འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱ་ཆེར་འགྲེལ་པ།
འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱ་ཆེར་འགྲེལ་པ་འཕགས་མཆོག་རྣམས་ཀྱི་གསང་བའི་མཛོད་ཅེས་བྱ་བ་བཞུགས་སོ།
ཨོཾ་སྭཱ་སྟི། འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོའི་རྒྱ་ཆེར་འགྲེལ་པ་འཕགས་མཆོག་རྣམས་ཀྱི་གསང་བའི་མཛོད་ཅེས་བྱ་བ། དེ་བཞིན་གཤེགས་པ་དང་འཕགས་པ་ཀུན་ཏུ་བཟང་པོ་ལ་ཕྱག་འཚལ་ལོ། །འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོའི་དོན་ཅུང་ཟད་བཤད་པར་བྱ་སྟེ། དེ་ལ་འདི་ནི་བྱང་ཆུབ་སེམས་དཔའི་སྨོན་ལམ་ཐམས་ཅད་ཡོངས་སུ་འདུས་པ་སྨོན་ལམ་གྱི་མདོ་ཆེན་པོ་ཡིན་པའི་ཕྱིར། ཚིགས་བཅད་འདི་ཉིད་ལོགས་སུ་ཕྱུང་བ་མདོ་སྡེ་རང་རྐང་ཚུགས་པ་ཞིག་ཏུ་ཡང་འགྱུར་ལ། སྤྱིར་ནི་འཕགས་པ་སངས་རྒྱས་ཕལ་པོ་ཆེ་ལས། འཕགས་པ་སྡོང་པོས་བརྒྱན་པའམ། འཕགས་པ་སྡོང་པོ་བཀོད་པའི་མདོ་ཞེས་བྱ་བ། བྱང་ཆུབ་སེམས་དཔའི་སྤྱོད་པ་རབ་འབྱམས་མཐའ་ཡས་སྟོན་པ་ཞིག་སྟེ། དམ་ཚིག་གསུམ་བཀོད་ཀྱི་རྟོག་པ་ལས། ཐེག་པ་ཆེན་པོའི་མདོ་སྡེ་མཆོག་ཏུ་བསྔགས་སོ། །མདོ་སྡེ་དེ་ཉིད་ཀྱི་མཇུག་གི་ཆ་ལ་གནས་པ་ལས་སྨོན་ལམ་འདི་ཕྱུང་བའོ། །ལོགས་སུ་བཞུགས་པ་ལ་མདོ་སྡེ་རང་རྐང་ཚུགས་པར་འགྱུར་བ་དང༌། ཚིག་དེ་ཉིད་མདོ་སྡེ་རྒྱས་
པ་གཞན་གྱི་ནང་ན་ཡོད་པ་ཡང་མི་འགལ་ཏེ། འཕགས་པ་ཚིགས་བཅད་གཅིག་པ་དང༌། འཕགས་པ་རྟེན་འབྲེལ་སྙིང་པོ་དང༌། ཤེར་ཕྱིན་བརྒྱ་ལྔ་བཅུ་པ་དང༌། སྒོ་ཉེར་ལྔ་པ་ལ་སོགས་པ་མདོ་རྒྱུད་དུ་མར་སྣང་བ་བཞིན་ནོ། །དེ་ཡང་སྤྱིར་སྡོང་པོ་བཀོད་པ་ཡོངས་རྫོགས་ཀྱི་དབང་དུ་བྱས་ན་ནི་འབྱམ་ཀླས་པ་ཞིག་ཡོད་པ་ལས། དེང་སང་འཛམ་བུའི་གླིང་དུ་སྤྱོད་པ་འདི་ནི། ནོར་བཟང་གིས་དགེ་བའི་གཤེས་གཉེན་བསྟེན་ཚུལ་ཕྱོགས་གཅིག་པ་སྟེ། འོན་ཀྱང་འདི་ཁོ་ནའི་དོན་ཙམ་ཡང་གཞལ་བར་དཀའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དག་པའི་ས་ལ་གནས་ངེས་པ་ཞིག་ཚོང་དཔོན་གྱི་ཁྱེའུའི་ཚུལ་བཟུང་བ། ནོར་བཟང་ཞེས་བྱ་བ་ཞིག་གིས། འཕགས་པ་འཇམ་དཔལ་ནས་བྱམས་པའི་བར་གྱི་དགེ་བའི་བཤེས་གཉེན་བསྟེན་ཏེ། མཐར་དཔག་ཚད་བརྒྱ་རྩ་བཅུའི་ཕ་རོལ་ནས་འཇམ་དཔལ་གྱིས་ཕྱག་བརྐྱང་བ། གྲོང་ཁྱེར་ཡིད་བདེ་བ་མངོན་དུ་གྱུར་པ་ཞེས་བྱ་བ་ན་ནོར་བཟང་ཡོད་པའི་སྤྱི་བོར་བཞག་སྟེ་ཆེད་དུ་བརྗོད་པ་མཛད་དོ། །དེ་ནས་ཚོང་དཔོན་གྱི་
བུ་ནོར་བཟང་ཡེ་ཤེས་ཀྱི་སྤྱོད་ཡུལ་མཐའ་ཡས་པ་ཐོབ་པ། འཇམ་དཔལ་གྱི་བྱིན་རླབས་ཀྱིས་ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ལ་འཇུག་ནུས་པར་བྱིན་གྱིས་བརླབས་ཤིང༌། རྡོ་རྗེ་རིན་པོ་ཆེ་པདྨའི་གདན་ལ་བཞག་སྟེ། དེ་བཞིན་གཤེགས་པ་རྣམ་པར་སྣང་མཛད་ཀྱི་སེང་གེའི་ཁྲི་ལ་མངོན་དུ་ཕྱོགས་པར་འདུག་གོ །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་ཀུན་ཏུ་བཟང་པོ་མཐོང་བར་འགྱུར་བའི་ལྟས་ངོ་མཚར་མཐའ་ཡས་པ་བཅུ་ཚན་གཉིས་ནོར་བཟང་གིས་མཐོང་ངོ༌། །དེ་ནས་འཕགས་པ་ཀུན་ཏུ་བཟང་པོ་ཉིད་མཐོང་ན་ཐམས་ཅད་མཁྱེན་པ་ཉིད་ཐོབ་པ་དང་འདྲ་བར་སེམས་པ་ལས། སྐད་ཅིག་དེ་ཉིད་ལ་ཡེ་ཤེས་མཐའ་ཡས་པ་འཕེལ་བར་གྱུར་ཏེ། བཅོམ་ལྡན་འདས་རྣམ་པར་སྣང་མཛད་ཀྱང་མངོན་སུམ་དུ་མཐོང༌། དེའི་སྤྱན་སྔ་ན་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཀྱང་མཐོང་ངོ༌། དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་དེ་བཞིན་གཤེགས་པ་ཐམས་ཅད་དང་མཉམ་པ་ཉིད་རྗེས་སུ་ཐོབ་པ་དེ་ཡང་རིན་ཆེན་པདྨའི་ཁྲི་ལ་བཞུགས་པ་མཐོང་སྟེ། དེའི་བ་སྤུའི་ཁུང་བུ་རེ་རེ་ནས་ཀྱང་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འོད་ཟེར་གྱི་སྤྲིན་མང་པོ་ཐོན་ནས། ནམ་མཁའི་མཐས་གཏུགས་པ་སྣང་བར་བྱས་ཏེ། སེམས་ཅན་ཐམས་ཅད་ཀྱི་སྡུག་བསྔལ་རབ་ཏུ་ཞི་བར་བྱེད་པ་ལ་སོགས་པ་རྣམ་པར་ཐར་པ་བསམ་གྱིས་མི་ཁྱབ་པའི་ཆོ་འཕྲུལ་ཆེན་པོ་ཉི་ཤུ་ལྷག་
ཅིག་མཐོང་ངོ༌། །དེ་ནས་ནོར་བཟང་ཡིད་དགའ་བ་དང་བདེ་བ་སྐྱེས་ནས། འཕགས་པ་ཀུན་ཏུ་བཟང་པོའི་སྐུ་ལུས་ཀྱི་ཆ་ཤས་རྣམ་པར་ཕྱེ་ནས། མཐར་བ་སྤུའི་ཁུང་བུ་གཅིག་ལ་ཡང༌། དབུས་སུ་མི་མཇེད་འཇིག་རྟེན་གྱི་ཁམས་དང་བཅས་པའི་ཕྱོགས་བཅུ་རབ་འབྱམས་མུ་མེད་པའི་འཇིག་རྟེན་གྱི་ཁམས་ཀྱི་བཀོད་པ་མཐའ་དག་དང་དེ་དག་ཀྱང༌། བསྐལ་པ་ཆགས་པ་དང་འཇིག་པའི་བར་གྱི་ཚུལ་རྣམས་མ་ལུས་པ། གཟུགས་བརྙན་གྱི་ཚུལ་དུ་མཐོང་ངོ༌། །སྐབས་འདི་ན་འདོད་པའི་ཁམས་ཀྱི་ཡུལ་དང་བཅས། གཟུགས་ཀྱི་ཁམས་ཀྱི་ཡུལ་དང་བཅས། གཟུགས་མེད་པའི་ཁམས་ཀྱི་ཡུལ་དང་བཅས། གཞི་དང་བཅས། རྟེན་དང་བཅས། དབྱིབས་དང་བཅས། ཞེས་འབྱུང་ཞིང༌། གཞན་ཡང་ཕལ་པོ་ཆེ་འདིར། གཟུགས་མེད་ཁམས་ལ་སྣོད་ཀྱི་འཇིག་རྟེན་ཡོད་པའི་ཚིགས་ཡང་དང་ཡང་དུ་འབྱུང་བས། གཟུགས་མེད་ཅེས་པ་དམན་པ་ལ་དགག་པའི་སྒྲའོ། །ཀུན་ཏུ་བཟང་པོ་དེའི་མཚན་བཟང་པོ་རེ་རེ་ལ་ཡང་སྔོན་གྱི་མཐའ་མུར་ཐུག་པའི་བར་གྱི་འཇིག་རྟེན་གྱི་ཁམས་ཐམས་ཅད་དང༌། སངས་རྒྱས་རྣམས་དང་འཁོར་གྱི་དཀྱིལ་འཁོར་ཡང་བསྟན། ཕྱི་མའི་མུ་མཐར་ཐུག་གི་བར་གྱི་ཡང་བསྟན། སངས་རྒྱས་རེ་རེའི་དྲུང་ན་ཀུན་ཏུ་བཟང་པོ་རེ་རེ་ཡང་འདུག དེ་དག་གི་ལུས་རེ་རེ་ལ་ཡང་དུས་གསུམ་དུ་བྱུང་བའི་ཤེས་བྱ་ཐམས་ཅད་ཀྱི་གཟུགས་བརྙན་ཡང་མངོན་པར་བསྟན་པར་མཐོང༌། དེ་
ནས་ཀུན་ཏུ་བཟང་པོ་ཉིད་ཀྱིས་ད་ལྟ་རྣམ་པར་འཕྲུལ་པ་མཐའ་ཡས་པས་འགྲོ་བའི་དོན་སྤྱོད་ཚུལ་དང༌། སངས་རྒྱས་མཉེས་པར་བྱེད་ཚུལ། དེ་དག་གི་རྒྱུར་སྔོན་བྱང་ཆུབ་སེམས་དཔའི་སྤྱོད་པ་མཐའ་ཡས་པ་སྤྱད་ཚུལ་གསུངས་ཏེ། སངས་རྒྱས་རྣམ་སྣང་གི་སྤྱན་སྔ་ན་བཞུགས་པའི་ཀུན་ཏུ་བཟང་པོས་ཕྱག་བརྐྱང་སྟེ་ནོར་བཟང་གི་སྤྱི་བོར་བཞག་པའི་ཚེ། ཕྱོགས་བཅུ་མཐའ་ཡས་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་ན་བཞུགས་པའི། སངས་རྒྱས་རེ་རེའི་ཞབས་འབྲིང་ན་ཡང་ཀུན་ཏུ་བཟང་པོ་རེ་རེ་བཞུགས་པའི་ཕྱག་གཡས་པའང༌། ནོར་བཟང་གི་སྤྱི་བོར་བཞག་པར་གྱུར་ཅིང༌། ཆོས་ཀྱི་སྒོ་མང་པོ་སྣ་ཚོགས་ལ་ཞུགས་པར་གྱུར་ཏོ། །དེ་ནས་རྣམ་འཕྲུལ་དེ་ལ་བརྟེན་པའི་ཞུ་ལན་ཅུང་ཟད་མཛད་ནས། རྣམ་འཕྲུལ་དེ་ལྟ་བུའི་རྒྱུ་སྤྱོད་པ་མཐའ་ཡས་པ་སྤྱད་ཚུལ་རྣམས་གསུངས་ཏེ། ངའི་ལུས་རྣམ་པར་དག་པ་ལ་ལྟོས་ཤིག་གསུངས་ནས། ཀུན་ཏུ་བཟང་པོའི་བ་སྤུའི་ཁུང་བུ་རེ་རེར་ཡང་སངས་རྒྱས་ཀྱི་ཞིང་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པ། སངས་རྒྱས་ཀྱི་མཛད་པ་སྟོན་པ་ལ་སོགས་པ་མཐའ་ཡས་པའང་མཐོང༌། ཀུན་ཏུ་བཟང་པོའི་གདམས་ངག་དང་རྗེས་སུ་བསྟན་པ་ཡང་ཐོས་ནས། དེའི་སྐུ་ལུས་ཀྱི་ཁོངས་སུ་གཏོགས་པའི་འཇིག་རྟེན་གྱི་ཁམས་ཐམས་ཅད་དུ་ཞུགས་ནས། སེམས་ཅན་སྨིན་པར་བྱེད་པར་གྱུར་ལ། དེ་ནས་ནོར་བཟང་རང་ཉིད་ཀྱིས་ཀྱང་རྣམ་པར་ཐར་བ་མཐའ་ཡས་པ་དེ་ཐོབ་ནས། དེ་ལྟ་བུ་སྟོན་པར་གྱུར་ཏོ། །དེའི་
རྗེས་སུ་འདི་སྐད་ཅེས། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བསྐལ་པ་དང༌། བསྐལ་པ་རྒྱ་མཚོ་འབྱམས་ཀླས་པ་དང༌། འཇིག་ཏེན་གྱི་ཁམས་གཅིག་ནས་གཅིག་ཏུ་བརྒྱུད་པ། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཕྲ་རབ་སྙེད་པོ་དེ་དག་བརྣན་ཏེ་མངོན་པར་བརྗོད་པའི་ཕྱིར། ཚིགས་སུ་བཅད་པའི་དབྱངས་ཀྱིས་སྨོན་ལམ་བཏབ་པ། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། སོགས་འབྱུང་ངོ༌། །འདི་ནི་ཞིང་ཁམས་རྣམ་པར་དག་པར་བྱེད་པ་དང༌། རྣམ་པར་ཐར་བ་མཐའ་ཡས་པ་དེ་ལྟ་བུ་ཐོབ་པར་བྱ་བའི་ཕྱིར། རྗེས་འཇུག་རྣམས་ཀྱིས་ཀྱང་སྨོན་ལམ་འདི་ལྟ་བུ་གདབ་དགོས་སོ་ཞེས་པ་དང༌། འདིའི་དོན་བཞིན་དུ་བྱང་ཆུབ་སེམས་དཔའི་སྤྱད་པ་སྤྱོད་པ་དེ་ནི། རྣམ་པར་ཐར་བ་འདི་ལ་གདོན་མི་ཟ་བར་འཇུག་པར་འགྱུར་རོ། །ཞེས་གོ་བར་བྱ་བའི་ཕྱིར་ཏེ། དེ་ཡང་བསྐལ་པ་དང་བསྐལ་པ་ཞེས་ལན་གཉིས་ཟློས་པ་ནི། མང་པོའི་སྒྲ་ཡིན་ལ། བསྐལ་པ་དེ་ཙམ་དུ་ཕྱོགས་བཅུའི་ཞིང་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་གྱི་གྲངས་དང་མཉམ་པ་རྣམས་རེ་རེ་བཞིན་ཡང་བསྐལ་པ་རྒྱ་མཚོ་འབྱམས་ཀླས་པའི་བར་དུ་ཆགས་འཇིག་གི་རིམ་པས་སྤེལ་ཞིང་བརྒྱུད་ནས་བྱུང་བ། དེ་ཙམ་གྱི་ཞིང་ཁམས་ཐམས་ཅད་ཡོངས་སུ་སྦྱོང་བ་དང༌། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་དུ། དེ་ཐམས་ཅད་སྟོང་པ་ཉིད་དང་སྙིང་རྗེ་དང་ཐབས་ལ་མཁས་པའི་ཡེ་ཤེས་གཅིག་གི་ངོ་བོར་བློས་
ཡང་ཡང་བསྡོམས་པ་ན་སྦྱངས་མིན་ལེགས་པར་གྲུབ་ཅིང་ཞིང་ཁམས་ལ་དབང་འབྱོར་བ་ཐོབ་པ་ནི་བརྣན་ཏེ་ཞེས་པའི་དོན་ཡིན་ནོ། །འདི་ལ་ཀུན་ཏུ་བཟང་པོའི་སྨོན་ལམ་ཞེས་བྱ་བ་ནི། བྱང་ཆུབ་སེམས་དཔའ་ཀུན་ཏུ་བཟང་པོས་གསུངས་བའམ། བདག་གཞན་གྱི་དོན་ཕུན་སུམ་ཚོགས་པ་ཐོབ་པས་ཀུན་ཏུ་མཛེས་པ་དང༌། སྐྱོན་ཐམས་ཅད་བྲལ་བས་ཀུན་ཏུ་ཀུན་ནས་བཟང་པའི་ཕྱིར་སངས་རྒྱས་དང༌། བྱང་ཆུས་སེམས་དཔའ་ཐམས་ཅད་ཀྱི་སྤྱི་མིང་ཡིན་ལ། སྨོན་ལམ་འདི་ལ་ཡང་བྱང་ཆུབ་ཀྱི་སྤྱོད་པ་ཐམས་ཅད་འདུས་པའི་ཕྱིར། སངས་རྒྱས་བྱང་སེམས་ཀུན་གྱི་སྨོན་ལམ་མོ། །ཡང་བཟང་པོ་སྤྱོད་པ་ཞེས་བྱ་བ་ནི་ཀུན་ཏུ་བཟང་པོ་སྤྱོད་པའི་དབང་དུ་བྱས་པ་དང༌། ཡང་ན་བཟང་པོ་ཡང་ཡིན་ལ་སྤྱོད་པ་ཡང་ཡིན་པ་ནི་བཟང་པོ་སྤྱོད་པ་སྟེ། བྱང་ཆུབ་སེམས་དཔའི་སྤྱོད་པ། ཐོག་མར་ཐོས་པའི་དུས་ན་དགེ། བར་དུ་བསམ་བསྒོམ་གྱི་དུས་ནའང་དགེ། མཐར་འབྲས་བུ་སངས་རྒྱས་པའི་དུས་ནའང་དགེ་བའོ། །འདི་ནི་བྱང་ཆུབ་སེམས་དཔའ་གཞོན་ནུའི་ས་པ་སྟེ། རྫི་བོ་ལྟ་བུར་སེམས་བསྐྱེད་པའི་སྨོན་ལམ་ཞེས་ཀྱང་ཟེར་རོ། །གཞུང་དངོས་བཤད་པ་ལ། དཔལ་ཕྱོགས་ཀྱི་གླང་པོའི་འགྲེལ་པ་ལས་ཡན་ལག་བདུན་པོ་རེ་རེ་ནས་བགྲང་བ་དང༌། བསྔོ་བའི་རབ་དབྱེ་དང༌། དེའི་མཐའ་དང༌། ཕན་ཡོན་ཏེ་དོན་གྱི་རྣམ་གྲངས་བཅུའི་བསྡུས་དོན་མཛད་དོ། །འདིར་འདི་སྐད་ཅེས་བྱས་ན་བཟུང་སླ་བར་འགྱུར་རོ། །རྒྱུད་དག་པར་བྱ་བ་ཡན་ལག་བདུན་པ། དངོས་གཞི་སྨོན་ལམ་གྱི་
རབ་དབྱེ། སྨོན་ལམ་གྱི་མཐའ་དང་ཕན་ཡོན་བསྟན་པ། ཕན་ཡོན་ཅན་གྱི་སྨོན་ལམ་ཉིད་བསྔོ་བ་སྟེ་དོན་བཞི་ལས། དང་པོ་ལ། ཕྱག་འཚལ་བ་དང༌། མཆོད་པ་བྱ་བ་དང༌། ཉེས་པ་བཤགས་པ་དང༌། བསོད་ནམས་ལ་ཡི་རངས་བ་དང༌། ཆོས་འཁོར་བསྐོར་བ་དང༌། བཞུགས་སུ་གསོལ་བ་དང༌། དགེ་བ་བསྔོ་བ་སྟེ་བདུན་ནོ། །དང་པོ་ཕྱག་འཚལ་བ་ལ། མདོར་བསྟན་པ་ནི། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་གང༌། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །ཕྱོགས་བཅུའི་འཇིག་རྟེན་ཇི་སྙེད་ན་སུ་དག་བཞུགས་པ་ཞེས་སྦྱར་ཏེ། འཇིག་རྟེན་ཁམས་གཅིག་གམ། བཅུ་ལ་སོགས་པའི་གྲངས་ཚད་ཅན་མ་ཡིན་པར། ཕྱོགས་བཅུའི་མཐའ་ཡས་པ་ན་བཞུགས་པ་ལ་ཕྱག་འཚལ་ལོ། །དེ་ཡང་ད་ལྟར་བཞུགས་པ་ཁོ་ནར་མ་ཟད་ཀྱི། དུས་གསུམ་དུ་གཤེགས་པ་སྟེ། གཤེགས་པའི་དོན་བྱུང་བ་ཡིན་པས། སྔར་བྱུང་ཟིན་པ་དང༌། ད་ལྟར་བྱུང་བ་དང༌། མ་འོངས་པ་འབྱུང་འགྱུར་ཐམས་ཅད་ལ་ཕྱག་འཚལ་ལོ། །སུ་ཞིག་གིས་ཕྱག་འཚལ་ཞེ་ན། བདག་གིས་སོ། །ཕྱོགས་བཅུ་དུས་གསུམ་གྱི་ཁྱད་པར་དང་ལྡན་པ་སུ་ལ་ཕྱག་འཚལ་ཞེ་ན། མིའི་སེང་གེ་ནི་སངས་རྒྱས། ཀུན་ཏེ་མང་པོ། མ་ལུས་པ་སྟེ་མཐའ་དག་གོ །དེ་དག་ཐམས་ཅད་ལ་ཕྱག་འཚལ་ལོ། །
ཚུལ་ཇི་ལྟར་ཕྱག་འཚལ་ན། གཞན་གྱིས་བསྐུལ་བ་སོགས་མ་ཡིན་པར། རབ་ཏུ་དང་བ་སྟེ་དང་བ་ཆེན་པོའི་སྒོ་ནས་ལུས་དང་ངག་དང་ཡིད་གསུམ་ཅར་གྱི་ཕྱག་བགྱིའོ། །ཞེས་པའོ། །ཅིའི་ཕྱིར་སངས་རྒྱས་ལ་མི་ཡི་སེང་གེ་ཞེས་བྱ་ན། སེང་གེ་ནི་རི་དྭགས་ཐམས་ཅད་ཟིལ་གྱིས་གནོན་ཅིང་བག་ཚ་བ་མེད་པ་ལྟར་མིའི་སྐྱེ་བར་ཡང་སྟོན་ལ། བདུད་དང་ཕྱིར་རྒོལ་བ་སོགས། ལྷ་མི་ཐམས་ཅད་ཟིལ་གྱིས་གནོན་ཅིང༌། རང་གི་སྐུ་དང་གསུང་དང་ཐུགས་དང་འཕྲིན་ལས་བྱ་བ་ལ་བག་ཚ་བ་མེད་པའོ། །མང་པོ་ལ་ཕྱག་འཚལ་བའི་དགོས་པ་ཅི་སྙམ་ན། སངས་རྒྱས་གཅིག་ལ་ཕྱག་བྱས་པའི་བསོད་ནམས་ཡང་མཐའ་ཡས་ན་སངས་རྒྱས་མཐའ་ཡས་པ་ལ་ཕྱག་འཚལ་བའི་བསོད་ནམས་གཞལ་དུ་མེད་པ་ལས་ཀྱང་ཆེས་གཞལ་དུ་མེད་པའོ། །རྒྱས་བཤད་ལ་གསུམ་ལས་ལུས་ཀྱི་ཕྱག་འཚལ་བ་ནི། བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །བཟང་པོ་སྤྱོད་པའི་སྨོན་ལམ་ནི། བཟང་པོ་སྤྱོད་པ་ལ་སྨོན་པ་སྟེ། སྤྱོད་པ་དེ་ལ་འདུན་པའི་སྟོབས་དག་གིས། རྒྱལ་བ་སྟེ་སངས་རྒྱས་མངོན་སུམ་དུ་མཐོང་བར་ནུས་ཀྱང་རུང་མི་མཐོང་ན་ཡང་སྟེ། ཕྱོགས་བཅུའི་རྒྱལ་བ་མ་ལུས་ཐམས་ཅད་ཡིད་ཀྱིས་མོས་པས་མངོན་སུམ་དུ་དམིགས་ཏེ། དེ་རེ་རེའི་སྐུ་མདུན་དུ་ཡང་རང་གི་ལུས་ཞིང་སྟེ་འཇིག་རྟེན་གྱི་ཁམས་ཀྱི་རྡུལ་ཇི་སྙེད་ཡོད་པ་དེ་སྙེད་དུ་སྤྲུལ་ཏེ། ལུས་དེ་དག་ཐམས་ཅད་རབ་ཏུ་བཏུད་པ་སྟེ།
ཐལ་མོ་སྦྱར་ཞིང་ཡན་ལག་ལྔ་ས་ལ་གཏུགས་པ་ཡིས། རྒྱལ་བ་སངས་རྒྱས་ཀུན་ལ་རབ་ཏུའམ་ཤིན་ཏུ་སྟེ། དུས་མཐའ་ཡས་པར་ཡང་ནས་ཡང་དུའམ་རྟག་ཏུ་ཕྱག་འཚལ་ལོ། །སངས་རྒྱས་རྣམས་ལ་ཅིའི་ཕྱིར་རྒྱལ་བ་ཞེས་བྱ་ན། མདོ་ལས། སྡིག་པ་མི་དགེའི་ཆོས་ལས་ང་བརྒྱལ་ཏེ། །དེ་ཕྱིར་ཉེར་འགྲོ་ང་ནི་རྒྱལ་བ་ཡིན། །ཅེས་སོ། །ལུས་མང་པོས་ཕྱག་འཚལ་བར་མོས་པའི་དགོས་པ་ཡང༌། ལས་གཅིག་ཏུ་འདུ་ཤེས་པས་ཕྱག་བཙལ་བ་ཡང་ཕན་ཡོན་ཆེ་ན། མཐའ་ཡས་པར་མོས་པས་ལྟ་ཅི་སྨོས་པའོ། །གཉིས་པ་ཡིད་ཀྱི་ཕྱག་འཚལ་བ་ནི། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། རྡུལ་ཕྲ་རབ་གཅིག་གི་སྟེང་སྟེ་གོ་ས་ན་ཡང༌། སངས་རྒྱས་ཀྱི་ཞིང་མ་ལུས་པའི་རྡུལ་གྱི་གྲངས་ཇི་སྙེད་པ་དེ་སྙེད་དང་མཉམ་པའི་སངས་རྒྱས་རྣམས་བཞུགས་པ་དང༌། དེ་ཡང་གཅིར་བ་དང་དོག་པ་མ་ཡིན་པར། སངས་རྒྱས་རྣམས་ཀྱང་རང་གི་སྲས་ཏེ་བྱང་ཆུབ་སེམས་དཔའི་འཁོར་གྱིས་བསྐོར་བ། མཆོད་པའི་བཀོད་པ་སོགས་དཔག་ཏུ་མེད་པ་དང་བཅས་ཏེ། ཞིང་ཁམས་ཀྱི་དབུས་ན་བཞུགས་པ་དག་ཡིན་ལ། རྡུལ་གཅིག་ན་ཡོད་པ་དེ་བཞིན་དུ། ཆོས་ཀྱི་དབྱིངས་རྣམས་མ་ལུས་པ་སྟེ། ཆོས་ཀྱི་དབྱིངས་ཀྱིས་ཇི་ལྟར་ཁྱབ་པ་དེ་ལྟར་རྡུལ་གྱིས་ཁྱབ་པ་ཐམས་ཅད་དུ་ཡང༌།
ཕྱོགས་ཐམས་ཅད་རྒྱལ་བ་མང་པོ་དག་གིས་གང་བར་མོས་ཏེ། དེ་དག་ལ་ཡིད་ཀྱིས་དད་པ་བླ་ན་མེད་པ་སྒོམ་མོ། །དེ་ལ་སངས་རྒྱས་ཞེས་པ་ནི། མ་རིགས་པ་ཐམས་ཅད་སངས་ཤིང་མཁྱེན་པ་ཐམས་ཅད་རྒྱས་པའོ། །བྱང་ཆུབ་སེམས་དཔའ་ལ་སྲས་ཞེས་བྱ་བ་ནི། ཆོས་ལས་སྐྱེས་པའི་སྲས་སོ། །དེ་ནི་སེམས་དང་པོ་བསྐྱེད་པ་ཡན་ཆད་ཀྱང་ཡིན་ལ། ཡང་ན་འཕགས་པ་ས་བཅུ་པའི་མདོ་ལས། ས་དང་པོ་ཐོབ་པའི་བྱང་ཆུབ་སེམས་དཔའ་རྣམས་ནི། དེ་བཞིན་གཤེགས་པའི་རིགས་སུ་སྐྱེས་པ་ཡིན་ནོ། །ཞེས་གསུངས་པ་ལྟར། དེ་བཞིན་གཤེགས་པ་དང་སྐུ་གསུང་ཐུགས་རྣམ་པ་འདྲ་བར་གྱུར་པའི་དོན་ནོ། །རྡུལ་གཅིག་ཏུ་སངས་རྒྱས་མང་པོ་བཞུགས་པ་སོགས་ནི། རྣལ་འབྱོར་པའི་ཏིང་ངེ་འཛིན་གྱི་སྤྱོད་ཡུལ་གྱི་རྡུལ་ལ་དེ་ལྟར་སྣང་བ་དང༌། ལས་དང་པོ་པས་ནི་མོས་པ་ཡིད་བྱེད་ཁོ་ནར་ཟད་དོ། །སངས་རྒྱས་རྣམས་ཀྱི་ཡེ་ཤེས་ཀྱི་སྤྱོད་ཡུལ་ཡང་དེ་དང་འདྲ་མོད་ཀྱི། ཡེ་ཤེས་ཀྱི་སྣང་བ་ཁོ་ན་ཡིན་པས། ཕྱི་རོལ་གྱི་རྡུལ་ལམ། ཏིང་ངེ་འཛིན་གྱི་སྤྱོད་ཡུལ་ཙམ་ལ་གནས་ཤིང་མི་སྤྱོད་དེ། རྡུལ་དང་སྤྱོད་ཡུལ་དེ་དག་ནི་དོན་དམ་པའི་ཡེ་ཤེས་ཀྱི་ངོར་མེད་པའི་ཕྱིར་རོ། །ཆོས་ཀྱི་དབྱིངས་ཀྱིས་ཁྱབ་ཚད་དུ་འཇོག་པ་ནི། ཆོས་ཀྱི་དབྱིངས་ཀྱིས་མ་ཁྱབ་པ་མི་སྲིད་པའི་དོན་ཏེ། ནམ་མཁས་གར་ཁྱབ་ཏུ་དེ་ལྟར་སྣང་བ་ཡིན་མོད། དེ་ཡང་ཀུན་ཏུ་བཟང་པོའི་སྨོན་ལམ་འདི། ཡོངས་སུ་གྲུབ་པའི་བྱང་ཆུབ་སེམས་དཔའ་ལ་སྣང་བ་ནི་ཡིན་ལ། སྨོན་ལམ་དེ་ཡང་ས་དང་པོ་ནས་དངོས་སུའམ་རབ་ཏུ་སྒྲུབ་
ཅིང༌། ས་བརྒྱད་པ་ནས་ནི་ལེགས་པར་གྲུབ་པ་ཡིན་པར་ཤེས་སོ། །ཡང་ངེས་པའི་དོན་མཐར་ཐུག་པ་ན། ཡེ་ཤེས་ཉིད་ལ་ཆོས་ཀྱི་དབྱིངས་མ་ལུས་པ་ཐམས་ཅད་དེ་བཞིན་གཤེགས་པའི་དཀྱིལ་འཁོར་དུ་མངོན་སུམ་དུ་སྣང་བ་ཡིན་ཏེ། དེ་ལྟར་ན་འདི་ནི་བདེ་གཤེགས་སྙིང་པོ་མཁའ་མཉམ་ཡིན་པས། ས་བཅུ་པ་ཐོབ་པ་ཡན་ཆད་ཀྱི་སྤྱོད་ཡུལ་ཡིན་ཏེ། དེ་མན་ཆད་ཀྱི་བྱང་ཆུབ་སེམས་དཔའ་ལ་ནི་མོས་པའི་ཡུལ་དུ་བྱ་བ་ཙམ་མོ། །འོན་ཀྱང་ལས་དང་པོ་པས། དེ་ལྟ་བུ་ལ་དད་པར་བྱས་པས་འབྲས་བུ་མཐའ་ཡས་པ་ནི་འབྱུང་ངོ༌། །གསུམ་པ་ངག་གི་ཕྱག་འཚལ་བ་ནི། དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང༌། །བདེ་བར་གཤེགས་པ་ཐམས་ཅད་བདག་གིས་བསྟོད། །མཐའ་ཡས་པའི་སངས་རྒྱས་དེ་དག་བསྟོད་པར་བགྱི་ཞེས་པ་ནི། གཉིས་པའི་དོན་ལ་དང་པོ་སྟེ་དེ་དག་ལ་བསྟོད་པར་བགྱི་བའོ། །ཡིད་ཀྱི་ཡུལ་དུ་ཇི་ལྟར་བྱས་པའི་སངས་རྒྱས་དེ་དག་ལ། བསྟོད་ཅིང་བསྔགས་པ་ཡོན་ཏན་རྒྱ་མཚོ་ཟད་མི་ཤེས་པ་རྣམས་བརྗོད་པའི་སྒོ་ཐམས་ཅད་ནས་བསྟོད་པའི་ཚུལ་ཡང་མི་ཟད་པ་རྒྱ་མཚོ་ལྟ་བུ་རྣམས། ངག་གིས་བརྗོད་ཚུལ་ཕུན་སུམ་ཚོགས་པ་དབྱིངས་ཀྱི་ཡན་ལག་ལྔ་ལ་སོགས་པ་ཡན་ལག་སྟེ་སྙན་པ་ལ་སོགས་པའི་ཁྱད་པར་མཐའ་ཡས་པ་རྒྱ་མཚོ་ལྟ་བུའི་སྒྲ་སྐད་དེ་ལྷ་མོ་དབྱངས་ཅན་མའི་ངག་བཞིན་ནོ། །དེ་ལྟ་བུའི་སྒོ་ནས་རྒྱལ་བ་ཐམས་ཅད་ཀུན་གྱི་
ཡོན་ཏན་རབ་ཏུ་བརྗོད་ཅིང་སྟེ་བརྗོད་པའི་ཚུལ་གྱིས། བདེ་བར་གཤེགས་པ་དེ་དག་ཐམས་ཅད་ལ་བདག་གིས་བསྟོད་པར་བགྱིའོ། །དེ་ཡང་ཆོས་དབྱིངས་དང་མཉམ་པའི་སངས་རྒྱས་རེ་རེའི་དྲུང་དུ། ལུས་ཞིང་གི་རྡུལ་སྙེད་དུ་སྤྲུལ་པ་དང༌། ལུས་དེ་ལྟ་བུས་སངས་རྒྱས་རེ་རེའི་ཞབས་ལ་འདུད་ཅིང༌། ལུས་རེ་རེ་ལ་ཡང་མགོ་དེ་སྙེད་དང༌། མགོ་བོ་རེ་རེ་ལ་ཡང་ལྕེའི་རྩེ་མོ་དེ་སྙེད་དང༌། ལྕེ་དེ་སྙེད་ལས་ཀྱང་བསྟོད་དབྱངས་དེ་སྙེད་འབྱུང་བར་མོས་པའོ། །ཡང་བཤད་པའི་རྣམ་གྲངས་གཞན་རྒྱ་མཚོ་ཞེས་སྨོས་པ་རྣམས། རྒྱ་མཚོ་ལྟ་བུའི་དཔེ་དོན་དུ་མི་སྦྱོར་བར། གྲངས་ཀྱི་གནས་རྒྱ་མཚོ་ཞེས་བྱ་བ་རྒྱ་སྐད་ས་མུ་དྲིའི་སྒྲ་ལས། སྔོན་གྱི་ལོ་ཙཱ་བ་བྱང་ཆུབ་སེམས་དཔའ་རྣམས་ཀྱིས་མཚོ་ཡས་སུ་བསྒྱུར་པ་དེའོ། །དེ་ནི་གཅིག་བཅུ་བརྒྱ་སྟོང་ཁྲི་འབུམ་ས་ཡ་བྱེ་བ་དུང་ཕྱུར་ཐེར་འབུམ་རྣམས་དང༌། ཤྭ་རྔོག་དང་མཆོག་ཉལ་དང༌། རྐྱང་འཕྱེས་དང༌། བྱེ་བ་ནབ་ནུབ་དང༌། མཚོ་ཡས་ཞེས་འཇིག་རྟེན་ཏུ་བགྲངས་པ་ལྟར་ཡིན་ནོ། །ཞེས་ཀྱང་བཤད་དེ་འོན་ཀྱང་དཔེ་དོན་དུ་སྦྱོར་བ་ཁོ་ན་འཐད་དོ། །གཉིས་པ་ལ་བླ་ན་ཡོད་པའི་མཆོད་པ་དང༌། བླ་ན་མེད་པའི་མཆོད་པའོ། །དང་པོ་ནི། མེ་ཏོག་དམ་པ་ཕྲེང་བ་དམ་པ་དང༌། །སིལ་སྙན་རྣམས་དང་བྱུག་པ་གདུགས་མཆོག་དང༌། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང༌། །ཕྱེ་མའི་ཕུར་མ་རི་རབ་མཉམ་པ་དང༌། །བཀོད་པས་ཁྱད་པར་འཕགས་པའི་མཆོག་ཀུན་གྱིས། །
རྒྱལ་བ་དེ་དག་ལ་ཡང་མཆོད་པར་བགྱི། །དེ་ལ་དམ་པ་ཞེས་པ་རྣམས་དང༌། མཆོག་ཅེས་པ་རྣམས་ཀྱིས་དོན་ནི། བཟང་པོའི་དོན་ཏེ། དངོས་པོ་དེ་དང་དེ་ཡང་རྒྱུ་བཟང་བ། ཁ་དོག་དང་དབྱིབས་མཛེས་པ། གཞན་ཡང་སྒྲ་དྲི་རོ་རེག་ཕུན་སུམ་ཚོགས་པ་དང་བཀོད་པ་ལེགས་པ་ལ་སོགས་པའོ། །དེས་ན་སྣ་ཚོགས་པའི་མེ་ཏོག་བཟང་པོ་དང༌། རིན་པོ་ཆེ་དང་མེ་ཏོག་གི་དྲ་བ་སོགས་ཕྲེང་བ་དམ་པ་དང༌། སིལ་སྙན་ཏེ་རོལ་མོའི་བྱེ་བྲག་རྒྱུད་ཅན་དང༌། འབུད་དཀྲོལ་དང་བརྡུང་བྱ་སྣ་ཚོགས་པ་སྒྲ་སྙན་པ་རྣམས་དང༌། དྲི་ཞིམ་པོའི་བྱུག་པ་རྣམས་དང༌། གདུགས་མཆོག་ལ་སོགས་པ་བ་དན་དང༌། རྒྱལ་མཚན་དང༌། ལྡ་ལྡི་ལ་སོགས་པའོ། །མར་མེ་ལ་སོགས་པ་སྣང་གསལ་གྱི་མཆོག་མཐའ་ཡས་པ་དང༌། སྦྱར་བ་དང་མ་སྦྱར་བའི་དྲི་ཞིམ་པོ་སྲེག་པའི་བདུག་སྤོས་དམ་པ་རྣམས་ཀྱིས། གང་མངོན་སུམ་དང་ཡིད་ཀྱི་སྤྱོད་ཡུལ་དུ་དམིགས་པའི་རྒྱལ་བ་དེ་དག་ལ་ནི་ཉིན་རེ་བཞིན་དུ་ཡང་མཆོད་པར་བགྱིའོ། །བར་འདིར་རྒྱ་དཔེ་འགའ་ཞིག་ལས་བྱུང་བ། ཕྱིས་ཀྱི་ལོ་ཙཱ་བ་ཁ་ཅིག་གིས་བསྒྱུར་བ་ན། རིན་ཆེན་མཆོག་དང་དོ་ཤལ་མཆོག་རྣམས་དང༌། །རྣམ་བཀྲ་ལྷ་རྫས་བླ་རེ་མཆོག་རྣམས་དང༌། །རྒྱལ་མཚན་མཆོག་དང་བ་དན་མཆོག་ཀུན་གྱིས། །རྒྱལ་བ་དེ་དག་ལ་ཡང་མཆོད་པར་བགྱི། །ཞེས་པ་ཡང་སྣང་བ་སྔོན་གྱི་འགྲེལ་པ་རྣམས་ལས་མི་འབྱུང་ཞིང༌། བོད་དཔེ་རྙིང་པ་ཀུན་ལ་ཡང་མེད་ལ། དེང་སང་སུ་
ཡང་མི་འདོན་པའི་ཕྱིར་འདིར་ཡང་བཤད་པ་མ་བྲིས་ཏེ་གོ་ནི་སླའོ། །ལྷ་དང་མི་ལས་བྱུང་བའི་ན་བཟའ་དམ་པ་རྣམས་དང༌། ཆག་ཆག་གིས་བཏབ་པ་དང༌། མཆོད་ཡོན་དང༌། གོང་བུའི་རྫས་དྲི་ཞིམ་མཆོག་རྣམས་དང༌། དྲི་བཟང་གི་བྱེ་མའི་ཕུར་མ་ཏེ་ཐུམ་པོར་བྱས་པ་རྣམས་པ་སྣ་ཚོགས་སྤུངས་པའི་ཕུང་པོ་རི་རབ་དང་མཉམ་པ་དང་མཆོད་པ་དེ་དག་ཐམས་ཅད་ཀྱང་བཀོད་པ་མཛེས་པས་ཁྱད་པར་དུ་འཕགས་པའི་མཆོག་ཀུན་གྱིས། རྒྱལ་བ་དེ་དག་ལ་ནི་མཆོད་པར་བགྱིའོ། །དངོས་སུ་སྨོས་པ་དེ་དག་ནི་མཚོན་པ་ཙམ་ཏེ། འཇིག་རྟེན་དུ་ཇི་ཙམ་ཡོད་པ་དེ་ཙམ་དུ་མཆོད་པ་བཟང་པ་དང་བཀོད་པ་ལེགས་པ་ཐམས་ཅད། དངོས་སུ་བཤམས་པ་དང་ཡིད་ཀྱིས་སྤྲུལ་པའི་ཚུལ་གྱིས་འབུལ་བ་ཡིན་ནོ། །གཉིས་པ་བླ་ན་མེད་པའི་མཆོད་པ་ནི། མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །མཆོད་པ་གང་བགྱིས་པ་རྣམས་བླ་ན་མེད་པ་སྟེ་ལྷའི་འཇིག་རྟེན་མན་ཆད་ན། དེ་བས་ལྷག་པ་ལྟ་ཅི་སྨོས། དེ་དང་མཉམ་པ་འགའ་ཡང་མེད་པ་སྟེ། བྱང་ཆུབ་སེམས་དཔའ་མཐུ་ཐོབ་པ་རྣམས་ཀྱིས་བྱས་པའི་མཆོད་པའོ། །དེ་ཡང༌། སངས་རྒྱས་ཀྱི་ཞིང་ཁམས་ཐམས་ཅད་རྒྱས་པར་འགེངས་པས་རྒྱ་ཆེ་བ་ཡིན་ལ། མཆོད་པ་དེ་དག་གོང་དུ་སྨོས་པའི་རྒྱལ་བ་ཐམས་ཅད་ལ་ཡང༌། ལྷག་པར་མོས་པ་བླ་ན་མེད་པའི་དད་པ་དང༌། བཟང་པོ་སྤྱོད་པ་
ལ་ཕན་ཡོན་དཔག་ཏུ་མེད་པ་ཞིག་ཡོད་པར་ཡིད་ཆེས་པའི་དད་པ་སྟོབས་ཀྱིས་ཀུན་ནས་བླངས་པས། རྒྱལ་བ་ཀུན་ལ་ཕྱག་འཚལ་ཞིང་མཆོད་པར་བགྱིའོ། །དེ་ལྟར་ན་ཕྱག་འཚལ་བའི་ཚུལ་བསམ་གྱིས་མི་ཁྱབ་པ་དང༌། བླ་ན་མེད་པའི་མཆོད་པ་འདི་དག དངོས་སུ་སྒྲུབ་མི་ནུས་པས་ནི་མོས་པས་སྒྲུབ་པ་དང༌། མ་འོང་པ་ན་དེ་ལྟ་བུ་འགྲུབ་པར་སྨོན་ལམ་འདེབས་པ་ཉིད་དོན་གྱི་གཙོ་བོ་ཡིན་ཏེ། བཟང་པོ་སྤྱོད་པའི་སྨོན་ལམ་སྟོབས་དག་གིས། །ཞེས་དང༌། བཟང་པོ་སྤྱོད་ལ་དད་པའི་སྟོབས་དག་གིས། །ཞེས་གསུངས་པའི་དོན་ཡང་ཡིན་ནོ། །ཡང་མདོ་ལས། ཚངས་པ་གསུམ་པོ་འདི་དག་ནི་དེ་བཞིན་གཤེགས་པ་ལ་མཆོད་པ་དང་རིམ་གྲོ་བྱ་བ་བླ་ན་མེད་པའོ། །མཆོད་པའི་ལས་བླ་ན་མེད་པའི་བསོད་ནམས་ཚད་མེད་པ་འབྱུང་ངོ༌། །གསུམ་གང་ཞེ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང༌། དེ་བཞིན་གཤེགས་པ་རྣམས་ཀྱི་ཆོས་འཛིན་པ་དང༌། ཇི་ལྟར་ཐོས་པའི་ཆོས་རྣམས་དེ་བཞིན་དུ་སྒྲུབ་པའོ། །ཞེས་བླ་ན་མེད་པའི་མཆོད་པ་དེ་གསུམ་དུ་བཤད་ལ། འདིར་ཡང་སངས་རྒྱས་ལ་མོས་པ་དང༌། བཟང་པོའི་སྤྱོད་པ་ལ་དད་པ་གཉིས་བླ་ན་མེད་པའི་མཆོད་པའི་ཁྱད་ཆོས་སུ་བཤད་དེ། གནད་གཅིག་གོ ། གསུམ་པ་ནི། འདོད་ཆགས་ཞེ་སྡང་གཏི་མུག་དབང་གིས་ན། །ལུས་དང་ངག་དང་དེ་བཞིན་ཡིད་ཀྱིས་ཀྱང༌། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་
ཅད་བདག་གིས་སོ་སོར་བཤགས། །དེ་ལ་ཉེས་པའི་རྒྱུ་ནི་དུག་གསུམ་སྟེ། འདོད་ཆགས་དང་ཞེ་སྡང་དང་གཏི་མུག་གིས་ཀུན་ནས་བླངས་པའི་དབང་གིས་ནའོ། །ཉེས་པའི་གཞི་ནི་ལུས་དང་ངག་དང་དེ་བཞིན་དུ་ཡིད་ཀྱིས་ཀྱང་བགྱིས་པ་སྟེ། སྲོག་གཅོད་པ་ལ་སོགས་པ་ནི་ལུས་ཀྱིས་སོ། །རྫུན་ལ་སོགས་པ་ནི་ངག་གིས་སོ། །གནོད་སེམས་ལ་སོགས་པ་ནི་ཡིད་ཀྱིས་སོ། །བྱེད་པ་པོ་ནི་བདག་གིས་བགྱིས་པ་ཞེས་པའོ། །བཤགས་པ་དངོས་ནི། དེ་ལྟ་བུའི་སྡིག་པ་ཅི་མཆིས་པ་སྟེ་གང་ཡོད་པ་དེ་དག་ཐམས་ཅད་བདག་གིས་སོ་སོར་བཤགས་པར་བགྱིའོ། །སུ་ཞིག་གི་སྤྱན་སྔར་ཞེ་ན། རྡུལ་གཅིག་སྟེང་ན་ཞེས་སོགས་སུ་ཇི་སྐད་བསྟན་པ་ལྟར། སངས་རྒྱས་སྲས་བཅས་མཐའ་ཡས་པ་རྣམས་ཀྱི་སྤྱན་སྔར་རོ། །དེ་ལ་མ་བཤགས་པའི་ཉེས་པ་ནི། སྔར་བྱས་ལ་འགྱོད་པ་མེད་པས། སྡིག་པ་ལ་རུང་བར་འཛིན་པ་ན། སྡིག་པའི་རྒྱུན་དེ་ཉིད་འཕེལ་བར་འགྱུར་ཞིང༌། ཕྱིན་ཆད་མི་སྡོམ་པས་ལས་ངན་པ་ཟད་པ་མེད་པར་འགྱུར་རོ། །དེ་ལས་ངན་སོང་དུ་བརྒྱུད་མར་འགྲོ་སྟེ་ཐར་པ་ལྟ་ཅི་སྨོས་མཐོ་རིས་ཀྱང་ཐོབ་པར་དཀའོ། །སྡིག་པ་བཤགས་པའི་ཕན་ཡོན་ནི། འགྱོད་ཅིང་བཤགས་པ་ཁོ་ནས་སྔར་གྱི་རྒྱུན་མི་འཕེལ་ཞིང་བྱང་བར་ཡང་འགྱུར་ལ། ཕྱིན་ཆད་འཛེམ་ཞིང་ཟློག་པས་མི་དགེ་བ་རྒྱུན་ཆད་དེ། ངན་འགྲོ་ལས་ཟློག་ཅིང་མཐོ་རིས་སུ་འགྱུར་བ་དང༌། དགེ་བའི་ས་བོན་བརྟས་ཏེ་ཐར་པ་དང་ཐམས་ཅད་མཁྱེན་པའི་རྒྱུར་ཡང་འགྱུར་རོ། །བཞི་པ་ནི། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །
རང་རྒྱལ་རྣམས་དང་སློབ་དང་མི་སློབ་དང༌། །འགྲོ་བ་ཀུན་གྱི་བསོད་ནམས་གང་ལ་ཡང༌། །དེ་དག་ཀུན་གྱི་རྗེས་སུ་བདག་ཡི་རང༌། །ཕྱོགས་བཅུའི་འཇིག་རྟེན་གྱི་ཁམས་ན་རྒྱལ་བ་སངས་རྒྱས་ཀུན་དང༌། སངས་རྒྱས་ཀྱི་སྲས་བྱང་ཆུབ་སེམས་དཔའ་རྣམས་དང༌། རང་རྒྱལ་རྣམས་དང༌། ཉན་ཐོས་ལ། སློབ་པ་རྒྱུན་ཞུགས་དང༌། ཕྱིར་འོང་བ་དང༌། ཕྱིར་མི་འོང་གསུམ་དང༌། མི་སློབ་པ་དགྲ་བཅོམ་པ་དང༌། འགྲོ་བ་ནི་འགྲོ་བ་དྲུག་གི་སོ་སོ་སྐྱེ་བོ་རྣམས་ཀྱི། བསོད་ནམས་ཏེ། དགེ་བ་ཅི་དང་ཅི་བགྱིས་པ་གང་ལ་ཡང༌། དེ་དག་ཀུན་གྱི་རྗེས་སུ་བདག་ཡི་རང་བར་བགྱིའོ། །དེ་ལ་ཡི་རང་བ་ནི་རབ་ཏུ་དགའ་བ་ཡིན་ལ། རྗེས་སུ་ཞེས་པ་ནི་གང་དང་གང་གིས་བྱ་བ་བྱས་པའམ་འབྲས་བུ་ཐོབ་པའི་གནས་སྐབས་དེ་ལ། སླར་ཡང་དམིགས་ནས་འཇུག་པ་ནི། སྔར་སོང་པ་དེའི་རྗེས་སུ་ཞུགས་པ་ལྟ་བུ་ཡིན་པའི་ཕྱིར་རོ། །སྤྱིར་བསོད་ནམས་ཞེས་པ། བསོད་ནམས་དང་བསོད་ནམས་མ་ཡིན་པ་དང༌། མི་གཡོ་བའི་ལས་གསུམ་དུ་ཕྱེ་བའི་བསོད་ནམས་དང་ཡེ་ཤེས་ཀྱི་ཟླས་དྲངས་པའི་བསོད་ནམས་སོགས་ཡོད་ཀྱང༌། འདིར་ནི་དགེ་བའི་ཆོས་ཐམས་ཅད་དོ། །བཤགས་པ་དང་ཡི་རང་བ་འདི་དག་ལ། དགེ་བའམ་སྡིག་པ་རང་གི་བགྱིས་པ་དང༌། གཞན་བགྱིད་དུ་བརྩལ་བ་དང༌། གཞན་གྱིས་བྱ་བ་ལ་རྗེས་སུ་ཡི་རང་བ་དང༌། དེ་དང་དེའི་བསྔགས་པ་བརྗོད་ཅིང་བསྟོད་པ་རྣམས་ཀྱང༌། བཤགས་པ་དང་རྗེས་སུ་ཡི་རང་བར་བྱ་སྟེ། འོན་
ཀྱང་བཤགས་བྱའི་སྡིག་པ་ནི་རང་གིས་བྱས་པ་གཙོ་བོ་ཡིན་ལ། ཡི་རང་གི་ཡུལ་ནི་གཙོ་བོར་གཞན་གྱི་དགེ་བའོ། །རང་གིས་བགྱིས་པའི་དགེ་བ་ལ་ཡང༌། འགྱོད་ན་དགེ་བ་མི་འཕེལ་ལ། ང་རྒྱལ་མེད་ཅིང་དགའ་བ་བསྒོམས་ན་དགེ་བ་འཕེལ་བར་འགྱུར་རོ། །གཞན་གྱི་དགེ་བ་ལ་རྗེས་སུ་ཡི་རང་བ་ནི། གཞན་གྱི་དགེ་བ་བྲི་བ་ཡང་མེད་ལ། རང་གི་རྩོལ་བ་མེད་ཅིང་མ་བྱས་ཀྱང༌། དགེ་བ་ཆེན་པོ་རྒྱུད་ལ་ཐོབ་པར་འགྱུར་བས། སྨད་དུ་བྱུང་བའི་དགེ་བ་ཡིན་ལ། བྱང་ཆུབ་སེམས་དཔའ་འཕགས་པ་ཆོས་ཀྱི་དབྱིངས་མངོན་སུམ་དུ་རྟོགས་ཤིང༌། ཇི་སྙེད་པ་ཐམས་ཅད་ལ་ཡང་གསལ་སྣང་ཐོབ་པ་དག་གིས་ནི། རང་གིས་དམིགས་པའི་ཡུལ་དུ་གསལ་བར་སྣང་བའི་འཇིག་རྟེན་གྱི་དགེ་བ་ཇི་ཙམ་པ་དེ་ཙམ་དེ་དང་དེ་ལ་ཡི་རང་བས་ཀྱང་ཐོབ་པར་འགྱུར་ཏེ། དཔེར་ན་སྟོང་སུམ་ཅུའི་འཇིག་རྟེན་གྱི་ཁམས་ཀྱི་སེམས་ཅན་རྣམས་ཀྱི་བསྐལ་པ་བརྒྱའི་བར་དུ་བྱས་པའི་དགེ་བ་རྣམས། །བྱང་ཆུབ་སེམས་དཔའ་འཕགས་གཅིག་གི་མངོན་ཤེས་ཀྱིས་ཐམས་ཅད་མ་འདྲེས་པར་གསལ་བ་སྣང་བར་མཐོང་ལ། དེ་ཐམས་ཅད་ལ་གཅིག་ཅར་དུ་དམིགས་པ་མེད་པའི་ཡི་རང་ཐུན་གཅིག་ཙམ་བསྒོམས་པས་ཀྱང༌། སེམས་ཅན་དེ་རྣམས་ཀྱིས་དུས་དེ་ཙམ་དུ་བསགས་པའི་དགེ་བ་དེ་སྙེད་ཅིག་ཡི་རང་དེའི་མཐུ་ལས་སྐད་ཅིག་དེ་ལ་བྱང་ཆུབ་སེམས་དཔའ་དེའི་རྒྱུད་ལ་ཐོབ་པར་འགྱུར་རོ། །དེ་བཞིན་དུ་མཐའ་མེད་པའི་བར་དུ་ཡང་སྦྱར་བར་བྱའོ། །དེ་ལ་འདོད་པའི་ཁམས་ཀྱི་སེམས་ཅན་ནི་མཉམ་པར་མ་བཞག་པ་ཡིན་ལ།
གཟུགས་ཀྱི་ཁམས་པ་ནི་བསམ་གཏན་བཞིའི་ཏིང་ངེ་འཛིན་ལ་མཉམ་པར་བཞག་པ་དང༌། གཟུགས་མེད་ཁམས་པ་ཡང་གཟུགས་མེད་པའི་སྙོམས་འཇུག་གི་ཏིང་ངེ་འཛིན་ལ་མཉམ་པར་བཞག་པ་ཁོ་ནའོ། །ཉན་ཐོས་དང་རང་སངས་རྒྱས་ཀྱི་འཕགས་པ་ལྷག་བཅས་ཐམས་ཅད་ནི་ལུས་ཀྱི་རྟེན་ཁམས་གསུམ་དུ་གཏོགས་པ་ཡིན་མོད་ཀྱི། ཉན་རང་དགྲ་བཅོམ་པ་རྣམས་ཀྱི་སེམས་ཀྱི་རྟེན་ནི། ཁམས་གསུམ་ལས་འདས་པ་ཁོ་ན་ཡིན་ལ། སློབ་པ་རྣམས་ཀྱི་སེམས་ཀྱང༌། ཁམས་གསུམ་གྱི་སེམས་དང་བཅས་པ་ཡིན་གྱི། སེམས་རྒྱུད་གྱི་ངོ་བོ་གང་འཕགས་པའི་རྒྱུད་དུ་གྱུར་པའི་ཆ་དེ་ནི། ཁམས་གསུམ་ལས་འདས་པ་ཡིན་པར་ཤེས་པར་བྱའོ། །དགྲ་བཅོམ་པ་ལྷག་མེད་ཀྱི་ཡིད་ལུས་དང༌། ལྷག་བཅས་ཀྱི་དབང་པོའི་ལུས་དང༌། ཐེག་ཆེན་འཕགས་པ་རྣམས་ཀྱི་ནི། ལུས་ཀྱང་ཁམས་གསུམ་ལས་འདས་ན་སེམས་ལྟ་སྨོས་ཀྱང་ཅི་དགོས། །དེ་ལྟར་ན་ཁམས་གསུམ་དུ་གཏོགས་པའི་སོ་སོ་སྐྱེ་བོ་ལ་ཡང༌། ལམ་དུ་ཞུགས་པ་དང་མ་ཞུགས་པ་གཉིས་ཡོད་པ་ལས། འདིར་ལམ་ཞུགས་རྣམས་ནི། བྱང་ཆུབ་སེམས་དཔའ་དང་སློབ་པའི་ཁོངས་སུ་བསྡུས་ཏེ། འགྲོ་བ་ཀུན་ཅེས་པ་ནི་ལམ་དུ་མ་ཞུགས་པ་ཁོ་ནའི་དབང་དུ་བྱས་པའི་ཁམས་གསུམ་གྱི་སེམས་ཅན་ཐམས་ཅད་དོ། །ཉན་ཐོས་ཚོགས་ལམ་པ་དང་སྦྱོར་ལམ་པ་རྣམས་ནི། ཉན་ཐོས་འཕགས་པ་སློབ་པའི་རྒྱུ་ཉེ་བ་ཡིན་པས། དེའི་ཁོངས་སུ་གཏོགས་པར་དགོངས་ཏེ་མ་སྨོས་པ་དང༌། རང་རྒྱལ་གྱི་ཚོགས་ལམ་ལ་གནས་པ་ཡང་དེ་དང་འདྲ་ལ།
སྦྱོར་ལམ་པ་དང་འཕགས་པ་སློབ་པའང་ཅུང་ཟད་ཡོད་མོད་ཀྱི། ཡུན་ཐུང་བར་དགོངས་ནས་སློབ་པ་ཟུར་དུ་མ་སྨོས་སོ། །དེ་ལ་གང་ཟག་གི་བདག་མེད་པ་གཙོ་བོར་གྱུར་པའི་བདེན་པ་བཞིའི་དོན་མངོན་སུམ་དུ་རྟོགས་པ་ནི་འཕགས་པ་ཡིན་ལ། མ་རྟོགས་པ་ནི་སོ་སོ་སྐྱེ་བོའོ། །ཉན་ཐོས་ཀྱི་ཚོགས་སྦྱོར་གྱི་རྟོགས་པ་སྔོན་དུ་སོང་ནས། བདེན་པ་བཞིའི་དོན་མངོན་སུམ་གྱིས་མཐོང་བས། ཁམས་གསུམ་དུ་གཏོག་པའི་ཉོན་མོངས་ཀྱི་ནང་ནས་ལྟ་བ་ངན་པ་དང་ཐེ་ཚོམ་ལ་སོགས་པ་མཐོང་སྤངས་ཀྱི་ཆར་གྱུར་པ་རྣམས་ནི་སྤངས་མོད་ཀྱང༌། སྤྱིར་ཁམས་གསུམ་དུ་གཏོགས་པའི་ཉོན་མོངས་མ་སྤངས་པ་དེ་ནི་རྒྱུན་དུ་ཞུགས་པ་ཞེས་བྱ་ལ། འདིས་མ་སྤངས་པའི་ཉོན་མོངས་དེ་དག་ལ། སྒོམ་པས་སྤང་བར་བྱ་བ་ཞེས་བྱ་ཞིང༌། དེའི་ནང་གི་འདོད་ཁམས་སུ་གཏོགས་པའི་ཉོན་མོངས་སུམ་གཉིས་ནི་སྤངས། སུམ་ཆ་ལུས་པ་ན་འཕགས་པ་ཕྱིར་འོང་ཞེས་བྱའོ། །འདོད་ཁམས་སུ་གཏོགས་པའི་ཉོན་མོངས་ཐམས་ཅད་སྤངས་པ་ན། འཕགས་པ་ཕྱིར་མི་འོང་བ་ཞེས་བྱའོ། །འདི་ལ་སྒོམ་སྤངས་སུ་གཏོགས་པ་གཟུགས་ཁམས་དང་གཟུགས་མེད་ཁམས་ཀྱི་ཉོན་མོངས་ཅི་ཡང་མ་སྤངས་པ་དང༌། ཅུང་ཟད་སྤངས་པ་ནས། ཕལ་ཆེར་སྤངས་པའི་བར་དུ་རྟོགས་པ་མཐོ་དམན་སྣ་ཚོགས་པ་ཡོད་དོ། །ཁམས་གསུམ་དུ་གཏོགས་པའི་ཉོན་མོངས་ཐམས་ཅད་སྤངས་པ་ནི་དགྲ་བཅོམ་པའོ། །དེ་ཡང་མྱུར་བ་སྲིད་པ་གསུམ་གྱིས་མཐར་ཞེས་པ་ལྟར། ཉུང་མཐའ་ཡང་སྐྱེ་བ་གསུམ་དུ་ཚོགས་བསགས་པ་ལས་འབྱུང་ལ། སྐྱེ་བ་གསུམ་
ལ་ལམ་ལྔ་སྦྱོར་ཚུལ་བཤད་ཀྱང་མཐའ་གཅིག་ཏུ་མ་ངེས་སོ། །རྒྱུན་ཞུགས་སོགས་བཞི་པོ་དེ་གང་ཟག་གཅིག་གིས་རིམ་ཅན་ཁོ་ནར་མངོན་དུ་བྱེད་པའང་ཡོད། བར་བ་གཉིས་མེད་པར་སྒོམ་སྤང་ཁམས་གསུམ་གྱི་ཉོན་མོངས་རྣམས་ཆབ་གཅིག་ཏུ་སྤོང་པའི་རིགས་ཅན་ཐོགས་མཐའ་གཉིས་ཁོ་ན་མངོན་དུ་བྱེད་པའང་ཡོད། སོ་སོ་སྐྱེ་བོའི་དུས་ན་འཇིག་རྟེན་པའི་ལམ་གྱིས་བསམ་གཏན་གཟུགས་མེད་ཀྱི་ཏིང་ངེ་འཛིན་ཐོབ་པ་རྣམས་ནི། ནམ་བདེན་པ་མཐོང་བ་ན་ཕྱིར་མི་འོང་དུ་འགྱུར་བས་འབྲས་བུ་ཕྱི་མ་གཉིས་ཁོ་ན་མངོན་དུ་བྱེད་པ་སོགས་སྣ་ཚོགས་པ་ཡོད་དེ། དེ་དག་ནི་ཉན་ཐོས་འཕགས་པ་ཡིན་ནོ། །རང་རྒྱལ་ནི་བསྐལ་པ་བརྒྱར་ཚོགས་བསགས་པ་སྔོན་དུ་འགྲོ་བ་ཡིན་ཡང༌། གནས་སྐབས་དེ་དག་ཏུ་ཕལ་ཆེར་ཚོགས་ལམ་ལ་གནས་པ་ཡིན་ལ། སྦྱོར་མཐོང་སྒོམ་གསུམ་མཉམ་གཞག་ཐུན་གཅིག་ལ་བགྲོད་པར་བྱས་ནས། དེའི་བར་མ་ཆད་པ་ལ་ཟད་པ་དང་མི་སྐྱེ་བ་ཤེས་པ་སྟེ། དགྲ་བཅོམ་པའི་འབྲས་བུ་དང་མཐར་ཕྱིན་པའི་ལམ་མངོན་དུ་བྱེད་པ་ནི། རང་རྒྱལ་གྱི་གཙོ་བོ་བསེ་རུ་ལྟ་བུ་ཡིན་ལ། ཚོགས་ལ་སྤྱོད་པའི་རང་རྒྱལ་ལ་ནི་དེ་ལྟར་མ་ངེས་ཏེ། འོན་ཀྱང་ཐམས་ཅད་མཐུན་པར་སྔོན་གྱི་སྐྱེ་བར་སངས་རྒྱས་ལ་བྱ་བ་བྱས་ཤིང༌། ཉན་ཐོས་ལམ་ལ་སློབ་པ་རྣམས་དང་འདྲ་བར་བྱས་པ་ཡིན་ཡང༌། ལྷག་པོར་རྟེན་ཅིང་འབྲེལ་བར་འབྱུང་བ་ལ་ཆེས་མཁས་པར་བྱས་པ་དང༌། སྨོན་ལམ་གྱི་དབང་གིས་སྲིད་པ་ཐ་མའི་གནས་སྐབས་སུ་
སངས་རྒྱས་མི་བཞུགས་ཤིང༌། །སྟོན་པ་མེད་པའི་འཇིག་རྟེན་གྱི་ཁམས་སུ། བླ་མ་མེད་པར་རང་གི་བག་ཆགས་ཀྱི་སྟོབས་སད་པ་ཁོ་ནས། བྱང་ཆུབ་མངོན་དུ་བྱེད་པའོ། །ཉན་ཐོས་འཕགས་པ་ལ་ནི་དབང་པོ་རྣོ་བརྟུལ་སྣ་ཚོགས་ཡོད་ལ། འདི་ནི་དབང་རྣོན་ཁོ་ནའོ། །བྱང་ཆུབ་སེམས་དཔའ་ནི་སེམས་དང་པོ་བསྐྱེད་པ་ནས་བཟུང་སྟེ་བསོད་ནམས་ཀྱི་ཚོགས་མཐའ་ཡས་པ་བསགས་ཏེ། བྱང་ཆུབ་ཏུ་སྨོན་ལམ་བཏབ་ཐེག་པ་ཆེན་པོ་ལ་ཐོས་བསམ་སྒོམ་གསུམ་དུ་བྱས་པས་ཚོགས་ཀྱི་ལམ་དུ་ཡང་ཡོན་ཏན་དུ་མ་ཐོབ་ལ། སྦྱོར་བའི་ལམ་དུ་གནས་ལུགས་ཀྱི་རྟོགས་པ་འཕག་མཆོག་རྣམས་དང་རྗེས་མཐུན་པ་གྲུབ་ཅིང༌། ཏིང་ངེ་འཛིན་དང་གཟུངས་དང་མངོན་ཤེས་མཐའ་ཡས་པའང་བསྒྲུབས་ནས། མཐོང་ལམ་དུ་ཆོས་ཉིད་སྤྲོས་བྲལ་རྣམ་པ་ཐམས་ཅད་པའི་དོན་མངོན་དུ་བྱས་པས། བདེན་བཞིའི་དོན་སོགས་ཉན་རང་གི་སྤངས་རྟོགས་ཐམས་ཅད་ཞོར་ལ་ཐོབ་ཅིང༌། བྱང་སེམས་འཕགས་པར་གྱུར་པ་ཞེས་བྱ་ལ། དེ་ཉིད་ཀྱི་རྒྱུན་ལས་དང་པོ་ནས་བཅུ་པའི་བར་དུ་ཡོན་ཏན་མཐའ་ཡས་པ་གོང་འཕེལ་ཐོབ་པ་དེ་དག་ནི། རྒྱལ་བའི་སྲས་པོ་ཞེས་བྱ་སྟེ། དེ་ལྟར་ན་དབྱེ་བ་འདི་དག་མངོན་པ་སོགས་གསུང་རབ་གཞན་ཤེས་པ་དག་ལ་སྐབས་འདིར་བཤད་མི་དགོས་ཀྱང་ཤིན་ཏུ་ལས་དང་པོ་དག་ལ་གོ་བ་ཕྱོགས་ཙམ་མཚོན་པའི་ཕྱིར། ཟུར་ཙམ་སྨོས་པའོ། །རྣམ་པར་དབྱེ་བ་མཐའ་ཡས་པ་ནི་དུས་ཇི་སྙེད་པར་ཡང་བརྗོད་པར་མི་ནུས་ཏེ། འཕགས་པ་རྣམས་ཀྱིས་སོ་སོར་རང་གིས་རིག་པར་བྱ་བ་ཉིད་པས། གཞུང་རྒྱ་
ཆེན་པོ་སྨྲ་བ་རྣམས་ཀྱིས་འཆད་ཚུལ་མང་པོའི་སྒོ་ནས། དཀའ་བ་དུ་མ་དང་བཅས་ཏེ་འཆད་མོད་ཀྱང༌། རྒྱ་མཚོ་ཆེན་པོ་ལས་སྐྲ་རྩེ་གཅིག་གིས་བླངས་པའི་ཆུ་ཐིག་གི་ཚད་ཙམ་ཡང་མ་ཡིན་ནོ། །སྤྲོས་པས་ཆོག་གོ ལྔ་པ་ནི། གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །གང་སངས་རྒྱས་རྣམས་ཞེས་སྤྱིར་སྨོས་ཏེ། དེ་ཡང་ཕྱོགས་བཅུའི་འཇིག་རྟེན་གྱི་ཁམས་རྣམས་ན། སེམས་ཅན་གཏི་མུག་གི་མུན་པར་འཁྱམས་པ་རྣམས་ལ་ལམ་སྟོན་པར་མཛད་པས། འཇིག་རྟེན་གྱི་སྒྲོན་མར་གྱུར་པ་སངས་རྒྱས་རྣམས་བྱང་ཆུབ་སྒྲུབ་པར་བྱེད་པའི་ལམ་གྱི་རིམ་པ། ལམ་ལྔ་དང་ས་བཅུ་ལ་སོགས་པའི་རིམ་པ་མ་ལུས་པར་སྔོན་དུ་སོང་བས། བླ་ན་མེད་པ་སངས་རྒྱས་ཀྱི་གོ་འཕང་མ་ཆགས་མ་ཐོགས་པར་བརྙེས་པའམ། ཡང་ན་དེ་ལྟར་ལམ་དང་འབྲས་བུའི་ཡོན་ཏན་ཕུན་སུམ་ཚོགས་པ་ཐོབ་ཀྱང༌། ཐོབ་པ་དེ་ལ་ཞན་པ་མི་མངའ་བས་མ་ཆགས་པའི་མགོན་པོ་སངས་རྒྱས་དེ་དག་ཐམས་ཅད་ལ་བདག་གིས་འཁོར་ལོ་བླ་ན་མེད་པ་སྟེ། དམ་པའི་ཆོས་ཀྱི་འཁོར་ལོ་བསྐོར་བར་བསྐུལ་ལོ། །འཁོར་ལོ་ནི་ཤིང་རྟའི་འཁོར་ལོ་ལྟ་བུ་སྟེ། ངོ་བོ་བརྟན་པའི་དངོས་པོ་ཡིན་ཡང༌། རང་གི་གཟུགས་ཀྱི་འཕྲུལ་གྱིས། ཕ་རོལ་གྱི་གནས་སུ་ཕྱིན་པར་བྱེད་པ་དང་འདྲ་བར། ཉོན་མོངས་པ་སོགས་མི་
མཐུན་པའི་ཕྱོགས་ཀྱིས་མི་ཤིགས་པར་གནས་པ་ཤིན་ཏུ་བརྟན་པ་ཆོས་ཀྱི་ལམ་སྟོན་པ་པོའི་རྒྱུད་ལ་མངའ་བ་དེ། ཉན་པ་པོའི་རྒྱུད་ལ་འཕོས་པ་དང་འདྲ་བར་རྟོགས་པ་བསྐྱེད་ནུས་པ་ནི་ཆོས་ཀྱི་འཁོར་ལོའོ། །བླ་ན་མེད་པ་ནི་འཇིག་རྟེན་ལས་འདས་པ་ཡིན་པ་དང༌། ལྷ་དང་དྲང་སྲོང་རྣམས་ཀྱིས་བསྟན་པའི་ཆོས་དང་ཐུན་མོང་མ་ཡིན་པའོ། །བསྐུལ་མ་འདེབས་པ་ནི། སྤྲུལ་པའི་སྐུ་སངས་རྒྱས་ནས་རིང་པོ་མ་ལོན་པ། ད་ལྟར་འཇིག་རྟེན་དུ་ཆོས་འཁོར་ཡེ་མ་བསྐོར་བ་ལ། ཆོས་འཁོར་སྤྱི་ལྡོག་ནས་བསྐོར་བར་གསོལ་བ་འདེབས་པ་སྟེ། སྤྱིར་ཆོས་འཁོར་བསྐོར་བཞིན་པ་ཡིན་ཡང༌། སྐབས་སུ་བབས་པ་དེ་དང་དེའི་ཆོས་གསུང་བར་གསོལ་བ་འདེབས་པའང་འདིའི་ཁོངས་སུ་བསྡུའོ། །སངས་རྒྱས་ཐུགས་རྗེ་ཅན་ཟང་ཟིང་ལ་ཆགས་པ་དང་མི་མཁྱེན་པ་མི་མངའ་བས། མི་དགོས་སོ་སྙམ་ན། ཆོས་ལ་གུས་པ་བསྐྱེད་པའི་ཕྱིར་བསྐུལ་དགོས་པའང་ཡིན་ལ། གཙོ་བོར་ནི་སངས་རྒྱས་ཆོས་མི་གསུང་བར་མི་སྲིད་ཀྱང༌། རང་གི་བློ་སེམས་ཅན་ལ་སྙིང་བརྩེ་བའི་ཕྱིར་ཚོགས་བསགས་པའི་སླད་དུ་བློའི་རིམ་པ་སྦྱངས་ཚུལ་ལོ། །དྲུག་པ་ནི། མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང༌། །བདག་གིས་ཐལ་མོ་རབ་སྦྱར་གསོལ་བ་འདེབས། །དོན་དམ་པར་ན། སངས་རྒྱས་ཡོངས་སུ་མྱ་ངན་ལས་མི་འདའ་མོད། མྱ་ངན་ལས་འདའ་བར་བསྟན་པས་འདུལ་བ་རྣམས་ལ་ཡོངས་སུ་མྱ་ངན་ལས་འདའ་
བའི་ཚུལ་སྟོན་པར་གང་བཞེད་པ་དེ་དག་ལ། དགོས་པ་སངས་རྒྱས་འཇིག་རྟེན་དུ་བཞུགས་ན་ཕན་བདེ་མཐའ་ཡས་པ་ལྷུན་གྲུབ་ཏུ་འབྱུང་བ་ཉིད་ཡིན་པས། འགྲོ་བ་ཀུན་ལ་འཕྲལ་དུ་ཕན་པར་འགྱུར་ཞིང་ཡུན་དུ་བདེ་བའི་ཕྱིར་དུ། དུས་ཀྱི་ཁྱད་པར་བསྐལ་པ་ཆེན་པོ་ཕྱོགས་བཅུའི་སངས་རྒྱས་ཐམས་ཅད་ཀྱི་ཞིང་ཁམས་ཀྱི་རྡུལ་ཕྲ་རབ་ཀྱི་གྲངས་སྙེད་དུ་བཞུགས་པར་ཡང་གསོལ་བ་འདེབས་པ་པོ་བདག་གིས་གསོལ་བ་འདེབས་ཏེ་ཇི་ལྟར་འདེབས་པའི་ཚུལ་ནི། ཐལ་མོ་རབ་ཏུ་སྦྱར་བས་གསོལ་བ་འདེབས་པར་བགྱིའོ། །འཕྲལ་དུ་བདེ་བ་ནི་འབྱོར་བ་དང༌། དབང་ཕྱུག་ལ་སོགས་པ་དང་ཡུན་དུ་ཕན་པ་ནི་མྱ་ངན་ལས་འདས་པའོ། །བདུན་པ་ནི། ཕྱག་འཚལ་བ་དང་མཆོད་ཅིང་བཤགས་པ་དང༌། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཕྱིར་བསྔོའོ། །གོང་དུ་སྨོས་པ་ལྟར། ཡུལ་མཆོག་ལ་ལུས་ངག་ཡིད་ཀྱིས་ཕྱག་འཚལ་བ་དང༌། མཆོད་པ་རྣམ་པ་གཉིས་ཀྱིས་མཆོད་པ། སྟོབས་བཞིའི་སྒོ་ནས་སྡིག་པ་བཤགས་པ་དང༌། སྐྱེ་འཕགས་ཀྱི་དགེ་བ་ཐམས་ཅད་ལ་རྗེས་སུ་ཡི་རང་བ་དང༌། ཆོས་ཀྱི་འཁོར་ལོ་བསྐོར་བར་བསྐུལ་ཞིང༌། མྱ་ངན་ལས་མི་འདའ་བར་བཞུགས་སུ་གསོལ་བ་སྟེ། ཡན་ལག་དྲུག་པོ་དེ་བྱས་པ་ལུས་བྱུང་བའི་དགེ་བ་ཅུང་ཟད་བདག་གིས་གང་དང་ཅི་བསགས་པ་དེ་དག་ཐམས་ཅད་ཅེས་པ་
སྟེ། དངོས་སུ་ནི་དེ་ཙམ་ཡིན་ཡང་རང་གིས་དུས་གསུམ་དུ་དགེ་བ་བྱས་པ་དང་བྱེད་དུ་བཅུག་པ་དང༌། ཡི་རང་དང༌། བསྔགས་པ་བརྗོད་པ་ཐམས་ཅད་དང༌། འགྲོ་བ་ཐམས་ཅད་ཀྱིས་དུས་གསུམ་དུ་བསགས་པའི་དགེ་བ་ཐམས་ཅད་ཀྱང༌། བློས་གཅིག་ཏུ་བསྡོམས་ནས་བསྔོ་དགོས་ཏེ། དེ་དག་ཐམས་ཅད་ཀྱང་ཆོས་ཀྱི་དབྱིངས་དང་མཉམ་པ་ཉིད་དུ་བྱས་ནས་སོ། །ཅུང་ཟད་དད་ཅི་བསགས་པ་ཞེས་པའི་ཚིག་གིས་ཀྱང་ཟུར་གྱིས་འཕངས་པ་ཡིན་ནོ། །བསྔོ་རྒྱུའི་དགེ་བ་དེ་རྣམས་གང་དུ་བསྔོ་ཞེ་ན། བྱང་ཆུབ་ཆེན་པོ་བླ་ན་མེད་པའི་སངས་རྒྱས་ཀྱི་ཕྱིར་བསྔོའོ། །སུས་བསྔོ་བར་བྱེད་ཅེ་ན་བདག་གིས་སོ། །གལ་ཏེ་བྱང་ཆུབ་མཆོག་ཏུ་མ་བསྔོས་ན། རང་རང་གི་འབྲས་བུ་ཕྱུང་ནས་ཟད་པར་འགྱུར་ཏེ། འཁོར་བ་པ་རྣམས་ཀྱི་ནི་བདེ་འགྲོ་ཚུན་དུ་ཟད་ལ། ཉན་རང་གི་དེ་དག་ཀྱང་ལྷག་མེད་ཀྱི་དབྱིངས་སུ་ཟད་པའོ། །སངས་རྒྱས་སུ་བསྔོས་ན་ནི། དེ་མ་ཐོབ་ཀྱི་བར་དུ་ཡང་ལྷ་མིའི་བདེ་སྐྱིད་སོགས་བདེ་བ་གོང་འཕེལ་དུ་འགྱུར་ཞིང༌། བླ་ན་མེད་པའི་བྱང་ཆུབ་ཐོབ་ཟིན་ནས། མི་གནས་པའི་མྱ་ངན་ལས་འདས་པ་བརྙེས་པའི་ཕྱིར། ནམ་མཁའ་ཇི་སྲིད་པའི་བར་དུ་གནས་ཤིང༌། སེམས་ཅན་ཐམས་ཅད་ཀྱི་དོན་སྤྱོད་པས་བསོད་ནམས་ཀྱི་འབྲས་བུ་ནམ་ཡང་ཟད་པ་མི་སྲིད་པ་ཡིན་ནོ། །བསྔོ་བ་དེ་ཡང༌། དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །ཞེས་གསུངས་པ་ལྟར། སངས་རྒྱས་ཐམས་ཅད་ཀྱིས་
བསྔགས་པའི་བསྔོ་བ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་སོགས་སུ་ལས། སྦྱིན་པ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ནས། བླ་ན་མེད་པའི་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་དེ་ཡོངས་སུ་བསྔོས་པ་ན། ཅི་ནས་མཚན་མར་ཡང་དག་པར་ཡོངས་སུ་མི་མཐོང་བ་སྟེ། དེ་ལྟ་བུའི་ཚུལ་གྱིས་ཡོངས་སུ་བསྔོ་བར་བྱེད་དེ། བདག་གིས་ཅི་ཞིག་སྦྱིན་པར་བྱེད། སུ་ཞིག་སྦྱིན་པར་བྱེད། ཅི་ཞིག་ཡོངས་སུ་བསྔོ་བར་བྱ། སུ་ཞིག་ཡོངས་སུ་བསྔོ་བར་བྱེད། གང་དུ་བསྔོས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་པའི་དངོས་པོ་དེ། ཡང་དག་པར་རྗེས་སུ་མ་མཐོང་ངོ༌། །དེ་ཅིའི་ཕྱིར་ཞེ་ན་ནང་སྟོང་པ་ཉིད་ཀྱིས་སྟོང་པ་དང༌། ཞེས་པ་ནས། སྟོང་ཉིད་རྣམས་ལ་རིམ་གྱིས་སྦྱར་ནས། རང་གི་མཚན་ཉིད་སྟོང་པ་ཉིད་ཀྱིས་སྟོང་པའི་ཕྱིར་རོ། །དེས་གང་དུ་ཡོངས་སུ་བསྔོ་བར་འགྱུར། ཅི་ཞིག་ཡོངས་སུ་བསྔོ་བར་འགྱུར། གང་གིས་ཡོངས་སུ་བསྔོ་བར་འགྱུར། ཞེས་དེ་ལྟར་མཐོང་སྟེ། དེ་ལྟར་ཡོངས་སུ་བསྔོས་ན་ལེགས་པར་ཡོངས་སུ་བསྔོས་པར་འགྱུར་རོ། །ཞེས་གསུངས་ཏེ། བསྔོ་བའི་ཡུལ་བླ་ན་མེད་པའི་བྱང་ཆུབ་དང༌། ཆེད་དུ་བྱ་བ་གཞན་དོན་ཁོ་ན་དང༌། ཡིད་ལ་བྱེད་པའི་རྣམ་པ་ནི། བསྔོ་བྱའི་དགེ་བ་འཁོར་གསུམ་མི་དམིགས་པ་དང༌། བསྔོ་བ་ཉིད་ཀྱང་འཁོར་གསུམ་མི་དམིགས་པ་སྟེ། ཁྱད་པར་གསུམ་དང་ལྡན་པའི་བསྔོ་བ་ཡིན་ནོ། །ཡོངས་
སུ་བསྔོ་བའི་ཁྱད་པར་རྒྱས་པ་ནི། འཕགས་པ་རྡོ་རྗེ་རྒྱལ་མཚན་གྱི་བསྔོ་བའི་ལེའུ་ལས་རྟོགས་པར་བྱའོ། །རྩ་བའི་ས་བཅད་གཉིས་པ་སྨོན་ལམ་གྱི་རབ་དབྱེ་ལ། དཔལ་ཕྱོགས་ཀྱི་གླང་པོ་ལ་སོགས་པ་སྔོན་གྱི་མཁས་པ་རྣམས་ཀྱིས་དོན་ཚན་རྣམ་པ་བཅུ་དྲུག་ཏུ་མཛད་དོ། །དེ་ཡང་སྡོམ་ནི། ལྷག་བསམ་བྱང་སེམས་མི་བརྗེད་དང༌། །མ་གོས་ཕན་བདེ་གོ་ཆ་དང༌། །སྐལ་མཉམ་འགྲོགས་དང་བཤེས་གཉེན་བསྟེན། །སངས་རྒྱས་མངོན་གྱུར་དམ་ཆོས་འཛིན། །མི་ཟད་མཛོད་ཐོབ་འཇུག་པ་དང༌། །སྟོབས་དང་སྒྲུབ་པ་ལས་དང་ནི། །རྗེས་སུ་སློབ་དང་འཇུག་སྡུད་དོ། །དེ་ཡང་བསམ་པ་དག་པའི་སྒོ་ནས་སྨོན་པ་དང༌། བྱང་ཆུབ་ཀྱི་སེམས་མི་བརྗེད་པའི་སྒོ་ནས་སྨོན་པ་དང༌། དེ་བཞིན་དུ་སྦྱར་ཏེ་མ་གོས་པའི་སྦྱོར་བའི་དང༌། གཞན་ལ་ཕན་བདེའི་དང༌། གོ་ཆ་བགོས་པའི་དང༌། སྐལ་མཉམ་དང་འགྲོགས་པའི་དང༌། བཤེས་གཉེན་བསྟེན་པའི་དང༌། སངས་རྒྱས་མངོན་གྱུར་གྱི་དང༌། དམ་ཆོས་ཡོངས་བཟུང་གི་དང༌། མི་ཟད་པའི་མཛོད་ཐོབ་པའི་དང༌། འཇུག་པ་དུ་མའི་དང༌། སྟོབས་ཀྱི་དང༌། གཉེན་པོ་བསྒྲུབ་པའི་དང༌། ལས་ཀྱི་དང༌། རྗེས་སུ་སློབ་པའི་དང༌། ཐམས་ཅད་ཀྱི་དོན་བསྡུ་བའི་སྒོ་ནས་སྨོན་པའི་སྨོན་ལམ་རྣམས་སོ། །དང་པོ་བསམ་པ་དག་པའི་སྒོ་ནས་སྨོན་པ་ནི། འདས་པའི་སངས་རྒྱས་རྣམས་དང་ཞེས་པ་ནས། རེ་བའང་འགྲུབ་པར་ཤོག་གི་བར་ཡིན་ལ། དེ་ལའང་དོན་ཚན་བཞི་ལས། སངས་རྒྱས་ལ་མཆོད་པའི་བསམ་པ་ནི་
འདས་པའི་སོགས། དགོངས་པ་ཡོངས་སུ་བསྐང་བའི་ནི། གང་ཡང་མ་བྱོན་སོགས། ཞིང་ཡོངས་སུ་དག་པའི་ནི། ཕྱོགས་བཅུའི་ག་ལའི་སོགས། སེམས་ཅན་ལ་ཕན་གདགས་པའི་བསམ་པ་ནི། ཕྱོགས་བཅུའི་སེམས་ཅན་སོགས་སོ། །གཉིས་པ་བྱང་ཆུབ་ཀྱི་སེམས་མི་བརྗེད་པ་ལ། བྱང་ཆུབ་སྤྱོད་པ་དག་ནི་བདག་སྤྱོད་ཅིང༌། །ཞེས་པ་ནས། ཡོངས་སུ་བྱང་བར་ཤོག་གི་བར་ཏེ། ཚེ་རབས་སོགས་ཀྱིས་རྟག་ཏུ་རབ་ཏུ་འབྱུང་བ་དང༌། ཚུལ་ཁྲིམས་སྤྱོད་པ་སོགས་ཀྱིས་ཚུལ་ཁྲིམས་དག་པ་དང༌། ལྷའི་སོགས་ཀྱིས་སྐད་སྣ་ཚོགས་པས་ཆོས་སྟོན་པ་དང༌། དེས་ཤིང་སོགས་ཀྱིས་དགེ་བ་ལ་བརྩོན་པ་དང༌། རྒྱུ་བཞི་སྔོན་དུ་འགྲོ་བའི་བྱང་ཆུབ་ཀྱི་སེམས་མི་བརྗེད་པ་དང༌། སྡིག་པ་སོགས་ཀྱིས་དེའི་མི་མཐུན་ཕྱོགས་སྤོང་བར་སྟོན་ཏོ། །ཡང་ན་འདི་ལ་ཚེ་རབས་དྲན་པ་དང༌། རབ་ཏུ་བྱུང་བ་སོ་སོར་ཕྱེ་ནས། རྒྱུ་ལྔར་བྱས་ཀྱང་ལེགས་པར་འགྱུར་རོ། །གསུམ་པ་མ་ལུས་པའི་སྦྱོར་བའམ་མ་ཆགས་པ་ནི། ལས་དང་ཞེས་པ་ལ་སོགས་པའོ། །བཞི་པ་གཞན་ལ་ཕན་བདེ་ནི། ཞིང་གི་ཁྱོན་དང་སོགས་སོ། །ལྔ་པ་གོ་ཆ་བགོ་བ་ནི། བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང༌། །སོགས་ཏེ། སངས་རྒྱས་ཀྱི་ཆོས་རྫོགས་པ་དང༌། སེམས་ཅན་གྱི་སྤྱོད་པ་དང་མཐུན་པར་འཇུག་པ་དང༌། དམ་པའི་ཆོས་སྟོན་པ་གསུམ་ལ་རིམ་པས་སྦྱར་རོ། །དྲུག་པ་སྐལ་མཉམ་གྱི་གྲོགས་དང་འགྲོགས་པ་ནི། བདག་གི་སྤྱོད་དང་སོགས་
སོ། །བདུན་པ་དགེ་བའི་བཤེས་གཉེན་བསྟེན་ཅིང་མཉེས་པར་བྱེད་པ་ནི། བདག་ལ་ཕན་པར་སོགས་སོ། །བརྒྱད་པ་སངས་རྒྱས་མངོན་གྱུར་ལ་མཆོད་པ་སོགས་བྱ་བ་ནི། སངས་རྒྱས་སྲས་ཀྱི་སོགས་ཏེ། འཁོར་དང་དུས་དང་བསམ་པ་སྐྱོ་བ་མེད་པ་དང༌། མཆོད་པ་སྟེ་དོན་ཚན་བཞི་རིམ་ཅན་དུ་སྦྱར་རོ། །དགུ་པ་དམ་ཆོས་ཡོངས་སུ་བཟུང་བ་ནི་རྒྱལ་བ་རྣམས་ཀྱི་སོགས་ཏེ། ཆོས་འཛིན་པ་དང་སྟོན་པ་དང༌། རབ་ཏུ་སྦྱོར་བ་གསུམ་རིམ་གྱིས་སོ། །བཅུ་པ་མི་ཟད་པའི་མཛོད་ཐོབ་པར་བྱ་བ་ནི། སྲིད་པ་ཐམས་ཅད་སོགས་ཏེ། ཚོགས་གཉིས་དང་མཐུ་ཐོབ་པར་བྱ་བའོ། །བཅུ་གཅིག་པ་འཇུག་པ་དུ་མའི་སྒོ་ནས་སྨོན་པ་ནི། རྡུལ་གཅིག་སྟེང་ན་རྡུལ་སྙེད་ཞིང་རྣམས་ཏེ། །ཞེས་པ་ནས། དྲུང་དུ་བདག་མཆིའོ་བར་རོ། །དེ་ལ་འཇུག་པ་བརྒྱད་སྟེ། དང་པོ་ཞིང་དང་བཅས་པའི་སངས་རྒྱས་ལྟ་བ་ལ་འཇུག་པ་ནི། རྡུལ་གཅིག་སོགས། གཉིས་པ་སངས་རྒྱས་ཀྱི་གསུང་ལ་འཇུག་པ་ནི། གསུང་གཅིག་ཡན་ལག་སོགས། གསུམ་པ་ཆོས་འཁོར་བསྐོར་བ་ལ་འཇུག་པ་ནི། དུས་གསུམ་གཤེགས་པ་སོགས། བཞི་པ་བསྐལ་པའི་སྒོ་ནས་འཇུག་པ་ནི། མ་འོངས་བསྐལ་པ་སོགས། ལྔ་པ་དེ་བཞིན་གཤེགས་པ་བལྟ་བ་ལ་འཇུག་པ་ནི། དུས་གསུམ་གཤེགས་པ་སོགས། དྲུག་པ་དེའི་སྤྱོད་ཡུལ་ལ་འཇུག་པ་ནི། རྟག་ཏུ་དེ་དག་སོགས། བདུན་པ་ཞིང་སྒྲུབ་པ་ལ་འཇུག་པ་ནི། གང་ཡང་དུས་གསུམ་སོགས། བརྒྱད་པ་དེ་བཞིན་
གཤེགས་པའི་དྲུང་དུ་འགྲོ་བ་ལ་འཇུག་པ་ནི། གང་ཡང་མ་བྱོན་སོགས་སོ། །འདིར་སྡོམ་ནི། ཞིང་བལྟ་གསུང་དང་ཆོས་འཁོར་དང༌། །བསྐལ་པ་སངས་རྒྱས་སྤྱོད་ཡུལ་དང༌། །ཞིང་སྒྲུབ་པ་དང་དྲུང་དུ་འགྲོ། །འཇུག་པ་བརྒྱད་དུ་ཤེས་པ་ཡིན། སྤྱི་དོན་བཅུ་གཉིས་པ་སྟོབས་ཀྱི་སྒོ་ནས་སྨོན་པ་ནི། ཀུན་ཏུ་མྱུར་བའི་ནས། ཡང་དག་སྒྲུབ་པར་བྱེད་ཀྱི་བར་རོ། །བཅུ་གསུམ་པ་བསྒྲུབ་པའམ་གཉེན་པོའི་སྒོ་ནས་སྨོན་པ་ནི། ལས་ཀྱི་སྟོབས་རྣམས་སོགས་ཏེ། ལས་ཉོན་བདུད་གསུམ་འཇོམས་པ་དང༌། གཉེན་པོ་དངོས་ཏེ་དོན་ཚན་བཞི་རིམ་ཅན་དང༌། བཅུ་བཞི་པ་འཕྲིན་ལས་ཀྱི་སྒོ་ནས་སྨོན་པ་ནི། ཞིང་རྣམས་རྒྱ་མཚོ་ནས་མི་སྐྱོ་སྤྱད་པར་བགྱི་ཞེས་པའི་བར་ཏེ། འདི་ལ་ཡང་སངས་རྒྱས་ཀྱི་ཞིང་དག་པ་དང༌། སེམས་ཅན་སྨིན་པར་བྱེད་པ་དང༌། ཆོས་རྟོགས་པ་དང༌། རྗེས་ཐོབ་ཀྱི་ཡེ་ཤེས་ཐོབ་པ་དང༌། སྤྱོད་པ་མཐའ་ཡས་པ་དང༌། སྨོན་ལམ་རྫོགས་པ་དང༌། མཆོད་པ་སྒྲུབ་པ་དང༌། བསྐལ་པ་མཐའ་མེད་པར་འཇུག་པ་སྟེ་དོན་བརྒྱད་རིམ་ཅན་ནོ། །བཅོ་ལྔ་པ་རྗེས་སུ་སློབ་པ་ནི། གང་ཡང་དུས་གསུམ་སོགས་ཏེ། འདི་ལ་སངས་རྒྱས་ཀྱི་རྗེས་སུ་སློབ་པ་དང༌། སེམས་དཔའ་ཆེན་པོའི་རྗེས་སུ་སློབ་པའོ། །བཅུ་དྲུག་པ་དོན་བསྡུ་བའི་བསྔོ་བ་བསྟན་པ་ནི། སྤྱོད་པ་དག་ནི་ཚད་ཡོད་མ་གྱུར་ཅིག །སོགས་སོ། །དེ་ལྟར་ན་བསྡུས་པའི་དོན་གྱི་རིམ་པ་འདི་ནི། རྒྱ་འགྲེལ་ཕལ་ཆེར་གྱི་བཤད་པ་མགྲིན་གཅིག་པ་ཡང་ཡིན་ལ། ཁྱད་པར་
མཁན་པོ་ཡེ་ཤེས་སྡེའི་ཞལ་ལྔ་ནས་ཇི་སྐད་གསུངས་པ་ལྟར་བཀོད་པ་ཡིན་ནོ། །དེ་བས་ན་བསྡུས་དོན་འདི་ནི་ཤིན་ཏུ་ཁུངས་ཆེ་བའི་ཕྱིར། འདི་ལ་གཅེས་སྤྲས་སུ་བྱ་ཞིང་མི་ནུབ་པའི་དོན་དུ་བཀོད་པའོ། །ཤཱཀྱ་བཤེས་གཉེན་གྱི་འགྲེལ་པར་ནི་དོན་ཚན་བཅུ་དྲུག་པོ་སྤྱི་ཙམ་ནས་འདྲ་བ་ལས། དང་པོ་ལ་བྱང་ཆུབ་ཏུ་སེམས་བསྐྱེད་པ་ཞེས་མིང་འདོགས་པ་དང༌། སེམས་བསྐྱེད་པ་སོགས་དོན་ཚན་བཅུ་རིམ་པ་བཞིན་མོས་སྤྱོད་ཀྱི་སའི་ཕར་ཕྱིན་བཅུ་དང་སྦྱོར་ཞིང༌། མཆོད་པར་གྱུར་ཅེས་པས་སྦྱིན་པ་དང༌། པདྨོ་དང༌། ཉི་ཟླའི་དཔེས་ཆགས་སྡང་གིས་མ་གོས་པ་དང༌། གྲང་དྲོའི་བྱ་བ་བྱེད་ཀྱང༌། ཆགས་སྡང་གི་རྣམ་རྟོག་མེད་པས་བཟོད་པ་དང༌། སངས་རྒྱས་མངོན་དུ་འགྱུར་བས་སྨོན་ལམ་གྱི་སྟོབས་ཡིན་པ་སོགས་རྒྱུ་མཚན་དང་བཅས་ནས་འཆད་ལ། སངས་རྒྱས་ཀྱི་ཞིང་ལྟ་བ་ལ་སོགས་པས་འཇུག་པ་བརྒྱད་ཀྱིས། དེ་བཞིན་གཤེགས་པ་ལྟ་བའི་འཇུག་པ་དང༌། དེའི་སྤྱོད་ཡུལ་ལ་འཇུག་པ་གཅིག་ཏུ་བསྡོམས་ནས་གཞུང་ཚན་བདུན་པོ་དེ་ས་དང་པོ་རབ་ཏུ་དགའ་བ་སོགས་ལྷག་བསམ་དག་པའམ་མ་དག་ས་བདུན་ལ་རིམ་གྱིས་སྦྱོར་བ་དང༌། དོན་ཚན་བཅུ་གཉིས་པ་སྟོབས་ཀྱི་སྨོན་པ་ས་བརྒྱད་པ་དང༌། བཅུ་གསུམ་པ་ལ་མི་མཐུན་ཕྱོགས་ཉམས་ཞེས་ཟེར་ཏེ་ས་དགུ་པ་དང༌། བཅུ་བཞི་པ་ལ་ཡོན་ཏན་ཡོངས་སུ་སྦྱོང་ཞེས་འདོགས་པ་དང༌། བཅོ་ལྔ་པ་རྗེས་སུ་སློབ་པ་ལ་གཉིས་སུ་ཕྱེ་ནས། གང་ཡང་དུས་གསུམ་གཤེགས་པའི་རྒྱལ་བ་ཡི། །ཞེས་སོགས་ལ་ཡོན་ཏན་ཐམས་ཅད་རྫོགས་པར་
བྱ་བ་ཞེས་གསུང་ཞིང༌། རྒྱལ་བ་ཀུན་གྱི་སྲས་ཀྱི་ཐུ་བོ་པ། །སོགས་ཚིགས་བཅད་གསུམ་གྱིས། ཚོགས་གཉིས་བཟུང་བས་བྱང་ཆུབ་སེམས་དཔའ་ཆེན་པོའི་རྗེས་སུ་སློབ་པ་སྟེ་དོན་ཚན་བཅུ་བཞི་པ་དང་བཅོ་ལྔ་པ་བསྡོམས་པས་ས་བཅུ་པ་བཤད་ཅིང༌། ས་བཅུ་བསྟན་པས་འཕགས་ལམ་གྱི་ཕར་ཕྱིན་བཅུ་ཡང་བཤད་པ་དང༌། བཅུ་དྲུག་པ་ཐམས་ཅད་ཀྱི་དོན་བསྡུས་ནི་ཀུན་ཏུ་འོད་ཀྱིས་རྫོགས་པའི་སངས་རྒྱས་སུ་སྨོན་ལམ་འདེབས་པའོ། །ཞེས་བཞེད་དེ་ལེགས་པར་བཤད་པའང་ཡོད་ལ། ཇི་བཞིན་མི་འབྱོར་བ་ཡང་འགའ་རེ་སྣང་ངོ༌། །འོན་ཀྱང་སྔོན་གྱི་དུས་འཕགས་པའི་ཡུལ་དུ་ཐེག་པ་ཆེན་པོ་ཕ་རོལ་ཏུ་ཕྱིན་པའི་བཤད་སྒྲུབ་ཀྱི་བསྟན་པ་རྣམ་པར་དག་པ་དང་པོར་ཡོད་པའི་གནས་སྐབས་སུ་ལེགས་པར་གྲགས་པའི་མཁས་པས་བཤད་པ་ཡིན་པས་ན། འདིར་ཡང་ལུགས་དེ་གོ་བའི་ཕྱིར་རྣམ་གྲངས་སུ་ཅུང་ཟད་བླངས་པའོ། །འོན་ཀྱང་འདིར་བཤད་སླ་ཞིང་གོ་བདེ་བའི་ཕྱིར། བསྡུས་དོན་གཞན་གྱི་སྒོ་ནས་བརྗོད་ན། འདི་ལ་མདོར་བསྟན་རྒྱས་བཤད་དོན་བསྡུས་གསུམ་ལས། དང་པོ་ནི། ཚིགས་བཅད་གསུམ་སྟེ། གསུངས་པ། འདས་པའི་སངས་རྒྱས་རྣམས་དང་ཕྱོགས་བཅུ་ཡི། །འཇིག་རྟེན་དག་ན་གང་བཞུགས་མཆོད་པར་གྱུར། །གང་ཡང་མ་བྱོན་དེ་དག་རབ་མྱུར་བར། །བསམ་རྫོགས་བྱང་ཆུབ་རིམ་པར་སངས་རྒྱས་སྤྱོན། །སྔོན་བྱོན་པ་འདས་པའི་སངས་རྒྱས་སུ་རབ་ཏུ་གྲགས་པ་
རྣམས་དང༌། ད་ལྟར་ཕྱོགས་བཅུ་ཡི་འཇིག་རྟེན་གྱི་ཁམས་དག་ན་གང་འགྲོ་བའི་དོན་ལ་བཞུགས་པ་ཐམས་ཅད་ལ། མཆོད་པའི་བྱེ་བྲག་ཐམས་ཅད་ཀྱིས་མཆོད་པར་གྱུར་ཅིག གང་ཡང་མ་བྱོན་པའི་སངས་རྒྱས་ཏེ། འོག་མིན་དུ་སངས་རྒྱས་ཟིན་ནས། གདུལ་བྱ་དུས་ལ་མ་བབས་པར། འཇིག་རྟེན་དུ་སྤྲུལ་པའི་སྐུ་མི་སྟོན་པ་རྣམས་སམ། མྱུར་དུ་འཚང་རྒྱ་བར་རུང་བའི་བྱང་ཆུབ་སེམས་དཔའ་ཆེན་པོ་དེ་དག་རྣམས། དཀའ་བ་དང་འབད་རྩོལ་མེད་བཞིན་དུ། རབ་ཏུ་མྱུར་བར་རང་རང་གི་དགོངས་པའི་བསམ་པ་རྫོགས་ནས། དུས་ལ་བབ་སྟེ། དགའ་ལྡན་དུ་སྐྱེ་བ་སྟོན་པ་ལ་སོགས་པ། བྱང་ཆུབ་མངོན་དུ་བརྙེས་པའི་རིམ་པ་ཚུལ་དང་མཐུན་པར་བསྟན་ནས། སངས་རྒྱ་བར་སྤྱོན་ཅིག་སྟེ་ཤོག་ཅིག་པའོ། །དེ་ཡང་འོག་མིན་དུ་སངས་རྒྱས་ཟིན་པ་རྣམས། སོ་སོའི་གདུལ་བྱ་སྨིན་པ་སོགས་དགོངས་པ་མྱུར་དུ་རྫོགས་ནས་སྤྲུལ་སྐུ་མྱུར་དུ་འབྱོན་པར་ཤོག་ཅིག་པ་དང༌། སེམས་དཔའ་ཆེན་པོ་རྣམས་ཀྱི་དགོངས་པའི་བསམ་པ་ཚོགས་གཉིས་ཀྱི་ལྷག་མ་མྱུར་དུ་རྫོགས་ནས། སངས་རྒྱས་བརྙེས་པར་གྱུར་ཅིག་པ་སྟེ། སངས་རྒྱས་དང་བྱང་སེམས་ཆེན་པོ་དེ་རྣམས་ཀྱི་སྨོན་ལམ་རྫོགས་པར་བསྔོ་བ་ཡིན་ལ། དེ་དག་གི་ཕྱིར་དུ་རང་གི་སྨོན་ལམ་རྫོགས་པར་ཡང་བྱ་དགོས་པས་མཆོད་པ་དང་བསྐུལ་བ་འདི་གཉིས་ནི། རང་གཞན་གྱི་སྨོན་ལམ་ཉིད་ཡོངས་སུ་རྫོགས་པའི་ཕྱིར་དུ་སྨོན་ལམ་འདེབས་པའོ། །ཡང་གསུངས་པ། ཕྱོགས་བཅུ་ག་ལའི་ཞིང་རྣམས་
ཇི་སྙེད་པ། །དེ་དག་རྒྱ་ཆེར་ཡོངས་སུ་དག་པར་གྱུར། །བྱང་ཆུབ་ཤིང་དབང་དྲུང་གཤེགས་རྒྱལ་བ་དང༌། །སངས་རྒྱས་སྲས་ཀྱིས་རབ་ཏུ་གང་བར་ཤོག །ཕྱོགས་བཅུའི་ག་ལ་བའི་མ་དག་པའི་ཞིང་ཇི་སྙེད་པ་དེ་དག་ཐམས་ཅད་བདེ་བ་ཅན་གྱི་ཞིང་བཞིན་དུ་མཆོག་ཏུ་རྒྱ་ཆེ་ཞིང༌། ངན་སོང་ལ་སོགས་པའི་སྐྱོན་ཐམས་ཅད་དང་བྲལ་ནས། ཡོངས་སུ་དག་པར་གྱུར་ཅིག ཞིང་ཁམས་དེ་ཐམས་ཅད་ཀྱང་ཤིང་གི་རྣམ་པ་ཐམས་ཅད་ཀྱི། རབ་དང་མཆོག་དང་གཙོ་བོ་མཐར་ཐུག་པ་ཡིན་པའི་ཕྱིར། ཤིང་གི་དབང་པོ་སྟེ་བྱང་ཆུབ་ཀྱི་ཤིང་གི་དྲུང་དུ་གཤེགས་ཏེ། མངོན་པར་རྫོགས་པ་སངས་རྒྱས་ཟིན་པའི་རྒྱལ་བ་དང༌། དེ་དག་གི་འཁོར་དུ་སངས་རྒྱས་ཀྱི་ཐུགས་ཀྱི་སྲས་བྱང་ཆུབ་སེམས་དཔའི་ཚོགས་དེ་བཞིན་གཤེགས་པ་རྣམས་མཆོད་པ་དང༌། སེམས་ཅན་མཐའ་ཡས་པ་དགེ་བ་ལ་འགོད་པར་མཛད་པ་རྣམས་ཀྱིས་རབ་ཏུ་གང་བར་ཤོག་ཅིག་པ་སྟེ། སྣོད་དང་བཅུད་དག་པར་སྨོན་པ་ཚིག་རྐང་གཉིས་གཉིས་སོ། །དེ་ནི་ཞིང་ཡོངས་སུ་སྦྱོང་བའི་སྨོན་ལམ་མོ། །ཡང་གསུངས་པ། ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་རྟག་ཏུ་ནད་མེད་བདེ་བར་གྱུར། །འགྲོ་བ་ཀུན་གྱི་ཆོས་ཀྱི་དོན་རྣམས་ནི། །མཐུན་པར་གྱུར་ཅིང་རེ་བའང་འགྲུབ་པར་ཤོག །ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་རྟག་ཏུ་ནད་ཀྱི་རིགས་མཐའ་དག་སྤངས་ཤིང་མེད་ལ། ངན་སོང་གསུམ་དང༌། མཐོ་རིས་ཀྱི་སྡུག་བསྔལ་ཐམས་ཅད་དང་བྲལ་ཞིང༌། འདོད་
ཡོན་དང་ཏིང་ངེ་འཛིན་གྱི་བདེ་བ་ཕུན་སུམ་ཚོགས་པ་དང་ལྡན་པར་གྱུར་ལ། འགྲོ་བ་ཀུན་གྱི་ཆོས་ཀྱི་དོན་ཏེ་མཐོ་རིས་དང་ཐར་པ་ཐམས་ཅད་མཁྱེན་པའི་རྒྱུར་གྱུར་པའི་སྤྱོད་པ་རྣམས་བྱས་པ་ལ། ཕན་ཚུན་ཐམས་ཅད་བློ་གྲོས་མཐུན་པར་འགྱུར་ཞིང༌། ཆོས་དང་མི་འགལ་པའི་རེ་བའི་དོན་ཐམས་ཅད་ཀྱང་འགྲུབ་པར་ཤོག་ཅིག རེ་བའི་དོན་གྱི་མཐར་ཐུག་པ་ནི། བླ་ན་མེད་པའི་བྱང་ཆུབ་ཡིན་པར་འགྱུར་ཏེ། སེམས་ཅན་ཐམས་ཅད་ཀྱང་རང་ཉིད་བདེ་བ་དམ་པ་ཐོབ་པར་འདོད་པ་ཡིན་ན། བདེ་བ་དམ་པ་མཐར་ཐུག་པ་ནི། དེ་ལས་གཞན་མེད་པའི་ཕྱིར། དུད་འགྲོའི་སྐྱེ་གནས་ཚུན་ཆད་ཀྱི་ཡང༌། རེ་སྨོན་གྱི་གནས་ནི་རྫོགས་པའི་བྱང་ཆུབ་ཡིན་པར་འགྱུར་རོ། །དེ་བས་ན་དངོས་སུ་སྨོན་པར་མི་བྱེད་ཀྱང་འདོད་པའི་ཚུལ་ལ་དཔག་ནས་བསྒྲུབ་ན་དེ་ལྟར་རིགས་ཤིང་འགྲུབ་པ་ཡིན་ནོ། །དེ་དག་ནི་སེམས་ཅན་ཡོངས་སུ་སྨོན་པར་བྱེད་པའི་སྨོན་ལམ་སྟེ། མདོར་བསྟན་འདིས་ནི་རྫོགས་སྨིན་སྦྱང་གསུམ་ཚང་བར་བསྟན་ཅིང༌། བྱང་ཆུབ་སེམས་དཔའི་སྤྱོད་པ་ཐམས་ཅད་དམ། སྨོན་ལམ་གྱི་ཡུལ་ཐམས་ཅད་གསུམ་པོ་དེར་འདུས་པ་ཡིན་ནོ། །གཉིས་པ་རྒྱས་བཤད་ལ། ཐེག་པ་ཆེན་པོའི་སྤྱོད་པ་ཐུན་མོང་བའི་རིམ་པ་དང་སྦྱར་བའི་སྨོན་ལམ་དང༌། བྱང་ཆུབ་སེམས་དཔའི་གསང་བ་ཐུན་མོང་མ་ཡིན་པའི་དབང་དུ་བྱས་པའི་སྨོན་ལམ་དང༌། གཉིས་ཀར་དུ་འཇུག་པའི་རྣམ་གྲངས་སྣ་ཚོགས་པ་བསྟན་པའི་སྨོན་ལམ་མོ། །དང་པོ་ནི། བྱང་ཆུབ་སྤྱོད་པ་དག་ནི་ནས།
ཀུན་ཏུ་སྤྱོད་པར་གྱུར་ཅེས་པའི་བར་ཏེ། དེ་ལ་བྱང་ཆུབ་སྤྱོད་པ་ནི། གཞན་དོན་དུ་བདག་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པའི་ཕྱིར་དུ་སྤྱོད་པ་སྟེ། བདག་གིས་སངས་རྒྱས་ཀྱི་ཆོས་རྫོགས་པའི་རྒྱུར་གྱུར་པའི་ལྡོག་ཆ་འཛིན་ལ། བཟང་པོ་སྤྱོད་པ་ནི་སེམས་ཅན་གཞན་རྣམས་ཁོ་ན་སངས་རྒྱས་ཀྱི་ས་ལ་འཇོག་པའི་ཕྱིར་སྤྱོད་པ་སྟེ་སེམས་ཅན་གཞན་སྨིན་ཅིང་གྲོལ་བར་བྱེད་པའི་རྒྱུའི་ལྡོག་ཆ་འཛིན་པ་ཡིན་ཅིང༌། གཉིས་ཀ་ཡང་སྙིང་རྗེ་ཆེན་པོ་དང་འཁོར་གསུམ་རྣམ་པར་མི་རྟོག་པའི་ཡེ་ཤེས་ཀྱིས་ཀུན་ནས་བླངས་པའི། སྦྱིན་སོགས་ཕར་ཕྱིན་བཅུ། ཐབས་མཁས་ཕུན་སུམ་ཚོགས་པས་ཟིན་པས། རང་རྒྱུད་གྲོལ་ཞིང་གཞན་རྒྱུད་སྨིན་པར་བྱེད་པ་ལ་ནི་འདྲའོ། །དེས་ན་བྱང་ཆུབ་སེམས་དཔའ་གཅིག་ཁོ་ནས་ཀྱང༌། སྤྱོད་པ་གཉིས་ཀར་སྤྱད་དགོས་ཏེ། སེམས་ཅན་གྱི་དོན་དུ་གང་རླབས་ཆེ་བ། སྐབས་སུ་གང་བབ་པ་དེ་ཉིད་ལ་འཇུག་དགོས་པའི་ཕྱིར་རོ། །འོན་ཀྱང༌། སེམས་བསྐྱེད་པ་དང་པོའི་གནས་སྐབས་ཀྱི་སྨོན་ལམ་གྱི་ཁྱད་པར་ལས། བྱང་ཆུབ་སེམས་དཔའ་འདོད་ཆེན་པ་དང༌། འདོད་ཆེན་པ་མ་ཡིན་པའོ། །དང་པོ་ནི། བྱང་ཆུབ་སྤྱོད་པ་པ་སྟེ། ཐོག་མར་བདག་ཉིད་སངས་རྒྱས་སུ་གྱུར་ནས་འཁོར་བ་སྲིད་ཀྱི་བར་གཞན་དོན་བྱེད་པ། རྒྱལ་པོ་ལྟ་བུའི་སེམས་བསྐྱེད་དང་ལྡན་པའི་བྱང་སེམས་ཞེས་བྱའོ། །གཉིས་པ་ནི། སེམས་ཅན་གཅིག་ཀྱང་མ་ལུས་པར། སངས་
རྒྱས་ཀྱི་ས་ལ་མ་བཞག་གི་བར་དུ། སེམས་ཅན་ཁོ་ན་སྒྲོལ་བའི་ཕྱིར། བདག་ཉིད་འཁོར་བ་ན་གནས་པར་བྱ་ཡི། འཚང་རྒྱ་བར་མ་གྱུར་ཅིག་ཅེས་སྨོན་ལམ་འདེབས་པ་ནི། བཟང་པོ་སྤྱོད་པ་པ་སྟེ་རྫི་བོ་ལྟ་བུའི་སེམས་བསྐྱེད་དང་ལྡན་པའི་བྱངཆུབ་སེམས་དཔའ་འོ། །དེ་བས་ན་དེ་གཉིས་སེམས་དང་པོ་བསྐྱེད་པའི་སྨོན་ལམ་དང་འདུན་པའི་ཁྱད་པར་ཡིན་གྱིས། བར་དུ་སྤྱོད་པ་ནི་གཉིས་ཀར་སྤྱོད་ལ། མཐར་འབྲས་བུ་ལ་ཡང་ཁྱད་པར་མེད་དོ། །འོ་ན་བྱང་ཆུབ་སྤྱོད་པ་པ་ནི། འཕགས་པ་བྱམས་པ་བཞིན་དུ་འཇིག་རྟེན་ན་འཚང་རྒྱ་བར་འགྱུར་ལ། བཟང་པོ་སྤྱོད་པ་པ་ནི་ཀུན་ཏུ་བཟང་པོ་དང་འཇམ་དཔལ་ལ་སོགས་པ་བཞིན་དུ། ཚོགས་རྫོགས་ཀྱང་དམ་བཅའ་མ་རྫོགས་པས་མངོན་པར་སངས་མི་རྒྱ་བ་སྟེ། འབྲས་བུ་རིགས་གཉིས་ཡོད་པ་མ་ཡིན་ནམ་སྙམ་ན། ཚོགས་རྫོགས་ནས་སངས་མི་རྒྱ་བ་ནི་མི་སྲིད་དེ། སྒྲིབ་གཉིས་བྱང་ཞིང་ཚོགས་གཉིས་རྫོགས་པ་དེ་ཉིད་སངས་རྒྱས་ཡིན་པའི་ཕྱིར་རོ། །སྔོན་གྱི་དམ་བཅའ་དང་སྨོན་ལམ་ཡང༌། བློ་སྦྱོང་པའི་ཕྱིར་ཡིན་གྱི། དམིགས་ཡུལ་དངོས་པོ་ལ་ཞུགས་པ་མ་ཡིན་པའི་ཕྱིར། མཐར་ཕྱིན་པར་སྤྱོད་དགོས་པ་ཡང་མ་ཡིན་ནོ། །ཀུན་ཏུ་བཟང་པོ་དང་འཇམ་དཔལ་ལ་སོགས་པ། ཞིང་ཁམས་ཀུན་ཏུ་བྱང་ཆུབ་སེམས་དཔར་སྣང་བ་ཡང༌། བྱང་ཆུབ་སེམས་དཔར་འདུལ་བ་ལ་དེ་ལྟར་བསྟན་པ་ཡིན་གྱི། གནས་ཚུལ་མ་ཡིན་ལ། སངས་རྒྱས་ཀྱིས་འདུལ་བའི་ཞིང་ཁམས་མང་པོར་སངས་རྒྱས་ཉིད་དུ་ཡང་བསྟན་ཟིན་
ཅིང་སྟོན་བཞིན་པ་ཡིན་པའི་ཕྱིར་རོ། །རྒྱལ་བ་བྱམས་པ་ལ་སོགས་པ་བཞིན་ཞིང་འདིར་སངས་རྒྱས་སུ་སྟོན་པ་རྣམས་ཀྱང༌། ཞིང་གཞན་དང་གནས་སྐབས་གཞན་དུ་བྱང་ཆུབ་སེམས་དཔས་འདུལ་བ་ལ་སླར་ཡང་བྱང་ཆུབ་སེམས་དཔར་འབྱུང་སྟེ། འོ་སྐོལ་གྱི་སྟོན་པ་བསྐལ་པ་མཐའ་ཡས་པའི་སྔོན་རོལ་ཏུ་སངས་རྒྱས་ཟིན་པ་ཡང༌། ཕྱི་ནས་ཀྱང་བྱང་ཆུབ་སེམས་དཔའི་སྤྱོད་པ་རྒྱུན་མི་ཆད་པར་བསྟན་པ་བཞིན་ནོ། །དེ་བས་ན། སངས་རྒྱས་རྣམས་ཀྱི་རྩ་བའི་ཞིང་དང་སྐུ་ལུས་འོག་མིན་སྟུག་པོ་བཀོད་པའི་ཞིང་དུ་ལོངས་སྤྱོད་རྫོགས་སྐུ་ཡིན་ན། གང་ཚོགས་གཉིས་རྫོགས་ཚད་དེ་མ་ཐག་ཏུ་ཞིང་དེར་ལོངས་སྐུའི་རྟེན་དུ་མངོན་པར་རྫོགས་པར་སངས་རྒྱ་བར་གདོན་མི་ཟ་ལ། མ་དག་པའི་ཞིང་དུ་སྤྲུལ་པ་སྟོན་པ་ལ་ནི། སངས་རྒྱས་དང་སེམས་དཔའ་ཆེན་པོ་གཉིས་སུ་ཡང་འབྱུང་མོད་ཀྱི། དེར་མ་ཟད་སྤྲུལ་པ་མཐའ་ཡས་པའི་ཚུལ་གྱིས་འབྱུང་ངོ༌། །དེས་ན་འཇམ་དཔལ་ལ་སོགས་པ་སྔོན་གྱི་དམ་བཅའ་མི་འདོར་བའི་ཕྱིར། ད་དུང་སངས་མ་རྒྱས་སོ་ཞེས་གསུངས་པ་ལྟར་ཡོད་སྲིད་ནའང༌། དགོས་པ་བཟང་པོ་སྤྱོད་པ་དང་འབྲེལ་བའི་དམ་བཅའ་ཡང་དག་པ་ལ། གདུལ་བྱ་རྣམས་སྤྲོ་བ་སྐྱེ་ཞིང་འགོད་ནུས་པའི་དགོས་པ་ཡོད་པར་གཟིགས་པ་དང༌། དགོངས་གཞི་བྱང་ཆུབ་སེམས་དཔས་འདུལ་བའི་ངོར་བྱང་ཆུབ་སེམས་དཔའི་ཚུལ་འཛིན་པ་ཡང༌། རྟག་ཏུ་རྒྱུན་མི་འཆད་པར་འབྱུང་བ་ལ་དགོངས་སོ། །གཞན་དུ་ན་ཚོགས་གཉིས་རྫོགས་ནས་སངས་མི་
རྒྱ་བ་ཞིག་སྲིད་ན་ནི་དེའི་རྒྱུ་གང་ཡིན། སྒྲིབ་པའི་ཆ་ཅུང་ཟད་བཟུང་བས་སོ་སྙམ་ན། ས་བཅུ་པའི་ཡེ་ཤེས་ཀྱིས་འབད་རྩོལ་མེད་པར། ཡུན་ཐུང་ངུས་ཀྱང་སྒྲིབ་པ་མཐའ་དག་སྤོང་བར་འགྱུར་ན་ཡུན་རིང་པོ་དེ་ཉིད་ཀྱིས་ཅིའི་ཕྱིར་སྤང་པར་མི་འགྱུར། རྡོ་རྗེ་ལྟ་བུའི་ཏིང་ངེ་འཛིན་ཡང་ཚོགས་གཉིས་རྫོགས་པའི་ཕྱིར་མི་ཐོབ་པ་མི་སྲིད་ལ། དེས་སྒྲིབ་གཉིས་བག་ཆགས་དང་བཅས་པར་སྤོང་བར་མི་འགྱུར་ན་ནི། སངས་རྒྱས་གཞན་རྣམས་ཀྱིས་ཀྱང་ཐམས་ཅད་མཁྱེན་པ་ལ་སྒྲིབ་པ་མི་སྤངས་པར་ཡང་འགྱུར་ལ། དེས་དེ་སྤོང་ན་སྒྲིབ་པ་ཅི་ཞིག་ལུས་པར་འགྱུར། གཞན་ཡང་ཚོགས་གཉིས་རྫོགས་ནས་སྒྲིབ་པ་ལུས་པ་ཡང་མི་སྲིད་དེ། ཉི་མ་ཤར་བས་མུན་པ་བཞིན་ནོ། །ཚོགས་མ་རྫོགས་པ་ཡང་མི་སྲིད་དེ། དུས་མཐའ་ཡས་པར་གཞན་རྣམས་ལས་ཀྱང་ལྷག་པར་སྤྱོད་པ་རྒྱ་ཆེ་བ་རྟག་ཏུ་སྤྱད་པའི་ཕྱིར་རོ། །འཇམ་དཔལ་ལ་སོགས་པས་སྒྲིབ་པའི་ཆ་ཅུང་ཟད་གཟུང་བ་ལྟར་བཤད་པ་ཡོད་དུ་ཆུག་ཀྱང༌། གདུལ་བྱ་འགའ་ཞིག་ལ་སྣང་ཚུལ་བྱུང་བ་ལ་དགོངས་པའི་དྲང་དོན་ཡིན་པའི་ཕྱིར་རོ། །ཤིན་ཏུ་སྤྲོས་པས་ཆོག་གོ །དེ་བས་ན། གཞུང་འདིར་བྱང་ཆུབ་སྤྱོད་པ་དང༌། བཟང་པོ་སྤྱོད་པ་ཞེས་པ་རྣམས་དེ་ལྟར་ངེས་པར་བྱས་ནས། སེམས་བསྐྱེད་པ་དང༌། སྐྱེ་བ་དྲན་པ་དང༌། རབ་ཏུ་བྱུང་བ་དང༌། སྤྱོད་པ་སྤྱི་ལ་སློབ་པ་དང༌། ཁྱད་པར་དུ་ཚུལ་ཁྲིམས་ལ་སློབ་པ་དང༌། མངོན་ཤེས་དང་ལྡན་པས་ཆོས་སྟོན་པ་དང༌། བྱང་ཆུབ་ཀྱི་སེམས་
མི་བརྗེད་པ་རྣམས་ལ་བསླབས་པས། སྒྲིབ་པ་མཐའ་དག་བྱང་བ་དང༌། སྐྱོན་གསུམ་ལས་གྲོལ་ཞིང༌། ཆགས་པ་མེད་པའི་གནས་ཐོབ་པ་ན། སེམས་ཅན་རྣམས་སྡུག་བསྔལ་ཞི་ཞིང་བདེ་བ་དང་དགེ་བ་ལ་འགོད་པར་བྱེད། ཁྱད་པར་དུ་མཐའ་ཡས་པའི་རྣམ་པར་འཕྲུལ་པ་ཐོབ་ནས། ཆོས་བསྟན་པས་འགྲོ་བའི་དོན་མཐའ་མེད་དུ་སྤྱོད་པ་འགྱུར་རོ་ཞེས་པ་ནི། ལམ་གྱི་རིམ་པ་དང་པོ་འདིའི་སྐབས་ཀྱི་བསྡུས་པའི་དོན་ཡིན་ཏེ། དེ་དང་མཐུན་པར་སྨོན་ལམ་འདེབས་པའོ། །སྡོམ་ནི། སེམས་བསྐྱེད་སྐྱེ་བ་དྲན་དང་རབ་ཏུ་བྱུང༌། །སྤྱོད་པ་སྤྱི་དང་ཚུལ་ཁྲིམས་མངོན་ཤེས་སྟོན། །བྱང་སེམས་མི་བརྗེད་སྒྲིབ་བྱང་སྐྱོན་གསུམ་གྲོལ། །ཆགས་མེད་ཞི་བདེར་འགོད་དང་རྣམ་འཕྲུལ་ཐོབ། །འགྲོ་དོན་སྤྱོད་དེ་དོན་ཚན་བཅུ་གསུམ་ཡིན། །ཅེས་སོ། དོན་ཚན་དང་པོ་གསུམ་ནི། བྱང་ཆུབ་སྤྱོད་པ་དག་ནི་བདག་སྤྱོད་ཅིང༌། །འགྲོ་བ་ཀུན་ཏུ་སྐྱེ་བ་དྲན་པར་གྱུར། །ཚེ་རབས་ཀུན་ཏུ་འཆི་འཕོ་སྐྱེ་བ་ན། །རྟག་ཏུ་བདག་ནི་རབ་ཏུ་འབྱུང་བར་ཤོག །ཅེས་གསུངས་ཏེ། བྱང་ཆུབ་སྤྱོད་པ་གཞན་དོན་དུ་རྫོགས་པའི་བྱང་ཆུབ་ཐོབ་པར་འདོད་ཅིང༌། བྱང་ཆུབ་ཀྱི་ཕྱིར་དུ་ཕ་རོལ་ཏུ་ཕྱིན་པ་དྲུག་ལ་སྤྱོད་པར་འདོད་པའི་སེམས་སྐྱེད་བླངས་ཤིང༌། དེ་དང་མཐུན་པའི་སྤྱོད་པ་དག་ནི་བདག་སྤྱོད་ཅིང༌། དེ་ལས་འཇིག་རྟེན་ཕ་རོལ་འགྲོ་བའི་གནས་ཀུན་ལས། གར་སྐྱེས་ཀྱང་རུང་སྟེ། རྟག་ཏུ་སྐྱེ་བ་དྲན་པས་སྔོན་སེམས་
བསྐྱེད་པ་དང༌། ཆོས་སྤྱད་པ་ཡང་དྲན་པར་གྱུར་ལ། ཚེ་རབས་ཀུན་གྱི་གནས་སྐབས་སུ་ནི། འཆི་འཕོ་བ་དང་སྐྱེ་བས་བསྡུས་པའི་སྐྱེ་བ་བཟུང་ཞིང་གསོན་པའི་གནས་སྐབས་ཐམས་ཅད་ན། དུས་རྟག་ཏུ་བདག་ནི་རབ་ཏུ་འབྱུང་བར་ཤོག་ཅིག འདིར་རབ་ཏུ་བྱུང་བ་ནི་གཉིས་ཏེ། སོ་སོ་སྐྱེ་བོའི་གནས་སྐབས་སུ་ཁྱིམ་སྤངས་ཏེ་རབ་ཏུ་བྱུང་ནས་སྡོམ་པ་ཡང་དག་པར་བླངས་བས་རབ་བྱུང་དུ་འགྱུར་བ་དང༌། ཐེག་ཆེན་འདི་ལ་འཕགས་པའི་ས་ཐོབ་ཚད་ཆོས་ཉིད་ཀྱི་རབ་བྱུང་ཐོབ་པའོ། །དོན་ཚན་བཞི་པ་དང་ལྔ་པ་སྤྱོད་པ་སྤྱི་དང་ཚུལ་ཁྲིམས་ལ་བསླབ་པ་ནི། རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང༌། །ཚུལ་ཁྲིམས་སྤྱོད་པ་དྲི་མེད་ཡོངས་དག་པ། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །ཅེས་ཏེ། དེ་བཞིན་གཤེགས་པ་མངོན་སུམ་དུ་མཇལ་བའམ་ལྐོག་ཏུ་གྱུར་ཀྱང་གསུང་རབ་ཐོས་པ་ལ་བརྟེན་ནས། རྒྱལ་བ་སངས་རྒྱས་ཀུན་གྱི་གདམས་ངག་ཆོས་ལས་ཇི་ལྟར་འབྱུང་བ་ལྟར། རྗེས་སུ་སློབ་པར་གྱུར་ཏེ། བཟང་པོ་སྤྱོད་པའི་རྒྱུའམ་སྒྲུབ་པ་ཕ་རོལ་ཏུ་ཕྱིན་པ་དྲུག་ལ་ཡང་དག་པར་བསླབ་པས་ཡོངས་སུ་རྫོགས་པར་འགྱུར་བའི་ཐབས་ལ་འཇུག་པར་བྱེད་ཅིང༌། ཁྱད་པར་དུ་བྱང་ཆུབ་སེམས་དཔའི་ཚུལ་ཁྲིམས་རྣམ་པ་གསུམ་གྱི་སྤྱོད་པ། ཉོན་མོངས་སྤངས་པས་དྲི་མ་མེད་ལ། རང་དོན་ཐེག་པ་དམན་པའི་སེམས་ཀྱིས་མ་གོས་པས་ཡོངས་སུ་དག་པ། འཆལ་
ཚུལ་ལྟུང་པའི་ཉེས་པས་རྟག་ཏུ་མ་གོས་པས་མ་ཉམས་པ། དུས་གསུམ་གྱི་དངོས་པོ་ཐོབ་པར་སྲེད་པ་མེད་པའམ། བདེན་དངོས་སུ་འཛིན་པ་དང་བྲལ་བས་སྐྱོན་མེད་པ་སྟེ། དེ་ལྟ་བུའི་ཚུལ་ཁྲིམས་ལ་སྤྱོད་པར་ཤོག་ཅིག ། དོན་ཚན་དྲུག་པ་མངོན་པར་ཤེས་པ་ལྔ་དང་ལྡན་པས་ཆོས་སྟོན་པ་ནི། ལྷ་ཡི་སྐད་དང་ཀླུ་དང་གནོད་སྦྱིན་སྐད། གྲུལ་བུམ་དག་དང་མི་ཡི་སྐད་རྣམས་དང༌། །འགྲོ་བ་ཀུན་གྱི་སྐད་རྣམས་ཇི་ཙམ་པར། །ཐམས་ཅད་སྐད་དུ་བདག་གིས་ཆོས་བསྟན་ཏོ། །བྱང་ཆུབ་སེམས་དཔའ་མཐུ་ཐོབ་པའི་དབང་དུ་བྱས་ནས། ལྷའི་སྐད་དང༌། ཀླུའི་སྐད་དང༌། གནོད་སྦྱིན་གྱི་སྐད་དང༌། གྲུལ་བུམ་ལ་སོགས་པ་དག་གི་སྐད་དང༌། མིའི་སྐད་ཐ་དད་སྣ་ཚོགས་རྣམས་ཀྱི་སྐད་དང༌། དེ་དག་ལ་སོགས་པ་འགྲོ་བ་ཀུན་གྱི་སྒྲ་སྐད་རྣམས་ཇི་ཙམ་ཡོད་པ་དེ་ཙམ་ཐམས་ཅད་ཀྱི་སྐད་དུ། བདག་གིས་ཆོས་བསྟན་ཏོ་སྟེ་སྟོན་པར་གྱུར་ཅིག་པའོ། །དེ་ཡང༌། ལྷའི་རྣ་བའི་མངོན་ཤེས་ཀྱི་དབང་དུ་བྱས་པ་ཡིན་ཏེ། མངོན་ཤེས་དེའི་མཐུ་ནི་ཐག་རིང་བ་དང་ཤིན་ཏུ་ཕྲ་བ་སོགས་ལྐོག་ཏུ་གྱུར་པའི་སྒྲ་ཐམས་ཅད་ཀྱང་ཤེས། འགྲོ་བ་ཐ་དད་པའི་སྐད་རྣམས་དང༌། འབྱུང་བ་བཞིའི་སྒྲ་རྣམས་ཀྱང་གོ་རང་གི་སྐད་དང་ངག་ཚིག་གཅིག་གིས་ཀྱང་སེམས་ཅན་གཞན་རྣམས་ལ་དེ་དང་དེའི་སྐད་སྣ་ཚོགས་པ་སོ་སོར་གོ་བར་ནུས་པའོ། །དེ་བས་ན། ལྷ་ལ་ལྷའི་སྐད་དང༌། ཀླུ་ལ་ཀླུའི་སྐད་ལ་སོགས་པ་དུས་གཅིག་གམ་
རིམ་ཅན་དུ་སྟོན་པར་ནུས་སོ། །འདིར་ལྷ་ནི་འདོད་པའི་ལྷ་རིགས་དྲུག་གོ །ཀླུ་ནི་བྲང་འགྲོ་སྦྲུལ་གྱི་མིང་ཡིན་ཡང༌། དེ་རྣམས་ཀྱི་ནང་ནས་རྫུ་འཕྲུལ་དང་ལྡན་པ་རྣམས་ལ། སྤྱི་མིང་བྱེ་བྲག་ལ་བཏགས་པའི་ཚུལ་ཏེ། འཕགས་པའི་ཡུལ་དུ་ཀླུའི་ལྷའམ། །བོད་ཀྱི་བརྡ་རྙིང་པ་རྣམས་ལ་ཀླུ་འབྲུག་ཏུ་གྲགས་པའོ། །གནོད་སྦྱིན་ནི་རྒྱལ་ཆེན་བཞིའི་རིགས་ཀྱི་ལྷ་རྣམས་ལའང་གྲགས་མོད་ཀྱིས་འདིར་ལྷ་ལས་ལོགས་སུ་བཀར་བའི་ཕྱིར། བར་སྣང་ལ་རྒྱུ་བའམ་ས་སྟེང་དུ་རྒྱུ་བའི་མདངས་འཕྲོག་པ་པོ་རྣམས་སོ། །གྲུལ་བུམ་ནི་གཤིན་རྗེའི་རིགས་སུ་གཏོགས་པ་ཡི་དྭགས་ཀྱི་འགྲོ་བའི་ཁྱད་པར་རམ། གདུགས་པའི་སེམས་ཅན་ནོ། །བདུན་པ་བྱང་ཆུབ་ཀྱི་སེམས་མི་བརྗེད་པ་ནི། དེས་ཤིང་ཕ་རོལ་ཕྱིན་ལ་རབ་བརྩོན་ཏེ། །བྱང་ཆུབ་སེམས་ནི་ནམ་ཡང་བརྗེད་མ་གྱུར། །དེས་པ་ནི་མཛངས་པ་སྟེ། ངང་ཚུལ་འཇམ་པའམ། མཁས་ལ་ཞིབ་པའི་བློ་སྟེ། དེས་པར་བགྱིས་ཤིང༌། ཕ་རོལ་ཏུ་ཕྱིན་པ་རྣམས་ལ་སྐྱོ་བ་མེད་པར་ངང་གིས་འཇུག་པའི་རབ་ཏུ་བརྩོན་པ་དང༌། བྱང་ཆུབ་ཀྱི་སེམས་ཞེས་བྱ་བ་ནི་རྣམ་པ་གཉིས་ཏེ། སེམས་ཅན་ཐམས་ཅད་སངས་རྒྱས་ལ་འགོད་པར་འདོད་པ་དང༌། ཆོས་ཀྱི་དབྱིངས་སྤྲོས་པ་དང་བྲལ་བའི་ཡེ་ཤེས་ལ་མཉམ་པར་འཇོག་པའོ། །དེ་ལྟ་བུའི་བྱང་ཆུབ་ཀྱི་སེམས་དུས་དང་གནས་སྐབས་ཐམས་ཅད་དུ་ནམ་ཡང་བརྗེད་པར་མ་གྱུར་ཅིག་ཅེས་པའོ། །དེ་ལ་དེས་པ་ནི་རྒྱུད་འཇམ་པའི་ཕྱིར་སྙིང་རྗེ་མི་བརྗེད་པ་དང༌། མཁས་པའི་
ཕྱིར་སྟོང་ཉིད་མི་བརྗེད་པ་སྟེ་རྒྱུའོ། །ཕ་རོལ་ཏུ་ཕྱིན་པ་ལ་ངང་གིས་བརྩོན་པ་ཡང་དེ་རྣམས་མི་བརྗེད་པ་སྟེ་ཡན་ལག་གོ །དེ་ཡང་གཞན་གྱིས་མ་བསྟན་པར་སྦྱིན་པའི་ཕ་རོལ་ཏུ་ཕྱིན་པ་ལ་འཇུག་པ་ལ་སོགས་པ་བྱང་ཆུབ་སེམས་དཔའི་ཆོས་མ་འདྲེས་པ་བཅོ་བརྒྱད་རྣམས་འདི་དག་ཏུ་འདུས་པ་ཡིན་ཏེ། དེ་ཡང་མོས་སྤྱོད་ཀྱི་ས་ལ་ནི་ཅི་རིགས་པར་ཐོབ་ཅིང༌། འཕགས་པའི་ས་ལ་ནི་རྫོགས་པར་ཐོབ་པའོ། །དེ་དག་ཀྱང་འཕགས་པ་དཀོན་མཆོག་སྤྲིན་ལས་གསུངས་ཏེ། མ་བསྟན་པར་ཕ་རོལ་ཏུ་ཕྱིན་པ་དྲུག་ལ་འཇུག་པ་སྟེ་དྲུག་དང༌། མ་བསྟན་པར་བསྡུ་དངོས་དང་ཐབས་ལ་མཁས་པ་དང༌། ཐེག་པ་མཆོག་གི་འབྱུང་བ་ཞེས་པ་སྟེ་གསུམ་དང༌། ཐེག་ཆེན་ལས་མ་ཉམས་པ་དང༌། འཁོར་འདས་ཀྱི་སྒོ་སྟོན་པ་དང༌། ཟུང་དང་སྣྲེལ་ཞིའི་རྒྱུད་ལ་མཁས་པ་དང༌། ཡེ་ཤེས་སྔོན་དུ་འགྲོ་ཞིང་འདུ་མི་བྱེད་པས་དགེ་སྡིག་གི་བླང་དོར་ལ་མཁས་པ་དང༌། བཟོད་པའི་ལུས་ཀྱི་སེམས་ཅན་མི་གཏོང་བ་དང༌། འགྲོ་ཀུན་དགའ་བར་སྟོན་པ་དང༌། བྱིས་པ་དང་ཉན་ཐོས་ཀྱི་ནང་དུ་ཐམས་ཅད་མཁྱེན་པའི་སེམས་མི་ཉམས་པ་དང༌། སངས་རྒྱས་ཀྱི་ཆོས་ཚོལ་བ་ལས་མི་ཟློག་པ་རྣམས་སོ། །དོན་འདི་ཉིད་ཞིབ་མོར་རྟོགས་པར་འདོད་ན། བདེན་པ་པོའི་ལེའུ་ལས་རྒྱས་པར་བཤད་པས་དེར་བལྟའོ། །བྱང་ཆུབ་སྤྱོད་པ་ཞེས་པ་ནས། དེ་ཡན་ཆད་ནི་བཟང་པོ་སྤྱོད་པ་དང༌། བྱང་ཆུབ་སྤྱོད་པ་སྒྲུབ་པའི་དབང་དུ་བྱས་ཤིང༌། མོས་སྤྱོད་ཀྱི་ས་ལ་གནས་པ་དང༌།
ཐུན་མོང་བའི་ཡོན་ཏན་གྱི་དབང་དུ་བྱས་པའི་སྨོན་ལམ་མོ། །དོན་ཚན་བརྒྱད་དགུ་བཅུ་པ། སྡིག་སྒྲིབ་སྦྱང་བ་དང༌། སྐྱོན་གསུམ་ལས་གྲོལ་བ་དང་མ་ཆགས་པ་ནི། སྡིག་པ་གང་རྣམས་སྒྲིབ་པར་གྱུར་པ་དག །དེ་དག་མ་ལུས་ཡོངས་སུ་བྱང་བར་ཤོག །ལས་དང་ཉོན་མོངས་བདུད་ཀྱི་ལས་རྣམས་ལས། །གྲོལ་ཞིང་འཇིག་རྟེན་འགྲོ་བ་རྣམས་སུ་ཡང༌། ཇི་ལྟར་པདྨོ་ཆུ་མི་ཆགས་པ་བཞིན། །ཉི་ཟླ་ནམ་མཁར་ཐོགས་པ་མེད་ལྟར་སྤྱད། །དེ་ལ་སྡིག་པ་ནི་སྡིག་ཏོ་མི་དགེ་བའི་ཆོས་ཏེ། འདོད་པའི་ཁམས་ཀྱི་ཉོན་མོངས་པ་དང༌། དེས་ཀུན་ནས་བླངས་པའི་ལས་ཐམས་ཅད་དོ། །དེའི་ཕྱོགས་མཐུན་པ་ནི། ཉོན་མོངས་པ་ཐམས་ཅད་ཡིན་ཏེ། དེ་བས་ན་སྡིག་པ་གང་རྣམས་ཐར་པ་ལ་སྒྲིབ་པར་གྱུར་པ་དག་སྟེ། དེ་དག་ས་བོན་དང་བཅས་པ་མ་ལུས་པ་ཡོངས་སུ་བྱང་བར་ཤོག་ཅིག སྐྱོན་གསུམ་ནི་ལས་ཉོན་བདུད་གསུམ་མོ། །ལས་ནི་ཁམས་གསུམ་དུ་སྐྱེ་བར་འགྱུར་བའི་ལས་དང༌། ཉོན་མོངས་པ་ནི་ཀུན་ཏུ་སྦྱོར་བ་དགུའི་ཉོན་མོངས་པ་དང༌། བདུད་ནི་ཆོས་ཀྱི་འཚོ་བ་ལ་བར་དུ་གཅོད་པར་བྱེད་པའི་གདོན་ཏེ། འདོད་པ་ལ་ཆགས་པ་དང༌། རྣམ་པར་གཡེངས་བ་དང༌། འཁྲུགས་པ་དང༌། ནད་ལ་སོགས་པ་བསྐྱེད་ཅིང༌། གསོད་པར་བྱེད་པའི་ལས་ཅན་ནམ། དེ་བཞིན་དུ་ལམ་བཟང་པོ་ལས་ཟློག་ཏུ་བཅུག་ནས་དཀའ་ཐུབ་ངན་པ་དང༌། ལྟ་བ་ངན་པ་ལ་སོགས་པ་ལ་ཡང་སྦྱོར་བར་བྱེད་པ་སྟེ། གཞན་འཕྲུལ་དབང་བྱེད་ཀྱི་བདག་པོ་ལ་སོགས་པའོ། །གང་བྱང་ཆུབ་སེམས་དཔའི་ཏིང་ངེ་འཛིན་གྱི་ལུས་
ཐོབ་པ་ཕན་ཆད་དུ། རང་ཉིད་ལ་ནི་བདུད་ཀྱི་ལས་ཀྱིས་འཇུག་པ་མེད་ལ། དེ་ལས་གཞན་ལ་ནི་ཡོད་དོ། །ལས་དང་ཉོན་མོངས་པའི་སྐྱོན་གྱིས་འཁྲིད་པ་ཡང་དེ་དང་འདྲ་ལ། འོན་ཀྱང་དེ་གཉིས་སྤངས་པའི་དུས་ནི། མཐོང་པའི་ལམ་སྟེ་ཆོས་ཉིད་ལ་བཟོད་པ་འབྲིང་པོ་ཐོབ་པ་ནའོ། །མ་གོས་པའམ་མ་ཆགས་པའི་ཡོན་ཏན་ནི། རང་ཉིད་གང་དུ་གནས་ཤིང་སྤྱོད་པའི་འཇིག་རྟེན་གྱི་འགྲོ་བ་རྣམས། གང་དུ་སྤྱོད་ཀྱང་རུང་སྟེ། ཇི་ལྟར་པདྨོ་ཆུ་ནང་དུ་གནས་ཀྱང་ཆུ་མི་ཆགས་པ་བཞིན་དུ། རྟག་ཏུ་འཁོར་བར་གནས་ཀྱང་འཁོར་བའི་སྐྱོན་ལས་དང་ཉོན་མོངས་པ་དང༌། སྐྱེ་ཤི་ལ་སོགས་པས་མི་གོས་པ་དང༌། ཉི་ཟླ་ནམ་མཁའི་ལ་ཐོགས་པ་མེད་པར་རྒྱུ་བ་ན། ལོ་ཐོག་སྨིན་པ་དང༌། སྨན་རྣམས་བསྐྱེད་པ་ལ་སོགས་པ། གཞན་གྱི་དོན་མང་པོ་སྤྱོད་ཀྱང༌། ལན་ལ་རེ་བ་མེད་ཅིང་རློམས་སེམས་དང་རྣམ་པར་རྟོགས་པ་མེད་པ་ལྟར། བྱང་ཆུབ་སེམས་དཔའ་དེ་ཡང་སྦྱིན་པ་རྣམ་པ་བཞི་ལ་སོགས་པས་སེམས་ཅན་ལ་ཕན་པ་རྒྱ་ཆེན་པོ་རྟག་ཏུ་སྒྲུབ་ཀྱང༌། ལན་ལ་རེ་བ་དང་རློམས་སེམས་མེད་པ་སྟེ། བདག་ཀྱང་དེ་ལྟར་སྤྱོད་པར་གྱུར་ཅིག་པའོ། །བཅུ་གཅིག་པ་སེམས་ཅན་བདེ་བ་ལ་འགོད་པ་ནི། ཞིང་གི་ཁྱོན་དང་ཕྱོགས་རྣམས་ཇི་ཙམ་པར། །ངན་སོང་སྡུག་བསྔལ་རབ་ཏུ་ཞི་བར་བྱེད། །བདེ་བ་དག་ལ་འགྲོ་བ་ཀུན་འགོད་ཅིང༌། །འགྲོ་བ་ཐམས་ཅད་ལ་ནི་ཕན་པར་སྤྱད།། སངས་རྒྱས་ཀྱི་ཞིང་གི་ཁྱོན་དང༌། ཕྱོགས་བཅུ་རྣམས་ཇི་ཙམ་ཡོད་པར།
ངན་སོང་གིས་མཚོན་པའི་འགྲོ་བ་རྣམས་ཀྱི་སྡུག་བསྔལ་མ་ལུས་པ་ཐམས་ཅད་རབ་ཏུ་ཞི་བར་བྱེད་ལ། འཇིག་རྟེན་པའི་བདེ་བ་དང༌། ལྷ་མིའི་ལུས་དང༌། ཕུན་སུམ་ཚོགས་པ་དག་ལ་འགྲོ་བ་ཀུན་འགོད་ཅིང༌། དེ་ཙམ་དུ་མ་ཟད་འགྲོ་བ་དེ་རྣམས་ཐམས་ཅད་ལ་ནི། ཐར་པ་མྱ་ངན་ལས་འདས་པའི་ཆོས་ཀྱིས་རྟག་ཏུ་ཕན་པར་སྤྱོད་ནུས་པར་གྱུར་ཅིག ། དོན་ཚན་བཅུ་གཉིས་བཅུ་གསུམ་པ་མཐའ་ཡས་པའི་རྣམ་འཕྲུལ་དང༌། འགྲོ་དོན་མི་ཟད་པར་སྤྱོད་པ་ནི། བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང༌། །སེམས་ཅན་དག་གི་སྤྱོད་དང་མཐུན་པར་འཇུག །བཟང་པོ་སྤྱོད་པ་དག་ནི་རབ་སྟོན་ཅིང༌། །མ་འོངས་བསྐལ་པ་ཀུན་ཏུ་སྤྱོད་པར་འགྱུར། །བདག་ཉིད་བྱང་ཆུབ་སྤྱོད་པའི་སྒོ་ནས། ཕ་རོལ་ཏུ་ཕྱིན་པ་དྲུག་པོ་དག་ནི་ཡོངས་སུ་རྫོགས་པར་བྱེད་ཅིང༌། སེམས་ཅན་གཞན་རྣམས་ཀྱི་ཁམས་དང༌། མོས་པ་དང༌། དབང་པོ་དང༌། བག་ལ་ཉལ་རྣམས་ཤེས་པས་དེ་རྣམས་ཀྱི་སྤྱོད་པ་དང་མཐུན་པར། གང་གིས་འདུལ་བར་འགྱུར་བའི་ཐབས་ཀྱིས་འཇུག་སྟེ། ཁྱིམ་པས་འདུལ་བ་ལ་ཁྱིམ་པའི་གཟུགས་དང༌། རབ་ཏུ་བྱུང་བས་འདུལ་བ་ལ་རབ་ཏུ་བྱུང་བའི་གཟུགས་དང༌། དེ་བཞིན་དུ་སངས་རྒྱས་དང་བྱང་ཆུབ་སེམས་དཔའ་དང༌། རང་སངས་རྒྱས་དང༌། ཉན་ཐོས་དང༌། ཚངས་པ་དང༌། ལྷ་དང༌། དྲང་སྲོང་དང༌། འཁོར་ལོས་སྒྱུར་བ་དང༌། རྒྱལ་པོ་ལ་སོགས་པ་གཟུགས་སྣ་ཚོགས་པ་དང༌། སྤྱོད་པ་སྣ་ཚོགས་པ་དང༌། བཤད་པ་སྣ་ཚོགས་པའི་སྒོ་ནས་སེམས་ཅན་རྣམས་སྨིན་པར་བྱེད་པའི་ནུས་པ་ཐོབ་པའོ། །
གཞན་དོན་དུ་འཁོར་བར་སྐྱོ་བ་མེད་པའི་རང་བཞིན་ཅན་དེ་ནི་འགྲོ་བའི་དོན་འདི་ལྟར་སྤྱོད་དེ། རང་གི་རྟོགས་པ་དང་མཐུན་པའི་བཟང་པོ་སྤྱོད་པ་དག་གི་ཆོས་ནི། སེམས་ཅན་རྣམས་ལ་རབ་ཏུ་སྟོན་ཅིང་སྤྱོད་པ་དེ་ལ་འགོད་པར་མཛད་པས་སོ། །དེ་ལྟར་རང་གི་སྤྱོད་པ་རྫོགས་པ་དང་ནུས་པ་ཐོབ་པ་དང༌། ཆོས་སྟོན་པ་སྟེ། རང་གཞན་གྱི་དོན་གསུམ་པོ་དེ་ཡང༌། དུས་རེ་ཞིག་སྤྱོད་པར་མ་ཟད་མ་འོངས་པའི་བསྐལ་པ་མཐའ་མེད་པའི་བར་དུ་ཀུན་ཏུ་སྤྱོད་པར་འགྱུར་ཏེ་གྱུར་ཅིག་པའོ། །གཉིས་པ་བྱང་ཆུབ་སེམས་དཔའི་གསང་བ་ཐུན་མོང་མ་ཡིན་པའི་དབང་དུ་བྱས་པའི་སྨོན་ལམ་ལ། གྲོགས་ཕུན་སུམ་ཚོགས་པ་དང་ལྷན་ཅིག་པར་སྨོན་ལམ་དག་པས་མཚམས་སྦྱར། བཤེས་གཉེན་དམ་པ་རྟག་ཏུ་བརྟེན་ཅིང་མཉེས་པར་བྱས། ཐུན་མོང་གི་སྐབས་སུ་བཤད་པའི་སྤྱོད་པ་རྣམས་དག་ལ་གནས་པས་ཆོས་ཀྱི་སྒོའི་ཏིང་ངེ་འཛིན་དང་གཟུངས་ཐོབ་པར་གྱུར། ཚོགས་གཉིས་ཀྱི་མཐུ་ལས་བྱང་ཆུབ་སེམས་དཔའི་རྒྱན་རྣམས་ཐོབ། ཞིང་མཐའ་ཡས་པའི་སངས་རྒྱས་ཀྱི་དྲུང་དུ་བྱང་ཆུབ་སེམས་དཔའི་སྤྱོད་པ་སྤྱད་པས་སླར་ཡང་སྤྱོད་པ་ཤིན་ཏུ་སྨིན་པའི་གནས་སྐབས་ན། ཀུན་ཁྱབ་ཏུ་རྫོགས་སྨིན་སྦྱངས་གསུམ་ནུས་པ་དང༌། ཡུལ་དུས་མཉམ་ཉིད་དུ་གྱུར་པ་དང༌། རྒྱལ་བའི་གསུང་མཐའ་དག་ལ་འཇུག་པ་དང༌། རྒྱལ་ཚབ་ཀྱི་ས་ལ་གནས་པའི་སྤྱོད་པ་མཐའ་དག་སྟོན་པའི་དབང་དུ་བྱས་ཏེ། རིམ་པ་དེ་དང་མཐུན་པར་སྨོན་ལམ་དུ་བྱས་པ་ནི། སྐབས་འདིའི་བསྡུས་དོན་ནོ། །སྡོམ་ནི། གྲོགས་དང་བཤེས་གཉེན་
སྒོ་གཉིས་བསྒྲུབ། །ཚོགས་ལས་རྒྱན་ཐོབ་སངས་རྒྱས་མཆོད། །ཡངས་དོག་མེད་དང་གསུང་དབྱངས་འགྲུབ། །རྒྱལ་ཚབ་མཆོག་གི་སྤྱོད་པའོ། །བརྒྱད་པོ་དེ་ལ་དབང་འབྱོར་དྲུག །ཆོས་སྟོན་དུས་དང་མཐོང་བ་དང༌། སྤྱོད་ཡུལ་ཞིང་ཁམས་མཛད་པ་ལའོ། །རྩ་བའི་དོན་ཚན་བརྒྱད་དུ་འདོད། ཅེས་པའོ། །དེ་ལ་འདི་ནི་ཕྱིར་མི་ལྡོག་པའི་འཁོར་ལོའི་གཏམ་ལ་ཡང་དག་པར་འཇུག་པའི་ཚུལ་ཡིན་ཏེ། དང་པོ་ཉིད་དུ་མོས་པའི་དགེ་བ་ཕུན་སུམ་ཚོགས་པའི་རྒྱུ། བསོད་ནམས་ཁྱད་པར་ཅན་སྒྲུབ་པ་ནི། གྲོགས་བཟང་པོ་དང་སྤྱོད་པ་གཅིག་ཏུ་སྤྱོད་ཅིང་སྨོན་ལམ་སྒྲུབ་པ་ཡིན་པས། དེའི་དབང་དུ་བྱས་ནས། བདག་གིས་སྤྱོད་དང་མཚུངས་པར་གང་སྤྱོད་པ། །དེ་དག་དང་ཡང་རྟག་ཏུ་འགྲོགས་པར་ཤོག །ལུས་དང་ངག་རྣམས་དང་ནི་སེམས་ཀྱིས་ཀྱང༌། །སྤྱོད་པ་དག་དང་སྨོན་ལམ་གཅིག་ཏུ་སྤྱད། བདག་བྱང་ཆུབ་སྤྱོད་པ་དང་བཟང་པོ་སྤྱོད་པ་ལ་སྦྱོར་བ་ན། བདག་གི་སྤྱོད་པ་དང་མཚུངས་པར་སྤྱོད་པའི་གྲོགས་གང་ཡིན་པ་དེ་དག་དང་ཡང་དུས་རྟག་ཏུ་འགྲོགས་པར་ཤོག་ཅིག །འགྲོགས་ནས་ཀྱང༌། ལུས་དང་ངག་རྣམས་དང་ནི་སེམས་ཀྱིས་ཀྱང་སྟེ། སྒོ་གསུམ་གྱི་སྤྱོད་པ་དེ་དག་གཅིག་ཏུ་མཐུན་པར་སྤྱོད་པ་དང༌། སྨོན་ལམ་རྣམས་ཀྱང་གཅིག་ཏུ་མཐུན་པར་སྤྱད་པ་སྟེ་མཐུན་པར་སྨོན་ལམ་འདེབས་པའོ། །དེ་ཡང་གྲོགས་ནི་ཟང་ཟིང་གི་སྦྱིན་པ་གཏོང་བ་ལ་དགའ་ལ། བདག་གིས་ནི་ཚུལ་ཁྲིམས་ཁོ་ན་བསྔགས་ཏེ། ཟང་ཟིང་གི་སྦྱིན་པ་སྨོད་པར་བྱེད་པ་དང༌། གྲོགས་ནི་བདག་དབེན་པར་གནས་པ་ལ་དགའ་ལ།
རང་ཉིད་ནི་ཁྱིམ་གྱི་འཚོ་ཆས་ལ་དགའ་བ་མི་འདོར་བ་དང༌། གྲོགས་དེ་ནི་ཀུན་རྫོབ་རྟེན་འབྲེལ་གྱི་ཆོས་ལ་ཆེད་ཆེར་འཛིན་ཅིང་མོས་ལ། རང་གིས་ནི་དོན་དམ་སྟོང་པའི་གཏམ་གྱིས་ཨུར་གནོན་དུ་བྱེད་པ་ལ་སོགས་པ་ནི་གཉིས་ཀར་ཆོས་སྤྱོད་པ་ཡིན་དུ་ཆུག་ཀྱང༌། སྤྱོད་པ་མི་མཐུན་པར་སྤྱོད་པ་ཡིན་པས་དེ་ལྟར་མི་བྱ་བར། གྲོགས་བྱང་ཆུབ་སེམས་དཔའ་ཆོས་ལ་སྤྱོད་པ་དེ་ཉིད་དང༌། བསམ་པ་མཐུན་ཅིང་སྦྱོར་བ་ཡང་མཐུན། བསྔགས་པ་བརྗོད་པ་ཡང་མཐུན། སྨོན་ལམ་གདབ་པ་ཡང་མཐུན་པར་བྱའོ། །དེ་ལྟར་ན་ཇི་ཙམ་གྲོགས་སུ་འགྲོགས་པ་དང་ཕྱོགས་གཅིག་ཏུ་ཚོགས་པའི་བྱང་ཆུབ་སེམས་དཔའ་ཐམས་ཅད། སྤྱིར་སོ་སོ་ནས་དགེ་བ་ལ་བརྩོན་པར་མ་ཟད། ཕན་ཚུན་གཅིག་གཅིག་གི་དགེ་བ་ལ་ཡི་རང་ཞིང༌། ཕན་ཚུན་དུ་བལྟས་ནས་མཐུན་པར་སྤྱོད་ཅིང༌། གཞན་རེ་རེ་དག་གི་ཆོས་མཐུན་གྱི་འདུན་པ་མི་འདྲ་བ་གསར་དུ་སྐྱེས་པ་རྣམས་ཀྱང༌། མཐོང་ཞིང་ཐོས་ན་ཕྱིན་ཆད་ཐམས་ཅད་ཀྱིས་དེ་དང་འདྲ་བར་སྤྱོད་པའམ་ཡི་རང་བྱེད་ན། སྤྱོད་པ་གཅིག་ཏུ་སྤྱོད་པ་ཞེས་བྱ་ཞིང་སྨོན་ལམ་ཡང་སྤྱི་སྒྲིགས་ཤིག་མ་གཏོགས་གཞན་འདེབས་སུ་མི་རུང་བ་ལྟ་མ་ཡིན་མོད། དང་པོ་ཉིད་ནས་སྤྱི་མཐུན་ན་ནི་ལེགས། ཐོག་མ་འདོད་པ་སོ་སོའི་སྨོན་ལམ་ཐ་དད་པ་ཡོད་དུ་ཆུག་ཀྱང༌། དེ་འདྲ་དེ་ནམ་མཐོང་ཞིང་ཐོས་ལ་གོ་བ་ན་ཕན་ཚུན་གཅིག་གཅིག་སོ་སོས་དེ་དང་དེ་ལ་ཁྱད་དུ་གསོད་པ་དང༌། གཤེ་བ་དང་ངན་དུ་མི་ཟེར་བར་སྨོན་ལམ་མཐུན་པར་འདེབས་པ་ནི་སྨོན་ལམ་གཅིག་པ་སྟེ། འདི་ནི་
སྤྱིར་ཆོས་བྱེད་ཙམ་དང༌། སྒོས་སུ་ད་ལྟའི་དབང་དུ་བྱས་ན། ཆོས་བརྒྱུད་གཅིག་པ་དང་གནས་གཞི་གཅིག་པ་དང༌། བླ་མ་གཅིག་པ་རྣམས་ལ་ཉམས་ལེན་མི་དགོས་ཀ་མེད་པ་ཞིག་ཡིན་ཏེ། ཚེ་འདི་དང་སྐྱེ་བ་གཞན་གྱི་གནས་སྐབས་ཐམས་ཅད་དུ། རྟེན་འབྲེལ་རྣམ་དག་སྒྲིག་པ་དང༌། ཞིང་སྦྱོང་བ་དང༌། འགྲོ་བ་སྨིན་པ་སོགས་ལ་འདི་ཁོ་ན་གལ་ཆེ་བར་ཡོད་པས། ལག་ལེན་ལ་ཐེབས་པར་འཚལ་ལོ། །གལ་ཏེ་དངོས་སུ་སྤྱོད་པ་མི་མཐུན་ཡང༌། ཕན་ཚུན་གནང་བ་སྦྱིན་པ་དང༌། གདམས་ངག་དང་རྗེས་སུ་བསྟན་པ་སྒྲུབ་པ་དང༌། རྗེས་སུ་ཡི་རང་བ་དང་མོས་པའི་སེམས་དང་མ་བྲལ་བ་དེ་ནི། སྤྱོད་པ་མཐུན་པ་ཉིད་ཡིན་ཏེ། བློ་གྲོས་མཐུན་པར་གྱུར་པའི་ཕྱིར་རོ། །དེ་བཞིན་དུ་ཆོས་མིན་ནི་བཟློག་དགོས་པ་ཡིན་ཏེ། མཐུན་པར་བྱེད་པ་མ་ཡིན་ནོ། །དེ་ལྟར་སྤྱོད་པ་དང་སྨོན་ལམ་གཅིག་ཏུ་སྤྱད་པ་དེ་ནི། ཚེ་འདིའམ་སྐྱེ་བ་གཞན་དུ་མོས་པའི་དགེ་བ་ཕུན་སུམ་ཚོགས་པར་འགྱུར་རོ། །དགེ་བའི་བཤེས་གཉེན་བསྟེན་ཅིང་མཉེས་པར་བྱེད་པ་ནི། བདག་ལ་ཕན་པར་འདོད་པའི་གྲོགས་པོ་དག །བཟང་པོ་སྤྱོད་པ་རབ་ཏུ་སྟོན་པ་རྣམས། །དེ་དག་དང་ཡང་རྟག་ཏུ་འཕྲད་པར་ཤོག །དེ་དག་བདག་གིས་ནམ་ཡང་ཡིད་མི་དབྱུང༌། །བདག་ལ་བཟང་པོ་སྤྱོད་པའི་ཆོས་ཀྱི་ལག་ལེན་རབ་ཏུ་སྟོན་པས། མཐར་ཐུག་ཏུ་ཕན་འདོགས་པར་འདོད་པའི་དགེ་བའི་བཤེས་གཉེན། འཁོར་བ་དང་ཐེག་དམན་ལས་ཡོངས་སུ་སྐྱོབ་ཅིང༌། ཐེག་ཆེན་གྱི་བདེ་བ་སྟེར་པའི་གྲོགས་པོ་སྟེ། བླ་མ་དམ་པ་གང་དག་ཡོད་པ་དེ་
རྣམ་དག་དང་ཡང༌། དུས་རྟག་ཏུ་འཕྲད་པ་སྟེ་མཇལ་བར་ཤོག་ཅིག །བླ་མ་དམ་པ་དེ་དག་བདག་གིས་དུས་ནམ་ཡང་ལན་གཅིག་གམ་སྐད་ཅིག་གཅིག་ཀྱང་ཐུགས་ཡིད་མི་དབྱུང་བར་བྱའོ། །ཞེས་སྨོན་པ་སྟེ། ཡིད་འབྱུང་བ་ནི་མི་དགྱེས་པ་ཡིན་པས་མི་དབྱུང་བ་ནི་རྟག་ཏུ་བླ་མ་མཉེས་པའི་ཐབས་ལ་འབད་པའོ། །དེ་ལྟ་བུའི་བཤེས་གཉེན་དམ་པ་བསྟེན་པའི་ཚུལ་ནི་འཕགས་པ་སྡོང་པོ་བཀོད་པ་ལས། ཁྱེའུ་དཔལ་འབྱུང་གི་རྣམ་ཐར་ལས་རྟོགས་པར་བྱའོ། །མོས་པའི་དགེ་བ་ཕུན་སུམ་ཚོགས་པ་དང་ལྡན་པ་དེ་ནི། ཕྱིར་མི་ལྡོག་པ་འཁོར་ལོའི་གཏམ་གྱི་ཆོས་དང༌། དེ་སྟོན་པའི་བཤེས་གཉེན་དམ་པ་དང་འཕྲད་པར་འགྱུར་བས། སྔ་མའི་མཇུག་ཐོག་ཏུ་འདི་བསྟན་པ་ཡིན་ཅིང༌། བླ་མ་དམ་པ་མཉེས་པར་བྱེད་དགོས་པར་གསུངས་ལ་དེ་མཉེས་པའི་ཐབས་ཀྱང་ཆོས་སྤྱོད་ལས་གཞན་དུ་མེད་པས་བྱང་ཆུབ་སེམས་དཔའི་སྤྱོད་པ་རྣམས་ལ་སློབ་དགོས་པར་གྲུབ་ལ། དེའི་ཐུན་མོང་གི་སྤྱོད་པ་རྣམས་ནི་སྔར་བཤད་ཟིན་ཅིང༌། ཐུན་མོང་མ་ཡིན་པའི་སྤྱོད་པ་ཡང༌། སྤྱོད་པ་དང་སྨོན་ལམ་གཅིག་པར་བཤད་པ་ཉིད་ཀྱིས་ཤུགས་ལ་གྲུབ་པ་ཡིན་ཏེ། དེ་བཞིན་གཤེགས་པའི་སྙིང་པོ་གཅིག་པར་ཤེས་པ་དང༌། འཁོར་འདས་རོ་མཉམ་རྟོགས་པ་དང༌། སེམས་ཅན་བདག་མཚུངས་ཀྱི་བྱམས་པ་རྣམས་ཡོད་ན། སྤྱོད་སྨོན་གཅིག་ཏུ་སྤྱད་པ་ཁྱད་པར་དུ་འཕགས་པ་འགྲུབ་པའི་ཕྱིར་རོ། །བཟང་པོ་སྤྱོད་པ་རབ་ཏུ་སྟོན་བྱེད་པ། །ཞེས་པས་ཀྱང་ཤུགས་ལས་བསྟན་ཏེ། དོན་དམ་པར་ན་ཀུན་ཏུ་བཟང་པོ་ནི།
དེ་བཞིན་གཤེགས་པའི་སྙིང་པོ་རྟག་ཏུ་བཟང་བ་དེ་ཡིན་ལ། དེ་ལ་དམིགས་ནས་སྤྱད་པ་སྤྱོད་པའི་ཕྱིར་ཡང༌། ཐུན་མོང་མ་ཡིན་པའི་གསང་བ་རྣམས་ལ་ལས་དང་པོ་པའི་ས་ལ་གནས་པས་ཀྱང་སྒྲུབ་པར་སྟོན་པ་ཡིན་ནོ། །དེ་ལྟར་གྲོགས་བཟང་པོ་དང་སྤྱོད་པ་གཅིག་ཏུ་སྤྱད། བླ་མ་དམ་པ་ཡོངས་སུ་བསྟེན་ཏེ་སྤྱོད་པ་ལ་ནན་ཏན་དུ་གནས་པ་དེས་ནི་རིམ་གྱིས་དད་པའི་ས་དང་མོས་པ་ལ་སྤྱོད་པའི་ས་ཕལ་ཆེར་བགྲོད་པར་འགྱུར་ཏེ།དེ་ནས་ནི་སྐབས་འདིར་སྒོ་དང་པོ་ཆོས་ཀྱི་སྒོའི་ཏིང་འཛིན་ནི་ཐོབ་པའི་དབང་དུ་བྱས་ཏེ། སངས་རྒྱས་སྲས་ཀྱིས་བསྐོར་བའི་མགོན་པོ་རྣམས། །མངོན་སུམ་རྟག་ཏུ་བདག་གིས་རྒྱལ་བ་བལྟ། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་དག་ལ་ཡང་མཆོད་པ་རྒྱ་ཆེར་བགྱི། །སངས་རྒྱས་རྣམས་སྲས་བྱང་ཆུབ་སེམས་དཔས་བསྐོར་བ་ཡང་ཡིན་ལ། མཐའ་ཡས་པའི་འགྲོ་བ་ཐམས་ཅད་ཀྱི་མགོན་པོར་གྱུར་པ་རྣམས་ནི་རྒྱལ་བ་ཞེས་བྱ་སྟེ། དེ་རྣམས་བདག་གིས་དུས་རྟག་ཏུ་མངོན་སུམ་དུ་བལྟ་ཞིང་མཐོང་བར་གྱུར་ལ། ལན་གཅིག་ཙམ་མ་ཡིན་པར་དུས་དེ་ནས་བཟུང་སྟེ་མ་འོངས་པའི་བསྐལ་པ་ཀུན་ཏུ་རྒྱུན་མི་འཆད་པར་སངས་རྒྱས་དེ་དག་ལ་ཡང་མཆོད་པ་རྒྱ་ཆེར་བགྱི་ལ། དུས་ཡུན་རིང་མོ་དང་དཀའ་བ་ཆེན་པོས་མཆོད་པར་བྱེད་པ་ལ་ཡང༌། ཡིད་མི་སྐྱོ་བར་རྟག་ཏུ་དགའ་བ་དང་སྤྲོ་བ་ཆེན་པོས་མཆོད་པར་གྱུར་ཅིག་པའོ། །སངས་རྒྱས་མངོན་སུམ་དུ་མཐོང་ཞིང་མཆོད་པར་བྱེད་པ་ཙམ་ནི། དད་པའི་ས་ཆེན་པོ་ལ་གནས་པས་རྫུ་འཕྲུལ་གྱི་རྐང་པ་བཞི་ཐོབ་པ་ཡན་ཆད་དུ། ཐམས་ཅད་ལ་ཡོད་
པ་ཡིན་ཡང༌། རྟག་ཏུ་མཐོང་ཞིང་སྐྱོ་བ་མི་སྲིད་པར་བཤད་པ་ནི། མོས་སྤྱོད་ཀྱི་ས་ཆེན་པོར་ཆོས་ཀྱི་རྒྱུན་གྱི་ཏིང་ངེ་འཛིན་ནི་ཐོབ་པ་ཡན་ཆད་ཁོ་ནའོ། །དེ་ཐོབ་པ་ན་ཆོས་ཀྱི་སྒོ་གཉིས་པ་གཟུངས་ཁྱད་པར་ཅན་ཡང་ཐོབ་པ་ཡིན་ཏེ། དེ་སྟོན་པ་ནི། རྒྱལ་བ་རྣམས་ཀྱི་དམ་པའི་ཆོས་འཛིན་ཅིང༌། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །བཟང་པོ་སྤྱོད་པ་རྣམ་པར་སྦྱོང་བ་ཡང༌། །མ་འོངས་བསྐལ་པ་ཀུན་ཏུ་སྤྱད་པར་བགྱི། །ཇི་ཙམ་མངོན་དུ་གྱུར་པའི་རྒྱལ་བ་སངས་རྒྱས་རྣམས་ཀྱི་གསུང༌། ལུང་གི་དམ་པའི་ཆོས་གསུང་རབ་ཡན་ལག་བཅུ་གཉིས་པོ་ཐམས་ཅད་མི་བརྗེད་པའི་གཟུངས་ཀྱི་སྒོ་ནས་འཛིན་པར་བགྱིད་ཅིང༌། སེམས་ཅན་རྣམས་ལ་བྱང་ཆུབ་སྤྱོད་པའི་ལམ་ཀུན་ཏུ་སྟོན་ཅིང་སྣང་བར་བྱེད་ལ། བདག་ཉིད་ཀྱིས་བཟང་པོ་སྤྱོད་པ་ཡང་དག་པར་བླངས་ཤིང༌། ཅུང་ཟད་དམ་ཅི་རིགས་པར་གྲུབ་པ་དེ་ཉིད། རྣམ་པར་སྦྱང་བ་སྟེ། འཕེལ་བ་དང་དག་པར་བྱེད་པར་ཤོག་ཅིག དེ་ལ་སྦྱོང་བའི་དོན་འཕེལ་བ་ནི། རྩལ་སྦྱོང་བ་ལྟ་བུ་དང༌། སྤྱོད་པ་དེའི་སྐྱོན་དག་པར་བྱེད་པ་ནི། རིམས་ནད་སྦྱོང་བ་ལྟ་བུའོ། །དེ་ལྟར་སྤྱོད་པ་སྤྱོད་པ་ཡང༌། སྤྱོད་པ་ལ་ཞུགས་པ་ནས་བརྩམས་ནས། མ་འོངས་པའི་བསྐལ་པ་མཐའ་མེད་པ་ཀུན་ཏུ་སྤྱད་པར་བགྱིའོ་ཞེས་སྨོན་པའོ། །སྐབས་དེ་དག་ཏུ་ཚོགས་གཉིས་མང་དུ་གསོག་པས་ཚོགས་གཉིས་ཀྱི་སྟོབས་རྙེད་པའི་ཕྱིར། བྱང་ཆུབ་སེམས་དཔའི་ཡོན་ཏན་གྱི་རྒྱན་རྣམས་ཀྱང་ཐོབ་པར་འགྱུར་བས། དེ་ལྟར་སྟོན་པ་ནི། སྲིད་པ་ཐམས་ཅད་དུ་ཡང་འཁོར་བ་ན། །བསོད་ནམས་ཡེ་
ཤེས་དག་ནི་མི་ཟད་རྙེད། །ཐབས་དང་ཤེས་རབ་ཏིང་འཛིན་རྣམ་ཐར་དང༌། །ཡོན་ཏན་ཀུན་གྱི་མི་ཟད་མཛོད་གྱུར་ཅིག སྲིད་པ་ནི་བྱུང་བ་དང་འབྱུང་བ་སྟེ། ཁམས་གསུམ་གྱི་སྲིད་པ་ཐམས་ཅད་དུ་ཡང༌། ལས་དང་སྨོན་ལམ་དང་ཏིང་ངེ་འཛིན་དང༌། དབང་འབྱོར་པའི་སྟོབས་ཀྱིས་འཁོར་ཞིང་སྐྱེ་བ་ན། བསོད་ནམས་དང་ཡེ་ཤེས་ཀྱི་ཚོགས་གཉིས་ཟད་མི་ཤེས་པ་གོང་ནས་གོང་དུ་འཕེལ་བ་རྙེད་པ་དང༌། དེ་ལས་སེམས་ཅན་སྒྲོལ་བ་ལ་དགོས་པ་བདག་གིས་སངས་རྒྱས་ཀྱི་ཆོས་རྫོགས་པའི་ཐབས་ལ་མཁས་པ་དང༌། རྟེན་འབྲེལ་དང༌། དེ་བཞིན་ཉིད་དང༌། སེམས་ཅན་གྱི་དོན་སྤྱོད་པ་གསུམ་ལ་མཁས་པའི་ཤེས་རབ་དེ་གསུམ་ཀ་ལ་ཡང་མཉམ་གཞག་ལྷག་མཐོང་དང༌། རྗེས་ཐོབ་སྤྱོད་པས་བསྡུས་པའི་དབྱེ་བ་ཅན་དང༌། ནམ་མཁའ་མཛོད་དང་དྲི་མ་མེད་པའི་ཕྱག་རྒྱ་ལ་སོགས་པ་ཏིང་ངེ་འཛིན་མཐའ་ཡས་པ་རྣམས་དང༌། རྣམ་པར་ཐར་པ་ནི་རྣམ་ཐར་བརྒྱད་དང༌། ཏིང་ངེ་འཛིན་གསུམ་ལ་སོགས་པ་སྟེ། ཉོན་མོངས་པ་དང༌། ཤེས་བྱ་དང༌། སྙོམས་འཇུག་གི་སྒྲིབ་པའི་ཁྱད་པར་རེ་རེ་སྤངས་པ་ལས། རྣམ་པར་གྲོལ་བའི་ཡེ་ཤེས་ཉམས་སུ་མྱོང་བ་དང༌། དེ་ལས་བྱུང་བའི་དགའ་སྟོན་རྣམ་པར་འཕྲུལ་བའི་རོལ་རྩེད་སྟོན་པ་དང༌། གཞན་ཡང་ཡོན་ཏན་གྱི་ཁྱད་པར་ཀུན་གྱིས་མི་ཟད་པའི་མཛོད་ཐོབ་པར་གྱུར་ཅིག་པའོ། །དེ་ལ་ལས་ཀྱི་སྐྱེ་བ་དངོས་ནི། སེམས་དཔའ་སོ་སྐྱེས་རྣམས་ཡིན་ལ། དེར་ཡང་ཡོན་ཏན་གྱི་ཚོགས་ནི་རྟོག་གེ་བ་རྣམས་ཀྱིས་བསྐལ་པའི་བར་དུ་ཡང་བློས་དཔྱོད་པར་མི་ནུས་པ་ཡོད་ཅིང༌། འཕགས་
མཆོག་རྣམས་ཀྱིས་ལས་ལ་དབང་བའི་སྐྱེ་བ་ཡང༌། སྤྱིར་ལས་ཀྱི་དབང་གིས་སྐྱེ་བ་ཙམ་ཡིན་ལ། དེ་དང་ཏིང་ངེ་འཛིན་དང༌། དབང་སྒྱུར་པའི་ཚུལ་ལ་ནི། ཡེ་ཤེས་མཐའ་ཡས་ཡོད་པར་སྨོས་མ་དགོས་ལ། སྨོན་ལམ་གྱི་སྐྱེ་བའང་སེམས་རྒྱུད་ཀྱིས་བཟུང་བ་མ་ཡིན་མོད། ཡེ་ཤེས་ཀྱི་མཐུ་ལས་བྱུང་ཞིང༌། ཡེ་ཤེས་དང་ལྡན་པའི་བྱ་བ་བྱེད་པའོ། །དེ་རྣམས་ལས་དབང་སྒྱུར་བའི་སྐྱེ་བ་ཅན་གྱིས་ལུས་དངོས་ནི། ཁམས་གསུམ་དུ་མི་འཁོར་ཡང༌། དེའི་སྤྲུལ་བ་འཁོར་པ་ལྟར་སྟོན་པ་ཡིན་ལ། གཞན་རྣམས་ནི་ཁམས་གསུམ་དུ་འབྱུང་པ་ཤས་ཆེའོ། །ཚོགས་གཉིས་ནི་ཇི་སྐད་དུ། རྒྱལ་བ་བྱམས་པས། བྱང་ཆུབ་སེམས་དཔའ་རྣམས་ཀྱིས་ཚོགས། །བསོད་ནམས་ཡེ་ཤེས་མཚུངས་པ་མེད། །གཅིག་གིས་འཁོར་བར་མངོན་མཐོ་བྱེད། །གཞན་གྱིས་ཉོན་མོངས་མེད་པར་འཁོར། །སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་པོ་གཞན་ནི་གཉིས་ཀའི་སྟེ། །ལྔ་ཆར་ཡང་ནི་ཡེ་ཤེས་ཚོགས། །ཞེས་གསུངས་པ་ལྟར་རོ། །ཐབས་ལ་མཁས་པ་ནི། ཚོགས་ཆུང་ངུས་དོན་ཆེན་པོ་འགྲུབ་པ་དང༌། རྒྱུ་ཆུང་ངུ་ལས་འབྲས་བུ་ཆེན་པོ་འབྱུང་བ་སྟེ་ཤེས་རབ་ཕུན་སུམ་ཚོགས་པའི་བྱེད་ལས་སོ། །ཚིགས་སུ་བཅད་པ་འདིའི་དོན་ནི། ཡངས་ཤིང་རྒྱ་ཆེ་ལ་བསམ་གྱིས་མི་ཁྱབ་བོ། །དེ་ལྟར་འཕགས་པའི་ས་ལ་གནས་པར་གྱུར་ན། ཡིད་ཀྱི་རང་བཞིན་གྱི་ལུས་གྲུབ་པ་དང་
རྒྱལ་བའི་སྤྱོད་ཡུལ་མཐའ་དག་ལ་ལྟ་བུའི་ནུས་པ་ཐོབ་པས། སངས་རྒྱས་ཐམས་ཅད་ཀྱི་ཞལ་བལྟ་ཞིང་མཆོད་པ་ཡིན་ལ། དོན་དེ་ཉིད་སྟོན་པ་ནི། རྡུལ་གཅིག་སྟེང་ན་རྡུལ་སྙེད་ཞིང་རྣམས་ཏེ། །ཞིང་དེར་བསམ་གྱིས་མི་ཁྱབ་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་ལ། །བྱང་ཆུབ་སྤྱད་པ་སྤྱོད་ཅིང་བལྟ་བར་བགྱི། །རྡུལ་གཅིག་གི་སྟེང་ན་ཡང༌། ཕྱོགས་བཅུའི་འཇིག་རྟེན་གྱི་ཁམས་ཀྱི་རྡུལ་ཇི་སྙེད་པའི་གྲངས་དང་མཉམ་པའི་སངས་རྒྱས་ཀྱི་ཞིང་མཐོང་བར་འགྱུར་ལ། ཞིང་དེ་རྣམས་སུ་གྲངས་བསམ་གྱིས་མི་ཁྱབ་པའི་སངས་རྒྱས་རྣམས། སངས་རྒྱས་ཀྱི་སྲས་བྱང་སེམས་རྣམས་ཀྱི་དབུས་ན་བཞུགས་པ་ལ། དེ་དག་དང་མཚུངས་པར་ལྷན་ཅིག་ཏུ་བྱང་ཆུབ་སྤྱད་པ་ཡང་སྤྱོད་ཅིང༌། སྐུ་ལྟ་བ་དང་གསུང་ཉན་པར་བགྱིད་པར་སྨོན་པའོ། །འདིར་འཕགས་པའི་ས་ཐོབ་མ་ཐག་པ་ལ། ཞིང་གི་རྡུལ་སྙེད་ཀྱི་སངས་རྒྱས་ཅིག་ཆར་མཐོང་བ་རང་ནི་མིན་ཡང༌། ས་གཞི་ཁྱོན་ཆེ་ཆུང་མ་ངེས་པར་སངས་རྒྱས་དང་སངས་རྒྱས་ཀྱི་ཞིང་ཅི་རིགས་པར་མཐོང་བར་ནུས་པ་ཡིན་ལ། དེ་ནས་རིམ་པས་གོང་འཕེལ་དུ་གྱུར་ཏེ། མཐའ་མེད་དུ་འཕེལ་བ་ཐོབ་པར་འགྱུར་བས། ས་དང་པོ་ཐོབ་མ་ཐག་པ་ནས་དངོས་སུ་རང་མ་ཐོབ་ཀྱང༌། ཞིང་གི་རྡུལ་སྙེད་ལྟ་བུའི་སྦྱོར་བ་ལ་ཞུགས་པ་ནི་ཡིན་ནོ། །རྒྱུད་ལ་སྐྱེ་ཚུལ་དེ་ལྟར་ཡིན་ཡང༌། སྨོན་ལམ་འདེབས་པའི་ཚེ་རྒྱ་ཆེ་ས་ནས་སྦྱོང་བ་ཡིན་པས། འདིར་དེ་ཉིད་ཁོ་ན་སྨོས་སོ། །དེ་ལྟར་
སྟོང་གསུམ་ཡུངས་འབྲུར་འཇུག་པ་དང༌། རྡུལ་ཕྲན་གཅིག་གིས་ཕྱོགས་བཅུ་ཁྱབ་པར་ནུས་པ་སོགས། ཏིང་ངེ་འཛིན་གྱི་སྤྱོད་ཡུལ་ཡངས་དོག་མེད་པ་ནི། ས་བརྒྱད་པ་མི་སྐྱེ་བའི་ཆོས་ལ་བཟོད་པ་ཐོབ་པ་ན་ཡིན་ཏེ། དེ་དག་གི་དབང་དུ་བྱས་ནས། དེ་ལྟར་མ་ལུས་ཐམས་ཅད་ཕྱོགས་སུ་ཡང༌། །སྐྲ་ཙམ་ཁྱོན་ལ་དུས་གསུམ་ཚད་སྙེད་ཀྱི། །སངས་རྒྱས་རྒྱ་མཚོ་ཞིང་རྣམས་རྒྱ་མཚོ་དང༌། །བསྐལ་པ་རྒྱ་མཚོར་སྤྱོད་ཅིང་རབ་ཏུ་འཇུག །རྡུལ་གཅིག་ལ་སངས་རྒྱས་ཀྱི་ཞིང་མང་པོས་བཀོད་པ་དེ་ལྟར། མ་ལུས་ཤིང་ལུས་པ་མེད་པའི་ཕྱོགས་ཐམས་ཅད་རྣམས་སུ་ཡང༌། སྐྲ་རྩེ་ཙམ་གྱི་ཁྱོན་ལ་དུས་གསུམ་གྱི་ཚད་ཇི་སྙེད་ཀྱི་སྟེ། དུས་གསུམ་དུ་བྱུང་བའི་སངས་རྒྱས་གྲངས་སུ་བགྲངས་ན་ཟད་མི་ཤེས་པ་རྒྱ་མཚོ་ལྟ་བུ་རྣམས། རང་རང་གི་ཞིང་ཁམས་རྣམས་དང་བཅས་པ། ཞིང་ཁམས་རྣམས་རྒྱ་མཚོ་ལྟར་མི་ཟད་པ་དང༌། དེ་དག་རེ་རེ་ཡང་དུས་བསྐལ་པ་རྒྱ་མཚོ་ལྟར་ཟད་མི་ཤེས་པའི་བར་དུ། བདག་ཀྱང་ཞིང་ཁམས་རེ་རེ་བྱང་ཆུབ་སེམས་དཔའི་སྤྱད་པ་སྤྱོད་ཅིང༌། རབ་ཏུ་འཇུག་པ་སྟེ། ལྟ་ཞིང་གྲོལ་བར་གྱུར་ཅིག་པའོ། །འགྲེལ་བ་ཁ་ཅིག་ལས། སྐྲ་ཙམ་ཁྱོན་ལ་ཞེས་པ་ལ། བྱིས་པའི་ལམ་དུ་ཞེས་པའི་དོན་དུ་བཤད་ནས། མ་དག་པའི་ཞིང་ལ་འཆད་པ་དང༌། འཛམ་བུ་གླིང་ཁོ་ན་ལ་འཆད་པ་སོགས་ནི། བཤད་པ་མི་བདེ་བས་མ་བཀོད་དོ། །རྡུལ་ཕྲན་གཅིག་གི་ནང་དུ་སངས་རྒྱས་ཀྱི་ཞིང་སྟོན་པ་ལ།
རྨི་ལམ་ན་ཁང་པ་དོག་པོའི་ནང་དུ། གླང་པོ་ཆེའི་ཁྱུ་དང་ནགས་ཚལ་ལ་སོགས་པ་བདེ་བར་སྤྱོད་པ་སྣང་ལ། སད་པའི་དུས་ན་ཡང་དྲན་པ་དང༌། ཆུ་སྣོད་གཅིག་གི་ནང་དུ་ཉི་ཟླ་གཟའ་སྐར་ཡུལ་ལྗོངས་ལ་སོགས་པ། ཆུ་ལ་གཟུགས་བརྙན་དུ་ཤར་བ་དཔེར་མཛད་དེ། སེམས་ཀྱི་སྣང་བ་ཙམ་དང༌། རྟེན་འབྲེལ་གྱི་མཐུ་ལས། དེ་ལྟར་སྣང་བ་མི་འགལ་བ་དང༌། རྣལ་འབྱོར་གྱི་མཐུ་སྟོབས་བསམ་གྱིས་མི་ཁྱབ་པའི་ཕྱིར་ཡིད་ཆེས་པར་བྱའོ། །གསང་བ་བསམ་གྱིས་མི་ཁྱབ་པ་ལས་ཀྱང༌། འཇིག་རྟེན་མགོན་པོ་སྐྱོབ་པ་ཡིས། །བསམ་གཏན་ལས་དང་ཀླུ་རྣམས་དང༌། །སངས་རྒྱས་བདག་ཉིད་ཆེ་རྣམས་ཀྱི། །བསམ་གྱིས་མི་ཁྱབ་བཞིར་བཤད་དོ། །ཞེས་གསུངས་ཏེ། བསམ་གཏན་པའི་ཏིང་ངེ་འཛིན་གྱི་མཐུ་དང༌། ལས་ཀྱི་མཐུ་དང༌། ཀླུ་མཆོག་གི་རྫུ་འཕྲུལ་དང༌། སངས་རྒྱས་ཀྱི་མཐུ་བསམ་གྱིས་མི་ཁྱབ་པར་བསྟན་ཏོ། །འདི་ལེགས་པར་མཐར་ཕྱིན་པ་ཇི་ལྟ་བ་བཞིན་ནི། ཆོས་ཀྱི་སྤྲིན་ལ་གནས་པ་ཡན་ཆད་ཀྱི་ཡོན་ཏན་ཡིན་ལ། རྗེས་མཐུན་པའམ་འགོ་བརྩམས་པ་ནི། མི་གཡོ་བའི་ས་ཡན་ཆད་དོ། །རྒྱལ་བའི་གསུང་རབ་མཐའ་དག་ལ་འཇུག་པ་ནི། གསུང་གཅིག་ཡན་ལག་རྒྱ་མཚོའི་སྒྲ་སྐད་ཀྱིས། །རྒྱལ་བ་ཀུན་དབྱངས་ཡན་ལག་རྣམ་དག་པ། །འགྲོ་བ་ཀུན་གྱི་བསམ་པ་ཇི་བཞིན་དབྱངས། །སངས་རྒྱས་གསུང་ལ་རྟག་ཏུ་འཇུག་པར་བགྱི། །དེ་
བཞིན་གཤེགས་པ་གཅིག་གིས་གསུང་གཅིག་ཁོ་ན་བཀའ་སྩལ་ན། དེ་ཡང་ཡན་ལག་རྒྱ་མཚོ་སྟེ། གསུང་གི་རང་བཞིན་ཆ་ཚང་བ་དང་ཆ་ཚང་བ་ཁོ་ན་རིགས་མི་འདྲ་བ་རྒྱ་མཚོ་ལྟར་མཐའ་ཡས་པའི་སྒྲ་སྐད་དུ་འགྱུར་ཏེ། དོན་དང་ཚིག་དང༌། སྐད་དང་དབྱངས་མཐའ་ཡས་པ་ཉིད་ཀྱིས་སྣང་བར་འགྱུར་རོ། །དེ་སྐད་དུ་ཡང༌། མོས་པ་སྣ་ཚོགས་ཅན་གྱི་ནི། འཁོར་མང་རྣམས་ནི་གནས་པ་ལ། གསུང་གཅིག་བཀའ་ནི་སྩལ་བ་ན། གསུང་རྣམས་དུ་མར་གོ་འགྱུར་ཞིང༌། །ང་ཡི་ཆེད་དུ་ཡིན་ནོ་ཞེས། །སྐྱེ་བོ་ཀུན་གྱིས་རྟོགས་འགྱུར་གང༌། །འདི་ལས་རྨད་བྱུང་ཆེ་ཅི་ཡོད། །འདི་ལས་ཆེས་མཚར་ཅི་ཞིག་ཡོད། །ཅེས་སོ། །གཞན་ཡང་དེ་ཉིད་རྒྱལ་བ་སངས་རྒྱས་ཀུན་གྱི་གསུངས་དབྱངས་ཀྱི་ཡན་ལག་སྐྱོན་ཐམས་ཅད་དང་བྲལ་ཞིང་རྣམ་པར་དག་པ་དང༌། ངོ་བོ་གཅིག་ཏུ་ཡང་གནས་ལ། ཆོས་གང་དང་གང་ཉན་པར་འདོད་པ་དང༌། དེ་དང་དེས་འདུལ་བར་འགྱུར་བའི་འགྲོ་བ་ཀུན་གྱི་བསམ་པ་ཇི་ལྟ་བ་བཞིན་དུ་དབྱངས་དེ་འཇུག་པར་འགྱུར་རོ། །སངས་རྒྱས་གཅིག་གི་གསུང་གཅིག་ལ་ཁྱད་ཆོས་དེ་འདྲ་ཚང་པ་བཞིན་དུ། འདྲེན་པ་མ་ལུས་པའི་གསུང་མཐའ་དག་ཀྱང་དེ་དང་འདྲའོ། །དེ་ལྟ་བུའི་སངས་རྒྱས་ཀྱི་གསུངས་ཐམས་ཅད་ལ། བདག་དུས་རྟག་ཏུ་ཉན་པ་དང༌། མི་བརྗེད་པར་འཛིན་པ་དང༌། བདག་གི་ངག་ཀྱང་རྒྱལ་བའི་གསུང་དེ་དང་རྗེས་སུ་མཐུན་ཅིང་འདྲ་བར་སྤྱོད་པའི་ཚུལ་
གྱིས་འཇུག་པར་བགྱིའོ། །འདི་ཡང་མཐར་ཕྱིན་པའི་དུས་ནི་སྔར་ལྟར་ཡིན་ལ། ཐོག་མར་ཐོབ་པ་ནི་ལེགས་པའི་བློ་གྲོས་ཀྱི་ས་ལ་སྟེ། དེར་སོ་སོ་ཡང་དག་པར་རིག་པ་བཞི་ཐོབ་པར་བཤད་པ་དང་གནད་གཅིག་གོ །འདིར་གོ་སླ་བར་བརྗོད་ན། སངས་རྒྱས་གཅིག་ལ་ཆོས་ཉན་ཅིང་དོན་གོ་བཞིན་པ་ན། དེ་དང་དུས་མཉམ་ཁོ་ནར་སངས་རྒྱས་གཞན་མང་པོ་ལ་ཡང་ཆོས་ཉན་ཅིང་ཚིག་འཛིན་པ་དང༌། དོན་སེམས་པ་ལ་གཅིག་གིས་གཅིག་ལ་གེགས་མི་བྱེད་ཅིང་མཉམ་པར་ཐོས་ལ་མཉམ་པར་འཛིན་ཅིང་མཉམ་པར་སེམས་པ་ལ་དཀའ་བ་དང་འབད་སྩོལ་མེད་པའོ། །ད་ནི། དུས་གསུམ་གཤེགས་པའི་རྒྱལ་བ་ཐམས་ཅད་དག །ཅེས་པ་ནས། མགོན་པོ་ཀུན་གྱི་དྲུང་དུ་བདག་མཆིའོ། །ཞེས་པའི་བར་ནི་རྒྱལ་ཚབ་ཀྱི་ས་ལ་གནས་པ་རྣམས་ཀྱི་ཡོན་ཏན་དང་རྗེས་སུ་འབྲེལ་བའི་སྨོན་ལམ་སྟེ། དེ་ལ་རྒྱལ་ཚབ་ཀྱི་ས་ཞེས་པ་ནི། སྔགས་ཀྱི་ཐེག་པ་ལ་སོགས་པ་གཞུང་གཞན་འགའ་ཞིག་ཏུ། དགུ་པ་སོགས་སྣ་ཚོགས་ལ་བཤད་པ་ཡོད་ཀྱང༌། འདིར་ནི་རྒྱལ་ཚབ་ཏུ་དབང་བསྐུར་བ་སྟེ། བཅུ་པ་ཡིན་པར་ཤེས་པར་བྱའོ། །དེ་ལ་དབང་འབྱོར་བ་དྲུག་སྟེ། ཆོས་སྟོན་པ་དང༌། དུས་དང༌། མཐོང་བ་དང༌། སྤྱོད་ཡུལ་དང༌། ཞིང་ཁམས་དང༌། མཛད་པ་ལ་དབང་འབྱོར་པའོ། །དང་པོ་ནི། དུས་གསུམ་གཤེགས་པའི་རྒྱལ་བ་ཐམས་ཅད་དག །འཁོར་ལོའི་ཚུལ་རྣམས་རབ་ཏུ་བསྐོར་བ་ཡི། །དེ་དག་གི་ཡང་གསུང་དབྱངས་མི་ཟད་ལ། །བློ་ཡི་སྟོབས་ཀྱིས་བདག་ཀྱང་རབ་ཏུ་འཇུག །དུས་གསུམ་དུ་བྱོན་
ཅིང་གཤེགས་པར་འགྱུར་བའི་རྒྱལ་བ་ཐམས་ཅད་དག །སེམས་ཅན་རྣམས་གྲོལ་བའི་ཆེད་དུ། ཆོས་ཀྱི་འཁོར་ལོའི་ཚུལ་རྣམས་རབ་ཏུ་བསྐོར་བ་ཡི། སངས་རྒྱས་དེ་དག་གི་ཡང་གསུང་དབྱངས་ཆོས་མི་ཟད་པ་སྟེ་མཐའ་ཡས་པ་ལ། རང་གི་བློ་ཡི་མཐུ་ཐོབ་པའི་སྟོབས་ཀྱིས་བདག་ཀྱང་གསུང་གི་འཕྲིན་ལས་དེ་ལ་ལྷན་ཅིག་ཏུ་རབ་ཏུ་འཇུག་པར་ཤོག་ཅིག་པ་སྟེ། འདིར་སྔ་མ་གསུང་གཅིག་སོགས་ནི་ཆོས་ཐོས་པའི་དབང་དུ་བྱས་པ་ཡིན་ལ། འདི་ནི་སངས་རྒྱས་ཀྱི་གསུང་དང་ངོ་བོ་ཕྱེད་ལས་འདྲེས་པར་ཐོབ་པའི་དབང་དུ་བྱས་པའོ། །དེས་ན་ས་བཅུའི་དབང་ཕྱུག་གིས་ཆོས་སྟོན་པ་དེ་ཉིད་སངས་རྒྱས་ཀྱི་ཆོས་ཀྱི་འཁོར་ལོ་བསྐོར་བའང་ཡིན་ལ། སངས་རྒྱས་ཀྱི་ཞལ་སྔ་ནས་ཆོས་སྟོན་པ་ཀུན་ལའང༌། བྱང་ཆུབ་སེམས་དཔའ་དེའི་འཕྲིན་ལས་འཇུག་སྟེ། དོན་གཅིག་ལ་བློ་གྲོས་དང་འདུན་པ་གཅིག་ཏུ་བསྒྲིལ་པའི་དམག་ལ་སོགས་པའི་བྱ་བ་བཞིན་ནོ། །འདིའི་རབ་ཏུ་འཇུག་པ་ཞེས་པ་འདྲེས་པ་སྟེ། ཆུ་ཀླུང་རྒྱ་མཚོར་འཇུག་པ་ལྟ་བུ་སྟེ་གསུང་ཉན་པ་ཁོ་ན་ལ་སྦྱོར་ན་སྔ་མ་དང་ཟློས་པའི་སྐྱོན་ཡོད་དོ། །གཉིས་པ་ནི། མ་འོང་བསྐལ་པ་ཐམས་ཅད་འཇུག་པར་ཡང༌། །སྐད་ཅིག་གཅིག་གིས་བདག་ཀྱང་འཇུག་པར་བགྱི། །གང་ཡང་བསྐལ་པ་དུས་གསུམ་ཚད་དེ་དང༌། །སྐད་ཅིག་ཆ་ཤས་ཀྱིས་ནི་ཞུགས་པར་སྤྱད། །མ་འོངས་པའི་བསྐལ་པ་མང་པོ་ཐམས་ཅད་དུ། ནམ་མཁས་གར་ཁྱབ་ཀྱི་འཇིག་རྟེན་མཐའ་ཡས་པ་རྣམས་སུ། ཇི་སྙེད་པའི་ཆོས་འབྱུང་བ་ཐམས་ཅད་ལ་ཡེ་ཤེས་འཇུག་སྟེ་མངོན་ཤེས་ཀྱིས་ཤེས་པར་གྱུར་
པ་ཡང༌། དེ་བཞིན་གཤེགས་པ་རྣམས་ཀྱིས་མཁྱེན་པ་དེ་བཞིན་དུ། བདག་གིས་ཀྱང་ཡེ་ཤེས་སྐད་ཅིག་གཅིག་གིས་འཇུག་པ་སྟེ། ཤེས་པ་གཅིག་གིས་དུས་ཐམས་ཅད་ཀྱི་དངོས་པོ་ཐམས་ཅད་ཅིག་ཅར་ཤེས་པར་བགྱི་ཞེས་སྨོན་པ་དང༌། གང་ཡང་བསྐལ་པ་སྔོན་འདས་པ་ཐམས་ཅད་དང༌། ད་ལྟར་དང་མ་འོངས་པ་འབྱུང་འགྱུར་ཏེ་དུས་གསུམ་ཇི་ཙམ་ཡོད་པ་དང་ཚད་མཉམ་པའི་བསྐལ་པ་དེ་དག་ཐམས་ཅད་སྐད་ཅིག་གཅིག་གི་ཆ་ཤས་སུ་འཇུག་ཅིང་བསྒྱུར་ནུས་པའི་སྟོབས་ཀྱིས་ནི། བསྐལ་པ་གཅིག་ནས་བསྐལ་པ་མཐའ་མེད་པའི་བར་ཇི་ལྟར་འོས་འོས་སུ་སྐད་ཅིག་གི་ནང་དུ་ཞུགས་པར་བྱས་ནས། །བྱང་ཆུབ་ཀྱི་སྤྱད་པ་སྤྱོད་པར་གྱུར་ཅིག་པའོ། །འདི་ནི་དབང་ཐོབ་པ་ན། བསྐལ་པའམ་བསྐལ་པ་མང་པོ་སྐད་ཅིག་ཏུ་སྡུད་པ་དང༌། སྐད་ཅིག་རེ་རེ་ལ་ཡང་བསྐལ་པ་དུ་མ་སྟོན་པ་སྟེ། དཔེར་བགྱི་ན་སེམས་ཅན་སྤྱི་མཐུན་གྱི་རྩ་བའི་སྣང་བ་ལ། སྐད་ཅིག་གཅིག་གམ་ཡུད་ཙམ་གཅིག་ལ་སོགས་པར་སྣང་བའི་དུས་ཚོད་དེ་ལ། བྱང་ཆུབ་སེམས་དཔའ་རང་ཉིད་ཀྱི་སྣང་བ་ལ་ཡང་བསྐལ་པ་དང་སྐད་ཅིག་མི་འགལ་བར་འཆར་བ་དང༌། རྣམ་པར་འཕྲུལ་པའི་སྟོབས་ཀྱིས་ཞིང་ཁམས་འདིའི་གོ་ས་དང༌། ཕྱོགས་བཅུ་གཞན་གྱི་ཞིང་ཁམས་མང་པོར། དེ་དང་དེའི་སེམས་ཅན་ཀུན་ལ་བསྐལ་པ་མང་པོ་ཡང་དངོས་སུ་མྱོང་ཞིང༌། དུས་དེ་སྙེད་དུ་ཆོས་སྤྱད་པས་ཚོགས་རྫོགས་ཤིང་སྒྲིབ་པ་བྱང་བར་གྱུར་པས་ཏེ། སྐད་ཅིག་གཅིག་ལ་བསྐལ་པ་མཐའ་ཡས་པའི་བར་དུ་སྒྲུབ་དགོས་པའི་ཚོགས་གསོག་ལོངས་ཡང་སྤྱོད། སྤྱོད་པ་སྤྱོད་ལོངས་ཡང་ཡོད་ཅིང༌།
གསོག་པ་དང་སྤྱོད་ནུས་པའོ། །ཡང་སྤྱི་མཐུན་སྣང་བ་རྩ་བ་དེ་ལ་བསྐལ་བ་མང་པོ་ཡོད་ཀྱང་ཡུན་རིང་དུ་ཐོགས་པར་མ་ངེས་ཏེ། བསྐལ་པ་སྐད་ཅིག་མར་སྡུད་པའི་ཕྱིར་དང༌། བསྐལ་པ་མང་པོའི་བྱ་བ་ཉམས་སུ་མྱོང་བས་ཡུད་ཙམ་གཅིག་ལ་གྲུབ་པར་ཡང་ནུས་ལ། བྱ་བ་ཡུད་ཙམ་གཅིག་པུ་ལན་གཅིག་གིས་བསྐལ་པའམ་བསྐལ་པ་མང་པོ་འཁྱོངས་པར་ཡང་བྱེད་དོ། །དེ་ལྟར་ན་དུས་ཐམས་ཅད་མཉམ་པ་ཉིད་དུ་རྟོགས་པའི་ཡེ་ཤེས་ཀྱིས། དུས་རིང་ཐུང་དབྱེ་བ་མེད་པར་སྤྱོད་པ་སྟེ། འདིའི་དགོས་པ་ནི་སྐད་ཅིག་ལ་ཡང་མཐའ་ཡས་པའི་བྱེད་ལོང་ཡོད་ལ། བསྐལ་པ་ལ་ཡང་ཡུན་རིང་བསྒུག་མི་དགོས་པའི་ཕྱིར་ཏེ། དུས་ཐུང་ངུ་ལ་བྱ་བ་རྒྱ་ཆེན་པོ་མི་འགྲུབ་པར་དོགས་པས། བློ་ཙབ་ཙོབ་ཏུ་འགྱུར་བ་དང༌། རྒྱ་ཆེན་པོ་ལ་ཡུན་རིང་ཐོགས་པས་ངལ་ཞིང་སྐྱོ་བར་འགྱུར་བའི་གཉེན་པོའོ། །གསུམ་པ་ནི། དུས་གསུམ་གཤེགས་པ་མི་ཡི་སེང་གེ་གང༌། །དེ་དག་སྐད་ཅིག་གཅིག་ལ་བདག་གིས་བལྟ། །དུས་གསུམ་དུ་བྱུང་ཞིང་གཤེགས་པའི་མི་ཡི་སེང་གེ་བཅོམ་ལྡན་འདས་གང་ཡིན་པ་དེ་དག་ཐམས་ཅད་སྐད་ཅིག་གཅིག་ལ་དུས་གཅིག་ཏུ། ལུས་པ་མེད་པར་བདག་གིས་མངོན་སུམ་དུ་ལྟ་ཞིང༌། དུས་ཀྱང་ཐུང་ངུ་མ་ཡིན་པར་རྟག་ཏུ་བལྟ་བར་བགྱིའོ། །བཞི་པ་ནི། རྟག་ཏུ་དེ་དག་གི་ནི་སྤྱོད་ཡུལ་ལ། །སྒྱུ་མར་གྱུར་པའི་རྣམ་ཐར་སྟོབས་ཀྱིས་འཇུག །རྟག་ཏུ་སངས་རྒྱས་དེ་དག་གི་ནི་སྤྱོད་ཡུལ་ཏེ། རྟོགས་བྱའི་ཡུལ་དང་རྟོགས་བྱེད་ཀྱི་ཡེ་ཤེས་དང༌། དེ་དག་གི་རྣམ་པར་ཐར་བ་དང༌། རྫུ་འཕྲུལ་
གྱི་རྣམ་པར་འཕྲུལ་བ་བསམ་གྱིས་མི་ཁྱབ་པ་ལ་འཇུག་པར་གྱུར་ཅིགཚུལ་ཇི་ལྟ་བུས་འཇུག་ན། མཉམ་བཞག་གི་ཡེ་ཤེས་བདེ་བར་གཤེགས་པའི་སྙིང་པོ་སྤྲོས་བྲལ་རྣམ་པ་ཐམས་ཅད་པ་སྒྱུ་མ་ལྟ་བུའི་ཡེ་ཤེས་མངོན་སུམ་དུ་རྟོགས་པའི་ནུས་པས། རྗེས་ཐོབ་ཀྱི་ཡེ་ཤེས་སྒྱུ་མ་ལྟར་སྣང་བར་གྱུར་ལ་དེ་ལྟ་བུའི་ཏིང་ངེ་འཛིན་གྱི་སྟོབས་ལས། སྒྲིབ་པའི་ཁྱད་པར་མང་པོ་ལས་གྲོལ་ཞིང་རྣམ་པར་ཐར་བའི་སྟོབས་ཀྱིས་གང་ལ་གང་འདོད་དུ་སྒྱུར་ཐུབ་ཅིང་སྤྱོད་པའི་ཚུལ་གྱིས་སོ། །འདི་ནི་དོན་ལ་ངེས་པར་ན་སངས་རྒྱས་དང་འཕྲིན་ལས་མཉམ་པོར་སྤྱོད་པའི་དོན་ནོ། །ལྔ་པ་ནི། གང་ཡང་དུས་གསུམ་དག་གི་ཞིང་བཀོད་པ། །དེ་དག་རྡུལ་གཅིག་སྟེང་དུ་མངོན་པར་སྒྲུབ། །དེ་ལྟར་མ་ལུས་ཕྱོགས་རྣམས་ཐམས་ཅད་དུ། །རྒྱལ་བ་དག་གི་ཞིང་རྣམས་བཀོད་ལ་འཇུག །གང་ཡང་དུས་གསུམ་དུ་བྱུང་ཟིན་དང་འབྱུང་བ་དང་འབྱུང་འགྱུར་དག་གི སངས་རྒྱས་ཀྱི་ཞིང་གི་བཀོད་པ་དེ་དག་ཐམས་ཅད། མོས་པ་དང༌། སྨོན་ལམ་དང༌། རྫུ་འཕྲུལ་གྱི་སྟོབས་ཀྱིས། རྡུལ་ཕྲ་རབ་གཅིག་གི་སྟེང་སྟེ་གོ་ས་རུ། མངོན་པར་སྒྲུབ་ཅིང༌། རྡུལ་གཅིག་པོ་དེ་ལ་སྒྲུབ་པ་ལྟར། མ་ལུས་པའི་ཕྱོགས་རྣམས་ཐམས་ཅད་དུ། རྡུལ་མཐའ་དག་ལ་རྒྱལ་བ་དག་གི་ཞིང་རྣམས་སྒྲུབ་ཅིང་བཀོད་པ་ཡིད་དུ་འོང་བ་དང༌། རྒྱན་གྱི་ཁྱད་པར་རྣམ་པ་ཐམས་ཅད་པ་ལ་འཇུག་པར་གྱུར་ཅིག་པ་སྟེ། སྐབས་འདིའི་འཇུག་པ་ཞེས་པ་ནི། ཞིང་ཁམས་དེ་ལྟ་བུ་སྟོན་ནུས་པའི་བྱ་བ་ལ་འཇུག་པའོ། །རྡུལ་གཅིག་ལ་དུས་གསུམ་གྱི་ཞིང་ཁམས་མཐའ་དག་སྟོན་པ་ནི་གཞི་ཕྲ་ཤོས་དང་བཀོད་པ་རྒྱ་
ཆེ་ཤོས་ཀྱི་ཡ་མཐའ་ནས་བཟུང་བ་ཡིན་པས། སྤྱིར་བཀོད་པ་ཡང༌། རྡུལ་གཉིས་པའི་བཀོད་པ་ནས་བརྩམས་ཏེ་དུས་གསུམ་གྱི་ཞིང་གི་བར་དུ་སྣ་ཚོགས་པར་སྟོན་ཏོ། །དེས་མཚོན་ཏེ་རིམ་པ་བཞིན་དུ་སྦྱར་ནས། ཉི་ཟེར་རྡུལ་རེ་རེ་ལ་ཡང་དུས་གསུམ་གྱི་ཞིང་ཁམས་ལ་སོགས་པ་དེ་ལྟར་སྟོན་པ་དང༌། བྱེ་མའི་འབྲུ་རེ་རེ་འམ། སྤུ་ཉག་རེ་རེའམ། འབྲས་ལ་སོགས་པ་འབྲུ་རེ་རེའམ། རྩྭ་རེ་རེའམ་ཤིང་གེལ་བ་རེ་རེའམ། ལོ་མ་རེ་རེའམ། མེ་ཏོག་རེ་རེའམ། འབྲས་བུ་རེ་རེའམ། ཁྱིམ་རེ་རེའམ། དེ་བཞིན་ཏུ་སྦྱར་ཏེ། རྒྱང་གྲགས་རེ་རེའམ། དཔག་ཚད་རེ་རེའམ། རི་བོ་རེ་རེའམ། གྲོང་ཁྱེར་རེ་རེའམ། གླིང་རེ་རེའམ། འཇིག་རྟེན་གྱི་ཁམས་རེ་རེའམ། སྟོང་གསུམ་རེ་རེ་ལ་སོགས་པའི་བར་དུ་ཡང་དེ་ལྟར་སྟོན་ལ། སོ་སོ་སོ་སོར་ཐད་མཉམ་པ་ལ་ཡང༌། འཇིག་རྟེན་གྱི་ཁམས་གཅིག་ལ་གོ་ས་ཐ་མི་དད་པར། འཇིག་རྟེན་གྱི་ཁམས་ཐ་དད་པ་ཡང་ཚད་མཉམ་པ་དུ་མ་གཅིག་ཤུལ་དུ་གཅིག་སྟོན་ལ། གཞི་ཚད་ཆེན་པོ་ལ་ཆུང་ངུས་ཁྱབ་པ་ཡང་དཔག་ཏུ་མེད་པ་སྟོན་ཏེ། སྟོང་གསུམ་གཅིག་གླིང་བཞི་པའི་འཇིག་རྟེན་གྱི་ཁམས་གཅིག་གིས་ཁྱབ་པ་དང༌། འཛམ་བུ་གླིང་གཅིག་གིས་ཁྱབ་པ་དང༌། གྲོང་ཁྱེར་གཅིག་གིས་ཁྱབ་པ་དང༌། ལུས་གཅིག་གིས་ཁྱབ་པ་དང༌། སྐྲ་གཅིག་གིས་ཁྱབ་པ་དང༌། རྡུལ་ཕྲན་གཅིག་གིས་ཁྱབ་པའི་བར་དུ་ཡང་སྟོན་ཏོ། །ཡང་རྡུལ་ཕྲན་གཞན་གཅིག་གི་ནང་དུ་ཆུད་པ་དེ་ཉིད་ཀྱིས། གཞན་སྟོང་གསུམ་མང་པོ་ཡང་ནོན་པ་དང༌། གཞན་དུ་དུས་ཀྱང་ངེས་པ་མེད་པར་སྟོན་ཏེ་འདས་པ་
ཡང་མ་འོངས་བ་དང་མ་འོངས་པ་ཡང་འདས་པར་སྒྱུར་བ་ལ་སོགས་པ་རྣམ་པར་འཕྲུལ་བ་བསམ་གྱིས་མི་ཁྱབ་པ་ཁོ་ན་འབྱུང་བའོ། །དྲུག་པ་ནི། གང་ཡང་མ་བྱོན་འཇིག་རྟེན་སྒྲོན་མེ་རྣམས། །དེ་དག་རིམ་པར་འཚང་རྒྱ་འཁོར་ལོ་བསྐོར། །མྱ་ངན་འདས་པ་རབ་ཏུ་ཞི་མཐའ་སྟོན། །མགོན་པོ་ཀུན་གྱི་དྲུང་དུ་བདག་མཆིའོ། །གང་ཡང་མ་བྱོན་པའི་སངས་རྒྱས་འཇིག་རྟེན་སྣང་བར་བྱེད་པའི་སྒྲོན་མེ་དེ་དག་རྣམས། རང་རང་གི་མཛད་པའི་རིམ་པ་མཐའ་དག་སྟོན་པ་རྣམས་མ་འཁྲུགས་པར་སྤྱོད་དེ། སངས་རྒྱབ་དང༌། ཆོས་ཀྱི་འཁོར་ལོ་བསྐོར་བ་དང༌། མྱ་ངན་ལས་འདས་པ་སྡུག་བསྔལ་རབ་ཏུ་ཞི་བའི་མཐའ་ཐོབ་པའི་ཚུལ་སྟོན་པར་མཛད་པའི། མགོན་པོ་སངས་རྒྱས་དེ་དག་ཀུན་གྱི་དྲུང་དུ་བདག་དུས་གཅིག་ཏུ་མཆི་བ་སྟེ། འགྲོ་ཞིང་བསླེབས་ལ་ཕྱིན་པར་བགྱིའོ། །ཞེས་སྨོན་པ་སྟེ་སངས་རྒྱ་བ་སོགས་མཛད་པ་གསུམ་ནི་མཚོན་པ་སྟེ། སངས་རྒྱས་ཀྱི་མཛད་པ་སྟོན་པའི་གནས་སྐབས་ཐམས་ཅད་དུ་དེར་ཕྱིན་པར་བྱས་ནས། ཅི་ཞིག་བྱེད་ཅེ་ན་མཆོད་པ་དང༌། རྫུ་འཕྲུལ་སྟོན་པ་དང་ཆོས་བསྟན་པས་སེམས་ཅན་འདུལ་བ་དང༌། ཆོས་ཀྱི་དོན་འདྲི་བ་ལ་སོགས་པ། མདོར་ན་སངས་རྒྱས་ཀྱི་མཛད་པ་ཐམས་ཅད་ཀྱི་དཔུང་རོགས་བྱ་བ་ཡིན་ལ། དོན་ལ་བདག་ཉིད་གསར་དུ་མངོན་པར་རྫོགས་པར་སངས་རྒྱས་ཟིན་གྱི་དབང་དུ་བྱས་ན་ནི། མཛད་པ་འཕྲིན་ལས་གཅིག་པ་ཁོ་ནར་འགྱུར་ཞིང༌། ས་བཅུ་པ་ཉིད་ལ་གནས་པའི་སྐབས་ཡིན་ན་ཡང༌། སངས་རྒྱས་ཀྱིས་འདུལ་བ་ལ་སངས་རྒྱས་སུ་གྱུར་ཏེ་སངས་རྒྱས་ཀྱི་མཛད་པ་སྟོན་པ་དང༌། སངས་རྒྱས་
སུ་མི་སྟོན་ཡང༌། སངས་རྒྱས་གཞན་གྱིས་མཛད་པའི་ལས་བྱེད་པ་པོར་འབྱུང་བ་ཡིན་ནོ། །རྩ་བའི་གསུམ་པ། ཐུན་མོང་དང་ཐུན་མོང་མ་ཡིན་པ་གཉིས་ཀར་ལ་འཇུག་པའི། རྣམ་གྲངས་གཞན་གྱི་སྨོན་ལམ་བསྟན་པ་ལ། སྒྲུབ་པ་གཙོ་བོར་གྱུར་པ་སྟོབས་ཀྱི་སྨོན་ལམ་དང༌། ཕན་ཡོན་གཙོ་བོར་གྱུར་པ་བསམ་མི་ཁྱབ་ཀྱི་སྨོན་ལམ་དང༌། མཐར་ཐུག་སྨོན་ལམ་བླ་ན་མེད་པར་གཅིག་ཏུ་བྱ་བ་སྟེ། གསུམ་ལས། དང་པོ་ལ། སྟོབས་བཅུ་བཤད་པ་དང༌། དེའི་བྱེད་ལས་བཤད་པའོ། །དང་པོ་ནི། ཀུན་ཏུ་མྱུར་བའི་རྫུ་འཕྲུལ་སྟོབས་རྣམས་དང༌། །ཀུན་ནས་སྒོ་ཡི་ཐེག་པའི་སྟོབས་རྣམས་དང༌། །ཀུན་ཏུ་ཡོན་ཏན་སྤྱོད་པའི་སྟོབས་རྣམས་དང༌། །ཀུན་ཏུ་ཁྱབ་པར་བྱམས་པ་དག་གི་སྟོབས། །ཀུན་ནས་དགེ་བའི་བསོད་ནམས་སྟོབས་རྣམས་དང༌། །ཆགས་པ་མེད་པར་གྱུར་བའི་ཡེ་ཤེས་སྟོབས། །ཤེས་རབ་ཐབས་དང་ཏིང་འཛིན་སྟོབས་དག་གིས། །བྱང་ཆུབ་སྟོབས་རྣམས་ཡང་དག་སྒྲུབ་པར་བྱེད། །མཆོད་པ་དང༌། ཆོས་སྟོན་པ་དང༌། སེམས་ཅན་གྱི་དོན་དུ། མཐའ་མེད་པའི་ཞིང་ཁམས་རྣམས་ཀྱང་སྐད་ཅིག་གིས་བགྲོད་ནུས་ཤིང༌། ཞིང་ཐ་དད་པར་དུ་མར་ཡང་དུས་གཅིག་ཅར་བགྲོད་ཐུབ་པས་ཀུན་ཏུ་མྱུར་བའི་རྫུ་འཕྲུལ་གྱི་སྟོབས་རྣམས་དང༌། ཀུན་ནས་སྒོ་ཞེས་བྱ་བ་ནི། སྒོ་ཀུན་དང་ལྡན་པའི་དོན་ཏེ། ཐབས་ཚུལ་གྱིས་རིམ་པ་མཐའ་ཡས་པའི་སྒོ་ནས། སེམས་ཅན་གྱི་དོན་སྤྱོད་པ་དང་ལྡན་པའི་སེམས་བསྐྱེད་ནི། དེ་ལ་བརྟེན་ནས་བླ་ན་མེད་པའི་བྱང་ཆུབ་ཏུ་བགྲོད་ནུས་པའི་ཕྱིར། བཞོན་པ་དང་འདྲ་
བས་ཐེག་པའི་སྟོབས་ཏེ་དེ་རྣམས་དང༌། ཕ་རོལ་ཏུ་ཕྱིན་པ་དང་བསྡུ་དངོས་བཞི་དང་ཚད་མེད་བཞི་ལ་སོགས་པ། ཡོན་ཏན་དུ་མ་དང་འགྲོགས་པའི་སྙོམས་འཇུག་དགུ་དང་ཟད་པར་བཅུ་དང༌། ཟིལ་གནོན་བརྒྱད་དང༌། མངོན་ཤེས་དྲུག་ལ་སོགས་པ་ཡོན་ཏན་ཀུན་ཏུ་སྤྱོད་པའི་སྟོབས་རྣམས་དང༌། ཀུན་ནས་སེམས་ཅན་ཐམས་ཅད་ལ་ཉེ་རིང་མེད་པར་ཁྱབ་པའི་བྱམས་པ་ལ་སོགས་པ་ཚད་མེད་བཞི་པོ་དག་གི་སྟོབས་དང་ཀུན་ཏུ་སེམས་ཅན་ཐམས་ཅད་ལ་ཕན་པ་དང་བདེ་བ་བྱེད་པའི་ཕྱིར། རབ་ཏུ་དགེ་བའི་སྦྱིན་སོགས་བསོད་ནམས་ཀྱི་སྟོབས་རྣམས་དང༌། དུས་གསུམ་གྱི་དངོས་པོ་ཐམས་ཅད་ལ་ཆགས་ཐོགས་མེད་པར་འཇུག་པའི་མངོན་པར་མཁྱེན་པ། ཡེ་ཤེས་ཀྱི་སྟོབས་དང༌། ཆོས་དབྱིངས་ཇི་ལྟ་བ་བཞིན་རྟོགས་པའི་ཤེས་རབ་ཀྱི་སྟོབས་དང༌། གཞན་དོན་སྒྲུབ་པ་ལ་མཁས་པ་ཐབས་མཁས་ཀྱི་སྟོབས་དང༌། དམིགས་པ་ལ་རྩེ་གཅིག་པ་གང་ཞིག་མངོན་ཤེས་དང་རྣམ་འཕྲུལ་ལ་སོགས་པ་ཡོན་ཏན་བསྐྱེད་པའི་རྒྱུ། དཔའ་བར་འགྲོ་བ་ལ་སོགས་པ་ཏིང་ངེ་འཛིན་གྱི་སྟོབས་ཏེ། སྟོབས་དགུ་པོ་དེ་དག་གི་སྒོ་ནས་འབད་པས། བྱང་ཆུབ་ཀྱི་སྟོབས་ཏེ་བླ་ན་མེད་པའི་བྱང་ཆུབ་འཕྲལ་དུ་ཐོབ་པར་བྱེད་པའི་ཡེ་ཤེས་ཀྱི་ཁྱད་པར། རྫོགས་པའི་སངས་རྒྱས་ཀྱི་ཡེ་ཤེས་ཉིད་དང་རྣམ་པ་མཐུན་ཅིང་རྒྱ་ཁྱོན་མཚུངས་པའི་ལམ་གྱི་བདེན་པ་ནི། བྱང་ཆུབ་ཀྱི་སྟོབས་ཡིན་ལ། དེ་ཡང་རྣམ་པ་མཐའ་ཡས་པ་འཛིན་པའི་ཕྱིར། རྣམས་ཞེས་མང་པོའི་སྒྲ་སྨོས་ཏེ། དེ་རྣམས་ཡང་དག་པར་སྒྲུབ་པར་བྱེད་པར་ཤོག་ཅིག་པའོ། །འདིར་བཤད་པའི་སྟོབས་འདི་རྣམས།
འཕགས་པ་དཀོན་མཆོག་སྤྲིན་དང་ཕལ་པོ་ཆེའི་སྐབས་གཞན་ལས་འབྱུང་བ་ལྟར་གྱི་བྱང་ཆུབ་སེམས་དཔའི་སྟོབས་བཅུ་དང་ཕལ་ཆེར་འདྲ་བར་སྣང་སྟེ། ཇི་ལྟར་ཞེ་ན། བྱང་ཆུབ་སེམས་དཔའི་སྟོབས་བཅུ་ནི། བསམ་པ་ལྷག་བསམ་སྦྱོར་བ་དང༌། ཤེས་རབ་སྨོན་ལམ་སྤྱོད་པ་དང༌། ཐེག་པ་རྣམ་འཕྲུལ་བྱང་ཆུབ་དང༌། ཆོས་འཁོར་བསྐོར་བའི་སྟོབས་རྣམས་སོ། །འདིར་ཤེས་རབ་ཀྱི་སྟོབས་དང༌། བྱང་ཆུབ་ཀྱི་སྟོབས་དང༌། སྤྱོད་པའི་སྟོབས་དང༌། ཐེག་པའི་སྟོབས་ནི་དངོས་སུ་གསལ་ལ། རྣམ་པར་འཕྲུལ་པའི་སྟོབས་ནི་རྫུ་འཕྲུལ་དང་བསམ་པའི་སྟོབས་ནི་བྱམས་པ་དང་ལྷག་པའི་བསམ་པའི་སྟོབས་ནི་ཡེ་ཤེས་དང༌། སྦྱོར་བའི་སྟོབས་ནི་བསོད་ནམས་ཀྱི་སྟོབས་དང༌། ཐབས་ཀྱི་སྟོབས་གཅིག་པོའི་ནང་ཚན་ནས་གཙོ་བོ་ཁྱད་པར་ཅན་ལོགས་སུ་ཕྱེ་བ་ནི་སྨོན་ལམ་གྱི་སྟོབས་དང༌། ཆོས་ཀྱི་འཁོར་ལོ་བསྐོར་བའི་སྟོབས་གཉིས་སོ། །དེ་བས་ན་གཞུང་འདིར་བཤད་པའི་ཏིང་ངེ་འཛིན་གྱི་སྟོབས་ལྷག་པ་ལྟར་བྱུང་ཡང་སྤྱོད་པ་དང༌། ལྷག་བསམ་དུ་འདུས་པར་མངོན་ནོ། །གཉིས་པ་སྟོབས་ཀྱི་བྱེད་ལས་ནི། ལས་ཀྱི་སྟོབས་རྣམས་ཡོངས་སུ་དག་བྱེད་ཅིང༌། །ཉོན་མོངས་སྟོབས་རྣམས་ཀུན་ཏུ་ཕམ་པར་བྱེད། །བདུད་ཀྱི་སྟོབས་རྣམས་སྟོབས་མེད་རབ་བྱེད་ཅིང༌། །བཟང་པོ་སྤྱོད་པའི་སྟོབས་ནི་རྫོགས་པར་བགྱི། །དེ་ལ་སྤངས་པར་བྱ་བའི་ལས་ནི། ཁམས་གསུམ་པོ་སྤྱོད་པར་བྱེད་པ་སྟེ། ལས་དངོས་དང༌། ལས་རྗེས་སུ་མཐུན་པའོ། །ལས་དངོས་ཀྱང་མི་དགེ་བའི་ལས་དང༌། ཟག་བཅས་ཀྱི་དགེ་བའོ། །ཟག་
བཅས་ཀྱི་དགེ་བ་དེ་ཡང་གཉིས་ཏེ། འདོད་ཁམས་ཀྱིས་བསྡུས་པའི་དགེ་བ་བསོད་ནམས་དང༌། ཁམས་གོང་མ་གཉིས་ཀྱིས་བསྡུས་པའི་དགེ་བ་མི་གཡོ་བའི་ལས་སོ། །རྗེས་སུ་མཐུན་པའི་ལས་ནི། ལས་རྣམས་ཀྱིས་བཞག་པའི་བག་ཆགས་གང་ཡིན་པ་སྟེ། དེ་ལྟ་བུའི་ལས་ཀྱི་སྟོབས་རྣམས་ཡོངས་སུ་དག་པར་བྱེད་ཅིང༌། ཉོན་མོངས་པ་ནི། ལུས་དང་སེམས་རབ་ཏུ་མ་ཞི་བར་རྙོག་པ་དང་རང་ཉིད་ལ་གནོད་པར་བྱེད་པའི་རྣམ་རྟོག་སྟེ། འདོད་ཆགས་དང་ཁོང་ཁྲོ་དང༌། ང་རྒྱལ་དང་མ་རིག་པ་དང༌། ཐེ་ཚོམ་སྟེ་ལྟ་བ་མིན་པ་ལྔ་དང༌། འཇིགས་ཚོགས་ལ་ལྟ་བ་དང༌། ལོག་པར་ལྟ་བ་དང༌། མཐར་ལྟ་བ་དང༌། ལྟ་བ་མཆོག་འཛིན་དང༌། ཚུལ་ཞུགས་མཆོག་འཛིན་ཏེ་ལྟ་བ་ལྔའོ། །དེ་དག་ནི་རྩ་བ་ཡིན་ལ། གཞན་ཡང་ཁྲོ་བ་ལ་སོགས་པ་ཉེ་བའི་ཉོན་མོངས་པ་ཉི་ཤུ་དང༌། ཉོན་མོངས་པའི་རབ་དབྱེ་ཕྲ་མོ་གཞན་རྣམས་དང༌། ཉོན་མོངས་པ་རྣམས་ཀྱི་བག་ཆགས་དང་གནས་ངན་ལེན་གང་ཡིན་པ་རྣམས་ཀྱང་སྟེ། ཉོན་མོངས་པའི་སྟོབས་རྣམས་ཀུན་ཏུ་ཕམ་པ་སྟེ། ཉོན་མོངས་ཕལ་ཆེར་སྤངས་ཤིང༌། འགའ་ཞིག་རྩད་ནས་རང་མ་སྤངས་ཀྱང༌། དེ་ལ་རང་དབང་འབྱོར་པའི་ཚུལ་གྱིས། དེའི་སྟོབས་བཅོམ་ནས་ལམ་གྱི་གྲོགས་སུ་བྱས་པའོ། །སྐབས་འདིར་ཕྱོགས་རེ་མགོ་གནོན་གྱི་གཉེན་པོ་སྤྱད་པ་རྣམ་པར་སྦྱོང་བ་དང༌། མཐའ་དག་དཔྱིས་འབྱིན་གྱི་གཉེན་པོ་བདག་མེད་གཉིས་དང༌། ཉོན་མོངས་བྱང་ཆུབ་ཀྱི་ཡན་ལག་ཏུ་སྒྱུར་བའི་ཐབས་མཁས་ལ་སོགས་པའི་རྣམ་བཞག་རྣམས་གཞན་ལས་འབྱུང་
བ་ལྟར་རྒྱས་པར་ཤེས་པར་བྱའོ། །བདུད་ཀྱི་སྟོབས་རྣམས་ཞེས་པ་ལ་སྤྱིར་བདུད་བཞི་ཡིན་ཡང༌། ཉོན་མོངས་པའི་བདུད་ནི་སྔར་བཤད་ཟིན་པས། ཕུང་པོའི་བདུད་དང་འཆི་བདག་གི་བདུད་དང་ལྷ་བུའི་བདུད་དོ། །གང་འདུས་བྱས་ཐམས་ཅད་ལ། རང་བཞིན་གྱིས་གྲུབ་པ་དང་རྟག་པའི་ཆོས་རྡུལ་ཙམ་ཡང་མི་དམིགས་ཏེ། ཕུང་པོ་སྟོང་པར་རྟོགས་པས་ཕུང་པོའི་བདུད་བཅོམ་པ་དང༌། དེ་བཞིན་གཤེགས་པའི་སྙིང་པོ་ནི་རྟག་ཅིང་བརྟན་ལ། སྐྱེ་འཇིག་ཐམས་ཅད་དང་བྲལ་པར་རྟོགས་པས་འཆི་བདག་གི་བདུད་བཅོམ་ཤིང༌། ཀུན་རྫོབ་ཐ་མལ་གྱི་སྡུག་པ་དང་མི་སྡུག་པ་སོགས་ཡུལ་ལ་མངོན་པར་མ་ཞེན་ལ། ཆོས་ཉིད་ཀྱི་གཟུགས་སོགས་དོན་དམ་པའི་སྤྱོད་ཡུལ་མཐའ་ཡས་པ་ལ་མངོན་པར་སྤྱོད་པའི་ཕྱིར། གང་ཞིག་ཉོན་མོངས་སྐྱེད་དུ་འཇུག་ཅིང༌། སྡིག་ཏོ་མི་དགེ་བའི་ཆོས་ལ་འཁྲིད་པའི་ལྷའི་བུའི་བདུད་བཅོམ་པས་ན། བདུད་ཀྱི་སྟོབས་རྣམས་ནི་སྟོབས་མེད་ཅིང་མི་མངོན་པར་རབ་ཏུ་བྱེད་པ་དང༌། བཟང་པོ་སྤྱོད་པའི་སྟོབས་ནི་རྫོགས་པར་བགྱིད་པ་སྟེ། བླ་ན་མེད་པའི་སངས་རྒྱས་ཐོབ་པར་སྨོན་པའོ། །གཉིས་པ་ཕན་ཡོན་གཙོ་བོར་སྟོན་པ་བསམ་མི་ཁྱབ་གྱི་སྨོན་ལམ་ནི། ཞིང་རྣམས་རྒྱ་མཚོ་རྣམ་པར་དག་བྱེད་ཅིང༌། །སེམས་ཅན་རྒྱ་མཚོ་དག་ནི་རྣམ་པར་གྲོལ། །ཆོས་རྣམས་རྒྱ་མཚོ་རབ་ཏུ་མཐོང་བྱེད་ཅིང༌། །ཡེ་ཤེས་རྒྱ་མཚོ་རབ་ཏུ་རྟོགས་པར་བྱེད། །སྤྱོད་པ་རྒྱ་མཚོ་རྣམ་པར་དག་བྱེད་ཅིང༌། །སྨོན་ལམ་རྒྱ་མཚོ་རབ་ཏུ་རྫོགས་པར་བྱེད། །
སངས་རྒྱས་རྒྱ་མཚོ་རབ་ཏུ་མཆོད་བྱེད་ཅིང༌། །བསྐལ་པ་རྒྱ་མཚོར་མི་སྐྱོ་སྤྱད་པར་བགྱི། །སངས་རྒྱས་ཀྱི་ཞིང་རྣམས་རྒྱ་མཚོ་ཐམས་ཅད་བདེ་བ་ཅན་དང༌། པདྨ་ཅན་གྱི་འཇིག་རྟེན་བཞིན་དུ་ངན་འགྲོ་དང་ནད་དང་སྡུག་བསྔལ་དང༌། ལྟ་བ་ལོག་པ་དང༌། ངམ་གྲོག་དང༌། ཚེར་མ་ལ་སོགས་པ་སྤངས་པ། རིན་པོ་ཆེའི་ས་གཞི་དང་ལྗོན་པ་ལ་སོགས་པ་རྒྱན་ཐམས་ཅད་ཀྱིས་རྣམ་པར་བརྒྱན་པའི་ཞིང་ཁམས་རྣམ་པར་དག་པ་སྟེ་བཟང་པོ་འབའ་ཞིག་ཏུ་བྱེད་ཅིང༌། སེམས་ཅན་རྒྱ་མཚོ་དག་ནི་སྡུག་བསྔལ་དང་སྒྲིབ་པ་ལས་རྣམ་པར་གྲོལ་བར་བྱེད་པ་དང༌། ལུང་རྟོགས་ཀྱི་ཆོས་རྒྱ་མཚོ་རྣམས་ནི། ཤེས་རབ་ཀྱི་མིག་གིས་རབ་ཏུ་མཐོང་བར་བྱེད་ཅིང༌། ཇི་ལྟ་བ་དང་ཇི་སྙེད་པའི་ཆོས་མངོན་སུམ་དུ་མཐོང་བའི་ཡེ་ཤེས་རྒྱ་མཚོ་རྣམས་ནི། རབ་ཏུ་རྟོགས་པ་སྟེ་ཐོབ་པར་བྱེད་ལ། སྤྱོད་པ་སྟེ་བདག་གཞན་ལ་ཕན་པའི་ཐབས་རྒྱ་མཚོ་ལྟ་བུ་དག་ལ་ནི། བསམ་པ་དྲི་མ་ཅན་ལ་སོགས་པའི་སྐྱོན་རྣམས། རྣམ་པར་དག་པར་བྱེད་ཅིང་རང་གཞན་གྱི་དོན་གྱི་སྨོན་ལམ་གྲངས་མེད་པ་རྒྱ་མཚོ་རྣམས་ནི། རབ་ཏུ་རྫོགས་པ་སྟེ་འབྲས་བུ་འགྲུབ་པར་བྱེད་པ་དང༌། སངས་རྒྱས་རྒྱ་མཚོ་ཐམས་ཅད་ནི། མཆོད་པ་རྣམ་པ་བཅུ་ལ་སོགས་པ་ཐམས་ཅད་ཀྱིས། རབ་ཏུ་མཆོད་པར་བྱེད་ཅིང༌། དེ་ལྟར་ཞིང་དག་པར་བྱེད་པ་ལ་སོགས་པ་བདུན་པོ་དེ་ཡང༌། བསྐལ་པ་རྒྱ་མཚོ་སྟེ་མཐའ་མེད་པའི་བར་དུ་སྐྱོ་བ་མེད་ཅིང་རབ་ཏུ་དགའ་བས་སྤྱད་པར་བགྱི་ཞེས་སྨོན་པའོ། །དེ་ལྟར་ན་རྒྱ་མཚོ་ལྟ་བུ་བརྒྱད་ཀྱིས། དང་པོ་གཉིས་ནི་ཞིང་སྦྱོང་དང་སེམས་ཅན་སྨིན་བྱེད་ཡིན་ལ། ལྷག་མ་ལྔ་ནི་སྨོན་ལམ་དང་ཚོགས་
རྫོགས་པའི་ཐབས་སོ། །ཐ་མ་ནི་རྫོགས་སྨིན་སྦྱང་གསུམ་དེ་ཇི་ཙམ་དུ་སྤྱོད་པའི་དུས་བསྟན་པའོ། །གསུམ་པ་སྨོན་ལམ་མཐར་ཐུག་བླ་ན་མེད་པར་གཅིག་ཏུ་བྱ་བ་ནི། གང་ཡང་དུས་གསུམ་གཤེགས་པའི་རྒྱལ་བ་ཡིས། །བྱང་ཆུབ་སྤྱོད་པའི་སྨོན་ལམ་བྱེ་བྲག་རྣམས། །བཟང་པོ་སྤྱོད་པས་བྱང་ཆུབ་སངས་རྒྱས་ནས། །དེ་ཀུན་མ་ལུས་བདག་གིས་རྫོགས་པར་བགྱི། །གང་ཡང་དུས་གསུམ་དུ་བྱོན་གཤེགས་མཛད་པའི། རྒྱལ་བ་མཐའ་ཡས་པ་རྣམས་ཀྱིས་སྔོན་ཐོག་མ་མེད་པའི་དུས་ནས་བརྩམས་པའི། བྱང་ཆུབ་སྤྱོད་པའི་སྨོན་ལམ་གྱི་བྱེ་བྲག་མཐའ་ཡས་པ་དེ་རྣམས་ཀུན། མ་ལུས་པར་བདག་གིས་རྫོགས་པར་བགྱི་བར་སྨོན་པའོ། །དེ་ཡང་དུས་ནམ་གྱི་ཚེ་རྫོགས་པར་འགྱུར་སྙམ་ན། བཟང་པོ་སྤྱོད་པ་སྤྱད་པས་བླ་ན་མེད་པས་བྱང་ཆུབ་ཏུ་སངས་རྒྱས་པར་གྱུར་ནས་ཞེས་པའོ། །དེ་ལྟ་བུའི་སངས་རྒྱས་རྣམས་ཀྱི་སྨོན་ལམ་བདག་གིས་རྫོགས་པར་བྱ་བའི་ཕྱིར། རྒྱལ་སྲས་མཆོག་གཉིས་དང་ཡང་སྨོན་ལམ་གཅིག་ཏུ་བྱ་བ་ནི། རྒྱལ་བ་ཀུན་གྱི་སྲས་ཀྱི་ཐུ་བོ་པ། །གང་གི་མིང་ནི་ཀུན་ཏུ་བཟང་ཞེས་བྱ། །མཁས་པ་དེ་དང་མཚུངས་པར་སྤྱད་པའི་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ། །དེ་ཡང་རྒྱལ་བ་ཀུན་གྱི་སྲས་ཀྱི་མཆོག་ཐུ་བོ་པ། གང་གི་མིང་ནི་ཀུན་ཏུ་བཟང་པོ་ཞེས་བྱ་བར་གྲགས་པའི། མཁས་པ་དེ་དང་མཚུངས་པར་ཆོས་ལ་སྤྱོད་པའི་ཕྱིར། བདག་གི་དགེ་བ་འདི་དག་ཐམས་ཅད་རབ་ཏུ་བསྔོ་བར་བགྱིའོ། །འདི་ལ་ཀུན་ཏུ་བཟང་པོ་ཉིད་ཀྱིས་རང་དང་མཚུངས་པར་སྨོན་ལམ་བྱེད་པར་མི་འཐད་དོ་སྙམ་ན།
འདི་ནི་གཞོན་ནུ་ནོར་བཟང་ལ་སོགས་པ་རྗེས་འཇུག་རྣམས་ཀྱི་འདེབས་པའི་དོན་དུ་གསུངས་པས་མི་འགལ་ལ། ཀུན་བཟང་ཉིད་ཀྱིས་རང་དོན་དུ་ནི་སྨོན་ལམ་གཞན་རྣམས་ཀྱང་འདེབས་མི་དགོས་པར་ཁྱད་མེད་དོ། །ཚུལ་ཇི་ལྟར་ན། ལུས་དང་ངག་དང་ཡིད་ཀྱང་རྣམ་དག་ཅིང༌། །སྤྱོད་པ་རྣམ་དག་ཞིང་རྣམས་ཡོངས་དག་དང༌། །བསྔོ་བ་བཟང་པོ་མཁས་པ་ཅི་འདྲ་བ། །དེ་འདྲ་བདག་ཀྱང་དེ་དང་མཚུངས་པར་ཤོག །སེམས་ཅན་གང་ལ་གང་འདུལ་གྱིས་ལུས་མཐའ་ཡས་པར་སྟོན་པ་དང༌། དབྱངས་གཅིག་འགྲོ་བ་ཀུན་གྱི་སྐད་དང་འབྱོར་བའི་ངག་དང༌། རྣམ་པར་མི་རྟོག་བཞིན་དུ་མ་འདྲེས་པར་ཤེས་ལ་སྙིང་རྗེ་ཆེན་པོའི་ཏིང་ངེ་འཛིན་ལ་ཡང་འཇུག་ནུས་པའི་ཡིད་ཀྱང་སྟེ། སྒོ་གསུམ་རྣམ་པར་དག་པར་གྱུར་ཅིང༌། ཕར་ཕྱིན་དྲུག་གི་སྤྱོད་པ་ལ། སེར་སྣ་སོགས་ཀྱི་དྲི་མ་རྣམ་པར་དག་པ་དང༌། ཞིང་མ་དག་པ་རྣམས་ཀྱང་ཡོངས་སུ་དག་པར་འགྱུར་བ་དང༌། བསྔོ་བ་བཟང་པོ་མཐའ་དང་བྲལ་བ་བཏབ་པའི་མཁས་པ་བྱང་ཆུབ་སེམས་དཔའ་ཆེན་པོ་རྣམས། ཀུན་བཟང་དང་ལྷན་ཅིག་སྤྱོད་པ་ཅི་འདྲ་བ་དེ་འདྲར་བདག་ཀྱང་ཀུན་ཏུ་བཟང་པོ་དང་མཚུངས་པར་ཤོག་ཅིག་འགྲེལ་པ་ཁ་ཅིག་ལས། མཁས་པ་བཟང་པོ་བསྔོ་བ་ཅི་འདྲ་བ། །ཞེས་འདོན་ཏེ། དོན་ལ་ཁྱད་ཆེར་མེད་དོ། །ཀུན་ནས་དགེ་བ་བཟང་པོ་སྤྱོད་པའི་ཕྱིར། །འཇམ་དཔལ་གྱི་ནི་སྨོན་ལམ་སྤྱད་པར་བགྱི། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་ཡི་བྱ་བ་མ་ལུས་རྫོགས་པར་བགྱི། །ཐོག་མཐའ་བར་གསུམ་ཀུན་ཏུ་ཀུན་ནས་དགེ་བའི་ཆོས། བཟང་པོ་སྤྱོད་པ་སྤྱད་པའི་ཕྱིར། འཕགས་མཆོག་འཇམ་
དཔལ་གྱི་སྨོན་ལམ་ཇི་ལྟ་བ་བཞིན་དུ་བདག་གིས་ཀྱང་སྤྱད་པར་བགྱི་སྟེ། སྤྱོད་པར་གྱུར་ཅིག སངས་རྒྱས་རྣམས་དང་ཀུན་བཟང་དང་འཇམ་དཔལ་གྱི་སྨོན་ལམ་དེ་ཀུན། མ་འོངས་མཐའ་མེད་པའི་བསྐལ་པ་ཀུན་ཏུ་མི་སྐྱོ་ཞིང༌། དགའ་སྤྲོ་དང་བཅས་པར། རྒྱལ་བ་སྲས་བཅས་དེའི་བཞེད་དོན་གྱི་བྱ་བ་མ་ལུས་པ་བདག་གིས་རྫོགས་པར་བགྱི་བ་སྨོན་པའོ། །གསུམ་པ་དོན་བསྡུ་ནི། སྤྱོད་པ་དག་ནི་ཚད་ཡོད་མ་གྱུར་ཅིག །ཡོན་ཏན་རྣམས་ཀྱང་ཚད་གཟུང་མེད་པར་ཤོག །སྤྱོད་པ་ཚད་མེད་པ་ལ་གནས་ནས་ཀྱང༌། །དེ་དག་འཕྲུལ་པ་ཐམས་ཅད་འཚལ་བར་བགྱི། །བདག་གིས་སྦྱིན་པ་ལ་སོགས་པ་རྒྱུད་སྤྱོད་པ་དག་གི་མཐའ་ནི། འདི་ཙམ་མོ་ཞེས་ཚད་བཟུང་དུ་ཡོད་པར་མ་གྱུར་ཅིག །དེ་ལས་འབྱུང་བའི་འབྲས་བུ་གཟུངས་དང་སྤོབས་པ་ལ་སོགས་པའི་ཡོན་ཏན་རྣམས་ཀྱང༌། ཚད་བཟུང་དུ་མེད་པར་ཤོག་ཅིག །དེ་ལྟར་སྤྱོད་པ་དང་ཡོན་ཏན་ཚད་བཟུང་མེད་པ་ལ་གནས་པར་བྱས་ནས་ཀྱང༌། སངས་རྒྱས་དང་བྱང་ཆུབ་སེམས་དཔའ་དེ་དག་རྣམས་ཀྱི། སྐུ་གསུང་ཐུགས་ཀྱི་རྣམ་པར་འཕྲུལ་པ་ཐམས་ཅད་བདག་གིས་འཚལ་པ་སྟེ། ཐོག་མར་མཐོང་ཞིང་ཤེས་ལ། མཐར་ཐོབ་པར་འགྱུར་བར་སྨོན་པའོ། །གཞུང་འདིར་འབྲས་བུ་མཐར་ཐུག་སངས་རྒྱས་ལ་སྦྱོར་ཚུལ། ཡང་ནས་ཡང་དུ་བྱུང་ཡང༌། འབྲས་བུའི་རྣམ་གཞག སྒོས་སུ་རྒྱས་ཤིང་གསལ་བར་མི་འབྱུང་བ་ནི། བཟང་པོ་སྤྱོད་པ་པོ་འདོད་ཆེན་པ་མ་ཡིན་པའི་བྱང་ཆུབ་སེམས་དཔའ་རྣམས་ཀྱིས། དང་པོའི་སེམས་
བསྐྱེད་པ་དང་འབྲེལ་བའི་སྨོན་ལམ་གྱི་དབང་དུ་བྱས་པ་དང༌། སེམས་དཔའ་ཆེན་པོའི་གནས་སྐབས་ན། རང་དོན་ཡིད་བྱེད་ཀྱི་ཁྱད་པར་གཞན་ནི་ཆེར་མི་འབྱུང་ལ། བདག་དོན་དུ་བྱང་ཆུབ་གཉེར་བ་ཙམ་ཞིག་འབྱུང་ཉེ་ན། དེ་སྤོང་པའི་དུ་ཡང་བཟང་པོ་སྤྱོད་པའི་དམ་བཅའ་བྱེད་པའོ། །སོ་སོ་སྐྱེ་བོའི་གནས་སྐབས་ཐམས་ཅད་དུ་ཡང༌། རང་དོན་ཡིད་བྱེད་འགོག་པ་ལ། དམ་བཅའ་འདི་ཁོ་ན་གལ་ཆེ་ཞིང༌། བདག་གཞན་བརྗེ་བའི་བྱང་ཆུབ་སེམས་ཀྱི་རྩ་བ་དང་མཐར་ཐུག་པ་ཡང་བཟང་པོ་སྤྱོད་པའི་དམ་བཅའ་ལ་ལྟོས་པ་ཡིན་པ་དང༌། བྱང་ཆུབ་བསྒྲུབ་པ་ལ་ངང་ཐུང་བ་སྤོང་བའི་གོ་ཆ་ཆེན་པོ་ཡང་འདིའོ། །གསུམ་པ་སྨོན་ལམ་གྱི་མཐའ་དང་ཕན་ཡོན་བསྟན་པ་ལ། སྨོན་ལམ་གྱི་མཐའ་བཤད་པ་དང༌། ཕན་ཡོན་དངོས་བཤད་པའོ། །དང་པོ་ནི། ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཇི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ནམ་མཁའི་མཐར་ཐུག་གྱུར་པ་ཞེས་པ་ལ། ནམ་མཁའ་ལ་མཐའ་མེད་ཕྱིར། ཕྱོགས་བཅུ་མཐའ་མེད་པ་ཇི་ཙམ་པར། སེམས་ཅན་མ་ལུས་པའི་མཐའ་ཡས་དེ་བཞིན་ཏེ་མཐའ་མེད་པའོ། །སེམས་ཅན་ཇི་ཙམ་པར་ལས་དང་ཉོན་མོངས་པ་ཡང་དེ་ཙམ་སྟེ། ཇི་ཙམ་ལས་དང་ཉོན་མོངས་པའི་མཐའ་ཚད་གཟུང་དུ་མེད་པར་གྱུར་པ་དེ་བཞིན་དུ། བདག་གི་སྨོན་ལམ་གྱི་མཐའ་ཡང་དེ་ཙམ་དང་མཉམ་པའི་ཕྱིར་ཚད་མེད་པའོ། །མདོར་ན་སེམས་ཅན་ཐམས་ཅད་ཀྱི་ལས་དང་ཉོན་
མོངས་གཅིག་ཀྱང་མ་ལུས་པ་བདག་གིས་སེལ་བ་དང༌། སེམས་ཅན་གཅིག་ཀྱང་མ་ལུས་པར་ཐམས་ཅད་བླ་ན་མེད་པའི་བྱང་ཆུབ་ལ་འགོད་པའི་སྨོན་ལམ་དང༌། དེ་མ་རྫོགས་ཀྱི་བར་དུ་ཡང་སེམས་ཅན་རྣམས་ཀྱི་སྡུག་བསྔལ་དང་མི་འདོད་པ་མཐའ་དག་བདག་གིས་འཇོམས་པ་དང༌། གང་དང་གང་དུ་ཇི་ལྟར་འོས་པའི་ཕུན་སུམ་ཚོགས་པ་ཐམས་ཅད་ཀྱང་བདག་གིས་སྒྲུབ་པར་སྨོན་ཅིང༌། དེ་ལྟར་སྨོན་པ་ཡང་དད་པ་དང་སྙིང་སྟོབས་ཤིན་ཏུ་བརྟན་པ་ལ་གཞི་བྱས། སྙིང་རྗེ་ཆེན་པོ་དང༌། འདུན་པ་དང་བརྩོན་འགྲུས་དྲག་པོས་མཚམས་སྦྱར། དེ་ཐམས་ཅད་སྟོང་ཉིད་རྟོགས་པའི་ཡེ་ཤེས་དང་ཇི་ལྟར་དམིགས་པ་དེ་ལྟར་ཐམས་ཅད་ལ་དབང་འབྱོར་བའི་ཏིང་ངེ་འཛིན་གྱི་ནང་དུ་བཅུག་སྟེ། དུས་བསྐལ་པ་མཐའ་མེད་པར་སྒྱུར་བྱེད་ཀྱི་གྲོགས་ཚོགས་བསགས་པའི་སྒོ་གྲངས་མེད་པས་ཡོངས་སུ་སྒྱུར་ཏེ་བསྔོས་ཤིང་སྨོན་ལམ་བཏབས་པ་ཡིན་པའི་ཕྱིར། སྨོན་ལམ་དེ་ཡང་ཇི་ལྟར་བསྔོས་པ་དང་མཐུན་པར་ནི་འགྲུབ་ལ། འཁོར་བའི་གནས་ན་སེམས་ཅན་གཅིག་ཀྱང་མ་ལུས་པར་རྫོགས་པ་ནི་མི་སྲིད་པའི་ཕྱིར། སྨོན་ལམ་འདི་ཡི་འབྲས་བུ་རྫོགས་ཟིན་ནས་ཟད་པ་ནི་མི་སྲིད་པ། དེས་ན་སེམས་ཅན་མཐའ་ཡས་པ་ཞིག་རྒྱུན་མི་འཆད་པར་གྲོལ་བར་འགྱུར་ཡང༌། སེམས་ཅན་གྱི་ཁམས་ལ་འཕེལ་འགྲིབ་མེད་དེ་མི་ཟད་པ་བཞིན་དུ། སྨོན་ལམ་འདི་ཡང་ཇི་ལྟར་སྨོན་པ་དང་མཐུན་པའི་གཞན་དོན་རླབས་ཆེན་རྒྱུན་མི་འཆད་པའི་འབྲས་བུ་འབྱིན་བཞིན་དུ་ཕྱི་མའི་མུ་མཐར་ཐུག་པར་སྤྱད་དུ་ཟིན་ཀྱང༌། དེའི་འབྲས་བུ་ཟད་ཅིང་རྫོགས་པ་
ནི་མི་སྲིད་དོ། །དེས་ན་སྨོན་ལམ་རྫོགས་པ་ནི་འགྲུབ་རུང་ཐམས་ཅད་འགྲུབ་ནུས་པའི་དོན་ཡིན། སྔར་རྫོགས་ཟིན་པའི་དོན་མིན་ནོ། །ཚིགས་བཅད་འདི་ཡང་སྨོན་ལམ་གྱི་ངོ་བོ་ཤིན་ཏུ་བཟང་ཞིང་རྒྱ་ཆེ་བར་སྟོན་པ་ཡིན་པས་དང༌། གྲུབ་འབྲས་ཀྱི་ཆེ་བ་སྟོན་པ་ཡིན་པའི་ཕྱིར། ཕན་ཡོན་གྱི་དོན་ཚན་དུ་འདུས་སོ་སྙམ་པ་ནི་བདག་གི་རྣམ་པར་རྟོག་པའོ། ཁ་ཅིག་སྨོན་ལམ་ཇི་ཙམ་དུ་འདེབས་པའི་ཚད་བསྟན་པ་ཟེར་ཏེ་མི་ལེགས་སོ། །གཉིས་པ་ཕན་ཡོན་དངོས་བསྟན་པ་ལ། མདོར་བསྟན་པ་དང༌། རྒྱས་པར་བཤད་པ་དང༌། དོན་བསྡུ་གསུམ་མོ། །དང་པོ་ནི། གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །ལྷ་དང་མི་ཡི་བདེ་བའི་མཆོག་རྣམས་ཀྱང༌། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང༌། །ལན་ཅིག་ཙམ་ཡང་དད་པ་བསྐྱེད་པ་ནི། །བསོད་ནམས་དམ་པའི་མཆོག་ཏུ་འདི་འགྱུར་རོ། །འདིས་ནི་བསོད་ནམས་ཁྱད་པར་དུ་འཕགས་པ་ཡོངས་སུ་སྡུད་པ་བསྟན་ཏེ། མཆོད་པའི་ཡུལ་ཞིང་གི་མཆོག་སངས་རྒྱས་ལ། མཆོད་པའི་དངོས་པོ་རྒྱ་ཆེ་བ་སྣ་ཚོགས་ཕན་བྱེད་མང༌། ཞེས་པ་ལྟར། ཁྱད་པར་བཞི་ལྡན་ཕུལ་བ་དེ་འཇིག་རྟེན་དུ་བསོད་ནམས་ཆེས་ཆེ་བར་གྲགས་ན། དེ་བས་བསྔོ་བ་འདི་ལ་མོས་པ་བསྐྱེད་པ་ཡང་ཕན་ཡོན་ཆེ་སྟེ། འདི་ལ་འདི་དང་ཕྱི་མའི་ཕན་ཡོན་གཞན་མཐའ་ཡས་ཡོད་པ་ནི་སྨོས་ཀྱང་ཅི་དགོས། ཞེས་པའི་དོན་ཏེ། གང་ཡང་ཕྱོགས་
བཅུའི་འཇིག་རྟེན་གྱི་ཁམས་ཞིང་ཁམས་མཐའ་ཡས་པ་རབ་ཏུ་རྒྱ་ཆེ་བ་རྣམས། མཆོད་པའི་ཁྱད་པར་སྣ་ཚོགས་པ། རྒྱལ་སྲིད་རིན་པོ་ཆེ་སྣ་བདུན་དང༌། ཨིནྡྲ་ནཱི་ལའི་རི་བོ་ལ་སོགས་པ། རིན་པོ་ཆེའི་རྒྱན་སྣ་ཚོགས་པས་བརྒྱན་ཅིང་བཀང་ནས། དེ་ལས་གཞན་ཕན་པར་བྱེད་པའི་དངོས་པོ། ལྷ་དང་མིའི་བདེ་བའི་རྒྱུ་མཆོག་སྟེ། ཁ་ཟས་དང་གོས་དང་གནས་ཁང་དང་བང་མཛོད་དང༌། བཞོན་པ་དང༌། འབྲུ་དང༌། གཞན་ཡང་འདོད་པའི་ཡོན་ཏན་མཐའ་ཡས་པ་དང་བཅས་པའི་ཕྱོགས་བཅུའི་ཞིང་ཁམས་དེ་དག་རྣམས་ཀྱང༌། གྲངས་ཆེས་མང་བ་ཞིང་གི་རྡུལ་སྙེད་དང༌། དུས་མང་བ་བསྐལ་པའི་བར་དུ་རྒྱུན་མི་འཆད་པར། ཞིང་གི་དམ་པ་རྒྱལ་བ་རྣམས་ལ་ཕུལ་ན་བསོད་ནམས་ཤིན་ཏུ་ཆེའོ་ཞེས་གྲགས་སོ། །དེ་ནི་གོང་དུ་སྨོས་པ་ལྟར། གཞི་དང་མཚམས་སྦྱོར་དང༌། འཛིན་བྱེད་དང༌། སྒྱུར་བ་ཁྱད་པར་ཅན་བཞི་པོ་དེས་མ་ཟིན་ཅིང༌། བྱང་ཆུབ་ཏུ་མ་བསྔོས་ན་ནན་ཏར་ན་དེ་ཙམ་དུ་ཆེས་ཆེ་བ་མ་ཡིན་ཏེ། བསོད་ནམས་དེ་ཡང་ཟག་པ་དང་བཅས་པ་དང༌། རྣམ་སྨིན་མྱོང་ནས་ཟད་པར་འགྱུར་བའི་ཕྱིར་རོ། །དེ་བས་ནི་འདི་བཟང་སྟེ་གང་གིས་བཟང་པོ་སྤྱོད་པ་བསྔོ་བའི་རྒྱལ་པོ་འདི། ཐོས་ཤིང་ཐོས་བྱུང་གི་ཤེས་རབ་ཀྱིས་གོ་ནས་བླ་ན་མེད་པའི་བྱང་ཆུབ་མཆོག་གི་རྗེས་སུ་རབ་ཏུ་མོས་པ་སྟེ། བྱང་ཆུབ་ལ་མཐའ་ཡས་པའི་ཡོན་ཏན་དང་ལྡན་པར་ངེས་ཤེས་སྐྱེས་ཤིང༌། དེས་དྲངས་ཏེ་སྙིང་ཐག་པ་ནས་བྱང་ཆུབ་ལ་དང་བའི་དད་པ་ལན་ཅིག་ཙམ་ཡང་སྐྱེད་
ཅིང་སྨོན་ལམ་འདེབས་པ་དེ་ནི། སྔ་མ་དེ་བས་ཆེས་ཁྱད་པར་དུ་འཕགས་པའི་བསོད་ནམས་དམ་པའི་མཆོག་ཏུ་འགྱུར་ཏེ། དད་པ་པོའི་དད་པས་སྨོན་ལམ་འདེབས་པ་པོ་འདི་ནི་དེ་འདྲར་འགྱུར་བའོ། །ཡང་ན་འདིར་དད་པ་བསྐྱེད་པ་ཁོ་ནའི་ཕན་ཡོན་ལ་སྦྱར་ཀྱང་ཆོག་སྟེ། གཞུང་གི་དངོས་བསྟན་དེ་ཙམ་ཡིན་པའི་ཕྱིར་རོ། །དེ་ལས་དེ་མཆོག་ཡིན་པའི་རྒྱུ་མཚན་ནི་ཕྱི་མ་འདི་ནི་ཟག་པ་མེད་པའི་དགེ་བ་ཡིན་པ་དང༌། འདི་ལས་ངེས་པར་སངས་རྒྱས་ཀྱི་ས་བོན་ཐེབས་ནས། ཕུགས་ཀྱི་འབྲས་བུ་མི་ཟད་པའི་ཕྱིར་རོ། །རྗེས་སུ་མོས་པའི་དོན་ནི། བྱང་ཆུབ་ཉིད་ཀྱི་གནས་ཚུལ་དང་མཐུན་པར། མོས་པ་བྱས་པའི་དོན་ཡིན་ཏེ། མོས་པ་གང་དག་མོས་ཡུལ་དངོས་པོའི་རྗེས་སུ་མི་འགྲོ་བ། ལྷ་ནག་པོ་དང་དྲག་པོ་དབང་ཕྱུག་ལ་སོགས་པ་ཉོན་མོངས་ཀུན་ཏུ་སྤྱོད་པ་ལ་ཉོན་མོངས་མེད་པར་འདོད་པ་སོགས་མོས་པ་དངོས་པོ་དང་རྗེས་སུ་མི་མཐུན་པ་དེ་རྣམས་དགག་པའི་དོན་ནོ། །ཐོས་ནས་ཞེས་པས། དོན་མ་གོ་བ་དང༌། མོས་པ་དང་དད་པ་ཞེས་བསྟན་པས་གཞན་གྱིས་བསྐུལ་བ་དང་འགྲན་པའི་ཕྱིར་དང༌། གཡོམ་རྒྱུགས་སུ་སྨོན་ལམ་འདེབས་པ་སོགས། འདི་དག་ལ་དངོས་སུ་ཕན་ཡོན་ཆེན་པོ་དེ་ལྟ་བུ་མི་འབྱུང་ངོ༌། །ཞེས་པའི་དོན་ཏེ། འོན་ཀྱང་བསམ་པ་དག་པ་དང་མ་དག་པ་གང་ཡིན་ཡང་རུང་སྟེ། ཆོས་འདི་དང་འབྲེལ་པ་ཐོབ་པའི་ཕྱིར་མ་འོངས་པ་ན་དོན་ཆེན་པོ་དང་འཕྲད་པའི་རྒྱུ་ནི་ངེས་པར་ཡིན་ནོ། །གཉིས་པ་རྒྱས་བཤད་ནི། གང་གིས་བཟང་སྤྱོད་སྨོན་ལམ་འདི་བཏབ་
པ། །དེས་ནི་ངན་སོང་ཐམས་ཅད་སྤང་བར་འགྱུར། །དེས་ནི་གྲོགས་པོ་ངན་པ་སྤངས་པ་ཡིན། །སྣང་བ་མཐའ་ཡས་དེ་ཡང་དེས་མྱུར་མཐོང༌། །དེ་དག་རྙེད་པ་རབ་རྙེད་བདེ་བར་འཚོ། །མི་ཚེ་འདིར་ཡང་དེ་དག་ལེགས་པར་འོང༌། །ཀུན་ཏུ་བཟང་པོ་དེ་ཡང་ཅི་འདྲ་བར། །དེ་དག་རིང་པོར་མི་ཐོག་དེ་བཞིན་འགྱུར། །མཚམས་མེད་ལྔ་པོ་དག་གི་སྡིག་པ་རྣམས། །གང་གིས་མི་ཤེས་དབང་གིས་བྱས་པ་དག །དེ་ཡིས་བཟང་པོ་སྤྱོད་པ་འདི་བརྗོད་ན། །མྱུར་དུ་མ་ལུས་ཡོངས་སུ་བྱང་བར་འགྱུར། །ཡེ་ཤེས་དང་ནི་གཟུགས་དང་མཚན་རྣམས་དང༌། །རིགས་དང་ཁ་དོག་རྣམས་དང་ལྡན་པར་འགྱུར། །བདུད་དང་མུ་སྟེགས་མང་པོས་དེ་མི་ཐུབ། །འཇིག་རྟེན་གསུམ་པོ་ཀུན་ནའང་མཆོད་པར་འགྱུར། །བྱང་ཆུབ་ཤིང་དབང་དྲུང་དུ་དེ་མྱུར་འགྲོ། །སོང་ནས་སེམས་ཅན་ཕན་ཕྱིར་དེར་འདུག་སྟེ། །བྱང་ཆུབ་འཚང་རྒྱ་འཁོར་ལོ་རབ་ཏུ་བསྐོར། །བདུད་རྣམས་སྡེ་དང་བཅས་པ་ཐམས་ཅད་བཏུལ། །སྐྱེས་བུ་གང་གི་དད་པ་ཕུན་སུམ་ཚོགས་པ་དང་ལྡན་པས། ཕན་ཡོན་རྣམ་པ་བཅུ་གསུམ་པོ་འདི་དག་རིམ་གྱིས་ཐོབ་པར་འགྱུར་ཏེ། ཕན་ཡོན་དང་པོ་ནི། སྐྱེས་བུ་གང་ཞིག་གིས་སྨོན་ལམ་འདི་བརྩོན་པས་བཏབ་པར་བྱས་ན། ངན་སོང་དུ་སྐྱེ་འགྱུར་གྱི་སྡིག་པ་ཐམས་ཅད་བྱང་ནས། དེས་ནི་རེ་ཞིག་ལས་ཀྱི་དབང་གིས་ངན་སོང་དུ་འགྲོ་བ་ཐམས་ཅད་སྤངས་པར་འགྱུར་བའོ། །ཕན་ཡོན་གཉིས་པ་ནི། སྨོན་ལམ་འདི་འདེབས་པ་དེས་ནི། ཚེ་འདི་དང་ཕྱི་མ་ཐམས་ཅད་དུ་གྲོགས་པོ་ངན་པ་སྤངས་པ་
ཡིན་ཏེ། གྲོགས་ངན་པ་དང་འཕྲད་པར་མི་འགྱུར་ཞིང༌། སྔར་འཕྲད་པའི་རྒྱུན་དང་འབྲལ་བ་ཡིན་ནོ། །དེ་ལ་གྲོགས་པོ་ངན་པ་ནི་སྡིག་པའི་གྲོགས་པོ་ཉོན་མོངས་པ་འཕེལ་བར་བྱེད་ཅིང༌། ལས་ངན་སྡིག་པ་ལ་སྦྱོར་བར་བྱེད་པ་དང༌། ཚུལ་ཁྲིམས་དང་ཐོས་བསམ་སྒོམ་གསུམ་འཕེལ་བ་ལ་བར་དུ་གཅོད་པའི་བྱེད་པ་སྟེ། ཚེ་འདིའི་འདོད་ཡོན་དང༌། དགྲ་གཉེན་ལ་སོགས་པ་འཇིག་རྟེན་པའི་བྱ་བ་ལ་སྦྱོར་བའམ། ཐར་པའི་ལམ་དུ་རློམ་ཡང་རུང་སྟེ། ལྟ་བ་དང་སྤྱོད་པ་ལོག་པ་ལ་སྦྱོར་བ་དེ་དག་ནི་བླ་མའམ་རྗེ་དཔོན་ནམ། གྲོགས་ཐད་ཀར་མཉམ་པའམ། གཡོག་གམ་སློབ་མར་གྱུར་པ་ཡིན་ཡང་རུང་སྟེ། མི་དགེ་བའི་བཤེས་གཉེན་ནམ་སྡིག་པའི་གྲོགས་པོ་དང༌། བདུད་ཀྱི་དཔུང་གཉེན་ཞེས་བྱ་སྟེ། མེ་འབར་བའམ། སྤྲུལ་གདུག་རེག་པ་དུག་ཅན་ལྟར་རིང་དུ་སྤོང་དགོས་རྒྱུའོ། །དེ་འདྲ་བའི་སྡིག་གྲོགས་རང་མིན་ཡང༌། ཐེག་ཆེན་དུ་ཞུགས་པ་དག་ཐེག་དམན་དུ་སྦྱོར་བ་དང༌། ཟབ་པ་དང་རྒྱ་ཆེ་ལ་མོས་པ་དྲང་དོན་གྱི་ཆོས་ལ་སྦྱོར་བ་སོགས་ཀྱང་གྲོགས་ངན་ནོ། །ཕན་ཡོན་གསུམ་པ་ནི། སྣང་བ་མཐའ་ཡས་དེ་ཡང་དེས་མྱུར་མཐོང༌། །བཅོམ་ལྡན་འདས་དེ་བཞིན་གཤེགས་པ་སྣང་བ་མཐའ་ཡས་ཏེ་འོད་དཔག་ཏུ་མེད་པ་ཞིང་ཁམས་བདེ་བ་ཅན་དང་བཅས་པ་ཡང༌། གསོན་པའི་ཚེ་ལའང་མྱུར་དུ་མཐོང་བ་དང༌། སངས་རྒྱས་དེ་ལས་ཆོས་ཐོས་པ་དང༌། ཤི་ནས་ཀྱང་ཞིང་ཁམས་དེར་སྐྱེ་བའོ། །ཕན་ཡོན་བཞི་པ་ནི། སྨོན་ལམ་འདི་ལ་བརྩོན་པ་དེ་དག་དོན་
ཆེན་པོ་འགྲུབ་པའི་ཕྱིར་རྙེད་པ་རབ་ཏུ་རྙེད་པའམ། འབད་རྩོལ་མེད་པར་ཆོས་དང་ལྡན་པའི་ཟས་གོས་བསོད་སྙོམས་ལ་སོགས་པ་རབ་ཏུ་རྙེད་པ་སྟེ་འཕོངས་པ་མེད་པའོ། །ཕན་ཡོན་ལྔ་པ་ནི། བདེ་བར་འཚོ་བ་སྟེ་བདེ་བའི་དོན་ནི་ལེགས་པ་ཡིན་ལ། དེས་ན་ཚེ་གང་དུ་ལེགས་པར་སྤྱོད་པ། དགེ་བ་དང་མ་བྲལ་བས་འཚོ་བའམ། དགྲ་དང་གདོན་དང་ནད་ལ་སོགས་པའི་ཉེར་འཚེ་མེད་པས་བདེ་བར་འཚོ་བའོ། །ཕན་ཡོན་དྲུག་པ་ནི། མི་ཚེ་འདིར་ཡང་སྨོན་ལམ་འདེབས་པ་དེ་དགམིར་སྐྱེས་པ་དོན་ཡོད་པར་འགྱུར་བས་ལེགས་པར་འོངས་བ་སྟེ། མི་ཚེ་དོན་ལྡན་དུ་བྱུང་ཞེས་པའི་དོན་ནོ། །དེ་ཡང་འདིར་དགེ་བ་འཕེལ་བར་གྱུར་པས། སྐྱེ་བ་ཤིན་ཏུ་མང་པོར་བདེ་བའི་རྒྱུ་གྲུབ་ཟིན་པའི་དོན་ནོ། །ཡང་ན་སྨོན་ལམ་འདི་འདེབས་པ་དེ་དག་མི་ཚེ་འདིར་ཡང་ཚེ་རིང་བ་དང༌། ལོངས་སྤྱོད་ཆེ་བ་དང༌། འཁོར་དང་ཉེ་དུ་སོགས་རྩ་འཇིངས་རྒྱས་པ་དང༌། ལོ་ལེགས་པ་དང༌། གཞན་རྣམས་བྱམས་པ་དང༌། སྙན་པར་གྲགས་པ་སོགས་ལེགས་ཚོགས་ཐམས་ཅད་དང་ལྡན་པར་འོངས་ཏེ། འོངས་ཞེས་པ་འབྱུང་འགྱུར་ལ་བྱུང་བའི་སྒྲས་བསྟན་པའོ། །ཕན་ཡོན་བདུན་པ་ནི། ཀུན་ཏུ་བཟང་པོའི་སྤྱོད་པ་ཐོབ་པ་སྟེ། ཕན་ཡོན་དྲུག་པོ་དེ་ཙམ་དུ་མ་ཟད་འཕགས་པ་ཀུན་ཏུ་བཟང་པོ་ཡོན་ཏན་དང་རྣམ་པར་འཕྲུལ་པ་མཐའ་ཡས་པ། མཆོད་པ་དང་སྨོན་ལམ་རྒྱ་མཚོ་ལ་དབང་འབྱོར་པ་དེ་ཅི་འདྲ་བ་དེ་འདྲ་བར་ཡང༌། དུས་རིང་པོར་མི་ཐོགས་པར་སྨོན་ལམ་འདེབས་པ་དེ་དག་ཀུན་
བཟང་ཉིད་ཀྱིས་ཇི་ལྟར་ཡོན་ཏན་བརྙེས་པའི་གོ་རིམ་དང་མཐུན་པ་དེ་བཞིན་དུ་འགྱུར་རོ། །དེ་ལ་ཀུན་ཏུ་བཟང་པོའི་རྣམ་པར་ཐར་པ་ཅུང་ཟད་གྲུབ་པ་ནི། ས་དང་པོ་རབ་ཏུ་དགའ་བ་ནས་ཡིན་ལ། ཕལ་ཆེར་གྲུབ་པ་ནི་ས་བརྒྱད་པ་ནས་དང༌། ལེགས་པར་གྲུབ་པ་ནི་ས་བཅུ་པའོ། །ཕན་ཡོན་བརྒྱད་པ་ནི། ལས་སྒྲིབ་བྱང་བ་སྟེ། མཚམས་མེད་པ་ལྔ་པོ་དག་གི་ལས་ཀྱི་སྒྲིབ་པ་རྣམས་ལས། གང་ཡང་རུང་བ་ཞིག་སྐྱེས་བུ་གང་གི་སྡིག་པའི་ཉེས་དམིགས་མི་ཤེས་པའི་དབང་གིས་སྔ་རོལ་ཏུ་བྱས་པ་དག ཕྱིས་དེ་ཡིས་དད་པ་བསྐྱེད་ནས་བཟང་པོ་སྤྱོད་པ་འདི་སྙིང་ཐག་པ་ནས་བརྗོད་ན། དེ་ཡི་མཚམས་མེད་ཀྱི་སྡིག་པ་དེ་དག་མ་ལུས་པ་མྱུར་དུ་ཡོངས་སུ་བྱང་བར་འགྱུར་བའོ། །མི་དགེ་བའི་ལས་ཐམས་ཅད་དུག་གསུམ་གང་རུང་གིས་འཕེན་ཞིང་སྦྱོར་བ་ཡིན་ལ། འདོད་ཆགས་དང་ཞེ་སྡང་གིས་འཕེན་ཞིང་སྦྱོར་བ་རྣམས་ལའང༌། གཏི་མུག་གིས་འཕེན་པ་སྔོན་དུ་འགྲོ་དགོས་པས་སྡིག་པ་ཐམས་ཅད་མི་ཤེས་པའི་དབང་གིས་བྱས་པའོ། །བྱང་ཆུབ་ཏུ་སེམས་བསྐྱེད་ཅིང་དད་པས་སྨོན་ལམ་འདི་ཡང་ཡང་བཏབ་པས། མཚམས་མེད་བྱས་པའང་ཚེ་འདི་ལ་བྱང་བར་ནུས་ན། སྡིག་པ་ཕྲ་མོ་རྣམས་ལྟ་སྨོས་ཀྱང་ཅིག་དགོས་སོ། །ཕན་ཡོན་དགུ་པ་ནི། ཡེ་ཤེས་ཕུན་སུམ་ཚོགས་པ་ཐོབ་པ་སྟེ། གོང་དུ་བསྟན་པ་ལྟར་ཁྱད་པར་བཞི་ལྡན་གྱི་བསྔོ་བ་འདིས་ཡོངས་སུ་བསྔོ་བ་ནི། འཕགས་པའི་ཡེ་ཤེས་རྣམ་པར་མི་རྟོག་པ་ཐོབ་པའི་རྒྱུ་དྲུག་པོ་ཡིན་ལ། དང་ནི་ཞེས་པ་གཟུགས་སོགས་དང་སོ་སོར་འབྱེད་པའི་ཚིག་
གོ །ཕན་ཡོན་བཅུ་པ་ནི། ལུས་ཕུན་སུམ་ཚོགས་པ་སྟེ། ཡིད་ཀྱི་རང་བཞིན་གྱི་ལུས་ཀྱི་གཟུགས་དང༌། དེའི་ཡོན་ཏན་མཚན་བཟང་སུམ་ཅུ་རྩ་གཉིས་དང༌། དཔེ་བྱད་བརྒྱད་ཅུ་སྟེ་མཚན་གྱི་ཡོན་ཏན་བརྒྱ་དང་བཅུ་གཉིས་ལ་སོགས་པ་རྣམས་དང༌། འགྲོ་བ་དྲུག་ཏུ་སྐྱེས་པའི་ཚེ་ཡང༌། བྲམ་ཟེ་ཆེན་པོ་དང༌། རྒྱལ་རིགས་མཆོག་ལ་སོགས་པ། རིགས་ཕུན་སུམ་ཚོགས་པ། ཁ་དོག་གི་ཡོན་ཏན་རྣམས་དང་ལྡན་པའི་གཟུགས་མཛེས་པར་འགྱུར་བའོ། །ཡང་ན་ཁ་དོག་ནི། རྒྱ་སྐད་དུ་ཝརྞ་ཏེ་རུས་ལ་འཇུག་པས། གཽ་ཏ་མ་དང༌། འོད་སྲུང་ལ་སོགས་པ་བྲམ་ཟེ་དང༌། ཟླ་བའི་རིགས་དང༌། ཉི་མའི་རིགས་ལ་སོགས་པ་རྒྱལ་རིགས་ཀྱི་རུས་ཏེ། རུས་ཆེ་ཞིང་ཁུངས་བཙུན་པ་རྣམས་སོ། །ཕན་ཡོན་བཅུ་གཅིག་པ་ནི་ཐུབ་པར་དཀའ་བ་སྟེ། བདུད་དང་བདུད་ཀྱི་རིགས་ཀྱི་ལྷ་དང་འབྱུང་པོ་རྣམས་ཀྱིས་གླགས་ལྟ་བར་མི་ནུས་ཤིང༌། གང་སངས་རྒྱས་ཀྱི་བསྟན་པ་འདི་ལས་ཕྱི་རོལ་ཏུ་གྱུར་པ། ལྟ་བ་ངན་པའི་འཐིབས་པོ་ཅན་དེ་དག་ནི་མུ་སྟེགས་བྱེད་དེ། དེ་དག་གི་ཤེས་རབ་དང་སྟོབས་ཀྱིས་འདི་ཐུབ་པར་མི་འགྱུར་ལ། གཞན་དུ་ན་བདུད་དང་མུ་སྟེགས་དེ་དག་རྣམས་ཕར་ཟིལ་གྱིས་གནོན་པར་འགྱུར་རོ། །གཞུང་ཕལ་ཆེར་དུ། །བདུད་དང་མུ་སྟེགས་མང་པོས་དེ་མི་ཐུབ། །ཅེས་འབྱུང་བ་དང༌། འགྲེལ་པ་རྔོག་ལོ་ཆེན་པོས་བསྒྱུར་བ་ལྟར་ན། བདུད་དང་མུ་སྟེགས་ཚོགས་ཀྱིས་དེ་མི་ཐུབ། །ཅེས་འགྱུར་བ་དོན་ལ་འདྲ་བས་ཇི་ལྟར་བདེ་བར་
སྦྱར་རོ། །ཕན་ཡོན་བཅུ་གཉིས་པ་ནི། མཆོད་འོས་སུ་འགྱུར་བའི་ཡོན་ཏན་ཏེ། ས་འོག་དང་ས་སྟེང་དང་ནམ་མཁའ་ལ་སྤྱོད་པའམ་འཇིག་རྟེན་གསུམ་པོ་ཀུན་ན་ཡང་ལྷ་དང་མི་དང་འབྱུང་པོ་རྣམས་ཀྱིས་སྨོན་ལམ་འདི་འདེབས་པ་པོ་དེ་ལ་དངོས་དང་བརྒྱུད་པའི་སྒོ་ནས་མཆོད་པ་བྱེད་ཅིང༌། གུས་པ་དང་ཕན་འདོགས་པར་འགྱུར་རོ། །ཕན་ཡོན་བཅུ་གསུམ་པ་ནི། མཐར་ཐུག་གི་ཕན་ཡོན་ནོ། །སྨོན་ལམ་འདི་འདེབས་པར་བྱེད་ཅིང་བཏབ་པ་མཐར་ཕྱིན་པའི་ཕན་ཡོན་ནི། ཚོགས་གཉིས་ཡོངས་སུ་རྫོགས་ནས་བླ་ན་མེད་པའི་བྱང་ཆུབ་ཐོབ་པར་འགྱུར་བ་སྟེ། དེ་ནི་བྱང་ཆུབ་ཀྱི་ཤིང་གི་དབང་པོའི་དྲུང་དུ་མྱུར་དུ་འགྲོ་ཞིང༌། སོང་ནས་སེམས་ཅན་ཐམས་ཅད་ལ་ཕན་པའི་ཕྱིར་ཤིང་དྲུང་དེར་འདུག་སྟེ། བདུད་ཀྱི་རྒྱལ་པོ་རྣམས་རང་རང་གི་འཁོར་གྱི་སྡེ་དང་བཅས་པ་ཐམས་ཅད་བཏུལ་ནས། བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། ཆོས་ཀྱི་འཁོར་ལོ་རབ་ཏུ་བསྐོར་བར་འགྱུར་རོ། །དེ་ལྟར་ན་བྱང་ཆུབ་ཀྱི་སྙིང་པོར་གཤེགས་པ་དང༌། བདུད་འདུལ་བ་དང༌། སངས་རྒྱས་པ་དང༌། ཆོས་འཁོར་བསྐོར་བ་སྟེ། མཛད་པ་བཞི་པོ་དངོས་སུ་བསྟན་པས། མཛད་པ་མཐའ་ཡས་པ་ཐམས་ཅད་ཀྱང་ཤུགས་ལ་གོ་བའི་ཕྱིར་རོ། །འདིར་འགྲོ་བ་རྣམས་ཀྱི་གོ་རིམ་འདི་ལྟར་དུ་མཛད་པ། མཛད་པ་བཅུ་གཉིས་ཀྱི་རིམ་པ་དང་མཐུན་ཞིང༌། གཞུང་གི་དཀྱུས་ལྟར་ན་བདུད་བཏུལ་བའི་མཛད་པ་ནི། བྱང་ཆུབ་སྙིང་པོར་བདུད་བཏུལ་བ་གཅིག་པུར་མ་ཟད། སྔ་ཕྱི་ཐམས་ཅད་དུ་བདུད་ཀྱི་
ལས་ཡང་དང་ཡང་དུ་འཇོམས་པར་མཛད་པ་ཉིད་ཡིན་ཏེ། མདོ་སྡེ་ཉི་མའི་སྙིང་པོ་དང༌། འདུས་པ་རིན་པོ་ཆེ་ཏོག་ལ་སོགས་པ་ལས་འབྱུང་བ་ལྟ་བུ་སྟེ། སྔ་ཕྱི་ཐམས་ཅད་དུ་སྦྱོར་དགོས་པའི་ཕྱིར། མཇུག་ཏུ་སྨོས་པ་ཡིན་པས། སངས་རྒྱས་གཉིས་པ་ལྟ་བུའི་ལོ་ཙཱ་བ་ཡེ་ཤེས་སྡེས་ཀྱང་དེ་བཞིན་དུ་བཤད་དོ། །བྱང་ཆུབ་ཀྱི་སྙིང་པོར་གཤེགས་པ་ལ་སོགས་པ་འདི་རྣམས། གཙོ་བོར་གཟུགས་ཀྱི་སྐུ་མཆོག་གི་སྤྲུལ་སྐུའི་མཛད་པ་ཡིན་མོད་ཀྱི། དེས་དེ་ལྟར་སྟོན་པ་ལ་རྒྱུ་ནི་འོག་མིན་གྱི་གནས་སུ་ལོངས་སྤྱོད་རྫོགས་པའི་སྐུའི་རྣམ་འཕྲུལ་ལ་ཡང་དེ་བཞིན་དུ་འཆར་བ་ཡིན་ནོ། །ལོངས་སྐུ་རྟག་ཏུ་བཞུགས་པ་དང༌། འོག་མིན་གྱི་གནས་སུ་བདུད་ཀྱི་འཇུག་པ་མེད་པས། ཡབ་ཡུམ་གྱི་སྐྱེ་བ་སྟོན་པ་དང་བདུད་འདུལ་བ་སོགས་ལོངས་སྐུའི་མཛད་པ་ལ་མི་འགྲིག་གོ་སྙམ་པ་ནི་ཤིན་ཏུ་བློ་ཆུང་དུ་གནས་འདི་དག་ལ་མུན་པར་གྱུར་པའི་གཏམ་ཡིན་ཏེ། ལོངས་སྐུ་དེའི་བ་སྤུའི་ཁུང་བུ་གཅིག་ལ་ཡང༌། ཕྱོགས་བཅུ་དུས་གསུམ་གྱི་སངས་རྒྱས་ཀྱི་མཛད་པ་མཐའ་དག་སྟོན་པ་ཡིན་པའི་ཕྱིར། དེ་ཙམ་གྱིས་ལོངས་སྐུ་མྱ་ངན་ལས་འདས་པར་མི་འགྱུར་ཞིང༌། དེ་ན་བདུད་ཡོད་པར་ཐལ་བ་ཡང་མ་ཡིན་ནོ། །དེ་ལྟར་ན་ཕན་ཡོན་དང་པོ་གཉིས་དང༌། བརྒྱད་པ་ལས་སྒྲིབ་བྱང་བ་སྟེ། གསུམ་པོ་དེ་ནི་མི་མཐུན་ཕྱོགས་སྤངས་པ་དང༌། བཞི་པ་རྙེད་པ་དང༌། ལྔ་པ་འཚོ་བ་དང༌། དྲུག་པ་ལེགས་པར་ཐོབ་པ་སྟེ་གསུམ་པོ་དེ་ནི། མཐུན་རྐྱེན་འབྱོར་བའི་ཕན་ཡོན་ཏེ། དེ་ལྟར་དྲུག་ནི། ལས་
དང་པོ་པ་ཉིད་ནས་འཕྲལ་དུ་འབྱུང་བ་རྣམས་སོ། །གཟུགས་ཕུན་སུམ་ཚོགས་པ་དང༌། མཆོད་འོས་སུ་གྱུར་པ་ནི། གཙོ་བོར་སྨོན་ལམ་ལ་བརྩོན་པ་ནས་བཟུང་བའི་སྐྱེ་བ་གཉིས་པ་ཕན་ཆད་དུའོ། །ཐུབ་པར་དཀའ་བ་ཡང༌། འདི་དང་ཕྱི་མ་གཉིས་ཀར་ན་སྟེ། དེའི་ཕྱོགས་གཅིག་ཕར་ཟིལ་གྱིས་མནན་པ་ནི། ཕྱི་མ་ཕན་ཆད་དོ། །བདུན་པ་ཀུན་བཟང་གི་སྤྱོད་པ་ལ་འཇུག་པ་དང༌། བཅུ་པ་གཟུགས་ཕུན་སུམ་ཚོགས་པའི་ཕྱོགས་གཅིག་ཡིད་ཀྱི་ལུས་ནི། ས་ཐོབ་པའི་དུས་ཀྱི་ཕན་ཡོན་ནོ། །བཅུ་གསུམ་པ་ནི་སངས་རྒྱས་ཐོབ་པའི་དུས་ཀྱི་སྟེ། ཕན་ཡོན་བཅུ་གསུམ་པོ་ཡང་མཐོང་བའི་ཆོས་ལ་འབྱུང་བའི་ཕན་ཡོན་དང༌། ཚེ་ཕྱི་མ་སོ་སོ་སྐྱེ་བོའི་གནས་སྐབས་ཀྱི་དང༌། འཕགས་པའི་ས་ཐོབ་པའི་དང༌། མཐར་ཐུག་གི་གནས་སྐབས་ཀྱི་ཕན་ཡོན་ཏེ་སྡེ་ཚན་བཞིར་འདུས་པ་ཡིན་ནོ། །གསུམ་པ་དོན་བསྡུ་ནི། གང་ཡང་བཟང་པོ་སྤྱོད་པའི་སྨོན་ལམ་འདི། །འཆང་པ་དང་ནི་སྟོན་ཏམ་ཀློག་པ་ཡི། །དེ་ཡི་རྣམ་པར་སྨིན་པ་སངས་རྒྱས་མཁྱེན། །བྱང་ཆུབ་མཆོག་ལ་སོམ་ཉི་མ་བྱེད་ཅིག །སྐྱེས་བུ་གང་ཡང་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་འདིའི། དོན་དང་ཚིག་དང་གླེགས་བམ་གུས་པས་འཆང་བ་དང་ཁ་ཏོན་དུ་འདོན་པ་དང༌། གླེགས་བམ་ཀློག་པར་བྱེད་ན་ཡང་རུང་སྟེ། དེ་ཡི་རྣམ་པར་སྨིན་པ་སྟེ་འབྲས་བུ་ནི། མཐའ་ཡས་ཤིང་བསམ་གྱིས་མི་ཁྱབ་སྟེ། ཇི་ལྟ་བ་བཞིན་དུ་ནི་སངས་རྒྱས་ཁོ་ནས་མཁྱེན་གྱི། ཉན་ཐོས་དང་རང་རྒྱལ་གྱི་ཡང་སྤྱོད་ཡུལ་
མ་ཡིན་ན། སོ་སོ་སྐྱེ་བོ་རྣམས་ཀྱི་ལྟ་སྨོས་ཀྱང་ཅི་དགོས། དེའི་འབྲས་བུ་མཐར་ཐུག་པ། བྱང་ཆུབ་ཀྱི་མཆོག་བླ་ན་མེད་པར་ཐོབ་པར་འགྱུར་བ་ལ། སོམ་ཉི་མ་བྱེད་ཅིག་སྟེ་ཐེ་ཚོམ་མེད་པའོ། །འདིར་ཤཱཀྱ་བཤེས་གཉེན་གྱི་འགྲེལ་པ་ལས་ནི་རྒྱུ་མཐུན་པའི་འབྲས་བུ་མངོན་པར་མཐོ་བའི་ཕུན་སུམ་ཚོགས་པ་མཐའ་དག་ནི། ཉན་རང་སོགས་ཀྱིས་བསམ་གྱིས་མི་ཁྱབ་པ་དང༌། བསོད་ནམས་ཀྱི་རྒྱུ་མཐུན་པའི་འབྲས་བུ་བྱང་ཆུབ་མཆོག་ཅེས་འཆད་དོ། །རྩ་བའི་བཞི་པ་ཕན་ཡོན་ཅན་གྱི་སྨོན་ལམ་ཉིད་བསྔོ་བ་ལ། སྲས་བྱང་སེམས་ཀྱིས་བསྔོས་པ་ལ་འཇུག་པ། རྒྱལ་བས་བསྔོས་པ་ལ་འཇུག་པ། སྨོན་ལམ་གྱི་འབྲས་བུ་མངོན་གྱུར་དུ་བསྔོ་བ། དངོས་སུ་ལུང་བསྟན་ཐོབ་པར་བསྔོ་བ། སེམས་ཅན་ལ་ཕན་པ་སྒྲུབ་པར་བསྔོ་བ་སྟེ་ལྔ་ལས། དང་པོ་ནི། འཇམ་དཔལ་ཇི་ལྟར་མཁྱེན་ཅིང་དཔའ་བ་ལྟར། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང༌། །དགེ་བ་འདི་དག་ཐམས་ཅད་རབ་ཏུ་བསྔོ། །འདི་ལ་དཔེ་ཕལ་ཆེར་ནས། འཇམ་དཔལ་ཇི་ལྟར་མཁྱེན་ཅིང་དཔའ་བ་ལྟར་ཞེས་འབྱུང་བ་ལྟར་ན། ཇི་ལྟར་འཇམ་དཔལ་ཤེས་བྱ་ཐམས་ཅད་མཁྱེན་ཅིང་འགྲོ་བའི་དོན་ལ་དཔའ་བ་ལྟར། དེ་ལྟར་ཀུན་ཏུ་བཟང་པོ་ཡང་ངོ་ཞེས་པར་འགྱུར་ལ། འགྱུར་འདི་ལྟར་ལ་དཔའ་བ་དང་ཟེར་པ་ཡིག་ནོར་ཙམ་མོ། །རྒྱ་འགྲེལ་རྣམས་དང་མཁན་པོ་ཡེ་ཤེས་སྡེའི་འགྲེལ་པ་ལས། འཇམ་དཔལ་དབའ་བོས་ཇི་ལྟར་མཁྱེན་པ་དང༌།
ཞེས་འདོན་པ་ལྟར་ན། འཕགས་པ་འཇམ་དཔལ་བདུད་ཀྱི་སྡེ་འཇོམས་པ་དང༌། འགྲོ་བའི་དོན་སྤྱོད་པ་དང༌། ཤེས་རབ་མཆོག་གིས་དངོས་པོར་འཛིན་པ་འཇོམས་པ་ལ། དཔའ་བོར་གྱུར་པ་དེས། ཇི་ལྟར་བསྔོ་བ་ཐུགས་སུ་ཆུད་ཅིང་མཁྱེན་པ་དང༌། འཕགས་པ་ཀུན་ཏུ་བཟང་པོ་དེ་ཡང་དེ་བཞིན་དུ་དཔའ་བོ་ཆེན་པོ་ཡིན་ལ། བསམ་གྱིས་མི་ཁྱབ་པའི་བསྔོ་བ་ཐུགས་སུ་ཆུད་པ་ཡང་དེ་བཞིན་ཏེ། བྱང་ཆུབ་སེམས་དཔའི་མཆོག་དེ་དག་ཀུན་གྱི་རྗེས་སུ་སྟེ། དེ་དང་འདྲ་བར་བདག་ཀྱང་སློབ་པར་འདོད་ཅིང་འདུན་པའི་བསམ་པས། བཟང་པོ་སྤྱོད་པའི་སྨོན་ལམ་བཏབ་པའི་དགེ་བ་ཇི་སྙེད་མཆིས་པ་འདི་དག་ཐམས་ཅད་རབ་ཏུ་བསྔོ་བར་བགྱིའོ། །གཉིས་པ་ནི། དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང༌། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །དུས་གསུམ་དུ་སེམས་ཅན་གྱི་དོན་ལ་བྱོན་ཅིང་གཤེགས་པའི་རྒྱལ་བ་ཐམས་ཅད་ཀྱིས་མཆོག་ཏུ་བསྔགས་ཤིང་བསྟོད་པའི་བསྔོ་བའི་རྒྱལ་པོ་བཟང་ཞིང་རྒྱ་ཆེ་བའི་བསྔོ་བ་མཐའ་ཡས་པ་གང་དང་གང་ལ། མཆོག་ཏུ་བསྔགས་པར་མཛད་པའི་བསྔོ་བ་དེ་རྣམས་ཀྱིས། བདག་གིས་སྨོན་ལམ་འདི་བཏབ་པ་ལ་སོགས་པའི་དགེ་བའི་རྩ་བ་འདི་ཀུན་ཀྱང༌། ཀུན་ཏུ་བཟང་པོའི་སྤྱོད་པ་ཐོབ་པའི་ཕྱིར་རབ་ཏུ་བསྔོ་བར་བགྱིའོ་སྟེ། དེའི་དོན་ནི་བདག་གི་དགེ་བའི་རྩ་བ་འདི། སངས་རྒྱས་རྣམས་ཀྱི་སྨོན་ལམ་དང་གཅིག་ཏུ་འདྲེས་ཏེ། དགེ་རྩ་འདིས་སྨོན་ལམ་དེ་རྣམས་འགྲུབ་པར་
གྱུར་ཅིག །དེ་རྣམས་ཀྱིས་ཀྱང་འདི་འགྲུབ་པར་གྱུར་ཅིག་ཅེས་དང༌། སྨོན་ལམ་དེ་རྣམས་ཀྱི་གྲུབ་འབྲས་ཀྱང་ཀུན་ཏུ་བཟང་པོའི་སྤྱོད་པའོ། །འཇམ་དཔལ་དཔའ་བོས་ཞེས་སོགས་ཚིགས་བཅད་འདི་གཉིས་ནི། བསྔོ་བ་མ་ལུས་པ་ཐམས་ཅད་འདུས་པའི་ཕྱིར། བླ་ན་མེད་པའི་བསྔོ་བའོ། །གསུམ་པ་ནི། བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །དེར་སོང་ནས་ནི་སྨོན་ལམ་འདི་དག་ཀྱང༌། །ཐམས་ཅད་མ་ལུས་མངོན་དུ་འགྱུར་བར་ཤོག །དེ་ལྟར་མ་ལུས་བདག་གིས་ཡོངས་སུ་བསྐང༌། །འཇིག་རྟེན་ཇི་སྲིད་སེམས་ཅན་ཕན་པར་བགྱི། །བདག་ནི་ནམ་ཞིག་འཆི་བའི་དུས་བྱེད་པར་གྱུར་པ་ན། ལས་དང་ཉོན་མོངས་པའི་སྒྲིབ་པ་ཐམས་ཅད་དག་ནི་ཕྱིར་བསལ་ཞིང་མེད་པར་བྱས་པ་སྟེ། སྒྲིབ་པ་སྤྱི་དང་ཁྱད་པར་དུ་འགྱོད་པ་ལ་སོགས་པའི་སྒྲིབ་པ་ལྔ་པོ་དང༌། སངས་རྒྱས་མངོན་སུམ་དུ་མཐོང་བ་ལ་བར་དུ་གཅོད་པའི་སྒྲིབ་པ་རྣམས་བྱང་བའོ། །དེ་ནས་སངས་རྒྱས་སྣང་བ་མཐའ་ཡས་དེ་མངོན་དུ་མཐོང་བར་འགྱུར་ལ། དེ་མཐོང་བས་ཀྱང་སླར་ཡང་སྒྲིབ་པ་མང་པོ་ཞིག་ནི་དག །ཏིང་ངེ་འཛིན་གྱི་སྒོ་དུ་མ་ཐོབ་ནས། གནར་གཅོད་ལ་སོགས་པའི་སྡུག་བསྔལ་མེད་ཅིང༌། འཆི་བའི་སེམས་དེ་ཡང་རབ་ཏུ་རྣམ་པར་དཀར་བའི་ཏིང་ངེ་འཛིན་དུ་མ་དང་བཅས་པར་འགྱུར་ཞིང༌། དེ་སོང་མ་ཐག་ཏུ་གཞན་འཕྲུལ་དབང་བྱེད་ཀྱི་ལྷའི་རྒྱལ་
པོའི་ལུས་དང་མཚུངས་པའི་བར་དོའི་ལུས་གྲུབ་ནས། སྐད་ཅིག་ཐང་ཅིག་ཡུད་ཙམ་དེ་ལ་བདེ་བ་ཅན་གྱི་ཞིང་ཁམས་དེར་རབ་ཏུ་འགྲོ་ཞིང༌། དེར་སོང་ནས་ནི་རིན་པོ་ཆེའི་པདྨའི་ཟེའུ་འབྲུའི་ཁང་པར་བརྫུས་ཏེ་སྐྱེ་བ་བླང་ནས། བཟང་པོ་སྤྱོད་པའི་སྨོན་ལམ་བཏབ་པ་འདི་རྣམས་ཀྱི་འབྲས་བུ་དེ་དག་ཀྱང་ཐམས་ཅད་མ་ལུས་པ་མངོན་དུ་འགྱུར་ཞིང་འགྲུབ་པར་ཤོག་ལ། དེ་ལྟར་བདག་གི་སྨོན་ལམ་གྱི་འབྲས་བུ་དེ་དག་མ་ལུས་པ་རང་རྒྱུད་ལ་དགོས་པ་རྣམས་ཀྱང་ཡོངས་སུ་བསྐང་ཞིང་རྫོགས་ལ། སེམས་ཅན་གཞན་རྣམས་ཀྱི་དོན་དུ་དགོས་པ་ཀུན་ཀྱང༌། ཡོངས་སུ་རྫོགས་ཤིང་རེ་བ་བསྐོང་བར་བྱས་ནས། འཇིག་རྟེན་ཇི་སྲིད་མ་སྟོངས་པ་དེ་སྲིད་དུ། སེམས་ཅན་རྣམས་ལ་ཕན་པ་མཐའ་ཡས་པ་རྟག་ཏུ་བགྱིད་པར་གྱུར་ཅིག བཞི་པ་ནི། རྒྱལ་བའི་དཀྱིལ་འཁོར་བཟང་ཞིང་དགའ་བ་རེད། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །རྒྱལ་བ་འོད་དཔག་ཏུ་མེད་པའི་ཞིང་ཁམས་ཕུན་སུམ་ཚོགས་པ་དེར་སྤྱོད་པའི་འཁོར་གྱི་དཀྱིལ་འཁོར་བདེ་ཞིང་སྐྱིད་པས་བཟང་ཞིང་དགའ་བའམ། ཡང་ན་གཟུགས་བཟང་ཞིང་ཡིད་ཡོན་ཏན་གྱིས་དགའ་བར་གྱུར་པ་ཞེས་འཆད་པ་ལྟར་རམ། ཡོན་ཏན་ཐམས་ཅད་ཀྱིས་རྣམ་པར་བརྒྱན་ཅིང༌། གནས་ངན་ལེན་གྱི་སྤྱོད་པ་སྤངས་པས་བཟང་བ། ནང་དུ་ཏིང་ངེ་འཛིན་གྱི་དགའ་བ་དང༌། ཕྱི་རོལ་ཏུ་སྨོན་ལམ་གྱི་སྟོབས་ལས་གྲུབ་པའི་གནས་དང་ཡོ་བྱད་དང་འདོད་པའི་ཡོན་ཏན་ཐམས་
ཅད་ཀྱིས་དགའ་བར་གྱུར་པ་རྣམས་ཀྱི་དབུས་དེར། པདྨོ་དམ་པ་རིན་པོ་ཆེའི་པདྨོ་ཤིན་ཏུ་མཛེས་པ་ལས། བརྫུས་ཏེ་སྐྱེས་ནས་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་རྒྱལ་བ་སྣང་བ་མཐའ་ཡས་ཀྱིས་མངོན་སུམ་དུ་ཁྱོད་འཇིག་རྟེན་ཁམས་འདི་ཞེས་བྱ་བར་བསྐལ་པ་འདི་ཞེས་བྱ་བ་ལ། སངས་རྒྱས་འདི་ལྟ་བུར་འགྱུར་རོ་ཞེས་ལུང་སྟོན་པ་ཡང་བདག་གིས་དུས་དེ་སྐབས་སུ་དང་གནས་དང་གྲོགས་ཀྱི་ཁྱད་པར་འཁོར་གྱི་དཀྱིལ་འཁོར་དེར་ཐོབ་པར་ཤོག་ཅིག་པའོ། །ལྔ་པ་ནི། དེར་ནི་བདག་གིས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང༌། །སེམས་ཅན་རྣམས་ལ་ཕན་པ་མང་པོ་བགྱིད། །བདེ་བ་ཅན་གྱི་ཞིང་དེར་ནི་སྨོན་ལམ་འདེབས་པ་པོ་བདག་གིས། ལུང་བསྟན་དེ་ལྟ་བུར་རབ་ཏུ་ཐོབ་ནས། སྤྲུལ་པ་མང་པོ་བྱེ་བ་ཕྲག་རྒྱ་ལ་སོགས་པ་མཐའ་ལས་འདས་པ་ཡིས། གཞན་དོན་ལ་གཅིག་ཏུ་གཞོལ་བའི་བློའི་སྟོབས་ཀྱིས་ཕྱོགས་བཅུའི་འཇིག་རྟེན་གྱི་ཁམས་མ་ལུས་པ་རྣམས་སུ་ཡང༌། སྐད་ཅིག་རེ་རེ་ཡང་སེམས་ཅན་མཐའ་ཡས་པ་རྣམས་ལ། ངན་སོང་གི་སྡུག་བསྔལ་ལས་སྐྱོབ་པ་ནས་བརྩམས་ཏེ། མཐོ་རིས་དང༌། ཉན་རང་དང༌། བླ་ན་མེད་པའི་བྱང་ཆུབ་ལ་འགོད་པའི་བར་གྱི། ཕན་པ་མང་པོ་ཇི་སྲིད་འཁོར་བ་མ་སྟོང་གི་བར་དུ་བགྱིད་པར་སྟེ་སྒྲུབ་པར་ཤོག་ཅེས་པའོ། །ཤཱཀྱ་བཤེས་གཉེན་གྱི་འགྲེལ་པའི་ལུགས་ལྟར་ན། སྤྲུལ་པ་བྱེ་བ་བརྒྱ་ཕྲག་དུ་མ་ཡིས། །ཞེས་འདོན་ཞིང༌། དེར་
སོང་ནས་ནི་ཞེས་པའི་ཤོ་ལོ་ཀ་གཅིག་པོ་དེ། ཕན་པ་མང་པོ་བགྱིད་ཅེས་པའི་རྗེས་འདིར་འདོན་པ་སྣང་ངོ༌། །བཟང་པོ་སྤྱོད་པའི་སྨོན་ལམ་བཏོན་པ་ཡི། སོགས་ཤོ་ལོ་ཀ་གཉིས་ནི་སྡོང་པོ་བཀོད་པའི་མདོ་དངོས་བོད་དུ་ཡོད་པ་འདི་ལས་མི་འབྱུང་ཞིང༌། རྒྱ་འགྲེལ་རྣམ་དག་གཞན་རྣམས་ན་ཡང་བཤད་པ་མེད་དོ། །ཤཱཀྱ་བཤེས་གཉེན་གྱི་འགྲེལ་བར་ནི་འབྱུང་ཞིང༌། བཟང་སྤྱོད་ཀྱི་གླེགས་བམ་ལོགས་སུ་བྱས་པའི་རྒྱ་དཔེ་གཅིག་ན་ཡང་སྣང་ངོ༌། །མཁན་པོ་ཡེ་ཤེས་སྡེས་ཀྱང་བཤད་པ་མཛད་པས། སྤྱིར་མདོ་སྡེའི་ཚིག་ནི་ཡིན་པར་བྱ་དགོས་སོ། །དེས་ན་འདིར་སྔར་གྱི་ས་བཅད་ལྔ་པོ་ལ་མི་ཐེ་ཡང༌། གཞན་དོན་ཁོ་ནར་ཡོངས་སུ་བསྔོ་བ་ཞེས་བྱ་སྟེ། ཚིགས་བཅད་དང་པོ་ནི། བཟང་པོ་སྤྱོད་པའི་སྨོན་ལམ་བཏོན་པ་ཡི། །དགེ་བ་ཅུང་ཟད་བདག་གིས་ཅི་བསགས་པ། །དེས་ནི་འགྲོ་བའི་སྨོན་ལམ་དགེ་བ་རྣམས། །སྐད་ཅིག་གཅིག་གིས་ཐམས་ཅད་འབྱོར་བར་ཤོག །བཟང་པོ་སྤྱོད་པའི་སྨོན་ལམ་གྱི་གླེགས་བམ་བཀླགས་པ་དང་ཁ་ཏོན་དུ་བྱས་པ་ནི་བཏོན་པའོ། །དེ་ལས་བདག་གིས་དགེ་བ་ཅུང་ཟད་ཅི་བསགས་པ་དེས་ནི་འགྲོ་བ་སེམས་ཅན་ཐམས་ཅད་ཀྱིས་ཡིད་ལ་སྨོན་ཞིང༌། ངག་གི་གྱུར་ཅིག་པར་བརྗོད་པའི་སྨོན་ལམ་གྱི་རིགས་ལས་དགེ་བར་གཏོགས་པ་རྣམས་ཐམས་ཅད་འབད་སྩོལ་མེད་ཅིང༌། ཡུན་རིང་དུ་ཐོགས་པ་མ་ཡིན་པར། སྐད་ཅིག་གཅིག་གིས་ཏེ་མྱུར་དུ་ཐམས་ཅད་འབྱོར་ཞིང་འགྲུབ་པར་ཤོག་ཅིག་པའོ། །འདིས་ནི་བདག་ཉིད་ཀྱི་བཟང་སྤྱོད་བཏོན་པའི་དགེ་བས་སེམས་ཅན་ཐམས་ཅད་ཀྱི་བཟང་
སྨོན་འགྲུབ་པར་སྨོན་པ་ཡིན་པས། གཞན་དོན་ཁོ་ནར་བསྔོ་བའོ། །ཚིགས་བཅད་གཉིས་པ་ནི། གང་ཡང་བཟང་པོ་སྤྱོད་པ་འདི་བསྔོས་པས། །བསོད་ནམས་མཐའ་ཡས་དམ་པ་གང་ཐོབ་དེས། །འགྲོ་བ་སྡུག་བསྔལ་ཆུ་བོར་བྱིང་བ་རྣམས། །འོད་དཔག་མེད་པའི་གནས་རབ་ཐོབ་པར་ཤོག །ཅེས་པའམ་དཔེ་འགའ་ལས། བཟང་སྤྱོད་ཡོངས་སུ་བསྔོས་པའི་བསོད་ནམས་ནི། མཐའ་ཡས་ཤིན་ཏུ་ཁྱད་འཕགས་གང་ཐོབ་དེས། །ཞེས་ཀྱང་ངོ༌། །བཟང་པོ་སྤྱོད་པའི་བསྔོ་བ་བྱས་པ་འདི་ཡིས། གང་ཡང་བདག་གི་རྒྱུད་ལ་བསོད་ནམས་ཏེ་དགེ་བའི་རྩ་བ་རྒྱ་ཆེ་བས་མཐའ་ཡས་ཤིང༌། ངོ་བོ་བཟང་པས་དམ་པར་གྱུར་པ་གང་ཞིག་ཐོབ་པ་དེས། འགྲོ་བ་རིགས་དྲུག་གི་སེམས་ཅན་སྐྱེ་རྒ་ན་འཆི་ལ་སོགས་པའི་སྡུག་བསྔལ་གྱི་ཆུ་བོར་བྱིང་བ་རྣམས། བཅོམ་ལྡན་འདས་འོད་དཔག་མེད་པའི་གནས་བདེ་བ་ཅན་གྱི་ཞིང་ཁམས་སྡུག་བསྔལ་གྱི་མིང་ཡང་མི་གྲག་ཅིང༌། རྟག་ཏུ་བདེ་བའི་གནས་དེ་རབ་ཏུ་ཐོབ་པར་ཤོག་ཅིག་པ་སྟེ། དེར་སྐྱེ་བར་གྱུར་ཅིག་པའོ། །བཟང་པོ་སྤྱོད་པའི་གཞུང་འདི་ལ་སྔོན་བསྟན་པ་སྔ་འགྱུར་གྱི་དུས་སུ། ལོ་པཎ་སྤྲུལ་པའི་སྐྱེས་མཆོག་རྣམས་ཀྱིས་བསྒྱུར་བ་ལ། སློབ་དཔོན་ཆེན་པོ་དཔལ་ཕྱོགས་ཀྱི་གླང་པོ་དང༌། ཤཱཀྱ་བཤེས་གཉེན་དང༌། སངས་རྒྱས་གྲགས་པ་དང༌། རྒྱན་བཟང་པོ་སྟེ། བཞི་པོ་དེས་མཛད་པའི་འགྲེལ་པ་དག་འགྱུར་ལ། དེ་རྣམས་ཀྱིས་དོན་ལེགས་བསྡུས་ཀྱི་སྟེང་དུ། མཁས་པའི་
གསུང་དང་མདོ་དོན་འགའ་ཞིག་གིས་བརྒྱན་པ། མཁན་པོ་ཡེ་ཤེས་སྡེས་རྗེད་བྱང་གི་འགྲེལ་ཆེན་མཛད་དོ། །སློབ་དཔོན་ཆེན་པོ་དབྱིག་གཉེན་གྱིས་མཛད་ཟེར་བའི་འགྲེལ་པ་དང༌། རྔོག་འགྱུར་ཀླུ་སྒྲུབ་ཀྱིས་མཛད་ཟེར་བའི་འགྲེལ་བ་དེ་གཉིས་རྒྱན་བཟང་པོའི་འགྲེལ་པ་དང༌། འགྱུར་ཁྱད་མ་གཏོགས་གཅིག་པས། དཔེ་ཐོག་མ་དབང་བཙན་པར་བྱས་ཏེ་རྒྱན་བཟང་པོའི་ཡིན་གྱི། སློབ་དཔོན་ཆེན་པོ་དེ་གཉིས་ཀྱི་མ་ཡིན་ནོ། །རྒྱན་བཟང་པོའི་འགྲེལ་པ་འདི་ཡང་ཕྱོགས་གླང་གི་འགྲེལ་པའི་བསྡུས་དོན་བོར་ཞིང༌། མགོ་ཞབས་སུ་ཚིགས་བཅད་བསྣན་པ་ཙམ་མ་གཏོགས་ལྷག་མ་རྣམས་བྲིས་བཤུས་ལྟ་བུ་སྣང་ངོ༌། །སངས་རྒྱས་གྲགས་པའི་འགྲེལ་པ་ནི་མ་མཐོང་ལ་འདིར་ཕྱོགས་གླང་དང་ཤཱཀྱ་བཤེས་གཉེན་གྱི་འགྲེལ་པའི་དོན་གྱི་སྙིང་པོ་གལ་ཆེ་བ་རྣམས་ཚང་བར་བྱས་ལ། ཕལ་ཆེར་ཡེ་ཤེས་སྡེའི་གསུང་གི་ཡང་རྗེས་སུ་འབྲངས་ཤིང༌། རང་བློས་རྟོགས་པའི་ལེགས་བཤད་ཅུང་ཟད་ཀྱིས་ཀྱང་བརྒྱན་ཏེ་བཤད་པ་ཡིན་ནོ། །དེ་ལྟར་ན་སྡོང་པོ་བཀོད་པ་ཉིད་ལས་འབྱུང་བ་དང༌། རྒྱ་འགྲེལ་ཕལ་ཆེར་ལྟར་ན། ཤོ་ལོ་ཀ་དྲུག་ཅུ་ཡིན་ལ། ཤཱཀྱ་བཤེས་གཉེན་གྱི་འགྲེལ་པ་ལྟར་ན་ཕྱི་མ་གཉིས་པོ་བསྣན་པའོ། །འདི་ཉིད་ཀྱི་སྒོས་ཀྱི་གླེགས་བམ་བོད་མ་ཕལ་ཆེར་གྱི་མཇུག་ཏུ། སྨོན་ལམ་རྒྱལ་པོ་འདི་དག་མཆོག་གི་གཙོ། །མཐའ་ཡས་འགྲོ་བ་ཀུན་ལ་ཕན་བྱེད་ཅིང༌། །ཀུན་ཏུ་བཟང་པོས་བརྒྱན་པའི་ཞིང་གྲུབ་སྟེ། །ངན་སོང་གནས་རྣམས་མ་ལུས་སྟོངས་པར་ཤོག །ཅེས་འབྱུང་བ་ནི། མདོ་དང༌།
སྔར་སྨོས་པ་བདག་གིས་མཐོང་བའི་འགྲེལ་པ་རྣམས་ན་མི་སྣང་ཞིང༌། སངས་རྒྱས་གྲགས་པའི་འགྲེལ་པ་ནའང་མེད་པར་གྲགས་ལ། པ་གོར་བཻ་རོ་ཙ་ན་རཀྵི་ཏ་ལ་སོགས་པ་འདིའི་གཞུང་འགྲེལ་རྣམས་འགྱུར་མཛད་པའི་ལོ་ཙཱ་བ་དག་གིས། འགྱུར་གྱི་སྨོན་ལམ་གྱི་ཚུལ་དུ་མཛད་པ་ཡིན་ནོ་ཞེས་གྲགས་ཏེ། དེ་ལྟར་ཡིན་པ་ཡང་སེམས་ལ། དོན་ནི་བཟང་པོ་ཞིག་སྟེ། སྨོན་ལམ་གྱི་རྒྱལ་པོ་འདི་དག་ནི། མཆོག་གི་གཙོ་བོ་སངས་རྒྱས་སུ་འགྲུབ་ཅིང༌། མཐའ་ཡས་པའི་འགྲོ་བ་ཀུན་ལ་ཕན་པར་བྱེད་པ་དང༌། ཁྱད་པར་དུ་ཕྱོགས་བཅུའི་ཞིང་ཁམས་མ་ལུས་པའི་ངན་སོང་གི་གནས་ཐམས་ཅད་མ་ལུས་པར་སྟོངས་པ་དང༌། ཕྱོགས་ཐམས་ཅད་ཀུན་ཏུ་བཟང་པོའི་སྨོན་ལམ་གྱིས་བརྒྱན་པའི་ཞིང་ཁམས་ཁྱད་པར་ཅན་དུ་བསྒྲུབས་པས་གྲུབ་པར་གྱུར་ཅིག་པའོ། །དེར་ལྟར་ན་ཚིགས་བཅད་ཐ་མ་དེ་གསུམ་ནི། སྡོང་པོ་བཀོད་པ་ཉིད་ལས་མི་འབྱུང་བའི་ཕྱིར། མ་བཏོན་ཡང་ཆད་པའི་ཉེས་པ་མེད་པར་ཤེས་པར་བྱའོ། །འདིར་སྨྲས་པ། ཟབ་ཅིང་རྒྱ་ཆེའི་སྨོན་ལམ་དམ་པ་འདི། །བདག་ལྟ་རྨོངས་པའི་སྤྱོད་ཡུལ་མ་ཡིན་མོད། །རང་གི་བློ་གྲོས་རྣམ་པར་སྦྱང་བའི་ཕྱིར། །དམ་པའི་གསུང་གི་རྗེས་ཞུགས་སྐྱོན་མེད་སྙམ། །སྟོང་པ་ཉིད་དང་སྙིང་རྗེའི་རང་སྣང་ལས། །ཏིང་འཛིན་སྤྱོད་ཡུལ་དམ་པའི་འཇིག་རྟེན་དང༌། །ཡིད་ཀྱི་ལུས་དང་བསམ་མི་ཁྱབ་པ་ཡི། །སྐྱེ་དང་འཆི་འཕོ་རྣམ་འཕྲུལ་མཐའ་ཡས་པ། །དེ་ནི་རྒྱལ་དང་སེམས་དཔའ་ཆེ་རྣམས་ཀྱི། །སྤྱོད་ཡུལ་ཉིད་ཡིན་གཞན་གྱི་མ་ལགས་མོད། །སྨོན་ལམ་འདིས་ནི་དེ་དོན་རྫོགས་པར་སྟོན། །དེ་ཕྱིར་འཕགས་པའི་སྤྱོད་ཡུལ་ཉག་གཅིག་གོ །
ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །དེ་ལ་བྱང་ཆུབ་སེམས་དཔའ་རྣམས་ཀྱི་བསམ་པ་ཕུན་སུམ་ཚོགས་པ་གང་ཡིན་པ་དེ་ཡང༌། སྐྱེས་བུ་ཆེན་པོའི་རྣམ་པར་རྟོག་པ་བརྒྱད་དུ་འདུས་པ་ཡིན་ནོ། །རྣམ་པ་བརྒྱད་པོ་དེ་ལ་ནི་བྱང་ཆུབ་སེམས་དཔའ་རྣམས་ཉིན་དང་མཚན་དུ་མངོན་པར་ཕྱོགས་པར་བྱེད་དོ། །དེ་ལ་སྡོམ་ནི། སྡུག་བསྔལ་སེལ་དང་འབྱོར་པ་དང༌། །བདག་ལུས་དོན་དང་ངན་འགྲོར་འཇུག །རེ་བ་རྫོགས་དང་འཁོར་ལས་འདྲེན། །འགྲོ་ལ་ཕན་མེད་འདོད་བྲལ་དང༌། །བརྒྱད་པ་བདག་གཞན་བརྗེ་བ་ཡིན། །རྣམ་རྟོག་དང་པོ་ནི། བདག་གིས་སེམས་ཅན་ཐམས་ཅད་ཀྱི་སྡུག་བསྔལ་ནམ་ཞིག་སེལ་བར་འགྱུར་སྙམ་པ་དང༌། རྣམ་རྟོག་གཉིས་པ་ནི། སེམས་ཅན་དབུལ་པོ་རྣམས་འབྱོར་པ་ཆེན་པོ་ལ་བདག་གིས་ནམ་སྦྱོར་བར་འགྱུར་སྙམ་པ་དང༌། རྣམ་རྟོག་གསུམ་པ་ནི། ཤ་ཁྲག་དང་བཅས་པའི་ལུས་འདིས་སེམས་ཅན་གྱི་དོན་ནམ་བྱེད་སྙམ་པ་དང༌། རྣམ་རྟོག་བཞི་པ་ནི། བདག་ངན་འགྲོར་སོང་ནས་ཀྱང༌། སེམས་ཅན་རྣམས་ལ་ནམ་ཞིག་ཕན་འདོགས་པར་འགྱུར་སྙམ་པ་དང༌། རྣམ་རྟོག་ལྔ་པ་ནི། བདག་གིས་འཇིག་རྟེན་དང་འཇིག་རྟེན་ལས་འདས་པའི་འབྱོར་བ་སྟེ། རྫུ་འཕྲུལ་དང་ལོངས་སྤྱོད་དང་ཡོན་ཏན་དང་ཡོན་ཏན་རྣམས་ཀྱིས་སེམས་ཅན་ཀྱི་རེ་བ་རྫོགས་པར་ནམ་འགྱུར་སྙམ་པ་དང༌། རྣམ་རྟོག་དྲུག་པ་ནི། བདག་སངས་རྒྱས་སུ་གྱུར་ནས་སེམས་ཅན་འཁོར་བ་ལས་ནམ་ཞིག་འདྲེན་པར་འགྱུར་སྙམ་པ་དང༌། རྣམ་རྟོག་བདུན་པ་ནི། སེམས་ཅན་ལ་ཕན་པ་རྒྱ་ཆེན་པོ་མི་འབྱུང་ན་སྐྱེ་བ་དང་སྤྱོད་པ་དང་
ལོངས་སྤྱོད་ཆེས་ཕུན་སུམ་ཚོགས་པ་ཞིག་ཡིན་ཡང་རུང་ནམ་ཡང་མི་འདོད་ཅིང་སྐྲ་རྩེ་བསྐྱོད་པ་ཙམ་དང་དབུགས་འབྱུང་རྔུབས་ཚུན་ཆད་ཀྱང༌། སེམས་ཅན་ལ་ཕན་པ་ཁོ་ན་བྱེད་ནུས་པར་ནམ་ཞིག་འགྱུར་སྙམ་པ་དང༌། བརྒྱད་པ་ནི་སེམས་ཅན་གྱི་སྡིག་པ་དང་སྡུག་བསྔལ་བདག་ལ་སྨིན་པར་གྱུར་ཅིག བདག་གིས་བདེ་བ་དང་དགེ་བ་སེམས་ཅན་ལ་འབྱུང་བར་གྱུར་ཅིག་ཅེས་སྨོན་པའོ། །བྱང་ཆུབ་སེམས་དཔའ་རྣམས་སྨོན་ལམ་འདེབས་པའི་རྩ་བ་བསམ་པ་ཕུན་སུམ་ཚོགས་པ་ནི་དེ་དག་ཡིན་ཏེ། དེ་ལ་སྨོན་ལམ་དངོས་ནི། ངག་ཏུ་བརྗོད་པ་ལ་མི་བྱ་སྟེ་ཡིད་ཀྱིས་སོ། །དེ་ལྟར་ཡང་བརྟན་པ་རྣམས་ཀྱི་སྨོན་ལམ་ནི། སེམས་པ་འདུན་དང་བཅས་པ་སྟེ། །ཞེས་གསུངས་པས། སྐབས་འདིར་ཡང་སྨོན་པར་བྱ་བའི་གནས་བརྒྱད་པོ་དེ་དག་ལ། རྟག་ཏུ་སེམས་པར་བྱེད་ཅིང༌། ཐོབ་པར་འདུན་པ་ནི་སྨོན་ལམ་དངོས་སོ། །དེ་དག་ཀྱང༌། གཞུང་འདིས་གསལ་བར་བསྟན་པ་ཡིན་ཏེ། སྐྱེས་བུ་ཆེན་པོའི་རྣམ་རྟོག་དང་པོ་སེམས་ཅན་རྣམས་སྡུག་བསྔལ་མེད་ཅིང་བདེ་བར་འདོད་པ་ནི། ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་རྟག་ཏུ་ནད་མེད་བདེ་བར་གྱུར། །ཞེས་པའོ། །གཉིས་པ་འབྱོར་པ་ཐོབ་པར་འདོད་པ་ནི། ཞིང་སྦྱོང་བ་དང་མཆོད་པའི་ཚིག་རྣམས་དང༌། དེའི་བྱ་བ་མ་ལུས་རྫོགས་པར་བགྱི་ཞེས་པའོ། །གསུམ་པ་རང་ལུས་ཀྱི་སེམས་ཅན་ལ་ཕན་འདོགས་པ་ནི། ལུས་དང་ངག་དང་ཡིད་ཀྱང་རྣམ་དག་ཅིང༌། །ཞེས་པ་ལ་སོགས་པ་སྟེ།
སྒོ་གསུམ་གཞན་དོན་དུ་སྤྱོད་ན་རྣམ་པར་དག་པར་འགྱུར་བའི་ཕྱིར་རོ། །བཞི་པ་ངན་འགྲོར་ཞུགས་ནས་ཀྱང་གཞན་གྱི་དོན་བྱེད་པ་ནི། སེམས་ཅན་དག་གི་སྤྱོད་དང་མཐུན་པར་འཇུག།ཅེས་པའོ། །ལྔ་པ་སེམས་ཅན་གྱི་རེ་བ་སྐོང་བ་ནི། འགྲོ་བ་ཀུན་གྱི་ཆོས་ཀྱིས་དོན་རྣམས་ནི། །ཞེས་པ་ནས། ཐམས་ཅད་སྐད་དུ་བདག་གི་ཆོས་སྟོན་ཏོ། །ཞེས་པའི་བར་རོ། །དྲུག་པ་སངས་རྒྱས་ཐོབ་ནས་འགྲོ་བ་སྒྲོལ་བ་ནི། བྱང་ཆུབ་ཤིང་དབང་དྲུང་དུ་དེ་མྱུར་འགྲོ། །སོགས་དང༌། སྤྲུལ་པ་མང་པོ་བྱེ་བ་ཕྲག་བརྒྱ་ཡིས། སོགས་སོ། །བདུན་པ་དོན་དམ་དུ་མི་འགྱུར་བ་ནི། གང་ཡང་དུས་གསུམ་གཤེགས་པའི་རྒྱལ་བ་ཡི། །སོགས་དང༌། གཞན་ཡང་ཤུགས་བསྟན་ལ་མང་ངོ༌། །བརྒྱད་པ་བདག་གཞན་བརྗེ་བ་ནི། ཞིང་གི་ཁྱོན་དང་ཕྱོགས་རྣམས་ཇི་ཙམ་པར། །ངན་སོང་སྡུག་བསྔལ་རབ་ཏུ་ཞི་བར་བྱེད། །བདེ་བ་དག་ལ་འགྲོ་བ་ཀུན་འགོད་ཅིང༌། །སེམས་ཅན་ཐམས་ཅད་ལ་ཡང་ཕན་པར་བགྱིད། །ཞེས་པས་བསྟན་ཏོ། །ཡང་བྱང་ཆུབ་སེམས་དཔའ་འཕགས་པ་རྣམས་ཀྱི་སྨོན་ལམ་གྲངས་མེད་པ་འབུམ་ཕྲག་བཅུ་ནི། སྨོན་ལམ་ཆེན་པོ་བཅུར་འདུས་པ་ཡིན་ལ། དེ་དག་ཀྱང་འཕགས་པ་ས་བཅུ་པའི་མདོ་ལས། ས་དང་པོའི་དོན་བསྡུ་ཚིགས་བཅད་ཀྱི་སྐབས་སུ་འདི་སྐད་ཅེས་འབྱུང་སྟེ། རྒྱལ་བ་ལྟ་བའི་དོན་དུ་སྨོན་ལམ་མངོན་པར་སྒྲུབ། །དམ་ཆོས་ཡོངས་སུ་བཟུང་ཞིང་དྲང་སྲོང་དྲུང་འགྲོ་དང༌། །སྤྱོད་པ་མཆོག་གི་དོན་དུ་སྨོན་ལམ་མངོན་པར་སྒྲུབ། །སེམས་ཅན་ཡོངས་སུ་སྨིན་བྱ་སངས་རྒྱས་ཞིང་སྦྱོང་སྟེ། །དེ་ཡི་ཞིང་མཆོག་རྒྱལ་སྲས་
ཀུན་གྱིས་གང་འགྱུར་ཞིང༌། །རྒྱལ་སྲས་རྣམས་དང་བསམ་པ་གཅིག་ཅིང་དོན་མཐུན་ཕྱིར། །སྐྲ་སྦུབས་ཀུན་ཏུ་དོན་གྱི་དམ་པ་མངོན་འཚང་རྒྱ། །དེ་དག་སྨོན་ལམ་དུ་མ་མངོན་པར་སྒྲུབ་པར་བྱེད། །དེ་དག་མཐའ་ཡས་ཡངས་ཤིང་མཐར་ཐུག་མེད་དང་ལྡན། །ནམ་མཁའི་ཁམས་དང་ཆོས་ཉིད་མྱ་ངན་འདས་ཁམས་དང༌། །འཇིག་རྟེན་མཐར་ཐུག་རྒྱལ་བ་འབྱུང་དང་ཡེ་ཤེས་དང༌། །སེམས་ཀྱིས་ཡུལ་དང་ཡེ་ཤེས་འཇུག་པའི་མཐར་ཐུག་དང༌། །རྣམ་གསུམ་རྒྱུད་རྣམས་མཐར་ཐུག་འགྲོ་བའི་མུར་ཐུག་པ། །རྣམ་པ་དེ་ཚུལ་བདག་སྨོན་མཐའ་ཡང་ཐུག་གྱུར་ཅིང༌། །དེ་དག་མཐར་ཐུག་ཇི་བཞིན་བདག་སྤྱོད་དེ་འདྲར་ཤོག །ཅེས་གསུངས་ལ། དེ་ལ་སྨོན་ལམ་ཆེན་པོ་བཅུའི་སྡོམ་ནི། མཆོད་དང་དམ་ཆོས་ཡོངས་སུ་བཟུང༌། །ཀུན་འགྲོའི་ལུས་དང་སྤྱོད་པ་དང༌། །ཡོངས་སུ་སྨིན་དང་ཞིང་སྦྱོང་དང༌། །སྦྱངས་པའི་ཞིང་དེའི་ཁྱད་པར་སྒྲུབ། །རྒྱལ་སྲས་ཀུན་དང་མཐུན་པར་སྤྱོད། །མཐུན་པའི་དོན་འགྲུབ་མངོན་འཚང་རྒྱ། །དེ་ལྟར་སྨོན་ལམ་བཅུ་པོ་ལ། །མཐར་ཐུག་གནས་ཀྱང་རྣམ་བཅུ་སྟེ། །སེམས་ཅན་འཇིག་རྟེན་ནམ་མཁའ་དང༌། །ཆོས་དབྱིངས་མྱང་འདས་སངས་རྒྱས་འབྱུང༌། །ཡེ་ཤེས་ཁམས་དང་སེམས་ཀྱི་དམིགས། །ཡེ་ཤེས་མངོན་སྒྲུབ་ཁམས་མཐར་ཐུག །རྒྱུད་གསུམ་ཁམས་པར་སྨོན་ལམ་འདེབས། །འཇིག་རྟེན་ཆོས་དང་ཡེ་ཤེས་ཀྱི། །རྒྱུད་དེ་སྐབས་འདིར་རྒྱུད་གསུམ་མོ། །སྨོན་ལམ་ཆེན་པོ་བཅུ་ནི། སངས་རྒྱས་ཐམས་ཅད་ལ་མཆོད་པ་ཐམས་ཅད་ཀྱིས་མཆོད་པར་སྨོན་པ་ནི་དང་པོའོ། །
དམ་པའི་ཆོས་ཐམས་ཅད་ཡོངས་སུ་བཟུང་ཞིང་བསྲུང་བར་སྨོན་པ་ནི་གཉིས་པའོ། །ཕྱོགས་བཅུའི་སངས་རྒྱས་རྣམས་མཛད་པ་ངོ་མཚར་ཅན་མཛད་པ་ཐམས་ཅད་ཀྱི་དྲུང་དུ་ཐོགས་པ་མེད་པའི་ལུས་ཀྱིས་བདག་འགྲོ་ཞིང་བྱ་བ་ཁྱད་པར་ཅན་བྱེད་པར་སྨོན་པ་ནི་གསུམ་པའོ། །རྟག་ཏུ་བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱོད་པར་སྨོན་པ་ནི་བཞི་པའོ། །བདག་གི་སེམས་ཅན་ཐམས་ཅད་ཡོངས་སུ་སྨིན་པར་བྱེད་པར་སྨོན་པ་ནི་ལྔ་པའོ། །འཚང་རྒྱ་བར་འགྱུར་བའི་ཞིང་འཇིག་རྟེན་གྱི་ཁམས་མཐའ་ཡས་པ་འགྲུབ་པར་སྨོན་པ་ནི་དྲུག་པའོ། །མངོན་པར་སྒྲུབ་པའི་ཞིང་ཁམས་རྣམས་ཀྱང་མཐའ་ཡས་པ་བསམ་གྱིས་མི་ཁྱབ་པའི་སྤྱོད་ཡུལ་ཅན་ལས། བྱང་ཆུབ་སེམས་དཔའ་མཆོག་གིས་གང་བ་སོགས་དག་པ་རབ་འབྱམས་འབའ་ཞིག་ཏུ་སྦྱོང་བར་སྨོན་པ་ནི་བདུན་པའོ། །བྱང་ཆུབ་སེམས་དཔའ་ཐམས་ཅད་དང་བདག་ཉིད་བསམ་སྦྱོར་གཅིག་པར་སྨོན་པ་ནི་བརྒྱད་པའོ། །སྤྱོད་པ་དང་ཉམས་ལེན་ཐམས་ཅད་དོན་གྱི་མཆོག་ཁོ་ན་མཐའ་ཡས་པ་འགྲུབ་པར་སྨོན་པ་ནི་དགུ་པའོ། །ནམ་མཁའི་མཐས་གཏུགས་པ་ཐམས་ཅད་དུ་མཛད་པ་མཐའ་ཡས་པ་སྟོན་པའི་ཚུལ་གྱིས་མངོན་པར་རྫོགས་པར་སངས་རྒྱ་བར་སྨོན་པ་ནི་བཅུ་པའོ། །དེ་ལས་དང་པོ་མཆོད་པ་ནི། བསོད་ནམས་ཀྱི་ཚོགས་རྫོགས་པའི་ཆེད་དང༌། གཉིས་པ་དམ་ཆོས་ཡོངས་སུ་བཟུང་བ་ནི། ཡེ་ཤེས་ཀྱི་ཚོགས་ཀྱི་ཆེད་དུའོ། །གསུམ་པ་ལ་སོགས་པ་ལྔ་ནི་སེམས་ཅན་ཡོངས་སུ་སྨིན་པའི་ཆེད་དུ་ཡིན་ཏེ། གསུམ་པ་ཀུན་ཏུ་འགྲོ་བའི་ལུས་ནི། རྟེན་ལུས་ཀྱི་ཁྱད་པར་
ཅི་འདྲ་བས་དང༌། བཞི་པ་སྤྱོད་པ་མཐའ་དག་ལ་སློབ་པ་ནི། སེམས་ལ་སོགས་པའི་སྤྱོད་པ་ཅི་འདྲ་བས་གཞན་སྨིན་པར་བྱེད་པ་དང༌།ལྔ་པ་ནི། སྨིན་པར་བྱེད་པ་དངོས་ཏེ། གང་སྨིན་པར་བྱ་བའི་སེམས་ཅན་གྱི་དབང་དུ་བྱས་པ་དང༌། དྲུག་པ་ནི། གནས་གང་དུ་སྨིན་པར་བྱེད་པའི་ཞིང་ཁམས་སྒྲུབ་པ་དང༌། བདུན་པ་ནི། རྣམ་པ་ཇི་ལྟ་བུས་སྨིན་པར་འགྱུར་བའི་ཐབས་སྟོན་པའི་ཕྱིར་རོ། །བརྒྱད་པ་སེམས་དཔའ་ཀུན་དང་མཐུན་པར་སྤྱོད་པ་ནི། རང་གི་སའི་ཡོན་ཏན་གྱི་ཁྱད་པར་རྟོགས་པའི་ཕྱིར་དང༌། དགུ་པ་དོན་ཡོད་པར་སྤྱོད་པ་ནི། ཁྱད་པར་རྟོགས་པ་གོང་ནས་གོང་དུ་འགྲོ་བའི་ཕྱིར་དང༌། བཅུ་པ་བྱང་ཆུབ་ཀྱི་སྨོན་ལམ་ནི་འབྲས་བུ་མཐར་ཐུག་གི་ཕྱིར་རོ། །དེ་ལྟ་བུའི་སྨོན་ལམ་བཅུ་པོ་དེ་ཡང༌། བཟང་པོ་སྤྱོད་པ་འདི་ལ་ཡོངས་སུ་རྫོགས་པར་ཚང་པ་ཡིན་ཏེ། འཇིག་རྟེན་དག་ན་གང་བཞུགས་མཆོད་པར་གྱུར། ཅེས་དང༌། དེ་དག་ལ་ཡང་མཆོད་པ་རྒྱ་ཆེར་བགྱི། །ཞེས་དང༌། སངས་རྒྱས་རྒྱ་མཚོ་རབ་ཏུ་མཆོད་བྱེད་ཅིང༌། །ཞེས་པ་ལ་སོགས་པས་དང་པོའི་དབང་དུ་བྱས་ཏེ་སངས་རྒྱས་མཆོད་པའོ། །རྒྱལ་བ་རྣམས་ཀྱི་དམ་པའི་ཆོས་འཛིན་ཅིང༌། །ཞེས་དང༌། བྱང་ཆུབ་སྤྱོད་པ་དག་ནི་བདག་སྤྱོད་ཅིང༌། །ཞེས་རང་གིས་སྤྱོད་པ་དང༌། བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །ཅེས་གཞན་ལ་སྟོན་པ་སྟེ། དེ་སོགས་མང་པོ་ཞིག་ནི་གཉིས་པའི་དབང་དུ་བྱས་པ་སྟེ། དམ་ཆོས་ཡོངས་སུ་འཛིན་པའོ། །བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང༌།
ཞེས་དང༌། རྟག་ཏུ་དེ་དག་གི་ནི་སྤྱོད་ཡུལ་ལ། །སྒྱུ་མར་གྱུར་པའི་རྣམ་ཐར་སྟོབས་ཀྱིས་འཇུག །ཅེས་པ་ལ་སོགས་པས་ནི་གསུམ་པའི་དབང་དུ་བྱས་པ་སྟེ། ཀུན་ཏུ་འགྲོ་བའི་ལུས་ཀྱིས་སངས་རྒྱས་ཀྱི་སྤྱོད་ཡུལ་ལྟ་བའོ། །བཟང་པོ་སྤྱོད་པ་རྣམ་པར་སྦྱང་བ་ཡང༌། །མ་འོངས་བསྐལ་པ་ཀུན་ཏུ་སྤྱད་པར་བགྱི། །ཞེས་སོགས་མང་པོ་ཞིག་ནི། བཞི་པའི་དབང་དུ་བྱས་པ་སྟེ། སྤྱོད་པ་ཐམས་ཅད་ལ་བསླབ་པའོ། །བདེ་བ་དག་ལ་འགྲོ་བ་ཀུན་འགོད་ཅིང༌། །ཞེས་སོགས་དང༌། སེམས་ཅན་རྒྱ་མཚོ་དག་ནི་རྣམ་པར་གྲོལ། །ཞེས་པ་ལ་སོགས་པ་ནི། ལྔ་པའི་དབང་དུ་བྱས་པ་སྟེ། སེམས་ཅན་ཡོངས་སུ་སྨིན་པར་བྱེད་པའོ། །དེ་ལྟར་མ་ལུས་ཕྱོགས་རྣམས་ཐམས་ཅད་དུ། །རྒྱལ་བ་བདག་གི་ཞིང་རྣམས་བཀོད་ལ་འཇུག །ཅེས་པ་ལ་སོགས་པ་དྲུག་པའི་དབང་དུ་བྱས་པ་སྟེ། ཞིང་མཐའ་ཡས་པ་སྒྲུབ་པའོ། །རྡུལ་གཅིག་སྟེང་ན་རྡུལ་སྙེད་ཞིང་རྣམས་ཏེ། །ཞིང་དེར་བསམ་གྱིས་མི་ཁྱབ་སངས་རྒྱས་རྣམས། །ཞེས་པ་ནས། མྱ་ངན་འདས་པ་ཞི་མཐའ་རབ་ཏུ་སྟོན། །ཅེས་པའི་བར་དང༌། ཞིང་རྣམས་རྒྱ་མཚོ་རྣམ་པར་དག་བྱེད་ཅིང༌། །ཞེས་པས་ནི། བདུན་པའི་དབང་དུ་བྱས་པ་སྟེ། ཞིང་རྣམ་པར་དག་པར་སྦྱོང་བའོ། །གང་ཡང་དུས་གསུམ་གཤེགས་པའི་རྒྱལ་བ་ཡིས། །བྱང་ཆུབ་སྤྱོད་པའི་སྨོན་ལམ་བྱེ་བྲག་རྣམས། །ཞེས་སོགས་དང༌། ལུས་དང་ངག་དང་ཡིད་ཀྱང་རྣམ་དག་ཅིང༌། །ཞེས་པ་ནས། དེ་དག་འཕྲུལ་པ་ཐམས་ཅད་འཚལ་བར་བགྱི། །ཞེས་པའི་
བར་དང༌། བདག་གི་སྤྱོད་དང་མཚུངས་པར་གང་སྤྱོད་པ། །ཞེས་སོགས་ཚིགས་བཅད་གསུམ་དང༌། དུས་གསུམ་གཤེགས་པ་མི་ཡི་སེང་གེ་གང༌། །ཞེས་པ་ལ་སོགས་པ་དང༌། ཚེ་རབས་ཀུན་ཏུ་འཆི་འཕོ་སྐྱེ་བ་ན། །ཞེས་པ་ལ་སོགས་པ་ནི་བརྒྱད་པའི་དབང་དུ་བྱས་པ་སྟེ། བྱང་ཆུབ་སེམས་དཔའ་ཐམས་ཅད་དང་སྤྱོད་པ་མཐུན་པར་སྤྱོད་པའོ། །ཀུན་ཏུ་ཡོན་ཏན་སྤྱོད་པའི་སྟོབས་རྣམས་དང༌། །ཞེས་དང༌། སྤྱོད་པ་རྒྱ་མཚོ་རྣམ་པར་དག་བྱེད་ཅིང༌། །ཞེས་དང༌། ཡོན་ཏན་རྣམས་ཀྱང་ཚད་གཟུང་མེད་པར་ཤོག །ཅེས་དང༌། དེ་ཡི་བྱ་བ་མ་ལུས་རྫོགས་པར་བགྱི། །ཞེས་པ་ལ་སོགས་པ་མང་པོ་དག་ནི་དགུ་པའི་དབང་དུ་བྱས་པ་སྟེ། འབྲས་བུ་དོན་ཡོད་པ་ཁོ་ནར་སྤྱད་པའོ། །བཟང་པོ་སྤྱོད་པས་བྱང་ཆུབ་སངས་རྒྱས་ནས། །ཞེས་པ་དང༌། སྐྲ་ཙམ་ཁྱོན་ལ་དུས་གསུམ་ཚད་སྙེད་ཀྱི། །སོགས་དང༌། ཡོན་ཏན་ཀུན་གྱི་མི་ཟད་མཛོད་གྱུར་ཅིག །ཅེས་པ་དང༌། ཀུན་ཏུ་མྱུར་བའི་རྫུ་འཕྲུལ་སྟོབས་རྣམས་དང༌། །ཞེས་དང༌། ཆགས་པ་མེད་པར་གྱུར་པའི་ཡེ་ཤེས་སྟོབས། །ཞེས་པ་ལ་སོགས་པ་ནི། བཅུ་པའི་དབང་དུ་བྱས་པ་སྟེ། ནམ་མཁའི་མཐས་གཏུགས་པར་མཛད་པ་མཐའ་ཡས་པ་བསྟན་པའི་སངས་རྒྱས་སུ་སྨོན་པའོ། །སྨོན་ལམ་དེ་རྣམས་ཀྱི་མཐར་ཐུག་པའི་གནས་བཅུ་ལ། སེམས་ཅན་གྱི་ཁམས་ཀྱི་མཐར་ཐུག་པ་ནི། སེམས་ཅན་ཇི་ཙམ་ཡོད་པའི་ས་ཕྱོགས་སུ་སྨོན་ལམ་གྱིས་ཁྱབ་ཅིང༌། མ་འོངས་པ་ན་སེམས་ཅན་མ་ཟད་ཀྱི་བར་དུ་སྨོན་ལམ་གྱི་འབྲས་བུ་ཡང་མི་ཟད་པའོ། །འཇིག་
རྟེན་གྱི་ཁམས་དང༌། ནམ་མཁའི་ཁམས་ཀྱི་མཐར་ཐུག་པ་ཡང་དེ་དང་འདྲ་སྟེ། འཇིག་རྟེན་དང་ནམ་མཁས་ཁྱབ་ཚད་ཀྱི་ཡུལ་དང༌། དེ་གཉིས་ཇི་སྲིད་ཡོད་པའི་བར་གྱི་དུས་དེ་དག་ཏུ་སྨོན་ལམ་མི་ཟད་པའོ། །གཞན་རྣམས་ལའང་མཐར་ཐུག་ཚུལ་དེ་ཁོ་ན་བཞིན་ཡིན་ལ། ཆོས་ཀྱི་དབྱིངས་དང་མྱ་ངན་ལས་འདས་པའི་ཁམས་དང༌། དེ་བཞིན་གཤེགས་པའི་ཡེ་ཤེས་ཀྱི་ཁམས་རྣམས་ངོ་བོ་གཅིག་སྟེ། ངོ་བོ་ཆོས་དབྱིངས་སེམས་ཉིད་བདེ་བར་བཤེགས་པའི་སྙིང་པོ་ཡིན་ལ། འོན་ཀྱང་འདུལ་བའི་དོན་དུ་ཆོས་སྟོན་པའི་གཞི་ཡིན་པའི་ཕྱིར། ཆོས་ཀྱི་དབྱིངས་དང༌། མཐར་ཐུག་སེམས་ཅན་གང་དུ་འདུལ་བའི་གནས་ཡིན་པའི་ཕྱིར་མྱ་ངན་ལས་འདས་པ་དང༌། དེ་བཞིན་ཉིད་དང་རྣམ་པ་མཐུན་པར་སྒོམ་པའི་ཆོས་ཀྱི་དམིགས་པ་ཡིན་པའི་ཕྱིར། དེ་བཞིན་གཤེགས་པའི་ཡེ་ཤེས་ཀྱི་ཁམས་ཞེས་བསྟན་པ་ཡིན་ནོ། །སངས་རྒྱས་འབྱུང་བའི་ཁམས་དང༌། ཡེ་ཤེས་མངོན་པར་སྒྲུབ་པའི་ཁམས་ཀྱང་དོན་གཅིག་སྟེ། ངོ་བོ་ནི་ལམ་གྱི་བདེན་པ་ཡིན་ཏེ། འབྲས་བུའི་དབང་དུ་བྱས་ནས་སངས་རྒྱས་འབྱུང་བ་དང༌། ངོ་བོའི་དབང་དུ་བྱས་ནས་ཡེ་ཤེས་མངོན་པར་བསྒྲུབ་པའོ། །སེམས་ཀྱི་དམིགས་པའི་ཁམས་ནི་ཤེས་བྱ་ཐམས་ཅད་དོ། །རྒྱུད་གསུམ་ལ་འཇིག་རྟེན་གྱི་རྒྱུད་ནི། སྡུག་བསྔལ་དང་ཀུན་འབྱུང་ངོ༌། །ཆོས་ཀྱི་རྒྱུད་ནི་འགོག་པའི་བདེན་པའོ། །ཡེ་ཤེས་ཀྱི་རྒྱུད་ནི་ལམ་གྱི་བདེན་པ་སྟེ། དེ་དག་ཇི་སྲིད་ཡོད་ཀྱི་བར་དུ། སྨོན་ལམ་འདིའི་འབྲས་བུ་ཡོད་པར་གྱུར་
ཅིག་པའོ། །དེ་ལྟར་ན་སྨོན་ལམ་བཅུ་པོ་ཡང༌། མཐར་ཐུག་པའི་གནས་རྣམ་པ་བཅུའི་སྒོ་ནས་འདེབས་དགོས་པ་ལས། དེ་ཡང༌། ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཇི་ཙམ་ལས་དང་ཉོན་མོངས་མཐར་གྱུ་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ཞེས་གསུངས་པའི་དོན་ལ་འདུས་པ་ཡིན་ནོ། །སྨོན་ལམ་བཅུ་པོ་འདི་དག་རྒྱས་པར་འཕགས་པ་ས་བཅུ་པའི་མདོ་ལས། ས་དང་པོའི་རྒྱས་བཤད་ཀྱི་སྐབས་ན་ཡོད་ལ། ཞིབ་མོར་ཤེས་འདོད་ན་མདོ་དེ་ཉིད་དང༌། རྒྱལ་སྲས་ཆེན་པོ་འཕགས་པ་དབྱིག་གཉེན་གྱི་འགྲེལ་པ་དང་བཅས་པ་ལས་རྟོགས་པར་བྱ་ལ། རྒྱས་བཤད་ཀྱི་མདོའི་ཚིག་དང༌། འཕགས་པ་བཟང་པོ་སྤྱོད་པའི་སྨོན་ལམ་གྱི་ཚིག་ཕལ་ཆེར་ཞིབ་ཏུ་སྦྱོར་རྒྱུ་ཡོད་མོད་ཀྱིས། འདིར་ནི་ཧ་ཅང་མང་བར་གྱུར་གྱི་དོགས་པས་མ་བཀོད་དོ། །ཕྱིས་བྱུང་བ་མཁས་པར་རློམ་པ་ཁ་ཅིག་གིས། སྨོན་ལམ་ཆེན་པོ་བཅུའི་ཚིགས་བཅད་སྦྱོར་བ་མཐོང་སྟེ། དེས་ནི་མདོ་རྩ་འགྲེལ་མ་མཐོང་ཞིང༌། བཟང་པོ་སྤྱོད་པ་དོན་ལ་སྦྱོར་ཚུལ་ཡང་མ་གོ་བས། མིང་ཙམ་ལས་དོན་མ་རྟོགས་པའི་བཞད་གད་ཀྱི་གནས་ཀྱང་སྣང་ངོ༌། །དེ་བས་ན་རྒྱལ་སྲས་ཀྱི་སྨོན་ལམ་ཐམས་ཅད་སྨོན་ལམ་ཆེན་པོ་གྲངས་མེད་པ་འབུམ་ཕྲག་བཅུར་འདུས་ལ། དེ་ཡང་བཟང་པོ་སྤྱོད་པའི་སྨོན་ལམ་དུ་འདུས་པར་ཤེས་ནས། རྟག་ཏུ་འདི་ཉིད་ཁྱད་པར་བཞི་དང་ལྡན་པས་ཁ་ཏོན་དུ་
བྱེད་པ་ལ་བརྩོན་པར་བྱ་སྟེ། ཐེག་པ་ཆེན་པོ་ལ་རྣལ་འབྱོར་དུ་བྱེད་པ་རྣམས་ཀྱིས་སོ། །འཕགས་པ་བཟང་པོ་སྤྱོད་པ་སྨོན་ལམ་གྱི་རྒྱལ་པོའི་རྒྱ་ཆེར་འགྲེལ་པ། འཕགས་མཆོག་རྣམས་ཀྱི་གསང་བའི་མཛོད་ཅེས་བྱ་བ། རྒྱལ་ཁམས་པ་ཏཱ་ར་ནཱ་ཐས་ནགས་རྒྱལ་གྱི་དབེན་གནས་ཇོ་ནང་དུ་སྨྲས་པའོ། །ལས་དང་པོ་ལ་ཕན་པའི་ཕྱིར། །ཕྱག་རྒྱ་ལྔ་ཡི་མདོ་རྣམས་ལ། །རྣམ་བཤད་ཤིན་ཏུ་གོ་སླ་ཤིང༌། །ཟབ་མོའི་དོན་དང་ལྡན་པར་སྦྱར། །འདི་ལས་དགེ་བ་གང་ཐོབ་དེས། །འགྲོ་བ་ཀུན་གྱིས་ཆོས་ཀྱི་སྐུ། །མཐའ་ཡས་སྙིང་པོ་ངེས་ཐོབ་ནས། །ཡེ་ཤེས་རྒྱ་མཚོར་རོ་གཅིག་གྱུར། ༈ ཐེག་ཆེན་ཤིན་ཏུ་རྒྱས་པའི་སྨོན་ལས་མདོའི། །དགོངས་འགྲེལ་ཆོས་སྦྱིན་མཛད་མེད་འཇོ་བའི་བར། །དབོན་སྤྲུལ་ཀརྨ་བསྟན་འཛིན་རབ་རྒྱས་གྱིས། །ཐུབ་བསྟན་འཁོར་གླིང་གི་གདན་སར་བསྒྲུབས། །སརྦ་ཐཱ་མངྒལཾ། །