འཕོ་བ་ཧིཀ་དགུ་མ།
འཕོ་བ་ཧིཀ་དགུ་མ་བཞུགས། ཨོཾ་སྭཱ་སྟི། སྐྱབས་སེམས་སྔོན་དུ་འགྲོ་བའི། རང་ཉིད་ཤ་ཁྲག་གི་གདོས་བཅས་མ་ཡིན་པ། རང་དུས་འཁོར་ལྷན་སྐྱེས་སྐུ་མདོག་སྔོན་པོ་རྐྱལ་པ་སྦུབ་སྟོང་དག་ཤེལ་སྔོན་པོའི་དབྱིབས་སུ་བསྒོམ་པའི། རྩ་དབུ་མ་མདའ་སྙུག་འབྲིང་པོ་ཙམ་ལུས་ཀྱི་དབུས་སུ་སྲོག་
ཤིང་ཚུལ་གི་དུ་ཡོད་པ། མར་སྣེ་ལྟེ་འོག་སོར་བཞི་ཙམ་ལ་ཟུག་པ། ཡར་སྣེ་སྤྱི་བོར་ཚངས་བུག་ཏུ་ཟུག་པའོ། །སྤྱི་བོར་ཧཾ་དཀར་པོ་མགོ་བོ་ཐུར་དུ་ལྟ་བ། དཔྲལ་བར་ཨོཾ་དཀར་བོ་མགོ་བོ་ཐུར་དུ་བལྟ་བ། མགྲིན་པར་ཨཱཿདམར་པོ་མགོ་བོ་ཐུར་དུ་བལྟ་བ། སྙིང་གར་ཧཱུཾ་སྔོན་པོ་མགོ་བོ་གྱེན་དུ་བལྟ་བ། ལྟེ་བར་སྭཱ་སེར་བོ་མགོ་བོ་གྱེན་དུ་བལྟ་བ། དབུ་མའི་མར་སྣའི་ཨ་ཡིག་དམར་པོ་ཡེ་ཤེས་ཀྱི་མེ་འབར་བའི་དབྱིབས་ཅན་རྣམས་བསྒོམས་པའི་མཐར་བཤང་སྒོ་བསྡམས་པ་དང༌། ཧིཀ་ཅེས་བརྗོད་པའི་ཚེ་མེ་རླུང་དྲངས་པའི་རྐྱེན་གྱིས་ཨཱཿཡིག་ལ་མེ་འབར་བའི་དབུ་མའི་ནང་ནས་ཡར་སོང་བས། ཡང་ཧིག་ཅེས་བརྗོད་པའི་ཡང་རླུང་དྲངས་པའི་རྐྱེན་གྱི་ལྟེ་བའི་སྭཱ་ཡིག་སེར་པོ་ལ་ཕོག་པས་ཐིག་ལེ་སེར་པོར་གྱུར། ཡང་ཧིཀ་ཅེས་བརྗོད་པའི་རྐྱེན་གྱི་སྙིང་གའི་ཧཱུཾ་ཡིག་ལ་ཕོག་པས་ཐིག་ལེ་ནག་པོར་གྱུར། སྔར་གྱི་ཐིག་ལེ་སེར་པོ་དང་རོ་གཅིག་ཏུ་འདྲེས་པས་སེར་ནག་ཏུ་གྱུར། ཡང་ཧིཀ་ཅེས་བརྗོད་པའི་རྐྱེན་གྱི་སྟེང་རླུང་ཐུར་དུ་མནན་པའི་སྤྱི་བོར་ཧཾ་དཀར་པོ་ལ་ཕོག་པས་ཧཾ་ཡིག་ཐིག་ལེ་དཀར་པོའི་རྣམ་པར་ཞུ། ཡང་ཧིཀ་ཅེས་བརྗོད་པས་རླུང་ཐུར་དུ་མནན་པའི་རྐྱེན་གྱི། དཔྲལ་བར་ཨོཾ་དང་འདྲེས་པས་ཐིག་ལེ་དཀར་པོ་གྱུར། ཡང་ཧིཀ་ཅེས་བརྗོད་པས་རླུང་ཐུར་དུ་མནན་པའི་མགྲིན་པར་ཨཱཿལ་ཕོག་སྔར་གྱི་ཐིག་ལེ་དཀར་པོ་དང་རོ་གཅིག་ཏུ་འདྲེས། ཐིག་ལེ་དཀར་དམར་འདྲེས་པ། ཡང་ཧིག་ཅེས་བརྗོད་པས་རླུང་ཐུར་དུ་མནན་པའི་རྐྱེན་གྱི་ཐིག་ལེ་དམར་པོ་དེ་ཉིད་སྙིང་གའི་ཐིག་ལེ་སེར་ནག་ལ་ཐིམ་པའི་ཐིག་ལེ་ཁྲ་བོ་སྲན་མ་ཙམ་མམ་ཡུངས་འབྲུ་ཙམ་གང་རུང་བསྒོམ་པའི་མཐར་ཧིག་
གསུམ་དང་བཅས་དབུ་མའི་ནང་ནས་ཡར་སོང་བས་སོར་བཅུ་དྲུག་གཞལ་བའི་སྤྱི་གཙུག་སྟེང་གི་ནམ་མཁའ་ལ་ཆོས་སྐུའི་བླ་མ་དུས་ཀྱི་འཁོར་ལོའི་ཐུགས་ཀར་ཡིད་གཉིས་ཐེ་ཚོམ་མེད་པར་འཕོས། ༈ སྤྱི་བོར་ཐར་པའི་སྒོ་ཆེན་ཡངས་པ་རུ། །སྐྱབས་གནས་བསླུ་བ་མེད་པའི་རྡོ་རྗེ་འཆང༌། །ངེས་འབྱུང་གདུང་ཤུག་དྲག་པོས་གསོལ་བ་འདེབས། །བླ་མའི་ཐུགས་ཀར་འཕོ་བར་བྱིན་གྱིས་རློབས། །དཔལ་ལྡན་བླ་མའི་རྣམ་པར་ཐར་བ༴ སོགས། སྐྱེ་བ་ཀུན་ཏུ་ཡང་དག༴ སོགས། ཡི་དམ་ལ་མོས་ན། ཡི་དམ་ཐུགས་རྗེའི་དབང་ཕྱུག་རྣམས། །དུས་ད་ལྟ་བྱིན་གྱིས་བརླབ་ཏུ་གསོལ། །ཞེས་མན་ཆད་སྔར་བཞིན་སྦྱར་བས་ཆོག་གོ །འདིའི་མཛད་བྱང་མི་སྣང་ཡང་ཏཱ་ར་ནཱ་ཐའི་གསུང་ཡིན་པར་གྲགས་སོ། །མངྒལཾ། །