྟ་སྟངས་མཛད་པས། ཀྲྀཥྞ་བྷི་མ་ཡང་རྣལ་དུ་གནས་པར་གྱུར། ཏམྤ་ལའི་ཡུལ་དུ་རེ་ཞིག་མུ་སྟེགས་རྒྱུན་ཆད་དེ་སངས་རྒྱས་པ་འབའ་ཞིག་ཏུ་གྱུར་སྐད། ཡུལ་དེར་སྔོན་འཕགས་པ་ཤ་ནའི་གོས་ཅན་གྱིས་བྱོན། སྐྱེ་བོ་མང་པོ་བདེན་པ་ལ་བཀོད། བར་དུ་མུ་སྟེགས་ཁོ་ནར་སོང༌། ཡང་ཀླུ་སྒྲུབ་ཀྱི་དུས་སུ་ནང་པ་དང༌། ཡང་ནུབ་པ་ལ་ཆོས་ཀྱི་གྲགས་པའི་དུས་སུ་དར་རོ། །སྐབས་དེར་ཕྱི་ནང་གཉིས་ཀ་ཡོད་པ་ལ། དེས་ནང་པ་ཁོ་ན་དར། ད་ལྟའི་བར་དུའང་སངས་རྒྱས་པ་ཡོད་དེ་ཡུལ་འདི་ནི་གྲོང་ཁྱེར་བི་དྱ་ན་ག་ར་དང་ཉེ་བ་ན་ཡོད་དོ། །ཡང་ཡུལ་བི་ར་ཛ་པུ་ར་ཞེས་བྱ་བ། འབིགས་བྱེད་ཀྱི་རི་བོའི་ཁོངས་ཀྱི་གྲོང་ཁྱེར་དེ་བ་གྷ་ཊ་ཟེར་བ་ཅིག་ན། ལོག་པར་ལྟ་བའི་རྒྱལ་པོ་པངྒ་ཛ་ཞེས་པ་ཞིག་ཡོད་དོ། །སློབ་དཔོན་འཁོར་བཅས་དེར་བྱོན་ཞིང༌། སྐྱེ་བོ་མང་པོ་དག་གིས་མཆོད་པར་བྱེད་པ་ན། རྒྱལ་པོ་དེ་རབ་ཏུ་ཁྲོས་ནས་ཉིན་མོ་སློབ་དཔོན་གྲོང་ཁྱེར་དུ་གཤེགས་པའི་ལམ་གྱི་གཡས་དང་གཡོན་


TNT17_Page_0190
[མ་དཔེ་གཟིགས་ན་འདིར་གནོན།]

དུ་གླང་པོ་ཆེ་གཏུམ་པོ་མཆེ་བ་ལྕགས་ཀྱིས་གཡོགས་པ་གསུམ་གསུམ་བཞག་སྟེ་སློབ་དཔོན་བྱོན་པ་ན་རྦད་དོ། །དེར་གླང་པོ་ཆེ་རེ་རེའི་མདུན་དུ་སློབ་དཔོན་རེ་རེ་བྱུང་གླང་པོ་ཆེའི་སྣས་བསྙབས་ཤིང་མཆེ་བས་བསྣུན་པར་བརྩམས་པ་ན། དེ་ན་གང་ཡང་མེད་པར་གློ་གཡས་གཡོན་ནམ་རྒྱབ་ཀྱི་ཕྱོགས་སུ་སློབ་དཔོན་འདུག་པར་མཐོང་ངོ༌། །ཡང་དེ་ཕྱོགས་སུ་གདོང་ལྟས་ཏེ་སྣ་ཞལ་གྱིས་འཆིང་བའམ་མཆེ་བ་བརྣུན་པའམ་བརྫི་བར་བརྩམས་ན། ཡང་གླང་པོ་ཉིད་ཀྱི་རྒྱབ་བམ་གཡས་གཡོན་དུ་བཞུགས་པར་སྣང་ངོ༌། །རྒྱབ་ན་བཞུགས་པ་ལ་རྐང་པས་འཕྲས་ན་དེ་ན་མེད་པར་མདུན་དུ་བཞུགས་སོ། །ཚུལ་དེ་ལྟ་བུའི་དུས་འདས་ཏེ་གླང་པོ་ཆེ་རྣམས་ངལ་ཞིང་ཐང་ཆད་ནས་ས་ལ་འགྱེལ་ལོ། །དེ་ནས་རྒྱལ་པོ་དེས་ཞབས་ལ་གཏུགས་ཤིང་བཟོད་པར་གསོལ་ནས་ལྟ་བ་ལོག་པ་ཡང་དོར་རོ། །ཡང་ཡུལ་ཀོང་ཀ་ནར་གཤེགས། དེར་ཞིང་གི་རྣལ་འབྱོར་མ་མང་པོ་ཡང་འདུས་ཏེ་ཚོགས་ཀྱི་འཁོར་ལོར་སྤྱོད་པ་ན། ནུབ་ཅིག་ཌཱ་མ་རུ་ལ་སོགས་པ་མཆོད་པའི་རོལ་མོའི་སྒྲ་རྣམས་ལས། སྒྲ་ཤིན་ཏུ་སྙན་པ་དག་ཆེར་གྲགས་པར་གྱུར་ཏེ་ཡུལ་དེ་ཁྱབ་བོ། །དེ་ཐོས་པས་གྲོང་ཁྱེར་གྱི་མི་རྣམས་སྒྲ་དེས་ཡིད་དབང་མེད་དུ་དྲངས་ཏེ། སློབ་དཔོན་བཞུགས་པའི་ཕྱོགས་དེར་འདུས་ཤིང་སྒྲ་དེ་ཉན་ཅིང་འདུག་གོ །དེ་བཞིན་དུ་ཕྱུགས་རྫི་རྣམས་དང་རི་ཁྲོད་པ་རྣམས་ཀྱང་ངོ༌། །རྟ་དང་གླང་པོ་དང་མ་ཧེ་ལ་སོགས་པ་ཡང་དེ་ཉན་ཅིང་འདུས་སོ། །དེ་བཞིན་དུ་རི་དྭགས་དང་བྱ་སྣ་ཚོགས་དང་གཅན་གཟན་སྣ་ཚོགས་པ་དག་ཀྱང་དེ་


TNT17_Page_0191
[མ་དཔེ་གཟིགས་ན་འདིར་གནོན།]

ཉན་པའི་ཕྱིར་འདུས་ཤིང་འདུག་གོ །དེ་བཞིན་དུ་ལྷ་དང་ཀླུ་དང་གནོད་སྦྱིན་ལ་སོགས་པ་མི་མ་ཡིན་པ་དག་ཀྱང་འདུས་ཏེ། སེམས་ཅན་དེ་རྣམས་ཐམས་ཅད་སྒྲ་སྙན་པོ་དེས་འཁྲུལ་ཞིང་མྱོས་པའི་ངང་ལ་མཚན་མོ་དེ་འདས་ཏེ། ནང་པར་ཉི་མ་ཤར་བ་ན་སློབ་དཔོན་གྱིས་སྣོད་ཆུང་ངུ་ཞིག་ནས་རོ་མཆོག་དང་ལྡན་པའི་ཁ་ཟས་སྣ་ཚོགས་པས་མི་དང་མི་མ་ཡིན་པ་ཐམས་ཅད་ཚིམས་པར་མཛད་དེ། ཁྱེད་རྣམས་རྟག་ཏུ་དགེ་བ་ལ་སྤྱོད་ཅིག་གསུངས་པས། མི་མ་ཡིན་རྣམས་ན་རེ་ལོ་ལྔ་བརྒྱར་དེ་ལྟར་བགྱིའོ་ཟེར་རོ། །དེ་ནི་ཡུལ་དེར་དེ་ཙམ་ནས་བཟུང་ནས། ཕྱིས་མཁས་པ་སྒོ་དྲུག་གི་བར་དུ་མུ་སྟེགས་ངང་གིས་ནུབ་ཅིང་ནང་བ་འབའ་ཞིག་རང་ཤུགས་ཀྱིས་དར་བ་ལ་ལྟ་བ་ཡིན་སྐད། ཡང་དུས་གཅིག་ན་ཡུལ་ཙ་རི་ཏྲ་ཞེས་བྱ་བ། གྲོང་ཁྱེར་ཙེ་ཏྱ་པཱ་ཊ་ན་ཏེ་མཆོད་རྟེན་གྲོང་ཞེས་བྱ་བ་ན་བཞུགས་སོ། །གནས་དེ་རུ་རྡོ་རྗེ་ཕག་མོས་སྲིད་པ་གསུམ་གྱི་ཆང་འགུགས་པར་གྲགས་ཏེ། ཆང་ཚོང་མའི་གྲོང་བདུན་བརྒྱ་ལ་སྦྱར་བའི་ཆང་རྣམས་ཆང་སྣོད་དུ་རྫས་སྦྱོར་ཐེངས་རེ་དང༌། འབྲུ་ཆང་རྣམས་འབྲུ་བཙོས་པ་ཕབས་དང་སྦྱོར་ཐེངས་རེ་ལ་ཇི་སྲིད་དུ་ཆང་ལན་མང་དུ་བསིངས་ནས་མཐར་རྫས་ཀྱི་ཚིགས་མའམ། འབྲུའི་སྦང་མ་བཅུད་མེད་པར་སོང་བའི་ཚེ། ཆུ་ཚོད་རེ་ཙམ་ཁ་བསྡམས་ཏེ་བཞག་པ་ན། སླར་ཡང་གསར་པར་ལོག་ཡོང་བ་དེ་འདྲ་བ་ལན་བདུན་གྱི་བར་དུ་འབྱུང་བ་ཡིན་པར་འདུག །དེང་སང་ཡང་གྲོང་རེ་རེ་ཙམ་ལ་འབྱུང་


TNT17_Page_0192
[མ་དཔེ་གཟིགས་ན་འདིར་གནོན།]

ངེས་པ་དང༌། དུས་བཟང་ལ་ལུང་པ་ཐམས་ཅད་ཆང་གི་དྲིས་ཁྱབ་པ་ཡོང་ངེས་ཡིན་པར་འདུག །དེའི་རྒྱལ་པོ་ཨིན་དུ་མཱ་ལ་ཟེར་བ་ཞིག །ཉི་མ་འབའ་ཞིག་ལྷར་འཛིན་ལ་ལྟ་བ་ལོག་པས་གནས་པའོ། །དེ་ཚེས་བཅུ་གཉིས་ཀྱི་མཆོད་པ་ཞིག་ལ། ལྕགས་རི་རིམ་པ་བདུན་གྱིས་བསྐོར་བའི་ནང༌། ཉི་མའི་ལྷ་ཁང་དུ་སྲོག་ཆགས་བརྒྱ་སྟོང་དུ་མ་བསད་པའི་མཆོད་པ་བྱེད་དོ། །དེའི་དུས་ལ་བབ་པ་ཅིག་ན། ལྕགས་རི་རིམ་པ་བདུན་གྱི་སྒོ་ནི་བསྡམས། ཕྱི་རོལ་ཏུ་བསྲུང་བ་དུ་མ་བཞག །མཆོད་པ་བྱེད་པའི་བྲམ་ཟེ་དང༌། རྒྱལ་པོ་འཁོར་བཅས་ནང་ན་ཡོད་དེ། སྲོག་ཆགས་རྣམས་ཀྱང་བཅིངས་ཏེ་བཞག་གོ །དེར་སློབ་དཔོན་སྤྱོད་པ་བ་གཅིག་པུ་སྒོ་དྲུང་དུ་ཕེབས་ནས། སྒོ་སྲུང་ལྔ་བརྒྱ་ཙམ་ལ་ལྟ་སྟངས་མཛད་པས། ཐམས་ཅད་དབང་དུ་གྱུར་ཏེ་འཛུམ་དམུལ་ཞིང་འདུག་གོ །སྒོ་རིམ་པ་ཐམས་ཅད་རང་བྱེ་སྟེ་མཆོད་པའི་གནས་སུ་བྱོན། མཆོད་སྦྱིན་གྱི་དོན་དུ་བཅིངས་པའི་མི་དང་དུད་འགྲོའི་ཚོགས་པ་ལ་ལྟ་སྟངས་མཛད་པས་ཐག་པ་རྣམས་རང་ཆད་ལ་སོང༌། བྲམ་ཟེའི་མཆོད་པའི་སྦྱིན་སྲེག་གི་ཐབ་ལ་ལྟ་སྟངས་མཛད་པས། མེ་དེ་སྐད་ཅིག་གིས་ཆེར་མཆེད་ནས་ཕྱོགས་དེ་ཐམས་ཅད་མེས་ཁྱབ་པའི་སྣང་བ་ཤར་ཏེ་རྒྱལ་པོ་འཁོར་བཅས་འཇིགས་ཏེ་བྲོས་སོ། །དེ་ནས་རྒྱལ་པོ་དང་བྲམ་ཟེ་དེ་དག་སློབ་དཔོན་གྱིས་མཐུ་བསྟན་པར་ཤེས་ནས། ཞབས་ལ་ཕྱག་བཙལ་ཞིང་གསུང་བཞིན་སྒྲུབ་པར་ཁས་བླངས། དེ་དག་ཀྱང་སངས་རྒྱས་ལ་དད་པ་ལ་བཀོད་ནས་ཡུལ་གཞན་དུ་བཞུད་དོ། །


TNT17_Page_0193
[མ་དཔེ་གཟིགས་ན་འདིར་གནོན།]

ཡང་ལྷོ་ཕྱོགས་མ་ལྱ་རའི་ཡུལ་དང་ཉེ་བ། ཧ་རི་ཀེ་ལ་ཞེས་བྱ་བར་བཞུད་དེ། ཡུལ་དེ་ན་གནས་ཆེན་དུ་བྱེད་པ་རི་ཤིན་ཏུ་ཆེ་བ་ཞིག་ཡོད། དེང་སང་ནི་ཙནྡྲ་ཀུ་མ་ར་ཟེར་གྱིན་འདུག་གོ །རི་དེའི་དྲུང་དུ་ཚོགས་ཁང་བཅོས་དེར་ཚོགས་ཀྱི་འཁོར་ལོའི་རོལ་པ་རྒྱ་ཆེན་པོ་མཛད་པའི་སྐབས་ཤིག སྒོ་དྲུང་ན་མ་ཧེ་མོ་ཕྲུ་གུར་བཙས་པ་འཇོགས་གིན་ཡོད་པ་ལས། ཡུལ་དེའི་མི་དཔོན་ཞིག་གིས་རྣལ་འབྱོར་པ་ནུས་པ་ཡོད་མེད་བལྟའོ་བྱས་ནས། ཉི་མ་གུང་གི་དུས་ཞིག་ཚོགས་ཀྱི་ཁང་པའི་སྒོ་བསྡམས་ཏེ་འདུག་པ་ལས། མ་ཧེ་མོ་མ་སྨད་གཉིས་བརྐུས་ནས་སོང་ངོ༌། །དེར་གོམ་པ་ལྔ་བཅུ་ཙམ་སོང་ནས་ཕྱི་མིག་བལྟས་པས། མ་ཧེ་མོ་ཕྲུ་གུར་བཅས་པ་སྔར་གྱི་ཤུལ་ན་འདུག་སྟེ། ཕན་ཚུན་དུ་བལྟས་ན་ཤིན་ཏུ་འདྲ་བར་མཐོང༌། ཡང་མི་ཞིག་བཏང་སྟེ་དེ་ཡང་བརྐུས་སོ། །ཡང་སྔར་བཞིན་ཕྱི་མིག་བལྟས་པ་ན། སྔར་གྱི་ཤུལ་ན་སྔ་མ་བཞིན་འདུག་སྟེ། དེ་ཡང་བརྐུས་པ་སོགས་ལན་བདུན་གྱི་བར་དུ་དེ་བཞིན་དུ་བྱུང་ངོ༌། །དེ་ནས་མ་ཧེ་མོ་བདུན་དང་ཕྲུ་གུ་བདུན་ཐོབ་བོ་སྙམ་ན། མ་བུ་གཉིས་ལས་གཞན་མི་འདུག་གོ །སྔར་གྱི་ཤུལ་ལ་ཕྱི་མིག་བལྟས་པས། སྔར་གྱི་ཤུལ་ན་མ་བུ་གཉིས་འདུག་གོ །དེས་བསམས་པ་ད་ཅིའི་མ་ཧེ་མོ་དང་བེའུ་དེ་འདི་ཡིན་ནམ་ཅིག་ཤོས་དེ་ཡིན། འདི་ལས་གང་ཞིག་བདེན་གང་ཞིག་རྫུན་མི་ཤེས་སོ་སྙམ་སྟེ། ལྷན་ཅིག་ཏུ་ཁྲིད་པ་དེ་ཡང་བོར་ཏེ་སོང་ངོ༌། །དེ་ནས་དེས་རྣལ་འབྱོར་པའི་རྣམ་འཕྲུལ་དང་མངོན་ཤེས་


TNT17_Page_0194
[མ་དཔེ་གཟིགས་ན་འདིར་གནོན།]

འཇུག་ཚུལ་ངོ་མཚར་བར་ཤེས་ནས། རང་ཉིད་རྒྱལ་སྲིད་ཕྱེད་ཀྱི་འབྱོར་པ་སྤངས་ཏེ། སློབ་དཔོན་གྱི་འཁོར་དུ་རྣལ་འབྱོར་བ་བྱས་སོ། །དེ་ནི་ལ་བཱ་ཡི་པ་ཡིན་པར་གྲགས། ཡང་ཡུལ་ཏྲི་ལིང་གའི་རྒྱལ་པོས་སློབ་དཔོན་འཁོར་བཅས་མཆོད་པར་བྱས་པའི་སྐབས་ཤིག ཕྱོགས་དེ་དང་ཉེ་བའི་དུར་ཁྲོད་ཨཊྚཊྚ་ཧ་ས་ཏེ་ཧ་ཧ་སྒྲོག་པར་བྱོན། དེར་ཚོགས་ཀྱི་འཁོར་ལོའི་སྤྱོད་པ་ཡུན་རིང་དུ་མཛད། ཡོ་བྱད་འབྱོར་པ་དཔག་ཏུ་མེད་པ་རྒྱལ་པོས་ཕུལ་ཞིང༌། ཡུལ་གྱི་བྲམ་ཟེ་དང༌། རྒྱལ་རིགས་ཀྱི་བུ་དང༌། ཚོང་དཔོན་དང༌། ཞིང་པ་དང༌། གདོལ་པ་ལ་སོགས་པ་སྐྱེ་བོ་མང་པོ་དང༌། བུད་མེད་ལྔ་བརྒྱ་ཙམ་མཆོད་པའི་དོན་དུ་འདུས་པ་ལས། ཚོགས་ཀྱི་བཟའ་བའི་ཁྱད་པར་ལས་ཁ་རྦཱུ་ཛ་སྟེ་ཤིང་ཐོག་རྒྱལ་མོ་ག་གོན་རེ་གཅིག་ཡོད་པ་བརྒྱ་སྟོང་དུ་འཕེལ་ཏེ་ཀུན་ལ་སྩལ་བ། དེ་རྣམས་ཀྱིས་ཟོས་པས་རྒྱུད་བྱིན་གྱིས་བརླབས། དབབ་པའི་ལྟ་སྟངས་མཛད་པས་ཐམས་ཅད་ལ་ཡེ་ཤེས་ཕེབས་ཏེ། ལུས་ངག་གི་རྣམ་འགྱུར་དང་རྫུ་འཕྲུལ། ཆོ་འཕྲུལ་སྣ་ཚོགས་པ་བསྟན་ཏོ། །རྗེས་སུ་དེ་ཐམས་ཅད་རྣལ་འབྱོར་ཕོ་མོར་གྱུར་ཏེ། ཏིང་ངེ་འཛིན་བཟང་པོ་འབའ་ཞིག་ཐོབ་པ་སྟོང་ཕྲག་མང་པོ་བྱུང་ཞིང་དངོས་གྲུབ་ཐོབ་པའང་མང་པོའོ། །ཡང་ཡུལ་དཎྜ་ཀ་ར་ཎྱ་ཞེས་བྱ་བ་ལྷོ་ཕྱོགས་ཁཱ་ནའི་ཡུལ་དང་ཉེ་བ་ཞིག་ན་བཞུགས་ཏེ། གནས་དེ་ན་མཚོ་རྫིང་བཟང་པོ་ཞིག་ཡོད། སྐྱེ་བོ་རྣམས་ཀྱང་དེ་ལས་འཐུང་བ་ལ་དེར་ནག་ཕྱོགས་ཀྱི་ཀླུ་གདུགས་པ་ཅན་གཉིས་གློ་བུར་དུ་འོངས་ཏེ། དུག་སྦྲུལ་གྱི་གཟུགས་ཀྱིས་དངོས་སུ་ཆུ་འཐུངས་པས་ཁའི་དུག་གི་མཚོ་དེ་


TNT17_Page_0195
[མ་དཔེ་གཟིགས་ན་འདིར་གནོན།]

མ་རུངས་པར་བྱས་སོ། །དེ་ན་ནང་པའི་གནས་གཞི་ཞིག་ཡོད་པའི་དགེ་སློང་དང༌། དགེ་བསྙེན་འགའ་རེས་མཚོ་རྫིང་དེ་ལས་ཆུ་འཐུང་པས་དུག་སྦྲུལ་གྱི་ཁ་ཆུ་འདྲེས་པའི་དུག་གིས་དེ་མ་ཐག་ཤིའོ། །དེ་སློབ་དཔོན་གྱིས་གསན་ནས་མཚོ་འགྲམ་དེར་བྱོན་པས། མཚོ་འཁྲུགས་པའི་གསེབ་ནས་གདུག་པའི་ཀླུ་དེ་གཉིས་བྱུང་སྟེ། སློབ་དཔོན་གྱི་སྐུ་ལ་འཆིང་བར་སེམས་ཏེ་འཁྲིལ་ཡང་དེར་གནོད་པ་ནི་མ་ནུས། སློབ་དཔོན་གྱིས་དགོངས་པ་བརྟད་དེ། སྐུ་ལུས་བགང་བས་གདུག་པའི་ཀླུ་སྦྲུལ་གྱི་གཟུགས་ཅན་དེ་གཉིས་ཀྱི་ལུས་དུམ་བུ་བརྒྱ་ཕྲག་བརྒྱ་ཕྲག་ཏུ་ཆད། ཡུན་རིང་དུ་སྡུག་བསྔལ་གྱི་ཚོར་བ་དྲག་པོས་གཟིར་དུ་བཅུག་གོ །སླར་གུས་པས་གསོལ་བ་འདེབས་པ་ན། སེམས་ཅན་ལ་གནོད་པ་མི་བྱེད་པར་དམ་ལ་བཞག་ནས། ཡང་གསོ་བའི་ལྟ་སྟངས་ཀྱིས་རྗེས་སུ་གཟུང་ཆུའི་དུག་ཀྱང་བསྡུས། སྔར་གྱི་མི་ཤི་བ་རྣམས་ཀྱང་ཐལ་མོ་བརྡབ་པའི་སྒྲ་མཛད་པས་གསོས་སོ། །དེར་སློབ་དཔོན་ནི་གདུག་པའི་སྦྲུལ་འདུལ་བར་བྱོན་སོང་ཞེས་སློབ་མ་རྣམས་ཀྱིས་ཐོས་ཏེ་བལྟར་འོངས་བས་ཡུལ་དེའི་སྐྱེ་བོ་ཕལ་ཆེར་དེ་ན་འདུས། ཀླུ་བཏུལ་ཟིན་ནས་ཀླུ་དེ་དག་དང་ཀླུ་སྦྲུལ་གྱི་གཟུགས་ཅན་དཔག་ཏུ་མེད་པ་འདུས་ནས། ཁང་བཟང་གི་རྣམ་པར་བྱས་པའི་དབུས་ན་སློབ་དཔོན་བཞུགས་སོ། །སྐྱེ་བོ་ཐམས་ཅད་དེ་ལ་བལྟ་ཞིང་ངོ་མཚར་དུ་བྱེད་པར་གྱུར། དེ་ནས་སྦྲུལ་དེ་དག་མི་སྣང་བར་སོང་ཞིང་སྐྱེ་བོའི་ཚོགས་དེ་དག་ཀྱང་གྱེས་སོ། །ཡུལ་དེར་སྔགས་ཀྱི་ཐེག་པ་བཤད་པས་ཀྱང་སྐྱེ་བོ་མང་


TNT17_Page_0196
[མ་དཔེ་གཟིགས་ན་འདིར་གནོན།]

པོས་དངོས་གྲུབ་ཐོབ་པར་གྲགས་སོ། །དེ་དག་གི་སྐབས་ཤིགདཔལ་ཨོ་རྒྱན་གྱི་གནས་ཀྱི་རྒྱལ་པོ་དིག་དེ་བ་སྟེ་ཕྱོགས་ཀྱི་ལྷ་ཞེས་པས་སློབ་དཔོན་སྤྱན་དྲངས་ཏེ་ཡུན་ཡང་རིང་དུ་བཞུགས་ཤིང༌། ཕྱོགས་དེ་ན་གནས་པའི་མུ་སྟེགས་ཀྱི་རྣལ་འབྱོར་པ་དང༌། མཁའ་འགྲོ་མ་ནུས་པ་ཐོབ་པ་མང་པོ་ཞིག་ལྟ་སྟངས་དང༌། ཆོ་འཕྲུལ་གྱིས་བཏུལ། དེའི་ཤུགས་ཀྱིས་ཕྱི་བའི་ཕྱོགས་འཛིན་པའི་རྒྱལ་ཕྲན་དང་པཎྜི་ཏ་ཉི་ཤུ་ཙམ་ནང་པར་གྱུར་སྐད། རེ་རེ་བཞིན་གྱི་ལོ་རྒྱུས་རྒྱས་པར་མ་བྲིས་ཀྱང༌། ལ་ལ་དབང་དུ་བྱེད་པའི་ལྟ་སྟངས་ཀྱིས་དབང་དུ་བསྡུས། ལ་ལ་རེངས་པར་མཛད་པ་སོགས་ཀྱིས་བསྡིགས། ལ་ལ་གཅིག་དང་དུ་མ་དང་འབར་བ་ལ་སོགས་པའི་ཆོ་འཕྲུལ་བསྟན། ལ་ལ་སེམས་ཤེས་པའི་མངོན་ཤེས་སོགས་བསྟན་པས་དད་པ་བསྐྱེད་པ་ཡིན་ནོ། །དེར་དུར་ཁྲོད་ཆེན་པོ་གྷོ་ར་ཨནྡྷ་ཀར་ཚོགས་ཀྱི་འཁོར་ལོ་བསྐོར་བ་ན། དཔལ་ཧེ་རུ་ཀ་འཁོར་ལོ་སྡོམ་པ་རིག་པའི་ལྷ་མོར་བཅས་པ་མངོན་སུམ་དུ་བྱོན་པས་སློབ་དཔོན་ཉིད་རབ་ཏུ་དགྱེས་ཏེ་རོ་ལངས་མང་པོ་དང་ལྷན་ཅིག་ཏུ་སྔགས་ཀྱི་བསྟོད་པ་དང་བཅས་ཏེ་གར་དང་སྐོར་བ་མཛད་པས། ཀེང་རུས་དང་ཅེ་སྤྱང་རྣམས་ཀྱང་གར་བྱེད་དོ། །མི་བཟད་པའི་ལུས་ཅན་མང་པོས་ཀྱང་མཆོད་པར་བྱེད་དོ། །དེའི་ཚེ་དཔལ་ཧེ་རུ་ཀས་སྔགས་ཀྱི་སྒྲ་དབྱངས་སྔོན་དུ་འགྲོ་བས། ཀྱཻ་འཇིག་རྟེན་མ་རིག་འཐིབས་པོའི་སྨག་གིས་མུན་པར་སྤྲུལ་པ་ལ། །མཚན་མོ་སྤྲིན་རུམ་སྟུག་པོའི་ནང་ནས་གློག་འགྱུ་གསལ་འབར་བཞིན། །རབ་ཏུ་གཉེན་


TNT17_Page_0197
[མ་དཔེ་གཟིགས་ན་འདིར་གནོན།]

གཤིན་འཇམ་པའི་བློ་གྲོས་ཕྱོགས་གྲོལ་ལྟར་ཡང་ལས། །ཉི་མ་བྱེ་བ་ཕྲག་བརྒྱ་ལས་ལྷག་འོད་ཀྱིས་སྣང་བར་གྱིས། །གང་ལས་རྣམ་པ་དྲུག་གི་ངག་ཚིག་དཔྱོད་གསལ་བས། །བདེ་དང་ཡེ་ཤེས་རྣམ་ཤེས་ཐར་བའི་དོན་ལྡན་པ། །སྣ་ཚོགས་སྤྱོད་དང་ནུས་པ་སྙིང་ལ་འཇུག་འགྱུར་བའི། །སྐྱེ་བོའི་རབ་རིབ་སེལ་བྱེད་མངོན་པར་སྦྱོར་བར་གྱིས། །ཞེས་དབུགས་ཕྱུང་ཞིང་སྣང་བ་བྱིན་ནོ། །དེ་ནས་སློབ་དཔོན་གྱིས། སྲིད་པ་གསུམ་འབར་སྐུ་ནི་རྗེས་ཆགས་དུལ་བར་ལྡན། །སོགས་ཀྱིས་བསྟོད་པས། ཧ་ཧ་ཧེ་ཧེ་ལ་སོགས་པ་བཞད་པ་བརྒྱད་ཀྱིས་བཞད་དེ་མི་སྣང་བར་གྱུར་ཏོ། །ཡང་ཕྱིས་ཛ་ལནྡྷ་རར་ཡང་བཞུད་དེ། ས་འོག་ནས་རྡོ་རིངས་ཆེན་པོ་དཔངས་སུ་འདོམ་བརྒྱད། རྒྱར་འདོམ་གང་པ་ཅིག་བཏོན་ཏེ་ཕྱག་ཡ་གཅིག་གིས་བསྣམས་ནས། ཀོ་ནེ་ཛའི་གྲོང་ཁྱེར་གྱི་མཐར་བཙུགས་སོ། །རྡོ་རིངས་དེ་ད་ལྟ་ཡང་ཡོད་དོ། །གནས་དེར་ཡང་རྡོ་རྗེ་ཐེག་པའི་ཟབ་མོའི་དོན་ཅི་རིགས་པ་གསུངས། ཡང་ཡུལ་ར་དྷའི་རྒྱལ་པོས་གསོལ་བ་བཏབ་ནས། སོ་མ་པུ་རིའི་ལྷ་ཁང་ཞིག་ལ་རབ་གནས་མཛད། སྐྱེ་བོ་ཐམས་ཅད་ཀྱིས་མཐོང་བར་ལྷ་ཁང་ནམ་མཁའ་ལ་ལན་གསུམ་དུ་འཕགས་ཤིང༌། ལྷ་རྣམས་གར་བྱེད་པར་སྣང་ངོ༌། །འདི་སོ་མ་པུ་རི་རྙིང་པ་ཡིན། ཕྱིས་བྱུང་བ་ཆ་གསུམ་གྱི་གཙུག་ལག་ཁང་ནི་སོ་མ་པུ་རི་གསར་བ་སྟེ། རྒྱལ་པོ་དེ་བ་པཱ་ལས་སོ་མ་རུ་རའི་གནས་གཞི་དང་གྲོང་རྣམས་ས་ཡུལ་གསར་པར་དཔོས་པས་སྔ་མའི་མིང་དེ་ཀ་གསར་པ་ལའང་གྲགས་སོ། །


TNT17_Page_0198
[མ་དཔེ་གཟིགས་ན་འདིར་གནོན།]

ཡུལ་བི་ར་ཛར་བྱོན་པའི་ལོ་རྒྱུས་ནས་དེ་དག་གི་བར་གྱི་གཏམ་རྣམས་འདིར་བཤད་པའི་གོ་རིམ་ཡིན་གྱི། དུས་སྔ་ཕྱི་སྣ་ཚོགས་ཡོད་པར་སྣང་ལ་དེ་དག་ནི་སློབ་དཔོན་ཀུ་ས་ལི་ཆུང་བས་མཛད་པའི་གནས་ཀྱི་སྒྲོན་མེ་ཞེས་བྱ་བའི་བསྟན་བཅོས་ཀྱི་ཐོག་མར་བཤད་པའི་གཏམ་རྒྱུད་ལྟར་བྲིས་པའོ། །སྤྱིར་ཡུལ་ཉི་ཤུ་རྩ་བཞི་དང་དུར་ཁྲོད་བརྒྱད་དེ་སུམ་ཅུ་རྩ་གཉིས་སུ་ངོ་མཚར་བའི་མཛད་པ་བསྟན་པའི་ལོ་རྒྱུས་དང༌། རྒྱས་པ་ལ་གནས་བཞི་བཅུ་རྩ་བརྒྱད་དང༌། དུར་ཁྲོད་བཅུ་དྲུག་དུ་བྱོན་པའི་གཏམ་རྒྱུད་ཀྱང་ཡོད་པར་སྣང་ཞིང༌། ཙརྱ་པ་རྣམས་ཀྱི་སྡེ་ན་དེ་དག་གི་གླེགས་བམ་ཡང་ཡོད་ཅེས་ཐོས་སོ། །དེ་ནས་ཕྱིས་ཤིག་ན། ཡུལ་ཆེན་པོ་ཤར་ཕྱོགས་བྷངྒ་ལ་ན་སྔར་གྱི་རྒྱལ་པོ་གོ་བི་ཙནྡྲའི་ཚ་བོ་རྒྱལ་པོ་རོལ་པའི་ཟླ་བ་རྒྱལ་སྲིད་སྐྱོང་ཞིང༌། དེའི་བློན་པོ་ནི་དགེ་བའི་མགོན་པོའོ། །དེར་རྒྱལ་པོ་ལ་སོགས་པ་ཡུལ་ཁམས་ཀྱི་སྐྱེ་བོ་གཞན་ཐམས་ཅད་མུ་སྟེགས་བྱེད་ཁོ་ན་ལ་མོས་ཤིང༌། བློན་པོ་དགེ་བའི་མགོན་པོ་འཁོར་བཅས་ཉིད་ནང་པའོ། །སློབ་དཔོན་ནག་པོ་སྤྱོད་པ་འཁོར་སྟོང་བཞི་བརྒྱ་དང་བཅས་པ། གདུགས་བདུན་བརྒྱ་དང༌། ཌཱ་མ་རུ་བདུན་བརྒྱ་དང༌། འཁོར་ཚོགས་ཐམས་ཅད་ལ་ཡང་ཆོ་འཕྲུལ་སྣ་རེ་དང་བཅས་བྷཾ་ག་ལའི་གྲོང་ཁྱེར་དུ་བྱོན་ནོ། །དེ་དུས་ཀྱི་གྲོང་ཁྱེར་ནི་ཧེ་མ་ད་ལ་ཡིན་པར་འདུག ད་ལྟ་དེ་སྟོངས་ནས་ནགས་སུ་ཡོད་ཟེར། དེར་སྐྱེ་བོ་ཐམས་ཅད་ངོ་མཚར་དུ་འཛིན་བཞིན་པ་ལས། བློན་པོ་དགེ་བའི་མགོན་པོས་མཆོད་པར་བྱས་ཤིང༌། གྲོང་ཁྱེར་གྱི་དབུས་དང་ཕྱོགས་བཞི་ཐམས་ཅད་དུ་ཁྱབ་


TNT17_Page_0199
[མ་དཔེ་གཟིགས་ན་འདིར་གནོན།]

པར་ཉུལ་བར་མཛད། རྒྱ་གར་གྱི་གྲོང་ཁྱེར་ཆེན་པོ་རྣམས་ལ་ཕྱོགས་མཚམས་བརྒྱད་ཀར་དུ་དུར་ཁྲོད་ཡོད་པས། ཕྱོགས་མཚམས་ཀྱི་དུར་ཁྲོད་བརྒྱད་རྣམས་སུ་ངེས་པ་མེད་པར་བཞུགས་ཤིང་སྐལ་བ་དང་ལྡན་པ་རྣམས་ལ་ཟབ་མོའི་དོན་གྱི་བཀའ་དྲིན་ཡང་མཛད་དོ། །དེར་བློན་པོ་དགེ་བའི་མགོན་པོས་ཡོ་བྱད་བཟང་ལ་གྱ་ནོམ་པས་མཆོད་བཞིན་པ་ལ་དུས་རིང་ཙམ་སོང་བ་ན། ལན་ཅིག་དགེ་བའི་མགོན་པོ་དྲུང་དུ་འོངས་བ་ཞིག་ལ། ཁྱོད་ཀྱིས་ང་ལ་མང་དུ་སྦྱིན་པ་ནི་གང་གི་དོན་དུ་ཡིན་གསུང༌། བདག་གི་སྐྱེད་མོས་ཚལ་ན། འཕགས་པ་སྤྱན་རས་གཟིགས་ཀྱི་ལྷ་ཁང་ཞིག་བཞེངས་ཡོད་པས། དེ་ལ་སློབ་དཔོན་གྱིས་རབ་ཏུ་གནས་པ་མཛད་པར་ཞུ་ཞུས་པས། སློབ་དཔོན་གྱི་ཞལ་ནས་འོ་ན་དེང་ཉིད་ཚེས་དང་གཟའ་དང་སྐར་མ་དང་སྦྱོར་བ་དང་བྱེད་པ་མཐའ་དག་བཟང་བས། ད་ལྟ་རང་བྱ་གསུང༌། ཡོ་བྱད་ཇི་ལྟ་བུ་འཚལ་ཞུས་པས། གང་ཡང་མི་དགོས་གསུང༌། ལྷ་ཁང་དུ་བཞུད་པའི་ལམ་ནས་མེ་ཏོག་ཅིག་བསྣམས། ལྷ་ཁང་དུ་བྱོན་ནས་སྐུ་གཟུགས་ཀྱི་སྤྱི་བོར་མེ་ཏོག་བཞག་སྟེ། སུ་པྲ་ཏིཥྛ་གསུངས་ནས་རབ་གནས་ཚར་རོ་གསུངས། དེར་བློན་པོ་དགེ་པའི་མགོན་པོ་ཡིད་མ་ཆེས་པས། སློབ་དཔོན་ན་རེ། ཁྱོད་ཡིད་མ་ཆེས་ན་ངས་རབ་གནས་བརྟུལ་ཏེ་འགྲོའོ་ཞེས་གསུང༌། དབུ་ཐོག་ཏུ་བཞག་པའི་མེ་ཏོག་དེ་བླངས་ཏེ་སློབ་དཔོན་བཞུད་པ་ན། སྤྱན་རས་གཟིགས་ཀྱི་སྐུ་གཟུགས་དེ་ཡང་བཀག་སྟེ་བཞེངས་ནས་སློབ་དཔོན་གྱི་ཕྱི་བཞིན་དུ་ཐེགས། སློབ་དཔོན་བཞུགས་པས་དུར་ཁྲོད་དུ་བྱོན་ནོ། །དེར་


TNT17_Page_0200
[མ་དཔེ་གཟིགས་ན་འདིར་གནོན།]

བློན་པོ་འགྱོད་དེ་དུར་ཁྲོད་དེར་སོང༌། སྔར་ཡིད་མ་ཆེས་པ་ལ་བཤགས་པ་ཕུལ་ཏེ། ད་ནི་ཡིད་ཆེས་པས་རབ་གནས་མཛད་པར་ཞུ་ཞུས་པས། སྔར་བཞིན་མེ་ཏོག་སྐུ་གཟུགས་ཀྱི་སྤྱི་བོར་བཞག །སྐུ་གཟུགས་འོད་འཕྲོ་ཞིང་གཟི་བརྗིད་དང་ལྡན་པར་སོང༌། དེ་ནས་བློན་པོ་དགེ་བའི་མགོན་པོས་སྤྱན་རས་གཟིགས་ཀྱི་སྐུ་གཟུགས་དེ་སྤྱན་འདྲེན་པར་བརྩམས་ན། མི་གཉིས་དང་བཞི་དང་བརྒྱད་དང་བཅུ་དྲུག་ནས་བརྩམས་ཏེ། ལྔ་བརྒྱའི་བར་གྱིས་ཀྱང་གཡོ་འགུལ་བྱེད་མ་ནུས་ཏེ་གནས་དེ་ཉིད་དུ་ལྷ་ཁང་བཞེངས། དེ་ལ་ནི་རྒསྠཱ་པ་ན་ཞེས་གྲགས། སྔར་གྱི་ལྷ་ཁང་དེར་ཡང་མཆོད་རྟེན་ལྷ་ཅན་ཞིག་བྱས་སོ། །སྔར་བོད་ན་ཡོད་པའི་ལོ་རྒྱུས་ན། འདིར་རྒྱལ་པོའི་ཆད་པ་བྱུང་གི་དོགས་པས་ལྷ་དབང་ཕྱུག་ཆེན་པོའི་རྣམ་པ་དང་འདྲ་བའི་སྤྱན་རས་གཟིགས་བཞེངས་ཟེར་བ་འདུག །འོན་ཀྱང་སྐུ་འདྲ་དེ་ཕྱིས་ཀླ་ཀློའི་འཇིགས་པས། གང་ག་སཱ་ག་ར་ཞེས་པ་རྒྱ་མཚོའི་དེའུ་ཅིག་ལ་སྤྱན་དྲངས་ནས་ད་ལྟ་ཡོད་འདུག་པ། མཐོང་བ་རྣམས་ཟེར་བ་ལྟར་ན་འཕགས་པ་ཧ་ལཱ་ཧ་ལཱ་ཞལ་གཅིག་ཕྱག་བཞི་པ་དེ་ཡིན་ཡོད་འདུག་པ་དེ་ནི་གདོད་ནས་དབང་ཕྱུག་ཞི་བ་དང་རྣམ་པ་ཕྱོགས་འདྲ་བ་ཡིན་གྱི། མུ་སྟེགས་པའི་ལྷ་དང་འདྲ་བར་རྫུས་ཏེ་བཅོས་པ་མིན་ནོ། །དེ་ནས་བློན་པོ་དགེ་བའི་མགོན་པོས་གསོལ་བ་བཏབ་པ་ལ། དེ་སྐལ་བ་དང་ལྡན་པར་མཁྱེན་ནས། དབང་བསྐུར་ཞིང་གདམས་པ་དང་རྗེས་སུ་གདམས་པ་ཡང་སྩལ་ལོ། །སྤྱིར་བཏང་ལ། དཔའ་བོའི་དབང་ཕྱུག་མི་འབྲི་ཞིང༌། །གང་གི་ཐད་དུའང་མི་གདོན་ནོ། །ཞེས་འབྱུང་


TNT17_Page_0201
[མ་དཔེ་གཟིགས་ན་འདིར་གནོན།]

བ་ཡིན་ཀྱང༌། སྐབས་དེར་མཁའ་འགྲོས་ལུང་བསྟན་ཏེ། དཔལ་འཁོར་ལོ་སྡོམ་པའི་བྲིས་སྐུ་ཞིག་བློན་པོ་ཉིད་ཀྱི་ཡི་དམ་དུ་བཞེངས་སོ། །དེ་ཤིན་ཏུ་གསང་ཤིང་མཚན་མོ་བསྒོམ་བཟླས་དང་མཆོད་གཏོར་བྱེད་ཀྱིན་ཡོད་པ་ལས། མཁའ་འགྲོ་མ་རྣམས་ཀྱིས་བསྒྲགས་ཏེ། བློན་པོ་དགེ་བའི་མགོན་པོས་རྒྱལ་པོའི་ལྷ་གདན་དུ་བཏང་བའི་ལྷ་སྐུ་བཞེངས་ཡོད་པར་འདུག་ཅེས་གྲོང་ཁྱེར་བ་ཀུན་ལ་གྲགས་སོ། །དེར་བློན་པོའི་ཉེ་དུ་དང་གྲོགས་པོ་འགའ་ཞིག་ན་རེ། ཁྱེད་ཀྱིས་འདི་ལྟ་བུ་བཞེངས་འདུག་པ། དེ་ཡུལ་གཞན་ཞིག་ཏུ་བརྫངས་ན་ལེགས། གལ་ཏེ་རྒྱལ་པོས་ཁྱིམ་གཡེངས་བཏང་སྟེ་སྙེད་ན་ཁྱོད་ཀྱི་མགོ་གཅོད་པར་འགྱུར་ཞེས་ཟེར། དེར་བློན་པོ་སྐྲག་སྟེ་བྲིས་སྐུ་དེ་སྣོད་དུ་བཅུག གོས་མང་པོས་གཡོགས་ཏེ་མི་རོ་ཡིན་པ་ལྟར་རྫུས་ཏེ་ཁྱོགས་ལ་བཏེག །ལྷོ་སྒོ་ནས་བརྫངས་པས་སྒོ་དེའི་སྒོ་སྲུངས་པ་ཐེ་ཚོམ་ཟོས་ཏེ་བཟུང་ནས་བལྟས་པས་བྲིས་སྐུ་དེར་འདུག དེ་དབྱུག་པའི་རྩེ་མོར་བཏགས་ཏེ་རྒྱལ་པོའི་དྲུང་དུ་ཁྱེར། གྲོང་ཁྱེར་བ་རྣམས་སྨྲ་བ་ནི་བདེན་ཏེ་བློན་པོ་དགེ་བའི་མགོན་པོའི་འདི་ལྟ་བུ་བྲིས་སོ་ཞེས་བྱས། རྒྱལ་པོས་བློན་པོ་གཞན་དང་བྲོས་པ་རྣམས་བསགས་ཏེ་གྲོས་བྱིས་པས། དགེ་བའི་མགོན་པོ་གསལ་ཤིང་ལ་བསྐྱོན་ནམ། མགོ་ཆོད་ཅིག་ཅེས་ཐམས་ཅད་མགྲིན་གཅིག་ཏུ་སྨྲའོ། །རྒྱལ་པོ་ན་རེ། ཁྱེད་རྣམས་མ་བརྟགས་པ་ཁོ་ནར་སྨྲའམ། རྒྱལ་པོ་ཞེས་བྱ་བ་བརྟགས་ཤིང་དཔྱད་ནས་བྱེད་དགོས་པས། ངས་བརྟགས་པར་བྱའོ་ཞེས་དགེ་བའི་མགོན་པོ་བོས་སོ། །


TNT17_Page_0202
[མ་དཔེ་གཟིགས་ན་འདིར་གནོན།]

དེ་ལ་བྲིས་སྐུ་བསྟན་ནས་ངའི་ལྷ་མནན་པའི་སྐུ་འབྲི་བ་འདི། ཁྱོད་ཀྱིས་དྲན་ནམ། ཁྱོད་རང་གི་སློབ་དཔོན་གྱིས་དྲན། སུས་དྲན་པ་དེ་ལ་ཆད་པ་གཅོད་གསུང༌། བློན་པོ་ན་རེ། འདི་བདག་གིས་དྲན་པ་ཡང་མ་ཡིན། སློབ་དཔོན་གྱི་དྲན་པ་ཡང་མ་ཡིན་གྱི་ནང་པ་སངས་རྒྱས་པ་རང་གི་གཞུང་ནས་བཤད་ཞུས་པས། རྒྱལ་པོ་ཡིད་མ་ཆེས་པ་ལ་ཁྱིམ་ནས་གླེགས་བམ་བླངས་ཏེ་བསྟན་པས། རྒྱལ་པོ་ན་རེ། དེ་ན་བདེན་མོད་ཀྱི་གཞུང་ལུགས་འདི་གཉིས་གང་བདེན་ནུས་པ་འགྲན་ནོ་ཞེས་གསུངས་ནས། རྒྱལ་པོས་ཀྱང་ཧེ་རུ་ཀ་གདན་དུ་བྱས་པའི་བྲིས་སྐུ་བཞེངས་སོ། །རི་མོའི་བྱ་བ་ཟིན་པ་ན། རྒྱལ་པོ་ན་རེ། ཁྱོད་ཀྱི་བྲིས་སྐུ་དང༌། ངའི་བྲིས་སྐུ་གདན་མཐོ་དམའ་མེད་པ་ཅིག་ལ་བཞག སྒོ་བསྡམས་ཏེ་ཁྱེད་དང་ངེད་ཀྱི་མི་སུ་ཡང་མི་འགྲོ། མཆོད་པ་རྒྱ་ཆེན་པོ་ཡང་མཉམ་པོར་འབུལ། གསོལ་བ་ཡང་མཉམ་པོར་འདེབས། དེ་ལྟར་ཞག་བདུན་སོང་ནས་རང་རེ་གཉིས་ཀར་ཕྱོགས་མི་དང་བཅས་པ་མཉམ་པོར་འོངས་ཏེ་ངོ་མཚར་པའི་ལྟས་ཀྱི་ནུས་པ་བལྟ་བ་ཡིན་ནོ། །དེ་རྗེས་གང་ནུས་པ་དང་ལྡན་པ་དེའི་རྗེས་སུ་ཅིག་ཤོས་ནུས་པ་མེད་པ་དེ་འཇུག་དགོས་སོ། །ཞེས་བྱས་ནས་བྲིས་སྐུ་གཉིས་ལྷ་ཁང་གསར་བ་ཅིག་གི་ནང་དུ་བཞག ཞག་བདུན་དུ་དེ་ལྟར་བྱེད་པ་ལས། བློན་པོས་རྒྱལ་པོའི་བཀའ་འགོང་བར་ནི་མི་ནུས་པས་དེ་ལྟར་བྱས་ཀྱང༌། ཁོང་འདར་བས་ལན་ཅིག་སློབ་དཔོན་གྱི་དྲུང་དུ་སོང་ནས། འདི་ལྟར་བྱེད་དགོས་བྱུང་བས་སློབ་དཔོན་གྱིས་ནུས་པ་བསྟན་པར་ཞུ་བྱས་ཙ་ན། སློབ་དཔོན་གྱི་


TNT17_Page_0203
[མ་དཔེ་གཟིགས་ན་འདིར་གནོན།]

གསུང་ན་རེ། ཁྱོད་སེམས་ལས་ཆུང་ངུར་འདུག་ཅིང༌། དོན་འདི་ལ་ངས་ནུས་པ་སྟོན་མི་དགོས་ཀྱི། བཅོམ་ལྡན་འདས་དཔལ་ཧེ་རུ་ཀ་ཕྱུགས་བདག་གིས་བརྗི་བར་ག་ལ་ནུས་གསུང་སྟེ། དུར་ཁྲོད་རྣམས་སུ་གླུ་དང་གར་ལ་སོགས་པ་རོལ་བ་སྣ་ཚོགས་པས་བཞུགས་སོ། །དེ་ནས་ཞག་བརྒྱད་པའི་ཉིན་པར་རྒྱལ་པོ་དང་བློན་པོ་གཉིས། སངས་རྒྱས་པ་དང་མུ་སྟེགས་བྱེད་ཀྱི་ཕྱོགས་འཛིན་རྣམས་དང་བཅས་ཏེ། ལྷན་ཅིག་ལྷ་ཁང་དེར་ཞུགས་ནས་བྲིས་སྐུ་གཉིས་དུས་གཅིག་ཏུ་ཞལ་ཕྱེའོ། །དེར་བྲིས་སྐུ་སྔ་མ་དཔལ་ཧེ་རུ་ཀ་ནི་སྔར་བས་ཀྱང་ཆེས་གཟི་བརྗིད་འབར་བར་འདུག །རྒྱལ་པོས་བཞེངས་པའི་བྲིས་སྐུ་དེ་ཡང་སྔ་མ་ལས་རང་འགྱུར་ནས། དབང་ཕྱུག་ཆེན་པོ་དང་ལྷ་མོ་ཨུ་མ་མནན་པའི་དཔལ་ཧེ་རུ་ཀའི་སྐུ་བརྙན་ཉིད་དུ་གྱུར་རོ། །དེར་ཐམས་ཅད་ཀྱིས་བྲིས་སྐུ་ལ་མཆོད་ཅིང༌། རྒྱལ་རྔ་ཆེན་པོ་ཡང་བརྡུངས་ཏེ། ད་ཕྱིན་ཆད་རྒྱལ་པོ་འཁོར་དང་བཅས་པ་སངས་རྒྱས་པ་བྱེད་དོ་ཞེས་དྲིལ་བསྒྲགས་སོ། །དེ་ནས་རྒྱལ་པོས་ཀྱང་སློབ་དཔོན་སྤྱོད་པ་པའི་ཞབས་ལ་གཏུགས། དབང་བསྐུར་ཞུས་ཤིང་གདམས་པ་ནོད། ཕྱིས་དུས་གཞན་ན་རྒྱལ་བློན་འདི་གཉིས་ཀྱང་དངོས་གྲུབ་ཐོབ། དུས་དེར་རེ་ཞིག་རྒྱལ་བློན་བྲམ་ཟེ་ཚོང་དཔོན་ཁྱིམ་བདག་སོགས་ཐམས་ཅད་སངས་རྒྱས་ཀྱི་བསྟན་པ་ཁོ་ན་མཆོད་དེ་ཡུལ་ལྷ་མཆོད་པ་དང༌། གསངས་ཏེ་མཆོད་པའི་རིགས་མ་གཏོགས། བྷངྒ་ལ་བ་རིལ་གྱིས་སངས་རྒྱས་པར་གྱུར། ཡུལ་གྲུ་ཆེན་པོ་དེ་དེ་ལྟར་གྱུར་པས། ཤིན་ཏུ་ཡ་མཚན་པའི་དབང་དུ་བྱས་ནས།


TNT17_Page_0204
[མ་དཔེ་གཟིགས་ན་འདིར་གནོན།]

སྐུ་གཟུགས་རྣམ་པར་འགྱུར་བའི་གཏམ་ཞེས་ལོ་རྒྱུས་འདི་རྒྱ་གར་ན་གྲགས་ཆེའོ། །ཡུལ་དེར་ཡང་སྔགས་ཀྱི་བསྟན་པ་ཤིན་ཏུ་དར་བར་གྱུར། སློབ་དཔོན་འདིས་ཀྱང་དེ་སྐབས་ཡུན་རིང་དུ་བཞུགས་སོ། །དེ་ནས་ལན་ཅིག་ད་ནི་དུར་ཁྲོད་ཆེན་པོ་བརྒྱད་དམ་བཅུ་དྲུག་དང༌། ཡུལ་ཆེན་གཞན་ཐམས་ཅད་ནི་བགྲོད་ཟིན་པས། ད་ནི་དེ་བཱི་ཀོ་ཊར་ཡང་འགྲོའོ་དགོངས་སོ། །དེ་ནས་བྷངྒ་ལའི་ཡུལ་བསྒྲལ་ཏེ་བར་གྱི་ཡུལ་ཁམས་བ་རེནྡྲ་ཞེས་བྱ་བར་བྱོན། དེར་ཡང་དུས་ཅི་རིགས་པ་སོང་བ་ན། ཉིན་གཅིག་གྲོང་ཁྱེར་དུ་གཤེགས་པའི་ལམ་ཀ་ཅིག་ན། ཆུ་ཤིང་དང༌། ཛམྦུ་དང༌། ཨརྨ་ལ་སོགས་པའི་འབྲས་བུ་ཅན་གྱི་ཤིང་སྣ་ཚོགས་པའི་ཚལ་ཅིག་གི་འགྲམ་ན། དེ་བསྲུང་བའི་བུ་མོ་ཞིག་འདུག་ནས། སློབ་དཔོན་གྱི་འཁོར་ལྷན་ཅིག་རྒྱུ་བའི་རྣལ་འབྱོར་བ་དག་གིས་དེ་ལ་ཤིང་འབྲས་སློངས་སོ། །བུ་མོ་དེ་ན་རེ། ཁྱོད་རང་རྣམས་ནུས་པ་དང་ལྡན་པར་རློམ་གྱིན་འདུག་པ། ནུས་པས་ཤིང་ཐོག་ཕོབ་ལ་ཟོ་ཟེར། སློབ་དཔོན་གྱིས་ལྷུང་བའི་ལྟ་སྟངས་མཛད་པས་ཤིང་ཐོག་ཐམས་ཅད་ཉིལ་གྱིས་བྱུང༌། ས་ལ་མ་རེག་ཙམ་ལ་བུ་མོ་དེས་རྫི་མ་གྱེན་དུ་བསྐྱོད་པའི་ལྟ་སྟངས་བྱས་པ་ཙམ་གྱིས། ཡང་ཤིང་ཐོག་དེ་རྣམས་གྱེན་ལ་ཡར་སོང་ནས་རང་གནས་སུ་འབྱར་ཏེ་འདུག་གོ །དེ་ནས་སློབ་དཔོན་གྱིས་ལྟ་སྟངས་ཀྱིས་མར་ལ་ཕབ། བུ་མོའི་ལྟ་སྟངས་ཀྱིས་ཡར་ལ་འབྱར་བ་དེ་གཉིས། རེ་མོས་འབའ་ཞིག་གི་ཚུལ་གྱིས་རིང་ཞིག་ཐོགས་སོ། །མཐར་བུ་མོ་དེ་ན་རེ། ནུས་པ་ཅུང་ཟད་ཙམ་ལ་ང་བརྒྱལ་བར་མི་བྱ་ལ། ཞིང་མཐའ་དག་རང་དུ་རྒྱུ་བར་ཡང་མི་བྱའོ་ཟེར་ནས་མི་སྣང་


TNT17_Page_0205
[མ་དཔེ་གཟིགས་ན་འདིར་གནོན།]

བར་སོང་ངོ༌། །བུ་མོ་དེ་ནི་རྡོ་རྗེ་ཕག་མོའོ། །དེ་ནས་དུས་གཞན་ཞིག་ན། སློབ་དཔོན་ཉིད་འཁོར་དང་བཅས་པ། ཡུལ་ཀཙྪ་རངྒའི་མདའ་བོད་ཀྱི་རི་དང་ཉེ་བའི་ཕྱོགས་ཡུལ་དེ་བཱི་ཀོ་ཊར་བྱོན་ནོ། །དེར་རྣལ་འབྱོར་པའི་གནས་གཞི་གཅིག་ཀྱང་མཛད། ད་ནི་འདིར་ཡང་འོངས་པས། ཛམྦུ་གླིང་གི་དུར་ཁྲོད་ཆེན་པོ་རྣམས་དང༌། ཡུལ་ཆེན་པོ་རྣལ་འབྱོར་པ་རྣམས་ཀྱི་བརྟུལ་ཞུགས་ཀྱི་སྤྱོད་པས་བགྲོད་པར་བྱ་བའི་ཞིང་ཐམས་ཅད་བགྲོད་ཟིན་གྱི། ཕྱིན་ཆད་གཞན་དུ་མི་འགྲོ་བར་འདིར་འདུག་གོ་གསུང་ངོ༌། །དེར་དུས་རིང་ཞིག་སོང་བ་ན་འཕྲ་མེན་མ་ཆེན་མོ་མུ་སྟེགས་ཀྱི་མཁའ་འགྲོ་མ་ཞིག་རིགས་བར་མའི་ཁྱིམ་དུ་མིའི་སྐྱེ་བའི་གཟུགས་བསྟན་པའི་མིང་ནི་པ་ཧུ་རཱི་ཞེས་ཟེར་བ་ཞིག་ཡོད་དོ། །དེ་དོན་དུ་ནི་མ་མོ་སྤྱིའི་ཕོ་ཉ་མོ་ཀཱ་ལ་དཎྜཱི་བྷརྟ་ཀཱ་ལི་ཉིད་ཡིན་སྐད། དེ་ལོ་བཅུ་དྲུག་མ་ཙམ་དུ་གྱུར་པ་ན། ཡུལ་དེའི་རྟེན་གྱི་གཙོ་བོ་སངས་རྒྱས་ཀྱི་རིང་བསྲེལ་ཅན་གྱི་མཆོད་རྟེན་གཅིག་བཞུགས་པའི་རྩེ་མོར་ཕྲ་མེན་མ་དེས་མ་མོའི་སྐྱེ་གནས་ཀྱི་ཕྱག་རྒྱ་བཞག་གོ །དེ་ཡུན་རིང་དུ་དེ་ཁར་བཞག་ན་ཡུལ་དེའི་ཉེ་སྐོར་གྱི་སངས་རྒྱས་པ་ཐམས་ཅད་བརླག་པར་འགྱུར་པར་སློབ་དཔོན་གྱིས་མཁྱེན་ནས་གསུངས་པས་སློབ་དཔོན་གྱི་སློབ་མ་རྣམས་ཀྱིས་སྐྱེ་གནས་ཀྱི་ཕྱག་རྒྱ་དེ་བླངས་ཏེ། ཆུ་བོ་ཆེན་པོར་དོར་རོ། །དེ་ལ་དེས་འཁོན་དུ་བལྟས་ནས་འདུག་གོ །ལན་ཅིག་སློབ་དཔོན་གྲོང་ཁྱེར་དུ་བཞུད་པའི་ལམ་གཅིག་ན། གདུག་པའི་མཁའ་འགྲོ་མ་དེ་གཏུན་ཤིང་ཐོགས་ནས་འབྲས་བརྡུང་ཞིང་འདུག་གོ །དེ་དང་ཉེ་བར་སློབ་དཔོན་འཁོར་


TNT17_Page_0206
[མ་དཔེ་གཟིགས་ན་འདིར་གནོན།]

བཅས་བྱོན་པ་ན། ལུས་ཀྱིས་སློབ་དཔོན་ལ་མ་གུས་པའི་རྣམ་འགྱུར་སྟོན་ཅིང་སངས་རྒྱས་པ་སྤྱི་ལ་ཁ་ཟེར་རོ། །དེར་སློབ་དཔོན་གྱིས་ལྟ་སྟངས་མཛད་པས་འབྲས་ཀྱི་གཏུན་དང་གཏུན་བུ་ཚལ་པར་གས། དེས་ཀྱང་སློབ་དཔོན་ལ་ལྟ་སྟངས་བྱས་མོད་ཅང་མ་གནོད་དོ། །ཡང་དེས་སློབ་དཔོན་གྱི་འཁོར་རྣམས་ལ་ལྟ་སྟངས་ཡང་ཡང་བྱས་པས། ཕལ་ཆེར་ལ་མ་གནོད་ཀྱང༌། ཁ་ཅིག་ལ་གོས་ཚིག་པ་དང་འགྱེལ་བ་དག་བྱུང་ངོ༌། །སློབ་མ་དེ་རྣམས་ཀྱིས་ཞུས་ནས་ཡང་སློབ་དཔོན་གྱིས་ལྟ་སྟངས་མཛད་པས། ཕྲ་མེན་མ་དེ་ཁ་བུབ་ཏུ་ལྟུང་བ་དང༌། ལག་པ་གཉིས་ས་ལ་ལྷུང་ངོ༌། །དེར་སློབ་དཔོན་ཐུགས་སྙིང་རྗེ་ཅུང་ཟད་སྐྱེས་པས་ལག་པ་གཉིས་གསོ་བའི་ལྟ་སྟངས་ཀྱིས་འབྱར་བར་མཛད་དོ། །དེས་སྔགས་བཟླས་ཤིང་སློབ་དཔོན་ལ་ལྟ་སྟངས་བྱེད་དོ། །སྙིང་རྗེའི་ཤུགས་ཀྱིས་ཐུགས་ཡེངས་ཏེ་བསྲུང་བ་གཡེལ་བའི་རྣམ་པ་ཅུང་ཟད་ཅིག་བྱུང་བ་ཡིན་ནམ་ཟེར། སློབ་དཔོན་རང་གི་གནས་གཞིར་ཕེབས་པ་ན། ཤིན་ཏུ་བསྙུང་པར་གྱུར་ཏེ། སློབ་དཔོན་ན་རེ། འདི་ལྟ་བུ་ནི་བླ་མའི་གསུང་ལས་དེ་བཱི་ཀོ་ཊར་མ་འགྲོ་ཞེས་གསུང་ན། བཀའ་དེ་བཅག་པའི་ཉེས་པ་ཡིན་གྱི། ཡུལ་ཉི་ཤུ་རྩ་བཞི་དང༌། དུར་ཁྲོད་བརྒྱད་དུ་དཔའ་བོ་དང་རྣལ་འབྱོར་མ་རྣམས་ལ་ཚོགས་ཀྱི་འཁོར་ལོ་དང་བཤགས་པ་གྱིས་ཤིག དེ་ནས་ཀྱང་ལང་ལ་ཤོག ཞག་བདུན་གྱི་ཁོངས་སུ་འཁོར་བར་གྱིས་གསུང༌། དེ་ནས་སློབ་མ་རྐང་མགྱོགས་ཀྱི་གྲུབ་པ་ཐོབ་པ་མང་པོས། སྐད་ཅིག་ལ་མྱུར་བར་དེ་རྣམས་བྱས་ཏེ། ཚུར་ལོག་འོངས་པས། ཚན་གཅིག་གིས་སྨན་ཐོགས་ཏེ་


TNT17_Page_0207
[མ་དཔེ་གཟིགས་ན་འདིར་གནོན།]

འོངས་པ་ལ། ལམ་དང་ཉེ་བ་ན་བུད་མེད་མང་པོས་པདྨའི་མཚོ་ལ་ཁྲུས་བྱེད་དེ། དེ་རྣམས་ན་རེ་རྣལ་འབྱོར་པ་ཁྲུས་གྱིས་ཟེར། སློབ་དཔོན་བསྙུང་བས་ལོང་བ་མེད་དོ་བྱས་པ་ན། དེ་རྣམས་ན་རེ། བསྙུང་བ་གདངས་ཟེར། སྨན་རྣམས་ཆུ་འགྲམ་དུ་བཞག་ནས་ཁྲུས་ཅུང་ཟད་བྱས་པས། སྨན་དེ་དག་བུད་མེད་དེ་རྣམས་ཀྱིས་ཁྱེར་ནས་གར་སོང་ཆ་མེད་དོ། །དེ་ནས་ནང་དུ་འོངས་ནས་སློབ་དཔོན་དང་མཇལ་བ་ན། བུད་མེད་དེ་དག་སྔར་གྱི་མཁའ་འགྲོ་མ་དེས་སྤྲུལ་པ་ཡིན་གསུང༌། དེ་ནས་སློབ་མའི་མཆོག་རྣལ་འབྱོར་ཕོ་མོ་བདུན་བཅུ་རྩ་གཉིས་བོས་ཏེ། སྐུའི་དྲུང་དུ་གནས་པ་ལ། སློབ་དཔོན་ན་རེ། ད་རེས་བླ་མའི་བཀའ་བཅག་པའི་ཆད་པ་ཟློག་ཏུ་མེད་པ་ཡིན། ད་བར་དོར་མཆོག་གི་དངོས་གྲུབ་བསྒྲུབས་ཏེ་སླར་འོང་བ་ཡིན་པས་དེ་བར་དུ་འདིར་ཡང་མ་ཡོང་ཞིག་གསུངས་ནས། སྒོ་བསྡམས་ཏེ་བཞུགས་སོ། །དེར་སློབ་མ་རྣམས་ཀྱིས་ཤིན་ཏུ་གསང་བར་བྱས་ཀྱང་གདུག་པའི་མཁའ་འགྲོ་མ་རྣམས་ཀྱིས་དེ་སླར་བྱུང་ན་བདག་ཅག་ཕུང་བར་འགྱུར་ཞེས་འགྲོས་ནས། སྐུ་འདས་སོ་ཤེས་བསྒྲགས་པའི་རྐྱེན་གྱིས་བྲམ་ཟེ་དང་རྩིས་མཁན་རྣམས་ཀྱིས་ཚོར་ནས་རྒྱལ་པོ་ལ་ཞུས་ཏེ། དེ་དག་རྒྱལ་པོའི་མི་དང་བཅས་པ་འོངས་ནས། ཞག་ལྔ་བའི་ཉིན་མོ་སྒོ་ཕྱེ་བས་སློབ་དཔོན་སྐུ་འདས་པར་མཐོང༌། སློབ་མ་འགའ་དང་བྲམ་ཟེ་དང་རྩིས་མཁན་རྣམས་ཀྱིས་ཙནྡན་ལ་སོགས་པའི་བུད་ཤིང་ཁྱེར་ཏེ། དུད་ཁྲོད་ཆེན་པོར་སྐུ་གདུང་སྤྱན་དྲངས་པ་ན། སྐད་ཅིག་དེ་ཉིད་ལ་རལ་གྲི་ལ་སོགས་པའི་དངོས་གྲུབ་བརྒྱད་ཅུ་རྩ་བཞི་


TNT17_Page_0208
[མ་དཔེ་གཟིགས་ན་འདིར་གནོན།]

ལས་རེ་རེ་སྟེར་བར་བྱེད་པ་པོ། གདོད་ནས་གྲུབ་པའི་གྲུབ་ཐོབ་བརྒྱད་ཅུ་རྩ་བཞི་འཁོར་མང་པོ་དང་བཅས་པ་གང་ནས་བྱུང་ཆ་མེད་པར་འོངས་པས། བྲམ་ཟེ་ལ་སོགས་པ་མི་དེ་རྣམས་དེ་དག་གི་གཟི་བརྗིད་མ་བཟོད་གདུང་བས་ཚིག་པར་གྱུར་ཏེ། ཅུང་ཟད་བྲོས་ནས་རྒྱང་རིང་པོ་ནས་སྐྱེ་བོའི་ཚོགས་རྣམས་དང་ལྷན་ཅིག་ལྟ་བ་ལས་གདུང་ལ་ཉེ་བར་འགྲོ་མ་ཐུབ་བོ། །གྲུབ་ཐོབ་དེ་རྣམས་ཀྱིས་བར་སྣང་ལ་དཀྱིལ་འཁོར་བྲིས་པའི་དབུས་སུ་སྐུ་གདུང་བཞག་སྟེ། རང་བྱུང་གི་མེ་འོད་ཀྱིས་སྦྱངས་སོ། །དུས་དེར་མྱ་ངན་གྱི་ཤུགས་ཡོད་པ་ལྟར་སྟོན་པ་དང༌། རྫུ་འཕྲུལ་གྱི་བཀོད་པ་དེ་དག་བལྟ་བར་འོངས་པའི་རྣལ་འབྱོར་ཕོ་མོ་སྟོང་ཕྲག་བརྒྱ་ཅུ་རྩ་བཞི་དང༌། གློ་བུར་དུ་ལྷགས་པ་གཞན་འབུམ་ཕྲག་དུ་མ་འདུས་ཏེ་གནས་པ་ལ། ཞག་བདུན་པའི་ཐ་མར་སློབ་དཔོན་ཉིད་སྔོན་བཞིན་དུ་གདུགས་བདུན་བརྒྱ་དང༌། ཌ་མ་རུ་བདུན་བརྒྱ་དང༌། སྣང་བའི་འཁོར་བདུན་བརྒྱ་དང༌། མི་སྣང་བའི་འཁོར་བདུན་བརྒྱར་བཅས་པ་མངོན་སུམ་དུ་བྱོན་བྱུང་བ་ན། རྣལ་འབྱོར་བ་ཐམས་ཅད་ངོ་མཚར་སྐྱེས་ནས་བསུ་བ་བྱས་ཤིང༌། ས་ཕྱོགས་མཐོ་བ་ཅིག་ལ་སློབ་དཔོན་བཞུགས་ཏེ། སོ་སོ་ལ་ཆོས་ཀྱི་བཀའ་མཆིད་མང་དུ་མཛད་དོ། །དེའི་མཐར་ངའི་ལུས་ག་རེ་ཞེས་གསུང་བ་ལ། བསྲེགས་ཟིན་ཏོ་ཞེས་ཞུས་པས། དོ་ཧ་རྡོ་རྗེ་གླུ་དབྱངས་མཆོག་དང་བཅས་པས་སྐུའི་སྣང་བ་དེ་དང་འཁོར་སྟོང་བཞི་བརྒྱ་ཡང་མི་སྣང་བར་གྱུར་རོ། །གདུང་ཞུགས་ལ་ཕུལ་བའི་གནས་སྐབས་དེར། ས་གཡོ་བ་དང༌། འོད་ཀྱིས་ཁྱབ་པ་དང༌། སྤོས་ཀྱི་དྲི་ངད་ཕྱོགས་ཐམས་ཅད་དུ་ལྡང་བ་དང༌།


TNT17_Page_0209
[མ་དཔེ་གཟིགས་ན་འདིར་གནོན།]

ནམ་མཁའ་ནས་རོལ་མོའི་སྒྲ་དང༌། མེ་ཏོག་གི་ཆར་ཆེན་པོ་བྱུང་ངོ༌། །དེ་ཉིན་ཡར་ངོའི་ཚེས་བཅུ་གཉིས་ཡིན། དེ་བཱི་ཀོ་ཊར་ད་ལྟ་ཡང་ཞག་དུས་དེ་ལ་སྒྲ་འོད་མེ་ཏོག་གི་ཆར་སོགས་ངོ་མཚར་བའི་ལྟས་རེ་རྟག་ཏུ་འོང་བ་ཡིན་པར་འདུགདེར་གདུང་ཞུགས་ལ་ཞེན་པ་དེ་མི་ལེགས་པ་ཆེན་པོ་བྱུང་ཟེར་ནས། ད་ནས་བརྩམས་ཏེ་ད་ལྟའི་བར་དུ་རྒྱ་གར་བའི་རྣལ་འབྱོར་པ་རྣམས་ཕུང་པོ་བསྲེག་སྦྱང་མི་བྱེད་དོ། །དེ་ནས་རེ་ཞིག་ཤར་ཕྱོགས་ཀྱི་རྒྱལ་ཁམས་དེ་བཱི་ཀོ་ཊ་དང༌། བ་རེནྡྲ་དང༌། ཀཱ་མ་རུ་པ་དང༌། ཧེ་རམྤ་དང༌། ཤྲཱི་ཧ་ཊྚ་དང༌། བྷངྒ་ལ་དང༌། ཨོ་ཌི་བི་ཤ་དང༌། ར་དྷ་ལ་སོགས་པའི་ལྗོངས་རྣམས་སུ་ཡུལ་ཕྱོགས་གྲོང་ཁྱེར་ཐམས་ཅད་རྣལ་འབྱོར་ཕོ་མོས་ཁྱབ་པ་ལྟ་བུར་ཡོད་པ་ལ། ཇི་ཞིག་ལྟར་ནས་འདི་འདི་ན་འདི་ལྟར་གནས། འདི་ལྟར་སོང་ཞེས་བརྗོད་དུ་མེད་པར་ཕལ་ཆེར་མི་སྣང་ངོ༌། །དུས་དེ་སྐབས་ཤིག་མ་རུའི་ཡུལ་གྱི་པུསྐཱ་ར་ཞེས་པའི་ཡུལ་དུ་སློབ་དཔོན་འདི་ཉིད་ཕྱག་རྒྱ་དྲུག་གིས་བརྒྱན་པ་མངོན་སུམ་དུ་བྱོན། ནུབ་ཕྱོགས་ཀྱི་ཡུལ་སྣ་ཚོགས་སུ་ཕེབས། སྐལ་ལྡན་གྱི་སྐྱེ་བོ་མང་པོ་གནས་ལུགས་རྟོགས་པ་ལ་བཀོད། ཟླ་བ་འགའ་རེ་བཞུགས་ནས་མཐར་གར་གཤེགས་ཆ་མེད་དོ། །ལྷོ་ཕྱོགས་ཀརྞ་ཊ་ཀར་ནི་བར་དོར་མཆོག་བསྒྲུབས་ཏེ་སྔར་གྱི་སྐུ་ལུས་དེ་ཉིད་ལ་ཞུགས་ནས་མངོན་སུམ་དུ་བྱོན་པ་ཡིན་ཅེས་འགྲོ་བ་མང་པོ་ལ་བཅུད་ལེན་སོགས་གནང་སྟེ་ཕན་འདོགས་པ་དང༌། དབུལ་འཕོངས་དང་ནད་པ་མང་པོའི་སྡུག་བསྔལ་བསལ། འགའ་ཞིག་ལ་གདམས་ངག་ཀྱང་ཅུང་ཟད་བསྟན་པར་མཛད་དེ་ཟླ་བ་བཞི་ཙམ་


TNT17_Page_0210
[མ་དཔེ་གཟིགས་ན་འདིར་གནོན།]

བཞུགས་པར་གྲགས། ཡུལ་དེའི་ཕྱོགས་གཅིག་ཤེ་ཡ་གི་རི་ཞེས་བྱ་བ་ན། དེ་ལྟར་བྱོན་པའི་དུས་ཀྱི་མཆོད་པ་ད་ལྟ་ཡང་ཡོད་དོ། །བྱང་ཕྱོགས་གངྒ་དང་ཡ་མུ་ནའི་བར་མཚམས་མ་ལ་བུ་རི་ཞེས་བྱ་བར་སྔར་གྱི་སྐུ་ལུས་ལ་ཞུགས་ཏེ་དེར་བྱོན་པ་ཡིན་གསུངས་ནས་སྔར་བརྟུལ་ཞུགས་སྤྱོད་པའི་དུས་ལ་མ་སླེབ་པས་ཉེས། ད་སྤྱོད་པའི་དུས་ལ་བབ་ན་ལུས་ལ་རང་བྱུང་གི་ཕྱག་རྒྱ་དྲུག་འབྱུང་བར་ཤོག་ཅེས་གསུངས་ནས། ཟླ་བ་དྲུག་ཏུ་རྩེ་གཅིག་ཏུ་བསྒོམ་པ་ལྟར་མཛད། དེ་ནས་སྐུ་ལ་རུས་པའི་རྒྱན་དྲུག་རང་བྱུང་དུ་ཡང་བྱུང༌། ཞག་བདུན་དུ་སྤྲོས་བཅས་ཀྱི་སྤྱོད་པ་མཛད་པར་ཀུན་གྱིས་མཐོང་ངོ༌། །དེ་ནས་ཟུང་འཇུག་གི་སྐུ་བསྙེས་ཏེ་མི་སྣང་བར་གྱུར་སྐད། ཡང་མ་ག་དྷ་དང་ཉེ་བ་ལྷོ་ཕྱོགས་ཛ་རི་ཁཎྜར་གཏོགས་པའི་དེ་བ་གྷ་ཊ་ཞེས་བྱ་བའི་གྲོང་ཁྱེར་དུ་བྲམ་ཟེའི་རིགས་སུ་གཏོགས་པ་ཅིག་གི་ཁྱིམ་དུ་སྐྱེ་བ་བཞེས་ཏེ། སྐུ་ལ་རུས་པའི་རྒྱན་དྲུག་རང་བྱུང་དུ་ཡོད་པར་སྐུ་བལྟམས། དེ་མ་ཐག་ང་སྔོན་གྱི་སློབ་དཔོན་ནག་པོ་ཡིན་གྱི་ལམ་ལྷག་མ་རྣམས་ལུས་འདི་ལ་རྫོགས་པར་འགྱུར་གསུང་ནས། བཙས་མ་ཐག་ནས་བསྒོམ་པར་མཛད། ཟླ་བ་གཅིག་ཙམ་ན་སྐུ་ལུས་ཀྱི་བསྐྱེད་རྫོགས་ཤིང༌། དེ་ནས་ཀྱང་མཉམ་བཞག་འབའ་ཞིག་ལ་བཞུགས་ཟླ་བ་དྲུག་གི་མཐའ་ཡང་ཟེར། ལོ་གཅིག་ལ་ཡང་ཟེར། སྒྲ་དང་འོད་དང་མེ་ཏོག་གི་ཆར་སོགས་ཆོ་འཕྲུལ་དང་བཅས་ཏེ་མི་སྣང་བར་གྱུར་ཏེ་ཟུང་འཇུག་གི་སྐུ་བརྙེས་པའོ། །ཡུལ་དེ་ན་ཡང་མཆོད་པ་དང༌། དུས་སྟོན་གྱི་རྣམ་གྲངས་རེ་ད་ལྟའི་བར་དུ་ཡང་ཡོད་དོ། །ཚུལ་དེ་ལྟ་བུས་ཕྱི་རྗེས་སུ་ཡང་ཆོ་


TNT17_Page_0211
[མ་དཔེ་གཟིགས་ན་འདིར་གནོན།]

འཕྲུལ་མཐའ་ཡས་པ་བསྟན་ཏོ། །དེ་ལྟར་ན་རྣམ་ཐར་གཏམ་རྒྱུད་དེ་དག་ནི། སློབ་དཔོན་གྲུབ་ཐོབ་ཀུ་ས་ལི་པའི་གསུང་ལོ་རྒྱུས་ཀྱི་སྡོམས་ལ་སྲོགས་ཤིང་བཅོལ་ཏེ། རྒྱ་བོད་ཀྱི་ལོ་རྒྱུས་གཞན་ཡིད་ཆེས་ཡོད་ངེས་རྣམས་ལས་ཁ་བསྐང་སྟེ་བྲིས་པ་ཡིན་པས་ཤིན་ཏུ་རྣམ་པར་དག་པ་སེམ་མོ། །སློབ་དཔོན་འདིས་དང་པོ་ཡུལ་ཛ་ལནྡྷ་ར་ནས་བྱོན་པའི་དུས་ནས། ཕྱིས་དེ་བཱི་ཀོ་ཊར་ཕེབས་པའི་བར་ལ་སློབ་དཔོན་ཉིད་ཀྱིས་ཆོས་བསྟན་པ་དང༌། གཞན་ཡང་མིག་ལྟོས་ཀྱི་བདག་རྐྱེན་ལ་བརྟེན་ནས་སྐྱེ་བོ་དཔག་ཏུ་མེད་པ་ཅིག་སྔགས་ཀྱི་ཐེག་པ་ལ་ཞུགས་ཏེ་རྣལ་འབྱོར་ཕོ་མོར་གྱུར་པས། གྲོང་ཁྱེར་བཅུ་གསུམ་ཙམ་སྟོངས་སྐད་པའི་གྲོང་ཁྱེར་ནི་བྱང་ཕྱོགས་མ་ལའི་གྲོང་སྟེ་འཕྲོག་བྱེད་སྒོ་དང༌། ནུབ་ཕྱོགས་ཨརྦནྟི་སྟེ། མཱ་ལ་པ་དང༌། ཀཱནྟི་སྟེ་ལྷོ་ཕྱོགས་ཁ་ནའི་ཡུལ་དང༌། བི་རཱ་ཛ་སྟེ་ལྷོ་ཕྱོགས་བི་ཛ་པུ་ར་དང༌། པུནྚ་བརྡྷ་སྟེ་ཤར་ཕྱོགས་ལི་ཁ་ར་ཤིང་འཕེལ་དང༌། ཀ་ན་ཀ་སྟེ་ལྷོ་ཕྱོགས་མ་ར་ཧ་ཊའི་ནང་ཚན་ཅིག་དང༌། གྲོང་ཁྱེར་ཀ་ར་ནྱ་ཏེ་ལྷོ་ཕྱོགས་གོ་དྷ་བ་རི་དང་ཉེ་བ་དང༌། ཙི་ཏི་པ་ཊ་ན་སྟེ་ལྷོ་ཕྱོགས་ཙ་རི་ཏྲ་དང༌། ཧེ་མ་ད་ལ་སྟེ་ཤར་ཕྱོགས་བྷངྒ་ལའི་ཁྱད་པར་དང༌། ཡུལ་བྱང་ཕྱོགས་གནྡྷ་ར་སྟེ་དེང་སང་ཊི་ལར་གྲགས་པ་དང༌། དེ་བཱ་གྷ་ཊ་སྟེ་ལྷོ་ཕྱོགས་ཛ་རི་ཁཎྜའི་བྱེ་བྲག་ཅིག་དང༌། ཤར་ལྷོ་གྲོང་ཁྱེར་ག་ལིང་ཀ་དང༌། ཡུལ་དབུས་རཽ་ད་སི་དང༌། ནུབ་ཕྱོགས་གྲོང་ཁྱེར་པུ་ཀཱ་ར་རྣམས་སོ། །དེ་དག་ཀྱང་སྐོར་ཙེ་སྐོར་ཙེ་སྟོངས་པ་རང་མིན་གྱི། གྲོང་ཁྱེར་དེ་དང་དེའི་ཆ་ལག་ཡུལ་ཁམས་ཐམས་ཅད་ནས། སྐྱེས་པ་བུད་མེད་ཁྱེའུ་བུ་མོ་རྣམས་རྣལ་འབྱོར་ཕོ་


TNT17_Page_0212
[མ་དཔེ་གཟིགས་ན་འདིར་གནོན།]

མོ་བྱས་པའི་གྲངས་རྣམས་བགྲངས་ན། ཕྱི་ལྕགས་རིས་བསྐོར་བའི་གྲོང་ཁྱེར་ཚད་ལྡན་གཅིག་གི་གྲོང་མིའི་གྲངས་སུ་ལོངས་པ་རེའི་དབང་དུ་བྱས་པས་གྲོང་དེ་ཙམ་བསེ་བ་ཚེགས་སུ་སྟོངས་པ་སྟེ། དེ་ཡང་རྒྱ་གར་གྱི་གྲོང་ཁྱེར་རེ་རེ་ལ་ཡང་མི་གྲོང་ཁྲི་ཕྲག་མང་པོའམ། འབུམ་ཕྲག་བགྲང་པ་ཡོད་དོ། །ཡང་རྟག་ཏུ་རྗེས་སུ་འབྲང་བའི་འཁོར་སྟོང་དང་བཞི་བརྒྱ་ནི། དངོས་གྲུབ་ཀྱི་རྣམ་གྲངས་རེ་རེ་ཐོབ་པ་འབའ་ཞིག་སྟེ། དེའི་ཕྱེད་བདུན་བརྒྱ་ནི་དགོས་པ་ཡོད་ན་མི་རྣམས་ལ་སྟོན་པར་བྱེད་ལ། དེ་ཡང་སྤྲུལ་པས་སྟོན་པར་བྱེད་ཀྱི་ལུས་དངོས་མིས་མཐོང་བ་མིན་ནོ། །གཞན་གནས་སྐབས་ཐམས་ཅད་དུ་མིས་མི་མཐོང་བའི་ཕྱིར་མི་སྣང་བའི་འཁོར་ཞེས་གྲགས་ལ། ཕྱེད་ལྷག་མ་བདུན་བརྒྱ་ནི། ཤིང་ལྷམ་དང༌། གཏེར་གྱི་བུམ་པ་དང༌། རལ་གྲི་དང༌། གནོད་སྦྱིན་མོ་ལ་སོགས་པ་དངོས་གྲུབ་གཞན་ཐོབ་ཀྱང་མི་སྣང་བ་མ་བསྒྲུབས་པས། ལུས་དངོས་དེ་ཉིད་མི་རྣམས་ཀྱིས་མཐོང་བའི་ཕྱིར། སྣང་བའི་འཁོར་ཞེས་བྱ། འདི་དག་ཀྱང་འདོད་ན་ལུས་སྦས་པའི་མི་སྣང་བ་ནི་ཡོད་དོ། །རྣལ་འབྱོར་ཕོ་མོ་བདུན་ཅུ་རྩ་གཉིས་སུ་གྲགས་པ་ནི། གནས་ཆེན་ཐམས་ཅད་དུ་ཡིད་ཀྱིས་བསམས་པ་ཁོ་ནས་བགྲོད་ཅིང༌། སློབ་དཔོན་ཆེན་པོ་ཉིད་དང་རིག་པའི་བརྟུལ་ཞུགས་ལྷན་ཅིག་ཏུ་སྤྱོད་པའི་གྲོགས་ཡིན་པ་དང༌། སློབ་དཔོན་ཉིད་དང་རྟོགས་པ་མཉམ་པར་བྱིན་གྱིས་བརླབས་སོ་ཞེས་གྲགས་སོ། །སྟོང་བཞི་བརྒྱ་པོ་རྣམས་རྟོགས་པ་མཉམ་པར་མ་ངེས་ཀྱང༌། སློབ་དཔོན་ཆེན་པོ་སྐད་ཅིག་གིས་ཡུལ་ཆེན་རྣམས་སུ་འབྱོན་པ་ན། ལྷན་ཅིག་ཏུ་རྫུ་


TNT17_Page_0213
[མ་དཔེ་གཟིགས་ན་འདིར་གནོན།]

འཕྲུལ་གྱིས་འགྲོ་བར་ནུས་ཤིང༌། རིག་པའི་བརྟུལ་ཞུགས་སྤྱོད་པའང་ཡིན་ནོ། །གྲོང་ཁྱེར་བཅུ་གསུམ་གྱི་མི་རྣམས་རྣལ་འབྱོར་པར་གྱུར་པ་ལ། རྣལ་འབྱོར་པ་འབུམ་སྡེ་བཅུ་གསུམ་ཞེས་གྲགས་ཏེ། འཕགས་ཡུལ་གྱི་ས་ཕྱོགས་ཐམས་ཅད་ནང་པ་སངས་རྒྱས་པའི་གསང་སྔགས་པ་རྣལ་འབྱོར་ཕོ་མོས་ཁྱབ་པ་ལྟར་གྱུར་ཏེ། རབ་ཀྱིས་མཆོག་འགྲུབ་པ་དང༌། གཞན་མང་པོས་ཐུན་མོང་གི་དངོས་གྲུབ་མཆོག་འབྲིང་ཐ་མ་ཅི་རིགས་པ་འགྲུབ་པ་དང༌། ཐ་མ་རྣམས་ཀྱིས་ཀྱང་ཏིང་ངེ་འཛིན་སྣ་རེ་མ་ཐོབ་པ་དང༌། ཕྲ་མོ་སྣ་རེ་མ་གྲུབ་པ་མེད་སྐད་དོ། །ཡང་བཤད་པ། སྤྱིར་གྲུབ་པའི་སློབ་དཔོན་རྣམས་ཀྱིས་བསྟན་བཅོས་མཛད་པ་ནི། དོ་ཧ་མགུར་དུ་བཞེས་པ་ཁོ་ན་མང༌། སྒྲུབ་ཐབས་ཆེ་ཆུང་དང་དབང་ཆོག་དང༌། རྫོགས་རིམ་གྱི་གཞུང་ཆེ་བའམ། ཆུང་བ་མཛད་པའང་ཅི་རིགས་པ་ཡོད་པ་དེར་གདའ། འགྲེལ་ཊཱིཀ་གི་རིགས་སོགས་བཤད་ཆོས་མང་པོ་དང༌། དགག་སྒྲུབ་མང་པོའི་རྩོད་ཆོས་དང༌། སྒྲ་སོགས་ཐ་སྙད་ཀྱི་གཙུག་ལག་གི་རིགས་ནི། གྲུབ་ཐོབ་དངོས་ཀྱིས་གསུངས་པ་ཆེར་མི་འབྱུང་ལ། དེ་འདྲའི་རིགས་གྲུབ་ཐོབ་དེས་མཛད་དོ་ཟེར་བ་ན། སློབ་དཔོན་དེ་དང་དེའི་གསུང་རྒྱུན་ནམ་བཞེད་སྲོལ་བསྐྱང་བའི་ཕྱིར་དུ་ཕྱིས་བརྩམས་པ་སྟེ། དེ་དང་དེའི་ལུགས་ཡིན་པས་ལུགས་སྲོལ་དེ་སློབ་དཔོན་དེས་མཛད་ཅེས་པའི་དོན་ཡིན་གྱི། དངོས་སུ་ནི་པཎྜི་ཏ་དག་གིས་བརྩམས་པའོ། །དེས་ན་གྲུབ་ཐོབ་ཀྱི་རྩོམ་པ་རྣམས་དཔེ་ཚོགས་ཆེན་པོའི་རིགས་ཅན་ཉུང་ངོ༌། །སློབ་དཔོན་འདིས་མཛད་པ་ལ་ཧེ་རུ་


TNT17_Page_0214
[མ་དཔེ་གཟིགས་ན་འདིར་གནོན།]

ཀས་ལུང་བསྟན་པ། གང་ལས་རྣམ་པ་དྲུག་གི་ངག་ཚིག་དཔྱོད་གསལ་བ། །ཞེས་འབྱུང་བ་དང༌། སྔར་བོད་དུ་གྲགས་པ་ལྟར་ན། གཞུང་དྲུག་རྩོམས་ཤིག་ཅེས་ལུང་བསྟན་པའི་གཞུང་དྲུག་གི་ངོས་འཛིན་ལ། སློབ་དཔོན་ཀུ་ས་ལ་བྷ་དྲ་ཆུང་བ་ན་རེ། དང་པོ་བསམ་གཏན་གཞུང་ཡིན་ཏེ། །ཡེ་ཤེས་ཀྱི་ནི་དེ་བཞིན་གཉིས། །གསུམ་པ་རིག་པའི་བརྟུལ་ཞུགས་ཏེ། །གཞན་ལ་གསང་སྔགས་སྦྱིན་བྱེད་པ། །བཞི་པ་ཡིན་ཏེ་གཞུང་གི་རིམ། །དེ་བཞིན་རབ་འབྱམས་རྟོག་པ་ནི། །བློ་ལྡན་རྣམས་ཀྱིས་ལྔ་བར་བཤད། །གང་ཡང་དམ་པའི་དོན་གསལ་བ། །རྣལ་མའི་སྦྱོར་བ་དྲུག་པ་སྟེ། སློབ་དཔོན་གྱིས་ནི་དེ་རབ་བསྟན། །ཉི་ཤུས་ལྷག་པའི་བརྒྱ་ཕྲག་གི །རབ་ཏུ་སྦྱོར་བ་བདག་གིས་མཐོང༌། ཞེས་འཆད་དེ། དང་པོ་བསྐྱེད་རིམ། གཉིས་པ་དབང་གི་ཡེ་ཤེས། གསུམ་པ་སྤྱོད་པ། བཞི་པ་དབང་ཆོག ལྔ་པ་ལས་ཚོགས། དྲུག་པ་རྫོགས་རིམ་སྟེ་དོན་སྡེ་ཚན་དྲུག་སྟོན་པའི་གཞུང་དྲུག་ཡིན་གྱི། སྤྱི་དོ་ཧ་ཕྲ་མོ་སོགས་བསྟན་བཅོས་མཐའ་དག་སྡོམ་པ་ལ། བརྒྱ་དང་ཉི་ཤུ་ཙམ་ཁོང་རང་གིས་གཟིགས་གསུང་ངོ༌། །ཡང་འཕྲོས་དོན་འདི་གོ་དགོས་ཏེ། རྡོ་རྗེའི་གླུ་བྱ་བ་དངོས་སུ་རྒྱུད་ལས་གསུངས་པའི་གླུ་ཁོ་ན་ལ་འཇོག་ཀྱང་གྲུབ་ཐོབ་ཡིན་ངེས་རྣམས་ཀྱི་ཉམས་ཤར་ཐོལ་བྱུང་གི་དོ་ཧ་རྣམས་ལའང་རྗེས་མཐུན་གྱི་དབང་ལས་རྡོ་རྗེའི་གླུ་ཞེས་ཟེར་བར་སྣང་བའང་མི་འགལ་ལོ། །ཡང་ཇོ་བོ་ནཱ་རོ་པ་རྗེས་འབྲང་དང་བཅས་པ་ནི། དཔལ་འཁོར་ལོ་སྡོམ་པ་ཉིད་ཀྱི་བཀས་གནང་བའི་ཕྱིར་འཁོར་ལོ་སྡོམ་པ་ཁོ་ནའི་དགོངས་འགྲེལ་དྲུག་ཡིན་མོད།


TNT17_Page_0215
[མ་དཔེ་གཟིགས་ན་འདིར་གནོན།]

འོན་ཀྱང་ཆ་ཤས་ཕྲ་མོ་ཙམ་ནས་རྩི་དགོས་པ་མ་ཡིན་པས་གཞུང་གི་གཙོ་པོ་དྲུག་གོ །དེ་ཡང་དབང་ཆོག་དང༌། སྒྲུབ་ཐབས་དང༌། སྦྱིན་སྲེག་དང༌། དཔྱིད་ཀྱི་ཐིག་ལེ་དང༌། རིམ་པ་བཞི་པ་དང༌། གསང་བའི་དེ་ཁོ་ན་ཉིད་དེ་དྲུག་གོ་གསུང་ངོ༌། །ད་ལྟ་བོད་ན་ཡོད་པའི་སྦྱིན་སྲེག་གི་ཆོ་ག་འདི། སློབ་དཔོན་ཆེན་པོའི་གསུང་དངོས་མ་ཡིན་པར། མར་དོ་ལོ་ཙཱ་བ་བཞེད་པ་ནི་དེ་བཞིན་ཡིན་ཏེ། སྔོན་སློབ་དཔོན་གྱིས་སྦྱིན་སྲེག་གི་ཆོ་ག་ཞིག་མཛད་ཀྱང༌། བར་སྐབས་སུ་དཔེ་ནུབ་པས་ཕྱིས་རྗེས་འབྲང་གི་སློབ་དཔོན་གཞན་གྱིས་དེའི་ཚབ་ཏུ་རྩམས་པའོ། །དཔེར་ན་སློབ་དཔོན་སངས་རྒྱས་ཡེ་ཤེས་ཀྱིས་ཀྱང༌། ལུང་དང་མཐུན་པའི་ཆོས་བཅུ་བཞི་མཛད། དེའི་ནང་ན་དབང་ཆོག་ཡོད་ཀྱང་ཁ་ཆེའི་ཡུལ་དུ་ཁྱེར་ནས་དཔེ་ནུབ་པས། དེའི་དོད་དུ་མར་མེ་མཛད་ཀྱིས་བཞི་བརྒྱ་ལྔ་བཅུ་པ་བརྩམས་པ་ལྟ་བུའོ། །ཡང་པཎྜི་ཏ་ག་ཡ་དྷ་ར་ནི། གཞུང་དྲུག་ཅེས་པ་རྫོགས་རིམ་གྱི་གཞུང་སྟེ། སྡོམ་པ་བཤད་པ། སྙིང་པོ་བསྡུས་པ། ཕྱག་རྒྱ་ཐིག་ལེ་རྣམ་ཀྱང་བགྲངས་ནས། སྡོམས་དྲུག་གི་ཐ་སྙད་མཛད་དོ། །འོན་ཀྱང་གཞུང་ཕྱི་མ་གསུམ་པོ་དེ་སློབ་དཔོན་ཆེན་པོ་འདིས་མཛད་པ་མིན་པས། གཞུང་དྲུག་ལ་བགྲོང་པ་མི་འཐད་མོད། ནག་པོ་པའི་རྗེས་འབྲང་གི་ཆོས་སྐོར་ངོ་མཚར་ཅན་ནི་ཡིན་ཏེ། མཛད་པ་པོ་ཡང་སློབ་དཔོན་གྲུབ་ཐོབ་སྤྱོད་ཆུང་བ་ཉིད་དོ། །སྤྱིར་སློབ་དཔོན་འདིས་མཛད་པའི་བསྟན་བཅོས་གཞན་མང་པོ་ཡོད་པ་ནི་བདེན་ནོ། །ཡང་སྔར་ཕམ་ཐིང་པ་མལ་ལོ་སོགས་ནས་བརྒྱུད་པའི་ལོ་རྒྱུས་ལ། བྷངྒ་ལར་རྒྱལ་པོ་རོལ་བའི་


TNT17_Page_0216
[མ་དཔེ་གཟིགས་ན་འདིར་གནོན།]

ཟླ་བ་འདུལ་བར་བྱོན་པའི་སྐབས་དེའི་སྔོན་དུ། ཡུལ་དབུས་ནས་ཤར་ཕྱོགས་ལ་འབྱོན་པའི་ལམ་ཀ་རྣམས་སུ། རྡོ་རྗེ་ཕག་མོ་མཛེ་མོའི་རྣམ་པ་དང༌། ཤིང་ཐོག་བསྲུང་བའི་བུ་མོར་སྤྲུལ་པ་དང༌། དཔལ་ཧེ་རུ་ཀ་ཐོད་མཁན་དང༌། གློག་དར་མཁན་དུ་སྤྲུལ་པས་སྤྱོད་པའི་དུས་མ་ཡིན་ཞེས་བཟློག་པ་དང༌། བྷངྒ་ལ་ཕེབས་ནས་རྒྱལ་བློན་གྱིས་བྲིས་སྐུ་ལ་ཞག་བདུན་མཆོད་པའི་བར་དེར། སློབ་དཔོན་དུར་ཁྲོད་དུ་ཚོགས་འཁོར་ལ་བྱོན་པ་ན། ཏིརྟི་ཀ་སྟེ་མུ་སྟེགས་པའི་ཚུལ་མི་སྔོན་པོ་ཐོད་པ་འཛིན་པ་ཅིག་བྱུང་ནས། ངས་ཚོགས་དཔོན་བྱེད་ཟེར་བ་ལ་ཁྱོད་ཀྱིས་མི་རུང་བྱས་པས། དེ་དཔལ་ཧེ་རུ་ཀར་གྱུར་ནས་ནམ་མཁའ་ལ་འཕགས་ཏེ། མཛེ་མོ་དེ་ཡང་མཛེ་མོ་མ་ཡིན་རྡོ་རྗེ་ཕག་མོའི་རྣམ་འཕྲུལ་ཏེ། ཞིང་རྨོད་དེ་ཡང་ཞིང་རྨོད་མ་ཡིན་ཧེ་རུ་ཀ་ཡི་རྣམ་སྤྲུལ་ལོ། །བུ་མོ་དེ་ཡང་བུ་མོ་མ་ཡིན་རྡོ་རྗེ་ཕག་མོའི་རྣམ་སྤྲུལ་ལོ། །ཀློག་མཁན་དེ་ཡང་ཀློག་མཁན་མ་ཡིན་ཧེ་རུ་ཀ་ཡི་རྣམ་འཕྲུལ་ལོ། །ཐོད་པ་ཅན་ཡང་ཐོད་པ་ཅན་མིན་ཧེ་རུ་ཀ་ཡི་སྤྲུལ་པའོ། །ཚེ་འདིར་མཆོག་མིན་གཞུང་དྲུག་རྩོམས་ཤིག་བར་དོར་མཆོག་གི་དངོས་གྲུབ་ཐོབ། །ཅེས་གསུངས་པ་ལ། སློབ་དཔོན་གྱིས། ཁྱོད་ཀྱི་ཞབས་གཉིས་མཉམ་པར་མནན་ན་འོག་གི་ཀླུ་ཡང་འཇིག་འགྱུར་ཞེས་ཏེ་ཐུགས་རྗེས་ཞབས་གཡོན་བསྐུམ་པར་མཛད། །དབུ་ཡི་གཙུག་ཏོར་དྲང་པོར་བསྲངས་ན་ཚངས་པའི་འཇིག་རྟེན་འཇིག་འགྱུར་ཞེས་ཏེ་དབུ་ནི་ཅུང་ཟད་ཡོ་བར་གནས། ཁྱོད་ཀྱི་ཕྱག་རྣམས་དྲང་པོར་བསྲངས་ན་ཕྱོགས་སྐྱོང་རྣམས་ཀྱང་སྐྲག་འགྱུར་ཞེས་ཏེ་ཐུགས་རྗེས་ཕྱག་རྣམས་ཅུང་ཟད་བསྐུམ། །རྗེ་བཙུན་ཁྱོད་ཀྱི་སྐུ་ཡི་གར་ནི་


TNT17_Page_0217
[མ་དཔེ་གཟིགས་ན་འདིར་གནོན།]

དགོས་པ་དང་ལྡན་མཐོང་བས་དད་དེ་མཆོག་ཏུ་གུས་པས་འདུད། །ཅེས་བསྟོད་པས་མི་སྣང་བར་གྱུར། ཅེས་ཟེར་བར་སྣང༌། ཚིག་བཅད་རྟིང་མ་འདི་རྒྱ་གར་བའི་ངག་སྒྲོས་ཅིག་ཡིན་པར་འདུག བཅོམ་ལྡན་འདས་ཀྱིས་གསུངས་པར་བྱེད་པའི་ཚིག་སྔ་མ་དྲུག་བོ་རྣམས་བོད་ཚིག་ཏུ་གསལ། སྔར་བཤད་མཛེ་མོ་སོགས་ཀྱིས་དེ་བཱི་ཀོ་ཊར་བགྲོད་པ་ལས་བཟློག་པ་ཡིན་ན་མི་འགལ་མོད་ཀྱང༌། བརྟུལ་ཞུགས་ཀྱི་སྤྱོད་པ་ལས་བཟློག་པ་ནི་མི་བདེན་ཏེ། གྲུབ་པའི་སློབ་དཔོན་མཆོག་གི་བཀས་གནང་ནས། ཡི་དམ་མམ་མཁའ་འགྲོས་བཟློག་པ་ནི་འགལ་ཞིང༌། ཅི་སྟེ་བཟློག་དགོས་ཀྱང༌། སྤྱོད་པ་ལ་མ་ཞུགས་པའི་སྔོན་རོལ་ནས་བཟློག་པ་འོས་ཀྱི། སྐབས་དེར་སྤྱོད་པ་སྤྱད་ནས་ཡུན་རིང་ལོན་ཟིན་པ་ལ་བཟློག་ཀྱང་དགོས་པ་མེད་པའི་ཕྱིར་རོ། །ཐོད་མཁན་དང༌། ཀློག་མཁན་དང༌། ཐོད་པ་ཅན་རྣམས་ཀྱི་ལོ་རྒྱུས་འདི་སྒྲུབ་པ་པོ་གཞན་ལ་བྱུང་བ་ཡིན་གྱི། སློབ་དཔོན་འདིའི་ལོ་རྒྱུས་མིན་ནོ། །ཡང་བཤད་པ། སྤྱིར་དངོས་གྲུབ་ཆེན་པོ་ཁྱད་པར་ཅན་བརྙེས་པའི་གྲུབ་ཐོབ་རྣམས། གྲུབ་པའི་ས་དེ་བརྙེས་ཕྱིན་ཆད། ཡི་དམ་ལྷག་པའི་ལྷ་ཐམས་ཅད་འགྲུབ་པ་ཡིན་ལ། རྒྱུད་ཐམས་ཅད་ཀྱི་དགོངས་པའང་རྟོགས་པ་ཡིན་པས། ལྷ་སོ་སོ་དང་རྒྱུད་སོ་སོའི་ཕྱོགས་རིགས་སུ་བཅད་པ་མི་འབྱུང་བས། སློབ་དཔོན་འདི་ཡང་ལྷ་དང་རྒྱུད་ཀུན་གྱི་བདག་པོ་ཡིན་མོད་ཀྱི། སྔོན་དངོས་གྲུབ་མ་ཐོབ་པའི་དུས། དཔལ་འཁོར་ལོ་སྡོམ་པ་ཉིད་ཀྱི་སྒྲུབ་པ་པོ་ཡིན་ཅིང༌། ཕྱིས་དངོས་གྲུབ་བརྙེས་ནས་ཀྱང་བསྟན་བཅོས་མཛད་པ་གྲགས་ཆེ་བ་རྣམས། འཁོར་ལོ་


TNT17_Page_0218
[མ་དཔེ་གཟིགས་ན་འདིར་གནོན།]

སྡོམ་པའི་དགོངས་འགྲེལ་ཤས་ཆེ་བས་འདི་ཉིད་རྒྱུད་དེའི་ལུགས་ལ་གྲུབ་པ་ཐོབ་པ་ཡིན་པར་ཐམས་ཅད་འདོད་པ་མཐུན། དེའི་སྟེང་དུ་ལྷག་ཆོས་ལ། རྒྱ་གར་བའི་དགྱེས་རྡོར་བ་རྣམས་དང༌། གསང་འདུས་པ་རྣམས་དང༌། གཤིན་རྗེ་གཤེད་ནག་པོ་མཁན་རྣམས་ཀྱང་རྒྱུད་དེ་དང་དེའི་སྒྲུབ་པ་པོ་ཡིན་ནོ་ཞེས། སློབ་དཔོན་འདི་ལ་སུ་ཐོབ་ཀྱི་ཚུལ་དུ་བྱེད་མོད་ཀྱི། དོན་ལ་དེ་ཐམས་ཅད་ཡིན་པས་འགལ་བ་མེད་དེ། རྒྱུད་དེ་དག་གི་ཆོས་རྒྱུན་ལ། སློབ་དཔོན་འདི་བཞུགས་པའང་མང་དུ་ཡོད་ཅིང༌། གཞན་ཡང་མཧཱ་མཱ་ཡའི་དཀྱིལ་ཆོག་རིམ་པ་གསལ་བ་དང༌། སངས་རྒྱས་ཐོད་པའི་དཀྱིལ་ཆོག་ས་ར་ཧས་མཛད་པར་གྲགས་པ་སོགས་ཀྱང་སློབ་དཔོན་འདིའི་རྗེས་འབྲང་གི་གཞུང་ཡིན་པར་དངོས་སུ་གྲུབ་པས་མཚོན་ཏེ་མཐའ་ཡས་པར་དག་གོ །སློབ་དཔོན་འདིའི་སློབ་མ་སངས་རྒྱས་ཀྱིས་ལུང་བསྟན་པ་དག་གི་དང་པོ། ཨེ་ཡ་ལ་པ་ནི།སློབ་དཔོན་ཆེན་པོ་ཡུལ་ཛ་ལནྡྷ་ར་ནས་སྤྱོད་པ་ལ་མི་འབྱོན་ཙམ་གྱི་དུས་ཤིག་རྒྱལ་པོ་ཞིག་གི་གླང་པོ་ཆེ་སྐྱོང་བའི་བུ་གཅིག་རྣལ་འབྱོར་པ་བྱས་ཤིང་བསྒོམས་པས། མི་རིང་བར་ལུས་ཤིན་ཏུ་ཡང་བ་ཐོབ་སྟེ། ཞབས་ས་ལ་མི་རེག་པར་གཤེགས་སོ། །ཕལ་ཆེར་བླ་མའི་ཕྱག་གཡོག་ཏུ་ཡོད་པའི་ངང་ནས་རིག་པ་བརྟུལ་ཞུགས་ཀྱི་སྤྱོད་པ་མཛད་དེ། ཡང་ཕྱིས་སྡོམ་པའི་རྒྱུད་ལས་བཤད་པའི་ལས་ཀྱི་ཕྱག་རྒྱ་ཆེན་པོ་གྲུབ་སྟེ། དེའི་རྟགས་སུ་ཡུལ་གྱི་བུད་མེད་ངན་མ་མང་པོ་དག་ལ་ཡེ་ཤེས་ཕབ་ཅིང་བསྒྲུབས་པས་ཐམས་ཅད་གཟུགས་དང་སྐལ་བ་མཆོག་དང་ལྡན་ཅིང་འབར་སྣང་ཅན་དུ་སོང༌། དེ་འདྲ་བརྒྱ་ཉི་ཤུས་ཚོགས་ཀྱི་དཀྱིལ་འཁོར་ཡང་བྱས། ཡང་


TNT17_Page_0219
[མ་དཔེ་གཟིགས་ན་འདིར་གནོན།]

ཡུལ་ཨ་ལ་ཀ་ན་ལོག་ལྟའི་རྒྱལ་པོ་མ་ཧུ་བ་ཟེར་བ་ཅིག་གི་སར་བྱོན། ཁྱེད་ཀྱི་ཆོས་ལ་ཡིད་ཆེས་ཅི་ཡོད་ཟེར། ཁྱོད་ཉིད་གང་འདོད་བྱས་པས། གསེར་ལ་དགའ་ཟེར། སློབ་དཔོན་འདིས་སྣོད་ཆེན་པོ་གཅིག་ནམ་མཁའ་ལ་བཟེད་པས་གསེར་གྱིས་གང༌། རྒྱལ་པོ་དེ་ཡ་མཚན་སྐྱེས་ནས་ཆོས་ལ་ཞུགས་སོ། །ཕྱིས་སློབ་དཔོན་སྤྱོད་པ་བ་ཏཾ་བ་ལའི་ཡུལ་དུ་བཞུགས་དུས་གཅིག་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་སྟེ་འཇའ་ལུས་སུ་གྱུར་ཏོ། །འདི་ནི་དཔྱིད་ཀྱི་ཐིག་ལེ་ཁོ་ན་བསྒོམས་པས་གྲུབ་པ་ཐོབ་པའོ། །གཉིས་པ་མ་ཧི་ལ་པ་ནི། ཡུལ་ནི་མ་ལ་བར་འཁྲུངས་ཟེར། རིགས་དམངས་རིགས་ལུས་སྟོབས་ཤིན་ཏུ་ཆེ་བ་ཞིག་ཡོད་དེ། ལག་པ་ཡ་རིས་གོ་ཡུ་དང༌། ན་རི་ཀེ་ལའི་ཤིང་སྡོང་རྩ་བ་ནས་འབྱིན་ནུས་ཟེར། དེར་སྐྱེ་བོ་ཐམས་ཅད་ལུས་སྟོབས་ཀྱིས་ཕམ་པར་བྱེད་པ་ཅིག་ཡོད་པ་ལས། ལན་ཅིག་སློབ་དཔོན་སྤྱོད་པ་པ་ལས་ཞིག་ལ་ཕེབས་པ་ལ། ལུས་སྟོབས་འགྲན་ནོ་བྱས་ནས་འོངས་པ་ན་སློབ་དཔོན་གྱི་ཕྱག་གཡོན་པའི་སོར་མོ་གཅིག་རེག་པས། ཁོང་གི་ལུས་སྟོབས་ཐམས་ཅད་ཉམས་ཏེ་དེར་འགྱེལ་ལོ། །དེ་ནས་ང་རྒྱལ་ཆག་སྟེ་རྣལ་འབྱོར་པ་བྱས། ཁ་ཟས་ཉུང་ངུའི་དཀའ་ཐུབ་སྤྱད་དེ། ལོ་བཅུ་གཉིས་འཁོར་ལོ་སྡོམ་པ་བསྒོམས་པས་མཆོག་གི་དངོས་གྲུབ་ཉམས་འོག་ཏུ་ཆུད། ཡུལ་སཽ་རཥྟར་མུ་སྟེགས་ཀྱི་གནས་ཅིག་ན་བྲམ་ཟེ་དང་ཀུན་ཏུ་རྒྱུ་ལྔ་བརྒྱ་ཙམ་ཡོད་པ་ལ། དེར་བྱོན་ནས་སློང་མོ་བྱས་པས་དེ་རྣམས་ཀྱིས་བཞད་གད་བྱེད་ཅིང་འཕྱའོ། །དེར་ནི་ཏྲ་ཨ་བོ་ལི་ཞེས་པ་སྟེ་གཉིད་ཤོག་ཅིག་པ་ལན་མང་


TNT17_Page_0220
[མ་དཔེ་གཟིགས་ན་འདིར་གནོན།]

དུ་གསུངས་པས། དེ་རྣམས་ཐམས་ཅད་གཉིད་དུ་སོང༌། ཞག་བདུན་གྱི་བར་དུ་མ་སད་དོ། །དེར་གཞན་རྣམས་ཀྱིས་ནུས་པ་དཀྲོལ་བར་ཞུས་པས། ཕྱག་སེ་གོལ་གཏོག་པས་ཐམས་ཅད་གཉིས་སད་དོ། །དེ་ནས་ངོ་མཚར་སྐྱེས་ནས་དེ་རྣམས་སློབ་དཔོན་མ་ཧི་ལའི་ཞབས་ལ་གཏུགས། སངས་རྒྱས་ཀྱི་བསྟན་པ་ལ་ཞུགས་ཤིང༌། དེ་དག་གི་ནང་ནས་དངོས་གྲུབ་ཐོབ་པ་ཡང་མང་དུ་བྱུང་ངོ༌། །གསུམ་པ་དྷ་མ་པ་ནི། ཡུལ་མཧཱ་རཥྟ་བ། དང་པོ་བྲམ་ཟེའི་རིགས་མང་དུ་ཐོས་པ་ཞིག་ཡིན། དེ་ནས་སློབ་དཔོན་གྱི་དྲུང་དུ་བྱོན་བླ་མས་ཀྱང་དབང་བསྐུར་ཞིང་རྒྱུད་བྱིན་གྱིས་བརླབས། འདིས་ཐོག་མ་བཅོམ་ལྡན་འདས་གཤིན་རྗེ་གཤེད་ཞལ་གཟིགས། ནུས་པ་ཅུང་ཟད་ཐོབ་ནས་སློབ་དཔོན་སྤྱོད་འཆང་དབང་པོའི་འཕྲལ་གྱི་རིམ་གྲོ་པ་མཛད། བླ་མ་ཕན་ཚུན་དུ་གཤེགས་ཤིང་བཞུད་པ་ན། དྷ་མཱ་མ་སྟེ་རྔ་ཟླུམ་བརྡུང་བ་པོ་ཡུན་རིང་དུ་མཛད་པས་དྷ་མ་པར་གྲགས་སོ། །དེ་ནས་ཡུན་རིང་ཞིག་ལོན་པ་ན། ལན་ཅིག་བསྒོམ་ཞིང་བཞུགས་པའི་དུས། རང་གི་མདུན་དུ་ཐོད་པ་དཀར་ཙེར་རེ་བ་ཅིག་བྱུང༌། དེ་ཕྱག་ཏུ་བླངས་པ་ན་དེའི་ནང་ན་མི་གཙང་བ་ལྗན་ལྗིན་སྣ་ཚོགས་ཀྱིས་གང་བ་འདྲ་བ་ཞིག་འདུག རྣམ་རྟོག་མེད་པར་དེ་གསོལ་བས། རྩིག་པ་ལ་ཐོགས་པ་མེད་པ་དང༌། དཔག་ཚད་བརྒྱ་ཕྲག་མང་པོ་ཡུད་ཙམ་གྱིས་བགྲོད་ནུས་པ་བྱུང༌། ཕྱིས་ཕྱག་རྒྱ་ཆེན་པོ་མཆོག་འགྲུབ་བོ། །བཞི་པ་དྷུ་མ་པ་ནི། ཡུལ་སྐད་དུ་ཤར་ཕྱོགས་ར་ར་ཟེར། ལེགས་སྦྱར་སྐད་དུ་ར་དྷའི་ཡུལ་ཏེ་དེར་འཁྲུངས། རིགས་ནི་ཚོང་དཔོན་གྱི་བུ་ཡིན། གནས་གཞི་


TNT17_Page_0221
[མ་དཔེ་གཟིགས་ན་འདིར་གནོན།]

ཅིག་ཏུ་རབ་ཏུ་བྱུང་ནས། སྤྱན་རས་གཟིགས་ཀྱི་རྣལ་འབྱོར་བ་ཞིག་ལ་དབང་ཞུས་ནས་བསྒོམ་ཞིང་འདུག་གོ །སློབ་དཔོན་སྤྱོད་པའི་རྡོ་རྗེ་འཁོར་བཅས་ལམ་ལ་འབྱོན་པ་མཐོང་ནས། དད་པ་སྐྱེས་ནས་ཕྱི་བཞིན་འབྲངས་སོ། །ལན་ཅིག་སློབ་དཔོན་གྱི་ཞབས་ལ་ཕྱག་འཚལ་དུ་ཕྱིན་པས། ཁྱོད་ཀྱིས་སྤྱན་རས་གཟིགས་བསྒོམས་སམ་གསུང༌། བསྒོམས་ཞུས་པས། འོ་ན་ཞལ་བལྟ་བར་འདོད་དམ་གསུང༌། འདོད་ཞུས་པས། འོ་ན་འདི་ལ་ལྟོས་ཞེས་མཛུབ་མོས་སྟོན་པར་མཛད་དེ། བལྟས་པས་ནམ་མཁར་འཕགས་པ་ལྷ་ལྔ་འོད་ལམ་མེ་མཐོང༌། ཤིན་ཏུ་དགའ་བས་བྲོ་འཁྲབས། ཞག་མང་པོར་ཏིང་ངེ་འཛིན་ཐུན་གཅིག་ལ་གནས་པ་བྱུང༌། དེ་སད་ཙ་ན་རྐང་མགྱོགས་ཀྱི་དངོས་གྲུབ་ཐོབ་སྐད། འདི་ཡང་སློབ་དཔོན་ཆེན་པོའི་རིམ་གྲོ་པ་གོ་རེ་ལོང་བྱས་ཏེ། རྔ་པ་ཊ་ཧ་བརྡུང་བ་དང༌། འབུད་དཀྲོལ་གྱི་བྱ་བ་མང་དུ་མཛད་པས། རོལ་མོའི་སྒྲ་ལས་བརྟགས་ཏེ་མཚན་དྷུ་མ་པར་གྲགས། འདི་རྡོ་རྗེ་བདག་མེད་མའི་རྣལ་འབྱོར་བསྒོམས་པས་མཆོག་ཐོབ་པ་ཡིན་ཡང་ཟེར། གང་ལྟར་རྒྱུད་དགྱེས་རྡོར་ལ་བརྟེན་ནས་གྲུབ་པ་ཐོབ་སྐད། སློབ་དཔོན་ཆེན་པོས་རྒྱལ་པོ་གོ་བོ་ཙནྡྲ་བཏུལ་བའི་དུས་དེ་ཙམ་ནས་གཟུང༌། དྷ་མ་དྷུ་མ་འདི་གཉིས་ཀྱིས་ལོ་མང་པོ་ཞིག་ཏུ་ཉེ་གནས་རིམ་འགྲོ་པ་ཁོ་ན་མཛད། ལན་ཅིག་ཨོ་རྒྱན་དང་ཉེ་བའི་ཡུལ་ཆུང་ཞིག་ན། ལྟ་བ་ལོག་པའི་རྒྱལ་པོ་སྐྱེ་བ་སྔ་ཕྱི་མེད་པར་འདོད་པ་ཅིག་ཡོད་པ་ལ། ཁོང་གཉིས་རྒྱལ་པོ་དེའི་དྲུང་དུ་ཕྱིན་པས། དེ་ན་རེ། སྐྱེ་བ་སྔ་ཕྱི་མེད་པ་ལ་ཁྱེད་རྣལ་འབྱོར་པ་བྱེད་པ་འཁྲུལ་ཟེར། སློབ་དཔོན་


TNT17_Page_0222
[མ་དཔེ་གཟིགས་ན་འདིར་གནོན།]

གཉིས་ན་རེ། སྐྱེ་བ་སྔ་མ་ཡོད་དེ་རྒྱལ་པོ་ཁྱེད་རང་སྐྱེ་བ་སྔ་མ་ཞིག་གདོལ་བར་སྐྱེས་པའི་དུས། རབས་ཆད་པས་གསེར་ཡོད་པ་རྣམས་རི་འདིའི་མཚན་རྟགས་འདི་ལྟ་བུར་སྦས་འདུག་པ། དེ་ཐོན་ཞིགདེ་དུས་ཀྱི་སྐྱེ་བ་དྲན་འོང་གསུང༌། དེས་ཀྱང་དེ་བཞིན་དུ་བྱས་པས་སྐྱེ་བ་དྲན། རྒྱལ་པོ་དེ་ཆོས་ལ་བཅུག་གོ །ཐོག་མར་དུག་སྦྲུལ་དང༌། གཅན་གཟན་དང༌། ཆོམས་པོ་ལ་སོགས་གདུག་པ་ཅན་རྣམས་རེངས་པ་དང༌། དབང་དུ་བྱེད་པ་ལ་སོགས་པའི་ལྟ་སྟངས་འགྲུབ་པ་ཅིག་ཡིན་པ། དེ་ནས་ཕྱིས་བྷངྒ་ལར་སློབ་དཔོན་ཆེན་པོས་རྒྱལ་པོ་རོལ་པའི་ཟླ་བ་བཏུལ་བའི་སྐབས་ཤིག་ན། དྷ་མ་དྷུ་མ་གཉིས་ཀ་འཇའ་ལུས་སུ་གྱུར། དེ་ཡང་ཐུན་མོང་ཙམ་མིན་མཆོག་འགྲུབ་པའོ། །ཡང་ཕྱིས་སློབ་དཔོན་ཆེན་པོ་སྐུ་འདས་དུས། དེ་གཉིས་མངོན་སུམ་དུ་བྱུང་ནས་གདུང་བའི་གླུ་དབྱངས་ཀྱང་བླངས། དེ་རྗེས་རྣལ་འབྱོར་པ་རྣམས་ཀྱི་མྱ་ངན་བསལ་བ་ཡང་བྱས། སྐལ་ལྡན་མང་པོ་ལ་གདམས་ངག་བསྟན་པས། རྒྱུད་གྲོལ་བ་ཡང་མང་དུ་བྱུང༌། མི་རྣམས་ཀྱིས་མཐོང་བར་ལོ་འགའ་བཞུགས་སོ། །ལྔ་པ་བྷ་དྲ་པ་ནི། སློབ་མ་ཀུན་གྱི་མཆོག་ཏུ་གྱུར་པ་སྟེ། སློབ་དཔོན་ནག་པོ་པ་ཡུལ་ཀ་ལིང་ཀར་ཕེབས་པའི་དུས། ཡུལ་དེའི་རྒྱལ་པོའི་བུ་གཞོན་ནུ་མིང་བྷ་དྲ་ཞེས་བྱ་བ་ཞིགསློབ་དཔོན་འཁོར་བཅས་ལ་ལྷག་པར་དད་དེ། སློབ་དཔོན་གྱི་སློབ་མ་ཞིག་དང་འགྲོགས་ནས་ཕྱི་བཞིན་དུ་སོང༌། གྲུ་གཟིངས་ལ་ཞུགས་ནས་རྣལ་འབྱོར་པ་མང་པོ་དང་ལྷན་ཅིག་སང་གྷ་ལར་སོང་ངོ༌། །གཞོན་ནུ་དེས་རིག་པའི་གནས་ཐམས་ཅད་ནི་སྔར་ནས་ཤེས། སློབ་དཔོན་གྱི་ཞབས་ལ་གཏུགས་ཏེ་


TNT17_Page_0223
[མ་དཔེ་གཟིགས་ན་འདིར་གནོན།]

རྗེས་སུ་འཛིན་པར་ཞུས་པས་སྐལ་ལྡན་དུ་མཁྱེན་ཏེ་དབང་བསྐུར་ཞིང་རྗེས་སུ་གདམས། དབང་བསྐུར་བ་ཙམ་གྱིས་ཡེ་ཤེས་དང་ལྡན་པར་གྱུར་མོད་ཀྱི། ཕལ་ཆེར་བླ་མའི་དྲུང་དུ་བཞུགས་ཤིང༌། བླ་མ་བསྟེན་པའི་སྒོ་ནས་དཀའ་བ་སྤྱོད་ཅིང་ཡུན་རིང་ལོན་ནོ། །ལན་ཅིག་ལམ་དུ་སོང་བ་ན། མུ་སྟེགས་ཀྱི་རྣལ་འབྱོར་པ་མང་པོས་ཁྱོད་སློབ་དཔོན་ཙརྱ་པའི་སློབ་མ་ཡིན་ན་ནུས་པ་ཡོད་དམ་ཟེར། ཀྱལ་ཀའི་ཚུལ་དུ་ཅུང་ཟད་ཡོད་ཅེས་གསུངས་པས། དེ་རྣམས་ཀྱིས་རྡོ་དང་དབྱུག་པ་དང་ཐོ་བ་ལ་སོགས་པ་བརྒྱ་སྟོང་བསྣུན་པས་སྐུ་ལུས་དར་བལ་གྱི་ཕུང་པོ་འདྲ་བ་བསྒྱུར། ཆུ་གྲི་ལ་སོགས་པའི་མཚོན་ཆ་སྣ་ཚོགས་བསྣུན་ཙ་ན་རྡོ་ངར་མ་དང་ཐུག་པ་བཞིན་དུ་མེ་སྟག་ཁྲོམ་ཁྲོམ་པ་བྱུང༌། དེ་ལྟར་ཆུ་ཚོད་གཅིག་གཉིས་སོང་བ་ན། སྔོ་ཙམ་པེ་ལི་ཞེས་ཀྱང་ཟེར། མེ་ཏོག་མ་ལི་ཀའི་སྡོང་པོ་ཅིག་ཕྱག་ཏུ་བསྣམས་ནས། དེ་རྣམས་ཉིད་ལ་བསྣུན་པས་ཐམས་ཅད་ཐང་ལ་རོ་བཞིན་དུ་འགྱེལ་ཏེ་ཤི་བ་ལྟར་སོང་ངོ༌། །ཞག་གཅིག་ལོན་པ་གཞན་རྣམས་ཀྱིས་གསོལ་བ་བཏབ་སྟེ་སླར་གསོས་སོ། །དང་པོར་དབང་བསྐུར་ཐོབ་མ་ཐག་ཡེ་ཤེས་སྐྱེས་ཀྱང༌། འདི་ལྟ་བུའི་རྟགས་མ་བསྟན་གྱི་བར་དུ། ནུས་པ་ཐོབ་པར་སུས་ཀྱང་མ་ཤེས་པས། གུ་ཧྱ་པ་སྟེ་གསང་བ་པ་ཞེས་གྲགས། དེའི་གོ་བ་ནི་སྦས་པའི་རྣལ་འབྱོར་པའོ། །དེ་ནས་མི་རིང་བ་ན། ཕྱག་རྒྱ་ཆེན་པོ་མཆོག་གི་དངོས་གྲུབ་ཉམ་འོག་ཏུ་ཆུད་པ་ཡིན། འོན་ཀྱང་རེ་ཞིག་བླ་མ་བཞུགས་ཀྱི་བར། མི་སྣང་བར་གྱུར་པའི་ཆོ་འཕྲུལ་མ་བསྟན་སློབ་དཔོན་སྤྱོད་པ་པ་སྐུ་འདས་ནས། སློབ་མ་རྣམས་ཀྱིས་ས་ཕྱོགས་


TNT17_Page_0224
[མ་དཔེ་གཟིགས་ན་འདིར་གནོན།]

དེར་མཆོད་རྟེན་དང་ལྷ་ཁང་ཞིག་ཀྱང་བཞེངས་སོ། །དེ་དག་གི་བྱ་བ་ཡང་མི་ཕལ་བ་བཞིན་དུ་མཛད། དེ་ནས་བླ་མའི་སྐུ་ཚེ་ལ་བར་དུ་གཅོད་པར་བྱེད་པའི་གདུག་པའི་མཁའ་འགྲོ་མ་དེ་གང་ན་འདུག་ཅེས་འཚོལ་བར་བཞུད་དེ། རྫུ་འཕྲུལ་གྱིས་གནས་ཆེན་གཞན་ཐམས་ཅད་དང༌། དུར་ཁྲོད་ཐམས་ཅད་དུ་བཙལ་ཡང་མ་རྙེད་དོ། །དེ་ནས་མངོན་ཤེས་ཀྱིས་རིང་དུ་བརྟགས་པས། དེ་བཱི་ཀོ་ཊའི་གནས་དེ་ཉིད་ན། སི་མི་ལི་ཟེར་བའི་ཤིང་ཞིག་གི་ཁོང་སྟོང་ན་སྲིན་འབུ་ལ་སོགས་ལུས་གཞན་སྣ་ཚོགས་སུ་བསྒྱུར་ནས་ཡིབ་ཅིང་སྡོད་པ་གཟིགས་སོ། །དེ་ནས་ཏིང་ངེ་འཛིན་གྱིས་སྤྲུལ་པའི་རལ་གྲིས་ཤིང་སྡོང་དེ་གཤགས་ཏེ། མཁའ་འགྲོ་མ་དེའི་ཅོ་ཏོ་ནས་བཟུང་སྟེ། ཕྱི་མི་མོའི་ལུས་ཀྱི་དབྱིབས་དེ་རལ་གྲིས་དུམ་བུར་གཏུབས་ནས། རྡོ་རྗེ་མཁའ་འགྲོ་མ་རྣམས་ལ་བཟའ་བར་སྦྱིན། སྤྲུལ་གཞི་ལྷ་སྲིན་མོ་དེ་ཡེ་ཤེས་སྤྲུལ་པའི་མེ་འོད་ཀྱིས་བསྲེགས་ཏེ་ཚར་བཅད་དོ། །དེ་ནས་རྡོ་རྗེའི་གླུ་བླངས་ཤིང༌། ཆེད་དུ་བརྗོད་ནས་རེ་ཞིག་མི་སྣང་བར་གྱུར་ཏོ། །སླད་ཀྱི་ལོ་འགའ་ལོན་པ་ན། ཡུལ་ཛ་ཊ་སངྒྷ་ཊར་བྱོན། དེ་ན་རྒྱལ་པོ་ཨརྫུ་ན་དཏྟ་ཟེར་བ་ཕྱི་བ་ཅིག་ཡོད། དེས་སྤྱོད་པ་པའི་སློབ་མ་མཆོག་ཅིག་བྱུང་ཟེར་བ་ཐོས་ནས། རྒྱང་རིང་པོ་ནས་བལྟས་ན། སྒྲ་དང༌། འོད་དང༌། ས་གཡོ་བ་དང༌། འཚུབས་མ་དང༌། མེ་འབར་བ་སོགས་ཀྱི་བན་བུན་ལས་མ་མཐོང་ཉེ་བར་སླེབ་པ་ན་དེའི་གསེབ་ནས་རྣལ་འབྱོར་པ་ཅིག་བྱུང་ངོ༌། །རྒྱལ་པོ་ངོ་མཚར་སྐྱེས། མཆོད་གནས་མུ་སྟེགས་པ་རྣམས་ཀྱིས་བཀག་ཀྱང་མ་ཉན་པར། ཕོ་བྲང་གི་ཕྱི་རོལ་ཏུ་སོང་ནས་སློབ་དཔོན་གུ་ཧྱ་པའི་ཞབས་ལ་གཏུགས་སོ། །ཡུན་རིང་དུ་མཆོད་པར་བྱས་ཤིང༌། སྐབས་ཤིག་


TNT17_Page_0225
[མ་དཔེ་གཟིགས་ན་འདིར་གནོན།]

འཇིག་རྟེན་པའི་ལྷ་ཁང་ཞིག་ཏུ་ཚོགས་འཁོར་མཛད་གསུང་ཚོགས་རྫས་བསྣམས་ཏེ་བཞུད། སྒོ་བསྡམས་ཏེ་སུ་ཡང་མི་གཏོང་བར་འདུག་པ་ལ། ལན་ཅིག་སྒོ་གསེང་ཅིག་བྱུང༌། རྒྱལ་པོས་བལྟས་པས། རྡོ་རྗེ་སེམས་དཔའ་ལྷ་སུམ་ཅུ་རྩ་བདུན་དུ་བཞེངས་པར་མཐོང་སྐད། དེར་རྒྱལ་པོས་མཐོང་བ་དང་མཐུན་པའི་ལྷ་ཁང་བཞེངས་པར་ཞུས་པས། དེ་ལྟ་བུ་སྐལ་མེད་ཀྱི་བལྟར་མི་རུང་བས། བཀཽད་པ་དེ་ལྟ་བུ་ལ་ཆགས་བྲལ་གྱི་སྐུ་བཞེངས་ན་ལེགས་གསུང༌། གཙོ་བོ་བཅོམ་ལྡན་འདས་དེ་བཞིན་གཤེགས་པ་ཤཱཀ་ཐུབ་ཀྱིས་མཛད་པའི་ལྷ་ཁང་ཅིག་བཞེངས། དེ་ལ་མིང་བུདྡྷ་སྠཱ་པ་ན་སྟེ། སངས་རྒྱས་གནས་གཞི་ཟེར་བ་ཡིན། ཡུལ་དེ་ན་ལྷ་ཁང་གཞན་ཐམས་ཅད་མུ་སྟེགས་པའི་ཡིན་པས་དེ་ལ་སངས་རྒྱས་ཀྱི་གནས་གཞིར་ཐོགས་པའོ། །ལྷ་ཁང་འདིའི་ངོ་དོད་ད་ལྟ་ཡང་ཡོད། ཡང་ལན་ཅིག་ཁ་ཆེའི་ཡུལ་དུ་ཏུ་རུ་སྐ་མ་ན་ཞེས་བྱ་བར། རྒྱལ་པོ་ཀླ་ཀློར་གྱུར་པ་ཅིག་གི་དམག་བྱུང་སྟེ། ཁ་ཆེའི་ཡུལ་མཐའི་མི་རྣམས་ཐམས་ཅད་བྲོས། རྒྱལ་པོ་འཁོར་བཅས་ཀྱིས་འཁྲུགས་ཀྱང་ཐུབ་པར་དཀའ་བ་ལ། སློབ་དཔོན་འདི་ཉེ་སྐོར་ན་བཞུགས་པ་ལ་གསོལ་བ་བཏབ་པས། རི་དྭགས་རུ་རུའི་རྭ་དུང་ཞིག་ལ་སྔགས་ཀྱིས་བཟླས་ཤིང་བྱིན་གྱིས་བརླབས་ནས། རྒྱལ་པོ་ལ་གཏད་དེ། ཕན་ཚུན་གཡུལ་བཤམས་པའི་ཚེ། འབུད་དཀྲོལ་དང་ལྷན་ཅིག་འདི་བུས་ཤིག་གསུང་དེ་ནས་དེ་བཞིན་བྱས་པས། ཀླ་ཀློའི་དམག་མི་མང་པོ་ནི་བརྒྱལ་ཞིང་མྱོས། ཕལ་ཆེར་ནི་རྣ་བ་འོན། རྟ་ཐམས་ཅད་སུས་ཀྱང་བཟུང་མི་ཐུབ་པར་རྒྱུག་ཅིང་བྲོས་སོ། །དེར་ཀླ་ཀློའི་དཔུང་རྨེག་མེད་པར་


TNT17_Page_0226
[མ་དཔེ་གཟིགས་ན་འདིར་གནོན།]

གྱུར། ཁ་ཆེའི་རྒྱལ་པོའི་དམག་གིས་ཡུལ་དེ་ཡང་མནན་ཏེ་ཆོས་དབུ་འཕང་མཐོ་བར་མཛད་དོ། །དེ་སྐབས་ཀྱི་ཁ་ཆེའི་རྒྱལ་པོ་ནི་ཧརྵ་དེ་བ་ཡིན་པར་གྲགས། བློན་པོའི་བུ་ཤིན་ཏུ་རྨོངས་པ་བློ་ཞན་པ་རྡུལ་བ་ཞིག་གིས། རྭ་དུང་དེ་བླངས་ཏེ་འགའ་རེར་བུས་པས་སྐད་ཅིག་དེ་ལ་སྐད་དང་བསྟན་བཅོས་མཐའ་དག་ཤེས་པ་ཅིག་བྱུང་མིང་ལ་སྭཱ་ཡམྦྷུ་ར་ཛ་ཟེར་ཏེ། ཕྱིས་ཁ་ཆེའི་ཡུལ་གྱི་ཀློག་དང་ཡི་གེ་དང་བརྡ་སྤྲོད་ཕལ་ཆེར་དེ་ལ་ཐུག་པ་ཡིན། སྨྲ་བ་ཆེས་མཁས་པ་ཅིག་བྱུང་བར་སྣང༌། གཞན་ཡང་སློབ་དཔོན་འདིས་ཡུལ་དེར། དིགས་པ་བརྒྱ་ཙམ་ལ་བྱིན་རླབས་མཛད་པས་མཁས་པར་སོང་བར་གྲགས། ཡང་ལན་ཅིག་དཔལ་ཨོ་རྒྱན་གྱི་གནས་སུ་བཞུགས་ཏེ། དེའི་ཚེ་ཨོ་རྒྱན་དང་ཉེ་བའི་བྱང་ཕྱོགས་ཤིག་ཏུ། སྔོན་མེད་པའི་མཚོ་གསར་བ་བརྡོལ། ཀླུ་གདུགས་པ་ཅན་ཨོ་རྒྱན་པ་རྣམས་ལ་གནོད་ཅིང༌། ཆོས་ལ་སྡང་བ་ཞིག་བྱུང༌། དེས་རྒྱུད་བསྐུལ་ནས། མ་ཁ་པའི་ཆོམ་པོའི་འཚེ་བ་ཡང་ཡང་ཡོང་བ་ཞིག་བྱུང་བ་ན། སློབ་དཔོན་འདིས་དེ་འདུལ་བར་དགོངས་ནས། འཁོར་འགའ་ཞིག་དང་བཅས་ཏེ་མཚོ་དང་ཉེ་བར་བཞུགས་སོ། །དེར་ཐོག་ལྷུང་བ་དང༌། ལྕེ་འབབ་པ་ཇི་ཙམ་བསྟན་ཀྱང༌། སློབ་དཔོན་འཁོར་བཅས་ལ་གནོད་པ་མེད་པར་མ་ཟད། ཕྱག་གིས་བླངས་ནས་ཞལ་དུ་གསོལ་ལོ། །ཆར་དྲག་པོ་མི་བཟད་པའི་ཤྭ་བརྒལ་ཁྲུ་ཉི་ཤུའི་དཔངས་ཙམ་བྱུང་ངོ༌། །འཁོར་བཅས་དེ་ལྟ་བུའི་རྦ་རླབས་ཀྱི་སྟེང་དུ་བྱོན་ནས། མཚོ་དེའི་སྟེང་དུ་བཞུགས་སོ། །དེར་སྲོག་ཆགས་གདུག་པ་ཅན་མི་ཟད་པ་དཔག་ཏུ་མེད་པ་འདུས་ནས་བྱུང་ཡང་སྣང་བ་མེད་པ་ལ་མཉམ་པར་བཞག་པས།


TNT17_Page_0227
[མ་དཔེ་གཟིགས་ན་འདིར་གནོན།]

ལ་ལས་མ་མཐོང༌། ལ་ལས་མཐོང་ཡང་རེག་ཐོགས་མེད་དེ། འཇའ་ཚོན་བཞིན་དུ་གྱུར་པས་ཅི་བྱར་ཡང་མ་བྱུང་ངོ༌། །ཇི་ཞིག་ལྟར་ན། སློབ་དཔོན་གྱིས་དགོངས་པ་བརྟད་པས་མཚོ་ཁོལ། འགྲམ་ཕྱོགས་གཅིག་གི་ས་སྒངས་རྣམས་དྲལ་ཏེ། ཆུ་རྣམས་ཕྱིར་ཕོ་བས་མ་ཁ་བའི་རྟ་བ་མང་པོའང་ཁྱེར། མཚོ་བསྐམས་ཤིང༌། ཀླུ་གདུག་པ་ཅན་ཡང་རྫུ་འཕྲུལ་ཉམས་ཏེ་གྲགས་པ་མེད་པར་གྱུར་སྐད། དེ་ནས་ལོ་ལྔ་བརྒྱ་ཙམ་གྱི་བར་དུ། ཨོ་རྒྱན་དུ་མ་ཁ་སོགས་ཡུལ་གཞན་གྱི་གནོད་པ་མ་བྱུང་སྐད། དེ་དག་ལ་སོགས་པ་ལོ་མང་དུ་འགྲོ་བའི་དོན་མཛད་ནས། སླར་ཡང་སྐུ་ལུས་མི་སྣང་སྟེ། ཟུང་འཇུག་གི་སྐུས་མཁའ་ཁྱབ་ཏུ་བཞུགས་པའོ། །སློབ་དཔོན་འདིས་ཀྱང་འཁོར་ལོ་སྡོམ་པའི་ཕྱོགས་ལ་བསྟན་བཅོས་ཅི་རིགས་མཛད་ཅིང༌། དགྱེས་རྡོར་གྱི་དགོངས་འབྲེལ་ཡང་ཅུང་ཟད་མཛད་དོ། །སྤྱིར་བདེ་མཆོག་འཁོར་ལོའི་གྲུབ་བརྙེས་སུ་ཀུན་ལ་གྲགས་སོ། །དྲུག་པ་དགེ་ཚུལ་ཚིམ་བུ་པ་ནི། མ་གྷ་དྷའི་རྒྱལ་རིགས་ཀྱི་བུ་ཅིགན་ལནྡར་དགེ་ཚུལ་བྱས་ཆོས་ཀྱང་ལེགས་པར་ཤེས་པ་ཅིག་ཡིན། སློབ་དཔོན་སྤྱོད་འཆང་དབང་པོ་ཡུལ་ཀོངྐ་ནར་བཞུགས་པའི་སྐབས་ཤིགགྲོགས་འགའ་ཞིག་གིས་བསྐུལ་ནས་གནས་དེར་སོང་སྟེ་སློབ་དཔོན་དང་མཇལ། རྗེས་སུ་བཟུང་བར་ཞུས་པས། ཡང་དག་པའི་དབང་བསྐུར་ཏེ། གདམས་པ་དང་རྗེས་སུ་གདམས་པས་སྐྱོང་བཞིན་དུ་ལོ་བདུན་གྱི་བར་དུ་འདུག་གོ །དེ་ནས་ནང་ཅིག་སྤྲིན་ཁ་དོག་སྣ་ལྔ་པ་དང༌། ཉི་མའི་འོད་དང༌། ཆར་ཟིམ་དང༌། འཇའ་ཚོན་ཐམས་ཅད་ཚོགས་པ་ཅིག་འདུག་ནས། དེ་ལ་


TNT17_Page_0228
[མ་དཔེ་གཟིགས་ན་འདིར་གནོན།]

ལྟ་ཞིང་ལྷན་ཅིག་སྐྱེས་པའི་དོན་བསྒོམས་པས་དེ་རྣམས་སྒྱུ་མ་ལྟ་བུར་ཤར། དེའི་རྐྱེན་གྱིས་ཡང་དག་པའི་ཡེ་ཤེས་ཕྱིན་ཅི་མ་ལོག་པ་རྒྱུད་ལ་སྐྱེས་སོ། །དེ་ནས་ལྟ་སྟངས་བརྒྱད་ལ་སོགས་པ་ཡང་རིམ་པས་གྲུབ། ཡང་ལན་ཅིག་དྲོད་རྟགས་དང༌། མིག་སྨན་ལ་སོགས་པའི་དངོས་གྲུབ་སྒྱུ་མས་སྒྱུ་མ་བསླུ་བ་འདིས་ཅི་ཕན་བྱས་སྟེ། ལྷན་ཅིག་སྐྱེས་པ་འབའ་ཞིག་བསྒོམ་ཞིང༌། ཤིན་ཏུ་སྤྲོས་མེད་ཀྱི་སྤྱོད་པ་སྤྱོད་དོ། །དེ་ནས་དུས་ཕྱི་ཞིག་ན་སློབ་དཔོན་སྤྱོད་པ་པ་འཁོར་བཅས་ཤར་ཕྱོགས་ལ་གཤེགས་པའི་སྐབས། ཆུ་བོ་གང་གཱའི་འགྲམ་གྱི་ལམ་འཕྲང་དོག་པོ་འཛུར་ས་མེད་པ་ཅིག་ན་མཛེ་མོ་ལུས་ཐམས་ཅད་རྣག་ཁྲག་དང་རྨ་ཤུས་གང༌། སོར་མོ་རྣམས་ཆད་པ་ཅིག་འདུག་གོ །དེ་ན་རེ་ཁྱེད་རྣམས་ཀྱིས་ང་ཆུ་བོ་འདི་ལས་བསྒྲལ་ནས་གྲོང་ཁྱེར་ཞིག་གི་འདབས་སུ་སྐྱོལ་ཟེར་ཡང་གཞན་རྣམས་ཀྱིས་ལེན་མཁན་མ་བྱུང༌། དེར་ཚིམ་བུ་པས་རྒྱབ་ཏུ་ཁུར་ཏེ། ཆུ་བོ་གང་གཱ་ལ་རྐྱལ་ཞིང་སོང༌། གཱང་གའི་དབུས་སུ་སླེབ་པ་ཙམ་ན། མཛེ་མོ་དེ་རྡོ་རྗེ་ཕག་མོའི་སྐུའི་རྣམ་པར་དངོས་སུ་གྱུར་ཏེ། ཚིམ་བུ་པའང་བདེ་མཆོག་ཧེ་རུ་ཀའི་རྣམ་པ་འཛིན་པར་གྱུར་པ། རྡོ་རྗེ་ཕག་མོས་ཚོམ་བུ་པའི་ཕྱག་ནས་ཁྲིད་དེ་ནམ་མཁའ་ལ་འཕགས་སོ། །དེར་རྣལ་འབྱོར་པ་གཞན་རྣམས་ལ། རྡོ་རྗེ་ཕག་མོའི་ཞལ་ནས། རྣལ་འབྱོར་པ་བྱ་བ་སྙིང་རྗེ་དང་ལྡན་པ་དགོས་པ་ཡིན། དེ་མེད་པར་དངོས་གྲུབ་ག་ལ་ཐོབ་གསུང༌། ཚུལ་དེས་ཚིམ་བུ་པ་མཁའ་སྤྱོད་དུ་བཞུད་དོ། །འདི་བདེ་མཆོག་རྩ་རྒྱུད་ཀྱི་ལེའུ་སོ་བདུན་པ་ནས། ཧ་ཧར་རྒོད་པའི་དངོས་གྲུབ་ཏུ་བཤད་པ་དེ་ཡིན་པར་སྣང་བས། དེ་དུས་དངོས་སུ་


TNT17_Page_0229
[མ་དཔེ་གཟིགས་ན་འདིར་གནོན།]

ཐུན་མོང་གི་དངོས་གྲུབ་ཆེན་པོ་ཡིན་ཡང༌། དེ་ནས་མི་རིང་པར་མཆོག་དངོས་སུ་འགྲུབ་པའོ། །སློབ་དཔོན་འདི་སྔོན་དགེ་ཚུལ་ཡིན་པས། དགེ་ཚུལ་ཚོམ་བུ་པ་ཟེར་ཡང༌། ཕྱིས་ཆ་བྱེད་རྣལ་འབྱོར་པ་ཀ་ཡིན་པར་འདུག ཚིམ་བུའི་གོ་བ་ནི་ཕྱགས་དར་ཁྲོད་གྱོན་པའི་མིང་ཡིན། ཁ་ཅིག་མཚན་དངོས་མ་ཎི་བྷ་དྲ་སྟེ་ནོར་བུ་བཟང་པོ་བྱ་བ་ཡིན་ཟེར་རོ། །སློབ་དཔོན་འདིས་མཛད་པའི་དོ་ཧའི་རིགས་ནི་ཅི་རིགས་པ་ཡོད། གཞན་དེས་མཛད་པའི་བསྟན་བཅོས་དང༌། ཆོས་རྒྱུན་གྱི་རིགས་ནི་ཆེར་མ་བྱུང་བ་འདྲ་ཞིང༌། རྫུ་འཕྲུལ་རྣམ་པར་འཕྲུལ་པའི་ལོ་རྒྱུས་ཀྱང༌། སྤྱིར་མང་དུ་ཡོད་དགོས་ཀྱང་གཞན་མ་རྙེད་དོ། །དེ་ལྟར་སློབ་མ་དྲུག་པོ་དེ་དག་ནི། སློབ་དཔོན་ཆེན་པོ་ཉིད་དང་ལྷན་ཅིག་ཏུ་རིག་པའི་བརྟུལ་ཞུགས་ཀྱི་སྤྱོད་པ་སྤྱད་པས་མཆོག་ཐོབ་པའོ། །སློབ་དཔོན་ཆེན་པོ་ཀཧྣ་པའི་སློབ་མ་བུད་མེད་གྲུབ་པ་ཐོབ་པ་ལ། སློབ་དཔོན་ཆེན་པོ་ལྷོ་ཕྱོགས་མཧཱ་རཥྟར་བྱོན་པའི་དུས། ཡུལ་དེ་ན་རྒྱལ་རིགས་ཀྱི་བུ་མོ་སྤུན་གཉིས་ལས་ཆེ་བའི་མིང་ནི་མེ་ཁ་ལ་ཞེས་བྱ། ཆུང་བའི་མིང་ནི་ཀ་ན་ཁ་ལའོ། །དེ་གཉིས་ལོ་བཅུའམ་བརྒྱད་ལོན་པ་ན། བྲམ་ཟེའི་ཁྱེའུ་གཉིས་དང་གཉེན་དུ་བསྒྲིགས་ཡོད་ཀྱང༌། ཁྱེའུ་དེ་གཉིས་ཆེས་གཞོན་པས་ལོ་འགར་བག་མ་ལ་མ་སོང་བ་ན། ཡུལ་མི་ཐམས་ཅད་ཀྱི་དེ་དག་ལ་ཁ་ཟེར་བར་བྱེད་དོ། །དེ་ཡང་ལས་ཀྱི་མཐུ་ཡིན་གྱི་ཉེས་པ་ནི་མེད་སྐད། དེ་ནས་མདུན་མ་དེ་དྲལ་ལོ། །སློབ་དཔོན་འཁོར་བཅས་རྫུ་འཕྲུལ་རྣམ་པར་འཕྲུལ་བ་ཅན་མཐོང་པས། ཡིད་ལ་ཡ་མཚན་ཆེར་སྐྱེས་ནས། བདག་ཅག་འཁོར་བས་འཇིགས་པ་ལགས་ཀྱི། འཁོར་བ་


TNT17_Page_0230
[མ་དཔེ་གཟིགས་ན་འདིར་གནོན།]

ལས་ཐར་བའི་ཐབས་ཅིག་འཚལ་ཞུས་པས། སྣོད་དང་ལྡན་པར་མཁྱེན་ཏེ་དབང་བསྐུར་བས་ཡེ་ཤེས་མཆོག་ཕེབས། གདམས་པ་དང་རྗེས་སུ་གདམས་པས་བསྐྱངས་པ་ན། མི་རིང་བར་ལྟ་སྟངས་བརྒྱད་ལ་སོགས་པའི་ནུས་པ་ཡང་ཐོབ། རྩིག་པ་དང༌། རི་དང༌། ཆུ་ལ་ཐོགས་པ་མེད། མངོན་ཤེས་ལ་སོགས་པའི་ཡོན་ཏན་མང་པོ་ཐོབ་བོ། །དེ་ནས་ཀྱང་ཚོགས་པ་དེ་ཉིད་དུ་གཙོ་བོར་གནས་ཤིང༌། རིག་པའི་བརྟུལ་ཞུགས་ཀྱི་སྤྱོད་པ་ཅན་ནོ། །ལན་ཅིག་དེ་གཉིས་ལམ་དུ་སོང་བ་ན། གོ་རཀྵའི་རྗེས་འབྲང་རྣལ་འབྱོར་པ་ཕལ་པ་མང་པོ་ལམ་ན་འདུག་པ་རྣམས་ཀྱིས་ཅོ་འདྲི་ཞིང༌། ནག་པོ་པ་སློབ་མར་བཅས་པ་སྒྱུ་མ་སྟོན་པར་བྱེད་དོ་ཞེས་སྨྲ་བ་ལ། ཛོ་གིར་གྲགས་པ་དེ་རྣམས་ཉིད་ཀྱི་གནས་གཞིས་ཕྱོགས་ཡིད་དུ་འོང་བ་ཅིག་ན་འདུག་པ་ལས་ཁང་པ་ཐམས་ཅད་ལྟ་སྟངས་ཀྱིས་དྲངས་ནས་མ་ཞིག་པ་ཁོ་ནར་བྱེ་མའི་ཐང་སྐྱ་བོ་ཡིད་དུ་མི་འོང་པ་ལ་བཞག་གོ ཁྱེད་རྣམས་ཀྱང་སྒྱུ་མ་འདི་ལྟ་བུ་གྱིས་ཤིག་བྱས་ནས་སོང་ངོ༌། །དེ་ནས་དུས་གཞན་ཞིག་ན་དེ་དག་གིས་བཟོད་པ་གསོལ་བས། ཁང་པ་རྣམས་སྔར་གྱི་གནས་སུ་བསྐྱལ་ལོ། །ཕྱིས་སློབ་དཔོན་ཆེན་པོས་བྷངྒ་ལར། རྒྱལ་པོ་རོལ་པའི་ཟླ་བ་བཏུལ་བའི་དུས་སྐབས་ཤིག་ན་སྐྱེ་བོ་མང་པོ་འདུས་པའི་དབུས་ཤིག་ཏུ་དེ་གཉིས་སློབ་དཔོན་གྱི་ཞབས་ལ་ཕྱག་འཚལ་ནས་བླ་མའི་དྲིན་གྱིས་བདག་ཅག་གཉིས་ཀྱིས་དོན་ཆེན་པོ་བླ་ན་མེད་པ་ཐོབ་པ་ལགས་པས། ད་ནི་མཁའ་སྤྱོད་དུ་འགྲོ་ན། ཐོག་མར་སློབ་དཔོན་གྱིས་གང་བཀའ་སྩོལ་བ་དེ་བགྱིད་ཞུས་པས། འོ་ན་མགོ་བོ་བཅད་དེ་ང་ལ་ཕུལ་ཞིག་གསུང༌།


TNT17_Page_0231
[མ་དཔེ་གཟིགས་ན་འདིར་གནོན།]

དེར་ཡེ་ཤེས་ཀྱི་རལ་གྲི་རྣོ་ངར་དང་ལྡན་པ་རེ་ཁ་ནས་བྱུང་སྟེ། རང་རང་གི་མགོ་བོ་ཐོགས་པ་མེད་པར་བཅད་དེ་བླ་མའི་ཕྱག་ཏུ་ཕུལ་ནས། ཕྱི་ལྟས་སུ་གར་བྱེད་ཅིང་ནམ་མཁའི་ལམ་ལས་ཇེ་མཐོ་ཇེ་མཐོར་སོང་ནས་འཇའ་འོད་དུ་ཡལ་ལོ། །སྔོན་ལྷ་མོ་དཔལ་གྱི་བློ་གྲོས་ལས་ཀྱང་འདི་དག་དང་འདྲ་པའི་ཆོ་འཕྲུལ་བསྟན་འདུག །སྲིན་པོ་དང་མཁའ་འགྲོ་མ་ཕལ་པའི་གཟུགས་ལ་ཡང༌། འདི་ལྟ་བུ་མང་དུ་ཡོད་པ་ཡིན་འདུག །དེའི་གཉེན་པོར་རྡོ་རྗེ་ཕག་མོ་དབུ་བཅད་མ་སོགས་འབྱུང་བ་ལྟར། རྡོ་རྗེ་ཕག་མོའི་གྲུབ་ཐོབ་རྣམས་ཀྱི་ཆོ་འཕྲུལ་ལ་ཡང༌། འདི་འདྲ་མང་དག་བྱུང་པར་གདའ་འོ། །སློབ་དཔོན་ནག་པོ་སྤྱོད་པའི་སློབ་མ་བུད་མེད་ཀྱི་རྟེན་ཅན་གྲུབ་པ་ཐོབ་པ་ཐམས་ཅད་ཀྱི་མཆོག་རྣལ་འབྱོར་མ་བནྡྷེ་པའམ། སིང་གྷ་གླིང་གི་རྣལ་འབྱོར་མའམ། ཌོམྦི་རྣལ་འབྱོར་མར་གྲགས་པ་དེ་ནི། གླིང་ཁྱད་པར་དུ་འཕགས་པ་སིང་གྷ་ལར། ཌོཾ་པ་ཞེས་པ་རིགས་ངན་གཡུང་པོའི་རིགས་ལ་བུ་མོ་ཞིག་བཙས་པ་ནི་པདྨ་ཅན་མཆོག་གི་མཚན་ཉིད་ཡོངས་སུ་རྫོགས་པ་ཞིག་གོ །ཆེར་སྐྱེས་པ་ན་བློ་གསལ་ཞིང་རིག་པ་དང་ལྡན་པ་དང་ཚུལ་བཟང་བ་ཞིག་ཡོད་པས་ཡི་གེ་སོགས་རིག་པ་ཀུན་ཡང་བྱང་ངོ༌། །སློབ་དཔོན་སྤྱོད་པ་པ་འཁོར་བཅས་གླིང་དེར་ཕེབས་ནས་མི་རིང་བ་ཞིག་ན། དེ་རྣམས་ཀྱིས་ངོ་མཚར་རྨད་དུ་བྱུང་བའི་ཆོས་མཐོང་སྟེ། ཤིན་ཏུ་དད་པར་གྱུར་ཀྱང༌། རིགས་ཀྱི་དབང་གིས་ཆོས་སྤྱོད་པའི་སྐལ་བ་མེད་སྙམ་པ་དང༌། འདི་དག་དང་ཉེ་བར་ཡང་མི་ནུས་སྙམ་ཙ་ན། རྣལ་འབྱོར་པ་ཁ་ཅིག །འདི་ན་རིགས་དང་རིགས་མིན་མེད། །འགྲོ་བ་འདི་དག་ཐམས་ཅད་ལ། །རང་བྱུང་ཡེ་ཤེས་ཡང་དག་


TNT17_Page_0232
[མ་དཔེ་གཟིགས་ན་འདིར་གནོན།]

གནས། །དེ་ཕྱིར་ཀུན་ལ་བརྙས་མི་བྱ། །ཞེས་སོགས་གླུར་ལེན་པ་ཐོས་པས་རང་ཉིད་ཆོས་ཀྱི་སྐལ་བ་ཡོད་པར་ཤེས་ནས། མཆོག་ཏུ་དགའ་བ་སྐྱེས་སོ། །དེ་ནས་ལན་ཅིག་སློབ་དཔོན་འཁོར་དང་བཅས་པ་མཆོད་སྟོན་རྒྱ་ཆེན་པོས་ཚིམས་པར་བྱས་ནས། ཡང་དག་པའི་ལམ་སྩལ་དུ་གསོལ་ཞེས་གསོལ་བ་བཏབ་པས་ཞལ་གྱིས་བཞེས་སོ། །དེ་ནས་དུས་གཅིག་ན་སློབ་དཔོན་འཁོར་བཅས་དུར་ཁྲོད་ཅིག་ཏུ་བཞུགས་པའི་སར། ཕག་གི་ཤ་གཅིག་དང་མྱོས་བྱེད་བུམ་པ་གང་ཁྱེར་ཏེ་ཕུལ་པས། ཚོགས་རྫས་དེ་ཁོ་ནས་རྣལ་འབྱོར་ཕོ་མོ་སྟོང་ཕྲག་མང་པོ་འབྱུང་པོ་དང་ཐམས་ཅད་ཚིམས་པར་མཛད་དེ་ཌོམྦི་ནི་ལ་དབང་བསྐུར་བས། དེ་ཉིད་དུ་ཡེ་ཤེས་མཆོག་དང་ལྡན་པའི་རྣལ་འབྱོར་མ་ཆེན་མོར་གྱུར། ཚོགས་ཀྱི་འཁོར་ལོ་དེ་ཡང་ཞག་བདུན་གྱི་བར་དུ་ཟད་པ་མེད་པར་ལོངས་སྤྱད་དོ། །དེ་ནས་དཔྱིད་ཀྱི་ཐིག་ལེའི་རྣལ་འབྱོར་འབད་པས་བསྒོམས་པས། དུས་ཇི་ཞིག་ལྟར་ན། ཉིན་ཞག་བདུན་དུ་སྡུག་བསྔལ་གྱི་ཚོར་བ་ཤིན་ཏུ་མི་བཟད་པའི་ཉམས་ལུས་བརྒྱ་སྟོང་དུ་འཐོར་པ་འདྲ་བ་བྱུང༌། དེས་གཏུམ་མོ་འབར་བའི་མེ་ཚད་རྫོགས། རྩ་མདུད་ཐམས་ཅད་ཞིག་སྟེ་ལྷན་ཅིག་སྐྱེས་པའི་དོན་ཇི་བཞིན་དུ་རྟོགས་ནས། ཏིང་ངེ་འཛིན་ཐུན་གཅིག་ལ་ཟླ་བ་དྲུག་འདས་སྐད། དེ་སད་ཙ་ན་གྲུབ་པའི་དབང་ཕྱུག་མར་གྱུར་ཏེ། ཡང་དག་པ་ལྷན་ཅིག་སྐྱེས་པའི་དོན་རྟོགས་པས། ཞོར་བྱུང་གི་ཡོན་ཏན་གཟུགས་བསྒྱུར་བའི་ཆོ་འཕྲུལ་དང༌། དཔག་ཚད་བརྒྱ་སྟོང་དུ་འཇུག་པའི་མངོན་ཤེས་དང༌། ལྟ་སྟངས་ལ་སོགས་པའི་ནུས་པ་དང༌། རྐང་མགྱོགས་ལ་སོགས་པའི་ཆོ་འཕྲུལ་རྣམས་ཀྱང་རང་ཤུགས་ལ་ཐོབ་བོ། །དེ་ནས་ཡུན་


TNT17_Page_0233
[མ་དཔེ་གཟིགས་ན་འདིར་གནོན།]

རིང་པོའི་བར་དུ་སློབ་དཔོན་ཆེན་པོའི་འཁོར་གྱི་ཚོགས་པ་དེར་བཞུགས་ནས་རྟག་ཏུ་ཚོགས་ཀྱི་དཀྱིལ་འཁོར་འབྱུང་བའི་ཚོགས་ཀྱི་གཙོ་མོའི་བྱ་བ་བསྒྲུབས་པས་རིག་པ་བརྟུལ་ཞུགས་ཀྱི་སྤྱོད་པ་མཛད་དོ། །དེ་ནས་ཕྱི་ཞིག་ན་འཇའ་ལུས་བརྙེས་ཤིང་བར་སྐབས་དེར་མི་སྣང་པར་གྱུར་པ་ལས། སློབ་དཔོན་སྤྱོད་པ་པའི་འདས་མཆོད་ཀྱི་དུས་མངོན་སུམ་དུ་བྱོན་ཏེ། ས་གཡོ་བ་ལ་སོགས་པ་ཆོ་འཕྲུལ་དུ་མ་བསྟན་དེ་སྐབས་ཡུལ་ཀ་མ་རཱུ་པར། ལྷ་ཁྱབ་འཇུག་ཆེན་པོ་རྟའི་གདོང་ཅན་གྱི་རྡོ་སྐུ་ཁྲུ་གང་པ་ཅིག་རང་བྱུང་དུ་བྱུང༌། ཆོ་འཕྲུལ་ཤིན་ཏུ་ཆེ། ཧ་རི་གི་རི་མཱ་ཐོ་ཞེས་གྲགས་ཤིང༌། ཕྱོགས་དེར་དེ་ལ་མཆོད་པ་པོ་བྲམ་ཟེ་ཆོ་འཕྲུལ་ཅན་སྔགས་གྲུབ་པ་མང་པོས་ཀྱང་བསྐོར་ནས་ཡོད། དེར་སངས་རྒྱས་པའི་ཕྱོགས་འཛིན་པ་རྣམས་ལ། འབོག་ནད་གདོང་ཐུག་མང་པོ་དང༌། མེ་ལྕེ་འབབ་པས་གནས་ཁང་དང་ཡོ་བྱད་སྲེག་པ་སོགས་གནོད་པ་མང་དུ་བྱུང་ཞིང༌། སྐྱེ་བོ་གཞན་རྣམས་ལ་ཡང་གནོད་པ་ཆེར་བྱུང་ངོ༌། །སྐབས་དེར་དེ་བྱུང་ནས་ལོ་མང་མ་ལོན་པའི་སྐབས་ཡིན། དེ་འདུལ་བར་རྣལ་འབྱོར་མ་འདིས་བྱོན། ལམ་དུ་ཆོ་འཕྲུལ་གྱི་རྟ་བ་མང་པོ་མཚོན་ཆ་ཐོགས་ཏེ་བྱུང༌། ཡི་དམ་གྱི་ཕྱག་མཚན་གྲི་གུག་ཅིག་ཡོད་པ་དེ། ཕྱར་བ་ཙམ་གྱིས་དེ་རྣམས་ཐམས་ཅད་སིལ་བུར་ཞིག་གོ །དེ་ནས་ལྷ་ཁང་དེའི་དྲུང་དུ་བྱོན་པ་ན། ལྷ་དེ་ཁྲོས་པས་ཕྱི་ནང་ཐམས་ཅད་ཏུ་མེ་འབར་བར་བསྟན་པས། རྣལ་འབྱོར་མས་དེ་ཉིད་དུ་ཆར་ཆེན་པོ་ཕབ་ཀྱང་ཟེར། སྔགས་ཀྱིས་བཏབ་ཀྱང་ཟེར། མི་བསྐྱོད་པས་གཏོར་ཡང་


TNT17_Page_0234
[མ་དཔེ་གཟིགས་ན་འདིར་གནོན།]

ཟེར། གང་ལྟར་ཡང་དེ་མ་ཐག་མེ་ཤིའོ། །དེ་ནས་ནང་དུ་བྱོན་པ་ན་སྐུ་དེ་ཉིད་རྟ་གདོང་ཁྲོས་པ་མི་བཟད་པ་འཇིགས་པའི་ཆོ་འཕྲུལ་ཅན་དུ་སོང་ནས། ཟ་ཟ་འཆའ་འཆའ་ལྟར་རྒོལ་དུ་བྱུང༌། བྲམ་ཟེ་སྔགས་མཁན་རྣམས་ཀྱང་སྲིན་པོ་མི་གདུག་པའི་གཟུགས་སུ་བསྒྱུར་ཏེ། མཚོན་ཆ་སྣ་ཚོགས་དང༌། དབྱུག་པ་དང༌། རྡོ་བ་ཆེན་པོ་དག་བརྡེག་ཏུ་བྱུང་ངོ༌། །དེར་རྣལ་འབྱོར་མས་ཐུགས་གཡོ་བ་མེད་པར་ཐལ་མོ་བརྡབས་པས། ཁྱབ་འཇུག་གི་སྐུ་དེའི་སྐུ་གཟུགས་མ་དེ་ཐལ་བར་ཞིག རྟ་མགོ་ས་ལ་ལྷུང༌། བྲམ་ཟེ་རྣམས་ཁྲག་ཏུ་སྐྱུག་ཅིང་འགྱེལ་ལོ། །དེ་དང་ཉེ་བ་ན་སྤྱོད་པ་ཁྱབ་འཇུག་དེ་ཉིད་ལྷར་འཛིན་པའི་མི་ཐམས་ཅད་ཀྱང་མྱོས་ཤིང་རོད་རོད་བོར་སོང་ངོ༌། །དེའི་ལྷ་ཁང་དང་གནས་གཞི་ཐམས་ཅད་ཀྱང་ལ་ལ་རྩ་བ་ནས་ཞིག །ལ་ལ་ཤག་ཤིག་ཏུ་སོང་ངོ༌། །དེ་ལྟར་ཉིན་ཞག་གཉིས་འདས་པ་ན། རྒྱལ་པོ་ལ་སོགས་པ་སྐྱེ་བོ་རྣམས་འོངས་ཏེ། ཞབས་ལ་གཏུགས་ནས་གསོ་བར་ཞུས་སོ། །དེར་བྲམ་ཟེ་ལ་སོགས་པའི་སྐྱེ་བོ་རང་རོད་དུ་གྱུར་པ་རྣམས་གསོས་སོ། །དེ་རྗེས་རྣལ་འབྱོར་མ་བནྡྷེ་པ་ཡུལ་དེའི་ཨུ་མ་གི་རི་ཟེར་བའི་རི་ལ་བཞུགས་ནས། སྐལ་ལྡན་རྣམས་ལ་ཆོས་ཅུང་ཟད་སྟོན་ནོ། །དེ་ནས་མུ་སྟེགས་དེ་རྣམས་ཀྱིས་ཁོ་རང་ཚོའི་གནས་ཞིག་པ་རྣམས་གསོས། ཧ་རི་གི་རི་མཱ་ཐོའི་སྐུ་འདྲ་བཞེངས་པ་ན། བཞེངས་པའི་བྱ་བ་དང༌། ཞལ་བསྲོ་བྱེད་པ་ལ་གླང་པོ་ཆེ་རྒྱུགས་པས་ཐམས་ཅད་བཅོམ་མོ། །ཡང་བསྐྱར་ནས་བཞེངས་ཟིན་པ་ན། ཁྱིམ་རྡིབ་སྟེ་ཞིག་གོ །ཡང་བཞེངས་ཟིན་པ་ན་དུམ་བུར་གས་ཏེ་རང་ཞིག་གོ །དེ་ནས་རྒྱལ་པོ་དང་སྐྱེ་བོ་


TNT17_Page_0235
[མ་དཔེ་གཟིགས་ན་འདིར་གནོན།]

དེ་དག་དང་བྲམ་ཟེ་དེ་རྣམས་ཀྱང་རྣལ་འབྱོར་མའི་དྲུང་དུ་འོངས་ཏེ། རིན་པོ་ཆེ་དུ་མས་སྐུ་ལ་གཏོར་ཞིང་བཟོད་པར་གསོལ་ནས་སེམས་ཅན་རང་རང་གི་ལུགས་འདོར་བར་མི་ནུས་པས། ཐུགས་བརྩེ་བར་མཛོད་ཅེས་ལྷ་ཁང་བཞེངས་པར་གནང་བ་ཞུས། ཕྱིས་ཁོང་རྣམས་ཀྱིས་ལྷ་ཁང་བཞེངས་པ་ན་འཇིགས་པ་ནི་མ་བྱུང༌། འོན་ཀྱང་དུས་དེ་ནས་གཟུང་སྟེ་ཡུལ་ཕྱོགས་དེར་ལྷ་ཁྱབ་འཇུག་ལ་མཆོད་པ་ནི་ཉུང་ངོ༌། །དེ་རྗེས་ཀྱང་ཡུལ་སྣ་ཚོགས་སུ་སྐལ་ལྡན་འགའ་རེ་སྨིན་ཅིང་གྲོལ་བ་ལ་བཀོད་དེ་ལོ་ཡང་ཅི་རིགས་པར་མི་རྣམས་ཀྱིས་མཐོང་བར་བཞུགས་པར་གྲགས་སོ། །འདིས་མཛད་པའི་བསྟན་བཅོས་ཐོར་བུ་དང༌། དོ་ཧཱ་འགའ་རེ་ད་ལྟའང་ཡོད་དོ། །དེ་དག་ནི་སློབ་དཔོན་སྤྱོད་པ་པ་ཉིད་སྐུ་བཞུགས་པའི་སྐབས་ཉིད་དུ་མཆོག་གི་དངོས་གྲུབ་ཐོབ་པའི་སློབ་མ། སྐྱེས་པའི་རྟེན་ཅན་དྲུག་དང༌། བུད་མེད་གསུམ་སྟེ་ཤིན་ཏུ་གྲགས་ཆེ་བ་རྣམས་ཡིན་ནོ། །གཞན་སློབ་དཔོན་བྷ་དཱ་ལི་པ་ནི། ཤར་ཕྱོགས་བྷ་ག་ལར་འཁྲུངས་པ། སློབ་དཔོན་སྤྱོད་པ་པ་ཡུལ་ཛ་ལནྡྷ་ར་ནས་སྤྱོད་པ་ལ་འབྱོན་ཁར་སླེབ་ཟེར། ཕྱིས་སློབ་དཔོན་སྐུ་འདས་པའི་རྗེས་སུ། ཤར་ཕྱོགས་ཨོ་ཌི་བི་ཤིའི་ཡུལ་དུ་བཞུགས། དེར་ཚོང་དཔོན་ཞིག་གིས་དགེ་འདུན་ལ་ས་གཞི་ཕུལ་ཏེ། གཙུག་ལག་ཁང་ཞིག་རྩིག་པའི་གྲབས་བྱས་པ་ན། ས་ཕྱོགས་དེ་དང་པོ་ནས་མུ་སྟེགས་རྣམས་དབང་ཟེར་ནས། ནང་པའི་གཙུག་ལག་ཁང་བཞེང་དུ་མི་སྟེར་ཏེ། སླད་ཀྱིས་རྒྱལ་པོ་ལ་ཞུས་ནས། བྲམ་ཟེ་ཞིག་གིས་དེར་མུ་སྟེགས་བྱེད་ཀྱི་ལྷ་ཁང་ལིང་ག་ཅན་ཆུང་ངུ་ཞིག་བརྩིགས་


TNT17_Page_0236
[མ་དཔེ་གཟིགས་ན་འདིར་གནོན།]

སོ། །ཡང་སླད་ཀྱིས་དགེ་འདུན་གྱི་གནས་བརྟན་གྱིས་རྩོད་པ་བསླངས་ཏེ། ཕྱི་ནང་གི་སྐྱེ་བོ་མང་པོ་དེར་འདུས། དེར་སློབ་དཔོན་བྷ་དཱ་ལི་བྱོན་ཏེ། རེ་ཞིག་རྩོད་པ་འདི་མ་ཞིའི་བར་དུ་ལྷ་ཁང་འདི་ཕ་གིར་བསྐྱལ་ལགས་ཀྱི་བྱས། ལྷ་ཁང་དེ་ཐག་པས་འཆིང་ཚུལ་བྱས་རྒྱབ་ཁུར་དུ་ཐོགས་ནས། བྲམ་ཟེ་དེ་རྣམས་ཉིད་ཀྱི་གྲོང་གི་འདབས་སུ་བསྐྱལ་ལོ། །དེར་གྲུབ་པའི་རྟགས་ལ་ཡ་མཚན་སྐྱེས་ཏེ། ས་ཕྱོགས་དེར་རང་ཤུགས་ཀྱིས་དགེ་འདུན་ལ་བྱུང་ནས། ཨཾ་ཀྵ་སྠཱ་པ་ན་ཞེས་བྱ་བའི་གཙུག་ཁང་བརྩིགས་སོ། །འདིས་ཀྱང་ཕྱིས་ཕྱག་རྒྱ་ཆེན་པོའི་དངོས་གྲུབ་བརྙེས་པར་གྲགས་སོ། །གྲུབ་ཐོབ་ལ་བཱ་ཡི་པ་ནི། གོང་དུ་སྨོས་པ་ལྟར་ཡང་ཡིན་ལ། ཕྱིས་མ་ག་དྷར་རྣལ་འབྱོར་པ་ནུས་པ་ཅུང་ཟད་ཐོབ་པ་མང་པོ་འདུས་ནས། དུར་ཁྲོད་བསིལ་བའི་ཚལ་དུ་ཚོགས་ཀྱི་དཀྱིལ་འཁོར་བསྒྲུབས་པའི་ཚོགས་འཁོར་བྱེད་པར་བྱས། སློབ་དཔོན་ལ་བཱ་ཡི་པས་ཚོགས་ཀྱི་གཙོ་བོ་བྱེད་པར་ཁས་བླངས་སོ། །དེར་ཚོགས་ཀྱི་ཁང་པར་ཞུགས་ཙ་ན། མུ་སྟེགས་ཅན་མདོག་ནག་པོ་དབང་ཕྱུག་པའི་ཆ་བྱད་འཛིན་པ། ཨུ་ཙིཥྟ་པ་སྟེ་གཙང་སྨེ་མེད་པའི་སྤྱོད་པ་ཅན་ཐོད་པ་ཐོགས་པ་ཅིག་བྱུང་ནས་ཚོགས་དཔོན་ངས་བྱེད་ཟེར་རོ། །དེར་སློབ་དཔོན་གྱིས་ཁྱེད་མུ་སྟེགས་པས་ངེད་སངས་རྒྱས་པའི་ཚོགས་དཔོན་མི་རུང་བྱས་པས། འོ་ན་ཁྱོད་རང་ཚོགས་ཀྱི་གཙོ་བོའི་ཁྲི་ལ་འཛེགས་ཟེར། ཁྲིའི་དཔངས་ཁྲུ་དོ་ཙམ་ཡོད་པ་དེའི་རྩར་སོང་ན། ཁྲི་དེ་མཐོ་རུ་མ་སོང༌། སློབ་དཔོན་གྱི་ལུས་ཆུང་དུ་མ་སོང་ཡང༌། སློབ་དཔོན་གྱི་ལུས་ཀྱིས་ཁྲི་དེའི་བཞི་ཆ་ཙམ་ལས་མ་སླེབ། ཐབས་


TNT17_Page_0237
[མ་དཔེ་གཟིགས་ན་འདིར་གནོན།]

གཞན་གང་གིས་ཀྱང་ཁྲིའི་སྟེང་དུ་འགྲོ་བར་མ་ནུས་སོ། །དེ་ནས་ཐོད་པ་ཅན་དེ་སྤྲུལ་པའི་སྐུ་ཡིན་པར་ཤེས་ནས། སློབ་དཔོན་ལ་བཱ་ཡི་པས་ཉེས་པ་བཤགས་ཤིང་གསོལ་བ་བཏབ་པས། དེ་དཔལ་ཧེ་རུ་ཀར་གྱུར་ཏེ་ནམ་མཁར་བཞུགས་ནས། ཁྱོད་ཀྱི་དང་པོ་ཉིད་ནས་ང་རྒྱལ་སྤངས་ཏེ་གསོལ་བ་བཏབ་ན་ད་རེས་ཀ་འདོད་པའི་དངོས་གྲུབ་ཐོབ་པ་ལ་ང་རྒྱལ་གྱིས་ཉེས། ད་སེམས་ཅན་གྱི་དོན་གྱིས་ཟེར་མི་སྣང་བར་གྱུར། དེ་ནས་སློབ་དཔོན་འདིར་གྲོང་ཁྱེར་ཨ་ཛོ་དྷྱ་རུ་བྱོན། དེ་ན་ལྟ་བ་ལོག་པ་འཛིན་པའི་རྒྱལ་པོ་བི་ཛྙ་པྟི་ཟེར་བ་ཞིག་ཡོད། དེ་འདུལ་བ་ལ་དགོངས་ནས། ཡུལ་དེའི་ཕྱོགས་གཅིག་བྲག་ཅིག་གི་ཁོང་ན། ཕུག་པ་ཁོང་སྟོང་ཅུང་ཟད་ཡོད་པ་ལ། བུ་ག་སོར་བརྒྱད་ཙམ་གྱི་ཚད་ཅན་བྲག་སྲབ་ཐུག་ཁྲུ་བརྒྱད་ཙམ་ཡོད་པ་ལ་བུ་ག་དེ་དོད་པ་ཅིག་ཡིན། དེ་མིན་སྒོ་མེད་པའི་བྲག་གི་ཁོང་སེང་དེར་བཞུགས།རྒྱལ་པོ་དེའི་བློན་པོ་དང་ནང་གཡོག་འགའ་ཞིག་གིས་དོན་འདྲ་སྤྱོད་པའི་ལམ་དུ་དེར་སོང་ཙ་ན། ཕུག་པའི་སྒོ་ཤིན་ཏུ་ཡངས་པ་དང༌། ཕུག་པ་དེ་ཡང་ཤིན་ཏུ་ཆེ་བར་འདུག་ཅིང༌། ཟས་ནོར་སྣ་ཚོགས་པའི་དབུས་ན་རྣལ་འབྱོར་པ་དེ་འདུག་པར་མཐོང་ངོ༌། །དེ་དག་གིས་རྒྱལ་པོ་ལ་བསྙད་པས་ནང་པར་རྒྱལ་པོ་ལིངས་ལ་འགྲོ་བའི་ཚུལ་གྱིས་དེར་བལྟར་འོངས་པ་ན། སློབ་དཔོན་ཕྱིར་བྱོན་ཏེ་རྒྱལ་པོ་ཆེན་པོ་འདིར་ཅིས་ཀྱང་འབྱོན་པར་ཞུ་གསུང༌། དེར་ཕུག་གི་སྒོ་ཡངས་བའི་འདུ་ཤེས་ཀྱིས་འཁོར་འགའ་དང་བཅས་པ་ཞུགས་ཤིང༌། བཟའ་བཏུང་གྱ་ནོམ་པ་མང་པོས་ཚིམས་པར་བྱས་སོ། །དེ་ནས་རྒྱལ་བློན་གཉིས་འདུག གཡོག་དེ་ཕྱིར་སོང་བའི་


TNT17_Page_0238
[མ་དཔེ་གཟིགས་ན་འདིར་གནོན།]

སྐབས་ཤིག སློབ་དཔོན་གྱིས་ཆོ་འཕྲུལ་བསྡུས་པས་ཁོང་གཉིས་ཕུག་པ་དོག་མོ་དེར་ཆུད། ཕྱི་རོལ་ཏུ་འགྲོ་སའི་སྒོ་མེད་ཅིང༌། བུ་ག་ཕྲ་མོ་དེའི་ཕྱོགས་ཀྱང་བྲག་ཤིན་ཏུ་འཐུག་པར་ཤེས། ཡ་མཚན་ཡང་སྐྱེས་ལ་ཤིན་ཏུ་སྐྲག་གོ །དེ་ནས་སློབ་དཔོན་གྱིས་དེ་གཉིས་སྔར་གྱི་ལྟ་བ་ལོག་པ་དེ་སྤངས། དགེ་བ་བྱེད་པར་དམ་འཆའ་རུ་བཅུག་ནས་བྲག་གི་བུ་ག་ཆུང་ངུ་དེ་ནས་ཀ་གནོད་པ་མེད་པར་ཕྱིར་བཏོན་ནོ། །རྣམ་འཕྲུལ་དེ་ལྟ་བུ་བསྟན་པས་རྒྱལ་པོ་དེ་ཆོས་ལ་བཀོད་པའོ། །རྒྱལ་པོ་རོལ་བའི་ཟླ་བ་དང༌། བློན་པོ་དགེ་བའི་མགོན་པོའི་གཏམ་རྒྱུད་ཀྱི་འཕྲོས་ནི། རྒྱལ་བློན་གཉིས་ཀས་ཉིན་མོ་ནི་རྒྱལ་སྲིད་ཀྱི་བྱ་བ་ཆོས་བཞིན་དུ་སྐྱོད། མཚན་ཐོག་ཐག་ནི་རིམ་པ་གཉིས་ཀྱི་ཏིང་ངེ་འཛིན་བསྒོམ་པ་ལས། ལོ་འགའ་ཞིག་འདས་པར་གྱུར་པ་ན། བློན་པོ་ལ་དངོས་སུ་ཙནྡྲ་ལི་འབར་བའི་གསལ་སྣང་བྱུང༌། དང་པོར་ཁྱིམ་ཉེ་འཁོར་དང་བཅས་པ་རྩིག་པ་སོགས་ཀྱིས་སྒྲིབ་ཐོགས་མེད་ཅིང༌། ཉིན་མཚན་ཀུན་ཏུ་མཐོང༌། དེ་ནས་རིམ་པས་རྒྱང་གྲགས་ཙམ་དང༌། དཔག་ཚད་ཙམ་དང༌། གཽ་རའི་ཡུལ་ཙམ་ཡང་མཐོང༌། མི་རིང་བར་མཐའ་མེད་དུ་འཕེལ་ལོ། །དེ་བཞིན་དུ་སྒྲ་སྐད་ཐམས་ཅད་ཀྱང་ཐོས་ཤིང་ཤེས། སྔར་མ་ཐོས་པའི་བསྟན་བཅོས་ཐམས་ཅད་ཀྱང་རང་ཤེས་ནས། ལན་ཅིག་རྒྱལ་པོའི་དྲུང་དུ་ཕྱོགས་ཀྱི་རྒྱལ་པོ་མང་པོའི་འཕྲིན་ཡིག་དུས་གཅིག་ཏུ་འཛོམ། འཕྲིན་ཡིག་དེ་དག་ཡུལ་སོ་སོའི་པཎྜི་ཏས་བརྩམས་པ། སྡེབས་སྦྱོར་དང་སྙན་ངག་གིས་བཅིངས་པས་གོ་དཀའ་ཞིང༌། སྐད་རིགས་དང་ཡིག་རིགས་ཐ་དད་པ་དང༌། ལྟ་གྲུབ་ཐ་དད་པའི་ཤིས་བརྗོད་མི་འདྲ་བ་དུ་མ་ཡོད་པས།


TNT17_Page_0239
[མ་དཔེ་གཟིགས་ན་འདིར་གནོན།]

ཡིག་མཁན་དང༌། མདུན་ན་འདོན་བྲམ་ཟེ་པཎྜི་ཏ་མང་པོ་འདུས་ཏེ་དཔྱད་ཀྱང༌། ཤིན་ཏུ་གོ་དཀའ་བར་གྱུར་པ་ལ། བློན་པོས་དེ་དག་ཐམས་ཅད་བཀྲོལ་ཞིང་དོན་རྒྱས་པར་བཤད། ལན་རྣམས་ཀྱང་སོ་སོ་དང་མཐུན་པར་བྱས་པས་རྒྱལ་པོ་དང་འཁོར་རྣམས་ན་རེ། སྔར་ཁྱོད་ཀྱིས་འདི་ལྟ་བུ་ཤེས་སུ་མི་བཤའ་པ་ལ། འདི་ལྟར་ཡོད་པ་ཅི་ཡིན་དྲིས་པས། ངས་ན་ནིང་བར་ལ་བསླབས་པ་ཡིན་ཞེས་ཁ་བསྒྱུར་རོ། །དེ་ནས་མི་རིང་བ་ཞིག་ན་ནམ་ཕྱེད་ཅིག་གཉིད་དུ་སོང་བའི་གཉིད་སད་པ་ན། བུད་མེད་རྒན་མོ་ཆེས་མི་སྡུགས་པ། མཛེ་སྐྱས་ཐེབས་པ་ཅིག་གཤེད་ནས་ལངས་ནས། མཁར་བ་ལ་བརྟེན་ཅིང་བློན་པོའི་མདུན་དུ་འོངས་ནས། བཀྲེས་སོ་ཞེས་ཟེར་རོ། །དེ་བཅོམ་ལྡན་འདས་མའི་རྣམ་འཕྲུལ་དུ་ཤེས་ནས། ཚམ་ཚོམ་མེད་པར་ཕྱག་བྱས་ནས། བཟའ་བཏུང་འབྲུ་བཅུད་གྱ་ནོམས་པ་ཐམས་ཅད་ཕུལ། བདག་རྗེས་སུ་གཟུང་བར་ཞུ་ཞུས་པས། དེས་ཕྱག་སྤྱི་བོར་བཞག་ཅིང་བྱིན་གྱིས་རློབ་རློབ་ལྟར་མཛད་ནས། བློན་པོ་ཉིད་ཀྱི་སྤྱི་བོར་ཐིམ་པ་སྙམ་བྱེད་པ་ན་མི་སྣང་བར་གྱུར་སྐད། དེར་གནས་ལུགས་ཀྱང་རྗེས་སུ་རྟོགས། ཕྲ་མོ་རྣམས་དང༌། དངོས་གྲུབ་སྣ་ཚོགས་ཉམས་འོག་ཏུ་ཆུད་པའི་གྲུབ་ཐོབ་ཏུ་གྱུར་ཀྱང༌། རེ་ཞིག་སྦས་ཏེ་ཐ་མལ་བའི་ཚུལ་གྱིས་རྒྱལ་སྲིད་ཀྱི་བྱ་བ་བྱེད་ཅིང༌། མི་རྣམས་ཀྱི་བསམ་པ་དང་སྐལ་བ་ཤེས་པའི་སྒོ་ནས་སྤྱོད་དོ། །ལན་ཅིག་རྒྱལ་པོའི་དྲུང་དུ་ཡོད་པ་ལ། རང་གི་སྐྱེད་མོས་ཚལ་གྱི་ལྷ་ཁང་ན། འོ་མ་དང་ཞོ་དག་ཡོད་པ་ལ། བྱི་ལ་འགའ་ཞིག་གིས་བལྡག་པ་མཐོང་ནས། ཡེངས་ཚུལ་གྱིས་དེ་སྐྲོད་པའི་བརྡ་བྱས་སོ། །


TNT17_Page_0240
[མ་དཔེ་གཟིགས་ན་འདིར་གནོན།]

རྒྱལ་པོས་ཅི་ཡིན་དྲིས་པས། དུས་ལ་བབ་པར་ཤེས་ནས། རང་གི་དངོས་གྲུབ་ཐོབ་ཚུལ་རྣམས་བཤད། དེ་ནས་བློན་པོའི་བྱ་བ་བོར་ཏེ་རྣལ་འབྱོར་པའི་སྤྱོད་པས་བཞུགས་ཤིང་སེམས་ཅན་གྱི་དོན་མཛད། མཐར་ཕྱག་རྒྱ་ཆེན་པོའི་དངོས་གྲུབ་ཐོབ་པར་གྲགས་སོ། །གྲུབ་ཐོབ་ཀུ་ཤ་ལ་ནཱ་ཐ་འདིས། དོ་ཧ་དང་ཟབ་དོན་གྱི་བསྟན་བཅོས་ཅི་རིགས་པར་མཛད་དོ། །སྔར་གྱི་འཕྲོས་ལ་དེར་རྒྱལ་པོས་བསམས་པ། གྲུབ་པའི་སློབ་དཔོན་གྱི་གདམས་ངག་ཐོབ་ནས་ཡུན་དེ་སྙེད་ལོན་ཡང༌། དངོས་གྲུབ་མ་ཐོབ་པ་ང་བརྩོན་འགྲུས་ཆུང་སྙམ་སྟེ། རྒྱལ་སྲིད་ཀྱི་བྱ་བ་བློན་པོ་དང་མདུན་ན་འདོན་དག་བྱེད་དུ་བཅུག་སྟེ། ཉིན་མཚན་ཀུན་ཏུ་འབད་པས་བསྒོམས་སོ། །དེ་ནས་ལོ་གཅིག་གམ་གཉིས་ཙམ་སོང་བའི་དུས་ན། ཉིན་མོ་ཅིག་གཙུག་ལག་ཁང་དང་དགེ་འདུན་རྣམས་མཆོད། དེའི་མཚན་མོ་གསངས་ཏེ་དུར་ཁྲོད་ལ་མཆོད་པར་བྱོན། དེ་ན་བུད་མེད་ཀྱི་རོ་ཤ་ཐམས་ཅད་བཏོགས་པའི་ཀེང་རུས་མ་འཐོར་བ་ཞིག་འདུག་པ་ལ་མཆོད་པ་བྱས་པས་དེ་ལངས་སོ། །དེ་ལ་བཅོམ་ལྡན་འདས་མ་བཞུགས་པར་ཤེས། སྔགས་ཀྱིས་གསོལ་བ་བཏབ་པས། ཀེང་རུས་ཀྱི་གཟུགས་གར་མཛད་ཅིང་ཆོས་བསྟན། སྐད་ཅིག་དེ་ཉིད་ལ་རྒྱལ་པོས་ཉམས་རྟོགས་ཕུན་སུམ་ཚོགས་པ་ཡང་བརྙེས། ལས་ཕྲ་མོ་སྣ་ཚོགས་པ་གྲུབ་བོ། །དེ་ནས་གཟུང་ཀེང་རུས་ཏ་ར་ཎའི་གདམས་ངག་བྱུང་པ་ཡིན་ཞེས་གྲགས། བར་དེར་བློན་པོ་རྣམས་དང་བྲམ་ཟེས་ཁྲིམས་འཆོལ་བས་ཡུལ་མི་བདེ་བར་གྱུར་པ་ལ། རྒྱལ་པོ་ཉིད་ཀྱིས་སྔགས་དང་ཏིང་ངེ་འཛིན་གྱིས་བསྐུལ་ནས་ཡུལ་ཁམས་


TNT17_Page_0241
[མ་དཔེ་གཟིགས་ན་འདིར་གནོན།]

བདེ་བར་སྤྱོད་དོ། །ལན་ཅིག་མུ་སྟེགས་པའི་རྒྱལ་ཕྲན་བཅོ་ལྔ་ཙམ་གྱི་དམག་གིས་མཐའ་བསྐོར་བ་ལ། རྒྱལ་པོས་སྔགས་ཀྱིས་བསྔགས་པའི་མེ་ཏོག་གཏོར་བས། ཕ་རོལ་པོ་ཐམས་ཅད་ཤེས་པ་འགྱུར་ཏེ་དབང་དུ་འདུས། རྒྱལ་པོའི་ཞབས་ལ་ཕྱག་བྱས་སོ། །བྷང་ག་ལ་པ་ལ་གནོད་པ་མི་བྱེད་པར་མནའ་བོར། དམ་བཞག་མང་པོ་བྱས་ཏེ་སོང་ངོ༌། །མཐར་རྒྱལ་པོ་དེས་ཀྱང་མི་སྣང་བའི་རིག་པ་འཛིན་པ་ཐོབ་སྐད། སྤྱིར་རྒྱལ་བློན་འདི་གཉིས་ལས་བློན་པོ་གྲུབ་ཐོབ་ཆེ་བར་བྱེད་དོ། །གཞན་ཡང་རྣལ་འབྱོར་མ་ཀང་ཀ་ནཱ་པ་ཞེས་བྱ་བ་རང་གི་ལག་གདུབ་ལ་སེམས་ཟིན་པས་དེ་ལ་བརྟེན་ནས་གནས་ལུགས་ཀྱི་དོན་མངོན་སུམ་དུ་གྱུར། རྣལ་འབྱོར་པ་དྷུ་མ་པ་དང་ལྷན་ཅིག་ཏུ་རིག་པའི་བརྟུལ་ཞུགས་ཀྱི་སྤྱོད་པ་མཛད། འཕྲལ་ཕལ་ཆེར་དུ་ཤིང་ཨ་མྲའི་ལྗོན་པའི་འབྲས་བུ་རྣམས་ཛམྦུའི་ཤིང་ལ་སྤོ། དེའི་འབྲས་བུ་ཀེ་ལའི་ཤིང་ལ་སྤོ་བ་སོགས་ལྗོན་ཤིང་རྣམས་ཀྱྀ་མེ་ཏོག་འབྲས་བུ་ལོ་མ་དག་ཕན་ཚུན་དུ་སྤོ་བའི་རོལ་རྩེད་ཁོ་ན་མཛད་སྐད། མཐར་འདི་ཡང་མི་སྣང་བའི་དངོས་གྲུབ་འགྲུབ་བོ། །རྣལ་འབྱོར་མ་ཛ་ལ་ཧ་རི་ནི། རྗེ་རིགས་ཀྱི་བུ་མོ་ཞིག་ལོ་གཉིས་སམ་གསུམ་དུ་ཚོགས་ཅན་མ་བྱས་སོ། །དེ་ནས་དད་པ་རྙེད་ནས་སྔགས་ཀྱི་སྒོར་ཞུགས་ཏེ། སློབ་དཔོན་ཆེན་པོའི་དངོས་སློབ་ཀྱང་ཡིན། སློབ་དཔོན་གུ་ཧྱ་པ་རིང་དུ་བསྟེན་ཅིང༌། གཏུམ་མོ་བསྒོམས་པས་གྲུབ་པ་ཐོབ། ལོ་མང་དུ་འགྲོ་བའི་དོན་མཛད་དེ། དེ་དག་གི་སྐབས་ཕལ་ཆེར་དུ་ཁ་ཟས་ཀྱི་བྱ་བ་མཛད་པ་ན། རང་གི་


TNT17_Page_0242
[མ་དཔེ་གཟིགས་ན་འདིར་གནོན།]

མདུན་དུ་ཐོད་པ་རེ་བཞག་ནས། ཁྱིམ་གཅིག་གམ་གཉིས་སམ་གསུམ་སོགས་ནས། གོང་བུ་དགུག་པའི་སྦྱོར་བ་བྱས་ཏེ། ལ་ལ་ནས་འབྲས་ཆན་དང་ཁུར་བ་བཀུག ལ་ལ་ནས་ཆང་བཀུག ལ་ལ་ནས་ཞུན་མར་སོགས་དགུག་སྟེ་སྣོད་ཁེངས་པར་མཛད་དེ་གསོལ་ལོ། །དེའི་སྐབས་སུ་ཡུད་ཅིག་ཁྱིམ་དེ་དང་དེའི་ཟས་དང་སྐོམ་རྣམས་བཅུད་མེད་པར་འགྱུར། །དེ་ནས་ཁོང་རང་ཚིམས་ཚུལ་མཛད་ནས་སེ་གོལ་གཏོགས་པ་ན། སླར་ཡང་ཁྱིམ་དེ་དང་དེར་ཆང་ཁུགས་པ་དང༌། དར་བ་ལས་མར་སྐྱེ་བ་སོགས་འབྱུང་ངོ༌། །འདིས་སྣ་ཚོགས་རི་མོ་ཞེས་བྱ་བའི་གཞུང་ཞིག་ཀྱང་མཛད་དེ་རྫོགས་རིམ་སྟོན། འདི་ཡང་འཇའ་ལུས་སུ་གྱུར་པར་གྲགས། དེ་དག་ལ་སོགས་པ་དངོས་གྲུབ་དང་ནུས་པ་ཐོབ་པའི་སློབ་མ་བགྲང་བར་མི་སྤྱོད་དོ། །ཡང་ཉིང་སློབ་རྣམས་ཀྱི་རྣམ་པར་ཐར་པ་ནི་སྤྱིར་བྲི་བར་མི་ལང་ཡང༌། སློབ་དཔོན་གུ་ཧྱ་པ་ལ་སློབ་མ་གྲུབ་པ་ཐོབ་པ་མང་དུ་བྱུང་བའི་གཙོ་བོ་ལྷག་པར་གྲགས་ཆེ་བ་ནི། སློབ་དཔོན་ཨནྟར་པ་སྟེ་ཨནྟར་ཙརྱ་ཞེས་ཟེར། དེ་ཉིད་བོད་སྐད་དུ་བསྒྱུར་བ་བར་མའི་སློབ་དཔོན་ནོ། །མཚན་དངོས་བྀ་ཛ་ཡ་རཀྵི་ཏ་རྣམ་རྒྱལ་སྲུང་བ་སྟེ། དེ་ལ་ཞེས་སྦྱར་བས་རྣལ་རྒྱལ་ཞབས་ཟེར་རོ། །སློབ་དཔོན་འདི་ནི་དཔལ་ནཱ་ལན་དར། རིག་པའི་གནས་ལྔ་ལ་མཁས་པར་བྱས་ཤིང༌། གསང་སྔགས་ཀྱི་རྒྱུད་སྡེ་ཡང་མང་དུ་ཤེས་པ་ཅིག་གོ །དེ་ནས་སློབ་དཔོན་གུ་ཧྱ་པ་ལ་དད་པ་རྙེད་ནས། དེའི་དྲུང་དུ་རྣལ་འབྱོར་པ་མཛད། དཔལ་འཁོར་ལོ་སྡོམ་པའི་དོན་བསྒོམ་ཞིང་བཞུགས། ལན་ཅིག་ལམ་ཅིག་ལ་


TNT17_Page_0243
[མ་དཔེ་གཟིགས་ན་འདིར་གནོན།]

བཞུད་པས། གྲོང་ཁྱེར་ཞིག་གི་མཐའ་ན་སྔར་གདོལ་པའི་ཁྱིམ་ཞིག་ཡོད་པ། སྐབས་དེར་ཁང་བཟང་རྒྱ་དཔངས་ཆེན་པོ་ཡོད་པ་ཅིག་ཏུ་སོང་འདུག །དེའི་ཁང་ཐོག་མདའ་ཡབ་ཀྱི་ཕག་ནས་བུད་མེད་བཟང་མོ་ཞིག་རིབ་ཙམ་རིབ་ཙམ་བལྟ་ཞིང༌། ཡུལ་ཨོ་ཏྲེ་ཞེས་པ་ན་ཆང་འཚོང་མ་ནག་མོ་ཞེས་བྱ་བའི་ཁྱིམ་ན། ཆོས་ཀྱི་གླེགས་བམ་ཞིག་འདུག་པ་ཁྱོད་ཀྱིས་ལོང་ཞེས་ཟེར་བ་གསན་པས། དེ་མ་ཐག་ཆས་ནས་རིམ་གྱིས་ཡུལ་ཨོ་ཏྲེར་བྱོན་ནོ། །དེ་ན་ཆང་འཚོང་མ་ནག་མོ་བྱ་བ་ཡོད་དམ་བྱས་པས་ཡོད་ཟེར། ཁྱིམ་རྩད་བཅད་དེ་དེར་ཞུགས་ནས་གླེགས་བམ་ཡོད་མེད་དྲིས་པས་མེད་ཟེར། ཁྱིམ་དེ་ཡང་ཆུང་ངུ་ངན་པ་ཅིག་ལ་སྟེང་འོག་ཀུན་ཏུ་བཙལ་ཡང་མ་མཐོང་ངོ༌། །དེ་ནས་དེའི་སྒོ་དྲུང་དུ་བཞུགས་ཏེ་ཞག་ཤས་ཤིག་སོང་བ་ན། ཉིན་ཅིག་ཆང་འཚོང་མ་ཏེ་ཕྱིར་སོང༌། རང་ཉིད་ཆང་མང་པོ་འཐུངས་པས་ར་རོ་སྟེ། སྲང་ཁར་གཉིད་དུ་སོང༌། ཇི་ཞིག་ན་དེ་བློ་རྡོལ་གྱི་ཚུལ་དུ་ཁྲོ་བོ་ཆེན་པོ་སྒོ་གོང་ན་ཡོད་ཟེར། དེར་སྒོ་སྟེང་བྲུས་ཏེ་བཙལ་བས་གཏུམ་པོ་ཁྲོ་བོ་ཆེན་པོའི་རྒྱུད་ཀྱི་གླེགས་བམ་བྱུང་ངོ༌། །དེ་ཉིད་སྤྲུལ་པར་ཤེས་ནས་གསོལ་བ་བཏབ་ཀྱང༌། དངོས་སུ་ལན་ཅང་མ་བྱུང༌། རྨི་ལམ་དུ་ལོ་བདུན་ནས་སྟོན་པར་འགྱུར་གསུང་བ་བྱུང་བས། གླེགས་བམ་སྤྱན་དྲངས་ཏེ་མ་ག་དྷར་བྱོན། ཕྱིས་ལོ་བདུན་ན་རྡོ་རྗེ་མཁའ་འགྲོ་མ་མངོན་སུམ་དུ་བྱོན་ནས་བྱིན་གྱིས་བརླབས་ཤིང་རྒྱུད་དེ་ཡང་གཞན་ལ་སྟོན་པའི་སྣང་བ་སྩལ་ལོ། །དེ་ནས་ལན་ཅིག་དུར་ཁྲོད་བསིལ་བའི་ཚལ་དུ་བསྒོམས་པས་ཧེ་རུ་ཀ་ཞལ་གཟིགས་ཤིང༌། ནུས་པ་ཐོབ་པའི་རྣལ་འབྱོར་པ་ཆེན་པོར་གྱུར་ཏོ། །


TNT17_Page_0244
[མ་དཔེ་གཟིགས་ན་འདིར་གནོན།]

དེ་ལྟར་རིམ་པས་བསྒོམས་པས། རྒྱུད་དང༌། སྔགས་དང༌། ཡེ་ཤེས་ཀྱི་རིམ་པའི་རྟོགས་པ་རྫོགས། འཁོར་མང་པོ་དང་བཅས་ནས་བྷང་ག་ལ་དང༌། མ་ག་དྷར་ཕར་འགྲོ་ཚུར་འགྲོ་མཛད་ཅིང༌། སྤྲོས་བཅས་དང༌། སྤྲོས་མེད་ཀྱི་རིག་པའི་བརྟུལ་ཞུགས་ཅི་རིགས་པ་མཛད་པ་ན། དུས་ལན་ཅིག་མ་ག་དྷིས་ཡུལ་གྱི་མཐའ་གྲོང་ཁྱེར་ཁ་བ་ཙ་ཟེར་བ་ཅིག་ཏུ། རྒྱལ་པོའི་བློན་པོ་ཞིག་གིས་ལྷ་ཁང་བཞེངས་ཤིང༌། དེ་ལ་རབ་གནས་ཞུས་པས་ཟླ་བ་ཉ་བ་ཞིག་ལ་རབ་གནས་མཛད། ཉི་མ་དེ་ཀ་ལ་ནུབ་ཕྱོགས་སིནྡྷུའི་ཡུལ་དུ་ཀླ་ཀློའི་རྒྱལ་པོ་བཏུལ་པ་ཡིན། སྐུ་ལུས་ཀྱི་བཀོད་པ་གཉིས་དུས་གཅིག་ཏུ་བསྟན་པའོ། །དེ་ཡང་སིནྡྷུའི་ཡུལ་དུ་ཀླ་ཀློའི་རྒྱལ་པོ་ཞིག་གསར་དུ་བཞུགས། ཡུལ་དེ་ན་དགེ་སློང་ལྔ་བརྒྱ་ཙམ་གནས་པའི་གཙུག་ལག་ཁང་ནོར་བུ་སྦས་པའི་མིང་ཅན་ཞིག་ཡོད། རྒྱལ་པོ་དེས་དེ་འཇོམས་པར་འདོད་པ་ན་དེར་གནས་པའི་དགེ་སློང་ཕལ་ཆེར་ནི་བྲོས། ནང་པར་ཀླ་ཀློའི་རྒྱལ་པོ་དེ་རིང་ཡོང་རྒྱུའི་དེའི་ནུབ་མོ་ཁྱིམ་ཆུང་ཞིག་ན་ཕྱོགས་ནས་འོངས་པའི་རྣལ་འབྱོར་པ་ཅིག་འདུག །ནམ་ཕྱེད་ན་དེར་རོལ་མོའི་སྒྲ་བྱུང་བས། དེར་སྡོད་མཁན་བཙུན་པ་ཅིག་གིས་སྒོ་གསེང་ནས་བལྟས་པས། བུད་མེད་གཟུགས་དང་རྣམ་འགྱུར་སྣ་ཚོགས་ཅན་མང་པོ་རྣལ་འབྱོར་པ་དེ་ལ་མཆོད་པ་བྱེད་པར་མཐོང་ངོ༌། །དེ་ལ་ཁྱེད་ནུས་པ་ཐོབ་པར་འདུག་པས་མ་རུངས་པའི་རྒྱལ་པོ་འདུལ་བར་ཞུ་ཞུས་པས། ངས་དེ་འདུལ་བའི་སྐལ་བ་མེད། སློབ་དཔོན་ཨནྟར་པ་སྤྱན་དྲངས་ཀྱི་ཟེར། རྒྱལ་པོ་སང་ཉིན་འོང་ན་དེས་མི་ཕན་བྱས་པས། ངས་ད་ལྟ་སླེབ་འོང་ཟེར། དེ་རྐང་མགྱོགས་གྲུབ་པ་ཡིན། དེ་ནས་ནམས་ལངས་


TNT17_Page_0245
[མ་དཔེ་གཟིགས་ན་འདིར་གནོན།]

པ་ཉིད་ན་སློབ་དཔོན་ཨནྟར་པ་འཁོར་བཅས་དེར་བྱུང་ངོ༌། །དེ་ནས་ཉི་མ་ཤར་བ་ན་རྒྱལ་པོ་གླང་པོ་ཆེ་ལ་ཞོན་འཁོར་དང་བཅས་པ་དེར་འོངས། སློབ་དཔོན་གྱིས་གླང་པོ་ཆེ་ལ་ལྟ་སྟངས་མཛད། གླང་པོ་ཆེའི་སྣ་དང་མཆེ་བ་ས་ལ་ལྷུང༌། གླང་པོ་ཆེའི་འབྲོགས་པས་ཀླ་ཀློའི་རྒྱལ་པོ་ཡང་ས་ལ་ལྷུང༌། ཡང་ལྟ་སྟངས་མཛད་པས་རྒྱལ་པོ་དང་དམག་མི་དཔའ་བོ་ཐམས་ཅད་ལྐུགས་ཤིང་རེངས་པར་གྱུར། དཔུང་གཞན་རྣམས་བྲོས་སོ། །དེ་ནས་དམག་མི་དཔའ་བོ་དེ་རྣམས་ཀྱི་ནང་ནས། ཕལ་ཆེར་གྱིས་སློབ་དཔོན་གྲུབ་པ་ཐོབ་པར་ཤེས། གུས་པ་བྱས་པས་རེངས་པ་ལས་གྲོལ་ལོ། །ཡང་ལྟ་སྟངས་མཛད་པས་གླང་པོའི་སྣ་དང་མཆེ་བ་འབྱོར། རྒྱལ་པོ་ནི་གསོ་བའི་སྐལ་བ་མེད་གསུང་སྟེ་དུས་ལས་འདས་སོ། །དེ་ནས་མི་རིང་བར་རྒྱལ་པོ་གཤིན་རྗེ་ཞེས་བྱ་བ་ཆོས་དང་ལྡན་པ་ཅིག་གིས་རྒྱལ་སྲིད་དེ་བླངས་སོ། །སློབ་དཔོན་འདིས་ཕལ་ཆེར་འཁོར་ལོ་སྡོམ་པའི་སྒོ་ནས་འགྲོ་བའི་དོན་མཛད། གྲུབ་ཐོབ་ཏིལླི་པའི་རྩ་བའི་བླ་མ་ཡང་འདི་ཡིན། མཐར་ཤིན་ཏུ་སྤྲོས་མེད་ཀྱི་སྤྱོད་པ་སྤྱད་པས་གསང་རིམ་མཐར་ཕྱིན། ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་པའོ། །གཞན་ཡང་སློབ་དཔོན་ནག་པོ་སྤྱོད་པ་ཆུང་བ་དང༌། བྷུ་བ་རི་པ་དང༌། བྷུ་པ་བློ་ལྡན་ལ་སོགས་པ་དང༌། ཀུ་ས་ལ་བྷ་དྲ་ཆུང་བ་ནས་བརྩམས་ཏེ། ད་ལྟའི་བར་དུ་ཡང་ཙརྱ་པའི་སྡེ་མ་སྟོངས་པར་ཡོད་དོ། །དེ་དག་གི་ལོ་རྒྱུས་ཅི་རིགས་པ་ནི་གཞན་དུ་ཤེས་པར་བྱའོ། །འདིར་སྨྲས་པ། བླ་མེད་བདེ་བས་སྲིད་གསུམ་ཁྱབ་མཛད་


TNT17_Page_0246
[མ་དཔེ་གཟིགས་ན་འདིར་གནོན།]

པ། །དངོས་གྲུབ་མཆོག་བརྙེས་རྣམས་ཀྱི་གཏམ་འདི་མཚར། །རང་བསྟོད་ཙམ་གྱི་རྫུ་རླབས་འཕྲེང་བ་ལ། །རྡཽམ་བརྗིད་ཆེན་པོར་རློམ་པ་བཞད་གད་གནས། །སྤྱོད་པའི་རྡོ་རྗེ་སློབ་མའི་ཚོགས་བཅས་པའི། །གཏམ་རྒྱུད་ཡིད་ཆེས་རུང་བ་འདིར་བཤད་ཀྱི། །འདི་ལས་བསོད་ནམས་ཕུང་པོ་ཅི་ཐོབ་པ། །དེས་ནི་ཧེ་རུ་ཀ་དཔལ་གནས་ཐོབ་ཤོག །སློབ་དཔོན་ཆེན་པོ་སྤྱོད་འཆང་དབང་པོའི་རྣམ་པར་ཐར་བ་ངོ་མཚར་སྙན་པའི་སྒྲ་དབྱངས་ཞེས་བྱ་བ་འདི་ཡང༌། རང་དང་ལྷན་ཅིག་སྤྱོད་པ་ཀུན་དགའ་དཔལ་བཟང་གིས་ཡང་ཡང་བསྐུལ་ནས། ཏཱ་ར་ནཱ་ཐས་བར་སྐབས་སུ་ངེས་པར་བརྗོད་པའོ། །རང་ལོ་ང་བརྒྱད་པ་ལ་བྲིས་པ་ཡིན། གཅིག་ཞུས། མངྒ་ལཾ།། །།བདག་གིས་དགེ་བ་གང་བསགས་འདི་ཡིས་ནི། །སེམས་ཅན་ཐམས་ཅད་བདེ་ཞིང་སྐྱིད་པ་དང༌། །གནས་སྐབས་མཐར་ཐུག་ཕན་བདེ་མཆོག་སྤེལ་བའི། །བླ་ན་མེད་པའི་རྒྱུ་ཚོགས་ཉིད་གྱུར་ཅིག། །།

སློབ་དཔོན་སྤྱོད་འཆང་དབང་པོའི་རྣམ་ཐར་གྱི་འཕྲོས་དོན་ཁ་སྐོང་ལ་ཉེ་བར་མཁོ་ཞིང་གྲུབ་ཐོབ་གཞན་མང་པོའི་བྱུང་ཚུལ་རྟོགས་པར་བྱེད་པའི་ཡི་གེ


TNT17_Page_0247
[མ་དཔེ་གཟིགས་ན་འདིར་གནོན།]

སློབ་དཔོན་སྤྱོད་འཆང་དབང་པོའི་རྣམ་ཐར་གྱི་འཕྲོས་དོན་ཁ་སྐོང་ལ་ཉེ་བར་མཁོ་ཞིང་གྲུབ་ཐོབ་གཞན་མང་པོའི་བྱུང་ཚུལ་རྟོགས་པར་བྱེད་པའི་ཡི་གེ་ཡང་དག་པའོ།


TNT17_Page_0248
[མ་དཔེ་གཟིགས་ན་འདིར་གནོན།]

ན་མོ་གུ་རུ། སློབ་དཔོན་ཙརྱ་པ་ཆེན་པོའི་གཏམ་རྒྱུད་ཀྱི་སྐབས་སུ་གོལ་ས་གཅོད་པ་དང་ཉེར་མཁོ་འགའ་ཞིག་བཤད་ན། སློབ་དཔོན་ཆེན་པོ་དེ་ཉིད་ཀྱི་སྐབས་ནས་གཟུང་རྗེས་སུ་ལོ་བརྒྱའམ་ཉིས་བརྒྱའི་བར་མཚམས་ཚུན་ཆད་དུ་སློབ་དཔོན་ཉིད་ཀྱི་རྗེས་འབྲང་དང༌། རྗེས་འབྲང་སློབ་རྒྱུད་མ་ཡིན་པའི་རྣལ་འབྱོར་པ་གཞན་ཡང་རུང་སྟེ། དབང་པོ་རྣོན་པོ་རྫོགས་རིམ་ཁོ་ན་བསྒོམས་པས་ཡེ་ཤེས་མཆོག་སྐྱེས་པ། འབྲིང་པོ་བསྐྱེད་རྫོགས་གཉིས་ཀར་ལ་བསླབས་པས་རིམ་པས་བརྟན་པ་ཐོབ་པ་དང༌། ཐ་མ་བསྐྱེད་རིམ་ཙམ་ལ་བརྟན་པ་ཐོབ་པ་ཤིན་ཏུ་མང་བར་བྱུང་ཞིང༌། ཕལ་ཆེར་སློབ་དཔོན་སྤྱོད་པ་པ་ཆེན་པོའི་མིག་ལྟོས་ལ་བརྟེན་ནས། སྤྲོས་བཅས་སམ་སྤྲོས་མེད་ཀྱི་རིག་པའི་བརྟུལ་ཞུགས་འཇིག་རྟེན་པའི་མངོན་དུ་སྤྱོད་པའི་སྲོལ་ཀ་མང་པོ་དང༌། དུས་ལ་མ་


TNT17_Page_0249
[མ་དཔེ་གཟིགས་ན་འདིར་གནོན།]

བབ་པ་ཅི་རིགས་ཙམ་མ་གཏོགས། སྤྱོད་པ་ལ་ཞུགས་པ་རྣམས་མཆོག་དང་ཐུན་མོང་གི་དངོས་གྲུབ་གང་རུང་རེ་ཐོབ་པ་ཁོ་ནའོ། ཁྱད་པར་དུ་ཡང་སློབ་དཔོན་ཆེན་པོ་ཀཧྣ་པའི་སློབ་རྒྱུད་ཆེས་མང་ཞིང༌། དེ་དག་རྣམས་རིམ་གཉིས་ལ་རྟོགས་པ་སྐྱེས་ཤིང༌། ཅུང་ཟད་བརྟན་ན་ཤིན་ཏུ་བརྟན་པ་རང་མ་ཐོབ་ཀྱང༌། རིག་པའི་བརྟུལ་ཞུགས་སྤྱོད་པའི་སྲོལ་ཀ་ཤིན་ཏུ་དར་ཞིང༌། ཐམས་ཅད་ལ་འདོད་དོན་གྲུབ་འབྲས་ཀྱང་འབྱུང་སྟེ། བརྟུལ་ཞུགས་སྤྱོད་པའི་བསྟན་པ་དར་བའི་དུས་ལ་བབ་པ་གཅིག་དང༌། སློབ་དཔོན་ཀཧྣ་པ་ཉིད་ཀྱི་བྱིན་རླབས་ཀྱི་སྟོབས་ཀྱང་ཡིན་པར་གྲགས། དེ་ཡང་སློབ་དཔོན་དེས་བརྟུལ་ཞུགས་ཀྱི་འཕྲོ་བསྡུས་ནས། རང་གི་མཛད་དགོས་རྒྱུའི་བྱ་བ་ལྷག་མ་རྣམས། སློབ་རྒྱུད་རྣམས་ཀྱི་དོན་དུ་བསྔོས་པ་ལས་བྱུང་བ་ཡིན་ཟེར།


TNT17_Page_0250
[མ་དཔེ་གཟིགས་ན་འདིར་གནོན།]

དུས་དེ་ཙམ་ན་སྤྱོད་པ་པའི་སློབ་རྒྱུད་ཕྱོགས་ཀུན་ཏུ་ཁྱབ་ལ། དུས་ཚོད་དེའི་རྗེས་ཤིག་ནས་ཙརྱ་པའི་སྡེ་ཤར་ཕྱོགས་སུ་གཙོ་བོར་དར་བས། བར་སྐབས་དེར་འཕག་ཡུལ་གྱི་ཁ་སྐད་ལ། ཤར་ཕྱོགས་ནག་པོ་པས་འདུལ་བས་ཙརྱ་པ་མང༌། ལྷོ་ཕྱོགས་ཀླུ་སྒྲུབ་ཀྱིས་འདུལ་བས་དྷརྨ་པ་མང༌། ནུབ་ཕྱོགས་ལཱ་བ་པས་འདུལ་བས་བ་ལནྟི་པ་མང༌། བྱང་ཕྱོགས་གོ་རཀྵས་འདུལ་བས་ཨ་ཏེ་ས་པ་མང་ཟེར་ཏེ་ཕྱི་མ་འདི་ད་ལྟ་ཛོ་གིར་གྲགས་པ་རྣམས་སོ། །ཙརྱ་པའི་སྡེ་ལ་གྲུབ་ཐོབ་ཆེ་ཆུང་དཔག་ཏུ་མེད་པ་བྱུང༌། ད་ལྟ་ཡང་བྷང་ག་ལ་དང་བྷཱ་ཊི་དང༌། ཧེར་མྦ་དང༌། སིལ་ཧ་ཊ་དང༌། ཀོ་ཀི་སོགས་ན་སྡེ་ཅུང་ཟད་ཙམ་ཡོད་དེ། མི་གྲངས་མང་པོ་མེད་ཀྱང་དུས་ལ་ལྟོས་པའི་ནུས་པ་ཐོབ་པ་མང་པོ་ཡོད་དོ། །སྔོན་བོད་ཀྱི་ལོ་རྒྱུས་གཞན་རྣམས་ནའང་སྣ་ཚོགས་སྣང་ཞིང༌། དོ་ཧའི་ངག་སྒྲོས་རས་ཆུང་པ་ནས་བརྒྱུད་པ། རྗེ་རྒྱ་རས་ཀྱིས་ཡི་གེར་མཛད་པ་ཅིག་ན། བླ་མའི་བཀའ་ཆད་བྱུང་བའི་ཚུལ་བསྟན་པའི་ནག་པོ་པ་དེ། ནག་པོ་སྤྱོད་པ་ཆུང་བ་ཡིན། ཆེ་བ་མིན་གསུང་བ་ཅིག་ཀྱང་འདུག དེ་ཡང་ཏི་པུའམ། ཨ་མོ་གྷ་བཛྲ་གྱི་གསུང་བགྲོས་ཅིག་ནི་ཡིན་པར་སྣང༌། ཨུ་རྒྱན་པ་རིན་ཆེན་དཔལ་ཡང་དེ་དང་མཐུན་པར་གསུང་ཞིང༌། ཁོང་རང་ནག་པོ་པའི་རྣམ་འཕྲུལ་ཡིན་ཚུལ་སློབ་མ་རྣམས་ཀྱིས་བྲིས་འདུག ཁོང་གིས་མཛད་པའི་གཏན་ཚིགས་ཉུང་ངུ་ཅིག་ན། རྒྱ་གར་བ་རྣམས་སློབ་དཔོན་ནག་པོ་སྤྱོད་པ་ད་ལྟ་ཀམྤོ་ཛའི་གླིང་ན་འཁྲུངས་ཡོད། མ་འོངས་པ་ན་རལ་གྲི་ལ་སོགས་པའི་དངོས་གྲུབ་མང་པོ་སྒྲུབས་ཏེ། ཝཱ་རཱ་ཎ་སིར་བྱོན་ནས་ཆོས་བསྟན་པས་རྡོ་རྗེ་ཐེག་པའི་བསྟན་པ་ཆེས་


TNT17_Page_0251
[མ་དཔེ་གཟིགས་ན་འདིར་གནོན།]

དར་ཏེ། གྲུབ་ཐོབ་གནམ་གྱི་སྐར་མ་ཙམ་འབྱུང་བར་འདོད་དོ། །ཞེས་བྲིས་འདུག ཡི་གེ་དེ་ན་རྒྱལ་པོ་གོ་པཱ་ལས་འགྲུབ་པའི་ཡི་དམ་ཡང་ལྷ་མོ་ཙུན་ད་ཡིན་པར་བཤད་པ་དང༌། སྐབས་འདིའི་འདོད་ཚུལ་བསྐྱར་བ་དེ་གཉིས་རྒྱ་གར་བའི་ངག་སྒྲོས་སུ་འདུག །བོད་རྐྱང་པའི་རིག་གྲས་དང་མི་འདྲའོ། །རྒྱ་གར་ཕྱོགས་ནའི་སློབ་རྒྱུད་བོད་པ་རྣམས་ཀྱི་དོ་ཧའི་ལོ་རྒྱུས་ཀུན་ན། མངའ་བདག་མཻ་ཏྲི་པ་ཡང༌། སློབ་དཔོན་ནག་པོ་སྤྱོད་པའི་རྣམ་འཕྲུལ་ཡིན་པར་འཆད་ཅིང༌། འབར་བའི་གཙོ་བོ་ནག་པོ་སྤྱོད་པའི་མཚན་གྱི་རྣམ་གྲངས་སུ་འཆད་དོ། །ཡང་ཇི་སྐད་དུ། བརྟུལ་ཞུགས་སྤྱོད་འཆང་བླ་མེད་པ། །འབར་བའི་གཙོ་བོའི་བཀའ་དྲིན་གྱིས། །ཞེས་སློབ་དཔོན་ཨ་མི་ཏ་བཛྲ་གྱིས་བཤད། དཔྱད་དེ་མིག་ཟུར་ལ་ཐོགས་ནས་ཕྱིས་ཀྱི་ཁ་ཅིག སྤྱོད་འཆང་ནག་པོ་དང༌། འབར་གཙོ་གཅིག་ཡིན། དེ་དང་ནག་པོ་སྤྱོད་པ་ཐ་དད་དོ་ཞེས་སྨྲ་བ་ནི། གླིང་ཆེན་རས་པ་དང༌། གླིང་རས་མི་གཅིག་ཟེར་བ་དང་འདྲའོ། །ཡང་འབར་བའི་གཙོ་བོའི་སྐྱེ་བ་གསལ་བར་དྲན་པས་སྤྱོད་པ་ཉིད་ལའང་འབར་བའི་གཙོ་བོའི་མཚན་གྱི་རྣམ་གྲངས་འབྱུང་བ་ནི་མི་འགལ་ལོ། །ད་ནི་གཏམ་རྒྱུད་འགའ་ཞིག་བརྗོད་དེ། ཙརྱ་པའི་རྣལ་འབྱོར་པ་ཀཱ་ལི་ཟེར་བ་ཅིག ཡུལ་ར་དྷའི་ཚོང་འདུས་དང་ཉེ་བར་སྒོམ་བྱེད་དོ། །དེའི་གྲོགས་མཆེད་བི་ཀཱ་ལི་ཟེར་བ་ཅིག་གྲོང་ཁྱེར་ལི་ཁར་ཤིང་འཕེལ་དང་ཉེ་བར་བསྒོམ་མོ། །གཉིས་


TNT17_Page_0252
[མ་དཔེ་གཟིགས་ན་འདིར་གནོན།]

ཀར་གྱིས་ཏིང་ངེ་འཛིན་ཅུང་ཟད་བརྙེས། བི་ཀཱ་ལི་གྲོང་ཁྱེར་ར་དྷར་སོང་ན། ཀ་ལི་དང་འཕྲད། འོ་སྐོལ་རྣམས་ཚོགས་འཁོར་བྱའོ་ཞེས་བགྲོས་ནས། ཚོགས་ཁང་དུ་རྣལ་འབྱོར་ཕོ་མོ་གཞན་ཡང་སྤྱན་དྲངས། བི་ཀཱ་ལི་ན་རེ། དུར་ཁྲོད་ནས་མི་རོ་བཀུག་ལ་གདན་བྱ་ཟེར། ཁོང་གཉིས་ཀར་དུར་ཁྲོད་དུ་ཕྱིན། མི་རོ་རྣམས་ལ་ལྕག་རྒྱབ་པས་ཐམས་ཅད་ལངས་ཏེ། ཚོགས་ཁང་དུ་སླེབ་ནས་སོ་སོའི་གདན་དགོས་པར་འགྱེལ་ཏེ་སོང་ངོ༌། །དེར་གཡས་གྲལ་གྱི་འགོ་ལ་བི་ཀཱ་ལི་དང༌། གཡོན་གྲལ་གྱི་འགོ་ལ་ཀཱ་ལི་འདུག་ནས་ཚོགས་འཁོར་གྱི་བྱ་བ་བྱས། དེ་གྲོལ་བ་ན་ཐམས་ཅད་ལངས་པའི་སྐབས། ད་མི་རོ་རྣམས་རང་གནས་སུ་སྐྱེལ་དགོས་ཟེར་ཙ་ན། ཀཱ་ལིའི་འགྲལ་གྱི་རྣམས་ལ། ཁོང་རང་གིས་སེ་གོལ་གཏོགས་པས་ཐམས་ཅད་ལངས་ནས་གར་བྱེད་ཅིང་དུར་ཁྲོད་དུ་སོང༌། སྔར་གྱི་ཤུལ་དུ་འགྱེལ་ལོ། །བི་ཀཱ་ལིའི་གྲལ་གྱི། རྣམས་ཁོང་རང་གི་དམིགས་པ་བརྟད་ཅིང་རྣམ་འགྱུར་བྱས་པས། ཐོག་མར་ཕྱེད་ཙམ་ལངས་ཏེ་སླར་འགྱེལ། བར་དུ་མགོ་བཏེག་ཙམ་བཏེག་ཙམ་བྱུང༌། མཐར་འགུལ་བ་ཙམ་ཡང་མ་བྱུང་སྟེ། དེར་རྣལ་འབྱོར་པ་ཀཱ་ལིན་རེ། ནུས་པ་ཅུང་ཟད་ཙམ་ལ་ང་རྒྱལ་བྱར་མི་རུང༌། ད་དུང་བསྒོམ་དགོས་ཟེར། མི་རོ་དེ་རྣམས་ལ་ཀཱ་ལིས་རྡོག་པ་རེ་བསྣུན་པས་ཐམས་ཅད་ལངས་ཏེ་སྔ་མ་བཞིན་དུ་སོང་ངོ༌། །ཕྱིས་རྣལ་འབྱོར་པ་ཀཱ་ལིས་དངོས་གྲུབ་ཆེན་པོ་བརྙེས། བི་ཀཱ་ལིས་ཀྱང་


TNT17_Page_0253
[མ་དཔེ་གཟིགས་ན་འདིར་གནོན།]

སླར་རང་གནས་སུ་ལོག་སྟེ་བསྒོམས། དུས་གཞན་ཅིག་ན་མིག་སྨན་གྱི་དངོས་གྲུབ་ཐོབ་བོ། །ཡང་རྒྱལ་པོ་དེ་བ་བཱ་ལིའི་ཡིག་མཁན་པྲ་ཎ་པ་ཞེས་བྱ་བ་ཞིགཡིག་མཁན་བོར་ཏེ་ཆོས་བསླབས་པས་པཎྜི་ཏ་མཁས་པར་སོང༌། དེ་ནས་ཙརྱ་པའི་རྣལ་འབྱོར་པ་ཅིག་གི་དྲུང་དུ་ཕྱིན་ནས་གདམས་ངག་ཞུས་ནས་བསྒོམས། ཏིང་ངེ་འཛིན་བཟང་པོ་སྐྱེས། ལུས་ཀྱང་ཤིན་ཏུ་ཡང་བ་ཐོབ་སྟེ་ངལ་དུབ་མེད་པར་གྱུར་ཅིང༌། ཆུའི་སྟེང་དུ་འཆག་པར་ནུས། ནང་གི་རྩ་ཐིག་མཐོང་པའི་ནུས་པས། བསྟན་བཅོས་དང་ཡི་གེའི་རིགས་སྔར་མ་ཤེས་པ་ཐམས་ཅད་ཀྱང་ཤེས། དུད་འགྲོ་དང་མི་མ་ཡིན་གྱི་སྐད་གོ་བར་བྱུང༌། ད་ནི་ནུས་པ་ཐོབ་པས་སྤྱོད་པ་བྱའམ་སྙམ་སྟེ་ལན་ཅིག་ལྗོངས་རྒྱུ་ཞིང་སོང་ངོ༌། །དེར་ཡུལ་ཀཱ་མ་རུའི་གྲོང་ཁྱེར་ཅིག་གི་འདབས་ན། ལྷ་ཁང་ཕྱེད་ཙམ་ཞིག་པ་ཅིག་འདུག།དེ་ན་གསུང་རབ་ཀློག་པའི་སྒྲ་ཐོས་སོ། །སྒོ་ཕྱེ་ནས་ནང་དུ་ཕྱིན་པས། རྣལ་འབྱོར་པ་ཀུན་སྤངས་ཀྱི་ཆ་བྱད་རྒན་པོ་ཅིགརེས་འགའ་ནི་པོ་ཏི་ཀློགརེས་འགའ་ནི་གཉིད་ཡུར་ཞིང་འདུག་གོ །དེ་དང་གཏམ་ཅུང་ཟད་བྱས་ནས། པྲ་ཎ་པས་ཀློག་མཁན་དེ་ལ། ཁྱེད་པཎྜི་ཏ་ལགས་སམ་རྣལ་འབྱོར་པ་ལགས་བྱས་པས། དེ་ན་རེ། རྣལ་འབྱོར་པ་ཡིན་ཟེར། རྣལ་འབྱོར་པ་རྒན་པོ་ཞིག་ཀློག་འདོན་བྱེད་དམ་བྱས་པས། འདི་ཀློག་པ་ཤིན་ཏུ་དཀའ་བས་དཀའ་ཐུབ་ཏུ་འགྱུར་སྡིག་པ་འབྱང་སྙམ་ཀློག་པ་ཡིན་


TNT17_Page_0254
[མ་དཔེ་གཟིགས་ན་འདིར་གནོན།]

ཟེར། དེ་ཙམ་ཀློག་པ་ལ་དཀའ་བ་ཅི་ཡོད་བྱས་པས། དེ་ན་རེ། འོ་ན་ཁྱེད་རང་འདི་ཀློག་ང་སྒོམ་པ་ལ་འགྲོ་ཟེར། པོ་ཏི་དེ་གཏད་ནས་དེ་སོང་ངོ༌། །པྲ་ཎ་པས་དེར་པོ་ཏི་བལྟས་པས་ཡི་གེའི་འགོ་གཞུག་ཙམ་ཡང་ངོ་མ་ཤེས། རྣལ་འབྱོར་པ་དེ་ཡང་གར་སོང་ཆ་མེད་དོ། །དེར་སྤྱོད་པ་བྱ་བའི་དུས་ལ་མ་སླེབ། ད་དུང་སྒོམས་ཤིག་ཅེས་པའི་སྒྲ་ནམ་མཁའ་ནས་སྒྲགས་པས། ཡང་དེ་ནགས་ཚལ་དབེན་པ་ཞིག་ཏུ་སོང་ནས་བསྒོམས་སོ། །ཀློག་མཁན་གྱི་ཚུལ་འཛིན་པའི་རྣལ་འབྱོར་པ་དེ་ནི། གྲུབ་ཐོབ་དྷརྨ་པ་ཡིན་པར་གྲགས། རྣལ་འབྱོར་པ་པྲ་ཎ་པས་ཕྱིས་སྤྲོས་བཅས་ཀྱི་སྤྱོད་པ་ནི་མ་བྱས། འཁོར་ལོ་སྡོམ་པའི་རྒྱུད་ལས་གསུངས་པའི་ཚིག་གི་བདག་པོའི་དངོས་གྲུབ་འགྲུབ་སྟེ་སྨོན་ལམ་གང་བཏབ་པ་འགྲུབ་བོ། །ཡང་ཙརྱ་པའི་རྣལ་འབྱོར་པ་ཅིག་མཚོ་ཞིག་གི་འགྲམ་ན་སྒོམ་ཞིང་ཡོད་དོ། །ཡུལ་ནི་ཨུ་ཌི་བི་ཤ་ཡིན། དེར་ལན་ཅིག་ཐོ་རངས་ཁ་སྒྲ་དང་འོད་ཆེན་པོ་དང་བཅས་ཏེ། བུད་མེད་ནག་མོ་ཅིག་གམ་དུ་བྱུང་ངོ༌། །དེ་བཀྲེས་སོ། །སྐོམས་སོ། །ངལ་ལོ་ཟེར་བ་ལ། རྣལ་འབྱོར་པ་དེ་ལ་རི་ཁྲོད་པ་འགས་བྱིན་པའི་མ་ཧེའི་གཟུག་གཅིག་དང༌། ཆང་གྷ་ཊ་གང་ཡོད་པ་དང་སྟབས་འགྲིག་ནས། དེ་ལ་བྱིན་པས། དེ་ཁམས་གཅིག་ལ་ཟོས། ཧུབ་གཅིག་ལ་བཏུངས། དེ་དགའ་བའི་ཚུལ་གྱིས་སྔགས་ཅིག་བསླབས། འདིས་ལྟ་སྟངས་བཅུ་འགྲུབ་པར་འགྱུར་ཟེར། བུད་མེད་དེ་ན་རེ། ངེད་ཕྲ་མེན་མའི་ལུགས་ཀྱིས་སྔགས་གཞན་ལ་སྦྱིན་ནས་


TNT17_Page_0255
[མ་དཔེ་གཟིགས་ན་འདིར་གནོན།]

ལུས་འདོར་དགོས་ཟེར། མཚོ་དེའི་དབུས་སུ་ནུབ་སོང་སྐད། རྣལ་འབྱོར་པ་དེས་རྩ་ཤིང་ལ་ཉམས་སད་བྱས་པས། ལྟ་སྟངས་གྲུབ་པར་མངོན་ཏེ། ད་ནི་ཡུལ་རྒྱུ་ཞིང་སྤྱོད་པ་བྱ་སྙམ། དེ་ནས་ཅུང་ཟད་ཅིག་ཡུལ་གཞན་དུ་སོང་བ་ན། བློན་པོའི་བུ་མོ་ཞིག་བློན་པོ་གཞན་ཅིག་ལ་བག་མར་འགྲོ་བ་ལ། རྒྱང་རིང་པོ་ནས་དབང་གི་ལྟ་སྟངས་བྱས་པས། དེ་དཔོན་གཡོག་ཐམས་ཅད་ཚུར་འོངས་རྣལ་འབྱོར་པ་ལ་ཕྱག་བཙལ། གསེར་གྱི་ཕྱེ་མས་གཏོར། ཡོ་བྱད་རྣམ་པ་དུ་མ་བཞག་ནས་སོང་ངོ༌། །དེ་ནས་རྣལ་འབྱོར་པ་དེ་དོན་ཐམས་ཅད་འགྲུབ་སྙམ་དགའ་ཆེས་ཏེ། རིག་པ་ཡེར་ཡེར་པོར་བྱས་ནས་རྒྱུ་ཞིང་སོང་ངོ༌། །དེ་ནས་དུས་གཞན་ཅིག་ན། ཐོང་མཁན་ཞིག་ཞིང་རྨོ་ཞིང་འདུག །ཕ་ཚད་ན་བཟའ་བཏུང་སྣ་ཚོགས་པ་རས་ཀྱིས་གཡོགས་ཏེ་བཞག་འདུག་གོ །ད་ལྟོའི་དུས་ལ་བབ་པས་ཟས་སློང་དགོས་སྙམ་སྟེ། ཤིས་བརྗོད་བྱས་པས། ཐོང་མཁན་དེ་ནི་གཏམ་གྱི་སྣེ་ཙམ་ཡང་མི་ལེན་པར་མ་ཐོས་པ་བཞིན་དུ་ལན་མི་འདེབས། རྒྱབ་བསྟན་ཅིང་འགྲོའོ། །དེ་ནས་ཡང་ནན་གྱིས་ལྟོ་བསླངས་པས་རྣལ་འབྱོར་པའི་གཟུགས་བཟུང་ནས་ལྟོགས་ངབ་ཆེ་བ་འདི་འདྲ་ཞེས་ཁ་ཟེར་བས། དེས་ཀྱང་རྨོས་གླང་གཉིས་ལ་ལྟ་སྟངས་བྱས་པས། གླང་གཉིས་དེ་མ་ཐག་ཤིའོ། །དེར་ཐོང་མཁན་ན་རེ། འོ་ན་ཁྱོད་སངས་རྒྱས་པའི་རྣལ་འབྱོར་པར་འདུག་པ། སངས་རྒྱས་པ་སྙིང་རྗེ་ཅན་བྱ་བ་ཡིན། ད་གླང་


TNT17_Page_0256
[མ་དཔེ་གཟིགས་ན་འདིར་གནོན།]

འདི་གཉིས་གསོ་བར་ཞུ་ཟེར། དེར་རྣལ་འབྱོར་པས་སྔགས་དང་ཕྱག་རྒྱ་དང་ཏིང་ངེ་འཛིན་བྱས་ཀྱང༌། གཡོ་བ་ཙམ་ཡང་མ་བྱུང་ངོ༌། །དེར་ཐོང་མཁན་ཉིད་ཀྱིས་ལྕག་རྒྱབ་པས་གླང་གཉིས་འཕྲབ་ཅིང་ལངས། ཞིང་ཆེན་པོ་དེ་ཡང་སྐད་ཅིག་ཉིད་ལ་རྨོས་གྲུབ་སྟེ། ཐག་ཇེ་རིང་ཇེ་རིང་ལ་མིག་མཐོང་ཙམ་ནས། དེ་ན་རེ། སེམས་ཅན་ལ་ཕན་བཏགས་པས་དངོས་གྲུབ་ཐོབ་པ་ཡིན་གྱི། ངན་པའི་སྤྱོད་པས་ག་ལ་ཡིན། ད་དུང་སྒོམས་ཤིག་ཟེར་ནས་མི་སྣང་བར་སོང་ངོ༌། །དེ་ནས་འཇིག་རྟེན་པའི་མཁའ་འགྲོ་མས་མཆོག་སྦྱིན་པ་དེ་ནི་ཡང་དག་པའི་དངོས་གྲུབ་ཀྱི་བར་ཆད་དུ་ཤེས་ནས་ལྷག་པའི་ལྷ་ལ་ནན་ཏན་དུ་བཤགས་པ་བྱས་ནས་བསྒོམས་པས། ནམ་ཞིག་ན་བཅོམ་ལྡན་འདས་མ་འདབ་ཆགས་ཀྱི་གཟུགས་ཀྱི་རྣམ་པས་བྱོན་ནས། ལུང་བསྟན་ཞིང་བྱིན་གྱིས་བརླབས། ཤེས་བྱ་ཐམས་ཅད་ལ་ཐོགས་པ་མེད་པའི་བློ་གྲོས་ཅན་དུ་གྱུར། ཕྲ་མོའི་ལས་རྣམས་ནི་གྲུབ་ལུས་ནི་གནས་མ་གྱུར་རོ། །འདིས་དང་པོ་ཞིག་རྣལ་འབྱོར་པ་རྣམས་ཀྱི་དགའ་སྟོན་དང་ཚོགས་ཀྱི་སྐབས། གྲལ་འཆོས་མཁན་ཡུན་རིང་རབ་བྱས་པས། པང་ཀ་ཏི་པ་སྟེ་གྲལ་བཅོས་པ་ཞེས་མིང་ལ་གྲགས་སོ། །ཐོང་མཁན་དུ་སྣང་བ་དེ་ཡང་གྲུབ་ཐོབ་མེ་དྷི་ན་པ་ཡིན་པར་གྲགས་ཀྱི། དཔལ་ཧེ་རུ་ཀའི་གསལ་ཁ་མེད་དོ། །ཡང་སློབ་དཔོན་ཤྲཱི་མ་ནུ་ནི། ཡུལ་མ་རུར་འཁྲུངས། རིགས་ཚོང་པ། གནས་དེ་ཉིད་དུ་རབ་ཏུ་བྱུང་ནས་མི་རིང་བར་ཁ་ཆེའི་ཡུལ་དུ་སོང༌། དེར་རིན་སྦས་


TNT17_Page_0257
[མ་དཔེ་གཟིགས་ན་འདིར་གནོན།]

པའི་གཙུག་ལག་ཁང་དུ་སྡེ་སྣོད་གསུམ་ལ་སྦྱངས་ཤིང་མཁས་པར་བྱས་པ་ཞིག །སློབ་དཔོན་སྤྱོད་པ་པའི་དངོས་སློབ་རྣལ་འབྱོར་པ་ནནྡྷི་པ་ཞེས་བྱ་བ་ས་འོག་གི་འཇིག་རྟེན་དུ་འགྲོ་ནུས་པ་ཅིག་དང་མཇལ། དབང་བསྐུར་ཞིང་གདམས་པ་དང་རྗེས་སུ་གདམས་པ་ཐོབ། དཔལ་ཨོ་རྒྱན་གྱི་གནས་སུ་བྲག་ཕུག་གཅིག་ཏུ་གནས་བཅས་ཏེ་བསྒོམ་ཞིང་བཞུགས། དཔྱིད་ཀྱི་ཐིག་ལེ་ལ་གསལ་སྣང་ཐོབ་པས། མངོན་ཤེས་དང་རྫུ་འཕྲུལ་ཤུགས་ལ་བྱུང་སྟེ། རིའི་ཁོང་སེང་དང་ས་འོག་ལ་ཅི་བདེར་སྤྱོད་ནུས། དེ་ནས་ནུས་པ་ཅུང་ཟད་ཐོབ་པའི་རྣལ་འབྱོར་ཕོ་འགའ་ཞིག་དང་ལྷན་ཅིག་ཏུ་རིག་བརྟུལ་གྱི་སྤྱོད་པས་ཡུལ་རྒྱུ་ཞིང་སོང་བ་ན། གྲོང་ཁྱེར་ཅིག་གི་འདབས་ན་ཐགས་མཁན་རྒད་པོ་གཅིག་འདུག་གོ །དེ་ན་རེ་ཁྱོད་རྣམས་རྣལ་འབྱོར་པར་རློམ་པ་ཞིག་འདུག་ན། དུར་ཁྲོད་དུ་ཚོགས་འཁོར་ལ་མི་འགྲོའམ་ཟེར། འགྲོའོ་བྱས་ནས་ལྷན་ཅིག་ཏུ་སོང༌། མི་གཞོན་ནུ་ཚོ་བཅུད་དང་ལྡན་པའི་རོ་ཞིག་བླངས་ཏེ་ཚོགས་རྫས་ལ་བཞག་པ་ན། ཤྲཱི་མ་ནུ་འཁོར་བཅས་ཀྱིས་མཚོན་གྱིས་གཅོད་པར་བརྩམས་པ་ལ། ཐགས་མཁན་དེ་ན་རེ། ཁྱེད་རྣམས་དངོས་གྲུབ་ཀྱི་རྫས་ལ་སྡིག་པ་གསོག་གམ་ཞེས་གད་མོ་བྱེད་དོ། །འོ་ན་ཇི་ལྟར་བཟའ་བྱས་པས། ཐགས་མཁན་དེ་སྟག་ཆེན་པོའི་གཟུགས་སུ་བྱས་ནས། ཁམས་ཅིག་ལ་ཟོས་ནས་སླར་མིར་སོང་ངོ༌། །དེ་ན་རེ། དེང་འདིར་རྫས་ཀྱི་དངོས་གྲུབ་ལ། ཁྱོད་


TNT17_Page_0258
[མ་དཔེ་གཟིགས་ན་འདིར་གནོན།]

རྣམས་གཡེལ་བར་གྱུར་གྱྀ། ད་ནི་དངོས་གྲུབ་ཕྲ་མོ་དོན་དུ་མི་གཉེར་བར། ལྷན་ཅིག་སྐྱེས་པའི་དོན་སྒོམས་ཤིག་ཟེར་རོ། །དེ་ནས་ཤྲཱི་མ་ནུས་ཀྱང་སྤྲོས་པ་སྤངས་ཏེ་ལོ་བཅུ་གཉིས་བསྒོམས། དེར་དངོས་གྲུབ་ཆེན་པོ་ཉམས་འོག་ཏུ་ཆུད་ནས་སློབ་མ་འགའ་ལ་ཆོས་བསྟན། ཡུལ་ལ་ཧོར་དུ་གྲོང་ཁྱེར་གྱི་ལམ་འགེགས་པའི་བྲག་དེའུ་ཅིག་ཆུ་ཀླུང་ནཱི་ལའི་འགྲམ་དུ་བསྐྱལ་བས། སྡིག་སྤྱོད་ཀླ་ཀློའི་རྒྱལ་པོ་ཞིག་ཀྱང་དད་པ་ཐོབ་སྟེ་ཞབས་ལ་གཏུགས། འདི་མཐར་སྐུ་ལུས་མི་སྣང་བར་གྱུར་རོ། །དེ་ལྟར་བཞི་པོ་དེ་རྣམས་ལ་ཙ་ཏུར་ཨ་བྷི་མ་ནྱ་སཱ་དྷ་ཀ་སྟེ། མངོན་པའི་ང་རྒྱལ་ཅན་གྱི་སྒྲུབ་པ་པོ་བཞི་ཟེར་རོ། །བོད་རྙིང་རྣམས་ཀྱང༌། གཏམ་རྒྱུད་དེ་དག་གི་དུམ་བུ་འདྲ། སློབ་དཔོན་ཀཧྣ་པ་ཆེན་པོ་ལ་སྦྱོར་བ་འདི་ནི། དེ་བཞི་ཀར་ཙརྱ་པའི་རྣལ་འབྱོར་པ་ཡིན་པས། ཙརྱ་པ་ཟེར་ཙ་ན་སློབ་དཔོན་ཀཧྣ་པ་ཡིན་ཏེ་འོང་སྙམ་པ་ཅིག་གིས། བལ་པོའི་སྔགས་པ་འགའ་ཞིག་དང༌། བོད་རྙིང་པ་རྣམས་ལ་འཁྲུལ་གཞི་བསྐྱེད་པས་བྱུང་འདྲའོ། །བཤད་མ་ཐག་པའི་ཐགས་མཁན་རྒན་པོ་དེ་ནི། གྲུབ་ཐོབ་ཏནྡི་པ་ཡིན་ཏེ་དེ་ཡང༌། ཡུལ་མཱ་ལ་བར་ཐགས་མཁན་ཞིག་ཐགས་འཐགས་པའི་ལས་ལ་མཁས་ཤིང་རྩོལ་བ་ཆེ་བ་ཅིག་ཡོད་དོ། །དེ་ལ་བུ་ཡང་བཅུ་ཙམ་བྱུང་ཞིང༌། ཕྱིས་དེ་དག་ཆེན་པོར་གྱུར་ནས་རེ་རེ་ཞིང་ཁྱིམ་ཕུག བག་མ་བླངས། སོ་སོ་ལ་ཡང་བུ་ཚ་མང་དུ་བཙས་ཐགས་


TNT17_Page_0259
[མ་དཔེ་གཟིགས་ན་འདིར་གནོན།]

མཁན་གྱི་རིགས་རྒྱུད་ཤིན་ཏུ་མང་བར་གྱུར་ཏོ། །དེ་ནས་དེ་ཤིན་ཏུ་རྒས་པར་གྱུར་ཏེ། བུ་རྣམས་ཀྱི་ཁྱིམ་དུ་རེ་མོས་ཀྱིས་གསོ་བ་ལས། དེ་རྒས་པས་སྦྱོར་བ་མི་བཟོ་ཞིང༌། སྤྱོད་པ་མི་མཛེས་པར་མཐོང་ནས། བུ་རྣམས་ན་རེ། ཕ་ལ་འོ་མི་བརྒྱལ་བའི་ཞབས་ཏོག་ནི་ངེད་རྣམས་ཀྱིས་བྱེད། ཁྱིམ་དུ་རེ་མོས་འབྱོན་པ་ཁྱེད་རང་འོ་བརྒྱལ། མི་རྣམས་ཀྱིས་ཀྱང་འཕྱ་བ་ལས་མི་འདུག་པས། འདིར་བཞུགས་ཤིག་ཟེར་བུ་རྒན་ཤོས་ཀྱི་ཁྱིམ་དང་ཉེ་བའི་སྐྱེད་མོས་ཚལ་ཅིག་དུ་བཞག འཚོ་བ་རེ་མོས་ཀྱིས་སྐྱེལ་ལོ། །ལན་ཅིག་གྲུབ་ཐོབ་ཛ་ལནྡྷ་རི་པ་དེ་ཐགས་མཁན་དེའི་བུ་ཅིག་གི་ཁྱིམ་དུ་བྱོན་པ། ནམ་སྲོས་པ་ན་སྐྱེད་མོས་ཚལ་དེར་གནས་གཡར་བའི་ཚུལ་གྱིས་བསྐྱལ་ལོ། །དེར་སྒྲོན་མེ་དང་བཅས་ཏེ་མི་ཞིག་སླེབ་སོང་བ་ནི་ཤེས། སུ་ཡིན་མ་ཤེས་པ་ལ། ཐོ་རངས་ཀྱི་དུས་ཙ་ན་ཐགས་མཁན་རྒན་པོས་དེ་ན་ཡོད་པ་དེ་སུ་ཡིན་ཞེས་དྲིས་པས། དངོས་ཕྱོགས་ནས་འོངས་པའི་རྣལ་འབྱོར་པ་ཅིག་ལགས། ཉིད་རང་སུ་ཡིན་གསུང༌། བདག་ཐགས་མཁན་འདི་ཀུན་གྱི་ཕ་ལགས་ཏེ། གཞན་ལ་སྟོན་མ་ཉན་པར་འདིར་སྦས་པ་ཡིན་པས། རང་གིས་རང་ལ་ཡི་ཆད་པས་ཡིད་མི་བདེ་བར་མཆིས་ཟེར། འོ་ན་སྡུག་བསྔལ་དེ་སེལ་བའི་ཐབས་ཅིག་མི་འཚལ་ལམ་གསུངས་པས། ཅིས་ཀྱང་འཚལ་གྱི་རྗེས་སུ་གཟུང་བར་ཞུ་ཟེར། དེ་ལ་སློབ་དཔོན་ཛ་ལནྡྷ་རི་


TNT17_Page_0260
[མ་དཔེ་གཟིགས་ན་འདིར་གནོན།]

པས་རྒན་པོ་དེ་ལ་ཡེ་ཤེས་འཕོ་བར་མཛད་དེ་རྒྱུད་བྱིན་གྱིས་བརླབས། གདམས་པ་དང་རྗེས་སུ་གདམས་པ་སྩལ་ལོ། །དེ་ཡང་སེམས་ཀྱི་སྡུག་བསྔལ་སངས། ནོམ་པ་ཆེན་པོ་རྙེད་པ་བཞིན་དུ་སྤྲོ་བ་བསྐྱེད་དེ་བསྒོམས་པས། ལེ་གཉིས་སམ་གསུམ་ཙམ་ལོན་པའི་སྐབས་ཤིག་ན། ཕྱག་རྒྱ་ཆེན་པོའི་དངོས་གྲུབ་ཉམས་འོག་ཏུ་ཆུད་དེ། འོན་ཀྱང་རེ་ཞིག་གཞན་ལ་མ་བསྟན་པར་སྦས་ཏེ་འདུག་གོ །ལན་ཅིག་བུ་ཆེ་ཤོས་དེའི་ཟས་སྐྱེལ་བའི་རེས་ཅིག་ལ། ཉིན་པར་མགྲོན་པོ་བྱུང་བ་སོགས་བྱ་བས་གཡེངས་ནས། ཟན་སྐྱེལ་བ་བརྗེད། ནམ་ཕྱེད་ན་དྲན་ཏེ་གཡོག་པོ་ཞིག་ཟས་སྐྱེལ་དུ་བཏང་བས། སྐྱེད་མོས་ཚལ་ནི་འོད་ཀྱིས་ཁྱབ། རོལ་མོའི་སྒྲ་སྣ་ཚོགས་འདུག་སྟེ། སྒོ་གསེང་ནས་བལྟས་པས་རྒན་པོ་དེ་ནི་ལུས་ལ་འོད་འཕྲོ་ཞིང༌། གཟུགས་དང་ཆ་བྱད་སྣ་ཚོགས་པའི་མི་མ་ཡིན་གཟི་བརྗིད་དང་ལྡན་པས་མཆོད་པ་བྱེད་པར་མཐོང་ངོ༌། །དེ་ནས་གྲུབ་པ་ཐོབ་པའི་གྲགས་པ་བྱུང་བས་ཡུལ་དེར་མ་བཞུགས། ཡུལ་གཞན་སྣ་ཚོགས་པར་ཐགས་མཁན་གྱི་སྤྱོད་པར་བརྫུས་ཏེ། ལོ་མང་དུ་འགྲོ་བའི་དོན་མཛད་ནས་མཐར་འཁོར་མང་པོ་དང་བཅས་ཏེ་མཁའ་སྤྱོད་དུ་གཤེགས་སོ། །གྲུབ་ཐོབ་ཏནྟི་པ་འདི་ནི་བརྦི། ཌོམྦི་སོགས་དང་འདྲ་བའི་གྲུབ་ཐོབ་ཆེས་ཆེ་བ་ཞིག་ཡིན་པར་འདུག འདིས་གསུངས་པའི་དོ་ཧ་སུམ་བརྒྱ་པ་བྱ་བ་རྒྱས་པ་ཅིག་ཡོད། གཞན་ཡང་མན་ངག་ཐོར་བུ་མང་དུ་མཛད་ཡོད་པར་


TNT17_Page_0261
[མ་དཔེ་གཟིགས་ན་འདིར་གནོན།]

འདུག་ནའང༌། གཏམ་རྒྱུད་དེ་ཙམ་ཁོ་ན་མ་གཏོགས། འགྲོ་དོན་མཛད་ཚུལ་གྱི་ལོ་རྒྱུས་རྒྱས་པ་ནི་བདག་གིས་མ་རྙེད་དོ། །གཞན་ཡང་འདི་ལྟར་གོ་བར་བྱ་སྟེ། སྔོན་ཐེག་པ་ཆེན་པོའི་གསུང་རབ་འཇིག་རྟེན་དུ་ཐོག་མར་བྱོན་པའི་སྐབས། བྱ་སྤྱོད་རྣལ་འབྱོར་གྱི་རྒྱུད་ཕལ་ཆེར་བྱོན་པར་སྣང་ཞིང༌། འདུས་པ་ལ་སོགས་པ་རྣལ་འབྱོར་བླ་མེད་ཀྱང་མང་དུ་བྱུང་བའི་སྡེབས་ལ། དཔལ་འཁོར་ལོ་སྡོམ་པའི་རྩ་བའི་རྒྱུད་ཀྱི་རྒྱལ་པོ་ལེའུ་ལྔ་བཅུ་རྩ་གཅིག་པ་འདི་ཡང་བྱོན་པ་ཡིན་ནོ། །སྔར་བོད་གཞན་རྣམས་འཁོར་ལོ་སྡོམ་པ་རྩ་རྒྱུད་འདི་སུས་སྤྱན་དྲངས་པའི་གསལ་ཁ་མི་སྨྲ་ལ། མར་དོ་ནི་སམྦྷུ་ཊི་དང་ལྷན་ཅིག་སློབ་དཔོན་སྤྱོད་པ་པས་སྤྱན་དྲངས་པར་བཞེད་མོད། སྔ་མ་ཉིད་དོན་ལ་གནས་སོ། །དེ་ལྟར་རྒྱུད་འདི་བྱོན་པ་ནས་རིང་ཞིག་གི་བར་དུ་གསང་སྔགས་འཛིན་པ་རྣམས་ཀྱིས་བསྒོམས་ཤིང་བཤད་ནས་དངོས་གྲུབ་ཐོབ་པ་མཐའ་ཡས་པ་བྱུང་མོད་ཀྱང༌། གཅིག་ནས་གཅིག་ཏུ་བརྒྱུད་པ་རིང་དུ་དར་བ་མེད་ལ། དགོངས་འགྲེལ་གྱི་བསྟན་བཅོས་བརྩམས་པ་ཡང་ཆེར་མེད། དེའི་ཕྱིར་དེ་དག་གི་གཏམ་རྒྱུད་ཀྱང་ནུབ་པ་ཁོ་ནའོ། །དེས་ན་རྡོ་རྗེ་འཛིན་པ། ས་ར་ཧ་པ་ཀླུ་སྒྲུབ་ཅེས་སོགས་བརྒྱུད་པ་འདོད་པ་ཡང་རྣམ་གྲངས་ཙམ་ཡིན་གྱི། གཅིག་ཏུ་ངེས་བཟུང་ཅན་ཡང་མེད་དོ། །དེ་ནས་ཕྱི་ཞིག་ན་གྲུབ་ཐོབ་ཤཱ་བ་རི་པས། སྡོམ་པའི་རྒྱུད་


TNT17_Page_0262
[མ་དཔེ་གཟིགས་ན་འདིར་གནོན།]

ཀྱི་དོན་ཐུགས་སུ་ཆུད་ནས་དཔལ་ལཱུ་ཡི་པ་ལ་ཐོག་མར་གདམས་པ་ཡིན་མོད། ཕྱིས་ནི་སློབ་དཔོན་ལཱུ་ཡི་པ་དེ་ཉིད་སྡོམ་པའི་རྒྱུད་ཀྱི་བདག་པོར་གྱུར་ཅིང༌། དཔལ་ཧེ་རུ་ཀ་དང་རྡོ་རྗེ་ཕག་མོ་ཉིད་ཀྱིས་རྟག་ཏུ་མངོན་སུམ་དུ་འདོམས་པ་ཡིན་པས། ལཱུ་ཡི་པའི་གོང་དུ་གཞན་ལ་བརྒྱུད་པ་འདེད་མི་དགོས་སོ། །སློབ་དཔོན་འདིས་དཔལ་རྣལ་འབྱོར་མ་ཀུན་སྤྱོད་ཀྱི་རྒྱུད་སྤྱན་དྲངས་པར་གྲགས། དེའི་རྗེས་སུ་སློབ་དཔོན་རྡོ་རྗེ་དྲིལ་བུ་བས་ཀྱང༌། དཔལ་མངོན་སྤྱོད་བླ་མའི་རྒྱུད་སྤྱན་དྲངས་པར་འཆད་པའང་ཡོད། གང་ལྟར་ན་ཡང་སློབ་དཔོན་འདི་གཉིས་ཀྱིས་བཤད་རྒྱུད་དེ་དག་དང་བསྟུན་ནས། རྩ་རྒྱུད་ཀྱི་སྒྲུབ་ཐབས་སོགས་བསྟན་བཅོས་མཛད་དོ། །སློབ་དཔོན་ལཱུ་དྲིལ་ནག་གསུམ་པོ་འཁོར་ལོ་སྡོམ་པའི་སྲོལ་འབྱེད་ཉི་ཟླ་ལྟ་བུར་གྲགས་པ་ཡིན་ལ། གཞན་ཡང་དཱ་རི་ཀ་པ་དང༌། ཌིང་གི་པ་དང༌། ཨིནྡྲ་བྷཱུ་ཏི་ཆུང་བ་རྣམས་ཀྱིས་ལམ་སྲོལ་རེ་ཕྱེ་ཞིང༌། སློབ་དཔོན་ཀོང་ཀ་ན་པའམ། ལང་ཀ་རྒྱལ་བཟང་དང༌། མི་ཐུབ་ཟླ་བ་དང༌། བྷ་བ་བྷ་དྲ་རྣམས་ཀྱིས་ཀྱང་ལུགས་སྲོལ་མི་འདྲ་བ་རེ་མཛད་འདུག བྲམ་ཟེ་རིན་ཆེན་རྡོ་རྗེས་ཀྱང་དེ་དག་དང་མི་འདྲ་བའི་ལུགས་སྲོལ་གསར་བ་མཛད་འདུག་པ། ཨིནྡྲ་བྷཱུ་ཏི་ཆུང་བའི་རྗེས་འབྲང་ཡིན་ནམ་ཁོང་རང་ཉིད་ཀྱིས་སྲོལ་གསར་དུ་ཕྱེ་བ་ཡིན་བརྟག་པར་བྱ་མོད་ལུགས་སྲོལ་ངོ་མཚར་ཆེ་ཞིང་བྱིན་རླབས་དང་ལྡན་པ་ཅིག་ནི་


TNT17_Page_0263
[མ་དཔེ་གཟིགས་ན་འདིར་གནོན།]

ཡིན་པར་སྣང་ངོ༌། །རིན་ཆེན་རྡོ་རྗེས་བདེ་མཆོག་གི་སྒྲུབ་ཐབས་འདི་ཁ་ཆེའི་ཡུལ་དུ་བརྩམས་ནས། ཡུལ་དབུས་སུ་དཔལ་ནཱ་རོ་པ་ལ་སྐྱེས་སུ་སྩལ་བས། ནཱ་རོ་པས་གཟིགས་ཏེ་ངོ་མཚར་ཆེ་བར་དགོངས་ནས། རྒྱལ་མཚན་གྱི་རྩེ་མོར་བཏགས་ནས། ཕྱག་མཆོད་རྒྱ་ཆེར་མཛད་པས། སྙན་གྲགས་རྒྱས་ཏེ་ཇི་ཞིག་ལྟར་ལ་ཁ་ཆེ་དང་ཉི་འོག་ཏུ། དཔལ་ལཱུ་ཡི་པའི་ལུགས་ལས་ཀྱང་འདི་སྒོམ་པ་མང་བའི་དུས་ཅིག་བྱུང་སྐད། བོད་དུ་ཡང་ལོ་ཙཱ་བ་རིན་ཆེན་བཟང་པོས་རྩལ་འདོན་དུ་བསྒྱུར་ཞིང༌། སྔོན་དུས་ཅུང་ཟད་དར་བས་ས་བཅད་མཆན་བུ་ཡིག་སྣ་སོགས་ཡོད་དོ། །ལང་ཀ་རྒྱལ་བཟང་གི་ལུགས་ནི་འགའ་ཞིག་ལཱུ་ཡི་པའི་ནང་སེལ་ཡིན་ཟེར་རོ། །འོན་ཀྱང་བསྐྱེད་རིམ་ལཱུ་ཡི་པ་དང་མཐུན་རུང་དུ་ཡོད་ཀྱང༌། རྫོགས་རིམ་སོགས་སྒོ་གཞན་ནས་ཆེས་མི་འདྲ་བས་ལུགས་སྲོལ་ལོགས་པ་ཉིད་ཡིན་ནོ། །དེ་དག་ནི་བོད་དུ་འགྱུར་བའི་དབང་དུ་བྱས་སོ། །གཞན་ཡང་གྲུབ་ཐོབ་གླུ་དབྱངས་མཁན་དང༌། ནག་པོ་རྡོ་རྗེ་དང༌། ཀ་ལ་ཧང་ས་ཀུ་མཱ་ར་དང༌། དྷརྨ་པ་དང༌། ཀུཀྐུ་ཊི་པ་དང༌། གྷུནྚ་རི་པ་དང༌། ཙ་ཊི་ཡ་པ་དང༌། ནཱ་ཌི་པ་དང༌། གྷནྡྷ་ར་པ་དང༌། བཱི་ན་པ་དང༌། ཊནྚེན་པ་དང༌། ཏཱ་ཌ་ཀ་བ་དང༌། ཀཾ་ཀ་ལ་པ་དང༌། ཛ་ཡ་ནནྡི་པ་དང༌། བྷ་དེ་པ་སྟེ་གྲུབ་པའི་སློབ་དཔོན་བཅུ་བཞི་པོ་དེ་དག་ཀྱང་འཁོར་ལོ་སྡོམ་པའི་ལམ་ལས་གྲུབ་པ་བརྙེས་


TNT17_Page_0264
[མ་དཔེ་གཟིགས་ན་འདིར་གནོན།]

ཤིང༌། དེ་དག་གི་སྲོལ་གཏོད་པའི་བསྐྱེད་རྫོགས་ཀྱི་གཞུང་སོགས་ལུགས་སྲོལ་མི་འདྲ་བ་རེ་རེ་བྱུང་བར་གྲགས། སོ་སོའི་དུས་དེར་ལུགས་དེ་དང་དེ་བསྒོམས་པས་གྲུབ་པ་ཐོབ་པ་ཡང་མང་དུ་བྱུང་བར་འདུག །དེ་དག་གིས་མཛད་པའི་གཞུང་ལུགས་བོད་དུ་འགྱུར་བ་མང་པོ་མི་སྣང་ཡང༌། འཕགས་པའི་ཡུལ་དུ་སྔོན་དུས་མང་དུ་བྱུང་ཞིང༌། ཕྱིས་ཀྱང་ཅི་རིགས་པ་ཡོད་པར་སྣང་ངོ༌། །རྩ་རྒྱུད་ཀྱི་དཀྱིལ་འཁོར་ལ་ལྷ་ཚོགས་ཐམས་ཅད་སྐུ་མདོག་ནག་པོར་འདོད་པ་ཡོད་ཅེས་བཤད་པ་ནི། སློབ་དཔོན་དྷརྨ་པའི་ལུགས་ཡིན་པར་སྣང་ལ། ཞབས་གཡོན་བརྐྱང་དུ་མཛད་པ་ཡོད་པར་བཤད་པ་ནི་ནག་པོ་རྡོ་རྗེའི་སྒྲུབ་ཐབས་སོ། །གར་སྟབས་སུ་བྱེད་པ་ནི་གྲུབ་ཐོབ་ས་འཛིན་ཞབས་ཏེ་གནྡྷར་པའི་ལུགས་སོ། །གྲུབ་ཐོབ་གྷུནྚ་རི་པའི་སློབ་མ་དཔལ་ཨོ་རྒྱན་པར་གྲགས་པ་ཆོས་ཀྱི་འབྱུང་གནས་ཀྱི་སྒྲུབ་ཐབས་ནི། སྐུ་མདོག་མ་ངེས་པར་འདོད་ཅིང༌། ཡབ་ཡུམ་ཁ་དོག་རྣམ་པ་ཀུན་ཏུ་མཚུངས་པར་སྨྲའོ། །བཱི་ན་པས་མཛད་པའི་སྒྲུབ་ཐབས་ན། ལྷ་ཚོགས་ཐམས་ཅད་ཞལ་གཅིག་ཕྱག་གཉིས་པར་ཡོད་པས། དེའི་ལུགས་ལ་རྩ་རྒྱུད་ཀྱི་ལྷ་ཚོགས་ཕྱག་གཉིས་པ་ཁོ་ནར་བཞེད་ཅེས་གྲགས་ཀྱང༌། སྒོམ་བདེ་བའི་དགོས་པ་དང་མཚོན་བྱེད་ཙམ་ཡིན་གྱི། ཕྱག་མངས་མི་བཞེད་པ་མ་ཡིན་ནོ། །རྣལ་འབྱོར་རྫོགས་འཕྲེང་དུ་བསྡུས་པའི། ཧེ་རུ་ཀ་སེར་པོའི་དཀྱིལ་འཁོར་ནི། སློབ་དཔོན་


TNT17_Page_0265
[མ་དཔེ་གཟིགས་ན་འདིར་གནོན།]

ཛ་ཡ་ནན་ཏི་པའི་ལུགས་ཡིན་ཟེར་བ་ཙམ་སྣང༌། སློབ་དཔོན་བྷ་དེ་པ་དང༌། བྷ་ད་ལི་ཀ་དང༌། བྷ་དྲ་པ་དང༌། བནྡྷེ་པ་རྣམས་མཚན་འདྲ་མཚུངས་ལ། ཡི་གེ་ནོར་བ་དང༌། དོན་ནོར་བ་དང༌། གཅིག་ཏུ་འཁྲུལ་བ་མང་པོ་བྱུང་ཡང་ངོ་བོ་སོ་སོ་ཡིན་ཞིང༌། བསྟན་བཅོས་ཀྱང་སོ་སོར་ཡོད་དོ། །སློབ་དཔོན་ཀུཀྐུ་ཊི་པའི་ལུགས་ཀྱི་རྩ་རྒྱུད་ཀྱི་དཀྱིལ་འཁོར་ལྷ་ཚོགས་ཐམས་ཅད་གདོང་བརྙན་ཅན་དུ་བཞེད་ཅེས་གྲགས་སོ། །དེ་ལ་གྲུབ་ཐོབ་གླུ་དབྱངས་མཁན་ནི། གླུ་གར་མཁན་གྱི་རིགས་རང་གི་ལས་ལ་བརྩོན་པ། ཚིག་མང་པོ་གསར་དུ་སྦྱོར་ནུས་པ་ཞིག་ཡོད་པ་ལས། ལན་ཅིག་དུས་སྟོན་ཞིག་ལ་མི་ཆེ་བ་ལྔ་བརྒྱ་ཙམ་འདུས། དེ་རེ་རེ་ལ་བསྟོད་པ་གསར་པའི་གླུ་དབྱངས་ཀྱིས་བསྟོད་དགོས་བྱུང་བས། ཇི་ཞིག་ནས་ཚིག་གསར་པ་སྦྱོར་བའི་བློ་གྲོས་གཏུགས་ཏེ། ཚིག་སྦྱོར་སྔ་མ་རྣམས་ཉིད། སླར་བསྐྱར་ཏེ་འདོན་པ་སྤོས་ནས་གླུ་བླངས་སོ། །དེར་ཚིག་གསར་པས་བསྟོད་པ་རྣམས་ཀྱིས་རྔན་པ་ཆེ་བར་བྱིན། བསྐྱར་མས་བསྟོད་པ་རྣམས་ཀྱིས་ཟས་ཉུང་ཟད་རེ་ཙམ་མ་གཏོགས་མ་བྱིན་པས་དུས་སྟོན་གྲོལ་ནས་དེས་བསམས་པ། ཚིག་གསར་པ་སྦྱོར་བ་ལ་ཐོགས་པ་མེད་པའི་ཐབས་ཅིག་དགོས་པ་འདུག་སྙམ། ཤིང་དྲུང་ཞག་ཏུ་མ་ནོ་བསམ་གཏོང་ཀྱིན་ཡོད་ཙ་ན། རྒྱུད་ཡོངས་སུ་གྲོལ་བའི་རྣལ་འབྱོར་པ་ཞིག་དེར་བྱོན་ནས་ཁྱོད་འདི་ལྟར་སེམ་མམ་གསུངས་པས། དེ་མཆོག་ཏུ་


TNT17_Page_0266
[མ་དཔེ་གཟིགས་ན་འདིར་གནོན།]

དད་པ་སྐྱེས་ནས་དེ་ལྟར་ལགས་ཀྱི་རྗེས་སུ་བཟུང་བར་ཞུ་ཞེས་ཞབས་ལ་གཏུགས། གསོལ་བ་བཏབ་པས་རྣལ་འབྱོར་པ་དེས། བདེ་མཆོག་ཧེ་རུ་ཀའི་བསྐྱེད་རྫོགས་ཀྱི་གདམས་པ་ཉུང་ངུ་ཞིག་བྱིན་ནོ། །དེ་ནས་དེས་ཀྱང་མཚན་ཐོག་ཐག་ཏུ་གཉིད་སྤངས་ཏེ་རྟག་ཏུ་སྒོམ་པར་བྱེད་ཅིང༌། ཉིན་པར་ཡང་རེས་འགའ་ནི། ངམ་གྲོག་དག་ཏུ་ཡིབ་ཀྱིན་བསྒོམ། རེས་འགའ་ནི་རང་གི་ལས་ཀྱི་མཐའ་བྱེད་དོ། །དེ་ནས་ལོ་མང་དག་སོང་བའི་སྐབས་ཞིག་ན། ལུང་སྟོངས་ཀྱི་ལམ་འགའ་ཞིག་ན་ཁྱི་མོ་ཞིག་ན་ནས་འཆི་ལ་ཁད་འདུག་གོ །དེར་སྤྱང་ཀི་ཞིག་འོངས་ནས་ཁྱི་དེ་ཟ་ལ་ཁད་ཁད་འདུག་པ་ལ། ཐབས་སྣ་ཚོགས་ཀྱིས་བསྲུངས་ཀྱང་མི་ཐུབ་པ་ལྟར་བྱུང༌། ཁྱི་མོ་དེའི་སྲོག་སྲུང་བའི་ཕྱིར་རང་གི་ཕྱག་གཡོན་པ་བཅད་དེ་སྤྱང་ཀི་ལ་བྱིན་པས་དེ་ཟོས་ཏེ་སྤྱང་ཀི་སོང་ངོ༌། །དེ་ནས་ཡངས་ཐབས་ཅིག་ལ་ཁྱི་མོ་མེད་པར་རྡོ་རྗེ་ཕག་མོར་སོང་ནས། ཕྱག་སྤྱི་བོར་བཞག་ཅིང་བཀའི་གནང་བ་སྩལ་བ་ཙམ་གྱིས་གྲུབ་པ་ཐོབ། དེ་ནས་ནགས་དང་གྲོང་ཁྱེར་ཀུན་ཏུ་གླུ་ཁོ་ན་ལེན་ཅིང་སྐྱེ་བོ་མང་པོ་སྨིན་གྲོལ་ལ་བཀོད། གྲུབ་ཐོབ་གཱ་ཡ་པ་སྟེ་གླུ་དབྱངས་མཁན་དུ་གྲགས་སོ། །སློབ་དཔོན་ནག་པོ་རྡོ་རྗེ་ནི་ཡུལ་ཀ་ལིཉྫ་ར་ཏེ། ཀ་ལིང་ཀ་པ་ཡིན། སོ་མ་པུ་རིར་སློབ་གཉེར་བྱས་ཏེ། མཁས་པར་སོང་བའི་སྐབས་ཤིག་གྲོང་ཁྱེར་ན་བྱིས་པ་མང་པོ་ཚོགས་ཏེ། གཅིག་གིས་སྒོམ་བྱེད་པ་ལྟར་བྱེད། གཞན་རྣམས་ཀྱིས་དེ་ལ་ལྐོག་གྱུར་དྲིས་


TNT17_Page_0267
[མ་དཔེ་གཟིགས་ན་འདིར་གནོན།]

ཤིང༌། དེས་ཀྱང་དེ་རྣམས་ལ་མངོན་ཤེས་ལུང་སྟོན་གྱི་ཟླད་མོ་བྱེད་ཀྱིན་འདུག་པ་མཐོང་ནས། དེས་རྐྱེན་བྱས་ཏེ་སློབ་དཔོན་གྱིས་ཀྱང༌། ཚོང་ཁང་ན་ཚོང་པ་རྣམས་ཀྱི་སྒྲོམ་དང་རྐྱལ་པ་རྣམས་ཀྱི་ནང་ན་ཅི་ཞིག་ཡོད་ཅེས་བློས་བརྟགས་ཀྱང་མ་ཤེས་ནས། རིག་པའི་གནས་ལྔ་ལ་སྦྱངས་ཀྱང་ཕྲ་མོ་འདི་ཙམ་ཡང་མི་ཤེས་པ་སྙམ། མཁས་པའི་བྱ་བ་ལ་ཐུགས་མུག་སྟེ་མཚན་མོ་གསངས་ནས་བྲོས་སོ། །དེ་ནས་ཁ་སར་པ་ཎི་ལ་གསོལ་བ་འདེབས་ཀྱིན་ཟླ་བ་དྲུག་བཞུགས། རྨི་ལམ་དུ། འདི་ནས་ཤར་ཕྱོགས་སུ་ཕྱིན་པ་ཧི་ཙི་ལི་ཞེས་པའི་གྲོང་ཁྱེར་ཡོད། དེའི་ཉ་པའི་གྲོང་ན་རྡོ་རྗེ་ཕག་མོ་བཞུགས་ཏེ། དེར་ཞག་བདུན་དུ་གསོལ་བ་བཏབ་ན་ཞལ་སྟོན་གསུང༌། དེ་བཞིན་དུ་བྱས་པས་ཞག་བདུན་སོང་བའི་ཐོ་རངས་ཅིག །ཉ་བའི་བུད་མེད་རྒན་མོ་ཉ་བརྒྱ་ཕྲག་པ་ལ་བཀལ་ནས་ཧྲལ་ཧྲལ་འགྲོ་བ་ཅིག་འདུག །དེ་བཅོམ་ལྡན་འདས་མར་ཤེས་ནས་ཞབས་ལ་ཕྱག་བྱས་ཏེ་གསོལ་བ་བཏབ་པས། བུད་མེད་ལང་ཚོ་མ་ཅིག་ཏུ་གྱུར་ཏོ། །ཡང་གསོལ་བ་བཏབ་པས་སྐུ་དངོས་སུ་གྱུར་ཏེ་མེ་ལྕེ་དྲག་ཏུ་འབར་བའི་དབུས་ན་བཞུགས་ནས། རྒྱུད་བྱིན་གྱིས་བརླབས་ཤིང་གདམས་པས་ཏིང་ངེ་འཛིན་དང་མངོན་ཤེས་སྐྱེས་སོ། །དེར་ས་དོང་བྱས་ཉ་རོས་མཐའ་བསྐོར་ཏེ། རྒྱུད་སྦྱངས་ཤིང་བསྒོམས་པས་དུས་གཞན་ཞིག་ན་གྲུབ་པ་བརྙེས་སོ། །སློབ་དཔོན་འདིས་ཉ་པའི་


TNT17_Page_0268
[མ་དཔེ་གཟིགས་ན་འདིར་གནོན།]

གྲོང་གི་མགྲོན་ཁང་ཅིག་ཏུ་བཞུགས་ཙ་ན། རྣལ་འབྱོར་པའི་གཙོ་བོ་གསུམ་འཁོར་རྣལ་འབྱོར་པ་སྟོང་ཙམ་དང་བཅས་ནས་འོང་ཞིང་འདུག །དེ་རྣམས་ལ་འདིར་བྱོན་ཚོགས་ཀྱི་འཁོར་ལོ་མཛོད་བྱས་པས། སློབ་དཔོན་གསུམ་པོ་དེས་སློབ་དཔོན་འདི་བཞུགས་པའི་སྒོ་ནས་ལྟས་པས་ཤ་དུམ་ཅིག་དང༌། ཉ་དུམ་ཅིག་དང་ཆང་བུམ་ཆུང་ཅིག་ལས་མི་འདུག་ཅིང༌། གནས་དེ་ཡང་དོག་པོར་ཤེས་ནས་ཁྱེད་ཀྱིས་དེ་རྣམས་ཚིམས་པར་ཡང་མི་ནུས། གནས་འདིར་ཡང་མི་ཤོང་ངོ་ཟེར། སློབ་དཔོན་ན་རེ། ཇི་ཙམ་ཤོང་བལྟའོ་བྱས་ནས། རྣལ་འབྱོར་པ་སྟོང་ཕྲག་གཅིག་ནང་དེར་ཞུགས་པས། ཁྱིམ་གྱི་གྲ་ཅིག་ཀྱང་མ་ཁེངས་སོ། །ཡོ་བྱད་དེ་རྣམས་གཏད་ནས་ཁྱེད་རྣམས་ཀྱིས་འདི་ལོངས་སྤྱོད་ནུས་པར་གྱིས་ཤིག་གསུངས། རྣལ་འབྱོར་པ་དེ་རྣམས་ཀྱིས་རྫས་དེ་ལས་ཞག་བདུན་གྱི་བར་དུ་ཇི་ཙམ་ཟོས་ཤིང་འཐུངས་ཀྱང་མ་ཟད་དོ། །དེ་རྣམས་ཀྱིས་སློབ་དཔོན་ནག་པོ་རྡོ་རྗེའི་ཞབས་ལ་ཕྱག་བྱས། བཟོད་པ་གསོལ་ཏེ། ལྷག་མ་ཟ་མ་ནུས་པར་བོར་ཏེ་སོང་ངོ༌། །ཀ་ལ་ཧཾ་ས་ཀུ་མཱ་ར་ནི་གྲོང་ཁྱེར་པ་ཊ་ལི་པུ་ཏྲར་འཁྲུངས། ཆུང་ངུའི་དུས་སུ་ཞིང་གི་རྐ་ཡུར་ཁོ་ན་འཚོ་བར་བྱེད། ལུས་ཁ་དོག་དཀར་བ་ཞིག་ཡོད་པས། ཀ་ལ་ནི་ཞིང་གི་ཡུར་བ་པ། ཧང་ས་ནི་ངང་པ་སྟེ་དཀར་པོ། ཀུ་མཱ་ར་གཞོན་ནུ་སྟེ་དེ་ལྟར་གྲགས། དེ་ནས་གཙུག་ལག་ཁང་གཅིག་ཏུ་རབ་ཏུ་བྱུང་ཞིང་ཆོས་བསླབས་པས་མཁས་པའི་གྲལ་


TNT17_Page_0269
[མ་དཔེ་གཟིགས་ན་འདིར་གནོན།]

དུ་ཆུད་ཙམ་བྱུང༌། ད་ནི་གཞན་སྙིང་པོ་མེད་སྙམ་སྟེ། བླ་མ་ཅིག་ལ་འཁོར་ལོ་སྡོམ་པ་ཞུས་ནས་བསྒོམས་པས། ནམ་ཞིག་ན་ནུས་པ་ཁྱད་པར་ཅན་བརྙེས་སོ། །ཡུལ་བྷང་ག་ལའི་གྲོང་ཁྱེར་ཅིག་ན། རྒྱལ་པོ་ཅིག་གིས་སྦྱིན་བདག་བྱས་ཏེ། བྲམ་ཟེ་ལྔ་བརྒྱ་ཙམ་ཡོད་པ་ལ་རེ་རེས་ཐབ་གསུམ་གསུམ་བྱས་ཏེ་སྦྱིན་སྲེག་མཆོད་སྦྱིན་རེ་རེ་བྱེད། དཀྱིལ་འཁོར་དང་མཆོད་པའི་ཡོ་བྱད་དཔག་ཏུ་མེད་པ་ཡོད་པ་ལ། སློབ་དཔོན་འདིས་དམིགས་པ་བརྟད་པས་སྐད་ཅིག་ཉིད་ལ་རླུང་དམར་མི་བཟད་པ་ལངས་ནས། མཆོད་སྐོང་ཐམས་ཅད་ཆག་ཡོ་བྱད་ཐམས་ཅད་ཁྱེར་རོ། །དེ་ལྟར་ལན་བདུན་བརྩམས་པ་ལས་ཐམས་ཅད་རླུང་གིས་ཁྱེར་བའི་ཐ་མལ་བྲམ་ཟེ་རྣམས་དང༌། རྒྱལ་པོ་རང་ཡང་རླུང་གིས་ཁྱེར་ཞིང་གོས་དང་བྲལ་བར་འདུག་གོ །དེ་ནས་རྒྱལ་པོ་དང་བྲམ་ཟེ་རྣམས་སློབ་དཔོན་གྱི་མཐུ་བསྟན་པར་ཤེས་ནས་གུས་པས་བཏུད་དེ། བཀའ་གནང་ཞུས། ཕྱིན་ཆད་སྲོག་བཅད་པའི་མཆོད་སྦྱིན་མི་བྱེད་ཅིང༌། སངས་རྒྱས་ཀྱི་བསྟན་པ་ལ་དད་པར་གྱུར་ཏོ། །སློབ་དཔོན་དྷརྨ་པ་ནི་ཡུལ་ལྷོ་ཕྱོགས་དང་ཉེ་བའི་གྲོང་ཁྱེར་སཱ་ལི་པུ་དྲར་འཁྲུངས། ཡུལ་དེར་རབ་ཏུ་བྱུང་ཞིང༌། རིག་པའི་གནས་རྣམས་ལ་མཁས་པར་བྱས། ཉན་བཤད་ཀྱིས་དུས་འདས་པའི་ངང་ལ་བགྲེས་ཤིང་སྤྱན་ཡང་ལོང༌། ཅི་བྱར་ཡང་མེད་པའི་སྐབས་སུ་ཡང་དག་པའི་ལམ་དངོས་སུ་སྟོན་ནུས་པའི་


TNT17_Page_0270
[མ་དཔེ་གཟིགས་ན་འདིར་གནོན།]

བླ་མ་ཞིག་དང་མཇལ་ན་ཅི་མ་རུང་སྙམ་ཞིང་རྟག་ཏུ་དཀོན་མཆོག་ལ་གསོལ་བ་བཏབ་པས། མནལ་ལམ་དུ་རྡོ་རྗེ་མཁའ་འགྲོ་མ་བྱོན། ངས་བྱིན་གྱིས་བརླབས་ཀྱི་གསུང༌། དེ་ནས་ཡང་ཡང་གསོལ་བ་བཏབ་པས་དངོས་སུ་བྱོན་ནས་བྱིན་གྱིས་བརླབས་ཤིང་གདམས་པ་གནང་ངོ༌། །དེ་ནས་བསྒོམས་པས་ལོ་ལྔ་ལོན་པ་ན། ཕྱག་རྒྱ་ཆེན་པོའི་དངོས་གྲུབ་ཉམས་འོག་ཏུ་ཆུད། ཀློག་མཁན་གྱི་ཚུལ་བཟུང་ནས་སེམས་ཅན་གྱི་དོན་མཛད་དོ། །མཧཱ་མཱ་ཡའི་གཞུང་སློབ་དཔོན་འདིས་མཛད་པ་ཞིག་བདག་གིས་ཀྱང་ཐོས་སོ། །ཀུཀྐུ་ཊི་པ་ནི་རིག་མ་ཁྱིམ་བྱའི་གཟུགས་སུ་བསྒྱུར་བ་ཅིག་ཡིན། གུཎྜི་རི་པ་ནི་གྷུནྡ་རི་པ་ཞེས་སྔར་བོད་ན་གྲགས་པ་དེ་ཡིན་པར་མངོན། བྱེའུ་གྷུཎྜི་རི་དྭགས་མང་པོ་བསད་ནས་ཤ་གསོལ། ཡང་གསོས་ཏེ་ཞལ་ནས་སྤུར་བའི་ཆོ་འཕྲུལ་བསྟན་ཏོ། །ཙཱ་ཊི་ལ་པ་ནི་མཚན་ཙམ་མ་གཏོགས་ལོ་རྒྱུས་ཆ་མ་འཚལ། ནཱ་ཌི་པ་ཡང་ན་རི་པ་གཅིག་གམ་མི་གཅིག་བརྟག་གོ །སློབ་དཔོན་གནྡྷ་ར་པ་སྟེ་སློབ་དཔོན་ས་འཛིན་པ་ནི། རིགས་རྗེ་རིགས། ཡུལ་གནྡྷ་ར་སྟེ་ས་འཛིན་དུ་འཁྲུངས། མཚན་དངོས་ནི། བིཛྙཱ་ནཾ་ཀུ་རི་ཟེར། དགེ་བསྙེན་བྱས་ནས་རིག་པའི་གནས་ཅི་རིགས་པར་བསླབས། གསང་སྔགས་པའི་སྡེ་ཅིག་ལ་ཞུགས། དེ་ན་ས་འཛིན་ནས་ཡོངས་པའི་མི་གཞན་མེད་པས། གནྡྷ་ར་པ་ཞེས་བླ་དྭགས་སུ་ཐོགས། སློབ་དཔོན་སྒྲུབ་པ་པོ་


TNT17_Page_0271
[མ་དཔེ་གཟིགས་ན་འདིར་གནོན།]

པུརྦ་གུཔྟ་ཞེས་པ། སྦས་པའི་རྣལ་འབྱོར་ཅིག་ལ་འཁོར་ལོ་སྡོམ་པ་ཞུས་ནས་བསྒོམས་པས། ནམ་ཞིག་ན་ཕྲ་རགས་ཐམས་ཅད་ལ་གསལ་སྣང་ཐོབ་བོ། །དེས་གསེར་མགར་གྱི་གྲོང་བྱ་བ་ཤར་ཕྱོགས་ཀྱི་གྲོང་ཁྱེར་ཅིག་དང་ཉེ་བའི་ནགས་སུ་བསྒོམས་པས། འབར་སྣང་གསལ་བ་ཅིག་ལ་དངོས་སུ་མེ་བྱུང་ནས། ནགས་ཀྱི་རྩྭ་དང་ཤིང་ཐམས་ཅད་མེས་ཚིག་གོ །དེ་ནས་མི་རིང་བར་ཆར་དབབ་པོ་སྙམ། ཏིང་ངེ་འཛིན་ཁོ་ནས་ཆར་ཕབ་སྟེ་སྔར་ཚིག་པ་རྣམས་ཡུད་ཙམ་གྱིས་གསོས་སོ། །དེར་ནུས་པ་ཐོབ་པས་རིག་པའི་བརྟུལ་ཞུགས་ཀྱི་སྤྱོད་པ་མཛད་ཅིང་ཡུལ་སྣ་ཚོགས་སུ་བཞུད། གླིང་གཾ་ག་ས་ག་ར་ནས། གྲོང་ཁྱེར་པྲ་ཡ་གའི་བར་དུ། ཆུ་བོ་གངྒཱ་ལ་ལྤགས་གདན་བཏིང་སྟེ། འཁོར་དང་བཅས་པ་ཡར་འབྱོན་མར་འབྱོན་མང་པོ་མཛད། ཆུ་ཀླུང་རོ་ཧཾ་ཏའམ་ཚངས་པའི་བུ་ཤིན་ཏུ་རྒྱས་པ་ལའང་དེ་བཞིན་དུ་མཛད། དེ་ནས་ལན་ཅིག་གླིང་དྷ་ན་ཤྲཱིར་བཞུད་པར་བཞེད་ནས། འཁོར་དང་བཅས་པ་རྒྱ་མཚོའི་སྟེང་ནས་མི་བྱིང་བར་བཞུད་པ་ན་མེ་ཏོག་གི་ཆར་དང༌། སྒྲ་དང་འོད་དང་དྲི་བཟང་གིས་ཁྱབ་པ་དག་བྱུང་ངོ༌། །དེར་སློབ་དཔོན་གན་དྷ་ར་པས་བསམས་པ། ད་ནི་བདག་བླ་མ་དང་ནུས་པ་མཉམ་མོ་བསམས་པ་ནི། དེ་མ་ཐག་ཆུར་བྱིང་ངོ༌། །ཡང་དད་པ་སྐྱེད་པས་སྔར་བཞིན་དུ་གྱུར་ཏེ་གླིང་དྷ་ན་ཤྲཱིར་བཞུད་དོ། །དེར་ཡང་སྔགས་ཀྱིས་འགྲོ་


TNT17_Page_0272
[མ་དཔེ་གཟིགས་ན་འདིར་གནོན།]

བའི་དོན་མང་དུ་མཛད། ཉི་མ་གཅིག་ལ་མཆོད་རྟེན་བརྒྱ་དང་བརྒྱད་ལ་རྡོའི་གདུགས་བཀལ་ལོ། །དེ་ནས་སླར་ཡང་མ་ག་དྷ་དང་ཉེ་བ། དབང་པོས་ཕུག་གི་གནས་སུ་བཞུགས། དང་པོ་བླ་མ་དང་ཡོན་ཏན་མཉམ་མོ་བསམ་པའི་ང་རྒྱལ་བྱུང་བའི་རྒྱུས། སྐུ་ལུས་ནི་གནས་མ་གྱུར། ནུས་པ་ཁྱད་པར་ཅན་བརྙེས་པས་འགྲོ་བའི་དོན་མཛད་ཅིང༌། ཕྱག་རྒྱ་ཆེན་པོའི་དངོས་གྲུབ་ལ་ཉེ་བར་ཕྱོགས་པའོ། །བཱི་ན་པ་ནི་གཞན་དུ་བྲིས་ཟིན། ཏཎྜེ་པ་ནི། ཏནྟི་པ་དང་གཅིག་གམ་སྙམ། ཏཱ་ཌ་ཀ་པ་ནི། ཆོམ་པོ་གཅིག་ཕྱིས་གྲུབ་པ་ཐོབ་པར་གྲགས། གྲུབ་ཐོབ་ཀང་ཀཱ་ལ་པ་ནི། ཡུལ་ཤར་ཕྱོགས་གཽ་ར་པ། ཁྱིམ་བདག་ནོར་དང་ལྡན་པ་ཅིག་འདོད་ཡོན་ལ་རྩེ་ཞིང་དགའ་བས་གནས་པ་ལས། གློ་བུར་དུ་ཆུང་མ་ཤི་བར་གྱུར་ཏེ། ཕུང་པོ་དུར་ཁྲོད་དུ་བསྐྱལ་བའི་ཙ་ན་མྱ་ངན་བྱེད་ཅིང་འདུག་གོ །དེར་ལེགས་པར་རྟོགས་པའི་རྣལ་འབྱོར་པ་ཅིག་བྱོན་ནས། ཁྱོད་ཅི་བྱེད་གསུང༌། དེས་ལོ་རྒྱུས་བཤད་སྡུག་གཏམ་བྱས་པས། འདི་བས་ཁྱོད་ཉིད་ཀྱང་འཆི་ན་གསུང༌། འོ་ན་དེ་ལས་ཐར་བ་ཅིག་ཞུ་བྱས་པས་དེས་དབང་བསྐུར་ཞིང་གདམས་པ་གནང་དེ་ནས་ཁྱིམ་བདག་དེ་དུར་ཁྲོད་དེར་འདུག་ནས། སེམས་ཀྱི་དྲི་མ་སྦྱོང་བའི་དོན་དུ་ཀེང་རུས་ཀྱིས་མཐའ་བསྐོར་ཏེ་བསྒོམས་པས་ལོ་དྲུག་ན་དངོས་གྲུབ་ཐོབ། འགྲོ་དོན་ཡང་རྒྱ་ཆེར་མཛད་དོ། །སློབ་དཔོན་ཛ་ཡ་ནན་དི་པ་ནི། བྲམ་ཟེ་


TNT17_Page_0273
[མ་དཔེ་གཟིགས་ན་འདིར་གནོན།]

མཁས་པ་ཚངས་པར་སྤྱོད་པ་ཞིག སངས་རྒྱས་ཀྱི་བསྟན་པ་ལ་ཞུགས་ནས་དགེ་བསྙེན་བྱས་སོ། །གསང་སྔགས་ཀྱི་སློབ་དཔོན་ཅིག་ལ་གདམས་པ་ནོད་ནས་བསྒོམས། ཡུལ་བ་ག་ལའི་རྒྱལ་པོའི་མཆོད་གནས་བྱེད་ཅིང་ཡོད་པ་ལ། དེས་གཏོར་མའི་བྱ་བ་ཡོ་བྱད་དཔག་ཏུ་མེད་པ་དང་བཅས་ཏེ། ཉིན་རེ་བཞིན་གཏོར་མ་བཏང་བས་བློན་པོ་འགའ་ཞིག་གིས་རྒྱལ་པོ་ལ། འདིས་རྒྱལ་པོའི་ལོངས་སྤྱོད་ལ་འཕངས་མེད་བྱས་ཟེར་ཞིང་ཕྲ་མ་བཅུག་པས། རྒྱལ་པོས་སློབ་དཔོན་བཙོན་དུ་བཅུག་གོ །དེར་བྱ་རིགས་མི་གཅིག་པ་ཐམས་ཅད་འདུས། འདབ་ཆགས་འབུམ་ཕྲག་མང་པོ་ཕོ་བྲང་དེར་འོངས་ནས། སྒྲ་སྣ་ཚོགས་འབྱིན། ལུས་རྣམ་འགྱུར་སྣ་ཚོགས་བྱེད། མི་རྣམས་ཀྱི་མགོ་ལ་འཚོག་པར་བྱེད་དོ། །དེར་བྱ་སྐད་ཤེས་པ་ཞིག་གིས་བརྟགས་པས། ངེད་རྣམས་ཀྱི་ཕ་མ་བཙོན་དུ་བཟུང་བ་ཡིན། ཁྱེད་རྣམས་ཞག་བདུན་ནས་རླག་པར་བྱེད་དོ་ཟེར་སྐད། དེ་རྒྱལ་པོ་ལ་ཟློས་པས། རྒྱལ་པོས་ཀྱང་བཙོན་ཁང་གི་ཁར་འོངས་ནས། སློབ་དཔོན་ལ་གཏམ་དྲིས་པས། སློབ་དཔོན་ན་རེ། ངས་རྒྱལ་པོའི་ཡོ་བྱད་ནས་རང་འཚམས་ཀྱིས་བླངས་ནས་བཏང་བ་མེད་གསུང༌། འོ་ན་དེ་ཙམ་གང་ལས་རྙེད་བྱས་པས་ཕྱག་ནམ་མཁའ་ལ་གཡབས་པ་ཙམ་གྱིས་འབྲུ་དང་ཟན་དང་དར་རས་སོགས་དཔག་ཏུ་མེད་པ་མདུན་དུ་ཕུང་ཕུང་བྱུང༌།


TNT17_Page_0274
[མ་དཔེ་གཟིགས་ན་འདིར་གནོན།]

དེ་ནས་སློབ་དཔོན་དེ་གྲུབ་པ་ཐོབ་པར་ཤེས་ནས། རྒྱལ་པོས་ཞབས་ལ་གཏུགས། ཕོ་བྲང་དུ་སྤྱན་དྲངས་ཏེ། མཆོད་དོ། །དེ་གོང་ཡོན་ཏན་སྦས་པའི་རྣལ་འབྱོར་དུ་མཛད། དེ་ནས་བརྩམས་ཏེ་གྲུབ་ཐོབ་ཏུ་གྲགས་སོ། །ཆོས་འཁོར་བི་ཀྲ་མ་ཤཱི་ལའི་བ་ལིང་ཨཱ་ཙརྱ་ཏེ་གཏོར་མའི་སློབ་དཔོན་ཐོག་མ་རང་མཚན་ཀླུ་སྒྲུབ་སྙིང་པོར་གྲགས་པ་གཏོར་མའི་ཆོ་ག་ཀུན་ལས་བཏུས་པ་མཛད་པ་པོ་དེ་ཡང༌། གྲུབ་ཐོབ་ཛ་ཡ་ནན་དི་པ་འདིའི་སློབ་མ་ཡིན་ནོ། །སློབ་དཔོན་བྷ་དེ་པ་ནི། མ་ག་དྷའི་ཕྱོགས་གཅིག་གནས་ཆུང་གཅིག་གི་གཉེར་བྱེད་པའི་གནས་བརྟན་ཡིན། ཆོས་ཀྱང་ཅི་རིས་ཤེས་པ་གཅིག་ཡིན་པ་ལ། ལན་ཅིག་དགེ་སློང་དུར་ཁྲོད་པ་ཞིག་ལ་བརྡ་གཏོང་བའི་ཕྱིར་དུར་ཁྲོད་དུ་ཕྱིན། དེར་མང་ངོའི་བཅུ་བཞི་ཡིན་པས། གྲོང་ཁྱེར་ནས་འོངས་པའི་མཆོད་པ་བྱེད་མཁན་མང་དུ་འདུག གཞན་རྣམས་མཆོད་པ་ཟིན་ནས་སྔོན་ལ་ལོག །བུད་མེད་དར་ཡོལ་ཅིག་མཆོད་པའི་བྱ་བ་ལ་ཐོགས་ནས་རྗེས་ལ་ལུས། དེ་ནི་སངས་རྒྱས་ལ་ཕྱག་འཚལ་ལོ་ལན་གསུམ་ཟེར་ནས། རྐང་པ་ཁྲུ་གང་ཙམ་ས་ལ་མ་རེག་པར་ཡེར་ཀྱིས་སོང་ཙ་ན། གཞན་རྣམས་ལས་ཆོད་ཆད་ཀྱི་སོང་བར་གྲོང་ཁྱེར་དུ་སླེབ་སོང་བ་མཐོང༌། ད་དུས་རྗེས་མ་ཟིན་ཡང་སླར་དེ་བཙལ་བས་རྙེད། སྤྲུལ་པའི་སྐུར་ཤེས་ནས་ཞབས་ལ་གཏུགས་ཤིང་གསོལ་བ་བཏབ་པས། དེས་ཡེ་ཤེས་འཕོ་བའི་དབང་བསྐུར་ཞིང་


TNT17_Page_0275
[མ་དཔེ་གཟིགས་ན་འདིར་གནོན།]

གདམས་པ་དང་རྗེས་སུ་གདམས་པ་སྩལ། བྷ་དེ་བས་གནས་བརྟན་གྱི་བྱ་བ་བོར་ནས། རེས་འགའ་ནི་དུར་ཁྲོད་དུ་བསྒོམ། རེས་འགའ་ནི་གཙུག་ལག་ཁང་དུ་བསྒོམ། དེ་ལྟར་ལོ་བཅུ་གཉིས་ཙམ་སོང་བ་ན། ལན་ཅིག་དུར་ཁྲོད་དུ་མི་མང་པོས་སོང་བ་ན། ཀེང་རུས་ཆོས་གོས་གོན་པ་ཞིག་ཏུ་མི་རྣམས་ཀྱིས་མཐོང་སྐད། གཙུག་ལག་ཁང་དུའང་དེ་ལྟར་མཐོང་བ་ལན་མང་དུ་བྱུང༌། ནང་དུ་དངོས་གྲུབ་ཁྱད་པར་ཅན་བརྙེས། ཕྱི་རོལ་ཏུ་ཀེང་རུས་དང༌། མི་ཐོད་བྱ་རིལ་གྱི་ཆོ་འཕྲུལ་མང་དུ་བསྟན། ཕྱིས་འཇའ་ལུས་སུ་གཤེགས། འདིས་ཀྱང་དཔལ་འཁོར་ལོ་སྡོམ་པའི་བསྐྱེད་རིམ་དང་རྫོགས་རིམ་དང་དབང་ཆོག་གི་གཞུང་ལ་སོགས་པ་མཛད་དོ། །གཞན་ཡང་གྲུབ་ཐོབ་བི་དྷི་བཛྲ་ཞེས་བྱ་བ་འཁོར་རྣལ་འབྱོར་ཕོ་མོ་ལྔ་བརྒྱ་ཙམ་དང་བཅས་ཏེ་རྟག་ཏུ་ཚོགས་ཀྱི་དཀྱིལ་འཁོར་ལ་སྤྱོད་པ་ཞིག་བྱུང༌། འཁོར་ལྔ་བརྒྱ་པོ་རེ་རེས་ཀྱང་ཐུན་མོང་གི་དངོས་གྲུབ་འགྲུབ། གཞན་ཡང་སློབ་ཚོགས་མང༌། འདིས་འགྲོ་ལྡིང་དུ་བྱོན་ཏེ། དཔལ་འཁོར་ལོ་སྡོམ་པའི་སྒྲུབ་ཐབས་དང༌། བསྡུས་པའི་དོན་དང༌། རྣམ་པར་བཤད་པ་ལ་སོགས་པ་མཛད། གནས་དེར་འཇའ་ལུས་སུ་གཤེགས་པར་གྲགས། འདིའི་སྲོལ་ཀ་རྒྱ་གར་དུ་རིང་དུ་མ་དར། འགྲོ་ལྡིང་ན་ད་ལྟའི་བར་དུ་ཡང་ཡོད་པར་འདུག འདི་དང་བྲམ་ཟེ་ཡེ་ཤེས་རྡོ་རྗེ་སྟེ་ཡེ་ཤེས་ཞབས་སུ་གྲགས་


TNT17_Page_0276
[མ་དཔེ་གཟིགས་ན་འདིར་གནོན།]

པ་གཉིས་ཅར་དུས་ཀྱི་འཁོར་ལོའི་རྒྱུད་ཕྱི་མ་ནས་ལུང་བསྟན་ཏོ། །ཡང་རྣལ་འབྱོར་པ་མ་ཏྲི་དད་ཏ་ཞེས་བྱ་བ། རིགས་ནི་བྲམ་ཟེ། རྟེན་ནི་དགེ་བསྙེན། དཔལ་འཁོར་ལོ་སྡོམ་པ་ལ་རྣམ་འབྱོར་དུ་བྱེད་པ་ཅིག ལན་ཅིག་ལུང་བསྟན་བྱུང་སྟེ་དུར་ཁྲོད་དུ་བཞུད། རང་གི་བློ་སྦྱང་བའི་དོན་དུ། མི་རོ་ལ་ལ་གདན་དུ་བཏིང༌། ལ་ལ་སྔས་སུ་བཙུག །ལ་ལ་ཕྱོགས་ཕྱོགས་སུ་ཀ་བའི་ཚུལ་དུ་བཙུགས། ལ་ལས་སྟེང་ནས་ཐོག་ཕུབ་པའི་ཚུལ་བྱས་ཏེ་བཞུགས། དེ་ལྟར་མཚན་མ་མེད་པའི་ཏིང་ངེ་འཛིན་བསྒོམ་སྟེ། ཕྱག་རྒྱ་ཆེན་པོའི་དངོས་གྲུབ་ཉམས་འོག་ཏུ་ཆུད་དོ། །ཤིན་ཏུ་སྤྲོས་མེད་ཀྱི་སྤྱོད་པ་མཛད་པ་ཅིག་ཡིན། དུས་དེ་ཙམ་ན་ཨོ་ཌི་བི་ཤའི་ཡུལ་གྱི་ཕྱོགས་ཅིག་ཏུ། མཚོ་གསར་པ་བརྡོལ། ཀླུ་གདུག་པ་ཅན་གསར་དུ་སྐྱེས་པ་ཞིག་བྱུང་སྟེ། དེས་གྲོང་པའི་ཁྱེའུ་དང་བུ་མོ་གཙང་མ་དག་རྐུས་ཏེ་རང་གནས་སུ་འཁྱེར་རོ། །ལན་ཅིག་རྒྱལ་པོ་བཱི་ར་པཱ་ལ་ཞེས་བྱ་བའི་བུ་གཅིག་ཀྱང་ཀླུས་ཁྱེར་ཏེ་སྟོར་བས། རྒྱལ་པོས་སློབ་དཔོན་དེ་ལ་གསོལ་བ་བཏབས། སློབ་དཔོན་གྱིས་མཚོའི་ནང་དུ་སོང༌། ཀླུའི་གནས་སུ་བྱོན་ཏེ་རྒྱལ་པོའི་བུ་བླངས་ཏེ་སླར་རྒྱལ་པོ་ཉིད་ལ་གཏད་དོ། །དེར་ཐམས་ཅད་ཀྱི་གྲུབ་པ་ཐོབ་པར་ཤེས་ནས། ཀླུ་དེ་འདུལ་བར་ཞུས། སློབ་དཔོན་གྱིས་ཐུགས་བརྟད་པས་མཚོ་དེ་ཁོལ། སྔར་ཁྱེའུ་བུ་མོ་རྐུས་པ་ཐམས་ཅད་ཀྱང་མ་ཤི་བ་ཉིད་དུ་ཐོན་ནས།


TNT17_Page_0277
[མ་དཔེ་གཟིགས་ན་འདིར་གནོན།]

རང་རང་གི་ཕ་མ་སོགས་ལ་གཏད་པས་དགའ་བ་སྐྱེས། འདི་ལ་གྲུབ་ཐོབ་མ་སཱ་ན་པ་ཟེར། བྱང་ཆུབ་སེམས་དཔའི་འགྲེལ་པ་སྟེ་ཕྱག་རྡོར་སྟོད་འགྲེལ་ལུགས་ཀྱི་སྡོམ་པའི་སྒྲུབ་ཐབས་དང༌། སྦྱོར་དྲུག་བསྒོམས་པས་གྲུབ་པ་ཐོབ་པ་ཡིན། འདིས་སེམས་འགྲེལ་གྱི་ཁ་སྐོང་ཡང་མཛད། ཆོས་རྒྱུན་ཡང་ཅི་རིགས་པར་བྱུང་ངོ༌། །དཱ་རི་ཀ་པ་ནས་དེའི་བར་གྱི་སློབ་དཔོན་དེ་རྣམས་ཀྱིས་སེམས་ཅན་གྱི་དོན་མཛད་པའི་ངོ་མཚར་བའི་གཏམ་ཤིན་ཏུ་མང་བ་ཞིག་ཡོད་འདུག་ནའང༌། བདག་གིས་མཐོང་ཐོས་སུ་གྱུར་པ་ནི། གཞན་དུ་བྲིས་པ་དང༌། འདིར་ནི་བྲིས་པ་དེ་ཙམ་མོ། །དེ་བཞིན་དུ་ཙརྱ་པའི་སྡེ་རིགས་སུ་ཆད་པ་ལ། གྲུབ་ཐོབ་ཧི་ར་ཎྱ་པ་དང༌། མནྡ་ར་པ་དང༌། ཏི་ལ་ཀ་པ་དང༌། སུ་དར་ཤ་པ་དང༌། ཙི་ཏྲཱ་ཙ་པ་དང༌། ཀརྐ་ར་པ་དང༌། ཛ་དུ་ཀརྞ་དང༌། དྷ་ན་མི་ཏྲ་དང༌། སློབ་དཔོན་ཛི་མུ་ཏ་པ་དང༌། དྷརྨ་ཤྲཱི་དང༌། ཨ་ཛི་ཏ་བཛྲ་དང༌། ཀྲྀཥྞ་ག་ཡི་པ་དང༌། ལི་ལ་བཛྲ་དང༌། ས་རི་ཏ་པ་ལ་སོགས་པ་བསྟན་བཅོས་ཀྱང་ཅི་རིགས་པ་མཛད་ཅིང༌། ནུས་པ་ཐོབ་པའི་གྲགས་ཆེན་མང་དུ་བྱུང་ལ། ཕྱིས་རང་ཡང་ན་གོ་པ་དང༌། ས་དྷཱ་རི་པ་སོགས་ནུས་མཐུ་ཆེན་པོ་ཐོབ་པ་དག་བྱུང་ངོ༌། །ཙརྱ་པ་རྣམས་ཕལ་ཆེར་འཁོར་ལོ་སྡོམ་པ་ལ་ཞུགས་པ་མང༌། དགྱེས་རྡོར་དང༌། གཤིན་རྗེ་གཤེད་དང༌། གཞན་སྒྲུབ་ཐབས་


TNT17_Page_0278
[མ་དཔེ་གཟིགས་ན་འདིར་གནོན།]

ཕྲ་མོ་ལ་བརྟེན་ནས། ནག་པོ་ཆེན་པོ་དང༌། རྡོ་རྗེ་མཁའ་འགྲོ་མ་རིགས་གྲུབ་པ་ཡང་མང་དུ་བྱུང༌། ཐམས་ཅད་ཀྱང་དཔྱིད་ཀྱི་ཐིག་ལེ་དང༌། རླུང་གི་རྣལ་འབྱོར་ལ་གཙོ་བོར་བྱེད་པ་ཤ་སྟག་གོ །སློབ་དཔོན་ཨན་ཏར་པ་ཡན་ཆད་དུ། སྤྱོད་པ་པའི་སློབ་རྒྱུད་མང་པོས་ས་སྟེང་ཁྱབ་ཀྱང༌། ཙརྱ་པའི་སྡེ་རིགས་སུ་ཆད་པ་མེད། སློབ་དཔོན་སྤྱོད་ཆུང་བའི་དུས་སུ་སྤྱོད་པ་པར་གྲགས་པའི་སྡེ་བྱུང༌། དེ་ནས་བྷུ་བ་རི་པ་དང༌། བྷུ་བ་བློ་ལྡན་གྱི་དུས་ལའང་ཅུང་ཟད་འཕེལ། དེ་རྗེས་སློབ་དཔོན་ཀུ་ས་ལ་པས་གཞན་གྱི་འདྲེས་དང་བསྲེ་བསླད་སྤངས། གཞུང་མན་ངག་རྣམས་ལ་དག་སྟེར་དང༌། སྒྲུབ་པ་ཉམས་ལེན་གྱི་སྒྲིགས་བཀོད་སོགས། ལུགས་སྲོལ་ཁྱད་པར་ཅན་བཙུགས་པ་ཡིན་ནོ། །ཞེས་པ་འདི་ཡང་སློབ་དཔོན་སྤྱོད་པ་པའི་ལོ་རྒྱུས་ཁ་སྐོང་དང་འཁོར་ལོ་སྡོམ་པའི་སྲོལ་འབྱེད་གྱི་བྱུང་ཚུལ་རྟོགས་པའི་ཕྱིར་དུ། རྒྱལ་ཁམས་པ་ཏཱ་ར་ནཱ་ཐས་བར་སྐབས་སུ་བརྗོད་པའོ། །ཞུས་དག །མངྒ་ལཾ།། །།

གྲུབ་ཆེན་བུདྡྷ་གུཔྟའི་རྣམ་ཐར་རྗེ་བཙུན་ཉིད་ཀྱི་ཞལ་ལུང་ལས་གཞན་དུ་རང་རྟོག་གི་དྲི་མས་མ་སྦགས་པའི་ཡི་གེ


TNT17_Page_0279
[མ་དཔེ་གཟིགས་ན་འདིར་གནོན།]

གྲུབ་ཆེན་བུདྡྷ་གུཔྟའི་རྣམ་ཐར་རྗེ་བཙུན་ཉིད་ཀྱི་ཞལ་ལུང་ལས་གཞན་དུ་རང་རྟོག་གི་དྲི་མས་མ་སྦགས་པའི་ཡི་གེ་ཡང་དག་པའོ། །


TNT17_Page_0280
[མ་དཔེ་གཟིགས་ན་འདིར་གནོན།]

ན་མོ་བཛྲ་དྷ་རཱ་ཡ། དུས་གསུམ་སངས་རྒྱས་ངོ་བོ་རྡོ་རྗེ་འཆང༌། །རིག་ཀུན་བདག་པོ་དཔལ་ལྡན་བླ་མ་ལ། །སྙིང་ནས་གུས་པས་ཕྱག་འཚལ་གསོལ་བ་འདེབས། །ཐུགས་རྗེ་ཆེན་པོའི་བྱིན་གྱིས་བརླབ་ཏུ་གསོལ། འདིར་བདག་ཅག་གི་བླ་མ་དམ་པ་རྡོ་རྗེ་ཐེག་པའི་ལམ་གྱིས་མཆོག་དང་ཐུན་མོང་གི་དངོས་གྲུབ་བརྙེས་པ། རྗེ་བཙུན་བུདྡྷ་གུཔྟ་ནཱ་ཐའི་ཞབས་ཀྱི་རྣམ་པར་ཐར་བ་ཅུང་ཟད་ཅིག་བརྗོད་ན། འཕགས་ཡུལ་ལྷོ་ཕྱོགས་རྒྱ་མཚོའི་འགྲམ་རསྨི་ཤྭ་ར་ཞེས་བྱ་བ་དང་ཉེ་བ་ཨིནྡྲ་ལིང་ག་ཞེས་བྱ་བའི་གྲོང་ཁྱེར་ཆེན་པོར་ཡབ་ནི་ཚོང་དཔོན་ཆེན་པོ་ལོངས་སྤྱོད་བསམ་གྱིས་མི་ཁྱབ་པས་མངོན་པར་མཐོ་བ་ཀྲིཥྞ་ཞེས་བྱ་བ་ལ། ཡུལ་ཐ་དད་ན་བུ་བརྒྱད་ཡོད་པ་ལས། རྗེ་འདི་ནི་ཆུང་སྟག་ཡིན་ཏེ། ཆུང་ངུའི་དུས་ནས་སློབ་དཔོན་ཏིརྠི་ནཱ་ཐ་ཞེས་བྱ་བ་འཁོར་རྣལ་འབྱོར་པ་མང་པོ་དང་


TNT17_Page_0281
[མ་དཔེ་གཟིགས་ན་འདིར་གནོན།]

བཅས་པ་ཕྱོགས་དེར་ཕེབ་པས་རྣལ་འབྱོར་པ་བྱེད་པ་ལ་མོས་པར་གྱུར། ཡབ་ལ་ཞུས་པས་ཀྱང་གནང་ནས་རྣལ་འབྱོར་པ་མཛད། མཚན་ནི་བུདྡྷ་ནཱ་ཐ་ཞེས་བྱ་བར་བཏགས། བླ་མ་དེ་ཡང་ལོ་འགའ་རེར། ཡུལ་ཀ་ཙ་ལི་དང༌། གོང་ཀུ་ན་དང༌། ཏུ་ལུ་རཱ་ཏི་ལ་སོགས་པར། གཙོ་བོར་དབེན་པ་བསྟེན་ཅིང་བཞུགས། རྗེ་འདིས་ནི་བླ་མའི་རིམ་གྲོ་བ་མཛད་ཅིང༌། ཡི་གེ་ལ་སོགས་པ་རིག་གནས་ཕྲ་མོ་ལ་བསླབས། བྲམ་ཟེའི་རྣལ་འབྱོར་པ་དཱི་པ་ནཱ་ཐ་ཞེས་བྱ་བ་ལ་སྒྲ་མདོ་ཙནྡྲ་པ་ཡན་ལག་དང་བཅས་པ་ཐམས་ཅད་དང༌། སྡེབ་སྦྱོར་གྱི་བསྟན་བཅོས་དམར་སེར་སྙན་དངགས་ཨ་ལངྐ་ར། ཨ་མ་ར་ཀོ་ཥ་ནས་ཅི་རིགས་པ་དང་བཅས་པ་གསན། བླ་མ་ཏིརྠི་ནཱ་ཐ་དེ། བཅུད་ལེན་གྱི་རྫས་གསོལ་ཞིང་བཞུགས་པས། རྫས་ཀྱི་ནུས་པས་རལ་པ་ནི་ཁྲུ་ཉི་ཤུ་


TNT17_Page_0282
[མ་དཔེ་གཟིགས་ན་འདིར་གནོན།]

ཙམ། སྐུའི་སྨ་ར་ཡང་ཁྲུ་བདུན་ཙམ་སྐྱེས་ཏེ། སྐྱེ་བོ་རྣམས་ཡ་མཚན་དུ་གྱུར་པ་ལ། རྒྱལ་པོ་རཱ་མ་རཱ་ཛ་ཐེ་ཚོམ་སྐྱེས། ལེགས་པར་བརྟགས་པའི་ཡིད་ཆེས་ཏེ། ཉག་མ་རེ་རེ་བཞིན་དུ་མཆོག་ཏུ་གྱུར་པའི་མུ་ཏིག་རེ་རེས་བརྒྱན་ནོ། །སློབ་དཔོན་གྱིས་མུ་ཏིག་ཐམས་ཅད་ཕྱོགས་གཅིག་ཏུ་སྤུངས་པས་ཕུང་པོ་ཆེན་པོར་གྱུར་ཏེ། སུ་འདོད་པ་ཁྱེར་ཞེས་དེ་ཉིད་དུ་ཅི་དགར་བོར་ནས། འཁོར་བཅས་ཡུལ་དབུས་སུ་ཕེབས། བླ་མ་དེ་བྷ་ཎཱ་ར་ཤི་ཏེ། བཱ་རཱ་ཎ་སིར་ཐོག་གཅིག་བཞུགས། ཌི་ལིའི་གྲོང་ཁྱེར་དང་ཉེ་བ། བི་ཀྲ་མ་ལོངས་སྤྱོད་ཀྱི་ནགས་སུ་གཙོ་བོར་བཞུགས། བཅུད་ལེན་ཀླ་པ་སྒྲུབ་པར་མཛད་པས། ལེགས་པར་འགྲུབ་སྟེ་སྔར་གྱི་རལ་བ་སོགས་ལྷུང༌། དགུང་ལོ་བཅུ་དྲུག་ལོན་པའི་རྣམ་པ་ཅན་དུ་གྱུར། དམ་པ་འདིས་ཀྱང་བླ་མ་དེ་ལ་སིནྡྷྱཱ་ན་ཏ་པ་ར་མ་ཞེས་བྱ་བའི་གཽ་རཀྵའི་ལུགས་ཀྱི་དབང་བསྐུར་གསན་ནས། འཇིག་རྟེན་དང་འཇིག་རྟེན་ལས་འདས་པའི་ལྷའི་སྒྲུབ་ཐབས་ཀྱང་མང་དུ་གསན། ཌི་ལི་དང༌། ཊི་ལ་དང༌། གཽར་ཥ་ཊ་རི་དང༌། ཧ་རི་དྭ་ར་ཞེས་བྱ་བ། འཕྲོག་བྱེད་སྒོ་ཡང་ཟེར་བ་སྟེ་བྱང་ཕྱོགས་ཀྱི་རི་དང་ཉེ་བ་དེ་རྣམས་སུ་ཡང་ཐོག་རེ་བཞུགས་ཤིང༌། དེ་ལྟར་ལོ་དགུ་ཙམ་ཞིག་སྐབས་སུ་རླུང་གི་རྣལ་འབྱོར་བསྒོམ་པ་དང༌། ཡང་དག་འཇོག་སྤེལ་གྱིན་མཛད། ཕལ་ཆེར་སློབ་དཔོན་པྲཧྨ་ནཱ་ཐ་ཞེས་བྱ་བ་རིག་སྔགས་ཀྱི་ནུས་པས་ཀླུའི་ཡུལ་དུ་བྱོན་པར་གྲགས་


TNT17_Page_0283
[མ་དཔེ་གཟིགས་ན་འདིར་གནོན།]

པ་ཞིག་དང༌། ཀྲིཥྞ་ནཱ་ཐ་ཞེས་བྱ་བ་དུག་སྦྲུལ་གྱིས་མིད་ཀྱང་གནོད་པ་མ་བྱུང་བར་ཕྱིར་ཐོན་པའི་རྣལ་འབྱོར་པ་ཆེན་པོ་དེ་གཉིས་ལ་ཡང་གདམས་པ་མང་དུ་གསན། གཽ་རཀྵའི་གསུང༌། མཧཱ་བ་ད་དང༌། སྭ་སཾ་བ་ད་ཞེས་བྱ་བ་རིག་བྱེད་ཆེན་པོ་དང༌། རང་གི་རིག་པ་ཞེས་བྱ་བ་ངེས་དོན་སྟོན་པ་གཉིས། པྲཱ་ཎ་ཤྲིཾ་ཁ་ལ་སྟེ། སྲོག་ལུ་ཁུར་རྒྱད་ཅེས་བྱ་བ། ལུས་དང་འཇིག་རྟེན་གྱི་རྣམ་གཞག་སྟོན་པ། པྲཱ་ཎ་ཏནྡྲ་ཏེ་སྲོག་གི་རྒྱུད་ཅེས་བྱ་བ་རྣལ་འབྱོར་གྱི་ལམ་གཙོ་བོར་སྟོན་པ་ཞིག་སྟེ། གཞུང་ལུགས་དེ་རྣམས་འཛིན་པར་མཛད་ཅིང༌། དེ་དག་གི་བཤད་པ་དང༌། ཉམས་ལེན་གྱི་མན་ངག་ཐོར་བུ་ལྔ་བཅུ་ལྷག་ཙམ་ལས་ཚོགས་མང་པོ་དང་བཅས་པ་ལ། མཁས་པར་སྦྱངས། མཐོ་དམན་བདེ་སྡུག་གི་ཉམས་ཀྱི་གེགས་སེལ་བོགས་འདོན་ཇི་རྙེད་པ་ཞིག་ཞུས། ཕན་གནོད་ཀྱི་སྔགས་དང་ལས་ཚོགས། གཞན་ཡང་མང་དུ་མཁྱེན་ཅིང་གྲུབ་པར་མཛད། དེ་ནས་སྐུ་ཡང་དར་ལ་བབ་པའི་སྐབས་ཡིན་པའི། ད་ནི་སྒྲུབ་པ་རྩེ་གཅིག་པ་ཞིག་བྱ་དགོས་ཤིང༌། སྒྲོ་འདོགས་ཐམས་ཅད་བླ་མ་བཞུགས་དུས་མ་བཅད་ན་མི་ཡོངས་དགོངས་ཏེ། གྷནྡྷ་མྲྀ་གའི་མཆོད་པ་སྟེ། ངོ་བོ་ནི་ཚོགས་ཀྱི་འཁོར་ལོ་ཡིན་ལ། དབང་དང་གདམས་ངག་ཟབ་པ་རེ་ལ་མཆོད་པ་དེ་འདྲ་རེ། གཞན་ཡང་རྙེད་བཀུར་དང༌། ཇི་རྙེད་པའི་ཡོན་རྣམས་འབུལ་བ་དང༌། ཅི་གསུང་སྒྲུབ་པའི་སྤྱོད་ལམ་གྱིས་མཉེས་པར་མཛད་དེ།


TNT17_Page_0284
[མ་དཔེ་གཟིགས་ན་འདིར་གནོན།]

ཡང་དང་ཡང་དུ་དྲི་ལན་གྱི་རྣམ་པར་གཏན་ལ་ཕབ་སྟེ། བླ་མ་གསུམ་པོ་དེའི་གདམ་ངག་གི་སྒྲོ་འདོགས་ཆོད་པར་བྱུང་ངོ༌། །གཽ་རཀྵའི་རྗེས་འབྲང་དུ་གྲགས་པ་ཛོ་གི་ཞེས་ཟེར་བ་ལ་སྡེ་ཚན་བཅུ་གཉིས་ཡོད། ནཱ་ཐ་པནྠི། པ་ཝོ་པནྠི། པཀྵ་པནྠི། གོ་པཱ་ལ་པནྠི། པ་ག་ལ་པནྠི། ཨཱ་ཡི་པནྠི། ཙོ་ལི་པནྠི། ཧོ་དུ་པནྠི། དྷྭ་ཛ་པནྠི། བྷེ་ར་གི་པནྠི། མང་ག་ལ་ནཱ་ཐ་པནྠི། སཏྟ་ནཱ་ཐ་པནྠི། ཞེས་པ་རྣམས་སོ། །སྔ་མའི་ནང་སེལ། ནཱ་ཌེ་ཤྭ་རི་ཛོ་ཀི་ཟེར་བའི་སྡེ་གཅིག་ཡོད། ད་ལྟ་ཡང་ནང་པ་ཟང་མ་ཡིན། བླ་མ་ཏིརྠི་ནཱ་ཐ། པྲཧྨ་ནཱ་ཐ། ཀྲྀཥྞ་ནཱ་ཐ་གསུམ་ཀ ནཱ་ཊེ་ཤྭ་རིའི་སྡེ་ཡིན་ནོ། །དེ་ནས་རྗེ་འདིས་ལོ་གཅིག་མ་ལ་ཝའི་ཡུལ་དུ་ནིམྦའི་བཅུད་ལེན་ཟླ་བ་དྲུག ཀླ་པ་ཟླ་བ་དྲུག་བསྟེན། ཕྱིས་སིང་ག་ལིའི་གླིང་དང༌། ཛྷ་མི་གི་རི་དང༌། ཛ་གཏྣཱ་ཐར་ཡང་ཀླ་པ་ཀྱི་སྦྱོར་བ་ཟླ་བ་བཞི་རེ་མཛད་པས། ད་ལྟ་དགུང་ལོ་སྨིན་ཡང༌། ལོ་སུམ་ཅུ་ཙམ་གྱི་ན་ཚོད་དུ་བཞུགས་པ་འདི་ཡིན། དེ་སྐབས་ཀྱང༌། མ་རུས་ཡུལ་དུ་ར་ཋོ་ར་སྟེ་རྒྱལ་པོའི་མི་གཅིག་གིས་ཡོན་སྦྱར་ཏེ། སྤྱིལ་བུ་ཆུང་ངུ་ཞིག་མཛད་ནས་རྩེ་གཅིག་ཏུ་བསྒོམས། མནལ་ལམ་དུ་རྡོ་རྗེ་རྣལ་འབྱོར་མའི་སྐུའི་རྣམ་པ་ཡང་ཡང་བྱུང༌། རེས་འགའ་མངོན་ཤེས་སྐྱེ་བ་སྙམ་བྱེད་པ་དང༌། མི་དང་མི་མ་ཡིན་ཅི་རིགས་པའི་ལྐོག་གྱུར་གྱི་སྤྱོད་པ་མཁྱེན་པ་དང༌། དེ་སོགས་ཡོན་ཏན་གྱི་སྣ་མང་དུ་བྱུང་ཞིང༌།


TNT17_Page_0285
[མ་དཔེ་གཟིགས་ན་འདིར་གནོན།]

རེས་འགའ་སྐུ་ལ་ཟུག་ཟེར་སྣ་ཚོགས་ལྡང་བ་དང༌། ཐུགས་ཀྱང་མི་བདེ་ཞིང་མཐོ་དམན་དུ་འགྱུར་བ་སོགས། ཉམས་མཐོ་དམན་སྣ་ཚོགས་པ་བྱུང་ཞིང༌། དེ་ཐམས་ཅད་ཀྱང་བླ་མའི་གདམས་ངག་གིས་ལམ་དུ་བཏང༌། རེས་འགའ་མནལ་ལམ་དུ་རྡོ་རྗེ་རྣལ་འབྱོར་མ་ཆང་འཚོང་མ་ཞིག་གི་གཟུགས་སུ་འོང་ནས། གེགས་སེལ་མཛད་པ་ཡང་ཡང་བྱུང༌། དེ་ནས་ལོ་བཞི་ལྔ་ཙམ་ཞག་རེ་མལ་རེ་མཛད་ཅིང་རྩེ་གཅིག་ཏུ་བསྒོམས་པས། སྒོམས་ཀྱང་མཐོ་དམན་ཆེ་བར་བྱུང་ཞིང༌། ལན་ཅིག་ནུབ་ཕྱོགས་སིན་དྷུའི་ཡུལ་གྱི་གྲོང་ཁྱེར་ན་ག་ར་ཋ་ཋ་ཞེས་བྱ་བར་ཅུང་ཟད་ཅིག་བཞུགས་པའི་སྐབས། བསྙུང་བ་དྲག་པོས་དྲག་ཏུ་བསྙུང་སྟེ། དེ་ཡང་ཇེ་དྲག་ལ་འཆི་ལྟས་རྣམས་ཀྱང་ཚང་བར་བྱུང་བས། འཆི་བའི་གདམས་ངག་བསྒོམ་དགོས་དགོངས། རྩེ་གཅིག་ཏུ་རླུང་བཀག་ཅིང་བསྒོམ་པར་མཛད་པ་ན། ལན་ཅིག་ཉིན་ཞག་སྦྲེལ་མ་ཙམ་ཐུགས་དྲན་མེད་དུ་སོང་ཞིང༌། ཞལ་དབུགས་ཀྱི་འགྱུ་བའང་ཆད། དེ་ཁའི་ངང་ནས་ཐུགས་གསལ་རིག་བདེ་ཉམས་དང་བཅས་པ་རྙེད་ཅིང༌། དེ་ཀ་ཡང་ཡུན་རིང་རབ་བར་དུ་མ་སད། དེ་ནས་སད་ཙམ་ན་བསྙུང་བ་ཀུན་དྲག དེ་ནས་བཟུང་ནས། གསལ་སྟོང་གི་ཏིང་ངེ་འཛིན་ཕལ་ཆེར་རྒྱུན་མི་འཆད་པ་དང༌། ཚུལ་མི་བྱིང་བ་སོགས་ཐུན་མོང་གི་ཡོན་ཏན་ཅི་རིགས་པ་ཤར་པ་འདི་བྱུང་གསུང༌། དེ་རྗེས་སིན་དྷུའི་གནས་ཆེན་མཇལ་བར་བཞེད་དེ་


TNT17_Page_0286
[མ་དཔེ་གཟིགས་ན་འདིར་གནོན།]

ཕེབས་པ། ན་ག་ར་ཋ་ཋ་ནས་གནས་ཆེན་གྱི་བར་དུ་ཉིན་ལམ་དགུ་ལ་ཡུལ་སྟོང་པ་འབའ་ཞིག་ཡིན་ཅིང༌། གཅན་གཟན་དང་ཆོམ་པོ་སོགས་འཇིགས་པ་ཆེ། ཁྱད་པར་ཟས་གཡོས་སུ་བྱས་པ་ཅི་རིགས་པ་ཁུར་ཡང་ཉེས་པ་མེད། རྫས་གཞན་ཁབ་དང་སྐུད་པ་རེ་ཡོད་ནའང༌། ཆོམ་པོ་རྣམས་ཀྱིས་ངེས་པར་འཕྲོག་ཅིང༌། བརྡུང་བ་དང་གསོད་པའི་བར་དུ་བྱེད་པ་ཞིག་ཡོད། དེར་ཕེབས་དུས་ནགས་ཚལ་ཞིག་ཏུ། སྟག་གཅིག་དྲུང་དུ་རྒྱུགས་བྱུང་བ། དེ་གཟིགས་པ་ལ་བརྟེན་ནས་རྨི་ལམ་ལྟ་བུར་བདེན་མེད་དུ་ཆམ་སོང་བས་སྟག་ཀྱང་ལོག །ཡང་ལམ་ཞིག་ཏུ་ནགས་ཀྱི་ཁྱི་ཞིག་གིས་རྨུགས་པས་སྐུ་ལ་རྨ་བྱུང་ཞིང༌། ཉིན་གཅིག་ཟུག་ཟེར་ཆེ་བར་ཡོད་པ་ལམ་དུ་ཁྱེར་ཞིང་བསྒོམས་པས། ནམ་ཕྱེད་ཙམ་ན་ཟུག་ཟེར་ཞི་ཞིང་རྨ་ཡང་ཤུལ་མེད་དུ་སོང༌། གནས་ཆེན་ཉིད་དུ་ཕེབས་ནས། དེ་ན་ལྷ་མོ་ཧིང་ག་ལཱ་ཙཱི་ཞེས་བྱ་བ། ལྷ་མོ་ཨུ་མའི་རྟེན་རང་བྱུང་ཞིག་ཡོད་པ། དེའི་དྲུང་དུ་ཞག་འགའ་བཞུགས་པས། ནུབ་སྔ་མ་ཆོ་འཕྲུལ་ཆེར་བྱུང་ཞིང༌། གཉིས་པ་ལ་ཐོ་རངས་ཀྱི་དུས་ཙམ་ན། རྡོ་སྐུ་ཉིད་བུད་མེད་རྒྱན་གྱིས་བརྒྱན་པའི་རྣམ་པར་སོང༌། ཕྱག་བྱེད་པ་ནི་མེད། ཡོ་བྱད་མང་པོ་འབུལ་བ་ལྟར་བྱུང༌། དེ་ན་རེ། རྣལ་འབྱོར་པ་ང་རྒྱལ་ཆེར་མི་རུང༌། གྲུབ་པ་མ་ཡིན་པ་ལ་ང་ཕྱག་མི་འཚལ། ཏིང་ངེ་འཛིན་ཅུང་ཟད་ཙམ་འདུག ཡོ་བྱད་ནི་སྦྱིན་གྱི་ཟེར། དེ་སྐབས་ང་


TNT17_Page_0287
[མ་དཔེ་གཟིགས་ན་འདིར་གནོན།]

སངས་རྒྱས་པའི་རྣལ་འབྱོར་པ་ནུས་པ་ཐོབ་པ་ཡིན་པས། མུ་སྟེགས་པའི་ལྷ་ཆེན་པོས་ཀྱང་ཕྱག་འཚལ་ལམ་དགོངས་པ་ཐུགས་ལ་ཡོད་པས། དེ་ཤེས་པར་འདུག །ལར་དེ་དུས་རྒྱུད་སྡེ་མང་པོ་མ་ཐོས་པས། ཡོན་ཏན་ཆུང་ངུ་ལ་ང་རྒྱལ་ཆེན་པོ་ཡོད་གསུངས། ཚུར་ལམ། ལམ་དུ་ཆོམ་རྐུན་མང་པོས་སྐུ་ལ་དབྱུག་པ་བརྡེག་པ་སོགས་བྱུང་བས། དེ་རྣམས་ལུས་སྦྱོང་བཞིན་དུ་སོང་ནས་རྩ་མདུད་གྲོལ། སྐུ་ལུས་ཆེས་ཡང་བར་གྱུར་ནས་ཞག་དགུའི་ལམ་ཉི་མ་ལྔ་ལ་ཆོད་ནས། སླར་ན་ག་ར་ཋ་ཋ་ར་ཕེབས། དེ་ནས་བྱང་ཕྱོགས་ལ་བྱོན་ཏེ། གྲོང་ཁྱེར་མོ་ལ་ཏཱ་ན་དང༌། ཀ་བྷེ་ལ་དང༌། ཁོ་རཱ་སཱ་ན་དང༌། བ་ཛ་སཱ་ན་དང༌། གོ་ཥ་ལ་སོགས་པར་ཐོག་རེ་ཐོག་རེ་བཞུགས་ཤིང༌། ཡུལ་དེ་དག་གི་མི་ཕལ་ཆེར་མོང་གོལ་ཏེ། སྟོད་ཧོར་ཀླ་ཀློ་སྟག་གཟིག་གི་རིགས་ཡིན་པས། ཐོག་མར་ཕེབས་ཙ་ན་ཅོ་འདྲི་བ་དང༌། གནོད་པ་རེ་བྱེད་པ་བྱུང༌། དྲག་སྔགས་ཀྱི་མཐུར་མངོན་པའམ། རྫས་སྔགས་ཀྱི་མིག་འཕྲུལ་ཅུང་ཟད་རེ་བསྟན་ཙ་ན། མགུ་བར་འདུག་གསུང༌། དེ་རྣམས་ཀླ་ཀློ་སྡིག་སྤྱོད་ཀྱི་ཡུལ་ཡིན་ཡང༌། ནུབ་ཕྱོགས་ཨོ་རྒྱན་གྱི་ཡུལ་དང་འབྲེལ་བས། ཞིང་གི་རྣལ་འབྱོར་མ་ཤིན་ཏུ་མང་བར་འདུག་གསུང༌། དེ་ནས་ནུབ་ཕྱོགས་ཨོ་རྒྱན་དུ་ཕེབས། སང་སྐྲྀ་ཏའི་སྐད་དུ་ཨཽ་ཌི་ཡ་ཎ། རང་བཞིན་སྐད་དུ་ཨོ་རྒྱན་ཟེར། ཌ་དང་ར་འདོན་ཚུལ་འདྲ་མིན་ཡོད་པས། ཨཽ་ར་ཡ་ཎ་ཟེར་བ་


TNT17_Page_0288
[མ་དཔེ་གཟིགས་ན་འདིར་གནོན།]

འདྲ་ཅིག་ཡོད། དེ་ལ་བོད་ཡིག་འཁྲུལ་གཞི་རྒྱ་འབྱམས་ནས། ཨུ་རྒྱན་དུ་སོང་གདའ་ན་བོད་སྐད་རང་ལ་གྲགས་པའི་ཚད་མར་བྱ་དགོས་དགག་ཏུ་མེད། ད་ལྟ་དེ་ཕྱོགས་རང་ན་ཀླ་ཀློའི་སྐད་དུ་གྲགས་པ་ཀུན་གྱིས་གོ་བ་ལ། ཡུལ་ག་ཛ་ནི་ཟེར་རོ། །གྲུབ་ཆེན་ལྭ་བའི་ན་བཟའ་ཅན་གྱི་ཕུག་པ་དང༌། རྒྱལ་པོ་ཨིནྡྲ་བྷཱུ་ཏའི་ཕོ་བྲང་གི་ཤུལ་དང༌། ཨི་ལོ་བར་པ་ཏ་ཞེས་བྱ་བའི་གནས་ཆེན་རྣམས་སུ་ཕེབས། ཨོ་རྒྱན་གྱི་གནས་མཐིལ་དྷུ་མསྠཱིར་སྟེ། དུ་བའི་གནས་ཞེས་བྱ་བའི་གྲོང་ཁྱེར་ཞིག་ཏུ་ཟླ་གཅིག་ཙམ་བཞུགས། སྤྱིར་ཨོ་རྒྱན་གྱི་གནས་མཐིལ་དེ་རི་རོང་དང་ནགས་འཐུག་པོས་མཐའ་བསྐོར་པའི་དབུས་ན་ཐང་ཁོར་ཙམ་པ་ཤར་ནུབ་ཏུ་ཉིན་ལམ་གཉིས་ཙམ། ལྷོ་བྱང་དུ་བཞི་ཙམ། གྲོང་ཁྱེར་ནི་དྷུ་མསྠཱིར་གཅིག་པུར་འདུག དེ་ཡང་རྒྱ་གར་གྱི་གྲོང་ཁྱེར་ཆུང་ལ་གཏོགས་པ་ཙམ་ཡིན། གཞན་གྷཱ་མ་གྷཱ་མ་འདྲ་འདུག་གསུངས། གནས་མཐིལ་དེ་མ་གཏོགས་པའི་སྒོ་བཞི་སོགས་ཨོ་རྒྱན་གྱི་ཕྱིའི་ཡུལ་ནི་ཤིན་ཏུ་ལྟོས་ཆེ་བར་འདུག ཀླ་ཀློའི་ཡུལ་ཡིན་རུང་གནས་མཐིལ་ན་ཡང་ད་ལྟ་དགེ་འདུན་གྱི་སྡེ་ནི་མེད། གཞི་སྡོད་རྣལ་འབྱོར་པའི་སྡེ་དང༌། དགེ་བསྙེན་དང༌། མུ་སྟེགས་དང༌། ཀླ་ཀློ་སོགས་ཀྱང་མི་འདུག བུད་མེད་ཕལ་ཆེར་ནི་མཁའ་འགྲོ་མའི་རིགས་ཅན་དུ་ཡོད་པར་སྣང་སྟེ། ཕན་གནོད་ཀྱི་སྔགས་ཀྱི་ནུས་མཐུ་ཆེན་པོ་གྲུབ་པ་དང༌། གཟུགས་སྣ་ཚོགས་སུ་


TNT17_Page_0289
[མ་དཔེ་གཟིགས་ན་འདིར་གནོན།]

བསྒྱུར་བ་དང༌། ལྟ་སྟངས་ཀྱི་ནུས་པ་ཡོད་པ་དང༌། ཆོ་འཕྲུལ་སྟོན་ནུས་པའི་རིགས་ཅན་ཤིན་ཏུ་མང་བ་གཟིགས་འདུག་ཅིང༌། སྔོན་ཆད་སྟོད་ཧོར་དང༌། ཨ་ཀ་པ་ར་པཱ་ཙས་སོགས་ཀྱི་ལུང་མི་འགྲོ་བ་ཡང༌། སྔགས་ཀྱིས་བསྲུངས་པའི་ནུས་མཐུ་འབའ་ཞིག་ཡིན་གསུངས། གནས་འདི་ཤར་དང་ལྷོ་དང་ནུབ་རྣམས་མཚོ་གསུམ་གྱིས་བསྐོར། ཤར་གྱི་དང་ལྷོའི་རྒྱ་མཚོའི་ལག་བརྒལ་ནས་འོངས་ན་ཧོར་ཀླ་ཀློ་བྷ་ལག་ཁའི་ཡུལ་དུ་སླེབ་འོང༌། དེའི་ས་ཕྱོགས་གཅིག་ན་སློབ་དཔོན་རྟ་མཆོག་གི་སྤྲུལ་པ་མ་བསྡུས་པར་གྲགས་པའི་ནམ་མཁའ་ཐག་རིང་པོ་ན་རྟའི་གཟུགས་བརྙན་ཞིག་དང༌། ལྭ་བ་པས་མཁའ་འགྲོ་མའི་རྡོ་ཆར་བཟློག་སྟེ་ནམ་མཁའ་ལ་ཆགས་པར་མཛད་པའི་ཕ་བོང་ཞིག་བྲག་གི་ངོས་ཞིག་དང་ཉེ་བའི་གནས་ལ་རྟེན་མེད་དུ་གནས་པ་དང༌། གཞན་ཕ་བོང་ཆེ་ཆུང་མང་པོ་བྲག་ལ་ཅུང་ཟད་འབྱར་པའི་ཚུལ་གྱིས་རམ་མེ་གནས་པ་དང༌། པདྨ་བཛྲ་ཀྱི་ཐུགས་དམ་ཧེ་རུ་ཀའི་ལྷ་ཁང་སོགས་ངོ་མཚར་ཅན་གྱི་གནས་ཐམས་ཅད་མཇལ། སྔོན་གྲུབ་ཆེན་གྲགས་ཆེ་བ་ཕལ་ཆེར་གྱི་གནས་རེ་ཡོད་གསུང༌། ལན་གཅིག་ལམ་དུ་འགྲོ་བའི་བུ་མོ་གཅིག །ཆུ་ཧ་ཅང་ཆེ་བ་མ་ཡིན་པ་ཞིག་གི་འགྲམ་དུ། བྱེ་མ་ལ་སྔགས་བཟླས་ནས་ཆུ་ལ་གཏོར་སོང་བས། ཆུའི་རྒྱུན་ཆད་དེ། དེའི་བར་ལ་སོང༌། སླར་ཡང་ཆུ་སྔར་བཞིན་འབབ་པ་དང༌། ཡང་བུད་མེད་ཞིག་བྱ་མ་བྱའི་གཟུགས་སུ་བསྒྱུར་ནས། ནམ་མཁའ་ལ་འཕུར་


TNT17_Page_0290
[མ་དཔེ་གཟིགས་ན་འདིར་གནོན།]

ཏེ་ཐག་རིང་པོའི་ཤིང་ཞིག་ལ་བབས་སོང༌། དེ་སོགས་འཇིགས་ཤིང་ངོ་མཚར་བ་མང་པོ་འདུག་གསུང༌། འོན་ཀྱང་ཞིང་གི་རྣལ་འབྱོར་མའི་ཆོ་འཕྲུལ་དེ་དག་ནི་རྗེ་ཉིད་ཀྱི་གཟིགས་པ་ཡིན་གྱི་སྐྱེ་བོ་ཕལ་བས་མཐོང་པའི་སྤྱོད་ཡུལ་མིན་ནམ་སྙམ་མོ། །དྷུ་མཥྛི་རར་བཞུགས་པའི་སྐབས་སྨྀག་སྒྱུ་ལ་སོགས་པའི་རྟགས་ལྔ་རྒྱུད་ནས་གསུངས་པ་བཞིན་དུ། ཤིན་ཏུ་གསལ་ཞིང་བརྟན་པར་བྱུང༌། རང་དང་སྣང་བ་ཐམས་ཅད་རྡོ་རྗེ་ཕག་མོའི་དཀྱིལ་འཁོར་དུ་རང་ཤར་ལ་སྣང་བ་ཞག་གསུམ་ཙམ་ཉིན་མཚན་འབྲལ་མེད་དུ་བྱུང་མོད། ཕྱིས་ཡང་ཡལ་སོང་གསུང༌། དེ་ནས་རིམ་གྱིས། སྟོད་ཧོར་གྱི་ཡུལ་མང་པོ་བརྒྱུད་ནས་ཁ་ཆེར་ཕེབས། ས་ར་དཱ་དང་ན་ར་དཱ་སོགས་མུ་སྟེགས་ཀྱི་གནས་རྣམས་སུ་བྱོན། ཤིན་ཏུ་འཚུབ་ཅིང་ཐུགས་དམ་ཡང་གོང་འཕེལ་དུ་བྱུང༌། དྷ་ར་ཏ་བྷོ་ཊ་སྟེ་ནང་ཁོམ་དུ་གྲགས་པ་དང༌། ཀས་ཀཱ་ར་ཞེས་གྲགས་པ་བོད་ལ་རྒྱུག་པའི་སྟོད་ཧོར་གྱི་ཡུལ་རྣམས་སུ་བྱོན། བོད་དང་ལི་ཡུལ་གྱིས་སོ་མཚམས་དང༌། པར་སིག་གི་བར་མཚམས་དང༌། ཁ་ཆེ་དང་མོང་གོལ་གྱི་ཡུལ་འདི་ཀུན་ལ་ཁོ་རང་ཡུལ་སྐད་དུ་ཆག་སོ་ཟེར་རོ། །སླར་ཡང་བླ་མ་ཏིརྠི་ནཱ་ཐ་མཇལ་དུ་ཕེབས། ལོ་རྒྱུས་ཞུས་པས་ཤིན་ཏུ་དགེས་པར་བྱུང༌། ཡང་ཌི་ལི་ནས་ལྷོ་ལ་ཕེབས་ཏེ། བྷི་མེ་ཤྭ་ར་ཞེས་བྱ་བ། དབང་ཕྱུག་གི་ལྷ་ཁང་སྟོང་པ་ཞིག་ཏུ་བཞུགས་པས། སྲོད་ཀྱི་ཐུན་ལ་རོ་ལངས་མང་པོ་ལག་ཏུ་དབྱུག་པ་ཐོགས་ཏེ། གནོད་པ་སྐྱེལ་དུ་བྱུང་བ་ལ། ཐུགས་གཡོ་བ་མེད་པ་དང༌། རླུང་བཀག་སྟེ་བཞུགས་པས། དེ་རྣམས་རུས་དུམ་དུ་སིལ་གྱིས་ཞིག །དེ་མ་ཐག་ཏུ་འབྲུག་སྒྲ་


TNT17_Page_0291
[མ་དཔེ་གཟིགས་ན་འདིར་གནོན།]

ཙམ་གྱི་སྒྲ་ཞིག་གྲགས་པ་དང་མཉམ་དུ་བདེ་སྟོང་གི་ཏིང་ངེ་འཛིན་ལ་སོང་སྟེ། ཉི་མ་ཤར་བའི་བར་མ་སད། དེ་ནས་ཀྱང་ཞག་མང་པོའི་བར་དུ་སྐུ་ལུས་བདེ་བ་ཆེན་པོས་གང༌། དེ་ཡན་ཆད་དུ་ལོ་བཅུ་དྲུག་ཙམ་གཙོ་བོར་བསྒོམ་བཟླས་དང༌། རླུང་དང་སེམས་གནས་ཀྱང་མ་ཆག་པར་མཛད། འདི་ནས་རླུང་ཅི་རིགས་པར་ལས་སུ་རུང་བར་བྱུང་བས་འདི་ཕྱིན་རྫོགས་རིམ་གཙོ་བོར་མཛད་གསུང༌། དེ་ནས་ལྷོ་ཕྱོགས་དང་ཉེ་བ་ཨུ་ཤིར་ཞེས་བྱ་བ། ཡུལ་ཆུང་ངུ་ཞིག་ན། རྡོ་རྗེ་འཇིགས་མཛད་ཀྱི་ལྷ་ཁང་མར་མེ་མཛད་བཟང་པོས་རབ་གནས་མཛད་པ། ད་ལྟ་ལུང་སྟོང་ན་ཡོད་ཅིང༌། གྲོང་ཁྱེར་བའི་མི་རྣམས་ཀྱི་རྐྱེན་སེལ་དུ་ལོ་རེ་བཞིན་མཆོད་པ་ཆེན་པོ་ཡོད་པ། ཡུལ་ཆོས་དང་བསྟུན་པའི་གྲོང་ཁྱེར་བ་རྣམས་ཀྱིས་ནི། ཁྲག་མཆོད་བྱེད་པ་ཞིག་ཡོད་པ་དེར་ཡུན་རིང་པོ་བཞུགས། ལན་གཅིག་བདེ་ཉམས་གཅིག་གིས་རྐྱེན་བྱས་ཏེ། ཉིན་ཞག་དྲུག་ཙམ་ཏིང་ངེ་འཛིན་ཐུན་གཅིག་ལ་སོང་ཞིང༌། ཕྱིའི་སྣང་བ་ཐམས་ཅད་འགགས། ནང་བདེ་སྟོང་གི་ཉམས་ཁྱད་པར་ཅན་ལ་རྩེ་གཅིག་ཏུ་གནས་པར་འདུག་གསུང༌། འདི་ཕྱིན་དྭངས་མ་རགས་པ་བརྟན་ཅིང་དབང་ཐོབ་པ་བྱུང༌། དེ་ནས་མ་རུར་ཕེབས་པདྨ་བཛྲ་གྱིས་བཞེངས་པའི་ཀྱཻ་རྡོ་རྗེའི་ལྷ་ཁང༌། དམ་ཚིག་ཉམས་པས་ཞལ་རས་མཐོང་ན་ཁྲག་སྐྱུག་པར་གྲགས་པ་དེ་མཇལ། དེ་ནས་ཨཱ་བྷུའི་མུ་སྟེགས་ཀྱི་གནས་དང༌། ཡུལ་སཽ་རཥྟ་ན་མ་སི་ཏ་སྟེ་ཀླ་ཀློའི་ལྷ་ཁང་ཞིག་ཏུ་


TNT17_Page_0292
[མ་དཔེ་གཟིགས་ན་འདིར་གནོན།]

སྨོ་བརྫུས་མཛད་ཅིང་ཐོག་རེར་བཞུགས། ཡུལ་ཀད་ཙ་རུ་བླ་མ་ཏིརྠི་ནཱ་ཐ་ཕེབས་པ་གསན་ཏེ་མཇལ་དུ་བྱོན། ཞག་གསུམ་ཙམ་བཞུགས། བླ་མ་དེ་ལྷོ་ཕྱོགས་སུ་ཕེབས་སོང༌། ཡུལ་སཽ་རཥྟར་སོ་བ་ནཱ་ཐ་སྟེ་དབང་ཕྱུག་གི་ལིངྒ་དང༌། བི་རཱུ་པའི་རྡོ་སྐུ་རང་བྱུང་ཡང་མཇལ་བར་མཛད། ལྷོ་ཕྱོགས་ས་ཧེ་ར་བྷི་ཐང་ཞེས་པའི་གྲོང་ཁྱེར། ལམ་སྲང་རང་ལ་ཡང་ཉིན་ལམ་གསུམ་བཞི་ཙམ་འགྲོ་དགོས་པ་ཞིག་ཡོད་པ་དེར། དབྱར་ཞིག་བཞུགས་པས་ཐུགས་དམ་ཤིན་ཏུ་འཕེལ་ཞིང་རྒྱུ་འགྲུལ་ཞིག་ལ་ཕེབས་པ་ལ། སྨད་འཚོང་མ་ཞིག་གིས་ཁྲུས་བྱས་པའི་ཁྲུས་ཁུ་ཁང་སྟེང་ནས་ཕོ་བ་དབུ་ལ་ཕོག་པས། དེ་དང་མཉམ་དུ། བིཛྙཱ་ན་ཛྙཱ་ན། ཨ་བརྫི་ཏ་བི་བརྫི་ཏཾ་ཞེས་རྣམ་ཤེས་དང་ཡེ་ཤེས་སྤང་བྱ་དང་སྤོང་བྱེད་མེད་ཅེས་པའི་སྒྲ་གྲགས་པ་ཡང་གསན་པས། དེ་ཉིད་དུ་ལྟ་བ་ལ་ངེས་ཤེས་ཆེན་པོ་བརྙེས། དེ་ནི་ཡེ་ཤེས་ཀྱི་རྣལ་འབྱོར་མ་ཞིག་ཡིན་པ་འདུག་གསུང༌། ལྷོ་ཕྱོགས་མཐིལ་གྱི་ཕྱི་ནང་གྀི་གནས་ཕལ་ཆེར་དུ་ཕེབས་ཤིང༌། སྔ་ཕྱིར་བགྱིས་ན་ལྷོ་ཕྱོགས་ཀྱི་ཡུལ་གྲུ་ཐམས་ཅད་དུ་མ་བྱོན་པ་ཙམ་མེད། དེ་ཡང་མར་ཧ་ཊ་དང༌། ཁཱ་ན་དེ་ས་དང༌། ཏཾ་བ་ལ་དང༌། བི་དྱཱ་ན་ག་ར་དང༌། ཀརྞ་ཊ་ཀ་དང༌། ཏྲི་ལིངྒ་དང༌། ཏྲི་མལ་དང༌། ཙནྩི་དང༌། མ་ལྱཱ་ར་དང༌། ཙཱ་རི་ཏྲ་དང༌། མརྦ་ར་དང༌། ཀོངྐུ་ན་དང༌། ཙཻ་བ་ལ་དང༌། ནི་ཙཱ་མས་དང༌། ནི་ཙམྦྷ་ཧ་ར་དང༌། ཙནྡྲ་དུ་ར་དང༌། པཉྩ་བྷ་ཏཱ་ར་དང༌། ཙ་ར་མཎྜལ་དང༌།


TNT17_Page_0293
[མ་དཔེ་གཟིགས་ན་འདིར་གནོན།]

མོ་ར་མཎྜལ་དང༌། ཛ་ལ་མཎྜལ་དང༌། ཏ་ལ་མཎྜལ་དང༌། ཏུཎྜ་མཎྜལ་དང༌། བྷོ་ག་མ་ལྱ་ར་དང༌། ཀ་ལིངྐ་དང༌། གཞན་ཡང་ཡུལ་ཕྲན་སྣ་ཚོགས་པ་དེ་དག་ནི། ལྷོ་ཕྱོགས་མཐིལ་ཡིན་ནོ། །དེ་ནས་ཀོངྐུ་ན་ནས། རྒྱ་མཚོ་ལ་ནུབ་ཕྱོགས་སུ་གྲུ་བཏང་ནས་བྱོན་པས། འགྲོ་ལྡིང་གི་གླིང་སྟེ། རྒྱ་སྐད་དུ། ཌ་མི་ཌོ་དྭི་པ་ཞེས་པར་ཕེབས། འདི་ལ་ཀླ་ཀློ་དང་ཡུལ་མཐའི་མི་དང༌། གླིང་ཕྲན་པ་རྣམས་ཀྱི་སྐད་དུ། སམ་ལོ་ར་ན་སོ་ཟེར་གྱིན་གདའ། གླིང་དེ་ན་གསང་སྔགས་ཀྱི་བསྟན་པ་ཆེས་དར་བ་ཡོད། མངོན་ཤེས་དང་ལྡན་པའི་སློབ་དཔོན་སུ་མ་ཏི་ཞེས་བྱ་བའི་པཎྜི་ཏ་གཅིག་ལ། བདེ་མཆོག་དང༌། དགྱེས་རྡོར་གྱི་དབང་གསན་ནས། དགྱེས་རྡོར་གྱི་རྒྱུད་ལ་བཤད་པའང་ཞིབ་རྒྱས་སུ་གསན། དགྱེས་རྡོར་འདི་སློབ་དཔོན་པདྨ་འབྱུང་གནས་ཀྱི་ལུགས་ཡིན་ཅིང༌། སྤྱིར་གླིང་དེ་ན་རྒྱུད་སྡེ་བཞི་ཀའི་བཀའ་མ་ཆད་པ་དང༌། ཁྱད་པར་བླ་མེད་ཆེས་དར་དུས་འཁོར་མ་གཏོགས་རྒྱ་གར་ན་ཡོད་པ་ཕལ་ཆེར་དེ་ན་ཡོད། ཕུར་བུ་དང་ཁྲོ་བོ་བཅུའི་རྒྱུད་དང༌། ཧེ་རུ་ཀའི་རྒྱུད་མང་པོ་དང༌། ཕྱག་ན་རྡོ་རྗེ་དང་མཁའ་ལྡིང་དང༌། མ་མོ་དང་ནག་པོ་ཆེན་པོ་སོགས་དང༌། རྟ་མགྲིན་བླ་མེད་ཀྱི་རིགས་རྒྱ་གར་ན་མེད་པ་མང་པོ་ཡང་དེ་ན་ཡོད་པ་དང༌། སློབ་དཔོན་པདྨ་འབྱུང་གནས་ནས་བརྒྱུད་པའི་ཆོས་ཀྱང་མང་བར་ཡོད་འདུག དགེ་འདུན་མང་པོ་ཡོད་ཀྱང་འདུལ་བའི་ལག་ལེན་དག་པོ་མེད་དེ། དགེ་སློང་རྣམས་གོས་


TNT17_Page_0294
[མ་དཔེ་གཟིགས་ན་འདིར་གནོན།]

ནག་གྱོན་པ་ཕལ་ཆེར་ཆང་འཐུང་བ་སོགས་ཡོད་པར་འདུག་གོ །གླིང་དེར་ལོ་གཅིག་ཙམ་ནས་བླ་མ་དེ་སྐུ་འདས་པས། རྒྱུད་ཀྱི་འཕྲོས་ཡང་བག་ཙམ་མ་རྫོགས་ཤིང༌། མན་ངག་ཀྱང་གསན་མ་ཐུབ་པས། སློབ་དཔོན་དེའི་སྲས་མོ་རྣལ་འབྱོར་མ་ནུས་པ་ཐོབ་པ། མ་ཏི་སྭ་མཱི་ཞེས་བྱ་བ་ཞིག་ལ་ཆོས་ཀྱི་འཕྲོ་རྣམས་གསན། དེ་ནས་སླར་ཚོང་པ་དང་ལྷན་ཅིག་གྲུར་ཞུགས་ནས་ཤང་ཁ་དྭི་པ་སྟེ། དུང་གི་གླིང་དུ་ཕེབས། དེ་ན་བདེ་འབྱུང་གི་གནས་ཞེས་བྱ་བ། རི་བོ་སྨན་སྣ་ཚོགས་སྐྱེ་བ་ཞིག་འདུག །དེར་ཐོག་གཅིག་བཞུགས། གླིང་དེ་ན། ག་ཛ་ནཱ་ས་ཞེས་བྱ་བའི་གླིང་ནས་འོངས་པའི་མི་གདོང་མི་ལ། སྣ་གླང་པོ་ཆེ་ལྟ་བུར་ཡོད་པ་མང་པོ་གཟིགས། དེ་ནས་ལྷོར་བྱོན་པ་ལ། པཱ་ལ་ཏ་ཞེས་བྱ་བའི་གླིང་དུ་ཕེབས། དེ་ནས་ཤར་ཕྱོགས་སུ་གྲུ་བཏང་བས། སིང་ག་ལིའི་གླིང་དུ་ཕེབས་ཏེ་དེར་ལོ་ལྔ་ཙམ་བཞུགས། གླིང་དེ་ནི། དགེ་འདུན་གྱི་སྡེ་མང་ཞིང༌། ཆོས་ཀྱང་དར་ལ། ཤིན་ཏུ་འབྱོར་པ་ཆེ་ཞིང༌། སྐྱིད་པ་ཡིན་ཏེ། ཛ་ལཱི་མུཀྟི་ཏ་ལཱི་མ་ཎི་ཀ ར་ནེ་བ་ནེ་ཀུཉྫ་ར་གྷ་རི་གྷ་རེ་པདྨ་ནཱི་ནཱ་རི། བྷ་ལཱ་དེ་ཤ་སིངྒ་ལ་ཞེས་པ་སྟེ། ཆུ་རྣམས་མུ་ཏིག་དྭངས་གཞི་ནོར་བུས་གང་བ། ནགས་རྣམས་གླང་པོ་ཆེས་གང་བ། ཁྱིམ་ཐམས་ཅད་བུད་མེད་པདྨ་ཅན་གྱིས་གང་བ་ཟེར་ཏེ། དོན་ལའང་ཕྱོགས་འདྲ་འདུག་གླིང་དེ་རྒྱ་ཁྱོན་ཡང་ཤིན་ཏུ་ཆེ་བར་འདུག་སྟེ། ཐམས་ཅད་ཞབས་ཀྱིས་བཅགས་གསུངས། ཤྲཱི་བཱ་དུ་ཀ་ཞེས་བྱ་བ། བཅོམ་


TNT17_Page_0295
[མ་དཔེ་གཟིགས་ན་འདིར་གནོན།]

ལྡན་འདས་ཀྱི་ཞབས་རྗེས་བཞུགས་པ་ལ། ཞག་བདུན་ཙམ་གསོལ་བ་འདེབས་པར་མཛད་པས། ཞབས་རྗེས་ནས་འོད་ཟེར་མང་པོ་འཕྲོས་ནས་སྐུ་ལུས་ལ་ཐིམ་པའི་སྣང་བ་བྱུང༌། ཀན་ཌ་ལ་ཞེས་བྱ་བའི་ཡུལ་ཞིག་གི་ཕུ། ནགས་འཐུགས་པོ་ཞིག་གི་དབུས་ན་བྲག་ཕུག་འདུག །དེ་ན་སྔོན་སློབ་དཔོན་ཆེན་པོ་ཤནྟི་པས་སིངྒ་ལིའི་གླིང་དུ་ཕེབས་པའི་དུས་ཀྱི་དངོས་སློབ། མ་ཤཱ་ཀ་ར་ཤནྟི་བོད་སྐད་དུ་གྲགས་པའི་འབྱུང་གནས་ཞི་བ་ཞེས་བྱ་བ། དགུང་ལོ་བདུན་བརྒྱ་ཡང་ལྷག་ལོན་པ་ཞིག་བཞུགས་པ། སློབ་མ་གཅིག་མ་གཏོགས་པ་ཕལ་ཆེར་ལ་མི་མཇལ་ནའང༌། རྗེ་འདིས་ཕུག་པའི་སྒོ་དྲུང་དུ་བཞུགས་པས་ནང་དུ་བྱོན་གསུང་མཇལ་བས་ཤིན་ཏུ་དགེས་ཤིང༌། ཆོས་འབྲེལ་ཞིག་ཀྱང་གསན། དེ་ཡང་གྲུབ་པ་ཡིན་གྱི་ཕལ་པ་ཆོས་མཐོང་བ་རང་ཅིག་མིན་པར་སེམས། རྒྱལ་པོ་རཱ་ཧེ་ཤིང་ཁ་བྷན་ཊ་རི་ལ། ཆོས་ཀྱི་གླེང་བ་གསུངས་པས། མཆོག་ཏུ་མགུ་བ་ཐོབ་པར་བྱུང༌། གླིང་དེ་ནས་གྲུ་བཏང་ནས་ཨུ་ལིངྒ་ཞེས་བྱ་བའི་གླིང་ཕྲན་ཞིག་ཏུ་ཅུང་ཟད་བཞུགས། དེ་ནས་ཡང་ཡུལ་དེའི་ཚོང་བ་འགའ་ཞིག་དང་ལྷན་ཅིག་ཏུ། ཨ་མུ་ཀ་ཞེས་བྱ་བའི་གླིང་ཕྲན་ཞིག་ཏུ་ཕེབས། འདི་ཕན་ཆད་དུ་ནི་རྗེ་ཉིད་རང་མ་གཏོགས་འཛམ་བུ་གླིང་གི་མི་འགྲོ་བ་མེད་པ་ལྟ་བུ་ཡིན་གསུང་ཞིང༌། སིང་ག་ལའི་གླིང་ནས་ད་བར་ཞག་སུམ་ཅུ་ལྷག་ཙམ་རེ་རྒྱ་མཚོ་ལ་གཟིངས་གཏོང་དགོས་གཉིས་དང༌། གླིང་གཉིས་


TNT17_Page_0296
[མ་དཔེ་གཟིགས་ན་འདིར་གནོན།]

པོ་དེ་ལའང་ཟླ་ལམ་ཙམ་རེ་ཡོད་གསུངས། དེ་ནས་གླིང་དེ་དག་གི་མི་དང་ལྷན་ཅིག་གྲུ་བོ་ཆེ་བཟོ་ཁྱད་ཆོས་ཕུན་སུམ་ཚོགས་པ་ཞིག་ཏུ། མི་སྟོང་ཕྲག་ལྔ་ཙམ་དང་ལྷན་ཅིག་ལྷོ་ཕྱོགས་ལ་གྲུ་བསྐྱོད་དེ་བྱོན་པས། ཟླ་བ་བཞི་ཙམ་ན། ཛྷ་མི་གི་རི་ཞེས་བྱ་བའི་གླིང་ཆེས་བཟང་བ། ཞིང་ལ་སོགས་པ་མེད་ཅིང༌། འབྲས་འབྲུ་རེ་བཏབ་པ་ལ་སྡོང་པོ་མི་འགྲང་ལྔ་ཙམ་ཡོད་པ། ཁྱིམ་རེའི་འཚོ་བ་ཐམས་ཅད་འབྱུང་བ་ཙམ་ཡོད་པ། གྲོང་ཁྱེར་ཆེན་པོ་ལྷོ་བྱང་གཉིས་སྣང་ཞིང༌། དེ་གཉིས་རེ་རེའི་སྲང་བར་ལ་ཉི་མ་བདུན་བདུན་ཙམ་རེ་འགྲོ་དགོས་པའི་ལམ་ཡོད་པ། གྲོང་ཁྱེར་གཉིས་ཀྱི་བར་ན་རི་ལྷོ་བྱང་དུ་གསུམ་ཙམ་ཞིག་འདུག་པའི་གཅིག་གི་རྩེ་མོ་ན་མཚན་མོ་འོད་འཕྲོ་བའི་གསེར་གྱི་བྲག་ཆུང་ངུ་ཞིག་ཀྱང་སྣང་གསུང༌། དེར་ལོ་གཅིག་ལྷག་ཙམ་བཞུགས་ཤིང༌། གླིང་དེ་ན་སྔོན་སློབ་དཔོན་ཀླུ་སྒྲུབ་ཕེབས་པའི་བཞུགས་ཁྲི་དང༌། བཅོམ་ལྡན་འདས་ཀྱི་རྡོ་སྐུ་ཆེན་པོ་མང་པོ་དང༌། ལྷ་ཁང་ཡང་མང་དུ་ཡོད་ཅིང༌། དེ་རྣམས་ལ་མཆོད་པ་དང༌། དུས་སྟོན་ཡང་ཆེ་བར་ཡོད། ཀླུ་སྒྲུབ་ཀྱིས་བཞེངས་པའི་ལྷ་ཁང་ཞིག་ཏུ་རྩེ་གཅིག་ཏུ་ཐུགས་དམ་མཛད་པས། བདེ་བ་ཅན་ནས་སློབ་དཔོན་ཀླུ་སྒྲུབ་འཁོར་མང་པོ་དང་བཅས་ནས་བྱོན་པ་གཟིགས་ཤིང༌། དེ་ཡང་སྐུའི་རྣམ་པ་ནི་བྱང་ཆུབ་སེམས་དཔའ་རྒྱན་ཐམས་ཅད་ཀྱིས་བརྒྱན་པ། ཕྱག་སོར་རེ་ལའང་དཔག་ཚད་ཙམ་ཡོད་པ་བལྟ་བའི་མི་ངོམ་པ་ཞིག་གཟིགས་ཤིང༌། དག་སྣང་གི་ཆོས་ཀྱང་འགའ་


TNT17_Page_0297
[མ་དཔེ་གཟིགས་ན་འདིར་གནོན།]

རེ་གསན་ནོ། །དེ་ལ་ཡེ་ཤེས་ཀྱི་སྐུ་གཟིགས་པ་འདི་ནི་གསང་འདུས་ལས། ཚངས་པ་དྲག་པོ་ལ་སོགས་ལྷས། །ནམ་ཡང་མཐོང་བར་མི་ནུས་སོ། །ཞེས་ལྷ་མཐུ་ཆེ་རྣམས་ཀྱིས་ཀྱང་མཐོང་བར་དཀའ་བ་ཡིན་པས། མངོན་པར་རྟོགས་པ་ཅི་ཙམ་ཡིན་རྒྱུད་སྡེ་མཁྱེན་པ་རྣམས་ཀྱིས་གསུངས་ཤིག དེ་ནས་ཤར་ཕྱོགས་ཀྱི་གླིང་ཕྲན་འགར་འགྲོ་བའི་ཚོང་བ་རྣམས་དང་ལྷན་ཅིག གྲུ་ཤར་དྲང་ཐད་དུ་བཏང་སྟེ་ཟླ་གཅིག་ཙམ་ཕེབས་པ་ན། རིའི་རྒྱལ་པོ་པོ་ཊ་ལ་ཀ་ཡོད་པའི་གླིང་དུ་ཕེབས། ཁ་ཅིག་འདི་པོ་ཊ་ལ་ཆུང་བ་ཡིན་ཟེར་བའང་ཡོད། གང་ནའང་མིའི་འགྲོ་བའི་སྤྱོད་ཡུལ་གྱི་པོ་ཊ་ལ་སྟེ་འདི་ཁོ་ནར་མངོན་ནོ། །ནོར་བཟང་གཞོན་ནུའི་གནས་ཤེལ་གྱི་ཕུག་པ་དང༌། ཁྲོ་གཉེར་ཅན་མའི་གནས་དང༌། ལྷ་མ་ཡིན་གྱི་སྒོ་གསེར་གྱི་ཕུག་པ་དང༌། སྒྲོལ་མའི་གནས་སེང་ལྡེང་གི་ནགས་དང༌། ཚངས་པ་དང༌། ཁྱབ་འཇུག་དང༌། དབང་ཕྱུག་ཆེན་པོའི་གནས་རི་བོ་རང་བྱུང་གི་ལྷ་ཁང་དང་བཅས་པ་རེ་རེ། གཞན་ཡང་མཇལ་དུ་བཏུབ་པའི་གནས་ཕལ་ཆེར་མཇལ། རི་བོ་པོ་ཊ་ལ་ཉིད་ལའང་བསྐོར་བ་ཞིག་མཛད། འཕགས་པ་འཇམ་དཔལ་གྱི་གནས་སུ་གྲགས་པ། ནམ་མཁའི་ངོས་ལ་ནགས་ཚལ་དང༌། དེ་ནས་འབབ་པའི་ཆུ་དངོས་སུ་འབབ་པ་ཡོད་དེ། དེ་ལ་ཁྲུས་ཀྱང་མཛད་གསུངས། པོ་ཊ་ལའི་རི་ཆེན་པོའི་མགུལ་ཐུགས་པར་ནགས་སྣ་ཚོགས་འདུག་པ་བསྐོར་བར་ཕེབས། རྩེ་མོ་ཤེལ་མ་རྡོའི་བྲག་རི་རྒྱ་དཔངས་


TNT17_Page_0298
[མ་དཔེ་གཟིགས་ན་འདིར་གནོན།]

བསམ་གྱིས་མི་ཁྱབ་པ་ཡོད་པ་ལ་ད་ལྟ་འགྲོ་ས་ནི་མི་འདུག་གསུང། གླིང་དེར་ཕྱིན་པའི་སྡིག་པ་དག་པ་འདྲ། དེ་ཕྱིན་ཆད་ཐ་མལ་གྱི་མནལ་གཏན་མེད་པ་དང༌། མི་མ་ཡིན་ཕལ་མོ་ཆེ་ཞིག་གི་སྤྱོད་པ་མངོན་སུམ་དུ་གཟིགས་པ་དང༌། དེ་དག་གི་ལོངས་སྤྱོད་ལ་དངོས་སུ་ལོངས་སྤྱོད་བྱར་གྱུར་པ་འདི་བྱུང་གསུང༌། གླིང་དེའི་མི་ཀུན་ལ་ད་ལྟ་ཕྱི་ནང་ཀླ་ཀློ་སོགས་གྲུབ་མཐའ་གང་ཡང་མེད། མི་གྲོང་ཡང་ཐན་ཐུན་མ་གཏོགས་མི་འདུག པོ་ཊ་ལ་ཀ་ལ་གསོལ་བ་འདེབས་པ་ལ་ཤིན་ཏུ་བརྩོན་པར་འདུག སྔོན་དུས་བཞེངས་པའི་སངས་རྒྱས་པའི་ལྷ་ཁང་ཡོད། འཛམ་བུ་གླིང་ན་མེད་པ་ལ། ལས་ལས་གྲུབ་པའི་འཁྲུལ་འཁོར་མང་པོས་ཁྱིམ་གྱི་མཐའ་བསྲུང་བ་འབའ་ཞིག་འདུག གླིང་འདིར་གླིང་གཞན་ནས་འོངས་པའི་མི་རྣ་བས་ལུས་ཐམས་ཅད་གཡོག་ཐུབ་པ་མང་པོ་གཟིགས། གླིང་དེ་ནས་གྲུ་བཏང་སྟེ་ཐག་རིང་པོ་བྱང་ཕྱོགས་སུ་བྱོན་པས། ཛ་བ་དྭཱི་པ་ཞེས་བྱ་བ། ནས་གླིང་དུ་ཕེབས། གླིང་དེ་ན་ཉན་ཐོས་སེནྡྷ་པའི་དགེ་འདུན་གྱི་སྡེ་མང་དུ་ཡོད་ཅིང༌། དེ་རྣམས་སུ་མ་བཞུགས། དེ་ན་མཚོ་ཆུང་ཞིག་གི་དཀྱིལ་ན་གླིང་ཆུང་ཞིག་ཡོད་དེ། དེའི་མིང་ནི། བ་ན་དྭི་པ་སྟེ། ནགས་གླིང་ཞེས་བྱ་བ་ཡིན། དེ་ན་སློབ་དཔོན་མཚོ་སྐྱེས་རྡོ་རྗེས་བྱིན་གྱིས་བརླབས་པའི་གནས། ཕྱི་བྲག་རི་ནང་ལྷ་ཁང་གྲུ་བཞིར་ཡོད་པ། དབུས་ན་ཀྱཻ་རྡོ་རྗེ་ཕྱག་གཉིས་པའི་རྡོ་སྐུ་རང་བྱུང་བཞུགས་ཤིང༌། ཕུག་པ་གཅིག་ན་གསང་སྔགས་ཀྱི་གླེགས་བམ་མང་དུ་ཡོད། རྒྱུད་


TNT17_Page_0299
[མ་དཔེ་གཟིགས་ན་འདིར་གནོན།]

འབུམ་ཕྲག་ལྔ་པ་ཡང་བཞུགས་ཟེར་ཏེ། ཤིན་ཏུ་འཚུབ་པར་གྲགས་པས་ལྟ་ནུས་པ་ནི་མི་འདུག་གསུང༌། དེ་ནས་སླར་ཡང་བྱང་ལ་ཕེབས་ཏེ། སིངྒ་ལར་ཕེབས། དེ་དུས་སངས་རྒྱས་ཀྱི་ཞབས་རྗེས་ལ་གསོལ་བ་འདེབས་ཤིང་བཞུགས། དེར་རྫོགས་རིམ་གྱི་རྣལ་འབྱོར་གཙོ་བོར་མཛད་པས། ཐ་མལ་གྱི་རྣམ་རྟོག་ཕལ་ཆེར་འགགས། བདེ་བས་ཉིན་མཚན་ངོ་མི་མཁྱེན་པ་འདྲ་བའང་བྱུང༌། དེ་ཕྱིན་ཞུ་བདེ་འགྱུར་མེད་བསྟན་པས་བདེ་སྟོང་རྒྱུན་མི་འཆད་པ་བྱུང་ལ། ལན་གཅིག་མནལ་ལམ་ན། རང་ཉིད་རྣམ་པར་སྣང་མཛད་ཀྱི་སྐུ་ཤིན་ཏུ་ཆེ་བར་གྱུར་པ་ལ། ཕྱོགས་བཅུའི་སངས་རྒྱས་ཡིན་སྙམས་པ་སངས་རྒྱས་མང་པོ་བྱོན་ཏེ། ཁྱོད་ནི་འཆི་བ་མེད་པའི་སྐུའོ་ཞེས་བསྟོད་པའི་སྣང་བ་བྱུང༌། དེ་ནས་ཀོངྐ་ནའི་གླིང་དུ་ཕེབས་ཏེ། ཛྙཱ་ན་ཀཱ་ཡ་ཞེས་བྱ་བ། མཚོའི་ནང་ན་འཇམ་དཔལ་གྱི་སྐུ་རང་བྱུང༌། སྐུ་ཚད་རི་ཆུང་ཙམ་ཡོད་པ་ཉལ་སྟབས་སུ་གནས་པ་དང༌། བིམྤ་ཀཱ་ཡ་ཞེས་བྱ་བ། ནམ་མཁའ་ལ་འཇའ་ཚོན་ཤར་བ་ལྟ་བུ། མཆོད་རྟེན་གྱི་གཟུགས་བརྙན་ཤིན་ཏུ་ཆེ་ཞིང་གསལ་བ་དཔལ་དུ་བ་འཁྲིགས་པ་རེག་པ་མེད་པའི་མཆོད་རྟེན་དུ་གྲགས་པ་དེ་ཡིན་ཏེ། དེ་གཉིས་ལ་ཉིན་མཚན་དུས་དྲུག་ཏུ་རོལ་མོ་དང༌། དྲི་བཟའ་དང༌། མེ་ཏོག་གི་ཆར་འབབ་པ་ལ་སོགས་པ་མི་མ་ཡིན་གྱི་མཆོད་པ་རྟག་ཏུ་འོང༌། ཆོ་འཕྲུལ་རྒྱུན་མི་འཆད་པ་ཞིག་ཡོད་པ་དེ་དག་ཏུ་ཕྱག་མཆོད་དང་སྨོན་ལམ་མཛད།


TNT17_Page_0300
[མ་དཔེ་གཟིགས་ན་འདིར་གནོན།]

སླར་གྲུ་བཏང་ནས་ལྷོ་ཕྱོགས་མ་ལྱཱ་རར་ཕེབས། འདི་དང་ཉེ་བའི་ཡུལ་ཕྲན་ཤཾ་བྷུ་དཏྟ་ཞེས་བྱ་བ་ན། རྡོ་རྗེ་ཐེགས་པ་རྒྱ་མཚོའི་ཕ་རོལ་ཏུ་སོན་པ། ཐུན་མོང་གི་གྲུབ་པའི་རྟགས་ཅི་རིགས་པ་དང་ལྡན་པའི་རྒྱལ་པོ་འཕྲོག་བྱེད་འོད་ཅེས་བྱ་བ་ལ། སངས་རྒྱས་མཉམ་སྦྱོར་གྱི་རྒྱུད་དང༌། སྡོམ་པ་རྣམ་པར་བརྩོན་པ་དང༌། ལྷན་ཅིག་སྐྱེས་པའི་དེ་ཉིད་དང༌། ཧ་རི་དཱ་རིའི་གླུ་དབྱངས་ལ་སོགས་པ་ཆོས་མང་དུ་གསན། བླ་མ་འདི་ནི་རྣལ་འབྱོར་མ་དཱི་ན་ཀ་རིའི་ཞང་པོ་ཡིན་ནོ། །དེར་གྲུབ་ཆེན་ཞི་བ་སྦས་པའི་སྙན་པ་གསན་ཏེ། ཛ་གད་ནཱ་ཐར་ཐོག་མར་མཇལ་བར་ཕེབས་ཟླ་བ་གསུམ་ཙམ་བླ་མའི་རིམ་གྲོ་བགྱིད་ཅིང་བཞུགས། སྔར་གྱི་བླ་མ་གཞན་རྣམས་ལ་གདམས་ངག་ཞུས་ཤིང་བསྒོམས་པ་བས། གྲུབ་ཆེན་འདིའི་ཞལ་རས་མཐོང་བ་ཙམ་ཡང་བོགས་ཆེ་བར་བྱུང་ཞིང༌། ཡོ་བྱད་ཐམས་ཅད་ཡོན་དང༌། ཚོགས་ཀྱི་འཁོར་ལོར་བྱས་ཏེ། གདམས་ངག་གནང་དགོས་པར་ཞུས་པས། བླ་མའི་ཞལ་ནས་དབང་བསྐུར་དགོས་པས་ད་རུང་ཡོ་བྱད་ཚོལ་གསུངས། དེ་ནས་ཏྲི་ལིངྐ་ཕྱོགས་སུ་ཟླ་བ་གསུམ་ཙམ་སྡོམ་བུ་བྱེད་ཅིང་བྱོན་པས། རུ་པྱ་སྟེ། དངུལ་ཏོ་ལ་སུམ་ཅུ་ཙམ་དང༌། གཞན་ཡང་ཡོ་བྱད་མང་དུ་བྱུང༌། ཏྲི་མལ་ཞེས་བྱ་བ་ཙནྡན་དམར་པོའི་ནགས་ཀྱིས་ཁྱབ་པའི་ཡུལ་ཞིག་ཏུའང་བྱོན། དེར་ཡང་ཡོ་བྱད་མང་པོ་འབྱོར། བླ་མ་ཡང་ཀརྞ་ཊ་ཀར་ཕེབས་འདུག་པས། དྲུང་དུ་ཕེབས། དབང་


TNT17_Page_0301
[མ་དཔེ་གཟིགས་ན་འདིར་གནོན།]

གི་ཡོ་བྱད་ཐམས་ཅད་ལེགས་པར་བཤམས། དམིགས་པའི་སྒོ་ནས་དབང་བསྐུར་ཞིག་མཛད། གདམས་པ་ཅི་རིག་པ་གནང༌། དེ་སྐབས་དབང་བསྐུར་ཐ་དད་མང་པོ་ནི། སློབ་དཔོན་གཾ་བྷི་རཱ་མ་ཏི་ལ་ཞུས། དེ་ནས་ཤར་ཕྱོགས་ཀྱི་གླིང་ཕྲན་རྣམས་གཟིགས་པར་བཞེད་ནས། ཛཱ་རི་ཁཎྜ་དང༌། ཛ་ག་ད་ནཱ་ཐ་རྒྱུད་ནས་བྷངྒ་ལར་ཕེབས། ཡུལ་པུཎྜ་བྷརྟ་རུ་ཁ་སརྤ་ཎི་མཇལ། ཞག་ཉི་ཤུ་ཙམ་གསོལ་བ་འདེབས་ཀྱིན་བཞུགས། མནལ་ལམ་དུ་བྱིན་གྱིས་བརླབས་པའི་མཚན་མ་ཡང་ཡང་བྱུང༌། དེ་ནས་ཏི་པུ་རར་ཕེབས། ཏི་པུ་རའི་ཡུལ་གྱི་ཕུ། ཀ་ས་རཾ་གའམ། དེ་ཝི་གོ་ཊའི་གནས་ཡོད་པ་མཇལ་པར་མཛད་ཅིང༌། གྲུབ་ཆེན་ནག་པོ་སྤྱོད་པས་བཞེངས་པའི་གཙུག་ལག་ཁང་དུ་ཞག་ཤས་བཞུགས། ཡུལ་འདི་ཡང་ཨོ་རྒྱན་བཞིན་དུ། གཟུགས་སྣ་ཚོགས་སུ་བསྒྱུར་བའི་མཁའ་འགྲོ་མ་གདུག་ཚུབ་ཆེ་བ་མང་པོ་ཡོད་ཅིང༌། སྟག་རྫུས་དང༌། སྣ་ཚོགས་པའི་རྫས་དང་སྔགས་ཀྱི་ངན་ཐབས་བྱེད་པ་ཤིན་ཏུ་མང༌། དེ་ནས་ར་ཁང་གི་ཡུལ་གྱི་ནང་ཚན། ཧ་རི་བྷཉྫ་དང༌། པུ་ཁང་དང༌། བལ་གུ་རྣམས་སུ་ཕེབས། ཡུལ་འདི་རྣམས་ན་དགེ་སློང་གི་དགེ་འདུན་ཆེས་མང་ཞིང༌། བསྟན་པ་ལྷག་པར་དར་བར་ཡོད་པས། ཡུན་རིང་རབ་རེ་བཞུགས་ཤིང༌། ཧ་རི་བྷཉྫའི་གཙུག་ལག་ཁང་མཆོད་རྟེན་ཆེན་པོ་ཞེས་བྱ་བ་ཞིག་ན། དྷརྨཱ་ཀྵ་གྷཽ་ཥ་


TNT17_Page_0302
[མ་དཔེ་གཟིགས་ན་འདིར་གནོན།]

ཞེས་བྱ་བའི་པཎྜི་ཏ་ཆེན་པོ་ཞིག་དང༌། དེ་བཞིན་དུ་བལ་གུའི་ཡུལ་དུ་བཞུས་པའི་བར་ཧེ་ཏན་ནྡགྷོ་ཥ་ཞེས་བྱ་བ། དགེ་བསྙེན་པཎྜི་ཏ་ཆེན་པོ་ཞིག་ལ་གསང་སྔགས་ཀྱི་ཆོས་ཀྱང་ཅི་རིགས་པ་གསན། མདོ་ལུགས་ཀྱི་གཞུང་མང་པོ་ཞོར་ཉན་དུ་མཛད། བླ་མ་འདི་ཀུན་ཡང་གྲུབ་ཆེན་ཞི་བའི་ཞབས་ཀྱིས་སློབ་མ་འབའ་ཞིག་ཡིན་གསུང༌། དེ་ནས་གྲུ་བཏང་སྟེ། དྷ་ན་ཤྲཱི་གླིང་དུ་ཕེབས། གླིང་འདི་ནང་དགེ་འདུན་ཤིན་ཏུ་མང་ཞིང༌། དཔལ་ལྡན་འབྲས་སྤུང་ངམ། མཆོད་རྟེན་དཔལ་ཡོན་ཅན་ཞེས་ཀྱང་བྱ། ཨསྟུ་ཀ་ཀཱ་ཡ་ཞེས་བྱ་བ་མཆོད་རྟེན་ཆེན་པོ་ངོ་བོ་ཤིན་ཏུ་རྒྱ་ཁྱོན་ཆེ་བའི་བྲག་རི་མཆོད་རྟེན་གྱི་དབྱིབས་ཅན། ཕྱི་ལ་རྡོའི་ལྕགས་རི་བྲག་རི་འདྲ་བ་ཉིས་རིམ་གྱིས་བསྐོར་བ། ཉི་མ་གཅིག་ལ་སྐོར་བ་ཐེབས་ཙམ། ཤར་དུ་གྲོང་ཁྱེར་ཤིན་ཏུ་ཆེ་བ། རྒྱ་ནག་དང༌། ཕྲེང་གི་དང༌། རྒྱ་གར་ལ་སོགས་པའི་ཡུལ་ཐ་དད་པའི་ཚོང་བ་ཤིན་ཏུ་མང་པའི་ཚོང་འདུས་ཆེན་པོ་འདུག་གསུང༌། དང་པོ་རེག་པ་མེད་པ་གཟུགས་བརྙན་གྱི་མཆོད་རྟེན་མཇལ་བར་མཛད་དུས། རྣམ་སྣང་གཙོ་བོར་གྱུར་པའི་རིགས་ལྔའི་དཀྱིལ་འཁོར་དང༌། ཛྙཱ་ན་ཀཱ་ཡ་ནི། འོད་དཔག་མེད་གཙོ་བོར་གྱུར་པའི་རིགས་ལྔའི་དཀྱིལ་འཁོར་དང༌། ཤྲཱི་དྷ་ནྱཱ་ཀ་ཊ་ཀ་ནི་མི་བསྐྱོད་པ་གཙོ་བོར་བྱས་པའི་རྒྱལ་བ་རིགས་ལྔའི་དཀྱིལ་འཁོར་དུ་གཟིགས། གཞན་ཡང་ཚོང་པ་རྣམས་དང་ལྷན་ཅིག་ཏུ་བྱོན་པས། པོ་ཊ་ལ་ཟེར་བའི་རྒྱ་མཚོའི་དོ་རི་


TNT17_Page_0303
[མ་དཔེ་གཟིགས་ན་འདིར་གནོན།]

གཞན་གཅིག་དང༌། པཻ་གུའི་གླིང་དང༌། ཛ་ཏི་དང་ལི་ཤི་སོགས་མང་པོ་སྐྱེ་བ། ཕྲེང་གིས་འཛིན་པའི་གླིང་ཞིག་དང༌། སཱདྷ་དྷཱི་པ་དང༌། གསེར་གླིང་ཆེན་པོ་དང༌། གསེར་གླིང་གི་མིང་ཅན་ཆུང་བ་གཉིས། སུརྫ་དྷཱི་པ། ཙནྡྲ་དྷཱི་པ། སརྦ་དྷཱི་པ་སྟེ། གླིང་ཆུང་ཆུང་དེ་རྣམས་སུ་ཡང་ཞབས་ཀྱིས་བཅགས། དེ་ནས་གཾ་ག་ས་ག་ར་ཞེས་བྱ་བའི་གླིང་ཆུང་ཞིག་ཏུ་ནག་པོ་སྤྱོད་ཆུང་དང༌། བྷུ་བ་རི་པ་དང༌། བྷུ་བ་བློ་ལྡན་རྣམས་རིམ་པར་བྱོན་སའི་དགོན་པ་ཞིག་ན་སློབ་དཔོན་ནག་པོ་སྤྱོད་པ་པའི་རྒྱན་དྲུག་མཁའ་འགྲོ་མས་བྱིན་གྱིས་བརླབས་པ་དེ་མཚན་མོ་མེ་འབར་བ་སོགས་ཆོ་འཕྲུལ་དང་འཚུབ་ཤིན་ཏུ་ཆེ་བ་ཅིག་འདུག་པ་དེ་ཡང་མཇལ། དེར་དབྱར་ཞིག་ཟླ་བ་གསུམ་གཏུམ་མོ་དང༌། ཕྱག་རྒྱ་ཆེན་པོ་རྩེ་གཅིག་ཏུ་བསྒོམས་པས། གནས་གསུམ་གྱི་མཁའ་འགྲོ་མའི་རིགས་སུ་གཏོགས་པ་མང་པོ་དང༌། ཁྱད་པར་མི་མ་ཡིན་གྱིས་མཁའ་འགྲོ་མ་མང་པོ་དངོས་སུ་འདུ་བ་བྱུང༌། དེ་དག་གི་རྐྱེན་གྱིས་ཡེ་ཤེས་གོང་ནས་གོང་དུ་འཕེལ་ཞིང༌། རྟོག་པ་ཁྱད་པར་དུ་གྱུར། གྲུབ་པའི་དབང་ཕྱུག་ཆེན་པོ་ཞི་བ་སྦས་པ་ལ། དེ་རྣམས་ཀྱིས་རྟོགས་པ་འབུལ་བར་བཞེད་ནས། གཟེངས་ལ་བསྐྱོད་དེ། ཛམ་བུ་གླིང་དུ་ཕེབས་པར་བཞེད་པའི་ལམ་གླིང་ཕྲན་ཆུང་ངུ་ཞིག་ན། སྔོན་འཕགས་པ་སྤྱན་རས་གཟིགས་དབང་ཕྱུག་སེདྒེ་སྒྲས་ཐུགས་བསྐྱེད་པའི་གནས་སུ་གྲགས་པ། གླིང་སྟོང་པ་ཞིག་ན་ནོར་བུ་དམར་པོ་འདྲ་བའི་རྡོའི་ཕུག་པ་དང༌། ཙནྡན་གྱི་ནགས་ཚལ་ཡང་


TNT17_Page_0304
[མ་དཔེ་གཟིགས་ན་འདིར་གནོན།]

ཡོད་པ། ཤིན་ཏུ་གཉན་པས་འདབ་མ་རེ་ཡང་གཅོད་མི་ནུས་པ་ཞིག་ཡོད་པ་དེ་མཇལ་དུ་ཕེབས། དེ་ན་གྲུབ་ཆེན་ཞི་བའི་ཞབས་ཀྱི་གདམས་པའི་མངའ་བདག་རྣལ་འབྱོར་མ་ཆེན་མོ་དཱི་ན་ཀ་རཱ། འཁོར་རྣལ་འབྱོར་ཕོ་མོ་བཞི་བཅུ་ཙམ་དང་བཅས་པ་བཞུགས་འདུག་པ་ལ། གདམས་ངག་གནང་བར་ཞུས་པས། མང་དུ་གནང་ཞིང༌། དེ་ནས་རྣལ་འབྱོར་མ་ཆེན་མོ་དེ་ཉིད་ཀྱི་ཞབས་པད་བསྟེན་བཞིན་དུ། ཏྲི་ལིངྒ་དང༌། བི་དྱ་ན་ག་ར་དང༌། ཀརྞ་ཊ་ཀ་རྣམས་བརྒྱུད་ནས། བྷཾ་དྭ་གྱི་ཡུལ་དུ་ཕེབས། ཛམ་བུ་གླིང་བ་ཐམས་ཅད་ཀྱི་སྐྱབས་གནས་གཅིག་པུ་གྲུབ་ཆེན་ཞི་བ་སྦས་པ་དང་མཇལ། ཟླ་བ་བཅུ་གསུམ་ཙམ་དྲུང་དུ་བཞུགས། གདམས་པ་བསམ་གྱིས་མི་ཁྱབ་པ་གསན། མཚན་ནི་བུདྡྷ་གུབྟ་གྱིས་གསུང་བས་དེ་ཕྱིན་བུདྡྷ་གུཔྟ་ནཱ་ཐ་ཟེར། དབང་བསྐུར་དང་བཤད་པ་ཕལ་ཆེ་བ་ནི་རྣལ་འབྱོར་མ་ཆེན་མོ་དཱི་ན་ཀཱ་ར་དང༌། སློབ་དཔོན་གམ་བྷི་ར་ཡ་ཏི་ཆེན་པོ་གཉིས་ལ་ཞུས་ཤིང༌། ཕྱག་ལེན་དང་དོགས་དཔྱོད་ཅི་རིགས་པ་ཞུ་བར་མཛད་པའི་བླ་མ་ནི། གཞན་ཡང་མང་དུ་ཡོད་པ། སུ་དྷཱི་གརྦྷ་ཞེས་བྱ་བ་དང༌། ཀནྟ་པ་ཞེས་བྱ་བ་དང༌། བེ་ཏ་ཏིཀྵ་ཎ་དང༌། བཱི་ར་བནྡྷ་དང༌། གྷ་གྷ་པ་སྟེ། དེ་རྣམས་ཀྱང་གྲུབ་ཆེན་ཞི་བ་སྦས་པའི་ཞབས་འབྲིང་བསྟེན་པས། རྡོ་རྗེའི་ཐེགས་པ་ལ་ཆེས་མཁས་ཤིང༌། ཁྱད་པར་ནུས་པ་བརྙེས་པ་ཤ་སྟག་ཡིན་ཏེ། སྤྱིར་གྲུབ་ཆེན་འདིའི་དྲུང་དུ། ཡུལ་དང་རིགས་ལ་སོགས་པ་སྐྱེ་བོ་གཞན་གྱིས་བཤད་


TNT17_Page_0305
[མ་དཔེ་གཟིགས་ན་འདིར་གནོན།]

རྒྱུ་མེད་པའི་རྣལ་འབྱོར་བ་རྫུ་འཕྲུལ་གྱི་བཀོད་པ་ངོ་མཚར་ཅན་སྟོན་པ་མང་དུ་འོང་ཞིང༌། ཡང་གར་སོང་ཆ་མེད་པར་སོང་བ། དེ་ལྟ་བུ་ཡང་ཡང་ཡོད་པ་ཞིག་འདུག་གསུངས། ལན་ཅིག་ཁ་གེནྡྲའི་རི་སུལ་ཞིག་ན་རྣལ་འབྱོར་བ་ཞིག་མར་མེ་སྦར་ཏེ་འདུག དྲུང་དུ་བྱོན་པའི་དེའི་སྣང་བར་ཡལ་ཤུལ་ན་མི་ཐོད་སྐམ་པོ་གསུམ་འདུག་གསུང༌། དེ་ནི་མིག་སྨན་གྲུབ་པའོ། །དེ་ནས་གྲུབ་ཆེན་ཞི་བ་སྦས་པའི་གསུང་གིས། ཡུལ་དབུས་ཀྱི་ཕྱོགས་སུ་སྒོམ་དུ་སོངས་ཞིག ཐུགས་དམ་གྱི་བོགས་ཆེ་བར་འོང་ཞེས་གསུངས་པ་ཞིག་བྱུང་བས། དབུས་ཀྱི་ཕྱོགས་སུ་ཕེབས། མཧཱ་བྷོ་དྷི་མཇལ་བར་མཛད། རྡོ་རྗེ་གདན་གྱི་བྱང་ཕྱོགས་རྒྱང་ཙམ་གཅིག་ཏུ་སྒོམ་ཁང་ཞིག་མཛད། ཟླ་བ་གཅིག་ཙམ་བཞུགས་ཤིང༌། ཉིན་མོ་ཏིང་ངེ་འཛིན་ཁོ་ན་དང༌། མཚན་མོ་ཕྱག་དང་སྐོར་བ་འབའ་ཞིག་མཛད། ཐུགས་ཀྱི་སྣང་བ་ལ། རང་ཉིད་མངོན་པར་རྫོགས་པ་སངས་རྒྱས་པ་ཡིན་སྙམ་པ་དང༌། སྐུ་ལུས་རྡོ་རྗེ་སེམས་དཔའི་རྣམ་པ་ཤིན་ཏུ་སྐུ་ཚད་ཆེ་བ། སྒྲ་དང་འོད་དུ་མ་དང་བཅས་པར་གྱུར། བྱང་ཆུབ་ཆེན་པོ་བཅོམ་ལྡན་འདས་ཤཱཀྱ་ཐུབ་པ་དངོས་ཀྱི་རྣམ་པར་གྱུར་ཏེ། ཁྱོད་ནི་ཏ་ཐཱ་ག་ཏ་རཏྣ་སྥ་ར་པྲ་དཱི་པ་ཞེས་བྱ་བ་ཡིན་ནོ། །ཞེས་ལུང་སྟོན་པ་དང༌། ཕྱོགས་བཅུའི་སངས་རྒྱས་མང་པོ་བྱོན་ཏེ། རྡོ་རྗེ་འཛིན་པ་ཁྱོད་སྤྲུལ་པ་སྟེ་སྤྲུལ་པ་ལྟ་བུས་སེམས་ཅན་གྱི་དོན་མཛོད་ཅིག །


TNT17_Page_0306
[མ་དཔེ་གཟིགས་ན་འདིར་གནོན།]

ཅེས་གསུང་བའི་སྣང་བ་བྱུང༌། དེ་ཉིད་དུ་བདེ་སྟོང་གི་ཡེ་ཤེས་འོད་གསལ་མུ་མཐའ་མེད་པ་ལ་ཡུན་རིང་དུ་གནས་པ་བྱུང་ཞིང༌། དེ་ནས་རིམ་གྱིས་གནས་ཆེན་པོ་བརྒྱད་པོ་རྣམས་བསྐོར་བ་ལ་ཡང་ཕེབས། ཐམས་ཅད་དུ་ཐུགས་དམ་གྱི་བོགས་ཤིན་ཏུ་ཆེ་བ་བྱུང༌། བྱ་རྒོད་ཕུང་པོའི་རི་དང༌། རི་བྱ་རྐང་ཡང་མཇལ། སླར་ཡང་རྟོགས་པ་འབུལ་བ་ལ། གྲུབ་ཆེན་ཞི་བའི་ཞབས་ཀྱི་དྲུང་དུ་ཕེབས། འདི་སྐབས། བྷཾ་དྭ་གྱི་རྒྱལ་པོ་གཞོན་ནུ་བ་ལ་བྷ་དྲ་འདིས། གྲུབ་ཐོབ་ཆེན་པོ་འཁོར་བཅས་ལ་ཚོགས་ཀྱི་འཁོར་ལོ་མཛད་པའི་གསོལ་བ་གདབ་པའི་དོན་དུ་སྟོན་མོ་ཞིག་མཛད་པ་དང་འཛོམ། སྔར་གྱི་རྟོགས་པ་རྣམས་ཕུལ་ཞིང༌། སངས་རྒྱས་དངོས་སུ་གཟིགས་པའི་མོས་གུས་སྤྲོས་པའི་རྣམ་པ་ཐམས་ཅད་དང་བྲལ་བ་ཐུགས་པ་འཁྲུངས་ཏེ། སྔོན་མེད་པའི་མོས་གུས་ཀྱི་ནུས་མཐུ་འདིས། ཆོས་ཐམས་ཅད་ཀྱི་རང་བཞིན་སྤྲོས་པ་ཐམས་དང་བྲལ་བ། གཅིག་མིན་དུ་མ་མ་ཡིན་པ་བརྗོད་བྲལ་ནམ་མཁའ་ལྟ་བུ་མངོན་དུ་གྱུར། ཕྱག་རྒྱ་ཆེན་པོའི་རྟོགས་པ་ཚད་དུ་ཕྱིན། ནང་ཀུན་དྷ་དབུ་མའི་ནང་འཁོར་ལོ་རྣམས་སུ་བརྟན་པ་ཐོབ་པས་རྩ་མདུད་གྲོལ་བའི་རྟགས་ཐོབ། རྣལ་འབྱོར་བའི་གྲར་སུ་ཆུད་པ་འདི་དེ་ནས་བྱུང་བ་ཡིན་གསུང༌། བླ་མ་ཏིརྠི་ནཱ་ཐ་དང་ལན་རྟིང་མ་མཇལ་བའི་དུས་དེ་ནས། དེ་བར་དུ་ལོ་བཞི་བཅུ་ཞེ་དྲུག་སོང་གསུང༌། ལར་ཁོ་བོ་སྒོམ་ཡུན་ཤིན་ཏུ་རིང་ཡང༌། གནས་སྐོར་ཡང་གཡེང་བའི་རྒྱུར་སོང་བ་འདྲ། ཁྱད་པར་གྲུབ་ཆེན་ཞི་བ་སྦས་པ་འདི་དང་མ་མཇལ་བར་དུ་བླ་མ་གཞན་རྣམས་དང་ཅུང་ཟད་ལས་འཕྲོ་ཆུང་བ་ཡིན་ན། ཐུན་མོང་གི་ཡོན་ཏན་འགའ་ལས་


TNT17_Page_0307
[མ་དཔེ་གཟིགས་ན་འདིར་གནོན།]

གནས་ལུགས་ཀྱི་དོན་ལ་འགྱུར་བ་མེད་པའི་གདེང་མ་ཐོབ། སྤྱིར་ཡང་ཌ་མི་ཌོར་དགྱེས་པའི་རྡོ་རྗེ་མ་གསན་བར་དུ་སངས་རྒྱས་པའི་མན་ངག་རྒྱུད་དང་འབྲེལ་བའི་ཁུང་མ་རང་ཚོ་མ་ལོན་པས་ཀྱང་ཡིན་པ་འདྲའོ་གསུང༌། ཨོ་རྒྱན་ནས་ཕྱིར་བྱོན་དུས། ད་ང་རྣལ་འབྱོར་པ་ཆེན་པོ་ཡིན་སྙམ་པའི་ང་རྒྱལ་ཆེན་པོ་བྱུང༌། གཞན་ཁྱད་དུ་གསོད་པའི་སེམས་སྐྱེས་པས་ཀྱང༌། དེ་ནས་ལོ་བཅུ་གཉིས་ཙམ་དུ་སྒོམ་ལ་སྐྱེད་ཆེན་པོ་མ་བྱུང་ཞེས་དང༌། ལན་ཅིག་ཛྷ་མི་གི་རིའི་གླིང་དུ་དད་པར་བྱ་དགོས་པའི་ཡུལ་འགའ་ཞིག་ལ་སྨད་པས་ཀྱང༌། དངོས་གྲུབ་རང་དུ་འགྱང་བར་འདུག་གསུང༌། དེ་དག་ཀྱང་བདག་ཅག་ལ་སོགས་པ་གྱ་གྱུར་སྤྱོད་པ་རྣམས། ལམ་ལ་འབད་པར་གདམས་པའི་དགོངས་པ་ཅན་ཡིན་གྱི། གཞན་དུ་ན། དམ་པ་འདི་ཉིད་གྲུབ་པའི་དབང་ཕྱུག་ལྭ་བའི་ན་བཟའ་ཅན་དང་གཉིས་སུ་མེད་པར་འཁུམས་སོ། །དེ་སྐབས་ཟླ་བ་གསུམ་ཙམ་དུ་སློབ་དཔོན་མཆོག་ལ་གདམས་པའི་འཕྲོ་མང་དུ་གསན། དེ་མཚམས་ནས། ཁ་གེནྡྲའི་རི་བོར་ཚོགས་ཀྱི་ཁང་པ་རྒྱ་ཆེན་པོ་ཞིག་བཞེངས། རིམ་པས་སློབ་དཔོན་ཞི་བའི་ཞབས་ཀྱི་སློབ་མ། གསང་སྔགས་སྤྱོད་པ་ཐམས་ཅད་འདུས་ཏེ། སླར་ཡང་ཟླ་བ་གསུམ་ཙམ་ན། རྣལ་འབྱོར་ཕོ་མོ་སྟོང་ཕྲག་ལྔ་ཙམ་བྱུང་སྟེ། རྒྱལ་པོས་ཀྱང་ཉིན་རེ་བཞིན་དུ་དངུལ་ཏོ་ལ་སྟོང་ཕྲག་དྲུག་དྲུག་གི་རིན་ཐང་གི་ཚོགས་ཀྱི་ཡོ་བྱད་དང༌། གཞན་


TNT17_Page_0308
[མ་དཔེ་གཟིགས་ན་འདིར་གནོན།]

ཡང་ཉེར་མཁོའི་ཡོ་བྱད་བསམ་གྱིས་མི་ཁྱབ་པ་དང་བཅས་པ་འབུལ་ཞིང༌། དཔོན་སློབ་རྣམས་ཀྱི་ཚོགས་ཀྱི་དཀྱིལ་འཁོར་རྒྱ་ཆེན་པོ་མཛད་དེ། ཉིན་མོའི་ཆ་ལ་ཕལ་ཆེར་གདམས་ངག་འབོགས་པ་དང༌། སོ་སོར་མཉམ་པར་བཞག་པས་གནས་པ་དང༌། རྒྱུད་སྡེ་ཟབ་མོ་དང་སྔགས་ཀྱི་གཞུང་མཐའ་ཡས་པ་རྣམས་འཆད་པའང་ཤིན་ཏུ་མང་ལ། མཚན་མོའི་ཆ་ལ་འཁོར་ལོའི་མཆོད་པས་དུས་འདའ་བར་མཛད། ཟླ་བ་རེ་རེ་བཞིན་རྒྱལ་པོ་ཉིད་ཀྱང་འོངས་ཏེ། དེར་འདུས་ཐམས་ཅད་ལ་གོས་མཆོག་ཕྲུགས་རེ་དང༌། དངུལ་སྲང་བཞི་བཞིའི་ཡོན་ཕུལ་ཞིང༌། ཟླ་བ་དྲུག་སོང་བའི་རྗེས་སུ། རྣལ་འབྱོར་པ་རེ་རེ་ལ་ཡང་གསེར་མོ་ཧར་བཅུ་ཕྲག་རེ་སོགས་ཡོན་གྱི་རྣམ་པ་ནི་མཐའ་ཡས་པ་ཞིག་གིས་མཆོད་པར་བྱས་ཏེ། ཕྱི་རབས་ལོ་ལྔ་བརྒྱ་ཚུན་ཆད་ལ་འཕགས་པའི་ཡུལ་དུ་རྡོ་རྗེ་ཐེག་པའི་ཆོས་འཁོར་འདི་བས་ཆེ་བ་མ་བྱུང༌། གྲུབ་ཐོབ་ཞི་བའི་ཞབས་ཀྱི་གདམས་པ་ལ་བརྟེན་ནས། མཁས་པ་རྣམས་ཀྱིས་རྒྱུད་སྡེ་འཆད་པ་དང༌། ནུས་པ་ཅུང་ཟད་རྙེད་པའི་རྣལ་འབྱོར་པ་རྣམས་ལས་ཚོགས་དང་དངོས་གྲུབ་སྒྲུབ་པ་མང་པོ་བྱུང་སྟེ། དམ་པ་འདིས་གཟིགས་པ་ལ་ཡང་དངུལ་ཆུ་གྲུབ་པ་བཅུ་གཉིས་ཙམ་དང༌། མི་སྣང་བར་གྱུར་པ་ཡང་དྲུག་ཙམ་དང༌། དངོས་གྲུབ་ཕྲ་མོ་དང༌། ལས་ཚོགས་གྲུབ་པ་ནི་དཔག་ཏུ་མེད་པ་འདུག་གསུང༌། དེ་ནས་ཚོགས་པ་ཤས་ཆེ་བ་ནི་སོ་སོར་གྱེས་


TNT17_Page_0309
[མ་དཔེ་གཟིགས་ན་འདིར་གནོན།]

ཤིང༌། རྣལ་འབྱོར་ཕོ་མོ་སུམ་བརྒྱ་ཙམ་ཞིག་སླར་ཡང་ཟླ་བ་བཞི་ཙམ་དེར་བཞུགས་ཏེ། དེ་ཀུན་གྱི་འཚོ་བ་ཡང་རྒྱལ་པོའི་ཕུལ། དེ་བར་དུ་དམ་པ་འདིས་ཀྱང་བཞུགས་ཤིང༌། དམ་པའི་ཆོས་ཀྱི་དགའ་སྟོན་གྱིས་ཐུགས་མགུ་བ་བླ་ན་མེད་པ་ཐོབ། མཆོག་བརྙེས་ཞི་བའི་ཞལ་སྔ་ནས་དམ་པ་འདི་ལ། ཁྱོད་བྱང་ཕྱོགས་དང་ཤར་ཕྱོགས་ཀྱི་ཡུལ་རྣམས་སུ་སོང༌། སྐལ་བ་དང་ལྡན་པར་ཤེས་ན་གཞན་ལ་ཆོས་ཀྱང་ཅི་རིགས་པར་ཤོད། ཅེས་སྩལ་པ་ལྟར་བླ་མའི་ཞབས་ལ་ཕྱག་མཛད་དེ། ཕྱིར་ཕེབས་པ་ན་པཎྜི་ཏའི་རྣམ་པ་གཅིག་གིས། མགྲོན་ཁང་གཡོས་ཁང་ཡོད་པ་ཞིག་ཏུ་ཁྲིད། གཡོས་ཁང་གི་ནང་དུ་མི་མང་པོ་ཡོད་པ་ལྟར་སྣང་བ་ཞིག་ལས། དམ་པ་འདི་དང་གཞན་ཡང་རྣལ་འབྱོར་པ་མང་པོ་ལ། བཟའ་བཏུང་གྱ་ནོམ་པའི་རྙེད་བཀུར་བྱས། དེ་ཉིད་ཕྱིར་སོང་བའི་ཤུལ་ན། གཡོས་ཁང་གི་ནང་ན་སུ་ཡང་མེད་དེ། མེ་བུས་པའི་ཤུལ་ཡང་མི་སྣང་གསུང༌། ཡང་རྣལ་འབྱོར་པ་གཞན་ཞིག །མེ་བས་ཤིག་ཅེས་བརྗོད་པས་མེ་རང་འབར་འབྱུང་ཞིང༌། འབྲས་ཚོས་ཤིག་ཅེས་བརྗོད་པས་སྣོད་དུ་འབྲས་ཆན་འབྱུང་བ་སོགས་ཆོ་འཕྲུལ་དེ་ལྟ་བུས་མགྲོན་བྱེད་པ་ཞིག་ཀྱང་ཡོད་གསུངས། དེ་ནས་པྲ་ཡ་ཀར་ཕེབས་པས། ཞི་བའི་ཞབས་ཀྱི་སློབ་མ། ཤུབྷ་རཀྵི་ཏ་ཞེས་བྱ་བ་རྣལ་འབྱོར་པ་ཤིན་ཏུ་མ་སྤྲོས་པ་འཆོལ་བ་ལྟར་སྟོན་པ་ཞིག་དང་མཇལ། ཁོང་རྣལ་འབྱོར་ཆེན་པོར་


TNT17_Page_0310
[མ་དཔེ་གཟིགས་ན་འདིར་གནོན།]

གྲགས་པའི་ཕྱག་མཛད་ཅིང༌། དཀའ་བ་མང་པོ་བྱས། རྩེ་གཅིག་ཏུ་བསྒོམས་པས། ཐུན་མོང་གི་རྟགས་འདི་ཙམ་ཐོབ་གསུང་སྟེ། རླུང་ཅུང་ཟད་འཛིན་ཀྱྀན་འདུག་པས། སྐུ་ལུས་ཤིན་ཏུ་ཆུང་བར་གྱུར་ནས་ཀུ་ཕོར་ཆུང་ཆུང་ཞིག་གི་ནང་དུ་ཞུགས། ཡང་རླུང་སྦྱོར་ཞིག་མཛད་ཀྱིན་འདུག་པས་སྐུ་ལུས་མི་འདྲ་བ་བརྒྱད་བྱུང༌། མཆོག་གི་ཡོན་ཏན་ནི་ཆོས་ཐམས་ཅད་མཉམ་པ་ཉིད་དུ་མཐོང་བ་ཙམ་ཡོད་གསུང༌། གདམས་པ་གནང་བར་ཞུས་ཀྱང་མ་གནང༌། དེ་ནས་ཛ་གད་ནཱ་ཐར་ཕེབས། དེ་རྗེས་ཅིག་ཏི་བུ་ར་དང་ཉེ་བ་བྷི་མེ་ཤྭ་རའི་ཡུལ་ན་ཕྱི་བྲག་ཕུག་ལ། ནང་དགྱེས་རྡོར་དྲག་པོ་གདན་ཅན་གྱི་ལྷ་ཁང་ཀ་ཡསྠ་བགྲེས་པོས་བཞེངས་པ་ཞིག་ཡོད་པར་བཞུགས་དུས། མཚན་མོ་ཅིག་དེར་དུར་ཁྲོད་ནས་རོ་ལངས་ཉི་ཤུ་ཙམ་ཡོངས་ནས་གར་བྱེད་ཅིང་འདུག མཆོད་གཏོར་དངོས་སུ་བླངས་སོང་གསུང༌། དེ་སྐབས་ཙརྱ་པའི་རྣལ་འབྱོར་པ་འགའ་ལ་དབང་དང་མན་ངག་འདྲ་མཛད། བྷཾ་ག་ལ་དང༌། ཏི་པུ་ར་དང༌། ར་ཁང་གི་རྣམས་སུ་སླར་ཡང་ཕེབས། ཀཱ་མ་རུར་ལོ་གཅིག་ཙམ་བཞུགས། སློབ་མ་བརྒྱད་ཙམ་ཕྱག་ཕྱིར་ཡོད་པ། ཡང་དག་པའི་དོན་ལ་རྟོགས་པ་བཟང་རབ་ཡོད་པ་རྣམས་རྗེ་བཙུན་ཞི་བའི་ཞབས་མཇལ་བར་སོང༌། གཞན་འགའ་ཞིག་ཡོད་པ། རྗེ་ཉིད་ཀྱི་མཆེད་གྲོགས་ཞིག་ལ་གཏད་དེ། རང་ཉིད་ཤིང་གི་རི་བརྒྱུད་ནས་ཕེབས་པས་མོན་པའི་ཇག་པ་ཚན་གཅིག་བྱུང་བ། རང་དཀྱིལ་འཁོར་དུ་བསྒོམས་པས་ཁོ་བ་ཚོ་མིག་


TNT17_Page_0311
[མ་དཔེ་གཟིགས་ན་འདིར་གནོན།]

ཡེངས་པ་འདྲ་བ་ལ་ཅང་མ་བྱས་པར་ཚུར་ཐོན། བོད་ཀྱི་ཕྱོགས་སུ་ཆེད་བརྟད་ལྷ་ས་མཇལ་བར་ཕེབས། ལམ་དུ་བསམ་ཡས་མཇལ་བར་ཕེབས་པས། གནས་བདག་མི་དཀར་པོའི་རྣམ་པར་དངོས་སུ་བྱུང༌། ཕྱག་འབུལ་ཞིང་ཆོས་འབྲེལ་ཞུས་ཏེ། དེ་ནས་ལྷ་སར་ཕེབས་དུས་ཇོ་བོ་ཤཱཀྱ་མུ་ནེ་དེ་ཐུབ་པའི་དབང་པོ་ཆགས་བྲལ་ལ་ཤེས་རབ་དང་བཅས་པ་གོ་བཟློག་གི་ལྷར་ཞལ་གཟིགས། བཅུ་གཅིག་ཞལ་ལ་གསོལ་བ་འདེབས་པར་མཛད་པས། ཁ་སརྤ་ཎིའི་སྐུ་ཞིག་ཐུགས་ཀ་ནས་ཆད་ནས། ཉིད་ཀྱི་ཐུགས་ཀར་ཐིམ་པའི་མོད་ལ། རང་ཉིད་འཕགས་པ་སྤྱན་རས་གཟིགས་དངོས་ཡིན་སྙམ་པ་ཞག་མང་པོ་བྱུང་གསུངས། ནུབ་གཅིག་དངོས་སུ་བུད་མེད་ཤིན་ཏུ་མཛེས་མ་གཟི་བརྗིད་ཆེ་བ་མང་པོ། རེ་རེ་ལ་འཁོར་བརྒྱ་སྟོང་དུ་མར་བཅས་པ་མཇལ་བར་བྱུང༌། གླུ་དང་མཆོད་པ་མང་པོ་བྱས། བོད་དུ་སླེབ་པ་ལ་གཞི་ལེན་གྱི་ཚུལ་དུ་འདུག བོད་ཀྱི་གནས་བདག་མཁའ་འགྲོ་མ་ཆེན་མོར་འདུག་གསུང་སྟེ། བསྟན་མ་བཅུ་གཉིས་ཡིན་པར་མངོན་དེས་ཞག་མང་པོ་མི་ཟས་གསོལ་མ་དགོས། དེ་ནས་རིམ་གྱིས་གཙང་ཕྱོགས་སུ་ཕེབས། བོད་ཀྱི་སྡེ་དཔོན་གྱི་སར་ཆེར་མ་ཕེབས། དེ་སྐབས་བདག་དབེན་གནས་བྱང་ཆུབ་ཆེན་པོར་ཡོད་པ་དང་དུས་མཚུངས། བདག་གི་བསོད་ནམས་ཀྱི་དཔལ་དུ་ཕེབས། སང་ཕེབས་རྒྱུའི་དོ་ནུབ་རྨི་ལྟས་ཀྱང་བཟང་བ་རང་ཞིག་རྨིས། བདག་གིས་འཕྲལ་


TNT17_Page_0312
[མ་དཔེ་གཟིགས་ན་འདིར་གནོན།]

སྐད་ཐམས་ཅད་བྱང་བར་ཤེས་ཤིང༌། ལེགས་སྦྱར་ཡང་ཐོར་བུ་ཤེས་པས། ཆོས་དང་གང་ཟག་གི་དྲི་བ་འགའ་རེ་ཞུས་པ་རྣམས། ལན་དཔྱིས་ཕྱིན་པར་བཀའ་སྩལ། སྤྲོ་བ་བསྐྱེད་དེ་རྒྱུད་ཅི་ཙམ་མཁྱེན་ཞུས་པས། །ཀྱཻ་རྡོ་རྗེ། སམྦུ་ཊ། སངས་རྒྱས་མཉམ་སྦྱོར། མཧཱ་མཱ་ཡ། མཚན་བརྗོད། དབང་མདོར་བསྟན། སྒྲོལ་མའི་རྒྱུད་རྣམས་ཞིབ་མོར་ཐོས། བདེ་མཆོག་འཁོར་ལོ་དང༌། གསང་བ་འདུས་པ་དང༌། མི་གཡོ་བ་དང༌། རྡོ་རྗེ་གདན་བཞི་དང༌། རལ་གཅིག་མ་དང༌། ཀུ་རུ་ཀུལླེ་ལ་སོགས་པའི་རྒྱུད་ཕན་འགའ་རེ་དང༌། ནག་པོ་ཆེན་པོའི་རྒྱུད་རྣམས་ཡཾ་མེ་བ་རེ་ཉན་གསུངས། མན་ངག་གི་གཞུང་ནི་མཐའ་ཡས་པ་ཞིག་ཐུགས་ལ་མངའ་སྟེ། གསང་འདུས། བདེ་མཆོག གཤེན་རྗེ་གཤེད་དང༌། མཧཱ་མཱ་ཡ། ཀྱཻ་རྡོ་རྗེ་སོགས་གྱི་རྫོགས་རིམ་གྱི་གཞུང་མང་པོ་དང༌། གཞན་ཡང་གསང་བ་གྲུབ་པ་དང༌། དོ་ཧ་མཛོད་དང༌། ཕྱག་རྒྱ་བཞི་པ་དང༌། བསམ་མི་ཁྱབ་ལ་སོགས་པ་གཞུང་མང་པོ་དང༌། ཕྲེང་བ་སྐོར་གསུམ་སོགས་སློབ་དཔོན་གྱི་ལས་རིམ་གྱི་གཞུང་ཆེན་བོད་དུ་སྔར་འགྱུར་བའི་ཚད་ལྡན་རྩ་བའི་གཞུང་རྣམས་ཕལ་ཆེ་བ་ལའང་མཁྱེན་པ་ཤིན་ཏུ་རྒྱས་པར་སྣང་ཡང་དེ་དུས་ངེད་ཀྱིས་ཆེར་མ་ཞུས། སྔ་ཕྱིར་གསེར་ཞོ་ཉི་ཤུ་ལྷག་ཙམ་དང༌། དངུལ་ཊཾ་ཁ་བརྒྱད་ཙམ། གཞན་ཅི་རིགས་པ་དང༌། དབང་རེ་ལ་གོས་དར་ཡུག་རེ་ཙམ་དང༌། ཐེར་མ་རེ་ཙམ་དང༌། བྱིན་བརླབས་དང་མན་ངག་རེ་


TNT17_Page_0313
[མ་དཔེ་གཟིགས་ན་འདིར་གནོན།]

ལ་ཚོགས་འཁོར་རེ་དང་ཁ་བཟང་བ་རེ་ཙམ་རེ། ཆོས་ཐུན་ཐམས་ཅད་ལ་ཆོས་ཕྱག་བཟང་བ་རེ་མ་ཆག་པར་ཕུལ་ཏེ། སྔོན་ཆད་ཁ་བ་ཅན་གྱི་ཕྱོགས་སུ་མ་བྱུང་བ་ཞུས་པ་ལ། སྒྲོལ་མ་རྣལ་འབྱོར་མའི་དབང་བསྐུར་བ། དེའི་བསྐྱེད་རིམ་དང༌། རྫོགས་རིམ་གྱི་མན་ངག་བྱིན་བརླབས་དང་བཅས་པ། རྒྱུད་ཀྱི་བཤད་པ། གསང་འདུས་ཡེ་ཤེས་ཞབས་ལུགས། མི་བསྐྱོན་པ་ལྷ་བཅུ་དགུ། སེམས་ཀྱི་ཕྱག་རྒྱའི་དབང༌། དཔྱིད་ཐིག་གི་བྱིན་རླབས། བཀའ་བབས་དྲུག་ལྡན་གྱི་ཁྲིད་ཆེན་མོ། ཛ་ལན་དྷ་རའི་དོ་ཧ་དང་མན་ངག སེམས་ཀྱི་ཕྱག་རྒྱས་མན་ངག་གཞུང་བཤད། ཡི་གེ་བཞི་པའི་མན་ངག རང་བྱིན་གྱིས་རླབས་པའི་བྱིན་རླབས་རྣམས་དང་གཞུང་གི་བཤད་པ། ཕྱག་རྒྱ་བཞིའི་སྙིང་པོ། ཀྱཻ་རྡོ་རྗེའི་རྫོགས་རིམ་ཀུ་ས་ལའི་མན་ངག་དང༌། ཡན་ལག་དྲུག་པ། ཡེ་ཤེས་འཆར་བ། སྒྲོན་མེ་གཅིག་པ། དྲན་པ་གཅིག་པ། མཧཱ་མཱ་ཡའི་མན་ངག ཕག་མོ་ཀེང་རུས་ལ་ཞུགས་པ་ཛ་ལན་དྷ་རིའི་ལུགས། ཕག་མོ་རྔོན་པའི་གདམས་ངག ཕག་མོ་སྣ་ཚོགས་མདོག རྣམ་འབྱོར་མ་དཀར་དམར་སྔོ་གསུམ། ངང་བའི་རྡོ་རྗེ་བདག་མེད་མ། རྡོ་རྗེ་ཕག་མོ་ཅ་ཅོ་སྒྲོག་མ། མི་གཡོ་བའི་རྫོགས་རིམ་ཨ་ཏི་ཤས་མཛད་པ། དཔལ་མཆོག་ཌོམ་བི་པའི་དེ་ཉིད་བཞི་པ། ནག་པོ་ཆེན་པོའི་སྒྲུབ་ཐབས་གཉིས་དང་བཅས་པ་རྣམས་ལེགས་པར་ཐོབ། ཉིན་མཚན་མེད་


TNT17_Page_0314
[མ་དཔེ་གཟིགས་ན་འདིར་གནོན།]

འབད་སྩོལ་བྱས་ཏེ། དབང་དང་བྱིན་བརླབས་དང༌། ཁྲིད་རྣམས་ལ་དོགས་དཔྱོད་ཟིན་བྲིས་ནན་ཆགས་སུ་བྱས་ཤིང༌། གཞུང་མང་པོ་ཕྱག་དཔེ་དང༌། ཞལ་ལས་ཡི་གེར་བྲིས་ཏེ་ཐོ་རེ་ལོང་ངེ་བ་བསྒྱུར་ཞིང༌། གསུང་འཕྲོས་ཅི་བྱུང་བྱུང་ཟིན་བྲིས་སུ་བྱས། ཆོས་ཟབ་མོ་གཅིག་ལ་རྣམ་རྟོག་ཅུང་ཟད་གཅིག་བྱུང་བའི་རྐྱེན་གྱིས་ཟླ་བ་གསུམ་དུ་ཉེ་བ་ན། ཅིས་ཀྱང་མྱུར་དུ་འབྱོན་པའི་ཞལ་ཏ་གནང་བ་ལ། ལོ་གསུམ་ཅིས་ཀྱང་བཞུགས་དགོས་པ་དང༌། མིན་ནའང་ལོ་གཅིག་ཅིས་ཀྱང་བཞུགས་དགོས་པའི་ནན་ཞུས་ཕུལ། དེ་ལྟར་མ་གནང་ན་ཆོས་ཀྱང་འཕྲོ་ལུས་འགྲོ་བར་འདུག བཀའ་དྲིན་དྲན་པའི་ཡོན་ནི་འདི་ཙམ་ཞིག་མ་མཐའ་འབུལ་ཞེས་ཞུས་ཀྱང༌། མྱུར་དུ་རྒྱ་གར་དུ་འགྲོ་བ་དོན་ཆེ། རྙེད་པ་དང་ནོར་གྱི་དགོས་པ་མེད། བཤད་པ་དང་གདམས་ངག་གི་འཕྲོ་རྣམས་ངའི་ཆོས་ཀྱི་སྤུན་རྣམས་ཀྱིས་འཆད་པར་འགྱུར། རྣམ་རྟོག་ཤས་ཆེ་བར་འདུག་པས། གདམས་ངག་ལ་ལ་བཤད་ཀྱང་མི་བཏུབ་པ་འདུག་གསུང་ཞིང་བཞུགས་སུ་མ་གནང༌། རྗེ་འདི་ཉིད་རྒྱ་གར་བའི་ལུགས་ལ་ལྟོས་པའི་དབང་དང་གདམས་ངག་གནང་བ་ལ་བཀའ་ཡངས་པར་འདུག་ཅིང༌། འོན་ཀྱང་བླ་མེད་ཀྱི་དབང་དང་གདམས་ངག་འདི་ཀུན་ནི། སློབ་མ་བཞིར་ལོངས་པ་ལ་ཕྱོགས་གཅིག་ཏུ་འཆད་པ་ཆེར་མེད་གསུངས། དམ་པ་འདི་གོང་དུ་བཤད་པ་ལྟར། མཁས་པའི་ཡོན་ཏན་ཡང་བསམ་གྱིས་མི་ཁྱབ་ཅིང༌། རྣལ་


TNT17_Page_0315
[མ་དཔེ་གཟིགས་ན་འདིར་གནོན།]

འབྱོར་པའི་རྟགས་མཚན་ཁོ་བོ་ཅག་གི་ཐ་མལ་བའི་མིག་གི་མཐོང་བ་ཡང༌། ཉི་མ་ཕྱེད་ཙམ་དུ་རླུང་གི་རྒྱུ་བ་བཀག་ནས་བཞུགས་པ་དང༌། ཤིན་ཏུ་གྲང་བའི་ཚེ་ཡང་སྐུ་ལུས་གཅེར་བུར་བཞུགས་པ་ལ་ཉམས་ང་བ་མེད་པར་མ་ཟད། ཉེ་འཁོར་འདོམ་གང་ཙམ་ཚུན་ཆད། ཚ་ཚུབ་ཚུབ་པ། གཞན་གྲང་བ་ལས་སྐྱོབ་ནུས་ཤིང༌། རླུང་རྣམས་ཞལ་དང་ཤངས་ཀྱི་རྒྱུ་བ་བཀག་ནས། སྤྱན་དང་སྙན་ནས་ཅི་བདེར་འབྱུང་འཇུག་ནུས་པ་དང༌། ཞབས་ཆུ་ལ་མི་བྱིང་བ་དང༌། ཕྱག་སོར་གཉིས་ས་ལ་བཙུགས་ཏེ་སྐུའི་བརྗིད་ཐམས་ཅད་བོར་ཡང་ཡུན་རིང་དུ་ཐེག་པ་དང༌། གཞན་གྱི་སེམས་མཁྱེན་པ་སོགས་ལྐོག་གྱུར་གཟིགས་པ་མངའ་འོ། །སྐུ་ལུས་ཡང་བས་ཐོག་སོ་གཉིས་གསུམ་སྐུ་ལྷུང་དུ་བཅུག་ཀྱང་ལྤགས་པ་བསྐྱུར་བ་འདྲ་བ་ཟེམ་ཟེམ་འབབ་པ་དང༌། རི་གཟར་པོ་ལ་ཡང་ཐང་བཞིན་གཤེགས་པ་དང༌། དུག་དང་དངུལ་ཆུ་ལ་སོགས་པས་སྐུ་ལ་གནོད་པ་མེད་པ་དང༌། ཐུགས་བྱམས་པའི་ངང་ཚུལ་གྱིས་ཁྱི་དང་གཅན་གཟན་མ་རུངས་པ་རྣམས་ཀྱང་སྐུ་ལ་ལྡག་པ་སོགས་ཡིད་ཆགས་པར་བྱེད་ལ། བྱ་རོག་དང་བྱིའུ་ལ་སོགས་པ་རྣམས་སྐུ་པང་དང་ཕྱག་རྩེར་འོང་ཞིང༌། ཕྱག་གིས་བྱུགས་ཀྱང་མི་འབྲོས་པར་དགའ་བཞིན་པས་གནས་པ་དང༌། དབང་བསྐུར་བའི་ཚེ་ཡེ་ཤེས་དངོས་སུ་འབེབ་པར་ནུས་པ་དང༌། དཀྱིལ་འཁོར་ལས་འོད་འཕྲོ་བ་སོགས་ཆོ་འཕྲུལ་ཅི་རིགས་པ་སྐལ་ལྡན་


TNT17_Page_0316
[མ་དཔེ་གཟིགས་ན་འདིར་གནོན།]

རྣམས་ཀྱི་ངོར་སྟོན་པར་མཛད་པ་དང༌། མིའི་ཁ་ཟས་གསོལ་བ་མེད་ཀྱང༌། མི་མ་ཡིན་གྱིས་ཕུལ་བའི་ཞལ་ཟས་ཀྱིས་འཚོ་བ་དང༌། ལྷའི་རྣལ་འབྱོར་ལ་ཐུགས་རྩེ་གཅིག་ཏུ་བཞག་པའི་ཚེ་ད་ལྟའི་སྣང་བ་འདི་དངོས་སུ་འགག་ཅིང༌། དུས་རྟག་ཏུ་ཕྱི་ནང་ཐམས་ཅད་གཞི་མེད་རང་གྲོལ་དུ་གཟིགས་པའི་ཡེ་ཤེས་མངའ་སྟེ། བདག་ཅག་ཉི་ཚེ་བ་རྣམས་ཀྱི་སྤྱོད་ཡུལ་ཡང་དེ་འདྲ་ན། སྐུ་གསུང་ཐུགས་ཀྱི་ཡོན་ཏན་གྱི་ཕ་མཐའ་ནི་སུ་ཞིག་གིས་བགྲང་བར་སྤྱོད། ཡི་དམ་གྱི་ལྷ་ཇི་ལྟར་གཟིགས་ཚུལ་ཞུས་པས། དངོས་སུ་ནི་མ་མཐོང༌། རྨི་ལམ་གྱི་མཚན་མ་བརྟན་པོ་ལ། རྡོ་རྗེ་ཕག་མོ་དང༌། སྒྲོལ་མའི་རྣམ་པ་ཡང་ཡང་འོང༌། དཔལ་ཧེ་རུ་ཀ་དང༌། བཅོམ་ལྡན་འདས་ཤཱཀྱ་ཐུབ་པའང་ལན་འགའ་རེ་མཐོང་གསུང༌། དེ་ཡང་ཞལ་གཟིགས་དངོས་ཀྱི་དབང་དུ་བྱས་ཤིང༌། བདག་ཅག་བློ་ཆུང་རྣམས་ཀྱི་དོན་གསུངས་ཀྱི། ཉམས་ཀྱི་སྣང་བ་ལ་གཟིགས་པ་ནི་ཅི་རིགས་པ་གོང་དུ་བརྗོད་པ་ལྟར་ཡང་ཡིན་ལ། གཞན་ཡང་རྟག་ཏུ་རྒྱུན་མི་ཆད་པར་གཟིགས་ཀྱིན་ཡོད་པར་སྣང་ངོ༌། ཁོ་བོ་ཡང་སྐུ་དྲུང་ན་ཡོད་པ་ལ། ལན་གཅིག་ནམ་མཁའ་ལ་གཟིགས་ཤིང་སྐུ་ཉམས་དང་གསུང་ཉམས་མང་པོ་ཞིག་མཛད་ཀྱིན་འདུག་པ་ལ། ཇི་ལྟར་ཡིན་ནན་གྱིས་ཞུས་ཤིང་གསོལ་བ་བཏབ་པས། ལཱུ་ཡི་པ་དང༌། པདྨ་འབྱུང་གནས་འཁོར་མང་པོ་དང་བཅས་ཏེ་ནམ་མཁའ་ལ་གཤེགས་པར་འདུག་གསུང༌། སིནྡྷུ་ཧིང་ག་ལྔ་ཙིའི་གནས་སུ་བྱོན་པ་མན་ཆད། སྔོན་གྱི་གྲུབ་


TNT17_Page_0317
[མ་དཔེ་གཟིགས་ན་འདིར་གནོན།]

ཐོབ་མང་པོ་དང་ཡང་ནས་ཡང་དུ་མཇལ། ཡང་བཀའ་ལས་ཁོ་བོས་སྔགས་བཟླས། རླུང་བསྒོམས། ཆུ་དང་གཡང་ས་དང་ཆོམ་པོ་དང༌། ལྟོ་གོས་ཀྱི་འཇིགས་པ་མེད་པས་ང་ནི་གནས་སྐོར་བྱེད་པ་བློ་བདེ་ཞིང་སྐྱིད་པོ་ཡོད་ཀྱང་གསུང་ངོ༌། །དེ་ལྟར་ན་བདག་གིས་དམ་པ་འདི་ལ་གཞུང་དང་མན་ངག་ཅི་རིག་པར་ཐོབ་མོད་ཀྱི། དེ་ཙ་ན་འབྱོར་པ་ཡང་ཆུང༌། རྣམ་རྟོག་ཀྱང་རྒོད་པས། རྫོགས་རིམ་གྱི་མན་ངག་གི་གནད་ཟབ་མོ་ཅི་རིགས་པ་ཐོབ་ཀྱང༌། མང་པོ་ཞིག་མ་ཐོབ་ཅིང༌། བླ་མ་ཉིད་ཀྱིས་བཀའ་སྩལ་ལྟར། གཞུང་གི་བཤད་པ་རྣམས་ནི་དམ་པ་འདི་ཉིད་ཀྱི་མཆེད་གྲོགས། སློབ་དཔོན་ནིརྦཱ་ཎ་ཤྲཱིའི་ཞབས་དང༌། པུརྞ་བཛྲ་གྱི་ཞབས་ལས་མཐའ་ཆོད་པར་ནོད་མོད་ཀྱི། སྔར་མ་ཐོབ་པའི་མན་ངག་རྣམས་ཞུས་དུས། ཕལ་ཆེར་མི་བཞུགས་གསུང་ནས་མི་གནང་ངོ༌། །དམ་པ་འདི། དེ་ནས་བོད་ཀྱི་ཡུལ་ཁམས་གཞན་ཅི་རིགས་པ་རྣམས་སུ་ཕེབས་ནས། སྐྱིད་གྲོང་ཕྱཽགས་སུ་ཟླ་བ་གསུམ་ཙམ་བཞུགས་གནང་ཟེར། འགྱང་ཙམ་བཞུགས་བདེན་ཡིན། ཡང་སྐབས་དེ་ཉིད་དུ་ཀ་སྣར་ཐང་བའི་ཚོང་པ་འབྲས་དོལ་ཁར་ཕྱིན་པ་དང་ཡང་མཇལ་ངེས་ཡིན་ཟེར། སྐུ་ལུས་ཀྱི་བཀོད་པ་གཉིས་པར་སེམ། དེ་ནས་བལ་ཡུལ་མཐིལ་དུ་ཕེབས། འཇུ་འཇུ་འགའ་ཞིག་གིས་ཞབས་རྟོག་དང་འབུལ་བ་ཆེར་བྱས་པ། དེ་ཉིད་དུ་འཕོངས་པ་ཐམས་ཅད་ལ་སྩལ། བལ་


TNT17_Page_0318
[མ་དཔེ་གཟིགས་ན་འདིར་གནོན།]

པོའི་གནས་ཐམས་ཅད་མཇལ་བར་མཛད། ཟླ་བ་གཉིས་གསུམ་ཙམ་བཞུགས། དེ་ནས་ཡུལ་བྷང་ཤྱ་ཡང་ཟེར། ཙམྤཱ་ར་ཎར་ཕེབས། སྔར་གྱི་སློབ་མ་རྣམས་དང་མཇལ་ཏེ། དཔོན་སློབ་ལྷན་ཅིག་ཏུ་པྲ་ཡ་ག་སོགས་ཀྱི་ལམ་རྒྱུད་ནས། གྲུབ་ཆེན་ཞི་བ་སྦས་པའི་དྲུང་དུ་ཕེབས་ཏེ། རྡོ་རྗེ་སློབ་དཔོན་གཙོ་བོར་བཞུགས། ཁ་གེནྡྲའི་རི་ལ་གནས་པའི་རྣལ་འབྱོར་ཕོ་མོ་རྣམས་ལ། འཁོར་ལོའི་མཆོད་པ་རྒྱ་ཆེན་པོ་མཛད། འདི་སྐབས་ནི་སློབ་དཔོན་ཆེན་པོ་ཞི་བའི་ཞབས་ཀྱང༌། སློབ་མ་རྙིང་པ་མཆོག་རྣམས་མ་གཏོགས་ཕལ་ཆེར་དང་མི་མཇལ་བར་ལོ་གཅིག་གཉིས་འགྲོ་ཚོད་ཡིན་པར་འདུག བཞུགས་ས་ཡང་ཕུག་པ་ཟབ་མོ་མི་བཟད་པ་ཅིག་ཡོད་པར་འདུག རྗེ་འདིས་ཟླ་གཅིག་ཙམ་ཁ་གེནྡྲའི་གནས་དེར་བཞུགས་ཏེ། ཉིན་རེ་བཞིན་གྲུབ་ཆེན་ཞི་བའི་ཞབས་ཀྱི་སྐུ་དྲུང་དུ་ཕེབས་གྱིན་འདུག་ཟེར། དེ་ནས་ཡང་ཡུལ་དབུས་ཀྱི་ལམ་རྒྱུད་ནས་བྷངྒ་ལར་ལོ་གཅིག་ཙམ་བཞུགས། སྤྱོད་པ་པའི་རྣལ་འབྱོར་ཕོ་མོ་ཉི་ཤུ་ཙམ་ཞབས་འབྲིང་དུ་བྱུང་ལ། སླར་ཏི་ཕུ་རའི་ཡུལ་དུ་ཕེབས། ལོ་མང་རབ་བཞུགས། དེ་ནས་ད་ལྟ་དེ་ཝི་ཀོ་ཊ་དང་ཉེ་བ་ཞིག་ན་བཞུགས་ཞེས་ཐོས་སོ། །འདི་དག་གི་སྐབས་ཀྱི་ཡུལ་སོ་སོའི་ངོ་མཚར་བའི་གཏམ་མང་པོ་ཡོད་མོད་ཀྱི། འདིར་རྣམ་ཐར་དཀྱུས་གོ་བའི་གེགས་སུ་འགྱུར་བར་སྣང་བས་མ་བྲིས་སོ། ༈ ཡང་སྨྲས་པ། རྗེ་བཙུན་མཆོག་འདིའི་བཀའ་དྲིན་གྱིས། །


TNT17_Page_0319
[མ་དཔེ་གཟིགས་ན་འདིར་གནོན།]

བདག་ཀྱང་སྐལ་བ་བཟང་པོར་གྱུར། །འགྲོ་ལ་རྟག་ཏུ་ཕན་དགོངས་པ། །བརྩེ་ལྡན་ཁྱོད་ལ་ཕྱག་འཚལ་ལོ། ཁྱོད་སྔོན་མ་རུའི་དུས་ཡུལ་ཕྱོགས་སུ། ང་ཙོར་གྱུར་ཏེ་འདབ་ཆགས་ཀྱི། །འགྲོ་བ་མང་ལ་ཆོས་སྟོན་པ། །དེ་ཚེ་གཙོ་བོར་གྱུར་ལ་འདུད། །རི་བོ་པོ་ཊ་ལ་ཡི་ངོགས། །དགེ་བསྙེན་རིགས་སྔགས་འཛིན་གྱུར་ནས། །སྤྱན་རས་གཟིགས་དབང་སློབ་དཔོན་དུ། །བསྟེན་མཛད་ཁྱོད་ལ་ཕྱག་འཚལ་ལོ། །དུས་གཞན་ཞིག་ན་ཨོ་རྒྱན་དུ། །ལྭ་བའི་ཞབས་ཀྱིས་རྗེས་བཟུང་ནས། །བླ་མར་གུས་པའི་ཚད་དུ་བཞག །གཙོ་འཁོར་གཉིས་མེད་གྱུར་ལ་འདུད། །ས་འོག་སྤྱོད་པའི་མི་མ་ཡིན། །རིགས་འཛིན་མཐུ་སྟོབས་ཆེར་གྱུར་ནས། །ཀླུ་དང་ལྷ་མིན་དབང་པོ་སོགས། །འགྲོ་བའི་དོན་ཆེན་མཛད་ལ་འདུད། །དེང་འདིར་གྲུབ་པ་ཐམས་ཅད་ཀྱི། །ཞལ་ལུང་དངོས་སུ་གསོལ་མཛད་ནས། །སྐལ་ལྡན་མང་པོའི་དོན་མཛད་པའི། །གྲུབ་པའི་དབང་ཕྱུག་ཁྱོད་ཕྱག་འཚལ། །འདི་འོག་ལྕང་ལོ་ཅན་དུ་ནི། །བཛྲ་ཤུ་ཀླ་ཞེས་བྱ་བ། །གསང་བའི་བདག་པོའི་ཕོ་ཉར་འགྱུར། །རིགས་སྔགས་བདག་པོ་དེ་ལ་འདུད། །དེ་འོག་ཨིནྡྲ་ནཱི་ལའི་འོད། །ཅེས་བྱ་སངས་རྒྱས་ཞིང་མཆོག་ཏུ། །རྡོ་རྗེ་སྡེ་ཞེས་བྱ་བ་ཡི། །འཁོར་ལོའི་བསྒྱུར་རྒྱལ་དེ་ལ་འདུད། །སླར་ཡང་ཞིང་དེར་དགའ་ལྡན་གནས། །མཛེས་བྱེད་གསེར་གྱི་དབང་པོ་ཞེས། །སྐྱེ་བ་


TNT17_Page_0320
[མ་དཔེ་གཟིགས་ན་འདིར་གནོན།]

གཅིག་གིས་ཐོགས་པའི་ཚུལ། །སེམས་དཔའ་ཆེ་ལ་སྤྱི་བོའི་འདུད། །དེ་ནས་དེ་བཞིན་གཤེགས་པ་ནི། །རིན་ཆེན་རབ་འཕྲོ་སྣང་བ་ཞེས། །ཐེག་ཆེན་དམ་ཆོས་སེང་གེའི་སྒྲ། །སྒྲོག་མཛད་རྒྱལ་བ་ཁྱོད་ལ་འདུད། ཁྱོད་སྔོན་ཤཱཀྱ་ཐུབ་པའི་དྲུང༌། །ཞིང་པར་གྱུར་ཏེ་དད་པ་བསྐྱེད། །དེ་ནས་བརྩམས་ཏེ་དུས་རྟག་ཏུ། །མཆོད་འོས་གྱུར་པ་ཁྱོད་ལ་བསྟོད། །དེ་དག་ནི་རྡོ་རྗེ་གདན་གྱི་བྱང་ཆུབ་ཆེན་པོ་དང༌། དཔལ་ཧེ་རུ་ཀས་ལུང་བསྟན་པ་དང༌། སྔོན་གྱི་གནས་རྗེས་སུ་དྲན་པའི་ཚུལ་ཤིན་ཏུ་གསང་བ་ཆེན་པོས་བཀའ་སྩལ་པའི་སྐྱེས་རབས་རྣམས་སོ། །ཞེས་པ་འདི་ནི་བླ་མ་དམ་པ་ལྷོ་ཕྱོགས་པ་སངས་རྒྱས་སྦས་པའི་མགོན་པོའི་རྣམ་པར་ཐར་པ་སྟེ། རྒྱ་གར་གྱི་སློབ་དཔོན་ཆེན་པོ་དེ་ཉིད་ཀྱི་ཞབས་ཀྱི་པདྨོ་ལ་ཉེ་བར་རེག་པས་རྡོ་རྗེ་ཐེག་པ་ལ་བློ་གྲོས་ཀྱི་སྣང་བ་རྒྱས་པའི་བཀའ་དྲིན་ཐོབ་པ་རྒྱལ་ཁམས་པ་ཏཱ་ར་ནཱ་ཐས་རང་གཞན་ལ་ཕན་པའི་ཕྱིར་སྒྲོ་སྐུར་སྤངས་ཏེ་དངོས་གནས་ལྷུག་པར་བརྗོད་པའོ། །ཐོག་མའི་དུས་ཀྱི་བརྗེད་བྱང་ལས་གསལ་བར་ཕྱེ་བ་འདི་ནི་རང་ལོ་ཉེར་བདུན་པ་ལའོ། །འདིས་ཀྱང་རྒྱལ་བའི་བསྟན་པ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །ཞུས་དག །མདྒལཾ།། །།

རྒྱལ་བུ་དགའ་བྱེད་ས་སྐྱོང་གི་རྟོགས་བརྗོད།


TNT17_Page_0321
[མ་དཔེ་གཟིགས་ན་འདིར་གནོན།]

རྒྱལ་བུ་དགའ་བྱེད་ས་སྐྱོང་གི་རྟོགས་བརྗོད་བཞུགས།


TNT17_Page_0322
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། དགེ་ལེགས་དཔྱིད་ཀྱི་དགའ་སྟོན་རྣམ་འཕྲུལ་བ། །གང་འདིར་ཡིད་བྱུང་གཡུལ་ལས་རྣམ་རྒྱལ་ཏེ། །དཔལ་ལྡན་ཕྱོགས་ཀྱི་དགའ་མའི་སྐྱེད་ཚུལ་དུ། །མཆོག་ཏུ་གྲོལ་བའི་དགའ་སྟོན་སྦྱིན་འདི་མཚར། །སྙན་པའི་དྲི་བསྲུང་གཡོ་ལྡན་པ། །ཕྱོགས་ཀུན་ཡ་མཚན་རི་མོ་ཡི། །རབ་ཏུ་རྒོད་པ་ལྷུར་ལེན་པ། །འཕྲོག་བྱེད་ཀྱི་ནི་ཞལ་བཟང་བཞིན། །ངོ་མཚར་གཏམ་གྱི་སྦྱོར་བ་ནི། །གང་འདིར་དྲི་ཟའི་བུ་མོ་ཡི། །རྒྱུད་མངས་ཀྱི་ནི་རྗེས་འགྲོ་བ། །ཡིད་ཅན་རྣ་བའི་བདུད་རྩི་ཉིད། །གང་ཡང་ཡང་དག་པའི་ལམ་ལ་ཤིན་ཏུ་གོམས་ཤིང་སྨོན་ལམ་གྱིས་དབང་དུ་གྱུར་པ་རྣམས་ནི། གཞན་གྱིས་མ་བསྐུལ་བར་ཡང་དགེ་བ་ལ་འཇུག་པ་ལྟ་ཅི་སྨོས། དེ་བས་ན་དགེ་བ་ལ་ཡོངས་སུ་གོམས་པར་བྱའོ། །དེ་ཡང་འདི་སྐད་ཅེས་བྱ་སྟེ། ནམ་


TNT17_Page_0323
[མ་དཔེ་གཟིགས་ན་འདིར་གནོན།]

ཞིག་སྔོན་གྱི་ལེགས་བྱས་ཀྱི། །བདུད་རྩིས་འཚོ་བྱེད་མཁར་ཉལ་བུ། །བདེ་སོགས་བདག་བཞིན་མཆོད་སྦྱིན་བརྒྱས། །མངོན་པར་བསྒྲུབས་པའི་མི་བདག་ནི། །མུ་ཀུན་ད་ཡི་ལྷ་ཞེས་པ། །ཆུ་གཏེར་བཞི་ཡི་སྐེ་རགས་ཅན། །འབྱུང་པོ་འཛིན་བྱེད་ནོར་འཛིན་མ། །གང་གི་འཇུག་བྱེད་ན་ཡང་སྤྱོད། །བློ་ལྡན་ས་འཛིན་དེ་ཡི་བཀའ། །ཕྱོགས་ཀུན་མི་བདག་མགོ་བོ་ལ། །སྣང་བྱེད་ཅོད་པན་རབ་འཆར་བ། །ཉི་གཞོན་ཤར་གྱི་རི་ལ་བཞིན། །དེ་ཡང་ཤར་ཕྱོགས་ཏི་པཱུ་རིའི་རྒྱུད་དུ། ཟླ་བའི་རིགས་ཀྱི་རྒྱལ་རིགས་ཞིག་གིས་འཕགས་པ་སྤྱན་རས་གཟིགས་དབང་ཕྱུག་ཟླ་བ་དྲུག་ཏུ་བསྒྲུབས་པས། རྨི་ལམ་དུ་འཕགས་པ་འཇིག་རྟེན་དབང་ཕྱུག་བྲམ་ཟེའི་གཟུགས་ཀྱིས་བྱོན་ཏེ། ཁྱོད་ཅི་འདོད་གསུང་བ་ལ། འཕགས་པ། བདག་དང་


TNT17_Page_0324
[མ་དཔེ་གཟིགས་ན་འདིར་གནོན།]

བདག་གི་རིགས་ཐམས་ཅད། རྒྱལ་སྲིད་ཐོབ་པར་འགྱུར་བ་དེ་ལྟ་བུ་འཚལ་ལོ། །ཞེས་གསོལ་བས། འཕགས་པའི་གསུང་གིས། འཇིག་རྟེན་ན་བསོད་ནམས་དང་ལྡན་པ་ཉུང་མོད་ཀྱི། འོན་ཀྱང་བརྒྱུད་པ་བཅོ་ལྔའི་བར་དུ་དེ་ལྟར་འགྱུར་རོ། །ཞེས་གསུངས་ནས་མི་སྣང་བར་གྱུར་ཏོ། །དེ་ནས་ནང་པར་འཕགས་པ་ལ་མཆོད་པའི་དོན་དུ། ཁ་སརྤཱ་ཎིར་ཆས་པ་ལས་མཐར་གྱིས་ཕྱིན་ཏེ། དེ་ཉིད་དུ་མཆོད་ཅིང་འདུག་གོ །དེའི་ཚེ་ཤར་ལྷོའི་ཡུལ་ཨཽ་ཌི་ཤའི་རིགས་ཀྱི་གཙོ་བོ་རྣམས་ཀྱིས་བདག་ཅག་རྣམས་སྔོན་རྒྱལ་པོ་ཡོད་པའི་དུས་སུ་ནི་བདེ་ལ། ད་ལྟར་ནི་འཐབ་རྩོད་ཀྱིས་མི་བདེ་བས། འོ་སྐོལ་རྣམས་ཀྱིས་རྒྱལ་པོ་ཞིག་བཙལ་ལོ་ཞེས་ཕྱོགས་མང་པོར་སོང་བ་ལས། མཐར་གྱིས་ཁ་སརྤཱ་ཎི་མཆོད་པར་བྱེད་པའི་རྒྱལ་རིགས་ཀྱི་བུ་དེ་ཁྱེར་ནས་སེང་གེའི་ཁྲི་ལ་བཞག་ཅིང་དབང་བསྐུར་བས། མིང་ཡང་ཨཱ་ག་མ་རཱ་ཛ་ཞེས་གྲགས་སོ། །དེ་ཉིད་ཀྱི་བུ་བརྒྱུད་བརྒྱད་པར་གྱུར་པ། རྒྱལ་པོ་མུ་ཀུན་ད་དེ་བ་ཞེས་བྱ་བ་བྱུང་སྟེ། ཡུལ་ཨཽ་ཌི་ཤ གྷ་ཧཱུ་ར། བཱ་ག་ལ། བོ་ཌ། ཛཱ་རི་ཁཾ་ཌ། ཀ་ལིཉྫ་ར་རྣམས་སྔ་ནས་ཀྱང་མངའ་རིས་སུ་ཡོད་པ་ལས། དཔུང་གི་སྟོབས་ཀྱིས་ཏྲི་ལིཾ་ག་ཞེས་བྱ་བའི་རྒྱལ་ཁམས་དང༌། ཡུལ་དབུས་ཕལ་ཆེར་ཡང་མངའ་འབངས་སུ་ཆུད་ཅིང་རྒྱལ་པོ་གླང་པོའི་བདག་པོ་ཞེས་གྲགས་སོ། །རྒྱལ་པོ་དེའི་སྲས་བ་ར་པ་རཱ་མ་བརྷ་རི་ཞེས་བྱ་བ། མ་ག་ད་དང༌།


TNT17_Page_0325
[མ་དཔེ་གཟིགས་ན་འདིར་གནོན།]

བཅོམ་བརླག་དང༌། པྲ་ཡ་ག་རྣམས་ཀྱི་བདག་པོའི་ས་ལ་གནས་པ་ཞིག་གི་སྲས་སུ་གྲུབ་ཆེན་ཀ་ཧྣ་པའི་རྣམ་འཕྲུལ་དུ་མི་འཇིགས་པའི་བདེན་པས་ཞལ་གྱིས་མཆེས་པ་བླ་མ་དམ་པ་ཀུན་དགའ་གྲོལ་མཆོག་དེ་ཉིད་ཡང་སྲིད་ལེན་པའི་ཚུལ་མཛད་ཅེས་གྲགས་ཏེ། གྲོང་ཁྱེར་གཱ་ཡར་བལྟམས་པའི་ཉིན། ཕོ་བྲང་གི་ཡང་ཐོག་ཏུ་རྣལ་འབྱོར་པ་གཅེར་བུ་ཐལ་བས་ལུས་ལ་བྱུགས་པ་ཞིག་ལམ་གང་ནས་འོངས་ཆ་མེད་པར་བྱུང་སྟེ། དེ་ན་མཆོད་པའི་ལས་ལ་བརྩོན་པའི་བྲམ་ཟེ་རྣམས་ཀྱིས་མི་གཙང་ངོ་སྙམ་ནས། སྡེ་ཚན་བཅུ་གཉིས་ཀྱི་རྣལ་འབྱོར་པ་རྣམས་ནི་འཆོལ་བའི་སྤྱོད་པ་ཅན་ཏེ་ཁོ་བོ་ཅག་གཙང་མའི་ལས་ལ་མངོན་པར་དགའ་བ་རྣམས་ལ་ཚུལ་འདི་འོས་པ་མ་ཡིན་པས་རྣལ་འབྱོར་པ་འདིར་མ་འདུག་ཅིག་བརྗོད་པས། རྣལ་འབྱོར་པ་དང་མཆོད་རྫས་གཉིས་ཀ་དེ་ཉིད་དུ་མི་སྣང་བར་གྱུར་ནས་དེ་རྣམས་ཕན་ཚུན་དུ་མི་དང་མི་མ་ཡིན་པ་སུ་ཞིག་ཅེས་སྨྲ་བ་ལ་ཡང་རྣལ་འབྱོར་པ་གཞན་ཞིག་དེ་ཉིད་དུ་བྱུང་ནས། དམ་པ་གུ་རུ་ན་མཱ་སྟེ་ན་མོ་ཞེས་སྨྲས་ནས་དེ་ཡང་མི་སྣང་བར་གྱུར་ཏོ། །དེ་ནས་དུས་གཞན་ཞིག་ན་བཙས་སྟོན་རྒྱ་ཆེན་པོ་བྱེད་པའི་ཚེ། ཡབ་རྒྱལ་པོ་ཉིད་སྔ་ནས་མུ་སྟེགས་སྤྱོད་པ་པ་ཁོ་ན་ལ་དད་པའི་དབང་གིས་དཔག་ཚད་བརྒྱད་འཁོར་ཡུག་ཏུ་ཕྱི་ནང་གི་རབ་ཏུ་བྱུང་པ་གཞན་བསྲུང་ཞིང་ཉིན་རེར་རྟ་བ་དང་རྔ་མོ་ལ་གནས་པ་དག་གིས་སའི་ཆ་རྣམས་རྟོག་པར་བྱེད་དོ། །དེ་ལྟར་


TNT17_Page_0326
[མ་དཔེ་གཟིགས་ན་འདིར་གནོན།]

ཉིན་ཞག་དགུའི་བར་དུ་སྔར་གནས་པ་རྣམས་བསྐྲད་ཅིང༌། གློ་བུར་བ་ཡོངས་སུ་མི་སྟེར་བ་ལས། ཉི་མ་བཅུ་པའི་སྔ་དྲོ་མཆོད་སྦྱིན་གྱི་ཁང་པར་རྒྱལ་པོ་ཉིད་ཀྱང་བཞུགས་ཤིང༌། བྲམ་ཟེ་རྣམས་ཀྱིས་མཆོད་པ་བྱེད་པར་བརྩམས་པ་ན། སྲེད་མེད་ཀྱི་བུའི་སྐུ་ལ་མཆོད་ཡོན་འབུལ་བའི་ཚེ། གློ་བུར་དུ་གོ་དྷ་རི་གྱོན་པའི་རྣལ་འབྱོར་པ་ཐོད་པ་ཅན་ཞིག་གིས་མཆོད་སྦྱིན་གྱི་ཆུ་སྣོད་དུ་ཁྲུས་བྱས་པས། བྲམ་ཟེ་སྟག་དབྱུག་ཐོགས་པ་རྣམས་ཀྱིས་བརྡེག་པར་བརྩམས་པ་ན། ཕཊ་ཡེ་ཞེས་ཟེར་བས་མཆོད་སྦྱིན་གྱི་ཁང་པ་ཞིག་པས་དེ་ཐམས་ཅད་དངངས་པ་ན། རྣལ་འབྱོར་པ་དེའི་ཞལ་ནས་རྒྱལ་པོ་ལ་ཁྱོད་ཀྱི་བུ་ནི་སྐྱེ་བ་གཞན་དུ་སངས་རྒྱས་པའི་རིགས་ཡིན་པས་འདིའི་བཙས་སྟོན་ལ་བྲམ་ཟེའི་ལུགས་ཀྱི་མཆོད་སྦྱིན་བྱ་བར་མི་འོས། ངེས་པར་རྣལ་འབྱོར་པ་རྣམས་ལ་མཆོད་སྦྱིན་པ་རྒྱ་ཆེན་པོ་གྱིས་གསུང༌། འདི་སུ་ཞིག་ཡིན་ཞུས་པས། མེ་གྷ་ནཱ་ཐ་ཞེས་གསུངས་ནས་དེ་ཉིད་དུ་ས་ལ་ཐིམ་མམ་ཟེར། དེར་ཡང་རྣལ་འབྱོར་པའི་བཀའ་བཞིན་བྱས། མིང་རཱ་མ་གོ་བཱ་ལར་བཏགས། དེ་ནས་ཕྱིས་སྲས་ཀྱིས་གཏམ་སྨྲ་ཞིང་ཤེས་པའི་དུས་ན། སངས་རྒྱས་དང་སློབ་དཔོན་གཽ་རཀྵ་ཁོ་ནའི་བསྔགས་པ་བརྗོད་པ་ཞིག་བྱུང་སྟེ། ཡུམ་རྒྱལ་རིགས་ཀྱི་བུ་མོ་ལཀྵྨཱི་ནི་ཐོག་མ་ནས་ཀྱང་སངས་རྒྱས་ལ་དད་པས། ནུབ་ཕྱོགས་སཽ་རཥྟའི་པཎྜི་ཏ་གསུམ་ལྡན་རྡོ་རྗེ་འཛིན་པ་བསོད་སྙོམས་པ་ཞིག་སྤྱན་དྲངས་ནས། དེས་ཀྱང་སློབ་དཔོན་མ་


TNT17_Page_0327
[མ་དཔེ་གཟིགས་ན་འདིར་གནོན།]

ཁོལ་གྱིས་མཛད་པའི་སངས་རྒྱས་ཀྱི་བསྟོད་པ་མང་པོ་འཛིན་དུ་བཅུག ལྷག་པའི་ལྷ་མང་པོའི་དབང་བསྐུར་བ་དང༌། རིགས་སྔགས་སྦྱིན་པས་སྔོན་གྱི་སྐྱེ་བ་མང་པོ་དྲན་ཅིང༌། ཁྱད་པར་ཡང་སྲིད་སྔ་མ་གངས་རིའི་ཁྲོད་དུ་ཆོས་ཀྱི་སྒྲོན་མེ་སྦར་བའི་ཚིག་དོན་དང་ཡི་གེ་དང་སྐད་རྣམས་ཐམས་ཅད་ཡོངས་སུ་དྲན་ཅིང་གཞན་རྣམས་ལའང་མང་དུ་བསྟན་པས་བྲམ་ཟེ་དང་མུ་སྟེགས་ཅན་ཀུན་ཀྱང་ངོ་མཚར་དུ་བྱེད་ཅིང༌། ཡང་བསོད་སྙོམས་པ་ཀུཔྟ་མི་ཏྲ་ལས་བྱང་ཆུབ་ཏུ་སེམས་བསྐྱེད་པའི་སྡོམ་པ་ནོད་ཅིང་ཟབ་མོའི་ཆོས་ཀྱང་མང་དུ་ནོད་ནས་བཟླས་པ་དང་རྣལ་འབྱོར་སོགས་ཀྱང་ཅི་རིགས་པར་བྱེད་ཅིང༌། རྒྱལ་པོའི་སྲས་སུ་སོང་བས། དངུལ་ཏོ་ལ་མང་པོས་མེ་ཏོག་སོགས་རྩེད་མོའི་ཡོ་བྱད་སྣ་ཚོགས་པ་ཉོས་ཏེ་རྩེད་མོར་སྤྱོད་པ་ན་ཡང་སངས་རྒྱས་ཀྱི་སྐུ་གཟུགས་དང་མཆོད་རྟེན་རྣམས་ཁོ་ན་ལ་མཆོད་པའི་ཚུལ་དུ་མཛད་དོ། །ཡང་སྐབས་ཤིག་ན། རཱ་ཛ་གྲྀ་ཧ་དང༌། གུར་པ་པར་པ་ཏ་དང་ཉེ་བའི་ནགས་ཚལ་རྣམས་སུ་འཁོར་ཉུང་ཤས་དང་བཅས་དེ་རྒྱུ་བ་ན། ཤིང་དྲུང་ཞིག་ན་རྣལ་འབྱོར་པ་ཞིག་བཅུད་ལེན་སྒྲུབ་པའི་གཡོག་ཐམས་ཅད་སྤྲེའུ་གསུམ་དང༌། དོམ་ཞིག་གིས་བྱེད་པ། སྐབས་འགར་མཉམ་པར་བཞག་པ་ན་རླུང་གི་རྒྱུ་བ་འགག་པ་ཞིག མཐོང་བ་ཙམ་གྱིས་ལྷག་པར་མོས་པས་ཕྱག་འཚལ་ཞིང་དེ་ཉིད་དུ་འདུག་ནས། གྲོང་ཁྱེར་དུ་མི་འགྲོའོ། །རྣལ་འབྱོར་པ་དེ་ནི་གྲུབ་ཐོབ་ཆེན་པོ་ཨོ་ཀོ་ར་ནཱ་ཐའི་


TNT17_Page_0328
[མ་དཔེ་གཟིགས་ན་འདིར་གནོན།]

དངོས་ཀྱི་སློབ་མ་མེ་གྷ་ནཱ་ཐའམ་ཛྭ་ལ་ནཱ་ཐ་ཞེས་བྱ་བ་ཡིན་ནོ། །འདིར་བླ་མ་དེ་གཉིས་ཀྱི་ལོ་རྒྱུས་ཅུང་ཟད་བསྙད་ན། དང་པོ་ནི་ཡུལ་དབུས་ན་རྒྱལ་རིགས་ཀྱི་བུ་ཞིག་ཆུང་ངུ་ནས་ཕ་འདས་ཤིང༌། ཕུ་བོའི་ཁྱིམ་དུ་གསོ་བ་ལས། བཱི་རཱུ་པཀྵིའི་སློབ་བརྒྱུད་ཛོ་གི་ཞིག་གིས་རྣལ་འབྱོར་མའི་སྒྲུབ་ཐབས་ཞིག་བྱིན་ནོ། །དེ་ཙམ་མ་གཏོགས་ལོ་བཅོ་བརྒྱད་ལོན་གྱི་བར་དུ་རིག་པ་གཅིག་ཀྱང་མ་བསླབས་པས། ཡིད་མི་དགའ་ནས་ཕུ་བོ་དང༌། ཁྱིམ་བདག་མོས་བླུན་པོ་ཁྱོད་ཀྱིས་ཅི་རུང་ཞེས་སྤྱོས་ནས་ཕྱིར་ཕྱུང་བས་ཡིད་འབྱུང་ནས། གཞན་གྱི་ཡུལ་དུ་སློང་མོས་འཚོ་ཞིང་རྡོ་རྗེ་རྣལ་འབྱོར་མ་སྒྲུབ་པར་བྱེད་ཅིང་མཐར་གྱིས་ལོ་བཅུ་དྲུག་སོང་བ་ན། ཏིང་ངེ་འཛིན་བཟང་པོ་ཡང་སྐྱེས་ནས་ནུབ་ཕྱོགས་ཧིཾ་ག་ལ་ཙི་ལྷ་མོ་ཨུ་མའི་གནས་སུ་སོང་ནས་ལྷ་མོའི་རྡོ་སྐུའི་སྟེང་དུ་ཟླ་བ་དྲུག་གཉིད་ཀྱི་འོད་གསལ་ཐུན་གཅིག་བསྒོམས་པས་ལྷ་མོ་བསྐྲག་ནས། རྣལ་འབྱོར་པ་རྀད་དྷི་དེ་ཧི་ཀི་ནི་དྷི་དེ་ཞེས་ཟེར་བ་ན་རྣལ་འབྱོར་པས་རྫུ་འཕྲུལ་དང་གཏེར་གྱིས་ཅི་བྱེད། ཡེ་ཤེས་ཀྱི་དངོས་གྲུབ་སྦྱིན་ན་བླང་མོད། ལྷ་མོས་བདག་ལ་གྲུབ་ཐོབ་སྦྱིན་དུ་མེད། གཽ་རཀྵ་ལས་ལོང་ཟེར་བས་ན་དེས་གཽ་རཀྵ་འཚོལ་དུ་སོང་བ་ན། སིན་དྷུའི་ཡུལ་ན་རྣལ་འབྱོར་པ་གྲངས་མེད་པ་འདུག་པའི་གྲལ་གྱི་ཐ་མ་ཞིག་ན། བཞིན་ཤིན་ཏུ་མི་སྡུག་པ། ཡན་ལག་ལས་རྣག་ཁྲག་ལྷུང་བ་ཞིག་འདུག་པས་དེ་ཡིན་པར་ཤེས་ནས་ཕྱག་བཙལ་ཞིང་གསོལ་བ་བཏབ་པས།


TNT17_Page_0329
[མ་དཔེ་གཟིགས་ན་འདིར་གནོན།]

དེས་བྱིན་གྱིས་རླབས་པའི་ཚོད་མ་ཕུལ་གང་སྩལ་བ་འཐུངས་པས་དེ་ཉིད་དུ་ཤེས་བྱའི་ཡུལ་ཀུན་ལ་མངའ་བརྙེས། ཆོས་ཉིད་མངོན་སུམ་དུ་མཐོང་བའི་གྲུབ་ཐོབ་ཆེན་པོར་གྱུར་ནས། ཆོས་བཤད་པས་འདིའི་སློབ་རྒྱུད་ཤིན་ཏུ་མང་ངོ༌། །འདིའི་གསུང་འགའ་ཞིག་མུ་སྟེགས་ཀྱི་གཞུང་ལུགས་དང་བསྲེས་ནས་སྤྱོད་པའི་མུ་སྟེགས་པའི་རྣལ་འབྱོར་པའང་ཨོ་ཀཽ་ར་པནྠི་ཞེས་པ་མང་དུ་བྱུང་ངོ༌། །ཕྱི་མ་ནི་དུས་མ་ཡིན་པར་ཆར་འབེབས་པ་དང༌། ལུས་ལ་མེ་འབར་བའི་ཆོ་འཕྲུལ་བསྟན་པས། སྤྲིན་གྱི་མགོན་པོ་དང་འབར་བའི་མགོན་པོ་ཞེས་གྲགས་སོ། །དེ་ནས་རྒྱལ་བུ་རཱ་མ་གོ་པཱ་ལས་སློབ་དཔོན་དེ་ལ་བསྙེན་བཀུར་མང་དུ་མཛད་པ་ན། སློབ་དཔོན་དེས་ཀྱང་ལྷག་པའི་ལྷས་བྱིན་གྱིས་བརླབས་པ་དང༌། གདམས་ངག་ཀྱང་འདོམས་པར་མཛད་ཅིང༌། བུ་ཁྱིམ་དུ་མ་འགྲོ་བར་དེ་ཉིད་དུ་འདུག་ཤིག་ཅེས་གསུང་ནས་འདུག་པ་ན། ཡབ་ཀྱིས་སློབ་དཔོན་ལ་ངའི་བུ་འདི་ཉིད་དུ་རྫོངས་ཤིག་ཅེས་བརྗོད་པས། སློབ་དཔོན་གྱིས་ཀྱང་འདི་ནི་ངའི་ཆོས་ཀྱི་བུ་ཡིན་པས་ང་དབང་བ་ཡིན་ནོ་ཞེས་སླར་གསུངས་པ་ན། རྒྱལ་བུ་ར་མ་བྷར་ཏ་རི་ཁྲོས་ནས། ཞོ་ཤས་འཚོ་བ་དག་ཅིག་འཕྲོག་ཏུ་བཏང་པས་འཕྲོག་པར་མ་ནུས་ཤིང༌། སླར་རྟ་བ་སྟོང་ཕྲག་གཅིག་ལ་རྣལ་འབྱོར་པ་ངན་པ་དེ་ཆོམས་ཤིག་ཅེས་སྨྲས་ཏེ་བཏང་པ་དེ་རྣམས་སློབ་དཔོན་གྱི་དྲུང་དུ་ཉེ་བར་སླེབ་པ་ན། སློབ་དཔོན་གྱིས་སྔགས་


TNT17_Page_0330
[མ་དཔེ་གཟིགས་ན་འདིར་གནོན།]

ཀྱི་སྦྱོར་བ་ཅུང་ཟད་ཅིག་གིས་དེ་ཐམས་ཅད་ཀྱི་ཕྱིན་པ་རེངས་ཏེ་གཡོ་འགུལ་མ་ནུས་པ་ན་ཐམས་ཅད་ངོ་མཚར་དུ་གྱུར་ཏེ། ཨེ་མ་མཐུ་དང་ལྡན་པའི་རྣལ་འབྱོར་པ་འདི་ལ་བདག་ཅག་མོས་པར་བྱའོ། །ཞེས་ཕན་ཚུན་གཅིག་གིས་གཅིག་ལ་འདོམས་ཤིང་དད་པ་བསྐྱེད་པས་རེངས་པ་རྣམས་གྲོལ་ཞིང༌། སླར་རྒྱལ་པོ་ལ་སྦྲན་པས། རྒྱལ་པོ་ཡང་ངོ་མཚར་སྐྱེས་ནས། སློབ་དཔོན་གྱི་དྲུང་དུ་སོང་སྟེ་ཕྱག་འཚལ་ཞིང༌། དངུལ་ཏ་ར་སྙིམ་པ་མང་པོ་གཏོར་ཏེ་བཟོད་པར་གསོལ་བས་སློབ་དཔོན་གྱིས་ཀྱང་བི་བྷཱུ་ཏིའི་ཐིག་ལེ་ཡང་སྩལ་ཏོ། །དེ་ནས་དུས་གཞན་ཞིག་ན་གོང་མ་རྒྱལ་པོ་མུ་ཀུན་ད་དེ་བ། ཌི་ལཾ་པཱ་ཙ་བ་སྟག་གཟིག་གི་རྒྱལ་པོ་རྩོད་པར་གྱུར་ཏེ། མ་ག་དྷ་ནས་ཟླ་ཕྱེད་ཙམ་ནུབ་ཏུ་འོངས་པ། ཡུལ་མ་ཐུ་ར་ས་ཀ་རི་ཞེས་པའི་གྲོང་ཁྱེར་སྲང་ག་ལ་ཡང་ཉི་མ་གཉིས་ཀྱི་ལམ་ཡོད་པ་ཞིག་ཏུ་རྒྱལ་པོ་རཱ་མ་བྷ་ར་ཏ་རི་དམག་དཔུང་སུམ་འབུམ་ཙམ་དང་ལྷན་ཅིག་གནས་པ་ན། སློབ་དཔོན་ཆེན་པོ་མེ་གྷ་ནཱ་ཐ་ཡང་དེ་ཉིད་དུ་བྱོན་ཏེ་ཕན་ཚུན་གྱི་དམག་དཔོན་གཉིས་ཀར་ལས་བསོད་སྙོམས་གསོལ་ཏེ་བདེན་པའི་ཚིག་གི་སྟོབས་ཀྱིས་འཁྲུག་པའང་རང་ཞི་ལ། ཁྱད་པར་ཌི་ལིའི་གཡུལ་ངོར་སྤྱོད་པའི་གླང་པོ་ཆེ་དྲུག་སྟོང་ཙམ་གྱི་གཙོ་བོ་གསུམ་དང༌། རྒྱལ་པོ་གླང་པོའི་བདག་པོའི་གཡུལ་དུ་སྤྱོད་པའི་གླང་པོ་ཆེ་ཀུན་གྱི་མཆོག་གོ་པཱ་ལ་ཧསྟི་ཞེས་བྱ་བ། ལུས་ཀྱི་དཔང་ལ་


TNT17_Page_0331
[མ་དཔེ་གཟིགས་ན་འདིར་གནོན།]

ཁྲུ་སུམ་ཅུ་རྩ་བརྒྱད་ཡོད་པ་གླང་ཆེན་ཕལ་པ་ཉིས་བརྒྱའི་བྱ་བ་བྱེད་པར་གྲགས་པའི་གླང་ཆེན་མཆོག་དེ་རྣམས་ཀྱང་ཕྱག་རེ་རེས་གནོན་པའི་ཆོ་འཕྲུལ་སྟོན་ཅིང༌། དམ་པ་འདིས་ཀྱང་སྔགས་དང་མཉམ་གཞག་ཅུང་ཟད་རེ་མཛད་པ་ན། རྒྱལ་པོ་གཉིས་ཀའི་རྟའི་ཚོགས་རྣམས་རེས་བསྐུལ་ཡང་མི་འགྲོ། རེས་བཟུང་བར་ཡང་མི་ནུས་པ་མཐོང་ནས། སྐྱེ་བོ་ཐམས་ཅད་ཆེས་ངོ་མཚར་བར་གྱུར་ཏོ། །ཡང་སྐབས་ཞིག་ཡབ་རྒྱལ་པོ་དེ་ཉིད་ཀུ་བེ་ར་དང་ཞི་བ་ལ་མཆོད་པ་ནམ་བྱེད་རེས་ཀྱི། སློབ་དཔོན་མེ་གྷ་ནཱ་ཐ་རྫུ་འཕྲུལ་གྱིས་མངོན་དུ་བྱོན་ནས། ཁྱོད་ཀྱི་རིགས་ཀྱང་སངས་རྒྱས་ཁོ་ན་མཆོད་ན། འདི་མི་འོས་ཞེས་ཟློག་པར་མཛད་དོ། །ལན་ཅིག་རྩེད་མོའི་ཞོར་ལ་ལམ་གྱི་གཞི་མདོའི་ལྡིང་ག་ཞིག་ལ་བྱི་ཙེ་སྙིམ་པ་གང་གཏོར་བ་ནའང་མིག་འཕྲུལ་བཞིན་དུ་སློབ་དཔོན་དཔོན་སློབ་གཉིས་དེར་བྱོན་ནས་སྔར་བཞིན་བཟློག་པས། དེ་ཕྱིན་ཆད་ཡབ་རྒྱལ་པོའང་སངས་རྒྱས་པ་རྣམས་རྫུ་འཕྲུལ་ཆེ་ཞེས་གཙོ་བོར་མཆོད་དོ། །དེ་ལྟར་དམ་པ་འདིས་ནི་སྐབས་འགར་སློབ་དཔོན་རྣམ་གསུམ་སོ་སོའི་དྲུང་དང༌། སྐབས་འགར་ཕོ་བྲང་དུ་བཞུགས་ཤིང༌། ཡབ་དང་ལྷན་ཅིག་ཡུལ་པུཎྜ་བརྔྷ་ན་དང༌། ཁ་སརྤཱ་ཎ་དང༌། ར་ར་རྣམས་བརྒྱུད་ནས་ཨུ་ཌི་ཤ ཛ་གད་ནཱ་ཐ། ཀཊ་ཀ་བྷ་ན་ར་སི། ཨུ་ཤི་ར་ན་ལི་ཏ་གྷཱ་ཧཱུ་ར་བྷོ་ཌ་རྣམས་སུའང་བྱོན།


TNT17_Page_0332
[མ་དཔེ་གཟིགས་ན་འདིར་གནོན།]

སློབ་དཔོན་ཆེན་པོ་ཨཱ་ནནྡ་བྷ་དྲའི་དཔོན་པོ་ཨཱ་ནནྡ་པྲ་ཤྲོ་ཏི་དང་ཡང་མཇལ། འཕགས་མ་སྒྲོལ་མའི་བཟླས་ལུང་མནོས་པས་རྗེས་སུ་བཟུང་བའི་རྟགས་འཕྲལ་དུ་བྱུང་བར་གྲགས་[འདི་རྒྱལ་པོ་གྲག་ཤོས་ཡིན།]ཤིང༌། རཱ་ཛ་གྲྀ་[རྒྱལ་པོའི་ཁབ་]ཧ། ག་ཡ་ཤིརྵ་གུརླ་རི་བྱ་རྐང༌། གྲྀ་དྷ་[བྱ་རྒོད་ཕུང་པོ་]ཀུ་ཊ་སོགས་རྒྱལ་པོའི་གནས་ཆེན་ཀུན་དང༌། ནགས་དང་གྲོང་ཁྱེར་ཀུན་ཏུ་བསྐོར་ཞིང་ངོ་མཚར་སྒྱུ་མའི་རོལ་རྩེད་ཅན་ཞིག་གོ །དེ་ལྟར་སྐྱེས་བུ་མཆོག་གི་ལོ་བརྒྱའི་བྱ་བ་ཞིག་ལོ་བརྒྱད་དུ་ཉེ་བ་ལ་རྫོགས་པར་མཛད་པར་གྲགས། དེ་ལས་སྐྱེ་བ་འཕོས་པ་ནི་ད་ལྟའི་འདིའོ། །དེ་ལྟར་ན་སྔོན་གོམས་པ་རྣམས་ནི་དགེ་བ་ལ་ངང་གིས་འཇུག་པ་ཡིན་ནོ་ཞེས་དགེ་བ་ལ་གོམས་པའི་ཡོན་ཏན་བསྔགས་པ་ལ་སྦྱར་བར་བྱའོ། །བླ་མ་དམ་པ་ཚུལ་བཞིན་བསྟེན་པ་རྣམས་ནི་འཕགས་པ་རྣམས་རྟག་ཏུ་རྗེས་སུ་འབྲང་བའི་ཕྱིར། བླ་མ་བསྟེན་པའི་ཡོན་ཏན་བསྔགས་པ་ལའང་སྦྱར་བར་བྱའོ། །སྨོན་ལམ་གྱིས་ལེགས་པར་བསྒྲུབ་པ་རྣམས་ནི་ངེས་པར་ལེགས་པ་ཁོ་ནར་འགྱུར་རོ་ཞེས་སྨོན་ལམ་གྱི་སྟོབས་ལའང་སྦྱར་བར་བྱའོ།། །།འདིར་སྨྲས་པ། ཚོགས་གཉིས་རིན་ཆེན་ཡིད་ཀྱི་ཤིང་རྟ་དང༌། །ཡང་དག་སྨོན་ལམ་རྟ་བདུན་རབ་སྦྱར་བས། །དོན་གཉིས་རབ་རྒྱས་སྣང་བྱེད་བདག་པོ་ནི། །ས་གསུམ་མཁའ་ལ་ཐོགས་པ་མེད་པར་སྤྱོད། །ཆུ་ཡི་


TNT17_Page_0333
[མ་དཔེ་གཟིགས་ན་འདིར་གནོན།]

གཏེར་ལས་ཐིགས་ཚུལ་དུ། །དམ་པའི་རྣམ་ཐར་བརྗོད་པ་ལས། །བསོད་ནམས་གང་ཞིག་ཐོབ་གྱུར་པ། །མ་གྱུར་འགྲོ་བ་ཡོངས་ལ་བསྔོ། །ཞེས་པའང་མཁྱེན་ཡངས་མིའི་དབང་པོའི་བཀས་བསྐུལ་ནས། ཏཱ་ར་ནཱ་ཐས་རང་ལོ་ཉེར་གསུམ་པ་ལ་འགུར་མོའི་ཕོ་བྲང་དུ་སྦྱར་བའོ། །གཅིག་ཞུས་དག །མངྒ་ལཾ། བྷ་ཝན་ཏུ།། །།


TNT17_Page_0334
[མ་དཔེ་གཟིགས་ན་འདིར་གནོན།]

ཤོག་སྟོང་།

ཇོ་ནང་གི་གནས་བཤད།


TNT17_Page_0335
[མ་དཔེ་གཟིགས་ན་འདིར་གནོན།]

ཇོ་ནང་གི་གནས་བཤད་བཞུགས།


TNT17_Page_0336
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། རྡོ་རྗེ་འཆང་དབང་དཔལ་ལྡན་དུས་འཁོར་དང༌། །ཟླ་བཟང་འཇམ་དཔལ་གྲགས་པ་པད་དཀར་སོགས། །ཆོས་རྒྱལ་རིགས་ལྡན་སྤྲུལ་པའི་སྐུ་རྣམས་དང༌། །དུས་འཁོར་ཞབས་དང་ཟླ་བ་མགོན་པོ་དང༌། །རིགས་ལྡན་རྣམ་འཕྲུལ་ཆོས་རྗེ་ཡབ་སྲས་སོགས། །རྩ་བརྒྱུད་བླ་མ་རྣམས་ལ་གུས་པས་འདུད། །བདག་ཅག་འདིར་ཚོགས་སྐལ་ལྡན་གདུལ་བྱ་ལ། །མཆོག་དང་ཐུན་མོང་དངོས་གྲུབ་སྩལ་ཏུ་གསོལ། །འདིར་ཞིང་ཁམས་མཆོག་ཏུ་གྱུར་པ་མི་མཇེད་འཇིག་རྟེན་གྱི་ཁམས། གླིང་ཁྱད་པར་ཅན་བདུན་པ་ལས་ཀྱི་ས། དུམ་བུ་བླ་ན་མེད་པ་འཛམ་གླིང་ལྷོའི་ཕྱོགས། རྒྱལ་ཁམས་ངོ་མཚར་ཅན་པུ་རྒྱལ་བོད་ཀྱི་ཡུལ། དུས་གསུམ་རྒྱལ་བ་ཀུན་གྱི་ཞིང་ཁམས་ཁུང་བ། རྒྱལ་སྲས་བྱང་སེམས་ཀུན་གྱི་མཛད་པའི་སྤྱོད་ཡུལ། གསང་


TNT17_Page_0337
[མ་དཔེ་གཟིགས་ན་འདིར་གནོན།]

སྔགས་འཛིན་པ་ཀུན་གྱི་གནས་མཆོག་དམ་པ། གངས་ཅན་ལྗོངས་འདིའི་ལྟེ་བ་སའི་ཐིག་ལེ། རི་བོ་སྟོང་ཕྲག་དུ་མའི་དབུས་ན་མངོན་པར་འཕགས་པ། ས་འཛིན་དབང་པོ་ནགས་རྒྱལ་དཔལ་གྱི་རི། རུ་ལག་གཡས་རུའི་སོ་མཚམས། ཕྱི་ལྟར་ན་སངས་རྒྱས་ཀུན་ཀྱི་ཟབ་མོའི་ཆོས་སྒྲ་སྒྲོག་པའི་གནས་བྱ་རྒོད་ཕུང་པོའི་རི། ནང་ལྟར་ན་འཕགས་པ་སྤྱན་རས་གཟིགས་ཀྱི་ཕོ་བྲང་དམ་པ་རི་བོ་པོ་ཊ་ལ། གསང་བ་ལྟར་ན་རྡོ་རྗེ་ཐེག་པའི་ངེས་གསང་འབྱུང་ཞིང་དར་བའི་གནས་བྱང་ཕྱོགས་ཤམ་བྷ་ལ། དེ་ཁོ་ན་ཉིད་ལྟར་ན་དཔལ་ལྡན་འབྲས་སྤུངས་ཆོས་ཀྱི་དབྱིངས་གསུང་གི་དབང་ཕྱུག་གི་དཀྱིལ་འཁོར། དོན་དམ་ཡེ་ཤེས་སངས་རྒྱས་སེང་གེའི་ཁྲིར་བཞུགས་ཨེ་ཝཾ་ཟུང་འཇུག་གི་ངོ་བོ། སྒྲུབ་གནས་བྱེ་བ་ཕྲག་བརྒྱའི་དབུས་ན། ལྷུན་པོ་ལྟར་མངོན་པར་མཐོ་ཞིང༌།


TNT17_Page_0338
[མ་དཔེ་གཟིགས་ན་འདིར་གནོན།]

གྲགས་པ་ཉི་ཟླ་ལྟར་གསལ་བ། རི་ཁྲོད་ཆེན་པོ་ཇོ་ནང་ཞེས་ཡོངས་སུ་གྲགས་པ་འདིའི་གནས་ཀྱི་ཆེ་བའི་དབང་དུ་བྱས་ན། ས་གཞི་ལ་རང་བཞིན་གྱིས་གྲུབ་པའི་ཡོན་ཏན་དང༌། སྐྱེས་བུ་དམ་པ་རྣམས་ཀྱིས་བྱིན་གྱིས་བརླབས་པའི་ཆེ་བ་དང༌། སྒྲུབ་བརྒྱུད་ཆུ་བོའི་གཞུང་ལྟར་རྒྱུན་མ་ཆད་ཅིང་དར་བའི་གཟི་བརྫིད་དཔལ་དང་ལྡན་པའོ། །དང་པོ་ས་ལ་རང་བཞིན་གྱི་ས་གྲུབ་པའི་ཡོན་ཏན་ནི། གངས་ཅན་མནྡྷ་ར་དང་ལྷུན་པོ་སོགས། །ལྷ་དང་དྲང་སྲོང་རིག་འཛིན་བགྲང་ཡས་ཀྱིས། །ཉེ་བར་བསྟན་པའི་རིའི་རྒྱལ་པོ་རྣམས། །ཕྱོགས་འདིར་གཅིག་ཏུ་འདུས་པ་ལྟ་བུར་ཡོད། །ཕྱོགས་བཞིའི་རི་རྣམས་རྩེ་མོ་ཤིན་ཏུ་མཐོ། །རྩ་བ་བརྟན་ཅིང་དབྱིབས་ལེགས་ལྷུན་སྟུག་ཆགས། །ངོས་རྣམས་སྨན་ལྗོངས་ཉམས་དགའ་ཡངས་པ་དང༌། །ཟླ་བ་ཆུ་ཤེལ་ཨིནྡྲ་ནཱི་ལ་སོགས། །ནོར་བུའི་ཕུང་པོ་བརྩེགས་འདྲའི་བྲག་རི་མཛེས། །རི་བོའི་སུལ་རྣམས་ནགས་ཚལ་སྣ་ཚོགས་དང༌། །ལྗོན་ཤིང་དུ་མས་རྣམ་པར་བརྒྱན་པ་ཡོད། །ཟླ་བ་དྲུག་ཏུ་མེ་ཏོག་སྣ་ཚོགས་བཀྲ། །བཞི་བརྒྱ་རྩ་བཞིའི་ནད་ཀུན་སེལ་བྱེད་པ། །སྨན་མཆོག་རྣམ་པ་སྣ་ཚོགས་དུ་མ་ཡི། །དྲི་ཞིམ་ངད་ཀྱིས་ཕྱོགས་ཀུན་ཁྱབ་པ་དང༌། །རྣམ་པ་སྣ་ཚོགས་འབྲས་བུ་ཆགས་པ་ནི། །འཆི་མེད་དབང་པོ་མཆོད་སྦྱིན་བརྒྱ་པའམ། །མི་འམ་ཅི་ཡི་རྒྱལ་པོ་ལྗོན་པ་ནི། །འཁོར་བཅས་རོལ་ཞིང་རྩ་བའི་སྐྱེད་


TNT17_Page_0339
[མ་དཔེ་གཟིགས་ན་འདིར་གནོན།]

ཚལ་འདྲ། །རི་བོའི་མགུལ་ནས་ཆར་སྤྲིན་གསར་པ་འཁྲིགས། །བདུད་རྩིའི་ཆར་ཟིམ་རྒྱུན་མི་འཆད་པར་འབབ། །མཐོང་བས་ཡིད་འཕྲོག་ཐོས་ན་ཉམས་དགའ་ཞིང༌། །བསྡད་པ་ཙམ་གྱིས་ཏིང་འཛིན་ངང་གིས་སྐྱེ། །ཀླུ་ཡི་རྒྱལ་པོ་རྒྱ་མཚོའི་རྩེ་ས་འདྲ། །འབབ་ཆུ་སྣ་ཚོགས་ལྷུང་ལྷུང་སྒྲ་འབྱིན་ཅིང༌། །རི་དྭགས་དུ་མ་བག་ཕབ་བདེ་བར་རྒྱུ། །འདབ་ཆགས་སྣ་ཚོགས་སྙན་པའི་ཅ་ཅོ་སྒྲོག །རྟ་བདུན་རྒྱལ་པོ་ལྷོ་ཡི་ཁྱིམ་གནས་པའི། །ཟླ་བ་དྲུག་ཏུ་རི་དང་རི་བོའི་སུལ། །རི་དྲུང་རི་ཡི་ཤོད་ཀྱི་ངོགས་རྣམས་སུ། །རྨད་བྱུང་ཡ་མཚན་ཁ་དོག་སྣ་ཚོགས་འཆར། །སྟོན་ནི་གསེར་དང་བྱི་རུའི་འཕྲེང་བ་སྤེལ། དགུན་དུས་རི་དབང་རྒྱས་པའི་རྩེ་མོ་རྣམས། །བཅོ་ལྔའི་ཟླ་བ་ཉ་རྒྱས་ལྟ་བུར་འགྱུར། །ཡན་ལག་བརྒྱད་ལྡན་འབབ་ཆུ་དུ་མ་ཅན། །རི་མཐོ་ས་གཙང་རིག་པ་ཤིན་དུ་དྭངས། །ལུ་ཧི་ཏ་ཞེས་ཆུ་ཀླུང་ཚངས་པའི་བུ། །འབབ་ཆུའི་རྒྱལ་པོ་བྱང་གི་ཕྱོགས་སུ་རྒྱུ། །རྒྱལ་བའི་ཞལ་མཐོང་གྲུབ་པའི་དམ་ལ་གནས། །འདྲེན་པའི་བསྟན་པ་གཅེས་པར་སྐྱོང་བ་ཡི། །ལྷ་མོ་མཐུ་ལྡན་ནགས་སྨན་རྒྱལ་མོ་ནི། །ལྷ་སྨན་འབུམ་གྱི་ཚོགས་དང་ལྷན་ཅིག་ཏུ། །དགའ་བས་རོལ་ཞིང་ལྷ་སྲིན་སྡེ་བརྒྱད་ལ། །དབང་བསྒྱུར་རྫུ་འཕྲུལ་ཆེན་པོས་སྐྱོང་བའི་གནས། །རི་རྒྱལ་འདི་ཡི་རི་འདབས་ཁོར་ཡུག་ན། །གྲུབ་


TNT17_Page_0340
[མ་དཔེ་གཟིགས་ན་འདིར་གནོན།]

པའི་གནས་དང་ལྷ་ཁང་གཙུག་ལག་ཁང༌། །ཆོས་གྲྭ་བརྒྱ་ཕྲག་དུ་མས་བསྐོར་ཏེ་གནས། །དེ་ལས་ཁྱད་པར་གནས་མཆོག་དམ་པ་འདི། ས་གཞི་ཨེ་ཡིག་ཆོས་ཀྱི་འབྱུང་གནས་འདྲ། །མཁའ་ལ་རང་བྱུང་འཁོར་ལོ་རྩིབས་བརྒྱད་དབྱིབས། །རི་རྣམས་པདྨ་འདབ་མ་རྒྱས་པ་འདྲ། །ནུབ་བྱང་དཔལ་གྱི་རི་བོ་སྔོ་འབོར་སྐྱོང༌། །མཐོ་ཞིང་བརྗིད་ཆགས་རི་རྒྱུད་དུ་མས་བསྐོར། །ཕྱི་རོལ་རྒྱལ་ཁམས་གཞན་ནས་བལྟས་པའི་ཚེ། །ས་ལས་རྡོ་རྗེ་རྩེ་ལྔ་ལྟ་བུར་འཕགས། །གནས་འདིའི་ནང་གི་གང་ནས་བལྟས་གྱུར་ཀྱང༌། །འཁོར་ལོས་བསྒྱུར་རྒྱལ་གདན་ལ་བཞུགས་པ་འདྲ། །བྱང་ཤར་ཕྱོགས་ན་རྟ་མཆོག་རིན་ཆེན་ཟུང༌། །དེའི་དྲུང་ན་དམག་དཔོན་རིན་པོ་ཆེ། །དཔའ་བོའི་ཚོགས་ཀྱིས་བསྐོར་བ་འདྲ་བ་ཡོད། །བྱང་གི་ཕྱོགས་ན་ཉེ་བར་བརྟེན་པ་ནི། །བྲག་རིའི་འཕྲེང་བ་འཁོར་ལོ་རིན་ཆེན་འདྲ། །དེ་འོག་སེང་རྫོང་ཞེས་གྲགས་བྲག་རི་ནི། །བློན་པོ་རིན་ཆེན་གཙོ་ལ་གུས་པས་འདུད། །ནོར་བུ་རིན་ཆེན་འདྲ་བའི་བྲག་རི་ནི། །ནུབ་བྱང་ཕྱོགས་གནས་རི་དེའི་ངོས་ལ་ནི། །འདབ་ཆགས་དབང་པོ་དུ་མ་དགའ་བའི་རོལ། །གྲུབ་པའི་གནས་མཆོག་དུ་མས་བརྒྱན་པ་ཡོད། །ལྷོ་ཡི་ཕྱོགས་ན་ཡིད་འོང་རི་ཡི་དབྱིབས། །བཙུན་མོ་རིན་ཆེན་མངོན་དུ་ཕྱོགས་པ་འདྲ། །ནུབ་ཕྱོགས་རི་ནི་གླང་ཆེན་ཉལ་བ་བཞིན། །མདུན་རི་ལྷུན་ཆགས་སྨན་ལྗོངས་རྒྱས་པ་ནི། །འབྲུ་ཡི་


TNT17_Page_0341
[མ་དཔེ་གཟིགས་ན་འདིར་གནོན།]

ཕུང་པོ་ལྟ་བུར་དབྱིབས་ལེགས་ཤིང༌། །གནོད་སྦྱིན་དབང་པོ་གཏེར་གྱི་བདག་པོའི་གཙོ། །འཕགས་པ་ཛམ་བྷ་ལ་ཡི་དབྱིབས་སུ་ཡོད། །ཕུ་ནི་གཟེངས་མཐོ་ལྕགས་རི་ལྟ་བུས་བསྐོར། །མདའ་ནི་མ་ཤོར་ཕྱག་རྒྱ་ལྟ་བུར་བསྣོལ། །ཤར་རིའི་ངོས་ལ་བཀྲ་ཤིས་དཔལ་བེ་དང༌། །གནས་ལུགས་མཚོན་པ་ཨ་ཡིག་གསལ་བར་དོད། །གཡོན་ཕྱོགས་དངུལ་གྱི་ཕྱེ་མས་གཡོགས་འདྲ་བའི། །རི་བོ་དར་ཡོལ་ལྟ་བུས་མཛེས་པར་བྱས། །དོན་དམ་ཨེ་ལ་ཝཾ་ཡིག་བཞུགས་པ་ལྟར། །གནས་ཀྱི་ལྟེ་བར་མཐོང་གྲོལ་ཆེན་མོ་ནི། །ཕྱོགས་བཅུ་དུས་གསུམ་བཞུགས་པའི་སངས་རྒྱས་དང༌། །བྱང་ཆུབ་སེམས་དཔའ་ཀུན་གྱི་ངོ་བོ་ཉིད། །མཐོང་ཐོས་དྲན་རེག་འབྲེལ་ཚད་དོན་ལྡན་ནི། །རྨང་ནི་ས་གཞི་ལྟ་བུ་རྒྱུ་ཆེ་ཞིང༌། །རྩེ་མོ་སྐྱེ་མེད་གནས་ལ་རེག་པ་སྙམ། །བཀོད་ལེགས་རྣམ་པར་རྒྱལ་བའི་ཁང་བཟང་འདྲ། །སངས་རྒྱས་རྣམ་པར་སྣང་མཛད་བཞུགས་པའི་གནས། །གཞི་དང་སྙིང་པོ་མེ་ཏོག་གིས་བརྒྱན་པ། །རབ་འབྱམས་རྒྱ་མཚོ་ཞེས་བྱའི་ཞིང་ཁམས་དང༌། །འོད་དཔག་མེད་ཀྱི་གནས་མཆོག་བདེ་བ་ཅན། །མི་འཁྲུགས་ཞིང་ཁམས་མངོན་དགའ་ལ་སོགས་དང༌། །འདོད་པའི་ཁམས་ཀྱི་མཆོག་རབ་དགའ་ལྡན་དང༌། །གཟུགས་ཁམས་རྩེ་མོ་དབང་ཕྱུག་ཆེན་པོའི་ཞིང༌། །མཁའ་ཁྱབ་འོག་མིན་སྟུག་པོ་བཀོད་པ་སོགས། ཀུན་


TNT17_Page_0342
[མ་དཔེ་གཟིགས་ན་འདིར་གནོན།]

འདུས་བདག་ཉིད་མཆོད་རྟེན་དཔལ་ཡོན་ཅན། །སྐུ་གཟུགས་གཞལ་དུ་མེད་པས་གང་བ་བཞུགས། །མཐའ་སྐོར་ཁོ་ར་ཁོར་ཡུག་ཕྱོགས་ཀུན་ཏུ། །གཙུག་ལག་ཁང་དང་སྒྲུབ་གནས་བགྲང་ཡས་ཡོད། །དབུས་ནི་ཧེ་རུ་ཀ་དཔལ་དུས་འཁོར་སོགས། །འཁོར་ལོའི་དབང་ཕྱུག་རྣམས་ཀྱི་དཀྱིལ་འཁོར་དང༌། །ཕྱི་རོལ་ཕྱོགས་མཚམས་དུར་ཁྲོད་ཆེན་པོ་བརྒྱད། །རྡོ་རྗེ་ཅན་གྱི་དཀྱིལ་འཁོར་ཟབ་མོ་དང༌། །རྒྱ་ཆེའི་དཀྱིལ་འཁོར་ངོ་མཚར་རྨད་དུ་བྱུང༌། །གནས་མཆོག་དམ་པ་འདིར་ནི་སུ་བསྡད་ཀྱང༌། །ཆགས་སྡང་ལ་སོགས་ཉོན་མོངས་ངང་གིས་སངས༌། །དགེ་བའི་ཆོས་རྣམས་གོང་ནས་གོང་དུ་འཕེལ། །གཉིད་རྨུགས་སེལ་ཞིང་རིགས་པ་དྭངས་པའི་གནས། །ཞེན་ཆགས་སེལ་ཞིང་ངེས་འབྱུང་འཕེལ་བའི་གནས། །གནོད་སེམས་འབྲི་ཞིང་སྙིང་རྗེ་རྒྱས་པའི་གནས། །རྣམ་གཡེངས་སྤངས་ཤིང་ཞི་གནས་བརྟན་པའི་གནས། །ལོག་རྟོག་མི་འབྱུང་ལྷག་མཐོང་ངང་གིས་སྐྱེ། །གནས་མཆོག་འདི་དང་མཚུངས་པ་གཞན་ཡོད་མིན། །ཕྱོགས་འཛིན་ཅན་གྱིས་བསྔགས་པ་བརྗོད་པ་དང༌། །ཐེ་རང་འགོང་པོས་གྲགས་པ་བསྒྲགས་པ་དང༌། །དབང་སྡུད་ནོར་སྒྲུབ་ལ་སོགས་རྟེན་འབྲེལ་ཀྱིས། །འདུ་འཚོགས་ཅན་དང་གྲགས་པ་ཆེ་བ་འགར། །རྨོངས་པའི་འགྲོ་རྣམས་ཆུ་ལྟར་རྒྱུག་པ་ལ། ཞིང་མཆོག་དམ་པར་འཁྲུལ་དང་འདི་མི་མཚུངས། །གཞན་དུ་ལོ་དང་ཟླ་བར་བསྒོམས་པ་


TNT17_Page_0343
[མ་དཔེ་གཟིགས་ན་འདིར་གནོན།]

བས། །གནས་མཆོག་འདིར་ནི་ཞག་དང་ཟ་མ་ཙམ། །བསྒོམས་པའི་ཕན་ཡོན་ལྷག་པར་ཆེ་བ་ཡིན། །གཞན་དུ་དགེ་སྦྱོར་འབད་དེ་བསྒོམས་པ་བས། །སྡིག་པའི་ལས་སྤངས་ཆོས་དང་བླ་མ་ལ། །མོས་གུས་བྱས་ནས་གནས་འདིར་ཉལ་བ་ཡང༌། །བླ་མེད་བྱང་ཆུབ་མཆོག་ལ་ཉེ་བ་ཡིན། །ཉ་པ་གདོལ་པ་རི་དྭགས་རྔོན་པ་དང༌། །མཚམས་མེད་བྱེད་པ་ལ་སོགས་སྡིག་ཅན་ཡང༌། །གནས་འདི་བསྐོར་ཞིང་སྒྲུབ་ཆུ་འཐུང་པ་དང༌། ཁྲུས་བྱས་ཕྱག་དང་སྐོར་བ་མཆོད་པ་ཕུལ། །དེ་ཡིས་སྡིག་པ་དག་ནས་ལྷ་ཡུལ་སྐྱེ། །སྐྱེ་བོ་གཞན་དག་སྨོས་ཀྱང་ཅི་ཞིག་དགོས། །གནས་མཆོག་འདི་ནི་མཐོང་བ་དོན་ལྡན་ཡིན། །དེ་ལྟར་ན་མཚན་ཉིད་ཕུན་སུམ་ཚོགས་པ་དང་ལྡན་པའི་གནས་མཆོག་འདི་ནི། རྒྱལ་བ་ཤཱཀྱ་སེང་གེ་ལ་སོགས་པ་སྔར་བྱོན་པའི་སངས་རྒྱས་རྣམས་ཀྱིས་བྱིན་གྱིས་བརླབས། འཕགས་པ་སྤྱན་རས་གཟིགས་ཀྱི་བཞུགས་གནས་སུ་སྩལ་བ་ལགས། གཉིས་པ་སྐྱེས་བུ་དམ་པ་རྣམས་ཀྱིས་བྱིན་གྱིས་བརླབས་པའི་ཆེ་བ་ནི། གནས་འདི་དུས་གསུམ་གྱི་སངས་རྒྱས་རྣམས་ཀྱིས་བྱིན་གྱིས་བརླབས་ཤིང༌། སྒོས་སུ་འཕགས་པ་སྤྱན་རས་གཟིགས་ཀྱི་ཞིང་མཆོག་ཏུ་གདོད་ནས་གྲུབ་པ་ཡིན་པ་ལས། བསྟན་པ་འདི་ལ་མིའི་སྐྱེ་བ་ཉེ་བར་གཟུང་བའི་ཚུལ་བསྟན་པའི་དམ་པ་རྣམས་ཀྱིས་བྱིན་གྱིས་རློབས་ཚུལ་ནི། སློབ་


TNT17_Page_0344
[མ་དཔེ་གཟིགས་ན་འདིར་གནོན།]

དཔོན་ཆེན་པོ་པདྨ་འབྱུང་གནས་ཞེས་བྱ་བ་སྤྲུལ་པའི་སྐུ་དེ་ཉིད་ཀྱིས། བརྟན་མ་བཅུ་གཉིས་ཀྱི་གནས་རྣམས་སུ་བྱོན་ཞིང༌། ཁྱད་པར་ནགས་རྒྱལ་གྱི་རི་ལ་ལན་མང་དུ་ཕེབས་པ་དང༌། ཡང་དགོས་གནས་འདིར་ཞག་བདུན་བཞུགས་པར་གྲགས་ཤིང༌། ཕུག་ཆེན་གོང་མ་དང་ཕུག་པ་གོང་འོག་རྣམས་སུ་ཆགས་ཕབ། དེ་རྗེས་སུ་རིག་པ་འཛིན་པའི་ས་ལ་བཞུགས་པ། སྣུབས་ཆེན་ནམ་མཁའི་སྙིང་པོ་དང༌། ངམ་འབྲེ་ཀླུའི་རྒྱལ་མཚན་དང༌། སྣ་མནམ་པ་ཚུལ་ཁྲིམས་འབྱུང་གནས་ལ་སོགས་པས་ཀྱང་སྒྲུབ་གནས་སུ་མཛད་ཅིང༌། བོད་དབུས་གཙང་གི་ཕྱོགས་འདིར་གསང་སྔགས་བརྒྱུད་ཀྱི་བསྟན་པ་དར་བར་མཛད་པ་ལ་ཐོག་མར་བཀའ་དྲིན་ཆེ་བ་སྒྲ་སྒྱུར་གྱི་རྒྱལ་པོ་འབྲོག་མི་ལོ་ཙཱ་པའི་སློབ་མ། མོ་གྲུབ་པ་ཐོབ་པ་བཞིའི་གཙོ་མོ། བཟང་སྒོམ་དཀོན་མཆོག་ཞེས་བྱ་བས། ཐོག་མར་ནགས་རྒྱལ་གྱི་ཤར་མགུལ་དུ་ཅུང་ཟད་བཞུགས། དེ་ནས་གནས་འདིར་བྱོན་ཏེ་ཡུན་རིང་དུ་བཞུགས་ཤིང༌། མཐར་འཇའ་ལུས་རྡོ་རྗེའི་སྐུ་བརྙེས་པ་ཡིན། བཞུགས་གནས་ད་ལྟ་ཡང་ཡོད་པ་འདི་ལགས། དེ་རྗེས་སུ་ལོ་བརྒྱད་ཅུ་སྐོར་སོང་བ་ན། མ་ཅིག་སངས་རྒྱས་རི་མས་གནས་འདིར་ཆགས་ཕབ། ཡུན་རིང་དུ་བཞུགས་ཤིང་བཀའ་གདམས་དང་རྫོགས་ཆེན་གྱི་སྒྲུབ་གྲྭ་བསྐྱངས་པར་གདའ། བཞུགས་གནས་དང་ཆོས་གྲྭ་ད་ལྟ་ཡང་ཡོད་པ་འདི་ལགས། དེ་ཉིད་ཀྱི་སྒྲུབ་གྲྭ་མ་སྟོངས་པའི་རྒྱུན་ལ། མི་རིང་བར་དཔལ་ལྡན་


TNT17_Page_0345
[མ་དཔེ་གཟིགས་ན་འདིར་གནོན།]

གྲུབ་ཐོབ་འདར་ཕྱར་རིན་ཆེན་བཟང་པོ་ཕེབས་ཏེ། ཐོག་མར་ཚོགས་པ་མ་བསྐྱངས། སྒྲུབ་པ་ཁོ་ན་མཛད་ཅིང་བཞུགས། ཕུག་ཆེན་འོག་མར་བདག་མེད་ལྷ་མོ་བཅོ་ལྔ་དང་འཁོར་ལོ་བདེ་མཆོག་སོགས་ཞལ་གཟིགས། ཕུག་ཆེན་གོང་མར་སློབ་དཔོན་པདྨ་འབྱུང་གནས་དངོས་སུ་ཞལ་མཇལ་ཏེ། པདྨ་དབང་ཆེན་གྱི་ཆོས་སྐོར་མཐའ་ཡས་པའི་བདག་པོར་བསྐོས། ནུས་མཐུ་ཐོགས་པ་མེད་ཅིང་བྱིན་རླབས་དང་ཡེ་ཤེས་བསམ་གྱིས་མི་ཁྱབ་པའི་གྲུབ་ཐོབ་རྩོད་མེད་དུ་གྱུར་པ་ཡིན་པར་གདའ། དེ་སྐབས་གསང་འདུས་རིམ་ལྔ་གཙོ་བོར་གྱུར་པའི་གསང་རྙིང་གཉིས་འདུས་ཀྱི་སྒྲུབ་གྲྭ་མཛད། གྲུབ་ཐོབ་ཉིད་ཀྱིས་མིའི་བླ་མ་གཞན་ལ་མ་གསན་ཡང༌། སེམས་འགྲེལ་སྐོར་གསུམ་ལ་གཟིགས་ཀྱིན་དོན་ཐུགས་ཉམས་སུ་བཞེས་པས། སྦྱོར་བ་ཡན་ལག་དྲུག་པའི་ཉམས་རྟོགས་མཐར་ཕྱིན་པ་མངའ་བར་འདུག དེ་རྗེས་མི་རིང་བར་སྔར་གྱི་སྒྲུབ་གྲྭའི་རྒྱུན་མ་སྟོངས་པ་ལ། རིགས་ལྡན་སྤྲུལ་པའི་སྐུ་མཁས་བཙུན་བཟང་པོའི་མཐར་ཐུག །རྟགས་མངོན་གྱུར་གྱི་གྲུབ་ཐོབ་ཆེན་པོ་ཞང་ཀུན་སྤངས་ཐུགས་རྗེ་བརྩོན་འགྲུས། མཚན་གྱི་ཁྱད་པར་གཞན་ཀུན་སྤངས་ཆེན་པོ་ཀུན་ཏུ་བཟང་པོ་ཞེས་བྱ་བས་ཕེབས་པ་ཡིན་ཏེ། དེ་ཡང་ཆོས་རྗེས་ཀུན་སྤངས་ཆེན་པོ་དེ་ཉིད། སེ་མཁར་ཆུང་ན་བཞུགས་པའི་དུས། གྲུབ་ཐོབ་སེ་སྟོན་ཀུན་རིག་གི་སྐུའི་སྐྱེ་བ་ཡིན་པ་ཡང་ཐུགས་ཀྱིས་དྲན། གཞི་བདག་རྙིང་པ་


TNT17_Page_0346
[མ་དཔེ་གཟིགས་ན་འདིར་གནོན།]

རྣམས་ཀྱིས་ཀྱང་ངོ་ཤེས། རྒྱུད་ཀྱི་སྙིང་པོ་མཛད་པའི་ཐོག་མར་དགེ་བའི་གཟུགས་ལྟས་ཀྱང་བྱུང༌། བརྟན་མ་བཅུ་གཉིས་ཀྱི་གཙོ་མོ། ནགས་སྨན་རྒྱལ་མོས་ཇོ་ནང་དུ་སྤྱན་འདྲེན་པའི་ཞུ་བ་ཡང་ཡང་ཕུལ། དེ་ལ་ད་ལྟ་དུས་ལ་ཅུང་ཟད་མ་བབ་པས་ད་རེས་མི་འཚལ། ལོ་གསུམ་ནས་འོང་ཞེས་ཞལ་གྱིས་བཞེས། དེ་བར་དུ་ལྷ་ས་ཡེར་བ་སོགས་དབུས་ཕྱོགས་སུ་འགྲོ་དོན་ཆེར་མཛད། སྔར་གྱི་ཕྱི་ནང་གི་རྟེན་འབྲེལ་འཛོམ་པ་ལས། ལོ་གསུམ་གྱི་མཚམས་དེ་ནས་སྤྱི་བྲག་ནགས་གསུམ་གྱི་མཁན་སློབ་དགེ་འདུན་ཐམས་ཅད་མགྲིན་གཅིག་པས་ནན་ཏན་དུ་གསོལ་བ་བཏབ་པ་ལ་བརྟེན་ནས། གནས་མཆོག་དམ་པར་འདིར་ཆགས་ཕབ། དེ་ཙ་ན་གནས་འདིའི་རྒྱུན་བཞུགས་སྒྲུབ་པ་པོ་སུམ་ཅུ་ཙམ་ཡོད་པར་གྲགས། ཐོག་མ་ལོ་གཅིག་སེང་རྫོང་དུ་བཞུགས། དེ་ནས་འཁྱོགས་པོའི་བཙན་གྱིས་གདན་དྲངས། འཁྱོག་པོར་གཟིམས་ཁང་མཁའ་སྤྱོད་བདེ་ལྡན་དུ། ཐོག་མཐའ་བར་གསུམ་དུ་དགེ་བའི་མཚན་མ་བརྙེས་ནས་རྒྱུད་ཀྱི་སྙིང་པོ་རྩ་འགྲེལ་ཚང་བར་མཛད། རྣལ་འབྱོར་ཡན་ལག་དྲུག་པའི་སྙན་རྒྱུད་ཡི་གེར་བཀོད་པའི་ཐོག་མ་འཁྲིད་ཡིག་ཆེན་པོ་ཡང་མཛད། དེ་རྗེས་སྐུ་ཚེའི་སྨད་ལ་སྒྲུབ་གནས་སྐྱིད་ཕུག་བདེ་ལྡན་དུ་གདན་ཕབ་པར་གདའ། དེ་སྐབས་ཕྱོགས་བཅུ་ནས་འདུས་པའི་ཆོས་མཛད་སྒྲུབ་པ་ཕོ་མོ་ཚོགས་པ་ཉུང་དུས་ཀྱང་དྲུག་བརྒྱ་རེ་རྟག་ཏུ་འདུས་ཤིང༌། དེ་ནས་


TNT17_Page_0347
[མ་དཔེ་གཟིགས་ན་འདིར་གནོན།]

བརྩམས་ཏེ་ད་ལྟའི་བར་དུ་རྒྱུད་ཐམས་ཅད་ཀྱི་ངེས་གསང་ཟབ་ལམ་རྡོ་རྗེའི་རྣལ་འབྱོར་རྣལ་འབྱོར་ཡན་ལག་དྲུག་པ་གཙོ་བོར་གྱུར་པའི་སྒྲུབ་གྲྭ་རྒྱུན་མ་ཆད་ཅིང༌། དར་ཞིང་རྒྱས་པར་གྱུར་པ་ལགས་ཏེ། ཆོས་རྗེ་ཀུན་སྤངས་ཆེན་པོས་གནས་འདིར་ལོ་ཉི་ཤུ་རྩ་གཅིག་ཙམ་བཞུགས། དེ་ནས་བྱང་སེམས་རྒྱལ་བ་ཡེ་ཤེས་ཀྱིས་ལོ་བརྒྱད། མཁས་བཙུན་ཡོན་ཏན་རྒྱ་མཚོས་ལོ་བདུན་རྣམས་གདན་ས་མཛད་པ་རྣམས་ལའང་སྒྲུབ་བརྒྱུད་ཇེ་འཕེལ་དུ་གྱུར། དེ་རྗེས་རིགས་ལྡན་སྤྲུལ་པའི་སྐུ་ཆེན་པོ། དུས་གསུམ་སངས་རྒྱས་ཐམས་ཅད་ཀྱི་ངོ་བོ། མདོ་རྒྱུད་རྒྱ་མཚོའི་གླེགས་བམ་གཅིག་གྱུར། ངུར་སྨྲིག་འཛིན་པ་ཀུན་གྱི་ཁྱུ་མཆོག རྒྱ་ཆེན་བྱང་ཆུབ་སེམས་ཀྱི་མངའ་བདག མཐའ་བྲལ་ངེས་དོན་བསྟན་པའི་བདག་པོ། རྟགས་དང་ཡོན་ཏན་མཐའ་དག་མ་སྦས་མངོན་དུ་གྱུར་པའི། གྲུབ་ཐོབ་ཀྱི་འཁོར་ལོས་བསྒྱུར་པ་ཆེན་པོ། ཆོས་རྗེ་ཀུན་མཁྱེན་དོལ་པོ་པ་མཚན་བརྗོད་པར་དཀའ་བ་ཤེས་རབ་རྒྱལ་མཚན་དཔལ་བཟང་པོ་དེ་ཉིད་ཀྱིས། ལོ་བཅོ་ལྔའམ་བཅུ་གསུམ་གྱི་བར་དུ་གདན་སར་བཞུགས་དུས། སྐབས་དེ་ཉིད་དང༌། མ་འོངས་པའི་སེམས་ཅན་མཐོང་ཐོས་དྲན་རེག་ཐམས་ཅད་བླ་ན་མེད་པའི་བྱང་ཆུབ་ཀྱི་ས་བོན་གདབ་པའི་ཕྱིར་དུ། མཐོང་གྲོལ་གྱི་སྐུ་འབུལ་ཆེན་མོ་བཞེངས། བཤད་སྒྲུབ་མཐའ་


TNT17_Page_0348
[མ་དཔེ་གཟིགས་ན་འདིར་གནོན།]

དག་གི་སྒོ་ནས་མདོ་རྒྱུད་ཀྱི་བསྟན་པ་སྒོ་ཐམས་ཅད་ནས་རྒྱས་པར་མཛད། དེ་རྗེས་ཐུགས་སྲས་དམ་པ་སྒྲ་སྒྱུར་ལོ་ཙཱ་བ་ཆེན་པོ་བློ་གྲོས་དཔལ་བཟང་པོ་རྒྱལ་ཚབ་དུ་མངའ་གསོལ་ནས་ལོ་ངོ་བཅོ་ལྔ་གདན་སར་བཞུགས་པ་དང༌། དེ་རྗེས་མཁན་ཆེན་ཕྱོགས་ལས་རྣམ་རྒྱལ་གྱིས་ལོ་དྲུག་གདན་ས་མཛད། དེ་རྗེས་ལོ་གསུམ་ཙམ་ནས་མཁས་གྲུབ་དཀོན་མཆོག་རྒྱལ་མཚན་གདན་སར་མངའ་གསོལ་མཛད་དེ། དེ་རྣམས་ཀྱི་རིང་ལ་ཡང་ཀུན་མཁྱེན་ཆོས་ཀྱི་རྒྱལ་པོ་ཉིད་གནས་མཆོག་དམ་པ་འདི་ཉིད་དུ་བཤད་སྒྲུབ་ཀྱི་རྒྱལ་མཚན་འཛིན་པ་དང༌། ཕྱོགས་བཞིའི་རི་ཁྲོད་སྣ་ཚོགས་སུ་སྒྲུབ་བརྒྱུད་ཀྱི་བསྟན་པ་སྤེལ་བ་དང༌། ཆོས་སྡེ་དང་གྲྭ་ས་ཐ་དད་པ་རྣམས་སུ་ཆོས་ཀྱི་འཁོར་ལོ་མཐའ་ཡས་པ་བསྐོར་བར་མཛད། དེ་ལྟར་ཀུན་མཁྱེན་ཆེན་པོ་འདིའི་སྐུ་ཐོག་ལ་ཚོགས་པ་ཉུང་དུས་སུ་ཡང་སྟོང་ཕྲག་གཉིས་རེ་འཚོགས། མང་བ་ལ་ཚོད་བཟུང་དུ་མེད། ནམ་ཞག་རྒྱུན་དུ་མདག་སྦྱར་མཚམས་བཅད་པ་རང་ཡང་སྟོང་ཕྲག་རེ་མི་འཆད་པ་འབྱུང༌། གནས་འདིར་འཚོགས་ཕྱིན་དགེ་སྦྱོར་གྱི་སྣེ་མི་ཟིན་པ་ཡེ་མི་ཡོང༌། སེམས་འབྲེལ་སྐོར་གསུམ་དང༌། བྱམས་ཆོས་སྡེ་ལྔ་དང༌། བསླབ་བསྡུས་སྤྱོད་འཇུག་སོགས་གཞུང་ལུགས་ཀྱི་འཆད་ཉན་དང༌། དབང་སྒྲུབ་མཆོད་ལག་ལེན་མན་ངག་སྒོ་ཐམས་ཅད་ནས་སྤེལ་བས། བཤད་ཉན་གྱི་ཟུར་ཆོས་པ་ཡང་ལྔ་བཅུ་ཙམ་རེ་རྟག་ཏུ་བཞུགས། མདོར་ན་ངེས་


TNT17_Page_0349
[མ་དཔེ་གཟིགས་ན་འདིར་གནོན།]

དོན་གྱི་བསྟན་པ་ནམ་ལངས་པ་དང་ཉི་མ་ཤར་བ་བཞིན་དུ་གྱུར་པས། སྔོན་ཆོས་རྗེ་ཀུན་སྤངས་ཆེན་པོས་གནས་འདིར་ཕ་ལས་བུ་ལྷག བུ་ལས་ཚ་ལྷགཚ་ལས་ཡང་ཚ་ལྷག་པ་འབྱུང་ཞེས་དང༌། ད་ལྟ་བཟང་ལྡན་བར་མར་ཆོས་འཆད། མ་འོངས་པ་ན་མཆོད་རྟེན་བཞེངས་ཞེས་ལུང་བསྟན་པ་ཐོག་ཏུ་བབ་པ་དེར་གདའ། དེ་ནས་སླར་ཡང་མཁན་ཆེན་ཕྱོགས་ལས་རྣམ་རྒྱལ་གྱིས་ལོ་བཅོ་ལྔའི་བར་གདན་ས་མཛད་པ་དང༌། དེ་རྗེས་རིམ་ཅན་དུ་ཀུན་མཁྱེན་བྱང་ཆུབ་སེང་གེ མཁས་མཆོག་ཉ་དབོན་ཆེན་པོ་ཀུན་དགའ་དཔལ། མཁན་ཆེན་རྒྱལ་བ་ཇོ་བཟང༌། རྒྱལ་སྲས་ཆོས་དཔལ་མགོན་པོ། འདྲེན་མཆོག་ཤེས་རབ་བཟང་པོ། འཇམ་དབྱངས་དཀོན་མཆོག་བཟང་པོ། མཁས་བཙུན་ཆོས་དཔལ་བཟང་པོ། འཇིམས་ཆེན་དཀོན་མཆོག་རྒྱལ་མཚན། འཇིམས་ཆེན་བསོད་ནམས་རྒྱལ་མཚན། རྒྱལ་བ་ནམ་མཁའ་ཆོས་སྐྱོང་སྟེ། དེ་ཡན་ཆད་མདོ་སྔགས་མཐའ་དག་དཔལ་ཇོ་ནང་པ་ཁོ་ནའི་བཀའ་སྲོལ་འདྲེས་མེད་ཁོ་ན་ཡིན་ཞིང༌། གདན་རབས་དེ་ཐམས་ཅད་རིགས་ལྡན་གྱི་སྤྲུལ་པའི་སྐུ་ཡིན་པར་གྲགས་སོ། །དེ་རྗེས་ཀྱང་གདན་རབས་སུ་བྱོན་པ་ཐམས་ཅད་མཁས་བཙུན་བཟང་པོ་ཤ་སྟག་བྱོན་པ་ལགས་ཏེ། འདྲེན་མཆོག་ནམ་མཁའི་མཚན་ཅན་གྱི་རྗེས་སུ། བྱང་སེམས་དཔལ་ལྡན་རིན་ཆེན། མཚུངས་མེད་ཆོས་སྐྱོང་རྒྱལ་མཚན། སྒོ་རུམ་


TNT17_Page_0350
[མ་དཔེ་གཟིགས་ན་འདིར་གནོན།]

ཀུན་དགའ་ལེགས་པ། བསྟན་འཛིན་ནམ་མཁའ་བཟང་པོ། མཁས་པ་རིན་ཆེན་བཀྲ་ཤིས། རྗེ་བཙུན་ཀུན་དགའ་གྲོལ་མཆོགབསྟན་འཛིན་ཀུན་དགའ་དཔལ་བཟང་རྣམས་བྱོན། དེ་རྗེས་ད་ལྟའི་བླ་མ་དམ་པའོ། གཞན་ཡང་གནས་འདིར་རི་ཁྲོད་སོ་སོའི་སྒྲུབ་གནས་སྐྱོང་བའི་སྒྲུབ་པ་མོ་དང་སྒྲུབ་ཆེན་གྲུབ་བརྙེས་མང་པོ་དང༌། ཟུར་ཆོས་ཀྱི་སློབ་དཔོན་དང༌། རྡོར་འཛིན་མཛད་པ་སོགས་མཁས་གྲུབ་དུ་མ་ཞིག་བྱོན་པ་ལགས་ནའང༌། མཐའ་ཡས་པར་བརྗོད་ཀྱི་ག་ལ་ལང༌། སྐབས་འདི་དག་ཏུ་སྤྲོ་ན། ཆོས་རྗེ་ཡབ་སྲས་ལ་སོགས་པ་བླ་མ་རྣམས་ཀྱི་ཆེ་བརྗོད། རྣམ་ཐར་རྒྱས་བསྡུས་རྣམས་ནས་ཅི་རིགས་པར་བླངས་ལ་འཚམ་པར་བཤད་དོ། །གསུམ་པ། སྒྲུབ་བརྒྱུད་ཆུ་བོའི་གཞུང་ལྟར་རྒྱུན་མ་ཆད་ཅིང་དར་བའི་གཟི་བརྗིད་དཔལ་དང་ལྡན་པའི་ཡོན་ཏན་ནི། ཁ་བ་ཅན་འདི་ན་སྔོན་སྒྲུབ་གནས་བསམ་གྱི་མི་ཁྱབ་པ་བྱོན་ཞིང། ད་ལྟར་ཡང་སྒྲུབ་གྲྭ་མང་དུ་ཡོད་མོད་ཀྱི། སྒྲུབ་གྲྭ་འདི་དང་པོར་ཚུགས་པ་དང་དུས་མཉམ་པའི་སྒྲུབ་གྲྭ་བཤད་གྲྭ་རྣམས་ལྟ་སྨོས་ཀྱང་ཅི་དགོས། འདི་དག་ལས་ཆེས་འཕྱི་བ་དུས་ཕྱིས་བཏབ་པ་རྣམས་ཀྱང༌། འགའ་ཞིག་ནི་རྩ་བ་ནས་སྟོངས། འགའ་ཞིག་ནི་གྲོང་ཡུལ་དང་སེར་ཁྱིམ་དུ་སོང༌། ཁ་ཅིག་སྔོན་གྱི་ཤུལ་དུ་ད་ལྟ་སྒྲུབ་གྲྭ་ཡོད་པའང་འདུག་མོད་ཀྱི། བར་སྐབས་སུ་སྟོངས་པའི་ཤུལ་ལ་གསར་འདེབས་བྱས་པ་དང༌། ཁ་


TNT17_Page_0351
[མ་དཔེ་གཟིགས་ན་འདིར་གནོན།]

ཅིག་སེར་ཁྱིམ་གྱི་ས་ནས་གཙང་མའི་གྲྭ་གསར་དུ་ཕྱེ་བ་དང༌། བར་སྐབས་སུ་སེར་ཁྱིམ་དུ་སོང་བ་རྣམས་ཕུད་ནས། དེའི་ཤུལ་དུ་གྲྭ་ཚང་ངམ་སྒྲུབ་གྲྭ་གསར་འཛུགས་བྱས་པ་ཁོ་ན་ཡིན་གྱི། ལོ་སུམ་བརྒྱ་བཞི་བརྒྱ་ཙམ་དུ་གང་སྟོངས་དང་སེར་ཁྱིམ་ལ་སོགས་པས་བར་མ་ཆོད་པར། བླ་བརྒྱུད་ཆོས་བརྒྱུད་གཅིག་ཅིང༌། ཉམས་ལེན་གྱི་རྒྱུན་གཅིག་པའི་སྒྲུབ་བརྒྱུད་བར་མ་ཆད་པར་དར་བ་ནི། བོད་གངས་རིའི་ཁྲོད་ན་སྒྲུབ་གནས་དམ་པ་འདི་ཁོ་ན་ལས་གཞན་མེད། གནས་འདིར་ནི་མ་ཅིག་རི་མ་ནས་གཟུང་སྟེ། དེང་སང་གི་བར་དུ་སྒྲུབ་གྲྭ་རྒྱུན་མ་ཆད་པའི་དབང་དུ་བྱས་ནས། ལོ་ལྔ་བརྒྱ་ཙམ་སོང་ཞིང༌། ཆོས་རྗེ་ཀུན་སྤངས་ཆེན་པོ་ཕེབས་པ་ནས་ཆོས་བརྒྱུད་གཅིག་ཅིང༌། ཉམས་ལེན་གྱི་རྒྱུན་གཅིག་པའི་སྒྲུབ་བརྒྱུད་འདི་ཁོ་ན་ལའང༌། ད་ལྟ་ཡན་ཆད་དུ་ལོ་བཞི་བརྒྱ་ལྷག་ཙམ་སོང་ངོ༌། །དེ་ལྟར་ན་གནས་གཅིག་ཏུ་ཚུགས་པའི་སྒྲུབ་བརྒྱུད་ལ་དཔལ་ཇོ་མོ་ནང་དང༌། གནས་གཅིག་ཏུ་ཚུགས་པའི་བཤད་གྲྭ་ལ་གསང་ནེའུ་ཐོག་བསྟན་པའི་རྒྱུན་གང་སྟོངས་མེད་པར་གནས་ཡུན་རིང་བ་ཡིན་ཅེས། ཤེས་ལྡན་བློ་གཟུ་བོར་གནས་པ་རྣམས་ལ་གྲགས་ཤིང་ཕྱོགས་གཅིག་ནས་དོན་ལའང་གནས་པ་ཡིན་མོད་ཀྱི། འོན་ཀྱང་དཔལ་ལྡན་གསང་ཕུ་ན། ཕྱིས་བྱུང་ལོ་ཉིས་བརྒྱ་ཚུན་ལ། ས་དགེ་སོ་སོའི་གྲུབ་མཐའ་འཛིན་པ་མ་གཏོགས། རྔོག་


TNT17_Page_0352
[མ་དཔེ་གཟིགས་ན་འདིར་གནོན།]

ལོ་ཡབ་སྲས་དང༌། ཕྱ་ཚང་ལ་སོགས་པ་གསང་ཕུ་བ་རང་ལུགས་ཀྱི་གྲུབ་མཐའ་འཛིན་པ་མེད་ལ། གནས་མཆོག་འདིར་ནི་ལྟ་གྲུབ་ཉམས་ལེན་གྱི་རྒྱུན་གཅིག་ཁོ་ནས་བྱིན་རླབས་ཀྱི་རྒྱུན་ལ་བསྲེ་བསླད་མེད་པ་དང༌། གཞན་ཡང་ཚིག་བཤད་ཙམ་གྱི་རྒྱུན་མ་ཡིན་པར་སྒྲུབ་པ་ཉམས་ལེན་སྙིང་པོར་བྱེད་པའི་སྲོལ་ཀ་རྒྱུན་མ་ཆད་ཅིང༌། དུས་ཀྱི་ཐ་མ་འདི་ལྟ་བུར་ཡང་ལག་ལེན་དུ་ཐེབས་བའི་གྲ་ཡིན་པས་ན། ཅིག་ཤོས་ལས་ཀྱང་ཆེས་ཁྱད་པར་དུ་འཕགས་ཤིང༌། ཆེས་ངོ་མཚར་རྨད་དུ་བྱུང་བ་ཡིན་ནོ། །སྒྲུབ་གནས་ཀྱི་རྒྱལ་པོ་དཔལ་ལྡན་ཇོ་མོ་ནང་འདིར་མཐོང་གྲོལ་ཆེན་མོ་གནས་ཀྱི་ལྟེ་བར་བྱས་པའི་མཐའ་སྐོར་གྱི་སྒྲུབ་གནས་བྱིན་རླབས་ཅན་རྣམས་ཅུང་ཟད་སྨོས་ན། རྒྱབ་རིའི་གཡོན་ཕྱོགས་ཉི་བསྟན་འདི་ལ། ཆོས་རྗེ་ཡབ་སྲས་བཞིས་བཞུགས་ཤིང་རྡོ་རྗེ་ཕག་མོའི་གནས་སྐྱིད་ཕུག་བདེ་ལྡན་འོད་གསལ་བྲག དེའི་གཡས་ཕྱོགས་ན་རིན་པོ་ཆེ་ཤེས་རབ་འབུམ་པ་དང༌། མཁས་མཆོག་ཉ་དབོན་ཆེན་པོ་ཀུན་དགའ་དཔལ་དང༌། རྒྱས་སྲས་དངུལ་ཆུ་ཆོས་རྫོང་བའི་ཐུགས་སྲས་རྒྱ་མ་པ་ཡོན་ཏན་འོད་སོགས་སྐྱེས་བུ་དམ་པ་དུ་མས་བཞུགས་པའི་གནས་ཤུག་པ་གནམ་འཕྱང་བདེ་ཆེན་བྲག དེའི་སྟོད་ན་མཁས་གྲུབ་ཨོ་རྒྱན་པ་དཀོན་མཆོག་གྲགས་པའི་བཞུགས་གནས་སྒྲུབ་ཁང་འདི་ལགས། སྦུད་བཀྲ་དབུ་རྒྱན་པ་ལས་ཅུང་ཟད་བགྲེས་པ་གཅིག་ཡིན། ཨོ་རྒྱན་དུ་ལོ་ལྔ་བཞུགས། གྲུབ་རྟགས་མངོན་


TNT17_Page_0353
[མ་དཔེ་གཟིགས་ན་འདིར་གནོན།]

རྒྱུར་བ་མངའ། ཆཽས་རྗེ་ཀུན་སྤངས་ཆེན་པོའི་མཆེད་གྲོགས་གོང་མ་ལགས་པར་གདའ། སྐྱིད་ཕུག་གི་གཡོན་ཕྱོགས་ཀྱི་བྲག་ན། མ་ཅིག་རི་མའི་ཆོས་གྲྭ་དང་བཞུགས་གནས། དེའི་གཡོན་ཕྱོགས་སུ་ཕུག་པ་ཆེན་པོ་གོང་འོག་གཉིས་ཡོད་པའི། གོང་མ་ནི་སློབ་དཔོན་ཆེན་པོ་པདྨ་འབྱུང་གནས་ཀྱི་བཞུགས་གནས་དངོས་དེ་ཡིན་པར་གྲགས་ཤིང༌། ཕྱིས་གྲུབ་ཐོབ་འདར་ཕྱར་རིན་ཆེན་བཟང་པོས་ཡུན་རིང་དུ་བཞུགས། སློབ་དཔོན་པདྨ་འབྱུང་གནས་དང་མངོན་སུམ་དུ་མཇལ། རྟ་མགྲིན་ཡང་གསང་གི་ཆོས་སྐོར་མཐའ་དག་གི་བཀའ་བབས་བརྙེས་ས་དེར་གདའ། ཕུག་པ་འོག་མ་འདིར་གྲུབ་ཐོབ་འདར་ཕྱར་ཉིད་ཀྱིས་བདག་མེད་ལྷ་མོ་བཅོ་ལྔ་དང༌། འཁོར་ལོ་སྡོམ་པ་ལྷན་སྐྱེས་སོགས་ཀྱི་ཞལ་གཟིགས་ས་དེར་གདའ། ཕུག་པ་འདི་གཉིས་ཀར་དུ་གྲུབ་ཐོབ་དེས་ཡུན་རིང་དུ་བཞུགས་པས། དེང་སང་འདར་ཕྱར་ཕུག་པ་གོང་འོག་ཏུ་གྲགས། སྐྱིད་ཕུག་གི་འོག་ན་མཁས་བཙུན་ཡོན་ཏན་བརྒྱ་མཚོ་དང༌། ཀུན་མཁྱེད་ཆོས་ཀྱི་རྒྱལ་པོ་གཉིས་ཅར་གྱི་སློབ་མ་དགེ་སློང་བཀྲ་ཤིས་བཟང་པོ་ཞེས་བྱ་བ། མངོན་ཤེས་ཐོགས་མེད་དུ་མངའ་བ། སྐུ་གཤེགས་དུས་བྱང་ཆུབ་ཀྱི་སེམས་སྤྱི་བོར་འཁྱིལ་བས་དབུ་གཙུག་ཏུ་གཙུག་ཏོར་གྱི་རྣམ་པ་ཤིན་ཏུ་རྒྱས་ཏེ་རྨོག་གི་ཁྱོན་ཙམ་བྱུང་བ། དེ་ལྟ་བུའི་བཞུགས་གནས་ཕུག་པ་དང༌། དེའི་འོག་ཕྱོགས་ན་ཀུན་མཁྱེན་ཆོས་ཀྱི་རྒྱལ་པོ་ཉིད་འཛིན་པའི་ཉམས་རྟོགས་མཐར་ཕྱིན་པའི་ཚུལ་


TNT17_Page_0354
[མ་དཔེ་གཟིགས་ན་འདིར་གནོན།]

བསྟན་ས་རྡོ་རྗེ་གདན་ཞེས་བྱ་བའི་ཕུག་པ་དང༌། པདྨ་གདན་ཞེས་བྱ་བའི་ཕུག་པ་གཉིས་ཡོད། དེའི་འོག་གཡོན་ངོས་བྲག་པདྨ་ཁ་འབུས་ལྟ་བུའི་རྩེ་ལ། ཆོས་རྗེ་ཀུན་སྤངས་ཆེན་པོ་དང༌། བྱང་སེམས་རིན་པོ་ཆེ་ཅུང་ཟད་བཞུགས་ཤིང༌། མཁས་བཙུན་ཡོན་ཏན་རྒྱ་མཚོས་ཡུན་རིང་བཞུགས་པའི་གཟིམས་ཁང་བདེ་བ་ཅན་ཞེས་བྱ་བ་འདིར། ཀུན་མཁྱེན་ཆོས་ཀྱི་རྒྱལ་པོས་ཀྱང་ཡུན་རིང་དུ་བཞུགས། སློབ་དཔོན་ཆེན་པོ་པདྨ་འབྱུང་གནས་མཁའ་འགྲོའི་ཚོགས་དང་བཅས་པ་དང༌། ཁྲོ་བོའི་རྒྱལ་པོ་རྟ་མགྲིན་དྲེགས་པའི་ཚོགས་ཀྱིས་བསྐོར་བ་ཞལ་གཟིགས། བདེ་བ་ཅན་གྱི་སྨོན་ལམ་མཛད་པས་ནུབ་བདེ་བ་ཅན་གྱི་ཞིང་ཁམས་ཀྱི་བཀོད་པ་དངོས་སུ་གཟིགས་ཤིང༌། མཐོང་གྲོལ་གྱི་སྐུ་འབུམ་ཆེན་མོ་ལ་ལུས་ཀྱི་ལས་དང༌། རྒྱུ་ནོར་ལོངས་སྤྱོད་ཀྱི་འབྲེལ་པ་ཐོགས་ཚད་རང་གི་སྐལ་བ་དང་འཚམ་པར་སྐྱེ་བ་གཅིག་ནས་བརྩམས་ཏེ། སྐྱེ་བ་བདུན་ཚུལ་ཆད་ལ་ཞིང་ཁམས་རྣམ་དག་བདེ་བ་ཅན་དུ་སྐྱེ་ལ། ཐེག་ཆེན་ཆོས་ཀྱི་དགའ་སྟོན་ལ་སྤྱོད་པར་འགྱུར་བའི་འཁྲུལ་མེད་ཀྱི་ལྟས་མངོན་སུམ་དུ་གཟིགས། གནས་ཀྱི་མིང་བདེ་བ་ཅན་མཚན་དོན་དང་མཐུན་པ་ལགས། དེ་དག་གི་གཡོན་ངོས་ཕྱོགས་བློན་པོ་རིན་པོ་ཆེ་འཚོགས་པ་ལྟ་བུའི་བྲག་འདི་ལ། སྒྲུབ་གནས་དམ་པ་གསང་སྔགས་འཇིགས་མེད་སེང་གེ་རྫོང་ཞེས་བྱ་བ། ཆོས་རྗེ་ཀུན་སྤངས་ཀུན་ཏུ་བཟང་པོས་རྣལ་འབྱོར་ཡན་ལག་དྲུག་པ་དང༌། དཔལ་དུས་ཀྱི་འཁོར་ལོས་


TNT17_Page_0355
[མ་དཔེ་གཟིགས་ན་འདིར་གནོན།]

བསྟན་པ་སྤེལ་བའི་བར་དུ་དགེ་བའི་རྟགས་དང་མཚན་མ་བྱུང་བའི་གནས་དེ་ལགས། དེའི་འོག་ཏུ་རྟ་ར་གདོང་ཞེས་གྲགས་པ་འདི་ན། སྦུད་བཀྲ་ཨོ་རྒྱན་པའི་སློབ་མ་ཟླ་སེང་གིས་ཀྱང་ཅུང་ཟད་བཞུགས། ཀུན་མཁྱེན་ཆོས་ཀྱི་རྒྱལ་པོའི་སློབ་མ། གྲུབ་ཆེན་རྟ་ར་བ་ཞེས་བྱ་བ། ལྕེ་ཆུང་གི་བདུད་རྩི་ཁོ་ནས་ཚིམ་སྟེ། སྐུ་ཚེ་སྨད་ལོ་ཉི་ཤུ་རྩ་ལྔའི་བར་དུ་མི་ཟས་བཟའ་བཏུང་གཞན་རྣམས་གསོལ་མི་དགོས་པ་ལྟ་ཅི་སྨོས། མཐའ་ན་ཆུ་སྙིམ་པ་གང་ཙམ་ཡང་མ་གསོལ་བ། གདན་དང་ན་བཟའ་ལ་སོགས་པའི་སྤྲོས་པ་ཡེ་མི་དགོས་པ་དེས་བཞུགས་ཤིང༌། དེའི་སྟོད་བྲག་རི་ངོས་གཟར་པོའི་ཕུག་པ་ཆུང་ངུ་ཕལ་གྱིས་བགྲོད་དཀའ་བ་འདིར། ཀུན་མཁྱེན་ཆོས་ཀྱི་རྒྱལ་པོ་ཉིད་ཀྱི་སློབ་མ་གྲུབ་ཆེན་དབུས་པས་བཞུགས། གྲུབ་ཐོབ་དེ་ཡང་ཟླ་བ་ཕྱེད་ཕྱེད་ཙམ་མི་ཟས་ཡེ་གསོལ་མི་དགོས། ཐུགས་ཉམས་འུར་རེས་ཀྱི་སྐུ་འབུམ་ཆེན་མོའི་ཕྱིར་ངོས་ནས་བརྒྱུད་དེ་རྩེ་ལ་ཐལ་བྱུང་དུ་གཤེགས། ཆར་ཁེབས་ཀྱི་ཟེ་པྲོ་ལ་ཕྱག་ཡ་རེ་ཙམ་ཞབས་ཡ་རེ་ཙམ་བཞག་པའི་ངང་ནས་འཕགས་ཅིང་བསྐོར་བ་ལན་མང་དུ་མཛད། སླར་བུམ་ལྡིར་ཆེན་མོའི་སྟེང་དུ་འབེབས་ཀྱི་ཚུལ་དུ་རྡོ་རྗེའི་སྐྱིལ་ཀྲུང་ཕབ་པས་ཉམས་སད་འགྲོ་བ་ཞིག་ཡིན་པར་འདུག རྒྱབ་རིའི་གཡས་ཀྱི་ངོས་ལ་ཆོས་རྗེ་ཡབ་སྲས་ཐམས་ཅད་དང་བླ་མ་མཁའ་སྤྱོད་པ་ལ་སོགས་པ་མཁས་གྲུབ་དཔག་ཏུ་མེད་པའི་བཞུགས་གནས། མཁའ་སྤྱོད་ཟུང་


TNT17_Page_0356
[མ་དཔེ་གཟིགས་ན་འདིར་གནོན།]

འཇུག་རྡོ་རྗེའི་རྫོང་ཞེས་བྱ་བ། ད་ལྟ་འཁྱོག་པོའི་བྲག་ཅེས་ཟེར་བ་ཡང་དབེན་གནས་མཆོག་ངོ་མཚར་ཅན་འདི་བཞུགས། འདིར་ཆོས་རྗེ་ཀུན་མཁྱེན་ཆེན་པོས་སྲོག་རྩོལ་གྱི་ཉམས་རྟོགས་རྒྱུད་ནས་བཤད་པ་བཞིན་མཐར་ཕྱིན་པའི་ཚུལ་བསྟན། དེའི་གཡོན་དུ་བྲག་ཕུག་པདྨ་རཱ་ག་དང༌། གཡས་སུ་ཕག་མོའི་དུར་ཁྲོད་དོ། །གནས་མཆོག་དམ་པ་འདིར་ལྷོ་ནས་ཤར་གྱི་བར་མདུན་གྱི་རི་ལ། ཕུ་ན་རྫ་བྱེ་འུར་གྲགས་པ་འདི། ཆོས་རྗེ་ཀུན་སྤངས་ཆེན་པོ་དང༌། བྱང་སེམས་ཆེན་པོའི་སློབ་མ་མོ་གྲུབ་པ་ཐོབ་པ་ཞང་བཙུན་མ་ཡོན་ཏན་མཚོས་བཞུགས་ཤིང༌། དེ་ནི་འཛིན་པའི་ཉམས་རྟོགས་མཐར་ཕྱིན། རྩིག་པ་ལ་ཐོགས་མེད་དུ་གཤེགས། མ་ཟོས་བཀྲེས་མེད་ཟོས་ཀྱང་འཇུ། །ཐུར་སེལ་མི་འཛག་བདེ་བ་རྒྱས། །ཞེས་སོགས་ཀྱི་ཡོན་ཏན་མངོན་གྱུར་དུ་མངའ། ཕུ་ཤར་ནུབ་ཀྱི་རི་རྩེ་ལ་ཕར་འཕུར་ཚུར་འཕུར་མཛད་པར་གྲགས་ཤིང༌། ལས་སྟོད་པ་དབང་རྒྱལ་གྱིས་ཀྱང་བསྟོད་བསྐུར་ཆེར་མཛད་པ་དེ་ཡིན། དེ་རྗེས་ཀུན་མཁྱེན་ཆེན་པོས་ཀྱང་ཅུང་ཟད་བཞུགས་ཤིང༌། ཞལ་སློབ་སྒྲུབ་པ་མོ་ཡེ་ཤེས་རྒྱན་ཞེས་བྱ་བ་མངོན་ཤེས་རྒྱ་ཆེ་ལ་བརྟན་པ་མངའ། ཕྱི་ནང་བར་གསུམ་འཕྲལ་ཡུན་ཐམས་ཅད་ཐོགས་མེད་དུ་མཁྱེན་པ་ཞིག་དང༌། སྒྲུབ་པ་མོ་ཞང་བཙུན་མ་ཆོས་མཚོ་ཞེས་བྱ་བ། བདག་གཞན་བརྗེ་བའི་བྱང་ཆུབ་ཀྱི་སེམས་མངའ་བ་ནུས་མཐུ་ཆེན་པོས། དགེ་སློང་


TNT17_Page_0357
[མ་དཔེ་གཟིགས་ན་འདིར་གནོན།]

བཀྲ་ཤིས་བཟང་པོ་གཤེགས་ལ་ཁད་ཀྱི་དུས་སུ། ངའི་ཚེའི་ལྷག་མ་ལོ་བདུན་ཁྱེད་ལ་འབུལ། ཁྱེད་ཀྱི་ཚབ་ཏུ་ང་འགྲོ་གསུང་ནས་དེ་མ་ཐག་སྙུང་བ་མེད་པར་གཤེགས། དགེ་སློང་པའང་དེ་འཕྲལ་སྙུང་བ་གདངས། ལོ་བདུན་བཞུགས་ཏེ། དེ་ལྟ་བུའི་གྲུབ་བརྙེས་ངོ་མཚན་ཅན་དེ་རྣམས་ཀྱིས་བཞུགས་པའི་གནས་ལགས། འདིའི་གཡོན་ན་གཞོང་སྟོད་ཀྱི་དུར་ཁྲོད་དང༌། ཤར་ངོས་ཀྱི་ལུང་པ་ན། འབྲོག་མིའི་སློབ་མ་མོ་གྲུབ་པ་ཐོབ་པ་པྲད་མོ་དཀོན་ནེའི་སྒྲུབ་གནས་རྣམས་བཞུགས་ཤིང༌། གཞན་ཡང་ཕྱིས་ཐེབས་པ་ལ། ཀུན་མཁྱེན་ཆོས་ཀྱི་རྒྱལ་པོའི་སློབ་མ་སྒྲུབ་ཆེན་མ་འོད་གསལ་སྐྱིད་ཀྱི་སྒྲུབ་གནས་དང༌། སྒྲུབ་ཆེན་མ་དཔལ་མོ་མཚོའི་སྒྲུབ་གནས། དེང་སང་རྫ་ཤར་ནུབ་ཏུ་གྲགས་པ་གཉིས། གཞན་ཡང་གླིང་བཞིར་གྲགས་པ། བདེ་ཆེན་བྱང་ཆུབ་གླིང༌། འོད་ཟེར་གླིང༌། ཁྲའུ་གླིང༌། བསམ་གཏན་གླིང་སྟེ། གླིང་བཞི་དང༌། དབུ་རྩེ་གཙུག་ལག་ཁང་ལྷ་ཁང་དུ་མ་དང་བཅས་བཞུགས་པ་འདི་ལགས། དེ་དག་ནི་གནས་སྤྱིའི་བཤད་པ་མདོ་ཙམ་ལགས་ཏེ། ཕྱོགས་བཅུའི་སངས་རྒྱས་ཀུན་གྱི་ཞིང་ཁམས་འདིར། །བརྩོན་འགྲུས་ལྡན་པས་རྩེ་གཅིག་འབད་གྱུར་ན། །མ་དག་རྣམ་སྨིན་ལུས་འདི་གནས་གྱུར་ནས། །རྡོ་རྗེའི་སྐུ་མཆོག་ཚེ་འདི་ཉིད་ལ་འགྲུབ། །བརྩོན་པ་འབྲིང་པོའང་བར་དོར་སངས་རྒྱ་ཞིང༌། །བརྩོན་འགྲུས་ཐ་མ་ཡིས་ཀྱང་ལམ་སྣ་ཟིན། །གནས་


TNT17_Page_0358
[མ་དཔེ་གཟིགས་ན་འདིར་གནོན།]

མཆོག་འདི་དང་ཆོས་བརྒྱུད་འདི་ཉིད་ལ། །དམ་ཚིག་མ་ཉམས་སྡིག་ཆེན་མ་བསགས་ན། །འབད་རྩོལ་མེད་ཀྱང་སྙོམས་ལས་དབང་གྱུར་ཀྱང༌། །གནས་འདིར་བསྡད་པ་ཙམ་གྱིས་དགེ་སྦྱོར་སྐྱེ། །ས་བཅུའི་བྱང་སེམས་རིགས་ལྡན་སྤྲུལ་པའི་སྐུ། །དེ་དག་རྣམས་ཀྱི་བྱིན་རླབས་ངང་གིས་འཇུག །དད་པ་ཆེན་པོས་ཕྱག་མཆོད་སྐོར་བ་དང༌། །གསོལ་བ་བཏབ་ན་ཡིད་ཆེས་འཕྲལ་འཕྲལ་འབྱུང༌། །ལན་གཅིག་མཇལ་བའང་བར་ཆད་ཀུན་ཞི་ཞིང༌། །ལན་གསུམ་བསྐོར་བས་ངན་འགྲོའི་སྐྱེ་སྒོ་ཁེགས། །ལན་མང་མཇལ་ན་མཚམས་མེད་བྱས་པ་ཡང༌། །རྣམ་པར་དག་ནས་བདེ་ཆེན་གནས་སུ་འགྲོ། །མཐོང་ཐོས་དྲན་རེག་ཐམས་ཅད་དོན་ལྡན་པའི། །གནས་མཆོག་འདི་དང་མཚུངས་པ་འགའ་ཡང་མེད། །ཟུང་འཇུག་ཡེ་ཤེས་ཆེན་པོའི་ཕོ་བྲང་འདིར། །དད་པ་བསྐྱེད་ཅིང་འབྲེལ་བ་འཇོག་པ་རྣམས། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །རྣམ་མཁྱེན་གོ་འཕང་ཐོབ་པའི་དགེ་ལེགས་འཕེལ། །[ཞེས་དགེ་སློང་ཀུན་དགའ་སྙིང་པོས་བྲིས།] བཀྲ་ཤིས། དགེ་ལེགས་འཕེལ།སྲས་བཅས་རྒྱལ་བ་ཀུན་གྱིས་བྱིན་བརླབས་པས། །དངོས་གྲུབ་ཐམས་ཅད་འབད་མེད་འབྱུང་བའི་གནས། །འདིར་ནི་མཁའ་མཉམ་སེམས་ཅན་དོན་ཕྱིར་དུ། །བདག་ཀྱང་སྒྲུབ་པའི་རྒྱལ་མཚན་འཛིན་པར་ཤོག །ཤུ་བྷཾ།

སྒྲུབ་གནས་སྐྱིད་ཕུག་བདེ་ལྡན་གྱི་གནས་བཤད།


TNT17_Page_0359
[མ་དཔེ་གཟིགས་ན་འདིར་གནོན།]

སྒྲུབ་གནས་སྐྱིད་ཕུག་བདེ་ལྡན་གྱི་གནས་བཤད་བཞུགས།


TNT17_Page_0360
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། དཔལ་ལྡན་དུས་ཀྱི་འཁོར་ལོ་དང༌། །རྡོ་རྗེ་ཕག་མོ་རྣལ་འབྱོར་མ། །མཐུ་སྟོབས་དབང་ཕྱུག་བིརྺ་པ། །ཆོས་སྐུ་ཀུན་བཟང་གཉིས་པ་ནི། །ཀུན་སྤངས་ཐུགས་རྗེ་བརྩོན་འགྲུས་སོགས། །ཆོས་རྗེ་ཡབ་སྲས་རྣམ་བཞི་ཡི། །ཞབས་ཀྱི་པད་མོ་ལ་བཏུད་དེ། །འདིར་ཚོགས་རྣམས་ལ་བྱིན་གྱིས་རློབས། སྒྲུབ་གནས་སྐྱིད་ཕུག་བདེ་ལྡན་འདིའི་ཆེ་བའི་དབང་དུ་བྱས་ན། ཤེས་རབ་ཨེ་ཡིག་ཆོས་ཀྱི་འབྱུང་གནས་མཆོག །ཝཾ་ཡིག་བདེ་བ་ཆེ་དང་མཉམ་སྦྱོར་བ། །ཟུང་འཇུག་ཡེ་ཤེས་མཚོན་པའི་བརྡ་ཐབས་ཅན། །གནས་ཀྱི་བཀོད་པ་ངོ་མཚར་རྨད་དུ་བྱུང༌། །ལྷུན་སྟུག་བྲག་རི་ཡངས་ཤིང་མཐོ་བ་ནི། །རྣམ་དག་ལྟ་བ་མཐོ་ཞིང་ཡངས་པ་མཚོན། །དེ་ལ་བྱ་རྒྱལ་འཕུར་ལྡིང་རོལ་བ་ནི། །ཉམས་རྟོགས་ཡོན་ཏན་སྣ་ཚོགས་


TNT17_Page_0361
[མ་དཔེ་གཟིགས་ན་འདིར་གནོན།]

འཆར་བའི་རྟགས། །རྩ་བ་མེ་ཏོག་འབྲས་བུའི་ཚལ་གྱིས་མཛེས། །རྟགས་དང་ཉམས་མྱོང་ཕྱོགས་མེད་ཤར་བ་མཚོན། །རི་དྭགས་ཚོགས་རྣམས་དགའ་ཞིང་རྩེ་བའི་གནས། །ཐུགས་རྗེ་ཆེན་པོས་འགྲོ་བ་སྐྱོང་བའི་རྟགས། །གསང་བ་ནམ་མཁའི་ཁམས་ཀྱི་ཕུག་པ་ནི། །རྡོ་རྗེ་ཕག་མོའི་གནས་མཆོག་པཱ་ཊ་ན། །རང་བྱུང་མཆོད་རྟེན་གནས་དང་མཚུངས་པ་སྟེ། །དུས་དང་དུས་ལ་བདུད་རྩིའི་དྲི་བཟང་འབྱུང༌། །དེ་ཡང་གཤིན་རྗེ་གཤེད་དམར་ནག་གི་རྒྱུད་ལས་གསུངས་པ། ཙེ་ཏྱ་པཱ་ཊ་ན་མཆོད་རྟེན་གྱི་གྲོང་ཁྱེར་ཞེས་ཀྱང་བྱ། དགྱེས་རྡོར་དང་ཁ་སྦྱོར་སོགས་ལས། ཙཱ་རི་ཏྲ་ཞེས་བཤད་པ། རྒྱ་གར་ལྷོ་ཕྱོགས་ན་འཕྲིན་ལས་ཀྱི་རྡོ་རྗེ་ཕག་མོའི་རང་བྱུང་གི་གནས་མྱོས་བྱེད་བཟང་པོའི་དྲི་རང་བྱུང་དུ་འཐུལ་བ་ཞིག་ཡོད་པ་ཡིན་ལ། དེ་


TNT17_Page_0362
[མ་དཔེ་གཟིགས་ན་འདིར་གནོན།]

དང་མཚུངས་པར་གནས་མཆོག་དམ་པ་འདིར་ཡང༌། རྡོ་རྗེ་ཕག་མོས་བྱིན་གྱིས་བརླབས་པའི་རང་བྱུང་གི་གནས་ཡིན་པའི་རྟགས་སུ་དུས་བཟང་ཅི་རིགས་པ་ལ་ནང་མཆོད་ཀྱི་དྲི་བཟང་པོ་རང་བྱུང་དུ་འཐུལ་བའི་རྣམ་པ་ད་ལྟ་ཡང་འབྱུང༌། དེ་ལ་གནས་འདིར་ཆོས་རྗེ་ཀུན་སྤངས་ཆེན་པོས། སྒྲུབ་གནས་ཀྱི་དགེ་མཚན་དུ་མ་ཡོད་པར་གཟིགས་ཏེ། དབྱར་དགུན་བཅུ་གསུམ་ཙམ་བཞུགས། དེ་རྗེས་ཡབ་སྲས་གཞན་གཉིས་ཀྱིས་ཀྱང་ཐོག་རེ་བཞུགས་ཤིང༌། དེ་ནས་ཀུན་སྤངས་ཆོས་གྲགས་དཔལ་བཟང་ལ་སོགས་པ་དུ་མས་རིམ་ཅན་དུ་བཞུགས། ཁྱད་པར་ཀུན་མཁྱེན་དུས་གསུམ་སངས་རྒྱས་ཀྱིས་ཀྱང་ལོ་གཉིས་བཞུགས་ཤིང༌། དཔལ་དུས་ཀྱི་འཁོར་ལོའི་རྒྱུད་འགྲེལ་ཡོངས་སུ་རྫོགས་པའི་གཟབ་བཤད་ཐོག་མར་མཛད་པའི་གནས་ཡིན་ལ། ཡང་སྔོན་ཆོས་རྗེ་ཀུན་སྤངས་ཆེན་པོས་སློབ་དཔོན་རྣལ་འབྱོར་གྱི་དབང་ཕྱུག་བིརྺ་པ་དངོས་སུ་ཞལ་གཟིགས། ལམ་འབྲས་ཀྱི་འཁྲུགས་སྡེབ་པ་དང༌། རྡོ་རྗེའི་ཚིག་རྐང་གི་ཊཱི་ཀ་གྱིས་ཤིག་པར་ལུང་བསྟན་པ་ཡང་བརྙེས། ལམ་འབྲས་ཀྱི་བསྟན་བཅོས་རྣམས་ཀྱང་འདིར་མཛད་པར་གདའ་བས། སློབ་དཔོན་རྣལ་འབྱོར་གྱི་དབང་ཕྱུག་བིརྺ་པས་བྱིན་གྱིས་བརླབས་པའི་གནས་ཆེན་ཡང་ཡིན་ནོ། །ཞུས་དག །དགེ་ལེགས་འཕེལ། །

འཁྱོག་པོ་རི་ཁྲོད་ཀྱི་གནས་བཤད།


TNT17_Page_0363
[མ་དཔེ་གཟིགས་ན་འདིར་གནོན།]

འཁྱོག་པོ་རི་ཁྲོད་ཀྱི་གནས་བཤད་བཞུགས། །


TNT17_Page_0364
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། རྡོ་རྗེ་འཆང་དབང་དཔལ་ལྡན་དུས་འཁོར་དང༌། །ཞེས་པ་ནས། རི་ཁྲོད་ཆེན་པོ་ཇོ་མོ་ནང་ཞེས་ཡོངས་སུ་གྲགས་པ་འདིའི་གནས་ཀྱི་ཡང་དབེན་རྒྱལ་མཚན་གྱི་ཏོག་ལྟ་བུར་གྱུར་པ་ནི། སྒྲུབ་གནས་མཁའ་སྤྱོད་བདེ་ལྡན་ཞེས་བྱ་བ་འདི་ཡིན་ལ། སའི་མཐིལ་ཆོས་འབྱུང་གྲུ་གསུམ་ལྟ་བུ། ལུང་པ་པདྨ་འདབ་བརྒྱད་ཁ་ཕྱེ་བ་འདྲ་བ། གནམ་འཁོར་ལོ་རྩིབས་བརྒྱད་ཀྱི་དབྱིབས་ཅན། མདུན་རི་འབྲུའི་ཕུང་པོ་ལ་རིན་པོ་ཆེའི་འཕྲཻང་བ་ལན་གསུམ་དུ་གཡོགས་པ་འདྲ་བ། ལྷོའི་རི་རྒྱལ་བ་ཚེ་དང་ཡེ་ཤེས་དཔག་ཏུ་མེད་པ་མཉམ་གཞག་གི་ཕྱག་རྒྱ་མཛད་པ་ལས། བདུད་རྩིའི་ཆུ་རྒྱུན་འབབས་པ་ལྟ་བུ། ལྷོ་ནུབ་ཀྱི་ཕྱོགས་ན་རྒྱལ་བ་ཐམས་ཅད་སྐྱེད་པའི་ཡུམ་རྡོ་རྗེ་ཕག་མོའི་སྐུའི་རྣམ་པ་ཅན་གྱི་རི་མཐོན་པོ། ཆུ་སྐྱེས་ཀྱི་ཟེའུ་འབྲུ་རྒོད་པའི་དབུས་ནས་


TNT17_Page_0365
[མ་དཔེ་གཟིགས་ན་འདིར་གནོན།]

བདུད་རྩིའི་ཆུ་རྒྱུན་འབབ་པ། དེའི་དྲུང་ན་དངོས་གྲུབ་འབྱུང་བ་ཕག་མོའི་དུར་ཁྲོད་དང་བཅས་པ། དེ་དང་ཉེ་བའི་གཡས་ཀྱི་རི་ལ་དུང་དང་རྒྱལ་མཚན་ལ་སོགས་པ་བཀྲ་ཤིས་ཀྱི་རྟགས་བརྒྱད་ཚང་བ། རྒྱབ་རི་བདུད་རྩི་ཅན་གྱི་ཤིང་གི་ནགས་ཚལ་གྱིས་ཁེབས་པ། སྐུ་གསུང་ཐུགས་རྣམ་པར་དག་པའི་རི་བོ་རྩེ་མོ་གསུམ་པ་རིགས་གསུམ་མགོན་པོའི་ཚུལ་དུ་བཞུགས་ཤིང༌། གཡོན་གྱི་ཕྱོགས་ན་བྲག་རྒྱལ་པོ་ཆེན་པོ་སྡེ་བཞི་ཆོས་ཉན་པའི་རྣམ་པ་ཅན་དང༌། མཁའ་འགྲོ་གསང་བའི་བྲག་ཕུག་པདྨ་རཱ་ག་ལ་སོགས་པ་སྒྲུབ་གནས་དགེ་མཚན་ཅན་དུ་མའི་དབུས་ན། བྲག་རི་རྡོ་རྗེ་རྩེ་ལྔ་པ་ལྟ་བུའི་སྟེང་དུ། རིགས་ལྡན་སྤྲུལ་པའི་སྐུ་ཀུན་སྤངས་ཀུན་ཏུ་བཟང་པོས་སྒྲུབ་གནས་ཆེན་པོ་མཛད། བྱང་སེམས་ཆེན་པོ་དང་མཁས་བཙུན་ཆེན་པོས་ཀྱང་རིམ་ཅན་དུ་བཞུགས། ཆོས་རྗེ་ཀུན་


TNT17_Page_0366
[མ་དཔེ་གཟིགས་ན་འདིར་གནོན།]

མཁྱེན་ཆེན་པོས་ཀྱང་ལོ་གཉིས་ངོ་གསུམ་བཞུགས། སོར་སྡུད་བསམ་གཏན་སྲོག་རྩོལ་གསུམ་མཐར་ཕྱིན་པའི་ཚུལ་སྟོན་ས་ཡང་འདི་ལགས། དེ་རྗེས་དམ་པ་དེ་ཉིད་ཀྱི་ཐུགས་སྲས་བླ་མ་སངས་རྒྱས་བཟང་པོ་ཞེས་བྱ་བ། འཁྲུངས་ཡུལ་དབུ་རུ་སྟོད་པ་ཡིན། དགོན་པ་སྤྲིན་ཆེན་དུ་རབ་བྱུང་མཛད། མཁས་བཙུན་ཡོན་ཏན་རྒྱ་མཚོའི་ཡང་ཞབས་ལ་ཐུག །ཆོས་རྗེ་ཀུན་མཁྱེན་ཆེན་པོའི་དྲུང་དུ་རྣལ་འབྱོར་ཡན་ལག་དྲུག་པའི་འཁྲིད་ཞུས་ནས། གནས་འདིར་སྒྲུབ་པ་ཡུན་རིང་དུ་མཛད་པས་བླ་མ་མཁའ་སྤྱོད་པར་གྲགས། སྲོག་རྩོལ་གྱི་གེགས་བྱུང་བ་ཡང་ཀུན་མཁྱེན་ཆེན་པོས་སེལ་བར་མཛད། དེ་ནས་མངོན་ཤེས་ཁྱད་པར་ཅན་འཁྲུངས་ཏེ། མཁའ་སྤྱོད་ཀྱི་མུན་ཁང་དུ་བཞུགས་བཞིན་པ་ནས། དགོན་པ་ནགས་ཕུག་གི་གཙུག་ལག་ཁང་གི་གསུང་རབ་པོ་ཏི་ཐམས་ཅད་ཆོས་འདོན་བྱེད་པ་བཞིན་དུ་ཀློག་ཐུབ་པ་དང༌། གཞན་ཡང་མངོན་ཤེས་ཐོགས་མེད་མངའ་སྟེ། འོན་ཀྱང་ཡོན་ཏན་ཐམས་ཅད་སྦས་པའི་ཚུལ་དུ་མཛད། ཀུན་མཁྱེན་ཆེན་པོ་སྐུ་བཞུགས་པའི་རིང་ལ་འཛིན་པའི་ཉམས་རྟོགས་མཐར་ཕྱིན་ཕྱིས་གཟིམས་ཁང་དུ་ཁོང་རང་གཅིག་པུ་བཞུགས་པ་ལ། ཕྱི་ནས་ཉན་དུས་རོལ་མོའི་སྒྲ་གྲག་པ་ཡང་ཡང་བྱུང༌། ནང་གཅིག་རོལ་མོའི་སྒྲ་ཤིན་ཏུ་ཡུན་རིང་བ་ཞིག་བྱུང་ནས། གཞན་རྣམས་ཀྱིས་ལྟ་བར་ཕྱིན་པས། ན་བཟའ་ཤུལ་ཧར་རེ་ལུས་འདུག་སྟེ། གནས་


TNT17_Page_0367
[མ་དཔེ་གཟིགས་ན་འདིར་གནོན།]

སྐབས་དེ་ཉིད་དུ་འཇའ་ལུས་རྡོ་རྗེའི་སྐུ་བརྙེས་པས། སྔར་བླ་མ་མཁའ་སྤྱོད་པ་ཞེས་མཚན་ཐོགས་པ་ཡང་དོན་དང་ལྡན་པར་སོང་ངོ༌། །དེ་ལྟར་ན་སྐྱེས་བུ་དམ་པ་དེ་མཁའ་སྤྱོད་དུ་གཤེགས་པའི་གནས་འདི་ཡིན་ཅིང༌། དེ་རྗེས་སུ་སྐྱེས་བུ་དམ་པ་བསམ་གྱིས་མི་ཁྱབ་པ་བྱོན་པ་ལགས་སོ། །སྒྲུབ་གནས་ལས་ཀྱང་སྒྲུབ་གནས་མཆོག་གི་ཕུལ། །དབེན་གནས་ལས་ཀྱང་ཡང་དབེན་འཁྱོག་པོའི་བྲག །ངོ་མཚར་ལས་ཀྱང་ངོ་མཚར་རྨད་བྱུང་གནས། །ཉམས་དགའ་ལས་ཀྱང་ཉམས་དགའི་ཏིང་འཛིན་འཕེལ། །ལུང་པའི་མཐིལ་གྱི་རི་དང་ས་གཞི་དང༌། །ཆུ་རྣམས་འདུས་པ་ཨེ་ཡིག་ཆོས་འབྱུང་འདྲ། །བར་གྱི་ཆ་ནི་པདྨ་རྒྱས་པ་བཞིན། །དྲི་མེད་ནམ་མཁའི་ངོས་ནི་འཁོར་ལོ་འདྲ། །ཤར་རི་རིན་ཆེན་འབྲས་བུའི་ཕུང་པོ་དང༌། །ལྷོ་ཡི་རི་ནི་རྒྱལ་བ་ཚེ་དཔག་མེད། །ནུབ་དང་བདེན་བྲལ་རྣལ་འབྱོར་མ་དཔལ་དབྱིབས། །བྱང་གི་ཕྱོགས་ན་མཁའ་འགྲོ་གསང་བའི་ཕུག །རྒྱབ་རི་རིགས་གསུམ་མགོན་པོ་ལྟ་བུ་ལ། །གཡོན་ནས་རྒྱལ་ཆེན་བཞི་ཡི་ཆོས་ཉན་ཚུལ། །གནས་ཀྱི་ལྟེ་བ་རྡོ་རྗེ་རྩེ་ལྔ་འདྲ། །བྲག་རི་རིན་ཆེན་རྡུལ་མང་བརྩེགས་པའི་སྟེང༌། །བླ་མའི་གཟིམས་ཁང་མཁའ་སྤྱོད་བདེ་ལྡན་ཞེས། །གྲུབ་རིགས་བྱེ་བ་ཕྲག་བརྒྱས་བརྟེན་པ་ཡོད། །རྩ་གསུམ་རྣམ་པར་དག་པ་མཚོན་བྱེད་དུ། །བདུད་རྩི་ལྟ་བུའི་ཆུ་རྒྱུན་གསུམ་


TNT17_Page_0368
[མ་དཔེ་གཟིགས་ན་འདིར་གནོན།]

ཡང་འབབ། །བསིལ་དང་དྲོ་དང་བསིལ་དྲོད་སྙོམས་པ་སྟེ། །ནུས་པའི་ཁྱད་པར་རྩ་དང་མཚུངས་པ་ཡིན། །གནས་མཆོག་འདི་རུ་ཕྱག་དང་བསྐོར་བ་དང༌། །བྱིན་རླབས་སྒྲུབ་ཆུ་འཐུངས་དང་ཁྲུས་བྱས་པ། །དེ་དག་ཐམས་ཅད་བདེ་འགྲོ་བཟང་པོར་འགྲོ །ལན་གཅིག་ཙམ་གྱིས་བར་ཆད་སེལ་བ་དང༌། །ལན་མང་བསྐོར་བས་སྡིག་སྒྲིབ་ཐམས་ཅད་འབྱང༌། །གནས་མཆོག་འདི་ཡང་རྒྱལ་བའི་སྤྲུལ་པ་སྟེ། །འབྲེལ་ཚད་དོན་དང་ལྡན་པ་ཨེ་མ་ཧོ། །གནས་ཀྱི་སྲུང་མ་གནོད་སྦྱིན་རྫུ་འཕྲུལ་ཅན། །ཆེ་བཙན་དཔའ་བོ་བྲག་རྗེ་ཞེས་བྱ་བར། །མིང་འདོགས་བསྒྱུར་ནས་བཀའ་ཡི་སྲུང་མ་མཛད། །ལྟ་བ་རྣམ་དག་དབུ་མ་ཆེན་པོ་ལ། །ངེས་པ་རྙེད་ནས་ཟབ་ལམ་མཐར་ཐུག་པ། །རྡོ་རྗེའི་རྣལ་འབྱོར་རྩེ་གཅིག་བསྒོམ་པ་ལ། །རྟག་ཏུ་གཡེལ་བ་མེད་པར་འཕྲིན་ལས་སྒྲུབ། །ལྟ་གྲུབ་གཞན་དང་ཟོག་པོ་ཚུལ་འཆོས་མཁན། །ལོག་སྤྱོད་ཅན་ལ་ཆད་པས་གཅོད་པའི་ཕྱིར། །གནས་འདི་ཤིན་ཏུ་གཉན་ཞེས་གྲགས་པ་བྱུང༌། ཆོས་བཞིན་སྤྱོད་པ་དགེ་བའི་ངང་ཚུལ་ཅན། །བསྡད་པ་ཙམ་གྱིས་ཏིང་འཛིན་ངང་གིས་སྐྱེ། །ཅུང་ཟད་གོམས་ན་ལྷག་པར་བོགས་བསྐྱེད་ཆེ། །ཕྱི་ནང་གསང་བ་དེ་ཁོ་ན་ཉིད་ཀྱི། །དགེ་མཚན་རྟེན་འབྲེལ་ཐམས་ཅད་འདུས་པ་ཡིན། །བླ་མ་ཡི་དམ་མཁའ་འགྲོའི་བྱིན་རླབས་ཀྱིས། །གནས་


TNT17_Page_0369
[མ་དཔེ་གཟིགས་ན་འདིར་གནོན།]

འདིར་བཞུགས་དང་གནས་འདི་བསྐོར་བ་སོགས། །རྣམ་དག་ལེགས་ལམ་འབྲེལ་པ་འཇོག་པ་རྣམས། །བདེ་སྐྱིད་ཕུན་ཚོགས་སངས་རྒྱས་འགྲུབ་པར་ཤོག །དེ་དག་ནི་ཕྱིའི་གནས་བཤད་ཡིན་ལ། ནང་གི་རྟེན་བཤད་སོགས་ཇི་ལྟར་འོས་པ་སྦྱར་ཏེ་བཤད་དོ། །འཁྱོག་པོ་རི་ཁྲོད་ཀྱི་གནས་བཤད་དགེའོ། ཞུས་དག། །།


TNT17_Page_0370
[མ་དཔེ་གཟིགས་ན་འདིར་གནོན།]

ཤོག་སྟོང་།

དགའ་ལྡན་ཕུན་ཚོགས་གླིང་གི་གནས་བཤད


TNT17_Page_0371
[མ་དཔེ་གཟིགས་ན་འདིར་གནོན།]

དགའ་ལྡན་ཕུན་ཚོགས་གླིང་གི་གནས་བཤད་བཞུགས།


TNT17_Page_0372
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། འདིར་དུས་གསུམ་དུ་བྱོན་པའི་རྒྱལ་བ་ཐམས་ཅད་ཀྱི་ཞིང་ཁམས་ཀྱི་མཆོག་འོག་མིན་སྟུག་པོ་བཀོད་པ་དང་གཉིས་སུ་མ་མཆིས་པ། སངས་རྒྱས་དང་བྱང་ཆུབ་སེམས་དཔའ་འཕགས་ཚོགས་རྒྱ་མཚོ་འདུ་བའི་གནས་ཆེན་འཛམ་གླིང་བྱེ་བ་ཕྲག་བརྒྱའི་ཆོས་གཞི་མཐའ་དག་གི་གཙུག་གི་ནོར་བུ། ཏིང་འཛིན་འབུམ་ཕྲག་བརྒྱའི་འབྱུང་གནས། ལེགས་བཤད་བྱེ་བ་སྒྲོག་པའི་སྐྱེད་ཚལ། འགྲོ་ཀུན་ཐར་པར་བགྲོད་པའི་ཐེམ་སྐས། སྲིད་ཞིའི་ཕན་བདེ་ཀུན་གྱི་རྩ་བ། མཆོག་དང་ཐུན་མོང་འགྲུབ་པའི་ཞིང་ས། ཀུན་ཁྱབ་འཕྲིན་ལས་འབར་བའི་ཉིད་བྱེད། ཕྱོགས་བཅུ་དུས་གསུམ་རབ་འབྱམས་སྲིད་ཞི་མཐའ་དག་གི་རྣམ་དཀར་ལེགས་ཚོགས་ཐམས་ཅད་འབད་རྩོལ་མེད་པར་ལྷུན་གྲུབ་ངང་གིས་འདུ་བའི་གནས། དགའ་ལྡན་ཕུན་ཚོགས་གླིང་ངེས་དོན་དགའ་


TNT17_Page_0373
[མ་དཔེ་གཟིགས་ན་འདིར་གནོན།]

བའི་ཚལ་གྱི་གཙུག་ལག་ཁང་འདིའི་ལོ་རྒྱུས་ཀྱི་དབང་དུ་བྱས་ན། རྒྱལ་བ་ཀུན་ལས་ལྷག་པའི་ཐུགས་རྗེ་ཅན། །མཉམ་མེད་ཤཱཀྱ་སེང་གེ་དུས་འཁོར་ལོ། །གསང་བདག་འཇམ་དཔལ་ཕྱག་ན་པདྨ་སོགས། །ས་བཅུའི་དབང་ཕྱུག་ཆོས་རྒྱལ་རིགས་ལྡན་ཚོགས། །འཕགས་ཡུལ་གྲུབ་པའི་གཙུག་རྒྱན་དུས་འཁོར་ཞབས། །བསྟན་པ་འདི་ལ་མཁས་དང་གྲུབ་པའི་དཔལ། །བགྲང་བར་མི་དཔྱོད་ཡང་དག་ལམ་སྟོན་པ། །ཀུན་གྱི་རྒྱན་གྱུར་འགྲན་པའི་ཟླ་བྲལ་བ། །ཆོས་ཀྱི་རྒྱལ་པོ་ཤེས་རབ་རྒྱལ་མཚན་དཔལ། །དོལ་པོ་བ་ཞེས་སྙན་པའི་འབྲུག་སྒྲ་ཡིས། །ཕྱོགས་ཀྱི་འཁོར་ལོ་མ་ལུས་བགེངས་མཛད་པ། ཁྱོད་ནི་སངས་རྒྱས་ཀུན་གྱི་རང་བཞིན་ཏེ། །སངས་རྒྱས་ཀུན་ཡང་ཁྱེད་ཀྱི་རྣམ་འཕྲུལ་ལགས། །བྱང་ཆུབ་སེམས་དཔའ་ཀུན་གྱི་ཡབ་ཀྱང་ཁྱེད། །


TNT17_Page_0374
[མ་དཔེ་གཟིགས་ན་འདིར་གནོན།]

ཉན་ཐོས་རང་རྒྱལ་འཕགས་ཚོགས་མ་ལུས་པའི། །རྟེན་དང་མགོན་སྐྱབས་བླ་མ་ཁྱེད་གཅིག་པུ། །དྲག་པོ་འཇུག་སེལ་དབྱིག་གི་སྙིང་པོ་སོགས། དྲེགས་ལྡན་ཀུན་གྱིས་མཆོད་བསྟོད་བཀུར་སྟིའི་ཡུལ། །རྒྱལ་བ་ཁྱེད་ལས་གཞན་དུ་མ་མཆིས་ཏེ། །འགྲོ་བ་དྲུག་ཏུ་འཁོར་བའི་སྐྱེ་འགྲོའི་ཚོགས། །ཀུན་གྱི་སྐྱོབ་པ་གཅིག་པོའང་རྒྱལ་བ་ཁྱོད། །སྲིད་ཞིར་གཏོགས་པའི་སྐྱེ་བོ་ཐམས་ཅད་ལ། །མཐའ་དག་ལེགས་ལམ་སྩལ་བའང་ཁྱོད་ཉིད་ལགས། །དེ་ལྟར་སྐྱབས་གནས་རྒྱ་མཚོ་དཀོན་མཆོག་གསུམ། །ཀུན་འདུས་དུས་གསུམ་སངས་རྒྱས་ཇོ་ནང་བ། །ཀུན་གྱི་བྱེད་པོ་འདྲེན་མཆོག་བླ་མེད་དེས། །སྲིད་གསུམ་མཐའ་དག་སྐྱོང་བའི་དགེ་ལེགས་སྩོལ། །དེ་ལྟར་ན། སྒྲུབ་གནས་ཐམས་ཅད་ཀྱི་རྒྱལ་པོ། རི་ཁྲོད་ཆེན་པོ་དཔལ་ཇོ་མོ་ནང་གི་གནས་ཀྱི་སྒོ་ཆེན་པོར་གྱུར་པ་འདི་ཉིད་ལ་དང་པོར་ཕྱི་འབྱུང་བས་སྒྲུབ་པའི་དགེ་མཚན་གྱི་དབང་དུ་བྱས་ན། བརྟན་ཅིང་བརྗིད་ལ་མཐོ་ཞིང་ལྷུན་ཆགས་པ། །ལྷུན་པོ་བྱེ་བ་ཕྲག་བརྒྱའི་དཔལ་ཡོན་ཅན། །ནགས་རྒྱལ་ཞེས་བྱ་རིའི་དབང་པོའི་འདབས། ས་བསྲུང་བུ་ཡི་གདོང་གི་དབྱིབས་ཅན་ཡོད། །རྒྱབ་རི་ནོར་བུའི་བྲག་ཚོགས་གཏམས་པ་ནི། །ལྷ་མིན་གཡུལ་འཇོམས་ལྷ་ཚོགས་དབུགས་འབྱིན་མཛད། །རྒྱལ་ཆེན་རྣམ་མང་ཐོས་པ་འགྱིང་པའི་སྐུ། །སེང་གེའི་ཁྲི་ལ་བཞུགས་པའི་རྣམ་པ་ཅན། །དེ་ཡི་མདུན་དུ་རིན་ཆེན་ཆར་འབབ་


TNT17_Page_0375
[མ་དཔེ་གཟིགས་ན་འདིར་གནོན།]

ཅིང༌། །གཏེར་གྱི་བུམ་པ་འདྲ་བའི་རྟགས་མཚན་དང༌། །མདུན་ནས་བལྟས་ན་གཡས་སུ་འཁྱིལ་བའི་དུང༌། །རྒྱབ་བལྟས་བང་རིམ་དང་བཅས་མཆོད་རྟེན་དབྱིབས། །རིན་ཆེན་རྡུལ་བརྩེགས་མཁའ་ལ་རྙོག་པ་འདྲ། །དེ་དང་ཉེ་བའི་ངོས་ལ་དགེ་མཚན་ནི། །དཔལ་གྱི་བེའུ་ལ་སོགས་བཀྲ་ཤིས་ཀྱི། །རྟགས་བརྒྱད་པོ་རྣམས་ཡོངས་སུ་ཚང་བར་ཡོད། །ས་གཞི་ཤར་དང་དབང་ལྡན་ཕྱོགས་སུ་གཞོལ། །ནུབ་དང་ལྷོ་ཡི་ཕྱོགས་སུ་པགས་ཀྱིས་མཐོ། །རྒྱུད་སྡེ་ཀུན་ལས་དཀྱིལ་འཁོར་བཞེངས་པ་ཡི། །ས་གཞིའི་མཚན་ཉིད་མཆོག་ཏུ་བསྔགས་པ་ཡིན། །བྱང་གི་ཕྱོགས་སུ་ལུ་ཧི་ཏར་གྲགས་པ། །རིག་བྱེད་གཞུང་ལས་ཚངས་པའི་སྲས་སུ་བཤད། །ཆུ་ཀླུང་ཀུན་གྱི་རྒྱལ་པོ་གྲགས་ལྡན་འབབ། །འབབ་ཆུ་གཞན་ཡང་གཡས་ཕྱོགས་འཁྱིལ་བས་འགྲོ །ཤར་ཕྱོགས་རི་འདི་བློན་པོ་རིན་ཆེན་འདྲ། །ཉི་ཟླ་གཟའ་སྐར་ཐམས་ཅད་འཆར་བའི་གནས། །ཤར་ལྷོའི་ཕྱོགས་ན་ནོར་བུ་རིན་ཆེན་བྲག །རྣམ་མང་ཆོས་དང་ནོར་གཏེར་དུ་མས་གང༌། །ལྷོ་ཕྱོགས་གྲུབ་པའི་གནས་ཆེན་ཀུན་ཀྱི་གཙོ། །མཐའ་ཡས་དངོས་གྲུབ་བྱེ་བའི་གཏེར་ཆེན་བཞུགས། །བདེན་བྲལ་ངོས་ལ་འཁོར་ལོ་རིན་པོ་ཆེ། །ལྟེ་བ་བརྟན་ཅིང་རྩིབས་བརྒྱད་གསལ་བར་སྣང༌། །ཆུ་བདག་ཕྱོགས་ཀྱི་རི་བོ་མགྱོགས་འགྲོའི་གཙོ། །རྣམ་དཀར་དགེ་བའི་ལམ་དང་བཅས་ཏེ་ཡོད། །


TNT17_Page_0376
[མ་དཔེ་གཟིགས་ན་འདིར་གནོན།]

ནུབ་བྱང་ཁྱིམ་བདག་རིན་ཆེན་གོ་མཚོན་བཅས། །སྙིང་སྟོབས་སྲ་ཞིང་བརྟན་པ་དཔའ་བོའི་ཚུལ། །བྱང་ཕྱོགས་ཤེས་རབ་མཚན་ལྡན་ནགས་ཀྱི་རི། །བཙུན་མོ་དམ་པའི་རྣམ་པ་མཆོག་ཏུ་གསལ། །དབང་ལྡན་མཚམས་ན་གླང་ཆེན་ལུས་རྒྱས་པ། །འགྱིང་ཞིང་གུས་པས་ཚུར་ལ་འོང་བའི་ཚུལ། །མཁའ་ལ་འཁོར་ལོ་བཅུ་དྲུག་རྩིབས་ལྡན་དང༌། །ས་གཞི་ལ་ཡང་པདྨ་རྒྱས་པའི་ཚུལ། །གཡས་ཀྱི་རི་བོ་མཐོ་ཞིང་སྐྱོབ་འདྲ་དང༌། །གཡོན་ཕྱོགས་དར་དཀར་ཡོལ་བ་བརྐྱང་བ་བཞིན། །རྒྱབ་རི་མཐོ་ཞིང་གཟེངས་མཐོ་ལྷུན་རེ་ཆགས། །རྒྱ་ནག་རྩིས་ཀྱིས་དཔྱད་ནས་འབྱུང་བ་བཞིན། །ཤར་གྱི་སྟག་དང་ལྷོ་ཡི་གཡུ་འབྲུག་དང༌། །ནུབ་ཀྱི་བྱ་དང་བྱང་གི་རུས་སྦལ་སོགས། །མདོར་ན་རྒྱལ་པའི་བཀའ་དང་འཇིག་རྟེན་གྱི། །གཙུག་ལག་རྣམས་ལས་ཇི་སྐད་བཤད་པ་ཡི། །ས་གཞིའི་དགེ་མཚན་ཇི་སྙེད་བཤད་པ་ཡི། །ས་གཞིའི་དགེ་མཚན་ཇི་སྙེད་ཡོད་པ་རྣམས། །ཐམས་ཅད་གནས་མཆོག་འདི་ལ་ཚང་བར་བཞུགས། །གནས་མཆོག་དམ་པ་འདིར་ནི་སུས་འདུག་ཀྱང༌། །ཆགས་སྡང་ལ་སོགས་ཉོན་མོངས་ཤས་ཆུང་ཞིང༌། །དགེ་བའི་ཆོས་རྣམས་གོང་ནས་གོང་དུ་འཕེལ། །གཉིད་རྨུགས་གསལ་ཞིང་རིག་པ་དྭངས་པའི་གནས། །ཞེན་ཆགས་ཆུང་ཞིང་ངེས་འབྱུང་འཕེལ་བའི་གནས། །གནོད་སེམས་ཞི་ཞིང་སྙིང་རྗེ་རྒྱས་པའི་གནས། །


TNT17_Page_0377
[མ་དཔེ་གཟིགས་ན་འདིར་གནོན།]

རྣམ་གཡེངས་སངས་ཤིང་ཞི་གནས་བརྟན་པའི་གནས། །ལོག་ལྟ་མི་འབྱུང་ལྷག་མཐོང་ངང་གིས་སྐྱེ། །གནས་མཆོག་འདི་དང་མཚུངས་པ་གཞན་ཡོད་མིན། །ཕྱོགས་འཛིན་ཅན་གྱི་བསྔགས་པ་བརྗོད་པ་དང༌། །ཐེ་རང་འགོང་པོས་གྲགས་པ་བསྒྲགས་པ་དང༌། །དབང་སྡུད་ནོར་སྒྲུབ་ལ་སོགས་རྟེན་འབྲེལ་གྱིས། །འདུ་འཚོག་བྱུང་ཞིང་གྲགས་པ་ཙམ་ཞིག་ལ། །རྨོངས་པའི་འགྲོ་རྣམས་ཆུ་ལྟར་རྒྱུག་བཞིན་དུ། །ཞིང་མཆོག་ཡིན་པར་འཁྲུལ་དང་འདི་མི་མཉམ། །གཞན་དུ་ལོ་དང་ཟླ་བ་བསྒོམས་པ་པས། །གནས་མཆོག་འདིར་ནི་ཞག་དང་ཟ་མ་ཙམ། །བསྒོམས་པའི་ཕན་ཡོན་ལྷག་པར་ཆེ་བ་ཡིན། །གཞན་དུ་ཡུན་རིང་དགེ་སྦྱོར་འབད་པ་བས། །སྡིག་པའི་ལས་སྤངས་ཆོས་དང་བླ་མ་ལ། །མོས་གུས་བྱས་ནས་གནས་འདིར་ཉལ་བ་ཡང༌། །བླ་མེད་བྱང་ཆུབ་མཆོག་ལ་ཤིན་ཏུ་ཉེ། །ཉ་པ་གདོལ་པ་རི་དྭགས་དམན་པ་དང༌། །མཚམས་མེད་བྱས་པ་ལ་སོགས་སྡིག་ཅན་ཡང༌། །རང་ཉིད་དད་པའམ་གཞན་གྱིས་བསྐུལ་ཡང་རུང༌། །གནས་འདི་བསྐོར་ཞིང་གཙུག་ལག་ཁང་ལ་ལྟ། ཁྲུས་བྱས་ཕྱག་དང་བསྐོར་བ་མཆོད་པ་འབུལ། །དེ་ཡི་སྡིག་པ་དག་ནས་ལྷ་ཡུལ་སྐྱེ། །སྐྱེ་བོ་གཞན་དག་སྨོས་ཀྱང་ཅི་ཞིག་དགོས། །གནས་མཆོག་འདི་ནི་མཐོང་བ་དོན་ལྡན་ཡིན། །དེ་ཡང་སྟོན་པ་ཡང་དག་པར་རྫོགས་པའི་སངས་རྒྱས་ཀྱི་ཐུགས་རྗེའི་འོད་ཟེར་ལ་བརྟེན་


TNT17_Page_0378
[མ་དཔེ་གཟིགས་ན་འདིར་གནོན།]

ནས་འཛམ་གླིང་ཡངས་པའི་རྒྱལ་ཁམས་འདིར། སྐྱེས་བུ་དམ་པ་བསམ་གྱིས་མི་ཁྱབ་པ་བྱོན་མོད་ཀྱང༌། རྒྱ་བོད་ལ་སོགས་པ་འཛམ་གླིང་ལྷོ་ཕྱོགས་ཀྱི་དུམ་བུ་འདིར། ངེས་པའི་དོན་གྱི་གནད་མ་ལུས་ཤིང་ལུས་པ་མེད་པ་ཕྱིན་ཅི་མ་ལོག་ཅིང་མ་འཁྲུལ་བ་རྒྱ་ཆེར་གསུངས་པས། སྐལ་ལྡན་གྱི་སྐྱེ་བོ་གཞལ་དུ་མེད་པ་ཚིམ་པར་མཛད་པ་ནི། རྒྱལ་བ་ཉིད་ཀྱིས་རྔ་བོ་ཆེའི་མདོ་དང༌། ཨུ་དུམ་བ་རའི་མེ་ཏོག་ལྟར་དཀོན་པའི་མདོ་སྡེ་ལ་སོགས་པ། མདོ་སྡེ་དུ་མ་ཞིག་ནས་ལུང་བསྟན་པའི། ཀུན་མཁྱེན་ཆོས་ཀྱི་རྒྱལ་པོ་དུས་གསུམ་སངས་རྒྱས་དོལ་པོ་པ་ཤེས་རབ་རྒྱལ་མཚན་དཔལ་བཟང་པོ་ཞེས། ཕྱོགས་བཅུ་དུས་གསུམ་གྱི་རྒྱལ་བའི་ཞིང་ཁམས་ཐམས་ཅད་དུ་མཚན་སྙན་པའི་འབྲུག་སྒྲས་ཁྱབ་པ། མཁས་གྲུབ་ཀྱི་བསྟན་འཛིན་གཟའ་སྐར་བྱེ་བ་ཕྲག་བརྒྱའི་དབུས་ན་མཁྱེན་བརྩེ་ནུས་པའི་ཡེ་ཤེས་ཡོན་ཏན་འཕྲིན་ལས་འོད་སྟོང་བདག་པོའི་ཚུལ་གྱིས། གཞན་ཐམས་ཅད་ཟིལ་གྱིས་མནན་ཏེ་བཞུགས་པ་དེ་ཡིན་པ་གདའ། དེ་ཉིད་ཀྱི་ཡེ་ཤེས་ཆེན་པོའི་ཆོ་འཕྲུལ་ལས་སྤྲུལ་པ་ནི། རྔ་བོ་ཆེའི་ལེའུ་ཞེས་བྱ་བ། ངེས་དོན་མཐར་ཐུག་མ་སྦས་ཤིང་གསར་བར་བསྟན་པའི་མདོ་སྡེ་ཆེན་པོ་དེ་ཉིད་ཀྱི། ཐ་མའི་ཚིག་གིས་ལུང་བསྟན་པ། འཛམ་གླིང་ལྷོ་ཕྱོགས་ཀྱི་རྒྱུད་འདིར་ཤིན་ཏུ་ཕྱི་མར་གྱུར་པའི་དུས་སུ་ཡང༌། ལི་ཙ་བཱི་གཞོན་ནུ། འཇིག་རྟེན་ཀུན་གྱིས་མཐོང་ན་དགའ་བ། དགེ་སློང་བློ་འཆང་སྟེ། ཤེས་


TNT17_Page_0379
[མ་དཔེ་གཟིགས་ན་འདིར་གནོན།]

རབ་རྒྱལ་མཚན་ཅེས་བྱ་བར་གྱུར་པ་དེ་ཉིད། སྔར་ཡང་ཤིན་ཏུ་ཕྱི་མར་གྱུར་པའི་དུས་དེར་བྱུང་ནས། ངའི་བསྟན་པ་གསལ་བར་བྱེད་དོ་ཞེས་འབྱུང་བའི་གནས་གང་དུ་བསྟན་པ་གསལ་བར་འགྱུར་བའི་ཆོས་གཞི་གཙུག་ལག་ཁང་གི་གཙོ་བོ་ནི། རྟག་བརྟན་དམ་པའི་ཆོས་ཀྱི་གླིང་ངེས་དོན་དགའ་བའི་ཚལ་ཞེས་བྱ་བ་འདི་ཉིད་ཡིན་ཏེ། དོན་ལ་བཅོམ་ལྡན་འདས་དེ་བཞིན་གཤེགས་པ་ཐུགས་རྗེའི་བདག་ཉིད་ཅན་གྱི་བཀའ་ལས་ལུང་བསྟན་པ་ལགས། དེ་ཡང་རྔ་བོ་ཆེའི་མདོ་ལས། ཀུན་མཁྱེན་ཆོས་ཀྱི་རྒྱལ་པོ་དོལ་པོ་སངས་རྒྱས་དེ་ཉིད་ཀྱིས། རྒྱལ་བའི་བསྟན་པ་ཉི་མ་ལྟར་གསལ་བར་མཛད་ཅིང༌། ལོ་བརྒྱད་ཅུའི་བར་དུ་ངེས་དོན་གྱི་བསྟན་པ་ཕྱོགས་ཐམས་ཅད་དུ་དར་བར་གྱུར་ལ། དེ་ནས་བར་སྐབས་དེར་ཅུང་ཟད་ངེས་པའི་དོན་གྱི་བསྟན་པ་མི་གསལ་བར་གྱུར་པ་ན། སླར་ཡང་ཆོས་ཀྱི་རྒྱལ་པོ་དེ་ཉིད་འགྲོ་བའི་དོན་དུ་བཤེས་གཉེན་དམ་པའི་ཚུལ་བཟུང་སྟེ། སྤྲུལ་པའི་སྐུས་ངེས་པའི་དོན་གྱི་བསྟན་པ་གསལ་བར་མཛད་ཚུལ་ལུང་བསྟན་པ་ནི། ཀྱེ་མ་འཇིག་རྟེན་ཀུན་མཐོང་དགའ། །བསྟན་པ་དགེ་སློང་གཟུགས་གྱུར་ནས། །རིང་ཞིག་བསྟན་པ་འབྱིན་བྱེད་ཅིང༌། །ཆོས་ཀྱི་རྔ་ཆེན་བརྡུང་བར་འགྱུར། །དེ་ན་མྱ་ངན་ཡོངས་འདས་ནས། །དེ་འོག་འཇིག་རྟེན་སྟོང་པར་འགྱུར། །ཆོས་སྨྲ་དེ་ནི་འདས་གྱུར་ནས། །དེ་འདྲ་གཞན་ནི་འགའ་མི་འབྱུང༌། །དེ་འདྲའི་དགེ་སློང་རྙེད་དཀའ་


TNT17_Page_0380
[མ་དཔེ་གཟིགས་ན་འདིར་གནོན།]

སྟེ། །རིམ་གྱིས་སྣང་བ་ཉམས་པར་འགྱུར། །འདི་ལྟར་དེ་ནི་ལྷོ་ཕྱོགས་སུ། །འབྱུང་པའི་ཐ་མ་གཅིག་ཡིན་ནོ། །དམ་པའི་ཆོས་དེ་ནུབ་པའི་དུས་སུ་སླར་ཡང་ཆོས་སྨྲ་བ་དེ་འབྱུང་པར་འགྱུར་རོ། །ཞེས་གསུངས་ཏེ། འདིར་ལྷོ་ཕྱོགས་སུ་འབྱུང་བ་ཞེས་བཤད་པ་ནི། འཛམ་བུ་གླིང་གི་ཕྱེད་ལྷོ་མ་ཆུ་བོ་སི་ཏིའི་ལྷོ་ཕྱོགས་སུ་འབྱོན་པའི་དོན་ཡིན་ལ། དེ་ཡང་ཤིན་ཏུ་དུས་ཀྱི་ཐ་མར། དེ་ཉིད་འབྱོན་པར་གསུངས་པ་ནི། བདག་ཅག་གི་རྗེ་བཙུན་དམ་པ་འདིས། སླར་ཡང་ངེས་དོན་གྱི་བསྟན་པ་དར་བར་མཛད་པ་ལུང་བསྟན་པ་ཡིན་པར་གདའ། དེ་ལ་ཤིང་མོ་ཡོས་ཀྱི་ལོ། དབོའི་ཟླ་བའི་ཚེས་བཅུ་གཅིག་གཟའ་ཚེས་སྦྱོར་བ་བྱེད་པ་ཐམས་ཅད་ཤིན་ཏུ་བཀྲ་ཤིས་པ་ལ་ས་ཆོག་མཛད། འཕགས་པ་སྤྱན་རས་གཟིགས་དང་སངས་རྒྱས་བྱང་སེམས་དཔག་ཏུ་མེད་པ་ནམ་མཁའ་ལ་བྱོན་པའི་ལྟས་དང༌། དཔལ་ཡེ་ཤེས་ཀྱི་མགོན་པོ་འཁོར་དང་བཅས་མངོན་སུམ་དུ་བྱོན་ནས། གནས་དེ་བདག་གིར་མཛད་པའི་བཀོད་པ་དང༌། ཕྱི་ལྟས་ཤིན་ཏུ་ངོ་མཚར་བ་མང་པོ་དང་བཅས་པ་བྱུང་ཞིང༌། དེ་རྗེས་ཀྱི་ནག་པ་ཟླ་བའི་ཚེས་བརྒྱད་ལ། གཙུག་ལག་ཁང་གི་རྨངས་དང་པོར་བཏིང༌། ནམ་མཁའ་ལ་འཇའ་འོད་ཀྱི་བཀོད་པ་ངོ་མཚར་ཅན་དང༌། མེ་ཏོག་གི་ཆར་ཆེན་པོ་སྙོན་མེད་དུ་མཐོང༌། དེ་སྔ་ས་ཕྱོགས་འདི་ཀུན་ན་གྲོག་མོ་ལ་སོགས་པ་སྲོག་ཆགས་མང་ཡང༌། དེ་ཕྱིན་ཆད་ནས་


TNT17_Page_0381
[མ་དཔེ་གཟིགས་ན་འདིར་གནོན།]

སྲོག་ཆགས་ཆེས་དཀོན་ཞིང༌། གཙུག་ལག་ཁང་བཞེངས་པའི་ས་རྡོའི་བྱ་བ་བྱེད་པ་ཀུན་ལ་ཡང༌། སྲོག་ཆགས་ཀྱི་རིགས་གཏན་ནས་མེད་པར་སོང༌། གནས་གཞི་དགོན་སྡེ་ཆེན་པོ་འདི་ཉིད་བཞེངས་པའི་དུས་སྐབས་ཐམས་ཅད་དུ། ལས་བྱེད་ཀྱི་སྐྱེ་བོ་ཐམས་ཅད་ཀྱང༌། གཞན་གྱིས་བསྐུལ་བ་ལ་མ་ལྟོས་པར། རབ་ཏུ་དགའ་ཞིང་སྤྲོ་བས་ལས་ལ་ངང་གི་འཇུག་པ་དང༌། མཚན་མོའི་ཆ་ལ་སྐྱེ་བོ་ཐམས་ཅད་ཉལ་བའི་སྐབས་སུ་ཡང༌། ས་རྡོ་ཤིང་གསུམ་གྱི་ལས་ཀ་བྱེད་མཁན་མང་པོ་ཡོད་པ་འདྲ་བ་དང༌། ཕྱིས་བྲིས་འབུར་བརྡུང་གསུམ་གྱི་རྟེན་བཞེངས་པའི་སྐབས་སུ་ཡང༌། ནམ་གུང་ལས་དེ་དང་དེ་བྱེད་པ་པོ་མང་དུ་འཚོགས་པ་ལྟ་བུ་དང༌། སྒྲ་དི་རི་རི་ཡང་ནས་ཡང་དུ་འབྱུང་བ་དང༌། རྡོ་ལེབ་ཆེན་པོ་མི་མང་པོས་འདེགས་དགོས་པ་ཡང༌། མཚན་མོ་ཕན་ཚུན་ཐག་རིང་བར་བསྐྱལ་བ་དང༌། བསྣོར་ཏེ་འཇོག་པ་དང༌། ཆེས་ཆེར་ཤིན་ཏུ་ལྕི་བའི་ཁུར་ཆེན་པོ་དག ཁྱེའུ་བུ་མོ་ཆུང་ངུ་རེས་ཀྱང་ཐེག་པ་དང༌། དགོན་པ་དང་ཉེ་བར་ལུ་མ་བཀོད་མའི་ཆུ་མིག་ཆེན་པོ་སྔར་མེད་གསར་དུ་བརྡོལ་བ་སོགས། མིའི་འགྲོ་བ་སོ་སོ་སྐྱེ་བོའི་མཐོང་ཐོས་ཀྱི་སྤྱོད་ཡུལ་དུ་ཡང༌། སྡེ་བརྒྱད་དྲེགས་པ་ཅན་རྣམས་དང༌། དཔའ་བོ་མཁའ་འགྲོའི་ཚོགས་གྱིས་འཕྲིན་ལས་ཀྱི་མཐུན་འགྱུར་མཛད་པའི་རྟགས་བཤད་ཀྱིས་མི་ལང་བ་ཡོད་དེ་ཡེ་ཤེས་འཕགས་པའི་སྤྱོད་ཡུལ་ལ་བསམ་


TNT17_Page_0382
[མ་དཔེ་གཟིགས་ན་འདིར་གནོན།]

གྱིས་ག་ལ་ཁྱབ། གཙུག་ལག་ཁང་གི་ཞལ་ས་རྣམས་ནམ་དགོས་དགོས་སུ་གཏེར་ནས་ཐོན་པ་ལྟ་བུ་ས་རྡོ་ཤིང་སོགས་དཀོན་པ་ལྟར་སྣང་བ་ཐམས་ཅད་ཀྱང་འབད་མེད་ལྷུན་གྲུབ་ཏུ་བྱུང༌། སྔར་གྱི་དེ་ཁའི་འཕྲོས་ལ། ཧོར་ཟླ་དྲུག་པ་ཆུ་སྟོད་ཀྱི་ཚེས་བཅུ་བཞིའི་ཉིན་པར། སྔ་དྲོའི་ཚ་བ་ཐོན་པ་ནས། ཉི་མ་ཕྱེད་ཡུན་ལ་གཙུག་ལག་ཁང་ཆེན་མོའི་ཀ་བ་སུམ་ཅུ་སོ་དྲུག་པོ། མི་ཉུང་དུས་དཀའ་ལས་མེད་པར་ཚུགས་པ་དང༌། འདིའི་ཐོག་གི་ཤིང་ཐམས་ཅད་ཀྱང་ཉི་མ་གཅིག་ལ་ཁེལ། དེ་སྐབས་དཔལ་མགོན་པོའི་འཁོར་རྣམས་དེ་འདྲ་བའི་ལས་ལ་ཞུགས་པའི་ཚུལ་གསལ་བར་གཟིགས་པ་ཡིན་པ་ཡང་གདའ། གསུམ་པ་ནང་གི་གཙུག་ལག་ཁང་རྟེན་གསུམ་དང་བཅས་པ། ཇི་ལྟར་བཞུགས་པའི་དབང་དུ་བྱས་ན། ས་ཕྱོགས་འདི་ཉིད་རིའི་རྩ་བ་ནས་ཁྲི་སྟེགས་ཡན་ཆད། ཨེ་ཡིག་ཆོས་ཀྱི་འབྱུང་གནས་རྩེ་མོ་ཤར་དུ་བསྟན་པའི་རྣམ་པ་ཅན། དེའི་ནང་གི་ངོས་ཡངས་པའི་ཕྱོགས་སུ་སྤྱིར་གནས་གཞི་འདི་ཉིད་དང༌། ཁྱད་པར་གཙུག་ལག་ཁང་བཾ་ཡིག་བདེ་བ་ཆེན་པོའི་ཚུལ་དུ་བཞུགས་པ་ལགས། དེ་ལ་སྔོན་འོ་སྐོལ་གྱི་སྟོན་པའི་བཞུགས་གནས། རྒྱལ་བུ་རྒྱལ་བྱེད་ཀྱི་ཚལ་ལ་སོགས་པ་ཤིན་ཏུ་གཙོ་བོར་གྱུར་པ་ཐམས་ཅད་དང་མཐུན་པར། དབུས་སུ་གཙུག་ལག་ཁང་ཆེན་པོ། དེའི་མཐའ་ལ་གཙུག་ལག་ཁང་བཅུ་དྲུག གཞན་ཡང་ཇི་ལྟར་འོས་པར། གཙུག་ལག་ཁང་ཆེས་


TNT17_Page_0383
[མ་དཔེ་གཟིགས་ན་འདིར་གནོན།]

མང་བ་དང་བཅས་ཏེ་བཞུགས་པ་ཡིན་པ་ལས། དབུས་ཀྱི་གཙུག་ལག་ཁང་ཆེན་པོ་འདི་ཉིད་རང་ལ་ཡང༌། ནང་ཚན་དུ་ལྷ་ཁང་ཇི་སྙེད་ཅིག་མཆིས་པ་ལས། དྲི་གཙང་ཁང་ཕྱུར་བུ། གཙུག་ལག་ཁང་ཐམས་ཅད་ཀྱི་གཙོ་བོ་འདི་ཉིད་ཀྱི་དབང་དུ་བྱས་ན། སོ་སོ་ཐར་པའི་མདོ་ལས། སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་གསེར་ཐུབ་འོད་སྲུང་དང༌། །ཤཱཀྱ་ཐུབ་པ་གོ་ཏཾ་ལྷ་ཡི་ལྷ། །མི་འདུལ་ཁ་ལོ་བསྒྱུར་བ་བླ་ན་མེད། །འཇིག་རྟེན་མགོན་པོ་སྐྱོབ་པའི་མཆོག སངས་རྒྱས་དཔའ་བོ་བདུན་པོ་སྟེ། །གྲགས་ལྡན་རྣམས་ཀྱི་སོ་སོ་ཐར། །འདི་ནི་རབ་ཏུ་རྒྱས་པར་སྟོན། །ཅེས་གསུངས་པ་ལྟར། བསྐལ་པ་འདིའི་སྔོན་རོལ་བསྐལ་པ་དགུ་བཅུ་རྩ་གཅིག་པ་ལ། བཅོམ་ལྡན་འདས་རྣམ་གཟིགས་འཇིག་རྟེན་དུ་བྱོན། དེའི་རྗེས་ཀྱི་དྲུག་བཅུ་པ་ལ། གཙུག་ཏོར་ཅན་བྱོན། དེ་རྗེས་བཞི་བཅུ་པ་ལ་ཐམས་ཅད་སྐྱོབ་བྱོན། བསྐལ་པ་བཟང་པོ་འདི་ཉིད་ལ། མི་རྣམས་ཀྱི་ཚེ་ལོ་བཞི་ཁྲི་ཐུབ་པ་ལ། བཅོམ་ལྡན་འདས་ལོག་པར་དད་སེལ་ལམ། འཁོར་བ་འཇིག་འཇིག་རྟེན་དུ་བྱོན། གསུམ་ཁྲི་ཐུབ་པ་ནས་གསེར་ཐུབ་བྱོན། ཉི་ཁྲི་ཐུབ་པ་ནས་འོད་སྲུང་བྱོན། ཚེ་ལོ་བརྒྱ་བའི་གནས་སྐབས་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ཤཱཀྱ་ཐུབ་པ་འཇིག་རྟེན་དུ་བྱོན་ཏེ། དེ་ལྟར་


TNT17_Page_0384
[མ་དཔེ་གཟིགས་ན་འདིར་གནོན།]

ན་སངས་རྒྱས་བདུན་པོ་དེ་དག །སྔོན་ཐུགས་བསྐྱེད་པའི་གནས་སྐབས་ནས་བཟུང༌། འགྲོ་བའི་དོན་ལ་མཆོག་ཏུ་དཔའ་པའི་ཕྱིར། སངས་རྒྱས་དཔའ་བོ་བདུན་ཞེས་གྲགས། དེ་ཡང་སྤྱིར་དེ་དང་འདྲ་བའི་དེ་བཞིན་གཤེགས་པ་མཐའ་ཡས་པ་བྱོན་མོད་ཀྱི། བདུན་གྱི་གྲངས་སུ་བཅད་པ་ནི། ས་ཕྱོགས་འཇིག་རྟེན་ཁམས་འདིའི་དབང་དུ་བྱས། དུས་ཀྱང་སངས་རྒྱས་གཞན་གྱིས་བར་མ་ཆོད་པའི་དབང་དུ་བྱས་ན། དེ་བཞིན་གཤེགས་པ་བདུན་པོ་འདི་དག་ནི། འདུལ་བའི་བསྟན་པ་བསླབ་བྱ་ཕྲ་མོ་ཐམས་ཅད་ཀྱང་གཅིག་པ་ཡིན་ལ། གཞན་དང་གཞན་དག་ནི། གནད་ཀྱི་དགོངས་དོན་གཅིག་ཏུ་ཟིན་ཡང་བཅས་མཚམས་སྣ་ཚོགས་པ་དག་ནི་ཡུལ་དུས་སོ་སོའི་གདུལ་བྱ་རྣམས་ཀྱི་བསམ་པའི་ཁྱད་པར་ལས་མང་ཉུང་རྒྱས་བསྡུས། ཡངས་དོག་མ་ངེས་པ་སྣ་ཚོགས་ཤིག་ཡོད་པའི་རིགས་སུ་གདའ། དེས་ན་འཕགས་པའི་ཡུལ་ན་སངས་རྒྱས་ཀྱི་བསྟན་པ་རྣལ་མ་ཡོད་པའི་ཕྱོགས་སུ་ནི། དེ་བཞིན་གཤེགས་པ་བདུན་གྱི་སྐུ་གཟུགས་བཞེངས་པ་དང༌། གསོལ་བ་འདེབས་པ་ལ་སོགས་པའི་སྲོལ་ཀ་ཤིན་ཏུ་དར་བ་ཡིན། ཕྱོགས་འདིར་ཡང་དེ་དར་བར་འགྱུར་བའི་མིག་ལྟས་ཁྱད་པར་ཅན་བཞག་པའི་ཕྱིར་དང༌། དོན་གྱི་གཙོ་བོ་སངས་རྒྱས་དཔའ་བོ་བདུན་གྱི་སྐུ་གཟུགས་ཤིན་ཏུ་ཆུང་བ་མ་ཡིན་པ་ཆབས་གཅིག་ཏུ་བཞུགས་པ་དེར། གནས་སྐབས་སུ་ཡུལ་ཕྱོགས་ཐམས་ཅད་བདེ་ཞིང་སྐྱིད་པ་དང༌། མཐར་


TNT17_Page_0385
[མ་དཔེ་གཟིགས་ན་འདིར་གནོན།]

ཐུག་མཐོང་ཐོས་དྲན་རེག་ཐམས་ཅད་ཐར་བ་མཆོག་གི་ས་བོན་ཐེབས་པར་འགྱུར་པ་ལ་གཞན་པས་ཀྱང་ལྷག་པར་སྟོབས་ཆེ་བ་ཡིན་བར་སྣང་བས་དེ་ལ་དགོངས་པ་ཡིན་པ་འདུག །དེ་ཡང་གཙུག་ལག་ཁང་ཆེན་པོ་འདི་ཉིད་ཀྱི་རྟེན་གཙོ་ཐུབ་པའི་དབང་པོ་འདི་ལ་སྐུ་རྒྱབ་མཐོ་ཉི་ཤུ་རྩ་གསུམ། དེའི་གཡས་ཕྱོགས་སུ་བཞུགས་པ་བཅོམ་ལྡན་འདས་རྣམ་གཟིགས། སྐུའི་གཡོན་གྱི་ཕྱོགས་སུ་བཅོམ་ལྡན་འདས་རིན་ཆེན་གཙུག་ཏོར་ཅན། དེ་དག་གི་ཡང་གཡས་ཕྱོགས་ན། དེ་བཞིན་གཤེགས་པ་ཐམས་ཅད་སྐྱོབ། གཡོན་ཕྱོགས་ན་ལོག་པར་དད་སེལ་ཏེ་དེ་རྣམས་ཞལ་ཤར་གཟིགས་སུ་མཛད། དེ་དག་གི་གཡས་ཕྱོགས་ཞལ་བྱང་གཟིགས་ན། རྫོགས་པའི་སངས་རྒྱས་གསེར་ཐུབ་དང༌། གཡོན་ཕྱོགས་ཀྱི་ཞལ་ལྷོ་གཟིགས་འདི། རྫོགས་པའི་སངས་རྒྱས་འོད་སྲུང་ཡིན་ཏེ། དེ་ལྟར་དྲུག་པོ་འདི་རྣམས་ལ་རྒྱབ་མཐོ་བཅུ་གཉིས་རེ་ཡོད། སྐུ་རྒྱུའི་དབང་དུ་བྱས་ན། སྐུ་རྒྱུ་ཤིན་ཏུ་འཐུག་པར་ཡོད་ཅིང༌། སོ་སོའི་རྒྱབ་ཡོལ་ཚུན་ཆད་ཀྱང༌། གསེར་དངུལ་ཟངས་གསུམ་ལས་གྲུབ་པར་བཞུགས་པས། སྐུ་རྒྱུར་ཟངས་ཁལ་བརྒྱད་བརྒྱ་ལྷག་པ་དང༌། གསེར་ཞོ་སྟོང་ཕྲག་བདུན་ཙམ་དང༌། གཞན་ཡང་དེ་ལ་དཔགས་པའི་རྒྱུ་ཚོགས་ཤིན་ཏུ་རྒྱ་ཆེ་བ་དང༌། ཡོན་རྫོངས་དགའ་སྟོན་སོགས་ཆོས་ནས་བཤད་ཚོད་དང་མཐུན་པ། སྐྱེ་བོ་མང་པོའི་བསོད་ནམས་ཀྱི་ཚོགས་རྒྱ་


TNT17_Page_0386
[མ་དཔེ་གཟིགས་ན་འདིར་གནོན།]

ཆེན་པོ་སྤེལ་བའི་སླད་དུ་གནང་བར་གདའ། ནང་བཞུགས་ཀྱི་དབང་དུ་བྱས་ན། གཙོ་བོའི་དབུ་གཙུག་ན་དེ་བཞིན་གཤེགས་པའི་རིང་སྲེལ་འཁྲུལ་མེད་འཕགས་པའི་ཡུལ་ནས་གསར་དུ་བྱོན་པ། རིན་པོ་ཆེ་དྭངས་མའི་ཁ་དོག་ཐམས་ཅད་ཟིལ་གྱིས་གནོན་པར་བྱེད་པ་ཅིག་དང༌། བོད་ཡུལ་གྱི་འཕེལ་གདུང་རྣམ་བཞིར་གྲགས་པ་སོགས། དེ་བཞིན་གཤེགས་པའི་འཕེལ་གདུང་ཡིད་ཆེས་ཅན་ཤིན་ཏུ་མང་བ་དང༌། བྱང་ཆུབ་ཤིང་གི་ཡལ་ག་གཅིག་མེ་ཏོག་ལོ་མ་མང་པོ་དང༌། མཁས་གྲུབ་དམ་པ་སོ་སོའི་ཐུགས་དམ་ཀྱི་རྟེན་དང༌། དབུ་སྐྲ་ན་བཟའ་སོགས་བྱིན་རླབས་གཟི་བྱིན་རྒྱས་པའི་ནང་བཞུགས་རྣམ་གྲངས་སུམ་ཅུ་རྩ་བདུན་ཙམ་དང༌། རྒྱུད་སྡེ་བཞིའི་གཟུངས་སྔགས་ཀྱི་ཚོགས་མཐའ་ཡས་པ་གོ་རིམ་མ་འཁྲུལ་བ་དང༌། རྒྱ་བོད་ཀྱི་གནས་ཆེན་ཀུན་གྱི་ས་རྡོ་ཤིང་སོགས་རྟེན་འབྲེལ་གྱི་རྫས་དུ་མས་གཏམས་པར་བཞུགས། རྣམ་གཟིགས་ལ་སོགས་པའི་སྐུ་བརྙན་དྲུག་པོ་འདི་རྣམས་ལའང༌། དེ་བཞིན་གཤེགས་པའི་འཕེལ་གདུང་འཁྲུལ་མེད་བཅུ་རེ་དང༌། བྱང་ཆུབ་ཤིང་གི་ལོ་མ་སོགས་བྱིན་རླབས་ཀྱི་རྟེན་གཙོ་བོ་ཉིད་དང་ཕལ་ཆེར་ཆ་འདྲ་བར་བཞུགས། རབ་གནས་སྐབས་དགེ་མཚན་གྱི་དབང་དུ་བྱས་ན། ས་ཕོ་རྟའི་ལོ་ཁྲུམས་ཀྱི་ཟླ་བའི་ཚེས་བཅུ་བཞི་ནས་བརྩམས་ཏེ། ཐ་སྐར་གྱི་ཡར་ངོས་ཚེས་གསུམ་གྱི་བར་ལ། དཔལ་གསང་བ་འདུས་པ་དང༌། བདེ་


TNT17_Page_0387
[མ་དཔེ་གཟིགས་ན་འདིར་གནོན།]

མཆོག་ལཱུ་ཧི་པ་དང༌། གཤིན་རྗེ་གཤེད་ནག་པོ་དང༌། རྡོ་རྗེ་འཇིག་བྱེད་དང༌། མི་གཡོ་བླ་མེད་དང༌། ཕྱག་ན་རྡོ་རྗེ་གཏུམ་པོ་དང༌། ཕག་མོ་ལྷ་སོ་བདུན་མ་དང༌། བདག་མེད་ལྷ་མོ་བཅོ་ལྔ་དང༌། དཔལ་དུས་ཀྱི་འཁོར་ལོའི་དཀྱིལ་འཁོར་རྣམས་ཞལ་ཕྱེ་ནས་རབ་གནས་ཚར་རེ་རེ་མཛད་པར་གདའ། ས་མོ་ལུག་ལོའི་ཆུའི་ཟླ་བའི་ཡར་ངོའི་ནང་དུ་ཡང༌། སངས་རྒྱས་ཐོད་པ་དང༌། ཡེ་ཤེས་དབང་ཕྱུག་མ་དང༌། སེམས་འགྲེལ་ལུགས་ཀྱི་བདེ་མཆོག་སྟེ། དཀྱིལ་འཁོར་དེ་གསུམ་གྱི་སྟེང་ནས་རབ་གནས་ཚར་གསུམ། ལོ་དེ་ཉིད་ཀྱི་ཆུ་སྟོད་ཟླ་བའི་ཚེས་བརྒྱད་ཀྱི་ཉིན། དཔལ་ཧེ་རུ་ཀ་འཁོར་ལོ་བདེ་མཆོག་འཇམ་པའི་རྡོ་རྗེའི་དཀྱིལ་འཁོར་སྟེང་ནས་རབ་གནས་རྒྱས་པ་གཅིག་སྟེ་མདོར་ན་རབ་གནས་ཚར་བཅུ་གསུམ་དང༌། སྐྱ་སེར་སྐྱེ་བོ་ཡོངས་འདུས་པའི་ཞལ་གྲོ་དགའ་སྟོན་ཆེན་མོ་ཚར་གསུམ་མཛད། རབ་གནས་ཀྱི་སྐབས་ཐམས་ཅད་དུ་མེ་ཏོག་གི་ཆར་དང་འཇའ་འོད་སོགས་ཉིན་རེ་བཞིན་དུ་བྱུང་ཞིང༌། སྐབས་འགར་སྒྲ་དང་དྲི་བཟང་གིས་ཁྱབ་པ་སོགས་ལན་མང་དུ་བྱུང༌། རབ་གནས་ཐོག་མའི་སྐབས། ཡུངས་ཀར་བུམ་ནང་དུ་ལྷུང་བ། མྱུ་གུ་སྐྱེས་ནས་ཟླ་བ་ཕྱེད་ཙམ་ནས་མེ་ཏོག་ཤར་བ་དང༌། བར་བའི་སྐབས། འཕགས་ཡུལ་མ་ག་དྷའི་ཕྱོགས་ནས་སྤྲུལ་པའི་རྣལ་འབྱོར་པས་སངས་རྒྱས་ཀྱི་སྐུ་གཟུགས་སྤྱན་དྲངས་ཏེ། རབ་གནས་དངོས་གཞི་


TNT17_Page_0388
[མ་དཔེ་གཟིགས་ན་འདིར་གནོན།]

དང་པོའི་ཡེ་ཤེས་སྤྱན་འདྲེན་ཉིད་ཀྱི་སྐབས་ཕེབས་པ་དང༌། རབ་གནས་གསུམ་པའི་སྐབས་སུ། ཆོས་རྒྱལ་སྲོང་བཙན་སྒམ་པོས་ཁྲ་འབྲུག་བཞེངས་དུས། ཟོ་ཐང་ནས་སྤྱན་དྲངས་པའི་དང་པོར་སྐུའི་རྣམ་པ་རགས་རིམ་རང་བྱོན་ལ། བལ་པོའི་བཟོ་བོས་ཅུང་ཟད་ཙམ་སྒྲོས་གཙང་བར་བྱས་པའི་ཐུབ་པའི་སྐུ་བརྙན་བླ་མ་སྨན་ཆུ་ཁ་པས་སྤྱན་དྲངས་ཏེ། ཤར་ཕྱོགས་ནས་བྱོན་པ་སོགས་ཕྱི་ནང་གི་ལྟས་ཐམས་ཅད་ལེགས། རྟེན་འབྲེལ་ཐམས་ཅད་བཟང་བའི་ཕྱོགས་སུ་འགྲིག་པ་ཡིན་པར་འདུག ཇོ་བོ་ཕྱོགས་ལས་རྣམ་རྒྱལ་འདིའི་དབང་དུ་བྱས་ན། སྟོན་པའི་རྒྱལ་ཚབ་འོད་སྲུང་ཆེན་པོ་སེང་གེའི་ཁྲི་ལ་འཁོད་པ་ནས་ལོ་བརྒྱ་ཙམ་ན། རྒྱ་གར་རྡོ་རྗེ་གདན་གྱི་བྱང་ཆུབ་ཆེན་པོ་བཞེངས། དུས་དེ་ཙམ་ན། ལྷའི་བཟོ་བོས་བཞེངས་པའི་སྐུ་གཟུགས་འཕྲུལ་དང་ལྡན་པ་མང་དུ་བྱུང༌། འཕྲུལ་སྣང་གི་ཇོ་བོ་ཤཱཀྱ་མུ་ནི་ལ་ཆེ་བ་དབྱུང་བའི་གཏམ་རྒྱུད་མི་འདྲ་བ་དུ་མ་ཡོད་ཀྱང༌། དུས་དེ་སྐབས་ཀ་བྱོན་པར་གདའ། དཔལ་བྱང་ཆུབ་ཆེན་པོ་བཞུགས་པའི་ཕྱོགས་མཚམས་བརྒྱད་ན། གན་དྷོ་ལ་བརྒྱད་ཡོད། དེ་དག་རེ་རེ་ན་ལྷ་ཁང་རེ་རེ། མཛད་པ་བརྒྱད་ཀྱི་ནང་ནས་མཛད་པ་རེ་རེའི་སྐུ་བརྙན་བཞུགས། དེ་ཐམས་ཅད་ལྷའི་བཟོས་བོས་བཞེངས་པ་ཡིན་པར་གདའ། ཇོ་བོ་ཕྱོགས་ལས་རྣམ་རྒྱལ་འདི་ནི་དེའི་ནང་ནས། གླང་པོ་ཆེ་ནོར་སྐྱོང་བཏུལ་བ་དེ་ཡིན། ལྷ་ས་འཕྲུལ་སྣང་གི་བྱམས་པ་ཆོས་ཀྱི་འཁོར་ལོ་དང༌། ར་མོ་


TNT17_Page_0389
[མ་དཔེ་གཟིགས་ན་འདིར་གནོན།]

ཆེ་ན་བཞུགས་པའི་ཇོ་བོ་མི་བསྐྱོད་རྡོ་རྗེ་དང༌། ཕྱོགས་ལས་རྣམ་རྒྱལ་འདི་གསུམ་ཞལ་བཞིན་སོགས་བཟོ་བཀོད་དབྱིབས་ཁྱད་པར་མེད་པ་ལྟ་བུར་བཞུགས། འདི་ཡང་དང་པོར་ཆོས་ཀྱི་རྒྱལ་པོ་སྲོང་བཙན་སྒམ་པོའི་ཐུགས་དམ་གྱི་རྟེན་མཛད་ཅིང་ཕོ་བྲང་དུ་བཞུགས་པ་ཡིན། དེ་ནས་ཆོས་རྒྱལ་ཁྲི་སྲོང་ལྡེ་བཙན་གྱི་རིང་ལ། བསམ་ཡས་ཀྱི་ཕྱོགས་སུ་ཕེབས། བད་རྔམ་པའི་ལྷ་ཁང་དུ་བཞུགས་པ་ལས། དུས་ཕྱིས་ཆུས་གནོད་པ་ཆེན་པོ་བྱུང་བའི་སྐབས་ཤིག བད་རྔམ་པ་དང་ཧྭ་ཤང་ལྷ་ཁང་སོགས་མང་པོ་ཞིག་ལ་ཆུ་སྐྱོན་བྱུང༌། སྐུ་འདི་རེ་ཞིག་མ་རྙེད། ཀླུས་སྤྱན་དྲངས་པ་ཡིན་ནམ་ཟེར་བ་ཡང་བྱུང་སྟེ། ཕྱིས་ལོ་ཤས་ལོན་དུས་བཤའ་བུད་ཀྱི་ནོན་པ་སོགས་ཡེ་མེད་པར་ལྷ་ཁང་གི་ཤུལ་ནས་རྙེད། རིམ་པས་ཕོ་བྲང་སྣེའུ་གདོང་སོགས་རྒྱུད་ནས། ལྕགས་མོ་བྱའི་ལོ་ལ་གཙུག་ལག་ཁང་ཆེན་པོ་འདིར་ཕེབས་པ་ལགས། དེ་རྗེས་ཁྲི་རྒྱབ་ལ་སོགས་པ་རྗེ་བཙུན་ཉིད་ཀྱི་ཞལ་བཀོད་མཛད་ནས་བཞེངས། འགྲོ་བའི་དོན་དུ་མངའ་གསོལ་མཛད་དེ། བྱིན་རླབས་ཀྱི་གཟི་བྱིན་མཁའ་དབྱིངས་གང་བར་བཞུགས་པ་འདི་ལགས། འདི་ནི་དེ་བཞིན་གཤེགས་པའི་བཀའ་འགྱུར་རོ་འཚལ་ཧོར་རྒྱལ་པོ་བྱང་ཆུབ་སེམས་དཔའ་སྦྱིན་བདག་མཛད་དེ་སྤར་རྣམས་བཞེངས་པ་རིན་པོ་ཆེ་དུ་མ་བསྲེས་པའི་མཚལ་གྱི་སྤར་བཏབ་པར་འདུག །བོད་དབུས་གཙང་གི་རྒྱལ་ཁམས་སུ་


TNT17_Page_0390
[མ་དཔེ་གཟིགས་ན་འདིར་གནོན།]

འདི་ལྟ་བུ་ཚར་གསུམ་ལས་ལྷག་པ་མ་བྱོན་པར་གྲགས་ཤིང༌། གཞན་གཉིས་པོ་དུས་ཕྱིས་ཁ་ཐིག་ཚང་བ་མེད་པར་འདུག འདི་ཡོངས་རྫོགས་མ་ཚང་བ་མེད་པ། གླེགས་ཤིང་ཚུན་ཆོད་རྒྱ་ཡུལ་ཉིད་དུ་བཅོས་པའི་ཚད་ཁང་གི་རི་མོ་ཅན་ཆ་ལག་ཐམས་ཅད་ཁ་ཐིག་ཚང་བར་བཞུགས། དེ་རྗེས་ལོགས་བྲིས་ཀྱི་ལྷ་རྣམས་དང༌། རྒྱབ་ཡོལ་ལ་བཞུགས་པའི་ལྷ་རྣམས་འདི་དང་འདི་ལྟ་བུའོ་ཞེས་ངོ་སྤྲད། ལོགས་བྲིས་ལ། དུས་ཀྱི་འཁོར་ལོ་ལྷ་ལྔ། བདེ་མཆོག་ནག་པོ་ཞབས་ལུགས་རྣལ་འབྱོར་མ་བཞི་དང་བཅས་པ། རྡོ་རྗེ་ཤུགས། རྡོ་རྗེ་འཇིགས་བྱེད། གསང་འདུས་འཇམ་རྡོར། རྡོ་རྗེ་རྣལ་འབྱོར་མ། ཀུན་མཁྱེན་ཆེན་པོ། གུར་མགོན་ལྕམ་དྲལ། རྣམ་ཐོས་སྲས། ལྷ་ཆེན་རྣམས་ཀྱི་སྐུ་རྒྱབ་ངོས་ལ་རྒྱལ་བ་རིགས་དྲུག་སྒྲུབ་པ་པོའི་ཚུལ་དུ་རྗེ་བཙུན་ཉིད་ཀྱི་སྐུ་འདྲ་དང་བཅས་པ་བཞུགས། དེ་རྗེས་སྐུ་གཞན་ཚོ་དང་ཟབ་སྐུ་སོགས་ཀྱང་འཚམ་པ་བཤད། གཙུག་ལག་ཁང་གི་ཁྱམས་འདིའི་ལོགས་བྲིས་ཀྱི་དབང་དུ་བྱས་ན། ངེས་དོན་མདོ་ཉི་ཤུ་ཞེས་གྲགས་པའི་གླེང་གཞི་སོ་སོའི་མདོ་བཀོད་དང༌། དུས་ཀྱི་འཁོར་ལོ་རྩ་བའི་རྒྱུད་དང༌། འཇམ་དཔལ་རྩ་རྒྱུད་གསུངས་ཚུལ་དང༌། གཞན་ཡང་སྟོན་པ་ཡང་དག་པར་རྫོགས་པའི་སངས་རྒྱས་ཉིད་ཀྱི་མཛད་པའི་རྣམ་གྲངས་ཅི་རིགས་པ་དང་བཅས་པ་སྤེལ་ནས་བཀོད་པ་ཡིན་པ་འདུག ཀ་རིང་གཉིས་མ་གཏོགས་པའི་ཀ་བ་སུམ་ཅུ་སོ་བཞིའི་


TNT17_Page_0391
[མ་དཔེ་གཟིགས་ན་འདིར་གནོན།]

ཞུའི་ངོས་ལ། བྱང་ཆུབ་སེམས་དཔའི་འཁྲུངས་རབས་སོ་བཞི་སློབ་དཔོན་དཔའ་བོས་མཛད་པའི་གཞུང་དང་མཐུན་པར་བཀོད། ཡང་མདོ་བཀོད་ཀྱི་བར་བར་ན་བཞུགས་པ་འདི་རྣམས། འཕགས་པའི་གནས་བརྟན་ཆེན་པོ་བཅུ་དྲུག་དང༌། དཔལ་ལྡན་ཤམ་བྷ་ལར་བྱོན་པའི་ཆོས་རྒྱལ་རིགས་ལྡན་རྣམས་ཀྱི་སྐུ་བརྙན་ཡིན་ལགས། དེ་ནས་ཞིང་ཁམས་བཞི་བཅུ་པོ་རེ་རེ་བཞིན་དུ་ངོ་སྤྲད། སེང་གེ་བུབས་ཀྱི་ངོས་ལ། བསྟན་པའི་གཙོ་བོ་ལ་འཛམ་གླིང་མཛེས་པར་བྱེད་པའི་རྒྱན་དྲུག གསལ་བྱེད་ཆེན་པོ་བཞི། རྨད་བྱུང་སློབ་དཔོན་གཉིས་ལ་སོགས་པ་བཞུགས། དབུས་ཀྱི་བཞུགས་ཁྲི་ཆེན་པོ་འདི་ཡང་ཁྲི་ཕལ་པ་ཙམ་མ་ཡིན་པར། གསང་བདག་འཁོར་ལོ་ཆེན་པོ་ལ་སོགས་པའི་དཀྱིལ་འཁོར་དུ་མ་ཁྲི་འདི་ཉིད་ཀྱི་སྟེང་དུ་བཞེངས་པའི་དབང་བསྐུར་སོགས་འགྲོ་དོན་དུ་མ་མཛད་པའི་ཤིན་ཏུ་བྱིངས་ཆེ་ཞིང་བཀྲ་ཤིས་པ་འགྲན་ཟླ་མེད་པ་ཡིན། འདི་ན་དཔལ་ཡེ་ཤེས་ཀྱི་མགོན་པོ་མཐུ་སྟོབས་བསམ་གྱིས་མི་ཁྱབ་པ། ལེགས་ལྡན་ཆེན་པོ་ལྕམ་དྲལ་གྱི་མགོན་ཁང་བྱིན་རླབས་ཀྱི་གཟི་བརྗིད་དཔག་ཏུ་མེད་པ་བཞུགས། འདི་ན་དཔལ་མགོན་ལྷ་ཆེན་དཔལ་འབར་གྱི་སྐུ་བརྙན་སྐུ་ཚད་ཆེ་ཞིང་བཟོ་བཀོད་རྣམ་གྲངས་མང་བར་ཡོད་ཀྱང༌། ཞག་བདུན་ཁོངས་སུ་ལེགས་པར་ཚར་བ་སོགས་ངོ་མཚར་བའི་ལྟས་དང་བཅས་པ་ཡིན། སྒོ་ཁང་ཆེན་པོ་ལ།


TNT17_Page_0392
[མ་དཔེ་གཟིགས་ན་འདིར་གནོན།]

འདི་ན་སངས་རྒྱས་ཀྱི་བསྟན་པའི་སྲུང་མ་ཆེན་པོ་རྒྱལ་པོ་ཆེན་པོ་སྡེ་བཞི། བཙུན་མོ་སྲས་དང་བློན་པོ་གཡོག་འཁོར་དང་བཅས་པའི་བཀོད་པ་དང༌། འཇིག་རྟེན་མཐའ་དག་གི་བྱེད་པ་པོའམ་སྐྱོང་བ་པོ་ཕྱོགས་སྐྱོང་ཆེན་པོ་བཅོ་ལྔ་ཀླུ་ཆེན་བརྒྱད་དང་བཅས་པ་བཞུགས། དེ་ལ་ཕྱོགས་སྐྱོང་བཅུ་ཞེས་བྱ་བ་ཀུན་ལ་གྲགས་ཤིང༌། བཅོ་ལྔའི་ངེས་པ་འདི་ནི་རྒྱུད་གཤིན་རྗེ་གཤེད་དམར་ནག་ནས་འབྱུང་བ་ལྟར། རྡོ་རྗེ་སློབ་དཔོན་ཆེན་པོ་སངས་རྒྱས་ཡེ་ཤེས་ཞབས་ཀྱི་བཞེད་པས་གསལ་བར་མཛད་པ་ཡིན་པ་འདུག གསེང་སྒོ་ལ། འདི་ཡང་སྒོ་ཁང་ཡིན་པས། ཆོས་འདུལ་བ་ནས་སྒོ་ཁང་དུ་འཁོར་བའི་འཁོར་ལོ་ཆ་ལྔ་པ་འབྲི་གསུང་བ་ལྟར། ལྟེ་བར་ཉོན་མོངས་གསུམ། བར་དུ་འགྲོ་བ་རྒྱུད་ལྔ། ཐ་མ་རྟེན་འབྲེལ་བཅུ་གཉིས། འཐོབ་བྱ་འགོག་བདེན། ཐོབ་བྱེད་ལམ། དེ་སྟོན་པ་པོ་སངས་རྒྱས་དང་བཅས་པ་དང༌། དེ་དག་གི་མཐར་ཆོ་འཕྲུལ་ཆེན་པོའམ་བདུད་འདུལ་བ་གང་རུང་འབྲི་བར་གསུངས་པ་ལྟར། འདིར་བདུད་འདུལ་གྱི་བཀོད་པ་བཞེངས། གཞན་ཡང་འཇམ་དཔལ་རྩ་རྒྱུད་ནས་འབྱུང་བའི་གཤིན་རྗེ་གཤེད་དང༌། རྩ་བའི་མགོན་པོ་དང་བཅས་པ་བཞུགས། སྟེང་ཁང་བཀོད་པ་མཐའ་ཡས་ཞེས་བྱ་བ་འདི་ན། འོ་སྐོལ་གྱི་སྟོན་པ་ཡང་དག་པར་རྫོགས་པའི་སངས་རྒྱས་ཀྱི་རྣམ་ཐར་ཤིན་ཏུ་ངོ་མཚར་བ། མངོན་པར་འབྱུང་བའི་མདོ་དང༌། འདུལ་བ་ལུང་དང༌། ལས་


TNT17_Page_0393
[མ་དཔེ་གཟིགས་ན་འདིར་གནོན།]

བརྒྱ་པ་དང༌། རྟོགས་བརྗོད་བརྒྱ་པ་སོགས་ལས་བསྡུས་པའི་བཀོད་པ་བཞུགས། ཞེས་བརྗོད་ནས་ལོ་རྒྱུས་དང་བསྟུན་ཅི་རིགས་ཅི་རིགས་འདི་དང་འདིའོ་ཞེས་བཤད་དོ། །ལྷོ་ཕྱོགས་ངོས་ཀྱི་ལྷ་ཁང་འདི་ན། ལེགས་ལྡན་ཡེ་ཤེས་ཀྱི་མགོན་པོ་ལྷ་ཆེན་དཔལ་འབར་གྱི་སྐུའི་བཀོད་པ་མི་འདྲ་བ་དུ་མ་དང༌། དཔལ་ལྷ་མོ་འདོད་པ་ཁམས་ཀྱི་དབང་ཕྱུག་མའི་སྐུའི་བཀོད་པ་མི་འདྲ་བ་དུ་མ་དང་བཅས་པ་ཤིན་ཏུ་བཀའ་གཉན་པར་བཞུགས། ཤར་ཕྱོགས་ཀྱི་འདི་རྒྱ་གར་ལྷ་ཁང་ཞེས་བྱ་བ། འཕགས་ཡུལ་གྱི་རྟེན་བྱིན་རླབས་ཆེ་ཚད་བཞུགས་ཏེ་འདིའི་དཀར་ཆག་ལོགས་སུ་བྱ། འོག་མིན་ལ་འདི་གཙུག་ལག་ཁང་གི་ཡང་ཐོག་ཡིན་པས། ཆོས་མཚུངས་པའི་རྒྱུ་མཚན་གྱི་འོག་མིན་ལྷ་ཁང་དུ་མཚན་བཏགས། མཚན་དོན་དང་མཐུན་པའི་ཕྱིར། འདི་ནི་སྟེང་ཕྱོགས་ཀྱི་འོག་མིན་གྱི་བཀོད་པར་གདའ། སྤྱིར་འོག་མིན་ཞེས་བྱ་བ་གསུང་རབ་ནས་རྣམ་པ་དུ་མ་གསུངས་ཏེ། གཟུགས་ཁམས་གནས་རིགས་བཅུ་བདུན་གྱི་ནང་ཚན་གནས་གཙང་མའི་འོག་མིན་ཞེས་བྱ་བ་ཡོད་དེ། ཐ་མལ་པའི་འཇིག་རྟེན་ཁམས་ཀྱི་ནང་ཚན་ཡིན། དེའི་སྟེང་ན་ལྷའི་བུ་དབང་ཕྱུག་ཆེན་པོའི་གནས་ཀྱི་འོག་མིན་ཞེས་ཀྱང་བྱ། གནས་གཙང་མ་ཆེན་པོ་ཞེས་ཀྱང་བྱ། སྟོང་གསུམ་གཅིག་ཏུ་སངས་རྒྱས་བྱེ་བ་ཕྲག་བརྒྱ་འབྱུང་བའི་སྤྲུལ་གཞི། སྤྲུལ་པའི་སྐུ་ཆེན་པོ་དེ་བཞུགས་པའི་གནས་ཡིན། བཀོད་པ་འདི་ཡང་དེའི་


TNT17_Page_0394
[མ་དཔེ་གཟིགས་ན་འདིར་གནོན།]

བཀོད་པ་ཡིན་པ་འདུག གཞན་ཡང་སངས་རྒྱས་རྣམ་པར་སྣང་མཛད་ཀྱི་ཞིང་ཁམས་ལ་ཡང་འོག་མིན་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་ཞེས་གྲགས་པ་དང༌། འོག་མིན་སྟུག་པོ་བཀོད་པའི་ཞིང་མཆོག་ཅེས་བྱ་བ། ནམ་མཁའ་དང་མཉམ་པར་ཁྱབ་ཅིང་ལོངས་སྤྱོད་རྫོགས་སྐུའི་ཞིང་ཁམས་ཡིན་པ་ཅིག་ཀྱང་གསུངས་སོ། །འདི་ནི་དོན་ཞགས་ལྷ་ལྔ། འདི་ནི་རྒྱུང་སྡེ་སྤྱིའི་ལུགས་ཀྱི་རིགས་ལྔ་ཡུམ་ལྔ། འདི་ནི་དཔལ་དུས་ཀྱི་འཁོར་ལོ། འདི་རྣམས་དུས་འཁོར་ཉིད་ནས་གསུངས་པའི་རིགས་བདག་རྒྱལ་བ་རིགས་དྲུག གཞན་ཡང་བྱང་ཆུབ་སེམས་དཔའ་ཉེ་བའི་སྲས་བརྒྱད། འཇམ་དབྱངས་དང་སྤྱན་རས་གཟིགས་ཀྱི་ཡུམ་གཉིས་གཉིས། སྟེང་གི་ཆ་ལ་མཛད་པ་བཅུ་གཉིས་མདོར་བསྡུས་དང་བཅས་པའི་བཀོད་པ་ལགས། འདི་ཕྱོགས་ན་སྟོན་པ་ཡང་དག་པར་རྫོགས་པའི་སངས་རྒྱས། འཕགས་པ་སྤྱན་རས་གཟིགས་ཀྱི་རིགས་ལ། བཅུ་གཅིག་ཞལ་འཁོར་ནོར་བཟང་དང་རྟ་མགྲིན་གཉིས། སྤྱན་རས་གཟིགས་མགྲིན་སྔོན། ཇོ་བོ་ཧ་རི་ཧ་རི་ཧ་རི་ལ་ཞོན་པ། འཕགས་པ་སེང་གེ་སྒྲ། ཇོ་བོ་བདེ་ལྡན། སྤྱན་རས་གཟིགས་ཡིད་བཞིན་ནོར་བུ། སྤྱན་རས་གཟིགས་ཧ་ལ་ཧ་ལ། སྤྱན་རས་གཟིགས་འཇིགས་པ་བརྒྱད་སྐྱཽབ། དབང་དུ་བྱེད་པའི་སྤྱན་རས་གཟིགས་དམར་པོ་རིགས་གཉིས། ཡང་ཧ་ལ་ཧ་ལ་ཕྱག་བཞི་པ་གཅིག སྤྱན་རས་གཟིགས་རྒྱལ་པོ་རོལ་བ་རྣམས་དང༌། འདི་ན་སྒྲོལ་མ་ལྷ་ལྔ། འདི་ན་ཀུན་མཁྱེན་


TNT17_Page_0395
[མ་དཔེ་གཟིགས་ན་འདིར་གནོན།]

ཆོས་ཀྱི་རྒྱལ་པོ་དོལ་པོ་པ་ཆེན་པོ། འགྲོ་ལྡིང་གི་སློབ་དཔོན་ལྷའི་འབྱུང་ལྡན། རྒྱ་གར་གྱི་པཎྜི་ཏ་གང་བའི་རྡོ་རྗེ། སྦྱིན་བདག་གི་ཚུལ་དུ་རྗེ་བཙུན་ཉིད་ཀྱི་སྐུ་བརྙན་རྣམས་བཞུགས། འདིའི་རྟེན་གྱི་གཙོ་བོ་འདི་བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་བཟོ་བཀོད་ལེགས་ཤིང༌། སྐུ་རྒྱན་སོགས་བཀོད་པ་ཕུན་སུམ་ཚོགས་པ། ནང་བཞུགས་རྟེན་བྱིན་རླབས་ཅན་དུ་མ་དང་བཅས་པ་བཞུགས་པ་ཡིན། མེ་ཕོ་སྟག་ལོ་ཤིན་ཏུ་ཐན་པ་ཆེ་བའི་སྐབས། འདིའི་རབ་གནས་མཛད་པའི་ཉིན་མོ་ནས་བརྩམས་ཞག་མང་པོར་ཆར་པ་གཤིན་ལ་ཆེ་བར་བབས། ཐན་པའི་འཇིགས་པ་ལས་གྲོལ་བས། ཚེ་དཔག་མེད་བདུད་རྩིའི་ཆར་འབེབས་མར་མཚན་གསོལ་བ་ལགས། རྗེས་སུ་ཡང་འདི་ལ་སྐུ་ཁྲུས་གསོལ་ཞིང་མཆོད་པ་ཕུལ་བས། ཆར་དཀོན་པའི་དུས་སུ་ཡང་ཆར་ཅི་རིགས་པ་འབབ་པའི་བྱིན་རླབས་ཀྱི་ལྟས་མངོན་གྱུར་པ་བཞུགས། གདུང་ལྡེབས་ཀྱི་འདི་དག་ནི་ཞི་བ་དམ་པ་རིགས་བརྒྱ་ཡིན་པར་འདུག ཀ་བ་བརྒྱད་ཀྱི་ངོས་འདི་རྣམས་མཆོད་པའི་ལྷ་མོ་བརྒྱད་ཡིན་ལགས། ཡང་འདི་ན་རྗེ་བཙུན་མ་འཕགས་མ་སྒྲོལ་མའི་ལྷ་ཁང་བཞུགས་པ་ཡིན། རྟེན་འདི་རྗེ་བཙུན་མ་འཕགས་མ་སྒྲོལ་མ་སྔོ་ལྗང་ཀུན་ཁྱབ་ཏུ་གྲགས་པ། རྩ་བའི་སྒྲུབ་ཐབས་ཀྱི་ལུགས་ཡིན། སྐུ་ཚུགས་བཟང་ཞིང༌། འཕྲ་རྒྱན་རིན་པོ་ཆེ་སྣ་ཚོགས་པས་མཛེས་པ། ནང་བཞུགས་བྱིན་རླབས་བསམ་


TNT17_Page_0396
[མ་དཔེ་གཟིགས་ན་འདིར་གནོན།]

གྱིས་མི་ཁྱབ་པ་བཞུགས། འདི་བཞེངས་པའི་ལོ། བསྟན་པ་ལ་བར་དུ་གཅོད་པའི་མི་མཐུན་པའི་ཕྱོགས་ཐམས་ཅད་སྤྲིན་བཞིན་དེངས་པ་ཞིག་བྱུང་བས། བདུད་འདུལ་སྒྲོལ་མར་མཚན་གསོལ་བ་ཡིན། འདི་ནི་འཆི་བ་བླུ་བའི་སྒྲོལ་ལྗང༌། སྒྲུབ་ཐབས་སློབ་དཔོན་ཀླུ་སྒྲུབ་ཀྱིས་མཛད་པའི་ལུགས་ཡིན། སྐུ་རྒྱུའི་ཚོགས་སྔ་མ་འདི་དང་འདྲ་བ་རང་ཡིན་ནའང༌། རྒྱུ་ཚོགས་འཕེལ་བའི་ཚུལ་གྱིས། སྔ་མ་ལས་སྐུ་ཚད་ཆེ་བའི་ཆོ་འཕྲུལ་བསྟན་པ་དང༌། འདིའི་རབ་གནས་མཛད་པའི་ཚེ། ཕྱོགས་ཐམས་ཅད་ནས་རྙེད་བཀུར་ལོངས་སྤྱོད་སྤྲིན་སྟིབས་པ་བཞིན་བྱུང་བས། འདོད་དགུ་འབྱུང་བའམ། དགོས་འདོད་ཀུན་འབྱུང་བའི་སྒྲོལ་མར་མཚན་གསོལ། འདི་ཡང་བཟོ་སྒྲོས་གཙང་ཞིང༌། གཞན་ཀུན་པས་ཟིལ་དང༌། གཟི་བྱིན་ཆེ་བ། རྒྱན་སྤྲོད་སོགས་ཐམས་ཅད་ནས་རྒྱུ་ཚོགས་འགངས་ཆེ་བར་བཞུགས། འདི་ནི་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མ་སྟེ། བཅོམ་ལྡན་འདས་མ་འདི་ཉིད་ཀྱི་རྟོག་པ་ནས་འབྱུང་བ་བཞིན་གྱི་སྐུ་བརྙན་ལགས། འདི་ཡང་བཟོ་སྒྲོས་གཙང་ཞིང་ཚུགས་བཟང་བས། རྒྱན་སྤྲོད་སོགས་སྐུ་རྒྱུ་ཕུན་སུམ་ཚོགས་པ། འདིའི་ནང་བཞུགས་ལ་དེ་བཞིན་གཤེགས་པའི་རིང་བསྲེལ་འཁྲུལ་མེད་བཅུ་ཙམ་བཞུགས། འདི་ད་ལྟ་ཡིན་ཕུགས་ལྷ་ཁང་ལ་སོགས་པ་དགོས་པ་འདུག རྒྱུད་རིས་ཀྱི་དབང་དུ་བྱས་ན། འདི་ནི་བཅོམ་ལྡན་འདས་མ་ཨུ་རྒྱན་སྒྲོལ་མར་


TNT17_Page_0397
[མ་དཔེ་གཟིགས་ན་འདིར་གནོན།]

གྲགས་པ་གནས་ཀྱི་དབང་ཕྱུག་མ་ཡིན། འདི་རྣམས་མཚན་ཡིན་དང་མཐུན་པར་རྗེ་བཙུན་མ་སྒྲོལ་མའི་རིགས་སྣ་ཚོགས་པ་ལགས། འདི་རྣམས་སྒྲོལ་མ་འཇིགས་པ་བརྒྱད་སྐྱོབ་ཀྱི་བཀོད་པ་ཡིན། འདི་ནི་དཔལ་སཾ་པུ་ཊའི་རྒྱུད་ནས་གསུངས་པའི་བཅོམ་ལྡན་འདས་རྡོ་རྗེ་འཇིགས་མཛད་བསྡུས་པ་དེ་ལགས། གཞན་ཡང་ལྷ་ཚོགས་ཅི་རིགས་དང་བཅས་པ་བཞུགས། བདེ་ཡངས་འདི་ལ་ཆོས་བཟང་ཞེས་བྱ་ཞིང༌། མཐའ་སྐོར་འདི་ལ་བསྐལ་བཟང་གི་སངས་རྒྱས་སྟོང་རྩ་གཉིས། ཆོས་རྒྱལ་རིགས་ལྡན་ལ་སོགས་པའི་སྐུ་བརྙན་གྱིས་མཛེས་པར་བྱས་པ་འདི་ལགས་ཤིང༌། དབུས་ཀྱི་བཞུགས་ཁྲི་རྡོ་རྗེ་གདན་ཞེས་བྱ་བ་འདི་ན། རྒྱ་གར་རྡོ་རྗེ་གདན་གྲཱ་དར་བའི་དུས་ཀྱི་བཀོད་པ་དང༌། སློབ་དཔོན་པུཎྱ་ཨཱ་ཀ་ར་གུཔྟ། སློབ་དཔོན་རཏྣ་ཨཱ་ཀ་ར་གུཔྟ། སློབ་དཔོན་ཨ་བྷ་ཡ་ཨ་པ་ར་གུཔྟ། ཙ་མི་སངས་རྒྱས་གྲགས་པ་སྟེ་རྡོ་རྗེ་གདན་པའི་མཚན་ཅན་བཞི་པོའི་སྐུ་བརྙན་རྣམས་བཞུགས། མཐའ་སྐོར་གྱི་གཙུག་ལག་ཁང་བཅུ་དྲུག་ལ། འདི་ནི་དཔལ་ཆེན་པོ་ཧེ་རུ་ཀ་འཁོར་ལོ་བདེ་མཆོག་གི་བཞུགས་གནས་ཡིན་པའི་ཕྱིར། དཔལ་ཆེན་ལྷ་ཁང་ཞེས་བྱ། དེ་ལ་སྒོ་ཁང་འདི་ན་རྫོགས་པའི་སངས་རྒྱས་རབས་བདུན་གཙུག་ལག་གི་ནང་དུ་འབྱོན་པའི་བཀོད་པ་ཡིན། ཁྱམས་འདིའི་ལོགས་བྲིས་ཀྱི་དབང་དུ་བྱས་ན། ལྷོའི་ལྡེབས་ལ་ཞིང་སྐྱོང་ཡབ་ཡུམ་བདུན་ཅུ་རྩ་གཉིས་མཁའ་འགྲོ་རྒྱ་མཚོ་


TNT17_Page_0398
[མ་དཔེ་གཟིགས་ན་འདིར་གནོན།]

ནས་གསུངས་པ་ལྟར་དང༌། གཙང་ཁང་གི་ཕྱིའི་གཡས་ཀྱི་ངོས་ཆེན་ལ། འཁོར་ལོ་སྡོམ་པ་ཞལ་ཕྱག་འབུམ་པའི་བཀོད་པ་དང༌། གཡོན་ངོས་ལ་ཤྲཱི་བཛྲ་བྷཻ་ར་ཝ་ཐུན་མོང་མ་ཡིན་པའི་མན་ངག་ལུགས་རོ་ལངས་བརྒྱད་ཀྱིས་བསྐོར་བ་དང༌། གཞན་ཞལ་ཤར་གཟིགས་དང་ནུབ་གཟིགས་ཀྱི་ལྡེབས་ལ་བཞུགས་པ་འདི་རྣམས་དཔལ་འཁོར་ལོ་བདེ་མཆོག་དང་རྡོ་རྗེ་ཕག་མོའི་རིགས་ཁོ་ན་ཡིན་ཅིང༌། ཐམས་ཅད་ཀྱང་རྒྱུད་ཀྱི་རྒྱལ་པོ་མངོན་བརྗོད་བླ་མའམ། ཨ་བྷི་དྷ་ན་ལས་གསུངས་པ་ཁོ་ན་ཡིན་པ་འདུག་ལགས། སེང་གཡབ་ཀྱི་ནང་དུ་གཙོ་མོ་རྡོ་རྗེ་ཕག་མོ། གཞན་གྲུབ་ཐོབ་ཀྱི་འཁོར་ལོ་བསྒྱུར་བ་འདི་དང་འདི་ཞེས་བྱ་བ་བཞུགས་ཞེས་སོ་སོར་བརྡ་སྤྲད། གཙང་ཁང་འདི་ཉིད་ན། དཔལ་འཁོར་ལོ་སྡོམ་པ་ཞལ་བཞི་ཕྱག་བཅུ་གཉིས་པའི་སྐུ་བརྙན་བྱིན་རླབས་ཀྱི་གཟི་འོད་དཔག་ཏུ་མེད་པ་དང་བཅས་པ་འདི། སློབ་དཔོན་ཆེན་པོ་ནག་པོ་སྤྱོད་པ་པའི་བཞེད་དགོངས་དང་མཐུན་པར་བཞེངས། འདི་ནི་རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་དུ་གྲགས་པ་ཡིན་ཏེ། འདི་ནི་ཕག་དཀར་ཤེས་རབ་གསལ་བྱེད་ཡིན། རྣལ་འབྱོར་མ་རྒྱུད་རྣམས་ལ་འཁོར་ལོའི་དབང་ཕྱུག་མ་རྣམས་བྱིན་རླབས་འཇུག་པའི་སྒོ་ཡིན་པས། འདིར་ཡང་སྐུ་བརྙན་ལྷག་པོར་བཞེངས་པ་ཉིད་བྱིན་རླབས་འཇུག་པའི་སྒོར་གྱུར་པ་ལགས། ལོགས་བྲིས་ལ། དཀྱིལ་འཁོར་གྱི་ལྷ་ཚོགས་འཁོར་དཔའ་པོ་དཔའ་མོ་དྲུག་


TNT17_Page_0399
[མ་དཔེ་གཟིགས་ན་འདིར་གནོན།]

ཅུ། སློབ་དཔོན་སྤྱོད་པའི་རྡོ་རྗེ་དང་བཅས་པ་སོགས་དང༌། སྐེད་རིས་ལ་དུར་ཁྲོད་ཆེན་པོ་བརྒྱད། ལྷ་ཁང་ཉིད་ཀྱི་ནང་ཡང་ཕྱོགས་མདོག་ཏུ་བསྒྱུར་བ་སོགས། གཞལ་མེད་ཁང་གི་མཚན་ཉིད་ཚང་བར་བཞུགས། འདི་ནི་ཕྱོགས་དང་འབྲེལ་བའི་དབང་དུ་བྱས་ནས། དབང་ལྡན་ལྷ་ཁང་དུ་མཚན་གསོལ། འདིའི་བར་ཁང་གི་བསྲུང་མ་ནི། འཇིགས་བྱེད་ཆེན་པོ་དགུ་ཡུམ་དང་བཅས་པ་བཞུགས། ལྷ་ཁང་འདིའི་རྟེན་གྱི་གཙོ་བོ་ནི། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་ནག་པོའི་རྒྱུད་ནས་འབྱུང་བ་ལྟར། དཔལ་གཤིན་རྗེ་གཤེད་ཞལ་གསུམ་ཕྱག་དྲུག་པའི་སྐུ་བརྙན་བདུད་དཔུང་ཟིལ་གྱིས་གནོན་པ་འདི་ལགས། ལོགས་བྲིས་ལ་ཁྲོ་བོ་ཁམས་གསུམ་རྣམ་རྒྱལ། ཐུབ་དབང་གཙོ་བོར་གྱུར་པའི་རིགས་ལྔ། དཔལ་མགོན་པོ་སེང་ཞོན་གཙོ་འཁོར་ཁམས་གསུམ་རྣམ་རྒྱལ་གྱི་རྒྱུད་གསུངས་པའི་གླེང་གཞིའི་བཀོད་པ། གཤིན་རྗེ་གཤེད་དམར་པོ་ལྷ་ལྔ་ལ་སོགས་པ་བཞུགས། ཁྱད་པར་གནས་འདིར་བྱང་ཤར་དབང་ལྡན་འབྱུང་བའི་གནོད་པ་མཐའ་དག་བཟློག་པའི་ཕྱིར་དུ་ལྷ་ཆེན་པོ་དབང་ལྡན་དྲག་པོ་དབང་ཕྱུག་ཉིད། བཙུན་མོ་རིའི་ལྷ་མོ། འཁོར་འབྱུང་པོ་ཚོགས་ཀྱི་མངའ་བདག་བཞི་དང་བཅས་པ་བཞུགས། སྟེང་གི་ལྷ་ཁང་འདི་ན། དཔལ་ཆེན་པོ་ཡང་དག་འཁོར་བཅས་དང༌། རྡོ་རྗེ་གཞོན་ནུ་ཕུར་བུའི་ལྷ་ཚོགས། གཤིན་


TNT17_Page_0400
[མ་དཔེ་གཟིགས་ན་འདིར་གནོན།]

རྗེ་གཤེད་ཕྱག་རྒྱ་ཟིལ་གནོན། རྟ་མགྲིན་ཡང་གསང་ལྷ་དགུ། དཔལ་མགོན་པོ་མ་ནིང་ལ་སོགས་པ། གསང་སྔགས་རྙིང་མའི་ལྷ་ཚོགས་རྣམས་བཞུགས། ཤར་སྒོ་བར་མའི་སྟེང་གི་ཤར་ཕྱོགས་སྨན་བླའི་ལྷ་ཁང་ནི། ཕུག་གི་ལྷ་ཁང་འདི་ན་བཅོམ་ལྡན་འདས་སྨན་པའི་རྒྱལ་པོའི་ལྡེར་བཟོ་རྟེན་གྱི་གཙོ་བོར་བཞུགས་པ་འདི་ལགས་ཤིང༌། ལོགས་བྲིས་ལ་བདེ་བར་གཤེགས་པ་བརྒྱད། བྱང་ཆུབ་སེམས་དཔའ་བཅུ་དྲུག མཁན་པོ་བོ་དྷི་སཏྭ། རྒྱལ་པོ་ཁྲི་སྲོང་ལྡེ་བཙན། ཀུན་མཁྱེན་ཆོས་ཀྱི་རྒྱལ་པོ་ལ་སོགས་པ་བཞུགས། མདོ་ན་ཕྱོགས་སྐྱོང་བཅུ། གནོད་སྦྱིན་གྱི་དེད་དཔོན་བཅུ་གཉིས། རྒྱལ་ཆེན་བཞི། མགོན་པོ་བང་ལ་སོགས་པ་བཞུགས། ཆོས་བཟང་རྡོ་རྗེའི་གདན་གྱི་བདེ་ཡངས་ཆེན་པོའི་ཤར་སྒོ། ཐེམ་སྐས་གཡས་གཡོན་སྟེང་གསུམ་གྱི་ངོས་ལ། ཁྲོ་བོ་ཆེན་པོ་བཅུ། ཟད་པར་ཆེན་པོ་བཅུ། ཕྱོགས་སྐྱོང་བ་བཅུ། གཟའ་མཆོག་ཆེན་པོ་བཅུ། ཀླུ་རྒྱལ་ཆེན་པོ་བཅུ། འབྱུང་པོ་ཆེན་པོ་བཅུ་སྟེ། དཔལ་དུས་ཀྱི་འཁོར་ལོ་ནས་གསུངས་པའི་སྡེ་དྲུག་སྲུང་མ་དྲུག་ཅུ་ལ་སོགས་པ་བར་ཆད་སེལ་བའི་ལྷ་ཁྱད་པར་ཅན་རྣམས་བཞུགས། ཤར་ལྷོའི་ལྷ་ཁང་འབར་འཛིན་དུ་གྲགས་པ་འདི་ན། བར་ཁང་འདིར་སྲུང་མ་མིང་པོ་གསུམ་དང་སྲིང་མོ་བཞི། ཕུག་གི་ལྷ་ཁང་དངོས་གཞི་འདི་ན། རྟེན་གཙོ་བཅོམ་ལྡན་འདས་མི་གཡོ་མགོན་པོ་པུས་


TNT17_Page_0401
[མ་དཔེ་གཟིགས་ན་འདིར་གནོན།]

བཙུགས་མ་དང༌། ལས་ཐམས་ཅད་སྒྲུབ་པའི་ལྷ་དྲང་སྲོང་ཆེན་པོ་མེ་ལྷ་ཞབས་འབྲིང་གི་ཚུལ་དུ་བཞུགས། ལོགས་བྲིས་ལ་རྣམ་སྣང་མངོན་བྱང་གི་རྒྱུད་གསུངས་པའི་བཀོད་པ། གཤིན་རྗེ་གཤེད་རྣམ་པར་རྒྱལ་བའི་རྒྱུད་གསུངས་པའི་བཀོད་པ། གཟུངས་གྲྭ་ལྔ། དུག་སེལ་མ། རི་ཁྲོད་མ། འོད་ཟེར་ཅན། མི་གཡོ་བླ་མེད་ལྷ་ལྔ། རྗེ་བཙུན་ཉིད་ཀྱི་སྐྱེས་རབས་འཕྲེང་བ་ལ་སོགས་པ་བཞུགས། ལྷ་ཁང་སྟེང་མ་འདི་ན་བཅོམ་ལྡན་འདས་ཐུབ་པའི་དབང་པོ། རྡོར་སེམས་ལ་སོགས་པ་སེམས་དཔའ་བཅུ་དྲུག འཕགས་པའི་གནས་བརྟན་ཆེན་པོ་བཅུ་དྲུག །ཧྭ་ཤང་དྷརྨ་ཏ། རྒྱལ་ཆེན་བཞི་ལ་སོགས་པ་མང་པོ་བཞུགས། གཞལ་ཡས་ཁང་ཞེས་བྱ་བའི་གཙུག་ལག་ཁང་འདི་ཉིད་ཀྱི་དབང་དུ་བྱས་ན། དང་པོར་སྒོ་ཁང་འདི་ན། བྱང་ཆུབ་སེམས་དཔའ་ཉེ་བའི་སྲས་བརྒྱད་ལྡེམ་སྐུའི་ཚུལ་དུ་གཙུག་ལག་ཁང་གི་ནང་དུ་འབྱོན་པའོ། །འཁྱམས་འདི་ལ་རྒྱུད་སྡེ་ཐ་དད་ནས་གསུངས་པའི་དཀྱིལ་འཁོར་གྱི་གཙོ་བོ་མང་དུ་བཞུགས་པ་ལགས། དེ་ཡང་གཡས་བསྐོར་དུ་བྱས་ན་དང་པོར་མངོན་བྱུང་མགོན་པོ། །གཤིན་རྗེ་གཤེད་རྣམ་པར་རྒྱལ་བ། འཇམ་དཔལ་ཆོས་དབྱིངས་གསུང་དབང༌། རྡོ་རྗེ་བདུད་རྩི། གདན་བཞི་ཡེ་ཤེས་དབང་ཕྱུག་མ། སངས་རྒྱས་མཉམ་སྦྱོར་རྡོ་རྗེ་སེམས་དཔའ། སྒྱུ་འཕྲུལ་དྲྭ་བ། འདུས་པ་ཡེ་ཤེས་ཞབས་ལུགས། ཕྱག་


TNT17_Page_0402
[མ་དཔེ་གཟིགས་ན་འདིར་གནོན།]

རྡོར་སྟོད་འགྲེལ་ལུགས་ཀྱི་བདེ་མཆོག དུས་འཁོར་ཞལ་བཅུ་གཉིས་པ། སངས་རྒྱས་ཐོད་པ། མཧཱ་མ་ཡ། དཔལ་མཁའ་འགྲོ་རྒྱ་མཚོ། རྡོ་རྗེ་ཕག་མོ་ཕག་གདོང་ཆེན་མོ། ཁ་སྦྱོར་རྡོར་སེམས། སྡོམ་པ་འབྱུང་བ། དཔལ་སྡོམ་པ་ཆེན་པོ། བདེ་མཆོག་ལཱུ་ཡི་ལུགས། དགྱེས་པ་རྡོ་རྗེ་ཐོད་པ་ཅན། དགྱེས་རྡོར་མཚོན་ཆ་ཅན། ཕྱག་ཆེན་ཐིག་ལེ། བདེ་མཆོག་འཇམ་རྡོར། གཤིན་རྗེ་གཤེད་དགྲ་ནག དཔལ་ཟླ་གསང་ཐིག་ལེ། དཔལ་ནག་པོ་ཆེན་པོ་རྒྱུད་མགོན་རྣམས་བཞུགས། གཞན་འཁོར་ཚོགས་དང་ལྷ་མགྲོན་བཀོད་པ་དུ་མ་ཡོད་ཅིང༌། སེང་གཡབས་ཀྱི་ངོས་ལ། ཐུབ་པའི་དབང་པོ། འོད་སྲུང་ལ་སོགས་པ་བསྟན་པའི་གཏད་རབས་བདུན། ཉི་མ་གུང་པ་དང་བཅས་པ་བཞུགས་པ་ཡིན་ལ། སྒོ་སྟོད་ཀྱི་འདི་གྲུབ་ཐོབ་ཆེན་པོ་ཞི་བ་སྦས་པ་དང༌། ཀུན་མཁྱེན་དུས་གསུམ་སངས་རྒྱས་དང༌། རྗེ་བཙུན་ཉིད་དོ། །དབུས་ཀྱི་གཙང་ཁང་ཆེན་པོ་འདི་ཁ་ཆེ་ལུགས་ཀྱི་ཐོག་འབུབས་ལུགས་སུ་བྱས། གཙང་ཁང་གི་དབུས་སུ་དཔལ་དུས་ཀྱི་འཁོར་ལོའི་སྐུ་གསུང་ཐུགས་ཡོངས་སུ་རྫོགས་པའི་བློས་བླངས་ངོ་མཚར་གཟི་འོད་དཔག་ཏུ་མེད་པ་འཕྲོ་བ། རིགས་ལྡན་སྤྲུལ་པའི་སྐུས་བྱིན་གྱིས་རླབས་ཤིང༌། དངོས་སུ་བཞེངས་པར་གྲགས་པ་མཆོད་པའི་ཡོ་བྱད་དང་བཅས་པ་འདི་ལགས། ལོགས་བྲིས་ལ་མཆོད་པའི་ལྷ་མོ་བཅུ་གཉིས། གསང་བའི་


TNT17_Page_0403
[མ་དཔེ་གཟིགས་ན་འདིར་གནོན།]

མཆོད་པ་ཡུམ་བཞི་དང་བཅས་པ་དང༌། ཞལ་བ་ཕྱོགས་མདོག རྩིག་པ་དང་མཐུན་པའི་སྐེད་རིས་སོགས། དཀྱིལ་འཁོར་གྱི་མཚན་ཉིད་རྫོགས་པའི་ཚུལ་དུ་ཡོད། བསྐོར་ཁང་འདི་ལ་རྗེ་བཙུན་མ་འཕགས་མ་སྒྲོལ་མ་དང་ཚེ་དཔག་མེད་ཀྱི་ལྷ་ཚོགས་བཞུགས། །གསུང་ཁང་དུ་གྲགས་པའི་གཙུག་ལག་ཁང་འདི་ཉིད་ན། ལྷ་ཁང་ཕུག་ན་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་ཕྱག་བཞི་མའི་སྐུ་བརྙན། ལོགས་བྲིས་ཕྱོགས་བཅུའི་སངས་རྒྱས་དང་བཅས་པ། འཁྱམས་འདིའི་གཡས་ལོགས་ན། ཡུམ་ཆེན་མོ་ཕྱག་གཉིས་པ་ལ་འཁོར་ཕྱོགས་བཅུའི་སངས་རྒྱས་ཀྱི་སྐོར་བ་དང༌། བཅོམ་ལྡན་འདས་ཐུབ་པའི་དབང་པོ་ལ་བྱང་སེམས་ཉེ་བའི་སྲས་བརྒྱད་ལ་སོགས་པས་བསྐོར་བ། ཤར་ནུབ་ཀྱི་ངོས་རྣམས་ལ་རིགས་ལྔའི་ལྷ་ཚོགས་མང་པོ་དང༌། བྱང་གི་ངོས་ལ་རྗེ་བཙུན་དབྱངས་ཅན་མའི་ཞིང་ཁམས། བྱ་རྒྱུད་ལས་འབྱུང་བའི་ནག་པོ་ཆེན་པོའི་ཞིང་ཁམས། འདི་བི་ཀྲ་མ་ཤི་ལའི་གཏོར་མ་སློབ་དཔོན་ཀུན་གྱི་ཐོག་མ། སྐུ་སྒྲུབ་སྙིང་པོར་གྲགས་པ་དེས་མཛད་པའི་གཏོར་མའི་ཆོ་ག་ཀུན་ལས་བཏུས་པའི་ནང་ནས་འབྱུང་བ་ཡིན། ཡང་མ་ཅིག་ནགས་རྒྱལ་གྱི་ཞིང་ཁམས་ཅིག འཕགས་པ་ཀླུ་སྒྲུབ་ཀྱིས་མཛད་པའི་སྒྲུབ་ཐབས་ལས་འབྱུང་བ་ལྟར། གུར་མགོན་ཡུམ་ཅན་ལྷ་ལྔ་མ་རྣམས་བཞུགས། གསུང་རབ་བཞུགས་


TNT17_Page_0404
[མ་དཔེ་གཟིགས་ན་འདིར་གནོན།]

པའི་དབང་དུ་བྱས་ན། བཀའ་འགྱུར་རོ་འཚལ་གསེར་མ་ཡོངས་རྫོགས་ཚར་གཉིས། སྐྱ་པོད་ཆ་ཚང་གཅིག་སོགས་བཀའ་འགྱུར་ཡོངས་རྫོགས་ཚར་བཞི་དང༌། ཐོར་བུ་པ་ཤིན་ཏུ་མང་བ་བཞུགས། །དགའ་ལྡན་བྱམས་པའི་ལྷ་ཁང་འདིའི་དབང་དུ་བྱས་ན། གཙང་ཁང་ཕུག་ན་རྗེ་བཙུན་བྱམས་པའི་འབུར་དོད། ལོགས་བྲིས་ལ་ཡང་རྒྱལ་བ་མ་ཕམ་པ་ཉིད་ཀྱི་སྐུ་བརྙན་བརྒྱ་ཕྲག་མང་པོ་དང༌། འཁྱམས་འདི་ལ་རྗེ་བཙུན་བྱམས་པའི་སྐུ་བརྙན་གཉིས། སྒྲོལ་མ་དཀར་མོ་གཉིས། གཞན་ཉི་མ་སྦས་པའི་ལུགས་སྒྲུབ་ཐབས་དང་བསྟོད་པ་རྣམ་དག་གཙུག་ནོར་ནས་འབྱུང་བ་ལྟར། སྒྲོལ་མ་ཉི་ཤུ་རྩ་གཅིག་གི་ལྷ་ཚོགས་དང༌། བཀའ་སྲུང་མགོན་པོ་ལྷོ་ནུབ་པ་དང༌། ལྷ་མོ་ཙཎྜི་ཀཱ་རྣམས་བཞུགས།ཐེག་མཆོག་ཧེ་རུ་ཀའི་ལྷ་ཁང་འདིའི་དབང་དུ་བྱས་ན། ལྷ་ཁང་ཕུག་གི་རྟེན་གཙོ་འདི་རྩ་བའི་ཧེ་རུ་ཀ་ཞེས་བྱ་བ་ཡིན། དེ་ཡང་གང་ལ་ངོས་འཛིན་ན། དགྱེས་པ་རྡོ་རྗེ་ཕྱག་གཉིས་པ་དང༌། དྲག་པོ་གདན་ཅན་དང༌། དུར་ཁྲོད་ན་དགྱེས་པའི་ཧེ་རུ་ཀ་དང༌། མཉམ་སྦྱོར་ཧེ་རུ་ཀ་ཕྱག་གཉིས་པ་དང༌། གཞན་ཡང་ཟླ་གསང་ཐིག་ལེ་དང༌། དགྲ་ནག་གི་རྒྱུད་དང༌། རྡོ་རྗེ་རྩེ་མོ་ནས་གསུངས་པ་ལ་སོགས་པའི་ཧེ་རུ་ཀ་རྣམས་སྐུའི་རྣམ་འགྱུར་གཅིག་པར་བྱུང་བ་དེ་ལ་ཟེར་བ་ཡིན། ལོགས་བྲིས་ལ་ཧེ་རུ་ཀ་ཕྱག་གཉིས་པའི་སྟར་ཅིག བདག་མེད་མའི་སྟར་ཅིག །


TNT17_Page_0405
[མ་དཔེ་གཟིགས་ན་འདིར་གནོན།]

གཽ་རི་ལ་སོགས་པ་འཁོར་གྱི་ལྷ་མོའི་སྟར་གཅིག་རྣམས་བཞུགས། འཁྱམས་ལ་རྡོར་སེམས་ཡུམ་ཅན། བདེ་མཆོག་ལྷན་སྐྱེས་བཞུགས་པ། གྲུབ་ཐོབ་བརྒྱད་བཅུ་རྩ་བཞི་དང་བཅས་པ་ཡིན། སྔོན་བལ་པོའི་བཟོ་བོ་གཅིག་གིས་བོད་ཡུལ་དུ་བོད་སྐད་དུ་བརྩམས་ནས། སློབ་དཔོན་རྡོ་རྗེ་གདན་པ་ལ་ཁ་འཕངས་པའི་ལུགས་དེ་མ་ཡིན། གྲུབ་ཐོབ་བརྒྱད་བཅུ་རྩ་བཞི་རྒྱ་གར་གྱི་སློབ་དཔོན་དཔའ་བོ་འོད་གསལ་གྱི་བཞེད་པ་ལྟར། ནོར་བ་སྤངས་པ་དང༌། ཡེ་ཤེས་མགོན་པོ་ཕྱག་བཞི་པ་བཅས་པ་དང་བཞུགས། གྲུབ་བརྒྱ་ལུགས་རྣམ་དག་དེ་ཡིན། །ཀུན་གཟིགས་འཇམ་དབྱངས་ལྷ་ཁང་འདིའི་དབང་དུ་བྱས་ན། རྟེན་གྱི་གཙོ་བོ་འཕགས་པ་འཇམ་དཔལ་ཨ་ར་པ་ཙ་དམར་སེར། ཤེས་བྱ་ཐམས་ཅད་ལ་བློ་གྲོས་ཀྱི་སྣང་བ་རྒྱས་པར་མཛད་པའི་བྱིན་རླབས་ཀྱི་གཏེར་ཆེན་པོ་འདི་དང༌། རྒྱུད་རིས་ལ་འཇམ་དཔལ་ངག་གི་རྒྱལ་པོ། འཇམ་དཔལ་ཆོས་ཀྱི་འཁོར་ལོ། འཇམ་དཔལ་ཡེ་ཤེས་སེམས་དཔའ། འཇམ་དཔལ་སེང་ལྡན། ཁྲོ་བོ་གཤིན་རྗེ་གཤེད་རྣམས་གཙོ་བོར་བྱས་ཤིང༌། འཇམ་དཔལ་ཨ་ར་པ་ཙ་ན་དཀར་པོ། སེར་པོ། འཇམ་དཔལ་ཆོས་ཀྱི་དུང་གི་ཏིང་ངེ་འཛིན། འཇམ་དཔལ་རྡོ་རྗེ་ཆོས། འཇམ་དཀར་དཔའ་བོ་ཆིག་སྒྲུབ་རྣམས་ཀྱི་སྟར་རེ་རེ་བཞུགས། ནུབ་ཕྱོགས་ནས་ཞལ་ཤར་དུ་གཟིགས་པའི་ལྷ་ཁང་གསུམ་ལ། དང་པོ་ཨོ་རྒྱན་མཁའ་སྤྱོད་ཀྱི་ལྷ་ཁང་


TNT17_Page_0406
[མ་དཔེ་གཟིགས་ན་འདིར་གནོན།]

འདིའི་མཆོད་ཁང་ཕུག་མ་ན། རྟེན་གྱི་གཙོ་བོ་རྗེ་བཙུན་རྡོ་རྗེ་རྣལ་འབྱོར་མ་ཤིན་ཏུ་བྱོན་མཚར་ཞིང་བཞེངས་པའི་སྐབས། འབད་རྩོལ་མེད་པར་ཡུད་ཀྱི་གྲུབ་པས་དོན་ལའང་བྱོན། ཁྱད་པར་མ་མཆིས། སྲིད་གསུམ་དབང་དུ་སྡུད་པའི་ནུས་མཐུ་ཁྱད་པར་ཅན། ཕྲིན་ལས་ནམ་མཁའི་མཐའ་དང་མཉམ་པའི་རྟེན་འབྲེལ་ཐམས་ཅད་འདི་ལས་འགྲིག་པ་ལགས། གཙང་ཁང་འདིའི་གྱང་རིས་ལ། རྡོ་རྗེ་ཕག་མོའི་རིགས་ཞལ་མ་གཉིས། ཕག་མོའི་གནམ་ཞབས་མ། ནཱ་རོ་མཁའ་སྤྱོད། རྔོན་པའི་གདམས་ངག་ལས་འབྱུང་བའི་ཕག་མོ་ཕྱག་བཞི་མ། ཕག་མོ་ཀུརྨ་པ་ཏི། ཕག་མོ་ལྗང་གུ་དུས་འཁོར་ལུགས། ཕག་དཀར་ཤེས་རབ་གསལ་བྱེད་རྣམས་དང༌། ཐབས་འཁོར་ལོ་བདེ་མཆོག་དཔའ་བོ་གཅིག་པ་དང༌། གཞན་ཡང་མཻ་ཏྲི་མཁའ་སྤྱོད། དབུ་བཅད་མ། དོན་གྲུབ་མ། གོ་ཆའི་དཔའ་མོ་དྲུག་མཁའ་སྤྱོད་དཀར་དམར་ལ་སོགས་པ་རྣམ་གྲངས་ཤིན་ཏུ་མང་བ་བཞུགས། ལྷ་ཁང་མདོ་ན་དཔལ་དུས་ཀྱི་འཁོར་ལོ་ནས་འབྱུང་བ་ལྟར་རྣལ་འབྱོར་མ་རིགས་བརྒྱའི་ལྷ་ཚོགས་ཐམས་ཅད་དང༌། རིགས་སུམ་ཅུ་རྩ་བདུན་གྱི་རྣལ་འབྱོར་མ་མི་མོའི་རྣམ་པ་རྣམས་བཞུགས། །བདེ་བ་ཅན་གྱི་ལྷ་ཁང་ན། རྟེན་གྱི་གཙོ་བོ་བཅོམ་ལྡན་འདས་དེ་བཞིན་གཤེགས་པ་འོད་དཔག་ཏུ་མེད་པ་སྐུ་ཚད་རྒྱབ་མཐོ་བཅུ་གཅིག་པ། རྒྱབ་ཡོལ་དང་བཅས་པ། རྒྱུ་གསེར་དངུལ་ཟངས་གསུམ་


TNT17_Page_0407
[མ་དཔེ་གཟིགས་ན་འདིར་གནོན།]

ལས་གྲུབ་ཅིང༌། རིན་པོ་ཆེ་སྣ་ཚོགས་པའི་འཕྲ་རྒྱན་ཅན་བྱིན་རླབས་ཀྱི་གཟི་འོད་དཔག་ཏུ་མེད་པ་འདི་ལགས། འདི་ཉིད་ཀྱི་སྐུའི་གཡས་དང་གཡོན་དུ་ཡང༌། བཅོམ་ལྡན་འདས་འོད་དཔག་ཏུ་མེད་པ་ཉིད་ཀྱི་སྐུ་བརྙན་བྱིན་ཆགས་པ་རེ་རེ་བཞུགས། རྒྱ་ནག་ཆེན་པོ་ལ་སོགས་པའི་ཡུལ་རྣམས་དང༌། བོད་ཡུལ་འདིར་ཡང་སྔོན་རྒྱལ་བློན་བྱང་ཆུབ་སེམས་དཔའི་སྐབས། བཅོམ་ལྡན་འདས་སྣང་བ་མཐའ་ཡས་ཀྱིས་ལྷ་ཁང་ཆེ་ཐང་དུ་བཞེངས་པ་མཛད་འདུག་ནའང༌། ཕྱིས་དེའི་སྲོལ་ཀ་ནུབ་པ་ལྟ་བུར་འདུག་པས། སླར་ཡང་སྲོལ་དར་བ་གཞན་ལ་མིག་ལྟོས་ལ་ཡང་ཕན་པ་སྲིད་དམ་གང་ལྟར་ཡང་མཐོང་ཐོས་དྲན་རེག་རྣམས་ཐར་བའི་ལམ་དུ་འདྲེན་པ་ལ་གཞན་པས་ཐུགས་རྗེ་ཆེ་བར་གསུངས་འདུག་པས། སེམས་ཅན་རྣམས་ལ་ཕན་པའི་ཕྱིར་བཞེངས་པར་གདའ། གྱང་རིས་ལ་རྒྱལ་བ་འོད་སྣང་ཉིད་ཀྱི་སྐུ་བརྙན་མང་པོ་དང༌། རྒྱལ་བ་ཚེ་དང་ཡེ་ཤེས་དཔག་ཏུ་མེད་པའི་སྐུ་བརྙན་སྟོང་ཕྲག་གསུམ་བཞུགས། ལྷ་ཁང་མདོ་མ་ན་རྒྱུད་རིས་འོད་དཔག་མེད་ཀྱི་སྐུ་ཆེ་བ་མང་པོ་དང༌། བདེ་བ་ཅན་གྱི་ཞིང་བཀོད་དང༌། འོད་དཔག་མེད་ཀྱི་སྔོན་ཐུགས་བསྐྱེད་ཚུལ་གྱི་བཀོད་པ་དང༌། འོ་སྐོལ་གྱི་སྟོན་པ་བཅོམ་ལྡན་འདས་ཤཱཀྱ་ཐུབ་པས་བདེ་བ་ཅན་གྱི་ཞིང་བཀོད་ཀྱི་མདོ་གསུངས་པའི་བཀོད་པ་རྣམས་བཞུགས། གཙུག་ལག་ཁང་བདེ་བ་ཅན་གྱི་སྟེང་ཁང་འདི་ན། རྟེན་གྱི་


TNT17_Page_0408
[མ་དཔེ་གཟིགས་ན་འདིར་གནོན།]

གཙོ་བོ། དཔལ་དུས་ཀྱི་འཁོར་ལོའི་ཡེ་ཤེས་ལེའུ་ལས་གསལ་བར་གསུངས་པའི་མཆོད་རྟེན་ལ་མཚན་ཏུ་ཡང་ཡེ་ཤེས་མཆོད་རྟེན་དུ་གྲགས་པ་འདི་ཡིན་ཏེ། དེ་ཡང་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་ཀྱི་རྟེན་ཡང་ཡིན། ཡང་སངས་རྒྱས་ཐམས་ཅད་བཞུགས་པའི་གནས་ཆོས་ཀྱི་སྐུའི་རྟེན་ལ། མཆོད་རྟེན་ཅེས་ཡོངས་སུ་གྲགས་པ་འདི་ལ་བཟོ་བཀོད་རྣམ་གྲངས་མཐའ་ཡས་པ་ཡོད་ཀྱང་གཞན་རྣམས་ལ་ཆ་ཚད་ངེས་ཅན་མདོ་རྒྱུད་ནས་གསུངས་པ་མེད། ཆ་ཚད་ཀྱི་ཡི་གེ་ཁ་རེ་ཡོད་པ་རྣམས་ཀྱང༌། རྒྱ་བོད་ཀྱི་མཁས་པའི་སྐྱེ་བོ་འགའ་རེའི་ཐུགས་ལས་སྤྲོས་པ་ཙམ་ཡིན་གསུངས་པར་འདུག ཡེ་ཤེས་མཆོད་རྟེན་འདི་ལ་རྒྱ་དཔངས་ཀྱི་ཚད་ངེས་ཅན་དང༌། ཕྱི་ནང་གཞན་གསུམ་དག་སྦྱོར་རྒྱས་པ་དང་བཅས་པ་རྒྱུད་ཉིད་ལས་འབྱུང་བ། འཕགས་པ་སྤྱན་རས་གཟིགས་ཀྱི་འགྲེལ་པས་རྒྱས་པར་བཀྲལ་བ་ལགས། རྒྱུད་གཞུང་ལས་གསལ་བར་གསུངས་པའི་ཚད་དང་ལྡན་ཅིང༌། བཟོ་བཀོད་ཕུན་སུམ་ཚོགས་པ། བྱིན་ཆགས་པ་འདི་ཉིད་གཙོ་བོར་བཞུགས་ནས། འཁོར་གྱི་ཚུལ་དུ་དེང་སང་ཀུན་ལ་གྲགས་པ་བདེ་གཤེགས་མཆོད་རྟེན་བརྒྱད་ཅེས་ཟེར། དོན་ལ་སྟོན་པ་བཅོམ་ལྡན་འདས་ཉིད་ཀྱིས་བྱིན་གྱིས་བརླབས་པའི་གནས་ཆེན་པོ་བརྒྱད་ཀྱི་མཆོད་རྟེན་བྱ་བ། དེ་རྣམས་ཀྱིས་བཀོད་པ་གདའ། དེ་ཡང་སྐུའི་གཡས་ཀྱི་འདི་ནི་བཀྲ་ཤིས་


TNT17_Page_0409
[མ་དཔེ་གཟིགས་ན་འདིར་གནོན།]

སྒོ་མང་ཆོས་འཁོར་མཆོད་རྟེན་ཡིན་ཞེས་སོགས་གྲལ་བསྟར་བཞིན་རིམ་གྱིས་བརྗོད། གཡོན་གྱི་དང་པོ་འདི་བདུད་བདུལ་མཆོད་རྟེན་ཅེས་ཀྱང་བྱ་བ་བྱང་ཆུབ་ཆེན་པོ་མཆོད་རྟེན་ཏེ་ཞེས་སོགས། དེ་བཞིན་དུ་འཇུག་ཆུགས་སུ་ངོ་སྤྲད། དེ་ལྟར་ན་མཆོད་རྟེན་ངོ་མཚར་ཅན། གཙོ་འཁོར་དགུ་པོ་འདི་རྣམས་གསེར་དངུལ་སོགས་རྒྱུ་ཕུན་སུམ་ཚོགས་པ། བཟོ་བཀོད་ལེགས་ཤིང་ཚད་དང་ལྡན་པ། རིན་པོ་ཆེ་སྣ་ཚོགས་དང༌། གཡུ་བྱུར་མུ་ཏིག་ཤེལ་སོག་འཕྲ་རྒྱན་ཕུན་སུམ་ཚོགས་པ་ནི། འདི་ཀུན་བསྡོམས་ཀྱི་དབང་དུ་བྱས་ན་འཕྲའི་རྣམ་གྲངས་ཁྲི་ཁྲག་རྒལ་ངེས་པ་ཡོད། ནང་བཞུགས་སུ་ཐམས་ཅད་ལ་དེ་བཞིན་གཤེགས་པའི་རིང་བསྲེལ་འཁྲུལ་མེད་མང་ཉུང་ཇི་ལྟར་འོས་པ་རེ་རེས་གཙོ་བྱས། བྱིན་རླབས་རྟེན་བཟང་ལ་མང་བ་དང༌། གཟུངས་ཀྱི་ཚོགས་དཔག་ཏུ་མེད་པ་བཞུགས། འདིའི་གྱང་རིས་ལ། ཀུན་མཁྱེན་དུས་གསུམ་སངས་རྒྱས་ལོ་ཙཱ་བ་རྣམ་གཉིས། འཕགས་པ་ཐོགས་མེད། དུས་ཞབས་པ་ཆེན་པོ་རྣམས་དང༌། གཞན་ཡང་མཚན་བྱང་བཞིན་དུ། སྤྲུལ་པའི་སྐྱེས་མཆོག་ལོ་ཙཱ་བ་ཆེན་པོ་རྣམས་ཀྱི་སྐུ་བརྙན་བཞུགས། །པདྨ་བཀོད་ཀྱི་ལྷ་ཁང་ཕུག་ན། རྟེན་གྱི་གཙོ་བོ་འཕགས་པ་སྤྱན་རས་གཟིགས་དབང་ཕྱུག་ཡི་གེ་དྲུག་པ། གཡས་གཡོན་གྱི་ཕྱོགས་སུ་སློབ་དཔོན་པདྨ་འབྱུང་གནས་དང༌། ཀུན་མཁྱེན་ཆོས་ཀྱི་རྒྱལ་པོ་སྟེ། འབུར་དོད་ཀྱི་སྐུ་


TNT17_Page_0410
[མ་དཔེ་གཟིགས་ན་འདིར་གནོན།]

གཟུགས་གསུམ་དང༌། ལོགས་བྲིས་ལ་འཕགས་པ་བཅུ་གཅིག་ཞལ། རྟ་མགྲིན། སྒྲོལ་མ་འཇིགས་པ་བརྒྱད་སྐྱོབ། ཡེ་ཤེས་མགོན་པོ་ཕྱག་དྲུག་པ་ལ་སོགས་པ་བཞུགས། ལྷ་ཁང་མདོ་ན་སློབ་དཔོན་པདྨ་འབྱུང་གནས་འཁོར་མཁའ་འགྲོའི་ཚོགས་དང་བཅས་པ་དང༌། དེ་ཉིད་ཀྱི་རྣམ་ཐར་ཞིང་བཀོད། ལོ་རྒྱུས་ཚད་ལྡན་ཁོ་ན་དང་བསྟུན་པས་ཡིད་ཆེས་པའི་གནས་དང༌། ཀུན་མཁྱེན་དུས་གསུམ་སངས་རྒྱས་ཇོ་ནང་བ་ཆེན་པོ་སློབ་མའི་ཚོགས་དང་བཅས་པ་དང༌། དེ་ཉིད་ཀྱི་རྣམ་ཐར་ཞིང་བཀོད་ངོ་མཚར་ཆེ་བ་རགས་རིམས་རྣམས་བཞུགས། །ལྕང་ལོ་ཅན་གསང་བདག་གི་ལྷ་ཁང་འདི་ན། རྟེན་གྱི་གཙོ་བོ་ཕྱག་རྡོར་མདོ་ལུགས། བྱིན་རླབས་ཀྱི་སྟོབས་ལས། ས་བདག་ཀླུ་གཉན་སོགས་སྡེ་བརྒྱད་བྲན་དུ་འཁོལ་བར་མཛད་པ་འདི་དང༌། གྱང་རིས་ལ་གསང་བདག་ཞི་བ་རྡོར་སེམས། གསང་བདག་འཁོར་ལོ་ཆེན་པོ། གསང་བདག་གཏུམ་པོ། འབྱུང་པོ་འདུ་བྱེད། རྡོ་རྗེ་རྣམ་འཇོམས་རྣམས་དང༌། སྟར་གསུམ་ལ་ཕྱག་ན་རྡོ་རྗེ་ཨུ་ཙརྱ་དང༌། གཏུམ་པོ་དམར་པོ་དང༌། རྣམ་ཐོས་སྲས་ཀྱི་རིགས་སྣ་ཚོགས་པ་བཞུགས། །བདེ་འབྱུང་ཤམ་བྷ་ལའི་ལྷ་ཁང་འདི་ལ། གཙང་ཁང་ན་རྟེན་གཙོ་རྡོ་རྗེ་འཆང་ཆེན་པོ་ཁྲི་རྒྱབ་དང་བཅས་པ། རྒྱུ་གསེར་ཟངས་ལས་གྲུབ་ཅིང་བྱོན་ལེགས་པ། མཐའ་སྐོར་དུ་ཆོས་རྒྱལ་བདུན་རིགས་ལྡན་ཉི་ཤུ་རྩ་ལྔ། འཁོར་


TNT17_Page_0411
[མ་དཔེ་གཟིགས་ན་འདིར་གནོན།]

ལོ་ཅན་དྲག་པོ་དང་བཅས་པ་རྣམས་འབུར་སྐུར་བཞུགས་ཤིང༌། རྒྱུད་རིས་ལ་བྱང་ཕྱོགས་དཔལ་ལྡན་ཤམྦྷ་ལའི་བཀོད་པ། བོད་ཡུལ་གྱི་དཔལ་ལྡན་ཤམྦྷ་ལ་རི་ཁྲོད་ཇོ་ནང་གི་བཀོད་པ། ཆོས་རྒྱལ་རིགས་ལྡན་རྣམས་ཀྱི་ཡུམ་བྱང་ཆུབ་སེམས་མ་དང་ཁྲོ་མོའི་ཚོགས་རྣམས་བཞུགས། ལྷ་ཁང་མདོ་མ་ན། སྟོན་པ་སངས་རྒྱས་ཀྱི་རྩ་རྒྱུད་གསུངས་པ་དང༌། དཔལ་དུས་ཀྱི་འཁོར་ལོ་ལྷན་སྐྱེས་དང༌། ཆོས་རྒྱལ་རིགས་ལྡན་གྱི་ཚོགས་རྣམས་རྒྱུད་རིས་སུ་བཞུགས། །མངོན་སྤྱོད་དྲག་པོའི་ལྷ་ཁང་བསྟན་བསྲུང་མགོན་པོའི་གནས་མཆོག་འདི་ན། ཕུག་གི་མགོན་ཁང་དངོས་ན། དབུས་ཀྱི་གཙོ་བོར་རྡོ་རྗེ་ནག་པོ་ཆེན་པོ་གུར་གྱི་མགོན་པོ་གཡས་གཡོན་མཐའ་སྐོར་དུ། ཡེ་ཤེས་མགོན་པོ་ཕྱག་དྲུག་པ། ཕྱག་བཞི་པ། ལྷ་མོ་འདོད་ཁམས་མ། རྒྱལ་ཆེན་རྣམ་ཐོས་སྲས། སྟོབས་འཕྲོག་ནག་པོ་བྲམ་གཟུགས་རྣམས་བཞུགས། མགོན་ཁང་མདོ་མ་ན་ལོགས་བྲིས་ཀྱི་ཚུལ་དུ་བཞུགས་པ་ལ། ལས་ཀྱི་མགོན་པོ་བེར་ནག་ཟངས་གྲི་ཅན། ལྷ་མོ་དམག་ཟོར་མ། དུར་ཁྲོད་བདག་པོ། གནོད་སྦྱིན་ཡབ་ཡུམ། པུ་དྲ་ལྕམ་དྲལ་ལ་སོགས་པ། ལས་གཤིན་དམར་ནག ཆོས་བདག་སྨན་བཙུན་མ། ལས་མཁན་གདུང་དམར་ཅན་ལ་སོགས་པ་བཞུགས། །གནོད་སྦྱིན་ནོར་ལྷའི་ལྷ་ཁང་འདི་ཉིད་ཀྱི་དབང་དུ་བྱས་ན། རྟེན་གྱི་


TNT17_Page_0412
[མ་དཔེ་གཟིགས་ན་འདིར་གནོན།]

གཙོ་བོ་བྱང་ཆུབ་སེམས་དཔའ་གནོད་གནས་དབང་པོ་ཞེས་ཀྱང་བྱ། འཕགས་པ་ཆུ་དབང་སྙིང་རྗེ་ཆེན་པོ་ཞེས་ཀྱང་བྱ། གནོད་སྦྱིན་གསེར་གྱི་མདོག་ཅན་ཛམ་བྷ་ལ་ཞེས་ཀྱང་བྱ་བ། མདོར་ན་མདོ་སྔགས་ཐམས་ཅད་ལས་གསུངས་ཤིང༌། ནང་པ་སངས་རྒྱས་པའི་ནོར་ལྷ་ཐམས་ཅད་ཀྱི་གཙོ་བོ་འཕགས་པ་ཛམ་བྷ་ལྷའི་སྐུ་བརྙན་འདི། བཟོ་ཁྱད་ལེགས་ཤིང་རྒྱན་གྱི་བཀོད་པ་ལ་སོགས་པ་ཆེས་ཕུན་སུམ་ཚོགས་པ། འདི་བཞེངས་ཙམ་ཉིད་ནས་གནས་འདིར་འབྱོན་པའི་ལོངས་སྤྱོད་བསམ་གྱིས་མི་ཁྱབ་པ་འཕེལ་བ་སོགས་ཤིན་ཏུ་བཀྲ་ཤིས་པའི་ཡོན་ཏན་དཔག་ཏུ་མེད་པ་མངའ་བ་ལགས། འདི་ནི་འཕགས་མ་ནོར་རྒྱུན་མ་ཕྱག་དྲུག་མ་ས་བཟང་པཎ་ཆེན་གྱི་ཐུགས་དམ། འདི་ནི་ཚོགས་བདག་དཀར་པོ། འདི་ནི་ཛམ་བྷ་ལ་ནག་པོ་སྟེ། འདི་ཉིད་ཀྱང་རྗེ་བཙུན་ཉིད་ཀྱིས་གསར་བཞེངས་སུ་གནང་བ་བྱིན་རླབས་ཀྱི་རྟགས་མཚན་ཅན་ཡིན། གྱང་རིས་ལ་དཔལ་གསང་བ་འདུས་པ་ལས་བྱུང་བ། སློབ་དཔོན་སངས་རྒྱས་ཡེ་ཤེས་ཞབས་ཀྱི་མན་ངག་དང་མཐུན་པ། ཛམ་བྷ་ལ་ཞལ་གསུམ་ཕྱག་དྲུག་པ། ཛམ་སེར་ཕྱག་གཉིས་པ། ཛམ་བྷ་ལ་ནག་པོའམ་ཁྲོ་བོ་འཆོལ་བའི་ཛམ་བྷ་ལ། རྣམ་སྲས་ལྗང་ཁུ་བེ་ཅོན་མ། ཛམ་བྷ་ལ་དཀར་པོ་འབྲུག་ཞོན་མ། འཇུར་གེགས་སེལ་བའི་ཚོགས་བདག །ནོར་རྒྱུན་མ་བ་ལང་རྫི་རྣམས་བཞུགས། གཡོན་གྱི་


TNT17_Page_0413
[མ་དཔེ་གཟིགས་ན་འདིར་གནོན།]

ཕྱོགས་ལ་གནོད་སྦྱིན་ཨ་པ་ར་ཙི་ཏ། ནོར་རྒྱུན་མ་ཕྱག་གཉིས་མ། ཛམ་བྷ་ལ་ལ་དམར་པོ་གྲྭ་པ་མངོན་ཤེས་ལུགས་དང༌། ཀུན་མཁྱེན་ཆོས་ཀྱི་རྒྱལ་པོ། རྗེ་བཙུན་ཉིད། སངས་རྒྱས་རིགས་ལྔ། དུས་ཀྱི་འཁོར་ལོ་ལས་བྱུང་བའི་ཛམ་བྷ་ལ་ལྗང་ཁུ། མགོན་དཀར་ཡིད་བཞིན་ནོར་བུ། ཡང་ནོར་རྒྱུན་མ། ཁོལ་པོ་ཀུན་ད་ལི་རྣམས་བཞུགས། དེ་ལྟར་མཐིལ་གྱི་གཙུག་ལག་ཁང་འདི་རྣམས་ཀྱི་དབང་དུ་བྱས་ན། ཕྱི་སྒོ་ཆེན་པོ་རེ་རེའི་ནང་དུ་ཆུད་པ་རྣམས་གཅིག་ཏུ་རྩིས་པའི་དབང་དུ་བྱས་ན། དབུས་སུ་གཙུག་ལག་ཁང་ཆེན་པོ་མཐའ་གཙུག་ལག་ཁང་བཅུ་དྲུག་སྟེ། ངོ་མཚར་རྨད་དུ་བྱུང་བའི་ལྷ་ཁང་བཅུ་བདུན་ཡིན། དེ་དག་རེ་རེའི་ནང་སེལ་རྣམ་གྲངས་ཀྱིས་ཕྱེ་ན། ལྷ་ཁང་གི་གྲངས་ལྔ་བཅུ་ཙམ་ཡོད། གཞན་ཡང་གསུང་སྤར་མང་པོ་བཞུགས་པའི་སྤར་ཁང་དང༌། རི་བོའི་ངོས་དང་རྩེ་མོའི་ཕྱོགས་ལ་འཇམ་དཔལ་ཁྲོ་རྒྱལ་ལྷ་ཁང་དང༌། མགོན་ཁང་ཨུ་ཙ་ལ་དང༌། དཔལ་ལྡན་འབྲས་སྤུངས་དང༌། གཟིམས་ཁང་པོ་ཊ་ལ་དང༌། སཽ་རཥྟ་དང༌། དཔལ་གྱི་རི་ལ་སོགས་པ་གཙུག་ལག་ཁང་གི་རྣམ་གྲངས་དཔག་ཏུ་མེད་པ་བཞུགས་ཏེ། བསྐལ་པའི་མཐའི་བར་དུ་འགྲོ་དོན་འཕྲིན་ལས་ནམ་མཁའ་ལྟར་རྒྱ་ཆེ་ཞིང་ཆུ་བོའི་རྒྱུན་ལྟར་ཆད་པ་མེད་ལ། རི་


TNT17_Page_0414
[མ་དཔེ་གཟིགས་ན་འདིར་གནོན།]

རབ་ལྟར་བརྟན་ཅིང༌། ཉི་འོད་ལྟར་གཟི་བརྗིད་ཀྱི་དཔལ་འབར་བར་བཞུགས་པ་ལགས། དེ་ལྟར་དཀོན་མཆོག་བདེན་པའི་མཐུ་སྟོབས་ཀྱིས། །མཁའ་ཁྱབ་འགྲོ་བའི་བདེ་སྐྱིད་འཕེལ་བ་དང༌། ངེས་དོན་བསྟན་པའི་བདག་པོ་ཇོ་ནང་བའི། །འཕྲིན་ལས་དར་ཞིང་རྒྱས་པའི་བཀྲ་ཤིས་ཤོག །མངྒ་ལཾ།། ༈ ཆོས་གྲྭ་བྱེ་བ་གྲངས་མེད་ཀྱི་དབུས་ན། རི་རབ་ལྟར་མངོན་པར་མཐོ་བ་རྟག་བརྟན་དམ་ཆོས་གླིང་། ཨོཾ་སྭཱ་སྟི། ཆོས་གྲྭ་བྱེ་བ་གྲངས་མེད་ཀྱི་དབུས་ན། རི་རབ་ལྟར་མངོན་པར་མཐོ་བ་རྟག་བརྟན་དམ་ཆོས་གླིང་འདི་ཉིད་ཀྱི་གནས་ཀྱི་རྩེ་མོར་གྱུར་པ་གཟིམས་ཁང་པོ་ཊ་ལ་འདི་ཉིད་ཀྱི་དབང་དུ་བྱས་ན། ལྷ་ཁང་ཕུག་མ་ན། འཕགས་པ་སྤྱན་རས་གཟིགས་དབང་ཕྱུག་ཁ་སར་པ་ཎ། གཡས་སུ་སྒྲོལ་མ་དང་ནོར་བཟང༌། གཡོན་དུ་ཁྲོ་གཉེར་ཅན་དང་རྟ་མགྲིན་ཏེ། འཕགས་པ་ལྷ་ལྔའི་འབུར་སྐུ་ཤིན་ཏུ་མཚར་བ་བྱིན་རླབས་དཔག་ཏུ་མེད་པ་དང་བཅས་པ་བཞུགས། བར་གྱི་ལྷ་ཁང་ཀ་གཉིས་མ་འདི་ན། འཕགས་པ་སྤྱན་རས་གཟིགས་ཡི་གེ་དྲུག་མ་རིགས་གསུམ། སེང་གེ་སྒྲ། ཧ་རི་ཧ་རི་ཧ་རི་ལ་ཞོན་པ། འཕགས་པ་པདྨ་དཀར་དབང༌། སྤྱན་རས་གཟིགས་དྲག་པོ་ཆེན་པོ། ཁམས་གསུམ་དབང་སྡུད་ཀྱི་སྤྱན་རས་གཟིགས་ཕྱག་བཞི་པ་དང་གཉིས་པ། ཡིད་བཞིན་ནོར་བུའི་འཁོར་ལོས་བསྒྱུར་བ་ཕྱག་བཞི་པ་དང༌། ཕྱག་གཉིས་པ༌། རྒྱལ་བ་རྒྱ་མཚོར་གྲགས་པ་ཡིག་དྲུག་དམར་པོ། དོན་


TNT17_Page_0415
[མ་དཔེ་གཟིགས་ན་འདིར་གནོན།]

ཞགས་ཕྱག་བཅུ་པ། དོན་ཡོད་ལྕགས་ཀྱུ། དོན་ཡོད་མཆོད་པའི་ནོར་བུ། སྤྱན་རས་གཟིགས་པདྨ་དྲྭ་བ། འཇིག་རྟེན་མགོན་པོ། རྗེ་བཙུན་རི་ཁྲོད་པ། ཡེ་ཤེས་མགོན་པོ་ཕྱག་དྲུག་པ་རྣམས་ལོགས་བྲིས་སུ་བཞུགས། ཕྱིའི་བར་འཁྱམས་ལ། གཡས་ཕྱོགས་སུ་ལྷོ་ཕྱོགས་རི་པོ་ཊ་ལའི་བཀོད་པ། གཡོན་ཕྱོགས་ན་དགེ་བསྙེན་ཞི་བའི་གོ་ཆ་རི་བོ་པོ་ཏ་ལ་བྱོན་པའི་བཀོད་པ་རྣམས་བཞུགས། བཀྲ་ཤིས་དགེ་ལེགས་འཕེལ། །


TNT17_Page_0416
[མ་དཔེ་གཟིགས་ན་འདིར་གནོན།]

ཤོག་སྟོང་།

རྒྱལ་བའི་བསྟན་པ་རིན་པོ་ཆེ་སྤྱིའི་རྣམ་བཞག་ལས་འཕྲོས་པའི་དཔལ་ལྡན་ཤངས་པའི་ཆོས་སྐོར་གྱི་འབྱུང་ཁུངས་ཡིད་ཀྱི་མུན་སེལ།


TNT17_Page_0417
[མ་དཔེ་གཟིགས་ན་འདིར་གནོན།]

རྒྱལ་བའི་བསྟན་པ་རིན་པོ་ཆེ་སྤྱིའི་རྣམ་བཞག་ལས་འཕྲོས་པའི་དཔལ་ལྡན་ཤངས་པའི་ཆོས་སྐོར་གྱི་འབྱུང་ཁུངས་ཡིད་ཀྱི་མུན་སེལ་བཞུགས།


TNT17_Page_0418
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། སངས་རྒྱས་ཀུན་ཀྱི་གསང་བའི་མཛོད་གྱུར་རྒྱལ་བའི་གཙོ། །དེ་ཡི་དགའ་མ་རྡོ་རྗེ་བཙུན་མོ་ནཻ་གུ་མ། །དེ་ཡིས་རྗེས་བཟུང་ཁྱུང་པོ་ཇོ་གིའི་བརྒྱུད་པར་བཅས། །དེ་དག་བཀའ་བརྒྱུད་སྲིད་མཐའི་བར་དུ་ཕྱག་གི་གནས། །རྣམ་དག་བརྒྱུད་པའི་ཟབ་དོན་བཅུད་བསྡུས་ནས། །བདག་རྒྱུད་ཆོས་ཀྱི་ཕོངས་པར་རབ་བསལ་བའི། ཁྱད་པར་རྩ་བའི་བླ་མ་དམ་པ་རྣམས། །སྒོ་གསུམ་གུས་པའི་ཡིད་ཀྱིས་ཕྱག་བགྱིའོ། །དེ་ལྟར་དཔལ་ལྡན་ཤངས་པ་བཀའ་བརྒྱུད་ཅེས། །འགྲན་པའི་ཟླ་བྲལ་འདི་ལ་བདག་སྤྲོས་ཏེ། རྗེས་སུ་གཞན་ཡང་འཇུག་ཕྱིར་སྤྲོ་བའི་གཏམ། །ཚུལ་འདི་འཆད་ལ་བདག་ཉིད་སྤྲོ་བ་སྐྱེས། །ཞེས་མཆོད་པར་བརྗོད་ཅིང༌། རྒྱུ་མཚན་དེས་རྩོམ་པར་དམ་འཆའ་བ་སྔོན་དུ་བཏངས་ནས། བདག་ཉིད་ཀྱི་རྗེས་སུ་འཇུག་ཅིང་གསུང་རབ་མཐའ་དག་ལ་བགྱི་བ་མི་ལྷོད་ཅིང༌། ལམ་


TNT17_Page_0419
[མ་དཔེ་གཟིགས་ན་འདིར་གནོན།]

སྲོལ་འདི་ལ་སྤྲོ་བ་དག་ལ་ཉེ་བར་མཁོ་ཞིང༌། རང་ཉིད་ཀྱང་དད་པའི་གསོས་གདབ་ཕྱིར་སངས་རྒྱས་ཀྱི་བསྟན་པ་རིན་པོ་ཆེ་སྤྱིའི་རྣམ་གཞག་བསྟན་པ་དང༌། དཔལ་ལྡན་ཤངས་པའི་བསྟན་པའི་རྣམ་གཞག་རྒྱས་པར་བསྟན་པའོ། །དང་པོ་ལ་འཕགས་ཡུལ་དུ་དར་ཚུལ་དང༌། གངས་ཅན་དུ་དར་ཚུལ་ལོ། །དང་པོ་ནི། འཇིག་རྟེན་དུ་སངས་རྒྱས་བྱོན་ཞིང་བསྟན་པ་དར་བའི་སྒྲོན་བསྐལ་དང༌། སངས་རྒྱས་མི་འབྱོན་ཞིང་དགེ་སྡིག་གི་བླང་དོར་དང་བྲལ་བའི་མུན་བསྐལ་ཏེ་གཉིས་ལས། བསྐལ་བ་འདི་ལ་སངས་རྒྱས་སྟོང་འབྱོན་པའི་ཕྱིར་སྒྲོན་བསྐལ་བསྐལ་བ་བཟང་པོའོ། །དེ་ལ་སངས་རྒྱས་རྣམ་གཟིགས། གཙུག་གཏོར་ཅན། ཐམས་ཅད་སྐྱོབ་གསུམ་པོ་བསྐལ་པ་འདིའི་སངས་རྒྱས་མིན་པར་བཞེད་ཀྱང་སངས་རྒྱས་བདུན་པོ་འདི་དག་འདུལ་བ་གཅིག་པས་སངས་རྒྱས་རབས་བདུན་ཞེས་བརྗོད་ལ། འགའ་


TNT17_Page_0420
[མ་དཔེ་གཟིགས་ན་འདིར་གནོན།]

ཞིག་བསྐལ་བ་འདིའི་སངས་རྒྱས་ཡི་ཟེར་རུང་སངས་རྒྱས་སྟོང་ལ་མི་བགྲང་ངོ༌། །སྙིང་རྗེ་པད་དཀར་ནས་སངས་རྒྱས་སྟོང་དང༌། གསང་བ་བསམ་གྱིས་མི་ཁྱབ་པ་ནས་སངས་རྒྱས་སྟོང་དང་སེམས་དཔའ་གཉིས་ཏེ་སྟོང་རྩ་གཉིས་གསུང་བའི་ཐོག་མ་ནི། འཁོར་བ་འཇིགས། གསེར་ཐུབ། འོད་སྲུང་གསུམ་གྱི་བསྟན་པ་རྫོགས་ནས་ད་ལྟ་ཤཱཀྱ་ཐུབ་པའི་བསྟན་པའོ། །དེ་ལ་བདག་ཅག་གི་སྟོན་པ་ཤཱཀྱའི་རྒྱལ་པོ་འདི་སྔོན་རྫ་མཁན་གྱི་ཁྱེའུ་སྣང་བྱེད་དུ་གྱུར་པའི་ཚེ། ཐུབ་པ་ཆེན་པོ་ལ་བྱང་ཆུབ་མཆོག་ཏུ་ཐུགས་བསྐྱེད་པ་ནས། བསྐལ་པ་གྲངས་མེད་གསུམ་ལ་ཕར་ཕྱིན་དྲུག་ལ་བསྟེན་ནས་ཚོགས་རྫོགས་པར་གྱུར་པའི་མཐར་བབས་པའི་ཚེ། འཛམ་བུ་གླིང་དུ་ཚེ་ལོ་ཉི་ཁྲི་པའི་དུས་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ། སྟོན་པ་འདི་ཉིད་བྲམ་ཟེའི་ཁྱེའུ་བླ་མར་གྱུར་པ་སྟེ། དེ་ནས་དགའ་ལྡན་དུ་ལྷའི་སྟོན་པ་དམ་པ་ཏོག་དཀར་པོ་སྟེ་ལྷ་གཙོ་བོར་གྱུར་པའི་སྐྱབས་གནས་སུ་མཛད། འཛམ་གླིང་ཚེ་ལོ་བརྒྱ་པར་སླེབས། རང་སངས་རྒྱས་རྣམས་ཀྱི་མཆོད་པའི་ཞིང་དང༌། འཁོར་ལོས་སྒྱུར་བའི་རྒྱལ་པོ་བྱོན་ནས་ཕན་བདེ་ལ་བཀོད་ཙམ་ལས། ཡང་དག་པའི་དོན་ལ་འཇུག་པའི་སངས་རྒྱས་ཀྱི་བསྟན་པ་ནི་མེད། འོད་སྲུང་རྫོགས་བྱེད་སོགས་རྟོག་གེ་པ་དྲུག བྲམ་ཟེ་རྒྱལ་སོགས་རྗེས་སྒྲོགས་པ་དྲུག རེངས་བྱེད་ཀྱི་བུ་ལྷག་སྤྱོད་སོགས་སྙོམས་འཇུག་པ་དྲུག་སྟེ། ལོག་


TNT17_Page_0421
[མ་དཔེ་གཟིགས་ན་འདིར་གནོན།]

པ་གྱུར་བའི་སྟོན་པ་བཅོ་བརྒྱད་པོ་འདི་དག་གིས་འཇིག་རྟེན་པ་རྣམས་ཀྱིས་མཆོད་པའི་ཞིང་བྱེད་པའི་དུས་ཡིན་པས། སྐྱེ་འགྲོ་རྣམས་ཡང་དག་པའི་ལམ་ལ་འཇུག་པའི་དུས་སུ་མཁྱེན་ཏེ། བསྐལ་པ་མང་པོའི་སྔོན་རོལ་ནས་སངས་རྒྱས་དབང་པོ་ཏོག་ཅེས་སངས་རྒྱས་གྲུབ་པ་ནི་ཡབ་སྲས་མཇལ་བའི་མདོ་སོགས་ལས་གསུངས་མོད། སྣང་ཚུལ་དུ་དུས་འདིར་མཛད་པ་བཅུ་གཉིས་ཀྱི་ཚུལ་སྟོན་པར་ཉེ་བ་ན་རྒྱལ་བ་མ་ཕམ་པ་དགའ་ལྡན་དུ་རྒྱལ་ཚབ་ཏུ་དབང་བསྐུར་ཏེ། དུས་དང༌། ཡུལ་དང༌། རིགས་དང༌། ཡུམ་དང༌། རྒྱུད་ལ་གཟིགས་པ་སྟེ་གཟིགས་པ་ལྔ་དང་ལྡན་པར། དགའ་ལྡན་ནས་གླང་པོ་ཆེ་ཐལ་དཀར་མཆེ་བ་དྲུག་པར་མཛད་དེ། རྒྱལ་པོ་ཟས་གཙང་གི་བཙུན་མོ་སྒྱུ་འཕྲུལ་མའམ་ལྷ་མཛེས་མའི་ལྷུམས་སུ་ཞུགས། ཡུམ་གྱིས་མནལ་ལམ་གྱི་ལྟས་བཟང་པོ་དང༌། བདེ་བའི་ཉམས་དང་ལྡན་ཞིང་ཟླ་བ་བཅུ་རྫོགས་པར་ཉེ་བ་ན་ལུམ་བི་ནའི་ཚལ་དུ་ལྷ་མིའི་འགྲོ་བ་དུ་མ་ཚོགས་ཤིང༌། ངོ་མཚར་བའི་ལྟས་དང་བཅས་ཡུམ་ལ་གནོད་པ་མེད་པར་སྐུའི་རྩིབ་མའི་སྒོ་བར་ནས་ལྷའི་ན་བཟས་མཛེས་ཤིང་ལྟ་བའི་ཆོག་མི་ཤེས་པ་དང་བཅས་ཏེ་བལྟམས། ཕྱོགས་བཞིར་གོམ་པ་བདུན་བདུན་བོར་ཏེ། ཚིགས་སུ་བཅད་པ་ཡང་གསུང་ཞིང༌། ཞབས་རྗེས་ལ་པདྨ་རེ་ཡང་བྱུང༌། དེའི་དུས་ཕྱོགས་ཀྱི་རྒྱལ་པོ་དང་ཤཱཀྱ་ལྔ་བརྒྱ་རྣམས་ལ་བུ་རེ་ཡང་བཙས། གཏེར་མཛོད་


TNT17_Page_0422
[མ་དཔེ་གཟིགས་ན་འདིར་གནོན།]

ཡང་ཐོན་རྟ་དང་གླང་པོ་སོགས་ལྔ་བརྒྱ་ཙམ་ལའང་ཕྲུ་གུ་རེ་ཡང་བྱུང་ནས། རྒྱལ་འབངས་ཐམས་ཅད་ཀྱི་འདོད་དོན་འགྲུབ་པས་མཚན་ཡང་རྒྱལ་བུ་དོན་ཐམས་ཅད་འགྲུབ་བོ་ཞེས་གསོལ། ཞག་བདུན་ནས་ཡུམ་སྐུ་ནོངས་པར་གྱུར་ཏེ། ལྷ་གནས་སུམ་ཅུ་རྩ་གསུམ་དུ་འཁྲུངས། སྲུ་སྐྱེ་དགུའི་བདག་མོ་ལ་སོགས་མ་བརྒྱད་དང་བཅས་སྐུའི་སྟོབས་བསྐྱེད། ལྷ་མཐུ་བོ་ཆེ་དག་གིས་བསྲུངས་བ་ཡང་བྱས། སྟོབས་དང་གཟི་བརྗིད་སྒྱུ་རྩལ་སོགས་ཀྱིས་ལྷས་སྦྱིན་སོགས་ཤཱཀྱ་འགྲན་ཟླར་གྱུར་པ་ཐམས་ཅད་ཟིལ་གྱིས་མནན། བཙུན་མོ་ས་འཚོ་མ་དང༌། གྲགས་འཛིན་མ། རི་དྭགས་སྐྱེས་མ་དེ་མཆོག་གསུམ་དང༌། འཁོར་ཉི་ཁྲི་རེ་དང་བཅས་དྲུག་ཁྲི་ཁབ་ཏུ་བཞེས། པདྨ་འདམ་གྱིས་མ་གོས་ལྟར་རྒྱལ་སྲིད་ཀྱི་འདོད་པའི་ཡོན་ཏན་ལ་རོལ་བར་མཛད་ཅིང༌། སྐྱེ་རྒུ་ཀུན་བདེ་བ་ལ་བཀོད་ཅིང༌། འཇིག་རྟེན་ན་འགྲན་པའི་ཟླ་དང་བྲལ་བར་མཛད་དོ། །དགུང་ལོ་ཉེར་དགུ་བཞེས་པ་ན་རྒྱུའི་སྟོབས་ལ་ཚོགས་གཉིས་རྫོགས་པའི་མཐར་བླ་ན་མེད་པའི་བྱང་ཆུབ་བརྙེས་པའི་དུས་མཁྱེན་ཅིང༌། སྐྱེས་ནས་གྲོང་ཁྱེར་གྱི་ཕྱོགས་བཞི་ན་སྐྱེ་རྒ་ན་འཆིའི་སྡུག་བསྔལ་ཉམས་ཐག་པས་ཐུགས་ཕྱུང༌། ལྷའི་སྤྲུལ་པའི་དགེ་སློང་ལ་གཟིགས་པས་སྤྲོ་བ་སྐྱེས་ནས། བྱང་ཆུབ་ཐོབ་པའི་ཕྱིར་རྒྱལ་སྲིད་སྤོང་བར་བརྩམས་པ་ན། ཡབ་རྒྱལ་པོ་ཕོ་བྲང་གི་ཕྱོགས་བཞིར་དཔུང་དང་བཅས་ཏེ་བསྲུངས་


TNT17_Page_0423
[མ་དཔེ་གཟིགས་ན་འདིར་གནོན།]

ཀྱང༌། ལྷའི་དབང་པོ་བརྒྱ་བྱིན་དང་ཚངས་པ་སོགས་ཀྱིས་བསྐུལ་ཏེ་བཙུན་མོ་གྲགས་འཛིན་མར་སྲས་བསྐྲུན་པར་མཛད་དེ། ཆིབས་སྔགས་ལྡན་འཁོར་འདུན་པ་དང་བཅས་ཏེ་རྒྱལ་པོ་ཆེན་པོ་བཞིས་བཏེགས་ནས་ཕོ་བྲང་གི་ཕྱི་རོལ་ཐོན་པ་ན། ལྷའི་ཚོགས་མང་པོ་དང་བཅས་ད་ལྟ་ཡང་མཆོད་རྟེན་རྣམ་དག་ཡོད་པའི་སར་དྲང་སྲོང་ངན་སྤོང་གི་གནས་སུ་བཞུགས། འཁོར་འདུན་པ་དང་ཆིབས་སྔགས་ལྡན་དང་བཅས་ཕྱིར་ལོག་ཏེ། ཉིད་ཀྱི་དབུ་སྐྲ་ཉིད་ཀྱིས་བཅད་པའི་ཚེ། བརྒྱ་བྱིན་ཐ་མལ་དུ་སྤྲུལ་པའི་གཟུགས་ཀྱིས། སྔོན་རང་སངས་རྒྱས་ཀྱིས་ཤིང་གི་ལྷ་མོར་བཅོལ་བའི་ཆོས་གོས་རྣམ་གསུམ་སྦས་པ་ཞིག་ཕུལ་བས། རྒྱལ་པོའི་སྐུ་ཆས་རྣམས་དང་བརྗེས་ཏེ་སྐུ་ལ་གསོལ་བས་སྐུ་དང་འཚམ་པར་གྱུར་ཏེ་ངུར་སྨྲིག་རྒྱལ་མཚན་གྱི་ཆས་སུ་ཞུགས་མ་ཐག དབུ་སྐྲ་དང་ན་བཟའ་དེ་ལྷའི་གནས་སུ་ཁྱེར་ཏེ་མཆོད་པ་བྱས་སོ། །དེ་ཡང་ཧ་ཅང་ཡབ་ཀྱི་གནས་དང་ཉམས་ཏེ། བྱ་རྒོད་སྤུངས་རི་དང་ཉམ་པར་བསྟི་གནས་སུ་དྲང་སྲོང་རྣམས་གནས་པའི་ཕྱོགས་སུ་གཤེགས་ཏེ། དེ་དག་གིས་དཀའ་ཐུབ་ཅི་ཙམ་སྤྱོད་པ་དེ། བྱང་ཆུབ་སེམས་དཔས་གཉིས་འགྱུར་སྤྱད་པས་དྲང་སྲོང་ཆེན་པོར་གསོལ། དེ་ནས་རིང་ཕུར་དང་ལྷག་སྤྱོད་ཀྱི་གནས་སུ་གཤེགས་ཏེ། བྱང་ཆུབ་སེམས་དཔས་མཉམ་པར་བཞག་པ་ན་ཅི་ཡང་མེད་པའི་ཏིང་ངེ་འཛིན། ཅི་ཡང་མེད་མིན་གྱི་ཏིང་ངེ་འཛིན་སོགས་སྲིད་


TNT17_Page_0424
[མ་དཔེ་གཟིགས་ན་འདིར་གནོན།]

རྩེའི་བར་གྱི་ཏིང་ངེ་འཛིན་ཐོབ་སྟེ། སྐབས་དེར་ཡང་རྒྱལ་པོ་ཟས་གཙང་གིས་མི་སུམ་བརྒྱ་དང༌། སྐུ་ཞང་རྒྱལ་པོ་རབ་སད་ཀྱིས་མི་ཉིས་བརྒྱས་བཀུར་བསྟི་བསྡད་པ་རྣམས་ཀྱི་ནང་ནས་ལྔས་བསྟེན། གཞན་རྣམས་ཕྱིར་ལོག་སྟེ། དཀའ་ཐུབ་མི་ཟད་པ་དྲག་ཏུ་བརྩོམས་པར་མཛད་ནས་སྐུ་ཡང་ཤིན་ཏུ་རིད་པར་གྱུར་ཀྱང༌། ཞུམ་པ་མེད་པའི་ངང་ནས་ལོ་དྲུག་ཏུ་ཉེ་བ་ན་དཀའ་ཐུབ་ལས་གྲོལ་ཏེ། སྐུའི་མཐུ་བསྐྱེད་པར་དགོངས་ནས་བརྙེད་པའི་དོན་ལ་གཤེགས་པ་ན། དེའི་ཚེ་སྲི་ཞུའི་འཁོར་ལྔ་པོ་ནི་དཀའ་ཐུབ་ལས་ཉམས་སོ་སྙམ་ནས། ལོག་པར་བལྟས་ཏེ་བྱང་ཆུབ་སེམས་དཔའ་སྤངས་ཏེ་ལྔ་སྡེ་ཞེས་དབེན་པར་གནས་སོ། །བྱང་ཆུབ་སེམས་དཔའ་གྲོང་ཁྱེར་དུ་གཤེགས་པས། བདེ་ཅན་གྱི་བུ་མོ་དགའ་མ་དང་དགའ་སྟོབས་ཞེས་པ་གཉིས་ཀྱིས་བ་སྟོང་གི་འོ་མ་སྦྱངས་སྐོལ་རྫས་སྦྱོར་ཕུན་སུམ་ཚོགས་པའི་འོ་ཐུག་ཕུལ་བས་བཞེས་ཏེ། ལོངས་སྤྱོད་པར་མཛད་པས་སྐུ་ཉམས་སྟོབས་དང་ལྡན་ཞིང་གསེར་གྱི་ཁ་དོག་ལྟ་བུར་གྱུར། དེ་ནས་རྡོ་རྗེ་གདན་དུ་གཤེགས་པའི་ལམ་དུ་ཆུ་ཀླུང་ནཻ་རཉྫ་ནར་ཀླུ་རྒྱལ་དུས་ཅན་ཁས་ཆེ་ཤིན་ཏུ་རིང་བ་འཇིག་རྟེན་དུ་སངས་རྒྱས་འབྱོན་པའི་ཚེ་མིག་གིས་མཐོང་ལ། རྒྱུན་དུ་མིག་ལོང་བཞིན་པ་དེ་ཡང་མིག་ཕྱེ་སྟེ། བྱང་ཆུབ་སེམས་དཔའ་མཐོང་མ་ཐག་སངས་རྒྱ་བར་ཤེས་ནས། དེས་སྨྲས་པ། བདག་གིས་སྔོན་ནས་མཐོང་བ་ཡི། སངས་རྒྱས་མཐུ་ཆེན་


TNT17_Page_0425
[མ་དཔེ་གཟིགས་ན་འདིར་གནོན།]

དེ་རྣམས་དང༌། ཐུབ་པ་ཁྱོད་ནི་མཐོང་གྱུར་ནས། །དེ་དག་ཐ་དད་དབྱེར་མེད་མཆིས། །ཞེས་བརྗོད་དོ། །ཡང་རྩྭ་ཚོང་བཀྲ་ཤིས་དང་མཇལ་ནས་རྩ་འཇམ་པོའི་ཁུར་ཕུལ་བ་བསྣམས་ཏེ། རྡོ་རྗེ་གདན་དུ་ཤིང་ཨ་ཤྭ་ཏ་བྱང་ཆུབ་ཀྱི་དྲུང་དུ། རྩྭའི་གདན་ལ་རྡོ་རྗེ་དཀྱིལ་ཀྲུང་བཅས་ཏེ་བྱང་ཆུབ་མ་ཐོབ་ཀྱི་བར་དུ་དཀྱིལ་དཀྲུང་མི་འཇིགས་པའི་དམ་བཅའ་མཛད་དེ་མཉམ་པར་བཞག་པས། བདུད་ཀྱི་གནས་སུ་ལྟས་ལོགས་པས་ཡིད་མ་རངས་ཏེ་བར་དུ་གཅོད་པའི་ཐོ་བརྩམ་བའི་ཕྱིར་བརྩོད་པས། སའི་ལྷ་མོས་ཚོགས་རྫོགས་པའི་དཔང་པོ་ཚིགས་སུ་བཅད་པ་བརྗོད་པས། བདུད་དཔའ་ཞུམ་ཀྱང་སླར་བར་ཆད་ཀྱི་མཚན་མ་སྣ་ཚོགས་བསྟན་པས། ཏིང་ངེ་འཛིན་གྱིས་ཟིལ་གྱིས་མནན་ཏེ། ས་ག་ཟླ་བའི་ཚེས་བཅོ་ལྔར་རབ་མཐའི་བསམ་གཏན་ལ་བརྟེན་ནས་མངོན་ཤེས་རྫུ་འཕྲུལ་སོགས་མཐའ་ཡས་པ་ཐོབ་སྟེ། ཐོ་རངས་ཀྱི་ཐུན་ཐ་མ་ལ་བླ་ན་མེད་པའི་ཡེ་ཤེས་བརྙེས། ཟག་ཟད་ཀྱི་མངོན་ཤེས་གྲུབ། མངོན་པར་རྫོགས་པར་སངས་རྒྱས་ནས་ཐམས་ཅད་མཁྱེན་པ་དེ་བཞིན་གཤེགས་པར་གྱུར་ཏོ། །ནང་ལྟར་དུ་འོག་མིན་སྟུག་པོ་བཀོད་པར་འདས་པའི་སངས་རྒྱས་རྣམས་དང་ཆོས་ཀྱི་དབྱིངས་རོ་གཅིག་པར་ལོངས་སྐུ་ཡན་ལག་བདུན་པ་ས་བཅུའི་བྱང་ཆུབ་སེམས་དཔའ་རྣམས་ཀྱི་སྟོན་པར་གྱུར། སྐབས་དེར་བཙུན་མོ་གྲགས་འཛིན་མའི་ལྷུམ་སུ་སྲས་བསྐྲུན་


TNT17_Page_0426
[མ་དཔེ་གཟིགས་ན་འདིར་གནོན།]

པའང་སྐུ་བལྟམས་ཏེ་ཟླ་བ་ཡང་སྒྲ་གཅན་གྱིས་བཟུང་བས། སྲས་ཀྱི་མཚན་སྒྲ་གཅན་འཛིན་དུ་གྲགས་སོ། །དེའི་ཚེ་བདུད་རྩི་ཟས་ཀྱི་བུ་ཀུན་དགའ་བོ་ཡང་བཙས་སོ། །གཞན་ཡང་ས་གཡོ་བ་སོགས་ངོ་མཚར་བའི་ལྟས་དུ་མ་དང་བཅས་འགྲོ་བ་ཀུན་ལུས་སེམས་བདེ་བས་གྱ་ནོམ་པ་ཐོབ་པར་གྱུར་ཏོ། །མཉམ་པར་བཞག་སྟེ་སངས་རྒྱས་ནས་ཞག་བདུན་ཕྲག་གསུམ་ནས་ཚོང་པ་ག་གོན་དང་བཟང་སྐྱོང་གིས་རྙེད་པ་ཕུལ་བ་སྣོད་ཕལ་པར་ལོངས་སྤྱོད་པར་མི་རུང་བར་དགོངས་པ་ན། རྒྱལ་ཆེན་བཞིས་རྡོའི་ལྷུང་བཟེད་རེ་ཕུལ་བས། བཞི་པོ་གཅིག་ཏུ་བྱིན་གྱིས་རླབས་ཏེ་ལོངས་སྤྱོད་པར་མཛད་ཅིང༌། སྐྱབས་འགྲོ་ལ་བཀོད། སྦྱིན་པའི་ཡི་རངས་ཀྱི་ཆོས་བསྟན། བདུན་ཕྲག་དྲུག་པ་ལ་ནགས་སུ་གཤེགས་ཏེ། བདག་གིས་བདུད་རྩིའི་ཐོབ་པ་འདི་གཞན་ལ་བསྟན་ཀྱང་གོ་བར་མི་འགྱུར་བ་ཞིག་གོ་དགོངས་ཏེ་ཐུགས་ལས་སུ་གྱུར་པ་ན། ལྷ་ཚངས་པ་ཆེན་པོས་ཤེས་ཏེ་གསོལ་བ་བཏབ་པ་ནི། མ་ག་རྡ་ར་ན་སྔོན་ཆད་ཆོས་བྱུང་བ། །དག་པ་མ་ལགས་དྲི་མར་བཅས་པར་རྟོགས། བདུད་རྩི་ཆོས་ཀྱི་སྒོ་ནི་ཕྱེ་མཛོད་ལ། །དྲི་མ་མེད་པའི་རྟོགས་པ་བཤད་པར་མཛོད། །ཅེས་ཞུས་པ་ལ། བཀའ་སྩལ་པ། །བདུད་རྩིའི་སྒོ་ནི་བདག་གིས་དབྱེ་བར་བྱ། །ཉན་པ་སུ་འདོད་སོམ་ཉིས་གསོལ་ཞིག་དང༌། །ཚངས་པ་མི་རྣམས་ལ་ནི་གྱ་ནོམ་ཆོས། །གླན་ཀ་མི་བཙལ་མདོ་ཙམ་


TNT17_Page_0427
[མ་དཔེ་གཟིགས་ན་འདིར་གནོན།]

བཤད་པར་བྱ། །ཞེས་ཞལ་གྱིས་བཞེས་ཏེ། ཞག་བདུན་ཕྲག་བདུན་པར་བབས་པ་ན། ཆོས་ཀྱི་སྣོད་ལྷག་སྤྱོད་དང་རིང་འཕུར་གཉིས་དགོངས་པས་དེ་གཉིས་དུས་ལས་འདས་པར་མཁྱེན་ཏེ། ད་ནི་ལྔ་སྡེར་དཀའ་བ་སྤྱོད་དུས་གུས་པ་དང་ལྡན་པ་ཡིན་པས། ཆོས་ཐོག་མར་བསྟན་པར་བྱའི་དགོངས་ནས། ཝཱ་རཱ་ཎ་སཱི་དྲང་སྲོང་ལྷུང་བ་རི་དྭགས་ཀྱི་ནགས་སུ་གཤེགས། འཁོར་ལྔ་སྡེ་དང་ལྷན་ཅིག་ཏུ་གནས་ཤིང༌། བདེན་པ་བཞི་དང་ལྡན་པ་ཟླས་པ་ལན་གསུམ་སྟེ། བཀའ་དང་པོ་བདེན་པ་བཞིའི་ཆོས་འཁོར་བསྐོར་བའི་བརྗོད་བྱ་ནི། ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་གསུམ་ལ་བརྩམས། ལྟ་བ་གང་ཟག་བདག་མེད། སྒོམ་པ་ཞི་ལྷག་གི་རྣལ་འབྱོར་སྟོན་སྤྱོད་པ་འཚེ་བ་མེད་པ། བརྩོན་འགྲུས་ཅན་རབ་ཀྱིས་བསྒོམ་ན་ཚེ་གསུམ་ལ་ཉན་ཐོས་དགྲ་བཅོམ་དང༌། བསྐལ་པ་བརྒྱར་རང་སངས་རྒྱས་ཐོབ་ནུས་པ་དང༌། ཕར་ཕྱིན་དྲུག་ལ་སོགས་པའི་མིང་ཙམ་ལས་ངོ་བོ་ཚང་བར་མ་བཤད་པ་དང༌། ཐེག་དམན་གྱི་སྡེ་སྣོད་གསུམ་པོ་འདི་ཁོ་ནའི་ལམ་གྱིས་སངས་རྒྱས་ཐོབ་པར་མི་ནུས་སོ། །རྫོགས་པའི་སངས་རྒྱས་དངོས་སུ་བཞུགས་པའི་དུས་ནི་འབྲས་བུའི་དུས་ཡིན་པས། བཀའ་དང་པོའི་ཆོས་འཁོར་ལ་བརྟེན་ནས། ཚེ་གཅིག་རང་ལ་དགྲ་བཅོམ་པ་ཐོབ་པ་ནི་མང་དུ་བྱུང་ངོ༌། །ལམ་འདི་


TNT17_Page_0428
[མ་དཔེ་གཟིགས་ན་འདིར་གནོན།]

སྟོན་བྱེད་གསུང་རབ་འཕགས་ཡུལ་དུ་མང་པོ་དག་བཞུགས་མོད། བོད་དུ་འགྱུར་བ་རགས་རིམ་ཙམ་ནི། སོ་ཐར་གྱི་མདོ། འདུལ་བ་ལུང་སྡེ་བཞི། གདགས་པའི་བསྟན་བཅོས། མདོ་སྡེ་ལས་བརྒྱ་པ། རྟེན་འབྲེལ་གྱི་མདོ། དོན་དམ་ངེས་པའི་མདོ་སོགས་འཁོར་ལོ་དང་པོ་བདེན་བཞིའི་ཆོས་འཁོར་གྱི་མདོ་ཆེ་ཆུང་བསྡོམས་པ་ལྔ་བཅུ་ཙམ་ཡོད་པར་གདའ། བཅོམ་ལྡན་འདས་ཀྱིས་བྱ་རྒོད་ཕུང་པོའི་རི་ལ་འཁོར་བྱང་ཆུབ་སེམས་དཔའ་གཙོ་བོར་གྱུར་པའི་ཐེག་པ་ཆེན་པོའི་གདུལ་བྱ་རྣམས་ལ་བར་བ་མཚན་ཉིད་མེད་པའི་ཆོས་འཁོར་བསྐོར་བའི་བརྗོད་བྱ་དང༌། རྒྱལ་པོའི་ཁབ་དང་ཡངས་པ་ཅན་སོགས་སུ་བྱང་ཆུབ་སེམས་དཔའ་བློ་གྲོས་མཆོག་དང་ལྡན་པ་གཙོ་བོར་གྱུར་པ་རྣམས་ལ་ཐ་མ་ལེགས་པར་རྣམ་པར་ཕྱེ་བའི་འཁོར་ལོ་བསྐོར་བའི་བརྗོད་བྱ་ནི། བསམ་པ་གཞན་ཕན་བྱང་སེམས། སྤྱོད་པ་ཕར་ཕྱིན་བཅུ་དང་བསྡུ་དངོས་བཞི། ལྟ་བ་བདག་མེད་གཉིས། བསྒོམ་པ་རྣམ་པར་མི་རྟོག་པ་སྟེ། དེ་རྗོད་བྱེད་གསུང་རབ་ནི་འབུམ་ཉི་ཁྲི་བརྒྱད་སྟོང་པ་སོགས་བཀའ་བར་པ་ཤེར་ཕྱིན་རྒྱས་འབྲིང་བསྡུས་པ་རྣམས་དང༌། བྱང་ཆུབ་སེམས་དཔའི་གཞི་ལམ་འབྲས་གསུམ་སྟོན་པ། དེ་བཞིན་གཤེགས་པའི་སྙིང་པོའི་མདོ་དང༌། དགོངས་པ་ངེས་འགྲེལ་སོགས་ཕྱིར་མི་ལྡོག་པ་འཁོར་ལོའི་གཏམ་སྟོན་བྱེད་མདོ་ཉི་ཤུ་ཙམ་ཡོད་པ་དང༌། གཞན་ཡང་ཀུན་མཛེས་འདུས་པ་ཆེན་པོ། སྡོང་


TNT17_Page_0429
[མ་དཔེ་གཟིགས་ན་འདིར་གནོན།]

པོ་བཀོད་པ། ཕལ་ཆེན། སྐལ་བཟང༌། མ་སྐྱེས་དགྲའི་འགྱོད་ཚངས་བསལ་བ་སོགས་མང་པོ་དག་འཁོར་ལོ་ཐ་མའི་མདོ་ཡིན་པར་བཞེད། འཁོར་ལོ་བར་ཐ་གཉིས་བསྡོམས་པར་ཐེག་ཆེན་གྱི་མདོ་ཞེས་གྲགས་ཤིང༌། ཡོངས་སྒྲིལ་སུམ་བརྒྱར་ཉེ་བ་ཙམ་བཞུགས་པ་ཡིན་འདུག །འཁོར་ལོ་བར་ཐ་གཉིས་སྤྱོད་པ་ཕར་ཕྱིན་བཅུ་སོགས་ཁྱད་པར་མེད་ཀྱང་ནང་ཚན་དུ་ཐེག་པ་ཆེན་པོ་དབུ་སེམས་གཉིས་ཡོད་པས། སེམས་ཙམ་པ་རྣམ་རིག་ཙམ་ལ་མཐའ་དྲུག་ཏུ་འདོད་པ་དང༌། དབུ་མ་པ་སྤྲོས་བྲལ་དུ་འདོད་པ་སོགས་དང༌། གཞན་ཡང་སེམས་ཙམ་པའི་ནང་ཚན་དུ་རྣམ་བདེན་དང་རྣམ་རྫུན། དབུ་མ་པ་ལ་ཡང་ཐལ་འགྱུར་བ་དང་རང་རྒྱུད་པ། ཆོས་ཐམས་ཅད་རང་གི་ངོ་བོ་སྟོང་པས་དོན་དམ་ཀྱང་རང་གི་ངོ་བོས་སྟོང་པའི་རང་སྟོང་པ། ཀུན་རྫོབ་ཀྱི་ཆོས་རྣམས་དཔྱད་བཟོད་པས་རང་གི་ངོ་བོས་སྟོང་ལ། དོན་དམ་གནས་ལུགས་འགྱུར་མེད་ཡོངས་གྲུབ་སྲ་བརྟན་གཡུང་དྲུང་དཔྱད་མི་བཟོད་པས་རང་གི་ངོ་བོས་སྟོང་མི་དགོས་པའི་དོན་དམ་སྟོང་ཉིད་ཅེས་གཞན་སྟོང་ལུགས་སུ་གྲགས་པ་འདི་ཉིད་ད་ལྟའི་སྐབས་སུ་བློའི་ཡུལ་ལམ་ཚིག་ཏུ་བརྗོད་པའི་སྐབས་སུ་དགག་སྒྲུབ་མི་མཐུན་པ་འདུག་ཀྱང༌། མཉམ་པར་བཞག་པའི་ཚེ་གཞན་སྟོང་ཇི་ལྟ་བ་བཞིན་དུ་གནས་ལུགས་བརྗོད་བྲལ་ལམ་སྤྲོས་བྲལ་ལ་མཐུན་འགྲོ་བས་མཉམ་པར་འཇོག་པའི་སྐབས་ཀྱང་བློའི་རི་མོ་ཐམས་ཅད་


TNT17_Page_0430
[མ་དཔེ་གཟིགས་ན་འདིར་གནོན།]

སྟོང་ཉིད་དུ་ཐག་བཅད། ཡོད་མེད་རྟག་ཆད་སྟོང་མི་སྟོང་ཐམས་ཅད་ལས་འདས་པའི་གསལ་སེང་ངེ་རྗེན་ནེ་ལྷན་ནེ་ལྷོད་དེ་ཤིག་གེ་བསྐྱང་བ་རང་རིག་རྗེན་པར་རྟོགས་པའི་འཇོག་བསྒོམས་སྐབས། ཉམས་སུ་བླངས་ན་ཐམས་ཅད་མཐུན་པས། དོན་དམ་ལ་ནི་ཁྱད་པར་མེད་དོ། །སྒོམས་ཞིང་རྟོགས་ན་མཐུན་འགྲོ། གཞན་སྟོང་དུ་ཁྱི་འཁྲུགས་པ་ལྟར་ཚིག་གི་སྤྲོས་པ་བསྐྱུར། དེ་དག་ནི་གདུལ་བྱ་ཐུན་མོང་པ་དག་ལ་གསུང་བའི་འཁོར་ལོ་གསུམ་སྟེ། འཁོར་ལོ་གསུམ་པོ་འདི་ནི་གནས་དར་དུས་སོ་སོར་གསུང་བས་གདུལ་བྱ་རང་རང་གི་སྐལ་བ་དང་འཚམ་པར་དགོངས་ནས་གསུམ་དུ་བཞག ཞེས་པའི་ལུགས་ཀྱང་འདུག་སྟེ། སྤྲོས་པས་ཆོག་པར་གདའ། གཞན་ཡང་ཕྱི་ལྟར་ཆོས་འཁོར་འདི་དག་བསྐོར་བའི་དུས། ནང་ལྟར་སྔགས་རྒྱུད་སྡེ་བཞི་སོགས་ཀྱི་ཆོས་འཁོར་བསྐོར་བའི་ཚུལ་བཤད་པའང་ཡོད་དོ། །དབང་པོ་རྣོ་ཞིང་སྐལ་བ་དང་ལྡན་པ་དག་ལ། གསང་སྔགས་རྡོ་རྗེ་ཐེག་པའི་ཆོས་འཁོར་བསྐོར་བ་ནི། མདོ་སྡེ་གདམ་ངག་འབོགས་པའི་རྒྱལ་པོ་ལས། ཞུས་ལན་གྱི་བཀའ་ནི། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་སུ་འབྱུང་བར་འགྱུར། །ཞེས་གསུངས་ཤིང༌། མདོ་དེ་བོད་དུ་མ་འགྱུར་ཡང༌། ལོ་ཆེན་རིན་བཟང་གིས་ཆོས་ལུག་སུན་འབྱིན་དུ་ལུང་དྲང་བས་ཚད་མར་བྱའོ། ཚུལ་དེས་


TNT17_Page_0431
[མ་དཔེ་གཟིགས་ན་འདིར་གནོན།]

སྔགས་གསུང་བའི་དུས་ནི། སྟོན་པ་མངོན་པར་སངས་རྒྱས་པའི་ཕྱི་ལོ་ཤྲཱི་དྷ་ན་ཀ་ཊ་ཀ་སྟེ་དཔལ་ལྡན་འབྲས་སྤུངས་ཀྱི་མཆོད་རྟེན་དུ། ཆོས་རྒྱལ་ཟླ་བ་བཟང་པོ་སོགས་ལ་དཔལ་དུས་ཀྱི་འཁོར་ལོ་གཙོ་བོ་གྱུར་པའི་རྒྱུད་སྡེ་དུ་མ་གསུངས་པ་དང༌། གཞན་ཡང་རི་རབ་ཀྱི་རྩེ་མོ་དང༌། ཨུ་རྒྱན་གྱི་ཡུལ་དང༌། རྡོ་རྗེའི་གདན་སོགས་གདུལ་བྱ་སོ་སོའི་ངོར་གནས་དུས་ངེས་མེད་དུ་མར་གསུང་བའི་རྒྱུད་མཐའ་དག་རྣམས་ནི། རྒྱུད་སྡེ་ཆེན་པོ་བཞིར་མ་འདུས་པ་མེད་ཅིང་དེ་ཡང་བྱ་རྒྱུད། སྤྱོད་རྒྱུད། རྣལ་འབྱོར་རྒྱུད། བླ་མེད་དང་བཞིའོ། དེ་དག་གི་ནང་ཚད་དབྱེ་བསྡུས་གཉིས་དང༌། གསུམ་དང༌། དྲུག་ཏུ་བཞག་པ་ཡང་ཡོད། རྒྱུད་སྡེ་བཞིར་དབྱེ་པའང་གདུལ་བྱའི་ཁྱད་པར་བྲམ་ཟེ་རྒྱལ་རིགས་རྗེའུ་རིགས་དམངས་རིགས་གདོལ་བའི་རིགས་བཞི་ལ་དགོངས་ནས་གསུངས་པའི་ཚུལ་དང༌། འདོད་ཁམས་ན་ཆགས་པ་བཞི་ཡོད་པ་དགོངས་ཏེ་གསུང་པའི་ཚུལ་དང༌། དབང་པོ་རྣོ་རྟུལ་རིམ་པ་བཞི་ལ་དགོངས་པ་སོགས་ཏེ། རྡོ་རྗེ་ས་འོག་གི་རྒྱུད་ལས། བྲམ་ཟེ་རྗེ་རིགས་རྒྱལ་རིགས་དང༌། །དམངས་རིགས་གདོལ་པ་འདུལ་དོན་དུ། །ཞེས་དང༌། སམ་བྷུ་ཊི་ལས། ལྟ་དང་རྒོད་དང་ལག་བཅང་དང༌། །གཉིས་གཉིས་འཁྱུད་འཁྱུད་རྣམ་པ་བཞི། །ཞེས་དང༌། རྡོ་རྗེ་གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་


TNT17_Page_0432
[མ་དཔེ་གཟིགས་ན་འདིར་གནོན།]

འབྱོར་དེ་དག་ལ། །སེམས་ཅན་མཆོག་ལ་རྣལ་འབྱོར་མཆོག །རྣལ་འབྱོར་བླ་མེད་དེ་དག་ལའོ། །ཞེས་གསུངས་པས་སོ། །དེ་ལྟར་རྒྱུད་སྡེ་བཞི་པོ་དེ་དག་ནི། ཡང་དག་པར་རྫོགས་པའི་སངས་རྒྱས་ཀྱི་ཐུགས་ཡེ་ཤེས་ལས་བྱུང་བའི་སྔགས། དེའི་ཆོ་ག་ལམ་གྱི་གཙོ་བོར་སྟོན་པ་ལ་སྔགས་རྡོ་རྗེ་ཐེག་པ་ཞེས་བྱ་བ་ཡིན་ཏེ། ཐེག་པ་གཞན་ལས་ཁྱད་པར་དུ་འཕགས་པའི་ཕྱིར། འཇམ་དཔལ་མཚན་བརྗོད་ལས། ཐེག་པ་གསུམ་གྱི་ངེས་འབྱུང་ལས། །ཐེག་པ་གཅིག་གིས་འབྲས་བུ་གནས། །ཞེས་གསུངས་ཤིང༌། གཙོ་བོ་ནི་ལས་ཚོགས་དང༌། དངོས་གྲུབ་སྒྲུབ་ཚུལ་ལྷ་སྔགས་ལུས་ལ་གནད་དུ་བསྣུན་ཚུལ་འདོད་ཡོན་ལམ་འཁྱེར་སོགས་གཞན་ན་མེད་པའི་ཐབས་མང་པོ་དར་དཀའ་བ་མེད་པ་ཡིན་ཏེ། སློབ་དཔོན་ཀྲི་པི་:དྲ་[ཊ་]ཀ་མ་ལའི་ཚུལ་གསུམ་སྒྲོན་མེ་ལས། དོན་གཅིག་ནའང་མ་རྨོངས་དང༌། །ཐབས་མང་དཀའ་བ་མེད་པ་དང༌། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་པའོ། །གཞན་ཡང་དབང་བསྐུར་བ་ཙམ་གྱིས་མཆོག་དང་ཐུན་མོང་གི་དངོས་གྲུབ་མྱུར་དུ་ཐོབ་པའི་ཁྱད་པར་ཡོད་དེ་གསང་བ་མཛོད་ཀྱི་རྒྱུད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ནས་ནི། །མ་སྒོམ་པར་ཡང་སངས་རྒྱས་འགྱུར། །ཞེས་གསུངས། གསང་འདུས་ལས། སེམས་ཅན་མཚམས་


TNT17_Page_0433
[མ་དཔེ་གཟིགས་ན་འདིར་གནོན།]

མེད་ལ་སོགས་པ། །སྡིག་པ་ཆེན་པོ་བྱས་པ་ཡང༌། །རྡོ་རྗེ་ཐེག་པ་རྒྱ་མཚོ་ཆེ། །ཐེག་པ་མཆོག་ནི་འདི་ལས་འགྲུབ། །ཅེས་དང༌། ཡང་དེ་ཉིད་ལས། འདོད་པའི་ལོངས་སྤྱོད་ཐམས་ཅད་ལ། །བསྟེན་ནས་མྱུར་དུ་འགྲུབ་པར་འགྱུར། །ཞེས་པ་ལྟར་རོ། །རྒྱུད་སྡེ་ཆེན་པོ་བཞི་པོ་དེ་དག་བརྗོད་བྱའི་དབང་དུ་བྱས་ན་བྱ་རྒྱུད་ལ་མདོ་ནས་ཇི་སྐད་བཤད་པའི་ལམ་རྣམས་ཀྱི་སྟེང་དུ། ཆུ་དང་ཅོད་པན་གྱི་དབང་ཙམ་དང༌། མདུན་བསྐྱེད་ཀྱི་ལྷ་སྤྱན་དྲངས་མཆོད་པ་ཕུལ། དམ་ཚིག་གི་རྒྱས་བཏབས། སྔགས་བཟླས་པས་ཐུགས་རྒྱུད་བསྐུལ་བའི་བསྙེན་པ་དང༌། ལས་ཚོགས་སྣ་ཚོགས་པ་དང༌། ཐུན་མོང་གི་དངོས་གྲུབ་སྒྲུབ་པའི་ཐབས་རྒྱ་ཆེར་བསྟན། རྒྱུད་འདི་ལ་བདག་བསྐྱེད་མ་བཤད་པས། རང་ཉིད་ཐ་མལ་དུ་གནས་པའི་རྗེ་འབངས་ལྟ་བུའི་དངོས་གྲུབ་ལེན་པའི་ཐ་སྙད་བྱེད། དཀའ་ཐུབ་དང་གཙང་སྦྲ་གཙོ་བོར་སྤྱོད། འདིའི་རང་ལམ་གྱིས་བསྐལ་ཆེན་བརྒྱད་ནས་ས་བཅུ་ཐོབ་པར་བཞེད། སྤྱོད་རྒྱུད་ནི་ཕལ་ཆེར་བྱ་རྒྱུད་དང་འདྲ་བ་ལས། དབང་གི་ཚེ་རིག་པའི་དབང་ལྔ་དང༌། ཉམས་ལེན་སྐབས། སྟོང་པའི་ལྷ། ཡིག་གེའི་ལྷ། སྒྲའི་ལྷ། གཟུགས་ཀྱི་ལྷ། ཕྱག་རྒྱའི་ལྷ། མཚན་མའི་ལྷ་སྟེ་ལྷ་དྲུག་སྒོམས་པ་དང༌། བདག་དམ་ཚིག་པར་བསྐྱེད་པ་དང༌། མདུན་བསྐྱེད་ལ་སྔགས་


TNT17_Page_0434
[མ་དཔེ་གཟིགས་ན་འདིར་གནོན།]

བཟླས་སོགས་གྲོགས་པོ་ལྟ་བུའི་དངོས་གྲུབ་ལེན། བསྐལ་པ་ཆེན་པོ་གསུམ་མམ། གཅིག་གིས་ས་བཅུ་པ་ཐོབ་པར་འདོད། བྱ་སྤྱོད་དེ་གཉིས་ལ་ཐུན་མོང་གི་དངོས་གྲུབ་ཚེའི་རིག་འཛིན་གྲུབ་ནས། རྟེན་དེ་ལ་སྟོང་ཉིད་སྙིང་རྗེ་དབྱེར་མེད་དེ་ཐུན་མོང་བ་དེས་འཕགས་པའི་ས་འགྲུབ་པ་ལས་རང་ལམ་དེས་མཆོག་གི་དངོས་གྲུབ་འཕགས་པའི་ཡེ་ཤེས་སྒྲུབ་པའི་ཐབས་མ་བཤད། རྣལ་འབྱོར་རྒྱུད་ནི། སྤྱོད་རྒྱུད་མན་ཆད་ཀྱི་ཉམས་ལེན་ཡོད་ཀྱི་སྟེང་དུ། དབང་གི་སྐབས་རིག་པའི་དབང་ངམ། སློབ་མའི་དབང་ལྔ། རྟུལ་ཞུགས་རྡོ་རྗེ་སློབ་དཔོན་གྱི་དབང་སྟེ་བདུན་ནོ། །བུམ་དབང་གི་སྡེ་ལ་རྗེས་གནང༌། ལུང་བསྟན། དབུགས་དབྱུངས། གཟེངས་བསྟོད་མཐའ་རྟེན་བཞི་དང་བཅས་པ་ནི་བུམ་དབང་བཅུ་གཅིག ཉམས་ལེན་སྐབས། བདག་བསྐྱེད་ཀྱི་དཀྱིལ་འཁོར་ལ་དམ་ཡེ་ཕྱག་རྒྱ་བཞིས་རྒྱས་བཏབ་སྟེ་སྒོམས་པ་དང༌། ཐུན་གྱི་མཐར་ཕྱག་རྒྱ་བཀྲོལ་ཏེ། ཡེ་ཤེས་པ་གཤེགས། འབྲས་བུ་སངས་རྒྱས་ཀྱི་སའི་རྣམ་པ་ལམ་བྱེད་ཐུན་མོང་གི་མངོན་བྱང་ལྔ་སོགས་བསྒོམས་པས། མཆོག་གི་དངོས་གྲུབ་སྒྲུབ་པའི་ཐབས་མང་པོ་དང་ཁྱད་པར་དུ་གྱུར་པ་ཡོད་པར་གྲགས། འདིའི་རང་ལམ་གྱིས་ཚེ་ལོ་བརྒྱའི་དབང་དུ་བྱས་བའི་མའི་སྐྱེ་བ་བཅུ་དྲུག་གི་ཡུན་ཚོད་ཙམ་ལ་དབང་པོ་རྣོ་ཤོས་ཀྱིས་ཕྱག་རྒྱ་ཆེན་པོའི་དངོས་གྲུབ་འགྲུབ་པ་དང༌། ཡུན་དེ་གཉིས་འགྱུར་ཙམ་


TNT17_Page_0435
[མ་དཔེ་གཟིགས་ན་འདིར་གནོན།]

གྱིས་ས་བཅུ་པ་ཐོབ་པར་གསུངས། དཀའ་སྤྱད་གཙང་སྦྲ་ཡང་མི་དགོས། གཙང་རྨེ་མེད་པ་ཡང་མི་བྱེད། རྒྱུད་གསུམ་པོའི་དབང་བསྐུར་ཚུལ་ནི། ཆགས་པ་བཞི་ཡོད་པའི་དང་པོ་གསུམ་དང་མཚུངས་ཕན་ཚུན་བལྟས་པས་ཚིམ་པ་དང༌། རྒོད་པས་དབང་བསྐུར་ཚུལ་ནི། མིག་ཚིམ་པ་ཙམ་གྱིས་ཆགས་ལམ་སྟོན་ཞིང༌། ཡང་སོ་སོའི་དབང་བསྐུར་ཚུལ་ནི། ཡེ་ཤེས་ཐིག་ལེ་ལས། ཆུ་ཡི་དབང་བསྐུར་ཅོད་པན་དག །བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང༌། །སྤྱོད་པའི་རྒྱུད་ལ་རབ་ཏུ་གསལ། །ཕྱིར་མི་ལྡོག་པ་བུམ་པའི་དབང༌། །རྣལ་འབྱོར་རྒྱུད་ལ་གསལ་བར་ཕྱེ། །འདི་ནི་དྲུག་གི་བྱེ་བྲག་དབང༌། །དེ་ནི་སློབ་དཔོན་དབང་ཞེས་བརྗོད། །ཅེས་སོ། རྒྱུད་སྡེ་གསུམ་པོ་དེས་ས་བཅུ་པ་ཐོབ་ནས་སངས་རྒྱ་ཁ་མར་བླ་མེད་ཀྱི་དབང་བཞི་རྫོགས་ནས་སངས་རྒྱ་བ་དང༌། བླ་མེད་ཀྱི་རྒྱུད་ནི། དབང་གི་སྐབས། བུམ་དབང༌། གསང་དབང༌། ཤེར་དབང༌། དབང་བཞི་པ་སྟེ་དབང་བཞི་རྫོགས་པ་དང༌། ལམ་བསྐྱེད་རིམ་མ་དག་པ་དག་སྣང་དུ་འཆར་བྱེད། སྦྱང་བྱ་སྦྱོང་བྱེད་སྦྱངས་འབྲས་ཚངས་པའི་དཀྱིལ་འཁོར་བསྒོམས་པ་དང༌། མཚན་བཅས་དང་མཚན་མེད་ཀྱི་རྫོགས་རིམ་བསྒོམས་པ། སྤྲོས་བཅས་སྤྲོས་མེད་ཤིན་ཏུ་སྤྲོས་མེད་དམ། ཀུན་བཟང་ཀུན་འདར་ཕྱོགས་


TNT17_Page_0436
[མ་དཔེ་གཟིགས་ན་འདིར་གནོན།]

ལས་རྣམ་རྒྱལ་གྱི་སྤྱོད་པ་སྤྱད་ནས། འབྲས་བུ་ལ་མཚམས་སྦྱོར་བར་བཞེད། ཇི་ལྟར་བཤད་པའི་དོན་བརྩོན་པ་དྲག་པོས་ཉམས་སུ་བླངས་ཤིང༌། བར་ཆད་མེད་པའི་དབང་དུ་བྱས་ན་ཚེ་ལོ་བརྒྱ་བའི་ཚེ་གཅིག་ལ་སངས་རྒྱས་གྱི་ས་ཐོབ་ངེས་པར་བཤད་དེ། རྡོ་རྗེ་རྩེ་མོ་ལས། བསྐལ་པ་གྲངས་མེད་པ་རུ་འབྱུང༌། །ས་ཡི་ཕ་རོལ་ཕྱིན་པའི་མཆོག །གང་ཕྱིར་གསང་བ་པོ་ཐོབ་པ། །རབ་ཏུ་དགའ་བ་ཐོབ་པར་འགྱུར། །གལ་ཏེ་རྣལ་འབྱོར་པ་ངེས་བརྩོན། །ཚེ་འདི་ཉིད་ལ་མྱ་ངན་འདའ། །ཞེས་སོ། །བླ་མེད་ཀྱི་དབང་བསྐུར་ཚུལ་ནི། བརྟགས་གཉིས་ལས། སློབ་དཔོན་གསང་བ་ཤེས་རབ་དང༌། །བཞི་པ་དེ་ཡང་དེ་བཞིན་ནོ། །ཞེས་དང༌། གསང་འདུས་ལས། དབང་ནི་རྣམ་པ་བཞི་དག་ཏུ། །རྒྱུད་འདི་ལ་ནི་རབ་ཏུ་གྲགས། །བུམ་པའི་དབང་ནི་དང་པོ་སྟེ། །གཉིས་པ་གསང་དབང་ཞེས་བྱར་བརྗོད། །ཤེས་རབ་ཡེ་ཤེས་གསུམ་པ་ཡིན། །དེ་བཞིན་དེ་ལྟར་ཡང་བཞི་པ། །ཞེས་སོ། །རྗོད་བྱེད་རྒྱུད་ཀྱི་རྣམ་གྲངས་ནི། བྱ་རྒྱུད་རིགས་དྲུག་སྟེ། དམ་ཚིག་བཀོད་པ་སོགས་དེ་བཞིན་གཤེགས་པའི་རིགས། དོན་ཞགས་སོགས་པད་མའི་རིགས། ཕྱག་རྡོར་རིག་པ་མཆོག་སོགས་རྡོ་རྗེ་རིགས། ནོར་རྒྱུན་མ་སོགས་ནོར་བུའི་རིགས། མེ་ཁ་ལ་སོགས་ལྔ་བརྩེན་གྱི་རིགས། ལྷ་ཀླུ་གནོད་སྦྱིན་ཕལ་པས་ཕུལ་བ་རྣམས་འཇིག་རྟེན་ཕལ་པའི་རིགས། དྲུག་


TNT17_Page_0437
[མ་དཔེ་གཟིགས་ན་འདིར་གནོན།]

དེའི་ནང་དུ། རིགས་ཀྱི་གཙོ་བོ། རིགས་ཀྱི་ཁྲོ་བོ། རིགས་ཀྱི་ཁྲོ་མོ། རིགས་ཀྱི་ཕོ་ཉ་མོ་སོགས་པ་རྣམ་གྲངས་དུ་མ་ཡོད་དོ། །སྤྱོད་རྒྱུད་ལ་རིགས་གསུམ་ལས། རྣམ་སྣང་མངོན་བྱང་སོགས་སྐུའི་རིགས། གསུང་གི་རིགས་ནི་བོད་དུ་མ་འགྱུར། ཕྱག་རྡོར་དབང་བསྐུར་བའི་རྒྱུད་སོགས་ཐུགས་ཀྱི་རིགས། རྣལ་འབྱོར་རྒྱུད་ལ་ཕ་རྒྱུད་མ་རྒྱུད་གཉིས་ལས། དེ་ཉིད་འདུས་སོགས་ཕ་རྒྱུད། དཔལ་མཆོག་དང་པོ་སོགས་མ་རྒྱུད། བླ་མེད་ལ་ཕ་རྒྱུད་མ་རྒྱུད་གཉིས་སམ། བོད་དུ་བཏགས་པའི་གཉིས་མེད་རྒྱུད་དང་གསུམ། ཕ་རྒྱུད་ལ་གསུམ་ཡོད་དེ། གསང་བ་འདུས་སོགས་ཆགས་ཅན་རྗེས་སུ་འཛིན་པའི་རྒྱུད། འཇིགས་བྱེད་ཀྱི་རྟོགས་པ་བདུན་ལྡན་སོགས་ཞེ་སྡང་ཅན་ཚར་གཅོད་པའི་རྒྱུད། སྒྱུ་འཕྲུལ་དྲྭ་བ་སོགས་གཏི་མུག་ཅན་རྗེས་སུ་འཛིན་པའི་རྒྱུད། འདིའི་དུམ་བུ་མཚན་བརྗོད་མ་གཏོགས་བོད་དུ་མ་འགྱུར་རོ། །མ་རྒྱུད་ལ་དབྱེ་ན་རིགས་དྲུག་སྟེ། བདེ་མཆོག་མ་ཡ་སོགས་ཧེ་རུ་ཀའི་རིགས། གདན་བཞི་རྣམ་སྣང་གི་རིགས། རིགས་ཀྱི་འཇིག་རྟེན་མགོན་པོ་པདྨའི་རིགས། རྡོ་རྗེ་བདུད་རྩི་རིན་འབྱུང་གི་རིགས། སྒྲོལ་མ་བླ་མེད་སོགས་རྟའི་རྒྱལ་པོའི་རིགས། སངས་རྒྱས་མཉམ་སྦྱོར་སོགས་རྡོ་རྗེ་སེམས་དཔའི་རིགས། དཔལ་དུས་ཀྱི་འཁོར་ལོ་ཡང་རྡོ་རྗེ་སེམས་དཔའི་རིགས་གཙོ་ཆེར་གདའ། གཉིས་མེད་རྒྱུད་ཀྱི་དབང་དུ་བྱས་ན། དགྱེས་རྡོར་དང་དུས་འཁོར་


TNT17_Page_0438
[མ་དཔེ་གཟིགས་ན་འདིར་གནོན།]

གྱི་རྒྱུད་ལ་ངོས་འཛིན། ཕ་རྒྱུད་མ་རྒྱུད་ཀྱི་ཐ་སྙད་ནི། ལྷ་ཡབ་ཀྱི་དཀྱིལ་འཁོར་དང་སྔགས་ཆོག་རྩལ་འདོན་དུ་སྟོན་པ་ཕ་རྒྱུད། ལྷ་ཡུམ་གྱི་དཀྱིལ་འཁོར་དང་སྔགས་རྩལ་འདོན་དུ་སྟོན་པ་མ་རྒྱུད། ཆ་མཉམ་དུ་སྟོན་པ་གཉིས་མེད་རྒྱུད། ཡང་ན་ཞུ་བ་ཕོ་ཡིན་པས་ཕ་རྒྱུད། མོ་ཡིན་པས་མ་རྒྱུད། གཞན་ཡང་ལྷའི་རྒྱན་དང་དུར་ཁྲོད་ཡོད་མེད་སོགས་ལ་ཡང་སྦྱོར་བ་ཡོད་ཅེས་ངོས་འཛིན་པ་ཡང་སྣང་ངོ༌། །གསང་སྔགས་རིགས་སྔགས་གཟུངས་སྔགས་ཞེས་པ་ནི། ལྷ་ཕོ་གཙོ་ཆེ་བ་གསང་སྔགས། ལྷ་མོ་གཙོ་ཆེ་བ་རིགས་སྔགས། སྔགས་གཅིག་ཕོ་མོ་གཉིས་ཀ་ལ་འགྱུར་བ་ནི། གཟུགས་སྔགས་ཞེས་པའི་ཐ་སྙད་ཙམ་ཡོད་པའོ། །དེ་ལྟར་རྒྱུད་སྡེ་དེ་དག་དཔལ་ཕྱག་ན་རྡོ་རྗེ་ལ་གཉེར་གཏད་ཅིང༌། མ་འོང་པ་ན་ཕྱག་ན་རྡོ་རྗེས་འཆད་པར་ཡང་ལུང་བསྟན་ཏེ། ཡེ་ཤེས་ཐིག་ལེའི་རྒྱུད་ལས། མ་འོངས་དུས་སུ་གསང་བའི་རྒྱུད་སྐལ་བ་དང་ལྡན་པའི་སེམས་ཅན་སུས་བཤད་པར་བྱེད་པར་འགྱུར་ཞུས་པས། བཀའ་སྩལ་པ། ཕྱག་ན་རྡོ་རྗེ་མགོན་པོས་བྱེད་པར་འགྱུར་རོ། །ཞེས་ལུང་བསྟན་པའི་ཕྱིར་རོ། །འོ་ན་རྒྱུད་ཡོངས་སུ་བསྡོམས་ན་གྲངས་ཇི་ཙམ་བཞུགས་ཞེ་ན། བདེ་མཆོག་སྡོམ་འབྱུང་ལས། རྣལ་འབྱོར་རྒྱུད་ཀྱི་གྲངས་རྣམས་ནི། །བྱེ་བ་ཕྲག་ནི་དྲུག་ཏུ་ངེས། །དེ་བཞིན་རྣལ་འབྱོར་མ་རྒྱུད་གྲངས། །བྱེ་བ་ཕྲག་ནི་བཅུ་དྲུག་སྟེ། །གྲངས་སོགས་བརྗོད་ལས་འདས་པའོ། །ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས།


TNT17_Page_0439
[མ་དཔེ་གཟིགས་ན་འདིར་གནོན།]

རྣལ་འབྱོར་ཆེན་པོ་རྒྱུད་ཀྱི་མིང༌། །སྟོང་ཕྲག་བཅུ་གཉིས་ཞེས་བྱ་སྟེ། །རྒྱས་པར་བྱས་ན་གྲངས་མེད་དོ། །གཉིས་ཀའི་རྒྱུད་སྟོང་ཕྲག་དྲུག སྤྱོད་པའི་རྒྱུད་སྟོང་ཕྲག་བརྒྱ། བྱ་བའི་རྒྱུད་སྟོང་ཕྲག་བཞིའོ། །ཞེས་གསུངས་སོ། །མདོར་བསྡུས་ན་རྒྱུད་དེ་དག་གི་བརྗོད་བྱ་སྨིན་གྲོལ་གཉིས་སུ་འདུས་ཏེ། སྣང་བ་རྡོ་རྗེ་འཆར་བའི་རྒྱུད་ལས། གང་ཕྱིར་རྡོ་རྗེ་འཆང་ཆེན་གྱི། །གསུངས་པའི་ཆོས་ནི་རྣམ་མང་པོ། །མདོར་བསྡུས་རྣམ་པ་གཉིས་ཡིན་ཏེ། །སྨིན་པ་དང་ནི་གྲོལ་བའོ། །ཞེས་སོ། །གཞན་ཡང་གྲུབ་ཐོབ་དབུས་སྙོན་པ་ཆེན་པོ་ནས། དཔལ་ས་ར་ཧའི་རྣམ་པར་ཞིག་བསྒྲིགས་པ་དེ་ལ་བརྟེན་པའི་གང་ལྟར་བླ་མ་འགས་གསུང་རྒྱུན་ལས། བཅོམ་ལྡན་འདས་མྱ་ངན་ལས་འདས་ཁར། ལྷོ་ཕྱོགས་བེ་ཏའི་ཡུལ་དུ་ངེས་དོན་གྱི་འཁོར་ལོ་བསྐོར་བ་འདི། འཁོར་ལོ་གསུམ་དང་སྔགས་ཀྱི་འཁོར་ལོ་དང་བཅས་པ། བཀའི་འཁོར་ལོ་བཞི་གར་མི་གཏོགས་ཤིང༌། ཆེས་རྨད་དུ་བྱུང་བའི་འཁོར་ལོ་ཞེས་གསུངས་པ། འཁོར་ལོ་བར་ཐ་དང༌། སྔགས་ཀྱི་འཁོར་ལོའི་བརྗོད་བྱ་ལས་འཕྲོས་པའི་ངེས་དོན་བཟང་པོ་གཞན་ཞིག་སྟོན་པའི་ཆོས་འཁོར་ཇི་ལྟར་འབྱུང་ངམ་སྙམ་མོད། རེ་ཞིག་བཏང་སྙོམས་སུ་བཞག །འདིར་ཐུགས་རྗེས་དང་ཐབས་ལ་མཁས་པའི་རྒྱལ་བའི་དབང་པོ་དེས་ཆོས་འཁོར་རིམ་པ་བཞི་ལ་བརྟེན་ནས། གདུལ་བྱ་རིགས་ཅན་གསུམ་དང༌། རྡོ་རྗེའི་


TNT17_Page_0440
[མ་དཔེ་གཟིགས་ན་འདིར་གནོན།]

རིགས་ཏེ་སྔགས་ཀྱི་གདུལ་བྱ་མང་པོ་དག་བྱང་ཆུབ་གསུམ་དང༌། ཟུང་འཇུག་རྡོ་རྗེ་འཆང་ཆེན་པོའི་ས་ལ་འགོད་པར་མཛད། སྐུ་དངོས་ཀྱི་གདུལ་བྱ་རེ་ཞིག་རྫོགས་པར་ཉེ་བ་ན། མ་འོངས་པའི་དུས་འགྲོ་བ་རྣམས་ཡང་དག་པའི་ལམ་ལ་འཇུག་པའི་ཐབས་རྒྱུན་མི་འཆད་པའི་ཕྱིར། བསྟན་པ་རིན་པོ་ཆེའི་འཕེལ་བར་ནུས་པའི་གདུལ་བྱ་མཆོག་རྣམས་ལ། བསྟན་པ་གཏོད་པར་མཛད་ཚུལ་ནི། དཔལ་ཕྱག་ན་རྡོ་རྗེ་ལ་གསང་སྔགས་ཀྱི་བསྟན་པ་གཏད། འོད་བསྲུང་ཆེན་པོ་ལ་མདོའི་བསྟན་པའི་བདག་པོར་བསྐོས། གཟུགས་སྐུ་ཆོས་དབྱིངས་སུ་བསྡུས་པའི་དུས་ལ་བབ་ཅིང༌། རྟག་འཛིན་ཅན་རྣམས་ངེས་པར་འབྱུང་བའི་ཕྱིར། དགུང་ལོ་བརྒྱད་ཅུ་ལ་བབ་པའི་ཚེ། ཀུན་དགའ་བོས་གསོལ་བ་མ་བཏབ་པའི་བར་དུ་བདུད་ཀྱིས་མྱ་ངན་ལས་འདའ་བར་གསོལ་བ་བཏབ་པ་ལ་བརྟེན་ནས། གྲོང་ཁྱེར་རྩ་ཅན་དང་ཉེ་བའི་སར། ཤིང་སཱ་ལ་ཟུང་གི་བར་དུ་ཁྲི་བརྩིགས་ཏེ། མྱ་ངན་ལས་འདའ་བའི་ཚུལ་སྟོན་པའི་སྔོན་རོལ་དུ་ཀུན་ཏུ་རྒྱུ་རབ་བཟང་དང༌། དྲི་ཟའི་རྒྱལ་པོ་རབ་དགའ་འདུལ་བར་མཛད་རྗེས། ཞིང་འདིར་སྐུ་དངོས་ཀྱི་གདུལ་བྱ་མེད་པར་དགོངས་ཏེ། ངོ་མཚར་བའི་ལྟས་དུ་མ་དང་བཅས་མྱ་ངན་ལས་འདས་སོ། །སྐུ་གདུང་གྱད་ཀྱི་བཏེགས་པའི་མཆོད་རྟེན་གྱི་དྲུང་དུ། མཆོད་སྤྲིན་རྒྱ་མཚོ་ལྟ་བུ་དང་བཅས། འོད་སྲུང་ཆེན་པོ་འཁོར་དང་བཅས་པས་ཞུགས་སུ་ཕུལ་ལོ། །ཚེམས་


TNT17_Page_0441
[མ་དཔེ་གཟིགས་ན་འདིར་གནོན།]

མཆེ་བ་བཞི་མ་གཏོགས་རིང་སྲེལ་གྱི་ཕུང་པོར་གྱུར། གདུང་སྐལ་བ་རྩོད་པའི་ཕྱིར་སྐྱེས་བུ་མང་པོ་འཐབ་པར་བརྩམས་པ་ན། བྲམ་ཟེ་བྲེ་བོ་མཉམ་པ་ཞེས་བྱ་བ་བསོད་ནམས་དང་ལྡན་ཞིང་དྲང་པོར་བརྗོད་པ་ཞིག་ཡོད་པ་དེས། ཆ་བརྒྱད་དུ་བགོས་ནས་རྩོད་པ་མེད་པར་བྱས། ཚེམས་མཆེ་བ་དང་པོ་སུམ་ཅུ་རྩ་གསུམ་ན། གཉིས་པ་ཡུལ་མཆོག་འཛིན་ན། གསུམ་པ་ཀ་ལིང་ཀ་ན། བཞི་པ་གྲོང་ཁྱེར་སྒྲ་སྒྲོགས་པས། ཐོབ་ཀྱང་ཀླུ་རྣམས་ཀྱིས་འཕྲོག་ཏེ་ཀླུ་ཡུལ་ན་ཁྱེར་དེ་མཆོད་པ་བྱེད་དོ། །དེ་ནས་མི་རིང་བ་ནས་འོད་སྲུང་ཆེན་པོས་བཅོམ་ལྡན་འདས་ཀྱི་འཁོར་རྣམས་བསྡུས་ཏེ་ཚོགས་པ་ན། ཀུན་དགའ་བོ་ལ་དྲི་མ་ཡོད་པར་མཁྱེན་ཏེ། དྲག་པོས་བཅོས་ནས་རེས་ཤིག་དབྱུང་པས་བརྩོན་འགྲུས་དྲག་པོ་བརྩམས་ནས་དྲི་མ་དང་བྲལ་ཏེ་དགྲ་བཅོམ་པར་གྱུར་ཏོ། །བཀའ་བསྡུ་དང་པོ་མཛད་པའི་དུས་ལ་བབས་པས་སེང་གེའི་ཁྲི་བཤམས། ཀུན་དགའ་བོ་ཁྲི་ལ་བཞུགས་ནས། མདོ་སྡེ། ཉེ་བ་འཁོར་ཁྲི་ལ་བཞུགས་ནས་འདུལ་བ། འོད་སྲུང་ཆེན་པོས་ཁྲི་ལ་བཞུགས་ཏེ། མངོན་པ་བསྡུས། དེ་ནས་འོད་སྲུང་ཆེན་པོས་སྡེ་སྣོད་གསུམ་གྱི་བདག་པོ་ཀུན་དགའ་བོ་ལ་བསྐོས། དེས་ཤ་ནའི་གོས་ཅན་ལ། དེས་ཉེར་སྦས་ལ། དེས་དྷི་ཏི་ཀ་ལ། དེས་འཕགས་པ་ནག་པོ་ལ་གཏད། དེས་འཕགས་པ་ལེགས་མཐོང་ལ་བསྟན་པ་གཏད་པས། གཏད་རབས་


TNT17_Page_0442
[མ་དཔེ་གཟིགས་ན་འདིར་གནོན།]

བདུན་ཞེས་གྲགས་སོ། །ཡང་ན་ཀུན་དགའ་བོའི་སློབ་མ་འཕགས་པ་ཉི་མ་གུང་ཆེན་པོས་ཡུལ་དབུས་ལ་བསྟན་པ་བསྐྱངས་ཤིང༌། ཁ་ཆེའི་ཡུལ་སོགས་ལ་འཕེལ་པས་རབས་བརྒྱད་དོ། །དེ་ཡན་ཆད་བསྟན་པ་གཅིག་གིས་སྐྱོང་ཤིང་སངས་རྒྱས་དང་འདྲ་བའི་ཉན་ཐོས་ཆེན་པོ་ཁོ་ནའོ། །དེའི་རྗེས་གྲོང་ཁྱེར་ནག་པོ་ཅན་ནས་དགྲ་བཅོམ་གྲགས་པའི་གཟིགས་པས། ཡངས་པ་ཅན་དུ་དགེ་སློང་བཞི་བཅུ་ཙམ་གྱིས་གསེར་དངུལ་གྱི་རུང་པ་སོགས་ཉེས་པ་བྱས་པའི་རྒྱུ་ལ་བརྟེན་ནས། གྲགས་པས་དགྲ་བཅོམ་པ་མང་པོ་ལ་སྦྲན་ཏེ། སྡེ་སྣོད་གསུམ་དག་པར་སྟོན་ཅིང༌། དགེ་སློང་བཞི་བཅུ་ཙམ་གནས་ནས་དབྱུང༌། བཀའ་བསྡུ་བར་པ་མཛད་དོ། །འདི་དགྲ་བཅོམ་པ་བདུན་བརྒྱས་བསྡུས་ཞེས་གྲགས་སོ། ཁ་ཆེའི་ཡུལ་དུ་རྒྱལ་པོ་སེང་གེ་གྲ་མ་ཞེས་པ་རབ་ཏུ་བྱུང་ནས། དགྲ་བཅོམ་པ་ཐོབ་པ་དེས་ཆོས་བསྟན་ཅིང༌། ཛ་ལན་དྷ་རའི་རྒྱལ་པོ་ཀ་ནི་ཀས་སྦྱིན་བདག་བྱས་དགེ་འདུན་མང་དུ་འདུས། འཕགས་པ་བརྩིབ་ལོགས་ཞེས་བྱ་བས་ཀྱང་ཆོས་བསྟན་ནས། ཁ་ཆེའི་ཡུལ་རྣམས་རྒྱ་ནགས་ཀྱི་གཙུག་ལག་ཁང་དུ་དགེ་འདུན་མང་དུ་ཚོགས་ནས་བཀའ་བསྡུ་བ་གསུམ་པ་མཛད་ཅེས་གྲགས་ཤིང༌། ཁ་ཅིག་ལ་ནི་ཛ་ལན་དྷ་རའི་དགོན་པ་ཀུ་བ་ནའི་གཙུག་ལག་ཁང་དུ་བསྡུས། དེ་ཡང་དགྲ་བཅོམ་བྱང་སེམས་སོ་སྐྱེ་བ་ལྔ་བརྒྱ་ལྔ་བརྒྱ་ཚོགས་ནས་བསྡུས་ཞེས་སོགས་རྣམ་གཞག་མང་པོ་ཡོད་པས། བཀའ་བསྡུ་ཐ་མ་


TNT17_Page_0443
[མ་དཔེ་གཟིགས་ན་འདིར་གནོན།]

མཛད་ཞེས་བརྗོད་དོ། །དེ་ནས་རེས་ཤིག་ཉན་ཐོས་བྱེ་བྲག་སྨྲ་བ་དང༌། མདོ་སྡེ་བ་གཉིས་ཀྱི་བསྟན་པ་ཁོ་ནས་ཁྱབ་པ་ལ། སངས་རྒྱས་མྱ་ངན་ལས་འདས་ནས་མི་རིང་བར་དཔལ་ས་ར་ཧ་ཆེན་པོས་ཐོག་མར་:ཨེནྡྲའི་[ན་ལེནྡྲའི་]དགེ་འདུན་གྱི་སྡེ་སྐྱོང་བར་མཛད། ཕྱིས་རིམ་གཉིས་ལ་བརྟན་པ་ཐོབ་བརྟུལ་ཞུགས་ཀྱི་སྤྱོད་པ་མཛད་དེ་མཆོག་གི་དངོས་གྲུབ་བརྙེས་ནས་ངེས་དོན་གྱི་ཆོས་འཁོར་བསྐོར། སློབ་དཔོན་འཕགས་པ་ཀླུ་སྒྲུབ་རྗེས་སུ་བཟུངས་ཏེ། རྡོ་རྗེ་ཐེག་པའི་བསྟན་པ་དར་བའི་མགོ་བརྩམས། གཞན་ནམ་ཨིནྡྲ་བོ་དྷི་ཆེན་པོས་ཨུ་རྒྱན་དུ་གསང་སྔགས་དར། ཀླུ་སྒྲུབ་ནི་ལུང་ཟིན་གྱི་སྐྱེས་བུ་ཡིན་ཏེ། རྫོགས་པའི་སངས་རྒྱས་ཀྱིས་ལང་ཀར་གཤེགས་པའི་མདོ་ལས། ལྷོ་ཕྱོགས་བེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་འབོད་པ་སྟེ། །ཡོད་དང་མེད་པའི་ཕྱོགས་འཇིགས་པ། །ང་ཡི་བསྟན་པ་འཇིག་རྟེན་དུ། །བླ་མེད་ཐེག་པ་རབ་བཤད་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །ཞེས་ལུང་བསྟན་པ་བཞིན། སློབ་དཔོན་འཕགས་པ་ཀླུ་སྒྲུབ་ཀྱིས་འཕགས་པ་འཇམ་དཔལ་ནས་བརྒྱུད་པའི་ཐེག་པ་ཆེན་པོ་དབུ་མའི་ལུགས་ཀྱྀ་སྲོལ་བཟུང། ཡང་སྟོན་པ་མྱ་ངན་ལས་འདས་ནས་ལོ་དགུ་བརྒྱ་ཙམ་ན། སློབ་དཔོན་འཕགས་པ་ཐོགས་མེད་ཀྱིས་རྗེ་བཙུན་བྱམས་པ་བསྒྲུབས་པས་རྗེས་སུ་


TNT17_Page_0444
[མ་དཔེ་གཟིགས་ན་འདིར་གནོན།]

བཟུངས་ཏེ་ཐེག་པ་ཆེན་པོའི་སྲོལ་ལུགས་དར་བར་མཛད་པའི་སློབ་དཔོན་འདི་ཡང་ལུང་བསྟན་པ་ནི། འཇམ་དཔལ་རྩ་རྒྱུད་ལས། ང་ནི་མྱ་ངན་འདས་འོག་ཏུ། །ལོ་ནི་དགུ་བརྒྱ་ལོན་པ་ན། །ཐོགས་མེད་ཅེས་བྱའི་དགེ་སློང་གིས། །བསྟན་བཅོས་དེ་ཡི་དོན་ལ་མཁས། །མདོ་སྡེ་ངེས་དོན་དྲང་བའི་དོན། །རྣམ་པ་མང་པོ་རབ་ཏུ་འབྱེད། །ཅེས་གསུངས་སོ། །སློབ་དཔོན་འདི་གཉིས་སློབ་དཔོན་བརྒྱུད་དང་བཅས་ཐེག་པ་ཆེན་པོའི་ལྟ་བ་དང༌། རྒྱ་ཆེན་སྤྱོད་པའི་སྒོ་ནས་སངས་རྒྱས་ཀྱི་བསྟན་པ་ཉིན་མོར་མཛད་པ་ཡིན་ལ། འདི་དག་གི་སློབ་རྒྱུན་ལ་གྲགས་ཆེ་བ་ནི། ཕྱོགས་གླང་ཆོས་གྲགས་གཉིས། ཨརྱ་དེ་བ། སློབ་དཔོན་དབྱིག་གཉེན་དང་གོང་གི་གཉིས་ཏེ་རྒྱན་དྲུག ཞི་བ་ལྷ་དང༌། ཙནྡྲ་གོ་མི་སྟེ་རྨད་བྱུང་སློབ་དཔོན་གཉིས་དང་བཅས་པའོ། །གསང་སྔགས་ཀྱི་བསྟན་པ་ནི། རྡོ་རྗེ་གདན་དུ་ཚོགས་འཁོར་གཅིག་ཏུ་ཚོགས་པའི་གྲུབ་ཐོབ་བརྒྱད་ཅུ་དང༌། གཞན་ཡང་དེར་མ་འདུས་པའི་གྲུབ་པ་བརྙེས་པའི་སྐྱེས་བུ་བགྲང་བ་ལས་འདས་པ་དང༌། ལྷག་ཏུ་ལཱུ་དྲིལ་ནག་གསུམ། ཏཻ་ལོ་ནཱ་རོ་:་མི་དྲི་[མཻ་ཏྲི]།དུས་ཞབས་པ་ཆེ་ཆུང༌། བིར་ཝ་པ་སོགས་ཀྱིས་དར་རྒྱས་སུ་མཛད་ཅིང༌། ཁྱད་པར་ཡེ་ཤེས་ཀྱི་མཁའ་འགྲོ་མ་ནཻ་གུ་མ་དང༌། སུ་ཁ་སིདྡྷི་སོགས་ཀྱི་བཀའ་དྲིན་གཞལ་དུ་མེད་པ། མཁས་གྲུབ་ཁྱུང་པོ་རྣལ་འབྱོར་ལས་བདག་ཅག་རྣམས་ལ་སྐལ་བཟང་དུ་བྱུང་བ་


TNT17_Page_0445
[མ་དཔེ་གཟིགས་ན་འདིར་གནོན།]

རྣམས་འོག་ཏུ་འཆད་པར་འགྱུར་ལ། ༈ གཉིས་པ་གངས་ཅན་ལྗོངས་སུ་བསྟན་པ་དར་ཚུལ་ནི། ལྷ་མོ་དྲི་མེད་སྦྱིན་ལུང་བསྟན་པའི་མདོ་ལས། ང་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན་གདོང་དམར་ཅན་གྱི་ཡུལ་དུ་དམ་པའི་ཆོས་དར་བར་འགྱུར་རོ། །ཞེས་ལུང་བསྟན་པ་ལྟར། བོད་ཀྱི་རྒྱལ་པོ་གཉའ་ཁྲི་བཙན་པོ་ནས་རིམ་པར་བྱོན་པའི་ལྷ་ཐོ་ཐོ་རིའི་གཉན་བཙན་ཞེས་པ་ཕོ་བྲང་ཡུམ་བུ་ལྷ་མཁར་དུ་བཞུགས་པའི་ཡང་ཐོག་ཏུ་གསེར་གྱི་མཆོད་རྟེན་གྲུ་གང་བ་ཞིག་དང༌། མདོ་སྡེ་ཟ་མ་ཏོག་བཀོད་པ། སྤང་སྐོང་ཕྱག་རྒྱ་ཚིནྟ་མ་ནི་སོགས་ནམ་མཁའ་ལས་བབས་ཏེ་རྒྱལ་པོས་གཟིགས་པས། དེ་དུས་བོད་ན་ཡི་གེའི་འགྱུར་མེད་པས་དོན་ནི་མ་གོ །ཡ་མཚན་དུ་བཟུངས་ནས། མཚན་གཉེན་པོ་གསང་བ་ཞེས་བཏགས། བཀུར་བསྟི་རྒྱ་ཆེ་མཛད་པས་རྒྱལ་པོའི་སྐུ་བསོད་རྒྱས་པར་གྱུར། དམ་པ་ཆོས་ཀྱི་དབུ་རྙེད། དེ་ནས་རྒྱལ་རབས་འགའ་ཙམ་སོང་བ་ན། ཆོས་རྒྱལ་སྲོང་བཙན་སྒམ་པོ་བྱོན་ཏེ། སློབ་དཔོན་ཆེན་པོ་ཐོན་མི་སམ་བྷོ་ཊས་རྒྱ་གར་དུ་ཐེགས། ལོ་ཙ་དང་ཡི་གེ་མཁས་པར་བསླབས། རྒྱ་གར་གྱི་ཡི་གེ་མཁས་པ་ལི་བྱིན་སྤྱན་དྲངས། རླངས་ཁམས་པ་གོ་ཆ་དང་ཐོན་མི་སམ་བྷོ་ཊ་གཉིས་ཀྱིས་བོག་ཡིག་བརྩམས། སྐད་ལ་སྐད་དོད་པ་ཙལ་ཏེ། ཆོས་བསྒྱུར་དུ་བཏུབ་པར་དགོངས་ནས། ཟ་མ་ཏོག་བཀོད་པ། འདུས་པ་རིན་པོའི་ཆེའི་ཏོག་རྒྱལ་པོ་


TNT17_Page_0446
[མ་དཔེ་གཟིགས་ན་འདིར་གནོན།]

མདོ་ལྔ་སོགས་མང་པོ་བསྒྱུར། རྒྱ་ནག་དང་བལ་པོའི་རྒྱལ་པོ་གཉིས་ཀྱི་སྲས་མོ་གཉིས་ཁབ་ཏུ་བཞེས་ཏེ། དེ་གཉིས་ཀྱིས་ཇོ་བོ་ཤཱཀྱ་མུ་ནེ་དང༌། ཇོ་བོ་མི་བསྐྱོད་རྡོ་རྗེ་ཞེས་པ་དགུང་ལོ་བཅུ་གཉིས་པ་དང་བརྒྱད་པའི་སྐུ་ཚད་ཅན་ར་ས་འཕྲུལ་སྣང་དང་ར་མོ་ཆེར་བཞུགས་པ་འདི་གཉིས་སོགས་རྟེན་ཁྱད་པར་ཅན་སྤྱན་དྲངས། ར་ས་འཕྲུལ་སྣང་དང་ར་མོ་ཆེ་སོགས་གཙུག་ལག་ཁང་དང་མཆོད་རྟེན་མང་དུ་བཞེངས་པ་ལ་སོགས་པའི་སངས་རྒྱས་ཀྱི་བསྟན་པའི་སྲོལ་བཏོད་པར་མཛད། དེ་ནས་རྒྱལ་རབས་ལྔ་ནས། རྒྱལ་པོ་ཁྲི་སྲོང་ལྡེའུ་བཙན་བྱོན། སློབ་དཔོན་ཞི་བ་འཚོ་དང༌། སློབ་དཔོན་པདྨ་སྤྱན་དྲངས། བསམ་ཡས་ཀྱི་གཙུག་ལག་ཁང་རྟེན་དང་བཅས་པ་བཞེངས། སློབ་དཔོན་པདྨས་སྔགས་མང་དུ་གསུངས་པ་རྣམས་ལ་རྙིང་མའམ་སྔ་འགྱུར་དུ་གྲགས་མཁས་པ་ཀ་མ་ལ་ཤི་ལ་སྤྱན་དྲངས། ཧྭ་ཤང་གི་བསྟན་པ་སུན་ཕྱུངས། གཞན་ཡང་པཎྜི་ཏ་སངས་རྒྱས་གསང་བ། མཁན་པོ་དྷ་ན་ཤི་ལ། དྷརྨ་ཀིརྟི། བི་མ་ལ་མི་ཏྲ། ཤྲི་ལེན་དྲ་བོ་དྷི་ལ་སོགས་པ་བསམ་ཡས་སུ་བྱོན་ཏེ། བོད་ཀྱི་མི་བློ་གསལ་བ་རྣམས་བསྡུས་ཏེ་ལོ་ཙཱ་བ་བསླབས་པས། ཐོག་མར་འཁོན་ཀླུའི་དབང་པོ་སོགས། སད་མི་མི་བདུན་རབ་ཏུ་བྱུང་ཞིང་ལོ་ཙཱ་མཁས་པར་བསླབས། དེ་ལས་འཕྲོས་ཏེ་ལོ་ཙཱ་བརྒྱ་རྩ་ཙམ་བྱུང༌། དེ་ལས་འཕྲོས་ཏེ་ལྕོག་རོ་ཀླུའི་རྒྱལ་མཚན་སོགས་མི་སྟོང་ལྷག་ཙམ་གྱིས་ལོ་ཙཱ་མཁས་པར་གྱུར་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་མང་པོ་དང༌།


TNT17_Page_0447
[མ་དཔེ་གཟིགས་ན་འདིར་གནོན།]

སྤྱོད་རྒྱུད་རྣམ་སྣང་མངོན་བྱང༌། རྣལ་འབྱོར་རྒྱུད་དེ་ཉིད་བསྡུས་པ་ལ་སོགས་པ་ཆོས་མང་པོ་བསྒྱུར་ཏེ། དགེ་འདུན་གྱི་སྡེ་སོགས་བསྟན་པ་ཆེར་དར་བར་མཛད། དེ་ལ་སྲས་བཞི་ཡོད་པའི་སད་ན་ལེགས་འཇིངས་ཡོན་དུ་གྲགས་པ་དེས། རྒྱལ་སྡེ་དཀར་ཆུང་གི་གཙུག་ལག་ཁང་བཞེངས། པཎྜི་ཏ་བི་མ་ལ་མི་ཏྲ། ཀ་མ་ལ་ཤི་ལ། ཛྙཱ་ན་སེ་ན། བལ་པོ་ཧཱུཾ་ཀ་ར་རྣམས་དང༌། ལོ་ཙཱ་བ་འཁོན་ཀླུའི་དབང་པོ་བསྲུང་བ་དང༌། རྨ་རིན་ཆེན་མཆོག་སོགས་ཀྱིས་ཆོས་མང་དུ་བསྒྱུར་ཞིང༌། སྐད་གསར་བཅད་ཀྱིས་བཅོས་ཤིང་གཏན་ལ་ཕབས། བཤད་གྲྭ་དང་སྒོམ་གྲྭ་མང་པོ་བཙུགས། དེ་ལ་སྲས་གསུམ་ཡོད་པའི་ཆེ་བ་རབ་ཏུ་བྱུང༌། འབྲིང་གླང་དར་མ་རང་རྒྱུད་ངན་པས། ཆུང་བ་ཁྲི་རལ་པ་ཅན་རྒྱལ་སར་བསྐོས། འུ་ཞང་རྡོའི་ལྷ་ཁང་བཞེངས། མཁན་པོ་པཎྜི་ཏ་པྲཛྙཱ་ཝརྨ་དང༌། ཛི་ན་མི་དྲ་སོགས་མང་པོ་དང༌། ལོ་ཙཱ་བ་སྐ་བ་དཔལ་རྩེགས། ལྕོག་རོ་ཀླུའི་རྒྱལ་མཚན། ཞང་སྣ་ནམས་ཡེ་ཤེས་རྡོ་རྗེ་རྣམས་ཀྱིས་ཆོས་མང་དུ་བསྒྱུར་ཞིང་གཏན་ལ་ཕབས། རྒྱལ་པོས་བླ་སྒོ་དང་པོ་དགེ་འདུན་ལ་ཕུལ་བ་སོགས། བསྟན་པ་རབ་ཏུ་རྒྱས་པར་མཛད་པ་ནི་བསྟན་པ་སྔ་དར་གྱི་ཐ་སྙད་མཛད་པ་ཡིན་ནོ། །དེའི་རྗེས་གླང་དར་མས་རྒྱལ་པོ་ཁྲི་རལ་བཀྲོངས་ཏེ་རྒྱལ་ས་བཟུངས་ནས་དབུས་གཙང་གི་བསྟན་པ་བསྣུབས་ཏེ་ལྷག་མ་ཙམ་ཡང་མེད་པར་རྩམས་པ་ན། ལྷ་ལུང་དཔལ་


TNT17_Page_0448
[མ་དཔེ་གཟིགས་ན་འདིར་གནོན།]

གྱི་རྡོ་རྗེས་སངས་རྒྱས་ཀྱི་བསྟན་པ་ལ་དགོངས་ནས་རྒྱལ་པོ་གླང་དར་བཀྲོངས་ཀྱང༌། བསྟན་པ་ཉམས་ཆེས་པས་རེས་ཤིག་དར་མ་ཐུབ། བར་དུ་དབུས་གཙང་ནས་མདོ་ཁམས་སུ་བྲོས་པའི་བཙུན་པ་གཡོ་དགེ་འབྱུང༌། གཙང་རབ་གསལ། དམར་ཤཱཀྱ་མུ་ནེ་དང་གསུམ། རྒྱ་ནག་ཧྭ་ཤང་གཉིས་ཀྱིས་ཁ་བསྐོངས་བྱས་ཏེ། བླ་ཆེན་དགོངས་པ་རབ་གསལ་རབ་ཏུ་བྱུང་སྟེ་བསྙེན་པར་རྫོགས། དེ་ལ་ལོ་སྟོན་རྡོ་རྗེ་དབང་ཕྱུག་ཚོ་བཙུན་ཤེས་རབ་སེང་གེ འབྲི་བཙུན་རྒྱལ་བ་འབྱུང་གནས་ཏེ་གཙང་པ་གསུམ། ཀླུ་མེས་འཕགས་པ་ཤེས་རབ། སུམ་པ་ཡེ་ཤེས་སྡེ་སྟེ་དབུས་པ་གཉིས། དབུས་གཙང་གི་མི་ལྔ་རབ་ཏུ་བྱུང༌། དེ་རྣམས་མདོ་ཁམས་ནས་དབུས་གཙང་དུ་བྱོན་ཏེ་རབ་ཏུ་བྱུང་བ་མང་པོའི་མཁན་སློབ་མཛད་ནས་དགེ་འདུན་གྱི་སྡེ་མང་དུ་བཙུགས། བསྟན་པའི་མེ་རོ་སླར་གསོས་ཏེ་རྒྱས་པར་མཛད་པ་ནི། སྨད་མདོ་ཁམས་ནས་དར་བའོ། །བསྟན་པ་སྔ་དར་ཕྱི་དར་བར་དར་གསུམ་གྱི་དབང་དུ་བྱས་ན་བར་དར། སྔ་ཕྱི་གཉིས་སུ་བྱས་ནས་ཕྱི་དར་གྱི་ཐོག་མའི་བསྟན་པ། ཕྱི་དར་སྟོད་ནས་དར་ཚུལ་ནི། གླང་དར་གྱི་སྲས་གཉིས་བྱུང་བའི། འོད་སྲུང་གི་སྲས་དཔལ་འཁོར་བཙན། དེའི་སྲས་གཉིས་བྱུང་བའི་སྐྱིད་ལྡཻ་ཉི་མ་མགོན། མངའ་རིས་སྟོད་དུ་བཙུག་པའི་མངའ་རིས་སྐོར་གསུམ་ལ་མངའ་མཛད། དེའི་སྲས་གསུམ་བྱུང་བའི། མི་དྲི་ར་མགོན། དེའི་སྲས་


TNT17_Page_0449
[མ་དཔེ་གཟིགས་ན་འདིར་གནོན།]

འོད་ཀྱི་སྦྱིན། དེའི་སྲས་གཉིས་འབྱུང་བའི་ཁོ་རེ་ཞེས་པ་རབ་ཏུ་བྱུང༌། ལྷ་བླ་མ་ཡེ་ཤེས་འོད་ཅེས་བྱ། ཁོང་གིས་ཡབ་མེས་ཀྱི་སྲོལ་བཟུངས་ཏེ་སངས་རྒྱས་ཀྱི་བསྟན་པར་དར་རྒྱས་མཛད་པའི་ཕྱིར། མངའ་འབངས་ནས་བློ་གསལ་བ་ཉི་ཤུ་རྩ་གཅིག་གསེར་མདོ་དང་བཅས་ཏེ་རྒྱ་གར་ལ་ཆོས་སློབ་ཏུ་བརྫངས་པས། ཕལ་ཆེར་ཚེའི་དུས་བྱས། ལོ་ཆེན་རིན་ཆེན་བཟང་པོ་དང༌། ལོ་ཆུང་ལེགས་པའི་ཤེས་རབ་གཉིས་མགོ་ཐོན། ལྷག་པར་ལོ་ཆེན་མཁས་པར་གྱུར་ཏེ། དེ་གཉིས་ཀྱིས་མདོ་བསྟན་བཅོས། སྔགས་ཕྱི་ནང་གི་རྒྱུད་འགྲེལ་མན་ངག་ལ་སོགས་པའི་ཆོས་མང་དུ་བསྒྱུར། བྱང་ཆུབ་ཡེ་ཤེས་འོད་ཀྱིས་ཁུ་བོའི་དགོངས་པ་རྫོགས་པའི་ཕྱིར། ནག་ཚོ་ལོ་ཙཱ་བ་རྒྱ་གར་དུ་ཇོ་བོ་གདན་འདྲེན་དུ་གསེར་མང་པོ་དང་བཅས་རྫོང་པར་མཛད་སྤྱན་འདྲོངས་ཏེ། མངའ་རིས་སྟོད་དུ་བཀུར་བསྟི་རྒྱ་ཆེན་པོ་དང་བཅས། སྡེ་སྣོད་གསུམ་དང་རྒྱུད་སྡེ་བཞིའི་སྙིང་པོ་བྱང་ཆུབ་ལམ་སྒྲོན་སོགས་གཞུང་དང་སྒྲུབ་ཐབས་མང་པོ་གསུངས། གཞན་ཡང་ཕ་རོལ་ཏུ་ཕྱིན་པ་དང༌། སྔགས་ཀྱི་ལམ་སྲོལ་མང་པོ་དར་རྒྱས་སུ་མཛད། ཆོས་ལོག་དང་གོལ་པར་གྱུར་པ་ཐམས་ཅད་སྣུབ་པར་མཛད། དེའི་ཐུགས་སྲས་འབྲོམ་སྟོན་རྒྱལ་བའི་འབྱུང་གནས་ཡབ་སྲས་ཀྱིས་བཀའ་གདམས་རིན་པོ་ཆེ་བསྟན་པ་ཕྱོགས་མཐར་རྒྱས་པར་མཛད། ཁྱུང་པོ་རྣལ་འབྱོར། འགོས་ལོ། ཁྲི་ལོ། གྱི་ཇོ། གླན་


TNT17_Page_0450
[མ་དཔེ་གཟིགས་ན་འདིར་གནོན།]

དར་མ་མ་ཏི། འབྲོག་མི་ཤཱཀྱ་ཛྙཱ་ན། མ་ར་ས། དྷརྨ་མ་ཏི། འབྲོ་ལོ། བ་རི་བ། རྒ་ལོ། ཏྭ་ལོ། གཉན་ལོ། རྔོག་བློ་ལྡན་ཤེས་རབ་ལ་སོགས་པ་མང་པོ་རྣམས་ཀྱིས། མདོ་སྔགས་ཀྱི་ཆོས་མང་པོ་བསྒྱུར་ཅིང༌། བོད་དུ་སྤྱན་དྲངས་ཏེ། དེ་དག་གི་སློབ་བརྒྱུད་རྣམས་ཀྱིས་རྒྱ་གར་གྱི་གཞུང་བཟང་པོ་རྣམས་ཀྱི་དགོངས་བཀྲོལ་ནས། བསྟན་བཅོས་མཛད་པའི་སྲོལ་ལུགས་སོ་སོར་བཟུངས་པས། དེ་ཡང་བོད་དུ་གྲུབ་མཐའི་ཞལ་འཛིན་སོ་སོར་མཛད་པ་ནི། དཔལ་ལྡན་ས་སྐྱ་པ། དེ་ལས་ངོར་རྫོང་གཉིས། ཇོ་ནང་པ། དྭགས་པོ་བཀའ་བརྒྱུད་པ། དེ་ལས་ཀརྨ་པ། འབྲི་སྟག་གཉིས། ཁྲོ་ཕུ་བ། འབྲུག་པ། རྔོག་པ། དེ་རྣམས་ལས་འཕྲོས་པ། ཞ་ལུ་བ། བོ་དོང་པ། རི་བོ་དགའ་ལྡན་པ་སོགས་མཁས་གྲུབ་རྣམས་ཀྱིས་བསྟན་པ་རིན་པོ་ཆེ་ཉིན་མོར་མཛད་པ་རྣམས་ནི་རང་རང་གི་ལུགས་སུ་རྒྱས་པར་ཤེས་སོ། །འདིར་སྤྲོ་བར་མ་ནུས་སོ། །སངས་རྒྱས་ཀྱི་བསྟན་པ་མདོར་བསྡུས་ཏེ་བཤད་པ་ནི། སྡིག་པ་སྤོང་ཞིང་དགེ་བ་སྒྲུབ་པ་སེམས་ཞི་ཞིང་དུལ་བར་བྱེད་པ། སྟོང་ཉིད་སྙིང་རྗེ་དབྱེར་མེད་དུ་བསྒོམ་པ། བསྐྱེད་རྫོགས་ཀྱི་ལམ་ལ་ནན་ཏན་དུ་བྱེད་པའོ། །གཞན་རྣམས་ནི་ཡན་ལག་གོ །དེ་ཡང་སོ་སོར་ཐར་མདོ་ལས། སྡིག་པ་ཅི་ཡང་མི་བྱ་ཞིང༌། །དགེ་བ་ཕུན་སུམ་ཚོགས་པ་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་


TNT17_Page_0451
[མ་དཔེ་གཟིགས་ན་འདིར་གནོན།]

བསྟན་པ་ཡིན། །ཞེས་དང༌། རྡོ་རྗེ་གུར་ལས། སྟོང་ཉིད་སྙིང་རྗེ་ཐ་དད་མེད། །གང་དུ་སེམས་ནི་རྣམ་སྒོམས་པ། །དེ་ནི་སངས་རྒྱས་ཆོས་དང་ནི། །དགེ་འདུན་གྱིའང་བསྟན་པའོ། །ཞེས་དང༌། དགྱེས་རྡོར་ལས། རིམ་གཉིས་མཉམ་པར་གནས་ནས་ནི། །རྡོ་རྗེ་ཅན་གྱི་ཆོས་འཆད་དོ། །ཞེས་གསུངས་སོ། །དགེ་བ་ཚུལ་བཞིན་དུ་མཛད་པ་ཐམས་ཅད་བསྟན་པ་རྣམ་དག་ཡིན་པས་ཕྲན་བུའི་ཕྱག་ལེན་མི་འདྲ་བ་ཙམ་ལ། རང་གཞན་གྱི་ཕྱོགས་མི་བཟུང་བ་དང༌། ཞེ་ནས་ཆགས་སྡང་ལྷུར་ལེན་གྱིས་སྐྱེས་བུ་དམ་པ་ལ་བསྐུར་ཞུས་མཛད་པ་སོགས་ནི་བསྟན་པའི་ཆོམ་རྐུན་ཡིན་པས་སྤོང་འཚལ་ལོ། །འོ་ན་བསྟན་པ་དེ་ཇི་ཙམ་གནས་ན། འབྲས་བུ། སྒྲུབ་པ། ལུང་གི་དུས་ལྔ་བརྒྱ་ཕྲག་གསུམ། རྟགས་ཙམ་འཛིན་པ་ལྔ་བརྒྱ་ཕྲག་གཅིག་གནས་པར་འགྱུར་རོ། །བུད་མེད་རབ་ཏུ་བྱུང་བས་ལྔ་བརྒྱ་ཕྲག་གཅིག་འགྲིབས་ཞེས་གྲགས་སོ།། ༈ གཉིས་པ་གཏན་ལ་དབབ་བྱའི་གཙོ་བོ་དཔལ་ལྡན་ཤངས་པ་བཀའ་བརྒྱུད་ཀྱི་རྣམ་གཞག་ལ། བླ་མ་བརྒྱུད་པའི་ལོ་རྒྱུས་དང༌། བརྒྱུད་པ་དེ་ལས་བྱུང་བའི་གདམས་ངག་གི་སྐོར་བཤད་པའོ། །དང་པོ་ནི། མཁས་གྲུབ་ཁྱུང་པོ་རྣལ་འབྱོར་རམ། ཤངས་པ་བསྡུ་བུ་པ་མི་ཉམས་རྡོ་རྗེ། མཚན་གཞན་ཚུལ་ཁྲིམས་མགོན་པོ། དེའི་འཁྲུངས་ཡུལ་སྙེ་མོ་ར་མངས། རྗེ་རིགས་ཁྱུང་པོ། ཡབ་བོན་པོ་ཁྱུང་


TNT17_Page_0452
[མ་དཔེ་གཟིགས་ན་འདིར་གནོན།]

རྒྱལ་སྟག་སྐྱེས། ཡུམ་མགོ་བཟའ་བཀྲ་ཤིས་སྐྱིད། སྟག་གི་ལོ་ལ་སྐུ་བལྟམས་མ་ཐག རྒྱ་གར་གྲུབ་ཆེན་ཨ་མོ་གྷ་བཛྲ་རྫུ་འཕྲུལ་གྱིས་བྱོན་ནས་བློ་འཕེལ་གྱི་ཆོ་ག་མཛད། བྱིན་གྱིས་བརླབས་ཤིང་ལུང་བསྟན་པ་ནི། འདི་ནི་སྤྲུལ་པའི་སྐུ་སྟེ་རྒྱ་གར་བགྲོད། །ཞེས་སོགས་ནས། རྒྱལ་བའི་ཞིང་དེར་གྲོད་པར་ཐེ་ཚོམ་མེད། །ཅེས་པའི་བར་གསུངས་ཏེ། སླར་ནམ་མཁའ་ལ་བྱ་བཞིན་དུ་གཤེགས་སོ། །དགུང་ལོ་བཅུ་པ་ལ་ཡིག་རྩིས་མཁས་པར་མཁྱེན། བཅུ་གཉིས་པ་ལ་ཡབ་མེས་བགས་ཆགས་ལ་ཞུགས་ཏེ། བླ་མ་གཡུང་དྲུང་ཁྲོ་རྒྱལ་ལ་བོན་ཆོས་གསན། མཁས་གྲུབ་ཏུ་གྱུར་ཀྱང༌། ཆོས་ཁུངས་ལ་ཐུགས་མ་ཆེས་ཏེ། བླ་མ་འབྱུང་གནས་སེང་གེ་ལ་རྫོགས་ཆེན་གསན། སླད་ནས་ཤོ་མདར་སྐོར་དུ་བསྐོར། ནེ་རུ་པ་ལ་སྔགས་གསར་མའི་ཆོས་སྐོར་མང་དུ་གསན། དེས་ཐུགས་ཚིམ་པར་མ་གྱུར་ཏེ། ཆུ་རྩ་གངས་ལ་གཏུག་དགོས་དགོངས་ཏེ། གསེར་མང་དུ་བསྣམས་ནས། རྒྱ་གར་ཡུལ་དུ་ལན་གསུམ་ཐེག་པའི། དང་པོའི་སྐབས་བལ་པོའི་པཎྜི་ཏ་བ་སུ་མ་ཏི་དང་མཇལ། གསང་བ་སྤྱིའི་རྒྱུད་སོགས་ཆོས་མང་དུ་གསན། པཎྜི་ཏ་ཨ་ཐུ་ལ་བཛྲ་གྱིས་གྲོགས་མཛད། འཕགས་ཡུལ་དུ་གཤེགས། བླ་མ་རྡོ་རྗེ་གདན་པ་དང་མཇལ་གསེར་སྲང་ལྔ་བཅུ་ཕུལ་ཏེ་གུས་པས་ཐལ་མོ་སྦྱར་ཏེ། བསྟན་པའི་རྩ་བ་དགེ་སློང་གི་སོགས་གསོལ་བ་བཏབས་པས། དཔལ་ལྡན་རྡོ་རྗེ་གདན་པས། སྲིན་པོ་


TNT17_Page_0453
[མ་དཔེ་གཟིགས་ན་འདིར་གནོན།]

གདོང་དམར་མཐའ་འཁོབ་ཡུལ། །སོགས་ནས། སྔོན་ཚེ་བྱང་ཕྱོགས་གངས་ཅན་དུ། །ཉན་ཐོས་སྤྲུལ་པ་དཔག་མེད་ལྡན། །རྫུ་འཕྲུལ་ཆེན་པོ་ཞེས་བྱར་འགྱུར། །ཞེས་གསུངས་ནས། གླང་རི་ཐང་པ་སངས་རྒྱས་སྣང་བ་མཐའ་ཡས་ཀྱིས་སྤྲུལ་པ་ཡིན་པས་དེར་སོང་གསུངས་ནས་བསྙེན་པར་རྫོགས་པའི་མཁན་པོར་ལུང་བསྟན། རྒྱ་གར་དབུས་འགྱུར་ཤར་ནུབ་ལྷོ་བྱང་རྣམས་ལ་ཁྱེད་ཀྱི་མཁན་པོ་བྱེད་ནུས་པ་མེད་གསུངས་ནས། དགེ་ཚུལ་མཁན་པོ་མཛད་མཚན་ཚུལ་ཁྲིམས་མགོན་པོར་གསོལ་ཞིང༌། འདུལ་བ་ལུང་དང་མདོ་རྩ་སོགས་དང༌། རྒྱུད་སྡེ་ལྔའི་དབང་སྒྲུབ་ཐབས། མི་གཡོ་བ་སྒྲོལ་མ། བྱ་སྤྱོད་རྣལ་འབྱོར་རྒྱུད་སོགས་རྒྱུད་སྡེ་བཞི་དང་འབྲེལ་བའི་རྒྱུད་སྒྲུབ་ཐབས་མང་དུ་གསན། རྗེ་བཙུན་ཤྲཱི་ཛྙཱ་ན་ལ། སེམས་བསྐྱེད་བྱམས་ཆོས་ལྔ། རྣལ་འབྱོར་སྤྱོད་པའི་ས་སྡེ་ལྔ། ཚད་མ་སྡེ་བདུན་སོགས་གསན། བཻ་རོ་ཙ་ན་རཀྵི་ཏ་ལ་གསང་བ་འདུས་པ་ཧེ་བཛྲ། འཁོར་ལོ་བདེ་མཆོག མཧཱ་མ་ཡ། རྡོ་རྗེ་འཇིགས་བྱེད། སངས་རྒྱས་ཐོད་པ། སངས་རྒྱས་མཉམ་སྦྱོར་རྣམས་དབང་དང་བྱིན་བརླབས་སྒྲུབ་ཐབས་རྣམས་ཞུས། ཁ་ཆེ་དགོན་པ་བ་དང༌། རྡོ་རྗེ་གདན་པ་གཉིས་ལ། རྡོ་རྗེ་ས་འོག བྱུང་པོ་འདུལ་བྱེད། གར་མཁན་མཆོག གནོད་སྦྱིན་ཤིང་རྟ། རྣམ་སྲས་ཞི་དྲག་རྣམས་ཞུས། རྡོ་རྗེ་གདན་དུ་ཚོགས་འཁོར་ཞིག་མཛད་


TNT17_Page_0454
[མ་དཔེ་གཟིགས་ན་འདིར་གནོན།]

པའི་ཚེ། དཔའ་བོ་མཁའ་འགྲོས་བར་སྣང་ཁེངས་ཤིང༌། ལྷ་རྣམས་ལ་མཆོད་པ་འབུལ་བའི་ཚེ། རྡོ་རྗེ་གདན་པའི་གསུངས་ནས། རིགས་ཀྱི་བུ་ཁྱོད་བོད་དུ་སོང༌། །འདུལ་དཀའ་ཁ་བ་ཅན་ལྗོངས་ཀྱི། །སེམས་ཅན་མང་པོ་གྲོལ་བྱེད་ཅིང༌། །ཕྱི་མའི་དུས་ན་ཆོས་འདི་རྣམས། ཁྱོད་ཀྱི་བརྒྱུད་འཛིན་རྣལ་འབྱོར་པ། །གཅིག་གིས་དར་བར་བྱེད་པར་འགྱུར། །ཆོས་འདི་རྣམས་ལ་བཀའ་ཐོབ་ཅིང༌། །ཕན་སེམས་ལྡན་པ་དེ་ཡི་ནི། །གང་བྱུང་རྒྱལ་སྲས་མ་ནོར་སྟོན། །རབ་ཏུ་མི་གནས་པ་ལ་སྦྱོར། །རིམ་གྱིས་དོན་རྟོགས་མང་དུ་འབྱུང༌། །ཞེས་སོགས་ནས། ང་དང་འདྲ་བ་ཁྱོད་ཀྱི་རྟོགས། །ཞེས་པའི་བར་གསུངས་ཤིང༌། བདེ་མཆོག་གི་ཕོ་བྲང་:གཞོང་ཞོང་[ཞང་ཞང་]པའོ་ལུང་བསྟན་མཛད་དོ། །བླ་མ་ཞིང་གི་རྡོ་རྗེ་འཆང༌། མི་ཉམས་རྡོ་རྗེ། རིན་ཆེན་རྡོ་རྗེ་མཆེད་གསུམ་ལ། གཤིན་རྗེ་གཤེད་དམར་ནག་ཞུས། སྒྲུབས་པས་ཞལ་གཟིགས། ཌཱ་ཀི་མ་ཀ་ན་ཀ་ཤྲཱི་ལ། སམ་བྷུ་ཊིའི་རྒྱུད་རྫོགས་རིམ་དེ་ཁོ་ན་ཉིད། དཔལ་མཆོག་དྲ་བ་སྡོམ་པ། ཡེ་ཤེས་རྒྱ་མཚོ། ཡེ་ཤེས་མངོན་འབྱུང༌། དམ་ཚིག་བཀོད་པ་རྣམས་ཞུས། བྲམ་ཟེ་རཀྵི་ཏ་པ་ལ། གཤིན་རྗེ་གཤེད་དང༌། མེད་འཚོལ་ལྟེ་བསྒྱུར་ཞུས། བོད་དུ་བྱོན་སྲུ་མོ་བཟའ་མས་སྔར་གཡུ་ཕུལ་བའི་ལན་དུ། མེད་འཚོལ་དང་ལྟེ་བསྒྱུར་བསླབས་པས་དབུ་གསུམ་བྱུང་ཆེས་ཡོན་བདག་ཏུ་གྱུར། སླར་


TNT17_Page_0455
[མ་དཔེ་གཟིགས་ན་འདིར་གནོན།]

རྒྱ་གར་དུ་བར་པ་བྱོན་པའི་སྐབས། བལ་པོ་ཕམ་ཐིང་པ་ལ། བདེ་མཆོག་ཡེ་ཤེས་སྒྲུབ་པ་སྐུ་གསུང་ཐུགས་ཀྱི་རྒྱུད། དགོངས་པ་བླ་མེད་སོགས་མང་དུ་གསན། རྗེ་བཙུན་མ་རིན་ཆེན་ལྷ་མོ་ལ་ཕྱག་རྒྱ་ཆེན་པོ་སྙིང་པོའི་སྐོར་རྣམས་ཞུས། གྲུབ་ཐོབ་ཉི་མའི་སྙིང་པོ་ལ། ཀུ་ཀུ་རི་པའི་ཆོས་བདུན་དང༌། རྗེ་བཙུན་མའི་སྒྲུབ་ཐབས་ཞུས། རྗེ་མངའ་བདག་:མི་དྲི་[མཻ་ཏྲི་]པ་ལ། ཕྱག་རྒྱ་ཆེན་པོ་རབ་ཏུ་མི་གནས་པ་ལ་སོགས་པའི་རྒྱུད་ལྔ་དང༌། :དྷོ་[དོ་]ཧ། ཕྱག་ཆེན་དག་པ་ཡེ་ཤེས། སྐུ་གསུམ་ལམ་ཁྱེར། དགྱེས་རྡོར་མཚན་བརྗོད་སོགས་མང་དུ་ཞུས། ཡང་མཻ་ཏྲི་ཆེན་པོ། ཀོ་ས་ལཾ་པའི་དུར་ཁྲོད་དུ་བཞུགས་དུས། གསེར་སྲང་བདུན་ཕུལ་ནས། བོད་ལོངས་སྤྱོད་ཆུང་བས་ནོར་སྒྲུབ་མྱུར་ལ་ལྷག་མཚན་ཆེ་བའི་ཆོས་སྐྱོང་ཞིག་དགོས་ཞུས་པས། དཔལ་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་འདི་གནང་ནས། ཆེ་བརྗོད་སྔར་གྱི་ལོ་རྒྱུས། ཕྱིས་ཀྱི་ལུང་སྟན་ཡང་མཛད། དེ་ནས་རྡོ་རྗེ་འཆང་དང་དངོས་སུ་མཇལ་བའི་བླ་མ་ཞིག་འཚོལ་དགོས་དགོངས་པ་ན། པཎ་གྲུབ་ཐམས་ཅད་ཞལ་མཐུན་པར། ནཱ་རོ་པཎ་ཆེན་གྱི་ལྕམ་མོ། ཡེ་ཤེས་ཀྱི་མཁའ་འགྲོ་ནཻ་གུ་མ་ཞེས་བྱ་བ་དག་པ་ས་གསུམ་ལ་གནས་པ། རྡོ་རྗེ་འཆང་ལ་དངོས་སུ་ཆོས་གསན་པ་ཞིག་ཡོད་གསུངས་ནས། དེ་ག་ན་བཞུགས་ཞུས་པས། སྣང་བ་དག་ན་གར་ཡང་ཞལ་མཐོང༌། སྣང་


TNT17_Page_0456
[མ་དཔེ་གཟིགས་ན་འདིར་གནོན།]

བ་མ་དག་ན་བཙལ་ཀྱང་མི་རྙེད་དོ། །དེ་དག་པའི་ས་ལ་གནས་པ་དང༌། འཇའ་ལུས་སུ་གྱུར་པའི་ཕྱིར་རོ། །འོན་ཀྱང་དུར་ཁྲོད་ཆེན་པོ་སོ་ས་གླིང་གི་སེང་ལྡེང་ནགས་གསེབ་ན། ཌཱ་ཀི་མང་པོ་ཚོགས་དཔོན་ལ་རེས་འགའ་འབྱོན་ཟེར་ནས། ཌཱ་ཀི་མའི་མཚན་ཐོས་པ་ཙམ་གྱིས་མཆི་མ་འཁྲུགས་ཤིང༌། བ་སྤུ་ལྡང་པའི་མོས་གུས་ལྷག་པར་སྐྱེས་ནས། དུར་ཁྲོད་ཆེན་པོ་སོ་ས་གླིང་གི་སེང་ལྡེང་ནགས་ཁྲོད་ནས་ཡར་ལ། ན་མོ་བུདྡྷ་ཡའི་གསོལ་བ་འདེབས་ཀྱིན་བྱོན་པས། ཤིང་ཏ་ལ་བདུན་སྲིད་ཙམ་གྱི་ནམ་མཁའ་ལ། མཁའ་འགྲོ་མ་སྐུ་མདོག་སྨུག་ནག་ཏུ་ཡོད་པ་རུས་པའི་རྒྱན་གྱི་བརྒྱན་པ་གཅིག་ཕྱག་ན་ཁ་ཊྭཱཾ་ག་དང་ཐོད་པ་བསྣམས་པ། གཅིག་དུ་མ་ལ་སོགས་པའི་གར་བསྒྱུར་བ་མཐོང་ནས། ཌཱ་ཀི་མ་ནི་གུ་མ་ཡིན་འདུག་སྙམས་ནས་ཕྱག་དང་བསྐོར་བ་མཛད། ཡང་དག་པའི་གདམས་པ་ཞུ་གསུངས་པས། ང་ནི་ཤ་ཟའི་ཌཱ་ཀི་ཡིན། འཁོར་རྣམས་བྱུང་ན་ཟར་འོང་ད་ལྟ་བྲོས་གསུངས། སླར་ཡང་ཕྱག་དང་བསྐོར་བ་བྱས་ནན་གྱིས་ཞུས་པ། ཐེག་པ་ཆེན་པོའི་ཆོས་ཞུ་བ་ལ་གསེར་དགོས་ཕུལ་གསུང་བ་ལ། གསེར་སྲང་ལྔ་བརྒྱ་ཕུལ་བས་ཐམས་ཅད་ནགས་གསེབ་ཏུ་གཏོར་ཏེ། སྤྱན་ནམ་མཁའ་ལ་ཧྲིག་ཧྲིག་གཟིགས་པས། འཁོར་ཌཱ་ཀི་མ་དཔག་ཏུ་མེད་པ་བྱུང་སྟེ། འགའ་ཞིག་གིས་གཞལ་ཡས་ཁང་སུམ་རིམ་བཞེངས། འགའ་ཞིག་གིས་རྡུལ་ཚོན་གྱིས་དཀྱིལ་འཁོར་བཞེངས། འགའ་ཞིག་གིས་


TNT17_Page_0457
[མ་དཔེ་གཟིགས་ན་འདིར་གནོན།]

ཚོགས་ཀྱི་ཡོ་བྱད་བསགས་ནས། ཚེས་བཅོ་ལྔའི་སྲོད་ལ་སྒྱུ་ལུས་རྨི་ལམ་གྱི་དབང་བསྐུར་མཛད། དབང་ཐོབ་པ་དང༌། བོད་ཀྱི་བན་ཆུང་ཡར་འདེངས་གསུངས་ནས་ཌཱ་ཀི་མའི་རྫུ་འཕྲུལ་ལ་བསྟེན་ནས། དཔག་ཚད་གསུམ་ཡུད་ཙམ་གྱིས་བགྲོད་གསེར་གྱི་རི་མི་ཆེ་བ་ཙམ་ཞིག་གི་སྟེངས། ནམ་མཁའ་ལ་ཌཱ་ཀི་མའི་ཚོགས་ཀྱིས་བསྐོར་ནས་གར་བསྒྱུར་ཞིང་རི་བོའི་ཕྱོགས་བཞི་ནས་གསེར་གྱི་ཆུ་རྒྱུན་འབབ་ཀྱིན་འདུག་པས། འདི་ལྟ་བུ་རྒྱ་གར་ན་ཡོད་དམ། མཁའ་འགྲོའི་རྫུ་འཕྲུལ་ཡིན་ཞུས་པས། ནཻ་གུ་མའི་ཞལ་ནས། འཁོར་བའི་རྒྱ་མཚོར་བསྐྱུར་བྱེད་པའི། །ཆགས་སྡང་རྟོག་པ་སྣ་ཚོགས་འདི། །རང་བཞིན་མེད་པར་རྟོགས་ཙ་ན། །ཐམས་ཅད་གསེར་གླིང་ཡིད་ནོར་བུ། །སྒྱུ་མ་ལྟ་བུའི་ཆོས་རྣམས་ལ། །སྒྱུ་མ་ལྟ་བུར་སྒོམས་བྱས་ན། །སྒྱུ་མ་ལྟ་བུར་མངོན་སངས་རྒྱས། །ལམ་ལྔ་ས་བཅུའི་རིམ་པ་རྣམས། །མོས་གུས་སྟོབས་ཀྱིས་འབྱུང་བར་འགྱུར། །ད་ངའི་བྱིན་བརླབས་ཀྱིས་རྨི་ལམ་ཟུང་གསུངས་ནས། རྨི་ལམ་ཟིན་ནས་ལྷ་དང་ལྷ་མིན་གྱི་གནས་སུ་ཕྱིན་པས། ལྷ་མ་ཡིན་ཤིན་ཏུ་ཆེ་བ་གཅིག་གིས་ཁྱུར་མིད་པ་དང༌། མཁའ་འགྲོ་མ་ནམ་མཁར་བྱོན་ནས་གཉིད་མ་སད་པར་གྱིས་ཤིག་གསུངས་ནས། དུས་དེར་ཆོས་དྲུག་གི་འཁྲིད་ཚར་བར་མཛད་དེ། གཉིད་ཐུན་གཅིག་ལ་ཆོས་དྲུག་གི་འཁྲིད་ཚར་བ་ཁྱེད་ལས་མེད་དོ་


TNT17_Page_0458
[མ་དཔེ་གཟིགས་ན་འདིར་གནོན།]

གསུངས་སོ། །དེ་ནས་དངོས་སུ་ཁྲིད་ཚར་གསུམ་དང༌། རྡོ་རྗེའི་ཚིག་རྐང་དང༌། སྒྱུ་མ་ལམ་རིམ། རྒྱུད་སྡེ་ལྔའི་དབང་དང་གདམས་པ་རྣམས་དང༌། དེ་ཁོ་ན་ཉིད་བཞིའི་གདམས་པ་རྣམས་གསུངས། ཀྱཻ་རྡོར་སྤྲུལ་པའི་ལྷ་དགུ་དང་མཚོན་ཆ་ཅན་ལྷ་བཅུ་དྲུག་ཏུ་དབང་བསྐུར། བརྟག་གཉིས། གུར་སམ་བྷུ་ཊིའི་སྒྲུབ་ཐབས་དང་མཚོན་ཆ་ཅན་གྱི་བསྐྱེད་རིམ་རྒྱས་བསྡུས་གསུམ་དང༌། དེ་ཁོ་ན་ཉིད་བཞིའི་གདམས་པ་གསུང༌། བདེ་མཆོག་དྲུག་ཅུ་རྩ་གཉིས། བཅུ་གསུམ་མ་དང་ལྷ་ལྔའི་དཀྱིལ་འཁོར་དུ་དབང་བསྐུར་ཞིང༌། རྒྱུད་སྒྲུབ་ཐབས་མང་དུ་གསུངས། མཚོན་ཆ་ཅན་དང༌། དུས་འཁོར་གཉིས་ཀྱི་གདམས་པ་དེ་ཁོ་ན་ཉིད་ཀྱི་ཞལ་གདམས་གསུངས། མཁའ་སྤྱོད་དཀར་དམར། རྒྱུད་སྡེ་བཞིའི་གྲིབ་སེལ་བདེ་མཆོག་རིམ་ལྔའི་རྫོགས་རིམ་ཐིག་ལེའི་རྫོགས་རིམ་རྣམས་གསུངས། རྒྱུད་ཡེ་ཤེས་མཁའ་འགྲོའི་ཆོས་སྐོར་ཐམས་ཅད་གཏན་ལ་ཕབས་ནས་གསུངས་སོ། །མདོར་ན་ཡེ་ཤེས་ཀྱི་མཁའ་འགྲོ་མ་འདི་ཉིད་ཀྱིས་རྒྱུད་སྒྲུབ་ཐབས་གདམས་པ་དང་བཅས་པ་དཔག་ཏུ་མེད་པ་གསུངས་ཤིང༌། དེ་ནས་མཁའ་འགྲོ་མའི་ཞལ་ནས། ཆོས་དྲུག་གི་དབང་གདམས་པ་དང་བཅས་པ་འདི། རྗེ་བཙུན་ལྭ་བ་པ་དང་ང་གཉིས་མ་གཏོགས་རྒྱ་གར་ན་ཡང་ཤེས་པ་མེད་ལ། མི་རབས་བདུན་དུ་ཆིག་རྒྱུད་ལས་མ་སྤེལ་ཅིག དེ་རྣམས་བྱིན་གྱིས་བརླབས་ཤིང་ལུང་སྟོན་


TNT17_Page_0459
[མ་དཔེ་གཟིགས་ན་འདིར་གནོན།]

པར་འགྱུར་རོ། ༈ དེ་ལ་མཁའ་འགྲོ་མ་ནཻ་གུ་མ་འཁྲུངས་པའི་ཡུལ་ཁ་ཆེའི་གྲོང་ཁྱེར་དཔེ་མེད། ཡབ་བྲམ་ཟེ་ཞི་བའི་གོ་ཆ། ཡུམ་དཔལ་གྱི་བློ་གྲོས་མ། མཚན་དངོས་དཔལ་གྱི་ཡེ་ཤེས། བསྐལ་པ་གྲངས་མེད་གསུམ་དུ་ཚོགས་བསགས་པ་མངོན་དུ་གྱུར་ཏེ། སྐུ་ཚེ་འདི་ལ་གྲུབ་ཐོབ་ལྭ་བ་པ་ལ་སོགས་པའི་གདམས་ངག་གི་གསུང་འཕྲོས་ལ་བརྟེན་ནས། གསང་སྔགས་རྡོ་རྗེ་ཐེག་པའི་ལམ་རྟགས་མངོན་དུ་གྱུར་ཏེ་ཟུང་འཇུག་གི་སྐུ་བརྙེས། འཇའ་ཚོན་ལྟ་བུའི་སྐུ་ལུས་སུ་གྱུར། རྡོ་རྗེ་འཆང་ཆེན་པོ་ལ་དངོས་སུ་ཆོས་གསན་པར་ནུས། བྱང་ཆུབ་སེམས་དཔའ་ཆེན་པོར་གྱུར་ནས་སྤྲུལ་པ་ཕྱོགས་མཐར་ཁྱབ་ཏེ་འགྲོ་བའི་དོན་མཛད་པ་དེའོ། །དེ་ནས་སྦས་པའི་རྣལ་འབྱོར་པ་ལ་གསེར་སྲང་བརྒྱད་ཕུལ་ནས། བདེ་མཆོག་ལྷ་ལྔ། མཁའ་སྤྱོད་དཀར་དམར། རིམ་ལྔ་སྟན་ཐོག་གཅིག་མ། སྦྱོར་བ་ཡན་ལག་དྲུག་པ་རྣམས་ཞུས་སོ། །པཎྜི་ཏ་རོལ་པའི་རྡོ་རྗེ། ཨརྱ་དཱེ་བ། ཌཱ་ཀི་མ་སུ་མ་ཏི་ལ་སོགས་པ། གྲུབ་ཐོབ་བཅུ་གསུམ་ལ་གསེར་མང་པོ་ཕུལ་ནས་གདམ་ངག་ཞུས། ཁོང་རྣམས་ཀྱིས་ལུང་བསྟན་ཏེ། མཁའ་འགྲོ་མ་སུ་ཁ་སིདྡྷི་བཙལ། བདེ་བ་སྦྱིན་པའི་ནགས་གསེབ་ན་ཡར་ན་མོ་བུདྡྷ་ཡའི་གསོལ་བ་འདེབས་ཀྱིན་བྱོན་པས། ཙནྡཱན་གྱི་ནགས་དེའི་སྟེང་གི་ནམ་མཁའ་ལ་ཌཱ་ཀི་མ་སྐུ་མདོག་དཀར་མོ་དབུ་སྐྲ་གསིལ་བུས་སྐུ་རྒྱབ་


TNT17_Page_0460
[མ་དཔེ་གཟིགས་ན་འདིར་གནོན།]

ནོན་པ། ཕྱག་གཉིས་སྐྱེ་མེད་ཀྱི་ཕྱག་རྒྱ་མཛད་པ་ཌཱ་ཀི་ཚོགས་ཀྱིས་བསྐོར་བ། འཇའ་འོད་འཁྱིལ་བའི་དབུས་ན་བཞུགས་པ། གཟིགས་མ་ཐག་དད་པའི་སྤུ་ལོང་གཡོ་བ་ས་དང་པོ་ལྟ་བུའི་དགའ་བ་ཐོབ་བོ། །མེ་ཏོག་མང་པོ་གཏོར་ཞིང༌། ཕྱག་དང་བསྐོར་བ་མང་དུ་མཛད་དེ། ཡང་དག་པའི་གདམ་ངག་ཞུ་ཞུས་པས། ཌཱ་ཀི་མའི་ཞལ་ནས། སྨིན་པར་བྱེད་པའི་དབང་བཞི་དང༌། །གྲོལ་བྱེད་བསྐྱེད་རྫོགས་སྟོན་པ་ལ། །དཀོན་པའི་རིན་ཆེན་གསེར་ཕྱེ་ཕུལ། །གུས་པས་ཐལ་སྦྱར་རྐྱང་ཕྱག་འཚལ། །དམན་པའི་ཞབས་མཐིལ་གཙུག་གིས་ལོངས། །དུས་འདིར་བདག་གིས་གྲོལ་བར་བྱ། །དེ་རིང་རྙེད་པ་མཆོག་རྙེད་དོ། །རིགས་ཀྱི་བུ་ཁྱོད་ཨེ་མ་ཧོ། །ཞེས་གསུངས་སོ། །གསེར་སྲང་ལྔ་བརྒྱ་ཕུལ་བས། ཁྱོད་ཀྱི་སློབ་མ་ཡང་སློབ་དང༌། །ཕྱི་རབས་བརྒྱུད་འཛིན་ཐམས་ཅད་ལ། །ང་ཡིས་དངོས་སུ་བྱིན་གྱིས་བརླབས། །དག་པ་མཁའ་སྤྱོད་གནས་སུ་འགྲོ། །ཞེས་གསུངས་ནས། སྤྲུལ་པའི་དཀྱིལ་འཁོར་དང་གསང་བ་མཆོག་གི་དཀྱིལ་འཁོར་དུ་བཅུག གསང་སྒྲུབ་ལྟེ་བ་སྤྲུལ་འཁོར་གྱིས། བསྐྱེད་རྫོགས་དབང་བཞི་ཉམས་ལེན་གྱི་གནང་དང་བཅས་པ་མ་ལུས་གནང༌། བདེ་བ་ཅན་དུ་ས་བཅུ་གཉིས་པ་ཐོབ་པར་ལུང་བསྟན། སློབ་མ་རྒྱུད་འཛིན་དང་བཅས་པ་ཐུགས་རྗེས་བཟུང་དག་པའི་ཞིང་དུ་འགྲོ་བར་ལུང་བསྟན་ཏོ། ༈ སུ་ཁ་སིདྡྷི་འདི་ཉིད་


TNT17_Page_0461
[མ་དཔེ་གཟིགས་ན་འདིར་གནོན།]

འཁྲུངས་པའི་ཡུལ་ནི། ཁ་ཆེ་ཁྲི་སྟན་གྱི་གྲོང་ཁྱེར། གཟའ་ཚོ་བདུན་གྱི་ཨ་མ། ཡུལ་དེར་མུ་གེ་བྱུང་བས། བུ་ཁྱོའི་བཟའ་བ་བཙལ་བས་མ་རྙེད་བཀྲེས་འཕོངས་ནས་ལོག་པའི་ཚེ། འབྲས་བུམ་པ་གང་ཡོད་པ་ལ། མས་དགེ་རྩར་བཏང་ལོངས་སྤྱོད་མེད་པར་བྱས་ནས། བུ་ཁྲོས་ནས་ཕྱིར་བཏོན་པས། ཨུ་རྒྱན་དུ་བྱོན་འབྲས་བསླངས་བས་བེ་ཏའི་གྲོང་ཁྱེར་དུ་ཆང་ཚོང་མ་ཅིག་མཛད་པའི་སྐབས་སུ། དེའི་ཕུ་ན་གྲུབ་ཐོབ་བིར་ཝ་པ་གསང་གཅོད་མཛད་པའི་དམ་རྫས་རྣལ་འབྱོར་མ་ཞིག་གིས་ཉིན་ལྟར་གྲོངས་ཁྱེར་དུ་ཉེ་བ་ལ། རྒན་མོས་ལོངས་སྤྱོད་ལ་སྙིང་པོ་མེད་བསྙམས་ནས། དད་པས་ཆང་རིན་མེད་པར་དམ་རྫས་ནར་མར་ཕུལ་བས། བིར་ཝ་པས་སྐལ་ལྡན་དུ་མཁྱེན་ནས་རྒན་མོ་འཁོར་བ་ནས་འདྲེན་དགོས་དགོངས་ནས། དྲུང་དུ་ཤོག་གསུངས་པས། ཕག་ཤ་དང་དམ་རྫས་བཟང་པོ་ཁྱེར་ནས་མཇལ་བས་རྗེ་བཙུན་མའི་གསང་སྒྲུབ་ཀྱི་དབང་བཞི་རྫོགས་པར་བསྐུར་མ་ཐག་ཡེ་ཤེས་མཁའ་འགྲོར་གྱུར་ཏེ། དེ་ལྟར་ལོ་དྲུག་ཅུ་ལོན་པའི་རྒན་མོ་དེ། དབང་བསྐུར་བས་ལོ་བཅུ་དྲུག་གི་ན་ཚོད་ལྟ་བུར་གྱུར་ཞིང༌། བདག་མེད་མ་དང་དབྱེར་མེད་པའི་རྡོ་རྗེ་འཆང་ལ་དངོས་སུ་ཆོས་གསན་པའི་ཌཱ་ཀི་མ་སུ་ཁ་སིདྡྷི་ཞེས་གྲགས་སོ། །དེ་ནས་མཁའ་འགྲོ་མ་སུ་མ་ཏི་དང༌། གྷང་ག་དྷ་ར་དང༌། ཀུན་ཏུ་བཟང་མོ་རྣམས་ལ་གསེར་སྲང་བདུན་རེ་ཕུལ་


TNT17_Page_0462
[མ་དཔེ་གཟིགས་ན་འདིར་གནོན།]

ཏེ། མ་རྒྱུད་ཀྱི་རྫོགས་རིམ་རི་བོང་དབབ་བཟུང་ལ་སོགས་པ་ཞུས། པཎྜི་ཏ་བདེ་བའི་རྡོ་རྗེ་ལ་གཤིན་རྗེ་གཤེད་གྲ་ནག འཇིགས་བྱེད་མཁའ་འགྲོ་རྣམ་རྒྱལ། ལྷ་མོ་གནམ་ཞལ་བྱ་རོག་རྐང་གཉིས། ཐོད་པ་བརྟག་ཐབས། མི་གཡོ་བ་རྣམས་དང༌། པཎྜི་ཏ་རོལ་བའི་རྡོ་རྗེ་ལ། ལྷ་མོ་མགོན་པོ་སྒྲུབ་ཐབས་ཕྱི་ནང་སེར་བ་དང་ཐོག་བབ་བསྲུངས། སྨན་དཔྱད་སྐོར། བླ་མ་ཨ་ད་ཡ་བཛྲ་ལ། རྡོ་རྗེ་རྣམ་འཇོམས་སྤྲུལ་པའི་དཀྱིལ་འཁོར་དུ་དབང༌། དེའི་སྒྲུབ་ཐབས་རྣམས་ཞུས། དེ་ཉིད་ཀྱི་བུམ་པ་དང་རྡོར་དྲིལ་ནམ་མཁའ་ལ་བཞག་པ་དང༌། བྲམ་ཟེའི་ཐོད་པ་མཚན་ལྡན་རྣམས་གནང་བའི་བུམ་པ་རྡོར་དྲིལ་ད་ལྟ་བསམ་སྡིང་ན་བཞུགས་ཞེས་གྲགས་སོ། །དེ་ནས་གདམས་ངག་གི་སྤྲོས་པ་ཆོད་དེ། བོད་དུ་བྱོན་པར་བརྩམས་པ་ན། ཚོགས་མཆོད་ཞིག་མཛད་པའི་ཐོ་རངས་ལ་ཨ་ད་ཡ་བཛྲ་དང༌། སུ་ཁ་སིདྡྷི། རྗེ་བཙུན་སྒྲོལ་མ་རྣམས་བྱོན་ནས། གནས་ཀྱི་ལུང་བསྟན་མཛད། དེ་ནས་བོད་དུ་བྱོན། གསེར་མང་པོ་སྒྲུབས་ཏེ་སླར་བླ་མ་རྣམས་ལ་ཆོས་ཀྱི་སྐྱེས་སུ། རྡོ་རྗེ་གདན་དུ་ཚོགས་འཁོར་མཛད། བླ་མ་ལྔ་བཅུ་ལ་གསེར་མང་པོ་ཕུལ་བས། སྐུ་གསུང་ཐུགས་ཀྱི་རྟེན་དང༌། དམ་རྫས་བཀའ་ལ་སོགས་བྱིན་གྱིས་བརླབས་པ་ཁྱད་པར་ཅན་མང་པོ་གནང༌། འགའ་ཞིག་གིས་ལུང་བསྟན་ཡང་གནང༌། མཻ་ཏྲི་པ་ཞིང་བརྗེས་ཀྱང༌། ཇོ་མོ་གྷང་ག་དྷ་ར་ལ་གསེར་ཕུལ་ཏེ་


TNT17_Page_0463
[མ་དཔེ་གཟིགས་ན་འདིར་གནོན།]

སེམས་ཐག་ཆོད་པའི་གདམས་པ་མང་པོ་ཞུས། བལ་པོར་ལན་བཞི་སྟེ། རྒྱ་བལ་དུ་ལན་བདུན་ཐེགས་པའི་ཕྱི་མ་བོད་དུ་ཕེབ་པར་བརྩམས་ལོ་དྷཱི།འཙཱ་བ་གླན་དར་མ་དང༌། པཎ་ཆེན་གྷ་ཡ་དྷ་ར་དང་འགྲོགས། མངའ་རིས་མཐོ་ལྡིང་དུ་ཇོ་བོ་རྗེ་དང་མཇལ། སེམས་བསྐྱེད་གསང་འདུས་ཀྱི་དབང་ཞུས། གསང་འདུས་དགྲ་ནག་འཇྀགས་བྱེད། མངོན་རྟོགས་རྒྱན། མདོ་རྒྱན། རྒྱུད་བླ་སོགས་ཆོས་མང་དུ་ཞུས། རྒྱ་དཔེ་རྣམས་གླན་དར་མ་བློ་གྲོས་ཀྱིས་བསྒྱུར་བ་རྣམས་སླར་ལོ་ཆེན་རིན་བཟང་གིས་བསྒྱུར། པཎྜི་ཏ་དི་པཾ་ཀ་རས་ཞུས་དག་མཛད་པའོ། །དེ་ནས་རང་ཡུལ་དུ་བྱོན་རྗེ་བཙུན་ཁྱུང་བོ་དང༌། དངུལ་བཙུན་གཉིས་ཀྱིས་ཆོས་འཁོར་བཙུག་སར་ཐོན་པ་དང༌། ལྷ་ས་ཇོ་བོ་ལ་གསེར་གདུགས་ཞིག་ཕུལ་མཆོད་པ་བཤམས། གསོལ་བ་བཏབ་ནས་གཟིམས་པས། མནལ་ལམ་དུ་ཇོ་བོའི་ཞལ་ནས། ཉན་ཐོས་རྫུ་འཕྲུལ་ཆེན་པོ་ཡིན་པ་དང༌། །བདེ་བ་ཅན་ཏུ་འགྲོ་བར་འགྱུར། ཞེས་ལུང་བསྟན། དེ་ནས་འཕན་ཡུལ་གླང་ཐང་བར་བསྙེན་པར་རྫོགས། འཇོག་བོ་ཤུག་བྲག་ཏུ་བཞུགས། མཐུན་རྐྱེན་དམན་པས། མགོན་པོ་ལྕམ་དྲལ་འཁོར་དང་བཅས་པར་གནད་སྐུལ་མཛད། དེ་འཕྲལ་ཁམས་པའི་འབུལ་སྐྱེལ་ཚན་ཅན་བྱུང༌། གྲྭ་ཚོགས་ཀྱང་མང་དུ་འདུས། མན་པ་སྤྱིལ་པོར་བཞུགས་དུས། རྒྱ་གར་སྒྲུབ་ཐོབ་རཱ་ཧུ་ལ་རྫུ་འཕྲུལ་


TNT17_Page_0464
[མ་དཔེ་གཟིགས་ན་འདིར་གནོན།]

གྱིས་བྱོན་ནས། ཆད་ཀར་གདན་དྲངས་ཟླ་བ་བཅུ་བཞུགས། རྒྱུད་སྡེ་ལྔའི་དབང༌། མགོན་པོའི་དབང༌། ཏིང་ངེ་འཛིན་གྱི་དབང༌། དེ་དག་གི་སྒྲུབ་ཐབས། བརྟག་གཉིས། སཾ་བྷུ་ཊི། བདེ་མཆོག ད་ལིཾ། དགྱེས་རྡོར་མཚོ་སྐྱེས་ལུགས་ཀྱི་སྒྲུབ་ཐབས། དེ་ཉིད་བཞི་དང༌། ཕྱག་རྒྱ་བཞིའི་རྫོགས་རིམ། ལྔ་ལྡན། ལཱུ་ཡི་པ། དཔའ་བོ་གཅིག་པ། རྗེ་བཙུན་མ་བརྒྱུད་པ་གསུམ་པ། མཧཱ་མ་ཡ། ཀུ་ཀུ་ར་བའི་ཆོས་བདུན། འབེ་ལུགས་ཆེན་པོ། ཤན་ཏི་པའི་དེ་ཉིད་ལྔ་ལྡན། འཇིགས་བྱེད་རྟོགས་བདུན། དགྲ་ནག་གསང་བ་སྦས་པ། འཁོར་ལོ་ལྔའི་རྫོགས་རིམ། རླུང་ཤིང་རྟ་ཅན། བུམ་པ་ཅན། འཁོར་ལོ་བཅིང་གྲོལ། འཕོ་བ་ཡེ་ཤེས་སྐར་ཁུང་མ། རྫོགས་རིམ་དེ་ཉིད་གསུམ་པ། དབུ་མ་བདེན་གཉིས། བདེ་མཆོག་རིམ་བཞི་རིམ་ལྔ། ཕྱག་རྒྱ་ཆེན་པོ། དོ་ཧ་དག་པ་ཡེ་ཤེས། ངན་སོང་སྦྱོང་རྒྱུད། ཡོ་གའི་རྒྱུད་མང་པོ། ཕྱག་རྡོར་རྒྱུད་འབྱུང་པོ་འདུལ་བྱེད། མི་གཡོའི་སྒྲུབ་ཐབས། རྣམ་འཇོམས། བྱིན་རླབས་ལྷ་བཞིའི་སྒྲུབ་ཐབས། སེར་བ་དབབ་སྲུངས་ཀྱི་གདམས་པ་སོགས་མང་དུ་ཞུས། དཔོན་སློབ་གཉིས་ཀས་མཆོད་རྟེན་དེ་ཉིད་རེ་ལ་ཚར་བ་མཛད། མཁའ་འགྲོས་ལས་རོགས་དང༌། རབ་གནས་ཀྱང་དྲོད་གོང་ལ་ཚར་བ་དང༌། རྡོར་དྲིལ་ནམ་མཁའ་ལ་བཞག དེ་ནས་སླར་ར་ཧུ་ལ་རྒྱ་གར་དུ་


TNT17_Page_0465
[མ་དཔེ་གཟིགས་ན་འདིར་གནོན།]

ཐེགས་པའི་དཔོན་སློབ་གཉིས་ཀྱིས་མངའ་རིས་མང་ཕྱིན་ལྡན་དུ་ཕེབས། བླ་མའི་ཞལ་ནས། རྒྱ་གར་ལ་ཚེ་ཉི་ཟླ་ལྟར་སྒྲུབ་ཏུ་འདེངས་གསུངས་པ་ལ། མ་བཞེད་པས། མཁྱེན་ནས་ཁྱོད་མི་འགྲོར་འདུག ང་དོ་ནུབ་རྒྱ་གར་རྡོ་རྗེ་གདན་དུ་ཚོགས་དཔོན་ལ་འགྲོ་གསུངས། ནམ་མཁའ་ལ་བྱ་བཞིན་གཤེགས། གསོལ་བ་བཏབ་པས་སླར་བྱོན་ནས་བདུད་རྩི་ཚེ་སྒྲུབ་གསུངས་ནས་གཤེགས་སོ། ཁྱུང་པོ་ཚུར་ཕེབས་སྙེ་མོར་སྤྲུལ་པའི་དམག་གིས་གཡུལ་ངོ་བཟློག །ཆད་ཀར་བླ་མ་རཱ་ཧུ་ལའི་གདམས་པ་རྣམས་འཆད་ཅིང་ལོ་གསུམ་བཞུགས། མཁའ་འགྲོ་སེང་གདོང་ཅན་གྱིས་ཤངས་ལ་དགོན་པ་ལུང་བསྟན། དཔོན་སློབ་སུམ་སྟོང་ཙམ་ཤངས་ལ་ཕེབས། ལུང་བསྟན་གྱིས་ངན་ལྕོག་ལྕོག་རྩེ་ཡིན་པས་དེ་དང་ཉེར་:གཞོང་ཞོང་[ཞང་ཞང་]དུ་དགོན་པ་བཏབ་པ་སོགས་གནས་དགོན་བརྒྱ་རྩ་བརྒྱད་ཀྱི་སྤྱི་དཔོན་ཁྱུང་པོས་མཛད། ཆོས་འཁོར་རྒྱ་ཆེན་བསྐོར་བས། བཤད་གྲྭ་ཆེན་མོས་ཕྲག་དོག་བྱས་གཡུལ་བཤམས་པས། སྤྲུལ་པའི་དམག་གིས་གཡུལ་ངོ་བཟློགརྗེ་བཙུན་མར་གསོལ་བ་བཏབ་པས། སྔ་དྲོ་ས་བོན་བཏབ་པ། ཕྱི་དྲོས་ནས་སུ་སྨིན་ནས་ཡུལ་དེའི་སྐྱེས་བོ་རྣམས་དབུལ་བ་དང་བྲལ། བྲག་ལ་ཐལ་ཕྱུང་དུ་བྱོན་པ། ནམ་མཁའ་ལ་དཀྱིལ་ཀྲུང་འཆའ་པ་དང༌། རྣམ་འཇོམས་ཀྱི་སྤྲུལ་པའི་དཀྱིལ་འཁོར་དུ་དབང་བསྐུར་བ། སྐུ་རྒྱུད་


TNT17_Page_0466
[མ་དཔེ་གཟིགས་ན་འདིར་གནོན།]

སྡེ་ལྔའི་དཀྱིལ་འཁོར་དུ་བསྟན་པས། ཉེ་གནས་རིན་ཆེན་རྡོ་རྗེ་དང༌། བུ་ཆེན་རྣམས་ཀྱིས་གསལ་བར་གཟིགས། བྱིན་རླབས་ལྷ་བཞི་ལ་སོགས་པ་སྐུ་ལུས་ཡི་དམ་གྱི་ལྷ་མང་པོར་བསྒྱུར་བ་དང༌། མནལ་ལམ་བཟུང་ནས་བདེ་བ་ཅན་དང༌། འོག་མིན་པོ་ཏ་ལ། ལྕང་ལོ་ཅན་ལ་སོགས་པར་བྱོན་ཏེ། ཚེ་དཔག་མེད་ཡུམ་ཆེན་མོ། སྤྱན་རས་གཟིགས། ཕྱག་རྡོར་རྣམས་ལ་ཆོས་མང་དུ་གསན། དཔོན་དགའ་མ་ཆོས་རྒྱལ་ལ་གནང་བས་ཉམས་རྟོགས་ཁྱད་པར་ཅན་སྐྱེས་པ་དང༌། གཞན་ཡང་ཡི་དམ་གྱི་ལྷ་གྲངས་མེད་ལས་འདས་པ་ཞལ་གཟིགས་ཤིང་ཆོས་གསན། སྐུ་ལུས་ཀྱི་བཀོད་པ་བརྒྱ་རྩ་བརྒྱད་དུ་བསྟན་ཏེ། ཆོས་ཁྲི་བརྒྱ་རྩ་བརྒྱད་ནས་ཆོས་གསུངས་པ་དང༌། ཁམས་པའི་འབུལ་བ་བཞེས་པ་སོགས་ཀུན་གྱི་ཐུན་མོང་མངོན་སུམ་དུ་གྲུབ། གྲྭ་པའི་མཐར་ཐུག་ཁྲི་ཚོ་བརྒྱད། སློབ་མའི་མཐར་ཐུག་དངུལ་བཙུན་རི་དབང༌། ཞང་སྒོམ་ཆོས་སེང༌། གཡོ་པོར་རྒྱ་མོ་ཆེ་ལ་སྟོད་པ་དཀོན་མཆོག་མཁར། སྨེའུ་སྟོན་པ་དེ་ལྔ་བུ་ལྔ། རྨོག་ཅོག་པ་རིན་ཆེན་བརྩོན་འགྲུས་ཏེ་དྲུག་དང་བཅས་པ་ལ་རང་རང་གི་སྐལ་བ་དང་འཚམ་པའི་ཆོས་རྣམས་ཀྱིས་ཚིམ་པར་མཛད། ནཻ་གུའི་ཆོས་སྐོར་བཀའ་རྒྱ་མ་རྣམས། རྨོག་ཅོག་པ་ལ་བུམ་པ་གང་བྱོའི་ཚུལ་དུ་གནང༌། བཀའ་རྒྱས་བཏབ། སྐུ་ཚེའི་མཐར་ཐུག་བརྒྱ་ལྔ་བཅུ་ཉེ་བ་ན། ཚེས་བཅུ་བཞིའི་ཉིན། འཁོར་ཚོགས་རྒྱ་མཚོའི་


TNT17_Page_0467
[མ་དཔེ་གཟིགས་ན་འདིར་གནོན།]

དབུས་སུ་ཚོགས་ཀྱི་འཁོར་ལོའི་མགོན་པོ་མཛད། ཆོས་རྣམས་ལྷག་མ་མེད་པར་རྩལ་ཞིང༌། གཟིམས་ཆུང་དུ་ཕེབས་ཏེ། བུ་ཆེན་རྣམས་ལ་སྐུའི་བཀོད་པ་མང་པོ་སྟོན་པ་དང༌། སྐུ་གདུང་མ་བཞུ་བར་བཞག་ན་:གཞོང་ཞོང་[ཞང་ཞང་]རྡོ་རྗེ་གདན་ལྟར་འགྱུར། ཆོས་རྒྱུན་ཆུ་བོའི་རྒྱུན་ལྟར་གནས་གསུང་བཀའ་ཆེམས་མཛད་པའི་མཐར་ཡེ་ཤེས་སེམས་དཔའ་གཤེགས་མཛད་ཅིང༌། འཕོ་བ་ཡེ་ཤེས་སྐར་ཁུང་མ་ཉམས་ལེན་འདི་ལྟར་གྱིས་གསུངས། དབུ་ཐོད་སྤར་མཐིལ་ཙམ་ཞིག་ནམ་མཁའ་ལ་འཕར་ཞིང༌། ངོ་མཚར་བའི་ལྟས་དང་བཅས་ཞིང་ཁམས་མཐར་ཐུག་བདེ་བ་ཅན་དུ་གཤེགས་སོ། །འདིའི་བརྒྱུད་འཛིན་རྣམས་ལ་ཤངས་པ་བཀའ་རྒྱུད་ཅེས་གྲགས་སོ། །བསྟན་པའི་གཞི་འཕན་ཡུལ་ཆད་ཀར་བྱུང་མོད་ཀྱང༌། བླ་མ་ཡི་དམ་གྱིས་ལུང་བསྟན་པའི་གནས་ཤངས་ཡིན་པ་དང༌། མཐར་ཐུག་ལྔ་པོ་རྫོགས་པར་ཡང་ཤངས་ཞང་ཞང་ཡིན་པས་ཤངས་པ་ཞེས་པ་དང༌། རྡོ་རྗེ་འཆང་ནས་རྩ་བའི་བླ་མའི་བར་ཞལ་ནས་སྙན་དུའམ། བཀའ་ནས་བཀར་བརྒྱུད་པའི་བཀའ་བརྒྱུད་དོ། །དེས་ན་དཔལ་ལྡན་ཤངས་པ་བཀའ་རྒྱུད་ཞེས་གྲགས་སོ། ༈ རྨོག་ཅོག་པ་རིན་ཆེན་བརྩོན་འགྲུས་འཁྲུངས་པའི་ཡུལ་ནི། ཤངས་ལྷ་ཕུ་སྤངས་ཙ། རུས་གཤེ། ཕ་ཤེས་རྒན་སྨྱུང་:[སྨན་ཆུང་]། མ་འབྲི་མོ་དཔལ་སྒྲོན་གྱི་སྲས་སུ་འཁྲུངས། ལོ་བཅུ་ནས་


TNT17_Page_0468
[མ་དཔེ་གཟིགས་ན་འདིར་གནོན།]

ཞང་ཞང་དུ་ཆོས་སྒོར་ཞུགས། བླ་མ་ཤངས་པས་དགྱེས་རྡོར་གྱི་དབང་གནང༌། བཙུན་ཆུང་ཁྱོད་གཞོན་ནུ་ནས་ཐོས་པ་གྱིས། སྒོམ་སྔ་ན་འདྲེས་ཁྱེར་གསུངས། ངས་ཆ་རྐྱེན་དང་དཔེ་ཅ་སྦྱིན་གྱིས་གསུངས་པ་ལ། ཆོས་རྗེ་ཆོས་བཞི་པར། འབྲོམ་སྟོན་བྱ་བ་གཅིག་ཐོས་པས་ཡིད་ཆད་པའི་གསུངས་མང་དུ་བྱོན། བཙུན་ཆུང་ཁྱོད་རང་ཡང་སྒོམ་པ་ཡོངས་ཐང་ཟེར་ནས་བླ་མ་ལ་གདམས་ངག་ཞུས་པས་ཀྱང་སྔར་བཞིན་གསུངས་ནས། མ་ཆིང་པ་ལ་གདམས་པ་འགའ་ཉན་ནས་བསྒོམས་པས། ཉམས་མྱོང་ཆེར་མ་བྱུང༌། བླ་མའི་དྲུང་དུ་ཕྱིན་པས། མགོན་པོའི་སྐོར་དང༌། ཉི་དྲོས་ཀྱི་གདམས་པ་གནང༌། གཡོ་པོར་རྒྱ་མོ་ཆེས་འབུལ་སྐྱེལ་ལ་བྱོན་པས། བླ་མས་བདག་ལ་གསེར་ཞོ་དྲུགདར་ཡུག་དྲུག་མདོ་སྡེ་རྒྱན་གྱི་པུ་ཏི་གཅིག་གནང་ནས། རྒྱ་མོ་ཆེའི་རྗེས་ལ་སོང་གསུངས་པ་ལྟར་བྱོན་པས་ཁོང་སྟོད་ལུང་ལ་བྱོན། ཁྱོད་རང་སྐྱིད་ཤོད་ལ་གཤེགས་གསུངས་ཕྱིན་པའི་ལམ་དུ་དགེ་བཤེས་པུ་ཏི་མང་པོ་ཁུར་པ་གཅིག་ཐོས་པ་ལ་ཡི་ཆད་ནས་བྲང་བརྡུང་བ་གཅིག་དང་འཕྲད་པས། ཐུགས་སྐྱོས་ཏེ་ཁམས་པ་ཨ་སེང་བྱ་བ་དང་དཔལ་རྒ་ལོའི་སློབ་མ་ཐོས་པ་ཅན་མང་དུ་མཁྱེན་པ་སྒྲུབ་པ་ལ་བཞུགས་པ་ཡིན་ཟེར་བ་དེ། གནམ་རྫིང་ཁ་ན་བཞུགས་པའི་དྲུང་དུ་ཕྱིན། ཁོང་དབང་མཛད་པ་དང་ཐུག རྡུལ་ཚོན་དང་ཏིང་ངེ་འཛིན་གྱི་དཀྱིལ་འཁོར་ལ་བརྟེན་ནས། བསྐྱེད་རིམ་ལོ་ཧི་པ་དང་


TNT17_Page_0469
[མ་དཔེ་གཟིགས་ན་འདིར་གནོན།]

ལྷན་སྐྱེས་གཉིས། རྫོགས་རིམ་སྦྱོར་དྲུག་དང་རྩ་འགྲེལ། སྦྱོར་འཕྲེང་རྩ་འགྲེལ་གཉིས། སྙིང་པོ་གསུམ་གསལ་རྩ་འགྲེལ་གཉིས་རྣམས་ཞུས། དེར་བླ་མའི་དྲུང་དུ་བུམ་ཅན་འགའ་རེ་སྒོམ། བླ་མ་དབེན་པ་ཁོ་ན་ལ་དགྱེས་པས། སྟོན་བུར་སྒོམ་ཅན་ཏུ་འོངས། བུ་རམ་གྱིས་ཕྱག་རྟེན་དང་བཅས་མཇལ། རས་ཆུང་ལུགས་ཀྱི་དབང་གདམ་ངག་རྣམས་ཡང་དག་པར་གནང༌། བུར་སྒོམ་པའི་ཕྱུགས་རྣམས་ཤུན་པས་དེད་པས་དེར་སེར་བ་འབེབས་སུ་ཕྱིན་པས། སེར་བ་གྱང་རིམ་གསུམ་ཙམ་ཕབ། མི་ཡང་འགའ་རེ་ཤི་འདུག ཤུན་པས་བཤགས་པ་ཕུལ། ངས་སྡིག་པ་བསགས་ཞུས་པས། བསྟན་པ་དང་བླ་མའི་ཞབས་ཏོག་ཡིན་པས་ས་མང་པོ་ཆོད། བློ་མ་བདེ་ན་གདམ་ངག་ཡོད་གསུངས་ནས་རྗེ་བཙུན་མའི་ཞལ་མཐོང༌། རྨི་ལམ་ཡང་ཟིན། ཁྱོད་ཀྱི་མགོན་པོ་དང་ཉི་དྲོས་གཉིས་ང་ལ་ཕུལ་གསུངས་ནས། བླ་མ་ལ་ཕུལ། དགེ་བཤེས་དཀོན་མཆོག་མཁར་ལ་སྤྱན་སྔའི་སྒོམ་རིམ་དང༌། རབ་གནས། དགེ་བཤེས་རྫ་ར་བ་ལ་བཀའ་གདམས་གདམ་ངག་མང་པོ་ཞུས། སློབ་དཔོན་གཡོར་པོ་བཙན་དུ་ལོ་ལྔ་བཞུགས། ཕར་ཕྱིར། སྤྱོད་བསྡུས། མྱང་སྒོམ་ལ་ཁ་རག་སྐོར་གསུམ་ཞུས། ཡུལ་དུ་བྱོན། ཕ་འགུམ་འདུག་པས་ཞིང་བཙོང་ནས་དགེ་བ་བྱས། དེ་ནས་རྒྱ་གྲགས་སོགས་ལ་སྦྱོར་


TNT17_Page_0470
[མ་དཔེ་གཟིགས་ན་འདིར་གནོན།]

དྲུག་རྡོ་རྗེའི་ཚིག་རྐང་ལ་སོགས་པ་གདམས་པ་མང་པོ། དགེ་བཤེས་བཞི་ལ་ཡང་གདམས་པ་མང་པོ། སློབ་དཔོན་ཞང་ལ་འདུལ་བ་འོད་ལྡན་མ་སོགས། བལ་སྒོམ་ཕྱག་ན་ལ་ཞི་བྱེད་སོགས་མང་པོ་ཞུས། བླ་མའི་དྲུང་དུ་ཕྱིན། རྣལ་འབྱོར་མའི་ཞལ་མཐོང་བ་དང༌། རྨི་ལམ་ཟིན་པ་ཞུས་པས། ཤེས་ཆོག་པའི་ཕར་ཕྱིན་དེ་མ་ཤེས་པར་རྫུན་ཤེས་འདུག་གསུངས་བཀའ་བཀྱོན་མཛད། དེ་ནུབ་རང་ལ་སྐུ་གཞོགས་ལ་ཤོག་གསུངས། ཆོས་གདམས་ངག་ཐམས་ཅད་གནང༌། གཟིམ་གཡོག་མཛད། སྔར་ལོ་ལྔ་དང་ད་ལན་ལོ་གཅིག་དང་ཟླ་བ་བདུན་ལ་ཆོས་ཟབ་མོ་རྣམས་གནང༌། ངའི་བརྒྱུད་པ་ཟུངས་རྩེ་གཅིག་ཏུ་སྒྲུབ་པ་གྱིས་གསུངས་ནས། བླ་མ་ཞི་བར་གཤེགས་སོ། །སྐུ་རྗེས་ཀྱི་བྱ་བ་རྣམས་ཚར་ནས། རྟིང་མར་ལོ་གཉིས་ལ་མཚམས་བཅད་ནས་བསྒོམས་པས། ཉམས་མྱོང་བཟང་པོ་བྱུང༌། ཤངས་པ་མི་བཞུགས་པས་དྲི་ས་མེད་ནས། སྒོམ་པོར་བྱོན། སྔོན་གྱི་འབྲེལ་པས་དགྱེས་པ་དྭངས་མཇལ། མནལ་ལམ་དུ་ཆོས་དྲུག་ཚར་གཅིག དངོས་སུ་ཚར་གཅིག་སོགས། རྗེ་བཙུན་མི་ལ་ནས་བརྒྱུད་བའི་ཆོས་སྐོར་ཡོངས་རྫོགས་དང༌། ཕྱག་རྒྱ་ཆེན་པོའི་གདམས་པའི་བཀའ་བབས་བཀའ་གདམས་པའི་ཆོས་སྐོར་རྣམས་བུམ་པ་གང་འབྱོར་གནང་ཞིང༌། ཐུགས་ཡིད་གཅིག་ཏུ་འདྲེས། དེ་ནས་རིམ་གྱི་ཕེབས་ཏེ། ཤངས་རྨོག་ཅོག་དུ་ཕེབས། ལོ་


TNT17_Page_0471
[མ་དཔེ་གཟིགས་ན་འདིར་གནོན།]

བཅུ་གཉིས་སུ་ཉུང་ལོ་ལ་བརྟེན་ནས་སྒྲུབ་པ་རྩེ་གཅིག་ཏུ་མཛད་མཛད་པས། ཉམས་རྟོགས་ཀྱི་ཀློང་རྡོལ། ཟད་པར་བཞིའི་ཏིང་ངེ་འཛིན་ལ་མཉམ་པར་འཇོག་ནུས་པ་དང༌། རྒྱུད་སྡེ་ལྔའི་ལྷ་ལ་སོགས་པ་དཔག་ཏུ་མེད་པའི་ཞལ་གཟིགས། མགོན་པོའི་ཞལ་གཟིགས། ཉམས་འཕར་དེ་ནམ་མཁའ་ལ་གར་བསྒྱུར་བ་སོགས་སྙན་གྲགས་ཀྱིས་ཁྱབ་པ་དང༌། གྲྭ་པ་ཡང་མང་པོ་འདུས། སྐུག་ལུང་དུ་དགོན་པ་བཏབ། དངོས་སུ་གདམས་པ་བཏབ་པ་རྣམས་ལྟ་ཞོག མོས་གུས་ཀྱིས་ལམ་དུ་ཞུགས་པས་ས་ལམ་བགྲོད་པ་ཡང་དཔག་ཏུ་མེད། ཁྱད་པར་བཀའ་རྒྱ་མ་རྣམས་དབོན་སྟོན་སྐྱེར་སྒང་པ་ལ་གཏད། བདེ་བ་ཅན་ནས་སྤྱན་འདྲེན་པའི་ཕོ་ཉ་བྱུང༌། ད་ལན་མི་འགྲོ་གསུངས་ནས་ལོ་གསུམ་བཞུགས་བུ་སློབ་རྣམས་ལ་མངོན་དགར་འགྲོ་བས་དེར་གསོལ་བ་ཐོབ་གསུངས་ནས་ཞི་བར་གཤེགས་སོ། །༈ དབོན་སྟོན་སྐྱེར་སྒང་པ་ནི། འཁྲུངས་ཡུལ་སྟོད་ལུང་མ། གདུང་རུས་འབལ། ལོ་བཅུ་གཉིས་ནས་གཤིན་རྗེ་གཤེད་ལ་བསྙེན་པ་བསྐྱལ། བཙུན་པ་འབལ་ཚད་མ་བ་ཐམས་ཅད་མཁྱེན་པའི་དྲུང་དུ་རབ་ཏུ་བྱུང་ནས་ཆོས་མང་དུ་གསན། ལྷ་སར་ཁུ་བོའི་ཕྱག་ཕྱིར་ཕྱིན་པས་གྲྭ་པ་གཅིག་གིས་རྣམ་དག་བྱས་པའི་སྐལ་བར་དར་ཡུག་གསུམ། ཟངས་དང་མར་དང་བཅས་བྱུང་བ་ཁྱེར། བྲག་སྣ་ཀླུ་ཕུག་གི་ཐང་དུ་ཉ་འདོན་ལ་


TNT17_Page_0472
[མ་དཔེ་གཟིགས་ན་འདིར་གནོན།]

ཕྱིན་པས། རི་ངོས་དེ་ལ་འཕགས་པ་ཅེར་སྒོམས་བྱ་བ་ཐུགས་རྗེ་ཆེན་པོས་གྲུབ་ཐོབ་གཅིག་བཞུགས་ཟེར་བ་མོས་པར་བྱུང་ནས་ཕྱིན་པས། བླ་མ་དང་མཇལ་དངོས་པོ་རྣམས་ཕུལ། བླ་མས་འཕགས་པ་ཞལ་གཟིགས་པ་ཡིན་ནམ་ཞུས་པས། ཐུགས་རྗེ་ཆེན་པོ་ཡིན་ནམ་ཆ་མེད། གྲིབ་ཀྱི་ཐད་ཀར་སྐྱ་ཤར་ཤར་ཞིག་ཏུ་མཐོང་གིན་འདུག་གསུངས། འོ་ན་ཐུགས་རྗེ་ཆེན་པོ་ཞུ་འཚལ་ཞུས་པས། རིགས་གཏད་ཀྱི་དབང་མཛད། མར་ཁལ་གཉིས་ལ་མར་མེ་བྱས། གཉིས་ཙ་རཱུའི་སྟོན་མོ་བྱས། སྒྲུབ་ཐབས་ཚར་གསུམ་ཞུས། དེས་སྟོན་ལ་བསོད་སྙོམས་རེ་བྱས་བཞིན་སྒྲུབ་པས། ལོ་བརྒྱད་ནས་ཞལ་མཐོང་གསུངས་སོ། །དེ་ནས་སྐྱེར་སྒང་དུ་མཚམས་བཅད་བསྒྲུབས་པས་ལོ་ཕྱེད་བཞི་ནས་ཞལ་མཐོང༌། སྔར་བཟླས་པ་བྱས་པའི་གཤིན་རྗེ་གཤེད་དེ་ཡང་ཞལ་མཐོང༌། ཁུ་བོའི་སར་ཤོག་གསུངས་བྱོན་པས། ཁྱོད་ཀྱིས་སྤྱན་རས་གཟིགས་དང་གཤིན་རྗེ་གཤེད་ཀྱི་ཞལ་མཐོང་འདུག ད་ཁམས་པ་ལ་ཉན་མི་དགོས་སྒྲུབ་པ་ཁོ་ན་གྱིས་གསུངས། ད་རས་ཆུང་བའི་སློབ་མ་ཙ་རི་སྒོམ་པ་ལ་སྟོད་ལ་བཞུགས་དེར་སོང་གསུངས་ནས་གསེར་ཞོ་གང་དར་ཡུག་དྲུག་རྣམས་གནང་ནས། ལ་སྟོད་ལ་ཆས་པའི་ལམ་ག་ཞིག་ན་གནས་ལུགས་ཀྱི་རྟོགས་པ་ཆ་མཐུན་ཞིག་ཐུགས་ལ་འཁྲུངས། ཙ་རི་སྒོམ་པ་དང་མཇལ་ཕྱག་བཙལ་ནས་རྟེན་དར་ཁ་གང་ཕུལ་ནས། རྒྱགས་


TNT17_Page_0473
[མ་དཔེ་གཟིགས་ན་འདིར་གནོན།]

མེད་པས་ཆོས་མྱུར་བ་ཅིག་ཞུ་ཞུས་པས། གསེར་དང་དར་ཟབ་བརྩལ་ན་ཆོས་ཚར་བ་བྱེད་གསུངས། བླ་མ་ལ་རྫུན་དེ་ལས་བྱེད་མ་མྱོང་གསུངས་སོ། །ལོ་གཉིས་ལ་རས་ཆུང་ལུགས་ཀྱི་དབང་གདམ་ངག་རྫོགས་པར་གནང་ངོ༌། །དེ་ནས་འུ་ཡུག་ཏུ་བླ་མ་སྤེན་ཕུག་པ་བྱ་བ་ལ་ཇོ་བོ་རྗེའི་གསང་སྔགས་ཀྱི་གདམས་ངག་རྫོགས་པར་མངའ་བ་དེ་ལ་ལོ་ལྔ་བརྟེན་ནས་གདམས་པ་རྣམས་ཚར་བར་ཞུས། རྨོག་ཅོག་པའི་སྙན་པ་གསན་ནས། ཤངས་ལ་རྩར་ཉེ་བའི་ཚེ། མི་ནག་པོ་རས་ཀྱི་ཨང་རག་གྱོན་པ་གཅིག་བྱུང་ནས་ནངས་པར་ང་ལ་ཟླ་བོ་ཡོང་བ་ཡོད། ངས་ཁྱེད་ཀྱི་བྲན་བཞིན་བྱེད། སུ་ཐོད་ཐོད་ལ་མ་སྦྱིན་ཅིག་ཟེར་ནས་སོང༌། སང་ལམ་གྲོགས་མང་པོ་དང་བཅས་ཕྱིན། བླ་མ་དང་མཇལ། བླ་མའི་ཞལ་ནས་མདང་མི་ནག་པོ་ཅིག་བསུར་བཏང་ཡོད་པས་བྱུང་ངམ་གསུངས། བྱུང་ལགས་ཞུས་པས། མགོན་པོ་ཡིན་ཁྱོད་ཀྱི་བྲན་བཞིན་བྱེད་པར་འདུག་གསུངས། དེར་གདམས་པ་རྣམས་ཁད་ཀྱིས་ཁད་ཀྱིས་གནང༌། ཉམས་མྱོང་གི་རིམ་པ་ཤིན་ཏུ་སྟོབས་ཆེ། ལྷ་དང་གྲུབ་པ་ཐོབ་པའི་རྣལ་འབྱོར་བ་མཇལ་བ་ཡང་གྲངས་ཀྱིས་མི་ལངས། སྐབས་ཞིག་ཏུ་བླ་མའི་ཞལ་ནས་གཞན་གྱི་ཆོས་སྒོ་ཕྱེ་གསུངས་ནས། མཚོན་ཆ་ཅན་གྱི་དབང་བསྐུར་བས་ཉམས་མྱོང་འགྲིབས། མཚམས་བཅད་འབད་ནས་སྒོམས་པས་སོར་ཆུད། གསུང་རབ་གི་བསླུ་ལ་བརྟེན་ནས་བསྙུང་


TNT17_Page_0474
[མ་དཔེ་གཟིགས་ན་འདིར་གནོན།]

བ་བཟོད་པར་དཀའ་བ་ཙམ་བྱུང༌། འཕྲོད་བརྟེན་ཅི་བྱས་ཀྱང་མ་ཕན། སྤྱན་རས་གཟིགས་ཞལ་གཟིགས་ནས་དཀོར་སྐུ་བསླུད་ཟོས་པའི་རྣམ་སྨིན་ཡིན་པས། སྦྲུལ་གཏོར་གྱིས་གསུངས། སྦྲུལ་གཏོར་མཛད་པས་སྙུང་བ་ལས་གྲོལ། རྨི་ལམ་སྤྲུལ་བསྒྱུར་ཉིན་མཚན་དུ་འོད་གསལ་ཀྱི་གསལ་སྣང༌། ཡི་དམ་གྱི་ཞལ་གཟིགས་མང་པོ་བྱུང་བས། ཆོས་དང་བླ་མ་ལ་ཡིད་ཆེད་གཏིང་ནས་རྙེད་ནས་རྩེ་གཅིག་པའི་སྒྲུབ་པ་ཁོ་ན་བྱ་དགོས་དགོངས་པ་ན། འབལ་ཚད་མ་གཤེགས་ནས་གདན་སར་འགྲོ་དགོས་ཟེར་ནས་གདན་འདྲེན་མི་བྱུང༌། མི་འགྲོ་བསམ་ཀྱང་བླ་མའི་བཀས་སྐྱེར་སྒང་དུ་བྱོན། གདན་ས་མཛད་སྐུ་འབུམ་ཡང་བརྩིགས། དགོན་པ་ལ་ལྕགས་རི་ཅིག་བྱ་བསམ་ནས་ས་རྡོ་སྤུངས་པ་ན་གཞན་གྱིས་བྱེད་དུ་མ་སྟེར། དེར་ཆོས་སྐྱོང་བྲན་བཞིན་དུ་བྱེད་ཟེར་བ་ལ་ལྕགས་རི་རྩིག་ཏུ་མི་སྟེར་བ་ཨང་གསུངས་པས། དེ་ནུབ་རང་ལ་ལྕགས་རི་གཅོག་པའི་མི་འགའ་ཤི་ནས་བབས་བྱེད་དུ་བྱུང༌། ཐུགས་འགྱོད་ནས་དེ་རྣམས་ཀྱི་བདུན་ཚིག་ཡང་མཛད། འབལ་གྱི་དུས་མཆོད་དུས་མ་གཏོགས་སྐུ་མཚམས་དམ་པར་བསྡམས། ཐུགས་དམ་མཛད་གཞན་དོན་གྱི་མཐུ་རྒྱས་ཏེ། སྒ་དང་རྒྱའི་རྒྱལ་པོས་འབུལ་ཚན་ཆེར་སླེབ། སྔ་ནས་རྨོག་ཅོག་ཏུ་འབུལ་སྐྱེལ་ཆེ་བ་ཞིག་མཛད་རུང༌། བླ་མའི་གདན་སར་འབུལ་བ་སྐྱེལ་དགོས་དགོངས་པ་ལ། གྲྭ་པ་རྣམས་ཀྱིས་འབལ་ཐམས་ཅད་མཁྱེན་


TNT17_Page_0475
[མ་དཔེ་གཟིགས་ན་འདིར་གནོན།]

པའི་གྲྭ་པ་ནས། གཞན་དུ་འབུལ་བ་གཏོང་བ་མི་འཐད་ཟེར་ནས། མི་གཅིག་ཀྱང་འགྲོ་ས་མེད་པའི་ཁྲིམས་བྱས། དེར་ཆོས་སྐྱོང་གི་འཁོར་རྣམས་འཕན་ཡུལ་གྱི་ཚོང་པའི་རྟ་བདུན་དང༌། གཡག་མང་པོ་ཁྲིད་པའི་གཟུགས་སུ་བརྫུས་ཏེ། བླ་མ་ལ་འབུལ་བ་དང་བཅས་པ་ཤངས་ཀྱི་ལ་རྩར་བསྐྱལ། ད་ངེད་རྣམས་དུར་ཁྲོད་མུན་པ་མི་ཟད་པ་ན། དྷ་ན་སང་སྐྲི་ཏའི་ཚོགས་འཁོར་ལ་འགྲོ་ཟེར་ནས་མི་སྣང་བར་སོང༌། བླ་མ་རྨོག་ཅོག་པའི་དྲུང་དུ་བྱོན་པ་ན། ཁྱོད་ལ་འབུལ་བ་སྐྱེལ་རོགས་མ་བྱུང་བར་འདུག་པས། མགོན་པོའི་འཁོར་རྣམས་སོང་བ་ཡིན་དེ་མ་བྱུང་ངམ་གསུངས། བྱུང་ཚུལ་ཞུས་པས་ཆོས་མང་པོ་གནང༌། སྐྱེར་སྒང་དུ་ཕེབས། ཨུ་རྒྱན་པདྨ་དང་མཇལ། རྟ་མགྲིན་གསང་སྒྲུབ་གནང༌། ཆུ་བདག་ཝ་རུ་ཎས་ཕྲིན་ལས་སྒྲུབས་ཤིང༌། ཀླུའི་ཡིད་བཞིན་ནོར་བུ་ཕུལ། རྨོག་ཅོག་པ་སྐྱེར་སྒང་དུ་གདན་དྲངས་ཏེ། འབུལ་ཆེན་ཞིག་མཛད་པའི་ཐོག ཉམས་རྟོགས་དྲི་བ་ཕུལ་བས། ཁྱོད་ཀྱི་འདི་ལྟ་བུ་བདག་ལ་མ་བྱུང་བས། བལ་མཛོ་སྐྱེས་ཡིན་གསུངས་དབུགས་དབྱུང༌། གཞན་ཡང་ཡི་དམ་ལྷ་མང་པོའི་ཞལ་མཐོང༌། མངོན་ཤེས་ལ་དབང་བསྒྱུར་བས་མི་རྣམས་ཀྱིས་བྱ་བ་བྱེད་པ་ན། ཇི་ལྟར་འདུག་མངོན་སུམ་དུ་མཁྱེན་པ་དང༌། ཁྱད་པར་ཆིག་བརྒྱུད་བཀའ་རྒྱ་མ་རྣམས་གཉན་སྟོན་སྦས་པའི་སངས་རྒྱས་


TNT17_Page_0476
[མ་དཔེ་གཟིགས་ན་འདིར་གནོན།]

ལ་གཏད་དོ། དགུང་ལོ་བདུན་ཅུ་རྩ་གསུམ་ལ་ཆོས་དབྱིངས་སུ་ཞི་བར་གཤེགས་སོ། ༈ གཉན་སྟོན་སྦས་པའི་སངས་རྒྱས་ནི། འཁྲུངས་ཡུལ་ཡོལ་གྱི་མདའ། གདུང་རུས་གཉན། འཁོར་བ་མཐའ་དག་ལ་སྐྱོ་བ་སྐྱེས། ལོངས་སྤྱོད་ལ་ཞེན་པ་སྤངས་ནས། དལ་འབྱོར་འདི་ལ་ཐར་བ་ཐོབ་པ་བྱེད་དགོངས་ནས། དགུང་ལོ་བཅུ་གཅིག་ལ་གོང་བུ་མཁར་དུ་སློབ་དཔོན་སྟོན་གཡོ་ལ་ཆོས་སྒོར་ཞུགས། བཅུ་དྲུག་ལ་འཁོན་བྱང་ཆུབ་སེམས་དཔའ་ལ་དགེ་ཚུལ། ཉི་ཤུ་ལ་བཟོད་པ་ལ་བསྙེན་རྫོགས་མཛད་ནས། མཁན་པོ་དེ་གཉིས་ལ་འདུལ་པ་དང་ཤེར་ཕྱིན་ལ་སོགས་པ་གསན། སློབ་དཔོན་གཡོ་ལ་ཚད་མ་རྣམ་ངེས། དབུ་མ་བསླབ་བསྡུས་སྤྱོད་འཇུག་སོགས་གསན། བླ་མ་རིན་པོ་ཆེ་གྲགས་པ་རྒྱལ་མཚན་ལ། རྒྱུད་དང༌། ལམ་འབྲས། ཞི་བྱེད། ཕག་མོ་ཆོས་དྲུག ཁ་རག་སྐོར་གསུམ། ནཱ་རོ་ཆོས་དྲུགབསོ་ཆུང་བའི་གདམས་ངག་རྣམས་ཞུས། ཐོས་པ་མང་པོ་སྟབས་སུ་བྱས་པ་ན། གོང་བུ་མཁར་དུ་མཆེད་གྲོགས་མ་སྟོད་པ་བྱ་བ་ཡོད་པ་ན་རེ། ཐོས་པའང་དེ་ཙམ་ཡིན། ཤེས་བྱའི་མཐའ་ལ་ཆོད་རྒྱུ་མེད་པའི་སྨིག་རྒྱུ་དང་འདྲ། ད་སྒྲུབ་པ་ཉམས་སུ་ལེན་པ་ཁྱད་པར་ཆེ་ངས་དབུས་གཙང་ཁམས་གསུམ་དུ་ཕྱིན། བླ་མ་ཡང་མང་དུ་བཙལ། འབྲི་ཁུང་པ། དོལ་པོ། ས་སྐྱ་པཎ་ཆེན་རྣམས་བརྟེན་པ་ཡིན་ཏེ། གང་བས་


TNT17_Page_0477
[མ་དཔེ་གཟིགས་ན་འདིར་གནོན།]

ཀྱང་སྒོམ་པའི་ཡོན་ཏན་ཆེ་བ་སྐྱེར་སྒང་བ་བྱ་བ་སངས་རྒྱས་དངོས་ཞིག་བཞུགས་པ་དེར་དེངས། ངས་སྐྱེར་སྒང་དུ་ལན་གཅིག་བསྡད་པས་སྒྱུ་ལུས་ཀྱི་དགེ་སྦྱོར་འཕེལ་པོ་བྱུང་ཟེར་ནས་མཚན་ཐོས་པས་གདུང་བའི་མཆི་མ་ཁྲག་ལྟར་འཛགས། མོས་གུས་ཚད་མེད་སྐྱེས་ནས་མྱུར་དུ་མཇལ་བའི་སྨོན་ལམ་དང༌། གསོལ་བ་དྲག་ཏུ་བཏབ་སྟོན་ཁ་སོང་པའི་དཔྱིད་དེ་ནས་ཐོན། མཇལ་མ་ཐག་ཏུ་བླ་མའི་ཞལ་ནས། ན་ནིང་སྟོན་གསོལ་བ་དྲག་ཏུ་འདེབས་པ་དེ་ཁྱེད་དུ་འདུགད་བར་མི་སླེབས་པ་ཅི་ཡིན་གསུང༌། དེ་བྲེལ་བ་ཅིག་གིས་མ་ཐོན་ལགས། ད་བླ་མའི་གདམ་ངག་མ་ལུས་པ་ཞུ་ཞུས་པས། བླ་མ་ཤངས་པའི་ཆོས་འདི་བཀའ་དོགས་པོར་ཡོད་དེ་ཁྱོད་ལ་ཆིག་བརྒྱུད་རྣམས་མ་ལུས་པར་ཚར་བ་ཅིག་བྱ་གསུང༌། དབང་དང་གདམས་པ་གནང་ནས་སྒོམ་པས། ཉམས་མྱོང་ཡང་བླ་མ་འདྲ་བ་སྐྱེས། ཡི་དམ་གྱི་ལྷ་དང༌། དཔལ་མྱུར་མཛད་ཡེ་ཤེས་མགོན་པོ་ཡང་ཞལ་མཐོང༌། སྒྱུ་མའི་ཉམས་བཟང་པོ་ཡང་སྐྱེས། ཚེ་འདིའི་སྣང་བ་ཧྲུལ་པོར་སོང་ཀྱང༌། ཁམས་འཛག་གི་གེགས་ཞིག་བྱུང་བའི་སྐབས། མོས་གུས་དང་དགེ་སྦྱོར་འདི་ཙམ་ལ་གེགས་འདི་ཡོང་མི་འཐད་སྙམས་པ་ལ། བླ་མའི་ཞལ་ནས་སྔཽན་གྱི་རྣམ་པར་སྨིན་པ་དགེ་སྦྱོར་གྱི་ནུས་པས་ཚེ་འདིར་སྨིན་པ་ལ། གེགས་སེལ་གཞན་དང་གཞན་ཡང་ལུང་བསྟན་མང་པོ་མཛད། བླ་མའི་གསུང་བཞིན་


TNT17_Page_0478
[མ་དཔེ་གཟིགས་ན་འདིར་གནོན།]

སྒོམ་པས། སུ་ཁསིདྡྷི་དང་མཇལ་ནས། རིག་པ་གཏད་མེད་དུ་ཞོག་དང་རྣལ་འབྱོར་པ། ཞེས་ལན་གསུམ་གསུངས་པས། གནས་ལུགས་ཀྱི་རྟོགས་པ་ཁྱད་པར་ཅན་འཁྲུངས། སྐབས་ཤིག་བླ་མས་དགོན་གནས་དང༌། མིང་དང་འཁོར་ཁྱད་པར་ཅན་བཅུ་བྱུང་བར་ལུང་བསྟན། ཆོས་ཚང་བར་མ་སྦྱིན་རིས་དབུ་སྙུང་མཛད། ཁྱོད་ཀྱིས་གཞན་ལ་ཆོས་སྟོན་པ་ན། ཧྲུལ་པོའི་གོས་གྱོན། ཟས་ངེས་མེད་ཀྱིས། །ཆོས་འཆད་པའི་ཚེ་སྔོན་དུ་སེམས་བསྐྱེད་དང༌། མཐར་བསྔོ་བ་ཡང་མི་ཤེས་པ་ལྟར་གྱིས། འཁོར་ལང་ལོང་དུ་འདུས་གསུང་ངོ༌། ཆོས་ཞུས་དག་པར་མཛད། ང་བས་གདམས་པ་ཆེ་བ་མེད་སྙམས་པ་དང༌། སྐྱེར་སྒང་དུ་དབྱར་དགུན་བཅུ་བཞུགས། དེ་ནས་འབྲི་ཁུང་དང༌། གཙང་པ་རྒྱ་རས་དྲུང་དུ་བྱོན། འབྲུག་དགོན་པ་འདེབས་པ་དང་ཐུག་ཆོས་མང་པོ་ཞུས། ཕྱག་གཡོག་ཀྱང་ཞུས་སོ། །དེ་ནས་ཡང་ན་སངས་རྒྱས་ཐོབ་པ་ཅིག་བྱེད། ཡང་ན་ཤི་བ་ཅིག་བྱེད་སྙམས་ལོ་གསུམ་མཚམས་བསྡམས་པའི་ཚེ། བླ་མ་དུར་ཁྲོད་ནག་པོས་ཁྱོད་ལ་ཆོས་སྐྱེལ་དུ་བཏང་བ་ཡིན་ཞེས་རྣལ་འབྱོར་གཅིག་གིས་འཆི་མེད་གནང༌། ཟླ་བ་བདུན་བཞུགས། འཆི་མེད་གནང་བ་ཙམ་གྱིས་གེགས་སེལ་ཁོང་ལ་གསེར་དངུལ་དར་ཟབ་ལ་སོགས་པའི་འབུལ་བ་མང་པོ་བྱས་པས། ང་ལོངས་སྤྱོད་ཀྱི་དགོས་པ་མེད། ཁྱོད་ལ་ཆོས་སྒོ་སྐྱེལ་དུ་འོངས་


TNT17_Page_0479
[མ་དཔེ་གཟིགས་ན་འདིར་གནོན།]

པ་ཡིན་ཟེར་ནས་བཞུད། དེ་ན་ས་རི་གོང་གི་དགོན་པ་བཏབ། སྤྱན་རས་གཟིགས་ཀྱི་ཞིང་ཁམས་མང་པོ་དང༌། ལྕང་ལོ་ཅན་ལ་སོགས་པར་བྱོན་པ་དང༌། སུ་ཁ་སིདྡྷི་ལ་སོགས་པའི་མཁའ་འགྲོ་མང་པོ་དང་མཇལ་ཞིང༌། གཏམ་གླེང་བ་དང༌། གྲུབ་ཐོབ་བརྒྱད་བཅུ་ལ་སོགས་པ་དང་མཇལ་ཞིང་གཏམ་གླེང་བ་དང༌། སྐུ་ལུས་ཀྱི་སྟེང་དུ་ཐོག་ལྷུང་བ་ཡང་མ་གནོད་པ་དང༌། ཆོས་སྐྱོང་རྣམས་མ་རྦད་ཀྱང་མི་མཐུན་པ་རྣམས་ཚར་གཅོད་པ་དང༌། སློབ་མ་སྐྱེལ་བསུ་བྱེད་པ་སོགས་བྲན་དུ་འཁོལ། ལྷ་མོས་ལུང་བསྟན་ཏེ། མགོན་པོའི་སྐུ་ཞིག་བཞེངས་པར་བརྩམས། འབྱིན་པ་ཁྱེར་སྒོ་ཙར་ཕྱིན་པས། ཨ་ཙ་ར་ལྷ་བཟོ་ཤེས་ཟེར་བ་གཅིག་འདུག་ནས། སྐུ་རུའི་འབྱིན་པ་གཏད། ནང་ན་འཚོ་བའི་ལྟ་གོན་ལ་གཤེགས་པའི་བར་དེར་མགོན་པོའི་སྐུ་གཉན་སྟོན་ལ་ཞལ་གཟིགས་པ་ལྟར་རང་བྱོན་དུ་ལྷུན་གྱིས་གྲུབ། ཨ་ཙ་ར་རང་ཉིད་ཀྱིས་རབ་གནས་མཛད། དེར་ཐིམ་པས་མགོན་པོའི་སྤྲུལ་པར་ངེས། སློབ་མ་རྣམས་ལ་ཆོས་མང་དུ་བསྟན། ཁྱད་པར་ཆིག་བརྒྱུད་བཀའ་རྒྱ་མ་རྣམས་དང༌། གདན་ས་ཆོས་རྗེ་སངས་རྒྱས་སྟོན་པ་ལ་གཏད། དུས་དེར་བསྟན་པའི་བདག་པོར་གྱུར་ཅིང༌། ངོ་མཚར་བའི་ལྟས་དུ་མ་དང་བཅས་ཤར་འོད་འཕྲོ་ཅན་གྱི་ཞིང་དུ་བདེ་བར་གཤེགས་སོ། ༈ ཆོས་རྗེ་སངས་རྒྱས་སྟོན་པ་བརྩོན་འགྲུས་


TNT17_Page_0480
[མ་དཔེ་གཟིགས་ན་འདིར་གནོན།]

སེང་གེ་ནི། བསིལ་མར་བོན་གྱི་རིས་སུ་ཡོས་ལོ་ལ་འཁྲུངས། བསམ་ཤེས་ནས་ཆོས་ལ་མོས། ལོ་བརྒྱད་པ་ལ་འབྲི་ཀློག་ལེགས་པར་མཁྱཻན། ལོ་བཅུ་གཅིག་གི་སྐབས་སུ་གངས་བཟང་ནས་མ་ཅིག་སྤྲུལ་སྐུ་ལ། གཅོད་ཀྱི་ཆིག་བརྒྱུད་རྣམས་ཞུས། ཆུང་ངུ་ནས་འཁོར་བ་ལ་སྐྱོ་བ་སྐྱེས་ནས་དགེ་བ་ལ་འབད། བཅུ་གསུམ་ལ་བླ་མ་ཙ་རི་རས་པའི་དྲུང་དུ་རབ་ཏུ་བྱུང༌། སེམས་ཅན་ལ་ཕན་ཐོག་པ་ཞིག་ཡོང་ཆོས་ལ་བརྩོན་པར་འོངས་པར་འདུགམཚན་བརྩོན་འགྲུས་སེང་གེ་ཐོག་གསུངས། བླ་མ་བསྟེན་ལོང་མེད་པར་སྐུ་འདས། སློབ་དཔོན་སྟེག་ལ་ཆོས་མང་དུ་ཞུས། ལོ་བཅུ་ལ་བཤད་པ་བྱས་པས་བཤད་པ་མགོ་ཐོན། སུཾ་པ་རས་པ་ལ་གཅོད་སྐོར་ཞུས། འབུལ་བས་མཉེས་པར་བྱས། ཁྱེད་ནས་གཅོད་འདི་རྒྱ་ཆེན་པོར་འཕེལ་ལོ་ཞེས་ལུང་བསྟན། བླ་མ་བུམ་པ་ལ་དགྱེས་རྡོར་སོགས་ཞུས། བཟང་ཡུལ་པ་ལ་ཚེ་དཔག་མེད་ཀྱི་དབང་ཞག་བདུན་ཞུས་པས། ཁྱེད་སྟོན་འཆིར་འདུག་པ་ལ། དབང་འདིས་ཚེ་བསྲེང་འདུག ལོ་ཐོག་སེ་ཆི་ལེ་བ་ལ་མ་ཤི་བ་དང༌། ཚེ་དཔག་མེད་གཉིས་ཀྱི་བྱིན་རླབས་ཡིན་གསུངས། ང་ལོ་བཅུ་གསུམ་པར་མི་ལ་མ་བསྟན། དེ་ནས་ཚེ་དཔག་མེད་ཀྱི་སྒོ་ནས་སེམས་ཅན་ལ་ཕན་ཐོག་པ་འདུག ལོ་བཅུ་དགུ་བསྙེན་རྫོགས་གྱིས་གསུངས། བླ་མ་སྤང་པོ་པ་ལ། ཞང་ཚལ་བའི་ཆོས་སྐོར་ཞུས་སོ། །


TNT17_Page_0481
[མ་དཔེ་གཟིགས་ན་འདིར་གནོན།]

བཅུ་དགུ་པ་ལ་འཁོན་ཆོས་རྒྱལ་ཅན་ལ་བསྙེན་པར་རྫོགས། བླ་མ་སྣང་བུ་པ། སློབ་དཔོན་སྟོན་ཤགས། བླ་མ་ཁྲོ་ཕུ་བ། ས་སྐྱ་པཎ་ཆེན། བླ་མ་རྩང་བ། སློབ་དཔོན་ཇོ་གདན་པ། གྲུབ་ཐོབ་ཁར་རྒྱ་བ། སློབ་དཔོན་ཇོ་རྒྱལ། ཁམས་སྟོན་རྣམས་ལ་ཆོས་མང་དུ་གསན། བླ་མ་གྲུབ་ཐོབ་ཅིག་བཙལ་ལ་སྒྲུབ་པ་བྱེད་དགོས་སྙམ་ཡོད་པ་ལ། བླ་མ་རྔོག་སྟོན་ཟེར་བའི་མཁས་པ་ཆེན་པོ། ས་ལོ་དང་འཁྲུ་ལོ་ལས་མཁས་ཤིང་བཙུན་པ་དེའི་ཐད་དུ་བྱོན། ཁོང་དང་ལྷན་ཅིག་གཟིམས་པས། ཁོང་གིས་རྗེ་བཙུན་མ་སྒྲོལ་མ་ངན་སོང་ལས་སྐྱོབ་ཅིག་ཟེར་བའི་སྐད་ཆེན་པོ་བྱུང༌། ཅི་བྱུང་ལགས་ཞུས་པས། གཏིང་རིང་ལ་མུན་པ་ནག་པོའི་དོང་གསུམ་བསྒྲིགས་འདུག་པ། དེར་ལྷུང་ལ་ཁད་བྱུང༌། ཅི་ཡིན་དྲིས་པས་ངན་སོང་དོང་ཡིན་ཟེར་བས་བྲེད་ནས་སྐད་ཤོར་བ་ཡིན། ད་བླ་མ་གྲུབ་ཐོབ་ཅིག་གི་སར་འགྲོ་དགོས་པ་འདུག་ཡོལ་རི་གོང་བ་བྱ་བ་སྒྱུ་ལུས་རྨི་ལམ་འབྱོངས་པ། མངོན་ཤེས་དང་ལྡན་པ་ཡི་དམ་མང་པོའི་ཞལ་གཟིགས་པ་སྦས་པའི་རྣལ་འབྱོར་བ་ཆེན་པོ་ཅིག་ཡོད་པས། དེའི་ཐད་དུ་ཅིས་ཀྱང་འགྲོ་བསམ་ཀྱང༌། ལོ་གསུམ་མ་ཐོན་པའི་བར་རྔོག་སྟོན་གཤེགས། དེ་ནས་མཇལ་དུ་ཕྱིན་པའི་ཐོ་རངས་ལ་ཉེ་གནས་བླ་མ་གོང་པོ་བྱ་བ་ལ། དེ་རིང་སྒོམ་ཆེན་ཅིག་མཇལ་དུ་འོང་བ་གདམས་པའི་བདག་པོ་བྱེད་པར་


TNT17_Page_0482
[མ་དཔེ་གཟིགས་ན་འདིར་གནོན།]

འདུག ངའི་གདམ་ངག་གིས་ཨུ་རྒྱན་ཛ་ལན་དྷ་ར་ཚུན་ཆད། ཕྱི་རྒྱ་མཚོའི་འགྲམ་ཡན་ཆད་དུ་ཆོས་ཀྱི་ཁྱབ་འགྲོར་འདུག ད་ནང་མཁའ་འགྲོ་ཆོས་སྐྱོང་བསུར་སོངས། ད་ཁྱོད་ཀྱིས་མཆོད་ཁང་ཆགས་བདར་གྱིས། ཁོང་གཙང་སྦྲ་ལ་དགའ་བ་ཅིག་འདུག་གསུངས། བྱས་ཟིན་པ་དང༌། ད་ལྟ་སེ་མའི་ན་ག་ནས་གྲོ་ཟ་ཡིན་འདུག བསུར་རྒྱུག་གསུངས་ནས། ནའི་སྒང་གར་བླ་མ་གོང་པོ་བྱུང༌། དེ་ནས་ཡང་དགོན་དུ་སླེབ་མ་ཐག བླ་མའི་ཞལ་ནས། ཁྱོད་སང་འོང་གནང་འོང་ལ་ལོ་གསུམ་མ་ཐོན། དེ་བར་ལ་ང་མཇལ་བའི་ལུང་བསྟན་བྱེད་པའི་རྔོག་སྟོན་དང་གཞི་པ་ནག་པོ་གཉིས་ཀྱང་གྲོངས་གསུང༌། བླ་མ་ལ་མངོན་མཁྱེན་འདུག་བསམ་པ་དང༌། བླ་མའི་ཞལ་ནས། ཁྱོད་ང་ལ་ག་ལ་མོས་ནས་འོངས་གསུངས། བླ་མས་སྒྱུ་ལུས་རྨི་ལམ་འབྱོངས། འོད་གསལ་མངོན་འགྱུར། ཡི་དམ་མང་པོའི་ཞལ་གཟིགས། ཆོས་སྐྱོང་བྲན་བཞིན་དུ་ཉན་ཟེར་བ་ཐོས་ནས། མཇལ་བ་ལ་འོངས་ལགས། བླ་མ་ཤངས་པའི་གདམ་ངག་རྣམས་ཞུ་འཚལ་ཞུས་པས། དབང་གདམས་ངག་རྣམས་རིམ་གྱིས་ཉམས་ལེན་དང་བསྲེས་ཏེ་གནང༌། སྒོམས་པའི་ཡོན་ཏན་དང་མི་དང་མི་མ་ཡིན་པའི་དོན་ཆེན་པོ་མཛད་པ་རྣམས་ངོ་མཚར་ཞིང་གྲངས་ལས་འདས། ཡི་དམ་ལྷ་མང་པོའི་ཞལ་གཟིགས་པའང་མང་ཞིང་མནལ་ལམ་གྱིས་སྦྱངས་


TNT17_Page_0483
[མ་དཔེ་གཟིགས་ན་འདིར་གནོན།]

པའི་ཡོན་ཏན། སྙོན་གྱི་སྐུ་ཕྱག་རྡོར་དུ་གསལ་བའི་དབུ་སྐྲ་ཉག་རེའི་བུ་གར་བདེ་མཆོག་ལྷ་ལྔའི་དཀྱིལ་འཁོར་གསལ་ཐེབས་པ་དང༌། ལྷ་སྐུའི་གསལ་སྣང་རྒྱ་ཆེན་པོ་ཐོབ་ཅིང༌། སློབ་མའི་ཚོགས་མང་པོ་འདུས། ཁྱད་པར་བཀའ་རྒྱ་བཀྲོལ་བའི་སློབ་མ་མཆོག་གསུམ་ནི། མཁས་གྲུབ་གཙང་མ་ཤངས་སྟོན། གནས་རྙིང་པ་ཨ་ཡི་སེང་གེ །མཁས་བཙུན་གཞོན་ནུ་གྲུབ་གསུམ་ལ་ཆིག་བརྒྱུད་ཀྱི་གདམ་པ་རྣམས་རྫོགས་པར་གནང༌། གྲ་པ་ཁི་ཚོ་ལྔ་ལན་ལྔ་ཀྱེས་ཏེ། སྟོད་སྨད་བར་གསུམ་བསྟན་པ་འདིས་ཁྱབ་པར་མཛད་ཅིང༌། དགུང་ལོ་བདུན་ཅུ་རྩ་གཉིས་ལ་རེ་གོང་ཉིད་དུ་དགོངས་པ་ཆོས་དབྱིངས་སུ་ཐིམ། སྤུར་སྤྱད་པས་རིལ་བསྲེལ་མང་དུ་བྱོན་པ་ནང་རྟེན་དང༌། གསེར་འབུམ་དུ་བཞུགས་ནས་འགྲོ་བ་ཐམས་ཅད་པ་མཆོད་རྟེན་དམ་པར་བཞུགས་སོ། །དེ་ལྟར་ཆིག་བརྒྱུད་བཀའ་རྒྱ་མའི་གདུང་བརྒྱུད་རྫོགས་ནས། འཆི་མེད་རྡོ་རྗེའི་ཚིག་རྐང་དུ་ལུང་བསྟན་པའི་དེ་ལྟར་གསུམ་ལའོ། །ཞེས་གསུངས་པ་ནི། འཁོར་གྱི་ཐོག་མ་མཁས་གྲུབ་ཤངས་སྟོན། བསམ་སྡིངས་པ་གཞོན་ནུ་གྲུབ། གནས་རྙིང་པ་ཨ་ཡི་སེང་གེ་དང་གསུམ་ཡིན་ཞིང༌། དེ་ལས་གཞན་ཡང་རྨོག་ཅོག་རིན་ཆེན་བློ་གྲོས་སོགས་མང་དུ་བྱུང་བ་ལས་འཕྲོས་ནས། ཤངས་པ་སྟོད་ལུང་མངའ་རིས་ཞོག་ཏུ་དར། སྨད་ལུས་


TNT17_Page_0484
[མ་དཔེ་གཟིགས་ན་འདིར་གནོན།]

མདོ་ཁམས་སུ་དར། བར་དབུས་གཙང་དུ་རྒྱ་ཆེར་དར་བའོ། །ཆོས་རྗེས་སྟོན་པའི་གདན་ས་རི་གོང་དུ། གནས་རྙིང་པའི་བཞུགས་གནས། གསེར་གླིང་པ་བཀྲ་ཤིས་དཔལ་སོགས་སྨིན་གྲོལ་ལ་བཀོད། གསེར་གླིང་པས་ཡོལ་དང༌། སྦུས་སྡེའི་ནང་དུ་སྒྲུབ་སྡེ་བཙུགས། གསེར་གླིང་པའི་ཆོས་སྒོར་ཆོས་དཔལ་ཤེས་རབ་ཀྱིས་མཐིལ་དུ་བཞུགས་བསྟན་པ་བསྐྱངས་དེ་ལས་རྒྱ་ཆེ་བ་མི་འཕེལ་བ་ནི་གསོལ་འདེབས་ཨ་ཐུང་མ་རྩོམས་པའི་རྟེན་འབྲེལ་དུ་གདའ་འོ།། ༈ བསམ་སྡིངས་པ་གཞོན་ནུ་གྲུབ་ནི། འཁྲུངས་ཡུལ་ཉང་སྨད། སྐུ་ཆུང་ངུ་ནས་རབ་ཏུ་བྱུང༌། མཁས་བཙུན་བཟང་པོར་གྱུར། ཆོས་རྗེ་སྟོན་པའི་ཞབས་པད་བརྟེན། ཤངས་ཆོས་ཡོངས་སུ་རྫོགས་པ་གསན། ཉམས་རྟོགས་ཀློང་རྡོལ། བླ་མའི་གསུང་གིས་ལུང་བསྟན་ལ་བརྟེན། མྱང་སྟོད། བསམ་སྟིངས་སུ་སྒྲུབ་སྡེ་བཏབ། ལམ་འབྲས། ཕྱག་ཆེན་ནཻ་གུའི་ཆོས་སྐོར་ནས་འགྲོ་དོན་རྒྱ་ཆེན་མཛད། ནཻ་གུ་བསམ་སྡིངས་ལུགས་སུ་གྲགས། བླ་མའི་ལུང་བསྟན་ལྟར་བསྟན་པའི་རྒྱ་གནས་རྙིང་པ་ལ་ཆེ་བ་མ་བྱུང༌། ༈ བསྟན་པའི་སྲོག་ཤིང་མཁས་གྲུབ་གཙང་མ་ཤངས་སྟོན་གྱི་རྣམ་ཐར་ནི། འཁྲུང་ཡུལ་ལྷ་ཕུ་ཁོང་ཀྱང་སྤང་ཁ། གདུང་རུས་རྭ། ཡབ་དབོན་པོ་དཀོན་བཟང༌། ཡུམ་ཇོ་གེ་གཉིས་སྲས་སུ་འཁྲུངས། ཆུང་ངུ་ནས་དད་བརྩོན་


TNT17_Page_0485
[མ་དཔེ་གཟིགས་ན་འདིར་གནོན།]

ཤེས་རབ་སྙིང་རྗེ་དང༌། སྐྱོ་ཤས་ཆེ་བ་དགུང་ལོ་བཅུ་གསུམ་ལ་སློབ་དཔོན་ཚུལ་ཤེས་ཀྱིས་སློབ་དཔོན་མཛད། དགེ་ཚུལ་མཛད། སློབ་དཔོན་ཤངས་འབུལ་ལ་ཕར་ཕྱིན་དང༌། སྤྱོད་འཇུག་ཚད་མ་རྣམ་ངེས། བྱམས་ཆོས་ལྔ། དབུ་མ་རིགས་ཚོགས་དྲུགབསླབ་བཏུས་རྣམས་ཞུས་ཤིང༌། ཚིགས་དོན་མ་ལུས་པ་ཐུགས་སུ་ཆུད། གཤེད་དམར་ལྷ་ལྔ། སྒྲོལ་མ་རྣམ་འཇོམས་རྣམ་རྒྱལ་རྣམས་ཞུས། བླ་མ་སྟོན་རིན་ལ་ཀྱཻ་རྡོར། བདེ་མཆོག །སྒྲོལ་མ། ཕྱག་རྡོར། རྩེ་མོ། དཔལ་མཆོག་དེ་ཉིད་བསྡུས་པ། ངན་སོང་སྦྱོང་རྒྱུད། རྡོ་རྗེ་འབྱུང་བ། གཙུག་དགུ། རྣམ་འཇོམས། རྣམ་རྒྱལ། གུར་མགོན། སེང་གེ་སྒྲ་སྒྲོག མྱ་ལུང་མ། བཀའ་གདམས་ལམ་རིམ། བློ་སྦྱོང་སོགས་གནས་བརྟན་བཅུ་དྲུག ཤེར་སྙིང་རྣམས་ཞུས། ཀརྨ་པ་ཐུགས་རྗེ་ཆེན་པོ་ལ་རྒྱལ་བ་རྒྱ་མཚོ། སྐུ་གསུང་ངོ་སྤྲོད། རླུང་སེམས་དབྱེར་མེད། བསམ་གཏན་ཐུན་འཇོག་ལ་སོགས་པ་མང་དུ་ཞུས་ཤིང༌། ཐོས་བསམ་གྱི་སྒོ་ནས། འཆད་རྩོད་རྩོམས་པས་མཁས་པ་གཞན་གྱི་ཡིད་འཕྲོག་པར་མཛད། །དངོས་པོ་ལ་སྲེད་པ་བྲལ་དེ་ཡབ་ཡུམ་གཤེགས་པའི་ཤུལ་གྱི་ས་ཞིང་རྣམས་སྤངས་ཏེ། ཡུལ་མི་ལ་ནས་འགྱེད་ལན་མང་པོ་དང༌། ཆོས་ཞུ་བའི་བླ་མ་ཐམས་ཅད་ལ་ཟང་ཟིང་དང་མོས་


TNT17_Page_0486
[མ་དཔེ་གཟིགས་ན་འདིར་གནོན།]

གུས་ཀྱིས་མཉེས་པར་མཛོད། ཀྱལ་ཀའི་ཚུལ་དུ་ཡང་གསུང་མི་ལྕོག་ཅིང་རྒྱུད་དང་མཐུན་པར་བླ་མ་བསྟེན་ཏོ། འདུ་འཛི་ལ་བདུད་དུ་གཟིགས་ནས་མཐུན་འཇུག་སྤངས། ཉམས་སུ་བླང་པའི་བསྐྱེད་རིམ་ལ་བརྟན་པ་ཐོབ། རྫོགས་རིམ་གྱི་ཏིང་ངེ་འཛིན་ལ་ངེས་ཤེས་ཁྱད་པར་ཅན་འཁྲུངས། ཡོལ་ཕུ་རི་གོང་དུ་སངས་རྒྱས་སྟོན་པ་བཞུགས་པའི་སྙན་པ་གསན། མོས་གུས་ཚད་མེད་པ་དང་བཅས་ཞལ་མཇལ་བས་བ་སྤུ་གཡོ་ཞིང༌། མཆི་མ་འཁྲུགས། དེ་ནས་སྒྱུ་ལུས་རྨི་ལམ་སྤྱིའི་དབང་ཞུས་ནས། ཆོས་དྲུག་གི་འཁྲིད་བསྐྱགས་པས་ཞག་བདུན་ནས་བདེ་དྲོད་འབར། སྒྱུ་ལུས་འབྲེང་པོ་སྒོམས་པས་རྨི་ལམ་རང་ཟིན། སྒྱུ་མ་རང་ཤར། སྦྱོངས་སྤེལ་སྤྲུལ་བསྒྱུར་ཐམས་ཅད་དུས་གཅིག་ལ་ནུས་པ་དང༌། སངས་རྒྱས་ཀྱི་ཞིང་ཁམས་ལྟར་དབུས་གཙང་གི་ས་རྡོ་རི་བྲག་ཐམས་ཅད་གསལ་བར་མཐོང༌། དགེ་སྦྱོར་ལ་ཐག་ཆོད་པས། བླ་མས་ང་བས་ཁྱོད་དགེ་སྦྱོར་བཟང་བར་འདུག་གསུངས། ནུབ་གཅིག་ནམ་མཁའ་ལྷ་སྐུས་གང་བའི་གསེབ་ནས་ཕག་མོ་ཞིག་བྱུང་ནས་སྐུ་ལུས་ལ་ཧྲིལ་གྱིས་འཁྱུད་ནས་ཟག་མེད་ཀྱི་བདེ་བ་སྐྱེས། དོན་གྱི་དབང་ཐོབ་པ་ཡིན་གསུངས། འཁྲུལ་འཁོར་བདེ་བར་ཡོད་པས། གཞན་ལ་བསླབ་པའི་དགེ་སྦྱོར་ལ་ཅུང་ཟད་ནོད། དེ་ནས་ཆོས་དྲུག་སོ་སོའི་དབང༌། མཁའ་སྤྱོད་དཀར་དམར། བདེ་མཆོག་ལྷ་ལྔ། ཐུགས་


TNT17_Page_0487
[མ་དཔེ་གཟིགས་ན་འདིར་གནོན།]

རྗེ་ཆེན་པོ་སྐྱེར་སྒང་ལུགས། ཡེ་ཤེས་མགོན་པོའི་སྐོར། བདེ་མཆོག་མཁའ་སྤྱོད་རིགས་འཛིན་སོགས་མདོར་ན་ཤངས་ཆོས་ཡོངས་སུ་རྫོགས་པར་ཞུས། བླ་མས་བརྩེ་བས་བསྐྱངས། ཆིག་བརྒྱུད་ཀྱི་བདུད་རྩི་ཐོག་མར་ཐོབ། རང་གི་གཅུང་གིས་སྙེན་སྒྲིག་པ་ཡང༌། ཁྱིམ་གཏོར་དེ་ཆོས་ལ་བཙུད། གེགས་བྱུང་བ་འཕལ་དུ་སེལ་ཞིང༌། དང་དེའི་བྲག་གི་ཁྲིག་ལ་བཞུགས་དུས། སྒྲོལ་མའི་གྲལ་འཁོར་མང་པོ་ཞིག་གཟིགས་པས། གཙོ་མོའི་ཕྱག་དབུ་ཐོག་ཏུ་བཞག་ནས་བྱིན་གྱིས་བརླབས་ཤིང༌། གཞན་ཀུན་གྱིས་ཀྱང་བྱིན་གྱིས་བརླབས་པ་སོགས་ཡི་དམ་མང་པོས་བྱིན་གྱིས་བརླབས། གཉན་ཁྲོད་རྣམས་སུ་གཅོད་པ་མཛད་པའི་ཚེ། ལྷ་འདྲེ་ཀུན་དམ་ལ་ཐོགས། ཡི་དམ་བདེ་མཆོག་དང་ཐུགས་རྗེ་ཆེན་པོར་གཙོ་བོ་མཛད། ལྗགས་མཆིལ་དང་དྲི་ཆུ་ནམ་འཐུང་བ་ཙམ་དང་བྱུགས་བ་ཙམ་གྱིས་ནད་གདོན་ཐམས་ཅད་ལས་གྲོལ། རིགས་དྲུག་གི་གནས་སྦྱོངས་གཟིགས། དངོས་པོ་ལ་ཞེན་པ་བྲལ་བས་འབུལ་བ་རྣམས་མཆོད་སྦྱིན་མཛད། ཕྱི་འབུལ་བ་མི་བཞེས་པའི་དམ་བཅའ་མཛད། འཇག་ཏུ་བཞུགས་ནས་བསྟན་པ་བསྐྱངས། འཇག་ལུགས་སུ་གྲགས། བྱ་བཏང་ཁོ་ནའི་ཚུལ་ལུགས་སུ་བཞུགས། སྐུ་གཤཻགས་དུས་ན་བཟའ་ཕྲུག་གཅིག་མ་གཏོགས་དངོས་པོ་མེད་པ་དང༌།


TNT17_Page_0488
[མ་དཔེ་གཟིགས་ན་འདིར་གནོན།]

མཐོང་ཐོས་ཙམ་གྱིས་དགེ་སྦྱོར་བཟང་པོ་བྱུང་བས་སྙན་པས་འཁོར་མང་པོ་འདུས། ལམ་སྣ་ཟིན་པ་ཤ་སྟག་བྱུང་ཞིང༌། ཕྱི་ནང་དུ་སྲིན་བུ་མེད་ཅིང་དྲི་མས་མ་གོས་པར། ཤེལ་ལྟར་དྭངས་པར་གྱུར་པས་གཙང་མ་ཤངས་སྟོན་དུ་གྲགས་ཤིང༌། སྐྱེར་སྒང་པ། གཏན་སྟོན་པ། ཆོས་རྗེ་སྟོན་པ་རྣམས་ལ་ཡི་དམ་ལྷས་ལུང་བསྟན་པའི་སློབ་མ་ལས། ཐོག་མར་འགྲན་ཟླ་མེད་པ་འདི་ཡིན། །མྱ་ངན་ལས་འདའ་བར་ཉེ་བ་ན། །ང་ཤར་ཕྱོགས་དག་པའི་ཞིང་དུ་འགྲོ །སངས་རྒྱས་སྟོན་པའི་ཞིང་དུ་འགྲོ །ལུང་བསྟན་འཁོར་གྱི་ཐོག་མ་ཡིན། །དག་པའི་འཁོར་དང་ཞིང་ཁམས་སོགས། །ཕྱི་མ་འགྲོ་དོན་དཔག་ཏུ་མེད། །ས་ཡི་ཡོན་ཏན་རྫོགས་པར་འཆང༌། ཞེས་སོགས་གསུང་ཞིང༌། སྐུ་ལ་ཟུག་རྔུ་མེད་ཀྱང༌། སྙུང་ཚུལ་བསྟན་ཏེ། དགུང་ལོ་བདུན་ཅུ་རྩ་དྲུག་བྱ་ལོ་ཟླ་བ་ལྔའི་ཚེས་བཅོ་ལྔ་ལ་ངོ་མཚར་བའི་ལྟས་དང་བཅས་ཏེ་གཤེགས་སོ། །སྐུ་གདུང་རིང་བསྲེལ་གྱི་མཆོད་པའི་ཞིང་དུ་གྱུར་ཏོ། །བླ་མ་འདི་འཇག་ཆུང་དུ་སྒྲུབ་པ་མཛད། སྙན་གྲགས་ཀྱི་ཁྱབ་པས། འཁོར་ཚོགས་མང་དུ་འདུས། འདི་ཉིད་ཆོས་རྗེ་སྟོན་པའི་ལུང་བསྟན་ལྟར་བསྟན་པ་དར་རྒྱས་ཤིན་ཏུ་ཆེ། ཁྱད་པར་མཁས་བཙུན་རྒྱལ་མཚན་འབུམ་དང༌། ཁྱུང་པོ་ཚུལ་ཁྲིམས་མགོན་པོ་སོགས་སློབ་མའི་ཚོགས་མང་དུ་འདུས་པ་ལས་འཕྲོས་པ་འཇག་ལུགས་སུ་གྲགས། འདི་ལ་འཇག་པ་


TNT17_Page_0489
[མ་དཔེ་གཟིགས་ན་འདིར་གནོན།]

སྟོད་སྨད་པར་གསུམ་དུ་བྱུང་བ་ལས། སྟོད་དུ་མུས་ཆེན་རྒྱལ་མཚན་འབུམ་དཔལ་བཟང་གི་མུས་ཕྱོགས་སུ་དར་བར་མཛད་པ་དང༌། ལ་ཆི་བ་ནམ་མཁའ་རྒྱལ་མཚན་གྱིས་སྟོད་ཕྱོགས་སུ་བསྟན་པ་བསྐྱངས། སྨད་དུ་བྱམས་དཔལ་གྱི་སློབ་མ་གོག་སྟོན་ནམ་མཁའ་རྒྱལ་པོ་སོགས་ཀྱིས་དར་བར་མཛད། བར་དུ་མཁས་བཙུན་རྒྱལ་མཚན་འབུམ་གྱིས་འཇག་གི་གདན་ས་མཛད། དབོན་པོ་བྱམས་དཔལ་སོགས་འཇག་པ་གདན་ས་བརྒྱུད་པར་གྲགས་པ་དེ་ལས་འཕྲོས་ནས། བ་བོང་བ་རྡོ་རྗེ་རྒྱལ་མཚན་སོགས། བ་བོང་ལུགས་སུ་ཤངས་ཟུར་ཁང་པ་བསོད་ནམས་བཟང་པོ། གུང་དཀར་བ། བཤོངས་ཅན་པ། ཐོབ་རྒྱལ་བྲག་ནག་པ། གེར་བྲ་དཀར་པ། ཡང་དགོན་དུ་རྨོག་ཅོག་པ་ཕྱི་མས་བསྟན་པ་དར་ཞིང་རྒྱས་པར་མཛད་པ་དང༌། མཁས་གྲུབ་ཤངས་སྟོན་གྱི་སློབ་མ། འཇག་པ་སློབ་མ་བརྒྱུད་པ་ལ། ཁྱུང་པོ་ཚུལ་ཁྲིམས་མགོན་པོ་ནས་བརྒྱུད་པ་འདི་ཡིན་ཞིང༌། ཁྱུང་པོ་ཚུལ་ཁྲིམས་མགོན་པོ་འདི་ཉིད་ཀྱིས་མཁས་བཙུན་རྒྱལ་མཚན་འབུམ་ལ་གསན་པས་གདན་ས་བརྒྱུད་པ་ལ་འགྲོ་བ་ཙམ་དུ་ཡང་ཡིན་མོད། འདི་ཉིད་ཁྱུང་པོ་རྣལ་འབྱོར་གྱིས་སྤྲུལ་པ་ཡིན་པས། དེ་ལྟ་སློབ་བརྒྱུད་ཅེས་གྲགས་ཤིང༌། དེང་སང་འདི་དག་གཙོ་བོར་བཟུང་བར་བྱའོ། །གཞན་ཡང་གྲུབ་ཐོབ་ཐང་སྟོང་རྒྱལ་པོ་དང༌། རས་ཆེན་དཔལ་


TNT17_Page_0490
[མ་དཔེ་གཟིགས་ན་འདིར་གནོན།]

འབྱོར་བཟང་པོ་གཉིས་ནས་བརྒྱུད་པའི་ལུགས་འདི་གཉིས་རང་བརྒྱུད་ཀྱང་འཇག་བསམ་གཉིས་ཀའི་ཆར་གཏོགས་སོ། ༈ ཁྱུང་པོ་ཚུལ་ཁྲིམས་མགོན་པོ་ནི། འཁྲུངས་ཡུལ་ཤངས་སྐྱ་ར། ཡབ་མགོན་པོ། ཡུམ་རྒྱལ་སྐྱིད་གཉིས་ཀྱི་སྲས་སུ་འཁྲུངས། རུས་ཁྱུང་པོ། མཚན་ཚུལ་ཁྲིམས་མགོན་ཞེས། སྐུ་ཆུང་ངུ་ནས་ཞེན་མེད་ངེས་འབྱུང་ཆེ་བ། གྲུབ་ཐོབ་ཨུ་རྒྱན་པར་ཡབ་ཡུམ་ཞོར་ཚེས་གསན་པས་ཆོས་ཀྱི་སྣང་བ་ཆེར་འཕེལ། དགུང་ལོ་བཅུ་བཞིའི་དུས་སྐུ་ཉེ་རྣམས་ཀྱིས་ཁྱོད་གཅུང་ཡིན་པས། སྐྱ་རའི་དཔོན་གྱིས་ཟེར་ཏེ། གཅུང་པོས་རབ་བྱུང་ཆས་སྒྲུབ་པས། ཆོས་སུ་ཐོབ་རྒྱལ་དགོངས། གཅུང་པོ་འདི་རབ་བྱུང་ཆས་རྣམས་སྟེར། འཇག་ཏུ་ཆོས་བྲོས་མཛད། མཁས་གྲུབ་ཤངས་སྟོན་སྐུ་མཚམས་ཐོག་ཕེབས་པས། དེ་འཕྲལ་སྐུ་འཚམས་ཁོག་ཏུ་འབྱོན་ཆུག་གསུངས། དྲུང་དུ་ཕེབས་འཕྲལ་བུ་དབུ་སྐྲ་བཅད། མཚན་ཚུལ་ཁྲིམས་མགོན་པོ་བཏགས། མདང་རྨི་ལམ་དུ་ཁྱུང་པོ་རྣལ་འབྱོར་དང་མཇལ་བ་རྨིས། མིང་འདི་ཁྱུང་པོའི་མཚན་ཡིན་གསུངས། དགེ་བསྙེན་གྱི་སྡོམ་པ་གནང༌། རབ་ཏུ་བྱུང་བའི་མཁོན་ལུང་བསྟན་མཛད། སྒྱུ་ལུས་དབང་མོ་ཆེའི་ཆོས་སྒོ་ཕྱེ་ནས། དཔལ་ལྡན་ཤངས་པའི་དབང་འཁྲིད་ལུང་ལག་ལེན་ཐམས་ཅད་རྫོགས་པར་གནང༌། ཉམས་རྟོགས་


TNT17_Page_0491
[མ་དཔེ་གཟིགས་ན་འདིར་གནོན།]

ཀྱང་ཤིན་ཏུ་བཟང་བ་དང༌། ནུབ་གཅིག་མནལ་ལམ་དུ། མཁས་གྲུབ་ཤངས་སྟོན་སྐུ་ལ་རྒྱན་སྣ་ཚོགས་དང་བཅས་པ་བྱོན་ནས། དཔལ་ལྡན་ཤངས་པའི་ཆོས་ཀྱིས་བདག་པོར་མངའ་གསོལ་བས། རྟེན་འབྲེལ་ལེགས་ཚོགས་དུ་མ་བསྒྲིགས་པར་མཛད། དེ་ནས་སྒྲུབ་པ་རྩེ་གཅིག་ཏུ་མཛད་པས། སྙན་གྲགས་ཀྱིས་ཁྱབ་ཅིང་འཁོར་ཚོགས་དུ་མ་འདུས་པར་ཐུགས་བསྐྱེད། གཅུང་པོས་ཆོས་ཀྱི་ཆར་ཕབ་ཅིང༌། བྱིན་རླབས་ཆེ་བའི་གྲགས་པས། སྐྱ་རའི་རྒན་རྒོན་བཟའ་མི་གཉིས་ཀྱི་བུ་ཤི་བས་རྐྱེན་བྱས། སྨྱོ་སྟེ་གང་ཕྱོད་གཡང་ཕྱོད་བྱེད་པ་ཞིག་ཀྱང༌། བྱིན་གྱིས་བརླབས་པས་སྨྱོ་ཐུལ་ནས་རྟོགས་པ་སྐྱེས། གཞན་ཡང་སྨྱོ་བ་མང་པོ་ཐུལ། ལ་ཕར་རྒྱབ་ཀྱི་རི་བའི་འོ་མ་བོ་བ་མཁྱེན་པ་སོགས་ལྐོག་གྱུར་མངའ་བ་དང༌། མཚུར་ཕུར་བྱོན་པས་ཆུ་ལོག་རྒྱས། དཔོན་སློབ་རྣམས་ཆུ་འགྲམ་དུ་བཞུགས་ཙ་ན། སྤང་ཟམ་པ་ཞིག་བཙུག་བྱུང༌། ཆུ་ལ་ཐོན་པ་དང་ཟམ་པ་ཆུས་ཁྱེར་བ་སོགས་ཡ་མཚན་དག་བཅས། :དྲོལ་[རོལ་]པའི་རྡོ་རྗེ་དབང་ཞུས། མཁན་ཆེན་བུ་སྟོན་པ་ལ་ཆོས་འབྲེལ་ཞུས། བླ་མ་དམ་པ་བསོད་ནམས་རྒྱལ་མཚན་གྱི་དྲུང་དུ་ཀྱཻ་རྡོར་གྱི་དབང་ཞུས། རྡོ་རྗེ་འཆང་དུ་གཟིགས། རྒྱལ་སྲས་དངུལ་ཆུ་བར་སེམས་བསྐྱེད། བློ་སྦྱོང༌། སྙིང་པོ་དོན་གསུམ། རྟེན་འབྲེལ་སྙིང་པོ་རྣམས་ཞུས། སྒོམ་


TNT17_Page_0492
[མ་དཔེ་གཟིགས་ན་འདིར་གནོན།]

ཉམས་དང་རྟོགས་པ་མཐར་ཕྱིན། རི་ཁྲོད་ངེས་མེད་མཛད་རྩིས་ལ། ཡོན་བདག་གྲྭ་རིགས་རྣམས་ཀྱིས་གསོལ་བ་བཏབ་པའི་ངོར། བདེ་ཆེན་གཟིམ་ཁང་དུ་བཞུགས་ཤིང༌། རས་ཆེན་སངས་རྒྱས་སེང་གེ་སོགས་སློབ་མ་མང་པོ་སྨིན་གྲོལ་ལ་བཀོད། དགུང་ལོ་མཐར་ཕྱིན་ཏེ། མེ་ཏོག་གི་ཆར་འཇའ་འོད་ཀྱི་གུར། ས་གཡོ་བ་སོགས་ལྟས་བཟང་པོ་དང་བཅས་གཤེགས་སོ། གདུང་བཞུ་བས། མེའི་གཟུགས་ལ་དཔལ་བེའུ། འཁོར་ལོ་ཡི་གེ་བདུན་པའི་སྒྲ་འབྱུང་བ་སོགས་བསམ་ལས་འདས་པ་བྱུང་ངོ༌། །བླ་མ་འདི་ལ་སློབ་མའི་ཚོགས་མང་དུ་བྱུང་བ་དང༌། ཉམས་རྟོགས་ཀྱང་བཟང་པོ་ཤ་སྟག་བྱུང་བ་ལས། སྐབས་འདིར་བརྒྱུད་པའི་གཙོ་བོ་རས་ཆེན་སངས་རྒྱས་སེང་གེའོ།། ༈ རྣལ་འབྱོར་གྱི་དབང་ཕྱུག་རས་ཆེན་སངས་རྒྱས་སེང་གེའམ། བྱ་བྲལ་བ་རི་ཁྲོད་རས་ཆེན་ནི། འཁྲུངས་ཡུལ་མདོ་ཁམས་གླིང༌། ཡབ་ཨ་སུ་ར། ཡུམ་ཁ་ཁེང༌། སྲས་མིང་སྲིང་ལྔའི་ཆེ་བ། ཡབ་མེས་ཐུགས་རྗེ་ཆེན་པོའི་ཆོས་སྐོར་ལ་ཐུགས་དམ་མཛད་པའི་རིགས། དགུང་ལོ་བཞིར་རྨི་ལམ་རང་ཟིན་བྱུང༌། བཅུ་གཅིག་པ་ལ་བརྟག་གཉིས་བཤད་པ་མཛད། བཅོ་བརྒྱད་པ་ལ་སྤྱོད་འཇུག་ཕར་ཕྱིན་སོགས་ཀྱང་མཁས་པར་མཁྱེན། ས་སྐྱར་ཕེབས། རྣམ་འགྲེལ་བསླབས། ད་འཆི་ཆོས་རང་ཞིག་བྱ་དགོས་ཏེ། འབྲི་གུང་དུ་བླ་མ་བློ་བཟང་པ་ལ་


TNT17_Page_0493
[མ་དཔེ་གཟིགས་ན་འདིར་གནོན།]

ནཻ་གུ་ཆོས་དྲུག་ཞུས། ཐུགས་དམ་ཀྱང་དགའ་རབ་སྐྱེས། བླ་མ་བློ་བཟང་པ་ལས། ཤངས་པ་བླ་མ་ཚུལ་ཁྲིམས་མགོན་པོ་ཞེས་པའི་གྲུབ་ཐོབ་ཆེན་པོ་ཅིག་ཡོད་དེར་ཆོས་ཞུས་གསུངས་ནས། དེར་ཕྱིར་ཁྱུང་ཚུལ་ཁྲིམས་མགོན་པོ་དང་མཇལ། ལོ་དྲུག་བཞུགས་རྩིས་མཛད། ནཻ་གུ་ཞུས་སྒོམ་པས། ཞག་བདུན་ནས་རས་རྐྱང་ཐུབ་པ་བྱུང༌། གཞན་ཡང་གསེར་ཆོས་ཆ་ལག་དང་བཅས་པའི་ཤངས་ཆོས་ཡོངས་རྫོགས་ཞུས། མདོ་ཁམས་སུ་ཡུམ་གུམ་པའི་དུས་ཆོས་ཀྱང་གསལ་བར་མཁྱེན་དགོངས་རྫོགས་མཛད། རས་རྐྱང་བྱས་ས་སྐྱར་ཕྱིན་པས། མཚན་ཉིད་ཀྱི་མཆེད་གྲོགས་འགས་སྙིང་རྗེ་གོ་ལོག་པ་བྱུང་བས། གནས་ལུགས་མ་རྟོགས་པ་ཡ་ཆད་དགོངས་ནས་སླར་ལོགས་ཏེ་ཤངས་ལ་བྱོན་པས། ནག་ཅན་ཞིག་བྱུང་བ། སྦས་བཞག་པས། རིན་སྤུངས་ནས་ཕོ་ཉ་བྱུང་བར་མ་བཏང་བས། རས་ཆེན་རིན་སྤུངས་ལ་བཙོན་དུ་བཟུང༌། གཏུམ་མོ་བདེ་དྲོད་བརྟེན་ནས། སླར་བཤགས་པ་བྱས། གཞན་ཡང་སེམས་ལ་རང་དབང་ཐོབ་པ་མངོན་རྟགས་སུ་གྱུར། སྐུ་ཚེ་ཕྱི་མའི་སྐུ་དང་ཞིང་ཁམས་འདུལ་བ་སོགས་ཀྱང་གསལ་བར་མཁྱེན་པ་སོགས་ཡོན་ཏན་བསམ་གྱིས་མི་ཁྱབ་པ་མངའ། བྱ་བཏང་ངེས་མེད་ལ་ཐུགས་གཏད་ཀྱང༌། ཆོས་རྗེ་མཁས་གྲུབ་པའི་བཀའ་མཆོག་པར། བདེ་ཆེན་གྱི་གདན་སར་མཛད།


TNT17_Page_0494
[མ་དཔེ་གཟིགས་ན་འདིར་གནོན།]

གདུལ་བྱ་མང་པོ་སྨིན་གྲོལ་ལ་བཀོད། སྙུང་བའི་ཚུལ་བསྟན་པར། འཕྲོད་རྟེན་སོགས་ཞུས་ཀྱང་མ་གསན་པར། ནུབ་བདེ་བ་ཅན་དུ་གསོལ་བ་ཐོབ་གསུང་ནས། དགུང་ལོ་དྲུག་ཅུ། ཕག་ལོ་ཟླ་བ་བརྒྱད་པའི་ཚེས་ཉི་ཤུ་ལ་ཆོས་དབྱིངས་སུ་གཤེགས། གདུང་བཞུའི་དུས་མེ་ཏོག་གི་ཆར་སོགས་སྐུ་གདུང་རིང་བསྲེལ་གྱི་སྙིང་པོ་བསོད་ནམས་ཀྱི་ཞིང་དུ་གྱུར་ཏོ། །༈ ཤངས་དཀར་བ་རིན་ཆེན་རྒྱལ་མཚན་ནི། ཡབ་དཔོན་ཡིག་བཟང་པོ་དཔལ། ཡུམ་ཇོ་སྲས་མ་དཔལ་ཆེན་གཉིས་ཀྱི་སྲས་སུ། ཆུ་མོ་སྦྲུལ་ལ་འཁྲུངས། དགུང་ལོ་གསུམ་ལ་ཡབ་ཡུམ་གཉིས་འདས། ཁུ་བོ་འདུལ་འཛིན་རིན་ཆེན་འོད་མཛེས་དང༌། ཤཱཀྱ་སེང་གེ་གཉིས་ཀྱི་དྲུང་དུ། ཀློག་ཡིག་ལ་སོགས་ཕྲ་མོ་རྣམས་སྦྱངས། འཁོན་དགྲ་བཅོམ་པ་མཛད་པ་དང༌། འདུལ་འཛིན་ཤཱཀྱ་དཔལ་གཉིས་དང་བཅས་པའི་དབུས་སུ་རབ་ཏུ་བྱུང༌། མཚན་རིན་ཆེན་རྒྱལ་མཚན་དུ་བཏགས། དགུང་ལོ་ཉི་ཤུ་པ་ལ་འདུལ་འཛིན་ཆེན་པོ་མཛེས་པ་རྒྱས་ལ་མཁས་པོར་གསོལ། དགེ་འདུན་ཁ་སྐོངས་དང་བཅས་པའི་དབུས་སུ་སྙེན་པར་རྫོགས། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་དང༌། ལོ་ཆེན་བྱང་རྩེ་ལ། དབུ་མ་དང༌། སེམས་ཙམ་གཉིས་ཀྱི་སེམས་བསྐྱེད། ཁུ་བོ་རིན་ཆེན་ལ་སོགས་པའི་རྣལ་འབྱོར་དབང་ཕྱུག་མང་པོར་རྒྱུད་སྡེ་བཞིའི་དབང་མང་པོ་


TNT17_Page_0495
[མ་དཔེ་གཟིགས་ན་འདིར་གནོན།]

ཞུས། ལུང་རིགས་འབྱུང་ཁུངས། དཔལ་ལྡན་ས་སྐྱར། སློབ་དཔོན་གཞོན་ནུ་བཀྲ་ཤིས་སོགས་ལ་ཚད་མ་སྡེ་བདུན་གསན། དེ་ནས་བུ་སྟོན་ཆོས་རྗེ། ལོ་ཙཱ་བ་དྷརྨ་ཤྲཱི་སོགས་བསྟེན་ནས། བྱམས་ཆོས་ལྔ་སོགས་ཕར་ཕྱིན། ཡུམ་རྒྱས་འབྲིང་སོགས་གསན། མའི་མ་ཚོར་བར་མཁས་གྲུབ་ཁྱུང་པོ་ཚུལ་མགོན་བཞུགས་པ་ལ་འཁྲིད་གསན་ནས་རྨི་ལམ་འོད་གསལ་གྱི་ཉམས་མྱོང་རྣམས་ཞུས་པས་ཤིན་ཏུ་དགྱེས། བྱང་ཆེན་འཇམ་རིན་ལ་དུས་འཁོར་དབང་རྒྱུད་བཤད། སྦྱོར་དྲུག་དབང་ཆ་ལག་དང་བཅས་པ་ཞུས། ཐོས་བསམ་མཛད་དུས། གསོལ་ཆས་ཀྱི་རྩོལ་བ་བསྐྱུངས། འཇམ་ཙམ་ལ་བརྟེན་ནས་བརྩོན་འགྲུས་བསྐྱེད་པས། བླ་མ་དགྱེས་ཤིང་མཆེད་གྲོགས་ཀུན་སྤྱན་ཆབ་འདོན་པ་བྱུང༌། ལན་ཅིག་ཕྱགས་དར་ཁྲོད་ནས་གསེར་ཞོ་དོ་རྙེད། བདག་པོ་མི་འདུག་པས་མགོན་པོས་གནང་བར་ངེས་ཏེ། ཞོ་གང་བླ་མ་ལ་ཕུལ། ཞོ་གང་ཆ་རྐྱེན་བྱས། ལོ་ཆེན་བྱང་རྩེ་ལ་གསང་འདུས་རིམ་ལྔ་མྱོང་ཁྲིད་དུ་གསན་དུས། བླ་མ་སྤྱན་རས་གཟིགས་སུ་རྟོགས། སྒྱུ་ལུས་རྨི་ལམ་འོད་གསལ་གྱི་ཉམས་མྱོང་རྟོགས་པ་ཀློང་རྡོལ། དག་སྣང་ཐོབ། རི་ཁྲོད་རས་ཆེན་ལ་ཤངས་ཆོས་མ་ལུས་པ་ཞུས། དགེ་སྦྱོར་སྟོབས་འདི་འདྲ་ཤངས་སྟོན་པ་ལའང་མ་བྱུང་གསུངས་སོ། །ཕྱག་དཔེ་སོགས་ཀྱང་མང་དུ་གནང༌། རྗེ་རས་


TNT17_Page_0496
[མ་དཔེ་གཟིགས་ན་འདིར་གནོན།]

ཆེན་ཞིང་བརྗེས་པའི་མཆོད་འབུལ་དགོངས་རྫོགས་རྒྱས་པར་མཛད། བདེ་ཆེན་གྱི་གདན་ས་བཟུང་ནས། འཆད་ཉན་སྒོམས་སྒྲུབ་སྤེལ་གྱིན་མཛད། ཀོར་བ་ལ་ཐེགས་པས། ཆུ་ལ་བྱིངས་ཀྱང་སྐུ་ནོངས་པར་མ་གྱུར་པའི་རྟགས་མཚན་དང༌། དྲི་མ་དང་སྲིན་བུའི་རྒྱུན་ཆད། ཚུལ་ཁྲིམས་ཀྱི་དྲི་བསུང་ཀུན་ཏུ་ཁྱབ་པར་སློབ་མ་ཡང་མང་དུ་འདུས། འཁྲིད་གནང་ཚད་བཤད་ཡམ་སྤངས་ཏེ་ཕུར་ཚུགས་སུ་མཛད་པས་སློབ་མ་ལ་འཁྲིད་མི་ཐེབ་པ་མི་ཡོང༌། ཁོ་བོ་མྱུར་དུ་འགྲོ་གསུངས། ཟླ་མཚམས་ནས་སྙུང་བའི་ཚུལ་བསྟན། དགུང་ལོ་བརྒྱད་ཅུ་གྱ་བརྒྱད་པ་སྟག་ལོ་ཟླ་བ་བཅུ་གཅིག་པའི་ཉེར་ལྔ་ལ་གཟུགས་སྐུ་ཆོས་དབྱིངས་སུ་བསྡུས་ནས། སྤུར་སྦྱངས་པའི་དུས་འཇའ་ཚོན་མེ་ཏོག་གི་ཆར་ངོ་མཚར་བའི་ལྟས་དུ་མ་དང་བཅས་སོ། ༈ མཉམ་མེད་སངས་རྒྱས་དཔལ་བཟང་ནི། འཁྲུངས་ཡུལ་གཙང་གི་སྟག་ཚང་ཕུའི་ཚ་བུ། རུས་འབེ། ཡབ་དཔོན་རིས་བཟང༌། ཡུམ་ཚེ་འབུམ་དཔལ། སྲས་གཅིག་འཁྲུངས་པ། མ་འཚོའི་བདུན་ཚོགས་ལ་རི་ཁྲོད་རས་ཆེན་གདན་དྲངས་པས་ནང་མཆཽད་གནང་ནས་འདི་འཐུང་བུ་ཁྱད་པར་ཅན་ཅིག་ཡོང་གསུངས་ནས་ལུང་བསྟན། ཡུམ་གྱིས་ལོ་ཆེན་བྱང་རྩེ་མཇལ་དུ་བྱོན་བུས་ཕོངས་པ་ལགས་ཞུས་པས་ནུ་མ་སྟོན་གསུངས། ཞལ་གྱིས་འཇིབ་ཏེ་བུའི་ལུང་བསྟན། ཡུམ་གྱི་མནལ་ལམ་དུ་བུད་མེད་མང་པོས་བུམ་པ་ཐོགས་ཏེ་


TNT17_Page_0497
[མ་དཔེ་གཟིགས་ན་འདིར་གནོན།]

སྐུ་ཁྲུས་གསོལ། ལྷུམས་སུ་ཞུགས་མ་ཐག་ཡུམ་བདེ་བའི་ཉམས་དང་ལྡན་པར་གྱུར། ཟླ་བ་རྫོགས་པ་དང་སྐུ་བལྟམས། ཆུང་ངུ་ནས་ཏིང་ངེ་འཛིན་ལ། མཉམ་པར་འཇོགས་པ་དང༌། འཁྲིད་ཡིག་ནས་ཆོས་འཆད་པའི་ཚུལ་མཛད། རྡོ་རྗེ་དྲིལ་བུ་བཟུང་བའི་ཚུལ་དང༌། རི་བོང་སོགས་ཕྱག་གིས་བཟུང་ཡང་མི་འབྲོས་བར་སླར་གཞན་གྱིས། བཟུང་དོགས་ནས་འབྲོས་སུ་འཇུག་པ་སོགས་དང༌། ཀློག་ཡིག་ཚེགས་མེད་དུ་མཁྱེན་པས། ཆོས་ལ་ཐུགས་འདུན་སྐྱེས་ནས། ཡབ་ཡུམ་ལ་ཞུས་ནས་ཡི་གེ་མང་པོ་བྲིས་པ་དང༌། ཡབ་ཀྱིས་བཀག་པས་མ་ཁོགས་པར། ཤངས་དཀར་པས་སློབ་དཔོན་མཛད་དེ་བསྙེན་པར་རྫོགས། ལོ་བཅུ་གཉིས་ཙམ་ཤངས་དཀར་བ་འབྲལ་མེད་དུ་བསྟེན་ནས། ཤངས་པའི་ཆོས་སྐོར་ཁྲིད་ཆ་ལག་དང་བཅས་པ་ཐམས་ཅད་ཞུས་སོ། །རྩེ་གཅིག་ཏུ་བསྒོམས་པས། བདེ་དྲོད་རབ་འབར་སྒྱུ་ལུས་རྨི་ལམ་འོད་གསལ་གྱི་ཉམས་རྟོགས་ཕུལ་ཕྱིན་ཏུ་འཁྲུངས། རྨི་ལམ་སྤྲུལ་བསྒྱུར་གྱིས་བདེ་བ་ཅན་གྱི་ཞིང་གཟིགས་པ་སོགས་ཡོན་ཏན་དཔག་ཏུ་མེད་པ་མངའ། ཡུམ་སྲས་གཉིས་རང་ཡིན་པས། ཡབ་གཤེགས་རྗེས། ཨ་ཁུས་སྤྱད་དངོས་འཕྲོག་པ་ཡང༌། བཟོད་པའི་གོ་ཆས་ཁྲོ་བ་སྤངས་ཏེ། ཤངས་དཀར་བའི་འཕྲལ་གྱི་ཕྱག་གཡོན་མཆོད་གཡོག་སོགས་མོས་གུས་ངང་ཞབས་ཏོག་གིས་མཉེས་པར་མཛད། གྲུབ་


TNT17_Page_0498
[མ་དཔེ་གཟིགས་ན་འདིར་གནོན།]

ཆེན་སངས་རྒྱས་དར་ལ་ཡང་ཤངས་ཆོས་ཡོངས་རྫོགས་ཅིག་གསན། རྗེ་ཤངས་དཀར་བ་ཞིང་བརྗེས། མཆོད་འབུལ་གསོལ་འདེབས་རྩེ་གཅིག་ཏུ་སྒྲུབས། སྐུག་ལུང་གི་གཙུག་ལང་ཁང་གོགས་ཤིང་ཅུང་ཟད་ཉམས་འདུག་པ་ཐུགས་སྐྱོ་སྟེ་ཞིག་གསོས་ཞབས་ཏོག་རྒྱས་པར་མཛད། བདེ་མཆོག་གི་དབང་གནང་བས་བདེ་མཆོག་དངོས་སུ་མཐོང་བ་བྱུང༌། ཕག་མོའི་དབང་གནང་བས། ནང་མཆོད་ཀྱི་སྟེང་ས་ནས་རྗེ་བཙུན་མ་དངོས་སུ་བྱོན། དབང་རྣམས་མཛད་ཚེ་སྒྲ་སྙན་པ་ཐམས་ཅད་ཀྱིས་ཐོས་པ་སོགས་ཡ་མཚན་དང་ལྡན་ཞིང༌། མཁས་བཙུན་བཟང་པོའི་མཐར་ཐུགསློབ་མ་ཡང་མང་དུ་བྱུང་བ་སྨིན་གྲོལ་ལ་བཀོད། སྐུག་ལུང་དབུ་རྩེའི་རྫ་ཐོག་སོགས་དགོངས་གཏད་ཐམས་ཅད་འགྲུབ་པའི་མཐར། སྙུངས་ཚུལ་ཆེར་མེད་ཀྱང༌། བདག་ཤར་ཕྱོགས་མངོན་པར་དགའ་བར་འགྲོ་བས་དེར་གསོལ་བ་ཐོབ་གསུངས་ནས། དགུང་ལོ་དྲུག་ཅུ་རེ་བརྒྱད་པ་ལ་སྤྲུལ་སྐུའི་བཀོད་པ་ཆོས་དབྱིངས་སུ་ཐིམ། ཞག་ལྔ་ན་དབུ་གཙུག་ནས་བྱང་སེམས་ལུད་པ་སོགས་ངོ་མཚར་བའི་ལྟས་དུ་མ་བྱུང་པར་གདའ་འོ། །༈ གྲུབ་ཆེན་ནམ་མཁའ་རྒྱལ་མཚན་ནི། སྐུའི་སྐྱེ་བ་དུ་མར་བཤེས་གཉེན་དམ་པས་རྗེས་སུ་བཟུང་བའི་སྐྱེས་བུ་དམ་པ་ཤ་སྟག་ཏུ་གྱུར་པ་ཞིག་སྐུ་ཚེ་འདིར་སྐྱེ་བ་བཞེས་ཚུལ་ནི། མི་ཤངས་དགོན་གསར་དུ། ཡབ་རིན་ཆེན་བསོད་ནམས། ཡུམ་བསོད་ནམས་སྒྲོལ་མ་


TNT17_Page_0499
[མ་དཔེ་གཟིགས་ན་འདིར་གནོན།]

གཉིས་ཀྱི་སྲས་སུ་ཤིང་མོ་བྱའི་ལོ་ལ་འཁྲུངས། ཆུང་ངུ་ནས་ཡིག་དྲུག་ལ་ཞལ་འདོན། བྱམས་སྙིང་རྗེ་རང་ཤུགས་ཀྱི་སྐྱེ་བ། གནས་ལུགས་ཀྱི་དོན་ཞི་ལྷག་གི་ཏིང་ངེ་འཛིན་འཁྲུངས། དགུང་ལོ་བརྒྱད་པའི་སྟེང་དུ། བླ་མ་རིན་ཆེན་ཚུལ་ཁྲིམས་པའི་དྲུང་དུ་རབ་ཏུ་བྱུང༌། དགུང་ལོ་བཅུ་གཉིས་ལ་བརྟག་གཉིས་ལ་བཤད་པ་གནང༌། དགུང་ལོ་བཅོ་བརྒྱད་ལ་ནུབ་ཆོས་ལུང་དུ་འཁོན་རིན་ཆེན་རྒྱལ་དབང་གྲགས་པ་དང༌། དད་པའི་དགེ་སློང་ཁ་སྐོང་དང་བཅས་པའི་དྲུང་དུ་བསྙེན་པར་རྫོགས། མཚན་ནམ་མཁའ་རྒྱལ་མཚན་དུ་གསོལ། དྲན་ཤེས་བག་ཡོད་ཀྱི་ངང་ནས་མདོ་སྔགས་ཀུན་ལ་ཐོས་བསམ་སྒོམ་སྒྲུབ་ལ་ནན་ཏན་གྱི་ཐུགས་རྟོགས་བསྐྱེད་ནས། མཉམ་མེད་སངས་རྒྱས་དཔལ་བཟང༌། བུ་སྟོན་ཐམས་ཅད་མཁྱེན་པ། པཎྜི་ཏ་ནགས་རིན། ལོ་ཙཱ་བ་ནམ་མཁའ་གྲགས། སྟག་རྩེ་རྒྱལ་མཚན་དཔལ་བཟང་སོགས་མཁས་གྲུབ་ཀྱི་བླ་མ་དམ་པ་རྣམས་ཀྱི་ཞབས་རྡུལ་སྤྱི་བོས་བླངས། ལོངས་སྤྱོད་མོས་གུས་སྒྲུབ་པའི་སྒོ་ནས་བླ་མ་ཐམས་ཅད་མཉེས་པར་མཛད། ཁྱད་པར་དཔལ་ལྡན་ཤངས་པའི་ཆིག་བརྒྱུད་ཀྱི་གདམས་པ་ཐམས་ཅད་རྫོགས་པར་ཐོབ་སྟེ། མཁས་གྲུབ་ཀྱི་རྟགས་མཚན་མངོན་དུ་གྱུར། དུར་འཁོར། རྟ་མགྲིན། སྤྱན་རས་གཟིགས། ཕག་མོ་ལ་སོགས་པའི་ཡི་དམ་མང་པོའི་ཞལ་གཟིགས། མནལ་ལམ་དུ་དག་པའི་ཞིང་དུ་མར་


TNT17_Page_0500
[མ་དཔེ་གཟིགས་ན་འདིར་གནོན།]

བྱོན་པ། མཁའ་འགྲོ་ཆོས་སྐྱོང་བྲན་བཞིན་འདུ་བ། མི་དང་མི་མ་ཡིན་པ་མང་པོ་བྱམས་སྙིང་རྗེས་འདུལ་བར་མཛད་པ། ཆོས་རྗེ་སངས་རྒྱས་དཔལ་བཟང་གིས་སྐུག་ལུང་གི་ཞིག་གསོས་གནང་བ་སོགས་ཀྱི་ཕྱག་གཡོག་ཞབས་ཏོག་སྒྲུབས་ཏེ། ནུབ་ཆོས་ལུང༌། བྱང་ཆེན། ཁུ་ལུང༌། བློ་མའི་ས་སྙུག་སོགས་སུ་སྒྲུབས་པ་དང་གཞན་དོན་ཟུང་དུ་སྤྲེལ་ནས། གདུལ་བྱ་མང་པོ་སྨིན་གྲོལ་ལ་བཀོད། ངཻས་མེད་བྱ་བཏང་ལ་ཐུགས་རྩེ་གཏད་ཀྱང༌། སྟག་ལྷུན་འགྲུབ་ལ་རེ་ཞིག་བཞུགས་དགོས་པ་བྱུང་ནས། ཆོས་འཁོར་རྒྱ་ཆེར་བསྐོར་ནས། དགུང་ལོ་དྲུག་ཅུ་རེ་གསུམ་པའི་མེ་མོ་ཕག་གི་ལོ་ལ་གླང་རིའི་གདན་ས་མཛད། གཙུག་ལག་ཁང་རྟེན་བཞེངས་སོགས་རྒྱས་པར་མཛད་ཅིང༌། མཐར་དབེན་པ་ལ་ཞུགས་དགོས་པའི་དགོངས་པ་གཏད། གདན་ས་བ་བསྐོས་ནས། རི་ཁྲོད་རབ་བརྟན་ཆོས་ལུང་དུ་མཛད། ཚེ་བློས་བཏང་ནུས་པའི་འཁོར་ཚོགས་དང༌། ཕྱོགས་ཀྱི་བླ་མ་ཆེ་ཕྲ་བཀའ་རབ་འབྱམས་རྣམས་དང༌། ཆོས་རྒྱལ་རབ་བརྟན་ཀུན་བཟང་སོགས་མི་ཆེན་དུ་མས་ཞབས་ནས་འདེགས་པ་སོགས་སྙན་པའི་གྲགས་པས་ཁྱབ་ཅིང༌། སྐུ་སྙུང་བའི་ཚུལ་མེད་པར་སྐུ་ཤེད་ཅུང་ཟད་བྲི་ཞིང་ཞན་དུ་ཉེ་བ་ན། ཚེས་བཅུའི་ཉིན་མཇལ་འདོད་པ་རྣམས་ཀྱང་དྲུང་ནས་འཁོད། ཆོས་སྐུ་དེ་བཞིན་ཉིད་ཀྱི་འཕོ་བ་བྱེད་གསུངས་ནས། མཉམ་པར་བཞག་པའི་ངང་ནས་ཚེ་བཅུ་གཅིག་གི་ཉིན་ངོ་མཚར་བའི་


TNT17_Page_0501
[མ་དཔེ་གཟིགས་ན་འདིར་གནོན།]

ལྟས་དང་བཅས་ཞིང་གཞན་དུ་གཤེགས་སོ། ༈ ཕ་བླ་མ་རྒྱ་སྒོམ་ལེགས་པ་རྒྱལ་མཚན་ནི། འཁྲུངས་ཡུལ་ཤངས་མཁས་གྲུབ་ཁྱུང་པོའི་གནས་དང་ཉེ་བའི་ལ་རྒྱབ། ཡབ་དབོན་པོ་བཀྲ་ཤིས་མགོན། ཡུལ་བདེ་ལེགས་བུ་འདྲེན། གདུང་རུས་ལྡོང༌། འབྲུག་ལོ་ལ་སྐུ་བལྟམས། མཚན་ཛམ་བྷ་ལར་བཏགས། སྐུ་ན་གཞོན་པའི་སྐབས་ནས་འབྲི་ཀློག་སྨན་དཔྱད་སོགས་དཀའ་ཚེགས་མེད་པར་མཁྱེན། ཁུ་བོའི་དྲུང་དུ་བཀའ་ཆོས་མང་དུ་གསན། དེ་ནས་གྲུབ་ཆེན་ནམ་མཁའ་རྒྱལ་མཚན་ལ་དབུ་སྐྲ་བཅད། མཚན་ལེགས་པ་རྒྱལ་མཚན་དུ་བཏགས། རྗེ་ཉིད་ལ་དཔལ་ལྡན་ཤངས་པའི་ཆོས་སྐོར་མ་ལུས་པ་གསན། ཐོག་མར་རྒྱུད་སྡེ་ལྔའི་དབང་གི་གསང་མཚན་མི་བསྐྱོད་རྡོ་རྗེ་བཏགས། དུས་འཁོར་གྱི་ཆོས་སྐོར་མཐའ་དག་གསན། ཆོས་རྗེ་སེང་གེ་བཟང་པོ་ལ་བཀའ་གདམས་ཀྱི་ཆོས་སྐོར་བ་བོང་བ་རྡོ་རྗེ་རྒྱལ་མཚན་ལའང་ཤངས་ཆོས་ཡོངས་རྫོགས། ནཻ་གུ་བསམ་སྡིངས་ལུགས་ཆ་ཚངས། ཕག་མོ་གཞུང་དྲུག་རྣམས་ཞུས། མདོར་ན་ནཻ་གུའི་ཆོས་སྐོར་འཇག་བསམ་གཉིས་ལས་འཇག་ལུགས་ལ་གདན་ས་བརྒྱུད་པ་དང༌། སློབ་མ་བརྒྱུད་པའི་གདན་བརྒྱུད་མཁས་བཙུན་རྒྱལ་མཚན་འབུམ་ནས། བྱམས་པ་དཔལ། བློ་གྲོས་ཀུན་དགའ་དཔལ། ནཻ་དཔལ་དེ་གདན་ས་བརྒྱུད་མ་ཆད་པ་རྣམས་དང༌། སློབ་བརྒྱུད་ལ་


TNT17_Page_0502
[མ་དཔེ་གཟིགས་ན་འདིར་གནོན།]

འཇག་པ་གོང་འོག གོང་མ་མ་མུས་ཆེན་རྒྱལ་མཚན་དཔལ་བཟང༌། གྲུབ་ཆེན་རྡོ་རྗེ་གཞོན་ནུ། གྲུབ་ཆེན་ནམ་མཁའི་རྡོ་རྗེ། རོང་སྟོན་ཤེས་བྱ་ཀུན་རིགས་ནས་བརྒྱུད་པ་འཁྲུལ་ཞིག་ཆོས་འབྱོར་ལེགས་པས་གསན། བླ་མ་འདི་ལ་ཇོ་ཞལ་ཁའི་སྦྱོར་དྲུག་ཞུས། འཇག་པ་འོག་མ་ཁྱུང་པོ་ཚུལ་ཁྲིམས་མགོན་ནས་བརྒྱུད་པ་རང་རེའི་བརྒྱུད་པ་འདི་བཞིན། གནས་རྙིང་པ་ཨ་ཡི་སེང་གེ་ནས་བརྒྱུད་པ་ནི། གསེར་གླིང་པ་བཀྲ་ཤིས་དཔལ། ཁམས་པ་རྡོ་རྗེ་དཔལ། སྐུག་ལུང་པ་ཆོས་གྲགས་ལས་མཉམ་མེད་སངས་རྒྱས་དཔལ་གྱིས་གསན་པ་དང༌། སྤྲུལ་སྐུ་རིན་ཆེན་བློ་གྲོས་ལ་རྨོག་ཅོག་པ་ཕྱི་མ་ཀུན་འོད། དགེ་འདུན་བློ་བཟང་པ། ཤེར་སྒོམ་སངས་རྒྱས་དར། དེ་ལ་སངས་རྒྱས་དཔལ་གྱིས་གསན། ཡང་མཁས་གྲུབ་གཞོན་ནུ་གྲུབ། ཀུན་མཁྱེན་རིག་པའི་རྡོ་རྗེ། བྱ་བཏང་ཆུའི་རྣལ་འབྱོར། གཞུ་སྟོན་ཚུལ་ཁྲིམས་མགོན་པོ། རྩ་གསུམ་ཆོས་གྲགས་པ་ལ། སངས་རྒྱས་དཔལ་གྱིས་གསན་པ་རྣམས། ཆོས་སྐུ་རིན་ཆེན་ནས་བརྒྱུད་པ། ཀུན་བཟང་ངག་དབང་བློ་གྲོས་པའི་སྤྱན་སྔར་ཞུས། མཁས་གྲུབ་སངས་རྒྱས་རྡོ་རྗེ། བྲག་ནག་པ་ནམ་མཁའ་རྒྱལ་མཚན་ནས་བརྒྱུད་པ། བྲག་ནག་པ་སྟོབས་ལྡན་རྒྱལ་མཚན་ལ་ཞུས། ཤངས་ཟུར་ཁང་པ་བསོད་ནམས་བཟང་པོ། བ་བོང་པ་དཀོན་མཆོག་ལེགས་པ་ནས་བརྒྱུད་པ། བ་བོང་པ་རྡོ་རྗེ་རྒྱལ་མཚན་ལ་བརྒྱུད་པ་སོགས་ཏེ། ནཻ་གུ་


TNT17_Page_0503
[མ་དཔེ་གཟིགས་ན་འདིར་གནོན།]

ལུགས་སྲོལ་བཅུ་གཉིས་གཅིག་ཏུ་སྒྲིལ་བའི་གདམས་པའི་མངའ་བདག་ཏུ་གྱུར་ཏོ། །ཆོས་ལུང་མཁན་པོ་སངས་རྒྱས་དཔལ་བཟང་མཁན་པོར་གསོལ། དད་པའི་དགེ་འདུན་གྱི་དབུས་སུ་བསྙེན་པར་རྫོགས། ཤངས་ཀྱི་རི་ཁྲོད་ངེས་མེད་དུ་སྒྲུབ་པ་མཛད། སྒྱུ་ལུས་རྨི་ལམ་འོད་གསལ་གྱི་ཉམས་རྟོགས་མཐར་ཕྱིན་ཀྱང་སྦས་པའི་རྣལ་འབྱོར་མཛད། ཕྱིས་རི་ཁྲོད་ཆོས་སྐོར་རབ་བརྟན་ཆོས་ལུང་གི་གདན་ས་མཛད། རྐུན་མ་ཤར་བ་མགོན་གཡག་གིས་ཕྱིར་བཟློགསྒྱུ་ལུས་དབང་མོ་ཆེ་ཞིག་གནང་སྐབས། ནང་མཆོད་ཟད་མི་ཤེས་པ་བྱུང༌། སྤྲུལ་བསྒྱུར་ཡང་ནུས། སྐུ་ཚེའི་སྨད་དུ་རྗེ་བཙུན་ཀུན་དགའ་གྲོལ་མཆོག་བློ་གསལ་རྒྱ་མཚོའི་སྡེ་ཞེས་བྱ་བར་ཆོས་ཀྱི་བདག་པོར་གཏད་པའི་ཤངས་ཆོས་ཡོངས་སུ་རྫོགས་པར་མཛད་དེ། ཞི་བར་གཤེགས་སོ། །གདུང་རུས་ལ་རིང་བསྲེལ་བྱོན་པའི་དུམ་བུ་ད་ལྟ་ཆོས་ལུང་བྱང་རྩེ་ན་བཞུགས་སོ།། ༈ གྲུབ་པའི་དབང་ཕྱུག་དཔལ་ལྡན་ཀུན་དགའ་གྲོལ་མཆོག་བློ་གསལ་རྒྱ་མཚོའི་སྡེ་ཞེས་པ་དེ་ཉིད། འཁྲུངས་ཡུལ་ནི་མངའ་རིས་སྨོན་ཐང་རྒྱལ་པོའི་ཁབ། འོད་གསལ་ལྷའི་རིགས། ཡབ་དགུང་ལོ་ལྔ་བཅུ་རྩ་དྲུག ཡུམ་དགུང་ལོ་ཉི་ཤུ་བཞེས་པའི། མེ་མོ་ཡོས་ཀྱི་ལོ་ས་ག་ཟླའི་ཚེས་བཅོ་ལྔ་ལ་སྐུ་བལྟམས་སོ། །དེ་སྐབས་སྒྲོལ་མ་འབུམ་ཐེར་བཙུགས་སྐབས་ཡིན་པས། རྗེ་བཙུན་སྒྲོལ་མའི་ཐུགས་རྗེར་དགོངས་ཏེ་


TNT17_Page_0504
[མ་དཔེ་གཟིགས་ན་འདིར་གནོན།]

མཚན་སྒྲོལ་མ་འབུམ་དུ་གསོལ། དེ་ནས་སྐུ་ཆུང་ངུའི་དུས་སྙུང་བ་མང་དུ་ཡོད་པ་ཞིག་ཡོད་པ་དང༌། ཡབ་ཡུམ་སངས་རྒྱས་བསྟན་པར་སྲི་ཞུ་ཁོ་ན་མཛད་པའི་སྐབས་ནས། བླ་མ་དམ་པ་ཀུན་དགའ་མཆོག་གྲུབ་ཀྱི་དྲུང་དུ། ལོ་ངོ་བཞི་པའི་ཐོག་ཏུ་བསྟན་པའི་སྒོར་ཞུགས། དགེ་བསྙེན་གྱི་སྡོམ་པ་ལེན་པར་མཛད། དེ་ནས་ལོ་བརྒྱད་ཀྱི་བར་དུ་ཡབ་ཀྱི་དྲུང་དུ། ཀློག་ཡིག་སོགས་ལ་སྦྱངས། དགུང་ལོ་བཅུ་གསུམ་པ་ལ་བླ་མ་ཀུན་དགའ་མཆོག་གྲུབ་ལ་རབ་ཏུ་བྱུང་ཞིང༌། མདོ་སྔགས་ཀྱི་ཆོས་མང་དུ་གསན། དེ་ནས་དབུས་གཙང་དུ་ཐུགས་གཉེར་ལ་ཕེབས། ལམ་དུ་ས་སྐྱ་མཇལ་བས་སྒོ་རུམ་རྡོ་རྗེ་ནག་པོ་ཆེན་པོ་ལན་གསུམ་དུ་ཞལ་གཟིགས་སྣང་མི་འདྲ་བ་རེ་རེ་བྱུང༌། ཁའུ་བྲག་རྫོང་དུ་ཆོས་རྗེ་ཀུན་སྤང་ཆོས་ཀྱི་ཉི་མའི་དྲུང་དུ། དཔལ་མགོན་གྱི་རྗེས་གནང་གསན་པས། ཆོས་སྐྱོང་གི་སྐུའི་རྣམ་པ་གསལ་ཆ་ཆེར་བྱུང༌།ཆོས་གྲྭ་ཆེན་པོ་གསེར་མདོག་ཅན་ཏུ། མདོའི་ཐུགས་གཉེར་སྐབས། པཎྜི་ཏ་དོན་ཡོད་གྲུབ་པ་ལ་མདོ་སྔགས་ཀྱི་ཆོས་མང་དུ་གསན། ཁྱད་པར་རྒྱུད་སྡེ་ལྔ་དང༌། བདེ་མཆོག་ལྷ་ལྔའི་དབང་ཞུས། སླར་མངའ་རིས་སུ་ཕེབས། དགུང་ལོ་ཉི་ཤུ་པ་ལ། ཐམས་ཅད་མཁྱེན་པ་བསོད་ནམས་ལྷུན་གྲུབ་ལེགས་པའི་རྒྱལ་མཚན་མཁན་པོ་མཛད། ངོར་ཆེན་རྡོ་རྗེ་ལྷ་མཆོག་གིས་ལས་སློབ་མཛད། གཞན་ཡོངས་འཛིན་དམ་པའི་ལས་ཁ་སྐོང་དང་བཅས་


TNT17_Page_0505
[མ་དཔེ་གཟིགས་ན་འདིར་གནོན།]

བསྙེན་པར་རྫོགས། སློབ་དཔོན་རྣམས་ལ་གསུང་ངག་ལམ་འབྲས་སོགས་ཆོས་མང་དུ་གསན། བླ་མ་དཔལ་ལྡན་ཚུལ་ཁྲིམས་པ་ལ། འཇིགས་བྱེད་ཀྱི་ཆོས་སྐོར་རྣམས་ཞུས། ཡང་ཡེ་ཤེས་མཁའ་འགྲོ་ནཻ་གུ་མས་ཞལ་གཟིགས། ཆོས་དྲུག་ཕྱག་ཆེན་ལམ་ཁྱེར་འཆི་མེད་མཁའ་སྤྱོད་དཀར་དམར་མགོན་པོའི་བཀའ་སྣ་རྣམས་ཞུས། བདག་དང་ཡེ་ཤེས་མཁའ་འགྲོའི་བར་དུ་བརྒྱུད་པ་གཞན་མི་དགོས་གསུངས་སོ། ཁམས་སྟོན་བསོད་ནམས་རྒྱལ་མཚན་ལ་ནཻ་གུའི་ཆ་ལག་ཕྱག་ཆེན་རྣམས་མཐའ་རྒྱས་སུ་གསན། དྲག་སྟེང་རྡོ་རྗེ་རྫོང་དུ་རྣམ་སྲས་རྟ་བརྒྱད་ཞལ་གཟིགས། ཡང་མནལ་ལམ་དུ་གྲུབ་ཆེན་མི་དྲ་ཛོ་གི་དང་མཇལ་ཏེ་སྙིང་པོ་དོན་གསུམ་གྱི་འཁྲིད་གནོད་ཞིང་བྱིན་གྱིས་བརླབས། ཡང་མནལ་ལམ་སྣང་བར་བུད་མེད་དམར་མོ་གཉིས་ཀྱིས་དོ་ལིར་བཏེགས་ནས་སོ་ས་གླིང་གི་དུར་ཁྲོད་ཡིན་ཟེར་བ་ཞིག་ཏུ། ནཻ་གུ་མས་ཚོགས་དཔོན་མཛད་པའི་མཁའ་འགྲོ་མང་པོ་འདུས་པའི་ཚོགས་འཁོར་གྱི་གྲལ་དུ་ཚུད། ནཻ་གུ་མས་བྱིན་གྱིས་བརླབས་པའི་མཚན་མ་ཐོབ། སླར་བུད་མེད་གཉིས་ཀྱིས་གཟིམ་ཁང་དུ་བསྐྱལ་བའི་མོད་ལ་མནལ་སད། དཔལ་ཤ་བ་རིས་ཀྱང་བྱིན་གྱིས་བརླབས་ཤིང་དབང་བསྐུར་བའི་མཚན་མ་སོགས་དང༌། དག་པའི་གཟིགས་སྣང་དང་ལྷ་དང་བླ་མའི་ཚོགས་ལས་ཟབ་ཆོས་དུ་མ་གསན། དངོས་ཀྱི་བླ་མ་ཡང་གཙུག་རྒྱན་ནོར་བུ་འཇམ་དབྱངས་བསོད་ནམས་


TNT17_Page_0506
[མ་དཔེ་གཟིགས་ན་འདིར་གནོན།]

ལྷུན་གྲུབ། སངས་རྒྱས་རིན་ཆེན་སེང་གེ ཀུན་དགའ་མཆོག་གྲུབ་སོགས། རིན་ཆེན་རྣམ་བཞི། དོན་ཡོད་མཚན་ཅན། དཔལ་ལྡན་ཚུལ་ཁྲིམས། ཡིག་དྲུག་ཤེས་དཔལ། ཁམས་སྟོན་བསོད་ནམས་རྒྱལ་མཚན། ཀརྨ་པ་དྲེ་བོ་ཆོས་རྒྱལ། དཔལ་ལྡན་འབྲུག་པ་ངག་དབང་ཆོས་རྒྱལ། ལྕངས་ལུང་པ་གཞོན་ནུ་མཆོག་གྲུབ། སྟག་ལུང་པ་ཆེན་པོ་རྣམ་རྒྱལ་བཀྲ་ཤིས་སོགས་མཁས་གྲུབ་ཀྱི་བླ་མ་བཞི་བཅུ་ཙམ་བསྟེན། མདོ་སྔགས་ཀྱི་གཞུང་འགྲེལ་དབང་འཁྲིད་བྱྀན་རླབས་པ་སོགས་མན་ངག་འབྱམས་ཀླས་པ་གསན། ཁྱད་པར་སྦས་པའི་རྣལ་འབྱོར་རྒྱ་སྒོམ་ལེགས་པ་རྒྱལ་མཚན་ལ། མགོན་པོའི་སྤྲུལ་པས་ཆོས་བདག་པོའི་ལག་ཏུ་སྤྲོད་གསུངས་ལུང་བསྟན་ལྟར། ནཻ་གུ་ལུགས་སྲོལ་བཅུ་གཉིས་ཀྱི་ཆོས་སྐོར་མ་ཚང་པ་མེད་པ་ཞལ་ཤེས་གནད་དང་བཅས་པ་བུམ་པ་གང་འབྱོའི་ཚུལ་གསན། བླ་མ་ཐམས་ཅད་རྒྱ་སྒོམ་པར་འདུས་ཤིང་ངེ་ཤེས་འཁྲུངས། མངོན་ཤེས་དང་གྲུབ་རྟགས་སྙན་པ་དང་གྲགས་པས་ཁྱབ། སྟག་ལུང་པ་ཆེན་པོ་ཀུན་དགའ་བཀྲ་ཤིས་སོགས་སྐྱེས་ཆེན་དུ་མ་དང༌། གྲུབ་མཐའ་མཐའ་དག་གི་བླ་མ་མང་པོས་ཞབས་ལ་གཏུགས། དབུས་གཙང་ལ་སོགས་ཀྱི་སྡེ་དཔོན་ཆེ་བ་ཐམས་ཅད་ཀྱིས་མཆོད་པའི་ཞིང་དམ་པར་བྱུང་ཅིང༌། གདུལ་བྱ་མཐའ་ཡས་པ་སྨིན་ཅིང་གྲོལ་བར་མཛད། ཐུབ་བསྟན་གསེར་མདོག་ཅན། དཔལ་འཁོར་བདེ་ཆེན་གླིང༌། རྩེ་ཆེན་


TNT17_Page_0507
[མ་དཔེ་གཟིགས་ན་འདིར་གནོན།]

ངམ་རིངས་སོགས་ཀྱི་སེང་གེའི་ཁྲིད་འཁོད་ཀྱང༌།¿བྱ་བཏང་ཁོ་ནའི་ཚུལ་གྱིས་སྡེའི་ཞལ་འཛིན་ནི་ཆེར་མ་མཛད། སྐུ་ཚེའི་འཇུག་ཏུ་ཇོ་ནང་དང༌། ཆོས་ལུང་གི་སྒྲུབ་སྡེ་ལ་གཙོ་བོར་མཛད་ཅིང༌། །སློབ་མ་མཁས་པ་བཟང་བ་མང་དུ་བྱུང་མོད། གཙོ་བོ་རྡོ་རིང་པ་ཀུན་དགའ་རྒྱལ་མཚན། མཁས་པའི་དབང་པོ་བྱམས་པ་ལྷུན་གྲུབ། ཆོས་སྐུ་ལྷ་དབང་གྲགས་པ་རྣམས་ལ། ས་ཛོ། དྭགས་ཤངས་ཀྱི་ཆོས་སྐོར་མཐའ་ཡས་པའི་བཀའ་བབས་གཏད་དེ། གཟུགས་སྐུ་ཆོས་དབྱིངས་སུ་བསྡུས། སྐུ་གདུང་རིང་སྲེལ་གྱི་སྙིང་པོ་ཆོས་ལུང་བྱང་ཆུབ་རྩེ་མོར་བཞུགས་སོ། ༈ བྲག་སྟོད་པ་ལྷ་དབང་གྲགས་པ་ནི། འཁྲུང་ཡུལ་ལ་སྟོད། ཐོག་མར་སྟོད་འབྲུག་གི་བླ་མ་ལ། འབྲུག་ལུགས་ཀྱི་ཆོས་སྐོར། རས་ཆུང་བའི་སྙན་རྒྱུད། རྙིང་མའི་ཆོས་སྐོར་རྣམས་གསན། ཕྱིས་རྗེ་བཙུན་གྲོལ་མཆོག་ལ་ཉེ་བར་བསྟེན་ནས། ཇོ་ནང་པའི་ཆོས་སྐོར། ས་སྐྱའི་ཆོས་སྐོར་སོགས་སྨིན་གྲོལ་མཐའ་ཡས་ཐུགས་རྒྱུད་ཕྱུག་པོར་མཛད། ཁྱད་པར་ཤངས་པའི་ཆོས་སྐོར་མ་ལུས་པ་བུམ་པ་གང་འབྱོར་མཁྱེན་ཞིང་ཐུགས་སུ་ཚུད་པར་མཛད། སྒྲུབ་པའི་རྒྱལ་མཚན་བཙུགས་ཏེ་ཉམས་རྟོགས་ཀྱི་ཀློང་རྡོལ། རྩ་རླུང་ལ་རང་དབང་ཐོབ། འཆི་མེད་རྡོ་རྗེའི་སྐུ་བརྙེས། དགུང་ལོ་བརྒྱ་དང་ཉི་ཤུ་ལྷག་པར་འཚོ་ཞིང་གཞེས། ས་


TNT17_Page_0508
[མ་དཔེ་གཟིགས་ན་འདིར་གནོན།]

དྭགས་ཇོ་ཤངས་སོགས་ཀྱི་སྒོ་ནས་གདུལ་བྱ་མང་པོ་སྨིན་གྲོལ་ལ་བཀོད། ཁྱད་པར་དཔལ་ལྡན་ཤངས་པའི་གདམས་པ་མཐའ་དག རྗེ་བཙུན་ཐམས་ཅད་མཁྱེན་པར་ཆོས་བདག་པོའི་ཕྱག་ཏུ་སྤྲད་དེ། ཞིང་གཞན་དུ་གཤེགས་སོ། །སྐུ་རྗེས་རྣམས་རྗེ་བཙུན་ཆེན་པོས་ཐུགས་ཁུར་བཞེས། སྐུ་གདུང་རིང་བསྲེལ་གྱི་སྙིང་པོ་ཅན་རྣམས་བྲག་སྟོད་ན་གསེར་གདུང་བཀྲ་ཤིས་འོད་འབར་དུ་བཞུགས་ཏེ་འགྲོ་བའི་མཆོད་པའི་ཞིང་དུ་གྱུར་ཏོ། །༈ ཁམས་གསུམ་གྱི་བླ་མ། སྲིད་པ་གསུམ་གྱི་འདྲེན་མཆོག་དམ་པར་གྱུར་བ། རྗེ་བཙུན་ཐམས་ཅད་མཁྱེན་པ་ཀུན་དགའ་སྙིང་པོ་བཀྲ་ཤིས་རྒྱལ་མཚན་དཔལ་བཟང་པོ་འདི་ཉིད། སྐུ་སྐྱེ་བ་མང་པོའི་སྔོན་རོལ་ནས། ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་ཀྱང་སྐྱེ་བ་མེད་ལ་སྐྱེ་བའི་ཚུལ་དུ། སློབ་དཔོན་ཀླུ་སྒྲུབ་ཀྱི་སློབ་མ་འབར་བའི་གཙོ་བོ་ནས་དགའ་བྱེད་ས་སྐྱོང་གི་བར་དུ་སྐྱེ་བ་བཞེས་པའི་ཚུལ་ནི། འཁྲུངས་རབས་རྣམ་ཐར་ནས་ཤེས་པར་བྱས་ལ། འདིར་སྐུ་སྐྱེ་བ་འདི་ཉིད་ཀྱི་རྣམ་པར་བརྗོད་པ་ནི། སྐུ་བལྟམས་པའི་ཡུལ། བརྟན་མ་བཅུ་གཉིས་ཀྱི་ནང་ཚན་ཁ་རག་ཁྱུང་བཙུན་མ་གནས་པའི་ཕྱོགས། ཨུ་རྒྱན། གཉོས་ལོ། གྷ་ཡ་ངྷ་ར་སོགས། སྐྱེས་མཆོག་དུ་མས་བསྟེན་པའི་གནས་དང་ཉེ་བའི། འགྲངས་ཕུ་ཞེས་དགེ་མཚན་དུ་མས་བརྒྱན་པའི་ཡུལ། གདུང་རུས་རྭ་ལོ་རྡོར་གྲགས་ལས་རིམ་གྱི་གྱེས་པའི་རྭ་ཤར་ནུབ་གཉིས་ལས་ཤར་བ། གྲུབ་


TNT17_Page_0509
[མ་དཔེ་གཟིགས་ན་འདིར་གནོན།]

ཐོབ་དབུས་སྨྱོན་པས་ལུང་བསྟན་བཞིན། ཡབ་རྣམ་རྒྱལ་ཕུན་ཚོགས། ཡུམ་རྡོ་རྗེ་བུ་དགའ་གཉིས་ཀྱི་སྲས་སུ། ཡུམ་ལ་མནལ་ལྟས་བཟང་པོ་དང་བཅས་ལྷུམས་སུ་ཞུགས་པའི་དུས་སུ། རྒྱལ་གྱི་ཟླ་བར་མེ་ཏོག་ཁ་འབུས་པ་དང་བཅས། ཤིང་མོ་ཕག་ཆུ་སྟོད་ཟླ་བའི་ཚེས་བརྒྱད་ལ་སྐུ་བལྟམས། མཚན་སྲིད་གཅོད་རྡོ་རྗེར་གསོལ། དགུང་ལོ་གཉིས་ཙམ་ལ་སྙུང་བ་ཤིན་ཏུ་ཐུ་བ་ཞིག་ལ། འཕགས་ཡུལ་གྱི་བླ་མ་དམ་པ་རྣམས་ཀྱི་སྤྲུལ་པ་ཨ་ཙ་ར་ལྔ་ཐལ་ཕྱུང་དུ་བྱུང་སྟེ་བྱིན་གྱིས་རླབས། སྙུང་བ་ལས་གྲོལ། སྐུ་ཆུང་ངུའི་དུས་ནས་ཡི་དམ་གྱི་ལྷས་ཞལ་གཟིགས་པ་དང༌། མངོན་ཤེས་ཐོགས་མེད་མངའ་བ་སོགས་ནས་རྗེ་གྲོལ་མཆོག་གི་སྐུའི་སྐྱེ་བ་ཞིག་བལྟམས་སོ་ཞེས། སྔོན་གྱི་སྦྱིན་བདག་བུ་ཆེན་རྣམས་ཀྱིས་གསན་ཞིང༌། ཁྱད་པར་མཁན་ཆེན་ལུང་རིག་རྒྱ་མཚོ་ལ་རྗེ་གོང་མའི་གནས་གཞི་རང་གནས་རི་བོའི་ཕུག་ཏུ་མཇལ། ཞེས་གསུངས་ཡོད་འདུག་པ་དང༌། སྐབས་དེར་མནལ་ལྟས་བཟང་པོ་ལ་བརྟེན་ནས། སྐུ་སྐྱེས་ངོ་འཛིན་སྤྱན་འདྲེན་ལ་ཕེབས་དུས། སྔོན་གནས་མཁྱེན་པའི་གནས་ལ་ཡིད་ཆེས་རྙེད་དེ་སྤྱན་དྲངས། སྣ་དཀར་རྩེ། བྱང་མཁར་རྩེ་སོགས་རིམ་གྱི་བརྒྱུད་དེ། སྦྱིན་བདག་དང་དགོན་གནས་ཀྱི་སར་ཕེབས། སྐུ་ཆས་དང་འཁོར་རྣམས་ལ་ངོ་འཛིན་ཡིད་ཆེས་ཀྱི་གནས་སུ་གྱུར། ཇོ་ནང་དུ་ཕེབས་མ་ཐག་རྡོའི་ཆོས་འབྱུང་རང་


TNT17_Page_0510
[མ་དཔེ་གཟིགས་ན་འདིར་གནོན།]

བྱོན་རྩར་གཅོད་མཛད་པས་རྗེ་དྲུང་ཀུན་དགའ་དཔལ་བཟང་པོ་དགའ་སྐྱོ་ཟུང་འབྲེལ་གྱི་ཉམས་སྐྱེས། །དེ་ནས་ཆོས་ལུང་བྱང་རྩེར་ཕེབས་ཏེ། ཀློག་ཡིག་སོགས་སྦྱངས་པའི་ཚུལ་བསྟན། རྗེ་རྡོ་རིང་པ་དང༌། རྗེ་ལྷ་དབང་གྲགས་པ་གཉིས་ལ་ཟབ་ཆོས་དུ་མ་གསན་པའི་འགོ་བརྩམ། དེ་ནས་ལྷོ་སྟེན་ཁེབ་ཕྱོགས་དང་ཡར་འབྲོག་ཕྱོགས་སུ་བླ་མ་དམ་པ་རྣམས་ཆོས་ཇི་སྙེད་པ་གསན་པ་དང་ཉམས་སུ་བཞེས་པའི་ཚུལ་མཛད་པས། ཐུགས་མྱོང་བཟང་པོ་ཡང་འཁྲུངས། ཡར་འབྲོག་སྟག་ལུང་ཏུ་བཞུགས་པའི་སྐབས། རྣལ་འབྱོར་མའི་བྱིན་རླབས་ཞིག་གསན་པའི་ནུབ་མནལ་ལམ་དུ། གངས་ལ་ཞིག་བརྒལ་ཏེ་ཐེག་པས། ཨུ་རྒྱན་ཡིན་ཟེར་བའི་གནས་དུར་ཁྲོད་སྐྱི་གཡའ་བ་ཞིག་ཏུ་ཕུག་པ་ཞིག་ན་བུད་མེད་མང་པོ་ཚོགས་པའི་གཙོ་མོའི་ཕྱག་དབུ་ཐོག་ཏུ་བཞག་བྱིན་གྱིས་རླབས། དེ་དག་ཐམས་ཅད་ཀྱིས་དུས་གཅིག་ཏུ་བྱིན་གྱིས་བརླབས་པའི་སྣང་བ་བྱུང་བས་རྣལ་འབྱོར་མས་རྗེས་སུ་འཛིན་པར་ངེས་ཏེ། ཡི་དམ་གཙོ་བོར་བཟུང༌། སླར་ཡང་ཆོས་ལུང་བྱང་རྩེར་ཕེབས། སྟག་ལུང་བ་ཆེན་པོ་ཀུན་དགའ་བཀྲ་ཤིས་རྒྱལ་མཚན་དཔལ་བཟང་པོའི་ཞལ་སྔ་ནས་སྦྱངས་པའི་མཁན་པོར་གསོལ། འཇམ་དབྱངས་ཀུན་དགའ་རྒྱལ་མཚན་གྱིས་སློབ་དཔོན། རྗེ་དྲུང་ཀུན་དགའ་དཔལ་བཟང་པོས་དུས་བསྒོ་བ་དང་བཅས། དགུང་ལོ་བརྒྱད་པ་སྣ་ཚོགས་ཞེས་བྱའི་ཁྲུམས་སྟོད་ཟླ་བའི་


TNT17_Page_0511
[མ་དཔེ་གཟིགས་ན་འདིར་གནོན།]

ཚེས་ལྔའི་ཉིན་རབ་ཏུ་བྱུང་བ་སྟེ་ངུར་སྨྲིག་རྒྱལ་མཚན་གྱིས་མཛེས་པར་མཛད། བླ་མ་དམ་པ་མཁན་སློབ་དེ་དག་ལ་མདོ་སྔགས་ཀྱི་ཆོས་མང་དུ་ཞུས། །བླ་མ་དམ་པ་རྣམས་བཀའ་བགྲོས་པའི་མཁས་མཆོག་བྱམས་པ་ལྷུན་གྲུབ་གནས་ཀྱི་སློབ་དཔོན་དུ་མངའ་གསོལ། མདོ་ཕྱོགས་ཀྱི་ཐུགས་གཉེར་བརྩོན་པར་མཛད་ཅིང༌། ལུང་རིག་སྨྲ་བའི་ཁྱུ་མཆོག་ཆེན་པོར་གྱུར། གཞན་ཡང་རྗེ་སྟག་ལུང་བ་ཆེན་པོ། རྗེ་རྡོ་རིང་པ་ཆེན་པོ། མཁན་ཆེན་ལུང་རིགས་རྒྱ་མཚོ། བླ་མ་དམ་པ་བྱམས་པ་ལྷུན་གྲུབ་གྲུབ་པའི་དབང་ཕྱུག་ལྷ་དབང་གྲགས་པ། མཁས་གྲུབ་སངས་རྒྱས་ཡེ་ཤེས། རྡོ་རྗེ་འཛིན་པ་ཆེན་པོ་ཡེ་ཤེས་དབང་པོ་སོགས་ལ་རྒྱུད་སྡེ་བཞི་དང་འབྲེལ་བའི་ས་སྐྱ་པའི་ཆོས་སྐོར་ཡོངས་རྫོགས། དཔལ་ཇོ་མོ་ནང་བ་དང༌། ཞ་ལུ་པ་གཉིས་ཀྱི་ཆོས་སྐོར། འབྲུག་པའི་རྒྱལ་དབང་བཀའ་འབུམ་སོགས་ཆོས་སྐོར་ཡོངས་སུ་རྫོགས་པ། ཀརྨ་ཀཾ་གཙང་གི་ཆོས་སྐོར། སྟག་ལུང་པའི་ཆོས་སྐོར་ཡོངས་རྫོགས།༈ དཔལ་ལྡན་ཤངས་པ་བཀའ་བརྒྱུད་པའི་སྨིན་གྲོལ་གདམས་པ་ལག་འཁྲིད་ཞལ་གདམས་དང་བཅས་པ་མ་ལུས་པ་གསན་ཞིང༌། ཡི་དམ་ཆོས་སྐྱོང་གི་བསྙེན་སྒྲུབ་སོགས་ཀྱང་ནན་ཏན་གནང་བས་བསྐྱེད་རིམ་ལ་བརྟན་པ་ཐོབ། རྒྱུད་སྡེའི་གཞུང་བཤད་རྒྱ་ཆེན་པོ་ཐུགས་སུ་ཆུད། ཡི་དམ་ལྷའི་ཞལ་གཟིགས་མང་དུ་བྱུང་བ་


TNT17_Page_0512
[མ་དཔེ་གཟིགས་ན་འདིར་གནོན།]

སོགས་རྣལ་འབྱོར་མ་རྒྱུད་ཕྱོགས་ལ་གཙོ་བོར་ཐུགས་ཀྱི་བློ་གྲོས་རྒྱས་པར་བྱུང་བ་ན། བསྙེན་པར་མ་རྫོགས་ཕན་གྱི་མཛད་པའོ། །དེ་ནས་དགུང་ལོ་ཉི་ཤུར་ཉེ་བའི་ཧོར་ཟླ་བཅུ་གཅིག་པའི་ཚེས་བཅུ་བདུན་ལ་འདུལ་འཛིན་ཀུན་དགའ་རྒྱལ་མཚན་གྱིས་མཁན་པོ། མཁས་མཆོག་བྱམས་པ་ལྷུན་གྲུབ་པས་སློབ་དཔོན། དགེ་བཤེས་བློ་བཟང་པ་དང༌། རྗེ་དྲུང་ཀུན་དགའ་སོགས་ཀྱིས་ཁ་སྐོང་ལ་བསྙེན་པར་རྫོགས་པ་དགེ་སློང་གི་སྡོམ་པ་ཡང་དག་པར་བཞེས། ཕྱི་ལྟར་ཉན་ཐོས་ཀྱི་སྤྱོད་པ། ནང་ལྟར་རྒྱལ་སྲས་རྡོ་རྗེ་འཛིན་པ་ཆེན་པོར་གྱུར་ཏེ། བསྟན་པའི་བདག་པོ་ཆེན་པོ་མཛད་ནས་བྱང་སྟག་ལུང༌། ལྷོ་སྟེན་ཁེབས། སྣེ་སྔོ་པ་རྩེ། ཡར་རྒྱབ། ནུབ་ལ་སྟོད་བར་གྱི་སྡེ་དཔོན་ཆེ་ཕྲ། དགོན་གྲཱ་རིས། ཡུལ་མི་ཐམས་ཅད་ཆོས་ཀྱིས་གདུལ་བྱར་མ་གྱུར་པ་མེད་པ་ལྟ་བུ། སྦྱོར་དྲུག་གི་རྟགས་བཅུ་སོགས་བཤད་ཚོད་དང་མཐུན་པར་ཐུགས་ཉམས་སུ་འཁྲུངས། ནཻ་གུ་ཆོས་དྲུག་ཐུགས་ཉམས་སུ་བསྟར་བའི་དུས་རྨི་ལམ་ཟིན་འབྱོངས་ཡུལ་སྣང་གཏན་ལ་ཕེབས་པས། ལྐོག་འགྱུར་གྱི་དོན་ལ་མངའ་བརྙེས། མངོན་མཁྱེན་ལ་ཐོགས་པ་མེད། བསམ་སྡིངས་སུ་བཞུགས་པའི་སྐབས། ཀརྨ་པ་དབང་ཕྱུག་རྡོ་རྗེ་ཞྭ་དམར་སྤྲུལ་པའི་སྐུ་དང་བཅས་པ་ཞལ་འཛོམས་ལེགས་ཚོགས་ཀྱི་སྟེང་ནས་ཆོས་ཀྱི་གསུང་བགྲོས་ལས་འཕྲོས་ཏེ་དགྱེས་པ་ཆེན་པོར་གྱུར། དབང་ཕྱུག་རྡོ་རྗེ་ཞིང་གཞན་དུ་གཤེགས་པའི་


TNT17_Page_0513
[མ་དཔེ་གཟིགས་ན་འདིར་གནོན།]

མཚན་མ་དགོངས་ཏེ། རྗེ་བཙུན་ཆེན་པོ་འདི་ཉིད་ལ་བསྟན་པའི་བདག་པོར་མངའ་གསོལ་གྱི་བརྟན་བཞུགས་གསུང་བརྩོམ་དང་བཅས་འབུལ་བར་གནང༌། དཔལ་ལྡན་ས་སྐྱའི་གདུང་བརྒྱུད་བདག་ཆེན་བསོད་ནམས་དབང་པོ་དེ་ཉིད་དགྱེས་པ་ཆེན་པོས་རྟེན་གསུམ་ནང་མཇལ་མང་པོའི་གཟིགས་འབེབས་དང༌། ས་སྐྱ་བའི་གདུང་བརྒྱུད་ལ་དགོངས་ཏེ་ཆོས་འབྲེལ་ཞུ་བ་གནང་དུས་བདག་ཆེན་ཉིད་ཀྱིས་ས་སྐྱའི་བསྟན་པའི་བདག་པོར་མངའ་གསོལ་ལྟ་བུར་མཛད། འོན་ཀྱང་སྡེ་སྲིད་ནས་དབུ་བླའི་གཙོ་བོར་མ་ཁུར་བས་ཕྱིས་ཅུང་ཟད་མི་དགྱེས་པའི་ཚུལ་བསྟན། རྒྱ་གར་གྱི་པཎྜི་ཏ་པུརྞ་བཛྲ་དང༌། བུདྡྷ་གུབྟ་ནཱ་ཐ་ལ་སོགས་པ་མཁས་ཤིང་གྲུབ་པ་བརྙེས་པ་དག་ལ། རྡོ་རྗེ་ཐེག་པའི་གཞུང་འགྲེལ་མན་ངག་བོད་ཀྱི་བསྲེ་ལྷད་མ་ཞུགས་པ་མང་དུ་གསན་ཅིང༌། རྒྱ་གར་ཡུལ་སོ་སོའི་འཕྲལ་སྐད་དང༌། ལེགས་སྦྱར་གྱི་སྐད་སོགས་རང་མཁྱེན་དུ་ཡོད་ཅིང༌། སྒྲ་ལ་མཁྱེན་པ་མཛད་པ་མཐར་ཕྱིན་པས་ལོ་ཙཱ་གཞན་ལ་མ་ལྟོས་པའི་འགྱུར་བྱང་ཡང་ལེགས་པར་ཞུས་ཤིང་དག་པ་སོགས་དང༌། གཞན་ཡང་ཞི་བྱེད་གཅོད་ཡུལ་པ། རི་བོ་དགའ་ལྡན་པའི་ཆོས་སྐོར། རྗེ་ཙོང་ཁ་པ་སོགས་དང༌། མདོར་ན་རྒྱ་བོད་དུ་འགྱུར་རོ་ཅོག་གི་གཞུང་དང་མན་ངག་དང༌། བོད་ཀྱི་བླ་མ་མཐའ་དག་གི་གསུང་ཕྱོགས་རིས་སུ་མ་བཅད་པ་དག་གསན་ཅྀང༌། སློབ་


TNT17_Page_0514
[མ་དཔེ་གཟིགས་ན་འདིར་གནོན།]

དཔོན་པདྨ་ལ་དངོས་སུ་ཆོས་གསན་པ་དང་བྱིན་གྱིས་བརླབས་པའི་མཚན་མ་ཐོབ་པ་དང༌། དགུང་ལོ་ཉེར་དགུ་པའི་སྟེང༌། ཇོ་ནང་སྐུ་འབུམ་རྡོ་རྗེ་གདན་དུ་བཞུགས་དུས། ཀུན་མཁྱེན་དུས་གསུམ་སངས་རྒྱས་དང་མཇལ། ངེས་དོན་བསྟན་པའི་བདག་པོ་མངའ་གསོལ། བྱང་ཆུབ་སེམས་དཔའ་ཆོས་འཕགས་ཀྱི་སྐུའི་རྣམ་པ་ཅན་ཡང་གཟིགས་ཤིང༌། མཐར་ཐུག་གི་དོན་གཞན་སྟོང་དབུ་མའི་ལྟ་བ་ལ་ངེས་པའི་ཤེས་པ་ཁྱད་པར་ཅན་དང༌། ཆོས་ཐམས་ཅད་ཀྱི་གནས་ལུགས་དེར་འདུས་པའི་ཐག་ཆོད་པའི་རྟོགས་པ་ཁྱད་པར་ཅན་ཐུགས་ལ་འཁྲུངས། སྤྱིར་སྐུ་སྐྱེས་སྔ་རིམ་གྱི་རྟེན་འབྲེལ་ལ། བཾ་རོངས་པའི་དུས་དྭགས་པོ་པའི་སློབ་མར་གྱུར་པས། དྭགས་པོ་བཀའ་བརྒྱུད་ཀྱི་ཆོས་ལ་མངའ་བརྙེས་པ་དང༌། ཨ་ཝ་དྷཱུ་ཏཱིར་འཁྲུངས་པའི་དབུ་ཐོད་བདེ་མཆོག་རང་བྱོན་ཡོད་པ་ས་སྐྱའི་སྐུ་འདྲ་མཛེས་ཐོད་མའི་ནང་ལ་བཞུགས་པས། ས་སྐྱའི་ཆོས་ལ་འགྲོ་ཕན་ཆེ། འཇམ་དབྱངས་ཆོས་རྗེར་འཁྲུངས་དུས་ཙོང་ཁ་པའི་ཐུགས་སྲས་སུ་གྱུར་བས། དགེ་ལུགས་ལ་མཁྱེན་པ་རྒྱས། རྗེ་གྲོལ་མཆོག་དུས། ཤངས་པའི་བསྟན་པའི་བདག་པོར་གྱུར་པས་སྦྱངས་པ་འགྲོ་དོན་འཕྲིན་ལས་ཆེ་བ་སོགས། བསྟན་པ་སྤྱིའི་བདག་པོར་གྱུར་པས། འཕགས་ཡུལ་དུའང་སྙན་གྲགས་ཀྱི་ཁྱབ་པས། རྒྱ་གར་ལྷོ་ཕྱོགས་ཀྱི་རྒྱལ་པོ་བྷ་རེ་ཞེས་པས། སྙན་ཚིག་ཟ་འོག་གོས་


TNT17_Page_0515
[མ་དཔེ་གཟིགས་ན་འདིར་གནོན།]

ཀྱི་ཞུ་ཤོག་གི་རྟེན་དང་བཅས་པ་འབུལ་བ་སོགས་འཛམ་གླིང་ཀུན་ཏུ་གྲགས་སོ། །འོན་ཀྱང་ཀུན་མཁྱེན་ཆེན་པོས་ལུང་བསྟན་ལ་བརྟེན་ནས། དཔལ་ཇོ་མོ་ནང་པའི་ལུགས་སྲོལ་ལ་གཙོ་བོར་གྱུར་པའི་སྐྱེ་འགྲོའི་བསོད་ནམས་ཀྱི་ཞིང་ས་ཆོས་རྗེ་ཆེན་པོ་ཞིག་གནང་བར་བརྩམས་ཏེ། ལྷ་སར་ཇོ་བོ་ཆེན་པོ་ལ་མཆོད་འབུལ་དང་སྨོན་ལམ་འདེབས་པ་གནང་བས། རྟེན་འབྲེལ་གྱི་ལེགས་ཚོགས་དུ་མ་བྱུང་བ་ནས། ཆོས་སྡེའི་ས་ཡུལ་གང་དུ་གདབ་དགོངས་པ་གཏད་པའི་ཚེ། རྟག་བརྟན་གྱི་ས་ཡུལ་འདིའི་སྟེང་གི་ནམ་མཁའ་ལ། དཔལ་དུས་ཀྱི་འཁོར་ལོའི་དཀྱིལ་འཁོར་སངས་རྒྱས་དང་བྱང་ཆུབ་སེམས་དཔའ་མང་པོ་དང༌། ཨུ་ཙ་ལའི་ཐད་དུ་མཧཱ་ཀཱ་ཡ་ལྕམ་དྲལ་འཁོར་བཅས་ཀྱི་རྣམ་པ་དང་བཅས་པའི་གཟིགས་སྣང་བྱུང་པས། ཆོས་སྡེའི་ས་ཡུལ་ལུང་བསྟན་པར་དགོངས་ནས། ས་ཕྱོགས་དེ་ཉིད་བྱིན་གྱིས་བརླབས་པས། དེར་གནས་པའི་འབྱུང་པོ་རྣམས་ཀྱིས་ས་རྡོ་གང་དགོས་ཕུལ་ཞིང༌། ཀླུ་རྣམས་ཀྱིས་ཆུ་མིག་གསར་བ་དུ་མ་ཡང་ཕུལ་ཆུ་ཤིང་འཕེལ་རྒྱས་ཀྱིས་ལས་སྒྲུབ་པས། ཨར་པོ་བྱེད་པའི་དུས་སུ། ས་རྡོའི་རིགས་གང་དགོས་གཏེར་ལྟ་བུ་འཐོན་ཞིང༌། སྐྱེ་ཤིང་ཀྱང་ཤིན་ཏུ་ལེགས་པ་སྐྱེ་གྲགས་པ་སོགས་ཀུན་གྱི་མཐུན་སྣང་དུ་གྲུབ་པ་འདི་ག་ཡིན། གཞན་ཡང་སྲོག་ཆགས་གྲོག་སྦུར་སོགས་ཆེར་མི་སྣང་བས། ས་རྡོའི་བྱ་བ་


TNT17_Page_0516
[མ་དཔེ་གཟིགས་ན་འདིར་གནོན།]

སྡིག་དང་མ་འདྲེས་པ་དང་བཅས་ཉིན་མོ་མིའི་འགྲོ་བས་ལས་ལ་འབད་ཅིང༌། ནུབ་མོ་འབྱུང་པོ་རྣམས་ཀྱིས་ལས་ཀྱི་བྱ་བ་ལ་ཞུགས་པས་ཟིན་གྲུབ་ཀུན་གྱི་བློར་མི་ཤོངས་པ་ལྟར་དུ་གཙུག་ལག་ཁང་ཉི་ཤུ་རྩ་གྲངས། གྲྭ་ཁང་བརྒྱ་ཕྲག་ལྕགས་རི་དང་བཅས་པ། ནང་གི་རྟེན་གསུམ་སངས་རྒྱས་རབས་བདུན་སྐུ་ཚད་ཤིན་ཏུ་ཆེ་བ་གསེར་ཟངས་ལས་གྲུབ་པ། ཚེ་དཔག་མེད། སྒྲོལ་མ། ཡུམ་ཆེན་མོ། ཛམ་བྷ་ལ་སོགས་གསེར་ཟངས་ལས་གྲུབ་པའི་སྐུ་མི་ཚད་རེ་རྒྱན་ཕྲ་བཀོད་ཕུན་སུམ་ཚོགས་པ། དར་ཟབ་རིན་པོ་ཆེ་སྣ་ཚོགས་གསེར་ཟངས་ལས་ལྷག་པའི་དཔལ་འཁོར་ལོ་སྡོམ་པ་ཞལ་ཕྱག་ཡོངས་རྫོགས་སྐུ་ཚད་ཤིན་ཏུ་ཆེ་བ། བདེ་གཤེགས་མཆོད་རྟེན་བརྒྱད། དུས་འཁོར་ནས་བརྒྱུད་པའི་མཆོད་རྟེན་རྣམས་གསེར་ཟངས་ཕྲ་རྒྱན་རིན་ཆེན་སྣ་ཚོགས་བཀོད་པའི་ངོ་མཚར་མི་ཚད་ཙམ། རྒྱལ་བ་འོད་དཔག་མེད་ཐོག་ཚད་ཕྱེད་གཉིས་གསེར་ཟངས་ལ་གྲུབ་པ། ཇོ་ནང་དུ་ལྷ་ཁང་གསར་བཞེངས་གསུམ་ཙམ་ལ། གསེར་ཟངས་དང་འཇིམ་སྐུ་མང་པོ་དག་དང༌། ཁྱད་པར་བྱམས་ཆེན་ཐོག་ཚད་གཉིས་པ་གསེར་ཟངས་ལས་གྲུབ་པ། བཀའ་འབུམ་པུ་ཏི་ཉི་ཤུ་རྩ་གྲངས་གྱི་སྤར་ཡོངས་རྫོགས་དང་བཅས་པ། རྟེན་གསུམ་[དང་]ལྷ་རྫས་ཀྱིས་ལྷ་ཁང་ཐམས་ཅད་ཡོངས་སུ་གང་བ། ཐོག་ཐམས་ཅད་གོས་ཆེན་བཟང་སྒྲིགས་དང་བུམ་གདན་ལ་སོགས་ཀྱིས་


TNT17_Page_0517
[མ་དཔེ་གཟིགས་ན་འདིར་གནོན།]

གནམ་བརྒྱན་ལྕམ་དྲལ། མཐོང་པའི་གོ་སྐབས་མེད་པ། གོས་སྐུ་ལེགས་པ་བཅོ་བརྒྱད་ཙམ། བཀའ་བསྟན་བཅོས་འགྱུར་རོ་ཅོག་གི་གླེགས་བམ་ཡོངས་རྫོགས་གྲངས་མང་པོ། དགེ་འདུན་པ་སྟོང་ར་ཅན་ལ་ནར་ཕོགས། དཔལ་དུས་ཀྱི་འཁོར་ལོའི་གཙོ་བོར་གྱུར་པའི་རྒྱུད་སྡེ་རབ་འབྱམས་ཀྱི་རྡུལ་ཚོན་གྱི་དཀྱིལ་འཁོར་ལ་བརྟེན་ནས་སྒྲུབ་མཆོད་ཉིན་གྲངས་མང་པོ། གར་འཆམས་ཀྱི་ཆ་ལག་རྒྱན་གོས། རོལ་མོའི་ཚོགས་བརྒྱ་ཕྲག་མང་པོ་དང་བཅས་པ། ལོ་བཅུ་གསུམ་ཙམ་གྱི་ཁོག་ཏུ་གྲུབ་པ་རྣམས་སོ་སྐྱེའི་སྤྱོད་ཡུལ་དུ་མ་གྱུར་པ་ནི། ད་ལྟ་ཉིད་དུ་བདོག་པ་འདི་ལྟར་གདའ། དགུང་ལོ་ལྔ་བཅུ་རྩ་བདུན་ཐོག་ཡུམ་སྐུ་ནོངས་པར་གྱུར་པའི་དགོངས་རྫོགས་ལ་ཡང་རྟེན་བཞེངས་རྒྱ་ཆེ་བར་སྒྲུབས། དེ་དང་དུས་མཚུངས་པ་ཙམ་དུ་ཤུན་ཞབས་དྲུང་སྐུ་གྲིབ་ཀྱི་གཉེར་བབས་ཡོད་བཞིན། གྲུབ་མཐའ་གོ་ལོང་འཛིན་པ་བྱས་བྱུང་རུས་མེད་ཀྱི་མི་འགའ་རེའི་ཞུ་དབང་དུ་སོང་ནས། དགོངས་པ་དང་གནད་སྒོ་ལོག་པར་སོངས་པས། སྡེ་སྲིད་བཀའ་བཞིན་ཕྱག་མཛོད་ནས་རྟག་བརྟན་གདན་དྲངས་སྙུང་བ་སླར་འདས་པའི་སྐུ་བཤགས་པར། ཕྱག་མཛོད་ནས་བཀུར་བསྟི་ཆེ་བ་རང་མ་བྱུང་བ་འདྲ་ཟེར་གྱིན་ཡོན་འདུག ཞག་ཉེར་གཅིག་ཙམ་ནས་གནས་ཚུལ་སྟོན་པས། སྐུ་རྗེས་ལ་གཙུག་ལག་ཁང་གསར་


TNT17_Page_0518
[མ་དཔེ་གཟིགས་ན་འདིར་གནོན།]

བཞེངས། དགེ་འདུན་ཚོགས་ཆེན་ལ་ཡང་སྐུ་ཆས་གང་ཡོད་འགྱེད་དུ་གནང་ཞིང་སྐུ་གྲིབ་སྦྱོང་ཞིང་བཤགས་ཐབས་ཉིན་གྲངས་མང་པོ་ཐུགས་རྩོལ་གནང་བས། སྐུའི་སྐྱེ་གནས་ལོག་པར་མི་ལྷུང་བའི་མཚན་མ་གཟིགས། སྤྲེའུ་ལོའི་དགུན་སྟོད་གཞིས་ཁ་རྩེར་ཕེབས། སྡེ་སྲིད་ཀྱི་དགོངས་པ་བསྐང་བའི་བཀའ་ཆོས་ཀྱི་རིམ་པ་རྒྱ་ཆེར་གནང་སྐབས། ཞབས་ལ་སྐྲངས་འབུར་གྱི་རྣམ་པས་སྙུང་བའི་ཚུལ་དེས་སྡེ་སྲིད་ཀྱི་སྐུ་དོགས་ཀྱང་སངས་པ་འདུག་གསུངས། ངུར་སྨྲིག་སྒྲོལ་མས་ལུང་བསྟན་ལྟར་རྟག་བརྟན་དུ་ཕེབས་བཞུད་ཤར་བས། ཉིན་རེ་བཞིན་སྐུ་དར་སྐྱེད་ཆེ་བའི་ངོས། བྱ་ལོའི་མགོར་ཇོ་ནང་དུ་འཁྲིད་ཚུགས། དབུས་ཕྱོགས་ནས། རྨོག་ཅོག་པ་དཔོན་སློབ་རྟོགས་ལྡན་རྒྱ་བོད་དང་བཅས་པའི་ཞུ་བ་མང་པོ་དང༌། གཙང་ཕྱོགས་ཀྱི་བླ་མ་ཆེ་ཕྲ། ལ་སྟོད་ལྷོ་བྱང་གི་བླ་མ་གྲྭ་རིས། སྡེ་དཔོན་མི་མང་སྐྱ་བོ་ཕོ་མོ་འདུས་ཚོགས་ཤིན་ཏུ་ཆེར། ཆོས་དང་ཟང་ཟིང་གཉིས་ཀས་གྱ་ནོམ་པར་བཀའ་དྲིན་བསྩལ་ཞིང༌། སྦྱོར་དྲུག་མུན་མཚམས་དམ་པོའི་འཁྲིད་སྐྱོང་བ་ཡང་ལོ་འདི་ལས་མང་བ་སྔར་མ་བྱུང་ཞིང༌། ངོ་སྤྲོད་ཀྱི་དུས་གར་འཆམས་རྣམས་ཀྱང་སྔར་ལས་རྒྱས་པ་བྱུང་ཞིང༌། དེ་ནས་མི་རིང་པར་ཕྱག་མཛོད་པ་གསུངས་ཆམས་རས་པའི། ཧོར་ཟླ་གཉིས་པའི་ཉེར་བཞི་ལ་སྐུ་མ་འཚོའི་ཉེར་དྲུག་ལ་བསང་གཏོར་མང་ཇ་འགྱེད་བཅས་རྒྱས་པར་གནང༌། སྐུ་གདུང་


TNT17_Page_0519
[མ་དཔེ་གཟིགས་ན་འདིར་གནོན།]

གི་བྱ་བའི་ཉིན་ནམ་མཁའ་དྭངས་ཤིང་འཇའ་ཚོན་འཁྲིགས་པ་སོགས་ངོ་མཚར་གྱི་ལྟས་མང་དུ་བྱུང་ཞིང༌། ༧རྗེ་བཙུན་ཉིད་ཀྱི་ཞལ་ནས། འདི་པ་མི་འཆི་བའི་སྔོན་ལོ་བཅུ་ཙམ་ནས། དགེ་སྦྱོར་ལ་བརྩོན་པ་ཕུལ་ཕྱིན་བྱེད་ཀྱིན་ཡོད་པ་དང༌། གཙུག་ལག་ཁང་རྟེན་བཞེངས་སོགས་ཀྱང༌། རྒྱ་ཆེའི་ཁུར་བླངས་བརྩོལ་བ་བྱས་པས། ཟང་ཟིང་གི་དགེ་རྩ་རྗེས་སུ་སྒྲུབ་པ་ལ་མ་ལྟོས་པའི་སྐྱེས་གནས་ངན་པ་མི་ཡོང་བའི་གདེང་ཡོད། འོན་ཀྱང་རང་ཕྱོགས་ཀྱི་གྲུབ་མཐའ་ལ་འདོད་པའི་བློ་ནུས་ཆེ་ཞིང༌། རྟག་བརྟན་ཇོ་ནང་གཉིས་ཁོ་ན་བརྩལ་དུ་བཏོན་པས། ཀུན་གྱི་མིག་ཏུ་མི་ཤོངས་པ་ལྟ་བུའི་སྟོབས་རྒྱས་པས། གཞན་ཕྱོགས་འགའ་ཞིག་ལ་ནི་ཅུང་ཟད་གནོད་པ་ཡང་བྱུང་སྲིད། མ་གནོད་ཀྱང་ཆགས་སྡང་དང་དོགས་པའི་བློ་སྐྱེས་པའི་སྐུར་འདེབས་ལོག་སྨྲས་བྱེད་པ་དང༌། རང་ངོས་ཉམས་ལེན་དང༌། བརྩོམས་པ་དང་ཆོས་འཆད་པའི་ཆོས་ཀྱི་བྱ་བ་ཁོ་ནས་འདའ་བ་མ་གཏོགས། བྱ་བ་གང་ལ་ཡང་བློ་མ་འཇུག་ཅིང༌། སྐོང་རེངས་མི་བྱེད་པར་བརྟེན། ཁོང་པ་དབང་བཙན་ཏུ་སོང་བ་འདྲའི། སྦྱིན་བདག་ཆེ་ཕྲ་བླ་མས་གྲྭ་རིགས། ཚེ་འདིའི་འདོད་པ་དང་འདྲེས་པ་རྣམས་ལ་ནི། སེམས་འགྲས་དང་ལོག་ལྟས་རྒྱུས་བྱུང་རིགས་དང༌། མཇལ་འཕྲད་ཆོས་ཞུ་བྱེད་མཁན་ལ་ཡང༌། འདོད་པ་བཞིན་མ་བྱུང་སྙམ་པའི། སྔར་དབང་ཆོས་ཀྱི་འབྲེལ་


TNT17_Page_0520
[མ་དཔེ་གཟིགས་ན་འདིར་གནོན།]

བའི་སྐྱ་སེར་གྲགས་ཞན་མང་པོ་སྐུར་བའི་གཞི་བྱེད་པའི། འགྲོ་བ་དེ་དག་ཉེས་པ་ཆེན་པོར་འགྱུར་བ་འདྲ་སྙམ་པས། རྗེས་བསྡུར་ལ་དམིགས་པའི་དགེ་རྩ་རྒྱ་ཆེར་སྒྲུབ་གསུངས། མང་ཇ་འགྱེད་བཅས་སྒྲུབ་དཀྱིལ་ཞལ་འབྱེད་ཆོག་གྲྭ་རྟེན་བཞེངས་རྒྱ་ཆེ་བ་གནང་ཞིང༌། ༧རྗེ་བཙུན་ཉིད་ཀྱིས་མི་འཁྲུག་པའི་རྒོ་ནས་སྒྲིབ་སྦྱོངས་གནང་བ་སོགས་སྐུ་རྗེས་བསམ་ལས་འདས་པ་བསྒྲུབ་པའོ། །ཡང་དུས་དེར་བུ་ཆེན་དང་ཕྱག་གཡོན་ནང་མ་སྐུ་དྲུང་དུ་འཁོད་པ་རྣམས་ཀྱིས། རྗེ་བཙུན་ཉིད་ཀྱི་སྐུ་གསུང་ཐུགས་མཛད་པ་འཕྲིན་ལས་གང་ལ་ཡང་ལེགས་པར་བརྟགས་ན། རྒྱལ་བ་གཉིས་པ་ལྟ་བུ་འདི་ལ་སྦྱིན་བདག་འགའ་རེར་མི་འདོད་པ་ཐོག་ཏུ་བབས་པའི་ངན་ཁག་དང༌། སྐྱེ་བོ་འགའ་ཡང་གཞི་མེད་ལ་སྒྲོ་བཏགས་ཀྱི་བསྐུར་བ་ཡོད་པ་འདི་ཡང༌། ཕྱག་མཛོད་པའི་སྐྱོན་རང་ཡིན་ནམ་ཞུས་དུས། ལན་གསུངས་ལས། སྤྱིར་སྙིགས་མའི་དུས་འདིར་རྫོགས་པའི་སངས་རྒྱས་དངོས་སུ་བྱོན་ཀྱང༌། ཐམས་ཅད་མགུ་བ་དང་གུས་པ་བྱེད་པ་དཀའ། དགོས་སུ་མཐོན་པོར་མི་སྡང༌། ཧྲུལ་པོར་ཁྱི་སྡང་ཟེར་བའི་འཇིག་རྟེན་ཕལ་པའི་གཏམ་རྒྱུད་ལྟར་ཡིན། གཞན་གོང་དུ་སྨོས་པའི་རྒྱུ་མཚན་དེ་གོ་དགོས། ལར་སེམས་ཅན་རྣམས་ཀྱི་བདེ་སྡུག་སྔོན་ལས་གཉེན་པོས་མ་བཅོམ་ཞིང༌། འཕྲལ་གྱི་བྱེད་རྐྱེན་གཉིས་ཀ་འཛོམས་པའི་འབྲས་བུ་ནི། སངས་རྒྱས་སྟོང་གི་ཐུགས་རྗེ་སྤུངས་ཀྱང་བཟློག་པའི་ཡུལ་དུ་མི་འགྱུར་ཏེ། རྗེ་བཙུན་བྱམས་མགོན་གྱིས། ལྷ་ཡི་རྒྱལ་པོས་ཆར་ཕབས་ཀྱང༌། །ས་བོན་མི་རུང་མི་འཁྲུངས་ལྟར། སངས་རྒྱས་རྣམས་ནི་བྱོན་གྱུར་ཀྱང༌། །སྐལ་བ་མེད་པས་


TNT17_Page_0521
[མ་དཔེ་གཟིགས་ན་འདིར་གནོན།]

བཟང་མི་མྱོངས། །ཞེས་གསུངས་འདུག་པ། དཔེར་ན་རྒྱལ་དབང་ཀརྨ་པ་སངས་རྒྱས་དྲུག་པའི་སྤྲུལ་པ་ཡིན་ངེས་པ་ཡིན་ཀྱང༌། སྦྱིན་བདག་གི་ཐུ་བོ་སྐུ་རབ་པ་ཁུངས་མེད་དུ་སོང༌། འཇམ་དཔལ་གྱི་རྣམ་སྤྲུལ། དཔལ་ལྡན་ས་སྐྱའི་སྦྱིན་བདག་གི་གཙོ་བོ་སྡེ་སྲིད་ཡར་རྒྱབ་པར་ཡང་དེ་བཞིན། འཇམ་དབྱངས་ཀྱིས་རྗེས་སུ་བཟུང་ངེས་པ་རྒྱལ་བ་ཙོང་ཁ་པ་ཆེན་པོ་དང༌། འབྲོམ་སྟོན་རྒྱལ་བའི་འབྱུང་གནས་ཀྱི་རྣམ་འཕྲུལ་ཐམས་ཅད་པ་ཡབ་སྲས་ཀྱི་བསྟན་པའི་སྦྱིན་བདག་སྡེ་པ་དགའ་ལྡན་བར་ཡང་གཟིགས་དང༌། འཕགས་པ་འཇིག་རྟེན་དབང་ཕྱུག་མའི་གཟུགས་འཛིན་པ། གཙང་པ་རྒྱ་རས་པ་ཆེན་པོའི་རྣམ་སྤྲུལ་དང༌། བརྒྱུད་པ་རིམ་པར་བྱོན་པའི་བསྟན་པའི་སྦྱིན་བདག ལྷུན་པོ་རྩེ་བར་ཡང་གཟིགས་མཛོད། སྐྱེས་ཆེན་དམ་པ་དགེ་འདུན་འདུས་པ། རྣལ་འབྱོར་ཕོ་མོ་རྣམས་ལ་ཐུགས་རྗེ་དང་བྱིན་རླབས་མེད་པ་དག་ག་ལ་ཡིན་ཁོ་རང་རྣམས་ཀྱིས་ལས་མཐུ་བཙན་ལས་བྱུང་བ་ཡིན་མོད། རྣམ་པ་གཅིག་ཏུ་ན། དད་པ་ལ་འགྱུར་ལྡོག་ལོག་ལྟ་ཚབས་ཅན་གྱིས་དམ་ཉམས་བྱས་པས། མཐོང་ཆོས་ཀྱི་འབྲས་བུ་ཚེ་འདིར་སྨིན་པ་ཡང་ཡིན་སྲིད། འོན་ཀྱང་ཁོ་བོའི་རྣམ་ཐར་བྱ་བ་སྒྲུབ་ཚུལ་འདི་ལ། བློ་གྲོས་དང་ལྡན། དྲང་པོར་བརྗོད། ཡུན་དུ་བརྟགས་དཔྱད་བྱས་པ་རྣམས་ཀྱིས་བསྟན་པའི་བཞག་པ་དང༌། བསྟན་བཅོས་མཐོང་བ་


TNT17_Page_0522
[མ་དཔེ་གཟིགས་ན་འདིར་གནོན།]

རྣམས་ལ་ནི། ཁྱོད་རང་ཚོས་ཚིག་གི་སྒོ་ནས་དད་པ་སྐྱེད་མི་དགོས་རང་ཤུགས་ཀྱིས་དད་པ་ཡོང་ངེས། དེ་ལས་བཟློག་པའི་སྐྱ་སེར་བློ་གྲོས་དམན་ཞིང༌། ཆགས་སྡང་གིས་ཁོག་འཁྲུགས་པ་རྣམས་ལ་ནི། ངེད་ཀྱིས་ཤཱཀྱ་ཐུབ་པའི་ངོ་མཚར་གྱི་མཛད་པ་དང་མཚུངས་པ་ཞིག་མིག་ལམ་དུ་བསྟན་ཀྱང༌། ད་དུང་ཁོག་འཁྲུགས་ཏེ་ལོག་པར་སྨྲ་བ་ལས་གཞན་མི་འབྱུང༌། ལྷ་སྦྱིན་དང་ལེགས་སྐར་མུ་སྟེགས་སྟོན་པ་དྲུག་སོགས་ཀྱི་ངན་བརྗོད་དང༌། སློབ་དཔོན་པདྨའི་རྫུ་འཕྲུལ་ཡང་སྡིག་བློན་རྣམས་ཀྱིས་ལོག་པར་བལྟས་པའི་ལོ་རྒྱུས་ལ་རྟོགས་མཛོད། བསྟོད་བཀུར་རེ་བའི་མཛེས་ཆོས་གཞན་མགོ་བསྐོར་བའི་རྫུན་ཟོབ་ནི་ཁོ་བོས་ད་དུང་མི་བྱེད། འཇིག་རྟེན་རྨོངས་པ་རྨོངས་ཞེན་ཅན་ལ་ནི། སྤྱོད་ལམ་ངན་པ་བསྟན་ཀྱང་དད་པའི་གཞིར་འགྱུར། གྲུབ་མཐའ་འཛིན་པ་བློ་གྲོས་ཆུང་ཞིང༌། རང་ཕྱོགས་ལ་ཞེན་འཛིན་དམ་པོ་རྣམས་ནི། གཞན་ཕྱོགས་ཀྱི་ཡོན་ཏན་ལ་རྗེས་སུ་མི་འཇུག་ཅིང་ཡི་རང་མི་བྱེད། དཔེར་ན་བོན་དང་མུ་སྟེགས་སོགས་རང་རང་གི་ཕྱོགས་ཏེ་བཟང་པོར་འདོད་པའི་བཅོས་མིན་གྱི་བློ་རེས་ཡོད་པ་ཡིན། ཁྱེད་རང་རྣམས་སྒོ་གསུམ་ཆོས་དང་བསྟུན། ངའི་རྣམ་ཐར་སྐྱོངས། བདག་བསྟོད་སྨད་ཅི་བྱེད་པ་ལ་ཆགས་སྡང་མ་བྱེད། སྐྱེས་བུ་དམ་པ་སུ་དང་མཇལ་ཡང་གུས་འདུད་ཀྱིས། རང་ལུགས་མ་སྤོང༌། གཞན་ལ་མ་སྨོད། ཐེག་པ་གསུམ་པོ་རང་རང་གི་བསམ་སྦྱོར་


TNT17_Page_0523
[མ་དཔེ་གཟིགས་ན་འདིར་གནོན།]

སྒྲུབ་ཐབས་གོ་རིམ་ཤེས་པའི་བླང་དོར་མ་འཁྲུལ་པར་གྱིས། དེས་དཀོན་མཆོག་མི་ཁྲེལ་ཞིང་བདག་གི་བསམ་པ་རྫོགས་པ་ཡིན། གྲྭ་གླིང་ཕྱོགས་ཀྱི་བུ་ཆེན་ཐམས་ཅད་ལ། བཀའི་བསླབ་བྱ་མཐའ་དག་གནང་བ་ནི། དགུང་ལོ་ལྔ་བཅུ་ཕན་གྱི་རྣམ་པར་ཐར་པ་མདོར་བསྡུས་སུ་བརྗོད་པ། རྗེ་བཙུན་ཉིད་ཀྱི་གསུང་ལས་བྱུང་བའི་དོན་བཞིན་བཀོད་པའོ། །དེ་ལྟར་དམ་པ་འདི་ཉིད་ལ། བྱ་བཏང་བྱམས་པའི་མིང་ཅན་གྱིས། སྤྱིར་ཆོས་སྒོ་མཐའ་ཡས་པ་ཐོབ། ཁྱད་པར་དཔལ་ལྡན་ཤངས་པའི་ཆོས་སྐོར་དབང་ལུང་འཁྲིད་ཞལ་ཤེས་སུ་རླུང་གནད་འཁྲུལ་འཁོར་སོགས་ལག་ལེན་མཐའ་རྒྱས་ཞུས་པ་ཡིན་ཅིང༌། གཞན་ཡང་རྗེ་འདི་ཉིད་ཀྱི་ཐུགས་སྲས་དམ་པ་ཐོན་མིའི་རིས་ཡར་རྒྱབ་ཞལ་ངོར་འཁྲུངས་པའི་བླ་ཆེན་ཀུན་དགའ་བསོད་ནམས་ལ་ཡང་ཡོངས་རྫོགས་ཐོབ་པས་སོ། ༈ ཨོཾ་སྭཱ་སྟི། ལྷར་བཅས་འགྲོ་བའི་སྐྱབས་ཅིག་ཤཱཀྱའི་སྲས། །གཽ་ཏམ་རྒྱལ་བའི་བསྟན་པ་དར་བ་དང༌། །འགྲོ་ཀུན་སྡུག་བསྔལ་རྣམ་གསུམ་དག་པའི་ཕྱིར། །དཀོན་མཆོག་གསུམ་དང་བླ་མའི་ཞབས་ལ་འདུད། །རྒྱལ་ཀུན་མཁྱེན་བརྩེའི་ནུས་པའི་ཆུ་གཏེར་ལས། །ལེགས་འོངས་ངུར་སྨྲིག་འཛིན་པ་དཀྱིལ་འཁོར་གཙོ། །མཐུ་བཙན་བླ་མ་བྱམས་པའི་མཚན་ཅན་གྱིས། །ངོ་མཚར་མཛད་པའི་རྣམ་པར་རྒྱ་མཚོ་ལས། །


TNT17_Page_0524
[མ་དཔེ་གཟིགས་ན་འདིར་གནོན།]

ཆུ་ཐིག་ཙམ་ཞིག་འགྲོ་ལ་ཕན་ཕྱིར་དང༌། །གདུང་རྟེན་རྣམ་རྒྱལ་མཆོད་པའི་རྟེན་མཆོག་གི དཀར་ཆག་མདོར་བསྡུས་ཙམ་ཞིག་འདིར་བརྗོད་བྱ། །བློ་གྲོས་དམན་ཞིང་སྦྱངས་པའི་སྟོབས་ཞན་པའི། །སྙན་ངག་སྦྱོར་བ་མཁས་པའི་ཡུལ་སྤངས་ནས། །བློ་དམན་གོ་བདེའི་ཚུལ་འདི་བརྗོད་པ་ལ། །ཉེས་སྐྱོན་འཁྲུལ་ན་མཁས་པས་བཟོད་པར་བཞེས། །དེ་ཡང༌། བླ་མ་དམ་པ་འདི་ཉིད་སྐུ་ཚེ་སྔོན་རབས་ནས་སངས་རྒྱས་ཀྱི་བསྟན་པར་བྱ་བ་ཆེན་པོ་མཛད་པའི་རྟེན་འབྲེལ་དང༌། སྨོན་ལམ་གྱི་མཐུས། སྐུ་ཚེ་འདི་ཉིད་ལ་ཡང་བསྟན་པའི་བྱ་བ་རླབས་ཆེན་འབྱུང་བའི་ཕྱིར། ཡབ་ཡུམ་ལ་གཟིགས་པ་ནི། ཡབ་མཐུའི་རྒྱལ་རིགས། རྗེ་བཙུན་ཐམས་ཅད་མཁྱེན་པ་རྡོ་རྗེ་གདན་པ་ཆེན་པོ་ཀུན་དགའ་རྣམ་རྒྱལ་དཔལ་བཟང་པོའི་དབོན་པོ་ཆོས་རྒྱལ་ཚེ་འཕེལ་བསོད་ནམས་རྒྱལ་པོ་དང༌། ཡུམ་ཡེ་ཤེས་ཀྱི་མཁའ་འགྲོ་དངོས་ཀྱི་མཚན་རྟགས་ཅན་དགུང་ལོ་སུམ་ཅུ་རྩ་གཅིག་གི་སྟེང༌། རྗེ་ཉིད་ལྷུམས་སུ་ཞུགས་པ་དང༌། ཡུམ་གྱི་མནལ་ལམ་དུ་གསེར་གྱི་མཆོད་རྟེན་འོད་ཟེར་ཕྱོགས་བཅུར་འཕྲོ་བ་སྐྱེ་འགྲོ་ཀུན་གྱིས་ཕྱག་མཆོད་བྱེད་པ་ཞིག་སྐུ་ལུས་ལ་ཐིམ་པ་རྨིས། མནལ་སད་པ་དང་སྐུ་ལུས་བདེ་ཉམས་དང་ལྡན་པར་གྱུར་ཏོ། །མངལ་གྱི་མཛད་པ་ཡོངས་སུ་རྫོགས་ནས། ཤིང་ཕོ་བྱི་བ་ས་ག་ཟླ་བའི་ཚེས་བརྒྱད་ཡུམ་གསོ་སྦྱོང་ལ་གནས་པའི་དུས་


TNT17_Page_0525
[མ་དཔེ་གཟིགས་ན་འདིར་གནོན།]

ངོ་མཚར་བའི་ལྟས་དང་བཅས་སྐུ་བལྟམས་པ་ནི། སྐུའི་ལྟེ་ཐག་སྒོམ་ཐག་གི་ཚུལ་དུ་དཀྲིས་ཤིང༌། ཞལ་འཛུམ་པ་མཛད་པའི་བཞིན་རས་དང་བཅས་པས། ཡབ་ཡུམ་ཀུན་དགྱེས་པ་ཆེན་པོས་བཙས་སྟོན་རྒྱ་ཆེན་པོ་མཛད། མཚན་གནོད་སྦྱིན་རྡོ་རྗེ་དབང་ཕྱུག་ཏུ་གསོལ། དགུང་ལོ་ང་དྲུག་ནས་གཞོན་ནུ་ཕལ་པའི་རྗེས་སུ་མི་འཇུག་པར། དཀོན་མཆོག་གསུམ་གྱི་རྟེན་ལ་ཕྱག་མཆོད། སྲོག་ཆགས་རྣམས་ལ་སྙིང་རྗེ་ཚུལ་དང༌། སྐུའི་རྩེད་རོགས་བྱས་པ་རྣམས་ཆོས་ཉན་གྱི་ཚུལ་དུ་བཞག་ནས་རྗེ་ཉིད་རང་ས་སྟེགས་དང༌། རྡོ་ལེབ་ཇི་ལྟར་འོས་པ་རྣམས་ཀྱི་སྟེང་ནས་ཆོས་འཆད་ཀྱི་ཚུལ་མཛད་པ་དང༌། དགུང་ལོ་བཅུ་གཅིག་ལ། རྗེ་བླ་མའི་གདན་ས་རྡོ་རྗེ་གདན་གྱི་ཆོས་གྲྭ་ཆེན་པོར་ཕེབས། རྗེ་བཙུན་ཀུན་དགའ་རྒྱལ་མཚན་པ་ཆེན་པོའི་དྲུང་དུ། སངས་རྒྱས་བསྟན་པའི་སྒོར་འཇུག་པའི་སྐྱབས་གསུམ་འཛིན་པའི་དགེ་བསྙེན་དུ་མཛད། མཚན་ངག་དབང་ཀུན་དགའ་བསོད་ནམས་དཔལ་བཟང་པོར་གསོལ། དགེ་འདུན་ཚོགས་ཆེན་དུ་ཆོས་སྟོན་རྒྱས་པར་བཤམས། དེ་ནས་བཟུངས་ཏེ་སྒྲུབ་དཀྱིལ་གར་ཐིག་དབྱངས་གསུམ་གྱི་གསན་སྦྱོངས་མཛད་པས་བསྙེལ་གསོས་ཀྱི་ཚུལ་ཙམ་ནས་ཐུགས་སུ་ཆུད་དེ། རྡོ་རྗེ་གུར་གྱི་གར་འཆམས་པ་ཀུན་གྱི་དབུས་སུ་ཕེབས་དུས་སྐུའི་རྣམ་འགྱུར་དང་སྤོབ་པའི་གཟེངས་མཐོ་བ་སོགས་ངོ་མཚར་བར་གྱུར་ཏོ། །


TNT17_Page_0526
[མ་དཔེ་གཟིགས་ན་འདིར་གནོན།]

དགུང་ལོ་བཅོ་ལྔ་བཞེས་དུས། འདྲེན་མཆོག་ཤཱཀྱ་ཀུན་དགས་མཁན་པོ་མཛད། ལས་ཁ་སྐོང་མ་ཚང་བ་མེད་པའི་དྲུང་དུ། ཉེས་མེད་ཕུན་ཚོགས་ཀྱི་རབ་ཏུ་བྱུང་བ་ནོད་པའི་ངུར་སྨིགས་རྒྱན་མཆོག་གིས་མཛེས་པར་མཛད། དགུང་ལོ་ཉེར་བདུན་པའི་སྟེང་དུ་གཙང་ཕྱོགས་སུ་ཕྱགས་ཕེབས་ཏེ། རྗེ་བཙུན་ས་སྐྱ་པཎྜི་ཏས་ཁ་ཆེ་པཎ་ཆེན་ལ་གསན་པས། སྙེན་རྫོགས་ཀྱི་སྡོམས་རྒྱུན་ལ་གཟིགས་པས་དགེ་བཅུ་མཁན་པོར་བཞུགས་པ་མཁྱེན་ནས། དེའི་དྲུང་དུ། ལས་ཁ་སྐོངས་དང་བཅས་བསྙེན་པར་རྫོགས་པ་བཞེས། དེ་མཐུན་གདན་ས་ཆེན་པོ། དཔལ་ལྡན་ས་སྐྱ་མཇལ་བ་གནང༌། གདུངས་བརྒྱུད་ཞལ་ངོས་ནས་བཀུར་བསྟི་ཕུལ་དུ་ཕྱིན་པ་གནང་ཞིང༌། ས་སྐྱ་པའི་བསྟན་པ་རིན་པོ་ཆེར་བྱ་བ་རླབས་ཆེན་འབྱུང་བའི་རྟེན་འབྲེལ་གྱི་མཚན་མ་ངོ་མཚར་བ་དཔག་ཏུ་མེད་པ་བྱུང་ཞིང༌། ཁའུ་བྲག་རྫོང་མཇལ་བར་ཐེག་པའི་དུས། དེའི་ཆོ་འཕྲུལ་གློ་བུར་དུ་རྒྱས་ཤིང་དཔལ་མགོན་ཉིད་ཀྱིས་འཕྲིན་ལས་སྒྲུབ་ངེས་པའི་རྟེན་འབྲེལ་དུ་མ་ཡང་གཟིགས་སོ། །རྡོ་རྗེ་གདན་དུ་འདྲེན་མཆོག་ཤཱཀྱ་ཀུན་དགའ། པཎ་ཆེན་བདེ་བའི་རྡོ་རྗེ། སྔགས་འཆང་ཚེ་དབང་བཀྲ་ཤིས། རྡོ་རྗེ་འཛིན་པ་ཡེ་ཤེས་དབང་པོ་སོགས་བླ་མ་དེ་དག་རྗེ་འདི་ཉིད་ཀྱི་དབུ་བླར་མངའ་གསོལ་བའི་དྲུང་དུ། གསུང་ངག་རིན་པོ་ཆེ་རྫོང་ལུགས་ཀྱི་དབང་འཁྲིད་གཞུང་བཤད་ཀྱི་གཙོས། རྗེ་ཐམས་ཅད་མཁྱེན་པ་ཆེན་པོ་ས་སྐྱ་པ་ནས་བརྒྱུད་


TNT17_Page_0527
[མ་དཔེ་གཟིགས་ན་འདིར་གནོན།]

པའི་གདམས་པ་མཐའ་དག་མདོ་རྒྱུད་བསྟན་བཅོས་ཀྱི་ལུང་རྣམས་དང༌། ཁྱད་པར་ཆོས་སྐྱོང་གུར་ཞལ་གྱི་སྒྲུབ་སྐོར་མ་ཚང་བ་མེད་པ་གསན་པ་སོགས་གསན་ཡིག་རྒྱ་མཚོར་གསལ་ལོ། །རེ་ཞིག་འཇམ་དཔལ་དཀར་པོའི་བསྙེན་སྒྲུབ་ཞིག་གནང་དུས། ཐོ་རངས་ཐུགས་དམ་ཐུན་གྱི་སྒང་དུ། མནལ་གྱི་རྣམ་པ་ཞིག་བྱུང་བའི་མནལ་ལམ་དུ། མི་དཀར་པོ་ཞིག་གིས་ཤེལ་ལས་གྲུབ་པའི་རལ་གྲི་ཞིག་ཕྱག་ཏུ་ཕུལ་བ། ལྗགས་ཐོག་ཏུ་གླན་པས་འཁྱག་པ་ཞུ་བ་ལྟར་དུ་གྱུར་པའི་རོ་སྦྲང་རྩི་ལས་ཁྱད་པར་དུ་འཕགས་པ་བྱུང་མ་ཐག་མནལ་སད་པའི་དུས་ཀྱང་མི་དཀར་པོ་དེ་འཛུམ་ཆེ་རེ་འདུག་པ་ཞིག་གཟིགས་ཤིང༌། གཞན་ཡང་ཡི་དམ་ཆོས་སྐྱོང་གི་བསྙེན་སྒྲུབ་གང་དང་གང་གནང་བའི་དུས་ཐམས་ཅད་དུ་དེ་དང་དེའི་ཞལ་གཟིགས་ཀྱི་མཚན་མ་བརྗོད་ཀྱིས་མི་ལང་པ་བྱུང་འདུག་ནའང༌། ཆོས་བརྒྱད་ལས་ཐུགས་ཟློག་པ་དང༌། བློ་དམན་པ་རྣམས་ལོག་རྟོག་གིས་ཉེས་པར་གཟིགས་ནས། ཤིན་ཏུ་གསང་བར་མཛད་པའོ། །འཇམ་དཔལ་གྱིས་རྗེས་སུ་བཟུང་བའི་མཚན་མ་དེ་ནས་བརྩམས། ཤེས་བྱའི་གནས་ཐམས་ཅད་ལ་ཐོགས་པ་མེད་པར་གྱུར་ཏོ། །ཆོས་སྡེ་ཆེན་པོ་འདུས་པའི་དབུས་སུ་དཔལ་འཁོར་ལོ་བདེ་མཆོག་མཁའ་འགྲོ་རྒྱ་མཚོ་སོགས་རྡོ་རྗེ་སློབ་དཔོན་གནང་བར་གསུང་ཚིག་གི་བརྗོད་པ་གཙང་ཞིང༌། བློ་གྲོས་ཀྱི་སྤོབས་པའི་ནུས་པས། ཀུན་ངོ་མཚར་


TNT17_Page_0528
[མ་དཔེ་གཟིགས་ན་འདིར་གནོན།]

བའི་གནས་སུ་གྱུར་ཏོ། །དེ་ནས་ལྷ་གཟུགས་མི་དབང་ཆེན་པོའི་གསུང་གི་གནང་པས། རྒྱ་སྟོན་པ་ཕྱིངས་རུ་བ་ཆེན་པོའི་གནས་གཞི་སྙེ་ཐང་བདེ་བ་ཅན་གྱི་འདུས་པའི་གཙུག་རྒྱན་དུ་སེང་གེའི་ཁྲི་ལ་འཁོད་པར་མཛད། དེ་ནས་མི་རིང་པར་རྗེ་བཙུན་བླ་མ་དམ་པའི་དབེན་གནས་ཆོས་རྫོང་རྡོ་རྗེའི་ཕོ་བྲང་དང༌། བདེ་མཆོག་གི་སྒྲུབ་གནས་ཀྱང་ཞལ་འཛིན་གནང་བ་དང༌། དེ་ནས་ལྷར་བཅས་འགྲོ་བ་ཀུན་གྱི་སྐྱབས་གནས་དམ་པར་གྱུར་པ་རྗེ་བཙུན་དམ་པ་ཀུན་དགའ་སྙིང་པོ་བཀྲ་ཤིས་རྒྱལ་མཚན་དཔལ་བཟང་པོའི་ཞབས་དྲུང་དུ་འདུད་པར་མཛད། དཔལ་ལྡན་ས་སྐྱ་པའི་གདམས་པ། ཤངས་ལུགས་སོགས་ཀྱིས་དབུ་མཛད་གདམས་པ་མ་ཚངས་བ་མེད་པ་མཐའ་དག་བུམ་པ་གང་འབྱོའི་ཚུལ་དུ་གསན། ཁྱད་པར་ས་ཤངས་གཉིས་ཀྱི་བསྟན་པའི་འཁུར་ཆེན་པོར་མངའ་གསོལ། མགོན་པོ་ཏཀྴད་ཀྱི་རྗེས་གནང་ཞིག་གནང་སྐབས། ཐུགས་ཉམས་སུ་མགོན་པོའི་སྤྲུལ་པ་ཨ་ཙ་རའི་ཆ་བྱད་ཅན་གཉིས་ཀྱི་ཕྱག་ཏུ་མགོན་པོའི་ཕྱག་མཚན་ཁ་ཊྭཱཾ་རྩེ་གསུམ་ཞིག་ཕུལ་བ་སོགས་ལྟས་དུ་མ་བྱུང་ཞིང༌། ཕྱིས་རྗེས་གནང་སྩོལ་བའི་དུས་ཕྱག་མཚན་གཏོད་དུས་ཀྱང་དེ་ཀ་གནང་བའི་བཀའ་བབས་ལུང་བསྟན་རྒྱས་པར་བསྩལ་ཏོ། །གདམས་པའི་ཆུ་བོ་མ་ཚང་བ་མེད་པ་གསན་པ་སོགས་ནི་གསན་ཡིག་རྒྱ་མཚོ་ནང་བལྟ་བར་བྱའོ། །མི་བརྗེད་པའི་གཟུངས་ལ་དབང་འབྱོར་བས། སློབ་མ་རྗེས་


TNT17_Page_0529
[མ་དཔེ་གཟིགས་ན་འདིར་གནོན།]

འཛིན་གྱི་དུས་མཐའ་དག་རྣམས་སུ་སྒྲུབ་དཀྱིལ་གང་ལ་གསན་སྦྱོངས་གནང་ཡང༌། ངལ་གསོས་ཙམ་ལས་མི་དགོས་པའི་མཁྱེན་པ་དང༌། སྐྱེ་འགྲོ་ཀུན་ལ་ཐུགས་བརྩེའི་སྙིང་རྗེ་ཀུན་ནས་བསླངས་པའི་བྱང་སེམས་གཉིས་དང་མ་བྲལ་བ་དང༌། །ལོག་ལྟ་ཅན་ཅི་རིགས་ཀྱིས་ཞབས་ཏོག་འགྲན་པ་དང་ཐུགས་དཀྲུགས་ཞུས། རྗེ་ཉིད་ནི་ཁྲོ་བ་མི་མངའ་ཡང༌། བཀའ་བསྲུང་རྣམས་བྲན་མཁོལ་གྱི་ནུས་པས། མངོན་སྤྱོད་ཀྱི་ལས་སྣ་ཚོགས་རྟགས་མཚན་མངོན་སུམ་དུ་འབྱུང་བ་ཀུན་གྱི་རྣའི་བུ་གར་དབྱར་རྔ་ལྟར་གསལ་བས། མཐུ་སྟོབས་ཀྱི་ནུས་པས་ས་གསུམ་གཡོ་བར་མཛད་ཅིང༌། མདོར་ན་མཁྱེན་བརྩེ་ནུས་གསུམ་གྱི་མངའ་བདག་རྒྱལ་བ་ཉིད་དང་དབྱེར་མ་མཆིས་སོ། །དེ་ནས་ཡར་རྒྱབ་ཆོས་ཀྱི་རྒྱལ་པོས་ཀྱང༌། སྔར་ཞལ་ངོས་སྐུ་གཟོས་ལས་མི་གནང་བ་ཞིག་ཡིན་ཏེ། ཕྱིས་དཔལ་ལྡན་བླ་མ་འདི་ཉིད་ཀྱི་མཛད་པ་ངོ་མཚར་ལ་བརྟེན་ནས། ཐུགས་དད་ཀྱིས་སྤུ་ལོང་རབ་ཏུ་གཡོས་ཏེ། དབང་བསྐུར་རྗེས་གནང་གི་རིམ་པ་མཐའ་དག་གནང་ཞིང༌། རྒྱལ་གླིང་དུས་རིམ་ཆེན་པོས་རྡོ་རྗེ་སློབ་དཔོན་ཉིད་དུ་མངའ་གསོལ། ལུགས་གཉིས་ཀའི་བཀུར་བསྟི་མངོན་པར་མཐོ་བ་སོགས་ནས། གྲྭ་ཐང་གནས་སྙིང་དུ་རྒྱལ་ཁྲིམས་ཀྱི་གཡོར་བཟོ་ཆེ་བར་བྱུང་བས། གདན་ས་ན་རིམ་ལས་རྗེ་འདི་ཉིད་བཀའ་དྲིན་ལྷག་པར་ཆེ་བ་སོགས་དང༌། ལྷ་གཟུགས་གདུང་བརྒྱུད་གོང་དཀར་


TNT17_Page_0530
[མ་དཔེ་གཟིགས་ན་འདིར་གནོན།]

ཞབས་དྲུང་ནས་ཀྱང༌། ཐུབ་པ་གནས་བཅུའི་སྐུ་སོགས་ཀྱི་རྟེན་བཞེངས་མཛད་པའི། རབ་གནས་ཀྱི་རྡོ་རྗེ་སློབ་དཔོན་དུ་བོས་པ་མང་དག་ཞིག་ཡོད་ནའང༌། རྗེ་འདི་ཉིད་ཀྱི་ངོ་མཚར་མཛད་པ་ལྟ་བུ་གང་དུ་ཡང་མ་རྙེད་པས་ཐུགས་དད་ཀྱི་སྤུ་ལོང་རབ་ཏུ་གཡོས་ཏེ། གཙུག་གི་ནོར་བུ་ལྟ་བུར་སྤྱན་དྲངས་བསྙེན་བཀུར་གྱི་རིམ་པ་ཡང་རྒྱས་པར་ཞུས་པའི་དུས། ཡོན་བདག་བསྒོ་ཞིང་ཤིས་བརྗོད་ཀྱི་དུས་སུ། རབ་གནས་བཟང་པོ་དྲུག་ལས་འཕྲོས་པའི་བཤད་པ་ཧྲུག་ཙམ་གནང་བས་མེ་ཏོག་གི་ཆར་ལ་སོགས་པ་དཀར་གསལ་སོགས་ཀྱིས་ཕྱི་ནས་བྱུང་སྟེ་རྟེན་དྲུང་དུ་ཡལ་ནས་འགྲོ་བ་དང༌། དྲི་བཟང་པོ་འབྱུང་བ་དང༌། ཁྱད་པར་རྗེ་འདི་ཉིད་ཀྱི་དབུ་གཙུག་གི་ཐད་ཀར་བར་སྣང་དུ་འཇའ་ཚོན་སྣ་ལྔ་ཤིན་ཏུ་མཛེས་པ་ཞིག་བྱུང་སྟེ་རྟགས་བསམ་གྱིས་མི་ཁྱབ་པ་བྱུང་ཞིང༌། མི་དབང་དཔོན་སློབ་ཀུན་སྔར་གྱི་སྙན་པ་དང་མཐུན་པའི་རྟགས་མཚན་ལ་བརྟེན་ནས། ཐུགས་དད་རབ་ཏུ་གཡོས་པར་གྱུར་ནས། གསུངས་ཆོས་ཀྱི་འབྲེལ་ཞུའི་སྙན་དབང་གསོལ་ཏེ་ཡོད་ཀྱང༌། མཆོད་ཡོན་རྟེན་འབྲེལ་སྟེས་དབང་གིས་དེ་བར་དུ་ལུས་པ་ཞིག་བྱུང་རུང༌། མི་དབང་དཔོན་སློབ་རྣམས་ནི་རྗེ་འདི་ཉིད་ཀྱི་སྐུ་བསྟོད་ཤོ་ལོ་ཀ་གཅིག་མ་འདི་སོགས་ལ་གང་བརྩོན་མཛད་དོ། །དེ་ནས་ཕག་ལོ་ཟླ་བ་བཅུ་པར། རྗེ་བླ་མའི་གདན་ས། རྡོ་རྗེ་གདན་གྱི་ཆོས་གྲྭ་ཆེན་པོ་ས་གསུམ་གྱི་འགྲན་ཟླ་དང་བྲལ་བའི་


TNT17_Page_0531
[མ་དཔེ་གཟིགས་ན་འདིར་གནོན།]

སྤྲུལ་པའི་གཙུག་ལག་ཁང་ཆེན་པོར། སྤྱི་བོ་ནས་དགེ་འདུན་འདུས་པ་ཆེན་པོའི་གཙུག་རྒྱན་དུ་སྤྱན་དྲངས་ཏེ། ཆོས་ཀྱི་རྗེ་ཐམས་ཅད་མཁྱེན་པ་རྡོ་རྗེ་གདན་ཆེན་པོའྀ་མི་འཇིགས་པའི་ཁྲི་སྟེངས་སུ་ཕེབས་ཏེ། གཙོ་བོར་ས་སྐྱའི་བཀའ་འབུམ་ལྗགས་ལུང་དང༌། ནཻ་གུ་ཆོས་དྲུག་ཕྱག་ཆེན་སྙན་བརྒྱུད་དང་བཅས་པ་གནང་དུས་ནཻ་གུ་ཆོས་དྲུག་ལ་ཉམས་མྱོང་བཟང་པོ་མང་དུ་བྱུང༌། བདེ་མཆོག་མཧཱ་མ་ཡ་སོགས་ཀྱི་དབང་འཁྲིད་མང་དུ་གནང་དུས་ཚོགས་ཆེན་དུ་མང་ཇ་འགྱེད་བཅས་རྒྱས་པར་མཛད་དེ། ཆོས་དང་ཟང་ཟིང་གཉིས་ཀས་དགེ་འདུན་པ་རྣམས་ཐུགས་རྒྱུད་ཚིམ་པར་མཛད་དེ། སྡེ་སྲིད་གོང་དཀར་ཞབས་དྲུང་ནས་ཕོ་བྲང་ཆེན་པོར་ཆིབས་བསུས་མཛད་དེ། བཀུར་བསྟི་ཕུན་སུམ་ཚོགས་པར་མཛད། གཞན་ཡང་ལྷོ་བྱང་གི་སྡེ་རིགས་ཆེ་ཕྲ་དང་སྐྱེ་འགྲོ་ཀུན་གྱིས་གུས་པ་ཆེན་པོར་གྱུར་ཏོ། །ས་དཀར་རྙིང་གསུམ་གྱི་བླ་མ་མང་དག་ཕྱོགས་བཅུ་ནས་འདོད་ཆོས་ཞུ་རུ་བྱོན་པ་རྣམས་ལ། རྒྱུན་གྱི་འཚོ་བ་དང་གནང་སྦྱིན་གྱི་རིམ་པ་སོ་སོའི་འདོད་བློ་ཚིམས་པ་སོགས། མདོར་ན་ཆོས་དང་ཟང་ཟིང་གཉིས་ཀའི་སྦྱིན་པ་རྒྱ་ཆེར་མཛད་དོ། །དེ་ནས་ཞིང་འདིར་སྐུ་སྐྱེ་བ་དེ་ཉིས་ཀྱི་གདུལ་བྱ་དེ་ཙམ་ལས་མེད་པར་དགོངས་ཏེ་སྐུ་ལ་བསྙེལ་ཟུག་མེད་ཀྱང་ཅུང་ཟད་བསྙུང་བའི་ཚུལ་བསྟན། གྲྭ་ཐང་དུ་ཕེབས། དུས་རིམ་སོགས་སྔར་བས་རྒྱས་པའི་ཞལ་


TNT17_Page_0532
[མ་དཔེ་གཟིགས་ན་འདིར་གནོན།]

བཀོད་དང༌། སྐུ་ཆས་གང་ཡོད་ཇ་མར་ཐེབས་པའི་ཕྱག་གཡོག་རྗེས་འཇུག་རྣམས་བྱེད་བདེ་བའི་བཀའ་ཁྱབ་དང་བཅས། བྱ་ཡི་ལོ་ཟླ་བ་བཞི་པའི་ཟླ་མགོར། གསེར་ཁང་གཞིས་ཀར་སྐུ་བསྟེན། གཞིས་ཀར་ཞལ་ངོ་རྣམས་ལ་དབང་བཀའ་འདོད་ཆོས་ཚིམས་པར་གནང༌། བྱང་རྭ་བསྒྲེང་དུ་ཕེབས་བཞེད། ཆོས་རྗེ་རྨོག་ལྕོག་པ་དང་སློབ་དཔོན་གསེར་ཁང་ཞལ་ངོ་གཉིས་དང་བཅས་ལྷན་དུ་ཡབ་ཐུ་ར་ཚག་དགོན་པར། པཎ་ཆེན་ནཱ་རོ་པའི་ཐུགས་དམ་རྗེ་བཙུན་རྡོ་རྗེ་རྣལ་འབྱོར་མར་ཕྱག་མཆོད་རྒྱས་པར་གནང་བས་རྡོ་རྗེ་རྣལ་འབྱོར་མའི་སྐུ་དེ་ཉིད་ཀྱིས་གསུང་འབྱོན་ལུང་བསྟན་པ་བཞིན། རྭ་བསྒྲེང་དུ་ཕེབས་བཞེད་བཤོལ། སླར་སྙེ་ཐང་བདེ་བ་ཅན་བླ་བྲང་ཡང་དགོན་དུ། ཞིང་གཞན་དུ་གཤེགས་པའི་དགོངས་པས། ཐུགས་དམ་སྤྲོས་བཅས་ཀྱི་རིམ་པ་བསྐྱུངས་ནས། བྱང་ཆུབ་སེམས་གཉིས་བདག་གཞན་བརྗེ་བའི་གཏོང་ལེན་དང༌། གནས་ལུགས་ཕྱག་རྒྱ་ཆེན་པོའི་ངང་དུ་མཉམ་པར་འཇོག་པར་བརྩོན་པའི་ཚུལ་མཛད། ཕ་བླ་མ་རྨོག་ལྕོག་པ། སྦྱིན་བདག་གསེར་ཁང་ནང་སོ། ཁར་རྔ་ནང་སོ་སྐུ་དྲུང་དུ་བཅར་བཞུགས་ཡོད་པ་རྣམས་ལ་ཡང༌། ཐུགས་དམ་རིམ་པ་ཇི་ལྟར་ཡོད་ཚུལ་དང༌། ཁྱད་པར་བླ་མ་རྨོག་ལྕོག་པར་བྱིན་རླབས་འཇུག་པས་སྙུང་གཡོག་བགྱིད་པ་དང༌། སྐུ་འདས་ཀྱི་བྱ་བ་བགྱིད་ལུགས་བརྩོན་པར་བྱས་ནས། སྐྱེ་བ་ཀུན་ཏུ་འདུ་


TNT17_Page_0533
[མ་དཔེ་གཟིགས་ན་འདིར་གནོན།]

འབྲལ་མི་ཡོང་གསུངས་པའི། བཀའ་བསྩལ་ལུང་བསྟན་བསླབ་བྱ་མང་དུ་གནང་བའི་མཐར། ཟླ་བ་དེ་ཀའི་ཚེས་བཅོ་ལྔའི་ཐོ་རངས་ལ། ཞབས་གཡོན་པའི་མཐེ་བོང་གི་རྩེ་ནས་བདེ་ཉམས་ཤིན་ཏུ་ཆེ་བ་ཞིག་ཏུ་གྱུར། བདེ་ཆེན་དེ་ཉིད་རྒྱ་ཆེར་འཕེལ་ཏེ་སྐུ་ལུས་ཐམས་ཅད་བདེ་བས་ཁྱབ་ཅིང་རྩ་མདུད་ཐམས་ཅད་གྲོལ་བས། ཟུང་འཇུག་གི་རྣམ་པས་ཐུགས་སྣང་ཐམས་ཅད་ཡེ་ཤེས་སུ་ཤར། ནམ་ལང་པ་དང༌། རྨོག་ལྕོག་བླ་མ་འབོད་པ་གནང་ནས་ཚུལ་དེ་རྒྱས་པར་གསུངས་པས་བླ་མས་བརྟན་བཞུགས་གསོལ་བ་བཏབས་པས། ད་རེས་ནད་འདིའི་ངེས་པར་འཆི། མཐོང་ལམ་གྱི་ཡེ་ཤེས་དང་འདྲ་བའི་བདེ་སྟོང་ཁོ་ནར་གནས། ལག་གཡོག་བསམ་ཅན་བླང་དོར་བྱེད་པའི་མི་རིགས་མི་འདུག་པས། དགོན་སོ་སོའི་རྩིས་སྤྲོས་སྔར་ཡོད་གཙང་སྤྲོད་དང༌། སྤྱི་རྫས་རྗེས་འཇོག་འདི་ལྟར་གྱིས་ཞེས། རང་ནོར་སིལ་སྙན་ལེགས་པ་ཞིག་ཡོད་པ་ཡར་རྒྱབ་ཞབས་དྲུང་དུ་ཕུལ། གྲྭ་ཐང་མི་སྤྱོད་ཚུབ་ཀྱང་བྱེད་བཀའ་མི་ཡོང༌། སྙེ་ཐང་ཕྱོགས་གསེར་ཁང་ཁ་སྔར་དང་བསྟུན་ནས་རྗེས་ཀྱི་བྱ་བ་གྱིས། དཔེ་ཆ་དང་དབང་རྫས་རེ་ཞིག་མི་འཁྱར་བར་གྱིས། གདུང་ཆོག་ཀྱཻ་རྡོར་ཆོ་ག་གོང་དཀར་རྡོར་གདན་ནས་བོས། རྟེན་བཞེངས་ཐུབ་ན་རྡོ་རྗེ་གདན་བླ་མ་ལྷ་ཁང་དུ་སྐྱོལ་གསུང་བའི་བཀའ་ཆེམས་མཛད། ཚེས་བཅོ་ལྔར་སྐུ་འདས་ཚུལ་ཉེ་བ་ན། སླར་


TNT17_Page_0534
[མ་དཔེ་གཟིགས་ན་འདིར་གནོན།]

ལི་ཐོར་གཟིགས་ནས། བཅོ་ལྔར་ཟིན་ཕུང་འདུག་གསུངས། བཅུ་དྲུག་གི་ནམས་སྲོད་བྱི་བར། སྐུ་བདེ་ཉམས་སྤྱན་ཧྲིག་གེ་གཟིགས་པའི་ངང་ནས་མྱ་ངན་ལས་འདས་ཤིང་ཞག་གསུམ་གྱི་བར། སྐུའི་བཀྲག་མདངས་ཉམས་མེད། སྤྱན་སེམས་དཔའི་ལྟ་སྟངས་མ་ཉམས་པར་བཞུགས་པ་དང༌། སྐུ་རྗེས་ཀྱི་བྱ་བ་རྣམས་ཀྱང༌། བླ་མ་རྨོག་ལྕོག་པས། བཀའ་ཆེམས་ལྟར་བསྒྲུབས་ཤིང༌། །དགོངས་རྫོགས་མཆོད་འབུལ་རྟེན་བཞེངས་ལྷོ་བྱང་གཉིས་ཀར་རྒྱ་ཆེ་བར་བྱུང་བ་དང༌། ལོ་དུས་ཀྱི་མཆོད་པ་ཡང་སྔ་མུར་ལོ་དེ་ཀའི་སྟོན་གཞུག་རྒྱས་པར་སྒྲུབས་ཐོག་གདན་ས་པ་ཡང་བསྐོས་བཞག་གྲུབ་པ་སོགས་དང༌། ཇི་སྲིད་བསྟན་པ་གནས་བར་དུ་སྐུ་མཆོད་རྒྱུན་འཛུགས་ཀྱི་མཆོད་ཐེབས་དང་བཅས་བདེ་བ་ཅན་ཁོ་ནར་སྦྱར་བའི་ཐུགས་དགོངས་ཡོངས་སུ་རྫོགས་པར་བརྟེན་ཏོ། །རྨོག་ལྕོག་བླ་མ་ལ་ཡང་མཐོང་ཆོས་ཀྱི་འབྲས་བུ་འཕྲིན་ལས་རྒྱ་ཆེ་པར་བྱུང་སོང་བ་དང༌། སྐུའི་སྐྱེ་བ་བླ་མ་རྨོག་ལྕོག་པའི་ཚ་མོར་བྱུང་བ། སྙེ་ཐང་གི་སེར་མོ་ཆེན་བླ་མ་གྲྭ་རིགས་འགའ་རེས་ལས་འབྲས་ལ་མཁྱེན་པ་རྒྱས་ཤིང༌། བཀའ་དམ་ཚིག་ལ་གཅེས་སྤྲས་མཛད་པ་རྣམས་ཀྱི་གསུང་ལས། ཁོང་པའི་ཚ་བུ་ལ་སྐུ་སྐྱེས་ཡིན་ཞེས་རྫུན་རླབས་པོ་ཆེ་བགྱིས་སོ་ཞེས་གསུང་གིན་འདུག རྨོག་ལྕོག་པས་ནི་བདེན་ནམ་རྫུན་ཀྱང་བླ་མའི་དམ་ཚིག་ལ་བསམ་པས། གྲྭ་རིགས་


TNT17_Page_0535
[མ་དཔེ་གཟིགས་ན་འདིར་གནོན།]

བུ་ཆེན་ཕྱི་ཐག་ཅན་དམ་ཚིག་ཅན་གྱི་ཕྱག་རྫས་དང་ཆོས་གཞི་ལེན་སྤྲོད་ཀྱང་བྱུང་དགོས་དང་ཡོང་རེ་མི་འདུག བདེ་བ་ཅན་ཁོ་རང་གི་བདག་བྱེད་བཞིན་གླིང་སྟོད་ཆོས་རྗེ་བསྐོས་པ་ཡིན་འདུག ཕྱིས་སུ་ནི་ཁོ་རང་གི་དགོན་པ་ཡང་ཉེ་རིགས་གང་ལ་མི་གཏོགས་པའི་བླ་མ་བསྐོས་འདུག་པས། མཁྱེན་པ་ཅན་རྣམས་གླན་ཀའི་ཞལ་གྱི་སྐུ་ཡོང༌། བྱ་བཏང་འགྱོད་མེད་བྱ་བ་ཞིག་འོངས་གསུངས། ཡིད་ཆེས་ངེས་ཤེས་ཀྱི་ཚ་ཟེར་འཕྲོས་པས། གྲྭ་ཐང་རང་གོང་དཀར་རྡོ་རྗེ་གདན་སོགས་ཀྱི་གྲྭ་རིགས་ཞལ་སློབ་བླང་དོར་གྱི་གནས་ལ་མཁྱེན་པ་མི་འགོག་པའི་དམ་ཚིག་ཅན་རྣམས་ལ་ནི། ཐེ་ཚོམ་གྱི་ཆུ་འཛིན་དངོས་པོ་མངོན་རྟགས་སུ་གྱུར་ཏོ། །བླ་མའི་རྣམ་པར་ཐར་པ་འདི། [རྗེ་རྡོ་རྗེ་འཆང་ཏཱ་ར་ནཱ་ཐའི་བཀའ་ཇི་ལྟར་གནང་བ་བཞིན་དུ་བྱ་བཏང་འབྱམས་པ་ཡོན་ཏན་མགོན་པོས།]།བགྱིས་པའི་དགེ་བས་འགྲོ་ཀུན་རྣམས། །ཚོགས་གཉིས་རྫོགས་པའི་དཔལ་དུ་ཤོག །རང་བཟོས་སྒྲོ་བསྐུར་བཟོད་བཞེས་འཚལ། །བཀྲ་ཤིས།། །།ཞུས་དག །རྗེ་རྡོ་རྗེ་འཆང་ཏཱ་ར་ནཱ་ཐའི་བཀའ་ཇི་ལྟར་གནང་བ་བཞིན་དུ་བྱ་བཏང་བ་བྱམས་པ་ཡོན་ཏན་མགོན་པོས། མཆན། རབ་ཏུ་དཀར་བའི་རྟེན་བཞེངས་འདིས། །བདག་ཅག་གིས་ནི་ཐོག་མེད་ནས། །སྡིག་ལྟུང་གང་བསངས་ཡོངས་དག་སྟེ། རླབས་ཆེན་ཚོགས་གཉིས་མཐར་ཕྱིན་ཤོག །འདི་ཡང་གྲོགས་ལམ་མཁོ་ཕྱིར་མ་ཏི་བྲིས། །


TNT17_Page_0536
[མ་དཔེ་གཟིགས་ན་འདིར་གནོན།]

ཤོག་སྟོང་།

དཀོན་མཆོག་གསུམ་རྗེས་སུ་དྲན་པའི་མདོ་དོན་ཅུང་ཟད་བཤད་པ།


TNT17_Page_0537
[མ་དཔེ་གཟིགས་ན་འདིར་གནོན།]

དཀོན་མཆོག་གསུམ་རྗེས་སུ་དྲན་པའི་མདོ་དོན་ཅུང་ཟད་བཤད་པ་བཞུགས།


TNT17_Page_0538
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། སངས་རྒྱས་དང་ཆོས་དང་དགེ་འདུན་ལ་ཕྱག་འཚལ་ལོ། །དཀོན་མཆོག་གསུམ་རྗེས་སུ་དྲན་པའི་མདོ་དོན་ཅུང་ཟད་བཤད་པར་བྱ་སྟེ། འདིར་རྗེས་སུ་དྲན་པ་ཞེས་པའི་རྗེས་སུ་དྲན་པའི་དོན་ནི་དངོས་པོ་ལ་ཡོན་ཏན་ཇི་ལྟར་ཡོད་པ་ལྟར་མ་ནོར་བར་རྗེས་སུ་ཞུགས་པ་ཉིད་དོ། །དེ་ལ་འདི་ནི་དཀར་པོའི་ཆོས་མཐའ་དག་གི་རྩ་བར་གྱུར་པ། ཡུལ་མཆོག་ལ་དད་པ་བསྐྱེད་པའི་ཆེད་དུ་ཡིན་ལ། དད་པ་དང་མོས་པ་དང་གུས་པ་ཞེས་བྱ་བ་ཡང༌། གནས་སྐབས་མང་པོ་ཞིག་ཏུ་བློའི་རིགས་མཚན་ཉིད་ཤིན་ཏུ་ཐ་དད་པར་ཡང་འཆད་ཅིང༌། གནས་སྐབས་གཞན་འགའ་ཞིག་ཏུ་ནི་དོན་གཅིག་མིང་གི་རྣམ་གྲངས་སུ་ཡང་བྱེད་དོ། །འོན་ཀྱང་སྐབས་འདིར་གསུམ་པོ་དོན་གྱི་གཙོ་བོ་ལ་གཅིག་པར་འགྱུར་ཞིང་ཆ་ཤས་ཕྲ་མོ་ནས་ཁྱབ་ཆེ་ཆུང་ཅུང་ཟད་ཡོད་པར་ཡང་བྱའོ། །དེ་ཡང་


TNT17_Page_0539
[མ་དཔེ་གཟིགས་ན་འདིར་གནོན།]

དད་པ་ནི་རྣམ་པ་གསུམ་སྟེ། དང་བའི་དད་པ་དང༌། ཡིད་ཆེས་པའི་དད་པ་དང༌། འདུན་པའི་དད་པའོ། །དང་པོ་ནི། འདིར་དཀོན་མཆོག་གསུམ་གྱི་ཡོན་ཏན་ཐོས་ནས། དེ་རྣམས་མཆོག་ཏུ་འཛིན་ཅིང༌། མཆོག་ཏུ་ཤེས་པ་དང༌། དེ་ཡང་ཡིད་ལ་དགའ་བ་ཕུན་སུམ་ཚོགས་པ་མཆོག་དང་མཚུངས་པར་ལྡན་པའོ། །ཡིད་ཆེས་པའི་དད་པ་ནི། དེ་བཞིན་གཤེགས་པ་ལ་ཡོན་ཏན་དེ་དང་དེ་ཡོད་པར་ཡིད་ཆེས་པ་དང༌། ལུང་གི་ཆོས་ནས་ཇི་སྐད་བཤད་པ་ལ། དོན་བདེན་ཅིང་ངེས་པའི་ཚིག་ཏུ་ཡིད་ཆེས་པ་དང༌། རྟོགས་པའི་ཆོས་དང༌། དགེ་འདུན་ལ་ཡང་དེ་དང་དེའི་ཡོན་ཏན་དང་ལྡན་པར་ཡིད་ཆེས་པ་དང༌། དོན་དམ་པའི་ཆོས་འགོག་པའི་བདེན་པ་ཡང༌། སྐྱོན་ཐམས་ཅད་དང་བྲལ་བར་ཡིད་ཆེས་པ་དང༌། གང་སྐྱོན་ཐམས་ཅད་དང་བྲལ་བ་དེ་ནི་ཡོན་ཏན་ཐམས་ཅད་དང་


TNT17_Page_0540
[མ་དཔེ་གཟིགས་ན་འདིར་གནོན།]

ལྡན་པ་ཡིན་ཏེ། གང་དང་གང་གི་ཕན་ཡོན་དང་མི་ལྡན་པ་དེ་ཉིད་སྐྱོན་ཡིན་པའི་ཕྱིར་རོ། །འདུན་པའི་དད་པ་ནི། སངས་རྒྱས་དང་དགེ་འདུན་གྱི་གོ་འཕང་ཐོབ་པར་འདུན་ཅིང་འདོད་པ་དང༌། ལུང་གི་ཆོས་ཁོང་དུ་ཆུད་པར་འདོད་པ་དང༌། དོན་དམ་དབྱིངས་ཀྱི་ཆོས་མངོན་དུ་བྱ་བར་འདོད་པ་དང༌། རྟོགས་པའི་ཆོས་རྒྱུད་ལ་སྐྱེད་པར་འདོད་པ་རྣམས་འདུན་པའི་དད་པ་དངོས་ཡིན་ལ། རྣམ་གྲངས་ཙམ་དུ་དཀོན་མཆོག་མཆོད་པར་འདོད་པ་དང༌། ཡོན་ཏན་སྒྲགས་པར་འདོད་པ་དང༌། ལུང་གི་ཆོས་དར་བར་འདོད་པ་ལ་སོགས་པ་ཡང་འདུན་པའི་དད་པ་ཡིན་ནོ། །དེ་དག་ཀྱང་དང་བ་དང་ཡིད་ཆེས་པའི་དད་པ་སྔོན་དུ་སོང་བས་ནི་དེ་ལྟར་ཡིན་གྱི། ཁེའི་ཕྱིར་དང༌། གྲགས་པ་འདོད་པ་དང༌། འགྲན་པའི་ཕྱིར་མཆོད་པ་ལ་སོགས་དེ་རྣམས་འདོད་པ་ནི། དེ་དང་དེར་འདུན་པ་ཙམ་ཡིན་ཡང་དད་པ་ནི་མ་ཡིན་ནོ། །མོས་པ་ཞེས་བྱ་བ་ནི། ངེས་པའི་དངོས་པོ་ལ་ངེས་པར་འཛིན་པ་སྟེ། སྐབས་འདིར་ནི་གང་ཡོན་ཏན་དང་ལྡན་པ་དང༌། གང་མི་བསླུ་བ་དེ་ལ་ཡོན་ཏན་དང་ལྡན་པར་ཤེས་ཤིང་མི་བསླུ་བར་ཤེས་པ་སྟེ། གཙོ་ཆེར་ཡིད་ཆེས་པའི་དད་པ་ཡིན་ནོ། །ཡང་མངོན་པ་ལས། དགའ་དང་གུས་ཉིད་ངོ་ཚ་ཤེས། །ཞེས་ཀྱང་འབྱུང་མོད། སྐབས་འདིར་གུས་པ་ནི་ཡུལ་དེ་ཉིད་མཆོག་ཏུ་ཤེས་པ་ཡིན་པས། ཕལ་ཆེར་དང་བའི་དད་པར་འདུ་བ་ཡིན། ཡང་བསླབ་པ་ལ་གུས་པ་ཞེས་པ་ལྟ་བུ་ཡིད་ཆེས་པའི་དད་པའི་


TNT17_Page_0541
[མ་དཔེ་གཟིགས་ན་འདིར་གནོན།]

རིགས་ཀྱང་ཡོད་ལ། དེ་ལས་གཞན་གུས་པར་སྦྱོར་བ་ཞེས་པ། བརྩོན་འགྲུས་ཤུགས་དྲག་པོ་ལ་བཤད་པའང་ཡོད་མོད་སྐབས་འདིར་མི་སྦྱར་རོ། །གང་དཀོན་མཆོག་གསུམ་ལ་དད་པ་ཕུན་སུམ་ཚོགས་པ་དང་ལྡན་པ་དེ་ནི་སྐྱབས་སུ་འགྲོ་བ་ལེན་པར་འགྱུར་ཞིང༌། སོ་སོ་ཐར་པའི་སྡོམ་པ་ལེན་པ་དང་བྱང་ཆུབ་ཏུ་སེམས་བསྐྱེད་པར་ཡང་འགྱུར་ལ། བསླབ་པ་གསུམ་དང་ཕ་རོལ་ཏུ་ཕྱིན་པ་དག་ལ་ཡང་འཇུག་པར་འགྱུར་བས། ལམ་ཐམས་ཅད་ཀྱི་རྩ་བ་ནི་དད་པ་ཡིན་ལ། དེ་ཡང་དཀོན་མཆོག་གསུམ་རྗེས་སུ་དྲན་པ་ལ་རག་ལས་སོ། །དེ་ལ་དང་པོར་སངས་རྒྱས་རྗེས་སུ་དྲན་པའི་དབང་དུ་བྱས་ནས། འདི་ལྟར་བཅོམ་ལྡན་འདས་ཞེས་པ་ལ་སོགས་པའོ། །འདི་ལ་ཚིག་དང་པོ་དགུ་ནི། མདོར་བསྟན་པའི་དབང་དུ་བྱས་ཤིང༌། ཐེག་པ་ཆེ་ཆུང་ཐམས་ཅད་ལ་ཐུན་མོང་དུ་ཡོངས་སུ་གྲགས་པ་ཡིན་ནོ། །དེ་ལ་འདི་ལྟར་ཞེས་པ་ནི། འཆད་པར་འགྱུར་བའི་ཡོན་ཏན་ཐམས་ཅད་འདི་ལྟ་སྟེ་ཞེས་པའོ། །དེ་ཡང་དོན་དགུ་སྟེ། སྡོམ་ནི། བགེགས་བཅོམ་པ་དང་བཤད་པ་དང༌། །སྤང་དང་ཡེ་ཤེས་ཕུན་ཚོགས་དང༌། །རྒྱུད་དང་ཇི་ལྟར་གཤེགས་པ་དང༌། །འཇིག་རྟེན་ལ་གཟིགས་སྐལ་ལྡན་འདུལ། །སྟོན་པ་ཉིད་དེ་ཡོན་ཏན་དགུ། །གང་ལ་གནས་པའི་གཞི་ཉིད་དོ། །དེ་ལ་བགེགས་བཅོམ་པ་ནི། བཅོམ་ལྡན་འདས་ཞེས་པ་སྟེ། བཅོམ་


TNT17_Page_0542
[མ་དཔེ་གཟིགས་ན་འདིར་གནོན།]

ལྡན་གྱི་མཚན་ཉིད་གང་ལ་མངའ་བའི་སངས་རྒྱས་དེ་ནི་ཞེས་པའོ། །དེ་ལ་བགེགས་ནི་ཕུང་པོ་དང༌། ཉོན་མོངས་པ་དང༌། འཆི་བདག་དང༌། ལྷའི་བུའི་བདུད་བཞི་ལས། དང་པོ་གསུམ་སྤངས་ཤིང༌། བཞི་པས་གནོད་པ་བྱེད་པའི་ཡུལ་ལས་འདས་པའི་ཕྱིར། བདུད་བཞི་བཅོམ་པའི་ཡོན་ཏན་དང་ལྡན་པའོ། །དེ་ལ་བྷ་ག་ཝཱན་ཞེས་བྱ་བ་ལ། བཅོམ་ལྡན་དང༌། སྐལ་ལྡན་དང༌། ལེགས་ལྡན་ལ་སོགས་པ་དོན་སྣ་ཚོགས་པར་འགྱུར་བའི་ཕྱིར། དྲང་སྲོང་སེར་སྐྱ་དང༌། རྒྱལ་རིགས་ནག་པོ་ལ་སོགས་པ་ལ་ཡང༌། བཅོམ་ལྡན་དུ་གྲགས་པའི་ཕྱིར་ན། དེ་ལས་ཁྱད་པར་དུ་འབྱེད་པའི་དོན་དུ་འཇིག་རྟེན་ལས་འདས་པ་ཉིད་ཀྱི་ཕྱིར་འདས་ཞེས་པ། སྔོན་གྱི་ལོ་ཙཱ་བ་བྱང་ཆུབ་སེམས་དཔའ་རྣམས་ཀྱིས་བླ་ཐབས་སུ་བསྣན་པ་ཡིན་གྱི། ལེགས་སྦྱར་གྱི་སྐད་ལ་སྐབས་འདིར་འདས་པའི་སྒྲ་ནི་མེད་དོ། །བཤད་པ་ཕུན་སུམ་ཚོགས་པ་ནི། དེ་བཞིན་གཤེགས་པ་ཞེས་པ་སྟེ། རང་ཉིད་ཀྱིས་ཕྱིན་ཅི་མ་ལོག་པར་རྟོགས་པ་བཞིན་དུ། གཞན་ལ་ཡང་ཕྱིན་ཅི་མ་ལོག་པར་སྟོན་པ་སྟེ། དེ་བཞིན་ནི་དེ་ཁོ་ན་བཞིན་གྱི་ཕྱིན་ཅི་མ་ལོག་པའི་དོན་ཡིན་ལ། གཤེགས་པ་ནི་རང་གིས་རྟོགས་པའམ་གཞན་རྟོགས་སུ་འཇུག་པའོ། །སྤངས་པ་ཕུན་སུམ་ཚོགས་པ་ནི་དགྲ་བཅོམ་པ་ཞེས་པ་སྟེ། དགེ་བའི་ཆོས་ལ་གནོད་པ་བྱེད་པའི་དོན་གྱི་ན། ཉོན་མོངས་པ་


TNT17_Page_0543
[མ་དཔེ་གཟིགས་ན་འདིར་གནོན།]

བག་ཆགས་དང་བཅས་པ་ནི་དགྲ་སྟེ། དེ་སྤངས་པའི་ཚུལ་གྱིས་བཅོམ་པའོ། །ཡེ་ཤེས་ཕུན་སུམ་ཚོགས་པ་ནི། ཡང་དག་པར་རྫོགས་པའི་སངས་རྒྱས་ཞེས་བྱ་སྟེ། ཕྱིན་ཅི་མ་ལོག་པར་ཤེས་བྱའི་དཀྱིལ་འཁོར་ཡོངས་སུ་རྫོགས་པ་ལ། མི་གཉིད་སངས་པ་བཞིན་དུ་མི་ཤེས་པ་མཐའ་དག་པ་སངས་ཤིང༌། པདྨ་ཁ་བྱེ་བ་ལྟར་བློ་གྲོས་ཀྱི་སྣང་བ་རྣམ་པ་ཐམས་ཅད་དུ་རྒྱས་པ་ཡིན་ནོ། །སྤངས་པ་དང་ཡེ་ཤེས་དེ་གཉིས་ནི་སྒྲུབ་པ་ཕུན་སུམ་ཚོགས་པ་ཞེས་ཀྱང་བྱ་ལ། དེ་གཉིས་དང་བཤད་པ་ཕུན་སུམ་ཚོགས་པ་སྟེ་གསུམ་དང་ལྡན་པ་ནི། འགྲོ་བའི་དོན་ཕྱིན་ཅི་མ་ལོག་པ་སྐྱོན་མེད་པར་སྤྱོད་ནུས་པའི་ཕྱིར། སྟོན་པ་ཕུན་སུམ་ཚོགས་པ་ཡིན་ཏེ། དེ་ཡང་སྟོན་པ་སངས་རྒྱས་ཁོ་ན་ལ་ཡོད་ཀྱི། དྲག་པོ་དང༌། ཁྱབ་འཇུག་ལ་སོགས་པ་གང་ལ་ཡང་ཡོད་པ་མ་ཡིན་པས། ཐུན་མོང་དུ་མ་གྱུར་པའི་ཡོན་ཏན་ནོ། །དེ་ལ་དྲང་སྲོང་རྒྱས་པ་ལ་སོགས་པ་ནི། ལྟག་འོག་འགལ་བར་སྨྲ་བ་དང༌། སྒྲ་ངན་གྱི་འཐབ་མོ་ལ་ལུང་བསྟན་པ་ཐོག་ཏུ་མ་བབས་པས་ཆོས་ཐམས་ཅད་ལ་བློ་གྲོས་རྒྱས་པ་མ་ཡིན་ལ། དགའ་བྱེད་ལ་སོགས་པ་འདོད་ཆགས་ཀྱི་དབང་དུ་གྱུར་པ་དང༌། སྡུག་བསྔལ་གྱིས་འཁོལ་ཞིང་སྡིག་པ་སྤྱོད་པ་དེ་དག་ལ་ནི། རང་ཉིད་ཉོན་མོངས་པའི་གཞན་དབང་དུ་གྱུར་པས། གཞན་སྐྱོབ་པའི་ནུས་པ་ཅི་ཞིག་ཡོད། གང་ཞིག་རང་རྒྱལ་ལ་སོགས་པ་


TNT17_Page_0544
[མ་དཔེ་གཟིགས་ན་འདིར་གནོན།]

ཡང་དག་པར་རྟོགས་ཀྱང༌། མི་སྨྲ་བ་དེས་ནི་གཞན་རྗེས་སུ་འཛིན་པར་མི་ནུས་པས། དེའི་ཕྱིར་བཤད་པ་ཕུན་ཚོགས་སྨོས་སོ། །དེ་ལྟ་བུའི་སྟོན་པ་ཕུན་སུམ་ཚོགས་པ་ཐོབ་པའི་རྒྱུ་ལ། རིག་པ་ནི་ཡང་དག་པའི་ལྟ་བ་ཡིན་ལ། ཞབས་ནི་རྟོག་པ་དང༌། ངག་དང༌། ལས་ཀྱི་མཐའ་དང༌། འཚོ་བ་དང༌། རྩོལ་བ་དང༌། དྲན་པ། ཏིང་ངེ་འཛིན་འཕགས་པའི་ལམ་རྣམས་སོ། །ཡང་ན་ལྷག་པའི་ཤེས་རབ་ནི་རིག་པ་ཡིན་ལ། ཚུལ་ཁྲིམས་དང་སེམས་ཀྱི་བསླབ་པ་ནི་ཞབས་སམ། གཞན་ཡང་རིག་པ་ནི་རིགས་པ་གསུམ་ཡིན་ལ། ཞབས་ནི་ཕུན་སུམ་ཚོགས་པ་བཞི་སྟེ། ཚུལ་ཁྲིམས་དང༌། སྤྱོད་པ་དང༌། ཟློག་པ་དང༌། མཐོང་ཆོས་བདེར་གནས་ཀྱི་ལྷག་པའི་སེམས་སོ། །བཤད་པའི་རྣམ་གྲངས་གསུམ་པོ་དེ་ཡང་དོན་གྱི་གནད་གཅིག་ལ་འདུ་སྟེ། ཡང་དག་པའི་ལྟ་བ་དང༌། ལྷག་པའི་ཤེས་རབ་ཀྱི་བསླབ་པ་དང༌། ཟག་ཟད་རིག་པ་རྣམས་དངོས་པོ་གཅིག་ལ་འདུ་བའི་ཕྱིར་དང༌། ཡང་དག་པའི་ངག་སོགས་གསུམ་དང༌། ཚུལ་ཁྲིམས་ཀྱི་བསླབ་པ་དང༌། ཚུལ་སྤྱོད་ཟློག་པ་གསུམ་ངོ་བོ་གཅིག་པའི་ཕྱིར་དང༌། ཡང་དག་པའི་ཏིང་ངེ་འཛིན་དང༌། སེམས་ཀྱི་བསླབ་པ་དང༌། མཐོང་ཆོས་བདེར་གནས་ཀྱི་ལྷག་སེམས་རྣམས་ཀྱང་དོན་གྱི་གཙོ་བོ་གཅིག་པའི་ཕྱིར་རོ། །དེ་ལ་རིག་པ་གསུམ་ནི། སྔོན་གྱི་མཐའ་རིག་པ་དང༌། ཕྱི་མའི་


TNT17_Page_0545
[མ་དཔེ་གཟིགས་ན་འདིར་གནོན།]

མཐའ་རིག་པ་དང༌། ཟག་ཟད་རིག་པའོ། །སྤྱོད་པ་ཕུན་སུམ་ཚོགས་པ་ནི། སྤྱོད་ལམ་ཐམས་ཅད་དུ་ཤེས་བཞིན་དུ་གནས་པའོ། །ཟློག་པ་ཕུན་སུམ་ཚོགས་པ་ནི་དབང་པོའི་སྒོ་བསྡོམས་པ་སྟེ། དེ་གཉིས་ནི་ཚུལ་ཁྲིམས་དག་པར་བྱེད་པ་དང༌། ཏིང་ངེ་འཛིན་གྱི་ལྷན་ཅིག་བྱེད་པའོ། །མཐོང་ཆོས་བདེར་གནས་ཀྱི་ལྷག་པའི་སེམས་ནི། བསམ་གཏན་བཞི་པོ་དག་པ་བ་དང༌། ཟག་མེད་རྣམས་ཏེ་དེའི་ནང་ནས་ཀྱང་བཞི་པ་གཙོ་བོ་ཡིན་ལ། འདི་ལས་མངོན་ཤེས་རྣམས་སྒྲུབ་པའི་ཕྱིར། རིག་པ་གསུམ་ཡང་འབྱུང་བའོ། །དེ་ལྟར་རིགས་པ་ནི་གང་ཤེས་པར་བྱ་བ་དང༌། སྤངས་བྱ་དང་བླང་བྱའི་གནས་རྣམས་མ་ནོར་བར་མངོན་སུམ་གྱིས་མཐོང་བས་མིག་དང་འདྲ་བ་ཡིན་ལ། དེ་དང་རྗེས་སུ་མཐུན་པར་སྒྲུབ་ཅིང་སྤྱོད་པ་ནི། མིག་གིས་བལྟས་པའི་ལམ་ལ་འགྲོ་བ་དང་འདྲ་བས། ཞབས་ཞེས་བྱའོ། །ཡང་ན་རིག་པ་ནི་མངོན་པར་ཤེས་པ་དྲུག་སྟེ། གོང་དུ་བཤད་པ་དང་དོན་འདྲ་ལ། ཞབས་ནི་རྫུ་འཕྲུལ་གྱི་རྐང་པ་བཞིའོ། །ཞེས་གཞན་ལས་བཤད་དོ། །ཇི་ལྟར་གཤེགས་པ་ནི། བདེ་བར་གཤེགས་པ་ཞེས་ཏེ། སུ་ག་ཏ་ཞེས་པའི་སྒྲ་ལས་དྲངས་ནས། བདེ་བར་གཤེགས་པ། ལེགས་པར་གཤེགས་པ། རབ་ཏུ་གཤེགས་པ་ཞེས་བྱ་བར་འགྱུར་ན། ལམ་བདེ་བ་ནས་འབྲས་བུ་བདེ་བར་གཤེགས་པའི་ཕྱིར་ཏེ། ལམ་གྱི་དུས་ན་བྱ་བ་མ་ཡིན་པ་སྤངས་ཤིང༌། གཞན་གྱི་


TNT17_Page_0546
[མ་དཔེ་གཟིགས་ན་འདིར་གནོན།]

བསྔགས་པ་མ་ཡིན་པ་མི་འབྱུང་བ་དང༌། རང་ཞུམ་པ་དང་འཛེམ་བག་མེད་ཅིང༌། ཡིད་བདེ་བ་མང་པོའི་བྱ་བས་སྒྲུབས་པ་དང༌། འབྲས་བུའི་དུས་ན་སྡུག་བསྔལ་གྱི་རིགས་ཐམས་ཅད་སྤངས་ཤིང༌། ཟག་པ་མེད་པའི་བདེ་བ་ཕུན་སུམ་ཚོགས་པ་བརྙེས་པའི་ཕྱིར་རོ། །དེས་ནི་གྲུབ་མཐའ་ལ་ཞུགས་སམ་མ་ཞུགས་ཀྱང་རུང་སྟེ། འཁོར་བ་པ་རྣམས་ལས་ཁྱད་པར་དུ་བྱས་པ་སྟེ། དེ་དག་ནི་རྒྱུ་སྡུག་བསྔལ་ལས་འབྲས་བུ་སྡུག་བསྔལ་སྒྲུབ་པའི་ཕྱིར་རོ། །འདོད་པ་ན་སྤྱོད་པ་རྣམས་ནི་དེ་ལྟར་སྡུག་བསྔལ་བ་ཡིན་ཡང༌། བསམ་གཏན་དང་གཟུགས་མེད་ལ་གནས་པ་ནི་དེ་ལྟར་མ་ཡིན་ནོ་སྙམ་ན། དེའི་འབྲས་བུ་ཡང་སྡུག་བསྔལ་ཡིན་མོད་ཀྱི། དེ་ལྟར་མ་གོ་བའི་ངོར་ལེགས་པར་གཤེགས་པ་ཞེས་ཏེ། ལེགས་པ་ནི་སྤངས་ཟིན་སླར་མི་ལྡོག་པ་ལ་སྦྱར་ཏེ། རིམས་ནད་ལེགས་པར་བྱང་བ་བཞིན། ཉིད་ཀྱིས་སྤངས་པའི་ཉོན་མོངས་པ་ལ་སོགས་པའི་སྒྲིབ་པ་ཐམས་ཅད་སླར་མི་ལྡོག་པར་གཤེགས་ཤིང་སོང་བའོ། །འདིས་ནི་མུ་སྟེགས་སྙོམས་འཇུག་པ་རྣམས་ལས་ཁྱད་པར་དུ་བྱས་པའོ། །འོ་ན་ཉན་ཐོས་དང་རང་སངས་རྒྱས་རྣམས་དེ་ཡིན་ནོ་སྙམ་ན། རབ་ཏུ་གཤེགས་པ་སྟེ་རྟོགས་པར་བྱ་བའི་ཆོས་མཐའ་དག་རབ་ཏུ་སྟེ་མ་ལུས་པར་རྟོགས་ཤིང་གཤེགས་པ་ནི། བུམ་པ་མ་ལུས་པ་གང་བ་ལ་བུམ་པ་རབ་ཏུ་གང་བ་ཞེས་པ་ལྟ་བུ་སྟེ། དེ་ནི་དེ་བཞིན་གཤེགས་


TNT17_Page_0547
[མ་དཔེ་གཟིགས་ན་འདིར་གནོན།]

པ་ཁོ་ན་ལ་ཡོད་དེ། ཤེས་བྱ་ཐམས་ཅད་ལ་ཆགས་ཐོགས་མེད་པའི་ཡེ་ཤེས་རྟག་ཏུ་འཇུག་པ་ཡིན་ནོ། །དེ་ལྟར་དོན་ཚན་གཉིས་པོ་དེ་ནི་སྤངས་རྟོགས་ཀྱི་མཐའ་གཅོད་པ་ཡིན་ལ། འདི་ནས་བརྩམས་ཏེ་གསུམ་ནི་འཕྲིན་ལས་ཀྱི་དབང་དུ་བྱས་སོ། །དེ་ལ་འཇིག་རྟེན་ལ་གཟིགས་པ་ནི། འཇིག་རྟེན་མཁྱེན་པ་ཞེས་པ་སྟེ། ཐུགས་རྗེ་ཆེན་པོས་སེམས་ཅན་ལ་རྟག་ཏུ་གཟིགས་པས། སེམས་ཅན་བདེ་བའམ་སྡུག་བསྔལ་དང་ལྡན་པ་དང༌། འབྱོར་པ་དང༌། རྒུད་པ་དང༌། སྐལ་བ་དང་ལྡན་པ་དང༌། མི་ལྡན་པ་དང༌། འདུལ་བའི་དུས་ལ་བབ་པ་དང༌། མ་བབ་པ་དང༌། འདུལ་བའི་ཐབས་ཐམས་ཅད་མཁྱེན་པའོ། །བཤད་པའི་རྣམ་གྲངས་གཞན་ལས་ནི། སྡུག་བསྔལ་དང་ཀུན་འབྱུང་ཀྱང་མ་ལུས་པ་མཁྱེན་པ་ལ་འཇིག་རྟེན་མཁྱེན་པར་བཤད་པ་ཡང་ཡོད་དོ། །སྐལ་ལྡན་འདུལ་བར་མཛད་པ་ནི། མི་མཆོག་གམ་སྐྱེས་བུ་འདུལ་བ་ཁ་ལོ་བསྒྱུར་བ་བླ་ན་མེད་པ་ཞེས་པ་སྟེ། མི་མཆོག་གམ་སྐྱེས་བུ་ནི་སྐལ་བ་དང་ལྡན་པ་སྟེ། དེ་དག་གིས་སེམས་རྒྱུད་འདུལ་བས་བྱང་ཆུབ་གསུམ་ལ་འགོད་པར་མཛད་པའོ། །དངོས་སུ་ཐར་བའི་ལམ་གྱིས་འདུལ་བའི་སྐལ་བ་མེད་པ་རྣམས་ནི། ངན་འགྲོ་ལས་འདོན་པ་དང༌། སྡུག་བསྔལ་ཆེན་པོ་རྣམས་ཆུང་ངུར་བསྒྱུར་བ་དང༌། མཐོ་རིས་ཀྱི་ལམ་ལ་འགོད་པར་མཛད་པ་ཡིན་ལ། མཐོ་རིས་དང་བྱང་གྲོལ་གང་ལ་ཡིན་ཡང་རུང་


TNT17_Page_0548
[མ་དཔེ་གཟིགས་ན་འདིར་གནོན།]

སྟེ། ཆེན་པོའི་སྐལ་བ་ལྡན་པ་ཆུང་ངུ་ལ་སྦྱར་བ་ནི་ནམ་ཡང་མི་སྲིད་དོ། ཁ་ལོ་བསྒྱུར་བ་ནི། ཇི་ལྟར་འདུལ་བའི་ཚུལ་གྱི་ཐབས་ལ་མཁས་པ་སྟེ། རྟ་དང་གླང་པོ་ཆེ་དང་ཤིང་རྟའི་ཁ་ལོ་བསྒྱུར་བ་རྣམས་ཀྱིས། དེ་དང་དེ་ལམ་དུ་འཇུག་པ་ལ་མཁས་པས་ལམ་བདེ་བ་ལ་སྦྱོར་བ་བཞིན། བླ་ན་མེད་པ་ནི། ཁ་ལོ་བསྒྱུར་བའི་ཁྱད་པར་སྟོན་པ་སྟེ། ཤིན་ཏུ་འདུལ་དཀའ་བ། འདོད་ཆགས་ཆེས་ཆེ་བ་གཅུང་དགའ་བོ་དང༌། ཞེ་སྡང་རབ་ཏུ་འབར་བ་སོར་མོའི་འཕྲེང་བ་དང༌། གཏི་མུག་གཤིན་ཏུ་འཐུག་པ་བྲན་བུ་དང་སྐྱོང་བ་ལ་སོགས་པ་དང༌། ང་རྒྱལ་ལྷག་པར་མཐོ་བ་སྟེང་རྒྱས་འོད་སྲུང་ལ་སོགས་པ་ཡང་ཉན་ཐོས་ཀྱི་བྱང་ཆུབ་ལ་བཞག་པར་མཛད་པ་ལྟ་བུའོ། །ཞེས་འཆད་དོ། །དེ་བཞིན་གཤེགས་པའི་འཕྲིན་ལས་ནི་སྣོད་དང་ལྡན་པ་དང་མི་ལྡན་པ་ཐམས་ཅད་ལ་ཡང་འཇུག་མོད་ཀྱི། ཐར་པའི་སྐལ་བ་ཅན་ནི་སྣོད་དང་ལྡན་པ་ཁོ་ན་ཡིན་པའི་ཕྱིར་དང༌། འཇིག་རྟེན་དུ་སངས་རྒྱས་འབྱུང་བའི་གནས་ཀྱི་གཙོ་བོ་ནི་མིའི་འཇིག་རྟེན་ཡིན་པའི་ཕྱིར། སྐལ་ལྡན་འདུལ་བ་དང་མི་མཆོག་འདུལ་བ་ཞེས་ནང་ཚན་གྱི་ཁྱད་པར་ནས་སྨོས་པ་ཡིན་ནོ། །འཕྲིན་ལས་དེ་གང་ལ་གནས་པའི་སྟོན་པ་ཉིད་ཀྱི་དོན་ནི། ལྷ་དང་མི་རྣམས་ཀྱི་སྟོན་པ་ཞེས་ཏེ། ཁམས་གསུམ་དུ་གཏོགས་པའི་སེམས་ཅན་ཐམས་ཅད་ཀྱི་སྟོན་པ་ཡིན་ཡང༌། ལྷ་དང་མི་སྨོས་པ་ནི། ལྷ་དང་མི་རྣམས་


TNT17_Page_0549
[མ་དཔེ་གཟིགས་ན་འདིར་གནོན།]

ལ་ནི་བདེན་པ་མཐོང་བའམ། དགེ་སྦྱོང་ཚུལ་གྱིས་འབྲས་བུ་ཐོབ་པའམ། འཕགས་པའི་ས་ཐོབ་པ་མཐོང་གི། གཞན་ལ་ནི་མ་མཐོང་ལ། འགྲོ་བའི་མཆོག་ཀྱང་དེ་ཡིན་པས་གདུལ་བྱའི་གཙོ་བོ་དེ་དག་ཡིན་པས་འདིར་སྨོས་སོ། །འདི་ལྟར་བཤད་པ་ཡང་ཐེག་པ་ཐུན་མོང་གི་དབང་དུ་བྱས་པའོ། །དོན་དུ་ནི་འཇིག་རྟེན་དུ་ཡང་རྒྱལ་པོས་འདུད་ཅིང་ཕྱག་འཚལ་བ་ཞེས་བརྗོད་ན། འཁོར་རྣམས་ཀྱིས་འདུད་ཅིང་ཕྱག་འཚལ་བ་མ་སྨོས་ཀྱང་ཤུགས་ལ་གོ་བ་བཞིན་ནོ། །དེ་ལྟ་བུའི་ཡོན་ཏན་གང་ལ་མངའ་བའི་གཞི་སྟོན་པ་ནི། སངས་རྒྱས་བཅོམ་ལྡན་འདས་སོ་ཞེས་སླར་ཡང་ཟློས་ཏེ་སྨོས་པའོ། །འདི་ལ་ཟློས་པའི་སྐྱོན་ནི་མེད་དེ། སྔ་མ་ནི་ཡོན་ཏན་གྱི་ངོ་བོ་སྟོན་པའི་ཕྱིར་ཡིན་ལ། འདིར་ནི་ཡོན་ཏན་གང་ལ་མངའ་བའི་གཞི་སྐྱེས་བུའི་གཙོ་བོ་ཉིད་གོ་བའི་ཕྱིར་རོ། །ད་ནི་རྒྱས་པར་བཤད་པའི་རིམ་པ་རྣམས་བརྗོད་པར་བྱ་སྟེ། སྡོམ་ནི། གཏན་དུ་བཞུགས་དང་སྐུའི་རང་བཞིན། །གང་ལ་བརྟེན་དང་བྱ་བ་ཐབས། །གནས་དང་མ་ཆགས་ཇི་ལྟས་མཛད། །དོན་བསྡུ་རྣམས་སུ་ངེས་པར་བྱ། །དེ་བཞིན་གཤེགས་པ་དེ་ནི་བསོད་ནམས་དག་གི་རྒྱུ་མཐུན་པ། དགེ་བའི་རྩ་བ་རྣམས་ཆུད་མི་ཟ་ཞེས་པའི་ཚིག་གཉིས་ཀྱིས། གཏན་དུ་བཞུགས་པ་སྟེ། ལྷག་མེད་ཀྱི་དབྱིངས་སུ་ཡོན་ཏན་ཟད་པར་མི་འགྱུར་བར་རྟག་ཏུ་སེམས་ཅན་གྱི་དོན་མཛད་པ་སྟོན་ཏེ་འཁོར་བ་


TNT17_Page_0550
[མ་དཔེ་གཟིགས་ན་འདིར་གནོན།]

པའི་དགེ་བ་ནི་རྣམ་སྨིན་ཕྱུང་ཟིན་ནས་ཟད་པར་འགྱུར་བ་དང༌། ཉན་རང་གི་དགེ་བ་ཡང་ལྷག་མེད་ཀྱི་དབྱིངས་སུ་ཟད་པར་འགྱུར་བ་ཉིད་ཀྱིས། བསོད་ནམས་ཀྱི་རྒྱུ་མཐུན་པ་རྟག་ཏུ་གནས་པ་མ་ཡིན་ལ། སངས་རྒྱས་ནི་སྔོན་བྱང་ཆུབ་སེམས་དཔའི་སྐབས། སྦྱིན་སོགས་ཐམས་ཅད་ཉིད་ཀྱི་བདེ་བའི་དོན་དུ་མ་བསྔོས་ཤིང༌། སེམས་ཅན་ཐམས་ཅད་ཀྱི་ཐར་པའི་དོན་དུ་བསྔོས་པས། དེ་མ་འགྲུབ་ཀྱི་བར་དུ་མི་ཟད་པ་དང༌། ཆོས་ཀྱི་དབྱིངས་དང་མཉམ་པར་སྒོམས་པའི་ཕྱིར་ཡང་སྟེ། རྒྱུ་དང་རྗེས་བུ་མཐུན་པ་འབྲས་བུ་ཡང་མི་ཟད་པའོ། །དེ་ལྟར་ཡང་རྒྱུད་བླ་མ་ལས། རྒྱུ་མཐའ་ཡས་དང་སེམས་ཅན་ཟད་མེད་དང༌། །བརྩེ་དང་སྤྲུལ་དང་མཁྱེན་དང་ཕུན་ཚོགས་ལྡན། །ཆོས་ཀྱི་དབང་ཕྱུག་འཆི་བའི་བདུད་བཅོམ་དང༌། །ངོ་བོ་མེད་ཕྱིར་འཇིག་རྟེན་མགོན་པོ་རྟག །ཅེས་གསུངས་པ་དྲན་པར་བྱའོ། །དེ་ཉིད་ཀྱི་ཕྱིར་ན་དགེ་བའི་རྩ་བ་རྣམས་ཆུད་མི་ཟ་བ་སྟེ། སྔོན་དགེ་བ་རྩ་བ་མཛད་པ་ཐམས་ཅད་ཀྱི་འབྲས་བུ་རྒྱུན་ཆད་པ་མེད་པ་ཉིད་ཀྱི་ཕྱིར་རོ། །བཟོད་པས་བརྒྱན་པ། བསོད་ནམས་ཀྱི་གཏེར་རྣམས་ཀྱི་གཞི། དཔེ་བྱད་བཟང་པོ་རྣམས་ཀྱིས་སྤྲས་པ། མཚན་རྣམས་ཀྱི་མེ་ཏོག་རྒྱས་པ། སྤྱོད་ཡུལ་:དྲན་[རན་]པར་མཐུན་པ། མཐོང་ན་མི་མཐུན་པ་མེད་པ་ཞེས་པ་ཚིག་དྲུག་པོའི་འདི་རྣམས་ཀྱིས། སྐུའི་རང་བཞིན་ཁྱད་པར་རྣམས་བསྟན་ཏེ། སྔར་རྟག་ཏུ་སེམས་ཅན་གྱི་དོན་རྒྱུན་


TNT17_Page_0551
[མ་དཔེ་གཟིགས་ན་འདིར་གནོན།]

མི་ཆད་པར་མཛད་དོ་ཞེས་བསྟན་ན། འགྲོ་དོན་མཛད་པའི་སྐུ་དེ་ཇི་ལྟ་བུ་ཞེས་པ་ལ་འདི་བསྟན་ཏེ། དེ་ཡང་གཟུགས་ཀྱི་སྐུའོ། །སྡོམ་ནི། རྩ་བ་རབ་དབྱེ་ངོ་བོ་དང༌། །གནས་སྐབས་བྱེད་ལས་ཕུན་སུམ་ཚོགས། །དེ་ལ་རྩ་བའི་རྒྱུ་བཤད་པ་ནི། བཟོད་པས་བརྒྱན་པ་སྟེ། བཟོད་པའི་མཐུ་ལས་སྐུ་བོང་ཚོད་ཆེས་འཕགས་ཤིང༌། ཁ་དོག་དང་དབྱིབས་མཛེས་པ་ཕུན་སུམ་ཚོགས་པ། རྒྱུ་བཟོད་པས་བརྒྱན་པའི་འབྲས་བུ། མཛེས་པ་ཉིད་རྒྱན་གྱི་དོན་ཏེ་སྐུ་ལ་རང་བཞིན་གྱིས་གྲུབ་པའོ། །དེ་ནི་མི་མཐུན་ཕྱོགས་ཁྲོ་བ་དང༌། འཁོན་དུ་འཛིན་པ་སྤངས་ཤིང༌། རྒྱུ་བཟོད་པ་ཉིད་བསྟེན་པའི་འབྲས་བུའོ། །བསོད་ནམས་ཀྱི་གཏེར་རྣམས་ཀྱི་གཞི་ཞེས་པ་ནི་རབ་ཏུ་དབྱེ་བའི་རྒྱུ་བཤད་པ་སྟེ། སྐུའི་བ་སྤུའི་ཁུང་བུ་རེ་རེ་ཡང་འགྲོ་བ་ཐམས་ཅད་ཀྱི་བསོད་ནམས་ཀྱི་ཕུང་པོ་བཅུ་འགྱུར་བཅུ་འགྱུར་གྱིས་འགྲུབ་པོ་ཞེས་སོགས་བསོད་ནམས་མཐའ་ཡས་པ་སོ་སོ་སོ་སོ་ལས། སྐུའི་ཆ་ཤས་དང་མཚན་དཔེ་སོགས་སོ་སོར་གྲུབ་པ་སྟེ། འདིར་གཏེར་ཞེས་བྱ་བ་ནི་དཔག་ཏུ་མེད་པའི་དོན་ནོ། །དོན་འདི་རྒྱས་པ་བློ་གྲོས་མི་ཟད་པས་བསྟན་པའི་མདོ་ལས་བརྩོན་འགྲུས་མི་ཟད་པའི་སྐབས་ལས་རྟོགས་པར་བྱའོ། །ངོ་བོའི་དབང་དུ་བྱས་ནས་དཔེ་བྱད་བཟང་པོ་རྣམས་ཀྱིས་སྤྲས་པ་ཞེས་པ་ནི། དཔེ་བྱད་བརྒྱད་ཅུ་ལ་སོགས་པའོ། །མཚན་རྣམས་ཀྱི་མེ་ཏོག་


TNT17_Page_0552
[མ་དཔེ་གཟིགས་ན་འདིར་གནོན།]

རྒྱས་པ་ནི། མཚན་བཟང་པོ་སུམ་ཅུ་རྩ་གཉིས་ལ་སོགས་པ་སྟེ། སྐུ་རང་གི་ངོ་བོ་ཕུན་སུམ་ཚོགས་པ་བསྟན་ཏེ། མེ་ཏོག་རྒྱས་པ་ནི་རྒྱན་དང་འདྲ་བའི་དོན་ཏེ། སྤྲས་པ་ནི་དེའི་འཁོར་ཡིན་པའི་ཕྱིར་མཚན་རྣམས་མཛེས་པར་བྱེད་པའི་དོན་ནོ། །སྤྱོད་ཡུལ་རན་པར་མཐུན་པ་ནི་གནས་སྐབས་ཕུན་སུམ་ཚོགས་པ་སྟེ་གཤེགས་པ་དང་བཞུགས་པ་ལ་སོགས་པ་ཅི་མཛད་ཀྱང༌། ཧ་ཅང་རྟབ་པ་ཡང་མ་ཡིན། ཧ་ཅང་དལ་བ་ཡང་མ་ཡིན་པ་ལ་སོགས་པ། གཞན་གྱི་མཐོང་ན་མི་མཛེས་པའི་སྐྱོན་གདགས་པའི་གཞིར་གྱུར་པ་མེད་པའོ། །མཐོང་ན་མི་མཐུན་པ་མེད་པ་ནི། སྐུའི་བྱེད་ལས་ཕུན་སུམ་ཚོགས་པ་སྟེ། གཤེགས་པ་དང༌། བཞུགས་པ་དང༌། མནལ་བ་དང༌། བསོད་སྙོམས་གསོལ་བ་དང༌། གཟིགས་པ་དང༌། གསུང་བ་ལ་སོགས་པ་ཐམས་ཅད་ལ་འདི་ཉིད་ཉོན་མོངས་སོ་སྙམ་པ་དང་གཞན་རྣམས་སྐྲག་པ་དང་གདུང་བ་དང༌། སྲེད་པ་བསྐྱེད་པ་སོགས་ནམ་ཡང་མེད་ལ། སྐུ་དང་འབྲེལ་བའི་སྤྱོད་པ་གང་མཐོང་བ་དང་ཐོས་པ་ཐམས་ཅད་དད་དང་སྙིང་རྗེ་དང༌། ངེས་པར་འབྱུང་བ་དང༌། བརྩོན་འགྲུས་དང༌། ཡང་དག་པའི་ཤེས་རབ་སྐྱེ་བ་དང་སྡུག་བསྔལ་ཞི་བ་ལ་སོགས་པ་གཞན་གྱི་དགེ་བའི་རྒྱུ་འབའ་ཞིག་ཏུ་འགྲོ་ཞིང་དང་བ་འདྲེན་པའོ། །དེ་ལ་མི་མཐུན་པ་ནི། ཡུལ་དེ་ལ་མ་དད་པའམ། མཐོང་བ་པོ་རང་ཉིད་ལ་ཉོན་མོངས་པའི་རྣམ་པར་


TNT17_Page_0553
[མ་དཔེ་གཟིགས་ན་འདིར་གནོན།]

རྟོག་པ་སྐྱེ་བའོ། །དེ་ལྟར་ཡང༌། ལུས་ཅན་རྣམས་ཀྱིས་ཁྱོད་མཐོང་ན། །སྐྱེས་བུ་དམ་པ་ལེགས་པར་འཚལ། །མཐོང་བ་ཙམ་གྱིས་རབ་དད་པར། །མཛད་པ་ཁྱོད་ལ་ཕྱག་འཚལ་ལོ། །ཞེས་སོ། །དད་པས་མོས་པ་རྣམས་ལ་མངོན་པར་དགའ་བ། ཤེས་རབ་ཟིལ་གྱིས་མི་ནོན་པ། སྟོབས་རྣམས་ལ་བརྫི་བ་མེད་པ། ཞེས་ཚིག་གསུམ་གྱིས་གང་ལ་བརྟེན་ནས་སེམས་ཅན་གྱི་དོན་མཛད་པ་དེ་སྟོན་ཏེ། སྟོན་པའི་དྲུང་དུ་འོང་བ་ནི་བསམ་པ་གཉིས་ཀྱིས་འོང་སྟེ། དད་པའི་བསམ་པ་དང༌། ཟིལ་གྱིས་གནོན་པའི་བསམ་པའོ། །དད་པ་ཡང་ཁ་ཅིག་ནི་སྔོན་གྱི་དགེ་བའི་རྩ་བས་བསྐྱེད་ནས་ཐེ་ཚོམ་གྱིས་འོང་པ་ཡང་ཡོད་དེ་དད་པར་གཏོགས་ལ། ཁ་ཅིག་རབ་ཏུ་དད་པ་ཉིད་ཀྱིས་འོང་བ་ནི། དེ་ལྟར་དད་པས་སྟོན་པའི་ཆོས་ཐོབ་པར་མོས་པས་འོང་སྟེ། དེ་ཐམས་ཅད་སྐུ་མཐོང་བ་དང༌། གསུང་ཐོས་པས་རབ་ཏུ་དང་ཞིང་མངོན་པར་དགའ་བ་སྐྱེ་བ་ཡིན་ནོ། །ཟིལ་གྱིས་གནོན་པའི་བསམ་པས་འོང་བའང་གཉིས་ཏེ། ཤེས་རབ་ཀྱིས་ཟིལ་གྱིས་གནོན་པར་འདོད་པ་གཅེར་བུ་པ་བདེན་སྨྲ་ལ་སོགས་པ་དང༌། ལུས་སྟོབས་ཀྱི་ཟིལ་གྱིས་གནོན་པར་འདོད་པ་གནོད་སྦྱིན་འབྲོག་གནས་ལ་སོགས་པ་སྟེ་དེ་དག་འདུལ་པའི་ཕྱིར། དེ་བཞིན་གཤེགས་པ་ནི་མི་མཁྱེན་པ་མེད་ཅིང་མཁྱེན་པ་མཐའ་ཡས་ལ། སྣོད་དང་འཚམ་པར་ཆོས་


TNT17_Page_0554
[མ་དཔེ་གཟིགས་ན་འདིར་གནོན།]

གསུང་བའི་སྤོབས་པ་དང་ལྡན་པའི་ཕྱིར། དེ་བཞིན་གཤེགས་པའི་ཤེས་རབ་ནི་གཞན་གྱི་ཟིལ་གྱིས་གནོན་པ་མེད་པ་དང༌། རྡོ་འཕངས་པའི་མདོ་ལས་གསུངས་པ་ལྟར། དེ་བཞིན་གཤེགས་པའི་སྐུའི་སྟོབས་མཐའ་ཡས་པ་མངའ་བའི་ཕྱིར། དེ་བཞིན་གཤེགས་པའི་སྐུའི་སྟོབས་ལ་སྐྱེས་བུ་གཞན་གྱི་སྟོབས་ཀྱིས་རྫི་བར་ནུས་པ་མེད་པའི་དོན་ནོ། །དེ་བཞིན་གཤེགས་པའི་སྐུའི་སྟོབས་རྣམ་པར་གཞག་པ་ཐེག་པ་ཆེན་པོ་ཉིད་ཀྱི་རང་ལུགས་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་གྱི་མདོ་ལས་རྒྱས་པར་འབྱུང་ངོ༌། །ཡང་ན་དད་པས་མོས་པ་ནི་དབང་པོ་རྟུལ་པོ་རྣམས་ཏེ། དེ་རྣམས་ཆོས་ཀྱི་དགའ་བས་དགའ་བར་མཛད་ལ། ཤེས་རབ་ཟིལ་གྱིས་མི་གནོན་པ་ཞེས་པས་དབང་པོ་རྣོན་པོ་མཐོང་བས་ཐོབ་པ་ལ་སོགས་པ་དགའ་བར་མཛད་པའོ། །སྟོབས་རྣམས་ལ་རྫི་བ་མེད་པ་ནི། སྟོབས་བཅུའི་ཡེ་ཤེས་དང་ལྡན་པའི་ཕྱིར། ཕ་རོལ་པོ་སུས་ཀྱང་གཞོམ་དུ་མེད་པའོ། །སེམས་ཅན་ཐམས་ཅད་ཀྱི་སྟོན་པ། བྱང་ཆུབ་སེམས་དཔའ་རྣམས་ཀྱི་ཡབ་འཕགས་པའི་གང་ཟག་རྣམས་ཀྱི་རྒྱལ་པོ། མྱ་ངན་ལས་འདས་པའི་གྲོང་ཁྱེར་དུ་འགྲོ་བ་རྣམས་ཀྱི་དེད་དཔོན། ཞེས་པའི་ཚིག་བཞི་པོ་འདིས། སེམས་ཅན་གྱི་དོན་མཛད་པའི་བྱ་བ་གང་ཡིན་པ་སྟོན་ཏེ། སེམས་ཅན་ཐམས་ཅད་ལ་བདེ་བའི་ལམ་མམ། རྒྱུ་སྟོན་པར་མཛད་དེ་དཔེར་ན་ངན་


TNT17_Page_0555
[མ་དཔེ་གཟིགས་ན་འདིར་གནོན།]

འགྲོ་ཁ་ཅིག་ནི་སྐུ་ལས་འོད་ཟེར་སྤྲོས་པས་སྡུག་བསྔལ་ཞི་ཞིང༌། དད་པ་བསྐྱེད་ནས་བདེ་འགྲོ་ལ་འགོད་པར་མཛད་པ་དང༌། བདེ་འགྲོ་རྣམས་ཀྱང་སྦྱིན་པ་དང་ཚུལ་ཁྲིམས་ལ་སོགས་པ་སྣ་ཚོགས་པ་ལ་བཀོད་ནས། རིམ་གྱིས་བྱང་ཆུབ་གསུམ་ལ་སྨིན་པར་མཛད་དོ། །སེམས་ཅན་དེ་རྣམས་ཀྱི་ནང་ནས་ཐེག་པ་ལ་ཞུགས་པའི་དབང་དུ་མཛད་ནས་ཕྱི་མ་གསུམ་སྟེ། དེ་ལ་བྱང་ཆུབ་སེམས་དཔའ་རྣམས་ཀྱི་ཡབ་ཅེས་པས་ནི།ཐེག་པ་ཆེན་པོ་ལ་སངས་རྒྱས་ཀྱི་རིགས་ཅན། བྱང་ཆུབ་སེམས་དཔའ་རྣམས་ནི་སངས་རྒྱས་ཀྱི་ཆོས་ལས་སྐྱེས་ཤིང༌། སྐུ་གསུང་ཐུགས་དང་མཛད་པའི་སྒོ་ནས། སངས་རྒྱས་ཉིད་དང་རྣམ་པ་འདྲ་རུང་དུ་གནས་པའི་ཕྱིར། སངས་རྒྱས་ཀྱི་སྲས་ཡིན་ལ། དེ་བཞིན་གཤེགས་པ་ནི་དེའི་ཡབ་སྟེ་དེ་དག་གི་ཡོན་ཏན་གང་ལས་ཐོབ་པའི་ཡུལ་ཡིན་པས་སོ། །འཕགས་པའི་གང་ཟག་རྣམས་ཞེས་པ་ནི་ཉན་རང་གི་རིགས་ཅན་ནོ། །རྒྱུན་དུ་ཞུགས་པ་དང༌། ཕྱིར་འོང་དང༌། ཕྱིར་མི་འོང་དང༌། ཉན་ཐོས་དགྲ་བཅོམ་པ་དང་རང་རྒྱལ་ལ་སོགས་པ་སྟེ། དེ་རྣམས་ནི་སངས་རྒྱས་ཀྱི་ཆོས་ཀྱིས་འཚོ་བ་ཡིན་ཀྱང༌། དེ་བཞིན་གཤེགས་པ་དང་འདྲ་བའི་ཕྱོགས་སུ་མ་སླེབ་པའི་ཕྱིར་འབངས་ཕལ་པ་ལྟ་བུ་ཡིན་པས་སངས་རྒྱས་ནི་དེའི་རྒྱལ་པོའོ། །ཚོང་པ་རྣམས་ཀྱི་གཙོ་བོ་ཚོང་པ་ཀུན་གྱི་སྣ་དྲངས་ཏེ་འགྲོ་བ་ནི་དེད་དཔོན་ཏེ།


TNT17_Page_0556
[མ་དཔེ་གཟིགས་ན་འདིར་གནོན།]

མྱ་ངན་ལས་འདས་པའི་གྲོང་ཁྱེར་ནི་ཐེག་པ་གསུམ་ཅར་གྱི་དབང་དུ་བྱས་པ་སྟེ། དེར་འགྲོ་འདོད་པ་རྣམས་མ་ནོར་བར་འཁྲིད་པའི་ཕྱིར་དེད་དཔོན་ཏེ་གྲོང་ཁྱེར་ནི་བསྟི་བའི་གནས་ཏེ་ཐར་པའོ། །ཡེ་ཤེས་དཔག་ཏུ་མེད་པ། སྤོབས་པ་བསམ་གྱིས་མི་ཁྱབ་པ། གསུང་རྣམ་པར་དག་པ། དབྱངས་སྙན་པ། སྐུ་བྱད་བལྟ་བས་ཆོག་མི་ཤེས་པ་སྐུ་མཚུངས་པ་མེད་པ་ཞེས་ཚིག་དྲུག་གིས་གཞན་དོན་མཛད་པའི་ཐབས་བསྟན་ཏོ། །དེ་ལ་ཐུགས་ཀྱི་འཕྲིན་ལས་ནི། ཡེ་ཤེས་དཔག་ཏུ་མེད་པ་སྟེ། སེམས་ཅན་རྣམས་ཀྱི་ཁམས་དང་མོས་པ་དང་དབང་པོ་དང༌། བག་ལ་ཉལ་ཐམས་ཅད་མཁྱེན་པས་འགྲོ་དོན་གྱི་དུས་དང་ཐབས་ཐམས་ཅད་མ་ནོར་བར་སྤྱོད་པའོ། །གསུང་གི་འཕྲིན་ལས་ནི། སྤོབས་པ་བསམ་གྱིས་མི་ཁྱབ་པ་སྟེ། དེ་ལ་ཡི་གེ་ལ་བརྟེན་པ་ནི་ཚིག་གཅིག་ལ་བརྟེན་ནས། ཚིག་གི་རྣམ་གྲངས་གཞན་དང་གཞན་གྱིས་བསྟན་ན། བསྐལ་པ་དཔག་ཏུ་མེད་པ་བསྟན་ཡང་མི་བཟད་པ་དང༌། དོན་ལ་བརྟེན་པ་ནི་བསྐལ་པ་དཔག་ཏུ་མེད་པར་སེམས་ཅན་མཐའ་ཡས་པས་དོན་མི་འདྲ་བ་ཁོ་ནས། དུས་གཅིག་ཏུ་ཞུ་བ་ཞུས་ཀྱང་དུས་གཅིག་ཁོ་ནར་གསུང་མི་འདྲ་བ་གསུང་ཐ་དད་པ་སྣ་ཚོགས་རྩོལ་མེད་དུ་བྱུང་ནས་སོ་སོ་ལ་མ་འཛིངས་པར་ལན་ཐེབས་ལ། གསུང་གཅིག་ཁོ་ནས་ཀྱང་དོན་མཐའ་ཡས་པ་སོ་སོ་ཐ་དད་པའི་ལན་དུ་ཡང་འབྱུང་བ་དང༌། གསུང་མཐའ་


TNT17_Page_0557
[མ་དཔེ་གཟིགས་ན་འདིར་གནོན།]

ཡས་པས་ཀྱང་གདུལ་བྱ་གཅིག་གི་ཡེ་ཤེས་མཐའ་མེད་དུ་འཕེལ་བར་ཡང་འགྱུར་བས། སྤོབས་པ་ནི་ཆོས་སྟོན་པ། བསམ་གྱིས་མི་ཁྱབ་པ་ནི་སྟོན་ཚུལ་ངོ་མཚར་རྨད་དུ་བྱུང་བའོ། །གསུང་རྣམ་པར་དག་པ་སྟེ། ངག་གི་སྐྱོན་བརྫུན་སྨྲ་བ་དང༌། ང་རོའི་སྐྱོན་གདངས་མི་སྙན་པ་དང༌། བྱེད་ལས་ཀྱི་སྐྱོན་ཡིད་མི་བདེ་བར་བྱེད་པ་སོགས་དང༌། རྩོལ་པའི་སྐྱོན་ཧ་ཅང་མྱུར་ཆེས་པ་ལ་སོགས་པ། གསུང་ལ་སྐྱོན་མཐའ་དག་སྤངས་ཤིང་རྣམ་པར་དག་པ་དང༌། གསུང་གི་ཡོན་ཏན་གྱི་སྒོ་ནས་དབྱངས་སྙན་པ་སྟེ། ཐེག་དམན་ལྟར་ན་གསུང་དབྱངས་ཡན་ལག་ལྔ་ལྡན་ནམ། ཐེག་ཆེན་ལྟར་ན་ཡན་ལག་དྲུག་ཅུ་ལ་སོགས་པའོ། །སྐུའི་འཕྲིན་ལས་ནི། སྐུ་བྱད་བལྟ་བས་ཆོག་མི་ཤེས་པ་སྟེ། སྐུའི་ཡན་ལག་དང་ཉིང་ལག་གི་ཆ་ཤས་རེ་རེའི་མཛེས་སྡུག་གིས་ཀྱང༌། ཁམས་གསུམ་གྱི་མཛེས་པ་ཐམས་ཅད་ཟིལ་གྱིས་གནོན་པའི་ཕྱིར། བལྟས་པས་ཚིམ་པ་མེད་པའོ། །སྐུ་མཚུངས་པ་མེད་པ་ནི། ཁམས་གསུམ་དང་འགྲོ་བ་དྲུག་དང༌། སྐྱེ་གནས་བཞིར་གཏོགས་པ་རྣམས་ལ། བཅོམ་ལྡན་འདས་ཀྱི་སྐུའི་ཁ་དོག་དང་དབྱིབས་ལས་ལྷག་པ་ལྟ་སྨོས་ཀྱང་ཅི་དགོས། མཉམ་པར་མཚུངས་པ་འགའ་ཡང་མ་དམིགས་པའོ། །འདོད་པ་དག་གིས་མ་གོས་པ། གཟུགས་དག་གིས་ཉེ་བར་མ་གོས་པ། གཟུགས་མེད་པ་དག་


TNT17_Page_0558
[མ་དཔེ་གཟིགས་ན་འདིར་གནོན།]

དང་མ་འདྲེས་བ་ཞེས་ཚིག་གསུམ་གྱིས་བཅོམ་ལྡན་འདས་དེ། གང་ལ་གནས་པ་བསྟན་ཏེ། དེ་ཡང་ཁམས་གསུམ་ལ་མི་གནས་ཏེ་ཆོས་ཀྱི་དབྱིངས་ལ་བཞུགས་ཤིང༌། ཁམས་གསུམ་དུ་སྤྱོད་པ་ན་ཡང་ཁམས་གསུམ་གྱི་སྐྱོན་གྱིས་མ་གོས་ཞེས་པའོ། །དེ་ལ་འདོད་ཁམས་ན་སེམས་ཅན་གྱི་དོན་མཛད་པའི་ཚེ། འདོད་པ་ལ་འདུན་པ་དང༌། གནོད་སེམས་དག་གིས་མ་གོས་པ་དང་གཟུགས་དང་གཟུགས་མེད་པའི་ཁམས་སུ་སྤྱོད་པའི་ཚེ། དེ་དག་གིས་བསམ་གཏན་ལ་སྙོམས་པར་འཇུག་པའི་སྐྱོན་སྲེད་པ། ལྟ་བ་དང༌། ང་རྒྱལ་དང༌། ཐེ་ཚོམ་ལ་སོགས་པས་ཉེ་བར་ཏེ་ལྷག་པར་མ་གོས་ཞེས་པ་དེ་ཡང་འདོད་གཟུགས་དག་ནི་ལུས་ངག་དང་འབྲེལ་བའི་ཕྱིར་དེ་དང་དེས་མ་གོས་པ་ཞེས་མཚུངས་པར་སྦྱར་ལ། གཟུགས་མེད་ཁམས་ན་གོས་པའི་ཚུལ་དེ་མེད་པའི་ཕྱིར། མ་འདྲེས་པ་ཞེས་བསྟན་པར་བཞེད་དེ། གཟུགས་མེད་ཁམས་ན་གཟུགས་མེད་པ་ཁོ་ནའི་ལུགས་ལྟར་ན་སྒྲ་ཇི་བཞིན་དུ་སྦྱར་ལ། གཟུགས་ཡོད་པའི་ལུགས་ལའང༌། དེ་ཤིན་ཏུ་ཕྲ་བ་ཡིན་པའི་ཕྱིར། དེ་ལྟར་འཆད་པ་མི་འགལ་ལོ། །ཕུང་པོ་དག་ལས་རབ་ཏུ་རྣམ་པར་གྲོལ་བ་ཁམས་རྣམས་དང་མི་ལྡན་པ། སྐྱེ་མཆེད་རྣམས་སྡམ་པ་ཞེས་ཚིག་གསུམ་གྱིས་སེམས་ཅན་གྱི་དོན་སྤྱོད་པ་ན་གང་ལ་ཡང་མ་ཆགས་པར་བསྟན་ཏེ། ཕུང་པོ་རྣམས་ནི་ཡང་ཡང་སྐྱེ་བའི་མཚན་ཉིད་ཅན་གྱི་ཕྱིར། དེ་བཞིན་གཤེགས་པ་སྐྱེ་བ་མེད་པས་དེ་ལས་རབ་ཏུ་རྣམ་པར་


TNT17_Page_0559
[མ་དཔེ་གཟིགས་ན་འདིར་གནོན།]

གྲོལ་བའོ། །ཁམས་རྣམས་ནི་རྣམ་ཤེས་ཡུལ་འཛིན་པ་སྐྱེ་བའི་སྒོ་འཇོག་ན། ཡུལ་དང་ཤེས་པ་ལ་བརྟེན་པའི་ཉོན་མོངས་པ་སྤངས་པའི་ཕྱིར། ཁམས་རྣམས་དང་མི་ལྡན་པ། སྐྱེ་མཆེད་ནི་མཐོང་བ་ལ་སོགས་པ་སྐྱེ་བའི་རྒྱུའི་སྒོ་ནས་འཇོག་ལ། དེ་ལ་བརྟེན་པའི་ཉོན་མོངས་རྣམས་སྡམས་ཟིན་པའི་ཕྱིར། སྐྱེ་མཆེད་རྣམས་སྡམས་པའོ། །མདོར་བསྡུ་ན་ངེས་པའི་དོན་དུ་ཕུང་ཁམས་སྐྱེ་མཆེད་ལས་འདས་པའི་ཡེ་ཤེས་ཀྱི་སྐུའོ། །ད་ནི་སྤངས་པ་དང་ཡེ་ཤེས་ཀྱིས་འགྲོ་དོན་མཛད་ཚུལ་སྟོན་ཏེ། དེ་ལས་མདུད་པ་རྣམས་བཅད་པ། ཡོངས་སུ་གདུང་བ་དག་ལས་རྣམ་པར་གྲོལ་བ། སྲེད་པ་ལས་གྲོལ་བ། ཆུ་བོ་ལས་བརྒལ་བ། ཞེས་ཚིག་བཞིས་དང་པོར་སྤངས་པ་ཇི་ལྟ་བུ་ཞིག་གི་སྒོ་ནས་སེམས་ཅན་གྱི་དོན་མཛད་པ་དེ་བསྟན་ཏེ། ཉོན་མོངས་པ་ཐམས་ཅད་བསྡུ་ན། ཡུལ་དང་ཕྲད་པ་མདུད་པའི་མཚན་ཉིད་ཅན་སྲེད་པ་དང༌། མ་ཕྲད་པ་ཡོངས་སུ་གདུང་བའི་མཚན་ཉིད་ཅན་ཆུ་བོའོ། །དེ་ཡང་མདུད་པ་བཅད་པ་ཉིད་ཀྱི་ཕྱིར་སྲེད་པ་ལས་གྲོལ་བའོ། །ཡོངས་སུ་གདུང་བ་ལས་གྲོལ་བའི་ཕྱིར་ཆུ་བོ་ལས་བརྒལ་བའོ། །ཞེས་སྦྱར་ཏེ་དེ་ལ་མདུད་པ་ནི། མ་གྲོལ་བ་འཆིངས་པའི་དོན་ཏེ་དེ་བཅད་པ་ནི། ལུས་དང་ལོངས་སྤྱོད་སོགས་ཕྲད་པའི་ཡུལ་ལ་སྲེད་པ་བཅད་པ་དང༌། ཡོངས་སུ་གདུང་བ་ནི་མ་ཕྲད་པའི་ཡུལ་ལ་དམིགས་ནས་ཉོན་མོངས་ཤས་ཆེར་ཀུན་ཏུ་སྤྱོད་པ་དེ་སྤངས་པའོ། །ཞེས་ཏེ་


TNT17_Page_0560
[མ་དཔེ་གཟིགས་ན་འདིར་གནོན།]

དེས་ན་སྲེད་པ་ནི་ཁམས་གསུམ་གྱི་ཡོངས་སུ་བསྡུས་པའི་སྲེད་པ་དང༌། ཆུ་བོ་ནི་ཆུ་བོ་དང་འདྲ་བར་རྒྱུན་ཕྱོགས་སུ་ཁྱེར་བ་སྟེ། ཉོན་མོངས་པས་སེམས་དབང་མེད་དུ་འཁྱེར་བའོ། །དེ་ཡང་བཞི་སྟེ། འདོད་པ་དང༌། སྲིད་པ་དང༌། མ་རིག་པ་དང༌། ལྟ་བའི་ཆུ་བོའོ། །ཡེ་ཤེས་ཡོངས་སུ་རྫོགས་པ། འདས་པ་དང་མ་བྱོན་པ་དང་ད་ལྟར་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ལ་གནས་པ། མྱ་ངན་ལས་འདས་པ་ལ་མི་གནས་པ། ཡང་དག་པ་ཉིད་ཀྱི་མཐའ་ལ་གནས་པ། ཞེས་ཚིག་བཞིའི་གཉིས་པ་ཡེ་ཤེས་ཇི་ལྟ་བུའི་སྒོ་ནས་སེམས་ཅན་གྱི་དོན་མཛད་པ་བསྟན་ཏོ། །ཡེ་ཤེས་ནི་གསུམ་སྟེ། རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་ཤེས་བྱ་ཐམས་ཅད་མཁྱེན་པ་དང༌། ཐ་དད་མེད་པར་མཁྱེན་པའི་ཡེ་ཤེས་ཀྱིས་སངས་རྒྱས་ཐམས་ཅད་མཉམ་པ་ཉིད་དུ་གཟིགས་པ་དང༌། མི་གནས་པ་མཁྱེན་པའི་ཡེ་ཤེས་ཀྱིས། འཁོར་འདས་ཀྱི་མཐའ་ལ་མི་གནས་ཤིང༌། ཡང་དག་པའི་མཐའ་ལ་གནས་པ་སྟེ། དེ་དག་ཀྱང་གོ་རིམ་བཞིན་དུ་སྦྱར་རོ། །དང་པོའི་དབང་དུ་བྱས་ནས་ཡེ་ཤེས་ནི་དུས་གསུམ་གྱི་ཤེས་བྱའི་དཀྱིལ་འཁོར་མ་ལུས་པ་རྣམས་ལ་ཡོངས་སུ་རྫོགས་པར་ཁྱབ་པའོ། །འདས་པ་དང་མ་འོངས་པ་དང་ད་ལྟར་བའི་སངས་རྒྱས་ཐམས་ཅད་ཀྱི་ཡེ་ཤེས་ནི་སངས་རྒྱས་གཅིག་གི་ཡེ་ཤེས་ཡིན་ལ། སངས་རྒྱས་གཅིག་གི་ཡེ་ཤེས་ཉིད་དུས་གསུམ་གྱི་སངས་རྒྱས་ཐམས་ཅད་ཀྱི་ཡེ་ཤེས་


TNT17_Page_0561
[མ་དཔེ་གཟིགས་ན་འདིར་གནོན།]

ཀྱང་ཡིན་པས། ཐ་དད་མེད་པར་མཁྱེན་པའོ། །མྱ་ངན་ལས་འདས་པ་ལ་མི་གནས་པ་ནི། མྱ་ངན་ལས་འདས་པའི་མཐའ་དམན་པའི་མྱང་འདས། གཞན་དོན་རྒྱུན་ཆད་པའི་དབྱིངས་ལ་མི་གནས་པའོ། །ཡང་དག་པ་ཉིད་ཀྱི་མཐའ་ནི། ཡང་དག་པ་ཁོ་ནའི་མཐའ་སྟེ། དེ་བཞིན་ཉིད་ཆོས་ཀྱི་དབྱིངས་ཤིན་ཏུ་རྣམ་པར་དག་པ་ཆོས་ཀྱི་སྐུ་ལ་གནས་པ་སྟེ། འདིས་འཁོར་བ་ལ་མི་གནས་པར་བསྟན་པས། འདི་གཉིས་སྡོམས་པ་ནི་མི་གནས་པའི་མྱང་འདས་སོ། །སེམས་ཅན་ཐམས་ཅད་ལ་གཟིགས་པའི་ས་ལ་བཞུགས་པ་སྟེ་ཞེས་པ་ནི། ཐམས་ཅད་ཀྱི་དོན་བསྡུའི་ཚིག་སྟེ། དེ་བཞིན་གཤེགས་པའི་སྐུ་གསུམ་ལས། ཆོས་ཀྱི་སྐུ་ནི་སེམས་ཅན་ཐམས་ཅད་ཀྱི་ཆོས་ཉིད་ལ་རང་གི་རང་བཞིན་དུ་གཟིགས་ཤིང་གཡོ་བ་མེད་པར་བཞུགས་པ་དང༌། ལོངས་སྤྱོད་རྫོགས་པའི་སྐུ་ནི་དག་པའི་སེམས་ཅན་སེམས་དཔའ་ཆེན་པོ་རྣམས་ཀྱི་སེམས་ཀྱི་རྒྱུད་ལ་གཟིགས་ཤིང༌། ཆོས་སྟོན་པས་བཞུགས་པ་དང༌། མཆོག་གི་སྤྲུལ་པའི་སྐུ་ནི་ཉན་ཐོས་ལ་སོགས་པ་དང༌། སོ་སོ་སྐྱེ་བོ་བློའི་མིག་ཡོངས་སུ་དག་པ་རྣམས་སེམས་ཀྱི་རྒྱུད་གྲོལ་བར་བྱ་བའི་ཕྱིར། དེ་དག་གི་ཁམས་དང་མོས་པ་གཟིགས་པའི་གནས་སམ་ས་ལ་བཞུགས་པ་ཡིན་ནོ། །དེ་ལྟར་ན་རྗེས་དྲན་ཕྱི་མ་འདི་ནི། གཏན་དུ་བཞུགས་པ་དང༌། སྐུའི་རང་བཞིན་དང༌། གང་ལ་བརྟེན་པ་དང༌། བྱ་བ་དང༌། ཐབས་དང༌།


TNT17_Page_0562
[མ་དཔེ་གཟིགས་ན་འདིར་གནོན།]

གནས་དང༌། མ་ཆགས་པ་དང༌། སྤངས་པ་དང༌། ཡེ་ཤེས་ཇི་ལྟ་བུས་འགྲོ་བའི་དོན་མཛད་པ་དང༌། དོན་བསྡུ་སྟེ་དོན་ཚན་དགུས་བསྡུས་པ་ཡིན་ནོ། །འདི་དག་ནི་སངས་རྒྱས་བཅོམ་ལྡན་འདས་ཀྱི་སྐུ་ཆེ་བའི་ཡོན་ཏན་ཡང་དག་པ་རྣམས་སོ། །ཞེས་པ་ནི་གོང་དུ་བསྟན་པའི་ཡོན་ཏན་ཐམས་ཅད་གཞན་ལ་མེད་ཅིང་དེ་བཞིན་གཤེགས་པ་ལ་མངའ་བའི་ཆེ་བ་ཡིན་ནོ། །ཞེས་པས་རིགས་མཐུན་ཕྲ་མོ་ཡོད་སྲིད་ཀྱང་རྫོགས་པར་གཞན་ལ་མེད་པའི་དོན་ནོ། །དེ་དག་ནི་སངས་རྒྱས་རྗེས་དྲན་གྱི་དོན་བཤད་པ་སྟེ། རྗེས་དྲན་དང་པོ་དགུ་ལ་འཕགས་པ་ཐོགས་མེད་སྐུ་མཆེད་གཉིས་ཀར་གྱིས་བཤད་པ་མཛད་པ་དང༌། རྗེས་དྲན་ཕྱི་མ་ལ་སློབ་དཔོན་དབྱིག་གཉེན་གྱིས་འགྲེལ་པ་མཛད་པ་ལྟར་ལས། འདུས་ཤིང་གསལ་བར་བཤད་པ་ཡིན་ནོ། །གཉིས་པ་ཆོས་རྗེས་སུ་དྲན་པའི་མདོ་ལ། དམ་པའི་ཆོས་ནི་ཞེས་པ་ལུང་དང་རྟོགས་པ་དང་མྱ་ངན་ལས་འདས་པའི་ཆོས་གསུམ་ཅི་རིགས་པ་ལ་སྦྱར་རོ། །ཐོག་མར་དགེ་བ་ནི་དང་པོ་ཐོས་པའི་དུས་ན། དོན་ངེས་ཤིང་ཡིད་ཆེས་པའི་དད་པ་བསྐྱེད་པ་དང༌། བར་དུ་དགེ་བ་ནི་བསམ་པའི་དུས་ན་ཆོས་ལས་ཇི་སྐད་བཤད་པ་ལྟར་གྱི་ཕན་ཡོན་དང་འབྲས་བུ་རྣམས་ཐོབ་པར་རིག་ནས་དགའ་བར་འགྱུར་བ་དང༌། ཐ་མར་དགེ་བ་ནི་སྒོམ་པའི་དུས་ན་དེ་ཁོ་ན་ཉིད་ཕྱི་ཅི་མ་ལོག་པར་རྟོགས་པའི་བློ་གྲོས་ཀྱི་རྒྱུ་བྱེད་པའི་དོན་ནོ། །དོན་བཟང་པོ་ནི། ཀུན་


TNT17_Page_0563
[མ་དཔེ་གཟིགས་ན་འདིར་གནོན།]

རྫོབ་དང་དོན་དམ་པའི་བདེན་པ་མ་འཁྲུལ་བར་སྟོན་པའོ། །ཚིག་འབྲུ་བཟང་པོ་ནི་གོ་བདེ་ཞིང་འཛིན་སླ་ལ་བརྗོད་པ་བདེ་ཞིང་སྙན་པའོ། །མ་འདྲེས་པ་ནི། གཞན་མུ་སྟེགས་བྱེད་ལ་སོགས་པ་དང་ཐུན་མོང་མ་ཡིན་པའི་ཡོན་ཏན་དང་ལྡན་པ་སྟེ། ཕྲ་བའི་མི་རྟག་པ་དང༌། འདུ་བྱེད་ཀྱི་སྡུག་བསྔལ་དང༌། བདག་མེད་ལ་སོགས་པ་དང་ལྡན་པའོ། །ཡོངས་སུ་རྫོགས་པ་ནི་འདོད་པའི་ཉོན་མོངས་པ་ཉི་ཚེའི་གཉེན་པོ་ལྟ་བུ་མ་ཡིན་གྱི། ཁམས་གསུམ་ཆར་གྱི་ཉོན་མོངས་སྤོང་བའོ། །ཡོངས་སུ་དག་པ་ནི། རང་བཞིན་རྣམ་པར་དག་པའི་གནས་ལུགས་ཆོས་དབྱིངས་དང༌། དེ་ལ་དམིགས་པའི་ཡེ་ཤེས་སོ། །ཡོངས་སུ་བྱང་བ་ནི་གློ་བུར་གྱི་དྲི་མ་སྦྱོང་བྱེད་དང་དེ་སྤངས་པའི་བྲལ་འབྲས་གཉིས་སོ། །དེ་ལྟར་ན་དགེ་བ་གསུམ་དང༌། དོན་ཚིག་བཟང་བ་སྟེ་ལྔ་པོ་ནི། ལུང་གི་ཆོས་ཀྱི་ཡོན་ཏན་གཙོ་བོར་བསྟན་པ་ཡིན་ལ་མ་འདྲེས་པ་སོགས་བཞི་ནི། ཚངས་སྤྱོད་ཡོན་ཏན་བཞི་ལྡན་ཞེས་བྱ་སྟེ། ཡུལ་འདུས་མ་བྱས་ཀྱི་དམ་ཆོས་དང༌། ཡུལ་ཅན་རྟོགས་པའི་དམ་ཆོས་ཀྱི་ཆེ་བའོ། །དེ་རྣམས་མདོ་སྡེའི་རྒྱན་གྱི་འགྲེལ་པར་དབྱིག་གཉེན་གྱིས་གསུངས་པ་ལྟར་བཤད་པའོ། །བཅོམ་ལྡན་འདས་ཀྱིས་ཆོས་ལེགས་པར་གསུངས་པ་ཞེས་པའམ། དཔེ་གཞན་འགའ་ཞིག་ལས་ཀྱང༌། བཅོམ་ལྡན་འདས་ཀྱི་ཆོས་ནི་ལེགས་པར་གསུངས་ཞེས་འབྱུང་སྟེ། མུ་སྟེགས་ཅན་རྣམས་ཀྱིས་བསྟན་པའི་ཆོས་ནི་ཉེས་པར་བཤད་


TNT17_Page_0564
[མ་དཔེ་གཟིགས་ན་འདིར་གནོན།]

པ་སྟེ། ཐར་པའི་ལམ་མ་ཡིན་པ་ལ་ལམ་དུ་འདུ་ཤེས་པའི་ཕྱིར་དང༌། ཁ་ཅིག་ནི་ངན་སོང་གི་ལམ་ལ་མཐོ་རིས་ཀྱི་ཆོས་སུ་འདུ་ཤེས་པའི་ཕྱིར་དང༌། ཁ་ཅིག་མཐོ་རིས་ཀྱི་ལམ་སྟོན་ཡང༌། དྲི་མ་ཅན་དང་མ་ཚང་པ་དག་སྟོན་པའི་ཕྱིར་རོ། །བཅོམ་ལྡན་འདས་ཀྱིས་བསྟན་པ་ནི་དེ་ལས་ལྡོག་པའི་ཕྱིར་ལེགས་པར་གསུངས་པའོ། །ཡང་དག་པར་བསྟན་པ་ནི། ཀུན་རྫོབ་དང་དོན་དམ་པའི་གནས་སྐབས་གང་ཡིན་ཀྱང་རུང༌། སོ་སོའི་མཚན་ཉིད་ཕྱིན་ཅི་མ་ལོག་པར་སྟོན་པའོ། །ནད་མེད་པ་ནི། ཉོན་མོངས་པ་དང༌། བག་ལ་ཉལ་གྱི་སྒྲིབ་པ་ཐམས་ཅད་ཀྱི་གཉེན་པོར་འགྱུར་པའི་ཕྱིར་སྒྲིབ་པའི་ནད་མེད་པའོ། །དུས་ཆད་པ་མེད་པ་ཞེས་པ་ནི། འདུས་མ་བྱས་ཀྱི་དབྱིངས་འགྱུར་བ་མེད་ཅིང་འཇིག་པ་མེད་པ་དང༌། འཕགས་པའི་ལམ་གྱི་ཡེ་ཤེས་ཀྱང་ཉམས་པ་མེད་པ་དང༌། སྤངས་བྱ་སྤངས་ཟིན་པ་སླར་ཡང་སྤོང་མི་དགོས་པ་རྣམས་ཀྱི་དོན་ནོ། །ཉེ་བར་གཏོད་པ་ཞེས་པ་ནི། ཨུ་པ་ནཱ་ཡི་ཀ་ཞེས་པའི་སྒྲ་ལས་དྲངས་ན། ཉེ་བར་འདྲེན་པ་སྟེ། ཉོན་མོངས་པ་དང་སྡུག་བསྔལ་གྱིས་བསྡུས་པའི་འཁོར་བ་སྤངས་པའི་ཚུལ་གྱིས་ཟག་མེད་ཀྱི་དབྱིངས་སུ་གཏོད་ཅིང་འདྲེན་པའི་དོན་ཡིན་ལ། འདིའི་འགྲེལ་པར་ལོ་ཙཱ་བས་རིག་པ་དང་ལྡན་པ་ཞེས་བསྒྱུར་ཏེ། དེ་ལྟར་ན་ཨུ་པ་རྱ་ཡི་ཀ་ཞེས་པ་ཡིན་དགོས་ཀྱང༌། བཤད་པ་དང་ཅུང་མི་འགྲིག་གོ །འདི་མཐོང་བ་ལ་དོན་ཡོད་པ་ནི། གང་ཞིག་ཆོས་མཐོང་བ་ལས། འབྲས་


TNT17_Page_0565
[མ་དཔེ་གཟིགས་ན་འདིར་གནོན།]

བུ་རྣམས་ཀྱི་མཆོག་ཐོབ་ཅིང༌། སླར་མི་ལྡོག་པའི་ཕྱིར་དོན་ཡོད་པའོ། །རྒྱ་སྐད་ཀྱི་དཔེ་འགའ་ཞིག་ལས། ཨེ་ཧི་པ་ཤྱི་ཀཿཞེས་འབྱུང་བ། འདིར་ལྟོས་ཤིག་ཅེས་བསྒྱུར་ཏེ། འོན་ཀྱང་དཀྱུས་ལྟར་ལེགས་སོ། །མཁས་པ་རྣམས་ཀྱིས་སོ་སོར་རང་གིས་རིག་པར་བྱ་བ་ཞེས་པ་ནི། མཁས་པའི་སྒྲ་ནི་འཕགས་པ་ཡིན་ལ། དེ་རྣམས་ཀྱི་མཉམ་གཞག་ཡེ་ཤེས་རྣམ་པར་མི་རྟོག་པས་མངོན་སུམ་དུ་རྟོགས་པར་བྱ་བ་ཡིན་གྱི། རྣམ་པར་ཤེས་པ་དང་རྟོག་གེའི་ཡུལ་མ་ཡིན་ནོ། །བཅོམ་ལྡན་འདས་ཀྱིས་གསུངས་པའི་ཆོས་འདུལ་བ་ལ་ལེགས་པར་སྟོན་པ་ཞེས་པ་ནི། སོ་སོར་རང་གི་རིག་པར་བྱ་བ་ཡིན་ཡང༌། ལུང་གིས་མི་སྟོན་པ་ནི་མ་ཡིན་ཏེ། དེ་བཞིན་གཤེགས་པའི་བཀའ་ནི་ཆོས་ཀྱི་སྐུའི་རྒྱུ་མཐུན་པ་ཡིན་པས། ཆོས་ཀྱི་སྐུ་ལ་ཇི་ལྟར་མངའ་བ་བཞིན་ལུང་ལས་འབྱུང་བས། སོ་སོར་རང་གིས་རིག་བྱ་དེ་ལུང་ལས་ཀྱང་བཤད་ཅེས་པའོ། །ལེགས་པར་སྟོན་པ་ཞེས་པ་ལ་རྒྱ་སྐད་འགའ་ཞིག་ཏུ༌། སུ་པྲ་གེ་དི་ཏ་ཞེས་འབྱུང་བ་ལྟར་ན་ལེགས་པར་རབ་ཏུ་ཕྱེ་བ་ཞེས་པར་འགྱུར་རོ། །ངེས་པར་འབྱུང་བ་ནི་འཁོར་བ་ལས་ངེས་པར་འབྱུང་བའོ། །རྫོགས་པའི་བྱང་ཆུབ་ཏུ་འགྲོ་བར་བྱེད་པ་ནི། ལུང་ལ་དམིགས་ནས་ལམ་གྱིས་འགྲོ་བར་བྱེད་པ་སྟེ། ཐེག་ཆེན་ཉིད་ཀྱི་ལམ་ལྟ་ཅི་སྨོས། བརྒྱུད་པའི་སྒོ་ནས་ནི་ཉན་རང་གི་ལམ་ཡང་འདི་ཡིན་ཏེ། ཉན་ཐོས་ལྷག་


TNT17_Page_0566
[མ་དཔེ་གཟིགས་ན་འདིར་གནོན།]

མེད་དུ་ཞུགས་པར་འདོད་པ་རྣམས་ཀྱང༌། དུས་ཡུན་རིང་པོ་འདས་པའི་འོག་ཏུ་གདོན་མི་ཟ་བར་ཐེག་ཆེན་དུ་འཇུག་པའི་ཕྱིར་རོ། །འདས་ནི་མཐར་ཐུག་ཐེག་པ་གཅིག་ཏུ་བསྟན་ཏོ། །མི་མཐུན་པ་མེད་ཅིང་ཞེས་པ་ནི། །རྟོགས་བྱའི་ཆོས་ཉིད་ཀྱང་གཅིག་ཡིན་ཅིང༌། འཕགས་པ་རང་ས་ཐད་མཉམ་པ་རྣམས་ནི་ཉམས་མྱོང་གི་ཆོས་མི་འདྲ་བ་གཏན་མེད་པའོ། །འདུས་པ་དང་ལྡན་པ་ནི། གང་ཤེས་པ་གཅིག་གིས་རྣམ་པ་དུ་མ་ཡོངས་སུ་འཛིན་པས་རྣམ་པ་རྣམས་གཅིག་ལ་འདུས་པ་ལྟ་བུའི་ཡོན་ཏན་དང་ལྡན་པ་སྟེ། ཡེ་ཤེས་གཅིག་ཉིད་ཀྱིས་མི་རྟག་པ་དང༌། སྡུག་བསྔལ་བ་དང༌། བདག་མེད་པ་ལ་སོགས་པ་མཐའ་དག་རྟོགས་པའོ། །བརྟེན་པ་ཡོད་པ་ནི། དགེ་བའི་ཆོས་མ་ལུས་པ་ཐམས་ཅད་ཀྱང༌། ཆོས་ཀྱི་དབྱིངས་དེ་བཞིན་གཤེགས་པའི་སྙིང་པོ་ལ་བརྟེན་པ་ཡིན་ལ། དེ་ཉིད་ཆོས་དཀོན་མཆོག་གི་མཐར་ཐུག་པའོ། །རྒྱུ་བ་བཅད་པ་ནི་སེམས་དང་སེམས་བྱུང་གི་རྒྱུ་བ་ཐམས་ཅད་ཡོངས་སུ་ཆད་པ་སྟེ། དེ་བཞིན་གཤེགས་པའི་ས་ལ་རྣམས་པ་ཐམས་ཅད་དུ་དང༌། བྱང་ཆུབ་སེམས་དཔའ་འཕགས་པ་རྣམས་ཀྱི་མཉམ་གཞག་ཏུ་ཡང༌། ཀུན་གཞི་ལས་གཞན་པ་ཐམས་ཅད་འགགས་པའོ། །གསུམ་པ་དགེ་འདུན་རྗེས་དྲན་གྱི་མདོ་ལ། ཐེག་པ་ཆེན་པོའི་དགེ་འདུན་ནི་ཞེས་པ་ལྟར་ན། བྱང་ཆུབ་སེམས་དཔའ་


TNT17_Page_0567
[མ་དཔེ་གཟིགས་ན་འདིར་གནོན།]

ཕྱིར་མི་ལྡོག་པའི་དགེ་འདུན་རྣམས་ཡིན་ལ། དེའི་དབང་དུ་བྱས་ན་ལེགས་པར་བཞུགས་པ་ནི་ཚུལ་ཁྲིམས་རྣམ་པ་གསུམ་ལ་གནས་པའོ། །རིགས་པར་ཞུགས་པ་ནི་ཏིང་ངེ་འཛིན་མཐའ་ཡས་ལ་ཞུགས་པའོ། །དྲང་པོར་ཞུགས་པ་ནི་རྟག་པ་དང་ཆད་པའི་མཐའ་ལ་མི་གནས་པར། ཆོས་ཀྱི་དབྱིངས་མཉམ་པ་ཉིད་ལ་ཞུགས་པ་སྟེ། དེ་གསུམ་རིམ་ཅན་དུ་ཚུལ་ཁྲིམས་དང་སེམས་དང་ཤེས་རབ་ཀྱི་བསླབ་པའོ། །མཐུན་པར་ཞུགས་པ་ནི། ཐམས་ཅད་ཀྱང་ལྟ་བ་དང༌། སྤྱོད་པ་དང༌། དམིགས་པའི་ཡུལ་དང༌། འགྲོ་བའི་དོན་སྤྱོད་པ་ལ་མི་མཐུན་པ་ཅུང་ཟད་ཀྱང་མེད་པའི་ལམ་ལ་ཞུགས་པའོ། །ཐལ་མོ་སྦྱར་བའི་འོས་སུ་གྱུར་པ་ནི། གང་ཞིག་གཞན་གྱིས་མ་མཐོང་བའི་ཆོས་ཉིད་ཟབ་མོ་མཐོང་བའི་ཕྱིར་རོ། །ཕྱག་བྱ་བའི་འོས་སུ་གྱུར་པ་ནི། སེམས་ཅན་འཁོར་བ་ལས་སྒྲོལ་བའི་སྙིང་རྗེ་ཆེན་པོ་ཅན། བདག་ཉིད་ཀྱི་དོན་ཡོངས་སུ་སྤངས་བས། སྐྱེས་བུ་དམ་པའི་སྤྱོད་པ་ཆེན་པོ་དང་ལྡན་པའི་ཕྱིར་རོ། །བསོད་ནམས་ཀྱི་དཔལ་གྱི་ཞིང་ཞེས་པ་ནི། བསོད་ནམས་ཡང་ཡིན་ལ་དཔལ་ཡང་ཡིན་པས་བསོད་ནམས་ཀྱི་ཚོགས་ཆེན་པོ་དང་ལྡན་པ་དང༌། ཞིང་དེ་གུས་པ་བྱ་བའི་ཡུལ་དུ་གྱུར་པའོ། །ཡོན་ཡོངས་སུ་སྦྱོང་བ་ཆེན་པོ་ནི། ཉེས་པ་སྤངས་ཤིང༌། ཡོན་ཏན་གྱི་ཚོགས་བསམ་གྱིས་མི་ཁྱབ་པས་ཉེར་བར་བརྒྱན་


TNT17_Page_0568
[མ་དཔེ་གཟིགས་ན་འདིར་གནོན།]

པ། མཐའ་ཡས་པ་ལ་ཕན་པ་ཉེ་བར་སྒྲུབ་པའི་ཕྱིར། རང་ཉིད་ཡོན་གྱི་ཕུང་པོ་སྟོང་གསུམ་དང་མཉམ་པས་རྟག་ཏུ་མཆོད་ཀྱང་རང་ཉིད་ལ་སྒྲིབ་པར་མི་འགྱུར་ཞིང༌། འབུལ་བ་པོ་ལ་ཆེས་ཕན་པའོ། །སྦྱིན་པའི་གནས་སུ་གྱུར་པ་ནི། སྦྱིན་པའི་ཞིང་ཁྱད་པར་ཅན་ཏེ། ཞིང་གི་སྐྱོན་རྩ་སྤངས་པ་ལྟ་བུ་སྟེ། མཐོང་བས་སྤངས་པར་བྱ་བའི་ཀུན་ནས་ཉོན་མོངས་པ་རྣམས་ཡོངས་སུ་སྤངས་པས། སྦྱིན་པ་པོ་ལ་འབྲས་བུ་མཐའ་ཡས་པར་འཕེལ་བའོ། །ཀུན་ཏུ་ཡང་སྦྱིན་པའི་གནས་སུ་གྱུར་པ་ཆེན་པོ་ནི། དོན་སྔ་མ་དང་འདྲ་བ་ལས་སྒོམ་པས་སྤངས་པར་བྱ་བའི་རིགས་ཉོན་མོངས་པ་དང༌། ཤེས་བྱ་དང་སྙོམས་འཇུག་གིས་སྒྲིབས་པས་བསྡུས་པ་མང་དུ་བྱང་བའི་ཕྱིར་འབྲས་བུ་ཟད་མི་ཤེས་པ་ཁོ་ནའོ། །ཀུན་ཏུ་ནི་གནས་སྐབས་ཀུན་ཏུའོ། །ཉན་ཐོས་ཀྱི་དགེ་འདུན་ལ་སྦྱོར་བའི་ཚུལ་ལ་ལེགས་པར་ཞུགས་པ་དགྲ་བཅོམ་ཞུགས་པ་སོགས་ལ་འཆད་པར་སྣང་ངོ༌། །ད་ལྟའི་དཀོན་མཆོག་རྗེས་དྲན་གྱི་མདོ་འདི་ཐེག་ཆེན་གྱི་མདོ་ཡིན་ལ། ཐེག་དམན་གྱི་མདོའི་ནང་ཚན་དཀོན་མཆོག་གསུམ་རྗེས་སུ་དྲན་པ་ལ། འཕགས་པ་ཐོགས་མེད་ཀྱིས་བཤད་པ་རགས་རིམ་ཙམ་མཛད་པ་གཅིག་འདུག་པ། བསྟན་བཅོས་རྒྱས་པ་ཞིག་གི་ནང་ནས་ཕྱུང་བ་ཡིན་ནམ་སེམས་ཤིང༌། མདོ་རང་གི་ཚིག་རིགས་ཀྱང་མི་འདྲ་བ་ཆེ་བར་སྣང་བས། ཇི་བཞིན་དུ་འདི་


TNT17_Page_0569
[མ་དཔེ་གཟིགས་ན་འདིར་གནོན།]

དག་ལ་མི་འབྱོར་བར་སྣང་ཡང༌། རྗེས་དྲན་ཕྱི་མ་གཉིས་ཀྱི་སྐབས་སུ་མཐུན་རུང་རྣམས་དེ་དང་མཐུན་པར་བཤད་དོ། །དཀོན་མཆོག་རྗེས་དྲན་གྱི་མདོའི་རྣམ་པར་བཤད་པ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་སྨྲས་པའོ།། །།མངྒ་ལཾ། །ཞུས་དག


TNT17_Page_0570
[མ་དཔེ་གཟིགས་ན་འདིར་གནོན།]

ཤོག་སྟོང་།

ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་མདོ་རྣམ་པར་བཤད་པ་སྔོན་མེད་ལེགས་བཤད།


TNT17_Page_0571
[མ་དཔེ་གཟིགས་ན་འདིར་གནོན།]

ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་མདོ་རྣམ་པར་བཤད་པ་སྔོན་མེད་ལེགས་བཤད་བཞུགས།


TNT17_Page_0572
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི།བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་འགྲེལ་པ་སྔོན་མེད་ལེགས་བཤད་ཞེས་བྱ་བ། སངས་རྒྱས་ལ་ཕྱག་འཚལ་ལོ། ཁྱབ་དང་རྟག་པའི་རང་བཞིན་ཅན། །རྒྱལ་བ་ཐུགས་རྗེའི་བདག་ཉིད་ལ། །གུས་པས་བཏུད་ནས་མདོ་འདིའི་དོན། །ཆ་ཙམ་འབྱེད་ལ་སྤྲོ་བ་སྐྱེས། །དེ་ལ་མདོ་འདིའི་མིང་ནི་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་ཞེས་བྱ་སྟེ། དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ནི། ཇི་སྐད་དུ་འཕགས་པ་ཐོགས་མེད་ཞབས་ཀྱིས་གང་གསུངས་པ་དེ་ཁོ་ན་ཕྱོགས་ཀྱི་གླང་པོའི་ཞལ་སྔ་


TNT17_Page_0573
[མ་དཔེ་གཟིགས་ན་འདིར་གནོན།]

ནས་ཀྱིས་ཀྱང་དྲངས་པ། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །སྒྲུབ་བྱ་དེ་དོན་སྦྱོར་བ་ཡི། །གཞུང་ལམ་དག་ལ་དེ་སྒྲ་ཡིན། ཞེས་གསུངས་ཏེ། རང་བཞིན་ཤེར་ཕྱིན་དང༌། འབྲས་བུ་ཤེར་ཕྱིན་དང༌། ལམ་ཤེར་ཕྱིན་ཏེ། བརྗོད་བྱ་དོན་གྱི་ཤེར་ཕྱིན་རྣམ་གྲངས་གསུམ་དང༌། གཞུང་ཤེར་ཕྱིན་ནི། རྗོད་བྱེད་ཚིག་གི་ཤེར་ཕྱིན་ཏེ། ཤེར་ཕྱིན་གྱི་རྣམ་གྲངས་བཞིའོ། །དེ་ལ་རང་བཞིན་ཤེར་ཕྱིན་ནི། ཆོས་ཐམས་ཅད་ཀྱི་གནས་ལུགས་སྤྲོས་པ་དང་བྲལ་བའི་ཡེ་ཤེས་ཆོས་དབྱིངས་གདོད་མ་ནས་གནས་པ་གང་ཡིན་པ་སྟེ། དེ་བཞིན་གཤེགས་པའི་སྙིང་པོ་ཞེས་བྱ་བའི་ཐ་སྙད་གང་ལ་འཇུག་པའི་གཞི་དེའོ། །དེ་ཉིད་གཞི་ལམ་འབྲས་བུ་གང་གི་ཡང་ལྡོག་ཆ་དང་མ་


TNT17_Page_0574
[མ་དཔེ་གཟིགས་ན་འདིར་གནོན།]

སྦྲེལ་བར། རང་རྐང་དུ་བཞག་པའི་ཚེ་རང་བཞིན་ཞེས་བྱ་ཞིང༌། གནས་ལུགས་དེ་ཉིད་དེ་བཞིན་གཤེགས་པ་སྟེ། དོན་དམ་པའི་སངས་རྒྱས་དངོས་ཀྱང་ཡིན་ལ། དེ་སྒྲིབ་གཉིས་བྱང་ཞིང་ཚོགས་གཉིས་རྫོགས་པའི་སྐྱེས་བུར་ཐོབ་པ་ན། སྐྱེས་བུ་དེའི་འབྲས་བུར་འཇོག་དགོས་པའི་རྒྱུ་མཚན་དང་སྦྲེལ་ནས། འབྲས་བུ་ཤེར་ཕྱིན་ཅེས་བྱ་ཞིང༌། དོན་ལ་ཡེ་ཤེས་གཅིག་ཉིད་སངས་རྒྱས་ཀྱི་སྐྱེས་བུ་ཁོ་ན་ལ་ལྟོས་ནས་འབྲས་བུ་དང༌། གཞི་ལམ་འབྲས་བུའི་ཆོས་སྤྱིའི་མཚན་ཉིད་ཀྱི་སྒོ་ནས་རང་བཞིན་དུ་བཞག་གོ །དེ་བས་ན་འབྲས་བུ་དེ་དངོས་ནི་གདོད་མ་རང་བྱུང་ཡིན་པའི་ཕྱིར། ལམ་གྱིས་བསྐྱེད་མི་དགོས་ཀྱང༌། གང་ཟག་དེས་འབྲས་བུ་དེ་ཐོབ་ཅིང་མངོན་དུ་འགྱུར་བ་ནི། ལམ་གྱིས་བསྐྱེད་དགོས་པའི་ཕྱིར། འཕགས་པའི་ལམ་གྱིས་བསྡུས་པ་སྤྲོས་བྲལ་རྟོགས་པའི་ཡེ་ཤེས་ནི་ལམ་ཤེར་ཕྱིན་ནོ། །དེ་གསུམ་བརྗོད་བྱར་སྟོན་པར་བྱེད་པའི་ངག་ཚིག་དེ་བཞིན་གཤེགས་པའི་བཀའ་ཡིན་པ་དེ་ལ་ནི། གཞུང་ཤེར་ཕྱིན་ཅེས་བྱ་སྟེ། སྐབས་འདིར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་པ་ཡང་གཞུང་ཤེར་ཕྱིན་ནོ། །གཞུང་དེ་ཡང་རྣམ་པ་གསུམ་ཡོད་དེ། སངས་རྒྱས་རང་སྣང་གི་གསུང་དབྱིངས་ཐེག་པ་ཆེན་པོའི་མདོ་སྡེ་ནི། གཉིས་མེད་ཀྱི་ཡེ་ཤེས་ཉིད་རྣམ་པ་ཐམས་ཅད་པར་ཤར་བའི་ནང་ཚན་གྱི་མདོ་སྡེའི་དག་གི་རྣམ་པ་དོན་དམ་དེ་ཡིན་པས་འདི་ནི་རང་བཞིན་ཤེར་ཕྱིན་ནམ་འབྲས་བུ་ཤེར་ཕྱིན་དང་ངོ་བོ་གཅིག་སྟེ་གཞུང་དང་པོའོ། །གཞན་འཕགས་པ་དང་སོ་སོ་སྐྱེ་བོ་རྣམས་ཀྱི་ཡིད་ལ་སྒྲ་ཕྱིའི་རྣམ་པར་ཤར་བའི་མིང་ཚིག་ཡི་གེའི་ཚོགས་པ་ཐེག་ཆེན་


TNT17_Page_0575
[མ་དཔེ་གཟིགས་ན་འདིར་གནོན།]

གྱི་མདོ་སྡེ་ནི་གཞུང་གཉིས་པའོ། །དེ་དང་མཐུན་པར་ངག་ཏུ་བརྗོད་པའི་སྒྲ་ནི་གཞུང་ཤེར་ཕྱིན་གསུམ་པ་སྟེ། ཕྱི་མ་འདི་གཉིས་ནི། རང་བཞིན་འབྲས་བུ་ལམ་གསུམ་ལས་ངོ་བོ་ཤིན་ཏུ་ཐ་དད་མོད་ཀྱི་སངས་རྒྱས་རྣམས་ཀྱི་སྨོན་ལམ་ལས་བྱུང་བ། ཆོས་ཀྱི་སྐུའི་རྒྱུ་མཐུན་པ་སྒྲིབ་གཉིས་སྤོང་བར་བྱེད་པའི་ནུས་མཐུ་ཅན་ཡིན་པའི་ཕྱིར། ཟག་མེད་ཀྱི་ཆོས་དང༌། རྣམ་པར་བྱང་བའི་དམིགས་པ་དང༌། ཡོངས་གྲུབ་ཀྱི་ཁོངས་སུ་གཏོགས་པ་ཡིན་པར་ཤེས་པར་བྱའོ། །དེ་དག་ནི་ཞིབ་མོར་དཔྱད་པའི་སྙིང་པོ་ཡིན་ལ། དཔྱད་པ་མ་བཏང་བར་རགས་བཤད་དུ་བྱས་ན། ཆོས་དབྱིངས་གཉིས་མེད་ཡེ་ཤེས་ཀུན་ཁྱབ་ཙམ་རང་བཞིན་དང༌། ཆོས་དབྱིངས་དེ་སྒྲིབ་པ་སྤངས་པའི་དག་པ་གཉིས་ལྡན་སངས་རྒྱས་ཀྱི་ཆོས་སྐུ་ནི་འབྲས་བུ་དང༌། དེ་ཐོབ་བྱེད་རྣམ་པར་མི་རྟོག་པའི་སྒོམ་པ་ནི་ལམ་དང༌། དེ་གསུམ་པོ་སྟོན་བྱེད་སངས་རྒྱས་ཀྱི་བཀའ་ནི་གཞུང་ཤེར་ཕྱིན་ནོ། །ཞེས་ཀྱང་རྣམ་པར་བཞག་གོ །གཞན་ཡང་ཐེག་པ་ཆེན་པོའི་མདོ་སྡེ་རྒྱས་པ་མཐའ་དག་ཤེས་རབ་ཀྱི་ཕ་རོལ་ཏུ་ཕྱིན་པ་བརྗོད་བྱར་སྟོན་པར་བྱེད་པའི་ཕྱིར། ངེས་པར་ན་གཞུང་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་མོད་ཀྱི། ཤེར་ཕྱིན་གྱི་མཚན་མདོ་ཐམས་ཅད་ལ་མ་གྲགས་པས། སྐབས་འདིར་མདོ་སྡེ་གང་ལ་ཤཻས་རབ་ཀྱི་ཕ་རོལ་ཏུ་ཕྱིན་པའི་མཚན་བཏགས་པ་དེ་ཉིད་ངེས་པར་བཟུང་ངོ༌། །བཅོམ་ལྡན་འདས་མ་ཞེས་པ་ནི། གོང་དུ་ཇི་སྐད་བསྟན་པའི་རང་བཞིན་དང་འབྲས་བུ་ཤེར་ཕྱིན་དེ་ཉིད། སངས་རྒྱས་ཉིད་ཡིན་པའི་ཕྱིར་བཅོམ་ལྡན་འདས་ཞེས་བྱ་ལ། དེའི་ངོ་བོར་སྦྱོར་བ་ཐབས་དང་ཤེས་རབ་ཟུང་དུ་འཇུག་


TNT17_Page_0576
[མ་དཔེ་གཟིགས་ན་འདིར་གནོན།]

པ་ཡིན་ཀྱང༌། སྐབས་འདིར་ཤེས་རབ་ཀྱི་ཆ་གཙོ་བོར་སྨོས་ཏེ། བཅོམ་ལྡན་འདས་མ་ཞེས་མོ་རྟགས་ཀྱི་སྒྲས་བསྟན་པ་ཡིན་ནོ། །དེ་སྟོན་པར་བྱེད་པའི་གཞུང་ལ་ཡང་བཅོམ་ལྡན་འདས་མ་ཞེས་མཚན་དུ་གསོལ་ཞིང༌། དེ་ལྟར་ན་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་འབུམ་པ་ལ་སོགས་པ་ཐམས་ཅད་ཀྱི་བརྗོད་བྱའི་དོན་འདུས་ཤིང༌། ཚིག་ཤིན་ཏུ་ཉུང་ངུས་སྟོན་པའི་ཕྱིར་སྙིང་པོ་ཞེས་བྱའོ། །མདོ་རྒྱས་པ་དེ་དག་དང་གཞུང་འདི་ལ་བརྗོད་བྱའི་ངོ་བོ་རྒྱ་ཆེ་ཆུང་གི་ཁྱད་པར་ཡོད་པར་འདོད་པ་མི་འཐད་ལ། བརྗོད་བྱ་སྟོན་ཚུལ་རྣམ་གྲངས་མི་འདྲ་བ་མང་ཉུང་གི་ཁྱད་པར་ནི་ཤིན་ཏུ་ཆེའོ། །དེ་ལ་མཁས་པ་ཆེན་པོ་འགའ་ཞིག་འདི་སྐད་གསུང་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། འབུམ་པ་ལ་སོགས་པ་ཤེར་མདོ་མཐའ་ཡས་པ་རྣམས་ཡིན་ལ། དེའི་དོན་གྱི་སྙིང་པོའི་མཆོག་གི་རྣམ་ཐར་སྒོ་གསུམ་མོ། །རྣམ་ཐར་སྒོ་གསུམ་རྟོགས་པའི་ཡེ་ཤེས་ནི། ལམ་ཤེར་ཕྱིན་གྱི་སྙིང་པོ་ཡིན་ལ། དེ་ཉིད་ཆ་ཚང་བར་སྟོན་བྱེད་ཀྱི་མདོ་ཡང་གཞུང་ཤེར་ཕྱིན་གྱི་སྙིང་པོར་འགྱུར་བས། ཚིག་ཉུང་ངུས་དེ་འདྲ་སྟོན་པ་ནི་ཤེར་ཕྱིན་གྱི་སྙིང་པོའོ། །དེ་ཡང་མདོ་འདིར་སྟོང་པ་ཉིད་དང་མཚན་ཉིད་མེད་པ་དང༌། མ་སྐྱེས་པ་དང༌། མ་འགགས་པ་དང༌། དྲི་མ་མེད་པ་དང༌། དྲི་མ་དང་བྲལ་བ་མེད་པ་དང༌། དྲི་བ་མེད་པ་དང༌། གང་བ་མེད་པ་སྟེ་རྣམ་གྲངས་བརྒྱད་གསུངས་སོ། །དེའི་དང་པོ་གཉིས་སྟོང་ཉིད་དང༌། བར་བ་བཞི་མཚན་མེད་དང༌། ཐ་མ་གཉིས་སྨོན་མེད་དོ། །གཟུགས་སོགས་ཆོས་རྣམས་ངོ་བོ་ཉིད་མེད་པ་དང༌། རང་སྤྱིའི་མཚན་ཉིད་ཀྱིས་སྟོངས་པའི་ཕྱིར་སྟོང་ཉིད་དང༌།


TNT17_Page_0577
[མ་དཔེ་གཟིགས་ན་འདིར་གནོན།]

ཀུན་ནས་ཉོན་མོངས་ཀྱི་རྟེན་འབྲེལ་ལ་བསྐྱེད་བྱེད་ཀྱི་རྒྱུ་མ་གྲུབ་ཅིང༌། རྣམ་བྱང་གི་རྟེན་འབྲེལ་ལ་འགོག་བྱེད་ཀྱི་རྒྱུ་མ་གྲུབ་པ་དང༌། དྲི་མ་ནི་ཀུན་ནས་ཉོན་མོངས་ཡིན་ལ། དྲི་མ་དང་བྲལ་བ་ནི་རྣམ་པར་བྱང་བའོ། །བཞི་པོ་དེ་ཀུན་བྱང་གི་རྒྱུའི་དོན་དང་འབྲེལ་བས། དེ་དག་ལ་བླང་དོར་གྱི་མཚན་མ་མ་དམིགས་པའི་ཕྱིར་མཚན་མ་མེད་པ་དང༌། སྐྱོན་བྲི་བ་དང་ཡོན་ཏན་གྱིས་གང་བ་མ་གྲུབ་སྟེ། བསལ་བཞག་མེད་པས་ན། སྐྱོན་སྤོང་ཡོན་ཏན་ཐོབ་པའི་ཕྱིར་མི་སྨོན་པས་སྨོན་པ་མེད་པའོ། །དེ་ལ་གཅིག་དུ་བྲལ་གྱི་རིག་པས་ངོ་བོས་སྟོང་པ་དང༌། རྡོ་རྗེ་གཟེགས་མས་རྒྱུའི་མཚན་མ་མེད་པ་དང༌། ཡོད་མེད་སྐྱེ་འགོག་གི་འབྲས་བུ་ལ་སྨོན་པ་མེད་པ་རྣམས་གྲུབ་ལ། དོན་དེ་ཙམ་ཞིག་གིས་ཡུམ་གྱི་སྙིང་པོར་འགྱུར་ཞིང༌། གཞི་ལམ་འབྲས་གསུམ་ལ་རྨོངས་པ་སེལ་བའི་དོན་དུ། རྣམ་ཐར་སྒོ་གསུམ་དུ་ཕྱེ་བ་ཡིན་གྱི། ངོ་བོའི་སྒོ་ནས་ནི་སྟོང་ཉིད་གཅིག་པུར་འདུས་སོ་ཞེས་གསུངས་ཏེ། གཞུང་གི་ཚིག་དོན་འཆད་པའི་སྐབས་རྣམ་པ་གཞན་དུ་བཤད་དགོས་ཀྱང༌། མཚན་དོན་གྱི་སྐབས་འདིར་བཤད་ཚུལ་འདུ་ཡང་ཁས་བླང་བར་བྱའོ། །དེ་ལ་མདོ་འདིས་བརྗོད་བྱའི་དོན་སྟོང་ཉིད་ཁོ་ན་གཙོ་བོར་བསྟན་པ་ཡིན་ན། སྟོང་ཉིད་དེ་ཡང་ཇི་སྐད་དུ། ཆོས་དབྱིངས་བསྟོད་པ་ལས། སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་གང༌། །དེ་དག་ཀུན་གྱིས་ཉོན་མོངས་བཟློག ཁམས་དེ་ཉམས་པར་བྱེད་མ་ཡིན། །ཞེས་དང༌། རང་བཞིན་གསུམ་ལ་འཇུག་པའི་སྒྲུབ་པ་ལས་ཀྱང༌། ཀུན་བཏགས་དང་ནི་གཞན་གྱི་དབང༌། །ཉོན་མོངས་མཚན་ཉིད་ཤེས་པར་བྱ། །རྣམ་པར་བྱང་བའི་རང་


TNT17_Page_0578
[མ་དཔེ་གཟིགས་ན་འདིར་གནོན།]

བཞིན་ནི། །ཡོངས་སུ་གྲུབ་པར་འདོད་པ་ཡིན། །ཞེས་ཀྱང་གསུངས་ཏེ། ལུང་དོན་དང་ལམ་བསྒོམས་པས་རྟོགས་པས་བཏགས་པའི་ཆོས་ཉོན་མོངས་རྣམས་འགོག་པ་ཡིན་མོད། ཡོངས་གྲུབ་རང་བཞིན་གྱིས་དག་པའི་ཁམས། ཆོས་དབྱིངས་དམ་པ་ཟད་མི་ཤེས་དེ་ནི། སྟོང་གཞིའི་ངོ་བོར་རྟག་ཏུ་ཡོད་དོ། །དེའི་ཕྱིར་སྟོང་རྐྱང་དུ་བལྟ་བར་མི་བྱ་སྟེ། དཀོན་མཆོག་བརྩེགས་པ་ལས། གང་ཞིག་སྟོང་པ་ཁོ་ནར་བལྟ་གྱུར་པ། །དེ་ནི་གསོར་མི་རུང་ཞེས་རྒྱལ་བས་གསུངས། །ཞེས་དང༌། ཀླུ་སྒྲུབ་ཀྱིས་ཀྱང༌། གང་དག་སྟོང་པ་ཉིད་ལྟ་བ། །དེ་དག་སྒྲུབ་ཏུ་མེད་པར་གསུངས། ཞེས་སོ། །རང་སྟོང་པར་གྲགས་པ་རྙིང་པ་རྣམས་ཀྱིས་བསམ་པ། སྟོང་པ་ཡང་མི་སྟོང་པ་ལ་བལྟོས་པའི་ཕྱིར། མི་སྟོང་པའི་ཆོས་མི་སྲིད་པས་སྟོང་པ་ཡང་མི་སྲིད་དེ། དེའི་ཕྱིར་ཁོ་བོ་ཅག བསམ་བྱུང་གི་རིགས་པས་ཀྱང་སྟོང་པར་མི་འཛིན་ལ། སྒོམ་པའི་ཚེ་གང་དུ་ཡང་རྣམ་པར་མི་རྟོག་པའི་ཕྱིར་སྐྱོན་མེད་དོ་སྙམ་ན། མི་སྟོང་པ་གཏན་ནས་མི་སྲིད་པར་གོ་བ་དེ་ཀ་བསམ་བྱུང་གི་བློས་སྟོང་རྐྱང་དུ་ལྟ་བ་ཟང་མ་ཡིན་པའི་སྟེང་དུ། སྟོང་པ་ཡང་མི་སྲིད་པར་གོ་བས་ན། དེ་བས་ཀྱང་ཆེས་ཤིན་ཏུ་སྟོང་པར་འཛིན་པ་མ་རུངས་པར་སོང་སྟེ། གྲོང་ཁྱེར་གྱི་མི་རྣམས་ཤི་བས་སྟོངས་པར་གྱུར་པའི་རྗེས་སུ། ཁྱིམ་རྣམས་ཀྱང་ཞིག་ན་ཆེས་སྟོངས་པར་འགྱུར་བ་བཞིན་ནོ། །དེས་ན་བསམ་བྱུང་དེ་ནི་སྟོང་པར་འཛིན་པ་ཡིན་པ་གྲུབ་ལ། གཞན་ཡང་དངོས་གཞི་མི་རྟོག་པ་ཙམ་ཡིན་དུ་ཆུག་ཀྱང༌། འཛིན་པ་མངོན་འགྱུར་བའི་རྣམ་པར་རྟོག་པ་ལོག་པ་ཙམ་གྱི་སྒོམ་པ་ནི། སྟོང་ཉིད་དུ་བལྟ་བ་རང་ཏ་དེ་མིན་ཤས་ཆེ་ཡང་དེ་ཙམ་


TNT17_Page_0579
[མ་དཔེ་གཟིགས་ན་འདིར་གནོན།]

ཞིག་སྒྲིབ་པ་གང་གི་ཡང་གཉེན་པོར་འགྱུར་བ་མ་ཡིན་ཏེ། དེ་འདྲ་དེ་སྔར་བརྗོད་པའི་ལྟ་བ་དེ་དང་འབྲེལ་ལམ་མ་འབྲེལ། འབྲེལ་ན་ནི། དངོས་གཞིའི་སྐབས་དེར་འཛིན་སྟངས་མི་གསལ་བའི་ཆ་ཤས་ཁོ་ནས་ཡོན་ཏན་དུ་མ་སྟེར་ནུས་ཤིང་འཚེངས་ན་མ་གཏོགས། སྦྱོར་བ་ཐོས་བསམ་སྐབས་ལས་ལྷག་རྒྱུ་ཅི་ཡང་མ་བྱུང་ལ། དེ་ནི་སྟོང་རྐྱང་དུ་འཛིན་པ་དེ་ཁོ་ནས་བསྒོས་པ་ཡང་ཡིན་ནོ། །འཛིན་སྟངས་མི་གསལ་བ་ཙམ་དེ་ལ་ནི། ངོ་མཚར་བའི་ཕན་ཡོན་ཅུང་ཟད་ཀྱང་ཡོད་པ་མ་མཐོང་ལ་དེ་འདྲ་བའི་རྣམ་རྟོག་རགས་པ་ལོག་ཙམ་ཁོ་ན་དོན་དུ་གཉཻར་བ་ལ་ནི། སྟོང་པ་དང་མི་སྟོང་པའི་དཔྱད་པ་གང་ཡང་སྔོན་དུ་འགྲོ་མི་དགོས་སོ། །ཡང་སྔར་གྱི་དཔྱད་པ་དང་ཕྱིས་ཀྱི་སྒོམ་པ་མ་འབྲེལ་བས། ཐར་པའི་དོན་དག་སྒོམ་པའི་དོན་དུ་དཔྱད་པ་དེ་ཡང་མི་དགོས་པར་འདོད་ན། ཐུག་མེད་ཀྱི་དཔྱད་པ་འདིས་ཅི་ཞིག་བྱ་སྟེ་རྩོད་པ་ལྷུར་ལེན་ཁོ་ནར་ཟད་དོ། །དེ་བས་ན་དབུ་མ་འཇུག་པ་ལས། རྟོག་རྣམས་ལོག་པར་གྱུར་པ་གང་ཡིན་དེ། །རྣམ་པར་དཔྱད་པའི་འབྲས་བུར་མཁས་རྣམས་གསུངས། །ཞེས་འབྱུང་སྟེ། ལྟ་བ་མཐོ་རུ་རེ་བའང་ཐང་ཆེ་ཆེ་མོ། དོན་གོ་བདེ་བདེ་འདྲ་བ། ཚིག་ལེགས་ལེགས་ལྟར་སྣང་བ་འདི་འདྲའི་རིགས་མང་པོས། རྒྱ་བོད་ཀྱི་མཁས་པར་གྲགས་པ་ཕལ་ཆེ་བ་ཡང་བསླུས་པར་གྱུར་ཏོ། །དེས་ན་སློབ་དཔོན་ཀླུས་བྱང་ཆུབ་སེམས་འགྲེལ་ལས། དངོས་པོ་ཞེས་བྱ་རྣམ་རྟོག་སྟེ། །རྣམ་རྟོག་མེད་པ་སྟོང་ཉིད་ཡིན། །གང་ལ་རྣམ་རྟོག་སྣང་ཡོད་པ། །དེ་ལ་སྟོང་ཉིད་ག་ལ་ཡོད། །ཅེས་གསུངས་ཏེ། དེའི་ཕྱིར་སྟོང་ཉིད་དངོས་ནི་ཡེ་ཤེས་ཡིན་ལ། ཡེ་ཤེས་


TNT17_Page_0580
[མ་དཔེ་གཟིགས་ན་འདིར་གནོན།]

ཤར་བ་དང་རྣམ་རྟོག་ནུབ་པ་འགྲོས་གཅིག་པ་ལས། ཅིར་ཡང་མ་གྲུབ་ཙམ་གྱི་སྟོང་ཉིད་ནི་དེ་འདྲ་མ་ཡིན་ཏེ། རྣམ་རྟོག་གི་སྣང་བ་མ་ཉམས་པར་ཡོད་ཀྱང་དེའི་སྣང་བ་ཡོད་པ་ཡང་མི་འགལ་བའི་ཕྱིར་རོ། །དེ་བས་ན་སྟོང་ཉིད་ཙམ་ལ་སྤྱི་ལྡོག་ནས། རྒྱན་ལས། མེད་པའི་སྟོང་པ་ཉིད་ཤེས་ཤིང༌། །དེ་བཞིན་ཡོད་པའི་སྟོང་ཉིད་དང༌། །རང་བཞིན་སྟོང་པ་ཉིད་ཤེས་ན། །སྟོང་ཉིད་ཤེས་པ་ཞེས་བརྗོད་དོ། །ཞེས་གསུངས་པ་ལྟར་ཀུན་བཏགས་རྣམས་ནི། ཞེན་ཡུལ་དུ་ཤར་བ་ཙམ་མ་གཏོགས། གནས་ལུགས་ལ་ལྟ་ཅི་སྨོས། ཀུན་རྫོབ་ཀྱི་ཤེས་པ་རླང་པོས་གཞིགས་ན། ཤེས་པ་ཀུན་རྫོབ་པ་དེའི་ངོར་ཡང་མ་གྲུབ་པའི་ཕྱིར། མེད་པའི་སྟོང་པ་ཉིད་ཅེས་བྱ་སྟེ། དེའི་ཕྱིར་ཐོས་བསམ་སྒོམ་གསུམ་གྱི་རིམ་པས། མེད་པར་ཤེས་དགོས་པ་ཙམ་ཞིག་ཡིན་པས་ཤེས་བྱར་བཤད་ལ། གཞན་དབང་ནི་མེད་བཞིན་དུ་དངོས་པོར་འཁྲུལ་བའི་བློ་ལ་དངོས་པོར་གསལ་བར་སྣང་བ་ཡིན་པས། འཁྲུལ་སྣང་རྒྱུ་དང་བཅས་པ་སྤང་དགོས་པས་སྤང་བྱ་དང༌། ཀུན་རྫོབ་ཀྱི་ཤེས་པ་ལ་གསལ་བར་སྣང་བ་ཡིན་པས་ཡོད་པའི་སྟོང་ཉིད་དེ་རྒྱ་སྐད་དུ་སཱ་ཏ་ཞེས་པ་ཡོད་པའི་དངོས་པོའི་དོན་ནོ། །ཡོངས་གྲུབ་ནི་དྲི་མ་སྦྱང་བའི་གཞི། གདོད་ནས་ཆོས་ཀུན་གྱི་རང་བཞིན་དུ་ཡོད་པ་ཡིན་ཀྱང༌། དེ་ལྟར་མ་རྟོགས་པའི་དྲི་མ་སྦྱོང་དགོས་ཤིང༌། མངོན་སུམ་དུ་རྟོགས་ཤིང་ཐོབ་པར་བྱ་དགོས་པས་ན། སྦྱང་གཞི་དང༌། ཐོབ་བྱ་དང༌། རེག་པར་བྱ་བ་ཡིན་ཅིང༌། རང་གི་ངོ་བོ་དོན་དམ་ཡང་ཡིན། སྤྲོས་བྲལ་གྱི་སྟོང་ཉིད་ཀྱང་ཡིན། ཆོས་ཐམས་ཅད་ཀྱི་རང་བཞིན་དུ་གནས་པ་ཡང་ཡིན། གློ་བུར་གྱི་དྲི་མའམ་


TNT17_Page_0581
[མ་དཔེ་གཟིགས་ན་འདིར་གནོན།]

འཁྲུལ་སྣང་གིས་གདོད་ནས་སྟོང་པ་ཡང་ཡིན་པས་དེ་ལ་རང་བཞིན་སྟོང་པ་ཉིད་ཅེས་བྱའོ། །དེ་ལྟར་ན་སྟོང་ཉིད་རྣམ་པ་གསུམ་གྱི་དབྱེ་བ་འདི་མ་ཤེས་ན། འཁོར་ལོ་གསུམ་གྱི་མདོ་སྡེ་རྣམས་ལས་སྟོང་ཉིད་ཀྱི་རྣམ་བཞག་མང་པོ་གསུངས་པའི་དངོས་བསྟན་ཡང་རྟོགས་པར་མི་འགྱུར་ན། དགོངས་དོན་ལྟ་སྨོས་ཀྱང་ཅི་དགོས་ལ། འདི་ཤེས་པས་ན་དངོས་བསྟན་དང་དགོངས་དོན་མཐའ་དག་ལ་མཁས་པར་འགྱུར་རོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་རྣམས་ལས། རབ་འབྱོར་གཞན་ཡང་བྱང་ཆུབ་སེམས་དཔའི་ཐེག་པ་ཆེན་པོ་ནི། ནང་སྟོང་པ་ཉིད་དང༌། ཕྱི་སྟོང་པ་ཉིད་དང༌། ཕྱི་ནང་སྟོང་པ་ཉིད་དང༌། སྟོང་པ་ཉིད་སྟོང་པ་ཉིད་དང༌། ཆེན་པོ་སྟོང་པ་ཉིད་དང༌། དོན་དམ་པ་སྟོང་པ་ཉིད་དང༌། འདུས་བྱས་སྟོང་པ་ཉིད་དང༌། འདུས་མ་བྱས་སྟོང་པ་ཉིད་དང༌། མཐའ་ལས་འདས་པ་སྟོང་པ་ཉིད་དང༌། ཐོག་མ་དང་ཐ་མ་མེད་པ་སྟོང་པ་ཉིད་དང༌། དོར་བ་མེད་པ་སྟོང་པ་ཉིད་དང༌། རང་བཞིན་སྟོང་པ་ཉིད་དང༌། རང་གི་མཚན་ཉིད་སྟོང་པ་ཉིད་དང༌། ཆོས་ཐམས་ཅད་སྟོང་པ་ཉིད་དང༌། མི་དམིགས་པ་སྟོང་པ་ཉིད་དང༌། དངོས་པོ་མེད་པ་སྟོང་པ་ཉིད་དང༌། ངོ་བོ་ཉིད་སྟོང་པ་ཉིད་དང༌། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཡིན་ནོ། །ཞེས་གསུངས་སོ། །འོ་ན་ཤེས་རབ་སྙིང་པོའི་མདོ་འདིར་སྟོང་པ་ཉིད་བཅུ་དྲུག་ཚང་བར་གསུངས་སམ་མ་གསུངས་ཞེ་ན། འདིར་སྟོང་ཉིད་ཁོ་ན་བརྗོད་བྱའི་གཙོ་བོར་གསུངས་མོད། དངོས་བསྟན་ཚིག་ཟིན་ལ་བཅུ་དྲུག་གི་རབ་དབྱཻ་མི་གསལ་གསུངས་པ་མ་ཡིན་ཀྱང༌།


TNT17_Page_0582
[མ་དཔེ་གཟིགས་ན་འདིར་གནོན།]

ཤུགས་ལ་བཅུ་དྲུག་རྫོགས་པར་བསྟན་ཏེ། མིག་མེད་ཅེས་སོགས་ཀྱིས་ནང་ཟ་བ་པོ་སྟོང་པ་ཉིད་དང༌། གཟུགས་མེད་ཅེས་སོགས་ཀྱིས་ཕྱི་བཟའ་བ་སྟོང་པ་ཉིད་དང༌། ཁམས་བཅོ་བརྒྱད་མེད་པར་བསྟན་པས་བཟུང་སྣང་དང་རྣམ་ཤེས་ཀྱི་སྦྲེལ་ཐག་རྟེན་དང་བཅས་པ་བཀག་པས་ཕྱི་ནང་སྟོང་པ་ཉིད་དང༌། གཟུགས་སོགས་བཀག་པས། གནས་སྣོད་ཀྱི་འཇིག་རྟེན་ཆེན་པོ་སྟོང་པ་ཉིད་དང༌། ཡེ་ཤེས་མེད་ཅེས་པས། ལམ་གྱི་ཡེ་ཤེས་དང་དེའི་རྣམ་པ་བཀག་པའི་ཕྱིར། དོན་དམ་སྟོང་པ་ཉིད་དང༌། སྟོང་ཉིད་སྟོང་པ་ཉིད་གཉིས་བསྟན་ཏོ། །ལམ་མེད་ཅེས་པས། འདུས་བྱས་ཀྱི་དགེ་བ་སྟེ། འདུས་བྱས་སྟོང་ཉིད་དང༌། འགོག་པ་མེད་ཅེས་པས་འདུས་མ་བྱས་སྟོང་ཉིད་དང༌། ཐོབ་པ་དང་མ་ཐོབ་པ་མེད་པར་བསྟན་པས་དགེ་བ་མི་ཟད་པའི་ཕྱིར་དོར་བ་མེད་པ་སྟོང་ཉིད་དང༌། སྡུག་བསྔལ་དང་ཀུན་འབྱུང་མེད་ཅེས་པས་སེམས་ཅན་ལ་ཕན་པ་བསྒྲུབ་པའི་ཕྱིར། མཐའ་ལས་འདས་པ་སྟོང་པ་ཉིད་དང༌། སྡུག་ཀུན་ཉིད་འཁོར་བ་ཡིན་ན་དེ་བཀག་པས་འཁོར་བ་ལ་སྤང་བྱར་ཞེན་པ་བཀག་པའི་ཕྱིར། ཐོག་མཐའ་མེད་པ་སྟོང་ཉིད་དང༌། དུས་གསུམ་གྱི་སངས་རྒྱས་ཐམས་ཅད་ཤེར་ཕྱིན་ཟབ་མོ་འདི་ལ་བསྟེན་ཅེས་པས། རིགས་རྣམ་པར་དག་པ་རང་བཞིན་སྟོང་ཉིད་དང༌། སྔགས་ཀྱི་ཕན་ཡོན་རྣམས་ཀྱིས་ནི་གཟུགས་སྐུ་དང་ཆོས་སྐུའི་ཡོན་ཏན་དག་བསྟན་པའི་ཕྱིར། མཚན་དཔེ་དང་སྟོབས་སོགས་བསྒྲུབ་པའི་ཕྱིར་དུ་རང་གི་མཚན་ཉིད་སྟོང་པ་ཉིད་དང༌། ཆོས་ཐམས་ཅད་སྟོང་པ་ཉིད་རྣམས་བསྟན་པ་ཡིན་ཏེ། དེ་ལྟར་ན་བཅུ་བཞི་


TNT17_Page_0583
[མ་དཔེ་གཟིགས་ན་འདིར་གནོན།]

ཡིན་ཅིང༌། གང་ཟག་དང་ཆོས་ཀྱི་བདག་མེད་པ་ནི་དངོས་པོ་མེད་པ་སྟོང་ཉིད་དེ། དབུ་ཞབས་ཐམས་ཅད་དུ་བསྟན་ལ། དངོས་པོ་མེད་པའི་ངོ་བོ་ཉིད་སྟོང་པ་ཉིད་ནི། སྟོང་ཉིད་ཁྱད་གཞིར་བྱས་ནས། གཟུགས་སོགས་འགོག་པ་དང་གཞན་ཡང་དོན་དམ་གཞན་སྟོང་ཆེན་པོ་གསལ་བར་བསྟན་པའི་ཚིག་རྣམས་ཀྱིས་བསྟན་ཏོ། །མི་དམིགས་པ་སྟོང་པ་ཉིད་ནི་དངོས་མེད་སྟོང་པ་ཉིད་དང་དོན་གཅིག་ལ་ངོ་བོ་ཉིད་སྟོང་པ་ཉིད་ནི་དངོས་མེད་ངོ་བོ་ཉིད་དང་དོན་གཅིག་གོ །ལྡོག་ཆའི་ཁྱད་པར་ནི། དངོས་མེད་སྟོང་ཉིད་ནི། ངོ་བོའི་སྒོ་ནས་མ་གྲུབ་པ་དང༌། མི་དམིགས་པ་ནི་ཡེ་ཤེས་ཀྱི་ངོ་བོར་དམིགས་སུ་མེད་ཅིང་མཐོང་རྒྱུ་མེད་པའི་དོན་ནོ། །ངོ་བོ་ཉིད་ནི་ཕྱིན་ཅི་མ་ལོག་པའི་རང་བཞིན་དེ་ལམ་གྱིས་གསར་དུ་མ་བཅོས་པའི་དོན་དང༌། དངོས་མེད་ངོ་བོ་ཉིད་ཀྱི་དོན་ནི་དངོས་པོ་རྣམས་གདོད་ནས་མ་གྲུབ་པའི་ཤུལ་ན་ཆོས་ཉིད་མི་གཡོ་ཞིང་བརྟན་པར་གནས་པའི་དོན་ནོ། །དེ་བཞིན་དུ་སྟོང་ཉིད་ཉི་ཤུའི་དབང་དུ་བྱས་ན། རང་གི་ངོ་བོ་སྟོང་པ་ཉིད་ནི། དངོས་མེད་སྟོང་ཉིད་དང་གཅིག་ལ་གཞན་གྱི་ངོ་བོ་སྟོང་པ་ཉིད་ནི་དངོས་མེད་ངོ་བོ་ཉིད་དང་གཅིག་གོ །རྣམ་གཞག་འདི་ནི་ཤིན་ཏུ་གསལ་བར་སྔགས་ཀྱི་ཐེག་པ་བླ་ན་མེད་པའི་རྒྱུད་གཉིས་ལས་འབྱུང་བ་དང༌། མདོ་ལུགས་ཀྱི་དབུས་མཐའ་རྣམ་འབྱེད་རྩ་འགྲེལ་དང༌། ཡུམ་གསུམ་གནོད་འཇོམས་དང༌། བརྒྱད་སྟོང་དོན་བསྡུ་སོགས་ལམ་ཤེས་པར་བྱའོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་འདི་ནི། སྤྲོས་པའི་མཐའ་བཅུའམ། རྣམ་གཡེང་གི་རྣམ་པར་རྟོག་པ་བཅུའི་


TNT17_Page_0584
[མ་དཔེ་གཟིགས་ན་འདིར་གནོན།]

གཉེན་པོར་ཡང་གསུངས་པ་ཡིན་ཏེ། ཇི་སྐད་དུ། རྒྱལ་བའི་སྲས་རྣམས་ཀྱི་ནི་མེད་དང་ཡོད་པ་དང༌། །སྒྲོ་འདོགས་སྐུར་བའི་རྟོག་དང་གཅིག་དང་དུ་མ་ཉིད། །རང་དང་ཁྱད་པར་རྟོག་དང་མིང་དོན་ཇི་བཞིན་དུ། །མངོན་པར་ཞེན་པའི་རྟོགས་པ་ཡང་དག་སྤང་བར་བྱ། །ཞེས་གསུངས་པ་ལྟར་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅེས་བྱ་བ་ནི། མེད་པའི་རྣམ་གཡེང་གི་གཉེན་པོར་བསྟན་ཏོ། །ཕུང་པོ་ལྔ་པོ་དེ་དག་ཀྱང་རང་བཞིན་གྱིས་སྟོང་པ་ཞེས་པ་ནི་ཡོད་པའི་རྣམ་གཡེང་གི་གཉེན་པོའོ། །གཟུགས་སྟོང་པའོ་ཞེས་པ་ནི་སྒྲོ་འདོགས་པའི་གཉེན་པོའོ། །སྟོང་པ་ཉིད་གཟུགས་སོ་ཞེས་པ་ནི་སྐུར་འདེབས་ཀྱི་གཉེན་པོའོ། །སྟོང་པ་ཉིད་ལ་གཟུགས་མེད་ཅེས་སོགས་ནི། སྟོང་ཉིད་དང་དངོས་པོ་གཅིག་པར་རྟོག་པའི་གཉེན་པོའོ། །གཟུགས་ལས་ཀྱང་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ཅེས་པ་ནི། ཐ་དད་དུ་རྟོག་པའི་གཉེན་པོའོ། །ཆོས་ཐམས་ཅད་སྟོང་པ་ཉིད་དེ་ཞེས་པ་ནི། ཀུན་རྫོབ་ཀྱི་ཆོས་རྣམས་རང་གི་ངོ་བོས་གྲུབ་པར་རྟོག་པའི་གཉེན་པོའོ། །མ་སྐྱེས་པ་ནས་གང་བ་མེད་པའི་བར་ནི་སྐྱེ་བ་ལ་སོགས་པ་ཁྱད་པར་དུ་རྟོག་པའི་གཉེན་པོའོ། །ཐོབ་པ་མེད་ཅེས་པས། ཆོས་རྣམས་ཀྱི་ཐོབ་ཚུལ་སྤྱིར་བཀག་པས་བྱེ་བྲག་ཏུ་འབྲེལ་བ་བཀག་པར་འགྱུར་ལ། དེའི་ཕྱིར་མིང་དོན་གྱི་འབྲེལ་བ་ཡང་བཀག་པ་སྟེ། མིང་ཇི་ལྟ་བ་བཞིན་དོན་དུ་རྟོག་པ་དང༌། དོན་ཇི་ལྟ་བ་བཞིན་མིང་དུ་རྟོག་པའི་གཉེན་པོའོ། །གཞན་ཡང་


TNT17_Page_0585
[མ་དཔེ་གཟིགས་ན་འདིར་གནོན།]

གཟུགས་སོགས་དངོས་པོ་ཉིད་བཀག་པས། ཀུན་རྫོབ་རྣམས་དོན་དུ་མེད་པའི་མིང་རྐྱང་ཙམ་དུ་གོ་བར་འགྱུར་བས། དོན་དམ་དུ་མིང་དོན་གཉིས་གདོད་ནས་མ་གྲུབ་ཅིང༌། ཀུན་རྫོབ་ཏུ་ཡང་མིང་དོན་གཉིས་བློ་ཀུན་བཏགས་ཀྱིས་སྦྲེལ་བ་མ་གཏོགས། དོན་ལ་མིང་གིས་སྟོངས་པ་དང༌། མིང་ལ་དོན་གྱིས་སྟོངས་པ་ཡིན་ནོ། །དེ་ལྟ་བས་ན། རྒྱལ་བ་སྟོན་པ་ཉིད་ཀྱི་ཞལ་སྔ་ནས། འཁོར་ལོ་དང་པོར་གཏོགས་པ་སྟོང་པ་ཉིད་ཀྱི་མདོ་ཆེན་པོ་ལས་ཀྱང༌། ཀུན་དགའ་བོ་དེ་ལྟ་བས་ན། གང་ལ་གང་མེད་པ་དེ་དེས་སྟོང་ངོ་ཞེས་བྱ་བར། ཡང་དག་པར་རྗེས་སུ་མཐོང་ཡང་དེ་ལ་ལྷག་མ་གང་ཡོད་པ་དེ། དེ་ལ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཀུན་དགའ་བོ་འདི་ལྟ་སྟེ། ཟག་པ་རྣམས་ཟད་པས་ཟག་པ་མེད་ཅིང་མངོན་པར་འདུས་མ་བྱས་པ་རྣམ་པར་གྲོལ་བ་གང་ཡིན་པ་འདི་ནི། སྟོང་པ་ཉིད་ལ་འཇུག་པ་བླ་ན་མེད་པ་ཡིན་ནོ། །ཞེས་གསུངས་ཤིང༌། ཆེན་པོ་སྟོང་པ་ཉིད་ཀྱི་མདོ་ལས་ཀྱང༌། ཕྱི་དང་ནང་དང་ཕྱི་ནང་སྟོང་པ་ཉིད་གསུམ་གསུངས་པ་ཡང་དེ་དང་འདྲ་ལ། འཁོར་ལོ་བར་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་རྒྱས་པ་རྣམས་ལས་ཀྱང༌། དེ་ལ་གཞན་གྱི་དངོས་པོ་སྟོང་པ་ཉིད་གང་ཞེ་ན། དེ་བཞིན་གཤེགས་པ་རྣམས་བྱུང་ཡང་རུང༌། མ་བྱུང་ཡང་རུང༌། ཆོས་གནས་པ་ཉིད་དང༌། ཆོས་ཉིད་དང༌། ཆོས་ཀྱི་དབྱིངས་དང༌། ཆོས་སྐྱོན་མེད་པ་ཉིད་དང༌། དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང༌། གཞན་མ་ཡིན་པ་དེ་བཞིན་ཉིད་དང༌། ཡང་དག་པའི་མཐའ་དེ་ནི་གནས་པ་ཉིད་དེ། དེ་ལྟར་


TNT17_Page_0586
[མ་དཔེ་གཟིགས་ན་འདིར་གནོན།]

གཞན་གྱིས་སྟོང་པ་གང་ཡིན་པ་དེ་ནི་གཞན་གྱི་དངོས་པོ་སྟོང་པ་ཉིད་ཅེས་བྱའོ། །རབ་འབྱོར་དེ་ནི་བྱང་ཆུབ་སེམས་དཔའི་ཐེག་པ་ཆེན་པོ་ཡིན་ནོ། །ཞེས་གསུངས་ཤིང༌། འཁོར་ལོ་ཐ་མའི་མདོ་རྣམས་ལས་ནི་ལྷག་པར་ཡང་རྒྱས་ཤིང་གསལ་བར་གསུངས་ཏེ། བཀའ་འཁོར་ལོ་གསུམ་ཆར་གྱི་དངོས་བསྟན་དང༌། ཤུགས་བསྟན་དང༌། དགོངས་དོན་གྱི་གཙོ་བོའི་སྟོང་པ་ཉིད་ནི། གཞན་སྟོང་དབུ་མ་ཆེན་པོའི་ཁོ་ན་ཡིན་གྱི། སྲིད་ཚད་ཐམས་ཅད་རང་སྟོང་དུ་འདོད་པའི་ལུགས་ལྟར་གསུངས་པ་ནི་མེད་དོ། །དེ་ལྟ་བས་ན་ཀུན་རྫོབ་ཀྱི་ཆོས་ཐམས་ཅད་གདོད་མ་ནས་རང་གི་ངོ་བོས་སྟོངས་པར་འཇོག་པའི་གྲུབ་མཐའ་ནི། རང་སྟོང་རྣམ་དག་རྒྱལ་བའི་དགོངས་པ་ཡིན་ཡང༌། མཐར་ཐུག་དོན་དམ་དབྱིངས་ཀྱང༌། རང་གི་ངོ་བོས་སྟོངས་པར་འདོད་པ་ནི། ཤིན་ཏུ་ཆེས་ལོག་པར་ལྟ་བ་ཡིན་པས། དེ་གཉིས་བསྡོམས་པའི་གྲུབ་མཐའ་ཐལ་རང་གི་ལུགས་འདི་དག་ནི་ཁ་ཟས་བཟང་པོ་དུག་ཅན་དང་འདྲ་ལ། ཀུན་རྫོབ་ཐམས་ཅད་རང་སྟོང་དང༌། དོན་དམ་དབྱིངས་གཞན་སྟོང་དུ་འཁྱེར་ཤེས་པ། ཟུང་འཇུག་གི་ལྟ་བ་ཡོན་ཏན་ཀུན་དང་ལྡན་པ་འདི་ནི། ཆོས་ཉིད་ཀྱི་གནས་ལུགས་དང་སངས་རྒྱས་ཐམས་ཅད་ཀྱི་དགོངས་པའོ། །དེའི་རྒྱུ་མཚན་ཆོས་ཉིད་རྟག་ཏུ་གནས་པ་བདེན་གྲུབ་ལ་བདེན་མེད་དོ་ཞེས་སྐུར་བ་བཏབ་པས། དོན་དམ་པའི་ཆོས་དཀོན་མཆོག་ལ་སྡིག་བསགས་པ་དང༌། ཆོས་སྐུ་དོན་དམ་དེ་ཀུན་ཁྱབ་ཡིན་པ་ལ་ཀུན་ཁྱབ་མིན་ཅེས་དང༌། ཀུན་ཁྱབ་ཀྱི་ཆོས་ཉིད་ཡོན་ཏན་ཀུན་ལྡན་ལ་ཡོན་ཏན་མེད་ཅེས་དོན་དམ་པའི་སངས་རྒྱས་


TNT17_Page_0587
[མ་དཔེ་གཟིགས་ན་འདིར་གནོན།]

དཀོན་མཆོག་ལ་སྐུར་བ་བཏབ་པའི་ཉེས་པ་ཆེན་པོ་དང༌། འཕགས་ཆེན་རྣམས་ཀྱི་མཉམ་བཞག་རྣམ་པ་ཀུན་ལྡན་ཡིན་པ་ལ་ཅི་ཡང་སྣང་བ་མེད་དོ། །ཞེས་དགེ་འདུན་དཀོན་མཆོག་ལ་སྨད་པའི་ཁ་ན་མ་ཐོ་བ་ཆེས་མི་བཟད་པ་དང་བཅས་པ་རྣམས་ནི་ཐལ་རང་པར་གྲགས་པ་རྣམས་ལ་ཐོག་ཏུ་བབས་པ་དང༌། གཞན་སྟོང་སྨྲ་བ་རྣམས་ནི་སྐྱོན་དེ་ལས་གྲོལ་བའི་ཕྱིར་རོ། །ད་ནི་ཚིག་གི་དོན་ལ་འཇུག་པར་བྱ་སྟེ། དེ་ཡང་མདོ་འདི་འཆད་པར་བྱེད་པ་ལ། དང་པོར་གླེང་བསླང་བའི་ཚུལ་གྱིས་ངོ་མཚར་བསྐྱེད་པ་དང༌། བར་དུ་ཟབ་ཅིང་རྒྱ་ཆེ་བའི་དོན་གཏན་ལ་དབབ་པ་དང༌། མཐར་ཡི་རང་མངོན་པར་བསྟོད་པ་སྟེ་དོན་གསུམ་ལས། དང་པོ་ལ། གླེང་གཞིའི་ཚིག་དང༌། མདོ་སྡེའི་ཆོས་འབྱུང་བའི་སྒོ་གཉིས་ལས། དང་པོ་ནི། འདི་སྐད་བདག་གིས་ཐོས་པ་ཞེས་པ་ལ་སོགས་པ་སྟེ། དེ་ལ་འདི་སྐད་ཅེས་པ་ནི། སངས་རྒྱས་ཀྱིས་བསྟན་པའི་ཆོས་དེ་ཡང་ཇི་ལྟ་བུ་ཞེ་ན། འདི་སྐད་དམ་འདི་ལྟར་ཏེ། དེ་ནས་བཅོམ་ལྡན་འདས་ཞེས་པ་ནས་རྗེས་སུ་ཡི་རང་ངོ་ཞེས་པའི་མཐར་ཐུག་པ་འདི་སྐད་དུ་ཐོས་ཞེས་པ་ཡིན་པས། དེ་ལྟར་ན་ཆོས་ཕུན་སུམ་ཚོགས་པའོ། །བདག་ཅེས་པ་ནི་བསྡུད་པ་པོ་ཕྱག་ན་རྡོ་རྗེ་བདག་གིས་དངོས་སུ་ཐོས་པ་སྟེ། མདོ་སྡེ་དམ་པ་འདི་གསུང་བའི་དུས་ན། སྟོན་པ་འཁོར་དང་བཅས་པའི་ཚོགས་པ་དེར་མངོན་སུམ་དུ་རང་ཉིད་ཡོད་པས་ན། གཞན་ལས་བརྒྱུད་དེ་ཐོས་པ་ནི་མ་ཡིན་ནོ་ཞེས་པའོ། །སྟོན་པ་ནི་རྣམ་པར་འཕྲུལ་བ་རྒྱུ་མ་ལྟ་བུ་ལ་མངའ་བརྙེས་པའི་ཕྱིར། དབྱར་དང་སྟོན་ལ་སོགས་པའི་དུས་འདི་ལྟ་


TNT17_Page_0588
[མ་དཔེ་གཟིགས་ན་འདིར་གནོན།]

བུའོ་ཞེས་ངེས་བཟུང་སུ་མ་བརྗོད་པར། དུས་གཅིག་ན་ཞེས་ཡངས་པའི་སྒྲ་སྨོས་ཏེ་དུས་ཕུན་སུམ་ཚོགས་པའོ། །བཅོམ་ལྡན་འདས་ཞེས་པ་ལ་བྷ་ག་ཝཱན་གྱི་སྒྲ་ལས་དྲངས་ན། ལེགས་པའི་ཡོན་ཏན་ཕུན་སུམ་ཚོགས་པ་ཐམས་ཅད་དང་ལྡན་པའི་ཕྱིར་ལེགས་ལྡན་ནམ། ཉེས་སྐྱོན་དང་འཇིགས་པ་དང་སྡུག་བསྔལ་ཐམས་ཅད་བཅོམ་ཞིང་ཞིག་པ་དང༌། གཞན་གྱི་ཉེས་སྐྱོན་རྣམས་འཇོམས་པར་མཛད་པའི་ཡོན་ཏན་དང་ལྡན་པའི་ཕྱིར། བཅོམ་ལྡན་ཞེས་བྱ་ལ་གང་རང་ཉིད་སྐྱོན་སྤངས་ཤིང་ཡོན་ཏན་ཀུན་དང་ལྡན་ལ། གཞན་གྱི་སྡུག་བསྔལ་སེལ་བར་མཛད་པ་དེ་ནི། སྐྱབས་དང་སྐྱོབས་པ་དང༌། སྐྱེས་བུ་དམ་པ་བླ་ན་མེད་པ་ཡིན་པས། ཤཱཀྱ་ཐུབ་པ་བཅོམ་ལྡན་འདས་དེ་ནི། སྟོན་པ་ཕུན་སུམ་ཚོགས་པའོ། །འདས་ཞེས་པའི་སྒྲ་ནི། འཇིག་རྟེན་ལས་འདས་པའམ་འཁོར་བ་པ་དང་ཐེག་དམན་པའི་སྤྱོད་ཡུལ་ལས་འདས་པའི་དོན་དུ་སྦྱོར་ཞིང༌། འཇིག་རྟེན་གྱི་ལྷ་ཁྱབ་འཇུག་ནག་པོ་སོགས་ལ་ཡང་འཇིག་རྟེན་དུ་ལེགས་ལྡན་དང་བཅོམ་ལྡན་དུ་གྲགས་པ་ལས། ཁྱད་པར་འབྱེད་ཅིང་མི་ནོར་བའི་ཕྱིར་དང་པོའི་ལོ་ཙཱ་བས་བཅུག་པའོ་ཞེས་གྲགས་པ་ནི། སྤྱིར་དེ་ལྟར་ཡིན་ལ། འདས་པའི་སྐད་དོད་མེད་དོ་ཞེས་ཀུན་ཏུ་གྲགས་ན། བྷ་ག་ཝཱན་ཞེས་པ། བྷ་ག་བཅོམ་པ་དང༌། ཝཱན་ལྡན་པའི་སྐད་དོད་ཡིན་པ་བཞིན་དུ། འདས་པའི་སྐད་དོད་ཞིག་བཅོམ་པ་དང་ལྡན་པའི་སྐད་དོད་ལས་ལོགས་སུ་ཡོད་པ་མ་ཡིན་ཀྱང༌། དེ་ཉིད་ལ་འདས་པའི་དོན་ཡོད་དུ་རུང་བ་ནི། བྷ་ག་ཞེས་པ་ཉིད་ཀྱི། བྷ་ལ་ཡི་གེ་བསྣན་པས། ཨ་བྷ་ཝི་ཥྱ་ཏི་སྟེ་འབྱུང་བར་མི་འགྱུར་


TNT17_Page_0589
[མ་དཔེ་གཟིགས་ན་འདིར་གནོན།]

བ་དང༌། ག་ནི་ག་ཏི་སྟེ་སོང་བ་ཞེས་པ་ཡིན་པས། སོང་ཞིང་མི་འབྱུང་བ་ནི། ཡང་དག་པའི་གནས་སུ་སོང་ཞིང་ལོག་པའི་གནས་སུ་མི་འབྱུང་བ་སྟེ། འཇིག་རྟེན་ལས་འདས་པའི་དོན་ནོ། །དེའི་ཕྱིར་མི་ནོར་བའི་ཆེད་ཁོ་ནར་སྐད་དོད་དང་མ་འབྲེལ་བ་ཞིག །གློ་བུར་དུ་དབང་ཆེའི་རིགས་པས་བསྣན་པ་མ་ཡིན་གྱི་སྐད་དོད་དང་ཡང་འབྲེལ་བ་ཉིད་ཡིན་ནོ། །གྲོང་ཁྱེར་རྒྱལ་པོའི་ཁབ་ཀྱི་ཤར་ཕྱོགས་ཀྱང་ཡིན་ལ་དེའི་ས་ཡུལ་དུ་གཏོགས་པ་ན། དཀའ་ཐུབ་ཀྱི་གནས་བྱ་རྒོད་ཕུང་པོའི་རི་བོ་ཡོད་པ་ཡིན་ཏེ། དེ་ཡང་སེམས་ཅན་ཕལ་བ་རྣམས་ཀྱི་སྣང་ངོ་ལྟར་ན། ཡུལ་ཕྱོགས་དང་གྲོང་ཁྱེར་དེ་དང་རི་བོ་དེར་སྣང་བ་ཡིན་ལ་བྱང་ཆུབ་སེམས་དཔའ་དབང་ཐོབ་པ་དང༌། སངས་རྒྱས་ཀྱིས་གཟིགས་པའི་སྤྱོད་ཡུལ་ལྟར་ན། ངོ་བོ་ཆོས་དབྱིངས་ཡེ་ཤེས་ཀྱི་རང་བཞིན། རྣམ་པར་དག་པའི་ཞིང་མཆོག་གཞལ་མེད་ཁང་དང་བཅས་པ་སྟེ། དེ་སྐད་དུ་གསེར་འོད་དམ་པ་སོགས་ལས་ཀྱང༌། བྱ་རྒོད་ཕུང་པོ་ཆོས་ཀྱི་དབྱིངས། །ཟབ་མོ་སངས་རྒྱས་སྤྱོད་ཡུལ་ན། །ཞེས་གསུངས་པའི་ཕྱིར། ཕྱི་ནང་གི་བྱ་རྒོད་ཕུང་པོ་དེ་ནི། གནས་ཕུན་སུན་ཚོགས་པའོ། །དགེ་སློང་གི་དགེ་འདུན་ཆེན་པོ་ཞེས་པ་ལ། སྤྱིར་བྱང་ཆུབ་སེམས་དཔའི་དགེ་སློང་ཡང་ཤིན་ཏུ་མང་མོད་ཀྱི། འདིར་དགེ་སློང་ཞེས་པ་འདི་ནི་ཉན་ཐོས་ཀྱི་ཡིན་ལ། དེ་ལས་ཀྱང་ཕལ་ཆེ་བ་ནི། ཉན་ཐོས་དགྲ་བཅོམ་པ་ཡིན་པས། དོན་དམ་པའི་དགེ་སློང་ཡང་ཡིན་མོད་ཀྱི། ཁྱད་པར་དུ་སོ་སོ་ཐར་བ་རིགས་བརྒྱད་ཀྱི་ནང་ཚན་དགེ་སློང་གི་སྡོམ་པ་དང་ལྡན་པ་ཁོ་ནའོ། ཁ་ཅིག་གསོལ་བཞིའི་


TNT17_Page_0590
[མ་དཔེ་གཟིགས་ན་འདིར་གནོན།]

ལས་ཀྱི་དགེ་སློང་ཁོ་ནའོ་ཞེས་ཟེར་བ་ནི་མ་བརྟགས་པ་སྟེ། ཡེ་ཤེས་ཁོང་ཆུད་ཀྱི་བསྙེན་པར་རྫོགས་པའང་མང་དུ་ཡོད་ལ། ཚུར་ཤོག་གི་བསྙེན་པར་རྫོགས་པ་ནི་ཤིན་ཏུ་མང་བའི་ཕྱིར་རོ། །བྱང་ཆུབ་སེམས་དཔའི་དགེ་འདུན་ཞེས་པ་ལ། སྤྱིར་སེམས་ཡང་དག་པར་བསྐྱེད་པའི་སོ་སོ་སྐྱེ་བོ་ཡང་བྱང་ཆུབ་སེམས་དཔའ་ཡིན་མོད་ཀྱི། འདིར་ནི་ཐེག་ཆེན་འཕགས་པ་རྣམས་བཟུང་སྟེ། དོན་དམ་པའི་སེམས་བསྐྱེད་པ་དང༌། དེ་བཞིན་གཤེགས་པའི་རིགས་སུ་སྐྱེས་པའི་ཕྱིར་རོ། །དེའི་རྒྱུ་མཚན་ཡང་ཀུན་རྫོབ་བྱང་ཆུབ་ཀྱི་སེམས་ཙམ་བསྐྱེད་པ་ན། བླ་ན་མེད་པའི་བྱང་ཆུབ་ཀྱི་གོ་འཕང་ལ་དམིགས་ནས། སེམས་ཅན་ཐམས་ཅད་དེ་ལ་འགོད་པར་འདོད་པའི་སེམས་པ་ཙམ་ཡོད་ཀྱང༌། བྱང་ཆུབ་ཀྱི་རང་བཞིན་མངོན་སུམ་དུ་མ་མཐོང་བས། བྱང་ཆུབ་ལ་ཇི་ལྟ་བ་བཞིན་དུ་སེམས་པར་མི་ནུས་ལ། འཕགས་པ་རྣམས་ཀྱི་ཆོས་ཉིད་མངོན་སུམ་དུ་རྟོགས་པའི་ཆོས་ཉིད་དེ་བྱང་ཆུབ་ཀྱི་རང་བཞིན་ཡིན་པས། དོན་དམ་སེམས་བསྐྱེད་ཐོབ་པ་ན། བྱང་ཆུབ་ལ་དངོས་སུ་སེམས་ནུས་པའོ་ཡང་ན་སངས་རྒྱས་ཀྱི་སྐུ་གསུང་ཐུགས་དང་འདྲ་བའི་གནས་སྐབས་ཐོབ་པ་ན། བྱང་ཆུབ་ཀྱི་ཕྱིར་དུ་སྤྱོད་པ་མཐུ་དང་ལྡན་པར་སྤྱོད་པ་དེ་བཞིན་གཤེགས་པའི་རིགས་སུ་སྐྱེས་པ་ལ་བྱང་ཆུབ་སེམས་དཔའ་ཞེས་བྱ་སྟེ། བོ་དྷི་སཏྭ་ཞེས་པ་ལ། བོ་དྷི་ནི་བྱང་ཆུབ་ཡིན་ལ། སེམས་དཔའི་སྐད་དོད་སཏྭ་ཞེས་པ་ནི། སྙིང་སྟོབས་སམ་མཐུ་ནུས་ལ་ཡང་འཇུག་པས་སོ། །དགེ་འདུན་ཞེས་པ་ལ་སྤྱིར་དོན་མང་དུ་བཤད་དུ་ཡོད་ཀྱང༌། འདིར་རེ་ཞིག་ཚོགས་པ་དང་འདུས་པའི་དོན་


TNT17_Page_0591
[མ་དཔེ་གཟིགས་ན་འདིར་གནོན།]

ཡིན་ལ། ཆེན་པོ་ནི་གྲངས་མང་བ་དང༌། ཐམས་ཅད་ཀྱང་འཕགས་པ་ཁོ་ན་ཡིན་པའི་ཕྱིར་ཆེས་བཟང་བའི་དོན་ནོ། །དེ་དག་ཀྱང་དེ་བཞིན་གཤེགས་པ་ལ་བལྟ་བ་དང༌། དམ་པའི་ཆོས་ཉན་པ་དང༌། སེམས་ཅན་རྣམས་ལ་ཕན་པའི་དོན་དུ། དགོངས་པ་གཅིག་པ་དང༌། བྱ་བ་གཅིག་པ་དང༌། གནས་གཅིག་ཏུ་འདུས་པས་ན་ཐབས་གཅིག་ཏུ་བཞུགས་པ་སྟེ་འཁོར་ཕུན་སུམ་ཚོགས་པའོ། །ཡང་ན་བཀའ་བསྡུད་པ་པོ་ཕུན་སུམ་ཚོགས་པ་ལོགས་སུ་བགྲངས་ཤིང་ཉན་ཐོས་ཀྱི་དགེ་འདུན་ནི་འཁོར་ཙམ་དང༌། བྱང་ཆུབ་སེམས་དཔའི་དགེ་འདུན་ནི་ཆེད་དུ་བྱ་བའི་གདུལ་བྱ་ཕུན་སུམ་ཚོགས་པ་སྟེ། ཕུན་སུམ་ཚོགས་པ་བདུན་དུ་རྣམ་པར་བཞག་ཀྱང་རུང་ལ། ཡང་ན་བསྡུད་པ་པོ་ཙམ་ལོགས་སུ་བྱས་ནས། ཁྱད་ཆོས་ཀྱི་ཕུན་སུམ་ཚོགས་པ་ལྔ་དང་ལྡན་པའི་ཁྱད་གཞི། བསྟན་པ་དམ་ཆོས་ཕུན་ཚོགས་ཞེས་བཤད་ཀྱང་རུང་ངོ༌། །དུས་གཅིག་ན་ཞེས་པ་དུས་ཀྱི་ཁྱད་པར་མ་ངེས་པ་དང༌། །ཐོས་པ་ཞེས་པ་དངོས་སུ་ཐོས་པ་ཁོ་ན་ལ་འཇོག་པ་ནི། ཐེག་པ་ཆེན་པོའི་མདོ་ཕལ་ཆེ་བའི་དབང་དུ་བྱས་པ་ཡིན་གྱི། ཉན་ཐོས་ཀྱི་མདོ་ཕལ་ཆེ་བ་དུས་ཀྱི་ཁྱད་པར་ངེས་པ་ཅན་ཡིན་པ་དང༌། བཀའ་བསྡུ་བ་པོ་ཀུན་དགའ་བོ་ལྟ་བུས་ཀྱང༌། མདོ་སྡེ་དངོས་སུ་ཐོས་པ་ཡང་ཡོད། དངོས་སུ་མ་ཐོས་པར་བརྒྱུད་ནས་ཐོས་པ་ཡང་ཡོད་ཅེས་བཤད་ཅིང༌། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལས། སྟོང་ཕྲག་ཉི་ཤུ་ཙམ་བརྒྱུད་ནས་ཐོས་པར་བཤད་པ་ཡང་ཡོད་པས། བཤད་སྒྲོས་གཅིག་གི་ཕྱོགས་ཞེན་ལ་བརྟེན་ནས། རྣམ་གྲངས་དུ་མ་


TNT17_Page_0592
[མ་དཔེ་གཟིགས་ན་འདིར་གནོན།]

འབྱུང་བ་རྣམས་དགག་པར་མི་བྱའོ། །དེ་བཞིན་དུ་ཐཽས་པ་ཞེས་པ་ཐོས་པ་ཙམ་ཡིན་གྱི། སངས་རྒྱས་ཀྱི་ཆོས་ཟབ་མོ་རྟོགས་པར་མ་ནུས་སོ་ཞེས་འཆད་པ་ཡང༌། ཆོས་ཀྱི་ཆེ་བ་དབྱུང་བའི་སྐབས་འགའ་ཞིག་ཏུ་ཡིན་གྱི་རྣམ་པ་ཐམས་ཅད་དུ་འཆད་དགོས་པ་མ་ཡིན་ནོ། །ཡང་ཁ་ཅིག་གླེང་གཞི་ཞལ་ནས་གསུངས་པའི་བཀར་བྱས་ནས། སྟོན་འཁོར་གཅིག་པའི་རྣམ་བཞག་མཛད་པ་ནི། ལུགས་གཞན་ཡིན་པས་ཕ་རོལ་ཏུ་ཕྱིན་པའི་ཐེག་པ་དང༌། ཕར་ཕྱིན་ཐེག་པ་འདིའི་ཕྱོགས་མཚུངས་ཀྱི་སྔགས་རྒྱུད་རྣམས་ལ་སྦྱར་བར་མི་བྱའོ། །འདི་ལ་དཔའ་ཕྱོགས་ཀྱི་གླང་པོའི་ཞལ་སྔ་ནས། སྟོན་པ་དབང་པོ་འཁོར་དང་ནི། །ཡུལ་དང་དུས་ཀྱི་ངས་བསྟན་པ། །བསྡུད་པོ་རང་ཉིད་ཚད་མར་ནི། །རབ་གྲུབ་ཕྱིར་ཡིན་འཇིག་རྟེན་ན། །ཡུལ་དང་དུས་ཀྱང་ཉེར་མཚོན་ཅིང༌། །དཔང་པོར་བཅས་པ་སྨྲ་བ་ཡི། །སྨྲ་པོ་ཚད་མར་རྗེས་སུ་རྟོགས། །ཞེས་བརྒྱད་སྟོང་དོན་བསྡུ་ལས་གསུངས་ཏེ། སྟོན་པ་དང་ཡུལ་དུས་ངེས་པ་དང༌། འཁོར་ཚོགས་དཔང་པོར་བཞག་ནས་བཤད་པས། སྨྲ་བ་པོའི་ཚིག་ཡིད་ཆེས་ཅན་དུ་འགྱུར་བའི་ཕྱིར་དང༌། གཞུང་མཛེས་པར་འགྱུར་བས་དད་ལྡན་འཇུག་པའི་ཡན་ལག་གོ །ཞེས་ཕྱིར་གཞུང་མཛེས་པར་འགྱུར་སྙམ་ན། མདོ་སྡེ་ཕལ་ཆེ་བ་ནི་ཞུ་བ་དང༌། ཞུ་ལན་སྤེལ་བའི་ཚུལ་ཡིན་པས། དེ་འདྲ་ལ་ནི་གླེང་གཞི་མ་སྨོས་པར། ཞུ་ལན་ཁོ་ན་བཙན་ཐབས་སུ་བཀོད་ན། མགོ་བཅད་པའི་ཤིང་བཞིན་མི་མཛེས་པར་འགྱུར་བ་ལས། གླེང་གཞི་བཀོད་པས་འབྲེལ་ཆགས་


TNT17_Page_0593
[མ་དཔེ་གཟིགས་ན་འདིར་གནོན།]

ཤིང་བརྗིད་བག་ཆེན་པོར་སྣང་བར་བྱ་པའི་ཕྱིར་རོ། །དྲི་མེད་བཤེས་གཉེན་ན་རེ། འཁོར་གྱི་མིང་མ་སྨོས་པ་དཔང་པོ་ཡིན་པར་ཡང་མི་གྲུབ་ཅིང༌། ཡུལ་དེ་དག་ཏུ་སོང་ཞིང་དྲིས་ན་ངེས་པ་རྙཻད་པར་འགྱུར་སྲིད་ཀྱང༌། དེ་ལྟར་མི་ནུས་པ་རྣམས་ཀྱིས་མདོ་དོན་ལ་ངེས་པ་མི་རྙེད་པར་ཐལ་བར་འགྱུར་རོ་ཞེས་ཕྱོགས་ཀྱི་གླང་པོ་འགོག་པ་ནི། རིགས་པ་ཡང་ལྟར་སྣང་ཡིན་ལ། དགག་ཡུལ་གྱི་ས་མཚམས་ཡང་མ་ཟིན་པའོ། །དེའི་རང་ལུགས་ལ་ཆོས་ཉན་པའི་སྐལ་བ་ཡོད་པ་རྣམས་འདིར་སྨོས་པ་ཡིན་ཅེས་ཟེར་བ་ནི། རང་གི་ཇི་སྐད་བསྟན་པའི་སྐྱོན་དེ་ཐོག་ཏུ་འབབ་ཏེ། མིང་མ་སྨོས་པའི་ཕྱིར། སྐལ་བ་དང་ལྡན་པ་ཡང་སུ་ཡིན་ངེས་པ་མི་རྙེད་པའི་ཕྱིར་རོ། །དེ་བཞིན་དུ་བཞུགས་ཏེ་ཞེས་པའི་སྐབས་སུ། བཅོམ་ལྡན་འདས་འཕགས་པའི་གནས་པ་རྣམ་ཐར་སྒོ་གསུམ་དང༌། ལྷའི་གནས་པ་བསམ་གཏན་གཟུགས་མེད་ཀྱི་ཏིང་ངེ་འཛིན་དང༌། ཚངས་པའི་གནས་པ་ཚད་མེད་བཞིའི་སྒོ་ནས་བཞུགས་ཞེས་འཆད་པ་ཡང༌། དོན་དང་མ་འབྲེལ་ཞིང༌། འོག་ཏུ་ཟབ་མོ་སྣང་བའི་ཏིང་ངེ་འཛིན་ལ་བཞུགས་པར་བཤད་པས། དེ་དག་ནི་དགོས་མེད་ལྷག་པོའི་བཤད་པར་སྣང་ལ། ཡང་སྐུ་སྤྱོད་ལམ་དང༌། གསུང་ཆོས་གསུངས་པ་དང༌། ཐུགས་ཏིང་ངེ་འཛིན་གྱི་གནས་པས་བཞུགས་ཞེས་འཆད་པ་ཡང༌། སྤྲོས་བཤད་ཁོ་ནར་བས་སོ། །འདི་སྐད་ཅེས་པའི་སྐབས་སུ། འདི་སྐད་ཁོ་ན་ཡིན་གྱི། ཚུལ་གཞན་གྱི་སྒོ་ནས་མ་ཡིན་ཏེ། དོན་གཞན་ན་ཚིག་གཞན་གྱི་རིམ་པས་བྱུང་ངམ་སྙམ་པའི་ཐེ་


TNT17_Page_0594
[མ་དཔེ་གཟིགས་ན་འདིར་གནོན།]

ཚོམ་གཅོད་པའོ། །ཡང་འདི་སྐད་ཅེས་པས། འདི་ཁོ་ན་ལྟར་ཡིན་གྱི་ཚིག་དང་དོན་གྱི་རིམ་པ་གཞན་ནི་མ་ཡིན་ནོ། །ཞེས་མདོ་ཚིག་འདི་དག་ལ་ལྷག་ཆད་ལ་སོགས་པའི་འཁྲུལ་བ་མེད་པར་བསྟན་ཏོ། །ཞེས་ཀྱང་འཆད་པ་རྣམ་གྲངས་སུ་ནི་རུང་ལ། འཁོར་གྱི་གྲངས་ལ་ཁ་ཅིག་སྟོང་ཉིས་བརྒྱ་ལྔ་བཅུའི་དགེ་འདུན་དང༌། དགེ་སློང་ལྔ་སྟོང་ཙམ་གྱི་དགེ་འདུན་ཞེས། མདོ་སྡེ་གཞན་དག་ལས་འབྱུང་བ་ལ། ཁ་ཡར་བ་སྟོང་ཕྲག་ལྔ་ལ། བཞི་ཚན་དུ་བསྡེབས་ན། བཞི་ཚན་པ་སྟོང་ཉིས་བརྒྱ་ལྔ་བཅུ་འབྱུང་བས། དེ་གཉིས་དོན་གཅིག་གོ་ཞེས་ཟེར་བ་ཡང་བླུན་གཏམ་དུ་སྣང་ངོ༌། །མདོ་འདི་ལ་ཡང་ཤེར་མདོ་རྒྱས་པ་བཞིན་དུ། དགེ་སློང་ལྔ་སྟོང་དང༌། བཟང་སྐྱོང་ལ་སོགས་པའི་བྱང་ཆུབ་སེམས་དཔའ་ཞེས་འཆད་པ་ནི། མདོ་འདི་ཉིད་ལས་གྲངས་དང་དམིགས་གསལ་མ་གསུངས་པ་དང༌། ཤེར་མདོ་རྒྱས་པའི་དུས་དང་འཁོར་སོགས་དང༌། འདིའི་དུས་དང་འཁོར་སོགས་གཅིག་པ་ཁོ་ནའི་རྒྱུ་མཚན་མི་སྣང་བས། རང་བཟོའི་བཤད་པར་འགྱུར་བ་ཡིན་ནོ། །གཉིས་པ་མདོ་སྡེའི་ཆོས་འབྱུང་པའི་སྒོ་ནི། དེའི་ཚེ་བཅོམ་ལྡན་འདས་ཞེས་པ་ལ་སོགས་པ་སྟེ། དེའི་ཚེ་ཞེས་པ་ནི། འཁོར་འདུས་པ་དེའི་ཚེ་ཞེས་པ་ཡིན་མོད་ཀྱི། འོན་ཀྱང་དེའི་ཚེ་ཆེད་དུ་བྱ་བའི་གདུལ་བྱ་རྣམས་ཡོངས་སུ་སྨིན་པས་ཆོས་འདི་བསྟན་ན་གྲོལ་བར་འགྱུར་ངེས་པའི་དུས་ཡིན་པར་མཁྱེན་པའོ། །དེས་ན་ཟབ་མོ་སྣང་བ་ཞེས་བྱ་བ་ལ། ཟབ་མོ་ནི་ཤིན་ཏུ་རྟོགས་པར་དཀའ་བ་སྟེ། ཆོས་ཀྱི་དབྱིངས་སྤྲོས་བྲལ་ནམ་དུ་ཡང་འགྱུར་བ་མེད་ལ་རྣམ་པ་


TNT17_Page_0595
[མ་དཔེ་གཟིགས་ན་འདིར་གནོན།]

ཐམས་ཅད་པ་ཡང་ཡིན་པ་སྟེ། དེ་མངོན་སུམ་དུ་རྟོགས་པའི་ཡེ་ཤེས་དེ་སྣང་བ་སྟེ། ཟབ་མོ་སྣང་བ་དེ་དང་ལྡན་པའི་མཉམ་བཞག་གི་ཐུགས་ནི་ཟབ་མོ་སྣང་བའི་ཏིང་ངེ་འཛིན་ནོ། །སྒྲ་བཤད་དེ་ནི་སངས་རྒྱས་ཀྱི་མཁྱེན་པ་སྤྱི་ལ་ཚང་བ་ཡིན་ཀྱང༌། སྤྱི་མིང་བྱེ་བྲག་ལ་བཏགས་པའི་ཚུལ་གྱིས། བཤད་པའི་ཆོས་ཀྱི་རྣམ་གྲངས་འདི་འབྱུང་བའི་རྒྱུ་ཏིང་ངེ་འཛིན་གྱི་ཁྱད་པར་ལ་དེ་སྐད་ཅེས་བྱ་བ་ཡིན་ནོ། །དེ་ཡང་དངོས་སུ་ན། དེ་བཞིན་གཤེགས་པ་ཏིང་ངེ་འཛིན་ཐམས་ཅད་ལ་རྟག་ཏུ་མཉམ་པར་བཞག་པ་ཡིན་པས། སྐབས་འདིར་ཟབ་མོ་སྣང་བའི་ཏིང་ངེ་འཛིན་ལ་གསར་དུ་མཉམ་པར་བཞག་པ་མ་ཡིན་ཀྱང༌། ཆེད་དུ་བྱ་བའི་གདུལ་བྱ་རྣམས་ཀྱི་སྣང་ངོར། ཏིང་ངེ་འཛིན་དེ་ལ་གསར་དུ་མཉམ་པར་བཞག་པར་བསྟན་པ་ཡིན་ནོ། །ཡང་དག་པར་ན་སངས་རྒྱས་ཀྱི་རྣམ་པར་ཐར་བ་ནི། སངས་རྒྱས་ཁོ་ནའི་སྤྱོད་ཡུལ་ལས་གཞན་མ་ཡིན་མོད། སྟོན་པའི་གཟུགས་ཀྱི་སྐུ་ནི་གདུལ་བྱའི་སྣང་ངོར་བསྟན་པའི་ངེས་པ་ལས། གང་གདུལ་བྱ་རྣམས་ཀྱིས་ཇི་ལྟ་བུ་ཞིག་མཐོང་བར་འགྱུར་བ། དེ་ལྟ་བུར་བྱིན་གྱིས་བརླབས་པས་དེ་ལྟར་སྣང་བ་ཡིན་ཏེ། ལུང་ལས་ཀྱང༌། སྟོན་པས་འཇིག་རྟེན་པའི་ཐུགས་བསྐྱེད་པའི་ཚེ། སྲོག་ཆགས་གྲོག་སྦུར་ཕྱིན་ཆད་ཀྱིས་ཀྱང་སྟོན་པའི་ཐུགས་ཤེས་སོ་ཞེས་འབྱུང་བ་ལྟ་བུའོ། །ཡང་དེའི་ཚེ་ཞེས་པ་ནི། དེ་ཁོ་ནར་མ་ཟད་གཞན་ཡང་ཞེས་པ་སྟེ། སྟོན་པ་ཉིད་ཏིང་ངེ་འཛིན་དེ་ལ་མཉམ་པར་བཞག་མ་ཐག་དེའི་ཚེའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་པ་ལ། བྱང་ཆུབ་སེམས་དཔའ་ནི་གོང་དུ་བཤད་ཟིན་ལ། སེམས་དཔའ་ཆེན་པོ་ནི། དག་པའི་ས་ལ་གནས་པ་དག་ལ་སྤྱི་ཁྱབ་ཏུ་འཇུག་པ་ཙམ་ཡིན་


TNT17_Page_0596
[མ་དཔེ་གཟིགས་ན་འདིར་གནོན།]

ཡང༌། གཙོ་བོར་འོད་ཟེར་ཆེན་པོའི་དབང་བསྐུར་བ་ཐོབ་པ། དེ་བཞིན་གཤེགས་པའི་རྒྱལ་ཚབ་རྣམས་སོ། །དེའི་སྒྲ་བཤད་པ་ནི། ཡོན་ཏན་རིན་པོ་ཆེ་བསྡུད་པ་ལས། ཅི་ཕྱིར་འདི་ནི་བྱང་ཆུབ་སེམས་དཔའ་བྱ་ཞེ་ན། །ཆགས་པ་གཅོད་བྱེད་ཀུན་ནས་ཆགས་པ་ཟད་པར་འདོད། །རྒྱལ་བ་རྣམས་ཀྱི་བྱང་ཆུབ་ཆགས་མེད་འགྱུར་ལ་རེག །དེས་ན་འདི་ནི་བྱང་ཆུབ་སེམས་དཔའི་མིང་ཐོབ་བོ། ཞེས་དང༌། ཅི་ཕྱིར་འདི་ནི་སེམས་དཔའ་ཆེ་ཞེས་བྱ་ཞེ་ན། །སེམས་ཅན་ཚོགས་རྣམས་མང་པོའི་མཆོག་ཏུ་གྱུར་པ་དང༌། །སེམས་ཅན་ཁམས་ཀྱི་ལྷ་རྣམས་ཆེན་པོ་གཅོད་པ་སྟེ། །དེ་ཕྱིར་འདི་ནི་སེམས་དཔའ་ཆེ་ཞེས་རབ་བརྗོད་དོ། །གཏོང་བ་ཆེ་དང་བློ་ཆེ་བ་དང་མཐུ་ཆེ་དང༌། །རྒྱལ་བ་རྣམས་ཀྱི་ཐེག་ཆེན་མཆོག་ལ་ཞུགས་པ་དང༌། །གོ་ཆ་ཆེན་པོ་བསྒོས་ཤིང་བདུད་ཀྱི་རྒྱུ་འདུལ་བ། །དེ་ཡི་ཕྱིར་ན་སེམས་དཔའ་ཆེ་ཞེས་བརྗོད་པ་ཡིན། །ཅེས་གསུངས་པ་ལྟར་རོ། །ཚིག་བཅད་འདི་དག་གི་སྦས་དོན་འོག་ཏུ་ཡང་འཆད་པར་འགྱུར་རོ། །འཕགས་པ་སྤྱན་རས་གཟིགས་ནི་དོན་གནས་ཚུལ་ལ་རྫོགས་པའི་སངས་རྒྱས་ཉིད་ཡིན་ལ། འཇིག་རྟེན་ཁམས་གཞན་མང་པོ་ཞིག་ཏུ་སངས་རྒྱས་ཉིད་དུ་ཡང་སྟོན་མོད་ཀྱི། སངས་རྒྱས་གཞན་ཐམས་ཅད་ཀྱི་འཁོར་གྱི་དཀྱིལ་འཁོར་དུ། བྱང་ཆུབ་སེམས་དཔའི་ཚུལ་ཡང་སྟོན་པའི་ཕྱིར། གདུལ་བྱ་རྣམས་ཀྱི་སྣང་ཚུལ་གཙོ་ཆེ་བའི་དབང་དུ་བྱས་ནས་དེ་ལྟར་སྨོས་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་སྤྱོད་ཅིང་ཉམས་སུ་ལེན་པའི་ཚུལ་གྱིས་ཡང་དག་པའི་དོན་ལ་མཉམ་པར་འཇོག་ཅིང༌། ལྷག་པའི་ཤེས་རབ་ཀྱིས་རྣམ་པར་བལྟ་ལ་ཞེས་སྤྱིར་སྨོས་ནས། ཁྱད་པར་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་འཇུག་པའི་


TNT17_Page_0597
[མ་དཔེ་གཟིགས་ན་འདིར་གནོན།]

སྒོ་ཕུང་པོ་ལྔ་པོ་དེ་དག་རང་བཞིན་གྱིས་ཏེ་གདོད་ནས་སྟོང་པར་རྣམ་པར་བལྟའོ། །དེ་དག་ཀྱང་ཅི་ཅེས་ཀྱང་ཡི་གེ་སྒྲས། ཁམས་དང་སྐྱེ་མཆེད་ལ་སོགས་པ་འཇུག་སྒོ་ཐམས་ཅད་ཀྱང་བསྟན་ཏོ། །དེ་ཡང་མདོ་འདིའི་རྒྱས་བཤད་གསུངས་པ་པོ་འཕགས་པ་སྤྱན་རས་གཟིགས་ཡིན་པས། ཆོས་ཀྱི་རྣམ་གྲངས་ཀྱི་ཚིག་འདི་དག་འབྱུང་བའི་གཞི། དོན་དམ་སྟོང་ཉིད་རྟོགས་པའི་ཡེ་ཤེས་དེ་གསར་དུ་བསྐྱེད་པའི་ཚུལ་བསྟན་པ་ཡིན་ཅིང༌། ཕུང་པོ་ལྔ་སོགས་སྟོང་པར་བསྒོམས་སོ་ཞེས་བསྟན་པ་ནི། རྗེས་འཇུག་རྣམས་ཀྱིས་ཀྱང་ཕུང་སོགས་སྟོང་ཉིད་དུ་བསྒོམས་པས། ཤེར་ཕྱིན་གྱི་ཡེ་ཤེས་རྟོགས་པར་འགྱུར་རོ། །ཞེས་གོ་བའི་ཆེད་དོ། །གཉིས་པ་བར་དུ་ཟབ་ཅིང་རྒྱ་ཆེ་བའི་དོན་གཏན་ལ་དབབ་པ་ལ། དྲི་ལན་གྱི་སྒོ་ནས་རྒྱས་པར་གཏན་ལ་ཕབ་པ་དང༌། མཐུན་གྱུར་གྱི་སྒོ་ནས་ཐེ་ཚོམ་བསལ་བའོ། །དང་པོ་ལ། དྲིས་པ་དང༌། ལན་གཉིས་སོ། །དང་པོ་ནི། དེ་ནས་སངས་རྒྱས་ཀྱི་མཐུས་ཞེས་པ་ལ་སོགས་པ་སྟེ། དེ་ཡང་སྐབས་དེའི་གདུལ་བྱ་རྣམས་ཀྱི་སྣང་ཚུལ་གྱི་དབང་དུ་བྱས་ཏེ། འཕགས་པ་ཤཱ་རིའི་བུ་ནི་ཤེས་རབ་ཅན་གྱི་མཆོག་ཡིན་པའི་ཕྱིར། ཟབ་མོའི་ཆོས་འདི་ལྟ་བུ་ལ་གླེང་བར་འོས་པ་ཡིན་ལ། འོན་ཀྱང་ཐེག་ཆེན་གྱི་ཆོས་ཟབ་མོ་འདི་ཉན་ཐོས་རྣམས་ཀྱི་སྤྱོད་ཡུལ་མ་ཡིན་པས། འདི་འདྲི་བ་ཡང་རང་སྟོབས་མ་ཡིན་གྱི་སངས་རྒྱས་ཀྱིས་བྱིན་གྱྀས་བརླབས་པའི་མཐུ་ཡིན་ནོ། །དོན་དུ་ནི། ཤཱ་རིའི་བུ་ཡང་བྱང་ཆུབ་སེམས་དཔའ་ཆེན་པོ་ཞིག་ཉན་ཐོས་ཀྱི་ཚུལ་བཟུང་བ་ཡིན་པར་ངེས་པས། ཐེག་ཆེན་གྱི་ཆོས་ལ་དབང་བསྒྱུར་བར་མི་ནུས་པ་སྟེ་མ་ཡིན་མོད། དེ་ཡང་སངས་རྒྱས་ཀྱི་མཐུ་ནི་ཡིན་ཏེ།


TNT17_Page_0598
[མ་དཔེ་གཟིགས་ན་འདིར་གནོན།]

འཇིག་རྟེན་དང་འཇིག་རྟེན་ལས་འདས་པའི་བདེ་དགེ་ཐམས་ཅད་སངས་རྒྱས་ཀྱི་མཐུ་ཉིད་ཀྱི་ཕྱིར་རོ། །རིགས་ཀྱི་བུའམ་རིགས་ཀྱི་བུ་མོ་ཞེས་པ་ནི། སྐྱེས་པ་དང་བུད་མེད་དེ། དེ་ལས་གཞན་མ་ནིང་གི་འགྲོ་བ་ནི་ཆོས་སྤྱོད་པ་ལ་མཐུ་ཆུང་བར་དགོངས་པས་མ་སྨོས་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་སྤྱད་པ་སྤྱོད་པར་འདོད་པ་ནི། ཞེས་པ་ལ། སྤྱིར་བྱང་ཆུབ་སེམས་དཔའི་སྤྱོད་པ་ནི་རྣམ་པ་བཞི་སྟེ། ཐེག་དམན་ལ་མོས་པ་རྣམས་ཀྱི་ཆེད་དུ་བྱང་ཆུབ་ཕྱོགས་མཐུན་གྱི་སྤྱོད་པ་དང༌། ཐེག་ཆེན་ལ་མོས་པ་རྣམས་ཀྱི་ཆེད་དུ་ཕར་ཕྱིན་དྲུག་གི་སྤྱོད་པ་དང༌། དེ་གཉིས་ཀ་མདུན་པའི་ཕྱིར་དུ་མངོན་ཤེས་ཀྱི་སྤྱོད་པ་དང༌། གཉིས་ཀ་གདུལ་བའི་ཕྱིར་དུ་སེམས་ཅན་ཡོངས་སྨིན་གྱི་སྤྱོད་པ་སྟཻ་བསྡུ་དངོས་བཞིའོ། །དེ་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་སྤྱོད་པར་མི་འདུ་སྟེ། ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པའི་ཐབས་ཡིན་པས་སོ། །དེ་ལྟར་ཡང་རྒྱལ་ཚབ་ཆེན་པོས། ལུས་ཅན་ཐེག་པ་ཆེན་པོ་དང༌། །ཐེག་པ་དམན་ལ་མོས་པ་རྣམས། །གཉིས་ཀ་མདུན་པར་བྱ་བ་དང༌། །གདུལ་བའི་ཕྱིར་ནི་བརྟེན་རྣམས་ཀྱི། །སྤྱོད་པ་བཞི་པོ་མདོ་བཞིན་དུ། །རྗེས་སུ་འབྲངས་ནས་བཤད་པ་ཡིན། །ཅེས་སོ། །དོན་འདི་ནི་འཕགས་པ་དཀོན་མཆོག་བརྩེགས་པའི་ནང་ཚན་གཙུག་ན་རིན་པོ་ཆེས་ཞུས་པའི་མདོ་ལས་འབྱུང་ངོ༌། །དེ་དག་ལས་ཀྱང་ལས་དང་པོ་པས་ལག་ལེན་དུ་འདེབས་སླ་བའི་དབང་དུ་བྱས་ནས། ཆོས་སྤྱོད་བཅུ་སྟེ། དེ་ལྟར་ཡང༌། ཡི་གེ་འབྲི་མཆོད་སྦྱིན་པ་དང༌། །ཉན་དང་གློག་དང་ལེན་པ་དང༌། །འཆད་དང་ཁ་ཏོན་བྱེད་པ་དང༌། །


TNT17_Page_0599
[མ་དཔེ་གཟིགས་ན་འདིར་གནོན།]

དེ་སེམས་པ་དང་སྒོམ་པ་སྟེ། སྤྱོད་པ་དེ་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་གསུངས་པ་ལྟར། །ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་ལ། ཆོས་སྤྱོད་བཅུའི་སྒོ་ནས་ནན་ཏན་དུ་བསྒྲུབ་པ་ནི། ཤེར་ཕྱིན་ཟབ་མོ་ལ་སྤྱད་པ་སྤྱོད་པ་སྟེ། འདིས་ནི་ཤེར་ཕྱིན་རྟོགས་པའི་རྒྱུ་ཐབས་ཀྱི་ཕྱོགས་རྣམས་ཀྱང་གསལ་བར་བསྟན་པའོ། །འདིར་འགྲེལ་ཆེན་ལྟར་ན། རིགས་ཀྱི་བུ་མོ་ཞེས་པ་མི་འདོན་ཞིང༌། འཕགས་པ་སྤྱན་རས་གཟིགས་དབང་ཕྱུག་ཅེས་བོད་པ་ཡང་མེད་པར། རིགས་ཀྱི་བུ་གང་ལ་ལ་ཞེས་འདོན་ཏེ། རིགས་ཀྱི་བུ་ཞེས་པ་སངས་རྒྱས་ཀྱི་སྲས་ཡིན་པའི་ཕྱིར་འཕགས་པ་སྤྱན་རས་གཟིགས་ལ་བོད་པའི་ཚིག་ཏུ་བཤད་མོད་ཀྱི། དོན་བསྒྱུར་ཞིང་བཤད་ན་དེ་ལྟར་འབྱུང་སྲིད་ཀྱང༌། སྒྲས་ཟིན་ལྟར་ན། འཕགས་པ་སྤྱན་རས་གཟིགས་ལ་མ་གུས་པའི་ཚིག་ཏུ་འགྱུར་བས། མདོ་འདོན་ཚུལ་དེ་དག་བཤད་ཚུལ་དེ་མི་ལེགས་པར་མཐོང་ངོ༌། །གཉིས་པ་ལ། ཤེར་ཕྱིན་ལ་སྤྱོད་ཚུལ་མདོར་བསྟན་པ་དང༌། ཤེར་ཕྱིན་གྱི་ངོ་བོ་རྒྱས་པར་བསྟན་པ་དང༌། དེ་རྟོགས་པའི་ལམ་གྱི་ཡོན་ཏན་དང༌། ལམ་དེས་ཐོབ་པའི་འབྲས་བུ་མངོན་དུ་འགྱུར་ཚུལ་དང༌། ཕན་ཡོན་དང་བཅས་པའི་གཟུངས་སྔགས་བསྟན་པ་དང༌། དོན་བསྡུའི་ཚུལ་དུ་ཤེར་ཕྱིན་སློབ་པར་གདམས་པའོ། །དང་པོ་ནི། དེ་སྐད་ཅེས་སྨྲས་པ་དང༌། ཞེས་པ་ལ་སོགས་པ་སྟེ། གང་ལ་ལ་ཅེས་པ་སྔ་ཕྱི་གཉིས་ནི། གང་ཅི་ཡང་རུང་བ་ཤེར་ཕྱིན་ལ་སྤྱོད་པར་འདོད་པ་དེ་ཐམས་ཅད་ཅེས་པའི་དོན་ནོ། །འདི་ལྟར་རྣམ་པར་བལྟ་བར་བྱ་ཞེས་པ་ནི། དེ་མ་ཐག་ཏུ་འཆད་པར་འགྱུར་


TNT17_Page_0600
[མ་དཔེ་གཟིགས་ན་འདིར་གནོན།]

པ་འདི་ལྟར་ཤིན་ཏུ་བསྒོམ་པར་བྱ་ཞེས་པ་སྟེ། ཆོས་སྤྱོད་བཅུ་དང་ཕྱིན་དྲུག་དང་བསྡུ་དངོས་བཞི་སོགས། སྤྱོད་པ་བཞི་པོ་གང་ལ་འཇུག་ཀྱང༌། རང་གཞན་སྣོད་བཅུད་ཀྱིས་བསྡུས་པའི་ཕུང་པོ་ལྔ་པོ་དེ་དག་རང་བཞིན་གདོད་མ་ནས་སྟོང་པར་བལྟ་བ་སྟེ། སྟོང་པར་མངོན་སུམ་དུ་མཐོང་བའམ། མོས་པའམ། མྱོང་བའི་སྒོ་ནས་ཤིན་ཏུ་རྣམ་པར་ཏེ་ལན་མང་པོ་དང༌། ཡུན་རིང་པོར་སྒོམ་པའོ། །ཀྱང་གི་སྒྲས་རྣམ་གྲངས་གཞན་བསྟན་པ་ཡང་གོང་དང་འདྲ་སྟེ། མདོར་ན་སྦྱིན་སོགས་སྤྱོད་པ་ཐམས་ཅད་སྤྲོས་བྲལ་རྟོགས་པའི་ལྟ་བས་ཟིན་པ་ཅིག་དགོས་སོ་ཞེས་པའོ། །གཉིས་པ་ཤེར་ཕྱིན་གྱི་ངོ་བོ་རྒྱས་པར་བཤད་པ་ལ། ཟབ་མོའི་མཚན་ཉིད་རྣམ་པ་བརྒྱད་ཀྱི་སྒོ་ནས་རང་བཞིན་ཤེར་ཕྱིན་གཏན་ལ་ཕབ། མཁས་པར་བྱ་བའི་དངོས་པོ་དྲུག་ལ་མཁས་པའི་སྒོ་ནས་ལམ་ཤཻར་ཕྱིན་ཇི་ལྟར་སྒོམ་ཚུལ་ལོ། །དང་པོ་ནི་གཟུགས་སྟོང་པའོ་སོགས་ཏེ། སྟོང་པ་ཉིད་དང༌། མཚན་ཉིད་མེད་པ་དང༌། མ་སྐྱེས་པ་དང༌། མ་འགགས་པ་དང༌། དྲི་མ་མེད་པ་དང༌། དྲི་བྲལ་མེད་པ་དང༌། བྲི་བ་མེད་པ་དང༌། གང་བ་མེད་པ་སྟེ། བརྒྱད་ལས་དང་པོ་སྟོང་ཉིད་ཅུང་ཟད་རྒྱས་པར་བཤད་ཅིང༌། ལྷག་མ་གཞན་རྣམས་དེས་རིགས་བསྒྲེས་ན་གོ་བླ་བར་དགོངས་ནས་མིང་ཙམ་སྨོས་པའོ། །དེ་ལ་ཕུང་པོ་ལྔ་སོགས་དང༌། དེ་དག་སྟོང་པར་ཤེས་པ་ལ། ཐོག་མར་ཤེས་བྱ་སྤྱིའི་རྣམ་གཞག་རྒྱས་པ་ཤེས་ན་ནི་ལེགས་ལ། ཤིན་ཏུ་བློ་གྲོས་ཞན་པས་ཀྱང་འདི་ཙམ་ཞིག་ཤེས་དགོས་ཏེ། འདིར་ཤེས་པར་བྱ་བའི་ཆོས་ཐམས་ཅད་ནི་མདོར་བསྡུ་ན། དངོས་པོའི་འདུས་བྱས་སུ་གཏོགས་པ་དང༌། འདུས་མ་བྱས་སུ་གཏོགས་


TNT17_Page_0601
[མ་དཔེ་གཟིགས་ན་འདིར་གནོན།]

པ་གཉིས་སོ། །དངོས་པོའི་འདུས་བྱས་ཏེ་ཡང་གཟུགས་ཅན་དུ་སྣང་བ་དང་ཤེས་པ་དང་དེ་དག་གི་གནས་སྐབས་ལ་བཏགས་པ་སྟེ་གསུམ་དུ་ཡོད་ལ། དང་པོ་གཉིས་ནི་དངོས་པོ་དངོས་ཡིན་ལ། ཕྱི་མ་ནི་བཏགས་པ་བའོ། །དེའི་དང་པོ་ནི་ཡུལ་དཔྱད་པས་གཟུགས་སུ་རུང་བ་སྟེ་རེག་པ་བསྐྱེད་པ་དང༌། ཐོགས་པ་དང་བཅས་པ་སོགས། དབང་ཤཻས་ཀྱི་སྤྱོད་ཡུལ་ལམ་རྟེན་གྱི་མཚན་ཉིད་ཅན་ནོ། །དེ་ཡང་རྒྱུའི་གཟུགས་ཅན་ནི། སྲ་བ་དང༌། བཤེར་བ་དང༌། དྲོ་བ་དང༌། གཡོ་བའི་རང་བཞིན་གྱི་རྡུལ་ཏེ། འབྱུང་བ་ཆེན་པོ་ས་ཆུ་མེ་རླུང་རྣམས་སོ། །འབྲས་བུའི་གཟུགས་ཅན་ནི། དཀར་དམར་སྔོ་སེར་ལ་སོགས་པ་ཁ་དོག་དང༌། གྲུ་བཞི་ཟླུམ་པོ་ལ་སོགས་པ་དབྱིབས་ཏེ་གཟུགས་དང༌། ཐོས་པ་བྱ་བ་སྙན་པ་དང༌། མི་སྙན་པ་དང་ཡང་ན་གླུ་དབྱངས་ལྟ་བུ་སེམས་ཅན་གྱི་རྒྱུད་དུ་གཏོགས་པ་དང༌། ཆུ་སྒྲ་ལྟ་བུ་དེར་མི་གཏོགས་པ་སྟེ་སྒྲ་དང༌། སྣཽམས་པ་ནི་ཞིམ་མི་ཞིམ་གྱི་ཁྱད་པར་སོགས་དྲི་དང༌། མངར་སྐྱུར་ལ་སོགས་པའི་རོ་དང༌། འཇམ་རྩུབ་ལ་སོགས་པའི་རེག་བྱ་མང་པོ་ཞིག་དང༌། མིག་རྣ་བ་སྣ་ལྕེ་ལུས་ཀྱི་དབང་པོ་སྟེ་དེ་རྣམས་ནི། རྒྱུ་འབྱུང་བ་ལས་བྱུང་ཞིང་དངོས་སུ་འབྱུང་བ་རྣམས་དང་འབྲེལ་བས་ན། འབྱུང་བ་ལས་གྱུར་པའི་གཟུགས་ཞེས་བྱའོ། །སྤྱིར་འབྱུང་བ་རྣམས་ཀྱང་རེག་བྱའི་ནང་དུ་འདུ་སྟེ། སྲ་བའི་རེག་བྱ་ལ་སོགས་པའི་ངོ་བོ་ཡིན་པའི་ཕྱིར་རོ། །དེ་ལྟར་ན་གཟུགས་སོགས་ལྔ་དང༌། མིག་སོགས་ལྔ་སྟེ་བཅུ་པོ་དེ་དག་ནི། གཟུགས་ཀྱི་ཁམས་དང་གཟུགས་ཀྱི་སྐྱེ་མཆེད་ནས། ལུས་ཀྱི་ཁམས་དང་ལུས་ཀྱི་སྐྱེ་མཆེད་ཀྱི་བར་དུ། ཁམས་བཅུ་དང་སྐྱེ་མཆེད་བཅུ་ཡིན་ལ་


TNT17_Page_0602
[མ་དཔེ་གཟིགས་ན་འདིར་གནོན།]

ཐམས་ཅད་ཀྱང་གཟུགས་ཅན་དུ་སྣང་བ་ཡིན་པའི་ཕྱིར། གཟུགས་ཀྱི་ཕུང་པོ་ཞེས་བྱའོ། །འགྲོ་བ་དྲུག་གི་ལུས་དང༌། ཕྱི་རོལ་ཀྱི་རི་དང༌། ལྗོན་ཤིང་དང༌། ཆུ་བོ་དང༌། རྒྱ་མཚོ་དང༌། བཟའ་བ་དང་བཏུང་བ་ལ་སོགས་པ། གནས་ལུས་ལོངས་སྤྱོད་འདི་དག་ཐམས་ཅད་ནི། གཟུགས་ཅན་བཅུ་པོ་དེ་དག་ཕན་ཚུན་དུ་ཚོགས་ཤིང་འདྲེས་པའི་གོང་བུ་ཡིན་པས་དེ་དག་ལས་གཞན་དུ་མི་བསམ་མོ། །གཉིས་པ་ཤེས་པ་ནི། དབང་པོ་ལྔའི་རྣམ་ཤེས་དང༌། ཡིད་ཀྱི་རྣམ་ཤེས་ཏེ་དྲུག་ནི་རྣམ་ཤེས་རགས་པ་དང༌། བདག་ཏུ་སྣང་བའི་ཉོན་ཡིད་ནི་འབྲིང་པོ་དང༌། དེ་ཀུན་ལ་ཁྱབ་པའི་ཀུན་གཞི་ནི་ཕྲ་བ་སྟེ། དེ་དག་ཐམས་ཅད་རྣམ་པར་ཤེས་པའི་ཕུང་པོ་ཡིན་པ་དང༌། མིག་གི་རྣམ་པར་ཤེས་པའི་ཁམས་ནས་ཡིད་ཤེས་ཀྱི་ཁམས་ཀྱི་བར་དུ་ཁམས་དྲུག་དང༌། ཡིད་ཁམས་ཏེ་བདུན་ནི། སྐྱེ་མཆེད་ཀྱི་སྐབས་ཡིད་ཀྱི་སྐྱེ་མཆེད་གཅིག་པུར་ཡང་ཡིན་ཏེ། འོན་ཀྱང་ཀུན་གཞི་རྣམ་ཤེས་ནི་ཆོས་ཁམས་སུ་བསྡུ་བའང་སྣང་བ་ལོགས་སུ་དཔྱད་པར་བྱར་ཡོད་དོ། །དབང་ཤེས་དྲུག་པོ་དེ་དག་དང་འབྲེལ་བར་བདེ་བ་དང༌། སྡུག་བསྔལ་དང༌། བཏང་སྙོམས་གསུམ་ཚོར་ཞིང་ཉམས་སུ་མྱོང་བ་ནི། ཚོར་བའི་ཕུང་པོ་དང༌། ཕྱི་དང་ནང་འདུས་བྱས་དང་འདུས་མ་བྱས་ཀྱི་ཆོས་གང་ལ་ཡང༌། འདི་ནི་བུམ་པའོ། །འདི་ནི་སྣམ་བུའོ། །འདི་ནི་བཟང་བའོ། །འདི་ནི་ངན་པའོ། །འདི་ནི་རིང་བའོ། །འདི་ནི་ཐུང་བའོ། །འདི་ནི་ཀ་ཞེས་པའོ། །འདི་ནི་ཀ་བ་ཞེས་པའོ། །ཞེས་པ་ལ་སོགས་པ། མིང་ཙམ་དུ་འཛིན་པ་དང༌། དོན་ཙམ་དུ་འཛིན་པ་དང༌། མིང་ཁོ་ན་འཛིན་པ་དང༌། དོན་ཁོ་ན་འཛིན་པ་དང༌། མིང་དོན་


TNT17_Page_0603
[མ་དཔེ་གཟིགས་ན་འདིར་གནོན།]

གཉིས་ཀ་འཛིན་པའི་མཚན་མ་ཅན་གྱི་རྟོག་པ་རྣམས་ནི་རྒྱུ་མཚན་གཏན་ཚིགས་ལ་བརྟེན་པ་དང་མ་བརྟེན་པ་ཇི་ལྟར་ཡིན་ཡང་རུང་སྟེ་འདུ་ཤེས་ཀྱི་ཕུང་པོ་ཞེས་བྱའོ། །འདོད་ཆགས་ཞེ་སྡང་ལ་སོགས་པའི་ཉོན་མོངས་པ་དང༌། དད་པ་དང༌། བརྩོན་འགྲུས་ལ་སོགས་པའི་དགེ་བ་དང༌། རྟོགས་དཔྱོད་ལ་སོགས་པ་མ་ངེས་པ་དང༌། དེ་ཀུན་ལ་ཁྱབ་པ་ཡུལ་ཡིད་ལ་བྱེད་པ་དང༌། ཡུལ་ལ་གཡོ་བའི་སེམས་དཔའ་ལ་སོགས་པ་མདོར་ན་ལས་བྱེད་པ་དང་འབྲེལ་བའི་རྣམ་རྟོག་ཐམས་ཅད་ནི། མཚུངས་ལྡན་འདུ་བྱེད་ཅེས་བྱ་སྟེ་འདུ་བྱེད་ཀྱི་ཕུང་པོའི་ཕྱེད་སྔ་མ་དང་འདུ་བྱེད་དངོས་དང་འདུ་བྱེད་ཀྱི་གཙོ་བོ་ཡིན་ནོ། །དེ་ལྟར་རྣམ་ཤེས་ཚོར་བ་འདུ་ཤེས། འདུ་བྱེད་ཀྱི་ཕུང་པོའི་ཕྱེད་དེ། ཕུང་པོ་ཕྱེད་དང་བཞི་པོ་དེ་ནི་རིག་པའམ་ཤེས་པ་ཡིན་ནོ། །འདུས་བྱས་རྣམས་ཀྱི་མཚན་ཉིད། སྐྱེ་བ་དང༌། གནས་པ་དང་འཇིག་པ་ལ་སོགས་པ་དང༌། མི་དང་མི་ཕན་ཚུན་འདྲ་བ་ལ་སོགས་པའི་སྐལ་མཉམ་དང༌། སྡུག་བསྔལ་ཐོབ་པ་དང༌། རྒྱལ་སྲིད་ཐོབ་པ་དང༌། སྡོམ་པ་ཐོབ་པ་དང། ལམ་དང་འབྲས་བུ་ཐོབ་པ་ལ་སོགས་པའི་འགྱུར་བའི་ཁྱད་པར་ནི་ཐོབ་པ་སྟེ། དེ་དག་ལ་སོགས་པ་གཟུགས་སེམས་ཀྱི་དངོས་པོའི་ཁྱད་པར་ལ་བཏགས་པ་ཤིན་ཏུ་མང་བ་དག་ནི། ལྡན་མིན་འདུ་བྱེད་ཅེས་གྲགས་ཏེ། འདུ་བྱེད་ཀྱི་ཕུང་པོའི་ཕྱོགས་གཅིག་གམ། ཕྱེད་ཕྱི་མ་སྟེ། བཏགས་པའི་འདུ་བྱེད་དང་འདུ་བྱེད་རྣམ་གྲངས་པའོ། །རྣམ་པ་རིག་བྱེད་མ་ཡིན་པའི་གཟུགས་ཞེས་པ་ནི་སྡོམ་པ་དག་སྡོམ་མིན་དང༌། དགེ་བའི་བརྟུལ་ཞུགས་ཙམ་པོ་རྣམས་ལ་ཟེར་ཏེ། འདི་མིང་གི་སྒོ་ནས་གཟུགས་ཕུང་དུ་བསྡུ་ཡང༌། གཟུགས་སེམས་


TNT17_Page_0604
[མ་དཔེ་གཟིགས་ན་འདིར་གནོན།]

གཉིས་འདུས་ཀྱི་གནས་སྐབས་ལ་བཏགས་པ་ཙམ་ཡིན་པས། དངོས་པོ་བཏགས་པ་པའི་ནང་ཚན་ཡིན་ནོ། །དེ་ལྟར་ན་དེ་དག་ནི་ཕུང་པོ་ལྔ་སྟེ་ཆོས་ཀྱི་ཁམས་ཀྱི་ཕྱེད་མ་དང༌། ཆོས་ཀྱི་སྐྱེ་མཆེད་ཀྱི་ཕྱེད་མ་མ་གཏོགས་སྐྱེ་མཆེད་བཅུ་གཉིས་དང་ཁམས་བཅོ་བརྒྱད་ཀྱང་དེ་ལ་ཚང་ངོ༌། །ཕྱེད་མ་དེ་ཡང་ཅི་སྙམ་ན། འདུས་མ་བྱས་སུ་གཏོགས་པ་ཡང་གཉིས་ཏེ་བཏགས་པ་བ་དང་དངོས་སོ། །དང་པོ་ནི། ནམ་མཁའ་དང༌། འགོག་པ་གཉིས་དང༌། རིགས་སྤྱི་ལ་སོགས་པ་ཡིན་ལ་འདི་ནི་ཕུང་པོར་མ་གཏོགས་པར་འདོད་ཅིང་ཁམས་དང་སྐྱེ་མཆེད་དུ་ནི་འདུས་ཏེ། ཚོར་འདུ་འདུ་ཤེས་འདུ་བྱེད་དེ་ཕུང་པོ་གསུམ་དང་འདུས་མ་བྱས་བཏགས་པ་བ་འདི་རྣམས་བསྡོམས་པ་ནི་ཆོས་ཀྱི་ཁམས་དང་ཆོས་ཀྱི་སྐྱེ་མཆེད་དོ། །གཉིས་པ་འདུས་མ་བྱས་དངོས་ནི་དོན་དམ་པའི་སེམས་ཉིད་རྣམ་པ་ཐམས་ཅད་པ་རྟག་བརྟན་ཞི་བ་གཡུང་དྲུང་བདེ་བར་གཤེགས་པའི་སྙིང་པོ། ཆོས་དབྱིངས་དེ་བཞིན་ཉིད་དོ། །དེ་ལ་འདུས་མ་བྱས་བཏགས་པ་བ་ནི། དངོས་སུ་ན་འདུས་བྱས་ཡིན་ཀྱང༌། རང་གི་མཚན་ཉིད་ཀྱིས་མེད་པས། སྐྱེ་འཇུག་གནས་པའི་དངོས་པོར་མེད་པའི་ཕྱིར། འདུས་བྱས་གཞན་རྣམས་དང་མཚན་ཉིད་མི་འདྲ་བ་ཤིན་ཏུ་ཆེ་བའི་ཕྱིར་ན་འདུས་མ་བྱས་སུ་བཏགས་པའོ། །ལམ་གྱི་ཆོས་རྣམས་ནི་འདུས་མ་བྱས་རྟོགས་པའི་ཐབས་ཡིན་ཡང༌། ངོ་བོ་ནི་དངོས་པོ་སྟེ། དད་པ་དང་བརྩོན་འགྲུས་དང་ཤེས་རབ་ལ་སོགས་པའི་སེམས་བྱུང་དང་རྣམ་ཤེས་སུ་འདུས་པ་ཡིན་ནོ། །འབྲས་བུས་བསྡུས་པའི་ཆོས་ལ་ནི། ཉན་ཐོས་དང༌། རང་སངས་རྒྱས་དང་བྱང་ཆུབ་སེམས་དཔའི་རྣམ་པར་གྲོལ་བའི་ཡེ་ཤཻས་ནི་ལམ་ཡིན་པའི་ཕྱིར་དངོས་པོ་ཉིད་དུ་འགྱུར་ལ། དེ་བཞིན་གཤེགས་


TNT17_Page_0605
[མ་དཔེ་གཟིགས་ན་འདིར་གནོན།]

པའི་རྣམ་གྲོལ་ལམ་དང༌། ཁྱད་པར་ལམ་དང་པོར་ཐོབ་པ་ཡང་དེ་དང་འདྲ་ཞིང༌། ཐེག་པ་གསུམ་ལ་སྤང་བྱ་སྒྲིབ་པ་རྣམ་འགགས་པའི་སྤངས་པ་ནི་སོ་སོར་བརྟགས་འགོག་ཡིན་པའི་ཕྱིར། འདུས་མ་བྱས་བཏགས་པ་བ་དང་དངོས་མེད་ཡིན་ནོ། །འགོག་བདེན་དངོས་ནི། དོན་དམ་ཆོས་སྐུ་གཞི་ལམ་འབྲས་བུ་ཀུན་གྱི་ཆོས་ཉིད། སངས་རྒྱས་ཀྱི་སྙིང་པོ་དེ་ཡིན་ཏེ། དེ་དངོས་པོ་དངོས་མེད་གཉིས་ཀ་མ་ཡིན་ཅིང༌། འདུས་མ་བྱས་ནི་དངོས་ཡིན་ནོ། །སྤྲོས་པ་ཐམས་ཅད་དང་བྲལ་བའི་དབྱིངས་དང༌། སྟོང་པ་ཉིད་ཅེས་བྱ་བ་ཡང༌། སེམས་ཉིད་འདུས་མ་བྱས་འདི་ཁོ་ན་ཡིན་གྱི། གཞན་ནི་ཡང་དག་པར་མ་ཡིན་ནོ། །དེ་ལྟར་ན་ཆོས་ཉིད་འདི་རེས་འགའ་ཆོས་ཀྱི་སྐྱེ་མཆེད་ཡིན་པ་ལྟར་བཤད་པ་ནི་དགོས་པའི་དབང་གིས་གསུངས་པ་སྟེ། རིག་ཤེས་རྗེས་དཔག་གིས་ཆོས་ཉིད་འདི་ལ་དམིགས་ནས་དོན་སྤྱིའི་ཚུལ་གྱིས་སྤྱོད་ཡུལ་དུ་བྱེད་པས་དབྱིངས་འདི་ཡང་ཡིད་ཀྱི་ཡུལ་རྗེས་མཐུན་ཡིན་པ་ལ་དགོངས་སོ། །ངེས་པར་ན་དེས་དེ་ཡུལ་དུ་བྱེད་མི་ནུས་ཏེ། རྣམ་པར་ཤེས་པ་དག་རྣམ་པར་རྟོག་པའི་ཡུལ་མ་ཡིན་པའི་ཕྱིར་རོ། །འདི་ནི་དངོས་གནས་ལ་ཕུང་ཁམས་སྐྱེ་མཆེད་གང་ཡང་མ་ཡིན་ལ། རྟེན་འབྲེལ་ལས་ཀྱང་གྲོལ་བའོ། །དོན་དམ་པའི་ནི་ཕུང་ཁམས་སྐྱེ་མཆེད་དང་རྟེན་འབྲེལ་དུ་ཡང་འཇོག་མོད་ཀྱི། ཕུང་སོགས་དེ་དག་ཀུན་རྫོབ་ཁོ་ནས་རབ་ཏུ་ཕྱེ་བ་ཡིན་པའི་ཕྱིར། དེ་ཡིན་པས་དེ་དག་ཡིན་པར་མི་འགྱུར་ཏེ། དངུལ་ཆུའི་སྐྱེས་བུ་མ་ཡིན་པ་བཞིན་ནོ། །དེ་བས་ན་ནམ་མཁའ་ལ་སོགས་པ་དེ་དག་དངོས་མེད་ཡིན་ལ། གཟུགས་སོགས་ཕུང་པོ་ལྔ་ནི་དངོས་པོ་སྟེ། དེ་གཉིས་ལ་འདུས་བྱས་དང་


TNT17_Page_0606
[མ་དཔེ་གཟིགས་ན་འདིར་གནོན།]

འདུས་མ་བྱས་སུ་གྲགས་ཀྱང༌། སོ་སོ་སྐྱེ་བོ་རྣམས་ཀྱི་རྟོག་ངོ་དང་མཐུན་པར་གསུངས་པས་དྲང་དོན་ཀུན་རྫོབ་ཏུ་དེ་ལྟར་ཡིན་གྱི། ཡང་དག་པར་ན་དངོས་མེད་རྣམས་ཀྱང་འདུས་བྱས་ཏེ། དངོས་པོ་ལ་བརྟེན་པ་ལ་ཁོ་ནའི་ཕྱིར་རོ། །དེའི་ཕྱིར་དོན་དམ་དབྱིངས་ནི་ཕུང་ཁམས་སྐྱེ་མཆེད་གང་ཡང་མ་ཡིན་པ་དང༌། དེ་རྣམས་ལ་འདུས་བྱས་ཀྱིས་ཁྱད་པ་དང༌། འདུས་མ་བྱས་དངོས་ཡིན་ན་དངོས་པོ་དངོས་མེད་གཉིས་ཀ་ལས་གྲོལ་བས་ཁྱབ་པ་ཡིན་ནོ། །དེ་ལས་དངོས་མེད་རྣམས་ནི་བཏགས་དེ་ཁོ་ན་ཡིན་པའི་ཕྱིར། མཚན་ཉིད་ཀྱི་ངོ་བོ་མེད་པས་ན། སྣང་བ་ཡང་མེད། མྱོང་བ་ཡང་མེད། བླང་བྱ་དང་དོར་བྱ་གང་ཡང་མ་ཡིན་པའི་ཕྱིར། ཞར་བྱུང་ཙམ་དུ་བཞག་ནས་དེ་མ་གཏོགས་པའི་ལྷག་མ་ཆོས་ཐམས་ཅད་ཕུང་ཁམས་སྐྱེ་མཆེད་ཅེས་པ་རེ་རེས་ཀྱང་བསྡུས་པ་ཡིན་མོད། དེ་གསུམ་པོ་མཚན་གཞི་དབྱེ་བ་མེད་པས། ཕུང་པོ་གང་ཡིན་སྐྱེ་མཆེད་ཡིན་པ་སོགས་མདོར་ན་དངོས་མེད་རྣམས་ཕར་བཞག་ནས་ལྷག་མ་གསུམ་པོ་ཕན་ཚུན་དུ་སྤྱི་ལྡོག་ནས་ངོ་བོ་གཅིག་གོ །དགོས་པའི་དབང་དང༌། ལྡོག་ཆའི་སྒོ་ནས་རྣམ་གྲངས་ཐ་དད་པར་བསྟན་ཏེ། དངོས་པོ་རྣམས་ཆོས་མི་འདྲ་བ་དུ་མ་ཁོ་ན་ཡིན་པས། སྐྱེས་པའོ། །བུད་མེད་དོ། །རིའོ། །ཤིང་སྡོང་ངོ༌། ཁང་བཟང་ངོ༌། །ཞེས་པ་ལ་སོགས་པ༌། དངོས་པོ་དུ་མ་མང་པོ་ཞིག་ཕྱོགས་རེ་རེར་འདུས་པ་ན། བློས་གཅིག་ཏུ་འཕྲུལ་ནས་བཟུང་བ་ཙམ་མ་གཏོགས་གཅིག་ཏུ་མེད་ཅིང༌། དུ་མ་འདུས་པ་མཉམ་པོ་ཡིན་ཀྱང༌། འགའ་ཞིག་བློས་ཕྱོགས་གཅིག་ཏུ་བསྡུས་ནས་གཅིག་ཏུ་རློམ་ཞིང༌། འགའ་ཞིག་དེ་ལས་གཞན་དུ་འབྱེད་དེ། དཔེར་ན་ཁང་པ་ཞེས་བྱ་བའི་དངོས་


TNT17_Page_0607
[མ་དཔེ་གཟིགས་ན་འདིར་གནོན།]

པོ་ལ་སོགས་པ་གཅིག་མེད་ཀྱང༌། རྡོ་ཤིང་ས་སོགས་དུ་མ་ཡོད་པའི་ཕྱོགས་གཅིག་ལ་བློས་བསྡུས་ནས་ཁང་པར་རློམ་ཞིང༌། ཕྱི་རོལ་རྡོ་ཤིང་ས་སོགས་དུ་མ་འདུས་པ་ཡིན་ཀྱང༌། འདི་ནི་ཁང་པ་མིན་གྱི་ས་སྟོངས་སོ་ཞེས་སོ་སོར་འབྱེད་པ་ལྟ་བུའོ། །དེ་བཞིན་དུ་གཅིག་ཏུ་མེད་མཉམ་དང༌། སྣ་ཚོགས་འདུས་མཉམ་ཡིན་ཀྱང༌། འདི་ནི་གཟུགས་སོ་ཞེས་མང་པོ་ཞིག་གཅིག་ཏུ་བསྡུ་ཞིང་ཡང་འདི་ནི་ཚོར་བ་སྟེ་གཟུགས་མིན་ནོ། །ཞེསགཞི་འགའ་ཞིག་གཅིག་ཏུ་ཆོས་གཞན་འགའ་ཞིག་ལས་སོ་སོར་འབྱེད་པ་ལྟ་བུའོ། །དེ་བས་ན་དངོས་པོ་དུ་མ་ཅི་རིགས་ཅི་རིགས་ལ་རིལ་པོ་གཅིག་ཏུ་འཛིན་པའི་གཉེན་པོར། སྣ་ཚོགས་འདུས་པའི་ཕུང་པོ་ཡིན་ནོ་ཞེས་གསུངས་སོ། །དེ་ལྟར་ཡང་རྒྱལ་ཚབ་ཆེན་པོས། ཐོག་མ་དུ་མ་ཉིད་དང་ནི། །བསྡུས་དང་རབ་ཏུ་ཕྱེ་བའི་དོན། །ཞེས་གསུངས་སོ། །སྐྱེ་མཆེད་ཀྱི་དོན་ནི་སྐྱེ་བའི་སྒོ་ཡིན་ལ། དེ་ཡང་དངོས་པོ་དེ་དང་དེ་སྐྱེ་བའི་ལྷན་ཅིག་བྱེད་རྐྱེན་ནོ། །སྐྱེ་མཆེད་ཀྱི་སྐབས་འདིར་བཟུང་བྱ་དྲུག་དང་འཛིན་པ་དྲུག་ཏུ་བྱས་ཏེ་གྲངས་མཉམ་པར་བསྟན་པའི་དགོས་པ་ནི། ཚོར་བ་ཉེ་བར་སྤྱོད་པ་འབྱུང་བའི་སྒོ། མིག་སོགས་དབང་པོ་དྲུག་སྟེ་དེ་ལ་ཚོར་བ་ཉཻར་བར་སྤྱོད་པ་ནི། ཡུལ་དང་ཕྲད་པའི་ཚོར་བ་ངོ་ཤེས་པར་བྱེད་མཁན་གྱི་དོན་ཡིན་པས་དེའི་ངོ་བོ་འདུ་ཤེས་སོ། །དབང་པོ་མེད་ན་ནི་ཡུལ་ཡོད་ཀྱང༌། འདུ་ཤེས་ཀྱི་ཡུལ་གྱི་དོན་སྤྱོད་པ་མི་སྲིད་པའི་ཕྱིར། དབང་པོ་ནི་འདུ་ཤེས་སྐྱེ་བའི་སྒོ་སྟེ། རྐྱེན་ཡིན་ལ། ཡུལ་དྲུག་ནི། དོན་ཡོངས་སུ་གཅོད་པའི་ཉེར་སྤྱོད་དེ། གཟུགས་སོགས་ཀྱི་རྣམ་པ་མཐོང་བ་ལ་བརྟེན་ནས། དེ་དག་དེར་ངོ་ཤེས་པའི་འདུ་ཤེས་འབྱུང་བའི་སྒོའམ་


TNT17_Page_0608
[མ་དཔེ་གཟིགས་ན་འདིར་གནོན།]

འདུ་ཤེས་སྐྱེ་བའི་རྐྱེན་བྱེད་པ་ཡིན་པས་སོ། །དེ་ཡང་ཡུལ་རྣམས་མེད་ན་ནི་དབང་པོ་ཡོད་ཀྱང༌། གཟུགས་སོགས་སྣང་བའི་དོན་རྣམས་གཅོད་པ་ནི་མི་སྲིད་པའི་ཕྱིར་རོ། །དེ་བས་ན་འདིས་ནི་སྣ་ཚོགས་སྣང་བ་འདི་ཐམས་ཅད་དབང་ཕྱུག་ལ་སོགས་པའི་བྱེད་པོ་གཞན་གྱི་རྐྱེན་ཅན་ནོ་སྙམ་པ་ལ་སོགས་པ་ཟློག་པའི་དོན་ཏེ། གཟུགས་སུ་སྣང་བ་ལ་སོགས་པའི་རྐྱེན་གྱིས་མཐོང་ཐོས་ཀྱི་ཤེས་པ་འབྱུང་ལ། དབང་པོར་སྣང་བ་ལ་བརྟེན་ནས་གཟུགས་སྣང་སོགས་ཉམས་སུ་མྱོང་བའི་བློ་སྐྱེའོ། །དེ་དག་ཀྱང་གཅིག་མེད་ན་ཅིག་ཤོས་ཀྱང་མི་འབྱུང་ངོ་ཞེས་རྟོགས་པར་འགྱུར་རོ། །དེ་ལྟར་ཡང༌། ཚོར་དང་དོན་རྣམས་ཡོངས་གཅོད་ཀྱི། ཉེར་སྤྱོད་འབྱུང་སྒོ་གཞན་ཡིན་ནོ། །ཞེས་སོ། ཁམས་ཞེས་བྱ་བ་ནི་རྒྱུ་སྟེ། རྒྱུ་དེ་ཡང་ས་བོན་ནམ། ཉེ་བར་ལེན་པའི་རྒྱུ་ལས་བརྩམས་པ་ཡིན་ན། དེ་བས་ན་འདིར་གཟུགས་སོགས་ཡུལ་དྲུག་ནི་འབྱུང་བཞིན་པའམ་འབྱུང་བར་འགྱུར་བའི་ས་བོན་ཞེས་ས་བོན་གྱི་དོན་ཡིན་ཏེ། སྔོན་པོར་སྣང་བ་ད་ལྟར་བ་སྐད་ཅིག་མ་དང་པོ་འདི་ནི། སྔོན་པོར་སྣང་བ་སྐད་ཅིག་མ་གཉིས་པ་མ་འོངས་པའི་ས་བོན་ནམ་ཉེར་ལེན་གྱི་རྒྱུའི་མཚན་ཉིད་ཅན་ནོ། །རིམ་པ་དེ་ཀས་སྐད་ཅིག་མ་གསུམ་པ་ནས་མཐའ་མེད་པའི་བར་དུ་སྦྱོར་ཏེ། ཡང་ད་ལྟར་གྱི་སྔོན་པོར་སྣང་བ་འདི་ནི། སྔོན་རོལ་འདས་མ་ཐག་པའི་སྐད་ཅིག་མ་ལ། སྔོན་པོར་སྣང་བ་བྱུང་བ་དེས། རྒྱུ་འམ་ས་བོན་བྱས་པ་ལས་སྐྱེས་སོ། །ཞེས་དང༌། །དེའི་ཡང་སྔོན་རོལ་གྱི་སྐད་ཅིག་མ་སོགས་མཐའ་མེད་པའི་བར་དུ་སྦྱོར་རོ། །དེ་བཞིན་དུ་འཛིན་པ་མིག་སོགས་སུ་སྣང་བ་ལྟར་བ་འདིས་ཀྱང༌། མ་འོངས་པའི་མིག་སོགས་སུ་སྣང་བ་སྐྱེ་བའི་ས་བོན་བྱེད་པ་དང༌། མིག་གི་རྣམ་པར་


TNT17_Page_0609
[མ་དཔེ་གཟིགས་ན་འདིར་གནོན།]

ཤེས་པ་དངོས། ད་ལྟར་བས་ཀྱང་མིག་གི་རྣམ་ཤེས་ཕྱི་མའི་ཉེར་ལེན་གྱི་རྒྱུ་བྱེད་པའི་ཕྱིར་ཁམས་ཏེ། དངུལ་རྡོ་ལ་དངུལ་གྱི་ཁམས་ཞེས་ཟེར་བ་ལྟ་བུའོ། །ཡང་དཔེར་ན་མིག་གི་རྣམ་ཤེས་སྐད་ཅིག་མ་དང་པོ་དེ། སྐད་ཅིག་མ་གཉིས་པ་མ་ཡིན་ཞིང༌། ངོ་བོ་མི་གཅིག་ཀྱང༌། སྐད་ཅིག་མ་གཉིས་པའི་ཁམས་སམ་རྒྱུར་གནས་པའི་ཕྱིར། ཁམས་ཞེས་བྱ་ཡི། རང་དང་དུས་མཉམ་གྱི་ཁམས་མ་ཡིན་ནོ། །དེ་ལྟར་ཡང༌། འཛིན་དང་བཟུང་དང་དེ་འཛིན་པ། །ས་བོན་དོན་ཏེ་གཞན་དུ་འདོད། །ཅེས་སོ། །དེ་ལྟར་ན། སྔོན་པོར་སྣང་བ་གཟུགས་ཀྱི་སྐྱེ་མཆེད་ལྟ་བུ་ཞིག་དུས་དང་རྣམ་པའི་ཆ་ཤས་དུ་མ་ཡིན་པའི་སྒོ་ནས་ཕུང་པོར་འཇོག་ལ་སྔོན་པོར་འཛིན་པའི་འདུ་ཤེས་བསྐྱེད་པའི་ཕྱིར་ན། སྐྱེ་མཆེད་དང༌། སྔོ་སྣང་སྐད་ཅིག་མ་གཉིས་པའི་རྒྱུ་བྱེད་པའི་ཕྱིར་ན། ཁམས་སུ་འཇོག་སྟེ། དེ་བས་ན་དངོས་པོར་གཅིག་ཉིད་ལ་རྒྱུ་མཚན་དེ་དང་དེས། ཕུང་པོ་ལ་སོགས་པའི་དོན་དང་དེའི་རྣམ་གཞག་སོ་སོར་འཇོག་གོ །གཞན་ཡང་དགོས་པ་དང༌། རྒྱུ་མཚན་རྣམ་གྲངས་མང་པོ་གཞུང་སོ་སོར་འབྱུང་བ་རྣམས་ནི་འདིར་མ་བཀོད་དོ། །ད་ནི་དེ་རྣམས་ཉིད་ལ་ཁྱད་ཆོས་སམ་མཚན་ཉིད་ཀྱི་ཚུལ་དུ་གནས་པའི་གནས་ལུགས་བདེན་པ་གཉིས་ཀྱི་དོན་ཅུང་ཟད་བརྗོད་ན། ཇི་སྐད་དུ་འཕགས་པ་ཀླུས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང༌། །དམ་པའི་དོན་གྱི་བདེན་པའོ། །གང་དག་བདེན་པ་འདི་གཉིས་ཀྱི། །རྣམ་པར་དབྱེ་བ་མི་ཤེས་པ། །དེ་དག་སངས་རྒྱས་བསྟན་པ་ནི། །ཟབ་མོའི་དེ་


TNT17_Page_0610
[མ་དཔེ་གཟིགས་ན་འདིར་གནོན།]

ཉིད་རྣམ་མི་ཤེས། །ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་ནུས། །དམ་པའི་དོན་ནི་མ་རྟོགས་ན། །མྱ་ངན་འདས་པ་ཐོབ་མི་འགྱུར། །ཞེས་གསུངས་ཤིང༌། སློབ་དཔོན་རང་ཉིད་ཀྱི་གསུང་ངག་ག་ལས་འཇིགས་མེད་ཅེས་བྱ་བའི་འགྲེལ་པར། སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྟན་པ་ནི། བདེན་པ་གཉིས་པོ་དེ་དག་ལ་བརྟེན་ནས་འབྱུང་སྟེ། འཇིག་རྟེན་པའི་ཀུན་རྫོབ་ཀྱི་བདེན་པ་ཞེས་བྱ་བ་ནི། ཆོས་རྣམས་ངོ་བོ་ཉིད་སྟོང་པ་དག་ལས། འཇིག་རྟེན་གྱིས་ཕྱིན་ཅི་ལོག་མ་རྟོགས་པས། ཆོས་ཐམས་ཅད་སྐྱེ་བར་མཐོང་བ་གང་ཡིན་པ་སྟེ། དེ་ནི་དེ་དག་ཉིད་ལ་ཀུན་རྫོབ་ཏུ་བདེན་པ་ཉིད་ཡིན་པས། ཀུན་རྫོབ་ཀྱི་བདེན་པའོ། །དོན་དམ་པའི་བདེན་པ་ནི། འཕགས་པ་རྣམས་ཀྱིས་ཕྱིན་ཅི་མ་ལོག་པའི་དོན་ཐུགས་སུ་ཆུད་པས། ཆོས་ཐམས་ཅད་སྐྱེ་བ་མེད་པར་གཟིགས་པ་གང་ཡིན་པ་སྟེ། དེ་ནི་དེ་དག་ཉིད་ལ་དོན་དམ་པར་བདེན་པ་ཉིད་ཡིན་པས། དོན་དམ་པའི་བདེན་པའོ། །ཞེས་གསུངས་སོ། །དེ་ལ་ཀུན་རྫོབ་ཀྱི་མཚན་གཞི་ནི། གོང་དུ་ཇི་སྐད་བསྟན་པའི་དངོས་པོ་དང་དངོས་མེད་ཀྱི་ཆོས་གང་ཡིན་པ་དེ་དག་རྣམས་སོ། །དོན་དམ་པའི་ངོ་བོ་ནི། ཆོས་དབྱིངས་སྤྲོས་བྲལ་གཉིས་མེད་ཀྱི་ཡེ་ཤེས་དེ་ཡིན་ཏེ། དེ་གཉིས་ཀྱང་གཞི་ཤིན་ཏུ་ཐ་དད་པ་མ་ཡིན་ཏེ། གནས་ལུགས་ལ་ནི་ཆོས་དབྱིངས་དོན་དམ་མ་གཏོགས་གཞན་གང་ཡང་མེད་མོད་ཀྱི། གནས་ཚུལ་དེ་དང་མཐུན་པར་མཐོང་བ་ནི་འཕགས་པའི་མཉམ་གཞག་ཡེ་ཤེས་ཁོ་ན་ཡིན་ལ། སོ་སོ་སྐྱེ་བོ་རྣམས་ཀྱིས་ནི་ཇི་ཙམ་དུ་ཆོས་དབྱིངས་ཡོད་པ་དེའི་སར། ཡོད་པའི་དོན་


TNT17_Page_0611
[མ་དཔེ་གཟིགས་ན་འདིར་གནོན།]

དམ་མི་མཐོང་བར། མེད་པའི་ཀུན་རྫོབ་ཀྱི་སྣང་བ་སྣ་ཚོགས་པ་དངོས་སུ་འཆར་བ་དང་འཆར་དུ་རུང་བ་དག་ཡིན་ནོ། །དཔེར་ན་མིག་སེར་གྱི་ནད་ཅན་གྱིས། དུང་གི་དཀར་པོ་ཡོད་པ་དེ་ཡེ་ནས་མ་མཐོང་ཞིང༌། དཀར་པོའི་ཤུལ་དུ་སེར་པོའི་ལོག་སྣང་ཙམ་ཤར་བ་ཡིན་ཀྱང༌། མིག་ལྡན་གཞན་དང་དེ་གཉིས་ཐུན་མོང་གི་དབང་དུ་བྱས་ནས། དུང་དཀར་པོ་དེ་མཁྲིས་ནད་ཅན་གྱིས་སེར་པོར་མཐོང་ཞེས་ཟེར་བ་ལྟ་བུ་སྟེ་བྱིས་པ་རྣམས་ཀྱིས་ནི་གནས་ལུགས་དེ་ཡང་ཕྱིན་ཅི་ལོག་ཏུ་མཐོང་སྟེ། གནས་ལུགས་དོན་དམ་དེ་སྣང་ཚུལ་ཀུན་རྫོབ་ཏུ་སྣང་ངོ༌། །ཞེས་ཀྱང་གྲགས་པའོ། །དེ་ལྟ་བས་ན་རང་གི་ངོ་བོ་བདེན་པས་སྟོང་ཞིང༌། རྣམ་ཤེས་འཁོར་བཅས་ཀྱི་སྤྱོད་ཡུལ་ནི་ཀུན་རྫོབ་ཀྱི་མཚན་ཉིད་ཡིན་ལ། རང་གི་ངོ་བོ་ཡང་དག་པར་གྲུབ་ཅིང༌། འཕགས་པའི་མཉམ་གཞག་ཡེ་ཤེས་ཀྱི་སྤྱོད་ཡུལ་ནི། དོན་དམ་བདེན་པའི་མཚན་ཉིད་དོ། །ཀུན་རྫོབ་བདེན་པ་དང༌། ཐ་སྙད་བདེན་པ་དང༌། བརྫུན་པའི་བདེན་པ་རྣམས་དོན་གཅིག་ཅིང་འཇིག་རྟེན་པའི་བདེན་པ་ཞེས་ཀྱང་བྱ་ལ། དོན་དམ་པ་ཞེས་པའི་དམ་པ་ཞེས་པ་ནི། མཆོག་གི་སྒྲ་ཡིན་ཏེ། མཆོག་ཏུ་གྱུར་པའི་དོན་ཡང་བདེན་པ་ཡོད་པ་ཉིད་ལ་བྱའོ། །ཀུན་རྫོབ་དེ་ལ་ཡང་དབྱེ་ན་ཀུན་རྫོབ་ཀྱི་ཀུན་རྫོབ་དང༌། ཀུན་རྫོབ་ཀྱི་དོན་དམ་མོ། །དང་པོ་ནི་ལོག་པའི་ཀུན་རྫོབ་སྟེ་ཆུ་ཟླ་ལ་སོགས་པ་རང་གི་ཡུལ་ཅན་གྱི་ཤེས་པ་ལོག་པ་ཙམ་ནི་བསྐྱེད་ནུས་ལ། ཟླ་བར་སྣང་མོད་ཟླ་བའི་དོན་མི་བྱེད་པ་འདི་ལྟ་བུའི་རིགས་དབང་པོ་བསླད་པ་ལས་བྱུང་བ་སྟེ་རྨི་ལམ་དང༌། སྒྱུ་མ་དང༌། ནད་ཀྱིས་འཁྲུགས་པ་


TNT17_Page_0612
[མ་དཔེ་གཟིགས་ན་འདིར་གནོན།]

དང༌། རབ་རིབ་ལ་སོགས་པ་དང༌། དཔེ་དང་གཏན་ཚིགས་ལ་སོགས་པས་ཡིད་བསླད་པ་ལ་བརྟེན་ནས། གཙོ་བོ་དང༌། བདག་དང༌། དབང་ཕྱུག་ལ་སོགས་པར་འཛིན་པའི་རྣམ་རྟོག་གིས། དེ་དང་དེར་བཏགས་པའི་བཏགས་ཆ་གཙོ་བོ་ལ་སོགས་པའི་དོན་སྤྱི་དང༌། གཞན་ཡང་བ་ལང་རྟས་སྟོངས་པ་ཙམ་ལ་སོགས་པ། དོན་བྱེད་ནུས་པ་དང་བྲལ་བ། འཇིག་རྟེན་ཉིད་དུ་ཡང་འདོད་པའི་འབྲས་བུ་བྱེད་མི་ནུས་པ་རྣམས་སོ། །གཉིས་པ་ནི་ཡང་དག་པའི་ཀུན་རྫོབ་སྟེ། དངོས་སུ་རྣམ་པར་རྟོག་པས་བཏགས་པ་ལ་མ་བལྟོས་ཤིང༌། འཕྲལ་གྱི་འཁྲུལ་རྒྱུས་མ་བསླད་པའི་གསལ་སྣང་ཅན། འཇིག་རྟེན་ཉིད་དུ་བླང་དོར་གྱི་གནས་ལ་མི་བསླུ་ཤིང༌། འདོད་པའི་འབྲས་བུའི་དོན་བྱེད་པ་སྟེ་མེས་བསྲེག་པར་བྱེད། ཆུས་གཤེར་བར་བྱེད། མིག་གིས་ནི་གཟུགས་མཐོང༌། རྣ་བས་ནི་སྒྲ་ཐོས། ལམ་དུ་སོང་ན་ནི་དེར་ཕྱིན་པར་འགྱུར། སྡིག་པས་ནི་དམྱལ་བར་འགྲོའོ། །དགེ་བས་ནི་མཐོ་རིས་སུ་འགྲོའོ། །བདག་མེད་བསྒོམས་པས་ནི་ཐར་བ་ཐོབ་བོ། །ཚོགས་རྫོགས་པ་ལས་སངས་རྒྱས་འབྱུང་བ་ལ་སོགས་པ་སྟེ། དེ་ལྟ་བུའི་དངོས་པོ་དང༌། བྱ་བྱེད་དང༌། རྒྱུ་འབྲས་དེ་དག་དོན་དམ་པའི་ངོ་ན་ཅུང་ཟད་ཀྱང་མ་གྲུབ་མོད་ཀྱི། འཇིག་རྟེན་ཉིད་དུ་རྒྱུ་འབྲས་མ་འཁྲུལ་བར་འབྱུང་བ་དང༌། ཉམས་སུ་མྱོང་བ་བརྟན་པོ་དང་བཅས་པ་དང༌། བླང་དོར་གྱི་གནས་དོན་ཡོད་པར་འགྱུར་བའི་ཕྱིར། ཀུན་རྫོབ་དང་ཡང་དག་པ་གཞི་མཐུན་པའི་མིང་གིས་བསྟན་ཏོ། །དབུ་མ་བ་པར་ཁས་འཆེ་བ་མང་པོ་ཞིག ཡང་དག་དང་ལོག་པའི་ཀུན་རྫོབ་ནི། འཇིག་རྟེན་ཉིད་ལ་གྲགས་པའི་


TNT17_Page_0613
[མ་དཔེ་གཟིགས་ན་འདིར་གནོན།]

དབྱེ་བ་ཡིན་གྱི། དབུ་མ་རང་ཉིད་ཀྱི་ལུགས་ཀྱི་ཀུན་རྫོབ་ལ། ཡང་ལོག་གི་དབྱེ་བ་མེད་དེ། རྨི་ལམ་གྱི་མེས་ཀྱང་རྨི་ལམ་དུ་འཚིག་པར་འགྱུར་བས་རྨི་ལམ་དུ་དོན་བྱེད་ནུས་པར་འགྱུར་ཞིང༌། མེ་དངོས་ཀྱིས་ཀྱང་དོན་དམ་པར་བསྲེས་པའི་བྱ་བ་མི་བྱེད་པས། གནས་ཚུལ་ལ་བྱ་བྱེད་མེད་པར་ཡང་འདྲ། སྣང་ངོར་བྱ་བ་བྱེད་པར་ཡང་འདྲ་བས་སོ། །ཞེས་ཟེར་རོ། །འདི་ནི་མི་རུང་སྟེ། སད་པའི་གནས་སྐབས་ཀྱི་དབང་པོ་སྐྱོན་མེད་པ་ལ་སྣང་བའི། རྒྱུ་འབྲས་རྟེན་འབྲེལ་འདི་ནི་གནས་དང་ལུས་དང་ཚེ་རིགས་མཐུན་རྒྱུན་གཅིག་པ་ལ་ངེས་པར་སྣང་ཞིང་རྒྱུ་མཚན་དང་བཅས་པ་མ་འཁྲུགས་པར་ཉམས་སུ་མྱོང་བའི་ཕྱིར་དང༌། རྨི་ལམ་ན་ནི་གནས་ལུས་ཚེ་གསུམ་རིགས་རྒྱུན་གཅིག་ཅིང༌། རེས་འགའ་ནི་མེ་ལ་ཞུགས་པ་བསྲེག་པར་བྱེད། རེས་འགའ་ནི་མེ་ལ་ཞུགས་པས་བཤེར་བར་ཡང་སྣང༌། རེས་འགའ་ནི་མེ་ལ་ཞུགས་པས་སུམ་ཅུ་རྩ་གསུམ་དུ་ཕྱིན་པ་ལ་སོགས་པ། ཤིན་ཏུ་མ་ངེས་པར་འཁྲུལ་བ་མཐོང་བའི་ཕྱིར་རོ། །དེས་ན་བག་ཆགས་བརྟན་པ་ལས་བྱུང་བ་དང༌། མི་བརྟན་པ་ལས་བྱུང་བའི་འབྲས་བུ་ནི་ཤིན་ཏུ་མི་འདྲའོ། །ཡང་ཀུན་རྫོབ་བདེན་པ་ནི་འཇིག་རྟེན་པའི་བདེན་པ་ཞེས་བྱ་སྟེ། འཇིག་རྟེན་པས་རབ་ཏུ་ཕྱེ་བ་འཇིག་རྟེན་པའི་བློ་ལ་བརྟེན་ནས་འཇོག་དགོས་པ་ཡིན་ན། གང་འཇིག་རྟེན་གྱི་ཤེས་ལྡན་རྣམས་ལ་རིགས་པར་གྲགས་པ་དེ་ནི། འདིར་ཡང་རིགས་པ་ཁོ་ན་ཡིན་གྱི་འཇིག་རྟེན་པ་དང་འགལ་བའི་འཇིག་རྟེན་བདེན་པའི་རྣམ་གཞག་དེ་ནི་ངོ་མཚར་ཆེའོ། །དབུ་མ་པའི་རང་ལུགས་ཞེས་བྱ་བ་འདི་ཡང་ཅི་ཞིག རིག་པའི་དཔྱད་ངོ་ལ་ཟེར་བ་ཡིན་ན་ནི། ཁྱེད་ཀྱི་ལུགས་ལ་རིག་ཤེས་ཀྱི་དཔྱད་


TNT17_Page_0614
[མ་དཔེ་གཟིགས་ན་འདིར་གནོན།]

ངོ་ན་ཁྱད་གཞི་ཀུན་རྫོབ་རང་མ་གྲུབ་པའི་ཕྱིར། ཡང་ལོག་གི་དབྱེ་བ་དེ་མི་འབྱུང་བ་བདེན་མོད་ཀྱི། དེ་འདྲའི་རང་ལུགས་ལ་ཀུན་རྫོབ་ཀྱི་རྣམ་གཞག་བྱེད་པ་རང་བླུན་པ་ཡིན་ཅིང༌། རིག་པ་དེའི་ངོར་ཀུན་རྫོབ་སྒྱུ་མ་ཙམ་དུ་མི་འགྱུར་ཏེ། སྒྱུ་མ་ལྟ་བུར་འཇོག་བྱེད་ལ་སྣང་བ་འཆར་བ་ཞིག་དགོས་པ་ལས་རིག་ངོར་དེ་མེད་པས་སོ། །ཡང་རྣལ་འབྱོར་བའི་རྗེས་ཐོབ་ཀྱི་ཉམས་སུ་མྱོང་བ་ལ་ཟེར་བ་ཡིན་ན་ནི། དེ་ལ་ནི་ཡང་ལོག་གཉིས་ལ་ཁྱད་པར་ཤིན་ཏུ་ཆེ་སྟེ། ལོག་པ་ནི་མྱོང་བ་མི་སྲིད་ལ། ཡང་དག་ནི་མྱོང་བའི་ཕྱིར་རོ། །སྒྱུ་མ་ལྟ་བུར་མཚུངས་སུ་ཆུག་ཀྱང༌། རང་གི་མཚན་ཉིད་ཐ་དད་པ་མི་འགལ་ཏེ། །སྒྱུ་མའི་གླང་པོ་ཆེ་ནི་མཆེ་བ་ཅན་གྱི་གཟུགས་ཅན་དུ་སྣང་ལ། སྒྱུ་མའི་རྟ་ནི་མཆེ་བ་ཅན་དུ་མི་སྣང་བའི་ཕྱིར་རོ། །བྱེད་ལས་ཀྱང་ཐ་དད་དེ། སྒྱུ་མ་མཛེས་པར་སྣང་བ་ལས་དགའ་བ་སྐྱེ་ལ། མི་མཛེས་པར་སྣང་བ་ལས་མི་དགའ་བ་སྐྱེ་བ་བཞིན་ནོ། །སྒྱུ་མ་མཁན་པོ་ལྟ་བུས་སྒྱུ་མར་ཤེས་ཀྱང༌། དགའ་མི་དགའ་ཟློག་པ་མ་ཡིན་ཏེ། སྲེད་པ་ནི་བག་ཆགས་ཀྱི་སྟོབས་ལས་འབྱུང་བའི་ཕྱིར། ལུས་མི་གཙང་པར་གོ་རིག་གིས་ཤེས་ཀྱང་ལུས་ལ་ཆགས་པ་མི་ཟློག་བ་བཞིན་ནོ། །དེའི་ཕྱིར་སྒྱུ་མ་ལྟ་བུའི་དེ་ཁོ་ན་ཉིད་མངོན་སུམ་དུ་མཐོང་ན་མ་གཏོགས། རིག་ཤེས་ཀྱིས་སྒྱུ་མ་ལྟ་བུར་རྟོགས་ཀྱང༌། ཆགས་སྡང་ལ་སོགས་པ་ཟློག་པ་ཡང་མ་ཡིན་མོད། གོམས་ན་ཤས་ཆུང་བར་འགྲོ་བ་ཙམ་ནི་ཡིན་ནོ། །ཞེས་ཀྱང་གོ་བར་བྱའོ། །ཅི་སྟེ་འཇིག་རྟེན་གྱི་ལུགས་གང་ཡིན་པ་དེ་ཡང༌། ཁྱེད་ཅག་ཁས་ལེན་པར་འདོད་པའི་ཕྱིར། ཡང་ལོག་གི་དབྱེ་བ་ཡང་ཅིའི་ཕྱིར་རང་ལུགས་མ་ཡིན། ཡང་ཀུན་རྫོབ་རྣམ་པར་འཇོག་བཞིན་དུ་


TNT17_Page_0615
[མ་དཔེ་གཟིགས་ན་འདིར་གནོན།]

ཡང་ལོག་གི་དབྱེ་བ་ལ་དོན་དམ་དཔྱོད་བྱེད་ཀྱི་རིག་ཤེས་ཀྱིས་དཔྱོད་པ་འདི་ནི། དོན་དམ་སྒོ་ཅན་གྱི་གླན་ཀ་ཡིན་པས་ལྟ་བ་ངན་པའི་གཞི་ཆེན་པོར་འགྱུར་ལ། དེར་མ་ཟད་དབུ་མ་འཇུག་པ་ལས། ཐ་སྙད་བདེན་ལ་རྣམ་པར་དཔྱད་མི་བྱ། །ཞེས་ཀུན་རྫོབ་མ་བརྟགས་མ་དཔྱད་པ་ཁོ་ནར་འཇོག་པར་འདོད་པ་དང༌། དེ་ཉིད་སྐབས་སུ་རིག་པ་གང་ཞིག་གིས། །བདག་དང་གཞན་ལས་སྐྱེ་བ་རིག་མིན་པས། །རིག་དེས་ཐ་སྙད་དུ་ཡང་རིག་མིན་པས། ཁྱོད་ཀྱི་སྐྱེ་བ་གང་གི་ཡིན་པར་འགྱུར། །ཞེས་དང༌། གང་ཟག་བདག་མེད་འཆད་པའི་སྐབས་ནའང༌། །དེ་ནི་དེ་ཉིད་དུ་ཡིད་འཇིག་རྟེན་དུ། །རྣམ་པ་བདུན་གྱིས་འགྲུབ་འགྱུར་མིན་མོད་ཀྱི། །ཞེས་དོན་དམ་དཔྱོད་བྱེད་ཀྱི་རིག་པ་དེས་ཐ་སྙད་དུ་དཔྱད་ཀྱང༌། སྣང་ཙམ་དེ་ཡོད་མེད་ཡིན་མིན་ལས་གྲོལ་བའི་སྤྲོས་བྲལ་དུ་གཏན་ལ་འབེབས་ནུས་སོ་ཞེས། དཔྱད་ངོར་སྒྱུ་མ་ལྟ་བུ་ཀུན་རྫོབ་ཏུ་འདོད་པ་གཉིས། རང་ཚིག་སྔ་ཕྱི་ཆེས་འགལ་བ་ཡིན་ལ་རིག་པས་ཀྱང་མི་འཐད་དེ། རིག་ཤེས་ཀྱིས་དཔྱད་པའི་ཚེ། དཔྱད་ངོ་ན་ཀུན་རྫོབ་རང་མ་གྲུབ་པས། དཔྱད་གཞི་མེད་པའི་ཁྱད་ཆོས་སྤྲོས་བྲལ་མི་སྲིད་ཅིང༌། སྣང་བ་མ་འགགས་པར་ཤར་[བ་]དེ་ནི་བག་ཆགས་ཀྱི་སྟོབས་ལས་དབང་མེད་དུ་ཤར་བ་ཡིན་གྱི། རིག་ངོར་མ་ཡིན་པས། དཔྱད་པ་མེད་པའི་སྣང་བ་ཙམ་ལ། སྤྲོས་བྲལ་ལམ་སྒྱུ་མའི་མཚན་ཉིད་དང༌། ཐ་སྙད་འཇོག་ཏུ་མེད་དེ། མ་དཔྱད་ཅིང་མ་བསྒོམས་པ་ལ་ཡང་དེ་ནི་ཡོད་ན། འཁོར་བ་པ་ཐམས་ཅད་ཀྱང༌། སྒྱུ་མ་ལྟ་བུ་ཤེས་པ་དང༌། སྤྲོས་བྲལ་གྱི་ཡེ་ཤེས་ལ་འཇུག་བཞིན་པ་ཡིན་པར་འགྱུར་རོ། ཁྱེད་ཀྱི་ལུགས་ལ་མ་དཔྱད་པའི་ཚེ་རྣམས་གཞག་ཐམས་ཅད་ཁས་ལེན་ལ་


TNT17_Page_0616
[མ་དཔེ་གཟིགས་ན་འདིར་གནོན།]

དེ་ནི་ཀུན་རྫོབ་བདེན་པའི་འཇུག་ཚུལ་ཡིན་ཅིང༌། དཔྱད་པའི་ཚེ་ཁས་ལེན་ཐམས་ཅད་དང་བྲལ་བ་འདི་ནི་དོན་དམ་བདེན་པ་ལ་འཇུག་པའོ། །ཞེས་རྐངས་གཙུགས་ཏེ་སྨྲས་པ་ཡིན་ན་ཀུན་རྫོབ་ཏུ་ཡང་དཔྱད་པའི་ཚེ། དེ་དང་དེ་མི་འགྲུབ་ཅེས་ཟེར་བ་འདི་ནི། རང་ཚིག་ཤིན་ཏུ་འགལ་བ་ཡིན་ཏེ། དཔེར་ན་ཤི་བའི་རོ་དུམ་བུར་གཏུབས་ན་འཇིག་པ་བཞིན་དུ། མ་ཤི་གསོན་བཞིན་དུ་ཤི་བའི་རོ་དུམ་བུར་གཏུབས་ཀྱང་འཇིག་པར་འགྱུར་རོ་ཞེས་ཟེར་ན། ཤིན་ཏུ་འབྲེལ་མེད་པ་བླ་རྡོལ་ལྟ་བུའི་ཚིག་ཏུ་འགྱུར་བ་བཞིན་ནོ། །དེས་ན་གསོན་བཞིན་དུ་ཤི་བའི་རོ་མི་སྲིད་པ་ལྟར་དོན་དམ་དཔྱོད་བྱེད་ཀྱི་རིག་པས་ཀུན་རྫོབ་ཏུ་དཔྱོད་པ་དེ་འདྲ་མི་སྲིད་དེ། རིག་པ་དེས་དཔྱད་ཕྱིན་དོན་དམ་ཁོ་ནར་དཔྱད་པར་འགྲོ་བས་སོ། །དོན་དམ་དཔྱོད་བྱེད་ཀྱི་རིག་པས་དཔྱད་ཅེས་པའི་དཔྱད་པ་རང་ངོས་ནས་ཀུན་རྫོབ་ཡིན་ཡང༌། ཀུན་རྫོབ་ཏུ་དཔྱད་པ་མ་ཡིན་ཏེ་དཔྱད་པས་དོན་དམ་གོ་ནུས་པའི་ཕྱིར་རོ། །གཞན་དུ་ན་དཔྱད་འབྲས་ཀུན་རྫོབ་གོ་བ་ལ་འཇོག་དགོས་ཤིང༌། ཁྱོད་དག་དོན་དམ་དཔྱོད་བྱེད་ཀྱི་རིག་པས་ཀུན་རྫོབ་ཏུ་དཔྱད་ན་དོན་དམ་གོ་བར་འགྱུར་རོ་ཞེས་སྨྲ་བའམ། ཀུན་རྫོབ་ཏུ་དཔྱད་པས་དམ་པའི་དོན་གོ་བར་འགྱུར་ཞེས་སྨྲ་ལ་རག དེའི་ཕྱིར་མ་འབྲེལ་བ། འགལ་བ་ཕྱིན་ཅི་ལོག་དེ་ལ་སུ་ཞིག་ཡིད་རྟོན་པར་བྱེད། ཁོ་བོ་ཅག་ནི་འདི་སྐད་ཅེས་སྨྲ་སྟེ། ཡང་ལོག་གི་དབྱེ་བ་གཉིས་སུ་མ་ཟད་ད་དུང་དབྱེ་བ་དུ་མ་འཐད་ལྡན་དུ་འབྱུང་བར་འགྱུར་ལ། རིག་པའི་དཔྱད་ངོ་ཞེས་པ་ཡང་རྣམ་པ་གཉིས་ཏེ། འཇིག་རྟེན་དག་པ་པའི་དཔྱད་པ་དང༌། དོན་དམ་རིག་ཤེས་ཀྱི་དཔྱད་པ་གཉིས་ཡོད་པས། དང་པོས་ནི་རྒྱུ་འབྲས་རྟེན་འབྲེལ་མ་འཁྲུལ་བ་ལ་ངེས་ཤེས་སྐྱེད་པར་བྱེད། ཕྱི་མའི་ངོ་ན་ཀུན་རྫོབ་སྣང་གྲགས་ཀྱི་ཆོས་གང་ཡང་མི་འགྲུབ་མོད་


TNT17_Page_0617
[མ་དཔེ་གཟིགས་ན་འདིར་གནོན།]

ཀྱི། དོན་དམ་དབྱིངས་ནི་འགོག་པ་ནུས་པ་མ་ཡིན་ནོ། །ཞེས་བྱའོ། །དོན་དམ་དངོས་ལ་ནི་ངོ་བོའི་སྒོ་ནས་དབྱེ་བ་མེད་ཀྱང༌། བློའི་རྟོགས་ཚུལ་གྱི་དབང་དུ་བྱས་ནས། དོན་དམ་གྱི་ཀུན་རྫོབ་དང༌། དོན་དམ་གྱི་དོན་དམ་མོ། །དང་པོ་ནི་སོ་སོ་སྐྱེ་བོའི་ཤེས་པ་ཡིན་ཡང༌། གང་ལ་དམིགས་ཏེ་སྒོམས་ན། གནས་ལུགས་མཐོང་ཞིང༌། རྣམ་པར་མི་རྟོག་པའི་ཡེ་ཤེས་ཐོབ་པར་འགྱུར་བ་དེ་ནི། རྗེས་སུ་མཐུན་པའི་དོན་དམ་དང༌། རྣམ་གྲངས་ཀྱི་དོན་དམ་ཞེས་ཀྱང་བྱ་སྟེ། ལུགས་གཞན་ལས་ཇི་སྐད་དུ། སྐྱེ་ལ་སོགས་པ་བཀག་པ་ཡང༌། །དམ་པའི་དོན་དང་མཐུན་པའི་ཕྱིར། །དོན་དམ་ཡིན་པར་ཁོ་བོས་འདོད། །ཅེས་སྨྲ་བ་ལྟ་བུ་དང་མཚུངས་ཏེ། རིག་ཤེས་ཀྱི་ཡུལ་དུ་དགག་བྱ་མཐའ་དག་བཀག་པ་ཙམ་དེ་དང༌། གཞན་ཡང་མི་རྟག་སྡུག་བསྔལ་བདག་མེད་ལ་སོགས་པ་ཡང་ཡིན་ཏེ། འདི་དངོས་སུ་ན་ཀུན་རྫོབ་ཡིན་ཀྱང༌། དོན་དམ་ལ་འཇུག་པའི་ཐབས་ཡིན་པའི་ཕྱིར། དོན་དམ་གྱི་རྣམ་གྲངས་ལ་བགྲོང་ངོ༌། །གཉིས་པ་ནི། མཐོང་བའི་ལམ་ཐོབ་པ་ཡན་ཆད་ཀྱི། མཉམ་གཞག་རྣམ་པར་མི་རྟོག་པའི་སྤྱོད་ཡུལ་དེ་ཁོ་ན་ཡིན་ནོ། །དེ་དག་ལས། ལོག་པའི་ཀུན་རྫོབ་ནི། ཀུན་རྫོབ་ཙམ་པོ་སྟེ། ཀུན་རྫོབ་བདེན་པ་བཏགས་པ་བ་དང༌། ཡང་དག་ཀུན་རྫོབ་ནི། དེ་དངོས་སོ། །རྣམ་གྲངས་ཀྱི་དོན་དམ་ནི་དོན་དམ་ཙམ་པོ་སྟེ། དོན་དམ་བཏགས་པ་བ་དང༌། རྣམ་གྲངས་མ་ཡིན་པའི་དོན་དམ་ནི་དོན་དམ་དངོས་སོ། །ཅིའི་ཕྱིར་ཀུན་རྫོབ་ཅེས་བྱ་ན། ཀུན་རྫོབ་ཀྱི་སྐད་དོད། སམ་པྲྀ་ཏའི་སྒྲ་ལས་དྲངས་ནས། ཡང་དག་པ་ལ་སྒྲིབ་བྱེད་མ་རིག་པའི་སྣང་ངོར་གྱུར་པའི་དོན་ཡིན་ལ། ཡང་སམ་ནི་ཀུན་ནས་ཀྱི་དོན་དང་


TNT17_Page_0618
[མ་དཔེ་གཟིགས་ན་འདིར་གནོན།]

པྲྀ་ཏ་བསླུ་བ་དང༌། སྒྲིབ་པ་དང༌། བརྫུན་གྱི་དོན་ཡིན་པས། ཀུན་ཏུ་བརྫུན་པའོ། །འཇིག་རྟེན་ཞེས་བྱ་བ་ནི། འཇིག་རྟེན་པའི་ཚད་མས་བསྟན་པར་བྱའོ། །ཐ་སྙད་བདེན་པ་ཞེས་བྱ་བ་ལས། ཐ་སྙད་ཀྱི་སྐད་དོད་བྱ་བ་ཧ་རཿ ཞེས་བྱ་བ་ཡིན་ལ། དེ་ཡང་བི་དག་ཨ་བ་ཧ་ར་མཚམས་སྦྱར་བའོ། །དེའི་བི་ཞེས་བྱ་བ་ལས། ཤེ་ཥ་བསྣན་ཏེ། ཁྱད་པར་རམ། བྱེ་བྲག་གམ། ཐ་དད་པར་ངེས་བཟུང་བྱེད་པའི་དོན་ཏེ། བི་ཤེ་ཥ་ཞེས་བྱའོ། །ཨ་བ་ནི་ངེས་པ། ཧ་ར་ནི་བསྡུད་ཅིང་འཛིན་པ་ཡིན་པས། སོ་སོ་ཐ་དད་པར་ངེས་པར་འཛིན་པ་ཞེས་པ་སྟེ། དཔེར་ན་བུམ་པ་ཞེས་པ་ནི། ལྟོ་ལྡིར་ཞབས་ཞུམ་པ་ལ་འཇུག་གི་གཞན་ལ་མ་ཡིན་ནོ། །ཀ་བ་ཞེས་པ་ནི་གདུང་འདེབས་པའི་བྱ་བ་བྱེད་པ་ལ་འཇུག་གི་གཞན་ལ་མ་ཡིན་ནོ་ཞེས་པ་ལྟར་རྣམ་པར་རྟོག་པས་དོན་ཐ་དད་པ་མང་པོ་ལ་མིང་སྣ་ཚོགས་པ་བསྙད་ཅིག་བརྗོད་ལ་ངོས་བཟུང་བྱེད་པའི་དོན་ནོ། །ཐ་དད་ཅེས་པའི་ཐ་ཡིག་དང༌། ཐ་སྙད་ཅེས་པའི་ཡི་གེ་དང་པོ་ནི། དོན་གཅིག་སྟེ་དངོས་པོ་སོ་སོའི་མིང་ཡིན་པ་དང༌། ཐ་དད་ཅེས་པ་ཡང་སོ་སོར་གནས་པའི་དོན་ཡིན་པས་མིང་གཉིས་འདུས་པའོ། །དེའི་ཕྱིར་ཐ་དད་ལ་དགག་པའི་སྒྲ་སྦྱོར་བའི་ཚེ། མི་ཐ་དད་ཅེས་མི་ཟེར་བར། ཐ་མི་དད་ཅེས་མིང་གཉིས་ཀྱི་དབུས་སུ་འཇུག་པ་མཐོང་ངོ༌། །དོན་དམ་ཞེས་བྱ་བ་ལ་པ་ར་མཱརྠ་ཞེས་བྱ་སྟེ། པ་ར་མ་ནི་མཆོག་གི་དམ་པ་སྟེ། མི་རྟོག་པའི་ཡེ་ཤེས་སོ། །ཨརྠ་ནི་དོན་ཏེ་དེས་རྟོགས་ཤིང་ཁོང་དུ་ཆུད་ལ། ངེས་པ་ཐོབ་པའི་རྙེད་དོན་ནོ། །དེས་ན་དངོས་ནི་གནས་ལུགས་ཀྱི་ཡེ་ཤེས་ཁོ་ན་ཡིན་མོད། རྗེས་མཐུན་པའི་དབང་དུ་བྱས་ནས། སོ་སོ་སྐྱེ་བོའི་རིག་ཤེས་མ་ནོར་


TNT17_Page_0619
[མ་དཔེ་གཟིགས་ན་འདིར་གནོན།]

བ་དང༌། གནས་ལུགས་ལ་དམིགས་པའི་ལྷག་མཐོང་ཕལ་པ་རྣམས་ལ་ཡང༌། ཡེ་ཤེས་དང༌། དོན་དམ་དང༌། འཕགས་པའི་མིང་གིས་བཏགས་པ་ཡོད་དོ། །འོ་ན་ཡོད་དང་མེད་དེ་ཁོ་ན་སྟེ། ཞེས་པའི་གཞུང་ཁས་ལེན་དགོས་པས། གཟུང་འཛིན་མེད་པ་དང༌། རྣམ་རིག་ཡོད་པ་ལྟ་བུ་གནས་ལུགས་དེ་ཁོ་ན་ཉིད་གཉིས་སུ་འགྱུར་བས། དོན་དམ་གཉིས་སུ་མེད་པ་དང་འགལ་ལོ་སྙམ་ན། སྤྱིར་ནི་གནས་ལུགས་མཐར་ཐུག་པ་དང་དོན་དམ་དངོས་ནི་གཉིས་སུ་མེད་པ་ཡིན་གྱི། དོན་དམ་ཙམ་དང༌། དེ་ཁོ་ན་ཉིད་ཙམ་པོ་ནི། གནས་སྐབས་སུ་དགོས་པའི་དབང་གིས་གཞག་པའི་ཕྱིར་གཉིས་སུ་མ་ཟད་མཐའ་ཡས་པའི་བར་དུ་ཡང་འགྱུར་རོ། །འོན་ཀྱང་གཟུང་འཛིན་མེད་པ་ཞེས་པ་དེ་ཡོད་པ་ལས་ལོག་ཙམ་ལ་མི་འཇོག་པས་གཟུང་འཛིན་མེད་པ་དང༌། ཡེ་ཤེས་ཡོད་པ་ནི་གཅིག་ཁོ་ནར་འགྱུར་གྱི་གཉིས་སུ་མི་འགྱུར་རོ། །དཔེར་ན་སྐྱེས་བུ་ཞིག་མིའི་ངོ་བོ་ཡོད་པ་དང༌། འགྲོ་བ་གཞན་དུ་མེད་པ་གཉིས། གནས་ལུགས་སོ་སོ་མ་ཡིན་པར་བཞིན་ནོ། །མཚན་ཉིད་ཀྱི་རྣམ་གྲངས་དང༌། ཁྱད་ཆོས་ཀྱི་རྣམ་གྲངས་བསྟན་ན་ནི། བསྐལ་པ་འབྱམས་ཀླས་པར་ཡང་ཟད་པ་མེད་མོད་ཀྱི། དེ་ཙམ་གྱིས་གནས་ལུགས་མང་པོར་མི་འགྱུར་བས། འདི་ལ་བསམ་ནས་དགག་པ་ཐན་ཐུན་སྨྲ་ཞིང༌། མུ་ཅོར་གྱི་ང་རོ་སྒྲོག་པར་བྱེད་པ་ལ་སྙིང་པོ་མེད་དོ། །བདེན་པ་རྣམ་པ་གཉིས་པོ་འདི་ནི། ཕྱག་ན་རྡོ་རྗེ་དབང་བསྐུར་བ་ཞེས་བྱ་བ་ཐེག་པ་ཆེན་པོ་གསང་བའི་མདོའམ་རྒྱུད་ལས་འདི་སྐད་ཅེས་གསུངས་ཏེ། ཐེག་པ་ཆེན་པོ་ནི་རྣམ་པ་གཉིས་ཏེ། འདུས་བྱས་ཀྱིས་རབ་ཏུ་ཕྱེ་བ་


TNT17_Page_0620
[མ་དཔེ་གཟིགས་ན་འདིར་གནོན།]

དང༌། འདུས་མ་བྱས་ཀྱིས་རབ་ཏུ་ཕྱེ་བའོ། །དེ་ལ་འདུས་བྱས་ཀྱིས་རབ་ཏུ་ཕྱེ་བ་ནི། སྤྱོད་པའི་ངོ་བོའོ། །འདུས་མ་བྱས་ཀྱིས་རབ་ཏུ་ཕྱེ་བའི་ཐེག་པ་ཆེན་པོ་ཉིད་ནི། ཐེག་པ་ཆེན་པོའོ། །རིགས་ཀྱི་བུ་གཞན་ཡང་འདུས་བྱས་ནི་རྐྱེན་གྱིས་བསྐྱེད་པ་སྟེ། རྟེན་ཅིང་འབྲེལ་བར་འབྱུང་བའི་མཚན་ཉིད་དོ། །རིགས་ཀྱི་བུ་འདུས་མ་བྱས་ནི་མི་སྐྱེ་བའི་ཆོས་ཉིད་དོ། །སྟོང་པ་ཉིད་ཀྱི་རང་གི་ངོ་བོའོ། །རིགས་ཀྱི་བུ་གཞན་ཡང་སྤྱོད་པའི་ངོ་བོའི་ཐེག་པ་ཆེན་པོ་གང་ཞེ་ན། སྟོང་པ་ཉིད་མངོན་དུ་བྱས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཡུལ་དང་དུས་ཀྱི་དབང་གིས་སེམས་ཅན་འདུལ་བའི་དབང་ཉེ་བར་བཟུང་སྟེ། བྱ་བ་དང་ལས་ཀྱིས་ཀུན་ཏུ་བསླངས་བའི་ཚུལ་གྱིས་འདོགས་པ་སྟེ། རིགས་ཀྱི་བུ་འདི་ནི་སྤྱོད་པའི་ངོ་བོའི་ཐེག་པ་ཆེན་པོའོ། །རིགས་ཀྱི་བུ་དེ་ལ་འདུས་མ་བྱས་ཀྱི་ཐེག་པ་ཆེན་པོ་ཉིད་ཐེག་པ་ཆེན་པོ་གང་ཞེ་ན། ཇི་ལྟར་གནས་པའི་ཆོས་ཉིད་ཀྱི་ཚིག་བླ་དྭགས་སོ། །རིགས་ཀྱི་བུ་ཇི་ལྟར་གནས་པའི་ཆོས་ཉིད་ཅེས་བྱ་བ་འདི་ནི། བསམ་གྱིས་མི་ཁྱབ་པ་ཉིད་ཀྱི་ཚིག་བླ་དྭགས་སོ། །བསམ་གྱིས་མི་ཁྱབ་པའི་ཆོས་ཉིད་གང་ཡིན་པ་དེ་ནི་འདུས་མ་བྱས་པའོ། །འདུས་མ་བྱས་གང་ཡིན་པ་དེ་ནི། མཐའ་གཉིས་ལ་མི་བལྟོས་པ་སྟེ། དེ་ལ་གདགས་པའི་ངོ་བོ་ཉིད་མེད་ཅིང༌། མི་གདགས་པའི་ངོ་བོ་ཡང་མེད་དོ། །གང་ལ་གདགས་པའི་ངོ་བོ་ཉིད་མེད་ཅིང༌། མི་གདགས་པའི་ངོ་བོ་མེད་པ་དེ་ལ་སྤྱོད་པ་མེད་དོ། །གང་ལ་སྤྱོད་པ་མེད་པ་དེ་ནི་བརྗོད་པར་བྱ་བ་མ་ཡིན་ནོ། །གང་བརྗཽད་པར་བྱ་བ་མ་ཡིན་པ་དེ་དངོས་པོ་ཐམས་ཅད་དང་བྲལ་


TNT17_Page_0621
[མ་དཔེ་གཟིགས་ན་འདིར་གནོན།]

བའོ། །གང་དངོས་པོ་ཐམས་ཅད་དང་བྲལ་བ་དེ་ནི་མི་འཁྲུགས་པའོ། །གང་མི་འཁྲུགས་པ་དེ་ཆོས་སོ། །ཆོས་གང་ཡིན་པ་དེ་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་སོ། །གང་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་པ་དེ་བདེན་པའོ། །རིགས་ཀྱི་བུ་བདེན་པ་གང་ཡིན་པ་དེ་ཡོད་པའོ། །ཡོད་པ་གང་ཡིན་པ་དེ་བརྫུན་མ་ཡིན་པའོ། །གང་བརྫུན་མ་ཡིན་པ་དེ་ཡང་དག་པའོ། །ཡང་དག་པ་གང་ཡིན་པ་དེ་ནི་ཆོས་ཉིད་དོ། །ཆོས་ཉིད་གང་ཡིན་པ་དེ་ནི་མི་རྟོག་རྣམ་པར་མི་རྟོག་པའོ། །གང་མི་རྟོག་རྣམ་པར་མི་རྟོག་པ་དེ་ཡེ་ཤེས་སོ། །ཞེས་པ་ལ་སོགས་པ་རྒྱ་ཆེར་གསུངས་ཏེ། ཆོས་ཉིད་དེ་ནི་དངོས་པོ་ལས་གྲོལ་ཞིང༌། ཇི་ལྟར་གནས་པའི་གནས་ཚུལ་ཡང་ཡིན་ལ། མི་འཁྲུགས་པ་སྟེ་མི་འཇིག་པ་དང༌། སངས་རྒྱས་ཐོབ་མཁན་རྣམས་ཀྱི་ཐོབ་བྱ་སངས་རྒྱས་དངོས་དང༌། བདེན་གྲུབ་དང༌། ཡོད་པ་དང༌། ཡེ་ཤེས་རྣམས་ཡིན་པར་གསུངས་ཤིང༌། གདགས་པའི་ངོ་བོ་ཉིད་མེད་ཅེས་སྒྲ་དང་རྟོག་པའི་ཡུལ་ལས་འདས་པ་དང༌། མི་གདགས་པའི་ངོ་བོ་ཉིད་མེད་ཅེས་པ། སྒྲ་དོན་འདྲེས་འཛིན་མ་ཡིན་པར་རྣམ་ཤེས་ལ་སྣང་བའི་ངོ་བོར་ཡང་མེད་ཅེས་པ་སྟེ། ཀུན་བཏགས་དང་གཞན་དབང་གི་མཚན་ཉིད་བཀག་པ་ཡིན་ནོ། །དེ་ལ་ཀུན་བཏགས་པའི་མཚན་ཉིད་ནི། ལོག་པའི་ཀུན་རྫོབ་ཐམས་ཅད་ཡིན་མོད་ཀྱི། གཟུང་འཛིན་རྒྱང་ཆད་དུ་སྣང་བའམ། ཡུལ་སེམས་ཐ་དད་དུ་སྣང་བའི་སྣང་ཆ་དང༌། མིང་དོན་འབྲེལ་བར་སྣང་བའི་སྣང་ཆ་དང༌། མི་དང་དུད་འགྲོ་དང་རི་དང་ཁང་ཁྱིམ་ལ་སོགས་པ་རགས་པར་འཛིན་


TNT17_Page_0622
[མ་དཔེ་གཟིགས་ན་འདིར་གནོན།]

པའི་བློ་དང༌། རྣམ་རྟོག་གི་བཏགས་ཆ་དོན་སྤྱི་ཐམས་ཅད་དེ། མདོར་ན་རྣམ་པར་རྟོག་པའི་འཛིན་སྟངས་ཀྱི་གཟུང་བྱ་ཐམས་ཅད་དག དངོས་སུ་རྣམ་ཤེས་ལ་སྣང་བ་ཡིན་ཡང༌། གཉིས་འཛིན་གྱི་རྟོག་པའི་བག་ཆགས་ལས་སྣང་བའི་ཁྱད་པར། དངོས་སུ་སྒྲ་དོན་ཅན་གྱི་རྟོག་པས་མ་བཞག་ཀྱང་ཕྱི་དོན་དུ་སྣང་བ་ལྟ་བུ་བཏགས་པར་བྱ་བ་ཀུན་བཏགས་དངོས་ཡིན་ལ། འདོགས་མཁན་ནི་འཛིན་པ་རྣམ་རྟོག་ཡིན་ཏེ། རྣམ་རྟོག་དེ་ཉིད་ཀྱི་ངོ་བོ་ནི་གཞན་དབང་ཡིན་ཀྱང༌། བཏགས་ཆའི་རྣམ་པས་ཤེས་པ་འགྱུར་བའི་ཆ་དེ་ཡང་ཀུན་བཏགས་སོ། །གཞན་གྱི་དབང་གི་མཚན་ཉིད་ནི། ཀུན་བཏགས་ཀྱི་སྣང་ཆ་དེ་ཁོ་ན་དང་རྗེས་སུ་འབྲེལ་བ་ཉིད་ཡིན་ལ། ངོ་བོ་སྣང་བ་དེ་འདྲ་འཆར་དུ་རུང་བའི་གཞི་ཤེས་རིག་འཛིན་པའི་རྣམ་པར་ཤེས་པ་ཙམ་སྟེ། དེ་ལ་སྣང་བ་སྣ་ཚོགས་འཆར་བ་ནི། བག་ཆགས་ཀྱི་གཞན་དབང་ལས་བྱུང་བ་ཡིན་པ་དང༌། རྣམ་ཤེས་དེ་ཉིད་རང་ཡང་ཐོག་མ་མེད་པའི་བག་ཆགས་ལས་གྲུབ་པའི་ཕྱིར། གཞན་བག་ཆགས་ཀྱི་དབང་ལས་རང་དབང་མེད་པར་སྣང་བའི་ཕྱིར། གཞན་དབང་ཞེས་བཏགས་སོ། །དེ་ཡང་ཀུན་བཏགས་གཟུགས་བརྙན་དང་འདྲ་བ་དང༌། རྟག་ཏུ་འབྲེལ་བ་གཟུགས་བརྙན་འཆར་བའི་གཞི་མེ་ལོང་ལྟ་བུ་དེ་ཡིན་ནོ། །ཡོངས་སུ་གྲུབ་པའི་མཚན་ཉིད་ནི་གཞན་གྱི་དབང་དེ་ཉིད་དང་དབྱེར་མེད་དུ་འདྲེས་པ་ལྟར་སེམས་ཅན་ལ་སྣང་ཡང་རང་བཞིན་མཚན་ཉིད་ཤིན་ཏུ་འགལ་བ། ཆོས་ཉིད་ཀྱི་སེམས་ཡིན་ཏེ། དཔེར་ན་གསེར་རྡོའི་གནས་སྐབས་ན་གསེར་དང་རྡོ་བཞིན་ནོ། །ཡང་ན་དུག་ལ་སེམས་ཅན་འཆི་བར་བྱེད་པའི་ནུས་པ་དང༌། ཚེ་ཉི་ཟླ་དང་མཉམ་པར་བྱེད་པའི་ནུས་པ་


TNT17_Page_0623
[མ་དཔེ་གཟིགས་ན་འདིར་གནོན།]

བཞིན་ཏེ། ནུས་པའི་རྫས་དང་མཚན་ཉིད་ཤིན་ཏུ་འགལ་ཡང༌། ཕལ་པའི་མིག་གིས་དབྱེ་བ་མི་ཕྱེད་ཅིང༌། རྫས་དང་སྨན་ལ་སོགས་པའི་རྐྱེན་གང་ལས་འཆི་བ་མེད་པར་བྱེད་པ་དེ་འདྲ་མངོན་དུ་གྱུར་ན། འཆི་བྱེད་ཀྱི་རྫས་ནུས་དེ་རྩ་བ་ནས་བྱང་བར་འགྱུར་བ་བཞིན་ནོ། །དེ་ལ་སྤང་བྱ་སྒྲིབ་པ་དང༌། སྤོང་བྱེད་ལམ་གྱི་ཡེ་ཤེས་ཐམས་ཅད་ངོ་བོ་གཞན་དབང་ཡིན་པས་གཞན་དབང་བླང་དོར་གྱི་གནས་ཡང་དག་ཀུན་རྫོབ་ཡིན་ལ། ཡོངས་གྲུབ་ནི་བླང་དོར་ལས་གྲོལ་བའི་དོན་དམ་བདེན་པའོ། །གཞན་དབང་སྤངས་པས་ཀུན་བཏགས་རང་སར་དག་པར་འགྱུར་ཏེ། འོན་ཀྱང་ཀུན་བཏགས་ཀྱི་རང་བཞིན་ཡང་ཤེས་པར་བྱ་དགོས་པ་ཡིན་ནོ། །གཞན་ཡང་ཇི་སྐད་དུ། བརྟགས་པ་དང་ནི་ཤེས་པ་དང༌། །དེ་བཞིན་བརྗོད་པ་རགས་པ་ཡིན། །དམ་པའི་དོན་ནི་གཅིག་པུའོ། །ཞེས་བདེན་གཉིས་ཀྱི་དབྱེ་བ་དང༌། དོན་དང་ཐོབ་དང་སྒྲུབ་པ་ནི། །དོན་དམ་རྣམས་པ་གསུམ་དུ་འདོད། །ཅེས་སོགས་གསུངས་ཏེ། སོ་སོའི་དབྱེ་བ་དང༌། དངོས་དང༌། བཏགས་པའི་ཁྱད་པར་རྣམས་ཤེས་དགོས་ཏེ། འདིར་ཧ་ཅང་མང་པར་འགྱུར་བས་མ་སྤྲོས་སོ། །དེ་ལྟར་ན་ཕུང་ཁམས་སྐྱེ་མཆེད་མཚན་གཞིའི་ཆོས་དེ་དག་ནི། རྟོག་པས་བཏགས་པ་ཙམ་དང༌། ཕྱིན་ཅི་ལོག་གི་བློ་ལ་སྣང་བ་ཁོ་ན་ཡིན་གྱི། ཡང་དག་པར་ན་ཅུང་ཟད་ཀྱང་ཡོད་པ་མ་ཡིན་ནོ། །ཀུན་རྫོབ་ཀྱི་ཆོས་དེ་དག་གདོད་ནས་མེད་པ་དང༌། དོན་དམ་གྱི་ཆོས་འགྱུར་བ་མེད་པར་གནས་པ་ནི། གནས་ལུགས་ཡིན་ལ། དེ་ཡང་ཀུན་རྫོབ་ཀྱི་ཆོས་གདོད་ནས་མ་གྲུབ་པ་ནི། ཆོས་དབྱིངས་འགྱུར་མེད་ལ་ཆོས་དབྱིངས་དེའི་ཁྱད་ཆོས་ཀྱི་ཚུལ་དུ་འཇུག་པའོ། །ད་ནི་སྐབས་འདིར་འཕགས་པ་ཀླུ་སྒྲུབ་ཀྱི་ཞལ་སྔ་ནས་གསུངས་པ་འཇིག་


TNT17_Page_0624
[མ་དཔེ་གཟིགས་ན་འདིར་གནོན།]

རྟེན་ལས་འདས་པའི་བསྟོད་པ་ཞེས་བྱ་བ་དབུ་མའི་སྙིང་པོར་གྱུར་པ་དེ་དང་སྦྱར་ཏེ་བཤད་པར་བྱའོ། །དེ་ལྟ་ཡང་གཞུང་དེ་ལས། བློ་ལྡན་ཁྱོད་ཀྱི་ཕུང་པོ་དེའང༌། སྒྱུ་མ་སྨིག་སྒྱུ་དྲི་ཟ་ཡི། །གྲོང་ཁྱེར་རྨི་ལམ་ཇི་བཞིན་དུ། །བློ་ལྡན་རྣམས་ལ་རབ་ཏུ་བསྟན། །གང་དག་རྒྱུ་ལས་བྱུང་བ་རྣམས། །དེ་མེད་པར་ནི་ཡོང་མིན་པས། །གཟུགས་བརྙན་ཉིད་དང་མཚུངས་པ་རུ། །གསལ་བ་ཅི་ཡི་ཕྱིར་མི་འདོད། །འབྱུང་བ་མིག་གིས་གཟུང་མིན་པས། །དེ་དངོས་མིག་གི་ཇི་ལྟར་ཡིན། །གཟུགས་ཉིད་བཟུང་བར་རབ་བཀག་པས། །གཟུགས་ཉིད་དེ་ལྟར་ཁྱོད་ཀྱིས་གསུངས། །ཚོར་བྱ་མེད་པར་དེ་མེད་པས། །ཚོར་བ་ཉིད་ནི་བདག་མེད་པས། །ཚོར་བ་དེ་ཡང་རང་བཞིན་གྱིས། །ཡོད་པ་མིན་པར་ཁྱེད་ཉིད་བཞེད། །མིང་དང་དོན་དག་ཐ་དད་མིན། །མི་ཡིས་ཁ་ཉིད་ཚིག་པར་འགྱུར། །གཞན་ཡང་རྟོགས་པ་མེད་འགྱུར་ཞེས། །བདེན་པ་གསུང་བ་ཁྱེད་ཀྱིས་བསྟན། །བྱེད་པོ་རང་དབང་ལས་ཉིད་ཀྱང༌། །ཐ་སྙད་དུ་ནི་ཁྱོད་ཀྱིས་བསྟེན། །ཕན་ཚུན་བལྟོས་པ་ཅན་ཉིད་དུ། །གྲུབ་པར་ཁྱོད་ཀྱིས་བཞེད་པ་ལགས། །བྱེད་པོ་ཡོད་མིན་སྤྱོད་པའང་མེད། བསོད་ནམས་དེ་མིན་རྟེན་འབྲེལ་སྐྱེས། །བརྟེན་ནས་སྐྱེས་གང་མ་སྐྱེས་ཤེས། །ཚིག་གི་བདག་པོ་ཁྱོད་ཀྱིས་གསུངས། །ཤེས་པ་མེད་པར་ཤེས་བྱ་མིན། །དེ་མེད་རྣམ་པར་ཤེས་པའང་མེད། དེ་ཕྱིར་ཤེས་དང་ཤེས་བྱ་དག །རང་དངོས་མེད་པར་ཁྱོད་ཀྱིས་གསུངས། །ཞེས་འབྱུང་སྟེ། དེ་ལ་འདི་ནི་བདག་མེད་རྣམ་པ་གཉིས་ལས་ཆོས་ཀྱི་བདག་མེད་ཁོ་ནའི་དབང་དུ་བྱས་པ་སྟེ། དེ་ཡང་སྣང་གྲགས་ཀྱི་ཆོས་གང་ཅི་ཡང་རུང་བ་དེ་དང་དེ་སོ་སོ་ལ། གཞན་དང་ཐུན་མོང་མ་ཡིན་པས་རང་དབང་


TNT17_Page_0625
[མ་དཔེ་གཟིགས་ན་འདིར་གནོན།]

བའི་ངོ་བོ་དེའི་ཁྱད་གཞི་ཞིག་ཅི་སྟེ་ཡོད་སྲིད་ན། དེ་ནི་ཆོས་དེ་ཉིད་ཁོ་ན་རང་དབང་གི་གཞན་མི་དབང་བས་བདག་ཅེས་བྱའོ། །མདོར་ན་སྣང་གྲགས་ཀྱི་ཆོས་རྣམས་ལ་འཁྲུལ་སྣང་ཙམ་མ་ཡིན་བློས་བཏགས་པ་ཙམ་མ་ཡིན་པར་གནས་ཚུལ་ལ་གྲུབ་རྒྱུའམ། ཚུགས་ཐུབ་ཞིག་ཡོད་ན་ཆོས་ཀྱི་བདག་ཡིན་པར་འགྱུར་བ་ལས། དེ་ལྟ་བུ་ཡེ་མི་སྲིད་པའི་ཕྱིར། ཤེས་བྱ་སྤྱི་དང་སོ་སོ་གང་གི་སྟེང་ན་ཡང་དེ་འདྲ་གྲུབ་པ་མེད་པས། ཆོས་ཐམས་ཅད་ཆོས་ཀྱི་བདག་མེད་པ་ཡིན་ནོ། །ཆོས་ཀྱི་བདག་མེད་པའི་གནས་ཚུལ་དེ་ལ་འཇུག་པ་ནི། སྣང་གྲགས་ཀྱི་ཆོས་རྣམས་རང་རང་གི་ངོ་བོར་མེད་ན། གཞན་གྱི་ངོ་བོར་ལྟ་ག་ལ་ཡོད་དེ། གཤིས་ཅིར་ཡང་མ་གྲུབ་པའི་ཚུལ་དེ་ལ། མཉམ་གཞག་ཏུ་རྣམ་རྟོག་གི་ཡུལ་ཟད་དེ། གང་དུ་ཡང་མི་འཛིན་ཅི་ཡང་མི་དམིགས་པའི་ཚུལ་གྱིས་འཇུག་པ་ཡིན་ལ། རྗེས་ཐོབ་ཏུ་ནི་གནས་ལུགས་དང་རྗེས་སུ་མཐུན་པའི་ངེས་ཤེས་ཀྱིས་ཀྱང་བརྟག་པར་བྱ་བ་ཁོ་ན་སྟེ། ཐེ་ཚོམ་དང་ལོག་པར་རྟོག་པ་སེལ་བར་བྱེད་པའི་ཕྱིར་རོ། །ཅི་འོ་ན་ནི་ཆོས་ཉིད་ཀྱི་ཡེ་ཤེས་དེ་ཆོས་ཀྱི་བདག་མེད་ཡིན་པའི་ཕྱིར། རང་གི་ངོ་བོས་ཡོད་པར་འདོད་པའི་དམ་བཅའ་བ་ཉམས་སོ་སྙམ་ན། བློ་གྲོས་ཁྲ་བོར་གྱུར་པ་རྣམས་ཀྱི་རིག་པའི་འཆར་ཚུལ་དེ་ལྟར་འབྱུང་བ་བདེན་ཡང༌། གང་ཞིག་མཆོག་ཏུ་རྣམ་པར་དཀར་བའི་ཤེས་རབ་ཤིན་ཏུ་གསལ་བ་རྣམས་ཀྱིས་ནི། འདི་གཉིས་ཀྱི་ཁྱད་པར་གསལ་བ་མཐོང་ངོ༌། །དེ་ཡང་སྨྲོས་ཤིག་ཅེ་ན། གང་སྣང་ཞིང་གྲགས་པའི་ཆོས་འདི་དག་ནི། ཅི་སྟེ་རང་གི་ངོ་བོས་ཡོད་པར་གྱུར་ན། སྣང་བ་དང་མཐུན་པའམ། གྲགས་པ་དང་མཐུན་པར་ཡོད་དགོས་ཏེ།


TNT17_Page_0626
[མ་དཔེ་གཟིགས་ན་འདིར་གནོན།]

དཔེར་ན་མཚན་མོ་ཐོ་ཡོར་ལ་བལྟས་པས། མི་རེང་དུ་སྣང་བར་གྱུར་ན། གལ་ཏེ་མིར་སྣང་བ་དེ་ངོ་བོས་ཡོད་ན་ནི། སྣང་བ་དང་མཐུན་པར་མིའི་མཚན་ཉིད་དུ་ཡོད་དགོས་པ་ལས། དེ་ལ་མིའི་མཚན་ཉིད་མེད་པས་མི་རེང་དུ་སྣང་བ་དེ་ངོ་བོས་མ་གྲུབ་པ་ཡིན་ནོ། །མི་རེང་དུ་སྣང་ཡང་དེར་མ་གྲུབ་ཕྱིན། རྨ་བྱ་དང་གླང་པོ་ལ་སོགས་པ་གཞན་དུ་ནི་སྣང་ཡང་མི་སྣང་ན། གྲུབ་པ་ལྟ་སྨོས་ཀྱང་ཅི་དགོས་པ་བཞིན་ནོ། །དེའི་ཕྱིར་སྣང་གྲགས་ཀྱི་ཆོས་ཐམས་ཅད་ནི། ཆོས་ཀྱི་བདག་མེད་པའི་ཕྱིར། རང་གི་ངོ་བོས་ཀྱང་མ་གྲུབ་བོ། །དོན་དམ་དབྱིངས་ཀྱི་ཡེ་ཤེས་ལ་ནི། སྣང་གྲགས་རྣམས་ལ་ཡོད་པར་འདོད་པའི་རང་གི་ངོ་བོ་དང་རང་གི་མཚན་ཉིད་དེ་འདྲ་བ་མེད་པའི་ཕྱིར། ཆོས་ཀྱི་བདག་མེད་ཡིན་ལ། ངོ་བོས་གྲུབ་མ་གྲུབ་ཅེས་པའམ་དེ་ཙམ་ཞིག་ལ་བསམས་ན་ནི། རང་གི་ངོ་བོས་མེད་པའང་ཡིན་ཏེ། སྒྲ་དང་ཡིད་ཀྱི་བརྗོད་པས་དོན་དམ་དབྱིངས་ཀྱི་ཡེ་ཤེས་སུ་བསམས་པ་དེ་དང་ཀུན་རྫོབ་ཀྱི་ཤེས་པ་གསལ་སྣང་ཅན་ལ། དོན་དམ་པའི་ཡེ་ཤེས་ལྟར་སྣང་བ་དེ་ནི། དོན་དམ་མ་ཡིན་པའི་ཕྱིར་དང༌། རང་གི་ངོ་བོས་མ་གྲུབ་པའི་ཕྱིར་རོ། །དེ་ལྟར་ཡང༌། རྒྱལ་ཚབ་ཆེན་པོས། དེ་བཞིན་བརྗོད་པ་རགས་པ་ཡིན། །ཅེས་གསུངས་ཏེ། སྒྲ་རྟོག་གི་ཀུན་ཏུ་བརྗོད་པའི་ཡུལ། ཡོངས་གྲུབ་དོན་དམ་པའི་རྣམ་པ་འདྲ་རུང་དེ་ནི། དོན་དམ་མ་ཡིན་ཏེ་ཀུན་རྫོབ་ཀུན་བཏགས་དང་གཞན་དབང་གིས་བསྡུས་པ་ཡིན་ནོ། །དེ་བས་ན་ཅི་ཙམ་དུ་ཆོས་ཀྱི་བདག་གི་མཚན་ཉིད་ཅན་ཐམས་ཅད་ཡོངས་གྲུབ་དོན་དམ་པའི་རང་གི་ངོ་བོ་ཡོད་ཚུལ་དེར་མི་འགྱུར་ལ། དོན་དམ་རང་གི་ངོ་བོས་ཡོད་ཚུལ་གཞན་ཡིན་པས། དེ་


TNT17_Page_0627
[མ་དཔེ་གཟིགས་ན་འདིར་གནོན།]

བདེན་པར་མེད་པས་འདི་བདེན་པར་མེད་པར་མི་འགྱུར་རོ། །དཔེར་ན་སྒྱུ་མ་མཁན་གྱི་རྡེའུ་ལ་དམིགས་ནས་སྔགས་བཟླས་པས། དབང་པོ་བསླད་པའི་མི་རྣམས་ལ་གླང་པོའི་གཟུགས་བརྙན་བྱུང་བ་ན་སྒྱུ་མར་སྣང་བའི་གླང་པོའི་གཟུགས་ལ་གླང་པོའི་མཚན་ཉིད་མེད་པས། གནས་དེ་ན་གླང་པོ་གདོད་ནས་མ་གྲུབ་ཀྱང༌། དེའི་ཤུལ་ན་སྐྱེ་བོ་རྣམས་ཀྱི་མ་མཐོང་བའི་རྡེའུ་ཡོད་པ་མི་འགལ་བ་བཞིན་ནོ། །གླང་པོར་སྣང་བ་དེ་ནི། རྡེའུ་དེ་ལས་སྐྱེས་པ་ཡང་མ་ཡིན། དེ་ལས་གཞན་པ་ལས་སྐྱེས་པ་ཡང་མ་ཡིན། རྡེའུ་དེས་དེ་བསྐྱེད་པ་ཡང་མ་ཡིན། མི་རྣམས་ཀྱིས་ཀྱང་རྡེའུ་དེ་ཉིད་གླང་པོར་མཐོང་བ་ཡང་མ་ཡིན། རྡེའུ་མ་ཡིན་པའི་གཞན་ཞིག་གླང་པོར་མཐོང་བ་ཡང་མ་ཡིན་ཏེ། སྔགས་དང་རྫས་དང་སྒྱུ་མ་མཁན་པོའི་བསམ་གཏན་དང༌། རྡེའུ་ལ་དམིགས་པའི་ཡིད་ལ་བྱེད་པ་རྣམས་འཛོམས་པ་ལས། མི་རྣམས་ལ་གླང་པོ་ཆེའི་རྣམ་པ་ཙམ་ཞིག་མཐོང་བར་ཟད་དེ། དངོས་གནས་ལ་མེད་པའི་གླང་པོ་ཆེ་མཐོང་བ་ན་དེའི་ཤུལ་ན། མི་རྣམས་ཀྱིས་མ་མཐོང་བའི་རྡེའུ་ནི་ཡོད་དོ། །གླང་པོ་དང་རྡེའུ་གཉིས་བསྐྱེད་བྱ་སྐྱེད་བྱེད་མ་ཡིན་ཀྱང༌། རྡེའུ་མེད་ན་ནི་དེ་ཡང་མི་འབྱུང་ངོ༌། །སྐྱེ་བོ་རྣམས་ཀྱིས་མཐོང་བའི་གླང་པོ་དང༌། མ་མཐོང་བའི་རྡེའུ་གཉིས་མཚན་གཞི་ཡང་གཅིག་མ་ཡིན་ཅིང༌། སྒྱུ་མའི་གླང་པོ་ལ་གླང་པོ་ཆེའི་མཚན་ཉིད་མེད་པས། རྡེའུ་ལ་རྡེའུ་མཚན་ཉིད་མེད་པར་མི་འགྱུར་ལ། རྡེའུ་དེ་ལ་གླང་པོ་ཆེའི་མཚན་ཉིད་མེད་པས་རྡེའུ་དེ་གླང་པོ་ཆེར་མི་འགྱུར་མོད་ཀྱང༌། རྡེའུ་མ་ཡིན་པར་མི་འགྱུར་རོ། །ཞེས་འཇིག་རྟེན་དུ་གྲགས་པ་ཡིན་ནོ། །དེ་བཞིན་དུ་འདིར་ཡང་སྦྱར་


TNT17_Page_0628
[མ་དཔེ་གཟིགས་ན་འདིར་གནོན།]

ཏེ། དོན་དམ་པའི་དབྱིངས་དེ་ཡོད་པ་དང༌། དེ་ལ་ལོག་པར་དམིགས་པའི་རྣམ་པར་རྟོག་པ་དང་ལས་དང་ཉོན་མོངས་པ་རྣམས་ཀྱི་རྒྱུ་རྐྱེན་ཚོགས་པ་ལས་འཁོར་བའི་སྣང་བ་སྣ་ཚོགས་པ་འདི་སེམས་ཅན་རྣམས་ལ་སྣང་བར་འགྱུར་རོ། །དོན་དམ་དབྱིངས་དེས་འཁོར་བ་བསྐྱེད་པ་ཡང་མ་ཡིན་ལ། འཁོར་བ་དེ་ལས་སྐྱེས་པ་ཡང་མ་ཡིན། དབྱིངས་དེ་མ་ཡིན་པའི་ཚུགས་ཐུབ་ཀྱི་དངོས་པོ་གཞན་ལས་བྱུང་བ་ཡང་མ་ཡིན། སེམས་ཅད་རྣམས་ལའང་ཆོས་དབྱིངས་དེ་ཀུན་རྫོབ་འཁོར་བར་སྣང་བའང་མ་ཡིན། དེ་མ་ཡིན་པའི་ཚུགས་ཐུབ་གཞན་ཞིག་འཁོར་བར་བྱུང་བའང་མ་ཡིན་ཏེ། གཞན་དུ་ན་བདེན་པར་མེད་བཞིན་དུ་སྣང་བའི་ལས་ཉོན་རྣམ་རྟོག་འཁྲུལ་བས། གནས་ལུགས་ལ་ལོག་པར་ཞུགགས་པ་ཙམ་ལས། ཀུན་རྫོབ་ཀྱི་སྣང་བ་མཐའ་དག་སྣང་བར་ཟད་དོ། །གནས་ལུགས་ལ་དེ་མེད་ཀྱང་སེམས་ཅན་རྣམས་ཀྱིས་མཐོང་བའི་འཁོར་བ་ཀུན་རྫོབ་དེའི་ཤུལ་ན། སེམས་ཅན་རྣམས་ཀྱིས་མི་མཐོང་བའི། དོན་དམ་ཆོས་ཉིད་བདེ་བར་གཤེགས་པའི་སྙིང་པོ་ནི་གནས་ལུགས་ལ་རྟག་ཏུ་ཡོད་དོ། །དོན་དམ་དང་ཀུན་རྫོན་གཉིས་བསྐྱེད་བྱ་སྐྱེད་བྱེད་མ་ཡིན་ཀྱང༌། ཅི་སྟེ་དོན་དམ་མེད་པ་ཞིག་སྲིད་ན་ནི། སེམས་ཅན་སུ་ལ་ཡང་ཀུན་རྫོབ་ཀྱི་སྣང་བ་མི་འབྱུང་ངོ༌། །སེམས་ཅན་རྣམས་ཀྱིས་མཐོང་བའི་ཀུན་རྫོབ་དང༌། མ་མཐོང་བའི་དོན་དམ་གཉིས་མཚན་གཞི་ཡང་གཅིག་མ་ཡིན་ལ། ཀུན་རྫོབ་རྣམས་ལ་རང་རང་གི་མཚན་ཉིད་མེད་ཀྱང༌། དོན་དམ་ལ་རང་གི་མཚན་ཉིད་མེད་པར་མི་འགྱུར་ཞིང༌། དོན་དམ་ལ་ཀུན་རྫོབ་ཀྱི་མཚན་ཉིད་མ་གྲུབ་ཀྱང༌། དོན་དམ་


TNT17_Page_0629
[མ་དཔེ་གཟིགས་ན་འདིར་གནོན།]

མེད་པར་ཡང་མི་འགྱུར་རོ། །གཟུགས་སོགས་ལ་རྣམ་པར་དཔྱད་པའི་ཚེ་གཟུགས་སོགས་ཀྱི་མཚན་ཉིད་མ་གྲུབ་ན། གཟུགས་སོགས་ངོ་བོས་མི་འགྲུབ་པ་ཡིན་ཀྱང༌། གཟུགས་སོགས་མ་ཡིན་པ་ཞིག་ལ་གཟུགས་སོགས་ཀྱི་མཚན་ཉིད་མེད་པས། དེ་ངོ་བོས་མ་གྲུབ་པར་མི་འགྲོ་སྟེ། བ་ལང་དུ་སྣང་བ་ལ་བ་ལང་གི་མཚན་ཉིད་མེད་ན། བ་ལང་དུ་སྣང་བ་དེ་འཁྲུལ་སྣང་ཡིན་པའི་རྒྱུ་མཚན་དུ་འགྲོ་ཡི་མིར་སྣང་བ་ལ་བ་ལང་གི་མཚན་ཉིད་མེད་ཀྱང༌། རྒྱུ་མཚན་དེས་མི་མེད་དུ་མི་འགྱུར་བ་བཞིན་ནོ། །དེས་ན་ཀུན་རྫོབ་ཀྱི་ཆོས་གང་དང་གང་ལ་རང་གི་ངོ་བོས་གྲུབ་ན་ཆོས་ཀྱི་བདག་ཡོད་པར་འགྲོ་རྒྱུའི་ངོ་བོས་གྲུབ་ཚུལ་དང༌། དོན་དམ་རང་གི་ངོ་བོས་གྲུབ་ཚུལ་གཉིས། ངོ་བོས་གྲུབ་པའི་བློ་རྩེ་གཏད་མཚམས་མི་འདྲ་ཞིང༌། ངོ་བོས་གྲུབ་ཚུལ་མི་འདྲ་བས་ཆོས་ཀྱི་བདག་མེད་དང་རང་གི་ངོ་བོས་བདེན་པར་གྲུབ་པ་མི་འགལ་ལོ། །དཔེར་ན་བ་ལང་རང་གི་མཚན་ཉིད་ཀྱིས་གྲུབ་ན། ནོག་ལྐོག་ཤལ་ཅན་ཡིན་དགོས་ཀྱང༌། མི་རང་གི་མཚན་ཉིད་ཀྱིས་གྲུབ་པ་ལ། ནོག་ལྐོག་ཤལ་ཅན་ཡིན་མི་དགོས་པ་བཞིན་ཀུན་རྫོབ་རང་གི་མཚན་ཉིད་ཀྱིས་གྲུབ་ན། རྣམ་ཤེས་ལ་ཇི་ལྟར་སྣང་བ་ལྟར་དང༌། རྣམ་རྟོག་གིས་ཇི་ལྟར་བཟུང་བ་ལྟར་གྲུབ་དགོས་ཀྱང༌། དོན་དམ་རང་གི་ངོ་བོས་གྲུབ་པ་ལ། རྣམ་ཤེས་དང་རྣམ་རྟོག་ལ་སྣང་བ་ལྟར་གྲུབ་མི་དགོས་སོ། །དེ་བས་ན་ཀུན་རྫོབ་ནི་ཡོད་ན་གཅིག་དང་དུ་མ་གང་རུང་དུ་ཡོད་དགོས་ཏེ། གཅིག་དང་དུ་མ་གང་ཡང་མ་ཡིན་པ། རྣམ་ཤེས་རྟོག་པའི་ཡུལ་དུ་མི་རུང་བ། ཀུན་རྫོབ་ཏུ་གྱུར་ཚད་ཤེས་རྟོག་ཁོ་ནས་བཞག་


TNT17_Page_0630
[མ་དཔེ་གཟིགས་ན་འདིར་གནོན།]

ཅིང༌། ཤེས་རྟོག་གི་ཡུལ་ཁོ་ནར་ངེས་པའི་ཕྱིར་རོ། །དོན་དམ་ནི་གཅིག་དང་དུ་མ་ལས་འདས་ཀྱང༌། རྣམ་ཤེས་དང་རྟོགས་པའི་ཡུལ་མ་ཡིན་པའི་ཕྱིར། སྐྱོན་དེ་མེད་དེ་ཤེས་རྟོག་གི་ཡུལ་མ་ཡིན་ཅིང་ཤེས་རྟོག་གིས་བཞག་པ་མ་ཡིན་པ་ལ། གཅིག་དང་དུ་མ་གཉིས་མིན་འགལ་བ་མེད་པའི་ཕྱིར་རོ། །དེས་ན་ཀུན་རྫོབ་རྣམས་ནི་ཡོད་ན་དངོས་པོ་དངོས་མེད་གཅིག་དུ་མ་ལ་སོགས་པ་འགལ་འབྲེལ་ཅན་དང༌། ཀུན་རྫོབ་ཀྱི་བློའི་དཔྱད་བྱར་ཡོད་པ་དང༌། སྤྲོས་པའི་ཚུལ་དུ་ཡོད་དགོས་ལ། དོན་དམ་ནི་དེ་དག་ཏུ་མེད་ཀྱང༌། ཡེ་ཤེས་ཆེན་པོའི་རང་རིག་རང་མྱོས་སྤྲོས་བྲལ་རྣམ་པ་ཐམས་ཅད་པར། གདོད་ནས་རྟག་ཏུ་གནས་ཤིང་སྐྱེ་འགག་གནས་གསུམ་དང་བྲལ་བས། དོན་དམ་པའི་ངོ་བོས་ཡོད་ཅིང༌། གནས་ལུགས་སུ་བདེན་ལ། སྤྲོས་བྲལ་གྱི་ངོ་བོར་རྟག་པ་བརྟན་པ་ཐེར་ཟུག་པ། ཞི་བ་གཡུང་དྲུང་ཆེན་པོའི་ངང་དུ་གནས་པ་ཡིན་ནོ། །དཔེར་ན་སྒྱུ་མའི་ཚོགས་པ་གཅིག་ཉིད་ལས། སྒྱུ་མ་དཔག་ཏུ་མེད་པ་བྱུང་ན་སྤྲུལ་པ་མཐའ་ཡས་པ་དེའི་གཞི་རྟེན་ནི་ཚོགས་པ་གཅིག་པུ་དེ་ཡིན་ལ། ཚོགས་པ་གཅིག་པུ་དེས་སྤྲུལ་པ་དེ་ཀུན་ལ་ཁྱབ་པར་གྲགས་པ་དང༌། རྣམ་པར་དཔྱད་ན་སྒྱུ་མ་སྤྲུལ་པ་དེ་ནི་གདོད་ནས་མེད་པའི་ཕྱིར། ཚོགས་པས་ཁྱབ་རྒྱུ་མ་གྲུབ་ཅིང༌། ཚོགས་པ་ལ་བརྟེན་མཁན་ཡང་མེད་མོད་ཀྱི། དཔྱད་པ་མ་བྱས་པར། སྣང་བ་དང་ཚོགས་པ་གཉིས་ཀའི་སྟེང་ནས་བསད་པའི་ཚེ། ཁྱབ་པ་དང་བརྟེན་པའི་རྣམ་གཞག་འཇོག་པར་ལྟར། ཀུན་རྫོབ་ཀྱི་ཤེས་བྱ་ཐམས་ཅད་ཀྱང་དོན་དམ་དབྱིངས་ལ་བརྟེན་པ་དང༌། དོན་དམ་དབྱིངས་ཀྱིས་ཤེས་བྱ་ཐམས་ཅད་ལ་ཁྱབ་བོ་ཞེས་འཇོག་ཅིང༌། དཔྱད་ན་ཀུན་


TNT17_Page_0631
[མ་དཔེ་གཟིགས་ན་འདིར་གནོན།]

རྫོབ་གདོད་ནས་མེད་པའི་ཕྱིར། དོན་དམ་དབྱིངས་ཀྱིས་ཁྱབ་པར་བྱ་རྒྱུ་གཏོར་ལ། དོན་དམ་ལ་རྟེན་མཁན་ཡང་མ་གྲུབ་བོ། །འོན་ཀྱང་ཀུན་རྫོབ་ཀྱི་སྣང་བ་ཤར་བ་ཐམས་ཅད་ཀྱི་ཤུལ་ན། གནས་ཚུལ་ལ་དོན་དམ་གཅིག་པུ་གནས་ཤིང༌། དེ་ནི་སྣང་བ་ཀུན་ལ་ཉེ་རིང་ཡང་མེད་པའི་ཕྱིར། ཀུན་ལ་ཁྱབ་པ་ནི་ཡིན་ལ། འགྱུར་བ་མེད་ཅིང་སྐྱེ་འགག་གནས་གསུམ་དང་བྲལ་བའི་ཕྱིར་རྟག་པ་ཡང་ཡིན་ནོ། །ཟབ་མོ་མཐར་ཐུག་གི་དབང་དུ་བྱས་པའི་ཁྱབ་རྟག་ནི་དེ་ཡིན་ལ། ཇི་སྐད་དུ། དེ་ལྟར་མཛད་པ་རྒྱ་ཆེའི་ཕྱིར། །སངས་རྒྱས་ཁྱབ་པར་ངེས་པར་བརྗོད། །དེ་ཉིད་ཟད་པ་མེད་པའི་ཕྱིར། །རྟག་པ་ཞེས་ཀྱང་བརྗོད་པ་ཡིན། །ཞེས་གསུངས་པ་ལྟ་བུ་ནི། ཀུན་རྫོབ་གཙོ་བོར་བྱས་པའི་ཁྱབ་རྟག་ཡིན་ནོ། །དེ་བས་ན་ཆོས་ཀྱི་བདག་མེད་རྣམ་གྲངས་དུ་མས་བསྟན་པའི་སྙིང་པོ་ནི། བདེ་གཤེགས་སྙིང་པོ་རང་རིག་འགྱུར་མེད་རྣམ་པ་ཐམས་ཅད་པ་དེ་ལ། གློ་བུར་དྲི་མ་སྣང་ཞིང་གྲགས་པའི་ཆོས་གང་ཡང་མ་གྲུབ་པ་འདི་ཉིད་ཡིན་ནོ། །དེ་ཡང་དེ་ལ་དེ་མ་གྲུབ་པའི་ཆ་ཙམ་ནས་འཇོག་པ་མ་ཡིན་གྱི། མ་གྲུབ་པས་ཁྱད་པར་དུ་བྱས་པའི་རིག་པའི་ཡེ་ཤེས་ཉིད་དོན་གྱི་གཙོ་བོར་བཟུང་ངོ༌། །དེས་ན་དགག་གཞི་གཟུགས་སོགས་ཆོས་རྣམས་དགག་བྱ་བདེན་གྲུབ་ཀྱིས་སྟོང་པ་ཙམ་ཆོས་ཀྱི་བདག་མེད་པའི་དོན་དུ་འདོད་པ་ནི། འཇིག་རྟེན་ཕལ་པའི་རྣམ་རྟོག་ལས། སྟོང་ཉིད་ཀྱི་ཕྱོགས་ལ་བློ་ཁ་ཅུང་ཟད་འཕགས་པ་ཙམ་གྱི་རྣམ་རྟོག་རགས་པ་ཡིན་ལ། ཡང་སྣང་གྲགས་ཀྱི་ཆོས་ཐམས་ཅད་གདོད་མ་ནས་ཡོད་མ་མྱོང་ཞིང༌། གྲུབ་ན་ཡོད་པར་


TNT17_Page_0632
[མ་དཔེ་གཟིགས་ན་འདིར་གནོན།]

གྲུབ་དགོས་པ་འཐད་ཀྱང༌། ཡོད་པ་མ་གྲུབ་ཕྱིན་མེད་པ་ངོ་བོས་གྲུབ་པ་ནི་སྤྱི་ལྡོག་ནས་ཡེ་མི་སྲིད་པར་གོ་ནས། ཡོད་མེད་ཡིན་མིན་གྱི་སྤྲོས་པ་དང་བྲལ་ཙམ་ཆོས་ཀྱི་བདག་མེད་ཀྱི་དོན་དུ་འདོད་པ་ཡང༌། དེ་ཙམ་གྱི་ཕྱོགས་ནས་ནོར་བ་ནི་མ་ཡིན་མོད། ཆོས་བདག་མེད་པའི་དོན་གྱི་ཕྱེད་ཙམ་ལས་མ་རྟོགས་སོ། །ལྟ་བ་དེའི་སྟེང་དུ་རང་སྟོང་སྨྲ་བར་གྲགས་པ་ཐམས་ཅད་དོན་དམ་དབྱིངས་ཀྱང་སྣང་གྲགས་རྣམས་དང་ཁྱད་པར་མེད་པར་བདེན་པར་མ་གྲུབ་པ་དང༌། བདེ་གཤེགས་སྙིང་པོ་ཡོན་ཏན་ཅན་ཤེས་བྱ་ལ་མི་སྲིད་པར་འདོད་པ་དང༌། ཡེ་ཤེས་ནི་དོན་དམ་དབྱིངས་མ་ཡིན་པར། ཀུན་རྫོབ་ཁོ་ནར་འདོད་པ་དང༌། དེ་དག་དེ་སྟོན་པའི་གསུངས་རབ་རྣམས་ཀྱང་དྲང་དོན་ནོ་ཞེས་སྨྲ་ཞིང་སྐུར་བ་འདེབས་ལ། གཞན་སྟོང་དབུ་མ་ཆེན་པོའི་གྲུབ་མཐའ་གསལ་བར་མཛད་པའི་སྐྱེས་ཆེན་བྱང་ཆུབ་སེམས་དཔའ་རྣམས་ལ་སྡང་སྨྲས་བྱེད་པ་ནི། ཤིན་ཏུ་འཁྲུལ་ཚབས་ཆེ་བ་སྟེ་སྡིག་པའི་ལས་རླབས་ཆེན་པོའི་མཐུ་ལས། ངན་སོང་ནས་ངན་སོང་དུ་འགྲོ་བ། བདུད་དང་སྡིག་པའི་གྲོགས་པོས་ཡོངས་སུ་བཟུང་བའོ། །རང་གིས་ཡང་ནས་ཡང་དུ་ཆོས་ཟབ་མོ་དང་དམ་པ་རྣམས་ལ་སྐུར་བ་འདེབས་བཞིན་པ་ནི་འདི་སྐད་དུ། བདེན་པ་གཉིས་པོ་རྣམ་ཕྱེ་ཡང༌། །ཤིན་རྟ་ཆེ་དག་རྨོངས་ཉིད་ན། །ཞེས་རང་ཡོན་ཏན་ཆེན་པོར་ང་རྒྱལ་བའི་ཁེང་ཚིག་དང༌། དམ་པ་རྣམས་ལ་སྡང་སྨྲས་མི་བཟད་པ་བྱས་ཟིན་ནས། ཡང་འདི་སྐད་ཅེས། མི་ཡང་ཤིན་ཏུ་རྙེད་པར་དཀའ། །བློ་སྦྱངས་ཉམས་ཡང་རབ་ཏུ་ཆུང༌། །འཁོར་བའི་དགོན་པ་བགྲོད་པར་དཀའ། །སྲོག་ཀྱང་ཤིན་ཏུ་གཡོ་བ་ཡིན། །བཤེས་གཉེན་བཟང་པོ་རྙེད་པར་དཀའ། །མོས་པ་


TNT17_Page_0633
[མ་དཔེ་གཟིགས་ན་འདིར་གནོན།]

མེད་དུ་ཟིན་ན་ཡང༌། །རབ་ཏུ་སྡང་བ་གང་དུ་དགོས། །ཞེས་གཞན་བསླུ་བའི་ཁ་ཚིག་མཁས་མཁས་ལྟར་སྨྲ་སྟེ། མི་ལུས་རྙེད་དཀའ་ཞིང༌། ཆོས་ཟབ་མོ་དང་མཇལ་བའི་སྐབས་སུ། སྡང་སེམས་མ་བྱེད་ཅིག་ཅེས་གཞན་ལ་སྨྲས་ཀྱང༌། ཡང་དེ་མ་ཐག་ཏུ། སྡང་བས་ཚིག་པ་ཁྱོད་ལ་ནི། །དལ་བ་འབྱོར་པའང་རིང་བར་གསལ། ཞེས་ཞེ་སྡང་གི་ཚིག་རྩུབ་ཤོར་བས། གཞན་ལ་སྨྲས་པའི་སྐྱོན་དེ་རང་ཉིད་ལ་དེ་འཕྲལ་ཁོ་ནར་ཐོག་ཏུ་བབ་པ་དང༌། ཡང་ཁ་ཅིག་རང་གིས་མདོ་སྡེ་ཟབ་མོ་རྣམས་ཚིག་དོན་དང་ཡེ་མི་མཐུན་པའི་སྐྱོགས་བཤད་འབའ་ཞིག་གིས་དགོངས་དོན་ལོག་པར་འགྲེལ་ཞིང༌། རྣམ་པ་དེ་ལྟའི་མདོ་སྡེ་གཞན་ཡང་ནི། དྲང་དོན་ཉིད་དུ་ལུང་འདིས་གསལ་བར་བྱེད། ཅེས་མདོ་སྡེ་འགའ་ཞིག་གི་ཚིགས་ལ་འཁྱོག་བཤད་ཀྱིས་བསྒྲིབ་མི་ཐུབ་པར་ཤིན་ཏུ་གསལ་བ་རྣམས། དྲང་དོན་ཁོ་ནའོ་ཞེས་བཀྲལ་ནས། ཅི་ཏོལ་ཆེན་པོས་རྒྱལ་བའི་བསྟན་པ་མ་རུང་པར་བྱེད་བཞིན་དུ། རྒྱལ་བའི་གསུང་ལ་ཡིད་ཆེས་པར་བྱེད་པའི་དམ་པ་རྣམས་ལ། འདི་དག་གིས་བཀའི་དོན་ལོག་པར་སྨྲས་སོ། །ཞེས་ཟེར་བ་ནི་རང་སྐྱོན་གཞན་ལ་བགོད་པར་བྱེད་པ། གཡོ་སྒྱུ་ཅན་གྱི་རྣམ་ཐར་ཏེ། རང་གི་སློབ་མ་རྣམས་བསླུ་བར་བྱེད་པའོ། །དེ་བཞིན་དུ་ཆེས་ཆེར་གྲགས་པ་ལེགས་ལྡན་གྱིས་ཀྱང༌། འཕགས་པ་ཐོགས་མེད་རྒྱལ་བས་ལུང་མ་བསྟན་ཅེས་སྨྲས་སྣང་ན། འཇམ་དཔལ་གྱི་རྩ་བའི་རྟོག་པ་མ་མཐོང་བར་བབ་ཅོལ་བསྟེན་པའམ། མཐོང་ཡང་སྦེད་པའི་སྒྱུ་ཐབས་གང་རུང་ལས་མ་འདས་ལ། སློབ་དཔོན་དབྱིག་གཉེན་གྱི་ལེགས་བཤད་མང་པོ་ཞིག་བསྐུས་ནས་རང་གིས་ཤེས་པ་སྐད་དུ་སྨྲ་ཞིང༌།


TNT17_Page_0634
[མ་དཔེ་གཟིགས་ན་འདིར་གནོན།]

ཡང་སྐབས་གཞན་དུ་དབྱིག་གཉེན་ཤིན་ཏུ་འགོག་པར་བྱེད་པ་ཡང་གཡོ་ཅན་གྱི་རྣམ་ཐར་རོ། །འོན་ཏེ་སྣང་གྲགས་ཐམས་ཅད་གདོད་ནས་སྟོང་པའི་སྤྲོས་བྲལ་དུ་ཁས་བླངས་ཏེ། དོན་དམ་པའི་ཡེ་ཤེས་ལ་དགག་སྒྲུབ་གང་ཡང་མི་བྱེད་པར། བཏང་སྙོམས་སུ་འཇོག་ན་ནི། སྐུར་འདེབས་མ་བྱས་པའི་ཕྱིར་ཉེས་པའང་མེད་ལ། སྟོང་ཉིད་ཐུན་མོང་བ་ལ་མོས་པས་འཇུག་པའི་ཕྱིར། རང་གི་སྐལ་བ་དང་འཚམས་པའི་ཆོས་དེ་ཙམ་ལ་འཇུག་པ་ཡང་ངོ་མཚར་ཆེ་སྟེ། སྔོན་གྱི་ངོ་བོ་ཉིད་མེད་པར་སྨྲ་བ་རྣམས་བཞིན་ནོ། །སྣང་གྲགས་ཀྱི་ཆོས་ཐམས་ཅད་ནི་གདོད་མ་ནས་མ་གྲུབ་ལ། དེའི་ཕྱིར་སྤྲོས་པ་ཐམས་ཅད་དང་བྲལ་བའི་ཡེ་ཤེས་འགྱུར་མེད་མཁའ་ཁྱབ་ནི། ཆོས་ཀྱི་བདག་མེད་ཀྱི་དོན་ཡོངས་སུ་རྫོགས་པ་ཡོངས་སུ་དག་པ་གྱ་ནོམ་པའོ། །ཤིན་ཏུ་སྤྲོས་པས་ཆོག་གོ །དེ་ལྟར་ན། དོན་དམ་དབྱིངས་དེ་མཚན་མས་སྟོངས་པ་ནི་སྟོང་ཉིད་ཡིན་ལ། མཚན་མ་ཡང་དངོས་པོའམ་དངོས་པོ་ལ་བརྟེན་པ་ཁོ་ན་སྟེ། དངོས་པོ་དེ་ཡང་ཕུང་པོ་ལྔར་འདུས་སོ། །དེ་ལ་དབང་པོ་ལྔ་དང་གཟུགས་སྒྲ་དྲི་རོ་རྣམས་ནི་འབྱུང་བ་ལས་བྱུང་བ་སྟེ་འབྱུང་ལས་གྱུར་པ་ཡིན་པའི་དོན་དང༌། དེ་བཞིན་དུ་རེག་བྱའི་ནང་ཚན་ཡང༌། ཡང་ལྕི་དང་འཇམ་རྩུབ་ལ་སོགས་པ་ཡང་འབྱུང་བའི་འབྲས་བུ་དང༌། འབྱུང་བ་རྣམས་ཀྱང་རེག་བྱ་ཡིན་པར་འདོད་ན། དེ་དག་རང་བཞིན་གྱིས་གྲུབ་པར་མི་འདོད་དེ། རྒྱུ་མིག་གི་བཟུང་བྱ་མ་ཡིན་པ་འབྱུང་བ་རྣམས་ལས། འབྲས་བུའི་དངོས་པོ་མིག་གི་བཟུང་བྱར་གྱུར་པའི་གཟུགས་ཀྱི་སྐྱེ་མཆེད་མི་སྐྱེ་བར་ཐལ་ཏེ། གཟུགས་དང་རེག་བྱ་ངོ་བོ་ཉིད་ཀྱིས་མ་གྲུབ་པའི་ཐ་དད་ཡིན་པའི་ཕྱིར་ཞེས་དང༌།


TNT17_Page_0635
[མ་དཔེ་གཟིགས་ན་འདིར་གནོན།]

ཁ་དོག་དང་དབྱིབས་རང་གི་ངོ་བོ་ཉིད་ཀྱིས་མ་གྲུབ་སྟེ། རྒྱུ་འབྱུང་བ་ལས་བལྟོས་པའི་ཕྱིར། ཞེས་རྟེན་འབྲེལ་གྱི་གཏན་ཚིགས་དང༌། ཚོར་བ་ཡང་རང་བཞིན་གྱིས་གྲུབ་པ་མེད་དེ། ཚོར་བ་བདེ་སྡུག་རྣམས་རྒྱུ་ཡིད་དུ་འོང་བ་དང་མི་འོང་བ་ལ་བལྟོས་པའི་ཕྱིར་རོ། །འདུ་ཤེས་ནི་མཚན་མར་འཛིན་པའི་བདག་ཉིད་ཡིན་ལ། མཚན་མ་དེ་ཡང་མིང་དང་དོན་འདྲེས་པར་འཛིན་པའི་བདག་ཉིད་ཡིན་ན། མིང་དང་དོན་ཐ་དད་མ་ཡིན་པར་ངོ་བོ་གཅིག་ན་ནི། མེ་ཞེས་བརྗོད་པས་བརྗོད་པ་པོའི་ཁ་ཚིག་པར་ཐལ་བར་འགྱུར་ལ། ངོ་བོ་ཉིད་ཀྱིས་ཐ་དད་པར་གྲུབ་ན་ནི། མིང་ལས་དོན་རྟོགས་པ་མེད་པར་འགྱུར་ཏེ། ངོ་བོ་ཉིད་ཀྱིས་ཐ་དད་ན་འབྲེལ་པ་མེད་པར་འགྱུར་བའི་ཕྱིར་རོ། །འདི་ནི་གཅིག་དུ་བྲལ་གྱི་རིག་པར་གཏོགས་ཏེ། མིང་དང་དོན་དག་ངོ་བོ་ཉིད་ཀྱིས་མེད་དེ། ངོ་བོ་ཉིད་ཀྱིས་གཅིག་པ་ཡང་མ་ཡིན་དུ་མ་ཡང་མ་ཡིན་པའི་ཕྱིར་གཟུགས་བརྙན་བཞིན་ནོ། །ཞེས་པ་ནི་རྩ་བའི་སྦྱོར་བའོ། །དེའི་རྟགས་གྲུབ་པ་ནི་གོང་དུ་བསྟན་པ་དེའོ། །འདི་བྱེད་ནི་ལས་ཡིན་ལ། བྱེད་པ་པོའི་སྐྱེས་བུའི་གང་ཟག་གི་འདོད་པའི་ཡུལ་ལ་ལས་ཞེས་བྱའོ། །སྐྱེས་བུ་གང་ཟག་དེ་ནི་བསོད་ནམས་བྱ་བའི་ལས་ཀྱང་མངོན་པར་འདུ་བྱེད་ཅེས་དང༌། བསོད་ནམས་མ་ཡིན་པའི་ལས་དང༌། མི་གཡོ་བའི་ལས་ལའང་དེ་ལྟར་སྟོན་པས་གསུངས་པ་ནི། ཐ་སྙད་ཙམ་དུ་བསྟན་པ་ཡིན་གྱི་དོན་དམ་པར་ན་དེ་མ་ཡིན་ནོ། །ལས་ངོ་བོ་ཉིད་ཀྱིས་མ་གྲུབ་སྟེ། བྱེད་པ་པོ་ལ་བལྟོས་པའི་ཕྱིར་རོ། །སྐྱེས་བུ་གང་ཞིག་ཕ་མེད་ན་བུར་མི་འགྱུར་བ་བཞིན་ནོ། །བྱེད་པོ་ཡོད་པའི་ཕྱིར་ལས་ཀྱང་ཡོད་སྙམ་ན། བྱེད་པ་པོ་ངོ་བོ་ཉིད་ཀྱིས་མ་གྲུབ་སྟེ། ལས་མ་གྲུབ་པར་བྱེད་པ་པོ་མི་འཐད་པ་ནི་ལོ་ཐོག་


TNT17_Page_0636
[མ་དཔེ་གཟིགས་ན་འདིར་གནོན།]

མེད་ན་རྔ་བར་བྱེད་པ་པོ་མི་འབྱུང་བ་བཞིན་ནོ། །དེ་ལྟར་ན་ལས་དང་བྱེད་པ་པོ་རྣམས་ཕན་ཚུན་བལྟོས་པས། གཉིས་ཀར་ཡང་མ་གྲུབ་སྟེ། འོན་ཀྱང་འཁྲུལ་བའི་སྣང་ངོ་དང༌། རྟོག་ངོ་ཙམ་དུ་ལས་དང་བྱེད་པ་ཡོད་དོ། །དེ་ནི་རྟེན་འབྲེལ་ཙམ་སྟེ་ངོ་བོ་ཉིད་ཀྱིས་གྲུབ་པའི་བྱེད་པ་པོའི་བྱེད་པ་ཡང་མེད་ལ། བྱེད་པོས་འབྲས་བུ་ལ་ལོངས་སྤྱོད་པའང་མེད་ཅིང༌། བསོད་ནམས་གསོག་པ་ལ་སོགས་པའང་མེད་དོ། །ལས་དང་བྱེད་པ་པོ་དེའང་ངོ་བོ་ཉིད་ཀྱིས་མ་གྲུབ་སྟེ། རྒྱུ་དང་རྐྱེན་གྱི་རྟེན་འབྲེལ་ལས་སྐྱེས་པའི་ཕྱིར་སྒྱུ་མ་བཞིན་ནོ། །ཇི་སྐད་དུ། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལས་རག་ལས་གང་དེ་སྟོང་བར་མཐོང༌། །གང་གིས་སྟོང་ཉིད་ཤེས་དེ་བག་ཡོད་ཡིན། །ཅེས་རྣམ་པར་ཤེས་པ་མེད་ན་ནི་ཤེས་བྱ་ཡུལ་ཡང་མི་འགྲུབ་སྟེ། མིག་ཤེས་ཅི་ཡང་མི་སྲིད་ན་ནི། གཟུགས་ཡེ་མེད་པར་འགྱུར་ཏེ། མིག་གིས་མཐོང་བའི་དངོས་པོ་མི་སྲིད་པར་འགྱུར་བའི་ཕྱིར་རོ། །དེ་བཞིན་དུ་ཤེས་པ་མིག་ཤེས་བདེན་པར་མི་འགྲུབ་པས། ཤེས་བྱ་གཟུགས་ཀྱང་བདེན་པར་མེད་ལ། གཟུགས་ཡེ་མེད་ན་མིག་ཤེས་སྐྱེ་བ་མི་སྲིད་པ་ལྟར། གཟུགས་བདེན་པར་མ་གྲུབ་ན། དེ་མཐོང་བའི་མིག་ཤེས་ཀྱང་བདེན་པར་མི་འགྲུབ་སྟེ། རྣམ་པར་ཤེས་པ་ནི་དམིགས་པའི་རྐྱེན་ལ་བལྟོས་པའི་ཕྱིར་རོ། །དེས་ན་འདི་ལྟར་མིག་ཤེས་རང་གི་ངོ་བོས་མ་གྲུབ་སྟེ་གཟུགས་ལ་བརྟེན་ནས་སྐྱེ་དགོས་པའི་ཕྱིར། གཟུགས་རང་གི་ངོ་བོས་མ་གྲུབ་སྟེ། མིག་ཤེས་ཀྱིས་མཐོང་བ་ལ་བརྟེན་ནས་གཟུགས་སུ་འཇོག་དགོས་པའི་ཕྱིར། གཉིས་ཀར་


TNT17_Page_0637
[མ་དཔེ་གཟིགས་ན་འདིར་གནོན།]

བདེན་པ་མ་ཡིན་ཏེ། ཕན་ཚུན་གཅིག་ལ་གཅིག་བལྟོས་པའི་ཕྱིར་རོ། །དེ་བས་ན་ཕུང་པོ་རྣམས། སྒྱུ་མ་དང༌། རྨི་ལམ་དང༌། སྨིག་སྒྱུ་དང༌། དྲི་ཟའི་གྲོང་ཁྱེར་བཞིན་དུ། སྣང་ལ་རང་བཞིན་མེད་པའོ། །དེ་ལྟར་ཡང་དག་འཕགས་པ་རྒྱན་སྡུག་པོ་བཀོད་པ་ལས། འདི་ལ་ཁམས་རྣམས་གང་ཡང་མེད། །ཕུང་པོ་ལྔ་དང་རྣམ་ཤེས་ཀྱང༌། །མིང་དང་གཟུགས་དག་རྒྱུར་བྱས་ཤིང༌། །ལུས་ཅན་རྣམས་ཀྱི་ཡིད་ཀྱང་སྟེ། །ཇི་ལྟར་མེ་ནི་ཤིང་དབང་གིས། །འབར་ཏེ་འབར་བར་རྟོག་པ་མེད། །དེ་བཞིན་ཕུང་པོ་ཤིང་རྟ་སྟོང༌། །ཅི་ཕྱིར་རྣལ་འབྱོར་འཇུག་མི་བྱ། །རི་དྭགས་སྲེད་དང་དྲི་ཟ་ཡི། །གནས་དང་སྒྲ་ཚོགས་སྣང་བ་རུ། །རི་དྭགས་བུས་པ་ལ་སོགས་མཐོང༌། །ཡང་དག་མ་ཡིན་བལྟས་བསླད་པས། །དེ་བཞིན་ཡུལ་ལས་བྱུང་བའི་སེམས། ཁབ་ལོང་ལྟ་བུར་འཁོར་བ་སྟེ། གང་ཡང་འདི་ལ་དངོས་མེད་པ། །འབྱུང་བ་རྣམས་དང་འབྱུང་བ་པའི། །གཡོ་བ་དྲོ་བ་བཤེར་སྲ་བར། །བུས་པ་རྣམས་ནི་རྟག་ཏུ་རྟོག །འབྱུང་བ་སེམས་ཀྱི་ཚོགས་ལས་ན། །ཅི་ཕྱིར་རྣལ་འབྱོར་འཇུག་མི་བྱ། །ཇི་ཙམ་མ་ཞིག་ལུས་ཡོད་དང༌། །ཇི་ཙམ་དུ་ནི་བློ་འབྱུང་བ། །དེ་བར་རྣལ་འབྱོར་ཡེ་ཤེས་ལ། །མ་བཤོལ་བསམ་གཏན་རབ་ཏུ་གྱིས། །ཐམས་ཅད་སྒྱུ་མ་རྨི་ལམ་ལྟར། །འབྱུང་བ་གསུམ་ཀུན་རབ་ཏུ་བལྟོས། །སྨིག་སྒྱུ་ཆུ་ཟླ་ལྟ་བུ་ན། །ཅི་ཕྱིར་རྣལ་འབྱོར་འཇུག་མི་བྱ། །ཅི་བཞིན་དྲི་ཟའི་གྲོང་ཁྱེར་ན། །འགྲོ་བའི་སྤྱོད་པ་རྣམ་པར་སྣང༌། །དེ་བཞིན་ལུས་ལ་ཕུང་པོའི་སྤྱོད། །ཅི་ཕྱིར་རྣལ་འབྱོར་འཇུག་མི་བྱ། །རྨི་ལམ་དག་ན་འགྲོ་བའི་ཚོགས། །ཇི་ལྟར་


TNT17_Page_0638
[མ་དཔེ་གཟིགས་ན་འདིར་གནོན།]

རྨི་ལམ་རྨི་བས་མཐོང༌། །དེ་བཞིན་ཕུང་པོའི་གནས་ཡིན་ན། །ཅི་ཕྱིར་རྣལ་འབྱོར་འཇུག་མི་བྱ། །ས་འདི་ས་ལ་སོགས་པའི་ཚོགས། །འདུས་པ་རྡུལ་གྱི་ཕུང་པོ་ཡིན། །འདི་སེམས་སེམས་བྱུང་ཚོགས་ཡིན་པར། །རྒྱལ་བའི་སྲས་རྣམས་ཀུན་བལྟོས་ཤིག །འབྱུང་བ་ཆེན་པོ་བཞི་པོ་རྣམས། ཕན་ཚུན་ནས་ནི་འདུས་པ་སྟེ། བརྡེག་པ་ལ་སོགས་ལྡན་པ་ཡིན། །ཅི་ཕྱིར་རྣལ་འབྱོར་འཇུག་མི་བྱ། །འདི་ནི་རླུང་དང་མཁྲིས་པས་མྱོས། །རོ་བསླས་ལྟ་བུར་གནས་པ་སྟེ། །བྱེད་པ་གང་ཡང་ཡོད་མ་ཡིན། །ཅི་ཕྱིར་རྣལ་འབྱོར་འཇུག་མི་བྱ། །དབུ་བའི་གོང་བུ་ལྟ་བུ་ཀུན། །འགྲོ་བ་གནས་ཤིང་གཡོ་བ་རྣམས། །སྨིག་སྒྱུ་འདྲ་བའི་འདུ་ཤེས་སུ། །རྫས་ལ་སོགས་པའི་ཤིན་ཏུ་རྟོགས། །ཚོར་བ་ཆུ་བུར་ལྟ་བུ་སྟེ། །བདེ་དང་མི་བདེར་རྟོག་པ་ཡིན། །ཆུ་ཤིང་འདྲ་བའི་འདུ་བྱེད་རྣམས། །ཞིག་པ་གྲུབས་པ་སྙིང་པོ་མེད། །རྣམ་པར་ཤེས་པ་སྒྱུ་མ་འདྲ། །དེ་ཡི་དངོས་ལ་གནས་པ་མེད། །རྩྭ་ཤིང་གནས་པ་ཇི་བཞིན་ན། །ཅི་ཕྱིར་རྣལ་འབྱོར་འཇུག་མི་བྱ། །འདི་ནི་རྨི་ལམ་རྣམ་མྱོས་འདི། །འདི་ནི་སྒྱུ་མ་ལྟ་བུས་འདྲིད། །འདི་དག་ཐམས་ཅད་སྨིག་སྒྱུ་སྟེ། །དེ་བཞིན་དྲི་ཟའི་གྲོང་ཁྱེར་རོ། །ཞེས་གསུངས་པ་ལྟར་རོ། །སྒྱུ་མ་ལ་སོགས་པ་ནི་སྣང་བ་བཞིན་དུ་མེད་པ་བདེན་ན། ཕུང་པོ་རྣམས་རང་རང་གི་རྒྱུ་ལས་འབྲས་བུ་མ་འཁྲུལ་བར་འབྱུང་བས། དོན་བྱེད་ནུས་པའི་ཕྱིར་ངོ་བོས་ཡོད་དོ་སྙམ་ན། དངོས་པོ་གང་དག་རྒྱུ་སོ་སོ་ལས་བྱུང་བ་རྣམས་ནི་རང་གི་ངོ་བོས་ཡོད་པ་མ་ཡིན་ཏེ། རྒྱུ་དེ་མེད་ན་མི་འབྱུང་བའི་ཕྱིར་རྒྱུ་ལ་ངེས་པར་བལྟོས་སོ། །དཔེར་ན་མེ་ལོང་ནང་


TNT17_Page_0639
[མ་དཔེ་གཟིགས་ན་འདིར་གནོན།]

དུ་ཤར་བའི་བཞིན་གྱི་གཟུགས་བརྙན་དེ། རང་གི་ངོ་བོ་ཚུགས་ཐུབ་ཏུ་ཡོད་པ་མ་ཡིན་ཏེ། བཞིན་དང་མེ་ལོང་འདུས་པ་ལས་ནང་བ་ཙམ་ཡིན་པའི་ཕྱིར་རོ། །དེ་དག་ནི། མདོ་འདི་ལས་གཟུགས་སྟོང་པའོ་ཞེས་པ་དང༌། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་རྣམས་སྟོང་པའོ། །ཞེས་གསུངས་པའི་ཕུང་པོ་ལྔ་པོ་རང་བཞིན་གྱིས་མེད་ཅིང་སྟོང་པར་གཏན་ལ་འབེབས་ཚུལ་མདོ་ཙམ་བཤད་པ་ཡིན་ལ། གཟུགས་སྟོང་པའོ། །སྟོང་པ་ཉིད་གཟུགས་སོ་ཞེས་སོགས་གཞི་སྦྱོར་དུ་བྱས་པ་ནི། ཕུང་པོ་གཞན་བཞི་ལ་ཡང་སྦྱོར་དགོས་ཤིང༌། ཡང་ཕུང་པོ་ལྔ་པོ་སྟོང་པ་ཉིད་ལ་གཞི་སྦྱོར་བྱས་པ་བཞིན། གང་བ་མེད་པའི་བར་གཞི་སྦྱོར་དུ་འགྱུར་རོ་ཞེས་མང་པོ་དག་གསུང་བ་སྟོང་པ་དང་མཚན་མེད་སོགས་དོན་གཅིག་པས། དེ་ལྟར་ཡང་རུང་བ་ནི་ཡིན་ཕྱིར། སྔ་མ་ལས་ནུས་པ་ལྷག་པོ་ཆེ་བ་རང་མེད་པས། མཚན་ཉིད་མེད་པ་སོགས་བདུན་ལ་གཞི་སྦྱོར་གྱི་བཤད་པ་བྱེད་མི་དགོས་སོ། །གཟུགས་སྟོང་པའོ་ཞེས་སོགས་བཞི་པོ་འདི་ལ། འགྲེལ་ཆེན་ལས། མུ་སྟེགས་བྱེད་དང་རང་སྡེའི་གྲུབ་མཐའ་འོག་མ་རྣམས་ཀྱི་འཁྲུལ་བ་འགོ་བྱེད་དུ་སྦྱོར་ཏེ། ཧ་ཅང་སྐབས་སུ་བབ་པ་མིན་པའི་བཤད་པར་སྣང་ལ། གཞན་ཡང་འདིར་བཤད་པའི་རྣམ་གྲངས་ལ་གཟུགས་སྟོང་པའོ་ཞེས་པ་ཀུན་བཏགས་ཀྱི་གཟུགས་རང་བཞིན་གྱིས་སྟོངས་པ་སྟོང་ཉིད་གཟུགས་སོ་ཞེས། གཟུགས་ཀྱི་སྟོང་པ་ཉིད་དེ་ཆོས་ཉིད་ཀྱི་གཟུགས་ཡིན་ཅེས་པ་དང༌། གཟུགས་ལས་ཀྱང་སྟོང་པ་ཉིད་གཞན་མ་ཡིན་ཅེས་པ། རྣམ་བཏགས་


TNT17_Page_0640
[མ་དཔེ་གཟིགས་ན་འདིར་གནོན།]

གཞན་དབང་གི་གཟུགས་དེའི་ངོ་བོ་ལས། ཡོངས་གྲུབ་སྟོང་པ་གཞན་མ་ཡིན་པ་དང༌། སྟོང་པ་ཉིད་ལས་གཟུགས་གཞན་མ་ཡིན་ཅེས་པས། ཡོངས་གྲུབ་ལས་རྣམ་བཏགས་ཀྱི་གཟུགས་གཞན་མ་ཡིན་ཅེས་འཆད་པ་ནི་སེམས་ཙམ་གྱི་གྲུབ་མཐའ་དང་མཐུན་ཅིང༌། གནས་སྐབས་འགའ་ཞིག་ཏུ་རང་ལུགས་སུ་ཡང་ཁས་བླང་དུ་རུང་མོད། གཞན་སྟོང་དབུ་མ་ཆེན་པོའི་ལུགས་དཔྱིས་ཕྱིན་པ་ནི་མ་ཡིན་ནོ། །ཡང་གཟུགས་སྟོང་པའོ་ཞེས་སོགས་ལ་གཟུགས་རང་གི་ངོ་བོས་སྟོངས་པ་དང༌། སྟོང་བཞིན་དུ་གཟུགས་ཀྱི་རྣམ་པར་འཆར་བ་དང༌། དེའི་ཕྱིར་གཟུགས་ལས་ལོགས་ན་སྟོང་ཉིད་ཀྱི་ངོ་བོ་མེད། སྟོང་ཉིད་ལས་ལོགས་ན་གཟུགས་ཀྱི་ངོ་བོ་མེད། ཅེས་པ་ནི་ངོ་བོ་ཉིད་མེད་སྨྲ་བར་གྲགས་པ་རྣམས་ཀྱི་ལུགས་ཏེ། ཕྱོགས་གཅིག་ནས་འདི་ཡང་འགལ་བ་མེད་མོད་དོན་མཐར་ཐུག་པ་ནི་མ་ཡིན་ནོ། །དེས་ན་རང་ལུགས་ལ། སྤྲཽས་བཤད་ཀྱི་ཚུལ་དུ་མཚན་ཉིད་གསུམ་ལ་རྣམ་གྲངས་སུ་སྦྱར་བ་ནི། གཟུགས་ཀྱི་ཕུང་པོར་འདོགས་པའི་གཞི། དབང་ཡུལ་སོགས་ཕྱི་རོལ་དུ་སྣང་བ་དང༌། དེ་དག་གི་ཆེ་ཆུང་མཐོ་དམན་བཟང་ངན་སོགས། བློས་བཏགས་པའི་བཏགས་ཆ་ཙམ་སྟེ། ཀུན་བཏགས་ཀྱིས་བསྡུས་པའི་ཆོས་གང་ཡིན་པ་ཐམས་ཅད་ནི། མིང་ཙམ་བརྡ་ཙམ་རྟོག་ངོར་ཤར་བ་ཙམ་མ་གཏོགས། དོན་དམ་པར་ནམ་ཡང་མེད་དོ། །དེར་མ་ཟད་དེ་ནི་ཡང་དག་ཀུན་རྫོབ་བྱ་བ་བྱེད་ནུས་སུ་ཡང་མ་གྲུབ་པའི་ཕྱིར། མེད་པའི་སྟོང་པ་ཉིད་ཡིན་ལ། བདེན་པ་གཉིས་ཆར་དུ་མེད་པའི་སྟོང་པ་ཉིད་དེ། བྱིས་པ་སོ་སོ་སྐྱེ་བོ་རྣམས་ལ་ནི། གཟུགས་ཕུང་སོགས་ཕྱི་རོལ་ཀྱི་དོན་དུ་སྣང་


TNT17_Page_0641
[མ་དཔེ་གཟིགས་ན་འདིར་གནོན།]

བ་ཡིན་ནོ། །ཡང་ཁྱད་གཞི་སྟོང་པ་ལ་སྦྱར་ན་ཀུན་རྫོབ་དོན་དམ་གཉིས་ཀར་དུ་བདེན་པར་མེད་པའི་རང་གི་ངོ་བོས་སྟོང་པ་ཙམ་དེ་ལས། གཟུགས་སོགས་གཞན་དུ་མ་གྲུབ་ཅིང༌། ཁྱད་གཞི་གཟུགས་ཕུང་ལ་སྦྱར་ན། གཟུགས་ཕུང་ལས་ཀྱང་གཞན་དུ་གཟུགས་ཕུང་རང་གི་ངོ་བོས་མེད་པའི་སྟོང་པ་ཉིད་ཀྱང་ཡོད་པ་མ་ཡིན་ནོ། །ཞེས་པ་ནི་ཀུན་བཏགས་ཀྱི་མཚན་ཉྀད་ལ་སྦྱར་བ་སྟེ། དོན་གྱི་སྙིང་པོ་ཀུན་བཏགས་ཀྱི་ཆོས་རྫས་སུ་མེད་ཀྱང༌། བཏགས་ཡོད་ཙམ་ཞིག་བློ་ངོར་སྣང་བ་ཡིན་པས། འཁྲུལ་ངོ་ཙམ་གྱི་ཆོས་དེ་དང༌། ཆོས་དེ་ཉིད་ནམ་དུ་ཡང་ཡོད་མ་མྱོང་བའི་སྟོང་པ་ཙམ་དེ་ནི། ངོ་བོ་གཅིག་ཁོ་ན་ཡིན་པར་བསྟན་ཏོ། །ཡང་དག་ཀུན་རྫོབ་ཙམ་དུ་ན། གཟུགས་ལ་སོགས་པར་སྣང་བའི་ཤེས་པ་ཙམ་ཞིག་ནི་ཡོད་ལ། དེ་ནི་འཁོར་བ་འཇུག་པའི་རྒྱུ་ཡིན་ཅིང༌། ལམ་བསྒོམས་པས་དེ་སྤངས་ཏེ་གྲོལ་བར་ཡང་འགྱུར་བས། བླང་དོར་གྱི་གནས་ནི་རྣམ་པར་ཤེས་པ་ཙམ་སྟེ་གཟུགས་ཕུང་དུ་སྣང་བའི་རྣམ་པར་རིག་པ་ནི་རང་ལ་སྣང་བའི་གཟུང་བ་དང༌། འཛིན་ཆའི་རྣམ་པ་སྣ་ཚོགས་པས་སྟོང་པ་ཡིན་ལ། དེ་འདྲ་བའི་གཟུང་འཛིན་རྫས་གཞན་གྱིས་སྟོང་པ་དེ་ཁོ་ན་གཟུགས་ཕུང་དུ་སྣང་བའི་རྣམ་རིག་གོ །གཟུང་བ་རང་བཞིན་མེད་པའི་སྟོང་པ་གཉིས་ངོ་བོ་ཐ་དད་པ་མེད་པས། གཟུགས་སུ་སྣང་བའི་རྣམ་རིག་ལས་སྟོང་པ་ཉིད་གཞན་མ་ཡིན། སྟོང་པ་ཉིད་དེ་ལས་གཟུགས་སུ་སྣང་བའི་རྣམ་རིག་གཞན་མ་ཡིན་ནོ། །ཞེས་པ་སྟེ་ཡོད་པའི་སྟོང་ཉིད་གཞན་གྱི་དབང་གི་མཚན་ཉིད་དང་སྦྱར་ཏེ་བཤད་དོ། །དེས་ན་ད་ལྟར་སྣང་བ་སྣ་ཚོགས་


TNT17_Page_0642
[མ་དཔེ་གཟིགས་ན་འདིར་གནོན།]

པ་འདི་ཀ་བཟོ་བཅོས་མེད་པ། སྟོང་པ་ཉིད་དུ་གདོད་ནས་ཤར་བའི་རང་ངོ་བལྟ་བར་འདོད་པ་ནི། ཁ་ལྟ་ཙམ་མ་ཡིན་པར་གནད་དུ་སོང་ངེས་ན། ཀུན་བཏགས་དང་གཞན་དབང་གི་སྟོང་ཉིད་སྒོམ་པ་ཙམ་ཡིན་ནོ། །འདི་གཉིས་ལ་སྟོང་ཉིད་ཅེས་པའི་ཉིད་ཀྱི་སྒྲ་ནི་འབའ་ཞིག་པའི་སྒྲ་ཡིན་པས། སྟོང་པ་ཁོ་ན་ཞེས་དོན་དམ་པར་ཡོད་མ་མྱོང་བས་སྟོང་པ་ཁོ་ན་ཡིན་པའི་དོན་ནོ། །ཡང་ཆོས་ཉིད་ཀྱི་གཟུགས་ཕུང་ནི་ཡོངས་གྲུབ་ཀྱི་སྟོང་པ་ཉིད་དོ། །དེ་ཡང་ཆོས་ཉིད་ཀྱི་གཟུགས་སོ། །གཉིས་ཀྱིས་སྟོང་པ་དང་ཆོས་ཉིད་ཀྱི་གཟུགས་ཕན་ཚུན་སོ་སོ་གཞན་དུ་མ་གྲུབ་སྟེ། ངོ་བོ་གཅིག་ཁོ་ནར་གནས་པར་འཆད་པ་ནི། ཡོངས་གྲུབ་རང་བཞིན་སྟོང་པ་ཉིད་ཀྱི་དབང་དུ་བྱས་པའོ། །ད་ནི་དེ་དག་གི་སྙིང་པོ་འདུས་པའི་འདོད་དོན་གྱི་གཙོ་བོ་འཇོག་རྒྱུ་ལ། མཚན་ཉིད་བདེན་པ་གཉིས་སུ་འདུས་ལ། བདེན་གཉིས་ཐུན་མོང་དུ་སྦྱར་ན། ཆོས་ཉིད་ཀྱི་གཟུགས་ཕུང་ནི་ཀུན་བཏགས་གཞན་དབང་གཉིས་ཀྱིས་བསྡུས་པའི་ཀུན་རྫོབ་ཀྱི་ཆོས་ཐམས་ཅད་ཀྱི་སྟོང་པའོ། །ཀུན་རྫོབ་ཀྱིས་སྟོང་པའི་སྟོང་ཉིད་དེ་ཡང་སྟོང་རྐྱང་ཙམ་མ་ཡིན་པར། ཀུན་རྫོབ་མེད་པའི་གནས་ན་ཆོས་ཉིད་ཀྱི་གཟུགས་ཕུང་རྟག་ཏུ་ཡོད་པའོ། །ཆོས་ཉིད་ཀྱི་གཟུགས་ཕུང་ལས་གཞན་དུ་སྟོང་པ་དེ་མེད་ཅིང༌། སྟོང་པ་དེ་ལས་གཞན་དུ་དེ་ཡང་མེད་དེ། དཔེར་ན་སོས་ཀའི་དུས་ན། ཚ་བའི་དུས་ཡོད་པ་དང༌། གྲང་བའི་དུས་མེད་པ་གཉིས་དོན་ཐ་དད་དུ་མེད་པར་དོན་གཅིག་ཏུ་འདུ་བ་བཞིན་ནོ། །ཡང་ངེས་པའི་དོན་མཐར་ཐུག་གི་དབང་དུ་བྱས་ན། བདེ་ཆེན་རྣམ་པ་ཐམས་ཅད་པའི་གཟུགས་དང༌། དེ་ཉིད་གཟུང་འཛིན་སྤྲོས་པས་


TNT17_Page_0643
[མ་དཔེ་གཟིགས་ན་འདིར་གནོན།]

སྟོང་པ་གཉིས་ལས་སྦྱར་ནས་འཆར་དགོས་མོད་ཀྱི། རེ་ཞིག་སྐབས་འདིར་མ་བརྗོད་དོ། །དེ་བཞིན་དུ་ཕུང་པོ་གཞན་རྣམས་ལ་ཡང་སྦྱར་བར་བྱའོ། །དོན་གཉིས་པ་མཚན་ཉིད་མེད་པ་ནི། ཇི་སྐད་འཇིག་རྟེན་འདས་པར་བསྟོད་པ་ལས། མཚན་ཉིད་མཚོན་བྱ་གཞན་ཉིད་ན། །མཚོན་བྱ་མཚན་ཉིད་མེད་པར་འགྱུར། །ཐ་དད་མིན་ཡང་དེ་མེད་པར། ཁྱོད་ཀྱིས་གསལ་པོ་ཉིད་དུ་བསྟན། མཚན་ཉིད་མཚོན་བྱ་རྣམ་བྲལ་ཞིང༌། །ཚིག་གི་བརྗོད་པ་རྣམས་སྤངས་པར། ཁྱོད་ཉིད་ཡེ་ཤེས་ཅན་ཉིད་ཀྱིས། །འགྲོ་བ་འདི་དག་ཞི་བར་མཐོང༌། །ཞེས་བཤད་དེ། གཟུགས་སུ་རུང་བ་གཟུགས་ཀྱི་མཚན་ཉིད་དོ། །ཞེས་པ་ལ་སོགས་པ་བཏགས་པ་ཙམ་གྱི་ངོ་བོར་ཁས་ལེན་མོད་ཀྱང༌། གཟུགས་རུང་དང་གཟུགས་ཕུང་ངོ་བོ་ཉིད་ཀྱིས་གཞན་ཡིན་ན་ནི། མཚན་ཉིད་ཀྱིས་མཚན་གཞི་མཚོན་པར་མི་ནུས་པར་ཐལ་བར་འགྱུར་ལ། ངོ་བོ་ཉིད་ཀྱིས་གཅིག་ན་ནི། མཚན་མཚོན་གྱི་དབྱེ་བ་མེད་པར་འགྱུར་རོ། །གཞན་ཡང་གཟུགས་ཀྱི་མཚན་ཉིད་ཀྱི་སྔ་རོལ་ན། གཟུགས་ཡོད་དམ་མེད། མེད་ན་མཚན་ཉིད་གང་ལ་འཇུག་པའི་མཚན་གཞི་མེད་པར་འགྱུར་བས། མཚན་གཞི་མེད་པའི་ཕྱིར་མཚན་ཉིད་མེད་པར་ཐལ་བར་འགྱུར་ལ། ཡོད་ན་ནི་མཚན་ཉིད་མེད་པའི་མཚན་གཞི་མི་འཐད་ཅིང༌། དེ་ལ་མཚན་ཉིད་ཀྱིས་མ་ཁྱབ་པས། མཚན་ཉིད་དེ་ཡང་མཚན་ཉིད་མིན་པར་འགྱུར་རོ། །དེའི་ཕྱིར་མཚན་གཞིའམ་ཁྱད་གཞི་གང་དང་གང་ལ། མཚན་ཉིད་དམ་ཁྱད་ཆོས་དེ་དག་དེ་འཇུག་གོ །ཞེས་པའམ་བློས་བཏགས་པ་ཙམ་ཁོ་ན་ཡིན་གྱི། ཡང་དག་པར་ན་ཡོད་པ་མ་


TNT17_Page_0644
[མ་དཔེ་གཟིགས་ན་འདིར་གནོན།]

ཡིན་པས། ཆོས་ཐམས་ཅད་ནི་མཚན་ཉིད་མེད་པའོ། །མ་སྐྱེས་པ་ཞེས་པ་ལ། དངོས་པོ་ཡོད་པ་ཉིད་མི་སྐྱེ། །མེད་པའང་མ་ཡིན་ཡོད་མེད་མིན། བདག་ལས་མ་ཡིན་གཞན་ལས་མིན། །གཉིས་མིན་སྐྱེ་བ་ཇི་ལྟ་བུ། །ཞེས་བཤད་དེ། འཇིག་རྟེན་ན་བྱ་བ་ཅུང་ཟད་ཅིག་ཡོད་ན་བྱེད་པ་པོ་ངེས་པར་དགོས་ཏེ། ཟ་བ་དང་འགྲོ་བ་ལ་སོགས་པ་བཞིན་ནོ། །དེའི་ཕྱིར་སྐྱེ་བ་ཡོད་ན། སྐྱེ་བ་པོ་སྟེ་སྐྱེ་མཁན་ཡོད་དགོས་སོ། །སྐྱེ་བ་པོ་ཡོད་པ་ཉིད་མི་སྐྱེ་སྟེ་གྲུབ་ཟིན་པའི་ཕྱིར། གྲུབ་ཀྱང་སྐྱེ་ན་རྒྱུན་མི་འཆད་པར་སྐྱེ་བར་འགྱུར་བས་ཧ་ཅང་ཐལ་བ་དང༌། གྲུབ་ནས་སྐྱེ་བ་ལ་དགོས་པ་མེད་པར་ཐལ་བས་སོ། །སྐྱེ་བ་པོ་མེད་པར་སྐྱེ་ཡང་མི་འཐད་དེ། བྱེད་པོ་མེད་པའི་བྱ་བ་ཡོད་པར་ཐལ་བས་སོ། །སྐྱེ་བ་པོ་ཡོད་མེད་གཉིས་ཀ་ཡང་སྐྱེ་བ་མི་འཐད་[དེ།] གཉིས་པོ་ཐ་དད་གཉིས་ཡིན་ན་སོ་སོའི་སྐྱོན་དུ་འགྱུར་བའི་ཕྱིར་དང༌། དངོས་པོ་གཅིག་ལ་སྐྱེ་བ་པོ་ཡོད་མེད་གཉྀས་འགལ་བའི་ཕྱིར་རོ། འདི་ནི་ཡོད་མེད་སྐྱེ་འགོག་གི་གཏན་ཚིགས་སོ། །དངོས་པོ་རྣམས་བདག་ལས་མི་སྐྱེ་སྟེ་རང་ཉིད་དུ་གྲུབ་ཟིན་པའི་ཕྱིར་རོ། །གཞན་ལས་མི་སྐྱེ་སྟེ་སྐྱེ་བ་པོ་ཉིད་ལ་བལྟོས་པའི་ཕྱིར་རོ། །དཔེར་ན་མྱུ་གུ་དེ་གཞན་ལས་མི་སྐྱེ་སྟེ། མྱུ་གུ་ཉིད་དག་རྒྱུད་གཅིག་པའི་ས་བོན་ལ་བལྟོས་པའི་ཕྱིར་རོ། །དེ་ལ་མ་བལྟོས་པར་ཡང་སྐྱེ་ན། འབྲེལ་མེད་དོན་གཞན་ཐམས་ཅད་ལས་ཀྱང་སྐྱེ་བར་འགྱུར་རོ། །གཉིས་ཀ་ལས་མ་ཡིན་ཏེ། ཞེས་པ་གཉིས་ཀར་འགྱུར་མེད་པའི་ཕྱིར་རོ། །རྒྱུ་མེད་པར་ཡང་མི་འབྱུང་སྟེ། རྒྱུ་མེད་གཞན་ལ་མི་བལྟོས་ཕྱིར། །རྟག་ཏུ་ཡོད་པའམ་མེད་པར་འགྱུར། །ཞེས་པའི་སྐྱོན་དུ་ཐལ་བས་སོ། །དེའི་ཕྱིར་


TNT17_Page_0645
[མ་དཔེ་གཟིགས་ན་འདིར་གནོན།]

སྐྱེ་བར་སྣང་བའི་འཁྲུལ་བ་ཙམ་ཞིག་ཤར་བ་ཡིན་གྱི། གནས་ཚུལ་ལ་སྐྱེ་བ་གྲུབ་པ་ནི་མེད་དོ། །དེ་ལྟར་ན་བདེན་པའི་སྐྱེ་བ་ནམ་དུ་ཡང་མེད་ལ། སྐྱེ་བ་ཙམ་གྱི་དབང་དུ་བྱས་ན། ཇི་སྐད་དུ། ཐོག་མ་དང་ནི་དེ་ཉིད་གཞན་ཉིད་དང༌། །རང་གི་མཚན་ཉིད་རང་དང་གཞན་དུ་འགྱུར། །ཀུན་ནས་ཉོན་མོངས་པ་དག་ཁྱད་པར་ལས། །སྐྱེ་བ་མེད་པའི་ཆོས་ལ་བཟོད་པར་བཤད། ཅེས་ཁྱད་པར་གྱི་སྐྱེ་བ་གཏན་མེད་ཀྱི་རྣམ་གྲངས་ཀྱང་མང་དུ་གསུངས་སོ། །ཡང་དུས་ལ་དཔྱད་པ་ནི། རེ་ཞིག་པའི་རྒྱུ་ལས་ཀྱང༌། འབྲས་བུ་འབྱུང་བར་མི་རིགས་ལ། །མ་ཞིག་ལས་མིན་རྨི་ལམ་དང༌། །དྲ་བའི་སྐྱེ་བ་ཁྱོད་ཉིད་བཞེད། །ཞིག་དང་མ་ཞིག་པ་དག་གི །རྒྱུ་དང་འབྲས་བུ་འབྱུང་བ་དག །སྒྱུ་མ་འབྱུང་བ་བཞིན་དུ་འབྱུང༌། ཀུན་ཀྱང་དེ་བཞིན་ཁྱོད་ཀྱིས་གསུངས། །ཞེས་བཤད་དེ། རྒྱུ་དང་འབྲས་བུ་དག་ངོ་བོ་ཉིད་ཀྱིས་ཡོད་པ་མ་ཡིན་ཏེ་ངོ་བོ་ཉིད་ཀྱིས་དུས་ཐ་དད་པར་ཡང་མི་རུང༌། དུས་གཅིག་པ་ཡང་མི་རུང་བའི་ཕྱིར་རོ། །དུས་ཐ་དད་པ་སྔ་ཕྱི་ཅན་དུ་སྐྱེའོ་ཞེ་ན། རེ་ཞིག་རྒྱུ་ཞིག་ནས་འབྱུང་བ་མི་རིགས་ཏེ། རིགས་ན་ཁྱིམ་བྱ་ཤི་ནས་ཀྱང་སྐད་འབྱིན་པ་ཐལ་བར་འགྱུར་རོ། །སྒྱུ་མ་ཞིག་པ་ལས་འབྲས་བུ་འབྱུང་བ་ཡང་མི་འཐད་དེ། འཐད་ན་བསྲེག་བྱ་སྲེག་བཞིན་པ་རྒྱུའི་དུས་ན་བསྲེགས་ཟིན་ཀྱི་ཐལ་བ་ཡོད་པར་འགྱུར་རོ། །དེས་ན་རྒྱུ་འབྲས་སྔ་ཕྱི་ཅན་དང་དུས་མཉམ་པ་ཐམས་ཅད། རྨི་ལམ་མམ་སྒྱུ་མ་ལྟ་བུར་ཤེས་པར་བྱ་ཞིང༌། དེས་མཚོན་ན་འདུས་བྱས་ཀྱི་ཆོས་ཐམས་ཅད། ཀུན་རྫོབ་ཏུ་གནས་ཀྱང་དོན་དམ་པར་མེད་པ་ཞེས་བྱའོ། །མ་འགགས་པ་ཞེས་པ་ལ་


TNT17_Page_0646
[མ་དཔེ་གཟིགས་ན་འདིར་གནོན།]

ཡོད་པ་གནས་པར་རིགས་འགྱུར་གྱི། འཇིག་པར་འགྱུར་བ་མ་ཡིན་ནོ། །མེད་པ་མི་གནས་པ་རིག་པས། །འཇིག་པར་འགྱུར་བ་མ་ཡིན་ནོ། །ཞེས་བཤད་དེ། གཟུགས་སོགས་ངོ་བོ་ཉིད་ཀྱིས་འཇིག་པ་མ་ཡིན་ཏེ། ངོ་བོ་ཉིད་ཀྱིས་ཡོད་ན་ཡང་མི་འཇིག མེད་ན་ཡང་མི་འཇིག་པའི་ཕྱིར་རོ། །ཡོད་ན་མི་འཇིག་སྟེ། ཡོད་པ་ནི་གནས་པ་ཡིན་ལ། གནས་པ་དང་འཇིག་པ་དུས་ཅིག་ལ་འགལ་བའི་ཕྱིར་རོ། །མེད་ན་ཡང་མི་འཇིག་སྟེ། མེད་ཟིན་པ་ལ་འཇིག་རྒྱུ་མེད་པའི་ཕྱིར་རོ། །དེ་ལྟར་ན་འགག་པ་དག་འཇིག་པ་ནི་དོན་གཅིག་མིང་གི་རྣམ་གྲངས་ཡིན་པས། འཇིག་པ་མེད་པ་ནི་མ་འགགས་པའོ། །མ་སྐྱེས་པ་མ་འགགས་པ་ཞེས་པ་ལ། ཟོལ་ཟོག་ཅན་ཁ་ཅིག །རིག་པའི་ངོ་བོ་ཅིར་ཡང་མ་སྐྱེས། རྩལ་གང་དུ་ཡང་མི་འགག་ཅེས་པའི་དོན་དུ་འཆད་པ་ནི། བོད་ཀྱིས་སྒོམ་ཆེན་པར་གྲགས་པ་རྣམས་ཀྱི་བརྡ་ཆད་དང་མཐུན་པར་ཕལ་གྱིས་བལྟས་ན་བཤད་ཚུལ་བཟང་བཟང་འདྲ་ཞིང་གོ་བདེ་ཡང༌། ཤིང་རྟ་ཆེན་པོ་རྣམས་ཀྱིས་མ་བཤད་ཅིང༌། མ་སྐྱེས་པའི་དོན་འགགས་ཟིན་དང༌། མ་འགགས་པའི་དོན་སྐྱེ་བ་ལ་ངོས་བཟུང་བར་སོང་བས་ན། མདོ་འདིའི་ཚིག་དོན་དང་ཡེ་མི་འགྲིག་པས། རང་བཟོ་དེ་ལྟ་བུ་རིང་དུ་དོར་བར་བྱའོ། །ཡང་བཤད་པ། དེ་ཕྱིར་ཁྱོད་ཀྱིས་འགྲོ་འདི་དག །ཡོངས་སུ་བརྟགས་པ་ལས་བྱུང་བར། །ཀུན་ཏུ་ཤེས་བྱ་བྱུང་ན་ཡང༌། །སྐྱེ་བ་མེད་ཅིང་འགག་མེད་གསུངས། །ཞེས་ཏེ། ཕུང་སོགས་གདོད་ནས་སྟོང་པ་དེའི་ཕྱིར། སྣོད་བཅུད་ཀྱི་འགྲོ་བ་འདི་དག་རྣམ་པར་རྟོག་པ་ཙམ་ལས་བྱུང་ཞིང༌། རྟོག་པ་ཙམ་གྱིས་ཀུན་ཏུ་བཞག་པར་ཤེས་པར་བྱའོ། །ཀུན་རྫོབ་འཁྲུལ་ངོར་འདི་དག་བྱུང་བ་ཙམ་


TNT17_Page_0647
[མ་དཔེ་གཟིགས་ན་འདིར་གནོན།]

ཡིན་མོད་ཀྱི། དེ་རྣམས་ལ་ངོ་བོ་ཉིད་མེད་ཅིང༌། དེའི་ཕྱིར་སྐྱེ་བ་དང་འགག་པ་ཡང་མེད་དོ། །གཞན་ཡང་རིགས་པ་དྲུག་ཅུ་པ་ལས། འཇིག་རྟེན་མ་རིག་རྐྱེན་ཅན་དུ། །གང་ཕྱིར་རྫོགས་པའི་སངས་རྒྱས་གསུངས། །དེ་ཡི་ཕྱིར་ན་འགྲོ་འདི་དག །རྣམ་རྟོག་ཡིན་པ་ཅེས་མི་འཐད། །ཅེས་བཤད་དེ། འཇིག་རྟེན་ཕུང་ཁམས་སྐྱེ་མཆེད་རྣམས་ཐམས་ཅད་མ་རིག་པའི་དབང་གིས་བྱུང་བའི་ཕྱིར། རྣམ་རིག་རྣམ་པར་རྟོག་པ་ཙམ་ཡིན་དགོས་ཤིང༌། ལོག་པའི་རྒྱུ་ཅན་ཉིད་ཀྱི་ཕྱིར་བརྫུན་པ་ཡང་ཅིའི་ཕྱིར་མ་ཡིན། ཅེས་པའི་དོན་ནོ། །ཕུང་པོ་ལྔ་བཀག་པ་དང༌། མཚན་ཉིད་དང་སྐྱེ་འགག་བཀག་པས། གཙོ་བོར་ཀུན་བཏགས་མཚན་ཉིད་གྱི་ངོ་བོ་ཉིད་མེད་པར་བསྟན་ཏོ། །ད་ནི་དྲི་མ་མེད་པ་དྲི་མ་དང་བྲལ་བ་མེད་པ་ཞཻས་པའི་དབང་དུ་བྱས་ནས། རྟག་པ་ལའང་འཁོར་བ་ཡོད་མིན་ཏེ། །མི་རྟག་པ་ལའང་འཁོར་བ་མེད། །དེ་ཉིད་རིགས་པའི་མཆོག་ཁྱོད་ཀྱིས། །འཁོར་བ་རྨི་ལམ་འདྲ་བ་གསུངས། སྡུག་བསྔལ་རང་གིས་བྱས་པ་དང༌། །གཞན་གྱིས་བྱས་དང་གཉིས་ཀས་བྱས། །རྒྱུ་མེད་པར་ནི་རྟོག་གེ་འདོད། ཁྱོད་ཀྱིས་རྟེན་ཅིང་འབྲེལ་བར་གསུངས། །རྟེན་ཅིང་འབྲེལ་བར་གང་འབྱུང་བ། །དེ་ནི་ཁྱོད་ཀྱིས་སྟོང་པར་བཞེད། །དངོས་པོ་རང་དབང་ཡོད་མིན་ཞེས། མཉམ་མེད་ཁྱོད་ཀྱི་སེང་གེའི་སྒྲའོ། །ཀུན་རྟོགས་ཐམས་ཅད་སྤང་པའི་ཕྱིར། །སྟོང་ཉིད་བདུད་རྩི་སྟོན་མཛད་ན། །གང་གིས་དེ་ལ་ཞེན་གྱུར་པ། །དེ་ནི་ཁྱོད་ཀྱིས་ཤིན་ཏུ་སྨད། །ཅེས་བཤད་དེ། ལས་ཉོན་སྡུག་བསྔལ་གསུམ་གྱིས་འགྲོ་བ་དྲུག་ཏུ་འཁོར་བ་འདི་ཡང༌། རང་བཞིན་མེད་པ་སྒྱུ་མ་ལྟ་བུ་ལ་འཐད་


TNT17_Page_0648
[མ་དཔེ་གཟིགས་ན་འདིར་གནོན།]

ཀྱི། ངོ་བོ་ཉིད་ཀྱིས་གྲུབ་་ནི་མི་འཐད་དོ། །རྟག་པ་ནི་འཁོར་དུ་མི་རུང་སྟེ་ལྷའི་འགྲོ་བ་རྟག་ན། དམྱལ་བ་ལ་སོགས་པ་འཁོར་ཞིང་འགྲོ་བ་མི་སྲིད་པ་དང༌། ལས་ཉོན་རྒྱུའི་གནས་སྐབས་རྟག་ན་དེ་ཁོ་ན་ལ་བསྡད་དེ། སྡུག་བསྔལ་འབྲས་བུའི་གནས་སྐབས་སུ་འཁོར་ཞིང་གྲོང་བ་མི་སྲིད་པའི་ཕྱིར་རོ། །མི་རྟག་པ་ཡང་འཁོར་ཞིང་མི་འགྲོ་སྟེ། མི་རྟག་པ་ནི་སྐད་ཅིག་རེ་རེ་ལ་འདས་ཟིན་པའི་ཕྱིར། སྐད་ཅིག་གཉིས་པ་ཕན་ཆད་ལ་འཁོར་ཞིང་འགྲོ་མཁན་མེད་པའི་ཕྱིར་རོ། །ཕུང་སོགས་ཆོས་འདི་དག་འཁོར་བའི་ངོ་བོར་ཡང་མི་རིགས་ཏེ། ངོ་བོ་ཉིད་ཀྱིས་རྟག་པ་ཡང་མ་ཡིན་མི་རྟག་པ་ཡང་མ་ཡིན་པའི་ཕྱིར་རོ། །རྟག་ན་སྔ་ཕྱི་གཅིག་པས་གཅིག་པར་འགྱུར་ལ། མི་རྟག་ན་སྔ་ཕྱི་ཐ་དད་པས་དུ་མར་འགྱུར་རོ། །གཅིག་དང་དུ་མ་བྲལ་བའི་ཕྱིར་རྟག་མི་རྟག་ཀྱང་མི་འཐད་དོ། །འཁོར་བ་གནས་ཚུལ་ལ་ཡོད་ན་སངས་རྒྱས་ཀྱིས་མི་གཟིགས་པ་མི་སྲིད་ཀྱང༌། དེ་མེད་པས་དངོས་སུ་ནི་མི་གཟིགས་ཀྱང༌། མངོན་ཤེས་ཅན་གྱིས་གཞན་གྱི་རྨི་ལམ་མཐོང་བ་ལྟར་མཁྱེན་ནོ། །ཉེར་ལེན་གྱི་ཕུང་པོ་སྡུག་བསྔལ་འདི་ཡང༌། རང་གིས་རང་ཉིད་བྱས་པར་གྲངས་ཅན་པ་ལ་སོགས་པ་འདོད་ཅིང༌། ངོ་བོ་ཉིད་ཀྱིས་གཞན་ལས་བྱུང་བར། ཉན་ཐོས་པ་དང༌། སེམས་ཙམ་པ་དང༌། མུ་སྟེགས་གཞན་ཕལ་ཆེར་འདོད་པ་དང༌། གཉིས་ཀ་ལས་བྱུང་བར་གཅེར་བུ་པ་དག་སྨྲ་ལ། རྒྱུ་མེད་པར་འདོད་པ་ནི། ངོ་བོ་ཉིད་རྒྱུར་སྨྲ་བ་དག་གོ །དེ་དག་འགོག་པའི་རིག་པ་ནི་གོང་དུ་བཤད་ཟིན་ལ། རྒྱུ་མེད་ནི་མངོན་སུམ་དང་ཡང་འགལ་ལོ། །ཡང་ལྷའི་བྱིན་མིར་


TNT17_Page_0649
[མ་དཔེ་གཟིགས་ན་འདིར་གནོན།]

གྱུར་པའི་སྐབས་སུ་ལས་བསགས་ནས། དམྱལ་བར་འགྱུར་བའི་སྐབས་སུ་མྱོང་བའི་སྡུག་བསྔལ་གང་ཡིན་པ་དེ། བདག་གིས་བྱས་པ་ཡིན་ན། དམྱལ་བའི་རྟེན་ལ་ལས་བསགས་པར་འགྱུར་ཞིང༌། དམྱལ་བ་དང་མི་གཉིས་གཅིག་པར་ཡང་ཐལ་ལ། མིའི་རྟེན་ལ་དམྱལ་བའི་སྡུག་བསྔལ་མྱོང་བར་ཡང་འགྱུར་བས་རྟག་པའི་སྐྱོན་དུ་འགྱུར་ཞིང་ངོ་བོ་ཉིད་ཀྱིས་གཞན་པས་བྱས་ན་ནི། གཞན་གྱིས་ལས་བསགས་པའི་གཞན་གྱིས་སྡུག་བསྔལ་མྱོང་བར་འགྱུར་བས་མ་བྱས་པ་དང་ཕྲད་པར་ཐལ་ལོ། །གཉིས་ཀས་བྱས་ན་གཉིས་ཀར་ཐལ་བར་འགྱུར་ལ། སྡུག་བསྔལ་རྒྱུ་མེད་ན་ནི། སེལ་བའི་ཐབས་ཀྱིས་ཟློག་པ་ཡང་མི་འཐད་དོ། །དེ་ལྟར་མཐའ་བཞི་པོ་མི་རུང་ཡང༌། རིག་ཤེས་ཀྱིས་མ་དཔྱད་པའི་ཤེས་ངོར། རྒྱུ་རྐྱེན་དུ་མ་ཚོགས་པའི་རྟེན་འབྲེལ་ཙམ་ལས་བྱུང་བ་ནི་ཡིན་ནོ། །རྟེན་འབྲེལ་ཡན་ལག་བཅུ་གཉིས་དེ་ཡང་ཉན་ཐོས་སྡེ་པ་རྣམས་ཀྱིས་འདོད་པ་དང་མི་མཚུངས་ཏེ། རྟེན་ནས་བྱུང་བ་ཉིད་ཡིན་པའི་ཕྱིར། སྐྱེ་བའི་ངོ་བོ་ཡང་མེད་ལ་གནས་པའི་ངོ་བོ་ཡང་མེད་པས་སྟོང་པར་ཤེས་སོ། །དངོས་པོ་འདི་རྣམས་རྒྱུ་རྐྱེན་ཁོ་ནའི་གཞན་དབང་དུ་གྱུར་པའི་ཕྱིར། རང་ཚུགས་ཐུབ་པའི་རང་དབང་མེད་དེ་གཞན་ལ་བརྟེན་ནས་བཏགས་པ་ཙམ་མོ། །དེ་ལྟར་རྟེན་འབྲེལ་དང་སྟོང་ཉིད་ཀྱི་རྣམ་བཞག་གོ་ཡང༌། དེ་ལ་འཛིན་པ་དམ་པོ་དང༌། མཆོག་ཏུ་འཛིན་པའི་ང་རྒྱལ་བྱེད་པ་ནི། ལྷ་བདུད་དུ་བབས་པ་ལྟ་བུ་ཡིན་པས་ཤིན་ཏུ་སྨད་ལ། སྟོང་ཉིད་ལ་དངོས་པོར་ཞེན་པ་ཞེས་བྱ་བ་ནི། སྟོང་ཉིད་ཀྱི་རྣམ་


TNT17_Page_0650
[མ་དཔེ་གཟིགས་ན་འདིར་གནོན།]

བཞག་གོ་བའི་གོ་ཡུལ་གྱི་བརྟགས་ཆད་དེ་གནས་ལུགས་ཡིན་པར་འཁྲུལ་བ་སྟེ། དེ་ལྟར་ཡིད་ལ་བྱས་པ་ནི། མཉམ་གཞག་དངོས་གཞིའི་དུས་སུ་དུག་ཏུ་འགྱུར་བ་ཡིན་ནོ། །འཁོར་བའི་སྡུག་བསྔལ་རྒྱུ་བཅས་རང་བཞིན་མེད་པར་བསྟན་པས། ཆོས་དབྱིངས་དེ་ལ་ནི་ཕྱོགས་བཅུ་དུས་གསུམ་གྱི་སེམས་ཅན་འཁོར་བར་འཁོར་བའི་ཚེ་ན་ཡང༌། འཁོར་བའི་དྲི་མས་ནམ་དུ་ཡང་མ་གོས་ཏེ། དྲི་མ་མེད་པ་ཞེས་པ་དེ་ཉིད་རྒྱས་པར་བཤད་དོ། །དེ་ལྟར་ཡང༌། བེམ་པོ་གཞན་དབང་སྟོང་པ་ཉིད། །སྒྱུ་མ་བཞིན་དུ་རྐྱེན་བྱུང་བར། །མགོན་པོ་ཁྱོད་ཀྱིས་ཆོས་ཀུན་གྱི། །དངོས་མེད་གོམས་པར་མཛད་པ་ལགས། །ཞེས་ཏེ། བེམ་པོ་སྟེ་ཀུན་བཏགས་དང༌། གཞན་དབང་སྟེ་འཁྲུལ་སྣང་ཅན་གྱི་ཤེས་པ་ཡུལ་དག་བཅས་པ་ཐམས་ཅད་རང་གི་ངོ་བོས་མ་གྲུབ་པའི་སྟོང་པ་སྒྱུ་མ་ལྟ་བུ་རྗེས་ཐོབ་ཏུ་བསྒོམས་ཤིང༌། མཉམ་གཞག་ཏུ་དངོས་པོ་མེད་པ་སྟེ་ཡོངས་གྲུབ་ཀྱི་དོན་ལ་གོམས་པར་བྱས་པས། ཆོས་ཐམས་ཅད་ཀྱི་རང་བཞིན་གནས་ལུགས་ལ་ངང་གིས་གནས་ཤིང༌། འཁྲུལ་བ་སངས་པ་ཙམ་ལ་དྲི་བྲལ་གྱི་བྱང་ཆུབ་ཅེས་བརྗོད་དེ། སྔར་དྲི་མ་འཁོར་བའི་ཆོས་ཡོད་ནས། ཕྱིས་དེ་སྤངས་པ་མ་ཡིན་ཏེ་དྲི་མ་གདོད་ནས་མ་གྲུབ་པས། དྲི་མ་དང་བྲལ་བ་མེད་པ་ཞེས་སོ། །དེ་ལྟར་ཡང་རྒྱལ་ཚབ་ཆེན་པོས། གཉིས་ལས་གཞན་མེད་དེ་ནི་ནོར་བ་སྐྱེས། །དེ་ཕྱིར་ཐར་བ་ནོར་ཙམ་ཟད་པ་ཡིན། །ཅེས་ཏེ་དེ་དག་ནི་གཞན་དབང་སྐྱེ་བ་ངོ་བོ་ཉིད་མེད་པའི་དབང་དུ་བྱས་པའོ། །ད་ནི་དེ་བཞིན་ཉིད་ཆོས་ཀྱི་དབྱིངས་ལ། འཁོར་བའི་དུས་ན་ཡོན་ཏན་བྲི་བ་མེད་ཅིང་སྐྱོན་གང་བ་མེད་པ་དང༌། ཐར་པའི་གནས་སྐབས་ན་སྐྱོན་ནམ། སྒྲིབ་པ་བྲི་བ་


TNT17_Page_0651
[མ་དཔེ་གཟིགས་ན་འདིར་གནོན།]

མེད་ཅིང༌། ཡོན་ཏན་གང་བ་མེད་དེ། བྲི་གང་དུ་སྣང་བ་ནི། སེམས་ཅན་རྣམས་ཉིད་ཀྱི་འཁྲུལ་ངོར་སྣང་བ་ཙམ་ཞིག་ཡིན་ནོ། །སྐྱོན་ནམ་སྒྲིབ་པ་ནི་གདོད་མ་ནས་ཡོད་མ་མྱོང་བའི་ཕྱིར། འཁོར་བའི་གནས་སྐབས་ན་གང་ཞིང་འཕེལ་བ་ལྟར་སྣང་བ་ཡང་དངོས་གནས་ལ་མ་གྲུབ་ལ། ཡང་དག་པར་ན་སྤོང་རྒྱུ་མེད་པའི་ཕྱིར་ཐར་པའི་གནས་སྐབས་ན་བྲི་ཞིང་སྤང་བར་སྣང་བ་ཡང་བློ་ངོ་ཙམ་མོ། །ལམ་གྱིས་བསྡུས་པ་ཀུན་རྫོབ་ཀྱི་ཡོན་ཏན་ཡང༌། བདེན་པར་མ་གྲུབ་པའི་ཕྱིར། ལམ་བསྒོམས་པས་འཕེལ་བ་ལྟར་སྣང་བ་ཡང་བདེན་པར་མ་གྲུབ་ལ། གདོད་མ་ཆོས་ཉིད་ཀྱི་ཡོན་ཏན་ནི། དང་པོ་ཉིད་ནས་རང་ཆས་སུ་བཞུགགས་པས། འཁོར་བའི་སྐབས་སུ་སེམས་ཅན་རྣམས་གཉིད་ཀྱིས་མ་མཐོང་བར་ཟད་ཀྱི། ཆོས་ཉིད་རང་ངོས་ནས་ཉམས་ཤིང་བྲི་བའི་ཆ་མེད་པས། སངས་རྒྱས་ཐོབ་པའི་དུས་ན། ཡོན་ཏན་དཔག་ཏུ་མེད་པ་གསར་དུ་སྐྱེས་པ་ལྟར་སྣང་བ་ཡང༌། སློབ་པའི་གནས་སྐབས་ཀྱི་བློའི་མཐོང་ཚུལ་ཡིན་གྱི། སྒྲིབ་པ་སངས་པས་ཆོས་ཉིད་ལ་ཇི་ལྟར་གནས་པ་དེ་ལྟར་མཐོང་བ་ཁོ་ན་ལས་གཞན་གསར་དུ་སྐྱེས་པ་ཅུང་ཟད་ཀྱང་མེད་དོ། །དེ་ལྟར་ཡང་རྒྱ་ཚབ་ཆེན་པོས། ཉེས་པ་གློ་བུར་དང་ལྡན་དང༌། ཡོན་ཏན་རང་བཞིན་ཉིད་ལྡན་ཕྱིར། །ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་ཤིང༌། བསྟོད་པ་ལས། ཁྱོད་ཀྱིས་ཅུང་ཟད་མ་བསྐྱེད་ཅིང༌། །འགའ་ཡང་བཀག་པ་མ་མཆིས་ལ། །སྔོན་གྱི་ཇི་ལྟར་ཕྱིས་དེ་བཞིན། །དེ་བཞིན་ཉིད་དུ་ཐུགས་སུ་ཆུད། །ཅེས་ཏེ། དེ་བཞིན་ཉིད་ནི་འགྱུར་མེད་ཡོངས་


TNT17_Page_0652
[མ་དཔེ་གཟིགས་ན་འདིར་གནོན།]

གྲུབ་སེམས་ཉིད་དེ། སེམས་རང་བཞིན་གྱིས་འོད་གསལ་བ་གཉིས་མེད་ཀྱི་ཡེ་ཤེས་སམ་ཆོས་དབྱིངས་དོན་དམ་བདེན་པ་དེ་བཞིན་གཤེགས་པའི་སྙིང་པོ་ཞེས་བྱ་བ་རྣམས་ཡིན་ཏེ། སྔོན་འཁོར་བ་པ་རྣམས་ཀྱི་དེ་བཞིན་ཉིད་ཇི་ལྟ་བ། ཕྱིས་མྱ་ངན་ལས་འདས་པའི་ཆོས་ཉིད་ཀྱང་དེ་བཞིན་ཁོ་ན་སྟེ། རྣམ་འགྱུར་མེད་ཅིང་རྟག་པ་དེ་ལ་ཀུན་ནས་ཉོན་མོངས་པའི་ཆོས་འགའ་ཡང་བཀག་པ་མེད་དེ། ཕྱིར་བསལ་ཞིང་བྲི་བ་མེད་ལ། རྣམ་པར་བྱང་བ་དགེ་བའི་ཆོས་ཅུང་ཟད་ཀྱང་མ་བསྐྱེད་ཅིང་གང་བར་མ་བྱས་པ་སྟེ། བསལ་ཞག་མེད་པའམ། བྲི་གང་མེད་པའི་དོན་ཐུགས་སུ་ཆུད་པ་ནི་སངས་རྒྱས་སོ། །དེ་དག་གིས་ནི་ཡོངས་གྲུབ་དོན་དམ་ངོ་བོ་ཉིད་མེད་པ་དེ་གསལ་པོར་བསྟན་ཏོ། །དེ་ལྟ་ན་མདོ་འདི་དང༌། བསྟོད་པ་འདིས་ཀྱང་གཞན་སྟོང་དབུ་མ་ཆེན་པོ་ཁོ་ན་གསལ་བར་བསྟན་གྱི། འདི་ན་སྟོང་པ་ཆལ་ཡུག་ཙམ་ཞིག་སྙིང་ལ་བཅངས་ནས། ཟུང་འཇུག་ཡིན་ཚུལ་གྱི་སྒྲུབ་བྱེད་ལྟར་སྣང་མང་པོ་ཞིག་འགོད་ཅིང༌། སྨྱོན་པ་འགའ་ཞིག་གི་ཚིག་ལྟར་རྒྱུན་མི་འཆར་པ་སྨྲ་བའི་ཚེག་འཕྲེང་རིང་པོ་ཅན། རང་སྟོང་སྨྲ་བའི་བཤེས་གཉེན་དུ་གྲགས་པ་རྣམས་ཀྱི་ལུགས་དང་ཡེ་མི་མཐུན་ནོ། །འོན་ཀྱང༌། ཡོན་ཏན་མེད་ལ་གང་གུས་པ། །དེ་བླུན་མི་དགེའི་ལས་ལས་སྐྱེས། །ཞེས་གསུངས་པ་དོན་ལ་གནས་པས། ཚོགས་མ་བསགས་ཤིང༌། སྒྲིབ་པ་མ་སྦྱངས་པའི། སྔོན་ནས་ད་ལྟའི་བར་གྱི་ཤེས་རབ་ཆེ་རུ་རེ་བ་ཕལ་ཆེ་བ་ཡང༌། ངེས་པའི་དོན་ལས་ཕྱིར་ཕྱོགས་པ་ཤ་སྟག་བྱུང་ཞིང་འབྱུང་བར་འགྱུར་ལ། ད་ལྟར་ཡང་སྣང་ངོ༌། །གང་མོས་པའི་དགེ་བ་ཕུན་སུམ་


TNT17_Page_0653
[མ་དཔེ་གཟིགས་ན་འདིར་གནོན།]

ཚོགས་པ་བསགས་པ་དེ་རྣམས་ཁོ་ན་ཟབ་མོའི་དོན་འདི་ལ་མོས་ཏེ། དེ་དག་ནི་བརྩོན་པ་དང་བྲལ་ཞིང་མ་བསྡམས་པར་གྱུར་ཀྱང་མོས་པ་ཁོ་ནའི་མཐུ་ལས་ཐམས་ཅད་རང་སྟོང་དུ་སྨྲ་བ་ཚུལ་ཁྲིམས་དང་ལྡན་པ། བརྩོན་པ་དང་ལྡན་པ་དག་གིས། སྐྱེ་བ་བརྒྱར་ཚོགས་བསགགས་པ་ལས་ཀྱང་ཆེས་བྱང་ཆུབ་ལ་ཉེ་བ་ཡིན་ནོ། །བཅོམ་ལྡན་འདས་ཀྱིས་ཀྱང༌། མེ་ཏོག་ཙམ་པ་ཀ་ནི་རྙིང་གྱུར་ཀྱང༌། །མེ་ཏོག་ཕལ་པ་གཞན་གྱི་དོ་ཟླ་མིན། །ང་ཡི་དགེ་སློང་ཚུལ་ཁྲིམས་འཆལ་གྱུར་ཀྱང༌། །མུ་སྟེགས་ཕལ་པ་གཞན་གྱི་དོ་ཟླ་མིན། །ཞེས་གསུངས་པ་འདིར་ཡང་སྦྱར་བར་བྱ་སྟེ། རང་སྟོང་སྨྲ་བར་གྲགས་པ་རྣམས་ཀྱང་དམ་པའི་ཆོས་མཐར་ཐུག་ལ་སྡང་བ་ཡིན་པའི་ཕྱིར་དང༌། བྱང་ཆུབ་སེམས་དཔའ་མང་པོ་ལ་ཞེ་འགྲས་པ་ཡིན་པའི་ཕྱིར་སངས་རྒྱས་པའི་མུ་སྟེགས་ཅན་ནོ། །གཞན་སྟོང་དབུ་མ་ཆེན་པོ་སྨྲ་བ་ནི། སངས་རྒྱས་ཀྱི་སྐུ་གསུང་ཐུགས་ཀྱི་གསང་བ་ལ་བལྟ་བར་དབང་བའི་ཕྱིར། སྤྱི་མིང་བྱེ་བྲག་ལ་བཏགས་ནས། ང་ཡི་དགེ་སློང་ཞེས་ཐུན་མོང་མ་ཡིན་པའི་སྲས་སུ་བསྟན་པའོ། །ཞེས་བདག་གིས་སྨྲས་པའི་གནས་འདི་ལ་ནི། སངས་རྒྱས་སྲས་དང་བཅས་པ་དཔང་པོ་ཡིན་ཅིང༌། འཇིག་རྟེན་གྱི་ཁམས་ན་མཐུ་དང་རྫུ་འཕྲུལ་ཆེ་བའི་ལྷ་དང་འབྱུང་པོ་དཀར་ཕྱོགས་སྐྱོང་བ་རྣམས་ཀྱང་དཔང་པོར་གནས་སོ། །དེ་ལྟར་ན་ཟབ་མོ་རྣམ་པ་བརྒྱད་ཅུང་ཟད་རྒྱས་པར་བཤད་ཟིན་ཏོ། །གཉིས་པ་མཁས་པར་བྱ་བའི་དངོས་པོ་དྲུག་གི་སྒོ་ནས་གཏན་ལ་དབབ་པ་ལ། ཐེག་པ་ཐུན་མོང་གི་ལུགས་ཀྱིས་ནི་རྒྱུ་རྐྱེན་རྟེན་འབྲེལ་ལ་མཁས་པ་ཙམ་ཡིན་ལ། འདིར་ནི་ཀུན་རྫོབ་བདེན་


TNT17_Page_0654
[མ་དཔེ་གཟིགས་ན་འདིར་གནོན།]

པ་རྒྱུ་རྐྱེན་རྟེན་འབྲེལ་ལ་བརྟེན་ནས། ཆོས་དེ་རྣམས་བདེན་མེད་དུ་གཏན་ལ་ཕབས་ཤིང༌། དེ་ཡང་སྤྲོས་བྲལ་དུ་རྟོགས་ལ། སྤྲོས་བྲལ་དེའི་རང་གི་ངོ་བོ་ཡེ་ཤེས་འགྱུར་མེད་རྣམ་པ་ཐམས་ཅད་པར་མངོན་སུམ་དུ་རྟོགས་པ་ན། ཇི་ལྟ་བ་དང་ཇི་སྙེད་པ་ཐམས་ཅད་ལ་ཆེས་མཁས་པར་འགྱུར་རོ། །དེ་ཡང་ཕུང་པོ་ལ་མཁས་པ་དང༌། སྐྱེ་མཆེད་ལ་མཁས་པ་དང༌། ཁམས་ལ་མཁས་པ་དང༌། རྟེན་འབྲེལ་ལ་མཁས་པ་དང༌། བདེན་པ་ལ་མཁས་པ་དང༌། གནས་དང་གནས་མ་ཡིན་པ་ལ་མཁས་པའོ། །དང་པོའི་དབང་དུ་བྱས་ན་ཤཱ་རིའི་བུ་དེ་ལྟ་བས་ན། སྟོང་པ་ཉིད་ལ་གཟུགས་མེད་ཅེས་པ་ལ་སོགས་པའོ། །གཉིས་པའི་དབང་དུ་བྱས་ནས། མིག་མེད་རྣ་བ་མེད་ཅེས་པ་ལ་སོགས་པའོ། །གསུམ་པའི་དབང་དུ་བྱས་ནས། མིག་གི་ཁམས་མེད་ཅེས་པ་ལ་སོགས་པའོ། །བཞི་པའི་དབང་དུ་བྱས་ནས། མ་རིག་པ་མེད་མ་རིག་པ་ཟད་པ་མེད་ཅེས་པ་ལ་སོགས་པའོ། །ལྔ་པའི་དབང་དུ་བྱས་ནས། དེ་བཞིན་དུ་སྡུག་བསྔལ་བ་དང་ཞེས་པ་ལ་སོགས་པའོ། །དྲུག་པའི་དབང་དུ་བྱས་ནས། ཡེ་ཤེས་མེད་ཐོབ་པ་མེད་མ་ཐོབ་པ་ཡང་མེད་དོ། །ཞེས་པའོ། །དེ་རྣམས་ཀྱི་ཚིག་དོན་ཕལ་ཆེར་གོ་བླ་ལ། དོན་གྱི་མདོ་འདི་ལྟར་བཟུང་བར་བྱ་སྟེ། སྟོང་པ་ཉིད་ལ་གཟུགས་སོགས་ཀུན་རྫོབ་ཀྱིས་ཆོས་དེ་དག་གང་ཡང་མེད་ཅེས་བྱ་བ་ནི། སྟོང་གཞི་གཉིས་མེད་ཀྱི་ཡེ་ཤེས། དོན་དམ་སྟོང་པ་ཉིད་འདི་ལ། སྟོངས་པར་བྱ་རྒྱུ་གཟུང་འཛིན་ཀུན་རྫོབ་ཀྱི་ཆོས་གང་ཡང་མེད་དོ་ཞེས་བྱ་བ་ཡིན་གྱི་གཞན་དུ་རང་སྟོང་སྨྲ་བ་གྲགས་པ་རྣམས་ཀྱི་ལྟར་ན། སྟོང་པ་ཉིད་ཁྱད་གཞིར་བྱས་ནས་དེ་ལ་གཟུགས་མེད་ཅེས་


TNT17_Page_0655
[མ་དཔེ་གཟིགས་ན་འདིར་གནོན།]

སོགས་མི་རུང་བར་འགྱུར་ཏེ་གཟུགས་ཉིད་གཟུགས་ངོ་བོས་མེད་པ་ཡིན་ལ། དེ་ལས་གཞན་པའི་སྟོང་གཞིའི་སྟོང་ཉིད་ཁས་མི་ལེན་པའི་ཕྱིར་རོ། །འདི་དག་གི་ལྟར་ན། གཟུགས་མེད་པ་ནི་སྟོང་པ་ཉིད་དོ་ཞེས་པ་ནས། མ་ཐོབ་པ་མེད་པ་ནི་སྟོང་པ་ཉིད་དོ་ཞེས་པའི་བར་དུ་འདོན་པར་རིགས་ཀྱི། མདོའི་དངོས་ལྟར་བྱས་ན་འདི་ལུགས་དང་འགལ་བར་འགྱུར་རོ། །འོ་ན་ཅི་ཞེ་ན། མེད་ཅེས་གསུངས་པ་ནི་ངོ་བོ་ཉིད་མེད་པ་སྟེ། དེ་སྐད་དུ་འཕགས་པ་དབྱིག་གཉེན་གྱི་ཞལ་ནས་ཀྱང༌། ངོ་བོ་ཉིད་ནི་རྣམ་གསུམ་གྱི། །ངོ་བོ་ཉིད་མེད་རྣམ་གསུམ་ལ། །བརྟེན་ནས་ཆོས་རྣམས་ཐམས་ཅད་ནི། །རང་བཞིན་མེད་པར་བསྟན་པ་ཡིན། །ཅེས་གསུངས་ཏེ། གཅིག་ལ་དཔེར་མཚོན་ན། གཟུགས་མེད་ཅེས་གསུངས་པས། ཀུན་བཏགས་ཀྱི་གཟུགས་ཕུང་ནི་དོན་དམ་དུ་ལྟ་ཞོག་ཀུན་རྫོབ་ཏུ་ཡང་མི་བསླུ་བའི་མཚན་ཉིད་ཀྱིས་གནས་པ་མེད་པས་འཁྲུལ་ངོ་ཙམ་མ་གཏོགས་གང་ཡང་གྲུབ་པ་མེད་པ་དང༌། གཟུགས་ཕུང་དུ་སྣང་བའི་རྣམ་རིག་གཞན་དབང་ནི། གཞན་གྱི་དབང་གིས་སྐྱེ་ཞིང་འཇིག་པས། བླང་དོར་གྱི་ཡུལ་ཙམ་ཡིན་ཡང་རང་གི་ངོ་བོས་བདེན་པར་མ་གྲུབ་པ་དང༌། གཟུགས་ཀྱི་ཆོས་ཉིད་ཡོངས་གྲུབ་གང་ཡིན་པ་ནི་དེ་ནི་གློ་བུར་གྱི་དྲི་མ་གཟུང་འཛིན་འཁྲུལ་བའི་ངོ་བོར་མེད་པས། མེད་ཚུལ་རྣམ་པ་གསུམ་གྱི་སྒོ་ནས། གཟུགས་ཕུང་གི་ཐ་སྙད་འཇུག་པའི་གཞི་རྣམས་མེད་ཅེས་བསྟན་ཏོ། །འདིས་གཞན་ཐམས་ཅད་ལ་ཡང་རིགས་འགྲེའོ། །དེ་ལྟར་ན་ཁྱད་གཞི་ཆོས་ཉིད་ཀྱི་ཡེ་ཤེས་དེ་ལ། ཀུན་བཏགས་ཀྱི་གཟུགས་ནི་ནམ་གྲུབ་པ་ཡང་མེད་ཅིང༌། རྣམ་བཏགས་ཀྱི་གཟུགས་


TNT17_Page_0656
[མ་དཔེ་གཟིགས་ན་འདིར་གནོན།]

ཀྱང་བདེན་པའི་དངོས་པོར་ནམ་དུ་ཡང་གྲུབ་པས། དེ་གཉིས་རང་གི་ངོ་བོས་སྟོང་པའི་ཚུལ་གྱིས་མེད་ཅིང༌། ཡོངས་གྲུབ་ཆོས་ཉིད་ཀྱི་གཟུགས་ནི་རང་གི་ངོ་བོ་ཆོས་ཉིད་ཀྱིས་སྟོངས་པ་མ་ཡིན་ཀྱང༌། གཟུང་འཛིན་གློ་བུར་གྱི་དྲི་མའི་ངོ་བོར་མེད་པས། མེད་ཅེས་བྱ་བ་ནི་གཞན་གྱི་སྟོངས་པའི་ཚུལ་གྱིས་མེད་པའོ། །དེ་ལྟར་ན་ངག་དོན་སྙིང་པོ་བསྡུས་པ་ནི། སྟོང་ཉིད་ཡེ་ཤེས་དེའི་སྟོང་ན་ཀུན་བཏགས་དང་གཞན་དབང་གིས་བསྡུས་པའི་གཟུགས་སོགས་ཡེ་ནས་མ་གྲུབ་པས་མེད་ཅིང༌། ཆོས་ཉིད་ཀྱི་གཟུགས་སོགས་ནི་སྟོང་ཉིད་ཡེ་ཤེས་དེ་ཀ་རང་ཡིན་ཀྱང༌། གཟུང་འཛིན་འཁོར་བའི་ཆོས་སུ་མེད་པས་མེད་ཅེས་པའོ། །སྟོང་གཞི་ཆོས་དབྱིངས་ལ་གཟུགས་ནས་མ་ཐོབ་པའི་བར་དུ་མེད་ཅེས་པ་རགས་བཤད་དང༌། རེ་རེ་བཞིན་ངོ་བོ་ཉིད་གསུམ་དུ་ཕྱེ་བ་ཞིག་བཤད་ཀྱི་ཁྱད་ཙམ་ཡིན་ཏེ། ཀུན་བཏགས་གཞན་དབང་གཉིས་གཅིག་ཏུ་བསྡོམས་ནས། ཀུན་རྫོབ་ཀྱིས་ཡེ་ནས་སྟོང་པ་དང༌། དོན་དམ་ནི་གཟུང་འཛིན་གྱི་མཚན་ཉིད་ཅན་གྱི་སྟོང་པར་བྱས་ནས། བདེན་པ་གཉིས་ཀྱི་སྒོ་ནས་བཤད་ཀྱང་རུང༌། དོན་ལ་ཁྱད་མེད་དོ། །རྟེན་འབྲེལ་ལ་མཁས་པའི་སྐབས་སུ། འདི་ཙམ་ཞིག་གོ་དགོས་ཏེ། མ་རིག་འདུ་བྱེད་རྣམ་པར་ཤེས། །མིང་གཟུགས་སྐྱེ་མཆེད་རེག་པ་དང༌། །ཚོར་བ་སྲེད་ལེན་སྲིད་པ་དང༌། །སྐྱེ་བ་རྒ་ཤི་བཅུ་གཉིས་སོ། །དེ་ལ་མ་རིག་པ་ནི། ཤེས་པར་བྱ་བའི་གནས་ལ་རྨོངས་ཤིང་མི་ཤེས་པའི་བློ་ཤེས་པ་མི་གསལ་བའི་རྣམ་པ་ཅན། བདེན་པ་བཞིའམ་རྒྱུ་འབྲས་རྟེན་འབྲེལ་གྱི་དོན་ལ། མུན་ཁྲོད་ཀྱི་གཟུགས་སམ། ལ་ཕར་


TNT17_Page_0657
[མ་དཔེ་གཟིགས་ན་འདིར་གནོན།]

རྒྱབ་ཀྱི་དངོས་པོ་ལྟར། ཕྱོགས་ཙམ་ཡང་མི་རིག་པའི་རྣམ་རྟོག་སྟེ། དེ་ཁོ་ན་ཉིད་ལ་རྨོངས་པ་དང་ལས་འབྲས་ལ་རྨོངས་པ་གཉིས་སོ། །ཕྱི་མ་ནི་ལས་དགེ་སྡིག་ལས་འབྲས་བུ་བདེ་སྡུག་འབྱུང་བ་མི་ཤེས་པའི་སེམས་བྱུང་ཡིན་ལ། སྔ་མ་ལས་གསུམ་སྟེ་མི་རྟག་སྡུག་བསྔལ་བདག་མེད་སོགས་བདེན་བཞིའི་མཚན་ཉིད་ལ་རྨོངས་པ་དང༌། སྤྲོས་བྲལ་གྱི་སྟོང་པ་ཉིད་ལ་རྨོངས་པ་དང༌། དེ་བཞིན་གཤེགས་པའི་སྙིང་པོའི་གནས་ལ་རྨོངས་པའོ། །དེ་དག་ལས་ལས་འབྲས་ལ་རྨོངས་པས་ནི་མི་དགེ་བའི་ལས་འཕེན་པར་བྱེད་ལ། བདེན་བཞིའི་དེ་ཁོ་ན་ཉིད་ལ་རྨོངས་པས་ནི། འཁོར་བ་ཁམས་གསུམ་དུ་སྐྱེ་བའི་ལས་དགེ་སྡིག་གཉིས་ཀར་འཕེན་པར་བྱེད་ཅིང༌། སྤྲོས་བྲལ་ལ་རྨོངས་པས་ནི། ཁམས་གསུམ་ལས་འདས་ཀྱང༌། ཡེ་ཤེས་ཀྱི་ལུས་སུ་ནི་མ་གྱུར་པ་དམན་པའི་ཡིད་ལུས་དང༌། ཏིང་ངེ་འཛིན་གྱི་ལུས་འགྲུབ་པར་བྱཻད་པའི་ཟག་མེད་ཀྱི་ལས་དང༌། ལས་བར་མ་རྣམས་ཀྱང་འཕེན་པར་བྱེད་དོ། །དེ་བཞིན་གཤེགས་པའི་སྙིང་པོའི་གནས་ལ་རྨོངས་པ་ནི་མ་རིག་བག་ཆགས་ཀྱི་ས་ཡིན་ཏེ། ཡེ་ཤེས་ཀྱི་སྐུ་ཡིད་ལུས་རྣམ་པ་གསུམ་འགྲུབ་བྱེད་ཀྱི་ཟག་མེད་ཀྱི་ལས་ཚུན་ཆོད་ཀྱང་འཕེན་པར་བྱེད་དོ། །སྤྱིར་དེ་དག་ཀྱང་སྔ་མ་སྔ་མ་ཡོད་ཕྱིན། ཕྱི་མ་ཕྱི་མ་རྣམས་དེ་དང་ལྷན་ཅིག་ངེས་པར་ཡོད་པས་དེ་བཞིན་གཤེགས་པའི་སྙིང་པོ་ལ་རྨོངས་པས་ནི་དེ་ཐམས་ཅད་འཕེན་པར་བྱེད་ལ། སྤྲོས་བྲལ་ལ་རྨོངས་པས་ནི་ཡིད་ལུས་ཀྱི་ལས་མ་གཏོགས་གཞན་ཐམས་ཅད་བྱེད། ཅེས་པ་ནས། ལས་འབྲས་ལ་རྨོངས་པས་ནི་མི་དགེ་བ་ཁོ་ན་འཕེན་ནོ། །ཞེས་པའི་བར་དུ་སྦྱར་རོ། །


TNT17_Page_0658
[མ་དཔེ་གཟིགས་ན་འདིར་གནོན།]

འོ་ན་མ་རིག་པའི་ཡན་ལག་ནི། བདག་དང་བདག་གིར་འཛིན་པའི་འཇིག་ཚོགས་ལ་ལྟ་བ་ཡིན་པར་འཕགས་པ་ཀླུ་སྒྲུབ་དང༌། དཔལ་ཆོས་ཀྱི་གྲགས་པ་སོགས་ཀྱང་བཞེད་པ་མ་ཡིན་ནམ། ཅིའི་ཕྱིར་ངེས་པའི་དོན་ལ་དེ་མི་འདོད་ཅེ་ན། མ་རིག་པ་དང་འཇིག་ཚོགས་ལ་ལྟ་བ་ནི་ངོ་བོ་ཐ་དད་པ་ཡིན་ཀྱང༌། ཁམས་གསུམ་དུ་འཕེན་བྱེད་ཀྱི་མ་རིག་པ་ནི། འཇིག་ལྟ་དང་འབྲེལ་བ་ཅན་ཁོ་ནར་འབྱུང་བས་ན། མ་རིག་པ་ནི་རྣམ་པ་མི་གསལ་བས། དེའི་ཕྱོགས་ནས་མ་སྨོས་པར། འཇིག་ལྟ་རྣམ་པ་གསལ་ཞིང་ངོ་ཤེས་སླ་བའི་ཕྱིར། ཕྱོགས་དེ་ནས་སྨོས་པ་སྟེ། དཔེར་ན་ཁྱེའུ་གང་གི་རིགས་རུས་ཆོ་འབྲང་རྟོགས་དཀའ་བར་གྱུར་ན། རིགས་དང་རུས་ནས་མི་སྨོས་པར་མཚན་མ་མངོན་རྟགས་ཅན་གྱི་གོས་ལས་བརྩམས་ནས། ཁྱེའུ་དམར་པོ་དང༌། ཁྱེའུ་སེར་པོ་ཞེས་ཟེར་བ་ལྟ་བུའོ། །རིན་ཆེན་འཕྲེང་བ་ལས། ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ཅེས་པ་ནི། ངར་འཛིན་ལ་སོགས་པ་ཉོན་མོངས་པས་ལས་གསོག་ཅེས་པའམ། ངར་འཛིན་ཡོད་ན་འཁོར་བར་འཕེན་བྱེད་ཀྱི་ལས་གསར་པ་གསོག་ཐུབ་ཅེས་པའི་དོན་ཡིན་གྱི། ངར་འཛིན་མ་རིག་པའི་ཡན་ལག་ཏུ་སྟོན་པ་མ་ཡིན་ཅིང༌། འཕགས་པ་ཀླུས་ནི་མ་རིག་པ་བདག་འཛིན་དུ་བཞེད་པའི་གསལ་ཁ་མེད་ལ། མ་རིག་པའི་ཡན་ལག་ལ་གྲོགས་བདག་འཛིན་ངཻས་པར་དགོས་པའི་རྣམ་གཞག་འདི་ཡང༌། འཁོར་བ་ཁམས་གསུམ་དུ་སྐྱེ་བ་ཁོ་ནའི་དབང་དུ་བྱས་པ། ཉན་ཐོས་སྡེ་གཉིས་དང་ཐུན་མོང་གི་རྣམ་གཞག་ཡིན་ལ། ཐེག་ཆེན་ཐུན་མོང་མ་ཡིན་པའི་སྐབས་སུ། ཁམས་གསུམ་ལས་


TNT17_Page_0659
[མ་དཔེ་གཟིགས་ན་འདིར་གནོན།]

འདས་པ་རྣམ་པར་བྱང་བ་རྗེས་སུ་མཐུན་པའི་འཁོར་བ་འཇུག་ཚུལ་གྱི་རྟེན་འབྲེལ་བཅུ་གཉིས་ལས་མ་རིག་པའི་ཡན་ལག་སྤྲོས་བྲལ་དང་སྙིང་པོ་ལ་རྨོངས་པ་དེ་གཉིས་ནི། འཇིག་ལྟའི་ས་བོན་སྤངས་པ་དག་ལ་ཡང་ཡོད་པའི་ཕྱིར། མ་རིག་པའི་ངོས་འཛིན་འཇིག་ལྟ་ལ་བྱེད་པ་ཟབ་ཁྱད་དུ་རློམ་པ་ནི། ཟན་གྱི་ངོས་འཛིན་སྤང་ཟན་ལ་བྱེད་པ་ཟབ་ཁྱད་དུ་འདོད་པ་ལྟར། ཟབ་ཚུལ་གོ་ལོག་ཡིན་པར་ཤེས་པར་བྱའོ། །དེ་ལྟར་མ་རིག་པ་ལ་བརྟེན་ནས་ལུས་ངག་ཡིད་གསུམ་གྱི་འདུ་བྱེད་དུ་གཏོགས་པའི་བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བའི་ལས་གསུམ་པོ་གང་རུང་ཞིག་གསོག་པའི་འདུ་བྱེད་ཀྱི་ལས་འབྱུང་ངོ༌། །མ་རིག་པས་ཀུན་ནས་བསླངས་ཏེ་ལས་དེ་བྱས་ཤིང༌། བྱས་མ་ཐག་ཏུ་ཀུན་གཞི་རྣམ་ཤེས་ཏེ་ལས་དེའི་བག་ཆགས་དང་ས་བོན་ཅན་དུ་གྱུར་པ་ན། དེའི་མཐུ་ལས། ཚོགས་དྲུག་གི་རྣམ་པར་ཤེས་པ་རྣམས་ཀྱང་བག་ཆགས་དེས་བསླད་པའི་ནུས་པ་ཅན་དུ་གྱུར་ཏེ། ལས་བསགས་པའི་ཚེ་དེ་ཉིད་དང༌། བར་དོའི་གནས་སྐབས་ཀྱི་རྣམ་ཤེས་འགྱུར་བ་ཅན་དེ་ནི་རྣམ་ཤེས་ཀྱི་ཡན་ལག་གོ །དེ་ཉིད་མངལ་དུ་སྐྱེ་བ་བཟུང་མ་ཐག་པ་ན། ཚོར་འདུ་འདུ་བྱེད་རྣམ་ཤེས་ཏེ་མིང་བཞིའི་ཕུང་པོ་དང༌། ནུར་ནུར་པོ་ལ་སོགས་པའི་གནས་སྐབས་གྱི་འབྱུང་བ་དང་འབྱུང་གྱུར་རྣམས་ནི་གཟུགས་ཀྱི་ཕུང་པོ་སྟེ། མིང་གཟུགས་ཀྱི་ཡན་ལག་གོ །དེ་དག་འཕེལ་བ་ལས། མིག་སོགས་སྐྱེ་མཆེད་དྲུག་བྱུང་བ་ནི། སྐྱེ་མཆེད་དྲུག་གི་ཡན་ལག་གོ །མངལ་ནས་བཙས་པའི་རྗེས་སུ་དབང་པོ་དྲུག་དང༌། ཡུལ་དྲུག་དང༌། རྣམ་ཤེས་དྲུག་རྣམས་འདུས་ཏེ། ཡུལ་གྱི་རྣམ་པ་ལ་བརྟེན་


TNT17_Page_0660
[མ་དཔེ་གཟིགས་ན་འདིར་གནོན།]

ནས་ཤེས་པ་འགྱུར་བའི་རེག་པ་འབྱུང་བ་ནི་རེག་པའི་ཡན་ལག་གོ །དེ་ལ་བརྟེན་ནས་བདེ་བའམ་སྡུག་བསྔལ་ལམ་བཏང་སྙོམས་གང་རུང་ཞིག་ཉམས་སུ་མྱོང་བ་ནི་ཚོར་བའི་ཡན་ལག་གོ །དེ་ལ་བརྟེན་ནས་བདེ་བ་ལ་ཐོབ་པར་འདོད་ཅིང་ཡང་སྲེད་པ་དང༌། སྡུག་བསྔལ་ལ་འདོར་བར་འདོད་པའི་སྲེད་པ་དང༌། བཏང་སྙོམས་ལ་གནས་པར་དགའ་བའི་སྲེད་པ་འབྱུང་བ་ནི་སྲེད་པའི་ཡན་ལག་གོ །སྲེད་པ་དེ་འཕེལ་བ་ལས་བདེ་སྡུག་བཏང་སྙོམས་ཀྱི་རྒྱུ་རྣམས་ལ་འདོར་ལེན་བྱེད་འདོད་འབྱུང་བ་ནི་ལེན་པའི་ཡན་ལག་གོ །དེས་ཀྱང་སྲིད་པ་ཕྱི་མ་འཕེན་ནུས་ཀྱི་ལས་གསོག་པའམ། སྔར་འཕངས་ཟིན་པའི་ལས་ཀྱི་བག་ཆགས་གསོས་བཏབ་ནས། སྐྱེ་བ་འགྲུབ་པ་ལ་མངོན་དུ་ཕྱོགས་པར་བྱེད་པ་ནི་སྲིད་པའི་ཡན་ལག་གོ །དེ་ལ་བརྟེན་ནས་སྐྱེ་བ་ཕྱི་མའི་ཕུང་པོ་གྲུབ་པ་ནི། སྐྱེ་བའི་ཡན་ལག་གོ །དེ་ཉིད་ཀྱི་ཁམས་འགྱུར་བའི་ན་བ་དང༌། ན་ཚོད་འགྱུར་བའི་རྒས་པ་དང༌། སྲོག་འགྱུར་བའི་འཆི་བ་དང༌། ལུས་སེམས་གདུང་བར་བྱེད་པའི་མྱ་ངན་དང༌། ཟས་གོས་ལ་སོགས་པ་འདོད་པས་འཕོངས་པ་དང༌། སྨྲེ་སྔགས་འདོན་པ་དང་ཡིད་མི་བདེ་བ་དང༌། འཁྲུགས་པ་ལ་སོགས་པ་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་འདི་འབྱུང་བར་འགྱུར་ཏེ་རྒ་ཤིའི་ཡན་ལག་གོ །དེ་ལྟར་ཡན་ལག་བཅུ་གཉིས་པོ་ཡང༌། དུས་ཅིག་ཆར་དུ་ཚང་བ་དང༌། བྱ་བ་རྫོགས་པའི་སྐད་ཅིག་མ་གཅིག་ལ་ཚང་བ་དང༌། ཚེ་གཅིག་ལ་རྫོགས་པ་སོགས་ཀྱི་རྣམ་གཞག་དུ་མ་དང༌། བརྫུས་སྐྱེས་ཀྱི་འགྲོ་བ་དང༌། ཁམས་གོང་མའི་སེམས་ཅན་ལ། ཡན་ལག་ཅི་རིགས་ཚང་བ་ལས་ཡོངས་རྫོགས་


TNT17_Page_0661
[མ་དཔེ་གཟིགས་ན་འདིར་གནོན།]

མི་དགོས་པ་སོགས་རྣམ་གཞག་དུ་མ་ཡོད་ཀྱང༌། གཙོ་བོར་ཚེ་གཉིས་ལ་རྫོགས་པར་བྱས་ནས། འཕེན་པའི་ཡན་ལག་དང༌། འཕངས་པའི་ཡན་ལག་དང༌། འགྲུབ་བྱེད་ཀྱི་ཡན་ལག་དང༌། འགྲུབ་པའི་ཡན་ལག་སྟེ་བཞིར་བསྡུ་བའམ། ཡང་ན་ཚེ་གསུམ་ལ་བསྡུ་བའི་ལུགས་ཏེ། ཚེ་ལྔ་ལ་རྟེན་འབྲེལ་ཚར་གཉིས་རྫོགས་པར་འགྱུར་རོ། །འོན་ཀྱང་དེ་དག་གི་རྣམ་གཞག་རྒྱས་པ་འདིར་མི་སྤྲོའོ། །དེ་ནི་འཁོར་བ་འཇུག་པའི་རྟེན་འབྲེལ་ཡིན་ལ། མ་རིག་པ་སྤངས་པས་འདུ་བྱེད་ཀྱི་ཡན་ལག་འགགས་པ་སྟེ། སྐྱེ་བ་འཕེན་བྱེད་ཀྱི་ལས་མི་གསོག་པ་ནས། སྐྱེ་བ་འགགས་པས་རྒ་ཤི་མི་འབྱུང་བའི་བར་དུ་ནི་འཁོར་བ་བཟློག་པའི་རྟེན་འབྲེལ་ལོ། །རྟེན་འབྲེལ་རིམ་པ་འདི་གཉིས་ཁོ་ན། ལུས་འབྱུང་དང་ལུགས་ཟློག་གི་རྟེན་འབྲེལ་དུ་མདོ་དུ་མ་ལས་གསུངས་པའི་ཕྱིར། ལུགས་ཟློག་ལ་རྒ་ཤི་ནས་མ་རིག་པའི་བར་དུ། མས་ཟློག་ཁོ་ན་དགོས་པར་འདོད་པ་ནི་བཤད་སྒྲོས་ཕྱོགས་རེ་ལ་བརྟེན་ནས། དབང་ཟ་བའི་སྤྱོད་པའོ། །མ་རིག་པ་གང་ལས་སྐྱེས་ཞེས་མངོན་པར་བརྟགས་ན། བདག་ལས་མི་སྐྱེ། གཞན་ལས་མི་སྐྱེ། གཉིས་ཀ་ལས་མི་སྐྱེ། རྒྱུ་མེད་ཀྱང་མིན་པས། མ་རིག་པ་ནི་མ་སྐྱེས་སོ། །མ་སྐྱེས་པའི་ཕྱིར། གནས་པའི་དངོས་པོ་མ་བྱུང་ངོ༌། །གནས་པ་མེད་པའི་ཕྱིར་འཇིག་རྒྱུ་མེད་པས་མི་འཇིག་གོ །དེ་ལྟར་ན་མ་རིག་པ་སྐྱེ་འགགས་གནས་གསུམ་དང་བྲལ་བས་རང་བཞིན་མེད་དེ། འདུ་བྱེད་ནས་རྒ་ཤིའི་བར་ཡང་དེ་དག་འདྲའོ། །ཡང་དག་པར་གནས་ཚུལ་ལ། སྐྱེ་བ་མེད་ཅིང༌། འགགས་པ་མེད་ལ་གདོད་ནས་མ་གྲུབ་ཀྱང༌། མེད་


TNT17_Page_0662
[མ་དཔེ་གཟིགས་ན་འདིར་གནོན།]

བཞིན་དུ་སྣང་བའི་རྒྱུ་རྐྱེན་ཚོགས་པ་ཙམ་ལས། མེད་བཞིན་དུ་སྣང་བའི་འབྲས་བུའི་སྣང་ཆ་ཙམ་ཞིག་འཆར་བ་མ་བཀག་པ་འདི་ནི་མཐའ་བཞི་ལས་གྲོལ་བའི་རྟེན་འབྲེལ་ཞེས་བྱའོ། །འདི་ནི་ཡན་ལག་བཅུ་གཉིས་སུ་མ་ཟད། ས་བོན་དང་མྱུ་གུ་ལ་སོགས་པ་རྒྱུ་འབྲས་རྟེན་འབྲེལ་གྱི་རིགས་མཐའ་དག་ལ་སྦྱར་བར་བྱའོ། །འདི་ལ་དོན་དམ་པའི་རྟེན་འབྲེལ་ཞེས་ཟེར་ཏེ། གནས་སྐབས་པའི་དོན་དམ་ཙམ་མོ། །ཀུན་རྫོབ་རྟེན་འབྲེལ་གྱི་ཆོས་ཉིད་ཡེ་ཤེས་རྣམ་པ་ཐམས་ཅད་པ་ནི། དོན་དམ་ཉིད་གྱི་རྟེན་འབྲེལ་ལོ། །དེ་ལ་མ་རིག་པ་ནས། རྒ་ཤིའི་བར་ཀུན་ནས་ཉོན་མོངས་པའི་རྟེན་འབྲེལ་བཅུ་གཉིས་ནི། འཁྲུལ་བའི་སྣང་བ་ཙམ་ལས་གནས་ཚུལ་ལ་ནམ་ཡང་ཡོད་མ་མྱོང་བས། མ་རིག་པ་འགགས་པ་ནས་རྒ་ཤི་འགགས་པའི་བར་ཡང༌། རྣལ་འབྱོར་ཅན་གྱི་བློའི་སྣང་ཚུལ་ཙམ་ལས། གཞན་གནས་ཚུལ་ལ་ཡོད་པ་མ་ཡིན་ཏེ། རྨི་ལམ་གྱི་བུ་ནི་ནམ་དུ་ཡང་ཡོད་པ་མ་ཡིན་ན། དེ་ཤི་བ་དེ་བས་ཀྱང་མི་འཐད་པ་བཞིན་ནོ། །ཀུན་བྱང་གི་རྟེན་འབྲེལ་དེ་དག་གདོད་ནས་མ་གྲུབ་པའི་ཕྱིར༌། དེ་རྣམས་རང་བཞིན་མེད་ཙམ་གྱི་མཐའ་བྲལ་དེ་ཡང་མཐའ་དང་བཅས་པ་ལ་བལྟོས་ནས་བློས་བཞག་པ་ཙམ་ལས། ཡང་དག་པར་མེད་དོ། །ཡེ་ཤེས་རྣམ་པ་ཐམས་ཅད་པ་དེ་ནི་དོན་དམ་པའི་མ་རིག་པ་ནས་དོན་དམ་པའི་རྒ་ཤིའི་བར་དུ་ཡང་འཇོག་ཅིང༌། མ་རིག་པ་འགགས་པ་དོན་དམ་པ་ནས་རྒ་ཤི་འགགས་པ་དོན་དམ་པའི་བར་དུ་ཡང་ཡིན་ནོ། །ཡེ་ཤེས་འདི་ནི་མེད་བཞིན་སྣང་བའི་འཁྲུལ་ཆོས་མ་ཡིན་གྱི། གནས་ལུགས་ལ་ཞུགས་ཤིང་


TNT17_Page_0663
[མ་དཔེ་གཟིགས་ན་འདིར་གནོན།]

བདེན་པར་གྲུབ་པ་ཡིན་ཡང༌། དེ་ལ་གཟུང་འཛིན་དང་སྒྲ་རྟོག་གི་ཆོས་གང་ཡང་མེད་དོ། །འོ་ན་མ་རིག་པ་གདོད་མ་ནས་མེད་ན། དོན་དམ་པའི་མ་རིག་པ་རང་གི་ངོ་བོས་གདོད་མ་ནས་གྲུབ་པ་དང་འགལ་ལོ་སྙམ་ན། དོན་དམ་པའི་མ་རིག་པ་ནི་མ་རིག་པ་མ་ཡིན་ཅིང༌། མ་རིག་པ་འགགས་པ་དོན་དམ་པ་ཡང་མ་རིག་པ་འགགས་པ་མ་ཡིན་པས་ན། ཅིའི་ཕྱིར་འགལ་བར་འགྱུར༌། དེ་བཞིན་དུ་སྡུག་བསྔལ་བ་དང་སོགས་ལ་འདིར་སྡུག་བསྔལ་ནི། ཉེ་བར་ལེན་པའི་ཕུང་པོ་ལྔ་འཁོར་དང་བཅས་པ་སྟེ། སེམས་ཅན་རྣམས་ཀྱི་གནས་སྣོད་ཀྱི་འཇིག་རྟེན་དང༌། ནང་ལུས་སེམས་ཀྱི་དངོས་པོ་དང༌། དེ་དག་གི་ཉེ་བར་སྤྱོད་པ་ཐམས་ཅད་སྡུག་བསྔལ་གསུམ་པོ་གང་རུང་དང་འབྲེལ་བའི་ཕྱིར་སྡུག་བསྔལ་ལོ། །སྡུག་བསྔལ་དེ་ལ་བདེ་བར་བཟུང་ན་ནི། རང་གི་མཚན་ཉིད་དང་འགལ་བས་བྱ་བྱེད་ཐམས་ཅད་བསླུས་པར་འགྱུར་ལ། དེ་སྡུག་བསྔལ་དུ་ཤེས་པ་ནི་ཡུལ་དང་མཐུན་པའི་བློ་ཡིན་པའི་ཕྱིར། ཉམས་མྱོང་གི་སྒོ་ནས་མི་བསླུ་བས་ན་བདེན་པ་ཞེ་བྱའོ། །མི་བསླུ་བ་དེ་ཡང་འཕགས་པ་རྣམས་ཁོ་ནས་མངོན་སུམ་དུ་རྟོགས་པའི་ཕྱིར། འཕགས་པའི་བདེན་པ་སྟེ། འཁོར་བའི་གནས་ལུས་ལོངས་སྤྱོད་རྣམས་སྡུག་བསྔལ་ཡིན་པར་བདེན་པ་ནི། སྡུག་བསྔལ་འཕགས་པའི་བདེན་པའི་དོན་ཡིན་ལ། བདེན་པ་ཞེས་བྱ་བའི་དོན་དམ་དཔྱོད་བྱེད་ཀྱི་རིག་ངོར་བདེན་པའམ། འཕགས་པའི་མཉམ་བཞག་ངོ་བོར་བདེན་པའི་དོན་མ་ཡིན་གྱི། ཐ་སྙད་པའི་ཚད་མའི་ཡུལ་ཡང་དག་ཀུན་རྫོབ་ཏུ་བདེན་པའོ། །འཕགས་པའི་


TNT17_Page_0664
[མ་དཔེ་གཟིགས་ན་འདིར་གནོན།]

བདེན་པའི་གོ་དོན་ཀུན་འབྱུང་དང༌། ལམ་དང༌། འགོག་བདེན་གྱི་ཕྱོགས་གཅིག་ཀྱང་དེ་དག་འདྲའོ། །ཀུན་འབྱུང་གི་སྡུག་བསྔལ་གྱི་རྒྱུ་སྟེ། སྤྱི་ལྡོག་ནས་སྡུག་བསྔལ་གང་ཡིན་ཀུན་འབྱུང་དུའང་འཇོག་མོད་ཀྱི། འདིར་ལས་དང་ཉོན་མོངས་པ་གང་ཡིན་པ་དེ་ཐམས་ཅད་ཀུན་འབྱུང་ངོ༌། །ལམ་བདེན་དངོས་ནི། མཐོང་སྒོམ་མི་སློབ་ལམ་གསུམ་གྱིས་བསྡུས་པའི་ཡེ་ཤེས་གསར་བྱུང་རྒྱུ་རྐྱེན་ལས་སྐྱེས་པ་རྣམས་ཡིན་ལ། རྗེས་མཐུན་པ་ནི་སོ་སོ་སྐྱེ་བོའི་ལམ་རྣམས་ཀྱང་སྟེ། ལམ་བདེན་གྱི་ངོ་བོ་ནི་འཕགས་པའི་ལམ་ཡན་ལག་བརྒྱད་དང༌། ཕ་རོལ་ཏུ་ཕྱིན་པ་བཅུ་ལ་སོགས་པའོ། །དེའི་ཡང་གཙོ་བོ་ནི། ཡང་དག་པའི་ལྟ་བ་དང༌། ལམ་ཤེས་རབ་ཀྱི་ཕ་རོལ་ཏུ་ཕྱིན་པའོ། །འགོག་བདེན་ནི་གནས་སྐབས་པ་དང་མཐར་ཐུག་པ་གཉིས་ལས། དང་པོ་ནི། ལམ་བསྒོམས་པས་སྒྲིབ་པ་རྣམས་གསར་དུ་སྤངས་པའི་སྤངས་པ་སྟེ། སོ་སོར་བརྟགས་པའི་འགོག་པ་རྣམས་ཡིན་ལ། ཕྱི་མ་ནི་འཁོར་འདས་ཀྱི་ཆོས་ཀུན་འགོག་པའི་གཞི། རང་བཞིན་འོད་གསལ་བདེ་བར་གཤེགས་པའི་སྙིང་པོའོ། །འདི་ནི་ཆོས་ཐམས་ཅད་ཀྱི་གནས་ལུགས་ཡིན་པར་བདེན་ཅིང༌། འཕགས་པའི་མཉམ་གཞག་ཡེ་ཤེས་ཀྱི་ངོ་བོར་གྲུབ་པས་བདེན་པ་སྟེ། འདི་ཡང་ཀུན་རྫོབ་ཀྱི་ཆོས་ཀྱི་ངོ་བོར་མེད་ལ། བློས་བཏགས་ཤིང་བཟུང་བ་ལྟར་མ་གྲུབ་པའི་ཕྱིར་སྐབས་འགར་མེད་པའི་ཕྱིར་སྐབས་འགར་མེད་པའི་ཐ་སྙད་ཡང་བྱ་ལ། བདེན་པ་གཞན་གསུམ་དང་སོ་སོར་བརྟགས་པའི་འགོག་བདེན་ནི། ཀུན་རྫོབ་ཀྱི་ཤེས་པ་ལ། སྒྱུ་མ་ལྟར་སྣང་ལ་རང་བཞིན་མེད་པ་དང༌། དོན་དམ་པའི་ཡེ་ཤེས་ཀྱི་ངོར་སྣང་བ་ཡང་མེད་


TNT17_Page_0665
[མ་དཔེ་གཟིགས་ན་འདིར་གནོན།]

པའི་ཕྱིར། གདོད་མ་ནས་མ་གྲུབ་ཅིང་མེད་པའོ། །ཡེ་ཤེས་མེད་ཅེས་པ་མཁས་པར་བྱ་བ་བཅུའི་དབང་དུ་བྱས་ན། དབང་པོ་ལ་མཁས་པར་སྟོན་པ་ཡིན་ཡང༌། དྲུག་གི་དབང་དུ་བྱས་ན། གནས་དང་གནས་མ་ཡིན་པ་ལ་མཁས་པར་བྱ་བའི་ནང་དུ་འདུས་ཏེ། དེ་ལ་བདེན་བཞི་རྟོགས་པའི་ཡེ་ཤེས་ཀྱིས་ཉོན་མོངས་པའི་ས་བོན་སྤོང་བ་ནི། གནས་ཡིན་ཅིང་འཐད་ལ། འཇིག་རྟེན་པའི་སྙོམས་འཇུག་རྣམས་ཀྱིས་དེ་སྤོང་བ་ནི། གནས་མ་ཡིན་པ་དང༌། ཆོས་ཀྱི་བདག་མེད་རྟོགས་པའི་ཡེ་ཤེས་ཀྱིས་ཤེས་སྒྲིབ་སྤོང་ཞིང༌། དེ་ཉིད་ཐབས་དང་བཅས་པ་ཐོབ་པ་ནི་གནས་ཡིན་ལ། ཐབས་དང་བྲལ་བའང་ཡེ་ཤེས་དེ་མེད་ན་ཐམས་ཅད་མཁྱེན་པ་ཐོབ་པ་ནི་གནས་མ་ཡིན་ནོ་ཞེས་སྦྱར་ཏེ། ཡེ་ཤེས་དང་དེའི་བྱེད་ལས་སྨོས་པའང་གནས་དང་གནས་མིན་ཀྱི་ནང་ཚན་ནོ། །དངོས་སུ་ན། བདག་མེད་གཉིས་རྟོགས་པའི་ལམ་གྱི་ཡེ་ཤེས་དེ་བདེན་པར་མེད་ལ། ཡེ་ཤེས་ཞེས་པས་ཆོས་ཀྱི་དབྱིངས་ཀྱི་ཡེ་ཤེས་ཀྱང་ཟུར་གྱིས་འཕངས་པར་འགྱུར་ན་ནི། དེ་ནི་གཉིས་ཀྱིས་སྟོང་པའི་ཕྱིར་འདུས་བྱས་སུ་མེད་པས་ན་མེད་ཅེས་བྱའོ། །ཡེ་ཤེས་མེད། མི་ཤེས་པ་མེད་ཅེས་དཔེ་ཁ་ཅིག་ལས་འདོན་པ་ལྟར་ན། ཡེ་ཤེས་དང་དེའི་སྤང་བྱ་གཉིས་ཀར་རང་བཞིན་མེད་པའི་དོན་ཏེ། གང་བདེན་པའི་དོན་མི་ཤེས་པས་འཁོར་བར་འཁྱམ་པ་གནས་ཡིན་པ་དང་རྣམ་པར་མི་རྟོག་པའི་གནས་མི་ཤེས་པས། ཐེག་པ་ཆེན་པོའི་ལམ་དང་འབྲས་བུ་རྟོགས་པར་མི་འགྱུར་བ་གནས་ཡིན་ཅིང༌། དེ་དག་ལས་ཟློག་པ་གནས་མ་ཡིན་ནོ་ཞེས་སྦྱར་རོ། །ཐོབ་པ་མེད་ཅེས་བྱ་བ་ནི་རྣམ་བཤད་བྱེད་པ་ཕལ་ཆེ་བས་


TNT17_Page_0666
[མ་དཔེ་གཟིགས་ན་འདིར་གནོན།]

བྱང་ཆུབ་ཐོབ་པ་ཁོ་ན་ལ་སྦྱོར་ཡང་འདིར་ནི་ཐོབ་པ་དང་མ་ཐོབ་པ་ཞེས་སྤྱི་ལ་སྦྱར་ནས། ཆོས་གང་ཅི་ཡང་རུང་བ་དེ་ཐམས་ཅད་ཀྱི་འཕེལ་འགྲིབ་དང༌། གནས་སྐབས་སོ་སོར་གྱུར་བའི་ཆ་སྟེ། ཇི་སྐད་དུ། ཐོབ་པ་གང་ཞེ་ན། དགེ་བ་དང་མི་དགེ་བ་དང༌། ལུང་དུ་མ་བསྟན་པའི་ཆོས་རྣམས་ཀྱི། འཕེལ་བ་དང་འགྲིབ་པ་ཐོབ་པ་དང༌། རྙེད་པ་དང་ལྡན་པ་ཞེས་གདགས་སོ། །ཞེས་ཆོས་གང་དང་གང་གི་ས་བོན་འཕེལ་ཞིང་བརྟས་པ་དང༌། ནུས་པ་དམན་ཅིང་འགྲིབས་པ་དང༌། མངོན་གྱུར་དང་འབྲེལ་བའམ་མངོན་དུ་མ་གྱུར་ཀྱང༌། ནུས་པ་སྔོན་མེད་གསར་དུ་རྙེད་པའམ། ཐོབ་ཟིན་ཉམས་པ་ལས་བྱུང་བ་རྙེད་པ་དང༌། ཐོབ་པའི་རྒྱུན་མ་ཉམས་པར་ཡོད་པའི་ལྡན་པ་སྟེ། སེམས་ཅན་གྱི་རྒྱུད་དང་འབྲེལ་བ་དེ་ལྟ་བུ་ནི་ཐོབ་པའི་མཚོན་བྱེད་ཡིན་པས། མདོར་ན་ཆོས་གང་དང་གང་ཡིན་པ་རང་རང་གི་མཐུན་པའི་རྒྱུ་ལས་སྐྱེ་བ་དང༌། འགག་པ་དང་མཐུན་པའི་རྒྱུས་འགག་པ་དང༌། གནས་པའི་རྒྱུས་རིགས་མཐུན་གནས་པ་དང༌། འགྱུར་བའི་རྒྱུས་རིགས་མི་མཐུན་དུ་བསྒྱུར་བ་སོགས་ཏེ། དཔེར་ན་མིའི་རྟེན་ལ་དགེ་བ་སྤྱད་པས་ཚེ་དེ་ཉིད་ལ་རིང་དུ་གནས་པ་ནི། མིའི་རྟེན་གནས་པ་ཐོབ་པ་ཡིན་ཅིང༌། དེ་བཞིན་དུ་དགེ་བའི་མཐུ་ལས་ཕུང་པོའི་རིགས་རྒྱུན་ལྷའི་རྟེན་དུ་སྐྱེ་བ་ནི། ལྷའི་གནས་སྐབས་གསར་དུ་ཐོབ་པ་ཡིན་པ་དང༌། དེ་བཞིན་དུ་མི་དགེ་བའི་རྒྱུ་ལས་དམྱལ་བའི་གནས་སྐབས་ཐོབ་པ་དང༌། གཞན་ཡང་བདེ་བ་ཐོབ་པ་དང༌། སྡུག་བསྔལ་ཐོབ་པ་དང༌། དར་ཞིང་འཕེལ་བའི་དངོས་པོ་ཐོབ་པ་དང༌། འགྲིབས་ཤིང་རྒུད་པའི་དངོས་པོ་


TNT17_Page_0667
[མ་དཔེ་གཟིགས་ན་འདིར་གནོན།]

ཐོབ་པ་དང༌། སྐྱེ་བ་ཐོབ་པ་དང༌། འཆི་བ་ཐོབ་པ་ལ་སོགས་བྱུང་ཞིང་གྱུར་པ་དེ་ནི་མངོན་གྱུར་དུ་ཐོབ་པ་ཡིན་ལ། ད་ལྟ་མངོན་དུ་མ་གྱུར་ཡང༌། ངེས་པ་ཅན་གྱི་རྒྱུ་ལས་འབྱུང་བར་ངེས་ཤིང༌། འགྱུར་བར་ངེས་པའི་སྐབས་སུ་གྱུར་པ་ཡང་དེ་དང་དེ་ཐོབ་པ་སྔར་འདས་ཟིན་པའི་ཤུགས་དེ་ལྟར་ཡོད་ན་དེ་ཡང་བྱུང་ཟིན་དང་གྱུར་ཟིན་གྱི་དངོས་པོ་ལྡན་པ་སྟེ། རྣམ་པ་འདི་ལྟ་བུ་དག་ནི་ཐོབ་པ་ཡིན་ལ། དེ་དག་དང་མཚན་ཉིད་འགལ་བའི་དངོས་པོ་ནི་མ་ཐོབ་པ་སྟེ། ཐོབ་པ་དང་མ་ཐོབ་པ་འདི་དག་ནི། གནས་དང་གནས་མ་ཡིན་པ་དང་ཡོངས་སུ་འབྲེལ་བའོ། །དེ་ཡང་དགེ་བ་བྱས་པས་མཐོ་རིས་ཐོབ་པ་ནི་གནས་ཡིན་ལ། ངན་འགྲོ་ཐོབ་པ་ནི་གནས་མ་ཡིན་ཏེ། དེ་མ་ཐོབ་པ་ཉིད་གནས་སོ། །སྲེད་པ་དང་བཅས་པས་སྐྱེ་བ་ཐོབ་པར་འགྱུར་བ་ནི་གནས་ཡིན་ལ། སྲེད་པ་དང་བྲལ་བས་སྐྱེ་བ་མི་ཐོབ་པ་གནས་ཡིན་ཅིང༌། ཚེ་ཟད་ན་འཆི་བ་ཐོབ་པ་གནས་ཡིན་པ་སོགས་དང༌། དེ་དག་ལས་ཟློག་པ་ནི་གནས་མ་ཡིན་པ་སོགས་ཏེ། དེ་ལྟར་ཡང་རྒྱལ་ཚབ་ཆེན་པོས། མི་འདོད་འདོད་དང་རྣམ་དག་དང༌། མཉམ་དང་འབྱུང་དང་དབང་བྱེད་དང༌། །ཐོབ་དང་ཀུན་ཏུ་སྤྱོད་པ་དག །གཞན་དབང་ཉིད་ཀྱི་དོན་ཏེ་གཞན། །ཅེས་འདོད་པ་མཐོ་རིས་སོགས་བདེ་བ་དང༌། མི་འདོད་པ་ནི་ངན་སོང་སོགས་སྡུག་བསྔལ་དང༌། གནས་ལུགས་རྟོགས་པས་སེམས་རྣམ་པར་དག་པར་འགྱུར་བ་དང༌། ཡུལ་གྱི་ཚད་དང༌། དུས་ཀྱི་ཚད་འདི་དང་འདི་ལྟ་བུར་དངོས་པོ་འདི་དང་འདི་དག་མཉམ་དུ་འབྱུང་བ་དང༌། མཉམ་དུ་མི་འབྱུང་བ་དང༌། ངོ་བོ་དང་བྱ་བ་གང་དག་


TNT17_Page_0668
[མ་དཔེ་གཟིགས་ན་འདིར་གནོན།]

གཞན་གྱི་དབང་དུ་གྱུར་པ་སྟེ། དབང་བྱེད་པ་གཞན་དབང་དུ་གྱུར་པ་དང༌། ཐོབ་པ་གཞན་དབང་དུ་སོང་བ་དང༌། ཀུན་ཏུ་སྤྱོད་པ་གཞན་དབང་དུ་སོང་བ་ལ་སོགས་པ། དེ་དག་ནི་མཚོན་བྱེད་དེ། ཆོས་གང་དང་གང་གི་རྒྱུ་དང་རྐྱེན་དུ་རུང་བ་དང༌། རྒྱུ་རྐྱེན་དུ་ངེས་པ་ལས། དེ་དང་དེ་ཐོབ་པ་ནི་གནས་ཡིན་ཅིང༌། དེ་ལས་ཟློག་ན་གནས་མ་ཡིན་པའོ། །དེ་ལྟར་ན་དེ་ལྟ་བུའི་ཐོབ་པ་དང༌། མ་ཐོབ་པའི་རྣམ་པའི་རབ་དབྱེ་ཐ་དད་པ་ཐམས་ཅད་ཀྱང༌། རྟེན་འབྲེལ་ཙམ་གྱི་མཐུ་ལས་ཀུན་རྫོབ་སྒྱུ་མ་ཙམ་དུ་ནི་མ་འཛིངས་བར་སྣང་བ་ཤར་བ་ཙམ་ཡིན་གྱི། ཡང་དག་པར་ན་ཐོབ་པ་དང་མ་ཐོབ་པ་གནས་དང་གནས་མ་ཡིན་པ་དེ་དག་ཅུང་ཟད་ཀྱང་གྲུབ་པ་མེད་དོ། །དེ་ལྟ་བས་ན་གནས་དྲུག་པོ་དེ་རྣམས་ལ། ཀུན་རྫོབ་ཏུ་རང་རང་གི་རྒྱུ་རྐྱེན་མཚན་ཉིད་རྣམ་པའི་རབ་དབྱེ་མཐའ་དག་ཞིབ་ཅིང་མ་འཛིངས་ལ་གསལ་བར་ཤེས་པ་དང༌། དོན་དམ་པར་དེ་དང་དེ་དང་གང་དུ་ཡང་མ་གྲུབ་པའི་མཐའ་བྲལ་དང༌། དེ་དག་གི་རང་བཞིན་ཆོས་ཉིད་འགྱུར་མེད་རྣམ་པ་ཐམས་ཅད་པ་སྒྲ་རྟོག་གི་ཡུལ་ལས་འདས་པའི་མཐའ་བྲལ་ཆེན་པོ་ལ། ཐོས་བསམ་གྱི་དུས་སུ་ངེས་པ་རྙེད་པར་བྱས་ཤིང༌། བློ་གྲོས་གསལ་བས་ཅིག་ཅར་བློ་ལ་འཆར་ཞིང་འབྱུང་བ་ལྟ་བུའི་ཐབས་ལ་བསླབ། སྒོམ་པ་ལ་ཡིད་བྱེད་དང་བཅས་པ་དང༌། རྣམ་པར་མི་རྟོག་པའི་ཚུལ་གཉིས་ཀྱིས་ཉམས་སུ་བླངས་ཤིང་དགེ་བའི་རྩ་བ་གསོག་པ་ནི། ཐེག་པ་ཆེན་པོ་ལས་བརྩམས་ནས་མཁས་པར་བྱ་བའི་དངོས་པོ་དྲུག་ལ་མཁས་པར་བྱེད་པ་ཡིན་ལ། ཀུན་རྫོབ་དང་དོན་དམ་ཇི་ལྟ་བ་དང༌། ཇི་སྙེད་པའི་གནས་ཚུལ་དེ་དག་འཕགས་པའི་ས་ལ་མངོན་སུམ་དུ་རྟོགས་པ་གྱུར་ན་ནི། གནས་དྲུག་ལ་མཁས་པར་བྱས་ཟིན་པ་སྟེ། ཐེག་ཆེན་འཕགས་པའི་གནས་སྐབས་ཐོབ་པའོ། །དེ་ལྟར་ན་ཕུང་པོ་རང་


TNT17_Page_0669
[མ་དཔེ་གཟིགས་ན་འདིར་གནོན།]

བཞིན་མེད་པ་དང༌། སྐྱེ་མཆེད་རང་བཞིན་མེད་པ་དང༌། ཁམས་རང་བཞིན་མེད་པར་གཏན་ལ་དབབ་པ་གསུམ་ནི། ཆོས་དེ་དང་དེའི་ཀུན་རྫོབ་ཀྱི་མཚན་ཉིད་ལ་མཁས་པ་དང༌། དོན་དམ་པའི་རང་བཞིན་ལ་མཁས་པའི་དམིགས་པའམ་རྒྱུ་མཚན་ནོ། །རྟེན་འབྲེལ་བཅུ་གཉིས་ལ་མཁས་པ་དང༌། བདེན་པ་བཞི་ལ་མཁས་པ་ནི། དེ་དང་དེར་རང་བཞིན་མེད་པར་ཐོས་བསམ་སྒོམ་གསུམ་གྱིས་གཏན་ལ་ཕབ་སྟེ་བསྒོམས་པས། བླང་དོར་ཀུན་རྫོབ་བདེན་པ་དང༌། བླང་དོར་གྱི་གཞི་དོན་དམ་བདེན་པ་ལ་མཁས་པར་འགྱུར་རོ། །བདེན་བཞི་དང་རྟེན་འབྲེལ་གནད་གཅིག་ལ། དེ་ཡང་རྒྱུ་འབྲས་ཀྱི་ངོ་བོ་ལ་རྨོངས་པ་བསལ་བའི་དོན་དུ་བདེན་བཞི་བསྟན་པ་ཡིན་ཏེ། ཀུན་འབྱུང་ནི་རྒྱུར་གྱུར་པའི་འཁོར་བ་དང༌། སྡུག་བསྔལ་ནི་འབྲས་བུར་གྱུར་པའི་འཁོར་བའོ། །ལམ་ནི་ཐོབ་བྱེད་རྒྱུའི་རྣམ་པར་བྱང་བ་དག འགོག་པ་ནི་ཐོབ་བྱ་འབྲས་བུའི་རྣམ་པར་བྱང་བའོ། །རྒྱུ་དེ་གཉིས་ཀྱིས་འབྲས་བུ་དེ་གཉིས་འགྲུབ་ཚུལ་ནི། རྟེན་འབྲེལ་ཡིན་ཏེ། ཀུན་འབྱུང་གིས་སྡུག་བསྔལ་བསྐྱེད་ཚུལ་ལ། མ་རིག་པ་ནས་རྒ་ཤིའི་བར་འཁོར་བ་ལུགས་འབྱུང་གི་རྟེན་འབྲེལ་རྣམས་འབྱུང་བ་ཡིན་ཅིང༌། ལམ་བསྒོམས་པས་སྡུག་བསྔལ་འགག་ཚུལ་ནི། རྒྱུ་ལམ་བདེན་གྱིས་འབྲས་བུ་འགོག་བདེན་ཐོབ་ཚུལ་ཏེ་ཡེ་ཤེས་སྐྱེས་པ་ན་མ་རིག་པ་འགགས་པ་ནས། རྒ་ཤི་འགགས་པའི་བར་དུ་འཁོར་བ་ལུགས་ཟློག་གི་རྟེན་འབྲེལ་བཅུ་གཉིས་སོ། །གནས་དང་གནས་མ་ཡིན་པ་ལ་མཁས་པ་ནི། རྟེན་འབྲེལ་གྱི་རྒྱབ་རྟེན་དུ་འོང་བ་ཡིན་ཏེ། གང་ཅི་ཡང་རུང་བ་ཕྱི་ནང་


TNT17_Page_0670
[མ་དཔེ་གཟིགས་ན་འདིར་གནོན།]

གི་རྟེན་འབྲེལ་མཐའ་དག་གི་རྒྱུ་འབྲས་རྟེན་འབྲེལ་ཕྲ་ཞིང་ཕྲ་བ་ཐམས་ཅད་ཀྱང་རྟོགས་པའི་ཕྱིར་ཏེ། རྟེན་འབྲེལ་བཅུ་གཉིས་ནི་རྩ་བའི་རྟེན་འབྲེལ་ཡིན་ལ། འདི་ནི་ཡན་ལག་ཕྲ་མོ་རྣམས་སོ། །གནས་དང་གནས་མ་ཡིན་པ་ལ་དམིགས་ནས་སྟོང་ཉིད་བསྒོམས་པར་བྱས་པས་ནི། དེ་རྣམས་ཀྱི་རང་བཞིན་སྟོང་པ་ཉིད་དང༌། རྣམ་འགྱུར་རྒྱུ་འབྲས་ལ་མཁས་པར་འགྱུར་བ་སྟེ། དེ་ལྟར་ན་མཁས་པར་བྱ་བའི་དངོས་པོ་དྲུག་ལ་བྱང་ཆུབ་སེམས་དཔའ་རྣམས་ཀྱིས་ནན་ཏན་དུ་བསླབ་པར་བྱ་བ་ཡིན་ནོ། །གསུམ་པ་དེ་རྟོགས་པའི་ལམ་གྱི་ཡོན་ཏན་ནི། དེ་ལྟ་བས་ན་བྱང་ཆུབ་སེམས་དཔའ་རྣམས་ལ་ཐོབ་པ་མེད་པའི་ཕྱིར། ཞེས་པ་ལ་སོགས་པ་སྟེ། འདིར་ཐོབ་པ་མེད་པའི་ཕྱིར་ཞེས་པ་ནི་ཐ་མའི་གསལ་བྱེད་ཡིན་པས། གཟུགས་མེད་ཅེས་པ་ནས་བརྩམས་པ་ཐམས་ཅད་ལ་སྙེག་པ་མངོན་ལ། གཙོ་བོར་ཐོབ་པ་ཉིད་སྨོས་པས། གནས་ལུགས་ལ་རྒྱུ་འབྲས་བསྐྱེད་བྱ་སྐྱེད་བྱེད་གང་ཡང་གྲུབ་པ་མེད་ཅིང༌། མེད་པ་ལྟར་བྱང་ཆུབ་སེམས་དཔས་བསྒོམས་པ་ན་མངོན་དུ་གྱུར་པའི་ཚེ། རང་གི་སེམས་ལ་གནས་པའི་སྒྲིབ་གཉིས་བག་ཆགས་དང་བཅས་པ་གདོད་ནས་སྟོངས་ཤིང་མེད་པ་དང༌། སྐྲག་པ་ནི་འཇིགས་པ་སྟེ་འཁོར་བའི་ལས་ཉོན་སྡུག་བསྔལ་རྣམས་དང༌། མ་རིག་བག་ཆགས་ཀྱི་ས་དང༌། ཟག་མེད་ཀྱི་ལས་དང༌། ཡིད་ཀྱི་ལུས་བསམ་གྱིས་མི་ཁྱབ་པའི་འཆི་འཕོ་དང་བཅས་པ་ཚུད་ཆོད་ཀྱང༌། འཁྲུལ་བའི་སྣང་བ་ཙམ་མ་གཏོགས་གདོད་ནས་མེད་པར་མཐོང་བས་ཕྱིན་ཅི་ལོག་འགག་སྟེ། མི་རྟག་པ་ལ་རྟག་པར་འཛིན་པ་དང༌། རྟག་པ་ལ་མི་རྟག་པར་


TNT17_Page_0671
[མ་དཔེ་གཟིགས་ན་འདིར་གནོན།]

འཛིན་པ་སོགས་ཕྱིན་ཅི་ལོག་གི་རྣམ་རྟོག་གི་འཁྲུལ་བ་དང༌། གཟུང་འཛིན་འཁྲུལ་བའི་སྣང་བ་ནི་ཕྱིན་ཅི་ལོག་གི་སྣང་བ་སྟེ། དེ་འདྲ་ལས་འདས་པ་ཙམ་པོ་ནི་ས་དང་པོ་ཐུབ་པ་ནས་འབྱུང་ཞིང༌། དེ་ནས་ས་གོང་ནས་གོང་དུ་ཕྱིན་ཅི་ལོག་དེ་ལས་ཤིན་ཏུ་འདའ་བར་འགྱུར་རོ། །མྱ་ངན་ལས་འདས་པ་ནི་རྫོགས་པའི་སངས་རྒྱས་ཡིན་ལ། དེ་ལ་རེག་པར་བྱེད་པ་ནི་མཐར་ཕྱིན་པ་སྟེ། ས་བཅུ་རྒྱུན་གྱི་ཐ་མར་རྡོ་རྗེ་ལྟ་བུའི་ཏིང་ངེ་འཛིན་མངོན་དུ་བྱེད་པའི་དོན་ནོ། །མདོའི་འདིའི་དངོས་བསྟན་ལྟ་ན་ས་ལམ་གྱི་མངོན་པར་རྟོགས་པ་རྣམས་གཞུང་ཚིག་གི་སྐབས་འདིས་གསལ་བར་བསྟན་པ་ཡིན་ནོ། །རིགས་པ་དྲུག་ཅུ་པ་ལས། དངོས་ལ་མཁས་པ་རྣམས་ཀྱིས་ནི། །དངོས་པོ་མི་རྟག་བསླུ་བའི་ཆོས། །གསོག་དང་སྟོང་བ་བདག་མེད་པ། །རྣམ་པར་དབྱེན་པ་ཞེས་བྱ་བར་མཐོང༌། །ཞེས་པ་ལྟར་མཁས་པར་བྱ་བའི་གནས་དྲུག་ལ་མཁས་པར་བྱས་པས། ཕྱིན་ཅི་ལོག་ལས་འདས་ནས། རྣམ་པར་དབྱེན་པ་སྟེ་གནས་ལུགས་ལ་རེག་པར་བྱ་པའི་དོན་ནོ། །བཞི་པ་ལམ་དེས་ཐོབ་པའི་འབྲས་བུ་མངོན་དུ་འགྱུར་ཚུལ་ནི། དུས་གསུམ་གྱི་སོགས་ཏེ། དུས་གསུམ་གྱི་སངས་རྒྱས་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཟམ་མོ་འདི་ལ་བསྟེན་ཅིང་མཉམ་པར་གཞག་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་ཡིན་ཏེ། ཟབ་མོའི་མཚན་ཉིད་བརྒྱད་དང་ལྡན་པའི་རང་བཞིན་ཤེར་ཕྱིན་ལ་དམིགས་པའི་ཡུལ་གྱི་ཚུལ་དུ་བསྟེན་པ་དང༌། མཁས་པར་བྱ་བའི་དངོས་པོ་དྲུག་ལ་མཁས་པའི་ལམ་ཤེར་ཕྱིན་ཉམས་ལེན་དུ་


TNT17_Page_0672
[མ་དཔེ་གཟིགས་ན་འདིར་གནོན།]

བསྟེན་པ་ཉིད་ཀྱིས་སོ། །དེ་ལྟར་ཡང་བསྟོད་པ་ལས། དབྱེན་པའི་ཡེ་ཤེས་རིག་གྱུར་པ། །འཇིག་རྟེན་འདས་ཁྱོད་ཕྱག་འཚལ་འདུད། །གང་ཁྱོད་འགྲོ་ལ་ཕན་པའི་ཕྱིར། །ཡུན་རིངས་ཐུགས་རྗེས་ངལ་བར་གྱུར། །ཅེས་སོ། །དེ་ལྟར་གོང་དུ་གཟུགས་མེད་ཅེས་པ་ནས་མ་ཐོབ་པ་མེད་པའི་བར་དུ། སྒྲས་ཟིན་ལ་མཁས་པར་བྱ་བའི་ཡུལ་དྲུག་པོ། སྤྲོས་བྲལ་དུ་གཏན་ལ་ཕབ་ཅིང༌། ཤུགས་བསྟན་ལ་ཡུལ་དྲུག་ལ་མཁས་པའི་ཡུལ་ཅན་ཡེ་ཤེས་ཀྱང་ངེས་པར་བསྟན་ལ། ཡེ་ཤེས་དེའི་ཕན་ཡོན་དང་འབྲས་བུ་ནི། དེ་ལྟ་བས་ན་ཞེས་པ་ནས། མངོན་པར་རྫོགས་པར་སངས་རྒྱས་སོའི་བར་རོ། །དེ་ལྟར་ན་དངོས་བསྟན་འདི་ནི་ཆོས་ཀྱི་བདག་མེད་པ་ཁོ་ནའི་དབང་དུ་བྱས་ནས་གསུངས་ཀྱི། གང་ཟག་གི་བདག་མེད་པ་རྩལ་འདོན་དུ་མ་མཛད་དེ། དེ་ནི་འདིའི་ཞོར་ལ་འབྱུང་བར་དགོས་པའི་ཕྱིར་རོ། །འོན་ཀྱང་ཞོར་བྱུང་དུ་དེ་ཁོ་ན་ཉིད་ལ་མཁས་པ་བཅུའི་སྒོ་ན་གང་ཟག་གི་བདག་མེད་པ་ཤིན་ཏུ་རྒྱས་པར་བསྟན་པ་ཡང་ཡིན་ཏེ། དེ་ལྟར་ཡང་རྒྱལ་ཚབ་ཆེན་པོས། གཅིག་དང་རྒྱུ་དང་ཟ་བ་དང༌། །བྱེད་པ་དང་ནི་དབང་བསྒྱུར་དང༌། །བདག་པོའི་དོན་དང་རྟག་པ་དང༌། །ཉོན་མོངས་པ་དང་དག་པའི་གནས། །རྣལ་འབྱོར་ཅན་དང་གྲོལ་མ་གྲོལ། །འདི་དག་ལ་ནི་བདག་ཏུ་བལྟ། །ཞེས་དང༌། མཁས་དེ་ཁོ་ན་རྣམ་བཅུ་ནི། །བདག་ཏུ་བལྟ་བའི་གཉེན་པོའོ། །ཞེས་གསུངས་པ་ལས། བདག་གཅིག་པུར་འཛིན་པའི་གཉེན་པོར་ཕུང་པོ་ལ་མཁས་པ་དང༌། རྒྱུར་འཛིན་པའི་གཉེན་པོར་ཁམས་ལ་མཁས་པ་དང༌། ཟབ་པོར་འཛིན་པའི་གཉེན་པོར་སྐྱེ་མཆེད་


TNT17_Page_0673
[མ་དཔེ་གཟིགས་ན་འདིར་གནོན།]

ལ་མཁས་པ་དང༌། བྱེད་པོར་འཛིན་པའི་གཉེན་པོར་རྟེན་འབྲེལ་ལ་མཁས་པ་དང༌། བདག་ཀུན་ནས་ཉོན་མོངས་བྱ་དང་རྣམ་པར་བྱང་བྱར་འཛིན་པའི་གཉེན་པོར་བདེན་པ་བཞི་ལ་མཁས་པ་སྟེ། དེ་དག་སྔར་བཤད་པས་གོ་ལ། བདག་པོར་འཛིན་པའི་གཉེན་པོར་དབང་པོ་ལ་མཁས་པ་ནི། ཡེ་ཤེས་མེད་ཅེས་པས་བསྟན་ཏེ། དབང་པོ་ཉི་ཤུ་རྩ་གཉིས་ལས། ཕོ་མོ་དང་སྲོག་གི་དབང་པོ་ནི་ལུས་དང་ཡིད་ཀྱི་ཁམས་སུ་འདུས་ཤིང༌། མིག་རྣ་སྣ་ལྕེ་ལུས་ཡིད་ཀྱི་དབང་པོ་དྲུག་ནི། མིག་མེད་ཅེས་སོགས་ཀྱིས་གཏན་ལ་ཕབ་ཟིན་ལ། ཚོར་བའི་དབང་པོ་ལྔ་པོ་ཡང་ཚོར་བ་མེད་ཅེས་གཏན་ལ་ཕབ་ཟིན་པས། ལྷག་མ་དད་སོགས་དབང་པོ་ལྔ་ནི་སྦྱོར་ལམ་བའི་ཡེ་ཤེས་ཡིན་ལ། ཀུན་ཤེས་པར་བྱེད་པའི་དབང་པོ་མཐོང་ལམ་གྱི་ཡེ་ཤེས་དང༌། ཀུན་ཤེས་པའི་དབང་པོ་སྒོམ་ལམ་གྱི་ཡེ་ཤེས་དང༌། ཀུན་ཤེས་ལྡན་པའི་དབང་པོ་མི་སློབ་ལམ་གྱི་ཡེ་ཤེས་ཡིན་པས། ཡེ་ཤེས་མེད་ཅེས་པས་དབང་པོ་བརྒྱད་པོ་དེ་རང་བཞིན་མེད་པར་བསྟན་པ་ཡིན་ནོ། །དབང་པོ་ཕྱི་མ་གསུམ་པོ་སྤྱིར། ཇི་སྐད་དུ། མཐོང་སྒོམ་མི་སློབ་ལམ་ལ་དགུ། ཞེས་པ་ལྟ་བུ། དད་སོགས་ལྔ། ཡིད་དང་ཚོར་བ་གསུམ་གྱི་རྫས་སུ་ཡོད་པར་བཤད་ཅིང༌། གཞུང་གཞན་ལས། ཀུན་ཤེས་བྱེད་པ་ལ་རྫས་བཅུ་ཡོད་པར་ཡང་བཤད་མོད་ཀྱི། གཙོ་བོ་ནི་ཤེས་རབ་ཁོ་ནའོ། །རང་དབང་དུ་འཛིན་པའི་གཉེན་པོར། གནས་དང་གནས་མིན་ལ་མཁས་པ་ནི། ཐོབ་པ་མེད་སོགས་སོ། །རྣལ་འབྱོར་ཅན་དུ་འཛིན་པའི་གཉེན་པོར། ཐེག་པ་ལ་མཁས་པ་ནི། སྒྲིབ་པ་མེད་


TNT17_Page_0674
[མ་དཔེ་གཟིགས་ན་འདིར་གནོན།]

ཅིང་སྐྲག་པ་མེད་ཅེས་པ་སྟེ། དེ་ལྟར་ཡང༌། ཡོན་ཏན་སྐྱོན་དང་རྣམ་མི་རྟོག །ཤེས་པས་གཞན་ལས་བདག་གིས་ནི། ངེས་པར་འབྱུང་ཕྱིར་གཞན་ཞེས་བྱ། །ཞེས་གསུངས་པ་ལས། སྐབས་འདིར་རྣམ་པར་མི་རྟོག་པའི་ཡེ་ཤེས་ཀྱིས་ཐེག་པ་ཆེན་པོ་ལ་ངེས་པར་འབྱུང་བ་གསལ་བར་བསྟན་ཏོ། །བདག་མ་གྲོལ་བ་དང་གྲོལ་བར་འཛིན་པའི་གཉེན་པོར་འདུས་བྱས་དང་འདུས་མ་བྱས་ཀྱི་ཁམས་ལ་མཁས་པ་ནི། མྱ་ངན་ལས་འདས་པའི་མཐར་ཕྱིན་ཏོ། །ཞེས་པ་སྟེ། དེ་ལྟར་ཡང༌། རྟགས་བཅས་རྒྱུར་བཅས་རྒྱུ་མཚན་དང༌། །རབ་ཏུ་ཞི་བའི་དོན་བཅས་ནི། །ཐ་མ་ཉིད་དུ་བསྟན་པ་ཡིན། །ཞེས་གསུངས་ཏེ། །འདུས་བྱས་ཀྱི་མྱ་ངན་ལས་འདས་ཤིང༌། འདས་པ་དེ་ཉིད་རབ་ཏུ་ཞི་བའི་ཕྱིར་འདུས་མ་བྱས་སོ། །དེ་ལ་ཞི་བའི་འགོག་པ་ནི་སོ་སོར་བརྟགས་འགོག་གི་འགོག་བདེན་དང༌། རབ་ཏུ་ཞི་བའི་འགོག་པ་ནི་ཆོས་དབྱིངས་ཡིན་ཞིང༌། ལམ་ཡང་དེ་ཐོབ་བྱེད་ཀྱི་ཐབས་ཡིན་པས་རབ་ཏུ་ཞི་བར་བསྡུའོ། །བདག་རྟག་པར་འཛིན་པའི་གཉེན་པོར། དུས་ལ་མཁས་པར་བྱ་བ་ནི། དུས་གསུམ་དུ་ཞེས་སོགས་ཀྱིས་བསྟན་ཏེ། ཀུན་རྫོབ་ཏུ་དངོས་པོ་ཐམས་ཅད་དུས་གསུམ་དུ་བྱུང་བ་ཁོ་ན་ཡིན་པས། རྟག་པའི་བདག་མེད་ལ། དོན་དམ་པར་དུས་གསུམ་རང་ཡང་མེད་པས། དུས་ལ་རྟག་ཏུ་འཁོར་ཞིང་ཚུགས་ཐུབ་པའི་བདག་རྟག་པ་ག་ལ་ཡོད། ཅེས་པའོ། །དེས་ན་གང་ཟག་བདག་མེད་ཀྱི་ངོ་བོ་ངོས་འཛིན་ཙམ་ནི། ཐེག་པ་ཆེ་ཆུང་གཉིས་ལས་འདྲ་བར་གསུངས་ཀྱང༌། རྣམ་གྲངས་ནི་ཐེག་ཆེན་ལས་རྒྱས་པར་བསྟན་པ་ཙམ་དེར་མ་


TNT17_Page_0675
[མ་དཔེ་གཟིགས་ན་འདིར་གནོན།]

བསྟན་ཏོ། །བསྟོད་པ་ལས་ཀྱང༌། ཕུང་པོ་ཙམ་ལས་གྲོལ་བ་ཡི། །སེམས་ཅན་མེད་པར་ཁྱོད་བཞེད་ལགས། །སེམས་ཅན་དོན་ལ་མཆོག་གཞོལ་བར། །ཐུབ་པ་ཆེན་པོ་ཁྱོད་ཉིད་བཞུགས། །ཞེས་ཏེ། འཇིག་རྟེན་ཉེར་ལེན་གྱི་ཕུང་པོ་སྡུག་བསྔལ་འདི་ཐམས་ཅད་ལས་ལས་སྐྱེས་ལ། དེ་ཡང་ཉོན་མོངས་ལས་བྱུང་ཞིང༌། དེའི་རྩ་བ་བདག་ཏུ་འཛིན་པ་ཡིན་ནོ་ཞེས། དཀོན་མཆོག་གསུམ་ལ་སྐྱབས་སུ་སོང་བ་ཐམས་ཅད་ལ་ཐུན་མོང་དུ་བསྒྲགས་པ་ཡིན་ནོ། །བདག་འཛིན་འདི་ནི་དངོས་པོ་ལ་ལོག་པར་ཞུགས་པ་ཡིན་གྱི། དོན་དང་མཐུན་པར་བློས་བཟུང་བ་མ་ཡིན་ཏེ། བདག་ཅེས་བྱ་བ་བློས་བཏགས་པ་མ་ཡིན་པར་ཚུགས་ཐུབ་ཞིག་ཡོད་ན་ནི། ཕུང་པོ་ཉིད་ཡིན་ནམ། ཕུང་པོ་ལས་གཞན་དུ་ཡོད། དང་པོ་ལྟར་ན། མིའི་ཕུང་པོ་དོར་ནས་དམྱལ་བའི་ཕུང་པོ་ལེན་པ་སོགས་མི་སྲིད་པར་འགྱུར་ཏེ། ཕུང་པོ་ནི་བདག་རྟག་པ་དང་གཅིག་པའི་ཕྱིར་རོ། །ཕུང་པོ་དུ་མའི་རང་བཞིན་ཅན་མ་ཡིན་པར་འགྱུར་ཏེ་བདག་གཅིག་པུའི་མཚན་ཉིད་ཅན་གྱི་ངོ་བོ་ཡིན་པའི་ཕྱིར་རོ། །ཡང་ཕུང་པོ་ནི་བདག་མ་ཡིན་ཏེ། བདག་གི་ཉེ་བར་བླང་བྱ་ཡིན་པའི་ཕྱིར་རོ། །གཉིས་པ་ལྟར་ན། བདག་ལ་བདེ་སྡུག་མྱོང་བ་སོགས་འདུས་བྱས་ཀྱི་མཚན་ཉིད་མེད་པར་འགྱུར་ཏེ། བདག་དེ་ནི་ཕུང་པོ་ཙམ་སྟེ་ཕུང་པོ་ཐམས་ཅད་ལས་གྲོལ་བའི་ཕྱིར་རོ། །འདུས་མ་བྱས་ལ་ནི་འགྲོ་འོང་དང་བདེ་སྡུག་མྱོང་བ་སོགས་ཐམས་ཅད་འགལ་བ་ཡིན་ནོ། །དེའི་ཕྱིར་ཡང་དག་པར་ན་བདག་མེད་ཀྱང་བདག་ཏུ་བལྟ་བས་བཅིངས་པའི་སེམས་ཅན་རྣམས་ལ་ཐུགས་རྗེའི་གཞན་དབང་དུ་གྱུར་ནས་


TNT17_Page_0676
[མ་དཔེ་གཟིགས་ན་འདིར་གནོན།]

སངས་རྒྱས་ཉིད་ཐོབ་པར་མཛད་པའང་ཡིན་ནོ། །དེ་ལ་རྣལ་འབྱོར་པས་ཏིང་ངེ་འཛིན་དང་ལམ་ཇི་ལྟར་སྒོམ་པ་དང་མངོན་དུ་འགྱུར་བའི་ཚུལ་ནི། འདི་ཡིན་ཏེ། གང་ཞིག་ཐེག་པ་ཆེན་པོ་ལ་སློབ་པར་འདོད་པ་དེས་དཀོན་མཆོག་གསུམ་ལ་སྙིང་པ་ཐག་པ་ནས་སྐྱབས་སུ་སོང་ཞིང༌། འགྲུབ་ན་སོ་སོ་ཐར་པ་རིགས་གང་རུང་གི་སྡོམ་པ་བླང་དགོས་ཏེ། སྡོམ་པ་འདི་ཐེག་ཆེན་གྱི་ལམ་སྐྱེ་བའི་རྒྱུར་མེད་ན་ཡེ་མི་རུང་བར་རང་ཏ་མ་ཡིན་མོད་ཀྱང༌། འདི་ལ་བསླབ་པར་མི་ནུས་པས་བྱང་ཆུབ་སེམས་དཔའི་སྡོམ་པ་ལ་བསླབ་མི་ནུས་པའི་ཕྱིར་དང༌། གཞན་མུ་སྟེགས་བྱེད་པ་སོགས་དང་མི་འདྲེ་ཞིང་སེམས་ཅན་གྱི་དོན་སྤྱོད་པའི་མཐུ་དང་ལྡན་པའི་ཕྱིར་དང༌། ཐེག་པ་མཐའ་དག་ལ་སློབ་དགོས་པ་བྱང་ཆུབ་སེམས་དཔའི་བསླབ་བྱ་ཡང་ཡིན་པའི་ཕྱིར་བསླབ་པ་རྗེས་སུ་བསྒྲུབ་དགོས་པ་དང༌། འདི་ཉིད་སེམས་བསྐྱེད་ཀྱིས་ཟིན་ན་ཐེག་ཆེན་གྱི་ཉེས་པ་སྤྱོད་ཀྱི་སྡོམ་པའི་ཚུལ་ཁྲིམས་ཀྱི་གཙོ་བོར་འགྱུར་བའི་ཕྱིར་ཐེག་ཆེན་ལས་ཀྱང་འདི་ཤིན་ཏུ་བསྔགས་པས་སོ། །དེ་ནས་ངེས་པར་བྱང་ཆུབ་ཏུ་སེམས་བསྐྱེད་དེ། སྐྱབས་སུ་བབ་པ་ན་སེམས་བསྐྱེད་ཀྱི་སྡོམ་པ་ཡང་བླང་ངོ༌། །དེ་ནས་དགེ་བའི་བཤེས་གཉེན་དམ་པ་ལ་བསྟེན་ཅིང༌། ཐེག་པ་ཆེན་པོའི་མདོ་སྡེ་གཅིག་ལ་དམིགས་ཏེ་གཙོ་བོར་བསྒོམས་ན། ཏིང་ངེ་འཛིན་ནི་སྐྱེ་སླ་བས་དེ་ལྟར་བྱ་བའམ། གཞན་དུ་ན་གསུང་རབ་སྤྱི་ལ་དམིགས་ཀྱང་རུང་སྟེ། ངེས་པར་འབྱུང་བ་ལ་སོགས་པས་རྒྱུད་བསྐུལ་ནས། སྙིང་རྗེ་ཆེན་པོ་དང་སྟོང་པ་ཉིད་ཀྱིས་དོན་སྒོམ་པ་དང༌། བསྔོ་བ་ལ་སོགས་པ་ཐབས་ལ་མཁས་པའི་ཁྱད་པར་


TNT17_Page_0677
[མ་དཔེ་གཟིགས་ན་འདིར་གནོན།]

ལ་སློབ་ཅིང༌། ཆོས་སྤྱོད་བཅུའམ་ཐོས་བསམ་སྒོམ་གསུམ་གྱིས་དུས་འདས་པས། རིང་ཞིག་ན་ཤིན་ཏུ་གོམས་ཤིང་བྱང་བས་འབད་རྩོལ་དང་དགའ་བ་མེད་པར་ངང་གིས་འཇུག་པ་དང༌། དད་པ་དང་ཤེས་རབ་ཀྱི་སྟོབས་ཀྱི་ཚེ་དེ་ལ་རྐྱེན་གང་བྱུང་ཀྱང༌། དཀོན་མཆོག་གསུམ་དང་ཐེག་ཆེན་ནམ་དུ་ཡང་མི་སྤོང་བར་གནས་པ་དང༌། བདེ་སྡུག་ཅི་བྱུང་བ་ཐམས་ཅད་མྱོང་ཙམ་ཉིད་ནས་ལས་ཀྱི་འབྲས་བུར་ཤེས་པ་དང༌། ནམ་དུ་ཡང་ཆོས་ལས་འདའ་བར་མི་དཔྱོད་པ་དེ་ཚེ། ཞི་ལྷག་གི་ཏིང་ངེ་འཛིན་སྐྱེས་ཀྱང་རུང༌། མ་སྐྱེས་ཀྱང་རུང་སྟེ། ལམ་སྣ་ཟིན་པ་དང་ཚོགས་ཀྱི་ལམ་རྒྱུད་ལ་སྐྱེས་པ་ཡིན་ནོ། །དེ་ནས་ཡོན་ཏན་དེ་གོང་འཕེལ་དུ་སོང་ནས། ཚོགས་ཁྱད་པར་ཅན་བསགས་པ་ལས། དབང་པོ་རྣོ་རྟུལ་གྱི་ཁྱད་པར་གྱིས་དུས་ལ་ངེས་པ་མེད་ཀྱང༌། དེ་ཁོ་ན་ཉིད་ཀྱི་དོན་ལ་དམིགས་པའི་ཞི་གནས་དང་ལྷག་མཐོང་ངེས་པར་གྲུབ། ཆོས་རྒྱུན་གྱི་ཏིང་ངེ་འཛིན་ཆུང་ངུ་ཐོབ་པས། སངས་རྒྱས་མང་པོའི་ཞལ་མངོན་སུམ་དུ་མཐོང༌། གསུང་གི་སྣང་བ་ཡང་འབྱུང་སྟེ། ཆོས་ཀྱི་སྒོའི་ཏིང་ངེ་འཛིན་འདི་ནི། སྟོང་ཉིད་ལ་དམིགས་པའི་ལྷག་མཐོང་དང༌། སངས་རྒྱས་ལ་དད་པ་ཟུང་དུ་སྦྲེལ་བ་དེ། སངས་རྒྱས་ཀྱི་སྐུ་དང་ཞིང་ཁམས་ཡིད་ལ་བྱེད་པའི་ཞི་གནས་ཀྱིས་མགོ་བསྡུས་པ་ལས་འབྱུང་ངོ༌། །འདི་ནི་འབད་རྩོལ་གྱིས་ཡིད་ལ་བྱེད་པ་བསྒྲུབས་པས་འབྱུང་བ་ཡང་ཡོད། སྐྱེ་བ་ཤིན་ཏུ་མང་པོར་ཚོགས་བསགས་ཤིང་སྨོན་ལམ་བཏབ་པའི་མཐུ་ལས། དུས་སྐབས་དེར་ངང་གིས་སྐྱེ་བ་ཡང་ཡོད་དེ།


TNT17_Page_0678
[མ་དཔེ་གཟིགས་ན་འདིར་གནོན།]

ཚོགས་ཀྱི་ལམ་མཐར་ཕྱིན་པ་ཡིན་ནོ། །དེ་ནས་ཆོས་ཐམས་ཅད་ལ་བདག་མེད་རྣམ་པ་གཉིས་ཆ་མཉམ་དུ་སྒོམ་དགོས་པ་ཡིན་ཀྱང༌། སྟོང་ཉིད་ལ་གསལ་སྣང་སྐྱེ་ཚུལ་ནི་རིམ་ཅན་དུ་འབྱུང་སྟེ། ཀུན་བཏགས་ཐམས་ཅད་དང་ཁྱད་པར་གཟུང་བ་ཕྱི་རོལ་ཀྱི་དོན་རྣམས་གདོད་མ་ནས་མ་གྲུབ་པ་ལ་གསལ་སྣང་ཆུང་ངུ་སྐྱེས་པ་ན། སྦྱོར་ལམ་དྲོད་ཡིན་ལ། གསལ་སྣང་འབྲིང་དུ་སྐྱེས་པ་ན་སྦྱོར་ལམ་རྩེ་མོར་འགྱུར་ཞིང༌། སྐབས་འདིར་ཏིང་ངེ་འཛིན་གྱི་ལུས་གྲུབ་པ་དང༌། རྫུ་འཕྲུལ་གྱི་སྟོབས་ཀྱིས་ཕྱོགས་བཅུའི་སངས་རྒྱས་ཀྱི་ཞིང་མང་པོ་རིམ་ཅན་དུ་ཡིན་ཡང་མྱུར་བོར་བགྲོད་པར་ནུས་སོ། །དེ་ནས་དེ་ལ་གསང་སྣང་རབ་ཀྱི་མཐར་ཕྱིན་པ་སྐྱེས་ཤིང༌། དེའི་སྟོབས་ཀྱིས་འཛིན་པ་བདེན་མེད་ལ་ཡང་གསལ་སྣང་འོལ་སྤྱི་སྐྱེས་པར་གྱུར་པ་དེའི་ཚེ་སྦྱོར་ལམ་བཟོད་པ་ཡིན་ནོ། །དེ་ནས་མཉམ་གཞག་ཏུ་གཟུང་འཛིན་གྱི་རྟོག་པ་མངོན་འགྱུར་བ་འགགས་ཤིང༌། འཛིན་པ་རང་བཞིན་མེད་པ་ལ་གསལ་སྣང་ཙམ་པོ་མཐར་སོན་པ་དང༌། རྗེས་ཐོབ་ཏུ་ཡང་སྣང་བ་སྒྱུ་མ་ལྟར་འཆར་ཏེ། སྐབས་འདིར་ཆོས་ཀྱི་སྒོའི་ཏིང་ངེ་འཛིན་ཆེན་པོ་ཐོབ་པར་འགྱུར་བ་ནི་སྦྱོར་ལམ་ཆོས་མཆོག་གོ །ཏིང་ངེ་འཛིན་གྱི་ལུས་ཐོབ་པ་ཡན་ཆད་ནས། གཟུངས་དང་ཏིང་ངེ་འཛིན་དང་རྣམ་འཕྲུལ་མཐའ་ཡས་པ་དང༌། དབང་པོ་ཡང་རྣོན་པོ་ཁོ་ནའི་གནས་སྐབས་ཐོབ་ཅིང༌། ཐབས་ལ་མཁས་པའི་ཁྱད་པར་དཔག་ཏུ་མེད་པ་དང་ལྡན་པ་ཡིན་ནོ། །དེ་ནས་དེའི་རྗེས་སུ་སྔར་ཡུན་རིང་པོར་ཚོགས་བསགས་པ་དང༌། དེ་ཁོ་ན་ཉིད་ལ་གོམས་པའི་འབྲས་བུ་ཅིག་ཆར་སྨིན་


TNT17_Page_0679
[མ་དཔེ་གཟིགས་ན་འདིར་གནོན།]

ནས། མཐོང་ལམ་རྣམ་པར་མི་རྟོག་པའི་ཡེ་ཤེས་ཆོས་ཉིད་མངོན་སུམ་དུ་མཐོང་བ། རྗེས་ཐོབ་ཡོན་ཏན་དཔག་ཏུ་མེད་པ་དང་བཅས་པ་སྟན་ཐོག་གཅིག་ལ་འབྱུང་བར་འགྱུར་ཏེ། མཉམ་གཞག་དང་རྗེས་ཐོབ་གཉིས་ཀར་གྱི་ཡོན་ཏན་སྔར་སྦྱོར་ལམ་ཆོས་མཆོག་ཆེན་པོའི་དུས་ཀྱི་དེས་ཀྱང༌། བརྒྱ་སྟོང་གི་ཆ་ལ་སྒྲུན་པར་མི་ནུས་པ་འབྱུང་ལ། དེ་ལྟར་མཐོང་ལམ་དུ་ཆོས་ཉིད་ཀྱི་རང་བཞིན་ནི་མཐོང་ཞིང༌། སྤྲོས་པ་དང་བྲལ་བ་རྣམས་དཔྱདཀྱི་ཕྱོགས་ཀྱི་མཚན་ཉིད་མཐའ་དག་གསལ་བར་རྟོགས་ནས་སྒྲོ་འདོགས་ཆོད་པ་ཡིན་ཀྱང༌། ཡོངས་གཅོད་ཀྱི་ཕྱོགས་རྟག་ཅིང་བརྟན་པ་དང༌། རྣམ་པ་ཐམས་ཅད་པའི་མཚན་ཉིད་ནི། རང་སྟོབས་ཀྱིས་མཐའ་དག་རྟོགས་པ་མ་ཡིན་མོད། སངས་རྒྱས་ཀྱིས་གསུང་ལ་བསྟེན་ནས་ནི་རྟོགས་སོ། །ལམ་དེ་རྒྱུད་ལ་སྐྱེས་པ་དང༌། འཁོར་བའི་ལུས་ངག་ཡིད་གསུམ་སྤངས་བ་དང༌། མཚན་དཔེ་རྗེས་མཐུན་ཅན་གྱི་ཡིད་ལུས་དངོས་གྲུབ་པ་དང༌། ཉན་རང་གི་སྤངས་རྟོགས་ཐམས་ཅད་རྫོགས་པ་དུས་མཉམ། ཕྱི་ནས་མཐོང་ལམ་དེ་རྗེས་ཐོབ་ལ་ཡང་ཡུན་རིང་དུ་གནས་པ་སྲིད་དེ། དེ་དག་མཐོང་ལམ་ཉིད་དུ་གཏོགས་སོ། །བྱང་ཆུབ་སེམས་དཔའ་འཕགས་པ་ནི་ཐབས་ལ་མཁས་ཤིང་རྣམ་འཕྲུལ་ལ་མངའ་བརྙེས་པའི་ཕྱིར་སྐབས་གཞན་ནས་མཐོང་ལམ་ཉིད་ལ་ཡང་བསྐལ་པ་མང་པོར་གནས་པ་དང༌། ཆེ་འབྲིང་ཆུང་གསུམ་རེ་རེ་ཡང་གསུམ་གསུམ་དགུའི་དབྱེ་བ་བྱས་པ་སོགས་ཡོད་པའང་མི་འགལ་བར་མ་ཟད་ངོ་མཚར་ཆེན་པོའི་གཏམ་ཡིན་ལ། ཐེག་དམན་


TNT17_Page_0680
[མ་དཔེ་གཟིགས་ན་འདིར་གནོན།]

གྱི་མཐོང་ལམ་ལ་ནི་དེ་འདྲ་མི་སྲིད་པར་གྲགས་པར་ལྟར་འཐད་དོ། །མཐོང་ལམ་རྗེས་ཐོབ་དང་བཅས་པས་ས་དང་པོའི་ཕྱེད་འཁྱེར་ཞིང༌། ས་དང་པོའི་ཕྱེད་ཕྱི་མ་ནི་སྒོམ་ལམ་ཡིན་ནོ། །ས་གཉིས་པ་ནས་བཅུ་པའི་བར་དུ་ཡང་སྒོམ་ལམ་ཡིན་པ་ལས། དེ་དག་གི་སྤངས་པ་དང༌། རྟོགས་པ་དང༌། ཡོན་ཏན་གྱི་ཁྱད་པར་དང༌། འཕྲིན་ལས་ཇི་ལྟར་སྤྱོད་པའི་ཚུལ་སོགས་རྣམ་གཞག་མཐའ་ཡས་ལ། དེ་དག་འཕགས་པ་ས་བཅུ་པ་ལས་རྒྱས་པར་བསྟན་པ་དང༌། འཕགས་པ་དཀོན་མཆོག་བརྩེགས་པའི་ནང་གི་བློ་གྲོས་མི་ཟད་པས་ཞུས་པ་དང༌། གཞན་ཡང་མདོ་སྡེ་དགོངས་པ་ངེས་པར་འགྲེལ་པ་ལ་སོགས་པ། མདོ་སྡེ་རྒྱ་ཆེན་པོ་དག་ལས་ཤེས་པར་བྱ་དགོས་སོ། །དེ་ལྟ་མི་ནུས་ན་མདོ་སྡེ་གང་ཡང་རུང་བ་གཅིག་ལ་དམིགས་གཏན་དུ་བྱས་ནས། ཞིབ་བཤད་རྣམས་རྗེ་བཙུན་གྱི་རྒྱན་དང་དབུས་མཐའ་རྣམ་འབྱེད་སོགས་ལས་བླང་བར་བྱ་ལ། གཞན་དབུ་མ་འཇུག་པར་གྲགས་པ་ལས་བསྟན་པ་སོགས་ནི། ལྷག་ཆད་ནོར་གསུམ་དང་བཅས་པའི་ཕྱིར་ཡིད་བརྟོན་པར་མི་འོས་པའང་སྣང་ངོ༌། །འདིར་ས་བཅུའི་ངོ་བོ་ཟུར་ཙམ་སྨོས་ན། རྒྱལ་ཚབ་ཆེན་པོས་གསུངས་པ། བྱང་ཆུབ་སེམས་དཔའ་ལྟ་བ་རྣམ་པར་དག །ཚུལ་ཁྲིམས་ཤིན་ཏུ་རྣམ་དག་མཉམ་པར་གཞག །ཆོས་ལ་ང་སྤངས་རྒྱུད་དང་ཀུན་ཉོན་མོངས། །རྣམ་པར་དག་པ་ཐ་དད་ང་རྒྱལ་མེད། །སྐད་ཅིག་གཅིག་བློ་ཐོབ་པ་བཏང་སྙོམས་པ། །ཞིང་རྣམས་སྦྱོང་བ་སེམས་ཅན་སྨིན་བྱེད་པ། །མཁས་པ་མཐུ་ཆེན་ལུས་ཡོངས་རྫོགས་པ་དང༌། །ངེས་པར་བསྟན་


TNT17_Page_0681
[མ་དཔེ་གཟིགས་ན་འདིར་གནོན།]

ལ་མཁས་པ་དབང་བསྐུར་ཡིན། །ཅེས་གསུངས་པ་ལྟར་བུ་སྟེ། ས་དང་པོ་རབ་ཏུ་དགའ་བ་ནི། ཆོས་ཉིད་མངོན་སུམ་དུ་རྟོགས་པའི་ཕྱིར་ལྟ་བ་རྣམ་པར་དག་པ་དང༌། རྣམ་པར་མི་རྟོག་པའི་ཡེ་ཤེས་ཡང་དག་པར་ཐོབ་པའོ། །སྤྱིར་ས་ཐམས་ཅད་དུ་ཕ་རོལ་ཏུ་ཕྱིན་པ་བཅུ་ཀ་ལ་ཡོངས་སུ་སྦྱོར་བ་ཡིན་ཀྱང༌། འདིར་སྦྱིན་པ་ལ་གཙོ་བོར་སྤྱོད་པའོ། །ས་གཉིས་པ་ལ་ནི། ལུས་ངག་གི་ལྟ་ཅི་སྨོས་སེམས་ཀྱི་ཉེས་ལྟུང་ཕྲ་མོ་ཙམ་ཡང་ཀུན་ཏུ་སྤྱོད་པ་མེད་ཅིང༌། ཉེས་ལྟུང་མེད་པ་དེ་ལ་ངང་གིས་འཇུག་པ་ཡིན་གྱི་བསྒྲིམ་མི་དགོས་པའི་ཕྱིར་ཚུལ་ཁྲིམས་ཤིན་ཏུ་རྣམ་པར་དག་པ་སྟེ་དེའི་ཕ་རོལ་ཏུ་ཕྱིན་པ་ལ་སྤྱོད་པའོ། །ས་གསུམ་པ་ནི་སྤྱིར་བསམ་གཏན་གཟུགས་མེད་སོགས་འཇིག་རྟེན་པའི་ཏིང་ངེ་འཛིན་ཐུན་མོང་པ་རྣམས་ནི། སྔ་རོལ་ནས་ཐོབ་ཟིན་མོད་ཀྱི། འདིར་ནི་བྱང་ཆུབ་སེམས་དཔའ་རྣམས་ཉིད་ཀྱི་ཐུན་མོང་གི་སྤྱོད་ཡུལ་ཡིན་ཡང་གཞན་མུ་སྟེགས་དང༌། ཉན་ཐོས་དང་རང་སངས་རྒྱས་རྣམས་དང་ཐུན་མོང་གི་སྤྱོད་ཡུལ་དུ་མ་གྱུར་པ། བསམ་གཏན་གཟུགས་མེད་སོགས་དང་རིགས་མཐུན་པའི་ཏིང་ངེ་འཛིན་གྱི་ཁྱད་པར་འཇིག་རྟེན་པའི་ཏིང་ངེ་འཛིན་གྱི་རིགས་ཅན་དཔག་ཏུ་མེད་པ་བསྒྲུབས་ཤིང་མཉམ་པར་འཇོག་པའི་དོན་ཏེ། འདིར་ལུང་གི་ཆོས་ལ་ཡིད་ཆེས་པའི་དད་པ་བླ་ལྷག་ཏུ་འཕེལ་ཞིང༌། འོན་ཀྱང་ཆོས་ལ་སྲེད་པ་ཅུང་ཟད་མ་ལོག་པར་ཡོད་དོ། །ས་བཞི་པ་ལ་ནི། བྱང་ཆུབ་སེམས་དཔའ་རྣམས་ཀྱི་ཐུན་མོང་མ་ཡིན་པའི། བྱང་ཕྱོགས་སོ་བདུན་གྱི་ཁྱད་པར་མི་འབྲལ་བ་མཐའ་ཡས་པ་ཐོབ་པ་དང༌། བརྗོད་


TNT17_Page_0682
[མ་དཔེ་གཟིགས་ན་འདིར་གནོན།]

བྱ་རྗཽད་བྱེད་ཀྱི་ཆོས་ལ་ཐ་དད་པའི་ང་རྒྱལ་སྤངས་ཤིང༌། གཅིག་ཏུ་མངོན་པར་ཞེན་པ་ནི་སྔ་ནས་ཀྱང་མེད་མོད། འདིར་བརྡ་ཙམ་དུ་རྟོགས་པའི་ཕྱིར་ལུང་གི་ཆོས་ལ་སྲེད་པ་ནི་རྩ་བ་ནས་ལོག་ཀྱང༌། དད་པ་འགྲིབས་པ་ནི་མ་ཡིན་ཏེ་འཕེལ་བའོ། །ས་ལྔ་པ་ནི། བདེན་བཞིའི་དོན་ཉན་ཐོས་རང་རྒྱལ་རྣམས་ཀྱིས་མིང་ཙམ་དང༌། ཕྱོགས་ཙམ་ཡང་མ་རྟོགས་པའི་དོན་གྱི་རྣམ་པའི་རབ་དབྱེ་དང༌། འཇུག་ལྡོག་གི་དེ་ཁོ་ན་ཉིད་མཐའ་ཡས་པ་རྟོགས་པའི་ཕྱིར། དེའི་གྲུབ་དོན་དུ་སྐྱེ་བ་མེད་པ་མཉམ་པ་ཉིད་ལ་སོགས་པ་བཅུས་མཉམ་ཉིད་ཀྱི་ཚུལ་གྱིས་རང་གཞན་སྣོད་བཅུད་ཐམས་ཅད་རྒྱུད་ཐ་དད་པར་འཛིན་པ་ལོག་སྟེ། རྒྱུད་ལ་ང་རྒྱལ་སྤངས་བ་ཡིན་ནོ། །ས་དྲུག་པ་ནི། རང་རྒྱལ་མན་ཆད་དང་ཐུན་མོང་མ་ཡིན་པའི་ཀུན་རྫོབ་ཀྱི་དེ་བཞིན་ཉིད་དང༌། དོན་དམ་པའི་དེ་བཞིན་ཉིད་ཀྱི་རྟེན་འབྲེལ་འཇུག་ལྡོག་གི་རིམ་པ་དང་དེའི་གནས་ལུགས་ལ་ཤིན་ཏུ་གོམས་པར་བྱས་པས། ཀུན་ནས་ཉོན་མོངས་དང་རྣམ་བྱང་ཐ་དད་དུ་བལྟ་བའི་ང་རྒྱལ་སྤངས་པ་སྟེ། ཀུན་བྱང་སྟོང་པར་རྟོགས་ཚུལ་སྔར་བས་ཀྱང་ཆེས་ལྷག་པའི་ཁྱད་པར་ཐོབ་པ་ཡིན་ནོ། །ས་བདུན་པ་ལ་ནི། བསྒྲིམ་པའི་རྩོལ་བ་ཡོད་ཀྱང༌། དེ་ལས་གཞན་པའི་མཚན་མ་མེད་པའི་ཏིང་ངེ་འཛིན་ལ་རྟག་ཏུ་གནས་པའི་མཐུས། སྐད་ཅིག་སྐད་ཅིག་ལ་བྱང་ཕྱོགས་སོ་བདུན་ལ་སོགས་པ། ཆོས་ཀྱི་སྒོ་མཐའ་ཡས་པ་ཅི་ཆར་རྒྱུད་ལ་བསྐྱེད་པའི་མཐུ་ཐོབ་པ་ཡིན་ཏེ། ས་སྔ་མ་དྲུག་རྒྱུ་དང་འདི་འབྲས་བུར་འཇོག་པའི་རྣམ་གཞག་ཀྱང་བྱུང་བ། ས་བདུན་པོ་རང་ལས་ནང་ཚན་དུ་ཕྱེ་


TNT17_Page_0683
[མ་དཔེ་གཟིགས་ན་འདིར་གནོན།]

ན་ལམ་དང་འབྲས་བུའི་ཚུལ་དུ་གནས་པའང་ཡིན་ནོ། །ས་དང་པོ་དྲུག་ལ་ནི། མཚན་མའི་རྣམ་པར་རྟོག་པ་མི་འདོད་ཀྱང་འབྱུང་བའི་སྐབས་ཡོད་ལ། ས་འདིར་ནི་དེ་ལྟ་བུ་འབྱུང་བ་མེད་པས་འདོད་པས་བསྐྱེད་ན་མ་གཏོགགས་མཚན་མ་མེད་པ་ཉིད་ལ་གནས་ནུས་པ་ཡིན་ནོ། །ས་བརྒྱད་པ་ལ་ནི། འབད་རྩོལ་མེད་པར་མཚན་མ་མེད་པ་ལྷུན་གྱིས་གྲུབ་པར་གནས་ཏེ། དེའི་རྒྱུ་མཚན་གྱིས་རྟོགས་པ་དང་ཡེ་ཤེས་རྒྱུན་ཆད་པ་མེད་པའི་ཕྱིར། ཕྱིར་མི་ལྡོག་པ་དང༌། མི་སྐྱེ་བའི་ཆོས་ལ་བཟོད་པ་ཆེན་པོ་ཐོབ་པ་ཡིན་ནོ། །འདི་ལ་འབད་རྩོལ་མེད་པའི་ཕྱིར་བཏང་སྙོམས་ཞེས་གསུངས་ཤིང༌། ཀུན་གཞི་རིགས་མཐུན་པ་གཅིག་གི་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ་ཅིག་ཆར་ལུས་སྟོན་ནུས་པས། ཞིང་སྦྱོང་བ་ལ་རང་དབང་ཐོབ་པ་ཡིན་ནོ། །ས་དགུ་པ་ལ་ནི། སོ་སོ་ཡང་དག་པར་རིག་པ་བཞི་ཐོབ་སྟེ། སེམས་ཅན་མཐའ་ཡས་པའི་བསམ་པ་དང་མཚུངས་པར་ཆོས་སྟོན་པ་ལ་སོགས་པ། སེམས་ཅན་ཡོངས་སུ་སྨིན་པར་བྱེད་པ་ལ་དབང་ཐོབ་པའང་ཡིན་ནོ། །ས་བཅུ་པ་ལ་ནི། མངོན་པར་ཤེས་པ་ལ་སོགས་པའི་མཐུ་ཕུལ་དུ་བྱུང་བ་དང༌། ཏིང་ངེ་འཛིན་དང་གཟུངས་ཀྱི་སྒོ་ཚད་མེད་པ་ཐོབ་པའི་ཕྱིར། ཆོས་ཀྱི་ལུས་ཡོངས་སུ་རྫོགས་པ་དང༌། དགའ་ལྡན་དུ་སྐྱེ་བ་སྟོན་པ་ལ་སོགས་པ་སྤྲུལ་པ་སྣ་ཚོགས་པ་སྟོན་པ་ལ་དབང་ཐོབ་པ་ཡིན་ནོ། །ས་འདི་དང་པོར་ཐོབ་ནས་མི་རིང་བ་ན། འོད་ཟེར་ཆེན་པོའི་མངོན་པར་དབང་བསྐུར་བ་འབྱུང་ཞིང༌། དེ་ནས་དུས་གསུམ་གྱི་སངས་རྒྱས་ཐམས་ཅད་ཀྱི་


TNT17_Page_0684
[མ་དཔེ་གཟིགས་ན་འདིར་གནོན།]

སྐུ་གསུང་ཐུགས་ཀྱི་གསང་བ་རྟོགས་པ་དང་བདེ་བར་གཤེགས་པའི་སྙིང་པོའི་མཚན་ཉིད་རང་སྟོབས་ཀྱིས་མངོན་སུམ་དུ་མཐོང་བ་དང༌། སངས་རྒྱས་ཀུན་གྱི་འཕྲིན་ལས་དང་ལྷན་ཅིག་སྤྱོད་པ་ཡིན་ནོ། །ས་དང་པོ་ཐོབ་པ་ནས་བརྩམས་ཏེ། མ་དག་པའི་ལུས་ནི་གནས་གྱུར། ཡིད་ཀྱི་རང་བཞིན་གྱི་ལུས་དང༌། རང་སྣང་གི་ཞིང་ཁམས་ཕུན་སུམ་ཚོགས་པ་འགྲུབ་ལ། ས་བདུན་པ་རྫོགས་མཚམས་ནས་བཟུང་སྟེ། མཚན་དཔེ་ཕུན་སུམ་ཚོགས་པས་བརྒྱན་པའི་ལུས་མཆོག་དང༌། འོག་མིན་སྡུག་པོ་བཀོད་པའི་ཞིང་ཁམས་རྗེས་མཐུན་པར་སྤྱོད་པ་ཡིན་ཅིང༌། ས་བཅུ་པར་ནི། སྡུག་པོ་བཀོད་པའི་ཞིང་དངོས་ལ་བགྲོད་པར་འགྱུར་ལ། ས་བཅུའི་མཐར་འོག་མིན་གྱི་ཞིང་དེ་ཉིད་དུ། རྡོ་རྗེ་ལྟ་བུའི་ཏིང་ངེ་འཛིན་བསྒྲུབས་ཏེ། ལོངས་སྐུའི་རྟེན་ལ་མངོན་པར་རྫོགས་པར་སངས་རྒྱ་བར་འགྱུར་བས། དེ་ལྟར་ས་བཅུ་པོའི་སྐབས་དེ་དག་ཏུ་ཁམས་གསུམ་དུ་སྐྱེ་བ་སྟོན་པ་སོགས། ཁམས་གསུམ་གྱི་སེམས་ཅན་རྣམས་ཀྱིས་འགྲོ་དོན་སྤྱོད་ཚུལ་དེ་དག་ནི། རྣམ་པར་འཕྲུལ་པ་ཁོ་ན་ཡིན་པར་ཤེས་པ་བྱའོ། །འོག་མིན་དུ་སངས་རྒྱས་པའི་རྗེས་སུ། དགོས་པ་སོ་སོའི་མཛད་པ་བཅུ་གཉིས་ཀྱི་ཚུལ་སྟོན་པ་ཤས་ཆེ་བར་འགྱུར་ལ། ས་བཅུའི་བྱང་ཆུབ་སེམས་དཔའ་ཉིད་ཀྱི་རྣམ་འཕྲུལ་ལས་སངས་རྒྱས་ཀྱི་མཛད་པ་ཐམས་ཅད་སྟོན་པའང་ཡོད་ཅིང་ཡང་རྣམ་པ་གཅིག་ཏུ་ན། འོག་མིན་དུ་ས་བཅུ་པ་པ་དེ་ཉིད་སྤྱད་པ་སྤྱོད་ཅིང༌། དེའི་རྣམ་འཕྲུལ་ལ་དགའ་ལྡན་ནས་བྱང་ཆུབ་ཀྱི་སྙིང་པོར་གཤེགས་པའི་བར་དུ་ཡང་འབྱུང་


TNT17_Page_0685
[མ་དཔེ་གཟིགས་ན་འདིར་གནོན།]

ལ། འོག་མིན་དུ་ནམ་ཞིག་སངས་རྒྱས་ཐོབ་པ་ནས་བཟུང་སྟེ། འདིར་ཡང་བྱང་ཆུབ་ཐོབ་པ་དང༌། ཆོས་ཀྱི་འཁོར་ལོ་བསྐོར་བ་ལ་སོགས་པའི་མཛད་པ་སྟོན་པའང་ཡོད་དོ། །འབྲས་བུ་སངས་རྒྱས་ཀྱི་བཞུགས་ཚུལ་ནི། ཆོས་ཀྱི་སྐུ་སྤྲོས་བྲལ་གྱི་ཡེ་ཤེས་འཁོར་འདས་ཀྱི་ཆོས་ཐམས་ཅད་ལ་ཆོས་ཉིད་ཀྱི་ཚུལ་གྱིས་ཁྱབ་ཅིང༌། མ་དག་པའི་སྣང་བ་མི་འཆར་ཡང་དེའི་མཚན་ཉིད་མཁྱེན་པ་དང༌། རང་གི་ངོ་བོ་མཁའ་མཉམ་རྣམ་པར་མི་རྟོག་པ་ཡེ་ཤེས་ཉག་གཅིག་ཡིན་ནོ། །ལོངས་སྤྱོད་རྫོགས་སྐུ་དངོས་ནི། གོང་དུ་བཤད་པའི་ཆོས་སྐུ་དེ་ཉིད། སངས་རྒྱས་རང་སྣང་ལ་སྐུ་མཚན་དཔེ་ཅན་རྣམ་པ་ཐམས་ཅད་པ་དང༌། གསུང་བརྗོད་བྲལ་སྒྲ་དབྱངས་ཐམས་ཅད་པ་དང༌། འཁོར་དང་ཞིང་དང་མཆོད་པའི་བཀོད་པ་དཔག་ཏུ་མེད་པ་དང་བཅས་པར་འཆར་བའོ། །ཡང་དམིགས་པའི་ཡུལ་དེ་ཁོ་ན་རང་ལ་དམིགས་པ་ཡིན་ཀྱང༌། དེའི་གནས་ཚུལ་ལས་གཞན་དུ་སྣང་བ། ས་བཅུའི་བྱང་ཆུབ་སེམས་དཔའ་རྣམས་ལ་ངེས་པ་ལྔ་ལྡན་གྱི་ལོངས་སྐུ་གནས་དང་འཁོར་དང་བཅས་པར་སྣང་བ་འདི་ཡང་ལོངས་སྐུར་བསྡུ་སྟེ། སྣང་ཚུལ་གྱི་དབང་དུ་བྱས་པའོ། །ལོངས་སྐུ་གཉིས་པོ་དེ་ལ་བྱ་བ་སྒྲུབ་པའི་ཡེ་ཤེས་ཀྱི་སྣང་ཆའི་ཚུལ་དུ་སྤྲུལ་སྐུའི་སྐུ་གཟུགས་དང་ཞིང་དང་འཁོར་དང་མཛད་པ་ཐམས་ཅད། ཅིག་ཆར་རྟག་ཏུ་འཆར་བ་ཞིག་ཡོད་པ་ལས། སངས་རྒྱས་རང་སྣང་གི་དོན་གནས་ཚུལ་གྱི་སྤྲུལ་སྐུ་དངོས་ཡིན་ཅིང༌། ས་བཅུའི་སེམས་དཔའ་ལ་སྣང་བ་དེ་དངོས་མ་ཡིན་ཀྱང་ཕྱོགས་མཐུན་དུ་བསྡ྄ུ་ལ། དེ་དག་ནི་སྤྲུལ་པའི་སྐུ་ཡིན་


TNT17_Page_0686
[མ་དཔེ་གཟིགས་ན་འདིར་གནོན།]

གྱི་སྤྲུལ་པ་མ་ཡིན་ནོ། །དེ་དག་གི་གཟུགས་བརྙན་གྱི་ཚུལ་དུ་སྤྲུལ་པ་བྱུང་བ་ནི། གནས་གཙང་མའི་སྟེང་གི་ནམ་མཁའ་ལ་གནས་གཙང་མ་ཆེན་པོ་འོག་མིན་གཉིས་པ་དབང་ཕྱུག་ཆེན་པོའི་གནས་སུ། འོད་ལུས་རྫུས་ཏེ་སྐྱེས་པའི་ཚུལ་དུ་སངས་རྒྱས་སྤྲུལ་པའི་སྐུ་འབྱུང་སྟེ། འཛམ་གླིང་བྱེ་བ་ཕྲག་བརྒྱ་རྣམས་སུ་སྤྲུལ་པའི་སྐུས་མཛད་པ་ཅི་ཙམ་སྟོན་པ་ཐམས་ཅད་དེས་ཀྱང་གནས་དེར་གཟུགས་བརྙན་གྱི་ཚུལ་དུ་སྟོན་པར་མཛད་དོ། །འདི་ནི་མཆོག་གི་སྤྲུལ་སྐུ་ཆེན་པོའོ། །ནམ་མཁར་ཟླ་བ་གཅིག་ཤར་བ་ན་ཆུ་ཀླུང་བྱེ་བ་ཕྲག་བརྒྱར་གཟུགས་བརྙན་རེ་རེ་འཆར་བ་བཞིན་དུ། དེས་མཛད་པ་བསྟན་པའི་གཟུགས་བརྙན་འཛམ་གླིང་བྱེ་བ་ཕྲག་བརྒྱར་སྤྲུལ་པའི་སྐུ་འབྱུང་བ་ནི། སྤྲུལ་སྐུ་ཆུང་ངུ་ཡིན་ཏེ་འདི་གཉིས་ནི་སྤྲུལ་པ་ནི་དངོས་ཏེ་སྐུ་ནི་སྣང་ཚུལ་གྱི་དབང་དུ་བྱས་པའོ། །འཕྲིན་ལས་ནི་དེ་ལྟར་སྐུ་གསུམ་པོ་དངོས་དང་བཏགས་པ་བ་དེ་དག་གིས་སེམས་ཅན་རྣམས་ཀྱི་སྡུག་བསྔལ་ཞི་བ་དང༌། འགྲོ་རྣམས་ཉན་ཐོས་དང་རང་སངས་རྒྱས་དང་བླ་ན་མེད་པའི་བྱང་ཆུབ་རྣམས་ལ་འགོད་པར་མཛད་པ་རྣམས་ཡིན་ཏེ། སོ་སོའི་སྐལ་བ་དང་འཚམ་པར་སྦྱོར་བའོ། །ཞེས་རྟོགས་པར་བྱའོ། །དེ་ལྟར་གོང་འོག་ཏུ་གཞི་ལམ་འབྲས་བུ་སྤྱི་དོན་ཅུང་ཟད་བརྗོད་པ་འདི་རྣམས་ནི་གཞུང་ཆེན་པོ་དག་ཤེས་ཟིན་པ་དང༌། ད་ལྟ་མི་ཤེས་རུང་འཕྲལ་དུ་སློབ་པར་འགྱུར་བ་དག་ལ་ངེས་པར་བཤད་དགོས་པ་མ་ཡིན་ཀྱང༌། གཞུང་རྒྱ་ཆེན་པོ་སློབ་པར་མི་ནུས་ཤིང༌། ཆོས་ཀྱི་དོན་རགས་པ་གོ་བར་འདོད་ན་ཕྱོགས་འདིའི་རབ་ཏུ་བྱུང་བའམ། དགེ་བསྙེན་ནམ་ཀུན་སྤངས་ཀྱི་སྤྱོད་པ་ཅན་ཐམས་ཅད་


TNT17_Page_0687
[མ་དཔེ་གཟིགས་ན་འདིར་གནོན།]

ཀྱིས་ཐུན་མོང་དུ་འདོན་པ། ཐ་ན་བག་མེད་པའི་ཁྱིམ་བཙུན་དང་གྲོང་མི་ཕལ་པ་ལ་ཡང་གྲགས་པའི་མདོ་སྡེ་ཚིག་གི་ཤིན་ཏུ་ཉུང་ངུ་འདི་དག་ལ་བརྟེན་ནས། ཆོས་ཀྱི་ཚུལ་གོ་བར་གྱུར་ན་ལེགས་པར་མཐོང་སྟེ། ཕྱོགས་ཙམ་སྨོས་པ་ཡིན་ལ། ཚིགས་གསལ་པོར་བརྗོད་མོད་ཀྱང༌། དོན་དབྱིངས་ཆེ་བས་སྔར་གཞུང་ལུགས་མི་ཤེས་པ་དག་གིས། དཔེ་ཀློགས་པ་ཙམ་གྱིས་ནི་གོ་བར་དཀའ་ཡང༌། འདིར་ཇི་སྐད་བསྟན་པའི་དོན་རྣམས་ཤེས་པའི་སློབ་དཔོན་གྱིས་ཡང་ནས་ཡང་དུ་འཛུབ་ཁྲིད་དུ་བྱས་ཤིང་ནན་ཏན་དུ་དཔྱད་ན་རྟོགས་པར་འགྱུར་རོ། །ལྔ་པ་ཕན་ཡོན་དང་བཅས་པའི་གཟུངས་སྔགས་བསྟན་པ་ནི། དེ་ལྟ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས། ཞེས་པ་ལ་སོགས་པ་སྟེ་གོང་དུ་བསྟན་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཡེ་ཤེས་རྒྱལ་བ་རྣམས་ཀྱི་ཆོས་སྐུ་དེའི་རྒྱུ་མཐུན་པའི་རིགས་སྔགས་ཡིན་ཅེས་པའོ། །རིགས་པ་ཆེན་པོ་ནི། འདོད་པའི་དོན་ཐམས་ཅད་འགྲུབ་པར་བྱེད་པའི་དོན་ཏེ། དཀའ་བ་མེད་པ་དགོས་དོན་འགྲུབ་པའི་ཐབས་ལ་རིག་པ་ཞེས་གྲགས་པའོ། །བླ་ན་མེད་པ་ནི། ཆོས་སྐུ་རིག་སྔགས་ཀྱི་རྣམ་པ་ཅན་དེའི་འོད་ལྟ་བུར་འཇིག་རྟེན་དུ་རིག་སྔགས་བྱུང་བ་ཡིན་པས། རིག་སྔགས་འདི་ཡང་འཇིག་རྟེན་ལས་འདས་པ་ངོ་བོ་ཤིན་ཏུ་བཟང་བ་འདི་ལས་གོང་ན་གཞན་མེད་པའོ། །མི་མཉམ་པ་དང་མཉམ་པ་ནི། འདི་ལས་གོང་ན་ལྷག་པར་ལྟ་ཞོག་འདྲ་བ་ཡང་མེད་ཅེས་པ་སྟེ། དཔེས་མཚོན་དུ་མེད་པའོ། །ཡང་ན་མི་མཉམ་པ་དང་མཉམ་པ་སངས་རྒྱས་ཀྱི་གོ་འཕང་ཐོབ་པར་བྱེད་པའི་དོན་ཡང་ཡིན་ནོ། །ཡང་གཞན་དོན་གྱི་དབང་


TNT17_Page_0688
[མ་དཔེ་གཟིགས་ན་འདིར་གནོན།]

དུ་བྱས་ན་སེམས་ཅན་གྱི་སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་དོན་ནོ། །ཆོས་སྐུ་མི་བརྫུན་ཅིང་བདེན་པ་གྲུབ་པ་དེའི་རྒྱུ་མཐུན་པ་ཡིན་པའི་ཕྱིར། རིག་སྔགས་འཇིག་རྟེན་དུ་བྱུང་བ་འདི་ཡང༌། ལོག་པའམ། བརྫུན་པའམ། བསླུ་བ་མ་ཡིན་པར། རང་གཞན་གྱི་དོན་མཐའ་དག་སྒྲུབ་པ་ལ་བདེན་ཅིང་ངེས་ལ། ཡིད་ཆེས་པར་བྱེད་པའོ། །དེ་ལྟ་བུར་ཤེས་པར་བྱ་སྟེ་ཞེས་སྔགས་ཀྱི་ཕན་ཡོན་ཡིད་ལ་བྱེད་དགོས་པར་བསྟན་ནས། ཕན་ཡོན་དེ་དང་ལྡན་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་རིག་སྔགས་འཕགས་པ་སྤྱན་རས་གཟིགས་ཀྱིས་སྨྲས་པ་སྟེ་བཤད་པ་ནི། ཏདྱ་ཐཱ་ནི། འདི་ལྟ་སྟེ། ག་ཏེ་ག་ཏེ་ནི་གཤེགས་པ་གཤེགས་པ་ཞེས་པ་ལ་གཤེགས་པའི་དོན་རྟོགས་པ་སྟེ། ཀུན་རྫོབ་དང་དོན་དམ་པའི་བདེན་པ་རབ་ཏུ་རྟོགས་པའོ། །པ་ར་ནི་མཆོག་ག་ཏེ་གོང་བཞིན་ཡིན་པས། མཆོག་ཏུ་རྟོག་པ་མཐར་ཐུག་གི་གནས་ལུགས་རྟོག་པའམ། ཆོས་ཐམས་ཅད་ཀྱི་གནས་ཚུལ་དུ་སོང་ཞིང་གཤེགས་པའོ། །པ་ར་སང་ག་ཏེ་ནི་མཆོག་ཏུ་ཡང་དག་པར་གཤེགས་པ་སྟེ། ཇི་སྙེད་པའི་ཆོས་ཐམས་ཅད་ལ་ཡེ་ཤེས་ཡང་དག་པར་སོང་ཞིང་རྟོགས་པ་དེ་ཡང་ཇི་ལྟ་བ་ལས་གཡོ་བར་མི་བྱེད་པས་ན་མཆོག་གོ །བོ་དྷི་ནི་བྱང་ཆུབ་སྟེ་ཆོས་དབྱིངས་དེ་ཉིད་བླ་ན་མེད་པའི་བྱང་ཆུབ་ཀྱི་ངོ་བོ་ཡིན་པའི་ཕྱིར་རོ། །སྭཱཧཱ་ནི་སྔོན་གྱི་ལོ་ཙཱ་བ་རྣམས་ཀྱི་གཞི་ཚུགས་ཤིག་པར་བསྒྱུར་ཏེ། རིག་སྔགས་དེ་འགྲུབ་པར་སྨོན་པ་ཡིན་ལ། སྤྱིར་འདི་ལ་དོན་ཤིན་ཏུ་མང་བ་ཞིག་བཤད་དུ་ཡོད་དེ། སྔགས་བསྒྱུར་བའི་དོན་ནི་དེ་ཙམ་ཡིན་ལ། རིགས་སྔགས་ཀྱི་ཡི་གེའི་འབྲུ་རེ་རེའི་ཕན་ཡོན་ནི་བསམ་གྱིས་མི་ཁྱབ་


TNT17_Page_0689
[མ་དཔེ་གཟིགས་ན་འདིར་གནོན།]

པའི་ཡེ་ཤེས་ཀྱི་སྤྱོད་ཡུལ་ཡིན་པས། ཚུར་རོལ་མཐོང་བ་བདག་ལྟ་བུས་བཤད་པ་ག་ལ་ནུས། དཔེ་ཁ་ཅིག་ལས། སྔགས་སྨྲས་པ་ཞེས་མི་འདོན་པར་སྔགས་རིག་པའོ་ཞེས་འབྱུང་བ་ནི། ཨུཀ་ཏ་དང་ཡུག་ཏའི་སྒྲའི་ཁྱད་པར་གྱིས་ཡིན་ལ། དྲི་མེད་བཤེས་གཉཻན་གྱི་འགྲེལ་བའི་ལུགས་ལ་ནི། གཟུགས་སྔགས་མེད་ཅིང༌། སྔགས་སུ་བསྟན་པའི་ཕན་ཡོན་རྣམས། མདོ་ཚིག་གོང་མ་རྣམས་ཀྱི་ཆེ་བ་བསྟན་པ་འཆད་དེ། འོན་ཀྱང་འདི་ནི་གླེགས་བམ་མ་དག་པའི་སྐྱོན་ཡིན་པས་དཀྱུས་སུ་བཤད་པ་ཉིད་ལེགས་ལ། ཡང་ཁ་ཅིག་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་འདི་སྔགས་ཀྱི་ཐེག་པ་སྟོན་པའི་ཕྱིར་ཡིན་ཞེས་སྨྲ་བ་ནི་འབྲེལ་མེད་ཅལ་ཅོལ་ཙམ་མོ། །དྲུག་པ་དོན་བསྡུའི་ཕྱིར་དུ་ཤེར་ཕྱིན་ལ་སློབ་པར་གདམས་པ་ནི། ཤཱ་རིའི་བུ་བྱང་ཆུབ་སེམས་དཔའ་སོགས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མཚན་ཉིད་བརྒྱད་དང་ལྡན་པ་དེ་ལ་མཁས་པའི་ཐབས་དྲུག་ལ་སོགས་པ་ཐབས་ཚུལ་དེ་ལྟ་བུའི་སྒོ་ནས་བསླབ་པར་བྱའོ། །གཉིས་རྒྱལ་བས་མཐུན་འགྱུར་སྒོ་ནས་ཐེ་ཚོམ་བསལ་བ་ནི། དེ་ནས་བཅོམ་ལྡན་འདས་སོགས་ཏེ། འཕགས་པ་སྤྱན་རས་གཟིགས་ཀྱིས་མདོ་འདིའི་རྒྱས་བཤད་ཟིན་པའི་དུས་དེ་ལ། བཅོམ་ལྡན་འདས་ཟབ་མོ་སྣང་བའི་ཏིང་ངེ་འཛིན་དེ་ལས་གཞེངས་པའི་ཚུལ་བསྟན་ཅིང༌། གདུལ་བྱ་རྣམས་ཀྱིས་དེ་ལྟར་ཤེས་པར་བྱིན་གྱིས་བརླབས་ནས། འཕགས་པ་སྤྱན་རས་གཟིགས་ལ་ལེགས་སོ་སྩལ་བ་སྟེ། ལེགས་སོ་སྦྱིན་ནས་ཞེས་བྱ་བ་ནི། མདོར་བསྟན་ཡིན་ལ། ལེགས་སོ་ལེགས་སོ་ནས་ཡིད་རང་ངོའི་བར་རྒྱས་བཤད་དོ། །


TNT17_Page_0690
[མ་དཔེ་གཟིགས་ན་འདིར་གནོན།]

དེས་ན་ལེགས་སོ་ཞེས་བྱ་བ་ཡིན་ནས། ཇི་ལྟར་ལེགས་སོ་སྩལ་ཞེ་ན། ལེགས་སོ་ལེགས་སོ་ཞེས་སོགས་ཡིན་པས། ནས་ཞེས་པ་གོ་རིམ་སྔ་ཕྱི་སྟོན་པའི་ཚིག་མ་ཡིན་ནོ། །དེ་ཡང་འཁོར་རྣམས་ཀྱི་རྣམ་པར་རྟོག་པ་ལ། འཕགས་པ་སྤྱན་རས་གཟིགས་ཀྱིས་བསྟན་པ་འདི་ཡང་ཟབ་ཅིང་རྒྱ་ཆེ་བ་ཡིན་མོད་ཀྱི། འོན་ཀྱང་དེ་བཞིན་གཤེགས་པས་དངོས་སུ་གསུང་ན་ནི། འདི་བས་ཀྱང་ཆེས་ལྷག་པ་ཞིག་ཡོད་དོ་སྙམ་ན་རྒྱལ་བའི་སྲས་ཀྱིས་བསྟན་པ་ལ་མ་གུས་པ་ཟློག་པའི་ཕྱིར་རོ། །ལེགས་སོ་གཉིས་སྨོས་པ་ནི། ངོ་མཚར་བ་དང་རྩོད་པ་དང༌། ཁྲོ་དང་ཞུམ་དང་ངེས་བཟུང་དང༌། །དགའ་དང་དད་པ་དག་ལ་ནི། །ཚིག་གཅིག་ལན་གཉིས་འབྱུང་བ་ཡིན། །ཞེས་པ་ལྟར་རོ། །རིགས་ཀྱི་བུ་ཞེས་སྟོན་པ་ཉིད་ཀྱིས་སྤྱན་རས་གཟིགས་ལ་བོས་ནས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་ཚུལ་ནི་དེ་ཁོ་ན་བཞིན་ཡིན་གྱི་གཞན་མ་ཡིན་པས། འཁོར་རྣམས་ཀྱིས་ཀྱང་སྤྱན་རས་གཟིགས་ཀྱིས་བསྟན་པ་བཞིན་དུ་སློབས་ཤིག །སྤྱན་རས་གཟིགས་ཀྱིས་ཆོས་བསྟན་པ་འདི་ལ། དེང་དེ་བཞིན་གཤེགས་པ་ཤཱཀྱ་ཐུབ་པ་ང་ཉིད་རྗེས་སུ་ཡི་རང་བར་མ་ཟད་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱང་དགྱེས་པས་རྗེས་སུ་ཡི་རང་ངོ༌། །རྩ་བའི་གསུམ་པ་མཐར་འཁོར་རྣམས་ཀྱིས་ཡི་རང་མངོན་པར་བསྟོད་པ་ནི། བཅོམ་ལྡན་འདས་ཀྱིས་དེ་སྐད་ཅེས་སོགས་ཏེ། སངས་རྒྱས་ཀྱིས་མཐུན་འགྱུར་མཛད་པའི་རྐྱེན་གྱིས། ཤཱ་རིའི་བུ་ནི་བདག་གིས་དྲིས་པ་དོན་དང་ལྡན་ནོ་ཞེས་དང༌། སྤྱན་རས་གཟིགས་ཀྱང་བདག་གིས་བཤད་པ་ལ་ཡང་ལེགས་པར་བཤད་དོ་སྙམ་པ་དང༌། འཁོར་


TNT17_Page_0691
[མ་དཔེ་གཟིགས་ན་འདིར་གནོན།]

གཞན་རྣམས་ནི་དེ་བཞིན་གཤེགས་པས་དེ་ལྟར་གསུངས་པ་ལ། དགའ་ཞིང་ཡིད་ཆེས་པས་དེའི་རྒྱུ་མཚན་གྱིས་སྤྱན་རས་གཟིགས་ཀྱིས་ཡང་དག་པར་བཤད་པ་དེ་ལ་ཤིན་ཏུ་ཡི་རང་པས་མངོན་པར་ཡིད་བརྟོན་ཅིང་གློ་གཏོད་པར་བྱེད་པའི་དོན་ནོ། །ལྷ་ནི་ནམ་མཁའ་ལ་སྤྱོད་པ་དང༌། མི་ནི་ས་སྟེང་ན་སྤྱོད་པ་དང༌། ལྷ་མ་ཡིན་ནི་ས་འོག་ན་སྤྱོད་པ་དང༌། དྲི་ཟ་ནི་དེ་གསུམ་ཆར་དུ་སྤྱོད་པ་སྟེ། མགོ་ཙམ་སྨོས་པས་ཐམས་ཅད་གོ་བའི་ཕྱིར་རོ། །ཐམས་ཅད་དང་ལྡན་པ་ཞེས་པ་ལ། རིགས་ཐམས་ཅད་དང་ལྡན་པ་དང༌། ཁ་དོག་སྣ་ཚོགས་པ་དང༌། དབྱིབས་སྣ་ཚོགས་པ་དང༌། ལོངས་སྤྱོད་སྣ་ཚོགས་པ་དང༌། ཡུལ་སྣ་ཚོགས་པ་ལ་སོགས་པ་འཁོར་གྱི་དཀྱིལ་འཁོར་དེ་ན་ཐམས་ཅད་འདུས་པའི་ཚུལ་དུ་ཡོད་ཅེས་སྤྱིར་བསྟན་ནས་ལྷ་ལ་སོགས་པ་ཁྱད་པར་དུ་སྨོས་པའོ། །དེ་ཙམ་གྱིས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཉི་ཤུ་ལྔ་པ་ཤེས་རབ་སྙིང་པོར་གྲགས་པའི་མདོ་འདི་ཉིད་ཀྱི་དངོས་བསྟན་གྱི་དོན་རྣམས་ཕུལ་དུ་ཕྱིན་པར་མཛད་ཟིན་ཏོ། །མདོ་འདི་ལ་རྒྱ་གར་གྱི་འགྲེལ་པར་གྲགས་པ་འགའ་རེ་ཡོད་པ་ལས། རྒྱ་སྐད་དུ། བི་མ་ལ་མི་ཏྲ། བོད་སྐད་དུ། དྲི་མེད་བཤེས་གཉེན་ཞེས་བྱ་བ། རྒྱལ་པོ་ཁྲི་སྲོང་ལྡེ་བཙན་གྱི་དུས་སུ་བོད་དུ་བྱོན་པ་དེས་མཛད་པའི་རྒྱ་ཆེར་འགྲེལ་པར་གྲགས་པ་འདི་བཟང་ཤོས་སུ་སྣང་ལ། ཕྱོགས་འདིར་བྱོན་པ་ཆེན་པོ་སྔོན་རབས་པ་ཐམས་ཅད་ཀྱིས་ཀྱང༌། འགྲེལ་པ་འདིའི་སྒོ་ནས་འཆད་ཉན་གྱིས་གཏན་ལ་འབེབས་པར་མཛད་དོ། །འདིར་ཚངས་པའི་འབྱུང་གནས་གཙུག་ལག་ཁང་གནས་པའི། དགེ་སློང་དགེ་འདུན་རྣམས་ཀྱི་ཞལ་ངོར་


TNT17_Page_0692
[མ་དཔེ་གཟིགས་ན་འདིར་གནོན།]

ནི། ཤེས་རབ་ཕ་རོལ་ཕྱིན་པའི་སྙིང་པོ་ཡི། །རྒྱ་ཆེར་བཤད་པ་དྲི་མ་མེད་པས་བྱས། །ཞེས་འབྱུང་སྟེ། ཆོས་འཁོར་བསམ་ཡས་ལ་སོགས་པའི་དགེ་འདུན་རྣམས་ཀྱི་དོན་དུ་མཛད་པ་ཡིན་སྐད། འགྲེལ་པ་འདི་ལ་བཤད་ཚུལ་མི་འཐད་པ་ཡང་ཅི་རིགས་པར་ཡོད་མོད་ཀྱི། སྤྱིར་ལེགས་བཤད་ཀྱང་མང་ཞིང་ཁྱད་པར་དུ་འཕགས་པའི་ཡུལ་དུ་མདོ་ལུགས་ཀྱི་བསྟན་པ་རྣལ་མ་ཡོད་པའི་སྐབས་སུ་བྱུང་བའི། སྡེ་སྣོད་འཛིན་པ་ཡང་ཡིན་ལ་བོད་ཀྱི་རྒྱལ་པོ་བྱང་ཆུབ་སེམས་དཔས་མཆོག་ཏུ་བཀུར་བ་ཡིན་པའི་ཕྱིར། འགྲེལ་པ་འདི་ཡང་བལྟ་བ་དང་ཉན་པ་ལ་སོགས་པའི་སྒོ་ནས་ཤེས་ན་ལེགས་སོ། །འདིའི་འཆད་ཚུལ་ནི་འདི་ལྟར་ཡོད་དོ། །གླེང་བསླང་བ་དང་སྐབས་དང་ནི། །བསྟན་པར་རྟོགས་པ་འདུས་པ་དང༌། །གླེང་གཞི་དྲིས་དང་ལན་བཏབ་པ། །དེ་ནི་རྣམ་པ་བཅུ་གཅིག་དང༌། །མཐུན་འགྱུར་རྗེས་སུ་ཡི་རང་དང༌། །རྣམ་པར་བརྒྱད་བསྡུས་པ་ཡིན། །ཅེས་འབྱུང་སྟེ། དང་པོ་གླེང་བསླང་བ་ནི་འདི་སྐད་སོགས། གཉིས་པ་སྐབས་བརྩོམ་པ་ནི་དུས་གཅིག་ན་སོགས། གསུམ་པ་བསྟན་པར་རྟོགས་པ་ནི་དགེ་སློང་གི་སོགས། བཞི་པ་གླེང་བཞི་ནི་དེའི་ཚེ་སོགས། ལྔ་པ་དྲིས་པ་ནི། དེ་ནས་སངས་རྒྱས་ཀྱི་མཐུས་སོགས། དྲུག་པ་ལ་ལན་བཏབ་པ་ནི། དེ་སྐད་ཅེས་སྨྲས་པ་དང༌། ཞེས་པ་ནས། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་བསླབ་པར་བྱའོ། །ཞེས་པའི་བར་ཏེ་འདི་ལ་ནང་ཚན་བཅུ་གཅིག་ཡོད་དོ། །བདུན་པ་མཐུན་འགྱུར་ནི། དེ་ནས་བཅོམ་ལྡན་འདས་སོགས། བརྒྱད་པ་རྗེས་སུ་ཡི་རང་ནི། བཅོམ་ལྡན་འདས་ཀྱིས་དེ་


TNT17_Page_0693
[མ་དཔེ་གཟིགས་ན་འདིར་གནོན།]

སྐད་ཅེས་བཀའ་སྩལ་པ་སོགས་སོ། །དྲི་བའི་སྐབས་ཇི་ལྟར་བསླབ་པར་བྱ། ཞེས་པ་ལ། བསམ་པ་དང༌། སྦྱོར་བ་དང༌། མངོན་དུ་བྱ་བ་དང༌། སྒྲུབ་པ་དང༌། རྟོགས་པའི་རྣམ་པས་ཇི་ལྟར་བསླབ། ཅེས་ལམ་ལྔ་དང་སྦྱར་ནས་འཆད་ཅིང༌། ཟབ་མོ་སྤྱོད་པ་ཞེས་པ་ལ། སྦྱོར་ལམ་དུ་མོས་པས་སྤྱོད་པ་དང༌། དེ་ཡང་རང་དོན། གཉིས་དོན། གཞན་དོན་གྱི་དབྱེ་བ་སོགས་དང༌། ས་དྲུག་ལ་སྒྲུབ་པའི་སྤྱོད་པ་སྟེ་བསླབ་པ་གསུམ་ལ་སྤྱོད་པ་དང༌། ས་བརྒྱད་པ་སོགས་ལ་ངེས་པའི་སྤྱོད་པ་སོགས་སྤྲོས་བཤད་མང་དུ་མཛད་དོ། །དྲིས་ལན་གྱི་དོན་བཅུ་གཅིག་ནི། རྟོག་བཅས་རྟོག་མེད་གཟུགས་བརྙན་དང༌། །སྟོང་ཉིད་མཚན་མེད་སྨོན་མེད་གསུམ། །སྒོམ་ལམ་སྤྱི་དང་སྤོང་བ་ཆེ། །བར་ཆད་མེད་དང་སེམས་དཔའ་ཆེ། །རྟོགས་པ་ཆེ་རྣམས་ལམ་ལྔས་བསྡུས། ཞོར་ལ་ཤེར་ཕྱིན་སྔགས་སུ་བསྟན། །ཅེས་བྱའོ། །ཚོགས་སྦྱོར་ཀྱི་ལམ་དུ་རྟོག་པ་དང་བཅས་པའི་གཟུགས་བརྙན་ལྷག་མཐོང་གི་དམིགས་པ་དངོས་སུ་བསྟན་ཅིང༌། རྟོག་པ་མེད་པའི་གཟུགས་བརྙན་ཞི་གནས་ཀྱི་དམིགས་པ་ནི། ཤུགས་ལ་བསྟན་ཏོ། །ཚོགས་སྦྱོར་གཉིས་སུ་ཞི་ལྷག་ཟུང་འབྲེལ་དུ་སྒོམ་དགོས་པའི་དོན་ལ། གཟུགས་བརྙན་རྣམ་པ་གཉིས་པོ་དེ་བསྟན་ཏོ། །དེ་ཡང་རང་བཞིན་གྱིས་སྟོང་པར་ཡང་དག་པར་བལྟའོ། །ཞེས་པ་ཡན་ཆད་དོ། །དེ་ནས་མཐོང་ལམ་གྱི་དམིགས་པ་རྣམ་པར་ཐར་པའི་སྒོ་གསུམ་ཡིན་ལ། དེ་ལ་གཟུགས་སྟོང་པའོ་སོགས་ཀྱིས་སྟོང་ཉིད་དང༌། མཚན་ཉིད་མེད་པ་སོགས་ཀྱིས་མཚན་མ་མེད་པ་དང་


TNT17_Page_0694
[མ་དཔེ་གཟིགས་ན་འདིར་གནོན།]

བྲི་བ་མེད་པ་སོགས་ཀྱིས་སྨོན་པ་མེད་པ་སྟེ། དམིགས་རྣམ་གསུམ་པོ་དེ་གོམས་པས་མཚན་ཉིད་ལ་སོགས་པའི་ཞེན་པ་བདུན་ལོགས་པའི་ཐ་སྙད་མཛད་དོ། །སྒོ་ལམ་གྱི་དམིགས་རྣམ་དངོས་ནི། དེ་ལྟ་བས་ན་སྟོང་པ་ཉིད་ལ་གཟུགས་མེད་སོགས་སོ། །དེའི་འབྲས་བུ་སྤོང་བ་ཆེ་བ་ནི། སེམས་ལ་སྒྲིབ་པ་མེད་སོགས་ཏེ། དེ་གཉིས་སྒོམ་ལམ་གྱི་དབང་དུ་བྱས་པའོ། །བར་ཆད་མེད་པའི་ལམ་དངོས་ནི། དུས་གསུམ་དུ་སོགས་སོ། །དེའི་འབྲས་བུ་སེམས་དཔའ་ཆེ་བ་ནི་བླ་ན་མེད་པ་ཞེས་སོ། །རྟོག་པ་ཆེ་བ་ནི་ཡང་དག་པར་ཞེས་པ་ལ་སོགས་པའོ། །དོན་ཚན་བཅུ་གཅིག་པོ་ནི་དེ་དག་ཡིན་ལ། དེ་ལྟ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་ཞེས་སོགས་སོ། །བཅུ་གཅིག་ལ་མི་བགྲོང་བར་ཞར་བྱུང་ཤེར་ཕྱིན་སྔགས་སུ་བསྟན་པ་ཞེས་བྱ་སྟེ། ལམ་ལྔ་སོགས་བཤད་ཚུལ་འདི་དངོས་བསྟན་ཚིག་ཟིན་མ་ཡིན་པར། སྦས་དོན་མངོན་རྟོགས་ཀྱི་རིམ་པ་ཡིན་ལ། དངོས་པོ་བརྒྱད་དང་སྦྱོར་ཚུལ་མི་འདུག་ཀྱང༌། མངོན་པར་རྟོགས་པའི་རྒྱན་གྱི་བཤད་སྒྲོས་དང་བསྟུན་ནས་འཆད་པར་སྣང་ཞིང༌། འགྲེལ་པ་དེ་ན་སྤྱི་ཁྱབ་ཏུ་ཉེ་བར་མཁོ་བའི་བཤད་སྒྲོས་ཀྱང་མང་སྣང་ངོ༌། །བློ་གྲོས་ཞན་པས་འགྲེལ་པ་དེ་མཐོང་ཡང་གོ་དཀའ་བར་གྱུར་ན། ལུགས་དེ་ནི་ཞིབ་ཅིང་གསལ་ལ་མ་ནོར་བར་ཨར་བྱང་ཆུབ་ཡེ་ཤེས་ཀྱི་འགྲེལ་པ་ན་བཀོད་འདུག་པས་དེར་བལྟ་བར་བྱའོ། །ད་ནི་སྦས་དོན་མངོན་རྟོགས་ཀྱི་རིམ་པ། བདག་གི་རྣམ་པར་རྟོག་པ་དང་སྦྱར་ན། དངོས་པོ་བརྒྱད་ཀྱི་རིམ་པ་དང་ཡང་འབྱོར་བར་མཐོང་སྟེ། དེ་ལྟར་ཡང་རྒྱལ་ཚབ་


TNT17_Page_0695
[མ་དཔེ་གཟིགས་ན་འདིར་གནོན།]

ཆེན་པོས་མངོན་པར་རྟོགས་པའི་རྒྱན་ལས། ཤེས་རབ་ཕ་རོལ་ཕྱིན་པ་ནི། །དངོས་པོ་བརྒྱད་ཀྱིས་ཡང་དག་བཤད། །རྣམ་ཀུན་མཁྱེན་ཉིད་ལམ་ཤེས་ཉིད། །དེ་ནས་ཐམས་ཅད་ཤེས་པ་ཉིད། །རྣམ་ཀུན་མངོན་རྫོགས་རྟོགས་པ་དང༌། རྩེ་མོར་ཕྱིན་དང་མཐར་གྱིས་པ། །སྐད་ཅིག་གཅིག་མངོན་རྫོགས་བྱང་ཆུབ། །ཆོས་ཀྱི་སྐུ་དང་དེ་རྣམས་བརྒྱད། །ཅེས་གསུངས་པ་ལྟར་ཏེ། འདིར་དངོས་པོ་བརྒྱད་ཅེས་པ་ལ། དངོས་པོའི་དོན་ནི། དངོས་པོ་དངོས་མེད་ཅེས་པ་ལྟ་བུའི་སྐབས་ཀྱི་དངོས་པོ་ལ་མི་ཟེར་གྱི། བརྗོད་དོན་ཙམ་ཞིག་ལ་དངོས་པོའི་སྒྲ་འཇུག་པའི་སྐབས་ཡིན་པས། ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་བརྗོད་བྱའི་དོན་ཡིན་པའི་མིང་སྟེ། དོན་གྱི་གཙོ་བོ་བརྒྱད་པོ་འདི་ཡིན་ཅེས་པའི་དོན་ནོ། །སྤྱིར་ཤེར་མདོ་ཙམ་གྱི་བརྗོད་བྱའི་དོན་གྱི་གཙོ་བོ་མཐར་ཐུག་གི་དབང་དུ་བྱས་ན། བརྒྱད་པོའི་ནང་ནས་ཀྱང་ཆོས་སྐུ་ཁོ་ན་ཡིན་མོད་ཀྱི། མདོ་གཞུང་ལ། སྡེ་ཚན་དུམ་བུ་བརྒྱད་དུ་ཕྱེ་ན། བརྒྱད་ཀར་དོན་གྱི་གཙོ་བོར་བྱ་སྟེ། དཔེར་ན་ལམ་ཤེས་ཀྱི་མདོའི་བརྗོད་བྱའི་དོན་གྱི་གཙོ་བོ་ལམ་ཤེས་ཉིད་ལ་བྱ་དགོས་པ་བཞིན་ནོ། །དེ་ཡང་མདོ་ཚིག་དེ་དག་གིས་དངོས་སུ་བསྟན་པའི་བརྗོད་བྱའི་དབང་དུ་བྱས་པ་ཡིན་གྱི། གཞན་དུ་ན། ལམ་ཤེས་ཀྱང་འབྲས་བུ་ཆོས་སྐུ་ཐོབ་བྱེད་ཀྱི་ཐབས་ཡིན་པའི་ཕྱིར། ཤུགས་བསྟན་དང༌། བརྒྱུད་ནས་སྟོན་པའི་དབང་དུ་བྱས་ན། དེ་དག་གི་ཡང་དོན་གྱི་གཙོ་བོ་ཆོས་སྐུ་ཡིན་ནོ། །དེ་ལ་དངོས་པོ་བརྒྱད་ནི། རྣམ་པ་ཐམས་ཅད་མཁྱེན་པ་ཉིད་དང༌། ལམ་ཐམས་ཅད་མཁྱེན་པ་ཉིད་དང༌། གཞི་ཐམས་ཅད་མཁྱེན་


TNT17_Page_0696
[མ་དཔེ་གཟིགས་ན་འདིར་གནོན།]

པ་ཉིད་དང༌། རྣམ་པ་ཀུན་མངོན་པར་རྫོགས་པར་རྟོགས་པའི་སྦྱོར་བ་དང༌། རྩེ་མོར་ཕྱིན་པའི་སྦྱོར་བ་དང༌། མཐར་གྱིས་པའི་སྦྱོར་བ་དང༌། སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པའི་སྦྱོར་བ་དང༌། འབྲས་བུ་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཀྱི་སྐུ་རྣམས་སོ། །དེ་དག་ཀྱང་ཡུལ་མཁྱེན་པ་གསུམ། ཉམས་ལེན་སྦྱོར་བ་བཞི། འབྲས་བུ་ཆོས་ཀྱི་སྐུ་ཞེས་གསུམ་དུ་ཡང་བསྡུ་བར་བྱ་ཞིང༌། ཡང་མཁྱེན་པ་གསུམ་ནི་གཏན་ལ་དབབ་བྱ་ཡིན་པས་མཚན་ཉིད་ཅེས་བྱ་ལ། རྣམ་རྫོགས་སྦྱོར་བ་ནི། མཚན་ཉིད་དང་མཐུན་པར། ཉམས་སུ་ལེན་པའི་རིམ་པ་ཡིན་པས་དེའི་སྦྱོར་བ་དང༌། རྩེ་མོའི་སྦྱོར་བ་ནི་ས་ལམ་རང་རང་སོ་སོའི་ཡེ་ཤེས་དེ་ཉིད་བྱང་བའི་སྐབས་ཡིན་པས་སྦྱོར་བ་རབ་ཏུ་སོན་པ་དང༌། མཐར་གྱིས་པའི་སྦྱོར་བ་ནི། རང་རང་སོ་སོའི་ལམ་གྱི་གོམས་པ་དེ་ཉིད་བརྟན་པ་ཡང་བྱེད་ཅིང་རྩལ་ཕྱོགས་མེད་དུ་འཕེལ་བའི་ཕྱིར། གོ་རིམ་མི་འདྲ་བ་དུ་མ་ལ་སློབ་པ་ཡིན་པས་རབ་ཏུ་སོན་པ་དེའི་གོ་རིམ་ཞེས་བྱ་ལ། སྐད་ཅིག་མའི་སྦྱོར་བ་ནི། གོ་རིམ་དེའམ། སྦྱོར་བ་གསུམ་པོ་དེ་ཐམས་ཅད་ཀྱི་ནུས་པ་དུས་གཅིག་ཏུ་བསྒྲིལ་བའི་སྐབས་ཡིན་པས། གོ་རིམ་གྱི་མཐའ་འམ་ཡང་ན་སྦྱོར་བ་ཐམས་ཅད་ཀྱི་མཐའ་ཞེས་བྱའོ། །ཆོས་ཀྱི་སྐུ་ནི་ལམ་ཐམས་ཅད་ཀྱི་གྲུབ་དོན་རྩོལ་མེད་ཤུགས་འབྱུང་གི་ཚུལ་དུ་གནས་པས། མཐའ་དེའི་རྣམ་སྨིན་ཅེས་བྱའོ། །དེས་ན་ཤེར་ཕྱིན་གྱི་མཚན་ཉིད། ཤེར་ཕྱིན་གྱི་སྦྱོར་བ། སྦྱོར་བ་རབ་ཏུ་སོན་པ། གོ་རིམ་གྱི་སྦྱོར་བ། མཐའི་སྦྱོར་བ། རྣམ་སྨིན་མཐར་ཐུག་སྟེ། དོན་ཚན་


TNT17_Page_0697
[མ་དཔེ་གཟིགས་ན་འདིར་གནོན།]

དྲུག་ཏུ་ཡང་འདུས་སོ། །དེ་ལྟར་ཡང༌། མཚན་ཉིད་དེ་ཡི་སྦྱོར་བ་དང༌། །དེ་རབ་དེ་ཡི་གོ་རིམ་དང༌། །དེ་མཐའ་དེ་ཡི་རྣམ་སྨིན་ནི། །དོན་བསྡུས་གཞན་ཏེ་རྣམ་པ་དྲུག །ཡུལ་ནི་རྣམ་པ་གསུམ་པོ་རྒྱུ། །སྦྱོར་བ་བཞི་ཡི་བདག་ཉིད་ཅན། །ཆོས་སྐུ་འཕྲིན་ལས་འབྲས་བུ་ནི། །དོན་བསྡུས་གཞན་ཏེ་རྣམ་པ་གསུམ། །ཞེས་སོ། །དེ་ལ་ཡུལ་ཅེས་བྱ་བ་ནི། སྦྱོར་བ་བཞི་པོའི་དམིགས་པའི་ཡུལ་ཡིན། དེ་ཡང་མཁྱེན་པ་གསུམ་མ་ཐོབ་པ་རྣམས་ཀྱིས། མཁྱེན་གསུམ་ལ་དངོས་སུ་ནི་དམིགས་མི་ཐུབ་ལ། མཚན་ཉིད་འདི་དང་འདི་ལྟ་བུ་དག་ནི་རྣམ་མཁྱེན་ནོ། །ཞེས་སྒྲ་དོན་འདྲེས་པར་བཟུང་སྟེ་རྣམ་མཁྱེན་གྱི་མཚན་ཉིད་ཡང་ཡང་ཡིད་ལ་དྲན་པ་ཙམ་གྱྀས་ནི་དེ་ལ་དམིགས་པར་ཡང་མི་འགྱུར་བས། འདིར་མཁྱེན་པ་གསུམ་གྱི་རྟོགས་བྱ་གང་ཡིན་པ་དེ། སྦྱོར་བ་བཞིའི་དམིགས་པའི་ཡུལ་དུ་འཇོག་པ་ཡིན་ཏེ། དེའི་ཕྱིར་མཁྱེན་གསུམ་ཡང་བརྒྱུད་ནས་ཡུལ་དུ་བཞག་གོ །རྒྱུ་ཞེས་བྱ་བ་ནི་སྐྱེད་བྱེད་ཀྱི་རྒྱུ་དང༌། རྒྱུ་མཚན་གཉིས་ལ་སྐབས་ཐོབ་ཀྱི་འཇུག་ཤུལ་སོ་སོར་ཡོད་པ་ལས། འདིར་ནི་གཉིས་ཀ་ལྟར་མི་འགལ་ཏེ། གཙོ་བོར་ནི་རྣམ་པ་དང་ལམ་དང་གཞི་གསུམ་ལ་སྤྲོས་པ་ཐམས་ཅད་དང་བྲལ་བའི་རྣམ་པ་དེ་ཉིད་དམིགས་པའི་ཡུལ་དང་རྒྱུ་མཚན་དུ་བྱས་ནས་འཇོག་དགོས་པའི་ཕྱིར་རྒྱུའི་དོན་རྒྱུ་མཚན་དུ་བྱས་ལ། དམིགས་ཡུལ་དེ་ལ་དམིགས་ནས་བསྒོམས་པས་ཡེ་ཤེས་སྐྱེ་བ་ནི། དམིགས་ཡུལ་དེ་ཡེ་ཤེས་དེའི་བསྐྱེད་རྒྱུ་དངོས་མིན་ཡང༌། བསྐྱེད་རྒྱུ་དང་རྣམ་པ་མཚུངས་པས་སྐྱེད་བྱེད་ཀྱི་རྒྱུའི་ཚུལ་དུ་བཤད་ཀྱང་


TNT17_Page_0698
[མ་དཔེ་གཟིགས་ན་འདིར་གནོན།]

རུང་ངོ༌། །ཡང་རྣམ་པ་གཅིག་ཏུ་ན། ཇི་སྐད་དུ། སངས་རྒྱས་ལས་ཆོས་ཆོས་ལས་འཕགས་པའི་ཚོགས། །ཚོགས་ལས་སྙིང་པོ་ཡེ་ཤེས་ཁམས་ཐོབ་མཐར། །ཞེས་གསུངས་པའི་དངོས་བསྟན་ལྟར། སངས་རྒྱས་བྱང་སེམས་སོགས་ཀྱི་ཐུགས་རྒྱུད་ཀྱི་མཁྱེན་པ་གསུམ་གྱིས་རྒྱུ་མཐུན་པའི་ཆོས་བསྐྱེད་ཅིང༌། དེས་གདུལ་བྱའི་རྒྱུད་ལ་སྦྱོར་གཞི་སོགས་བསྐྱེད་པར་བྱས་ཀྱང་རུང་ངོ༌། །དེ་དག་ལས་མཁྱེན་པ་གསུམ་ནི། ཇི་སྐད་དུ། ཉི་ཁྲི་ལྔ་སྟོང་པ་ལས། རབ་འབྱོར་ཐམས་ཅད་ཤེས་པ་ཉིད་ནི་ཉན་ཐོས་དང་རང་སངས་རྒྱས་རྣམས་ཀྱི་ཡིན་ནོ། །ལམ་ཤེས་པ་ཉིད་ནི་བྱང་ཆུབ་སེམས་དཔའ་རྣམས་ཀྱི་ཡིན་ནོ། །རྣམ་པ་ཐམས་ཅད་མཁྱེན་པ་ཉིད་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡིན་ནོ། །ཞེས་གསུངས་ཤིང༌། རྒྱལ་ཚབ་ཆེན་པོའི་བསྟན་བཅོས་མངོན་པར་རྟོགས་པའི་རྒྱན་ལས་ཀྱང༌། ཐུབ་པའི་རྣམ་ཀུན་མཁྱེན་པ་ཉིད། །ཅེས་དང༌། བྱང་ཆུབ་སེམས་དཔའ་མཁས་རྣམས་ཀྱི། །ལམ་ཤེས་ཉིད་ནི་དེ་འདྲར་བཤད། །ཅེས་དང༌། ཉན་ཐོས་ལ་སོགས་མཐོང་བའི་ལམ། དེ་འདྲ་ཀུན་ཤེས་ཉིད་དུ་འདོད། །ཅེས་འབྱུང་བ་སོགས་ཀྱིས། སངས་རྒྱས་ཀྱི་ཡེ་ཤེས་ནི་རྣམ་མཁྱེན་དང༌། བྱང་ཆུབ་སེམས་དཔའ་འཕགས་པའི་རྒྱུད་ཀྱི་ཡེ་ཤེས་ནི་ལམ་ཤེས་དང༌། ཉན་རང་འཕགས་པའི་རྒྱུད་ཀྱི་ཡེ་ཤེས་ནི་གཞི་ཤེས་སོ་ཞེས་ཀྱང་རགས་བཤད་དུ་བྱ་ལ། འདི་ལ་འགའ་ཞིག་ནི། རྣམ་མཁྱེན་གང་ཡིན་ལམ་ཤེས་ཡིན་ལ། ལམ་ཤེས་གང་ཡིན་གཞི་ཤེས་ཡིན་ཏེ། ཤེས་བྱ་ཐམས་ཅད་མཁྱེན་


TNT17_Page_0699
[མ་དཔེ་གཟིགས་ན་འདིར་གནོན།]

ཕྱིན་ལམ་སྐྱེ་མེད་དུ་མ་རྟོགས་པ་མི་སྲིད་ལ། ལམ་གསུམ་ཀ་རྟོགས་ཕྱིན་གང་ཟག་གི་བདག་མེད་མ་རྟོགས་པ་མི་སྲིད་པས། རྟེན་གྱི་གང་ཟག་སུའི་རྒྱུད་ལ་ཡོད་ཀྱང་རུང་སྟེ། ལམ་གསུམ་སྐྱེ་མེད་དུ་རྟོགས་པ་ཡིན་ཕྱིན་ཆད་ལམ་ཤེས་ཡིན་ཅིང༌། གང་ཟག་གི་བདག་མེད་རྟོགས་པ་ཡིན་ཕྱིན་ཆད་གཞི་ཤེས་ཀྱང་ཡིན་པས་སོ། །འོན་ཀྱང་ཚུར་ཚུར་ལ་ནི་མ་ཁྱབ་སྟེ། བྱང་ཆུབ་སེམས་དཔའི་རྒྱུད་ཀྱི་ལམ་ཤེས་ནི། རྣམ་མཁྱེན་མ་ཡིན་ཅིང༌། ཉན་རང་གི་གཞི་ཤེས་ཀྱང་མཁྱེན་པ་གཞན་གཉིས་མ་ཡིན་ནོ། །ཞེས་ཟེར་རོ། །ལ་ལ་དག་ནི། མཁྱེན་པ་གསུམ་པོ་ངོ་བོ་མི་གཅིག་པ་ལྟ་ཅི་སྨོས་རྒྱུད་གཅིག་ལ་ཡང་མི་གནས་ཏེ། རྟེན་སོ་སོར་ངེས་པར་བཤད་པའི་ཕྱིར་རོ། །དེས་ན་སངས་རྒྱས་ཀྱིས་ལམ་དང་གཞི་སྐྱེ་མེད་དུ་གཟིགས་ཀྱང་དེ་རྣམ་མཁྱེན་ཁོ་ན་ཡིན་གྱི་གཞན་མ་ཡིན་ནོ། །ཞེས་སེམས་པར་བྱེད་དོ། །གཞན་དག་ནི་ཡོན་ཏན་ཡར་ལྡན་ཡིན་པས། ཉན་རང་ནི་གཞི་ཤེས་གཅིག་པུ་དང་ལྡན་ལ། བྱང་སེམས་ནི་དེའི་སྟེང་དུ་ལམ་ཤེས་དང་ཡང་ལྡན་ཅིང༌། སངས་རྒྱས་ནི་མཁྱེན་པ་གསུམ་ཀ་དང་ལྡན་པས། རྒྱུད་གཅིག་ལ་གསུམ་མམ་གཉིས་འཇུག་པ་ནི་ཡོད་ཀྱང༌། གསུམ་པོ་དངོས་པོ་ནི་ཐ་དད་ཡིན་ནོ་ཞེས་སྨྲའོ། །དེ་དག་ལས་མང་པོ་ཞིག་ནི། སངས་རྒྱས་ཀྱི་རྣམ་མཁྱེན་བྱང་སེམས་ཀྱི་ལམ་ཤེས། ཉན་རང་གི་གཞི་ཤེས་རྣམས་མཚན་ཉིད་པ་དངོས་ཡིན་ལ། བྱང་སེམས་ཀྱིས་གང་ཟག་གི་བདག་མེད་མཐོང་བ་དང༌། སངས་རྒྱས་ཀྱིས་ལམ་དང་གཞི་སྐྱེ་མེད་དུ་གཟིགས་པ་


TNT17_Page_0700
[མ་དཔེ་གཟིགས་ན་འདིར་གནོན།]

ནི། དེ་དང་དེ་བཏགས་པ་བ་ཡིན་ནོ། །ཞེས་རྒྱུ་མཚན་དུ་མ་དང་བཅས་ཏེ་བརྗོད་པ་དང༌། ཁ་ཅིག་ནི་མཁྱེན་པ་གསུམ་ཀ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་པས། སངས་རྒྱས་ཀྱི་གསུམ་ཀར་མཚན་ཉིད་པ་ཡིན་པ་དང༌། བྱང་ཆུབ་སེམས་དཔའི་ལམ་དང་གཞི་ཤེས་པ་མཚན་ཉིད་པ་ཡིན་ལ། ཉན་རང་གི་གཞི་ཤེས་ནི། སྤྲོས་པ་ཕྱོགས་གཅིག་ཙམ་བཀག་པ་ལས། གཞན་སྤྲོས་བྲལ་གྱི་རྣམ་པ་ཅན་མ་ཡིན་པས་བཏགས་པ་བའོ། །ཞེས་རྒྱུ་མཚན་དུ་མ་དང་བཅས་ཏེ་འབྲི་བར་བྱེད་དོ། །གཞན་ལ་ལ་དག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཡང༌། སངས་རྒྱས་ཁོ་ནའི་རྒྱུད་ལ་ཡོད་དོ་ཞེས་དང༌། ཁ་ཅིག་ནི་རྣམ་མཁྱེན་ཡང་རྣམ་པ་གཉིས་ཏེ་རྒྱུ་དང་འབྲས་བུའོ། །རྒྱུའི་རྣམ་མཁྱེན་ནི། བྱང་ཆུབ་སེམས་དཔའ་ཁོ་ནའི་རྒྱུད་ལ་ཡོད་དེ། སྐབས་དང་པོའི་རྣམ་མཁྱེན་ཡང་འདི་ཁོ་ན་ཡིན་ལ་སེམས་བསྐྱེད་སོགས་བཅུ་པོ་ཡང་རྣམ་མཁྱེན་ཉིད་ཡིན་པ་དང༌། འབྲས་བུའི་རྣམ་མཁྱེན་ནི་ཆོས་སྐུའོ་ཞེས་ཟེར་བ་དང༌། ཁ་ཅིག་ནི་སེམས་བསྐྱེད་སོགས་ཆོས་བཅུ་པོ་དངོས་པོ་བརྒྱད་ཀྱི་རྣམ་མཁྱེན་མ་ཡིན་ཏེ། མཚོན་བྱེད་ཀྱི་ཆོས་སམ་དམིགས་པའི་ཡུལ་ཡིན་ནོ། །ཞེས་འདོད་པ་དང༌། གཞན་ཁ་ཅིག་ནི་མདོ་དང་རྒྱན་གྱི་མཆོད་བརྗོད་དང༌། བསྟན་བཅོས་དངོས་ཀྱི་མདོར་བསྟན་རྒྱས་བཤད་སོགས་ལ་མཁྱེན་གསུམ་གྱི་འཇོག་མཚམས་མི་འདྲ་བ་རེ་རེ་ཡིན་ནོ་ཟེས་བླུན་གཏམ་དུ་སྨྲ་བ་སོགས། བསྟན་པ་ལྔ་བརྒྱ་ཐ་མ་ལ། རྒྱ་བོད་གཉིས་ཀར་དུ་འདིའི་ལག་ལེན་དང་སྒྲུབ་དཀའ་ནི་ཤིན་ཏུ་ཕྲ་བ་བཤད་པ་ཙམ་


TNT17_Page_0701
[མ་དཔེ་གཟིགས་ན་འདིར་གནོན།]

ཞིག་ནི་ཧ་ཅང་དར་ཆེས་པས། རྣམ་པ་དུ་མར་འཆོལ་བས་ཡིན་ལ། ཕྱོགས་རེ་ནས་བལྟས་ན། ཐམས་ཅད་ལ་འགལ་བ་ཆེར་མེད་པ་ལྟར་སྣང་ཞིང༌། ཕྱོགས་ཅིག་ཤོས་ནས་བལྟས་ན། རེ་རེ་ཞིང་སྐྱོན་དུ་མ་འཇུག་པར་ལྟ་ཡང་སྣང་བས་ཞིབ་ཏུ་དཔྱད་དགོས་ཀྱང༌། རེ་ཞིག་འདིར་རྒྱ་མི་བསྐྱེད་དོ། །དེ་ལ་དངོས་པོ་དང་པོ་རྣམ་པ་ཐམས་ཅད་མཁྱེན་པ་ནི། མདོ་ལས་བཅོམ་ལྡན་འདས་ཅིའི་སླད་དུ་རྣམ་པ་ཐམས་ཅད་མཁྱེན་པ་ཉིད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ལགས། རབ་འབྱོར་རྣམ་པ་གང་དག་དང༌། རྟགས་གང་དག་དང༌། མཚན་མ་གང་དག་གི་ཆོས་རྣམས་རབ་ཏུ་བརྗོད་པའི། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་དེ་བཞིན་གཤེགས་པས་ཐུགས་སུ་ཆུད་དེ། དེའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ནི། རྣམ་པ་ཐམས་ཅད་མཁྱེན་པ་ཉིད་ཅེས་བྱའོ། །ཞེས་གསུངས་ཏེ། དེ་ལ་རྣམ་པ་ནི་ངོ་བོ་དང༌། རྟགས་ནི་འབྲས་བུ་དང༌། མཚན་མ་ནི་རྒྱུའི་དོན་ཡིན་པས། མ་ལུས་ཤིང་ལུས་པ་མེད་པའི་ཤེས་བྱ་ཐམས་ཅད་ཀྱི་རང་རང་སོ་སོའི་ངོ་བོ་རྣམས་དང༌། སོ་སོ་རྣམས་ཀྱི་འབྲས་བུ་རྣམས་དང༌། དེ་དང་དེའི་རྒྱུ་རྐྱེན་ཐམས་ཅད་དེ། བསྐྱེད་བྱ་སྐྱེད་བྱེད་ཀྱི་རྒྱུ་འབྲས་དང༌། རྣམ་པར་གཞག་བྱ་འཇོག་བྱེད་ཀྱི་རྒྱུ་འབྲས་ཐམས་ཅད་དོ། །དེ་འདྲ་དེ་རྣམས་ཡེ་ཤེས་གཅིག་གིས་ཅིག་ཆར་མཁྱེན་པས་རྣམ་པ་ཐམས་ཅད་མཁྱེན་པ་ཉིད་དོ། །དེ་ཡང་ཇི་ལྟ་བའི་མཁྱེན་ཚུལ་གྱིས་ནི་


TNT17_Page_0702
[མ་དཔེ་གཟིགས་ན་འདིར་གནོན།]

ཆོས་ཐམས་ཅད་ཀྱི་རྒྱུ་འབྲས་ངོ་བོ་གསུམ་སྤྲོས་བྲལ་དུ་མཁྱེན་ཅིང༌། ཇི་སྙེད་གཟིགས་པའི་ཡེ་ཤེས་ཀྱིས་ནི། ཤེས་བྱ་ཐམས་ཅད་ཀྱི་ངོ་བོ་རྒྱུ་འབྲས་ཀྱི་རྣམ་འགྱུར་ཐམས་ཅད་ཀྱང་མཁྱེན་པ་ཡིན་ནོ། །དེ་ཡང་རྣམ་པ་ཐམས་ཅད་རང་བཞིན་གྱིས་འོད་གསལ་བར་གཟིགས་པ་ཡིན་ལ། རྣམ་པ་སྐྱེ་མེད་ཅེས་སམ། རྣམ་པ་རང་བཞིན་མེད་པ་ཞེས་འཆད་པ་ཡང་རང་བཞིན་འོད་གསལ་དང་དོན་གཅིག་པས། རྣམ་གྲངས་སུ་བཤད་ན་མི་འགའ་ཡང་བརྗོད་ཚུལ་ལེགས་པོ་ཁོ་ནར་ཡང་མི་འདུག་པས། སྐྱེ་མེད་དང་རང་བཞིན་མེད་ཅེས་པའི་བཟླས་བརྗོད་ཁོ་ན་ལ། བཟང་པོར་ཞེན་པ་ཡང་མི་མཛེས་སོ། །སངས་རྒྱས་ཀྱི་ཡེ་ཤེས་རྣམ་པ་ཐམས་ཅད་མཁྱེན་པས་མ་དག་པའི་རྣམ་བརྟགས་མཚན་མ་གསུམ་པོ་དངོས་སུ་གཟིགས་པ་ནི་མ་ཡིན་ཏེ། ཆོས་ཅན་ཀུན་རྫོབ་པའི་སྣང་བ་ཐམས་ཅད་གདོད་ནས་མ་གྲུབ་པའི་ཕྱིར། གནས་ཚུལ་ལ་མ་གྲུབ་པ་དེ་ཉིད་གཟིགས་ན། ཡེ་ཤེ་འཁྲུལ་བར་ཐལ་བའི་ཕྱིར་རོ། །གང་ཡོད་པ་མི་མཐོང་བ་དང༌། མེད་པ་མཐོང་བ་ནི་འཁྲུལ་ཞིང་རྨོངས་པ་ཁོ་ན་ཡིན་ནོ། །དེས་ན་ཇི་ལྟ་བ་དང་ཇི་སྙེད་པ་གཉིས་ཀ་ཤེས་བྱ་ཐམས་ཅད་ཀྱི་གནས་ཚུལ་རྟག་བརྟན་ཞི་བ་གཡུང་དྲུང་གི་ཡེ་ཤེས་བདེ་བ་དམ་པའི་ངོ་བོར་གནས་པ་གཟིགས་པ་གཞིར་བཞག་པ་ལས། དེ་ཉིད་ལ་དངོས་པོ་དངོས་མེད་ཡུལ་ཡུལ་ཅན། འཁོར་བ་དང༌། ལམ་དང༌། འབྲས་བུ་གསར་ཐོབ་སོགས་འཇིག་རྟེན་པ་དང་རྣལ་འབྱོར་པ་རྣམས་ལ་དངོས་སུ་སྣང་བ་དང༌། དངོས་སུ་མི་སྣང་ཡང༌། བློས་བཞག་པའི་ཆོས་གང་


TNT17_Page_0703
[མ་དཔེ་གཟིགས་ན་འདིར་གནོན།]

ཡང་ཡོད་མ་མྱོང་བ་ཞི་བའི་མཚན་ཉིད་དེ། སྣང་མཁན་དང་འཇོག་མཁན་གྱི་ཤེས་པ་ཀུན་ནས་ཉོན་མོངས་པ་ཐམས་ཅད་ཀྱང་གདོད་ནས་མེད་པའི་ཕྱིར་རྣམ་པར་དག་པ། རང་བཞིན་གྱི་འོད་གསལ་བ་མཉམ་ཉིད་ཡིན་པར་རྟོགས་པ་དེ་ནི་ཇི་ལྟར་བ་མཁྱེན་ཚུལ་ཡིན་ལ། རང་བཞིན་འོད་གསལ་གྱི་སེམས་ཉིད་དེ། དོན་དམ་པའི་རྣམ་པ་ཐམས་ཅད་པ་ཡིན་པའི་ཕྱིར། ཤེས་བྱ་ཐམས་ཅད་ཀྱི་རྣམ་པ་དོན་དམ་པ་དེ། ཀུན་རྫོབ་ཀྱི་ཤེས་བྱ་ཐམས་ཅད་ཀྱི་ཡང་གནས་ལུགས་དང་ཆོས་ཉིད་དུ་ཡོད་ཅིང་དེ་ལྟར་ཡོད་པ་མཁྱེན་པ་ནི་ཇི་སྙེད་པ་མཁྱེན་པའི་ཡེ་ཤེས་སོ། །དོན་དམ་སྲིད་གསུམ་དངོས་སུ་གཟིགས་ཀྱང་དེ་ཀུན་རྫོབ་ཀྱི་སྣང་བ་མ་ཡིན་ཅིང༌། ཀུན་རྫོབ་སྲིད་གསུམ་དངོས་སུ་མ་གཟིགས་ཀྱང༌། སེམས་ཅན་རྣམས་ལ་དེ་སྣང་བ་དང༌། དེ་རྣམས་ཀྱི་འཁྲུལ་ངོར་བདེ་སྡུག་སོགས་འབྱུང་བ་མཁྱེན་ནོ། །ཇི་ལྟ་བ་དང་ཇི་སྙེད་པའི་རྟོགས་ཚུལ་གཉིས་ཀར་རང་རིག་གི་ཚུལ་གྱིས་མཁྱེན་པ་ཡིན་པས། དོན་དམ་པའི་རྣམ་བརྟགས་མཚན་མ་རྣམས། རང་བཞིན་འོད་གསལ་ཉིད་ཡིན་ལ། དོན་དམ་པའི་རྣམ་བརྟགས་མཚན་མ་གསུམ་མཁྱེན་པ་དང༌། འོད་གསལ་དེ་ཉིད་རྣམ་པ་ཐམས་ཅད་པ་ཡིན་པ་དོན་གཅིག་ལ་འདུའོ། །དེ་ལྟར་ཡང་རྒྱལ་ཚབ་ཆེན་པོས། འགྲོ་བ་ཞི་བའི་ཆོས་ཉིད་དུ། །རྟོགས་ཕྱིར་ཇི་ལྟར་ཉིད་དེ་ཡང༌། །རང་བཞིན་ཀྱིས་ནི་ཡོངས་དག་ཕྱིར། །ཉོན་མོངས་གདོད་ནས་ཟད་ཕྱིར་རོ། །ཤེས་བྱ་མཐར་ཐུག་རྟོགས་པའི་བློས། །ཐམས་ཅད་མཁྱེན་པའི་ཆོས་ཉིད་ནི། །


TNT17_Page_0704
[མ་དཔེ་གཟིགས་ན་འདིར་གནོན།]

སེམས་ཅན་ཐམས་ཅད་ལ་ཡོད་པར། །མཐོང་ཕྱིར་ཇི་སྙེད་ཡོད་པ་ཉིད། །ཅེས་ཇི་ལྟ་ཇི་སྙེད་ཀྱི་རྟོགས་ཚུལ་དེ་ལྟར་ཡིན་པར་གསུངས་ལ། ཁ་ཅིག་སངས་རྒྱས་ཀྱིས་མ་དག་པའི་སྣང་བ་ཐམས་ཅད་གཟིགས་ཀྱང༌། བདེན་འཛིན་མེད་པས་མ་འཁྲུལ་བ་ཡིན་ནོ་སྐད་ཟེར་བ་ནི། སྐྱེས་བུ་འདི་ནི་ཆོམ་པོས་བཟུང་བས་ཆོ་ངེས་འདེབས་མོད་ཀྱི། ནོར་འཕྲོག་རྒྱུ་མེད་པས་སྡུག་བསྔལ་མེད་དོ་ཞེས་ཟེར་བ་དང༌། སྒྱུ་མའི་ཆ་སྒྱུས་ཤེས་པའི་མི་འདིས་ནི། སྒྱུ་མ་སྤྲུལ་པའི་ཁང་པ་མཐོང་མོད་ཀྱི། སྒྱུ་མར་ཤེས་པའི་ཕྱིར་མ་འཁྲུལ་ལོ། །ཞེས་ཟེར་བ་དང་འདྲ་སྟེ། ཆོ་ངེས་འདེབས་པ་ཉིད་སྡུག་བསྔལ་ཐོབ་པའི་རྟགས་ཡིན་པ་དང༌། སྒྱུ་མའི་ཁང་བཟང་མཐོང་བ་ཉིད་དབང་པོ་བསླད་པའི་འཁྲུལ་བ་ཡིན་ན། འཁྲུལ་བའི་ངོས་འཛིན་བློས་བཅོམ་མ་གཞན་ཞིག་གསར་དུ་རྣམ་པར་བཞག་ནས། དེ་མེད་པས་འཁྲུལ་བ་མེད་དོ་ཞེས་བརྗོད་ཀྱང་མི་མཛེས་པ་ལྟར། གང་མི་རྟག་པ་དང༌། སྡུག་བསྔལ་བ་དང༌། གཟུགས་སོགས་སུ་སྣང་བ་དེ་ཉིད་འཁྲུལ་བ་ཡིན་པས། དེ་ལ་བདེན་པར་མི་འཛིན་ནོ་ཞེས་སྨྲས་པས་ཅི་ཞིག་བྱ། དེ་ལྟར་ན་སངས་རྒྱས་ཀྱི་ཡེ་ཤེས་དེ་ནི། ཤེས་བྱ་ཐམས་ཅད་མཁྱེན་པའི་ཕྱིར་རྣམ་པ་ཐམས་ཅད་མཁྱེན་པ་ཉིད་ཡིན་ནོ། །སྤྲོས་པ་ཐམས་ཅད་ཉེ་བར་ཞི་བའི་ཡེ་ཤེས་ཡིན་པས་ཤེས་རབ་དང༌། ཆོས་ཐམས་ཅད་ཀྱི་གནས་ལུགས་མཐར་ཐུག་པའི་ཕྱིར། ཕ་རོལ་ཏུ་ཕྱིན་པ་ཡིན་པས་ན་ཤེས་རབ་ཀྱི་ཕ་རོལ་ཏུ་ཕྱིན་པའོ། །དངོས་པོ་གཉྀས་པ་ལམ་ཐམས་ཅད་ཤེས་པ་ཉིད་ནི། མདོ་ལས་བཅོམ་ལྡན་འདས་ཅིའི་སླད་དུ་ལམ་གྱི་རྣམ་


TNT17_Page_0705
[མ་དཔེ་གཟིགས་ན་འདིར་གནོན།]

པ་འཚོལ་བ་ཉིད་བྱང་ཆུབ་སེམས་དཔའ་རྣམས་ཀྱི་ལགས། རབ་འབྱོར་བྱང་ཆུབ་སེམས་དཔའ་རྣམས་ཀྱི་ནི་ཉན་ཐོས་ཀྱི་ལམ་གང་ཡིན་པ་དང༌། རང་སངས་རྒྱས་ཀྱི་ལམ་གང་ཡིན་པ་དང༌། སངས་རྒྱས་ཀྱི་ལམ་གང་ཡིན་པའི་ལམ་ཐམས་ཅད་བསྐྱེད་པར་བྱ་ཞིང༌། ལམ་ཐམས་ཅད་ཤེས་པར་བྱའོ། །དེ་དག་ཀྱང༌། ཡོངས་སུ་རྫོགས་པར་བྱ་ཞིང༌། དེ་དག་གི་ལམ་གྱི་བྱ་བ་ཡང་བྱ་ལ། སྨོན་ལམ་ཡོངས་སུ་རྫོགས་པར་མ་བྱས་པ་དང༌། སེམས་ཅན་ཡོངས་སུ་སྨིན་པར་མ་བྱས་པ་དང༌། སངས་རྒྱས་ཀྱི་ཞིང་ཡོངས་སུ་མ་སྦྱངས་པར། དེ་དག་གིས་ཡང་དག་པའི་མཐའ་མངོན་སུམ་དུ་ནི་མི་བྱའོ། །དེའི་ཕྱིར་བྱང་ཆུབ་སེམས་དཔའ་རྣམས་ཀྱིས་ནི། ལམ་གྱི་རྣམ་པ་ཤེས་པ་ཉིད་ཅེས་བྱའོ། །ཞེས་གསུངས་ཏེ། འདི་ལ་ཕལ་ཆེ་བ་དག་ལམ་གསུམ་སྐྱེ་མེད་དུ་རྟོགས་པ་དང༌། ལམ་གསུམ་རང་བཞིན་མེད་པར་རྟོགས་པ་ཞེས་ཟེར་ཞིང༌། དེའི་སྐྱེ་མེད་དང་རང་བཞིན་མེད་པ་ནི། ཤེར་ཕྱིན་ཡིན་པར་སྟོན་པའི་མཚན་ཉིད་ཀྱི་ཟུར་དུ་བསམས་པའོ། །དེ་ལྟར་ཡང་རུང་བ་ནི་ཡིན་མོད་ཀྱི། ཤེར་ཕྱིན་གྱི་མཚན་ཉིད་དེ་འདྲ་ཁོ་ནར་བཟུང་དགོས་པ་ཡང་མ་ཡིན་ནོ། །དེ་ལྟ་མོད་ཀྱི། དཔེར་ན་གཟུགས་སོགས་ཕུང་པོ་དམིགས་པའི་རྟེན་དུ་བཞག་ནས། དེ་བདེན་མེད་དུ་སྒོམ་པའམ། སྣང་ཆ་དེའི་རྣམ་པ་བདེན་མེད་དུ་ཤར་བ་ལྟ་བུར། འདིར་ཡང་དམིགས་ཡུལ་ཐེག་པ་གསུམ་གྱི་ལམ་གྱི་མཚན་ཉིད་བློ་ལ་ངེས་པར་བྱས་ནས། དེའི་འདྲའི་མཚན་ཉིད་ཀྱི་རྣམ་པ་ཡིད་ཡུལ་དུ་ཤར་བ་དེ་ལ་དམིགས་ནས་འདི་རང་བཞིན་མེད་དོ་སྙམ་


TNT17_Page_0706
[མ་དཔེ་གཟིགས་ན་འདིར་གནོན།]

སྒོམ་པའམ། ས་ལམ་སོ་སོའི་མཉམ་གཞག་རྗེས་ཐོབ་ཀྱི་ཉམས་མྱོང་ཤར་བ་རྣམས་སྒྱུ་མ་ལྟར་རང་བཞིན་མེད་པའི་དོན་སྒོམ་པ་ཙམ་ཡང་གནས་སྐབས་འདིའི་ལམ་སྐྱེ་མེད་ཀྱི་གོ་དོན་མིན་ནོ། །འོ་ན་ཅི་ཞེ་ན། ལམ་གྱི་རྣམ་པ་སྐྱེ་མེད་ཅེས་པ། སྐྱེ་མེད་རྣམ་པའི་ལམ་ཞེས་པའི་དོན་དུ་འགྱུར་ཏེ། རང་རྒྱུད་ཀྱི་མཉམ་གཞག་གམ་རྗེས་ཐོབ་ཀྱི་ལམ་གང་ཡིན་པ་དེ་ཡང༌། སྐྱེ་འགག་གནས་གསུམ་ལ་སོགས་པ་སྤྲོས་པ་ཐམས་ཅད་རང་སར་ཞི་བའི་རྣམ་པའམ། འགའ་ཞིག་དངོས་སུ་སྤྲོས་པའི་རྣམ་པ་ཙམ་སྣང་དུ་ཆུག་ཀྱང༌། མཉམ་གཞག་སྤྲོས་མེད་ཀྱི་ཤུགས་ཀྱིས་ཟིན་པས། སྤྲོས་པའི་མཚན་མ་སྟོབས་བྲི་ནས་སྤྲོས་མེད་དང་འདྲ་རུང་དུ་གྱུར་པ་ནི། སྐྱེ་མེད་རྣམ་པའི་ལམ་ཡིན་ལ། དེ་རྟོགས་ཚུལ་ལམ། ཤེས་ཚུལ་ནི། མཉམ་གཞག་ལ་རང་རིག་ཁོ་ན་དང༌། རྗེས་ཐོབ་ལ་གཉིས་ཀའོ། །དེས་ན་བྱང་ཆུབ་སེམས་དཔའ་རྣམས་ཀྱི་མཉམ་གཞག་རྣམ་པར་མི་རྟོག་པའི་ཡེ་ཤེས། ཆོས་ཀྱི་བདག་མེད་རྟོགས་པ་སྤྲོས་བྲལ་གྱི་རྣམ་པ་ཅན་དེ་ནི། རྫོགས་པའི་སངས་རྒྱས་སྒྲུབ་པར་བྱེད་པའི་ལམ་དངོས་ཡིན་ཅིང༌། ཉན་ཐོས་དང་རང་སངས་རྒྱས་ཀྱི་རྒྱུད་ཀྱི་གང་ཟག་གི་བདག་མེད་པ་རྟོགས་པ་ལ་སོགས་པ་དེ་དག་ཉིད་ཀྱི། འཁྲུལ་མེད་ཀྱི་ཡེ་ཤེས་གང་ཡིན་པ་དེ་དང༌། རྟོགས་ཚུལ་གང་ཡིན་པ་དང༌། ཡོན་ཏན་གང་ཡིན་པ་དང་ཕན་ཡོན་གང་ཡིན་པ་ཇི་ལྟ་བ་དེ་འདྲ་རེ། ཞོར་བྱུང་གི་ཡོན་ཏན་དུ་མའི་ལྷག་དང་བཅས་པར། དེ་ལ་ཚང་བས་ན་ཐེག་པ་གསུམ་ཆར་གྱི་ལམ་ཞེས་བྱ་ཞིང༌། དེ་ཉིད་རང་རིག་པས་ཤེས་པའི་ཕྱིར་ལམ་ཤེས་སོ། །


TNT17_Page_0707
[མ་དཔེ་གཟིགས་ན་འདིར་གནོན།]

རྫོགས་སྨིན་སྦྱང་གསུམ་མ་བྱས་ཀྱི་བར་དུ། ཡང་དག་པའི་མཐའ་མངོན་དུ་མི་བྱེད་པའི་ལས་ཅན་དང༌། སྐབས་གཞན་དུ་ཉོན་མོངས་ཆེད་དུ་མི་སྤོང་བའི་ལས་ཅན་དུ་བཤད་པ་སོགས་ནི། བྱང་ཆུབ་སེམས་པའི་གནས་སྐབས་ཉིད་ཀྱི་དབང་དུ་བྱས་པའི་ལམ་ཤེས་ལ་ཁྱད་པར་དེ་དག་ཚང་བ་ཡིན་ཀྱང༌། ལམ་ཤེས་སུ་འཇོག་བྱེད་ལ་དེ་ལྟར་དགོས་པ་ནི་མ་ཡིན་ནོ། །སངས་རྒྱས་ནི་འབྲས་བུ་མཐར་ཐུག་པ་ཡིན་པས། རྣམ་མཁྱེན་ཀྱི་སྐབས་སུ་རྣམ་བརྟགས་མཚན་མ་གསུམ་ཀར་བཤད་པ་ཡིན་ལ། བྱང་སེམས་ཀྱི་འབྲས་བུ་མཐའ་དག་མངོན་དུ་མ་བྱས་པས་ལམ་ཙམ་ཞིག་ཁོ་ན་སྨོས་པ་ཡིན་ནོ། །དངོས་པོ་གསུམ་པ་གཞི་ཤེས་ནི། མདོ་ལས། བཅོམ་ལྡན་འདས་ཅིའི་སླད་དུ་ཐམས་ཅད་འཚལ་བ་ཉིད་ཉན་ཐོས་དང་རང་སངས་རྒྱས་རྣམས་ཀྱི་ལགས། རབ་འབྱོར་ཐམས་ཅད་ནི་ཕྱི་དང་ནང་གི་ཆོས་རྣམས་ཇི་སྙེད་པ་ཙམ་ཡིན་ལ། དེ་དག་ཀྱང་ཉན་ཐོས་དང་རང་སངས་རྒྱས་རྣམས་ཀྱིས་ཤེས་ཀྱི། ལམ་ཐམས་ཅད་ཀྱིས་ཀྱང་མ་ཡིན་ལ། རྣམ་པ་ཐམས་ཅད་དུ་ཡང་མ་ཡིན་པས། དེའི་ཕྱིར་ཉན་ཐོས་དང་རང་སངས་རྒྱས་རྣམས་ཀྱི་ནི། ཐམས་ཅད་ཤེས་པ་ཉིད་ཅེས་བྱའོ་ཞེས་སོ། །འདིར་གཞི་ཕྱི་ནང་གི་ཆོས་རྣམས་ཤེས་པ་ཞེས་པ་ལས་ཤེས་ཚུལ་ཇི་ལྟར་ཡིན་མི་གསལ་ཡང༌། ཉན་རང་གི་རྟོགས་པ་ཡིན་པའི་ཕྱིར་ན། གང་ཟག་གི་བདག་མེད་པའི་རྟོགས་ཚུལ་ཡིན་དགོས་ཏེ། མདོ་ལས། ཕུང་པོ་གང་ཟག་བདག་མེད་པར། །རབ་ཏུ་རྣམ་ཕྱེ་མཐོང་གྱུར་ཅིང༌། ཆོས་ཀྱི་དངོས་ཡོད་མ་བཤིག་པས། །ཉན་ཐོས་དེ་དག་མངོན་རྟོགས་འགྱུར། །ཞེས་གསུངས་པས་སོ། །


TNT17_Page_0708
[མ་དཔེ་གཟིགས་ན་འདིར་གནོན།]

དེ་ལྟ་བས་ན། ཉན་རང་འཕགས་པ་ཆོས་ཀྱི་བདག་མེད་མངོན་སུམ་དུ་མ་རྟོགས་ཏེ་དེའི་ཕྱིར་ཆོས་ཀྱི་བདག་འཛིན་སྤངས་པ་ཡང་མ་ཡིན་ནོ། །འོན་ཀྱང་གང་ཟག་གི་བདག་མེད་ཉིད་རྟོགས་པའི་ཤུགས་ཀྱིས། དངོས་པོར་འཛིན་ཡང་ཅུང་ཟད་སྲབ་པར་གྱུར་པ་ནི་ཡིན་ལ། དེ་དག་གི་མཉམ་གཞག་ན་ཆོས་བདག་གི་སྣང་བ་མ་ལོག་ཀྱང༌། ཆོས་ཀྱི་བདག་འཛིན་མངོན་གྱུར་པ་ཡང་མེད་པས། དེ་འདྲའི་མཉམ་གཞག་དེ་དག་ཀྱང་ཆོས་ཀྱི་བདག་མེད་རྟོགས་པའི་ཡེ་ཤེས་དང་འཛིན་སྟངས་འགལ་བ་མ་ཡིན་པས། ཤེས་རབ་ཀྱི་ཕ་རོལ་ཏུ་ཕྱིན་པ་དང་ཅུང་ཟད་རྗེས་སུ་མཐུན་པ་ནི་ཡིན་ནོ། །དེས་ན་ཉན་རང་འཕགས་པའི་ཡེ་ཤེས་དེ་ནི། གཞི་ཕྱི་ནང་གི་ཆོས་ཕུང་ཁམས་སྐྱེ་མཆེད་ཐམས་ཅད་ལ། ཇི་ལྟར་རིགས་པར་མི་རྟག་པ་ལ་སོགས་པ་རྣམ་པའི་ཤེས་པ་བཅུ་དྲུག་པོ་དེ་དག་ཀུན་འཇུག་པ་ཡིན་ཀྱང༌། རྣམ་པའི་གཙོ་བོ་ཡིན་པ་དང༌། སྤྲོས་བྲལ་དང་ཆ་ཤས་མཐུན་པའི་ལྡོག་པ་ཉེ་བར་བཟུང་ནས། བདག་མེད་པར་ནི་ཤེས་ལ། དེ་ཤེས་པས་ཉན་རང་གི་ལམ་ཤེས་པ་ཙམ་དུ་ནི་འགྱུར་ཡང་སྤྲོས་པ་དང་བྲལ་བར་ནི་མ་ཤེས་པས། ཤེས་རབ་ཀྱི་ཕ་རོལ་ཏུ་ཕྱིན་པའི་རྟོགས་ཚུལ་གྱིས་ནི། ལམ་དེ་གཉིས་ཀྱང་མ་ཤེས་ལ། ཁྱད་པར་དུ་ལམ་གྱི་གཙོ་བོ་ཐེག་ཆེན་གྱི་ལམ་ནི་གཏན་ནས་ཀྱང་མ་ཤེས་པའི་ཕྱིར། ཉན་རང་གི་ཡེ་ཤཻས་དེ་ལམ་ཤེས་པར་མི་འགྱུར་ཞིང༌། ཇི་ལྟ་བ་དང་ཇི་སྙེད་པ་ཐམས་ཅད་མི་ཤེས་པས་ན། རྣམ་པ་ཐམས་ཅད་མཁྱེན་པ་ཉིད་ལྟ་ག་ལ་ཞིག་སྟེ། དེའི་ཕྱིར་གཞི་ཁོ་ན་ཤེས་པས་གཞི་ཤེས་ཞེས་བྱའོ། །འོན་ཀྱང་འདི་ནི་ཉན་རང་གི་


TNT17_Page_0709
[མ་དཔེ་གཟིགས་ན་འདིར་གནོན།]

གཞི་ཤེས་ཞེས་བྱ་ཞིང༌། མི་མཐུན་ཕྱོགས་ཀྱི་གཞི་ཤེས་ཀྱི་ནང་དུ་གཏོགས་པ་ཙམ་ཡིན་ལ། གཉེན་པོའི་གཞི་ཤེས་ནི། མཁྱེན་གསུམ་གྱིས་ཟླས་ཕྱེ་བའི་གཞི་ཤེས་དངོས་སམ་བཏགས་པ་བ་གང་དུ་བཞག་ན་ལེགས་ཤེས་དཔྱོད་ལྡན་རྣམས་ཀྱིས་རྣམ་པར་དཔྱོད་ཅིག་དང༌། གཞི་ཤེས་ཀྱི་སྐབས་ཀྱི་མདོ་དང་བསྟན་བཅོས་ཀྱི། གཞུང་དངོས་བསྟན་གྱི་བརྗོད་བྱའི་གཙོ་བོ་གཞི་ཤེས་ནི་གཉེན་པོའི་གཞི་ཤེས་འདི་ཁོ་ན་ཡིན་ལ། གཞུང་གི་དངོས་བསྟན་ལྟར་ན། མི་མཐུན་ཕྱོགས་ཀྱི་གཞི་ཤེས་ཀྱང་ཉན་རང་གི་དེ་གཙོ་མི་ཆེ་སྟེ། གཙོ་བོར་བྱང་ཆུབ་སེམས་དཔའ་སོ་སོ་སྐྱེ་བོ་དམིགས་པའི་ལྟ་བ་ཅན་རྣམས་ཡིན་ནོ། །གཉེན་པོ་གཞི་ཤེས་དེ་ཡང་གང་ཞེ་ན། མཉམ་གཞག་རྣམ་པར་མི་རྟོག་པའི་ཡེ་ཤེས་སྤྲོས་པ་ཐམས་ཅད་སྤངས་པ་དེ་ལ། བདག་དང་བྱེད་པོ་དང༌། རྟག་དངོས་དང༌། མྱོང་ཚོར་བདེ་བ་སོགས་གང་ཡང་གདོད་ནས་མ་དམིགས་པར་རྟག་པའི་ཆ་གཅིག་འདུག་པ་དེ་ཉིད། ཉན་རང་གི་ལམ་ཤེས་པའི་ལམ་ཤེས་ཡིན་ལ། གཉེན་པོ་གཞི་ཤེས་ཀྱང་ཡིན་ནོ། །ཡང་བདག་ཏུ་འཛིན་པའི་བག་ཆགས་དྲུང་ནས་འབྱིན་པའི་ཕྱིར། གང་ཟག་གི་བདག་མེད་པ་ཆེད་གཏད་བསྒོམས་པ་ན། བདག་ནི་རང་བཞིན་གྱིས་མེད་པར་མཐོང་ཞིང༌། ལྷག་མ་གཞན་དངོས་པོ་དང་དངོས་པོ་མེད་པའི་སྤྲོས་པ་རྣམས་ཀྱང་ཞོར་ལ་རང་བཞིན་མེད་པར་རྟོགས་ནས། སྤྲོས་པ་དང་མཚན་མ་ཐམས་ཅད་ཞིག་པའི་རྣམ་པ་ཅན་ཏེ། སྤྲོས་བྲལ་རྟོགས་པའི་ཡེ་ཤེས་ཀྱི་སྡོང་པོ་བདག་མེད་པའི་རྩ་བ་ཅན་དེ་ནི་གཉེན་པོའི་གཞི་ཤེས་ཉིད་ཡིན་ནོ། །བདག་འཛིན་གྱི་བག་ཆགས་དྲུང་ནས་འབྱིན་


TNT17_Page_0710
[མ་དཔེ་གཟིགས་ན་འདིར་གནོན།]

པ་ལ། སྤྱི་ཁྱབ་ཀྱི་སྤྲོས་བྲལ་དེ་ཁོ་ན་རྟོགས་པས་ཆོག་གི །གང་ཟག་མེད་པ་ལ་གཙོ་བོར་དམིགས་པས། ཅི་ཞིག་བྱ་སྙམ་ན། མ་ཡིན་ཏེ་དམིགས་པ་རྣམས་ཀྱི་ནུས་པ་ནི་ཐ་དད་པ་ཡིན་པས། སྟོང་ཉིད་ཁོ་ནས་ཆགས་སྡང་ལ་སོགས་པ་ཡང་བཟློག་པ་ཡིན་མོད་ཀྱང་མི་སྡུག་པའི་ཏིང་ངེ་འཛིན་སྤྲོས་བྲལ་གྱི་རྣམ་པ་ཅན་གྱིས་འདོད་ཆགས་ཀྱི་བག་ཆགས་ལྷག་པར་བཟློག་པ་དང༌། བྱམས་པའི་སེམས་སྤྲོས་བྲལ་གྱི་རྣམ་པ་ཅན་གྱིས་ཞེ་སྡང་གི་བག་ཆགས་ལྷག་པར་བཟློག་པ་བཞིན་ནོ། །རིགས་པས་ཀྱང་འཐད་དེ། མི་སྡུག་པ་དང༌། བྱམས་པ་དང༌། བདག་མེད་པ་དེ་དག་ཀྱང་དེ་དང་དེ་མངོན་གྱུར་འཕྲལ་དུ་བཟློག་པའི་ནུས་པ་ཅན་ནི་ཡིན་ལ། སྤྱིའི་གཉེན་པོ་སྟོང་ཉིད་དེ་ཡང་མ་ཚང་བ་མེད་པར་བསྒོམས་པའི་ཕྱིར། གཅིག་པུ་ཁོ་ན་ལས་གཉིས་ཀར་འཛོམ་པ་སྟོབས་ཆེ་བ་རྨོས་མ་དགོས་པའི་ཕྱིར་རོ། །རང་རྒྱལ་གྱིས་བཟུང་བ་ཆོས་ཀྱི་བདག་མེད་མངོན་སུམ་རྟོགས་སམ་མ་རྟོགས་ཞེ་ན། མ་རྟོགས་ཞེས་བྱའོ། །འོ་ན་ཇི་སྐད་དུ། གཟུང་དོན་རྟོག་པ་སྤོང་ཕྱིར་དང༌། །འཛིན་པ་མི་སྤོང་ཕྱིར་དང་ནི། །བརྟེན་གྱི་བསེ་རུ་ལྟ་བུའི་ལམ། །ཡང་དག་བསྡུས་པ་ཤེས་པར་བྱ། །ཞེས་གསུངས་པ་མ་ཡིན་ནམ། ཅེ་ན། རང་རྒྱལ་རྣམས་ནི་རྟེན་འབྲེལ་ཡུན་རིང་དུ་གོམས་པ་ལས། འཇིག་རྟེན་མ་རིག་པའི་རྐྱེན་ཅན་དུ་ཤེས་པས་ན། དེའི་ཤུགས་ཀྱིས་གཟུང་བའི་རྣམ་རྟོག་ཤིན་ཏུ་ཉམས་སྨད་པ་ཡིན་པས། དེ་ལྟ་བུའི་རྟོགས་པ་དེ་ཡང་བྱང་ཆུབ་སེམས་དཔའི་ལམ་ཤེས་ཀྱི་རྟོགས་རིགས་ཀྱི་ནང་དུ་འདུས་ཏེ། དེ་ཡང་བྱང་ཆུབ་སེམས་དཔའ་སྐབས་འགའ་ཞིག་ཏུ་ཆོས་ཐམས་


TNT17_Page_0711
[མ་དཔེ་གཟིགས་ན་འདིར་གནོན།]

ཅད་སེམས་ཀྱི་སྣང་བ་ཙམ་དུ་རྟོགས་པས། ང་བདག་དང་ཕྱི་རོལ་ཀྱི་དོན་གདོད་ནས་མ་གྲུབ་པར་རྟོགས་ཤིང༌། དེ་ཉིད་ཀྱང་སྤྲོས་པ་ཐམས་ཅད་དང་གདོད་ནས་བྲལ་བའི་རྣམ་པ་ཅན་ཡིན་མོད་ཀྱི། འཛིན་པ་ལ་ཆེད་གཏད་ཤུགས་ཕྱུང་ནས་སྟོང་པར་བསྒོམ་པ་མེད་པས། གཟུང་དོན་གྱི་རྟོགས་པ་སྤོང༌། འཛིན་པའི་རྟོག་པ་མི་སྤོང་ཞེས་ཐ་སྙད་མཛད་པ་ཡིན་གྱི། འཛིན་པའི་མངོན་ཞེན་དང་བཅས་པ་ནི་མ་ཡིན་ནོ། །དེ་ལྟ་བུའི་ཡེ་ཤེས་དེས། རང་རྒྱལ་གྱི་རྟོགས་པ་གང་ཡིན་པ་དེ། རིགས་མཐུན་གྱི་ཚུལ་གྱིས་བསྡུས་པ་ཡིན་པས་རང་རྒྱལ་གྱི་ལམ་གྱི་མིང་གིས་བཏགས་པ་ཙམ་མོ། །དེ་ལྟར་བཤད་ཟིན་པའི་མཁྱེན་པ་གསུམ་པོ་དེ་ནི། ལམ་གྱི་བདེན་པའི་དབང་དུ་བྱས་ལ། དངོས་པོ་བརྒྱད་ཀྱི་སྐབས་འདིར་གཙོ་བོ་ཡང་ལམ་བདེན་འདི་ཡིན་མོད། སྤྱིར་ཆོས་ཉིད་དོན་དམ་པའི་ཡེ་ཤེས་བདེ་བར་གཤེགས་པའི་སྙིང་པོ་ནི། ཤེར་ཕྱིན་མཐར་ཐུག་པ་ཡང་ཡིན་ལ། རྣམ་པ་ཐམས་ཅད་མཁྱེན་པ་ཉིད་དང༌། ལམ་ཤེས་པ་ཉིད་དང༌། གཞི་ཐམས་ཅད་ཤེས་པ་ཉིད་དེ། འདི་ནི་དོན་དམ་འགོག་པའི་བདེན་པ་ཡིན་ཅིང༌། ཤེར་ཕྱིན་གྱི་མདོ་དང་གཞུང་གི་སྦས་དོན་མཐར་ཐུག་གི་སྙིང་པོ་ཡིན་པར་ཤེས་པར་བྱའོ། །དེ་ལྟར་མཁྱེན་པ་གསུམ་གྱི་ངོ་བོ་ནི་དེ་འདྲ་ཡིན་ལ། ལམ་གྱི་བདེན་པས་བསྡུས་པའི་མཁྱེན་གསུམ་གྱི་རྟོགས་བྱའམ། །གནས་ལུགས་ཆོས་ཀྱི་དབྱིངས་སྤྲོས་བྲལ་གྱི་རིག་པ་དེ་ནི་བདག་མེད་གཉིས་སམ། རྣམ་པ་སྐྱེ་མེད། ལམ་སྐྱེ་མེད་གཞི་སྐྱེ་མེད། ཅེས་སོགས་ཐ་སྙད་དུ་མས་བསྙད་དེ། ཐོས་བསམ་གྱིས་གཏན་ལ་འབེབས་པའི་ཡུལ་དང༌། སྦྱོར་


TNT17_Page_0712
[མ་དཔེ་གཟིགས་ན་འདིར་གནོན།]

བ་རྣམས་ཀྱི་བསྒོམ་བྱ་དམིགས་པའི་ཡུལ་ཡང་ཡིན་ནོ། །དངོས་པོ་བཞི་པ་རྣམ་རྫོགས་སྦྱོར་བ་ནི། གཞི་དང་ལམ་དང་འབྲས་བུའི་ཆོས་རྣམས། རང་བཞིན་གདོད་ནས་སྟོང་པ་ཉྀད་དུ་མཚུངས་ཀྱང༌། སོ་སོའི་མཚན་ཉིད་རྣམ་པ་མི་འདྲ་བ་རྣམས་མ་འདྲེས་ཤིང་མ་འཛེངས་པར་བློས་རྟོགས་ནས། ཐམས་ཅད་སྤྲོས་པ་དང་བྲལ་བས་རོ་སྙོམས་ཤིང༌། སེམས་དངོས་པོ་གང་ལ་ཡང་མི་གནས་པར་ཡིད་ལ་མི་བྱེད་པའི་ཚུལ་དུ་བསྒོམ་མོ། །དེ་ལ་མི་རྟག་པ་ལྟ་བུའི་གསལ་སྣང་བསྒྲུབས་ཏེ་སྤྲོས་བྲལ་དུ་བསྲེ་ནུས་པ་ནས། རྣམ་རྫོགས་སྦྱོར་བ་ཙམ་རྒྱུད་ལ་སྐྱེ་བའི་འགོ་བརྩམས་པ་ཡིན་ལ། རྣམ་པ་གཞན་ཐམས་ཅད་ཀྱང་རེ་རེ་བཞིན་རིམ་པས་བསྒྲུབས་ཤིང་སྤྲོས་བྲལ་གྱི་ངོར་རིམ་གྱིས་སྐྱེ་ལ། མཐར་ཤེས་པ་སྐད་ཅིག་གཅིག་ལ་རྣམ་པ་ཐམས་ཅད་དུས་མཉམ་དུ་ཤར་བར་གྱུར་པ་ན། རྣམ་རྫོགས་སྦྱོར་བ་མཐར་ཕྱིན་པ་ཡིན་ཏེ་ཚོགས་ལམ་ནས་རྒྱུན་མཐའི་ཡེ་ཤེས་ཀྱི་བར་དུ་འདི་ཡོད་པར་འདོད་པ་ལྟར་འཐད་ལ། འདི་ལ་མཁྱེན་གསུམ་གྱི་རྣམ་པ་བསྡུས་སྒོམ་གྱི་སྦྱོར་བ་ཞེས་ཟེར་ཏེ། མཁྱེན་གསུམ་གྱི་རྣམ་པ་ནི་གོང་དུ་སྨོས་པ་ལྟར། ལམ་གྱི་བདེན་པའི་དམིགས་ཡུལ་རྟོགས་བྱ་ཆོས་དབྱིངས་དེའི་རྣམ་པ་ཡིན་ཅིང༌། དངོས་གནས་ལ་རྣམ་པའི་གྲངས་ཚད་བཟུང་བར་མི་ནུས་ཀྱང༌། དོན་གྱི་གཙོ་བོ་རྣམས་བསྡུས་པའི་ཕྱིར་དང༌། གདུལ་བྱ་ཉེ་བའི་བསམ་པ་ལ་དགོངས་ནས། རྣམ་པ་བརྒྱ་བདུན་བཅུ་རྩ་གསུམ་ཞེས་གྲགས་སོ། །བསྡུས་སྒོམ་གྱི་གོ་དོན་ནི། དཔེར་ན་འདུས་བྱས་མི་རྟག་པར་ཡིད་ལ་བྱས་ཤིང༌། དེ་ཡང་རང་བཞིན་མེད་པ་


TNT17_Page_0713
[མ་དཔེ་གཟིགས་ན་འདིར་གནོན།]

ལ་བསླབས་པས། གསལ་སྣང་ཐོབ་པ་ན། ཟག་བཅས་སྡུག་བསྔལ་གྱི་རྣམ་པ་ཡིད་ལ་བྱེད་ཅིང༌། དེ་རང་བཞིན་མེད་པ་ལ་གསལ་སྣང་སྒྲུབ་བོ། །དེ་ཡང་ཐོབ་པ་ན། མི་རྟག་སྡུག་བསྔལ་གཉིས་ཀ་དུས་གཅིག་ལ་ཡིད་ལ་བྱེད་ཅིང༌། རང་བཞིན་མེད་པར་གསལ་སྣང་ཡང་དུས་མཉམ་དུ་སྒྲུབས་པས། མཉམ་གཞག་སྐད་ཅིག་མ་གཅིག་པོ་དེ་ལ་ཤེས་པ་གཅིག་པོ་དེས། འདུས་བྱས་ཀྱི་སྣང་བ་ཐམས་ཅད་མི་རྟག་པའི་རྣམ་པ་ཅན་དུ་ཡང་ཤེས། ཟག་བཅས་ཀྱི་སྣང་བ་ཐམས་ཅད་སྡུག་བསྔལ་གྱི་རྣམ་པ་ཅན་དུ་ཡང་ཤེས། གཞི་འདུས་བྱས་དང་ཟག་བཅས་གཉིས་དང་མཚན་ཉིད་མི་རྟག་པ་དང་སྡུག་བསྔལ་རྣམས་ཀྱང་སྣང་བ་ཙམ་མ་གཏོགས། རང་བཞིན་གྱིས་སྟོང་པར་མཐོང་བ་ན། མི་རྟག་པ་དང་སྡུག་བསྔལ་གྱི་རྣམ་པ་ཕྱོགས་གཅིག་ཏུ་བསྡུས་ཏེ་སྒོམ་པ་ཡིན་པས། བསྡུས་བསྒོམ་ཞེས་བྱའོ། །མི་རྟག་པ་དང་སྡུག་བསྔལ་གྱི་རྣམ་པ་མ་འགགས་པ་དགོས་ཏེ། དེ་མེད་ན་བསྡུས་ཏེ་སྒོམ་པར་མི་འགྱུར་ཞིང༌། རྣམ་པའི་རྣམ་གྲངས་མང་པོ་བཤད་པ་རྣམས་ཀྱང་དོན་མེད་དུ་འགྱུར་བས་སོ། །སྣང་ཆ་དེའི་སྟེང་དུ་སྤྲོས་པ་དང་བྲལ་བར་འཇོག་མ་ཤེས་ན་ཡང༌། མི་རྟག་སྡུག་བསྔལ་གྱི་རྣམ་པ་ཙམ་གྱིས་ཤེར་ཕྱིན་སྒོམ་པར་མི་འགྱུར་ཞིང༌། གནས་ལུགས་ལ་རེག་པར་མི་འགྱུར་བས། སྤྱི་དང་ཁྱད་པར་གྱི་རྣམ་པ་ཐམས་ཅད་སྒོམ་དགོས་པའི་རྒྱུ་མཚན་དེ་ལྟར་ཡིན་ནོ། །འདིར་སྦྱོར་བ་ཞེས་པ་ནི་ཉམས་ལེན་སྒོམ་པའི་རྣལ་འབྱོར་ཡིན་ཏེ། དེ་ལྟར་ན་འདི་དག་ནི་གཞན་རྣམས་ལ་ཡང་རིགས་འགྲེའོ། །དངོས་པོ་ལྔ་པ་རྩེ་མོའི་སྦྱོར་བ་ནི། བསྡུས་སྒོམ་


TNT17_Page_0714
[མ་དཔེ་གཟིགས་ན་འདིར་གནོན།]

རབ་ཏུ་གྱུར་པ་ཞེས་བྱ་སྟེ། རབ་ཏུ་གྱུར་པའི་གོ་དོན་ཤིན་ཏུ་བྱང་བ་དང་གོང་འཕེལ་དུ་གྱུར་པ་སྟེ། དེ་ལ་རྣམ་རྫོགས་ནི། རྣམ་པ་གཉིས་ཀྱི་བསྡུས་སྒོམ་ནས་རྣམ་པ་ཐམས་ཅད་ཀྱི་བར་དུ། བསྡུས་སྒོམ་མ་ཐོབ་པ་ཐོབ་པར་བྱེད་པ་དང༌། ཐོབ་པ་མི་ཉམས་པར་བྱེད་པ་ཡིན་ཅིང༌། རྩེ་སྦྱོར་འདི་ནི། རྣམ་པ་གཉིས་ནས་རྣམ་པ་ཐམས་ཅད་པའི་བར་དུ་སོ་སོར་སྦྱར་ཏེ། བསྡུས་སྒོམ་དེ་དང་དེ་ཐོབ་ཅིང་མ་ཉམས་པར་སྔར་ནས་བྱས་པ་དེ། ཤིན་ཏུ་བྱང་བས་ཤུགས་འབྱུང་ལ་འཇུག་པའི་ཕྱིར་དང༌། སྐབས་དེ་དང་དེའི་ཡོན་ཏན་རྣམས་སྒྲུབ་པའི་ཕྱིར་དང༌། མི་རྟག་པ་ལྟ་བུ་གཅིག་ལ་ཡང་རྟོགས་ཚུལ་མི་འདྲ་བ་དུ་མའི་སྒོ་ནས། ཤེས་རབ་ཀྱི་སྣང་བ་སྤེལ་བའི་ཕྱིར་སྒོམ་པ་ཡིན་ནོ། །དེ་ལྟར་བསྒོམས་པས་གནས་སྐབས་དེ་དང་དེ་དག་ཏུ་དེ་འདྲ་མངོན་དུ་གྱུར་པ་ན་རྩེ་མོའི་སྦྱོར་བ་ཐོབ་པ་ཞེས་བྱ་སྟེ། སྦྱོར་ལམ་དྲོད་ནས་རྒྱུན་མཐའི་ཡེ་ཤེས་ཀྱི་བར་དུ་ཡོད་དོ། །དངོས་པོ་དྲུག་པ་མཐར་གྱིས་པའི་སྦྱོར་བ་ནི། བསྡུས་སྒོམ་དེ་ཉིད་མ་ཉམས་བཞིན་དུ་རིམ་པ་མི་འདྲ་བ་སྣ་ཚོགས་ལ་བསླབས་པས། འཕེལ་བའི་རྒྱུན་དེ་ཉིད་བྱང་ཞིང་ཤིན་ཏུ་བརྟན་པར་བྱེད་པ་སྟེ། དཔེར་ན་སྔར་གྱི་བསྡུས་སྒཽམ་དེ་ཉིད། ཆུ་ཚོད་ཅིག་ཏུ་སྒོམ་པར་བྱེད་ན། ཆུ་སྲང་བཞྀ་ལྷག་ཙམ་ཞིག་སེམས་སྤྲོས་བྲལ་གྱི་སྣང་ཆ་མི་རྟག་སྡུག་བསྔལ་སོགས་སུ་ཅིག་ཅར་ཤར་བ་དེ། དེ་ལྟར་མ་རྟོགས་པའི་སེམས་ཅན་ལ་སྙིང་རྗེས་སྦྱིན་པ་གཏོང་བའི་སེམས་པས་མགོ་བསྡུས་ཏེ་སྒྲོམ་པ་དང༌། དེ་རྗེས་རྒྱུན་དེ་ཙམ་ཞིག །ཚུལ་ཁྲིམས་སྤོང་སེམས་ཀྱིས་མགོ་བསྡུས་ཏེ་སྒོམ་པ་སོགས། ཕར་ཕྱིན་དྲུག་དང༌། རྗེས་དྲན་དྲུག་དང༌། དངོས་མེད་ངོ་


TNT17_Page_0715
[མ་དཔེ་གཟིགས་ན་འདིར་གནོན།]

བོ་ཉིད་དེ་བཅུ་གསུམ་ལ་སྦྱར་རོ། །དེ་ལ་གོམས་ནས་དབུགས་བཅུ་གསུམ་གྱི་རིང་ལ་ཆོས་བཅུ་གསུམ་སྦྱར་ཏེ་སྒོམ་པ་ལྟ་བུ་དང༌། རིམ་པས་དུས་མཐའི་སྐད་ཅིག་མ་བཅུ་གསུམ་ལ་སྦྱར་བ་ལྟ་བུ་དང༌། མཐར་མཐའ་མེད་པའི་བར་དུ་སྦྱར་ཏེ། འདི་ནི་སྦྱོར་བ་སྔ་མ་གཉིས་ཀྱི་རྩ་སྦྱོང་བ་ཡིན་ལ་སྦྱོར་བ་སྔ་མ་གཉིས་ནི་རྣམ་པ་མི་འདྲ་བ་དུ་མ་གཅིག་ཏུ་བསྡུས་ཏེ་སྒོམ་པ་ཡིན་ལ། འདི་ནི་བསྡུས་ཟིན་དེ་འདྲ་ཡོངས་རྫོགས་རེ་རེ་བཞིན། སྐད་ཅིག་རེ་རེར་རྣམ་པ་མི་འདྲ་བ་དུ་མར་འཆར་བ་ལ་སློབ་པ་ཡིན་པས། རྣམ་པ་སོ་སོར་ཕྱེ་སྟེ་སྒོམ་པ་ཡིན་ནོ། །འོ་ན་ཕྱེ་བའི་ཕྱིར་རྣམ་པ་ཉུང་ངུ་སོང་བ་ཡིན་ནམ་སྙམ་ན་མིན་ཏེ། སྔ་མ་རྣམས་ལས་ཀྱང་ཆེས་མང་བར་འགྱུར་རོ། །དཔེར་ན་ཤེས་པ་གཅིག་ལ་རྣམ་པ་བཅུ་དྲུག་དུས་མཉམ་དུ་འཆར་བ་བསྒྲུབས་ཟིན་པ་དེ། སླར་ཡང་རྣམ་པ་བཅུ་དྲུག་པོ་སོ་སོ་མ་ཉམས་བཞིན་དུ། ཐམས་ཅད་མི་རྟག་པའི་རྣམ་པ་གཅིག་ཏུ་འཆར་བ་དང༌། ཐམས་ཅད་སྡུག་བསྔལ་གྱི་རྣམ་པ་གཅིག་ཏུ་འཆར་བ་དང༌། ཐམས་ཅད་སྟོང་པ་གཅིག་ཏུ་འཆར་བ་ལ་སོགས་སྐད་ཅིག་རེ་རེ་བཞིན་དུ་འཕོས་ཤིང་སྒོམ་པ་ཡིན་ཏེ། སྔར་གྱི་རྣམ་པ་མང་པོ་དེ་དག་ཀྱང་རེ་རེ་བཞིན་རྣམ་པ་གཉིས་སྦྲག་ཏུ་བསླབས་པར་འགྱུར་ལ། སྔར་རྣམ་པ་མང་པོ་དེ་དག་སྟོང་ཉིད་ཙམ་གྱིས་ཁྱབ་བྱེད་དུ་བྱེད་པ་ལས་གཞན་མེད་ན་ཡང༌། འདིར་རྣམ་པ་ཐམས་ཅད་ལ་མི་རྟག་པའི་རྣམ་པས་ཁྱབ་པ་དང༌། རྣམ་པ་ཐམས་ཅད་ལ་སྡུག་བསྔལ་གྱི་རྣམ་པས་ཁྱབ་པ་སོགས། རྣམ་པ་ཐམས་ཅད་ལ་རེ་རེ་བཞིན་རྣམ་པ་ཐམས་ཅད་ཀྱིས་ཁྱབ་པར་བསྒྲུབས་པའི་ཕྱིར་


TNT17_Page_0716
[མ་དཔེ་གཟིགས་ན་འདིར་གནོན།]

རོ། །འོན་ཀྱང་སྐབས་འདིར། བསྡུས་སྒོམ་གྱི་རྣམ་པ་རྣམས་སྔར་དུས་མཉམ་དུ་གྲུབ་ཟིན་པའི་རྒྱུན་དེ་ཀ་ཡིན་ཀྱང་རྒྱས་འདེབས་བྱེད་རྣམས་དུས་མཉམ་དུ་མ་གྲུབ་པས། སྔ་ཕྱི་ཕྲཻང་ཆགས་སུ་བྱེད་དགོས་པའི་ཕྱིར། མཐར་གྱིས་རིམ་གྱིས་སྒྲུབ་པ་ཞེས་བྱ་སྟེ། ཆོས་གཅིག་བསྒོམས་པས་ཆོས་ཐམས་ཅད་བསྒོམ་པ་དང༌། སྐད་ཅིག་གཅིག་ལ་ཡང་ཏིང་ངེ་འཛིན་དུ་མ་ལ་ལྡང་འཇུག་ནུས་པར་འགྱུར་བའི་རྒྱུ་བླ་ན་མེད་པ་སྟེ། འདིའི་ས་མཚམས་ལ་འདོད་ཚུལ་མི་འདྲ་བ་མང་ཡང༌། སྦྱོར་ལམ་ནས་རྒྱུན་མཐའི་སྔ་ལོགས་ཀྱི་བར་དུ་ཡོད་དོ་ཞེས་གསུངས་པ་ལྟར་ན། བདག་གི་རྣམ་པར་རྟོག་པ་ནི་སྦྱོར་ལམ་ཡང་བཟོད་པ་ལ་བྱ་དགོས་པར་སེམས་སོ། །འདིར་ཆོས་བཅུ་གསུམ་བཤད་པ་ནི་མཚོན་པ་ཙམ་སྟེ། ཆོས་ཀྱི་རྣམ་པ་མཐའ་ཡས་པ་མཐའ་དག་གོ །དེ་ལྟར་ན་སྦྱོར་བ་གསུམ་པོ་དེ་དང༌། སྔ་མ་སྔ་མ་ལ་བརྟེན་ནས་ཕྱི་མ་ཕྱི་མ་སྐྱེ་ཞིང༌། ཕན་ཚུན་སྤེལ་བའི་ཚུལ་དུ་རྒྱུད་ལ་སྐྱེ་བ་ཡིན་ཏེ། དཔེར་ན་རྣམ་པ་ཉི་ཤུ་རྩ་བདུན་གྱི་རྣམ་རྫོགས་སྦྱོར་བའི་བསྡུས་སྒོམ་ཐོབ་པ་ན། རྣམ་པ་ཉེར་བདུན་པོ་དེ་རྣམས་ཉིད་ཀྱི་རྩེ་མོའི་སྦྱོར་བས་བྱང་ཞིང་འཕེལ་བ་ལ་སློབ་པར་བྱེད་དོ། །དེ་ནས་ཉེར་བདུན་པོ་དེ་རྣམས་རེ་རེ་བཞིན་ཉེར་བདུན་པོ་དེ་དག་ཐམས་ཅད་དུ་འཆར་བའི་ཕྱིར། ཉེར་བདུན་པོ་ལ་རྣམ་པ་རེ་རེ་བཞིན་གྱིས་རྒྱས་འདེབས་པའི་མཐར་གྱིས་པའི་སྦྱོར་བ་སྒོམ་དགོས་ཏེ། དེས་རྣམ་པ་མང་ཉུང་ཐམས་ཅད་ལ་རིགས་འགྲེའོ། །འོན་ཀྱང་སྦྱོར་བ་གསུམ་པོ་དེ་ཐོག་མར་ཐོབ་པའི་ས་མཚམས་ནི་མི་འདྲ་སྟེ། བསྡུས་སྒཽམ་ནི་ཚོགས་ལམ་ན་ཡང་ཡོད་ཅིང་


TNT17_Page_0717
[མ་དཔེ་གཟིགས་ན་འདིར་གནོན།]

བསྡུས་སྒོམ་ལ་བྱང་ཞིང་འཕེལ་བ་ནི། དེ་ན་མེད་པའི་ཕྱིར། ཚོགས་ལམ་ན་རྣམ་རྫོགས་ཡོད་ཀྱི་རྩེ་མོ་མེད་དོ། །བྱང་ཞིང་འཕེལ་བ་སྦྱོར་ལམ་དྲོད་རྩེ་གཉིས་ནས་ཡོད་ཀྱང༌། རྣམ་པ་མང་པོས་རྣམ་པ་མང་པོ་ལ་རྒྱས་ཐེབས་པ་དེ་ན་མེད་པས། རྩེ་སྦྱོར་ཡོད་ཀྱང་མཐར་གྱིས་པ་མེད་དོ། །བཟོད་པ་ནས་ནི་རྒྱས་ཐེབས་ཚུལ་དེ་ཡོད་པའི་ཕྱིར་མཐར་གྱིས་པ་ཡང་ཡོད་དེ། དེ་ནས་བརྩམས་ཏེ་གསུམ་ཀ་སྤེལ་མར་འབྱུང་ངོ༌། །རྩེ་སྦྱོར་མ་ཐོབ་པའི་སྔོན་དུ་མཐར་གྱིས་པ་ཡོད་པར་འདོད་པ་མི་འཐད་དེ། དེ་ནི་རྩེ་སྦྱོར་གྱི་བསྡུས་སྒོམ་འཕེལ་བའི་རྒྱུན་དེ་ཉིད་ལ། རིམ་སྒོམ་དུ་བྱེད་པ་ཉིད་ཡིན་པའི་ཕྱིར་རོ། ཁ་ཅིག་ས་བདུན་པ་མན་ཆད་མཁྱེན་གསུམ་གྱི་མངོན་རྟོགས་དང༌། བརྒྱད་པ་ཡན་ཆད་ལ་སྦྱོར་བཞིའི་མངོན་རྟོགས་ཡོད་པར་འདོད་ཅིང༌། དེ་ལས་ཀྱང་ཁ་ཅིག་དེ་དག་རེ་རེ་ལ་ཡང་སྦྱོར་མཐོང་སྒོམ་གསུམ་གྱི་དབྱེ་བ་སོགས་བྱེད་པ་ནི་འཐད་པར་མ་མཐོང་ལ་བཀའ་གདམས་པ་འགའ་ཞིག་ན་རེ། འཕགས་སེང་གིས་མངོན་རྟོགས་ཀྱི་དོན་རྣམས་ལམ་མཐོན་པོ་ཁོ་ན་ཡང་ཡང་སྦྱོར་བ་ནི། རང་རེ་ད་ལྟའི་གང་ཟག་རྣམས་ལ་སྐུ་དྲིན་ཆུང་སྟེ། འདི་ཐམས་ཅད་ལ་ད་ལྟ་ཉིད་ནས་ཉམས་སུ་བླང་རྒྱུ་དགོས་གསུང་བ་ཡང༌། རྗེས་མཐུན་གྱི་དབང་དུ་བྱས་ན་བདེན་པས། ལས་དང་པོ་པ་ཉིད་ནས་དངོས་པོ་བརྒྱད་ཀར་གྱི་རྒྱུ་ཚོགས་ལ་བསླབ་དུ་ཡོད་དོ། །གཞན་སྦྱོར་བ་དང་མངོན་རྟོགས་ཀྱི་དབྱེ་བ་ལྟར་ན། རྣམ་རྫོགས་སོགས་སྦྱོར་བ་གསུམ་པོ་འདི་ལ། སོ་སྐྱེའི་གནས་སྐབས་ན་ནི་སྦྱོར་བ་ཙམ་ཡིན་ལ། འཕགས་པའི་ལམ་གྱི་དེ་དང་དེ་ནི་མངོན་རྟོགས་ཀྱང་ཡིན་ནོ། །དངོས་པོ་


TNT17_Page_0718
[མ་དཔེ་གཟིགས་ན་འདིར་གནོན།]

བདུན་པ་སྐད་ཅིག་མའི་སྦྱོར་བ་ནི། སྤྲོས་པ་དང་བྲལ་བ། རབ་ཏུ་ཞི་བ། རབ་ཏུ་དབེན་པའི་ཡེ་ཤེས་སྐད་ཅིག་མ་གཅིག་གིས་ཇི་ལྟར་ཇི་སྙེད་གྱི་ཆོས་ཐམས་ཅད་ཀྱང་ཅིག་ཅར་ཤེས་ལ། དེའི་རྒྱུ་མཚན་གྱིས་འདི་ནི་ལམ་གྱིས་བསྡུས་པའི་ཡེ་ཤེས་དང་ཡོན་ཏན་དང་དགེ་བའི་ཆོས་ཐམས་ཅད་ཀྱི་ངོ་བོར་གྱུར་ཅིང༌། འབྲས་བུ་སངས་རྒྱས་ཀྱི་སས་བསྡུས་པའི་ཆོས་རྣམས་ཀྱི་སྣང་ཆ་ཐམས་ཅད་གཟུགས་བརྙན་གྱི་ཚུལ་དུ་ཤར་བས་ནི། ཆོས་ཐམས་ཅད་སྐད་ཅིག་གཅིག་གིས་རྟོགས་ནུས་པའི་ཕྱིར་དང༌། སངས་རྒྱས་ཀྱི་བྱང་ཆུབ་དེ་མ་ཐག་ཏུ་ཐོབ་ནུས་པའི་ཕྱིར། སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པ་ཞེས་བྱའོ། །མངོན་རྟོགས་འདི་ནི་རྒྱུན་མཐའི་སྐབས་ཁོ་ན་ཡིན་ཀྱང༌། བསམ་གྱིས་མི་ཁྱབ་པའི་གནས་ལ་དབང་སྒྱུར་བ་ཡིན་པས་ན། སྐད་ཅིག་ལ་བསྐལ་པར་སྟོན་པ་སོགས་འབྱུང་བའི་ཕྱིར། དུས་ཡུན་རིང་ཐུང་འདི་ཙམ་ཞེས་བསམ་པར་མི་ནུས་སོ། །མཐར་གྱིས་པའི་སྐབས་སུ། ཕན་ཚུན་ཡང་ཡང་རྒྱས་བཏབ་པའི་ནུས་པ་རྣམས་འདིར་ཤིན་ཏུ་སྨིན་པས། དགེ་ཆོས་གཅིག་ལ་དམིགས་པས་དགེ་ཆོས་གཞན་མ་ལུས་པ་ཡང་ཅིག་ཆར་འབྱུང་བ་ཡིན་པས་ན། མཐར་གྱིས་པ་ཡོངས་སུ་གྱུར་ནས། སྐད་ཅིག་མར་སོང་བ་ཡིན་ཏེ། སྐབས་འདིར་རྟག་པ་མཐར་བཟུང་སྟེ་མཐར་ཆགས་སུ་བསྒོམ་པ་ཞིག་གལ་ཏེ་སྲིད་དུ་ཆུག་ཀྱང༌། མཐར་ཆགས་སུ་མི་ཡོང་བར་ཀུན་དུས་སུ་འབྱུང་བ་ཡིན་ནོ། །དེ་ཡང་ཤིན་ཏུ་དབང་འབྱོར་བས་གལ་ཏེ་འདོད་ན་ནི། མཐར་ཆགས་སུ་འབྱུང་བ་


TNT17_Page_0719
[མ་དཔེ་གཟིགས་ན་འདིར་གནོན།]

ཡང་སྲིད་མོད་ཀྱི། སྐད་ཅིག་མ་གྲུབ་ནས་མཐར་ཆགས་བསྒོམས་པ་ལ་དགོས་པ་མེད་པའི་ཕྱིར་འདོད་པར་མི་བྱེད་དོ། །དེ་ལ་མཐར་ཆགས་རྐྱང་པར་བསྒོམས་པའི་ནུས་པ་ཡོངས་སུ་རྫོགས་པ་ནི། མཐར་གྱིས་པའི་མངོན་རྟོགས་ལེགས་པར་ཐོབ་ཟིན་པ་ཡིན་ལ། དེ་ནས་རྒྱས་འདེབས་ཉིས་སྦྲག་ཏུ་བྱེད་དེ། རྣམ་པ་ཐམས་ཅད་ལ་སྦྱིན་པ་དང་ཚུལ་ཁྲིམས་གཉིས་ཀྱིས་རྒྱས་འདེབས་པ། སྔ་ཕྱི་རིམ་ཅན་མ་ཡིན་པར་དུས་མཉམ་དུ་བྱེད་དོ། །དེ་ལྟར་ཉིས་སྦྲག་དུས་མཉམ་དུ་རྒྱས་ཐེབས་པ་ནས་བརྩམས་ཏེ། རྣམ་པ་ཐམས་ཅད་དུ་རྒྱས་འདེབས་མཐའ་མེད་པའི་བར་དུ་སྦྱོར་བ་ནི། སྐད་ཅིག་མའི་སྦྱོར་བ་ཙམ་ཡིན་ཏེ། འདི་ནི་རྒྱུན་མཐའ་སྔོན་རོལ་ནས་ཡོད་ཅིང༌། སྐད་ཅིག་མའི་མངོན་རྟོགས་ནི་མ་ཡིན་ནོ། །རྒྱས་འདེབས་དེ་ཡང་ལྷུན་གྲུབ་ཀྱི་ཚུལ་གྱིས་འབྱུང་དགོས་ཏེ། འབད་རྩོལ་ཅན་ཡིན་ན་ནི་སྐད་ཅིག་མའི་ཐུན་མོང་མ་ཡིན་པའི་རྒྱུར་མི་འགྱུར་བས། མི་གཡོ་བའི་ས་ཡན་ཆད་ལ་ཅི་རིགས་པ་ཡོད་པར་ཤེས་པར་བྱའོ། །དངོས་པོ་བརྒྱ྄ད་པ་ཆོས་སྐུ་ནི། མ་ལུས་ཤིང་ལུས་པ་མེད་པའི་ཆོས་སམ་ཤེས་བྱ་ཐམས་ཅད་ཀྱི་རང་གཟུགས་སམ་གནས་ལུགས་སམ། སྡོད་ལུགས་ཡིན་པའི་ཕྱྀར། ཆོས་ཀུན་གྱི་ལུས་སམ་སྐུའོ། །ཡང་སྟོབས་དང་མི་འཇིགས་པ་ལ་སོགས་པ། ཡོན་ཏན་དང་དགེ་ཆོས་མ་ལུས་པ་ཐམས་ཅད། གཅིག་ཏུ་འདུས་པའི་སྤྱི་གཟུགས་ཡིན་པའི་ཕྱིར་ཡང་ཆོས་ཀྱི་སྐུ་ཞེས་བྱའོ། །དེ་ཡང་དོན་ནི་སངས་རྒྱས་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་མཉམ་པ་ཉིད་ཡེ་ཤེས་ཀྱི་རྒྱ་


TNT17_Page_0720
[མ་དཔེ་གཟིགས་ན་འདིར་གནོན།]

མཚོ་ཆེན་པོ་དེ་ཡིན་ཏེ། དེ་ཡང་དག་པ་གཉིས་ལྡན་ནོ། །དག་པ་གཉིས་ལྡན་དང༌། རང་བཞིན་གྱིས་དག་པ་གཅིག་པུ་པ་ཞེས་པ་ཡང༌། ངོ་བོ་སོ་སོར་མེད་ཅིང་མཚན་གཞིའི་ངོས་འཛིན་ཡང་ཐ་དད་དུ་མ་གྲུབ་སྟེ། ཡེ་ཤེས་ཀྱི་རྒྱ་མཚོ་ལྟ་བུའི་ཆོས་དབྱིངས་དེ་ཉིད་ལས། གཞན་ངོས་བཟུང་དུ་མེད་པའི་ཕྱིར་རོ། །འོན་ཀྱང་རྣམ་གཞག་གཉིས་པོ་དེ་ནི། རྟེན་གྱི་རྒྱུད་རིགས་མི་འདྲ་བ་གཉིས་ལ། ཆོས་དབྱིངས་དེ་དེ་དང་དེར་སོང་ཚུལ་ཐ་དད་པ་ཡིན་ཏེ། ཆོས་སྐུ་དེ་ལ་རང་གི་ངོ་བོས་ནི་གློ་བུར་གྱི་དྲི་མ་ཡང་མེད་མོད་ཀྱི། སེམས་ཅན་རྣམས་ཉིད་གློ་བུར་གྱི་དྲི་མས་བསྒྲིབས་པའི་ཕྱིར། ཆོས་དབྱིངས་དེ་སེམས་ཅན་རྣམས་ལ་རང་བཞིན་རྣམ་དག་ཁོ་ནར་སོང༌། སངས་རྒྱས་རྣམས་ནི་རང་རྒྱུད་ལ་གློ་བུར་གྱི་དྲི་མ་དག་པའི་ཕྱིར། ཆོས་སྐུ་དེ་ཡང་སངས་རྒྱས་ལ་ནི་དག་པ་གཉིས་ལྡན་དུ་སོང་བས་ན། སངས་རྒྱས་ཀྱིས་ཆོས་དབྱིངས་དག་པ་གཉིས་ལྡན་ཐོབ་ཅེས་བྱ་བ་དེ་ཡང༌། ཆོས་དབྱིངས་ལ་དག་པ་གཉིས་ལྡན་ཡིན་མིན་གྱི་ཆ་གཉིས་ཡོད་པ་ཞིག་ལས། ཡིན་པའི་ཕྱོགས་དེ་ཐོབ་པའི་དོན་མ་ཡིན་གྱི། སངས་རྒྱས་ཀྱི་རྒྱུད་ཀྱིས་ཆོས་དབྱིངས་ཡོངས་རྫོགས་དེ་དག་པ་གཉིས་ལྡན་གྱི་ཚུལ་གྱིས་ཐོབ་པ་ལ། དག་པ་གཉིས་ལྡན་ཐོབ་ཅེས་བསྒྲགས་པ་ཡིན་ནོ། །དཔེར་ན་ཁྱིམ་བདག་མགོན་མེད་ཟས་སྦྱིན་ནི། སློང་བ་པོ་རྣམས་ལ་ཟས་གོས་ཁོ་ནའི་སྦྱིན་བདག་ཡིན་གྱི། སངས་རྒྱས་འཁོར་དང་བཅས་པའི་ནི་ཡོད་བྱད་ཐམས་ཅད་ཀྱི་སྦྱིན་བདག་ཡིན་ནོ་ཞེས་བརྗོད་ན། ཁྱིམ་བདག་གཉིས་ནི་མེད་ལ། ཟས་གོས་ཁོ་ནའི་སྦྱིན་བདག་དང་ཡོད་བྱད་ཐམས་ཅད་


TNT17_Page_0721
[མ་དཔེ་གཟིགས་ན་འདིར་གནོན།]

ཀྱི་སྦྱིན་བདག་མཚན་ཉིད་སྤྱི་ལྡོག་འགལ་ཡང༌། སྦྱིན་ཡུལ་སོ་སོ་ལ་བལྟོས་ནས་མི་འགལ་བ་བཞིན་ནོ། །ཆོས་སྐུ་འདི་དང༌། གོང་གི་མཁྱེན་གསུམ་འགོག་བདེན་ངོ་བོ་གཅིག་ཅིང༌། རྣམ་མཁྱེན་ལམ་བདེན་ཡང་འདིའི་ཁོངས་སུ་བསྡུ་བ་ཡིན་མོད་ཀྱི། མཁྱེན་གསུམ་གྱི་སྐབས་དེ་དག་ཏུ་ནི། ད་ལྟ་མ་ཐོབ་པ་ཐོབ་བྱའི་ཡུལ་དུ་བྱ་བ་དང༌། དམིགས་པའི་ཡུལ་དུ་བྱས་ནས་བཤད་ལ། འདིར་ནི་འབྲས་བུ་དེ་མངོན་དུ་བྱེད་པའི་དབང་དུ་བྱས་ནས་བཤད་པས། དོན་གྱི་འཆད་ཚུལ་ལ་ངོ་བོ་བཟློས་པར་མི་འགྱུར་རོ། །དེ་ཡང་མངོན་རྟོགས་བརྒྱད་སྒྲིག་པའི་དབང་དུ་བྱས་ན་བཟློས་སྤོང་དགོས་ལ། གཞན་དུ་ན་མདོའི་དངོས་བསྟན་དང་རྒྱས་བཤད་ལ་བཟློས་པའི་དོགས་པ་ཡང་མེད་དོ། །དེ་ལྟར་ན་དངོས་པོ་བརྒྱད་ཀྱི་ངོས་འཛིན་གསལ་འདུས་སུ་བཤད་ཟིན་ཏོ། །ཅུང་ཟད་རྒྱས་པར་བཤད་པ་ལ། ཤེར་ཕྱིན་འབུམ་པ་ལ་སོགས་པ་མདོ་རྒྱས་པ་རྣམས་ཀྱི་དབང་དུ་མཛད་ནས། དོན་གྱི་གཙོ་བོ་བདུན་བཅུ་དང་ཤིན་ཏུ་རྒྱས་བཤད་ལ་ཡན་ལག་གི་རྣམ་གྲངས་མཐའ་ཡས་པ་ཡོད་ཀྱང༌། མདོ་འདིར་ནི་རྣམ་མཁྱེན་མཚོན་བྱེད་ཀྱི་ཆོས་བདུན་དང་ལམ་ཤེས་དང༌། གཞི་ཤེས་ཀྱི་ངོ་བོ་ཙམ་དང༌། རྣམ་ཀུན་གྱི་རྣམ་པ་དང༌། སྦྱོར་བ་དང༌། རྩེ་མོར་ཕྱིན་པའི་སྤང་བྱ་སྤོང་བའི་གཉེན་པོའི་ཚུལ་ཙམ་དང༌། མཐར་གྱིས་པའི་ངོ་བོ་དང༌། སྐད་ཅིག་མའི་ངོ་བོ་དང༌། ཆོས་སྐུའི་དོན་ཚན་བཞི་པོ་རྣམས་ཏེ། དོན་གྱི་རྣམ་གྲངས་བཅོ་བརྒྱད་དམ། རྩེ་སྦྱོར་གྱི་མཐོང་སྒོམ་གཉིས་ཀའི་ཡང་ངོ་བོ་ཅུང་ཟད་གསལ་བས། བཅུ་དགུར་བྱས་ཀྱང་རུང་ངོ༌། །དེ་ལ་རྣམ་མཁྱེན་མཚོན་བྱེད་


TNT17_Page_0722
[མ་དཔེ་གཟིགས་ན་འདིར་གནོན།]

ཀྱི་ཆོས་ཞེས་པའི་གོ་དོན་འབྲས་བུ་རྣམ་མཁྱེན་དེ་ཐོབ་བྱེད་ཀྱི་རྒྱུ་ལམ་གྱི་རིམ་པ་ཡིན་པའི་དོན་ཡིན་གྱི། རྣམ་མཁྱེན་གྱི་རྟོགས་བྱའི་ཡུལ་བཅུ་ཡིན་པར་འཆད་པ་མི་ལེགས་ལ། སེམས་བསྐྱེད་ལ་སོགས་པ་འདི་དག་ལ། རྣམ་མཁྱེན་གྱི་སྒྲ་སྦྱོར་བ་ནི་དེ་བས་ཀྱང་ཤིན་ཏུ་མི་འཐད་དེ། རྣམ་མཁྱེན་གྱི་སྒྲ་བཤད་རྒྱུ་ཙམ་ཡོད་དུ་ཆུག་ཀྱང༌། ཉན་ཐོས་ཀྱི་ཐེག་པ་དང༌། ཕ་རོལ་ཏུ་ཕྱིན་པའི་ཐེག་པ་དང༌། སྔགས་ཀྱི་ཐེག་པ་རྣམས་ལས། རྣམ་པ་ཐམས་ཅད་མཁྱེན་པ་ནི་རྫོགས་པའི་སངས་རྒྱས་ཀྱི་ཡེ་ཤེས་ཁོ་ན་ལ་གསུངས་པའི་ཕྱིར། གནས་སྐབས་ཐམས་ཅད་དུ་ཤིན་ཏུ་གྲགས་པ་དང་ཧ་ཅང་འགལ་ཆེས་པས་སོ། །དཔེར་ན་སངས་རྒྱས་ལ་ལྷ་ཚེ་རིང་པོའི་སྒྲ་བཤད་དུ་ཡོད་ཀྱང༌། དེ་ལྟར་ཐ་སྙད་སྦྱར་ན་ཤིན་ཏུ་མི་མཛེས་པ་བཞིན་ནོ། །མཚོན་བྱེད་ཀྱི་ཆོས་དེ་དག་ཀྱང་ཇི་སྐད་དུ། སེམས་བསྐྱེད་པ་དང་གདམས་ངག་དང༌། །ངེས་འབྱེད་ཡན་ལག་རྣམ་བཞི་དང༌། །སྒྲུབ་པ་ཡི་ནི་རྟེན་གྱུར་པ། །ཆོས་ཀྱི་དབྱིངས་ཀྱི་རང་བཞིན་དང༌། །དམིགས་པ་དག་དང་ཆེད་དང་ནི། །གོ་ཆ་འཇུག་པའི་བྱ་བ་དང༌། །ཚོགས་ནི་ངེས་པར་འབྱུང་བཅུས་རྣམས། །ཐུབ་པའི་རྣམ་ཀུན་མཁྱེན་པ་ཉིད། །ཅེས་གསུངས་ན། སེམས་བསྐྱེད་ནི། གཞན་དོན་དུ་རྫོགས་པའི་བྱང་ཆུབ་ཐོབ་པར་འདོད་པ་ལ་ངོས་འཛིན་པ་ནི་སྤྱིར་བཏངས་ཙམ་ཡིན་ལ། དེ་ཙམ་ཞིག་ནི་སྨོན་པ་སེམས་བསྐྱེད་ཙམ་ཡང་ཡིན་ནོ། །དེ་ཡང་སྤྱོད་པ་ཕ་རོལ་ཏུ་ཕྱིན་པ་དྲུག་དང་འབྲེལ་ན་ནི། འཇུག་པ་སེམས་བསྐྱེད་ཞེས་བྱ་སྟེ། གང་འཇུག་པ་ཡོད་པ་དེ་ལ་སྨོན་སེམས་ཀྱང་ཡོད་དོ། །སེམས་བསྐྱེད་ཙམ་ནི་དེ་ལྟར་ཡིན་ཀྱང༌། ཤེས་


TNT17_Page_0723
[མ་དཔེ་གཟིགས་ན་འདིར་གནོན།]

རབ་ཀྱི་ཕ་རོལ་ཏུ་ཕྱིན་པའི་སྒྲུབ་པ་སེམས་བསྐྱེད་དུ་འགྱུར་བ་ལ། སྤྲོས་བྲལ་གྱི་ལྟ་བ་སྔོན་དུ་སོང་བ་དགོས་ཤིང་དེ་ལྟར་མ་རྟོགས་པའི་སེམས་ཅན་ལ་སྟོང་ཉིད་ལ་བརྟེན་ནས་སྙིང་རྗེ་འཇུག དེས་ཀུན་ནས་བསླངས་ཏེ་སེམས་བསྐྱེད་པ་ཡིན་པས། དངོས་གཞིའི་དུས་སུ་ཡང་དངོས་སམ་རྗས་མཐུན་ཅི་འདྲ་ཡང་འཁོར་གསུམ་རྣམ་པར་མི་རྟོག་པའི་སྟོང་ཉིད་ཀྱིས་ཟིན་པ་ཞིག་དགོས་པ་ཡིན་ནོ། །དེའི་ཚེ་སེམས་བསྐྱེད་དང་སེམས་བསྐྱེད་ཀྱི་སྤྱོད་པ་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་ལམ་དུ་འགྱུར་རོ། །དེ་ཡང་ལས་དང་པོ་པ་ནས། སངས་རྒྱས་མ་ཐོབ་གྱི་བར་དུ་སེམས་བསྐྱེད་ཀྱི་མཚན་ཉིད་དང་ལྡན་པ་ཡིན་ལ། སངས་རྒྱས་ཀྱི་སར་ནི་དེའི་རིགས་རྒྱུན་དམིགས་པ་མེད་པའི། སྙིང་རྗེས་ཆེན་པོ་ནི་ཡོད་ཀྱང༌། སེམས་བསྐྱེད་ཀྱི་མཚན་ཉིད་ནི་ལོག་པ་ཡིན་ཅིང༌། ཚོགས་སྦྱོར་གྱི་ལམ་དུ་ནི་སེམས་བསྐྱེད་དེ་ཡང་ཤེར་ཕྱིན་གྱི་སྒྲུབ་པ་ཁོ་ན་ཡིན་གྱི་ཤེར་ཕྱིན་དངོས་མ་ཡིན་ལ། མཐོང་ལམ་ཐོབ་ནས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སེམས་བསྐྱེད་དངོས་ཡིན་པར་ཤེས་པར་བྱའོ། །གདམས་ངག་ནི། སློབ་དཔོན་བྱང་ཆུབ་སེམས་དཔའ་ཞིག་གིས། སློབ་མ་བྱང་ཆུབ་ཏུ་སེམས་བསྐྱེད་པ་གང་ལ། ཤེས་རབ་ཀྱི་ཕ་རོལ་ཕྱིན་པའི་ཆོས་བསྟན་པའི་ངག་ཚིག་གིས་རྐྱེན་བྱས་ཏེ། དེའི་རྒྱུད་ལ་ཤེར་ཕྱིན་གྱི་དབང་དུ་བྱས་པའི། མཉམ་གཞག་གི་ལམ་དངོས་རྒྱུད་ལ་སྐྱེས་པའམ། སྔར་སྐྱེས་ལ་བོགས་ཕྱིན་པའམ། ཉེས་སྐྱོན་གྱི་གེགས་སེལ་བར་གྱུར་པའི་གནས་སྐབས་དེ་ནི་འདིར་བསྟན་གདམས་ངག་གི་ལམ་ཞེས་བྱའོ། །གདམས་ངག་ཁྱད་པར་ཅན་ནི་ཆོས་རྒྱུན་གྱི་ཏིང་ངེ་འཛིན་ཐོབ་ནས། དེ་བཞིན་གཤེགས་


TNT17_Page_0724
[མ་དཔེ་གཟིགས་ན་འདིར་གནོན།]

པས་མངོན་སུམ་དུ་འདོམས་པ་ལ་བྱ་སྟེ། གདམས་ངག་ཅེས་བྱ་བ་དངོས་བསྟན་ལྟར་ན། འདོམས་པའི་ངག་ཚིག་ལ་ཟེར་ཡང༌། འབྲས་བུ་ལ་རྒྱུའི་མིང་གིས་བཏགས་ནས། དེའི་དངོས་ཀྱི་གྲུབ་འབྲས་སློབ་མའི་རྒྱུད་ལ་སྐྱེས་པ་ལ་བྱའོ། །ངེས་འབྱེད་ཡན་ལག་ནི། སྐབས་འདིར་ཐེག་ཆེན་སྦྱོར་ལམ་སྟེ། ངེས་པ་ནི་ཆོས་ཉིད་དང་དེ་འབྱེད་པ་ནི་མཐོང་ལམ་ཡིན་པས། དེའི་ཡན་ལག་སྟེ་རྒྱུ་ཚོགས་ནི་དེ་ཡིན་པའི་ཕྱིར་རོ། །སྦྱོར་ལམ་དེ་ཆོས་ཉིད་ལ་གསལ་སྣང་ནི་ཐོབ་པ་ཡིན་ཅིང༌། མི་རྟོག་པའི་ཚུལ་གྱིས་ཆོས་ཉིད་ཅུང་ཟད་རང་གིས་རིག་པ་ཡང་ཡིན་ལ། རྣལ་འབྱོར་པའི་མངོན་སུམ་གྱིས་རྟོགས་པ་ནི་མ་ཡིན་པ་དང༌། གཟུང་འཛིན་གྱི་རྣམ་རྟོག་གློ་བུར་པ་རྣམས་རིམ་གྱིས་འགག་པར་འགྱུར་བ་ཡིན་པ་དང༌། གང་མངོན་འགྱུར་བ་མ་འགགས་པའི་རྟོག་པ་དེ་དང་དེ་ཡང༌། མཉམ་གཞག་ཏུ་མི་འབྱུང་མོད་ཀྱི། རྗེས་ཐོབ་ཏུ་དེ་དག་འབྱུང་ཞིང༌། དེ་དག་མ་སྤངས་པའི་སྟོབས་ཀྱིས་མཉམ་གཞག་ཀྱང་ཅུང་ཟད་མི་གསལ་བ་ཡིན་ནོ། །སྦྱོར་ལམ་གྱི་ཡེ་ཤེས་འདི་ཀུན་ཡང་མི་རྟོག་པ་སྤྲོས་བྲལ་གྱི་རྣམ་པ་ཅན་ཡིན་པས། བར་བར་ན་རྣམ་པར་རྟོག་པའི་འཛིན་པ་ཅུང་ཟད་འདྲེས་པ་ཡོད་ཀྱང་རང་གི་ངོ་བོ་རྟོག་པ་ནམ་ཡང་མ་ཡིན་ཅིང༌། ཆོས་ཉིད་ཅུང་ཟད་ཙམ་གསལ་ལ་ཅུང་ཟད་ཙམ་མི་གསལ་བ་ནི། དཔེར་ན་སེང་རས་ཀྱིས་གདོང་གཡོགས་ཏེ་དངོས་པོ་ལ་བལྟས་པ་བཞིན་ནོ། །དེ་ལྟར་སེམས་བསྐྱེད་ཅིང་གདམས་ངག་མནོས་ནས་ཕ་རོལ་ཏུ་ཕྱིན་པའི་དོན་བསྒོམས་པ་ལས། ངེས་འབྱེད་ཡན་ལག་རྒྱུད་ལ་སྐྱེས་ཏེ། ཚོགས་སྦྱོར་གྱི་ལམ་ཆོད་པར་འགྱུར་བས་རིམ་པ་དེ་བཞིན་དུ་བསྟན་ལ། སྤྱིར་སེམས་


TNT17_Page_0725
[མ་དཔེ་གཟིགས་ན་འདིར་གནོན།]

བསྐྱེད་ཉིད་དམ་གདམས་ངག་ཉིད་ཀྱི་ནང་དུ་ལམ་ཐམས་ཅད་འདུ་བ་ཡིན་པས་གོ་རིམ་མེད་ཀྱང༌། གོ་རིམ་འདི་དང་པོར་སེམས་བསྐྱེད་པ་དང༌། དང་པོར་གདམས་ངག་མནོས་པའི་དབང་དུ་བྱས་པ་ཡིན་ནོ། །དེ་ལྟར་ན་ཚོགས་སྦྱོར་ནི། སྤྱིར་རྣམ་མཁྱེན་གྱི་སྒྲུབ་པ་ཙམ་ཡིན་ཀྱང༌། ཁྱད་པར་ཅན་ནི་མ་ཡིན་ལ། སྒྲུབ་པ་ཁྱད་པར་ཅན་རྣམས་ནི་འཕགས་པའི་ལམ་ཡིན་པས། ལམ་དེ་གཙོ་བོར་བཞག་པའི་དབང་དུ་བྱས་ནས། ཇི་ལྟར་སྒྲུབ་པ་ཉམས་སུ་ལེན་པ་ཐམས་ཅད་ཀྱི་རྟེན་ནམ་རྒྱུ་ནི་ཆོས་དབྱིངས་ཡིན་ལ། ཆོས་དབྱིངས་དེ་ཡང་སྤྲོས་པ་དང་བྲལ་ཞིང་རྣམ་པ་ཐམས་ཅད་པའོ། །དེ་ནི་རང་གི་ངོ་བོའི་སྟཻང་ནས་ཀུན་རྫོབ་ཀྱི་ཆོས་གང་གིས་ཀྱང་མ་གོས་མོད། རྣལ་འབྱོར་ཅན་གྱི་བློ་ལ་འཆར་ཚུལ་གྱི་དབང་དུ་བྱས་ནས། ཚོགས་ལམ་གྱི་རྟེན་ཆོས་དབྱིངས་དང༌། སྦྱོར་ལམ་གྱི་རྟེན་ཆོས་དབྱིངས་སོགས་ལམ་ལྔ་དང་ས་བཅུའི་རྟེན་གྱི་འཇུག་ཚུལ་བྱེད་དོ། །ཆོས་དབྱིངས་དེ་ཉེར་ལེན་གྱི་རྒྱུ་དགོས་མིན་ཀྱང༌། །འདྲ་བའི་སྒོ་ནས་སྒྲུབ་པའི་ཉེར་ལེན་གྱི་ཐ་སྙད་འཇོག་གོ །ཆོས་དབྱིངས་དེ་རང་བཞིན་གནས་རིགས་ཡིན་ལ། ཐར་པའི་རྒྱུ་དགེ་ཆོས་འཕེལ་བའི་རྒྱས་འགྱུར་གྱི་རིགས་ཀྱང་དེ་ལ་བརྟེན་ཏེ་ཞུགས་པའི་ཕྱིར། དེ་དང་འབྲེལ་པ་ཅན་ཡིན་པའི་རྣམ་གཞག་ཀྱང་བྱས་སོ། །སྒྲུབ་པའི་དམིགས་པ་ཙམ་ནི་ཆོས་ཐམས་ཅད་ཡིན་ལ། དམིགས་པའི་གཙོ་བོ་ནི་ཆོས་ཐམས་ཅད་ཀྱི་ཆོས་ཉིད་དེ་བཞིན་གཤེགས་པའི་སྙིང་པོ་ཡིན་པས། དོན་དམ་པའི་སྟོང་ཉིད་དེ་རྟེན་དང་དམིགས་པ་གཉིས་ཀར་དུ་རུང་ངོ༌། །ཆེད་དུ་བྱ་བ་ནི་སྒྲུབ་པ་བྱེད་པའི་སྐབས་ཀྱི་འདོད་དོན་ཏེ། འདི་ལ་རྒྱ་


TNT17_Page_0726
[མ་དཔེ་གཟིགས་ན་འདིར་གནོན།]

བོད་ཕལ་ཆེར་སངས་རྒྱས་ཀྱི་སས་བསྡུས་པའི་སྤངས་རྟོགས་འཕྲིན་ལས་གསུམ་མམ་སྐུ་བཞིའམ། མཁྱེན་གསུམ་སོགས་ཆེན་པོ་གསུམ་དང་སྦྱོར་བ་ཞིག་སྣང་ཡང༌། དེའི་ཐད་ཀྱི་མདོ་དང་མི་མཐུན་ལ། བྱང་ཆུབ་སེམས་དཔའ་སེམས་དཔའ་ཆེན་པོའི་སྒྲ་བཤད་སངས་རྒྱས་ལ་སྦྱོར་བ་ཡང༌། འཚམ་པ་ལས་འདས་པའི་བཤད་པ་ཡིན་པས། འདི་ནི་བྱང་ཆུབ་སེམས་དཔའ་ཉིད་ཀྱི་སྤྱད་པ་སྤྱོད་པའི་ཚེ། འཕྲལ་འཕྲལ་དུ་དགོས་པའི་འདོད་དོན་ཡིན་གྱི། མཐར་ཐུག་གི་ཆེད་དུ་བྱ་བ་ཁོ་ན་མ་ཡིན་ནོ། །མདོ་ལས། བྱང་ཆུབ་སེམས་དཔའི་སྒྲ་བཤད་ཀྱི་དབང་དུ་མཛད་ནས། སེམས་དཔའ་དང་སེམས་དཔའ་ཆེན་པོའི་སྒྲ་བཤད་ཀྱིས་སེམས་ཆེན་པོ་དང༌། བྱང་བའི་སྒྲ་བཤད་ཀྱིས་སྤོང་བ་ཆེན་པོ་དང༌། ཆུབ་པའི་སྒྲ་བཤད་ཀྱིས་རྟོགས་པ་ཆེན་པོ་བསྟན་ཏེ། མདོ་རྒྱས་པ་ན། བཅོམ་ལྡན་འདས་ཀྱིས་སེམས་ཆེན་པོ་དང༌། ཤཱ་རིའི་བུས་སྤོང་བ་ཆེན་པོ་དང༌། རབ་འབྱོར་གྱིས་རྟོགས་པ་ཆེན་པོ་རྣམས་གསུངས་ལ། ཡོན་ཏན་རིན་པོ་ཆེ་བསྡུད་པ་ལས། ཅི་ཕྱིར་དེ་ནི་སེམས་དཔའ་ཆེ་ཞེས་བྱ་ཞེ་ན། །སེམས་ཅན་ཚོགས་རྣམས་མང་པོའི་མཆོག་ཏུ་གྱུར་པ་དང༌། སེམས་ཅན་ཁམས་ཀྱི་ལྟ་རྣམས་ཆེན་པོ་གཅོད་པ་སྟེ། །དེ་ཕྱིར་འདི་ནི་སེམས་དཔའ་ཆེ་ཞེས་རབ་བརྗོད་དེ། །གཏོང་བ་ཆེ་དང་བློ་ཆེ་བ་དང་མཐུ་ཆེ་དང༌། །རྒྱལ་བ་རྣམས་ཀྱི་ཐེག་ཆེན་མཆོག་ལ་ཞུགས་པ་དང༌། །གོ་ཆ་ཆེན་པོ་བསྒོས་ཤིང་བདུད་ཀྱི་རྒྱུ་འདུལ་བ། །དེ་ཡི་ཕྱིར་ན་སེམས་དཔའ་ཆེ་ཞེས་བརྗོད་པ་ཡིན། །ཅེས་གསུངས་ཏེ། འཇིག་རྟེན་པ་རྣམས་དང༌། ཉན་ཐོས་དང་རང་རྒྱལ་དང་བྱང་ཆུབ་


TNT17_Page_0727
[མ་དཔེ་གཟིགས་ན་འདིར་གནོན།]

སེམས་དཔའ་ཐམས་ཅད་ཀྱི། ཡོན་ཏན་གྱི་ཚོགས་རྣམས་ལས་ཇི་ལྟར་འོས་འོས་སུ་སྐད་ཅིག་རེ་རེ་བཞིན་མ་ཐོབ་པ་རྣམས་ཐོབ་པར་བྱེད། ཐོབ་པ་རྣམས་སྤེལ་བར་བྱེད་པའི་འཇུག་པ་སེམས་བསྐྱེད་དང་ལྡན་པས་སེམས་ཅན་གཞན་ཐམས་ཅད་ཀྱི་གཙོ་བོ་དང་མཆོག་ཏུ་གྱུར་པ་ནི་སེམས་ཆེན་པོའོ། །བདག་ཉིད་ཀྱིས་གཞན་ལ་ཆོས་བསྟན་པས། དེ་རྣམས་ཀྱི་བདག་ལྟ་དང་མཐར་ལྟ་ལ་སོགས་པ་ལྟ་སྨོས་ཀྱང་ཅི་དགོས། ལམ་དང་འབྲས་བུ་ལ་འཛིན་པའི་དམིགས་པའི་ལྟ་བ་ཐམས་ཅད་ཀྱང་སྤོང་བར་བྱེད་པ་ནི་སྤོང་བ་ཆེན་པོ་དང༌། སྦྱིན་པ་ཆེན་པོ་ལ་སོགས་པ་གཞན་ལ་མེད་པའི་ཁྱད་ཆོས་དཔག་ཏུ་མེད་པ་མངའ་བ་རྣམས་ལ་ཡང༌། ཆོས་དབྱིངས་ཀྱི་རང་བཞིན་རྟོགས་པའི་སྟོབས་ཀྱིས་མ་ཆགས་པ་ནི་རྟོགས་པ་ཆེན་པོ་སྟེ། རི་རབ་ལ་མངོན་པར་དམིགས་ན་ནྱ་གྲོ་དྷའི་སྡོང་པོ་ལ་ཆེ་བའི་བློ་མི་སྐྱེ་བ་བཞིན་ནོ། །འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་གང་སྤྱོད་ཀྱང༌། འཕྲལ་འཕྲལ་དུ་ཆེད་གཏད་སྦྱོར་དགོས་པས། ཆེད་དུ་བྱ་བ་ཞེས་བྱ་སྟེ། འཕྲལ་འཕྲལ་དུ་བྱེད་དགོས་རྒྱུའི་དོན་ནོ། །སྒྲུབ་པ་དངོས་ནི། ཕ་རོལ་ཏུ་ཕྱིན་པ་དྲུག་ཀར་ཤེར་ཕྱིན་གྱིས་ཟིན་པར་བྱས་ནས་ལག་ལེན་དུ་འདེབས་པ་ཡིན་ཏེ། ཁ་ཅིག་ངོ་བོ་ཕྱིན་དྲུག་ཡིན་ཀྱང་སྒྲུབ་པའི་ལྡོག་ཆ་ནས། བརྩོན་འགྲུས་ཡིན་པས། སྒྲུབ་པའི་ངོ་བོ་ནི་བརྩོན་འགྲུས་སོ་ཞེས་ཕལ་ཆེར་ཟེར་ན། དེ་ཙམ་ཞིག་དོན་ལ་ཞུགས་སུ་ནི་རུང་ཡང༌། བཤད་པའི་ནུས་པ་བཟང་པོ་ནི་མིན་ནོ། །ཤེས་རབ་སྙིང་པོའི་མདོ་འདིར་སྒྲུབ་པ་བཞིའི་དབྱེ་བ་མ་གསུངས་པས་སྐབས་འདིར་མི་འཆད་ལ། མདོར་ན་བདག་


TNT17_Page_0728
[མ་དཔེ་གཟིགས་ན་འདིར་གནོན།]

ཉིད་ཀྱི་ཡོན་ཏན་རྫོགས་པར་བྱེད་པའི་སྒྲུབ་པ་དང༌། གཞན་སྨིན་ཅིང་གྲོལ་བར་བྱེད་པའི་སྒྲུབ་པ་གཉིས་སུ་མ་འདུས་པ་མེད་དེ། རྒྱས་པར་བྱང་ཆུབ་སེམས་དཔའི་ས་ལས་རྟོགས་པར་བྱའོ། །ད་ནི་ལམ་ཤེས་པ་ཉིད་ལ་མཐོང་ལམ་དང་སྒོམ་ལམ་གཉིས་སུ་དབྱེར་ཡོད་ཀྱང༌། དམིགས་རྣམས་ཀྱི་སྒོ་ནས་མི་འདྲ་བ་མེད་དེ། མཐོང་ལམ་གྱིས་ཇི་ལྟར་མཐོང་བའི་དོན་དེ་ཉིད་སྒོམ་ལམ་གྱིས་གོམས་པར་བྱེད་པའི་ཕྱིར་རོ། །སྒོམ་ལམ་ལམ་ཤེས་དེ་ཡང་ཇི་ལྟ་བུ་སྙམ་ན། ཇི་སྐད་དུ། དེ་ཡི་ངོ་བོ་ཉིད་མཆོག་ཉིད། །ཀུན་ལ་མངོན་པར་འདུ་མི་བྱེད། །ཆོས་རྣམས་དམིགས་སུ་མེད་པར་ནི། །གཏོད་བར་བྱེད་པ་དོན་ཆེན་ཉིད། །ཅེས་གསུངས་ཏེ། མདོ་ལས་ཀྱང༌། ཤེར་ཕྱིན་ནི་ཤིན་ཏུ་རྣམ་པར་དག་པའི་སླད་དུ་སྣང་བར་བགྱིད་པའོ། །ཞེས་སོགས་དང༌། སྒྲུབ་པ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་བསྒྲུབ་པར་བྱའོ། །ཞེས་སོགས་གསུངས་པ་ལྟར། མུན་པ་ལྟ་བུའི་གཟུང་འཛིན་གྱི་སྣང་བ་སངས་ཤིང༌། ཡེ་ཤེས་ཀྱི་སྣང་བ་རྒྱས་པའི་ཆོས་དབྱིངས་རྣམ་པ་ཀུན་ལྡན་ལ་མཉམ་པར་འཇོག་པ་ནི། སྒོམ་ལམ་མཉམ་གཞག་དེའི་ངོ་བོ་ཉིད་ཡིན་ལ། དེ་ནི་དགེ་ཆོས་རྣམས་ཐམས་ཅད་ཀྱི་མཆོག་ཡིན་ཅིང༌། གཟུགས་སོགས་ཀུན་རྫོབ་ཀུན་ལ་སྒྲུབ་པ་མངོན་པར་འདུ་མི་བྱེད་ཅིང་ཐོབ་པར་ཡང་མི་བྱེད་ལ། ཆོས་དེ་རྣམས་དམིགས་པ་མེད་པའི་དབྱིངས་སུ་གཏད་པས། དོན་དམ་གྱི་དབྱིངས་དེར་ཐིམ་པར་བྱེད་པའི་ཁྱད་ཆོས་དང་ལྡན་པ་སྟེ། འདི་ནི་མཉམ་གཞག་སྒྲུབ་པ་སྒོམ་ལམ་ཞེས་བྱ་ཞིང༌། རྗེས་ཐོབ་ཏུ་མོས་པ་དང༌། བསྔོ་བ་དང་རྗེས་སུ་ཡི་རང་གསུམ་ལ་སློབ་དགོས་པ་དེ་ནི་མཚོན་བྱེད་དེ། ཐབས་མཁས་


TNT17_Page_0729
[མ་དཔེ་གཟིགས་ན་འདིར་གནོན།]

ཀྱི་སྒོ་ཐམས་ཅད་ལ་ཡང་བསླབ་པར་བྱའོ། །རྣམ་དག་སྒོམ་ལམ་ཞེས་བྱ་བ་ནི། ཉེར་ལྔ་པའི་མདོ་འདིར་དངོས་སུ་མེད་ཀྱང་འཕྲོ་དོན་ཙམ་དུ་ཞོར་ལ་འཕངས་པའང་ཡིན་ཏེ། སྒོམ་ལམ་གྱིས་ཐོབ་པའི་རྣམ་དག་གི་མིང་ངོ༌། །དེ་ཡང་ཇི་སྐད་དུ། འབྲས་བུ་དག་པ་གཟུགས་ལ་སོགས། དག་པ་ཉིད་དེ་གང་གི་ཕྱིར། །དེ་གཉིས་ཐ་དད་མ་ཡིན་ཅིང༌། །དཔྱད་དུ་མེད་པས་དག་པར་བརྗོད། །ཅེས་གསུངས་ཏེ་འབྲས་བུའི་དག་པ་དང༌། རང་བཞིན་གྱི་དག་པ་དབྱེ་བ་མེད་པ་དེ་ཉིད། ཇི་ལྟར་རིགས་པ་ཐོབ་པའི་དོན་ནོ། །དེ་ལྟ་བུའི་མཐོང་ལམ་དང་སྒོམ་ལམ་གྱི་ཡེ་ཤེས་རྒྱུད་ལ་སྐྱེས་པ་ན། མདོ་རྒྱས་པ་ལས་འབྱུང་བ་ལྟར་ཕན་ཡོན་སྣ་ཚོགས་པ་རྣམས་ཀྱང་འབྱུང་བ་ཡིན་ནོ། །གཞི་ཤེས་ཀྱི་རང་བཞིན་ནི་གོང་དུ་བཤད་ཟིན་ལ། ཉན་རང་གི་རྒྱུད་ཀྱི་གཞི་ཤེས་སམ་བྱང་ཆུབ་སེམས་དཔའི་རྒྱུད་ཀྱི་ཡང༌། ཐབས་མཁས་དང་མི་ལྡན་པ་དེ་ནི། ཆོས་ཀྱི་དབྱིངས་ལ་ཐག་རིང་པ་ཡིན་ཅིང༌། ཐབས་མཁས་དང་ལྡན་པ་ནི་ཉེ་བའོ། །འོན་ཀྱང་བྱང་སེམས་འཕགས་པ་ནི་ཐབས་ལ་མི་མཁས་པ་མི་སྲིད་ཅིང༌། སོ་སོ་སྐྱེ་བོའི་དེ་ནི་གཞི་ཤེས་མིན་པས། ཐེག་ཆེན་པ་ལ་ཆོས་དབྱིངས་ལ་ཐག་རིང་པའི་གཞི་ཤེས་མེད་དོ་སྙམ་ན། གཞི་ཤེས་ཀྱི་སྒྲུབ་པ་ལ་གཞི་ཤེས་སུ་བཏགས་པ་ཡིན་པས། སོ་སོ་སྐྱེ་བོ་ལ་ཡོད་དོ། །མི་མཐུན་ཕྱོགས་ཀྱི་གཞི་ཤེས་ཟེར་བ་ནི། ཐེག་པ་ཆེན་པོ་རྟོགས་པ་འགྱུར་བ་ལ་མི་མཐུན་ཕྱོགས་ཀྱི་ཁྱད་པར་ཞིག་གི་མིང་སྟེ། ཉན་རང་གི་གཞི་ཤེས་ཀྱང་དེའི་ནང་ཚན་ཡིན་མོད་ཀྱི། གཙོ་བོར་བྱང་ཆུབ་སེམས་དཔའ་རྣམས་ཉིད། གང་ཟག་གི་བདག་མེད་པ་སྒོམ་པའི་ཚེ། དངོས་པོར་འཛིན་པ་དང་སྟོང་པར་འཛིན་པ་སྐྱེ་


TNT17_Page_0730
[མ་དཔེ་གཟིགས་ན་འདིར་གནོན།]

ན་དེའི་མིང་ཡིན་ཏེ། ཇི་སྐད་དུ། གཟུགས་སོགས་ཕུང་པོ་སྟོང་ཉིད་དང༌། །དུས་གསུམ་རྟོགས་པའི་ཆོས་རྣམས་དང༌། །སྦྱིན་སོགས་བྱང་ཆུབ་ཕྱོགས་རྣམས་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་སོ། །གཉེན་པོའི་གཞི་ཤེས་ནི། བྱང་ཆུབ་སེམས་དཔའ་གང་ཟག་གི་བདག་མེད་པ་སྒོམ་པའི་ཚེ་ཡང༌། སངས་རྒྱས་ལ་མཚན་མར་འཛིན་པའི་ཡིད་བྱེད་དམ་ཆགས་པ་ཕྲ་མོས་ཀྱང་མ་གོས་པར་བྱེད་དགོས་ན། གཞན་ལ་འཛིན་ཅིང་ཆགས་པ་འགོག་པ་ལྟ་སྨོས་ཀྱང་ཅི་དགོས་པས། གང་ཟག་གི་བདག་མེད་སྒོམ་པ་དེ་ཡང༌། སེམས་ཅན་ནམ་ཕུང་པོའི་རྣམ་པ་མ་ལོག་པ་དེ་འདྲ་མ་ཡིན་པར། སྤྲོས་པ་ཐམས་ཅད་དང་བྲལ་བ་རང་བཞིན་གྱིས་འོད་གསལ་བའི་རྣམ་པ་ཅན་ནོ། །དེའི་ཕྱིར་བདག་མེད་དེས་ཟིན་པའི་སྤྱོད་པ་ཡང་འཁོར་གསུམ་མི་དམིགས་པ་ལ་རང་གནས་ཤིང་གཞན་ཡང་འགོད་པའོ། །དེ་ལྟར་ཡང༌། སྦྱིན་ལ་སོགས་པ་ངར་འཛིན་མེད། །གཞན་དག་དེ་ལ་འཇུག་པ་དང༌། །དེ་ནི་ཆགས་པའི་མཐའ་འགོག་པས། །རྒྱལ་ལ་སོགས་ལ་ཆགས་པ་ཕྲ། །ཆོས་ཀྱི་ལམ་ནི་རང་བཞིན་གྱིས། །དབེན་པའི་ཕྱིར་ན་དེ་ཟབ་ཉིད། །ཆོས་རྣམས་རང་བཞིན་གཅིག་པར་ནི། །ཤེས་པས་ཆགས་པ་སྤོང་བ་ཡིན། །ཅེས་གསུངས་ཏེ། རང་བཞིན་གཅིག་པ་ནི་རང་བཞིན་འོད་གསལ་བར་གཅིག་པས་དེ་ཤེས་པའོ། །རྣམ་རྫོགས་སྦྱོར་བའི་རྣམ་པ་ཞེས་བྱ་བ་ནི། ཆོས་ཉིད་དོན་དམ་པ་རྣམ་པ་ཐམས་ཅད་པར་གནས་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པར་འགྲོ་རྒྱུ་རྣམས་ནི། ཡུལ་གྱི་རྣམ་པ་སྟེ། དེང་སང་དོན་རྣམ་ཞེས་གྲགས་པ་དམིགས་ཡུལ་ཡིན་པས། རྣམ་ཀུན་དངོས་མ་ཡིན་ལ། དམིགས་ཡུལ་དེ་


TNT17_Page_0731
[མ་དཔེ་གཟིགས་ན་འདིར་གནོན།]

རྣམས་ལ་བསྒོམས་པས། མེ་ལོང་ལ་གཟུགས་བརྙན་ཤར་པ་ལྟར་རང་གི་ཤེས་པ་ཡང༌། རྣམ་པ་དེ་དག་དག་མཚུངས་པར་ཤར་བ་ནི། ཡུལ་ཅན་གྱི་རྣམ་པ་སྟེ། དེང་སང་ཤེས་རྣམ་དུ་གྲགས་པ་ཡིན་པས། དེ་ནི་རྣམ་རྫོགས་ཉིད་དང་ངོ་བོ་གཅིག་གོ །དེ་ལ་བསྟན་བཅོས་དང་མདོ་རྒྱས་པ་ལས། གཞི་ཤེས་ལ་བདེན་བཞིའི་རྣམ་པ་ཉེར་བདུན་དང༌། ལམ་ཤེས་ལ་བདེན་བཞིའི་རྣམ་པ་སོ་དྲུག་དང༌། རྣམ་མཁྱེན་ལ་སྣ་ཚོགས་པའི་རྣམ་པ་བརྒྱད་དང་བཅུ་བཤད་པ་ལས། མཁྱེན་པ་དང་པོ་གཉིས་ཀྱི་རྣམ་པ་རྣམས་བདེན་བཞིའི་རྣམ་པར་འདུས་སོ། །དེ་ཡང་བདེན་པ་བཞི་ལ་དམིགས་ནས་ཀུན་རྫོབ་སྒྱུ་མ་ཙམ་གྱི་རྒྱུ་འབྲས་རྟེན་འབྲེལ་འགག་པ་མེད་ཀྱང༌། རང་བཞིན་སྤྲོས་པ་ཐམས་ཅད་དང་བྲལ་བས་ཁྱད་པར་དུ་བྱས་པ་ཉིད་ལས་ང་བདག་མ་དམིགས་པ་ནི། གཞི་ཤེས་ཀྱི་རྣམ་པ་དང༌། བདེན་བཞིས་བསྡུས་པའི་ཀུན་རྫོབ་ཀྱི་ཆོས་ཐམས་ཅད་རྟེན་འབྲེལ་སྒྱུ་མ་ལྟ་བུ་ལ། དོན་དམ་པར་ཅི་ཡང་མ་ཡིན་པ་ནམ་མཁའ་ལྟ་བུ་སྟེ་སྤྲོས་བྲལ་དང༌། རང་གི་ཉམས་སུ་སྟར་བའི་དགེ་ཆོས་ཐམས་ཅད་ཀྱང༌། སྤྲོས་པ་དང་བྲལ་བའི་རང་བཞིན་ཉིད་དུ་གནས་པ་ནི། ལམ་ཤེས་ཀྱི་རྣམ་པ་དང༌། དོན་དམ་པའི་དབྱིངས་དེ་ནི་ནམ་མཁའ་ལྟར་སྤྲོས་པ་ཐམས་ཅད་དང་བྲལ་ཞིང༌། སྤྲོས་བྲལ་དེ་ཉིད་རྣམ་པ་ཐམས་ཅད་པར་གདོད་ནས་ཤར་བ་དང༌། ཁྱད་པར་དུ་ཡང་བྱང་ཕྱོགས་དང་ཕར་ཕྱྀན་དང་སྟོབས་བཅུ་སོགས་དགེ་ཆོས་ཐམས་ཅད་ཀྱི་རྣམ་པར་གནས་པ་ནི་རྣམ་མཁྱེན་གྱི་རྣམ་པ་ཡིན་ནོ། །རྣམ་པ་དེ་ལྟ་བུ་ཚང་བར་བྱས་ནས་ཇི་ལྟར་སྒོམ་པའི་ཚུལ་ནི། སྦྱོར་བ་སྟེ་


TNT17_Page_0732
[མ་དཔེ་གཟིགས་ན་འདིར་གནོན།]

དེ་ཡང་མི་གནས་པའི་སྦྱོར་བ་ཞེས་བྱ་ལ། དངོས་པོ་དང་མཚན་མ་དང་དམིགས་པ་གང་ལ་ཡང་མི་གནས་པའི་ཕྱིར་རོ། །དེས་ན་ཆོས་གང་དག་སྐྱེས་པ་དང༌། བྱུང་བ་དང༌། འབྱུང་བ་དང༌། གནས་པ་དང༌། འཕེལ་བ་དང་ཡོད་པ་སོགས་སུ་མི་འཛིན་ཅིང༌། དེ་དག་ལ་སེམས་མི་གནས་ལ། འགགས་པ་དང༌། མི་འབྱུང་བ་དང༌། མ་བྱུང་བ་དང༌། མ་ཕྲད་པ་དང༌། མ་ཚོགགས་པ་དང༌། འགྲིབས་པ་དང༌། མེད་པ་སོགས་ལ་ཡང་སེམས་མི་གནས་ཏེ། གང་ལ་ཡང་མི་གནས། གར་ཡང་མི་འགྲོ། ཅི་ལ་ཡང་མི་འགོག གང་དུ་ཡང་མི་འགྱུར་བའི་ཚུལ་གྱིས་མཉམ་པར་འཇོག་པ་ཉིད་ཡིན་ཏེ། རྩོལ་བ་མེད་པའི་ཕྱིར་ཁྱད་ཆོས་མི་སྦྱོར་བའི་སྦྱོར་བ་སོགས་ཀྱང་དེ་ལ་ཚང་བ་ཡིན་པས། སྦྱོར་བ་ནི་ཉི་ཤུའམ་ལྔ་ལ་སོགས་པར་གྲགས་ཀྱང་གཅིག་ཁོ་ན་ཡིན་ནོ། །དེ་ལྟར་ཡང་གཟུགས་ལ་སོགས་ལ་མི་གནས་ཕྱིར། དེ་ལ་སྦྱོར་བ་བཀག་པའི་ཕྱིར། ཞེས་སོ། །མདོ་འདི་ལས་དངོས་སུ་མི་གནས་པའི་སྦྱོར་བ་ཁོ་ན་བསྟན་ཏོ། །རྩེ་མོའི་སྦྱོར་བ་དངོས་ནི། མཐོང་སྒོམ་བར་ཆད་མེད་རྩེ་གསུམ་པོ་ཡིན་ན། དེ་རྣམས་ཀྱང་ཤཻས་རབ་ཀྱི་ཕ་རོལ་ཏུ་ཕྱིན་པའི་རྣམ་པ་ཁོ་ནར་གཅིག་པས། དམིགས་རྣམ་མི་འདྲ་བའི་ཚུལ་དུ་མེད་མོད། འོན་ཀྱང༌། སྤང་བྱ་སྤོང་ཚུལ་དང་ཡོན་ཏན་མངོན་པར་སྒྲུབ་པའི་ཁྱད་པར་ནི་ཤིན་ཏུ་ཆེ་ལ། དེ་ལ་སྤང་བྱ་གཟུང་འཛིན་གྱི་རྟོགས་པ་བཞི་ནི། གཟུང་བྱའི་སྣང་བ་ལ་བརྟཻན་ནས་ཀུན་ནས་ཉོན་མོངས་ཀྱི་རྣམ་རྟོག་སྐྱེ་བ་འདོད་ཆགས་ཞེ་སྡང་ལ་སོགས་པ་དང༌། དེ་དག་གི་གནས་ངན་ལེན་ལ་བརྟཻན་པའི་རྣམ་རྟོག་ནི་གཞི་ཀུན་


TNT17_Page_0733
[མ་དཔེ་གཟིགས་ན་འདིར་གནོན།]

ནས་ཉོན་མོངས་ཀྱི་རྣམ་རྟོག་གམ་གཟུང་རྟོག་སྟེ་དང་པོའོ། །གཟུང་བའི་སྣང་བ་ལ་བརྟེན་ནས་སྐྱེས་པའི་དད་པ་ལ་སོགས་པ་དགེ་ཆོས་ཀྱི་རྣམ་པར་རྟོག་པ་དངོས་པོར་མངོན་པར་ཞེན་པའི་མཚན་ཉིད་དུ་འདུག་པ་དེ་ནི། གཉེན་པོ་གཟུང་རྟོག་ཅེས་བྱ་བ་ཡིན་ནོ། །ཕྱི་རོལ་གཟུང་བའི་སྣང་བ་ལ་མངོས་སུ་མ་དམིགས་ཀྱང༌། སེམས་ཀྱི་རྒྱུད་ཙམ་ལ་དམིགས་ནས། བདག་གམ་ཆོས་རྫས་ཡོད་དུ་འཛིན་པ་ནི། རྫས་འཛིན་རྟོག་པ་ཞེས་བྱ་ལ། སེམས་ཀྱི་རྒྱུད་ལ་དམིགས་ནས། གང་ཟག་གམ་ཆོས་བཏགས་ཡོད་ཙམ་དུ་འཛིན་པ་ནི། བཏགས་འཛིན་རྟོག་པ་ཞེས་བྱའོ། །རྣམ་རྟོག་དེ་དག་ལས་མངོན་འགྱུར་བ་ནི་སྦྱོར་ལམ་བཞིས་རིམ་གྱིས་སྤོང་བ་ཡིན་ལ། དེ་རྣམས་ཀྱི་ནང་ནས་ཆོས་ཉིད་ཀྱི་ངོ་བོ་ཙམ་མཐོང་བ་ལ་སྒྲིབ་པ་མཐོང་བས་སྤང་བར་བྱ་བ་གང་ཡིན་པ་དེ་དག་ནི་མཐོང་ལམ་རྩེ་སྦྱོར་གྱིས་ས་བོན་དྲུང་འབྱིན་པར་བྱེད་ཅིང༌། ཆོས་ཉིད་ཀྱི་ཁྱད་པར་མཐོང་བ་ལ་བར་དུ་གཅོད་པར་བྱེད་པ་སྒོམ་སྤངས་སུ་གཏོགས་པ་གང་ཡིན་པ་དེ་ནི་སྒོམ་ལམ་རྩེ་སྦྱོར་རིམ་ཅན་དུ་བྱུང་བ་རྣམས་ཀྱིས་རིམ་གྱིས་སྤོང་བར་བྱེད་དེ། སྒོམ་སྤང་གི་ནང་ཚན་གཞི་ཀུན་ནས་ཉོན་མོངས་ཀྱི་རྣམ་རྟོག་ཅེས་བྱ་བ་རྣམས་ནི། བག་ལ་ཉལ་གྱི་ཉོན་སྒྲིབ་ལ་བརྟེན་ནས་གནས་པའི་རྣམ་རྟོག་ཡིན་ཅིང༌། ས་བརྒྱད་པ་ཡན་ཅད་ལ་ནི་དེ་དག་ཀྱང་མཚན་མ་མེད་པའི་རྣམ་རྟོག་ཁོ་ནར་ཤེས་པར་བྱའོ། །སྤང་བྱ་རྣམ་རྟོག་རང་གི་ཡུལ་སྣང་བ་དང་བཅས་པ་ནི། གདོད་མ་ནས་མ་གྲུབ་ཅིང༌། མེད་བཞིན་དུ་སྣང་པ་ཡིན་པ་ལ་དེ་ལྟར་རྟོགས་པ་ནི་སྤངས་པའི་དོན་ཡིན་ཏེ། དེ་སྐད་དུ། འགོག་པ་མེད་


TNT17_Page_0734
[མ་དཔེ་གཟིགས་ན་འདིར་གནོན།]

པའི་རང་བཞིན་ལ། །མཐོང་ཞེས་བྱ་བའི་ལམ་གྱིས་ནི། །ཅི་ཞིག་ཉམས་ཤིང་ཅི་ཞིག་ཐོབ། །རྣམ་པར་རྟོག་རིགས་ཅི་ཞིག་ཟད། །སྐྱེ་མེད་རྣམ་པ་ཅི་ཞིག་ཐོབ། །གཞན་གྱི་ཆོས་རྣམས་ཀྱང་ཡོད་ལ། །ཤེས་བྱ་ལ་ཡང་སྟོན་པ་ཡི། །སྒྲིབ་པ་ཟད་པར་བརྗོད་པ་གང༌། །དེ་ལ་ཁོ་བོས་མཚར་དུ་བརྩིས། །འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཅེས་གསུངས་པ་ཡིན་ནོ། །མཐོང་བས་སྤང་བར་བྱ་བ་རྣམས་ནི། དུས་གཅིག་ཏུ་སྤོང་བ་ཡིན་ལ། སྒོམ་པས་སྤང་བར་བྱ་བ་རྣམས་ནི་རིམ་གྱིས་སྤོང་ཞིང་ཡོན་ཏན་ཡང་རིམ་གྱིས་གང་བར་འགྱུར་ཏེ། ཇི་སྐད་དུ། ཡམས་ནད་འདི་རྣམས་ཟད་ནས་ནི། །ཡུན་རིངས་ལོན་ནས་དབུགས་ཕྱིན་ལྟར། །རྣམ་པ་ཀུན་ཏུ་འགྲོ་བ་ཡི། །བདེ་སྒྲུབ་ཡོན་ཏན་ཕུན་ཚོགས་ཀུན། །རྒྱ་མཚོ་ཆེ་ལ་ཆུ་བོ་བཞིན། །འབྲས་བུ་མཆོག་གིས་དཔའ་བ་ཡི། །སེམས་དཔའ་ཆེན་པོ་དེ་ལ་ནི། །རྣམ་པ་ཀུན་ཏུ་བསྟེན་པར་བྱེད། །ཅེས་འབྱུང་ངོ༌། །མཐར་གྱིས་པས་མཐར་ཆགས་སུ་སྒོམ་པས་ནི། རང་རང་གི་ངོ་སྐལ་གྱི་སྤང་བྱ་ཕྱིན་ཅི་ལོག་གི་བག་ཆགས་ཕྲ་མོ་རྣམས་རིམ་གྱིས་སྦྱོང་བར་བྱེད་དོ། །སྐད་ཅིག་མ་ནི་དེ་ལྟར་བག་ཆགས་བྱང་བའི་འབྲས་བུ་ཡིན་ཏེ། སངས་རྒྱས་ཀྱི་ཡེ་ཤེས་དང་ཕལ་ཆེར་འདྲ་བ། སྐད་ཅིག་གཉིས་པར་རྫོགས་པའི་སངས་རྒྱས་ཐོབ་པར་བྱེད་པའི་ལམ། བར་ཆད་མེད་པའི་སྦྱོར་བ་དང༌། རྡོ་རྗེ་ལྟ་བུའི་ཏིང་ངེ་འཛིན་ཅེས་བྱ་བ། མ་རིག་བག་ཆགས་ཀྱི་ས་རྩ་བ་ནས་འཇོམས་པར་བྱེད་པ་དེ་ཡིན་


TNT17_Page_0735
[མ་དཔེ་གཟིགས་ན་འདིར་གནོན།]

ནོ། །འབྲས་བུ་ཆོས་སྐུའི་མངོན་པར་རྟོགས་པ་ལ། སྐུ་གསུམ་དང་འཕྲིན་ལས་ཏེ་བཞིའོ། །དེ་ལ་ངོ་བོ་ཉིད་སྐུ་ནི། ཆོས་དབྱིངས་ཤིན་ཏུ་དྲི་མ་མེད་པ་དག་པ་གཉིས་ལྡན་དེ། ལེགས་པའི་ཡོན་ཏན་གྱི་ཆོས་ཐམས་ཅད་ཀྱི་རང་བཞིན་དང༌། ངོ་བོ་དང༌། རྣམ་པར་འདུག་པའོ། །དེ་ལྟར་ཡང༌། ཐུབ་པའི་ངོ་བོ་ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་གྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཅེས་གསུངས་པ་ཏེ། ལེགས་པའི་ཡོན་ཏན་གྱི་ཆོས་དེ་དག་ཐམས་ཅད་ཀྱང༌། དོན་དམ་གདོད་མ་ཡིན་པས་རང་བཞིན་གྱི་ངོ་བོར་གནས་ཀྱི། ཀུན་རྫོབ་རྣམ་འགྱུར་གྱི་ཚུལ་གྱིས་མ་ཡིན་ནོ། །འདིར་ཟག་པ་མེད་པའི་ཆོས་ཞེས་པའི་རྒྱས་བཤད་ལ། བྱང་ཆུབ་ཕྱོགས་མཐུན་སོགས་ཟག་མེད་ཀྱི་སྡེ་ཚན་ཉེར་གཅིག་གསུངས་པ་ཡིན་པས། གཞུང་གི་གནས་སྐབས་དེ་གཉིས་ངོ་བོ་ཉིད་སྐུ་དང༌། རྟོགས་པ་ཡེ་ཤེས་ཆོས་སྐུ་ཞེས། དོན་ཚན་སོ་སོར་འབྱེད་པ་ནི་མདོ་དང་བསྟན་བཅོས་ཀྱི་དགོངས་པ་མ་ཡིན་ནོ། །ལོངས་སྤྱོད་རྫོགས་པའི་སྐུ་ནི། མཚན་དཔེ་མཐའ་ཡས་པས་ཉེ་བར་བརྒྱན་པའི་ཡེ་ཤེས་ཀྱི་སྐུ། ཆོས་ཀྱི་འཁོར་ལོ་མ་ལུས་པ་ཅིག་ཆར་བསྐོར་བ་པོ་ཡིན་ལ། སྤྲུལ་པའི་སྐུ་ནི་འཇིག་རྟེན་གྱི་ཁམས་མཐའ་ཡས་པར། སངས་རྒྱས་ཀྱི་སྤྲུལ་པ་རྒྱུན་མི་འཆད་བར་འབྱུང་བ་རྣམས་ཏེ། མཛད་པ་བཅུ་གཉིས་སྟོན་པ་སོགས་ལ་མཆོག་གི་སྤྲུལ་པའི་སྐུ་ཞེས་ཡོངས་སུ་གྲགས་སོ། འདིར་ནི་དེ་ཙམ་ཞིག་རྣམ་པར་གཞག་མོད་ཀྱི། སྐུ་གསུམ་གྱི་རང་བཞིན་ནི་སྔར་བཤད་ཟིན་པ་ལྟར་རོ། །འཕྲིན་ལས་ནི། སེམས་


TNT17_Page_0736
[མ་དཔེ་གཟིགས་ན་འདིར་གནོན།]

ཅན་ཐམས་ཅད་ལ་འཇུག་སྟེ། རང་གི་སྐལ་བ་དང་འཚམ་པར། མངོན་པར་མཐོང་བའི་བདེ་བ་དང༌། ངེས་པར་ལེགས་པའི་ཕན་པ་ལ་འགོད་ཅིང༌། མཐར་ཐུག་གི་འཕྲིན་ལས་ནི་སངས་རྒྱས་རང་ཉིད་ཀྱི་གོ་འཕང་ལ་འགོད་པའོ། །འོ་ན་མཚན་དཔེ་ལ་སོགས་པའི་ཡོན་ཏན་ནི་ལོངས་སྤྲུལ་གྱི་སྐབས་སུ་བཤད་ཅིང༌། ངོ་བོ་ཉིད་སྐུའམ་ཆོས་སྐུའི་ཡོན་ཏན་གྱི་སྐབས་སུ་མེད་པས། རང་བཞིན་གྱི་མཚན་ཉིད་ཅན་གྱི་ཡོན་ཏན་མིན་ལ། དེ་མ་ཡིན་པའི་ཕྱིར་རང་བཞིན་གྱི་གྲུབ་པའི་བདེ་གཤེགས་སྙིང་པོ་ལ། མཚན་དཔེ་ཡོད་པར་འདོད་པ་ཤིན་ཏུ་མི་འཐད་དོ་སྙམ་པ་དང༌། རྒྱུད་བླ་མ་ལས་ཀྱང༌། གཟུགས་སྐུ་ལ་མཚན་གྱི་ཡོན་ཏན་སོ་གཉིས་དང༌། ཆོས་སྐུ་ལ་སྟོབས་སོགས་སོ་གཉིས་བཤད་པས་ཀྱང་ངོ་སྙམ་ན། ཡོན་ཏན་གྱི་སྡེ་ཚན་འདི་རྣམས་ནི། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། དེ་བཞིན་དུ་སྐྱེ་བ་ལ་དབང་བ་དང༌། སོ་སོ་ཡང་དག་པ་རིག་པ་བཞི་དང༌། མི་འཇིགས་པ་བཞི་དང༌། སྐུ་དང་གསུང་གི་སྤྱོད་ལམ་བསྲུང་བ་མི་མངའ་བ་དང༌། ལྷའི་མིག་དང༌། རྣ་བ་དང༌། སྐུ་ལ་འཁྲུལ་བ་མི་མངའ་བ་དང༌། གསུང་ཅ་ཅོ་མི་མངའ་བ་ལ་སོགས་པའི་ཡོན་ཏན་དེ་དག་ཀྱང་སྐུའི་སྣང་བ་དང་གསུང་གི་སྣང་བ་མེད་ན་ཁུངས་སྟོངས་པར་འགྱུར་ལ། ཟད་པར་དང་ཟིལ་གནོན་ལ་སོགས་པ་ཡང༌། སྐུ་དང་འབྲེལ་པ་ལས་འབྱུང་གི སྐུ་དང་གསུང་གི་སྣང་བ་མེད་པའི་རིག་པ་རྣམ་པ་རྣམ་མེད་ལ་ཅི་ཞིག་འབྱུང་སྟེ། དེ་དག་གི་སྤྱོད་ཡུལ་མཐོང་བ་པོ་མེད་པའི་ཕྱིར་རོ། །སྐུའི་སྤྱོད་ལམ་བསྲུང་བ་མི་མངའ་


TNT17_Page_0737
[མ་དཔེ་གཟིགས་ན་འདིར་གནོན།]

བ་དང༌། སྐུ་ལ་འཁྲུལ་བ་མི་མངའ་བ་དེ་དག ཆོས་སྐུའི་ཡོན་ཏན་ཡིན་ཕྱིན། འཁྲུལ་བ་མེད་རྒྱུའི་སྐུ་དེ་དང༌། བསྲུང་བ་མེད་རྒྱུའི་སྐུའི་སྤྱོད་ལམ་དེ། ཞལ་ཕྱག་རྣམ་པའི་གཟུགས་བརྙན་ཅན་མཚན་དཔེ་ཅན་གྱི་སྐུ་ལ་མི་འཇོག་ན། མཚན་དཔེ་སོགས་གང་ཡང་མེད་པའི་སྐུ་གཟུགས་འཇིམ་པའི་གོང་བུ་འདྲ་བ་ཞིག་ཡོད་དམ་ཅི། ཅི་སྟེ་ཆོས་ཀྱི་སྐུ་ལ་སྐུ་ལུས་མེད་ན་ནི། དེ་ལ་འཁྲུལ་བ་ཡོད་མེད་ཀྱི་དཔྱད་གཞི་སྟོངས་ཏེ། གཞན་དུ་ན། རི་བོང་གི་རྭ་ལ་གས་ཆག་མེད་པ་ཡང་ཅིའི་ཕྱིར་ཆོས་སྐུའི་ཡོན་ཏན་དུ་མི་འཇོག སྐུ་དེ་གཟུགས་སྐུ་ཁོ་ན་ཡིན་ན་ནི། ཡོན་ཏན་དེ་དག་ཀྱང་དེ་ཉིད་ཀྱི་སྤྱོད་ལམ་ལ་སོགས་པའི་ཡོན་ཏན་ཡིན་པར་འགྱུར་གྱི་ཆོས་སྐུའི་ཅིའི་ཕྱིར་ཡིན་ཆོས་སྐུའི་ནུས་མཐུ་ལས་གྱུར་པས་སོ་སྙམ་ན་ནི། མཚན་དཔེ་ཡང་ཅིའི་ཕྱིར་ཆོས་སྐུའི་མཐུ་ལས་མ་བྱུང༌། དེས་ན་གང་དག་སངས་རྒྱས་ཅི་མེད་ཅང་མེད་དུ་འདོད་པ་དང༌། སངས་རྒྱས་བྱ་བ་ཁ་མིག་གཅིག་མེད་ཀྱི། མི་སྐྱའི་སྐབས་ཀྱི་རིག་པ་ཧོལ་ཐོམ་མེ་བ་འདི་ཀ་ཆོས་སྐུ་ཟད་མ་ཡིན་ཅིང༌། འཐབ་བརྩོད་དང་འཁྲུག་ལོང་དང༌། ཉོ་ཚོང་དང༌། ཞིང་ལས་དང༌། ཟས་གོས་དང༌། འཁྲིག་པའི་ལོངས་སྤྱོད་སོགས་དོན་དུ་གཉེར་བ། ཉོན་མོངས་དང་རྣམ་རྟོག་གི་ལང་ལོང་འདི་ཀ་ཆོས་སྐུའི་རང་འོད་ཡིན་ལ། སྦྱིན་སོགས་དང་ལྷ་སྒོམ་པ་ལ་སོགས་པ་གནས་ལུགས་ལས་གོལ་བ་ཡིན་པས་སྒོམ་དུ་མི་རུང་ངོ༌། །ཞེས་སྐད་གསངས་མཐོན་པོས་ལྟ་བ་མཐོ་མཐོ་མོར་སྒྲཽག་པ་དེ་ནི། མཚན་དཔེ་ཅན་གྱི་སྐུ་དང༌། གསུང་ཆོས་ཀྱི་སྒྲ་དབྱངས་དང༌། ཐུགས་ཤེས་བྱ་ཐམས་ཅད་


TNT17_Page_0738
[མ་དཔེ་གཟིགས་ན་འདིར་གནོན།]

རིག་པའི་ཡེ་ཤེས་དང་འཕྲྀན་ལས་བླང་དོར་གྱི་གནས་རྣམས། རྣམ་རྟོག་ཙམ་དང་བློས་བྱས་ཙམ་ཡིན་ནོ་ཞེས་མཆོག་རྣམས་གཡས་ཆུང་ངུ་ཕབ་ཅིང༌། ཉོན་མོངས་རང་ག་མ་ཡར་བསྟོད་ནས་སངས་རྒྱས་ཡིན་པར་ཐག་གཅོད་པ་སྟེ། དགེ་ཆོས་སུན་འབྱིན་ཅིང༌། མི་དགེ་བའི་ཞབས་ཏོག་བྱེད་པའི་བླ་མ་སྐྱེས་ཆེན་བྱེ་བ་ཁྲག་ཁྲིག་བྱུང་བ་འདི་རྣམས་ནི། གཞན་འཕྲུལ་བདག་པོའི་གཅན་པ་ཁོ་ནར་ངེས་སོ། །ཡང་འདི་སྐད་ཅེས། ཡོན་ཏན་དེ་དག་ནི་ཆོས་སྐུ་དངོས་མ་ཡིན་གྱི། ཆོས་སྐུའི་ནུས་པ་ལ་བརྟེན་ནས་བྱུང་བ་ཡིན་པའི་ཕྱིར་འདིར་སྨོས་སོ་ཞེས་པ་འདི་ནི་བདེན་དགོས་ཏེ། གཞན་དུ་ན་ཟད་པར་ལ་སོགས་པ་འཁྲུལ་ཤེས་ཡིན་པའི་ཕྱིར་ཆོས་སྐུ་དངོས་ཏེ་ག་ལ་ཡིན་ཅེ་ན། ཆོས་ཀྱི་སྐུའི་ཡོན་ཏན་ཀྱི་སྐུ་དང༌། གསུང་དང༌། ཞིང་ཁམས་དང༌། མཚན་དཔེ་དང༌། ཟད་པར་ཟིལ་གནོན་ལ་སོགས་པའི་ཏིང་ངེ་འཛིན་གྱི་སྤྱོད་ཡུལ་རྣམས་ཀྱང་འཁྲུལ་བ་མ་ཡིན་ཏེ་ཡང་དག་པའི་ཡེ་ཤེས་ཉག་ཅིག་གོ །གདུལ་བྱ་གཞན་སྣང་དུ། ས་ཆུ་ལ་སོགས་པ་སྟོན་པ་ཡང༌། ཀུན་རྫོབ་བདེན་པ་ལ་བལྟོས་ཏེ་ནི་འཁྲུལ་སྣང་དུ་མི་འཇོག་སྟེ། སོ་སོ་སྐྱེ་བོ་རྣམས་ཀྱི་ལས་ངན་གྱི་འབྲས་བུ་ནི་མ་འཁྲུལ་ལ། འཕགས་པ་རྣམས་ཀྱི་ཡེ་ཤེས་ཀྱི་སྤྱོད་ཡུལ་ནི་འཁྲུལ་ལོ་ཞེས་བྱ་བ་ནི། འཁྲུལ་མ་འཁྲུལ་གྱི་དབྱེ་བ་གོ་ལོག་ཏུ་གྱུར་པའི་ཕྱིར་རོ། །ཅི་སྟེ་ལས་སྣང་འདི་ཀུན་རྫོབ་ཏུ་བདེན་ན་ནི། གདུལ་བྱའི་དོན་དུ་འགྱུར་བའི་ཚེ། རི་དང་ཆུ་ལ་སོགས་པ་འགྲོ་བ་སྤྱི་མཐུན་གྱི་སྣང་ངོར་བརྟན་པར་གནས་པ་ཡང་མཐོང་བས་དེ་དག་བདེན་ཅིང་གཞན་དག་མི་བདེན་ནོ། །ཞེས་དབྱེ་བ་ཅིའི་ཕྱིར་ནུས། དེ་ལྟ་བས་ན་


TNT17_Page_0739
[མ་དཔེ་གཟིགས་ན་འདིར་གནོན།]

རྒྱལ་བ་སྲས་དང་བཅས་པ་ལ་དད་པ་མི་འདོར་བ་ཤིན་ཏུ་གལ་ཆེའོ། །ཤིན་ཏུ་སྤྲོས་པས་ཆོག་གོ །ད་ནི་མངོན་པར་རྟོགས་པའི་དོན་དེ་དག་ཉིད། ཤེས་རབ་ཀྱི་ཕ་རོལ་ཕྱིན་པའི་སྙིང་པོའི་མདོ་འདི་ཉིད་ཀྱི་ཚིག་དང་རིམ་པ་བཞིན་དུ་སྦྱར་བར་བྱའོ། །དེ་ཡང་དེ་ནས་སངས་རྒྱས་ཀྱི་མཐུས་ཞེས་པ་ནས། གང་བ་མེད་པའོ་ཞེས་པའི་བར་གྱིས་རྣམ་པ་ཐམས་ཅད་མཁྱེན་པ་ཉིད་བསྟན་པ་ཡིན་ཏེ། དྲི་བ་དྲི་ལན་ཀྱི་སྐབས་སུ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་སྤྱད་པ་སྤྱོད་པར་འདོད་པ། ཞེས་པས་སེམས་བསྐྱེད་དང༌། ཇི་ལྟར་བསླབ་པ་ཞེས་དྲིས་པ་ལ་འདི་ལྟར་རྣམ་པར་བལྟ་བར་བྱ་སྟེ། ཞེས་གདམས་པས་ནི། གདམས་ངག་བསྟན་པ་དང༌། རང་བཞིན་གྱིས་སྟོང་པར་ཡང་དག་པར་རྗེས་སུ་བལྟའོ། །ཞེས་པས་ནི་སྦྱོར་ལམ་གྱི་དམིགས་རྣམ་བསྟན་པས་ངེས་འབྱེད་ཆ་མཐུན་ནོ། །དེ་ལྟར་ཡང༌། དམིགས་པ་མི་རྟག་ལ་སོགས་པ། །བདེན་པའི་རྟེན་ཅན་དེ་ཡི་ནི། །རྣམ་པ་མངོན་ཞེན་ལ་སོགས་འགོགཅེས་གསུངས་སོ། །གཟུགས་སྟོང་པའོ་ཞེས་པ་ལ་སོགས་པས་སྒྲུབ་པའི་རྟེན་ཆོས་དབྱིངས་བསྟན་ཏོ། །དེ་ལྟ་བས་ན་ཆོས་ཐམས་ཅད་སྟོང་པ་ཉིད་དེ་སོགས་ཀྱིས་སྒྲུབ་པའི་དམིགས་པ་དང༌། མཚན་ཉིད་མེད་པ་སོགས་ཀྱིས་སྤོང་བ་ཆེན་པོ་ལ་སོགས་པ་ཆེད་དུ་བྱ་བ་ཆེན་པོ་གསུམ་བསྟན་ཏོ། །བྲི་བ་མེད་ཅིང་གང་བ་མེད་པ་ཞེས་པས། སྤང་བྱ་སྒྲིབ་པ་རང་བཞིན་གྱིས་མ་དམིགས་ཤིང༌། ཐོབ་བྱ་ལམ་དང་ཡོན་ཏན་ཐམས་ཅད་ཀྱང་སྒྱུ་མ་ལྟ་བུར་ཤེས་ནས། བྲི་གང་བསལ་བཞག་མེད་པར་རྟོགས་ཀྱང་ཚོགས་གཉིས་རླབས་པོ་ཆེ་རྒྱུན་མི་འཆད་པར་སྤྱོད་པའི་


TNT17_Page_0740
[མ་དཔེ་གཟིགས་ན་འདིར་གནོན།]

སྒྲུབ་པ་བསྟན་པ་ཡིན་ཏེ། འདིར་སྒྲུབ་པའི་ངོ་བོ་ཙམ་ཞིག་བསྟན་པས། དབྱེ་བ་གོ་ཆའི་སྒྲུབ་པ། འཇུག་པའི་སྒྲུབ་པ། ཚོགས་ཀྱི་སྒྲུབ་པ། ངེས་འབྱུང་སྒྲུབ་པའི་ཁྱད་པར་རྣམས་ཤུགས་ལ་བསྟན་པ་ཡིན་ནོ། །དེ་ལྟར་ན་རྣམ་མཁྱེན་མཚོན་བྱེད་ཀྱི་ཆོས་བཅུ་པོ་བསྟན་པས་མཚོན་བྱ་རྣམ་མཁྱེན་བསྟན་པ་ཡིན་ལ། དེར་མ་ཟད་ཟབ་མོའི་མཚན་ཉིད་རྣམ་པ་བརྒྱད་དང་ལྡན་པའི་ཤེར་ཕྱིན་བསྟན་པ་ཁོ་ནས་ཀྱང་དོན་དམ་པའི་རྣམ་མཁྱེན་ཆོས་ཀྱི་སྐུ་ཉིད་གསལ་བར་བསྟན་པ་ཡིན་ནོ། །སྟོང་པ་ཉིད་ལ་གཟུགས་མེད་ཅེས་པ་ལ་སོགས་པས་ཕུང་པོ་དང་སྐྱེ་མཆེད་དང་ཁམས་རྣམས་རང་བཞིན་མེད་པར་བསྟན་པ་འདིས་ནི། ལམ་ཤེས་ཀྱི་དམིགས་པའི་ཡུལ་གསལ་བར་བསྟན་པས། དེ་ལྟར་རྟོགས་པའི་ལམ་ཤེས་ཉིད་ངེས་པར་བསྟན་པ་ཡིན་ལ། དབྱེ་བའི་ཚིག་མི་གསལ་ཡང་མཐོང་ལམ་དང༌། སྒྲུབ་པ་སྒོམ་ལམ་གཉིས་རྣམ་དག་དང་བཅས་པ་ཤུགས་ལ་བསྟན་པ་ཡིན་ནོ། །མ་རིག་པ་མེད་སོགས་རྟེན་འབྲེལ་བཅུ་གཉིས་ལུགས་འབྱུང་ལུགས་ཟློག་བཀག་པས་ནི། དངོས་བསྟན་གཉེན་པོའི་ཕྱོགས་ཀྱི་གཞི་ཤེས་ཀྱི་དམིགས་རྣམས་གསལ་བར་བསྟན་པ་ཡིན་ལ། ཀུན་ནས་ཉོན་མོངས་ཀྱི་རྟེན་འབྲེལ་སྟོང་ཉིད་དུ་བསྟན་པའི་ཤུགས་ལ། ཉན་རང་གི་གཞི་ཤེས་ཀྱང་འཕངས་པ་ཡིན་ནོ། །དེ་བཞིན་དུ་སྡུག་བསྔལ་བ་དང་སོགས་ཀྱིས། རྣམ་རྫོགས་སྦྱོར་བའི་རྣམ་པ་རྣམས་བསྟན་ཏེ། གཞི་ཤེས་ལམ་ཤཻས་ཀྱི་རྣམ་པ་རྣམས་ནི། བདེན་བཞི་སྤྲོས་པ་དང་བྲལ་བའི་རྣམ་པར་འདུས་ལ། རྣམ་མཁྱེན་གྱི་རྣམ་པ་རྣམས་ནི་ཡེ་ཤེས་ཞེས་པར་


TNT17_Page_0741
[མ་དཔེ་གཟིགས་ན་འདིར་གནོན།]

འདུས་སོ། །ཐོབ་པ་མེད་པ་དང་མ་ཐོབ་པ་མེད་པ་ཞེས་པས་ནི། མི་གནས་པའི་སྦྱོར་བ་དངོས་སུ་བསྟན་ཅིང༌། དེའི་ཁྱད་ཆོས་མི་སྦྱོར་བའི་སྦྱོར་བ་སོགས་ཤུགས་ལ་བསྟན་ལ། ཐོབ་པ་ཞེས་པ་ཡོན་ཏན་དང་འབྲས་བུ་ཐོབ་པ་ཁོ་ན་ལ་འཆད་པ་ལྟར་ན། སློབ་པ་ཕྱིར་མི་ལྡོག་པའི་ཚོགས་ལ་སོགས་པ། དོན་ཚན་ཕྱི་མ་བཞི་ཡང་དོན་གྱིས་བསྟན་པར་འགྱུར་རོ། །ཐོབ་པ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་བརྟེན་ཅིང་གནས་ཞེས་པ་ནི། མི་གནས་པའི་སྦྱོར་བའི་རྒྱུན་ཤིན་ཏུ་གོམས་ཤིང་བྱང་བ་ལ་གནས་པའི་དོན་ཏེ། རྩེ་མོའི་སྦྱོར་བ་དངོས་ཡིན་ལ། སྒྲིབ་པ་མེད་ཅིང་སྐྲག་པ་མེད་ཅེས་པས་མཐོང་སྒོམ་གྱི་རྩེ་སྦྱོར་གྱིས། སྤང་བྱ་གཟུང་འཛིན་གྱི་རྟོག་པ་སྤོང་ཚུལ་བསྟན་ཏེ། ཆོས་ཉིད་མཐོང་བ་ལ་བསྒྲིབ་པའི་མཐོང་སྤངས་མེད་ཅིང༌། ཆོས་ཉིད་ཁོ་ན་ལ་གནས་མི་ནུས་པར་སྐྲག་པའི་སྒོམ་སྤངས་མེད་དོ་ཞེས་དངོས་སུ་བསྟན་ལ། རྩེ་སྦྱོར་གྱི་རྟགས་དང༌། ལོག་སྒྲུབ་སྤོང་བ་རྣམས་ཀྱང་ཤུགས་ལ་འཕངས་སོ། །ཕྱིན་ཅི་ལོགས་ལས་ཤིན་ཏུ་འདས་ནས་མྱ་ངན་ལས་འདས་པའི་མཐར་ཕྱིན་ཏོ། །ཞེས་པས་མཐར་གྱིས་པའི་སྦྱོར་བ་བསྟན་ཏེ། བསླབ་པ་གསུམ་ལ་ཕྱིན་ཅི་ལོག་པའི་གཉེན་པོར་ཕ་རོལ་ཏུ་ཕྱིན་པ་དྲུག་དང༌། རྟག་པ་ལ་མི་རྟག་པར་འཛིན་པ་སོགས་ལོག་ལྟ་བཞིའི་གཉེན་པོར་རྗེས་དྲན་དྲུག་དང༌། མི་རྟག་པ་ལ་རྟག་པར་འཛིན་པ་ལ་སོགས་པ་ལྟ་བ་ཕྱིན་ཅི་ལོག་གི་གཉེན་པོར་བདག་མེད་གཉིས་ཀྱི་དོན་ལ་སྒོམ་པ་དངོས་མེད་ངོ་བོ་ཉིད་ཀྱི་མཐར་གྱིས་པ་གསུངས་ཏེ། སྤྱིར་མཐར་གྱིས་པའི་རྣམ་པ་ལ་ཚད་བཟུང་དུ་མེད་དེ། སྦྱོར་བ་སྔ་མ་གཉིས་ཀྱི་རྣམ་པ་ཐམས་ཅད་


TNT17_Page_0742
[མ་དཔེ་གཟིགས་ན་འདིར་གནོན།]

ལས་འདི་རྣམ་པ་མང་མོད་ཀྱང༌། ཆོས་བཅུ་གསུམ་གྱི་གྲངས་སུ་བཅད་པ་ནི། ཕྱིན་ཅི་ལོག་གི་གཉེན་པོར་དགོངས་པའི་ཕྱིར་ཏེ། ཕྱིན་ཅི་ལོག་ལས་ཤིན་ཏུ་འདས་ཞེས་པས་མཐར་གྱིས་པ་བསྟན་ཏོ། །དུས་གསུམ་དུ་སོགས་པ་སྐད་ཅིག་མའི་སྦྱོར་བ་སྟེ་སངས་རྒྱས་ཐམས་ཅད་གང་བསྒོམ་པ་ལ་བརྟེན་ནས། དངོས་སུ་སངས་རྒྱས་ཐོབ་པ་འགྱུར་བའི་ལམ་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ནི། སྐད་ཅིག་མའི་སྦྱོར་བ་ཡིན་ཏེ། རྒྱུན་མཐའི་ཡེ་ཤེས་ཀྱི་མིང་གི་རྣམ་གྲངས་སོ། །སྔགས་ཀྱི་ཕན་ཡོན་རྣམས་ནི་ཆོས་སྐུ་མཛད་པ་དང་བཅས་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་ཞེས་པ་མདོར་བསྟན་དང༌། རིག་པ་ཆེན་པོ་ཞེས་པ་ངོ་བོ་ཉིད་སྐུ་དང༌། བླ་ན་མེད་པ་ཞེས་པ་ལོངས་སྐུ་དང༌། འཇིག་རྟེན་ཁམས་སུ་མི་མཉམ་པ་དང་མཉམ་པ་ནི་སྤྲུལ་པའི་སྐུ་སྟེ་སྐུ་གསུམ་དང༌། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པ་ནི་འཕྲིན་ལས་ཏེ་ཆོས་སྐུའི་མཛད་པའོ། །ཆོས་ཀྱི་སྐུ་འགྱུར་མེད་ཡོངས་གྲུབ་དེ་ནི། མཉམ་གཞག་ཡེ་ཤེས་འཁྲུལ་བ་དང་བྲལ་བས་ཉམས་སུ་མྱོང་བྱ་ཡིན་པའི་ཕྱིར། བདེན་པར་གྲུབ་པ་ཡིན་ལ། བརྫུན་པ་ཀུན་རྫོབ་འཁོར་བའི་ཆོས་ཐམས་ཅད་ལས་གདོད་ནས་གྲོལ་བའི་ཕྱིར། མི་རྫུན་པ་སྟེ་བརྫུན་པ་མ་ཡིན་པའི་དོན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་ཞེས་པ་ནི། འཕྲིན་ལས་ཀྱི་ཁྱད་པར་ཆོས་སྐུའི་རྒྱུ་མཐུན་པའི་རིགས་སྔགས་སོ། ཁ་ཅིག་སྔགས་དོན་ལ། ལམ་ལྔ་དང་སྦྱོར་བ་ནི་སྐབས་འདིར་ཡང་བླང་སྟེ། ག་ཏེ་ནི་སོང་པ་སྟེ་ཚོགས་ལམ། ག་ཏེ་གཉིས་པ་ནི་སྦྱོར་ལམ། པ་ར་ག་ཏེ་ནི་མཐོང་ལམ་སྟེ། པ་ར་ཞེས་པ་མཆོག་སྟེ་འཇིག་རྟེན་ལས་འདས་པའི་ཡེ་ཤེས་


TNT17_Page_0743
[མ་དཔེ་གཟིགས་ན་འདིར་གནོན།]

ཡིན་པའི་ཕྱིར་རོ། །པ་ར་སང་ག་ཏེ་ནི་དེ་བས་ཀྱང་ལྷག་པ་ཡང་དག་པར་སོང་བའི་ཡེ་ཤེས་ཏེ་སྒོམ་ལམ་མོ། །བོ་དྷི་ནི་བྱང་ཆུབ་སྟེ་འབྲས་བུ་རྫོགས་པའི་སངས་རྒྱས་ཀྱི་སའོ། །ཞེས་སྐྱེས་བུ་དམ་པ་འགའ་ཞིག་གསུང་ངོ༌། །ད་ནི་ཤེར་ཕྱིན་སྙིང་པོའི་མདོ་འདིའི་དོན་གྱི་ཉིང་ཁུ་སྒོམ་རིམ་གྱི་ལག་ལེན་ཅུང་ཟད་བརྗོད་པར་བྱ་སྟེ། དེ་ཡང་ཐུབ་པའི་བསྟན་པ་ལ་བརྟུལ་ཞུགས་ཡང་དག་པར་བླངས་ནས། ཐེག་པ་ཆེན་པོའི་སྡེ་སྣོད་ལ་ཐོས་བསམ་ཅི་རིགས་པར་བྱའོ། །ཚེ་འདིར་མང་དུ་ཐོས་པ་ཁོ་ན་མ་ལྕོགས་ན་ཡང༌། གོང་དུ་ཇི་སྐད་བསྟན་པ་ལྟར་མདོ་སྡེ་དམ་པ་འདི་ཉིད་ཀྱི། དངོས་བསྟན་ཚིག་དོན་དང་འགྲེལ་པའི་གོ་བ་རྣམས་ལེགས་པར་རྟོགས་ཤིང༌། ཐེ་ཚོམ་མེད་པ་བློ་ལ་གསལ་པོ་འབྱུང་བ་ཞིག་ངེས་པར་གལ་ཆེའོ། ཁྱད་པར་སྟོང་པ་ཉིད་ཀྱི་ལྟ་བ་དང༌། སྙིང་རྗེ་ཆེན་པོ་དང༌། བྱང་ཆུབ་སེམས་པའི་སྤྱོད་པ་རྣམས་ལ་ངེས་པ་རྙེད་པ་དང༌། ཆོས་ལ་ཡིད་ཆེས་པ་དང་དད་པ་བརྟན་པོར་གྱུར་གྱི་བར་དུ་ཡང་ཡང་བསམ་པ་གལ་ཆེ་ན། དེའི་དོན་དུ་སྐྱེས་བུ་གསུམ་གྱི་རིམ་པ་ལྟ་བུ་སྔོན་འགྲོར་བྱས་ན་ལེགས་སོ། །དེ་ནས་བྱང་ཆུབ་ཏུ་སེམས་བསྐྱེད་ཅིང༌། འགྲུབ་ན་འཇུག་སེམས་ཀྱི་སྡོམ་པ་ཡང་བླང་བར་བྱའོ། །སྤྱིར་མདོ་སྡེའི་རྒྱན་ལས་གསུངས་པ་ལྟར། དམིགས་པའི་སེམས་དྲུག་དང་ཡིད་ལ་བྱེད་པ་བཅུ་གཅིག་དང༌། སེམས་གནས་པའི་ཐབས་དགུ་ལ་སོགས་པ་དགོས་ཀྱང༌། འདིར་དོན་གྱི་སྙིང་པོ་མདོ་ཙམ་ནི་འདི་ལྟ་བུས་བསྒོམ་པར་བྱ་སྟེ། དང་པོར་གནས་ཁང་གཙང་མར། སངས་རྒྱས་ཀྱི་སྐུ་གཟུགས་དང་མདོ་སྡེ་འདིའི་གླེགས་བམ་བཞུགས་སུ་གསོལ། མཆོད་པ་ཇི་ལྟར་འོས་


TNT17_Page_0744
[མ་དཔེ་གཟིགས་ན་འདིར་གནོན།]

པ་བཤམས། ཁྲུས་ལ་སོགས་པ་གཙང་སྦྲ་དང་ལྡན་པས། ཡན་ལག་བདུན་པ་དང༌། སྐྱབས་འགྲོ་སེམས་བསྐྱེད་བྱས་ཏེ། ལུས་རྣམ་སྣང་གི་ཆོས་བདུན་དང་ལྡན་པར་བྱ། སྣ་ནས་རླུང་ལན་གསུམ་བསལ། དབུགས་རང་བབས་སུ་བཞག་སྟེ། བདག་གང་ལ་བརྟེན་ནས་སྒོམ་ཞིང་སྒྲུབ་པ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་མདོ་འདིའོ། །ཞེས་ཡིད་ལ་དྲན་ཅིང་གཞན་གང་ལ་ཡང་མ་ཡེངས་པར། འདི་ལྟར་བསམ་སྟེ། ཤཽ་ལོ་ཀ་ཉེར་ལྔའི་ཚད་ཙམ་འདི་ནི་ཤེར་ཕྱིན་སྙིང་པོའི་མདོ་ཡིན་ནོ། །བདག་ནི་འདི་ལ་བརྟེན་ནས་སངས་རྒྱས་སྒྲུབ་བོ་སྙམ་པ་དེ་ཉིད་ལན་བརྒྱ་ཙམ་དྲན་པར་བྱས་ནས། བར་དེར་དགེ་བ་བྱང་ཆུབ་ཏུ་བསྔོས་ཏེ། ཁམས་གསེང་ཞིང༌། འཆག་པ་ལ་སོགས་པ་ཇི་ལྟར་བདེ་བས་ངལ་གསོས་ལ། ཡང་སྔར་གྱི་ཚད་ཙམ་དུ་བསྒོམ་པར་བྱའོ། །དེ་ལྟར་ཐུན་བཅུ་ཙམ་བྱས་པས་ཞག་གཅིག་ལ། ཡིད་ལ་བྱེད་པ་སྟོང་ཕྲག་གཅིག་ཏུ་འགྱུར་ལ། ཐུན་གྱི་ཚད་ཉི་གྲིབ་ལ་སོགས་པ་ངེས་པ་ཅན་དུ་བྱས་ནས། གལ་ཏེ་ཁམས་དུབ་ན་ཉི་མ་གཅིག་གམ་གཉིས་སམ་གསུམ་དུ་ཐུན་ཐམས་ཅད་ནས་ཆ་ཕྲི་བའམ། ཐུན་འགའ་ཞིག་ཆ་ཕྲི་བའམ། གང་མི་བདེ་བའི་ཐུན་འཇོག་པ་ལྟ་བུ་ཇི་ལྟར་འོས་པས་ངལ་གསོ། ཐོག་མའི་ཐུན་གྱི་ཚད་ནི་རིང་ཐུང་རང་གི་བློ་དང་འཚམ་པར་སྦྱར་བས་རུང་སྟེ། དེ་ནས་ཅུང་ཟད་གོམས་ཤིང་སྒོམ་པ་ལ་སྤྲོ་བར་གྱུར་པའི་ཚེ། ཐུན་ཅུང་ཟད་ཅུང་ཟད་བསྐྱེད་ཅིང༌། ཡང་ཁམས་ལོག་ན་ཅུང་ཟད་ཅུང་ཟད་ཕྲིའོ། །དེ་ལ་ཅུང་ཟད་གོམས་པ་ན། མདོ་སྡེ་འདི་ལ་ནི་དང་པོར་གླེང་གཞི་དང༌། དེ་ནས་གླེང་བསླང་བ་དང༌། དེ་ནས་ཟབ་


TNT17_Page_0745
[མ་དཔེ་གཟིགས་ན་འདིར་གནོན།]

མོ་བརྒྱད་ཀྱི་སྟོང་ཉིད་དང༌། མཁས་པར་བྱ་བ་དྲུག་ཕན་ཡོན་དང་བཅས་པ་དང་ཡི་རང་གི་བར་དུ་ཡོད་དོ། །དོན་འདི་ནི་བདག་གི་བསྒོམ་བྱ་ཡིན་པ་སོགས་གོང་བཞིན་བསམ་སྟེ། འདི་དམིགས་པ་ཐེབ་པའི་ཕྱིར། དམིགས་ཐེངས་རེ་ལ་སྔ་མ་ལས་ཡུན་གསུམ་བཞི་ཙམ་གྱིས་རིང་བར་འཇོག་དགོས་ཏེ། ཐུན་རེའི་ནང་དུ་ལན་བཞི་བཅུ་འམ་ལྔ་བཅུ་ལ་སོགས་པ་བསྒོམ་པར་བྱའོ། །འདི་ཡང་རིང་དུ་གོམས་ནས། ཐུན་སོ་སོའི་མགོར་སྔོན་བཞིན་བསྒོམས་ཏེ། དངོས་གཞིའི་སྐབས་སུ། མདོ་འདི་ལས་བསྟན་པའི་ཟབ་མོ་བརྒྱད་དང་ལྡན་པའི་སྟོང་ཉིད་ཅེས་བྱ་བ་ནི། གཞན་ཞིག་ཡོད་པ་མ་ཡིན་པ་འདི་ལྟ་སྟེ། བདག་གཞན་སྣོད་བཅུད་ཀྱི་ཆོས་སྣ་ཚོགས་པར་སྣང་བ་འདི། རང་སེམས་འཁྲུལ་བའི་སྣང་བ་ཙམ་ལ་ཤར་བ་མ་གཏོགས་ཅུང་ཟད་ཀྱང་ངོ་བོས་མེད་པ་ཉིད་དོ། །ཞེས་ཡང་ཡང་བསམས་ཤིང༌། དེ་ལྟར་བསམ་པ་ལན་ཉེར་གཅིག་སོགས་སོང་བ་ན། ཡང་སྔར་གྱི་དམིགས་པ་གཉིས་པོ་སྔོན་དུ་འགྲོ་བའི་བར་བྱས་ནས་དེ་འདྲ་ཉེར་གཅིག་སྒོམ་པ་ལྟ་བུ་བྱའོ། །དེ་ལ་ཅུང་ཟད་གོམས་ན། མ་སྐྱེས་པ་ལ་སོགས་པའི་རྒྱུ་མཚན་གཅིག་གམ་གཉིས་སམ་མང་པོ་རང་གི་བློའི་འཁོབས་དང་བསྟུན་ནས་དྲན་པར་བྱེད་པ་ཡང་བསྣོན་ནོ། །ཡང་དེ་བཞིན་དུ་ཕུང་པོ་ཞེས་བྱ་བ་ནི་རང་གཞན་སྣོང་བཅུད་ཀྱི་སྟེང་ན་གནས་འདི་དང་འདི་དག་ཡིན་ལ། དེ་ཐམས་ཅད་ཀྱང་གདོད་མ་ནས་མ་གྲུབ་པོ་ཞེས་གཅིག་དུ་བྲལ་ལ་སོགས་པའི་རྒྱུ་མཚན་ཅུང་ཟད་དྲན་པར་བྱས་ཏེ་འདུན་པ་ཤུགས་དྲག་པོ་སྦྱངས། དེ་བཞིན་དུ་ཁམས་དང་སྐྱེ་མཆེད་དང་རྟེན་འབྲེལ་དང་བདེན་བཞི་དང༌། གནས་


TNT17_Page_0746
[མ་དཔེ་གཟིགས་ན་འདིར་གནོན།]

དང་གནས་མིན་ལ་ཡང་སྦྱོང་དགོས་ཏེ། བློ་རྒྱ་ཆེ་ན་རིམ་ཅན་དུ་སྒོམ། རྒྱ་ཆུང་ན་དེ་དག་ལས་གང་ཡང་རུང་བ་བློ་ལ་བདེ་ཞིང་གསལ་བ་ཅིག་སྒོམ་སྟེ། དེ་དག་ནི་སྔོན་འགྲོ་འཇུག་པའི་རིམ་པ་ཡིན་ནོ། །ད་ནི་དངོས་གཞི་ལ། ཡན་ལག་བདུན་པ་ནས། མདོ་དོན་བསམ་པའི་བར་ཚར་གཅིག་སོང་ནས། རང་གཞན་སྣོད་བཅུད་འཁོར་འདས་ཐམས་ཅད་ཇི་ལྟར་སྣང་བ་འདི་སྒྱུ་མ་ལྟ་བུ་ཡིན། ཡང་དག་པར་ན་ཅུང་ཟད་ཀྱང་མ་གྲུབ་བོ། །གཅིག་དུ་བྲལ་ལ་སོགས་པ་ཅུང་ཟད་གཅིག་དྲན་པར་བྱས་ནས་ངེས་ཤེས་ཀྱང་བསྐྱེད། དེ་ལྟར་རང་གཞན་སྣང་བ་ཐམས་ཅད་ཀྱི་སྟེང་དུ་བསྙམས་པའི་ཚེ། གང་ཡང་མ་གྲུབ་པ་དེ་ལ་ཆེ་རེ་མཉམ་པར་གཞག ཚུལ་དེས་བདེན་མེད་དུ་བསམ་པ་དང༌། ངེས་ཤེས་བསྐྱེད་པ་དང༌། ངང་ལ་འཇོག་པ་གསུམ་པོ་དེ་དག་ཡང་ཡང་བསྐྱར་ཏེ། བཅུ་འམ་ཉེར་གཅིག་ལ་སོགས་པ་ཇི་ལྟར་རིགས་པ་སོང་བ་ན། ཡང་མདོ་དོན་དྲན་པ་སྔོན་དུས་སོང་པས་དམིགས་པ་ཉེར་གཅིག་ལ་སོགས་པ་བྱའོ། །དེ་དག་གི་བར་བར་དུ་ཤེར་ཕྱིན་གྱི་མདོ་འདིའི་ཕན་ཡོན་དང༌། གསུང་བ་པོ་སངས་རྒྱས་ཀྱི་ཡོན་ཏན་དྲན་ནས། སངས་རྒྱས་དང་ཆོས་སྤྱི་དང༌། དགོས་སུ་འདི་ལ་མོས་གུས་དུང་ངེ་བ་རེ་བསྒོམ། སེམས་ཅན་འཁྲུལ་བ་རྣམས་ལ་སྙིང་རྗེ་ལྷག་པར་རེ་ཡང་གསལ་བཏབ། དེ་ལྟར་གནད་དུ་འགྲོ་བར་བྱུང་ན། ཞག་བདུན་བདུན་ཙམ་རེ་ནས། བསམ་མེད་དུ་མཉམ་པར་འཇོག་པ་དེ་ཅུང་ཟད་ཅུང་ཟད་རེ་ཡུན་རིང་དུ་བཏང༌། དེ་ཡང་མི་རྟོག་པའི་བློ་ངོ་ན་ཅི་ཡང་མ་ཡིན་པའི་རྣམ་པ་དེ་འཆར་གྱི་འདུག་ན་དེ་ཡུན་རིང་དུ་གཏོང་བ་ཡིན་གྱི།


TNT17_Page_0747
[མ་དཔེ་གཟིགས་ན་འདིར་གནོན།]

ཤེས་པ་མི་གསལ་བ་མུན་མུན་པར་ཡོད་ན། ཤེས་པ་བཟོ་མེད་དུ་བཞག་ཀྱང་མི་ཕན་པས། གནད་སྔ་མ་གཉིས་ལ་ཤུགས་བསྐྱེད་པ་གལ་ཆེ། དེ་དག་གི་སྐབས་སུ་སྒོམ་ཐུན་ཡུན་རྀང་པོར་ཐུབ་ན་ཐུན་འཚམས་སུ་ངལ་གསོ་ཞིང༌། ཆོས་སྤྱོད་ཀྱི་རིམ་བཅུ་མདོ་ཙམ་རེ་བྱས་པས་ཆོག་ལ། ཐུན་ཡུན་ཐུང་ངུ་ལས་མི་བྱེད་ན། ཐུན་མཚམས་ཀྱི་ཆོས་སྤྱོད་གལ་ཆེ་སྟེ། དེ་ལ་ཐུན་མཚམས་ཀྱི་སྤྱོད་པ་ནི་སྤྱིར་ཆོས་སྤྱོད་སྒོ་ཐམས་ཅད་ནས་ཡིན་ཀྱང༌། ཁྱད་པར་མདོ་སྡེ་འདི་ཉིད་ཡི་གེར་འབྲི་བ་དང༌། འདིའི་གླེག་བམ་ལ་མཆོད་པ་དང༌། གླེག་བམ་ཀློག་པ་དང༌། ཁ་དོན་དུ་བྱེད་པ་དང༌། མདོའི་དོན་འཆད་པའམ། ཉན་པའམ། བསམ་པ་ལ་སོགས་པའོ། །དེ་དག་གོམས་ནས། སེམས་གནས་པར་དགུའི་རིམ་པས་སྟོང་ཉིད་ལ་དམིགས་པའི་ཞི་གནས་དང༌། རང་སེམས་ཀྱི་ངོ་བོ་ཉིད་དང༌། ཁྱད་པར་ཡང་ཡང་བརྩལ་བས་ཆ་ཤས་ཙམ་གྱི་ལྷག་མཐོང་ལ་བརྟེན་ནས་སྟོང་པ་ཉིད་ལ་ངེས་པ་རྙེད་པར་འགྱུར་བ་སོགས་སྤྱི་དང་འདྲའོ། །དེའི་ཚེ་རང་བཞིན་གང་དུ་ཡང་མ་གྲུབ་པའི་ངང་ནས་སེམས་ཀྱི་གསལ་སྣང་དང༌། ཏིང་ངེ་འཛིན་ཀྱི་སྤྱོད་ཡུལ་ཀྱི་གཟུགས་ན་ཚོགས་འབྱུང་སྟེ། གཙོ་བོར་མི་རྟོག་པའི་སྟོབས་ལས་འབྱུང་གི དཔྱད་པའི་སྐབས་སུ་འབྱུང་བ་ནི་ཉུང་ངོ༌། །དེ་ནི་སེམས་ཀྱི་རང་བཞིན་འོད་གསལ་བ་དང༌། རང་བཞིན་རྣམ་པ་ཐམས་ཅད་པ་ཡིན་པའི་རྟགས་སུ་ངོ་སྤྲད་པར་བྱའོ། །སྒོམ་ཚུལ་གནད་ཀྱི་སྙིང་པོ་དེ་ལྟར་བཟུང་ནས། རྣལ་འབྱོར་གྱྀ་ས་བཞིའམ། ཐེག་པ་ཆེན་པོའི་ཐུན་མོང་མ་ཡིན་པའི་བསམ་གཏན་བཞིའམ། རྣལ་འབྱོར་གྱི་


TNT17_Page_0748
[མ་དཔེ་གཟིགས་ན་འདིར་གནོན།]

ས་ལྔ་ལ་སོགས་པ་ཇི་ལྟར་རིགས་པ་སྦྱར་ཏེ་བཤད་པས་རུང་ཞིང༌། དངོས་གཞིའི་སྐབས་སུ་དཔྱད་མཐར་མི་རྟོག་པར་འཇོག་པ་དང༌། ཐོག་མའི་དུས་སུ་དཔྱད་པ་བྱེད་ཅིང་ཕྱིས་མི་རྟོག་པ་ཁོ་ནར་འཇོག་པ་དང༌། ཐོག་མ་ཉིད་ནས་ཀྱང་མི་རྟོག་པ་ཉིད་ལ་འཇུག་པ་དང༌། སྔགས་ཀྱི་ཐེག་པ་དང་གོ་མཐུན་དུ་སྒྲུབ་ཚུལ་སོགས། ཐམས་ཅད་ཀྱང་གང་ཟག་སོ་སོའི་བློ་དང་བསྟུན་ན་ལེགས་པར་འགྱུར་བ་ཤ་སྟག་གོ །ཤིན་ཏུ་ཟབ་པའི་མདོ་སྡེ་འདི། །རང་བློའི་སྟོབས་དང་སྦྱར་ཏེ་བཤད། །ཧ་ཅང་མང་ན་རྟོགས་དཀར་འགྱུར། །དཀའ་འགྲེལ་ཚུལ་དུ་མདོ་ཙམ་བཀྲོལ། །དགེ་བ་འདི་ཡིས་སེམས་ཅན་ཐམས་ཅད། །སངས་རྒྱས་རྟག་པའི་གོ་འཕངས་ཐོབ་གྱུར། །དེ་སྲིད་དུ་ཡང་ལེགས་བཤད་མང་པོས། །ཕན་བདེ་ཕྱོགས་ཀུན་ཁྱབ་པར་གྱུར་ཅིག །ཅེས་བཅོམ་ལྡན་འདས་མ་ཤེས་རབ་ཀྱི་ཕརོལ་ཏུ་ཕྱིན་པའི་སྙིང་པོའི་འགྲེལ་པ། སྔོན་མེད་ལེགས་བཤད་ཅེས་བྱ་བ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་སྦྱར་བའོ། །མདོ་འདི་ལ་དྲི་མེད་བཤེས་གཉེན་གྱི་འགྲེལ་པ་རྒྱ་འགྲེལ་ཡིན་ངེས་བསྟན་པ་སྔ་དར་ལ་འགྱུར་བ་དེ་དང༌། དེ་ལ་འགྲེལ་བཤད་རྔོག་ལོ་ཆེན་པོས་མཛད་པ་དང༌། དེ་གཉིས་ཀྱི་དགོངས་འགྲེལ་ཀླགས་ཆོག་མ། ཨར་བྱང་ཆུབ་ཡེ་ཤེས་ཀྱིས་མཛད་པ་དང༌། བཅོམ་ལྡན་འདས་རིག་རལ་གྱི་ཚིག་ཉུང་ལ་དོན་བཟང་བའི་འགྲེལ་ཆུང་ཞིག་དང༌། རོང་སྟོན་ཤཱཀྱ་རྒྱལ་མཚན་གྱི་འགྲེལ་པ་དང༌། མཁས་པའི་གཙུག་རྒྱན་ཤཱཀྱ་མཆོག་ལྡན་གྱི་འགྲེལ་པ་དང༌། བསྟན་འགྱུར་དུ་ཆུག་པ་ལ། ཇོ་བོ་རྗེས་མཛད་ཟེར་བའི་འགྲེལ་པ་ལེགས་པོ་ཞིག་དང༌། ཛྙཱ་ན་མི་ཏྲིས་མཛད་ཟེར་བ་དང༌།


TNT17_Page_0749
[མ་དཔེ་གཟིགས་ན་འདིར་གནོན།]

པྲ་ཤཱསྟ་སྱ་ནས་མཛད་ཟེར་བ་དང༌། མཧཱ་ཛ་ནས་མཛད་ཟེར་བ་རྣམས་ཀྱང་སྣང་ངོ༌། །ཕྱི་མ་འདིས་གཞན་སྟོང་གི་ཚུལ་དུ་ཡང་འགྲེལ་ཞིང༌། དེ་དག་ཕལ་ཆེར་བཤད་སྒྲོས་དྲི་མེད་བཤེས་གཉེན་གྱི་འགྲེལ་ཆེན་དང་ཕྱོགས་མཐུན་རུང་ངོ༌། །གང་ལྟར་མཁས་པ་རྣམས་ཀྱི་དཔྱད་གཞིར་གྱུར་པའི་འགྲེལ་པ་དེ་དག་མཐོང་ཞིང༌། གཞན་ཡང་རྩེ་ཐང་འབུམ་རམ་པའི་ཊཱི་ཀ་སོགས་བློ་གསར་བའི་རྣམ་རྟོག་འགའ་རེ་དང༌། བལ་པོ་ཨ་སུའི་ངག་སྒྲོས་བསྟན་འགྱུར་དུ་ཆུད་པ་ཅིག་དང༌། ལྕེ་སྒོམ་ལྗོང་པས་མཛད་པ་དང༌། གཞན་ཡང་བར་སྐབས་སུ་བྱུང་བའི་ཕྱག་རྫོགས་ཞི་བྱེད་ཀྱི་ལུགས་སུ་བཀྲལ་བ་སུས་བྱས་མི་ཤེས་པ་སྣ་ཚོགས་དང༌། དངོས་གྲུབ་དཔལ་འབར་བས་རང་གི་ཡོན་ཏན་སྒྲོག་པ་ཁོ་ནར་ལྷུར་བླངས་པའི་ཊིཀ་ཆུང་སོགས་ཕྱིས་བྱུང་གི་སྟོན་སྒོམ་དུ་འདོད་པ་སྣ་ཚོགས་པས་སྦྱར་བའི་འགྲེལ་པ་ཤོབ་ཐག་ཅན་འད་འུད་མང་པོ་ཡང་སྣང་ངོ༌། །འདིར་ནི་བི་མ་ལའི་བཞེད་པ་སོགས་སུ་བཀོད་པ་མ་གཏོགས་གཞན་དེ་དག་གང་གི་ཡང་རྗེས་སུ་མ་འབྲངས་པར། རང་བློའི་སྟོབས་ཀྱིས་བཤད་པའོ། །འོ་ན་པཎྜི་ཏ་དང་ལོ་ཙཱ་བ་ཆེན་པོ་དང༌། སྡེ་སྣོད་འཛིན་པའི་དབང་ཕྱུག་རྣམས་ཀྱིས་བཤད་པ་བྱས་ཟིན་པའི་ཕྱིར། ཁྱོད་ཀྱིས་འདིར་རྣམ་བཤད་བྱེད་མི་དགོས་ལ། དེ་དག་དང་བཤད་སྒྲོས་མི་མཐུན་པར་བྱེད་པ་ཡང་འོས་པ་མ་ཡིན་ཏེ། ཆེན་པོ་དག་གི་གསུང་ལ་གྲས་བཏོད་པ་ནི་སྨྲ་ཁམ་ཧ་ཅང་ཆེས་སོ་སྙམ་ན། སྤྱིར་གཞན་ལ་ཕན་པའི་རྒྱུར་ཁོ་བོས་རྣམ་བཤད་བྱེད་དགོས་པ་མ་ཡིན་པ་དང༌། དེ་དག་བས་བདག་ཅག་བློ་གྲོས་ཀྱི་སྟོབས་མཆོག་ཏུ་གྱུར་པ་ཡང་མ་ཡིན་པ་དང༌། དེ་


TNT17_Page_0750
[མ་དཔེ་གཟིགས་ན་འདིར་གནོན།]

དག་གི་བསོད་ནམས་དང་ཡེ་ཤེས་དང༌། ཚུལ་ཁྲིམས་ཀྱི་ཚོགས་ལ། བདག་ཅག་གི་ཆར་ཡང་སྐྲུན་པ་ནུས་པ་མ་ཡིན་པ་ནི་བདེན་ནོ། །འོན་ཀྱང་རང་གི་བློ་གྲོས་གོམས་པའི་ཕྱིར་བྱེད་པ་དང༌། ཆེས་ཆེ་བ་དག་གིས་ནི་གཞུང་ཕྲ་མོ་དག་ལ་ཆེ་ཐང་དུ་མ་མཛད་པ་ཡང་སྣང་ཞིང༌། བློ་གྲོས་ཆུང་བས་ཀྱང་བསྒྲིམས་པ་ན། བློ་ཆེན་དག་གིས་མ་རྙེད་པའི་ལེགས་བཤད་ཅི་རིགས་པ་རྙེད་པ་ཡང་སྲིད་པ་ནི་ཡིན་ནོ། །དེ་དང་གི་ཡོན་ཏན་ལ་མཆོག་ཏུ་གུས་པ་དང༌། སྐུ་དྲིན་དྲན་པ་ནི་ཡོད་མོད་ཀྱང༌། དེ་དག་དེས་བཤད་པ་གང་ལ་གནོད་བྱེད་གསལ་བར་མཐོང་བ་དང༌། དེ་དག་གིས་མ་བཤད་པ་དག་ལ་ཡང་རྟགས་དང་རྒྱུ་མཚན་ཚད་མ་མཐོང་བའི་ངེས་ཤེས་སྐྱེས་པའི་ཚེ། རྐྱེན་གང་གིས་ཀྱང་ཟློག་པར་མ་ནུས་ཏེ་འདི་ཙམ་ཞིག་སྨྲ་བ་ལ་ཉེས་པ་ཅི་ཡང་མེད་དོ། །བདག་ཅག་འཕགས་པའི་བློ་ཅན་མ་ཡིན་པས་འཁྲུལ་བར་སྨྲས་སུ་ཟིན་ཀྱང་འོས་ཡིན་ཅིང༌། ཕྱོགས་འཛིན་ཙམ་གྱི་ཆགས་སྡང་མ་ཡིན་པར་ངེས་པ་ཉིད་དུ་ནོར་བར་ཤེས་ན་ནི། ཁོ་བོ་ཅག་གི་བཤད་པ་འདི་ཡང་ཅི་བདེར་སྤོངས་ཤིག་དང༌། བདག་གི་ཁྲོ་བ་དང་འཁོན་པའི་སེམས་བསྐྱེད་པར་མི་བྱེད་དོ་ཅི་སྟེ་ལུང་རིགས་གསལ་ཞིང་ངེས་པ་ཡོད་ན་ཁོ་བོས་ཀྱང་ལན་པར་བགྱིའོ། །སྟོད་ལུངས་རྒྱ་དམར་བ་ཆེན་པོའི་ཞལ་ན་རེ། མ་རབས་མཐོ་སར་ཕྱིན་པ་དག །གཞན་གྱིས་བྱས་ལ་བསྐྱོར་འབྱིན་བཞིན། །དམ་པའི་ལེགས་བཤད་སྤངས་ནས་ནི། །གཞན་དུ་རྣམ་འཇོག་མི་རིགས་མོ། །རྣམ་དག་ཡིད་ཆེས་མ་སྐྱེས་པས། །དབང་མེད་རྣམ་དཔྱོད་འདི་ལྟར་རིག །ཅེས་དང༌། རྗེ་བཙུན་དམ་པ་མཁས་རྣམས་ཀྱི། །བཞེད་དང་མི་མཐུན་


TNT17_Page_0751
[མ་དཔེ་གཟིགས་ན་འདིར་གནོན།]

མང་བཤད་ཀྱང༌། །བྲམ་ཟེ་གཙང་སྦྲ་ཀུན་སྤྱོད་བཞིན། །རྣམ་དཔྱོད་རྟོག་གེ་པ་ཡི་ཚུལ། །དེས་ན་མཁས་རྣམས་མི་མཉེས་མེད། །བླ་མ་དག་གི་དྲིན་ཡིན་མོད། །རང་གི་སྦྱང་བའི་ཁྱད་ལས་ཀྱང༌། །རྣམ་དཔྱོད་རྟོག་གེ་སེམས་ལ་ཤར། །དཀྱུས་ས་བསྟན་པའི་རྟ་བཞིན་དུ། །རྟོག་དཔྱོད་ཡུལ་ལ་ཁ་མི་ཐུབ། །གཞུང་མང་གྱུར་ཀྱང་རང་དབང་མེད། །སྐྱེ་བོ་བློ་ཡིན་ནོར་ལྡན་རྣམས། །ཕྱོགས་འཛིན་སྤངས་པའི་ཡིད་ཀྱིས་དཔྱོད། །སྐལ་ལྡན་འདི་ལ་དགའ་མཆོག་སྐྱེ། །ཞེས་གསུངས་པ་ལྟར་བདག་ཀྱང་སྨྲ་སྟེ། བླུན་པོའི་དད་པ་ཕྱོགས་གཅིག་པས། །དམ་པ་སྔ་མའི་གསུངས་རྗེས་སུ། །འབྲང་ན་ཤིན་ཏུ་བརླིང་མོད་ཀྱི། །བློ་གྲོས་ཆུང་ཡང་གནོད་བྱེད་དང༌། །སྒྲུབ་བྱེད་ཚད་མ་མཐོང་བའི་ཚེ། །སྨྲ་བ་པོ་དེ་ཆེས་བཟང་ཡང༌། །འགལ་བའི་རྗེས་སུ་འཇུག་མ་འདོད། །ཡང་སྨྲས་པ། ཞེ་སྡང་ཁྲོ་བས་སྨྲས་ན་ཡང༌། །དམ་པ་རྣམས་ནི་བཟོད་མཛད་ན། །གུས་པའི་སེམས་ནི་མ་བཏང་བས། །མི་དགྱེས་པར་ནི་ཅི་ལ་འགྱུར། །དངོས་དང་བརྒྱུད་པའི་སློབ་མ་ལ། །གང་གི་བློ་གྲོས་མཆོག་སྐྱེས་པ། །འདི་ཡང་དེ་དེའི་དྲིན་ཡིན་ཅེས། །གུས་པའི་ཚུལ་ནི་ཉམས་པ་མེད། །རྒྱལ་པོའི་རྒྱལ་པོའི་བློན་པོ་སོགས། །སྟོབས་དང་བསོད་ནམས་བློ་ཆེ་ཡང༌། །དེ་དག་རྣམས་ཀྱིས་མ་གོ་བ། །ཞིང་པ་བླུན་པོས་རིག་པའང་ཡོད། །དེ་བཞིན་བདག་གིས་འདིར་ཡང་སྟེ། །སྔོན་མེད་ལེགས་བཤད་གསར་བའི་འཕྲེང༌། །བློ་ལྡན་རྣམས་ཀྱི་མགུལ་རྒྱན་དུ། །བྱིན་པ་འདི་ལ་ཡི་རང་བྱོས། །ཞེས་པའང་སྨྲས་ཏེ་རྣམ་པར་བཤད་པ་འདི་གཅིག་པུར་མ་ཟད། བདག་ཅག་གིས་ཉེ་བར་སྦྱར་བའི་བསྟན་བཅོས་ཐམས་


TNT17_Page_0752
[མ་དཔེ་གཟིགས་ན་འདིར་གནོན།]

ཅད་ལ་གོ་དགོས་སོ། །ཡང་ཁ་ཅིག་འདི་སྐད་དུ། ཁྱེད་བརྫུན་དུ་སྨྲ་བར་མ་གྱུར་ཅིག ཆེན་པོ་རྣམས་ཀྱིས་མ་བཤད་པའི་ལེགས་བཤད་མང་དུ་སྨྲས་སོ་བྱ་བ་འདུག་ན། ཁྱེད་ཀྱི་སྨྲ་བ་འདི་རྣམས་ཀྱི་ནང་ན། སྔོན་གཞན་སུས་ཀྱང་མ་བཤད་པའི་ལེགས་བཤད་ནི་གང་ཡིན། དེ་ཡང་སྟོན་དགོས་སོ་ཞེ་ན། དེ་ལ་སྨྲས་པ། སྤྱིར་དམ་པ་སྔ་མ་དག་གིས་གཏན་ནས་མ་བཤད་པའི་ལེགས་བཤད་ཁོ་བོ་ལ་ཡོད་པ་མ་ཡིན་ཏེ། དེ་འདྲ་བ་ནི་ཡོད་ཀྱང་ངོ་མཚར་མི་ཆེའོ། །འོན་ཀྱང་ཤེར་ཕྱིན་སྙིང་པོའི་མདོ་འདིའི་སྟེང་དུ། བརྗོད་བྱའི་དོན་ཟབ་མོ་འདི་དང་འདི་ཡོད་དོ་ཞེས་སྟོན་པ་ན། མདོ་འདིའི་འགྲེལ་བྱེད་སྔར་བྱུང་དག་གིས་མ་བཤད་པ་ནི་མང་དུ་ཡོད་དོ། །དེ་ལ་ཐོག་མར་འདི་ཡིན་ཏེ། འཕགས་པ་ཀླུ་སྒྲུབ་ཀྱིས་མཛད་པའི་འཇིག་རྟེན་ལས་འདས་པར་བསྟོད་པ་ནི། ཤེར་སྙིང་གི་དོན་འགྲེལ་ཁྱད་པར་ཅན་དུ་འདུག་པ་ལ། སྔོན་ཆད་དེ་ལྟར་ཡིན་པའི་ཁ་སྐད་ཙམ་ཡང་མི་སྣང་མོད། འདིར་བསྟོད་པ་དེས་མདོ་འདིའི་དོན་ལེགས་པར་བཤད་དེ་བཀྲལ་བ་ནི་ཤེར་སྙིང་གི་འགྲེལ་པ་སྔོན་ཆད་བྱུང་བ་སུ་ལ་ཡང་མེད་ཅིང་ངོ་མཚར་སྨད་དུ་བྱུང་བའི་ལེགས་བཤད་དང་པོའོ། །བསྡུས་དོན་གྱི་གནས་སྐབས་སུ། གཟུགས་སྟོང་པའོ་ཞེས་སོགས་ཟབ་མོའི་མཚན་ཉིད་བརྒྱད་པོ་གནས་ལུགས་སྤྲོས་བྲལ་དམིགས་པའི་ཡུལ་གཏན་ལ་འབེབས་བྱེད་དུ་འཆད་པ་དང་ཟབ་མོ་བརྒྱད་པོ་སྟོང་ཉིད་གསུམ་དང་སྦྱར་ཏེ་འཆད་པ་ནི་གཉིས་པའོ། །སྟོང་པ་ཉིད་ལ་གཟུགས་མེད་ཅེས་སོགས་མཁས་པར་བྱ་བའི་དངོས་པོ་དྲུག་དང་སྦྱར་ཏེ། གནས་ལུགས་དེ་སྒོམ་པའི་ཚུལ་དང་སྦྱོར་བ་ནི་གསུམ་པའོ། །དེ་ལྟ་བས་ན་ཞེས་སོགས་དེ་


TNT17_Page_0753
[མ་དཔེ་གཟིགས་ན་འདིར་གནོན།]

ལྟར་བསྒོམས་པའི་ཕན་ཡོན་སྟོན་པ་རྣམས་ཀྱིས། ས་ལམ་གི་རིམ་པ་རྒྱུད་ལ་སྐྱེ་ཚུལ་འཆད་པ་ནི་བཞི་པའོ། །ཡང་ཤུགས་བསྟན་གྱི་དབང་དུ་བྱས་ནས། སྟོང་པ་ཉིད་ལ་གཟུགས་མེད་ཅེས་པ་ནས་ཕན་ཡོན་གྱི་བར་གྱིས། བདག་ཏུ་ལྟ་བ་རྣམ་པ་བཅུའི་གཉེན་པོར། གང་ཟག་གི་བདག་མེད་རྒྱས་པ་བསྟན་པའི་ཚུལ་དུ་འཆད་པ་ནི་ལྔ་པའོ། །མདོ་ཚིག་དུམ་བུ་བརྒྱད་དུ་བྱས་ནས། དངོས་པོ་བརྒྱད་འཆད་པར་སྦྱར་བ་ན། ཤིན་ཏུ་གསལ་ཞིང་འགྲིགས་པར་བྱུང་བ་འདི་ནི་དྲུག་པའོ། །འདི་ནི་རིགས་པ་དང་ཡང་མཐུན་ཏེ། སྤྲོས་བྲལ་གྱི་སྟོང་ཉིད་ཙམ་སྟོན་པས། མདོ་རྒྱས་པའི་སྙིང་པའི་དོན་འདུས་པའི་ཕྱིར་སྙིང་པོར་འཇོག་ན་ནི། སུམ་བརྒྱ་པ་ལ་སོགས་པ་ཡང་ཅིའི་ཕྱིར་ཤེར་ཕྱིན་གྱི་སྙིང་པོར་མི་འགྱུར། ཚིག་ཉུང་བ་ཁོ་ནས་སྙིང་པོར་འགྱུར་ན་ནི། འདི་བས་ཀྱང་ཡི་གེ་གཅིག་མ་ཉུང་བའི་ཕྱིར་དེ་ལ་སྙིང་པོ་ཐ་སྙད་ཅིའི་ཕྱིར་མི་སྦྱོར། ཤེས་རབ་ཀྱི་ཕ་རོལ་ཏུ་ཕྱིན་པའི་མངོན་རྟོགས་ལམ་རིམ་གྱི་གཙོ་བོ་དེ། དངོས་པོ་བརྒྱད་ཀྱི་རིམ་པ་འདི་ཡིན་ན། སྦས་དོན་གྱི་ཚུལ་གྱིས་དེ་འདྲ་མི་སྟོན་ན་ནི། མདོ་ཐམས་ཅད་ཀྱི་སྙིང་པོའི་སྒྲས་བརྗོད་པ་ཡང་དོན་མེད་པར་འགྱུར་རོ། །དེའི་ཕྱིར་འདི་ནི་ཤེར་ཕྱིན་གྱི་ཡན་ལག་ཙམ་གྱི་མདོ་མ་ཡིན་ཏེ། དོན་གྱི་ལུས་ཡོངས་སུ་རྫོགས་པ་ཡང་ཡིན་ལ། རྣམ་གྲངས་ཀྱི་སྤྲོས་པ་དོར་བའི་ཕྱིར་སྙིང་པོའོ། །ཡང་སེམས་བསྐྱེད་དང་གདམས་ངག་ལ་སོགས་པ་ཉམས་ལེན་སྒྲུབ་པའི་དོན་གྱི་རྣམ་གྲངས་བཅོ་བརྒྱད། ཚིག་དོན་ལ་ཤིན་ཏུ་གསལ་བར་འབྱོར་བར་བཤད་དེ། འདི་ཡང་སྔོན་མེད་པའི་ལེགས་བཤད་བདུན་པའོ། །མདོ་འདིས་སྟོང་


TNT17_Page_0754
[མ་དཔེ་གཟིགས་ན་འདིར་གནོན།]

ཉིད་བཅུ་དྲུག་གམ་བཅོ་བརྒྱད་ཚིག་ཟུར་གྱིས་གསལ་བར་ཐོན་པའི་ཚུལ་དང་སྒོམ་པ་རྣམ་གཡེང་གི་རྣམ་རྟོག་བཅུའི་གཉེན་པོར་འཆད་པ་འདི་ཡང་སྔོན་མེད་པའི་ལེགས་པར་བཤད་པ་བརྒྱད་པའོ། །འདིར་དངོས་བསྟན་དང་སྦས་དོན་གཉིས་ཀ་འཆད་པ་ལས་ཐུན་མོང་རྣམས་ཆབས་གཅིག་ཏུ་འཆད་པ་དང༌། ཐུན་མོང་མ་ཡིན་པ་རྣམས་དངོས་བསྟན་ལ་སྦས་དོན་མ་འདྲེས་ཤིང༌། དངོས་བསྟན་དང་སྦས་དོན་དམིགས་ཕྱེད་པར་འཆད་པ་འདི་ཡང་སྔོན་མེད་པའི་ལེགས་པར་བཤད་པ་སྟེ་དགུ་པའོ། །གླེང་བསླང་བའི་སྐབས་སུ། ཕུང་ལྔ་སྟོང་པར་སྒོམ་པ་ཤེར་ཕྱིན་ལ་འཇུག་པའི་ཐབས་སུ་བཤད་པས། ཤེར་ཕྱིན་དངོས་དང་སྟོང་ཀྱང་མི་གཅིག་པར་བསྒྲུབ་པ་དང༌། སྟོང་ཉིད་གཟུགས་སོགས་ཞེས་སོགས་དང༌། བྲི་གང་མེད་པའི་ཚིག་དང༌། སྟོང་ཉིད་ཁྱད་གཞིར་བྱས་ནས་འདུས་བྱས་བཀག་པ་དང༌། བདེན་པར་ཤེས་པར་བྱ་སྟེ། ཞེས་པ་སྟེ་ཁྱད་པར་གྱི་ཚིག་ལྔས། དབུ་མའི་མཐར་ཐུག་གཞན་སྟོང་དབུ་མ་ཆེན་པོའི་དོན་གསལ་བར་འཆད་པ་འདི་ནི་བཅུ་པ་ཡིན་ཏེ། དེ་རྣམས་ཀྱི་ནང་ཚན་ལས་ཕྱེ་བའི་སྔོན་མེད་ལེགས་བཤད་ཀྱི་ཁྱད་པར་ཤིན་ཏུ་མང་པོར་འགྱུར་རོ། །དེའི་ཕྱིར་འདི་ནི་དགེ་ལེགས་ཕུན་སུམ་ཚོགས་པ་རབ་ཏུ་འཕེལ་བར་བྱེད་པའོ། །ཞེས་པའང་ཀུན་དགའ་སྙིང་པོས་འཕྲོས་དོན་དུ་བརྗོད་པའོ། །དགེ་ལེགས་འཕེལ།། །།ཨོཾ་སྭ་སྟི། དོན་དམ་འོད་གསལ་ཆོས་དབྱིངས་ཡེ་ཤེས་འཁོར་འདས་ཀུན་ཁྱབ་ལས། །འཇམ་དབྱངས་གཞོན་ནུ་ཟུར་ཕུད་ལྔ་པ་བླ་མའི་ཚུལ་འཆང་བ། །ཀུན་


TNT17_Page_0755
[མ་དཔེ་གཟིགས་ན་འདིར་གནོན།]

མཁྱེན་ཏཱ་ར་ནཱ་ཐའི་རྒྱལ་བསྟན་མདོ་སྔགས་ཡོངས་ཀྱི་བདག །ལྷ་དང་བཅས་པའི་འགྲོ་བ་ཀུན་གྱི་གཙུག་གིས་རྒྱན་དུ་བཀུར། །ཉིད་ཀྱི་མདོ་འགྲེལ་སྔོན་མེད་ལེགས་བཤད་ཀྱིས། །མཐའ་བྲལ་བྱ་མས་ཀླུའི་དགོངས་དོན་འགལ་མེད་དུ། །གཞན་དྲིང་མི་འཇོག་ལུང་རིགས་ཡང་དག་གིས། །མདོ་དོན་མཐར་ཐུགས་གཞན་སྟོང་དབུ་མར་བསྒྲུབ། །བསྟན་བཅོས་ཁྱད་པ་འཕགས་འཛམ་གླིང་སྤྱི་ནོར་འདི། །གཅིག་ལས་དུ་མ་འབྱུང་བའི་འཕྲུལ་གྱི་གཞི། །ཆོས་སྦྱིན་མཛད་མེད་ཆུ་བོའི་རྒྱུལ་ལར་གྲན། །གཅིག་སྟོང་དགུ་བརྒྱ་གོ་དྲུག་ཟླ་ཚེས་ལ། །སྔོན་བསགས་ལྡན་པའི་ངག་དབང་ཚུལ་ལྡན་གྱིས། །ལྷག་བསམ་དག་པའི་ཐུགས་བསྐྱེད་ཟླ་བྲལ་མཐུས། །བསྟན་འགྲོའི་དོན་དུ་དམིགས་ནས་ཡོན་སྦྱར་ལས། །ཡིག་ཚོགས་ཟད་མེད་སྤར་གྱི་ཕྱི་མོ་བསྐྲུན། །ལགས་བྱས་འདི་མཚོན་རྒྱལ་སྲས་རབ་དཀར་མཛོད། །གཅིག་ཏུ་སྡོམས་པའི་རྣམ་དཀར་བསོད་ནམས་ཀྱིས། །བསྟན་འཛིན་ཡོངས་གྱི་སྐུ་ཚེ་འདུ་བྱེད་བརྟན། །ཆབ་གཅིག་རྒྱལ་བསྟན་རྫོགས་ལྡན་དར་ཞིང་རྒྱས། །འགྲོ་མང་བདེ་སྐྱིད་དབྱར་གྱི་ཆུ་གཏེར་བཞིན། །སྦྱིན་བདག་ཕྱི་ནང་གསང་བའི་བར་ཆད་བྲལ། བསྟན་འཛིན་སྡེ་རྒྱས་ཐུགས་མཐུན་འདུལ་ཁྲིམས་གཙང་། །སྲོས་བསམ་སྒོམ་པའི་བརྩོན་པ་ལྷོད་མེད་ཤོག །ད་ལྟའི་ལུས་བསྐྱེད་མ་རྒན་ཀ་མའི་གཙོའི། །མཁའ་ཁྱབ་མར་གྱུར་སེམས་ཅན་ཐམས་ཅད་དང་། །འཛོམ་པ་བདེ་འཛོམ་འཇིགས་ལོ་སྤུ་ལོ་དང་། །བཀྲ་ཤིས་ཕུན་ཚོགས་དང་ནི་ནོར་བུ་དཔལ། །དགྲ་བླ་བྱིས་པ་ཚེ་འདས་ཚེ་ལྡན་སོགས། །རབ་དཀར་འདིའི་མཚོན་སྐྱེ་འཕགས་


TNT17_Page_0756
[མ་དཔེ་གཟིགས་ན་འདིར་གནོན།]

བསོད་ནམས་ཀྱིས། །འཁོར་བའི་སྡིག་རྒྱུན་ཀུན་ཆད་མངོན་མཐོའི་རྟེན། །ཐོབ་ནས་མདོ་སྔགས་ནམས་རྟོགས་སྐྱེ་བར་ཤོག །རྟེན་འདི་གང་ན་བཞུགས་པའི་ས་ཕྱོགས་སུ། །དུས་འཁྲུགས་ཀུན་ཞི་ཆབ་སྲིད་བསྟན་པ་དང་། །ལོ་ཕྱུག་ཀུན་ལེགས་ཚེ་རིང་ནད་མེད་ཀྱི། །བསྐལ་བཟང་པོ་ནམ་ཡང་ཉམ་མེད་ཤོག །དེ་ལྟར་སྨོན་དོན་ཇི་བཞིན་འགྲུབ་པའི་གཉེན། །དོན་དམ་མ་ཆོ་ག་གསུན་གནས་ལུགས་ཆོས་ཀྱི་དབྱིངས། །གདོད་ནས་བཞུགས་པ་དུས་གསུམ་རྒྱལ་ཀུན་གཤིས། །ནམ་ཡང་རས་འཇོག་མེད་པར་མྱུར་མངོན་ཤོག །ཅེས་སྐྱེས་ཐོབ་ཡོན་ཏན་གྱི་ཆེ་བ་ཡོངས་སུ་རྫོགས་ཤིང་ལམ་བསླབ་པ་གསུམ་དང་། ཐོས་བསམ་སྒོམ་གསུམ་གྱི་སྤངས་རྟོགས་མཐར་ཕྱིན་པས་རང་དོན་ཚོགས་གཉིས་ཡོངས་རྫོགས་ཤིང་། གཞན་དོན་དུ་འཆད་རྩོད་རྩོམ་གསུམ་དང་དབང་ལུང་གདམས་ངག་མ་ལུས་པ་ལ་བརྟེན་ནས་མདོ་སྔགས་གཞུང་ལུགས་རབ་འབྱམས་སྨྲ་བའི་མགྲིན་པ་གཟེངས་ས་མཐོ་བ་དང་། ཁྱད་པར་མདོ་དོན་མཐར་ཐུགས་གཞན་སྟོང་དབུ་མ་ཆེན་པོའི་ལྟ་བའི་རྐད་བྱས་ཏེ། སྔགས་གསར་རྒྱུད་ཀྱི་གསང་སྔགས་བསྟན་པའི་མངའ་བདག་ཆེན་པོར་བཞགུས་ཤིང་། མཚན་བརྗོད་པར་དཀའ་བ་དོན་རྒྱ་ཆེན་པོའི་སླད་དུ་མཚན་ནས་སྨོས་ན་རྗེ་ཏཱ་ར་ནཱ་ཐའམ། ཇོ་ནང་རྗེ་བཙུན་ཀུན་དཀའ་སྙིང་པོ་ཞེས་མཚན་གྱི་སྙན་པ་སྲིད་འདིར་ལྷའི་རྔ་བོ་ཆེ་ལྟར་གྲགས་ཤིང་། མཚན་གྱི་ཟེགས་མའི་ཆ་ཤས་ཙམ་འགྲོ་ཀུན་གྱི་རྣ་བ་ལྷུང་བས་ཀྱང་། ངན་འགྲོའི་ལས་ཀྱི་དབུང་བསྙིལ་ཞིང་བདེ་སྐྱིད་མ་ལུས་སྟེར་བས། སྙིགས་དུས་སུ་ངེས་གསང་གི་རྒྱལ་བསྟན་སླར་


TNT17_Page_0757
[མ་དཔེ་གཟིགས་ན་འདིར་གནོན།]

ཡང་སྐྱོངས་བར་དགོངས་ཏེ། བསམ་བཞིན་དུ་སྐུ་སྐྱེས་གཞོན་ནུའི་ཚུལ་དུ་བྱོན་བ་གང་གིས་མཛད་པའི་ཤེས་རབ་སྙིང་པོའི་འགྲེལ་བ་སྔོན་མེད་ལེགས་བཤད་ཅེས་བྱ་བའི་ཤིང་བར་ཨར་ཡས་ཚུལ་ལྡན་གྱིས་བཞེངས་སྐབས་སུ་སྤར་བྱང་སྨོན་ཚིག་གནས་ལུགས་རྟོགས་པའི་ཉམས་མྱོང་བསྐྲུན་བྱེད་འདི་ཡང་རབ་བྱུང་བཅུ་བདུན་པའི་མེ་ཁྱིའི་ལོའམ་འཛིན་བྱེད་ཅེས་བྱ་བའི་ཧོར་ཟླ་དྲུག་པ་ཆུ་སྟོད་ཚེས་དགུ་གཟའ་ལྷག་པ་སྐར་མ་ས་ཀའི་སྐབས་རྣམ་དཀར་གང་བསགས་འབུམ་འགྱུར་དུ་འགྲོ་བའི་དུས་ཆེན་ཉིན་མཐའ་ལེགས་པ་གྲུབ་སྐབས་ཆུ་སྐྱེས་སྣ་ཚོགས་བཞད་པ་ཆུ་མཚོ་རྐང་འཐུང་རབ་ཏུ་རྒྱས་ཤིང་སྨན་སྣའི་མྱུ་གུར་དྲི་ངད་སྣ་ཚོགས་ལྡེད་པ་དང་། བྱ་ཚོགས་མཛེས་པའི་སྐད་སྙན་སྣ་ཚོགས་གསུམ་ལ་མཆོད་པའི་རྣམ་འགྱུར་ངོམ་པ་དང་། ཕྱི་ནང་གི་ཐུན་རྐྱེན་ལེགས་ཚོགས་མ་ལུས་བ་འབྱུང་བའི་སྐབས་སུ་ཁོང་གི་དུད་ཚངས་ཀྱི་བྱ་ལས་ཡུལ་སྲོལ་ལྟར་རྣམ་དཀར་དུ་གཙང་དག་བྱེད་རྗེས་སུ་རྫས་འཕྲན་ཚིག་ཙམ་ལྷག་ཡོད་པས་དེ་ལུགས་ལྟར་ཡོན་སྦྱར་བྱས་ཏེ། ཉིད་ཀྱིས་བསྐུལ་བ་ལྟར་བློ་བཟང་ཆོས་འཕེལ་བས་གཙང་ཆེན་འདུ་ཁང་ཕོ་བྲང་དམར་ལྡེང་མའི་ནང་དུ་དགེ་འདུན་པ་བརྒྱ་ཕྲག་གཅིག་དང་ལྔ་བཅུ་རྩམ་གྱིས་ཕུར་བའི་སྒྲུབ་ཆེན་འདོན་ཞོར་དུ་བྲིས་པ་དགེ་ལེགས་འཕེལ། །སརྦ་མངྒ་ལམ། བར་འདི་འཛམ་ཡང་བསམ་འགྲུབ་ནོར་བུའི་གླིང་དུ་བཞུགས། །


TNT17_Page_0758
[མ་དཔེ་གཟིགས་ན་འདིར་གནོན།]

ཤོག་སྟོང་།

ཤེར་ཕྱིན་སྙིང་གི་ཚིག་འགྲེལ།


TNT17_Page_0759
[མ་དཔེ་གཟིགས་ན་འདིར་གནོན།]

ཤེར་ཕྱིན་སྙིང་གི་ཚིག་འགྲེལ་བཞུགས།


TNT17_Page_0760
[མ་དཔེ་གཟིགས་ན་འདིར་གནོན།]

ན་མོ་བུདྡྷཱ་ཡ། ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་མདོ་དོན་ཕྱོགས་ཙམ་སྨོས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་པ་དོན་མང་པོ་ལ་འཇུག་ཀྱང༌། དངོས་དང་གཙོ་བོ་ནི། ཤེས་བྱ་ཐམས་ཅད་ཀྱི་གནས་ལུགས་གཉིས་མེད་ཀྱི་ཡེ་ཤེས་བདེ་གཤེགས་སྙིང་པོ་དེ་ཡིན་ལ། མདོ་སྡེ་འདིས་ཤེར་ཕྱིན་དེའི་རང་བཞིན་སྤྲོས་བྲལ་གྱི་མཚན་ཉིད་དང༌། འགྱུར་བ་མེད་པའི་མཚན་ཉིད་དང༌། རྣམ་པ་ཐམས་ཅད་པའི་མཚན་ཉིད་དེ། དོན་གྱི་གཙོ་བོ་གསུམ་པོ་དེ་སྟོན་ཅིང༌། ཚིག་ཤིན་ཏུ་ཉུང་ངུའི་ཕྱིར་སྙིང་པོའོ། །ཇི་ལྟར་སྟོནཞེ་ན། གཟུགས་མེད་ཅེས་པ་ལ་སོགས་པས་སྤྲོས་བྲལ་དང༌། མ་སྐྱེས་པ་ཞེས་པ་ལ་སོགས་པས་འགྱུར་མེད་དང༌། གཟུགས་སྟོང་པའོ་ཞེས་པ་ལ་སོགས་པས་རྣམ་པ་ཐམས་ཅད་པའོ། །མདོ་འདི་ལ་དོན་གསུམ་སྟེ། གླེང་


TNT17_Page_0761
[མ་དཔེ་གཟིགས་ན་འདིར་གནོན།]

བསླང་བ་དང༌། དོན་གཏན་ལ་དབབ་པ་དང༌། ཡི་རང་མངོན་པར་བསྟོད་པའོ། །དང་པོ་ལ། གླིང་གཞིའི་ཚིག་དང༌། མདོ་སྡེའི་ཆོས་འབྱུང་བའི་སྒོ་གཉིས་སོ། །དང་པོ་ནི། འདི་སྐད་སོགས་ཏེ། གནས་རྒྱལ་པོའི་ཁབ་ཀྱི་ནང་ཚན་བྱ་རྒོད་ཕུང་པོའི་རི་ལ། སྟོན་པ་བཅོམ་ལྡན་འདས་ཤཱཀྱ་ཐུབ་པ་འཁོར་དགེ་སློང་སྟེ་ཉན་ཐོས་དགྲ་བཅོམ་པའི་དགེ་འདུན་གྱི་ཚོགས་ཆེན་པོ་དང༌། ཞིང་ཁམས་སྣ་ཚོགས་ནས་འདུས་པའི་བྱང་ཆུབ་སེམས་དཔའ་འཕགས་པའི་དགེ་འདུན་རྒྱ་ཆེན་པོ་དང༌། ཐབས་ཅིག་པ་ལྷན་ཅིག་ཏུ་བཞུགས་ཤིང༌། འཁོར་ཚོགས་ཐམས་ཅད་ཆོས་འདིའི་སྣོད་དུ་གྱུར་ཅིང་རྒྱུད་སྨིན་པའི་དུས་ཅིག་ན། ཆོས་ཤེར་ཕྱིན་སྙིང་པོའི་ཚིག་འདི་སྐད་མ་ནོར་བར། བསྡུད་པ་པོ་ཕྱག་ན་རྡོ་རྗེ་བདག་གིས་ཐོས་སོ། ཞེས་གནས་


TNT17_Page_0762
[མ་དཔེ་གཟིགས་ན་འདིར་གནོན།]

དུས་ངེས་པ་དང༌། འཁོར་ཚོགས་དཔང་བོར་གཞག་པས། སྟོན་པའི་གསུང་དུ་ངེས་ཤེས་བསྐྱེད་ཅིང༌། ངོ་མཚར་བའི་དད་པ་བསྐྱེད་པའི་ཕྱིར་རོ། །གཉིས་པ་མདོ་སྡེ་ཆོས་འབྱུང་བའི་སྒོ་ནི། དེའི་ཚེ་བཅོམ་ལྡན་འདས་སོགས་སོ། །རྟོགས་པར་དཀའ་བས་ན་ཟབ་མོ་སྟེ་གནས་ལུགས་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་མངོན་སུམ་རྟོགས་པའི་ཡེ་ཤེས་ནི་སྣང་བ་སྟེ། དངོས་སུ་མཐོང་བའི་དོན་ཡིན་ལ། ཡེ་ཤེས་དེ་དང་ལྡན་པའི་མཉམ་གཞག་ནི་ཏིང་ངེ་འཛིན་ཏེ། བཅོམ་ལྡན་འདས་ཏིང་ངེ་འཛིན་དེ་ལ་རྟག་ཏུ་བཞུགས་པ་ཡིན་ཀྱང༌། དེར་འདུས་ཀྱི་གདུལ་བྱ་རྣམས་ཀྱི་སྣང་བ་ལ། ཟབ་མོ་སྣང་བའི་ཏིང་ངེ་འཛིན་དེ་ལ་གསར་དུ་མཉམ་པར་གཞག་པ་ལྟར་སྣང་ངོ༌། །ཡང་བཅོམ་ལྡན་འདས་མཉམ་པར་གཞག་མ་ཐག་པ་དེའི་ཚེ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཀྱང༌། ཤེས་རབ་ཀྱི་ཕ་རོལ་ཏུ་བྱིན་པ་ཟབ་མོ་མངོན་སུམ་དུ་རྟོགས་ཤིང་སྤྱོད་པའི་ཡེ་ཤེས། ཏིང་ངེ་འཛིན་དང་རྗེས་སུ་འབྲེལ་བའི་མཉམ་གཞག་རྣམ་པར་ལྟ་བ་སྟེ་མཁྱེན་པའི་ཡེ་ཤེས་ལ་གནས་པ་དང༌། དེ་འདྲ་བའི་ཤེར་ཕྱིན་ལ་དངོས་སུ་སྤྱོད་པའི་རྒྱུ། ཕུང་པོ་ལྔ་པོ་རང་བཞིན་གྱི་ངོ་བོས་མ་གྲུབ་ཅིང་སྟོང་པར། ཡེ་ཤེས་ཀྱིས་རྣམ་པར་བལྟ་ཞིང་སྒོམ་མོ། །ཕུང་པོ་ལྔ་པོ་རང་བཞིན་གྱི་སྟོང་པ་དེ་ཉིད། ཤེར་ཕྱིན་ཟབ་མོ་ལས་ལོགས་སུ་བསྟན་པས།


TNT17_Page_0763
[མ་དཔེ་གཟིགས་ན་འདིར་གནོན།]

ཤེར་ཕྱིན་ཟབ་མོ་ནི་རང་གི་ངོ་བོས་མི་སྟོང་པར་གྲུབ་པའི་ཕྱིར། འདི་ནི་གཞན་སྟོང་དབུ་མ་གསལ་བར་སྟོན་པའི་ཚིག་དང་པོའོ། །སྤྱན་རས་གཟིགས་ཀྱི་ཤེར་ཕྱིན་ལ་གསར་དུ་མཉམ་པར་གཞག་པའི་ཚུལ་བསྟན་མ་ཐག་པ་དེ་ནས་ཞེས་སྔ་ཕྱི་འཚམས་སྦྱོར་ཏེ། གཉིས་པ་དོན་གཏན་ལ་དབབ་པ་ལ། དྲི་ལན་གྱི་སྒོ་ནས་གཏན་ལ་ཕབ་པ་དང༌། མཐུན་འགྱུར་གྱི་སྒོ་ནས་ཐེ་ཚོམ་བསལ་བའོ། །དང་པོ་ལ་དྲིས་པ་དང༌། ལན་བསྟན་པའོ། །དང་པོ་ནི། དེ་ནས་སངས་རྒྱས་ཀྱིས་མཐུས་སོགས་ཏེ། ཤཱ་རིའི་བུ་ལ་སོགས་པ་ཉན་ཐོས་རྣམས་ཀྱི་རང་སྟོབས་ཀྱིས་ཆོས་ཟབ་མོ་འདི་འདྲི་བར་ཡང་མི་ཤེས་མོད། སངས་རྒྱས་ཀྱི་བྱིན་གྱིས་བརླབས་པའི་མཐུ་ལས། ཚེ་དང་ལྡན་པ་ཤཱ་རིའི་བུས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །ཅི་སྨྲས་ཅེ་ན་རིགས་ཀྱི་བུ་སྐྱེས་པའམ། རིགས་ཀྱི་བུ་བུད་མེད་ཡིན་ཡང་རུང་སྟེ། གང་སུ་ཡང་རུང་བ་ལ་ལ་དག་བྱང་ཆུབ་ཏུ་སེམས་བསྐྱེད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ། ཐོས་བསམ་སྒོམ་གསུམ་གྱི་སྒོ་ནས་སྤྱད་པ་སྤྱོད་པ་སྟེ། ཉམས་ལེན་བྱེད་པར་འདོད་པས། སྒོམ་ཚུལ་ཇི་ལྟར་བསླབ་པར་བྱ་དགོས་ཞེས་པའོ། །གཉིས་པ་ལན་ལ། ཤེར་ཕྱིན་ལ་སྤྱོད་ཚུལ་མདོར་བསྟན། ཤེར་ཕྱིན་གྱི་ངོ་བོ་རྒྱས་པར་བཤད། དེ་རྟོགས་པའི་ལམ་གྱི་ཕན་


TNT17_Page_0764
[མ་དཔེ་གཟིགས་ན་འདིར་གནོན།]

ཡོན་བསྟན། ལམ་དེས་རྟོགས་པའི་འབྲས་བུ་བཤད། ཕན་ཡོན་དང་བཅས་པའི་གཟུངས་སྔགས་བསྟན། དོན་བསྡུའི་ཚུལ་དུ་ཤེར་ཕྱིན་ལ་སློབ་པར་གདམས་པའོ། །དང་པོ་ནི། དེ་སྐད་སོགས་ཏེ། ཤཱ་རིའི་བུས་དེ་སྐད་ཅེས་སྨྲས་པ་དང༌། དེའི་ལན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས། ཤཱ་རིའི་བུ་ལ་འདི་སྐད་ཅེས་སྨྲས་སོ། །ཅི་སྐད་ཅེས་ཟེར་ན། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་སྤྱད་པ་སྤྱོད་པར་འདོད་པ་དེ། ཚུལ་འདི་ལྟར་རྣམ་པར་ཏེ་ཤིན་ཏུ་ལྟ་ཞིང་བསྒོམ་པར་བྱའོ། །འདིར་སྤྱད་པ་ཞེས་པ་ནི། སྤྱད་བྱ་དེ་ལས་སུ་བྱ་བའི་ཚིག་ཡིན་ལ། སྤྱོད་པ་ནི་སྤྱོད་ཚུལ་ཏེ། བྱེད་པའི་ཚིག་ཡིན་པས་སྤྱད་བྱ་ཤེར་ཕྱིན་དེ་ལ་སྤྱོད་ལུགས་ཇི་ལྟ་བུ་ཞེས་པ་སྟེ། ཉམས་སུ་བླང་བྱ་ཤེར་ཕྱིན་གང་ལ། ཉམས་སུ་ལེན་པའི་ཐབས་གང་གིས་ཚུལ་ཇི་ལྟར་ཉམས་ལེན་བྱེད་པར་འདོད་ལ་ཞེས་པའོ། །སྤྱོད་པའི་ངོ་བོ་ནི་ཆོས་སྤྱོད་བཅུ་དང་ཕར་ཕྱིན་དྲུག་ལ་སོགས་པའོ། །ཇི་ལྟར་རྣམ་པར་ལྟ་བར་བྱ་ཅེ་ན། ཕུང་པོ་ལྔ་པོ་དེ་དག་དང༌། གཞན་ཡང་ཁམས་དང་སྐྱེ་མཆེད་ལ་སོགས་པའི་དབྱེ་བའི་སྒོ་ནས་ཀྱང༌། སྣང་གྲགས་ཀྱི་ཆོས་དེ་དག་ཐམས་ཅད་རང་བཞིན་ནམ་རང་གི་ངོ་བོས་མ་གྲུབ་པའི་ཚུལ་གྱིས་མ་ནོར་བ་ཡང་དག་པའི་གནས་ལུགས་ལ། ཡུལ་ཅན་སྒོམ་པའི་ཡེ་ཤེས་ཀྱིས་


TNT17_Page_0765
[མ་དཔེ་གཟིགས་ན་འདིར་གནོན།]

ཀྱང་གནས་ལུགས་དང་རྗེས་སུ་མཐུན་པར་བལྟ་ཞིང་སྒོམ་མོ། །གཉིས་པ་ཤེར་ཕྱིན་གྱི་ངོ་བོ་རྒྱས་པར་བཤད་པ་ལ། རང་བཞིན་ཤེར་ཕྱིན་གཏན་ལ་དབབ་པ་དང༌། ལམ་ཤེར་ཕྱིན་སྒོམ་པའི་ཚུལ་ལོ། །དང་པོ་ནི། གཟུགས་སྟོང་པའོ་སོགས་ཏེ། བདེན་གཉིས་ཐུན་མོང་དུ་སྦྱར་ན། ད་ལྟ་བྱིས་པ་སོ་སོ་སྐྱེ་བོ་རྣམས་ལ་གཟུགས་ཕུང་དུ་སྣང་བའི་གནས་འདི་ན། གཟུགས་ཕུང་ནི་ཡོད་པ་མ་ཡིན་ཏེ། གཟུགས་དེ་ནི་འཁྲུལ་སྣང་ཙམ་མ་གཏོགས་རང་གི་ངོ་བོས་སྟོང་པའི་ཕྱིར་རོ། །དེས་ན་གཟུགས་ཀྱི་རང་ལྡོག་ནས་མེད་ཅིང་མ་ཡིན་པའི་སྟོང་པའོ། །གཟུགས་ཀྱི་ཤུལ་ན་སྟོང་པའི་ཆོས་ཉིད་གནས་པ་དེ་ཉིད་སྟོང་པ་ཉིད་དངོས་དེ། འདི་ནི་བདེན་ཅིང་ཡོད་པ་དང་ཡིན་པའི་སྟོང་ཉིད་དོ། །གནས་ཚུལ་ལ་ཡོད་པའི་ཆོས་ཉིད་སྟོང་པ་ཉིད་ལ་བྱས་པ་སོ་སོའི་སྐྱེ་བོ་རྣམས་ལ་གཟུགས་ཕུང་དུ་སྣང་ཡང་འཁྲུལ་སྣང་ཙམ་མ་གཏོགས་ངོ་བོས་མེད་དོ། །གཟུགས་ཁྱད་གཞིར་བྱས་ན་དེ་ལས་གཞན་དུ་ཆོས་དབྱིངས་སྟོང་ཉིད་ལོགས་སུ་གནས་པ་མ་ཡིན་ཏེ། གཟུགས་སྣང་འཆར་བའི་གནས་དེ་ཉིད་ཆོས་དབྱིངས་ཡིན་པའི་ཕྱིར་དང༌། ཁྱད་གཞི་གཟུགས་ཕུང་ཉིད་ཡོད་མ་མྱོང་བས། གཟུགས་ཕུང་གི་ཆོས་ཉིད་ལ་ཐ་དད་དུ་རང་སོ་འཛུགས་པའི་རྐྱ་མི་ཕེར་བའི་ཕྱིར་དང༌། ཆོས་ཉིད་ཀྱི་རིག་པ་དེ་ཡང་སྤྲོས་བྲལ་ཡིན་པའི་ཕྱིར། གཟུགས་དང་དོ་སྡོ་བའི་


TNT17_Page_0766
[མ་དཔེ་གཟིགས་ན་འདིར་གནོན།]

ཟླ་བོ་ཐ་དད་པའི་མཚན་ཉིད་མི་འཛིན་པའི་ཕྱིར་རོ། །ཆོས་དབྱིངས་སྟོང་པ་ཉིད་དེ་ཉིད་ཁྱད་གཞིར་བཟུང་ན། དེ་ལས་གཞན་དུ་གཟུགས་ཡོད་པ་མ་ཡིན་ཏེ། ཆོས་ཉིད་གནས་ཀྱང་གཟུགས་ཕུང་མེད་པའི་ཕྱིར་དང༌། རྒྱུ་མཚན་སྔ་མ་རྣམས་ཀྱིས་ཡང་ཕྱིར་རོ། །དཔེར་ན་མཁྲིས་ནད་ཅན་གྱི་དུང་ལ་བལྟས་ན། གོང་བུ་དཀར་པོ་འཁྱིལ་བ་ཅན་དུ་མི་མཐོང་གི་སེར་བོ་འཁྱིལ་བ་ཅན་དུ་མཐོང་བར་འགྱུར་རོ། །མཐོང་ཡང་སེར་པོ་འཁྱིལ་བ་དེ་ནི་འཁྲུལ་སྣང་ཙམ་མ་གཏོགས་གདོད་ནས་མེད་ལ། དཀར་པོ་ནི་ཡོད་པས་ན་གང་ལ་སེར་པོ་སྣང་བ་འཆར་བ་དང་དཀར་པོ་གཉིས་གཞི་ཐ་དད་མེད་པའི་ཚུལ་གྱི་གཅིག་པ་ལ་བསམས་ནས། སེར་པོར་མཐོང་བ་དེ་ནི་གཞན་མ་ཡིན་གྱི་དུང་ངོ༌། །དུང་ནི་ཁྱོད་ཀྱིས་མཐོང་བའི་སེར་པོ་དེའོ། །ཁྱེད་ཀྱིས་མཐོང་བའི་སེར་པོ་དེ་ལས་གཞན་དུང་མེད་དོ། །དུང་ལས་གཞན་དུ་ཁྱོད་ཀྱིས་མཐོང་བའི་སེར་པོ་དེ་གྲུབ་པ་མ་ཡིན་ནོ། །ཞེས་བརྗོད་པ་ལྟ་བུ་ཡིན་ཏེ། དོན་ལ་ཤིན་ཏུ་འབྱོར་རོ། །རང་སྟོང་སྨྲ་བ་རྣམས་ཀྱི་ལྟར་ན་ནི། སྟོང་པ་ལ་དོན་དམ་གྱིས་ཁྱབ་པར་འདོད་པས། གཟུགས་ཕུང་དོན་དམ་བདེན་པར་ཐལ་བར་འགྱུར་ལ། སྟོང་པ་ཉིད་གཟུགས་མ་ཡིན་གཟུགས་ལས་གཞན་པ་ཡང་མ་ཡིན་ཞེས་བརྗོད་པར་འཐད་ཀྱི། གཟུགས་སྟོང་པའོ། །སྟོང་པ་ཉིད་གཟུགས་སོ་ཞེས་པ་འདི་མི་རུང་ངོ༌། །དེ་ལྟར་ན་འདི་ནི་གཞན་སྟོང་དབུ་མ་ཆེན་པོ་


TNT17_Page_0767
[མ་དཔེ་གཟིགས་ན་འདིར་གནོན།]

གསལ་བར་སྟོན་པའི་ཚིག་གཉིས་པའོ། །འདི་ལྟར་འཆད་པ་ནི་མདོ་འདིའི་དངོས་བསྟན་དགག་ཚིག་ཏུ་གསལ་བ་ལྟར་བསྟན་པ་ཡིན་ལ། སྦས་དོན་ལྟར་བཤད་ན་སྒྲུབ་ཚིག་ཁོ་ན་ཏེ། ཆོས་ཉིད་དོན་དམ་པའི་གཟུགས་གང་ཡིན་པ་དེ་ནི་སྟོང་པ་ཉིད་ཀྱི་ཡེ་ཤེས་སོ་སྟོང་པ་ཉིད་ཀྱི་ཡེ་ཤེས་གང་ཡིན་པ་དེ་ཆོས་ཉིད་ཀྱི་གཟུགས་སུ་སྣང་ངོ༌། །ཞེས་བསྟན་པས། དེ་གཉིས་གཞི་མཐུན་པ་ཡོད་པ་ཙམ་དུ་གོ་ཡང༌། སྟོང་པའི་ཡེ་ཤེས་དོན་དམ་གྱི་གཟུགས་མ་ཡིན་པ་ཡང་སྲིད། དོན་དམ་གྱི་གཟུགས་སྟོང་པའི་ཡེ་ཤེས་མ་ཡིན་པ་ཡང་སྲིད་སྙམ་པའི་དོགས་པ་དགག་པའི་ཕྱིར། གཟུགས་ལས་ཀྱང་སོགས་སོ། །དེ་ལ་སྐབས་འདིར་སྟོང་པ་ཞེས་པ་སྟོང་རྐྱང་མ་ཡིན་ཏེ་གཉིས་སྟོང་གི་ཡེ་ཤེས་སོ། །དོན་དམ་པའི་གཟུགས་ཕུང་ནི་གཟུགས་ཕུང་མ་ཡིན་མོད། ཆོས་དབྱིངས་རྣམ་པ་ཐམས་ཅད་པའི་ནང་གི་གཟུགས་ཕུང་གི་རྣམ་པ་དོན་དམ་པ་དེ་ནི། ཆོས་ཉིད་ཀྱི་གཟུགས་ཕུང་ངམ། དོན་དམ་གྱི་གཟུགས་ཕུང་ཞེས་བྱའོ། །དེའི་འོག་མ་རྣམས་ལ་ཡང་རིགས་འགྲེ་སྟེ། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་རྣམས་སྟོང་པའོ། །སྟོང་པ་ཉིད་ཚོར་བ་ནས་རྣམ་པར་ཤེས་པའི་བར་རོ། །ཚོར་བ་ནས་རྣམ་པར་ཤེས་པའི་བར་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་ཚོར་བ་ནས་རྣམ་པར་ཤེས་པའི་བར་གཞན་


TNT17_Page_0768
[མ་དཔེ་གཟིགས་ན་འདིར་གནོན།]

མ་ཡོན་ནོ། །ཞེས་སྦྱར་རོ། །དེ་ལྟ་བུའི་སྟོང་པ་ཉིད་བཤད་པའི་མཇུག་བསྡུ་བ་ནི། དེ་ལྟ་བས་ན་ཆོས་ཐམས་ཅད་སྟོང་པ་ཉིད་དེ་ཞེས་པ་སྟེ། ཇི་སྐད་དུ། ཆོས་ཀྱི་དབྱིངས་ནི་མ་གཏོགས་པ། །གང་ཕྱིར་ཆོས་མེད་དེ་ཡི་ཕྱིར། །ཞེས་རྗེ་བཙུན་གྱིས་གསུངས་པའོ། །མཚན་ཉིད་མེད་པ་ཞེས་པ་ནི། ཀུན་རྫོབ་ནི་རང་གི་ངོ་བོས་སྟོང་པའི་ཕྱིར་དེ་དང་དེའི་མཚན་ཉིད་མེད་དེ། བུམ་པ་བདེན་པར་མེད་པས་བུམ་པའི་མཚན་ཉིད་ཀྱང་བདེན་པར་མེད་པ་བཞིན་ནོ། །དོན་དམ་ནི་རང་གི་ངོ་བོས་ཡོད་ཀྱང༌། དོན་དམ་གྱི་མཚན་ཉིད་རང་བཞིན་གྱིས་མ་གྲུབ་སྟེ། མཚན་མཚོན་གཞི་གསུམ་ནི་བློས་གཞག་པ་ཙམ་ཡིན་གྱི་གནས་ལུགས་ལ་མེད་པས་སོ། །དེ་བཞིན་དུ་སྐྱེ་བ་མེད་པའི་ཕྱིར་འགག་པ་མེད་ཅེས་བྱ་སྟེ། སྐྱེ་མེད་དང་འགག་མེད་འདི་གཉིས་ལ་ཡང་སྔ་མ་དང་འདྲ་སྟེ། ཀུན་རྫོབ་ལ་ནི་སྣང་ངོ་ཙམ་དུ་སྐྱེ་འགག་གི་མཚན་ཉིད་ཡོད་ཀྱང་འཁྲུལ་སྣང་ཙམ་ཡིན་གྱི། ཀུན་རྫོབ་ཉིད་ཡེ་ནས་མེད་ན། དེ་ལ་སྐྱེ་རྒྱུ་དང་འགག་རྒྱུ་མེད་པའི་ཕྱིར་སྐྱེ་འགག་མེད་ལ། དོན་དམ་ནི་རང་གི་ངོ་བོས་སྟོང་བ་ཡོད་ཀྱང༌། དེ་ལ་སྐྱེ་འགག་ནས་གསུམ་མ་གྲུབ་པས་མ་སྐྱེས་ཤིང་མ་འགགས་པའོ། །དེ་ལྟར་ན། སྟོང་པ་ནི་འདུས་བྱས་ཀྱི་སྟོངས་པའི་དོན་ཡིན་པས། འདུས་བྱས་དང༌། མཚན་ཉིད།


TNT17_Page_0769
[མ་དཔེ་གཟིགས་ན་འདིར་གནོན།]

སྐྱེ་བ་དང༌། འགག་པ་རྣམས་ཀུན་བརྟགས་ཙམ་ཡིན་པས་མེད་པར་བསྟན་ལ། ཆོས་ཉིད་ནི་ཀུན་བརྟགས་ཀྱིས་སྟོང་པའི་དོན་ནོ། །འདུས་བྱས་ཙམ་ཀུན་བརྟགས་སུ་བྱར་མི་རུང་ངོ་སྙམ་ན། འདུས་བྱས་ཡིན་ན་ཀུན་བརྟགས་ཡིན་པས་མ་ཁྱབ་ཀྱང༌། འདུས་བྱས་ཐམས་ཅད་ལ་ཀུན་བརྟགས་ཀྱི་མཚན་ཉིད་འཇུག་པས་ཁྱབ་སྟེ། འདུས་བྱས་ཐམས་ཅད་ཀྱང་མདོར་བསྡུ་ན། ཡུལ་དང་ཡུལ་ཅན་གཉིས་སུ་ཟད་དོ། །ཡུལ་ཅན་གྱི་སྟེང་ན་ཡུལ་གཟུང་བ་ལས། ཡུལ་ཅན་ཉིད་ལོགས་སུ་ཚུགས་ཐུབ་པ་ལྟར་སྣང་བ་དེ་ནི་ཀུན་བརྟགས་ཡིན་པས་ཤེས་པ་ཐམས་ཅད་ལ་ཀུན་བརྟགས་དེ་འཇུག་ལ། ཤེས་པ་ལས་ལོགས་སུ་ཡུལ་གཟུང་བ་ཕྱི་དོན་ཡོད་པར་སྣང་ཡང༌། ཀུན་བརྟགས་ཡིན་ཞིང་དེ་ཉིད་གཟུགས་སོགས་ཡུལ་དང༌། མིག་སོགས་དབང་པོ་ཐམས་ཅད་ལ་འཇུག་པ་ཡིན་ནོ། །དེ་དག་ལས་གཞན་བརྟགས་ཡོད་ཀྱི་དངོས་པོ་དང༌། དངོས་མེད་ཐམས་ཅད་ནི་ཀུན་བརྟགས་ཡིན་པ་སྨོས་མ་དགོས་ཏེ། དེའི་ཕྱིར་འདུས་བྱས་ཐམས་ཅད་ལ་ཀུན་བརྟགས་ཀྱི་མཚན་ཉིད་འཇུག་པ་ཡིན་ནོ། །དེས་ན་གཞན་དབང་ཀུན་བརྟགས་ཀྱི་མཚན་ཉིད་ཅན་ཡིན་ཞིང༌། ཀུན་བརྟགས་ཀྱང་གཞན་དབང་གི་མཚན་ཉིད་ཅན་ནོ། །ཡོངས་གྲུབ་དངོས་ནི་དེ་ལྟར་མ་ཡིན་ཀྱང༌། ཡོངས་གྲུབ་བརྟགས་པ་བ་ཡང་དེ་དག་དང་འདྲའོ། །ད་ནི་དཀྱུས་ལ་འཇུག་པར་བྱ་སྟེ། དྲི་མ་ནི་འཁོར་


TNT17_Page_0770
[མ་དཔེ་གཟིགས་ན་འདིར་གནོན།]

བ་སྟེ། ལས་ཉོན་གྱི་དབང་གིས་སྡུག་བསྔལ་སྣ་ཚོགས་འབྱུང་བར་སྣང་བའི་དྲི་མ་འཁོར་བ་ཡང་རང་གི་ངོ་བོས་མེད་ལ། དྲི་མ་དང་བྲལ་བ་ནི་མྱ་ངན་ལས་འདས་པ་སྟེ། ལམ་བསྒོམས་པས་སྒྲིབ་པ་སྤངས་ནས་བྱང་ཆུབ་ཐོབ་པ་ཡིན་ན། ལམ་སྒོམ་པ་ཡང་བདེན་པར་མེད་ལ་སྒྲིབ་པ་རང་བཞིན་མེད་པའི་ཕྱིར། སྒྲིབ་པ་དང་བྲལ་བར་སྣང་བ་ཡང་བློའི་འཆར་ཚུལ་ཙམ་ལས་ངོ་བོས་མེད་དོ། །ཡང་དག་པའི་སངས་རྒྱས་བདེན་པར་གྲུབ་ཀྱང༌། དེ་ཐོབ་པར་སྣང་བ་ནི་བློའི་འཆར་ཚུལ་ཡིན་པས། ཀུན་རྫོབ་སྒྱུ་མ་ཙམ་མོ། །དེ་ལྟར་ན། ཀུན་ནས་ཉོན་མོངས་པ་དང༌། རྣམ་པར་བྱང་བར་བྱ་བའི་ལམ་འདི་དག་ནི། གཞན་དབང་ཡིན་ལ་དེ་ངོ་བོས་མེད་པར་བསྟན་པས། ཆོས་ཉིད་ལ་གཞན་དབང་གིས་མ་གོས་ཤིང༌། གཞན་དབང་རང་གི་ངོ་བོས་སྟོངས་པར་བསྟན་ཏོ། །དོན་དམ་དབྱིངས་དེ་ལ་འཁོར་བའི་གནས་སྐབས་ན་ཡོན་ཏན་བྲི་བ་དང༌། མྱང་འདས་ཀྱི་གནས་སྐབས་ན། སྒྲིབ་པ་སྤངས་ཤིང་བྲི་བ་ལྟར་སྣང་ཡང་འཁོར་བ་པ་དང་རྣལ་འབྱོར་པའི་བློའི་འཆར་ཚུལ་ཡིན་གྱི། གནས་ཚུལ་ལ་བྲི་བ་མེད་ཅིང༌། འཁོར་བའི་དུས་ན་སྐྱོན་གྱིས་གང་བ་དང༌། མྱང་འདས་ཀྱི་དུས་ན་ཡོན་ཏན་གྱིས་གང་བར་སྣང་བ་ཡང༌། གོང་མ་དང་འདྲ་སྟེ་བདེན་པར་མ་གྲུབ་བོ། །དེའི་རྒྱུ་མཚན་སྒྲིབ་པ་གདོད་ནས་མ་གྲུབ་པའི་ཕྱིར་དང༌། ཡོན་ཏན་གདོད་ནས་རང་ཆས་སུ་གནས་པའི་ཕྱིར་


TNT17_Page_0771
[མ་དཔེ་གཟིགས་ན་འདིར་གནོན།]

འཕེལ་འགྲིབ་ཏུ་སྣང་བ་ནི་ལོག་སྣང་ཙམ་མོ། །འདིས་ནི་དོན་དམ་ཡོངས་གྲུབ་ལ་ཀུན་རྫོབ་འཁོར་འདས་ཀྱིས་སྟོངས་པར་བསྟན་ཅིང༌། ཡོངས་གྲུབ་དོན་དམ་གྱི་ཡེ་ཤེས་དེ་འཁོར་འདས་ཀུན་ཁྱབ་ཡིན་ཡང༌། འཁོར་འདས་སོ་སོས་གོས་པ་མེད་ལ། དེ་མེད་པས་འཕོ་འགྱུར་མེད་པའི་ཕྱིར་རྟག་པར་བསྟན་ཏོ། །འདི་ནི་གཞན་སྟོང་དབུ་མ་གསལ་བར་བསྟན་པའི་ཚིག་གསུམ་པའོ། །དེ་ལྟར་ན། སྟོང་ཉིད་དང༌། མཚན་ཉིད་མེད་པ་དང༌། མ་སྐྱེས་པ་དང༌། མ་འགགས་པ་དང༌། དྲི་མ་མེད་པ་དང༌། དྲི་བྲལ་མེད་པ་དང༌། བྲི་བ་མེད་པ་དང༌། གང་བ་མེད་པ་སྡེ། ཟབ་མོ་མཚན་ཉིད་བརྒྱད་ཅེས་གྲགས་ལ། དེས་ན་རང་གཞིན་ཤེར་ཕྱིན་སྟོང་པ་ཉིད་ཀྱི་ཡེ་ཤེས་དེ། སྟོང་ཉིད་ཡིན་པ་ནས་གང་བ་མེད་པའི་བར་དུ་ཡིན་ནོ། །གཉིས་པ་ལམ་ཤེར་ཕྱིན་སྒོམ་པའི་ཚུལ་ནི། མཁས་པར་བྱ་བའི་དངོས་པོ་དྲུག་ལ་སློབ་པའི་དབང་དུ་བྱས་ནས། དང་པོ་ཕུང་པོ་ལ་མཁས་པར་བསླབ་པ་ནི། ཤཱ་རིའི་བུ་དེ་ལྟ་བས་ན་སྟོང་པ་ཉིད་ལ་གཟུགས་མེད་ཅེས་བྱ་བ་སྟེ། སྟོང་པའི་གཞི་བདེ་གཤེགས་སྙིང་པོ་དོན་དམ་པའི་སེམས་ཉིད། ཡོངས་གྲུབ་སྟོང་པ་ཉིད་ཆེན་པོ་དེ་ལ་ཆོས་ཅན་གློ་བུར་གྱི་དྲི་མ། གཟུགས་ཀྱི་ཕུང་པོ་མེད། ཚོར་བའི་ཕུང་པོ་མེད། འདུ་ཤེས་ཀྱི་ཕུང་པོ་མེད། འདུ་བྱེད་ཀྱི་ཕུང་པོ་མེད། རྣམ་པར་ཤེས་པའི་


TNT17_Page_0772
[མ་དཔེ་གཟིགས་ན་འདིར་གནོན།]

ཕུང་པོ་མེད་དོ། །དེའི་རྒྱུ་མཚན་ནི་དེ་ལྟ་བས་ན་ཞེས་པ་སྟེ། སྟོང་པ་ཉིད་ནས་གང་བ་མེད་པའི་བར་དུ་ཟབ་མོ་བརྒྱད་ཀྱི་རང་བཞིན་གྱི་ཕྱིར་རོ། །ཤཱ་རིའི་བུ་ཞེས་བྱ་བ་ནི་བོད་པའོ། །སྟོང་པ་ཉིད་ལ་ཞེས་པའི་ཚིག་འདི་ནི། མ་ཐོབ་པ་ཡང་མེད་དོ་ཞེས་པའི་བར་ཐམས་ཅད་ལ་སྦྱོར་རྒྱུ་སྟེ་ཐོག་མའི་གསལ་བྱེད་དོ། །འདི་ནི་སྟོང་ཉིད་ཀྱི་ཡེ་ཤེས་ཁྱད་གཞིར་བྱས་ནས། དེ་ལ་ཀུན་རྫོབ་ཀྱི་ཆོས་གང་ཡང་མེད་པར་སྟོན་པ་ཡིན་པས། གཞན་སྟོང་དབུ་མ་ཆེན་པོ་གསལ་བར་སྟོན་པའི་ཚིག་བཞི་པ་ཡིན་ནོ། །རང་སྟོང་སྨྲ་བར་གྲགས་པ་རྣམས་ཀྱི་ལྟར་ན། སྟོང་པ་ཉིད་ལ་གཟུགས་མེད་ཅེས་པ་མི་རུང་སྟེ། ཁྱད་གཞི་སྟོང་ཉིད་མ་གྲུབ་པའི་ཕྱིར། དེ་ལ་ཁྱད་ཆོས་གཟུགས་ལོགས་སུ་འགོག་པ་ནམ་དུ་ཡང་མི་འཐད་ལ། རང་སྟོང་པའི་སྟོང་ཉིད་བློ་ངོར་གྲུབ་ཟིན་ལ་གཟུགས་སོགས་འགོག་ན་བཀག་ཟིན་འགོག་པར་ཐལ་བའི་ཕྱིར་རོ། །དེ་རྣམས་ཀྱི་ལྟར་ན། གཟུགས་མེད་པ་ནི་སྟོངཔ་ཉིད་དོ་ཞེས། མདོ་ཚིག་བསྒྱུར་ཏེ་འདོན་དགོས་སོ། །གཉིས་པ་སྐྱེ་མཆེད་ལ་བསླབ་པ་ནི། སྟོང་ཉིད་ཀྱི་ཡེ་ཤེས་དེ་ལ། མིག་གི་སྐྱེ་མཆེད་མེད། དེ་བཞིན་དུ་སྦྱར་ཏེ། རྣ་བ་མེད། སྣ་མེད། ལྕེ་མེད། ལུས་མེད། ཡིད་ཀྱི་སྐྱེ་མཆེད་མེད། གཟུགས་ཀྱི་སྐྱེ་མཆེད་མེད། སྒྲ་མེད། དྲི་མེད། རོ་མེད། རེག་བྱ་མེད། ཆོས་ཀྱི་སྐྱེ་མཆེད་མེད་དོ། །གསུམ་


TNT17_Page_0773
[མ་དཔེ་གཟིགས་ན་འདིར་གནོན།]

པ་ཁམས་ལ་མཁས་པར་བསླབ་པ་ནི། སྟོང་ཉིད་ཀྱི་ཡེ་ཤེས་དེ་ལ། མིག་གི་ཁམས་མེད་པ་ནས། ཡིད་ཀྱི་ཁམས་ཀྱི་བར་དུ་མེད་དོ། །མིག་གི་ཁམས་དང༌། རྣ་བ། སྣ། ལྕེ། ལུས། ཡིད་ཀྱི་ཁམས་ཏེ་དྲུག་དང༌། གཟུགས་སྒྲ་དྲི་རོ་རེག་བྱ་ཆོས་ཀྱི་ཁམས་ཏེ་དྲུག་དང༌། མིག་གི་རྣམ་ཤེས། རྣ་བའི་རྣམ་ཤེས། སྣའི་རྣམ་ཤེས། ལྕེའི་རྣམ་ཤེས། ལུས་ཀྱི་རྣམ་ཤེས། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་ཡང་མེད་པའོ། །བཞི་པ་རྟེན་འབྲེལ་ལ་མཁས་པར་བསླབ་པ་ནི། སྟོང་པ་ཉིད་ཀྱི་ཡེ་ཤེས་ལ། མ་རིག་པ་མེད་པ་ནས། རྒ་ཤིའི་བར་དུ་མེད་དེ། མ་རིག་པའི་ཡན་ལག་མེད། དེ་བཞིན་དུ་སྦྱར་ཏེ། འདུ་བྱེད་ཀྱི་ཡན་ལག་དང༌། རྣམ་པར་ཤེས་པ་དང༌། མིང་གཟུགས་དང༌། སྐྱེ་མཆེད་དང༌། རེག་པ་དང༌། ཚོར་བ་དང༌། སྲེད་པ་དང༌། ལེན་པ་དང༌། སྲིད་པ་དང༌། སྐྱེ་བ་དང༌། རྒ་ཤིའི་ཡན་ལག་མེད་ཅིང༌། ལམ་བསྒོམས་པས་མ་རིག་པའི་ཡན་ལག་ཟད་ཅིང༌། འགོགས་པ་མེད་པ་དང༌། དེ་བཞིན་དུ་སྦྱར་ཏེ། འདུ་བྱེད་ཀྱི་ཡན་ལག་འགགས་པ་མེད་པ་དང༌། རྣམ་ཤེས་ཀྱི་ཡན་ལག་འགགས་པ་དང༌། མིང་གཟུགས་ཀྱི་ཡན་ལག་འགགས་པ་དང༌། སྐྱེ་མཆེད་དྲུག་གི་ཡན་ལག་འགགས་པ་དང༌། རེག་པ་འགགས་པ་དང༌། ཚོར་བ་འགགས་པ་དང༌། སྲེད་


TNT17_Page_0774
[མ་དཔེ་གཟིགས་ན་འདིར་གནོན།]

པ་འགགས་པ་དང༌། ལེན་པ་འགགས་པ་དང༌། སྲིད་པ་འགགས་པ་དང༌། སྐྱེ་བ་འགགས་པ་དང༌། རྒ་ཤིའི་ཡན་ལག་ཟད་ཅིང་འགགས་པའི་བར་དུ་ཡང་མེད་དོ། །ལྔ་པ་བདེན་པ་ལ་མཁས་པར་བསླབ་པ་ནི། སྟོང་ཉིད་ཀྱི་སྟེང་ན་ཕུང་ཁམས་སྐྱེ་མཆེད་རྟེན་འབྲེལ་མ་གྲུབ་པ་དེ་བཞིན་དུ༌། སྟོང་ཉིད་ཀྱི་ཡེ་ཤེས་ལ་སྡུག་བསྔལ་བདེན་པ་ཐམས་ཅད་དང༌། ཀུན་འབྱུང་བདེན་པ་ཐམས་ཅད་དང༌། འགོགས་བདེན་གསར་ཐོབ་རྣམས་དང༌། ལམ་བདེན་རྣམས་ངོ་བོས་མེད་དོ། །དེ་ཡང་སྤང་བླང་གི་གཞི་འགོག་བདེན་ནི་སྟོང་ཉིད་ཡིན་ལ། བླང་དོར་བྱེད་པའི་བདེན་པ་བཞི་ཅར་འགོག་གོ ། དྲུག་པ་གནས་དང་གནས་མ་ཡིན་པ་ལ་མཁས་པར་བསླབ་པ་ནི། སྟོང་པ་ཉིད་ཀྱི་ཡེ་ཤེས་ལ། ལམ་གྱིས་བསྡུས་པའི་ཡེ་ཤེས་མེད་ཅིང༌། དེས་ངེས་པར་འབྱུང་བ་ཡང་མེད། དངོས་པོ་རྣམས་ཀྱི་རྒྱུ་འབྲས་ཀྱི་གནས་སྐབས་སོ་སོ་ཐོབ་པར་འགྱུར་བ་ཡང་མེད་ལ། རྒྱུ་མིན་ལས་འབྲས་བུའི་གནས་སྐབས་མ་ཐོབ་པ་ཡང་མེད་དོ། །དེ་དག་ཐམས་ཅད་ཀྱི་དོན་གྱི་མདོ་འདི་ལྟར་གཟུང་སྟེ། འཁོར་བའི་སེམས་ཅན་རྣམས་དང༌། ལམ་སྒོམ་པ་པོ་ཐམས་ཅད་ལ། ཆོས་དབྱིངས་དེ་གཟུགས་སོགས་གཞིའི་ཆོས་ཀྱི་འཁྲུལ་བ་དང༌། ལམ་དང་འབྲས་བུའི་ཆོས་ཀྱི་སྣང་བ་སྣ་ཚོགས་སུ་ཤར་ཞིང༌། གནས་ལུགས་དེའི་རང་གཟུགས་སུ་མ་མཐོང་ལ། དེས་ན་གཞི་ལམ་གྱི་སྣང་བ་དེ་དག་ཐམས་ཅད་མེད་བཞིན་དུ་


TNT17_Page_0775
[མ་དཔེ་གཟིགས་ན་འདིར་གནོན།]

སྣང་བ་ཡིན་པའི་ཕྱིར། ཐོས་བསམ་གྱི་དུས་སུ་དེ་ལྟར་གཏན་ལ་ཕབ་ནས། སྒོམ་པས་གཟུགས་ཕུང་ནས་མ་ཐོབ་པའི་བར་གྱི་ཆོས་ཐམས་ཅད་རིག་པའི་ངོ་བོར་རང་སངས་སུ་བཏང་སྟེ། རང་བཞིན་སྟོང་ཉིད་ཀྱི་ཡེ་ཤེས་དེ་ལ་མཉམ་པར་འཇོག་དགོས་པར་བསྟན་ཏོ། །ངོ་བོ་ཉིད་མེད་གསུམ་དུ་འཆད་པ་དང་འདི་གནད་གཅིག་པས། གསུམ་དུ་བཤད་པའི་གྲུབ་དོན་ལའང་དོན་དམ་དབྱིངས་ཡང་དག་པར་གནས་པ་དེ། གློ་བུར་ཀུན་རྫོབ་ཀྱིས་སྟོངས་པ་ཙམ་ཁོ་ན་འབྱུང་བའི་ཕྱིར་རོ། །དེས་ན་ཁ་ཅིག་བཤད་ཚུལ་དེ་གཉིས་འགལ་བར་སེམས་པ་ནི། མ་གོ་བ་ཡུས་ཆེ་བའི་ཚུལ་ལོ། །དེ་ལྟར་དྲུག་ལས་ཕུང་ཁམས་སྐྱེད་མཆེད་གསུམ་ལ་བསླབ་པས་ནི། ཆོས་ཐམས་ཅད་ཀྱི་མཚན་ཉིད་ལ་མཁས་པར་འགྱུར་ལ། རྟེན་འབྲེལ་དང་བདེན་བཞི་ལ་བསླབ་པས་བླང་དོར་འཇུག་ལྡོག་ལ་མཁས་ཤིང༌། གནས་དང་གནས་མ་ཡིན་པ་ལ་བསླབ་པས་རྒྱུ་རྐྱེན་འབྲས་བུ་ལ་མཁས་པར་འགྱུར་བ་ཡིན་ནོ། །གསུམ་པ་དེ་རྟོགས་པའི་ལམ་གྱི་ཕན་ཡོན་ནི། དེ་ལྟ་བས་ན། བྱང་ཆུབ་སེམས་དཔའ་སོགས་སོ། །ཐོབ་པ་མེད་པའི་ཕྱིར་ཞེས་པ་མཐའི་གསལ་བྱེད་དེ། གཟུགས་མེད་ཅེས་པ་ཚུན་ཆད་ཐམས་ཅད་ལ་སྙེག་པར་མངོན་ལ། གཙོ་བོ་ཐོབ་པ་སྨོས་པ་ནི། གནས་ལུགས་ལ་སྐྱེད་བྱེད་རྒྱུས་བསྐྱེད་བྱ་འབྲས་བུ་བསྐྱེད་དུ་རུང་བ་དང་མི་རུང་བ་གང་ཡང་མ་གྲུབ་ཅེས་པར་གཞན་རྣམས་ཀྱང་འདུས་པར་དགོངས་སོ། །དེས་ན་


TNT17_Page_0776
[མ་དཔེ་གཟིགས་ན་འདིར་གནོན།]

འདི་ལྟར་གཟུགས་ནས་མ་ཐོབ་པའི་བར་གང་ཡང་དངོས་པོའི་གནས་ཚུལ་ལ་མ་གྲུབ་པ་ལྟར། ཐེག་ཆེན་པ་རྣམས་ཀྱིས་སྒོམ་དགོས་པ་དེ་ལྟ་བས་ན། བྱང་ཆུབ་སེམས་དཔའ་རྣམས་ཀྱི་མཉམ་གཞག་ཡེ་ཤེས་ཀྱི་རང་ངོ་ལ། རྒྱུ་དང་འབྲས་བུའི་དངོས་པོ་བྱ་བྱེད་དང་བཅས་པ་གདོད་ནས་མ་གྲུབ་པའི་ཕྱིར། འཁྲུལ་ངོར་རང་སེམས་ལ་ཤར་བའི་སྒྲིབ་གཉིས་བག་ཆགས་དང་བཅས་པ་ཡང༌། གཤིས་ལ་གདོད་ནས་མེད་ཅིང༌། འཁོར་བའི་སྡུག་བསྔལ་དང་ལས་ཉོན་གྱིས་སྐྲག་ཅིང༌། འཇིགས་པ་ཡང་གཤིས་ལ་ནམས་ཡང་མེད་པས། མེད་པ་མངོན་སུམ་དུ་རྟོགས་པ་ན། གཟུང་འཛིན་འཁྲུལ་པ་ཕྱིན་ཅི་ལོག་གི་སྣང་བ་རྣམས་རིམ་པས་སྤངས་པས། མཐར་འཁྲུལ་བ་ཐམས་ཅད་ལས་ཤིན་ཏུ་འདས་ནས། མྱ་ངན་ལས་འདས་པ་རྫོགས་པའི་སངས་རྒྱས་ཀྱི་གོ་འཕང་གི་མཐར་ཕྱིན་ཅིང་རེག་པར་འགྱུར་རོ། །ཕྱིན་ཅི་ལོག་ལས་རིམ་པས་འདས་ཚུལ་ནི། མོས་སྤྱོད་ཀྱི་ས་དང༌། འཕགས་པའི་ས་བཅུའི་རིམ་པས། མཐར་རྡོ་རྗེ་ལྟ་བུའི་ཏིང་ངེ་འཛིན་གྱི་བར་རོ། །བཞི་པ་ལམ་དེས་ཐོབ་པའི་འབྲས་བུ་མངོན་དུ་འགྱུར་ཚུལ་ནི། དུས་གསུམ་སོགས་ཏེ། དུས་གསུམ་དུ་མངོན་པར་བཞུགས་པ་སྟེ་སྔོན་བྱུང་བ་དང༌། ད་ལྟར་བཞུགས་པ་དང༌། མ་འོངས་པ་ན་འབྱོན་འགྱུར་གྱི་སངས་རྒྱས་ཐམས་ཅད་ཀྱང༌། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མཚན་ཉིད་བརྒྱད་དང་ལྡན་པ་འདི་ཉིད་ལ་བརྟེན་ནས། མཁས་པའི་ཚུལ་


TNT17_Page_0777
[མ་དཔེ་གཟིགས་ན་འདིར་གནོན།]

དྲུག་གིས་བསྒོམས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སངས་རྒྱས་ཟིན་པ་དང༌། སངས་རྒྱ་བར་འགྱུར་རོ། །དེ་དག་ཐམས་ཅད་ཀྱི་དངོས་བསྟན་ལ་ཆོས་ཀྱི་བདག་མེད་ཁོ་ན་གསུངས་ཏེ། གང་ཟག་གི་བདག་མེད་ནི་དེའི་ཤུགས་ལ་འབྱུང་བར་དགོངས་སོ། །འོན་ཀྱང་གང་ཟག་གི་བདག་མེད་བྱང་ཆུབ་སེམས་དཔས་མི་སྒོམ་པ་ལྟར་གསུངས་པ་ནི། དགག་གཞི་ཕུང་པོ་ཡོད་པར་བྱས་ནས། དེའི་སྟེང་དུ་ང་བདག་མེད་པར་སྒོམ་པའི་གང་ཟག་གི་བདག་མེད་སྒོམ་ཚུལ་དེ་འདྲ་མི་བྱེད་ཅེས་པའི་དོན་ཡིན་གྱི། སྤྲོས་བྲལ་གྱི་རྣམ་པ་ཅན་གྱི་གང་ཟག་གི་བདག་མེད་ནི་རྒྱལ་སྲས་རྣམས་ཀྱིས་བསྒོམ་བྱ་ཁོ་ནའོ། །གནས་ཚུལ་ལ་ང་བདག་གང་ཡང་མ་གྲུབ་པ་ནི། གང་ཟག་གི་བདག་མེད་ཡིན་ལ། གནས་ཚུལ་ལ་སྣང་གྲགས་ཀྱི་ཤེས་བྱ་གང་ཡང་ཡོད་མ་མྱོང་བ་ནི་ཆོས་ཀྱི་བདག་མེད་ཡིན་པས། སྔ་མ་ཕྱི་མའི་ནང་དུ་འདུས་པའི་ཕྱིར། ཆོས་ཀྱི་བདག་མེད་བསྒོམས་པས་གང་ཟག་གི་བདག་མེད་སྒོམ་པར་ཤུགས་ལ་འགྲུབ་བོ། །ལྔ་པ་ཕན་ཡོན་དང་བཅས་པའི་གཟུང་སྔགས་བསྟན་པ་ནི། དེ་ལྟ་བས་ན་ཤེས་རབ་ཀྱི་སོགས་ཏེ། མངོན་པར་རྫོགས་པར་སངས་རྒྱས་པ་དེ་ལྟ་བས་ན། རང་བཞིན་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་སུམ་དུ་རྟོགས་པའི་ཡེ་ཤེས་ཀྱི་སྣང་ཆ་ལ། རིག་སྔགས་བྱུང་སྟེ། ཆོས་སྐུའི་རྒྱུ་མཐུན་པའོ། །སྔགས་དེའི་ཆེ་བ་ནི། འདོད་པའི་


TNT17_Page_0778
[མ་དཔེ་གཟིགས་ན་འདིར་གནོན།]

དོན་དང་ལས་ཐམས་ཅད་འགྲུབ་པར་བྱེད་པའི་ཕྱིར། རིག་པ་ཆེན་པོའི་གསང་སྔགས་ཡིན་ལ། སྔགས་ཀྱི་ངོ་བོ་འཇིག་རྟེན་ཐམས་ཅད་ལ་འདས་ཤིང༌། ཐེག་པ་དམན་པ་ཟིལ་གྱི་གནོན་པས། བླ་ན་མེད་པའི་ཡེ་ཤེས་ཉིད་རིག་སྔགས་ཀྱི་རྣམ་པར་ཤར་བ་དང༌། འདི་ཡིས་འདོད་པའི་ལས་གཞན་བྱེད་པ་ལྟ་སྨོས་ཀྱང་ཅི་དགོས། རང་དོན་དུ་མི་མཉམ་པ་དང་མཉམ་པ་སྟེ། སྲིད་ཞི་གཉིས་ལ་འགྲན་ཟླ་དང་བྲལ་བའི་སངས་རྒྱས་ཀྱང་ཐོབ་པར་བྱེད་པའི་སྔགས་སོ། །གཞན་དོན་དུ་སེམས་ཅན་གྱི་སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་སྔགས་ཀྱང་ཡིན་ནོ། །ཆོས་ཀྱི་སྐུ་བསླུ་བ་མེད་པའི་ཕྱིར་རྫུན་པ་མ་ཡིན་ཞིང༌། རང་གི་ངོ་བོ་མི་འགྱུར་ཞིང་རྟག་པས་ན་བདེན་པར་གྲུབ་པ་སྟེ། སྔགས་འདི་ཡང་ཆོས་སྐུ་དེ་དང་ངོ་བོ་གཅིག་པའི་ཕྱིར། མི་བསླུ་ཞིང་མི་རྫུན་པས་ན། བདེན་པར་ཤེས་པར་བྱ་སྟེ། ཞེས་པའི་དོན་ཡིན་ལ། འདི་གཞན་སྟོང་དབུ་མ་ཆེན་པོ་གསལ་བར་སྟོན་པ་ཚིག་ལྔ་པ་ཡིན་ནོ། །ཤེར་ཕྱིན་གྱི་རིག་སྔགས་དངོས་ནི། སངས་རྒྱས་ཀྱི་ཐུགས་རྒྱུད་ལ་བཞུགས་པ་དེ་ཡིན་པས་ཆོས་སྐུ་དངོས་དང་བདེན་གྲུབ་དངོས་ཡིན་ཞིང༌། སློབ་པ་རྣམས་དང་སོ་སོ་སྐྱེ་བོ་རྣམས་ཀྱི་ངག་དང་ཡིད་ངོར་སྣང་བ་དེ་ནི། དེ་འདྲ་དངོས་མ་ཡིན་ཀྱང༌། དེ་ཐོབ་བྱེད་ཀྱི་རྒྱུ་ཡིན་པས་འབྲས་བུ་ཐོབ་པ་ལ་མི་བསླུ་བའི་བདེན་པ་ནི་ཡིན་ནོ། །འོན་ཀྱང་རྒྱལ་བས་


TNT17_Page_0779
[མ་དཔེ་གཟིགས་ན་འདིར་གནོན།]

གསུངས་པའི་རིག་སྔགས་འདི་ལྟ་བུ་དག་སོ་སོ་སྐྱེ་བོ་ལམ་མ་ཞུགས་ཀྱི་བློ་ལ་ཤར་བ་ཚུན་ཆད་ཀྱང༌། ཡོངས་གྲུབ་ཏུ་གཏོགས་ཤིང་ཟག་མེད་ཡིན་པར་གསུངས་སོ། །ཕན་ཡོན་དེ་དང་ལྡན་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་འཕགས་པ་འཇིག་རྟེན་དབང་པོས་སྨྲས་ཤིང་བཤད་པ་ནི། ཏདྱ་ཐཱ། ཞེས་པ་ནི་འདི་ལྟ་སྟེ། ག་ཏེ་ནི་གཤེགས་ཤིང་རྟོགས་པ། ལན་གཉིས་འབྱུང་པ་ནི་ཀུན་རྫོབ་རྟོགས་པ་དང༌། དོན་དམ་རྟོགས་པའོ། །པ་ར་ནི་མཆོག་སྟེ་གནས་ལུགས། ག་ཏེ་རྟོགས་པ། ཡང་པ་ར་མཆོག སམ་ནི་ཡང་དག་པ། ག་ཏེ་རྟོགས་པ། བོ་དྷི་ནི་བྱང་ཆུབ་སྟེ་བདེན་པ་གཉིས་ཀྱི་གནས་ལུགས་ཕྱིན་ཅི་མ་ལོག་པར་རྟོགས་པའི་ཡེ་ཤེས། བྱང་ཆུབ་སྟེ་ཆོས་དབྱིངས་དང་རོ་ཅིག་པར་གྱུར་པ་ཞེས་པའོ། །སྭཱཧཱ་ནི་གཞི་ཚུགས་ཤིག་པ་སྟེ། སྔགས་ཀྱི་མཐའ་འགྲུབ་པར་བྱེད་པའོ། །དྲུག་པ་དོན་བསྡུའི་ཚུལ་དུ་ཤེར་ཕྱིན་ལ་སློབ་པར་གདམས་པ་ནི། ཤཱ་རིའི་བུ་བྱང་ཆུབ་སེམས་དཔའ་སོགས་ཏེ། ཤཱ་རིའི་བུ་ཞེས་བོས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་མཁས་ཚུལ་དྲུག་ལ་སོགས་པ་དེ་ལྟ་བུའི་སྒོ་ནས། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མཚན་ཉིད་བརྒྱད་ལྡན་ལ་བསླབ་པར་བྱའོ། །གཉིས་པ་མཐུན་འགྱུར་གྱི་སྒོ་ནས་ཐེ་ཚོམ་བསལ་བ་ནི། དེ་ནས་བཅོམ་ལྡན་འདས་


TNT17_Page_0780
[མ་དཔེ་གཟིགས་ན་འདིར་གནོན།]

སོགས་ཏེ། དེ་ལྟར་བཤད་པའི་རྗེས་དེ་ནས། བཅོམ་ལྡན་འདས་ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་དེ་ལས་བཞེངས་པའི་ཚུལ་བསྟན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ནས། ཅེས་མདོར་བསྟན་ལ། ཇི་སྐད་དུ། ངོ་མཚར་བ་དང་རྩོད་པ་དང༌། ཁྲོ་དང་ཞུམ་དང་ངེས་བཟུང་དང༌། །དགའ་དང་དད་པ་དག་ལས་ནི། །ཚིག་གཅིག་ལན་གཉིས་འབྱུང་བ་ཡིན། །ཞེས་པ་ལྟར། རབ་ཏུ་དགྱེས་པས་ལེགས་སོ་ལེགས་སོ་རིགས་ཀྱི་བུ་ཞེས་སྤྱན་རས་གཟིགས་ལ་བོས་ནས། ཁྱོད་ཀྱི་བཤད་པ་དེ་ནི་མ་ནོར་བ་དེ་ཁོ་ན་བཞིན་ནོ། །དེ་ནི་དེ་ཁོ་ན་བཞིན་ཡིན་ཏེ་དེའི་རྒྱུ་མཚན་གྱིས་ཇི་ལྟར་སྤྱན་རས་གཟིགས་ཁྱོད་ཀྱིས་བསྟན་པ་དེ་བཞིན་དུ། ཤཱ་རིའི་བུ་ལ་སོགས་པ་དེར་འདུས་ཀྱི་འཁོར་ཁྱེད་རྣམས་ཀྱིས་ཀྱང༌། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་མཁས་པ་དྲུག་ལ་སོགས་པའི་སྒོ་ནས་སྤྱོད་ཚུལ་དེ་ལྟར་སྤྱད་པར་བྱ་དགོངས་ཏེ། སྤྱན་རས་གཟིགས་ཀྱིས་བཤད་པ་འདི་དང༌། འཁོར་གཞན་རྣམས་ཀྱིས་དེ་དང་མཐུན་པར་བསྒྲུབ་པ་འདི་ལ། ད་ལྟར་བཅོམ་ལྡན་འདས་ཤཱཀྱ་ཐུབ་པ་བདག་གིས་ཡི་རང་མཛད་པར་མ་ཟད། ཕྱོགས་བཅུའི་དེ་བཞིན་གཤེགས་པ་རྣམས་ཐམས་ཅད་ཀྱིས་ཀྱང་རྗེས་སུ་ཡི་རང་བར་མཛད་དོ། །ཞེས་སྟོན་པ་ཤཱཀྱ་སེང་གེས་དཔལ་


TNT17_Page_0781
[མ་དཔེ་གཟིགས་ན་འདིར་གནོན།]

གྱི་མགུར་ལས་གསུངས་སོ། །རྩ་བའི་གསུམ་པ་ཡི་རང་མངོན་པར་བསྟོད་པ་ནི། བཅོམ་ལྡན་འདས་ཀྱིས་དེ་སྐད་ཅེས་སོགས་ཏེ། འཁོར་རྣམས་སྔར་སྤྱན་རས་གཟིགས་ཀྱིས་བསྟན་པ་འདི་ལས་ལྷག་པའི་ཤེར་ཕྱིན་གྱི་དོན་ཞིག་ཀྱང་ཡོད་དམ་སྙམ་དུ་ཐེ་ཚོམ་དང་བཅས་པ་ལས། བཅོམ་ལྡན་འདས་ཀྱི་ཞལ་སྔ་ནས་ཕྱོགས་བཅུའི་སངས་རྒྱས་ཀུན་གྱིས་བསྟན་ཀྱང་ཤེར་ཕྱིན་གྱི་དོན་དེ་ཁོ་ན་བཞིན་ཡིན་ཏེ་གཞན་དུ་མ་ཡིན་ནོ་ཞེས་བཀའ་སྩལ་པ་དང༌། དྲི་བ་བྱེད་པ་ཤཱ་རིའི་བུ་དང༌། ལན་ལྡོན་པ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་དང༌། ཐམས་ཅད་དང་ལྡན་པ་ནི་ཐམས་ཅད་ཡོད་པ་སྟེ། ཡུལ་ཐ་དད་པ་དང༌། རིགས་ཐ་དད་པ་དང༌། འགྲོ་བ་ཐ་དད་པ་དང༌། གཟུགས་ཐ་དད་པ་དང༌། ལོངས་སྤྱོད་ཐ་དད་པ་དང༌། སྐད་རིགས་ཐ་དད་པ་ལ་སོགས་པ་ཐམས་ཅད་དང་ལྡན་པའི་འཁོར་དེ་དག་ཡི་རང་ཞེས་པའོ། །ཐམས་ཅད་དང་ལྡན་པའི་འཁོར་དེའི་གཙོ་བོ་དང༌། ཕལ་བའི་ཁྱད་པར་སྨོས་ན། ནམ་མཁའ་ལ་སྤྱོད་པའི་ལྷ་དང༌། ས་སྟེང་ན་སྤྱོད་པའི་མི་དང༌། ས་འོག་ན་སྤྱོད་པའི་ལྷ་མ་ཡིན་དང༌། གནས་གསུམ་ན་སྤྱོད་པའི་དྲི་ཟ་སྟེ། གཙོ་ཆེ་བ་བཞི་པོ་དེ་དག་སྨོས་པའི་འཇིག་རྟེན་ཕལ་པའི་འཁོར་དཔག་ཏུ་མེད་པ་རྣམས་དགའ་ཞིང་མགུ་ལ་ཡི་རང་སྟེ། སྤྱན་རས་གཟིགས་ཀྱིས་བཤད་པ་དང་


TNT17_Page_0782
[མ་དཔེ་གཟིགས་ན་འདིར་གནོན།]

མཐུན་པར་བཅོམ་ལྡན་འདས་ཀྱིས་གསུངས་པ་དེ་ལ། ཡིད་བརྟོན་ཅིང་མངོན་པར་བསྟོད་དེ། ཆེད་ཆེར་འཛིན་པ་དང་ངེས་བཟུང་དུ་བྱེད་དོ། །དེ་ལ་དེ་བཞིན་གཤེགས་པས་མཐུན་འགྱུར་དེ་བཞིན་མ་གསུངས་ན་ནི། འཁོར་རྣམས་ཀྱང་ཡིད་མ་ཆེས་པས་དགའ་ཞིང་ཚིམ་པར་མི་འགྱུར་ལ། གདུལ་བྱ་གཞན་སྣང་དང་བསྟུན་ནས་ཤཱ་རིའི་བུ་ཡང་བདག་གི་དྲི་བ་སྐབས་སུ་མ་བབ་བམ་སྙམ་པ་དང༌། སྤྱན་རས་གཟིགས་ཀྱང་བདག་གིས་ལན་ལེགས་པར་མ་སྟོན་པ་ཡང་སྲིད་སྙམ་དུ་ཞུམ་ཞིང་དོགས་པ་དང་བཅས་པར་འགྱུར་ན། སྟོན་པས་ལེགས་སོའི་མཐུན་འགྱུར་བཀའ་སྩལ་པས། ཤཱ་རིའི་བུ་ཡང༌། རང་ཉིད་ཀྱི་དྲི་བ་ལེགས་པས་དགའ་བ་དང༌། འཕགས་པ་སྤྱན་རས་གཟིགས་ཀྱང་རང་གི་དྲི་ལན་ལེགས་པོ་བྱུང་བར་ཤེས་ཏེ་མཆོག་ཏུ་དགྱེས་པ་དང༌། འཁོར་གཞན་རྣམས་ཀྱང་ཡིད་ཆེས་ཤིང་ཐེ་ཚོམ་ཆོད་པས། མགུ་ཞིང་ཚིམ་པ་ཐོབ་པ་ཡིན་ནོ། །ཡང་འདིར་མདོ་སྡེ་ཟབ་མོ་འདི་ནི་འཁོར་ལོ་བར་པའི་མདོར་གཏོགས་པ་ཡིན་ན། གཞན་སྟོང་གི་དབུ་མ་སྟོན་པར་མི་རིགས་སོ། །ཞེས་དང༌། དེ་སྟོན་ན་བར་མཐའ་གཉིས་ལ་ཟབ་མི་ཟབ་མེད་པར་འགྱུར་རོ། །ཞེས་སྨྲ་བ་བྱེད་པ་དག་བྱུང་ན་འདི་སྐད་ཅེས་བརྗོད་དེ། འཁོར་ལོ་གསུམ་ཅར་གྱི་དགོངས་པ་ཡང་གཞན་སྟོང་གི་དབུ་མ་ཡིན་ཅིང༌། དང་པོ་དང་བར་བ་ནས་ཀྱང་སྒྲས་ཟིན་ལ་གསལ་བར་སྟོན་པའི་ཚིག་ཅི་རིགས་པ་ནི་ཡོད་དོ། །དོན་དམ་རྣམ་པར་ངེས་པའི་འཁོར་ལོ་


TNT17_Page_0783
[མ་དཔེ་གཟིགས་ན་འདིར་གནོན།]

ལས་ནི། འཁོར་ལོ་དང་བར་གཉིས་ཀ་ལས་ཆེས་གསལ་ཞིང་རྒྱས་པ་མ་སྦངས་ཤིང་མངོན་དུ་ཕྱུང་བའམ། འབྱམས་ཀླས་པར་གསུངས་པས། འཁོར་ལོ་གསུམ་ལ་མཆོག་དམན་གྱི་ཁྱད་པར་ཡང་འབྱུང་ཞིང༌། དགོངས་པ་གཅིག་པ་ཡང་ཡིན་པས་སྐྱོན་དེ་གཉིས་མེད་དོ། །དེ་བས་ན་མདོ་འདིའི་དངོས་བསྟན་ལ། གཞན་སྟོང་ཐུན་མོང་པ་ནི་གསལ་བར་སྟོན་ཞིང༌། ཐུན་མོང་མ་ཡིན་པ་བདེ་བར་གཤེགས་པའི་སྙིང་པོའི་དོན། རྟག་བརྟན་གཡུང་དྲུང་རྣམ་པ་ཐམས་ཅད་པ་དེ་སྦས་དོན་གྱི་ཚུལ་གྱིས་འཆད་པ་ཡིན་ནོ། །ཤེར་ཕྱིན་སྙིང་པོའི་མདོའི་ཚིག་འགྲེལ་རྨད་དུ་བྱུང་བ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་སྨྲས་པའོ། །གཅིག་ཞུས། དགེ་ལེགས་འཕེལ།། །།


TNT17_Page_0784
[མ་དཔེ་གཟིགས་ན་འདིར་གནོན།]

ཤོག་སྟོང་།

འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱ་ཆེར་འགྲེལ་པ།


TNT17_Page_0785
[མ་དཔེ་གཟིགས་ན་འདིར་གནོན།]

འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱ་ཆེར་འགྲེལ་པ་འཕགས་མཆོག་རྣམས་ཀྱི་གསང་བའི་མཛོད་ཅེས་བྱ་བ་བཞུགས་སོ།


TNT17_Page_0786
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོའི་རྒྱ་ཆེར་འགྲེལ་པ་འཕགས་མཆོག་རྣམས་ཀྱི་གསང་བའི་མཛོད་ཅེས་བྱ་བ། དེ་བཞིན་གཤེགས་པ་དང་འཕགས་པ་ཀུན་ཏུ་བཟང་པོ་ལ་ཕྱག་འཚལ་ལོ། །འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོའི་དོན་ཅུང་ཟད་བཤད་པར་བྱ་སྟེ། དེ་ལ་འདི་ནི་བྱང་ཆུབ་སེམས་དཔའི་སྨོན་ལམ་ཐམས་ཅད་ཡོངས་སུ་འདུས་པ་སྨོན་ལམ་གྱི་མདོ་ཆེན་པོ་ཡིན་པའི་ཕྱིར། ཚིགས་བཅད་འདི་ཉིད་ལོགས་སུ་ཕྱུང་བ་མདོ་སྡེ་རང་རྐང་ཚུགས་པ་ཞིག་ཏུ་ཡང་འགྱུར་ལ། སྤྱིར་ནི་འཕགས་པ་སངས་རྒྱས་ཕལ་པོ་ཆེ་ལས། འཕགས་པ་སྡོང་པོས་བརྒྱན་པའམ། འཕགས་པ་སྡོང་པོ་བཀོད་པའི་མདོ་ཞེས་བྱ་བ། བྱང་ཆུབ་སེམས་དཔའི་སྤྱོད་པ་རབ་འབྱམས་མཐའ་ཡས་སྟོན་པ་ཞིག་སྟེ། དམ་ཚིག་གསུམ་བཀོད་ཀྱི་རྟོག་པ་ལས། ཐེག་པ་ཆེན་པོའི་མདོ་སྡེ་མཆོག་ཏུ་བསྔགས་སོ། །མདོ་སྡེ་དེ་ཉིད་ཀྱི་མཇུག་གི་ཆ་ལ་གནས་པ་ལས་སྨོན་ལམ་འདི་ཕྱུང་བའོ། །ལོགས་སུ་བཞུགས་པ་ལ་མདོ་སྡེ་རང་རྐང་ཚུགས་པར་འགྱུར་བ་དང༌། ཚིག་དེ་ཉིད་མདོ་སྡེ་རྒྱས་


TNT17_Page_0787
[མ་དཔེ་གཟིགས་ན་འདིར་གནོན།]

པ་གཞན་གྱི་ནང་ན་ཡོད་པ་ཡང་མི་འགལ་ཏེ། འཕགས་པ་ཚིགས་བཅད་གཅིག་པ་དང༌། འཕགས་པ་རྟེན་འབྲེལ་སྙིང་པོ་དང༌། ཤེར་ཕྱིན་བརྒྱ་ལྔ་བཅུ་པ་དང༌། སྒོ་ཉེར་ལྔ་པ་ལ་སོགས་པ་མདོ་རྒྱུད་དུ་མར་སྣང་བ་བཞིན་ནོ། །དེ་ཡང་སྤྱིར་སྡོང་པོ་བཀོད་པ་ཡོངས་རྫོགས་ཀྱི་དབང་དུ་བྱས་ན་ནི་འབྱམ་ཀླས་པ་ཞིག་ཡོད་པ་ལས། དེང་སང་འཛམ་བུའི་གླིང་དུ་སྤྱོད་པ་འདི་ནི། ནོར་བཟང་གིས་དགེ་བའི་གཤེས་གཉེན་བསྟེན་ཚུལ་ཕྱོགས་གཅིག་པ་སྟེ། འོན་ཀྱང་འདི་ཁོ་ནའི་དོན་ཙམ་ཡང་གཞལ་བར་དཀའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དག་པའི་ས་ལ་གནས་ངེས་པ་ཞིག་ཚོང་དཔོན་གྱི་ཁྱེའུའི་ཚུལ་བཟུང་བ། ནོར་བཟང་ཞེས་བྱ་བ་ཞིག་གིས། འཕགས་པ་འཇམ་དཔལ་ནས་བྱམས་པའི་བར་གྱི་དགེ་བའི་བཤེས་གཉེན་བསྟེན་ཏེ། མཐར་དཔག་ཚད་བརྒྱ་རྩ་བཅུའི་ཕ་རོལ་ནས་འཇམ་དཔལ་གྱིས་ཕྱག་བརྐྱང་བ། གྲོང་ཁྱེར་ཡིད་བདེ་བ་མངོན་དུ་གྱུར་པ་ཞེས་བྱ་བ་ན་ནོར་བཟང་ཡོད་པའི་སྤྱི་བོར་བཞག་སྟེ་ཆེད་དུ་བརྗོད་པ་མཛད་དོ། །དེ་ནས་ཚོང་དཔོན་གྱི་


TNT17_Page_0788
[མ་དཔེ་གཟིགས་ན་འདིར་གནོན།]

བུ་ནོར་བཟང་ཡེ་ཤེས་ཀྱི་སྤྱོད་ཡུལ་མཐའ་ཡས་པ་ཐོབ་པ། འཇམ་དཔལ་གྱི་བྱིན་རླབས་ཀྱིས་ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ལ་འཇུག་ནུས་པར་བྱིན་གྱིས་བརླབས་ཤིང༌། རྡོ་རྗེ་རིན་པོ་ཆེ་པདྨའི་གདན་ལ་བཞག་སྟེ། དེ་བཞིན་གཤེགས་པ་རྣམ་པར་སྣང་མཛད་ཀྱི་སེང་གེའི་ཁྲི་ལ་མངོན་དུ་ཕྱོགས་པར་འདུག་གོ །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་ཀུན་ཏུ་བཟང་པོ་མཐོང་བར་འགྱུར་བའི་ལྟས་ངོ་མཚར་མཐའ་ཡས་པ་བཅུ་ཚན་གཉིས་ནོར་བཟང་གིས་མཐོང་ངོ༌། །དེ་ནས་འཕགས་པ་ཀུན་ཏུ་བཟང་པོ་ཉིད་མཐོང་ན་ཐམས་ཅད་མཁྱེན་པ་ཉིད་ཐོབ་པ་དང་འདྲ་བར་སེམས་པ་ལས། སྐད་ཅིག་དེ་ཉིད་ལ་ཡེ་ཤེས་མཐའ་ཡས་པ་འཕེལ་བར་གྱུར་ཏེ། བཅོམ་ལྡན་འདས་རྣམ་པར་སྣང་མཛད་ཀྱང་མངོན་སུམ་དུ་མཐོང༌། དེའི་སྤྱན་སྔ་ན་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཀྱང་མཐོང་ངོ༌། དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་དེ་བཞིན་གཤེགས་པ་ཐམས་ཅད་དང་མཉམ་པ་ཉིད་རྗེས་སུ་ཐོབ་པ་དེ་ཡང་རིན་ཆེན་པདྨའི་ཁྲི་ལ་བཞུགས་པ་མཐོང་སྟེ། དེའི་བ་སྤུའི་ཁུང་བུ་རེ་རེ་ནས་ཀྱང་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འོད་ཟེར་གྱི་སྤྲིན་མང་པོ་ཐོན་ནས། ནམ་མཁའི་མཐས་གཏུགས་པ་སྣང་བར་བྱས་ཏེ། སེམས་ཅན་ཐམས་ཅད་ཀྱི་སྡུག་བསྔལ་རབ་ཏུ་ཞི་བར་བྱེད་པ་ལ་སོགས་པ་རྣམ་པར་ཐར་པ་བསམ་གྱིས་མི་ཁྱབ་པའི་ཆོ་འཕྲུལ་ཆེན་པོ་ཉི་ཤུ་ལྷག་


TNT17_Page_0789
[མ་དཔེ་གཟིགས་ན་འདིར་གནོན།]

ཅིག་མཐོང་ངོ༌། །དེ་ནས་ནོར་བཟང་ཡིད་དགའ་བ་དང་བདེ་བ་སྐྱེས་ནས། འཕགས་པ་ཀུན་ཏུ་བཟང་པོའི་སྐུ་ལུས་ཀྱི་ཆ་ཤས་རྣམ་པར་ཕྱེ་ནས། མཐར་བ་སྤུའི་ཁུང་བུ་གཅིག་ལ་ཡང༌། དབུས་སུ་མི་མཇེད་འཇིག་རྟེན་གྱི་ཁམས་དང་བཅས་པའི་ཕྱོགས་བཅུ་རབ་འབྱམས་མུ་མེད་པའི་འཇིག་རྟེན་གྱི་ཁམས་ཀྱི་བཀོད་པ་མཐའ་དག་དང་དེ་དག་ཀྱང༌། བསྐལ་པ་ཆགས་པ་དང་འཇིག་པའི་བར་གྱི་ཚུལ་རྣམས་མ་ལུས་པ། གཟུགས་བརྙན་གྱི་ཚུལ་དུ་མཐོང་ངོ༌། །སྐབས་འདི་ན་འདོད་པའི་ཁམས་ཀྱི་ཡུལ་དང་བཅས། གཟུགས་ཀྱི་ཁམས་ཀྱི་ཡུལ་དང་བཅས། གཟུགས་མེད་པའི་ཁམས་ཀྱི་ཡུལ་དང་བཅས། གཞི་དང་བཅས། རྟེན་དང་བཅས། དབྱིབས་དང་བཅས། ཞེས་འབྱུང་ཞིང༌། གཞན་ཡང་ཕལ་པོ་ཆེ་འདིར། གཟུགས་མེད་ཁམས་ལ་སྣོད་ཀྱི་འཇིག་རྟེན་ཡོད་པའི་ཚིགས་ཡང་དང་ཡང་དུ་འབྱུང་བས། གཟུགས་མེད་ཅེས་པ་དམན་པ་ལ་དགག་པའི་སྒྲའོ། །ཀུན་ཏུ་བཟང་པོ་དེའི་མཚན་བཟང་པོ་རེ་རེ་ལ་ཡང་སྔོན་གྱི་མཐའ་མུར་ཐུག་པའི་བར་གྱི་འཇིག་རྟེན་གྱི་ཁམས་ཐམས་ཅད་དང༌། སངས་རྒྱས་རྣམས་དང་འཁོར་གྱི་དཀྱིལ་འཁོར་ཡང་བསྟན། ཕྱི་མའི་མུ་མཐར་ཐུག་གི་བར་གྱི་ཡང་བསྟན། སངས་རྒྱས་རེ་རེའི་དྲུང་ན་ཀུན་ཏུ་བཟང་པོ་རེ་རེ་ཡང་འདུག དེ་དག་གི་ལུས་རེ་རེ་ལ་ཡང་དུས་གསུམ་དུ་བྱུང་བའི་ཤེས་བྱ་ཐམས་ཅད་ཀྱི་གཟུགས་བརྙན་ཡང་མངོན་པར་བསྟན་པར་མཐོང༌། དེ་


TNT17_Page_0790
[མ་དཔེ་གཟིགས་ན་འདིར་གནོན།]

ནས་ཀུན་ཏུ་བཟང་པོ་ཉིད་ཀྱིས་ད་ལྟ་རྣམ་པར་འཕྲུལ་པ་མཐའ་ཡས་པས་འགྲོ་བའི་དོན་སྤྱོད་ཚུལ་དང༌། སངས་རྒྱས་མཉེས་པར་བྱེད་ཚུལ། དེ་དག་གི་རྒྱུར་སྔོན་བྱང་ཆུབ་སེམས་དཔའི་སྤྱོད་པ་མཐའ་ཡས་པ་སྤྱད་ཚུལ་གསུངས་ཏེ། སངས་རྒྱས་རྣམ་སྣང་གི་སྤྱན་སྔ་ན་བཞུགས་པའི་ཀུན་ཏུ་བཟང་པོས་ཕྱག་བརྐྱང་སྟེ་ནོར་བཟང་གི་སྤྱི་བོར་བཞག་པའི་ཚེ། ཕྱོགས་བཅུ་མཐའ་ཡས་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་ན་བཞུགས་པའི། སངས་རྒྱས་རེ་རེའི་ཞབས་འབྲིང་ན་ཡང་ཀུན་ཏུ་བཟང་པོ་རེ་རེ་བཞུགས་པའི་ཕྱག་གཡས་པའང༌། ནོར་བཟང་གི་སྤྱི་བོར་བཞག་པར་གྱུར་ཅིང༌། ཆོས་ཀྱི་སྒོ་མང་པོ་སྣ་ཚོགས་ལ་ཞུགས་པར་གྱུར་ཏོ། །དེ་ནས་རྣམ་འཕྲུལ་དེ་ལ་བརྟེན་པའི་ཞུ་ལན་ཅུང་ཟད་མཛད་ནས། རྣམ་འཕྲུལ་དེ་ལྟ་བུའི་རྒྱུ་སྤྱོད་པ་མཐའ་ཡས་པ་སྤྱད་ཚུལ་རྣམས་གསུངས་ཏེ། ངའི་ལུས་རྣམ་པར་དག་པ་ལ་ལྟོས་ཤིག་གསུངས་ནས། ཀུན་ཏུ་བཟང་པོའི་བ་སྤུའི་ཁུང་བུ་རེ་རེར་ཡང་སངས་རྒྱས་ཀྱི་ཞིང་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པ། སངས་རྒྱས་ཀྱི་མཛད་པ་སྟོན་པ་ལ་སོགས་པ་མཐའ་ཡས་པའང་མཐོང༌། ཀུན་ཏུ་བཟང་པོའི་གདམས་ངག་དང་རྗེས་སུ་བསྟན་པ་ཡང་ཐོས་ནས། དེའི་སྐུ་ལུས་ཀྱི་ཁོངས་སུ་གཏོགས་པའི་འཇིག་རྟེན་གྱི་ཁམས་ཐམས་ཅད་དུ་ཞུགས་ནས། སེམས་ཅན་སྨིན་པར་བྱེད་པར་གྱུར་ལ། དེ་ནས་ནོར་བཟང་རང་ཉིད་ཀྱིས་ཀྱང་རྣམ་པར་ཐར་བ་མཐའ་ཡས་པ་དེ་ཐོབ་ནས། དེ་ལྟ་བུ་སྟོན་པར་གྱུར་ཏོ། །དེའི་


TNT17_Page_0791
[མ་དཔེ་གཟིགས་ན་འདིར་གནོན།]

རྗེས་སུ་འདི་སྐད་ཅེས། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བསྐལ་པ་དང༌། བསྐལ་པ་རྒྱ་མཚོ་འབྱམས་ཀླས་པ་དང༌། འཇིག་ཏེན་གྱི་ཁམས་གཅིག་ནས་གཅིག་ཏུ་བརྒྱུད་པ། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཕྲ་རབ་སྙེད་པོ་དེ་དག་བརྣན་ཏེ་མངོན་པར་བརྗོད་པའི་ཕྱིར། ཚིགས་སུ་བཅད་པའི་དབྱངས་ཀྱིས་སྨོན་ལམ་བཏབ་པ། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། སོགས་འབྱུང་ངོ༌། །འདི་ནི་ཞིང་ཁམས་རྣམ་པར་དག་པར་བྱེད་པ་དང༌། རྣམ་པར་ཐར་བ་མཐའ་ཡས་པ་དེ་ལྟ་བུ་ཐོབ་པར་བྱ་བའི་ཕྱིར། རྗེས་འཇུག་རྣམས་ཀྱིས་ཀྱང་སྨོན་ལམ་འདི་ལྟ་བུ་གདབ་དགོས་སོ་ཞེས་པ་དང༌། འདིའི་དོན་བཞིན་དུ་བྱང་ཆུབ་སེམས་དཔའི་སྤྱད་པ་སྤྱོད་པ་དེ་ནི། རྣམ་པར་ཐར་བ་འདི་ལ་གདོན་མི་ཟ་བར་འཇུག་པར་འགྱུར་རོ། །ཞེས་གོ་བར་བྱ་བའི་ཕྱིར་ཏེ། དེ་ཡང་བསྐལ་པ་དང་བསྐལ་པ་ཞེས་ལན་གཉིས་ཟློས་པ་ནི། མང་པོའི་སྒྲ་ཡིན་ལ། བསྐལ་པ་དེ་ཙམ་དུ་ཕྱོགས་བཅུའི་ཞིང་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་གྱི་གྲངས་དང་མཉམ་པ་རྣམས་རེ་རེ་བཞིན་ཡང་བསྐལ་པ་རྒྱ་མཚོ་འབྱམས་ཀླས་པའི་བར་དུ་ཆགས་འཇིག་གི་རིམ་པས་སྤེལ་ཞིང་བརྒྱུད་ནས་བྱུང་བ། དེ་ཙམ་གྱི་ཞིང་ཁམས་ཐམས་ཅད་ཡོངས་སུ་སྦྱོང་བ་དང༌། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་དུ། དེ་ཐམས་ཅད་སྟོང་པ་ཉིད་དང་སྙིང་རྗེ་དང་ཐབས་ལ་མཁས་པའི་ཡེ་ཤེས་གཅིག་གི་ངོ་བོར་བློས་


TNT17_Page_0792
[མ་དཔེ་གཟིགས་ན་འདིར་གནོན།]

ཡང་ཡང་བསྡོམས་པ་ན་སྦྱངས་མིན་ལེགས་པར་གྲུབ་ཅིང་ཞིང་ཁམས་ལ་དབང་འབྱོར་བ་ཐོབ་པ་ནི་བརྣན་ཏེ་ཞེས་པའི་དོན་ཡིན་ནོ། །འདི་ལ་ཀུན་ཏུ་བཟང་པོའི་སྨོན་ལམ་ཞེས་བྱ་བ་ནི། བྱང་ཆུབ་སེམས་དཔའ་ཀུན་ཏུ་བཟང་པོས་གསུངས་བའམ། བདག་གཞན་གྱི་དོན་ཕུན་སུམ་ཚོགས་པ་ཐོབ་པས་ཀུན་ཏུ་མཛེས་པ་དང༌། སྐྱོན་ཐམས་ཅད་བྲལ་བས་ཀུན་ཏུ་ཀུན་ནས་བཟང་པའི་ཕྱིར་སངས་རྒྱས་དང༌། བྱང་ཆུས་སེམས་དཔའ་ཐམས་ཅད་ཀྱི་སྤྱི་མིང་ཡིན་ལ། སྨོན་ལམ་འདི་ལ་ཡང་བྱང་ཆུབ་ཀྱི་སྤྱོད་པ་ཐམས་ཅད་འདུས་པའི་ཕྱིར། སངས་རྒྱས་བྱང་སེམས་ཀུན་གྱི་སྨོན་ལམ་མོ། །ཡང་བཟང་པོ་སྤྱོད་པ་ཞེས་བྱ་བ་ནི་ཀུན་ཏུ་བཟང་པོ་སྤྱོད་པའི་དབང་དུ་བྱས་པ་དང༌། ཡང་ན་བཟང་པོ་ཡང་ཡིན་ལ་སྤྱོད་པ་ཡང་ཡིན་པ་ནི་བཟང་པོ་སྤྱོད་པ་སྟེ། བྱང་ཆུབ་སེམས་དཔའི་སྤྱོད་པ། ཐོག་མར་ཐོས་པའི་དུས་ན་དགེ། བར་དུ་བསམ་བསྒོམ་གྱི་དུས་ནའང་དགེ། མཐར་འབྲས་བུ་སངས་རྒྱས་པའི་དུས་ནའང་དགེ་བའོ། །འདི་ནི་བྱང་ཆུབ་སེམས་དཔའ་གཞོན་ནུའི་ས་པ་སྟེ། རྫི་བོ་ལྟ་བུར་སེམས་བསྐྱེད་པའི་སྨོན་ལམ་ཞེས་ཀྱང་ཟེར་རོ། །གཞུང་དངོས་བཤད་པ་ལ། དཔལ་ཕྱོགས་ཀྱི་གླང་པོའི་འགྲེལ་པ་ལས་ཡན་ལག་བདུན་པོ་རེ་རེ་ནས་བགྲང་བ་དང༌། བསྔོ་བའི་རབ་དབྱེ་དང༌། དེའི་མཐའ་དང༌། ཕན་ཡོན་ཏེ་དོན་གྱི་རྣམ་གྲངས་བཅུའི་བསྡུས་དོན་མཛད་དོ། །འདིར་འདི་སྐད་ཅེས་བྱས་ན་བཟུང་སླ་བར་འགྱུར་རོ། །རྒྱུད་དག་པར་བྱ་བ་ཡན་ལག་བདུན་པ། དངོས་གཞི་སྨོན་ལམ་གྱི་


TNT17_Page_0793
[མ་དཔེ་གཟིགས་ན་འདིར་གནོན།]

རབ་དབྱེ། སྨོན་ལམ་གྱི་མཐའ་དང་ཕན་ཡོན་བསྟན་པ། ཕན་ཡོན་ཅན་གྱི་སྨོན་ལམ་ཉིད་བསྔོ་བ་སྟེ་དོན་བཞི་ལས། དང་པོ་ལ། ཕྱག་འཚལ་བ་དང༌། མཆོད་པ་བྱ་བ་དང༌། ཉེས་པ་བཤགས་པ་དང༌། བསོད་ནམས་ལ་ཡི་རངས་བ་དང༌། ཆོས་འཁོར་བསྐོར་བ་དང༌། བཞུགས་སུ་གསོལ་བ་དང༌། དགེ་བ་བསྔོ་བ་སྟེ་བདུན་ནོ། །དང་པོ་ཕྱག་འཚལ་བ་ལ། མདོར་བསྟན་པ་ནི། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་གང༌། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །ཕྱོགས་བཅུའི་འཇིག་རྟེན་ཇི་སྙེད་ན་སུ་དག་བཞུགས་པ་ཞེས་སྦྱར་ཏེ། འཇིག་རྟེན་ཁམས་གཅིག་གམ། བཅུ་ལ་སོགས་པའི་གྲངས་ཚད་ཅན་མ་ཡིན་པར། ཕྱོགས་བཅུའི་མཐའ་ཡས་པ་ན་བཞུགས་པ་ལ་ཕྱག་འཚལ་ལོ། །དེ་ཡང་ད་ལྟར་བཞུགས་པ་ཁོ་ནར་མ་ཟད་ཀྱི། དུས་གསུམ་དུ་གཤེགས་པ་སྟེ། གཤེགས་པའི་དོན་བྱུང་བ་ཡིན་པས། སྔར་བྱུང་ཟིན་པ་དང༌། ད་ལྟར་བྱུང་བ་དང༌། མ་འོངས་པ་འབྱུང་འགྱུར་ཐམས་ཅད་ལ་ཕྱག་འཚལ་ལོ། །སུ་ཞིག་གིས་ཕྱག་འཚལ་ཞེ་ན། བདག་གིས་སོ། །ཕྱོགས་བཅུ་དུས་གསུམ་གྱི་ཁྱད་པར་དང་ལྡན་པ་སུ་ལ་ཕྱག་འཚལ་ཞེ་ན། མིའི་སེང་གེ་ནི་སངས་རྒྱས། ཀུན་ཏེ་མང་པོ། མ་ལུས་པ་སྟེ་མཐའ་དག་གོ །དེ་དག་ཐམས་ཅད་ལ་ཕྱག་འཚལ་ལོ། །


TNT17_Page_0794
[མ་དཔེ་གཟིགས་ན་འདིར་གནོན།]

ཚུལ་ཇི་ལྟར་ཕྱག་འཚལ་ན། གཞན་གྱིས་བསྐུལ་བ་སོགས་མ་ཡིན་པར། རབ་ཏུ་དང་བ་སྟེ་དང་བ་ཆེན་པོའི་སྒོ་ནས་ལུས་དང་ངག་དང་ཡིད་གསུམ་ཅར་གྱི་ཕྱག་བགྱིའོ། །ཞེས་པའོ། །ཅིའི་ཕྱིར་སངས་རྒྱས་ལ་མི་ཡི་སེང་གེ་ཞེས་བྱ་ན། སེང་གེ་ནི་རི་དྭགས་ཐམས་ཅད་ཟིལ་གྱིས་གནོན་ཅིང་བག་ཚ་བ་མེད་པ་ལྟར་མིའི་སྐྱེ་བར་ཡང་སྟོན་ལ། བདུད་དང་ཕྱིར་རྒོལ་བ་སོགས། ལྷ་མི་ཐམས་ཅད་ཟིལ་གྱིས་གནོན་ཅིང༌། རང་གི་སྐུ་དང་གསུང་དང་ཐུགས་དང་འཕྲིན་ལས་བྱ་བ་ལ་བག་ཚ་བ་མེད་པའོ། །མང་པོ་ལ་ཕྱག་འཚལ་བའི་དགོས་པ་ཅི་སྙམ་ན། སངས་རྒྱས་གཅིག་ལ་ཕྱག་བྱས་པའི་བསོད་ནམས་ཡང་མཐའ་ཡས་ན་སངས་རྒྱས་མཐའ་ཡས་པ་ལ་ཕྱག་འཚལ་བའི་བསོད་ནམས་གཞལ་དུ་མེད་པ་ལས་ཀྱང་ཆེས་གཞལ་དུ་མེད་པའོ། །རྒྱས་བཤད་ལ་གསུམ་ལས་ལུས་ཀྱི་ཕྱག་འཚལ་བ་ནི། བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །བཟང་པོ་སྤྱོད་པའི་སྨོན་ལམ་ནི། བཟང་པོ་སྤྱོད་པ་ལ་སྨོན་པ་སྟེ། སྤྱོད་པ་དེ་ལ་འདུན་པའི་སྟོབས་དག་གིས། རྒྱལ་བ་སྟེ་སངས་རྒྱས་མངོན་སུམ་དུ་མཐོང་བར་ནུས་ཀྱང་རུང་མི་མཐོང་ན་ཡང་སྟེ། ཕྱོགས་བཅུའི་རྒྱལ་བ་མ་ལུས་ཐམས་ཅད་ཡིད་ཀྱིས་མོས་པས་མངོན་སུམ་དུ་དམིགས་ཏེ། དེ་རེ་རེའི་སྐུ་མདུན་དུ་ཡང་རང་གི་ལུས་ཞིང་སྟེ་འཇིག་རྟེན་གྱི་ཁམས་ཀྱི་རྡུལ་ཇི་སྙེད་ཡོད་པ་དེ་སྙེད་དུ་སྤྲུལ་ཏེ། ལུས་དེ་དག་ཐམས་ཅད་རབ་ཏུ་བཏུད་པ་སྟེ།


TNT17_Page_0795
[མ་དཔེ་གཟིགས་ན་འདིར་གནོན།]

ཐལ་མོ་སྦྱར་ཞིང་ཡན་ལག་ལྔ་ས་ལ་གཏུགས་པ་ཡིས། རྒྱལ་བ་སངས་རྒྱས་ཀུན་ལ་རབ་ཏུའམ་ཤིན་ཏུ་སྟེ། དུས་མཐའ་ཡས་པར་ཡང་ནས་ཡང་དུའམ་རྟག་ཏུ་ཕྱག་འཚལ་ལོ། །སངས་རྒྱས་རྣམས་ལ་ཅིའི་ཕྱིར་རྒྱལ་བ་ཞེས་བྱ་ན། མདོ་ལས། སྡིག་པ་མི་དགེའི་ཆོས་ལས་ང་བརྒྱལ་ཏེ། །དེ་ཕྱིར་ཉེར་འགྲོ་ང་ནི་རྒྱལ་བ་ཡིན། །ཅེས་སོ། །ལུས་མང་པོས་ཕྱག་འཚལ་བར་མོས་པའི་དགོས་པ་ཡང༌། ལས་གཅིག་ཏུ་འདུ་ཤེས་པས་ཕྱག་བཙལ་བ་ཡང་ཕན་ཡོན་ཆེ་ན། མཐའ་ཡས་པར་མོས་པས་ལྟ་ཅི་སྨོས་པའོ། །གཉིས་པ་ཡིད་ཀྱི་ཕྱག་འཚལ་བ་ནི། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། རྡུལ་ཕྲ་རབ་གཅིག་གི་སྟེང་སྟེ་གོ་ས་ན་ཡང༌། སངས་རྒྱས་ཀྱི་ཞིང་མ་ལུས་པའི་རྡུལ་གྱི་གྲངས་ཇི་སྙེད་པ་དེ་སྙེད་དང་མཉམ་པའི་སངས་རྒྱས་རྣམས་བཞུགས་པ་དང༌། དེ་ཡང་གཅིར་བ་དང་དོག་པ་མ་ཡིན་པར། སངས་རྒྱས་རྣམས་ཀྱང་རང་གི་སྲས་ཏེ་བྱང་ཆུབ་སེམས་དཔའི་འཁོར་གྱིས་བསྐོར་བ། མཆོད་པའི་བཀོད་པ་སོགས་དཔག་ཏུ་མེད་པ་དང་བཅས་ཏེ། ཞིང་ཁམས་ཀྱི་དབུས་ན་བཞུགས་པ་དག་ཡིན་ལ། རྡུལ་གཅིག་ན་ཡོད་པ་དེ་བཞིན་དུ། ཆོས་ཀྱི་དབྱིངས་རྣམས་མ་ལུས་པ་སྟེ། ཆོས་ཀྱི་དབྱིངས་ཀྱིས་ཇི་ལྟར་ཁྱབ་པ་དེ་ལྟར་རྡུལ་གྱིས་ཁྱབ་པ་ཐམས་ཅད་དུ་ཡང༌།


TNT17_Page_0796
[མ་དཔེ་གཟིགས་ན་འདིར་གནོན།]

ཕྱོགས་ཐམས་ཅད་རྒྱལ་བ་མང་པོ་དག་གིས་གང་བར་མོས་ཏེ། དེ་དག་ལ་ཡིད་ཀྱིས་དད་པ་བླ་ན་མེད་པ་སྒོམ་མོ། །དེ་ལ་སངས་རྒྱས་ཞེས་པ་ནི། མ་རིགས་པ་ཐམས་ཅད་སངས་ཤིང་མཁྱེན་པ་ཐམས་ཅད་རྒྱས་པའོ། །བྱང་ཆུབ་སེམས་དཔའ་ལ་སྲས་ཞེས་བྱ་བ་ནི། ཆོས་ལས་སྐྱེས་པའི་སྲས་སོ། །དེ་ནི་སེམས་དང་པོ་བསྐྱེད་པ་ཡན་ཆད་ཀྱང་ཡིན་ལ། ཡང་ན་འཕགས་པ་ས་བཅུ་པའི་མདོ་ལས། ས་དང་པོ་ཐོབ་པའི་བྱང་ཆུབ་སེམས་དཔའ་རྣམས་ནི། དེ་བཞིན་གཤེགས་པའི་རིགས་སུ་སྐྱེས་པ་ཡིན་ནོ། །ཞེས་གསུངས་པ་ལྟར། དེ་བཞིན་གཤེགས་པ་དང་སྐུ་གསུང་ཐུགས་རྣམ་པ་འདྲ་བར་གྱུར་པའི་དོན་ནོ། །རྡུལ་གཅིག་ཏུ་སངས་རྒྱས་མང་པོ་བཞུགས་པ་སོགས་ནི། རྣལ་འབྱོར་པའི་ཏིང་ངེ་འཛིན་གྱི་སྤྱོད་ཡུལ་གྱི་རྡུལ་ལ་དེ་ལྟར་སྣང་བ་དང༌། ལས་དང་པོ་པས་ནི་མོས་པ་ཡིད་བྱེད་ཁོ་ནར་ཟད་དོ། །སངས་རྒྱས་རྣམས་ཀྱི་ཡེ་ཤེས་ཀྱི་སྤྱོད་ཡུལ་ཡང་དེ་དང་འདྲ་མོད་ཀྱི། ཡེ་ཤེས་ཀྱི་སྣང་བ་ཁོ་ན་ཡིན་པས། ཕྱི་རོལ་གྱི་རྡུལ་ལམ། ཏིང་ངེ་འཛིན་གྱི་སྤྱོད་ཡུལ་ཙམ་ལ་གནས་ཤིང་མི་སྤྱོད་དེ། རྡུལ་དང་སྤྱོད་ཡུལ་དེ་དག་ནི་དོན་དམ་པའི་ཡེ་ཤེས་ཀྱི་ངོར་མེད་པའི་ཕྱིར་རོ། །ཆོས་ཀྱི་དབྱིངས་ཀྱིས་ཁྱབ་ཚད་དུ་འཇོག་པ་ནི། ཆོས་ཀྱི་དབྱིངས་ཀྱིས་མ་ཁྱབ་པ་མི་སྲིད་པའི་དོན་ཏེ། ནམ་མཁས་གར་ཁྱབ་ཏུ་དེ་ལྟར་སྣང་བ་ཡིན་མོད། དེ་ཡང་ཀུན་ཏུ་བཟང་པོའི་སྨོན་ལམ་འདི། ཡོངས་སུ་གྲུབ་པའི་བྱང་ཆུབ་སེམས་དཔའ་ལ་སྣང་བ་ནི་ཡིན་ལ། སྨོན་ལམ་དེ་ཡང་ས་དང་པོ་ནས་དངོས་སུའམ་རབ་ཏུ་སྒྲུབ་


TNT17_Page_0797
[མ་དཔེ་གཟིགས་ན་འདིར་གནོན།]

ཅིང༌། ས་བརྒྱད་པ་ནས་ནི་ལེགས་པར་གྲུབ་པ་ཡིན་པར་ཤེས་སོ། །ཡང་ངེས་པའི་དོན་མཐར་ཐུག་པ་ན། ཡེ་ཤེས་ཉིད་ལ་ཆོས་ཀྱི་དབྱིངས་མ་ལུས་པ་ཐམས་ཅད་དེ་བཞིན་གཤེགས་པའི་དཀྱིལ་འཁོར་དུ་མངོན་སུམ་དུ་སྣང་བ་ཡིན་ཏེ། དེ་ལྟར་ན་འདི་ནི་བདེ་གཤེགས་སྙིང་པོ་མཁའ་མཉམ་ཡིན་པས། ས་བཅུ་པ་ཐོབ་པ་ཡན་ཆད་ཀྱི་སྤྱོད་ཡུལ་ཡིན་ཏེ། དེ་མན་ཆད་ཀྱི་བྱང་ཆུབ་སེམས་དཔའ་ལ་ནི་མོས་པའི་ཡུལ་དུ་བྱ་བ་ཙམ་མོ། །འོན་ཀྱང་ལས་དང་པོ་པས། དེ་ལྟ་བུ་ལ་དད་པར་བྱས་པས་འབྲས་བུ་མཐའ་ཡས་པ་ནི་འབྱུང་ངོ༌། །གསུམ་པ་ངག་གི་ཕྱག་འཚལ་བ་ནི། དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང༌། །བདེ་བར་གཤེགས་པ་ཐམས་ཅད་བདག་གིས་བསྟོད། །མཐའ་ཡས་པའི་སངས་རྒྱས་དེ་དག་བསྟོད་པར་བགྱི་ཞེས་པ་ནི། གཉིས་པའི་དོན་ལ་དང་པོ་སྟེ་དེ་དག་ལ་བསྟོད་པར་བགྱི་བའོ། །ཡིད་ཀྱི་ཡུལ་དུ་ཇི་ལྟར་བྱས་པའི་སངས་རྒྱས་དེ་དག་ལ། བསྟོད་ཅིང་བསྔགས་པ་ཡོན་ཏན་རྒྱ་མཚོ་ཟད་མི་ཤེས་པ་རྣམས་བརྗོད་པའི་སྒོ་ཐམས་ཅད་ནས་བསྟོད་པའི་ཚུལ་ཡང་མི་ཟད་པ་རྒྱ་མཚོ་ལྟ་བུ་རྣམས། ངག་གིས་བརྗོད་ཚུལ་ཕུན་སུམ་ཚོགས་པ་དབྱིངས་ཀྱི་ཡན་ལག་ལྔ་ལ་སོགས་པ་ཡན་ལག་སྟེ་སྙན་པ་ལ་སོགས་པའི་ཁྱད་པར་མཐའ་ཡས་པ་རྒྱ་མཚོ་ལྟ་བུའི་སྒྲ་སྐད་དེ་ལྷ་མོ་དབྱངས་ཅན་མའི་ངག་བཞིན་ནོ། །དེ་ལྟ་བུའི་སྒོ་ནས་རྒྱལ་བ་ཐམས་ཅད་ཀུན་གྱི་


TNT17_Page_0798
[མ་དཔེ་གཟིགས་ན་འདིར་གནོན།]

ཡོན་ཏན་རབ་ཏུ་བརྗོད་ཅིང་སྟེ་བརྗོད་པའི་ཚུལ་གྱིས། བདེ་བར་གཤེགས་པ་དེ་དག་ཐམས་ཅད་ལ་བདག་གིས་བསྟོད་པར་བགྱིའོ། །དེ་ཡང་ཆོས་དབྱིངས་དང་མཉམ་པའི་སངས་རྒྱས་རེ་རེའི་དྲུང་དུ། ལུས་ཞིང་གི་རྡུལ་སྙེད་དུ་སྤྲུལ་པ་དང༌། ལུས་དེ་ལྟ་བུས་སངས་རྒྱས་རེ་རེའི་ཞབས་ལ་འདུད་ཅིང༌། ལུས་རེ་རེ་ལ་ཡང་མགོ་དེ་སྙེད་དང༌། མགོ་བོ་རེ་རེ་ལ་ཡང་ལྕེའི་རྩེ་མོ་དེ་སྙེད་དང༌། ལྕེ་དེ་སྙེད་ལས་ཀྱང་བསྟོད་དབྱངས་དེ་སྙེད་འབྱུང་བར་མོས་པའོ། །ཡང་བཤད་པའི་རྣམ་གྲངས་གཞན་རྒྱ་མཚོ་ཞེས་སྨོས་པ་རྣམས། རྒྱ་མཚོ་ལྟ་བུའི་དཔེ་དོན་དུ་མི་སྦྱོར་བར། གྲངས་ཀྱི་གནས་རྒྱ་མཚོ་ཞེས་བྱ་བ་རྒྱ་སྐད་ས་མུ་དྲིའི་སྒྲ་ལས། སྔོན་གྱི་ལོ་ཙཱ་བ་བྱང་ཆུབ་སེམས་དཔའ་རྣམས་ཀྱིས་མཚོ་ཡས་སུ་བསྒྱུར་པ་དེའོ། །དེ་ནི་གཅིག་བཅུ་བརྒྱ་སྟོང་ཁྲི་འབུམ་ས་ཡ་བྱེ་བ་དུང་ཕྱུར་ཐེར་འབུམ་རྣམས་དང༌། ཤྭ་རྔོག་དང་མཆོག་ཉལ་དང༌། རྐྱང་འཕྱེས་དང༌། བྱེ་བ་ནབ་ནུབ་དང༌། མཚོ་ཡས་ཞེས་འཇིག་རྟེན་ཏུ་བགྲངས་པ་ལྟར་ཡིན་ནོ། །ཞེས་ཀྱང་བཤད་དེ་འོན་ཀྱང་དཔེ་དོན་དུ་སྦྱོར་བ་ཁོ་ན་འཐད་དོ། །གཉིས་པ་ལ་བླ་ན་ཡོད་པའི་མཆོད་པ་དང༌། བླ་ན་མེད་པའི་མཆོད་པའོ། །དང་པོ་ནི། མེ་ཏོག་དམ་པ་ཕྲེང་བ་དམ་པ་དང༌། །སིལ་སྙན་རྣམས་དང་བྱུག་པ་གདུགས་མཆོག་དང༌། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང༌། །ཕྱེ་མའི་ཕུར་མ་རི་རབ་མཉམ་པ་དང༌། །བཀོད་པས་ཁྱད་པར་འཕགས་པའི་མཆོག་ཀུན་གྱིས། །


TNT17_Page_0799
[མ་དཔེ་གཟིགས་ན་འདིར་གནོན།]

རྒྱལ་བ་དེ་དག་ལ་ཡང་མཆོད་པར་བགྱི། །དེ་ལ་དམ་པ་ཞེས་པ་རྣམས་དང༌། མཆོག་ཅེས་པ་རྣམས་ཀྱིས་དོན་ནི། བཟང་པོའི་དོན་ཏེ། དངོས་པོ་དེ་དང་དེ་ཡང་རྒྱུ་བཟང་བ། ཁ་དོག་དང་དབྱིབས་མཛེས་པ། གཞན་ཡང་སྒྲ་དྲི་རོ་རེག་ཕུན་སུམ་ཚོགས་པ་དང་བཀོད་པ་ལེགས་པ་ལ་སོགས་པའོ། །དེས་ན་སྣ་ཚོགས་པའི་མེ་ཏོག་བཟང་པོ་དང༌། རིན་པོ་ཆེ་དང་མེ་ཏོག་གི་དྲ་བ་སོགས་ཕྲེང་བ་དམ་པ་དང༌། སིལ་སྙན་ཏེ་རོལ་མོའི་བྱེ་བྲག་རྒྱུད་ཅན་དང༌། འབུད་དཀྲོལ་དང་བརྡུང་བྱ་སྣ་ཚོགས་པ་སྒྲ་སྙན་པ་རྣམས་དང༌། དྲི་ཞིམ་པོའི་བྱུག་པ་རྣམས་དང༌། གདུགས་མཆོག་ལ་སོགས་པ་བ་དན་དང༌། རྒྱལ་མཚན་དང༌། ལྡ་ལྡི་ལ་སོགས་པའོ། །མར་མེ་ལ་སོགས་པ་སྣང་གསལ་གྱི་མཆོག་མཐའ་ཡས་པ་དང༌། སྦྱར་བ་དང་མ་སྦྱར་བའི་དྲི་ཞིམ་པོ་སྲེག་པའི་བདུག་སྤོས་དམ་པ་རྣམས་ཀྱིས། གང་མངོན་སུམ་དང་ཡིད་ཀྱི་སྤྱོད་ཡུལ་དུ་དམིགས་པའི་རྒྱལ་བ་དེ་དག་ལ་ནི་ཉིན་རེ་བཞིན་དུ་ཡང་མཆོད་པར་བགྱིའོ། །བར་འདིར་རྒྱ་དཔེ་འགའ་ཞིག་ལས་བྱུང་བ། ཕྱིས་ཀྱི་ལོ་ཙཱ་བ་ཁ་ཅིག་གིས་བསྒྱུར་བ་ན། རིན་ཆེན་མཆོག་དང་དོ་ཤལ་མཆོག་རྣམས་དང༌། །རྣམ་བཀྲ་ལྷ་རྫས་བླ་རེ་མཆོག་རྣམས་དང༌། །རྒྱལ་མཚན་མཆོག་དང་བ་དན་མཆོག་ཀུན་གྱིས། །རྒྱལ་བ་དེ་དག་ལ་ཡང་མཆོད་པར་བགྱི། །ཞེས་པ་ཡང་སྣང་བ་སྔོན་གྱི་འགྲེལ་པ་རྣམས་ལས་མི་འབྱུང་ཞིང༌། བོད་དཔེ་རྙིང་པ་ཀུན་ལ་ཡང་མེད་ལ། དེང་སང་སུ་


TNT17_Page_0800
[མ་དཔེ་གཟིགས་ན་འདིར་གནོན།]

ཡང་མི་འདོན་པའི་ཕྱིར་འདིར་ཡང་བཤད་པ་མ་བྲིས་ཏེ་གོ་ནི་སླའོ། །ལྷ་དང་མི་ལས་བྱུང་བའི་ན་བཟའ་དམ་པ་རྣམས་དང༌། ཆག་ཆག་གིས་བཏབ་པ་དང༌། མཆོད་ཡོན་དང༌། གོང་བུའི་རྫས་དྲི་ཞིམ་མཆོག་རྣམས་དང༌། དྲི་བཟང་གི་བྱེ་མའི་ཕུར་མ་ཏེ་ཐུམ་པོར་བྱས་པ་རྣམས་པ་སྣ་ཚོགས་སྤུངས་པའི་ཕུང་པོ་རི་རབ་དང་མཉམ་པ་དང་མཆོད་པ་དེ་དག་ཐམས་ཅད་ཀྱང་བཀོད་པ་མཛེས་པས་ཁྱད་པར་དུ་འཕགས་པའི་མཆོག་ཀུན་གྱིས། རྒྱལ་བ་དེ་དག་ལ་ནི་མཆོད་པར་བགྱིའོ། །དངོས་སུ་སྨོས་པ་དེ་དག་ནི་མཚོན་པ་ཙམ་ཏེ། འཇིག་རྟེན་དུ་ཇི་ཙམ་ཡོད་པ་དེ་ཙམ་དུ་མཆོད་པ་བཟང་པ་དང་བཀོད་པ་ལེགས་པ་ཐམས་ཅད། དངོས་སུ་བཤམས་པ་དང་ཡིད་ཀྱིས་སྤྲུལ་པའི་ཚུལ་གྱིས་འབུལ་བ་ཡིན་ནོ། །གཉིས་པ་བླ་ན་མེད་པའི་མཆོད་པ་ནི། མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །མཆོད་པ་གང་བགྱིས་པ་རྣམས་བླ་ན་མེད་པ་སྟེ་ལྷའི་འཇིག་རྟེན་མན་ཆད་ན། དེ་བས་ལྷག་པ་ལྟ་ཅི་སྨོས། དེ་དང་མཉམ་པ་འགའ་ཡང་མེད་པ་སྟེ། བྱང་ཆུབ་སེམས་དཔའ་མཐུ་ཐོབ་པ་རྣམས་ཀྱིས་བྱས་པའི་མཆོད་པའོ། །དེ་ཡང༌། སངས་རྒྱས་ཀྱི་ཞིང་ཁམས་ཐམས་ཅད་རྒྱས་པར་འགེངས་པས་རྒྱ་ཆེ་བ་ཡིན་ལ། མཆོད་པ་དེ་དག་གོང་དུ་སྨོས་པའི་རྒྱལ་བ་ཐམས་ཅད་ལ་ཡང༌། ལྷག་པར་མོས་པ་བླ་ན་མེད་པའི་དད་པ་དང༌། བཟང་པོ་སྤྱོད་པ་


TNT17_Page_0801
[མ་དཔེ་གཟིགས་ན་འདིར་གནོན།]

ལ་ཕན་ཡོན་དཔག་ཏུ་མེད་པ་ཞིག་ཡོད་པར་ཡིད་ཆེས་པའི་དད་པ་སྟོབས་ཀྱིས་ཀུན་ནས་བླངས་པས། རྒྱལ་བ་ཀུན་ལ་ཕྱག་འཚལ་ཞིང་མཆོད་པར་བགྱིའོ། །དེ་ལྟར་ན་ཕྱག་འཚལ་བའི་ཚུལ་བསམ་གྱིས་མི་ཁྱབ་པ་དང༌། བླ་ན་མེད་པའི་མཆོད་པ་འདི་དག དངོས་སུ་སྒྲུབ་མི་ནུས་པས་ནི་མོས་པས་སྒྲུབ་པ་དང༌། མ་འོང་པ་ན་དེ་ལྟ་བུ་འགྲུབ་པར་སྨོན་ལམ་འདེབས་པ་ཉིད་དོན་གྱི་གཙོ་བོ་ཡིན་ཏེ། བཟང་པོ་སྤྱོད་པའི་སྨོན་ལམ་སྟོབས་དག་གིས། །ཞེས་དང༌། བཟང་པོ་སྤྱོད་ལ་དད་པའི་སྟོབས་དག་གིས། །ཞེས་གསུངས་པའི་དོན་ཡང་ཡིན་ནོ། །ཡང་མདོ་ལས། ཚངས་པ་གསུམ་པོ་འདི་དག་ནི་དེ་བཞིན་གཤེགས་པ་ལ་མཆོད་པ་དང་རིམ་གྲོ་བྱ་བ་བླ་ན་མེད་པའོ། །མཆོད་པའི་ལས་བླ་ན་མེད་པའི་བསོད་ནམས་ཚད་མེད་པ་འབྱུང་ངོ༌། །གསུམ་གང་ཞེ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང༌། དེ་བཞིན་གཤེགས་པ་རྣམས་ཀྱི་ཆོས་འཛིན་པ་དང༌། ཇི་ལྟར་ཐོས་པའི་ཆོས་རྣམས་དེ་བཞིན་དུ་སྒྲུབ་པའོ། །ཞེས་བླ་ན་མེད་པའི་མཆོད་པ་དེ་གསུམ་དུ་བཤད་ལ། འདིར་ཡང་སངས་རྒྱས་ལ་མོས་པ་དང༌། བཟང་པོའི་སྤྱོད་པ་ལ་དད་པ་གཉིས་བླ་ན་མེད་པའི་མཆོད་པའི་ཁྱད་ཆོས་སུ་བཤད་དེ། གནད་གཅིག་གོ ། གསུམ་པ་ནི། འདོད་ཆགས་ཞེ་སྡང་གཏི་མུག་དབང་གིས་ན། །ལུས་དང་ངག་དང་དེ་བཞིན་ཡིད་ཀྱིས་ཀྱང༌། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་


TNT17_Page_0802
[མ་དཔེ་གཟིགས་ན་འདིར་གནོན།]

ཅད་བདག་གིས་སོ་སོར་བཤགས། །དེ་ལ་ཉེས་པའི་རྒྱུ་ནི་དུག་གསུམ་སྟེ། འདོད་ཆགས་དང་ཞེ་སྡང་དང་གཏི་མུག་གིས་ཀུན་ནས་བླངས་པའི་དབང་གིས་ནའོ། །ཉེས་པའི་གཞི་ནི་ལུས་དང་ངག་དང་དེ་བཞིན་དུ་ཡིད་ཀྱིས་ཀྱང་བགྱིས་པ་སྟེ། སྲོག་གཅོད་པ་ལ་སོགས་པ་ནི་ལུས་ཀྱིས་སོ། །རྫུན་ལ་སོགས་པ་ནི་ངག་གིས་སོ། །གནོད་སེམས་ལ་སོགས་པ་ནི་ཡིད་ཀྱིས་སོ། །བྱེད་པ་པོ་ནི་བདག་གིས་བགྱིས་པ་ཞེས་པའོ། །བཤགས་པ་དངོས་ནི། དེ་ལྟ་བུའི་སྡིག་པ་ཅི་མཆིས་པ་སྟེ་གང་ཡོད་པ་དེ་དག་ཐམས་ཅད་བདག་གིས་སོ་སོར་བཤགས་པར་བགྱིའོ། །སུ་ཞིག་གི་སྤྱན་སྔར་ཞེ་ན། རྡུལ་གཅིག་སྟེང་ན་ཞེས་སོགས་སུ་ཇི་སྐད་བསྟན་པ་ལྟར། སངས་རྒྱས་སྲས་བཅས་མཐའ་ཡས་པ་རྣམས་ཀྱི་སྤྱན་སྔར་རོ། །དེ་ལ་མ་བཤགས་པའི་ཉེས་པ་ནི། སྔར་བྱས་ལ་འགྱོད་པ་མེད་པས། སྡིག་པ་ལ་རུང་བར་འཛིན་པ་ན། སྡིག་པའི་རྒྱུན་དེ་ཉིད་འཕེལ་བར་འགྱུར་ཞིང༌། ཕྱིན་ཆད་མི་སྡོམ་པས་ལས་ངན་པ་ཟད་པ་མེད་པར་འགྱུར་རོ། །དེ་ལས་ངན་སོང་དུ་བརྒྱུད་མར་འགྲོ་སྟེ་ཐར་པ་ལྟ་ཅི་སྨོས་མཐོ་རིས་ཀྱང་ཐོབ་པར་དཀའོ། །སྡིག་པ་བཤགས་པའི་ཕན་ཡོན་ནི། འགྱོད་ཅིང་བཤགས་པ་ཁོ་ནས་སྔར་གྱི་རྒྱུན་མི་འཕེལ་ཞིང་བྱང་བར་ཡང་འགྱུར་ལ། ཕྱིན་ཆད་འཛེམ་ཞིང་ཟློག་པས་མི་དགེ་བ་རྒྱུན་ཆད་དེ། ངན་འགྲོ་ལས་ཟློག་ཅིང་མཐོ་རིས་སུ་འགྱུར་བ་དང༌། དགེ་བའི་ས་བོན་བརྟས་ཏེ་ཐར་པ་དང་ཐམས་ཅད་མཁྱེན་པའི་རྒྱུར་ཡང་འགྱུར་རོ། །བཞི་པ་ནི། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །


TNT17_Page_0803
[མ་དཔེ་གཟིགས་ན་འདིར་གནོན།]

རང་རྒྱལ་རྣམས་དང་སློབ་དང་མི་སློབ་དང༌། །འགྲོ་བ་ཀུན་གྱི་བསོད་ནམས་གང་ལ་ཡང༌། །དེ་དག་ཀུན་གྱི་རྗེས་སུ་བདག་ཡི་རང༌། །ཕྱོགས་བཅུའི་འཇིག་རྟེན་གྱི་ཁམས་ན་རྒྱལ་བ་སངས་རྒྱས་ཀུན་དང༌། སངས་རྒྱས་ཀྱི་སྲས་བྱང་ཆུབ་སེམས་དཔའ་རྣམས་དང༌། རང་རྒྱལ་རྣམས་དང༌། ཉན་ཐོས་ལ། སློབ་པ་རྒྱུན་ཞུགས་དང༌། ཕྱིར་འོང་བ་དང༌། ཕྱིར་མི་འོང་གསུམ་དང༌། མི་སློབ་པ་དགྲ་བཅོམ་པ་དང༌། འགྲོ་བ་ནི་འགྲོ་བ་དྲུག་གི་སོ་སོ་སྐྱེ་བོ་རྣམས་ཀྱི། བསོད་ནམས་ཏེ། དགེ་བ་ཅི་དང་ཅི་བགྱིས་པ་གང་ལ་ཡང༌། དེ་དག་ཀུན་གྱི་རྗེས་སུ་བདག་ཡི་རང་བར་བགྱིའོ། །དེ་ལ་ཡི་རང་བ་ནི་རབ་ཏུ་དགའ་བ་ཡིན་ལ། རྗེས་སུ་ཞེས་པ་ནི་གང་དང་གང་གིས་བྱ་བ་བྱས་པའམ་འབྲས་བུ་ཐོབ་པའི་གནས་སྐབས་དེ་ལ། སླར་ཡང་དམིགས་ནས་འཇུག་པ་ནི། སྔར་སོང་པ་དེའི་རྗེས་སུ་ཞུགས་པ་ལྟ་བུ་ཡིན་པའི་ཕྱིར་རོ། །སྤྱིར་བསོད་ནམས་ཞེས་པ། བསོད་ནམས་དང་བསོད་ནམས་མ་ཡིན་པ་དང༌། མི་གཡོ་བའི་ལས་གསུམ་དུ་ཕྱེ་བའི་བསོད་ནམས་དང་ཡེ་ཤེས་ཀྱི་ཟླས་དྲངས་པའི་བསོད་ནམས་སོགས་ཡོད་ཀྱང༌། འདིར་ནི་དགེ་བའི་ཆོས་ཐམས་ཅད་དོ། །བཤགས་པ་དང་ཡི་རང་བ་འདི་དག་ལ། དགེ་བའམ་སྡིག་པ་རང་གི་བགྱིས་པ་དང༌། གཞན་བགྱིད་དུ་བརྩལ་བ་དང༌། གཞན་གྱིས་བྱ་བ་ལ་རྗེས་སུ་ཡི་རང་བ་དང༌། དེ་དང་དེའི་བསྔགས་པ་བརྗོད་ཅིང་བསྟོད་པ་རྣམས་ཀྱང༌། བཤགས་པ་དང་རྗེས་སུ་ཡི་རང་བར་བྱ་སྟེ། འོན་


TNT17_Page_0804
[མ་དཔེ་གཟིགས་ན་འདིར་གནོན།]

ཀྱང་བཤགས་བྱའི་སྡིག་པ་ནི་རང་གིས་བྱས་པ་གཙོ་བོ་ཡིན་ལ། ཡི་རང་གི་ཡུལ་ནི་གཙོ་བོར་གཞན་གྱི་དགེ་བའོ། །རང་གིས་བགྱིས་པའི་དགེ་བ་ལ་ཡང༌། འགྱོད་ན་དགེ་བ་མི་འཕེལ་ལ། ང་རྒྱལ་མེད་ཅིང་དགའ་བ་བསྒོམས་ན་དགེ་བ་འཕེལ་བར་འགྱུར་རོ། །གཞན་གྱི་དགེ་བ་ལ་རྗེས་སུ་ཡི་རང་བ་ནི། གཞན་གྱི་དགེ་བ་བྲི་བ་ཡང་མེད་ལ། རང་གི་རྩོལ་བ་མེད་ཅིང་མ་བྱས་ཀྱང༌། དགེ་བ་ཆེན་པོ་རྒྱུད་ལ་ཐོབ་པར་འགྱུར་བས། སྨད་དུ་བྱུང་བའི་དགེ་བ་ཡིན་ལ། བྱང་ཆུབ་སེམས་དཔའ་འཕགས་པ་ཆོས་ཀྱི་དབྱིངས་མངོན་སུམ་དུ་རྟོགས་ཤིང༌། ཇི་སྙེད་པ་ཐམས་ཅད་ལ་ཡང་གསལ་སྣང་ཐོབ་པ་དག་གིས་ནི། རང་གིས་དམིགས་པའི་ཡུལ་དུ་གསལ་བར་སྣང་བའི་འཇིག་རྟེན་གྱི་དགེ་བ་ཇི་ཙམ་པ་དེ་ཙམ་དེ་དང་དེ་ལ་ཡི་རང་བས་ཀྱང་ཐོབ་པར་འགྱུར་ཏེ། དཔེར་ན་སྟོང་སུམ་ཅུའི་འཇིག་རྟེན་གྱི་ཁམས་ཀྱི་སེམས་ཅན་རྣམས་ཀྱི་བསྐལ་པ་བརྒྱའི་བར་དུ་བྱས་པའི་དགེ་བ་རྣམས། །བྱང་ཆུབ་སེམས་དཔའ་འཕགས་གཅིག་གི་མངོན་ཤེས་ཀྱིས་ཐམས་ཅད་མ་འདྲེས་པར་གསལ་བ་སྣང་བར་མཐོང་ལ། དེ་ཐམས་ཅད་ལ་གཅིག་ཅར་དུ་དམིགས་པ་མེད་པའི་ཡི་རང་ཐུན་གཅིག་ཙམ་བསྒོམས་པས་ཀྱང༌། སེམས་ཅན་དེ་རྣམས་ཀྱིས་དུས་དེ་ཙམ་དུ་བསགས་པའི་དགེ་བ་དེ་སྙེད་ཅིག་ཡི་རང་དེའི་མཐུ་ལས་སྐད་ཅིག་དེ་ལ་བྱང་ཆུབ་སེམས་དཔའ་དེའི་རྒྱུད་ལ་ཐོབ་པར་འགྱུར་རོ། །དེ་བཞིན་དུ་མཐའ་མེད་པའི་བར་དུ་ཡང་སྦྱར་བར་བྱའོ། །དེ་ལ་འདོད་པའི་ཁམས་ཀྱི་སེམས་ཅན་ནི་མཉམ་པར་མ་བཞག་པ་ཡིན་ལ།


TNT17_Page_0805
[མ་དཔེ་གཟིགས་ན་འདིར་གནོན།]

གཟུགས་ཀྱི་ཁམས་པ་ནི་བསམ་གཏན་བཞིའི་ཏིང་ངེ་འཛིན་ལ་མཉམ་པར་བཞག་པ་དང༌། གཟུགས་མེད་ཁམས་པ་ཡང་གཟུགས་མེད་པའི་སྙོམས་འཇུག་གི་ཏིང་ངེ་འཛིན་ལ་མཉམ་པར་བཞག་པ་ཁོ་ནའོ། །ཉན་ཐོས་དང་རང་སངས་རྒྱས་ཀྱི་འཕགས་པ་ལྷག་བཅས་ཐམས་ཅད་ནི་ལུས་ཀྱི་རྟེན་ཁམས་གསུམ་དུ་གཏོགས་པ་ཡིན་མོད་ཀྱི། ཉན་རང་དགྲ་བཅོམ་པ་རྣམས་ཀྱི་སེམས་ཀྱི་རྟེན་ནི། ཁམས་གསུམ་ལས་འདས་པ་ཁོ་ན་ཡིན་ལ། སློབ་པ་རྣམས་ཀྱི་སེམས་ཀྱང༌། ཁམས་གསུམ་གྱི་སེམས་དང་བཅས་པ་ཡིན་གྱི། སེམས་རྒྱུད་གྱི་ངོ་བོ་གང་འཕགས་པའི་རྒྱུད་དུ་གྱུར་པའི་ཆ་དེ་ནི། ཁམས་གསུམ་ལས་འདས་པ་ཡིན་པར་ཤེས་པར་བྱའོ། །དགྲ་བཅོམ་པ་ལྷག་མེད་ཀྱི་ཡིད་ལུས་དང༌། ལྷག་བཅས་ཀྱི་དབང་པོའི་ལུས་དང༌། ཐེག་ཆེན་འཕགས་པ་རྣམས་ཀྱི་ནི། ལུས་ཀྱང་ཁམས་གསུམ་ལས་འདས་ན་སེམས་ལྟ་སྨོས་ཀྱང་ཅི་དགོས། །དེ་ལྟར་ན་ཁམས་གསུམ་དུ་གཏོགས་པའི་སོ་སོ་སྐྱེ་བོ་ལ་ཡང༌། ལམ་དུ་ཞུགས་པ་དང་མ་ཞུགས་པ་གཉིས་ཡོད་པ་ལས། འདིར་ལམ་ཞུགས་རྣམས་ནི། བྱང་ཆུབ་སེམས་དཔའ་དང་སློབ་པའི་ཁོངས་སུ་བསྡུས་ཏེ། འགྲོ་བ་ཀུན་ཅེས་པ་ནི་ལམ་དུ་མ་ཞུགས་པ་ཁོ་ནའི་དབང་དུ་བྱས་པའི་ཁམས་གསུམ་གྱི་སེམས་ཅན་ཐམས་ཅད་དོ། །ཉན་ཐོས་ཚོགས་ལམ་པ་དང་སྦྱོར་ལམ་པ་རྣམས་ནི། ཉན་ཐོས་འཕགས་པ་སློབ་པའི་རྒྱུ་ཉེ་བ་ཡིན་པས། དེའི་ཁོངས་སུ་གཏོགས་པར་དགོངས་ཏེ་མ་སྨོས་པ་དང༌། རང་རྒྱལ་གྱི་ཚོགས་ལམ་ལ་གནས་པ་ཡང་དེ་དང་འདྲ་ལ།


TNT17_Page_0806
[མ་དཔེ་གཟིགས་ན་འདིར་གནོན།]

སྦྱོར་ལམ་པ་དང་འཕགས་པ་སློབ་པའང་ཅུང་ཟད་ཡོད་མོད་ཀྱི། ཡུན་ཐུང་བར་དགོངས་ནས་སློབ་པ་ཟུར་དུ་མ་སྨོས་སོ། །དེ་ལ་གང་ཟག་གི་བདག་མེད་པ་གཙོ་བོར་གྱུར་པའི་བདེན་པ་བཞིའི་དོན་མངོན་སུམ་དུ་རྟོགས་པ་ནི་འཕགས་པ་ཡིན་ལ། མ་རྟོགས་པ་ནི་སོ་སོ་སྐྱེ་བོའོ། །ཉན་ཐོས་ཀྱི་ཚོགས་སྦྱོར་གྱི་རྟོགས་པ་སྔོན་དུ་སོང་ནས། བདེན་པ་བཞིའི་དོན་མངོན་སུམ་གྱིས་མཐོང་བས། ཁམས་གསུམ་དུ་གཏོག་པའི་ཉོན་མོངས་ཀྱི་ནང་ནས་ལྟ་བ་ངན་པ་དང་ཐེ་ཚོམ་ལ་སོགས་པ་མཐོང་སྤངས་ཀྱི་ཆར་གྱུར་པ་རྣམས་ནི་སྤངས་མོད་ཀྱང༌། སྤྱིར་ཁམས་གསུམ་དུ་གཏོགས་པའི་ཉོན་མོངས་མ་སྤངས་པ་དེ་ནི་རྒྱུན་དུ་ཞུགས་པ་ཞེས་བྱ་ལ། འདིས་མ་སྤངས་པའི་ཉོན་མོངས་དེ་དག་ལ། སྒོམ་པས་སྤང་བར་བྱ་བ་ཞེས་བྱ་ཞིང༌། དེའི་ནང་གི་འདོད་ཁམས་སུ་གཏོགས་པའི་ཉོན་མོངས་སུམ་གཉིས་ནི་སྤངས། སུམ་ཆ་ལུས་པ་ན་འཕགས་པ་ཕྱིར་འོང་ཞེས་བྱའོ། །འདོད་ཁམས་སུ་གཏོགས་པའི་ཉོན་མོངས་ཐམས་ཅད་སྤངས་པ་ན། འཕགས་པ་ཕྱིར་མི་འོང་བ་ཞེས་བྱའོ། །འདི་ལ་སྒོམ་སྤངས་སུ་གཏོགས་པ་གཟུགས་ཁམས་དང་གཟུགས་མེད་ཁམས་ཀྱི་ཉོན་མོངས་ཅི་ཡང་མ་སྤངས་པ་དང༌། ཅུང་ཟད་སྤངས་པ་ནས། ཕལ་ཆེར་སྤངས་པའི་བར་དུ་རྟོགས་པ་མཐོ་དམན་སྣ་ཚོགས་པ་ཡོད་དོ། །ཁམས་གསུམ་དུ་གཏོགས་པའི་ཉོན་མོངས་ཐམས་ཅད་སྤངས་པ་ནི་དགྲ་བཅོམ་པའོ། །དེ་ཡང་མྱུར་བ་སྲིད་པ་གསུམ་གྱིས་མཐར་ཞེས་པ་ལྟར། ཉུང་མཐའ་ཡང་སྐྱེ་བ་གསུམ་དུ་ཚོགས་བསགས་པ་ལས་འབྱུང་ལ། སྐྱེ་བ་གསུམ་


TNT17_Page_0807
[མ་དཔེ་གཟིགས་ན་འདིར་གནོན།]

ལ་ལམ་ལྔ་སྦྱོར་ཚུལ་བཤད་ཀྱང་མཐའ་གཅིག་ཏུ་མ་ངེས་སོ། །རྒྱུན་ཞུགས་སོགས་བཞི་པོ་དེ་གང་ཟག་གཅིག་གིས་རིམ་ཅན་ཁོ་ནར་མངོན་དུ་བྱེད་པའང་ཡོད། བར་བ་གཉིས་མེད་པར་སྒོམ་སྤང་ཁམས་གསུམ་གྱི་ཉོན་མོངས་རྣམས་ཆབ་གཅིག་ཏུ་སྤོང་པའི་རིགས་ཅན་ཐོགས་མཐའ་གཉིས་ཁོ་ན་མངོན་དུ་བྱེད་པའང་ཡོད། སོ་སོ་སྐྱེ་བོའི་དུས་ན་འཇིག་རྟེན་པའི་ལམ་གྱིས་བསམ་གཏན་གཟུགས་མེད་ཀྱི་ཏིང་ངེ་འཛིན་ཐོབ་པ་རྣམས་ནི། ནམ་བདེན་པ་མཐོང་བ་ན་ཕྱིར་མི་འོང་དུ་འགྱུར་བས་འབྲས་བུ་ཕྱི་མ་གཉིས་ཁོ་ན་མངོན་དུ་བྱེད་པ་སོགས་སྣ་ཚོགས་པ་ཡོད་དེ། དེ་དག་ནི་ཉན་ཐོས་འཕགས་པ་ཡིན་ནོ། །རང་རྒྱལ་ནི་བསྐལ་པ་བརྒྱར་ཚོགས་བསགས་པ་སྔོན་དུ་འགྲོ་བ་ཡིན་ཡང༌། གནས་སྐབས་དེ་དག་ཏུ་ཕལ་ཆེར་ཚོགས་ལམ་ལ་གནས་པ་ཡིན་ལ། སྦྱོར་མཐོང་སྒོམ་གསུམ་མཉམ་གཞག་ཐུན་གཅིག་ལ་བགྲོད་པར་བྱས་ནས། དེའི་བར་མ་ཆད་པ་ལ་ཟད་པ་དང་མི་སྐྱེ་བ་ཤེས་པ་སྟེ། དགྲ་བཅོམ་པའི་འབྲས་བུ་དང་མཐར་ཕྱིན་པའི་ལམ་མངོན་དུ་བྱེད་པ་ནི། རང་རྒྱལ་གྱི་གཙོ་བོ་བསེ་རུ་ལྟ་བུ་ཡིན་ལ། ཚོགས་ལ་སྤྱོད་པའི་རང་རྒྱལ་ལ་ནི་དེ་ལྟར་མ་ངེས་ཏེ། འོན་ཀྱང་ཐམས་ཅད་མཐུན་པར་སྔོན་གྱི་སྐྱེ་བར་སངས་རྒྱས་ལ་བྱ་བ་བྱས་ཤིང༌། ཉན་ཐོས་ལམ་ལ་སློབ་པ་རྣམས་དང་འདྲ་བར་བྱས་པ་ཡིན་ཡང༌། ལྷག་པོར་རྟེན་ཅིང་འབྲེལ་བར་འབྱུང་བ་ལ་ཆེས་མཁས་པར་བྱས་པ་དང༌། སྨོན་ལམ་གྱི་དབང་གིས་སྲིད་པ་ཐ་མའི་གནས་སྐབས་སུ་


TNT17_Page_0808
[མ་དཔེ་གཟིགས་ན་འདིར་གནོན།]

སངས་རྒྱས་མི་བཞུགས་ཤིང༌། །སྟོན་པ་མེད་པའི་འཇིག་རྟེན་གྱི་ཁམས་སུ། བླ་མ་མེད་པར་རང་གི་བག་ཆགས་ཀྱི་སྟོབས་སད་པ་ཁོ་ནས། བྱང་ཆུབ་མངོན་དུ་བྱེད་པའོ། །ཉན་ཐོས་འཕགས་པ་ལ་ནི་དབང་པོ་རྣོ་བརྟུལ་སྣ་ཚོགས་ཡོད་ལ། འདི་ནི་དབང་རྣོན་ཁོ་ནའོ། །བྱང་ཆུབ་སེམས་དཔའ་ནི་སེམས་དང་པོ་བསྐྱེད་པ་ནས་བཟུང་སྟེ་བསོད་ནམས་ཀྱི་ཚོགས་མཐའ་ཡས་པ་བསགས་ཏེ། བྱང་ཆུབ་ཏུ་སྨོན་ལམ་བཏབ་ཐེག་པ་ཆེན་པོ་ལ་ཐོས་བསམ་སྒོམ་གསུམ་དུ་བྱས་པས་ཚོགས་ཀྱི་ལམ་དུ་ཡང་ཡོན་ཏན་དུ་མ་ཐོབ་ལ། སྦྱོར་བའི་ལམ་དུ་གནས་ལུགས་ཀྱི་རྟོགས་པ་འཕག་མཆོག་རྣམས་དང་རྗེས་མཐུན་པ་གྲུབ་ཅིང༌། ཏིང་ངེ་འཛིན་དང་གཟུངས་དང་མངོན་ཤེས་མཐའ་ཡས་པའང་བསྒྲུབས་ནས། མཐོང་ལམ་དུ་ཆོས་ཉིད་སྤྲོས་བྲལ་རྣམ་པ་ཐམས་ཅད་པའི་དོན་མངོན་དུ་བྱས་པས། བདེན་བཞིའི་དོན་སོགས་ཉན་རང་གི་སྤངས་རྟོགས་ཐམས་ཅད་ཞོར་ལ་ཐོབ་ཅིང༌། བྱང་སེམས་འཕགས་པར་གྱུར་པ་ཞེས་བྱ་ལ། དེ་ཉིད་ཀྱི་རྒྱུན་ལས་དང་པོ་ནས་བཅུ་པའི་བར་དུ་ཡོན་ཏན་མཐའ་ཡས་པ་གོང་འཕེལ་ཐོབ་པ་དེ་དག་ནི། རྒྱལ་བའི་སྲས་པོ་ཞེས་བྱ་སྟེ། དེ་ལྟར་ན་དབྱེ་བ་འདི་དག་མངོན་པ་སོགས་གསུང་རབ་གཞན་ཤེས་པ་དག་ལ་སྐབས་འདིར་བཤད་མི་དགོས་ཀྱང་ཤིན་ཏུ་ལས་དང་པོ་དག་ལ་གོ་བ་ཕྱོགས་ཙམ་མཚོན་པའི་ཕྱིར། ཟུར་ཙམ་སྨོས་པའོ། །རྣམ་པར་དབྱེ་བ་མཐའ་ཡས་པ་ནི་དུས་ཇི་སྙེད་པར་ཡང་བརྗོད་པར་མི་ནུས་ཏེ། འཕགས་པ་རྣམས་ཀྱིས་སོ་སོར་རང་གིས་རིག་པར་བྱ་བ་ཉིད་པས། གཞུང་རྒྱ་


TNT17_Page_0809
[མ་དཔེ་གཟིགས་ན་འདིར་གནོན།]

ཆེན་པོ་སྨྲ་བ་རྣམས་ཀྱིས་འཆད་ཚུལ་མང་པོའི་སྒོ་ནས། དཀའ་བ་དུ་མ་དང་བཅས་ཏེ་འཆད་མོད་ཀྱང༌། རྒྱ་མཚོ་ཆེན་པོ་ལས་སྐྲ་རྩེ་གཅིག་གིས་བླངས་པའི་ཆུ་ཐིག་གི་ཚད་ཙམ་ཡང་མ་ཡིན་ནོ། །སྤྲོས་པས་ཆོག་གོ ལྔ་པ་ནི། གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །གང་སངས་རྒྱས་རྣམས་ཞེས་སྤྱིར་སྨོས་ཏེ། དེ་ཡང་ཕྱོགས་བཅུའི་འཇིག་རྟེན་གྱི་ཁམས་རྣམས་ན། སེམས་ཅན་གཏི་མུག་གི་མུན་པར་འཁྱམས་པ་རྣམས་ལ་ལམ་སྟོན་པར་མཛད་པས། འཇིག་རྟེན་གྱི་སྒྲོན་མར་གྱུར་པ་སངས་རྒྱས་རྣམས་བྱང་ཆུབ་སྒྲུབ་པར་བྱེད་པའི་ལམ་གྱི་རིམ་པ། ལམ་ལྔ་དང་ས་བཅུ་ལ་སོགས་པའི་རིམ་པ་མ་ལུས་པར་སྔོན་དུ་སོང་བས། བླ་ན་མེད་པ་སངས་རྒྱས་ཀྱི་གོ་འཕང་མ་ཆགས་མ་ཐོགས་པར་བརྙེས་པའམ། ཡང་ན་དེ་ལྟར་ལམ་དང་འབྲས་བུའི་ཡོན་ཏན་ཕུན་སུམ་ཚོགས་པ་ཐོབ་ཀྱང༌། ཐོབ་པ་དེ་ལ་ཞན་པ་མི་མངའ་བས་མ་ཆགས་པའི་མགོན་པོ་སངས་རྒྱས་དེ་དག་ཐམས་ཅད་ལ་བདག་གིས་འཁོར་ལོ་བླ་ན་མེད་པ་སྟེ། དམ་པའི་ཆོས་ཀྱི་འཁོར་ལོ་བསྐོར་བར་བསྐུལ་ལོ། །འཁོར་ལོ་ནི་ཤིང་རྟའི་འཁོར་ལོ་ལྟ་བུ་སྟེ། ངོ་བོ་བརྟན་པའི་དངོས་པོ་ཡིན་ཡང༌། རང་གི་གཟུགས་ཀྱི་འཕྲུལ་གྱིས། ཕ་རོལ་གྱི་གནས་སུ་ཕྱིན་པར་བྱེད་པ་དང་འདྲ་བར། ཉོན་མོངས་པ་སོགས་མི་


TNT17_Page_0810
[མ་དཔེ་གཟིགས་ན་འདིར་གནོན།]

མཐུན་པའི་ཕྱོགས་ཀྱིས་མི་ཤིགས་པར་གནས་པ་ཤིན་ཏུ་བརྟན་པ་ཆོས་ཀྱི་ལམ་སྟོན་པ་པོའི་རྒྱུད་ལ་མངའ་བ་དེ། ཉན་པ་པོའི་རྒྱུད་ལ་འཕོས་པ་དང་འདྲ་བར་རྟོགས་པ་བསྐྱེད་ནུས་པ་ནི་ཆོས་ཀྱི་འཁོར་ལོའོ། །བླ་ན་མེད་པ་ནི་འཇིག་རྟེན་ལས་འདས་པ་ཡིན་པ་དང༌། ལྷ་དང་དྲང་སྲོང་རྣམས་ཀྱིས་བསྟན་པའི་ཆོས་དང་ཐུན་མོང་མ་ཡིན་པའོ། །བསྐུལ་མ་འདེབས་པ་ནི། སྤྲུལ་པའི་སྐུ་སངས་རྒྱས་ནས་རིང་པོ་མ་ལོན་པ། ད་ལྟར་འཇིག་རྟེན་དུ་ཆོས་འཁོར་ཡེ་མ་བསྐོར་བ་ལ། ཆོས་འཁོར་སྤྱི་ལྡོག་ནས་བསྐོར་བར་གསོལ་བ་འདེབས་པ་སྟེ། སྤྱིར་ཆོས་འཁོར་བསྐོར་བཞིན་པ་ཡིན་ཡང༌། སྐབས་སུ་བབས་པ་དེ་དང་དེའི་ཆོས་གསུང་བར་གསོལ་བ་འདེབས་པའང་འདིའི་ཁོངས་སུ་བསྡུའོ། །སངས་རྒྱས་ཐུགས་རྗེ་ཅན་ཟང་ཟིང་ལ་ཆགས་པ་དང་མི་མཁྱེན་པ་མི་མངའ་བས། མི་དགོས་སོ་སྙམ་ན། ཆོས་ལ་གུས་པ་བསྐྱེད་པའི་ཕྱིར་བསྐུལ་དགོས་པའང་ཡིན་ལ། གཙོ་བོར་ནི་སངས་རྒྱས་ཆོས་མི་གསུང་བར་མི་སྲིད་ཀྱང༌། རང་གི་བློ་སེམས་ཅན་ལ་སྙིང་བརྩེ་བའི་ཕྱིར་ཚོགས་བསགས་པའི་སླད་དུ་བློའི་རིམ་པ་སྦྱངས་ཚུལ་ལོ། །དྲུག་པ་ནི། མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང༌། །བདག་གིས་ཐལ་མོ་རབ་སྦྱར་གསོལ་བ་འདེབས། །དོན་དམ་པར་ན། སངས་རྒྱས་ཡོངས་སུ་མྱ་ངན་ལས་མི་འདའ་མོད། མྱ་ངན་ལས་འདའ་བར་བསྟན་པས་འདུལ་བ་རྣམས་ལ་ཡོངས་སུ་མྱ་ངན་ལས་འདའ་


TNT17_Page_0811
[མ་དཔེ་གཟིགས་ན་འདིར་གནོན།]

བའི་ཚུལ་སྟོན་པར་གང་བཞེད་པ་དེ་དག་ལ། དགོས་པ་སངས་རྒྱས་འཇིག་རྟེན་དུ་བཞུགས་ན་ཕན་བདེ་མཐའ་ཡས་པ་ལྷུན་གྲུབ་ཏུ་འབྱུང་བ་ཉིད་ཡིན་པས། འགྲོ་བ་ཀུན་ལ་འཕྲལ་དུ་ཕན་པར་འགྱུར་ཞིང་ཡུན་དུ་བདེ་བའི་ཕྱིར་དུ། དུས་ཀྱི་ཁྱད་པར་བསྐལ་པ་ཆེན་པོ་ཕྱོགས་བཅུའི་སངས་རྒྱས་ཐམས་ཅད་ཀྱི་ཞིང་ཁམས་ཀྱི་རྡུལ་ཕྲ་རབ་ཀྱི་གྲངས་སྙེད་དུ་བཞུགས་པར་ཡང་གསོལ་བ་འདེབས་པ་པོ་བདག་གིས་གསོལ་བ་འདེབས་ཏེ་ཇི་ལྟར་འདེབས་པའི་ཚུལ་ནི། ཐལ་མོ་རབ་ཏུ་སྦྱར་བས་གསོལ་བ་འདེབས་པར་བགྱིའོ། །འཕྲལ་དུ་བདེ་བ་ནི་འབྱོར་བ་དང༌། དབང་ཕྱུག་ལ་སོགས་པ་དང་ཡུན་དུ་ཕན་པ་ནི་མྱ་ངན་ལས་འདས་པའོ། །བདུན་པ་ནི། ཕྱག་འཚལ་བ་དང་མཆོད་ཅིང་བཤགས་པ་དང༌། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཕྱིར་བསྔོའོ། །གོང་དུ་སྨོས་པ་ལྟར། ཡུལ་མཆོག་ལ་ལུས་ངག་ཡིད་ཀྱིས་ཕྱག་འཚལ་བ་དང༌། མཆོད་པ་རྣམ་པ་གཉིས་ཀྱིས་མཆོད་པ། སྟོབས་བཞིའི་སྒོ་ནས་སྡིག་པ་བཤགས་པ་དང༌། སྐྱེ་འཕགས་ཀྱི་དགེ་བ་ཐམས་ཅད་ལ་རྗེས་སུ་ཡི་རང་བ་དང༌། ཆོས་ཀྱི་འཁོར་ལོ་བསྐོར་བར་བསྐུལ་ཞིང༌། མྱ་ངན་ལས་མི་འདའ་བར་བཞུགས་སུ་གསོལ་བ་སྟེ། ཡན་ལག་དྲུག་པོ་དེ་བྱས་པ་ལུས་བྱུང་བའི་དགེ་བ་ཅུང་ཟད་བདག་གིས་གང་དང་ཅི་བསགས་པ་དེ་དག་ཐམས་ཅད་ཅེས་པ་


TNT17_Page_0812
[མ་དཔེ་གཟིགས་ན་འདིར་གནོན།]

སྟེ། དངོས་སུ་ནི་དེ་ཙམ་ཡིན་ཡང་རང་གིས་དུས་གསུམ་དུ་དགེ་བ་བྱས་པ་དང་བྱེད་དུ་བཅུག་པ་དང༌། ཡི་རང་དང༌། བསྔགས་པ་བརྗོད་པ་ཐམས་ཅད་དང༌། འགྲོ་བ་ཐམས་ཅད་ཀྱིས་དུས་གསུམ་དུ་བསགས་པའི་དགེ་བ་ཐམས་ཅད་ཀྱང༌། བློས་གཅིག་ཏུ་བསྡོམས་ནས་བསྔོ་དགོས་ཏེ། དེ་དག་ཐམས་ཅད་ཀྱང་ཆོས་ཀྱི་དབྱིངས་དང་མཉམ་པ་ཉིད་དུ་བྱས་ནས་སོ། །ཅུང་ཟད་དད་ཅི་བསགས་པ་ཞེས་པའི་ཚིག་གིས་ཀྱང་ཟུར་གྱིས་འཕངས་པ་ཡིན་ནོ། །བསྔོ་རྒྱུའི་དགེ་བ་དེ་རྣམས་གང་དུ་བསྔོ་ཞེ་ན། བྱང་ཆུབ་ཆེན་པོ་བླ་ན་མེད་པའི་སངས་རྒྱས་ཀྱི་ཕྱིར་བསྔོའོ། །སུས་བསྔོ་བར་བྱེད་ཅེ་ན་བདག་གིས་སོ། །གལ་ཏེ་བྱང་ཆུབ་མཆོག་ཏུ་མ་བསྔོས་ན། རང་རང་གི་འབྲས་བུ་ཕྱུང་ནས་ཟད་པར་འགྱུར་ཏེ། འཁོར་བ་པ་རྣམས་ཀྱི་ནི་བདེ་འགྲོ་ཚུན་དུ་ཟད་ལ། ཉན་རང་གི་དེ་དག་ཀྱང་ལྷག་མེད་ཀྱི་དབྱིངས་སུ་ཟད་པའོ། །སངས་རྒྱས་སུ་བསྔོས་ན་ནི། དེ་མ་ཐོབ་ཀྱི་བར་དུ་ཡང་ལྷ་མིའི་བདེ་སྐྱིད་སོགས་བདེ་བ་གོང་འཕེལ་དུ་འགྱུར་ཞིང༌། བླ་ན་མེད་པའི་བྱང་ཆུབ་ཐོབ་ཟིན་ནས། མི་གནས་པའི་མྱ་ངན་ལས་འདས་པ་བརྙེས་པའི་ཕྱིར། ནམ་མཁའ་ཇི་སྲིད་པའི་བར་དུ་གནས་ཤིང༌། སེམས་ཅན་ཐམས་ཅད་ཀྱི་དོན་སྤྱོད་པས་བསོད་ནམས་ཀྱི་འབྲས་བུ་ནམ་ཡང་ཟད་པ་མི་སྲིད་པ་ཡིན་ནོ། །བསྔོ་བ་དེ་ཡང༌། དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །ཞེས་གསུངས་པ་ལྟར། སངས་རྒྱས་ཐམས་ཅད་ཀྱིས་


TNT17_Page_0813
[མ་དཔེ་གཟིགས་ན་འདིར་གནོན།]

བསྔགས་པའི་བསྔོ་བ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་སོགས་སུ་ལས། སྦྱིན་པ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ནས། བླ་ན་མེད་པའི་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་དེ་ཡོངས་སུ་བསྔོས་པ་ན། ཅི་ནས་མཚན་མར་ཡང་དག་པར་ཡོངས་སུ་མི་མཐོང་བ་སྟེ། དེ་ལྟ་བུའི་ཚུལ་གྱིས་ཡོངས་སུ་བསྔོ་བར་བྱེད་དེ། བདག་གིས་ཅི་ཞིག་སྦྱིན་པར་བྱེད། སུ་ཞིག་སྦྱིན་པར་བྱེད། ཅི་ཞིག་ཡོངས་སུ་བསྔོ་བར་བྱ། སུ་ཞིག་ཡོངས་སུ་བསྔོ་བར་བྱེད། གང་དུ་བསྔོས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་པའི་དངོས་པོ་དེ། ཡང་དག་པར་རྗེས་སུ་མ་མཐོང་ངོ༌། །དེ་ཅིའི་ཕྱིར་ཞེ་ན་ནང་སྟོང་པ་ཉིད་ཀྱིས་སྟོང་པ་དང༌། ཞེས་པ་ནས། སྟོང་ཉིད་རྣམས་ལ་རིམ་གྱིས་སྦྱར་ནས། རང་གི་མཚན་ཉིད་སྟོང་པ་ཉིད་ཀྱིས་སྟོང་པའི་ཕྱིར་རོ། །དེས་གང་དུ་ཡོངས་སུ་བསྔོ་བར་འགྱུར། ཅི་ཞིག་ཡོངས་སུ་བསྔོ་བར་འགྱུར། གང་གིས་ཡོངས་སུ་བསྔོ་བར་འགྱུར། ཞེས་དེ་ལྟར་མཐོང་སྟེ། དེ་ལྟར་ཡོངས་སུ་བསྔོས་ན་ལེགས་པར་ཡོངས་སུ་བསྔོས་པར་འགྱུར་རོ། །ཞེས་གསུངས་ཏེ། བསྔོ་བའི་ཡུལ་བླ་ན་མེད་པའི་བྱང་ཆུབ་དང༌། ཆེད་དུ་བྱ་བ་གཞན་དོན་ཁོ་ན་དང༌། ཡིད་ལ་བྱེད་པའི་རྣམ་པ་ནི། བསྔོ་བྱའི་དགེ་བ་འཁོར་གསུམ་མི་དམིགས་པ་དང༌། བསྔོ་བ་ཉིད་ཀྱང་འཁོར་གསུམ་མི་དམིགས་པ་སྟེ། ཁྱད་པར་གསུམ་དང་ལྡན་པའི་བསྔོ་བ་ཡིན་ནོ། །ཡོངས་


TNT17_Page_0814
[མ་དཔེ་གཟིགས་ན་འདིར་གནོན།]

སུ་བསྔོ་བའི་ཁྱད་པར་རྒྱས་པ་ནི། འཕགས་པ་རྡོ་རྗེ་རྒྱལ་མཚན་གྱི་བསྔོ་བའི་ལེའུ་ལས་རྟོགས་པར་བྱའོ། །རྩ་བའི་ས་བཅད་གཉིས་པ་སྨོན་ལམ་གྱི་རབ་དབྱེ་ལ། དཔལ་ཕྱོགས་ཀྱི་གླང་པོ་ལ་སོགས་པ་སྔོན་གྱི་མཁས་པ་རྣམས་ཀྱིས་དོན་ཚན་རྣམ་པ་བཅུ་དྲུག་ཏུ་མཛད་དོ། །དེ་ཡང་སྡོམ་ནི། ལྷག་བསམ་བྱང་སེམས་མི་བརྗེད་དང༌། །མ་གོས་ཕན་བདེ་གོ་ཆ་དང༌། །སྐལ་མཉམ་འགྲོགས་དང་བཤེས་གཉེན་བསྟེན། །སངས་རྒྱས་མངོན་གྱུར་དམ་ཆོས་འཛིན། །མི་ཟད་མཛོད་ཐོབ་འཇུག་པ་དང༌། །སྟོབས་དང་སྒྲུབ་པ་ལས་དང་ནི། །རྗེས་སུ་སློབ་དང་འཇུག་སྡུད་དོ། །དེ་ཡང་བསམ་པ་དག་པའི་སྒོ་ནས་སྨོན་པ་དང༌། བྱང་ཆུབ་ཀྱི་སེམས་མི་བརྗེད་པའི་སྒོ་ནས་སྨོན་པ་དང༌། དེ་བཞིན་དུ་སྦྱར་ཏེ་མ་གོས་པའི་སྦྱོར་བའི་དང༌། གཞན་ལ་ཕན་བདེའི་དང༌། གོ་ཆ་བགོས་པའི་དང༌། སྐལ་མཉམ་དང་འགྲོགས་པའི་དང༌། བཤེས་གཉེན་བསྟེན་པའི་དང༌། སངས་རྒྱས་མངོན་གྱུར་གྱི་དང༌། དམ་ཆོས་ཡོངས་བཟུང་གི་དང༌། མི་ཟད་པའི་མཛོད་ཐོབ་པའི་དང༌། འཇུག་པ་དུ་མའི་དང༌། སྟོབས་ཀྱི་དང༌། གཉེན་པོ་བསྒྲུབ་པའི་དང༌། ལས་ཀྱི་དང༌། རྗེས་སུ་སློབ་པའི་དང༌། ཐམས་ཅད་ཀྱི་དོན་བསྡུ་བའི་སྒོ་ནས་སྨོན་པའི་སྨོན་ལམ་རྣམས་སོ། །དང་པོ་བསམ་པ་དག་པའི་སྒོ་ནས་སྨོན་པ་ནི། འདས་པའི་སངས་རྒྱས་རྣམས་དང་ཞེས་པ་ནས། རེ་བའང་འགྲུབ་པར་ཤོག་གི་བར་ཡིན་ལ། དེ་ལའང་དོན་ཚན་བཞི་ལས། སངས་རྒྱས་ལ་མཆོད་པའི་བསམ་པ་ནི་


TNT17_Page_0815
[མ་དཔེ་གཟིགས་ན་འདིར་གནོན།]

འདས་པའི་སོགས། དགོངས་པ་ཡོངས་སུ་བསྐང་བའི་ནི། གང་ཡང་མ་བྱོན་སོགས། ཞིང་ཡོངས་སུ་དག་པའི་ནི། ཕྱོགས་བཅུའི་ག་ལའི་སོགས། སེམས་ཅན་ལ་ཕན་གདགས་པའི་བསམ་པ་ནི། ཕྱོགས་བཅུའི་སེམས་ཅན་སོགས་སོ། །གཉིས་པ་བྱང་ཆུབ་ཀྱི་སེམས་མི་བརྗེད་པ་ལ། བྱང་ཆུབ་སྤྱོད་པ་དག་ནི་བདག་སྤྱོད་ཅིང༌། །ཞེས་པ་ནས། ཡོངས་སུ་བྱང་བར་ཤོག་གི་བར་ཏེ། ཚེ་རབས་སོགས་ཀྱིས་རྟག་ཏུ་རབ་ཏུ་འབྱུང་བ་དང༌། ཚུལ་ཁྲིམས་སྤྱོད་པ་སོགས་ཀྱིས་ཚུལ་ཁྲིམས་དག་པ་དང༌། ལྷའི་སོགས་ཀྱིས་སྐད་སྣ་ཚོགས་པས་ཆོས་སྟོན་པ་དང༌། དེས་ཤིང་སོགས་ཀྱིས་དགེ་བ་ལ་བརྩོན་པ་དང༌། རྒྱུ་བཞི་སྔོན་དུ་འགྲོ་བའི་བྱང་ཆུབ་ཀྱི་སེམས་མི་བརྗེད་པ་དང༌། སྡིག་པ་སོགས་ཀྱིས་དེའི་མི་མཐུན་ཕྱོགས་སྤོང་བར་སྟོན་ཏོ། །ཡང་ན་འདི་ལ་ཚེ་རབས་དྲན་པ་དང༌། རབ་ཏུ་བྱུང་བ་སོ་སོར་ཕྱེ་ནས། རྒྱུ་ལྔར་བྱས་ཀྱང་ལེགས་པར་འགྱུར་རོ། །གསུམ་པ་མ་ལུས་པའི་སྦྱོར་བའམ་མ་ཆགས་པ་ནི། ལས་དང་ཞེས་པ་ལ་སོགས་པའོ། །བཞི་པ་གཞན་ལ་ཕན་བདེ་ནི། ཞིང་གི་ཁྱོན་དང་སོགས་སོ། །ལྔ་པ་གོ་ཆ་བགོ་བ་ནི། བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང༌། །སོགས་ཏེ། སངས་རྒྱས་ཀྱི་ཆོས་རྫོགས་པ་དང༌། སེམས་ཅན་གྱི་སྤྱོད་པ་དང་མཐུན་པར་འཇུག་པ་དང༌། དམ་པའི་ཆོས་སྟོན་པ་གསུམ་ལ་རིམ་པས་སྦྱར་རོ། །དྲུག་པ་སྐལ་མཉམ་གྱི་གྲོགས་དང་འགྲོགས་པ་ནི། བདག་གི་སྤྱོད་དང་སོགས་


TNT17_Page_0816
[མ་དཔེ་གཟིགས་ན་འདིར་གནོན།]

སོ། །བདུན་པ་དགེ་བའི་བཤེས་གཉེན་བསྟེན་ཅིང་མཉེས་པར་བྱེད་པ་ནི། བདག་ལ་ཕན་པར་སོགས་སོ། །བརྒྱད་པ་སངས་རྒྱས་མངོན་གྱུར་ལ་མཆོད་པ་སོགས་བྱ་བ་ནི། སངས་རྒྱས་སྲས་ཀྱི་སོགས་ཏེ། འཁོར་དང་དུས་དང་བསམ་པ་སྐྱོ་བ་མེད་པ་དང༌། མཆོད་པ་སྟེ་དོན་ཚན་བཞི་རིམ་ཅན་དུ་སྦྱར་རོ། །དགུ་པ་དམ་ཆོས་ཡོངས་སུ་བཟུང་བ་ནི་རྒྱལ་བ་རྣམས་ཀྱི་སོགས་ཏེ། ཆོས་འཛིན་པ་དང་སྟོན་པ་དང༌། རབ་ཏུ་སྦྱོར་བ་གསུམ་རིམ་གྱིས་སོ། །བཅུ་པ་མི་ཟད་པའི་མཛོད་ཐོབ་པར་བྱ་བ་ནི། སྲིད་པ་ཐམས་ཅད་སོགས་ཏེ། ཚོགས་གཉིས་དང་མཐུ་ཐོབ་པར་བྱ་བའོ། །བཅུ་གཅིག་པ་འཇུག་པ་དུ་མའི་སྒོ་ནས་སྨོན་པ་ནི། རྡུལ་གཅིག་སྟེང་ན་རྡུལ་སྙེད་ཞིང་རྣམས་ཏེ། །ཞེས་པ་ནས། དྲུང་དུ་བདག་མཆིའོ་བར་རོ། །དེ་ལ་འཇུག་པ་བརྒྱད་སྟེ། དང་པོ་ཞིང་དང་བཅས་པའི་སངས་རྒྱས་ལྟ་བ་ལ་འཇུག་པ་ནི། རྡུལ་གཅིག་སོགས། གཉིས་པ་སངས་རྒྱས་ཀྱི་གསུང་ལ་འཇུག་པ་ནི། གསུང་གཅིག་ཡན་ལག་སོགས། གསུམ་པ་ཆོས་འཁོར་བསྐོར་བ་ལ་འཇུག་པ་ནི། དུས་གསུམ་གཤེགས་པ་སོགས། བཞི་པ་བསྐལ་པའི་སྒོ་ནས་འཇུག་པ་ནི། མ་འོངས་བསྐལ་པ་སོགས། ལྔ་པ་དེ་བཞིན་གཤེགས་པ་བལྟ་བ་ལ་འཇུག་པ་ནི། དུས་གསུམ་གཤེགས་པ་སོགས། དྲུག་པ་དེའི་སྤྱོད་ཡུལ་ལ་འཇུག་པ་ནི། རྟག་ཏུ་དེ་དག་སོགས། བདུན་པ་ཞིང་སྒྲུབ་པ་ལ་འཇུག་པ་ནི། གང་ཡང་དུས་གསུམ་སོགས། བརྒྱད་པ་དེ་བཞིན་


TNT17_Page_0817
[མ་དཔེ་གཟིགས་ན་འདིར་གནོན།]

གཤེགས་པའི་དྲུང་དུ་འགྲོ་བ་ལ་འཇུག་པ་ནི། གང་ཡང་མ་བྱོན་སོགས་སོ། །འདིར་སྡོམ་ནི། ཞིང་བལྟ་གསུང་དང་ཆོས་འཁོར་དང༌། །བསྐལ་པ་སངས་རྒྱས་སྤྱོད་ཡུལ་དང༌། །ཞིང་སྒྲུབ་པ་དང་དྲུང་དུ་འགྲོ། །འཇུག་པ་བརྒྱད་དུ་ཤེས་པ་ཡིན། སྤྱི་དོན་བཅུ་གཉིས་པ་སྟོབས་ཀྱི་སྒོ་ནས་སྨོན་པ་ནི། ཀུན་ཏུ་མྱུར་བའི་ནས། ཡང་དག་སྒྲུབ་པར་བྱེད་ཀྱི་བར་རོ། །བཅུ་གསུམ་པ་བསྒྲུབ་པའམ་གཉེན་པོའི་སྒོ་ནས་སྨོན་པ་ནི། ལས་ཀྱི་སྟོབས་རྣམས་སོགས་ཏེ། ལས་ཉོན་བདུད་གསུམ་འཇོམས་པ་དང༌། གཉེན་པོ་དངོས་ཏེ་དོན་ཚན་བཞི་རིམ་ཅན་དང༌། བཅུ་བཞི་པ་འཕྲིན་ལས་ཀྱི་སྒོ་ནས་སྨོན་པ་ནི། ཞིང་རྣམས་རྒྱ་མཚོ་ནས་མི་སྐྱོ་སྤྱད་པར་བགྱི་ཞེས་པའི་བར་ཏེ། འདི་ལ་ཡང་སངས་རྒྱས་ཀྱི་ཞིང་དག་པ་དང༌། སེམས་ཅན་སྨིན་པར་བྱེད་པ་དང༌། ཆོས་རྟོགས་པ་དང༌། རྗེས་ཐོབ་ཀྱི་ཡེ་ཤེས་ཐོབ་པ་དང༌། སྤྱོད་པ་མཐའ་ཡས་པ་དང༌། སྨོན་ལམ་རྫོགས་པ་དང༌། མཆོད་པ་སྒྲུབ་པ་དང༌། བསྐལ་པ་མཐའ་མེད་པར་འཇུག་པ་སྟེ་དོན་བརྒྱད་རིམ་ཅན་ནོ། །བཅོ་ལྔ་པ་རྗེས་སུ་སློབ་པ་ནི། གང་ཡང་དུས་གསུམ་སོགས་ཏེ། འདི་ལ་སངས་རྒྱས་ཀྱི་རྗེས་སུ་སློབ་པ་དང༌། སེམས་དཔའ་ཆེན་པོའི་རྗེས་སུ་སློབ་པའོ། །བཅུ་དྲུག་པ་དོན་བསྡུ་བའི་བསྔོ་བ་བསྟན་པ་ནི། སྤྱོད་པ་དག་ནི་ཚད་ཡོད་མ་གྱུར་ཅིག །སོགས་སོ། །དེ་ལྟར་ན་བསྡུས་པའི་དོན་གྱི་རིམ་པ་འདི་ནི། རྒྱ་འགྲེལ་ཕལ་ཆེར་གྱི་བཤད་པ་མགྲིན་གཅིག་པ་ཡང་ཡིན་ལ། ཁྱད་པར་


TNT17_Page_0818
[མ་དཔེ་གཟིགས་ན་འདིར་གནོན།]

མཁན་པོ་ཡེ་ཤེས་སྡེའི་ཞལ་ལྔ་ནས་ཇི་སྐད་གསུངས་པ་ལྟར་བཀོད་པ་ཡིན་ནོ། །དེ་བས་ན་བསྡུས་དོན་འདི་ནི་ཤིན་ཏུ་ཁུངས་ཆེ་བའི་ཕྱིར། འདི་ལ་གཅེས་སྤྲས་སུ་བྱ་ཞིང་མི་ནུབ་པའི་དོན་དུ་བཀོད་པའོ། །ཤཱཀྱ་བཤེས་གཉེན་གྱི་འགྲེལ་པར་ནི་དོན་ཚན་བཅུ་དྲུག་པོ་སྤྱི་ཙམ་ནས་འདྲ་བ་ལས། དང་པོ་ལ་བྱང་ཆུབ་ཏུ་སེམས་བསྐྱེད་པ་ཞེས་མིང་འདོགས་པ་དང༌། སེམས་བསྐྱེད་པ་སོགས་དོན་ཚན་བཅུ་རིམ་པ་བཞིན་མོས་སྤྱོད་ཀྱི་སའི་ཕར་ཕྱིན་བཅུ་དང་སྦྱོར་ཞིང༌། མཆོད་པར་གྱུར་ཅེས་པས་སྦྱིན་པ་དང༌། པདྨོ་དང༌། ཉི་ཟླའི་དཔེས་ཆགས་སྡང་གིས་མ་གོས་པ་དང༌། གྲང་དྲོའི་བྱ་བ་བྱེད་ཀྱང༌། ཆགས་སྡང་གི་རྣམ་རྟོག་མེད་པས་བཟོད་པ་དང༌། སངས་རྒྱས་མངོན་དུ་འགྱུར་བས་སྨོན་ལམ་གྱི་སྟོབས་ཡིན་པ་སོགས་རྒྱུ་མཚན་དང་བཅས་ནས་འཆད་ལ། སངས་རྒྱས་ཀྱི་ཞིང་ལྟ་བ་ལ་སོགས་པས་འཇུག་པ་བརྒྱད་ཀྱིས། དེ་བཞིན་གཤེགས་པ་ལྟ་བའི་འཇུག་པ་དང༌། དེའི་སྤྱོད་ཡུལ་ལ་འཇུག་པ་གཅིག་ཏུ་བསྡོམས་ནས་གཞུང་ཚན་བདུན་པོ་དེ་ས་དང་པོ་རབ་ཏུ་དགའ་བ་སོགས་ལྷག་བསམ་དག་པའམ་མ་དག་ས་བདུན་ལ་རིམ་གྱིས་སྦྱོར་བ་དང༌། དོན་ཚན་བཅུ་གཉིས་པ་སྟོབས་ཀྱི་སྨོན་པ་ས་བརྒྱད་པ་དང༌། བཅུ་གསུམ་པ་ལ་མི་མཐུན་ཕྱོགས་ཉམས་ཞེས་ཟེར་ཏེ་ས་དགུ་པ་དང༌། བཅུ་བཞི་པ་ལ་ཡོན་ཏན་ཡོངས་སུ་སྦྱོང་ཞེས་འདོགས་པ་དང༌། བཅོ་ལྔ་པ་རྗེས་སུ་སློབ་པ་ལ་གཉིས་སུ་ཕྱེ་ནས། གང་ཡང་དུས་གསུམ་གཤེགས་པའི་རྒྱལ་བ་ཡི། །ཞེས་སོགས་ལ་ཡོན་ཏན་ཐམས་ཅད་རྫོགས་པར་


TNT17_Page_0819
[མ་དཔེ་གཟིགས་ན་འདིར་གནོན།]

བྱ་བ་ཞེས་གསུང་ཞིང༌། རྒྱལ་བ་ཀུན་གྱི་སྲས་ཀྱི་ཐུ་བོ་པ། །སོགས་ཚིགས་བཅད་གསུམ་གྱིས། ཚོགས་གཉིས་བཟུང་བས་བྱང་ཆུབ་སེམས་དཔའ་ཆེན་པོའི་རྗེས་སུ་སློབ་པ་སྟེ་དོན་ཚན་བཅུ་བཞི་པ་དང་བཅོ་ལྔ་པ་བསྡོམས་པས་ས་བཅུ་པ་བཤད་ཅིང༌། ས་བཅུ་བསྟན་པས་འཕགས་ལམ་གྱི་ཕར་ཕྱིན་བཅུ་ཡང་བཤད་པ་དང༌། བཅུ་དྲུག་པ་ཐམས་ཅད་ཀྱི་དོན་བསྡུས་ནི་ཀུན་ཏུ་འོད་ཀྱིས་རྫོགས་པའི་སངས་རྒྱས་སུ་སྨོན་ལམ་འདེབས་པའོ། །ཞེས་བཞེད་དེ་ལེགས་པར་བཤད་པའང་ཡོད་ལ། ཇི་བཞིན་མི་འབྱོར་བ་ཡང་འགའ་རེ་སྣང་ངོ༌། །འོན་ཀྱང་སྔོན་གྱི་དུས་འཕགས་པའི་ཡུལ་དུ་ཐེག་པ་ཆེན་པོ་ཕ་རོལ་ཏུ་ཕྱིན་པའི་བཤད་སྒྲུབ་ཀྱི་བསྟན་པ་རྣམ་པར་དག་པ་དང་པོར་ཡོད་པའི་གནས་སྐབས་སུ་ལེགས་པར་གྲགས་པའི་མཁས་པས་བཤད་པ་ཡིན་པས་ན། འདིར་ཡང་ལུགས་དེ་གོ་བའི་ཕྱིར་རྣམ་གྲངས་སུ་ཅུང་ཟད་བླངས་པའོ། །འོན་ཀྱང་འདིར་བཤད་སླ་ཞིང་གོ་བདེ་བའི་ཕྱིར། བསྡུས་དོན་གཞན་གྱི་སྒོ་ནས་བརྗོད་ན། འདི་ལ་མདོར་བསྟན་རྒྱས་བཤད་དོན་བསྡུས་གསུམ་ལས། དང་པོ་ནི། ཚིགས་བཅད་གསུམ་སྟེ། གསུངས་པ། འདས་པའི་སངས་རྒྱས་རྣམས་དང་ཕྱོགས་བཅུ་ཡི། །འཇིག་རྟེན་དག་ན་གང་བཞུགས་མཆོད་པར་གྱུར། །གང་ཡང་མ་བྱོན་དེ་དག་རབ་མྱུར་བར། །བསམ་རྫོགས་བྱང་ཆུབ་རིམ་པར་སངས་རྒྱས་སྤྱོན། །སྔོན་བྱོན་པ་འདས་པའི་སངས་རྒྱས་སུ་རབ་ཏུ་གྲགས་པ་


TNT17_Page_0820
[མ་དཔེ་གཟིགས་ན་འདིར་གནོན།]

རྣམས་དང༌། ད་ལྟར་ཕྱོགས་བཅུ་ཡི་འཇིག་རྟེན་གྱི་ཁམས་དག་ན་གང་འགྲོ་བའི་དོན་ལ་བཞུགས་པ་ཐམས་ཅད་ལ། མཆོད་པའི་བྱེ་བྲག་ཐམས་ཅད་ཀྱིས་མཆོད་པར་གྱུར་ཅིག གང་ཡང་མ་བྱོན་པའི་སངས་རྒྱས་ཏེ། འོག་མིན་དུ་སངས་རྒྱས་ཟིན་ནས། གདུལ་བྱ་དུས་ལ་མ་བབས་པར། འཇིག་རྟེན་དུ་སྤྲུལ་པའི་སྐུ་མི་སྟོན་པ་རྣམས་སམ། མྱུར་དུ་འཚང་རྒྱ་བར་རུང་བའི་བྱང་ཆུབ་སེམས་དཔའ་ཆེན་པོ་དེ་དག་རྣམས། དཀའ་བ་དང་འབད་རྩོལ་མེད་བཞིན་དུ། རབ་ཏུ་མྱུར་བར་རང་རང་གི་དགོངས་པའི་བསམ་པ་རྫོགས་ནས། དུས་ལ་བབ་སྟེ། དགའ་ལྡན་དུ་སྐྱེ་བ་སྟོན་པ་ལ་སོགས་པ། བྱང་ཆུབ་མངོན་དུ་བརྙེས་པའི་རིམ་པ་ཚུལ་དང་མཐུན་པར་བསྟན་ནས། སངས་རྒྱ་བར་སྤྱོན་ཅིག་སྟེ་ཤོག་ཅིག་པའོ། །དེ་ཡང་འོག་མིན་དུ་སངས་རྒྱས་ཟིན་པ་རྣམས། སོ་སོའི་གདུལ་བྱ་སྨིན་པ་སོགས་དགོངས་པ་མྱུར་དུ་རྫོགས་ནས་སྤྲུལ་སྐུ་མྱུར་དུ་འབྱོན་པར་ཤོག་ཅིག་པ་དང༌། སེམས་དཔའ་ཆེན་པོ་རྣམས་ཀྱི་དགོངས་པའི་བསམ་པ་ཚོགས་གཉིས་ཀྱི་ལྷག་མ་མྱུར་དུ་རྫོགས་ནས། སངས་རྒྱས་བརྙེས་པར་གྱུར་ཅིག་པ་སྟེ། སངས་རྒྱས་དང་བྱང་སེམས་ཆེན་པོ་དེ་རྣམས་ཀྱི་སྨོན་ལམ་རྫོགས་པར་བསྔོ་བ་ཡིན་ལ། དེ་དག་གི་ཕྱིར་དུ་རང་གི་སྨོན་ལམ་རྫོགས་པར་ཡང་བྱ་དགོས་པས་མཆོད་པ་དང་བསྐུལ་བ་འདི་གཉིས་ནི། རང་གཞན་གྱི་སྨོན་ལམ་ཉིད་ཡོངས་སུ་རྫོགས་པའི་ཕྱིར་དུ་སྨོན་ལམ་འདེབས་པའོ། །ཡང་གསུངས་པ། ཕྱོགས་བཅུ་ག་ལའི་ཞིང་རྣམས་


TNT17_Page_0821
[མ་དཔེ་གཟིགས་ན་འདིར་གནོན།]

ཇི་སྙེད་པ། །དེ་དག་རྒྱ་ཆེར་ཡོངས་སུ་དག་པར་གྱུར། །བྱང་ཆུབ་ཤིང་དབང་དྲུང་གཤེགས་རྒྱལ་བ་དང༌། །སངས་རྒྱས་སྲས་ཀྱིས་རབ་ཏུ་གང་བར་ཤོག །ཕྱོགས་བཅུའི་ག་ལ་བའི་མ་དག་པའི་ཞིང་ཇི་སྙེད་པ་དེ་དག་ཐམས་ཅད་བདེ་བ་ཅན་གྱི་ཞིང་བཞིན་དུ་མཆོག་ཏུ་རྒྱ་ཆེ་ཞིང༌། ངན་སོང་ལ་སོགས་པའི་སྐྱོན་ཐམས་ཅད་དང་བྲལ་ནས། ཡོངས་སུ་དག་པར་གྱུར་ཅིག ཞིང་ཁམས་དེ་ཐམས་ཅད་ཀྱང་ཤིང་གི་རྣམ་པ་ཐམས་ཅད་ཀྱི། རབ་དང་མཆོག་དང་གཙོ་བོ་མཐར་ཐུག་པ་ཡིན་པའི་ཕྱིར། ཤིང་གི་དབང་པོ་སྟེ་བྱང་ཆུབ་ཀྱི་ཤིང་གི་དྲུང་དུ་གཤེགས་ཏེ། མངོན་པར་རྫོགས་པ་སངས་རྒྱས་ཟིན་པའི་རྒྱལ་བ་དང༌། དེ་དག་གི་འཁོར་དུ་སངས་རྒྱས་ཀྱི་ཐུགས་ཀྱི་སྲས་བྱང་ཆུབ་སེམས་དཔའི་ཚོགས་དེ་བཞིན་གཤེགས་པ་རྣམས་མཆོད་པ་དང༌། སེམས་ཅན་མཐའ་ཡས་པ་དགེ་བ་ལ་འགོད་པར་མཛད་པ་རྣམས་ཀྱིས་རབ་ཏུ་གང་བར་ཤོག་ཅིག་པ་སྟེ། སྣོད་དང་བཅུད་དག་པར་སྨོན་པ་ཚིག་རྐང་གཉིས་གཉིས་སོ། །དེ་ནི་ཞིང་ཡོངས་སུ་སྦྱོང་བའི་སྨོན་ལམ་མོ། །ཡང་གསུངས་པ། ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་རྟག་ཏུ་ནད་མེད་བདེ་བར་གྱུར། །འགྲོ་བ་ཀུན་གྱི་ཆོས་ཀྱི་དོན་རྣམས་ནི། །མཐུན་པར་གྱུར་ཅིང་རེ་བའང་འགྲུབ་པར་ཤོག །ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་རྟག་ཏུ་ནད་ཀྱི་རིགས་མཐའ་དག་སྤངས་ཤིང་མེད་ལ། ངན་སོང་གསུམ་དང༌། མཐོ་རིས་ཀྱི་སྡུག་བསྔལ་ཐམས་ཅད་དང་བྲལ་ཞིང༌། འདོད་


TNT17_Page_0822
[མ་དཔེ་གཟིགས་ན་འདིར་གནོན།]

ཡོན་དང་ཏིང་ངེ་འཛིན་གྱི་བདེ་བ་ཕུན་སུམ་ཚོགས་པ་དང་ལྡན་པར་གྱུར་ལ། འགྲོ་བ་ཀུན་གྱི་ཆོས་ཀྱི་དོན་ཏེ་མཐོ་རིས་དང་ཐར་པ་ཐམས་ཅད་མཁྱེན་པའི་རྒྱུར་གྱུར་པའི་སྤྱོད་པ་རྣམས་བྱས་པ་ལ། ཕན་ཚུན་ཐམས་ཅད་བློ་གྲོས་མཐུན་པར་འགྱུར་ཞིང༌། ཆོས་དང་མི་འགལ་པའི་རེ་བའི་དོན་ཐམས་ཅད་ཀྱང་འགྲུབ་པར་ཤོག་ཅིག རེ་བའི་དོན་གྱི་མཐར་ཐུག་པ་ནི། བླ་ན་མེད་པའི་བྱང་ཆུབ་ཡིན་པར་འགྱུར་ཏེ། སེམས་ཅན་ཐམས་ཅད་ཀྱང་རང་ཉིད་བདེ་བ་དམ་པ་ཐོབ་པར་འདོད་པ་ཡིན་ན། བདེ་བ་དམ་པ་མཐར་ཐུག་པ་ནི། དེ་ལས་གཞན་མེད་པའི་ཕྱིར། དུད་འགྲོའི་སྐྱེ་གནས་ཚུན་ཆད་ཀྱི་ཡང༌། རེ་སྨོན་གྱི་གནས་ནི་རྫོགས་པའི་བྱང་ཆུབ་ཡིན་པར་འགྱུར་རོ། །དེ་བས་ན་དངོས་སུ་སྨོན་པར་མི་བྱེད་ཀྱང་འདོད་པའི་ཚུལ་ལ་དཔག་ནས་བསྒྲུབ་ན་དེ་ལྟར་རིགས་ཤིང་འགྲུབ་པ་ཡིན་ནོ། །དེ་དག་ནི་སེམས་ཅན་ཡོངས་སུ་སྨོན་པར་བྱེད་པའི་སྨོན་ལམ་སྟེ། མདོར་བསྟན་འདིས་ནི་རྫོགས་སྨིན་སྦྱང་གསུམ་ཚང་བར་བསྟན་ཅིང༌། བྱང་ཆུབ་སེམས་དཔའི་སྤྱོད་པ་ཐམས་ཅད་དམ། སྨོན་ལམ་གྱི་ཡུལ་ཐམས་ཅད་གསུམ་པོ་དེར་འདུས་པ་ཡིན་ནོ། །གཉིས་པ་རྒྱས་བཤད་ལ། ཐེག་པ་ཆེན་པོའི་སྤྱོད་པ་ཐུན་མོང་བའི་རིམ་པ་དང་སྦྱར་བའི་སྨོན་ལམ་དང༌། བྱང་ཆུབ་སེམས་དཔའི་གསང་བ་ཐུན་མོང་མ་ཡིན་པའི་དབང་དུ་བྱས་པའི་སྨོན་ལམ་དང༌། གཉིས་ཀར་དུ་འཇུག་པའི་རྣམ་གྲངས་སྣ་ཚོགས་པ་བསྟན་པའི་སྨོན་ལམ་མོ། །དང་པོ་ནི། བྱང་ཆུབ་སྤྱོད་པ་དག་ནི་ནས།


TNT17_Page_0823
[མ་དཔེ་གཟིགས་ན་འདིར་གནོན།]

ཀུན་ཏུ་སྤྱོད་པར་གྱུར་ཅེས་པའི་བར་ཏེ། དེ་ལ་བྱང་ཆུབ་སྤྱོད་པ་ནི། གཞན་དོན་དུ་བདག་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པའི་ཕྱིར་དུ་སྤྱོད་པ་སྟེ། བདག་གིས་སངས་རྒྱས་ཀྱི་ཆོས་རྫོགས་པའི་རྒྱུར་གྱུར་པའི་ལྡོག་ཆ་འཛིན་ལ། བཟང་པོ་སྤྱོད་པ་ནི་སེམས་ཅན་གཞན་རྣམས་ཁོ་ན་སངས་རྒྱས་ཀྱི་ས་ལ་འཇོག་པའི་ཕྱིར་སྤྱོད་པ་སྟེ་སེམས་ཅན་གཞན་སྨིན་ཅིང་གྲོལ་བར་བྱེད་པའི་རྒྱུའི་ལྡོག་ཆ་འཛིན་པ་ཡིན་ཅིང༌། གཉིས་ཀ་ཡང་སྙིང་རྗེ་ཆེན་པོ་དང་འཁོར་གསུམ་རྣམ་པར་མི་རྟོག་པའི་ཡེ་ཤེས་ཀྱིས་ཀུན་ནས་བླངས་པའི། སྦྱིན་སོགས་ཕར་ཕྱིན་བཅུ། ཐབས་མཁས་ཕུན་སུམ་ཚོགས་པས་ཟིན་པས། རང་རྒྱུད་གྲོལ་ཞིང་གཞན་རྒྱུད་སྨིན་པར་བྱེད་པ་ལ་ནི་འདྲའོ། །དེས་ན་བྱང་ཆུབ་སེམས་དཔའ་གཅིག་ཁོ་ནས་ཀྱང༌། སྤྱོད་པ་གཉིས་ཀར་སྤྱད་དགོས་ཏེ། སེམས་ཅན་གྱི་དོན་དུ་གང་རླབས་ཆེ་བ། སྐབས་སུ་གང་བབ་པ་དེ་ཉིད་ལ་འཇུག་དགོས་པའི་ཕྱིར་རོ། །འོན་ཀྱང༌། སེམས་བསྐྱེད་པ་དང་པོའི་གནས་སྐབས་ཀྱི་སྨོན་ལམ་གྱི་ཁྱད་པར་ལས། བྱང་ཆུབ་སེམས་དཔའ་འདོད་ཆེན་པ་དང༌། འདོད་ཆེན་པ་མ་ཡིན་པའོ། །དང་པོ་ནི། བྱང་ཆུབ་སྤྱོད་པ་པ་སྟེ། ཐོག་མར་བདག་ཉིད་སངས་རྒྱས་སུ་གྱུར་ནས་འཁོར་བ་སྲིད་ཀྱི་བར་གཞན་དོན་བྱེད་པ། རྒྱལ་པོ་ལྟ་བུའི་སེམས་བསྐྱེད་དང་ལྡན་པའི་བྱང་སེམས་ཞེས་བྱའོ། །གཉིས་པ་ནི། སེམས་ཅན་གཅིག་ཀྱང་མ་ལུས་པར། སངས་


TNT17_Page_0824
[མ་དཔེ་གཟིགས་ན་འདིར་གནོན།]

རྒྱས་ཀྱི་ས་ལ་མ་བཞག་གི་བར་དུ། སེམས་ཅན་ཁོ་ན་སྒྲོལ་བའི་ཕྱིར། བདག་ཉིད་འཁོར་བ་ན་གནས་པར་བྱ་ཡི། འཚང་རྒྱ་བར་མ་གྱུར་ཅིག་ཅེས་སྨོན་ལམ་འདེབས་པ་ནི། བཟང་པོ་སྤྱོད་པ་པ་སྟེ་རྫི་བོ་ལྟ་བུའི་སེམས་བསྐྱེད་དང་ལྡན་པའི་བྱངཆུབ་སེམས་དཔའ་འོ། །དེ་བས་ན་དེ་གཉིས་སེམས་དང་པོ་བསྐྱེད་པའི་སྨོན་ལམ་དང་འདུན་པའི་ཁྱད་པར་ཡིན་གྱིས། བར་དུ་སྤྱོད་པ་ནི་གཉིས་ཀར་སྤྱོད་ལ། མཐར་འབྲས་བུ་ལ་ཡང་ཁྱད་པར་མེད་དོ། །འོ་ན་བྱང་ཆུབ་སྤྱོད་པ་པ་ནི། འཕགས་པ་བྱམས་པ་བཞིན་དུ་འཇིག་རྟེན་ན་འཚང་རྒྱ་བར་འགྱུར་ལ། བཟང་པོ་སྤྱོད་པ་པ་ནི་ཀུན་ཏུ་བཟང་པོ་དང་འཇམ་དཔལ་ལ་སོགས་པ་བཞིན་དུ། ཚོགས་རྫོགས་ཀྱང་དམ་བཅའ་མ་རྫོགས་པས་མངོན་པར་སངས་མི་རྒྱ་བ་སྟེ། འབྲས་བུ་རིགས་གཉིས་ཡོད་པ་མ་ཡིན་ནམ་སྙམ་ན། ཚོགས་རྫོགས་ནས་སངས་མི་རྒྱ་བ་ནི་མི་སྲིད་དེ། སྒྲིབ་གཉིས་བྱང་ཞིང་ཚོགས་གཉིས་རྫོགས་པ་དེ་ཉིད་སངས་རྒྱས་ཡིན་པའི་ཕྱིར་རོ། །སྔོན་གྱི་དམ་བཅའ་དང་སྨོན་ལམ་ཡང༌། བློ་སྦྱོང་པའི་ཕྱིར་ཡིན་གྱི། དམིགས་ཡུལ་དངོས་པོ་ལ་ཞུགས་པ་མ་ཡིན་པའི་ཕྱིར། མཐར་ཕྱིན་པར་སྤྱོད་དགོས་པ་ཡང་མ་ཡིན་ནོ། །ཀུན་ཏུ་བཟང་པོ་དང་འཇམ་དཔལ་ལ་སོགས་པ། ཞིང་ཁམས་ཀུན་ཏུ་བྱང་ཆུབ་སེམས་དཔར་སྣང་བ་ཡང༌། བྱང་ཆུབ་སེམས་དཔར་འདུལ་བ་ལ་དེ་ལྟར་བསྟན་པ་ཡིན་གྱི། གནས་ཚུལ་མ་ཡིན་ལ། སངས་རྒྱས་ཀྱིས་འདུལ་བའི་ཞིང་ཁམས་མང་པོར་སངས་རྒྱས་ཉིད་དུ་ཡང་བསྟན་ཟིན་


TNT17_Page_0825
[མ་དཔེ་གཟིགས་ན་འདིར་གནོན།]

ཅིང་སྟོན་བཞིན་པ་ཡིན་པའི་ཕྱིར་རོ། །རྒྱལ་བ་བྱམས་པ་ལ་སོགས་པ་བཞིན་ཞིང་འདིར་སངས་རྒྱས་སུ་སྟོན་པ་རྣམས་ཀྱང༌། ཞིང་གཞན་དང་གནས་སྐབས་གཞན་དུ་བྱང་ཆུབ་སེམས་དཔས་འདུལ་བ་ལ་སླར་ཡང་བྱང་ཆུབ་སེམས་དཔར་འབྱུང་སྟེ། འོ་སྐོལ་གྱི་སྟོན་པ་བསྐལ་པ་མཐའ་ཡས་པའི་སྔོན་རོལ་ཏུ་སངས་རྒྱས་ཟིན་པ་ཡང༌། ཕྱི་ནས་ཀྱང་བྱང་ཆུབ་སེམས་དཔའི་སྤྱོད་པ་རྒྱུན་མི་ཆད་པར་བསྟན་པ་བཞིན་ནོ། །དེ་བས་ན། སངས་རྒྱས་རྣམས་ཀྱི་རྩ་བའི་ཞིང་དང་སྐུ་ལུས་འོག་མིན་སྟུག་པོ་བཀོད་པའི་ཞིང་དུ་ལོངས་སྤྱོད་རྫོགས་སྐུ་ཡིན་ན། གང་ཚོགས་གཉིས་རྫོགས་ཚད་དེ་མ་ཐག་ཏུ་ཞིང་དེར་ལོངས་སྐུའི་རྟེན་དུ་མངོན་པར་རྫོགས་པར་སངས་རྒྱ་བར་གདོན་མི་ཟ་ལ། མ་དག་པའི་ཞིང་དུ་སྤྲུལ་པ་སྟོན་པ་ལ་ནི། སངས་རྒྱས་དང་སེམས་དཔའ་ཆེན་པོ་གཉིས་སུ་ཡང་འབྱུང་མོད་ཀྱི། དེར་མ་ཟད་སྤྲུལ་པ་མཐའ་ཡས་པའི་ཚུལ་གྱིས་འབྱུང་ངོ༌། །དེས་ན་འཇམ་དཔལ་ལ་སོགས་པ་སྔོན་གྱི་དམ་བཅའ་མི་འདོར་བའི་ཕྱིར། ད་དུང་སངས་མ་རྒྱས་སོ་ཞེས་གསུངས་པ་ལྟར་ཡོད་སྲིད་ནའང༌། དགོས་པ་བཟང་པོ་སྤྱོད་པ་དང་འབྲེལ་བའི་དམ་བཅའ་ཡང་དག་པ་ལ། གདུལ་བྱ་རྣམས་སྤྲོ་བ་སྐྱེ་ཞིང་འགོད་ནུས་པའི་དགོས་པ་ཡོད་པར་གཟིགས་པ་དང༌། དགོངས་གཞི་བྱང་ཆུབ་སེམས་དཔས་འདུལ་བའི་ངོར་བྱང་ཆུབ་སེམས་དཔའི་ཚུལ་འཛིན་པ་ཡང༌། རྟག་ཏུ་རྒྱུན་མི་འཆད་པར་འབྱུང་བ་ལ་དགོངས་སོ། །གཞན་དུ་ན་ཚོགས་གཉིས་རྫོགས་ནས་སངས་མི་


TNT17_Page_0826
[མ་དཔེ་གཟིགས་ན་འདིར་གནོན།]

རྒྱ་བ་ཞིག་སྲིད་ན་ནི་དེའི་རྒྱུ་གང་ཡིན། སྒྲིབ་པའི་ཆ་ཅུང་ཟད་བཟུང་བས་སོ་སྙམ་ན། ས་བཅུ་པའི་ཡེ་ཤེས་ཀྱིས་འབད་རྩོལ་མེད་པར། ཡུན་ཐུང་ངུས་ཀྱང་སྒྲིབ་པ་མཐའ་དག་སྤོང་བར་འགྱུར་ན་ཡུན་རིང་པོ་དེ་ཉིད་ཀྱིས་ཅིའི་ཕྱིར་སྤང་པར་མི་འགྱུར། རྡོ་རྗེ་ལྟ་བུའི་ཏིང་ངེ་འཛིན་ཡང་ཚོགས་གཉིས་རྫོགས་པའི་ཕྱིར་མི་ཐོབ་པ་མི་སྲིད་ལ། དེས་སྒྲིབ་གཉིས་བག་ཆགས་དང་བཅས་པར་སྤོང་བར་མི་འགྱུར་ན་ནི། སངས་རྒྱས་གཞན་རྣམས་ཀྱིས་ཀྱང་ཐམས་ཅད་མཁྱེན་པ་ལ་སྒྲིབ་པ་མི་སྤངས་པར་ཡང་འགྱུར་ལ། དེས་དེ་སྤོང་ན་སྒྲིབ་པ་ཅི་ཞིག་ལུས་པར་འགྱུར། གཞན་ཡང་ཚོགས་གཉིས་རྫོགས་ནས་སྒྲིབ་པ་ལུས་པ་ཡང་མི་སྲིད་དེ། ཉི་མ་ཤར་བས་མུན་པ་བཞིན་ནོ། །ཚོགས་མ་རྫོགས་པ་ཡང་མི་སྲིད་དེ། དུས་མཐའ་ཡས་པར་གཞན་རྣམས་ལས་ཀྱང་ལྷག་པར་སྤྱོད་པ་རྒྱ་ཆེ་བ་རྟག་ཏུ་སྤྱད་པའི་ཕྱིར་རོ། །འཇམ་དཔལ་ལ་སོགས་པས་སྒྲིབ་པའི་ཆ་ཅུང་ཟད་གཟུང་བ་ལྟར་བཤད་པ་ཡོད་དུ་ཆུག་ཀྱང༌། གདུལ་བྱ་འགའ་ཞིག་ལ་སྣང་ཚུལ་བྱུང་བ་ལ་དགོངས་པའི་དྲང་དོན་ཡིན་པའི་ཕྱིར་རོ། །ཤིན་ཏུ་སྤྲོས་པས་ཆོག་གོ །དེ་བས་ན། གཞུང་འདིར་བྱང་ཆུབ་སྤྱོད་པ་དང༌། བཟང་པོ་སྤྱོད་པ་ཞེས་པ་རྣམས་དེ་ལྟར་ངེས་པར་བྱས་ནས། སེམས་བསྐྱེད་པ་དང༌། སྐྱེ་བ་དྲན་པ་དང༌། རབ་ཏུ་བྱུང་བ་དང༌། སྤྱོད་པ་སྤྱི་ལ་སློབ་པ་དང༌། ཁྱད་པར་དུ་ཚུལ་ཁྲིམས་ལ་སློབ་པ་དང༌། མངོན་ཤེས་དང་ལྡན་པས་ཆོས་སྟོན་པ་དང༌། བྱང་ཆུབ་ཀྱི་སེམས་


TNT17_Page_0827
[མ་དཔེ་གཟིགས་ན་འདིར་གནོན།]

མི་བརྗེད་པ་རྣམས་ལ་བསླབས་པས། སྒྲིབ་པ་མཐའ་དག་བྱང་བ་དང༌། སྐྱོན་གསུམ་ལས་གྲོལ་ཞིང༌། ཆགས་པ་མེད་པའི་གནས་ཐོབ་པ་ན། སེམས་ཅན་རྣམས་སྡུག་བསྔལ་ཞི་ཞིང་བདེ་བ་དང་དགེ་བ་ལ་འགོད་པར་བྱེད། ཁྱད་པར་དུ་མཐའ་ཡས་པའི་རྣམ་པར་འཕྲུལ་པ་ཐོབ་ནས། ཆོས་བསྟན་པས་འགྲོ་བའི་དོན་མཐའ་མེད་དུ་སྤྱོད་པ་འགྱུར་རོ་ཞེས་པ་ནི། ལམ་གྱི་རིམ་པ་དང་པོ་འདིའི་སྐབས་ཀྱི་བསྡུས་པའི་དོན་ཡིན་ཏེ། དེ་དང་མཐུན་པར་སྨོན་ལམ་འདེབས་པའོ། །སྡོམ་ནི། སེམས་བསྐྱེད་སྐྱེ་བ་དྲན་དང་རབ་ཏུ་བྱུང༌། །སྤྱོད་པ་སྤྱི་དང་ཚུལ་ཁྲིམས་མངོན་ཤེས་སྟོན། །བྱང་སེམས་མི་བརྗེད་སྒྲིབ་བྱང་སྐྱོན་གསུམ་གྲོལ། །ཆགས་མེད་ཞི་བདེར་འགོད་དང་རྣམ་འཕྲུལ་ཐོབ། །འགྲོ་དོན་སྤྱོད་དེ་དོན་ཚན་བཅུ་གསུམ་ཡིན། །ཅེས་སོ། དོན་ཚན་དང་པོ་གསུམ་ནི། བྱང་ཆུབ་སྤྱོད་པ་དག་ནི་བདག་སྤྱོད་ཅིང༌། །འགྲོ་བ་ཀུན་ཏུ་སྐྱེ་བ་དྲན་པར་གྱུར། །ཚེ་རབས་ཀུན་ཏུ་འཆི་འཕོ་སྐྱེ་བ་ན། །རྟག་ཏུ་བདག་ནི་རབ་ཏུ་འབྱུང་བར་ཤོག །ཅེས་གསུངས་ཏེ། བྱང་ཆུབ་སྤྱོད་པ་གཞན་དོན་དུ་རྫོགས་པའི་བྱང་ཆུབ་ཐོབ་པར་འདོད་ཅིང༌། བྱང་ཆུབ་ཀྱི་ཕྱིར་དུ་ཕ་རོལ་ཏུ་ཕྱིན་པ་དྲུག་ལ་སྤྱོད་པར་འདོད་པའི་སེམས་སྐྱེད་བླངས་ཤིང༌། དེ་དང་མཐུན་པའི་སྤྱོད་པ་དག་ནི་བདག་སྤྱོད་ཅིང༌། དེ་ལས་འཇིག་རྟེན་ཕ་རོལ་འགྲོ་བའི་གནས་ཀུན་ལས། གར་སྐྱེས་ཀྱང་རུང་སྟེ། རྟག་ཏུ་སྐྱེ་བ་དྲན་པས་སྔོན་སེམས་


TNT17_Page_0828
[མ་དཔེ་གཟིགས་ན་འདིར་གནོན།]

བསྐྱེད་པ་དང༌། ཆོས་སྤྱད་པ་ཡང་དྲན་པར་གྱུར་ལ། ཚེ་རབས་ཀུན་གྱི་གནས་སྐབས་སུ་ནི། འཆི་འཕོ་བ་དང་སྐྱེ་བས་བསྡུས་པའི་སྐྱེ་བ་བཟུང་ཞིང་གསོན་པའི་གནས་སྐབས་ཐམས་ཅད་ན། དུས་རྟག་ཏུ་བདག་ནི་རབ་ཏུ་འབྱུང་བར་ཤོག་ཅིག འདིར་རབ་ཏུ་བྱུང་བ་ནི་གཉིས་ཏེ། སོ་སོ་སྐྱེ་བོའི་གནས་སྐབས་སུ་ཁྱིམ་སྤངས་ཏེ་རབ་ཏུ་བྱུང་ནས་སྡོམ་པ་ཡང་དག་པར་བླངས་བས་རབ་བྱུང་དུ་འགྱུར་བ་དང༌། ཐེག་ཆེན་འདི་ལ་འཕགས་པའི་ས་ཐོབ་ཚད་ཆོས་ཉིད་ཀྱི་རབ་བྱུང་ཐོབ་པའོ། །དོན་ཚན་བཞི་པ་དང་ལྔ་པ་སྤྱོད་པ་སྤྱི་དང་ཚུལ་ཁྲིམས་ལ་བསླབ་པ་ནི། རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང༌། །ཚུལ་ཁྲིམས་སྤྱོད་པ་དྲི་མེད་ཡོངས་དག་པ། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །ཅེས་ཏེ། དེ་བཞིན་གཤེགས་པ་མངོན་སུམ་དུ་མཇལ་བའམ་ལྐོག་ཏུ་གྱུར་ཀྱང་གསུང་རབ་ཐོས་པ་ལ་བརྟེན་ནས། རྒྱལ་བ་སངས་རྒྱས་ཀུན་གྱི་གདམས་ངག་ཆོས་ལས་ཇི་ལྟར་འབྱུང་བ་ལྟར། རྗེས་སུ་སློབ་པར་གྱུར་ཏེ། བཟང་པོ་སྤྱོད་པའི་རྒྱུའམ་སྒྲུབ་པ་ཕ་རོལ་ཏུ་ཕྱིན་པ་དྲུག་ལ་ཡང་དག་པར་བསླབ་པས་ཡོངས་སུ་རྫོགས་པར་འགྱུར་བའི་ཐབས་ལ་འཇུག་པར་བྱེད་ཅིང༌། ཁྱད་པར་དུ་བྱང་ཆུབ་སེམས་དཔའི་ཚུལ་ཁྲིམས་རྣམ་པ་གསུམ་གྱི་སྤྱོད་པ། ཉོན་མོངས་སྤངས་པས་དྲི་མ་མེད་ལ། རང་དོན་ཐེག་པ་དམན་པའི་སེམས་ཀྱིས་མ་གོས་པས་ཡོངས་སུ་དག་པ། འཆལ་


TNT17_Page_0829
[མ་དཔེ་གཟིགས་ན་འདིར་གནོན།]

ཚུལ་ལྟུང་པའི་ཉེས་པས་རྟག་ཏུ་མ་གོས་པས་མ་ཉམས་པ། དུས་གསུམ་གྱི་དངོས་པོ་ཐོབ་པར་སྲེད་པ་མེད་པའམ། བདེན་དངོས་སུ་འཛིན་པ་དང་བྲལ་བས་སྐྱོན་མེད་པ་སྟེ། དེ་ལྟ་བུའི་ཚུལ་ཁྲིམས་ལ་སྤྱོད་པར་ཤོག་ཅིག ། དོན་ཚན་དྲུག་པ་མངོན་པར་ཤེས་པ་ལྔ་དང་ལྡན་པས་ཆོས་སྟོན་པ་ནི། ལྷ་ཡི་སྐད་དང་ཀླུ་དང་གནོད་སྦྱིན་སྐད། གྲུལ་བུམ་དག་དང་མི་ཡི་སྐད་རྣམས་དང༌། །འགྲོ་བ་ཀུན་གྱི་སྐད་རྣམས་ཇི་ཙམ་པར། །ཐམས་ཅད་སྐད་དུ་བདག་གིས་ཆོས་བསྟན་ཏོ། །བྱང་ཆུབ་སེམས་དཔའ་མཐུ་ཐོབ་པའི་དབང་དུ་བྱས་ནས། ལྷའི་སྐད་དང༌། ཀླུའི་སྐད་དང༌། གནོད་སྦྱིན་གྱི་སྐད་དང༌། གྲུལ་བུམ་ལ་སོགས་པ་དག་གི་སྐད་དང༌། མིའི་སྐད་ཐ་དད་སྣ་ཚོགས་རྣམས་ཀྱི་སྐད་དང༌། དེ་དག་ལ་སོགས་པ་འགྲོ་བ་ཀུན་གྱི་སྒྲ་སྐད་རྣམས་ཇི་ཙམ་ཡོད་པ་དེ་ཙམ་ཐམས་ཅད་ཀྱི་སྐད་དུ། བདག་གིས་ཆོས་བསྟན་ཏོ་སྟེ་སྟོན་པར་གྱུར་ཅིག་པའོ། །དེ་ཡང༌། ལྷའི་རྣ་བའི་མངོན་ཤེས་ཀྱི་དབང་དུ་བྱས་པ་ཡིན་ཏེ། མངོན་ཤེས་དེའི་མཐུ་ནི་ཐག་རིང་བ་དང་ཤིན་ཏུ་ཕྲ་བ་སོགས་ལྐོག་ཏུ་གྱུར་པའི་སྒྲ་ཐམས་ཅད་ཀྱང་ཤེས། འགྲོ་བ་ཐ་དད་པའི་སྐད་རྣམས་དང༌། འབྱུང་བ་བཞིའི་སྒྲ་རྣམས་ཀྱང་གོ་རང་གི་སྐད་དང་ངག་ཚིག་གཅིག་གིས་ཀྱང་སེམས་ཅན་གཞན་རྣམས་ལ་དེ་དང་དེའི་སྐད་སྣ་ཚོགས་པ་སོ་སོར་གོ་བར་ནུས་པའོ། །དེ་བས་ན། ལྷ་ལ་ལྷའི་སྐད་དང༌། ཀླུ་ལ་ཀླུའི་སྐད་ལ་སོགས་པ་དུས་གཅིག་གམ་


TNT17_Page_0830
[མ་དཔེ་གཟིགས་ན་འདིར་གནོན།]

རིམ་ཅན་དུ་སྟོན་པར་ནུས་སོ། །འདིར་ལྷ་ནི་འདོད་པའི་ལྷ་རིགས་དྲུག་གོ །ཀླུ་ནི་བྲང་འགྲོ་སྦྲུལ་གྱི་མིང་ཡིན་ཡང༌། དེ་རྣམས་ཀྱི་ནང་ནས་རྫུ་འཕྲུལ་དང་ལྡན་པ་རྣམས་ལ། སྤྱི་མིང་བྱེ་བྲག་ལ་བཏགས་པའི་ཚུལ་ཏེ། འཕགས་པའི་ཡུལ་དུ་ཀླུའི་ལྷའམ། །བོད་ཀྱི་བརྡ་རྙིང་པ་རྣམས་ལ་ཀླུ་འབྲུག་ཏུ་གྲགས་པའོ། །གནོད་སྦྱིན་ནི་རྒྱལ་ཆེན་བཞིའི་རིགས་ཀྱི་ལྷ་རྣམས་ལའང་གྲགས་མོད་ཀྱིས་འདིར་ལྷ་ལས་ལོགས་སུ་བཀར་བའི་ཕྱིར། བར་སྣང་ལ་རྒྱུ་བའམ་ས་སྟེང་དུ་རྒྱུ་བའི་མདངས་འཕྲོག་པ་པོ་རྣམས་སོ། །གྲུལ་བུམ་ནི་གཤིན་རྗེའི་རིགས་སུ་གཏོགས་པ་ཡི་དྭགས་ཀྱི་འགྲོ་བའི་ཁྱད་པར་རམ། གདུགས་པའི་སེམས་ཅན་ནོ། །བདུན་པ་བྱང་ཆུབ་ཀྱི་སེམས་མི་བརྗེད་པ་ནི། དེས་ཤིང་ཕ་རོལ་ཕྱིན་ལ་རབ་བརྩོན་ཏེ། །བྱང་ཆུབ་སེམས་ནི་ནམ་ཡང་བརྗེད་མ་གྱུར། །དེས་པ་ནི་མཛངས་པ་སྟེ། ངང་ཚུལ་འཇམ་པའམ། མཁས་ལ་ཞིབ་པའི་བློ་སྟེ། དེས་པར་བགྱིས་ཤིང༌། ཕ་རོལ་ཏུ་ཕྱིན་པ་རྣམས་ལ་སྐྱོ་བ་མེད་པར་ངང་གིས་འཇུག་པའི་རབ་ཏུ་བརྩོན་པ་དང༌། བྱང་ཆུབ་ཀྱི་སེམས་ཞེས་བྱ་བ་ནི་རྣམ་པ་གཉིས་ཏེ། སེམས་ཅན་ཐམས་ཅད་སངས་རྒྱས་ལ་འགོད་པར་འདོད་པ་དང༌། ཆོས་ཀྱི་དབྱིངས་སྤྲོས་པ་དང་བྲལ་བའི་ཡེ་ཤེས་ལ་མཉམ་པར་འཇོག་པའོ། །དེ་ལྟ་བུའི་བྱང་ཆུབ་ཀྱི་སེམས་དུས་དང་གནས་སྐབས་ཐམས་ཅད་དུ་ནམ་ཡང་བརྗེད་པར་མ་གྱུར་ཅིག་ཅེས་པའོ། །དེ་ལ་དེས་པ་ནི་རྒྱུད་འཇམ་པའི་ཕྱིར་སྙིང་རྗེ་མི་བརྗེད་པ་དང༌། མཁས་པའི་


TNT17_Page_0831
[མ་དཔེ་གཟིགས་ན་འདིར་གནོན།]

ཕྱིར་སྟོང་ཉིད་མི་བརྗེད་པ་སྟེ་རྒྱུའོ། །ཕ་རོལ་ཏུ་ཕྱིན་པ་ལ་ངང་གིས་བརྩོན་པ་ཡང་དེ་རྣམས་མི་བརྗེད་པ་སྟེ་ཡན་ལག་གོ །དེ་ཡང་གཞན་གྱིས་མ་བསྟན་པར་སྦྱིན་པའི་ཕ་རོལ་ཏུ་ཕྱིན་པ་ལ་འཇུག་པ་ལ་སོགས་པ་བྱང་ཆུབ་སེམས་དཔའི་ཆོས་མ་འདྲེས་པ་བཅོ་བརྒྱད་རྣམས་འདི་དག་ཏུ་འདུས་པ་ཡིན་ཏེ། དེ་ཡང་མོས་སྤྱོད་ཀྱི་ས་ལ་ནི་ཅི་རིགས་པར་ཐོབ་ཅིང༌། འཕགས་པའི་ས་ལ་ནི་རྫོགས་པར་ཐོབ་པའོ། །དེ་དག་ཀྱང་འཕགས་པ་དཀོན་མཆོག་སྤྲིན་ལས་གསུངས་ཏེ། མ་བསྟན་པར་ཕ་རོལ་ཏུ་ཕྱིན་པ་དྲུག་ལ་འཇུག་པ་སྟེ་དྲུག་དང༌། མ་བསྟན་པར་བསྡུ་དངོས་དང་ཐབས་ལ་མཁས་པ་དང༌། ཐེག་པ་མཆོག་གི་འབྱུང་བ་ཞེས་པ་སྟེ་གསུམ་དང༌། ཐེག་ཆེན་ལས་མ་ཉམས་པ་དང༌། འཁོར་འདས་ཀྱི་སྒོ་སྟོན་པ་དང༌། ཟུང་དང་སྣྲེལ་ཞིའི་རྒྱུད་ལ་མཁས་པ་དང༌། ཡེ་ཤེས་སྔོན་དུ་འགྲོ་ཞིང་འདུ་མི་བྱེད་པས་དགེ་སྡིག་གི་བླང་དོར་ལ་མཁས་པ་དང༌། བཟོད་པའི་ལུས་ཀྱི་སེམས་ཅན་མི་གཏོང་བ་དང༌། འགྲོ་ཀུན་དགའ་བར་སྟོན་པ་དང༌། བྱིས་པ་དང་ཉན་ཐོས་ཀྱི་ནང་དུ་ཐམས་ཅད་མཁྱེན་པའི་སེམས་མི་ཉམས་པ་དང༌། སངས་རྒྱས་ཀྱི་ཆོས་ཚོལ་བ་ལས་མི་ཟློག་པ་རྣམས་སོ། །དོན་འདི་ཉིད་ཞིབ་མོར་རྟོགས་པར་འདོད་ན། བདེན་པ་པོའི་ལེའུ་ལས་རྒྱས་པར་བཤད་པས་དེར་བལྟའོ། །བྱང་ཆུབ་སྤྱོད་པ་ཞེས་པ་ནས། དེ་ཡན་ཆད་ནི་བཟང་པོ་སྤྱོད་པ་དང༌། བྱང་ཆུབ་སྤྱོད་པ་སྒྲུབ་པའི་དབང་དུ་བྱས་ཤིང༌། མོས་སྤྱོད་ཀྱི་ས་ལ་གནས་པ་དང༌།


TNT17_Page_0832
[མ་དཔེ་གཟིགས་ན་འདིར་གནོན།]

ཐུན་མོང་བའི་ཡོན་ཏན་གྱི་དབང་དུ་བྱས་པའི་སྨོན་ལམ་མོ། །དོན་ཚན་བརྒྱད་དགུ་བཅུ་པ། སྡིག་སྒྲིབ་སྦྱང་བ་དང༌། སྐྱོན་གསུམ་ལས་གྲོལ་བ་དང་མ་ཆགས་པ་ནི། སྡིག་པ་གང་རྣམས་སྒྲིབ་པར་གྱུར་པ་དག །དེ་དག་མ་ལུས་ཡོངས་སུ་བྱང་བར་ཤོག །ལས་དང་ཉོན་མོངས་བདུད་ཀྱི་ལས་རྣམས་ལས། །གྲོལ་ཞིང་འཇིག་རྟེན་འགྲོ་བ་རྣམས་སུ་ཡང༌། ཇི་ལྟར་པདྨོ་ཆུ་མི་ཆགས་པ་བཞིན། །ཉི་ཟླ་ནམ་མཁར་ཐོགས་པ་མེད་ལྟར་སྤྱད། །དེ་ལ་སྡིག་པ་ནི་སྡིག་ཏོ་མི་དགེ་བའི་ཆོས་ཏེ། འདོད་པའི་ཁམས་ཀྱི་ཉོན་མོངས་པ་དང༌། དེས་ཀུན་ནས་བླངས་པའི་ལས་ཐམས་ཅད་དོ། །དེའི་ཕྱོགས་མཐུན་པ་ནི། ཉོན་མོངས་པ་ཐམས་ཅད་ཡིན་ཏེ། དེ་བས་ན་སྡིག་པ་གང་རྣམས་ཐར་པ་ལ་སྒྲིབ་པར་གྱུར་པ་དག་སྟེ། དེ་དག་ས་བོན་དང་བཅས་པ་མ་ལུས་པ་ཡོངས་སུ་བྱང་བར་ཤོག་ཅིག སྐྱོན་གསུམ་ནི་ལས་ཉོན་བདུད་གསུམ་མོ། །ལས་ནི་ཁམས་གསུམ་དུ་སྐྱེ་བར་འགྱུར་བའི་ལས་དང༌། ཉོན་མོངས་པ་ནི་ཀུན་ཏུ་སྦྱོར་བ་དགུའི་ཉོན་མོངས་པ་དང༌། བདུད་ནི་ཆོས་ཀྱི་འཚོ་བ་ལ་བར་དུ་གཅོད་པར་བྱེད་པའི་གདོན་ཏེ། འདོད་པ་ལ་ཆགས་པ་དང༌། རྣམ་པར་གཡེངས་བ་དང༌། འཁྲུགས་པ་དང༌། ནད་ལ་སོགས་པ་བསྐྱེད་ཅིང༌། གསོད་པར་བྱེད་པའི་ལས་ཅན་ནམ། དེ་བཞིན་དུ་ལམ་བཟང་པོ་ལས་ཟློག་ཏུ་བཅུག་ནས་དཀའ་ཐུབ་ངན་པ་དང༌། ལྟ་བ་ངན་པ་ལ་སོགས་པ་ལ་ཡང་སྦྱོར་བར་བྱེད་པ་སྟེ། གཞན་འཕྲུལ་དབང་བྱེད་ཀྱི་བདག་པོ་ལ་སོགས་པའོ། །གང་བྱང་ཆུབ་སེམས་དཔའི་ཏིང་ངེ་འཛིན་གྱི་ལུས་


TNT17_Page_0833
[མ་དཔེ་གཟིགས་ན་འདིར་གནོན།]

ཐོབ་པ་ཕན་ཆད་དུ། རང་ཉིད་ལ་ནི་བདུད་ཀྱི་ལས་ཀྱིས་འཇུག་པ་མེད་ལ། དེ་ལས་གཞན་ལ་ནི་ཡོད་དོ། །ལས་དང་ཉོན་མོངས་པའི་སྐྱོན་གྱིས་འཁྲིད་པ་ཡང་དེ་དང་འདྲ་ལ། འོན་ཀྱང་དེ་གཉིས་སྤངས་པའི་དུས་ནི། མཐོང་པའི་ལམ་སྟེ་ཆོས་ཉིད་ལ་བཟོད་པ་འབྲིང་པོ་ཐོབ་པ་ནའོ། །མ་གོས་པའམ་མ་ཆགས་པའི་ཡོན་ཏན་ནི། རང་ཉིད་གང་དུ་གནས་ཤིང་སྤྱོད་པའི་འཇིག་རྟེན་གྱི་འགྲོ་བ་རྣམས། གང་དུ་སྤྱོད་ཀྱང་རུང་སྟེ། ཇི་ལྟར་པདྨོ་ཆུ་ནང་དུ་གནས་ཀྱང་ཆུ་མི་ཆགས་པ་བཞིན་དུ། རྟག་ཏུ་འཁོར་བར་གནས་ཀྱང་འཁོར་བའི་སྐྱོན་ལས་དང་ཉོན་མོངས་པ་དང༌། སྐྱེ་ཤི་ལ་སོགས་པས་མི་གོས་པ་དང༌། ཉི་ཟླ་ནམ་མཁའི་ལ་ཐོགས་པ་མེད་པར་རྒྱུ་བ་ན། ལོ་ཐོག་སྨིན་པ་དང༌། སྨན་རྣམས་བསྐྱེད་པ་ལ་སོགས་པ། གཞན་གྱི་དོན་མང་པོ་སྤྱོད་ཀྱང༌། ལན་ལ་རེ་བ་མེད་ཅིང་རློམས་སེམས་དང་རྣམ་པར་རྟོགས་པ་མེད་པ་ལྟར། བྱང་ཆུབ་སེམས་དཔའ་དེ་ཡང་སྦྱིན་པ་རྣམ་པ་བཞི་ལ་སོགས་པས་སེམས་ཅན་ལ་ཕན་པ་རྒྱ་ཆེན་པོ་རྟག་ཏུ་སྒྲུབ་ཀྱང༌། ལན་ལ་རེ་བ་དང་རློམས་སེམས་མེད་པ་སྟེ། བདག་ཀྱང་དེ་ལྟར་སྤྱོད་པར་གྱུར་ཅིག་པའོ། །བཅུ་གཅིག་པ་སེམས་ཅན་བདེ་བ་ལ་འགོད་པ་ནི། ཞིང་གི་ཁྱོན་དང་ཕྱོགས་རྣམས་ཇི་ཙམ་པར། །ངན་སོང་སྡུག་བསྔལ་རབ་ཏུ་ཞི་བར་བྱེད། །བདེ་བ་དག་ལ་འགྲོ་བ་ཀུན་འགོད་ཅིང༌། །འགྲོ་བ་ཐམས་ཅད་ལ་ནི་ཕན་པར་སྤྱད།། སངས་རྒྱས་ཀྱི་ཞིང་གི་ཁྱོན་དང༌། ཕྱོགས་བཅུ་རྣམས་ཇི་ཙམ་ཡོད་པར།


TNT17_Page_0834
[མ་དཔེ་གཟིགས་ན་འདིར་གནོན།]

ངན་སོང་གིས་མཚོན་པའི་འགྲོ་བ་རྣམས་ཀྱི་སྡུག་བསྔལ་མ་ལུས་པ་ཐམས་ཅད་རབ་ཏུ་ཞི་བར་བྱེད་ལ། འཇིག་རྟེན་པའི་བདེ་བ་དང༌། ལྷ་མིའི་ལུས་དང༌། ཕུན་སུམ་ཚོགས་པ་དག་ལ་འགྲོ་བ་ཀུན་འགོད་ཅིང༌། དེ་ཙམ་དུ་མ་ཟད་འགྲོ་བ་དེ་རྣམས་ཐམས་ཅད་ལ་ནི། ཐར་པ་མྱ་ངན་ལས་འདས་པའི་ཆོས་ཀྱིས་རྟག་ཏུ་ཕན་པར་སྤྱོད་ནུས་པར་གྱུར་ཅིག ། དོན་ཚན་བཅུ་གཉིས་བཅུ་གསུམ་པ་མཐའ་ཡས་པའི་རྣམ་འཕྲུལ་དང༌། འགྲོ་དོན་མི་ཟད་པར་སྤྱོད་པ་ནི། བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང༌། །སེམས་ཅན་དག་གི་སྤྱོད་དང་མཐུན་པར་འཇུག །བཟང་པོ་སྤྱོད་པ་དག་ནི་རབ་སྟོན་ཅིང༌། །མ་འོངས་བསྐལ་པ་ཀུན་ཏུ་སྤྱོད་པར་འགྱུར། །བདག་ཉིད་བྱང་ཆུབ་སྤྱོད་པའི་སྒོ་ནས། ཕ་རོལ་ཏུ་ཕྱིན་པ་དྲུག་པོ་དག་ནི་ཡོངས་སུ་རྫོགས་པར་བྱེད་ཅིང༌། སེམས་ཅན་གཞན་རྣམས་ཀྱི་ཁམས་དང༌། མོས་པ་དང༌། དབང་པོ་དང༌། བག་ལ་ཉལ་རྣམས་ཤེས་པས་དེ་རྣམས་ཀྱི་སྤྱོད་པ་དང་མཐུན་པར། གང་གིས་འདུལ་བར་འགྱུར་བའི་ཐབས་ཀྱིས་འཇུག་སྟེ། ཁྱིམ་པས་འདུལ་བ་ལ་ཁྱིམ་པའི་གཟུགས་དང༌། རབ་ཏུ་བྱུང་བས་འདུལ་བ་ལ་རབ་ཏུ་བྱུང་བའི་གཟུགས་དང༌། དེ་བཞིན་དུ་སངས་རྒྱས་དང་བྱང་ཆུབ་སེམས་དཔའ་དང༌། རང་སངས་རྒྱས་དང༌། ཉན་ཐོས་དང༌། ཚངས་པ་དང༌། ལྷ་དང༌། དྲང་སྲོང་དང༌། འཁོར་ལོས་སྒྱུར་བ་དང༌། རྒྱལ་པོ་ལ་སོགས་པ་གཟུགས་སྣ་ཚོགས་པ་དང༌། སྤྱོད་པ་སྣ་ཚོགས་པ་དང༌། བཤད་པ་སྣ་ཚོགས་པའི་སྒོ་ནས་སེམས་ཅན་རྣམས་སྨིན་པར་བྱེད་པའི་ནུས་པ་ཐོབ་པའོ། །


TNT17_Page_0835
[མ་དཔེ་གཟིགས་ན་འདིར་གནོན།]

གཞན་དོན་དུ་འཁོར་བར་སྐྱོ་བ་མེད་པའི་རང་བཞིན་ཅན་དེ་ནི་འགྲོ་བའི་དོན་འདི་ལྟར་སྤྱོད་དེ། རང་གི་རྟོགས་པ་དང་མཐུན་པའི་བཟང་པོ་སྤྱོད་པ་དག་གི་ཆོས་ནི། སེམས་ཅན་རྣམས་ལ་རབ་ཏུ་སྟོན་ཅིང་སྤྱོད་པ་དེ་ལ་འགོད་པར་མཛད་པས་སོ། །དེ་ལྟར་རང་གི་སྤྱོད་པ་རྫོགས་པ་དང་ནུས་པ་ཐོབ་པ་དང༌། ཆོས་སྟོན་པ་སྟེ། རང་གཞན་གྱི་དོན་གསུམ་པོ་དེ་ཡང༌། དུས་རེ་ཞིག་སྤྱོད་པར་མ་ཟད་མ་འོངས་པའི་བསྐལ་པ་མཐའ་མེད་པའི་བར་དུ་ཀུན་ཏུ་སྤྱོད་པར་འགྱུར་ཏེ་གྱུར་ཅིག་པའོ། །གཉིས་པ་བྱང་ཆུབ་སེམས་དཔའི་གསང་བ་ཐུན་མོང་མ་ཡིན་པའི་དབང་དུ་བྱས་པའི་སྨོན་ལམ་ལ། གྲོགས་ཕུན་སུམ་ཚོགས་པ་དང་ལྷན་ཅིག་པར་སྨོན་ལམ་དག་པས་མཚམས་སྦྱར། བཤེས་གཉེན་དམ་པ་རྟག་ཏུ་བརྟེན་ཅིང་མཉེས་པར་བྱས། ཐུན་མོང་གི་སྐབས་སུ་བཤད་པའི་སྤྱོད་པ་རྣམས་དག་ལ་གནས་པས་ཆོས་ཀྱི་སྒོའི་ཏིང་ངེ་འཛིན་དང་གཟུངས་ཐོབ་པར་གྱུར། ཚོགས་གཉིས་ཀྱི་མཐུ་ལས་བྱང་ཆུབ་སེམས་དཔའི་རྒྱན་རྣམས་ཐོབ། ཞིང་མཐའ་ཡས་པའི་སངས་རྒྱས་ཀྱི་དྲུང་དུ་བྱང་ཆུབ་སེམས་དཔའི་སྤྱོད་པ་སྤྱད་པས་སླར་ཡང་སྤྱོད་པ་ཤིན་ཏུ་སྨིན་པའི་གནས་སྐབས་ན། ཀུན་ཁྱབ་ཏུ་རྫོགས་སྨིན་སྦྱངས་གསུམ་ནུས་པ་དང༌། ཡུལ་དུས་མཉམ་ཉིད་དུ་གྱུར་པ་དང༌། རྒྱལ་བའི་གསུང་མཐའ་དག་ལ་འཇུག་པ་དང༌། རྒྱལ་ཚབ་ཀྱི་ས་ལ་གནས་པའི་སྤྱོད་པ་མཐའ་དག་སྟོན་པའི་དབང་དུ་བྱས་ཏེ། རིམ་པ་དེ་དང་མཐུན་པར་སྨོན་ལམ་དུ་བྱས་པ་ནི། སྐབས་འདིའི་བསྡུས་དོན་ནོ། །སྡོམ་ནི། གྲོགས་དང་བཤེས་གཉེན་


TNT17_Page_0836
[མ་དཔེ་གཟིགས་ན་འདིར་གནོན།]

སྒོ་གཉིས་བསྒྲུབ། །ཚོགས་ལས་རྒྱན་ཐོབ་སངས་རྒྱས་མཆོད། །ཡངས་དོག་མེད་དང་གསུང་དབྱངས་འགྲུབ། །རྒྱལ་ཚབ་མཆོག་གི་སྤྱོད་པའོ། །བརྒྱད་པོ་དེ་ལ་དབང་འབྱོར་དྲུག །ཆོས་སྟོན་དུས་དང་མཐོང་བ་དང༌། སྤྱོད་ཡུལ་ཞིང་ཁམས་མཛད་པ་ལའོ། །རྩ་བའི་དོན་ཚན་བརྒྱད་དུ་འདོད། ཅེས་པའོ། །དེ་ལ་འདི་ནི་ཕྱིར་མི་ལྡོག་པའི་འཁོར་ལོའི་གཏམ་ལ་ཡང་དག་པར་འཇུག་པའི་ཚུལ་ཡིན་ཏེ། དང་པོ་ཉིད་དུ་མོས་པའི་དགེ་བ་ཕུན་སུམ་ཚོགས་པའི་རྒྱུ། བསོད་ནམས་ཁྱད་པར་ཅན་སྒྲུབ་པ་ནི། གྲོགས་བཟང་པོ་དང་སྤྱོད་པ་གཅིག་ཏུ་སྤྱོད་ཅིང་སྨོན་ལམ་སྒྲུབ་པ་ཡིན་པས། དེའི་དབང་དུ་བྱས་ནས། བདག་གིས་སྤྱོད་དང་མཚུངས་པར་གང་སྤྱོད་པ། །དེ་དག་དང་ཡང་རྟག་ཏུ་འགྲོགས་པར་ཤོག །ལུས་དང་ངག་རྣམས་དང་ནི་སེམས་ཀྱིས་ཀྱང༌། །སྤྱོད་པ་དག་དང་སྨོན་ལམ་གཅིག་ཏུ་སྤྱད། བདག་བྱང་ཆུབ་སྤྱོད་པ་དང་བཟང་པོ་སྤྱོད་པ་ལ་སྦྱོར་བ་ན། བདག་གི་སྤྱོད་པ་དང་མཚུངས་པར་སྤྱོད་པའི་གྲོགས་གང་ཡིན་པ་དེ་དག་དང་ཡང་དུས་རྟག་ཏུ་འགྲོགས་པར་ཤོག་ཅིག །འགྲོགས་ནས་ཀྱང༌། ལུས་དང་ངག་རྣམས་དང་ནི་སེམས་ཀྱིས་ཀྱང་སྟེ། སྒོ་གསུམ་གྱི་སྤྱོད་པ་དེ་དག་གཅིག་ཏུ་མཐུན་པར་སྤྱོད་པ་དང༌། སྨོན་ལམ་རྣམས་ཀྱང་གཅིག་ཏུ་མཐུན་པར་སྤྱད་པ་སྟེ་མཐུན་པར་སྨོན་ལམ་འདེབས་པའོ། །དེ་ཡང་གྲོགས་ནི་ཟང་ཟིང་གི་སྦྱིན་པ་གཏོང་བ་ལ་དགའ་ལ། བདག་གིས་ནི་ཚུལ་ཁྲིམས་ཁོ་ན་བསྔགས་ཏེ། ཟང་ཟིང་གི་སྦྱིན་པ་སྨོད་པར་བྱེད་པ་དང༌། གྲོགས་ནི་བདག་དབེན་པར་གནས་པ་ལ་དགའ་ལ།


TNT17_Page_0837
[མ་དཔེ་གཟིགས་ན་འདིར་གནོན།]

རང་ཉིད་ནི་ཁྱིམ་གྱི་འཚོ་ཆས་ལ་དགའ་བ་མི་འདོར་བ་དང༌། གྲོགས་དེ་ནི་ཀུན་རྫོབ་རྟེན་འབྲེལ་གྱི་ཆོས་ལ་ཆེད་ཆེར་འཛིན་ཅིང་མོས་ལ། རང་གིས་ནི་དོན་དམ་སྟོང་པའི་གཏམ་གྱིས་ཨུར་གནོན་དུ་བྱེད་པ་ལ་སོགས་པ་ནི་གཉིས་ཀར་ཆོས་སྤྱོད་པ་ཡིན་དུ་ཆུག་ཀྱང༌། སྤྱོད་པ་མི་མཐུན་པར་སྤྱོད་པ་ཡིན་པས་དེ་ལྟར་མི་བྱ་བར། གྲོགས་བྱང་ཆུབ་སེམས་དཔའ་ཆོས་ལ་སྤྱོད་པ་དེ་ཉིད་དང༌། བསམ་པ་མཐུན་ཅིང་སྦྱོར་བ་ཡང་མཐུན། བསྔགས་པ་བརྗོད་པ་ཡང་མཐུན། སྨོན་ལམ་གདབ་པ་ཡང་མཐུན་པར་བྱའོ། །དེ་ལྟར་ན་ཇི་ཙམ་གྲོགས་སུ་འགྲོགས་པ་དང་ཕྱོགས་གཅིག་ཏུ་ཚོགས་པའི་བྱང་ཆུབ་སེམས་དཔའ་ཐམས་ཅད། སྤྱིར་སོ་སོ་ནས་དགེ་བ་ལ་བརྩོན་པར་མ་ཟད། ཕན་ཚུན་གཅིག་གཅིག་གི་དགེ་བ་ལ་ཡི་རང་ཞིང༌། ཕན་ཚུན་དུ་བལྟས་ནས་མཐུན་པར་སྤྱོད་ཅིང༌། གཞན་རེ་རེ་དག་གི་ཆོས་མཐུན་གྱི་འདུན་པ་མི་འདྲ་བ་གསར་དུ་སྐྱེས་པ་རྣམས་ཀྱང༌། མཐོང་ཞིང་ཐོས་ན་ཕྱིན་ཆད་ཐམས་ཅད་ཀྱིས་དེ་དང་འདྲ་བར་སྤྱོད་པའམ་ཡི་རང་བྱེད་ན། སྤྱོད་པ་གཅིག་ཏུ་སྤྱོད་པ་ཞེས་བྱ་ཞིང་སྨོན་ལམ་ཡང་སྤྱི་སྒྲིགས་ཤིག་མ་གཏོགས་གཞན་འདེབས་སུ་མི་རུང་བ་ལྟ་མ་ཡིན་མོད། དང་པོ་ཉིད་ནས་སྤྱི་མཐུན་ན་ནི་ལེགས། ཐོག་མ་འདོད་པ་སོ་སོའི་སྨོན་ལམ་ཐ་དད་པ་ཡོད་དུ་ཆུག་ཀྱང༌། དེ་འདྲ་དེ་ནམ་མཐོང་ཞིང་ཐོས་ལ་གོ་བ་ན་ཕན་ཚུན་གཅིག་གཅིག་སོ་སོས་དེ་དང་དེ་ལ་ཁྱད་དུ་གསོད་པ་དང༌། གཤེ་བ་དང་ངན་དུ་མི་ཟེར་བར་སྨོན་ལམ་མཐུན་པར་འདེབས་པ་ནི་སྨོན་ལམ་གཅིག་པ་སྟེ། འདི་ནི་


TNT17_Page_0838
[མ་དཔེ་གཟིགས་ན་འདིར་གནོན།]

སྤྱིར་ཆོས་བྱེད་ཙམ་དང༌། སྒོས་སུ་ད་ལྟའི་དབང་དུ་བྱས་ན། ཆོས་བརྒྱུད་གཅིག་པ་དང་གནས་གཞི་གཅིག་པ་དང༌། བླ་མ་གཅིག་པ་རྣམས་ལ་ཉམས་ལེན་མི་དགོས་ཀ་མེད་པ་ཞིག་ཡིན་ཏེ། ཚེ་འདི་དང་སྐྱེ་བ་གཞན་གྱི་གནས་སྐབས་ཐམས་ཅད་དུ། རྟེན་འབྲེལ་རྣམ་དག་སྒྲིག་པ་དང༌། ཞིང་སྦྱོང་བ་དང༌། འགྲོ་བ་སྨིན་པ་སོགས་ལ་འདི་ཁོ་ན་གལ་ཆེ་བར་ཡོད་པས། ལག་ལེན་ལ་ཐེབས་པར་འཚལ་ལོ། །གལ་ཏེ་དངོས་སུ་སྤྱོད་པ་མི་མཐུན་ཡང༌། ཕན་ཚུན་གནང་བ་སྦྱིན་པ་དང༌། གདམས་ངག་དང་རྗེས་སུ་བསྟན་པ་སྒྲུབ་པ་དང༌། རྗེས་སུ་ཡི་རང་བ་དང་མོས་པའི་སེམས་དང་མ་བྲལ་བ་དེ་ནི། སྤྱོད་པ་མཐུན་པ་ཉིད་ཡིན་ཏེ། བློ་གྲོས་མཐུན་པར་གྱུར་པའི་ཕྱིར་རོ། །དེ་བཞིན་དུ་ཆོས་མིན་ནི་བཟློག་དགོས་པ་ཡིན་ཏེ། མཐུན་པར་བྱེད་པ་མ་ཡིན་ནོ། །དེ་ལྟར་སྤྱོད་པ་དང་སྨོན་ལམ་གཅིག་ཏུ་སྤྱད་པ་དེ་ནི། ཚེ་འདིའམ་སྐྱེ་བ་གཞན་དུ་མོས་པའི་དགེ་བ་ཕུན་སུམ་ཚོགས་པར་འགྱུར་རོ། །དགེ་བའི་བཤེས་གཉེན་བསྟེན་ཅིང་མཉེས་པར་བྱེད་པ་ནི། བདག་ལ་ཕན་པར་འདོད་པའི་གྲོགས་པོ་དག །བཟང་པོ་སྤྱོད་པ་རབ་ཏུ་སྟོན་པ་རྣམས། །དེ་དག་དང་ཡང་རྟག་ཏུ་འཕྲད་པར་ཤོག །དེ་དག་བདག་གིས་ནམ་ཡང་ཡིད་མི་དབྱུང༌། །བདག་ལ་བཟང་པོ་སྤྱོད་པའི་ཆོས་ཀྱི་ལག་ལེན་རབ་ཏུ་སྟོན་པས། མཐར་ཐུག་ཏུ་ཕན་འདོགས་པར་འདོད་པའི་དགེ་བའི་བཤེས་གཉེན། འཁོར་བ་དང་ཐེག་དམན་ལས་ཡོངས་སུ་སྐྱོབ་ཅིང༌། ཐེག་ཆེན་གྱི་བདེ་བ་སྟེར་པའི་གྲོགས་པོ་སྟེ། བླ་མ་དམ་པ་གང་དག་ཡོད་པ་དེ་


TNT17_Page_0839
[མ་དཔེ་གཟིགས་ན་འདིར་གནོན།]

རྣམ་དག་དང་ཡང༌། དུས་རྟག་ཏུ་འཕྲད་པ་སྟེ་མཇལ་བར་ཤོག་ཅིག །བླ་མ་དམ་པ་དེ་དག་བདག་གིས་དུས་ནམ་ཡང་ལན་གཅིག་གམ་སྐད་ཅིག་གཅིག་ཀྱང་ཐུགས་ཡིད་མི་དབྱུང་བར་བྱའོ། །ཞེས་སྨོན་པ་སྟེ། ཡིད་འབྱུང་བ་ནི་མི་དགྱེས་པ་ཡིན་པས་མི་དབྱུང་བ་ནི་རྟག་ཏུ་བླ་མ་མཉེས་པའི་ཐབས་ལ་འབད་པའོ། །དེ་ལྟ་བུའི་བཤེས་གཉེན་དམ་པ་བསྟེན་པའི་ཚུལ་ནི་འཕགས་པ་སྡོང་པོ་བཀོད་པ་ལས། ཁྱེའུ་དཔལ་འབྱུང་གི་རྣམ་ཐར་ལས་རྟོགས་པར་བྱའོ། །མོས་པའི་དགེ་བ་ཕུན་སུམ་ཚོགས་པ་དང་ལྡན་པ་དེ་ནི། ཕྱིར་མི་ལྡོག་པ་འཁོར་ལོའི་གཏམ་གྱི་ཆོས་དང༌། དེ་སྟོན་པའི་བཤེས་གཉེན་དམ་པ་དང་འཕྲད་པར་འགྱུར་བས། སྔ་མའི་མཇུག་ཐོག་ཏུ་འདི་བསྟན་པ་ཡིན་ཅིང༌། བླ་མ་དམ་པ་མཉེས་པར་བྱེད་དགོས་པར་གསུངས་ལ་དེ་མཉེས་པའི་ཐབས་ཀྱང་ཆོས་སྤྱོད་ལས་གཞན་དུ་མེད་པས་བྱང་ཆུབ་སེམས་དཔའི་སྤྱོད་པ་རྣམས་ལ་སློབ་དགོས་པར་གྲུབ་ལ། དེའི་ཐུན་མོང་གི་སྤྱོད་པ་རྣམས་ནི་སྔར་བཤད་ཟིན་ཅིང༌། ཐུན་མོང་མ་ཡིན་པའི་སྤྱོད་པ་ཡང༌། སྤྱོད་པ་དང་སྨོན་ལམ་གཅིག་པར་བཤད་པ་ཉིད་ཀྱིས་ཤུགས་ལ་གྲུབ་པ་ཡིན་ཏེ། དེ་བཞིན་གཤེགས་པའི་སྙིང་པོ་གཅིག་པར་ཤེས་པ་དང༌། འཁོར་འདས་རོ་མཉམ་རྟོགས་པ་དང༌། སེམས་ཅན་བདག་མཚུངས་ཀྱི་བྱམས་པ་རྣམས་ཡོད་ན། སྤྱོད་སྨོན་གཅིག་ཏུ་སྤྱད་པ་ཁྱད་པར་དུ་འཕགས་པ་འགྲུབ་པའི་ཕྱིར་རོ། །བཟང་པོ་སྤྱོད་པ་རབ་ཏུ་སྟོན་བྱེད་པ། །ཞེས་པས་ཀྱང་ཤུགས་ལས་བསྟན་ཏེ། དོན་དམ་པར་ན་ཀུན་ཏུ་བཟང་པོ་ནི།


TNT17_Page_0840
[མ་དཔེ་གཟིགས་ན་འདིར་གནོན།]

དེ་བཞིན་གཤེགས་པའི་སྙིང་པོ་རྟག་ཏུ་བཟང་བ་དེ་ཡིན་ལ། དེ་ལ་དམིགས་ནས་སྤྱད་པ་སྤྱོད་པའི་ཕྱིར་ཡང༌། ཐུན་མོང་མ་ཡིན་པའི་གསང་བ་རྣམས་ལ་ལས་དང་པོ་པའི་ས་ལ་གནས་པས་ཀྱང་སྒྲུབ་པར་སྟོན་པ་ཡིན་ནོ། །དེ་ལྟར་གྲོགས་བཟང་པོ་དང་སྤྱོད་པ་གཅིག་ཏུ་སྤྱད། བླ་མ་དམ་པ་ཡོངས་སུ་བསྟེན་ཏེ་སྤྱོད་པ་ལ་ནན་ཏན་དུ་གནས་པ་དེས་ནི་རིམ་གྱིས་དད་པའི་ས་དང་མོས་པ་ལ་སྤྱོད་པའི་ས་ཕལ་ཆེར་བགྲོད་པར་འགྱུར་ཏེ།དེ་ནས་ནི་སྐབས་འདིར་སྒོ་དང་པོ་ཆོས་ཀྱི་སྒོའི་ཏིང་འཛིན་ནི་ཐོབ་པའི་དབང་དུ་བྱས་ཏེ། སངས་རྒྱས་སྲས་ཀྱིས་བསྐོར་བའི་མགོན་པོ་རྣམས། །མངོན་སུམ་རྟག་ཏུ་བདག་གིས་རྒྱལ་བ་བལྟ། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་དག་ལ་ཡང་མཆོད་པ་རྒྱ་ཆེར་བགྱི། །སངས་རྒྱས་རྣམས་སྲས་བྱང་ཆུབ་སེམས་དཔས་བསྐོར་བ་ཡང་ཡིན་ལ། མཐའ་ཡས་པའི་འགྲོ་བ་ཐམས་ཅད་ཀྱི་མགོན་པོར་གྱུར་པ་རྣམས་ནི་རྒྱལ་བ་ཞེས་བྱ་སྟེ། དེ་རྣམས་བདག་གིས་དུས་རྟག་ཏུ་མངོན་སུམ་དུ་བལྟ་ཞིང་མཐོང་བར་གྱུར་ལ། ལན་གཅིག་ཙམ་མ་ཡིན་པར་དུས་དེ་ནས་བཟུང་སྟེ་མ་འོངས་པའི་བསྐལ་པ་ཀུན་ཏུ་རྒྱུན་མི་འཆད་པར་སངས་རྒྱས་དེ་དག་ལ་ཡང་མཆོད་པ་རྒྱ་ཆེར་བགྱི་ལ། དུས་ཡུན་རིང་མོ་དང་དཀའ་བ་ཆེན་པོས་མཆོད་པར་བྱེད་པ་ལ་ཡང༌། ཡིད་མི་སྐྱོ་བར་རྟག་ཏུ་དགའ་བ་དང་སྤྲོ་བ་ཆེན་པོས་མཆོད་པར་གྱུར་ཅིག་པའོ། །སངས་རྒྱས་མངོན་སུམ་དུ་མཐོང་ཞིང་མཆོད་པར་བྱེད་པ་ཙམ་ནི། དད་པའི་ས་ཆེན་པོ་ལ་གནས་པས་རྫུ་འཕྲུལ་གྱི་རྐང་པ་བཞི་ཐོབ་པ་ཡན་ཆད་དུ། ཐམས་ཅད་ལ་ཡོད་


TNT17_Page_0841
[མ་དཔེ་གཟིགས་ན་འདིར་གནོན།]

པ་ཡིན་ཡང༌། རྟག་ཏུ་མཐོང་ཞིང་སྐྱོ་བ་མི་སྲིད་པར་བཤད་པ་ནི། མོས་སྤྱོད་ཀྱི་ས་ཆེན་པོར་ཆོས་ཀྱི་རྒྱུན་གྱི་ཏིང་ངེ་འཛིན་ནི་ཐོབ་པ་ཡན་ཆད་ཁོ་ནའོ། །དེ་ཐོབ་པ་ན་ཆོས་ཀྱི་སྒོ་གཉིས་པ་གཟུངས་ཁྱད་པར་ཅན་ཡང་ཐོབ་པ་ཡིན་ཏེ། དེ་སྟོན་པ་ནི། རྒྱལ་བ་རྣམས་ཀྱི་དམ་པའི་ཆོས་འཛིན་ཅིང༌། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །བཟང་པོ་སྤྱོད་པ་རྣམ་པར་སྦྱོང་བ་ཡང༌། །མ་འོངས་བསྐལ་པ་ཀུན་ཏུ་སྤྱད་པར་བགྱི། །ཇི་ཙམ་མངོན་དུ་གྱུར་པའི་རྒྱལ་བ་སངས་རྒྱས་རྣམས་ཀྱི་གསུང༌། ལུང་གི་དམ་པའི་ཆོས་གསུང་རབ་ཡན་ལག་བཅུ་གཉིས་པོ་ཐམས་ཅད་མི་བརྗེད་པའི་གཟུངས་ཀྱི་སྒོ་ནས་འཛིན་པར་བགྱིད་ཅིང༌། སེམས་ཅན་རྣམས་ལ་བྱང་ཆུབ་སྤྱོད་པའི་ལམ་ཀུན་ཏུ་སྟོན་ཅིང་སྣང་བར་བྱེད་ལ། བདག་ཉིད་ཀྱིས་བཟང་པོ་སྤྱོད་པ་ཡང་དག་པར་བླངས་ཤིང༌། ཅུང་ཟད་དམ་ཅི་རིགས་པར་གྲུབ་པ་དེ་ཉིད། རྣམ་པར་སྦྱང་བ་སྟེ། འཕེལ་བ་དང་དག་པར་བྱེད་པར་ཤོག་ཅིག དེ་ལ་སྦྱོང་བའི་དོན་འཕེལ་བ་ནི། རྩལ་སྦྱོང་བ་ལྟ་བུ་དང༌། སྤྱོད་པ་དེའི་སྐྱོན་དག་པར་བྱེད་པ་ནི། རིམས་ནད་སྦྱོང་བ་ལྟ་བུའོ། །དེ་ལྟར་སྤྱོད་པ་སྤྱོད་པ་ཡང༌། སྤྱོད་པ་ལ་ཞུགས་པ་ནས་བརྩམས་ནས། མ་འོངས་པའི་བསྐལ་པ་མཐའ་མེད་པ་ཀུན་ཏུ་སྤྱད་པར་བགྱིའོ་ཞེས་སྨོན་པའོ། །སྐབས་དེ་དག་ཏུ་ཚོགས་གཉིས་མང་དུ་གསོག་པས་ཚོགས་གཉིས་ཀྱི་སྟོབས་རྙེད་པའི་ཕྱིར། བྱང་ཆུབ་སེམས་དཔའི་ཡོན་ཏན་གྱི་རྒྱན་རྣམས་ཀྱང་ཐོབ་པར་འགྱུར་བས། དེ་ལྟར་སྟོན་པ་ནི། སྲིད་པ་ཐམས་ཅད་དུ་ཡང་འཁོར་བ་ན། །བསོད་ནམས་ཡེ་


TNT17_Page_0842
[མ་དཔེ་གཟིགས་ན་འདིར་གནོན།]

ཤེས་དག་ནི་མི་ཟད་རྙེད། །ཐབས་དང་ཤེས་རབ་ཏིང་འཛིན་རྣམ་ཐར་དང༌། །ཡོན་ཏན་ཀུན་གྱི་མི་ཟད་མཛོད་གྱུར་ཅིག སྲིད་པ་ནི་བྱུང་བ་དང་འབྱུང་བ་སྟེ། ཁམས་གསུམ་གྱི་སྲིད་པ་ཐམས་ཅད་དུ་ཡང༌། ལས་དང་སྨོན་ལམ་དང་ཏིང་ངེ་འཛིན་དང༌། དབང་འབྱོར་པའི་སྟོབས་ཀྱིས་འཁོར་ཞིང་སྐྱེ་བ་ན། བསོད་ནམས་དང་ཡེ་ཤེས་ཀྱི་ཚོགས་གཉིས་ཟད་མི་ཤེས་པ་གོང་ནས་གོང་དུ་འཕེལ་བ་རྙེད་པ་དང༌། དེ་ལས་སེམས་ཅན་སྒྲོལ་བ་ལ་དགོས་པ་བདག་གིས་སངས་རྒྱས་ཀྱི་ཆོས་རྫོགས་པའི་ཐབས་ལ་མཁས་པ་དང༌། རྟེན་འབྲེལ་དང༌། དེ་བཞིན་ཉིད་དང༌། སེམས་ཅན་གྱི་དོན་སྤྱོད་པ་གསུམ་ལ་མཁས་པའི་ཤེས་རབ་དེ་གསུམ་ཀ་ལ་ཡང་མཉམ་གཞག་ལྷག་མཐོང་དང༌། རྗེས་ཐོབ་སྤྱོད་པས་བསྡུས་པའི་དབྱེ་བ་ཅན་དང༌། ནམ་མཁའ་མཛོད་དང་དྲི་མ་མེད་པའི་ཕྱག་རྒྱ་ལ་སོགས་པ་ཏིང་ངེ་འཛིན་མཐའ་ཡས་པ་རྣམས་དང༌། རྣམ་པར་ཐར་པ་ནི་རྣམ་ཐར་བརྒྱད་དང༌། ཏིང་ངེ་འཛིན་གསུམ་ལ་སོགས་པ་སྟེ། ཉོན་མོངས་པ་དང༌། ཤེས་བྱ་དང༌། སྙོམས་འཇུག་གི་སྒྲིབ་པའི་ཁྱད་པར་རེ་རེ་སྤངས་པ་ལས། རྣམ་པར་གྲོལ་བའི་ཡེ་ཤེས་ཉམས་སུ་མྱོང་བ་དང༌། དེ་ལས་བྱུང་བའི་དགའ་སྟོན་རྣམ་པར་འཕྲུལ་བའི་རོལ་རྩེད་སྟོན་པ་དང༌། གཞན་ཡང་ཡོན་ཏན་གྱི་ཁྱད་པར་ཀུན་གྱིས་མི་ཟད་པའི་མཛོད་ཐོབ་པར་གྱུར་ཅིག་པའོ། །དེ་ལ་ལས་ཀྱི་སྐྱེ་བ་དངོས་ནི། སེམས་དཔའ་སོ་སྐྱེས་རྣམས་ཡིན་ལ། དེར་ཡང་ཡོན་ཏན་གྱི་ཚོགས་ནི་རྟོག་གེ་བ་རྣམས་ཀྱིས་བསྐལ་པའི་བར་དུ་ཡང་བློས་དཔྱོད་པར་མི་ནུས་པ་ཡོད་ཅིང༌། འཕགས་


TNT17_Page_0843
[མ་དཔེ་གཟིགས་ན་འདིར་གནོན།]

མཆོག་རྣམས་ཀྱིས་ལས་ལ་དབང་བའི་སྐྱེ་བ་ཡང༌། སྤྱིར་ལས་ཀྱི་དབང་གིས་སྐྱེ་བ་ཙམ་ཡིན་ལ། དེ་དང་ཏིང་ངེ་འཛིན་དང༌། དབང་སྒྱུར་པའི་ཚུལ་ལ་ནི། ཡེ་ཤེས་མཐའ་ཡས་ཡོད་པར་སྨོས་མ་དགོས་ལ། སྨོན་ལམ་གྱི་སྐྱེ་བའང་སེམས་རྒྱུད་ཀྱིས་བཟུང་བ་མ་ཡིན་མོད། ཡེ་ཤེས་ཀྱི་མཐུ་ལས་བྱུང་ཞིང༌། ཡེ་ཤེས་དང་ལྡན་པའི་བྱ་བ་བྱེད་པའོ། །དེ་རྣམས་ལས་དབང་སྒྱུར་བའི་སྐྱེ་བ་ཅན་གྱིས་ལུས་དངོས་ནི། ཁམས་གསུམ་དུ་མི་འཁོར་ཡང༌། དེའི་སྤྲུལ་བ་འཁོར་པ་ལྟར་སྟོན་པ་ཡིན་ལ། གཞན་རྣམས་ནི་ཁམས་གསུམ་དུ་འབྱུང་པ་ཤས་ཆེའོ། །ཚོགས་གཉིས་ནི་ཇི་སྐད་དུ། རྒྱལ་བ་བྱམས་པས། བྱང་ཆུབ་སེམས་དཔའ་རྣམས་ཀྱིས་ཚོགས། །བསོད་ནམས་ཡེ་ཤེས་མཚུངས་པ་མེད། །གཅིག་གིས་འཁོར་བར་མངོན་མཐོ་བྱེད། །གཞན་གྱིས་ཉོན་མོངས་མེད་པར་འཁོར། །སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་པོ་གཞན་ནི་གཉིས་ཀའི་སྟེ། །ལྔ་ཆར་ཡང་ནི་ཡེ་ཤེས་ཚོགས། །ཞེས་གསུངས་པ་ལྟར་རོ། །ཐབས་ལ་མཁས་པ་ནི། ཚོགས་ཆུང་ངུས་དོན་ཆེན་པོ་འགྲུབ་པ་དང༌། རྒྱུ་ཆུང་ངུ་ལས་འབྲས་བུ་ཆེན་པོ་འབྱུང་བ་སྟེ་ཤེས་རབ་ཕུན་སུམ་ཚོགས་པའི་བྱེད་ལས་སོ། །ཚིགས་སུ་བཅད་པ་འདིའི་དོན་ནི། ཡངས་ཤིང་རྒྱ་ཆེ་ལ་བསམ་གྱིས་མི་ཁྱབ་བོ། །དེ་ལྟར་འཕགས་པའི་ས་ལ་གནས་པར་གྱུར་ན། ཡིད་ཀྱི་རང་བཞིན་གྱི་ལུས་གྲུབ་པ་དང་


TNT17_Page_0844
[མ་དཔེ་གཟིགས་ན་འདིར་གནོན།]

རྒྱལ་བའི་སྤྱོད་ཡུལ་མཐའ་དག་ལ་ལྟ་བུའི་ནུས་པ་ཐོབ་པས། སངས་རྒྱས་ཐམས་ཅད་ཀྱི་ཞལ་བལྟ་ཞིང་མཆོད་པ་ཡིན་ལ། དོན་དེ་ཉིད་སྟོན་པ་ནི། རྡུལ་གཅིག་སྟེང་ན་རྡུལ་སྙེད་ཞིང་རྣམས་ཏེ། །ཞིང་དེར་བསམ་གྱིས་མི་ཁྱབ་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་ལ། །བྱང་ཆུབ་སྤྱད་པ་སྤྱོད་ཅིང་བལྟ་བར་བགྱི། །རྡུལ་གཅིག་གི་སྟེང་ན་ཡང༌། ཕྱོགས་བཅུའི་འཇིག་རྟེན་གྱི་ཁམས་ཀྱི་རྡུལ་ཇི་སྙེད་པའི་གྲངས་དང་མཉམ་པའི་སངས་རྒྱས་ཀྱི་ཞིང་མཐོང་བར་འགྱུར་ལ། ཞིང་དེ་རྣམས་སུ་གྲངས་བསམ་གྱིས་མི་ཁྱབ་པའི་སངས་རྒྱས་རྣམས། སངས་རྒྱས་ཀྱི་སྲས་བྱང་སེམས་རྣམས་ཀྱི་དབུས་ན་བཞུགས་པ་ལ། དེ་དག་དང་མཚུངས་པར་ལྷན་ཅིག་ཏུ་བྱང་ཆུབ་སྤྱད་པ་ཡང་སྤྱོད་ཅིང༌། སྐུ་ལྟ་བ་དང་གསུང་ཉན་པར་བགྱིད་པར་སྨོན་པའོ། །འདིར་འཕགས་པའི་ས་ཐོབ་མ་ཐག་པ་ལ། ཞིང་གི་རྡུལ་སྙེད་ཀྱི་སངས་རྒྱས་ཅིག་ཆར་མཐོང་བ་རང་ནི་མིན་ཡང༌། ས་གཞི་ཁྱོན་ཆེ་ཆུང་མ་ངེས་པར་སངས་རྒྱས་དང་སངས་རྒྱས་ཀྱི་ཞིང་ཅི་རིགས་པར་མཐོང་བར་ནུས་པ་ཡིན་ལ། དེ་ནས་རིམ་པས་གོང་འཕེལ་དུ་གྱུར་ཏེ། མཐའ་མེད་དུ་འཕེལ་བ་ཐོབ་པར་འགྱུར་བས། ས་དང་པོ་ཐོབ་མ་ཐག་པ་ནས་དངོས་སུ་རང་མ་ཐོབ་ཀྱང༌། ཞིང་གི་རྡུལ་སྙེད་ལྟ་བུའི་སྦྱོར་བ་ལ་ཞུགས་པ་ནི་ཡིན་ནོ། །རྒྱུད་ལ་སྐྱེ་ཚུལ་དེ་ལྟར་ཡིན་ཡང༌། སྨོན་ལམ་འདེབས་པའི་ཚེ་རྒྱ་ཆེ་ས་ནས་སྦྱོང་བ་ཡིན་པས། འདིར་དེ་ཉིད་ཁོ་ན་སྨོས་སོ། །དེ་ལྟར་


TNT17_Page_0845
[མ་དཔེ་གཟིགས་ན་འདིར་གནོན།]

སྟོང་གསུམ་ཡུངས་འབྲུར་འཇུག་པ་དང༌། རྡུལ་ཕྲན་གཅིག་གིས་ཕྱོགས་བཅུ་ཁྱབ་པར་ནུས་པ་སོགས། ཏིང་ངེ་འཛིན་གྱི་སྤྱོད་ཡུལ་ཡངས་དོག་མེད་པ་ནི། ས་བརྒྱད་པ་མི་སྐྱེ་བའི་ཆོས་ལ་བཟོད་པ་ཐོབ་པ་ན་ཡིན་ཏེ། དེ་དག་གི་དབང་དུ་བྱས་ནས། དེ་ལྟར་མ་ལུས་ཐམས་ཅད་ཕྱོགས་སུ་ཡང༌། །སྐྲ་ཙམ་ཁྱོན་ལ་དུས་གསུམ་ཚད་སྙེད་ཀྱི། །སངས་རྒྱས་རྒྱ་མཚོ་ཞིང་རྣམས་རྒྱ་མཚོ་དང༌། །བསྐལ་པ་རྒྱ་མཚོར་སྤྱོད་ཅིང་རབ་ཏུ་འཇུག །རྡུལ་གཅིག་ལ་སངས་རྒྱས་ཀྱི་ཞིང་མང་པོས་བཀོད་པ་དེ་ལྟར། མ་ལུས་ཤིང་ལུས་པ་མེད་པའི་ཕྱོགས་ཐམས་ཅད་རྣམས་སུ་ཡང༌། སྐྲ་རྩེ་ཙམ་གྱི་ཁྱོན་ལ་དུས་གསུམ་གྱི་ཚད་ཇི་སྙེད་ཀྱི་སྟེ། དུས་གསུམ་དུ་བྱུང་བའི་སངས་རྒྱས་གྲངས་སུ་བགྲངས་ན་ཟད་མི་ཤེས་པ་རྒྱ་མཚོ་ལྟ་བུ་རྣམས། རང་རང་གི་ཞིང་ཁམས་རྣམས་དང་བཅས་པ། ཞིང་ཁམས་རྣམས་རྒྱ་མཚོ་ལྟར་མི་ཟད་པ་དང༌། དེ་དག་རེ་རེ་ཡང་དུས་བསྐལ་པ་རྒྱ་མཚོ་ལྟར་ཟད་མི་ཤེས་པའི་བར་དུ། བདག་ཀྱང་ཞིང་ཁམས་རེ་རེ་བྱང་ཆུབ་སེམས་དཔའི་སྤྱད་པ་སྤྱོད་ཅིང༌། རབ་ཏུ་འཇུག་པ་སྟེ། ལྟ་ཞིང་གྲོལ་བར་གྱུར་ཅིག་པའོ། །འགྲེལ་བ་ཁ་ཅིག་ལས། སྐྲ་ཙམ་ཁྱོན་ལ་ཞེས་པ་ལ། བྱིས་པའི་ལམ་དུ་ཞེས་པའི་དོན་དུ་བཤད་ནས། མ་དག་པའི་ཞིང་ལ་འཆད་པ་དང༌། འཛམ་བུ་གླིང་ཁོ་ན་ལ་འཆད་པ་སོགས་ནི། བཤད་པ་མི་བདེ་བས་མ་བཀོད་དོ། །རྡུལ་ཕྲན་གཅིག་གི་ནང་དུ་སངས་རྒྱས་ཀྱི་ཞིང་སྟོན་པ་ལ།


TNT17_Page_0846
[མ་དཔེ་གཟིགས་ན་འདིར་གནོན།]

རྨི་ལམ་ན་ཁང་པ་དོག་པོའི་ནང་དུ། གླང་པོ་ཆེའི་ཁྱུ་དང་ནགས་ཚལ་ལ་སོགས་པ་བདེ་བར་སྤྱོད་པ་སྣང་ལ། སད་པའི་དུས་ན་ཡང་དྲན་པ་དང༌། ཆུ་སྣོད་གཅིག་གི་ནང་དུ་ཉི་ཟླ་གཟའ་སྐར་ཡུལ་ལྗོངས་ལ་སོགས་པ། ཆུ་ལ་གཟུགས་བརྙན་དུ་ཤར་བ་དཔེར་མཛད་དེ། སེམས་ཀྱི་སྣང་བ་ཙམ་དང༌། རྟེན་འབྲེལ་གྱི་མཐུ་ལས། དེ་ལྟར་སྣང་བ་མི་འགལ་བ་དང༌། རྣལ་འབྱོར་གྱི་མཐུ་སྟོབས་བསམ་གྱིས་མི་ཁྱབ་པའི་ཕྱིར་ཡིད་ཆེས་པར་བྱའོ། །གསང་བ་བསམ་གྱིས་མི་ཁྱབ་པ་ལས་ཀྱང༌། འཇིག་རྟེན་མགོན་པོ་སྐྱོབ་པ་ཡིས། །བསམ་གཏན་ལས་དང་ཀླུ་རྣམས་དང༌། །སངས་རྒྱས་བདག་ཉིད་ཆེ་རྣམས་ཀྱི། །བསམ་གྱིས་མི་ཁྱབ་བཞིར་བཤད་དོ། །ཞེས་གསུངས་ཏེ། བསམ་གཏན་པའི་ཏིང་ངེ་འཛིན་གྱི་མཐུ་དང༌། ལས་ཀྱི་མཐུ་དང༌། ཀླུ་མཆོག་གི་རྫུ་འཕྲུལ་དང༌། སངས་རྒྱས་ཀྱི་མཐུ་བསམ་གྱིས་མི་ཁྱབ་པར་བསྟན་ཏོ། །འདི་ལེགས་པར་མཐར་ཕྱིན་པ་ཇི་ལྟ་བ་བཞིན་ནི། ཆོས་ཀྱི་སྤྲིན་ལ་གནས་པ་ཡན་ཆད་ཀྱི་ཡོན་ཏན་ཡིན་ལ། རྗེས་མཐུན་པའམ་འགོ་བརྩམས་པ་ནི། མི་གཡོ་བའི་ས་ཡན་ཆད་དོ། །རྒྱལ་བའི་གསུང་རབ་མཐའ་དག་ལ་འཇུག་པ་ནི། གསུང་གཅིག་ཡན་ལག་རྒྱ་མཚོའི་སྒྲ་སྐད་ཀྱིས། །རྒྱལ་བ་ཀུན་དབྱངས་ཡན་ལག་རྣམ་དག་པ། །འགྲོ་བ་ཀུན་གྱི་བསམ་པ་ཇི་བཞིན་དབྱངས། །སངས་རྒྱས་གསུང་ལ་རྟག་ཏུ་འཇུག་པར་བགྱི། །དེ་


TNT17_Page_0847
[མ་དཔེ་གཟིགས་ན་འདིར་གནོན།]

བཞིན་གཤེགས་པ་གཅིག་གིས་གསུང་གཅིག་ཁོ་ན་བཀའ་སྩལ་ན། དེ་ཡང་ཡན་ལག་རྒྱ་མཚོ་སྟེ། གསུང་གི་རང་བཞིན་ཆ་ཚང་བ་དང་ཆ་ཚང་བ་ཁོ་ན་རིགས་མི་འདྲ་བ་རྒྱ་མཚོ་ལྟར་མཐའ་ཡས་པའི་སྒྲ་སྐད་དུ་འགྱུར་ཏེ། དོན་དང་ཚིག་དང༌། སྐད་དང་དབྱངས་མཐའ་ཡས་པ་ཉིད་ཀྱིས་སྣང་བར་འགྱུར་རོ། །དེ་སྐད་དུ་ཡང༌། མོས་པ་སྣ་ཚོགས་ཅན་གྱི་ནི། འཁོར་མང་རྣམས་ནི་གནས་པ་ལ། གསུང་གཅིག་བཀའ་ནི་སྩལ་བ་ན། གསུང་རྣམས་དུ་མར་གོ་འགྱུར་ཞིང༌། །ང་ཡི་ཆེད་དུ་ཡིན་ནོ་ཞེས། །སྐྱེ་བོ་ཀུན་གྱིས་རྟོགས་འགྱུར་གང༌། །འདི་ལས་རྨད་བྱུང་ཆེ་ཅི་ཡོད། །འདི་ལས་ཆེས་མཚར་ཅི་ཞིག་ཡོད། །ཅེས་སོ། །གཞན་ཡང་དེ་ཉིད་རྒྱལ་བ་སངས་རྒྱས་ཀུན་གྱི་གསུངས་དབྱངས་ཀྱི་ཡན་ལག་སྐྱོན་ཐམས་ཅད་དང་བྲལ་ཞིང་རྣམ་པར་དག་པ་དང༌། ངོ་བོ་གཅིག་ཏུ་ཡང་གནས་ལ། ཆོས་གང་དང་གང་ཉན་པར་འདོད་པ་དང༌། དེ་དང་དེས་འདུལ་བར་འགྱུར་བའི་འགྲོ་བ་ཀུན་གྱི་བསམ་པ་ཇི་ལྟ་བ་བཞིན་དུ་དབྱངས་དེ་འཇུག་པར་འགྱུར་རོ། །སངས་རྒྱས་གཅིག་གི་གསུང་གཅིག་ལ་ཁྱད་ཆོས་དེ་འདྲ་ཚང་པ་བཞིན་དུ། འདྲེན་པ་མ་ལུས་པའི་གསུང་མཐའ་དག་ཀྱང་དེ་དང་འདྲའོ། །དེ་ལྟ་བུའི་སངས་རྒྱས་ཀྱི་གསུངས་ཐམས་ཅད་ལ། བདག་དུས་རྟག་ཏུ་ཉན་པ་དང༌། མི་བརྗེད་པར་འཛིན་པ་དང༌། བདག་གི་ངག་ཀྱང་རྒྱལ་བའི་གསུང་དེ་དང་རྗེས་སུ་མཐུན་ཅིང་འདྲ་བར་སྤྱོད་པའི་ཚུལ་


TNT17_Page_0848
[མ་དཔེ་གཟིགས་ན་འདིར་གནོན།]

གྱིས་འཇུག་པར་བགྱིའོ། །འདི་ཡང་མཐར་ཕྱིན་པའི་དུས་ནི་སྔར་ལྟར་ཡིན་ལ། ཐོག་མར་ཐོབ་པ་ནི་ལེགས་པའི་བློ་གྲོས་ཀྱི་ས་ལ་སྟེ། དེར་སོ་སོ་ཡང་དག་པར་རིག་པ་བཞི་ཐོབ་པར་བཤད་པ་དང་གནད་གཅིག་གོ །འདིར་གོ་སླ་བར་བརྗོད་ན། སངས་རྒྱས་གཅིག་ལ་ཆོས་ཉན་ཅིང་དོན་གོ་བཞིན་པ་ན། དེ་དང་དུས་མཉམ་ཁོ་ནར་སངས་རྒྱས་གཞན་མང་པོ་ལ་ཡང་ཆོས་ཉན་ཅིང་ཚིག་འཛིན་པ་དང༌། དོན་སེམས་པ་ལ་གཅིག་གིས་གཅིག་ལ་གེགས་མི་བྱེད་ཅིང་མཉམ་པར་ཐོས་ལ་མཉམ་པར་འཛིན་ཅིང་མཉམ་པར་སེམས་པ་ལ་དཀའ་བ་དང་འབད་སྩོལ་མེད་པའོ། །ད་ནི། དུས་གསུམ་གཤེགས་པའི་རྒྱལ་བ་ཐམས་ཅད་དག །ཅེས་པ་ནས། མགོན་པོ་ཀུན་གྱི་དྲུང་དུ་བདག་མཆིའོ། །ཞེས་པའི་བར་ནི་རྒྱལ་ཚབ་ཀྱི་ས་ལ་གནས་པ་རྣམས་ཀྱི་ཡོན་ཏན་དང་རྗེས་སུ་འབྲེལ་བའི་སྨོན་ལམ་སྟེ། དེ་ལ་རྒྱལ་ཚབ་ཀྱི་ས་ཞེས་པ་ནི། སྔགས་ཀྱི་ཐེག་པ་ལ་སོགས་པ་གཞུང་གཞན་འགའ་ཞིག་ཏུ། དགུ་པ་སོགས་སྣ་ཚོགས་ལ་བཤད་པ་ཡོད་ཀྱང༌། འདིར་ནི་རྒྱལ་ཚབ་ཏུ་དབང་བསྐུར་བ་སྟེ། བཅུ་པ་ཡིན་པར་ཤེས་པར་བྱའོ། །དེ་ལ་དབང་འབྱོར་བ་དྲུག་སྟེ། ཆོས་སྟོན་པ་དང༌། དུས་དང༌། མཐོང་བ་དང༌། སྤྱོད་ཡུལ་དང༌། ཞིང་ཁམས་དང༌། མཛད་པ་ལ་དབང་འབྱོར་པའོ། །དང་པོ་ནི། དུས་གསུམ་གཤེགས་པའི་རྒྱལ་བ་ཐམས་ཅད་དག །འཁོར་ལོའི་ཚུལ་རྣམས་རབ་ཏུ་བསྐོར་བ་ཡི། །དེ་དག་གི་ཡང་གསུང་དབྱངས་མི་ཟད་ལ། །བློ་ཡི་སྟོབས་ཀྱིས་བདག་ཀྱང་རབ་ཏུ་འཇུག །དུས་གསུམ་དུ་བྱོན་


TNT17_Page_0849
[མ་དཔེ་གཟིགས་ན་འདིར་གནོན།]

ཅིང་གཤེགས་པར་འགྱུར་བའི་རྒྱལ་བ་ཐམས་ཅད་དག །སེམས་ཅན་རྣམས་གྲོལ་བའི་ཆེད་དུ། ཆོས་ཀྱི་འཁོར་ལོའི་ཚུལ་རྣམས་རབ་ཏུ་བསྐོར་བ་ཡི། སངས་རྒྱས་དེ་དག་གི་ཡང་གསུང་དབྱངས་ཆོས་མི་ཟད་པ་སྟེ་མཐའ་ཡས་པ་ལ། རང་གི་བློ་ཡི་མཐུ་ཐོབ་པའི་སྟོབས་ཀྱིས་བདག་ཀྱང་གསུང་གི་འཕྲིན་ལས་དེ་ལ་ལྷན་ཅིག་ཏུ་རབ་ཏུ་འཇུག་པར་ཤོག་ཅིག་པ་སྟེ། འདིར་སྔ་མ་གསུང་གཅིག་སོགས་ནི་ཆོས་ཐོས་པའི་དབང་དུ་བྱས་པ་ཡིན་ལ། འདི་ནི་སངས་རྒྱས་ཀྱི་གསུང་དང་ངོ་བོ་ཕྱེད་ལས་འདྲེས་པར་ཐོབ་པའི་དབང་དུ་བྱས་པའོ། །དེས་ན་ས་བཅུའི་དབང་ཕྱུག་གིས་ཆོས་སྟོན་པ་དེ་ཉིད་སངས་རྒྱས་ཀྱི་ཆོས་ཀྱི་འཁོར་ལོ་བསྐོར་བའང་ཡིན་ལ། སངས་རྒྱས་ཀྱི་ཞལ་སྔ་ནས་ཆོས་སྟོན་པ་ཀུན་ལའང༌། བྱང་ཆུབ་སེམས་དཔའ་དེའི་འཕྲིན་ལས་འཇུག་སྟེ། དོན་གཅིག་ལ་བློ་གྲོས་དང་འདུན་པ་གཅིག་ཏུ་བསྒྲིལ་པའི་དམག་ལ་སོགས་པའི་བྱ་བ་བཞིན་ནོ། །འདིའི་རབ་ཏུ་འཇུག་པ་ཞེས་པ་འདྲེས་པ་སྟེ། ཆུ་ཀླུང་རྒྱ་མཚོར་འཇུག་པ་ལྟ་བུ་སྟེ་གསུང་ཉན་པ་ཁོ་ན་ལ་སྦྱོར་ན་སྔ་མ་དང་ཟློས་པའི་སྐྱོན་ཡོད་དོ། །གཉིས་པ་ནི། མ་འོང་བསྐལ་པ་ཐམས་ཅད་འཇུག་པར་ཡང༌། །སྐད་ཅིག་གཅིག་གིས་བདག་ཀྱང་འཇུག་པར་བགྱི། །གང་ཡང་བསྐལ་པ་དུས་གསུམ་ཚད་དེ་དང༌། །སྐད་ཅིག་ཆ་ཤས་ཀྱིས་ནི་ཞུགས་པར་སྤྱད། །མ་འོངས་པའི་བསྐལ་པ་མང་པོ་ཐམས་ཅད་དུ། ནམ་མཁས་གར་ཁྱབ་ཀྱི་འཇིག་རྟེན་མཐའ་ཡས་པ་རྣམས་སུ། ཇི་སྙེད་པའི་ཆོས་འབྱུང་བ་ཐམས་ཅད་ལ་ཡེ་ཤེས་འཇུག་སྟེ་མངོན་ཤེས་ཀྱིས་ཤེས་པར་གྱུར་


TNT17_Page_0850
[མ་དཔེ་གཟིགས་ན་འདིར་གནོན།]

པ་ཡང༌། དེ་བཞིན་གཤེགས་པ་རྣམས་ཀྱིས་མཁྱེན་པ་དེ་བཞིན་དུ། བདག་གིས་ཀྱང་ཡེ་ཤེས་སྐད་ཅིག་གཅིག་གིས་འཇུག་པ་སྟེ། ཤེས་པ་གཅིག་གིས་དུས་ཐམས་ཅད་ཀྱི་དངོས་པོ་ཐམས་ཅད་ཅིག་ཅར་ཤེས་པར་བགྱི་ཞེས་སྨོན་པ་དང༌། གང་ཡང་བསྐལ་པ་སྔོན་འདས་པ་ཐམས་ཅད་དང༌། ད་ལྟར་དང་མ་འོངས་པ་འབྱུང་འགྱུར་ཏེ་དུས་གསུམ་ཇི་ཙམ་ཡོད་པ་དང་ཚད་མཉམ་པའི་བསྐལ་པ་དེ་དག་ཐམས་ཅད་སྐད་ཅིག་གཅིག་གི་ཆ་ཤས་སུ་འཇུག་ཅིང་བསྒྱུར་ནུས་པའི་སྟོབས་ཀྱིས་ནི། བསྐལ་པ་གཅིག་ནས་བསྐལ་པ་མཐའ་མེད་པའི་བར་ཇི་ལྟར་འོས་འོས་སུ་སྐད་ཅིག་གི་ནང་དུ་ཞུགས་པར་བྱས་ནས། །བྱང་ཆུབ་ཀྱི་སྤྱད་པ་སྤྱོད་པར་གྱུར་ཅིག་པའོ། །འདི་ནི་དབང་ཐོབ་པ་ན། བསྐལ་པའམ་བསྐལ་པ་མང་པོ་སྐད་ཅིག་ཏུ་སྡུད་པ་དང༌། སྐད་ཅིག་རེ་རེ་ལ་ཡང་བསྐལ་པ་དུ་མ་སྟོན་པ་སྟེ། དཔེར་བགྱི་ན་སེམས་ཅན་སྤྱི་མཐུན་གྱི་རྩ་བའི་སྣང་བ་ལ། སྐད་ཅིག་གཅིག་གམ་ཡུད་ཙམ་གཅིག་ལ་སོགས་པར་སྣང་བའི་དུས་ཚོད་དེ་ལ། བྱང་ཆུབ་སེམས་དཔའ་རང་ཉིད་ཀྱི་སྣང་བ་ལ་ཡང་བསྐལ་པ་དང་སྐད་ཅིག་མི་འགལ་བར་འཆར་བ་དང༌། རྣམ་པར་འཕྲུལ་པའི་སྟོབས་ཀྱིས་ཞིང་ཁམས་འདིའི་གོ་ས་དང༌། ཕྱོགས་བཅུ་གཞན་གྱི་ཞིང་ཁམས་མང་པོར། དེ་དང་དེའི་སེམས་ཅན་ཀུན་ལ་བསྐལ་པ་མང་པོ་ཡང་དངོས་སུ་མྱོང་ཞིང༌། དུས་དེ་སྙེད་དུ་ཆོས་སྤྱད་པས་ཚོགས་རྫོགས་ཤིང་སྒྲིབ་པ་བྱང་བར་གྱུར་པས་ཏེ། སྐད་ཅིག་གཅིག་ལ་བསྐལ་པ་མཐའ་ཡས་པའི་བར་དུ་སྒྲུབ་དགོས་པའི་ཚོགས་གསོག་ལོངས་ཡང་སྤྱོད། སྤྱོད་པ་སྤྱོད་ལོངས་ཡང་ཡོད་ཅིང༌།


TNT17_Page_0851
[མ་དཔེ་གཟིགས་ན་འདིར་གནོན།]

གསོག་པ་དང་སྤྱོད་ནུས་པའོ། །ཡང་སྤྱི་མཐུན་སྣང་བ་རྩ་བ་དེ་ལ་བསྐལ་བ་མང་པོ་ཡོད་ཀྱང་ཡུན་རིང་དུ་ཐོགས་པར་མ་ངེས་ཏེ། བསྐལ་པ་སྐད་ཅིག་མར་སྡུད་པའི་ཕྱིར་དང༌། བསྐལ་པ་མང་པོའི་བྱ་བ་ཉམས་སུ་མྱོང་བས་ཡུད་ཙམ་གཅིག་ལ་གྲུབ་པར་ཡང་ནུས་ལ། བྱ་བ་ཡུད་ཙམ་གཅིག་པུ་ལན་གཅིག་གིས་བསྐལ་པའམ་བསྐལ་པ་མང་པོ་འཁྱོངས་པར་ཡང་བྱེད་དོ། །དེ་ལྟར་ན་དུས་ཐམས་ཅད་མཉམ་པ་ཉིད་དུ་རྟོགས་པའི་ཡེ་ཤེས་ཀྱིས། དུས་རིང་ཐུང་དབྱེ་བ་མེད་པར་སྤྱོད་པ་སྟེ། འདིའི་དགོས་པ་ནི་སྐད་ཅིག་ལ་ཡང་མཐའ་ཡས་པའི་བྱེད་ལོང་ཡོད་ལ། བསྐལ་པ་ལ་ཡང་ཡུན་རིང་བསྒུག་མི་དགོས་པའི་ཕྱིར་ཏེ། དུས་ཐུང་ངུ་ལ་བྱ་བ་རྒྱ་ཆེན་པོ་མི་འགྲུབ་པར་དོགས་པས། བློ་ཙབ་ཙོབ་ཏུ་འགྱུར་བ་དང༌། རྒྱ་ཆེན་པོ་ལ་ཡུན་རིང་ཐོགས་པས་ངལ་ཞིང་སྐྱོ་བར་འགྱུར་བའི་གཉེན་པོའོ། །གསུམ་པ་ནི། དུས་གསུམ་གཤེགས་པ་མི་ཡི་སེང་གེ་གང༌། །དེ་དག་སྐད་ཅིག་གཅིག་ལ་བདག་གིས་བལྟ། །དུས་གསུམ་དུ་བྱུང་ཞིང་གཤེགས་པའི་མི་ཡི་སེང་གེ་བཅོམ་ལྡན་འདས་གང་ཡིན་པ་དེ་དག་ཐམས་ཅད་སྐད་ཅིག་གཅིག་ལ་དུས་གཅིག་ཏུ། ལུས་པ་མེད་པར་བདག་གིས་མངོན་སུམ་དུ་ལྟ་ཞིང༌། དུས་ཀྱང་ཐུང་ངུ་མ་ཡིན་པར་རྟག་ཏུ་བལྟ་བར་བགྱིའོ། །བཞི་པ་ནི། རྟག་ཏུ་དེ་དག་གི་ནི་སྤྱོད་ཡུལ་ལ། །སྒྱུ་མར་གྱུར་པའི་རྣམ་ཐར་སྟོབས་ཀྱིས་འཇུག །རྟག་ཏུ་སངས་རྒྱས་དེ་དག་གི་ནི་སྤྱོད་ཡུལ་ཏེ། རྟོགས་བྱའི་ཡུལ་དང་རྟོགས་བྱེད་ཀྱི་ཡེ་ཤེས་དང༌། དེ་དག་གི་རྣམ་པར་ཐར་བ་དང༌། རྫུ་འཕྲུལ་


TNT17_Page_0852
[མ་དཔེ་གཟིགས་ན་འདིར་གནོན།]

གྱི་རྣམ་པར་འཕྲུལ་བ་བསམ་གྱིས་མི་ཁྱབ་པ་ལ་འཇུག་པར་གྱུར་ཅིགཚུལ་ཇི་ལྟ་བུས་འཇུག་ན། མཉམ་བཞག་གི་ཡེ་ཤེས་བདེ་བར་གཤེགས་པའི་སྙིང་པོ་སྤྲོས་བྲལ་རྣམ་པ་ཐམས་ཅད་པ་སྒྱུ་མ་ལྟ་བུའི་ཡེ་ཤེས་མངོན་སུམ་དུ་རྟོགས་པའི་ནུས་པས། རྗེས་ཐོབ་ཀྱི་ཡེ་ཤེས་སྒྱུ་མ་ལྟར་སྣང་བར་གྱུར་ལ་དེ་ལྟ་བུའི་ཏིང་ངེ་འཛིན་གྱི་སྟོབས་ལས། སྒྲིབ་པའི་ཁྱད་པར་མང་པོ་ལས་གྲོལ་ཞིང་རྣམ་པར་ཐར་བའི་སྟོབས་ཀྱིས་གང་ལ་གང་འདོད་དུ་སྒྱུར་ཐུབ་ཅིང་སྤྱོད་པའི་ཚུལ་གྱིས་སོ། །འདི་ནི་དོན་ལ་ངེས་པར་ན་སངས་རྒྱས་དང་འཕྲིན་ལས་མཉམ་པོར་སྤྱོད་པའི་དོན་ནོ། །ལྔ་པ་ནི། གང་ཡང་དུས་གསུམ་དག་གི་ཞིང་བཀོད་པ། །དེ་དག་རྡུལ་གཅིག་སྟེང་དུ་མངོན་པར་སྒྲུབ། །དེ་ལྟར་མ་ལུས་ཕྱོགས་རྣམས་ཐམས་ཅད་དུ། །རྒྱལ་བ་དག་གི་ཞིང་རྣམས་བཀོད་ལ་འཇུག །གང་ཡང་དུས་གསུམ་དུ་བྱུང་ཟིན་དང་འབྱུང་བ་དང་འབྱུང་འགྱུར་དག་གི སངས་རྒྱས་ཀྱི་ཞིང་གི་བཀོད་པ་དེ་དག་ཐམས་ཅད། མོས་པ་དང༌། སྨོན་ལམ་དང༌། རྫུ་འཕྲུལ་གྱི་སྟོབས་ཀྱིས། རྡུལ་ཕྲ་རབ་གཅིག་གི་སྟེང་སྟེ་གོ་ས་རུ། མངོན་པར་སྒྲུབ་ཅིང༌། རྡུལ་གཅིག་པོ་དེ་ལ་སྒྲུབ་པ་ལྟར། མ་ལུས་པའི་ཕྱོགས་རྣམས་ཐམས་ཅད་དུ། རྡུལ་མཐའ་དག་ལ་རྒྱལ་བ་དག་གི་ཞིང་རྣམས་སྒྲུབ་ཅིང་བཀོད་པ་ཡིད་དུ་འོང་བ་དང༌། རྒྱན་གྱི་ཁྱད་པར་རྣམ་པ་ཐམས་ཅད་པ་ལ་འཇུག་པར་གྱུར་ཅིག་པ་སྟེ། སྐབས་འདིའི་འཇུག་པ་ཞེས་པ་ནི། ཞིང་ཁམས་དེ་ལྟ་བུ་སྟོན་ནུས་པའི་བྱ་བ་ལ་འཇུག་པའོ། །རྡུལ་གཅིག་ལ་དུས་གསུམ་གྱི་ཞིང་ཁམས་མཐའ་དག་སྟོན་པ་ནི་གཞི་ཕྲ་ཤོས་དང་བཀོད་པ་རྒྱ་


TNT17_Page_0853
[མ་དཔེ་གཟིགས་ན་འདིར་གནོན།]

ཆེ་ཤོས་ཀྱི་ཡ་མཐའ་ནས་བཟུང་བ་ཡིན་པས། སྤྱིར་བཀོད་པ་ཡང༌། རྡུལ་གཉིས་པའི་བཀོད་པ་ནས་བརྩམས་ཏེ་དུས་གསུམ་གྱི་ཞིང་གི་བར་དུ་སྣ་ཚོགས་པར་སྟོན་ཏོ། །དེས་མཚོན་ཏེ་རིམ་པ་བཞིན་དུ་སྦྱར་ནས། ཉི་ཟེར་རྡུལ་རེ་རེ་ལ་ཡང་དུས་གསུམ་གྱི་ཞིང་ཁམས་ལ་སོགས་པ་དེ་ལྟར་སྟོན་པ་དང༌། བྱེ་མའི་འབྲུ་རེ་རེ་འམ། སྤུ་ཉག་རེ་རེའམ། འབྲས་ལ་སོགས་པ་འབྲུ་རེ་རེའམ། རྩྭ་རེ་རེའམ་ཤིང་གེལ་བ་རེ་རེའམ། ལོ་མ་རེ་རེའམ། མེ་ཏོག་རེ་རེའམ། འབྲས་བུ་རེ་རེའམ། ཁྱིམ་རེ་རེའམ། དེ་བཞིན་ཏུ་སྦྱར་ཏེ། རྒྱང་གྲགས་རེ་རེའམ། དཔག་ཚད་རེ་རེའམ། རི་བོ་རེ་རེའམ། གྲོང་ཁྱེར་རེ་རེའམ། གླིང་རེ་རེའམ། འཇིག་རྟེན་གྱི་ཁམས་རེ་རེའམ། སྟོང་གསུམ་རེ་རེ་ལ་སོགས་པའི་བར་དུ་ཡང་དེ་ལྟར་སྟོན་ལ། སོ་སོ་སོ་སོར་ཐད་མཉམ་པ་ལ་ཡང༌། འཇིག་རྟེན་གྱི་ཁམས་གཅིག་ལ་གོ་ས་ཐ་མི་དད་པར། འཇིག་རྟེན་གྱི་ཁམས་ཐ་དད་པ་ཡང་ཚད་མཉམ་པ་དུ་མ་གཅིག་ཤུལ་དུ་གཅིག་སྟོན་ལ། གཞི་ཚད་ཆེན་པོ་ལ་ཆུང་ངུས་ཁྱབ་པ་ཡང་དཔག་ཏུ་མེད་པ་སྟོན་ཏེ། སྟོང་གསུམ་གཅིག་གླིང་བཞི་པའི་འཇིག་རྟེན་གྱི་ཁམས་གཅིག་གིས་ཁྱབ་པ་དང༌། འཛམ་བུ་གླིང་གཅིག་གིས་ཁྱབ་པ་དང༌། གྲོང་ཁྱེར་གཅིག་གིས་ཁྱབ་པ་དང༌། ལུས་གཅིག་གིས་ཁྱབ་པ་དང༌། སྐྲ་གཅིག་གིས་ཁྱབ་པ་དང༌། རྡུལ་ཕྲན་གཅིག་གིས་ཁྱབ་པའི་བར་དུ་ཡང་སྟོན་ཏོ། །ཡང་རྡུལ་ཕྲན་གཞན་གཅིག་གི་ནང་དུ་ཆུད་པ་དེ་ཉིད་ཀྱིས། གཞན་སྟོང་གསུམ་མང་པོ་ཡང་ནོན་པ་དང༌། གཞན་དུ་དུས་ཀྱང་ངེས་པ་མེད་པར་སྟོན་ཏེ་འདས་པ་


TNT17_Page_0854
[མ་དཔེ་གཟིགས་ན་འདིར་གནོན།]

ཡང་མ་འོངས་བ་དང་མ་འོངས་པ་ཡང་འདས་པར་སྒྱུར་བ་ལ་སོགས་པ་རྣམ་པར་འཕྲུལ་བ་བསམ་གྱིས་མི་ཁྱབ་པ་ཁོ་ན་འབྱུང་བའོ། །དྲུག་པ་ནི། གང་ཡང་མ་བྱོན་འཇིག་རྟེན་སྒྲོན་མེ་རྣམས། །དེ་དག་རིམ་པར་འཚང་རྒྱ་འཁོར་ལོ་བསྐོར། །མྱ་ངན་འདས་པ་རབ་ཏུ་ཞི་མཐའ་སྟོན། །མགོན་པོ་ཀུན་གྱི་དྲུང་དུ་བདག་མཆིའོ། །གང་ཡང་མ་བྱོན་པའི་སངས་རྒྱས་འཇིག་རྟེན་སྣང་བར་བྱེད་པའི་སྒྲོན་མེ་དེ་དག་རྣམས། རང་རང་གི་མཛད་པའི་རིམ་པ་མཐའ་དག་སྟོན་པ་རྣམས་མ་འཁྲུགས་པར་སྤྱོད་དེ། སངས་རྒྱབ་དང༌། ཆོས་ཀྱི་འཁོར་ལོ་བསྐོར་བ་དང༌། མྱ་ངན་ལས་འདས་པ་སྡུག་བསྔལ་རབ་ཏུ་ཞི་བའི་མཐའ་ཐོབ་པའི་ཚུལ་སྟོན་པར་མཛད་པའི། མགོན་པོ་སངས་རྒྱས་དེ་དག་ཀུན་གྱི་དྲུང་དུ་བདག་དུས་གཅིག་ཏུ་མཆི་བ་སྟེ། འགྲོ་ཞིང་བསླེབས་ལ་ཕྱིན་པར་བགྱིའོ། །ཞེས་སྨོན་པ་སྟེ་སངས་རྒྱ་བ་སོགས་མཛད་པ་གསུམ་ནི་མཚོན་པ་སྟེ། སངས་རྒྱས་ཀྱི་མཛད་པ་སྟོན་པའི་གནས་སྐབས་ཐམས་ཅད་དུ་དེར་ཕྱིན་པར་བྱས་ནས། ཅི་ཞིག་བྱེད་ཅེ་ན་མཆོད་པ་དང༌། རྫུ་འཕྲུལ་སྟོན་པ་དང་ཆོས་བསྟན་པས་སེམས་ཅན་འདུལ་བ་དང༌། ཆོས་ཀྱི་དོན་འདྲི་བ་ལ་སོགས་པ། མདོར་ན་སངས་རྒྱས་ཀྱི་མཛད་པ་ཐམས་ཅད་ཀྱི་དཔུང་རོགས་བྱ་བ་ཡིན་ལ། དོན་ལ་བདག་ཉིད་གསར་དུ་མངོན་པར་རྫོགས་པར་སངས་རྒྱས་ཟིན་གྱི་དབང་དུ་བྱས་ན་ནི། མཛད་པ་འཕྲིན་ལས་གཅིག་པ་ཁོ་ནར་འགྱུར་ཞིང༌། ས་བཅུ་པ་ཉིད་ལ་གནས་པའི་སྐབས་ཡིན་ན་ཡང༌། སངས་རྒྱས་ཀྱིས་འདུལ་བ་ལ་སངས་རྒྱས་སུ་གྱུར་ཏེ་སངས་རྒྱས་ཀྱི་མཛད་པ་སྟོན་པ་དང༌། སངས་རྒྱས་


TNT17_Page_0855
[མ་དཔེ་གཟིགས་ན་འདིར་གནོན།]

སུ་མི་སྟོན་ཡང༌། སངས་རྒྱས་གཞན་གྱིས་མཛད་པའི་ལས་བྱེད་པ་པོར་འབྱུང་བ་ཡིན་ནོ། །རྩ་བའི་གསུམ་པ། ཐུན་མོང་དང་ཐུན་མོང་མ་ཡིན་པ་གཉིས་ཀར་ལ་འཇུག་པའི། རྣམ་གྲངས་གཞན་གྱི་སྨོན་ལམ་བསྟན་པ་ལ། སྒྲུབ་པ་གཙོ་བོར་གྱུར་པ་སྟོབས་ཀྱི་སྨོན་ལམ་དང༌། ཕན་ཡོན་གཙོ་བོར་གྱུར་པ་བསམ་མི་ཁྱབ་ཀྱི་སྨོན་ལམ་དང༌། མཐར་ཐུག་སྨོན་ལམ་བླ་ན་མེད་པར་གཅིག་ཏུ་བྱ་བ་སྟེ། གསུམ་ལས། དང་པོ་ལ། སྟོབས་བཅུ་བཤད་པ་དང༌། དེའི་བྱེད་ལས་བཤད་པའོ། །དང་པོ་ནི། ཀུན་ཏུ་མྱུར་བའི་རྫུ་འཕྲུལ་སྟོབས་རྣམས་དང༌། །ཀུན་ནས་སྒོ་ཡི་ཐེག་པའི་སྟོབས་རྣམས་དང༌། །ཀུན་ཏུ་ཡོན་ཏན་སྤྱོད་པའི་སྟོབས་རྣམས་དང༌། །ཀུན་ཏུ་ཁྱབ་པར་བྱམས་པ་དག་གི་སྟོབས། །ཀུན་ནས་དགེ་བའི་བསོད་ནམས་སྟོབས་རྣམས་དང༌། །ཆགས་པ་མེད་པར་གྱུར་བའི་ཡེ་ཤེས་སྟོབས། །ཤེས་རབ་ཐབས་དང་ཏིང་འཛིན་སྟོབས་དག་གིས། །བྱང་ཆུབ་སྟོབས་རྣམས་ཡང་དག་སྒྲུབ་པར་བྱེད། །མཆོད་པ་དང༌། ཆོས་སྟོན་པ་དང༌། སེམས་ཅན་གྱི་དོན་དུ། མཐའ་མེད་པའི་ཞིང་ཁམས་རྣམས་ཀྱང་སྐད་ཅིག་གིས་བགྲོད་ནུས་ཤིང༌། ཞིང་ཐ་དད་པར་དུ་མར་ཡང་དུས་གཅིག་ཅར་བགྲོད་ཐུབ་པས་ཀུན་ཏུ་མྱུར་བའི་རྫུ་འཕྲུལ་གྱི་སྟོབས་རྣམས་དང༌། ཀུན་ནས་སྒོ་ཞེས་བྱ་བ་ནི། སྒོ་ཀུན་དང་ལྡན་པའི་དོན་ཏེ། ཐབས་ཚུལ་གྱིས་རིམ་པ་མཐའ་ཡས་པའི་སྒོ་ནས། སེམས་ཅན་གྱི་དོན་སྤྱོད་པ་དང་ལྡན་པའི་སེམས་བསྐྱེད་ནི། དེ་ལ་བརྟེན་ནས་བླ་ན་མེད་པའི་བྱང་ཆུབ་ཏུ་བགྲོད་ནུས་པའི་ཕྱིར། བཞོན་པ་དང་འདྲ་


TNT17_Page_0856
[མ་དཔེ་གཟིགས་ན་འདིར་གནོན།]

བས་ཐེག་པའི་སྟོབས་ཏེ་དེ་རྣམས་དང༌། ཕ་རོལ་ཏུ་ཕྱིན་པ་དང་བསྡུ་དངོས་བཞི་དང་ཚད་མེད་བཞི་ལ་སོགས་པ། ཡོན་ཏན་དུ་མ་དང་འགྲོགས་པའི་སྙོམས་འཇུག་དགུ་དང་ཟད་པར་བཅུ་དང༌། ཟིལ་གནོན་བརྒྱད་དང༌། མངོན་ཤེས་དྲུག་ལ་སོགས་པ་ཡོན་ཏན་ཀུན་ཏུ་སྤྱོད་པའི་སྟོབས་རྣམས་དང༌། ཀུན་ནས་སེམས་ཅན་ཐམས་ཅད་ལ་ཉེ་རིང་མེད་པར་ཁྱབ་པའི་བྱམས་པ་ལ་སོགས་པ་ཚད་མེད་བཞི་པོ་དག་གི་སྟོབས་དང་ཀུན་ཏུ་སེམས་ཅན་ཐམས་ཅད་ལ་ཕན་པ་དང་བདེ་བ་བྱེད་པའི་ཕྱིར། རབ་ཏུ་དགེ་བའི་སྦྱིན་སོགས་བསོད་ནམས་ཀྱི་སྟོབས་རྣམས་དང༌། དུས་གསུམ་གྱི་དངོས་པོ་ཐམས་ཅད་ལ་ཆགས་ཐོགས་མེད་པར་འཇུག་པའི་མངོན་པར་མཁྱེན་པ། ཡེ་ཤེས་ཀྱི་སྟོབས་དང༌། ཆོས་དབྱིངས་ཇི་ལྟ་བ་བཞིན་རྟོགས་པའི་ཤེས་རབ་ཀྱི་སྟོབས་དང༌། གཞན་དོན་སྒྲུབ་པ་ལ་མཁས་པ་ཐབས་མཁས་ཀྱི་སྟོབས་དང༌། དམིགས་པ་ལ་རྩེ་གཅིག་པ་གང་ཞིག་མངོན་ཤེས་དང་རྣམ་འཕྲུལ་ལ་སོགས་པ་ཡོན་ཏན་བསྐྱེད་པའི་རྒྱུ། དཔའ་བར་འགྲོ་བ་ལ་སོགས་པ་ཏིང་ངེ་འཛིན་གྱི་སྟོབས་ཏེ། སྟོབས་དགུ་པོ་དེ་དག་གི་སྒོ་ནས་འབད་པས། བྱང་ཆུབ་ཀྱི་སྟོབས་ཏེ་བླ་ན་མེད་པའི་བྱང་ཆུབ་འཕྲལ་དུ་ཐོབ་པར་བྱེད་པའི་ཡེ་ཤེས་ཀྱི་ཁྱད་པར། རྫོགས་པའི་སངས་རྒྱས་ཀྱི་ཡེ་ཤེས་ཉིད་དང་རྣམ་པ་མཐུན་ཅིང་རྒྱ་ཁྱོན་མཚུངས་པའི་ལམ་གྱི་བདེན་པ་ནི། བྱང་ཆུབ་ཀྱི་སྟོབས་ཡིན་ལ། དེ་ཡང་རྣམ་པ་མཐའ་ཡས་པ་འཛིན་པའི་ཕྱིར། རྣམས་ཞེས་མང་པོའི་སྒྲ་སྨོས་ཏེ། དེ་རྣམས་ཡང་དག་པར་སྒྲུབ་པར་བྱེད་པར་ཤོག་ཅིག་པའོ། །འདིར་བཤད་པའི་སྟོབས་འདི་རྣམས།


TNT17_Page_0857
[མ་དཔེ་གཟིགས་ན་འདིར་གནོན།]

འཕགས་པ་དཀོན་མཆོག་སྤྲིན་དང་ཕལ་པོ་ཆེའི་སྐབས་གཞན་ལས་འབྱུང་བ་ལྟར་གྱི་བྱང་ཆུབ་སེམས་དཔའི་སྟོབས་བཅུ་དང་ཕལ་ཆེར་འདྲ་བར་སྣང་སྟེ། ཇི་ལྟར་ཞེ་ན། བྱང་ཆུབ་སེམས་དཔའི་སྟོབས་བཅུ་ནི། བསམ་པ་ལྷག་བསམ་སྦྱོར་བ་དང༌། ཤེས་རབ་སྨོན་ལམ་སྤྱོད་པ་དང༌། ཐེག་པ་རྣམ་འཕྲུལ་བྱང་ཆུབ་དང༌། ཆོས་འཁོར་བསྐོར་བའི་སྟོབས་རྣམས་སོ། །འདིར་ཤེས་རབ་ཀྱི་སྟོབས་དང༌། བྱང་ཆུབ་ཀྱི་སྟོབས་དང༌། སྤྱོད་པའི་སྟོབས་དང༌། ཐེག་པའི་སྟོབས་ནི་དངོས་སུ་གསལ་ལ། རྣམ་པར་འཕྲུལ་པའི་སྟོབས་ནི་རྫུ་འཕྲུལ་དང་བསམ་པའི་སྟོབས་ནི་བྱམས་པ་དང་ལྷག་པའི་བསམ་པའི་སྟོབས་ནི་ཡེ་ཤེས་དང༌། སྦྱོར་བའི་སྟོབས་ནི་བསོད་ནམས་ཀྱི་སྟོབས་དང༌། ཐབས་ཀྱི་སྟོབས་གཅིག་པོའི་ནང་ཚན་ནས་གཙོ་བོ་ཁྱད་པར་ཅན་ལོགས་སུ་ཕྱེ་བ་ནི་སྨོན་ལམ་གྱི་སྟོབས་དང༌། ཆོས་ཀྱི་འཁོར་ལོ་བསྐོར་བའི་སྟོབས་གཉིས་སོ། །དེ་བས་ན་གཞུང་འདིར་བཤད་པའི་ཏིང་ངེ་འཛིན་གྱི་སྟོབས་ལྷག་པ་ལྟར་བྱུང་ཡང་སྤྱོད་པ་དང༌། ལྷག་བསམ་དུ་འདུས་པར་མངོན་ནོ། །གཉིས་པ་སྟོབས་ཀྱི་བྱེད་ལས་ནི། ལས་ཀྱི་སྟོབས་རྣམས་ཡོངས་སུ་དག་བྱེད་ཅིང༌། །ཉོན་མོངས་སྟོབས་རྣམས་ཀུན་ཏུ་ཕམ་པར་བྱེད། །བདུད་ཀྱི་སྟོབས་རྣམས་སྟོབས་མེད་རབ་བྱེད་ཅིང༌། །བཟང་པོ་སྤྱོད་པའི་སྟོབས་ནི་རྫོགས་པར་བགྱི། །དེ་ལ་སྤངས་པར་བྱ་བའི་ལས་ནི། ཁམས་གསུམ་པོ་སྤྱོད་པར་བྱེད་པ་སྟེ། ལས་དངོས་དང༌། ལས་རྗེས་སུ་མཐུན་པའོ། །ལས་དངོས་ཀྱང་མི་དགེ་བའི་ལས་དང༌། ཟག་བཅས་ཀྱི་དགེ་བའོ། །ཟག་


TNT17_Page_0858
[མ་དཔེ་གཟིགས་ན་འདིར་གནོན།]

བཅས་ཀྱི་དགེ་བ་དེ་ཡང་གཉིས་ཏེ། འདོད་ཁམས་ཀྱིས་བསྡུས་པའི་དགེ་བ་བསོད་ནམས་དང༌། ཁམས་གོང་མ་གཉིས་ཀྱིས་བསྡུས་པའི་དགེ་བ་མི་གཡོ་བའི་ལས་སོ། །རྗེས་སུ་མཐུན་པའི་ལས་ནི། ལས་རྣམས་ཀྱིས་བཞག་པའི་བག་ཆགས་གང་ཡིན་པ་སྟེ། དེ་ལྟ་བུའི་ལས་ཀྱི་སྟོབས་རྣམས་ཡོངས་སུ་དག་པར་བྱེད་ཅིང༌། ཉོན་མོངས་པ་ནི། ལུས་དང་སེམས་རབ་ཏུ་མ་ཞི་བར་རྙོག་པ་དང་རང་ཉིད་ལ་གནོད་པར་བྱེད་པའི་རྣམ་རྟོག་སྟེ། འདོད་ཆགས་དང་ཁོང་ཁྲོ་དང༌། ང་རྒྱལ་དང་མ་རིག་པ་དང༌། ཐེ་ཚོམ་སྟེ་ལྟ་བ་མིན་པ་ལྔ་དང༌། འཇིགས་ཚོགས་ལ་ལྟ་བ་དང༌། ལོག་པར་ལྟ་བ་དང༌། མཐར་ལྟ་བ་དང༌། ལྟ་བ་མཆོག་འཛིན་དང༌། ཚུལ་ཞུགས་མཆོག་འཛིན་ཏེ་ལྟ་བ་ལྔའོ། །དེ་དག་ནི་རྩ་བ་ཡིན་ལ། གཞན་ཡང་ཁྲོ་བ་ལ་སོགས་པ་ཉེ་བའི་ཉོན་མོངས་པ་ཉི་ཤུ་དང༌། ཉོན་མོངས་པའི་རབ་དབྱེ་ཕྲ་མོ་གཞན་རྣམས་དང༌། ཉོན་མོངས་པ་རྣམས་ཀྱི་བག་ཆགས་དང་གནས་ངན་ལེན་གང་ཡིན་པ་རྣམས་ཀྱང་སྟེ། ཉོན་མོངས་པའི་སྟོབས་རྣམས་ཀུན་ཏུ་ཕམ་པ་སྟེ། ཉོན་མོངས་ཕལ་ཆེར་སྤངས་ཤིང༌། འགའ་ཞིག་རྩད་ནས་རང་མ་སྤངས་ཀྱང༌། དེ་ལ་རང་དབང་འབྱོར་པའི་ཚུལ་གྱིས། དེའི་སྟོབས་བཅོམ་ནས་ལམ་གྱི་གྲོགས་སུ་བྱས་པའོ། །སྐབས་འདིར་ཕྱོགས་རེ་མགོ་གནོན་གྱི་གཉེན་པོ་སྤྱད་པ་རྣམ་པར་སྦྱོང་བ་དང༌། མཐའ་དག་དཔྱིས་འབྱིན་གྱི་གཉེན་པོ་བདག་མེད་གཉིས་དང༌། ཉོན་མོངས་བྱང་ཆུབ་ཀྱི་ཡན་ལག་ཏུ་སྒྱུར་བའི་ཐབས་མཁས་ལ་སོགས་པའི་རྣམ་བཞག་རྣམས་གཞན་ལས་འབྱུང་


TNT17_Page_0859
[མ་དཔེ་གཟིགས་ན་འདིར་གནོན།]

བ་ལྟར་རྒྱས་པར་ཤེས་པར་བྱའོ། །བདུད་ཀྱི་སྟོབས་རྣམས་ཞེས་པ་ལ་སྤྱིར་བདུད་བཞི་ཡིན་ཡང༌། ཉོན་མོངས་པའི་བདུད་ནི་སྔར་བཤད་ཟིན་པས། ཕུང་པོའི་བདུད་དང་འཆི་བདག་གི་བདུད་དང་ལྷ་བུའི་བདུད་དོ། །གང་འདུས་བྱས་ཐམས་ཅད་ལ། རང་བཞིན་གྱིས་གྲུབ་པ་དང་རྟག་པའི་ཆོས་རྡུལ་ཙམ་ཡང་མི་དམིགས་ཏེ། ཕུང་པོ་སྟོང་པར་རྟོགས་པས་ཕུང་པོའི་བདུད་བཅོམ་པ་དང༌། དེ་བཞིན་གཤེགས་པའི་སྙིང་པོ་ནི་རྟག་ཅིང་བརྟན་ལ། སྐྱེ་འཇིག་ཐམས་ཅད་དང་བྲལ་པར་རྟོགས་པས་འཆི་བདག་གི་བདུད་བཅོམ་ཤིང༌། ཀུན་རྫོབ་ཐ་མལ་གྱི་སྡུག་པ་དང་མི་སྡུག་པ་སོགས་ཡུལ་ལ་མངོན་པར་མ་ཞེན་ལ། ཆོས་ཉིད་ཀྱི་གཟུགས་སོགས་དོན་དམ་པའི་སྤྱོད་ཡུལ་མཐའ་ཡས་པ་ལ་མངོན་པར་སྤྱོད་པའི་ཕྱིར། གང་ཞིག་ཉོན་མོངས་སྐྱེད་དུ་འཇུག་ཅིང༌། སྡིག་ཏོ་མི་དགེ་བའི་ཆོས་ལ་འཁྲིད་པའི་ལྷའི་བུའི་བདུད་བཅོམ་པས་ན། བདུད་ཀྱི་སྟོབས་རྣམས་ནི་སྟོབས་མེད་ཅིང་མི་མངོན་པར་རབ་ཏུ་བྱེད་པ་དང༌། བཟང་པོ་སྤྱོད་པའི་སྟོབས་ནི་རྫོགས་པར་བགྱིད་པ་སྟེ། བླ་ན་མེད་པའི་སངས་རྒྱས་ཐོབ་པར་སྨོན་པའོ། །གཉིས་པ་ཕན་ཡོན་གཙོ་བོར་སྟོན་པ་བསམ་མི་ཁྱབ་གྱི་སྨོན་ལམ་ནི། ཞིང་རྣམས་རྒྱ་མཚོ་རྣམ་པར་དག་བྱེད་ཅིང༌། །སེམས་ཅན་རྒྱ་མཚོ་དག་ནི་རྣམ་པར་གྲོལ། །ཆོས་རྣམས་རྒྱ་མཚོ་རབ་ཏུ་མཐོང་བྱེད་ཅིང༌། །ཡེ་ཤེས་རྒྱ་མཚོ་རབ་ཏུ་རྟོགས་པར་བྱེད། །སྤྱོད་པ་རྒྱ་མཚོ་རྣམ་པར་དག་བྱེད་ཅིང༌། །སྨོན་ལམ་རྒྱ་མཚོ་རབ་ཏུ་རྫོགས་པར་བྱེད། །


TNT17_Page_0860
[མ་དཔེ་གཟིགས་ན་འདིར་གནོན།]

སངས་རྒྱས་རྒྱ་མཚོ་རབ་ཏུ་མཆོད་བྱེད་ཅིང༌། །བསྐལ་པ་རྒྱ་མཚོར་མི་སྐྱོ་སྤྱད་པར་བགྱི། །སངས་རྒྱས་ཀྱི་ཞིང་རྣམས་རྒྱ་མཚོ་ཐམས་ཅད་བདེ་བ་ཅན་དང༌། པདྨ་ཅན་གྱི་འཇིག་རྟེན་བཞིན་དུ་ངན་འགྲོ་དང་ནད་དང་སྡུག་བསྔལ་དང༌། ལྟ་བ་ལོག་པ་དང༌། ངམ་གྲོག་དང༌། ཚེར་མ་ལ་སོགས་པ་སྤངས་པ། རིན་པོ་ཆེའི་ས་གཞི་དང་ལྗོན་པ་ལ་སོགས་པ་རྒྱན་ཐམས་ཅད་ཀྱིས་རྣམ་པར་བརྒྱན་པའི་ཞིང་ཁམས་རྣམ་པར་དག་པ་སྟེ་བཟང་པོ་འབའ་ཞིག་ཏུ་བྱེད་ཅིང༌། སེམས་ཅན་རྒྱ་མཚོ་དག་ནི་སྡུག་བསྔལ་དང་སྒྲིབ་པ་ལས་རྣམ་པར་གྲོལ་བར་བྱེད་པ་དང༌། ལུང་རྟོགས་ཀྱི་ཆོས་རྒྱ་མཚོ་རྣམས་ནི། ཤེས་རབ་ཀྱི་མིག་གིས་རབ་ཏུ་མཐོང་བར་བྱེད་ཅིང༌། ཇི་ལྟ་བ་དང་ཇི་སྙེད་པའི་ཆོས་མངོན་སུམ་དུ་མཐོང་བའི་ཡེ་ཤེས་རྒྱ་མཚོ་རྣམས་ནི། རབ་ཏུ་རྟོགས་པ་སྟེ་ཐོབ་པར་བྱེད་ལ། སྤྱོད་པ་སྟེ་བདག་གཞན་ལ་ཕན་པའི་ཐབས་རྒྱ་མཚོ་ལྟ་བུ་དག་ལ་ནི། བསམ་པ་དྲི་མ་ཅན་ལ་སོགས་པའི་སྐྱོན་རྣམས། རྣམ་པར་དག་པར་བྱེད་ཅིང་རང་གཞན་གྱི་དོན་གྱི་སྨོན་ལམ་གྲངས་མེད་པ་རྒྱ་མཚོ་རྣམས་ནི། རབ་ཏུ་རྫོགས་པ་སྟེ་འབྲས་བུ་འགྲུབ་པར་བྱེད་པ་དང༌། སངས་རྒྱས་རྒྱ་མཚོ་ཐམས་ཅད་ནི། མཆོད་པ་རྣམ་པ་བཅུ་ལ་སོགས་པ་ཐམས་ཅད་ཀྱིས། རབ་ཏུ་མཆོད་པར་བྱེད་ཅིང༌། དེ་ལྟར་ཞིང་དག་པར་བྱེད་པ་ལ་སོགས་པ་བདུན་པོ་དེ་ཡང༌། བསྐལ་པ་རྒྱ་མཚོ་སྟེ་མཐའ་མེད་པའི་བར་དུ་སྐྱོ་བ་མེད་ཅིང་རབ་ཏུ་དགའ་བས་སྤྱད་པར་བགྱི་ཞེས་སྨོན་པའོ། །དེ་ལྟར་ན་རྒྱ་མཚོ་ལྟ་བུ་བརྒྱད་ཀྱིས། དང་པོ་གཉིས་ནི་ཞིང་སྦྱོང་དང་སེམས་ཅན་སྨིན་བྱེད་ཡིན་ལ། ལྷག་མ་ལྔ་ནི་སྨོན་ལམ་དང་ཚོགས་


TNT17_Page_0861
[མ་དཔེ་གཟིགས་ན་འདིར་གནོན།]

རྫོགས་པའི་ཐབས་སོ། །ཐ་མ་ནི་རྫོགས་སྨིན་སྦྱང་གསུམ་དེ་ཇི་ཙམ་དུ་སྤྱོད་པའི་དུས་བསྟན་པའོ། །གསུམ་པ་སྨོན་ལམ་མཐར་ཐུག་བླ་ན་མེད་པར་གཅིག་ཏུ་བྱ་བ་ནི། གང་ཡང་དུས་གསུམ་གཤེགས་པའི་རྒྱལ་བ་ཡིས། །བྱང་ཆུབ་སྤྱོད་པའི་སྨོན་ལམ་བྱེ་བྲག་རྣམས། །བཟང་པོ་སྤྱོད་པས་བྱང་ཆུབ་སངས་རྒྱས་ནས། །དེ་ཀུན་མ་ལུས་བདག་གིས་རྫོགས་པར་བགྱི། །གང་ཡང་དུས་གསུམ་དུ་བྱོན་གཤེགས་མཛད་པའི། རྒྱལ་བ་མཐའ་ཡས་པ་རྣམས་ཀྱིས་སྔོན་ཐོག་མ་མེད་པའི་དུས་ནས་བརྩམས་པའི། བྱང་ཆུབ་སྤྱོད་པའི་སྨོན་ལམ་གྱི་བྱེ་བྲག་མཐའ་ཡས་པ་དེ་རྣམས་ཀུན། མ་ལུས་པར་བདག་གིས་རྫོགས་པར་བགྱི་བར་སྨོན་པའོ། །དེ་ཡང་དུས་ནམ་གྱི་ཚེ་རྫོགས་པར་འགྱུར་སྙམ་ན། བཟང་པོ་སྤྱོད་པ་སྤྱད་པས་བླ་ན་མེད་པས་བྱང་ཆུབ་ཏུ་སངས་རྒྱས་པར་གྱུར་ནས་ཞེས་པའོ། །དེ་ལྟ་བུའི་སངས་རྒྱས་རྣམས་ཀྱི་སྨོན་ལམ་བདག་གིས་རྫོགས་པར་བྱ་བའི་ཕྱིར། རྒྱལ་སྲས་མཆོག་གཉིས་དང་ཡང་སྨོན་ལམ་གཅིག་ཏུ་བྱ་བ་ནི། རྒྱལ་བ་ཀུན་གྱི་སྲས་ཀྱི་ཐུ་བོ་པ། །གང་གི་མིང་ནི་ཀུན་ཏུ་བཟང་ཞེས་བྱ། །མཁས་པ་དེ་དང་མཚུངས་པར་སྤྱད་པའི་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ། །དེ་ཡང་རྒྱལ་བ་ཀུན་གྱི་སྲས་ཀྱི་མཆོག་ཐུ་བོ་པ། གང་གི་མིང་ནི་ཀུན་ཏུ་བཟང་པོ་ཞེས་བྱ་བར་གྲགས་པའི། མཁས་པ་དེ་དང་མཚུངས་པར་ཆོས་ལ་སྤྱོད་པའི་ཕྱིར། བདག་གི་དགེ་བ་འདི་དག་ཐམས་ཅད་རབ་ཏུ་བསྔོ་བར་བགྱིའོ། །འདི་ལ་ཀུན་ཏུ་བཟང་པོ་ཉིད་ཀྱིས་རང་དང་མཚུངས་པར་སྨོན་ལམ་བྱེད་པར་མི་འཐད་དོ་སྙམ་ན།


TNT17_Page_0862
[མ་དཔེ་གཟིགས་ན་འདིར་གནོན།]

འདི་ནི་གཞོན་ནུ་ནོར་བཟང་ལ་སོགས་པ་རྗེས་འཇུག་རྣམས་ཀྱི་འདེབས་པའི་དོན་དུ་གསུངས་པས་མི་འགལ་ལ། ཀུན་བཟང་ཉིད་ཀྱིས་རང་དོན་དུ་ནི་སྨོན་ལམ་གཞན་རྣམས་ཀྱང་འདེབས་མི་དགོས་པར་ཁྱད་མེད་དོ། །ཚུལ་ཇི་ལྟར་ན། ལུས་དང་ངག་དང་ཡིད་ཀྱང་རྣམ་དག་ཅིང༌། །སྤྱོད་པ་རྣམ་དག་ཞིང་རྣམས་ཡོངས་དག་དང༌། །བསྔོ་བ་བཟང་པོ་མཁས་པ་ཅི་འདྲ་བ། །དེ་འདྲ་བདག་ཀྱང་དེ་དང་མཚུངས་པར་ཤོག །སེམས་ཅན་གང་ལ་གང་འདུལ་གྱིས་ལུས་མཐའ་ཡས་པར་སྟོན་པ་དང༌། དབྱངས་གཅིག་འགྲོ་བ་ཀུན་གྱི་སྐད་དང་འབྱོར་བའི་ངག་དང༌། རྣམ་པར་མི་རྟོག་བཞིན་དུ་མ་འདྲེས་པར་ཤེས་ལ་སྙིང་རྗེ་ཆེན་པོའི་ཏིང་ངེ་འཛིན་ལ་ཡང་འཇུག་ནུས་པའི་ཡིད་ཀྱང་སྟེ། སྒོ་གསུམ་རྣམ་པར་དག་པར་གྱུར་ཅིང༌། ཕར་ཕྱིན་དྲུག་གི་སྤྱོད་པ་ལ། སེར་སྣ་སོགས་ཀྱི་དྲི་མ་རྣམ་པར་དག་པ་དང༌། ཞིང་མ་དག་པ་རྣམས་ཀྱང་ཡོངས་སུ་དག་པར་འགྱུར་བ་དང༌། བསྔོ་བ་བཟང་པོ་མཐའ་དང་བྲལ་བ་བཏབ་པའི་མཁས་པ་བྱང་ཆུབ་སེམས་དཔའ་ཆེན་པོ་རྣམས། ཀུན་བཟང་དང་ལྷན་ཅིག་སྤྱོད་པ་ཅི་འདྲ་བ་དེ་འདྲར་བདག་ཀྱང་ཀུན་ཏུ་བཟང་པོ་དང་མཚུངས་པར་ཤོག་ཅིག་འགྲེལ་པ་ཁ་ཅིག་ལས། མཁས་པ་བཟང་པོ་བསྔོ་བ་ཅི་འདྲ་བ། །ཞེས་འདོན་ཏེ། དོན་ལ་ཁྱད་ཆེར་མེད་དོ། །ཀུན་ནས་དགེ་བ་བཟང་པོ་སྤྱོད་པའི་ཕྱིར། །འཇམ་དཔལ་གྱི་ནི་སྨོན་ལམ་སྤྱད་པར་བགྱི། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་ཡི་བྱ་བ་མ་ལུས་རྫོགས་པར་བགྱི། །ཐོག་མཐའ་བར་གསུམ་ཀུན་ཏུ་ཀུན་ནས་དགེ་བའི་ཆོས། བཟང་པོ་སྤྱོད་པ་སྤྱད་པའི་ཕྱིར། འཕགས་མཆོག་འཇམ་


TNT17_Page_0863
[མ་དཔེ་གཟིགས་ན་འདིར་གནོན།]

དཔལ་གྱི་སྨོན་ལམ་ཇི་ལྟ་བ་བཞིན་དུ་བདག་གིས་ཀྱང་སྤྱད་པར་བགྱི་སྟེ། སྤྱོད་པར་གྱུར་ཅིག སངས་རྒྱས་རྣམས་དང་ཀུན་བཟང་དང་འཇམ་དཔལ་གྱི་སྨོན་ལམ་དེ་ཀུན། མ་འོངས་མཐའ་མེད་པའི་བསྐལ་པ་ཀུན་ཏུ་མི་སྐྱོ་ཞིང༌། དགའ་སྤྲོ་དང་བཅས་པར། རྒྱལ་བ་སྲས་བཅས་དེའི་བཞེད་དོན་གྱི་བྱ་བ་མ་ལུས་པ་བདག་གིས་རྫོགས་པར་བགྱི་བ་སྨོན་པའོ། །གསུམ་པ་དོན་བསྡུ་ནི། སྤྱོད་པ་དག་ནི་ཚད་ཡོད་མ་གྱུར་ཅིག །ཡོན་ཏན་རྣམས་ཀྱང་ཚད་གཟུང་མེད་པར་ཤོག །སྤྱོད་པ་ཚད་མེད་པ་ལ་གནས་ནས་ཀྱང༌། །དེ་དག་འཕྲུལ་པ་ཐམས་ཅད་འཚལ་བར་བགྱི། །བདག་གིས་སྦྱིན་པ་ལ་སོགས་པ་རྒྱུད་སྤྱོད་པ་དག་གི་མཐའ་ནི། འདི་ཙམ་མོ་ཞེས་ཚད་བཟུང་དུ་ཡོད་པར་མ་གྱུར་ཅིག །དེ་ལས་འབྱུང་བའི་འབྲས་བུ་གཟུངས་དང་སྤོབས་པ་ལ་སོགས་པའི་ཡོན་ཏན་རྣམས་ཀྱང༌། ཚད་བཟུང་དུ་མེད་པར་ཤོག་ཅིག །དེ་ལྟར་སྤྱོད་པ་དང་ཡོན་ཏན་ཚད་བཟུང་མེད་པ་ལ་གནས་པར་བྱས་ནས་ཀྱང༌། སངས་རྒྱས་དང་བྱང་ཆུབ་སེམས་དཔའ་དེ་དག་རྣམས་ཀྱི། སྐུ་གསུང་ཐུགས་ཀྱི་རྣམ་པར་འཕྲུལ་པ་ཐམས་ཅད་བདག་གིས་འཚལ་པ་སྟེ། ཐོག་མར་མཐོང་ཞིང་ཤེས་ལ། མཐར་ཐོབ་པར་འགྱུར་བར་སྨོན་པའོ། །གཞུང་འདིར་འབྲས་བུ་མཐར་ཐུག་སངས་རྒྱས་ལ་སྦྱོར་ཚུལ། ཡང་ནས་ཡང་དུ་བྱུང་ཡང༌། འབྲས་བུའི་རྣམ་གཞག སྒོས་སུ་རྒྱས་ཤིང་གསལ་བར་མི་འབྱུང་བ་ནི། བཟང་པོ་སྤྱོད་པ་པོ་འདོད་ཆེན་པ་མ་ཡིན་པའི་བྱང་ཆུབ་སེམས་དཔའ་རྣམས་ཀྱིས། དང་པོའི་སེམས་


TNT17_Page_0864
[མ་དཔེ་གཟིགས་ན་འདིར་གནོན།]

བསྐྱེད་པ་དང་འབྲེལ་བའི་སྨོན་ལམ་གྱི་དབང་དུ་བྱས་པ་དང༌། སེམས་དཔའ་ཆེན་པོའི་གནས་སྐབས་ན། རང་དོན་ཡིད་བྱེད་ཀྱི་ཁྱད་པར་གཞན་ནི་ཆེར་མི་འབྱུང་ལ། བདག་དོན་དུ་བྱང་ཆུབ་གཉེར་བ་ཙམ་ཞིག་འབྱུང་ཉེ་ན། དེ་སྤོང་པའི་དུ་ཡང་བཟང་པོ་སྤྱོད་པའི་དམ་བཅའ་བྱེད་པའོ། །སོ་སོ་སྐྱེ་བོའི་གནས་སྐབས་ཐམས་ཅད་དུ་ཡང༌། རང་དོན་ཡིད་བྱེད་འགོག་པ་ལ། དམ་བཅའ་འདི་ཁོ་ན་གལ་ཆེ་ཞིང༌། བདག་གཞན་བརྗེ་བའི་བྱང་ཆུབ་སེམས་ཀྱི་རྩ་བ་དང་མཐར་ཐུག་པ་ཡང་བཟང་པོ་སྤྱོད་པའི་དམ་བཅའ་ལ་ལྟོས་པ་ཡིན་པ་དང༌། བྱང་ཆུབ་བསྒྲུབ་པ་ལ་ངང་ཐུང་བ་སྤོང་བའི་གོ་ཆ་ཆེན་པོ་ཡང་འདིའོ། །གསུམ་པ་སྨོན་ལམ་གྱི་མཐའ་དང་ཕན་ཡོན་བསྟན་པ་ལ། སྨོན་ལམ་གྱི་མཐའ་བཤད་པ་དང༌། ཕན་ཡོན་དངོས་བཤད་པའོ། །དང་པོ་ནི། ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཇི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ནམ་མཁའི་མཐར་ཐུག་གྱུར་པ་ཞེས་པ་ལ། ནམ་མཁའ་ལ་མཐའ་མེད་ཕྱིར། ཕྱོགས་བཅུ་མཐའ་མེད་པ་ཇི་ཙམ་པར། སེམས་ཅན་མ་ལུས་པའི་མཐའ་ཡས་དེ་བཞིན་ཏེ་མཐའ་མེད་པའོ། །སེམས་ཅན་ཇི་ཙམ་པར་ལས་དང་ཉོན་མོངས་པ་ཡང་དེ་ཙམ་སྟེ། ཇི་ཙམ་ལས་དང་ཉོན་མོངས་པའི་མཐའ་ཚད་གཟུང་དུ་མེད་པར་གྱུར་པ་དེ་བཞིན་དུ། བདག་གི་སྨོན་ལམ་གྱི་མཐའ་ཡང་དེ་ཙམ་དང་མཉམ་པའི་ཕྱིར་ཚད་མེད་པའོ། །མདོར་ན་སེམས་ཅན་ཐམས་ཅད་ཀྱི་ལས་དང་ཉོན་


TNT17_Page_0865
[མ་དཔེ་གཟིགས་ན་འདིར་གནོན།]

མོངས་གཅིག་ཀྱང་མ་ལུས་པ་བདག་གིས་སེལ་བ་དང༌། སེམས་ཅན་གཅིག་ཀྱང་མ་ལུས་པར་ཐམས་ཅད་བླ་ན་མེད་པའི་བྱང་ཆུབ་ལ་འགོད་པའི་སྨོན་ལམ་དང༌། དེ་མ་རྫོགས་ཀྱི་བར་དུ་ཡང་སེམས་ཅན་རྣམས་ཀྱི་སྡུག་བསྔལ་དང་མི་འདོད་པ་མཐའ་དག་བདག་གིས་འཇོམས་པ་དང༌། གང་དང་གང་དུ་ཇི་ལྟར་འོས་པའི་ཕུན་སུམ་ཚོགས་པ་ཐམས་ཅད་ཀྱང་བདག་གིས་སྒྲུབ་པར་སྨོན་ཅིང༌། དེ་ལྟར་སྨོན་པ་ཡང་དད་པ་དང་སྙིང་སྟོབས་ཤིན་ཏུ་བརྟན་པ་ལ་གཞི་བྱས། སྙིང་རྗེ་ཆེན་པོ་དང༌། འདུན་པ་དང་བརྩོན་འགྲུས་དྲག་པོས་མཚམས་སྦྱར། དེ་ཐམས་ཅད་སྟོང་ཉིད་རྟོགས་པའི་ཡེ་ཤེས་དང་ཇི་ལྟར་དམིགས་པ་དེ་ལྟར་ཐམས་ཅད་ལ་དབང་འབྱོར་བའི་ཏིང་ངེ་འཛིན་གྱི་ནང་དུ་བཅུག་སྟེ། དུས་བསྐལ་པ་མཐའ་མེད་པར་སྒྱུར་བྱེད་ཀྱི་གྲོགས་ཚོགས་བསགས་པའི་སྒོ་གྲངས་མེད་པས་ཡོངས་སུ་སྒྱུར་ཏེ་བསྔོས་ཤིང་སྨོན་ལམ་བཏབས་པ་ཡིན་པའི་ཕྱིར། སྨོན་ལམ་དེ་ཡང་ཇི་ལྟར་བསྔོས་པ་དང་མཐུན་པར་ནི་འགྲུབ་ལ། འཁོར་བའི་གནས་ན་སེམས་ཅན་གཅིག་ཀྱང་མ་ལུས་པར་རྫོགས་པ་ནི་མི་སྲིད་པའི་ཕྱིར། སྨོན་ལམ་འདི་ཡི་འབྲས་བུ་རྫོགས་ཟིན་ནས་ཟད་པ་ནི་མི་སྲིད་པ། དེས་ན་སེམས་ཅན་མཐའ་ཡས་པ་ཞིག་རྒྱུན་མི་འཆད་པར་གྲོལ་བར་འགྱུར་ཡང༌། སེམས་ཅན་གྱི་ཁམས་ལ་འཕེལ་འགྲིབ་མེད་དེ་མི་ཟད་པ་བཞིན་དུ། སྨོན་ལམ་འདི་ཡང་ཇི་ལྟར་སྨོན་པ་དང་མཐུན་པའི་གཞན་དོན་རླབས་ཆེན་རྒྱུན་མི་འཆད་པའི་འབྲས་བུ་འབྱིན་བཞིན་དུ་ཕྱི་མའི་མུ་མཐར་ཐུག་པར་སྤྱད་དུ་ཟིན་ཀྱང༌། དེའི་འབྲས་བུ་ཟད་ཅིང་རྫོགས་པ་


TNT17_Page_0866
[མ་དཔེ་གཟིགས་ན་འདིར་གནོན།]

ནི་མི་སྲིད་དོ། །དེས་ན་སྨོན་ལམ་རྫོགས་པ་ནི་འགྲུབ་རུང་ཐམས་ཅད་འགྲུབ་ནུས་པའི་དོན་ཡིན། སྔར་རྫོགས་ཟིན་པའི་དོན་མིན་ནོ། །ཚིགས་བཅད་འདི་ཡང་སྨོན་ལམ་གྱི་ངོ་བོ་ཤིན་ཏུ་བཟང་ཞིང་རྒྱ་ཆེ་བར་སྟོན་པ་ཡིན་པས་དང༌། གྲུབ་འབྲས་ཀྱི་ཆེ་བ་སྟོན་པ་ཡིན་པའི་ཕྱིར། ཕན་ཡོན་གྱི་དོན་ཚན་དུ་འདུས་སོ་སྙམ་པ་ནི་བདག་གི་རྣམ་པར་རྟོག་པའོ། ཁ་ཅིག་སྨོན་ལམ་ཇི་ཙམ་དུ་འདེབས་པའི་ཚད་བསྟན་པ་ཟེར་ཏེ་མི་ལེགས་སོ། །གཉིས་པ་ཕན་ཡོན་དངོས་བསྟན་པ་ལ། མདོར་བསྟན་པ་དང༌། རྒྱས་པར་བཤད་པ་དང༌། དོན་བསྡུ་གསུམ་མོ། །དང་པོ་ནི། གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །ལྷ་དང་མི་ཡི་བདེ་བའི་མཆོག་རྣམས་ཀྱང༌། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང༌། །ལན་ཅིག་ཙམ་ཡང་དད་པ་བསྐྱེད་པ་ནི། །བསོད་ནམས་དམ་པའི་མཆོག་ཏུ་འདི་འགྱུར་རོ། །འདིས་ནི་བསོད་ནམས་ཁྱད་པར་དུ་འཕགས་པ་ཡོངས་སུ་སྡུད་པ་བསྟན་ཏེ། མཆོད་པའི་ཡུལ་ཞིང་གི་མཆོག་སངས་རྒྱས་ལ། མཆོད་པའི་དངོས་པོ་རྒྱ་ཆེ་བ་སྣ་ཚོགས་ཕན་བྱེད་མང༌། ཞེས་པ་ལྟར། ཁྱད་པར་བཞི་ལྡན་ཕུལ་བ་དེ་འཇིག་རྟེན་དུ་བསོད་ནམས་ཆེས་ཆེ་བར་གྲགས་ན། དེ་བས་བསྔོ་བ་འདི་ལ་མོས་པ་བསྐྱེད་པ་ཡང་ཕན་ཡོན་ཆེ་སྟེ། འདི་ལ་འདི་དང་ཕྱི་མའི་ཕན་ཡོན་གཞན་མཐའ་ཡས་ཡོད་པ་ནི་སྨོས་ཀྱང་ཅི་དགོས། ཞེས་པའི་དོན་ཏེ། གང་ཡང་ཕྱོགས་


TNT17_Page_0867
[མ་དཔེ་གཟིགས་ན་འདིར་གནོན།]

བཅུའི་འཇིག་རྟེན་གྱི་ཁམས་ཞིང་ཁམས་མཐའ་ཡས་པ་རབ་ཏུ་རྒྱ་ཆེ་བ་རྣམས། མཆོད་པའི་ཁྱད་པར་སྣ་ཚོགས་པ། རྒྱལ་སྲིད་རིན་པོ་ཆེ་སྣ་བདུན་དང༌། ཨིནྡྲ་ནཱི་ལའི་རི་བོ་ལ་སོགས་པ། རིན་པོ་ཆེའི་རྒྱན་སྣ་ཚོགས་པས་བརྒྱན་ཅིང་བཀང་ནས། དེ་ལས་གཞན་ཕན་པར་བྱེད་པའི་དངོས་པོ། ལྷ་དང་མིའི་བདེ་བའི་རྒྱུ་མཆོག་སྟེ། ཁ་ཟས་དང་གོས་དང་གནས་ཁང་དང་བང་མཛོད་དང༌། བཞོན་པ་དང༌། འབྲུ་དང༌། གཞན་ཡང་འདོད་པའི་ཡོན་ཏན་མཐའ་ཡས་པ་དང་བཅས་པའི་ཕྱོགས་བཅུའི་ཞིང་ཁམས་དེ་དག་རྣམས་ཀྱང༌། གྲངས་ཆེས་མང་བ་ཞིང་གི་རྡུལ་སྙེད་དང༌། དུས་མང་བ་བསྐལ་པའི་བར་དུ་རྒྱུན་མི་འཆད་པར། ཞིང་གི་དམ་པ་རྒྱལ་བ་རྣམས་ལ་ཕུལ་ན་བསོད་ནམས་ཤིན་ཏུ་ཆེའོ་ཞེས་གྲགས་སོ། །དེ་ནི་གོང་དུ་སྨོས་པ་ལྟར། གཞི་དང་མཚམས་སྦྱོར་དང༌། འཛིན་བྱེད་དང༌། སྒྱུར་བ་ཁྱད་པར་ཅན་བཞི་པོ་དེས་མ་ཟིན་ཅིང༌། བྱང་ཆུབ་ཏུ་མ་བསྔོས་ན་ནན་ཏར་ན་དེ་ཙམ་དུ་ཆེས་ཆེ་བ་མ་ཡིན་ཏེ། བསོད་ནམས་དེ་ཡང་ཟག་པ་དང་བཅས་པ་དང༌། རྣམ་སྨིན་མྱོང་ནས་ཟད་པར་འགྱུར་བའི་ཕྱིར་རོ། །དེ་བས་ནི་འདི་བཟང་སྟེ་གང་གིས་བཟང་པོ་སྤྱོད་པ་བསྔོ་བའི་རྒྱལ་པོ་འདི། ཐོས་ཤིང་ཐོས་བྱུང་གི་ཤེས་རབ་ཀྱིས་གོ་ནས་བླ་ན་མེད་པའི་བྱང་ཆུབ་མཆོག་གི་རྗེས་སུ་རབ་ཏུ་མོས་པ་སྟེ། བྱང་ཆུབ་ལ་མཐའ་ཡས་པའི་ཡོན་ཏན་དང་ལྡན་པར་ངེས་ཤེས་སྐྱེས་ཤིང༌། དེས་དྲངས་ཏེ་སྙིང་ཐག་པ་ནས་བྱང་ཆུབ་ལ་དང་བའི་དད་པ་ལན་ཅིག་ཙམ་ཡང་སྐྱེད་


TNT17_Page_0868
[མ་དཔེ་གཟིགས་ན་འདིར་གནོན།]

ཅིང་སྨོན་ལམ་འདེབས་པ་དེ་ནི། སྔ་མ་དེ་བས་ཆེས་ཁྱད་པར་དུ་འཕགས་པའི་བསོད་ནམས་དམ་པའི་མཆོག་ཏུ་འགྱུར་ཏེ། དད་པ་པོའི་དད་པས་སྨོན་ལམ་འདེབས་པ་པོ་འདི་ནི་དེ་འདྲར་འགྱུར་བའོ། །ཡང་ན་འདིར་དད་པ་བསྐྱེད་པ་ཁོ་ནའི་ཕན་ཡོན་ལ་སྦྱར་ཀྱང་ཆོག་སྟེ། གཞུང་གི་དངོས་བསྟན་དེ་ཙམ་ཡིན་པའི་ཕྱིར་རོ། །དེ་ལས་དེ་མཆོག་ཡིན་པའི་རྒྱུ་མཚན་ནི་ཕྱི་མ་འདི་ནི་ཟག་པ་མེད་པའི་དགེ་བ་ཡིན་པ་དང༌། འདི་ལས་ངེས་པར་སངས་རྒྱས་ཀྱི་ས་བོན་ཐེབས་ནས། ཕུགས་ཀྱི་འབྲས་བུ་མི་ཟད་པའི་ཕྱིར་རོ། །རྗེས་སུ་མོས་པའི་དོན་ནི། བྱང་ཆུབ་ཉིད་ཀྱི་གནས་ཚུལ་དང་མཐུན་པར། མོས་པ་བྱས་པའི་དོན་ཡིན་ཏེ། མོས་པ་གང་དག་མོས་ཡུལ་དངོས་པོའི་རྗེས་སུ་མི་འགྲོ་བ། ལྷ་ནག་པོ་དང་དྲག་པོ་དབང་ཕྱུག་ལ་སོགས་པ་ཉོན་མོངས་ཀུན་ཏུ་སྤྱོད་པ་ལ་ཉོན་མོངས་མེད་པར་འདོད་པ་སོགས་མོས་པ་དངོས་པོ་དང་རྗེས་སུ་མི་མཐུན་པ་དེ་རྣམས་དགག་པའི་དོན་ནོ། །ཐོས་ནས་ཞེས་པས། དོན་མ་གོ་བ་དང༌། མོས་པ་དང་དད་པ་ཞེས་བསྟན་པས་གཞན་གྱིས་བསྐུལ་བ་དང་འགྲན་པའི་ཕྱིར་དང༌། གཡོམ་རྒྱུགས་སུ་སྨོན་ལམ་འདེབས་པ་སོགས། འདི་དག་ལ་དངོས་སུ་ཕན་ཡོན་ཆེན་པོ་དེ་ལྟ་བུ་མི་འབྱུང་ངོ༌། །ཞེས་པའི་དོན་ཏེ། འོན་ཀྱང་བསམ་པ་དག་པ་དང་མ་དག་པ་གང་ཡིན་ཡང་རུང་སྟེ། ཆོས་འདི་དང་འབྲེལ་པ་ཐོབ་པའི་ཕྱིར་མ་འོངས་པ་ན་དོན་ཆེན་པོ་དང་འཕྲད་པའི་རྒྱུ་ནི་ངེས་པར་ཡིན་ནོ། །གཉིས་པ་རྒྱས་བཤད་ནི། གང་གིས་བཟང་སྤྱོད་སྨོན་ལམ་འདི་བཏབ་


TNT17_Page_0869
[མ་དཔེ་གཟིགས་ན་འདིར་གནོན།]

པ། །དེས་ནི་ངན་སོང་ཐམས་ཅད་སྤང་བར་འགྱུར། །དེས་ནི་གྲོགས་པོ་ངན་པ་སྤངས་པ་ཡིན། །སྣང་བ་མཐའ་ཡས་དེ་ཡང་དེས་མྱུར་མཐོང༌། །དེ་དག་རྙེད་པ་རབ་རྙེད་བདེ་བར་འཚོ། །མི་ཚེ་འདིར་ཡང་དེ་དག་ལེགས་པར་འོང༌། །ཀུན་ཏུ་བཟང་པོ་དེ་ཡང་ཅི་འདྲ་བར། །དེ་དག་རིང་པོར་མི་ཐོག་དེ་བཞིན་འགྱུར། །མཚམས་མེད་ལྔ་པོ་དག་གི་སྡིག་པ་རྣམས། །གང་གིས་མི་ཤེས་དབང་གིས་བྱས་པ་དག །དེ་ཡིས་བཟང་པོ་སྤྱོད་པ་འདི་བརྗོད་ན། །མྱུར་དུ་མ་ལུས་ཡོངས་སུ་བྱང་བར་འགྱུར། །ཡེ་ཤེས་དང་ནི་གཟུགས་དང་མཚན་རྣམས་དང༌། །རིགས་དང་ཁ་དོག་རྣམས་དང་ལྡན་པར་འགྱུར། །བདུད་དང་མུ་སྟེགས་མང་པོས་དེ་མི་ཐུབ། །འཇིག་རྟེན་གསུམ་པོ་ཀུན་ནའང་མཆོད་པར་འགྱུར། །བྱང་ཆུབ་ཤིང་དབང་དྲུང་དུ་དེ་མྱུར་འགྲོ། །སོང་ནས་སེམས་ཅན་ཕན་ཕྱིར་དེར་འདུག་སྟེ། །བྱང་ཆུབ་འཚང་རྒྱ་འཁོར་ལོ་རབ་ཏུ་བསྐོར། །བདུད་རྣམས་སྡེ་དང་བཅས་པ་ཐམས་ཅད་བཏུལ། །སྐྱེས་བུ་གང་གི་དད་པ་ཕུན་སུམ་ཚོགས་པ་དང་ལྡན་པས། ཕན་ཡོན་རྣམ་པ་བཅུ་གསུམ་པོ་འདི་དག་རིམ་གྱིས་ཐོབ་པར་འགྱུར་ཏེ། ཕན་ཡོན་དང་པོ་ནི། སྐྱེས་བུ་གང་ཞིག་གིས་སྨོན་ལམ་འདི་བརྩོན་པས་བཏབ་པར་བྱས་ན། ངན་སོང་དུ་སྐྱེ་འགྱུར་གྱི་སྡིག་པ་ཐམས་ཅད་བྱང་ནས། དེས་ནི་རེ་ཞིག་ལས་ཀྱི་དབང་གིས་ངན་སོང་དུ་འགྲོ་བ་ཐམས་ཅད་སྤངས་པར་འགྱུར་བའོ། །ཕན་ཡོན་གཉིས་པ་ནི། སྨོན་ལམ་འདི་འདེབས་པ་དེས་ནི། ཚེ་འདི་དང་ཕྱི་མ་ཐམས་ཅད་དུ་གྲོགས་པོ་ངན་པ་སྤངས་པ་


TNT17_Page_0870
[མ་དཔེ་གཟིགས་ན་འདིར་གནོན།]

ཡིན་ཏེ། གྲོགས་ངན་པ་དང་འཕྲད་པར་མི་འགྱུར་ཞིང༌། སྔར་འཕྲད་པའི་རྒྱུན་དང་འབྲལ་བ་ཡིན་ནོ། །དེ་ལ་གྲོགས་པོ་ངན་པ་ནི་སྡིག་པའི་གྲོགས་པོ་ཉོན་མོངས་པ་འཕེལ་བར་བྱེད་ཅིང༌། ལས་ངན་སྡིག་པ་ལ་སྦྱོར་བར་བྱེད་པ་དང༌། ཚུལ་ཁྲིམས་དང་ཐོས་བསམ་སྒོམ་གསུམ་འཕེལ་བ་ལ་བར་དུ་གཅོད་པའི་བྱེད་པ་སྟེ། ཚེ་འདིའི་འདོད་ཡོན་དང༌། དགྲ་གཉེན་ལ་སོགས་པ་འཇིག་རྟེན་པའི་བྱ་བ་ལ་སྦྱོར་བའམ། ཐར་པའི་ལམ་དུ་རློམ་ཡང་རུང་སྟེ། ལྟ་བ་དང་སྤྱོད་པ་ལོག་པ་ལ་སྦྱོར་བ་དེ་དག་ནི་བླ་མའམ་རྗེ་དཔོན་ནམ། གྲོགས་ཐད་ཀར་མཉམ་པའམ། གཡོག་གམ་སློབ་མར་གྱུར་པ་ཡིན་ཡང་རུང་སྟེ། མི་དགེ་བའི་བཤེས་གཉེན་ནམ་སྡིག་པའི་གྲོགས་པོ་དང༌། བདུད་ཀྱི་དཔུང་གཉེན་ཞེས་བྱ་སྟེ། མེ་འབར་བའམ། སྤྲུལ་གདུག་རེག་པ་དུག་ཅན་ལྟར་རིང་དུ་སྤོང་དགོས་རྒྱུའོ། །དེ་འདྲ་བའི་སྡིག་གྲོགས་རང་མིན་ཡང༌། ཐེག་ཆེན་དུ་ཞུགས་པ་དག་ཐེག་དམན་དུ་སྦྱོར་བ་དང༌། ཟབ་པ་དང་རྒྱ་ཆེ་ལ་མོས་པ་དྲང་དོན་གྱི་ཆོས་ལ་སྦྱོར་བ་སོགས་ཀྱང་གྲོགས་ངན་ནོ། །ཕན་ཡོན་གསུམ་པ་ནི། སྣང་བ་མཐའ་ཡས་དེ་ཡང་དེས་མྱུར་མཐོང༌། །བཅོམ་ལྡན་འདས་དེ་བཞིན་གཤེགས་པ་སྣང་བ་མཐའ་ཡས་ཏེ་འོད་དཔག་ཏུ་མེད་པ་ཞིང་ཁམས་བདེ་བ་ཅན་དང་བཅས་པ་ཡང༌། གསོན་པའི་ཚེ་ལའང་མྱུར་དུ་མཐོང་བ་དང༌། སངས་རྒྱས་དེ་ལས་ཆོས་ཐོས་པ་དང༌། ཤི་ནས་ཀྱང་ཞིང་ཁམས་དེར་སྐྱེ་བའོ། །ཕན་ཡོན་བཞི་པ་ནི། སྨོན་ལམ་འདི་ལ་བརྩོན་པ་དེ་དག་དོན་


TNT17_Page_0871
[མ་དཔེ་གཟིགས་ན་འདིར་གནོན།]

ཆེན་པོ་འགྲུབ་པའི་ཕྱིར་རྙེད་པ་རབ་ཏུ་རྙེད་པའམ། འབད་རྩོལ་མེད་པར་ཆོས་དང་ལྡན་པའི་ཟས་གོས་བསོད་སྙོམས་ལ་སོགས་པ་རབ་ཏུ་རྙེད་པ་སྟེ་འཕོངས་པ་མེད་པའོ། །ཕན་ཡོན་ལྔ་པ་ནི། བདེ་བར་འཚོ་བ་སྟེ་བདེ་བའི་དོན་ནི་ལེགས་པ་ཡིན་ལ། དེས་ན་ཚེ་གང་དུ་ལེགས་པར་སྤྱོད་པ། དགེ་བ་དང་མ་བྲལ་བས་འཚོ་བའམ། དགྲ་དང་གདོན་དང་ནད་ལ་སོགས་པའི་ཉེར་འཚེ་མེད་པས་བདེ་བར་འཚོ་བའོ། །ཕན་ཡོན་དྲུག་པ་ནི། མི་ཚེ་འདིར་ཡང་སྨོན་ལམ་འདེབས་པ་དེ་དགམིར་སྐྱེས་པ་དོན་ཡོད་པར་འགྱུར་བས་ལེགས་པར་འོངས་བ་སྟེ། མི་ཚེ་དོན་ལྡན་དུ་བྱུང་ཞེས་པའི་དོན་ནོ། །དེ་ཡང་འདིར་དགེ་བ་འཕེལ་བར་གྱུར་པས། སྐྱེ་བ་ཤིན་ཏུ་མང་པོར་བདེ་བའི་རྒྱུ་གྲུབ་ཟིན་པའི་དོན་ནོ། །ཡང་ན་སྨོན་ལམ་འདི་འདེབས་པ་དེ་དག་མི་ཚེ་འདིར་ཡང་ཚེ་རིང་བ་དང༌། ལོངས་སྤྱོད་ཆེ་བ་དང༌། འཁོར་དང་ཉེ་དུ་སོགས་རྩ་འཇིངས་རྒྱས་པ་དང༌། ལོ་ལེགས་པ་དང༌། གཞན་རྣམས་བྱམས་པ་དང༌། སྙན་པར་གྲགས་པ་སོགས་ལེགས་ཚོགས་ཐམས་ཅད་དང་ལྡན་པར་འོངས་ཏེ། འོངས་ཞེས་པ་འབྱུང་འགྱུར་ལ་བྱུང་བའི་སྒྲས་བསྟན་པའོ། །ཕན་ཡོན་བདུན་པ་ནི། ཀུན་ཏུ་བཟང་པོའི་སྤྱོད་པ་ཐོབ་པ་སྟེ། ཕན་ཡོན་དྲུག་པོ་དེ་ཙམ་དུ་མ་ཟད་འཕགས་པ་ཀུན་ཏུ་བཟང་པོ་ཡོན་ཏན་དང་རྣམ་པར་འཕྲུལ་པ་མཐའ་ཡས་པ། མཆོད་པ་དང་སྨོན་ལམ་རྒྱ་མཚོ་ལ་དབང་འབྱོར་པ་དེ་ཅི་འདྲ་བ་དེ་འདྲ་བར་ཡང༌། དུས་རིང་པོར་མི་ཐོགས་པར་སྨོན་ལམ་འདེབས་པ་དེ་དག་ཀུན་


TNT17_Page_0872
[མ་དཔེ་གཟིགས་ན་འདིར་གནོན།]

བཟང་ཉིད་ཀྱིས་ཇི་ལྟར་ཡོན་ཏན་བརྙེས་པའི་གོ་རིམ་དང་མཐུན་པ་དེ་བཞིན་དུ་འགྱུར་རོ། །དེ་ལ་ཀུན་ཏུ་བཟང་པོའི་རྣམ་པར་ཐར་པ་ཅུང་ཟད་གྲུབ་པ་ནི། ས་དང་པོ་རབ་ཏུ་དགའ་བ་ནས་ཡིན་ལ། ཕལ་ཆེར་གྲུབ་པ་ནི་ས་བརྒྱད་པ་ནས་དང༌། ལེགས་པར་གྲུབ་པ་ནི་ས་བཅུ་པའོ། །ཕན་ཡོན་བརྒྱད་པ་ནི། ལས་སྒྲིབ་བྱང་བ་སྟེ། མཚམས་མེད་པ་ལྔ་པོ་དག་གི་ལས་ཀྱི་སྒྲིབ་པ་རྣམས་ལས། གང་ཡང་རུང་བ་ཞིག་སྐྱེས་བུ་གང་གི་སྡིག་པའི་ཉེས་དམིགས་མི་ཤེས་པའི་དབང་གིས་སྔ་རོལ་ཏུ་བྱས་པ་དག ཕྱིས་དེ་ཡིས་དད་པ་བསྐྱེད་ནས་བཟང་པོ་སྤྱོད་པ་འདི་སྙིང་ཐག་པ་ནས་བརྗོད་ན། དེ་ཡི་མཚམས་མེད་ཀྱི་སྡིག་པ་དེ་དག་མ་ལུས་པ་མྱུར་དུ་ཡོངས་སུ་བྱང་བར་འགྱུར་བའོ། །མི་དགེ་བའི་ལས་ཐམས་ཅད་དུག་གསུམ་གང་རུང་གིས་འཕེན་ཞིང་སྦྱོར་བ་ཡིན་ལ། འདོད་ཆགས་དང་ཞེ་སྡང་གིས་འཕེན་ཞིང་སྦྱོར་བ་རྣམས་ལའང༌། གཏི་མུག་གིས་འཕེན་པ་སྔོན་དུ་འགྲོ་དགོས་པས་སྡིག་པ་ཐམས་ཅད་མི་ཤེས་པའི་དབང་གིས་བྱས་པའོ། །བྱང་ཆུབ་ཏུ་སེམས་བསྐྱེད་ཅིང་དད་པས་སྨོན་ལམ་འདི་ཡང་ཡང་བཏབ་པས། མཚམས་མེད་བྱས་པའང་ཚེ་འདི་ལ་བྱང་བར་ནུས་ན། སྡིག་པ་ཕྲ་མོ་རྣམས་ལྟ་སྨོས་ཀྱང་ཅིག་དགོས་སོ། །ཕན་ཡོན་དགུ་པ་ནི། ཡེ་ཤེས་ཕུན་སུམ་ཚོགས་པ་ཐོབ་པ་སྟེ། གོང་དུ་བསྟན་པ་ལྟར་ཁྱད་པར་བཞི་ལྡན་གྱི་བསྔོ་བ་འདིས་ཡོངས་སུ་བསྔོ་བ་ནི། འཕགས་པའི་ཡེ་ཤེས་རྣམ་པར་མི་རྟོག་པ་ཐོབ་པའི་རྒྱུ་དྲུག་པོ་ཡིན་ལ། དང་ནི་ཞེས་པ་གཟུགས་སོགས་དང་སོ་སོར་འབྱེད་པའི་ཚིག་


TNT17_Page_0873
[མ་དཔེ་གཟིགས་ན་འདིར་གནོན།]

གོ །ཕན་ཡོན་བཅུ་པ་ནི། ལུས་ཕུན་སུམ་ཚོགས་པ་སྟེ། ཡིད་ཀྱི་རང་བཞིན་གྱི་ལུས་ཀྱི་གཟུགས་དང༌། དེའི་ཡོན་ཏན་མཚན་བཟང་སུམ་ཅུ་རྩ་གཉིས་དང༌། དཔེ་བྱད་བརྒྱད་ཅུ་སྟེ་མཚན་གྱི་ཡོན་ཏན་བརྒྱ་དང་བཅུ་གཉིས་ལ་སོགས་པ་རྣམས་དང༌། འགྲོ་བ་དྲུག་ཏུ་སྐྱེས་པའི་ཚེ་ཡང༌། བྲམ་ཟེ་ཆེན་པོ་དང༌། རྒྱལ་རིགས་མཆོག་ལ་སོགས་པ། རིགས་ཕུན་སུམ་ཚོགས་པ། ཁ་དོག་གི་ཡོན་ཏན་རྣམས་དང་ལྡན་པའི་གཟུགས་མཛེས་པར་འགྱུར་བའོ། །ཡང་ན་ཁ་དོག་ནི། རྒྱ་སྐད་དུ་ཝརྞ་ཏེ་རུས་ལ་འཇུག་པས། གཽ་ཏ་མ་དང༌། འོད་སྲུང་ལ་སོགས་པ་བྲམ་ཟེ་དང༌། ཟླ་བའི་རིགས་དང༌། ཉི་མའི་རིགས་ལ་སོགས་པ་རྒྱལ་རིགས་ཀྱི་རུས་ཏེ། རུས་ཆེ་ཞིང་ཁུངས་བཙུན་པ་རྣམས་སོ། །ཕན་ཡོན་བཅུ་གཅིག་པ་ནི་ཐུབ་པར་དཀའ་བ་སྟེ། བདུད་དང་བདུད་ཀྱི་རིགས་ཀྱི་ལྷ་དང་འབྱུང་པོ་རྣམས་ཀྱིས་གླགས་ལྟ་བར་མི་ནུས་ཤིང༌། གང་སངས་རྒྱས་ཀྱི་བསྟན་པ་འདི་ལས་ཕྱི་རོལ་ཏུ་གྱུར་པ། ལྟ་བ་ངན་པའི་འཐིབས་པོ་ཅན་དེ་དག་ནི་མུ་སྟེགས་བྱེད་དེ། དེ་དག་གི་ཤེས་རབ་དང་སྟོབས་ཀྱིས་འདི་ཐུབ་པར་མི་འགྱུར་ལ། གཞན་དུ་ན་བདུད་དང་མུ་སྟེགས་དེ་དག་རྣམས་ཕར་ཟིལ་གྱིས་གནོན་པར་འགྱུར་རོ། །གཞུང་ཕལ་ཆེར་དུ། །བདུད་དང་མུ་སྟེགས་མང་པོས་དེ་མི་ཐུབ། །ཅེས་འབྱུང་བ་དང༌། འགྲེལ་པ་རྔོག་ལོ་ཆེན་པོས་བསྒྱུར་བ་ལྟར་ན། བདུད་དང་མུ་སྟེགས་ཚོགས་ཀྱིས་དེ་མི་ཐུབ། །ཅེས་འགྱུར་བ་དོན་ལ་འདྲ་བས་ཇི་ལྟར་བདེ་བར་


TNT17_Page_0874
[མ་དཔེ་གཟིགས་ན་འདིར་གནོན།]

སྦྱར་རོ། །ཕན་ཡོན་བཅུ་གཉིས་པ་ནི། མཆོད་འོས་སུ་འགྱུར་བའི་ཡོན་ཏན་ཏེ། ས་འོག་དང་ས་སྟེང་དང་ནམ་མཁའ་ལ་སྤྱོད་པའམ་འཇིག་རྟེན་གསུམ་པོ་ཀུན་ན་ཡང་ལྷ་དང་མི་དང་འབྱུང་པོ་རྣམས་ཀྱིས་སྨོན་ལམ་འདི་འདེབས་པ་པོ་དེ་ལ་དངོས་དང་བརྒྱུད་པའི་སྒོ་ནས་མཆོད་པ་བྱེད་ཅིང༌། གུས་པ་དང་ཕན་འདོགས་པར་འགྱུར་རོ། །ཕན་ཡོན་བཅུ་གསུམ་པ་ནི། མཐར་ཐུག་གི་ཕན་ཡོན་ནོ། །སྨོན་ལམ་འདི་འདེབས་པར་བྱེད་ཅིང་བཏབ་པ་མཐར་ཕྱིན་པའི་ཕན་ཡོན་ནི། ཚོགས་གཉིས་ཡོངས་སུ་རྫོགས་ནས་བླ་ན་མེད་པའི་བྱང་ཆུབ་ཐོབ་པར་འགྱུར་བ་སྟེ། དེ་ནི་བྱང་ཆུབ་ཀྱི་ཤིང་གི་དབང་པོའི་དྲུང་དུ་མྱུར་དུ་འགྲོ་ཞིང༌། སོང་ནས་སེམས་ཅན་ཐམས་ཅད་ལ་ཕན་པའི་ཕྱིར་ཤིང་དྲུང་དེར་འདུག་སྟེ། བདུད་ཀྱི་རྒྱལ་པོ་རྣམས་རང་རང་གི་འཁོར་གྱི་སྡེ་དང་བཅས་པ་ཐམས་ཅད་བཏུལ་ནས། བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། ཆོས་ཀྱི་འཁོར་ལོ་རབ་ཏུ་བསྐོར་བར་འགྱུར་རོ། །དེ་ལྟར་ན་བྱང་ཆུབ་ཀྱི་སྙིང་པོར་གཤེགས་པ་དང༌། བདུད་འདུལ་བ་དང༌། སངས་རྒྱས་པ་དང༌། ཆོས་འཁོར་བསྐོར་བ་སྟེ། མཛད་པ་བཞི་པོ་དངོས་སུ་བསྟན་པས། མཛད་པ་མཐའ་ཡས་པ་ཐམས་ཅད་ཀྱང་ཤུགས་ལ་གོ་བའི་ཕྱིར་རོ། །འདིར་འགྲོ་བ་རྣམས་ཀྱི་གོ་རིམ་འདི་ལྟར་དུ་མཛད་པ། མཛད་པ་བཅུ་གཉིས་ཀྱི་རིམ་པ་དང་མཐུན་ཞིང༌། གཞུང་གི་དཀྱུས་ལྟར་ན་བདུད་བཏུལ་བའི་མཛད་པ་ནི། བྱང་ཆུབ་སྙིང་པོར་བདུད་བཏུལ་བ་གཅིག་པུར་མ་ཟད། སྔ་ཕྱི་ཐམས་ཅད་དུ་བདུད་ཀྱི་


TNT17_Page_0875
[མ་དཔེ་གཟིགས་ན་འདིར་གནོན།]

ལས་ཡང་དང་ཡང་དུ་འཇོམས་པར་མཛད་པ་ཉིད་ཡིན་ཏེ། མདོ་སྡེ་ཉི་མའི་སྙིང་པོ་དང༌། འདུས་པ་རིན་པོ་ཆེ་ཏོག་ལ་སོགས་པ་ལས་འབྱུང་བ་ལྟ་བུ་སྟེ། སྔ་ཕྱི་ཐམས་ཅད་དུ་སྦྱོར་དགོས་པའི་ཕྱིར། མཇུག་ཏུ་སྨོས་པ་ཡིན་པས། སངས་རྒྱས་གཉིས་པ་ལྟ་བུའི་ལོ་ཙཱ་བ་ཡེ་ཤེས་སྡེས་ཀྱང་དེ་བཞིན་དུ་བཤད་དོ། །བྱང་ཆུབ་ཀྱི་སྙིང་པོར་གཤེགས་པ་ལ་སོགས་པ་འདི་རྣམས། གཙོ་བོར་གཟུགས་ཀྱི་སྐུ་མཆོག་གི་སྤྲུལ་སྐུའི་མཛད་པ་ཡིན་མོད་ཀྱི། དེས་དེ་ལྟར་སྟོན་པ་ལ་རྒྱུ་ནི་འོག་མིན་གྱི་གནས་སུ་ལོངས་སྤྱོད་རྫོགས་པའི་སྐུའི་རྣམ་འཕྲུལ་ལ་ཡང་དེ་བཞིན་དུ་འཆར་བ་ཡིན་ནོ། །ལོངས་སྐུ་རྟག་ཏུ་བཞུགས་པ་དང༌། འོག་མིན་གྱི་གནས་སུ་བདུད་ཀྱི་འཇུག་པ་མེད་པས། ཡབ་ཡུམ་གྱི་སྐྱེ་བ་སྟོན་པ་དང་བདུད་འདུལ་བ་སོགས་ལོངས་སྐུའི་མཛད་པ་ལ་མི་འགྲིག་གོ་སྙམ་པ་ནི་ཤིན་ཏུ་བློ་ཆུང་དུ་གནས་འདི་དག་ལ་མུན་པར་གྱུར་པའི་གཏམ་ཡིན་ཏེ། ལོངས་སྐུ་དེའི་བ་སྤུའི་ཁུང་བུ་གཅིག་ལ་ཡང༌། ཕྱོགས་བཅུ་དུས་གསུམ་གྱི་སངས་རྒྱས་ཀྱི་མཛད་པ་མཐའ་དག་སྟོན་པ་ཡིན་པའི་ཕྱིར། དེ་ཙམ་གྱིས་ལོངས་སྐུ་མྱ་ངན་ལས་འདས་པར་མི་འགྱུར་ཞིང༌། དེ་ན་བདུད་ཡོད་པར་ཐལ་བ་ཡང་མ་ཡིན་ནོ། །དེ་ལྟར་ན་ཕན་ཡོན་དང་པོ་གཉིས་དང༌། བརྒྱད་པ་ལས་སྒྲིབ་བྱང་བ་སྟེ། གསུམ་པོ་དེ་ནི་མི་མཐུན་ཕྱོགས་སྤངས་པ་དང༌། བཞི་པ་རྙེད་པ་དང༌། ལྔ་པ་འཚོ་བ་དང༌། དྲུག་པ་ལེགས་པར་ཐོབ་པ་སྟེ་གསུམ་པོ་དེ་ནི། མཐུན་རྐྱེན་འབྱོར་བའི་ཕན་ཡོན་ཏེ། དེ་ལྟར་དྲུག་ནི། ལས་


TNT17_Page_0876
[མ་དཔེ་གཟིགས་ན་འདིར་གནོན།]

དང་པོ་པ་ཉིད་ནས་འཕྲལ་དུ་འབྱུང་བ་རྣམས་སོ། །གཟུགས་ཕུན་སུམ་ཚོགས་པ་དང༌། མཆོད་འོས་སུ་གྱུར་པ་ནི། གཙོ་བོར་སྨོན་ལམ་ལ་བརྩོན་པ་ནས་བཟུང་བའི་སྐྱེ་བ་གཉིས་པ་ཕན་ཆད་དུའོ། །ཐུབ་པར་དཀའ་བ་ཡང༌། འདི་དང་ཕྱི་མ་གཉིས་ཀར་ན་སྟེ། དེའི་ཕྱོགས་གཅིག་ཕར་ཟིལ་གྱིས་མནན་པ་ནི། ཕྱི་མ་ཕན་ཆད་དོ། །བདུན་པ་ཀུན་བཟང་གི་སྤྱོད་པ་ལ་འཇུག་པ་དང༌། བཅུ་པ་གཟུགས་ཕུན་སུམ་ཚོགས་པའི་ཕྱོགས་གཅིག་ཡིད་ཀྱི་ལུས་ནི། ས་ཐོབ་པའི་དུས་ཀྱི་ཕན་ཡོན་ནོ། །བཅུ་གསུམ་པ་ནི་སངས་རྒྱས་ཐོབ་པའི་དུས་ཀྱི་སྟེ། ཕན་ཡོན་བཅུ་གསུམ་པོ་ཡང་མཐོང་བའི་ཆོས་ལ་འབྱུང་བའི་ཕན་ཡོན་དང༌། ཚེ་ཕྱི་མ་སོ་སོ་སྐྱེ་བོའི་གནས་སྐབས་ཀྱི་དང༌། འཕགས་པའི་ས་ཐོབ་པའི་དང༌། མཐར་ཐུག་གི་གནས་སྐབས་ཀྱི་ཕན་ཡོན་ཏེ་སྡེ་ཚན་བཞིར་འདུས་པ་ཡིན་ནོ། །གསུམ་པ་དོན་བསྡུ་ནི། གང་ཡང་བཟང་པོ་སྤྱོད་པའི་སྨོན་ལམ་འདི། །འཆང་པ་དང་ནི་སྟོན་ཏམ་ཀློག་པ་ཡི། །དེ་ཡི་རྣམ་པར་སྨིན་པ་སངས་རྒྱས་མཁྱེན། །བྱང་ཆུབ་མཆོག་ལ་སོམ་ཉི་མ་བྱེད་ཅིག །སྐྱེས་བུ་གང་ཡང་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་འདིའི། དོན་དང་ཚིག་དང་གླེགས་བམ་གུས་པས་འཆང་བ་དང་ཁ་ཏོན་དུ་འདོན་པ་དང༌། གླེགས་བམ་ཀློག་པར་བྱེད་ན་ཡང་རུང་སྟེ། དེ་ཡི་རྣམ་པར་སྨིན་པ་སྟེ་འབྲས་བུ་ནི། མཐའ་ཡས་ཤིང་བསམ་གྱིས་མི་ཁྱབ་སྟེ། ཇི་ལྟ་བ་བཞིན་དུ་ནི་སངས་རྒྱས་ཁོ་ནས་མཁྱེན་གྱི། ཉན་ཐོས་དང་རང་རྒྱལ་གྱི་ཡང་སྤྱོད་ཡུལ་


TNT17_Page_0877
[མ་དཔེ་གཟིགས་ན་འདིར་གནོན།]

མ་ཡིན་ན། སོ་སོ་སྐྱེ་བོ་རྣམས་ཀྱི་ལྟ་སྨོས་ཀྱང་ཅི་དགོས། དེའི་འབྲས་བུ་མཐར་ཐུག་པ། བྱང་ཆུབ་ཀྱི་མཆོག་བླ་ན་མེད་པར་ཐོབ་པར་འགྱུར་བ་ལ། སོམ་ཉི་མ་བྱེད་ཅིག་སྟེ་ཐེ་ཚོམ་མེད་པའོ། །འདིར་ཤཱཀྱ་བཤེས་གཉེན་གྱི་འགྲེལ་པ་ལས་ནི་རྒྱུ་མཐུན་པའི་འབྲས་བུ་མངོན་པར་མཐོ་བའི་ཕུན་སུམ་ཚོགས་པ་མཐའ་དག་ནི། ཉན་རང་སོགས་ཀྱིས་བསམ་གྱིས་མི་ཁྱབ་པ་དང༌། བསོད་ནམས་ཀྱི་རྒྱུ་མཐུན་པའི་འབྲས་བུ་བྱང་ཆུབ་མཆོག་ཅེས་འཆད་དོ། །རྩ་བའི་བཞི་པ་ཕན་ཡོན་ཅན་གྱི་སྨོན་ལམ་ཉིད་བསྔོ་བ་ལ། སྲས་བྱང་སེམས་ཀྱིས་བསྔོས་པ་ལ་འཇུག་པ། རྒྱལ་བས་བསྔོས་པ་ལ་འཇུག་པ། སྨོན་ལམ་གྱི་འབྲས་བུ་མངོན་གྱུར་དུ་བསྔོ་བ། དངོས་སུ་ལུང་བསྟན་ཐོབ་པར་བསྔོ་བ། སེམས་ཅན་ལ་ཕན་པ་སྒྲུབ་པར་བསྔོ་བ་སྟེ་ལྔ་ལས། དང་པོ་ནི། འཇམ་དཔལ་ཇི་ལྟར་མཁྱེན་ཅིང་དཔའ་བ་ལྟར། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང༌། །དགེ་བ་འདི་དག་ཐམས་ཅད་རབ་ཏུ་བསྔོ། །འདི་ལ་དཔེ་ཕལ་ཆེར་ནས། འཇམ་དཔལ་ཇི་ལྟར་མཁྱེན་ཅིང་དཔའ་བ་ལྟར་ཞེས་འབྱུང་བ་ལྟར་ན། ཇི་ལྟར་འཇམ་དཔལ་ཤེས་བྱ་ཐམས་ཅད་མཁྱེན་ཅིང་འགྲོ་བའི་དོན་ལ་དཔའ་བ་ལྟར། དེ་ལྟར་ཀུན་ཏུ་བཟང་པོ་ཡང་ངོ་ཞེས་པར་འགྱུར་ལ། འགྱུར་འདི་ལྟར་ལ་དཔའ་བ་དང་ཟེར་པ་ཡིག་ནོར་ཙམ་མོ། །རྒྱ་འགྲེལ་རྣམས་དང་མཁན་པོ་ཡེ་ཤེས་སྡེའི་འགྲེལ་པ་ལས། འཇམ་དཔལ་དབའ་བོས་ཇི་ལྟར་མཁྱེན་པ་དང༌།


TNT17_Page_0878
[མ་དཔེ་གཟིགས་ན་འདིར་གནོན།]

ཞེས་འདོན་པ་ལྟར་ན། འཕགས་པ་འཇམ་དཔལ་བདུད་ཀྱི་སྡེ་འཇོམས་པ་དང༌། འགྲོ་བའི་དོན་སྤྱོད་པ་དང༌། ཤེས་རབ་མཆོག་གིས་དངོས་པོར་འཛིན་པ་འཇོམས་པ་ལ། དཔའ་བོར་གྱུར་པ་དེས། ཇི་ལྟར་བསྔོ་བ་ཐུགས་སུ་ཆུད་ཅིང་མཁྱེན་པ་དང༌། འཕགས་པ་ཀུན་ཏུ་བཟང་པོ་དེ་ཡང་དེ་བཞིན་དུ་དཔའ་བོ་ཆེན་པོ་ཡིན་ལ། བསམ་གྱིས་མི་ཁྱབ་པའི་བསྔོ་བ་ཐུགས་སུ་ཆུད་པ་ཡང་དེ་བཞིན་ཏེ། བྱང་ཆུབ་སེམས་དཔའི་མཆོག་དེ་དག་ཀུན་གྱི་རྗེས་སུ་སྟེ། དེ་དང་འདྲ་བར་བདག་ཀྱང་སློབ་པར་འདོད་ཅིང་འདུན་པའི་བསམ་པས། བཟང་པོ་སྤྱོད་པའི་སྨོན་ལམ་བཏབ་པའི་དགེ་བ་ཇི་སྙེད་མཆིས་པ་འདི་དག་ཐམས་ཅད་རབ་ཏུ་བསྔོ་བར་བགྱིའོ། །གཉིས་པ་ནི། དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང༌། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །དུས་གསུམ་དུ་སེམས་ཅན་གྱི་དོན་ལ་བྱོན་ཅིང་གཤེགས་པའི་རྒྱལ་བ་ཐམས་ཅད་ཀྱིས་མཆོག་ཏུ་བསྔགས་ཤིང་བསྟོད་པའི་བསྔོ་བའི་རྒྱལ་པོ་བཟང་ཞིང་རྒྱ་ཆེ་བའི་བསྔོ་བ་མཐའ་ཡས་པ་གང་དང་གང་ལ། མཆོག་ཏུ་བསྔགས་པར་མཛད་པའི་བསྔོ་བ་དེ་རྣམས་ཀྱིས། བདག་གིས་སྨོན་ལམ་འདི་བཏབ་པ་ལ་སོགས་པའི་དགེ་བའི་རྩ་བ་འདི་ཀུན་ཀྱང༌། ཀུན་ཏུ་བཟང་པོའི་སྤྱོད་པ་ཐོབ་པའི་ཕྱིར་རབ་ཏུ་བསྔོ་བར་བགྱིའོ་སྟེ། དེའི་དོན་ནི་བདག་གི་དགེ་བའི་རྩ་བ་འདི། སངས་རྒྱས་རྣམས་ཀྱི་སྨོན་ལམ་དང་གཅིག་ཏུ་འདྲེས་ཏེ། དགེ་རྩ་འདིས་སྨོན་ལམ་དེ་རྣམས་འགྲུབ་པར་


TNT17_Page_0879
[མ་དཔེ་གཟིགས་ན་འདིར་གནོན།]

གྱུར་ཅིག །དེ་རྣམས་ཀྱིས་ཀྱང་འདི་འགྲུབ་པར་གྱུར་ཅིག་ཅེས་དང༌། སྨོན་ལམ་དེ་རྣམས་ཀྱི་གྲུབ་འབྲས་ཀྱང་ཀུན་ཏུ་བཟང་པོའི་སྤྱོད་པའོ། །འཇམ་དཔལ་དཔའ་བོས་ཞེས་སོགས་ཚིགས་བཅད་འདི་གཉིས་ནི། བསྔོ་བ་མ་ལུས་པ་ཐམས་ཅད་འདུས་པའི་ཕྱིར། བླ་ན་མེད་པའི་བསྔོ་བའོ། །གསུམ་པ་ནི། བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །དེར་སོང་ནས་ནི་སྨོན་ལམ་འདི་དག་ཀྱང༌། །ཐམས་ཅད་མ་ལུས་མངོན་དུ་འགྱུར་བར་ཤོག །དེ་ལྟར་མ་ལུས་བདག་གིས་ཡོངས་སུ་བསྐང༌། །འཇིག་རྟེན་ཇི་སྲིད་སེམས་ཅན་ཕན་པར་བགྱི། །བདག་ནི་ནམ་ཞིག་འཆི་བའི་དུས་བྱེད་པར་གྱུར་པ་ན། ལས་དང་ཉོན་མོངས་པའི་སྒྲིབ་པ་ཐམས་ཅད་དག་ནི་ཕྱིར་བསལ་ཞིང་མེད་པར་བྱས་པ་སྟེ། སྒྲིབ་པ་སྤྱི་དང་ཁྱད་པར་དུ་འགྱོད་པ་ལ་སོགས་པའི་སྒྲིབ་པ་ལྔ་པོ་དང༌། སངས་རྒྱས་མངོན་སུམ་དུ་མཐོང་བ་ལ་བར་དུ་གཅོད་པའི་སྒྲིབ་པ་རྣམས་བྱང་བའོ། །དེ་ནས་སངས་རྒྱས་སྣང་བ་མཐའ་ཡས་དེ་མངོན་དུ་མཐོང་བར་འགྱུར་ལ། དེ་མཐོང་བས་ཀྱང་སླར་ཡང་སྒྲིབ་པ་མང་པོ་ཞིག་ནི་དག །ཏིང་ངེ་འཛིན་གྱི་སྒོ་དུ་མ་ཐོབ་ནས། གནར་གཅོད་ལ་སོགས་པའི་སྡུག་བསྔལ་མེད་ཅིང༌། འཆི་བའི་སེམས་དེ་ཡང་རབ་ཏུ་རྣམ་པར་དཀར་བའི་ཏིང་ངེ་འཛིན་དུ་མ་དང་བཅས་པར་འགྱུར་ཞིང༌། དེ་སོང་མ་ཐག་ཏུ་གཞན་འཕྲུལ་དབང་བྱེད་ཀྱི་ལྷའི་རྒྱལ་


TNT17_Page_0880
[མ་དཔེ་གཟིགས་ན་འདིར་གནོན།]

པོའི་ལུས་དང་མཚུངས་པའི་བར་དོའི་ལུས་གྲུབ་ནས། སྐད་ཅིག་ཐང་ཅིག་ཡུད་ཙམ་དེ་ལ་བདེ་བ་ཅན་གྱི་ཞིང་ཁམས་དེར་རབ་ཏུ་འགྲོ་ཞིང༌། དེར་སོང་ནས་ནི་རིན་པོ་ཆེའི་པདྨའི་ཟེའུ་འབྲུའི་ཁང་པར་བརྫུས་ཏེ་སྐྱེ་བ་བླང་ནས། བཟང་པོ་སྤྱོད་པའི་སྨོན་ལམ་བཏབ་པ་འདི་རྣམས་ཀྱི་འབྲས་བུ་དེ་དག་ཀྱང་ཐམས་ཅད་མ་ལུས་པ་མངོན་དུ་འགྱུར་ཞིང་འགྲུབ་པར་ཤོག་ལ། དེ་ལྟར་བདག་གི་སྨོན་ལམ་གྱི་འབྲས་བུ་དེ་དག་མ་ལུས་པ་རང་རྒྱུད་ལ་དགོས་པ་རྣམས་ཀྱང་ཡོངས་སུ་བསྐང་ཞིང་རྫོགས་ལ། སེམས་ཅན་གཞན་རྣམས་ཀྱི་དོན་དུ་དགོས་པ་ཀུན་ཀྱང༌། ཡོངས་སུ་རྫོགས་ཤིང་རེ་བ་བསྐོང་བར་བྱས་ནས། འཇིག་རྟེན་ཇི་སྲིད་མ་སྟོངས་པ་དེ་སྲིད་དུ། སེམས་ཅན་རྣམས་ལ་ཕན་པ་མཐའ་ཡས་པ་རྟག་ཏུ་བགྱིད་པར་གྱུར་ཅིག བཞི་པ་ནི། རྒྱལ་བའི་དཀྱིལ་འཁོར་བཟང་ཞིང་དགའ་བ་རེད། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །རྒྱལ་བ་འོད་དཔག་ཏུ་མེད་པའི་ཞིང་ཁམས་ཕུན་སུམ་ཚོགས་པ་དེར་སྤྱོད་པའི་འཁོར་གྱི་དཀྱིལ་འཁོར་བདེ་ཞིང་སྐྱིད་པས་བཟང་ཞིང་དགའ་བའམ། ཡང་ན་གཟུགས་བཟང་ཞིང་ཡིད་ཡོན་ཏན་གྱིས་དགའ་བར་གྱུར་པ་ཞེས་འཆད་པ་ལྟར་རམ། ཡོན་ཏན་ཐམས་ཅད་ཀྱིས་རྣམ་པར་བརྒྱན་ཅིང༌། གནས་ངན་ལེན་གྱི་སྤྱོད་པ་སྤངས་པས་བཟང་བ། ནང་དུ་ཏིང་ངེ་འཛིན་གྱི་དགའ་བ་དང༌། ཕྱི་རོལ་ཏུ་སྨོན་ལམ་གྱི་སྟོབས་ལས་གྲུབ་པའི་གནས་དང་ཡོ་བྱད་དང་འདོད་པའི་ཡོན་ཏན་ཐམས་


TNT17_Page_0881
[མ་དཔེ་གཟིགས་ན་འདིར་གནོན།]

ཅད་ཀྱིས་དགའ་བར་གྱུར་པ་རྣམས་ཀྱི་དབུས་དེར། པདྨོ་དམ་པ་རིན་པོ་ཆེའི་པདྨོ་ཤིན་ཏུ་མཛེས་པ་ལས། བརྫུས་ཏེ་སྐྱེས་ནས་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་རྒྱལ་བ་སྣང་བ་མཐའ་ཡས་ཀྱིས་མངོན་སུམ་དུ་ཁྱོད་འཇིག་རྟེན་ཁམས་འདི་ཞེས་བྱ་བར་བསྐལ་པ་འདི་ཞེས་བྱ་བ་ལ། སངས་རྒྱས་འདི་ལྟ་བུར་འགྱུར་རོ་ཞེས་ལུང་སྟོན་པ་ཡང་བདག་གིས་དུས་དེ་སྐབས་སུ་དང་གནས་དང་གྲོགས་ཀྱི་ཁྱད་པར་འཁོར་གྱི་དཀྱིལ་འཁོར་དེར་ཐོབ་པར་ཤོག་ཅིག་པའོ། །ལྔ་པ་ནི། དེར་ནི་བདག་གིས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང༌། །སེམས་ཅན་རྣམས་ལ་ཕན་པ་མང་པོ་བགྱིད། །བདེ་བ་ཅན་གྱི་ཞིང་དེར་ནི་སྨོན་ལམ་འདེབས་པ་པོ་བདག་གིས། ལུང་བསྟན་དེ་ལྟ་བུར་རབ་ཏུ་ཐོབ་ནས། སྤྲུལ་པ་མང་པོ་བྱེ་བ་ཕྲག་རྒྱ་ལ་སོགས་པ་མཐའ་ལས་འདས་པ་ཡིས། གཞན་དོན་ལ་གཅིག་ཏུ་གཞོལ་བའི་བློའི་སྟོབས་ཀྱིས་ཕྱོགས་བཅུའི་འཇིག་རྟེན་གྱི་ཁམས་མ་ལུས་པ་རྣམས་སུ་ཡང༌། སྐད་ཅིག་རེ་རེ་ཡང་སེམས་ཅན་མཐའ་ཡས་པ་རྣམས་ལ། ངན་སོང་གི་སྡུག་བསྔལ་ལས་སྐྱོབ་པ་ནས་བརྩམས་ཏེ། མཐོ་རིས་དང༌། ཉན་རང་དང༌། བླ་ན་མེད་པའི་བྱང་ཆུབ་ལ་འགོད་པའི་བར་གྱི། ཕན་པ་མང་པོ་ཇི་སྲིད་འཁོར་བ་མ་སྟོང་གི་བར་དུ་བགྱིད་པར་སྟེ་སྒྲུབ་པར་ཤོག་ཅེས་པའོ། །ཤཱཀྱ་བཤེས་གཉེན་གྱི་འགྲེལ་པའི་ལུགས་ལྟར་ན། སྤྲུལ་པ་བྱེ་བ་བརྒྱ་ཕྲག་དུ་མ་ཡིས། །ཞེས་འདོན་ཞིང༌། དེར་


TNT17_Page_0882
[མ་དཔེ་གཟིགས་ན་འདིར་གནོན།]

སོང་ནས་ནི་ཞེས་པའི་ཤོ་ལོ་ཀ་གཅིག་པོ་དེ། ཕན་པ་མང་པོ་བགྱིད་ཅེས་པའི་རྗེས་འདིར་འདོན་པ་སྣང་ངོ༌། །བཟང་པོ་སྤྱོད་པའི་སྨོན་ལམ་བཏོན་པ་ཡི། སོགས་ཤོ་ལོ་ཀ་གཉིས་ནི་སྡོང་པོ་བཀོད་པའི་མདོ་དངོས་བོད་དུ་ཡོད་པ་འདི་ལས་མི་འབྱུང་ཞིང༌། རྒྱ་འགྲེལ་རྣམ་དག་གཞན་རྣམས་ན་ཡང་བཤད་པ་མེད་དོ། །ཤཱཀྱ་བཤེས་གཉེན་གྱི་འགྲེལ་བར་ནི་འབྱུང་ཞིང༌། བཟང་སྤྱོད་ཀྱི་གླེགས་བམ་ལོགས་སུ་བྱས་པའི་རྒྱ་དཔེ་གཅིག་ན་ཡང་སྣང་ངོ༌། །མཁན་པོ་ཡེ་ཤེས་སྡེས་ཀྱང་བཤད་པ་མཛད་པས། སྤྱིར་མདོ་སྡེའི་ཚིག་ནི་ཡིན་པར་བྱ་དགོས་སོ། །དེས་ན་འདིར་སྔར་གྱི་ས་བཅད་ལྔ་པོ་ལ་མི་ཐེ་ཡང༌། གཞན་དོན་ཁོ་ནར་ཡོངས་སུ་བསྔོ་བ་ཞེས་བྱ་སྟེ། ཚིགས་བཅད་དང་པོ་ནི། བཟང་པོ་སྤྱོད་པའི་སྨོན་ལམ་བཏོན་པ་ཡི། །དགེ་བ་ཅུང་ཟད་བདག་གིས་ཅི་བསགས་པ། །དེས་ནི་འགྲོ་བའི་སྨོན་ལམ་དགེ་བ་རྣམས། །སྐད་ཅིག་གཅིག་གིས་ཐམས་ཅད་འབྱོར་བར་ཤོག །བཟང་པོ་སྤྱོད་པའི་སྨོན་ལམ་གྱི་གླེགས་བམ་བཀླགས་པ་དང་ཁ་ཏོན་དུ་བྱས་པ་ནི་བཏོན་པའོ། །དེ་ལས་བདག་གིས་དགེ་བ་ཅུང་ཟད་ཅི་བསགས་པ་དེས་ནི་འགྲོ་བ་སེམས་ཅན་ཐམས་ཅད་ཀྱིས་ཡིད་ལ་སྨོན་ཞིང༌། ངག་གི་གྱུར་ཅིག་པར་བརྗོད་པའི་སྨོན་ལམ་གྱི་རིགས་ལས་དགེ་བར་གཏོགས་པ་རྣམས་ཐམས་ཅད་འབད་སྩོལ་མེད་ཅིང༌། ཡུན་རིང་དུ་ཐོགས་པ་མ་ཡིན་པར། སྐད་ཅིག་གཅིག་གིས་ཏེ་མྱུར་དུ་ཐམས་ཅད་འབྱོར་ཞིང་འགྲུབ་པར་ཤོག་ཅིག་པའོ། །འདིས་ནི་བདག་ཉིད་ཀྱི་བཟང་སྤྱོད་བཏོན་པའི་དགེ་བས་སེམས་ཅན་ཐམས་ཅད་ཀྱི་བཟང་


TNT17_Page_0883
[མ་དཔེ་གཟིགས་ན་འདིར་གནོན།]

སྨོན་འགྲུབ་པར་སྨོན་པ་ཡིན་པས། གཞན་དོན་ཁོ་ནར་བསྔོ་བའོ། །ཚིགས་བཅད་གཉིས་པ་ནི། གང་ཡང་བཟང་པོ་སྤྱོད་པ་འདི་བསྔོས་པས། །བསོད་ནམས་མཐའ་ཡས་དམ་པ་གང་ཐོབ་དེས། །འགྲོ་བ་སྡུག་བསྔལ་ཆུ་བོར་བྱིང་བ་རྣམས། །འོད་དཔག་མེད་པའི་གནས་རབ་ཐོབ་པར་ཤོག །ཅེས་པའམ་དཔེ་འགའ་ལས། བཟང་སྤྱོད་ཡོངས་སུ་བསྔོས་པའི་བསོད་ནམས་ནི། མཐའ་ཡས་ཤིན་ཏུ་ཁྱད་འཕགས་གང་ཐོབ་དེས། །ཞེས་ཀྱང་ངོ༌། །བཟང་པོ་སྤྱོད་པའི་བསྔོ་བ་བྱས་པ་འདི་ཡིས། གང་ཡང་བདག་གི་རྒྱུད་ལ་བསོད་ནམས་ཏེ་དགེ་བའི་རྩ་བ་རྒྱ་ཆེ་བས་མཐའ་ཡས་ཤིང༌། ངོ་བོ་བཟང་པས་དམ་པར་གྱུར་པ་གང་ཞིག་ཐོབ་པ་དེས། འགྲོ་བ་རིགས་དྲུག་གི་སེམས་ཅན་སྐྱེ་རྒ་ན་འཆི་ལ་སོགས་པའི་སྡུག་བསྔལ་གྱི་ཆུ་བོར་བྱིང་བ་རྣམས། བཅོམ་ལྡན་འདས་འོད་དཔག་མེད་པའི་གནས་བདེ་བ་ཅན་གྱི་ཞིང་ཁམས་སྡུག་བསྔལ་གྱི་མིང་ཡང་མི་གྲག་ཅིང༌། རྟག་ཏུ་བདེ་བའི་གནས་དེ་རབ་ཏུ་ཐོབ་པར་ཤོག་ཅིག་པ་སྟེ། དེར་སྐྱེ་བར་གྱུར་ཅིག་པའོ། །བཟང་པོ་སྤྱོད་པའི་གཞུང་འདི་ལ་སྔོན་བསྟན་པ་སྔ་འགྱུར་གྱི་དུས་སུ། ལོ་པཎ་སྤྲུལ་པའི་སྐྱེས་མཆོག་རྣམས་ཀྱིས་བསྒྱུར་བ་ལ། སློབ་དཔོན་ཆེན་པོ་དཔལ་ཕྱོགས་ཀྱི་གླང་པོ་དང༌། ཤཱཀྱ་བཤེས་གཉེན་དང༌། སངས་རྒྱས་གྲགས་པ་དང༌། རྒྱན་བཟང་པོ་སྟེ། བཞི་པོ་དེས་མཛད་པའི་འགྲེལ་པ་དག་འགྱུར་ལ། དེ་རྣམས་ཀྱིས་དོན་ལེགས་བསྡུས་ཀྱི་སྟེང་དུ། མཁས་པའི་


TNT17_Page_0884
[མ་དཔེ་གཟིགས་ན་འདིར་གནོན།]

གསུང་དང་མདོ་དོན་འགའ་ཞིག་གིས་བརྒྱན་པ། མཁན་པོ་ཡེ་ཤེས་སྡེས་རྗེད་བྱང་གི་འགྲེལ་ཆེན་མཛད་དོ། །སློབ་དཔོན་ཆེན་པོ་དབྱིག་གཉེན་གྱིས་མཛད་ཟེར་བའི་འགྲེལ་པ་དང༌། རྔོག་འགྱུར་ཀླུ་སྒྲུབ་ཀྱིས་མཛད་ཟེར་བའི་འགྲེལ་བ་དེ་གཉིས་རྒྱན་བཟང་པོའི་འགྲེལ་པ་དང༌། འགྱུར་ཁྱད་མ་གཏོགས་གཅིག་པས། དཔེ་ཐོག་མ་དབང་བཙན་པར་བྱས་ཏེ་རྒྱན་བཟང་པོའི་ཡིན་གྱི། སློབ་དཔོན་ཆེན་པོ་དེ་གཉིས་ཀྱི་མ་ཡིན་ནོ། །རྒྱན་བཟང་པོའི་འགྲེལ་པ་འདི་ཡང་ཕྱོགས་གླང་གི་འགྲེལ་པའི་བསྡུས་དོན་བོར་ཞིང༌། མགོ་ཞབས་སུ་ཚིགས་བཅད་བསྣན་པ་ཙམ་མ་གཏོགས་ལྷག་མ་རྣམས་བྲིས་བཤུས་ལྟ་བུ་སྣང་ངོ༌། །སངས་རྒྱས་གྲགས་པའི་འགྲེལ་པ་ནི་མ་མཐོང་ལ་འདིར་ཕྱོགས་གླང་དང་ཤཱཀྱ་བཤེས་གཉེན་གྱི་འགྲེལ་པའི་དོན་གྱི་སྙིང་པོ་གལ་ཆེ་བ་རྣམས་ཚང་བར་བྱས་ལ། ཕལ་ཆེར་ཡེ་ཤེས་སྡེའི་གསུང་གི་ཡང་རྗེས་སུ་འབྲངས་ཤིང༌། རང་བློས་རྟོགས་པའི་ལེགས་བཤད་ཅུང་ཟད་ཀྱིས་ཀྱང་བརྒྱན་ཏེ་བཤད་པ་ཡིན་ནོ། །དེ་ལྟར་ན་སྡོང་པོ་བཀོད་པ་ཉིད་ལས་འབྱུང་བ་དང༌། རྒྱ་འགྲེལ་ཕལ་ཆེར་ལྟར་ན། ཤོ་ལོ་ཀ་དྲུག་ཅུ་ཡིན་ལ། ཤཱཀྱ་བཤེས་གཉེན་གྱི་འགྲེལ་པ་ལྟར་ན་ཕྱི་མ་གཉིས་པོ་བསྣན་པའོ། །འདི་ཉིད་ཀྱི་སྒོས་ཀྱི་གླེགས་བམ་བོད་མ་ཕལ་ཆེར་གྱི་མཇུག་ཏུ། སྨོན་ལམ་རྒྱལ་པོ་འདི་དག་མཆོག་གི་གཙོ། །མཐའ་ཡས་འགྲོ་བ་ཀུན་ལ་ཕན་བྱེད་ཅིང༌། །ཀུན་ཏུ་བཟང་པོས་བརྒྱན་པའི་ཞིང་གྲུབ་སྟེ། །ངན་སོང་གནས་རྣམས་མ་ལུས་སྟོངས་པར་ཤོག །ཅེས་འབྱུང་བ་ནི། མདོ་དང༌།


TNT17_Page_0885
[མ་དཔེ་གཟིགས་ན་འདིར་གནོན།]

སྔར་སྨོས་པ་བདག་གིས་མཐོང་བའི་འགྲེལ་པ་རྣམས་ན་མི་སྣང་ཞིང༌། སངས་རྒྱས་གྲགས་པའི་འགྲེལ་པ་ནའང་མེད་པར་གྲགས་ལ། པ་གོར་བཻ་རོ་ཙ་ན་རཀྵི་ཏ་ལ་སོགས་པ་འདིའི་གཞུང་འགྲེལ་རྣམས་འགྱུར་མཛད་པའི་ལོ་ཙཱ་བ་དག་གིས། འགྱུར་གྱི་སྨོན་ལམ་གྱི་ཚུལ་དུ་མཛད་པ་ཡིན་ནོ་ཞེས་གྲགས་ཏེ། དེ་ལྟར་ཡིན་པ་ཡང་སེམས་ལ། དོན་ནི་བཟང་པོ་ཞིག་སྟེ། སྨོན་ལམ་གྱི་རྒྱལ་པོ་འདི་དག་ནི། མཆོག་གི་གཙོ་བོ་སངས་རྒྱས་སུ་འགྲུབ་ཅིང༌། མཐའ་ཡས་པའི་འགྲོ་བ་ཀུན་ལ་ཕན་པར་བྱེད་པ་དང༌། ཁྱད་པར་དུ་ཕྱོགས་བཅུའི་ཞིང་ཁམས་མ་ལུས་པའི་ངན་སོང་གི་གནས་ཐམས་ཅད་མ་ལུས་པར་སྟོངས་པ་དང༌། ཕྱོགས་ཐམས་ཅད་ཀུན་ཏུ་བཟང་པོའི་སྨོན་ལམ་གྱིས་བརྒྱན་པའི་ཞིང་ཁམས་ཁྱད་པར་ཅན་དུ་བསྒྲུབས་པས་གྲུབ་པར་གྱུར་ཅིག་པའོ། །དེར་ལྟར་ན་ཚིགས་བཅད་ཐ་མ་དེ་གསུམ་ནི། སྡོང་པོ་བཀོད་པ་ཉིད་ལས་མི་འབྱུང་བའི་ཕྱིར། མ་བཏོན་ཡང་ཆད་པའི་ཉེས་པ་མེད་པར་ཤེས་པར་བྱའོ། །འདིར་སྨྲས་པ། ཟབ་ཅིང་རྒྱ་ཆེའི་སྨོན་ལམ་དམ་པ་འདི། །བདག་ལྟ་རྨོངས་པའི་སྤྱོད་ཡུལ་མ་ཡིན་མོད། །རང་གི་བློ་གྲོས་རྣམ་པར་སྦྱང་བའི་ཕྱིར། །དམ་པའི་གསུང་གི་རྗེས་ཞུགས་སྐྱོན་མེད་སྙམ། །སྟོང་པ་ཉིད་དང་སྙིང་རྗེའི་རང་སྣང་ལས། །ཏིང་འཛིན་སྤྱོད་ཡུལ་དམ་པའི་འཇིག་རྟེན་དང༌། །ཡིད་ཀྱི་ལུས་དང་བསམ་མི་ཁྱབ་པ་ཡི། །སྐྱེ་དང་འཆི་འཕོ་རྣམ་འཕྲུལ་མཐའ་ཡས་པ། །དེ་ནི་རྒྱལ་དང་སེམས་དཔའ་ཆེ་རྣམས་ཀྱི། །སྤྱོད་ཡུལ་ཉིད་ཡིན་གཞན་གྱི་མ་ལགས་མོད། །སྨོན་ལམ་འདིས་ནི་དེ་དོན་རྫོགས་པར་སྟོན། །དེ་ཕྱིར་འཕགས་པའི་སྤྱོད་ཡུལ་ཉག་གཅིག་གོ །


TNT17_Page_0886
[མ་དཔེ་གཟིགས་ན་འདིར་གནོན།]

ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །དེ་ལ་བྱང་ཆུབ་སེམས་དཔའ་རྣམས་ཀྱི་བསམ་པ་ཕུན་སུམ་ཚོགས་པ་གང་ཡིན་པ་དེ་ཡང༌། སྐྱེས་བུ་ཆེན་པོའི་རྣམ་པར་རྟོག་པ་བརྒྱད་དུ་འདུས་པ་ཡིན་ནོ། །རྣམ་པ་བརྒྱད་པོ་དེ་ལ་ནི་བྱང་ཆུབ་སེམས་དཔའ་རྣམས་ཉིན་དང་མཚན་དུ་མངོན་པར་ཕྱོགས་པར་བྱེད་དོ། །དེ་ལ་སྡོམ་ནི། སྡུག་བསྔལ་སེལ་དང་འབྱོར་པ་དང༌། །བདག་ལུས་དོན་དང་ངན་འགྲོར་འཇུག །རེ་བ་རྫོགས་དང་འཁོར་ལས་འདྲེན། །འགྲོ་ལ་ཕན་མེད་འདོད་བྲལ་དང༌། །བརྒྱད་པ་བདག་གཞན་བརྗེ་བ་ཡིན། །རྣམ་རྟོག་དང་པོ་ནི། བདག་གིས་སེམས་ཅན་ཐམས་ཅད་ཀྱི་སྡུག་བསྔལ་ནམ་ཞིག་སེལ་བར་འགྱུར་སྙམ་པ་དང༌། རྣམ་རྟོག་གཉིས་པ་ནི། སེམས་ཅན་དབུལ་པོ་རྣམས་འབྱོར་པ་ཆེན་པོ་ལ་བདག་གིས་ནམ་སྦྱོར་བར་འགྱུར་སྙམ་པ་དང༌། རྣམ་རྟོག་གསུམ་པ་ནི། ཤ་ཁྲག་དང་བཅས་པའི་ལུས་འདིས་སེམས་ཅན་གྱི་དོན་ནམ་བྱེད་སྙམ་པ་དང༌། རྣམ་རྟོག་བཞི་པ་ནི། བདག་ངན་འགྲོར་སོང་ནས་ཀྱང༌། སེམས་ཅན་རྣམས་ལ་ནམ་ཞིག་ཕན་འདོགས་པར་འགྱུར་སྙམ་པ་དང༌། རྣམ་རྟོག་ལྔ་པ་ནི། བདག་གིས་འཇིག་རྟེན་དང་འཇིག་རྟེན་ལས་འདས་པའི་འབྱོར་བ་སྟེ། རྫུ་འཕྲུལ་དང་ལོངས་སྤྱོད་དང་ཡོན་ཏན་དང་ཡོན་ཏན་རྣམས་ཀྱིས་སེམས་ཅན་ཀྱི་རེ་བ་རྫོགས་པར་ནམ་འགྱུར་སྙམ་པ་དང༌། རྣམ་རྟོག་དྲུག་པ་ནི། བདག་སངས་རྒྱས་སུ་གྱུར་ནས་སེམས་ཅན་འཁོར་བ་ལས་ནམ་ཞིག་འདྲེན་པར་འགྱུར་སྙམ་པ་དང༌། རྣམ་རྟོག་བདུན་པ་ནི། སེམས་ཅན་ལ་ཕན་པ་རྒྱ་ཆེན་པོ་མི་འབྱུང་ན་སྐྱེ་བ་དང་སྤྱོད་པ་དང་


TNT17_Page_0887
[མ་དཔེ་གཟིགས་ན་འདིར་གནོན།]

ལོངས་སྤྱོད་ཆེས་ཕུན་སུམ་ཚོགས་པ་ཞིག་ཡིན་ཡང་རུང་ནམ་ཡང་མི་འདོད་ཅིང་སྐྲ་རྩེ་བསྐྱོད་པ་ཙམ་དང་དབུགས་འབྱུང་རྔུབས་ཚུན་ཆད་ཀྱང༌། སེམས་ཅན་ལ་ཕན་པ་ཁོ་ན་བྱེད་ནུས་པར་ནམ་ཞིག་འགྱུར་སྙམ་པ་དང༌། བརྒྱད་པ་ནི་སེམས་ཅན་གྱི་སྡིག་པ་དང་སྡུག་བསྔལ་བདག་ལ་སྨིན་པར་གྱུར་ཅིག བདག་གིས་བདེ་བ་དང་དགེ་བ་སེམས་ཅན་ལ་འབྱུང་བར་གྱུར་ཅིག་ཅེས་སྨོན་པའོ། །བྱང་ཆུབ་སེམས་དཔའ་རྣམས་སྨོན་ལམ་འདེབས་པའི་རྩ་བ་བསམ་པ་ཕུན་སུམ་ཚོགས་པ་ནི་དེ་དག་ཡིན་ཏེ། དེ་ལ་སྨོན་ལམ་དངོས་ནི། ངག་ཏུ་བརྗོད་པ་ལ་མི་བྱ་སྟེ་ཡིད་ཀྱིས་སོ། །དེ་ལྟར་ཡང་བརྟན་པ་རྣམས་ཀྱི་སྨོན་ལམ་ནི། སེམས་པ་འདུན་དང་བཅས་པ་སྟེ། །ཞེས་གསུངས་པས། སྐབས་འདིར་ཡང་སྨོན་པར་བྱ་བའི་གནས་བརྒྱད་པོ་དེ་དག་ལ། རྟག་ཏུ་སེམས་པར་བྱེད་ཅིང༌། ཐོབ་པར་འདུན་པ་ནི་སྨོན་ལམ་དངོས་སོ། །དེ་དག་ཀྱང༌། གཞུང་འདིས་གསལ་བར་བསྟན་པ་ཡིན་ཏེ། སྐྱེས་བུ་ཆེན་པོའི་རྣམ་རྟོག་དང་པོ་སེམས་ཅན་རྣམས་སྡུག་བསྔལ་མེད་ཅིང་བདེ་བར་འདོད་པ་ནི། ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་རྟག་ཏུ་ནད་མེད་བདེ་བར་གྱུར། །ཞེས་པའོ། །གཉིས་པ་འབྱོར་པ་ཐོབ་པར་འདོད་པ་ནི། ཞིང་སྦྱོང་བ་དང་མཆོད་པའི་ཚིག་རྣམས་དང༌། དེའི་བྱ་བ་མ་ལུས་རྫོགས་པར་བགྱི་ཞེས་པའོ། །གསུམ་པ་རང་ལུས་ཀྱི་སེམས་ཅན་ལ་ཕན་འདོགས་པ་ནི། ལུས་དང་ངག་དང་ཡིད་ཀྱང་རྣམ་དག་ཅིང༌། །ཞེས་པ་ལ་སོགས་པ་སྟེ།


TNT17_Page_0888
[མ་དཔེ་གཟིགས་ན་འདིར་གནོན།]

སྒོ་གསུམ་གཞན་དོན་དུ་སྤྱོད་ན་རྣམ་པར་དག་པར་འགྱུར་བའི་ཕྱིར་རོ། །བཞི་པ་ངན་འགྲོར་ཞུགས་ནས་ཀྱང་གཞན་གྱི་དོན་བྱེད་པ་ནི། སེམས་ཅན་དག་གི་སྤྱོད་དང་མཐུན་པར་འཇུག།ཅེས་པའོ། །ལྔ་པ་སེམས་ཅན་གྱི་རེ་བ་སྐོང་བ་ནི། འགྲོ་བ་ཀུན་གྱི་ཆོས་ཀྱིས་དོན་རྣམས་ནི། །ཞེས་པ་ནས། ཐམས་ཅད་སྐད་དུ་བདག་གི་ཆོས་སྟོན་ཏོ། །ཞེས་པའི་བར་རོ། །དྲུག་པ་སངས་རྒྱས་ཐོབ་ནས་འགྲོ་བ་སྒྲོལ་བ་ནི། བྱང་ཆུབ་ཤིང་དབང་དྲུང་དུ་དེ་མྱུར་འགྲོ། །སོགས་དང༌། སྤྲུལ་པ་མང་པོ་བྱེ་བ་ཕྲག་བརྒྱ་ཡིས། སོགས་སོ། །བདུན་པ་དོན་དམ་དུ་མི་འགྱུར་བ་ནི། གང་ཡང་དུས་གསུམ་གཤེགས་པའི་རྒྱལ་བ་ཡི། །སོགས་དང༌། གཞན་ཡང་ཤུགས་བསྟན་ལ་མང་ངོ༌། །བརྒྱད་པ་བདག་གཞན་བརྗེ་བ་ནི། ཞིང་གི་ཁྱོན་དང་ཕྱོགས་རྣམས་ཇི་ཙམ་པར། །ངན་སོང་སྡུག་བསྔལ་རབ་ཏུ་ཞི་བར་བྱེད། །བདེ་བ་དག་ལ་འགྲོ་བ་ཀུན་འགོད་ཅིང༌། །སེམས་ཅན་ཐམས་ཅད་ལ་ཡང་ཕན་པར་བགྱིད། །ཞེས་པས་བསྟན་ཏོ། །ཡང་བྱང་ཆུབ་སེམས་དཔའ་འཕགས་པ་རྣམས་ཀྱི་སྨོན་ལམ་གྲངས་མེད་པ་འབུམ་ཕྲག་བཅུ་ནི། སྨོན་ལམ་ཆེན་པོ་བཅུར་འདུས་པ་ཡིན་ལ། དེ་དག་ཀྱང་འཕགས་པ་ས་བཅུ་པའི་མདོ་ལས། ས་དང་པོའི་དོན་བསྡུ་ཚིགས་བཅད་ཀྱི་སྐབས་སུ་འདི་སྐད་ཅེས་འབྱུང་སྟེ། རྒྱལ་བ་ལྟ་བའི་དོན་དུ་སྨོན་ལམ་མངོན་པར་སྒྲུབ། །དམ་ཆོས་ཡོངས་སུ་བཟུང་ཞིང་དྲང་སྲོང་དྲུང་འགྲོ་དང༌། །སྤྱོད་པ་མཆོག་གི་དོན་དུ་སྨོན་ལམ་མངོན་པར་སྒྲུབ། །སེམས་ཅན་ཡོངས་སུ་སྨིན་བྱ་སངས་རྒྱས་ཞིང་སྦྱོང་སྟེ། །དེ་ཡི་ཞིང་མཆོག་རྒྱལ་སྲས་


TNT17_Page_0889
[མ་དཔེ་གཟིགས་ན་འདིར་གནོན།]

ཀུན་གྱིས་གང་འགྱུར་ཞིང༌། །རྒྱལ་སྲས་རྣམས་དང་བསམ་པ་གཅིག་ཅིང་དོན་མཐུན་ཕྱིར། །སྐྲ་སྦུབས་ཀུན་ཏུ་དོན་གྱི་དམ་པ་མངོན་འཚང་རྒྱ། །དེ་དག་སྨོན་ལམ་དུ་མ་མངོན་པར་སྒྲུབ་པར་བྱེད། །དེ་དག་མཐའ་ཡས་ཡངས་ཤིང་མཐར་ཐུག་མེད་དང་ལྡན། །ནམ་མཁའི་ཁམས་དང་ཆོས་ཉིད་མྱ་ངན་འདས་ཁམས་དང༌། །འཇིག་རྟེན་མཐར་ཐུག་རྒྱལ་བ་འབྱུང་དང་ཡེ་ཤེས་དང༌། །སེམས་ཀྱིས་ཡུལ་དང་ཡེ་ཤེས་འཇུག་པའི་མཐར་ཐུག་དང༌། །རྣམ་གསུམ་རྒྱུད་རྣམས་མཐར་ཐུག་འགྲོ་བའི་མུར་ཐུག་པ། །རྣམ་པ་དེ་ཚུལ་བདག་སྨོན་མཐའ་ཡང་ཐུག་གྱུར་ཅིང༌། །དེ་དག་མཐར་ཐུག་ཇི་བཞིན་བདག་སྤྱོད་དེ་འདྲར་ཤོག །ཅེས་གསུངས་ལ། དེ་ལ་སྨོན་ལམ་ཆེན་པོ་བཅུའི་སྡོམ་ནི། མཆོད་དང་དམ་ཆོས་ཡོངས་སུ་བཟུང༌། །ཀུན་འགྲོའི་ལུས་དང་སྤྱོད་པ་དང༌། །ཡོངས་སུ་སྨིན་དང་ཞིང་སྦྱོང་དང༌། །སྦྱངས་པའི་ཞིང་དེའི་ཁྱད་པར་སྒྲུབ། །རྒྱལ་སྲས་ཀུན་དང་མཐུན་པར་སྤྱོད། །མཐུན་པའི་དོན་འགྲུབ་མངོན་འཚང་རྒྱ། །དེ་ལྟར་སྨོན་ལམ་བཅུ་པོ་ལ། །མཐར་ཐུག་གནས་ཀྱང་རྣམ་བཅུ་སྟེ། །སེམས་ཅན་འཇིག་རྟེན་ནམ་མཁའ་དང༌། །ཆོས་དབྱིངས་མྱང་འདས་སངས་རྒྱས་འབྱུང༌། །ཡེ་ཤེས་ཁམས་དང་སེམས་ཀྱི་དམིགས། །ཡེ་ཤེས་མངོན་སྒྲུབ་ཁམས་མཐར་ཐུག །རྒྱུད་གསུམ་ཁམས་པར་སྨོན་ལམ་འདེབས། །འཇིག་རྟེན་ཆོས་དང་ཡེ་ཤེས་ཀྱི། །རྒྱུད་དེ་སྐབས་འདིར་རྒྱུད་གསུམ་མོ། །སྨོན་ལམ་ཆེན་པོ་བཅུ་ནི། སངས་རྒྱས་ཐམས་ཅད་ལ་མཆོད་པ་ཐམས་ཅད་ཀྱིས་མཆོད་པར་སྨོན་པ་ནི་དང་པོའོ། །


TNT17_Page_0890
[མ་དཔེ་གཟིགས་ན་འདིར་གནོན།]

དམ་པའི་ཆོས་ཐམས་ཅད་ཡོངས་སུ་བཟུང་ཞིང་བསྲུང་བར་སྨོན་པ་ནི་གཉིས་པའོ། །ཕྱོགས་བཅུའི་སངས་རྒྱས་རྣམས་མཛད་པ་ངོ་མཚར་ཅན་མཛད་པ་ཐམས་ཅད་ཀྱི་དྲུང་དུ་ཐོགས་པ་མེད་པའི་ལུས་ཀྱིས་བདག་འགྲོ་ཞིང་བྱ་བ་ཁྱད་པར་ཅན་བྱེད་པར་སྨོན་པ་ནི་གསུམ་པའོ། །རྟག་ཏུ་བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱོད་པར་སྨོན་པ་ནི་བཞི་པའོ། །བདག་གི་སེམས་ཅན་ཐམས་ཅད་ཡོངས་སུ་སྨིན་པར་བྱེད་པར་སྨོན་པ་ནི་ལྔ་པའོ། །འཚང་རྒྱ་བར་འགྱུར་བའི་ཞིང་འཇིག་རྟེན་གྱི་ཁམས་མཐའ་ཡས་པ་འགྲུབ་པར་སྨོན་པ་ནི་དྲུག་པའོ། །མངོན་པར་སྒྲུབ་པའི་ཞིང་ཁམས་རྣམས་ཀྱང་མཐའ་ཡས་པ་བསམ་གྱིས་མི་ཁྱབ་པའི་སྤྱོད་ཡུལ་ཅན་ལས། བྱང་ཆུབ་སེམས་དཔའ་མཆོག་གིས་གང་བ་སོགས་དག་པ་རབ་འབྱམས་འབའ་ཞིག་ཏུ་སྦྱོང་བར་སྨོན་པ་ནི་བདུན་པའོ། །བྱང་ཆུབ་སེམས་དཔའ་ཐམས་ཅད་དང་བདག་ཉིད་བསམ་སྦྱོར་གཅིག་པར་སྨོན་པ་ནི་བརྒྱད་པའོ། །སྤྱོད་པ་དང་ཉམས་ལེན་ཐམས་ཅད་དོན་གྱི་མཆོག་ཁོ་ན་མཐའ་ཡས་པ་འགྲུབ་པར་སྨོན་པ་ནི་དགུ་པའོ། །ནམ་མཁའི་མཐས་གཏུགས་པ་ཐམས་ཅད་དུ་མཛད་པ་མཐའ་ཡས་པ་སྟོན་པའི་ཚུལ་གྱིས་མངོན་པར་རྫོགས་པར་སངས་རྒྱ་བར་སྨོན་པ་ནི་བཅུ་པའོ། །དེ་ལས་དང་པོ་མཆོད་པ་ནི། བསོད་ནམས་ཀྱི་ཚོགས་རྫོགས་པའི་ཆེད་དང༌། གཉིས་པ་དམ་ཆོས་ཡོངས་སུ་བཟུང་བ་ནི། ཡེ་ཤེས་ཀྱི་ཚོགས་ཀྱི་ཆེད་དུའོ། །གསུམ་པ་ལ་སོགས་པ་ལྔ་ནི་སེམས་ཅན་ཡོངས་སུ་སྨིན་པའི་ཆེད་དུ་ཡིན་ཏེ། གསུམ་པ་ཀུན་ཏུ་འགྲོ་བའི་ལུས་ནི། རྟེན་ལུས་ཀྱི་ཁྱད་པར་


TNT17_Page_0891
[མ་དཔེ་གཟིགས་ན་འདིར་གནོན།]

ཅི་འདྲ་བས་དང༌། བཞི་པ་སྤྱོད་པ་མཐའ་དག་ལ་སློབ་པ་ནི། སེམས་ལ་སོགས་པའི་སྤྱོད་པ་ཅི་འདྲ་བས་གཞན་སྨིན་པར་བྱེད་པ་དང༌།ལྔ་པ་ནི། སྨིན་པར་བྱེད་པ་དངོས་ཏེ། གང་སྨིན་པར་བྱ་བའི་སེམས་ཅན་གྱི་དབང་དུ་བྱས་པ་དང༌། དྲུག་པ་ནི། གནས་གང་དུ་སྨིན་པར་བྱེད་པའི་ཞིང་ཁམས་སྒྲུབ་པ་དང༌། བདུན་པ་ནི། རྣམ་པ་ཇི་ལྟ་བུས་སྨིན་པར་འགྱུར་བའི་ཐབས་སྟོན་པའི་ཕྱིར་རོ། །བརྒྱད་པ་སེམས་དཔའ་ཀུན་དང་མཐུན་པར་སྤྱོད་པ་ནི། རང་གི་སའི་ཡོན་ཏན་གྱི་ཁྱད་པར་རྟོགས་པའི་ཕྱིར་དང༌། དགུ་པ་དོན་ཡོད་པར་སྤྱོད་པ་ནི། ཁྱད་པར་རྟོགས་པ་གོང་ནས་གོང་དུ་འགྲོ་བའི་ཕྱིར་དང༌། བཅུ་པ་བྱང་ཆུབ་ཀྱི་སྨོན་ལམ་ནི་འབྲས་བུ་མཐར་ཐུག་གི་ཕྱིར་རོ། །དེ་ལྟ་བུའི་སྨོན་ལམ་བཅུ་པོ་དེ་ཡང༌། བཟང་པོ་སྤྱོད་པ་འདི་ལ་ཡོངས་སུ་རྫོགས་པར་ཚང་པ་ཡིན་ཏེ། འཇིག་རྟེན་དག་ན་གང་བཞུགས་མཆོད་པར་གྱུར། ཅེས་དང༌། དེ་དག་ལ་ཡང་མཆོད་པ་རྒྱ་ཆེར་བགྱི། །ཞེས་དང༌། སངས་རྒྱས་རྒྱ་མཚོ་རབ་ཏུ་མཆོད་བྱེད་ཅིང༌། །ཞེས་པ་ལ་སོགས་པས་དང་པོའི་དབང་དུ་བྱས་ཏེ་སངས་རྒྱས་མཆོད་པའོ། །རྒྱལ་བ་རྣམས་ཀྱི་དམ་པའི་ཆོས་འཛིན་ཅིང༌། །ཞེས་དང༌། བྱང་ཆུབ་སྤྱོད་པ་དག་ནི་བདག་སྤྱོད་ཅིང༌། །ཞེས་རང་གིས་སྤྱོད་པ་དང༌། བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །ཅེས་གཞན་ལ་སྟོན་པ་སྟེ། དེ་སོགས་མང་པོ་ཞིག་ནི་གཉིས་པའི་དབང་དུ་བྱས་པ་སྟེ། དམ་ཆོས་ཡོངས་སུ་འཛིན་པའོ། །བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང༌།


TNT17_Page_0892
[མ་དཔེ་གཟིགས་ན་འདིར་གནོན།]

ཞེས་དང༌། རྟག་ཏུ་དེ་དག་གི་ནི་སྤྱོད་ཡུལ་ལ། །སྒྱུ་མར་གྱུར་པའི་རྣམ་ཐར་སྟོབས་ཀྱིས་འཇུག །ཅེས་པ་ལ་སོགས་པས་ནི་གསུམ་པའི་དབང་དུ་བྱས་པ་སྟེ། ཀུན་ཏུ་འགྲོ་བའི་ལུས་ཀྱིས་སངས་རྒྱས་ཀྱི་སྤྱོད་ཡུལ་ལྟ་བའོ། །བཟང་པོ་སྤྱོད་པ་རྣམ་པར་སྦྱང་བ་ཡང༌། །མ་འོངས་བསྐལ་པ་ཀུན་ཏུ་སྤྱད་པར་བགྱི། །ཞེས་སོགས་མང་པོ་ཞིག་ནི། བཞི་པའི་དབང་དུ་བྱས་པ་སྟེ། སྤྱོད་པ་ཐམས་ཅད་ལ་བསླབ་པའོ། །བདེ་བ་དག་ལ་འགྲོ་བ་ཀུན་འགོད་ཅིང༌། །ཞེས་སོགས་དང༌། སེམས་ཅན་རྒྱ་མཚོ་དག་ནི་རྣམ་པར་གྲོལ། །ཞེས་པ་ལ་སོགས་པ་ནི། ལྔ་པའི་དབང་དུ་བྱས་པ་སྟེ། སེམས་ཅན་ཡོངས་སུ་སྨིན་པར་བྱེད་པའོ། །དེ་ལྟར་མ་ལུས་ཕྱོགས་རྣམས་ཐམས་ཅད་དུ། །རྒྱལ་བ་བདག་གི་ཞིང་རྣམས་བཀོད་ལ་འཇུག །ཅེས་པ་ལ་སོགས་པ་དྲུག་པའི་དབང་དུ་བྱས་པ་སྟེ། ཞིང་མཐའ་ཡས་པ་སྒྲུབ་པའོ། །རྡུལ་གཅིག་སྟེང་ན་རྡུལ་སྙེད་ཞིང་རྣམས་ཏེ། །ཞིང་དེར་བསམ་གྱིས་མི་ཁྱབ་སངས་རྒྱས་རྣམས། །ཞེས་པ་ནས། མྱ་ངན་འདས་པ་ཞི་མཐའ་རབ་ཏུ་སྟོན། །ཅེས་པའི་བར་དང༌། ཞིང་རྣམས་རྒྱ་མཚོ་རྣམ་པར་དག་བྱེད་ཅིང༌། །ཞེས་པས་ནི། བདུན་པའི་དབང་དུ་བྱས་པ་སྟེ། ཞིང་རྣམ་པར་དག་པར་སྦྱོང་བའོ། །གང་ཡང་དུས་གསུམ་གཤེགས་པའི་རྒྱལ་བ་ཡིས། །བྱང་ཆུབ་སྤྱོད་པའི་སྨོན་ལམ་བྱེ་བྲག་རྣམས། །ཞེས་སོགས་དང༌། ལུས་དང་ངག་དང་ཡིད་ཀྱང་རྣམ་དག་ཅིང༌། །ཞེས་པ་ནས། དེ་དག་འཕྲུལ་པ་ཐམས་ཅད་འཚལ་བར་བགྱི། །ཞེས་པའི་


TNT17_Page_0893
[མ་དཔེ་གཟིགས་ན་འདིར་གནོན།]

བར་དང༌། བདག་གི་སྤྱོད་དང་མཚུངས་པར་གང་སྤྱོད་པ། །ཞེས་སོགས་ཚིགས་བཅད་གསུམ་དང༌། དུས་གསུམ་གཤེགས་པ་མི་ཡི་སེང་གེ་གང༌། །ཞེས་པ་ལ་སོགས་པ་དང༌། ཚེ་རབས་ཀུན་ཏུ་འཆི་འཕོ་སྐྱེ་བ་ན། །ཞེས་པ་ལ་སོགས་པ་ནི་བརྒྱད་པའི་དབང་དུ་བྱས་པ་སྟེ། བྱང་ཆུབ་སེམས་དཔའ་ཐམས་ཅད་དང་སྤྱོད་པ་མཐུན་པར་སྤྱོད་པའོ། །ཀུན་ཏུ་ཡོན་ཏན་སྤྱོད་པའི་སྟོབས་རྣམས་དང༌། །ཞེས་དང༌། སྤྱོད་པ་རྒྱ་མཚོ་རྣམ་པར་དག་བྱེད་ཅིང༌། །ཞེས་དང༌། ཡོན་ཏན་རྣམས་ཀྱང་ཚད་གཟུང་མེད་པར་ཤོག །ཅེས་དང༌། དེ་ཡི་བྱ་བ་མ་ལུས་རྫོགས་པར་བགྱི། །ཞེས་པ་ལ་སོགས་པ་མང་པོ་དག་ནི་དགུ་པའི་དབང་དུ་བྱས་པ་སྟེ། འབྲས་བུ་དོན་ཡོད་པ་ཁོ་ནར་སྤྱད་པའོ། །བཟང་པོ་སྤྱོད་པས་བྱང་ཆུབ་སངས་རྒྱས་ནས། །ཞེས་པ་དང༌། སྐྲ་ཙམ་ཁྱོན་ལ་དུས་གསུམ་ཚད་སྙེད་ཀྱི། །སོགས་དང༌། ཡོན་ཏན་ཀུན་གྱི་མི་ཟད་མཛོད་གྱུར་ཅིག །ཅེས་པ་དང༌། ཀུན་ཏུ་མྱུར་བའི་རྫུ་འཕྲུལ་སྟོབས་རྣམས་དང༌། །ཞེས་དང༌། ཆགས་པ་མེད་པར་གྱུར་པའི་ཡེ་ཤེས་སྟོབས། །ཞེས་པ་ལ་སོགས་པ་ནི། བཅུ་པའི་དབང་དུ་བྱས་པ་སྟེ། ནམ་མཁའི་མཐས་གཏུགས་པར་མཛད་པ་མཐའ་ཡས་པ་བསྟན་པའི་སངས་རྒྱས་སུ་སྨོན་པའོ། །སྨོན་ལམ་དེ་རྣམས་ཀྱི་མཐར་ཐུག་པའི་གནས་བཅུ་ལ། སེམས་ཅན་གྱི་ཁམས་ཀྱི་མཐར་ཐུག་པ་ནི། སེམས་ཅན་ཇི་ཙམ་ཡོད་པའི་ས་ཕྱོགས་སུ་སྨོན་ལམ་གྱིས་ཁྱབ་ཅིང༌། མ་འོངས་པ་ན་སེམས་ཅན་མ་ཟད་ཀྱི་བར་དུ་སྨོན་ལམ་གྱི་འབྲས་བུ་ཡང་མི་ཟད་པའོ། །འཇིག་


TNT17_Page_0894
[མ་དཔེ་གཟིགས་ན་འདིར་གནོན།]

རྟེན་གྱི་ཁམས་དང༌། ནམ་མཁའི་ཁམས་ཀྱི་མཐར་ཐུག་པ་ཡང་དེ་དང་འདྲ་སྟེ། འཇིག་རྟེན་དང་ནམ་མཁས་ཁྱབ་ཚད་ཀྱི་ཡུལ་དང༌། དེ་གཉིས་ཇི་སྲིད་ཡོད་པའི་བར་གྱི་དུས་དེ་དག་ཏུ་སྨོན་ལམ་མི་ཟད་པའོ། །གཞན་རྣམས་ལའང་མཐར་ཐུག་ཚུལ་དེ་ཁོ་ན་བཞིན་ཡིན་ལ། ཆོས་ཀྱི་དབྱིངས་དང་མྱ་ངན་ལས་འདས་པའི་ཁམས་དང༌། དེ་བཞིན་གཤེགས་པའི་ཡེ་ཤེས་ཀྱི་ཁམས་རྣམས་ངོ་བོ་གཅིག་སྟེ། ངོ་བོ་ཆོས་དབྱིངས་སེམས་ཉིད་བདེ་བར་བཤེགས་པའི་སྙིང་པོ་ཡིན་ལ། འོན་ཀྱང་འདུལ་བའི་དོན་དུ་ཆོས་སྟོན་པའི་གཞི་ཡིན་པའི་ཕྱིར། ཆོས་ཀྱི་དབྱིངས་དང༌། མཐར་ཐུག་སེམས་ཅན་གང་དུ་འདུལ་བའི་གནས་ཡིན་པའི་ཕྱིར་མྱ་ངན་ལས་འདས་པ་དང༌། དེ་བཞིན་ཉིད་དང་རྣམ་པ་མཐུན་པར་སྒོམ་པའི་ཆོས་ཀྱི་དམིགས་པ་ཡིན་པའི་ཕྱིར། དེ་བཞིན་གཤེགས་པའི་ཡེ་ཤེས་ཀྱི་ཁམས་ཞེས་བསྟན་པ་ཡིན་ནོ། །སངས་རྒྱས་འབྱུང་བའི་ཁམས་དང༌། ཡེ་ཤེས་མངོན་པར་སྒྲུབ་པའི་ཁམས་ཀྱང་དོན་གཅིག་སྟེ། ངོ་བོ་ནི་ལམ་གྱི་བདེན་པ་ཡིན་ཏེ། འབྲས་བུའི་དབང་དུ་བྱས་ནས་སངས་རྒྱས་འབྱུང་བ་དང༌། ངོ་བོའི་དབང་དུ་བྱས་ནས་ཡེ་ཤེས་མངོན་པར་བསྒྲུབ་པའོ། །སེམས་ཀྱི་དམིགས་པའི་ཁམས་ནི་ཤེས་བྱ་ཐམས་ཅད་དོ། །རྒྱུད་གསུམ་ལ་འཇིག་རྟེན་གྱི་རྒྱུད་ནི། སྡུག་བསྔལ་དང་ཀུན་འབྱུང་ངོ༌། །ཆོས་ཀྱི་རྒྱུད་ནི་འགོག་པའི་བདེན་པའོ། །ཡེ་ཤེས་ཀྱི་རྒྱུད་ནི་ལམ་གྱི་བདེན་པ་སྟེ། དེ་དག་ཇི་སྲིད་ཡོད་ཀྱི་བར་དུ། སྨོན་ལམ་འདིའི་འབྲས་བུ་ཡོད་པར་གྱུར་


TNT17_Page_0895
[མ་དཔེ་གཟིགས་ན་འདིར་གནོན།]

ཅིག་པའོ། །དེ་ལྟར་ན་སྨོན་ལམ་བཅུ་པོ་ཡང༌། མཐར་ཐུག་པའི་གནས་རྣམ་པ་བཅུའི་སྒོ་ནས་འདེབས་དགོས་པ་ལས། དེ་ཡང༌། ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཇི་ཙམ་ལས་དང་ཉོན་མོངས་མཐར་གྱུ་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ཞེས་གསུངས་པའི་དོན་ལ་འདུས་པ་ཡིན་ནོ། །སྨོན་ལམ་བཅུ་པོ་འདི་དག་རྒྱས་པར་འཕགས་པ་ས་བཅུ་པའི་མདོ་ལས། ས་དང་པོའི་རྒྱས་བཤད་ཀྱི་སྐབས་ན་ཡོད་ལ། ཞིབ་མོར་ཤེས་འདོད་ན་མདོ་དེ་ཉིད་དང༌། རྒྱལ་སྲས་ཆེན་པོ་འཕགས་པ་དབྱིག་གཉེན་གྱི་འགྲེལ་པ་དང་བཅས་པ་ལས་རྟོགས་པར་བྱ་ལ། རྒྱས་བཤད་ཀྱི་མདོའི་ཚིག་དང༌། འཕགས་པ་བཟང་པོ་སྤྱོད་པའི་སྨོན་ལམ་གྱི་ཚིག་ཕལ་ཆེར་ཞིབ་ཏུ་སྦྱོར་རྒྱུ་ཡོད་མོད་ཀྱིས། འདིར་ནི་ཧ་ཅང་མང་བར་གྱུར་གྱི་དོགས་པས་མ་བཀོད་དོ། །ཕྱིས་བྱུང་བ་མཁས་པར་རློམ་པ་ཁ་ཅིག་གིས། སྨོན་ལམ་ཆེན་པོ་བཅུའི་ཚིགས་བཅད་སྦྱོར་བ་མཐོང་སྟེ། དེས་ནི་མདོ་རྩ་འགྲེལ་མ་མཐོང་ཞིང༌། བཟང་པོ་སྤྱོད་པ་དོན་ལ་སྦྱོར་ཚུལ་ཡང་མ་གོ་བས། མིང་ཙམ་ལས་དོན་མ་རྟོགས་པའི་བཞད་གད་ཀྱི་གནས་ཀྱང་སྣང་ངོ༌། །དེ་བས་ན་རྒྱལ་སྲས་ཀྱི་སྨོན་ལམ་ཐམས་ཅད་སྨོན་ལམ་ཆེན་པོ་གྲངས་མེད་པ་འབུམ་ཕྲག་བཅུར་འདུས་ལ། དེ་ཡང་བཟང་པོ་སྤྱོད་པའི་སྨོན་ལམ་དུ་འདུས་པར་ཤེས་ནས། རྟག་ཏུ་འདི་ཉིད་ཁྱད་པར་བཞི་དང་ལྡན་པས་ཁ་ཏོན་དུ་


TNT17_Page_0896
[མ་དཔེ་གཟིགས་ན་འདིར་གནོན།]

བྱེད་པ་ལ་བརྩོན་པར་བྱ་སྟེ། ཐེག་པ་ཆེན་པོ་ལ་རྣལ་འབྱོར་དུ་བྱེད་པ་རྣམས་ཀྱིས་སོ། །འཕགས་པ་བཟང་པོ་སྤྱོད་པ་སྨོན་ལམ་གྱི་རྒྱལ་པོའི་རྒྱ་ཆེར་འགྲེལ་པ། འཕགས་མཆོག་རྣམས་ཀྱི་གསང་བའི་མཛོད་ཅེས་བྱ་བ། རྒྱལ་ཁམས་པ་ཏཱ་ར་ནཱ་ཐས་ནགས་རྒྱལ་གྱི་དབེན་གནས་ཇོ་ནང་དུ་སྨྲས་པའོ། །ལས་དང་པོ་ལ་ཕན་པའི་ཕྱིར། །ཕྱག་རྒྱ་ལྔ་ཡི་མདོ་རྣམས་ལ། །རྣམ་བཤད་ཤིན་ཏུ་གོ་སླ་ཤིང༌། །ཟབ་མོའི་དོན་དང་ལྡན་པར་སྦྱར། །འདི་ལས་དགེ་བ་གང་ཐོབ་དེས། །འགྲོ་བ་ཀུན་གྱིས་ཆོས་ཀྱི་སྐུ། །མཐའ་ཡས་སྙིང་པོ་ངེས་ཐོབ་ནས། །ཡེ་ཤེས་རྒྱ་མཚོར་རོ་གཅིག་གྱུར། ༈ ཐེག་ཆེན་ཤིན་ཏུ་རྒྱས་པའི་སྨོན་ལས་མདོའི། །དགོངས་འགྲེལ་ཆོས་སྦྱིན་མཛད་མེད་འཇོ་བའི་བར། །དབོན་སྤྲུལ་ཀརྨ་བསྟན་འཛིན་རབ་རྒྱས་གྱིས། །ཐུབ་བསྟན་འཁོར་གླིང་གི་གདན་སར་བསྒྲུབས། །སརྦ་ཐཱ་མངྒལཾ། །

བྱམས་སྨོན་འགྲེལ་བ།


TNT17_Page_0897
[མ་དཔེ་གཟིགས་ན་འདིར་གནོན།]

བྱམས་སྨོན་འགྲེལ་བ་བཞུགས།


TNT17_Page_0898
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། སངས་རྒྱས་ལ་ཕྱག་འཚལ་ལོ། །འཕགས་པ་བྱམས་པའི་སྨོན་ལམ་ཞེས་ཡོངས་སུ་གྲགས་པ་འདི་ནི། འཕགས་པ་དཀོན་མཆོག་བརྩེགས་པའི་འདུས་པ་བཞི་བཅུ་ཞེ་གཅིག་པ། འཕགས་པ་བྱམས་པས་ཞུས་པ་ཞེས་བྱ་བའི་མདོ་ན་བཞུགས་སོ། །དེ་ཡང་ཡང་དག་པར་རྫོགས་པའི་སངས་རྒྱས་ཡུལ་ཝརྒ་ན་ཆུ་སྲིན་བྱིས་པ་གསོད་ཀྱི་རིའི་ངོགས། འཇིགས་སུ་རུང་བའི་རི་དྭགས་ཀྱི་ནགས་ན་བཞུགས་ཏེ། ཀུན་ཤེས་ལ་སོགས་པ་ཉན་ཐོས་ཆེན་པོ་ལྔ་བརྒྱ་དང༌། བྱམས་པ་ལ་སོགས་པ་སེམས་དཔའ་ཆེན་པོ་ཁྲི་དང་ཐབས་ཅིག་གོ །དེ་ནས་འཕགས་པ་བྱམས་པས་བྱང་ཆུབ་སེམས་དཔའ་ཆོས་དུ་དང་ལྡན་ན། ངན་འགྲོ་སྤོང་ཞིང་སྡིག་གྲོགས་ཀྱིས་དབང་དུ་མི་འགྲོ་བར་རྫོགས་པའི་བྱང་ཆུབ་ཐོབ་པར་འགྱུར་ཞེས་ཞུས་པ་ལ། སྟོན་པ་བཅོམ་ལྡན་འདས་ཀྱིས་ཆོས་གཅིག་དང་ལྡན་ན་དེར་འགྱུར་ཏེ། ལྷག་པའི་བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་སོ། །དེ་བཞིན་དུ་སྦྱར་ཏེ་ཆོས་གཉིས་ནི་ཞི་གནས་ཚོལ་བ་དང༌། ལྷག་མཐོང་ལ་མཁས་པའོ། །གསུམ་ནི་


TNT17_Page_0899
[མ་དཔེ་གཟིགས་ན་འདིར་གནོན།]

སྙིང་རྗེ་ཆེན་པོ་དང༌། སྟོང་ཉིད་ངེས་པར་སེམས་པ་དང༌། དེ་ལ་རློམ་སེམས་མི་བྱེད་པའོ། །བཞི་ནི་ཚུལ་ཁྲིམས་ལ་གནས་པ་དང༌། ཆོས་ལ་སོམ་ཉི་མེད་པ་དང༌། སྒོམ་པ་ལ་དགའ་བ་དང༌། ཡང་དག་པར་བླང་བ་ལས་མི་གཡོ་བའོ། །ལྔ་ནི་སྟོང་ཉིད་ལ་གནས་པ་དང༌། གཞན་གྱི་འཁྲུལ་པ་མི་འཚོལ་བ་དང༌། བདག་ལ་རྟོག་པ་དང༌། ཆོས་ལ་དགའ་བ་དང༌། གཞན་ལ་ཕན་འདོགས་པའོ། །དྲུག་ནི་བརྐམ་པ་དང༌། སྡང་བ་དང༌། རྨོངས་པ་མེད་པ་གསུམ་དང༌། དྲིས་མ་ཐག་ཏུ་ལན་ཡང་དག་པར་འདོན་པ་དང༌། བསྙེན་པར་བླ་བ་དང༌། སྟོང་པ་ཉིད་ཀྱི་སྤྱོད་ཡུལ་པའོ། །བདུན་ནི་དྲན་པ་དང༌། ཆོས་ལ་མཁས་པ་དང༌། བརྩོན་འགྲུས་དང༌། དགའ་བ་དང༌། ཤིན་སྦྱངས་དང༌། ཏིང་འཛིན་དང༌། ཤེས་རབ་བོ། །འདི་བྱང་ཆུབ་ཡན་ལག་དྲུག་དང་ཆོས་ལ་མཁས་པ་སྟེ་བདུན་བགྲངས་པ། ཆོས་ལ་མཁས་པ་ནི་ཇི་སྙེད་པ་དང༌། ཤེས་རབ་ནི་ཇི་ལྟ་བའི་ཕྱོགས་ལ་གཞག་པའོ། །བརྒྱད་ནི་འཕགས་ལམ་ཡན་ལག་བརྒྱད་དོ། །དགུ་ནི་སྙོམས་


TNT17_Page_0900
[མ་དཔེ་གཟིགས་ན་འདིར་གནོན།]

པར་འཇུག་པ་དགུའོ། །བཅུ་ནི་རྡོ་རྗེ་ལྟ་བུའི་ཏིང་ངེ་འཛིན་དང༌། གནས་དང་གནས་མ་ཡིན་པ་ལ་མངོན་པར་བརྩོན་པ་དང༌། ཐབས་ཀྱི་འགྲོ་བ་དང༌། རྣམ་པར་སྣང་བྱེད་དང༌། ཀུན་ནས་སྣང་བ་དང༌། ཀུན་ཏུ་གསལ་བ་དང༌། རིན་ཆེན་ཟླ་བ་དང༌། ཟླ་བ་སྒྲོན་མེ་དང༌། རྒྱལ་མཚན་རྩེ་མོའི་དཔུང་རྒྱན་གྱི་ཏིང་ངེ་འཛིན་ཏེ་ཏིང་ངེ་འཛིན་བཅུའོ། །དེ་ནས་མགོན་པོ་བྱམས་པས་བཅོམ་ལྡན་འདས་ལ་ཕར་ཕྱིན་དྲུག་གི་སྒོ་ནས་བསྟོད་དོ། །དེ་ནས་ཀུན་དགའ་བོས་འཕགས་པ་བྱམས་པ་ལ་བསྔགས་པ་ན། སྟོན་པས་མཐུན་འགྱུར་མཛད་དེ། ད་ལྟར་ང་ལ་བསྟོད་པར་མ་ཟད་སྔོན་བསྐལ་པ་གྲངས་མེད་པ་བཅུའི་སྔོན་རོལ་ན། བཅོམ་ལྡན་འདས་སྣང་བས་རྣམ་པར་རོལ་པ་མངོན་པར་མཁྱེན་པ་ཞེས་བྱ་བ་བྱུང་སྟེ། དེའི་ཚེ་བྲམ་ཟེའི་ཁྱེའུ་བཟང་དག་ཅེས་བྱ་བ་སྐྱེད་མོས་ཚལ་དུ་འགྲོ་བས་སངས་རྒྱས་དེ་མཐོང་ནས་དད་པ་ཆེར་སྐྱེས་ཏེ། བདག་ཀྱང་ལུས་འདི་འདྲ་བར་གྱུར་ཅིག །ཅེས་སྨོན་ལམ་བཏབ་སྟེ་ས་ལ་ཉལ་ནས། སྨོན་ལམ་འདི་འགྲུབ་པར་འགྱུར་ན། སངས་རྒྱས་འདིའི་ཞབས་ཀྱིས་བདག་གི་ལུས་ལ་རེག་པར་གྱུར་ཅིག་སྙམ་དུ་འདུག་པ་ན། སྟོན་པ་དེའི་ཞབས་ཀྱི་བྲམ་ཟེ་བཟང་དག་ལ་རེག་པར་མཛད་པས། དེ་ཉིད་དུ་མི་སྐྱེ་བའི་ཆོས་ལ་བཟོད་པ་ཐོབ་བོ། །སྟོན་པ་དེས་འཁོར་རྣམས་ལའང༌། བྲམ་ཟེའི་ཁྱེའུ་འདིའི་ལུས་ལ་མ་འགོམ་ཞིག་པར་བཀའ་བསྒོས། མངོན་ཤེས་ལ་སོགས་པའི་ཡོན་ཏན་གཞན་དཔག་ཏུ་མེད་པ་ཐོབ་ནས། སྟོན་པ་དེ་ལ་ཡོན་


TNT17_Page_0901
[མ་དཔེ་གཟིགས་ན་འདིར་གནོན།]

ཏན་དུ་མས་བསྟོད་པ་བྱས་སོ། །བཟང་དག་དེ་ནི་སེམས་དཔའ་ཆེན་པོ་བྱམས་པ་འདི་ཡིན་ནོ། །དེ་ནས་འཕགས་པ་ཀུན་དགའ་བོས། བྱམས་པས་དེ་དུས་བཟོད་པ་ཐོབ་ལགས་ན། ད་དུང་སངས་མི་རྒྱ་བའི་རྒྱུ་ཞུས་པས། བྱང་ཆུབ་སེམས་དཔའ་རྣམས་ཀྱི་བཀོད་པ་ཡོངས་སུ་བཟུང་བ་གཉིས་ཡོད་དེ། དང་པོ་ནི་སེམས་ཅན་གྱི་བཀོད་པ་དང༌། སེམས་ཅན་ཡོངས་སུ་བཟུང་བ་ཡིན་ལ། གཉིས་པ་ནི་ཞིང་གི་བཀོད་པ་དང་ཞིང་ཡོངས་སུ་བཟུང་བའོ། །བྱམས་པ་དང་ང་གཉིས་ཡོངས་སུ་བཟུང་བ་གཉིས་པོ་དེའི་སྒོ་ནས་སྤྱིར་ནི་འདྲའོ། །བྱམས་པ་འདི་ནི་ཡང་དག་པར་ཞུགས་པ་སྟེ། འཕགས་པའི་ས་ཐོབ་ནས། བསྐལ་པ་བཞི་བཅུ་རྩ་གཉིས་ལོན་པའི་འོག་ཏུ། དེས་སེམས་བསྐྱེད་དེ། དེའི་དབང་དུ་བྱས་ན། བསྐལ་པ་བཟང་པོ་འདི་འདས་ནས། བསྐལ་པ་དགུ་བཅུ་རྩ་བཞི་ན། ང་སངས་རྒྱ་བར་རིགས་པ་ལས། ངས་བརྩོན་འགྲུས་དྲག་པོ་བརྩམས་ནས་མྱུར་དུ་སངས་རྒྱས་པ་ཡིན་ནོ། །མྱུར་དུ་སངས་རྒྱ་བའི་ཆོས་བཅུ་ཚན་གཉིས་གསུངས་ཏེ། དང་པོ་ནི། ནོར་དང་ཆུང་མ་དང་བུ་དང༌། མགོ་དང་མིག་དང༌། རྒྱལ་སྲིད་དང་ལོངས་སྤྱོད་དང༌། ཁྲག་དང་རྐང་རུས་དང༌། ཡན་ལག་ཐམས་ཅད་སྦྱིན་པའོ། །བཅུ་ཚན་གཉིས་པ་ནི། ཕར་ཕྱིན་གཞན་ལྔ་དང༌། སེམས་ཅན་མི་བཏང་བ་དང༌། ཐབས་མཁས་པ་དང༌། ཐམས་ཅད་ལ་སེམས་སྙོམས་པ་དང༌། སྟོང་པ་ཉིད་ཀྱི་ཆོས་རྟོགས་པ་དང༌། མཚན་


TNT17_Page_0902
[མ་དཔེ་གཟིགས་ན་འདིར་གནོན།]

མེད་སྨོན་མེད་གཉིས་གཅིག་ཏུ་སྡོམས་པའི་ཆོས་རྟོགས་པའོ། །ངས་ཚོར་བ་སྡུག་བསྔལ་དྲག་པ། ཚ་བ་རྩུབ་པ་ཉམས་སུ་མྱོང་བས་ཆོས་རྟོགས་པར་བྱས་ཏེ། དེ་ཡང་རྒྱལ་བུ་གཞོན་ནུ་ནོར་ཐམས་ཅད་སྦྱིན་པ་ཞེས་བྱ་བར་གྱུར་ནས། ནད་པ་ལ་རང་གི་ཁྲག་སྦྱིན་པས་གསོས་པ་དང༌། རྒྱལ་བུ་མེ་ཏོག་ཅེས་བྱ་བར་གྱུར་ནས། སྐྱ་བབས་ཀྱི་ནད་ཅན་ལ་རང་གི་རྐང་སྦྱིན་པས་གསོས་པ་དང༌། རྒྱལ་པོ་ཟླ་འོད་ཅེས་བྱ་བར་གྱུར་ནས། ལོང་བ་ལ་མིག་སྦྱིན་ཏེ་དེས་ཀྱང་མིག་ཐོབ་པ་རྣམས་སུ་གསུངས་ནས། དེ་དག་ལ་སོགས་པ་ཁྲག་དང་རྐང་དང་སྤྱན་སྦྱིན་པར་བཏང་བའི་རྣམ་གྲངས་རང་ཡང་མཐའ་མེད་ལ། འཕགས་པ་བྱམས་པ་འདི་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཐེག་པ་བདེ་བ་དང་ལམ་བདེ་བ་དང༌། འཇུག་པ་བདེ་བས་བྱང་ཆུབ་སྒྲུབས་ཀྱི་གོང་གི་དེ་ལྟ་བུའི་དཀའ་བ་མ་སྤྱད་དོ། །བདེ་བས་བྱང་ཆུབ་སྒྲུབ་པ་དེ་ཡང་ཐབས་ལ་མཁས་པའི་ཁྱད་པར་གཅིག་ནི་ཡིན་ནོ། །སྐབས་འདིར་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཞེས་པ་ནི། ལས་དང་པོའི་ས་དང༌། མོས་སྤྱོད་ཀྱི་སའི་གནས་སྐབས་ལ་དགོངས་པ་ཡིན་གྱི། འཕགས་པའི་ས་ཐོབ་ནས་ནི་ཁྱད་པར་མེད་དོ། །ཞེས་གོ་དགོས་སོ། །རྒྱལ་བ་མ་ཕམ་པ་འདི་ཉིད་ཀྱི་རྣམ་པར་ཐར་བ་ནི་བསམ་གྱིས་མི་ཁྱབ་པ་ཡིན་པས། མཐའ་གཅིག་ཏུ་བརྗོད་པ་མ་ཡིན་མོད། བདེ་བས་བྱང་ཆུབ་སྒྲུབ་པའི་རིགས་ཅིག་ཀྱང་ཡོད་པས། དེའི་དཔེར་བརྗོད་པ་ལྟ་བུར་


TNT17_Page_0903
[མ་དཔེ་གཟིགས་ན་འདིར་གནོན།]

མཛད་པ་ཡིན་ལ། ངེས་པར་ནི་སེམས་དཔའ་ཆེན་པོ་འདིའི་མཛད་པའི་ཕྱོགས་གཅིག་ནས། བདེ་བ་ཁོ་ནས་བྱང་ཆུབ་སྒྲུབས་པའི་སྐབས་ཅིག་ཀྱང་ཡོད་པས། དེ་ལ་དགོངས་ནས་གསུངས་པའི་ཕྱིར། དེ་ལྟར་བསྟན་པ་དེ་དྲང་དོན་ཡང་མ་ཡིན་ནོ། །དེ་བཞིན་དུ་འོ་སྐོལ་གྱི་སྟོན་པ་ལ་ཡང་སྦྱར་བར་བྱ་ལ་སངས་རྒྱས་ཐམས་ཅད་ཀྱང་དེ་དང་འདྲའོ། །ཡང་སྔར་གྱི་འཕྲོས་ལས། དེ་ནས་ཀུན་དགའ་བོས་འཕགས་པ་བྱམས་པའི་ཐབས་མཁས་ཅི་ཡིན་ཞུས་པས། ཀུན་དགའ་བོ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས། སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། ཉིན་ལན་གསུམ་མཚན་ལན་གསུམ་དུ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་སངས་རྒྱས་ཐམས་ཅད་མངོན་སུམ་དུ་བྱས་ཏེ། ཚིག་འདི་སྐད་ཅེས་སྨྲས་སོ། །སངས་རྒྱས་ཀུན་ལ་ཕྱག་འཚལ་ལོ། །ཞེས་པ་ནས། ས་བཅུ་པོ་ལ་རབ་ཏུ་གནས། ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་གང་ལ་གནས་ནས། ཐབས་ལ་མཁས་པས་ཐེག་པ་བདེ་བ་དང༌། ལམ་བདེ་བ་དང༌། འཇུག་པ་བདེ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་སྒྲུབ་པའི་ཐབས་ལ་མཁས་པ་ནི་དེ་ཡིན་ནོ། །ཞེས་གསུངས་ཏེ། སྔོན་བྱུང་རྒྱལ་བ་མ་ཕམ་པ་ལའང་དེ་བཞིན་ཡིན་མོད་ཀྱི། འདིའི་དོན་གྱི་གཙོ་བོ་རྗེས་འཇུག་ལ་དགོངས་ཏེ། ཡན་ལག་བདུན་པ་འདི་ནི་བྱང་ཆུབ་སེམས་


TNT17_Page_0904
[མ་དཔེ་གཟིགས་ན་འདིར་གནོན།]

དཔའ་རྣམས་ཀྱི་ཐབས་མཁས་ཁྱད་པར་ཅན་ཡིན་པ་དང༌། ཚེགས་ཆུང་ངུས་སྡིག་སྒྲིབ་བྱང་ཞིང་ཚོགས་རྫོགས་པའི་ཐབས་སོ། །ཞེས་གོ་བར་བྱ་བའི་དོན་ནོ། །ཡང་སྔར་གྱི་འཕྲོས་ལས། བྱམས་པ་འདི་སྔོན་སེམས་ཅན་སྨིན་པར་བྱེད་པའི་དུས་ན། རང་གི་ཞིང་ཁམས་ཀྱི་སེམས་ཅན་རྣམས་དུག་གསུམ་ཤས་ཆུང་ཞིང༌། དགེ་བ་བཅུ་ལ་ངང་གི་གནས་པའི་ཐབས་ཁོ་ན་བྱས་ལ། ངས་ནི་སེམས་ཅན་དམུ་རྒོད་རྣམས་ཁོ་ན་དངོས་སུ་འདུལ་བའི་སྨོན་ལམ་སྙིང་རྗེ་ཆེན་པོས་ཀུན་ནས་བླངས་ཏེ་བཏབ་པས་དེ་ལྟར་གྱུར་ཏོ། །དེ་ཕྱིར་ངས་ཡུལ་རྣམས་སུ་ཆོས་སྟོན་པ་ན་ཆད་པར་སྨྲ་བ་ཡིན་ནོ། །རྟག་པར་སྨྲ་བ་ཡིན་ནོ། །འཁོར་འདོད་པའོ། །འདོད་པ་ཆེའོ་ཞེས་སྐུར་པ་འདེབས་པ་དང༌། སྐུ་ལ་ས་འཐོར་བ་དང༌། ཟས་སུ་དུག་ཅན་འབུལ་བ་དང༌། མེའི་དོང་སྒྲུབས་པ་དང༌། མཛེས་ལྡན་མས་སྐུར་པ་བཏབ་པ་ཀྱང༌། ད་ནི་སྙིང་རྗེ་ཆེན་པོ་མདུན་དུ་བྱས་ནས་ཆོས་སྟོན་ཏོ། །དེ་ནས་དེ་ཉིད་ཀྱི་འཕྲོས་ཀྱི་ཞུ་ལན་དང༌། ཆོས་ཀྱི་རྣམ་གྲངས་འདིའི་མཚན་བསྟན་པ་དང༌། རྗེས་སུ་ཡི་རང་རྣམས་ཀྱིས་ཆོས་ཀྱི་རྣམ་གྲངས་དེའི་དོན་ཚན་རྫོགས་པ་ཡིན་ནོ། །ད་ནི་གཞུང་དངོས་བཤད་པར་བྱ་སྟེ། འདི་ལ་དོན་གསུམ་ནི། རྩ་བ་སེམས་བསྐྱེད་ལེན་པ། ཐབས་མཁས་ཡན་ལག་བདུན་པ། འཕེལ་བྱེད་སྨོན་ལམ་དངོས་སོ། །དང་པོ་ལ། ཕྱག་འཚལ་ཚུལ་གྱིས་སྐྱབས་སུ་འགྲོ་བ། རང་རྒྱུད་དག་བྱེད་སྟོབས་བཞིའི་བཤགས་པ། སྨོན་པ་སེམས་བསྐྱེད་དངོས་བླང་ཚུལ་ཏེ་གསུམ་ལས།


TNT17_Page_0905
[མ་དཔེ་གཟིགས་ན་འདིར་གནོན།]

དང་པོ་ནི། སངས་རྒྱས་ཀུན་ལ་ཕྱག་འཚལ་ལོ་སོགས་ཏེ། སངས་རྒྱས་ནི་སྐུ་གསུམ་གྱིས་བསྡུས་པ་དང༌། དོན་དམ་པ་དང་བརྡར་བཏགས་པའི་སངས་རྒྱས་ཐམས་ཅད་དོ། །དེ་ལ་གུས་པར་བྱ་བའི་ཡུལ་གྱི་དབང་དུ་བྱས་ནས། ཆོས་ཡང་དག་པར་བསྡུད་པ་དང༌། ཕལ་པོ་ཆེ་ལས། སངས་རྒྱས་དཀོན་མཆོག་གི་རྣམ་གྲངས་བཅུ་གསུངས་པ་སྟེ། དེ་ཡང༌། རྒྱུ་མཐུན་རྣམ་སྨིན་ལས་བྱུང་དང༌། །ཏིང་འཛིན་སྨོན་ལམ་སེམས་ཀྱི་ངང༌། །ངོ་བོ་ཉིད་ལོངས་རྫོགས་སྤྲུལ་པ། །རྟགས་དང་མདུན་གཞག་སངས་རྒྱས་སོ། །དེ་ལ་རྒྱུ་མཐུན་པའི་སངས་རྒྱས་ནི། ཕར་ཕྱིན་དྲུག་གི་སྒྲུབ་པ་ལ་སྤྱོད་པའི་བྱང་སེམས་དང༌། རྣམ་སྨིན་ལས་བྱུང་བའི་སངས་རྒྱས་ནི། ཐེག་ཆེན་གྱི་ཡིད་ལུས་དང༌། ཏིང་ངེ་འཛིན་གྱི་སངས་རྒྱས་ནི། སངས་རྒྱས་ཉིད་ཀྱི་ཏིང་ངེ་འཛིན་ལས་རང་འཁྲུངས་སུ་སྤྲུལ་པ་དང༌། སྨོན་ལམ་གྱི་སངས་རྒྱས་ནི་བྱང་སེམས་ཀྱི་སྨོན་ལམ་ལས་བྱུང་བ་དང༌། སེམས་ཀྱི་སངས་རྒྱས་ནི་བྱང་ཆུབ་སེམས་དཔས་སྤྲུལ་པ་དང༌། དེ་ནས་སྐུ་གསུམ་ཉིད་དང༌། བཏགས་པའི་སངས་རྒྱས་མཁན་པོ་དང་སློབ་དཔོན། མདུན་དུ་བཞག་པའི་སངས་རྒྱས་ནི་སྐུ་གཟུགས་རྣམས་སོ། །དྲང་སྲོང་ཡང་ཡིན་ལ་ལྷའི་མིག་དང་ལྡན་པ་ནི་བྱང་ཆུབ་སེམས་དཔའ་འཕགས་པ་རྣམས་སོ། །དྲང་སྲོང་གི་སྒྲ་རི་ཥ་ཞེས་པའི་སྒྲ་ལས་དྲངས་ན། རྀདྡྷི་ནི་རྫུ་འཕྲུལ་ཏེ་འབྱོར་བ། ཤ་ནི་པོ་ཥ་དྷུ་གསོ་ཞིང་སྦྱོང་བ་སྟེ་ནུས་མཐུའི་འབྱོར་པ་ཕུན་སུམ་ཚོགས་དང་ལྡན་ལ།


TNT17_Page_0906
[མ་དཔེ་གཟིགས་ན་འདིར་གནོན།]

རང་གཞན་གྱི་ནད་དང་སྡུག་བསྔལ་སོགས་གསོ་ཞིང་སྦྱོང་བར་བྱེད་པའི་དོན་ནོ། །ཡང་ན་རྀ་ག་བེ་ཥ་དྷ་ར་ཞེས་པ་ངེས་བརྗོད་ཆ་བྱད་འཆང་བ་སྟེ། ངེས་པ་བདེན་པ་ཁོ་ན་སྨྲ་ཞིང༌། བདེན་པར་སེམས་ལ་བདེན་པར་བྱེད་པ་ཡང་ཡིན། དགེ་སྦྱོང་ངམ་བྲམ་ཟེའི་ཆ་བྱེད་ཀྱང་འཛིན་པའི་དོན་དུ་འཆད་དེ། དེ་ལྟར་ན་མཐུ་ཕུལ་དུ་བྱུང་བ་དང་སེམས་ཅན་གྱི་སྡུག་བསྔལ་སེལ་བ་དང༌། བདེན་པའི་རང་བཞིན་ཅན་གསུམ་པོ་དེ་ཡང་གཞན་རྣམས་ལ་ནི་ཕྱོགས་མཐུན་དང་ཕྲ་མོ་ཙམ་ལས་མེད་ལ། ཇི་ལྟ་བ་བཞིན་དུ་མངའ་བ་ནི་སངས་རྒྱས་དང་བྱང་ཆུབ་སེམས་དཔའ་རྣམས་སོ། །ཆ་བྱད་འཛིན་པ་ཡང་མུ་སྟེགས་དང༌། ཉན་ཐོས་དག་གིས་ནི་ཐོར་ཚུགས་དང༌། གཡང་གཞི་དང༌། ཆོས་གོས་གསུམ་ལ་སོགས་པ། བཅོས་མས་གསར་དུ་སྒྱུར་བ་ཙམ་ཡིན་ལ། སངས་རྒྱས་རྣམས་ཀྱི་སྐུ་དང་བྱང་ཆུབ་སེམས་དཔའ་རྣམས་ཀྱི་ཡིད་ལུས་ནི་མཚན་དང་དཔེ་བྱད་ཕུན་སུམ་ཚོགས་པས་བརྒྱན་པ། རང་བཞིན་གྱིས་གྲུབ་ཅིང་ཆོས་ཉིད་ཀྱིས་ཐོབ་པ་ཡིན་ནོ། །ཡང་དྲང་པོའི་ལམ་གཞུང་སྲོང་བར་བྱེད་པའི་ཕྱིར། དྲང་སྲོང་སྟེ་དྲང་པོ་ནི་མཐའ་གཉིས་སྤངས་པའམ། བདེན་པའི་དོན་ལ་འཆད་དགོས་པའི་ཕྱིར། བདེན་པ་བཞིའི་སྒོ་ནས་གང་ཟག་གི་བདག་མེད་པ་དང༌། བདེན་པ་གཉིས་ཀྱི་སྒོ་ནས་ཆོས་ཀྱི་བདག་མེད་པའི་ལམ་སྟོན་པའོ། །ལྷ་མིག་ནི་ལྷའི་མིག་གི་མངོན་ཤེས་ཉིད་ཀྱང་ཡིན་ལ། གཞན་དུ་ན་འགྲོ་བ་དྲུག་ལས་འདས་པའི་ལྷ་ནི་ལྷ་མཆོག་སྟེ། ཐེག་ཆེན་འཕགས་


TNT17_Page_0907
[མ་དཔེ་གཟིགས་ན་འདིར་གནོན།]

པ་རྣམས་ཡིན་ལ། མིག་ནི་གསལ་བར་མཐོང་བ་དབང་པོའི་དོན་ཏེ། ཤེས་རབ་ཀྱི་དབང་པོས་ཇི་ལྟ་ཇི་སྙེད་གཟིགས་པ་དང༌། ཏིང་ངེ་འཛིན་གྱི་དབང་པོ་སྤྱོད་ཡུལ་སྣ་ཚོགས་པ་བསྒྱུར་བ་དང༌། དབང་པོ་ལྔ་གཞན་དུ་གྱུར་པ་ལ་སོགས་པའི་མངོན་ཤེས་སྣ་ཚོགས་པ་མཐུ་ཐོབ་པ་ལས་བྱུང་བ་རྣམས་སོ། །ཡང་ཞེས་པས་ཆོས་དཀོན་མཆོག་ཀྱང་ཞོར་ལ་འཕངས་ཏེ་དེ་ལྟར་ན་ཐེག་ཆེན་པའི་སྐྱབས་ཡུལ་དཀོན་མཆོག་གསུམ་པོ་དངོས་རྣམས་ཡིན་ལ། ཉན་ཐོས་རྣམས་ཞེས་པ་ནི། རྒྱུན་ཞུགས་དང་ཕྱིར་འོང་དང༌། ཕྱི་མི་འོང་དང་དགྲ་བཅོམ་པ་སྟེ། དེ་དག་ཀྱང་ཞུགས་པ་དང་འབྲས་གནས་ཀྱི་དབྱེ་བས། གང་ཟག་ཡ་བརྒྱད་དམ་སྐྱེས་བུ་ཟུང་བཞི་སྟེ། རྣམས་ཞེས་པ་མང་པོའི་ཚིག་གོ །རང་རྒྱལ་རྣམས་ཀྱང་ཉན་ཐོས་དང་ལྟ་སྤྱོད་སྒོམ་པ་གསུམ་མཐུན་པའི་ཕྱིར། དེའི་ནང་དུ་བསྡུས་པ་ཡིན་ལ། ཉན་ཐོས་ལས་རང་རྒྱལ་མཆོག་ཏུ་གྱུར་པའི་ཕྱིར། མཆོག་དམན་པར་བསྡུ་བ་མི་རིགས་སོ་སྙམ་ན། མཆོག་དམན་གྱི་ཆ་ནས་དེ་ལྟར་བདེན་ཡང་ཉན་ཐོས་མང་བའི་ཕྱིར་མང་བར་བསྡུས་པའམ། རང་རྒྱལ་རྣམས་ནི་སྤྱིར་བཏང་ན། དེ་བཞིན་གཤེགས་པའི་དངོས་ཀྱི་འཁོར་དུ་མི་འབྱུང་བར་གྲགས་པ་དང༌། དེ་མ་ཟད་བསྟན་པ་གནས་པའི་ས་ཕྱོགས་སུ་ཡང་མི་འབྱུང་ཞིང༌། ལུང་གི་ཆོས་སྟོན་པ་པོ་ཡང་མིན་པས། དགེ་འདུན་དུ་འཇོག་པའི་ཆ་ནས་ཉན་ཐོས་གཙོ་ཆེ་བ་ཡིན་ནོ། །དག་པའི་ཞིང་དང་ཐེག་ཆེན་གྱི་ལམ་དུ་


TNT17_Page_0908
[མ་དཔེ་གཟིགས་ན་འདིར་གནོན།]

ཞུགས་པ་དང༌། ཐེག་པ་ཆེན་པོ་མདོ་སྔགས་ཀྱི་སྡེ་སྣོད་ལ་དམིགས་ཏེ། དེའི་འབྲས་བུ་ཐོབ་པ་དང༌། སྤྲུལ་པའི་རང་རྒྱལ་རྣམས་ནི་དམིགས་གསལ་ཡིན་པའི་ཕྱིར་ངེས་པ་དེ་ཡང་མེད་མོད། རེ་ཞིག་ཐུན་མོང་གི་རྣམ་གཞག་གཙོ་ཆེ་བར་བྱས་པའོ། །ཐེག་དམན་འཕགས་པ་འདི་དག་འཇིག་རྟེན་གྱི་ཡོན་གནས་ཆེན་པོར་གྱུར་པ་ཉིད་ཀྱིས་ན་འཇིག་རྟེན་གྱི་ངོ་བསྲུང་བའི་ཕྱིར་དང༌། ཐེག་དམན་གྱི་རིགས་ཅན་རྗེས་སུ་བཟུང་བའི་ཕྱིར་དང༌། ཐེག་པ་ཆེན་པོར་རློམ་པའི་ང་རྒྱལ་གཞིག་པའི་ཕྱིར་དང༌། ཡོན་ཏན་ཆེ་འབྲིང་ཆུང་ངུ་དང་ལྡན་པ་གང་ལ་ཡང་དད་པ་བསྐྱེད་དགོས་པའི་ཕྱིར་དང༌། དེ་བཞིན་གཤེགས་པའི་རིགས་ཅུང་ཟད་སད་པ་ཡིན་པས་ན། རྒྱལ་བའི་སྲས་ཀྱི་ཆ་ཤས་སུ་ཆུད་པས། མ་འོངས་པ་ན་སངས་རྒྱས་སུ་འགྱུར་ངེས་པའི་ཕྱིར་དང༌། དེ་བཞིན་གཤེགས་པའི་ཞབས་འབྲིང་དུ་གནས་པ་ཡིན་པས། སངས་རྒྱས་ལ་གུས་པ་བསྐྱེད་པའི་ཕྱིར་དང༌། བཀའ་བཞིན་དུ་སྒྲུབ་པས་ན། བཟང་འདུན་ལ་གཅིག་ཏུ་ཞུགས་པའི་ཕྱིར་དང༌། ཆོས་ལ་ཐུན་མོང་དུ་ཞུགས་ནས་མཐུན་པར་བགོ་བཤའ་བྱེད་པས། སྤུན་ཟླ་ཉེ་བ་ལྟ་བུར་གྱུར་པའི་ཕྱིར་དང༌། འཕགས་པའི་ས་མ་ཐོབ་པ་རྣམས་ཀྱིས་ནི། ཡོན་ཏན་འགའ་ཞིག་གིས་ལྷག་པའི་ཕྱིར་ཡང་བྱང་ཆུབ་སེམས་དཔའ་ཉན་ཐོས་ལ་ཕྱག་འཚལ་བའི་གནས་སྐབས་ཡོད་ཅིང༌། རྒྱུ་མཚན་ཕྱི་མ་དེ་དང༌། ཐོས་པ་ལ་སོགས་པའི་ཕྱིར། སྐྱབས་སུ་འགྲོ་བའི་སྐབས་ཀྱང་ཡོད་དོ། །སེམས་ཡང་


TNT17_Page_0909
[མ་དཔེ་གཟིགས་ན་འདིར་གནོན།]

དག་པར་བསྐྱེད་པའི་དོན་དང༌། ལམ་མཐར་ཐུག་པ་ལ་དཀྲི་བའི་དོན་དང༌། འཕགས་མཆོག་རྣམས་ཀྱི་དབང་དུ་བྱས་ནས་ནི། སྐྱབས་སུ་འགྲོ་བ་ཡང་མིན་ལ་ཕྱག་འཚལ་བ་ཡང་མིན་ནོ། །དེའི་ཕྱིར་འདིར་སྨོས་པ་ཡང༌། བསོད་ནམས་འཕེལ་བའི་ཕྱིར་ཞོར་ལ་བསྟན་པ་ཡིན་གྱི། སེམས་བསྐྱེད་པའི་ཡན་ལག་ཏུ་མ་ཡིན་ནོ། །ཐུན་མོང་མ་ཡིན་པའི་སྐྱབས་དང་ཕྱག་གི་ཡུལ་བསྟན་པ་ནི་ངན་འགྲོ་ལས་ནི་ལྡོག་བགྱིད་ཅིང་སོགས་ཏེ། དེ་ཡང་བྱང་ཆུབ་ཀྱི་སེམས་ཡིན་ལ་ཚིགས་བཅད་འདི་ནི་ཕྱག་འཚལ་བའི་ཚུལ་གྱིས་སེམས་བསྐྱེད་ཀྱི་ཕན་ཡོན་དྲན་པས་དེ་ལེན་འདོད་བསྐྱེད་དགོས་པ་བསྟན་ཏོ། །དེ་ནི་སྙིང་རྗེ་ཆེན་པོ་དང་སྟོང་པ་ཉིད་ཀྱི་ཡེ་ཤེས་ཟུང་དུ་འཇུག་པ་སྟེ། རེ་ཞིག་ལམ་གྱི་དབང་དུ་བྱས་ན། སྙིང་རྗེ་ཆེན་པོ་བདག་གཞན་བརྗེ་བ་ལ་སོགས་པའི་བྱང་ཆུབ་ཀྱི་སེམས་ཀྱིས་ཀྱང༌། ལས་ངན་དཔག་ཏུ་མེད་པ་ཟད་ཅིང་ཕྱིན་ཆད་སྡོམ་པར་འགྱུར་བས། ངན་འགྲོ་ལས་ལྡོག་པ་དང༌། སེམས་བསྐྱེད་པ་ཉིད་ཀྱི་ཕན་ཡོན་ལས། ལྷ་དང་མིའི་གཙོ་བོའི་གོ་འཕང་ལན་ཤིན་ཏུ་མང་བ་ཐོབ་པར་ཡང་འགྱུར་ལ། སེམས་བསྐྱེད་ལས་ཚུལ་ཁྲིམས་ལ་སོགས་པ་དགེ་བ་མཐའ་ཡས་པ་འབྱུང་བའི་ཕྱིར། མཐོ་རིས་ཀྱི་ལམ་སྟོན་པ་དང༌། རྒ་ཤི་མེད་པའི་གནས་སངས་རྒྱས་ཀྱི་སར་འདྲེན་པར་བྱེད་པའི་ཡོན་ཏན་དང་ལྡན་པའོ། །ཡང་སྟོང་ཉིད་རྟོགས་པའི་ཡེ་ཤེས་ཀྱིས་ཀྱང༌། ངན་འགྲོ་དང་དེའི་རྒྱུ་ས་བོན་དང་བཅས་པ་སྤོང་བར་


TNT17_Page_0910
[མ་དཔེ་གཟིགས་ན་འདིར་གནོན།]

བྱེད་ཅིང༌། དེ་ལས་དགེ་བ་དཔག་ཏུ་མེད་པ་འཕེལ་བ་དང༌། རྒ་ཤི་མེད་པ་འཕགས་པའི་ས་དངོས་སུ་སྒྲུབ་པར་བྱེད་པ་ཡིན་ནོ། །ཡང་ན་སྟོང་ཉིད་རྟོགས་པ་ལས་རྟེན་ཅིང་འབྲེལ་བར་འབྱུང་བ་ཤེས་ལ། དེ་ལས་ཀུན་རྫོབ་ཏུ་ལས་འབྲེལ་ཕྱིན་ཅི་མ་ལོག་པ་རྟོགས་པས་སྔ་མ་གཉིས་དང༌། དོན་དམ་དུ་འཁོར་བ་རྩ་བྲལ་དུ་རྟོགས་པས། རྒ་ཤི་མེད་པར་འདྲེན་ཞེས་ཀྱང་སྦྱར་རོ། །ཡང་ན་བྱང་ཆུབ་ཀྱི་སེམས་ནི་དོན་དམ་པའི་ཆོས་ཉིད་ཟུང་དུ་འཇུག་པའི་ཡེ་ཤེས་ཡིན་ལ། དེ་ལ་དམིགས་ཏེ་སྒོམས་པས་ཕན་ཡོན་གསུམ་པོ་དེ་འབྱུང་ཞེས་ཀྱང་སྦྱར་རོ། །གླེགས་བམ་འགའ་ཞིག་ལས། ཐར་པའི་ལམ་ནི་རབ་སྟོན་ལ་ཞེས་འབྱུང་བ་ལ་ཁ་ཅིག་ངན་འགྲོ་ལས་ལྡོག་པའི་ནང་དུ་མཐོ་རིས་ཀྱི་ལམ་སྟོན་པ་ནི་འདུས་ལ། ཐར་པའི་ལམ་ནི་ཐེག་པ་གསུམ་གྱི་ལམ་ཐམས་ཅད་སྤྱིར་བསྟན་པ་དང༌། རྒ་ཤི་མེད་པ་ནི་སངས་རྒྱས་ཀྱི་བྱང་ཆུབ་ཁོ་ན་སྟེ། སྐྱེས་བུ་གསུམ་གྱི་རིམ་པ་དང་ཡང་སྦྱོར་བར་བཞེད་དོ། །དེ་ལ་རྒ་ཤི་མེད་པ་དངོས་ནི། དེ་ཁོ་ན་ཡིན་ཏེ། ཉན་རང་རྣམས་ཀྱིས་མ་རིག་བག་ཆགས་ཀྱི་ས་དང་ཟག་མེད་ཀྱི་ལས་མ་སྤངས་པས། ཡིད་ཀྱི་ལུས་ལ་དེ་ཉིད་དུ་གཏོགས་པའི་སྐྱེ་འཆིའི་བྱེ་བྲག་མང་དུ་ཡོད་པའི་ཕྱིར་རོ། །འོན་ཀྱང་ཁམས་གསུམ་འཁོར་བའི་སྐྱེ་འཆི་སྤངས་པའི་ཕྱིར། ཐུན་མོང་གི་གཏམ་ལ་རྒ་ཤི་མེད་པར་ཡང་གྲགས་སོ། །དེ་ལ་འདི་ནི་ཐེག་ཆེན་ཐུན་མོང་མ་ཡིན་པ་ལ་འཇུག་པའི་ཕྱིར། སྐྱེས་བུ་གསུམ་དང་སྦྱར་བ་མཐའ་གཅིག་ཏུ་དགོས་ངེས་མིན་པས། རེ་


TNT17_Page_0911
[མ་དཔེ་གཟིགས་ན་འདིར་གནོན།]

ཞིག་དཀྱུས་ནི་སྔར་བསྟན་པ་དེ་ཡིན་ནོ། །གཉིས་པ་ནི། སེམས་ཀྱི་དབང་དུ་གྱུར་པས་ན་སོགས་ཏེ་སེམས་ནི་ཀུན་གཞི་རྣམ་ཤེས་ཏེ། དེ་ལ་ལས་ཉོན་གྱི་བག་ཆགས་ཡོད་པ་མཐུ་བརྟས་པའི་དབང་ལས། ཉོན་མོངས་མངོན་གྱུར་པས་སྡིག་པ་བསགས་ཞེས་ཀྱང་སྦྱར་ལ། དངོས་སུ་ན་སེམས་ཏེ་འདོད་ཆགས་སོགས་ཉོན་མོངས་ཀྱི་དབང་དུ་གྱུར་པ་ཞེས་སྦྱར་རོ། །འདི་ལ་ཀུན་སློང་ཉོན་མོངས་དང༌། ལས་དངོས་དང༌། བཤགས་པའི་ཡུལ་དང༌། བཤགས་པ་དངོས་རྣམས་རྐང་པ་རེ་རེ་སྟེ་ཚིག་དོན་རྣམས་གོ་སླའོ། །དབང་དུ་གྱུར་ཞེས་པས་སུན་འབྱིན་པ་དང༌། སྡིག་པ་ཞེས་པས་ཡིད་དུ་མི་འོང་བ་དེ་སླར་ཟློག་པར་སྟོན། སངས་རྒྱས་ཞེས་པས་རྟེན་ཏེ་དཀར་པོའི་ས་བོན་ཤུགས་ལ་འཕངས་སོ། །གསུམ་པ་ནི། བདག་ལས་རྣམ་པ་གསུམ་གང་གི་སོགས་ཏེ་ལས་གསུམ་ནི་ལུས་ངག་ཡིད་ཀྱི་ལས་ཞེས་སྦྱར་ཡང་རུང་མོད་ཀྱི། འདིར་ནི་སྨོན་པ་སེམས་བསྐྱེད་ཀྱི་ཆོ་ག་རྒྱལ་ཚབ་བྱམས་པ་ཉིད་ཀྱི་ལུགས་ལས་འབྱུང་བའི་ཆོ་གའི་ཚིག་རྒྱས་པ་དང་དངོས་སུ་སྦྱར་རྒྱུ་ཡོད་པས། འདི་ལྟར་བཤད་པར་བྱ་སྟེ། བདག་གི་ལས་སྦྱིན་པའི་ལས་དང༌། ཚུལ་ཁྲིམས་ཀྱི་ལས་དང༌། སྒོམ་པའི་ལས་གསུམ་གྱི་བསོད་ནམས་ཏེ་དགེ་བའི་ལས་སུ་གྱུར་པ། འཁོར་བ་ཐོག་མེད་ནས་ད་ལྟ་ཡན་ཆད་དུ་བསགས་པ་ཐམས་ཅད། བྱང་ཆུབ་ཀྱི་སེམས་ཀྱིས་བཟུང་སྟེ། སངས་རྒྱས་ཀྱི་རྒྱུར་དམིགས་ནས་བཞག་པ་སྟེ། ནམ་ཞིག་སངས་རྒྱས་ཐོབ་པར་འགྱུར་


TNT17_Page_0912
[མ་དཔེ་གཟིགས་ན་འདིར་གནོན།]

བའི་རྒྱུ་ཚོགས་ཀྱི་ས་བོན་ནམ་བསྐྱེད་འཕེལ་གྱི་རྩ་བར་བྱས་ནས། དགེ་བ་འདི་ལས་དགེ་བ་གཞན་རབ་ཏུ་སྤེལ་ཏེ། བདག་སེམས་ཅན་གྱི་དོན་དུ་སངས་རྒྱས་སུ་གྱུར་ཅིག །ཅེས་བསམ་པའོ། །འདིར་གྱུར་ཅིག་ཅེས་པ་སྨོན་ལམ་གདབ་པ་ཁོ་ན་མ་ཡིན་ཏེ་སྨོན་སེམས་ལེན་པའི་ཆོ་གའོ། །དེས་ན་འདིར་ས་བོན་ཞེས་པ་ནི་རྒྱས་འགྱུར་གྱི་རིགས་ཡིན་ལ། སེམས་ཅན་གང་ཅི་ཡང་རུང་སྟེ་དེ་ཐམས་ཅད་ཀྱི་རྒྱུད་ལ་འབྲས་བུ་གསུམ་སྨིན་ཟིན་པ་དང་མ་ཟིན་པའི་དགེ་བ་རིགས་གཉིས་ཀ་ཡང་མེད་པ་ནི་མི་སྲིད་ལ། དེ་ཙམ་གྱིས་རྒྱས་འགྱུར་གྱི་རིགས་དངོས་སུ་ནི་མི་འགྱུར་མོད་དགེ་བའི་ས་བོན་དེ་སླར་ཡང་དགེ་བ་གསར་པ་གཅིག་གིས་གསོས་བཏབ་ལ། དེ་གཞན་ཕན་བྱང་ཆུབ་ཀྱི་སེམས་ཀྱིས་བཟུང་ནས། བདག་གི་དགེ་བ་གསར་རྙིང་འདི་ཀུན་གྱི་མཐུ་ལས་བདག་མ་འོངས་པ་ན་སངས་རྒྱས་སུ་གྱུར་ན་ཅི་མ་རུང༌། ད་ལྟའི་དགེ་བ་འདི་ལས་དགེ་བ་གཞན་སྤེལ་ནས། བདག་སངས་རྒྱས་སུ་བྱའོ་སྙོམ་པའི་བསམ་པ་བཅོས་མ་མ་ཡིན་པ་སྐྱེས་པ་ཚུན་ཆད་ནས། དེ་ལྟ་བུའི་དགེ་བའི་ས་བོན་དེ་ནི་རྒྱས་འགྱུར་གྱི་རིགས་ཡིན་ཏེ། ལམ་གྱི་ཆོས་ཐམས་ཅད་ཀྱི་འཕེལ་བའི་གཞི་ཡིན་ལ། དེ་ནི་བྱང་ཆུབ་མ་ཐོབ་བར་དུ་ཆུད་མི་ཟ་བ་ཤིན་ཏུ་བརྟན་པ་ཡང་ཡིན་ཅིང༌། ཕྱིན་ཆད་སེམས་བསྐྱེད་ཀྱིས་ཟིན་པ་དང་མ་ཟིན་པའི་དགེ་བ་རང་གིས་བྱས་པ་ཐམས་ཅད་ཀྱིས་དེ་རྒྱས་པར་འགྱུར་བས། དེ་རྣམས་དེ་རྒྱས་བྱེད་ཡིན་ནོ། །དེ་ལྟར་ན་སེམས་བསྐྱེད་ཀྱི་ཆོ་ག་ཆེན་པོ་


TNT17_Page_0913
[མ་དཔེ་གཟིགས་ན་འདིར་གནོན།]

ལས། བདག་མིང་འདི་ཞེས་བགྱི་བས་སྔོན་འཁོར་བ་ཐོག་མ་མེད་པ་ནས་ཐ་མ་ད་ལྟ་ལ་ཐུག་གི་བར་དུ་སྦྱིན་པ་ལས་བྱུང་བ་དང༌། ཚུལ་ཁྲིམས་ལས་བྱུང་བ་དང༌། སྒོམ་པ་ལས་བྱུང་བའི་དགེ་བའི་རྩ་བ་བདག་གིས་བགྱིས་པ་དང༌། བགྱིད་དུ་རྩལ་བ་དང༌། བགྱིད་པ་ལས་རྗེས་སུ་ཡི་རང་བ་ལས་བྱུང་བའི་དགེ་བའི་རྩ་བ་དེས། ཞེས་འབྱུང་བ་སྟེ། གཞུང་འདིར་བདག་ལས་རྣམ་པ་གསུམ་གང་གིས། བསོད་ནམས་ཚོགས་ནི་བསྐྱེད་པ་སྟེ། བདག་གི་ཀུན་མཁྱེན་ས་བོན་ཏེ། །ཞེས་བསྡུས་ཏེ་གསུངས་པར་སྣང་ལ། སྐབས་འདིར་དགེ་བའི་རྩ་བ་དང་ས་བོན་ཡང་མིང་གི་རྣམ་གྲངས་སུ་འགྱུར་རོ། །ཤིན་ཏུ་བསྡུས་པ་ལ། བདག་གི་སྦྱིན་སོགས་བགྱིས་པའི་བསོད་ནམས་ཀྱིས། ཞེས་འདོན་པ་དེའོ། །བདག་གི་བྱང་ཆུབ་ཅེས་པ་ནི། མ་འོངས་པ་ན་བདག་གིས་ཐོབ་པར་གྱུར་པའི་བྱང་ཆུབ་དེ་ནི། འཁོར་བ་ཇི་སྲིད་བར་རམ། ནམ་མཁའ་ཇི་སྲིད་བར། སྐུ་དང་ཡེ་ཤེས་དང་ཕྲིན་ལས་ཟད་པ་མེད་པར་གྱུར་ཅིག ཅེས་སྨོན་པ་སྟེ། མི་ཟད་པ་དེ་ནི་ཉན་རང་གི་བྱང་ཆུབ་ལ་མེད་པས། བླ་ན་མེད་པའི་བྱང་ཆུབ་ཀྱི་ཁྱད་ཆོས་ཡིན་ལ། དགེ་བ་དེ་ཆོས་དབྱིངས་དང་རོ་གཅིག་ཏུ་བསྔོས་པས་ཀྱང་མི་ཟད་པའི་རྒྱུ་ཐུན་མོང་མིན་པ་བྱེད་དོ། །དོན་དམ་པར་ནི་མི་ཟད་པ་ནི་ཆོས་ཀྱི་དབྱིངས་ཡིན་ལ། གདོད་མའི་ཡེ་ཤེས་ཟད་མེད་གསུམ་ལྡན་དེ་ཉིད་དུ་སྒྲུབ་པོ་རང་ཡང་ཐིམ་པར་འགྱུར་བ་ནི། ལམ་གྱི་སྐབས་སུ་བདག་


TNT17_Page_0914
[མ་དཔེ་གཟིགས་ན་འདིར་གནོན།]

ཉིད་ཀྱི་སྟེང་དུ་བསམས་ནས་ཆོས་དབྱིངས་ལ་དམིགས་ཏེ། སྤྱོད་པ་སྤྱོད་པ་ལ་རག་ལས་པ་ཡིན་པས། དེ་ཕྱིར་སེམས་བསྐྱེད་དང་བསྔོ་བ་ལ་ཡང་འདི་དྲན་པར་བྱའོ། །འདུས་མ་བྱས་ཀྱི་དགེ་བ་བསྔོས་ཤིང་དེ་ལ་སེམས་བསྐྱེད་པས། ཆོས་སྐུ་ཐོབ་པར་འགྱུར་ལ། འདུས་བྱས་ཀྱི་དགེ་བ་བསྔོས་ཤིང་དེ་ལ་སེམས་བསྐྱེད་པས། གཟུགས་སྐུ་ཐོབ་པར་འགྱུར་རོ་ཞེས་ཀྱང་བྱའོ། །ཆོ་ག་རྒྱས་པ་ལས། གོང་གི་འཕྲོས་ལ་དགེ་བའི་རྩ་བ་དེས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང༌། ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་རྣམས་ཀྱིས། སེམས་ཅན་མ་བསྒྲལ་བ་རྣམས་བསྒྲལ་བའི་ཕྱིར་དང༌། མ་གྲོལ་བ་རྣམས་དགྲོལ་བའི་ཕྱིར་དང༌། དབུགས་མ་བྱུང་བ་རྣམས་དབུགས་དབྱུང་བའི་ཕྱིར་དང༌། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདས་པའི་ཕྱིར་དུ་ཞེས་འབྱུང་བ་དེ་གཞུང་འདིར། མི་ཟད་ཤོག་ཅེས་པས་བསྟན་ཏེ། སེམས་ཅན་མཐའ་ཡས་པ་སྒྲོལ་བའི་ཕྱིར་ཟད་པར་མི་འགྱུར་བའོ། །ཤིན་ཏུ་བསྡུས་པ་ལས། འགྲོ་ལ་ཕན་ཕྱིར་ཞེས་འདོན་པ་དེའོ། །ཆོ་ག་རྒྱས་པ་ལས། ཇི་ལྟར་བྱང་ཆུབ་མཆོག་ཏུ་ཐུགས་བསྐྱེད་པ་དེ་བཞིན་དུ། བདག་མིང་འདི་ཞེས་བགྱི་བ་ཡང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །ཞེས་སོགས་ནི་གཞུང་འདིར་བདག་གི་བྱང་ཆུབ་


TNT17_Page_0915
[མ་དཔེ་གཟིགས་ན་འདིར་གནོན།]

ཅེས་པ་དང་ཤོག་ཅིག་ཅེས་པའོ། །དེ་ཡང་སེམས་བསྐྱེད་པར་བགྱིའོ་ཞེས་པ། བྱང་ཆུབ་ཐོབ་པར་ཞིག་ངེས་པར་བགྱིའོ། །དེའི་རྒྱུར་བྱང་ཆུབ་འདོད་པའི་བསམ་པ་མ་འགྱུར་བར་བགྱིའོ། །ཞེས་པའི་དོན་ཡིན་ལ། དེ་ཉིད་བྱང་ཆུབ་ཐོབ་པར་ཤོག་ཅིག་པ་དང་དོན་གཅིག་པའི་ཕྱིར་རོ། །ཤིན་ཏུ་བསྡུས་པ་ལས། སངས་རྒྱས་འགྲུབ་པར་ཤོག་ཅེས་པ་དེའོ། །འདི་ནི་སྨོན་སེམས་ལེན་པ་ཡིན་པའི་ཕྱིར། སྨོན་ལམ་གྱི་ཚུལ་དུ་བྱུང་བ་ཡིན་མོད་ཀྱང༌། སེམས་བསྐྱེད་ལེན་ཆོག་དངོས་ཡིན་པས་སྨོན་ལམ་འདེབས་པ་ཙམ་ཞིག་ཏུ་གོ་བར་མི་བྱའོ། །རྩ་བའི་ས་བཅད་གཉིས་པ། ཐབས་མཁས་ཡན་ལག་བདུན་པ་ལ། མཆོད་པ། བཤགས་པ། ཡི་རང། ཕྱག་འཚལ། བསྔོ་བ། བསྐུལ་བ། གསོལ་འདེབས་ཏེ་བདུན་ལས། དང་པོ་ནི། ཕྱོགས་བཅུ་དག་གི་ཕྱོགས་རྣམས་སུ་སོགས་ཏེ། སངས་རྒྱས་མཁྱེན་པའི་ཡི་རང་བ། ཞེས་པ་ལ། སངས་རྒྱས་ཐམས་ཅད་མཁྱེན་པ། དེའི་ཡི་རང་བ་ནི་དེ་རྣམས་དགྱེས་པར་འགྱུར་བ་སྟེ། སངས་རྒྱས་ཀྱི་ཐུགས་དགྱེས་པ་བསྐྱེད་པའི་རྒྱུར་འགྱུར་བའི་དོན་ནོ། །དོན་དུ་ནི་མཆོད་པ་ཉིད་ཀྱི་ཁྱད་པར་ལ། སངས་རྒྱས་དགྱེས་མི་དགྱེས་ཀྱི་དབྱེ་བ་མེད་ཀྱང༌། གང་གདུལ་བྱ་ཉིད་ཀྱི་སྒྲིབ་པ་ཟད་པ་དང༌། ཚོགས་རྫོགས་པའི་ཐབས་སུ་ཆེ་བ་དེ་ཉིད་ལ། དེ་བཞིན་གཤེགས་པ་རྗེས་སུ་ཡི་རང་བར་མཛད་པའོ། །དེ་ལ་བདག་ཡི་རང་བ་ནི་བདག་ཀྱང་དེ་ལྟ་བུར་འདོད་དོ་ཞེས་


TNT17_Page_0916
[མ་དཔེ་གཟིགས་ན་འདིར་གནོན།]

པའི་དོན་ཏེ། ཕྱོགས་བཅུའི་མཆོད་པ་དེ་ལྟ་བུ་བདག་གི་འདོད་པས་ཀྱང་དབུལ་ལོ། །ཞེས་པ་ནི་མཆོད་པའི་ཡན་ལག་ཉིད་ཡིན་གྱི། ཡི་རང་གི་ཡན་ལག་ནི་མ་ཡིན་ནོ། །དཔེ་གཞན་ལ་ཐམས་ཅད་མཁྱེན་པའི་ཡི་རང་བས་ཞེས་འབྱུང་བའང་དོན་འདྲའོ། །གཉིས་པ་ནི། སྡིག་པ་ཐམས་ཅད་བཤགས་སོགས། གསུམ་པ་ནི་བསོད་ནམས་ཀུན་ལ་སོགས། བཞི་པ་ནི་སངས་རྒྱས་ཀུན་ལ་སོགས། ལྔ་པ་ནི་བདག་ནི་ཡེ་ཤེས་ཏེ། ཡེ་ཤེས་མཆོག་ནི་སངས་རྒྱས་ཀུན་གྱི་ཆོས་ཀྱི་སྐུ་ཤེས་བྱ་ཀུན་ལ་ཆོས་ཉིད་དུ་ཉེ་བར་སོང་བའི་ཆོས་དབྱིངས་ཡེ་ཤེས་རྣམ་པ་ཐམས་ཅད་པའོ། །དྲུག་པ་ལ་འཚང་རྒྱ་བར་ཉེ་བའི་བྱང་ཆུབ་སེམས་དཔའ་རྣམས་སངས་རྒྱས་ཐོབ་པར་བསྐུལ་བ་དང༌། སངས་རྒྱས་མ་ཐག་པ་རྣམས་ཆོས་འཁོར་བསྐོར་བར་བསྐུལ་བའོ། །དང་པོ་ནི། ཕྱོགས་བཅུ་དག་གི་ཕྱོགས་རྣམས་ན་སོགས་ཏེ། གང་དུ་བཞུགས་པའི་གནས་དང༌། བསྐུལ་བའི་ཡུལ་ངོས་བཟུང་བ་དང༌། བྱ་བ་གང་ལ་བསྐུལ་བ་སྟེ། རིམ་པ་བཞིན་དུ་ཚིག་རྐང་དང་པོ་དང༌། ཕྱེད་དང་གཉིས་པ་གཉིས་སོ། །ས་བཅུ་དག་ལ་གནས་པ་ཞེས་པ་ནི་ས་བཅུ་པ་ལ་གནས་པ་སྟེ། སེམས་རྒྱུད་དུ་མ་དང་འབྲེལ་བའི་ས་དུ་མ་ལ་དག་ཅེས་མང་པོའི་དོན་ལ་གཉིས་པོའི་ཚིག་སྦྱར་རོ། །རེ་ཞིག་ས་དང་པོ་ནས་དགུ་པའི་བར་ལ། ས་གཞན་གྱིས་བར་ཆོད་པའི་ཕྱིར། དངོས་སུ་ནི་མ་ཡིན་ལ། བརྒྱུད་ནས་བསྐུལ་བ་ཡིན་ན་མི་འགལ་


TNT17_Page_0917
[མ་དཔེ་གཟིགས་ན་འདིར་གནོན།]

ཡང་སྐབས་ཀྱི་དོན་དུ་མི་འགྱུར་རོ། །གཉིས་པ་ལ། ཆོས་ཀྱི་འཁོར་ལོ་བསྐོར་བའི་རྒྱུ་དང༌། དོན་དངོས་དང༌། དེའི་འབྲས་བུ་སྟེ་གསུམ་གྱི་སླད་དུ་བསྐུལ་ཞིང་སྨོན་པ་ལས། དང་པོ་ནི། དོན་གཉིས་ཏེ། རྟེན་དང་དགོས་པའོ། །རྟེན་ནི་བྱང་ཆུབ་དམ་པར་སོགས་ཏེ། བདུད་ཀྱི་སྡེ་མ་ལུས་པ་བཅོམ་པ་དང༌། མངོན་པར་རྫོགས་པར་སངས་རྒྱས་ཟིན་པ་དེས་ནི། འཇིག་རྟེན་དུ་ཆོས་ཀྱི་འཁོར་ལོ་བསྐོར་བར་འགྱུར་གྱི། གཞན་དུ་ན། འགྲོ་བ་མཐའ་དག་གི་འདྲེན་པར་མི་རུང་བའི་ཕྱིར་རོ། །དགོས་པ་ནི། སྲོག་ཆགས་ཀུན་ལ་སྨན་པ་སྟེ། ཕན་པའི་སླད་དུའོ། །གཉིས་པ་དོན་དངོས་ནི། ཆོས་ཀྱི་འཁོར་ལོ་སོགས་སོ། །དེ་ལ་བྱེ་བྲག་ཏུ་སྨྲ་བའི་སྡེ་པ་ཕལ་ཆེ་བ་དག་མཐོང་བའི་ལམ་ཁོ་ན་རྟོགས་པ་དོན་གྱི་ཆོས་འཁོར་དང༌། དེ་ཐོབ་བྱེད་ཀྱི་རྐྱེན་དུ་ཆོས་བསྟན་པ་དེ་ཉིད་འབའ་ཞིག་ལུང་གི་ཆོས་འཁོར་དུ་འདོད་ན། འདིར་ནི་དེ་ལྟར་མ་ཡིན་ཏེ། གང་བཟོད་པ་ཐོབ་པ་ཡན་ཆད་ཀྱི། ཐེག་པ་ཆེན་པོའི་ལམ་ལ་འཇིག་རྟེན་ལས་འདས་པའི་སའི་རིམ་པ་མི་འདྲ་བ་རེ་གསར་ཐོབ་ཏུ་འབྱུང་བ་ཀུན་དང༌། ཉན་ཐོས་ཀྱི་འབྲས་བུ་བཞི་ལ་སོགས་པ་ཐམས་ཅད་རྟོགས་པའི་ཆོས་འཁོར་ཡིན་ལ། དེ་དང་དེ་དངོས་སུ་ལྟ་ཅི་སྨོས། རྒྱུད་ནས་ཐོབ་བྱེད་ཀྱི་ཆོས་སྟོན་པ་ཐམས་ཅད་ཀྱང༌། ལུང་གི་ཆོས་འཁོར་ཏེ། དེ་དག་ཀུན་རྫོབ་ཀྱི་ཆོས་འཁོར་རོ། །ཤེས་བྱ་ཐམས་ཅད་གཟིགས་པའི་ཡེ་ཤེས་


TNT17_Page_0918
[མ་དཔེ་གཟིགས་ན་འདིར་གནོན།]

རྒྱུན་མི་འཆད་པ་ནི་རྟོགས་པའི་ཆོས་འཁོར་དང༌། དོན་དེ་དང་མཐུན་པའི་གསུང་རབ་ཡན་ལག་རྒྱ་མཚོ་སངས་རྒྱས་ཉིད་ལ་སྣང་བ་ནི། ལུང་གི་ཆོས་འཁོར་ཏེ་འདི་གཉིས་ནི་དོན་དམ་པའི་ཆོས་འཁོར་རོ། །དེ་བཞིན་གཤེགས་པ་རྣམས་ཀྱིས་འཇིག་རྟེན་དུ་ཆོས་ཀྱི་འཁོར་ལོ་བསྐོར་བའི་ཚུལ་ཡང་རྣམ་པ་གསུམ་སྟེ། ཆེད་དུ་བྱ་བ་ཐེག་དམན་གྱི་གདུལ་བྱ་ལ། བདེན་པ་བཞིའི་ཆོས་ཀྱི་འཁོར་ལོ་དང༌། ཆེད་དུ་བྱ་བ་ཐེག་ཆེན་ལ་གསར་དུ་ཞུགས་པའི་བྱང་ཆུབ་སེམས་དཔའ་སྟོང་ཉིད་ཀྱི་རྣམ་པར་གཡེང་བ་ཅན་ལ། མཚན་ཉིད་མེད་པའི་ཆོས་ཀྱི་འཁོར་ལོ་དང༌། ཆེད་དུ་བྱ་བ་ཐེག་པ་སྣ་ཚོགས་པ་མཐའ་དག་ལ་རིམ་གྱིས་ཞུགས་ཟིན་ནས་རྒྱུད་ཤིན་ཏུ་བྱང་བའི་བྱང་ཆུབ་སེམས་དཔའ་དབང་རྣོན་མོས་པའི་དགེ་བ་ཕུན་སུམ་ཚོགས་པ་ཅན་ལ། ལེགས་པར་རྣམ་པར་ཕྱེ་བ་དང་ལྡན་པའི་འཁོར་ལོའམ། ཕྱིར་མི་ལྡོག་པ་འཁོར་ལོའི་གཏམ་གྱི་ཆོས་འཁོར་རམ། ལུང་སྟོན་པའི་འཁོར་ལོའམ། བདེ་གཤེགས་སྙིང་པོའི་གཏམ་སྟོན་པར་མཛད་དོ། །གསུམ་པ་འབྲས་བུ་ནི། ཆོས་རྔ་སོགས་ཏེ། ལྷའི་རྔ་ཆེན་གྱི་སྒྲས་ལྷ་དམག་ཞུམ་པ་རྣམས་དབུགས་འབྱིན་ཅིང་སྡུག་བསྔལ་དང་ཡིད་མི་བདེ། སེལ་བ་ཡིན་པ་ལྟར། འདིར་སངས་རྒྱས་ཀྱི་ཆོས་སྟོན་པ་ནི་ལྷའི་རྔ་བོ་ཆེའི་གཟུགས་སུ་བཀོད་དེ། །དེའི་སྒྲས་སེམས་ཅན་གྱི་སྡུག་བསྔལ་སེལ་བ་ལས། སྡུག་བསྔལ་བའི་སེམས་ཅན་ལྷའི་དམག་དཔུང་གི་གཟུགས་སུ་བཀོད་དེ། དེའི་


TNT17_Page_0919
[མ་དཔེ་གཟིགས་ན་འདིར་གནོན།]

རྣམས་སྡུག་བསྔལ་ལས་ཐར་བར་བགྱིད་པར་ཤོག་ཅིག །ཅེས་ཆོས་བསྟན་པའི་འབྲས་བུ་སེམས་ཅན་རྣམས་སྡུག་བསྔལ་ཅན་གྱི་འཁོར་བ་ལས་བསྒྲལ་ཏེ། ཐར་བའི་བདེ་ལ་འཇོག་པའོ། །བདུན་པ་ནི། བསྐལ་པ་བྱེ་བ་བསམ་ཡས་སུ། །ཞེས་སོགས་ཚིག་རྐང་བཅུ་སྟེ། འདིར་བྱེ་བ་ཞེས་པ། འབུམ་ཕྲག་བརྒྱའི་ངེས་ཚིག་སྟོན་པ་མ་ཡིན་ཏེ། སྤྱི་ཙམ་ནས་ཤིན་ཏུ་མང་པོ་གོ་བར་བྱེད་པའོ། །དེ་བས་ན་དུས་ཀྱི་ཁྱད་པར་ནི་བསྐལ་པ་སོགས། མཛད་པའི་ཁྱད་པར་ནི་ཆོས་སྟོན་པར་མཛད་ཅིང་ཞེས་སོ། །དོན་དངོས་ནི། སངས་རྒྱས་མྱ་ངན་ལས་མི་འདའ་བར་འཇིག་རྟེན་དུ་བཞུགས་པར་གྱུར་ཅིག་ཅེས་པའོ། །རྒྱུ་ཅི་ཞིག་གིས་བཞུགས་ཅེ་ན་འདོད་པའི་འདམ་དུ་སོགས་ཏེ། ཁམས་གསུམ་གྱི་སེམས་ཅན་རྣམས་རང་རང་གི་སས་བསྡུས་པའི། སྲེད་པ་སྲེད་བུ་སྟེ་ཞགས་པས་དམ་དུ་བཅིངས་འདོད་པ་སྟེ་སྲེད་པའི་ཡུལ། རྒལ་བ་དཀའ་བའི་འདམ་དང་འདྲ་བར་བྱིང་བ། འཇིགས་ཚོགས་ལ་ལྟ་བ་སོགས་གཞན་ཡང་ཉོན་མོངས་པའི་འཆིང་བ་ལྕགས་སྒྲོག་ལྟ་བུས་བཅིངས་པ་དག་ལ། རྐང་གཉིས་མཆོག་སངས་རྒྱས་རྣམས་ཐུགས་རྗེ་ཆེན་པོས་གཟིགས་པར་མཛད་དུ་གསོལ། ཞེས་རྒྱུ་སྙིང་རྗེ་ཆེན་པོ་བསྟན་ཏོ། །འདི་ལ་འདོད་ཁམས་པ་རྣམས་གཟུགས་སོགས་འདོད་པའི་འདམ་དུ་བྱིང་བར་འཐད་ཀྱང༌། ཁམས་གཞན་གཉིས་ལ་དེ་ལྟར་བརྗོད་


TNT17_Page_0920
[མ་དཔེ་གཟིགས་ན་འདིར་གནོན།]

དུ་མི་རིགས་སོ་སྙམ་ན། འདོད་པ་ནི་འདོད་ཆགས་དང་དེའི་ཡུལ་ལ་ཟེར་བས་མི་འགལ་ལོ། །དེ་ཡང་དེ་རྣམས་ཉིད་ཀྱི་སྲེད་པའི་ཡུལ་ཕུང་པོ་དང་བསམ་གཏན་འོག་མ་གསུམ་གྱི་ཚོར་བ་བདེ་བ་དང༌། བཞི་པ་དང་གཟུགས་མེད་ཀྱི་བཏང་སྙོམས་གང་ཡིན་པ་དེ་ཡང༌། དེ་རྣམས་ཉིད་ཀྱི་འདོད་བྱ་ཡིན་པའི་ཕྱིར་འདོད་པའི་སྒྲས་བསྟན་ཏོ། །ཚིགས་བཅད་འདིའི་དོགས་པ་བསལ་བའི་ཚུལ་དུ་སེམས་ཉོན་མོངས་པའི་དྲི་མས་གཡོགས་པར་བགྱིས་པའི་དབང་གིས། མཚམས་མེད་པ་ཅན་དང༌། རྐུ་འཕྲོག་དང༌། ལོག་པར་གཡེམ་པ་ཅན་དང༌། སངས་རྒྱས་ལ་སྐུར་བ་འདེབས་ཤིང་སྡིག་བསོག་པ་སོགས། མ་རུངས་པ་རྣམས་ལ་ཐུགས་རྗེས་གཟིགས་པ་མིན་ནམ་སྙམ་ན། སངས་རྒྱས་རྣམས་ནི་དེ་དག་ལ་སྨོད་པ་སྟེ། སྤོང་ཞིང་ཁྱད་པར་གསོད་པ་དང་འཁོན་པ་དང༌། མ་བརྟགས་པའི་བཏང་སྙོམས་སུ་མི་མཛད་དེ། ཉོན་མོངས་མེད་པའི་བཏང་སྙོམས་ཚད་མེད་མངའ་བས་སོ། །དེ་ཙམ་དུ་མ་ཟད་སེམས་ཅན་ཐམས་ཅད་ལ་སྙོམས་པར་བྱམས་པའི་ཐུགས་དང་ལྡན་པས། བསྐུར་བ་འདེབས་པ་དང༌། སྨོད་པ་སོགས་མེད་པར་བཞུགས་ལ། རྟག་ཏུ་བྱམས་བརྩེའི་རང་བཞིན་ཅན་གྱི་ཕྱིར་རོ། །དེ་ལྟར་སྙིང་རྗེ་དང་བཏང་སྙོམས་དང་བྱམས་པ་སྨོས་པས་དགའ་བ་ཡང་ཤུགས་ལ་བསྟན་ཏོ། །མདོར་ན་ཚིགས་བཅད་དེ་གཉིས་ཀྱིས་གཞན་དོན་དུ་འཁོད་པར་བཞུགས་པའི་རྒྱུ་ཚད་མེད་བཞི་བཤད་པའོ། །དེ་ལྟར་ན་རྟག་ཏུ་ཆོས་


TNT17_Page_0921
[མ་དཔེ་གཟིགས་ན་འདིར་གནོན།]

སྟོན་ཅིང་བཞུགས་ནས་འགྲོ་བ་མཐའ་དག་སྲིད་པའི་མཚོ་ལས་སྒྲོལ་བར་ཤོག་ཅིག་ཅེས་པའོ། །དེ་ལྟར་དགེ་བའི་རྩ་བ་དེ་རྣམས་འཕེལ་ཞིང་ཡངས་ལ་རྒྱས་པར་འགྱུར་བ་ནི། སྨོན་ལམ་རྒྱ་ཆེན་པོས་ཡོངས་སུ་བསྔོ་བ་ལ་རག་ལས་པས། རྩ་བའི་ས་བཅད་གསུམ་པ་འཕེལ་བྱེད་སྨོན་ལམ་དངོས་ནི། རྫོགས་པའི་སངས་རྒྱས་གང་བཞུགས་དང་ཞེས་པ་མན་ཆད་དོ། །དེ་ལ་མདོར་བསྟན་རྒྱས་བཤད་ཕན་ཡོན་གསུམ་ལས། དང་པོ་ནི་ཚིགས་བཅད་གཅིག་སྟེ། རྫོགས་པའི་སངས་རྒྱས་གང་ད་ལྟར་འཇིག་རྟེན་ན་བཞུགས་པ་དང༌། གང་དག་འདས་པའི་ཚུལ་བསྟན་པ་རྣམས་དང༌། མ་བྱོན་པར་འབྱོན་འགྱུར་དེ་དག་ཐམས་ཅད་ཀྱི་དགོངས་པ་གང་ཡིན་པ་དང༌། གསུང་ཇི་སྐད་གསུང་བ་དང༌། མཛད་པ་གང་མཛད་པའི་རྗེས་སུ་བདག་ཀྱང་དེ་དང་འདྲ་བར་སློབ་ཅིང༌། བྱང་ཆུབ་ཀྱི་སྤྱད་པ་སྤྱོད་པར་གྱུར་ཅིག་ཅེས་པ་སྟེ། དེ་ལ་བྱང་ཆུབ་སྤྱོད་པ་ནི་བྱང་ཆུབ་ཀྱི་དབང་དུ་བྱས་པའི་སྤྱོད་པ་སྟེ། རྫོགས་པའི་བྱང་ཆུབ་ཀྱི་རྒྱུར་གྱུར་པ་རྣམས་དང་འབྲས་དུས་ཀྱི་འཕྲིན་ལས་ཐམས་ཅད་དོ། །དེ་བས་ན་དུས་གསུམ་གྱི་སངས་རྒྱས་ཐམས་ཅད་ཀྱི་གང་མཛད་པ་དེ་བདག་གིས་ཀྱང་བྱེད་ཅིང༌། བྱང་ཆུབ་ཀྱི་སྤྱོད་པ་ཐམས་ཅད་སྤྱོད་པར་གྱུར་ཅིག་ཅེས་པ་འདིར་ནི་སྨོན་ལམ་ཐམས་ཅད་འདུས་པ་ཡིན་ནོ། །གཉིས་པ་རྒྱས་བཤད་ལ། སྤྱོད་པའི་གཙོ་བོ་དང་འབྲེལ་བའི་སྨོན་ལམ། དོན་དམ་སྟོང་ཉིད་དང་འབྲེལ་བའི་སྨོན་ལམ་


TNT17_Page_0922
[མ་དཔེ་གཟིགས་ན་འདིར་གནོན།]

ཕྱིན་དྲུག་རྒྱས་པར་བསྟན་པའི་སྨོན་ལམ། འབྲས་བུ་མཐར་ཐུག་གི་སྨོན་ལམ་མོ། །དང་པོ་ནི། ཕ་རོལ་ཕྱིན་དྲུག་སོགས་ཏེ་བྱང་ཆུབ་སེམས་དཔའི་སྤྱོད་པ་མཐའ་དག་འདུས་པའི་ཕ་རོལ་ཏུ་ཕྱིན་པ་དྲུག་རྫོགས་པར་བགྱིད་པ་དང༌། གཞན་དོན་དུ་འགྱུར་བའི་ཕྱོགས་ནས་བསྡུ་བའི་དངོས་པོ་བཞིས་འགྲོ་བ་དྲུག་གི་སེམས་ཅན། ཐར་བ་ལ་འགོད་པར་བགྱིད་པ་དང༌། མཐུ་སྟོབས་ཀྱི་ངོ་བོ་མངོན་པར་ཤེས་པ་དྲུག་པོ་དག་མངོན་སུམ་དུ་བགྱིས་ནས། བདག་བླ་ན་མེད་པའི་བྱང་ཆུབ་ལ་རེག་པར་གྱུར་ཅིག་ཅེས་པ་སྟེ། ཕྱིན་དྲུག་བསྡུ་དངོས་མངོན་ཤེས་རྣམས་སྤྱོད་པའི་གཙོ་བོར་བསྟན་པ་ཡིན་ནོ། དེ་ལ་ཕྱིན་དྲུག་དང་བསྡུ་དངོས་ནི་ངོ་བོའི་སྒོ་ནས་ཐ་དད་པ་མ་ཡིན་ཀྱང། དབྱེ་སྒོ་ཐ་དད་པ་ཙམ་སྟེ། བྱང་ཆུབ་ཀྱི་སྤྱོད་པ་ལ་བདག་ཉིད་ཉམས་ལེན་གྱི་སྒོ་ནས་དབྱེ་ན་ཕར་ཕྱིན་དྲུག གཞན་དོན་སྤྱོད་ཚུལ་གྱི་སྒོ་ནས་དབྱེ་ན་བསྡུ་དངོས་བཞི། གཞན་དོན་གྱི་རྒྱུའི་རབ་དབྱེ་ལོགས་སུ་བསྟན་ན་མངོན་ཤེས་དྲུག་གོ །དེའི་དང་པོ་མི། སྦྱིན་པའི་ཕ་རོལ་ཏུ་ཕྱིན་པ་དང༌། ཚུལ་ཁྲིམས་ཀྱི་དང༌། བཟོད་པའི་དང༌། བརྩོན་འགྲུས་ཀྱི་དང༌། བསམ་གཏན་གྱི་དང༌། ཤེས་རབ་ཀྱི་ཕ་རོལ་ཏུ་ཕྱིན་པའོ། འདི་དག་ཀྱང་རྒྱ་ཆེ་བ་དང་ཟང་ཟིང་མེད། དོན་ཆེ་བ་དང་མི་ཟད་པ། བྱང་ཆུབ་སེམས་དཔའ་རྣམས་ཀྱི་ནི། ཡོན་ཏན་བཞིར་ནི་ཤེས་པར་བྱ། ཞེས་གསུངས་ཏེ། སྦྱིན་པ་ལ་སོགས་ལ་རེ་རེ་བཞིན་དུ། ཆེས་དཀའ་བ་རྣམས་


TNT17_Page_0923
[མ་དཔེ་གཟིགས་ན་འདིར་གནོན།]

ཀྱང་བྱེད་དགོས་ན་གཞན་རྣམས་སྨོན་ཀྱང་མ་དགོས་པས་རང་རང་གི་བསླབ་པའི་ཡུལ་མཐའ་དག་ལ་སློབ་པ་རྗེས་སུ་སྒྲུབ་པ་ནི། རྒྱ་ཆེ་བའི་ཡོན་ཏན་ནོ། །ལན་དང་རྣམ་སྨིན་ལ་རེ་བ་དང༌། བདག་གཅེས་འཛིན་ལ་སོགས་པ་ཉོན་མོངས་པའི་བསམ་པ་སྤང་བ་ནི། ཟང་ཟིང་མེད་པའི་ཡོན་ཏན་ནོ། །རང་གིས་བགྱིས་པའི་དགེ་བའི་རྩ་བ་ཡང་གཞན་དོན་དུ་སྒྱུར་བ་དང༌། གཞན་རྣམས་སྤྱིན་སོགས་ལ་བཀོད་ནས། སྟོང་པ་ཉིད་དང་བྱང་ཆུབ་ཀྱི་སེམས་དང༌། མོས་པ་དང༌། ཡི་རང་དང༌། བསྔོ་བ་བྱེད་དུ་འཇུག་པ་ནི་གཞན་དོན་དང་འབྲལ་བའི་ཕྱིར་དོན་ཆེ་བའི་ཡོན་ཏན་དང༌། སྦྱིན་པ། སྦྱིན་བྱ། ལེན་པོ་སོགས་དྲུག་ཀར་སོ་སོའི་འཁོར་གསུམ་རང་བཞིན་མི་དམིགས་པའི་ཡེ་ཤེས་ཀྱིས་ཟིན་པ་ནི། མི་ཟད་པའི་ཡོན་ཏན་ཏེ་ལས་དང་པོ་པ་ནས་ཡོན་ཏན་བཞི་ལྡན་དུ་འབད་རྩོལ་གྱིས་སྒྲུབ་པ་ནི། ཕ་རོལ་ཏུ་ཕྱིན་པའི་རྒྱུའམ་སྒྲུབ་པ་ཡིན་ལ། ས་ཐོབ་ནས་ཡོན་ཏན་བཞི་ལྡན་རང་ཤུགས་སུ་འབྱུང་བ་ནི། ཟབ་ཅིང་རྒྱ་ཆེ་དཔག་པར་དཀའ་བ་སྟེ། ལམ་གྱིས་བསྡུས་པའི་ཕར་ཕྱིན་དངོས་སོ། །སྡོམ་ནི། འགལ་དང་དང་པོར་འཇུག་པ་དང༌། །འཕེལ་དང་ཆེན་པོ་འགྲུབ་པ་དང༌། །མཐར་ཐུག་འགྲོ་ས་མི་མཐུན་ཕྱོགས། འདི་དག་གི་བར་དུ་གཅོད་པའི་ཆོས་ལ་སེར་སྣ་ལ་སོགས་པ་དྲུག་ནི་འགལ་བ་མི་མཐུན་པའི་ཕྱོགས་སོ། ཕྱི་བཤོལ་དང༌། ཆེན་པོ་


TNT17_Page_0924
[མ་དཔེ་གཟིགས་ན་འདིར་གནོན།]

ལ་ཞུམ་པ་དང༌། ཆུང་ངུ་ལ་བརྙས་པ་དང༌། ལེ་ལོ་ནི་དང་པོར་འཇུག་པ་ལ་མི་མཐུན་པའི་ཕྱོགས་སོ། །ཆོག་ཚོད་དུ་སེམས་པ་ནི་འཕེལ་བ་ལ་མི་མཐུན་པའི་ཕྱོགས་སོ། །ལན་དང་གྲགས་པ་དང་རྣམ་སྨིན་ལ་རེ་བ་དང༌། ཉེ་དུ་འདི་ཕྱིར་དང༌། འགྲན་པའི་ཕྱིར་དང༌། གཞན་ལ་བརྙས་པ་ལ་སོགས་པ་ཉོན་མོངས་ཅན་དང་འབྲེལ་བ་ནི། འབྲས་བུ་ཆེན་པོ་འགྲུབ་པ་ལ་མི་མཐུན་པའི་ཕྱོགས་སོ། །རང་དོན་ཡིད་བྱེད་དང་མཚན་མར་འཛིན་པ་ནི། མཐར་ཐུག་འགྲུབ་པ་ལ་མི་མཐུན་པའི་ཕྱོགས་སོ། །དེ་ལྟར་མི་མཐུན་པའི་ཕྱོགས་ལྔ་པོ་དེ་ཡོངས་སུ་སྤངས་པ་ནི། ཟང་ཟིང་མེད་པའི་དོན་ལས་རྣམ་པར་ཕྱེ་སྟེ་བཤད་པ་ཡིན་ལ། ཕར་ཕྱིན་ཀྱི་སྒྲུབ་པར་འགྱུར་པ་ལ་འདི་དག་སྤངས་པ་གལ་ཆེའོ། །དེ་དག་གི་ལྡོག་ཕྱོགས་སོ་སོའི་གཉེན་པོ་བསྟེན་ན་དེ་དག་མངོན་འགྱུར་བ་འགག་པའི་ཕྱིར། འཕགས་ལམ་མ་ཐོབ་ཀྱི་བར་དུ་གཉེན་པོ་ཡིད་བྱེད་བག་ཡོད་པས་མགོ་བསྡུས་ཏེ། ཡང་ཡང་སྒྲིམ་པ་ལ་བསླབ་པར་བྱའོ། །བསྡུ་བའི་དངོས་པོ་བཞི་ནི། ཟང་ཟིང་གི་སྦྱིན་པ་རྣམ་པར་དག་པ། སྡིག་བྲལ་ཆོས་ལྡན་གྱི་སྒོ་ནས་སེམས་ཅན་ཚིམ་པར་བྱེད་པ་སྦྱིན་པ་དང༌། རང་རང་གི་བསམ་པ་དང་མཚུངས་པར་དམ་པའི་ཆོས་སྟོན་པ་སྙན་པར་སྨྲ་བ་དང༌། གཞན་རྣམས་ཕྱིན་དྲུག་སོགས་དགེ་བ་བྱེད་དུ་འཇུག་པ་དོན་སྤྱོད་པ་དང༌། བདག་ཉིད་ཀྱང་དེ་ལྟ་བུའི་ཆོས་སྤྱོད་ལས་མི་འདའ་ཞིང་རྟག་ཏུ།


TNT17_Page_0925
[མ་དཔེ་གཟིགས་ན་འདིར་གནོན།]

བཙོན་པ་ནི་དོན་མཐུན་པའོ། །མངོན་པར་ཤེས་པ་དྲུག་ནི། ལྷའི་མིག་དང༌། ལྷའི་རྣ་བ་དང༌། ཕ་རོལ་སེམས་ཤེས་དང༌། སྔོན་གནས་རྗེས་དྲན་དང༌། རྫུ་འཕྲུལ་གྱི་ཡུལ་དང༌། ཟག་པ་ཟད་པའོ། །དེ་ལྟར་ཡང༌། སྐྱེ་དང་ངག་སེམས་དགེ་དང་མི་དགེ་བསྐྱེད། །དེའི་གནས་དང་ངེས་འབྱུང་མངོན་སུམ་དང༌། །ཤེས་པ་ཀུན་འགྲོ་རབ་ཏུ་དབྱེ་བཅས་ལ། །ཐོགས་མེད་བརྟན་པ་ཐོབ་པའི་མཐུ་ཡིན་ནོ། །ཞེས་སོ། །དེ་ལྟར་བྱང་ཆུབ་སེམས་དཔའི་མཐུ་དེ་ཡང༌། ངོ་བོ་རྒྱུ་འབྲས་ལས་ལྡན་འཇུག་པའི་དབྱེ་བས་རྒྱས་པར་རྟོགས་པར་བྱའོ། །དེ་ལྟར་ཡང་དཱི་བཾ་ཀ་ར་ཤྲཱི་ཛྙཱ་ནས། ཇི་ལྟར་འདབ་གཤོག་མེད་པ་ཡི། །བྱ་ནི་མཁའ་ལ་འཕུར་མི་ནུས། །དེ་བཞིན་མངོན་ཤེས་སྟོབས་བྲལ་བས། །འགྲོ་བའི་དོན་བྱེད་ནུས་མ་ཡིན། །མངོན་ཤེས་ལྡན་ན་ཉིན་མཚན་གྱི། །འགྲོ་བའི་དོན་ནི་གང་བྱེད་པ། །མངོན་ཤེས་དང་ནི་བྲལ་བ་ལ། །སྐྱེ་བ་བརྒྱར་ཡང་ཡོད་མ་ཡིན། །ཞེས་གསུངས་ཏེ། འགྲོ་བའི་དོན་སྤྱོད་པའི་མཐུའི་གཙོ་བོ་ནི་མངོན་ཤེས་རྣམས་སོ། །དེའི་ཕྱིར། མངོན་ཤེས་དྲུག་པོ་མངོན་བགྱིས་ནས། །བླ་མེད་བྱང་ཆུབ་རེག་གྱུར་ཅིག །ཅེས་པའི་ཚིག་འདི་ནུས་པ་ཅན་དུ་ཤེས་པར་བྱའོ། །གཉིས་པ་དོན་དམ་སྟོང་ཉིད་དང་འབྲེལ་བའི་སྨོན་ལམ་ནི། ཚིགས་བཅད་གཉིས་ལས། དང་པོ་ནི། མ་སྐྱེས་པ་དང་སོགས། དེ་ཡང་ཆོས་ཅན་ཀུན་རྫོབ་པའི་


TNT17_Page_0926
[མ་དཔེ་གཟིགས་ན་འདིར་གནོན།]

ཆོས་ལ་དམིགས་ནས་བདེན་པར་འཛིན་པ་ནི་ཆོས་ཀྱི་བདག་འཛིན་ཡིན་ལ། དེ་ལྟ་བུའི་ཆོས་གང་ཡང་དངོས་པོའི་གནས་ཚུལ་ལ་ཡོད་མ་མྱོང་བ་ནི་ཆོས་ཀྱི་བདག་མེད་དོ། །དེའི་དབང་དུ་བྱས་ནས་འདིར་བཤད་པ་དེ་ལ་མ་སྐྱེས་པ་ནི་མ་འོངས་པའོ། །མི་འབྱུང་བ་ནི་འདས་པའོ། །འདས་མ་འོངས་ཀྱི་དངོས་པོ་གཉིས་ནི་རང་བཞིན་གྱིས་མེད་པའོ། །གལ་ཏེ་འདས་པའི་དངོས་པོ་ཡོད་ན་ནི། ས་བོན་ཞིག་པ་ལས་ཀྱང་མྱུ་གུ་སྐྱེ་སྲིད་པར་ཐལ་བ་དང༌། མིར་སྐྱེས་པ་ད་ལྟར་བའི་དུས་ན་སྐྱེ་བ་སྔ་རོལ་ཀྱི་དམྱལ་བའི་སྡུག་བསྔལ་དང་ལྷའི་བདེ་བ་ཡང་ཡོད་པར་འགྱུར་ཞིང༌། དེ་ཡོད་ན་མྱོང་བར་ཡང་ཐལ་བར་འགྱུར་ཏེ། མྱོང་བ་པོ་མེད་པའི་བདེ་སྡུག་སྲིད་པའི་ཕྱིར་རོ། །མ་འོངས་པ་བདེན་པར་གྱུར་ན་ནི་དེ་རྒྱུ་སྔོན་སོང་ཡིན་པར་ཐལ་བར་འགྱུར་བ་དང༌། མ་སྐྱེས་པར་འཇིག་པར་ཡང་ཐལ་བར་འགྱུར་ཏེ། སྐད་ཅིག་རེ་རེར་འཇིག་པའི་ཕྱིར་རོ། །རང་བཞིན་ཏེ་ཀུན་གཞི་རྣམ་པར་ཤེས་པ་ཡང་བདེན་པར་མེད་ལ། གནས་ཏེ་སྣོད་ཀྱི་འཇིག་རྟེན་ཡང་གནས་ཚུལ་ལ་མ་གྲུབ་པ་དང༌། རྣམ་རིག་སྟེ་སེམས་དང་སེམས་བྱུང་དང་དེ་དག་རང་རང་གི་རྣམ་པ་དང་བཅས་པ་ཡང་ངོ་བོས་གྲུབ་པ་མེད་པ་དང༌། དངོས་པོ་སྟེ་ཕྱི་རོལ་ཀྱི་དོན་ཡང་རང་བཞིན་གྱིས་མ་གྲུབ་པའོ། །འདིར་མ་མཆིས་ཞེས་པ་ནི་མེད་པའི་ཚིག་གཙོ་བོ་ལ་སྨྲ་བའི་ཞེ་ས་བརྗོད་པའོ། །དེ་ལ་ཕྱི་རོལ་ཀྱི་དོན་མེད་དེ། ཕྱོགས་ཀྱི་


TNT17_Page_0927
[མ་དཔེ་གཟིགས་ན་འདིར་གནོན།]

ཆའི་དབྱེ་བས་བརྟགས་ན་གཅིག་དང་དུ་མ་གང་དུའང་མི་འགྲུབ་པའི་ཕྱིར་རོ། །རྒྱུ་མཚན་དེའི་ཕྱིར་སྣོད་ཀྱི་འཇིག་རྟེན་ཡང་མ་གྲུབ་ལ། རྣམ་རིག་སྣང་བ་རྣམས་ཀྱང་བདེན་པར་མི་འགྲུབ་སྟེ། སྔོན་པོ་མི་བདེན་པ་ཉིད་ཀྱི་ཕྱིར། སྔོན་པོར་སྣང་བ་ཡང་འཁྲུལ་བ་སྟེ། མོ་གཤམ་གྱི་བུ་མེད་པ་ཉིད་ཀྱི་ཕྱིར། དེ་མཐོང་བའི་རྣམ་པ་ཡང་རྫུན་པ་ཁོ་ན་ཡིན་པ་བཞིན་ནོ། །དེ་ལྟར་གཟུང་བའི་རྣམ་པ་མེད་པའི་ཕྱིར། རྣམ་པ་དེ་ལྟ་བུ་འཛིན་མཁན་ནམ་མཐོང་བ་པོ། སེམས་དང་སེམས་ལས་བྱུང་བ་ཡང་མེད་དེ། གང་ཡུལ་བརྫུན་པ་དེའི་ཡུལ་ཅན་མཐའ་དག་ཀྱང་བརྫུན་པ་ཡིན་དགོས་པ། རྨི་ལམ་གྱི་གཟུགས་དང་དེ་མཐོང་བའི་ཤེས་པ་བཞིན་ནོ། །ཀུན་གཞི་རྣམ་པར་ཤེས་པ་ཡང་བག་ཆགས་ཐམས་ཅད་པ་ཡིན་པའི་ཕྱིར་ཤེས་པ་ཉིད་ཀྱི་ཆ་དུ་མ་ནས་རྣམ་པར་དབྱེ་ན། རགས་པ་བཞིན་དུ་གཅིག་དང་དུ་མར་མ་གྲུབ་པའི་ཕྱིར་དང༌། རྣམ་ཤེས་ཀྱི་ཕྱོགས་ཀྱིས་བསྡུས་པའི་ཤེས་པ་ཐམས་ཅད་སྐད་ཅིག་མའི་འཕྲེང་བ་ཡིན་པ་ལས། སྐད་ཅིག་མ་ཡང་ཐོག་མཐའ་བར་གསུམ་དུ་དབྱེ་བ་ལ་སོགས་པས་རྣམ་པར་ཕྱེ་ན། རང་གི་ངོ་བོས་གྲུབ་པ་མི་སྲིད་པའི་ཕྱིར། ཐམས་ཅད་ཀྱང་མིང་ཙམ་བརྡ་ཙམ་འཁྲུལ་བ་ཙམ་སྣང་བ་ཙམ་བཏགས་པ་ཙམ་ཁོ་ན་ལས་དོན་དམ་པར་ཡོད་པ་ནི་མ་ཡིན་ནོ། །དེ་དག་ལས་འདས་པ་དང་མ་འོངས་པ་དང་ཕྱི་རོལ་ཀྱི་དོན་སྣོད་ཀྱི་འཇིག་རྟེན་དང་བཅས་པ་བཀག་པས་ནི། ཀུན་བརྟགས་


TNT17_Page_0928
[མ་དཔེ་གཟིགས་ན་འདིར་གནོན།]

མཚན་ཉིད་ངོ་བོ་ཉིད་མེད་པ་དང༌། ཀུན་རྫོབ་བདེན་པའི་དོན་ཡང་མ་གྲུབ་པར་བསྟན་པ་ཡིན་ལ། རྣམ་རིག་དང་རང་བཞིན་མེད་པར་བསྟན་པས། གཞན་དབང་སྐྱེ་བ་ངོ་བོ་ཉིད་མེད་པ་སྟེ། ཀུན་རྫོབ་རྟེན་འབྲེལ་གྱི་སྐྱེ་བ་ཙམ་ལས་གཞན་དོན་དམ་དུ་བསྟན་པ་མེད་དོ། །དེ་ལྟར་ཀུན་བརྟགས་དང་གཞན་དབང་གཉིས་ཀྱིས་སྟོང་པའི་སྟོང་གཞིའི་ཡེ་ཤེས་ནི། སྟོང་པའི་ཆོས་ཞེས་བྱ་ལ། ཡོངས་གྲུབ་དོན་དམ་པའི་བདེན་པ་གཟུང་འཛིན་གཉིས་སྟོང་ཆོས་ཀྱི་དབྱིངས་བདེ་བར་གཤེགས་པའི་སྙིང་པོའོ། །འདིར་སྟོང་པའི་ཆོས་ཞེས་སྟོང་པ་ཁོ་ནའི་སྒྲ་མ་སྨོས་པར་ཆོས་ཀྱི་ཚིག་ངེས་བཟུང་དུ་མཛད་པ་ནི། མེད་དགག་གི་སྒྲ་འཇུག་པའི་ཡུལ་སྤྲོས་བྲལ་ཙམ་གྱི་སྟོང་ཉིད་དགག་པའི་ཕྱིར་རོ། །དེ་ལ་ཆོས་ནི་ཆོས་ཉིད་ཀྱི་ཟླས་ཕྱེ་བའི་ཆོས་དང་ཆོས་ཁམས་ལྟ་བུ་ལ་མི་བྱ་སྟེ། ཡོངས་གཅོད་དུ་གྲུབ་པའི་དོན་ནོ། །དགག་པའི་རྣམ་གྲངས་དྲུག་དང༌། སྒྲུབ་པའི་མཚན་ཉིད་གཅིག་སྟེ། དོན་བདུན་དང་ལྡན་པའི་ཚིགས་བཅད་འདིས་ནི་ཆོས་ཀྱི་བདག་མེད་རྒྱས་ཤིང་གསལ་བར་བསྟན་པ་ཡིན་ནོ། །ད་ནི་གང་ཟག་གི་བདག་མེད་པའི་དབང་དུ་བྱས་ནས། སངས་རྒྱས་དྲང་སྲོང་སོགས་ཏེ། བྱང་ཆུབ་སེམས་དཔའ་འཕགས་པ་རྣམས་ནི་སྔར་བསྟན་པ་ལྟར་དྲང་སྲོང་ཞེས་བྱ་ལ། དེའི་ཕྱིར་ཡང་དག་པར་རྫོགས་པའི་སངས་རྒྱས་ནི་དྲང་སྲོང་ཆེན་པོའོ། །སངས་རྒྱས་ཀྱང་ཡིན་ལ་དྲང་སྲོང་ཀྱང་ཡིན་པས་སངས་རྒྱས་


TNT17_Page_0929
[མ་དཔེ་གཟིགས་ན་འདིར་གནོན།]

དྲང་སྲོང་ཆེན་པོ་སྟེ། དེས་ཇི་ལྟར་ཐུགས་སུ་ཆུད་པ་དེ་ལྟ་བུར་གདུལ་བྱ་རྣམས་ལ་བསྟན་པ་ལྟར། བདག་མེད་པའི་དོན་རྟོགས་པར་ཤོག་ཅེས་པ་སྟེ། གང་ཟག་གི་བདག་མེད་པའི་ཆོས་ཀྱི་གཏམ་ནི། ཐེག་པ་ཆེ་ཆུང་གིས་བསྡུས་པ་སངས་རྒྱས་ཀྱི་གསུང་ཡིན་ནོ་ཅོག་ལས་ནི་བསྟན་ཅིང༌། སངས་རྒྱས་ཀྱི་བསྟན་པ་ལས་གཞན་དུ་གྱུར་པ་ནི། གང་ལས་ཀྱང་མི་འབྱུང་བས། སངས་རྒྱས་ཀྱི་བསྟན་པ་ཡིན་མིན་གྱི་ཁྱད་པར་འབྱེད་ཆོས་ཀྱི་གཙོ་བོ་ཡིན་པའི་ཕྱིར། འདི་ལ་སངས་རྒྱས་ཀྱི་གསུངས་པ་ལྟར་ཞེས་སྨོས་སོ། །ཆོས་ཀྱི་བདག་མེད་ཉེ་ཚེ་བ་ནི་ཕྱི་རོལ་ལ་ཡང་ཡོད་ལ། ཆོས་ཀྱི་བདག་མེད་རྫོགས་པ་ནི། དེ་བཞིན་གཤེགས་པ་ཁོ་ནའི་སྤྱོད་ཡུལ་ཡིན་མོད་ཀྱི། ཐེག་པ་དམན་པའི་གང་ཟག་རྗེས་སུ་འཛིན་པ་ལ་མི་དགོས་པ་དང༌། ཐེག་དམན་གྱི་སྡེ་སྣོད་ཕལ་ཆེར་ལས་མ་གསུས་པར་ཡང་སྣང་ངོ༌། །དེས་ན་ཆོས་ཀྱི་བདག་མེད་ཉེ་ཚེའི་དབང་དུ་བྱས་ན། སྟོན་པའི་གསུང་ལས་གཞན་ལ་ཁྱབ་ཆེས་ལ། ཡོངས་རྫོགས་ཀྱི་དབང་དུ་བྱས་ན། སྡེ་སྣོད་མཐའ་དག་ལ་མ་ཁྱབ་པས། སྟོན་པའི་བསྟན་པ་དར་ཁྱབ་མཉམ་གྱི་བདག་མེད་ནི་གང་ཟག་གི་བདག་མེད་དོ། །དེ་ལ་བདག་འཛིན་ལྷན་སྐྱེས་སོགས་གང་ཅི་ཡང་རུང་བས། སེམས་ཅན་དང་བདག་ཅེས་བྱ་བ་ལ་ལུས་སེམས་འདུས་པའི་ཚོགས་པ་ལ་དམིགས་ནས་ཚོགས་ཙམ་དེ། ལུས་སེམས་ཀྱི་གནས་སྐབས་དང་ཆ་ཤས་སྣ་ཚོགས་པ་དེ་རྣམས་ལས་


TNT17_Page_0930
[མ་དཔེ་གཟིགས་ན་འདིར་གནོན།]

ལོགས་སུ་ཚུགས་ཐུབ་ཏུ་ཡོད་པར་འཛིན་ལ། བདག་འཛིན་ཀུན་བརྟགས་ཏེ་གྲུབ་མཐའ་ངན་ལས་བརྟགས་པ་ལས་བྱུང་བས་ནི། དེའི་སྟེང་དུ་གཞན་ཡང་ཁྱད་པར་དུ་མ་དང་བཅས་ཏེ་འདོགས་སོ། །བློ་འཁྲུལ་བ་དེ་དག་གིས་བཏགས་པའི་བཏགས་ཆ་དེ་གདོད་མ་ནས་ཡོད་མ་མྱོང་བ་ནི་གང་ཟག་གི་བདག་མེད་ཅེས་བྱའོ། །བདག་མེད་དེ་ནི་ནང་པའི་ཆོས་ཁོ་ན་ལས་བཤད་པའོ། །དེ་ལ་སེམས་ཅན་དང༌། སྲོག་དང༌། གང་ཟག་དང༌། གསོ་བ་དང༌། ང་བདག་རྣམས་སྤྱིར་བཏང་ལ་མིང་གི་རྣམ་གྲངས་སུ་བསྟན་ཅིང༌། དེ་དང་དེར་འཛིན་པ་ཡང་སྤྱིར་བཏང་ལ་མིང་གི་རྣམ་གྲངས་སོ། །ཞིབ་མོར་ན་ཁྱད་པར་ཅུང་ཟད་ཡོད་དེ། སེམས་ཅན་ལ་སོགས་པ་བཞི་ནི་ཚོགས་དྲུག་གི་ཡུལ་དུ་གསལ་བར་སྣང་དུ་རུང་ལ། ང་བདག་ནི་རྣམ་པར་རྟོག་པ་ཁོ་ནས་བཏགས་པ་ལས་གཞན་སྣང་དུ་མེད་དོ། །དེ་ཡང་དོན་དམ་པར་ན་སེམས་ཅན་ལ་སོགས་པ་ཡང་མེད་ཅིང༌། ཡང་དག་ཀུན་རྫོབ་ཏུ་ཡང་དེ་དག་མེད་ལ། བཏགས་པ་ཙམ་གྱི་ངོ་བོར་ནི་བདག་ཀྱང་ཡོད་པ་མ་ཡིན་ནམ་ཁྱད་པར་ཅི་ཡོད་སྙམ་ན། མ་བརྟགས་མ་དཔྱད་པའི་ངོར་ལས་འབྲས་ཀྱི་རྟེན་ཙམ་གྱི་བདག་ནི་སེམས་ཅན་ལ་སོགས་པ་དང་མཚུངས་པར་བཏགས་ཡོད་ཙམ་དུ་ཁས་བླངས་པ་ཡིན་མོད་ཀྱི། བདག་འཛིན་གྱིས་ཇི་ལྟར་གཟུང་བ་ལྟར་གྱི་དབང་དུ་བྱས་ན། བདག་འཛིན་ཀུན་བཏགས་ཀྱིས་བཟུང་བ་ལྟར་ལྟ་ཅི་སྨོས། བདག་འཛིན་ལྷན་སྐྱེས་ཀྱིས་བཟུང་བ་


TNT17_Page_0931
[མ་དཔེ་གཟིགས་ན་འདིར་གནོན།]

ལྟར་ཡང་སྲིད་པ་མ་ཡིན་ནོ། །དེའི་ཅིའི་ཕྱིར་ཞེ་ན། ལྷན་སྐྱེས་ཀྱིས་ཀྱང་རྟག་ཅིག་རང་དབང་ཅན་གྱི་དོན་འཛིན་པའི་ཕྱིར་རོ། །འདིར་སེམས་ཅན་དང་བདག་དང་སྲོག་དང་གང་ཟག་དང་གསོ་བ་པོ་རྣམས་ནི་འཇིག་རྟེན་ལྷན་སྐྱེས་ཀྱི་བློ་ལ་ཡང༌། བདག་གི་རྣམ་གྲངས་སུ་འགྱུར་ཏེ། རང་དང་གཞན་སེམས་ཅན་དུ་འཛིན་པའི་ཕྱིར་དང༌། བདག་ནི་ཕ་མས་གསོའོ། །བདག་གིས་ནི་རྟ་དང་བ་གླང་ལ་སོགས་པ་གསོས་སོ་ཞེས་དང༌། ཤི་བ་ན་སྲོག་གི་དབང་པོ་ཡོངས་སུ་འགགས་པ་ལ། བདག་ཆད་དོ། །ལྷ་སྦྱིན་ལྟ་བུ་སེམས་ཅན་འདི་མེད་པར་གྱུར་ཏོ་སྙམ་པ་དང༌། བདག་ལ་ནི་ཤེས་རབ་ཀྱང་ཡོད། འདོད་ཆགས་ཀྱང་ཡོད། ལུང་ཡང་ཡོད། ཤ་ཁྲག་ཀྱང་ཡོད་ཅེས་གང་བའི་རྣམ་པ་དང༌། ཤེས་རབ་ལ་སོགས་པ་འདིས་བྱ་བ་འདི་དང་འདི་བྱེད་དོ་ཞེས། ཟག་པའི་རྣམ་པ་སྟེ་གང་ཟག་གི་སྐྱེས་བུར་སེམས་པའི་ཕྱིར་དང༌། རང་ངམ་གཞན་གྱིས་ཀྱང་རུང་སྟེ། རྒྱལ་སིང་ལ་བསམས་ནས་ལས་འདི་བྱས་སོ། །ཐར་བའི་ཆེད་དུ་དཀའ་ཐུབ་འདི་སྤྱོད་དོ་ཞེས། སེམས་པ་པོར་ཡང་འདོད་པའི་ཕྱིར་རོ། །ཡང་གྲུབ་མཐས་བཏགས་པའི་དབང་དུ་བྱས་ན། སེམས་ཅན་དང་གང་ཟག་ཙམ་དུ་ནི་རང་སྡེ་སངས་རྒྱས་པ་ལ་གྲགས་པའི་དབང་དུ་བྱས་པ་དང༌། སྲོག་ནི་གཅེར་བུ་པ་སོགས་ལ་གཙོ་བོར་གྲགས་པ་དང༌། གསོ་བ་ནི་དབང་ཕྱུག་སྨྲ་བ་རྣམས་ལ་གཙོ་བོར་གྲགས་པ་དང༌། བདག་ནི་མུ་སྟེགས་བྱེད་ཐམས་ཅད་


TNT17_Page_0932
[མ་དཔེ་གཟིགས་ན་འདིར་གནོན།]

ལ་གྲགས་པའོ། །དེ་ལ་སེམས་ཅན་གྱི་གོ་དོན་ནི་སེམས་པར་བྱེད་པ་པོའོ། །དེ་ཡང་ཡོད་པ་མ་ཡིན་ཏེ། སེམས་པ་པོ་སེམས་པ་ལས་གཞན་དུ་ཡོད་ན། སེམས་པ་མ་ཡིན་པའི་སེམས་པ་པོ་ནི་སེམས་པ་དང་ཕན་ཚུན་དུ་གནས་ན། གཅིག་གིས་གཅིག་ལ་བྱ་བ་མི་མཐོང་བས་སེམས་པ་པོའི་ཡུལ་ལ་སེམས་པར་མི་ནུས་སོ། །ཅི་སྟེ་རྒྱུ་འབྲས་སུ་ཡོད་པར་གྱུར་ན་ནི། གཅིག་ཡོད་པའི་ཚེ་ཅིག་ཤོས་མེད་པས་སེམས་པ་པོས་སེམས་པར་ག་ལ་ནུས། ཅི་སྟེ་ངོ་བོ་གཅིག་ཡིན་ན་ནི་སེམས་དང་སེམས་པ་མི་རྟག་པས་སེམས་པ་པོ་ཡང་མི་རྟག་པར་འགྱུར་བའི་ཕྱིར། རང་གི་ངོ་བོས་མི་འགྲུབ་བོ། །འདིར་སེམས་པ་པོ། ཞེས་པས་སེམས་པ་ན། ཡུལ་ལ་རྗེས་སུ་འགྲོ་བའི་ཤེས་པ་སྤྱི་མིང་ཡིན་གྱི། སེམས་བྱུང་སེམས་པ་ཁོ་ན་ལ་བརྗོད་པ་ནི་མ་ཡིན་ནོ། །སྲོག་ཅེས་བྱ་བ་འདི་ཡང་ཅི་ཞིག བདག་དང་གཅིག་པར་ནི་མི་རུང་སྟེ། སྲོག་ལ་ནི་སྐྱེ་བ་དང་ཆད་པ་ཡོད་ལ། བདག་ལ་ནི་སྐྱེ་བ་དང་ཆད་པ་མི་རུང་བའི་ཕྱིར་རོ། །ཅི་སྟེ་ཐ་དད་པར་གྱུར་ན་ནི། ལུས་ཀྱི་ཡན་ལག་ལ་སོགས་པ་དང་འདྲ་བའི་ཕྱིར། སྲོག་ནི་དེ་ཁོ་ན་ཉིད་དུ་མི་རུང་ཞིང༌། གཅེས་པར་བྱ་བ་ཡང་མ་ཡིན་ནོ། །སྲོག་ནི་ཚེ་ཡིན་དྲོད་དང་ནི། །རྣམ་ཤེས་བརྟེན་གང་ཡིན་པའོ། །ཞེས་ཉན་ཐོས་སྡེ་པ་རྣམས་ཀྱི་འདོད་པ་ལྟར་ཡང་མི་རུང་སྟེ། རྣམ་པར་ཤེས་པ་གང་ལ་བརྟེན་པའི་གནས་ཉིད་སྲོག་ཡིན་ན་ནི། ལུས་སམ་སེམས་


TNT17_Page_0933
[མ་དཔེ་གཟིགས་ན་འདིར་གནོན།]

ལས་གཞན་དུ་མེད་ལ། ཅི་སྟེ་རྣམ་པར་ཤེས་པ་སྐྱེ་བ་དང་གནས་པའི་རྒྱུ་བྱེད་པ་ཙམ་ལ་རྟེན་ཞེས་བརྗོད་ན་ནི། དམིགས་རྐྱེན་དང༌། བདག་པོའི་རྐྱེན་དང༌། རྒྱུ་རྐྱེན་དང༌། དེ་མ་ཐག་རྐྱེན་བཞི་ལས་མ་འདས་ཀྱང༌། དེ་དག་གང་ཡང་སྲོག་ཏུ་མི་རུང་ཞིང་ལས་འབྲས་ཀྱི་རྟེན་དུ་ཡང་མི་རུང་ངོ༌། །དྲོད་དང་དྲོད་ཀྱི་གནས་ནི་ལུས་ལས་གཞན་དུ་མི་རུང༌། ཚེ་ཡང་ལུས་དང་སེམས་ཀྱི་གནས་སྐབས་ལས་གཞན་དུ་མ་དམིགས་པའི་ཕྱིར། སྲོག་ཅེས་བྱ་བ་ཡང་བཏགས་པ་ཙམ་མོ། །གང་ཟག་ཅེས་བྱ་བ་ལ་རྒྱུའམ་ལས་ཀྱི་གང་ཞིང༌། གནས་སྐབས་གཞན་དུ་འབྲས་བུ་མྱོང་བའི་ཚུལ་གྱིས་ཟག་པ་ནི། གང་ཟག་གི་དོན་ཏེ། ལས་བྱེད་པ་པོ་ཡང་དེ་ཡིན་རྣམ་སྨིན་མྱོང་བ་པོ་ཡང་དེ་ཡིན་པའི་དོན་ཡིན་ནོ། །འདི་ནི་མི་རུང་སྟེ། ལས་བྱེད་པ་པོ་དེ་ཉིད་མྱོང་བ་པོ་ཡིན་ན་ནི། ལས་བྱེད་པའི་དུས་ཉིད་དུ་རྣམ་སྨིན་མྱོང་བར་ཐལ་བ་དང༌། མྱོང་བ་པོ་ཉིད་བྱེད་པ་པོ་ཡིན་ན་ནི་འབྲས་བུ་མྱོང་བའི་དུས་སུ་ཡང་ལས་དེ་ཉིད་བྱེད་པར་ཐལ་བ་དང༌། ཅི་སྟེ་མི་བྱེད་པ་དང་མི་མྱོང་ཡང༌། བྱེད་པ་པོ་དང་མྱོང་བ་པོ་ཡིན་ན་ནི། ཐམས་ཅད་ཀྱང་བྱེད་པ་པོ་དང༌། མྱོང་བ་པོར་འགྱུར་རོ། །དེ་བས་ན་གང་ཟག་ཀྱང་དངོས་པོར་མ་གྲུབ་སྟེ་བློ་བཏགས་པ་ཙམ་དུ་ཟད་དོ། །ཞི་བ་ལྷས་ཀྱང༌། རྒྱུད་གཅིག་ལ་ནི་བརྟེན་ནས་སུ། །བྱེད་པོ་སྤྱོད་པོ་ཞེས་བྱར་བསྟན། །ཞེས་སོ། །གསོ་བ་ཞེས་བྱ་བ་འདི་ཡང་ཅི་ཞིག ཟས་དང༌། གནས་


TNT17_Page_0934
[མ་དཔེ་གཟིགས་ན་འདིར་གནོན།]

དང༌། ཡོ་བྱད་དང༌། རང་གི་རིགས་འདྲ་ཕྱི་མས་སྔ་མའི་རྒྱུན་འཐུད་པར་བྱེད་པ་ནི། གསོ་བའོ་ཞེས་བྱའམ། བྱེད་པ་པོ་གཅིག་པུ་ཞིག་གིས་བདག་ཅེས་བྱ་བ་གཅིག་པུ་ཞིག་གསོ་བར་བྱེད། སྔ་མ་ལྟར་ན་རང་སྡེ་རྣམས་ཀྱི་འདོད་པ་ཡིན་མོད་ཀྱི། རྒྱུ་སྣ་ཚོགས་པས་འབྲས་བུ་སྣ་ཚོགས་པ་བསྐྱེད་དེ་དངོས་པོའི་རྒྱུན་ཙམ་གནས་པ་ལ། གསོ་བ་པོར་བཏགས་པའི་ཕྱིར། འདི་ནི་རྫས་སུ་མེད་ཅིང་བཏགས་པ་ཁོ་ནར་གྲུབ་ལ། གཉིས་པ་ལྟར་ན་ནི་མི་རུང་སྟེ། དེ་ལྟ་བུའི་གསོ་བྱ་གསོ་བྱེད་གཉིས་ཀ་ཡང་སྣང་དུ་རུང་ལ་ཚད་མས་མ་དམིགས་པའི་ཕྱིར་རོ། །བྱེད་པ་པོས་གསོ་བ་ཡང་མི་རུང་སྟེ། བྱེད་པ་པོ་ཉིད་རང་དབང་འབྱོར་བ་ནི་ཡིན་ལ། གནས་པར་འདོད་པ་ཡིན་ན་ནི། གསོ་མི་དགོས་པར་གནས་པ་ཉིད་བྱེད་ལ་རག་གིས། ཐབས་གཞན་གྱིས་བསྐྱེད་ནས་ཐབས་གཞན་གྱིས་གནས་པར་བྱེད་དགོས་ན་ནི། རང་དབང་འབྱོར་བ་མིན་པའི་ཕྱིར་བྱེད་པ་པོར་མི་རུང་ངོ༌། །བདག་གཅིག་པུ་མ་འདྲེས་པ་ཡིན་ན་ནི། གསོ་བྱ་མི་རུང་སྟེ། དེ་ལ་ཕ་རོལ་པོས་རྫས་དང་བྱ་བ་མི་འཇུག་པའི་ཕྱིར་རོ། །མི་འཇུག་ཀྱང་གསོ་བྱར་རུང་ན་ནི། ནུབ་ཕྱོགས་ཀྱི་ཆུ་རྒྱུན་གྱིས་ཤར་ཕྱོགས་ཀྱི་ལོ་ཐོག་གསོ་བར་ཐལ་བར་འགྱུར་རོ། །ཅི་སྟེ་གཞན་གྱི་རྫས་དང་བྱ་བ་འདྲེ་ན་ནི། མི་རྟག་པ་དང་དུ་མ་ཉིད་ཀྱི་ཕྱིར། གཅིག་པུ་དང་མ་འདྲེས་པ་ཉམས་ལ་བཏགས་ངོ་ཙམ་དུ་ཡང་འགྱུར་རོ། །དེ་བཞིན་དུ་བདག་ཅེས་བྱ་བ་ཡང་མ་གྲུབ་སྟེ། ལུས་སེམས་ལས་ཐ་དད་ན་ནི། ལུས་


TNT17_Page_0935
[མ་དཔེ་གཟིགས་ན་འདིར་གནོན།]

སེམས་ཀྱི་འགྱུར་བ་ལས་བདག་བདེ་སྡུག་ཏུ་འདོད་པ་དང་འགལ་ལ། ཅི་སྟེ་གཅིག་ན་ནི་ལུས་སེམས་མི་རྟག་ཅིང་དུ་མ་ཡིན་པས་བདག་ཀྱང་ད་ལྟར་འགྱུར་དགོས་ན། དེ་ནི་རྟག་པ་དང་གཅིག་པུར་འདོད་པས་འགལ་ལོ། །ཅི་སྟེ་མི་རྟག་ཅིང་དུ་མ་ཡིན་ཡང༌། བདག་ཏུ་མི་འགལ་སྙམ་ན། དེ་དག་ནི་ལུས་སེམས་ལ་སོགས་པའི་དངོས་པོ་ཉིད་ཡིན་གྱི། དངོས་པོ་རྣམས་པས་གཞན་དུ་བློས་འཛིན་པ་དང་འགལ་བ་དང༌། བདག་ཅེས་བྱ་བའི་མིང་ལོགས་པ་བཏགས་པ་ལ་དགོས་པ་མེད་པ་དང༌། བྱེད་པ་པོ་དང་མྱོང་བ་པོར་མ་གྲུབ་པ་དང༌། རྫས་སུ་ཡོད་པར་མི་རུང་བའི་ཕྱིར་རོ། །འདིར་ཡང་བདག་མ་མཆིས་པའི་ཆོས་ཞེས་པ་ནི། བདག་མེད་པས་ཁྱད་དུ་མར་བྱས་པའི་ཆོས་ཞེས་པ་སྟེ། མེད་དགག་ཙམ་བཀག་ནས། དགག་གཞིའི་ཆོས་ཉིད་ཡོད་པར་བསྟན་པའོ། །ང་བདག་ལ་མཚན་ཉིད་དངོས་མི་སྲིད་ཀྱང༌། བདག་འཛིན་གྱིས་ཇི་ལྟར་བཏགས་པའི་བཏགས་ཆ་ང་བདག་གི་མཚན་ཉིད་དུ་འདོད་ཅིང་རློམ་པར་འཛིན་སྟངས་ཀྱི་བཟུང་ཆ་སེམས་ཅན་གྱི་མཚན་ཉིད་ནས་བདག་རང་གི་མཚན་ཉིད་ཀྱི་བར་དུ་བཀག་པས། ང་བདག་རྣམ་པ་ཐམས་ཅད་དུ་ཁེགས་པ་ཡིན་ལ། དེ་ལྟར་ན་དགག་བྱ་མཚན་ཉིད་ལྔ་བཀག་ཅིང༌། སྒྲུབ་ཕྱོགས་ཀུན་རྫོབ་ཏུ་ལས་འབྲས་ཀྱི་རྟེན་བཏགས་ཡོད་ཙམ་དང༌། དོན་དམ་དུ་ཆོས་དབྱིང་ཙམ་གནས་པ་སྟེ། དོན་དྲུག་དང་ལྡན་པའི་ཚིགས་བཅད་


TNT17_Page_0936
[མ་དཔེ་གཟིགས་ན་འདིར་གནོན།]

༼འདི་ན་མ་དཔེ་མེད༽འདིས་གང་ཟག་གི་བདག་མེད་རྒྱས་པར་བསྟན་ཏོ། །གསུམ་པ་ཕར་ཕྱིན་དྲུག་གི་སྨོན་ལམ་ལ། མཚན་ཉིད་ཐུན་མོང་པ་བཤད་པ་དང༌། མཚན་གཞི་ཐུན་མོང་མ་ཡིན་པ་བཤད་པའོ། །དང་པོ་ནི། བདག་འཛིན་བདག་གིར་འཛིན་པ་ཡི་སོགས་ཏེ། བདག་དང་བདག་གིར་འཛིན་པས་ཀུན་ནས་བླངས་པའམ། ལན་དང་རྣམ་སྨིན་ལ་རེ་བ་སོགས་སྤངས་ཤིང༌། དངོས་པོ་སྟེ་སྦྱིན་སོགས་དྲུག་པོའི་བྱ་བྱེད་ལས་གསུམ་པ་གང་ལ་ཡང་མངོན་པར་ཞེན་པས་མི་གནས་པར་ཕར་ཕྱིན་དྲུག་ལ་སྤྱོད་པའོ། །འཛིན་པ་ཡི་ཞེས་པ་ནི། བདག་དང་བདག་གིར་འཛིན་པ་ཡི་ཆོས་དང༌། ཞེས་པའི་དོན་ཡིན་པས། བདག་འཛིན་གྱི་ཆོས་ལ་གནས་པར་སྤྱོད། དངོས་པོར་འཛིན་པའི་ཆོས་ལ་མི་གནས་པར་སྤྱོད་ཅེས་པའི་དོན་ནོ། །བདག་དང་དངོས་པོར་མི་འཛིན་ཡང༌། དགོས་པ་དང་བྱེད་ལས་སེམས་ཅན་ཀུན་ལ་ཕན་པའི་སླད་དུ་སྤྱོད་དེ། སྙིང་རྗེ་ཆེན་པོས་ཀུན་ནས་བླངས་བས་སོ། །སེར་སྣ་མེད་པའི་སྦྱིན་གཏོང་ཞེས་པ་ནི་སྦྱིན་པ་ལ་ཐོག་མའི་གསལ་བྱེད་དུ་སྦྱར་བ་སྟེ། འཆལ་ཁྲིམས་སྤངས་ཤིང་ཉོན་མོངས་ཀྱི་གཉེན་པོ་བསྟེན་པའི་ཚུལ་ཁྲིམས་དང༌། མི་བཟོད་པའི་འགྱུར་བ་སྤངས་པའི་བཟོད་པ་དང༌། ལེ་ལོ་སྤངས་པའི་བརྩོན་འགྲུས་དང༌། རྣམ་པར་གཡེང་བ་སྤངས་པའི་བསམ་གཏན་དང༌། ཤེས་རབ་འཆལ་བ་སྤངས་པའི་ཤེས་རབ་རྣམས་ཤུགས་ལ་བསྟན་པ་ཡིན་


TNT17_Page_0937
[མ་དཔེ་གཟིགས་ན་འདིར་གནོན།]

ནོ། །ཚིགས་བཅད་འདིས་གོང་དུ་བཤད་པའི་ཡོན་ཏན་བཞི་ལྡན་ཉིད་བསྟན་ཏེ། སྦྱིན་གཏོང་ཞེས་པས་རྒྱ་ཆེ་བ་དང༌། བདག་འཛིན་སོགས་དང་སེར་སྣ་མ་མཆིས་ཞེས་པས་ཟང་ཟིང་མེད་པ་དང༌། སེམས་ཅན་ཞེས་སོགས་དོན་ཆེ་བ་དང༌། དངོས་པོ་སོགས་ཀྱིས་མི་ཟད་པ་བསྟན་ཏོ། །གཉིས་པ་ལ་དྲུག་ལས་སྦྱིན་པ་ནི། དངོས་པོ་དངོས་པོ་མ་མཆིས་པས་སོགས་ཏེ། འདིར་དངོས་པོ་ནི་སྦྱིན་པའི་དངོས་པོ་སྟེ། ཟང་ཟིང་གི་ཡོ་བྱད་དང༌། གཞན་ལ་བསྟན་པར་བྱ་བའི་ལུང་གི་ཆོས་ལ་སོགས་པའོ། །དེ་ལྟར་དངོས་པོར་སྣང་བ་རྣམས་ལ་དངོས་པོའི་ངོ་བོ་མ་གྲུབ་སྟེ། སྒྱུ་མ་ལྟར་རྟོགས་པའི་ཏིང་ངེ་འཛིན་དང༌། དགེ་བའི་རྩ་བ་དད་སྨོན་ལམ་གྱི་སྟོབས་ཚོགས་པ་ལས། བདག་གི་ཟང་ཟིང་དང་ཆོས་ཀྱི་ལོངས་སྤྱོད་དཔག་ཏུ་མེད་པ་འབད་རྩོལ་མེད་པར་ལྷུན་གྱིས་གྲུབ་པར་གྱུར་ཅིག་ཅེས་སྦྱིན་པའི་རྒྱུ་ཡོ་བྱད་སྒྲུབ་པ་དང༌། དངོས་པོ་ཐམས་ཅད་རྣམ་པར་འཇིག་པ། ངེས་པར་འབྲལ་བ་ཆོས་ཉིད་ཡིན་པས། གཞན་ལ་སྦྱིན་ན་ལེགས་ཞེས་པ་སྟེ། སྤྱོད་འཇུག་ལས། ཐམས་ཅད་གཏོང་བར་ཆབས་ཅིག་ལ། །སེམས་ཅན་རྣམས་ལ་གཏོང་བ་མཆོག །ཅེས་པ་བཤད་པ་དང་འདྲའོ། །འདི་ལ་རྣམ་པར་འཇིག་པའི་དངོས་ཀུན་གྱིས། །ཞེས་བསྒྱུར་ན་གོ་བདེ་ལ། དེ་ལྟར་ན་སྦྱིན་པ་རྣམ་པ་གསུམ་ལ། བསླབས་པས་སྦྱིན་པའི་ཕ་རོལ་ཏུ་ཕྱིན་པ་ཤོག་ཅིག་པའོ། །གཉིས་པ་ཚུལ་ཁྲིམས་ནི།


TNT17_Page_0938
[མ་དཔེ་གཟིགས་ན་འདིར་གནོན།]

ཁྲིམས་ཀྱི་སོགས་ཏེ། ཚིག་རྐང་གསུམ་པོ་རིམ་ཅན་དུ། ཉེས་སྤྱོད་སྡོམ་པ་དང༌། དགེ་བ་ཆོས་སྡུད་དང༌། སེམས་ཅན་དོན་བྱེད་གསུམ་བསྟན་པར་འཆད་མཁན་ཡོད་པ་ལྟར་བྱས་ཀྱང་རུང་ལ། ཡང་ན་ཚུལ་འཆལ་གྱི་སྐྱོན་མེད་ཅིང༌། ལྟུང་བའི་རྒྱུ་ཉོན་མོངས་པ་རྣམ་པར་དག་པ་དང༌། བདེན་ཞེན་གྱི་རློམ་སེམས་མེད་པ་ཞེས་སྦྱར་རོ། །འདིར་མཁས་མཆོག་འགའ་ཞིག་ཚུལ་ཁྲིམས་ཁྲིམས་ཀྱི་སྐྱོན་མེད་ཅིང༌། །ཞེས་བསྒྱུར་ན་ལེགས་སོ་ཞེས་གསུང་ངོ༌། །གསུམ་པ་བཟོད་པ་ནི། ས་འམ་ཡང་ན་སོགས་ཏེ་ས་ལྟ་བུ་ནི། གནོད་པ་ལ་ཇི་མི་སྙམ་པའི་བཟོད་པ་དང༌། མེ་ལྟ་བུ་ནི་སྡུག་བསྔལ་དང་ལེན་གྱི་བཟོད་པ་སྟེ། དཀའ་སྤྱད་ལ་སྤྲོ་བ་དང་འབད་པའི་ཕྱིར་དང༌། ཆོས་ལ་ངེས་པར་སེམས་པ་ལ་དབྱེ་བ་གཉིས་ཀྱི། ཀུན་རྫོབ་ལ་དམིགས་པ་ནི། ཆུ་དང་འདྲ་སྟེ་རྒྱ་ཆེ་བའི་ཆོས་ཀྱི་མཚན་ཉིད་ཤེས་པ་ལ། རྣོ་བར་འཇུག་པའི་ཕྱིར་རོ། །དོན་དམ་ལ་དམིགས་པ་ནི། རླུང་གི་ཁམས་ལྟར་སྤྲོས་པའི་མཚན་མ་ལ་མི་གནས་ཤིང་བཟོད་པའོ། ཁྲོ་བ་མེད་པ་ནི་བཟོད་པ་གསུམ་ག་ཡིན་ཏེ་ཡུལ་རྣམས་ལ་སྤོང་འདོད་ཀྱི་ཁྲོ་བ་མེད་པའོ། །ཡང་ན་གནོད་པ་ལ་ཇི་མི་སྙམ་པའི་དབང་དུ་བྱས་ནས་སྒྲ་ཇི་བཞིན་པ་སྟེ་ཁོང་ཁྲོ་རྗེས་འབྲང་དང་བཅས་པ་མེད་པའོ། །བཞི་པ་བརྩོན་འགྲུས་ནི། བརྩོན་འགྲུས་བརྩམས་པའི་སོགས་ཏེ། རྒྱལ་སྲས་བརྩོན་འགྲུས་བརྩམས་པ་ནི་སྦྱོར་བའི་དུས་སུ་གོ་ཆའི་བརྩོན་འགྲུས་རྒྱ་ཆེན་པོ་ལ་


TNT17_Page_0939
[མ་དཔེ་གཟིགས་ན་འདིར་གནོན།]

བློ་བརྟན་ཅིང་སྤྲོ་བ་དང༌། དངོས་གཞིའི་དུས་སུ་སྦྱོར་བའི་བརྩོན་འགྲུས་ལེ་ལོ་མེད་ཅིང་གུས་སྦྱོར་རྟག་སྦྱོར་གྱི་བརྩོན་འགྲུས་བརྩམས་པ་དང༌། རྗེས་ཀྱི་དུས་སུ་སླར་མི་ལྡོག་པའི་བརྩོན་འགྲུས་ལུས་སེམས་སྟོབས་དང་ལྡན་པ་སྟེ་ངལ་བ་མེད་པའོ། །ལྔ་པ་བསམ་གཏན་ནི། སྒྱུ་མ་ལྟ་བུ་སོགས་ཏེ། དེ་ཡང་སྒྱུ་མ་ལྟ་བུའི་ཏིང་ངེ་འཛིན་ནི། གཙོ་བོར་ཀུན་རྫོབ་རྟེན་འབྲེལ་མཐའ་དག་གཟིགས་པའི་ཡེ་ཤེས་རྩེ་གཅིག་པ་དང༌། དཔའ་བར་འགྲོ་བའི་ཏིང་ངེ་འཛིན་ནི། ངོ་བོ་སྟོང་ཉིད་སྙིང་རྗེ་དབྱེར་མེད་བྱེད་ལས་རང་སྣང་གི་སྐུ་དང༌། གཞན་སྣང་གང་ལ་གང་འདུལ་གྱི་ཆོ་འཕྲུལ་སྟེན་པའི་ཡེ་ཤེས་རྩེ་གཅིག་པ་དང༌། རྡོ་རྗེ་ལྟ་བུའི་ཏིང་ངེ་འཛིན་ནི། སྒྲིབ་གཉིས་བག་ཆགས་དང་བཅས་པ་བཅོམ་ནས། ཇི་ལྟ་བ་དང་ཇི་སྙེད་པའི་གནས་མཐའ་དག་གཟིགས་པའི་ཡེ་ཤེས་རྩེ་གཅིག་པའོ། །འདི་དག་རྒྱས་པ་རང་རང་གི་མདོ་ལ་ཤེས་པར་བྱ་ལ། ས་མཚམས་ནི་རྗེས་མཐུན་པ་ལམ་དམའ་མོ་ནས་ཡོད་ཅིང༌། སོ་སོའི་སྒྲུབ་པ་ལ་ནི་ལས་དང་པོ་པས་ཀྱང་འཇུག་དགོས་མོད། དངོས་ཀྱི་དབང་དུ་བྱས་ན་ས་བརྒྱད་པ་དང༌། བཅུ་པ་ཙམ་པོ་དང༌། རྒྱུན་མཐའ་རྣམས་སོ། །དྲུག་པ་ཤེས་རབ་ནི། རྣམ་པར་ཐར་བའི་སོགས་ཏེ། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་སྟེ། རྣམ་པར་ཐར་པའི་སྒོ་གསུམ་མོ། །དེ་ལྟར་ཡང༌།


TNT17_Page_0940
[མ་དཔེ་གཟིགས་ན་འདིར་གནོན།]

མདོ་སྡེ་རྒྱན་ལས། རྣམ་པར་མི་རྟོག་རྒྱབ་ཀྱི་ཕྱོགས། རྟག་ཏུ་དགའ་དང་ལྡན་པའོ་ཞེས། བདག་མེད་སྤྲོས་བྲལ་ལ་དམིགས་པའི་ཡེ་ཤེས་ནི། སྟོང་ཉིད་ཀྱི་ཏིང་ངེ་འཛིན་དང༌། འདུས་བྱས་དང་འཁོར་བའི་མཚན་ཉིད་ཤེས་པ་ནི་སྨོན་པ་མེད་དང༌། མྱང་འདས་ཀྱི་མཚན་ཉིད་ལ་དམིགས་པས་དགའ་བ་ཐོབ་པ་ནི་མཚན་མེད་དོ། །ཀུན་རྫོབ་ཀྱི་དུས་གསུམ་རང་བཞིན་མེད་པར་མཉམ་པ་ཉིད་དང༌། དོན་དམ་དབྱིངས་དུས་གསུམ་འགྱུར་མེད་རྟག་བརྟན་མཉམ་ཉིད་དུ་རྟོགས་པའི་ཤེས་རབ་དང༌། རིག་པ་གསུམ་ནི། སྔོན་གྱི་མཐའ་རིག་པ་དང༌། ཕྱི་མའི་མཐའ་རིག་པ་དང༌། ཟག་ཟད་རིག་པ་སྟེ། དེ་ཐམས་ཅད་ཀྱང་མངོན་སུམ་དུ་མཐོང་བའི་ཤེས་རབ་བོ། །བཞི་པ་འབྲས་བུ་མཐར་ཐུག་གི་སྨོན་ལམ་ནི། དེ་ལྟར་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པས། སངས་རྒྱས་ཀུན་གྱིས་བསྔགས་ཤིང་བསྟོད་པའི་ཆོས་སྐུ་དང༌། འོད་འབར་བའི་ལོངས་སྐུ་དང༌། གཟི་བརྗིད་འབར་བ་སྤྲུལ་སྐུ་དང༌། བྱང་ཆུབ་སེམས་དཔའི་དུས་སུ་བརྩོན་འགྲུས་ཀྱིས་འབད་པའི་འབྲས་བུ་འཕྲིན་ལས་རྒྱུན་མི་འཆད་པ་རྣམས་ཀྱི་སྒོ་ནས། བདག་གི་བསམ་པའི་དོན་སེམས་ཅན་བླ་ན་མེད་པའི་བྱང་ཆུབ་ལ་འགོད་པའི་བྱ་བ་མྱུར་དུ་རྫོགས་པར་གྱུར་ཅིག་པའོ། །གསུམ་པ་ཕན་ཡོན་ནི། དེ་ལྟར་སོགས་ཏེ། ཕྱིན་དྲུག་བསྡུ་དངོས་མངོན་ཤེས་ལ་སོགས་


TNT17_Page_0941
[མ་དཔེ་གཟིགས་ན་འདིར་གནོན།]

པ་བྱང་ཆུབ་ཀྱི་སྤྱད་པ་སྤྱོད་པ་བྱེད་ཅིང༌། སྨོན་ལམ་གྱི་ཁྱད་པར་འདི་བཏབ་པས་ནི། རྒྱལ་ཚབ་བྱམས་པ་འདི་སྔོན་སེམས་དང་པོ་བསྐྱེད་དེ་མི་རིང་བ་ན། དགེ་སློང་བློ་གྲོས་བརྟན་པ་ཞེས་བྱ་བ་གྱུར་པའི་ཚེ། བྱམས་པའི་ཏིང་ངེ་འཛིན་ཡངས་ཤིང་རྒྱ་ཆེ་བ་ཐོབ་ནས་སྐྱེ་བོ་དཔག་ཏུ་མེད་པ་བྱམས་པའི་ཏིང་ངེ་འཛིན་ལ་བཀོད་པ་དེ་ནས་བཟུང་ནས་དུས་རྟག་ཏུ་བྱམས་པ་ཞེས་བྱ་བའི་མཚན་གྱིས་འཁྱུད་པ། རྒྱལ་སྲས་ས་བཅུའི་དབང་ཕྱུག་རྣམས་ཀྱི་ནང་ནས་ཀྱང༌། ཆེས་གྲགས་པ་དང་ལྡན་པ་འདི་ཡིས་ཕ་རོལ་ཏུ་ཕྱིན་པ་དྲུག་རྫོགས་པར་བགྱིས་ནས། ས་བཅུ་པ་ལ་རབ་ཏུ་གནས་ཏེ་དཀའ་སྤྱད་མེད་ཅིང་འཇུག་པ་བདེ་བས་སངས་རྒྱས་ཐོབ་པར་གྱུར་ཏོ། །ཞེས་སྔོན་བྱུང་བ་རྣམ་འཕྲུལ་གྱི་རིམ་པ་བསྟན་པས། རྗེས་འཇུག་རྣམས་ལ་ཡང་ཕན་ཡོན་དེ་ལྟ་བུ་འབྱུང་བར་བསྟན་ཏོ། །དེ་ལྟར་ན་ཚིག་དོན་གསལ་བར་བསྟན་ཟིན་ཏོ། །གཞུང་འདི་ལ་འཕགས་ཡུལ་གྱི་འགྲེལ་པ་ནི་མེད་པར་གྲགས་ལ། བོད་ཀྱི་འགྲེལ་པ་ཅི་རིགས་པར་མཐོང་མོད་ཀྱི། འདིར་བཤད་ཕལ་ཆེར་མདོ་ཉིད་ལ་རྣམ་པར་བརྟག་ཏེ་རང་གི་བློ་མཐུས་སྨྲས་པའོ། །འོན་ཀྱང་མཁྱེན་རབ་ཀྱི་དབང་ཕྱུག་དམ་པ་རྗེ་བཙུན་ཤཱཀྱ་མཆོག་ལྡན་གྱི་ཞལ་སྔ་ནས། ཐེག་པ་ཆེན་པོ་མདོ་སྡེ་བརྒྱན་གྱི་གཞུང་དོན་རགས་པ་དང་གཞུང་འདིར་སྦྱོར་བར་མཛད་པ་ནི་སྦས་དོན་གྱི་རིམ་པ་རྨད་དུ་བྱུང་བའི་ལེགས་བཤད་ཐུན་མོང་མ་ཡིན་པ་བླ་ན་མེད་པ་སྟེ།


TNT17_Page_0942
[མ་དཔེ་གཟིགས་ན་འདིར་གནོན།]

ཚིགས་བཅད་དང་པོ་གཉིས་ནི་སྐྱབས་འགྲོའི་སྐབས་དང༌། བཤགས་པ་དང་བསོད་ནམས་ཀྱི་ཚོགས་ནི་རིགས་སད་བྱེད་དང༌། ཀུན་མཁྱེན་ས་བོན་ཞེས་པ་རིགས་དངོས་ཏེ་རིགས་ཀྱི་སྐབས་སོ། །བྱང་ཆུབ་མི་ཟད་ཅེས་པ་སེམས་བསྐྱེད་ཀྱི་སྐབས་དང༌། ཕྱོགས་བཅུ་དག་གི་སོགས། མཆོད་པ་དང༌། བཤགས་པ་དང༌། ཡི་རང་ཕྱག་འཚལ་རྣམས་སེམས་བསྐྱེད་ཀྱི་བསླབ་བྱ་ཡིན་པའི་ཕྱིར་སྒྲུབ་པའི་སྐབས་དང༌། ཡེ་ཤེས་མཆོག་ཅེས་པས་དེ་ཁོ་ན་ཉིད་དང༌། མངོན་ཤེས་དྲུག་པོ་ཞེས་པས་མཐུ་དང༌། སངས་རྒྱ་བར་བསྐུལ་བས་ཡོངས་སྨིན་དང༌། ཆོས་འཁོར་དང༌། བཞུགས་གསོལ་དང༌། བླ་མེད་བྱང་ཆུབ་ཅེས་པས་བྱང་ཆུབ་ཀྱི་སྐབས་སོ། །མ་སྐྱེས་པ་དང་སོགས་ནི། ཆོས་མོས་ཆོས་འཚོལ་ཆོས་བཤད་ཆོས་སྒྲུབ་གདམས་ངག་རྗེས་དྲན་གྱི་སྐབས་རྣམས་ཏེ། ལེའུ་དེ་དག་གི་བསྟན་བྱའི་སྙིང་པོ་བདག་མེད་གཉིས་རྟོགས་ཀྱི་ཤེས་རབ་བསྐྱེད་པའོ། །བདག་འཛིན་སོགས་ནི་ལས་གསུམ་རྣམ་དག་དང༌། ཕྱིན་དྲུག་སོ་སོའི་ཚིགས་བཅད་ཀྱིས་ཕར་ཕྱིན་གྱི་སྐབས་དང༌། སངས་རྒྱས་ཀུན་གྱི་སོགས་མཐར་ཐུག་གི་སྐབས་དང༌། བྱང་ཕྱོགས་དང་ས་བཅུ་སོགས་དེ་ལྟར་སྦྱར་བ་སོགས་ཀྱིས་བསྟན་ཏེ། མཆོད་རྟེན་ཚད་མེད་སོགས་ཀྱང་དེ་དག་གི་ནང་དུ་འདུས་པས། གཞུང་དེའི་ལེའུ་སོ་སོའི་བརྗོད་བྱའི་གཙོ་བོ་རྣམས་འདིར་འདུས་སོ་ཞེས་པའོ། །ཚིགས་བཅད་དང་པོ་གཉིས་ཀྱིས་བཀའ་སྒྲུབ་ཀྱི་ལེའུ་


TNT17_Page_0943
[མ་དཔེ་གཟིགས་ན་འདིར་གནོན།]

ཡང་བསྟན་ཞེས་བཤད་ཡམས་སུ་མཛད་དེ། འོན་ཀྱང་བཀའ་སྒྲུབ་ལམ་རིམ་ལ་མི་གཏོགས་པས། དེའི་དོད་མེད་ཀྱང་རྒྱན་གྱི་བརྗོད་བྱའི་གཙོ་བོ་མ་འདུས་པར་མི་འགྱུར་རོ་སྙམ་པ་ནི་བདག་གི་རྣམ་རྟོག་གོ །གཞུང་གཉིས་སྦྱར་བའི་འཆད་ཚུལ་འདི། མཁས་པ་རྣམས་ངོ་མཚར་བསྐྱེད་པའི་སྒོ་ཁྱད་པར་ཅན་དུ་སྣང་བའི་ཕྱིར། འདིར་ཡང་བླངས་པའོ། །ཞེས་པ་འཕགས་པ་བྱམས་པའི་སྨོན་ལམ་གྱི་རྣམ་པར་བཤད་པ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་སྨྲས་པའོ། །ཞུས་དག །མངྒ་ལཾ། །


TNT17_Page_0944
[མ་དཔེ་གཟིགས་ན་འདིར་གནོན།]

ཤོག་སྟོང་།

ལྟུང་བཤགས་ཀྱི་འགྲེལ་པ།


TNT17_Page_0945
[མ་དཔེ་གཟིགས་ན་འདིར་གནོན།]

ལྟུང་བཤགས་ཀྱི་འགྲེལ་པ་བཞུགས་སོ།


TNT17_Page_0946
[མ་དཔེ་གཟིགས་ན་འདིར་གནོན།]

ཨོཾ་སྭ་སྟི་སིདྡྷི་པྲ་ཛཱེ་བྷྱཿ སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདིར་ཕུང་པོ་གསུམ་པའི་རྒྱུན་བཤགས་ཀྱི་དོན་ཅུང་ཟད་བཤད་པར་བྱ་སྟེ། དེ་ཡང་འདི་ནི་འཕགས་པ་དཀོན་མཆོག་བརྩེགས་པ་ཆོས་ཀྱི་རྣམ་གྲངས་སྟོང་ཕྲག་བརྒྱ་པ་ལས། འདུས་པ་ཉི་ཤུ་རྩ་བཞི་པ་འདུལ་བ་རྣམ་པར་གཏན་ལ་དབབ་པ་ཞེས་ཀྱང་བྱ། ཉེ་བ་འཁོར་གྱིས་ཞུས་པའི་མདོ་ཞེས་ཀྱང་བྱ་བ་ལས་འབྱུང་བ་ཡིན་ཏེ། དེ་ནི་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་དུ་དགེ་སློང་ལྔ་བརྒྱ་དང༌། བྱང་ཆུབ་སེམས་དཔའ་སྟོང་ཕྲག་གཅིག་དང་བཅས་པ་དང་ལྷན་ཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་ཀྱིས་ཕྱི་མའི་དུས་ན་དམ་པའི་ཆོས་སུ་ཡོངས་སུ་བཟུང་བའི་ཕྱིར་དང༌། སེམས་ཅན་ཡོངས་སུ་སྨིན་པར་བྱ་བའི་ཕྱིར་ཐབས་སྣ་ཚོགས་པའི་ཆོས་


TNT17_Page_0947
[མ་དཔེ་གཟིགས་ན་འདིར་གནོན།]

སྐྱོང་བར་འཁོར་རྣམས་ལ་སྤྲོ་བ་འདྲི་བར་མཛད་དོ། །དེ་ནས་བྱང་ཆུབ་སེམས་དཔའ་བྱམས་པ་ལ་སོགས་པ་དངོས་སུ་མོས་པ་སུམ་ཅུ་རྩ་བརྒྱད་ཙམ་གྱིས། རང་རང་གི་སྐལ་བ་དང་མཐུན་པར་སྤྲོ་བར་ཁས་བླངས་སོ། །དེ་ནས་ཤཱ་རིའི་བུ་བྱང་ཆུབ་སེམས་དཔའ་དེ་རྣམས་ཀྱི་གོ་ཆ་ཆེན་པོའི་ཚུལ་ལ་ངོ་མཚར་སྐྱེས་པ་ན། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་དང་ཐབས་མཁས་དང༌། ཤེས་རབ་དང་ཡེ་ཤེས་ཀྱི་ཡུལ་ནི་ཉན་ཐོས་དང་རང་སངས་རྒྱས་ཀྱིས་སྤྱོད་ཡུལ་མ་ཡིན་ཏེ། སྤྲུལ་པ་སྣ་ཚོགས་སྟོན་ཀྱང་ཆོས་ཉིད་ལས་མི་གཡོ་ལ་གང་ལ་གང་འདུལ་གྱི་སྐུ་སྣ་ཚོགས་སྟོན་པ་སོགས་མང་དུ་གསུངས་ནས། བྱང་ཆུབ་སེམས་དཔའ་ཁྱིམ་པས་ཆོས་དང་ཟང་ཟིང་གི་སྦྱིན་པ་གཉིས་ལ་བསླབ་པར་བྱའོ། །རབ་ཏུ་བྱུང་བས་སྨྱུ་གུ་དང་


TNT17_Page_0948
[མ་དཔེ་གཟིགས་ན་འདིར་གནོན།]

སྣག་ཚ་དང་གླེགས་བམ་དང་ཆོས་སྦྱིན་པ་ལ་བསླབ་པར་བྱའོ། །མི་སྐྱེ་བའི་ཆོས་ལ་བཟོད་པ་ཐོབ་པས། གཏོང་བ་དང༌། གཏོང་བ་ཆེན་པོ་དང༌། ཤིན་ཏུ་གཏོང་བ་ལ་བསླབ་ཅེས་གསུངས་ཏེ། དེ་ལ་གཏོང་བ་ནི་རྒྱལ་སྲིད་ལ་སོགས་པ་དང༌། གཏོང་པ་ཆེན་པོ་ནི་བུ་དང་ཆུང་མ་སོགས་དང༌། ཤིན་ཏུ་གཏོང་བ་ནི་མགོ་དང་རྐང་ལག་ལ་སོགས་པའོ། །ཡང་ཤཱ་རིའི་བུས་བྱང་ཆུབ་སེམས་དཔའ་ཉོན་མོངས་པ་གསུམ་གྱིས་འཇིགས་སམ་མི་འཇིགས་ཞུས་པ་ལ། བྱང་ཆུབ་སེམས་དཔའ་རྣམས་ཀྱི་ཁ་ན་མ་ཐོ་བ་ཆེན་པོ་ནི་གཉིས་ཏེ། ཞེ་སྡང་དང་ལྡན་པ་དང༌། གཏི་མུག་དང་ལྡན་པའོ། །འདོད་ཆགས་དང་ལྡན་པའི་ཁ་ན་མ་ཐོ་བ་ནི། ཁ་ན་མ་ཐོ་བའི་ངོས་ནས་ཆུང་ལ་འབྲལ་བར་ནི་དཀའ་འོ། །ཞེས་སྡང་དང་ལྡན་པ་ནི། ཁ་ན་མ་ཐོ་བ་ཆེ་ལ་འབྲལ་བར་ནི་སླ་བ་ཡིན། གཏི་མུག་དང་ལྡན་པ་ནི། ཁ་ན་མ་ཐོ་བ་ཆེ་ལ་འབྲལ་བར་ཡང་དཀའ་བ་ཡིན། དེའི་རྒྱུ་མཚན་འདོད་ཆགས་འཁོར་བ་འཛིན་པའི་ས་བོན་དང་ཉིང་མཚམས་སྦྱོར་བ་ཡིན། ཞེ་སྡང་ངན་སོང་གི་རྒྱུ་ཡིན་ཡང་སྤོང་བའི་རྣམ་པ་ཅན་ཡིན་པའི་ཕྱིར་དང༌། གཏི་མུག་ནི་མི་ཤེས་པའི་རང་བཞིན་ཤིན་ཏུ་འགྲོལ་དཀའ་བའི་ཕྱིར། དམྱལ་བ་བརྒྱད་ཀྱི་ཡང་རྩ་བ་ཡིན་ནོ། །འདོད་ཆགས་དང་བཅས་པའི་ཁ་ན་མ་ཐོ་བ་ཆེན་པོའི་ཉེས་ལྟུང་གིས་ཕོག་ན། བྱང་ཆུབ་སེམས་དཔའི་ཚོགས་པ་བཅུ་ཚོགས་


TNT17_Page_0949
[མ་དཔེ་གཟིགས་ན་འདིར་གནོན།]

ལ་བཤགས་དགོས་པ་དང༌། རེགས་པའི་ལྷག་མ་ལྟ་བུ་འབྲིང་པོ་ནི་ལྔ་ཚོགས་ལ་བཤགས་དགོས་པ་དང༌། ཆགས་སེམས་ཀྱིས་ལྟ་བ་ལྟ་བུ་ཆུང་ངུ་ནི་གཅིག་གམ་གཉིས་ལ་བཤགས་པ་ཡིན་ནོ། །འདོད་ཆགས་ལ་དངོས་སུ་དེ་ལྟར་གསུངས་པའི་ཤུགས་ལ། ཞེ་སྡང་གཏི་མུག་གཉིས་ལ་དེའི་ཉིས་འགྱུར་ཡིན་པར་དོན་གྱིས་གོ་བར་བྱའོ། །དུག་གསུམ་གྱིས་ཀུན་ནས་བླངས་པའི་ལས་ཆེ་བ་མཚམས་མེད་པ་ལྔ་དང༌། དགེ་འདུན་དང་མཆོད་རྟེན་ལ་སྡིག་བསགས་པ་རྣམས་དང༌། འབྲིང་པོ་བུད་མེད་ཀྱི་ཉེས་པ་ལ་སོགས་པ་དང༌། ཆུང་བ་ཁྱེའུ་དང་ལག་པའི་ཉེས་པ་ལ་སོགས་པ་སྟེ། མདོར་ན་ཉེས་པ་ལྕི་བ་ཐམས་ཅད་ཀྱང་སངས་རྒྱས་སུ་སུམ་ཅུ་རྩ་ལྔའི་སྤྱན་སྔར་ཉིན་མཚན་དུས་དྲུག་ཏུ་བཤགས་པས་འདག་པར་འགྱུར་ན། ཆུང་ངུ་དང་འབྲིང་པོ་ལྟ་སྨོས་ཀྱང་ཅི་དགོས། འདི་ནི་གོང་དུ་བྱང་ཆུབ་སེམས་དཔའི་དགེ་འདུན་གྱི་མདུན་དུ་བཤགས་པར་མ་ནུས་ན་ཡང༌། སངས་རྒྱས་རྣམས་ཡིད་ཀྱིས་དམིགས་པའི་སྤྱན་ལྔར་བཤགས་པས་འདག་པའི་དོན་ནོ། །དེའི་རྗེས་སུ་ཕུང་པོ་གསུམ་པའི་བཤགས་པ་ཉིད་གསུངས་ནས། སངས་རྒྱས་སུམ་ཅུ་སོ་ལྔ་པོ་དེ་དག་ལ་སོགས་པ་དེ་བཞིན་གཤེགས་པ་ཐམས་ཅད་ཡིད་ལ་བྱེད་ན་སྡིག་པ་དག་པར་འགྱུར་ལ། སྡིག་པ་དག་ལ་ཞལ་སྟོན་པར་འགྱུར་རོ། །སངས་རྒྱས་བྱང་སེམས་རྣམས་ནི་སོ་སོ་སྐྱེ་བོ་འཁྲུལ་བ་ཅན་རྣམས་སྨིན་པར་


TNT17_Page_0950
[མ་དཔེ་གཟིགས་ན་འདིར་གནོན།]

བྱ་བའི་ཕྱིར་དང་མོས་པ་སྣ་ཚོགས་རྣམས་ཐར་པ་མཆོག་ཐོབ་པའི་ཕྱིར། སྨོན་ལམ་རྫོགས་པར་མཛད་ཀྱང་ཆོས་ཀྱི་དབྱིངས་ལ་གཡོ་བ་མེད་དོ། །གཞན་ཡང་བྱང་ཆུབ་སེམས་དཔའ་ཆེན་པོ་རྣམས། སྙིང་རྗེ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པའི་མཐུ་ལས། ལོག་པར་ལྟུང་བའི་འགྲོ་བ་བཞི་པོ་རྣམས་ཀྱི་གཟུགས་བཟུང་ནས། དེ་རྣམས་སྨིན་པར་མཛད་དོ། །བཀོད་པ་ཆེན་པོའི་ཏིང་ངེ་འཛིན་གྱིས་ཁྱིམ་བདག་གི་གཟུགས་དང༌། དེ་བཞིན་དུ་རིམ་གྱིས་སྦྱར་ནས། ཞི་བའི་ཏིང་ངེ་འཛིན་གྱིས་སངས་རྒྱས་ཀྱི་གཟུགས་དང༌། དབང་སྒྱུར་བའི་ཏིང་ངེ་འཛིན་གྱིས་མོས་པ་ཇི་ལྟ་བུའི་གཟུགས་སྟོན་པའི་བར་ཏིང་ངེ་འཛིན་བརྒྱད་གསུངས་ནས། དེ་ལྟར་སྟོན་ཡང་བདག་དང་སེམས་ཅན་དུ་དམིགས་པ་མེད་དོ། །སེངྒེའི་སྒྲ་སྐད་བྱི་ལས་བཟོད་པར་མི་ནུས་པ་སོགས་དཔེ་བཞི་གསུངས་ནས། བྱང་ཆུབ་སེམས་དཔའ་རྣམས་ཀྱི་སེམས་དཔའ་མཆོག་དང༌། དགེ་རྩེའི་སྟོབས་ཀྱིས་ཉེས་པ་ཐམས་ཅད་སྐད་ཅིག་གཅིག་ལ་སྤངས་ཏེ་སངས་རྒྱས་མཐོང་བའི་ཏིང་ངེ་འཛིན་ཐོབ་པ་ནི། བཤགས་པའི་ཡུལ་དང་བྱང་ཆུབ་ཀྱི་སེམས་ཀྱི་སྟོབས་དང༌། ཐབས་མཁས་ཀྱི་ཁྱད་པར་ཡིན་པས། ཉན་རང་རྣམས་ཀྱི་སྤྱོད་ཡུལ་མ་ཡིན་ལ། ཉིན་མཚན་དུས་དྲུག་ཏུ་སངས་རྒྱས་ཀྱི་མཚན་འཛིན་ཅིང༌། ཕུང་པོ་གསུམ་པ་འདོན་པ་དེ་དག་ནི། ཉེས་ལྟུང་ཐམས་ཅད་བྱང་ཞིང༌། སངས་རྒྱས་མཐོང་བའི་ཏིང་


TNT17_Page_0951
[མ་དཔེ་གཟིགས་ན་འདིར་གནོན།]

ངེ་འཛིན་ཡང་ཐོབ་པར་འགྱུར་རོ། །ཞེས་གསུངས་སོ། །དེ་ནས་འཕགས་པ་ཉེ་བར་འཁོར་ཡང་འཁོར་དེར་འདུས་ནས། འདུལ་བ་རྣམ་པར་གཏན་ལ་དབབ་པ་ཞུགས་པས། བཅོམ་ལྡན་འདས་ཀྱིས་ཉན་ཐོས་ཀྱི་ཐེག་པ་རྣམས་ཀྱི་སྦྱོར་བ་དང་བསམ་པ་ཡང་གཞན། ཐེག་ཆེན་ལ་ཞུགས་པ་རྣམས་ཀྱི་སྦྱོར་བ་དང་བསམ་པ་ཡང་གཞན་ཡིན་ཏེ། ཉན་ཐོས་པ་རང་དོན་ཁོ་ན་ལ་ཞུགས་པ་དང༌། འཁོར་བས་འཇིགས་པ་སྐྱེ་བ་འཕྲལ་དུ་སྤོང་བར་འདོད་པའི་ཚུལ་ཁྲིམས་དེ་ནི། ཐེག་ཆེན་པས་བླངས་ན་ཤིན་ཏུ་ཚུལ་ཁྲིམས་འཆལ་བ་ཡིན་ལ། ཐེག་ཆེན་པ་གཞན་དོན་དུ་བསྐལ་པ་མཐའ་ཡས་པའི་བར་དུའང་འཁོར་བར་གནས་དགོས་ཤིང༌། དེ་ལ་དམིགས་པའི་ཚུལ་ཁྲིམས་དེ་ནི་ཉན་ཐོས་པས་བླངས་ན་ཉན་ཐོས་ཐེག་པ་ཁོ་ན་ལ་ལྟོས་པའི་ལྟུང་བ་ཆེན་པོར་འཛིན་ནོ། །དེ་བཞིན་དུ་བྱང་ཆུབ་སེམས་དཔའི་བསླབ་པ་ནི། རྗེས་སུ་བསྲུང་བ་དང་བཅས་པ་སྟེ། སེམས་ཅན་རྣམས་ཀྱི་སེམས་དང་མཐུན་པར་འཇུག་པ་ཡིན་ལ། ཉན་ཐོས་རྣམས་ཀྱི་མ་ཡིན་ནོ། །བྱང་ཆུབ་སེམས་དཔའ་རྣམས་ཀྱི་བསླབ་པ་ནི་བཅོས་སུ་ཡོད་པ་ཡིན་ཏེ། སྔ་དྲོའི་ཚེ་ཉེས་པ་བྱུང་ཡང་གུང་ཚིགས་ཀྱི་དུས་ཐམས་ཅད་མཁྱེན་པའི་སེམས་དང་མ་བྲལ་བས་གནས་ན། ཚུལ་ཁྲིམས་ཀྱི་ཕུང་པོ་མ་ཟད་པ་ཁོ་ན་ཡིན་པ་སོགས་ཐུན་མཚམས་ཐམས་ཅད་ལ་སྦྱར་ནས། ཧ་ཅང་འགྱོད་པར་མི་བྱ་བ་དང༌།


TNT17_Page_0952
[མ་དཔེ་གཟིགས་ན་འདིར་གནོན།]

ཉན་ཐོས་ཀྱི་ཐེག་པ་ལ་ལྟུང་བ་ཡང་ཡང་བྱུང་ན། ཚུལ་ཁྲིམས་ཡོངས་སུ་ཟད་པར་འགྱུར་བ་ཡིན་ལ། ཁམས་གསུམ་གྱི་ཉོན་མོངས་འཕྲལ་དུ་སྤངས་ནས། རང་དོན་མྱང་འདས་མྱུར་དུ་ཐོབ་པར་བྱེད་དགོས་པའི་ཕྱིར་བསླབ་པ་བཅོས་སུ་མེད་པའོ། །ཡང་བྱང་ཆུབ་སེམས་དཔའ་ནི་བྱང་ཆུབ་ཀྱི་སེམས་མ་སྤངས་ན། བསྐལ་པ་མཐའ་ཡས་པར་འདོད་པའི་ཡོན་ཏན་ལྔས་བརྩེ་བར་བྱེད་ཀྱང༌། ཚུལ་ཁྲིམས་རྣམ་པར་དག་པ་ཁོ་ན་ཉིད་དེ། རྨི་ལམ་ན་ཡང་ཉོན་མོངས་པས་རིག་པར་མི་འགྱུར་བའི་ཕྱིར། བསླབ་པ་རིང་དུ་རྗེས་སུ་ཞུགས་པ་ཞེས་བྱ་ལ། ཉན་ཐོས་རྣམས་འབྲས་བུ་ཆུང་ངུ་དེ་འཕྲལ་དུ་ཐོབ་པའི་ཕྱིར། ལམ་ཆུང་ངུ་ལ་བརྩོན་འགྲུས་མྱུར་དུ་འཇུག་དགོས་པས་བསླབ་པ་མཐར་ཆགས་པ་སྟེ་མ་འདྲེས་པར་དགོས་པ་ཡིན་ནོ། །དེ་ཡང་རྫོགས་པའི་བྱང་ཆུབ་ནི་ཚེགས་ཆེན་པོས་སྒྲུབ་དགོས་པ་ཡིན་པས། སྡུག་བསྔལ་ལ་སྐྱོ་བ་དང་ཆགས་བྲལ་ལ་གཅིག་ཏུ་ཕྱོགས་པ་ཙམ་གྱིས་འགྲུབ་པར་མི་འགྱུར་བ་སོགས་གསུངས་སོ། །དེ་ནས་ཉེ་བ་འཁོར་གྱིས་ཉེས་པ་ལྕི་ཡང་ཞུས་པ་ལ། ཐེག་ཆེན་ཁོ་ནའི་དབང་དུ་བྱས་ནས། འདོད་ཆགས་དང་མཚུངས་ལྡན་གྱི་ཉེས་པ་དུས་མཐའ་ཡས་པར་བྱུང་བ་ལས་ཀྱང་ཞེ་སྡང་དང་མཚུངས་ལྡན་གྱི་ཉེས་པ་ལན་གཅིག་བྱུང་བ་ཡང་ལྕི་སྟེ། ཞེ་སྡང་ནི་སེམས་ཅན་གཏོང་བ་ཡིན། འདོད་ཆགས་ནི་སེམས་ཅན་དུད་པ་ཡིན་པའི་ཕྱིར་རོ། །དེ་བཞིན་དུ་འབྲལ་བ་བུལ་པ་སྟེ་འབྲལ་


TNT17_Page_0953
[མ་དཔེ་གཟིགས་ན་འདིར་གནོན།]

དཀའ་ཡང༌། ཁ་ན་མ་ཐོ་བ་དང་བཅས་པ་ཆུང་བ་དེ་ནི། བྱང་ཆུབ་སེམས་དཔའ་ལ་ཉོན་མོངས་པར་མི་ཆེ་ལ། འབྲལ་བ་མྱུར་ཡང་ཁ་ན་མ་ཐོ་བ་དང་བཅས་པ་ཆེ་བ་དེ་ནི་དེ་ལས་ལྡོག་པ་ཡིན་པར་གསུངས་ནས། བྱང་སེམས་ཐབས་མི་མཁས་པ་དེ་འདོད་ཆགས་ལ་འཇིགས་ཤིང་ཞེ་སྡང་ལ་མི་འཇིགས་ལ། ཐབས་མཁས་པ་ནི་དེ་ལས་ལྡོག་པའོ། །དེ་ནས་འཕགས་པ་འཇམ་དཔལ་འཁོར་དེར་འདུས་ནས། དུལ་བའི་ཆོས་ལ་འདུལ་བ་ཅི་ཞིག་མཆི་ཞེས་ཞུས་པ་ལ། ཆོས་ཐམས་ཅད་ཤིན་ཏུ་དུལ་བ་ཡིན་ཡང་དེ་ལྟར་མི་ཤེས་པ་ལ་འདུལ་བ་ཡང་ཡང་བསྟན་ཞེས་གསུངས་ཏེ། ཉོན་མོངས་རང་བཞིན་གྱིས་མེད་ཀྱང་དེ་ལྟར་མ་ཤེས་པ་ལ། འདུལ་བ་བསྟན་ཞེས་པའི་དོན་ནོ། །དེ་ནས་ཉེ་བའི་འཁོར་གྱིས་བཅོམ་ལྡན་འདས་བརྒྱུད་ནས་འཇམ་དཔལ་ཆོས་སྟོན་པར་བསྐུལ། འཇམ་དཔལ་གྱིས་ཀྱང་སེམས་རང་བཞིན་གྱིས་དུལ་བ་དང༌། བདག་མི་དམིགས་པ་དང༌། བླང་དོར་མེད་པ་དང༌། ནམ་མཁའི་མཐའ་ལ་གནས་པ་དང༌། དུས་གསུམ་མི་དམིགས་པ་ལ་སོགས་པ་སྟོང་པ་ཉིད་ཀྱི་དོན་བཤད་ནས། ཆོས་ཉིད་འདི་ལ་མི་མོས་ན་བསླབ་པ་ལས་རིང་དུ་གྱུར་ཞེས་བཤད་དོ། །དེ་ནས་ཉེ་བ་འཁོར་གྱིས་འཇམ་དཔལ་ནི་ཆོས་གང་སྟོན་ཡང་བསམ་གྱིས་མི་ཁྱབ་པ་ལས་བརྩམས་ཏེ་སྟོན་ཏོ། །ཞེས་ཞུས་པ་ལ། སྟོན་པས་བསམ་མི་ཁྱབ་ལམ་བརྟེན་ན་རྣམ་པར་གྲོལ་བ་མེད་པས། འཇམ་


TNT17_Page_0954
[མ་དཔེ་གཟིགས་ན་འདིར་གནོན།]

དཔལ་ཡང་རྟོག་པ་ཐམས་ཅད་སྤངས་པ་དང༌། ལྷག་པའི་ང་རྒྱལ་སྤངས་པའི་ཕྱིར་ཆོས་སྟོན་ཏོ། །དེ་བཞིན་དུ་འདོད་ཆགས་ལ་སོགས་པ་བདེན་པར་ཞེན་པས་སྤོང་སེམས་དང༌། རྣམ་པར་བྱང་བའི་ཆོས་ལ་བདེན་པར་ཞེན་ནས་ཐོབ་འདོད་དང༌། ཟབ་མི་ཟབ་བམ། ཐེག་པ་གསུམ་མམ། ཀུན་ནས་ཉོན་མོངས་པ་དང་རྣམ་པར་བྱང་བ་ལ་བདེན་ཞེན་གྱིས་དབྱེ་འབྱེད་དང༌། ཐ་ན་བསམ་པར་བྱ་བ་ཅི་ཡང་མེད་དོ། །ཞེས་སེམས་ཀྱང༌། དེ་ཐམས་ཅད་ལྷག་པའི་ང་རྒྱལ་སྤྱོད་པ་ཡིན་ཅིང༌། བསམ་གྱིས་མི་ཁྱབ་པ་ཉིད་ལ་མངོན་པར་མ་ཞེན་ན་ལྷག་པའི་ང་རྒྱལ་མེད་དོ་ཞེས་གསུངས། དེ་ནས་སྟོན་པས་ཆེད་དུ་བརྗོད་པའི་ཚུལ་གྱིས་ཚིགས་བཅད་རྒྱས་པར་གསུངས་ཏེ། བསམ་གྱིས་མི་ཁྱབ་པའི་གནས་དང༌། དེ་ཉིད་ལ་མངོན་པར་ཞེན་པ་མེད་པའི་ཚུལ་དེ་ཉིད། གཞི་ལམ་འབྲས་གསུམ་གྱི་ཆོས་ཐམས་ཅད་ལ་སྦྱར་ནས། གདམས་པ་དང་བཅས་ཏེ་ཟབ་རྒྱས་སུ་གསུངས་སོ། །སྐབས་འདིར། ཤེས་རབ་ཆོས་རྣམས་ཤེས་པར་གྱིས་ཤིག་ཅེས། །ཤེས་རབ་ལྷག་མཐོང་བློ་གྲོས་བློ་བརྟན་ཡང༌། །རང་བཞིན་རང་བཞིན་མེད་པ་ནམ་དུ་ཡང༌། །ཤེས་པར་མི་ནུས་དེ་ཡང་ངེས་པར་བསྟན། །ཞེས་རང་བཞིན་ཡོད་མེད་ཀྱི་དབྱེ་བ་དང༌། སེམས་དམྱལ་འཇིགས་པ་ང་ཡིས་བསྟན་བྱས་ཏེ། །སེམས་ཅན་སྟོང་ཕྲག་དུ་མ་སྐྱོ་བས་ཀྱང༌། །གང་དག་ཤི་འཕོས་ངན་སོང་དྲག་འགྲོ་བའི། །འགྲོ་བ་དེ་དག་


TNT17_Page_0955
[མ་དཔེ་གཟིགས་ན་འདིར་གནོན།]

ནམ་ཡང་ཡོད་མ་ཡིན། །ཞེས་པས་གང་ཟག་གི་བདག་མེད་པ་གཙོ་བོར་བསྟན་ཅིང༌། གང་དག་རལ་གྲི་མདའ་ཆེན་མཚོན་འཛིན་པའི། །གནོད་པ་བྱེད་པ་ཡོད་པ་མ་ཡིན་ཏེ། །རྟོག་པའི་དབང་གིས་ངན་སོང་དེ་དག་ན། །ལུས་ལ་བབས་མཐོང་དེ་ན་མཚོན་ཆ་མེད། །ཅེས་ཕྱི་རོལ་ཀྱི་དོན་མེད་ཅིང་སེམས་སུ་བསྟན་པ་དང༌། སྣ་ཚོགས་ཡིད་དགའ་མེ་ཏོག་ཁ་ཕྱེ་ཞིང༌། གསེར་གྱི་ཁང་མཆོག་འབར་བ་ཡིད་འོང་པ། །འདི་ན་དེ་ལའང་བྱེད་པ་འགའ་མེད་དེ། །དེ་དག་རྟོག་པའི་དབང་གིས་བཞག་པ་ཡིན། །ཞེས་བྱེད་པོ་གཞན་མེད་ཀྱི་རྟོག་པ་ཉིད་ཡིན་པས། སྣང་བ་དེ་ཡང་སེམས་ལས་གཞན་མིན་ནོ་ཞེས་པའི་དོན་དང༌། རྟོག་པའི་དབང་གིས་འཇིག་རྟེན་རྣམས་བཏགས་ཏེ། །འདུ་ཤེས་འཛིན་པས་བྱིས་པ་རྣམ་པར་ཕྱེ། །འཛིན་དང་འཛིན་མེད་དེ་ཡང་བྱུང་མིན་ཏེ། ཡོངས་སུ་རྟོགས་པ་རྒྱུ་མ་སྨིག་རྒྱུ་བཞིན། །ཞེས་གཟུང་འཛིན་གཉིས་ཀ་མེད་པར་བསྟན་ཏོ། །ཀུན་གཞིར་མ་གྱུར་མྱ་ངན་འདས་པ་ཐོབ། །མཁའ་འདྲ་ཆོས་རྣམས་འདི་དག་ཤེས་གྱུར་ན། །ཞིང་བརྒྱ་རྣམས་སུ་ཐོགས་མེད་འགྲོ་འགྱུར་ཞིང༌། །ཞེས་སོགས་ཀུན་གཞི་རྣམ་ཤེས་སྤངས་ན་མཐར་ཐུག་ཡིན་པ་དང༌། བསམ་གྱིས་མི་ཁྱབ་པ་རྟོག་པའི་ཡོན་ཏན་ཡང་གསུངས་སོ། །དེ་ནས་ཆོས་ཀྱི་རྣམ་གྲངས་འདི་གསུངས་པས། དགེ་སློང་ལྷག་པའི་ང་རྒྱལ་ཅན་ཉིས་བརྒྱ་དགྲ་


TNT17_Page_0956
[མ་དཔེ་གཟིགས་ན་འདིར་གནོན།]

བཅོམ་པ་ཐོབ་པ་དང༌། སེམས་དཔའ་དྲུག་ཁྲི་མི་སྐྱེ་བའི་ཆོས་ལ་བཟོད་པ་ཐོབ་བོ། །དེ་རྗེས་སུ་མདོ་འདིའི་མཚན་གྱི་རྣམ་གྲངས་བཤད་པ་དང༌། འཁོར་རྣམས་དགའ་ཞིང་ཡི་རང་བའི་བར་དུ་ཡང་ཡོད་དོ། །དེ་ལྟར་རྒྱུན་བཤགས་འདི་ཉིད་གང་ལས་འབྱུང་བའི་མདོའི་བཞུགས་ཚུལ་བཀོད་པས། ཐེག་པ་ཆེ་ཆུང་གི་ཉེས་ལྟུང་གི་ཁྱད་པར་དང༌། ཐེགས་ཆེན་ཉིད་ཀྱི་ལྟུང་པ་ལྕི་ཡང་དང༌། མཐར་ཐུག་རྫོགས་པར་འགྱུར་མི་འགྱུར་གྱི་ཁྱད་པར་སོགས་རྨད་དུ་བྱུང་བའི་ཆོས་ལ་ངེས་པ་རྙེད་པར་འགྱུར་རོ། །ད་ནི་རྒྱུན་བཤགས་ཀྱི་གཞུང་དངོས་ལ་འཇུག་པར་བྱ་སྟེ། གཞུང་འདི་ཕུང་པོ་གསུམ་དང༌། སྟོབས་བཞི་དང༌། བླ་ན་མེད་པའི་མཆོད་པ་རྣམ་པ་བདུན་པོ་དག་གིས་བསྡུས་པ་ཡིན་ནོ། །ཞེས་འཆད་དོ། །དང་པོ་ལ་འགའ་ཞིག་བཤགས་པ་ཡི་རང་བསྔོ་བའི་ཕུང་པོ་གསུམ་དུ་འཆད་ལ། འདི་ཉིད་ཀྱི་འགྲེལ་པ་གཅིག་ན། བཤགས་པ་དང༌། དགེ་བ་དང༌། གསོལ་འདེབས་ཀྱི་ཕུང་པོ་ཞེས་འཆད་དོ། །འོན་ཀྱང་ཕྱག་འཚལ་བ་དང༌། བཤགས་པ་དང༌། ཡོངས་སུ་བསྔོ་བའི་ཕུང་པོ་གསུམ་ལ་ངོས་འཛིན་པ་ཉིད། གཞུང་གི་ཚིག་དོན་དུམ་བུར་འབྱེད་པའི་དབང་དུ་བྱས་ན་ལེགས་པར་མཐོང་སྟེ། དེ་ལྟར་ན་རི་དབང་གི་རྒྱལ་པོ་ལ་ཕྱག་འཚལ་ལོ་ཡན་ཆད་ཕྱག་འཚལ་བའི་ཕུང་པོ་དང༌། དགོངས་སུ་གསོལ་ནས་སླན་ཆད་ཀྱང་སྡོམ་པར་བགྱི་ལགས་


TNT17_Page_0957
[མ་དཔེ་གཟིགས་ན་འདིར་གནོན།]

སོ་ཡན་ཆད་སྡིག་པ་བཤགས་པའི་ཕུང་པོ་དང༌། སངས་རྒྱས་བཅོམ་ལྡན་འདས་དེ་དག་ཐམས་ཅད་བདག་ལ་དགོངས་སུ་གསོལ་ཞེས་པ་མན་ཆད་ཡོངས་སུ་བསྔོ་བའི་ཕུང་པོ་ཡིན་ནོ། །འདི་ལ་དགོངས་གསོལ་གཉིས་ཀྱང་དོན་ཚན་ཕྱི་མའི་སོ་སོའི་འོག་རྩོམ་བྱེད་དུ་གསལ་བ་དང༌། གཞུང་ཚིག་སྡེ་ཚན་གསུམ་པོ་མང་ཉུང་ཆེས་མི་སྙོམས་པ་མེད་པ་སོགས་ཀྱི་ལུགས་འདི་ལེགས་པར་མཐོང་སྟེ། ཐོག་མའི་སྐྱབས་འགྲོ་ནི་ཡོན་ཏན་དྲན་པའི་ཕྱིར་བྱུང་བ་ཡིན་པས། ཕྱག་འཚལ་བའི་སྡེ་ཚན་ཡིན་ལ། བཤགས་པ་འོག་མ་མན་ཆད་རྣམ་གྲངས་གཞན་གྱི་སྒོ་ནས་བསྟན་པའོ། །གཉིས་པ་སྟོབས་བཞིའི་བསྡུ་ཚུལ་འཆད་ཚུལ་ལ། འཆད་ཚུལ་མི་འདྲ་བ་མང་དུ་སྣང་ཡང༌། བསྡུས་པའི་དོན་འདི་ལྟར་བྱ་སྟེ། བཤགས་པ་དངོས་དང༌། བཤགས་པའི་ཡན་ལག་སྟོབས་བཞི་བཤད་པའོ། །དང་པོ་ནི། སྡིག་པ་མི་དགེ་བའི་ལས་ཞེས་པ་ནས། འཇུག་པ་ལ་རྗེས་སུ་ཡི་རང་བའམ་ཞེས་པའི་བར་དང༌། དེ་དག་གི་སྤྱན་སྔར་སོགས་དང༌། སྡིག་པ་ཐམས་ཅད་ནི་སོ་སོར་བཤགས་སོ་ཞེས་པའོ། །གཉིས་པ་ལ་རྟེན་གྱི་སྟོབས། གཉེན་པོ་ཀུན་ཏུ་སྤྱོད་པའི་སྟོབས། སླར་ལྡོག་པའི་སྟོབས། སུན་འབྱིན་པའི་སྟོབས་རྣམས་ལས། རྟེན་གྱི་སྟོབས་ལ་རྟེན་ཡུལ་གྱི་སྟོབས་ནི། ཕྱག་འཚལ་གྱི་ཡུལ་དུ་གྱུར་པའི་སངས་རྒྱས་རྣམས་ལ། སངས་རྒྱས་བཅོམ་ལྡན་འདས་ཡེ་


TNT17_Page_0958
[མ་དཔེ་གཟིགས་ན་འདིར་གནོན།]

ཤེས་སུ་གྱུར་པ་སོགས་སོ། །རང་རྒྱུད་ལ་དགོས་པའི་རྟེན་གྱི་སྟོབས་ནི། ཐོག་མཐའི་སྐྱབས་འགྲོ་གཉིས་ཡིན་ལ། བསྔོ་བའི་ཁོང་གི་སེམས་བསྐྱེད་ཀྱང་དེར་བསྡུའོ། །གཉེན་པོ་ཀུན་ཏུ་སྤྱོད་པའི་སྟོབས་ནི། ཕྱག་འཚལ་དང༌། ཡི་རང་དང༌། གསོལ་འདེབས་དང༌། ཡོངས་སུ་བསྔོ་བ་སྔ་ཕྱི་གཉིས་སོ། །སུན་འབྱིན་པའི་སྟོབས་ནི། ལས་ཀྱི་སྒྲིབ་པ་གང་གིས་སོགས། སླར་ལྡོག་པའི་སྟོབས་ནི། སླན་ཆད་ཀྱང་གཅོད་ཅིང་སྡོམ་པར་བགྱིད་ལགས་སོ། །ཞེས་པའོ། །གསུམ་པ་ནི། དངོས་སུ་མ་ཚང་ཡང་བཤད་ཡམ་ཙམ་མམ། དོན་གྱི་སྟོབས་སྦྱར་ན་འགལ་བ་མེད་པས་དེ་ལྟར་སྦྱར་ན། རི་དབང་གི་རྒྱལ་པོ་ལ་ཕྱག་འཚལ་ལོ་ཞེས་པ་ཡན་ཆད་ཕྱག་འཚལ་བའི་ཡན་ལག་དང༌། དེ་རྗེས་ནས་བསྡོམ་པར་བགྱིད་ལགས་སོ་ཞེས་པ་ཡན་ཆད་སྡིག་པ་བཤགས་པའི་ཡན་ལག་དང༌། བདག་གིས་ཀྱང་ཡོངས་སུ་བསྔོ་བར་བགྱིའོ་ཞེས་པ་ཡན་ཆད་བསྔོ་བའི་ཡན་ལག་དང་བསོད་ནམས་ཐམས་ཅད་ལ་རྗེས་སུ་ཡི་རང་ངོ་ཞེས་པ་ཡན་ཆད་ཡི་རང་བའི་ཡན་ལག་ཡིན་ལ། སངས་རྒྱས་ཐམས་ཅད་ལ་གསོལ་བ་འདེབས་སོ་ཞེས་པས་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་དང༌། མྱ་ངན་ལས་མི་འདའ་བར་གསོལ་བ་འདེབས་པ་གཉིས་བསྟན་ཅིང༌། ཐོག་མཐའི་སྐྱབས་འགྲོ་དང༌། བསྔོ་བའི་ཁོང་གི་སེམས་བསྐྱེད་ཀྱང་བསྣན་ནས་ཕྱག་འཚལ་བཤགས་པ་ཡི་རང་གསོལ་འདེབས། སྐྱབས་


TNT17_Page_0959
[མ་དཔེ་གཟིགས་ན་འདིར་གནོན།]

འགྲོ་སེམས་བསྐྱེད་བསྔོ་བ་སྟེ། ཡན་ལག་བདུན་གྱི་བགྲོང་ཚུལ་འདི་བཞིན་དུ་བྱས་ན་རུང་ཙམ་མོ། །འོན་ཀྱང་ཚིག་དོན་དང་འབྲེལ་བའི་དོན་བསྡུ་ལ་སྦྱོར་ན་ཡན་ལག་བདུན་དུ་བགྲོང་བ་མི་ལེགས་ཏེ། སེམས་བསྐྱེད་བསྔོ་བ་ལས་གཞན་དུ་མ་དམིགས་པ་དང༌། གོ་རིམ་ཡང་འཆོལ་བར་གནས་པས་སོ། །བསྔོ་བའི་ཁོང་གི་སེམས་བསྐྱེད་སོགས་རྟེན་དང་དཀར་པོ་ས་བོན་གྱི་སྟོབས་ལ་མཚུངས་སོ་སྙམ་ན་མ་ཡིན་ཏེ། ཆ་ཚང་བར་བྱ་བའི་ཕྱིར་འཕྲོས་དོན་དུ་དེ་ལྟར་བཤད་ཀྱི། རྟེན་སྐྱབས་འགྲོ་དང༌། དཀར་པོ་ས་བོན་ཡི་རང་སོགས་རྐང་ཐུབ་ཀྱི་གཞུང་ཡོད་པའི་ཕྱིར་རོ། །སྤྱིར་མདོ་ལུགས་ཀྱི་ཡན་ལག་བདུན་པ་ཕལ་ཆེར་ལ་མཆོད་པ་ཡོད་ཅིང༌། གསོལ་འདེབས་གཉིས་སོ་སོར་བགྲོང་བ་དང༌། སྐྱབས་འགྲོ་སེམས་བསྐྱེད་མི་བགྲོང་བ་མང་བར་སྣང་བས། འདིར་ཡན་ལག་བདུན་པ་ཚང་བར་རྩི་བ་ངེས་པར་དགོས་པ་མིན་ལ། ཁ་ཅིག་སྐྱབས་འགྲོས་མཆོད་པ་དོན་གྱི་འཕངས་པས་དེ་བགྲོང་བར་འདོད་པ་ནི། དངོས་བསྟན་བོར་ནས་ཤུགས་བསྟན་འཚོལ་བ་ཕོངས་པའི་རྒྱུ་ཉིད་དོ། །ད་ནི་ཚིག་དོན་ཅུང་ཟད་བརྗོད་པར་བྱ་སྟེ། དེ་ཡང་གཞུང་འདིའི་དོན་ལ་དབྱེ་ན། ཕུང་པོ་གསུམ་རྒྱས་པར་བསྟན་པ་དང༌། རྒྱུན་བཤགས་མདོར་བསྡུས་པས་བཤད་པའི་དང་པོ་ལ། ཕྱག་འཚལ་བའི་ཕུང་པོ། སྡིག་པ་བཤགས་པའི་ཕུང་པོ། ཡོངས་སུ་བསྔོ་བའི་


TNT17_Page_0960
[མ་དཔེ་གཟིགས་ན་འདིར་གནོན།]

ཕུང་པོ་བཤད་པ་གསུམ་ལས། དང་པོ་ལ་བྱེད་པ་པོ་རང་གི་དོན། དམིགས་པ་ཡུལ་གྱི་དོན། བྱེད་པ་ཕྱག་འཚལ་བ་དངོས་ཏེ་གསུམ་ལས། དང་པོ་ནི། བདག་མིང་འདི་ཞེས་བགྱི་བ་ཞེས་པ་ལ་བྱང་ཆུབ་ཏུ་སེམས་བསྐྱེད་པ་སྐྱེས་བུ་བདག་ཉིད་ཀྱི་མིང་བརྗོད་པར་བྱ་སྟེ། གང་རང་གི་མིང་གསལ་བར་མི་བརྗོད་པ་དེ་ལ་ནི། ཉེས་པ་སྦེད་པའི་བསམ་པ་ཡོད་སྲིད་པས་དེ་དགག་པར་བྱ་བའི་ཕྱིར་བྱའོ། །གཉིས་པ་ནི། དཀོན་མཆོག་གསུམ་གྱི་ཡོན་ཏན་རྟོགས་པས་དེ་གསུམ་སྐྱབས་ཀྱི་ཡུལ་དུ་ཤེས་ཤིང་དེ་ཉིད་དྲན་པས་གསལ་འདེབས་པ་ཡིན་ཏེ། སངས་རྒྱས་ལ་སྐྱབས་སུ་མཆིའོ་སོགས་ལ། ཆོས་སྤྱོད་འདི་ནི་ལས་དང་པོ་པ་དང་མོས་སྤྱོད་མན་ཆད་ཀྱི་བྱང་ཆུབ་སེམས་དཔའ་བསྒྲུབ་པའི་དབང་དུ་བྱས་ནས། གནས་སྐབས་དང་མཐར་ཐུག་གི་སྐྱབས་ཡུལ་སོ་སོར་དབྱེ་བ་མི་བྱེད་དེ། སངས་རྒྱས་ནི་སྐུ་གསུམ་གྱིས་བསྡུས་པ་དངོས་དང་བཏགས་པ་བ་ཐམས་ཅད་དོ། །ཆོས་ནི་དམ་པའི་ཆོས་ལུང་དང་རྟོགས་པས་བསྡུས་པ་སྟེ། རྟོགས་པ་དེ་ཡང་ལམ་དང་འབྲས་བུའམ། འགོག་ལམ་གྱིས་བསྡུས་པ་ཐམས་ཅད་དོ། །དགེ་འདུན་ནི་ཕྱིར་མི་ལྡོག་གི་ས་ཐོབ་པའི་བྱང་ཆུབ་སེམས་དཔའ་རྣམས་གཙོ་བོར་ཡིན་ལ། སྐབས་འདིར་ཉན་རང་འཕགས་པ་རྣམས་ཀྱང་ཞོར་བྱུང་དུ་ནི་ཡིན་ཏེ། བྱང་ཆུབ་སེམས་དཔའ་སོ་སྐྱེས་མ་ཐོབ་པའི་སྤངས་པ་དང་རྟོགས་པའི་རིགས་ཉན་རང་འཕགས་པ་རྣམས་ཀྱིས་ཐོབ་པ་མང་


TNT17_Page_0961
[མ་དཔེ་གཟིགས་ན་འདིར་གནོན།]

དུ་ཡོད་པའི་ཕྱིར། ཡོན་ཏན་དེ་དག་གི་ཕྱོགས་ནས་བླ་མར་གྱུར་པ་དང༌། དེ་དག་སྒྲུབ་པའི་ཕྱིར་ཡང་སྐྱབས་སུ་འགྲོ་བའོ། །སངས་རྒྱས་ཀྱི་ཡོན་ཏན་ནི་མཁྱེན་པ་དང༌། ཐུགས་རྗེ་དང༌། ནུས་མཐུ་བསམ་གྱིས་མི་ཁྱབ་པ་ལ་སོགས་པའོ། །ཆོས་ཀྱི་ཡོན་ཏན་ལ་འབྲས་བུའི་ཆོས་ནི་སྐྱོན་ཐམས་ཅད་སྤངས་ཤིང་ཡོན་ཏན་རྫོགས་པ་དང༌། ལམ་གྱིས་ནི་སྒྲིབ་གཉིས་སྤོངས་ཞིང་ཕུན་སུམ་ཚོགས་པ་ཐོབ་པར་བྱེད་པ་དང༌། དེ་དག་རྣམས་མ་རྟོགས་པ་རྟོགས་པར་བྱེད་པ་ལུང་གི་ཆོས་ལ་རགས་ལས་པའོ། །དགེ་འདུན་གྱི་ཡོན་ཏན་ནི་ལམ་གྱི་ཆོས་དེ་དག་རྒྱུད་ལ་སྐྱེས་པས་སྐྱོན་མང་པོ་སྤངས་ཤིང་ཡོན་ཏན་དུ་མ་དང་ལྡན་པ། སྙིང་རྗེ་ཆེན་པོས་སེམས་ཅན་སྒྲོལ་བ་ལ་བརྩོན་པའོ། །དེའི་ཕྱིར་དཀོན་མཆོག་གསུམ་པོ་དེ་དག་སྐྱབས་སུ་འོས་ཤིང་ཕྱག་འཚལ་བར་འོས་པའོ། །གསུམ་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་པ་ལ་སོགས་པ་སྟེ། ཆོས་ཉིད་མ་ནོར་བར་གཟིགས་པས་དེ་བཞིན་གཤེགས་པ། བདུད་བཞི་བཅོམ་པའི་ཕྱིར་དགྲ་བཅོམ་པ། ཆོས་ཐམས་ཅད་མ་རིག་པའི་སྣང་བ་སངས་ཤིང་ཡེ་ཤེས་ཀྱི་སྣང་བ་རྒྱས་པའི་ཕྱིར་ཡང་དག་པ་རྫོགས་པའི་སངས་རྒྱས་སོ། །ཤཱཀྱ་ནི་ནུས་པའི་བདག་ཉིད་དེ། མཐུ་དང་སྙིང་སྟོབས་ཕུན་སུམ་ཚོགས་པ། ཐུབ་པ་ནི་དགྲ་ཐུབ་པ་སྟེ་སྒྲིབ་གཉིས་བག་ཆགས་དང་


TNT17_Page_0962
[མ་དཔེ་གཟིགས་ན་འདིར་གནོན།]

བཅས་པ་སྤངས་པའོ། །མདོའི་དཔེ་ཉིད་ལ་དེ་ཙམ་སྣང་ལ། དེ་ལྟར་ཕལ་ཆེར་འདོན་པ་ལྟར་ན། བཅོམ་ལྡན་འདས་དང་དཔལ་རྒྱལ་བ་ཞེས་པའི་ཚིག་ཀྱང་སྣོན་པས། སྐལ་བ་དྲུག་གི་ཕུན་སུམ་ཚོགས་པ་དང་ལྡན་པས་བཅོམ་ལྡན་འདས་དང༌། རང་དང་གཞན་གྱི་དོན་ཕུན་སུམ་ཚོགས་པ་གྲུབ་པས་དཔལ་དང༌། མི་མཐུན་པའི་ཕྱོགས་ཐམས་ཅད་ལས་རྒྱལ་བས་རྒྱལ་བའོ། །དེ་བཞིན་དུ་སྦྱར་ཏེ། མི་ཕྱེད་པས་རྡོ་རྗེ། སྲ་བས་སྙིང་པོ། འགྲོ་བའི་སྡུག་བསྔལ་ཐམས་ཅད་འཇོམས་པས་རབ་ཏུ་འཇོམས་པ་སྟེ་རྡོ་རྗེ་སྙིང་པོ་རབ་ཏུ་འཇོམས་པའོ། །མ་རིག་པ་སེལ་བའི་ཕྱིར་རིན་ཆེན་འོད་འཕྲོའོ། །ཆོས་དབྱིངས་རྒྱ་མཚོའི་བདག་པོ་ཡིན་པའི་ཕྱིར། ཀླུ་དབང་གི་རྒྱལ་པོའོ། །མི་མཐུན་པའི་ཕྱོགས་མཐའ་དག་འཇོམས་པའི་ཕྱིར་དཔའ་བོའི་སྡེའོ། །དེ་དང་འདྲ་བ་ལས་ཆོས་ཀྱི་དགའ་བས་དགྱེས་པ་ལས་དཔའ་དགྱེས་སོ། །རིན་པོ་ཆེ་ལྟར་མི་འགྱུར་ཞིང་གཞན་གྱི་ཉོན་མོངས་སྲེག་པས་རིན་ཆེན་མེའོ། །གདུལ་བྱའི་མ་རིག་པའི་མུན་པ་སེལ་བའི་ཕྱིར་རིན་ཆེན་ཟླ་འོད་དོ། །གང་གི་དེས་ཆོས་བསྟན་པའི་རྐྱེན་གྱིས་ཆོས་མཐོང་བ་ཐམས་ཅད་བྱང་ཆུབ་མཆོག་གི་དོན་ལ་ཐེ་ཚོམས་མེད་པར་སྦྱོར་བའི་ཕྱིར་མཐོང་བ་དོན་ཡོད་དོ། །ཐུགས་རྗེ་ཆེན་པོའི་བསིལ་ཟེར་སྤྲོ་བའི་ཕྱིར་རིན་ཆེན་ཟླ་བའོ། །མཐོང་བ་དང་སྒོམ་པས་སྤངས་པར་བྱ་བའི་སྒྲིབ་པའི་དྲི་མ་ཐམས་ཅད་སྤངས་པའི་ཕྱིར་དྲི་མ་མེད་པའོ། །སྒྲིབ་པ་


TNT17_Page_0963
[མ་དཔེ་གཟིགས་ན་འདིར་གནོན།]

ཐམས་ཅད་འཇོམས་པས་དཔའ་བར་གྱུར་པའི་ཡེ་ཤེས་སེམས་ཅན་ཐམས་ཅད་ལ་སྦྱིན་པར་མཛད་པའི་ཕྱིར་དཔའ་སྦྱིན་ནོ། །སྒྲིབ་པ་སྤངས་པས་གཙང་བའི་ཕྱིར་ཚངས་པའོ། །གདུལ་བྱ་མཐའ་ཡས་པ་སེམས་བསྐྱེད་དུ་བཅུག་པའི་ཕྱིར་ན། སངས་རྒྱས་མང་པོ་བསྐྱེད་ཅིང་སྤྲུལ་པར་སོང་བས་བྱེད་པ་པོ་མ་ཚངས་པ་དང་འདྲ་སྟེ། དེས་བྱེད་པ་སྟེ་བསྐྱེད་པས་ན་བསྐྱེད་བྱའི་མིང་སྐྱེད་པ་པོར་བཏགས་པ་ཚངས་པས་བྱིན་ནོ། །སེམས་ཅན་རྣམས་ཀྱི་འདོད་ཆགས་ཁོང་ཁྲོ་ང་རྒྱལ་མ་རིག་པ་ལྟ་བ་ངན་པ་དང་ཐེ་ཚོམ་གྱི་མེ་འཇིལ་ཞིང་དྲི་མ་འཁྲུད་པར་མཛད་པའི་ཕྱིར་ཆུ་ལྷའོ། །དེ་དང་འདྲ་བ་ལས་ལྷའི་ཡང་ལྷར་གྱུར་པས་ན་ཆུ་ལྷའི་ལྷའོ། །གཞན་དོན་ཕུན་སུམ་ཚོགས་པའི་དཔལ་དང༌། རང་ཉིད་ཀྱི་དྲི་མ་ཐམས་ཅད་སྤངས་པས་བཟང་པོ་སྟེ་དཔལ་བཟང་ངོ༌། །འཁོར་བའི་གདུང་བ་སེལ་བར་མཛད་པས་ཕྱིར་ཙན་དན་དཔལ་ལོ། །སྐུའི་འོད་ཟེར་གྱིས་ཞིང་ཁམས་ཐམས་ཅད་འགེངས་པར་མཛད་པའི་ཕྱིར་གཟི་བརྗིད་མཐའ་ཡས་སོ། །རང་བཞིན་འོད་གསལ་རྣམ་པར་དག་པའི་དཔལ་དང་ལྡན་པའི་ཕྱིར་འོད་དཔལ་ལོ། །སྡུག་བསྔལ་དང་ཀུན་འབྱུང་གི་མྱ་ངན་མེད་པའི་ཕྱིར་མྱ་ངན་མེད་པའི་དཔལ་ལོ། །ནཱ་ར་ཡ་ན་ཞེས་སྲེད་མེད་ཀྱི་བུ་སྟེ། དེ་ལ་སྲེད་མེད་ནི་གཞན་གྱི་རྒོལ་བའི་འགྲན་ཟླ་མེད་པ། བུ་ནི་རིགས་ཀྱི་དོན་ཏེ། ཟླ་མེད་པའི་རིགས་ཀྱི་ཕྱིར་སྲེད་མེད་ཀྱི་བུའོ། །ཡང་ན་དེའི་སྐད་དོད་ནཱ་ར་ཡ་ན་མིའི་ཐེག་པ་སྟེ།


TNT17_Page_0964
[མ་དཔེ་གཟིགས་ན་འདིར་གནོན།]

རང་སྟོབས་ཀྱིས་མ་ནོར་པར་ལམ་ལ་འཇུག་པ་ཁྱོགས་ལ་སོགས་པ་མིའི་བཞོན་པ་དང་འདྲ་བ་ཡིན་ནོ། །འགྲོ་བ་ཐམས་ཅད་ཀྱི་ཡིད་དུ་འོང་བ་མེ་ཏོག་དང་འདྲ་བར་ཆོས་སྟོན་པར་མཛད་པ་ནི་མེ་ཏོག་དཔལ་ལོ། །གདུལ་བྱ་རྣམས་ཚངས་པའི་འཁོར་ལོ་སྟེ། ཆོས་ཀྱི་འཁོར་ལོ་ཡེ་ཤེས་སྣང་བར་བྱེད་པའི་འོད་ཟེར་དང༌། རྫུ་འཕྲུལ་གྱིས་རྣམ་པར་རོལ་པ་དང༌། མངོན་ཤེས་མཐའ་ཡས་པའི་ཕྱིར་ཚངས་པའི་འོད་ཟེར་རྣམ་པར་རོལ་པ་མངོན་པར་མཁྱེན་པའོ། །གཞན་དེ་དང་འདྲ་བ་ལས་ཚངས་པ་ཞེས་པའི་གནས་སུ་ཉེས་པའི་སྐྱོན་གྱིས་མ་གོས་པས་པདྨ་ཞེས་པ་སྟེ། པད་མའི་འོད་ཟེར་རྣམ་པར་རོལ་པ་མངོན་པར་མཁྱེན་པའོ། །འདིར་རྣམ་པར་རོལ་པ་ནི་ཆོ་འཕྲུལ་རྣམ་པ་གསུམ་མོ་ཞེས་འཆད་པའང་ལེགས་པར་སྣང་ངོ༌། །འཕགས་པའི་ནོར་བདུན་གྱི་དཔལ་གྱིས་ཕྱུག་པར་མཛད་པས་ནོར་དཔལ་ལོ། །དྲན་པ་ཉེར་གཞག་བཞིའི་ཆོས་ཀྱི་དཔལ་གྱིས་ཁྱད་པར་མཛད་པས་དྲན་པའི་དཔལ་ལོ། །བདེ་བར་གཤེགས་པའི་སྙིང་པོ་མཚན་དང་དཔེ་བྱད་ཀྱི་དཔལ་དང་ལྡན་པའི་ཆོས་རྒྱ་ཆེར་སྒྲོག་པར་མཛད་པས་མཚན་དཔལ་ཤིན་ཏུ་ཡོངས་བསྒྲགས་སོ། །དབང་པོ་ལྔ་དང་མངོན་ཤེས་དྲུག་གི་ཏོག་དང་ལྡན་པའི་ཆོས་ཀྱི་རྒྱལ་མཚན་ལ་དབང་བསྒྱུར་བའི་ཕྱིར་དབང་པོ་རྟོག་གི་རྒྱལ་མཚན་གྱི་རྒྱལ་པོའོ། །འགྲོ་བ་མཐའ་དག་གི་གནོད་པ་ལས་ཉོན་སྡུག་བསྔལ་གྱིས་བསྡུས་པ་ཐམས་ཅད་གནོན་ཅིང་འཇོམས་པའི་ཕྱིར་ཤིན་ཏུ་རྣམ་པར་གནོན་པའི་དཔལ་ལོ། །བདུད་བཞིའི་གཡུལ་ལས་རྒྱལ་པའི་ཐབས་སྟོན་པའི་ཕྱིར་གཡུལ་ལས་ཤིན་ཏུ་རྣམ་པར་རྒྱལ་བའོ། །འཇིག་རྟེན་གྱི་གནོད་པ་རྣམས་བཅོམ་ཞིང་ཆེས་ཆེར་གནོན་པའི་ཆོས་རྟོགས་སུ་འཇུག་པས་གཤེགས་པའི་


TNT17_Page_0965
[མ་དཔེ་གཟིགས་ན་འདིར་གནོན།]

ཕྱིར་རྣམ་པར་གནོན་པས་གཤེགས་པའོ། །རྣམ་པར་དག་ཅིང་འོད་འཕྲོ་བའི་ཞིང་ཁམས་རྒྱ་ཆེན་པོ་སྟོན་པའི་ཕྱིར་ཀུན་ནས་སྣང་བ་བཀོད་པའི་དཔལ་ལོ། །འགྲོ་བའི་བསམ་པ་རྫོགས་པར་མཛད་པའི་ཕྱིར་ཕྲིན་ལས་རིན་པོ་ཆེ་དང༌། ཡེ་ཤེས་ཀྱི་འདབ་མ་རྒྱས་པའི་པདྨས་བདུད་དང་མུ་སྟེགས་ཟིལ་གྱིས་གནོན་པའི་ཕྱིར་རིན་ཆེན་པདྨས་རྣམ་པར་གནོན་པའོ། །རིན་ཆེན་པདྨ་དེ་དང་འདྲ་བ་ལས་ཡེ་ཤེས་དང་མཛད་པ་དེ་ལ་རབ་ཏུ་བཞུགས་པ། གཟུང་འཛིན་འཁྲུལ་པའི་ཆོས་གང་གིས་ཀྱང་བསྐྱོད་དུ་མེད་པས་རི་དབང་གི་རྒྱལ་པོ་ལྟ་བུ་སྟེ། རིན་པོ་ཆེའི་པདྨ་ལ་རབ་ཏུ་བཞུགས་པ་རི་དབང་གི་རྒྱལ་པོའོ། །དེ་དག་ལ་ཐོག་མཐའ་གཉིས་ལ་ཆེ་བ་རྒྱས་པར་སྦྱར་བ་ཐམས་ཅད་ལ་གོ་ཞིང༌། ཉེར་བཞི་པ་དང་ཉེར་ལྔ་པ་གཉིས་ལ་ཆེ་བརྗོད་བསྡུས་པ་མཛད་པ་ཡང་སྟོད་སྨད་རྣམས་སུ་གོ་བ་དང༌། གཞན་རྣམས་ཆེ་བའི་ཚིག་མེད་པར་མཚན་རྐྱང་བརྗོད་པ་བསྡུས་པ་སྟེ། གཞན་ལའང་གོ་བར་བྱ་བ་ཡིན་མོད། བསྡུས་པར་བརྗོད་པ་ལ་ཡང༌། ཐོག་མ་ལ་ནི་ཆེ་བའི་ཚིག་ངེས་པར་བརྗོད་དགོས་སོ། །སྐབས་འདིར་ཡང་ན་སློབ་དཔོན་དཔའ་བོས་མཛད་པར་གྲགས་པའི་བསྟོད་པ་ལྟར་མཚན་དོན་བཤད་ཀྱང་རུང་སྟེ། དེ་དང་དེ་ལ་མཚན་ནི་འཇིག་རྟེན་དུ་གྲགས་པ་ལྟར་ཡིན་གྱི། མཚན་གྱི་དོན་ནི་རྫོགས་པའི་སངས་རྒྱས་གང་ཅི་ཡང་རུང་བ་ཐམས་ཅད་ཀྱི་ཡོན་ཏན་ནོ། །གཉིས་པ་བཤགས་


TNT17_Page_0966
[མ་དཔེ་གཟིགས་ན་འདིར་གནོན།]

པའི་ཕུང་པོ་ནི། དེ་དག་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ཞེས་པ་ནས། བསྡོམ་པར་བགྱིད་ལགས་སོ། །ཞེས་པའི་བར་དེ་བཤགས་པའི་ཡུལ་ངོས་བཟུང་བ། བཤགས་བྱའི་ཉེས་པ་བསྟན་པ། ཇི་ལྟར་བཤགས་པའི་ཚུལ་གསུམ་མོ། །དང་པོ་ནི། དགོངས་གསོལ་ཐོག་མ་སྟེ། སངས་རྒྱས་སུམ་ཅུ་རྩ་ལྔ་པོ་དེ་དག་ལ་སོགས་པ་ཞེས་སྦྱར་ཞིང༌། ཇི་སྙེད་ཅེས་པ་མང་པོའི་ཚིག་གོ །འཚོ་ཞིང་གཞེས་པ་ནི་ད་ལྟར་བཞུགས་པའི་སངས་རྒྱས་རྣམས་ཁོ་ན་སྟེ། འདས་པ་དང་མ་འོངས་པའི་སངས་རྒྱས་ནི། འཇིག་རྟེན་ཕལ་པ་རྣམས་ཀྱི་བློ་ངོར་བཤགས་པའི་ཡུལ་དུ་མི་འདོད་པའི་ཕྱིར་མ་སྨོས་པའོ། །ངེས་པར་ན་ཀུན་རྫོབ་རྣམ་པར་གཞག་པ་ལ་ཡང༌། སྔོན་གྱི་སངས་རྒྱས་རྣམས་ད་ལྟར་མངོན་སུམ་དུ་བཞུགས་པ་ཡིན་ལ། དོན་དམ་པར་ནི། དུས་གསུམ་གྱི་སངས་རྒྱས་སུ་གདགས་པ་ཐམས་ཅད་ངོ་བོ་དབྱེ་བ་མེད་ཅིང་དུས་གསུམ་ལས་འདས་པའང་ཡིན་ནོ། །གཉིས་པ་ནི། གླེགས་བམ་འགའ་ཞིག་ལས་སྐྱེ་བ་ཐོག་མའི་ཐ་མ་མ་མཆིས་པ་ཞེས་འབྱུང་བ་ལ་སོགས་པར་མངོན་ཏེ། སྔོན་གྱི་མཐའ་མེད་པའི་དུས་ནས་ཞེས་པ་ཡིན་པའི་ཕྱིར་རོ། །ཐོག་མ་དང་ཐ་མ་མ་མཆིས་པ་ཞེས་པ་ལྟར་ནའང༌། དོན་དེ་ཁོ་ན་བཞིན་དུ་འཆད་དགོས་ཏེ། དེ་གཉིས་དོན་གཅིག་མིང་གི་རྣམ་གྲངས་སུ་བྱས་ནས། ཐོག་མ་མ་མཆིས་པའམ། ཐ་མ་སྟེ་སྔོན་གྱི་མཐའ་མ་མ་མཆིས་པ་ཞེས་སྦྱོར་དགོས་ཏེ།


TNT17_Page_0967
[མ་དཔེ་གཟིགས་ན་འདིར་གནོན།]

ཐ་མ་ནི་མཐའ་ཡིན་པ་ལས་ཕྱི་མཐའ་མ་ཡིན་པར་སྔོན་མཐའ་ཡིན་པའི་དོན་ནོ། །སྤྱིར་ནས་དུས་གསུམ་གྱི་དགེ་བ་ལ་ཡི་རང་བསྔོ་བ་འབྱུང་བས་བློ་སྦྱོང་པའི་དོན་དུ་མ་འོངས་པའི་སྡིག་པ་བཤགས་པའང་མི་འགལ་མོད། འདིར་དེ་མི་སྦྱོར་རོ། །འཁོར་བ་ན་ཞེས་པ་འཁོར་བའི་གནས་ན་སྟེ། དེར་ཇི་ལྟར་འཁོར་བའི་ཚུལ་སྐྱེ་གནས་བཞིའི་སྐྱེ་བས་འགྲོ་བ་རིགས་ལྔ་པོ་གཞན་དང་གཞན་དག་ཏུ་སྐྱེ་བའི་ཚེ་ཞེས་སྦྱར་ནས། སྡིག་པ་མི་དགེ་བའི་ལས་རྣམས་ལས་བགྱིས་པ་ནི་རང་གི་དངོས་སུ་བྱས་པའོ། །བགྱིད་དུ་རྩལ་བ་ནི་གཞན་བྱེད་དུ་བཅུག་པའོ། །རྗེས་སུ་ཡི་རང་བ་ནི་གཞན་གྱིས་བྱས་པ་ལ་དགའ་བ་སྒོམ་ཞིང་བསྔགས་པ་བརྗོད་པའོ། །མཆོད་རྟེན་ནི་སྒྲ་ཡངས་པར་ན། དེ་བཞིན་གཤེགས་པའི་སྐུ་གསུང་ཐུགས་ཀྱི་རྟེན་དུ་གྲགས་པ་ཐམས་ཅད་དོ། དགེ་འདུན་གྱི་དཀོར་ནི་གནས་གཞི་གཅིག་ཏུ་གནས་པའི་དགེ་འདུན་གྱི་རྫས་དང༌། ཕྱོགས་བཞིའི་དགེ་འདུན་གྱི་དཀོར་ནི། གཞི་ན་གནས་པ་དང་ཕྱོགས་ཐམས་ཅད་ནས་ངེས་མེད་དུ་ཡོང་བ་ཀུན་གྱི་དུས་སུ་འབྱུང་བའམ་ནར་མའི་ཚུལ་གྱི་ཐོས་སོ། །ད་ལྟ་བོད་ཀྱི་ཡུལ་འདི་ན། སྟོན་ཀའི་དུས་ཀྱི་བསོད་སྙོམས་པ་དགག་པའི་བཅའ་སྒྲིགས་བྱེད་པའང་འདིའི་ཁོངས་སུ་གཏོགས་སོ། །འཕྲོག་པ་ཞེས་པ་ནི་དབང་ཆེས་འཕྲོགས་པའམ། འཇབ་བུས་རྐུས་ཀྱང་རུང་སྟེ་མ་བྱིན་པར་བླངས་པ་ཐམས་ཅད་དོ། །མཚམས་མེད་པ་ལྔའི་


TNT17_Page_0968
[མ་དཔེ་གཟིགས་ན་འདིར་གནོན།]

ལས་ནི། ཕ་དང་མ་དང་དགྲ་བཅོམ་པ་གསོད་པ་དང༌། དགེ་འདུན་གྱི་དབྱེན་དང༌། ངན་སེམས་ཀྱིས་དེ་བཞིན་གཤེགས་པའི་སྐུ་ལ་ཁྲག་འབྱིན་པར་བྱེད་པ་སྟེ་ལས་དེ་བྱས་ནས་ཐེག་པ་ཆེན་པོའི་ཐབས་མཁས་ཀྱིས་མ་བཅོས་ན་སྐྱེ་བ་གཞན་གྱིས་བར་མ་ཆོད་པར་དམྱལ་བ་མནར་མེད་དུ་ལྷུང་ངེས་པའོ། །ལས་འདི་རྣམས་ཀྱི་ཕྱོགས་མཐུན་པ་ནི་ཉེ་བའི་མཚམས་མེད་པ་ལྔ་སྟེ། མ་ཡང་ཡིན་དགྲ་བཅོམ་པ་ཡང་ཡིན་པ་མི་གཙང་པར་སྤྱོད་པས་སུན་འབྱིན་པ་དང༌། བྱང་ཆུབ་སེམས་དཔའ་གསོད་པ་དང༌། རྒྱུན་ཞུགས་ལ་སོགས་པ་འཕགས་པ་སློབ་པ་གསོད་པ་དང༌། དགེ་འདུན་གྱི་འདུ་བའི་སྒོ་འཕྲོག་པ་སྟེ། དགེ་འདུན་གྱི་ལོངས་སྤྱོད་ངེས་པའི་རྫས་ཆུང་ཡང་རུང༌། མ་བྱིན་ལེན་པ་དང༌། མཆོད་རྟེན་འཇིགས་པ་སྟེ་རྟེན་གསུམ་བཤིག་པར་བྱེད་པའོ། །དེ་དག་ལས་དགེ་འདུན་གྱི་དབྱེན་ནི། འཁོར་ལོའི་དབྱེན་དང༌། ལས་ཀྱི་དབྱེན་དང༌། འཁྲུག་ལོང་བྱེད་པའི་དབྱེན་ཏེ་གསུམ་ལས། དང་པོ་ནི། སྟོན་པ་བཅོམ་ལྡན་འདས་ཉིད་བཞུགས་པའི་དུས་ལན་གཅིག་ཁོ་ན་བྱུང་བ་དེ་ཡིན་ལ། ལས་ཀྱི་དབྱེན་ནི། དགེ་སློང་ཚུལ་ཁྲིམས་ལྡན་པས་ཆོས་སུ་རློམ་པའི་བྱ་བ་ལ་བརྟེན་ནས་བྱུང་བའི་ཉེས་པ་ཡིན་པས་སྤྱིར་སྡིག་ཆེ་ཡང་རབ་ཏུ་བྱུང་བ་ལ་འབྱུང་འོས་པ་ཙམ་ཡིན་ལ། ཕྱི་མ་ནི་ངོ་ཚ་མེད་ཅིང༌། ཁྲེལ་མེད་པ་ཁོ་ནའི་དབང་དུ་གྱུར་པ་དང༌། རབ་ཏུ་བྱུང་བ་ལ་ཤིན་ཏུ་མི་འོས་ཤིང་མཚམས་ལས་འདས་པ་


TNT17_Page_0969
[མ་དཔེ་གཟིགས་ན་འདིར་གནོན།]

ཆོས་མ་ཡིན་པ་ཁོ་ན་ལ་བརྟེན་པ་ཡིན་ནོ། །དེ་རྣམས་ལས་དགེ་འདུན་ལ་འཁྲུག་ལོང་གི་དབྱེན་བསྐྱེད་པ་འདི་དང༌། དགེ་འདུན་གྱི་འདུ་བའི་སྒོ་འཕྲོག་པ་འདི་གཉིས་ཤིན་ཏུ་འབྱུང་ཉེ་ཞིང་སྡིག་ཆེ་བས་གཟབ་དགོས། དེང་སང་གི་ཆོས་ལ་མཆོད་རྟེན་འཇིག་པ་དངོས་བྱེད་མཁན་ཅུང་ཟད་ཉུང་ངུ་ཆུག་ཀྱང༌། རྟེན་གསུམ་ལ་གུས་པ་མེད་ཅིང༌། རྩིང་ཆོས་ཀྱི་སྒོ་ནས་འགོམ་ཡུགས་གཏོང་བ་དང་ཆུད་འཛའ་བར་བྱེད་པ་ཡང་དེའི་ཕྱོགས་མཐུན་ཡིན་པས་འབད་དེ་སྤོང་བ་གལ་ཆེའོ། །མི་དགེ་བ་བཅུའི་ལས་ཀྱི་ལམ་ཞེས་པ་ལ། སྲོག་གཅོད་པ་དང༌། མ་བྱིན་པ་ལེན་པ་དང༌། འདོད་པས་ལོགས་པར་གཡེམ་པ་སྟེ་ལུས་ཀྱི་ལས་གསུམ་དང༌། རྫུན་དང་ཕྲ་མ་དང་ཚིག་རྩུབ་ངག་འཁྱལ་སྟེ་ངག་གི་ལས་བཞི་དང༌། བརྣབ་སེམས་གནོད་སེམས་ལོག་ལྟ་སྟེ་ཡིད་ཀྱི་ལས་གསུམ་མོ། །ཡང་དག་པར་བླངས་པ་ཞེས་པ་ལ། ཡང་དག་པ་ནི་ཚབས་ཆེན་པོའི་མིང་ཡིན་ལ། བླངས་པ་ནི་ལས་དེ་ལ་ཞུགས་པའམ། ཡང་ཡང་བྱེད་པའི་དོན་ཡིན་གྱི། དམ་འཆའ་ཞིང་བླངས་པ་ངེས་པར་དགོས་པ་ནི་མ་ཡིན་ནོ། །དེ་ལ་སྡིག་པའི་ལས་བགྱིས་པ་སོགས་ཀྱིས་མདོར་བསྟན་པ་དང༌། མཆོད་རྟེན་གྱི་དཀོར་རམ་སོགས་ནི་ཉེས་པ་ཆེ་ཞིང་འབྱུང་ཉེ་བ་འགའ་ཞིག་གི་ཁྱད་པར་དུ་སྨོས་པ་ཡིན་ནོ། །དེ་དག་ནི་སྡིག་པ་ལས་ཀྱི་ངོ་བོ་བསམ་པ་ཡིན་ལ། ད་ནི་ཉེས་དམིགས་ཀྱི་སྒོ་ནས་ལས་ངན་པའི་


TNT17_Page_0970
[མ་དཔེ་གཟིགས་ན་འདིར་གནོན།]

རང་བཞིན་བསམ་པ་ནི། ལས་ཀྱི་སྒྲིབ་པ་སོགས་སོ། །གང་གིས་སྒྲིབ་ནས་ཞེས་པ་ལས་ངན་དེ་བྱས་པས་སེམས་རྒྱུད་བསྒྲིབས་ཏེ། ལས་དེའི་དབང་གིས་སྐྱེ་གནས་ངན་པར་འཁྲིད་པ་ཞེས་པའི་དོན་ནོ། །འཆི་བ་འགྲོ་བའི་དོན་ཏེ། འདིར་དམྱལ་བ་ལ་སོགས་པ་མི་ཁོམ་པའི་གནས་བརྒྱད་དང༌། སངས་རྒྱས་འབྱུང་བ་ལ་མི་མཉེས་པར་བྱེད་པ་སྟེ་འགྲོ་བ་ངན་པ་དགུའོ། །དེ་ལས་ཡུལ་མཐའ་འཁོབ་ནི་དམ་པའི་ཆོས་སངས་རྒྱས་ཀྱི་བསྟན་པ་མེད་པའོ། །ཀླ་ཀློ་ནི་སྟག་གཟིག་གི་ཆོས་ལུགས་འཛིན་པའམ་དགེ་སྡིག་གི་རྣམ་དབྱེ་མི་ཤེས་པ་དང༌། དགེ་སྡིག་གི་རྣམ་དབྱེ་གོ་ལོག་ལ་འཛིན་དམ་པོ་དང་བཅས་པ་རྣམས་སོ། །ལྷ་ཚེ་རིང་པོ་ནི་འདུ་ཤེས་མེད་པའི་ལྷ་སྟེ། རྟེན་དེ་ལ་ཏིང་ངེ་འཛིན་གྱི་གནས་པ་ངན་པའི་མཐུས། དམ་ཆོས་སྤྱོད་པའི་སྐལ་བ་མེད་ཅིང༌། ཕལ་ཆེ་བ་ཞིག་འཆི་ཁར་ལོག་ལྟས་མཚམས་སྦྱར་ནས་དམྱལ་བར་འགྲོ་བའོ། །ལྟ་བ་ལོག་པ་ནི། སྐུར་འདེབས་ཀྱི་ལོག་ལྟ་ཉིད་དམ། གཞན་ཡང་བྱེད་པ་པོར་འདོད་པ་ལ་སོགས་པའི་ལྟ་བ་ངན་པ་དམ་དུ་འཆང་བར་འགྱུར་བ་སྟེ། འདིར་འགྲོ་བའམ། སྐྱེ་བའམ། འགྱུར་བའམ་ཞེས་སོགས་ནི། དེ་དང་དེར་འགྱུར་བའི་རྒྱུ་ལས་ངན་པ་གང་དེ་དང་དེ་ཞེས་པའི་དོན་ནོ། །དེ་ལ་ངན་སོང་གསུམ་ནི། སྡིག་པའི་ལས་ཀྱི་རྣམ་སྨིན་མྱོང་བ་གཙོ་ཆེ་བའི་དབང་དུ་བྱས་ལ། གཞན་རྣམས་རྒྱུ་མཐུན་པ་ལ་སྤྱད་པས། སྡུག་


TNT17_Page_0971
[མ་དཔེ་གཟིགས་ན་འདིར་གནོན།]

བསྔལ་གཞན་གསུམ་པོའི་གཞི་འམ་རྟེན་དུ་འགྲོ་བའི་དབང་དུ་བྱས་སོ། །སངས་རྒྱས་འབྱུང་བ་ལ་མཉེས་པར་མི་བགྱིད་པ་ནི། དེ་བཞིན་གཤེགས་པ་ལ་སྐུར་བ་འདེབས་པ་ལ་སོགས་པ་དངོས་སུ་སྡིག་གསོག་པ་དང༌། བཀའ་གཅོག་པ་ལྟ་བུ་ཡིན་ཏེ། སྡིག་བསགས་ཀྱང་སངས་རྒྱས་ལ་མི་མཉེས་པའི་ཐུགས་འབྱུང་བ་མེད་མོད། འཇིག་རྟེན་དུ་གྲགས་པ་ལྟར་གསུངས་པའོ། །རྗེས་མཐུན་པ་ནི་ད་ལྟར་ཡང་ཚུལ་ཁྲིམས་དང་ལྡན་ཞིང་ཡང་དག་པའི་ལམ་གསལ་བར་བྱེད་པའི་སྐྱེས་བུ་དམ་པ་ལ་སྡིག་གསོག་པ་དང༌། དེའི་བཀའ་ཆོས་དང་ལྡན་པ་གཅོག་པའོ། །གསུམ་པ་ནི་དེ་དག་ཐམས་ཅད་ཅེས་པ་ལ་སོགས་པའོ། །ཡེ་ཤེས་དང་སྤྱན་དང་དཔང་དུ་དང་ཚད་མ་དང་མཁྱེན་པ་གཟིགས་པ་རྣམས་དོན་གཅིག་ལ་རྣམ་གྲངས་ཀྱི་དབང་དུ་བྱས་ཀྱང་རུང་སྟེ། བདག་གིས་ཉེས་པ་བྱས་པ་སངས་རྒྱས་རྣམས་ཀྱིས་མི་མཁྱེན་ཏོ་ཞེས་པ་དགག་པའི་ཕྱིར་དུ། ཐམས་ཅད་མཁྱེན་པ་ཡེ་ཤེས་ཀྱི་སྤྱན་དང་ལྡན་པ་ཡིན་པས་བདག་ལ་དེ་རྣམས་ལྐོག་ཏུ་གྱུར་ཀྱང༌། དེ་རྣམས་ཀྱིས་བདག་མངོན་སུམ་དུ་གཟིགས་པ་ཡིན་ནོ་སྙམ་ངོ་ཚ་བ་དང༌། འཇིག་པ་དང་འཛེམ་བག་དང་བཅས་པར་བྱ་བའི་ཕྱིར་རོ། །ཡང་ན་ཡེ་ཤེས་སུ་གྱུར་པ་ནི། ཤེས་བྱ་ཐམས་ཅད་གཟིགས་པས་བདག་གིས་ཉེས་པ་བྱས་པ་དང༌། དེའི་རྒྱུད་དང་ཉེས་དམིགས་ཐམས་ཅད་མཁྱེན་ཅིང༌། འོན་ཀྱང་སྙིང་རྗེ་ཆེན་པོའི་


TNT17_Page_0972
[མ་དཔེ་གཟིགས་ན་འདིར་གནོན།]

ཐུགས་ཅན་ཡིན་པས། བདག་ཅག་གི་ཉེས་པ་སྦྱོང་བར་མཛད་དོ། །སྤྱན་དུ་གྱུར་པ་ནི། སོ་བའམ་དེ་ཉིད་དཔང་པོའང་ཡིན་ཏེ་སེམས་ཅན་སྡུག་བསྔལ་བ་རྣམས་ལ། དཔང་པོར་གྱུར་པའི་ཕྱིར། བདག་གི་ཉེས་པ་བྱས་པ་ཡང་མཁྱེན་ལ། སྙིང་ཐག་པས་འཆགས་པའམ་གཡོ་རྒྱུ་ཚིག་ཙམ་གྱིས་འཆགས་པ་ཡང་མཁྱེན་ནོ། །དེའི་ཕྱིར་དཔང་པོ་ཞུ་བའི་དོན་ནོ། །ཚད་མར་གྱུར་པ་ནི། དངོས་པོའི་གནས་ལུགས་ལ་མ་འཁྲུལ་ཞིང༌། ཉེ་རིང་དང་གཡོ་སྒྱུ་སྤངས་པ། རྣམ་པ་ཀུན་ཏུ་རྫུན་མི་གསུང་བའི་ཕྱིར་ན་ཚད་མར་གྱུར་པའོ། །མཁྱེན་པས་གཟིགས་པ་ཞེས་དཔེ་ཕལ་ཆེར་ལས་འབྱུང་བ་ནི། བྱེད་ཚིག་ཅུང་ཟད་འཁྲུལ་བ་སྟེ། མཁྱེན་པ་གཟིགས་པ་ཞེས་སོ་སོར་མཚམས་བཅད་ན། སྐད་དོད་དང་མཐུན་ཏེ་ཇི་ལྟ་བའི་གནས་ལུགས་མཐའ་དག་མཁྱེན་པ་དང༌། ཀུན་རྫོབ་རྟེན་འབྲེལ་མཐའ་དག་གཟིགས་ཤིང༌། དེ་ལས་འགྲོ་བའི་དོན་ཕུན་སུམ་ཚོགས་པ་སྤྱོད་པའོ། །དེའི་ཕྱིར་ཉེས་བྱས་རྣམས་རང་བཞིན་མེད་པའི་དབྱིངས་ལ་འཇུག་པར་མཁྱེན་ཅིང་འཇུག་པའི་འཐབས་ཚུལ་ཡང་མཁྱེན་པའི་ཕྱིར། དག་ཚངས་འབུལ་བའི་ཡུལ་མཐར་ཐུག་པར་འོས་པའོ། །མཐོལ་བ་ནི་ཉེས་བྱས་འདི་ལྟ་བུ་བགྱིས་སོ་ཞེས་ཚོགས་སུ་མི་འཆབ་པར་སྒྲོགས་པ་ཡིན་ལ། བཤགས་པ་ནི། ཉེས་པ་ལ་འགྱོད་པས་ཀུན་ནས་བླངས་ཏེ་སྐྱོན་ཡིན་པར་སྨོས་པའོ། །མི་འཆབ་པོ་མི་སྦེད་དོ་ཞེས་པ་ནི་དོན་གཅིག་མིང་གི་རྣམ་


TNT17_Page_0973
[མ་དཔེ་གཟིགས་ན་འདིར་གནོན།]

གྲངས་སུ་བྱས་ན། འགྱོད་པ་སྟོབས་དང་ལྡན་པས་དོན་དེ་ཉིད་ཡང་ཡང་དུ་བརྗོད་པའོ། །ཡང་ན་མཐོལ་བ་ནི་ངོ་བོའམ་མདོར་བསྟན་པ་དང༌། ཕྱི་མ་གཉིས་དབྱེ་བའི་རྒྱས་བཤད་ཀྱི་ཚུལ་ཏེ་སྔར་གྱི་རྣམས་མི་འཆབ་བོ། །ཕྱིས་ཀྱི་རྣམས་མི་སྦེད་དོ། །ཞེས་ཀྱང་འཆད་དེ་འགལ་བ་མ་མཐོང་ལ། དེ་དག་སྔར་བྱས་དུག་འཐུངས་པ་ལྟ་བུའི་འགྱོད་སེམས་ཀྱིས་བཤགས་པའི་དབང་དུ་བྱས་སོ། །སླན་ཆད་ཀྱང་གཅོད་ཅིང་བསྡོམ་པར་བགྱི་ཞེས་པ་ཕྱིན་ཆད་སྲོག་ལ་བབ་ཀྱང་ཉེས་པ་དེ་ལྟ་བུ་མི་བྱེད་པར་ངམ་འཆའ་བ་སྟེ། གཅོད་པ་ནི་སྔར་གྱི་རྒྱུན་གཅོད་པ་དང༌། སྡོམས་པ་ནི་ཕྱོགས་དེ་ལ་དབང་པོའི་སྒྲོ་སྡོམ་པའོ། །ཉེས་ལྟུང་ལྡོག་པར་བྱེད་པའི་ཐབས་ཀྱི་གཙོ་བོ་ནི་འདི་ཁོ་ན་ཏེ། འདི་མེད་ན་ནི་འགྱོད་པ་དང་སུན་འབྱིན་པ་ཡོད་པ་ལྟར་སྣང་ཡང༌། ལྟར་སྣང་ཁོ་ན་ཡིན་པས་སུན་འབྱིན་པའི་སྟོབས་སུ་མི་འགྱུར་རོ། །གསུམ་པ་ཡོངས་སུ་བསྔོ་བའི་ཕུང་པོ་ལ། ཉེ་ཚེ་བའི་བསྔོ་བ་དང༌། རྒྱ་ཆེ་བའི་བསྔོ་བ་དང༌། བླ་ན་མེད་པའི་བསྔོ་བ་སྟེ་གསུམ་ལས། དང་པོ་ལ། སྦྱིན་པ་ཐ་ན་སོགས་ནི། སྦྱིན་པ་ལས་བྱུང་བའི་དགེ་བའི་རྩ་བ་ཐམས་ཅད་དང༌། ལུས་ངག་གི་ཉེས་སྤྱོད་ལས་ལྡོག་པའི་ཚུལ་ཁྲིམས་ཀྱི་དགེ་བ་ཐམས་ཅད་དང༌། ཚངས་པར་སྤྱོད་པ་སྟེ་བཟོད་པ་དང༌། དགེ་བ་ལ་སྤྲོ་བ་དང༌། ཞི་གནས་དང་ལྷག་མཐོང་ལས་བྱུང་


TNT17_Page_0974
[མ་དཔེ་གཟིགས་ན་འདིར་གནོན།]

བའི་དགེ་བ་རྣམས་བསྔོ་བར་བགྱིད་པའོ། །གཉིས་པ་ནི། བདག་གིས་སེམས་ཅན་སོགས་ཏེ་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱང༌། སེམས་ཅན་ཡོངས་སུ་སྨིན་པའི་ཐབས་སུ་འདུ་བས་ཕར་ཕྱིན་དྲུག་དང་བསྡུ་དངོས་བཞི་ལ་སོགས་པ་ཐེག་ཆེན་གྱི་ཐུན་མོང་མ་ཡིན་པའི་སྤྱོད་པ་རྣམས་སོ། །བྱང་ཆུབ་ཀྱི་སེམས་ཀྱི་དགེ་བའི་རྩ་བ་ནི། སྤྱོད་པ་དེའི་རྩ་བར་གྱུར་པ་སྨོན་པ་དང་འཇུག་པའི་སེམས་ཡང་དག་པར་བསྐྱེད་པ་དང༌། དེའི་རིགས་རྒྱུན་གོམས་པར་བྱེད་པ་བྱམས་པ་དང་སྙིང་རྗེས་ཀུན་ནས་བླངས་པའི་བྱང་ཆུབ་ཀྱི་སེམས་བདག་གཞན་མཉམ་པ་དང་བརྗེ་བ་སྒོམ་པར་བྱེད་པའོ། །བླ་ན་མེད་པའི་ཡེ་ཤེས་ནི། སྤྲོས་པ་ཐམས་ཅད་དང་བྲལ་བའི་སྟོང་པ་ཉིད་གཉིས་སྟོང་གི་ཡེ་ཤེས་དེ་བཞིན་གཤེགས་པའི་སྙིང་པོ་ཉིད་དང༌། དེ་ལ་དམིགས་པའི་རྣལ་འབྱོར་ཏེ་གཉིས་ལས། འདིར་ནི་ངེས་པར་བསྔོ་བར་དགོས་པའི་བླ་ན་མེད་པའི་ཡེ་ཤེས་ནི་ཕྱི་མ་དེ་ཡིན་ལ། དེ་ཉིད་ཀྱི་ཡུལ་དུ་དམིགས་པའི་ཆོས་དབྱིངས་དེ་ཡང་སྤྱི་ལྡོག་ནས་བསྔོ་བར་བྱ་བ་ནི་ཡིན་ཏེ། དགེ་བ་ཐམས་ཅད་ཆོས་ཀྱི་དབྱིངས་སུ་རོ་གཅིག་པར་དམིགས་ནས་གནས་ལུགས་མཐར་ཐུག་པའི་ཆོས་ཀྱི་སྐུར་སྨོན་པར་བྱེད་དགོས་པའི་ཕྱིར་རོ། །ཆོས་དབྱིངས་བསྔོ་རྒྱུར་བྱས་ན་དེ་ལ་མཚན་མར་བལྟ་བར་འགྱུར་སྙམ་ན། བསྔོ་བ་ནི་ཀུན་རྫོབ་ལ་བརྟེན་ནས་བཞག་དགོས་པ་བསོད་ནམས་བསྔོ་བྱར་བྱེད་པ་


TNT17_Page_0975
[མ་དཔེ་གཟིགས་ན་འདིར་གནོན།]

དང་ཁྱད་པར་མེད་པས་མཚན་ལྟར་མི་འགྲོའོ། །ཆོས་དབྱིངས་བསྔོ་བྱར་བྱེད་པ་ཡང་ཀུན་རྫོབ་ཀྱི་བློ་ངོར་ཡིན་ལ། དོན་དམ་པར་ནི་བསྔོ་བ་ཉིད་ཀྱང་མ་གྲུབ་ན། ཆོས་དབྱིངས་བསྔོ་བྱ་ཡིན་མིན་གྱི་དཔྱད་པ་མི་འཇུག་གོ །ཆོས་དབྱིངས་བསྔོ་ཡང་བདེན་པར་ཞེན་ནས་མི་བསྔོ་བའི་ཕྱིར། དམིགས་པའི་དུག་དང་བཅས་པའི་བསྔོ་བར་མི་འགྱུར་ལ། བསྔོ་བྱར་བསམ་པས་བདེན་ཞེན་དུ་འགྱུར་ན་ནི། དགེ་བའི་ལས་ལ་མཚུངས་པས། བསྔོ་བ་དུག་མེད་མི་སྲིད་པར་འགྱུར་ཞིང༌། ཅི་སྟེ་ཆོས་དབྱིངས་རང་བཞིན་ཡིན་ཅིང་དགེ་བར་ཡང་འདོད་ལ། བདེན་པར་ཡང་འདོད་པའི་ཕྱིར་དམིགས་བཅས་སོ་སྙམ་ན། ངོ་བོ་ཉིད་ཀྱི་དགེ་ཞིང་བདེན་པར་གནས་ཀྱང༌། དེ་འདྲ་ཁོ་ནར་ཞེན་པ་ནི་མི་བྱེད་པས་ན་སྐྱོན་མེད་དེ། དཔེར་ན་འདུས་བྱས་ཀྱི་དགེ་བ་རྣམས་ཀྱང་ཀུན་རྫོབ་ཏུ་དོན་བྱེད་ནུས་པ་ཡིན་མོད་ཀྱི། ཀུན་རྫོབ་ཏུ་དོན་བྱེད་ནུས་པའོ། །ཞེས་ཞེན་པར་མི་བྱེད་པ་བཞིན་ནོ། །བསྔོ་བྱ་དགེ་རྩ་གཉིས་པོ་དེའི་མཇུག་གཅིག་ཏུ་སྡོམ་པའི་བསྔོ་བ་ནི། གཅིག་ཏུ་བསྡུས་ཤིང་བཟླུམས་ཏེ་བསྡམས་ནས་ཞེས་པ་ལ་གསུམ་པོ་རྣམ་གྲངས་སུ་སྦྱར་ཀྱང་རུང་ལ། བསྡུས་པ་ནི་ཚོགས་པ་བཟླུམས་པ་ནི་འདྲེས་པ་བསྡོམས་པ་ནི་དབྱེར་མི་ཕྱེད་པ་ཞེས་འཆད་པ་ལྟར་ཡང་རུང་ངོ༌། །འགྲེལ་པ་གཅིག་ལས། ཚེ་འདིའི་ཕུན་ཚོག་དང་ལྷ་མི་དང༌། ཐེག་དམན་དུ་མ་བསྔོས་པ་ལ་རིམ་གྱིས་སྦྱོར་བ་ནི། བརྡོལ་ཐབས་


TNT17_Page_0976
[མ་དཔེ་གཟིགས་ན་འདིར་གནོན།]

སུ་སྨྲས་པའོ། །དེ་བས་ན་དགེ་བའི་རྩ་བ་རྣམས་ཐམས་ཅད་བློས་གཅིག་ཏུ་བསྡོམས་ནས། དེ་ལ་འབྲས་བུའི་མཆོག་ཐོབ་པར་སྨོན་ནོ། །འབྲས་བུའི་མཆོག་གང་དུ་བསྔོ་བར་བྱེད་ཅེ་ན། བླ་ན་མ་མཆིས་པ་དང་གོང་ན་མ་མཆིས་པ་རྣམ་གྲངས་ཀྱི་སྨོས་པ་སྟེ། དེ་ལས་ལྷག་པའི་གོ་འཕང་གཞན་མེད་པའོ། །བླ་མའི་ཡང་བླ་མར་ཞེས་དེ་ལ་བླ་མ་ནི། ཉན་ཐོས་དང་རང་སངས་རྒྱས་ཀྱི་བྱང་ཆུབ་ཡིན་ལ་དེ་ལས་བླ་མར་གྱུར་པ་ནི། བླ་ན་མེད་པའི་བྱང་ཆུབ་བོ། །གོང་མའི་ཡང་གོང་མ་ཞེས་འདོན་པ་ལྟར་ན། དེ་གཉིས་རྣམ་གྲངས་ཀྱི་སྒོ་ནས་སྨོས་པ་ཙམ་ཡིན་གྱི་དོན་སོགས་པ་མེད་ལ། དེ་ལྟ་བས་ན་མདོ་ཉིད་དང་དཔེ་མང་པོ་ལས། གང་རུང་གཅིག་ཁོ་ན་སྨོས་པ་ལེགས་པར་མངོན་ནོ། །དེ་ལྟར་ན་དགེ་རྩ་བསགས་པ་རྣམས་ཀྱི་མཐུ་ལས། གོང་འཕང་དེ་ལྟ་བུ་ཐོབ་པར་གྱུར་ཅིག་པའོ། །གསུམ་པ་ནི། ཇི་ལྟར་འདས་པའི་སངས་རྒྱས་སོགས་ཏེ། རང་ཅག་སོ་སོ་སྐྱེ་བོས་བྱང་ཆུབ་དང་གཞན་དོན་དུ་བསྔོ་བ་སོགས་སྨོན་ལམ་རྒྱ་ཆེན་པོར་རློམ་པ་མང་པོ་བགྱིས་ཀྱང༌། ཡང་དག་པར་ན་རྒྱ་ཆེན་པོར་འགྱུར་བ་དཀའ་བས། དུས་གསུམ་གྱི་སངས་རྒྱས་རྣམས་ཀྱི་སྨོན་ལམ་གང་ཡིན་པ་དེ་ཐམས་ཅད། བདག་གི་དགེ་བ་འདི་དག་ལ་བརྟེན་ནས་གྲུབ་པར་གྱུར་ཅིག་ཅེས་བརྗོད་པས། སྨོན་ལམ་རྒྱ་མཚོ་མཐའ་མེད་པ་ལ་འཇུག་པའི་བསྔོ་བར་འགྱུར་བའོ། །རྩ་བའི་བསྡུས་དོན་གཉིས་པ། རྒྱུན་


TNT17_Page_0977
[མ་དཔེ་གཟིགས་ན་འདིར་གནོན།]

བཤགས་མདོར་བསྡུས་པས་བཤད་པ་ནི་སྔར་གྱི་དོན་བསྡུ་ཡང་ཡིན་ལ། སྔར་མ་བསྟན་པའི་ཡི་རང་གསོལ་འདེབས་སོགས་ཀྱང་ཁ་སྐོང་གི་ཚུལ་དུ་གནས་སོ། །སྐྱབས་འགྲོ་སྔར་མདོར་བསྟན་པ་དེ། སླར་ཡང་འདིར་རྒྱས་པར་བཤད་ཅིང༌། མཐར་ཐུག་གི་སྐྱབས་གནས་གཅིག་ཏུ་བསྟན་པ་ཡང་ཡིན་ནོ། །དེ་ཡང་སྡིག་པ་ཐམས་ཅད་ནི་སོ་སོར་བཤགས་སོ་ཞེས་པ་མན་ཆད་དེ། བཤགས་པ་དང་ཡི་རང་དང་གསོལ་འདེབས་དང༌། བསྔོ་བ་རྣམས་ལ་ཚིག་རེ་རེ་དང༌། སྐྱབས་འགྲོ་ཚིགས་བཅད་གཅིག་གོ །དེ་དག་ལས་གཞན་རྣམས་གོ་སླ་ལ། གསོལ་བ་འདེབས་པ་ནི། མཆོག་གི་སྤྲུལ་པའི་སྐུ་བྱང་ཆུབ་ཐོབ་མ་ཐག་པའི་ཚུལ་སྟོན་པ་རྣམས་ལ་ཆོས་འཁོར་བསྐོར་བར་བསྐུལ་བ་དང༌། མྱ་ངན་ལས་འདའ་བར་བཞེད་པ་རྣམས་ལ་མྱ་ངན་ལས་མི་འདའ་བར་གསོལ་བ་འདེབས་པ་གཉིས་ཡིན་པར་འཆད་དེ། དེ་ལྟར་ཡང་ཡིན་ལ། དེར་མ་ཟད་འདོད་པའི་དོན་ལ་གསོལ་བ་འདེབས་པ་ཐམས་ཅད་བསྟན་ཏོ། །འདོད་པའི་དོན་ཡང་གཙོ་བོར་གཞན་དོན་ཏེ་སེམས་ཅན་གྱི་སྡུག་བསྔལ་སྐྱོབ་པར་མཛད་པ་ལ་སོགས་པའོ། །བླ་ན་མེད་པའི་ཡེ་ཤེས་ཀྱི་མཆོག་ནི་སངས་རྒྱས་རྣམས་ཀྱི་ངོ་བོ་ཉིད་སྐུ་རྣམ་པ་ཐམས་ཅད་པ་ཉིད་ཀྱི་གོ་འཕང་ངོ༌། །མི་མཆོག་དང་རྒྱལ་བ་ནི་སངས་རྒྱས་ཀྱི་མཚན་གྱི་རྣམ་གྲངས་དང༌། སྔར་སངས་རྒྱས་ལ་སྐྱབས་སུ་མཆིའོ་ཞེས་པ་ཙམ་ལས་མེད་ཀྱང༌། འདིར་


TNT17_Page_0978
[མ་དཔེ་གཟིགས་ན་འདིར་གནོན།]

རྒྱས་པར་དབྱེ་སྟེ། གང་དག་ད་ལྟར་བཞུགས་པ་རྣམས་དང༌། གང་དག་འདས་པའི་ཚུལ་བསྟན་པ་དག་དང༌། དེ་བཞིན་གང་དག་ད་ལྟ་མ་བྱོན་ཀྱང་མ་འོངས་པ་ན་འབྱོན་པར་འགྱུར་བ་རྣམས་ལའང་ཞེས་སངས་རྒྱས་ཐམས་ཅད་སྨོས་ཤིང༌། དེ་ལ་དུས་གསུམ་གྱི་སངས་རྒྱས་སུ་དབྱེ་བའི་ཐ་སྙད་ནི། མ་དག་པའི་ཞིང་དུ་འབྱུང་བའི་དབང་དུ་བྱས་ཀྱི། འོག་མིན་སྟུག་པོ་བཀོད་པའི་ཞིང་ལ་སོགས་པ་ན་ཐམས་ཅད་ད་ལྟར་ཡང་བཞུགས་སོ་ཞེས་བྱ་ལ། འོན་ཀྱང་མ་བྱོན་པའི་སངས་རྒྱས་རྣམས་ཇི་ལྟར་བཞུགས་སྙམ་ན། ཀུན་རྫོབ་ཐ་སྙད་ཀྱི་ལུགས་ལ་དངོས་སུ་བཞུགས་པར་མི་འདོད་ཀྱང༌། དད་པ་བསྐྱེད་ཅིང་བློ་སྦྱང་བའི་དོན་དུ་སྐྱབས་སུ་འགྲོ་བ་ཡིན་ལ། ངེས་པའི་དོན་དུ་ནི། ཡེ་ཤེས་ཀྱི་རྒྱ་མཚོ་ཆེན་པོ་རྟག་ཏུ་གནས་པ། ད་ལྟར་མོས་པའི་ཡུལ་དུ་བཞག་པ་འདི་ཁོ་ན། མ་བྱོན་པ་རྣམས་ཀྱི་ཐོབ་པར་བྱ་བ་ཡིན་པའི་ཕྱིར། འདས་པ་དང་ད་ལྟར་བའི་སྐུ་གསུམ་ལ་སྐྱབས་སུ་སོང་བས། མ་འོངས་པའི་སྐུ་གསུམ་ཞེས་བརྗོད་པའི་གཞི་གང་ཡིན་པ་དེ་ཡང་དེ་ཁོ་ནར་འདུས་པ་ཡིན་ནོ། །སངས་རྒྱས་དཀོན་མཆོག་དེའི་ཁྱད་པར་ནི། ཡོན་ཏན་ཡང་ཡིན་ལ་བསྔགས་ཤིང་བསྟོད་པར་བྱ་བ་ཡང་ཡིན་པའི་རྨད་བྱུང་གི་ཆོས་རྒྱ་མཚོ་དང་འདྲ་བར་མཐའ་ཡས་པ་སྟེ། དེ་གང་ལ་མངའ་བ་ཀུན་ལ་ཞེས་པའོ། །ཚུལ་ཇི་ལྟར་ན་ཐལ་མོ་སྦྱར་བ་བཏུད་ནས་ཞེས་གུས་པས་སོ། །


TNT17_Page_0979
[མ་དཔེ་གཟིགས་ན་འདིར་གནོན།]

འདིར་སྐྱབས་ཡུལ་སངས་རྒྱས་ཁོ་ན་སྨོས་པ་ནི། སྤྱིར་སངས་རྒྱས་ལ་སྐྱབས་སུ་སོང་ནས། གཞན་གཉིས་ཤུགས་ལའང་གོ་བ་དང༌། མཐར་ཐུག་གི་སྐྱབས་གནས་སངས་རྒྱས་གཅིག་པུ་ཡིན་པར་ཡང་དགོངས་སོ། །དེ་ལྟ་ན་བྱང་ཆུབ་ལྟུང་བཤགས་ཀྱི་དོན་མདོ་ཙམ་བཤད་པ་རྫོགས་ཏེ། ཆོས་ཀྱི་རྣམ་གྲངས་འདི་ལ་ད་ལྟ་བོད་ན་བཞུགས་པའི་བསྟན་བཅོས་འགྱུར་རོ་འཚལ་གྱི་ནང་ན། འགྲེལ་པ་གཉིས་ཞིག་སྣང་སྟེ། ཛེ་ཏཱ་རིས་མཛད་ནས་ཚོགས་ལོ་ཙཱ་བས་བསྒྱུར་ཟེར་བ་གཅིག་དང༌། ཀླུ་སྒྲུབ་ཀྱིས་མཛད་ཅིང༌། པཎྜི་ཏ་ཞི་བ་འཚོ་དང༌། ལོ་ཙཱ་བ་རྙི་བ་ལྷའི་དབྱིངས་ཀྱིས་བསྒྱུར་ཟེར་བ་གཉིས་སྣང་བ། སློབ་དཔོན་དེ་དང་དེས་མཛད་པ་ནི་མིན་པར་སྣང་ལ། ཡོངས་རྒྱ་གར་གྱི་འགྲེལ་པ་ཡིན་ཡང་ཐེ་ཚོམ་གྱི་གཞིར་སྣང་ངོ༌། །དོན་གྱི་ཆ་ནས་ལེགས་པར་བཤད་པ་ནི་ཡོད་ལ། ནོར་བ་ཡང་ཅི་རིགས་པར་ནི་སྣང་ངོ༌། །ཆོས་རྗེ་པཎྜི་ཏའི་གསུང་གིས། ལྟུང་བཤགས་སངས་རྒྱས་ཕྱག་མཚན་ལ། ཕུབ་དང་རལ་གྲི་སོགས་འཛིན་པའི། སྒྲུབ་ཐབས་སངས་རྒྱས་ཀྱིས་མ་གསུངས། ཞེས་པ་ཀླུ་སྒྲུབ་ཀྱིས་མཛད་ཟེར་བ་དེ་ན། རལ་གྲི་དང་གོ་ཆ་འཛིན་པའི་སྒྲུབ་ཐབས་བྱས་པ་དེ་ལ་དགོངས་པར་སྣང་ཞིང༌། འོན་ཀྱང་ཅུང་ཟད་དཔྱད་དུ་ཡོད་དེ། གསང་སྔགས་ནང་པར་བཀྲལ་བ་ཡིན་ན། སངས་རྒྱས་རབ་ཏུ་བྱུར་བ་ཆགས་བྲལ་གྱི་རྣམ་པ་མཚོན་ཆ་འཛིན་པའི་སྒྲུབ་


TNT17_Page_0980
[མ་དཔེ་གཟིགས་ན་འདིར་གནོན།]

ཐབས་བྱུང་སྲིད་ཀྱང༌། གྲུབ་ཐོབ་ཀྱི་མན་ངག་ཅན་ཡིན་ན། མཐའ་གཅིག་ཏུ་བསལ་བ་ཡང་མ་ཡིན་ཏེ། གཞན་ཡང་ཆ་བྱད་འགལ་འདུ་འཛིན་པའི་སྒྲུབ་ཐབས་ཚད་ལྡན་མང་དུ་སྣང་བའི་ཕྱིར་རོ། །མདོ་ལུགས་སུ་བཀྲལ་བ་ལྟ་བུ་ཡིན་ན་ནི་དེ་ལྟར་མི་འཐད་པ་ཅིས་ཀྱང་ཡིན་ནོ། །བདག་གིས་འདི་ནི་འགྲེལ་པ་དེ་གཉིས་ལས་ཀྱང་ལེགས་ཆ་ཅུང་ཟད་བླངས་ལ། བསླབས་བཏུས་ཀྱི་བཤད་པ་དང༌། སྤྱོད་འཇུག་གི་གཞུང་གི་འཕྲོས་དོན་དང༌། དམ་པ་སྔ་མའི་གསུང་འཕྲོས་ཆོས་འདི་དང་འབྲེལ་པ་རྣམས་ཀྱིས་ཀྱང་ཅུང་ཟད་གསལ་བར་བྱས་ལ། ཕལ་ཆེར་ནི་གཞུང་ཉིད་ལས་གསལ་བར་མཐོང་བ་དེ་ཉིད་སྨྲས་པ་ཡིན་ནོ། །སྐྱབས་འགྲོ་དང་ལས་འབྲས་ཀྱི་རྣམ་གཞག་སོགས་མཐའ་ཆོད་ཀྱི་གོ་དོན་དགོས་ན་ནི་གཞན་ལས་ཤེས་པར་བྱ་ལ། འཕྲལ་གྱི་ཚིག་དོན་ཙམ་གོ་སླ་བས། འདིར་ནི་བསྡུས་དོན་དཀའ་འགྲེལ་གྱི་ཚུལ་གྱིས་དོན་གྱི་མདོ་བཤད་པས་དགོས་པ་འགྲུབ་པར་སེམས་སོ། །ཞེས་པའང་ཏཱ་ར་ནཱ་ཐས་སྨྲས་པའོ། །པར་འདི་ཀརྨ་རཏྣས་བཞེངས། འབྲེལ་ཚད་བྱང་ཆུབ་ཐོག་ཤོག། མངྒ་ལཾ།། །།

ཚིགས་བཅད་གཅིག་པའི་རྣམ་བཤད།


TNT17_Page_0981
[མ་དཔེ་གཟིགས་ན་འདིར་གནོན།]

ཚིགས་བཅད་གཅིག་པའི་རྣམ་བཤད་བཞུགས། །


TNT17_Page_0982
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། སངས་རྒྱས་ལ་ཕྱག་འཚལ་ལོ། །ཚིགས་སུ་བཅད་པ་གཅིག་པའི་མདོ་འདི། སྔོན་གྱི་རྒྱལ་བ་ཡང་དག་པར་རྫོགས་པའི་སངས་རྒྱས་སྐར་རྒྱལ་ཞེས་བྱ་བ། མེའི་ཁམས་ལ་སྙོམས་པར་ཞུགས་ཏེ། ཏིང་ངེ་འཛིན་གྱིས་གནས་པས་བཞུགས་པ་ལ། འོ་སྐོལ་གྱི་སྟོན་པ་བྲམ་ཟེ་མི་སྦྱིན་ཞེས་བྱ་བར་གྱུར་པ་དེ། དད་པ་ལྷ་ལྷག་ཏུ་སྐྱེས་ནས། ཞབས་ཡ་གཅིག་ཁོ་ན་ས་ལ་བཙུགས་ཏེ་འགྲེང་བཞིན་དུ། ཚིགས་སུ་བཅད་པ་གཅིག་པ་འདིས། ཞག་བདུན་དུ་བར་མ་ཆད་པར་བསྟོད་པས། བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྫོགས་པ་ཡིན་ནོ། །ཞེས་གསུངས་ཏེ། སྟོན་པ་ཉིད་ཀྱི་སླར་ཡང་གཏམ་དེ། ཟློས་ནས་གསུངས་པ་ཡིན་ནོ། །དེ་ཡང་སྐྱེས་བུ་ཁྱུ་མཆོག་ཅེས་བྱ་བ་ནི། སྐྱེ་བུ་ནི་སོ་སོ་སྐྱེ་བོ་དང་འཕགས་པའི་སེམས་ཅན་གྱི་


TNT17_Page_0983
[མ་དཔེ་གཟིགས་ན་འདིར་གནོན།]

ཚོགས་སོ། །དེ་རྣམས་ཀྱི་གཙོ་བོ་དང་འདྲེན་པ་དང༌། ལམ་སྟོན་པ་པོ་ཡིན་པའི་ཕྱིར་ཁྱུ་མཆོག་སྟེ། ཡང་དག་པར་རྫོགས་པའི་སངས་རྒྱས་སོ། ཁྱོད་འདྲ་ཞེས་པ་ལ། ཁྱོད་ལས་ལྷག་པ་ལྟ་སྨོས་ཀྱང་ཅི་དགོས་ཏེ། ཁྱོད་དང་མཚུངས་པ་ཡང་གཞན་མེད་ཅེས་པའོ། །དགེ་སྦྱོང་ཆེན་པོ་གཞན་དག་གཅེས་པ་ལ། དགེ་སྦྱོང་ནི་རབ་ཏུ་བྱུང་བ་སྟེ། ཁྱོད་དང་མཚུངས་པའི་དགེ་སྦྱོང་ཡང་མེད་ན། ཁྱིམ་པ་ཁྱོད་དང་མཚུངས་པ་ལྟ་ཅི་སྨོས་ཞེས་པའི་དབང་དུ་བྱས་པ་ཡིན་ལ། དེ་ལྟར་ན་དྲག་པོ་དང་ཁྱབ་འཇུག་ལ་སོགས་པ་ལྷ་དང༌། སེར་སྐྱ་ལ་སོགས་པ་དགེ་སྦྱོང་དང༌། རྒྱས་པ་ལ་སོགས་པ་བྲམ་ཟེ་སྟེ། དབང་ཆེ་བ་དང༌། མཐུ་ཆེ་བ་དང༌། སྐྱེས་བུ་ཆེན་པོར་གྲགས་པ། འཇིག་རྟེན་པ་རྣམས་ཀྱི་མཆོད་འོས་སུ་གྱུར་པ་དེ་དག་ནི། ལྟ་བ་


TNT17_Page_0984
[མ་དཔེ་གཟིགས་ན་འདིར་གནོན།]

ལོག་པ་དང་སྤྱོད་པ་ངན་པར་བསྟེན་པའི་ཕྱིར། སངས་རྒྱས་ཀྱི་ཉན་ཐོས་རྣམས་དང་ཡང་མཉམ་པ་མ་ཡིན་ན། སངས་རྒྱས་ཉིད་དང་ག་ལ་མཚུངས། །ཞེས་པའི་དོན་ཏེ། འོན་ཏེ་དེ་བཞིན་གཤེགས་པ་གཞན་དག་ཀྱང་བཞུགས་པ་མ་ཡིན་ནམ་སྙམ་ན། ངེས་པའི་དོན་དུ་ནི། དེ་བཞིན་གཤེགས་པ་ཐམས་ཅད་ངོ་བོ་གཅིག་པའི་ཕྱིར། སོ་སོ་ཐ་དད་པའི་གཞན་དུ་མི་འགྱུར་ལ། ཀུན་རྫོབ་འཇིག་རྟེན་པ་རྣམས་ཀྱི་སྣང་ངོ་ལྟར་ན། འདས་པའི་སངས་རྒྱས་རྣམས་ནི་སྐབས་དེར་མ་མཐོང་བ་དང། མ་དག་པའི་བློ་མིག་ཅན་རྣམས་དང་ཐུན་མོང་དུ་སྣང་བ་ལ། འཇིག་རྟེན་གྱི་ཁམས་གཅིག་ཏུ་དེ་བཞིན་གཤེགས་པའི་སྤྲུལ་པའི་མཆོག་གཉིས་དུས་མཉམ་དུ་མི་འབྱུང་བའི་དབང་དུ་མཛད་པ་ཡིན་གྱི། ཉན་ཐོས་སྡེ་བ་མང་པོའི་འདོད་པ་ལྟར། འཇིག་རྟེན་གྱི་ཁམས་གཞན་དང་གཞན་དུ། སངས་རྒྱས་གཉིས་དུས་མཉམ་དུ་མི་འབྱུང་བར་འདོད་པ་ལྟར་ནི་མ་ཡིན་ནོ། །སྡེ་པ་བཅོ་བརྒྱད་ཀྱི་འདོད་པ་ལྟར་ན་ཡང༌། སངས་རྒྱས་རྣམས་ཆོས་ཀྱི་སྐུ་མཚུངས་ཤིང༌། བཞེད་དོན་གཅིག་ལ་འདུ་བུའི་ཕྱིར། དགེ་སྦྱོང་གཞན་གྱི་ཁོངས་སུ་མི་བསྡུའོ། །ལྷ་ཡུལ་ས་ཞེས་པ་ནི། རྒྱལ་ཆེན་བཞིའི་རིགས་དང༌། སུམ་ཅུ་རྩ་གསུམ་པའི་ལྷ་རྣམས་རི་རབ་ལ་སོགས་པ་ས་གཞི་ལ་བརྟེན་པས། དེ་དག་གི་ས་ཡུལ་ཡིན་ལ། བརྒྱ་བྱིན་གྱི་དྲུང་ན་ལྷ་མཐོ་བོ་ཆེ་རྣམས་གནས་པས། སུམ་ཅུ་རྩ་གསུམ་ན་ཡོད་དམ་སྙམ་པའི་དོགས་པ་སེལ་


TNT17_Page_0985
[མ་དཔེ་གཟིགས་ན་འདིར་གནོན།]

བའོ། །འཇིག་རྟེན་འདི་ན་ཞེས་པ་ནི། མིའི་འཇིག་རྟེན་འཛམ་བུའི་གླིང་འདི་ན་ཞེས་པའི་དོན་ཡིན་ལ། དགེ་སྦྱོང་དང་བྲམ་ཟེ་ཆེས་མཐུ་ཆེ་བ་རྣམས། ཁྱད་པར་ཅན་གྱི་ཡོན་ཏན་བསྒྲུབ་པའི་གནས་ནི་འདི་ཡིན་པས་སོ། །རྣམ་ཐོས་བུའི་གནས་ནི་ལྕང་ལོ་ཅན་དེ། དེ་ན་ནི་བཅུད་ལེན་དང་གྲུབ་པའི་རྫས་དང༌། རིགས་སྔགས་འཆང་བ་ཆེན་པོ་དག་གནས་པའི་ཕྱིར། དེ་ཁྱད་པར་དུ་སྨོས་ལ། དེས་ནི་འཇིག་རྟེན་སྐྱོང་བ་གཞན་གསུམ་པོ་དག་ཀྱང་ཤུགས་ལ་གོ་བར་འགྱུར་རོ། །ལྷའི་ཕོ་བྲང་གནས་མཆོག་ཅེས་བྱ་བ་ནི། ཟླ་བ་དང་ཉི་མ་ལ་སོགས་པ་ས་གཞི་ལ་བརྟེན་པ། ནམ་མཁའ་ལ་འགྲོ་བའི་གཞལ་མེད་ཁང་རྣམས་དང༌། འཐབ་བྲལ་གྱི་གནས་ཡན་ཆད། ནམ་མཁའ་ལ་སྤྲིན་ཆགས་པ་བཞིན་དུ་ཡོད་པའི་ལྷའི་གནས་རྣམས་ཏེ། ཉི་ཟླ་གཟའ་སྐར་ལ་སོགས་པ་ནི། ལོ་ལེགས་ཉེས་དང༌། ནད་ཡམས་འབྱུང་གཅོད་ལ་སོགས་པ། མི་དང་དུད་འགྲོ་རྣམས་ལ་བདེ་སྡུག་གི་བྱེད་པོར་འཇིག་རྟེན་ན་གྲགས་པའི་ཕྱིར་དང༌། འཐབ་བྲལ་ལ་སོགས་པ་ནི་ཆེས་ཆེ་བའི་ལྷ་རྣམས་གནས་པའི་ཕྱིར་སྨོས་པ་ཡིན་ནོ། །ཕྱོགས་དང་ཕྱོགས་མཚམས་ཞེས་བྱ་བ་ལ། རི་རབ་ཀྱི་ཕྱོགསབཞི། འཇིག་རྟེན་སྐྱོང་བ་བཞིའི་གནས་དང༌། རྩེ་མོའི་མཚམས་རྣམས་ན་གནོད་སྦྱིན་ལག་ན་རྡོ་རྗེ་དང་གནས་པའི་རྫོངས་རྣམས་ཡོད་པའམ། ཡང་ན་ཕྱོགས་དང་མཚམས་ཀྱི་གླིང་ཡིན་


TNT17_Page_0986
[མ་དཔེ་གཟིགས་ན་འདིར་གནོན།]

ཏེ། གླིང་བཅུ་གཉིས་རྣམས་སམ། ཡང་རྣམ་པ་ཅིག་ཏུ་ན། དབང་པོ་དང་མེ་ལྷ་ལ་སོགས་པ་ཕྱོགས་སྐྱཽང་བ་བརྒྱད་པོ་རྣམས་ཀྱི་གནས། འཁོར་ཡུག་གི་ནང༌། འཁོར་ཡུག་གི་རི་ལ་བརྟེན་པ་རྣམས་ཏེ། དེ་དག་ནི་འཇིག་རྟེན་གྱི་འཕེལ་འགྲིབ་བྱེད་པ་པོར་གྲགས་པ་དང༌། དྲི་ཟ་དང་དྲང་སྲོང་ལ་སོགས་པ་དབང་ཆེ་བ་རྣམས་གནས་ཤིང༌། དེ་དག་གི་རིགས་ལས་བྱུང་བའི་དགེ་སྦྱོང་དང་བྲམ་ཟེ་དེ་དག་གི་བརྟེན་པའི་ཕྱིར་འདིར་སྨོས་སོ། །རི་དང་ཞེས་པ་ནི་གཉའ་ཤིང་འཛིན་རི་ལ་སོགས་པ་རིའི་གཙོ་བོ་རྣམས་དང༌། གངས་ཅན་དང་མནྡན་ར་ལ་སོགས་པ་རི་ཕྲ་མོ་རྣམས་དང༌། ནགས་ནི། ནགས་ཚལ་ཆེན་པོ་བདུན་ནམ་བཅུ་གཉིས་ལ་སོགས་པ་སྟེ། རི་བོ་དང་ནགས་ཚལ་དག་ལ། དཀའ་ཐུབ་ཅན་དག་རྒྱུ་ཞིང་གནས་པའི་ཕྱིར་སྨོས་པ་སྟེ་ས་སྟེང་རྒྱས་པ་ནི། ས་སྟེང་ཡངས་པའི་དོན་ནོ། །ཚིག་གཞན་རྣམས་ཀྱི་འདོད་ཁམས་པ་ལས་ཁྱད་པར་དུ་འཕགས་པ་དང༌། ལྷ་ཡུལ་ས་ལའང་མེད་ཅེས་པས། ཁམས་གསུམ་ན་སྤྱོད་པ་ཐམས་ཅད་ལས་ཁྱད་པར་དུ་འཕགས་པ་བསྟན་ཏོ། །ཞེས་པ་ཡང་དོན་གྱི་མདོའི་རྣམ་གྲངས་གཞན་ཏེ། མདོ་འདིའི་དོན་འཕགས་པ་དབྱིག་གཉེན་གྱིས་བཤད་པ་ལྟར་ལས་གོ་བདེ་བར་ཏཱ་ར་ནཱ་ཐས་བརྗོད་པའོ།། ཤུ་བྷཾ།། །། ༈ ཚིགས་སུ་བཅད་པ་གཉིས་པའི་རྣམ་བཤད་བཞུགས། བླ་མ་ལ་ཕྱག་འཚལ་ལོ། །ཚིགས་སུ་བཅད་པ་གཉིས་པའི་གཟུངས་


TNT17_Page_0987
[མ་དཔེ་གཟིགས་ན་འདིར་གནོན།]

ནི། ཉེས་པ་བརྒྱད་དང་དེ་སྤོང་བྱེད་ཀྱི་ཆོས་དང༌། གཟུགས་སྔགས་དང༌། དེའི་ཕན་ཡོན་ཏེ། བསྡུས་པའི་དོན་བཞིས་བསྟན་ཏོ། །དང་པོ་ནི། སངས་རྒྱས་དང་ནི་ཆོས་ལ་བརྙེས་པ་དང་སོགས་ཏེ། དེ་ཡང་ཐེག་པ་དམན་པའི་སྡེ་སྣོད་ལས་མི་འབྱུང་ཞིང༌། ཐེག་པ་ཆེན་པོ་ལས་འབྱུང་བ། མདོའི་ཚིག་དོན་འགལ་འགལ་འདྲ་ལ་མི་འགལ་བ་མང་པོ་དག་ནི། ཉེས་པ་བརྒྱད་པོ་འདི་སྤོང་བའི་ཕྱིར་གསུངས་སོ། །དེ་ཡང་སོ་སོའི་དཔེར་བརྗོད་བཤད་ན། སྔོན་གྱི་སངས་རྒྱས་ལ་བརྙས་པ་སྤངས་པའི་དོན་དུ། དེ་བཞིན་གཤེགས་པ་རྣམ་གཟིགས་ལ་སོགས་པའི་སྐུ་ཚེ་དང་ཞིང་ཁམས་དང༌། འཁོར་ཕུན་སུམ་ཚོགས་པའི་ཚེ་དཔག་ཏུ་མེད་པ་གསུངས་ལ། འོ་ན་སྟོན་པ་ཤཱཀྱ་ཐུབ་པ་ནི། ཆེས་ཆུང་བའོ་སྙམ་པའི་བརྙས་པ་སྤངས་པའི་དོན་དུ། དེའི་ཚེ་དེའི་དུས་ན་ང་ཉིད་ཡང་དག་པར་རྫོགས་པའི་སངས་རྒྱས་རྣམ་གཟིགས་ཞེས་བྱ་བར་དེར་གྱུར་ཏོ། །ཅེས་གསུངས་པ་ལྟ་བུ་སྟེ། དེ་ཡང་སྔོན་གྱི་ལུས་རྗེས་འབྲང་བའི་ཚུལ་གྱི། ཐ་དད་པའམ། གཅིག་པ་གང་ཡིན་ཡང་འདྲ་སྟེ། སངས་རྒྱས་ཀྱིས་བརྙེས་ཟིན་པ་ན་ཐམས་ཅད་ངོ་བོ་གཅིག་པ་ལ་དགོངས་ཏེ། གངྒཱའི་ཆུ་ཡང་རྒྱ་མཚོ་ཆེན་པོ་ལ་འདུས་པ་སྟེ། རྒྱ་མཚོ་འདི་ནི་གངྒཱ་ཡང་ཡིན་ལ་སིན་དྷུ་ཡང་ཡིན་ནོ་ཞེས་པ་ལྟ་བུ་སྟེ། མཉམ་པ་ཉིད་ལ་དགོངས་པའོ། །ཆོས་ལ་བརྙས་པ་ནི། གསུང་རབ་ཡན་ལག་བཅུ་གཉིས་སམ། སྡེ་


TNT17_Page_0988
[མ་དཔེ་གཟིགས་ན་འདིར་གནོན།]

སྣོད་གསུམ་པོ་འདི་དག་གདོལ་བ་དང༌། བུད་མེད་ཚུལ་ཆད་ཀྱིས་ཀྱང་ཐོས་པས་ཐུན་མོང་བ་དང༌། རྙེད་སླ་བ་དང་ཉེས་པར་བཤད་པ་ཡིན་ནམ་སྙམ་པ་སྟེ། དེ་ལ་དེ་བཞིན་གཤེགས་པས་གསུངས་པའི་ཆོས་ནི། ཉོན་མོངས་པ་དང་སྡུག་བསྔལ་ཐམས་ཅད་ཀྱི་གཉེན་པོ། ཡེ་ཤེས་དང་བདེ་བ་ཐམས་ཅད་ཀྱི་རྒྱུ་ཡིན་ནོ། །དེའི་ཕྱིར་ཇི་སྐད་དུ། དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་ན། ཐེག་པ་ཆེན་པོ་ལ་ཤེས་པ་སྐྱེ་བ་འགྱུར་རོ་ཞེས་གསུངས་ཏེ། རྒྱུ་ཕུན་སུམ་ཚོགས་པ་དཔག་ཏུ་མེད་པ་ལས་སྒྲུབ་དགོས་པས་ཤིན་ཏུ་རྙེད་དཀའ་བར་བསྟན་ཏོ། །སྤྱིར་དམ་ཆོས་ཙམ་དང༌། དགོས་སུ་ཐེག་ཆེན་གྱི་ཆོས་ཐོས་པ་ཙམ་ཡང་ཤིན་ཏུ་རྙེད་དཀའ་བ་ནི་ངེས་པར་ཡིན་ནོ། །འོན་ཀྱང་དེ་ལྟར་གསུངས་པ་དེ་ནི། སྐབས་ཀྱི་གདུལ་བྱ་དེ་རྣམས་ཀྱིས་ཐེག་ཆེན་གྱི་ཆོས་ལ་ཐོས་པའི་ཤེས་རབ་སྐྱེ་བ་ལ་རྒྱུ་དེ་ཙམ་དགོས་པར་གོ་ནས། ཆོས་ལ་བརྙས་པ་སྤངས་ཏེ་གུས་པར་འགྱུར་ལ། དོན་དུ་མི་ཐོས་པའི་ཤེས་རབ་ཙམ། ཡེ་ཤེས་རྣམ་དག་མ་ཡིན་པས། ཐེག་ཆེན་གྱི་དོན་མངོན་སུམ་དུ་མཐོང་བའི་ཡེ་ཤེས་སྐྱེ་བ་ལ་རྒྱུ་དེ་ཙམ་དགོས་པར་དགོངས་སོ། །དེ་ནི་ཡིན་ཏེ། བསྐལ་པ་གྲངས་མེད་པ་གཅིག་ཏུ་ཚོགས་བསགས་པ་ལས། མཐོང་ལམ་གྱི་ཡེ་ཤེས་སྐྱེ་བར་དགོངས་སོ། །ལེ་ལོ་ནི། རྣམ་གཡེང་དང༌། ཡིད་ཆད་དང༌། སྒྱིད་ལུག་པ་དང༌། འདོད་པ་ལ་ཆགས་པ་ལ་སོགས་པའི་རྒྱུ་ལ་བརྟེན་


TNT17_Page_0989
[མ་དཔེ་གཟིགས་ན་འདིར་གནོན།]

ཏེ། དགེ་བ་ལ་མི་སྤྲོ་ཞིང་མི་རྩོལ་བ་སྟེ། དེའི་གཉེན་པོར་དེ་བཞིན་གཤེགས་པ་རིན་ཆེན་མིང་གི་མཚན་བརྗོད་པ་ཙམ་གྱིས་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །ཞེས་སྤྲོ་བ་བསྐྱེད་དེ་གསུངས་པ་ལྟ་བུའོ། །དེས་ནི་ལེ་ལོ་ཅན་དེ་ཡང་གནས་འདི་ལ་ནི་དེ་ཙམ་དུ་དཀའ་བ་མ་ཡིན་ནོ་སྙམ་པས། དེ་མ་ཐག་ཏུ་སངས་རྒྱས་རིན་ཆེན་མིང་གི་མཚན་བརྗོད་པ་དེ་ལ་འཇུག་པར་འགྱུར་ལ། དུས་སྐབས་དེ་ཉིད་དུ་བྱང་ཆུབ་ཆེན་པོར་ངེས་པ་མ་ཡིན་ཀྱང༌། མཚན་བརྗོད་པའི་དགེ་བ་དེ་ལ་བརྟེན་ནས་མ་འོངས་པ་ན་འགྱུར་ཏེ། ས་བོན་འདི་ལས་ནི། སྟོན་ཐོག་འདི་བྱུང་ངོ་ཞེས་པ་ལྟ་བུའོ། །ཅུང་ཟད་ཙམ་གྱི་ཆོག་པར་འཛིན་པ་ནི། སྦྱིན་པའང༌། ཚུལ་ཁྲིམས་སམ། ཏིང་ངེ་འཛིན་རེ་ཙམ་སྒྲུབ་ནས། གཞན་མི་དགོས་སོ་ཞེས་འཛིན་པ་སྟེ། དེ་ལ་དེ་བཞིན་གཤེགས་པའི་བ་སྤུའི་ཁུང་བུ་འགྲུབ་པར་བྱེད་པ་ལ་ཡང༌། དགེ་བ་རྒྱ་མཚོ་ལྟར་དཔག་ཏུ་མེད་པ་བྱ་དགོས་ན། དེ་ཇི་ལྟར་ལེ་ལོས་ཐོབ་པར་ནུས། ཞེས་གསུངས་ཏེ། བསོད་ནམས་དང་ཡེ་ཤེས་ཀྱི་ཚོགས་མཐའ་དག་ལ་བསྒྲུབ་དགོས་པར་གདམས་པའོ། །འདི་དང་གོང་མ་གཉིས་འགལ་འགལ་འདྲ་ཡང་མི་འགལ་ཏེ། ཆུང་ངུ་ལ་བརྟེན་ཏེ། རིམ་པས་བརྒྱུད་ནས་དོན་ཆེན་པོ་འགྲུབ་ཏུ་རུང་བ་དང༌། དོན་ཆེན་པོ་འཕྲལ་དུའམ་དངོས་སུ་སྒྲུབ་པ་ལ་རྒྱུ་ཚོགས་མང་པོ་བསགས་ཟིན་པ་དགོས་པ་མི་འགལ་བས་སོ། །དེ་


TNT17_Page_0990
[མ་དཔེ་གཟིགས་ན་འདིར་གནོན།]

བཞིན་དུ་རེས་འགའ་སྦྱིན་པ་ལ་ཆེས་བསྔགས་ཤིང༌། ཁ་ཅིག་ཏུ་བྱིན་པ་སྨད་དེ་ཚུལ་ཁྲིམས་བསྔགས་པ་སོགས་རྣམ་གྲངས་ཀྱི་སྒོ་ནས་གདུལ་བྱའི་བསམ་པ་ལ་ལྟོས་པས་མི་འགལ་ཏེ། སེར་སྣའི་གཉེན་པོར་འགྱུར་བའི་སྐབས་སམ། སྦྱིན་པ་ནི་ལྷག་པར་གཏོང་བར་ནུས་ལ། ཚུལ་ཁྲིམས་སོགས་ལ་རེ་ཞིག་མི་འཇུག་པ་དེ་དག་ལ་ནི། སྦྱིན་པ་ཉིད་ཕན་ཡོན་ཆེ་བའི་ཕྱིར་སྦྱིན་པ་བསྔགས་པར་མཛད་ལ། སྦྱིན་པ་ལ་མཆོག་འཛིན་ཅན་གྱི་གཉེན་པོར་འགྱུར་བའི་སྐབས་དང༌། དེ་ཙམ་གྱིས་ཆོག་པར་འཛིན་ཡང་ཚུལ་ཁྲིམས་ཀྱི་སྐལ་བ་ཅན་རྣམས་ཚུལ་ཁྲིམས་ལ་འགོད་པའི་དོན་དུ། སྦྱིན་པ་ནི་སྨད་་ཚུལ་ཁྲིམས་ནི་བསྟོད་པར་མཛད་དེ། དོན་དུ་སྦྱིན་པ་རྐྱང་པ་བས་ཚུལ་ཁྲིམས་མཆོག་ཡིན་པའི་ཕྱིར་རོ། །འདོད་ཆགས་ལ་སྤྱོད་པ་ནི། རང་གི་རྫས་དང་ཡོ་བྱད་ལ་ཆགས་ཤིང་བཟང་པོར་རློམ་པ་ཡིན་ཏེ། དེའི་དོན་དུ་བདེ་བ་ཅན་ལ་སོགས་པ་ཞིང་གི་འབྱོར་བ་དང་ལོངས་སྤྱོད་ཕུན་སུམ་ཚོགས་པ་བསྟན་པས་རང་གི་ལོངས་སྤྱོད་ངན་པ་ལ་མ་ཆགས་ཤིང༌། ཞིང་ཁམས་དེར་སྨོན་ལམ་འདེབས་པར་འགྱུར་བའོ། །ང་རྒྱལ་ལ་སྦྱོང་བ་ནི། ལྷ་དང་མི་ལ་སོགས་པ་གང་དག་ལུས་དང་ལོངས་སྤྱོད་དང་མཐུ་སྟོབས་དང༌། ཚེ་དང་ཤེས་རབ་དང་རིགས་ལ་སོགས་པའི་སྙེམས་ཏེ། དཀོན་མཆོག་མི་མཆོད་པའམ། དཀོན་མཆོག་ལ་མི་གུས་པའམ། བདེན་པ་མ་མཐོང་བ་དག་ལ། དེ་བཞིན་གཤེགས་


TNT17_Page_0991
[མ་དཔེ་གཟིགས་ན་འདིར་གནོན།]

པ་འོད་དཔག་མེད་ལ་སོགས་པའི་སྐུ་ཚེ་དཔག་ཏུ་མེད་པ་དང༌། འཁོར་གྱི་ཆེ་བ་དཔག་ཏུ་མེད་པ་སོགས་བསྟན། དེ་དག་གིས་ཐོས་པས་ང་རྒྱལ་ཞི་ཞིང༌། སྔར་གྱི་ངང་ཚུལ་ལ་འགྱོད་པས། བཤགས་སྡོམ་བྱེད་ཅིང་དཀོན་མཆོག་གསུམ་ལ་གུས་པ་སྐྱེ་བ་དང༌། དེས་རྒྱུད་དག་པར་གྱུར་ཏེ། བདེན་པ་མཐོང་བ་ལ་སོགས་པར་འགྱུར་རོ། །འགྱོད་པ་ནི། སྤྱིར་བྱ་བ་མ་ཡིན་པ་བྱས་ཟིན་པ་ལ་འགྱོད་པས་སྐྱེ་དགོས་པ་ཡིན་ཀྱང༌། ཧ་ཅང་འགྱོད་པ་ཐལ་ཆེས་པས། སེམས་རྩེ་གཅིག་པར་མ་གྱུར་ཅིང༌། དེ་ལས་ཡོན་ཏན་གྱི་ཁྱད་པར་མ་ཐོབ་པ་དག་ལ་དགོངས་ནས། སངས་རྒྱས་དང་བྱང་ཆུབ་སེམས་དཔའ་རྣམས་ལ་ནི། གནོད་པ་བྱེད་པ་གང་ཡིན་དེ་དག་ཐམས་ཅད་མཐོ་རིས་སུ་འགྲོ་བར་འགྱུར་རོ། །ཞེས་གསུངས་པ་ལྟ་བུ་སྟེ། ཚིག་དེ་ཐོས་པས་འགྱོད་པ་ཤུགས་ཆུང་དུ་སོང་ནས་སེམས་གནས་ཤིང༌། དེ་ལས་ཡོན་ཏན་གྱི་ཁྱད་པར་མང་པོ་ཐོབ་པར་འགྱུར་བ་ཡིན་ལ། སངས་རྒྱས་ལ་གནོད་པ་བྱས་པའི་དངོས་ཀྱི་འབྲས་བུ་ལ་ནི། སྡུག་བསྔལ་ཆེས་ཆེ་བ་ཁོ་ན་མ་གཏོགས། བདེ་བའི་དྲི་ཙམ་ཡང་མི་འབྱུང་མོད་ཀྱི། གནོད་པ་རྩོམ་པའི་སྐབས་དེར་ཡང་སྐུ་མཐོང་བའམ། མཚན་ཐོས་པའམ། རྣམ་པ་ཡིད་ལ་བྱས་པའི་འབྲས་བུ་ནི། དུས་མ་འོངས་པ་ཞིག་ན་མཐོ་རིས་ཀྱི་བདེ་བ་ཐོབ་པའི་རྒྱུར་འགྱུར་བ་ལ་དགོངས་པའོ། །མ་ངེས་འབྱེད་པ་ཞེས་པ་ལ། འབྱེད་


TNT17_Page_0992
[མ་དཔེ་གཟིགས་ན་འདིར་གནོན།]

པ་ནི་ལོག་པའི་དོན་ཏེ། རིགས་མ་ངེས་པའི་བྱང་ཆུབ་སེམས་དཔའ་བརྩོན་འགྲུས་ཆུང་ཞིང་བསམ་པ་མི་བརྟན་པ་རྣམས། ལོག་སྒྲུབ་དང་སྡུག་བསྔལ་དྲག་པོ་མྱོང་བ་ལ་སོགས་པའི་རྐྱེན་གྱིས་ཐེག་ཆེན་སེམས་བསྐྱེད་བཏང་སྟེ། ཐེག་དམན་དུ་འཇུག་པ་ཡང་སྲིད་པ་ལས། དེ་འདྲ་དེ་ལྡོག་པར་བྱ་བའི་ཕྱིར་དང༌། ཐེག་དམན་དུ་ཞུགས་པ་ཡིན་ཀྱང་ཐེག་དམན་གྱི་རིགས་སུ་མ་ངེས་པ་དག་ཀྱང༌། སྤྲོ་བ་སྐྱེད་དེ་ཐེག་པ་ཆེན་པོ་ལ་འཇུག་པའི་ཕྱིར་དུ། ཐེག་པ་ཆེན་པོ་འདི་བསྟན་ཏེ། ཉན་ཐོས་ཆེན་པོ་རྣམས་ཀྱང་སངས་རྒྱས་སུ་ལུང་བསྟན་པ་དང༌། ཐེག་པ་གཅིག་སྟེ་གཉིས་པ་ཡོད་མ་ཡིན། །ཞེས་བྱ་བ་ལ་སོགས་པ་གསུངས་ཏེ། ཐེག་པ་ནི་ཐེག་པ་ཆེན་པོ་ཁོ་ན་ཡིན་པ་དང༌། མྱ་ངན་ལས་འདས་པ་དང་ཐར་བ་དང་བྱང་ཆུབ་ཀྱང་བླ་ན་མེད་པའི་ཆོས་ཀྱི་སྐུ་ཁོ་ན་ཡིན་པར་བསྟན་པས་གདུལ་བྱ་ཉེ་བར་གནས་པ་དེ་རྣམས་ལས། ཐེག་ཆེན་པ་རིགས་མ་ངེས་པ་དེ་རྣམས་ནི། འདི་ལས་གཞན་པ་ལ་ཐེག་པ་མེད་པའི་ཕྱིར། བདག་དཀའ་བ་བརྒྱ་ཕྲག་དུ་མ་ལ་སྤྱོད་དགོས་ཀྱང༌། ལམ་གཞན་བཙལ་བར་མི་བྱའོ་སྙམ་པའི་དམ་བཅའ་བརྟན་པོར་བྱེད་པ་དང༌། ཉན་ཐོས་མ་ངེས་པ་རྣམས་ཀྱང༌། ལམ་འདི་ལ་ནི་མཐར་ཐུག་གི་གནས་མེད་ན། ཉེས་ལས་འདི་ཅི་ཞིག་བྱ་སྙམ་སྟེ། ཐེག་པ་ཆེན་པོ་ལ་འཇུག་པར་འགྱུར་རོ། །དགོངས་གཞི་ནི། ཐེག་པ་གཉིས་ནི་གནས་སྐབས་པའི་ཐེག་པ་ཙམ་ཡིན་


TNT17_Page_0993
[མ་དཔེ་གཟིགས་ན་འདིར་གནོན།]

ལ། མཐར་ཐུག་གི་ཐེག་པ་ནི་གཅིག་ཁོ་ན་ཡིན་པ་ལ་དགོངས་པའོ། །དེ་ལྟར་ན་ཉེས་པའམ། བར་དུ་གཅོད་པའམ། སྒྲིབ་པའི་ཆོས་བརྒྱད་པོ་དེ་དག་གི་གཉེན་པོར། ཐེག་པ་ཆེན་པོའི་ཁྱད་ཆོས། འགལ་བ་འདུས་པ་ལྟར་སྣང་བ་རྣམས་བསྟན་པ་ཡིན་ནོ། །འདིར་སྨོས་པ་རྣམས་ནི་མཚོན་བྱེད་ཙམ་སྟེ། དེ་དང་དེའི་རིགས་ཅན་རིགས་མཐུན་པའི་ལོག་པར་རྟོག་པ་དཔག་ཏུ་མེད་པ་ཡང་ཉེས་པ་བརྒྱད་པོ་དེར་འདུས་པ་དང༌། གཉེན་པོའི་ཆོས་བསྟན་པ་ཡང་དེ་དང་དེ་འདྲའི་རིགས་དཔག་ཏུ་མེད་པ་དག་འདིར་དཔེར་བརྗོད་ཙམ་བསྟན་པ་ལས་དཔགས་ཏེ་ཤེས་པར་བྱའོ། །སྤྱིར་སངས་རྒྱས་ལ་བརྙས་པ་ལ་སོགས་པ་ཉེས་པ་བརྒྱད་པོ་རྣམས་ནི། སེམས་ཅན་རྣམས་ཀྱི་རྒྱུད་ལ་འབྱུང་དུ་རུང་བའི་སྒྲིབ་པར་འགྱུར་བ་སྟེ། དེ་དག་ཀྱང་བསྡུ་ན། མ་དད་མི་བརྩོན་ཆགས་པ་དང༌། །ང་རྒྱལ་ལམ་ངན་ཞེས་པ་ལྔ། །དང་པོ་གཉིས་ནི་མ་དད་པར་འདུས་ལ། དེ་ནས་གཉིས་ནི་མི་བརྩོན་པ་ཡིན་ཞིང༌། དེ་ལྟར་གཉིས་དང་འདོད་ཆགས་དང་ང་རྒྱལ་ཏེ། ཉོན་མོངས་དང་འབྲེལ་བའི་ལས་བཞི་དང༌། འགྱོད་པ་དང༌། མ་ངེས་ལྡོག་པ་གཉིས་གཅིག་ཏུ་སྡོམས་པ་ནི་ལམ་ངན་པའི་ཉེས་པ་ཞེས་བྱ་སྟེ། གཉིས་པོ་དེ་ནི། གཉེན་པོའི་ཕྱོགས་ལ་བརྟེན་པ་ཡིན་ཀྱང༌། གཉེན་པོ་ལས་སྐྱོན་དུ་གྱུར་པ་ཡིན་ནོ། །དང་པོ་གཉིས་དང༌། འདོད་ཆགས་ནི་ཆོས་ལ་འཇུག་པ་ལ་བར་དུ་གཅོད་པའོ། །ཅུང་ཟད་


TNT17_Page_0994
[མ་དཔེ་གཟིགས་ན་འདིར་གནོན།]

ཆོག་འཛིན་དང༌། འགྱོད་པ་ནི་ཞུགས་ཟིན་པ་ལ་བར་དུ་གཅོད་པའོ། །ལེ་ལོ་དང་ང་རྒྱལ་ནི་གཉིས་ཀ་ལ་བར་དུ་གཅོད་པའོ། །ཐ་མ་ནི་འབྲས་བུ་མཆོག་ཐོབ་པ་ལ་བར་དུ་གཅོད་པའོ། །གཉིས་པ་ནི་དེ་ཡི་གཉེན་པོ་སོགས་ཏེ་དེ་དག་གི་གཉེན་པོ་ནི་ཐེག་པ་གསུམ་པོའི་ཆོས་མཐའ་དག་ཡིན་ཀྱང༌། ཐེག་པ་མཆོག་ཐེག་ཆེན་བསྟན་པས་ནི། དེའི་གཉེན་པོ་བླ་ན་མེད་པར་འགྱུར་ཏེ། དེའི་རིམ་པས་བར་དུ་གཅོད་པ་བརྒྱད་པོ་དེ་དག་གིས། ཉེས་པ་ཐམས་ཅད་རྩ་བ་ནས་རབ་ཏུ་སྤོང་བར་འགྱུར་རོ། །སྤོང་ཚུལ་སྔོན་བཤད་པ་དེ་དག་གི་འགྲེལ་བ་དག་ལས་གསུངས་པ་ལྟར་ཡིན་ལ། བདག་གི་རྟོག་པ་ནི་འདི་ལྟ་སྟེ། དེ་ཡང་ཐེག་ཆེན་གྱི་ཆོས་སྤྱི་ལྡོག་དང་སྦྱར་ན་འདི་ལྟར་གོ་དགོས་ཏེ། ཉན་ཐོས་ཀྱི་ཐེག་པར། སངས་རྒྱས་ཀྱི་སྤངས་པའི་ཁྱད་པར་ལས་བརྩམས་ཏེ། འདོད་ཆགས་ཞེ་སྡང་སོགས་མེད་པའི་ཚུལ་དང༌། རྒྱུའི་ཁྱད་པར་ལས་བརྩམས་ཏེ། གཞན་དོན་དུ་དཀའ་སྤྱད་དཔག་ཏུ་མེད་པ་སོགས་སྐྱེས་བུ་དམ་པ་ཁོ་ནའི་སྤྱོད་ཡུལ། ཁྱབ་འཇུག་དང་དྲག་པོ་སོགས་ལ་མེད་པའི་ཁྱད་ཆོས་སུ་ཤེས་པས། སངས་རྒྱས་ལ་བརྙེས་པ་ཕལ་ཆེར་ལྡོག་མོད་ཀྱི། རྣམ་པར་འཕྲུལ་བ་མཐའ་ཡས་པ་དང༌། ཤེས་བྱ་ཀུན་ཁྱབ་ཀྱི་ཚུལ་རྒྱས་པར་མ་བསྟན་པས། རྣམ་པར་འཕྲུལ་བ་དང༌། དབང་འབྱོར་བའི་ཁྱད་པར་ནི། སངས་རྒྱས་ལས་ཀྱང་དེ་དག་ལྷག་གོ་སྙམ་པ་འབྱུང་སྲིད་ན། ཐེག་ཆེན་ལས་ནི། དེ་བཞིན་གཤེགས་པའི་སྐུ་


TNT17_Page_0995
[མ་དཔེ་གཟིགས་ན་འདིར་གནོན།]

དང་ཡེ་ཤེས་དང༌། ཡོན་ཏན་དང༌། ཞིང་ཁམས་དང་འབྱོར་བ་དང་ཕྲིན་ལས་མཐའ་ཡས་པ་རྣམས་རྒྱས་ཤིང་གསལ་བར་བསྟན་པས། སྟོན་པ་གཞན་དེ་དག་གི་ཡོན་ཏན་ནི། བྱེ་བ་བརྒྱ་ཕྲག་དུས་གཅིག་ཏུ་ཚོགས་ཀྱང༌། བ་གླང་གི་རྨིག་རྗེས་མི་གཙང་བའི་ཆུས་གང་བ་ཙམ་དུ་ཟད་པ་ལ། བཅོམ་ལྡན་འདས་ཀྱི་ཆེ་བ་ནི། བདུད་རྩིའི་རྒྱ་མཚོ་ལྟ་བུ་གཏིང་མཐའ་མེད་པའོ། །ཞེས་ཤེས་པར་འགྱུར་རོ། །ཉན་ཐོས་ཀྱི་ཐེག་པ་ལས། ལམ་དང་གང་ཟག་བསྟན་པ་དེ་རྣམས་ཀྱིས་ཀྱང༌། མུ་སྟེགས་བྱེད་ཀྱི་ཆོས་ཕལ་ཆེར་ཟིལ་གྱིས་གནོན་མོད་ཀྱི། གནས་སྐབས་འགའ་ཞིག་ཏུ། རིག་བྱེད་ལ་སོགས་པ་ཐོས་པས་གྲོལ་བའི་རྒྱུའོ་ཞེས་ཐོས་པ་ན། འདི་བས་ཀྱང་དེ་བཟང་ངོ་སྙམ་པའི་ཐེ་ཚོམ་སྐྱེ་བ་སྲིད་ལ། ཐེག་ཆེན་དུ་ནི། ལྟ་སྤྱོད་སྒོམ་པ་འབྲས་བུའི་ཁྱད་པར། རྒྱུ་འབྲས་ཐམས་ཅད་བཟང་ལ་རྒྱ་ཆེ་བ་ཡང་བསྟན་ལ། ཆོས་ཐོས་པ་ཙམ་དང༌། གླེགས་བམ་ས་ཕྱོགས་ན་བཞུགས་པ་ཙམ་གྱི་ཕན་ཡོན་ཡང་མཐའ་ཡས་པ་ཞིག་གསུངས་པས། ཆོས་ལ་གུས་པ་མཚུངས་མེད་སྐྱེ་བར་འགྱུར་རོ། །ཉན་ཐོས་ཀྱི་ཐེག་པ་ལས་ནི། འཁོར་བ་འཁྲུལ་བའི་སྣང་བ་ཙམ་དུ་སྟོན་པ་ཉུང་ཞིང་མི་གསལ་ལ། ཐེག་པ་ཆེན་པོར་ནི་ཤིན་ཏུ་གསལ་ཞིང་རྒྱས་པས། འཁོར་བ་སྤོང་བ་ཡང་དཀའ་བ་མ་ཡིན་པར་ཤེས་ཤིང༌། སེམས་ཅན་ལ་སྙིང་རྗེ་ཆེན་པོ་ལྷག་པར་རྒྱས་པས། དེ་རྣམས་སྒྲོལ་བའི་ཕྱིར་


TNT17_Page_0996
[མ་དཔེ་གཟིགས་ན་འདིར་གནོན།]

ལུས་སྲོག་གཏོང་བ་ཡང་ཚོམ་ཚམ་ཚོམ་མེད་པར་ནུས་ཏེ། དེའི་ཕྱིར་ལེ་ལོའི་གཉེན་པོ་མཆོག་བརྩོན་འགྲུས་ལ་སྦྱོར་བར་བྱེད་དོ། །སྟོང་པ་ཉིད་དང༌། སྙིང་རྗེ་དེ་གཉིས་རྒྱས་པར་བསྟན་པ་ཁོ་ནས། ཅུང་ཟད་ཆོ་ག་འཛིན་ཡང་སེལ་ཏེ། རང་བཞིན་མེད་པའི་སྒྲིབ་པ་སྤོང་བ་དང༌། རང་བཞིན་མེད་པས་ཚོགས་བསོགས་ཅིང་སྤྱད་པ་སྤྱོད་པ་ལ་ཡུན་རིང་ཐུང་དང༌། གྲངས་མང་ཉུང་གི་དཀའ་བ་དང་སླ་བའི་ཁྱད་པར་མེད་དེ། སྒྱུ་མ་མཁན་པོས་སྐད་ཅིག་ལ་ཉིན་ཞག་ཏུ་སྤྲུལ་པ་དང༌། ལོ་མང་པོར་སྟོན་པ་དང་ཡུན་རིང་ཐུང་སོགས་སྒུག་དགོས་མི་དགོས་ཀྱི་ཁྱད་པར་དང༌། ཆུ་ཚོད་གཅིག་ཏུ་གཉིད་ལོག་པའི་རྨི་ལམ་ན། བརྒྱ་བྱིན་གྱི་འབྱོར་བ་ལ་སྤྱོད་པ་རྨི་བ་དང༌། ཕྱུག་རྫིའི་བྱ་བ་བྱེད་པར་མཐོང་བ་གཉིས་ལ་འབྱོར་བ་ཆེ་ཆུང་མེད་པར་བཞིན་ནོ། །དེ་བཞིན་དུ་སྙིང་རྗེས་སེམས་ཅན་མོས་པ་ཐ་དད་པ་རྗེས་སུ་འཛིན་པ་ལ། ཆོས་མཐའ་དག་རྟོགས་ཤིང་ཡོན་ཏན་མཐའ་དག་ལྡན་པ་དགོས་པས་སོ། །ཐེག་དམན་ལས་ནི། ཇི་ཙམ་མང་དུ་སྨྲ་བྱེད་པ། །དེ་དག་དམ་ཆོས་འཛིན་པ་མིན། །གང་དག་འདི་མ་ཐོས་ཉུང་ཡང༌། །ལུས་ཀྱི་ཆོས་དག་མངོན་སུམ་བྱས། །ཞེས་གསུངས་ཏེ། རང་ཉིད་གཅིག་པུ་འཁོར་བ་ལས་ཐར་བ་ལ་ཡོན་ཏན་མཐའ་མེད་དུ་འཕེལ་དགོས་པ་ཡང་མ་ཡིན་ནོ། །དེའི་ཕྱིར་ཅུང་ཟད་ཙམ་གྱིས་ཆོག་པར་འཛིན་པ་མཐའ་དག་སེལ་བར་མི་ནུས་སོ། །ཉན་ཐོས་ཀྱི་ཐེག་པས་ཀྱང༌། ངེས་འབྱུང་སྟོན་


TNT17_Page_0997
[མ་དཔེ་གཟིགས་ན་འདིར་གནོན།]

པས་འདོད་ཆགས་དང༌། ཁམས་ཀྱི་རྣམ་པའི་རབ་དབྱེ་དང༌། རགས་རྒྱུན་གྱི་དངོས་པོ་འཇིག་པར་སྟོན་པའི་ཕྱིར་ང་རྒྱལ་སེལ་ཞིང༌། བདག་མེད་པར་སྟོན་པས་གཉིས་ཀའང་སེལ་མོད་ཀྱི། ཐེག་པ་ཆེན་པོར་ནི་དེ་དག་ཀྱང་སྟོན་ལ། ཁྱད་པར་ཐུན་མོང་མ་ཡིན་པ་ནི། ཀུན་རྫོབ་ཐམས་ཅད་གདོད་མ་ནས་མ་གྲུབ་པར་སྟོན་པས། རང་དང་རང་གི་ཉེར་སྤྱོད་ལ་ཆགས་པ་དང་དེ་ལས་བྱུང་བའི་ང་རྒྱལ་ཤུགས་ལ་རྗེས་མེད་དུ་སྤོང་བར་འགྱུར་ཞིང༌། བདག་ཉིད་སེམས་ཅན་ཐམས་ཅད་ཀྱི་བྲན་དུ་ཁས་བླངས་པས། ང་རྒྱལ་སེལ་བ་དང༌། བདག་གི་ལུས་དང་ལོངས་སྤྱོད་ཐམས་ཅད་གཞན་ལ་གཏོང་བས། འདོད་ཆགས་སྤོང་སྟེ། དཔྱིས་ཕྱིན་པར་སྤོང་བ་ནི་ཐེག་ཆེན་ཁོ་ནས་སོ། །ཐེག་དམན་ལས་ཀྱང་སྡིག་པ་སྦྱོང་བའི་ཐབས་ཇི་སྐད་དུ། གང་གིས་སྡིག་པའི་ལས་བྱེད་པ། དགེ་བས་འགེབས་པར་བྱེད་པ་སྟེ། སྤྲིན་བྲལ་ཉི་མ་ཟླ་བ་ལྟར། །འཇིག་རྟེན་འདི་ན་ཀུན་ཏུ་གསལ། །ཞེས་གསུངས་ཏེ། ནོངས་པ་བཤགས་པ་དང༌། གཉེན་པོས་སྦྱོང་བའི་ཚུལ་མང་དུ་གསུངས་མོད་ཀྱི། འོན་ཀྱང་མཚམས་མེད་སྦྱོར་བ་བྱས་པ་ལ་འདོད་ཆགས་བྲལ་འབྲས་མི་སྲིད་དོ། །ཞེས་པ་ལ་སོགས་པ་གཉེན་པོའི་སྟོབས་ཆུང་ངུར་བསྟན་ལ། འདིར་ནི་ཆོས་ཉིད་ཀྱི་དོན་ཡང་དག་པར་བསམས་ན། མཚམས་མེད་ལ་སོགས་པ་སྡིག་པའི་ཕུང་པོ་ཆེས་ཆེ་བ་ཡང་མྱུར་དུ་བྱང་བར་འགྱུར་བ་དང༌། གཟུངས་


TNT17_Page_0998
[མ་དཔེ་གཟིགས་ན་འདིར་གནོན།]

སྔགས་བཟླས་པ་དང༌། ཏིང་ངེ་འཛིན་གྱི་ཁྱད་པར་དག་གིས་ཀྱང༌། ལས་སྒྲིབ་ཀྱི་ཚོགས་ཆེན་པོ་རྩོལ་མེད་དུ་བྱང་བར་འབྱུང་བའི་ཕྱིར། འགྱོད་པ་སེལ་བའི་ཁྱད་པར་ཡང་དེ་འདྲའོ། །མ་ངེས་འབྱེད་པ་ཡང༌། ཐེག་ཆུང་ལས། བཙུན་པ་སངས་རྒྱས་ཀྱི་ཆོས་ཟབ་མོ་དེ་ལྟ་བུ་བདག་གི་བློ་བར་མ་ཆུད་དོ། །གལ་ཏེ་བདག་གི་བློ་བར་ཆུད་པ་དེ་ལྟ་ན། བདག་གི་ལུས་ཏིལ་གྱི་བྱེ་མ་ལྟར་བགྱིས་ཀྱང༌། བདག་བླ་ན་མེད་པའི་བྱང་ཆུབ་ལ་བློ་མི་བཟློག་པ་ཞིག་ན། ད་ནི་ཤིང་ཚིག་པ་བཞིན་ཅི་བགྱིད་ཡང་མ་མཆིས་སོ། །ཞེས་པ་ལྟ་བུ། ཐེག་དམན་གྱི་ལམ་ལ་སྨད། ཐེག་ཆེན་གྱི་ལམ་ལ་བསྟོད་པ་ནི་ཅུང་ཟད་ཡོད་མོད་ཀྱི། ཉན་ཐོས་ཀྱི་ལམ་རྟོགས་ནས་ཐེག་ཆེན་དུ་འཇུག་ཚུལ་མ་བཤད་ལ། ཐེག་ཆེན་ལས་ནི། དེ་ཡང་རྒྱས་པར་བཤད་པས་ཤིན་ཏུ་ཁྱད་པར་ཆེ་བ་ཡིན་ནོ། །དེ་ལ་ཉན་ཐོས་སྡེ་བ་རྣམས་ཀྱི་འདོད་པ་ནི། གཉིས་སློབ་རིགས་ལས་ལྡོག་ནས་ནི། །སངས་རྒྱས་སུ་འགྱུར་གཞན་གསུམ་ཡང༌། །ཞེས་འདོད་མོད་ཀྱི་མདོའི་ཚིག་གསལ་ནི་མེད་པར་མངོན་ནོ། །གསུམ་པ་ནི། ཏདྱ་ཐཱ་ཞེས་པ་ནི། འདི་ལྟ་སྟེ་ཅེས་པའོ། །ཨོཾ་ནི་སྔགས་ཀྱི་འགྲོ་འདྲེན་པ་ཡིན་ལ། བཛྲ་ནི་རྡོ་རྗེ། པྲཱ་ཀཱ་རཱ་ནི་རྭ་བ་སྟེ་ལྕགས་རི། དེ་ཉིད་ལན་གཉིས་སུ་བཟློས་པ་ནི་རྒྱ་ཆེ་བ་དང་འཐུག་པོའི་དོན་ཡིན་ལ། བཛྲ་ཙཀྲ་ནི་རྡོ་རྗེ་འཁོར་ལོ། དཥྟཾ་ནི་མཆེ་བ། བྷ་ཡཱ་ན་ཀེ་ནི་འཇིགས་པར་བྱེད་པ་པོ། ཨ་མ་ལེ་


TNT17_Page_0999
[མ་དཔེ་གཟིགས་ན་འདིར་གནོན།]

ནི་དྲི་མ་མེད་པ། བི་མ་ལ་ནི་དྲི་མ་དང་བྲལ་བ། ནིརྨ་ལེ་ནི་དྲི་མ་མེད་པའམ་དག་པ། ཙ་ལེ་སོགས་འགྲོ་ལྡིང་པའི་སྔགས་ཏེ། དོན་མཐུན་པར་བསྒྱུར་དུ་མེད་ཀྱང་འབྲུ་བཅུ་བཞི་བོ་དེ་དག་གཟུངས་ཀྱི་དངོས་གཞི་ཡིན་ཏེ། ཏིང་ངེ་འཛིན་ཐོབ་པར་བྱེད་པའི་རྒྱུ་གཙོ་བོའོ། །སརྦ་བུདྡྷེ་སངས་རྒྱས་ཐམས་ཅད་ལ་ཞེས་པ་དང༌། སྭཱཧཱ་ནི་གཞི་ཚུགས་ཞེས་པ་སྟེ་སྔགས་ཀྱི་མཐའ་སྒྲུབ་པའོ། །འདི་དག་ཕ་རོལ་ཏུ་ཕྱིན་པའི་ཐེག་པ་ལྟར་ན། སྟོང་ཉིད་སྙིང་རྗེ་དེ་ནི། ལས་དང་ཉོན་མོངས་པ་དང་སྡུག་བསྔལ་གྱི་འཇིགས་པ་ཐམས་ཅད་ཕྱིན་ཆད་མི་འབྱུང་བར་བསྲུང་བ། རྡོ་རྗེའི་རྭ་བ་ལྟ་བུ་ཡིན་ལ། སྔར་གྱི་བག་ཆགས་གཅོད་པ་བྱེད་པའི་རྡོ་རྗེའི་འཁོར་ལོ་དང༌། ད་ལྟར་མངོན་གྱུར་པ་འགོག་པར་བྱེད་པའི། འཇིགས་པའི་གཟུགས་ཅན་མཆེ་བ་གཙིགས་པས་ཟ་བར་བྱེད་པ་ལྟ་བུ་ཡིན་ལ། དེའི་ངོ་བོ་ནི་དུས་གསུམ་དུ་དྲི་མ་དང་བྲལ་བའི་ཕྱིར། ཨ་མ་ལེ་སོགས་གསུམ་གསུངས་པ་ཡིན་ལ། དེ་ཉིད་ཀྱང་དོན་དམ་པའི་སངས་རྒྱས་ཐམས་ཅད་འདུས་པའི་ངོ་བོ་ཡིན་ཏེ། དྲི་མ་མེད་པ་ལ། སངས་རྒྱས་ཐམས་ཅད་ལ་ཞེས། བཞི་པའི་དོན་ལ་བདུན་པའི་ཚིག་ཡིན་པས། དྲི་མ་མེད་པའི་སངས་རྒྱས་ལ་དམིགས་པར་བྱའོ་ཞེས་པའི་དོན་ནོ། །དེ་ལྟར་གཟུངས་སྔགས་དེ་ཉིད་ངག་ཏུ་ཡང་བཟླ་ཞིང༌། ཤེས་བྱ་ཐམས་ཅད་གཟུངས་སྔགས་དེ་དག་དབྱེ་བ་མེད་པར་


TNT17_Page_1000
[མ་དཔེ་གཟིགས་ན་འདིར་གནོན།]

མོས་ཤིང༌། དེ་ཉིད་རྣམ་པར་དཔྱད་ན། སྒྲ་དང་བརྗོད་པ་གང་དུ་ཡང་མ་གྲུབ་ཅིང༌། ཆོས་ཉིད་གསལ་རིག་མ་འགགས་པ་ལ་མི་རྟོག་པར་མཉམ་པར་འཇོག་པ་དང༌། དེ་ལྟར་མ་རྟོགས་པ་ལ་སྙིང་རྗེ་ཆེན་པོ་བསྒོམས་པས། ཚིགས་སུ་བཅད་པ་གཉིས་པའི་གཟུངས་ཞེས་བྱ་བའི་གཟུངས་ཀྱི་སྒོ་ཐོབ་པར་འགྱུར་རོ། །གསང་སྔགས་ཀྱི་ཚུལ་ལྟར་ན། སྔར་བཤད་པ་དེ་ཡང་ཡིན་མོད་ཀྱི། རྡོ་རྗེ་ཁྲཽ་བོ་འཁོར་ལོ་དང་མཆེ་བ་ཐོགས་པ། བསྲུང་བའི་འཁོར་ལོ་དང་བཅས་པ་སྒོམས་ཏེ། གཟུངས་སྔགས་བཟླ་བ་ཡིན་མོད་ཀྱི་དེའི་ཆོ་ག་ནི་བྱ་བའི་རྒྱུད་ལྟར་སྦྱར་ན་ལེགས་པ་ཡིན་ནོ། །བཞི་པ་ནི། ཚིགས་སུ་བཅད་པ་གཉིས་པའི་གཟུངས་ལ་ནི། ཞེས་པ་ལ་སོགས་པ་སྟེ། ཚིགས་བཅད་གཉིས་པའི་གཟུངས་ཚིག་གི་སྒོ་ནས་བཟློས་པ་དང༌། དོན་སྟོང་ཉིད་སྙིང་རྗེ་སྒོམ་པ་གོང་དུ་བཤད་པ་ལྟར་སྒྲུབས་ན། སེམས་ཅན་དམ་པ་བློ་ལྡན་ཏེ། བྱང་ཆུབ་སེམས་དཔའ་སེམས་བསྐྱེད་པའི་སྡོམ་པ་དང་ལྡན་ཞིང་ཚུལ་ཁྲྀམས་ལ་བརྩོམ་པ་ཞི་གནས་གྲུབ་ཅིང་བདག་མེད་པའི་དོན་ལ་ལྷག་མཐོང་ཅུང་ཟད་སྐྱེས་པ་སྟེ། དེ་འདྲས་སྒྲུབས་ན་དེ་མ་ཐག་ཏུ་ཕན་ཡོན་རྣམ་པ་བཅུ་པ་ནི་ཐོབ་པར་འགྱུར་ཏེ། བཅུ་པོ་དེ་ཡང་གང་ཞེ་ན། ཁམས་ནི་སངས་རྒྱས་ཀྱི་ས་བོན་ཞེས་བྱ་སྟེ། དེ་ཡང་ཕར་ཕྱིན་དང་བྱང་ཕྱོགས་དང༌། ས་དང་སྟོབས་ལ་སོགས་པའི་ས་བོན་རྒྱས་འགྱུར་གྱི་རིགས་སྔར་ཡང་དག་པར་བླང་བ་ལས་ཐོབ་པ་དེ་


TNT17_Page_1001
[མ་དཔེ་གཟིགས་ན་འདིར་གནོན།]

རྣམས་སྒོ་ཐམས་ཅད་ནས་རྒྱས་ཤིང་འཕེལ་བར་འགྱུར་ལ། རྒྱས་ཤིང་འཕེལ་བའི་དོན་ཡང་འབྲས་བུ་བསྐྱེད་པ་ལ་མངོན་དུ་ཕྱོགས་པའི་དོན་ནོ། །གཉིས་པ་ནི། ནམ་ཞིག་འཆི་བའི་ཚེ། ལུས་དང་སེམས་ལ་མཆོག་ཏུ་དགའ་བ་དང༌། དགེ་བའི་སེམས་དང༌། ཡིད་དུ་འོང་བའི་སྣང་བརྙན་དག་མཐོང་ཞིང་སངས་རྒྱས་སྲས་དང་བཅས་པའི་ཞལ་མཐོང་བ་དང༌། ཏིང་ངེ་འཛིན་དག་ཀྱང་ཐོབ་པའོ། །གསུམ་པ་ནི། ཇི་ལྟར་འདོད་པ་བཞིན་དུ་སྐྱེ་བ་སྟེ། གང་དུ་སྐྱེ་བར་འགྱུར་བའི་གནས་ལ་ཡང་རང་ལ་རང་དབང་ཡོད་པ་སྟེ། གང་འདོད་འདོད་ཀྱི་སར་སྐྱེ་བ་ལེན་པར་འགྱུར་བའོ། །བཞི་པ་ནི་དེ་ཐམས་ཅད་དུ་ཡང་སྔོན་གྱི་ཚེ་རབས་རྣམས་དྲན་ཞིང༌། སེམས་བསྐྱེད་པ་དང༌། ཆོས་ལ་སྤྱོད་པ་རྣམས་ཀྱང་མི་བརྗེད་པར་འགྱུར་བའོ། །ལྔ་པ་ནི་སངས་རྒྱས་སྤྲུལ་པའི་སྐུ་རྣམས་དང་མངོན་སུམ་དུ་མཇལ་བར་འགྱུར་བ་དང༌། དྲུག་པ་ནི་དེ་བཞིན་དུ་སངས་རྒྱས་དེ་དག་ལས་ཀྱང་ཐེག་པ་མཆོག་ཐེག་ཆེན་གྱི་ཆོས་ངེས་པར་ཐོབ་པར་འགྱུར་བ་དང༌། བདུན་པ་ནི། སྟོན་པ་དང་ཆོས་ལ་མོས་པ་ཕུན་སུམ་ཚོགས་པ་ངེས་པར་འཛིན་པས་ཐེ་ཚོམ་སྤངས་པ་དང༌། བརྒྱད་པ་ནི། ཐོས་པའི་ཆོས་རྣམས་ལ་གཞན་གྱིས་བཀྲོལ་ཞིང་སྟོན་མི་དགོས་པར་རང་སྟོབས་ཀྱིས་དྲང་ངེས་འབྱེད་ནུས་ཤིང་དགོངས་པ་ལོངས་པའི་བློ་གྲོས་དང་བཅས་པར་འགྱུར་བ་དང༌། དགུ་པ་ནི། སྒོ་གཉིས་ཐོབ་པ་སྟེ། དེ་ལ་


TNT17_Page_1002
[མ་དཔེ་གཟིགས་ན་འདིར་གནོན།]

ཏིང་ངེ་འཛིན་གྱི་སྒོ་ནི། ཐེག་ཆེན་ཉིད་ཀྱི་ཐུན་མོང་མ་ཡིན་པའི་ཁྱད་ཆོས་དང་ལྡན་པའི་སྙོམས་འཇུག་དགུ་པོ་དག་ཡིན་ཏེ། ནམ་མཁའ་མཛོད་ལ་སོགས་པའི་ཏིང་ངེ་འཛིན་མཐའ་ཡས་པ་རྣམས་འདི་དག་ལ་བརྟེན་ནས་འབྱུང་བའི་ཕྱིར་སྒོ་ཞེས་བྱའོ། །གཟུངས་ནི་བཟོད་པ་དང༌། སྔགས་དང༌། ཆོས་དང༌། དོན་གྱི་གཟུངས་ཏེ་བཞིའམ། ཡང་ན་གཉིས་ཏེ། ཚིེག་གི་གཟུངས་དང༌། དོན་གྱི་གཟུངས་སོ། །དེ་ཡང་ཚིག་དོན་མཐའ་ཡས་པ་འབད་རྩོལ་མེད་པས་མི་བརྗེད་པ་འཛིན་པའི་ནུས་པ་ཡིན་ལ། དེའི་སྒོ་ཡང་གཟུངས་སྔགས་ཉིད་ཀྱིས་ཐོབ་པའི་ཡེ་ཤེས་སོ། །བཅུ་པ་ནི། བྱང་ཆུབ་མྱུར་དུ་ཐོབ་པ་སྟེ། གཟུངས་སྔགས་སྒྲུབ་པའི་སྒོ་འདིས་འབད་རྩོལ་གཞན་ལ་མ་ལྟོས་པར། སྒྲིབ་པ་དཔག་ཏུ་མེད་པ་བྱང་བ་དང༌། ཚོགས་མང་པོ་ཞིག་ཟླུམས་པར་འགྱུར་བས། བླ་ན་མེད་པའི་སངས་རྒྱས་ཀྱི་བྱང་ཆུབ་ཐོབ་པ་ལ་ཤིན་ཏུ་ཉཻ་བར་འགྱུར་རོ། །དེ་ལ་བྱང་ཆུབ་སེམས་དཔའ་དབང་པོ་རྣོན་པོ་ཚོགས་ལམ་ཆེན་པོ་ཐོབ་པ་ཞིག་ཡིན་ན་ནི། གཟུངས་འདི་སྒྲུབས་པས་ཕན་ཡོན་བཅུ་པོ་དེ་དག་ཚེ་འདི་ཉིད་ལ་འགྲུབ་པར་འགྱུར་དེ། གཞན་རྣམས་དངོས་སུ་ཐོབ་ཅིང༌། གང་འདོད་དུ་སྐྱེ་བ་ལེན་པའི་ནི་ནུས་མཐུ་ཐོབ་པ་ཡིན་ལ། བྱང་ཆུབ་དངོས་ཚེ་འདི་ལ་ཐོབ་པ་མིན་ཡང༌། སྤྱིར་བསྐལ་པ་མང་པོས་བགྲོད་དགོས་པའི་ལམ་ཡང་གཟུངས་ཀྱི་མཐུས་ཡུད་ཙམ་ལ་ཆུད་པའི་ཕྱིར་


TNT17_Page_1003
[མ་དཔེ་གཟིགས་ན་འདིར་གནོན།]

བྱང་ཆུབ་ལ་ཉེ་བའི་ཆོས་ཐོབ་པ་ཡིན་ནོ། །དབང་པོ་བརྟུལ་པོའི་དབང་དུ་བྱས་ན། དང་པོའི་གཉིས་ཚེ་འདི་ལ་དང༌། བར་གྱི་བདུན་ཚེ་རབས་གཞན་དང༌། ཐ་མ་ནི་མཐར་ཐུག་པ་ལ་ཉེ་བའི་གནས་སྐབས་སུ་སྦྱར་རོ། །ཞེས་འཆད་དོ། །དེས་ན་བསྡུས་པའི་དོན་འདི་ཡིན་ཏེ། མཉམ་གཞག་ཏུ་གཟུངས་ཀྱི་སྒོ་འདི་སྒྲུབ་ཅིང༌། རྗེས་ཐོབ་ཏུ་བྱང་ཆུབ་སེམས་དཔའི་སྤྱོད་པ་སྤྱི་དང༌། ཁྱད་པར་དུ་མདོ་འདི་ཡི་གེ་འབྲི་མཆོད་སྦྱིན་པ་ལ་སོགས་པ། སྤྱོད་པ་དགུས་སློབ་པར་བྱེད་ན། བར་དུ་གཅོད་པའི་ཆོས་བརྒྱད་སྤོང་བ་དང༌། ཕན་ཡོན་བཅུ་ཐོབ་པར་འགྱུར་རོ། །ཞེས་པ་སྟེ། འདིར་མ་ཟད་གཟུངས་མདོ་ཁྱད་པར་ཅན་ཐམས་ཅད་ཀྱི་ཕན་ཡོན་ཡང་ཞོར་ལ་བསྟན་པ་ཡིན་ནོ། །ཚིགས་སུ་བཅད་པ་གཉིས་པའི་མདོ་འདི་བརྗོད་བྱ་རྒྱ་ཆེ་ཞིང༌། བཤད་པའི་རྣམ་གྲངས་ངོ་མཚར་ལ། ཆོས་ལ་དད་པ་སྐྱེ་བའི་དགོས་པ་ཡང་ཆེ་བར་འདུག་པས། འདི་ཉིད་ཀྱི་འགྲེལ་པ་སློབ་དཔོན་མཛེས་བཀོད་ཀྱི་བྱས་པ་དང༌། ཐེག་པ་ཆེན་པོ་མདོ་སྡེ་རྒྱན་གྱི་འདི་སྟོན་བྱེད་ཀྱི་འགྲེལ་པ་རྣམས་ཀྱི་ལེགས་བཤད་ཀྱི་སྙིང་པོ་ཡང་བསྡུས་ལ། རང་གི་བློ་གྲོས་ཀྱི་ནུས་པས་ཀྱང་ཅུང་ཟད་སྤྲོས་ཏེ་འཚམས་པར་བཤད་པ་ཡིན་ནོ། །མངྒ་ལཾ།། གཅིག་ཞུས་དག ། ༈ ཚིགས་བཅད་བཞི་པའི་རྣམ་བཤད་བཞུགས། ན་མོ་བུདྡྷཱ་ཡ། ཚིགས་སུ་བཅད་པ་བཞི་པའི་མདོ་དོན་ཅུང་ཟད་བཤད་པར་བྱ་


TNT17_Page_1004
[མ་དཔེ་གཟིགས་ན་འདིར་གནོན།]

སྟེ། འདི་ལ་གསུམ། མདོ་དངོས་ཕྱག་འཚལ་བ་དང༌། གསུང་པ་པོའི་རང་བཞིན་དང༌། མདོ་བཏོན་པའི་ཕན་ཡོན་ཏེ་གསུམ་ལས། དང་པོ་ལ། དེ་བཞིན་གཤེགས་པ་ཉིད་ལ་ཕྱག་འཚལ་བ། དེའི་མཛད་པ་ཁྱད་པར་ཅན་གྱི་གནས་ལ་ཕྱག་འཚལ་བ། སྐུའི་སྤྱོད་ལམ་གྱི་གནས་ལ་ཕྱག་འཚལ་བ། མཆོད་རྟེན་གྱི་ཚོགས་ལ་ཕྱག་འཚལ་བ་སྟེ་བཞི་ལས། དང་པོ་ནི་སྐུར་གྱུར་པ་ནི་སོགས་པ་སྟེ། དེ་བཞིན་གཤེགས་པའི་སྐུ་ལ་མཚན་སུམ་ཅུ་རྩ་གཉིས་ལ་སོགས་པ་རྨད་དུ་བྱུང་བའི་མཚན་མཆོག་དུ་མས་བརྒྱན་པ་ནི། རེ་ཞིག་གཟུགས་ཀྱི་སྐུའི་ཡོན་ཏན་གྱི་དབང་དུ་བྱས་ཏེ་བླ་མ་སྐྱེལ་བ་ལ་སོགས་པ། བསོད་ནམས་ཀྱི་ཚོགས་དཔག་ཏུ་མེད་པ་དང་ལྡན་པའི་རྟགས་སོ། །རྫོགས་པའི་སངས་རྒྱས་ཞེས་པ་ལ། རྫོགས་པ་ནི། དོན་གཉིས་ཏེ་ལམ་དང་སྦྱར་ན་བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་ཤིང༌། ལམ་འདིའི་མཐུ་ལས་སྒྲིབ་པ་གཉིས་སྤངས་པའི་སྤངས་པ་ཡང་ཡོངས་སུ་རྫོགས་པའོ། །འབྲས་བུ་ལྟར་སྦྱར་ན། སྒྲིབ་པ་རྫོགས་པར་སངས་པ་དང༌། ཡེ་ཤེས་རྫོགས་པར་རྒྱས་པ་ཞེས་བྱའོ། །གྲགས་པ་དང་ལྡན་པ་ནི། ཐུབ་པ་མཆོག་འདི་ནི་སྔོན་སྐྱེས་པའི་རབས་ཀྱི་འཕྲེང་བ་མཐའ་ཡས་པར། སེམས་ཅན་གྱི་དོན་དུ་ཉིད་ཀྱི་སྐུ་ཡང་ལན་གྲངས་མེད་པར་བཏང་བ་སོགས། སྙིང་རྗེའི་གཞན་དབང་དུ་གྱུར་པས་དཀའ་བ་དཔག་ཏུ་མེད་པ་མཛད་པ་དང༌། དམ་པའི་


TNT17_Page_1005
[མ་དཔེ་གཟིགས་ན་འདིར་གནོན།]

ཆོས་འཚོལ་བ་ལ་མངོན་པར་རྩོལ་བ། ཆོས་ཚིགས་བཅད་གཅིག་ཐོས་པའི་ཕྱིར་ཡང༌། རྒྱལ་སྲིད་ཀྱི་འབྱོར་བ་རང་ཡང་གྲངས་མེད་པར་བཏང་བ་སོགས། དམ་པའི་སྤྱོད་པ་ལ་སོགས་པས་ཡིད་ཕྲོགས་པ་ལས་བྱུང་བའི་གྲགས་པ་ཆེན་པོ་དང༌། སངས་རྒྱས་པའི་མཛད་པ་བསྟན་པ་ན་ཡང༌། འོད་ཟེར་རེ་རེ་སྤྲོས་པས་ཀྱང་འགྲོ་བ་དྲུག་གི་སྐྱེ་བོ་མཐའ་ཡས་པའི་སྡུག་བསྔལ་ཞི་བ་དང༌། ཆོས་སྟོན་པ་གཅིག་གིས་ཀྱང་གདུལ་བྱ་དཔག་ཏུ་མེད་པ་སྨིན་ཅིང་གྲོལ་བར་མཛད་པའི་ཕྱིར། སྙན་པའི་གྲགས་པས་འཇིག་རྟེན་གསུམ་དུ་ཁྱབ་པའི་ཡོན་ཏན་དང་ལྡན་པའོ། །རྒྱལ་བ་ནི་རྒྱུའི་དུས་ན་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་གཉིས་བག་ཆགས་དང་བཅས་པ་ལས་རྒྱལ་བས། འབྲས་བུའི་དུས་ན་མི་མཐུན་པའི་ཕྱོགས་མཐའ་དག་སྤངས་ཤིང༌། འགྲན་ཟླ་མེད་པའི་གོ་འཕངས་བརྙེས་པའོ། །འདིར་སྐུར་གྱུར་པ་ཐམས་ཅད་ལ་མཚན་དཔེས་བརྒྱན་པ་ཞེས་བཤད་པ་ནི། གཟུགས་སྐུ་ཁོ་ན་མ་ཡིན་པར་དེ་བཞིན་གཤེགས་པའི་ཆོས་ཀྱི་སྐུ་ཡང་མཚན་དཔེ་ཐམས་ཅད་དང་ལྡན་པར་བསྟན་པ་ཡིན་ལ། དེའི་ཕྱིར་དེ་བཞིན་གཤེགས་པའི་སྙིང་པོ་དེར་བསྟན་པའང་ཡིན་ནོ། །གཉིས་པ་ནི། རྫོགས་སངས་གང་དུ་སོགས་ཏེ། མཆོག་གི་སྤྲུལ་པའི་སྐུ་རྣམས་བལྟམས་པ་དང་རྫོགས་པར་སངས་རྒྱས་པ་དང༌། ཆོས་ཀྱི་འཁོར་ལོ་བསྐོར་བ་དང༌། མྱ་ངན་ལས་འདའ་བའི་ཚུལ་གང་དུ་བསྟན་


TNT17_Page_1006
[མ་དཔེ་གཟིགས་ན་འདིར་གནོན།]

པའི་གནས་ལ་ཕྱག་འཚལ་ལོ། །ཞེས་སྦྱར་ཏེ། འདི་ནི་མཛད་པའི་གཙོ་བོ་བཞི་སྨོས་པས། མཐའ་ཡས་པའི་མཛད་པ་གང་དུ་བསྟན་པའི་གནས་ལའང་ཕྱག་འཚལ་བར་འགྱུར་ལ། དེ་ཁོ་ནར་མ་ཟད་གནས་དེར་བསྟན་པའི་མཛད་པ་ཉིད་ལའང་ཕྱག་འཚལ་བ་ཡིན་ནོ། །འདིར་མཛད་པ་གསུམ་ནི། ཐུན་མོང་གི་གདུལ་བྱ་རྣམས་ཀྱི་སྣང་ངོར་ཚུལ་སྟོན་པ་ཁོ་ན་ཡིན་ཏེ། དེ་བཞིན་གཤེགས་པ་ནི་སྐྱེ་འཆི་སྤངས་པའི་ཕྱིར་དང༌། སྔ་རོལ་ཀྱི་དུས་ནས། འོག་མིན་གྱི་ཞིང་དུ་མངོན་པར་རྫོགས་པར་སངས་རྒྱས་ཟིན་པའི་ཕྱིར་རོ། །འཇིག་རྟེན་དུ་ཆོས་ཀྱི་འཁཽར་ལོ་བསྐོར་བ་ཡང༌། དངོས་སུ་གདུལ་བྱའི་གཞན་སྣང་ཡིན་མོད་ཀྱི། དེ་དང་དེར་གནས་སུ་གསུང་གི་གསང་བ་རྗེས་སུ་ཞུགས་པའི་ཕྱིར། འདི་ལ་ཚུལ་སྟོན་པའི་ཐ་སྙད་མི་སྦྱོར་བ་ཤེས་ཆེའོ། །དེ་ལ་ཞི་བའི་འཁོར་ལོ་ཞེས་བྱ་བ་ནི། གདུལ་བྱ་རྣམས་ཞི་བ་དམ་པའི་གནས་ལ་འཇོག་པར་བྱེད་པའི་ཕྱིར། ལས་ཀྱི་སྒྲ་བྱེད་པ་པོ་ལ་སྦྱར་ནས་ཞི་བ་ཞེས་བྱ། འཁོར་ལོ་དོན་ནི་ཆོས་བསྟན་པ་ལས་ཞི་བ་ཐོབ་པ་དང༌། ཞི་བ་ཐོབ་པས་ཀྱང་ཆོས་སྟོན་པའི་ཕྱིར། ཕན་ཚུན་དུ་འཁོར་བའོ། །ཆོས་ཀྱི་འཁོར་ལོ་དེ་ཡང་རྣམ་པ་གསུམ་སྟེ། འཇིག་རྟེན་ཞི་བའི་ལམ་ལ་འཇུག་པ་དང༌། རབ་ཏུ་སྨིན་པ་དང༌། ལུང་སྟོན་པའི་འཁོར་ལོའོ། །གསུམ་པ་ནི་བདེ་གཤེགས་གང་དུ་སོགས་དང༌། སངས་རྒྱས་རྣམས་བཞུགས་པ་དང་འཆག་


TNT17_Page_1007
[མ་དཔེ་གཟིགས་ན་འདིར་གནོན།]

པ་དང་བཞེངས་པ་དང༌། གཟིམས་པའི་གནས་ལ་ཕྱག་འཚལ་བའོ། །བཞི་པ་ནི་སྟེང་དང་སོགས་ཏེ། དེ་ལ་སྟེང་ནི་སུམ་ཅུ་རྩ་གསུམ་ལ་སོགས་པ་ལྷའི་གནས་དང༌། གནོད་སྦྱྀན་གྱི་གནས་གྲོང་ཁྱེར་བྱ་གར་ཅན་ལ་སོགས་པའོ། །བར་ནི་མིའི་འཇིག་རྟེན་ལ་སོགས་པའོ། །འོག་ནི་རྒྱལ་མཚོ་ཆེན་པོ་དང་སའི་བུ་གའི་ནང་རྣམས་ཏེ། ཀླུ་དང་ལྷ་མ་ཡིན་དང༌། གྲུབ་པའི་བུད་མེད་དག་གནས་པའི་སའོ། །ཕྱོགས་དང་ཕྱོགས་མཚམས་ཞེས་པ་ནི། ཡུལ་དང་ཡུལ་མཐའ་ཞེས་པའམ། རང་ཉིད་གནས་པའི་ཕྱོགས་བཞི་མཚམས་བཞི་ལ་སོགས་པའོ། །སྐུར་བཅས་སོགས་ལ། དངོས་སུ་ན་དེ་བཞིན་གཤེགས་པའི་སྐུ་གཟུགས་དང་བཅས་པའི་མཆོད་རྟེན་ནི་གཞལ་མེད་ཁང་གི་ཚུལ་ཡིན་ལ། སྐུ་གཟུགས་མེད་པར་སྐུ་གདུང་ངམ་ཡིག་འབྲུའི་སྙིང་པོ་ཅན་ནི། ཆོས་ཀྱི་སྐུ་མཚོན་པས་ཏེ། དེ་གཉིས་ཀར་ལ་ཕྱག་འཚལ་ལོ་ཞེས་པའོ། །ཡང་ན་མཆོད་རྟེན་ནི་སྐུ་གཟུགས་དང་གླེགས་བམ་དང༌། ཆོས་ཀྱི་མཚན་མར་གཞག་པ་ཐམས་ཅད་ཡིན་པ་ལས། ད་ལྟར་གཟུགས་སུ་ཡོད་པ་རྣམས་ནི་སྐུ་དང་བཅས་པ་ཡིན་ལ། སྔོན་གྱི་སངས་རྒྱས་རྣམས་རྣམས་ཀྱི་མཆོད་རྟེན་རགས་པ་ནི་ཞིག །ཕྲ་ཞིང་དྭངས་པ་ནི་གཞིག་ཏུ་མེད་པས་ད་ལྟར་ཡང་གནས་ཤིང༌། བྱང་ཆུབ་སེམས་དཔའི་མངོན་ཤེས་འཇིག་རྟེན་ལས་འདས་པའི་སྤྱོད་ཡུལ་དུ་


TNT17_Page_1008
[མ་དཔེ་གཟིགས་ན་འདིར་གནོན།]

གསལ་བ་མཐོང་བ་ནི། གཟུགས་རགས་པ་མེད་པའི་ཕྱིར་སྐུ་མེད་པའོ། །སྐུ་བཅས་སྐུ་མེད་ཀྱི་དོན་རྣམ་གྲངས་གཞན་ཡང་མང་པོ་འཆད་པ་ནི། སྐབས་ཀྱི་དོན་མ་ཡིན་ནོ། །གཉིས་པ་གསུང་བ་པོའི་རང་བཞིན་ནི། རྐང་གཉིས་དམ་པ་སོགས་ནས། དེ་ཡང་ཤར་དང་བྱང་གི་ཕྱོགས་ནི་བྱང་ཤར་མཚམས་ཏེ། ཕྱོགས་དེའི་འཇིག་རྟེན་གྱི་ཁམས་ཞིག་ན་བཞུགས་པའི། དེ་བཞིན་གཤེགས་པ་ཞིག་ལ་བསྟེན་པར་དཀའ་བ་ཞེས་མཚན་དུ་གསོལ་བ་དེས་ཚིགས་བཅད་བཞི་པོ་འདི་གསུངས་པ་ཡིན་ལ། དེ་ཉིད་འོ་སྐོལ་གྱི་སྟོན་པས་སྐྱར་ཟློར་མཛད་དེ་འཁོར་རྣམས་ལ་བསྟན་པའོ། །རྐང་གཉིས་དམ་པ་དང་རྒྱལ་བ་ཞེས་པ་ནི་མཚན་གྱི་རྣམ་གྲངས་སོ། །དེ་ལ་རྐང་གཉིས་ནི། ལྷ་དང་མི་དང་ལྷ་མ་ཡིན་ལ་སོགས་པའོ། །དེ་རྣམས་ཀྱི་མཆོད་ཅིང་གུས་པར་བྱ་བའི་ཡུན་ཡིན་པའི་ཕྱིར་དམ་པའམ་མཆོག་གོ །གསུམ་པ་ཕན་ཡོན་ནི། གང་གི་ཚིགས་བཅད་སོགས་ཏེ། བསྟོད་པའི་མདོ་འདི་ཚེ་གང་དུ་ཡི་དམ་བླངས་ནས་ཉིན་མཚན་དུ་འདོན་པར་བྱེད་ན། བསྐལ་པ་ཐེར་འབུམ་ཆེན་པོ་གཅིག་གི་བར་དུ་ངན་འགྲོར་འགྲོ་བར་མི་འགྱུར་ཏེ། འདིའི་ཕན་ཡོན་གྱིས་ནི་དེ་ལྟར་འགྱུར་ལ། དེ་ནས་ནི་བསྐལ་པ་དེ་དག་ཏུ་དགེ་བ་སྤྱད་པས། བླ་ན་མེད་པའི་བྱང་ཆུབ་དམ་པ་ལ་གཞོལ་བར་འགྱུར་རོ། །དེ་ཡང་ཐར་བའི་ལམ་དུ་མ་ཞུགས་པ་འཁོར་བ་ཉིད་དུ་ཐ་


TNT17_Page_1009
[མ་དཔེ་གཟིགས་ན་འདིར་གནོན།]

མལ་བར་གནས་པ་ལ་ནི། བསྐལ་པ་བྱེ་བ་མང་པོར་ངན་སོང་དུ་གཏན་ནས་མི་སྐྱེ་བ་ནི་མེད་དེ། དེ་བས་ན་དེ་ཙམ་གྱི་བར་དུ་ངན་འགྲོར་མི་འགྲོ་བ་དེ་དག་ནི་ཕྱིས་ཀྱང་ངན་འགྲོར་འགྲོ་བ་གནས་མ་ཡིན་ནོ། །དེ་ལྟར་ན་དེ་འདྲ་བའི་ཕན་ཡོན་གྱི་འབྲས་བུ་འབྱུང་བ་ཡང༌། གང་དག་གི་བྱང་ཆུབ་ཏུ་སེམས་བསྐྱེད་ཅིང་དད་པ་ཕུན་སུམ་ཚོགས་པ་དང་ལྡན་པ། མ་ཡེངས་པའི་ཡིད་ཅན་ལ་ནི་དེ་དག་གདོན་མི་ཟ་བར་འབྱུང་བ་ཡིན་ལ། རྟག་ཏུ་འདོན་པར་བྱེད་ཀྱང་ཁྱད་ཆོས་དེ་དག་མ་ཚང་བ་ལ་ནི། ཕན་ཡོན་དེའི་ཆ་ཤས་ཅི་རིགས་སུ་འབྱུང་བ་ཡིན་ནོ། །ཡོངས་ནི་རྒྱུ་ཆུང་ངུ་ལྟར་སྣང་བ་ལ། ཕན་ཡོན་མཐའ་ཡས་པ་གསུངས་པ་མང་དུ་ཡོད་པ་རྣམས་ལས་ཡིད་མི་ཆེས་པར་མི་བྱ་སྟེ། ཆོས་ཟབ་མོའི་མཐུ་བསམ་གྱིས་མི་ཁྱབ་པ་ཡིད་ལ་གཞག་ནས། མོས་པ་བསྐྱེད་དེ་འབད་པར་བྱའོ། །འོ་ན་དེ་འདྲ་བ་དུས་གཞན་ལ་དགོངས་པ་མ་ཡིན་ནམ་ཞེ་ན། གནས་སྐབས་འགའ་ཞིག་ཏུ་དེ་ལྟར་ཡིན་པ་ཡང་ཅུང་ཟད་སྲིད་མོད་ཀྱི། དེ་ལ་ཡང་དུས་སྔ་ཕྱི་ཙམ་མ་གཏོགས། ཕན་ཡོན་དེ་ནི་ཇི་སྐད་བཤད་པ་ལྟར་གདོན་མི་ཟ་བར་འབྱུང་ངོ༌། །ཡང་གཟུངས་སྔགས་སོགས་ཀྱི་ཕན་ཡོན་འགའ་ཞིག་ནི། རིགས་སྔགས་དེ་གྲུབ་པའི་གནས་སྐབས་ཀྱི་དབང་དུ་བྱས་ནས་གསུངས་པའང་ཡོད་མོད། བཤེས་གཉེན་ལྟར་སྣང་གཞུང་ལུགས་ཤེས་པར་རློམ་པ་འགའ་ཞིག་ལྟར་


TNT17_Page_1010
[མ་དཔེ་གཟིགས་ན་འདིར་གནོན།]

ཆོས་ལ་དད་པའི་སྒོ་དོར་བར་མི་བྱ་སྟེ། གང་ཐེ་ཚོམ་ཟ་བ་དང་མོས་པ་མེད་པ་དེས་ནི། སྒྲུབས་ཀྱང་འགྲུབ་པར་མི་འགྱུར་ལ། ཡིད་ཆེས་དང་མོས་པ་བརྟན་པོས་སྒྲུབ་ན། སྤྱོད་པ་དང་གྲོལ་བའི་བདག་ཉིད་ཕུན་སུམ་ཚོགས་པ་ཐམས་ཅད་ཐོབ་པར་འགྱུར་རོ། །ཚིགས་སུ་བཅད་པ་བཞི་པའི་མདོའི་རྣམ་པར་བཤད་པ་འདི་ཡང་ཏཱ་ར་ནཱ་ཐས་སྦྱར་བའོ།། །།མངྒ་ལཾ། གཅིག་ཞུས་དག།

ཚིགས་བཅད་ཉུང་ངུའི་བསྟོད་པ་རྣམ་པར་འགྲེལ་པ།


TNT17_Page_1011
[མ་དཔེ་གཟིགས་ན་འདིར་གནོན།]

ཚིགས་བཅད་ཉུང་ངུའི་བསྟོད་པ་རྣམ་པར་འགྲེལ་པ་བཞུགས།


TNT17_Page_1012
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། འཕགས་པ་དཀོན་མཆོག་སྤྲིན་ལས་བྱུང་བའི་བསྟོད་པ་ཚིགས་བཅད་གཅིག་པ་ནི་འདི་ཡིན་ཏེ། གྲགས་ཆེན་སྙན་གྲགས་ཆེན་པོ་པ། །ཐུབ་ཆེན་དཔའ་བོ་ཆེན་པོ་པ། །སྲིད་པའི་མྱ་ངན་རྒལ་བ་པོ། །ཉོན་མོངས་བརྒལ་ལ་ཕྱག་འཚལ་འདུད། །ཅེས་སོ། །དེ་ལ་གྲགས་པ་ཆེན་པོ་ནི། བཅོམ་ལྡན་འདས་འདིས། བསྐལ་པ་ཆེན་པོ་གྲངས་མེད་པ་གསུམ་ལ་སོགས་པར་སེམས་ཅན་རྣམས་ལ་ཕན་པ་དང་བདེ་བར་བཞེད་པ་ཁོ་ནས། སྐུ་གཏོང་བ་སོགས་བཏང་དཀའ་བ་དཔག་ཏུ་མེད་པ་བཏང་བ་དང་གཞན་ཡང་ཕ་རོལ་ཏུ་ཕྱིན་པ་དྲུག་གི་སྤྱོད་པ་དཔག་ཏུ་མེད་པ་སྤྱད་པའི་ཕྱིར་གྲགས་པ་དོན་དང་མཐུན་པ་ཆེར་གྲགས་པའོ། །འདིས་ནི་ཐུགས་བསྐྱེད་པ་དང༌། ཚོགས་བསགས་པ་བསྟན་ཅིང༌། བྱང་ཆུབ་ཆེན་པོའི་རྒྱུ་ཐམས་ཅད་འདིས་བསྡུས་པར་རིག་


TNT17_Page_1013
[མ་དཔེ་གཟིགས་ན་འདིར་གནོན།]

པར་བྱའོ། །སྙན་པར་གྲགས་པ་ཆེན་པོ་པ་ནི་གང་ལ་མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བརྒྱད་ཅུས་བརྒྱན་པའི་སྐུ་མངའ་བ་དང༌། ཡན་ལག་དྲུག་ཅུའི་གསུང་དང༌། སྟོབས་བཅུ་དང༌། མི་འཇིགས་པ་བཞི་དང་མ་འདྲེས་པ་བཅོ་བརྒྱད་ལ་སོགས་པ་ཡོན་ཏན་རྒྱ་མཚོ་མངའ་བའི་ཐུགས་ཏེ། ཡོན་ཏན་འདི་ལྟ་བུ་དང་ལྡན་པའི་ཕྱིར་སྲིད་པ་གསུམ་ན་མཉམ་པ་མེད་པའོ། །ཞེས་ལྷ་དང་བཅས་པའི་འཇིག་རྟེན་ཐམས་ཅད་ཀྱིས་བསྟོད་པའོ། །འདིས་ནི་སྟོན་པ་ཉིད་ཀྱི་ཡོན་ཏན་མཐའ་དག་བསྟན་པར་རིག་པར་བྱའོ། ད་ལྟའི་མདོའི་དཔེ་འགའ་ལས། གྲགས་ཆེན་ཤེས་རབ་ཆེན་པོ་པ་ཞེས་འབྱུང་ཡང་འདི་ཉིད་འཐད་དོ། །ཐུབ་པ་ཆེན་པོ་ཞེས་པ་ལ། མུ་སྟེགས་བྱེད་རྣམས་ཀྱི་ཐུབ་པའི་དཀའ་ཐུབ་ནི་ལུས་ལ་གདུང་བ་བརྩོན་པ་ཙམ་ཞིག་


TNT17_Page_1014
[མ་དཔེ་གཟིགས་ན་འདིར་གནོན།]

སྟེ། སྡིག་པ་མཐའ་དག་ནམ་ཡང་སྤངས་པ་མ་ཡིན་ལ། ཏིང་ངེ་འཛིན་ཤིན་ཏུ་རྣམ་པར་དག་པ་མེད་ཅིང༌། ཤེས་རབ་འཆལ་བ་དང་བཅས་པ་ཡིན་པའི་ཕྱིར། ཐུབ་པའི་མིང་ཙམ་འཛིན་པའོ། ཉན་ཐོས་དང་རང་སངས་རྒྱས་དང༌། བྱང་ཆུབ་སེམས་དཔའ་རྣམས་ནི། ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་སྟེ་བསླབ་པ་གསུམ་རྣམ་པར་དག་པའི་དཀའ་ཐུབ་ཅན་གྱི་ཕྱིར་ཐུབ་པའོ། །ཆེན་པོ་ནི་ཀུན་ལས་ཆེ་བའི་དོན་ཏེ། འགའ་ཞིག་ལས་ཆེ་བས་ཆེན་པོར་འགྱུར་ན། ཐམས་ཅད་ཀྱང་ཆེན་པོར་ཐལ་བའི་ཕྱིར་རོ། །དེས་ན་དེ་ལས་ཆེ་བ་མི་སྲིད་པ་ལྟ་ཅི་སྨོས། མཉམ་པ་ཙམ་ཡང་མི་སྲིད་ལ། གཞན་དུ་ན་བགྲང་བར་ཡང་མི་བཟོད་པ་དེ་ལྟར་བུ་ཆེ་བ་ནི། སྟོན་པ་ཉག་གཅིག་སྟེ། དེ་ནི་བདག་ཉིད་བསླབ་པ་གསུམ་ལ་གོམས་ཤིང༌། བགྲང་བ་ལས་འདས་པའི་འགྲོ་བ་བསླབ་པ་གསུམ་གྱི་བརྟུལ་ཞུགས་ལ་འགོད་པའི་ཕྱིར་ཐུབ་པ་ཆེན་པོའོ། །དཔའ་བོ་ནི་དགྲ་ཐུབ་པའི་དོན་ཏེ། དགྲ་ནི་ཉོན་མོངས་པའི་བདུད་དང༌། ཕུང་པོའི་བདུད་དང་འཆི་བདག་གི་བདུད་དང༌། ལྷའི་བུའི་བདུད་སྡིག་ཏོ་ཅན་ནོ། །ཉན་རང་ལྷག་མེད་རྣམས་ཀྱང་དེ་དག་བཅོམ་པའོ་སྙམ་ན། གཞན་རྣམས་ཀྱིས་དེ་རྣམས་མི་འཇོམས་པའི་ཕྱིར་ཤིན་ཏུ་དཔའ་བ་མ་ཡིན་ལ། བཅོམ་ལྡན་འདས་ནི་བདག་ཉིད་ཀྱིས་བག་ཆགས་གནས་དང་བཅས་པ་བཅོམ་ཞིང༌། ཕྱོགས་ཐམས་ཅད་དུ་དུས་


TNT17_Page_1015
[མ་དཔེ་གཟིགས་ན་འདིར་གནོན།]

ཐམས་ཅད་ཀྱི་ཚེ་འགྲོ་བ་དཔག་ཏུ་མེད་པའི་བདུད་རྣམས་འཇོམས་པའི་ཕྱིར་དཔའ་བོ་ཆེན་པོའོ། །སྲིད་པ་ནི་འདོད་པ་དང་གཟུགས་དང་གཟུགས་མེད་པ་གསུམ་སྟེ། ཁམས་གསུམ་གྱིས་བསྡུས་པ་ཕུང་པོ་ལྔའི་བདག་ཉིད་ཐམས་ཅད་དོ། །མྱ་ངན་ནི་སྡུག་བསྔལ་ཏེ། སྡུག་བསྔལ་གསུམ་མམ་བརྒྱད་ཀྱིས་བསྡུས་པ་ཐམས་ཅད་དོ། །གང་ཞིག་རྒྱུ་རྐྱེན་གྱིས་བསྐྱེད་པའི་འཁྲུལ་འཁོར་ཉམས་པ་ལས་སྡུག་བསྔལ་བསྐྱེད་པ་གང་ཡིན་པ་དེ་ལ་མྱ་ངན་ཅེས་གྲགས་ཏེ། བུ་དང་ཆུང་མ་ཤི་བ་དང་ཁང་པ་ལ་སོགས་པ་ཞིག་པ་ན་སྡུག་བསྔལ་བསྐྱེད་པའི་ཕྱིར་མྱ་ངན་དང་བཅས་པའོ། །ཞེས་རྟོགས་པ་བཞིན་ནོ། །དེའི་ཕྱིར་མི་རྟག་པ་ལ་སྡུག་བསྔལ་གྱི་འདུ་ཤེས་རབ་ཏུ་འཇུག་གོ །དེ་ལྟ་བུའི་མྱ་ངན་ཆུ་བོ་ལྟ་བུ་ལས་བརྒལ་བ་སྟེ། ཐེག་པ་དམན་པ་དག་ནི་སྟོན་པས་སྡུག་བསྔལ་དེ་དག་སྤངས་མོད། འོན་ཀྱང་མྱ་ངན་ལས་འདས་པ་མ་བསྟན་གྱི་བར་དུ་ལྷག་མ་དང་བཅས་པར་འདོད་དོ། །དེ་ནི་མ་ཡིན་ཏེ། དེ་དག་གི་བག་ཆགས་ཕྲ་མོ་རྣམ་པར་བྱང་བཞིན་དུ་དེ་དང་བཅས་པ་འགལ་བའི་ཕྱིར་རོ། །དེས་ན་ཐུབ་པ་ཆེན་པོ་ནི་སྤྲུལ་པའི་སྐུ་ཉིད་ཀྱི་ཕྱིར། སྡུག་བསྔལ་གྱི་ཕུང་པོ་ཅན་དུ་བལྟ་བར་མི་བྱའོ། །ཉོན་མོངས་ནི་རྩ་བའི་ཉོན་མོངས་པ་དང༌། ཉེ་བའི་ཉོན་མོངས་པ་ཐམས་ཅད་དོ། །དེ་དག་ཀྱང༌། འདོད་ཆགས་དང༌། ཁོང་ཁྲོ་དང༌། ང་རྒྱལ་དང༌། མ་རིག་པ་དང༌། འཇིག་


TNT17_Page_1016
[མ་དཔེ་གཟིགས་ན་འདིར་གནོན།]

ཚོགས་ལ་ལྟ་བ་དང༌། ལོག་པར་ལྟ་བ་དང༌། མཐར་འཛིན་པའི་ལྟ་བ་དང༌། ལྟ་བ་མཆོག་ཏུ་འཛིན་པའི་ལྟ་བ་དང༌། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ལྟ་བས་བསྡུས་པ། མཐོང་བ་དང་སྒོམ་པས་སྤང་བར་བྱ་བ་ཐམས་ཅད་བསྡུས་སོ། །བརྒལ་བ་ནི། དེའི་བག་ལ་ཉལ་ཤེས་བྱའི་སྒྲིབ་པ་དང་བཅས་པ་མཐའ་དག་སྤངས་པའོ། །དེ་ཡང་འདོད་པ་དང་སྲིད་པ་དང་མ་རིག་པ་དང་ལྟ་བའི་ཆུ་བོ་སྟེ་བཞི་པོ་དེ་ལས་བརྒལ་བའོ། །དེ་ལྟ་བུའི་སྟོན་པ་ལམ་ཕུན་སུམ་ཚོགས་པ་ལས་བསྒྲུབས་པའི་སྤངས་པ་དང་ཡེ་ཤེས་ཕུན་སུམ་ཚོགས་པ་མངའ་བ་དེ་ལ། དེ་ལྟར་ཤེས་པའི་དད་པས་ཕྱག་བྱ་བ་ནི། ཕྱག་འཚལ་འདུད་ཅེས་པ་སྟེ། ལུས་ཀྱིས་ཕྱག་འཚལ་ཞིང༌། ཡིད་ཀྱིས་དང་བས་འདུད་པའོ། །འདིར་སྨྲས་པ། བྱང་ཆུབ་མཆོག་ཏུ་ཐུགས་བསྐྱེད་ནས། །གྲངས་མེད་གསུམ་དུ་དཀའ་སྤྱད་ཅིང༌། །ཕ་རོལ་ཕྱིན་དྲུག་ཡོངས་རྫོགས་པ། །གྲགས་པ་ཆེན་པོ་ཁྱོད་ལ་འདུད། །མཚན་དཔེར་རབ་གསལ་རྡོ་རྗེའི་གསུང༌། །ཐམས་ཅད་མཁྱེན་པའི་ཡེ་ཤེས་ཅན། །ལྷ་མི་ཀུན་གྱིས་བསྟོད་པའི་གནས། །སྙན་གྲགས་ཆེན་པོ་ཁྱོད་ལ་འདུད། །ཚུལ་ཁྲིམས་ཏིང་འཛིན་ཤེས་རབ་ནི། །ཟག་མེད་མཆོག་ལ་བདག་གནས་ཤིང༌། །སློབ་མ་མཆོག་ཏུ་ཞི་བས་བསྐོར། །ཐུབ་པ་ཆེན་པོ་ཁྱོད་ལ་འདུད། ཁྱོད་ཀྱིས་བདུད་བཞི་བཅོམ་པ་ནི། །དཔུང་པས་མ་


TNT17_Page_1017
[མ་དཔེ་གཟིགས་ན་འདིར་གནོན།]

ཡིན་མཚོན་ཆས་མིན། །ཤིན་ཏུ་དུལ་བའི་མཁྱེན་པས་ཏེ། །དཔའ་བོ་ཆེན་པོ་ཁྱོད་ལ་འདུད། །ལས་དང་སྡུག་བསྔལ་ལས་གྲོལ་བ། །འདུས་མ་བྱ་བར་རབ་བརྙེས་ནས། །ཡང་སྲིད་བྲལ་བའི་གནས་སུ་འཁྲིད། །སྲིད་པའི་མྱ་ངན་ལས་བརྒལ་འདུད། ཁམས་གསུམ་ཉོན་མོངས་ཀུན་བྲལ་ཞིང༌། །མ་རིག་བག་ཆགས་ས་ལས་འདས། །འགྲོ་འདི་ཆུ་བོ་བཞྀ་ལས་སྒྲོལ། །ཉཽན་མོངས་བརྒལ་བ་དེ་ལ་འདུད། །སེམས་བསྐྱེད་ཕར་ཕྱིན་དྲུག་གི་རྣམ་བཞག་དང༌། །སྟོན་པས་ཐུགས་བསྐྱེད་ཚོགས་བསགས་གཏམ་རྒྱུད་དང༌། །རྒྱལ་བའི་ཡོན་ཏན་རྒྱས་དང་བསླབ་པ་གསུམ། །བདུད་བཞི་བཏུལ་དང་སྡུག་བསྔལ་བདེན་པ་དང༌། །ལས་དང་སྤང་གཉེན་རྣམས་ཀྱི་ཚུལ་ཤེས་ན། །བསྟོད་པ་འདི་དོན་རྒྱས་པར་སྨྲ་བར་ནུས། །ཚིག་ཉུང་རྟོགས་དཀའི་མདོ་དོན་ཅུང་ཟད་ཙམ། །རྣམ་པར་ཕྱེ་བའི་དགེ་བ་འགྲོ་ལ་བསྔོ། །ཞེས་པའང་ཏཱ་ར་ནཱ་ཐས་སྨྲས་པའོ།། །།


TNT17_Page_1018
[མ་དཔེ་གཟིགས་ན་འདིར་གནོན།]

ཤོག་སྟོང་།

འཕགས་པ་སྒོ་དྲུག་གཟུངས་ཀྱི་རྣམ་པར་བཤད་པ།


TNT17_Page_1019
[མ་དཔེ་གཟིགས་ན་འདིར་གནོན།]

འཕགས་པ་སྒོ་དྲུག་གཟུངས་ཀྱི་རྣམ་པར་བཤད་པ་བཞུགས།


TNT17_Page_1020
[མ་དཔེ་གཟིགས་ན་འདིར་གནོན།]

ཨོཾ་སྭཱ་སྟི། སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །འཕགས་པ་སྒོ་དྲུག་པའི་གཟུངས་མདོའི་དོན་ཅུང་ཟད་བཤད་ན། དོན་གསུམ་སྟེ། གླེང་གཞི་དང༌། མདོ་དངོས་དང༌། རྗེས་སུ་ཡི་རང་ངོ༌། །དང་པོ་ནི།འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་འཁོར་གྱི་འཁྱམས་གནས་གཙང་མའི་སྟེང་ནམ་མཁའི་དཀྱིལ་ན་གནས་པ་རིན་པོ་ཆེ་སྣ་བདུན་གྱི་རབ་ཏུ་ཕྱེ་བས་སྤྲས་པ་ན། བྱང་ཆུབ་སེམས་དཔའ་གྲངས་མེད་པ་དང་ཐབས་གཅིག་ཏུ་བཞུགས་ཏེ། ཞེས་པའོ། །དེ་ལ་འདི་སྐད་ནི་འོག་ནས་འབྱུང་བའི་ཆོས་ཐམས་ཅད་དོ། །བདག་གིས་ཐོས་པ་ནི་བཀའ་སྡུད་པ་པོ་ཕྱག་ན་རྡོ་རྗེས་སོ། །དུས་གཅིག་ན་ནི་བསམ་གྱིས་མི་ཁྱབ་པའི་དུས་སོ། །བཅོམ་ལྡན་འདས་ནི་དེ་བཞིན་གཤེགས་པ་ཤཱཀྱ་ཐུབ་པ་སྟེ་


TNT17_Page_1021
[མ་དཔེ་གཟིགས་ན་འདིར་གནོན།]

སྟོན་པའོ། །འཁོར་གྱི་འཁྱམས་ནི་འདུ་ཞིང་ཚོགས་པའི་ཁང་པ་སྟེ། རིན་པོ་ཆེ་སྣ་བདུན་གྱི་སྤྲས་པའི་གཞལ་མེད་ཁང་ཉིད་དོ། །རབ་ཏུ་ཕྱེ་བ་ནི་བཀོད་པའི་དབྱེ་བ་དུ་མ་དང་བཅས་པ་སྟེ་གནས་དམ་པའོ། །གཞལ་མེད་ཁང་དེ་ཡང་ས་ཕྱོགས་གང་དུ་ཡིན་ཞེ་ན། གནས་གཙང་མའི་སྟེང་སྟེ་ཉན་ཐོས་འཕགས་པ་རྣམས་ཀྱི་གནས་མི་ཆེ་བ་ནས་འོག་མིན་ཆུང་ངུའི་བར་ཏེ་གནས་ལྔ་ནི་གནས་གཙང་མ་ཆུང་ངུ་སྟེ། དེ་རྣམས་ཀྱི་སྟེང་གི་ཕྱོགས་རིང་དུ་སོང་བའི་ནམ་མཁའི་དཀྱིལ་ན། གཞི་ཡོངས་སུ་དག་པ་རིན་པོ་ཆེའི་ས་གཞི་ལ་གནས་པའོ། འདི་ནི་གནས་གཙང་མ་ཆེན་པོ་ཡིན་ཏེ། ཐེག་དམན་པའི་གནས་གཙང་མ་སྤངས་པ། གཟུགས་ཀྱི་ཁམས་སུ་གཏོགས་ཤིང༌། ལྷའི་བུ་དབང་ཕྱུག་ཆེན་པོས་ཡོངས་སུ་བསྟེན་པའི་ཡུལ་ཏེ། ཡུལ་


TNT17_Page_1022
[མ་དཔེ་གཟིགས་ན་འདིར་གནོན།]

ཕྱོགས་ཀྱི་ཁྱད་པར་རོ། །བྱང་ཆུབ་སེམས་དཔའི་ཚོགས་གྲངས་མེད་པ་ནི། གནས་དེ་ཉིད་ན་གནས་པའི་ལྷའི་རྟེན་ཅན་མོས་པས་སྤྱད་པ་རྣམས་དང༌། ས་བཅུ་ལ་གནས་པ་ཡིད་ཀྱི་ལུས་ཅན་དང༌། དེའི་སྤྲུལ་པ་རྣམས་ཏེ། འཁོར་གྱི་ངེས་པའོ། །དེ་ལྟར་ན་ཆོས་དང་སྡུད་པ་པོ་དང༌། དུས་དང་སྟོན་པ་དང༌། གནས་དང་ཡུལ་ཕྱོགས་དང༌། འཁོར་གྱི་ངེས་པ་སྟེ་དོན་ཚན་བདུན་རིམ་པ་བཞིན་དུ་བསྟན་ཏོ། །གཉིས་པ་ལ་དགོས་པ་བསྟན་པའི་སྒོ་ནས་ཉན་པར་གདམས་པ་དང༌། སྒོ་དྲུག་པའི་ཏིང་ངེ་འཛིན་དང༌། དེའི་གཟུངས་སྔགས་བཤད་པ་དང༌། གཟུངས་སྔགས་བཟློས་པའི་ཕན་ཡོན་ཏེ་བཞི་ལས། དང་པོ་ནི། དེའི་ཚེ་བཅོམ་ལྡན་འདས་ཀྱིས་བྱང་ཆུབ་སེམས་རྣམས་ལ་བཀའ་སྩལ་པ། རིགས་ཀྱི་བུ་ཁྱེད་འགྲོ་བ་ཐམས་ཅད་ལ་ཕན་པ་དང་བདེ་བའི་ཕྱིར་སྒོ་དྲུག་པ་ཞེས་བྱ་བའི་གཟུངས་འདི་ཟུངས་ཤིག་ཅེས་ཏེ། སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར། སྒོ་དྲུག་པའི་གཟུངས་ཀྱི་ཏིང་ངེ་འཛིན་སྒོམས་ཤིང༌། གཟུངས་སྔགས་འདི་ཟུངས་ཤིག་ཅེས་བཟླས་བརྗོད་བྱ་དགོས་པ་སྟེ། རང་དོན་དུ་འཁོར་བའི་བདེ་བ་དང༌། དམན་པའི་མྱང་འདས་ཙམ་ཐོབ་པའི་ཕྱིར། བཟླས་སྒོམ་བྱེད་པ་ནི་མ་ཡིན་ནོ། །ཞེས་པ་ཡིན་པ་ལས། ཕན་པ་ཕྱི་མའི་དོན་དང༌། བདེ་བ་ཚེ་འདིའི་ཕུན་ཚོགས་ལ་འཆད་པའང་ཡོད་མོད་ཀྱི། འདིར་


TNT17_Page_1023
[མ་དཔེ་གཟིགས་ན་འདིར་གནོན།]

ཕན་པ་ནི། འཇིག་རྟེན་ལས་འདས་པའི་ཡེ་ཤེས་མ་ཐོབ་ཚུན་ཆོད་ཀྱི་བདེ་སྐྱིད་འབྱོར་པ་ཐམས་ཅད་ཡིན་ལ། བདེ་བ་ནི་འཇིག་རྟེན་ལས་འདས་པའི་ཡེ་ཤེས་ཐོབ་པ་ཕན་ཆད་ཀྱི། ཞིང་དང་ལུས་དང༌། ཏིང་ངེ་འཛིན་དང་རྣམ་འཕྲུལ་གྱི་ཕུན་སུམ་ཚོགས་པ་ཐམས་ཅད་དོ། །གཉིས་པ་ནི། དེ་ནི་འདི་ལྟ་སྟེ། ཞེས་སྤྱིར་བསྟན་པ་སྟེ། གྱུར་ཅིག་ཅེས་སོགས་དང་པོ་ལྔ་པོ་རྣམས་དོན་ཚན་རེ་རེ་དང༌། ཕྱི་མ་གཉིས་གཅིག་ཏུ་བསྡོམས་པ་དོན་ཚན་གཅིག་གོ །དེ་དག་ཀྱང་གང་ཞེ་ན། སྡུག་བསྔལ་ཤེས་པའི་སྒོ། བདེ་བ་སྦྱིན་པའི་སྒོ། ལས་སྒྲིབ་བཤགས་པའི་སྒོ། བདུད་ལས་སྤོང་བའི་སྒོ། ཚོགས་ཆེན་སྡུད་པའི་སྒོ། ཡང་དག་ཡེ་ཤེས་ཀྱི་སྒོ་སྟེ་སྒོ་དྲུག་གོ །དང་པོ་ནི། བདག་འཁོར་བ་ན་འཁོར་བའི་ཚེ་སྡུག་བསྔལ་གང་ཅི་མྱོང་བ་དེ་སེམས་ཅན་ཐམས་ཅད་དང་མཉམ་པ་ཉིད་དུ་མི་ཤེས་པའི་མཚན་ཉིད་དུ་མ་གྱུར་ཅིག །ཅེས་པ་སྟེ། བདག་འཁོར་བ་ན་ཞེས་པ་སོ་སོ་སྐྱེ་བོའི་གནས་སྐབས་ནའོ། །མཉམ་པ་ཉིད་དུ་མི་ཤེས་པའི་མཚན་ཉིད་ནི། དེའི་ཉེས་སྐྱོན་ཏེ། འདི་ལ་གསུམ་ལས་ཐབས་ལ་ལྟོས་པའི་ཉེས་སྐྱོན་ནི། བདག་ལ་སྡུག་བསྔལ་འབྱུང་བ་མི་འདོད་ཅིང་སྤོང་བར་སེམས་པ་སྟེ། དེའི་གཉེན་པོར་གཞན་གྱི་སྡུག་བསྔལ་བདག་གིས་ཁུར་དུ་ལེན་པར་འདོད་པའོ། །ཤེས་རབ་ཀྱི་ཕྱོགས་ལ་ཉེས་སྐྱོན་ནི་


TNT17_Page_1024
[མ་དཔེ་གཟིགས་ན་འདིར་གནོན།]

བདག་གཞན་གྱི་སྡུག་བསྔལ་བདེན་གྲུབ་ཏུ་འདོད་པས། སྡུག་བསྔལ་མཐའ་མེད་པ་ལ་འཇིགས་ཤིང་སྐྲག་ནས། གཞན་གྱི་སྡུག་བསྔལ་སེལ་བར་མི་སྤྲོ་བ་སྟེ། དེའི་གཉེན་པོར་རང་གཞན་གྱི་སྡུག་བསྔལ་མཐའ་དག་དངོས་གནས་ལ་མ་གྲུབ་པས་བདེན་མེད་དུ་མགོ་སྙོམས་པར་བྱེད་པའོ། །ཡེ་ཤེས་ཀྱི་ཕྱོགས་ལ་ཉེས་སྐྱོན་ནི། བདག་ཉིད་མཆོག་འཛིན་དང༌། བདག་ལ་སྨོད་པ་དང༌། གཞན་ལ་བརྙས་པ་རྣམས་ཡིན་ཏེ། དེའི་གཉེན་པོར་བདག་གཞན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ཡིན་ལ། དེ་ཡང་མཉམ་པ་ཉིད་དུ་ཤེས་པའོ། །དེ་ལ་མཉམ་པ་ཉིད་དང་པོའི་དབང་དུ་བྱས་ན་ཏེ། བདག་གི་སྡུག་བསྔལ་ནི་སེམས་ཅན་གཅིག་གི་སྡུག་བསྔལ་ཁོ་ན་ཡིན་ཞིང༌། གཞན་གྱི་སྡུག་བསྔལ་ནི་རང་དང་འདྲ་བའི་སེམས་ཅན་མཐའ་མེད་པ་རྣམས་ཀྱི་ཡིན་པ་དང༌། སེམས་ཅན་རེ་རེ་ནས་ཀྱང་རང་རང་ལ་ལྟོས་ན་གལ་ཆེ་ཆུང་ལ་ཁྱད་པར་མེད་པས། གཞན་གཅིག་པུ་ཞིག་དང་བདག་གཉིས་སྡུག་བསྔལ་སྤོང་དགོས་ལ་འདྲ་བར་མཐོང་ཞིང༌། སྡུག་བསྔལ་མི་འདོད་པར་མཚུངས་ཤིང་མཉམ་པས། རྐང་པའི་སྡུག་བསྔལ་གྱི་རྒྱུ་ལག་པས་སེལ་དགོས་པ་བཞིན་དུ། དེའི་སྡུག་བསྔལ་ཡང་བདག་གིས་སེལ་བར་བྱེད་དགོས་པ་ཁོ་ན་ཡིན་ནོ། །དེས་ན་བདག་དང་སེམས་ཅན་རེ་རེ་ནས་གལ་ཆེ་ཆུང་མཉམ་ཞིང་འདྲ་བ་ལ་མཉམ་པ་ཉིད་ཀྱི་དོན་ནོ། །བདག་དང་འདྲ་བའི་


TNT17_Page_1025
[མ་དཔེ་གཟིགས་ན་འདིར་གནོན།]

སེམས་ཅན་དེ་འདྲ་མཐའ་ཡས་པའི་ཕྱིར། སྤྱི་ལྡོག་ནས་སེམས་ཅན་ཁོ་ན་གཙོ་བོར་བྱེད་ཀྱི་བདག་དང་མཉམ་པར་མི་འགྱུར་རོ། །མཉམ་ཉིད་གཉིས་པའི་དབང་དུ་བྱས་ན། སྣང་བ་སྒྱུ་མ་ཙམ་དང༌། རང་བཞིན་སྤྲོས་པ་དང་བྲལ་བའི་ཕྱིར་མཉམ་ཉིད་དངོས་སོ། །མཉམ་ཉིད་གསུམ་པའི་དབང་དུ་བྱས་ན། བདག་གཞན་གྱི་སྟེང་གི་ཀུན་རྫོབ་འཁོར་འདས་ཀྱི་ཆོས་ཐམས་ཅད་གདོད་མ་ནས་མ་གྲུབ་པ་ཡིན་པས། དེའི་ཕྱོགས་ནས་མཉམ་ཉིད་དུ་གཞག་མི་དགོས་ཤིང༌། བདེ་གཤེགས་སྙིང་པོ་གདོད་མ་ནས་ཐ་དད་གཏན་མེད་ཡང་ཡིན་ལ། དངོས་གནས་ལ་གྲུབ་པའི་ཕྱིར། མཉམ་ཉིད་མཐར་ཐུག་པའོ། །གཉིས་པ་ནི། བདག་གི་འཇིག་རྟེན་པའི་ཕུན་སུམ་ཚོགས་པའི་བདེ་བ་གང་ཅི་མྱོང་བ་དེ་སེམས་ཅན་ཐམས་ཅད་དང་ཐུན་མོང་དུ་ཡོངས་སུ་སྤྱོད་པར་གྱུར་ཅིག་ཅེས་ཏེ། རང་གི་ལུས་དང་ལོངས་སྤྱོད། དེའི་རྒྱུ་དུས་གསུམ་གྱི་དགེ་བ་འཇིག་རྟེན་ལས་མ་འདས་པ་ཐམས་ཅད་ཀྱང༌། རང་ཚོར་བ་བདེ་བ་ལ་སོགས་པ་མྱོང་བའི་དོན་དུ་མི་འདོད་ཀྱི། བདག་གིས་ནི་སྦྱིན་པའི་ཡུལ་གང་དང་གང་ཕྲད་པར་གྱུར་པ་དེ་དང་དེ་ལ། འདོད་ན་རེ་རེ་བཞིན་ཐམས་ཅད་སྦྱིན་པར་བགྱིད་ཅིང་ཅི་སྟེ་ནུས་པ་དང་ལྡན་ན་སྦྱིན་པར་བགྱིད་དོ། །ཞེས་སྨོན་ཅིང་དམ་འཆའ་བའོ། །སེམས་དང་པོ་བསྐྱེད་པ་ནས་བཟུང་སྟེ་ཚུལ་འདི་ལྟ་བུས་བསྒྲུབ་པར་བྱ་ལ། འཕགས་པའི་ས་


TNT17_Page_1026
[མ་དཔེ་གཟིགས་ན་འདིར་གནོན།]

ཐོབ་ནས་ནི། སྐད་ཅིག་རེ་རེར་སེམས་ཅན་དཔག་ཏུ་མེད་པ་ལ་དངོས་སུ་དེ་ལྟར་བྱ་ནུས་པའང་ཡིན་ལ། དེ་དུས་ཀྱི་འཇིག་རྟེན་པ་ནི་རྗེས་ཐོབ་ཏུ་མ་རིག་བག་ཆགས་ཀྱི་རྣམ་འཕྲུལ་ལས་བྱུང་བའི་བདེ་དགེ་རྣམས་ཡིན་པར་བྱེད་དགོས་ཤིང༌། སྤྱིར་གཟུངས་འདི་དག་མོས་སྤྱོད་ཀྱི་སར་སྒྲུབ་པའི་དབང་དུ་བྱས་ནས་གསུངས་པས། དངོས་བསྟན་མོས་སྤྱོད་ཀྱི་དབང་དུ་བྱས་པ་ཡིན་ལ། དེའི་རིགས་རྒྱུན་མཐའ་མེད་དུ་འཕེལ་བ་ནི་འཕགས་པའི་སར་ཡིན་ནོ། །གསུམ་པ་ནི་བདག་ལ་སྡིག་པ་མི་དགེ་བའི་ལས་ཀྱི་སྒྲིབ་པ་གང་ཅི་ཡོད་པ་དེ། སོ་སོར་བཤགས་པ་བླ་ན་མེད་པས་སོ་སོར་མ་བཤགས་པར་མ་གྱུར་ཅིག་ཅེས་ཏེ། སྡིག་པ་དང་མི་དགེ་བ་ནི་དོན་གཅིག་མིང་གི་རྣམ་གྲངས་ཏེ་སོ་སོ་སྐྱེ་བོའི་ས་ཁོ་ན་ཡིན་ལ། ལས་ཀྱི་སྒྲིབ་པ་ཡང་དེ་དང་རྣམ་གྲངས་སུ་ཡང་བྱ་ཞིང༌། ལས་ངན་པའི་བག་ཆགས་ལ་བཤད་ནའང་རུང་སྟེ། དེ་ལྟར་ན་སྐྱེ་འཕགས་གཉིས་ཀར་ལ་ཡང་ཡོད་མོད་དེ། འོན་ཀྱང་དབང་ཐོབ་པའི་བྱང་ཆུབ་སེམས་དཔའ་ལ་ནི་མེད་དོ། །མ་བཤགས་པར་མ་གྱུར་ཅིག་ནི། བཤགས་པར་གྱུར་ཅིག་པའོ། །བྱང་ཆུབ་སེམས་དཔའ་འཕགས་པ་རྣམས་ནི་ཉེས་ལྟུང་དངོས་ཀྱིས་མ་གོས་ཀྱང༌། དེའི་བག་ཆགས་ནི་མ་བྱང་བར་ཡོད་པ་དང༌། སེམས་ཅན་གཞན་གྱི་ཉེས་ལྟུང་རྣམས་ཀྱང་བྱང་ཆུབ་སེམས་དཔའ་བཤགས་པར་བྱ་བའི་དབང་དུ་བྱས་སོ། །བཞི་པ་ནི་བདག་ལ་བདུད་ཀྱི་ལས་


TNT17_Page_1027
[མ་དཔེ་གཟིགས་ན་འདིར་གནོན།]

གང་དག་ཡོད་པ་དེ་དག་ཡོངས་སུ་ཤེས་པ་བླ་ན་མེད་པས་ཡོངས་སུ་མི་ཤེས་པར་མ་གྱུར་ཅིག་ཅེས་ཏེ། དེ་ལ་བདུད་ཀྱི་ལས་དངོས་ནི་སོ་སོ་སྐྱེ་བོ་ཁོ་ན་ལ་འཇུག་སྟེ། ཆོས་སྤྱོད་ལ་འཇུག་པའི་ཚེ་ཕྱི་བཤོལ་ལ་དགའ་བ་དང༌། འདོད་ཡོན་ལ་དགའ་བ་དང༌། ལེ་ལོ་སྐྱེ་བ་དང༌། འཐབ་ཁྲོལ་ལ་སོགས་པའི་གཞི་དང༌། གཞན་གྱི་དགེ་བའི་རྩ་བ་ལ་བརྙས་པ་དང༌། ཕུན་སུམ་ཚོགས་པ་ལ་སྡང་བ་དང༌། བྱང་ཆུབ་སེམས་དཔའ་ལ་སྨོད་པ་དང༌། ལྟ་བ་ངན་པའི་ཆ་ཤས་བསྐྱེད་པ་དང༌། མཉམ་པར་འཇོག་པ་ན་རྣམ་པར་གཡེང་བ་བསྐྱེད་པ་དང༌། དགེ་བ་ལས་རྩ་བ་ནས་བཟློག་པ་དང༌། ཆེན་པོ་ཆུང་ངུར་སྒྱུར་བ་དང༌། དགེ་བ་ལ་འཇུག་པ་ན་བློ་མི་མཐུན་པར་བསྒྱུར་བ་ལ་སོགས་པ་ཡིན་ལ། འཕགས་ཆེན་རྣམས་ལ་ནི། རང་ཉིད་ལ་བདུད་ཀྱི་ལས་འཇུག་པ་མེད་ཀྱང༌། སེམས་ཅན་གཞན་གྱི་བདུད་ཀྱི་ལས་སྤོང་བའི་ཕྱིར་དེ་ཡོངས་སུ་ཤེས་སུ་འཇུག་པའོ། །ཡོངས་སུ་ཤེས་པ་བླ་ན་མེད་པ་ཞེས་པ་ལ། བདུད་ཀྱི་ལས་ལ་དེར་ངོ་ཤེས་པ་དེ་ཉིད། བདུད་ལས་སྤོང་བའི་སྒོ་ཁྱད་པར་ཅན་ཡིན་པས་བླ་ན་མེད་པ་ཞེས་ཀྱང་བྱ་ལ། གཙོ་བོར་ནི་བདུད་དང་བདུད་ཀྱི་ལས་ཐམས་ཅད་སྒྱུ་མ་ལྟ་བུར་རྟོགས་པས། དེས་མི་རྫི་ཞིང་དེ་ཉིད་སྙིང་རྗེ་ཆེན་པོ་དང་སྦྲེལ་བས། དེ་ལ་བརྟེན་ནས་ཀྱང་རང་གཞན་གྱི་ཚོགས་ཁྱད་བར་ཅན་རྫོགས་པའི་ཐབས་ཤེས་པའོ། །ལྔ་པ་ནི་བདག་


TNT17_Page_1028
[མ་དཔེ་གཟིགས་ན་འདིར་གནོན།]

གི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་འཇིག་རྟེན་པའམ། འཇིག་རྟེན་ལས་འདས་པ་ཡང་རུང༌། གང་ཅི་ཡོད་པ་དེའི་འབྲས་བུ་བླ་ན་མེད་པའི་ཡེ་ཤེས་སུ་གྱུར་ཅིག་ཅེས་ཏེ། དེ་ལ་ལྡན་པ་ནི་འབྲེལ་བ་ནི་དོན་སྟེ། ཕ་རོལ་ཏུ་ཕྱིན་པ་དྲུག་གམ་བཅུ་དང་འབྲེལ་བའི་དགེ་བ་ཞེས་པའོ། །འཇིག་རྟེན་པ་ནི་རྗེས་ཐོབ་དང༌། འཇིག་རྟེན་ལས་འདས་པ་ནི་མཉམ་གཞག་གོ །བླ་ན་མེད་པའི་ཡེ་ཤེས་ནི་སངས་རྒྱས་ཀྱི་སའོ། །དེ་ལྟར་དགེ་བའི་ཆོས་རྒྱ་ཆེར་སྤེལ་བ་ཐམས་ཅད། སངས་རྒྱས་ཀྱི་སར་ཡོངས་སུ་བསྔོ་བའི་རྣམ་པ་ཅན་གྱི་མཉམ་གཞག་གོ །དྲུག་པ་ནི་བདག་གི་རྣམ་པར་གྲོལ་བ་གང་ཡིན་དེས་སེམས་ཅན་ཐམས་ཅད་རྣམ་པར་ཐར་བར་གྱུར་ཅིག །འཁོར་བ་དང་མྱ་ངན་ལས་འདས་པ་ལ་བདག་གནས་པར་མ་གྱུར་ཅིག་ཅེས་ཏེ། རང་གི་རྣམ་གྲོལ་ཐོབ་པའི་གཞི་ཆོས་དབྱིངས་དང༌། སེམས་ཅན་རྣམས་རྣམ་པར་ཐར་པའི་གཞི་ཆོས་དབྱིངས་ངོ་བོ་གཅིག་ཡིན་པས། བདག་གློ་བུར་གྱི་དྲི་མ་སྒྲིབ་པ་ཐམས་ཅད་ལས་རྣམ་པར་གྲོལ་བ་ན། དེའི་རྒྱུ་མཐུན་པའི་བྱིན་རླབས་ཀྱི་སྟོབས་ལས། ཆོས་བསྟན་པས་སེམས་ཅན་ཐམས་ཅད་རྣམ་པར་གྲོལ་བ་དེ་ལྟ་བུར་གྱུར་ཅིག །དེ་ལ་བི་མུཀྟ་རྣམ་པར་གྲོལ་བ། བི་མོ་ཀྵ་རྣམ་པར་ཐར་བ་སྟེ། དོན་གཅིག་མིང་གི་རྣམ་གྲངས་སོ། །བདག་རྣམ་པར་གྲོལ་བ་ནི་འཁོར་བའི་མཐའ་ལ་མི་གནས་པ་ཡིན་ལ། འཁོར་བ་མ་སྟོངས་བར་དུ་སེམས་ཅན་རྣམས་


TNT17_Page_1029
[མ་དཔེ་གཟིགས་ན་འདིར་གནོན།]

ཐར་བར་བྱེད་པ་ནི། མྱ་ངན་ལས་འདས་པའི་མཐའ་ལ་མི་གནས་པ་ཡིན་པས། འདིའི་སྨོན་ལམ་སྔ་ཕྱི་གཉིས་པོ་དོན་གཅིག་ལ་འདུ་ལ། བདག་གཞན་གྲོལ་བ་ནི་ངོ་བོའི་སྒོ་ནས་བསྟན་ལ། འཁོར་འདས་ལ་མི་གནས་པ་ནི། ཁྱད་པར་སྤངས་པའམ། མཐའ་གཉིས་ལ་མི་གནས་པའི་སྒོ་ནས་བསྟན་ཏོ། །དེ་ལྟར་ན་བྱང་ཆུབ་སེམས་དཔའི་ཞི་གནས་དང་ལྷག་མཐོང་གི་ཏིང་ངེ་འཛིན་སྤྱི་ཁྱབ་ཏུ་འཇུག་པ་དེ་སྒྲུབས་ནས། དེའི་རྗེས་སུ་ཆོས་ཀྱི་བདག་མེད་ལ་མཉམ་པར་བཞག་པའི་ངང་ནས། རྣམ་པ་དྲུག་པོ་འདི་དག་ལ་ཐོག་མར་གསལ་སྣང་སོ་སོར་སྒྲུབས་ནས། དེ་ནས་གཅིག་ཏུ་བསྡོམས་ཏེ་སྒོམ་བཞིན་དུ། གཟུངས་སྔགས་བཟློས་པས་སྒོ་དྲུག་པ་ཞེས་བྱ་བའི་གཟུངས་ཀྱི་སྒོ་ཐོབ་པར་འགྱུར་ཏེ། གཟུངས་བཞི་ཀར་གྱི་ཆ་ཤས་ཐོབ་པར་འགྱུར་རོ། །བཞི་པོ་གང་ཞེ་ན་ཚིག་གི་གཟུངས་ཞེས་བྱ་བ་ཐོས་པ་མ་ལུས་པ་འབད་པ་མེད་པར་འཛིན་པ་དང་དོན་གྱི་གཟུངས་ནི་ཐོས་པའི་དོན་ཐམས་ཅད་ལྷུན་གྲུབ་ཏུ་ཤེས་པ་དང༌། བཟོད་པའི་གཟུངས་ནི་རྟག་ཏུ་ཏིང་ངེ་འཛིན་དང་སྤྱོད་པ་བྱ་དཀའ་ཞིང་ཕུན་སུམ་ཚོགས་པ་རླབས་ཆེན་པོ་རྣམས་ལ་བདེ་བར་གནས་ཤིང་རྒྱུན་མི་འཆད་པར་སྤྱོད་ནུས་པ་དང༌། སྔགས་ཀྱི་གཟུངས་ནི་བདེ་ཆེན་ཚིག་གྲུབ་ཅིང༌། སེམས་ཅན་ལ་ཕན་པའི་གསང་སྔགས་གསར་དུ་བྱེད་ནུས་པའོ། །སྒོ་དྲུག་པོ་འདི་དག་རིམ་པ་བཞིན་དུ་ཤེས་རབ་


TNT17_Page_1030
[མ་དཔེ་གཟིགས་ན་འདིར་གནོན།]

ཡོངས་སུ་རྫོགས་པ་དང༌། སྙིང་རྗེའི་སྟོབས་རྣམ་པར་དག་པ་དང༌། རང་གི་རྒྱུད་རྣམ་པར་དག་པའི་ཕྱིར་དང༌། སྒྲུབ་པའི་གེགས་སྤོང་བ་དང༌། བྱང་ཆུབ་ཀྱི་ཚོགས་གསོག་པ་དང༌། དེའི་འབྲས་བུ་ཐོབ་པ་སྟེ་བསྒྲུབ་པར་བྱ་བའི་དགོས་པ་དྲུག་དང༌། སེམས་ཅན་གྱི་དོན་ལ་མི་ཕྱོགས་པ་དང༌། རང་གི་བདེ་བ་ལ་ཀུན་ཏུ་འཛིན་པ་དང༌། ལས་ཀྱི་སྒྲིབ་པས་བསྒྲིབས་ནས་ལམ་གྱི་ཡེ་ཤེས་མི་སྐྱེ་བ་དང༌། སྡིག་གྲོགས་ཀྱི་རྗེས་སུ་འཇུག་པ་དང༌། ཚོགས་རྒྱ་ཆུང་བ་དང༌། སྲིད་ཞྀའི་ཕུན་ཚོགས་ལ་སེམས་གཞོལ་བ་སྟེ། ཉེས་པ་དྲུག་གི་གཉེན་པོའི་ཕྱིར་དུ་ཡང་གསུངས་སོ། །ཡང་དང་པོ་གཉིས་སེམས་ཅན་སྨིན་པའི་ཕྱིར་དང༌། ལྔ་པ་ནི་རང་གི་ས་ལམ་གྱི་ཡོན་ཏན་ཐོབ་པའི་ཕྱིར་དང༌། དྲུག་པ་ནི་ཐེག་དམན་དུ་མི་གོལ་བའི་ཕྱིར་དང༌། གསུམ་པ་དང་བཞི་པ་ནི་ཕྱི་དང་ནང་གི་བར་ཆད་བསལ་བའི་ཕྱིར་རོ། །ཐམས་ཅད་ཀྱང་ཆོས་ལ་བདག་མེད་པའི་ཡེ་ཤེས་སྤེལ་བའི་ཕྱིར་ཏེ། སྡུག་བསྔལ་དང་བདེ་བ་དང༌། སྡུག་བསྔལ་གྱི་རྒྱུ་དང་ཉེ་བར་འཚེ་བ་དང༌། ལམ་གྱི་ཆོས་དང་འབྲས་བུའི་ཆོས་ལ་ཇི་ལྟར་སྣང་བ་དང༌། རྟོགས་པས་བཟུང་བའི་ཡུལ་ཐམས་ཅད་གདོད་ནས་མ་གྲུབ་ཅིང༌། དེའི་རང་བཞིན་ཡེ་ཤེས་མཉམ་ཉིད་རྟོགས་པའི་ཐབས་མཆོག་བླ་ན་མེད་པའོ། །ཕན་ཡོན་ཡང་རྣམ་པ་དྲུག་སྟེ། རང་གཞན་གྱི་སྡུག་བསྔལ་སྲབས་པར་འགྱུར་བ་དང༌། རང་


TNT17_Page_1031
[མ་དཔེ་གཟིགས་ན་འདིར་གནོན།]

གི་ཕུན་སུམ་ཚོགས་པས་སེམས་ཅན་སྨིན་པར་འགྱུར་བ་དང༌། དགེ་བའི་ཆོས་གེགས་མེད་དུ་སྐྱེ་བ་དང༌། མོས་པ་དང་དགའ་བ་ལ་སོགས་པས་དགེ་བའི་ཆོས་འཕེལ་བར་འགྱུར་བ་དང༌། ཚོགས་ཁྱད་པར་ཅན་གསོག་ཐུབ་པའི་ཏིང་ངེ་འཛིན་ཐོབ་པ་དང༌། སེམས་ཅན་གྱི་དོན་ཕུན་སུམ་ཚོགས་པ་འགྲུབ་པ་རྣམས་རིམ་པ་བཞིན་སྦྱར་རོ། །བསྡུས་བའི་དོན་གྱི་རྣམ་གྲངས་གཞན་ཡང་བཤད་དེ་འདིར་མ་བྲིས་སོ། །གསུམ་པ་གཟུངས་སྔགས་ནི། ཏདྱ་ཐཱ། ཨོཾ་ཀྵ་མེ་ཀྵ་མེ། ཀྵནྟེ་ཀྵནྟེ། ད་མེ་ད་མེ། དཱནྟེ་དཱནྟེ། བྷ་དྲེ་བྷ་དྲེ། སུ་བྷ་དྲེ། སུ་བྷ་དྲེ། ཙནྡྲེ་ཙནྡྲེ། སུ་ཙནྡྲེ་སུ་ཙནྡྲེ། ཙནྡྲ་ཀི་ར་ཎེ། ཙནྡྲ་བ་ཏི། དེ་ཛོ་བ་ཏི། དྷརྨ་བ་ཏི། ཡ་ཤོ་བ་ཏི། པྲཧྨ་བ་ཏི། སརྦ་ཀླེ་ཤ་བི་ཤོ་དྷ་ནི། སརྦ་ཨརྠ་སཱ་དྷ་ནི། སརྦ་ཨ་ནརྠ་པྲ་ཤ་མ་ནི། པྲ་ར་མ་ཨརྠ་སཱ་དྷ་ནི། ཀཱ་ཡ་བི་ཤོ་དྷ་ནི། ཝཀ་བི་ཤོ་དྷ་ནི། མ་ནཿསཾ་ཤོ་དྷ་ནི་སྭཱཧཱ། ཞེས་པ་སྟེ། དེ་ལ། ཏདྱ་ཐཱ་ནི་འདི་ལྟ་སྟེ། ཨོཾ་ནི་སྔགས་ཀྱི་མགོ་འདྲེན་ནོ། །ཀྵ་མེ་ཀྵ་མེ་ཀྵནྟེ་ཀྵནྟེ་ནི་བཟོད་པར་བྱ་བ་དང༌། བཟོད་པར་བྱེད་པའི་དོན་ཏེ་བཟོད་པའི་དོན་ནོ། །ད་མེ་ད་མེ་ནི་དུལ་བ་སྟེ་ཚུལ་ཁྲིམས་སོ། །དཱནྟེ་དཱནྟེ་ནི་སྦྱིན་པར་བྱེད་པ་སྟེ་སྦྱིན་པའོ། །བྷ་དྲེ་བྷ་དྲེ་བཟང་པོ་དང༌། སུ་བྷ་དྲེ་རབ་ཏུ་བཟང་པོ་སྟེ་བརྩོན་འགྲུས་སོ། །ཙནྡྲེ་ཟླ་བ། སུ་ཙནྡྲེ་ཟླ་བཟང༌། ཙནྡྲ་ཀི་ར་ཎེ་ཟླ་འོད་སྟེ་གདུང་བ་སེལ་བར་བྱེད་པའི་ཕྱིར་བསམ་


TNT17_Page_1032
[མ་དཔེ་གཟིགས་ན་འདིར་གནོན།]

གཏན་ནོ། །འདི་དག་རྟག་མཐའ་མོ་རྟགས་ཡིན་པས། བཟོད་མ་ཞེས་སོགས་མོ་རྟགས་སུ་སྦྱར་ཀྱང་རུང་ལ། དེ་ལྟར་ན་ཤེས་རབ་སྟོང་པ་ཉིད་ཡུམ་ཆེན་མོ་དང་རྗེས་སུ་འབྲེལ་བའི་དོན་དུ་བཤད་དགོས་སོ། །ཙནྡྲ་བ་ཏི་ཟླ་བ་ལྡན་པ། ཏེ་ཛོ་བ་ཏི་གཟི་བརྗིད་ལྡན་པ། དྷརྨ་བ་ཏི་ཆོས་ལྡན་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའོ། །ཡ་ཤོ་བ་ཏི་གྲགས་པ་དང་ལྡན་པ། པྲཧྨ་བ་ཏི་ཚངས་པ་དང་ལྡན་པ། འཇིག་རྟེན་གྱི་ལྷ་ཚངས་པ་ཐབས་མཁས་སྣ་ཚོགས་ཀྱིས་ལྷ་རྣམས་ཀྱི་དོན་བྱེད་པ་བཞིན་དུ། འདིར་ཡང་སྦྱར་ཏེ་དེ་གཉིས་ཐབས་ཀྱི་ཕ་རོལ་ཏུ་ཕྱིན་པའོ། །སརྦ་ཀླེ་ཤ་བི་ཤོ་དྷ་ནི་ཞེས་པ་ཉོན་མོངས་པ་ཐམས་ཅད་རྣམ་པར་སྦྱོང་བ་སྟེ། སྟོབས་ཀྱི་ཕ་རོལ་ཏུ་ཕྱིན་པའོ། །སརྦ་ཨརྠ་སཱ་དྷ་ནི་དོན་ཐམས་ཅད་སྒྲུབ་པ། སརྦ་ཨ་ནརྠ་པྲ་ཤ་མ་ནི་དོན་མེད་ཐམས་ཅད་རབ་ཏུ་ཞི་བ། པ་ར་མ་ཨརྠ་སཱ་དྷ་ནི་མཆོག་གི་དོན་སྒྲུབ་པ་སྟེ། དེ་རྣམས་སྨོན་ལམ་གྱི་ཕ་རོལ་ཏུ་ཕྱིན་པའོ། །ཀཱ་ཡ་བི་ཤོ་དྷ་ནི་ལུས་རྣམ་པར་སྦྱོང་བ། ཝཱཀ་བི་ཤོ་དྷ་ནི་ངག་རྣམ་པར་སྦྱོང་བ། མ་ནཿསཾ་ཤོ་དྷ་ནི་ཡིད་ཡང་དག་པར་སྦྱོང་བ་སྟེ། དེ་རྣམས་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །སྭཱཧཱ་ནི་སྔགས་ཀྱི་མཐའ་བརྟེན་པ་སྟེ་སྔགས་དོན་མཐའ་དག་སྒྲུབ་པར་བྱེད་པའོ། །གཟུངས་སྔགས་འདི་དག་ཀྱང༌། གོང་དུ་བསྟན་པའི་སྒོ་དྲུག་དང་སྦྲེལ་ཞིང༌། སྔགས་ཀྱི་སྒྲ་དང་ཡིག་འབྲུ་རང་བཞིན་མེད་ཀྱང་རྟེན་འབྲེལ་ཙམ་


TNT17_Page_1033
[མ་དཔེ་གཟིགས་ན་འདིར་གནོན།]

དུ་སྣང་བ་ལ་དམིགས་ནས། དེའི་ཆོས་ཉིད་སྔགས་སུ་མོས་པ་ལ་མཉམ་པར་བཞག་པས། གཟུངས་འདི་ཉིད་སྒྲུབ་པར་བྱེད་པ་ཡིན་ནོ། །བཞི་པ་གཟུངས་སྔགས་བསྡུས་པའི་ཕན་ཡོན་ནི། རིགས་ཀྱི་བུ་དེ་ལྟར་ན། རིགས་ཀྱི་བུའམ་རིགས་ཀྱི་བུ་མོ་གང་ལ་ལས། སྒོ་དྲུག་པ་ཞེས་བྱ་བའི་གཟུངས་འདི། ཉིན་ལན་གསུམ་མཚན་ལན་གསུམ་དུ་བརྗོད་ན། དེའི་ལས་ཀྱི་སྒྲིབ་པ་ཐམས་ཅད་བྱང་བར་གྱུར་ནས་སྐྱེ་བ་བདུན་གྱི་བར་དུ་དེས་ནི་སྐྱེ་བ་དྲན་པར་འགྱུར་རོ། །བླ་ན་མེད་པ་ཡང་དག་པ་རྫོགས་པའི་བྱང་ཆུབ་ཏུ་སངས་རྒྱ་བར་འགྱུར་རོ། །ཞེས་ཏེ། སེམས་དང་པོ་བསྐྱེད་པས་ཀྱང་གོང་དུ་བཤད་པའི་དོན་ལ་མཉམ་པར་བཞག་ནས། ཐུན་དྲུག་ཏུ་བཟླས་བརྗོད་མང་དུ་བྱས་ན། ཕན་ཡོན་གསུམ་སྟེ་མཚམས་མེད་པ་ལ་སོགས་པའི་ལས་ཀྱི་སྒྲིབ་པ་ཡང་བྱང་བ་དང༌། སྐྱེ་བ་དྲན་པ་དང༌། བླ་ན་མེད་པའི་བྱང་ཆུབ་ཏུ་རིགས་ངེས་པའོ། །སྐྱེ་བ་བདུན་གྱི་བར་དུ་ཞེས་པ་ནི། སྔོན་གྱི་སྐྱེ་བ་བདུན་གྱི་བར་དུ་དྲན་ཞེས་པ་ཡིན་གྱི། གཟུངས་འདི་བཟླས་པ་ནས་བརྩམས་ཏེ་སླར་ཚེ་རབས་བདུན་གྱི་བར་དུ་སྐྱེ་བ་དྲན་ལ་དེ་ནས་མ་ཡིན་ཞེས། ཅི་ཙམ་དུ་སྐྱེ་བ་དྲན་པའི་དུས་སྟོན་པ་མ་ཡིན་ཏེ། དེས་ན་འདི་སྐད་ཅེས་བྱ་བར་འགྱུར་ཏེ། དེས་ནི་སྐྱེ་བ་བདུན་གྱི་བར་གྱི་སྐྱེ་བ་དྲན་པར་འགྱུར་རོ་ཞེས་པའི་དོན་ཡིན་པས། བར་དུ་ཞེས་པ་ནི་དྲུག་པའི་དོན་ལ་བདུན་པའི་


TNT17_Page_1034
[མ་དཔེ་གཟིགས་ན་འདིར་གནོན།]

ཚིག་ཡིན་ནོ། །འཚང་རྒྱ་བར་འགྱུར་ཞེས་པ་ཕྱི་ཕྱིར་ལམ་གྱི་ཆོས་ཉམས་པ་མེད་པའི་ཚུལ་གྱིས། འཚང་རྒྱ་ངེས་སུ་འགྱུར་བའི་དོན་ནོ། །ཅི་སྟེ་གཟུངས་ཀྱི་སྒོ་འདི་སྒྲུབས་ནས། ཐོབ་པ་ཕན་ཆད་ཀྱི་ཕན་ཡོན་ནི། གོང་དུ་བསྟན་པའི་ཕན་ཡོན་དྲུག་དང༌། གཟུངས་བཞི་པོའི་ཕན་ཡོན་དང༌། ཕ་རོལ་ཏུ་ཕྱིན་པ་བཅུ་ཡང་འགྲུབ་པར་འགྱུར་རོ། །དེ་དག་ནི་སྒྲ་ཇི་བཞིན་པའི་དབང་དུ་བྱས་པས། ཕར་ཕྱིན་ཐེག་པ་ཉིད་ཀྱི་ལུགས་སུ་སྦྱར་རོ། །གལ་ཏེ་སྔགས་ཀྱི་ཚུལ་དང་མཐུན་པ་ལ་མོས་པས་སྒྲུབ་ན་འདི་ལྟར་བྱ་སྟེ། གཟུངས་ཀྱི་སྒོ་དང་པོ་ནི། མཉམ་པ་ཉིད་དུ་རྟོགས་པ་ཤེས་རབ་སྟེ། འཕགས་པ་འཇམ་དཔལ་ལོ། །གཉིས་པ་བདག་གི་བདེ་བ་སེམས་ཅན་ལ་སྦྱིན་པ་ནི་སྙིང་རྗེ་སྟེ། པདྨའི་རིགས་ཀྱི་གཙོ་བོ་སྤྱན་རས་གཟིགས་སོ། །གསུམ་པ་མཐོལ་ཚངས་སུ་བྱེད་པ་ནི། འཇིག་རྟེན་པའི་གཙོ་བོ་ཚངས་པ་ཆེན་པོ་སྟེ། གཡས་སུ་དཀྱིལ་འཁོར་གྱི་ལྷ་རྣམས་ལ་རིམ་པ་བཞིན་དུ་བཀོད་དོ། །བཞི་པ་བདུད་ཀྱི་ལས་སྤོང་བ་ནི། རྡོ་རྗེའི་རིགས་ཀྱི་གཙོ་བོ་ཕྱག་ན་རྡོ་རྗེའོ། །ལྔ་པ་ཚོགས་བསགས་པའི་སྒོ་ནི། ནོར་བུའི་རིགས་ཀྱི་གཙོ་བོ་འཕགས་པ་ཛཾ་བྷ་ལའོ། །དྲུག་པ་མྱ་ངན་ལས་འདས་པའི་མཐའ་ལ་མི་གནས་པ་ནི། རིགས་བརྒྱུད་དང་རྐང་འགྲོས་དང་རྩ་འབྱིང་དར་བར་བྱེད་ཅིང༌། ཕ་རོལ་གྱི་སྡེ་གཞོམ་པར་བྱེད་པ་གནོད་སྦྱིན་ལྔ་བརྩེན་ཏེ། གཡོན་གྱི་


TNT17_Page_1035
[མ་དཔེ་གཟིགས་ན་འདིར་གནོན།]

ཕྱོགས་སུ་རིམ་པ་བཞིན་དུ་འགོད་དོ། །རྒྱབ་དང་མདུན་དུ་ནི། ཁྲོ་བོ་ཆེན་པོ་དང་འཕགས་པ་གཤིན་རྗེ་གཤེད་ལ་སོགས་པ་འགོད་དོ། །གཞལ་ཡས་ཁང་དང་དཀྱིལ་འཁོར་གྱི་གཙོ་བོ་དེ་བཞིན་གཤེགས་པ་ཤཱཀྱའི་རྒྱལ་བོ་ནི། གླེང་གཞིའི་བསྟན་ཏོ། །དེའི་ཕྱི་རོལ་ཏུ་ཕྱོགས་སྐྱོང་བ་བཅུའི་བརྒྱད་ཀྱང་འགོད་ཅིང་སྒོ་བཞིར་ནི་རྒྱལ་པོ་ཆེན་པོ་བཞིའོ། །གལ་ཏེ་སྤྲོས་པ་ལ་མོས་ན། ཕ་རོལ་ཏུ་ཕྱིན་པ་བཅུའི་གཟུངས་ཀྱི་ལྷ་མོ་རྣམས་ལྷ་རྣམ་གཉིས་པ་ལ་འགོད་ཅིང༌། ཕྱོགས་སྐྱོང་བ་རྣམས་ནི་གསུམ་པ་ལའོ། ཁྲོ་བོ་ཆེན་པོ་དང་ཕྱོགས་སྐྱོང་ལ་སོགས་པ་ནི་གསང་བ་སྤྱིའི་ཆོ་གས་བཀོད་པ་ཡིན་ལ། འཕགས་པ་གཤིན་རྗེ་གཤེད་ནི་སྒོ་དྲུག་པ་སྟེ། ཥ་ཊ་མུ་ཁི་ཞེས་པའི་མཚན་དོན་ལ་བརྟེན་ནས་བཀོད་པའོ། །གཟུངས་སྔགས་ཀྱི་སྐབས། གོང་དུ་བསྟན་པའི་ཕར་ཕྱིན་དྲུག་གི་སྔགས་ནི། དེ་བཞིན་གཤེགས་པ་ཤཱཀྱ་ཐུབ་པའི་འོ། །ཡ་ཤོ་ཞེས་པ་ནི་ལྔ་བརྩེན་གྱིའོ། །པྲཧྨ་ནི་ཚངས་པ་ཉིད་དོ། །ཀླེ་ཤ་བི་ཤོ་དྷ་ནི་ཉོན་མོངས་འཇོམས་པ་སྟེ་འཇམ་དཔལ་གྱིའོ། །ཨརྠ་ནི་གཞན་དོན་སྒྲུབ་པ་སྙིང་རྗེ་སྟེ་སྤྱན་རས་གཟིགས་ཀྱིའོ། ཨ་ནརྠ་ནི་དོན་མེད་དེ་བར་ཆད་སེལ་བ་རྡོ་རྗེ་འཛིན་པའི་འོ། །པ་ར་མ་ནི་འདོད་དོན་མཆོག་སྒྲུབ་པའི་ཕྱིར་སྣོད་གནས་ཀྱིའོ། །ཀཱ་ཡ་སོགས་ནི་ཐམས་ཅད་ཀྱི་ཐུན་མོང་གི་སྔགས་སོ། །འདི་ལས་ཐུན་མོང་དང་ལས་ཚོགས་


TNT17_Page_1036
[མ་དཔེ་གཟིགས་ན་འདིར་གནོན།]

འགྲུབ་པ་ནི་ཉན་པར་གདམས་པ་བསྟན་ཏོ། །ཕན་ཡོན་གྱིས་ནི་མཆོག་གི་དངོས་གྲུབ་བོ། །ཇི་ལྟར་སྒྲུབ་པའི་ཆོ་ག་ནི་བྱ་བའི་རྒྱུད་ཀྱི་ཆོ་གས་ཏེ། འདི་རིགས་དྲུག་ཀ་འདུས་པ་ལྟ་བུ་ཡིན་ཀྱང༌། གཙོ་བོ་དེ་བཞིན་གཤེགས་པ་ཡིན་པས། དེའི་ཆོ་ག་སྦྱར་བར་བྱའོ། །གསུམ་པ་རྗེས་སུ་ཡི་རང་ནི། བཅོམ་ལྡན་འདས་དགྱེས་ཤིང་དེ་སྐད་ཅེས་བཀའ་སྩལ་བ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང༌། གནས་གཙང་མའི་རིགས་ཀྱི་ལྷའི་བུ་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྒོ་དྲུག་པ་ཞེས་བྱ་བའི་གཟུངས་རྫོགས་སོ། །ཞེས་ཏེ་དེ་ལ་དགྱེས་པ་ནི། འདི་གསུངས་པ་ཙམ་གྱིས་འཁོར་དེར་འདུས་པ་གཟུངས་ཀྱི་སྒོ་འདི་མ་ཐོབ་པ་རྣམས་ཀྱིས་ཐོབ་ཅིང༌། ཐོབ་པ་རྣམས་ཀྱང་ཕྱིར་ཞིང་འཕེལ་བར་གྱུར་པས། སེམས་ཅན་གྱི་དོན་རྒྱ་ཆེན་པོར་གྱུར་པ་ལ་དགྱེས་པའོ། །འཕགས་པ་སྒོ་དྲུག་པའི་གཟུངས་ཀྱི་རྣམ་པར་བཤད་པ་འདི་ནི། སངས་རྒྱས་གཉིས་པ་ལྟ་བུའི་སློབ་དཔོན་དབྱིག་གཉེན་གྱི་མདོ་ཙམ་དུ་བཀྲལ་བ་དང༌། བླ་མའི་མན་ངག་གི་ཡི་གེ་རྣམས་དང༌། རང་གི་བློ་མཐུ་སྟེ་གསུམ་ལས་ཇི་ལྟར་རིགས་པར་བརྗོད་པ་སྟེ་ཏཱ་ར་ནཱ་ཐས་སོ། །དགེའོ། །གཅིག་ཞུས།

ཚེ་མདོའི་འགྲེལ་བ།


TNT17_Page_1037
[མ་དཔེ་གཟིགས་ན་འདིར་གནོན།]

ཚེ་མདོའི་འགྲེལ་བ་བཞུགས་སོ།


TNT17_Page_1038
[མ་དཔེ་གཟིགས་ན་འདིར་གནོན།]

བཅོམ་ལྡན་འདས་པདྨ་གར་གྱི་དབང་ཕྱུག་ལ་ཕྱག་འཚལ་ལོ། །བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པའི་མཚན་བརྒྱ་རྩ་བརྒྱད་པའི་གཟུངས་མདོར་གྲགས་པ་འདི་ལ། དོན་གསུམ་གྱི་གཏན་ལ་དབབ་པར་བྱ་སྟེ། ཐོག་མར་གླེང་གཞི་བཀོད་པ། བར་དུ་མདོ་སྡེའི་དངོས་པོ། མཐར་རྗེས་སུ་ཡི་རང་སྟེ་རྣམ་པ་གསུམ་མོ། །དང་པོ་ནི།འདི་སྐད་བདག་གིས་སོགས་ཏེ། འོག་ནས་འབྱུང་བའི་མདོ་སྡེ་འདི་སྐད་བསྡུད་པ་པོ་ཕྱག་ན་རྡོ་རྗེ་བདག་གིས། དོན་ཟབ་མོ་ནི་སངས་རྒྱས་ཉག་གཅིག་གི་ས་སྤྱོད་ཡུལ་ཡིན་པས་རྟོགས་པར་མ་གྱུར་ཀྱང༌། དེ་བཞིན་གཤེགས་པའི་བྱིན་རླབས་ཀྱི་སྟོབས་ཀྱིས། ཐོས་པའི་ཤེས་རབ་ཀྱིས་རྟོགས་པའི་དུས་གཅིག་ན་འདི་སྐད་གསུང་ངོ༌། །གསུང་བ་པོ་གང་ཞིག་ན་བཅོམ་ལྡན་འདས་ཏེ། མཐའ་ཡས་པའི་ཡོན་ཏན་གྱིས་ཉེ་བར་བརྒྱན་


TNT17_Page_1039
[མ་དཔེ་གཟིགས་ན་འདིར་གནོན།]

པ། སྟོན་པ་བླ་ན་མེད་པའི་སངས་རྒྱས་ཤཱཀྱ་ཐུབ་པའོ། །གནས་གང་དུ་ཅེ་ན། སྔོན་དྲང་སྲོང་གཉན་པ་དང་ཡོད་པ་ཞེས་བྱ་བས་བཟུང་བའི་བསྟི་གནས་ལ་ཕྱིས་གྲོང་ཁྱེར་དུ་གྱུར་པ་ནི་མཉན་ཡོད་དེ། རྒྱལ་པོ་ལ་སོགས་པ་ཡུལ་གྱི་གཙོ་བོ་རྣམས་ཀྱི་གནས་སྨོས་པའོ། །རྒྱལ་བུ་རྒྱ་ལ་བྱེད་ནི། རྒྱལ་པོ་གསལ་རྒྱལ་གྱི་ནུ་བོ་ཞིག་སྟེ། སྔོན་དེ་ཉིད་ཀྱི་སྐྱེད་མོས་ཚལ་ཡིན་ལ། ཕྱིས་ཁྱིམ་བདག་མགོན་མེད་ཟས་སྦྱིན་གྱིས་གསེར་ས་གཞི་ཁེབས་པར་རིན་བཅལ་ཏེ་ཉོས་ནས་རྩ་བ་དང་མེ་ཏོག་དང་འབྲས་བུས་བརྒྱན་པའི་ཀུན་དགའ་ར་བའི་དབུས་སུ།གཙུག་ལག་ཁང་ཡངས་ཤིང་རྒྱ་ཆེ་བ་བཞེངས་པ་དེ་ནའོ། །འཁོར་གང་དང་ལྷན་ཅིག་ཏུ་ཐོས་ཞེ་ན། དགེ་སློང་སོགས་ཏེ། དགེ་སློང་ནི་མིང་གི་དགེ་སློང་དང༌། ཁས་འཆེས་པའི་དགེ་སློང་


TNT17_Page_1040
[མ་དཔེ་གཟིགས་ན་འདིར་གནོན།]

དང༌། སློང་བའི་དགེ་སློང་དང༌། གསོལ་བ་དང་གཞིའི་ལས་ཀྱི་དགེ་སློང་དང༌། དོན་དམ་པའི་དགེ་སློང་དང་ལྔ་ལས། འདིར་ཁ་ཅིག་བཞི་པ་ཡང་ཡིན་ལ། ཐམས་ཅད་ཀྱང་དོན་དམ་པའི་དགེ་སློང་དགྲ་བཅོམ་པའོ། །དགེ་འདུན་ནི་འདུས་པ་སྟེ། དགྲ་བཅོམ་པ་འདུས་པ་ཉིད་ཀྱི་ཕྱིར། འདི་བས་མཆོག་ཏུ་གྱུར་པའི་འདུས་པ་མེད་པས་ན་དགེ་འདུན་ཆེན་པོའོ། །དེའི་གྲངས་ནི། བརྒྱ་ཕྲག་ཕྱེད་དང་བཅུ་གསུམ་གྱི་དགེ་སློང་སྟེ་འཁོར་གྱི་གཙོ་བོ་བྱང་ཆུབ་སེམས་དཔའ་ཡིན་ཡང་ཐོག་མར་ཉན་ཐོས་རྣམས་སྨོས་སོ། །དེ་ལ་ཉན་ཐོས་རྣམས་ནི། དེ་བཞིན་གཤེགས་པ་ཉིད་ཀྱི་བྱིན་རླབས་མ་གཏོགས་པ། སངས་རྒྱས་གཞན་གྱི་ཞིང་ཁམས་སུ་བགྲོད་པར་ནུས་པ་མ་ཡིན་པའི་ཕྱིར། དགེ་སློང་དེ་རྣམས་ནི། སྟོན་པ་ཤཱཀྱ་སེང་གེ་ཉིད་ཀྱི་ཐུན་མོང་མ་ཡིན་པའི་འཁོར་ཡིན་པའི་ཕྱིར་དང༌། དེ་སྐབས་ཀྱི་ཡུལ་རུང་བ་ན་གནས་པའི་མུ་སྟེགས་བྱེད་སོགས་སྐྱེ་བོ་ཕལ་བ་ཀུན་དང་ཡང་ཐུན་མོང་གི་སྤྱོད་ཡུལ་ཅན་ཡིན་པའི་ཕྱིར་ཐོག་མར་སྨོས་སོ། །བྱང་ཆུབ་སེམས་དཔའ་རྣམས་ནི་དེ་ལས་ལྡོག་པའི་ཕྱིར་ཕྱིས་སྨོས་པའོ། །འགའ་ཞིག་རབ་བྱུང་དང་ཁྱིམ་པའི་ཁྱད་པར་ཞེས་སྨྲ་བ་དེ་ནི། རྒྱལ་སྲས་ཆེན་པོ་རྣམས་ཁྱིམ་པའོ་ཞེས་སྨྲ་བ་མི་བཟད་པའི་སྡིག་པ་སྒྲུབ་པར་བྱེད་པ་སྟེ། ཐེག་པ་ཆེན་པོ་ལས་ཕྱིར་ཕྱོགས་པའི་ཉན་ཐོས་སྡེ་བ་འགའ་ཞིག་གི་བློ་གྲོས་དང་མཚུངས་པའོ། །


TNT17_Page_1041
[མ་དཔེ་གཟིགས་ན་འདིར་གནོན།]

དེ་ལ་བྱང་ཆུབ་སེམས་དཔའ་ནི། སེམས་བསྐྱེད་པ་རྣམ་པ་གཉིས་ཀྱིས་རྒྱུད་ཕྱུག་པའོ། །སེམས་དཔའ་ཆེན་པོ་ནི། ཏིང་ངེ་འཛིན་དང་གཟུངས་དང༌། མངོན་པར་ཤེས་པ་དཔག་ཏུ་མེད་པ་དང་ལྡན་པ་སྟེ། རྡོ་རྗེའི་སྐུ་ཡིད་དང་མཚུངས་པ་ཐོབ་པའོ། །དེ་ཡང་རྒྱལ་བའི་སྲས་ཀྱི་གཙོ་བོ་འཇམ་དཔལ་ལ་སོགས་པ་རབ་ཏུ་མང་པོ་སྟེ། མཐའ་ཡས་པ་དག་དང་ཐབས་ཅིག་ཏུ་བཞུགས་སོ་ཞེས་པའོ། །དེ་ལ་འདི་སྐད་ཅེས་སོགས་ནི། ཆོས་ཕུན་སུམ་ཚོགས་པ། དུས་གཅིག་ན་ཞེས་པ་དུས་ཕུན་སུམ་ཚོགས་པ། བཅོམ་ལྡན་འདས་ནི་སྟོན་པ་ཕུན་སུམ་ཚོགས་པ། གཉན་ཡོད་ན་སོགས་ནི་གནས་ཕུན་སུམ་ཚོགས་པ། དགེ་སློང་བརྒྱ་ཕྲག་ཅེས་སོགས་ནི་འཁོར་ཕུན་སུམ་ཚོགས་པའོ། །གཉིས་པ་བར་དུ་མདོ་སྡེའི་དངོས་པོ་བཤད་པ་ལ། ཕ་རོལ་ཏུ་ཕྱིན་པའི་ཚུལ་དང་ཐུན་མོང་དུ་བཤད་པ་དང༌། སྔགས་ཀྱི་ཐུན་མོང་མ་ཡིན་པའི་དོན་སྟོན་ཚུལ་བཤད་པའོ། །དང་པོ་ལ་མཚམས་སྦྱོར་བ་དང༌། དོན་དངོས་སོ། །དང་པོ་མཚམས་སྦྱོར་བའི་ཚིག་ནི། དེ་ནས་དེའི་ཚེ་སོགས་ཏེ། འཁོར་བའི་སྡུག་བསྔལ་དང་ཉོན་མོངས་པ་དང༌། རྣམ་པར་སྨིན་པའི་ལུས་ཀྱི་རྩུབ་རེག་ཐམས་ཅད་བྲལ་བས་འཇམ་པ། རང་གཞན་གྱི་དོན་ཕུན་སུམ་ཚོགས་པའི་དཔལ་དང་ལྡན་པས་ན་འཇམ་དཔལ། གཞོན་ནུའི་ས་ལ་གནས་པས་ན་གཞོན་ནུར་གྱུར་པ་སྟེ། དེ་


TNT17_Page_1042
[མ་དཔེ་གཟིགས་ན་འདིར་གནོན།]

ཡང་རྒྱལ་པོའི་བུ་ཐུ་བོ་རྒྱལ་ཚབ་ལ་གནས་པ་ལ་གཞོན་ནུ་ཞེས་གྲགས་པ་ལྟར། ཆོས་ཀྱི་སྤྲིན་གྱི་ས་ལ་འོད་ཟེར་ཆེན་པོས་མངོན་པར་དབང་བསྐུར་བ་ཐོབ་པའི་བྱང་ཆུབ་སེམས་དཔའ་ཡང་རྒྱལ་སྲས་ཐུ་བོ་དབང་བསྐུར་བ་བརྙེས་པ་ཡིན་པའི་ཕྱིར་གཞོན་ནུའི་ས་པ་ཞེས་བྱའོ། །ཡང་གཅིག་ཏུ་ན་སེམས་དང་པོ་བསྐྱེད་པ་ནས་བཟུང་སྟེ་རྟག་ཏུ་ཚངས་པར་སྤྱོད་པ་ལ་གནས་པ་དེ་ཡང་གཞོན་ནུའི་ས་པ་ཞེས་བྱའོ། །དེ་ལ་འདིར་གདུལ་བྱའི་དུས་མཁྱེན་ནས་ཞུ་བ་པོ་མེད་པ་ཉིད་དུ་ཡང༌། འཇམ་དཔལ་ལ་བཀའ་སྩལ་པའི་ཚུལ་གྱིས་འཁོར་རྣམས་ལ་སྟོན་པས་གསུངས་པའོ། །གཉིས་པ་དོན་དངོས་ལ། དོན་གྱི་གཙོ་བོ་མདོར་བསྟན་པ་དང༌། ཕན་ཡོན་གྱི་སྒོ་ནས་རྒྱས་པར་བཤད་པ་གཉིས་སོ། །དང་པོ་ལ། བཅོམ་ལྡན་འདས་ཚེ་དཔག་ཏུ་མེད་པའི་ཞིང་ཁམས་དང༌། སྟོན་པ་ཉིད་ཀྱི་ཆེ་བ་དང༌། ཆོས་སྟོན་པ་དང༌། ཕན་ཡོན་དང་བཅས་པའི་གཟུངས་སྔགས་བསྟན་པའོ། །དང་པོ་ནི། འཇམ་དཔལ་སྟེང་གི་ཕྱོགས་ན་སོགས་ཏེ། སྟེང་གི་ཕྱོགས་འཇིག་རྟེན་གྱི་ཁམས་ཡོན་ཏན་དཔག་ཏུ་མེད་པ་ཞེས་བྱ་བ་ཞེས་པ་ལ། ཞིང་ཁམས་དེ་ནི་སྣོད་ཀྱི་འབྱོར་བའི་ཁྱད་པར་རིན་པོ་ཆེའི་རི་བོ་དང༌། དཔག་བསམ་གྱི་ཤིང་ལ་སོགས་པ་རིན་པོ་ཆེ་སྣ་བདུན་གྱི་ས་གཞི་དང༌། བདུད་རྩིའི་ཆུ་བོ་ལ་སོགས་པ་འདོད་པའི་ཡོན་ཏན་བསམ་གྱིས་མི་ཁྱབ་པའི་ཕྱིར་དང༌། བཅུད་ཀྱི་ཡོན་ཏན་ཡང་ངན་འགྲོ་དང་


TNT17_Page_1043
[མ་དཔེ་གཟིགས་ན་འདིར་གནོན།]

ལྟ་བ་ལོག་པ་དང༌། ཐེག་པ་དམན་པ་མེད་ཅིང༌། སྡུག་བསྔལ་གྱི་མིང་ཡང་མེད་ལ། དེར་སྐྱེས་པ་ཙམ་གྱིས་གཟུངས་དང་སྤོབས་པ་དང༌། མངོན་པར་ཤེས་པ་རྣམས་ཆོས་ཉིད་ཀྱིས་ཐོབ་པའི་ཕྱིར། ཞིང་ཁམས་དེ་ནི་ཡོན་ཏན་དཔག་ཏུ་མེད་པ་ཞེས་བྱ་ལ། རྒྱ་དཔེ་འགའ་ཞིག་ལས། ཨ་པ་ར་མི་ཏ་གུ་ཎ་པཉྩ་ཡཱ་ཞེས་འབྱུང་བ་ལྟར་ན་ཡོན་ཏན་དཔག་ཏུ་མེད་པ་བསྡུད་པ་ཞེས་བྱའོ། །གཉིས་པ་ནི། དེ་ན་དེ་བཞིན་གཤེགས་པ་སོགས་ཏེ། བདེན་པ་གཉིས་ཀྱི་ཆོས་ཇི་ལྟ་བ་བཞིན་དུ་མ་ནོར་བར་མཁྱེན་པས་སམ། ལམ་མ་ནོར་བར་སྟོན་པས་སམ། སྲོག་ཆགས་གྲོག་སྦུར་ལ་ཡང་འཇིགས་སྐྲག་བསྐྱེད་པར་མི་མཛད། སྡུག་བསྔལ་བསྐྱེད་པར་མི་མཛད་དེ་ཚུལ་ཇི་ལྟ་བ་བཞིན་དུ་སྤྱོད་པས་ན། དེ་བཞིན་གཤེགས་པ་སྟེ། གཤེགས་པ་ནི་རྟོགས་པ་དང་སྟོན་པ་དང་སྤྱོད་པའི་དོན་ནོ། །ཉོན་མོངས་པའི་དགྲ་རྣམས་བཅོམ་པ་དང༌། ཡང་དག་པ་སྟེ་ཕྱིན་ཅི་མ་ལོག་པར་ཤེས་བྱའི་དཀྱིལ་འཁོར་མ་ལུས་པ་རྫོགས་པ་དང་ཚད་མཉམ་པའི་སྐྱོན་རྣམས་སངས་ཤིང་ཡོན་ཏན་ཐམས་ཅད་རྒྱས་པ། སྐུ་ཚེ་བསྐལ་པ་མཐའ་མེད་པའི་བར་དུ་བཞུགས་པ་དང༌། ཡེ་ཤེས་ཏེ་མངོན་པར་མཁྱེན་པ་ཟད་པ་མེད་པ་མངའ་བའི་ཕྱིར། ཚེ་དང་ཡེ་ཤེས་དཔག་ཏུ་མེད་པའོ། །ཤིན་ཏུ་རྣམ་པར་ངེས་པ་ནི་རིག་པའི་ལམ་རྣམ་པར་ངེས་པར་སྟོན་པའོ། །གཟི་བརྗིད་ནི་གང་གི་འོད་ཟེར་གྱིས་


TNT17_Page_1044
[མ་དཔེ་གཟིགས་ན་འདིར་གནོན།]

འཇིག་རྟེན་གྱི་ཁམས་གཞན་ན་གནས་པའི་ངན་སོང་ཐམས་ཅད་སེལ་བར་བྱེད་པའི་ཕྱིར་རོ། དབང་དང་ལྡན་པས་རྒྱལ་པོའོ། །འདིར་ཨེ་ཏར་ཧི་ཏིཥྛ་ཏི་ཌྷི་ཡ་ཏ་ཡཱ་པ་ཡ་ཏི། ཞེས་འབྱུང་བ་ལོ་ཙཱ་བ་འགའ་ཞིག་གིས་བཞུགས་ཏེ་འཚོ་ཞིང་གཞེས་ལ་ཞེས་བསྒྱུར་བ་ལྟར་ན། སྟོན་པའི་ཁྱད་ཆོས་སུ་སྦྱོར་དགོས་ལ། ཚེ་འཛིན་ཅིང་ཚེ་མཐར་ཕྱིན་པར་བཞེད་དེ། ཞེས་པ་ནི་པ་ཚབ་ལོ་ཙཱ་བ་ཉི་མ་གྲགས་དང༌། ཀུན་སྤངས་ཆོས་གྲགས་དཔལ་དང༌། ལོ་ཙཱ་བ་བློ་གྲོས་དཔལ་གྱིས་བསྒྱུར་བ་རྣམས་ལ་ཡོད་དེ། དེའི་ལུགས་ལྟར་ན། ཆོས་སྟོན་པའི་ཁྱད་པར་ལ་སྦྱོར་རོ། །གསུམ་པ་ནི། བཅོམ་ལྡན་འདས་དེ་འཁོར་བྱང་ཆུབ་སེམས་དཔའི་ཚོགས་དཔག་ཏུ་མེད་པ་དང་བཅས་ཏེ་བཞུགས་ལ། སྔོན་གྱི་སྨོན་ལམ་དང་ཐུགས་བསྐྱེད་པ་དང༌། ཞིང་སྦྱོར་བ་ཁྱད་པར་ལས། དེ་ལྟར་མཚན་ཐོས་པ་ཙམ་དང༌། འོད་ཟེར་རེག་པ་དང༌། དེའི་གསུང་གི་ཆོས་ཐོས་པ་དང༌། དེ་བཞིན་གཤེགས་པ་དེ་ཡིད་ལ་བྱས་པ་ཐམས་ཅད་མཆོག་ཏུ་ཚེ་རིང་བར་འགྱུར་བའོ། །དེ་འདྲ་ནི་སྤྱིར་དེ་བཞིན་གཤེགས་པ་ཐམས་ཅད་ལ་ཡང་ཡིན་མོད། གདུལ་བྱ་རྣམས་ཚེ་སྤེལ་བའི་འཕྲིན་ལས་ཀྱི་སྒོ་ནས། རྒྱལ་བ་གཞན་ལས་ཀྱང་རྒྱལ་བ་འདི་ཉིད་ཆེས་ཁྱད་པར་དུ་བསྔགས་པ་ཡིན་ནོ། །དེ་བས་ན་མ་ལུས་པའི་སེམས་ཅན་རྣམས་ཀྱི་ཚེ་འཛིན་པ་སྟེ། ཚེ་སྲོག་བརྟན་པར་གནས་པ་དང༌།


TNT17_Page_1045
[མ་དཔེ་གཟིགས་ན་འདིར་གནོན།]

ཚེ་མཐར་ཕྱིན་པ་སྟེ་ཕྱིར་ཞིང་ཡང་ཡང་ཚེ་འཕེལ་བས་མཐར་ཕྱིན་པར་བྱེད་པའི་ཕྱིར། ཚེ་ཚད་ལ་བར་ཆད་མེད་ཅིང་བརྟན་པ་དང༌། ཚད་ལས་ཀྱང་ལྷག་པར་གནས་པར་འགྱུར་བའི་ཐབས་ཀྱི་སྒོ་རྣམ་གྲངས་དུ་མ་དང་བཅས་པའི་ཆོས་ཀྱང་སེམས་ཅན་རྣམས་ལ་སྟོན་ཅིང་བཞུགས་སོ། །དེ་ཡང་ཞིང་ཁམས་དེ་ཉིད་ཁོ་ནར་མ་ཟད་རྣམ་པར་འཕྲུལ་བ་མཐའ་ཡས་པས། འཇིག་རྟེན་གྱི་ཁམས་གཞན་མཐའ་ཡས་པར་ཡང་ཆོས་སྟོན་པའོ། །ཅི་ཞིང་ཁམས་དེ་ན་བཞུགས་པའི་རྒྱལ་བ་དེ་ཡང་མཆོག་གི་སྤྲུལ་པའི་སྐུ་ཡིན་ཞེ་ན། དེ་ཁོ་ན་ཏེ་ཞིང་ཁམས་དམིགས་གསལ་ཅན་དུ་ངེས་པ་དང༌། སྐུ་ཚེ་དང༌། འོད་དང༌། ཆོས་སྟོན་པ་རྣམས་དམིགས་གསལ་ཅན་གྱི་ཁྱད་ཆོས་དང་བཅས་པའི་ཕྱིར་རོ། །དེས་ན་འདིར་ནི་དེ་ལོངས་སྐུའོ་ཞེས་ཁ་ཅིག་འདོད་པ་ནི། སྐུ་གསུམ་གྱི་རྣམ་གཞག་མི་ཤེས་པའི་རྣམ་འགྱུར་རོ། །སྤྱིར་ནས་སངས་རྒྱས་ཐམས་ཅད་ཀྱི་ལོངས་སྤྱོད་རྫོགས་སྐུ་ནི་གཅིག་ཏུ་ཡང་འདྲེས་ལ་རྣམ་པ་ཐམས་ཅད་པར་ཡང་འཆར་པ་ནི་ནམ་དུ་ཡང་འགྲོངས་པ་མི་མངའ་བའི་ཕྱིར། རྒྱལ་བ་ཚེ་དང་ཡེ་ཤེས་དཔག་ཏུ་མེད་པ་ཞེས་བྱ་བར་གསུངས་པ་ཡང་ཡིན་མོད་དེ་ངེས་པའི་དོན་ཁོ་ནའི་སྐབས་ཡིན་པས་སྐབས་འདིར་བཤད་པ་དང་མི་འདྲའོ། །དེ་ལྟར་ན་བཅོམ་ལྡན་འདས་ལོངས་སྐུ་དེ་ཡང་བདག་ཉིད་རྟག་པའི་ཕྱིར། ཚེ་འཛིན་པ་དང༌། རྟག་པ་དེ་ཡང་ཡོན་ཏན་མཐའ་ཡས་པ་དང་ལྡན་


TNT17_Page_1046
[མ་དཔེ་གཟིགས་ན་འདིར་གནོན།]

པའི་ཕྱིར། ཚེ་མཐར་ཕྱིན་པ་ཡིན་ལ། སེམས་ཅན་ཐམས་ཅད་ཀྱང་དེ་ལྟ་བུའི་གོ་འཕང་ལ་འགོད་པར་བཞེད་པའི་ཕྱིར། ཚེ་འཛིན་ཅིང་ཚེ་མཐར་ཕྱིན་པར་བཞེད་པའོ། །ཞེས་སངས་རྒྱས་ཀུན་གྱི་སྤྱི་གཟིགས་དེ་ལ་ཡང་ཡོན་ཏན་དེ་འགྲིག་པར་ནི་འགྱུར་རོ། །དེ་ལྟར་ཡང་མགོན་པོ་བྱམས་པས། རྒྱུ་མཐའ་ཡས་དང་སེམས་ཅན་ཟད་མེད་དང༌། །བརྩེ་དང་འཕྲུལ་དང་མཁྱེན་དང་ཕུན་ཚོགས་ལྡན། །ཆོས་ཀྱི་དབང་ཕྱུག་འཆི་བའི་བདུད་བཅོམ་དང༌། །ངོ་བོ་མེད་ཕྱིར་འཇིག་རྟེན་མགོན་པོ་རྟག །ཅེས་གསུངས་ཏེ། གཟུགས་ཀྱི་སྐུ་རྒྱུན་མི་ཆད་པས་རྟག་པ་དང༌། ཆོས་ཀྱི་སྐུ་རང་བཞིན་གྱིས་རྟག་པ་ཞེས་བྱ་བ་འདི་ནི་ངེས་པའི་དོན་ནོ། །བཞི་པ་ལ་ཐོག་མ་གཟུངས་ཀྱི་ཕན་ཡོན་ནི། འཇམ་དཔལ་གཞོན་ནུར་གྱུར་པ་ཉོན་ཅིག །ཅེས་པ་ལ་སོགས་པ་སྟེ། འཛམ་བུ་གླིང་འདིའི་མི་རྣམས་ཞེས་པ་ནི། བཅོམ་ལྡན་འདས་ཤཱཀྱ་ཐུབ་པ་འཇིག་རྟེན་དུ་བྱོན་པའི་གནས་སྐབས་ནའོ། །ཕལ་ཆེར་ཞེས་པ་ནི་ཚེ་ཚད་ཚེ་ལོ་བརྒྱ་པ་ཡིན་ཡང༌། ཕལ་ཆེར་ཚད་ལ་མི་གནས་པའོ། །དུས་མ་ཡིན་པར་འཆི་བ་ནི། དེ་བཞིན་གཤེགས་པ་བདུན་གྱི་སྨོན་ལམ་གྱི་ཁྱད་པར་རྒྱས་པའི་མདོ་ལས་འབྱུང་བ་བཞིན་ཏེ། དང་པོ་ནད་དང༌། གཉིས་པ་རྒྱལ་པོའི་ཆད་པ་དང༌། གསུམ་པ་བག་མེད་པའི་རྒྱུས་མི་མ་ཡིན་པས་མདངས་འཕྲོག་པ་དང༌། བཞི་པ་མེ་དང༌། ལྔ་པ་ཆུ་དང༌། དྲུག་


TNT17_Page_1047
[མ་དཔེ་གཟིགས་ན་འདིར་གནོན།]

པ་སྲོག་ཆགས་དང༌། མཚོན་ཆ་གཅིག་ཏུ་སྡོམས་པ་དང༌། བདུན་པ་གཡང་དུ་ལྷུང་བ་དང༌། བརྒྱད་པ་དུག་དང་བྱད་ཐེམས་སོགས་གཅིག་ཏུ་སྡོམས་པ་དང༌། དགུ་པ་ཟས་སྐོམས་མ་རྙེད་པའི་རྒྱུ་ལས་བྱུང་བ་སྟེ་རྣམ་གྲངས་དགུའོ། །དེ་ལ་མི་འགྲོ་བ་གང་དག་བདེ་བའི་དུས་ན། མདོ་སྡེ་འདི་རང་ཉིད་ཡི་གེར་འབྲི་འམ། གཞན་འབྲིར་འཇུག་གམ། མིང་སྟེ་མཚན་གྱི་གཟུངས་སྔགས་ཙམ་ཉན་ནམ། གླེགས་བམ་ཁྱིམ་དུ་འཆང་བ་སྟེ་ཁྱིམ་དུ་འཇོག་གམ། ཚིག་བློ་ལ་བཟུང་ནས་བརྗོད་པར་བྱེད་དམ། གླེགས་བམ་ཀློག་པར་བྱེད་དམ། གླེགས་བམ་དང་སྐུ་གཟུགས་ལ་ཉིན་རེ་བཞིན་རྟག་ཏུ་མཆོད་པར་བྱེད་ན། ཐོག་མའི་ཚེ་ཚད་ལོ་བརྒྱའི་བར་དུ་བར་ཆད་མེད་ཅིང་བརྟན་པར་གནས་ལ། དེ་ཟད་པ་ལས་སླར་ཡང་ལོ་བརྒྱ་འཕེལ་ཞིང་ཐུབ་སྟེ། ཚེ་མཐར་ཕྱིན་པར་འགྱུར་རོ། །འཇམ་དཔལ་སེམས་ཅན་ཞེས་སོགས་ལ་གུས་པས་ཡི་གེར་འབྲི་སོགས་ཀྱི་ཕན་ཡོན་བཤད་ནས། དེར་མ་ཟད། འཇམ་དཔལ་སེམས་ཅན་གང་དག་ཅེས་སོགས་ཐོག་མ་ཉིད་ནས་དད་པས་བདག་ཉིད་ཀྱིས་གླེགས་བམ་འབྲི་བ་སོགས་ཆེད་དུ་བསམ་བཞིན་པས་བརྩམས་པ་ཡང་མ་ཡིན། ཉིན་རེ་བཞིན་འདོན་པ་སོགས་མ་ཡིན་ཀྱང༌། གློ་བུར་དུ་བླ་མ་དམ་པ་ལས་གཟུངས་འདི་ཐོས་པར་གྱུར་པ་དེ་དག་ཀྱང༌། ཚེའི་བར་ཆད་ཞི་ཞིང་ཚེ་འཕེལ་བར་འགྱུར་རོ། །


TNT17_Page_1048
[མ་དཔེ་གཟིགས་ན་འདིར་གནོན།]

ཡང་གང་ཚེ་ཡོངས་སུ་ཟད་པ་སོགས་ལ་ཚེ་ཡོངས་སུ་ཟད་ཀར་མཚན་གྱི་གཟུངས་སྔགས་འདི་འཆང་བ་སྟེ་བཟླ་བར་བྱེད་པ་ན། དེ་མ་ཐག་ཚེ་འཕེལ་ཏེ་ལོ་མང་པོར་གནས་པ་ཡང་ཡོད་དོ། །དེ་རྣམས་ཀྱི་དོན་བསྡུས་པ་ནི། འཇམ་དཔལ་དེ་ལྟ་བས་ན་སོགས་ཏེ། འདི་དག་གོ་ཞེས་པ་ནི་གོང་དུ་བསྟན་པ་དེ་དག་གོ །གཉིས་པ་གཟུངས་དངོས་ནི། ཨོཾ་ན་མོ་སོགས་དེ་ཨོཾ་ནི་སྔགས་ཀྱི་འགོ་འདྲེན་པ་སྟེ། རྡོ་རྗེ་རྩེ་མོ་ལས། ཡི་གེ་ཨོཾ་ནི་ཅི་ཡིན་བརྗོད། མཆོག་དང་ནོར་གཏེར་དཔལ་དང་གཡང༌། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། །ཞེས་གསུངས་ཏེ། མཆོག་ནི་དངོས་གྲུབ་བོ། །ནོར་ནི་ལོངས་སྤྱོད་དོ། །དཔལ་ནི་དབང་ཕྱུག་གོ །གཏེར་ནི་ལོངས་སྤྱོད་ཀྱི་རྒྱུ་བསོད་ནམས་སོ། །གཡང་ནི་ལུས་སེམས་བདེ་བ་མྱོང་བ་སྟེ། ཨོཾ་གྱི་མཐུ་ལས་དེ་དང་དེ་དག་སྒྲུབ་པར་བྱེད་དོ། །ངེས་པའི་དོན་དུ་ནི་མཆོག་ལ་སོགས་པ་ལྔ་པོ་ཡེ་ཤེས་རྣམ་པ་ལྔའོ། །ཨོཾ་དང་ལྡན་པའི་དོན་མཐར་ཕྱིན་པར་འགྱུར་བ་ནི། དམ་བཅའ་བ་སྟེ་མི་འགྱུར་བའི་དོན་ནོ། །ཨོཾ་དང་ཨ་ཐ་ནི་བཀྲ་ཤིས་པའི་དོན་དུ་བརྗོད་དོ། །ཞེས་ཀྱང་རབ་ཏུ་གྲགས་སོ། །རིགས་སྔགས་ཀྱི་ནོར་བུ་འཛིན་པ་ཞེས་ཀྱང་བྱ་སྟེ། སྔགས་འབྲུ་གཞན་ཐམས་ཅད་ཀྱི་ནུས་པ་དགེ་ཞིང་བཀྲ་ཤིས་པར་བསྒྱུར་བར་བྱེད་པ་སྟེ། ངེས་པའི་དོན་དུ་ནི། དེ་བཞིན་གཤེགས་པའི་སྙིང་པོ་


TNT17_Page_1049
[མ་དཔེ་གཟིགས་ན་འདིར་གནོན།]

རྟག་ཏུ་དགེ་བ་ཉིད་མཚོན་པར་བྱེད་ཅིང༌། དེས་སྔགས་སྤྲུལ་ཞིང་འདི་བཟླས་པས་རྟོགས་པར་བྱེད་པའོ། །ན་མོ་ནི་ཕྱག་འཚལ་བའོ། །བྷ་ག་ནི་བཅོམ་ལྡན་འདས་སོ། །ཨ་པ་ར་མི་ཏ་ནི་དཔག་ཏུ་མེད་པ། ཨཱ་ཡུར་ཛྙཱ་ན་ནི་ཚེ་དང་ཡེ་ཤེས། སུ་བི་ནི་ཤྩི་ཏ་ནི་ཤིན་ཏུ་རྣམ་པར་ངེས་པ། ཏེ་ཛོ་རཱ་ཛ་ནི་གཟི་བརྗིད་ཀྱི་རྒྱལ་པོ། ཏ་ཐཱ་ག་ཏ་ཡ་ནི་དེ་བཞིན་གཤེགས་པ་ལ། ཨར་ཧ་ཏེ་ནི་དགྲ་བཅོམ་པ་ལ། སམྱཀ་ནི་ཡང་དག་པར། སམ་བུདྡྷཱ་ཡ་ནི་རྫོགས་པའི་སངས་རྒྱས་ལ་ཞེས་སོ། །དེ་དག་ནི་ཕྱག་འཚལ་བའི་སྔགས་སོ། །ཏདྱ་ཐཱ་ནི་འདི་ལྟ་སྟེ། ཨོཾ་ནི་སྔར་བཞིན། པུཎྱེ་གཉིས་ནི་བསོད་ནམས་ལན་གཉིས། མཧཱ་པུཎྱེ་ནི་བསོད་ནམས་ཆེན་པོ། ཨ་པ་ར་མི་ཏ་པུཎྱེ་ནི་དཔག་ཏུ་མེད་པའི་བསོད་ནམས་ཏེ། དེ་ལྟར་བསོད་ནམས་ཞེས་པ་རྣམས་ལ། རྒྱ་སྐད་དུ་མོ་རྟགས་ཡོད་པ་ནི་འདི་གསང་སྔགས་དང་གཟུངས་སྔགས་གཉིས་ཀྱི་ཟླས་ཕྱེ་བའི་གཟུངས་སྔགས་ཡིན་པའི་དོན་གྱི་སྟེ། ཤེས་རབ་ཀྱི་ཕྱོགས་ཀྱི་སྔགས་མཚོན་པ་ཡིན་ལ། ལྷ་མོའི་རྣམ་པ་སྟོན་པར་ནི་མ་ངེས་སོ། །ཛྙཱ་ན་ནི་ཡེ་ཤེས། སམྦྷ་རོ་པ་ཙི་ཏེ་ནི་ཚོགས་ཉེ་བར་བསགས་པ། ཙི་ཏེ་ཞེས་པའི་མོ་རྟགས་ཀྱང་གོང་བཞིན་ནོ། །ཨོཾ་ནི་སྔར་བཞིན། སརྦ་ནི་ཐམས་ཅད། སཾ་སྐཱ་ར་ནི་འདུ་བྱེད། པ་རི་ཤུདྡྷ་ཡོངས་སུ་དག་པ། དྷརྨ་ཏེ་ནི་ཆོས་ཉིད། ག་ག་ན་


TNT17_Page_1050
[མ་དཔེ་གཟིགས་ན་འདིར་གནོན།]

ནམ་མཁའ། ས་མུད་ག་ཏེ་ཡང་དག་པར་འཕགས་པ། སྭ་བྷཱ་ཝ་རང་བཞིན། བི་ཤུདྡྷེ་རྣམ་པར་དག་མ། མཧཱ་ན་ཡ་ཚུལ་ཆེན་པོ། པ་རི་ཝ་རེ་ཡོངས་སུ་སྐོར་མ་སྟེ་ཀུན་ཏུ་ཁྱབ་པའོ། །སྭཱཧཱ་ནི་གཞི་ཚུགས་ཤིག་པ་སྟེ་རིག་སྔགས་གྲུབ་པར་གྱུར་ཅིག་པའོ། དེ་ལ་མཚན་སྔགས་ཀྱི་དོན་ནི་གོང་དུ་བཤད་ཟིན་ལ། འདི་ལྟ་སྟེ་ཞེས་པ་ནི། དེ་བཞིན་གཤེགས་པ་དེའི་ཡེ་ཤེས་ལས་བྱུང་བའི་གཟུངས་སྔགས་ཀྱི་རྣམ་པར་སྤྲུལ་པ་ནི། འོག་ནས་འབྱུང་བ་འདི་འདྲའོ་ཞེས་པའོ། །བསོད་ནམས་དང་པོ་ནི་སྦྱིན་པ་དང༌། གཉིས་པ་ནི་ཚུལ་ཁྲིམས་དང༌། ཆེན་པོ་ནི་བཟོད་པ་དང༌། དཔག་ཏུ་མེད་པ་ནི་བརྩོན་འགྲུས་དང༌། དཔག་ཏུ་མེད་པའི་བསོད་ནམས་གཉིས་པ་ནི་ཏིང་ངེ་འཛིན་ཏེ་བསམ་གཏན་དང༌། ཡེ་ཤེས་ནི་ཤེས་རབ་སྟེ་ཕ་རོལ་ཏུ་ཕྱིན་པ་དྲུག་གི་རང་བཞིན་གསང་སྔགས་ཏེ། ཚོགས་གཉིས་རབ་ཏུ་བསགས་པ་ལས་བྱུང་བའོ། །འདུ་བྱེད་ཐམས་ཅད་ཡོངས་སུ་དག་པ་ནི། དངོས་པོ་དང་དངོས་མེད་ཀྱིས་བསྡུས་པ་འདུས་བྱས་ཀུན་རྫོབ་ཀྱི་ཆོས་གང་གིས་ཀྱང་མ་གོས་པའི་ཆོས་ཉིད་ཤེས་རབ་ཀྱི་ཕ་རོལ་ཏུ་ཕྱིན་མ་སྟེ། ཆོས་དབྱིངས་ནམ་མཁའ་ལྟ་བུ་ལ་ཡང་དག་པར་འཕགས་པ་མོ། གདོད་ནས་རང་བཞིན་རྣམ་པར་དག་པ་ལ། གློ་བུར་གྱི་དྲི་མའང་སྤངས་པའི་ཕྱིར། དག་པ་གཉིས་ལྡན་དུ་གྱུར་པ་མའོ། །ཚུལ་ཆེན་པོ་ནི། ཇི་སྙེད་པ་མ་ལུས་པ་མཁྱེན་


TNT17_Page_1051
[མ་དཔེ་གཟིགས་ན་འདིར་གནོན།]

པའི་ཡེ་ཤེས་ཀྱི་ཀུན་ཏུ་ཁྱབ་པ་མོའོ། །མོ་རྟགས་ཀྱི་ཚིགས་བརྗོད་པ་རྣམས་ནི། ཤེས་རབ་ཀྱི་ཕ་རོལ་ཏུ་ཕྱིན་པར་སྟོན་པའི་ཚིག་སྟེ། དེ་ཡང་ཅི་ཞེ་ན་གཟུང་འཛིན་གཉིས་དང་བྲལ་བའི་ཡེ་ཤེས་སོ། །གཉིས་པ་ཕན་ཡོན་གྱི་སྒོ་ནས་རྒྱས་པར་བཤད་པ་ལ། སྔ་མ་དང་མཚམས་སྦྱོར་བའི་ཚུལ་གྱིས་ཕན་ཡོན་མདོ་ཙམ་སྨོས་པ་ནི། བྱང་ཆུབ་ཏུ་སེམས་མ་སྐྱེད་ཅིང༌། དམ་པའི་ཆོས་མ་སྤངས་ལ། མཚམས་མེད་ཀྱི་ལུས་མ་བྱས་པའི་ལས་དང་པོ་པ་རྣམས་ཀྱིས་ཀྱང་འབྲི་འདོན་མཆོད་གསུམ་བྱས་པའི་ཕན་ཡོན་ནི། འཇམ་དཔལ་དེ་བཞིན་གཤེགས་པའི་མཚན་མཆོག་བརྒྱ་རྩ་བརྒྱད་པོ་སོགས་ཏེ། མདོ་འདི་འབྲི་འདོན་མཆོད་གསུམ་བྱས་པས། དེ་འདྲ་དེ་ཡང་ཚེ་འདིར་ཡང་ཚེ་འཕེལ་ཞིང༌། ཤི་བའི་འོག་ཏུ་ཚེ་དཔག་མེད་ཀྱི་ཞིང་ཁམས་ཡོན་ཏན་དཔག་ཏུ་མེད་པའམ། བདེ་བ་ཅན་ལ་སོགས་པར་སྐྱེ་བར་འགྱུར་ན། བྱང་ཆུབ་ཏུ་སེམས་བསྐྱེད་པ་སོགས་ཀྱིས་ལྟ་ཅི་སྨོས་ཞེས་ཏེ། ཚེ་འདི་ཕྱི་གཉིས་ཀྱི་ཕན་ཡོན་བསྟན་ཏོ། །དེའི་རྗེས་སུ་ཕན་ཡོན་དེ་ལྟ་བུ་ལྡན་པའི་གཟུངས་སྔགས་ནི་འདི་ཡིན་ནོ་ཞེས་པའི་དོན་དུ་སླར་ཡང་གཟུངས་སྔགས་ཉིད་ཟློས་ཏེ་བསྟན་པ་ཡིན་ལ། འདིས་ནི་འོག་མ་རྣམས་ལའང་རིགས་འགྲེའོ། །དེའི་ཚེ་འཁོར་འདུས་པ་དེ་རྣམས་ཀྱི་ཐེ་ཚོམ་བསལ་བའི་ཕྱིར། ཡང་དེའི་ཚེ་སངས་རྒྱས་བྱེ་བ་


TNT17_Page_1052
[མ་དཔེ་གཟིགས་ན་འདིར་གནོན།]

ཞེས་སོགས་མདོ་ཚན་དགུ་སྟེ། གཟུངས་འདི་ཁོ་ན་ལས། ཕན་ཡོན་གོང་འོག་ཏུ་བསྟན་ཅིང་སྟོན་པར་འགྱུར་བ་རྣམས་ལ་ཐེ་ཚོམ་མི་འབྱུང་བའི་དོན་དུ། ད་ལྟར་སྟོན་པ་ཤཱཀྱ་ཐུབ་པས་གསུངས་པར་མ་ཟད། སངས་རྒྱས་དཔག་ཏུ་མེད་པས་གསུངས་ཤིང་བྱིན་གྱིས་བརླབས་པའི་ཕྱིར། རིག་སྔགས་མཐུ་ཆེ་བར་ཡང་བསྟན་པས་ཕན་ཡོན་དཔག་ཏུ་མེད་པ་འབྱུང་བའི་རྒྱུ་མཚན་དུ་འགྱུར་ཞིང༌། སངས་རྒྱས་མང་པོས་མགྲིན་གཅིག་ཏུ་གསུངས་པའི་ཕྱིར། དེ་རྣམས་དཔང་པོར་གྱུར་པས་ཤིན་ཏུ་ཡིད་ཆེས་པའི་ཡང་ཕྱིར་རོ། །འདི་དག་ཕྱོགས་བཅུའི་སངས་རྒྱས་ཀྱི་ཚུལ་དུ་བསྟན་པ་ཡིན་ཏེ། བརྒྱད་ནི་རིམ་པ་བཞིན་དུ་ཤར་སོགས་ཕྱོགས་བཞི་དང༌། དབང་ལྡན་སོགས་མཚམས་བཞི་ལ་གཡས་བསྐོར་རོ། །དགུ་པ་སངས་རྒྱས་བྱེ་བ་ཕྲག་གང་གཱའི་ཆུ་ཀླུང་བཅུའི་བྱེ་མ་སྙེད་ཅེས་གསུངས་པ་ནི། སྟེང་དང་འོག་གི་ཕྱོགས་ལ་སྦྱར་བར་བྱའོ། །གང་ཞིག་ཚེ་དཔག་ཏུ་མེད་པའི་མདོ་སྡེ་འདི་སོགས་ནི། ཕན་ཡོན་གྱི་སྡེ་ཚན་བཅོ་བརྒྱད་བསྟན་པ་སྟེ། དེ་དག་ཀྱང་འདི་རྣམས་ཡིན་ཏེ། བྱང་ཆུབ་ཀྱི་སེམས་མ་བསྐྱེད་ཀྱང༌། ཚེ་ཟད་པ་གསོ་བ་དང༌། ལོ་བརྒྱ་ཐུབ་པ་དང༌། དེ་ལས་ཀྱང་ལྷག་པར་འཕེལ་བར་འགྱུར་རོ། །ཞེས་པ་དོན་ཚན་དང་པོའོ། །གང་སེམས་བསྐྱེད་ཅིང་བྱང་ཆུབ་སེམས་དཔའི་སྤྱོད་པ་ལ་གནས་པ་དེ་ནི། དམྱལ་བ་དང༌། བྱོལ་སོང་དང༌། གཤིན་རྗེའི་འཇིག་རྟེན་


TNT17_Page_1053
[མ་དཔེ་གཟིགས་ན་འདིར་གནོན།]

ཏེ་ངན་སོང་གསུམ་དུ་ནམ་ཡང་མི་སྐྱེ་ཞིང༌། ཡང་མི་ཁོམས་པ་ཞེས་པ་མི་ཁོམ་པ་ལྷག་མ་རྣམས་ཏེ། འདུ་ཤེས་མེད་པའི་ལྷ་དང༌། དམ་པའི་ཆོས་མེད་པའི་འཇིག་རྟེན་གྱི་ཁམས་སུ་སྐྱེ་བ་དང༌། ཀླ་ཀློར་སྐྱེ་བ་དང༌། ལོག་པར་ལྟ་བ་ཅན་དང༌། དབང་པོ་མ་ཚང་བ་རྣམས་སོ། །འདིར་གཤིན་རྗེའི་འཇིག་རྟེན་པ་ནི་ཡི་དྭགས་ཀྱི་འགྲོ་བའོ། །དེ་ལྟར་མི་ཁོམ་པ་རྣམས་སུ་མི་སྐྱེ་ཞིང༌། རྟག་ཏུ་སྐྱེ་བ་དྲན་པ་ནི་དོན་ཚན་གཉིས་པའོ། །གལ་ཏེ་བྱང་ཆུབ་སེམས་དཔའ་སྙིང་རྗེ་ཆེན་པོའི་རང་བཞིན་ཅན་སྟོང་པ་ཉིད་ལ་སྤྱོད་ཡུལ་བས་རིག་སྔགས་འདི་སྒྲུབས་ཤིང་གྲུབ་པར་གྱུར་པ་ན། འདི་འབྲི་སྟོན་མཆོད་གསུམ་བྱས་པས། རིག་སྔགས་མ་གྲུབ་པ་རྣམས་ཀྱིས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་འབྲིར་བཅུག་པའི་ཕན་ཡོན་དང་མཉམ་པ་ནི་དོན་ཚན་གསུམ་པའོ། །དེ་བཞིན་དུ་དེ་ལ་རབ་ཏུ་གནས་པ་སྟེ། མཆོད་པ་ཆེན་པོའི་ཞལ་སྲོ་བ་རྒྱ་ཆེན་པོ་བྱས་པ་དང་མཉམ་པར་འགྱུར་བ་སྟེ་དོན་ཚན་བཞི་པའོ། །རང་གི་སྡིག་པ་ཆེན་པོ་བྱང་བར་མ་ཟད་འབྲི་བ་པོ་དང་ཡོན་བདག་གི་མཚམས་མེད་པ་ལྔ་ལས་ཅི་རིགས་པའི་ལས་བྱས་པ་ཡང་དེ་ཉིད་དུ་བྱང་བ་སྟེ་ལྔ་པའོ། །སྡིག་པའི་ཕུང་པོ་རི་རབ་ཙམ་སྟེ། སྡིག་པ་རྣམ་པ་སྣ་ཚོགས་པ་ཆེས་གྲངས་མང་བ་བསགས་པ་ཡང་བྱང་བར་འགྱུར་བ་སྟེ་དྲུག་པའོ། །བདུད་དང་སོགས་པ་བདུད་ནི་གསོད་བྱེད་དེ། གཞན་འཕྲུལ་དབང་བྱེད་ཀྱི་བདག་


TNT17_Page_1054
[མ་དཔེ་གཟིགས་ན་འདིར་གནོན།]

པོ་སྡིག་ཏོ་ཅན་ཏེ་འདོད་པའི་ལྷའོ། །བདུད་ཀྱི་རིགས་ནི་བདུད་ཀྱི་འཇིག་རྟེན་སྐྱོང་བ་བཞི་ལ་སོགས་པ་ལྷ་དང་འབྱུང་པོ་ནག་ཕྱོགས་ཁོ་ན་དང༌། དེ་དག་གིས་བྱིན་གྱིས་བརླབས་པའི་མིའི་འགྲོ་བ་ཀླ་ཀློ་སྡིག་སྤྱོད་སྟོབས་དང་ལྡན་པ་ལ་སོགས་པ། འདོད་ཆགས་དང་བྲལ་བའི་ལམ་སྟོན་པ་ལ་འཚེ་བ་ཅན་རྣམས་སོ། །གནོད་སྦྱིན་དང་སྲིན་པོ་ཞེས་པ་ནི། བདུད་ཀྱི་རིགས་མ་ཡིན་དུ་ཟིན་ཀྱང༌། གཏུམ་པོ་མ་རུངས་པ་འཚེ་བ་བྱེད་པ་སྟེ། དེ་དག་ལ་སོགས་པ་མདོར་ན་མི་དང་མི་མ་ཡིན་པས་གནོད་པ་མི་འབྱུང་ཞིང༌། དུས་མ་ཡིན་པའི་འཆི་བ་བཟློག་པ་སྟེ། སྒྲུབ་པ་པོ་གཅིག་པུར་མ་ཟད་འཁོར་གཡོག་ཡུལ་འཁོར་བཅས་པ་ལ་ཡང་སྟེ་བདུན་པའོ། །འཆི་བའི་ཚེ་སངས་རྒྱས་བྱེ་བ་ཕྲག་དགུ་བཅུ་རྩ་དགུའི་ཞལ་མངོན་སུམ་དུ་མཐོང་ཞིང་སྒྲིབ་པ་ལྔ་ཕྱིར་བསལ་ནས། ཏིང་ངེ་འཛིན་གྱི་སྒོ་མང་པོ་ཐོབ་པར་འགྱུར་རོ། །དེ་དག་དགྱེས་པས་ལུང་ཡང་སྟོན་པར་འགྱུར་རོ། །སངས་རྒྱས་སྟོང་ཕྲག་དག་གིས་ཕྱག་བརྐྱང་སྟེ། མགོ་ལ་བྱུགས་ཏེ་ཕྱག་གི་དབང་བསྐུར་བར་འགྱུར་རོ། །དེ་ནས་འདོད་ན་མ་དག་པའི་ཞིང་དུ་སྐྱེ་བར་མི་འགྱུར་ཏེ། སངས་རྒྱས་ཀྱི་ཞིང་དག་པ་འབའ་ཞིག་ཏུ་འགྲོ་བ་འདི་ལ་ཐེ་ཙོམ་མེད་ཅེས་པ་བརྒྱད་པའོ། །རྒྱལ་པོ་ཆེན་པོ་བཞི་ཕྱི་བཞིན་དུ་འབྲངས་ཏེ། རྟག་ཏུ་བསྲུང་སྐྱོབ་བྱེད་པ་སྟེ་དགུ་པའོ། །ངེས་པར་སྐྱེ་བ་གཞན་གྱིས་བར་མ་ཆོད་པར། འོད་དཔག་མེད་


TNT17_Page_1055
[མ་དཔེ་གཟིགས་ན་འདིར་གནོན།]

པའི་ཞིང་ཁམས་བདེ་བ་ཅན་དུ་སྐྱེ་བར་འགྱུར་ཏེ་བཅུ་པའོ། །དེ་རྣམས་ལས་མཚམས་མེད་བྱང་བ་དང༌། སྡིག་པ་བྱང་བ་དང༌། ཉེར་འཚེ་སེལ་བ་དང༌། རྒྱལ་པོ་ཆེན་པོ་བཞིས་བསྲུང་བ་རྣམས་ནི། ལས་དང་པོ་པ་དང་རིག་སྔགས་གྲུབ་པ་རྣམས་ཀྱི་ཐུན་མོང་དུ་བསྟན་པ་ཡིན་ལ། གཞན་རྣམས་གཙོ་བོར་རིག་སྔགས་གྲུབ་པའི་དབང་དུ་བྱས་མོད་ཀྱི། ལས་དང་པོ་པ་ལ་ཡང་འབྲས་བུ་དེ་དག་རྗེས་མཐུན་པ་འབྱུང་བའོ། །གཞན་དོན་ངན་འགྲོ་ལས་སྒྲོལ་བ་ནི། ཆོས་འདི་འབྲི་བ་དང༌། བཞུགས་པའི་ས་ཕྱོགས་དེ་ཡང་མཆོད་རྟེན་དང་འདྲ་བར་ཕྱག་བྱ་བའི་འོས་སུ་འགྱུར་ཞིང༌། མཐོང་བ་དང་རེག་པ་དོན་ཆེན་དང༌། བྱོལ་སོང་རྣམས་ཀྱི་རྣ་ལམ་དུ་མདོ་འདི་སྒྲགས་ན་ཡང༌། འཁོར་བ་མཐའ་ཅན་དང༌། རིམ་གྱིས་སངས་རྒྱས་སུ་འགྱུར་ངེས་པ་སྟེ། སྐལ་བ་མཆོག་ནི་ཐོས་པའི་མདོ་ལ་ཡང་གྲོལ་བར་འགྲོ་མོད་ཕལ་ཆེར་ནི་མ་ཡིན་ལ། རིམ་གྱིས་དབང་པོ་སྨིན་ནས་འགྲོ་བ་སྟེ་བཅུ་གཅིག་པའོ། །མཐོ་རིས་ལ་ཕན་འདོགས་པ་ནི། བུད་མེད་ཀྱི་དངོས་པོར་མི་སྐྱེ་བར་གསུངས་པ་ནི་མཚོན་བྱེད་དེ། བུད་མེད་དང་འདྲ་བར་ཤེས་རབ་འཆལ་བ་དང༌། ཉོན་མོངས་མང་བ་དང༌། གཞན་གྱི་དབང་དུ་སོང་བ་ལ་སོགས་པ་བར་དུ་གཅོད་པ་ཅན་དུ་སྐྱེ་བར་མི་འགྱུར་བ་སྟེ་བཅུ་གཉིས་པའོ། །གཟུངས་ཐོབ་པ་རྣམས་ཀྱིས་འདི་འབྲི་འདོན་མཆོད་


TNT17_Page_1056
[མ་དཔེ་གཟིགས་ན་འདིར་གནོན།]

གསུམ་བྱས་པའི་ཕན་ཡོན་ནི། མདོ་འདི་འབྲི་འདོན་སོགས་ཀྱི་ཕྱིར། ཀརྵ་པ་ཎ་གཅིག་བྱིན་པ་དང༌། སྐྱེ་བོ་ཕལ་བ་གཞན་གྱིས་སྟོང་གསུམ་རིན་པོ་ཆེ་སྣ་བདུན་གྱིས་བཀང་སྟེ་སྦྱིན་པ་གཉིས། འདི་ཆུང་བར་མི་འགྱུར་བའི་དོན་ཏེ་བཅུ་གསུམ་པའོ། །དེ་ལ་ཀརྵ་པ་ཎ་ནི། གསེར་གྱི་དོང་ཙེ་འམ། དངུལ་གྱི་ཊང་ཀ་ཡིན་ལ། རིན་པོ་ཆེ་སྣ་བདུན་ནི་རྒྱལ་སྲིད་རིན་པོ་ཆེ་སྣ་བདུན་ནམ། ཡང་ན་ཨིནྡྲ་ནཱི་ལ། ཟླ་བ་ཆུ་ཤེལ་དང༌། པདྨ་རཱ་ག་དང༌། བཻཌཱུརྱ་དང༌། མརྐ་ཏ་དང༌། མུ་ཏིག་དམར་པོ་དང༌། རྡོའི་སྙིང་པོའོ། །དེ་བཞིན་དུ་སྐྱེ་བོ་ཕལ་པས་ཆོས་ཐམས་ཅད་ལ་མཆོད་པར་གྱུར་པ་དང༌། གཟུངས་ཐོབ་པས་འདི་ཁོ་ན་མཆོད་པ་ཡང་མཉམ་སྟེ་བཅུ་བཞི་པའོ། །རིགས་སྔགས་འདི་ལ་བརྟེན་ནས་བདེན་པ་མཐོང་བ་རྣམས་ཀྱིས། འདི་འབྲི་འདོན་མཆོད་བཟླས་བྱས་པའི་ཕན་ཡོན་ནི། སངས་རྒྱས་དཔའ་བོ་བདུན་གྱི་སྐུ་གདུང་གི་མཆོད་རྟེན་ལ་རིན་པོ་ཆེ་སྣ་བདུན་གྱིས་མཆོད་པ་རྒྱ་ཆེན་པོ་བསྐལ་པར་ཕུལ་བས་ཀྱང་ལྷག་པ་སྟེ་བཅོ་ལྔ་པའོ། །སྐབས་འདིར་དཔེ་མང་པོ་ལས། ལོག་པར་དང་སེལ་དང། འཁོར་བ་འཇིག་དང་ཞེས་སོ་སོར་བགྲངས་པ་ནི་ཡི་གེ་མ་དག་པ་སྟེ། ཀྲ་ཀུཙྪནྡ་ཞེས་པ་ཁོ་ན་ལ། ལོག་པར་དད་སེལ་དང། འཁོར་བ་འཇིག་ཅེས་འགྱུར་གྱི་ཁྱད་པར་སོ་སོར་བསྒྱུར་བ་ཙམ་ཡིན་པའི་ཕྱིར་རོ། །དེ་བཞིན་དུ་རི་རབ་དང་མཉམ་པའི་རིན་པོ་ཆེའི་ཕུང་པོ་སྦྱིན་པ་


TNT17_Page_1057
[མ་དཔེ་གཟིགས་ན་འདིར་གནོན།]

ལས་ཀྱང་ལྷག་སྟེ་བཅུ་དྲུག་པའོ། །རྒྱ་མཚོ་ཆུ་ཐིགས་ལས་ཀྱང་ཆེས་མང་བའི་བསོད་ནམས་ཀྱི་ཕུང་པོ་ཐོབ་སྟེ་བཅུ་བདུན་པའོ། །སངས་རྒྱས་ཐམས་ཅད་ལ་ཕྱག་དང་མཆོད་པ་བྱས་པ་ལས་ཀྱང་ལྷག་པར་འགྱུར་ཏེ་བཅོ་བརྒྱད་པའོ། །གཟུངས་སྔགས་འདི་ཡང་ཕ་རོལ་ཏུ་ཕྱིན་པ་དྲུག་གི་རང་བཞིན་དུ་བསྟན་པའི་ཕྱིར། སྦྱིན་པའི་སྟོབས་ཀྱི་སོགས་ཏེ། དེ་ཡང་སྦྱིན་པའི་ཕ་རོལ་ཏུ་ཕྱིན་པའི་སྟོབས་ཀྱིས། རྫོགས་པའི་སངས་རྒྱས་རྣམས་ནི་འཁོར་བ་དང་མྱ་ངན་ལས་འདས་པའི་མཐའ་ལས་ཡང་དག་པར་འཕགས་པ་སྟེ། མི་གནས་པའི་མྱ་ངན་ལས་འདས་པའི་བྱང་ཆུབ་དམ་པ་བརྙེས་པ་ཡིན་ལ། མི་ཡི་སེང་གེ་སངས་རྒྱས་དེས་སྦྱིན་པའི་སྟོབས་ཞེས་བྱ་བ། སྦྱིན་པས་མཐར་ཕྱིན་པའི་ཡེ་ཤེས་གཟུངས་སྔགས་སུ་གྱུར་པ། མཁྱེན་ཅིང་རྟོགས་པ་དང་གྲུབ་པར་གྱུར་ནས། སྙིང་རྗེ་ཅན་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་གྲོང་ཁྱེར་ཏེ། རོལ་ཞིང་བརྩེ་བའི་གནས་ཡིན་པའི་ཕྱིར། གཞན་དོན་ཏེ་དེ་ལ་འཇུག་པ་ན། སྦྱིན་པའི་ཕར་ཕྱིན་གྱི་སྟོབས་ལ་བྱུང་བའི་གཟུངས་སྔགས་འདི་ལྟ་བུའི་སྒྲ་ནི་གྲགས་པར་འགྱུར་གཟུངས་སྔགས་འདིས་འགྲོ་དོན་སྤྱོད་པའོ། །དེ་བཞིན་དུ་ཚུལ་ཁྲིམས་དང་ཤེས་རབ་ཀྱི་བར་ཡང་སྦྱར་བར་བྱའོ། །དེ་ལྟ་བུའི་ཕར་ཕྱིན་དྲུག་གི་སྒྲ་ཡང་གང་ཞེ་ན། འདིའོ་ཞེས་ཏེ་སླར་ཡང་གཟུངས་སྔགས་གསུངས་སོ། །འདིས་ནི་གཟུངས་སྔགས་ཀྱི་ངོ་བོ་དང་རྒྱུ་དང་འབྲས་བུ་དང་བྱེད་


TNT17_Page_1058
[མ་དཔེ་གཟིགས་ན་འདིར་གནོན།]

ལས་རྣམས་བསྟན་ཏེ། རྒྱུ་ནི་ཕྱིན་དྲུག་གོ །ངོ་བོ་ནི་ཡེ་ཤེས་ཀྱི་སྟོབས་སོ། །འབྲས་བུ་ནི་མི་གནས་པའི་མྱང་འདས་སོ། །བྱེད་ལས་ནི་སེམས་ཅན་གྱི་དོན་ཏོ། །ཞེས་གོ་བར་བྱའོ། །གཉིས་པ་སྔགས་ཀྱི་ཐུན་མོང་མ་ཡིན་པའི་དོན་སྟོན་ཚུལ་ནི། སྤྱིར་འདི་དག་སྔགས་ཀྱི་ཚུལ་དུ་འགྲེལ་བ་ན། བྱ་བའི་རྒྱུད་ཁོ་ན་དང་མཐུན་པར་བྱས་ན་ལེགས་མོད། འདིར་སློབ་དཔོན་དགྲ་ལས་རྣམ་རྒྱལ་བས། རྒྱུད་སྡེ་གོང་མ་དང་གོ་བསྟུན་ནས་བྱ་རྒྱུད་ཀྱི་ཆོ་ག་མཛད་དེ། གང་ལྟར་ཡང་ཆོ་ག་ཁ་སྐོང་པ་མཐའ་དག་ནི་དེ་དང་དེར་ཤེས་པར་བྱས་ནས། འདིར་ཐུན་མོང་མ་ཡིན་པའི་དོན་བཤད་ན། སྔོན་བྱུང་ལ་ཞིང་ཁམས་ཡོན་ཏན་དཔག་ཏུ་མེད་པ་ནི། རྗེས་འཇུག་གི་དོན་དུ་སྲུང་འཁོར་གཞལ་ཡས་ཁང་དང་བཅས་པ་སྟོན་ལ། དེ་བཞིན་དུ་སྔོན་དང་རྗེས་འཇུག་གི་དབྱེ་བ་འོག་མ་རྣམས་ལའང་ཤེས་པར་བྱས་ལ། དེར་སངས་རྒྱས་ཚེ་དཔག་མེད་བཞུགས་པ་ནི། བྱ་རྒྱུད་རང་ལུགས་ལྟར་ན། བསྙེན་པའི་དུས་སུ་གཙོ་བོ་རྐྱང་པའི་མདུན་བསྐྱེད་བསྟན་པ་ཡིན་མོད། རྒྱུད་གོང་མའི་རྒྱས་བཀབ་པའི་ལུགས་ལྟར་ན་ནི། བདག་ཉིད་ལྷར་སྒོམ་པའི་རིམ་པ་ཡིན་ལ། གཉིས་ཀ་ལྟར་ཡང༌། ཆོས་སྟོན་པ་ནི་བཟླས་པའོ། །འབྲི་ཀློག་མཆོད་པ་གསུམ་བསྟན་པས་ནི། ཐུན་མཚམས་ཀྱི་སྤྱོད་པའོ། །འཇམ་དཔལ་དེ་བཞིན་གཤེགས་པའི་མཚན་མཆོག་སོགས་ཀྱི་ནི། དེའི་ཕན་ཡོན་བསྟན་ན། དེ་ནས་ཕྱོགས་མཚམས་


TNT17_Page_1059
[མ་དཔེ་གཟིགས་ན་འདིར་གནོན།]

བརྒྱད་ཀྱི་སངས་རྒྱས་རྣམས་དང༌། སྟེང་འོག་གི་སངས་རྒྱས་ནི་དབུས་ཀྱི་སྟོན་པ་རྣམ་པར་སྣང་མཛད་ཚེ་དཔག་མེད་པ་ཤཱཀྱའི་རྒྱལ་པོ་དང་རོ་གཅིག་ཏུ་བསྲེས་ཏེ། དེ་དག་གིས་ནི་མདུན་བསྐྱེད་ལྷ་དགུའི་དཀྱིལ་འཁོར་བྱེད་པ་བསྟན་ཏོ། །བྱ་རྒྱུད་དངོས་ལྟར་ན་སྒྲུབ་པའི་སྐབས་སོ། །ཚེ་ཟད་པ་འཕེལ་བར་བཤད་པ་ནི་འཆི་བ་བླུ་བའི་ཆོ་གའོ། །རབ་ཏུ་གནས་པ་བྱས་པར་འགྱུར་ཞེས་བྱ་བས་ནི། རྟེན་གསུམ་རབ་ཏུ་གནས་པ་དང༌། དཀྱིལ་འཁོར་གྱི་རབ་གནས་ཏེ། སྟ་གོན་དང་དངོས་གཞིའི་མདུན་བསྐྱེད་སྒྲུབ་པའི་ཆོ་ག་རྣམས་བསྟན་ཏོ། །མཚམས་མེད་པ་ལྔའི་ལས་སྦྱོང་བ་དང༌། སྡིག་པའི་ཕུང་པོ་བྱང་བ་གཉིས་ནི། རིག་སྔགས་ཀྱིས་སྒྲུབ་པའི་ཆུ་དང༌། ཕྱག་རྒྱས་དབང་བསྐུར་བ་སྟེ། ཆུ་དང་ཅོད་པན་ནོ། །བདུད་ཀྱི་གླགས་མི་རྙེད་པ་ནི། བཀྲུ་བ་དང་བྱབས་པ་དང་བསྲུང་བའི་ཚུལ་ལོ། །ཇི་ལྟར་དབང་བསྐུར་བའི་ཚུལ་ནི། སངས་རྒྱས་རྣམས་ཀྱི་ཞལ་བསྟན་ཅིང་ལུང་སྟོན་པ་སོགས་ཏེ་ཕན་ཡོན་དང་བཅས་པའོ། །རྒྱལ་པོ་ཆེན་པོ་བཞིས་བསྲུང་བར་བཤད་པ་ནི། འདིའི་བྱ་བ་ཐམས་ཅད་ལ་དེའི་གཏོར་མའི་ཆོ་ག་བསྟན་ཏོ། །ཆོས་ལ་མཆོད་པ་དང༌། སངས་རྒྱས་བདུན་གྱི་མཆོད་རྟེན་ལ་མཆོད་པ་བྱས་པར་འགྲོ་ཚུལ་བཤད་པས་ནི། གླེགས་བམ་མཆོད་ཆོག་དང་ཚ་ཚ་གདབ་པ་སོགས་མཆོད་རྟེན་སྒྲུབ་པ་དང༌། དེ་མཆོད་པའི་ཆོ་ག་ཡང་བསྟན་ཏོ། །དེ་བཞིན་གཤེགས་པ་


TNT17_Page_1060
[མ་དཔེ་གཟིགས་ན་འདིར་གནོན།]

ཐམས་ཅད་ལ་ཕྱག་དང་མཆོད་པ་བྱས་པར་འགྱུར་ཞེས་པས་ནི། དཀྱིལ་འཁོར་ལ་མཆོད་པ་དང༌། དཀྱིལ་འཁོར་དུ་འཇུག་པའི་དུས་ཀྱི་ཕྱག་འཚལ་བ་བསྟན་ཏོ། །དབང་བསྐུར་བའི་ཚིག་ནི་ཕར་ཕྱིན་དྲུག་གི་ཚིགས་བཅད་དོ། །བསྙེན་པ་དང་དབང་གི་སྐབས། ཐུན་མོང་མ་ཡིན་པའི་བྱིན་རླབས་བྱ་བ་ནི། ཚེ་འཛིན་ཅིང་ཚེ་མཐར་ཕྱིན་པ་ཞེས་པས་བསྟན་ཏོ། །རྩ་བའི་ས་བཅད་གསུམ་པ་རྗེས་སུ་ཡི་རང་ནི། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཞེས་པ་ལ་སོགས་པ་སྟེ་མདོ་སྡེ་སྤྱི་དང་འདྲའོ། །འདི་ལ་མཚན་བརྒྱ་རྩ་བརྒྱད་པ་ཞེས་བྱ་བ་ལ་མཚན་བརྒྱ་རྩ་བརྒྱད་ནི་སྭཱཧཱ་མ་གཏོགས་པའི་ཡི་གེ་བརྒྱ་དང་བརྒྱད་ལ་བླ་མ་གོང་མ་རྣམས་བཞེད་དོ། །འོན་ཀྱང་ཅུང་ཟད་དཔྱད་ན་ཨོཾ་གསུམ་པ་ཅན་གྱི་མདོ་ལ་དེ་ལྟར་བཤད་ཀྱང་འགལ་བ་མ་མཐོང་ལ། ཕྱི་རབས་པ་འགའ་ཞིག་ཨོཾ་གཉིས་པ་ཅན་གྱི་གཟུང་སྔགས་མ་དག་སྟེ། ལོ་ཙཱ་བ་འགའ་ཞིག་གིས་དཔེ་འཁྱུད་བྱས་པའི་ཕྱིར་རོ་ཞེས་སྨྲ་བ་ནི། རྫུན་དུ་སྣང་སྟེ་ཨོཾ་གསུམ་པ་དང་གཉིས་པའི་གཟུངས་མདོ་གཉིས་ཀ་ལ་རྒྱ་དཔེ་མང་དུ་ཡོད་པའི་ཕྱིར་རོ། །དེ་ལྟ་བས་ན་གཉིས་པའི་ཕྱོགས་ལ་ནི་མཚན་བརྒྱ་རྩ་བརྒྱད་པ་ལོགས་སུ་ཡོད་དགོས་ཏེ། མཚན་བརྒྱ་དང་དེ་ཉིད་ཀྱི་གཟུངས་མདོ་གླེགས་བམ་ཐ་དད་དུ་ཡོད་པ་ལ་ཡང་མི་འགལ་ཏེ། དཔལ་ཧེ་རུ་ཀའི་མཚན་བརྒྱ་དང་དེའི་སྔགས་བཞིན་ནོ། །དེས་ན་མ་མཐོང་བའི་དོན་ལ་ཁ་མཚོན་གཅོད་པ་


TNT17_Page_1061
[མ་དཔེ་གཟིགས་ན་འདིར་གནོན།]

དཀའོ། །དེའི་ཕྱིར་གཟུངས་མདོ་གཉིས་པོ་ཚིག་རིགས་གཞན་ཐམས་ཅད་འདྲ་བར་བྱུང་ཡང༌། མདོ་གཅིག་ལ་རྒྱ་དཔེའི་ཁྱད་པར་རམ། འགྱུར་བྱེད་ཀྱི་ཁྱད་པར་མ་ཡིན་ཏེ། ཆོ་ག་ཐ་དད་པས་སྒྲུབ་དགོས་པའི་རྒྱུད་དམ་གཟུངས་ཐ་དད་ཡིན་པར་ཤེས་པར་བྱའོ། །སྤྱིར་སངས་རྒྱས་ཀྱིས་གསུངས་པའི་སྔགས་རྒྱུད་ཐམས་ཅད་མདོ་སྡེ་ཙམ་དུ་འདུས་པ་ཡིན་ལ། མདོ་སྔགས་གཉིས་ཀྱི་ཟླས་ཕྱེ་བའི་དབང་དུ་བྱས་ན་ཡང༌། གཞི་མཐུན་པ་མེད་པ་ནི་མ་ཡིན་ཏེ། བྱ་བའི་རྒྱུད་ཀྱི་ནང་ཚན་གཟུངས་རྐྱང་དུ་གྲགས་པ་རྣམས་ནི། མདོ་རྒྱུད་གཉིས་ཀ་ཡིན་ལ་འདི་ཡང་དེ་ལྟར་ཤེས་པར་བྱའོ། །འདིའི་སྒྲས་ཟིན་གྱི་དོན་ཙམ་ཉམས་སུ་ལེན་པ་ནི་ཕ་རོལ་ཏུ་ཕྱིན་པ་ཁོ་ནའི་ཚུལ་དང་མི་འགལ་ལ། དབང་བསྐུར་པ་ལ་ཡང་ལྟོས་པ་མ་ཡིན་ཏེ། བསླབ་པ་ཀུན་ལས་བཏུས་པ་ལས། འོད་ཟེར་ཅན་མའི་གཟུངས་ལ་སོགས་པ་གསུངས་པ་བཞིན་ནོ། །སྒྲས་ཟིན་མ་ཡིན་པ་གསང་བའི་དོན་སྒོམ་པ་ནི། ངེས་པར་དབང་བསྐུར་པ་ལ་ལྟོས་པར་ཤེས་པར་བྱའོ། །ཚེ་དཔག་མེད་པའི་གཟུངས་ཀྱི་མདོ། །མདོ་ཙམ་རྣམ་པར་སྤྲོ་བ་ལས། །དགེ་བ་གང་ཞིག་བསགས་པ་དེས། །འཆི་མེད་རྡོ་རྗེའི་སྐུ་ཐོབ་ཤོག །ཚེ་མདོའི་འགྲེལ་པ་མདོ་ཙམ་འདི་ཡང་རྒྱལ་ཁམས་པ་ཏཱ་ར་ནཱ་ཐས་སྨྲས་པའོ། །ཞུས་དག །མངྒ་ལཾ།། །།


TNT17_Page_1062
[མ་དཔེ་གཟིགས་ན་འདིར་གནོན།]

ཤོག་སྟོང་།

བཀྲ་ཤིས་ཀྱི་རྣམ་བཤད།


TNT17_Page_1063
[མ་དཔེ་གཟིགས་ན་འདིར་གནོན།]

བཀྲ་ཤིས་ཀྱི་རྣམ་བཤད་བཞུགས། ཨོཾ་སྭཱ་སྟི། བཀྲ་ཤིས་ཀུན་ལས་རྨད་བྱུང་བཀྲ་ཤིས་པ། །དགེ་ལེགས་བླ་ན་མེད་པའི་དགེ་ལེགས་ཅན། །རིན་ཆེན་གསུམ་གྱི་གཟི་འོད་རིན་ཆེན་གྱིས། །བདེ་སྐྱིད་དོན་གཉེར་འགྲོ་རྣམས་བདེ་སྐྱིད་ཤོག །འདིར་ཤིས་པ་བརྗོད་པར་འདོད་པས། དཀོན་མཆོག་གསུམ་གྱི་བཀྲ་ཤིས་བརྗོད་པར་བྱའོ། །དེ་ལ་ཕུན་སུམ་ཚོགས་པ་མངའ་བ་ཞེས་བྱ་བ་ནི། ཆོས་ཀྱི་སྐུ་ཕུན་སུམ་ཚོགས་པ་དང༌། གཟུགས་ཀྱི་སྐུ་ཕུན་སུམ་ཚོགས་པ་དང༌། འཕྲིན་ལས་ཕུན་སུམ་ཚོགས་པ་སྟེ། ངོ་མཚར་རྨད་དུ་བྱུང་བ་ཐུན་མོང་མ་ཡིན་པའི་ཕུན་སུམ་ཚོགས་པ་གང་ལ་མངའ་བ་ནི་སངས་རྒྱས་སོ། །ཆོས་གང་ལའང་ཆགས་པ་དང་ཐོགས་པ་མེད་པའི་ཡེ་ཤེས་དང༌། སྒྲིབ་པ་མ་ལུས་པ་རྩ་བ་དང་བཅས་པར་སྤངས་པ། དམིགས་པ་མེད་པའི་ཐུགས་རྗེ་ཆེན་པོ་ནི་ཆོས་ཀྱི་སྐུ་ཕུན་སུམ་ཚོགས་པའོ། །མཚན་དང་དཔེ་བྱད་ཕུན་སུམ་ཚོགས་པ་དང༌། སྟོབས་མཐའ་མེད་པ་དང༌། ཡན་ལག་དྲུག་ཅུའི་གསུངས་དབྱངས་དང་ལྡན་པ་ནི་གཟུགས་ཀྱི་སྐུ་ཕུན་སུམ་ཚོགས་པའོ། །འགྲོ་བ་མཐའ་དག་གི་སྡུག་བསྔལ་སེལ་བ་དང༌། ཁྱད་པར་ཅན་གྱི་ཕུན་སུམ་ཚོགས་པ་ལ་འགོད་པ་སྟེ། རྣམ་པ་གཉིས་ནི་འཕྲིན་ལས་ཕུན་སུམ་ཚོགས་པའོ། །གསེར་གྱི་རི་བོ་འདྲ་ཞེས་པ་ནི།


TNT17_Page_1064
[མ་དཔེ་གཟིགས་ན་འདིར་གནོན།]

སྐུ་ཁ་དོག་བཟང་ཞིང་གཟི་བརྗིད་དང་ལྡན་པས་གསེར་གྱི་རི་བོ་དང་འདྲ་བའམ། ངོ་བོ་རབ་ཏུ་བཟང་ཞིང་རྐྱེན་གང་གིས་ཀྱང་མི་གཡོས་པས་གསེར་གྱི་རི་བོ་གཡོ་བ་མེད་པ་དང་འདྲ་བའོ། །འདིས་ནི་སངས་རྒྱས་དེ་ཉིད། བཟང་བའི་ཕྱིར་ཐུགས་རྗེ་ཆེན་པོ་ཤེས་བྱ་ཐམས་ཅད་ལ་འཇུག་པའི་ཡེ་ཤེས་རྣམ་པ་ཐམས་ཅད་པ་མཐུ་ཐོགས་པ་མེད་པ་དང༌། བརྟན་པའི་ཕྱིར་རྟག་ཅིང་ཐེར་ཟུག་ལ་གཡུང་དྲུང་གི་སྐུར་བསྟན་པ་ཡིན་ནོ། །གང་ཕུན་སུམ་ཚོགས་པ་མི་འཇིག་པ་དེ་ནི་མཆོག་ཏུ་ཕུན་སུམ་ཚོགས་པ་སྟེ། དེ་ཉིད་ཀྱི་ཕྱིར་གསེར་གྱི་རི་བོ་དང་འདྲ་བའོ། །འཇིག་རྟེན་གསུམ་གྱི་མགོན་པོ་ནི་ཐམས་ཅད་ཀྱི་སྐྱབས་དང་སྐྱོབ་པ་བླ་ན་མེད་པར་གྱུར་པ་སྟེ་འཕྲིན་ལས་སོ། །དྲི་མ་གསུམ་ནི་འདོད་ཆགས་དང་ཞེ་སྡང་དང་གཏི་མུག་སྟེ། དེ་རྣམས་བག་ཆགས་དང་བཅས་པ་གཏན་ནས་སྤངས་པའོ། །པདྨོ་རྒྱས་པའི་འདབ་མ་ཤིན་ཏུ་ཁ་བྱེ་བ་ལྟར་ཤེས་བྱ་ཐམས་ཅད་ལ་བློ་གྲོས་རབ་ཏུ་རྒྱས་ཤིང་ཁ་བྱེ་བའི་ཡེ་ཤེས་ཀྱི་སྤྱན་མངའ་བ་དེ་ནི་སངས་རྒྱས་ཏེ། དྲི་མ་གསུམ་སྤངས་པ་ནི་སངས་པ་དང༌། སྤྱན་མངའ་བ་ནི་རྒྱས་པའི་དོན་ནོ། །དེ་ཡང་བུདྡྷཿཞེས་བྱ་བ་ལ་མོ་ཧ་ནཱི་དྲཱ་པྲ་མརྡ་པྲ་བུདྡྷ་པུ་རུ་ཥ་བ་ཏ། ཞེས་གཏི་མུག་གི་གཉིད་སངས་པས་ན་མི་གཉིད་སངས་པ་བཞིན་ཞེས་བྱ་སྟེ། བུདྡྷ་སངས་པའི་དོན་དང༌། བུདྡྷརྦི་ཀཱ་སཱ་ནཱཏ་བུདྡྷ་བི་བུདྡྷ་པདྨ་བ་


TNT17_Page_1065
[མ་དཔེ་གཟིགས་ན་འདིར་གནོན།]

ཏ། ཞེས་པ་བློ་གྲོས་ཁ་བྱེ་ཞིང་རྒྱས་པས་ན། པདྨ་ཁ་བྱེ་བ་དང་འདྲ། ཞེས་པ་བུདྡྷ་རྒྱས་པའི་དོན་ནོ། །འདི་ནི་འཇིག་རྟེན་དུ་དགེ་བའི་བཀྲ་ཤིས་པ་ཐམས་ཅད་ཀྱི་དང་པོར་བགྲང་བ་མཆོག་ཡིན་ཏེ། འདི་བས་མཆོག་ཏུ་གྱུར་པ་གཞན་མེད་པ་དང༌། འཇིག་རྟེན་དང་འཇིག་རྟེན་ལས་འདས་པའི་བདེ་སྐྱིད་ཐམས་ཅད་སངས་རྒྱས་བཅོམ་ལྡན་འདས་ཀྱི་མཐུ་ལས་བྱུང་བའི་ཕྱིར་རོ། །དེ་ཡིས་ཉེ་བར་བསྟན་པ་སོགས་ནི་སྟོན་པ་དེས་བསྟན་པའི་ཆོས་ཏེ། བརྡའི་ཆོས་ནི་སྟོན་པར་བྱེད་པའི་ཚིག་གསུང་དབྱངས་རྣམས་ཡིན་ལ། གང་བསྟན་པར་བྱ་རྒྱུའི་ཆོས་ནི་རྣམ་གྲངས་གསུམ་སྟེ། བླང་དོར་དང་འབྲེལ་བ་བསྒྲུབ་པར་བྱ་བའི་ཆོས་ལམ་དང༌། གང་ཞིག་ཐོབ་པར་བྱ་བ་འགོག་པའི་བདེན་པ་འབྲས་བུའི་ཆོས་རྣམས་དང༌། གང་ཞིག་རྟོགས་པར་བྱ་བ་ཆོས་ཉིད་ཡང་དག་པའི་མཐའོ། །མཆོག་དང་རབ་ནི་ཕྱིན་ཅི་མ་ལོག་པ་མ་ནོར་བའི་དོན་དང༌། མི་གཡོ་བ་ནི་ལུང་གི་དོན་ལ་གཞན་གྱི་སྐྱོན་གདགས་པའི་སྒོ་ནས་གཡོ་བ་མེད་པ་དང༌། ལམ་གྱི་ཆོས་ལ་བོར་དུ་རུང་བར་བཏགས་པའི་སྒོ་ནས་གཡོ་བ་མེད་པ་དང༌། འབྲས་བུ་ཉམས་པ་མི་སྲིད་པས་གཡོ་བ་མེད་པ་དང༌། དེ་བཞིན་ཉིད་ནི་གནས་ལུགས་སུ་མ་སོང་བའི་སྒོ་ནས་སྐྱོན་གདགས་སུ་མེད་པས་གཡོ་བ་མེད་པའོ། །འཇིག་རྟེན་གསུམ་དུ་གྲགས་པ་ནི། སངས་


TNT17_Page_1066
[མ་དཔེ་གཟིགས་ན་འདིར་གནོན།]

རྒྱས་ཀྱི་བསྟན་པ་མ་ཡིན་པ་དག་ནི་ཁ་ཅིག་མིའི་ཡུལ་དུ་གྲགས་ཆེ་བ་སྲིད་ཀྱང༌། འགྲོ་བ་གཞན་གྱིས་གུས་པར་མི་བྱེད་པའམ། ཅུང་ཟད་དགའ་བར་བྱེད་ཀྱང་ཐམས་ཅད་ཀྱིས་མ་ཡིན་ནོ། །དེ་བཞིན་གཤེགས་པའི་བསྟན་པ་ནི། མཐོ་རིས་དང་ས་སྟེང་དང་ས་འོག་ན་གང་བློ་གྲོས་དང་ལྡན་ཞིང་བསོད་ནམས་དང་ལྡན་པ། ཆེས་ཆེ་བ་ཐམས་ཅད་ཀྱིས་བསྔགས་ཏེ་ཚངས་པ་དང་དབང་ཕྱུག་ལ་སོགས་པའི་ལྷ་དང༌། ཀུན་འགྱེད་གཞོན་ནུ་ལ་སོགས་པའི་དགེ་སྦྱོང་དང༌། དྲང་སྲོང་རྒྱས་པ་ལ་སོགས་པའི་བྲམ་ཟེ་དབང་ཆེ་བ་ཆེ་བར་གྲགས་པ་རྣམས་ཀྱང༌། རང་གི་བློ་གྲོས་ལ་ཐེ་ཚོམ་ཟ་ཞིང༌། དེ་བཞིན་གཤེགས་པས་བསྟན་པ་ལ་ནི་ཡིད་ཆེས་པས་བསྟོད་པར་བྱེད་དོ། །དེའི་ཕྱིར་བརྒྱ་བྱིན་ལ་སོགས་པའི་ལྷ་དང་འཁོར་ལོས་བསྒྱུར་བ་ལ་སོགས་པའི་མིས་མཆོད་པའོ། །ཆོས་ཀྱི་དམ་པ་མཆོག་སེམས་ཅན་ལ་བསྟན་པ་དེས་ནི་སྐྱེ་དགུ་སྟེ་འགྲོ་བར་སྐྱེས་ཚད་ཀྱི་སེམས་ཅན་ཆོས་དེ་ལ་བརྟེན་པ་རྣམས་ཀྱི་སྡུག་བསྔལ་རྒྱུ་དང་བཅས་པ་མ་ལུས་པ་ཞི་བར་བྱེད་པ་སྟེ། དེ་ལྟར་དམ་པའི་ཆོས་འདི་ནི། འཇིག་རྟེན་དུ་དགེ་ལེགས་ཐམས་ཅད་རྒྱུ་གྱུར་པའི་བཀྲ་ཤིས་སུ་བགྲང་རྒྱུ་གཉིས་པ་ཡིན་ཏེ། སངས་རྒྱས་ཀྱིས་བསྟན་པའི་ཕྱིར་ན་དེའི་རྗེས་སུ་ནི་བརྗོད་དགོས་ལ། གཞན་འདི་ལས་ལྷག་པ་མེད་པའི་ཕྱིར་གསུམ་པ་སོགས་ཕྱིས་བརྗོད་པར་བྱ་བ་མ་ཡིན་ནོ། །དགེ་འདུན་དམ་པ་སོགས་ཀྱིས་


TNT17_Page_1067
[མ་དཔེ་གཟིགས་ན་འདིར་གནོན།]

ནི་དཀོན་མཆོག་གསུམ་པ་འཆད་དེ། དེ་ལྟ་བུའི་ཆོས་མངོན་དུ་བྱས་པ་ནི་འཕགས་པ་ཡིན་ལ། འཕགས་པ་དེ་ཉིད་མང་དུ་ཚོགས་པ་ནི་འདུས་པའོ། །དེ་ལ་སངྒྷ་ཞེས་བྱ་བ་འདུས་པའི་དོན་དང༌། ཡང་རྣམ་པ་གཅིག་ཏུ་ན། སཾ་ནི་དགེ་བའམ་བཟང་པོའི་དོན་ཡིན་པའི་ཕྱིར། སྐྱེ་བོ་བཟང་འདུན་ལ་ཚོགས་པ་ལྟར་དགེ་བ་སྟེ་ཐར་བའི་བཟང་འདུན་བྱེད་པ་ཡིན་པའི་ཕྱིར་དགེ་འདུན་ཏེ། དམ་པ་ནི་འཕགས་པའི་སྐྱེས་བུའོ། །ཆོས་ལམ་གྱི་བདེན་པ་རྒྱུད་ལ་ལྡན་པ་དང༌། དེ་བཞིན་གཤེགས་པའི་བསྟན་པ་ཐོས་པ་མཆོག་གི་བཀྲ་ཤིས་ཀྱིས་ཕྱུག་པོ་སྟེ། བཀྲ་ཤིས་ནི་དཔལ་འབྱོར་དང་ནོར་གྱི་དོན་ནོ། །མིས་མཚོན་པའི་ས་སྟེང་གི་འགྲོ་བ་མིའམ་ཅི་དང་གནོད་སྦྱིན་དང་གྲུལ་བུམ་དང་སྲིན་པོ་ལ་སོགས་པ་རྣམས་སོ། །ལྷ་ནི་འདོད་པའི་ཁམས་ཀྱི་ལྷ་དྲུག་དང༌། གཟུགས་དང་གཟུགས་མེད་པའི་ཁམས་ཀྱི་ལྷ་དང༌། ལྷས་མཚོན་པའི་དྲི་ཟ་དང་ནམ་མཁའ་ལ་སྤྱོད་པའི་གནོད་སྦྱིན་ལྷ་མ་སྲིན་རྣམས་ཀྱང་ངོ༌། །ལྷ་མ་ཡིན་ཏེ་ཐགས་བཟང་རིས་ལ་སོགས་པ་སྟེ། དེས་མཚོན་པའི་ཡི་དྭགས་དང་ཀླུ་ལ་སོགས་པ་ས་འོག་ན་སྤྱོད་པ་ཐམས་ཅད་དོ། །དེ་ལྟར་ན་སྲིད་པ་གསུམ་གྱིས་མཆོད་པའི་གནས། མཆོད་པར་འོས་པ་ནི་འཕགས་པའི་ཚོགས་རྣམས་ཡིན་ཏེ། ཉོན་མོངས་པ་སྤངས་པའི་ཕྱིར་ཡོན་ཅུང་ཟད་ཕུལ་ཡང་འབྲས་བུ་མཐའ་མེད་པར་འགྱུར་བ་དང༌། རྣམ་པར་གྲོལ་པའི་


TNT17_Page_1068
[མ་དཔེ་གཟིགས་ན་འདིར་གནོན།]

ལམ་སྟོན་པའི་ཕྱིར་རོ། །མུ་སྟེགས་བྱེད་དང་དེའི་སྟོན་པ་རྣམས་ནི། རྣམ་པར་གྲོལ་བའི་ལམ་མི་ཤེས་ཤིང་ཆགས་སོགས་དང་བཅས་པའི་ཕྱིར་མཆོད་འོས་ཁྱད་པར་ཅན་དུ་མི་འགྱུར་རོ། །སྲིད་པ་འདི་ན་ཚོགས་པ་ཇི་ཙམ་ཡོད་པ་རྣམས་ཀྱི་མཆོག་དང་རབ་དང་ཕུལ་དང་གྱ་ནོམ་པ་སྟེ། བདེན་པ་མཐོང་པས་རང་བཞིན་གྱི་ངོ་ཚ་ཤེས་ཤིང༌། བདག་ཉིད་ངན་འགྲོར་འགྲོ་བ་ནི་སྲིད་ལ། འཇིག་རྟེན་དང་འཇིག་རྟེན་ལས་འདས་པའི་བདེ་བ་གོང་ནས་གོང་དུ་འཕེལ་བར་འགྲོ་བའི་ཕྱིར། རང་ཉིད་ཀྱི་དཔལ་གྱི་གཞི་དང༌། འཕགས་པ་རྣམས་གང་དུ་བཞུགས་པའི་གཟི་བྱིན་གྱིས་བདུད་དང་ཉེར་འཚེ་དག་དེངས་ཤིང༌། རྩོད་པ་དང་ནད་ཡམས་ལ་སོགས་པ་མེད་པར་འགྱུར་ལ། ཡོན་འབུལ་བ་རྣམས་ཀྱི་འབྱོར་པ་རྒྱས་པ་དང༌། མཐོ་རིས་དང་ཐར་པའི་རྒྱུ་ལ་སྐྱེ་བོ་རྣམས་འཇུག་པར་འགྱུར་པ་དང༌། རྫུ་འཕྲུལ་དང་སྤྱོད་ལམ་དང་ཆོས་བསྟན་པས་དད་པ་སྐྱེད་པ་ལ་སོགས་པ་མཐོང་པ་དང་ཐོས་པ་ཚུན་ཆོད་ཀྱང་དོན་མཆོག་ལ་སྦྱོར་བའི་ཕྱིར། གཞན་འགྲོ་བ་ཐམས་ཅད་ཀྱི་ཡང་དཔལ་གྱི་གཞིའོ། །དེ་ལྟར་ན་འཕགས་པ་ཉན་ཐོས་རྒྱུན་དུ་ཞུགས་པ་དང་འབྲས་གནས་དང༌། ཕྱིར་འོང་ཞུགས་པ་དང་འབྲས་གནས་དང༌། ཕྱིར་མི་འོང་ཞུགས་པ་དང་འབྲས་གནས་དང༌། དགྲ་བཅོམ་ཞུགས་པ་དང་འབྲས་གནས་ཏེ། གང་ཟག་བརྒྱད་པོ་རྣམས་དང༌། རང་སངས་རྒྱས་རྣམས་དང༌། བྱང་ཆུབ་སེམས་དཔའ་


TNT17_Page_1069
[མ་དཔེ་གཟིགས་ན་འདིར་གནོན།]

འཕགས་པ་ཕྱིར་མི་ལྡོག་པ་རྣམས་དང༌། རྗེས་མཐུན་པ་མོས་པས་སྤྱོད་པའི་ཕྱིར་མི་ལྡོག་པ་རྣམས་ཀྱང་སྟེ། དེ་དག་ནི་འཕགས་པའི་དགེ་འདུན་ཞེས་བྱའོ། །དོན་དམ་པ་མཐར་ཐུག་པའི་དགེ་འདུན་ནི་དེ་བཞིན་གཤེགས་པ་ཉིད་ཡིན་ཅིང༌། ཆོས་མཐར་ཐུག་ཀྱང་ཆོས་ཀྱི་སྐུའོ། །འོན་ཀྱང་རེ་ཞིག་འདིར་དཀོན་མཆོག་རིན་པོ་ཆེ་གསུམ་དུ་བཞག་སྟེ། ཐེག་པ་གསུམ་གྱི་འཕགས་པའི་དགེ་འདུན་འདི་ནི། འཇིག་རྟེན་དུ་དགེ་ལེགས་ཐམས་ཅད་འབྱུང་བའི་བཀྲ་ཤིས་ངོ་མཚར་རྨད་དུ་བྱུང་བ་བླ་ན་མ་མཆིས་པ་གྲངས་སུ་བགྲང་རྒྱུ་གསུམ་པ་ཡིན་ཏེ། ཆོས་ནི་བཀྲ་ཤིས་གཉིས་པ་ཡིན་ལ། འདི་ནི་དམ་པའི་ཆོས་བསྒོམས་པ་ལས་བྱུང་བའི་ཕྱིར་རོ། །བདེ་བ་ཀུན་གྱི་གཞིར་གྱུར་པ། །བདེ་མཆོག་རིན་ཆེན་རྣམ་གསུམ་གྱིས། །བདེ་ལེགས་ཐམས་ཅད་སྩོལ་ཞིག་ཅེས། །བདེ་དང་ཕན་པའི་སེམས་ཀྱིས་བཀོད། །དཔལ་བཀྲ་ཤིས་ཀྱི་རྣམ་པར་བཤད་པ་འདི་ཡང་ཏཱ་ར་ནཱ་ཐའམ་མིང་གཞན་ཀུན་དགའ་སྙིང་པོས། དཔལ་བདེ་འབྱུང་གིས་བཟུང་པའི་གནས་གཉིས་པར་བཀོད་པའོ།། །།ཞུས་དག །བཀྲ་ཤིས།