ལྟུང་བཤགས་ཀྱི་འགྲེལ་པ།
ལྟུང་བཤགས་ཀྱི་འགྲེལ་པ་བཞུགས་སོ།
ཨོཾ་སྭ་སྟི་སིདྡྷི་པྲ་ཛཱེ་བྷྱཿ སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདིར་ཕུང་པོ་གསུམ་པའི་རྒྱུན་བཤགས་ཀྱི་དོན་ཅུང་ཟད་བཤད་པར་བྱ་སྟེ། དེ་ཡང་འདི་ནི་འཕགས་པ་དཀོན་མཆོག་བརྩེགས་པ་ཆོས་ཀྱི་རྣམ་གྲངས་སྟོང་ཕྲག་བརྒྱ་པ་ལས། འདུས་པ་ཉི་ཤུ་རྩ་བཞི་པ་འདུལ་བ་རྣམ་པར་གཏན་ལ་དབབ་པ་ཞེས་ཀྱང་བྱ། ཉེ་བ་འཁོར་གྱིས་ཞུས་པའི་མདོ་ཞེས་ཀྱང་བྱ་བ་ལས་འབྱུང་བ་ཡིན་ཏེ། དེ་ནི་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་དུ་དགེ་སློང་ལྔ་བརྒྱ་དང༌། བྱང་ཆུབ་སེམས་དཔའ་སྟོང་ཕྲག་གཅིག་དང་བཅས་པ་དང་ལྷན་ཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་ཀྱིས་ཕྱི་མའི་དུས་ན་དམ་པའི་ཆོས་སུ་ཡོངས་སུ་བཟུང་བའི་ཕྱིར་དང༌། སེམས་ཅན་ཡོངས་སུ་སྨིན་པར་བྱ་བའི་ཕྱིར་ཐབས་སྣ་ཚོགས་པའི་ཆོས་
སྐྱོང་བར་འཁོར་རྣམས་ལ་སྤྲོ་བ་འདྲི་བར་མཛད་དོ། །དེ་ནས་བྱང་ཆུབ་སེམས་དཔའ་བྱམས་པ་ལ་སོགས་པ་དངོས་སུ་མོས་པ་སུམ་ཅུ་རྩ་བརྒྱད་ཙམ་གྱིས། རང་རང་གི་སྐལ་བ་དང་མཐུན་པར་སྤྲོ་བར་ཁས་བླངས་སོ། །དེ་ནས་ཤཱ་རིའི་བུ་བྱང་ཆུབ་སེམས་དཔའ་དེ་རྣམས་ཀྱི་གོ་ཆ་ཆེན་པོའི་ཚུལ་ལ་ངོ་མཚར་སྐྱེས་པ་ན། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་དང་ཐབས་མཁས་དང༌། ཤེས་རབ་དང་ཡེ་ཤེས་ཀྱི་ཡུལ་ནི་ཉན་ཐོས་དང་རང་སངས་རྒྱས་ཀྱིས་སྤྱོད་ཡུལ་མ་ཡིན་ཏེ། སྤྲུལ་པ་སྣ་ཚོགས་སྟོན་ཀྱང་ཆོས་ཉིད་ལས་མི་གཡོ་ལ་གང་ལ་གང་འདུལ་གྱི་སྐུ་སྣ་ཚོགས་སྟོན་པ་སོགས་མང་དུ་གསུངས་ནས། བྱང་ཆུབ་སེམས་དཔའ་ཁྱིམ་པས་ཆོས་དང་ཟང་ཟིང་གི་སྦྱིན་པ་གཉིས་ལ་བསླབ་པར་བྱའོ། །རབ་ཏུ་བྱུང་བས་སྨྱུ་གུ་དང་
སྣག་ཚ་དང་གླེགས་བམ་དང་ཆོས་སྦྱིན་པ་ལ་བསླབ་པར་བྱའོ། །མི་སྐྱེ་བའི་ཆོས་ལ་བཟོད་པ་ཐོབ་པས། གཏོང་བ་དང༌། གཏོང་བ་ཆེན་པོ་དང༌། ཤིན་ཏུ་གཏོང་བ་ལ་བསླབ་ཅེས་གསུངས་ཏེ། དེ་ལ་གཏོང་བ་ནི་རྒྱལ་སྲིད་ལ་སོགས་པ་དང༌། གཏོང་པ་ཆེན་པོ་ནི་བུ་དང་ཆུང་མ་སོགས་དང༌། ཤིན་ཏུ་གཏོང་བ་ནི་མགོ་དང་རྐང་ལག་ལ་སོགས་པའོ། །ཡང་ཤཱ་རིའི་བུས་བྱང་ཆུབ་སེམས་དཔའ་ཉོན་མོངས་པ་གསུམ་གྱིས་འཇིགས་སམ་མི་འཇིགས་ཞུས་པ་ལ། བྱང་ཆུབ་སེམས་དཔའ་རྣམས་ཀྱི་ཁ་ན་མ་ཐོ་བ་ཆེན་པོ་ནི་གཉིས་ཏེ། ཞེ་སྡང་དང་ལྡན་པ་དང༌། གཏི་མུག་དང་ལྡན་པའོ། །འདོད་ཆགས་དང་ལྡན་པའི་ཁ་ན་མ་ཐོ་བ་ནི། ཁ་ན་མ་ཐོ་བའི་ངོས་ནས་ཆུང་ལ་འབྲལ་བར་ནི་དཀའ་འོ། །ཞེས་སྡང་དང་ལྡན་པ་ནི། ཁ་ན་མ་ཐོ་བ་ཆེ་ལ་འབྲལ་བར་ནི་སླ་བ་ཡིན། གཏི་མུག་དང་ལྡན་པ་ནི། ཁ་ན་མ་ཐོ་བ་ཆེ་ལ་འབྲལ་བར་ཡང་དཀའ་བ་ཡིན། དེའི་རྒྱུ་མཚན་འདོད་ཆགས་འཁོར་བ་འཛིན་པའི་ས་བོན་དང་ཉིང་མཚམས་སྦྱོར་བ་ཡིན། ཞེ་སྡང་ངན་སོང་གི་རྒྱུ་ཡིན་ཡང་སྤོང་བའི་རྣམ་པ་ཅན་ཡིན་པའི་ཕྱིར་དང༌། གཏི་མུག་ནི་མི་ཤེས་པའི་རང་བཞིན་ཤིན་ཏུ་འགྲོལ་དཀའ་བའི་ཕྱིར། དམྱལ་བ་བརྒྱད་ཀྱི་ཡང་རྩ་བ་ཡིན་ནོ། །འདོད་ཆགས་དང་བཅས་པའི་ཁ་ན་མ་ཐོ་བ་ཆེན་པོའི་ཉེས་ལྟུང་གིས་ཕོག་ན། བྱང་ཆུབ་སེམས་དཔའི་ཚོགས་པ་བཅུ་ཚོགས་
ལ་བཤགས་དགོས་པ་དང༌། རེགས་པའི་ལྷག་མ་ལྟ་བུ་འབྲིང་པོ་ནི་ལྔ་ཚོགས་ལ་བཤགས་དགོས་པ་དང༌། ཆགས་སེམས་ཀྱིས་ལྟ་བ་ལྟ་བུ་ཆུང་ངུ་ནི་གཅིག་གམ་གཉིས་ལ་བཤགས་པ་ཡིན་ནོ། །འདོད་ཆགས་ལ་དངོས་སུ་དེ་ལྟར་གསུངས་པའི་ཤུགས་ལ། ཞེ་སྡང་གཏི་མུག་གཉིས་ལ་དེའི་ཉིས་འགྱུར་ཡིན་པར་དོན་གྱིས་གོ་བར་བྱའོ། །དུག་གསུམ་གྱིས་ཀུན་ནས་བླངས་པའི་ལས་ཆེ་བ་མཚམས་མེད་པ་ལྔ་དང༌། དགེ་འདུན་དང་མཆོད་རྟེན་ལ་སྡིག་བསགས་པ་རྣམས་དང༌། འབྲིང་པོ་བུད་མེད་ཀྱི་ཉེས་པ་ལ་སོགས་པ་དང༌། ཆུང་བ་ཁྱེའུ་དང་ལག་པའི་ཉེས་པ་ལ་སོགས་པ་སྟེ། མདོར་ན་ཉེས་པ་ལྕི་བ་ཐམས་ཅད་ཀྱང་སངས་རྒྱས་སུ་སུམ་ཅུ་རྩ་ལྔའི་སྤྱན་སྔར་ཉིན་མཚན་དུས་དྲུག་ཏུ་བཤགས་པས་འདག་པར་འགྱུར་ན། ཆུང་ངུ་དང་འབྲིང་པོ་ལྟ་སྨོས་ཀྱང་ཅི་དགོས། འདི་ནི་གོང་དུ་བྱང་ཆུབ་སེམས་དཔའི་དགེ་འདུན་གྱི་མདུན་དུ་བཤགས་པར་མ་ནུས་ན་ཡང༌། སངས་རྒྱས་རྣམས་ཡིད་ཀྱིས་དམིགས་པའི་སྤྱན་ལྔར་བཤགས་པས་འདག་པའི་དོན་ནོ། །དེའི་རྗེས་སུ་ཕུང་པོ་གསུམ་པའི་བཤགས་པ་ཉིད་གསུངས་ནས། སངས་རྒྱས་སུམ་ཅུ་སོ་ལྔ་པོ་དེ་དག་ལ་སོགས་པ་དེ་བཞིན་གཤེགས་པ་ཐམས་ཅད་ཡིད་ལ་བྱེད་ན་སྡིག་པ་དག་པར་འགྱུར་ལ། སྡིག་པ་དག་ལ་ཞལ་སྟོན་པར་འགྱུར་རོ། །སངས་རྒྱས་བྱང་སེམས་རྣམས་ནི་སོ་སོ་སྐྱེ་བོ་འཁྲུལ་བ་ཅན་རྣམས་སྨིན་པར་
བྱ་བའི་ཕྱིར་དང་མོས་པ་སྣ་ཚོགས་རྣམས་ཐར་པ་མཆོག་ཐོབ་པའི་ཕྱིར། སྨོན་ལམ་རྫོགས་པར་མཛད་ཀྱང་ཆོས་ཀྱི་དབྱིངས་ལ་གཡོ་བ་མེད་དོ། །གཞན་ཡང་བྱང་ཆུབ་སེམས་དཔའ་ཆེན་པོ་རྣམས། སྙིང་རྗེ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པའི་མཐུ་ལས། ལོག་པར་ལྟུང་བའི་འགྲོ་བ་བཞི་པོ་རྣམས་ཀྱི་གཟུགས་བཟུང་ནས། དེ་རྣམས་སྨིན་པར་མཛད་དོ། །བཀོད་པ་ཆེན་པོའི་ཏིང་ངེ་འཛིན་གྱིས་ཁྱིམ་བདག་གི་གཟུགས་དང༌། དེ་བཞིན་དུ་རིམ་གྱིས་སྦྱར་ནས། ཞི་བའི་ཏིང་ངེ་འཛིན་གྱིས་སངས་རྒྱས་ཀྱི་གཟུགས་དང༌། དབང་སྒྱུར་བའི་ཏིང་ངེ་འཛིན་གྱིས་མོས་པ་ཇི་ལྟ་བུའི་གཟུགས་སྟོན་པའི་བར་ཏིང་ངེ་འཛིན་བརྒྱད་གསུངས་ནས། དེ་ལྟར་སྟོན་ཡང་བདག་དང་སེམས་ཅན་དུ་དམིགས་པ་མེད་དོ། །སེངྒེའི་སྒྲ་སྐད་བྱི་ལས་བཟོད་པར་མི་ནུས་པ་སོགས་དཔེ་བཞི་གསུངས་ནས། བྱང་ཆུབ་སེམས་དཔའ་རྣམས་ཀྱི་སེམས་དཔའ་མཆོག་དང༌། དགེ་རྩེའི་སྟོབས་ཀྱིས་ཉེས་པ་ཐམས་ཅད་སྐད་ཅིག་གཅིག་ལ་སྤངས་ཏེ་སངས་རྒྱས་མཐོང་བའི་ཏིང་ངེ་འཛིན་ཐོབ་པ་ནི། བཤགས་པའི་ཡུལ་དང་བྱང་ཆུབ་ཀྱི་སེམས་ཀྱི་སྟོབས་དང༌། ཐབས་མཁས་ཀྱི་ཁྱད་པར་ཡིན་པས། ཉན་རང་རྣམས་ཀྱི་སྤྱོད་ཡུལ་མ་ཡིན་ལ། ཉིན་མཚན་དུས་དྲུག་ཏུ་སངས་རྒྱས་ཀྱི་མཚན་འཛིན་ཅིང༌། ཕུང་པོ་གསུམ་པ་འདོན་པ་དེ་དག་ནི། ཉེས་ལྟུང་ཐམས་ཅད་བྱང་ཞིང༌། སངས་རྒྱས་མཐོང་བའི་ཏིང་
ངེ་འཛིན་ཡང་ཐོབ་པར་འགྱུར་རོ། །ཞེས་གསུངས་སོ། །དེ་ནས་འཕགས་པ་ཉེ་བར་འཁོར་ཡང་འཁོར་དེར་འདུས་ནས། འདུལ་བ་རྣམ་པར་གཏན་ལ་དབབ་པ་ཞུགས་པས། བཅོམ་ལྡན་འདས་ཀྱིས་ཉན་ཐོས་ཀྱི་ཐེག་པ་རྣམས་ཀྱི་སྦྱོར་བ་དང་བསམ་པ་ཡང་གཞན། ཐེག་ཆེན་ལ་ཞུགས་པ་རྣམས་ཀྱི་སྦྱོར་བ་དང་བསམ་པ་ཡང་གཞན་ཡིན་ཏེ། ཉན་ཐོས་པ་རང་དོན་ཁོ་ན་ལ་ཞུགས་པ་དང༌། འཁོར་བས་འཇིགས་པ་སྐྱེ་བ་འཕྲལ་དུ་སྤོང་བར་འདོད་པའི་ཚུལ་ཁྲིམས་དེ་ནི། ཐེག་ཆེན་པས་བླངས་ན་ཤིན་ཏུ་ཚུལ་ཁྲིམས་འཆལ་བ་ཡིན་ལ། ཐེག་ཆེན་པ་གཞན་དོན་དུ་བསྐལ་པ་མཐའ་ཡས་པའི་བར་དུའང་འཁོར་བར་གནས་དགོས་ཤིང༌། དེ་ལ་དམིགས་པའི་ཚུལ་ཁྲིམས་དེ་ནི་ཉན་ཐོས་པས་བླངས་ན་ཉན་ཐོས་ཐེག་པ་ཁོ་ན་ལ་ལྟོས་པའི་ལྟུང་བ་ཆེན་པོར་འཛིན་ནོ། །དེ་བཞིན་དུ་བྱང་ཆུབ་སེམས་དཔའི་བསླབ་པ་ནི། རྗེས་སུ་བསྲུང་བ་དང་བཅས་པ་སྟེ། སེམས་ཅན་རྣམས་ཀྱི་སེམས་དང་མཐུན་པར་འཇུག་པ་ཡིན་ལ། ཉན་ཐོས་རྣམས་ཀྱི་མ་ཡིན་ནོ། །བྱང་ཆུབ་སེམས་དཔའ་རྣམས་ཀྱི་བསླབ་པ་ནི་བཅོས་སུ་ཡོད་པ་ཡིན་ཏེ། སྔ་དྲོའི་ཚེ་ཉེས་པ་བྱུང་ཡང་གུང་ཚིགས་ཀྱི་དུས་ཐམས་ཅད་མཁྱེན་པའི་སེམས་དང་མ་བྲལ་བས་གནས་ན། ཚུལ་ཁྲིམས་ཀྱི་ཕུང་པོ་མ་ཟད་པ་ཁོ་ན་ཡིན་པ་སོགས་ཐུན་མཚམས་ཐམས་ཅད་ལ་སྦྱར་ནས། ཧ་ཅང་འགྱོད་པར་མི་བྱ་བ་དང༌།
ཉན་ཐོས་ཀྱི་ཐེག་པ་ལ་ལྟུང་བ་ཡང་ཡང་བྱུང་ན། ཚུལ་ཁྲིམས་ཡོངས་སུ་ཟད་པར་འགྱུར་བ་ཡིན་ལ། ཁམས་གསུམ་གྱི་ཉོན་མོངས་འཕྲལ་དུ་སྤངས་ནས། རང་དོན་མྱང་འདས་མྱུར་དུ་ཐོབ་པར་བྱེད་དགོས་པའི་ཕྱིར་བསླབ་པ་བཅོས་སུ་མེད་པའོ། །ཡང་བྱང་ཆུབ་སེམས་དཔའ་ནི་བྱང་ཆུབ་ཀྱི་སེམས་མ་སྤངས་ན། བསྐལ་པ་མཐའ་ཡས་པར་འདོད་པའི་ཡོན་ཏན་ལྔས་བརྩེ་བར་བྱེད་ཀྱང༌། ཚུལ་ཁྲིམས་རྣམ་པར་དག་པ་ཁོ་ན་ཉིད་དེ། རྨི་ལམ་ན་ཡང་ཉོན་མོངས་པས་རིག་པར་མི་འགྱུར་བའི་ཕྱིར། བསླབ་པ་རིང་དུ་རྗེས་སུ་ཞུགས་པ་ཞེས་བྱ་ལ། ཉན་ཐོས་རྣམས་འབྲས་བུ་ཆུང་ངུ་དེ་འཕྲལ་དུ་ཐོབ་པའི་ཕྱིར། ལམ་ཆུང་ངུ་ལ་བརྩོན་འགྲུས་མྱུར་དུ་འཇུག་དགོས་པས་བསླབ་པ་མཐར་ཆགས་པ་སྟེ་མ་འདྲེས་པར་དགོས་པ་ཡིན་ནོ། །དེ་ཡང་རྫོགས་པའི་བྱང་ཆུབ་ནི་ཚེགས་ཆེན་པོས་སྒྲུབ་དགོས་པ་ཡིན་པས། སྡུག་བསྔལ་ལ་སྐྱོ་བ་དང་ཆགས་བྲལ་ལ་གཅིག་ཏུ་ཕྱོགས་པ་ཙམ་གྱིས་འགྲུབ་པར་མི་འགྱུར་བ་སོགས་གསུངས་སོ། །དེ་ནས་ཉེ་བ་འཁོར་གྱིས་ཉེས་པ་ལྕི་ཡང་ཞུས་པ་ལ། ཐེག་ཆེན་ཁོ་ནའི་དབང་དུ་བྱས་ནས། འདོད་ཆགས་དང་མཚུངས་ལྡན་གྱི་ཉེས་པ་དུས་མཐའ་ཡས་པར་བྱུང་བ་ལས་ཀྱང་ཞེ་སྡང་དང་མཚུངས་ལྡན་གྱི་ཉེས་པ་ལན་གཅིག་བྱུང་བ་ཡང་ལྕི་སྟེ། ཞེ་སྡང་ནི་སེམས་ཅན་གཏོང་བ་ཡིན། འདོད་ཆགས་ནི་སེམས་ཅན་དུད་པ་ཡིན་པའི་ཕྱིར་རོ། །དེ་བཞིན་དུ་འབྲལ་བ་བུལ་པ་སྟེ་འབྲལ་
དཀའ་ཡང༌། ཁ་ན་མ་ཐོ་བ་དང་བཅས་པ་ཆུང་བ་དེ་ནི། བྱང་ཆུབ་སེམས་དཔའ་ལ་ཉོན་མོངས་པར་མི་ཆེ་ལ། འབྲལ་བ་མྱུར་ཡང་ཁ་ན་མ་ཐོ་བ་དང་བཅས་པ་ཆེ་བ་དེ་ནི་དེ་ལས་ལྡོག་པ་ཡིན་པར་གསུངས་ནས། བྱང་སེམས་ཐབས་མི་མཁས་པ་དེ་འདོད་ཆགས་ལ་འཇིགས་ཤིང་ཞེ་སྡང་ལ་མི་འཇིགས་ལ། ཐབས་མཁས་པ་ནི་དེ་ལས་ལྡོག་པའོ། །དེ་ནས་འཕགས་པ་འཇམ་དཔལ་འཁོར་དེར་འདུས་ནས། དུལ་བའི་ཆོས་ལ་འདུལ་བ་ཅི་ཞིག་མཆི་ཞེས་ཞུས་པ་ལ། ཆོས་ཐམས་ཅད་ཤིན་ཏུ་དུལ་བ་ཡིན་ཡང་དེ་ལྟར་མི་ཤེས་པ་ལ་འདུལ་བ་ཡང་ཡང་བསྟན་ཞེས་གསུངས་ཏེ། ཉོན་མོངས་རང་བཞིན་གྱིས་མེད་ཀྱང་དེ་ལྟར་མ་ཤེས་པ་ལ། འདུལ་བ་བསྟན་ཞེས་པའི་དོན་ནོ། །དེ་ནས་ཉེ་བའི་འཁོར་གྱིས་བཅོམ་ལྡན་འདས་བརྒྱུད་ནས་འཇམ་དཔལ་ཆོས་སྟོན་པར་བསྐུལ། འཇམ་དཔལ་གྱིས་ཀྱང་སེམས་རང་བཞིན་གྱིས་དུལ་བ་དང༌། བདག་མི་དམིགས་པ་དང༌། བླང་དོར་མེད་པ་དང༌། ནམ་མཁའི་མཐའ་ལ་གནས་པ་དང༌། དུས་གསུམ་མི་དམིགས་པ་ལ་སོགས་པ་སྟོང་པ་ཉིད་ཀྱི་དོན་བཤད་ནས། ཆོས་ཉིད་འདི་ལ་མི་མོས་ན་བསླབ་པ་ལས་རིང་དུ་གྱུར་ཞེས་བཤད་དོ། །དེ་ནས་ཉེ་བ་འཁོར་གྱིས་འཇམ་དཔལ་ནི་ཆོས་གང་སྟོན་ཡང་བསམ་གྱིས་མི་ཁྱབ་པ་ལས་བརྩམས་ཏེ་སྟོན་ཏོ། །ཞེས་ཞུས་པ་ལ། སྟོན་པས་བསམ་མི་ཁྱབ་ལམ་བརྟེན་ན་རྣམ་པར་གྲོལ་བ་མེད་པས། འཇམ་
དཔལ་ཡང་རྟོག་པ་ཐམས་ཅད་སྤངས་པ་དང༌། ལྷག་པའི་ང་རྒྱལ་སྤངས་པའི་ཕྱིར་ཆོས་སྟོན་ཏོ། །དེ་བཞིན་དུ་འདོད་ཆགས་ལ་སོགས་པ་བདེན་པར་ཞེན་པས་སྤོང་སེམས་དང༌། རྣམ་པར་བྱང་བའི་ཆོས་ལ་བདེན་པར་ཞེན་ནས་ཐོབ་འདོད་དང༌། ཟབ་མི་ཟབ་བམ། ཐེག་པ་གསུམ་མམ། ཀུན་ནས་ཉོན་མོངས་པ་དང་རྣམ་པར་བྱང་བ་ལ་བདེན་ཞེན་གྱིས་དབྱེ་འབྱེད་དང༌། ཐ་ན་བསམ་པར་བྱ་བ་ཅི་ཡང་མེད་དོ། །ཞེས་སེམས་ཀྱང༌། དེ་ཐམས་ཅད་ལྷག་པའི་ང་རྒྱལ་སྤྱོད་པ་ཡིན་ཅིང༌། བསམ་གྱིས་མི་ཁྱབ་པ་ཉིད་ལ་མངོན་པར་མ་ཞེན་ན་ལྷག་པའི་ང་རྒྱལ་མེད་དོ་ཞེས་གསུངས། དེ་ནས་སྟོན་པས་ཆེད་དུ་བརྗོད་པའི་ཚུལ་གྱིས་ཚིགས་བཅད་རྒྱས་པར་གསུངས་ཏེ། བསམ་གྱིས་མི་ཁྱབ་པའི་གནས་དང༌། དེ་ཉིད་ལ་མངོན་པར་ཞེན་པ་མེད་པའི་ཚུལ་དེ་ཉིད། གཞི་ལམ་འབྲས་གསུམ་གྱི་ཆོས་ཐམས་ཅད་ལ་སྦྱར་ནས། གདམས་པ་དང་བཅས་ཏེ་ཟབ་རྒྱས་སུ་གསུངས་སོ། །སྐབས་འདིར། ཤེས་རབ་ཆོས་རྣམས་ཤེས་པར་གྱིས་ཤིག་ཅེས། །ཤེས་རབ་ལྷག་མཐོང་བློ་གྲོས་བློ་བརྟན་ཡང༌། །རང་བཞིན་རང་བཞིན་མེད་པ་ནམ་དུ་ཡང༌། །ཤེས་པར་མི་ནུས་དེ་ཡང་ངེས་པར་བསྟན། །ཞེས་རང་བཞིན་ཡོད་མེད་ཀྱི་དབྱེ་བ་དང༌། སེམས་དམྱལ་འཇིགས་པ་ང་ཡིས་བསྟན་བྱས་ཏེ། །སེམས་ཅན་སྟོང་ཕྲག་དུ་མ་སྐྱོ་བས་ཀྱང༌། །གང་དག་ཤི་འཕོས་ངན་སོང་དྲག་འགྲོ་བའི། །འགྲོ་བ་དེ་དག་
ནམ་ཡང་ཡོད་མ་ཡིན། །ཞེས་པས་གང་ཟག་གི་བདག་མེད་པ་གཙོ་བོར་བསྟན་ཅིང༌། གང་དག་རལ་གྲི་མདའ་ཆེན་མཚོན་འཛིན་པའི། །གནོད་པ་བྱེད་པ་ཡོད་པ་མ་ཡིན་ཏེ། །རྟོག་པའི་དབང་གིས་ངན་སོང་དེ་དག་ན། །ལུས་ལ་བབས་མཐོང་དེ་ན་མཚོན་ཆ་མེད། །ཅེས་ཕྱི་རོལ་ཀྱི་དོན་མེད་ཅིང་སེམས་སུ་བསྟན་པ་དང༌། སྣ་ཚོགས་ཡིད་དགའ་མེ་ཏོག་ཁ་ཕྱེ་ཞིང༌། གསེར་གྱི་ཁང་མཆོག་འབར་བ་ཡིད་འོང་པ། །འདི་ན་དེ་ལའང་བྱེད་པ་འགའ་མེད་དེ། །དེ་དག་རྟོག་པའི་དབང་གིས་བཞག་པ་ཡིན། །ཞེས་བྱེད་པོ་གཞན་མེད་ཀྱི་རྟོག་པ་ཉིད་ཡིན་པས། སྣང་བ་དེ་ཡང་སེམས་ལས་གཞན་མིན་ནོ་ཞེས་པའི་དོན་དང༌། རྟོག་པའི་དབང་གིས་འཇིག་རྟེན་རྣམས་བཏགས་ཏེ། །འདུ་ཤེས་འཛིན་པས་བྱིས་པ་རྣམ་པར་ཕྱེ། །འཛིན་དང་འཛིན་མེད་དེ་ཡང་བྱུང་མིན་ཏེ། ཡོངས་སུ་རྟོགས་པ་རྒྱུ་མ་སྨིག་རྒྱུ་བཞིན། །ཞེས་གཟུང་འཛིན་གཉིས་ཀ་མེད་པར་བསྟན་ཏོ། །ཀུན་གཞིར་མ་གྱུར་མྱ་ངན་འདས་པ་ཐོབ། །མཁའ་འདྲ་ཆོས་རྣམས་འདི་དག་ཤེས་གྱུར་ན། །ཞིང་བརྒྱ་རྣམས་སུ་ཐོགས་མེད་འགྲོ་འགྱུར་ཞིང༌། །ཞེས་སོགས་ཀུན་གཞི་རྣམ་ཤེས་སྤངས་ན་མཐར་ཐུག་ཡིན་པ་དང༌། བསམ་གྱིས་མི་ཁྱབ་པ་རྟོག་པའི་ཡོན་ཏན་ཡང་གསུངས་སོ། །དེ་ནས་ཆོས་ཀྱི་རྣམ་གྲངས་འདི་གསུངས་པས། དགེ་སློང་ལྷག་པའི་ང་རྒྱལ་ཅན་ཉིས་བརྒྱ་དགྲ་
བཅོམ་པ་ཐོབ་པ་དང༌། སེམས་དཔའ་དྲུག་ཁྲི་མི་སྐྱེ་བའི་ཆོས་ལ་བཟོད་པ་ཐོབ་བོ། །དེ་རྗེས་སུ་མདོ་འདིའི་མཚན་གྱི་རྣམ་གྲངས་བཤད་པ་དང༌། འཁོར་རྣམས་དགའ་ཞིང་ཡི་རང་བའི་བར་དུ་ཡང་ཡོད་དོ། །དེ་ལྟར་རྒྱུན་བཤགས་འདི་ཉིད་གང་ལས་འབྱུང་བའི་མདོའི་བཞུགས་ཚུལ་བཀོད་པས། ཐེག་པ་ཆེ་ཆུང་གི་ཉེས་ལྟུང་གི་ཁྱད་པར་དང༌། ཐེགས་ཆེན་ཉིད་ཀྱི་ལྟུང་པ་ལྕི་ཡང་དང༌། མཐར་ཐུག་རྫོགས་པར་འགྱུར་མི་འགྱུར་གྱི་ཁྱད་པར་སོགས་རྨད་དུ་བྱུང་བའི་ཆོས་ལ་ངེས་པ་རྙེད་པར་འགྱུར་རོ། །ད་ནི་རྒྱུན་བཤགས་ཀྱི་གཞུང་དངོས་ལ་འཇུག་པར་བྱ་སྟེ། གཞུང་འདི་ཕུང་པོ་གསུམ་དང༌། སྟོབས་བཞི་དང༌། བླ་ན་མེད་པའི་མཆོད་པ་རྣམ་པ་བདུན་པོ་དག་གིས་བསྡུས་པ་ཡིན་ནོ། །ཞེས་འཆད་དོ། །དང་པོ་ལ་འགའ་ཞིག་བཤགས་པ་ཡི་རང་བསྔོ་བའི་ཕུང་པོ་གསུམ་དུ་འཆད་ལ། འདི་ཉིད་ཀྱི་འགྲེལ་པ་གཅིག་ན། བཤགས་པ་དང༌། དགེ་བ་དང༌། གསོལ་འདེབས་ཀྱི་ཕུང་པོ་ཞེས་འཆད་དོ། །འོན་ཀྱང་ཕྱག་འཚལ་བ་དང༌། བཤགས་པ་དང༌། ཡོངས་སུ་བསྔོ་བའི་ཕུང་པོ་གསུམ་ལ་ངོས་འཛིན་པ་ཉིད། གཞུང་གི་ཚིག་དོན་དུམ་བུར་འབྱེད་པའི་དབང་དུ་བྱས་ན་ལེགས་པར་མཐོང་སྟེ། དེ་ལྟར་ན་རི་དབང་གི་རྒྱལ་པོ་ལ་ཕྱག་འཚལ་ལོ་ཡན་ཆད་ཕྱག་འཚལ་བའི་ཕུང་པོ་དང༌། དགོངས་སུ་གསོལ་ནས་སླན་ཆད་ཀྱང་སྡོམ་པར་བགྱི་ལགས་
སོ་ཡན་ཆད་སྡིག་པ་བཤགས་པའི་ཕུང་པོ་དང༌། སངས་རྒྱས་བཅོམ་ལྡན་འདས་དེ་དག་ཐམས་ཅད་བདག་ལ་དགོངས་སུ་གསོལ་ཞེས་པ་མན་ཆད་ཡོངས་སུ་བསྔོ་བའི་ཕུང་པོ་ཡིན་ནོ། །འདི་ལ་དགོངས་གསོལ་གཉིས་ཀྱང་དོན་ཚན་ཕྱི་མའི་སོ་སོའི་འོག་རྩོམ་བྱེད་དུ་གསལ་བ་དང༌། གཞུང་ཚིག་སྡེ་ཚན་གསུམ་པོ་མང་ཉུང་ཆེས་མི་སྙོམས་པ་མེད་པ་སོགས་ཀྱི་ལུགས་འདི་ལེགས་པར་མཐོང་སྟེ། ཐོག་མའི་སྐྱབས་འགྲོ་ནི་ཡོན་ཏན་དྲན་པའི་ཕྱིར་བྱུང་བ་ཡིན་པས། ཕྱག་འཚལ་བའི་སྡེ་ཚན་ཡིན་ལ། བཤགས་པ་འོག་མ་མན་ཆད་རྣམ་གྲངས་གཞན་གྱི་སྒོ་ནས་བསྟན་པའོ། །གཉིས་པ་སྟོབས་བཞིའི་བསྡུ་ཚུལ་འཆད་ཚུལ་ལ། འཆད་ཚུལ་མི་འདྲ་བ་མང་དུ་སྣང་ཡང༌། བསྡུས་པའི་དོན་འདི་ལྟར་བྱ་སྟེ། བཤགས་པ་དངོས་དང༌། བཤགས་པའི་ཡན་ལག་སྟོབས་བཞི་བཤད་པའོ། །དང་པོ་ནི། སྡིག་པ་མི་དགེ་བའི་ལས་ཞེས་པ་ནས། འཇུག་པ་ལ་རྗེས་སུ་ཡི་རང་བའམ་ཞེས་པའི་བར་དང༌། དེ་དག་གི་སྤྱན་སྔར་སོགས་དང༌། སྡིག་པ་ཐམས་ཅད་ནི་སོ་སོར་བཤགས་སོ་ཞེས་པའོ། །གཉིས་པ་ལ་རྟེན་གྱི་སྟོབས། གཉེན་པོ་ཀུན་ཏུ་སྤྱོད་པའི་སྟོབས། སླར་ལྡོག་པའི་སྟོབས། སུན་འབྱིན་པའི་སྟོབས་རྣམས་ལས། རྟེན་གྱི་སྟོབས་ལ་རྟེན་ཡུལ་གྱི་སྟོབས་ནི། ཕྱག་འཚལ་གྱི་ཡུལ་དུ་གྱུར་པའི་སངས་རྒྱས་རྣམས་ལ། སངས་རྒྱས་བཅོམ་ལྡན་འདས་ཡེ་
ཤེས་སུ་གྱུར་པ་སོགས་སོ། །རང་རྒྱུད་ལ་དགོས་པའི་རྟེན་གྱི་སྟོབས་ནི། ཐོག་མཐའི་སྐྱབས་འགྲོ་གཉིས་ཡིན་ལ། བསྔོ་བའི་ཁོང་གི་སེམས་བསྐྱེད་ཀྱང་དེར་བསྡུའོ། །གཉེན་པོ་ཀུན་ཏུ་སྤྱོད་པའི་སྟོབས་ནི། ཕྱག་འཚལ་དང༌། ཡི་རང་དང༌། གསོལ་འདེབས་དང༌། ཡོངས་སུ་བསྔོ་བ་སྔ་ཕྱི་གཉིས་སོ། །སུན་འབྱིན་པའི་སྟོབས་ནི། ལས་ཀྱི་སྒྲིབ་པ་གང་གིས་སོགས། སླར་ལྡོག་པའི་སྟོབས་ནི། སླན་ཆད་ཀྱང་གཅོད་ཅིང་སྡོམ་པར་བགྱིད་ལགས་སོ། །ཞེས་པའོ། །གསུམ་པ་ནི། དངོས་སུ་མ་ཚང་ཡང་བཤད་ཡམ་ཙམ་མམ། དོན་གྱི་སྟོབས་སྦྱར་ན་འགལ་བ་མེད་པས་དེ་ལྟར་སྦྱར་ན། རི་དབང་གི་རྒྱལ་པོ་ལ་ཕྱག་འཚལ་ལོ་ཞེས་པ་ཡན་ཆད་ཕྱག་འཚལ་བའི་ཡན་ལག་དང༌། དེ་རྗེས་ནས་བསྡོམ་པར་བགྱིད་ལགས་སོ་ཞེས་པ་ཡན་ཆད་སྡིག་པ་བཤགས་པའི་ཡན་ལག་དང༌། བདག་གིས་ཀྱང་ཡོངས་སུ་བསྔོ་བར་བགྱིའོ་ཞེས་པ་ཡན་ཆད་བསྔོ་བའི་ཡན་ལག་དང་བསོད་ནམས་ཐམས་ཅད་ལ་རྗེས་སུ་ཡི་རང་ངོ་ཞེས་པ་ཡན་ཆད་ཡི་རང་བའི་ཡན་ལག་ཡིན་ལ། སངས་རྒྱས་ཐམས་ཅད་ལ་གསོལ་བ་འདེབས་སོ་ཞེས་པས་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་དང༌། མྱ་ངན་ལས་མི་འདའ་བར་གསོལ་བ་འདེབས་པ་གཉིས་བསྟན་ཅིང༌། ཐོག་མཐའི་སྐྱབས་འགྲོ་དང༌། བསྔོ་བའི་ཁོང་གི་སེམས་བསྐྱེད་ཀྱང་བསྣན་ནས་ཕྱག་འཚལ་བཤགས་པ་ཡི་རང་གསོལ་འདེབས། སྐྱབས་
འགྲོ་སེམས་བསྐྱེད་བསྔོ་བ་སྟེ། ཡན་ལག་བདུན་གྱི་བགྲོང་ཚུལ་འདི་བཞིན་དུ་བྱས་ན་རུང་ཙམ་མོ། །འོན་ཀྱང་ཚིག་དོན་དང་འབྲེལ་བའི་དོན་བསྡུ་ལ་སྦྱོར་ན་ཡན་ལག་བདུན་དུ་བགྲོང་བ་མི་ལེགས་ཏེ། སེམས་བསྐྱེད་བསྔོ་བ་ལས་གཞན་དུ་མ་དམིགས་པ་དང༌། གོ་རིམ་ཡང་འཆོལ་བར་གནས་པས་སོ། །བསྔོ་བའི་ཁོང་གི་སེམས་བསྐྱེད་སོགས་རྟེན་དང་དཀར་པོ་ས་བོན་གྱི་སྟོབས་ལ་མཚུངས་སོ་སྙམ་ན་མ་ཡིན་ཏེ། ཆ་ཚང་བར་བྱ་བའི་ཕྱིར་འཕྲོས་དོན་དུ་དེ་ལྟར་བཤད་ཀྱི། རྟེན་སྐྱབས་འགྲོ་དང༌། དཀར་པོ་ས་བོན་ཡི་རང་སོགས་རྐང་ཐུབ་ཀྱི་གཞུང་ཡོད་པའི་ཕྱིར་རོ། །སྤྱིར་མདོ་ལུགས་ཀྱི་ཡན་ལག་བདུན་པ་ཕལ་ཆེར་ལ་མཆོད་པ་ཡོད་ཅིང༌། གསོལ་འདེབས་གཉིས་སོ་སོར་བགྲོང་བ་དང༌། སྐྱབས་འགྲོ་སེམས་བསྐྱེད་མི་བགྲོང་བ་མང་བར་སྣང་བས། འདིར་ཡན་ལག་བདུན་པ་ཚང་བར་རྩི་བ་ངེས་པར་དགོས་པ་མིན་ལ། ཁ་ཅིག་སྐྱབས་འགྲོས་མཆོད་པ་དོན་གྱི་འཕངས་པས་དེ་བགྲོང་བར་འདོད་པ་ནི། དངོས་བསྟན་བོར་ནས་ཤུགས་བསྟན་འཚོལ་བ་ཕོངས་པའི་རྒྱུ་ཉིད་དོ། །ད་ནི་ཚིག་དོན་ཅུང་ཟད་བརྗོད་པར་བྱ་སྟེ། དེ་ཡང་གཞུང་འདིའི་དོན་ལ་དབྱེ་ན། ཕུང་པོ་གསུམ་རྒྱས་པར་བསྟན་པ་དང༌། རྒྱུན་བཤགས་མདོར་བསྡུས་པས་བཤད་པའི་དང་པོ་ལ། ཕྱག་འཚལ་བའི་ཕུང་པོ། སྡིག་པ་བཤགས་པའི་ཕུང་པོ། ཡོངས་སུ་བསྔོ་བའི་
ཕུང་པོ་བཤད་པ་གསུམ་ལས། དང་པོ་ལ་བྱེད་པ་པོ་རང་གི་དོན། དམིགས་པ་ཡུལ་གྱི་དོན། བྱེད་པ་ཕྱག་འཚལ་བ་དངོས་ཏེ་གསུམ་ལས། དང་པོ་ནི། བདག་མིང་འདི་ཞེས་བགྱི་བ་ཞེས་པ་ལ་བྱང་ཆུབ་ཏུ་སེམས་བསྐྱེད་པ་སྐྱེས་བུ་བདག་ཉིད་ཀྱི་མིང་བརྗོད་པར་བྱ་སྟེ། གང་རང་གི་མིང་གསལ་བར་མི་བརྗོད་པ་དེ་ལ་ནི། ཉེས་པ་སྦེད་པའི་བསམ་པ་ཡོད་སྲིད་པས་དེ་དགག་པར་བྱ་བའི་ཕྱིར་བྱའོ། །གཉིས་པ་ནི། དཀོན་མཆོག་གསུམ་གྱི་ཡོན་ཏན་རྟོགས་པས་དེ་གསུམ་སྐྱབས་ཀྱི་ཡུལ་དུ་ཤེས་ཤིང་དེ་ཉིད་དྲན་པས་གསལ་འདེབས་པ་ཡིན་ཏེ། སངས་རྒྱས་ལ་སྐྱབས་སུ་མཆིའོ་སོགས་ལ། ཆོས་སྤྱོད་འདི་ནི་ལས་དང་པོ་པ་དང་མོས་སྤྱོད་མན་ཆད་ཀྱི་བྱང་ཆུབ་སེམས་དཔའ་བསྒྲུབ་པའི་དབང་དུ་བྱས་ནས། གནས་སྐབས་དང་མཐར་ཐུག་གི་སྐྱབས་ཡུལ་སོ་སོར་དབྱེ་བ་མི་བྱེད་དེ། སངས་རྒྱས་ནི་སྐུ་གསུམ་གྱིས་བསྡུས་པ་དངོས་དང་བཏགས་པ་བ་ཐམས་ཅད་དོ། །ཆོས་ནི་དམ་པའི་ཆོས་ལུང་དང་རྟོགས་པས་བསྡུས་པ་སྟེ། རྟོགས་པ་དེ་ཡང་ལམ་དང་འབྲས་བུའམ། འགོག་ལམ་གྱིས་བསྡུས་པ་ཐམས་ཅད་དོ། །དགེ་འདུན་ནི་ཕྱིར་མི་ལྡོག་གི་ས་ཐོབ་པའི་བྱང་ཆུབ་སེམས་དཔའ་རྣམས་གཙོ་བོར་ཡིན་ལ། སྐབས་འདིར་ཉན་རང་འཕགས་པ་རྣམས་ཀྱང་ཞོར་བྱུང་དུ་ནི་ཡིན་ཏེ། བྱང་ཆུབ་སེམས་དཔའ་སོ་སྐྱེས་མ་ཐོབ་པའི་སྤངས་པ་དང་རྟོགས་པའི་རིགས་ཉན་རང་འཕགས་པ་རྣམས་ཀྱིས་ཐོབ་པ་མང་
དུ་ཡོད་པའི་ཕྱིར། ཡོན་ཏན་དེ་དག་གི་ཕྱོགས་ནས་བླ་མར་གྱུར་པ་དང༌། དེ་དག་སྒྲུབ་པའི་ཕྱིར་ཡང་སྐྱབས་སུ་འགྲོ་བའོ། །སངས་རྒྱས་ཀྱི་ཡོན་ཏན་ནི་མཁྱེན་པ་དང༌། ཐུགས་རྗེ་དང༌། ནུས་མཐུ་བསམ་གྱིས་མི་ཁྱབ་པ་ལ་སོགས་པའོ། །ཆོས་ཀྱི་ཡོན་ཏན་ལ་འབྲས་བུའི་ཆོས་ནི་སྐྱོན་ཐམས་ཅད་སྤངས་ཤིང་ཡོན་ཏན་རྫོགས་པ་དང༌། ལམ་གྱིས་ནི་སྒྲིབ་གཉིས་སྤོངས་ཞིང་ཕུན་སུམ་ཚོགས་པ་ཐོབ་པར་བྱེད་པ་དང༌། དེ་དག་རྣམས་མ་རྟོགས་པ་རྟོགས་པར་བྱེད་པ་ལུང་གི་ཆོས་ལ་རགས་ལས་པའོ། །དགེ་འདུན་གྱི་ཡོན་ཏན་ནི་ལམ་གྱི་ཆོས་དེ་དག་རྒྱུད་ལ་སྐྱེས་པས་སྐྱོན་མང་པོ་སྤངས་ཤིང་ཡོན་ཏན་དུ་མ་དང་ལྡན་པ། སྙིང་རྗེ་ཆེན་པོས་སེམས་ཅན་སྒྲོལ་བ་ལ་བརྩོན་པའོ། །དེའི་ཕྱིར་དཀོན་མཆོག་གསུམ་པོ་དེ་དག་སྐྱབས་སུ་འོས་ཤིང་ཕྱག་འཚལ་བར་འོས་པའོ། །གསུམ་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་པ་ལ་སོགས་པ་སྟེ། ཆོས་ཉིད་མ་ནོར་བར་གཟིགས་པས་དེ་བཞིན་གཤེགས་པ། བདུད་བཞི་བཅོམ་པའི་ཕྱིར་དགྲ་བཅོམ་པ། ཆོས་ཐམས་ཅད་མ་རིག་པའི་སྣང་བ་སངས་ཤིང་ཡེ་ཤེས་ཀྱི་སྣང་བ་རྒྱས་པའི་ཕྱིར་ཡང་དག་པ་རྫོགས་པའི་སངས་རྒྱས་སོ། །ཤཱཀྱ་ནི་ནུས་པའི་བདག་ཉིད་དེ། མཐུ་དང་སྙིང་སྟོབས་ཕུན་སུམ་ཚོགས་པ། ཐུབ་པ་ནི་དགྲ་ཐུབ་པ་སྟེ་སྒྲིབ་གཉིས་བག་ཆགས་དང་
བཅས་པ་སྤངས་པའོ། །མདོའི་དཔེ་ཉིད་ལ་དེ་ཙམ་སྣང་ལ། དེ་ལྟར་ཕལ་ཆེར་འདོན་པ་ལྟར་ན། བཅོམ་ལྡན་འདས་དང་དཔལ་རྒྱལ་བ་ཞེས་པའི་ཚིག་ཀྱང་སྣོན་པས། སྐལ་བ་དྲུག་གི་ཕུན་སུམ་ཚོགས་པ་དང་ལྡན་པས་བཅོམ་ལྡན་འདས་དང༌། རང་དང་གཞན་གྱི་དོན་ཕུན་སུམ་ཚོགས་པ་གྲུབ་པས་དཔལ་དང༌། མི་མཐུན་པའི་ཕྱོགས་ཐམས་ཅད་ལས་རྒྱལ་བས་རྒྱལ་བའོ། །དེ་བཞིན་དུ་སྦྱར་ཏེ། མི་ཕྱེད་པས་རྡོ་རྗེ། སྲ་བས་སྙིང་པོ། འགྲོ་བའི་སྡུག་བསྔལ་ཐམས་ཅད་འཇོམས་པས་རབ་ཏུ་འཇོམས་པ་སྟེ་རྡོ་རྗེ་སྙིང་པོ་རབ་ཏུ་འཇོམས་པའོ། །མ་རིག་པ་སེལ་བའི་ཕྱིར་རིན་ཆེན་འོད་འཕྲོའོ། །ཆོས་དབྱིངས་རྒྱ་མཚོའི་བདག་པོ་ཡིན་པའི་ཕྱིར། ཀླུ་དབང་གི་རྒྱལ་པོའོ། །མི་མཐུན་པའི་ཕྱོགས་མཐའ་དག་འཇོམས་པའི་ཕྱིར་དཔའ་བོའི་སྡེའོ། །དེ་དང་འདྲ་བ་ལས་ཆོས་ཀྱི་དགའ་བས་དགྱེས་པ་ལས་དཔའ་དགྱེས་སོ། །རིན་པོ་ཆེ་ལྟར་མི་འགྱུར་ཞིང་གཞན་གྱི་ཉོན་མོངས་སྲེག་པས་རིན་ཆེན་མེའོ། །གདུལ་བྱའི་མ་རིག་པའི་མུན་པ་སེལ་བའི་ཕྱིར་རིན་ཆེན་ཟླ་འོད་དོ། །གང་གི་དེས་ཆོས་བསྟན་པའི་རྐྱེན་གྱིས་ཆོས་མཐོང་བ་ཐམས་ཅད་བྱང་ཆུབ་མཆོག་གི་དོན་ལ་ཐེ་ཚོམས་མེད་པར་སྦྱོར་བའི་ཕྱིར་མཐོང་བ་དོན་ཡོད་དོ། །ཐུགས་རྗེ་ཆེན་པོའི་བསིལ་ཟེར་སྤྲོ་བའི་ཕྱིར་རིན་ཆེན་ཟླ་བའོ། །མཐོང་བ་དང་སྒོམ་པས་སྤངས་པར་བྱ་བའི་སྒྲིབ་པའི་དྲི་མ་ཐམས་ཅད་སྤངས་པའི་ཕྱིར་དྲི་མ་མེད་པའོ། །སྒྲིབ་པ་
ཐམས་ཅད་འཇོམས་པས་དཔའ་བར་གྱུར་པའི་ཡེ་ཤེས་སེམས་ཅན་ཐམས་ཅད་ལ་སྦྱིན་པར་མཛད་པའི་ཕྱིར་དཔའ་སྦྱིན་ནོ། །སྒྲིབ་པ་སྤངས་པས་གཙང་བའི་ཕྱིར་ཚངས་པའོ། །གདུལ་བྱ་མཐའ་ཡས་པ་སེམས་བསྐྱེད་དུ་བཅུག་པའི་ཕྱིར་ན། སངས་རྒྱས་མང་པོ་བསྐྱེད་ཅིང་སྤྲུལ་པར་སོང་བས་བྱེད་པ་པོ་མ་ཚངས་པ་དང་འདྲ་སྟེ། དེས་བྱེད་པ་སྟེ་བསྐྱེད་པས་ན་བསྐྱེད་བྱའི་མིང་སྐྱེད་པ་པོར་བཏགས་པ་ཚངས་པས་བྱིན་ནོ། །སེམས་ཅན་རྣམས་ཀྱི་འདོད་ཆགས་ཁོང་ཁྲོ་ང་རྒྱལ་མ་རིག་པ་ལྟ་བ་ངན་པ་དང་ཐེ་ཚོམ་གྱི་མེ་འཇིལ་ཞིང་དྲི་མ་འཁྲུད་པར་མཛད་པའི་ཕྱིར་ཆུ་ལྷའོ། །དེ་དང་འདྲ་བ་ལས་ལྷའི་ཡང་ལྷར་གྱུར་པས་ན་ཆུ་ལྷའི་ལྷའོ། །གཞན་དོན་ཕུན་སུམ་ཚོགས་པའི་དཔལ་དང༌། རང་ཉིད་ཀྱི་དྲི་མ་ཐམས་ཅད་སྤངས་པས་བཟང་པོ་སྟེ་དཔལ་བཟང་ངོ༌། །འཁོར་བའི་གདུང་བ་སེལ་བར་མཛད་པས་ཕྱིར་ཙན་དན་དཔལ་ལོ། །སྐུའི་འོད་ཟེར་གྱིས་ཞིང་ཁམས་ཐམས་ཅད་འགེངས་པར་མཛད་པའི་ཕྱིར་གཟི་བརྗིད་མཐའ་ཡས་སོ། །རང་བཞིན་འོད་གསལ་རྣམ་པར་དག་པའི་དཔལ་དང་ལྡན་པའི་ཕྱིར་འོད་དཔལ་ལོ། །སྡུག་བསྔལ་དང་ཀུན་འབྱུང་གི་མྱ་ངན་མེད་པའི་ཕྱིར་མྱ་ངན་མེད་པའི་དཔལ་ལོ། །ནཱ་ར་ཡ་ན་ཞེས་སྲེད་མེད་ཀྱི་བུ་སྟེ། དེ་ལ་སྲེད་མེད་ནི་གཞན་གྱི་རྒོལ་བའི་འགྲན་ཟླ་མེད་པ། བུ་ནི་རིགས་ཀྱི་དོན་ཏེ། ཟླ་མེད་པའི་རིགས་ཀྱི་ཕྱིར་སྲེད་མེད་ཀྱི་བུའོ། །ཡང་ན་དེའི་སྐད་དོད་ནཱ་ར་ཡ་ན་མིའི་ཐེག་པ་སྟེ།
རང་སྟོབས་ཀྱིས་མ་ནོར་པར་ལམ་ལ་འཇུག་པ་ཁྱོགས་ལ་སོགས་པ་མིའི་བཞོན་པ་དང་འདྲ་བ་ཡིན་ནོ། །འགྲོ་བ་ཐམས་ཅད་ཀྱི་ཡིད་དུ་འོང་བ་མེ་ཏོག་དང་འདྲ་བར་ཆོས་སྟོན་པར་མཛད་པ་ནི་མེ་ཏོག་དཔལ་ལོ། །གདུལ་བྱ་རྣམས་ཚངས་པའི་འཁོར་ལོ་སྟེ། ཆོས་ཀྱི་འཁོར་ལོ་ཡེ་ཤེས་སྣང་བར་བྱེད་པའི་འོད་ཟེར་དང༌། རྫུ་འཕྲུལ་གྱིས་རྣམ་པར་རོལ་པ་དང༌། མངོན་ཤེས་མཐའ་ཡས་པའི་ཕྱིར་ཚངས་པའི་འོད་ཟེར་རྣམ་པར་རོལ་པ་མངོན་པར་མཁྱེན་པའོ། །གཞན་དེ་དང་འདྲ་བ་ལས་ཚངས་པ་ཞེས་པའི་གནས་སུ་ཉེས་པའི་སྐྱོན་གྱིས་མ་གོས་པས་པདྨ་ཞེས་པ་སྟེ། པད་མའི་འོད་ཟེར་རྣམ་པར་རོལ་པ་མངོན་པར་མཁྱེན་པའོ། །འདིར་རྣམ་པར་རོལ་པ་ནི་ཆོ་འཕྲུལ་རྣམ་པ་གསུམ་མོ་ཞེས་འཆད་པའང་ལེགས་པར་སྣང་ངོ༌། །འཕགས་པའི་ནོར་བདུན་གྱི་དཔལ་གྱིས་ཕྱུག་པར་མཛད་པས་ནོར་དཔལ་ལོ། །དྲན་པ་ཉེར་གཞག་བཞིའི་ཆོས་ཀྱི་དཔལ་གྱིས་ཁྱད་པར་མཛད་པས་དྲན་པའི་དཔལ་ལོ། །བདེ་བར་གཤེགས་པའི་སྙིང་པོ་མཚན་དང་དཔེ་བྱད་ཀྱི་དཔལ་དང་ལྡན་པའི་ཆོས་རྒྱ་ཆེར་སྒྲོག་པར་མཛད་པས་མཚན་དཔལ་ཤིན་ཏུ་ཡོངས་བསྒྲགས་སོ། །དབང་པོ་ལྔ་དང་མངོན་ཤེས་དྲུག་གི་ཏོག་དང་ལྡན་པའི་ཆོས་ཀྱི་རྒྱལ་མཚན་ལ་དབང་བསྒྱུར་བའི་ཕྱིར་དབང་པོ་རྟོག་གི་རྒྱལ་མཚན་གྱི་རྒྱལ་པོའོ། །འགྲོ་བ་མཐའ་དག་གི་གནོད་པ་ལས་ཉོན་སྡུག་བསྔལ་གྱིས་བསྡུས་པ་ཐམས་ཅད་གནོན་ཅིང་འཇོམས་པའི་ཕྱིར་ཤིན་ཏུ་རྣམ་པར་གནོན་པའི་དཔལ་ལོ། །བདུད་བཞིའི་གཡུལ་ལས་རྒྱལ་པའི་ཐབས་སྟོན་པའི་ཕྱིར་གཡུལ་ལས་ཤིན་ཏུ་རྣམ་པར་རྒྱལ་བའོ། །འཇིག་རྟེན་གྱི་གནོད་པ་རྣམས་བཅོམ་ཞིང་ཆེས་ཆེར་གནོན་པའི་ཆོས་རྟོགས་སུ་འཇུག་པས་གཤེགས་པའི་
ཕྱིར་རྣམ་པར་གནོན་པས་གཤེགས་པའོ། །རྣམ་པར་དག་ཅིང་འོད་འཕྲོ་བའི་ཞིང་ཁམས་རྒྱ་ཆེན་པོ་སྟོན་པའི་ཕྱིར་ཀུན་ནས་སྣང་བ་བཀོད་པའི་དཔལ་ལོ། །འགྲོ་བའི་བསམ་པ་རྫོགས་པར་མཛད་པའི་ཕྱིར་ཕྲིན་ལས་རིན་པོ་ཆེ་དང༌། ཡེ་ཤེས་ཀྱི་འདབ་མ་རྒྱས་པའི་པདྨས་བདུད་དང་མུ་སྟེགས་ཟིལ་གྱིས་གནོན་པའི་ཕྱིར་རིན་ཆེན་པདྨས་རྣམ་པར་གནོན་པའོ། །རིན་ཆེན་པདྨ་དེ་དང་འདྲ་བ་ལས་ཡེ་ཤེས་དང་མཛད་པ་དེ་ལ་རབ་ཏུ་བཞུགས་པ། གཟུང་འཛིན་འཁྲུལ་པའི་ཆོས་གང་གིས་ཀྱང་བསྐྱོད་དུ་མེད་པས་རི་དབང་གི་རྒྱལ་པོ་ལྟ་བུ་སྟེ། རིན་པོ་ཆེའི་པདྨ་ལ་རབ་ཏུ་བཞུགས་པ་རི་དབང་གི་རྒྱལ་པོའོ། །དེ་དག་ལ་ཐོག་མཐའ་གཉིས་ལ་ཆེ་བ་རྒྱས་པར་སྦྱར་བ་ཐམས་ཅད་ལ་གོ་ཞིང༌། ཉེར་བཞི་པ་དང་ཉེར་ལྔ་པ་གཉིས་ལ་ཆེ་བརྗོད་བསྡུས་པ་མཛད་པ་ཡང་སྟོད་སྨད་རྣམས་སུ་གོ་བ་དང༌། གཞན་རྣམས་ཆེ་བའི་ཚིག་མེད་པར་མཚན་རྐྱང་བརྗོད་པ་བསྡུས་པ་སྟེ། གཞན་ལའང་གོ་བར་བྱ་བ་ཡིན་མོད། བསྡུས་པར་བརྗོད་པ་ལ་ཡང༌། ཐོག་མ་ལ་ནི་ཆེ་བའི་ཚིག་ངེས་པར་བརྗོད་དགོས་སོ། །སྐབས་འདིར་ཡང་ན་སློབ་དཔོན་དཔའ་བོས་མཛད་པར་གྲགས་པའི་བསྟོད་པ་ལྟར་མཚན་དོན་བཤད་ཀྱང་རུང་སྟེ། དེ་དང་དེ་ལ་མཚན་ནི་འཇིག་རྟེན་དུ་གྲགས་པ་ལྟར་ཡིན་གྱི། མཚན་གྱི་དོན་ནི་རྫོགས་པའི་སངས་རྒྱས་གང་ཅི་ཡང་རུང་བ་ཐམས་ཅད་ཀྱི་ཡོན་ཏན་ནོ། །གཉིས་པ་བཤགས་
པའི་ཕུང་པོ་ནི། དེ་དག་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ཞེས་པ་ནས། བསྡོམ་པར་བགྱིད་ལགས་སོ། །ཞེས་པའི་བར་དེ་བཤགས་པའི་ཡུལ་ངོས་བཟུང་བ། བཤགས་བྱའི་ཉེས་པ་བསྟན་པ། ཇི་ལྟར་བཤགས་པའི་ཚུལ་གསུམ་མོ། །དང་པོ་ནི། དགོངས་གསོལ་ཐོག་མ་སྟེ། སངས་རྒྱས་སུམ་ཅུ་རྩ་ལྔ་པོ་དེ་དག་ལ་སོགས་པ་ཞེས་སྦྱར་ཞིང༌། ཇི་སྙེད་ཅེས་པ་མང་པོའི་ཚིག་གོ །འཚོ་ཞིང་གཞེས་པ་ནི་ད་ལྟར་བཞུགས་པའི་སངས་རྒྱས་རྣམས་ཁོ་ན་སྟེ། འདས་པ་དང་མ་འོངས་པའི་སངས་རྒྱས་ནི། འཇིག་རྟེན་ཕལ་པ་རྣམས་ཀྱི་བློ་ངོར་བཤགས་པའི་ཡུལ་དུ་མི་འདོད་པའི་ཕྱིར་མ་སྨོས་པའོ། །ངེས་པར་ན་ཀུན་རྫོབ་རྣམ་པར་གཞག་པ་ལ་ཡང༌། སྔོན་གྱི་སངས་རྒྱས་རྣམས་ད་ལྟར་མངོན་སུམ་དུ་བཞུགས་པ་ཡིན་ལ། དོན་དམ་པར་ནི། དུས་གསུམ་གྱི་སངས་རྒྱས་སུ་གདགས་པ་ཐམས་ཅད་ངོ་བོ་དབྱེ་བ་མེད་ཅིང་དུས་གསུམ་ལས་འདས་པའང་ཡིན་ནོ། །གཉིས་པ་ནི། གླེགས་བམ་འགའ་ཞིག་ལས་སྐྱེ་བ་ཐོག་མའི་ཐ་མ་མ་མཆིས་པ་ཞེས་འབྱུང་བ་ལ་སོགས་པར་མངོན་ཏེ། སྔོན་གྱི་མཐའ་མེད་པའི་དུས་ནས་ཞེས་པ་ཡིན་པའི་ཕྱིར་རོ། །ཐོག་མ་དང་ཐ་མ་མ་མཆིས་པ་ཞེས་པ་ལྟར་ནའང༌། དོན་དེ་ཁོ་ན་བཞིན་དུ་འཆད་དགོས་ཏེ། དེ་གཉིས་དོན་གཅིག་མིང་གི་རྣམ་གྲངས་སུ་བྱས་ནས། ཐོག་མ་མ་མཆིས་པའམ། ཐ་མ་སྟེ་སྔོན་གྱི་མཐའ་མ་མ་མཆིས་པ་ཞེས་སྦྱོར་དགོས་ཏེ།
ཐ་མ་ནི་མཐའ་ཡིན་པ་ལས་ཕྱི་མཐའ་མ་ཡིན་པར་སྔོན་མཐའ་ཡིན་པའི་དོན་ནོ། །སྤྱིར་ནས་དུས་གསུམ་གྱི་དགེ་བ་ལ་ཡི་རང་བསྔོ་བ་འབྱུང་བས་བློ་སྦྱོང་པའི་དོན་དུ་མ་འོངས་པའི་སྡིག་པ་བཤགས་པའང་མི་འགལ་མོད། འདིར་དེ་མི་སྦྱོར་རོ། །འཁོར་བ་ན་ཞེས་པ་འཁོར་བའི་གནས་ན་སྟེ། དེར་ཇི་ལྟར་འཁོར་བའི་ཚུལ་སྐྱེ་གནས་བཞིའི་སྐྱེ་བས་འགྲོ་བ་རིགས་ལྔ་པོ་གཞན་དང་གཞན་དག་ཏུ་སྐྱེ་བའི་ཚེ་ཞེས་སྦྱར་ནས། སྡིག་པ་མི་དགེ་བའི་ལས་རྣམས་ལས་བགྱིས་པ་ནི་རང་གི་དངོས་སུ་བྱས་པའོ། །བགྱིད་དུ་རྩལ་བ་ནི་གཞན་བྱེད་དུ་བཅུག་པའོ། །རྗེས་སུ་ཡི་རང་བ་ནི་གཞན་གྱིས་བྱས་པ་ལ་དགའ་བ་སྒོམ་ཞིང་བསྔགས་པ་བརྗོད་པའོ། །མཆོད་རྟེན་ནི་སྒྲ་ཡངས་པར་ན། དེ་བཞིན་གཤེགས་པའི་སྐུ་གསུང་ཐུགས་ཀྱི་རྟེན་དུ་གྲགས་པ་ཐམས་ཅད་དོ། དགེ་འདུན་གྱི་དཀོར་ནི་གནས་གཞི་གཅིག་ཏུ་གནས་པའི་དགེ་འདུན་གྱི་རྫས་དང༌། ཕྱོགས་བཞིའི་དགེ་འདུན་གྱི་དཀོར་ནི། གཞི་ན་གནས་པ་དང་ཕྱོགས་ཐམས་ཅད་ནས་ངེས་མེད་དུ་ཡོང་བ་ཀུན་གྱི་དུས་སུ་འབྱུང་བའམ་ནར་མའི་ཚུལ་གྱི་ཐོས་སོ། །ད་ལྟ་བོད་ཀྱི་ཡུལ་འདི་ན། སྟོན་ཀའི་དུས་ཀྱི་བསོད་སྙོམས་པ་དགག་པའི་བཅའ་སྒྲིགས་བྱེད་པའང་འདིའི་ཁོངས་སུ་གཏོགས་སོ། །འཕྲོག་པ་ཞེས་པ་ནི་དབང་ཆེས་འཕྲོགས་པའམ། འཇབ་བུས་རྐུས་ཀྱང་རུང་སྟེ་མ་བྱིན་པར་བླངས་པ་ཐམས་ཅད་དོ། །མཚམས་མེད་པ་ལྔའི་
ལས་ནི། ཕ་དང་མ་དང་དགྲ་བཅོམ་པ་གསོད་པ་དང༌། དགེ་འདུན་གྱི་དབྱེན་དང༌། ངན་སེམས་ཀྱིས་དེ་བཞིན་གཤེགས་པའི་སྐུ་ལ་ཁྲག་འབྱིན་པར་བྱེད་པ་སྟེ་ལས་དེ་བྱས་ནས་ཐེག་པ་ཆེན་པོའི་ཐབས་མཁས་ཀྱིས་མ་བཅོས་ན་སྐྱེ་བ་གཞན་གྱིས་བར་མ་ཆོད་པར་དམྱལ་བ་མནར་མེད་དུ་ལྷུང་ངེས་པའོ། །ལས་འདི་རྣམས་ཀྱི་ཕྱོགས་མཐུན་པ་ནི་ཉེ་བའི་མཚམས་མེད་པ་ལྔ་སྟེ། མ་ཡང་ཡིན་དགྲ་བཅོམ་པ་ཡང་ཡིན་པ་མི་གཙང་པར་སྤྱོད་པས་སུན་འབྱིན་པ་དང༌། བྱང་ཆུབ་སེམས་དཔའ་གསོད་པ་དང༌། རྒྱུན་ཞུགས་ལ་སོགས་པ་འཕགས་པ་སློབ་པ་གསོད་པ་དང༌། དགེ་འདུན་གྱི་འདུ་བའི་སྒོ་འཕྲོག་པ་སྟེ། དགེ་འདུན་གྱི་ལོངས་སྤྱོད་ངེས་པའི་རྫས་ཆུང་ཡང་རུང༌། མ་བྱིན་ལེན་པ་དང༌། མཆོད་རྟེན་འཇིགས་པ་སྟེ་རྟེན་གསུམ་བཤིག་པར་བྱེད་པའོ། །དེ་དག་ལས་དགེ་འདུན་གྱི་དབྱེན་ནི། འཁོར་ལོའི་དབྱེན་དང༌། ལས་ཀྱི་དབྱེན་དང༌། འཁྲུག་ལོང་བྱེད་པའི་དབྱེན་ཏེ་གསུམ་ལས། དང་པོ་ནི། སྟོན་པ་བཅོམ་ལྡན་འདས་ཉིད་བཞུགས་པའི་དུས་ལན་གཅིག་ཁོ་ན་བྱུང་བ་དེ་ཡིན་ལ། ལས་ཀྱི་དབྱེན་ནི། དགེ་སློང་ཚུལ་ཁྲིམས་ལྡན་པས་ཆོས་སུ་རློམ་པའི་བྱ་བ་ལ་བརྟེན་ནས་བྱུང་བའི་ཉེས་པ་ཡིན་པས་སྤྱིར་སྡིག་ཆེ་ཡང་རབ་ཏུ་བྱུང་བ་ལ་འབྱུང་འོས་པ་ཙམ་ཡིན་ལ། ཕྱི་མ་ནི་ངོ་ཚ་མེད་ཅིང༌། ཁྲེལ་མེད་པ་ཁོ་ནའི་དབང་དུ་གྱུར་པ་དང༌། རབ་ཏུ་བྱུང་བ་ལ་ཤིན་ཏུ་མི་འོས་ཤིང་མཚམས་ལས་འདས་པ་
ཆོས་མ་ཡིན་པ་ཁོ་ན་ལ་བརྟེན་པ་ཡིན་ནོ། །དེ་རྣམས་ལས་དགེ་འདུན་ལ་འཁྲུག་ལོང་གི་དབྱེན་བསྐྱེད་པ་འདི་དང༌། དགེ་འདུན་གྱི་འདུ་བའི་སྒོ་འཕྲོག་པ་འདི་གཉིས་ཤིན་ཏུ་འབྱུང་ཉེ་ཞིང་སྡིག་ཆེ་བས་གཟབ་དགོས། དེང་སང་གི་ཆོས་ལ་མཆོད་རྟེན་འཇིག་པ་དངོས་བྱེད་མཁན་ཅུང་ཟད་ཉུང་ངུ་ཆུག་ཀྱང༌། རྟེན་གསུམ་ལ་གུས་པ་མེད་ཅིང༌། རྩིང་ཆོས་ཀྱི་སྒོ་ནས་འགོམ་ཡུགས་གཏོང་བ་དང་ཆུད་འཛའ་བར་བྱེད་པ་ཡང་དེའི་ཕྱོགས་མཐུན་ཡིན་པས་འབད་དེ་སྤོང་བ་གལ་ཆེའོ། །མི་དགེ་བ་བཅུའི་ལས་ཀྱི་ལམ་ཞེས་པ་ལ། སྲོག་གཅོད་པ་དང༌། མ་བྱིན་པ་ལེན་པ་དང༌། འདོད་པས་ལོགས་པར་གཡེམ་པ་སྟེ་ལུས་ཀྱི་ལས་གསུམ་དང༌། རྫུན་དང་ཕྲ་མ་དང་ཚིག་རྩུབ་ངག་འཁྱལ་སྟེ་ངག་གི་ལས་བཞི་དང༌། བརྣབ་སེམས་གནོད་སེམས་ལོག་ལྟ་སྟེ་ཡིད་ཀྱི་ལས་གསུམ་མོ། །ཡང་དག་པར་བླངས་པ་ཞེས་པ་ལ། ཡང་དག་པ་ནི་ཚབས་ཆེན་པོའི་མིང་ཡིན་ལ། བླངས་པ་ནི་ལས་དེ་ལ་ཞུགས་པའམ། ཡང་ཡང་བྱེད་པའི་དོན་ཡིན་གྱི། དམ་འཆའ་ཞིང་བླངས་པ་ངེས་པར་དགོས་པ་ནི་མ་ཡིན་ནོ། །དེ་ལ་སྡིག་པའི་ལས་བགྱིས་པ་སོགས་ཀྱིས་མདོར་བསྟན་པ་དང༌། མཆོད་རྟེན་གྱི་དཀོར་རམ་སོགས་ནི་ཉེས་པ་ཆེ་ཞིང་འབྱུང་ཉེ་བ་འགའ་ཞིག་གི་ཁྱད་པར་དུ་སྨོས་པ་ཡིན་ནོ། །དེ་དག་ནི་སྡིག་པ་ལས་ཀྱི་ངོ་བོ་བསམ་པ་ཡིན་ལ། ད་ནི་ཉེས་དམིགས་ཀྱི་སྒོ་ནས་ལས་ངན་པའི་
རང་བཞིན་བསམ་པ་ནི། ལས་ཀྱི་སྒྲིབ་པ་སོགས་སོ། །གང་གིས་སྒྲིབ་ནས་ཞེས་པ་ལས་ངན་དེ་བྱས་པས་སེམས་རྒྱུད་བསྒྲིབས་ཏེ། ལས་དེའི་དབང་གིས་སྐྱེ་གནས་ངན་པར་འཁྲིད་པ་ཞེས་པའི་དོན་ནོ། །འཆི་བ་འགྲོ་བའི་དོན་ཏེ། འདིར་དམྱལ་བ་ལ་སོགས་པ་མི་ཁོམ་པའི་གནས་བརྒྱད་དང༌། སངས་རྒྱས་འབྱུང་བ་ལ་མི་མཉེས་པར་བྱེད་པ་སྟེ་འགྲོ་བ་ངན་པ་དགུའོ། །དེ་ལས་ཡུལ་མཐའ་འཁོབ་ནི་དམ་པའི་ཆོས་སངས་རྒྱས་ཀྱི་བསྟན་པ་མེད་པའོ། །ཀླ་ཀློ་ནི་སྟག་གཟིག་གི་ཆོས་ལུགས་འཛིན་པའམ་དགེ་སྡིག་གི་རྣམ་དབྱེ་མི་ཤེས་པ་དང༌། དགེ་སྡིག་གི་རྣམ་དབྱེ་གོ་ལོག་ལ་འཛིན་དམ་པོ་དང་བཅས་པ་རྣམས་སོ། །ལྷ་ཚེ་རིང་པོ་ནི་འདུ་ཤེས་མེད་པའི་ལྷ་སྟེ། རྟེན་དེ་ལ་ཏིང་ངེ་འཛིན་གྱི་གནས་པ་ངན་པའི་མཐུས། དམ་ཆོས་སྤྱོད་པའི་སྐལ་བ་མེད་ཅིང༌། ཕལ་ཆེ་བ་ཞིག་འཆི་ཁར་ལོག་ལྟས་མཚམས་སྦྱར་ནས་དམྱལ་བར་འགྲོ་བའོ། །ལྟ་བ་ལོག་པ་ནི། སྐུར་འདེབས་ཀྱི་ལོག་ལྟ་ཉིད་དམ། གཞན་ཡང་བྱེད་པ་པོར་འདོད་པ་ལ་སོགས་པའི་ལྟ་བ་ངན་པ་དམ་དུ་འཆང་བར་འགྱུར་བ་སྟེ། འདིར་འགྲོ་བའམ། སྐྱེ་བའམ། འགྱུར་བའམ་ཞེས་སོགས་ནི། དེ་དང་དེར་འགྱུར་བའི་རྒྱུ་ལས་ངན་པ་གང་དེ་དང་དེ་ཞེས་པའི་དོན་ནོ། །དེ་ལ་ངན་སོང་གསུམ་ནི། སྡིག་པའི་ལས་ཀྱི་རྣམ་སྨིན་མྱོང་བ་གཙོ་ཆེ་བའི་དབང་དུ་བྱས་ལ། གཞན་རྣམས་རྒྱུ་མཐུན་པ་ལ་སྤྱད་པས། སྡུག་
བསྔལ་གཞན་གསུམ་པོའི་གཞི་འམ་རྟེན་དུ་འགྲོ་བའི་དབང་དུ་བྱས་སོ། །སངས་རྒྱས་འབྱུང་བ་ལ་མཉེས་པར་མི་བགྱིད་པ་ནི། དེ་བཞིན་གཤེགས་པ་ལ་སྐུར་བ་འདེབས་པ་ལ་སོགས་པ་དངོས་སུ་སྡིག་གསོག་པ་དང༌། བཀའ་གཅོག་པ་ལྟ་བུ་ཡིན་ཏེ། སྡིག་བསགས་ཀྱང་སངས་རྒྱས་ལ་མི་མཉེས་པའི་ཐུགས་འབྱུང་བ་མེད་མོད། འཇིག་རྟེན་དུ་གྲགས་པ་ལྟར་གསུངས་པའོ། །རྗེས་མཐུན་པ་ནི་ད་ལྟར་ཡང་ཚུལ་ཁྲིམས་དང་ལྡན་ཞིང་ཡང་དག་པའི་ལམ་གསལ་བར་བྱེད་པའི་སྐྱེས་བུ་དམ་པ་ལ་སྡིག་གསོག་པ་དང༌། དེའི་བཀའ་ཆོས་དང་ལྡན་པ་གཅོག་པའོ། །གསུམ་པ་ནི་དེ་དག་ཐམས་ཅད་ཅེས་པ་ལ་སོགས་པའོ། །ཡེ་ཤེས་དང་སྤྱན་དང་དཔང་དུ་དང་ཚད་མ་དང་མཁྱེན་པ་གཟིགས་པ་རྣམས་དོན་གཅིག་ལ་རྣམ་གྲངས་ཀྱི་དབང་དུ་བྱས་ཀྱང་རུང་སྟེ། བདག་གིས་ཉེས་པ་བྱས་པ་སངས་རྒྱས་རྣམས་ཀྱིས་མི་མཁྱེན་ཏོ་ཞེས་པ་དགག་པའི་ཕྱིར་དུ། ཐམས་ཅད་མཁྱེན་པ་ཡེ་ཤེས་ཀྱི་སྤྱན་དང་ལྡན་པ་ཡིན་པས་བདག་ལ་དེ་རྣམས་ལྐོག་ཏུ་གྱུར་ཀྱང༌། དེ་རྣམས་ཀྱིས་བདག་མངོན་སུམ་དུ་གཟིགས་པ་ཡིན་ནོ་སྙམ་ངོ་ཚ་བ་དང༌། འཇིག་པ་དང་འཛེམ་བག་དང་བཅས་པར་བྱ་བའི་ཕྱིར་རོ། །ཡང་ན་ཡེ་ཤེས་སུ་གྱུར་པ་ནི། ཤེས་བྱ་ཐམས་ཅད་གཟིགས་པས་བདག་གིས་ཉེས་པ་བྱས་པ་དང༌། དེའི་རྒྱུད་དང་ཉེས་དམིགས་ཐམས་ཅད་མཁྱེན་ཅིང༌། འོན་ཀྱང་སྙིང་རྗེ་ཆེན་པོའི་
ཐུགས་ཅན་ཡིན་པས། བདག་ཅག་གི་ཉེས་པ་སྦྱོང་བར་མཛད་དོ། །སྤྱན་དུ་གྱུར་པ་ནི། སོ་བའམ་དེ་ཉིད་དཔང་པོའང་ཡིན་ཏེ་སེམས་ཅན་སྡུག་བསྔལ་བ་རྣམས་ལ། དཔང་པོར་གྱུར་པའི་ཕྱིར། བདག་གི་ཉེས་པ་བྱས་པ་ཡང་མཁྱེན་ལ། སྙིང་ཐག་པས་འཆགས་པའམ་གཡོ་རྒྱུ་ཚིག་ཙམ་གྱིས་འཆགས་པ་ཡང་མཁྱེན་ནོ། །དེའི་ཕྱིར་དཔང་པོ་ཞུ་བའི་དོན་ནོ། །ཚད་མར་གྱུར་པ་ནི། དངོས་པོའི་གནས་ལུགས་ལ་མ་འཁྲུལ་ཞིང༌། ཉེ་རིང་དང་གཡོ་སྒྱུ་སྤངས་པ། རྣམ་པ་ཀུན་ཏུ་རྫུན་མི་གསུང་བའི་ཕྱིར་ན་ཚད་མར་གྱུར་པའོ། །མཁྱེན་པས་གཟིགས་པ་ཞེས་དཔེ་ཕལ་ཆེར་ལས་འབྱུང་བ་ནི། བྱེད་ཚིག་ཅུང་ཟད་འཁྲུལ་བ་སྟེ། མཁྱེན་པ་གཟིགས་པ་ཞེས་སོ་སོར་མཚམས་བཅད་ན། སྐད་དོད་དང་མཐུན་ཏེ་ཇི་ལྟ་བའི་གནས་ལུགས་མཐའ་དག་མཁྱེན་པ་དང༌། ཀུན་རྫོབ་རྟེན་འབྲེལ་མཐའ་དག་གཟིགས་ཤིང༌། དེ་ལས་འགྲོ་བའི་དོན་ཕུན་སུམ་ཚོགས་པ་སྤྱོད་པའོ། །དེའི་ཕྱིར་ཉེས་བྱས་རྣམས་རང་བཞིན་མེད་པའི་དབྱིངས་ལ་འཇུག་པར་མཁྱེན་ཅིང་འཇུག་པའི་འཐབས་ཚུལ་ཡང་མཁྱེན་པའི་ཕྱིར། དག་ཚངས་འབུལ་བའི་ཡུལ་མཐར་ཐུག་པར་འོས་པའོ། །མཐོལ་བ་ནི་ཉེས་བྱས་འདི་ལྟ་བུ་བགྱིས་སོ་ཞེས་ཚོགས་སུ་མི་འཆབ་པར་སྒྲོགས་པ་ཡིན་ལ། བཤགས་པ་ནི། ཉེས་པ་ལ་འགྱོད་པས་ཀུན་ནས་བླངས་ཏེ་སྐྱོན་ཡིན་པར་སྨོས་པའོ། །མི་འཆབ་པོ་མི་སྦེད་དོ་ཞེས་པ་ནི་དོན་གཅིག་མིང་གི་རྣམ་
གྲངས་སུ་བྱས་ན། འགྱོད་པ་སྟོབས་དང་ལྡན་པས་དོན་དེ་ཉིད་ཡང་ཡང་དུ་བརྗོད་པའོ། །ཡང་ན་མཐོལ་བ་ནི་ངོ་བོའམ་མདོར་བསྟན་པ་དང༌། ཕྱི་མ་གཉིས་དབྱེ་བའི་རྒྱས་བཤད་ཀྱི་ཚུལ་ཏེ་སྔར་གྱི་རྣམས་མི་འཆབ་བོ། །ཕྱིས་ཀྱི་རྣམས་མི་སྦེད་དོ། །ཞེས་ཀྱང་འཆད་དེ་འགལ་བ་མ་མཐོང་ལ། དེ་དག་སྔར་བྱས་དུག་འཐུངས་པ་ལྟ་བུའི་འགྱོད་སེམས་ཀྱིས་བཤགས་པའི་དབང་དུ་བྱས་སོ། །སླན་ཆད་ཀྱང་གཅོད་ཅིང་བསྡོམ་པར་བགྱི་ཞེས་པ་ཕྱིན་ཆད་སྲོག་ལ་བབ་ཀྱང་ཉེས་པ་དེ་ལྟ་བུ་མི་བྱེད་པར་ངམ་འཆའ་བ་སྟེ། གཅོད་པ་ནི་སྔར་གྱི་རྒྱུན་གཅོད་པ་དང༌། སྡོམས་པ་ནི་ཕྱོགས་དེ་ལ་དབང་པོའི་སྒྲོ་སྡོམ་པའོ། །ཉེས་ལྟུང་ལྡོག་པར་བྱེད་པའི་ཐབས་ཀྱི་གཙོ་བོ་ནི་འདི་ཁོ་ན་ཏེ། འདི་མེད་ན་ནི་འགྱོད་པ་དང་སུན་འབྱིན་པ་ཡོད་པ་ལྟར་སྣང་ཡང༌། ལྟར་སྣང་ཁོ་ན་ཡིན་པས་སུན་འབྱིན་པའི་སྟོབས་སུ་མི་འགྱུར་རོ། །གསུམ་པ་ཡོངས་སུ་བསྔོ་བའི་ཕུང་པོ་ལ། ཉེ་ཚེ་བའི་བསྔོ་བ་དང༌། རྒྱ་ཆེ་བའི་བསྔོ་བ་དང༌། བླ་ན་མེད་པའི་བསྔོ་བ་སྟེ་གསུམ་ལས། དང་པོ་ལ། སྦྱིན་པ་ཐ་ན་སོགས་ནི། སྦྱིན་པ་ལས་བྱུང་བའི་དགེ་བའི་རྩ་བ་ཐམས་ཅད་དང༌། ལུས་ངག་གི་ཉེས་སྤྱོད་ལས་ལྡོག་པའི་ཚུལ་ཁྲིམས་ཀྱི་དགེ་བ་ཐམས་ཅད་དང༌། ཚངས་པར་སྤྱོད་པ་སྟེ་བཟོད་པ་དང༌། དགེ་བ་ལ་སྤྲོ་བ་དང༌། ཞི་གནས་དང་ལྷག་མཐོང་ལས་བྱུང་
བའི་དགེ་བ་རྣམས་བསྔོ་བར་བགྱིད་པའོ། །གཉིས་པ་ནི། བདག་གིས་སེམས་ཅན་སོགས་ཏེ་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱང༌། སེམས་ཅན་ཡོངས་སུ་སྨིན་པའི་ཐབས་སུ་འདུ་བས་ཕར་ཕྱིན་དྲུག་དང་བསྡུ་དངོས་བཞི་ལ་སོགས་པ་ཐེག་ཆེན་གྱི་ཐུན་མོང་མ་ཡིན་པའི་སྤྱོད་པ་རྣམས་སོ། །བྱང་ཆུབ་ཀྱི་སེམས་ཀྱི་དགེ་བའི་རྩ་བ་ནི། སྤྱོད་པ་དེའི་རྩ་བར་གྱུར་པ་སྨོན་པ་དང་འཇུག་པའི་སེམས་ཡང་དག་པར་བསྐྱེད་པ་དང༌། དེའི་རིགས་རྒྱུན་གོམས་པར་བྱེད་པ་བྱམས་པ་དང་སྙིང་རྗེས་ཀུན་ནས་བླངས་པའི་བྱང་ཆུབ་ཀྱི་སེམས་བདག་གཞན་མཉམ་པ་དང་བརྗེ་བ་སྒོམ་པར་བྱེད་པའོ། །བླ་ན་མེད་པའི་ཡེ་ཤེས་ནི། སྤྲོས་པ་ཐམས་ཅད་དང་བྲལ་བའི་སྟོང་པ་ཉིད་གཉིས་སྟོང་གི་ཡེ་ཤེས་དེ་བཞིན་གཤེགས་པའི་སྙིང་པོ་ཉིད་དང༌། དེ་ལ་དམིགས་པའི་རྣལ་འབྱོར་ཏེ་གཉིས་ལས། འདིར་ནི་ངེས་པར་བསྔོ་བར་དགོས་པའི་བླ་ན་མེད་པའི་ཡེ་ཤེས་ནི་ཕྱི་མ་དེ་ཡིན་ལ། དེ་ཉིད་ཀྱི་ཡུལ་དུ་དམིགས་པའི་ཆོས་དབྱིངས་དེ་ཡང་སྤྱི་ལྡོག་ནས་བསྔོ་བར་བྱ་བ་ནི་ཡིན་ཏེ། དགེ་བ་ཐམས་ཅད་ཆོས་ཀྱི་དབྱིངས་སུ་རོ་གཅིག་པར་དམིགས་ནས་གནས་ལུགས་མཐར་ཐུག་པའི་ཆོས་ཀྱི་སྐུར་སྨོན་པར་བྱེད་དགོས་པའི་ཕྱིར་རོ། །ཆོས་དབྱིངས་བསྔོ་རྒྱུར་བྱས་ན་དེ་ལ་མཚན་མར་བལྟ་བར་འགྱུར་སྙམ་ན། བསྔོ་བ་ནི་ཀུན་རྫོབ་ལ་བརྟེན་ནས་བཞག་དགོས་པ་བསོད་ནམས་བསྔོ་བྱར་བྱེད་པ་
དང་ཁྱད་པར་མེད་པས་མཚན་ལྟར་མི་འགྲོའོ། །ཆོས་དབྱིངས་བསྔོ་བྱར་བྱེད་པ་ཡང་ཀུན་རྫོབ་ཀྱི་བློ་ངོར་ཡིན་ལ། དོན་དམ་པར་ནི་བསྔོ་བ་ཉིད་ཀྱང་མ་གྲུབ་ན། ཆོས་དབྱིངས་བསྔོ་བྱ་ཡིན་མིན་གྱི་དཔྱད་པ་མི་འཇུག་གོ །ཆོས་དབྱིངས་བསྔོ་ཡང་བདེན་པར་ཞེན་ནས་མི་བསྔོ་བའི་ཕྱིར། དམིགས་པའི་དུག་དང་བཅས་པའི་བསྔོ་བར་མི་འགྱུར་ལ། བསྔོ་བྱར་བསམ་པས་བདེན་ཞེན་དུ་འགྱུར་ན་ནི། དགེ་བའི་ལས་ལ་མཚུངས་པས། བསྔོ་བ་དུག་མེད་མི་སྲིད་པར་འགྱུར་ཞིང༌། ཅི་སྟེ་ཆོས་དབྱིངས་རང་བཞིན་ཡིན་ཅིང་དགེ་བར་ཡང་འདོད་ལ། བདེན་པར་ཡང་འདོད་པའི་ཕྱིར་དམིགས་བཅས་སོ་སྙམ་ན། ངོ་བོ་ཉིད་ཀྱི་དགེ་ཞིང་བདེན་པར་གནས་ཀྱང༌། དེ་འདྲ་ཁོ་ནར་ཞེན་པ་ནི་མི་བྱེད་པས་ན་སྐྱོན་མེད་དེ། དཔེར་ན་འདུས་བྱས་ཀྱི་དགེ་བ་རྣམས་ཀྱང་ཀུན་རྫོབ་ཏུ་དོན་བྱེད་ནུས་པ་ཡིན་མོད་ཀྱི། ཀུན་རྫོབ་ཏུ་དོན་བྱེད་ནུས་པའོ། །ཞེས་ཞེན་པར་མི་བྱེད་པ་བཞིན་ནོ། །བསྔོ་བྱ་དགེ་རྩ་གཉིས་པོ་དེའི་མཇུག་གཅིག་ཏུ་སྡོམ་པའི་བསྔོ་བ་ནི། གཅིག་ཏུ་བསྡུས་ཤིང་བཟླུམས་ཏེ་བསྡམས་ནས་ཞེས་པ་ལ་གསུམ་པོ་རྣམ་གྲངས་སུ་སྦྱར་ཀྱང་རུང་ལ། བསྡུས་པ་ནི་ཚོགས་པ་བཟླུམས་པ་ནི་འདྲེས་པ་བསྡོམས་པ་ནི་དབྱེར་མི་ཕྱེད་པ་ཞེས་འཆད་པ་ལྟར་ཡང་རུང་ངོ༌། །འགྲེལ་པ་གཅིག་ལས། ཚེ་འདིའི་ཕུན་ཚོག་དང་ལྷ་མི་དང༌། ཐེག་དམན་དུ་མ་བསྔོས་པ་ལ་རིམ་གྱིས་སྦྱོར་བ་ནི། བརྡོལ་ཐབས་
སུ་སྨྲས་པའོ། །དེ་བས་ན་དགེ་བའི་རྩ་བ་རྣམས་ཐམས་ཅད་བློས་གཅིག་ཏུ་བསྡོམས་ནས། དེ་ལ་འབྲས་བུའི་མཆོག་ཐོབ་པར་སྨོན་ནོ། །འབྲས་བུའི་མཆོག་གང་དུ་བསྔོ་བར་བྱེད་ཅེ་ན། བླ་ན་མ་མཆིས་པ་དང་གོང་ན་མ་མཆིས་པ་རྣམ་གྲངས་ཀྱི་སྨོས་པ་སྟེ། དེ་ལས་ལྷག་པའི་གོ་འཕང་གཞན་མེད་པའོ། །བླ་མའི་ཡང་བླ་མར་ཞེས་དེ་ལ་བླ་མ་ནི། ཉན་ཐོས་དང་རང་སངས་རྒྱས་ཀྱི་བྱང་ཆུབ་ཡིན་ལ་དེ་ལས་བླ་མར་གྱུར་པ་ནི། བླ་ན་མེད་པའི་བྱང་ཆུབ་བོ། །གོང་མའི་ཡང་གོང་མ་ཞེས་འདོན་པ་ལྟར་ན། དེ་གཉིས་རྣམ་གྲངས་ཀྱི་སྒོ་ནས་སྨོས་པ་ཙམ་ཡིན་གྱི་དོན་སོགས་པ་མེད་ལ། དེ་ལྟ་བས་ན་མདོ་ཉིད་དང་དཔེ་མང་པོ་ལས། གང་རུང་གཅིག་ཁོ་ན་སྨོས་པ་ལེགས་པར་མངོན་ནོ། །དེ་ལྟར་ན་དགེ་རྩ་བསགས་པ་རྣམས་ཀྱི་མཐུ་ལས། གོང་འཕང་དེ་ལྟ་བུ་ཐོབ་པར་གྱུར་ཅིག་པའོ། །གསུམ་པ་ནི། ཇི་ལྟར་འདས་པའི་སངས་རྒྱས་སོགས་ཏེ། རང་ཅག་སོ་སོ་སྐྱེ་བོས་བྱང་ཆུབ་དང་གཞན་དོན་དུ་བསྔོ་བ་སོགས་སྨོན་ལམ་རྒྱ་ཆེན་པོར་རློམ་པ་མང་པོ་བགྱིས་ཀྱང༌། ཡང་དག་པར་ན་རྒྱ་ཆེན་པོར་འགྱུར་བ་དཀའ་བས། དུས་གསུམ་གྱི་སངས་རྒྱས་རྣམས་ཀྱི་སྨོན་ལམ་གང་ཡིན་པ་དེ་ཐམས་ཅད། བདག་གི་དགེ་བ་འདི་དག་ལ་བརྟེན་ནས་གྲུབ་པར་གྱུར་ཅིག་ཅེས་བརྗོད་པས། སྨོན་ལམ་རྒྱ་མཚོ་མཐའ་མེད་པ་ལ་འཇུག་པའི་བསྔོ་བར་འགྱུར་བའོ། །རྩ་བའི་བསྡུས་དོན་གཉིས་པ། རྒྱུན་
བཤགས་མདོར་བསྡུས་པས་བཤད་པ་ནི་སྔར་གྱི་དོན་བསྡུ་ཡང་ཡིན་ལ། སྔར་མ་བསྟན་པའི་ཡི་རང་གསོལ་འདེབས་སོགས་ཀྱང་ཁ་སྐོང་གི་ཚུལ་དུ་གནས་སོ། །སྐྱབས་འགྲོ་སྔར་མདོར་བསྟན་པ་དེ། སླར་ཡང་འདིར་རྒྱས་པར་བཤད་ཅིང༌། མཐར་ཐུག་གི་སྐྱབས་གནས་གཅིག་ཏུ་བསྟན་པ་ཡང་ཡིན་ནོ། །དེ་ཡང་སྡིག་པ་ཐམས་ཅད་ནི་སོ་སོར་བཤགས་སོ་ཞེས་པ་མན་ཆད་དེ། བཤགས་པ་དང་ཡི་རང་དང་གསོལ་འདེབས་དང༌། བསྔོ་བ་རྣམས་ལ་ཚིག་རེ་རེ་དང༌། སྐྱབས་འགྲོ་ཚིགས་བཅད་གཅིག་གོ །དེ་དག་ལས་གཞན་རྣམས་གོ་སླ་ལ། གསོལ་བ་འདེབས་པ་ནི། མཆོག་གི་སྤྲུལ་པའི་སྐུ་བྱང་ཆུབ་ཐོབ་མ་ཐག་པའི་ཚུལ་སྟོན་པ་རྣམས་ལ་ཆོས་འཁོར་བསྐོར་བར་བསྐུལ་བ་དང༌། མྱ་ངན་ལས་འདའ་བར་བཞེད་པ་རྣམས་ལ་མྱ་ངན་ལས་མི་འདའ་བར་གསོལ་བ་འདེབས་པ་གཉིས་ཡིན་པར་འཆད་དེ། དེ་ལྟར་ཡང་ཡིན་ལ། དེར་མ་ཟད་འདོད་པའི་དོན་ལ་གསོལ་བ་འདེབས་པ་ཐམས་ཅད་བསྟན་ཏོ། །འདོད་པའི་དོན་ཡང་གཙོ་བོར་གཞན་དོན་ཏེ་སེམས་ཅན་གྱི་སྡུག་བསྔལ་སྐྱོབ་པར་མཛད་པ་ལ་སོགས་པའོ། །བླ་ན་མེད་པའི་ཡེ་ཤེས་ཀྱི་མཆོག་ནི་སངས་རྒྱས་རྣམས་ཀྱི་ངོ་བོ་ཉིད་སྐུ་རྣམ་པ་ཐམས་ཅད་པ་ཉིད་ཀྱི་གོ་འཕང་ངོ༌། །མི་མཆོག་དང་རྒྱལ་བ་ནི་སངས་རྒྱས་ཀྱི་མཚན་གྱི་རྣམ་གྲངས་དང༌། སྔར་སངས་རྒྱས་ལ་སྐྱབས་སུ་མཆིའོ་ཞེས་པ་ཙམ་ལས་མེད་ཀྱང༌། འདིར་
རྒྱས་པར་དབྱེ་སྟེ། གང་དག་ད་ལྟར་བཞུགས་པ་རྣམས་དང༌། གང་དག་འདས་པའི་ཚུལ་བསྟན་པ་དག་དང༌། དེ་བཞིན་གང་དག་ད་ལྟ་མ་བྱོན་ཀྱང་མ་འོངས་པ་ན་འབྱོན་པར་འགྱུར་བ་རྣམས་ལའང་ཞེས་སངས་རྒྱས་ཐམས་ཅད་སྨོས་ཤིང༌། དེ་ལ་དུས་གསུམ་གྱི་སངས་རྒྱས་སུ་དབྱེ་བའི་ཐ་སྙད་ནི། མ་དག་པའི་ཞིང་དུ་འབྱུང་བའི་དབང་དུ་བྱས་ཀྱི། འོག་མིན་སྟུག་པོ་བཀོད་པའི་ཞིང་ལ་སོགས་པ་ན་ཐམས་ཅད་ད་ལྟར་ཡང་བཞུགས་སོ་ཞེས་བྱ་ལ། འོན་ཀྱང་མ་བྱོན་པའི་སངས་རྒྱས་རྣམས་ཇི་ལྟར་བཞུགས་སྙམ་ན། ཀུན་རྫོབ་ཐ་སྙད་ཀྱི་ལུགས་ལ་དངོས་སུ་བཞུགས་པར་མི་འདོད་ཀྱང༌། དད་པ་བསྐྱེད་ཅིང་བློ་སྦྱང་བའི་དོན་དུ་སྐྱབས་སུ་འགྲོ་བ་ཡིན་ལ། ངེས་པའི་དོན་དུ་ནི། ཡེ་ཤེས་ཀྱི་རྒྱ་མཚོ་ཆེན་པོ་རྟག་ཏུ་གནས་པ། ད་ལྟར་མོས་པའི་ཡུལ་དུ་བཞག་པ་འདི་ཁོ་ན། མ་བྱོན་པ་རྣམས་ཀྱི་ཐོབ་པར་བྱ་བ་ཡིན་པའི་ཕྱིར། འདས་པ་དང་ད་ལྟར་བའི་སྐུ་གསུམ་ལ་སྐྱབས་སུ་སོང་བས། མ་འོངས་པའི་སྐུ་གསུམ་ཞེས་བརྗོད་པའི་གཞི་གང་ཡིན་པ་དེ་ཡང་དེ་ཁོ་ནར་འདུས་པ་ཡིན་ནོ། །སངས་རྒྱས་དཀོན་མཆོག་དེའི་ཁྱད་པར་ནི། ཡོན་ཏན་ཡང་ཡིན་ལ་བསྔགས་ཤིང་བསྟོད་པར་བྱ་བ་ཡང་ཡིན་པའི་རྨད་བྱུང་གི་ཆོས་རྒྱ་མཚོ་དང་འདྲ་བར་མཐའ་ཡས་པ་སྟེ། དེ་གང་ལ་མངའ་བ་ཀུན་ལ་ཞེས་པའོ། །ཚུལ་ཇི་ལྟར་ན་ཐལ་མོ་སྦྱར་བ་བཏུད་ནས་ཞེས་གུས་པས་སོ། །
འདིར་སྐྱབས་ཡུལ་སངས་རྒྱས་ཁོ་ན་སྨོས་པ་ནི། སྤྱིར་སངས་རྒྱས་ལ་སྐྱབས་སུ་སོང་ནས། གཞན་གཉིས་ཤུགས་ལའང་གོ་བ་དང༌། མཐར་ཐུག་གི་སྐྱབས་གནས་སངས་རྒྱས་གཅིག་པུ་ཡིན་པར་ཡང་དགོངས་སོ། །དེ་ལྟ་ན་བྱང་ཆུབ་ལྟུང་བཤགས་ཀྱི་དོན་མདོ་ཙམ་བཤད་པ་རྫོགས་ཏེ། ཆོས་ཀྱི་རྣམ་གྲངས་འདི་ལ་ད་ལྟ་བོད་ན་བཞུགས་པའི་བསྟན་བཅོས་འགྱུར་རོ་འཚལ་གྱི་ནང་ན། འགྲེལ་པ་གཉིས་ཞིག་སྣང་སྟེ། ཛེ་ཏཱ་རིས་མཛད་ནས་ཚོགས་ལོ་ཙཱ་བས་བསྒྱུར་ཟེར་བ་གཅིག་དང༌། ཀླུ་སྒྲུབ་ཀྱིས་མཛད་ཅིང༌། པཎྜི་ཏ་ཞི་བ་འཚོ་དང༌། ལོ་ཙཱ་བ་རྙི་བ་ལྷའི་དབྱིངས་ཀྱིས་བསྒྱུར་ཟེར་བ་གཉིས་སྣང་བ། སློབ་དཔོན་དེ་དང་དེས་མཛད་པ་ནི་མིན་པར་སྣང་ལ། ཡོངས་རྒྱ་གར་གྱི་འགྲེལ་པ་ཡིན་ཡང་ཐེ་ཚོམ་གྱི་གཞིར་སྣང་ངོ༌། །དོན་གྱི་ཆ་ནས་ལེགས་པར་བཤད་པ་ནི་ཡོད་ལ། ནོར་བ་ཡང་ཅི་རིགས་པར་ནི་སྣང་ངོ༌། །ཆོས་རྗེ་པཎྜི་ཏའི་གསུང་གིས། ལྟུང་བཤགས་སངས་རྒྱས་ཕྱག་མཚན་ལ། ཕུབ་དང་རལ་གྲི་སོགས་འཛིན་པའི། སྒྲུབ་ཐབས་སངས་རྒྱས་ཀྱིས་མ་གསུངས། ཞེས་པ་ཀླུ་སྒྲུབ་ཀྱིས་མཛད་ཟེར་བ་དེ་ན། རལ་གྲི་དང་གོ་ཆ་འཛིན་པའི་སྒྲུབ་ཐབས་བྱས་པ་དེ་ལ་དགོངས་པར་སྣང་ཞིང༌། འོན་ཀྱང་ཅུང་ཟད་དཔྱད་དུ་ཡོད་དེ། གསང་སྔགས་ནང་པར་བཀྲལ་བ་ཡིན་ན། སངས་རྒྱས་རབ་ཏུ་བྱུར་བ་ཆགས་བྲལ་གྱི་རྣམ་པ་མཚོན་ཆ་འཛིན་པའི་སྒྲུབ་
ཐབས་བྱུང་སྲིད་ཀྱང༌། གྲུབ་ཐོབ་ཀྱི་མན་ངག་ཅན་ཡིན་ན། མཐའ་གཅིག་ཏུ་བསལ་བ་ཡང་མ་ཡིན་ཏེ། གཞན་ཡང་ཆ་བྱད་འགལ་འདུ་འཛིན་པའི་སྒྲུབ་ཐབས་ཚད་ལྡན་མང་དུ་སྣང་བའི་ཕྱིར་རོ། །མདོ་ལུགས་སུ་བཀྲལ་བ་ལྟ་བུ་ཡིན་ན་ནི་དེ་ལྟར་མི་འཐད་པ་ཅིས་ཀྱང་ཡིན་ནོ། །བདག་གིས་འདི་ནི་འགྲེལ་པ་དེ་གཉིས་ལས་ཀྱང་ལེགས་ཆ་ཅུང་ཟད་བླངས་ལ། བསླབས་བཏུས་ཀྱི་བཤད་པ་དང༌། སྤྱོད་འཇུག་གི་གཞུང་གི་འཕྲོས་དོན་དང༌། དམ་པ་སྔ་མའི་གསུང་འཕྲོས་ཆོས་འདི་དང་འབྲེལ་པ་རྣམས་ཀྱིས་ཀྱང་ཅུང་ཟད་གསལ་བར་བྱས་ལ། ཕལ་ཆེར་ནི་གཞུང་ཉིད་ལས་གསལ་བར་མཐོང་བ་དེ་ཉིད་སྨྲས་པ་ཡིན་ནོ། །སྐྱབས་འགྲོ་དང་ལས་འབྲས་ཀྱི་རྣམ་གཞག་སོགས་མཐའ་ཆོད་ཀྱི་གོ་དོན་དགོས་ན་ནི་གཞན་ལས་ཤེས་པར་བྱ་ལ། འཕྲལ་གྱི་ཚིག་དོན་ཙམ་གོ་སླ་བས། འདིར་ནི་བསྡུས་དོན་དཀའ་འགྲེལ་གྱི་ཚུལ་གྱིས་དོན་གྱི་མདོ་བཤད་པས་དགོས་པ་འགྲུབ་པར་སེམས་སོ། །ཞེས་པའང་ཏཱ་ར་ནཱ་ཐས་སྨྲས་པའོ། །པར་འདི་ཀརྨ་རཏྣས་བཞེངས། འབྲེལ་ཚད་བྱང་ཆུབ་ཐོག་ཤོག། མངྒ་ལཾ།། །།