གྲུབ་ཆེན་བུདྡྷ་གུཔྟའི་རྣམ་ཐར་རྗེ་བཙུན་ཉིད་ཀྱི་ཞལ་ལུང་ལས་གཞན་དུ་རང་རྟོག་གི་དྲི་མས་མ་སྦགས་པའི་ཡི་གེ
གྲུབ་ཆེན་བུདྡྷ་གུཔྟའི་རྣམ་ཐར་རྗེ་བཙུན་ཉིད་ཀྱི་ཞལ་ལུང་ལས་གཞན་དུ་རང་རྟོག་གི་དྲི་མས་མ་སྦགས་པའི་ཡི་གེ་ཡང་དག་པའོ། །
ན་མོ་བཛྲ་དྷ་རཱ་ཡ། དུས་གསུམ་སངས་རྒྱས་ངོ་བོ་རྡོ་རྗེ་འཆང༌། །རིག་ཀུན་བདག་པོ་དཔལ་ལྡན་བླ་མ་ལ། །སྙིང་ནས་གུས་པས་ཕྱག་འཚལ་གསོལ་བ་འདེབས། །ཐུགས་རྗེ་ཆེན་པོའི་བྱིན་གྱིས་བརླབ་ཏུ་གསོལ། འདིར་བདག་ཅག་གི་བླ་མ་དམ་པ་རྡོ་རྗེ་ཐེག་པའི་ལམ་གྱིས་མཆོག་དང་ཐུན་མོང་གི་དངོས་གྲུབ་བརྙེས་པ། རྗེ་བཙུན་བུདྡྷ་གུཔྟ་ནཱ་ཐའི་ཞབས་ཀྱི་རྣམ་པར་ཐར་བ་ཅུང་ཟད་ཅིག་བརྗོད་ན། འཕགས་ཡུལ་ལྷོ་ཕྱོགས་རྒྱ་མཚོའི་འགྲམ་རསྨི་ཤྭ་ར་ཞེས་བྱ་བ་དང་ཉེ་བ་ཨིནྡྲ་ལིང་ག་ཞེས་བྱ་བའི་གྲོང་ཁྱེར་ཆེན་པོར་ཡབ་ནི་ཚོང་དཔོན་ཆེན་པོ་ལོངས་སྤྱོད་བསམ་གྱིས་མི་ཁྱབ་པས་མངོན་པར་མཐོ་བ་ཀྲིཥྞ་ཞེས་བྱ་བ་ལ། ཡུལ་ཐ་དད་ན་བུ་བརྒྱད་ཡོད་པ་ལས། རྗེ་འདི་ནི་ཆུང་སྟག་ཡིན་ཏེ། ཆུང་ངུའི་དུས་ནས་སློབ་དཔོན་ཏིརྠི་ནཱ་ཐ་ཞེས་བྱ་བ་འཁོར་རྣལ་འབྱོར་པ་མང་པོ་དང་
བཅས་པ་ཕྱོགས་དེར་ཕེབ་པས་རྣལ་འབྱོར་པ་བྱེད་པ་ལ་མོས་པར་གྱུར། ཡབ་ལ་ཞུས་པས་ཀྱང་གནང་ནས་རྣལ་འབྱོར་པ་མཛད། མཚན་ནི་བུདྡྷ་ནཱ་ཐ་ཞེས་བྱ་བར་བཏགས། བླ་མ་དེ་ཡང་ལོ་འགའ་རེར། ཡུལ་ཀ་ཙ་ལི་དང༌། གོང་ཀུ་ན་དང༌། ཏུ་ལུ་རཱ་ཏི་ལ་སོགས་པར། གཙོ་བོར་དབེན་པ་བསྟེན་ཅིང་བཞུགས། རྗེ་འདིས་ནི་བླ་མའི་རིམ་གྲོ་བ་མཛད་ཅིང༌། ཡི་གེ་ལ་སོགས་པ་རིག་གནས་ཕྲ་མོ་ལ་བསླབས། བྲམ་ཟེའི་རྣལ་འབྱོར་པ་དཱི་པ་ནཱ་ཐ་ཞེས་བྱ་བ་ལ་སྒྲ་མདོ་ཙནྡྲ་པ་ཡན་ལག་དང་བཅས་པ་ཐམས་ཅད་དང༌། སྡེབ་སྦྱོར་གྱི་བསྟན་བཅོས་དམར་སེར་སྙན་དངགས་ཨ་ལངྐ་ར། ཨ་མ་ར་ཀོ་ཥ་ནས་ཅི་རིགས་པ་དང་བཅས་པ་གསན། བླ་མ་ཏིརྠི་ནཱ་ཐ་དེ། བཅུད་ལེན་གྱི་རྫས་གསོལ་ཞིང་བཞུགས་པས། རྫས་ཀྱི་ནུས་པས་རལ་པ་ནི་ཁྲུ་ཉི་ཤུ་
ཙམ། སྐུའི་སྨ་ར་ཡང་ཁྲུ་བདུན་ཙམ་སྐྱེས་ཏེ། སྐྱེ་བོ་རྣམས་ཡ་མཚན་དུ་གྱུར་པ་ལ། རྒྱལ་པོ་རཱ་མ་རཱ་ཛ་ཐེ་ཚོམ་སྐྱེས། ལེགས་པར་བརྟགས་པའི་ཡིད་ཆེས་ཏེ། ཉག་མ་རེ་རེ་བཞིན་དུ་མཆོག་ཏུ་གྱུར་པའི་མུ་ཏིག་རེ་རེས་བརྒྱན་ནོ། །སློབ་དཔོན་གྱིས་མུ་ཏིག་ཐམས་ཅད་ཕྱོགས་གཅིག་ཏུ་སྤུངས་པས་ཕུང་པོ་ཆེན་པོར་གྱུར་ཏེ། སུ་འདོད་པ་ཁྱེར་ཞེས་དེ་ཉིད་དུ་ཅི་དགར་བོར་ནས། འཁོར་བཅས་ཡུལ་དབུས་སུ་ཕེབས། བླ་མ་དེ་བྷ་ཎཱ་ར་ཤི་ཏེ། བཱ་རཱ་ཎ་སིར་ཐོག་གཅིག་བཞུགས། ཌི་ལིའི་གྲོང་ཁྱེར་དང་ཉེ་བ། བི་ཀྲ་མ་ལོངས་སྤྱོད་ཀྱི་ནགས་སུ་གཙོ་བོར་བཞུགས། བཅུད་ལེན་ཀླ་པ་སྒྲུབ་པར་མཛད་པས། ལེགས་པར་འགྲུབ་སྟེ་སྔར་གྱི་རལ་བ་སོགས་ལྷུང༌། དགུང་ལོ་བཅུ་དྲུག་ལོན་པའི་རྣམ་པ་ཅན་དུ་གྱུར། དམ་པ་འདིས་ཀྱང་བླ་མ་དེ་ལ་སིནྡྷྱཱ་ན་ཏ་པ་ར་མ་ཞེས་བྱ་བའི་གཽ་རཀྵའི་ལུགས་ཀྱི་དབང་བསྐུར་གསན་ནས། འཇིག་རྟེན་དང་འཇིག་རྟེན་ལས་འདས་པའི་ལྷའི་སྒྲུབ་ཐབས་ཀྱང་མང་དུ་གསན། ཌི་ལི་དང༌། ཊི་ལ་དང༌། གཽར་ཥ་ཊ་རི་དང༌། ཧ་རི་དྭ་ར་ཞེས་བྱ་བ། འཕྲོག་བྱེད་སྒོ་ཡང་ཟེར་བ་སྟེ་བྱང་ཕྱོགས་ཀྱི་རི་དང་ཉེ་བ་དེ་རྣམས་སུ་ཡང་ཐོག་རེ་བཞུགས་ཤིང༌། དེ་ལྟར་ལོ་དགུ་ཙམ་ཞིག་སྐབས་སུ་རླུང་གི་རྣལ་འབྱོར་བསྒོམ་པ་དང༌། ཡང་དག་འཇོག་སྤེལ་གྱིན་མཛད། ཕལ་ཆེར་སློབ་དཔོན་པྲཧྨ་ནཱ་ཐ་ཞེས་བྱ་བ་རིག་སྔགས་ཀྱི་ནུས་པས་ཀླུའི་ཡུལ་དུ་བྱོན་པར་གྲགས་
པ་ཞིག་དང༌། ཀྲིཥྞ་ནཱ་ཐ་ཞེས་བྱ་བ་དུག་སྦྲུལ་གྱིས་མིད་ཀྱང་གནོད་པ་མ་བྱུང་བར་ཕྱིར་ཐོན་པའི་རྣལ་འབྱོར་པ་ཆེན་པོ་དེ་གཉིས་ལ་ཡང་གདམས་པ་མང་དུ་གསན། གཽ་རཀྵའི་གསུང༌། མཧཱ་བ་ད་དང༌། སྭ་སཾ་བ་ད་ཞེས་བྱ་བ་རིག་བྱེད་ཆེན་པོ་དང༌། རང་གི་རིག་པ་ཞེས་བྱ་བ་ངེས་དོན་སྟོན་པ་གཉིས། པྲཱ་ཎ་ཤྲིཾ་ཁ་ལ་སྟེ། སྲོག་ལུ་ཁུར་རྒྱད་ཅེས་བྱ་བ། ལུས་དང་འཇིག་རྟེན་གྱི་རྣམ་གཞག་སྟོན་པ། པྲཱ་ཎ་ཏནྡྲ་ཏེ་སྲོག་གི་རྒྱུད་ཅེས་བྱ་བ་རྣལ་འབྱོར་གྱི་ལམ་གཙོ་བོར་སྟོན་པ་ཞིག་སྟེ། གཞུང་ལུགས་དེ་རྣམས་འཛིན་པར་མཛད་ཅིང༌། དེ་དག་གི་བཤད་པ་དང༌། ཉམས་ལེན་གྱི་མན་ངག་ཐོར་བུ་ལྔ་བཅུ་ལྷག་ཙམ་ལས་ཚོགས་མང་པོ་དང་བཅས་པ་ལ། མཁས་པར་སྦྱངས། མཐོ་དམན་བདེ་སྡུག་གི་ཉམས་ཀྱི་གེགས་སེལ་བོགས་འདོན་ཇི་རྙེད་པ་ཞིག་ཞུས། ཕན་གནོད་ཀྱི་སྔགས་དང་ལས་ཚོགས། གཞན་ཡང་མང་དུ་མཁྱེན་ཅིང་གྲུབ་པར་མཛད། དེ་ནས་སྐུ་ཡང་དར་ལ་བབ་པའི་སྐབས་ཡིན་པའི། ད་ནི་སྒྲུབ་པ་རྩེ་གཅིག་པ་ཞིག་བྱ་དགོས་ཤིང༌། སྒྲོ་འདོགས་ཐམས་ཅད་བླ་མ་བཞུགས་དུས་མ་བཅད་ན་མི་ཡོངས་དགོངས་ཏེ། གྷནྡྷ་མྲྀ་གའི་མཆོད་པ་སྟེ། ངོ་བོ་ནི་ཚོགས་ཀྱི་འཁོར་ལོ་ཡིན་ལ། དབང་དང་གདམས་ངག་ཟབ་པ་རེ་ལ་མཆོད་པ་དེ་འདྲ་རེ། གཞན་ཡང་རྙེད་བཀུར་དང༌། ཇི་རྙེད་པའི་ཡོན་རྣམས་འབུལ་བ་དང༌། ཅི་གསུང་སྒྲུབ་པའི་སྤྱོད་ལམ་གྱིས་མཉེས་པར་མཛད་དེ།
ཡང་དང་ཡང་དུ་དྲི་ལན་གྱི་རྣམ་པར་གཏན་ལ་ཕབ་སྟེ། བླ་མ་གསུམ་པོ་དེའི་གདམ་ངག་གི་སྒྲོ་འདོགས་ཆོད་པར་བྱུང་ངོ༌། །གཽ་རཀྵའི་རྗེས་འབྲང་དུ་གྲགས་པ་ཛོ་གི་ཞེས་ཟེར་བ་ལ་སྡེ་ཚན་བཅུ་གཉིས་ཡོད། ནཱ་ཐ་པནྠི། པ་ཝོ་པནྠི། པཀྵ་པནྠི། གོ་པཱ་ལ་པནྠི། པ་ག་ལ་པནྠི། ཨཱ་ཡི་པནྠི། ཙོ་ལི་པནྠི། ཧོ་དུ་པནྠི། དྷྭ་ཛ་པནྠི། བྷེ་ར་གི་པནྠི། མང་ག་ལ་ནཱ་ཐ་པནྠི། སཏྟ་ནཱ་ཐ་པནྠི། ཞེས་པ་རྣམས་སོ། །སྔ་མའི་ནང་སེལ། ནཱ་ཌེ་ཤྭ་རི་ཛོ་ཀི་ཟེར་བའི་སྡེ་གཅིག་ཡོད། ད་ལྟ་ཡང་ནང་པ་ཟང་མ་ཡིན། བླ་མ་ཏིརྠི་ནཱ་ཐ། པྲཧྨ་ནཱ་ཐ། ཀྲྀཥྞ་ནཱ་ཐ་གསུམ་ཀ ནཱ་ཊེ་ཤྭ་རིའི་སྡེ་ཡིན་ནོ། །དེ་ནས་རྗེ་འདིས་ལོ་གཅིག་མ་ལ་ཝའི་ཡུལ་དུ་ནིམྦའི་བཅུད་ལེན་ཟླ་བ་དྲུག ཀླ་པ་ཟླ་བ་དྲུག་བསྟེན། ཕྱིས་སིང་ག་ལིའི་གླིང་དང༌། ཛྷ་མི་གི་རི་དང༌། ཛ་གཏྣཱ་ཐར་ཡང་ཀླ་པ་ཀྱི་སྦྱོར་བ་ཟླ་བ་བཞི་རེ་མཛད་པས། ད་ལྟ་དགུང་ལོ་སྨིན་ཡང༌། ལོ་སུམ་ཅུ་ཙམ་གྱི་ན་ཚོད་དུ་བཞུགས་པ་འདི་ཡིན། དེ་སྐབས་ཀྱང༌། མ་རུས་ཡུལ་དུ་ར་ཋོ་ར་སྟེ་རྒྱལ་པོའི་མི་གཅིག་གིས་ཡོན་སྦྱར་ཏེ། སྤྱིལ་བུ་ཆུང་ངུ་ཞིག་མཛད་ནས་རྩེ་གཅིག་ཏུ་བསྒོམས། མནལ་ལམ་དུ་རྡོ་རྗེ་རྣལ་འབྱོར་མའི་སྐུའི་རྣམ་པ་ཡང་ཡང་བྱུང༌། རེས་འགའ་མངོན་ཤེས་སྐྱེ་བ་སྙམ་བྱེད་པ་དང༌། མི་དང་མི་མ་ཡིན་ཅི་རིགས་པའི་ལྐོག་གྱུར་གྱི་སྤྱོད་པ་མཁྱེན་པ་དང༌། དེ་སོགས་ཡོན་ཏན་གྱི་སྣ་མང་དུ་བྱུང་ཞིང༌།
རེས་འགའ་སྐུ་ལ་ཟུག་ཟེར་སྣ་ཚོགས་ལྡང་བ་དང༌། ཐུགས་ཀྱང་མི་བདེ་ཞིང་མཐོ་དམན་དུ་འགྱུར་བ་སོགས། ཉམས་མཐོ་དམན་སྣ་ཚོགས་པ་བྱུང་ཞིང༌། དེ་ཐམས་ཅད་ཀྱང་བླ་མའི་གདམས་ངག་གིས་ལམ་དུ་བཏང༌། རེས་འགའ་མནལ་ལམ་དུ་རྡོ་རྗེ་རྣལ་འབྱོར་མ་ཆང་འཚོང་མ་ཞིག་གི་གཟུགས་སུ་འོང་ནས། གེགས་སེལ་མཛད་པ་ཡང་ཡང་བྱུང༌། དེ་ནས་ལོ་བཞི་ལྔ་ཙམ་ཞག་རེ་མལ་རེ་མཛད་ཅིང་རྩེ་གཅིག་ཏུ་བསྒོམས་པས། སྒོམས་ཀྱང་མཐོ་དམན་ཆེ་བར་བྱུང་ཞིང༌། ལན་ཅིག་ནུབ་ཕྱོགས་སིན་དྷུའི་ཡུལ་གྱི་གྲོང་ཁྱེར་ན་ག་ར་ཋ་ཋ་ཞེས་བྱ་བར་ཅུང་ཟད་ཅིག་བཞུགས་པའི་སྐབས། བསྙུང་བ་དྲག་པོས་དྲག་ཏུ་བསྙུང་སྟེ། དེ་ཡང་ཇེ་དྲག་ལ་འཆི་ལྟས་རྣམས་ཀྱང་ཚང་བར་བྱུང་བས། འཆི་བའི་གདམས་ངག་བསྒོམ་དགོས་དགོངས། རྩེ་གཅིག་ཏུ་རླུང་བཀག་ཅིང་བསྒོམ་པར་མཛད་པ་ན། ལན་ཅིག་ཉིན་ཞག་སྦྲེལ་མ་ཙམ་ཐུགས་དྲན་མེད་དུ་སོང་ཞིང༌། ཞལ་དབུགས་ཀྱི་འགྱུ་བའང་ཆད། དེ་ཁའི་ངང་ནས་ཐུགས་གསལ་རིག་བདེ་ཉམས་དང་བཅས་པ་རྙེད་ཅིང༌། དེ་ཀ་ཡང་ཡུན་རིང་རབ་བར་དུ་མ་སད། དེ་ནས་སད་ཙམ་ན་བསྙུང་བ་ཀུན་དྲག དེ་ནས་བཟུང་ནས། གསལ་སྟོང་གི་ཏིང་ངེ་འཛིན་ཕལ་ཆེར་རྒྱུན་མི་འཆད་པ་དང༌། ཚུལ་མི་བྱིང་བ་སོགས་ཐུན་མོང་གི་ཡོན་ཏན་ཅི་རིགས་པ་ཤར་པ་འདི་བྱུང་གསུང༌། དེ་རྗེས་སིན་དྷུའི་གནས་ཆེན་མཇལ་བར་བཞེད་དེ་
ཕེབས་པ། ན་ག་ར་ཋ་ཋ་ནས་གནས་ཆེན་གྱི་བར་དུ་ཉིན་ལམ་དགུ་ལ་ཡུལ་སྟོང་པ་འབའ་ཞིག་ཡིན་ཅིང༌། གཅན་གཟན་དང་ཆོམ་པོ་སོགས་འཇིགས་པ་ཆེ། ཁྱད་པར་ཟས་གཡོས་སུ་བྱས་པ་ཅི་རིགས་པ་ཁུར་ཡང་ཉེས་པ་མེད། རྫས་གཞན་ཁབ་དང་སྐུད་པ་རེ་ཡོད་ནའང༌། ཆོམ་པོ་རྣམས་ཀྱིས་ངེས་པར་འཕྲོག་ཅིང༌། བརྡུང་བ་དང་གསོད་པའི་བར་དུ་བྱེད་པ་ཞིག་ཡོད། དེར་ཕེབས་དུས་ནགས་ཚལ་ཞིག་ཏུ། སྟག་གཅིག་དྲུང་དུ་རྒྱུགས་བྱུང་བ། དེ་གཟིགས་པ་ལ་བརྟེན་ནས་རྨི་ལམ་ལྟ་བུར་བདེན་མེད་དུ་ཆམ་སོང་བས་སྟག་ཀྱང་ལོག །ཡང་ལམ་ཞིག་ཏུ་ནགས་ཀྱི་ཁྱི་ཞིག་གིས་རྨུགས་པས་སྐུ་ལ་རྨ་བྱུང་ཞིང༌། ཉིན་གཅིག་ཟུག་ཟེར་ཆེ་བར་ཡོད་པ་ལམ་དུ་ཁྱེར་ཞིང་བསྒོམས་པས། ནམ་ཕྱེད་ཙམ་ན་ཟུག་ཟེར་ཞི་ཞིང་རྨ་ཡང་ཤུལ་མེད་དུ་སོང༌། གནས་ཆེན་ཉིད་དུ་ཕེབས་ནས། དེ་ན་ལྷ་མོ་ཧིང་ག་ལཱ་ཙཱི་ཞེས་བྱ་བ། ལྷ་མོ་ཨུ་མའི་རྟེན་རང་བྱུང་ཞིག་ཡོད་པ། དེའི་དྲུང་དུ་ཞག་འགའ་བཞུགས་པས། ནུབ་སྔ་མ་ཆོ་འཕྲུལ་ཆེར་བྱུང་ཞིང༌། གཉིས་པ་ལ་ཐོ་རངས་ཀྱི་དུས་ཙམ་ན། རྡོ་སྐུ་ཉིད་བུད་མེད་རྒྱན་གྱིས་བརྒྱན་པའི་རྣམ་པར་སོང༌། ཕྱག་བྱེད་པ་ནི་མེད། ཡོ་བྱད་མང་པོ་འབུལ་བ་ལྟར་བྱུང༌། དེ་ན་རེ། རྣལ་འབྱོར་པ་ང་རྒྱལ་ཆེར་མི་རུང༌། གྲུབ་པ་མ་ཡིན་པ་ལ་ང་ཕྱག་མི་འཚལ། ཏིང་ངེ་འཛིན་ཅུང་ཟད་ཙམ་འདུག ཡོ་བྱད་ནི་སྦྱིན་གྱི་ཟེར། དེ་སྐབས་ང་
སངས་རྒྱས་པའི་རྣལ་འབྱོར་པ་ནུས་པ་ཐོབ་པ་ཡིན་པས། མུ་སྟེགས་པའི་ལྷ་ཆེན་པོས་ཀྱང་ཕྱག་འཚལ་ལམ་དགོངས་པ་ཐུགས་ལ་ཡོད་པས། དེ་ཤེས་པར་འདུག །ལར་དེ་དུས་རྒྱུད་སྡེ་མང་པོ་མ་ཐོས་པས། ཡོན་ཏན་ཆུང་ངུ་ལ་ང་རྒྱལ་ཆེན་པོ་ཡོད་གསུངས། ཚུར་ལམ། ལམ་དུ་ཆོམ་རྐུན་མང་པོས་སྐུ་ལ་དབྱུག་པ་བརྡེག་པ་སོགས་བྱུང་བས། དེ་རྣམས་ལུས་སྦྱོང་བཞིན་དུ་སོང་ནས་རྩ་མདུད་གྲོལ། སྐུ་ལུས་ཆེས་ཡང་བར་གྱུར་ནས་ཞག་དགུའི་ལམ་ཉི་མ་ལྔ་ལ་ཆོད་ནས། སླར་ན་ག་ར་ཋ་ཋ་ར་ཕེབས། དེ་ནས་བྱང་ཕྱོགས་ལ་བྱོན་ཏེ། གྲོང་ཁྱེར་མོ་ལ་ཏཱ་ན་དང༌། ཀ་བྷེ་ལ་དང༌། ཁོ་རཱ་སཱ་ན་དང༌། བ་ཛ་སཱ་ན་དང༌། གོ་ཥ་ལ་སོགས་པར་ཐོག་རེ་ཐོག་རེ་བཞུགས་ཤིང༌། ཡུལ་དེ་དག་གི་མི་ཕལ་ཆེར་མོང་གོལ་ཏེ། སྟོད་ཧོར་ཀླ་ཀློ་སྟག་གཟིག་གི་རིགས་ཡིན་པས། ཐོག་མར་ཕེབས་ཙ་ན་ཅོ་འདྲི་བ་དང༌། གནོད་པ་རེ་བྱེད་པ་བྱུང༌། དྲག་སྔགས་ཀྱི་མཐུར་མངོན་པའམ། རྫས་སྔགས་ཀྱི་མིག་འཕྲུལ་ཅུང་ཟད་རེ་བསྟན་ཙ་ན། མགུ་བར་འདུག་གསུང༌། དེ་རྣམས་ཀླ་ཀློ་སྡིག་སྤྱོད་ཀྱི་ཡུལ་ཡིན་ཡང༌། ནུབ་ཕྱོགས་ཨོ་རྒྱན་གྱི་ཡུལ་དང་འབྲེལ་བས། ཞིང་གི་རྣལ་འབྱོར་མ་ཤིན་ཏུ་མང་བར་འདུག་གསུང༌། དེ་ནས་ནུབ་ཕྱོགས་ཨོ་རྒྱན་དུ་ཕེབས། སང་སྐྲྀ་ཏའི་སྐད་དུ་ཨཽ་ཌི་ཡ་ཎ། རང་བཞིན་སྐད་དུ་ཨོ་རྒྱན་ཟེར། ཌ་དང་ར་འདོན་ཚུལ་འདྲ་མིན་ཡོད་པས། ཨཽ་ར་ཡ་ཎ་ཟེར་བ་
འདྲ་ཅིག་ཡོད། དེ་ལ་བོད་ཡིག་འཁྲུལ་གཞི་རྒྱ་འབྱམས་ནས། ཨུ་རྒྱན་དུ་སོང་གདའ་ན་བོད་སྐད་རང་ལ་གྲགས་པའི་ཚད་མར་བྱ་དགོས་དགག་ཏུ་མེད། ད་ལྟ་དེ་ཕྱོགས་རང་ན་ཀླ་ཀློའི་སྐད་དུ་གྲགས་པ་ཀུན་གྱིས་གོ་བ་ལ། ཡུལ་ག་ཛ་ནི་ཟེར་རོ། །གྲུབ་ཆེན་ལྭ་བའི་ན་བཟའ་ཅན་གྱི་ཕུག་པ་དང༌། རྒྱལ་པོ་ཨིནྡྲ་བྷཱུ་ཏའི་ཕོ་བྲང་གི་ཤུལ་དང༌། ཨི་ལོ་བར་པ་ཏ་ཞེས་བྱ་བའི་གནས་ཆེན་རྣམས་སུ་ཕེབས། ཨོ་རྒྱན་གྱི་གནས་མཐིལ་དྷུ་མསྠཱིར་སྟེ། དུ་བའི་གནས་ཞེས་བྱ་བའི་གྲོང་ཁྱེར་ཞིག་ཏུ་ཟླ་གཅིག་ཙམ་བཞུགས། སྤྱིར་ཨོ་རྒྱན་གྱི་གནས་མཐིལ་དེ་རི་རོང་དང་ནགས་འཐུག་པོས་མཐའ་བསྐོར་པའི་དབུས་ན་ཐང་ཁོར་ཙམ་པ་ཤར་ནུབ་ཏུ་ཉིན་ལམ་གཉིས་ཙམ། ལྷོ་བྱང་དུ་བཞི་ཙམ། གྲོང་ཁྱེར་ནི་དྷུ་མསྠཱིར་གཅིག་པུར་འདུག དེ་ཡང་རྒྱ་གར་གྱི་གྲོང་ཁྱེར་ཆུང་ལ་གཏོགས་པ་ཙམ་ཡིན། གཞན་གྷཱ་མ་གྷཱ་མ་འདྲ་འདུག་གསུངས། གནས་མཐིལ་དེ་མ་གཏོགས་པའི་སྒོ་བཞི་སོགས་ཨོ་རྒྱན་གྱི་ཕྱིའི་ཡུལ་ནི་ཤིན་ཏུ་ལྟོས་ཆེ་བར་འདུག ཀླ་ཀློའི་ཡུལ་ཡིན་རུང་གནས་མཐིལ་ན་ཡང་ད་ལྟ་དགེ་འདུན་གྱི་སྡེ་ནི་མེད། གཞི་སྡོད་རྣལ་འབྱོར་པའི་སྡེ་དང༌། དགེ་བསྙེན་དང༌། མུ་སྟེགས་དང༌། ཀླ་ཀློ་སོགས་ཀྱང་མི་འདུག བུད་མེད་ཕལ་ཆེར་ནི་མཁའ་འགྲོ་མའི་རིགས་ཅན་དུ་ཡོད་པར་སྣང་སྟེ། ཕན་གནོད་ཀྱི་སྔགས་ཀྱི་ནུས་མཐུ་ཆེན་པོ་གྲུབ་པ་དང༌། གཟུགས་སྣ་ཚོགས་སུ་
བསྒྱུར་བ་དང༌། ལྟ་སྟངས་ཀྱི་ནུས་པ་ཡོད་པ་དང༌། ཆོ་འཕྲུལ་སྟོན་ནུས་པའི་རིགས་ཅན་ཤིན་ཏུ་མང་བ་གཟིགས་འདུག་ཅིང༌། སྔོན་ཆད་སྟོད་ཧོར་དང༌། ཨ་ཀ་པ་ར་པཱ་ཙས་སོགས་ཀྱི་ལུང་མི་འགྲོ་བ་ཡང༌། སྔགས་ཀྱིས་བསྲུངས་པའི་ནུས་མཐུ་འབའ་ཞིག་ཡིན་གསུངས། གནས་འདི་ཤར་དང་ལྷོ་དང་ནུབ་རྣམས་མཚོ་གསུམ་གྱིས་བསྐོར། ཤར་གྱི་དང་ལྷོའི་རྒྱ་མཚོའི་ལག་བརྒལ་ནས་འོངས་ན་ཧོར་ཀླ་ཀློ་བྷ་ལག་ཁའི་ཡུལ་དུ་སླེབ་འོང༌། དེའི་ས་ཕྱོགས་གཅིག་ན་སློབ་དཔོན་རྟ་མཆོག་གི་སྤྲུལ་པ་མ་བསྡུས་པར་གྲགས་པའི་ནམ་མཁའ་ཐག་རིང་པོ་ན་རྟའི་གཟུགས་བརྙན་ཞིག་དང༌། ལྭ་བ་པས་མཁའ་འགྲོ་མའི་རྡོ་ཆར་བཟློག་སྟེ་ནམ་མཁའ་ལ་ཆགས་པར་མཛད་པའི་ཕ་བོང་ཞིག་བྲག་གི་ངོས་ཞིག་དང་ཉེ་བའི་གནས་ལ་རྟེན་མེད་དུ་གནས་པ་དང༌། གཞན་ཕ་བོང་ཆེ་ཆུང་མང་པོ་བྲག་ལ་ཅུང་ཟད་འབྱར་པའི་ཚུལ་གྱིས་རམ་མེ་གནས་པ་དང༌། པདྨ་བཛྲ་ཀྱི་ཐུགས་དམ་ཧེ་རུ་ཀའི་ལྷ་ཁང་སོགས་ངོ་མཚར་ཅན་གྱི་གནས་ཐམས་ཅད་མཇལ། སྔོན་གྲུབ་ཆེན་གྲགས་ཆེ་བ་ཕལ་ཆེར་གྱི་གནས་རེ་ཡོད་གསུང༌། ལན་གཅིག་ལམ་དུ་འགྲོ་བའི་བུ་མོ་གཅིག །ཆུ་ཧ་ཅང་ཆེ་བ་མ་ཡིན་པ་ཞིག་གི་འགྲམ་དུ། བྱེ་མ་ལ་སྔགས་བཟླས་ནས་ཆུ་ལ་གཏོར་སོང་བས། ཆུའི་རྒྱུན་ཆད་དེ། དེའི་བར་ལ་སོང༌། སླར་ཡང་ཆུ་སྔར་བཞིན་འབབ་པ་དང༌། ཡང་བུད་མེད་ཞིག་བྱ་མ་བྱའི་གཟུགས་སུ་བསྒྱུར་ནས། ནམ་མཁའ་ལ་འཕུར་
ཏེ་ཐག་རིང་པོའི་ཤིང་ཞིག་ལ་བབས་སོང༌། དེ་སོགས་འཇིགས་ཤིང་ངོ་མཚར་བ་མང་པོ་འདུག་གསུང༌། འོན་ཀྱང་ཞིང་གི་རྣལ་འབྱོར་མའི་ཆོ་འཕྲུལ་དེ་དག་ནི་རྗེ་ཉིད་ཀྱི་གཟིགས་པ་ཡིན་གྱི་སྐྱེ་བོ་ཕལ་བས་མཐོང་པའི་སྤྱོད་ཡུལ་མིན་ནམ་སྙམ་མོ། །དྷུ་མཥྛི་རར་བཞུགས་པའི་སྐབས་སྨྀག་སྒྱུ་ལ་སོགས་པའི་རྟགས་ལྔ་རྒྱུད་ནས་གསུངས་པ་བཞིན་དུ། ཤིན་ཏུ་གསལ་ཞིང་བརྟན་པར་བྱུང༌། རང་དང་སྣང་བ་ཐམས་ཅད་རྡོ་རྗེ་ཕག་མོའི་དཀྱིལ་འཁོར་དུ་རང་ཤར་ལ་སྣང་བ་ཞག་གསུམ་ཙམ་ཉིན་མཚན་འབྲལ་མེད་དུ་བྱུང་མོད། ཕྱིས་ཡང་ཡལ་སོང་གསུང༌། དེ་ནས་རིམ་གྱིས། སྟོད་ཧོར་གྱི་ཡུལ་མང་པོ་བརྒྱུད་ནས་ཁ་ཆེར་ཕེབས། ས་ར་དཱ་དང་ན་ར་དཱ་སོགས་མུ་སྟེགས་ཀྱི་གནས་རྣམས་སུ་བྱོན། ཤིན་ཏུ་འཚུབ་ཅིང་ཐུགས་དམ་ཡང་གོང་འཕེལ་དུ་བྱུང༌། དྷ་ར་ཏ་བྷོ་ཊ་སྟེ་ནང་ཁོམ་དུ་གྲགས་པ་དང༌། ཀས་ཀཱ་ར་ཞེས་གྲགས་པ་བོད་ལ་རྒྱུག་པའི་སྟོད་ཧོར་གྱི་ཡུལ་རྣམས་སུ་བྱོན། བོད་དང་ལི་ཡུལ་གྱིས་སོ་མཚམས་དང༌། པར་སིག་གི་བར་མཚམས་དང༌། ཁ་ཆེ་དང་མོང་གོལ་གྱི་ཡུལ་འདི་ཀུན་ལ་ཁོ་རང་ཡུལ་སྐད་དུ་ཆག་སོ་ཟེར་རོ། །སླར་ཡང་བླ་མ་ཏིརྠི་ནཱ་ཐ་མཇལ་དུ་ཕེབས། ལོ་རྒྱུས་ཞུས་པས་ཤིན་ཏུ་དགེས་པར་བྱུང༌། ཡང་ཌི་ལི་ནས་ལྷོ་ལ་ཕེབས་ཏེ། བྷི་མེ་ཤྭ་ར་ཞེས་བྱ་བ། དབང་ཕྱུག་གི་ལྷ་ཁང་སྟོང་པ་ཞིག་ཏུ་བཞུགས་པས། སྲོད་ཀྱི་ཐུན་ལ་རོ་ལངས་མང་པོ་ལག་ཏུ་དབྱུག་པ་ཐོགས་ཏེ། གནོད་པ་སྐྱེལ་དུ་བྱུང་བ་ལ། ཐུགས་གཡོ་བ་མེད་པ་དང༌། རླུང་བཀག་སྟེ་བཞུགས་པས། དེ་རྣམས་རུས་དུམ་དུ་སིལ་གྱིས་ཞིག །དེ་མ་ཐག་ཏུ་འབྲུག་སྒྲ་
ཙམ་གྱི་སྒྲ་ཞིག་གྲགས་པ་དང་མཉམ་དུ་བདེ་སྟོང་གི་ཏིང་ངེ་འཛིན་ལ་སོང་སྟེ། ཉི་མ་ཤར་བའི་བར་མ་སད། དེ་ནས་ཀྱང་ཞག་མང་པོའི་བར་དུ་སྐུ་ལུས་བདེ་བ་ཆེན་པོས་གང༌། དེ་ཡན་ཆད་དུ་ལོ་བཅུ་དྲུག་ཙམ་གཙོ་བོར་བསྒོམ་བཟླས་དང༌། རླུང་དང་སེམས་གནས་ཀྱང་མ་ཆག་པར་མཛད། འདི་ནས་རླུང་ཅི་རིགས་པར་ལས་སུ་རུང་བར་བྱུང་བས་འདི་ཕྱིན་རྫོགས་རིམ་གཙོ་བོར་མཛད་གསུང༌། དེ་ནས་ལྷོ་ཕྱོགས་དང་ཉེ་བ་ཨུ་ཤིར་ཞེས་བྱ་བ། ཡུལ་ཆུང་ངུ་ཞིག་ན། རྡོ་རྗེ་འཇིགས་མཛད་ཀྱི་ལྷ་ཁང་མར་མེ་མཛད་བཟང་པོས་རབ་གནས་མཛད་པ། ད་ལྟ་ལུང་སྟོང་ན་ཡོད་ཅིང༌། གྲོང་ཁྱེར་བའི་མི་རྣམས་ཀྱི་རྐྱེན་སེལ་དུ་ལོ་རེ་བཞིན་མཆོད་པ་ཆེན་པོ་ཡོད་པ། ཡུལ་ཆོས་དང་བསྟུན་པའི་གྲོང་ཁྱེར་བ་རྣམས་ཀྱིས་ནི། ཁྲག་མཆོད་བྱེད་པ་ཞིག་ཡོད་པ་དེར་ཡུན་རིང་པོ་བཞུགས། ལན་གཅིག་བདེ་ཉམས་གཅིག་གིས་རྐྱེན་བྱས་ཏེ། ཉིན་ཞག་དྲུག་ཙམ་ཏིང་ངེ་འཛིན་ཐུན་གཅིག་ལ་སོང་ཞིང༌། ཕྱིའི་སྣང་བ་ཐམས་ཅད་འགགས། ནང་བདེ་སྟོང་གི་ཉམས་ཁྱད་པར་ཅན་ལ་རྩེ་གཅིག་ཏུ་གནས་པར་འདུག་གསུང༌། འདི་ཕྱིན་དྭངས་མ་རགས་པ་བརྟན་ཅིང་དབང་ཐོབ་པ་བྱུང༌། དེ་ནས་མ་རུར་ཕེབས་པདྨ་བཛྲ་གྱིས་བཞེངས་པའི་ཀྱཻ་རྡོ་རྗེའི་ལྷ་ཁང༌། དམ་ཚིག་ཉམས་པས་ཞལ་རས་མཐོང་ན་ཁྲག་སྐྱུག་པར་གྲགས་པ་དེ་མཇལ། དེ་ནས་ཨཱ་བྷུའི་མུ་སྟེགས་ཀྱི་གནས་དང༌། ཡུལ་སཽ་རཥྟ་ན་མ་སི་ཏ་སྟེ་ཀླ་ཀློའི་ལྷ་ཁང་ཞིག་ཏུ་
སྨོ་བརྫུས་མཛད་ཅིང་ཐོག་རེར་བཞུགས། ཡུལ་ཀད་ཙ་རུ་བླ་མ་ཏིརྠི་ནཱ་ཐ་ཕེབས་པ་གསན་ཏེ་མཇལ་དུ་བྱོན། ཞག་གསུམ་ཙམ་བཞུགས། བླ་མ་དེ་ལྷོ་ཕྱོགས་སུ་ཕེབས་སོང༌། ཡུལ་སཽ་རཥྟར་སོ་བ་ནཱ་ཐ་སྟེ་དབང་ཕྱུག་གི་ལིངྒ་དང༌། བི་རཱུ་པའི་རྡོ་སྐུ་རང་བྱུང་ཡང་མཇལ་བར་མཛད། ལྷོ་ཕྱོགས་ས་ཧེ་ར་བྷི་ཐང་ཞེས་པའི་གྲོང་ཁྱེར། ལམ་སྲང་རང་ལ་ཡང་ཉིན་ལམ་གསུམ་བཞི་ཙམ་འགྲོ་དགོས་པ་ཞིག་ཡོད་པ་དེར། དབྱར་ཞིག་བཞུགས་པས་ཐུགས་དམ་ཤིན་ཏུ་འཕེལ་ཞིང་རྒྱུ་འགྲུལ་ཞིག་ལ་ཕེབས་པ་ལ། སྨད་འཚོང་མ་ཞིག་གིས་ཁྲུས་བྱས་པའི་ཁྲུས་ཁུ་ཁང་སྟེང་ནས་ཕོ་བ་དབུ་ལ་ཕོག་པས། དེ་དང་མཉམ་དུ། བིཛྙཱ་ན་ཛྙཱ་ན། ཨ་བརྫི་ཏ་བི་བརྫི་ཏཾ་ཞེས་རྣམ་ཤེས་དང་ཡེ་ཤེས་སྤང་བྱ་དང་སྤོང་བྱེད་མེད་ཅེས་པའི་སྒྲ་གྲགས་པ་ཡང་གསན་པས། དེ་ཉིད་དུ་ལྟ་བ་ལ་ངེས་ཤེས་ཆེན་པོ་བརྙེས། དེ་ནི་ཡེ་ཤེས་ཀྱི་རྣལ་འབྱོར་མ་ཞིག་ཡིན་པ་འདུག་གསུང༌། ལྷོ་ཕྱོགས་མཐིལ་གྱི་ཕྱི་ནང་གྀི་གནས་ཕལ་ཆེར་དུ་ཕེབས་ཤིང༌། སྔ་ཕྱིར་བགྱིས་ན་ལྷོ་ཕྱོགས་ཀྱི་ཡུལ་གྲུ་ཐམས་ཅད་དུ་མ་བྱོན་པ་ཙམ་མེད། དེ་ཡང་མར་ཧ་ཊ་དང༌། ཁཱ་ན་དེ་ས་དང༌། ཏཾ་བ་ལ་དང༌། བི་དྱཱ་ན་ག་ར་དང༌། ཀརྞ་ཊ་ཀ་དང༌། ཏྲི་ལིངྒ་དང༌། ཏྲི་མལ་དང༌། ཙནྩི་དང༌། མ་ལྱཱ་ར་དང༌། ཙཱ་རི་ཏྲ་དང༌། མརྦ་ར་དང༌། ཀོངྐུ་ན་དང༌། ཙཻ་བ་ལ་དང༌། ནི་ཙཱ་མས་དང༌། ནི་ཙམྦྷ་ཧ་ར་དང༌། ཙནྡྲ་དུ་ར་དང༌། པཉྩ་བྷ་ཏཱ་ར་དང༌། ཙ་ར་མཎྜལ་དང༌།
མོ་ར་མཎྜལ་དང༌། ཛ་ལ་མཎྜལ་དང༌། ཏ་ལ་མཎྜལ་དང༌། ཏུཎྜ་མཎྜལ་དང༌། བྷོ་ག་མ་ལྱ་ར་དང༌། ཀ་ལིངྐ་དང༌། གཞན་ཡང་ཡུལ་ཕྲན་སྣ་ཚོགས་པ་དེ་དག་ནི། ལྷོ་ཕྱོགས་མཐིལ་ཡིན་ནོ། །དེ་ནས་ཀོངྐུ་ན་ནས། རྒྱ་མཚོ་ལ་ནུབ་ཕྱོགས་སུ་གྲུ་བཏང་ནས་བྱོན་པས། འགྲོ་ལྡིང་གི་གླིང་སྟེ། རྒྱ་སྐད་དུ། ཌ་མི་ཌོ་དྭི་པ་ཞེས་པར་ཕེབས། འདི་ལ་ཀླ་ཀློ་དང་ཡུལ་མཐའི་མི་དང༌། གླིང་ཕྲན་པ་རྣམས་ཀྱི་སྐད་དུ། སམ་ལོ་ར་ན་སོ་ཟེར་གྱིན་གདའ། གླིང་དེ་ན་གསང་སྔགས་ཀྱི་བསྟན་པ་ཆེས་དར་བ་ཡོད། མངོན་ཤེས་དང་ལྡན་པའི་སློབ་དཔོན་སུ་མ་ཏི་ཞེས་བྱ་བའི་པཎྜི་ཏ་གཅིག་ལ། བདེ་མཆོག་དང༌། དགྱེས་རྡོར་གྱི་དབང་གསན་ནས། དགྱེས་རྡོར་གྱི་རྒྱུད་ལ་བཤད་པའང་ཞིབ་རྒྱས་སུ་གསན། དགྱེས་རྡོར་འདི་སློབ་དཔོན་པདྨ་འབྱུང་གནས་ཀྱི་ལུགས་ཡིན་ཅིང༌། སྤྱིར་གླིང་དེ་ན་རྒྱུད་སྡེ་བཞི་ཀའི་བཀའ་མ་ཆད་པ་དང༌། ཁྱད་པར་བླ་མེད་ཆེས་དར་དུས་འཁོར་མ་གཏོགས་རྒྱ་གར་ན་ཡོད་པ་ཕལ་ཆེར་དེ་ན་ཡོད། ཕུར་བུ་དང་ཁྲོ་བོ་བཅུའི་རྒྱུད་དང༌། ཧེ་རུ་ཀའི་རྒྱུད་མང་པོ་དང༌། ཕྱག་ན་རྡོ་རྗེ་དང་མཁའ་ལྡིང་དང༌། མ་མོ་དང་ནག་པོ་ཆེན་པོ་སོགས་དང༌། རྟ་མགྲིན་བླ་མེད་ཀྱི་རིགས་རྒྱ་གར་ན་མེད་པ་མང་པོ་ཡང་དེ་ན་ཡོད་པ་དང༌། སློབ་དཔོན་པདྨ་འབྱུང་གནས་ནས་བརྒྱུད་པའི་ཆོས་ཀྱང་མང་བར་ཡོད་འདུག དགེ་འདུན་མང་པོ་ཡོད་ཀྱང་འདུལ་བའི་ལག་ལེན་དག་པོ་མེད་དེ། དགེ་སློང་རྣམས་གོས་
ནག་གྱོན་པ་ཕལ་ཆེར་ཆང་འཐུང་བ་སོགས་ཡོད་པར་འདུག་གོ །གླིང་དེར་ལོ་གཅིག་ཙམ་ནས་བླ་མ་དེ་སྐུ་འདས་པས། རྒྱུད་ཀྱི་འཕྲོས་ཡང་བག་ཙམ་མ་རྫོགས་ཤིང༌། མན་ངག་ཀྱང་གསན་མ་ཐུབ་པས། སློབ་དཔོན་དེའི་སྲས་མོ་རྣལ་འབྱོར་མ་ནུས་པ་ཐོབ་པ། མ་ཏི་སྭ་མཱི་ཞེས་བྱ་བ་ཞིག་ལ་ཆོས་ཀྱི་འཕྲོ་རྣམས་གསན། དེ་ནས་སླར་ཚོང་པ་དང་ལྷན་ཅིག་གྲུར་ཞུགས་ནས་ཤང་ཁ་དྭི་པ་སྟེ། དུང་གི་གླིང་དུ་ཕེབས། དེ་ན་བདེ་འབྱུང་གི་གནས་ཞེས་བྱ་བ། རི་བོ་སྨན་སྣ་ཚོགས་སྐྱེ་བ་ཞིག་འདུག །དེར་ཐོག་གཅིག་བཞུགས། གླིང་དེ་ན། ག་ཛ་ནཱ་ས་ཞེས་བྱ་བའི་གླིང་ནས་འོངས་པའི་མི་གདོང་མི་ལ། སྣ་གླང་པོ་ཆེ་ལྟ་བུར་ཡོད་པ་མང་པོ་གཟིགས། དེ་ནས་ལྷོར་བྱོན་པ་ལ། པཱ་ལ་ཏ་ཞེས་བྱ་བའི་གླིང་དུ་ཕེབས། དེ་ནས་ཤར་ཕྱོགས་སུ་གྲུ་བཏང་བས། སིང་ག་ལིའི་གླིང་དུ་ཕེབས་ཏེ་དེར་ལོ་ལྔ་ཙམ་བཞུགས། གླིང་དེ་ནི། དགེ་འདུན་གྱི་སྡེ་མང་ཞིང༌། ཆོས་ཀྱང་དར་ལ། ཤིན་ཏུ་འབྱོར་པ་ཆེ་ཞིང༌། སྐྱིད་པ་ཡིན་ཏེ། ཛ་ལཱི་མུཀྟི་ཏ་ལཱི་མ་ཎི་ཀ ར་ནེ་བ་ནེ་ཀུཉྫ་ར་གྷ་རི་གྷ་རེ་པདྨ་ནཱི་ནཱ་རི། བྷ་ལཱ་དེ་ཤ་སིངྒ་ལ་ཞེས་པ་སྟེ། ཆུ་རྣམས་མུ་ཏིག་དྭངས་གཞི་ནོར་བུས་གང་བ། ནགས་རྣམས་གླང་པོ་ཆེས་གང་བ། ཁྱིམ་ཐམས་ཅད་བུད་མེད་པདྨ་ཅན་གྱིས་གང་བ་ཟེར་ཏེ། དོན་ལའང་ཕྱོགས་འདྲ་འདུག་གླིང་དེ་རྒྱ་ཁྱོན་ཡང་ཤིན་ཏུ་ཆེ་བར་འདུག་སྟེ། ཐམས་ཅད་ཞབས་ཀྱིས་བཅགས་གསུངས། ཤྲཱི་བཱ་དུ་ཀ་ཞེས་བྱ་བ། བཅོམ་
ལྡན་འདས་ཀྱི་ཞབས་རྗེས་བཞུགས་པ་ལ། ཞག་བདུན་ཙམ་གསོལ་བ་འདེབས་པར་མཛད་པས། ཞབས་རྗེས་ནས་འོད་ཟེར་མང་པོ་འཕྲོས་ནས་སྐུ་ལུས་ལ་ཐིམ་པའི་སྣང་བ་བྱུང༌། ཀན་ཌ་ལ་ཞེས་བྱ་བའི་ཡུལ་ཞིག་གི་ཕུ། ནགས་འཐུགས་པོ་ཞིག་གི་དབུས་ན་བྲག་ཕུག་འདུག །དེ་ན་སྔོན་སློབ་དཔོན་ཆེན་པོ་ཤནྟི་པས་སིངྒ་ལིའི་གླིང་དུ་ཕེབས་པའི་དུས་ཀྱི་དངོས་སློབ། མ་ཤཱ་ཀ་ར་ཤནྟི་བོད་སྐད་དུ་གྲགས་པའི་འབྱུང་གནས་ཞི་བ་ཞེས་བྱ་བ། དགུང་ལོ་བདུན་བརྒྱ་ཡང་ལྷག་ལོན་པ་ཞིག་བཞུགས་པ། སློབ་མ་གཅིག་མ་གཏོགས་པ་ཕལ་ཆེར་ལ་མི་མཇལ་ནའང༌། རྗེ་འདིས་ཕུག་པའི་སྒོ་དྲུང་དུ་བཞུགས་པས་ནང་དུ་བྱོན་གསུང་མཇལ་བས་ཤིན་ཏུ་དགེས་ཤིང༌། ཆོས་འབྲེལ་ཞིག་ཀྱང་གསན། དེ་ཡང་གྲུབ་པ་ཡིན་གྱི་ཕལ་པ་ཆོས་མཐོང་བ་རང་ཅིག་མིན་པར་སེམས། རྒྱལ་པོ་རཱ་ཧེ་ཤིང་ཁ་བྷན་ཊ་རི་ལ། ཆོས་ཀྱི་གླེང་བ་གསུངས་པས། མཆོག་ཏུ་མགུ་བ་ཐོབ་པར་བྱུང༌། གླིང་དེ་ནས་གྲུ་བཏང་ནས་ཨུ་ལིངྒ་ཞེས་བྱ་བའི་གླིང་ཕྲན་ཞིག་ཏུ་ཅུང་ཟད་བཞུགས། དེ་ནས་ཡང་ཡུལ་དེའི་ཚོང་བ་འགའ་ཞིག་དང་ལྷན་ཅིག་ཏུ། ཨ་མུ་ཀ་ཞེས་བྱ་བའི་གླིང་ཕྲན་ཞིག་ཏུ་ཕེབས། འདི་ཕན་ཆད་དུ་ནི་རྗེ་ཉིད་རང་མ་གཏོགས་འཛམ་བུ་གླིང་གི་མི་འགྲོ་བ་མེད་པ་ལྟ་བུ་ཡིན་གསུང་ཞིང༌། སིང་ག་ལའི་གླིང་ནས་ད་བར་ཞག་སུམ་ཅུ་ལྷག་ཙམ་རེ་རྒྱ་མཚོ་ལ་གཟིངས་གཏོང་དགོས་གཉིས་དང༌། གླིང་གཉིས་
པོ་དེ་ལའང་ཟླ་ལམ་ཙམ་རེ་ཡོད་གསུངས། དེ་ནས་གླིང་དེ་དག་གི་མི་དང་ལྷན་ཅིག་གྲུ་བོ་ཆེ་བཟོ་ཁྱད་ཆོས་ཕུན་སུམ་ཚོགས་པ་ཞིག་ཏུ། མི་སྟོང་ཕྲག་ལྔ་ཙམ་དང་ལྷན་ཅིག་ལྷོ་ཕྱོགས་ལ་གྲུ་བསྐྱོད་དེ་བྱོན་པས། ཟླ་བ་བཞི་ཙམ་ན། ཛྷ་མི་གི་རི་ཞེས་བྱ་བའི་གླིང་ཆེས་བཟང་བ། ཞིང་ལ་སོགས་པ་མེད་ཅིང༌། འབྲས་འབྲུ་རེ་བཏབ་པ་ལ་སྡོང་པོ་མི་འགྲང་ལྔ་ཙམ་ཡོད་པ། ཁྱིམ་རེའི་འཚོ་བ་ཐམས་ཅད་འབྱུང་བ་ཙམ་ཡོད་པ། གྲོང་ཁྱེར་ཆེན་པོ་ལྷོ་བྱང་གཉིས་སྣང་ཞིང༌། དེ་གཉིས་རེ་རེའི་སྲང་བར་ལ་ཉི་མ་བདུན་བདུན་ཙམ་རེ་འགྲོ་དགོས་པའི་ལམ་ཡོད་པ། གྲོང་ཁྱེར་གཉིས་ཀྱི་བར་ན་རི་ལྷོ་བྱང་དུ་གསུམ་ཙམ་ཞིག་འདུག་པའི་གཅིག་གི་རྩེ་མོ་ན་མཚན་མོ་འོད་འཕྲོ་བའི་གསེར་གྱི་བྲག་ཆུང་ངུ་ཞིག་ཀྱང་སྣང་གསུང༌། དེར་ལོ་གཅིག་ལྷག་ཙམ་བཞུགས་ཤིང༌། གླིང་དེ་ན་སྔོན་སློབ་དཔོན་ཀླུ་སྒྲུབ་ཕེབས་པའི་བཞུགས་ཁྲི་དང༌། བཅོམ་ལྡན་འདས་ཀྱི་རྡོ་སྐུ་ཆེན་པོ་མང་པོ་དང༌། ལྷ་ཁང་ཡང་མང་དུ་ཡོད་ཅིང༌། དེ་རྣམས་ལ་མཆོད་པ་དང༌། དུས་སྟོན་ཡང་ཆེ་བར་ཡོད། ཀླུ་སྒྲུབ་ཀྱིས་བཞེངས་པའི་ལྷ་ཁང་ཞིག་ཏུ་རྩེ་གཅིག་ཏུ་ཐུགས་དམ་མཛད་པས། བདེ་བ་ཅན་ནས་སློབ་དཔོན་ཀླུ་སྒྲུབ་འཁོར་མང་པོ་དང་བཅས་ནས་བྱོན་པ་གཟིགས་ཤིང༌། དེ་ཡང་སྐུའི་རྣམ་པ་ནི་བྱང་ཆུབ་སེམས་དཔའ་རྒྱན་ཐམས་ཅད་ཀྱིས་བརྒྱན་པ། ཕྱག་སོར་རེ་ལའང་དཔག་ཚད་ཙམ་ཡོད་པ་བལྟ་བའི་མི་ངོམ་པ་ཞིག་གཟིགས་ཤིང༌། དག་སྣང་གི་ཆོས་ཀྱང་འགའ་
རེ་གསན་ནོ། །དེ་ལ་ཡེ་ཤེས་ཀྱི་སྐུ་གཟིགས་པ་འདི་ནི་གསང་འདུས་ལས། ཚངས་པ་དྲག་པོ་ལ་སོགས་ལྷས། །ནམ་ཡང་མཐོང་བར་མི་ནུས་སོ། །ཞེས་ལྷ་མཐུ་ཆེ་རྣམས་ཀྱིས་ཀྱང་མཐོང་བར་དཀའ་བ་ཡིན་པས། མངོན་པར་རྟོགས་པ་ཅི་ཙམ་ཡིན་རྒྱུད་སྡེ་མཁྱེན་པ་རྣམས་ཀྱིས་གསུངས་ཤིག དེ་ནས་ཤར་ཕྱོགས་ཀྱི་གླིང་ཕྲན་འགར་འགྲོ་བའི་ཚོང་བ་རྣམས་དང་ལྷན་ཅིག གྲུ་ཤར་དྲང་ཐད་དུ་བཏང་སྟེ་ཟླ་གཅིག་ཙམ་ཕེབས་པ་ན། རིའི་རྒྱལ་པོ་པོ་ཊ་ལ་ཀ་ཡོད་པའི་གླིང་དུ་ཕེབས། ཁ་ཅིག་འདི་པོ་ཊ་ལ་ཆུང་བ་ཡིན་ཟེར་བའང་ཡོད། གང་ནའང་མིའི་འགྲོ་བའི་སྤྱོད་ཡུལ་གྱི་པོ་ཊ་ལ་སྟེ་འདི་ཁོ་ནར་མངོན་ནོ། །ནོར་བཟང་གཞོན་ནུའི་གནས་ཤེལ་གྱི་ཕུག་པ་དང༌། ཁྲོ་གཉེར་ཅན་མའི་གནས་དང༌། ལྷ་མ་ཡིན་གྱི་སྒོ་གསེར་གྱི་ཕུག་པ་དང༌། སྒྲོལ་མའི་གནས་སེང་ལྡེང་གི་ནགས་དང༌། ཚངས་པ་དང༌། ཁྱབ་འཇུག་དང༌། དབང་ཕྱུག་ཆེན་པོའི་གནས་རི་བོ་རང་བྱུང་གི་ལྷ་ཁང་དང་བཅས་པ་རེ་རེ། གཞན་ཡང་མཇལ་དུ་བཏུབ་པའི་གནས་ཕལ་ཆེར་མཇལ། རི་བོ་པོ་ཊ་ལ་ཉིད་ལའང་བསྐོར་བ་ཞིག་མཛད། འཕགས་པ་འཇམ་དཔལ་གྱི་གནས་སུ་གྲགས་པ། ནམ་མཁའི་ངོས་ལ་ནགས་ཚལ་དང༌། དེ་ནས་འབབ་པའི་ཆུ་དངོས་སུ་འབབ་པ་ཡོད་དེ། དེ་ལ་ཁྲུས་ཀྱང་མཛད་གསུངས། པོ་ཊ་ལའི་རི་ཆེན་པོའི་མགུལ་ཐུགས་པར་ནགས་སྣ་ཚོགས་འདུག་པ་བསྐོར་བར་ཕེབས། རྩེ་མོ་ཤེལ་མ་རྡོའི་བྲག་རི་རྒྱ་དཔངས་
བསམ་གྱིས་མི་ཁྱབ་པ་ཡོད་པ་ལ་ད་ལྟ་འགྲོ་ས་ནི་མི་འདུག་གསུང། གླིང་དེར་ཕྱིན་པའི་སྡིག་པ་དག་པ་འདྲ། དེ་ཕྱིན་ཆད་ཐ་མལ་གྱི་མནལ་གཏན་མེད་པ་དང༌། མི་མ་ཡིན་ཕལ་མོ་ཆེ་ཞིག་གི་སྤྱོད་པ་མངོན་སུམ་དུ་གཟིགས་པ་དང༌། དེ་དག་གི་ལོངས་སྤྱོད་ལ་དངོས་སུ་ལོངས་སྤྱོད་བྱར་གྱུར་པ་འདི་བྱུང་གསུང༌། གླིང་དེའི་མི་ཀུན་ལ་ད་ལྟ་ཕྱི་ནང་ཀླ་ཀློ་སོགས་གྲུབ་མཐའ་གང་ཡང་མེད། མི་གྲོང་ཡང་ཐན་ཐུན་མ་གཏོགས་མི་འདུག པོ་ཊ་ལ་ཀ་ལ་གསོལ་བ་འདེབས་པ་ལ་ཤིན་ཏུ་བརྩོན་པར་འདུག སྔོན་དུས་བཞེངས་པའི་སངས་རྒྱས་པའི་ལྷ་ཁང་ཡོད། འཛམ་བུ་གླིང་ན་མེད་པ་ལ། ལས་ལས་གྲུབ་པའི་འཁྲུལ་འཁོར་མང་པོས་ཁྱིམ་གྱི་མཐའ་བསྲུང་བ་འབའ་ཞིག་འདུག གླིང་འདིར་གླིང་གཞན་ནས་འོངས་པའི་མི་རྣ་བས་ལུས་ཐམས་ཅད་གཡོག་ཐུབ་པ་མང་པོ་གཟིགས། གླིང་དེ་ནས་གྲུ་བཏང་སྟེ་ཐག་རིང་པོ་བྱང་ཕྱོགས་སུ་བྱོན་པས། ཛ་བ་དྭཱི་པ་ཞེས་བྱ་བ། ནས་གླིང་དུ་ཕེབས། གླིང་དེ་ན་ཉན་ཐོས་སེནྡྷ་པའི་དགེ་འདུན་གྱི་སྡེ་མང་དུ་ཡོད་ཅིང༌། དེ་རྣམས་སུ་མ་བཞུགས། དེ་ན་མཚོ་ཆུང་ཞིག་གི་དཀྱིལ་ན་གླིང་ཆུང་ཞིག་ཡོད་དེ། དེའི་མིང་ནི། བ་ན་དྭི་པ་སྟེ། ནགས་གླིང་ཞེས་བྱ་བ་ཡིན། དེ་ན་སློབ་དཔོན་མཚོ་སྐྱེས་རྡོ་རྗེས་བྱིན་གྱིས་བརླབས་པའི་གནས། ཕྱི་བྲག་རི་ནང་ལྷ་ཁང་གྲུ་བཞིར་ཡོད་པ། དབུས་ན་ཀྱཻ་རྡོ་རྗེ་ཕྱག་གཉིས་པའི་རྡོ་སྐུ་རང་བྱུང་བཞུགས་ཤིང༌། ཕུག་པ་གཅིག་ན་གསང་སྔགས་ཀྱི་གླེགས་བམ་མང་དུ་ཡོད། རྒྱུད་
འབུམ་ཕྲག་ལྔ་པ་ཡང་བཞུགས་ཟེར་ཏེ། ཤིན་ཏུ་འཚུབ་པར་གྲགས་པས་ལྟ་ནུས་པ་ནི་མི་འདུག་གསུང༌། དེ་ནས་སླར་ཡང་བྱང་ལ་ཕེབས་ཏེ། སིངྒ་ལར་ཕེབས། དེ་དུས་སངས་རྒྱས་ཀྱི་ཞབས་རྗེས་ལ་གསོལ་བ་འདེབས་ཤིང་བཞུགས། དེར་རྫོགས་རིམ་གྱི་རྣལ་འབྱོར་གཙོ་བོར་མཛད་པས། ཐ་མལ་གྱི་རྣམ་རྟོག་ཕལ་ཆེར་འགགས། བདེ་བས་ཉིན་མཚན་ངོ་མི་མཁྱེན་པ་འདྲ་བའང་བྱུང༌། དེ་ཕྱིན་ཞུ་བདེ་འགྱུར་མེད་བསྟན་པས་བདེ་སྟོང་རྒྱུན་མི་འཆད་པ་བྱུང་ལ། ལན་གཅིག་མནལ་ལམ་ན། རང་ཉིད་རྣམ་པར་སྣང་མཛད་ཀྱི་སྐུ་ཤིན་ཏུ་ཆེ་བར་གྱུར་པ་ལ། ཕྱོགས་བཅུའི་སངས་རྒྱས་ཡིན་སྙམས་པ་སངས་རྒྱས་མང་པོ་བྱོན་ཏེ། ཁྱོད་ནི་འཆི་བ་མེད་པའི་སྐུའོ་ཞེས་བསྟོད་པའི་སྣང་བ་བྱུང༌། དེ་ནས་ཀོངྐ་ནའི་གླིང་དུ་ཕེབས་ཏེ། ཛྙཱ་ན་ཀཱ་ཡ་ཞེས་བྱ་བ། མཚོའི་ནང་ན་འཇམ་དཔལ་གྱི་སྐུ་རང་བྱུང༌། སྐུ་ཚད་རི་ཆུང་ཙམ་ཡོད་པ་ཉལ་སྟབས་སུ་གནས་པ་དང༌། བིམྤ་ཀཱ་ཡ་ཞེས་བྱ་བ། ནམ་མཁའ་ལ་འཇའ་ཚོན་ཤར་བ་ལྟ་བུ། མཆོད་རྟེན་གྱི་གཟུགས་བརྙན་ཤིན་ཏུ་ཆེ་ཞིང་གསལ་བ་དཔལ་དུ་བ་འཁྲིགས་པ་རེག་པ་མེད་པའི་མཆོད་རྟེན་དུ་གྲགས་པ་དེ་ཡིན་ཏེ། དེ་གཉིས་ལ་ཉིན་མཚན་དུས་དྲུག་ཏུ་རོལ་མོ་དང༌། དྲི་བཟའ་དང༌། མེ་ཏོག་གི་ཆར་འབབ་པ་ལ་སོགས་པ་མི་མ་ཡིན་གྱི་མཆོད་པ་རྟག་ཏུ་འོང༌། ཆོ་འཕྲུལ་རྒྱུན་མི་འཆད་པ་ཞིག་ཡོད་པ་དེ་དག་ཏུ་ཕྱག་མཆོད་དང་སྨོན་ལམ་མཛད།
སླར་གྲུ་བཏང་ནས་ལྷོ་ཕྱོགས་མ་ལྱཱ་རར་ཕེབས། འདི་དང་ཉེ་བའི་ཡུལ་ཕྲན་ཤཾ་བྷུ་དཏྟ་ཞེས་བྱ་བ་ན། རྡོ་རྗེ་ཐེགས་པ་རྒྱ་མཚོའི་ཕ་རོལ་ཏུ་སོན་པ། ཐུན་མོང་གི་གྲུབ་པའི་རྟགས་ཅི་རིགས་པ་དང་ལྡན་པའི་རྒྱལ་པོ་འཕྲོག་བྱེད་འོད་ཅེས་བྱ་བ་ལ། སངས་རྒྱས་མཉམ་སྦྱོར་གྱི་རྒྱུད་དང༌། སྡོམ་པ་རྣམ་པར་བརྩོན་པ་དང༌། ལྷན་ཅིག་སྐྱེས་པའི་དེ་ཉིད་དང༌། ཧ་རི་དཱ་རིའི་གླུ་དབྱངས་ལ་སོགས་པ་ཆོས་མང་དུ་གསན། བླ་མ་འདི་ནི་རྣལ་འབྱོར་མ་དཱི་ན་ཀ་རིའི་ཞང་པོ་ཡིན་ནོ། །དེར་གྲུབ་ཆེན་ཞི་བ་སྦས་པའི་སྙན་པ་གསན་ཏེ། ཛ་གད་ནཱ་ཐར་ཐོག་མར་མཇལ་བར་ཕེབས་ཟླ་བ་གསུམ་ཙམ་བླ་མའི་རིམ་གྲོ་བགྱིད་ཅིང་བཞུགས། སྔར་གྱི་བླ་མ་གཞན་རྣམས་ལ་གདམས་ངག་ཞུས་ཤིང་བསྒོམས་པ་བས། གྲུབ་ཆེན་འདིའི་ཞལ་རས་མཐོང་བ་ཙམ་ཡང་བོགས་ཆེ་བར་བྱུང་ཞིང༌། ཡོ་བྱད་ཐམས་ཅད་ཡོན་དང༌། ཚོགས་ཀྱི་འཁོར་ལོར་བྱས་ཏེ། གདམས་ངག་གནང་དགོས་པར་ཞུས་པས། བླ་མའི་ཞལ་ནས་དབང་བསྐུར་དགོས་པས་ད་རུང་ཡོ་བྱད་ཚོལ་གསུངས། དེ་ནས་ཏྲི་ལིངྐ་ཕྱོགས་སུ་ཟླ་བ་གསུམ་ཙམ་སྡོམ་བུ་བྱེད་ཅིང་བྱོན་པས། རུ་པྱ་སྟེ། དངུལ་ཏོ་ལ་སུམ་ཅུ་ཙམ་དང༌། གཞན་ཡང་ཡོ་བྱད་མང་དུ་བྱུང༌། ཏྲི་མལ་ཞེས་བྱ་བ་ཙནྡན་དམར་པོའི་ནགས་ཀྱིས་ཁྱབ་པའི་ཡུལ་ཞིག་ཏུའང་བྱོན། དེར་ཡང་ཡོ་བྱད་མང་པོ་འབྱོར། བླ་མ་ཡང་ཀརྞ་ཊ་ཀར་ཕེབས་འདུག་པས། དྲུང་དུ་ཕེབས། དབང་
གི་ཡོ་བྱད་ཐམས་ཅད་ལེགས་པར་བཤམས། དམིགས་པའི་སྒོ་ནས་དབང་བསྐུར་ཞིག་མཛད། གདམས་པ་ཅི་རིག་པ་གནང༌། དེ་སྐབས་དབང་བསྐུར་ཐ་དད་མང་པོ་ནི། སློབ་དཔོན་གཾ་བྷི་རཱ་མ་ཏི་ལ་ཞུས། དེ་ནས་ཤར་ཕྱོགས་ཀྱི་གླིང་ཕྲན་རྣམས་གཟིགས་པར་བཞེད་ནས། ཛཱ་རི་ཁཎྜ་དང༌། ཛ་ག་ད་ནཱ་ཐ་རྒྱུད་ནས་བྷངྒ་ལར་ཕེབས། ཡུལ་པུཎྜ་བྷརྟ་རུ་ཁ་སརྤ་ཎི་མཇལ། ཞག་ཉི་ཤུ་ཙམ་གསོལ་བ་འདེབས་ཀྱིན་བཞུགས། མནལ་ལམ་དུ་བྱིན་གྱིས་བརླབས་པའི་མཚན་མ་ཡང་ཡང་བྱུང༌། དེ་ནས་ཏི་པུ་རར་ཕེབས། ཏི་པུ་རའི་ཡུལ་གྱི་ཕུ། ཀ་ས་རཾ་གའམ། དེ་ཝི་གོ་ཊའི་གནས་ཡོད་པ་མཇལ་པར་མཛད་ཅིང༌། གྲུབ་ཆེན་ནག་པོ་སྤྱོད་པས་བཞེངས་པའི་གཙུག་ལག་ཁང་དུ་ཞག་ཤས་བཞུགས། ཡུལ་འདི་ཡང་ཨོ་རྒྱན་བཞིན་དུ། གཟུགས་སྣ་ཚོགས་སུ་བསྒྱུར་བའི་མཁའ་འགྲོ་མ་གདུག་ཚུབ་ཆེ་བ་མང་པོ་ཡོད་ཅིང༌། སྟག་རྫུས་དང༌། སྣ་ཚོགས་པའི་རྫས་དང་སྔགས་ཀྱི་ངན་ཐབས་བྱེད་པ་ཤིན་ཏུ་མང༌། དེ་ནས་ར་ཁང་གི་ཡུལ་གྱི་ནང་ཚན། ཧ་རི་བྷཉྫ་དང༌། པུ་ཁང་དང༌། བལ་གུ་རྣམས་སུ་ཕེབས། ཡུལ་འདི་རྣམས་ན་དགེ་སློང་གི་དགེ་འདུན་ཆེས་མང་ཞིང༌། བསྟན་པ་ལྷག་པར་དར་བར་ཡོད་པས། ཡུན་རིང་རབ་རེ་བཞུགས་ཤིང༌། ཧ་རི་བྷཉྫའི་གཙུག་ལག་ཁང་མཆོད་རྟེན་ཆེན་པོ་ཞེས་བྱ་བ་ཞིག་ན། དྷརྨཱ་ཀྵ་གྷཽ་ཥ་
ཞེས་བྱ་བའི་པཎྜི་ཏ་ཆེན་པོ་ཞིག་དང༌། དེ་བཞིན་དུ་བལ་གུའི་ཡུལ་དུ་བཞུས་པའི་བར་ཧེ་ཏན་ནྡགྷོ་ཥ་ཞེས་བྱ་བ། དགེ་བསྙེན་པཎྜི་ཏ་ཆེན་པོ་ཞིག་ལ་གསང་སྔགས་ཀྱི་ཆོས་ཀྱང་ཅི་རིགས་པ་གསན། མདོ་ལུགས་ཀྱི་གཞུང་མང་པོ་ཞོར་ཉན་དུ་མཛད། བླ་མ་འདི་ཀུན་ཡང་གྲུབ་ཆེན་ཞི་བའི་ཞབས་ཀྱིས་སློབ་མ་འབའ་ཞིག་ཡིན་གསུང༌། དེ་ནས་གྲུ་བཏང་སྟེ། དྷ་ན་ཤྲཱི་གླིང་དུ་ཕེབས། གླིང་འདི་ནང་དགེ་འདུན་ཤིན་ཏུ་མང་ཞིང༌། དཔལ་ལྡན་འབྲས་སྤུང་ངམ། མཆོད་རྟེན་དཔལ་ཡོན་ཅན་ཞེས་ཀྱང་བྱ། ཨསྟུ་ཀ་ཀཱ་ཡ་ཞེས་བྱ་བ་མཆོད་རྟེན་ཆེན་པོ་ངོ་བོ་ཤིན་ཏུ་རྒྱ་ཁྱོན་ཆེ་བའི་བྲག་རི་མཆོད་རྟེན་གྱི་དབྱིབས་ཅན། ཕྱི་ལ་རྡོའི་ལྕགས་རི་བྲག་རི་འདྲ་བ་ཉིས་རིམ་གྱིས་བསྐོར་བ། ཉི་མ་གཅིག་ལ་སྐོར་བ་ཐེབས་ཙམ། ཤར་དུ་གྲོང་ཁྱེར་ཤིན་ཏུ་ཆེ་བ། རྒྱ་ནག་དང༌། ཕྲེང་གི་དང༌། རྒྱ་གར་ལ་སོགས་པའི་ཡུལ་ཐ་དད་པའི་ཚོང་བ་ཤིན་ཏུ་མང་པའི་ཚོང་འདུས་ཆེན་པོ་འདུག་གསུང༌། དང་པོ་རེག་པ་མེད་པ་གཟུགས་བརྙན་གྱི་མཆོད་རྟེན་མཇལ་བར་མཛད་དུས། རྣམ་སྣང་གཙོ་བོར་གྱུར་པའི་རིགས་ལྔའི་དཀྱིལ་འཁོར་དང༌། ཛྙཱ་ན་ཀཱ་ཡ་ནི། འོད་དཔག་མེད་གཙོ་བོར་གྱུར་པའི་རིགས་ལྔའི་དཀྱིལ་འཁོར་དང༌། ཤྲཱི་དྷ་ནྱཱ་ཀ་ཊ་ཀ་ནི་མི་བསྐྱོད་པ་གཙོ་བོར་བྱས་པའི་རྒྱལ་བ་རིགས་ལྔའི་དཀྱིལ་འཁོར་དུ་གཟིགས། གཞན་ཡང་ཚོང་པ་རྣམས་དང་ལྷན་ཅིག་ཏུ་བྱོན་པས། པོ་ཊ་ལ་ཟེར་བའི་རྒྱ་མཚོའི་དོ་རི་
གཞན་གཅིག་དང༌། པཻ་གུའི་གླིང་དང༌། ཛ་ཏི་དང་ལི་ཤི་སོགས་མང་པོ་སྐྱེ་བ། ཕྲེང་གིས་འཛིན་པའི་གླིང་ཞིག་དང༌། སཱདྷ་དྷཱི་པ་དང༌། གསེར་གླིང་ཆེན་པོ་དང༌། གསེར་གླིང་གི་མིང་ཅན་ཆུང་བ་གཉིས། སུརྫ་དྷཱི་པ། ཙནྡྲ་དྷཱི་པ། སརྦ་དྷཱི་པ་སྟེ། གླིང་ཆུང་ཆུང་དེ་རྣམས་སུ་ཡང་ཞབས་ཀྱིས་བཅགས། དེ་ནས་གཾ་ག་ས་ག་ར་ཞེས་བྱ་བའི་གླིང་ཆུང་ཞིག་ཏུ་ནག་པོ་སྤྱོད་ཆུང་དང༌། བྷུ་བ་རི་པ་དང༌། བྷུ་བ་བློ་ལྡན་རྣམས་རིམ་པར་བྱོན་སའི་དགོན་པ་ཞིག་ན་སློབ་དཔོན་ནག་པོ་སྤྱོད་པ་པའི་རྒྱན་དྲུག་མཁའ་འགྲོ་མས་བྱིན་གྱིས་བརླབས་པ་དེ་མཚན་མོ་མེ་འབར་བ་སོགས་ཆོ་འཕྲུལ་དང་འཚུབ་ཤིན་ཏུ་ཆེ་བ་ཅིག་འདུག་པ་དེ་ཡང་མཇལ། དེར་དབྱར་ཞིག་ཟླ་བ་གསུམ་གཏུམ་མོ་དང༌། ཕྱག་རྒྱ་ཆེན་པོ་རྩེ་གཅིག་ཏུ་བསྒོམས་པས། གནས་གསུམ་གྱི་མཁའ་འགྲོ་མའི་རིགས་སུ་གཏོགས་པ་མང་པོ་དང༌། ཁྱད་པར་མི་མ་ཡིན་གྱིས་མཁའ་འགྲོ་མ་མང་པོ་དངོས་སུ་འདུ་བ་བྱུང༌། དེ་དག་གི་རྐྱེན་གྱིས་ཡེ་ཤེས་གོང་ནས་གོང་དུ་འཕེལ་ཞིང༌། རྟོག་པ་ཁྱད་པར་དུ་གྱུར། གྲུབ་པའི་དབང་ཕྱུག་ཆེན་པོ་ཞི་བ་སྦས་པ་ལ། དེ་རྣམས་ཀྱིས་རྟོགས་པ་འབུལ་བར་བཞེད་ནས། གཟེངས་ལ་བསྐྱོད་དེ། ཛམ་བུ་གླིང་དུ་ཕེབས་པར་བཞེད་པའི་ལམ་གླིང་ཕྲན་ཆུང་ངུ་ཞིག་ན། སྔོན་འཕགས་པ་སྤྱན་རས་གཟིགས་དབང་ཕྱུག་སེདྒེ་སྒྲས་ཐུགས་བསྐྱེད་པའི་གནས་སུ་གྲགས་པ། གླིང་སྟོང་པ་ཞིག་ན་ནོར་བུ་དམར་པོ་འདྲ་བའི་རྡོའི་ཕུག་པ་དང༌། ཙནྡན་གྱི་ནགས་ཚལ་ཡང་
ཡོད་པ། ཤིན་ཏུ་གཉན་པས་འདབ་མ་རེ་ཡང་གཅོད་མི་ནུས་པ་ཞིག་ཡོད་པ་དེ་མཇལ་དུ་ཕེབས། དེ་ན་གྲུབ་ཆེན་ཞི་བའི་ཞབས་ཀྱི་གདམས་པའི་མངའ་བདག་རྣལ་འབྱོར་མ་ཆེན་མོ་དཱི་ན་ཀ་རཱ། འཁོར་རྣལ་འབྱོར་ཕོ་མོ་བཞི་བཅུ་ཙམ་དང་བཅས་པ་བཞུགས་འདུག་པ་ལ། གདམས་ངག་གནང་བར་ཞུས་པས། མང་དུ་གནང་ཞིང༌། དེ་ནས་རྣལ་འབྱོར་མ་ཆེན་མོ་དེ་ཉིད་ཀྱི་ཞབས་པད་བསྟེན་བཞིན་དུ། ཏྲི་ལིངྒ་དང༌། བི་དྱ་ན་ག་ར་དང༌། ཀརྞ་ཊ་ཀ་རྣམས་བརྒྱུད་ནས། བྷཾ་དྭ་གྱི་ཡུལ་དུ་ཕེབས། ཛམ་བུ་གླིང་བ་ཐམས་ཅད་ཀྱི་སྐྱབས་གནས་གཅིག་པུ་གྲུབ་ཆེན་ཞི་བ་སྦས་པ་དང་མཇལ། ཟླ་བ་བཅུ་གསུམ་ཙམ་དྲུང་དུ་བཞུགས། གདམས་པ་བསམ་གྱིས་མི་ཁྱབ་པ་གསན། མཚན་ནི་བུདྡྷ་གུབྟ་གྱིས་གསུང་བས་དེ་ཕྱིན་བུདྡྷ་གུཔྟ་ནཱ་ཐ་ཟེར། དབང་བསྐུར་དང་བཤད་པ་ཕལ་ཆེ་བ་ནི་རྣལ་འབྱོར་མ་ཆེན་མོ་དཱི་ན་ཀཱ་ར་དང༌། སློབ་དཔོན་གམ་བྷི་ར་ཡ་ཏི་ཆེན་པོ་གཉིས་ལ་ཞུས་ཤིང༌། ཕྱག་ལེན་དང་དོགས་དཔྱོད་ཅི་རིགས་པ་ཞུ་བར་མཛད་པའི་བླ་མ་ནི། གཞན་ཡང་མང་དུ་ཡོད་པ། སུ་དྷཱི་གརྦྷ་ཞེས་བྱ་བ་དང༌། ཀནྟ་པ་ཞེས་བྱ་བ་དང༌། བེ་ཏ་ཏིཀྵ་ཎ་དང༌། བཱི་ར་བནྡྷ་དང༌། གྷ་གྷ་པ་སྟེ། དེ་རྣམས་ཀྱང་གྲུབ་ཆེན་ཞི་བ་སྦས་པའི་ཞབས་འབྲིང་བསྟེན་པས། རྡོ་རྗེའི་ཐེགས་པ་ལ་ཆེས་མཁས་ཤིང༌། ཁྱད་པར་ནུས་པ་བརྙེས་པ་ཤ་སྟག་ཡིན་ཏེ། སྤྱིར་གྲུབ་ཆེན་འདིའི་དྲུང་དུ། ཡུལ་དང་རིགས་ལ་སོགས་པ་སྐྱེ་བོ་གཞན་གྱིས་བཤད་
རྒྱུ་མེད་པའི་རྣལ་འབྱོར་བ་རྫུ་འཕྲུལ་གྱི་བཀོད་པ་ངོ་མཚར་ཅན་སྟོན་པ་མང་དུ་འོང་ཞིང༌། ཡང་གར་སོང་ཆ་མེད་པར་སོང་བ། དེ་ལྟ་བུ་ཡང་ཡང་ཡོད་པ་ཞིག་འདུག་གསུངས། ལན་ཅིག་ཁ་གེནྡྲའི་རི་སུལ་ཞིག་ན་རྣལ་འབྱོར་བ་ཞིག་མར་མེ་སྦར་ཏེ་འདུག དྲུང་དུ་བྱོན་པའི་དེའི་སྣང་བར་ཡལ་ཤུལ་ན་མི་ཐོད་སྐམ་པོ་གསུམ་འདུག་གསུང༌། དེ་ནི་མིག་སྨན་གྲུབ་པའོ། །དེ་ནས་གྲུབ་ཆེན་ཞི་བ་སྦས་པའི་གསུང་གིས། ཡུལ་དབུས་ཀྱི་ཕྱོགས་སུ་སྒོམ་དུ་སོངས་ཞིག ཐུགས་དམ་གྱི་བོགས་ཆེ་བར་འོང་ཞེས་གསུངས་པ་ཞིག་བྱུང་བས། དབུས་ཀྱི་ཕྱོགས་སུ་ཕེབས། མཧཱ་བྷོ་དྷི་མཇལ་བར་མཛད། རྡོ་རྗེ་གདན་གྱི་བྱང་ཕྱོགས་རྒྱང་ཙམ་གཅིག་ཏུ་སྒོམ་ཁང་ཞིག་མཛད། ཟླ་བ་གཅིག་ཙམ་བཞུགས་ཤིང༌། ཉིན་མོ་ཏིང་ངེ་འཛིན་ཁོ་ན་དང༌། མཚན་མོ་ཕྱག་དང་སྐོར་བ་འབའ་ཞིག་མཛད། ཐུགས་ཀྱི་སྣང་བ་ལ། རང་ཉིད་མངོན་པར་རྫོགས་པ་སངས་རྒྱས་པ་ཡིན་སྙམ་པ་དང༌། སྐུ་ལུས་རྡོ་རྗེ་སེམས་དཔའི་རྣམ་པ་ཤིན་ཏུ་སྐུ་ཚད་ཆེ་བ། སྒྲ་དང་འོད་དུ་མ་དང་བཅས་པར་གྱུར། བྱང་ཆུབ་ཆེན་པོ་བཅོམ་ལྡན་འདས་ཤཱཀྱ་ཐུབ་པ་དངོས་ཀྱི་རྣམ་པར་གྱུར་ཏེ། ཁྱོད་ནི་ཏ་ཐཱ་ག་ཏ་རཏྣ་སྥ་ར་པྲ་དཱི་པ་ཞེས་བྱ་བ་ཡིན་ནོ། །ཞེས་ལུང་སྟོན་པ་དང༌། ཕྱོགས་བཅུའི་སངས་རྒྱས་མང་པོ་བྱོན་ཏེ། རྡོ་རྗེ་འཛིན་པ་ཁྱོད་སྤྲུལ་པ་སྟེ་སྤྲུལ་པ་ལྟ་བུས་སེམས་ཅན་གྱི་དོན་མཛོད་ཅིག །
ཅེས་གསུང་བའི་སྣང་བ་བྱུང༌། དེ་ཉིད་དུ་བདེ་སྟོང་གི་ཡེ་ཤེས་འོད་གསལ་མུ་མཐའ་མེད་པ་ལ་ཡུན་རིང་དུ་གནས་པ་བྱུང་ཞིང༌། དེ་ནས་རིམ་གྱིས་གནས་ཆེན་པོ་བརྒྱད་པོ་རྣམས་བསྐོར་བ་ལ་ཡང་ཕེབས། ཐམས་ཅད་དུ་ཐུགས་དམ་གྱི་བོགས་ཤིན་ཏུ་ཆེ་བ་བྱུང༌། བྱ་རྒོད་ཕུང་པོའི་རི་དང༌། རི་བྱ་རྐང་ཡང་མཇལ། སླར་ཡང་རྟོགས་པ་འབུལ་བ་ལ། གྲུབ་ཆེན་ཞི་བའི་ཞབས་ཀྱི་དྲུང་དུ་ཕེབས། འདི་སྐབས། བྷཾ་དྭ་གྱི་རྒྱལ་པོ་གཞོན་ནུ་བ་ལ་བྷ་དྲ་འདིས། གྲུབ་ཐོབ་ཆེན་པོ་འཁོར་བཅས་ལ་ཚོགས་ཀྱི་འཁོར་ལོ་མཛད་པའི་གསོལ་བ་གདབ་པའི་དོན་དུ་སྟོན་མོ་ཞིག་མཛད་པ་དང་འཛོམ། སྔར་གྱི་རྟོགས་པ་རྣམས་ཕུལ་ཞིང༌། སངས་རྒྱས་དངོས་སུ་གཟིགས་པའི་མོས་གུས་སྤྲོས་པའི་རྣམ་པ་ཐམས་ཅད་དང་བྲལ་བ་ཐུགས་པ་འཁྲུངས་ཏེ། སྔོན་མེད་པའི་མོས་གུས་ཀྱི་ནུས་མཐུ་འདིས། ཆོས་ཐམས་ཅད་ཀྱི་རང་བཞིན་སྤྲོས་པ་ཐམས་དང་བྲལ་བ། གཅིག་མིན་དུ་མ་མ་ཡིན་པ་བརྗོད་བྲལ་ནམ་མཁའ་ལྟ་བུ་མངོན་དུ་གྱུར། ཕྱག་རྒྱ་ཆེན་པོའི་རྟོགས་པ་ཚད་དུ་ཕྱིན། ནང་ཀུན་དྷ་དབུ་མའི་ནང་འཁོར་ལོ་རྣམས་སུ་བརྟན་པ་ཐོབ་པས་རྩ་མདུད་གྲོལ་བའི་རྟགས་ཐོབ། རྣལ་འབྱོར་བའི་གྲར་སུ་ཆུད་པ་འདི་དེ་ནས་བྱུང་བ་ཡིན་གསུང༌། བླ་མ་ཏིརྠི་ནཱ་ཐ་དང་ལན་རྟིང་མ་མཇལ་བའི་དུས་དེ་ནས། དེ་བར་དུ་ལོ་བཞི་བཅུ་ཞེ་དྲུག་སོང་གསུང༌། ལར་ཁོ་བོ་སྒོམ་ཡུན་ཤིན་ཏུ་རིང་ཡང༌། གནས་སྐོར་ཡང་གཡེང་བའི་རྒྱུར་སོང་བ་འདྲ། ཁྱད་པར་གྲུབ་ཆེན་ཞི་བ་སྦས་པ་འདི་དང་མ་མཇལ་བར་དུ་བླ་མ་གཞན་རྣམས་དང་ཅུང་ཟད་ལས་འཕྲོ་ཆུང་བ་ཡིན་ན། ཐུན་མོང་གི་ཡོན་ཏན་འགའ་ལས་
གནས་ལུགས་ཀྱི་དོན་ལ་འགྱུར་བ་མེད་པའི་གདེང་མ་ཐོབ། སྤྱིར་ཡང་ཌ་མི་ཌོར་དགྱེས་པའི་རྡོ་རྗེ་མ་གསན་བར་དུ་སངས་རྒྱས་པའི་མན་ངག་རྒྱུད་དང་འབྲེལ་བའི་ཁུང་མ་རང་ཚོ་མ་ལོན་པས་ཀྱང་ཡིན་པ་འདྲའོ་གསུང༌། ཨོ་རྒྱན་ནས་ཕྱིར་བྱོན་དུས། ད་ང་རྣལ་འབྱོར་པ་ཆེན་པོ་ཡིན་སྙམ་པའི་ང་རྒྱལ་ཆེན་པོ་བྱུང༌། གཞན་ཁྱད་དུ་གསོད་པའི་སེམས་སྐྱེས་པས་ཀྱང༌། དེ་ནས་ལོ་བཅུ་གཉིས་ཙམ་དུ་སྒོམ་ལ་སྐྱེད་ཆེན་པོ་མ་བྱུང་ཞེས་དང༌། ལན་ཅིག་ཛྷ་མི་གི་རིའི་གླིང་དུ་དད་པར་བྱ་དགོས་པའི་ཡུལ་འགའ་ཞིག་ལ་སྨད་པས་ཀྱང༌། དངོས་གྲུབ་རང་དུ་འགྱང་བར་འདུག་གསུང༌། དེ་དག་ཀྱང་བདག་ཅག་ལ་སོགས་པ་གྱ་གྱུར་སྤྱོད་པ་རྣམས། ལམ་ལ་འབད་པར་གདམས་པའི་དགོངས་པ་ཅན་ཡིན་གྱི། གཞན་དུ་ན། དམ་པ་འདི་ཉིད་གྲུབ་པའི་དབང་ཕྱུག་ལྭ་བའི་ན་བཟའ་ཅན་དང་གཉིས་སུ་མེད་པར་འཁུམས་སོ། །དེ་སྐབས་ཟླ་བ་གསུམ་ཙམ་དུ་སློབ་དཔོན་མཆོག་ལ་གདམས་པའི་འཕྲོ་མང་དུ་གསན། དེ་མཚམས་ནས། ཁ་གེནྡྲའི་རི་བོར་ཚོགས་ཀྱི་ཁང་པ་རྒྱ་ཆེན་པོ་ཞིག་བཞེངས། རིམ་པས་སློབ་དཔོན་ཞི་བའི་ཞབས་ཀྱི་སློབ་མ། གསང་སྔགས་སྤྱོད་པ་ཐམས་ཅད་འདུས་ཏེ། སླར་ཡང་ཟླ་བ་གསུམ་ཙམ་ན། རྣལ་འབྱོར་ཕོ་མོ་སྟོང་ཕྲག་ལྔ་ཙམ་བྱུང་སྟེ། རྒྱལ་པོས་ཀྱང་ཉིན་རེ་བཞིན་དུ་དངུལ་ཏོ་ལ་སྟོང་ཕྲག་དྲུག་དྲུག་གི་རིན་ཐང་གི་ཚོགས་ཀྱི་ཡོ་བྱད་དང༌། གཞན་
ཡང་ཉེར་མཁོའི་ཡོ་བྱད་བསམ་གྱིས་མི་ཁྱབ་པ་དང་བཅས་པ་འབུལ་ཞིང༌། དཔོན་སློབ་རྣམས་ཀྱི་ཚོགས་ཀྱི་དཀྱིལ་འཁོར་རྒྱ་ཆེན་པོ་མཛད་དེ། ཉིན་མོའི་ཆ་ལ་ཕལ་ཆེར་གདམས་ངག་འབོགས་པ་དང༌། སོ་སོར་མཉམ་པར་བཞག་པས་གནས་པ་དང༌། རྒྱུད་སྡེ་ཟབ་མོ་དང་སྔགས་ཀྱི་གཞུང་མཐའ་ཡས་པ་རྣམས་འཆད་པའང་ཤིན་ཏུ་མང་ལ། མཚན་མོའི་ཆ་ལ་འཁོར་ལོའི་མཆོད་པས་དུས་འདའ་བར་མཛད། ཟླ་བ་རེ་རེ་བཞིན་རྒྱལ་པོ་ཉིད་ཀྱང་འོངས་ཏེ། དེར་འདུས་ཐམས་ཅད་ལ་གོས་མཆོག་ཕྲུགས་རེ་དང༌། དངུལ་སྲང་བཞི་བཞིའི་ཡོན་ཕུལ་ཞིང༌། ཟླ་བ་དྲུག་སོང་བའི་རྗེས་སུ། རྣལ་འབྱོར་པ་རེ་རེ་ལ་ཡང་གསེར་མོ་ཧར་བཅུ་ཕྲག་རེ་སོགས་ཡོན་གྱི་རྣམ་པ་ནི་མཐའ་ཡས་པ་ཞིག་གིས་མཆོད་པར་བྱས་ཏེ། ཕྱི་རབས་ལོ་ལྔ་བརྒྱ་ཚུན་ཆད་ལ་འཕགས་པའི་ཡུལ་དུ་རྡོ་རྗེ་ཐེག་པའི་ཆོས་འཁོར་འདི་བས་ཆེ་བ་མ་བྱུང༌། གྲུབ་ཐོབ་ཞི་བའི་ཞབས་ཀྱི་གདམས་པ་ལ་བརྟེན་ནས། མཁས་པ་རྣམས་ཀྱིས་རྒྱུད་སྡེ་འཆད་པ་དང༌། ནུས་པ་ཅུང་ཟད་རྙེད་པའི་རྣལ་འབྱོར་པ་རྣམས་ལས་ཚོགས་དང་དངོས་གྲུབ་སྒྲུབ་པ་མང་པོ་བྱུང་སྟེ། དམ་པ་འདིས་གཟིགས་པ་ལ་ཡང་དངུལ་ཆུ་གྲུབ་པ་བཅུ་གཉིས་ཙམ་དང༌། མི་སྣང་བར་གྱུར་པ་ཡང་དྲུག་ཙམ་དང༌། དངོས་གྲུབ་ཕྲ་མོ་དང༌། ལས་ཚོགས་གྲུབ་པ་ནི་དཔག་ཏུ་མེད་པ་འདུག་གསུང༌། དེ་ནས་ཚོགས་པ་ཤས་ཆེ་བ་ནི་སོ་སོར་གྱེས་
ཤིང༌། རྣལ་འབྱོར་ཕོ་མོ་སུམ་བརྒྱ་ཙམ་ཞིག་སླར་ཡང་ཟླ་བ་བཞི་ཙམ་དེར་བཞུགས་ཏེ། དེ་ཀུན་གྱི་འཚོ་བ་ཡང་རྒྱལ་པོའི་ཕུལ། དེ་བར་དུ་དམ་པ་འདིས་ཀྱང་བཞུགས་ཤིང༌། དམ་པའི་ཆོས་ཀྱི་དགའ་སྟོན་གྱིས་ཐུགས་མགུ་བ་བླ་ན་མེད་པ་ཐོབ། མཆོག་བརྙེས་ཞི་བའི་ཞལ་སྔ་ནས་དམ་པ་འདི་ལ། ཁྱོད་བྱང་ཕྱོགས་དང་ཤར་ཕྱོགས་ཀྱི་ཡུལ་རྣམས་སུ་སོང༌། སྐལ་བ་དང་ལྡན་པར་ཤེས་ན་གཞན་ལ་ཆོས་ཀྱང་ཅི་རིགས་པར་ཤོད། ཅེས་སྩལ་པ་ལྟར་བླ་མའི་ཞབས་ལ་ཕྱག་མཛད་དེ། ཕྱིར་ཕེབས་པ་ན་པཎྜི་ཏའི་རྣམ་པ་གཅིག་གིས། མགྲོན་ཁང་གཡོས་ཁང་ཡོད་པ་ཞིག་ཏུ་ཁྲིད། གཡོས་ཁང་གི་ནང་དུ་མི་མང་པོ་ཡོད་པ་ལྟར་སྣང་བ་ཞིག་ལས། དམ་པ་འདི་དང་གཞན་ཡང་རྣལ་འབྱོར་པ་མང་པོ་ལ། བཟའ་བཏུང་གྱ་ནོམ་པའི་རྙེད་བཀུར་བྱས། དེ་ཉིད་ཕྱིར་སོང་བའི་ཤུལ་ན། གཡོས་ཁང་གི་ནང་ན་སུ་ཡང་མེད་དེ། མེ་བུས་པའི་ཤུལ་ཡང་མི་སྣང་གསུང༌། ཡང་རྣལ་འབྱོར་པ་གཞན་ཞིག །མེ་བས་ཤིག་ཅེས་བརྗོད་པས་མེ་རང་འབར་འབྱུང་ཞིང༌། འབྲས་ཚོས་ཤིག་ཅེས་བརྗོད་པས་སྣོད་དུ་འབྲས་ཆན་འབྱུང་བ་སོགས་ཆོ་འཕྲུལ་དེ་ལྟ་བུས་མགྲོན་བྱེད་པ་ཞིག་ཀྱང་ཡོད་གསུངས། དེ་ནས་པྲ་ཡ་ཀར་ཕེབས་པས། ཞི་བའི་ཞབས་ཀྱི་སློབ་མ། ཤུབྷ་རཀྵི་ཏ་ཞེས་བྱ་བ་རྣལ་འབྱོར་པ་ཤིན་ཏུ་མ་སྤྲོས་པ་འཆོལ་བ་ལྟར་སྟོན་པ་ཞིག་དང་མཇལ། ཁོང་རྣལ་འབྱོར་ཆེན་པོར་
གྲགས་པའི་ཕྱག་མཛད་ཅིང༌། དཀའ་བ་མང་པོ་བྱས། རྩེ་གཅིག་ཏུ་བསྒོམས་པས། ཐུན་མོང་གི་རྟགས་འདི་ཙམ་ཐོབ་གསུང་སྟེ། རླུང་ཅུང་ཟད་འཛིན་ཀྱྀན་འདུག་པས། སྐུ་ལུས་ཤིན་ཏུ་ཆུང་བར་གྱུར་ནས་ཀུ་ཕོར་ཆུང་ཆུང་ཞིག་གི་ནང་དུ་ཞུགས། ཡང་རླུང་སྦྱོར་ཞིག་མཛད་ཀྱིན་འདུག་པས་སྐུ་ལུས་མི་འདྲ་བ་བརྒྱད་བྱུང༌། མཆོག་གི་ཡོན་ཏན་ནི་ཆོས་ཐམས་ཅད་མཉམ་པ་ཉིད་དུ་མཐོང་བ་ཙམ་ཡོད་གསུང༌། གདམས་པ་གནང་བར་ཞུས་ཀྱང་མ་གནང༌། དེ་ནས་ཛ་གད་ནཱ་ཐར་ཕེབས། དེ་རྗེས་ཅིག་ཏི་བུ་ར་དང་ཉེ་བ་བྷི་མེ་ཤྭ་རའི་ཡུལ་ན་ཕྱི་བྲག་ཕུག་ལ། ནང་དགྱེས་རྡོར་དྲག་པོ་གདན་ཅན་གྱི་ལྷ་ཁང་ཀ་ཡསྠ་བགྲེས་པོས་བཞེངས་པ་ཞིག་ཡོད་པར་བཞུགས་དུས། མཚན་མོ་ཅིག་དེར་དུར་ཁྲོད་ནས་རོ་ལངས་ཉི་ཤུ་ཙམ་ཡོངས་ནས་གར་བྱེད་ཅིང་འདུག མཆོད་གཏོར་དངོས་སུ་བླངས་སོང་གསུང༌། དེ་སྐབས་ཙརྱ་པའི་རྣལ་འབྱོར་པ་འགའ་ལ་དབང་དང་མན་ངག་འདྲ་མཛད། བྷཾ་ག་ལ་དང༌། ཏི་པུ་ར་དང༌། ར་ཁང་གི་རྣམས་སུ་སླར་ཡང་ཕེབས། ཀཱ་མ་རུར་ལོ་གཅིག་ཙམ་བཞུགས། སློབ་མ་བརྒྱད་ཙམ་ཕྱག་ཕྱིར་ཡོད་པ། ཡང་དག་པའི་དོན་ལ་རྟོགས་པ་བཟང་རབ་ཡོད་པ་རྣམས་རྗེ་བཙུན་ཞི་བའི་ཞབས་མཇལ་བར་སོང༌། གཞན་འགའ་ཞིག་ཡོད་པ། རྗེ་ཉིད་ཀྱི་མཆེད་གྲོགས་ཞིག་ལ་གཏད་དེ། རང་ཉིད་ཤིང་གི་རི་བརྒྱུད་ནས་ཕེབས་པས་མོན་པའི་ཇག་པ་ཚན་གཅིག་བྱུང་བ། རང་དཀྱིལ་འཁོར་དུ་བསྒོམས་པས་ཁོ་བ་ཚོ་མིག་
ཡེངས་པ་འདྲ་བ་ལ་ཅང་མ་བྱས་པར་ཚུར་ཐོན། བོད་ཀྱི་ཕྱོགས་སུ་ཆེད་བརྟད་ལྷ་ས་མཇལ་བར་ཕེབས། ལམ་དུ་བསམ་ཡས་མཇལ་བར་ཕེབས་པས། གནས་བདག་མི་དཀར་པོའི་རྣམ་པར་དངོས་སུ་བྱུང༌། ཕྱག་འབུལ་ཞིང་ཆོས་འབྲེལ་ཞུས་ཏེ། དེ་ནས་ལྷ་སར་ཕེབས་དུས་ཇོ་བོ་ཤཱཀྱ་མུ་ནེ་དེ་ཐུབ་པའི་དབང་པོ་ཆགས་བྲལ་ལ་ཤེས་རབ་དང་བཅས་པ་གོ་བཟློག་གི་ལྷར་ཞལ་གཟིགས། བཅུ་གཅིག་ཞལ་ལ་གསོལ་བ་འདེབས་པར་མཛད་པས། ཁ་སརྤ་ཎིའི་སྐུ་ཞིག་ཐུགས་ཀ་ནས་ཆད་ནས། ཉིད་ཀྱི་ཐུགས་ཀར་ཐིམ་པའི་མོད་ལ། རང་ཉིད་འཕགས་པ་སྤྱན་རས་གཟིགས་དངོས་ཡིན་སྙམ་པ་ཞག་མང་པོ་བྱུང་གསུངས། ནུབ་གཅིག་དངོས་སུ་བུད་མེད་ཤིན་ཏུ་མཛེས་མ་གཟི་བརྗིད་ཆེ་བ་མང་པོ། རེ་རེ་ལ་འཁོར་བརྒྱ་སྟོང་དུ་མར་བཅས་པ་མཇལ་བར་བྱུང༌། གླུ་དང་མཆོད་པ་མང་པོ་བྱས། བོད་དུ་སླེབ་པ་ལ་གཞི་ལེན་གྱི་ཚུལ་དུ་འདུག བོད་ཀྱི་གནས་བདག་མཁའ་འགྲོ་མ་ཆེན་མོར་འདུག་གསུང་སྟེ། བསྟན་མ་བཅུ་གཉིས་ཡིན་པར་མངོན་དེས་ཞག་མང་པོ་མི་ཟས་གསོལ་མ་དགོས། དེ་ནས་རིམ་གྱིས་གཙང་ཕྱོགས་སུ་ཕེབས། བོད་ཀྱི་སྡེ་དཔོན་གྱི་སར་ཆེར་མ་ཕེབས། དེ་སྐབས་བདག་དབེན་གནས་བྱང་ཆུབ་ཆེན་པོར་ཡོད་པ་དང་དུས་མཚུངས། བདག་གི་བསོད་ནམས་ཀྱི་དཔལ་དུ་ཕེབས། སང་ཕེབས་རྒྱུའི་དོ་ནུབ་རྨི་ལྟས་ཀྱང་བཟང་བ་རང་ཞིག་རྨིས། བདག་གིས་འཕྲལ་
སྐད་ཐམས་ཅད་བྱང་བར་ཤེས་ཤིང༌། ལེགས་སྦྱར་ཡང་ཐོར་བུ་ཤེས་པས། ཆོས་དང་གང་ཟག་གི་དྲི་བ་འགའ་རེ་ཞུས་པ་རྣམས། ལན་དཔྱིས་ཕྱིན་པར་བཀའ་སྩལ། སྤྲོ་བ་བསྐྱེད་དེ་རྒྱུད་ཅི་ཙམ་མཁྱེན་ཞུས་པས། །ཀྱཻ་རྡོ་རྗེ། སམྦུ་ཊ། སངས་རྒྱས་མཉམ་སྦྱོར། མཧཱ་མཱ་ཡ། མཚན་བརྗོད། དབང་མདོར་བསྟན། སྒྲོལ་མའི་རྒྱུད་རྣམས་ཞིབ་མོར་ཐོས། བདེ་མཆོག་འཁོར་ལོ་དང༌། གསང་བ་འདུས་པ་དང༌། མི་གཡོ་བ་དང༌། རྡོ་རྗེ་གདན་བཞི་དང༌། རལ་གཅིག་མ་དང༌། ཀུ་རུ་ཀུལླེ་ལ་སོགས་པའི་རྒྱུད་ཕན་འགའ་རེ་དང༌། ནག་པོ་ཆེན་པོའི་རྒྱུད་རྣམས་ཡཾ་མེ་བ་རེ་ཉན་གསུངས། མན་ངག་གི་གཞུང་ནི་མཐའ་ཡས་པ་ཞིག་ཐུགས་ལ་མངའ་སྟེ། གསང་འདུས། བདེ་མཆོག གཤེན་རྗེ་གཤེད་དང༌། མཧཱ་མཱ་ཡ། ཀྱཻ་རྡོ་རྗེ་སོགས་གྱི་རྫོགས་རིམ་གྱི་གཞུང་མང་པོ་དང༌། གཞན་ཡང་གསང་བ་གྲུབ་པ་དང༌། དོ་ཧ་མཛོད་དང༌། ཕྱག་རྒྱ་བཞི་པ་དང༌། བསམ་མི་ཁྱབ་ལ་སོགས་པ་གཞུང་མང་པོ་དང༌། ཕྲེང་བ་སྐོར་གསུམ་སོགས་སློབ་དཔོན་གྱི་ལས་རིམ་གྱི་གཞུང་ཆེན་བོད་དུ་སྔར་འགྱུར་བའི་ཚད་ལྡན་རྩ་བའི་གཞུང་རྣམས་ཕལ་ཆེ་བ་ལའང་མཁྱེན་པ་ཤིན་ཏུ་རྒྱས་པར་སྣང་ཡང་དེ་དུས་ངེད་ཀྱིས་ཆེར་མ་ཞུས། སྔ་ཕྱིར་གསེར་ཞོ་ཉི་ཤུ་ལྷག་ཙམ་དང༌། དངུལ་ཊཾ་ཁ་བརྒྱད་ཙམ། གཞན་ཅི་རིགས་པ་དང༌། དབང་རེ་ལ་གོས་དར་ཡུག་རེ་ཙམ་དང༌། ཐེར་མ་རེ་ཙམ་དང༌། བྱིན་བརླབས་དང་མན་ངག་རེ་
ལ་ཚོགས་འཁོར་རེ་དང་ཁ་བཟང་བ་རེ་ཙམ་རེ། ཆོས་ཐུན་ཐམས་ཅད་ལ་ཆོས་ཕྱག་བཟང་བ་རེ་མ་ཆག་པར་ཕུལ་ཏེ། སྔོན་ཆད་ཁ་བ་ཅན་གྱི་ཕྱོགས་སུ་མ་བྱུང་བ་ཞུས་པ་ལ། སྒྲོལ་མ་རྣལ་འབྱོར་མའི་དབང་བསྐུར་བ། དེའི་བསྐྱེད་རིམ་དང༌། རྫོགས་རིམ་གྱི་མན་ངག་བྱིན་བརླབས་དང་བཅས་པ། རྒྱུད་ཀྱི་བཤད་པ། གསང་འདུས་ཡེ་ཤེས་ཞབས་ལུགས། མི་བསྐྱོན་པ་ལྷ་བཅུ་དགུ། སེམས་ཀྱི་ཕྱག་རྒྱའི་དབང༌། དཔྱིད་ཐིག་གི་བྱིན་རླབས། བཀའ་བབས་དྲུག་ལྡན་གྱི་ཁྲིད་ཆེན་མོ། ཛ་ལན་དྷ་རའི་དོ་ཧ་དང་མན་ངག སེམས་ཀྱི་ཕྱག་རྒྱས་མན་ངག་གཞུང་བཤད། ཡི་གེ་བཞི་པའི་མན་ངག རང་བྱིན་གྱིས་རླབས་པའི་བྱིན་རླབས་རྣམས་དང་གཞུང་གི་བཤད་པ། ཕྱག་རྒྱ་བཞིའི་སྙིང་པོ། ཀྱཻ་རྡོ་རྗེའི་རྫོགས་རིམ་ཀུ་ས་ལའི་མན་ངག་དང༌། ཡན་ལག་དྲུག་པ། ཡེ་ཤེས་འཆར་བ། སྒྲོན་མེ་གཅིག་པ། དྲན་པ་གཅིག་པ། མཧཱ་མཱ་ཡའི་མན་ངག ཕག་མོ་ཀེང་རུས་ལ་ཞུགས་པ་ཛ་ལན་དྷ་རིའི་ལུགས། ཕག་མོ་རྔོན་པའི་གདམས་ངག ཕག་མོ་སྣ་ཚོགས་མདོག རྣམ་འབྱོར་མ་དཀར་དམར་སྔོ་གསུམ། ངང་བའི་རྡོ་རྗེ་བདག་མེད་མ། རྡོ་རྗེ་ཕག་མོ་ཅ་ཅོ་སྒྲོག་མ། མི་གཡོ་བའི་རྫོགས་རིམ་ཨ་ཏི་ཤས་མཛད་པ། དཔལ་མཆོག་ཌོམ་བི་པའི་དེ་ཉིད་བཞི་པ། ནག་པོ་ཆེན་པོའི་སྒྲུབ་ཐབས་གཉིས་དང་བཅས་པ་རྣམས་ལེགས་པར་ཐོབ། ཉིན་མཚན་མེད་
འབད་སྩོལ་བྱས་ཏེ། དབང་དང་བྱིན་བརླབས་དང༌། ཁྲིད་རྣམས་ལ་དོགས་དཔྱོད་ཟིན་བྲིས་ནན་ཆགས་སུ་བྱས་ཤིང༌། གཞུང་མང་པོ་ཕྱག་དཔེ་དང༌། ཞལ་ལས་ཡི་གེར་བྲིས་ཏེ་ཐོ་རེ་ལོང་ངེ་བ་བསྒྱུར་ཞིང༌། གསུང་འཕྲོས་ཅི་བྱུང་བྱུང་ཟིན་བྲིས་སུ་བྱས། ཆོས་ཟབ་མོ་གཅིག་ལ་རྣམ་རྟོག་ཅུང་ཟད་གཅིག་བྱུང་བའི་རྐྱེན་གྱིས་ཟླ་བ་གསུམ་དུ་ཉེ་བ་ན། ཅིས་ཀྱང་མྱུར་དུ་འབྱོན་པའི་ཞལ་ཏ་གནང་བ་ལ། ལོ་གསུམ་ཅིས་ཀྱང་བཞུགས་དགོས་པ་དང༌། མིན་ནའང་ལོ་གཅིག་ཅིས་ཀྱང་བཞུགས་དགོས་པའི་ནན་ཞུས་ཕུལ། དེ་ལྟར་མ་གནང་ན་ཆོས་ཀྱང་འཕྲོ་ལུས་འགྲོ་བར་འདུག བཀའ་དྲིན་དྲན་པའི་ཡོན་ནི་འདི་ཙམ་ཞིག་མ་མཐའ་འབུལ་ཞེས་ཞུས་ཀྱང༌། མྱུར་དུ་རྒྱ་གར་དུ་འགྲོ་བ་དོན་ཆེ། རྙེད་པ་དང་ནོར་གྱི་དགོས་པ་མེད། བཤད་པ་དང་གདམས་ངག་གི་འཕྲོ་རྣམས་ངའི་ཆོས་ཀྱི་སྤུན་རྣམས་ཀྱིས་འཆད་པར་འགྱུར། རྣམ་རྟོག་ཤས་ཆེ་བར་འདུག་པས། གདམས་ངག་ལ་ལ་བཤད་ཀྱང་མི་བཏུབ་པ་འདུག་གསུང་ཞིང་བཞུགས་སུ་མ་གནང༌། རྗེ་འདི་ཉིད་རྒྱ་གར་བའི་ལུགས་ལ་ལྟོས་པའི་དབང་དང་གདམས་ངག་གནང་བ་ལ་བཀའ་ཡངས་པར་འདུག་ཅིང༌། འོན་ཀྱང་བླ་མེད་ཀྱི་དབང་དང་གདམས་ངག་འདི་ཀུན་ནི། སློབ་མ་བཞིར་ལོངས་པ་ལ་ཕྱོགས་གཅིག་ཏུ་འཆད་པ་ཆེར་མེད་གསུངས། དམ་པ་འདི་གོང་དུ་བཤད་པ་ལྟར། མཁས་པའི་ཡོན་ཏན་ཡང་བསམ་གྱིས་མི་ཁྱབ་ཅིང༌། རྣལ་
འབྱོར་པའི་རྟགས་མཚན་ཁོ་བོ་ཅག་གི་ཐ་མལ་བའི་མིག་གི་མཐོང་བ་ཡང༌། ཉི་མ་ཕྱེད་ཙམ་དུ་རླུང་གི་རྒྱུ་བ་བཀག་ནས་བཞུགས་པ་དང༌། ཤིན་ཏུ་གྲང་བའི་ཚེ་ཡང་སྐུ་ལུས་གཅེར་བུར་བཞུགས་པ་ལ་ཉམས་ང་བ་མེད་པར་མ་ཟད། ཉེ་འཁོར་འདོམ་གང་ཙམ་ཚུན་ཆད། ཚ་ཚུབ་ཚུབ་པ། གཞན་གྲང་བ་ལས་སྐྱོབ་ནུས་ཤིང༌། རླུང་རྣམས་ཞལ་དང་ཤངས་ཀྱི་རྒྱུ་བ་བཀག་ནས། སྤྱན་དང་སྙན་ནས་ཅི་བདེར་འབྱུང་འཇུག་ནུས་པ་དང༌། ཞབས་ཆུ་ལ་མི་བྱིང་བ་དང༌། ཕྱག་སོར་གཉིས་ས་ལ་བཙུགས་ཏེ་སྐུའི་བརྗིད་ཐམས་ཅད་བོར་ཡང་ཡུན་རིང་དུ་ཐེག་པ་དང༌། གཞན་གྱི་སེམས་མཁྱེན་པ་སོགས་ལྐོག་གྱུར་གཟིགས་པ་མངའ་འོ། །སྐུ་ལུས་ཡང་བས་ཐོག་སོ་གཉིས་གསུམ་སྐུ་ལྷུང་དུ་བཅུག་ཀྱང་ལྤགས་པ་བསྐྱུར་བ་འདྲ་བ་ཟེམ་ཟེམ་འབབ་པ་དང༌། རི་གཟར་པོ་ལ་ཡང་ཐང་བཞིན་གཤེགས་པ་དང༌། དུག་དང་དངུལ་ཆུ་ལ་སོགས་པས་སྐུ་ལ་གནོད་པ་མེད་པ་དང༌། ཐུགས་བྱམས་པའི་ངང་ཚུལ་གྱིས་ཁྱི་དང་གཅན་གཟན་མ་རུངས་པ་རྣམས་ཀྱང་སྐུ་ལ་ལྡག་པ་སོགས་ཡིད་ཆགས་པར་བྱེད་ལ། བྱ་རོག་དང་བྱིའུ་ལ་སོགས་པ་རྣམས་སྐུ་པང་དང་ཕྱག་རྩེར་འོང་ཞིང༌། ཕྱག་གིས་བྱུགས་ཀྱང་མི་འབྲོས་པར་དགའ་བཞིན་པས་གནས་པ་དང༌། དབང་བསྐུར་བའི་ཚེ་ཡེ་ཤེས་དངོས་སུ་འབེབ་པར་ནུས་པ་དང༌། དཀྱིལ་འཁོར་ལས་འོད་འཕྲོ་བ་སོགས་ཆོ་འཕྲུལ་ཅི་རིགས་པ་སྐལ་ལྡན་
རྣམས་ཀྱི་ངོར་སྟོན་པར་མཛད་པ་དང༌། མིའི་ཁ་ཟས་གསོལ་བ་མེད་ཀྱང༌། མི་མ་ཡིན་གྱིས་ཕུལ་བའི་ཞལ་ཟས་ཀྱིས་འཚོ་བ་དང༌། ལྷའི་རྣལ་འབྱོར་ལ་ཐུགས་རྩེ་གཅིག་ཏུ་བཞག་པའི་ཚེ་ད་ལྟའི་སྣང་བ་འདི་དངོས་སུ་འགག་ཅིང༌། དུས་རྟག་ཏུ་ཕྱི་ནང་ཐམས་ཅད་གཞི་མེད་རང་གྲོལ་དུ་གཟིགས་པའི་ཡེ་ཤེས་མངའ་སྟེ། བདག་ཅག་ཉི་ཚེ་བ་རྣམས་ཀྱི་སྤྱོད་ཡུལ་ཡང་དེ་འདྲ་ན། སྐུ་གསུང་ཐུགས་ཀྱི་ཡོན་ཏན་གྱི་ཕ་མཐའ་ནི་སུ་ཞིག་གིས་བགྲང་བར་སྤྱོད། ཡི་དམ་གྱི་ལྷ་ཇི་ལྟར་གཟིགས་ཚུལ་ཞུས་པས། དངོས་སུ་ནི་མ་མཐོང༌། རྨི་ལམ་གྱི་མཚན་མ་བརྟན་པོ་ལ། རྡོ་རྗེ་ཕག་མོ་དང༌། སྒྲོལ་མའི་རྣམ་པ་ཡང་ཡང་འོང༌། དཔལ་ཧེ་རུ་ཀ་དང༌། བཅོམ་ལྡན་འདས་ཤཱཀྱ་ཐུབ་པའང་ལན་འགའ་རེ་མཐོང་གསུང༌། དེ་ཡང་ཞལ་གཟིགས་དངོས་ཀྱི་དབང་དུ་བྱས་ཤིང༌། བདག་ཅག་བློ་ཆུང་རྣམས་ཀྱི་དོན་གསུངས་ཀྱི། ཉམས་ཀྱི་སྣང་བ་ལ་གཟིགས་པ་ནི་ཅི་རིགས་པ་གོང་དུ་བརྗོད་པ་ལྟར་ཡང་ཡིན་ལ། གཞན་ཡང་རྟག་ཏུ་རྒྱུན་མི་ཆད་པར་གཟིགས་ཀྱིན་ཡོད་པར་སྣང་ངོ༌། ཁོ་བོ་ཡང་སྐུ་དྲུང་ན་ཡོད་པ་ལ། ལན་གཅིག་ནམ་མཁའ་ལ་གཟིགས་ཤིང་སྐུ་ཉམས་དང་གསུང་ཉམས་མང་པོ་ཞིག་མཛད་ཀྱིན་འདུག་པ་ལ། ཇི་ལྟར་ཡིན་ནན་གྱིས་ཞུས་ཤིང་གསོལ་བ་བཏབ་པས། ལཱུ་ཡི་པ་དང༌། པདྨ་འབྱུང་གནས་འཁོར་མང་པོ་དང་བཅས་ཏེ་ནམ་མཁའ་ལ་གཤེགས་པར་འདུག་གསུང༌། སིནྡྷུ་ཧིང་ག་ལྔ་ཙིའི་གནས་སུ་བྱོན་པ་མན་ཆད། སྔོན་གྱི་གྲུབ་
ཐོབ་མང་པོ་དང་ཡང་ནས་ཡང་དུ་མཇལ། ཡང་བཀའ་ལས་ཁོ་བོས་སྔགས་བཟླས། རླུང་བསྒོམས། ཆུ་དང་གཡང་ས་དང་ཆོམ་པོ་དང༌། ལྟོ་གོས་ཀྱི་འཇིགས་པ་མེད་པས་ང་ནི་གནས་སྐོར་བྱེད་པ་བློ་བདེ་ཞིང་སྐྱིད་པོ་ཡོད་ཀྱང་གསུང་ངོ༌། །དེ་ལྟར་ན་བདག་གིས་དམ་པ་འདི་ལ་གཞུང་དང་མན་ངག་ཅི་རིག་པར་ཐོབ་མོད་ཀྱི། དེ་ཙ་ན་འབྱོར་པ་ཡང་ཆུང༌། རྣམ་རྟོག་ཀྱང་རྒོད་པས། རྫོགས་རིམ་གྱི་མན་ངག་གི་གནད་ཟབ་མོ་ཅི་རིགས་པ་ཐོབ་ཀྱང༌། མང་པོ་ཞིག་མ་ཐོབ་ཅིང༌། བླ་མ་ཉིད་ཀྱིས་བཀའ་སྩལ་ལྟར། གཞུང་གི་བཤད་པ་རྣམས་ནི་དམ་པ་འདི་ཉིད་ཀྱི་མཆེད་གྲོགས། སློབ་དཔོན་ནིརྦཱ་ཎ་ཤྲཱིའི་ཞབས་དང༌། པུརྞ་བཛྲ་གྱི་ཞབས་ལས་མཐའ་ཆོད་པར་ནོད་མོད་ཀྱི། སྔར་མ་ཐོབ་པའི་མན་ངག་རྣམས་ཞུས་དུས། ཕལ་ཆེར་མི་བཞུགས་གསུང་ནས་མི་གནང་ངོ༌། །དམ་པ་འདི། དེ་ནས་བོད་ཀྱི་ཡུལ་ཁམས་གཞན་ཅི་རིགས་པ་རྣམས་སུ་ཕེབས་ནས། སྐྱིད་གྲོང་ཕྱཽགས་སུ་ཟླ་བ་གསུམ་ཙམ་བཞུགས་གནང་ཟེར། འགྱང་ཙམ་བཞུགས་བདེན་ཡིན། ཡང་སྐབས་དེ་ཉིད་དུ་ཀ་སྣར་ཐང་བའི་ཚོང་པ་འབྲས་དོལ་ཁར་ཕྱིན་པ་དང་ཡང་མཇལ་ངེས་ཡིན་ཟེར། སྐུ་ལུས་ཀྱི་བཀོད་པ་གཉིས་པར་སེམ། དེ་ནས་བལ་ཡུལ་མཐིལ་དུ་ཕེབས། འཇུ་འཇུ་འགའ་ཞིག་གིས་ཞབས་རྟོག་དང་འབུལ་བ་ཆེར་བྱས་པ། དེ་ཉིད་དུ་འཕོངས་པ་ཐམས་ཅད་ལ་སྩལ། བལ་
པོའི་གནས་ཐམས་ཅད་མཇལ་བར་མཛད། ཟླ་བ་གཉིས་གསུམ་ཙམ་བཞུགས། དེ་ནས་ཡུལ་བྷང་ཤྱ་ཡང་ཟེར། ཙམྤཱ་ར་ཎར་ཕེབས། སྔར་གྱི་སློབ་མ་རྣམས་དང་མཇལ་ཏེ། དཔོན་སློབ་ལྷན་ཅིག་ཏུ་པྲ་ཡ་ག་སོགས་ཀྱི་ལམ་རྒྱུད་ནས། གྲུབ་ཆེན་ཞི་བ་སྦས་པའི་དྲུང་དུ་ཕེབས་ཏེ། རྡོ་རྗེ་སློབ་དཔོན་གཙོ་བོར་བཞུགས། ཁ་གེནྡྲའི་རི་ལ་གནས་པའི་རྣལ་འབྱོར་ཕོ་མོ་རྣམས་ལ། འཁོར་ལོའི་མཆོད་པ་རྒྱ་ཆེན་པོ་མཛད། འདི་སྐབས་ནི་སློབ་དཔོན་ཆེན་པོ་ཞི་བའི་ཞབས་ཀྱང༌། སློབ་མ་རྙིང་པ་མཆོག་རྣམས་མ་གཏོགས་ཕལ་ཆེར་དང་མི་མཇལ་བར་ལོ་གཅིག་གཉིས་འགྲོ་ཚོད་ཡིན་པར་འདུག བཞུགས་ས་ཡང་ཕུག་པ་ཟབ་མོ་མི་བཟད་པ་ཅིག་ཡོད་པར་འདུག རྗེ་འདིས་ཟླ་གཅིག་ཙམ་ཁ་གེནྡྲའི་གནས་དེར་བཞུགས་ཏེ། ཉིན་རེ་བཞིན་གྲུབ་ཆེན་ཞི་བའི་ཞབས་ཀྱི་སྐུ་དྲུང་དུ་ཕེབས་གྱིན་འདུག་ཟེར། དེ་ནས་ཡང་ཡུལ་དབུས་ཀྱི་ལམ་རྒྱུད་ནས་བྷངྒ་ལར་ལོ་གཅིག་ཙམ་བཞུགས། སྤྱོད་པ་པའི་རྣལ་འབྱོར་ཕོ་མོ་ཉི་ཤུ་ཙམ་ཞབས་འབྲིང་དུ་བྱུང་ལ། སླར་ཏི་ཕུ་རའི་ཡུལ་དུ་ཕེབས། ལོ་མང་རབ་བཞུགས། དེ་ནས་ད་ལྟ་དེ་ཝི་ཀོ་ཊ་དང་ཉེ་བ་ཞིག་ན་བཞུགས་ཞེས་ཐོས་སོ། །འདི་དག་གི་སྐབས་ཀྱི་ཡུལ་སོ་སོའི་ངོ་མཚར་བའི་གཏམ་མང་པོ་ཡོད་མོད་ཀྱི། འདིར་རྣམ་ཐར་དཀྱུས་གོ་བའི་གེགས་སུ་འགྱུར་བར་སྣང་བས་མ་བྲིས་སོ། ༈ ཡང་སྨྲས་པ། རྗེ་བཙུན་མཆོག་འདིའི་བཀའ་དྲིན་གྱིས། །
བདག་ཀྱང་སྐལ་བ་བཟང་པོར་གྱུར། །འགྲོ་ལ་རྟག་ཏུ་ཕན་དགོངས་པ། །བརྩེ་ལྡན་ཁྱོད་ལ་ཕྱག་འཚལ་ལོ། ཁྱོད་སྔོན་མ་རུའི་དུས་ཡུལ་ཕྱོགས་སུ། ང་ཙོར་གྱུར་ཏེ་འདབ་ཆགས་ཀྱི། །འགྲོ་བ་མང་ལ་ཆོས་སྟོན་པ། །དེ་ཚེ་གཙོ་བོར་གྱུར་ལ་འདུད། །རི་བོ་པོ་ཊ་ལ་ཡི་ངོགས། །དགེ་བསྙེན་རིགས་སྔགས་འཛིན་གྱུར་ནས། །སྤྱན་རས་གཟིགས་དབང་སློབ་དཔོན་དུ། །བསྟེན་མཛད་ཁྱོད་ལ་ཕྱག་འཚལ་ལོ། །དུས་གཞན་ཞིག་ན་ཨོ་རྒྱན་དུ། །ལྭ་བའི་ཞབས་ཀྱིས་རྗེས་བཟུང་ནས། །བླ་མར་གུས་པའི་ཚད་དུ་བཞག །གཙོ་འཁོར་གཉིས་མེད་གྱུར་ལ་འདུད། །ས་འོག་སྤྱོད་པའི་མི་མ་ཡིན། །རིགས་འཛིན་མཐུ་སྟོབས་ཆེར་གྱུར་ནས། །ཀླུ་དང་ལྷ་མིན་དབང་པོ་སོགས། །འགྲོ་བའི་དོན་ཆེན་མཛད་ལ་འདུད། །དེང་འདིར་གྲུབ་པ་ཐམས་ཅད་ཀྱི། །ཞལ་ལུང་དངོས་སུ་གསོལ་མཛད་ནས། །སྐལ་ལྡན་མང་པོའི་དོན་མཛད་པའི། །གྲུབ་པའི་དབང་ཕྱུག་ཁྱོད་ཕྱག་འཚལ། །འདི་འོག་ལྕང་ལོ་ཅན་དུ་ནི། །བཛྲ་ཤུ་ཀླ་ཞེས་བྱ་བ། །གསང་བའི་བདག་པོའི་ཕོ་ཉར་འགྱུར། །རིགས་སྔགས་བདག་པོ་དེ་ལ་འདུད། །དེ་འོག་ཨིནྡྲ་ནཱི་ལའི་འོད། །ཅེས་བྱ་སངས་རྒྱས་ཞིང་མཆོག་ཏུ། །རྡོ་རྗེ་སྡེ་ཞེས་བྱ་བ་ཡི། །འཁོར་ལོའི་བསྒྱུར་རྒྱལ་དེ་ལ་འདུད། །སླར་ཡང་ཞིང་དེར་དགའ་ལྡན་གནས། །མཛེས་བྱེད་གསེར་གྱི་དབང་པོ་ཞེས། །སྐྱེ་བ་
གཅིག་གིས་ཐོགས་པའི་ཚུལ། །སེམས་དཔའ་ཆེ་ལ་སྤྱི་བོའི་འདུད། །དེ་ནས་དེ་བཞིན་གཤེགས་པ་ནི། །རིན་ཆེན་རབ་འཕྲོ་སྣང་བ་ཞེས། །ཐེག་ཆེན་དམ་ཆོས་སེང་གེའི་སྒྲ། །སྒྲོག་མཛད་རྒྱལ་བ་ཁྱོད་ལ་འདུད། ཁྱོད་སྔོན་ཤཱཀྱ་ཐུབ་པའི་དྲུང༌། །ཞིང་པར་གྱུར་ཏེ་དད་པ་བསྐྱེད། །དེ་ནས་བརྩམས་ཏེ་དུས་རྟག་ཏུ། །མཆོད་འོས་གྱུར་པ་ཁྱོད་ལ་བསྟོད། །དེ་དག་ནི་རྡོ་རྗེ་གདན་གྱི་བྱང་ཆུབ་ཆེན་པོ་དང༌། དཔལ་ཧེ་རུ་ཀས་ལུང་བསྟན་པ་དང༌། སྔོན་གྱི་གནས་རྗེས་སུ་དྲན་པའི་ཚུལ་ཤིན་ཏུ་གསང་བ་ཆེན་པོས་བཀའ་སྩལ་པའི་སྐྱེས་རབས་རྣམས་སོ། །ཞེས་པ་འདི་ནི་བླ་མ་དམ་པ་ལྷོ་ཕྱོགས་པ་སངས་རྒྱས་སྦས་པའི་མགོན་པོའི་རྣམ་པར་ཐར་པ་སྟེ། རྒྱ་གར་གྱི་སློབ་དཔོན་ཆེན་པོ་དེ་ཉིད་ཀྱི་ཞབས་ཀྱི་པདྨོ་ལ་ཉེ་བར་རེག་པས་རྡོ་རྗེ་ཐེག་པ་ལ་བློ་གྲོས་ཀྱི་སྣང་བ་རྒྱས་པའི་བཀའ་དྲིན་ཐོབ་པ་རྒྱལ་ཁམས་པ་ཏཱ་ར་ནཱ་ཐས་རང་གཞན་ལ་ཕན་པའི་ཕྱིར་སྒྲོ་སྐུར་སྤངས་ཏེ་དངོས་གནས་ལྷུག་པར་བརྗོད་པའོ། །ཐོག་མའི་དུས་ཀྱི་བརྗེད་བྱང་ལས་གསལ་བར་ཕྱེ་བ་འདི་ནི་རང་ལོ་ཉེར་བདུན་པ་ལའོ། །འདིས་ཀྱང་རྒྱལ་བའི་བསྟན་པ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །ཞུས་དག །མདྒལཾ།། །།