དཔལ་དུས་ཀྱི་འཁོར་ལོ་ལ་གསོལ་བ་འདེབས་པ་དང་ཡན་ལག་དྲུག་གི་ལམ་གྱི་ཟབ་གནད།
དཔལ་དུས་ཀྱི་འཁོར་ལོ་ལ་གསོལ་བ་འདེབས་པ་དང་ཡན་ལག་དྲུག་གི་ལམ་གྱི་ཟབ་གནད་དག་བཞུགས། ༈ དུས་ཀྱི་འཁོར་ལོ་ལ་གསོལ་བ་འདེབས་པ། དཔལ་ལྡན་བླ་མ་ཐམས་ཅད་པ། དམ་པའི་ཤེས་རབ་ཡེ་ཤེས་ཆེ། །འགྱུར་མེད་བདེ་བ་ལྷན་ཅིག་སྐྱེས། །མ་ལུས་འདོད་པའི་ལྷ་སྩོལ་བ། །
དངོས་པོ་ཀུན་ཀྱི་ཁྱོད་ལ་འདུད་བགྱིད་ན། །འདྲེན་བྱེད་གཡོ་བའི་ཕྱག་རྒྱ་དམན་དག་ལ། །མཆིལ་མའི་ཐལ་བ་བཞིན་བགྱིས་རྡོ་རྗེ ཡིས། །སད་རྨི་གཉིད་འཐུག་བཞི་པའི་འབྲོག་དགོན་དུ། །རྣམ་པར་འཁྱམས་བྱེད་ཁྱབ་བདག་རྡོ་རྗེ་བཞི། །བྱང་ཆུབ་རྣམ་བཞིའི་ཁྱིམ་དུ་བདེ་བ་ཆེས། །དཔལ་ལྡན་སྒྱུ་འཕྲུལ་རྒྱལ་པོ་མགྲོན་གཉེར་ཤིག །མཧཱ་སུ་མ་སྟུ་སརྦ་ཛ་ག་ཏཾ། རང་ལོ་བཅུ་དྲུག་པ་ལའོ། ༈ །ཡན་ལག་དྲུག་གི་ལམ་གྱི་ཟབ་གནད་ནི།།ན་མོ་བུདྡྷ་བོ་དྷི་སཏྭ་ཀྲོ་ད་ར་ཛ་ཡཱ། དཔལ་ལྡན་དུས་ཀྱི་འཁོར་ལོ་ལ་ཕྱག་འཚལ་ལོ། །སོ་སོར་བསྡུད་པའི་དྷུ་ཏི་ཡི། ཡས་སྣར་སྲོག་རླུང་བསྡུད་པར་བྱེད།༵ ༼༡༽ །བསམ་གཏན་གྱིས་ནི་བསྟན་པར་བྱེད། ༼༢༽ །འདི་ནི་རྩ་ལམ་སྦྱོང་བྱེད་ཡིན། ༼༣༽ །མཐོ་རིས་སྣང་བའི་འཇུག་ངོགས་ལས། །རླུང་སྔགས་མི་ཕྱེད་ཡི་གེ་གསུམ། །ལྷུན་གྲུབ་རྡོར་བཟླས་སྙིང་ཀར་བྱེད། ༼༤༽ །སྲོག་ཐུར་བསྲེ་བྱེད་ཀུམྦྷ་ཉ། །ཀུནྡྷར་ནང་དུ་ཁ་སྦྱོར་པའོ། །སྲོག་རྩོལ་སྲོག་འགོག་ལྟེ་བར་བྱེད། ༼༥༽ །འཛིན་པ་འཁོར་ལོ་དྲུག་ཀ་རུ། ཁམས་དྲུག་ཐིག་ལེ་སྲོག་བཅིང་བས། །སྤྲོ་བསྡུ་དག་པའི་སྐུ་སྒྲུབ་བྱེད། ༼༦༽ །སྟོང་གཟུགས་ཕྱག་རྒྱའི་པདྨ་ཡིས། །མི་འགྱུར་བདེ་བ་འདྲེན་པར་བྱེད། ༼༧༽ །ཕྱག་རྒྱ་གཞན་ཡང་ཐབས་ཡིན་ཏེ། །དེ་འདྲ་རྗེས་དྲན་ཡིན་པར་ཤེས། ༼༨༽ །དེ་ཡི་སྟོང་ཕྲག་ཉི་ཤུ་དང༌། །རོལ་བརྒྱའི་དཀར་དམར་སྟེང་འོག་བརྩེགས། །རླུང་ཐིམ་དེ་ཉིད་བདེ་བར་བྱེད། ༼༩༽ །དཀར་དམར་
བརྩེགས་པའི་དཀར་དམར་ནི། །བརྟན་པ་འཛག་བདེར་བཅས་འཇོམས་བྱེད། ༼༡༠༽ །དྷུ་ཏིའི་སྣ་གཉིས་གཙོ་ཆེའོ། ༼༡༡༽ །ཇི་ལྟར་ངོ་ཡིས་རང་ཉིད་མི་སྣང་ཞིང༌། ཁམས་ཟད་བྱེད་བཞིན་བྱང་ཆུབ་སེམས་བཅིངས་པས། །ཕྲ་རགས་རྡུལ་འཇིགས་ཁུ་རྡུལ་ཚོགས་པ་འཇོམས། །ཇི་སྲིད་ཚོགས་པ་དེ་སྲིད་འགྱུར་པ་ཡིན། །བདེ་ཆེན་ཀུན་དའི་རྒྱུ་ལས་བྱུང་མོད་ཀྱང༌། །བདེ་བས་བརྟེན་པའི་འབྲེལ་བ་རྫོགས་ཚོགས་འཇིགས། །རྫོགས་སངས་རྒྱས་ལ་རྡུལ་གྱི་ཁམས་མེད་དོ། །ཚོགས་པ་ཞིག་ན་མི་འགྱུར་བདེ་ཆེན་ཐོབ། །བསྐྱེད་རིམ་ཡན་ལག་བཞི་ཡིས་རྒྱུད་སྨིན་བྱེད། །ཕྲ་ཐིག་བདེ་སྟོང་རྒྱས་འདེབས་གནད་དུ་ཆེ། དང་པོ་སྟོང་གཟུགས་བར་སྒྲུབ་དྷུ་ཏིར་བཅུག །དབུ་མར་མི་འགྱུར་བཅིང་དང་ཐིམ་པ་ཡིས། །ཕྱག་རྒྱ་ཆེན་པོ་འགྲུབ་ཅེས་གསལ་བར་ཤེས། །དེ་དང་སྦྱར་བའི་ལྷན་སྐྱེས་བདེ་སྟོང་དེས། །དོན་ནི་འཕོ་བ་གཅིག་ཐིམ་མ་རེག་པར༌། །བདེན་འཛིན་ཉོན་མོངས་སྒྲིབ་བྲལ་བྱེད་པར་གོ །རླུང་དང་ཐིག་ལེ་བཞི་དང་ཚོགས་པ་བཅོམ། །ཕུང་ཁམས་ཀུན་ཡང་མི་འགྱུར་བདེ་ཆེན་དང༌། །སྟོང་གཟུགས་ལུས་སེམས་ཟུང་འཇུག་ཏིང་འཛིན་འདི། །འཛག་བདེའི་བག་ཆགས་གཉིས་སྣང་ཕྲ་མོ་འཇོམས། །གཟའ་སྐར་འགྲོས་དང་ལོངས་སྤྱོད་ལ་སོགས་པ། །ཤིན་དུ་ཕྲ་བ་མདོ་རྒྱུད་གཞན་ན་མེད། །དེ་ཀུན་ལུས་ལ་དུས་སྦྱོར་རླུང་ལ་སོགས། །སྐྱེས་གནས་འཇིགས་སྲུང་འདི་ལས་རྒྱས་པ་སུ། །དགོས་པ་སྦྱང་གཞི་དང་ནི་ལུས་ཀྱི གནད། །རྟོགས་ཕྱིར་
ཉིད་ཡིན་དེ་ཤེས་རིམ་པ་གཉིས། །ཤིན་ཏུ་རྒྱས་པའི་གནད་ཀུན་བདེ་བར་རྟོགས། །ཕྱི་མ་ཤེས་པ་སྔ་མ་རག་ལས་ཤིང༌། །དང་པོའི་གནད་ཀུན་ཞིབ་པར་རྟོགས་སླའི་ཕྱིར། །སྐར་རྩིས་རྣམས་ཀྱང་གསལ་བར་གསུང་པ་ཡིན། །ཕྱི་ནང་ངེས་པའི་ལམ་གྱི་སྒྲིབ་སྤོང་དང༌། །ཡོན་ཏན་བསྐྱེད་ཚུལ་འབྲས་བུའི་གནད་ཀུན་ཤེས། །ལམ་དང་ལམ་མིན་འབྱེད་ལ་སྤོབས་པ་རྙེད། །རྒྱུད་དོན་མ་ལུས་ཉམས་ལེན་ལ་དྲིལ་ནས། །ལམ་གྱི་སྲོག་ནི་དེ་ལྟར་ཤེས་དེ་མཁས། །དེ་ལྟར་མི་ཤེས་གཟའ་སྐར་ལུང་སྟོན་ཙམ། །ཐུགས་ལ་བཞག་ནས་རིམ་གཉིས་ལ་བྱོལ་དང༌། །ལམ་གནད་མི་ཤེས་བླུན་པོ་གླུ་སྒྱུས་མཁན། །རི་མོར་བྲིས་པའི་མར་མེ་ངོ་མཚར་ཆེ། །བདག་ནི་ལོག་པའི་ལམ་དུ་མི་འགྲོའོ། །འདི་ནི་རང་ལོ་བཅུ་དགུ་པ་ལ་བྲག་སྟོད་ཡེ་ཤེས་ཀྱི་ཕོ་བྲང་དུ། ཀུན་དགའ་སྙིང་པོ་ཏཱ་ར་ནཱ་ཐས སོ།། །།བཀྲ་ཤིས། །དགེ་ལེགས་འཕེལ། །རྒྱལ་བ་གཉིས་པ་ཀུན་མཁྱེན་ཇོ་ནང་བའི། །རྣམ་སྤྲུལ་རྗེ་བཙུན་ཡོན་ཏན་བཟང་པོ་ཡིས། །སྤྱི་ལོ་ཅིག་སྟོང་དགུ་བརྒྱ་གོ་ལྔ་ལོར། །རྒྱལ་བསྟན་མི་ཉམ་གོང་དུ་འཕེལ་བའི་ཕྱིར། །ཀུན་མཁྱེན་ཏཱ་ར་ནཱ་ཐའི་བཀའ་འབུམ་གྱི། །ཤིང་པར་འཛམ་ཐང་གཙང་བའི་ཆོ་གྲྭ་ཆེར། །བསྐྲུན་པའི་དགེ་བའོ་དཀར་དྲི་མེད་ཀྱིས། མ་གྱུར་འགྲོ་ལ་རྫོགས་སངས་རྒྱས་ཐོགབ་ཤོག །འདི་བཞེངས་དགེ་བའི་ཟླ་ཟེར་ཀྱི། འཁོར་བའི་ཚ་གདུང་སེལ་བར་ཤོག །དགེའོ། །