རྣལ་འབྱོར་པ་རྣམ་པ་གཉིས་ཀྱི་གསལ་བྱེད་ཀྱི་ཊཱི་ཀ་བི་ཛཱ་ཧ་རི་པཱ་རུ།
རྣལ་འབྱོར་པ་རྣམ་པ་གཉིས་ཀྱི་གསལ་བྱེད་ཀྱི་ཊཱི་ཀ་བི་ཛཱ་ཧ་རི་པཱ་རུ་བཞུགས། མ།
ན་མོ་བུདྡྷ་ཡ། གང་གིས་ཡང་དག་རྫོགས་སངས་མངོན་དུ་བགྱིས་རྣམས་དང༌། །འདི་ན་བདེ་དགེ་ཕྲ་མོ་གང་དེའང་སངས་རྒྱས་དྲིན། །བདག་གིས་ནུས་མིན་ཅུང་ཟད་སྤོབས་པའང་རྒྱལ་ཉིད་ཀྱིའོ། །དེ་ཕྱིར་དེ་ལ་ཕྱག་འཚལ་ནམ་ཡང་གཟིགས་པའི་རིགས། །དེ་ཡང་ཇི་སྐད་དུ། ཤཱན་ཏ་དེ་བའི་ཞལ་སྔ་ནས། ཇི་ལྟར་མཚན་མོ་མུན་ནག་སྤྲིན་རུམ་ན། །གློག་འགྱུ་སྐད་ཅིག་རབ་སྣང་སྟོན་པ་ལྟར། །དེ་བཞིན་སངས་རྒྱས་མཐུ་ཡིས་བརྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་འབྱུང༌། །ཞེས་པ་ལྟར། སངས་རྒྱས་ཀྱི་མཐུས་ལུས་ཅན་རྣམས་ལ་ཕན་པའི་བློ་གྲོས་སམ་དགེ་བའི་སེམས་འགའ་འབྱུང་སྟེ། དེའི་ཕྱིར་འདི་ཡང་སངས་རྒྱས་ཀྱི་མཐུར་བལྟའོ། །དེ་ལ་འདིའི་དགོངས་པ་དང༌། བརྗོད་བྱ་དང༌། དགོས་པའི་དགོས་པ་རྣམས་ཅི་ཞེ་ན། སྙིང་
རྗེ་ཆེ་དང་སྟོང་པ་ཉིད་[བདེ་བླག་ཏུ་རྟོགས་པས་] བསྒོམ་པ། དེ་འདིར་དགོས་པ་ཉིད་ཡིན་[བརྗོད་བྱ་སྟོང་ཉིད་སྙིང་རྗེ་]སྟོན་པར་བྱེད། གཞན་[སྙིང་རྗེ་དགོས་]དག་སྒྲོལ་བའི་[ཕྱིར་ཐོས་པའི་]བྱང་ཆུབ་ཆེད་དུའོ། །[སྟོང་པ་ཉིད་དང་སྙིང་རྗེའི་རྣམ་གཞག་བསྟན་པའི་དེ་གོ་བར་འགྱུར་ལ་གོ་བ་དེ་རྣམས་དགོས་ཤིང༌། སྒོམ་པས་བླ་མེད་ཐོབ་པར་འགྱུར་ཏེ། དེའི་ཕྱིར་སྒོམ་པ་ཉིད་འབྲེལ་བར་བྱའོ། །]སྒོམ་པ་ལྷུར་བྱེད་ཐོས་ཙམ་འདི་ལ་མིན། །ཞེས་བྱའོ། །དེ་ཡང་ཇི་སྐད་དུ། ཚེ་ནི་ཡུན་ཐུང་ཤེས་བྱའི་གནས་ཀྱང་མང༌། །ཚེ་ཡི་ཚད་ཀྱང་ཇི་ཙམ་མི་རྟོགས་པས། །ངང་བས་ཆུ་ལ་འོ་མ་ལེན་པར་ལྟར། །རང་གི་འདོད་[འདིའི་མཚམས་ནས་མ་ཡིག་གི་ལྡེབ་གཉིས་པ་མ་རྙེད་པའི་སྐབས་འདིར་སྐོ་རྒྱུ་ལྷག་ཡོད་པའི་རྗེས་སོར་མ་ཡིག་རྙེད་སྐབས་སྐོ་དགོས་ལགས།] ཁྱིམ་ན་སོགས་ཀྱིས་གང་དུ་བསྒོམ་པའི་གནས་དང༌། བསྒོམ་པ་པོའི་གང་ཟག་དང༌། རེ་ཞིག་སེམས་ཅན་ཐམས་ཅད་
ལ་སོགས་པས། ཇི་ལྟར་བསྒོམ་པ་ལ་འཇུག་པ་སྟེ། སྙིང་རྗེ་རྐྱེན་གཞན་གྱིས་མི་འཕྲོག་པར་བྱ་བའི་ཐབས་དང༌། མ་སྐྱེས་པ་བསྐྱེད་པའི་ཐབས་དང༌། བྱང་ཆུབ་ཀྱི་སེམས་ཀྱི་མཐུན་ཕྱོགས་རྣམས་ལ་ནན་ཏན་ཏུ་བསླབ་དགོས་པར་བསྟན་པ་དང༌། སྤྱོད་པ་ཕ་རོལ་ཕྱིན་པ་དྲུག་ལ་སྦྱོར་བ་དང༌། ཇི་ལྟར་གསང་སྔགས་ལས་འབྱུང་བ་ལྟར། སྙིང་རྗེ་དང་བྱང་ཆུབ་ཀྱི་སེམས་རིན་པོ་ཆེ་བསྐྱེད་པའི་ཐབས་གཞན་བསྟན་པ་རྣམས་ཏེ། བསྒོམ་པར་བྱ་ཞེས་པའི་བར་དུ་སྦྱར་རོ། །མཇུག་གི་དོན་ནི་ལམ་མདོར་བསྡུས་རྫོགས་སོ་ཞེས་བྱའོ། །བདག་གི་འདི་བྲིས་སོགས་ནི་དགེ་བ་བསྔོ་བའོ། །ད་ནི་ཚིག་གི་དོན་ཅུང་ཟད་བརྗོད་པར་བྱ་སྟེ། དེ་ལ་ལམ་རྣམས་ཀྱི་རིམ་པ་མང་དུ་ཡོད་པ། རྣལ་འབྱོར་རྣམ་པ་གཉིས་མདོར་བསྡུ་བའི་དབང་དུ་བྱས་ཏེ། ནན་ཏན་དུ་བྱེད་པར་འདོད་པས་རེ་ཞིག །སེམས་ཀྱི་དྲི་མ་འགོ་གནོན་ཞིང༌། ཏིང་ངེ་འཛིན་སྐྱེ་སླ་བའི་ཕྱིར། བློ་ཆོས་ལ་འཇུག་པའི་སྒོ། ཡན་ལག་བདུན་པའི་རྣལ་འབྱོར་འདི་ལམ་གྱི་རིམ་པ་རྣམས་ཀྱི་དང་པོའོ། །ཞེས་གླེང་བའི་རྩ་བ་དང་འབྲེལ་བར་ཡན་ལག་བདུན་པ་མདོར་སྨོས་སོ། །དེ་ནས་ཡན་ལག་བདུན་པ་དངོས་ནི། ཕྱོགས་བཅུར་བཞུགས་པའི་ལ་སོགས་པ་སྨྲོས་ཏེ། ཕྱག་འཚལ་ཞིང་སྐྱབས་སུ་འགྲོ་བ། ༡ མཆོད་པ། ༢ སྡིག་པ་བཤགས་པ། ༣ བསོད་ནམས་ལ་ཡི་རང་བ། ༤ མྱ་ངན་ལས་མི་འདའ་བར་ཆོས་འཁོར་བསྐོར་བར་བསྐུལ་
པ། ༥ བྱང་ཆུབ་མཆོག་ཏུ་སེམས་བསྐྱེད་པ། ༦ རྫོགས་པའི་བྱང་ཆུབ་ཏུ་བསྔོ་བ་༧སྟེ་བདུན་གྱི། དང་པོ་ལ་ཕྱག་འཚལ་བ་ནི། ཕྱོགས་བཅུར་བཞུགས་པ་སྟེ། རབ་འབྱམས་མཐའ་ཡས་པའི་རྫོགས་པའི་སངས་རྒྱས་སྲས་དང་བཅས་པ་འགྲོ་བ་མ་ལུས་པ་ལ་ཕན་པར་མཛད་པ་སྟེ། བྱང་ཆུབ་སེམས་དཔའ་རྣམས་བསྡུ་བའི་དངོས་པོ་བཞིས་འགྲོ་བའི་དོན་མཛད་པ་ལ་ཡང༌། བྱང་སེམས་སོ་སོའི་སྐྱེ་བོ་དང༌། མ་དག་ས་བདུན་དང༌། དག་པ་ས་གསུམ་ལ་གནས་པ་རྣམས་རིམ་པ་བཞིན། རྗེ་བཙུན་གྱིས། ཕལ་ཆེར་དོན་མེད་དོན་ཡོད་དང༌། །རྣམ་ཀུན་དོན་ཡོད་ཤེས་པར་བྱ། །ཞེས་གསུངས་ཏེ་འགྲོ་བའི་དོན་དེ་དག་ཀྱང་ཕ་རོལ་དུ་ཕྱིན་པ་དྲུག་གི་སྒོ་ནས་གཅིག་ཏུ་ཕན་པར་མཛད་ཀྱང༌། ནམ་མཁའ་ལྟ་བུ་སྟེ་དོན་དམ་བདེན་པ་ཆོས་ཉིད་སྟོང་པ་རྟོགས་པའི་མཁྱེན་ཅན་རྣམས་དང༌། རྫོགས་སངས་རྒྱས་རྣམས་གཟུགས་ཀྱི་སྐུས་སེམས་ཅན་རྣམས་གྲོལ་བར་མཛད་པས་འགྲོ་ལ་ཕན་པར་མཛད་པ་དང༌། དེ་ལྟར་གཞན་དོན་མཛད་པ་ཡང༌། ནམ་མཁའ་ལྟ་བུའི་ཐུགས་མངའ་བ་
སྟེ། ཆོས་སྐུ་ཁོ་ནའི་རྣམ་རོལ་ཉིད་ལས་ནམ་དུ་ཡང་མ་འདས་མོད། འོན་ཀྱང༌། སྔོན་གྱི་སྨོན་ལམ་གྱིས་དབང་ལས་དང༌། བསམ་གྱིས་མི་ཁྱབ་པའི་ཚུལ་གྱིས་སོ། །ཞེས་པ་དང༌། རྒྱལ་སྲས་རྣམས་ཀྱང་གནས་འདི་ལ་མངོན་དུ་ཕྱོགས་པའི་ཕྱིར་ཕན་པ་དང༌། དོན་དམ་པའི་ཐུགས་མངའ་བ་བསྡུས་པར་རིག་སྟེ། མདོར་ན་ཕན་པར་མཛད་པ་དང༌། དོན་དམ་པའི་ཐུགས་ནི་རང་གཞན་དོན་གྱི་སྐུ་གཉིས་དང༌། བྱང་ཆུབ་ཀྱི་སེམས་གཉིས་སོ། །དེ་ཡང་ཇི་སྐད་དུ། སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང༌། །སྙིང་རྗེའི་སེམས་དང་གཉིས་སུ་མེད་བློ་དང༌། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་པ་ལྟར། སངས་རྒྱས། རྒྱལ་སྲས། བྱང་ཆུབ་ཀྱི་སེམས་རྣམས་ལས། སངས་རྒྱས་ནི་བྱང་སེམས་ཀྱི་རྒྱུ་ཅན་དང༌། དེ་ནི་བྱང་ཆུབ་ཀྱི་སེམས་རྣམ་གཉིས་ཀྱི་རྒྱུ་ཅན་གྱི་ཕྱིར་རིམ་པ་འདི་ལྟར་སྨོས་པ་ཡིན་ནོ། །ཕྱག་འཚལ་ནས་སྐྱབས་སུ་འགྲོ་བ་ནི། དུས་ཀྱི་ཁྱད་པར་དེང་ནས་བརྩམས་ཏེ་དུས་རྟག་ཏུ་སྟེ། ཇི་སྲིད་མངོན་པར་བྱང་ཆུབ་པའི་བར་དུའོ། །ཞེས། དམིགས་པའི་ཁྱད་པར་དམིགས་པ་ནི། །བདག་དང་མ་ལུས་སེམས་ཅན་རྣམས། ཞེས་པ་སྟེ། སེམས་ཅན་ཐམས་ཅད་དོ། །
དེ་ཡང་ཇི་སྐད་དུ། གང་ཞིག་སེམས་ཅན་ཐམས་ཅད་སྒྲལ་བར་ཞུགས་པ་དང༌། །ཞེས་རྗེ་བཙུན་གྱིས་གསུངས་སོ། །དམིགས་པའི་ཡུལ་གང་ལ་སྐྱབས་སུ་འགྲོ་བ་ནི། འདྲེན་པ་མཆོག་དང་མྱ་ངན་འདས། །འཕགས་པའི་ཚོགས་ལ་ཞེས་སོ། །ངོ་བོ་ནི་སྐྱབས་སུ་མཆིའོ་ཞེས་པ་ཁས་ལེན་པ་སྟེ། རྗེ་བཙུན་གྱིས། འདི་ནི་དེ་དངོས་འདོད་པའི་ཁས་ལེན་དེ་ཡང་སྙིང་བརྩེ་ལས་རིག་བྱ། །ཞེས་གསུངས་པ་ཡིན་ཏེ། དེ་བས་ན། སེམས་ཅན་ཐམས་ཅད་ཀྱི་དོན་དུ་སྐྱབས་ཡུལ་ཐོག་མར་འདོད་པས་ཁས་ལེན་པ་ཉིད་ཡིན་ནོ། །གནས་འདི་རྒྱས་པར་རྗེ་བཙུན་གྱིས་རྒྱན་དང༌། རྒྱུད་བླ་མར་གསུངས་པ། དེ་ངེས་པར་བལྟ་བར་བྱ་ལ། དེ་ལྟར་སྐྱབས་སུ་སོང་ནས་ལས་ཅི་ཞིག་བགྱི་ཞེ་ན། བསོད་ནམས་ཀྱི་ཚོགས་བསགས་པའི་སྒོ་བྱིན་པ་ལས་གྱུར་པ་དང༌། ཡེ་ཤེས་ཀྱི་ཚོགས་བསགས་པའི་སྒོར་གྱུར་པ། ཚུལ་ཁྲིམས་ལས་གྱུར་པ་དང༌། ཚོགས་གཉིས་རྫོགས་པའི་སྒོར་ཞུགས་པའི་དགེ་བ་སངས་རྒྱས་སུ་བྱེད་པའི་ཡན་ལག་དང༌། དེ་ལས་གཞན་དོན་བསྒྲུབ་པའི་ཡན་ལག་དང༌། ཕྱི་མ་གཉིས་ནི། དགེ་བ་ཐམས་ཅད་འབྲས་བུ་བྱང་ཆུབ་སྙིང་པོ་ཅན་དུ་བྱེད་པའི་ཡན་ལག་སྟེ་འདི་དག་བྱེད་དོ། །དེ་རྣམས་ལས། དང་པོ་གསུམ་ནི་རང་དོན་གཙོ་བོ་དང༌། བཞི་པ་གཞན་དོན་གཙོ་བོ་དང༌། ལྔ་པ་དང་དྲུག་པ་ནི་ཐུན་མོང་ཡིན་ཏེ། དེ་ཡང་གཉིས་པ་ཡེ་ཤེས་ཚོགས་ལས་ཏིང་ངེ་འཛིན་གྱི་སྒོ་དང༌། གསུམ་པ་ཕྱི་མ་གཉིས་ནི་ཤེས་རབ་གཙོ་བོར་གྱུར་པ་དང༌། ལྷག་མ་
བསོད་ནམས་ཀྱི་སྒོ་སྟེ། ཀུན་ཀྱང་བསོད་ནམས་ཀྱི་ཚོགས་ཡིན་པར་རིག་གོ །དེ་ཡང་སྐྱབས་སུ་སོང་ནས། ལོངས་སྤྱོད་ལ་ལྟོས་པ་མེད་པར་སྦྱིན་པ་བྱས་ནས། མི་མཐུན་ཕྱོགས་སྡིག་པ་བཤགས་ཤིང་བསལ་ཏེ། མཐུན་ཕྱོགས་དགེ་བ་རྒྱས་པས། གཞན་ལ་ཕན་པ་བླ་མེད་བསྒྲུབ་ནས། ཐམས་ཅད་ཀྱང་བླ་མེད་བྱང་ཆུབ་ཀྱི་སྙིང་པོ་ཅན་དུ་བགྱིས་ཏེ། ཕྱིས་དགེ་བ་ཆུད་མི་ཟ་ཞིང་སངས་རྒྱས་སུ་བྱེད་པ་ནི། མི་གནས་པའི་མྱང་འདས་ལ་འཇུག་པའི་སྒོ་ཡིན་ནོ། །ཞེས་ཤེས་པར་བྱ་སྟེ། འདི་ནི་ཡན་ལག་བདུན་པའི་གོ་རིམ་ཡིན་ནོ། །དེ་ལྟར་ཡན་ལག་ཕྱི་མ་དྲུག་ལས། དང་པོ་མཆོད་པ་ནི། མེ་ཏོག་རྣམས་དང་བདུག་པ་མར་མེ་དྲི། རྣམ་མང་ཞལ་ཟས་རོལ་མོ་གོས་རྣམས་དང་སྟེ། ཟང་ཟིང་དང༌། བྱས་དང་བྱེད་འགྱུར་དགེ་བ་དཔག་མེད་ཀྱི་མཐུ་ལས་བྱུང་བ། རྣམ་བྱང་གི་ཞིང་དང༌། ཡོ་བྱད་དབུལ་བ་མཆོག་གི་སྦྱིན་པ་ལས་གྱུར་པ་འདིས་རྣམ་འདྲེན་སྲས་དང་བཅས་ལ་མཆོད་པར་བགྱི། ཞེས་སོ། །གཉིས་པ་ནི། རབ་མེད་དེ་བརྒལ་དཀའ་བའི་འཁོར་བའི་རྒྱ་མཚོར་ལྷུང་བའི་བདག་དང་མཐའ་ཡས་པའི་བདག་གི་མ་སེམས་ཅན་རྣམས། ཆོས་ཀྱི་དེ་ཁོ་ན་ཉིད་དང༌། ལས་དང་འབྲས་བུའི་གནས་ལ་ཤིན་ཏུ་རྨོངས་པ་ཡིན་ཏེ། དེའི་ཕྱིར། མི་ཤེས་པའི་དབང་གིས། མི་དགེ་བ་བཅུ་དང་མཚམས་མེད་པ་ལྔ་ལ་སོགས་པའི་ཉེས་པ་སྤྱད་པ་ཐམས་ཅད་སོ་སོར་བཤགས་ཤིང༌། སླན་ཆད་སྲོག་ལ་
བབས་ཀྱང་མི་བགྱིའོ། །ཞེས་བྱ་སྟེ། ཅི་ནི་ཚུལ་ཁྲིམས་ལས་གྱུར་པ་ཡིན་ཙ་ན། འདི་ནི་ཉེས་པ་དང་མི་འགྲོགས་ཤིང༌། ཕྱིན་ཆད་སྡོམ་པ་ཡིན་ལ་ཚུལ་ཁྲིམས་ཀྱང་དེའི་ལས་ཅན་ཏེ། དེའི་ཕྱིར་དེ་ལྟར་སྨྲས་སོ། །གསུམ་པ་ནི། སོ་སོའི་སྐྱེ་བོ་ལམ་ལ་ཞུགས་པ་དང༌། །རྒྱུན་ཞུགས་ཕྱིར་འོང་ཕྱི་མི་འོང་དགྲ་བཅོམ། རང་རྒྱལ་རྒྱལ་བ་སྲས་དང་བཅས་རྣམས་ཀྱི། བྱས་དང་བྱེད་འགྱུར་དགེ་ལ་རྗེས་ཡི་རང༌། ཞེས་པའོ། །སངས་རྒྱས་རྣམས་ཀྱི་དམ་པའི་ཆོས་ཀྱིས་གཞན་གྲོལ་བར་མཛད་པ་ནི། གཞན་དོན་གྱི་གཙོ་བོ་ཡིན་ལ་དེ་ལྟ་བུའོ། །བཞི་པ་གཞན་དོན་གྱི་ཡན་ལག་ནི། ཞི་བར་བཞེད་པའི་འབུམ་ཕྲག་རྒྱལ་བ་རྣམས། །སྲིད་པ་ཇི་སྲིད་གནས་པ་དེ་སྲིད་བཞུགས། །ཞེས་པས་མྱ་ངན་ལས་མི་འདའ་བར་གསོལ་ནས་ཉོན་མོངས་ཏེ་མ་རིག་པ་ལ་སོགས་པ་རྩ་བ་དང་ཉེ་བའི་ཉོན་མོངས་པའི་དུག་གིས་རྣམ་པར་ཉམས་ཤིང་ཉེས་པའི་མ་རིག་པ་དང་འདོད་ཆགས་ལ་སོགས་པའི་དབང་གིས་སྡུག་བསྔལ་ཏེ་འཁོར་བའི་ཕུང་པོ་དང་ཉེར་སྤྱོད་ངན་སྐྱུགས་ཀྱི་ཁུང་བུ་ལྟ་བུ་དག་ལ་རབ་ཏུ་ཚང་བའི་སེམས་ཅན་འདི་དག་རྣམས་ཞི་བ་ནི་སྡུག་བསྔལ་ཀུན་གྱིས་མྱ་ངན་མེད་པ་དང༌། དེ་སྐད་དུ་ཡང༌། རྫོགས་སངས་རྒྱས་དང་ཉན་ཐོས་རྣམས། །སྲིད་པ་ཟད་པས་དགྱེས་པར་འགྱུར། ཞེས་གསུངས་པའི་ཚུལ་གྱིས་སོ། །ཟག་མེད་ཀྱི་དགའ་བའི་གཞིར་གྱུར་པས་དགའ་
ཚལ་དང་ཆོས་མཚུངས་ལ། དེ་མཐོང་བ་སྟེ་མངོན་དུ་བགྱི་བའི་སླད་དུ། བདུད་རྩི་ལྟ་བུའི་དམ་ཆོས་སྩོལ་ཞིག་སྟེ། ཆོས་འཁོར་བསྐོར་དུ་གསོལ། ཀྱཻ་ཕྱོགས་བཅུ་མ་ལུས་པའི་བཅོམ་ལྡན་འདས་རྣམས་ཞཻས་ཆོས་གསུང་བར་བསྐུལ་པའོ། །ལྔ་པ་ནི། མ་ལུས་ཕྱོགས་བཅུ་ན་བཞུགས་པའི་འདྲེན་པ་རྣམས་བདག་ལ་དགོངས་སུ་གསོལ། བདག་གིས་དུས་དེང་ནས་བརྩམ་སྟེ་བདག་གི་མ་སྟེ། སེམས་ཅན་འཁོར་བར་རྟག་ཏུ་འཁོར་བས་དང༌། ཞི་བ་རྟག་ཅིང་བརྟན་པ་མ་ཐོབ་པས་མི་བརྟན་པ་མཐའ་ཡས་ཤིང་བགྲང་བ་ལས་འདས་པ་མ་ལུས་པ་འདི་རྣམས་བུ་གཅིག་པ་ལྟར། བརྩེ་བས་ཡོངས་སུ་བཟུངས་ཤིང༌། བསླབ་བྱ་དེ་ལས་གནོན་པ་ཅི་ཡང་མི་བགྱིའོ། །ཞེས་པས། སེམས་བསྐྱེད་ཀྱི་བསླབ་བྱ་ལ་སློབ་པར་ཁས་བླངས་ནས། སེམས་བསྐྱེད་པ་དངོས་ནི། བདག་ནི་འཁོར་བའི་རྒྱ་མཚོར་འདིར་མི་གནས་ཏེ་ལས་ཉོན་གྱི་སྐྱེ་བ་མི་ལེན་པ་དང༌། ཞི་བ་ཆད་པའི་མྱང་འདས་ཀྱི་འབྲོག་དགོན་དེར་ཡང་བདག་མི་འགྲོ་སྟེ། ལྷག་མེད་དུ་ཞི་བར་མི་བྱེད་པར། སྨོན་ལམ་དང༌། སྤྲུལ་པ་དང༌། བསམ་གྱིས་མི་ཁྱབ་པའི་ལུས་ཀྱིས་འགྲོ་བའི་དོན་བྱེད་དོ། །ཞེས་སོ། །ཚུལ་དེ་དང་ལྡན་པས་བདག་གིས་བླ་ན་མེད་པའི་བྱང་ཆུབ་མི་གནས་པའི་མྱ་ངན་ལས་འདས་པ་ངེས་པར་འཐོབ་པར་བྱ་སྟེ། ལུས་པ་མེད་པའི་འགྲོ་བ་རྣམས་བྱང་ཆུབ་ལ་འགོད་པའི་ཕྱིར་ཁོ་ནར་ཡིན་གྱི་བདག་ཉིད་སྲིད་པའི་འཇིག་པ་ཙམ་གྱིས་ནི་མ་ཡིན་
ནོ། །ཞེས་སོ། །དྲུག་པ་ནི། ཡན་ལག་དྲུག་པོ་འདི་ལྟར་བགྱིས་པ་དང༌། སྲིད་ཞི་མ་ལུས་པའི་དགེ་བའི་མཐུ་ཡིས་བླ་མེད་བྱང་ཆུབ་གསལ་བར་མཐོང་པར་ཤོག་ཅེས་པ་སྟེ། མྱུར་དུ་ཐོབ་པར་གྱུར་ཅིག་ཅེས་ཡི་རང་དང༌། སེམས་བསྐྱེད་དང༌། བསྔོ་བ་རྣམས་ཤེས་རབ་ཀྱི་སྒོ་ཅི་ཞེ་ན། ལྷག་མཐོང་ལམ་ནི་དེ་དོན་དང༌། །རྣམ་པར་སྤྱོད་པར་ཤེས་པར་བྱ། །ཞེས་གསུངས་པ་དང་ཚུལ་མཚུངས་པ་ཉིད་དུ་ཡི་རང་ནི། དགེ་བའི་བསམ་པ་དང༌། བྱེད་པ་དང༌། འབྲས་བུ་ལ་སོགས་པ་ཇི་སྙེད་པའི་གནས་ལ་དམིགས་ནས་ཡི་རང་བའི་ཕྱིར་དང༌། ཐ་མ་གཉིས་ནི། བྱང་ཆུབ་ཕྲ་ཞིང་ཟབ་པ་ཇི་ལྟ་བའི་གནས་ལ་དམིགས་པའི་ཕྱིར། དེ་སྐད་ཅེས་སྨྲས་སོ། །དེ་ལྟར་ཡན་ལག་བདུན་པ་བཤད་ནས། གང་ལ་འཇུག་པའི་རྣལ་འབྱོར་ཉིད་བརྗོད་ན། དེ་ལ་ཐོག་མར་མདོར་བསྟན་པ་ལ། དོན་དམ་སེམས་བསྐྱེད་ནི། དངོས་པོ་ཀུན་གྱི་སྟེ་ཆོས་ཐམས་ཅད་ཀྱི་རང་བཞིན་ནམ། གཤིས་ནི་ཐོག་མ་ཉིད་ནས་ཐམས་ཅད་སྟེ་གཟུང་བ་དང༌། འཛིན་པའམ་ཡུལ་དང་ཡུལ་ཅན་རྣམ་ཤེས་དང་ཡེ་ཤེས་ལ་སོགས་པ་ཐམས་ཅད་ཀྱིས་ཐམས་ཅད་དུ་སྒྱུ་མ་ལྟ་བུར་སྟོང་བཞིན་དུ་སྣང་བ་སྟེ། རྣལ་འབྱོར་པ་གང་སྟེ། འདིས་ནི། རྣལ་འབྱོར་ཏིང་ངེ་འཛིན་ལ་མངོན་དུ་ཕྱོགས་པ་རྣམས་ཀྱང་བསྡུས་པར་བསྒོམ་པར་བྱ། ཞེས་པ་དང་འབྲེལ་ཏེ། དེ་ལ་རྣལ་འབྱོར་པ་དེས་ནི་འདི་ལྟར་ཏེ། འོག་ནས་
ཇི་ལྟར་འབྱུང་བ་བཞིན་དུ་བསྒོམ་པར་བྱ་སྟེ། དངོས་པོ་ཀུན་གྱི་རང་བཞིན་དེ་ནི་རིག་ཅིང་མངོན་པར་བགྱི་བར་འདོད་པ་ཁོ་ནས་སོ། །དེ་ནས་ཀུན་རྫོབ་བྱང་སེམས་སྤྱོད་པ་དང་བཅས་པ་མདོར་བསྟན་པ་ནི། གྲོང་ལ་སོགས་པ་འདུ་འཛི་དང་བཅས་པའི་ཡུལ་ལམ། འབྲོག་དགོན་པར་འདུག་ནའང༌། གནས་འདི་མ་རུང་སྟེ། རྒྱལ་པོ་བྱམས་པའི་སྟོབས་དང༌། ཤཱི་སི་ར་ཛ་དང༌། ཚོང་དཔོན་སྦྱིན་པ་ལ་དཔའ་བ་དང༌། ཟིལ་གྱིས་མི་གནོན་པ་ལ་སོགས་པ་བྱང་ཆུབ་སེམས་དཔའི་སྐྱེས་པའི་རབས་དག་བསྐང་བར་འོས་ལ། གང་ཡང༌། དོན་དམ་བྱང་ཆུབ་ཀྱི་སེམས་ལ་ནི། རྒྱལ་སྲས་ཤིན་ཏུ་ལས་དང་པོ་པས་དེ་ལྟར་མ་ཡིན་ཏེ། འདོད་ཡོན་རྣམ་པར་མ་སྤངས་པས་ནི། སེམས་རྩེ་གཅིག་ཙམ་ཡང་སྒྲུབ་མི་ནུས་སོ། །དེ་ལྟར་བྱང་ཆུབ་སེམས་དཔའ་དེས་བྱང་ཆུབ་སེམས་དཔའི་གྲོགས་སྙིང་རྗེ་དང་སྟོབས་མ་ཉམས་པས། བྱང་ཆུབ་སྤྱོད་པ་སྟེ། བྱང་ཆུབ་ཀྱི་ཕྱིར་སྤྱད་པར་འོས་པ་གང་ཡིན་པ་དེའོ། །དེ་ལ་བྱང་ཆུབ་ནི་བླ་ན་མེད་པ་ཉིད་ཡིན་ལ། དེ་བས་ན་སྤྱད་པ་ཡང་བླ་ན་མེད་པ་སྟེ། སྦྱིན་པ་ལ་སོགས་པ་རྒྱ་ཆེན་པོ་དངོས་སུ་སྤྱད་པར་བྱ་ཞིང་ཅི་སྟེ་མི་ནུས་ན། ཡིད་ཀྱིས་ཀྱང་ནི་རྟག་ཏུ་སྟེ་ནམ་ཡང་ཉོན་མོངས་པས་ལྷག་པར་ཟིལ་གྱིས་མ་མནན་པར་སྤྱད་པར་བྱ་ཞིང༌། དེའི་ཚུལ་ཡང༌། ཟླ་བའི་ཞལ་སྔ་ནས། སྦྱྀན་སོགས་ཆོས་གསུམ་འདི་དག་ཕལ་མོ་ཆེར། །བདེ་བར་གཤེགས་པས་ཁྱིམ་པ་རྣམས་ལ་བསྔགས། །ཞེས་གསུངས་པ་ལྟར།
ཁྱིམ་པའི་སྔ་མ་གསུམ་དང༌། རབ་ཏུ་བྱུང་པའི་ཕྱི་མ་གསུམ་ལ་གཙོ་ཆེར་བསླབ་པར་གསུང་སྟེ། དེ་ཡང་ཁྱིམ་པས་སྦྱྀན་པ་ཕལ་ཆེ་བ་ལ་སློབ་ཅིང༌། ཚུལ་ཁྲིམས་དང༌། བཟོད་པ་ཕལ་ཆེར་ལ་ཕྱིས་སློབ་ཅིང་འཇུག་པར་བྱ་བ་ཡིན་ལ། རབ་ཏུ་བྱུང་ནས་ནི། རབ་ཏུ་བྱུང་ཕྱིན་འཚོ་བ་རྣམ་པར་དག་པ་ལ་བརྟེན་དགོས་པའི་ཕྱིར། ལོངས་སྤྱོད་སྤང་དགོས་པས་སྦྱིན་པ་དང༌། བསྲུང་བྱ་ཚུལ་ཁྲིམས་ཀྱི་གཙོ་བོ་སོ་སོར་ཐར་པའི་སྡོམ་པ་ལ་གནས་དགོས་པས་ཚུལ་ཁྲིམས་དང༌། དགེ་སྦྱོང་དུ་བྱེད་པའི་ཆོས་བཞི་ལ་གནས་པས་གནོད་པ་ལ་བཟོད་པ་ཡང་འགྲུབ་པས་ན། དང་པོ་གསུམ་ལ་གནས་ནས། བསྒྲུབ་པར་བྱ་བ་ཐོས་བསམ་སྒོམ་གསུམ་ལ་རྩོལ་བ་ཆེས་ཆེན་པོས་འབད་དགོས་པའི་ཕྱིར། ཕྱི་མ་གསུམ་ལ་སླེབ་པར་འགྲུབ་སྟེ། རྒྱལ་སྲས་རྣམས་ཀྱི་དབང་དུ་བྱས་པ་ཡིན་ནོ། །ད་ནི་དོན་དམ་བྱང་ཆུབ་ཀྱི་སེམས་བསྒོམ་པའི་རིམ་པ་ཅུང་ཟད་རྒྱས་པར་བཤད་ན། ཞི་གནས་དང་ལྷག་མཐོང་གི་ལམ་གྱི་རིམ་པས་འགྲུབ་སྟེ། དེ་སྐད་དུ་ཡང༌། རྒྱལ་སྲས་ཤནྟ་དེ་བའི་ཞབས་ཀྱིས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པ་ཤེས་བྱས་ནས། །ཞེས་ཀྱང་གསུངས་ཤིང༌། དགོང་པ་ངེས་པར་འགྲེལ་པ་ལས་ཀྱང་བཀའ་སྩལ་ཏེ། རྣལ་འབྱོར་པ་ཡི་ཞི་གནས་དང༌། །ལྷག་མཐོང་བསྒོམ་པར་བྱས་པས་ནི། །མཚན་མའི་མཆིང་དང་དེ་བཞིན་དུ། །
གནས་ངན་ལེན་གྱི་འཆི་བས་གྲོལ། །ཞེས་པའོ། །དེ་ལྟར་ཞི་གནས་ཀྱིས་ཉོན་མོངས་པ་དང༌། ལྷག་མཐོང་གིས་ཤེས་བྱའི་སྒྲིབ་པ་སྦྱངས་པས་ནི། མང་དུ་སྨྲ་བ་ངལ་ཏེ། མདོར་བསྡུ་ན། ཞི་གནས་བསྒོམ་པའི་ཚུལ་ཡང༌། ཞི་བའི་ལྷ་ཆེན་པོས། ཐོག་མར་ཞི་གནས་བཙལ་བྱ་དེ་ཡང་ནི། འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་གསུངས་པ་ལྟར། འདོད་ཡོན་ལ་མ་ཆགས་པ་སྔོན་དུ་འགྲོ་བ་ཡིན་ལ། དེའི་ཕྱིར་དུ། ཇི་སྐད་དུ། འདོད་ལྡན་ལ་ལ་ལུས་ཀྱང་བཅད། ཁ་ཅིག་གསལ་ཤིང་རྩེ་ལ་བཙུག །ཞེས་པ་དང༌། བྱིས་དང་སྐལ་པ་མཉམ་སྤྱོད་ན། །ངེས་པར་ངན་འགྲོར་འགྲོ་འགྱུར་ཏེ། །སྐལ་མི་མཉམ་པར་འཁྲིད་བྱེད་ན། །བྱིས་པ་བརྟེན་པས་ཅི་ཞིག་བྱ། །སྐད་ཅིག་གཅིག་གི་མཛའ་འགྱུར་ལ། །ཡུད་ཙམ་གྱིས་ནི་དགྲར་ཡང་འགྱུར། །དགའ་བའི་གནས་ལ་ཁྲོ་བྱེད་པ། །སོ་སོའི་སྐྱེ་བོ་མགུ་བར་དཀའ། །ཕན་པར་སྨྲས་ན་ཁྲོ་བར་བྱེད། །བདག་ཀྱང་ཕན་ལས་བཟློག་པར་བྱེད། །དེ་དག་ངག་ནི་མ་ཉན་ན། ཁྲོ་བས་ངན་འགྲོར་འགྲོ་བར་འགྱུར། །ཞེས་དང༌། བྱིས་དང་འགྲོགས་ན་བྱིས་པ་ལ། །བདག་བསྟོད་གཞན་ལ་སྨོད་པ་དང༌། །འཁོར་བར་དགའ་བའི་གཏམ་ལ་སོགས། །མི་དགེ་ཞེས་ཀྱང་ངེས་པར་འབྱུང༌། །དེ་ལྟར་བདག་དང་གཞན་བརྟེན་པ། །དེས་ནི་ཕུང་བར་འགྱུར་བར་ཟད། །ཅེས་གསུངས་ཏེ། །དེའི་ཕྱིར་འདི་ལྟར་ཁྱིམ་ནི་ཉེས་མང་ཅན། །ནམ་ཡང་སྡིག་པའི་ལས་ཀྱི་གནས། །འཇོ་སྒེག་འཐབ་དང་ཀླག་
ཅོར་ཅན། །ཞེས་སྨྲས་པ་ཡིན་ནོ། །གཞན་ཡང་མཧཱ་ཙརྱ་ཤནྟ་དེ་བས། མཐོ་ལ་ཕྲག་དོག་མཉམ་ལ་འགྲན། །དམའ་ལ་ང་རྒྱལ་བསྟོད་ན་དྲེགས། །མི་སྙན་བརྗོད་ན་ཁོང་ཁྲོ་སྐྱེ། །ནམ་ཞིག་བྱས་ལ་ཕན་པ་འཐོབ། །ཅེས་དང༌། ནགས་ན་རི་དྭགས་བྱ་རྣམས་དང༌། །ཤིང་རྣམས་མི་སྙན་བརྗོད་མི་བྱེད། །འགྲོགས་ན་བདེ་བ་དེ་དག་དང༌། །ནམ་ཞིག་ལྷན་ཅིག་བདག་གནས་འགྱུར། གཞན་ཡང་ནམ་ཞིག་རྒྱབ་ཏུ་མི་ལྟ་ཞིང༌། །ཆགས་པ་མེད་པར་འགྱུར་ཞིག་གུ། །ས་ཕྱོགས་བདག་གིར་གཟུང་མེད་པ། །རང་བཞིན་གྱིས་ནི་ཡངས་རྣམས་སུ། །རང་དབང་སྤྱོད་ཅིང་ཆགས་མེད་པར། །ནམ་ཞིག་བདག་ནི་གནས་པར་གྱུར། །ལྷུང་བཟེད་ལ་སོགས་ཉེ་ཚེ་དང༌། །ཀུན་ལ་མི་མཁོའི་གོས་འཆང་ཞིང༌། །ལུས་འདི་སྦ་བ་མ་བྱས་ཀྱང༌། །འཇིགས་མེད་གནས་པར་ནམ་ཞིག་འགྱུར༌། །ཞེས་གསུངས་ཏེ། དེ་ཉིད་མདོར་བསྡུ་ན། རྟག་ཏུ་ཟིལ་གྱིས་གནོད་བྱེད་མང༌། །ཀྱེ་མ་ནམ་ཞིག་འདི་ལས་ཐར་འགྱུར་ཞེས། །བློ་ལྡན་དེ་ནི་དབེན་པ་འཚོལ་བར་བྱེད། །ཉེས་མང་ཁྱིམ་དུ་གདོན་མི་ཟ་བར་སྤངས། །ཞེས་སྨྲས་པའོ། གནོད་པ་མེད་པའི་གནས་སུ་དེ་འགྲོ་སྟེ། །ཞེས་པ་ནི། དེ་ཉིད་ལས། ཇི་སྐད་དུ། ཁང་སྟོང་ཤིང་དྲུང་ཕུག་དག་ཏུ། །གང་དུ་ཇི་སྲིད་འདོད་གནས་ཏེ། །ཡོངས་འཛིན་བསྲུང་པའི་སྡུག་བསྔལ་སྤངས། །ལྟོས་པ་མེད་པར་བག་ཡངས་སྤྱོད། །རང་དབང་སྤྱོད་ཅིང་ཆགས་མེད་ལ། །གང་དག་ཡང་ནི་འབྲེལ་མེད་པ། །ཆོག་
ཤེས་བདེ་སྤྱོད་གང་ཡིན་པ། །དབང་པོས་ཀྱང་ནི་དེ་སྙེད་དཀའ། །ཞེས་སོ། །དེ་ལྟར་བསམ་ནས་རྣལ་འབྱོར་དུ་བྱ་བ་ནི་མང་ངམ་ཉུང་ངུ་ཐོས་ཀྱང༌། ཞེས་སོགས་འབྲེལ་ཏེ། དེ་ལ་ནང་རྣལ་འབྱོར་ལ་གཞོལ་པའི་སེམས་དཔའ་དེ་དབེན་པ་འཚོལ་ཞིང༌། མང་ངམ་ཉུང་ངུར་ཐོས་ཀྱང་རྒྱལ་སྲས་རྣམས། རྟག་ཏུ་བསྒོམ་པ་ལྷུར་ལེན། ཞེས་པ་ནི་རྒྱལ་བའི་གསུང་རབ་ནི་སྒོམ་པ་ལྷུར་ལེན་གྱིས། ཐོས་པ་དང་རྩོད་པ་ལྷུར་ལེན་པའི་རྒྱུད་ནི། རྒྱལ་སྲས་ཆེན་པོ་ཨ་ཏི་ཤས། མངོན་སུམ་རྗེས་དཔག་དགོས་པ་མེད། །མུ་སྟེགས་རྩོད་པ་བཟློག་ཕྱིར་ཡིན། །ཞེས་ཀྱང་གསུང་སྟེ། རྟོག་གེ་དང་རིག་བྱེད་དང༌། བྷ་ར་ཏ་དང༌། ཀླུའི་འབུམ་པ་དང༌། ལྷའི་ཨིནྡྲ་བྱ་ཀ་ར་ཎ་ལ་སོགས་པའི་འདའ་བར་བྱེད་པ་ལ། མང་ངམ་ཉུང་ངུར་ཐོས་ཀྱང་བྱིས་པ་རྣམས། །ཐོས་པ་ཙམ་གྱིས་འདི་ན་ཁེངས་པར་བྱེད། །ཞེས་སོ། །མདོར་ན། རྒྱལ་སྲས་ཁྱིམ་སྤངས་པ་སྟེ་ཇི་ལྟར་ཐོས་པ་དེ་ལྟར་བསྒོམ་པའི་སྙིང་པོ་ཅན་དུ་བྱེད་དོ། །ཅི་རྒྱལ་སྲས་རྣམས་བསྒོམ་པ་ལྷུར་ལེན་ན། ཉུང་ངུར་ཐོས་པས། ཆོག་གམ་ཞེ་ན། ཐམས་ཅད་མཁྱེན་པ་བསྒྲུབ་པར་འདོད་པས་ཤིན་ཏུ་མང་དུ་ཐོས་དགོས་པ་ཡང༌། ཐོས་པས་མི་ངོམ་ཉིད་དང་ནི། །ཞེས་གསུངས་པ་བཞིན་ས་ཐོབ་ནས་ཀྱང་ཐོས་པ་ཚོལ་བའི་ཕྱིར། འདི་ན། ཕྱུག་བདག་གི་བརྟུལ་བཞུགས་ཅན་ཐོས་པ་དྲི་མེད་ལ་ལྷག་པར་བརྙས་པ་དག་ནི་
བདུད་ཀྱི་འཇུག་པ་ལས་གཞན་དུ་ཅི། དེ་བས་འདིར་བྱང་སེམས་དང་བྱིས་པ་ཐོས་པའི་དགོས་པ་མིན་མཚུངས་ཏེ། དང་པོ་ནི། ཚིགས་བཅད་གཅིག་ཁོ་ན་ཐོས་པ་ཡང་སྒོམ་པའི་སྙིང་པོ་ཅན་དུ་བྱེད་པ་དང༌། བྱིས་པ་ཞེས་པ་སྤྱིར་སོ་སོ་སྐྱེ་བོ་ཐམས་ཅད་ལ་འཇུག་ཀྱང༌། འདིར་ནི་ཡང་དག་པའི་ལམ་ལ་ཞུགས་པ་རྣམས་འཕགས་པ་ལ་མངོན་དུ་ཕྱོགས་པས་འཕགས་པའི་རིགས་ཡིན་པས། བྱིས་པ་ནི་ཡང་དག་པའི་ཁམས་ལ་མི་དགའ་བ་རྣམས་ཏེ། དེ་རྣམས་ཐོས་པ་ཙམ་གྱིས་ཆོག་ཤེས་ནས། མི་བསྒྲུབ་པོ་ཞེས་བསྟན་པ་ཡིན་ནོ། །ཐོས་པ་ཙམ་གྱིས་ཁེངས་པ་དེ་ནི་འཚོ་བ་པ་བཞིན་རྣམ་པར་ཉམས་ཞེས་པ་ལ། འཚོ་བ་པ་ནི་མི་དབུལ་པོའི་ཁྱད་པར་ཞིག་སྟེ། འཚོ་བ་པ་རིགས་ཀྱི་གཙོ་བོ་ལ་མི་སྨོན་པ་ཉིད་ཀྱིས་བྱ་བ་བཟང་པོ་ལ་མི་འཇུག་པས་རྟག་ཏུ་སྡུག་བསྔལ་བ་བཞིན་ནོ། །ཞེས་པའོ། །དེ་ནས་བློ་དང་ལྡན་པ་དེ། དགེ་བའི་བཤེས་གཉེན་བསྟེན་པ་ཡིན། དམ་པའི་ཆོས་ནི་འཚོལ་བར་བྱེད། །མན་ངག་གི་སྙིང་པོ་ཅན་གྱིས་ཐོས་པ་དེ་དག་གང་ལས་ཐོས་པར་འགྱུར་བ། དམ་པའི་ཆོས་ལ་སྤྱོད་པའི་རྐྱེན་གྱི་གཙོ་བོ་དགེ་བའི་བཤེས་གཉེན་ལས་ཏེ། བསྟེན་ཚུལ་རྗེ་བཙུན་གྱི། སྐྱོ་བ་སྤང་ལ་བརྟེན། བཀུར་སྟི་རྙེད་པ་དག་དང་རིམ་གྲོ་དང༌། །སྒྲུབ་པའི་སྒོ་ནས་བཤེས་གཉེན་བསྟེན་པར་བྱ། །ཞེས་གསུངས་པ་ལྟར་རོ། །བསྟེན་ནས་ཀྱང་དམ་པའི་ཆོས་འཚོལ་བར་བྱེད་དོ། །དེའི་ཕྱིར་བསྟེན་
པས་སོ། །དཔེར་ན་དཔལ་འབྱུང་པའི་རྣམ་ཐར་ལས། བླ་མ་བསྟེན་པའི་ཚུལ་ལྟར་བསླབ། །ཞེས་གསུངས་པ་དང༌། ནོར་བཟང་གི་བླ་མ་བརྒྱ་རྩ་བསྟེན་པ་བཞིན། བདག་ཅག་རྣམས་ཀྱིས་ཀྱང་བསླབ་པར་བྱའོ། །མན་ངག་མཆོག་གིས་ནོར་བླང་ནས་ཞེས་པ་ནི། དེ་ལྟར་དམ་ཆོས་འཚོལ་ཞིང་མང་དུ་ཐོས་ནས་ཀྱང༌། ཐོས་པ་ཐམས་ཅད་ཀྱང་མན་ངག་དང་ལྡན་པར་བྱས་ནས་སྒོམ་པ་ལ་ཕྱོགས་པའོ། །ཞེས་པའོ། །དེ་ནས། གང་དུ་བསྒོམ་པའི་གནས་བརྟན་དེ། ནགས་འདབ་བབ་འཆོལ་སྐྱེ་བོ་ཡིས། །ནམ་ཡང་བསྐྱོད་པ་མེད་པའི་གནས། །དེ་སྐད་དུ། རྒྱལ་སྲས་ཙནྡྲ་གོ་མིས། ནགས་ཀླུང་ཆུ་གཙང་ངོས་བདེ་དབེན་པ་སྐྱིད་པ་གང༌། །ཅི་སྟེ་ལྷ་ཡི་བུ་མོ་དྲི་ཞིམ་བྱུག་པ་ཡི། །ལན་བུའི་རྒྱན་དུ་ཐོགས་པའི་རྒྱུན་ལྡན་མེ་ཏོག་བཅས། །མཛེས་པ་ཟིལ་གནོན་ལྷ་ཡི་ཚུལའང་ཡོད་འགྱུར་རམ། །ཞེས་དང༌། རྩ་བ་འབྲས་བུ་ཤུན་པ་ལོ་མ་ཕུན་སུམ་ཚོགས་པའི་ལྗོན་ཤིང་ལྡན། །ནགས་ཚལ་ལྟོས་མེད་རི་བོའི་ཆུ་རྒྱུན་གསལ་བབས་ཆགས་པ་མེད་པའི་གནས། ཆུ་ཀླུང་ཡངས་པའི་མཐའ་རུ་འབྲས་བུ་རྒྱ་ཆེན་ལྷུང་བས་བརྒྱན་པ་ཡི། །ཉམས་དགའ་བས་མཐའ་ཅི་ཞིག་མེད་དེ་དམྱལ་དོང་ཁྱིམ་དུ་བསླུས་ཏེ་སྡོད། །རི་སུལ་ཡངས་པ་སྐྱེ་བོ་ལྷུག་པ་མེད་པས་རབ་བདེ་བ། །ཉེར་སྤྱོད་རྒྱ་ཆེན་ཁོར་ཡུག་ནགས་ཚལ་སྔོ་འཁྲུངས་འཕྲེང་བ་སྒྲེངས། །ཆུ་ངོགས་སྙན་པ་ཕུ་ཆུའི་རྒྱུན་སྒྲ་རྔ་ལྟར་སྙན་པ་ཡི། །བདག་ཅག་ཉོན་མོངས་ཡུལ་མ་ཡིན་
ཞེས་མགྲོན་ལ་སྒྲོགས་པ་བཞིན། །ཞེས་གསུངས་ཏེ། ཚིགས་བཅད་དང་པོས། ལྷ་ཡི་ཆུ་བོ་ནགས་ཀླུང་མཆོག་སྟེ། དང་པོས་ཉོན་མོངས་འཕེལ་ཞིང༌། ཕྱི་མ་ཆགས་བྲལ་ཡིད་འབྱུང་བའི་གནས་ཡིན་པའི་ཕྱིར། ཞེས་བསྟན་ལ། ལྗོན་ཤིང་ལྡན་ཡན་ཆད་རི་དང་རི་བོའི་ཆུ་རྒྱུན་ནས་དགའ་ཞེས་པའི་བར་དང༌། ཉེར་སྤྱོད་རྒྱ་ཆེན་མན་ཆད་ཀྱིས་དེར་བཟའ་བཏུང་སོགས་ཀྱིས་ངལ་ཏེ། ལས་ཀྱི་མཐའ་ལ་མ་ཞུགས་ཀྱང༌། བདག་པོས་མ་བཟུང་བ་དག་བདེ་བླག་ཏུ་རྙེད་པས་སོ། །གཞན་ཡང༌། འབྲོག་དགོན་པར་བསམ་གཏན་བསྒོམ་པ་ལ་མི་སྐྱོ་བའི་ཉེར་སྤྱོད་དང་ལྡན་ལ། ཁྱིམ་གྱི་ཉེར་སྤྱོད་ནི། རྣམ་པར་གཡེང་བར་བྱེད་པ་ཡིན་པས་ན། བས་མཐའ་ཅི་ཞིག་མེད་དེ་སོགས་གསུངས་སོ། །ནགས་ཚལ་ལྟོས་མེད་ནི་དགྲ་དང་གཉེན་གྱི་བྱ་བ་ལ་མི་ལྟོས་པས། གཡེང་བའི་རྒྱུ་མེད་པས་དང༌། རི་སུལ་ཡངས་པ་ནི་བདག་ལ་གནོད་པ་དང་ཆགས་པའི་སྐྱེ་བོ་མེད་ཅིང༌། གཞན་གྱིས་མ་བཟུང་པས་སྤྱོད་པ་སྤང་པའོ། །དེའི་ཕྱིར་ནགས་འདབ་ཞེས་སྨྲོས་ལ། སྐྱེ་བོ་ལྷུག་པ་ནི། ཉོན་མོངས་པའི་སྤྱོད་པ་མ་བསྡམས་པར་ལྷུག་པར་སྤྱོད་པ་སྟེ། དེ་བས་ནི་བབ་ཅོལ་སྐྱེ་བོ་ཡིས། །ནམ་ཡང་བགྲོད་པ་མེད་པའི་གནས། །ཞེས་སྨྲས་པའོ། །དེ་ལྟར་མ་བསྡོམ་པ་ཁྱིམ་པ་ལ་སོགས་པ་དང་ལྷན་ཅིག་ཏུ་འདུག་ན། རང་ཉིད་ཀྱང་ཉོན་མོངས་པ་མ་བསྡམས་པར་སྤྱོད་ལ། ཤིན་ཏུ་ཉོན་མོངས་པར་སྤྱོད་པ་དག་སྣང་བ་ནི།
རང་ཉིད་ཡང་ཉོན་མོངས་སྟོབས་སུ་འགྱུར་པ་ལས། དེ་དག་མེད་པའི་ཕྱིར། ཏིང་ངེ་འཛིན་ཆེར་སྐྱེས་སླ་བས་རབ་བདེ་བའོ། །དེའི་ཕྱིར་རྔ་ལྟར་སྙན་པ་ཡིན་སོགས་ཀྱི་དོན། ནགས་ཚལ་སོགས་དབེན་པ་ནི། བདག་ཅག་ཉོན་མོངས་ཞེས་སོགས་བརྗོད་པར་བྱའོ། །མི་མཆོད་དེ་ནི་དེར་སོང་ནས། །དྲང་པོའི་ལུས་ཀྱི་གནས་པར་བྱ། །ཞེས་པ་ནི། དབེན་པ་དེར་རྗེ་བཙུན་རྣམ་པར་སྣང་མཛད་ཀྱི་ཆོས་བདུན་གྱི་ལུས་གནད་དང་ལྡན་པར་བྱའོ། །ཞེས་པ་སྟེ། འདི་ཡན་ཆད་རྣལ་འབྱོར་ལ་འཇུག་པའི་རིམ་པ་སྔོན་དུ་འགྲོ་བ་ཡིན་ནོ། །དེའི་ཚུལ་ཡང་མཧཱ་ཨ་ཙརྱ་པདྨའི་ངང་ཚུལ་གྱིས། དེ་ལྟར་ཚུལ་ཁྲིམས་ལ་སོགས་པ་ཞི་གནས་ཀྱི་ཚོགས་རྣམས་ལ་གནས་ཏེ། ཡིད་དུ་འོང་བའི་ཕྱོགས་སུ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལ་སོགས་པ་བྱས་ཤིང༌། སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བར་བྱས་ལ། སྙིང་རྗེ་ཆེན་པོ་ཁོ་ན་སྔོན་དུ་བྱས་པས། འགྲོ་བ་མཐའ་དག་འདོན་པའི་བསམ་པ་ནན་དུ་གྱུར་ནས། ལུས་དྲངས་པོར་བསྲང་ལ་སྟན་བདེ་བའི་སྟེང་དུ་འདུག་སྟེ་སྐྱིལ་མོ་ཀྲུང་བཅས་ལ་ཏིང་ངེ་འཛིན་མངོན་པར་བསྒྲུབ་པོ། །ཞེས་གསུངས་པ་ལྟར་བྱ་བ་སྟེ། དེ་ལྟར་ཚུལ་ཁྲིམས་ལ་སོགས་པ་ཞི་གནས་ཀྱི་ཚོགས་རྣམས་ལ་གནས་ཏེ། ཞེས་པ་ཞི་གནས་ཀྱི་རྒྱུ་ཚུལ་ཁྲིམས་སྔོན་དུ་འགྲོ་བ་སྟེ། འདི་ལྟར་ཁྱིམ་ནི་ཞེས་སོགས་བཤད་པ་ཡིན་ནོ། །ཡིད་འོང་པའི་ཕྱོགས་ནི། ནགས་འདབ་ཞེས་
སོགས་སྨྲས་པ་སྟེ། སངས་རྒྱས་དང་ཞེས་བྱ་བ་ལ་སོགས་པ་ནི། དབེན་པ་དེར་སྔར་བཤད་པ་ལྟར་ཡན་ལག་བདུན་པ་བྱ་བ་ཡིན་ལ། སྙིང་རྗེ་ཆེན་པོ་ཁོ་ན་སྔོན་དུ་བྱེད་པ་ནི་བསྒོམ་པ་དང༌། འགྲོ་བ་མཐའ་དག་འདོན་པའི་བསམ་པ་ནི། བྱང་ཆུབ་ཏུ་སེམས་བསྐྱེད་པ་སྟེ། དེ་ནས་ལུས་དྲང་པོར་བསྲང་བ་ལ་སོགས་པས། ལུས་གནད་བསྟན་ཏེ། དེའི་ཕྱིར་དྲང་པོའི་ལུས་ཀྱི་སོགས་སྨྲས་པ་ཡིན་ནོ། །ད་ནི་ཏིང་ངེ་འཛིན་མངོན་པར་སྒྲུབ་བོ་ཞེས་པ་འདིར་བཤད་པར་བྱ་བ་སྟེ། སེམས་ཀྱི་སེམས་ནི་བཟུང་བྱ་སྟེ། །ཞེས་པ། རྣལ་འབྱོར་པ་གང་ནང་སེམས་ཉིད་ཀྱི་གནས་ལ། སེམས་ཁོ་ནར་དམིགས་ཏེ། རྟོག་མེད་དུ་འཇོག་པ་དང༌། དེ་ཉིད་ཡུན་བསྲང་བ་སྟེ། འཇོག་པ་དང༌། རྒྱུན་དུ་འཇོག་པའོ། །འདིར་ནི་དབང་པོ་རྣམ་པར་བསྡུ་བ་ནི། སྔ་མ་ནས་བྱིང་རྒོད་སྤངས་ཏེ། རྣམ་རྟོག་གི་རྒྱུ་སྤངས་ནས་དབང་པོ་ནང་དུ་བསྡུས་ཏེ་མཉམ་པར་འཇོག་པ་ཉེར་འཇོག་གོ །རྣམ་རྟོག་མང་པོས་རྣམས་ཉམས་ཚེ། རྒྱ་མཚོའི་རླབས་བཞིན་ཞི་བར་བྱ་བ་ནི་བླན་ཏེ་འཇོག་པ་སྟེ། རྣམ་རྟོག་མང་དུ་སྐྱེས་པ་ན་དེ་ཤེས་པར་བྱས་ནས་སླར་ཡང་མཉམ་པར་འཇོག་པའོ། །ཡིད་ནི་རྣམ་པར་གཡེང་གྱུར་ན། དེ་ཚེ་དྲན་པས་གདུལ་བར་བྱ་ཞེས་པ་ནི། ཞི་བར་བྱེད་པ་དང་རབ་ཏུ་ཞི་བར་བྱེད་པ་སྟེ། རྣམ་རྟོག་འཕྲོས་ཀྱང་དང་དུ་མི་ལེན་པ་དང༌། བརྗེད་ནས་རྣམ་པར་གཡེངས་ན་དྲན་པས་ཟིན་པར་བྱས་ནས་དེ་ལ་ཉེས་
པར་ལྟ་ཞིང་མཉམ་པར་འཇོག་པ་ལ་མི་དགའ་བ་སྤངས་ཏེ་འཇོག་པ་ཡིན་ཏེ། ཇི་སྐད་དུ། ཀ་མ་ལ་ཤཱི་ལ་མཧཱ་པུ་རུ་ཥས་སྒོམ་རིམ་ལས། གང་གི་ཚེ་དེ་ལ་མི་དགའ་བར་མཐོང་བ་དེའི་ཚེ། ཏིང་ངེ་འཛིན་གྱི་ཡོན་ཏན་ལ་བལྟས་ནས་དེ་ལ་དགའ་བར་བསྒོམ་ཞིང༌། རྣམ་པར་གཡེང་བ་ལ་ཉེས་པར་ལྟ་བས་མི་དགའ་བ་རབ་ཏུ་ཞི་བར་བྱའོ། །ཞེས་གསུངས་ཤིང༌། འདོད་ཡོན་སྤྱད་པ་དྲན་པ་སོགས། །དེ་ཚེ་དཔལ་དང་ལུས་འདོད་པ། །འདུས་བྱས་ཡུད་ཙམ་གར་མཁན་དང༌། །དུས་ཀྱི་སྤྲིན་དང་གློག་འགྱུ་མཚུངས། །འཁོར་བ་སྦྲུལ་གྱི་རོ་འཛིན་ན། །ཀྱེ་མ་བདག་ནི་གཡེང་བའི་གནས། །ཞེས་པས་འདོད་པའི་ཉེས་པ་དང༌། དེ་སྤང་ནས་དབེན་པ་དང་བསམ་གཏན་གྱི་ཕན་ཡོན་ཡིད་ལ་བྱེད་པ་ནི། འདུལ་བར་བྱེད་པ་སྟེ། དེ་ཉིད་ལས། ཅི་སྟེ་གང་གི་ཚེ་སྔོན་རྒོད་པ་དང་རྩེས་པ་ལ་སོགས་པ་དྲན་ཞིང་བར་བར་དུ་སེམས་རྒོད་པར་མཐོང་བ་དེའི་ཚེ་མི་རྟག་པ་ལ་སོགས་པ་ཡིད་འབྱུང་བར་འགྱུར་བའི་དངོས་པོ་ཡིད་ལ་བྱེད་པས་རྒོད་པ་ཞི་བར་བྱའོ། །ཞེས་གསུངས་སོ། །གཞན་ཡང་འདོད་ཆགས་ཞེ་སྡང་རྨོངས། །ཆོམ་རྐུན་དགྲ་ཆེན་འདི་དག་རྣམས། །བྱམས་དང་རྟེན་ཅིང་འབྲེལ་འབྱུང་དང༌། །མི་སྡུག་ཏིང་འཛིན་དཔུང་གིས་བཅོམ། །ཞེས་པ་ལ་གཏི་མུག་ཤས་ཆེ་བར་བྱིང་བ་དང༌། འདོད་ཆགས་ཤས་ཆེ་བར་རྒོད་པ་དང༌། ཞེ་སྡང་ཡང་དེ་དང་ཕྱོགས་མཐུན་པར་རིག་སྟེ། དེ་རྣམས་ལ་རིམ་པ་
བཞིན་རྟེན་འབྲེལ་དང༌། བྱམས་པ་དང༌། མི་སྡུག་པ་བསྒོམ་པས་བསལ་ཞིང༌། དེར་མདོར་བསྡུ་ན། བྱིང་རྒོད་སྤང་སྟེ་སེམས་ཀྱི་རྒྱུན་རྩེ་གཅིག་ཏུ་བྱེད་པ་བསྒྲུབ་པ་ལ། བྱིང་བ་ལ་སྤྲོ་བ་བསྐྱེད་པ་དང༌། རྒོད་པ་ལ་སེམས་མི་སྡུག་པ་ལ་སོགས་པས་བསལ་བར་བྱ་སྟེ། ཇི་སྐད་དུ། གང་གི་ཚེ་བར་སྐབས་འདོད་ཆགས་ལ་སོགས་པ་སེམས་ཕྱིར་རོལ་དུ་རྣམ་པར་གཡེང་བ་དེའི་ཚེ། སེམས་རྣམ་པར་གཡེང་བ་ཤེས་པར་བྱས་ལ། མི་སྡུག་པ་ལ་སོགས་པ་བསྒོམ་པས་རྣམ་པར་གཡེང་བ་ཞི་བར་བྱས་ཤིང༌། མྱུར་དུ་དེ་ཉིད་ལ་བྱང་སེམས་ཕྱི་ཕྱིར་རོལ་གཞུགས་པར་བྱའོ། །ཞེས་དང༌། ཅི་སྟེ་གང་གི་ཚེ་གཉིད་དང་རྨུགས་པས་ནོན་ཏེ་དམིགས་པ་འཛིན་པ་ལ་མི་གསལ་ཞིང་སེམས་བྱིང་བར་གྱུར་པ་དེའི་ཚེ། སྣང་བའི་འདུ་ཤེས་བསྒོམ་པའི་མཆོག་ཏུ་དགའ་བའི་དངོས་པོ་སངས་རྒྱས་ལ་སོགས་པའི་ཡོན་ཏན་ཡིད་ལ་བྱེད་པས་བྱིང་བ་བསལ་ལ། དམིགས་པ་དེ་ཉིད་ལ་དམ་དུ་བཟུང་ངོ༌། །ཞེས་གསུངས་སོ། །སེམས་ནི་སྒོ་གཏན་བཅུག་པ་ལྟར། རྣམ་རྟོག་རླུང་གིས་གཡོ་བ་མེད། །ཅེས་པ་ནི་དེ་ཉིད་ལས། གང་གི་ཚེ་བྱིང་བ་དང་རྒོད་པ་གཉིས་ཀ་དང་བྲལ་བའི་ཚེ། མཉམ་པར་འཇུག་ཅིང་སེམས་རང་གི་ངང་གིས་འབྱུང་བར་མཐོང་བ་དེའི་ཚེ་རྩོལ་བ་ཀློད་དེ་བཏང་སྙོམས་སུ་བྱའོ། །ཞེས་གསུངས་ཏེ། བྱིང་རྒོད་དང་བྲལ་ནས། སྒོ་གཏན་བཅུག་པ་ལྟར་སེམས་མི་གཡོ་བར་གནས་པ་ལ་རིང་དུ་འཇོག་པ་ནི།
མཉམ་པར་འཇོག་པ་ཞེས་བྱ་སྟེ། ཞི་གནས་གྲུབ་བོ། །ཕན་ཡོན་ནི། འདོད་པ་རྣམས་ལ་དགར་མི་འགྱུར། ཤིན་ཏུ་སྦྱངས་པས་བདེ་བ་ཐོབ། ཅེས་ཏེ་དང་པོ་ཞི་གནས་གྲུབ་པའི་སེམས་ཀྱིས་དང༌། ཕྱི་མ་ལུས་ཀྱི་གཙོ་ཆེ་སྟེ། དེ་ལྟར་ན་ཚིག་གི་དོན་ཏོ། དེ་ལ་སེམས་གནས་པའི་ཐབས་དགུ་པོ་ཉིད་དང༌། སྤོང་པའི་འདུ་བྱེད་བརྒྱད་པོ་ཅི་ཞེ་ན། དང་པོ་རྗེ་བཙུན་གྱིས་རྒྱན་ལས། དམིགས་པ་ལ་ནི་སེམས་གཏན་ནས། །དེ་རྒྱུན་རྣམ་པར་གཡེང་མི་བྱ། །རྣམ་གཡེང་མྱུར་དུ་རྟོག་བྱས་ནས། །དེ་ལ་སླར་ཡང་སླན་པར་བྱ། །བློ་ལྡན་གང་ནས་གོང་དུ་ཡང༌། །སེམས་ནི་གང་དུ་བསྡུ་བར་བྱ། །དེ་ནས་ཡོན་ཏན་མཐོང་བའི་ཕྱིར། །ཏིང་ངེ་འཛིན་ལ་སེམས་འདུལ་ལོ། །རྣམ་གཡེང་ཉེས་པ་མཐོང་བའི་ཕྱིར། །དེ་ལ་མི་དགའ་ཞི་བར་བྱ། །རློམ་སེམས་ཡིད་མི་བདེ་ལ་སོགས། །ལགས་པ་དེ་བཞིན་ཞི་བར་བྱ། །དེ་ནས་སྡོམ་བརྩོན་ཅན་གྱི་ནི། །སེམས་ནི་མངོན་པར་འདུ་བྱེད་བྱས། །རང་གི་ངང་གིས་འབྱུང་བ་ཐོབ། །དེ་གོམ་པ་ལས་འདུ་མི་བྱ། །ཞེས་པ་རྣམས་ཏེ་དམ་པའི་ཆོས་མངོན་པ་ཀུན་བཏུས་ལས་ཀྱང༌། ཞི་གནས་གང་ཞེ་ན་འདི་ལྟ་སྟེ། ནང་ཉིད་ལ་སེམས་འཇོག་པ་དང༌། རྒྱུན་དུ་འཇོག་པ་དང༌། བླན་ཏེ་འཇོག་པ་དང༌། ཉེ་བར་འཇོག་པ་དང༌། འདུལ་བར་བྱེད་པ་དང༌། ཞི་བར་བྱེད་པ་དང༌། རྣམ་པར་ཞི་བར་བྱེད་པ་དང༌། རྩེ་གཅིག་ཏུ་བྱེད་པ་དང༌། མཉམ་པར་འཇོག་པའོ། །ཞེས་སོ། །འདིའི་དོན་ནི།
མཧཱ་བྷོ་དྷི་ས་ཏྭ་པདྨའི་ངང་ཚུལ་གྱི་སྒོམ་རིམ་ལས། དེ་ལ་འཇོག་ཅེས་བྱ་བ་ནི། དམིགས་པ་ལ་སེམས་འདོགས་པའོ། །རྒྱུན་དུ་འཇོག་ཅེས་བྱ་བ་ནི། དམིགས་པ་དེ་ཉིད་ལ་རྒྱུན་དུ་འཇོག་པའོ། །བསླན་ཏེ་འཇོག་ཅེས་བྱ་བ་ནི། རྣམ་པར་གཡེང་བ་ཤེས་ནས་དེ་སྤང་པའོ། །ཉེ་བར་འཇོག་ཅེས་བྱ་བ་ནི། རྣམ་པར་གཡེང་བ་སྤང་ནས་ཕྱི་ཕྱིར་བསྟུན་ཏེ་དམིགས་པ་དེ་ཉིད་ལ་འཇོག་པའོ། །འདུལ་ལོ་ཞེས་བྱ་བ་ནི་དགའ་བ་བསྐྱེད་པའོ། །ཞི་བར་བྱེད་དོ་ཞེས་བྱ་བ་ནི། རྣམ་པར་གཡེང་པའི་ཉེས་པ་མཐོང་ནས་མི་དགའ་བར་རབ་ཏུ་ཞི་བར་བྱེད་པའོ། །རྣམ་པར་ཞི་བར་བྱེད་པ་ནི། རྨུགས་པ་དང་གཉིད་ལ་སོགས་པ་ལང་བ་རྣམ་པར་སེལ་པའོ། །རྩེ་གཅིག་ཏུ་བྱེད་པ་ནི་མངོན་པར་འདུ་བྱེད་པ་མེད་པས་འཇུག་པར་འབད་བྱེད་པའོ། །མཉམ་པར་འཇོག་ཅེས་བྱ་བ་ནི། སེམས་པར་གྱུར་པ་ན་བཏང་སྙོམས་སུ་བྱེད་པ་སྟེ། མཉམ་པར་འཛིན་ཞེས་བྱ་བའི་ཐ་ཚིག་གོ །ཚིག་འདི་རྣམས་ཀྱི་དོན་འདི་རྣམས་ནི་འཕགས་པ་བྱམས་པ་དང༌། སྔོན་གྱི་མཁན་པོ་རྣམས་བཤད་དོ། །ཞེས་གསུངས་ཏེ། ཐོག་མར་དམིགས་པ་ལ་སེམས་རྩེ་གཅིག་ཏུ་གཏོད་དེ་འཇོག་པ། རེ་ཞིག་དང་པོར་སེམས་བཞག་པ་དེ་ཉིད་ལ། རང་དུ་མཉམ་པར་འཇོག་ཅིང༌། དམིགས་པ་ཁོ་ན་ལ་ཡེངས་སུ་འཇུག་པ་རྒྱུན་དུ་འཇོག་ལ། སེམས་རྣམ་པར་གཡེང་ན། དེ་ངོ་ཤེས་པར་བྱས་ནས་སླར་
མཉམ་པར་འཇོག་པ་བསླན་ཏེ་འཇོག་པ། སེམས་ཕྱི་རོལ་དུ་མི་འཕྲོ་བའི་ཆེད་དུ། དང་པོ་ཉིད་དུ་དྲན་པ་དང་ལྡན་པས་རྣམ་གཡེངས་སྤངས་ཤིང་འཇོག་པ་ཉེ་བར་འཇོག་པ། ཏིང་ངེ་འཛིན་ལ་སོགས་པའི་ཕན་ཡོན་དང༌། གཡེངས་པའི་རྒྱུ་འདོད་ཡོན་ལ་ཉེས་དམིགས་སུ་བལྟས་ནས་སེམས་འཕྲོར་མི་འཇུག་པ་འདུལ་བར་བྱེད་པ་དང༌། སེམས་འཁྲུགས་པས་མི་གནས་པའི་རྒྱུ་རྣམ་གཡེང་ལ་ཉེས་པར་ལྟ་བས། སེམས་མཉམ་པར་འཇོག་པ་ལ་མི་དགའ་བ་སྤངས་ནས་མཉམ་པར་འཇོག་པ་ཞི་བར་བྱེད་པ་དང༌། དམིགས་པ་བརྗེད་ནས་དེ་ལས་གཞན་དུ་ཡེངས་ནས་བྱིང་རྒོད་རྣམ་རྟོག་སོགས་མངོན་དུ་གྱུར་ཀྱང༌། སྐབས་མི་འབྱེད་པར་རབ་ཏུ་ཞི་བར་བྱེད་པ་དང༌། དེ་ནས་སེམས་བརྩོན་པས་རྩེ་གཅིག་ཏུ་མངོན་པར་འདུ་བྱེད་པ་དང་བཅས་པས་བྱིང་རྒོད་ཅི་ཙམ་སྤངས་པ་དེ་ཙམ་དུ་མཉམ་པར་འཇོག་པ་སེམས་ཀྱི་རྒྱུན་གཅིག་ཏུ་བྱེད་པ་དང༌། དེ་ལས་ཤིན་ཏུ་གོམས་པས་འབད་རྩོལ་མངོན་པར་འདུ་བྱེད་མེད་པར་རང་གིས་གནས་པ་ནི་མཉམ་པར་འཇོག་པའོ། །སྔར་བཤད་པའི་ལུང་གི་ཚིག་དོན་ནི་དཔེ་བཤད་པའི་ཕྱྀར་རེ་ཞིག་བཞག་གོ །གཉིས་པ་ལ། ཏིང་ངེ་འཛིན་གྱི་ཉེས་པ་ལྔ་ནི། ལེ་ལོ་དང་ནི་གདམ་ངག་དང༌། །བརྗེད་དང་བྱིང་དང་རྒོད་པ་དང༌། །འདུ་མི་བྱེད་དང་འདུ་བྱེད་དེ། །འདི་དག་ཉེས་པ་ལྔར་འདོད་དོ། །ཞེས་དང༌། དེ་སྤངས་པའི་འདུ་བྱེད་བརྒྱད་ནི། གནས་དང་དེ་ལ་གནས་པ་དང༌། རྒྱུ་དང་འབྲས་
བུ་ཉིད་དུའོ། །ཞེས་དང་པོ་བཞི་དང༌། དམིགས་པ་བརྗེད་པར་མ་གྱུར་དང༌། །བྱིང་དང་རྒོད་པ་རྟོག་པ་དང༌། །དེ་སྤངས་མངོན་པར་འདུ་བྱེད་དང༌། །ཞི་ཚེ་རྣལ་དུ་འཇོག་པའོ། །ཞེས་ཕྱི་མ་བཞི་པོ་རྣམས་ཏེ། །འདིའི་དོན་ནི། མཧཱ་ར་བ་ཀ་མ་ལ་ཤི་ལས། མདོར་ན་ཏིང་ངེ་འཛིན་གྱི་ཉེས་པ་དྲུག་ཡོད་དེ། ལེ་ལོ་དང༌། དམིགས་པ་བརྗེད་པ་དང༌། བྱིང་བ་དང༌། རྒོད་པ་དང༌། མི་རྩོལ་བ་དང༌། རྩོལ་བའོ། །འདི་རྣམས་ཀྱི་གཉེན་པོ་ཡང༌། སྤོང་བའི་འདུ་བྱེད་བརྒྱད་ཀྱིས་སྤོང་ངོ༌། །འདི་ལྟ་སྟེ། དད་པ་དང༌། འདུན་པ་དང༌། རྩོལ་བ་དང༌། ཤིན་ཏུ་སྦྱང་པ་དང༌། དྲན་པ་དང༌། ཤེས་བཞིན་དང༌། སེམས་པ་དང༌། བཏང་སྙོམས་སོ། །དེ་ལ་གོང་མ་བཞི་ནི་ལེ་ལོའི་གཉེན་པོ་སྟེ། འདི་ལྟར་ཏིང་ངེ་འཛིན་གྱི་ཡོན་ཏན་དག་ལ་མངོན་པར་ཡིད་ཆེས་པ། མཚན་ཉིད་དང་ལྡན་པའི་དད་པའི་རྣལ་འབྱོར་པ་རྣམས་ལ་འདོད་པ་སྐྱེའོ། །དེ་ནས་འདོད་པའི་བརྩོན་འགྲུས་རྩོམ་མོ། །དེ་བརྩོན་འགྲུས་ཀྱི་སྟོབས་ཀྱི་ལུས་དང་སེམས་ལས་སུ་རུང་བ་ཉིད་བྱེད་དོ། །དེ་ནས་ལུས་དང་སེམས་ཤིན་ཏུ་སྦྱངས་པར་གྱུར་པས་ལེ་ལོ་ལྡོག་སྟེ། དེ་བས་ན་དད་པ་ལ་སོགས་པ་ནི་ལེ་ལོ་སྤང་པའི་ཕྱིར་སྒོམ་མོ། །དྲན་པ་ནི་དམིགས་པ་བརྗེད་པའི་གཉེན་པོའོ། །ཤེས་བཞིན་ནི་བྱིང་བ་དང་རྒོད་པའི་གཉེན་པོ་སྟེ། དེས་བྱིང་བ་དང་རྒོད་པ་ཡང་དག་པར་རྟོགས་པའི་ཕྱིར་རོ། །བྱིང་བ་དང་རྒོད་པ་རབ་ཏུ་མ་ཞི་བའི་དུས་ན་མི་རྩོལ་བ་ཉེས་པ་
སྟེ། དེའི་གཉེན་པོར་སེམས་པ་བསྒོམ་མོ། །བྱིང་བ་དང་རྒོད་པ་རབ་ཏུ་ཞི་སྟེ། གང་གི་སེམས་རྣལ་དུ་འཇུག་པ་དེའི་ཚེ་རྩོལ་བ་ཉེས་པ་ཡིན་ཏེ། དེའི་གཉེན་པོར་བཏང་སྙོམས་སོ། །སྤང་བའི་འདུ་བྱེད་བརྒྱད་པོ་དེ་དག་དང་ལྡན་པ་ཏིང་ངེ་འཛིན་ཤིན་ཏུ་ཞུགས་པ་ཡིན་ཏེ། ཞེས་སྒོམ་རིམ་ལས་གསུངས་ཏེ། དེ་ལ་རྩོལ་བའི་རྒྱུ་དད་པ། གཞིའམ་གནས་འདུན་པ། དེ་ལ་གནས་པ་རྩོལ་པ། རྩོལ་བའི་འབྲས་བུ་ཤིན་ཏུ་སྦྱངས་པ་སྟེ། སེམས་གནས་པའི་ཐབས་དང་པོ་བཞི་ཡི་གནས་སྐབས་དང་རིམ་པར་སྦྱར་བར་བྱའོ། །དམིགས་པ་བརྗོད་པ་སྟེ། རྣམ་རྟོག་ལས་འབྱམས་པའི་གཉེན་པོར་དྲན་པ་སྟེ། འདུལ་བར་བྱེད་པ་དང༌། ཞི་བར་བྱེད་པའི་སྐབས་སུ་རིག་ལ། ཤེས་བཞིན་གྱིས་ནི་གང་གི་ཚེ་ཇི་ལྟར་བྱིང་བ་དང་རྒོད་པ་ཤེས་ཏེ། དེའི་ཕྱིར་བྱིང་རྒོད་ཀྱིས་སེམས་ལས་སུ་མི་རུང་བའི་གཉེན་པོར་ཤེས་བཞིན་ཏེ། རབ་ཏུ་ཞི་བར་བྱེད་པ་དང༌། སེམས་པ་ནི་སེམས་རྩེ་གཅིག་ཏུ་བྱེད་པའི་སྐབས་སུ་རིག་ལ། མི་རྩོལ་པའི་གཉེན་པོའི་ཅིའི་ཕྱིར་སེམས་པ་མི་རྩོལ་བའི་གཉེན་པོ་ཞེ་ན། དེ་ཡང་མི་རྩོལ་བ་ནི། རྩེ་གཅིག་པ་ལ་མི་རྩོལ་བ་སྟེ། བྱིང་རྒོད་གྱི་སྐབས་རྙེད་དུ་རུང་བ་ཡིན་ལ། སེམས་པ་ནི། དེ་སྐད་དུ་ཡང༌། སེམས་པ་གང་ཞེ་ན། མངོན་པར་འདུ་བྱེད་པ་ཡིད་ཀྱི་ལས་དེ་དགེ་བ་དང་མི་དགེ་བ་དང་ལུང་མ་བསྟན་པ་རྣམས་ལ་སེམས་འཇུག་པའི་ལས་ཅན་ནོ། །ཞེས་གསུངས་ཏེ། སྐབས་འདིར་ཡང་ཁབ་ལེན་གྱི་རྗེས་སུ་ལྕགས་འགྲོ་བ་ལྟར། ཏིང་ངེ་འཛིན་ལ་སེམས་རྩེ་
གཅིག་ཏུ་འགྲོ་བའོ། །བཏང་སྙོམས་ནི་མཉམ་པར་འཇོག་པའི་ཚེ་རང་བཞིན་གྱི་སེམས་གནས་པ། རྩོལ་བ་ཉེས་པ་ཡིན་ཏེ། དེའི་ཕྱིར་ཞིང་རྣམ་རྟོག་གིས་འཁྲུགས་ཏེ་དེའི་གཉེན་པོར་བསྒོམ་པར་བྱ་སྟེ། འདི་དག་བསྒོམ་པའི་རིམ་པ་མདོར་བསྡུས་སུ་བཤད་ཟིན་ཏོ། །ད་ནི་ལྷག་མཐོང་བསྒོམ་ཚུལ་ཤིན་ཏུ་ཅུང་ཟད་ཅིག་བརྗོད་ན། དེ་ལྟར་ཞི་གནས་གྲུབ་པ་དེ་ནས་ཞེས་པ། ཆོས་མངོན་པ་ལས། ཡང་ཞི་གནས་དང་ལྷག་མཐོང་དེ་དག་ལ་བརྟེན་ནས་ལམ་བཞིར་གྱུར་ཏེ། ལ་ལ་ནི་ཞི་གནས་ཐོབ་པ་ཡིན་གྱི། ལྷག་མཐོང་ནི་མ་ཐོབ་སྟེ། དེ་ཞི་གནས་ལ་བརྟེན་ནས་ལྷག་མཐོང་ལ་བརྩོན་པར་བྱེད་དོ། །ལ་ལ་ནི་ལྷག་མཐོང་ཐོབ་པ་ཡིན་གྱི། ཞི་གནས་ནི་མ་ཐོབ་སྟེ། དེ་ལྷག་མཐོང་ལ་བརྟེན་ནས་ཞི་གནས་ལ་བརྩོན་པར་བྱེད་དོ། །ལ་ལ་ནི། ཞི་གནས་ཡང་ཐོབ་པ་མ་ཡིན་ལ། ལྷག་མཐོང་ཡང་ཐོབ་པ་མ་ཡིན་ཏེ། དེ་ལ་ཆོས་ལ་རྒོལ་བ་མངོན་པར་ཚར་བཅད་པའི་སེམས་ཀྱིས་གཉིས་ཀ་ལ་བརྩོན་པར་བྱེད་དོ། །ལ་ལ་ནི་ཞི་གནས་དང་ལྷག་མཐོང་ཡང་ཐོབ་པ་ཡིན་ཏེ། དེའི་གནས་དང་ལྷག་མཐོང་ཡང་འདྲེས་པར་གྱུར་ནས་མཉམ་པར་ཟུང་དུ་འཇུག་གོ །ཞེས་གསུངས་པས་དང་པོའི་དབང་དུ་བྱས་པའོ། །དེ་ལྟར་དེ་ནས་ཐེག་པ་ཆེན་པོའི་མདོ་རྣམས་ལས། ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པའི་རིམ་པ་གང་གསུང་པ་དེ་ལས་བྱུང་བ་བཞིན་མན་ངག་དང་ལྡན་པས་བློ་ལྡན་ཏེ། བྱང་ཆུབ་སེམས་དཔས་
བསྒོམ་པར་བྱེད་དོ་ཞེས་པ་མཚམས་སྦྱར་བའོ། །དེ་ནས་བསྒོམ་པ་དངོས་ནི། དེ་སྐད་དུ་ལྷག་མཐོང་གང་ཞེ་ན། འདི་ལྟ་སྟེ། ཆོས་རྣམས་ལ་རྣམ་པར་འབྱེད་པ་དང༌། རབ་ཏུ་རྣམ་པར་འབྱེད་པ་དང༌། ཡོངས་སུ་རྣམ་པར་རྟོག་པར་བྱེད་པ་དང༌། ཡོངས་སུ་རྣམ་པར་དཔྱོད་པར་བྱེད་པའོ། །ཞེས་གསུངས་ཏེ། རྣམ་པར་འབྱེད་པ་ནི་ཇི་སྙེད་པའི་ཆོས་ལ་འདི་དག་གོ །ཞེས་ལྟ་བ་དང༌། རབ་ཏུ་རྣམ་འབྱེད་ནི་ཆོས་ཉིད་ཇི་ལྟ་བའི་དོན་ལ་རྣམ་པར་འབྱེད་པ་དང༌། ཡོངས་སུ་རྟོག་པ་ནི། རྟོག་པ་དང་བཅས་པའི་ཤེས་རབ་ཀྱིས་མཚན་མར་བྱེད་ཅིང་ངོ་བོ་ལ་རང་སར་འཚོལ་བ་དང༌། ཡོངས་སུ་དཔྱོད་པ་ནི་ཁྱད་པར་ལ་ཞིབ་ཏུ་འཚོལ་བ་ཡིན་ནོ། ཁྱད་པར་དེ་དག་དང་ལྡན་པའི་ཟབ་མོ་སྟོང་པ་ཉིད་སྒོམ་ཚུལ་ཡང༌། མཧཱ་ས་ཏྭ་ཀ་མ་ཤི་ལའི་སྒོམ་རིམ་དུ། གང་གི་ཚེ་ཡིད་ལ་བྱེད་པ་དེ་དག་ཞུགས་པར་གྱུར་པ་དེའི་ཚེ། ཕུང་པོ་དང་ཁམས་ལ་སོགས་པའི་བྱེ་བྲག་གིས་རྒྱས་པར་དམིགས་པ་བྱེད་པ་ཁོ་ན་སྟེ། འདི་སྐད་དུ། དགོངས་པ་ངེས་པར་འགྲེལ་པ་ལ་སོགས་པ་ལས་ཀྱང༌། རྣལ་འབྱོར་པ་རྣམས་ཀྱིས་སྟོང་པ་ཉིད་རྣམ་པ་བཅོ་བརྒྱད་དམིགས་པ་ལ་སོགས་པའི་བྱེ་བྲག་གིས་དམིགས་པའི་རྣམ་པ་མང་དུ་བཀའ་སྩལ་ཏོ། །ཞེས་གསུངས་ཏེ། བྱེ་བྲག་གིས་རྒྱས་པར་དམིགས་པ་ཞེས་པ། ཇི་སྙེད་པ་རྣམ་འབྱེད་དང༌། དམིགས་པ་ལ་སོགས་པའི་བྱེ་བྲག་གིས་ཞེས་པ། ཇི་ལྟ་བ་རབ་ཏུ་
རྣམ་འབྱེད་དང་ཕྱི་མ་གཉིས་ཡིན་ལ། ད་ནི་འདིའི་རྗེས་སུ་འབྲང་བར་བྱ་སྟེ། ས་ལས་མྱུ་གུ་དང་འཇའ་ཚོན་ལྟར་ཆོས་འདི་དག་ཐམས་ཅད་རྟེན་ཅིང་འབྲེལ་བར་འབྱུང་བ་ཙམ་སྟེ། སེམས་ཀྱི་སྣང་བ་ཙམ་ལས་ལེགས་པར་དཔྱད་ན་ངོས་བཟུང་དང་བྲལ་བའི་ཕྱིར་ངོ་མཚར་རྨད་དུ་འབྱུང་བའོ། །དེའི་ཕྱིར་སྣང་བའི་ཆོས་འདི་ཀུན་སྒྱུ་མ་ལྟ་བུར་བདེན་པའི་སྟོང་པའོ་ཞེས་སྔར་བཤད་པའི་ཞི་གནས་ཀྱི་ངང་ནས་ཡང་ནས་ཡང་དུ་ཆོས་རྣམས་ཀྱི་རང་བཞིན་སྟོང་པ་ཉིད་དེ་བསྒོམ་པར་བྱའོ། །དེ་ལ་འདིར་ནི་ལང་ཀར་གཤེགས་པ་ལས་བཀའ་སྩལ་ཏེ། སེམས་ཙམ་ལ་ནི་རབ་བརྟེན་ནས། །ཕྱི་རོལ་དོན་ལ་མི་རྟོག་གོ །དེ་བཞིན་ཉིད་ལ་དམིགས་ནས་ནི། །སེམས་ཙམ་ལས་ཀྱང་འདའ་བར་བྱེད། །སེམས་ཙམ་ལས་ནི་འདས་ནས་སུ། །སྣང་བ་ལས་ནི་འདའ་བར་བྱ། །སྣང་མེད་གནས་པའི་རྣལ་འབྱོར་པ། །ཡེ་ཤེས་ཐེག་པ་ཆེན་པོ་མཐོང༌། །ཞེས་སོ། །དེ་ཡང་སེམས་ཙམ་ལ་ནི་རབ་བརྟེན་ནས་ཞེས་པ་ནས་བརྩམ་སྟེ། སེམས་ཙམ་ལས་ཀྱང་འདའ་བར་བྱ། །ཞེས་པའི་བར་ནི། སཱ་ལུའི་མྱུ་གུ་ཞེས་པ་ནས། དེ་བསྒོམ་བྱ། ཞེས་པས་བཤད་དེ། སྣང་མེད་ལ་གནས་པ་དང༌། ཡེ་ཤེས་ཐེག་པ་ཆེན་པོ་མཐོང་བ་ནི་སྔ་མ་གོམས་པ་ལས་འབྱུང་ཞིང༌། སེམས་མི་གཡོ་ཞིང་ཆོས་རྣམ་འབྱེད་ཅེས་པས་བཤད་དོ། །དེ་ལ་སཱ་ལུའི་མྱུ་གུ་རྟེན་འབྱུང་ཙམ་གྱི་དཔེ་དང་འཇའ་ཚོན་ནི་བར་སྣང་ལས་ལོགས་
སུ་མེད་པ་ལྟར། ཆོས་ཀུན་སེམས་ལས་གཞན་དུ་མེད་པའི་དཔེའོ། །སྐབས་འདིར་ངེས་ཤེས་སྐྱེས་དཀའ་ན། རྒྱལ་བའི་སྲས་ཀྱི་དབང་ཕྱུག་ཀླུ་སྒྲུབ་དང༌། གནས་བརྟེན་ཆེན་པོ་རྒྱལ་སྲས་དབྱིག་གཉེན་སོགས་ཀྱིས་ཇི་སྐད་བཤད་པའི་རིམ་པ་དང་ལུང་གིས་ཀྱང་ཅི་རིགས་སུ་གཏན་ལ་དབབ་བོ། །བསྡུས་པ་ནི་འདི་ཡིན་ཏེ། ཆོས་ཀུན་གྱི་རང་བཞིན་གཅིག་པ་ནི། མཐའ་ཀུན་བྲལ་བའི་སྟོང་ཉིད་རྟོགས་པ་དེ་བསྒོམ་པའི་ཕྱིར། ཡང་ཡང་སྟོང་པའོ་ཞེས་ཀྱང་བསྒོམ་པར་བྱའོ། །ཞེས་པའོ། །འདི་ཚིག་དོན་ལྟག་འོག་མི་མཐུན་པའོ་སྙམ་ན་མ་ཡིན་ཏེ། དེ་ཡང་ཇི་ལྟར་བྷ་ར་ཏ་ལས། མེས་སྨིན་པའི་འཁུར་བ་གསོད་པ་འོན་ཅིག་ཅེས་པའི་དོན་ལ། གྲུབ་པ་མེ་ཡིས་བསྲེག་པ་ཡི། །འཁུར་བ་གསོད་པ་འོན་ཅིག་བུ། །ཞེས་པ་ལྟ་བུ་སྟེ། དེའི་ཕྱིར་ཚིག་ལ་སྐྱོན་མེད་དོ། །དེ་ལྟར་མཉམ་བཞག་ཏུ་བསམ་གཏན་གྱི་སྐྱོན་དང༌། ཡིད་ལ་བྱེད་པ་དང་བསམ་གཏན་ཉིད་དྲན་པ་དང༌། སྐྱོན་དང་ཡོན་ཏན་དང༌། ཡང་དག་པའི་གནས་ལ་སེམས་སོན་མ་སོན་སོགས་ཤེས་བཞིན་དང༌། སྤྱོད་ཡུལ་འཇུག་པ་ནས་ཀྱང་སྨྲས་པ། བདག་གི་ལས་དང༌། དཀོན་མཆོག་གི་ཡོན་ཏན་འཁོར་བའི་ཉེས་པ་དང༌། རང་གི་སེམས་ལ་དྲན་པ་དང༌། ཤེས་བཞིན་དུ་ཡང་བརྟག་པར་བྱ། སྤྱོད་ལམ་ཀུན་ཏུ་སྲོག་ལ་བབས་ཀྱང་ཉོན་མོངས་པ་དང་ལས་ངན་པ་བསྡོམ་པའི་བག་ཡོད་བརྟེན་པར་བྱའོ། །ཞི་གནས་དང་ལྷག་མཐོང་ཆ་མཉམ་པ་དེ་ཅི་ཙམ་ན་རབ་ཏུ་ཞུགས་ཞེ་ན། བྱ་བ་ཀུན་
ལ་ཅི་ཞིག་ལྟར། །སེམས་མི་གཡོ་ཞིང་ཆོས་རྣམས་འབྱེད། །ཞེས་པའོ། །དེ་ལྟར་རབ་ཏུ་སྨྲས་པ་གང༌། །འདི་ལ་ལེགས་རྣམས་རྒྱལ་བ་དང༌། །མཁན་པོ་སློབ་དཔོན་རྣམས་ཀྱིའོ། །ཉེས་པ་གང་ཡིན་བདག་གི་བཟུང༌། །ཉེས་སྨྲས་ལྷག་པར་སྡིག་ཆེ་བས། །ནོངས་པ་གང་ཡིན་མཆོག་ལ་བཤགས། །མགོན་པོ་ཀླུ་དབང་འཕགས་པ་ལྷ། །ཟླ་གྲགས་འཕགས་པ་ཐོགས་མེད་དང༌། །སློབ་དཔོན་དབྱིག་གཉེན་བློ་བརྟན་དང༌། །ཙནྡྲ་གོ་མི་བདག་ཉིད་ཆེ། །ཞི་བ་ལྷ་ལ་སོགས་པ་ཡི། །དངོས་པོ་རྣམས་ལ་སྐྱབས་སུ་མཆི། །དེང་འདིར་གཅིག་ཏུ་ཕན་པའི་བློས། །བཤད་མོད་ཉེས་པ་གང་མཆིས་ཏེ། །བདག་ནི་ཤེས་བྱ་ཀུན་ལ་རྨོངས། །དེ་ལྟ་ན་ཡང་བསྒོམ་པའི་ཚུལ༌། །འདི་ལ་འཁྲུལ་པ་ཡོད་མ་ཡིན། །ཏིང་འཛིན་འདི་ལ་གང་གནས་པ། །དེས་ནི་རིན་ཆེན་བཟང་པོ་ལྟའི། །ཏིང་ངེ་འཛིན་སོགས་ཀུན་འཇུག་ནུས། ༈ །ད་ནི་ཀུན་རྫོབ་བྱང་ཆུབ་ཀྱི་སེམས་བསྒོམ་ཚུལ་ཅུང་ཟད་གཅིག་ཏུ་བརྗོད་པར་བྱ་སྟེ། དེ་ནས་ཞེས་པ་སྔར་དེ་བཤད་པའི་རྗེས་ཐོག་དེ་ནས་བཤད་པར་བྱའོ་ཞེས་པ་ཡིན་གྱི། བསྒོམ་པའི་རིམ་པ་བཞིན་དུ་བསྟན་པ་ནི་མ་ཡིན་ནོ། །དེ་ལ་དེ་ནས་གཞན་ཡང་བློ་ལྡན་བྱང་ཆུབ་གཉེར་བ་དག་གིས་གཅིག་ཏུ་འབད་པར་བྱ་བ་འདི་ལ་ནི། དང་པོར་གང་དུ་བསྒོམ་པའི་གནས་སྔར་བཤད་པ་ཉིད་ཆེས་མཆོག་ཡིན་མོད། གཅིག་ཏུ་དེ་ལྟར་དགོས་པ་ཡང་མ་ཡིན་ཏེ། ཁྱིམ་ན་འདུག་གམ་ཡང་ན་བས་མཐར་འདུག་ཀྱང་རུང་སྟེ། དཔེར་ན་ཐམས་ཅད་སྒྲོལ་དང༌། བྲམ་ཟེ་
སྤུན་དུ་གྱུར་པ་ལྟ་བུའོ། །བསྒོམ་པའི་གང་ཟག་ནི་གཙོ་བོར་ནང་གི་ནང་ལ་རབ་ཏུ་འཇོག་ཉིད་ཡིན་མོད། གཞན་ཡང་མཉམ་པར་འཇོག་ཀྱང་རུང༌། འདོད་པ་ལ་སྤྱོད་ཀྱང་རུང༌། ཞེས་ཀུན་རྫོབ་བྱང་ཆུབ་ཀྱི་སེམས་ལ་ཐོག་མར་འཇུག་པ་ནི། དཀའ་ཐུབ་པ་དང་འདོད་ལྡན་ཀུན་རུང་བར་མཚུངས་ཏེ། མདོར་ན་སེམས་ཅན་དམྱལ་བ་པ་ལ་ཡང་སྐྱེ་བར་རུང་ངོ༌། །དེའི་ཕྱིར་བདག་སྔོན་དགེ་བ་མ་བསགས་ཞེས། །ཞུམ་པ་ཉིད་དུ་མི་བྱ་སྟེ། །མི་གང་ལམ་འདི་ཐོས་གྱུར་པ། །དེ་དག་ཀུན་ཡང་མཐུ་དང་ལྡན། །འདི་ནི་ལམ་གྱི་གནས་སྐབས་ཕྱོགས་གཅིག་པ་ཡང་མ་ཡིན་ཏེ་ཡུན་རིང་མོར་བསླབ་པ་མདོར་ན་དག་པའི་ས་ལ་གནས་པ་དང༌། ལས་དང་པོ་པ་སེམས་བསྐྱེད་མ་ཐག་ཡན་ཆོད་ཀྱང་འདི་ཉིད་བསྒོམ་པར་བྱ་སྟེ། འོན་ཀྱང་དབང་པོ་དང་ལམ་གྱི་བྱེ་བྲག་གིས་དམིགས་པ་དང་རྣམ་པ་ཐ་དད་པའོ། །ད་ནི་དེ་ཉིད་སྒོམ་ཚུལ་ཡང་བསྡུས་ཏེ་བརྗོད་ན། རེ་ཞིག་དང་པོར་སེམས་ཅན་ཐམས་ཅད་ལ་སྙིང་རྗེ་བསྒོམ་པར་བྱ་སྟེ། དེ་ཡང་ཐོག་མར་སེམས་ཅན་རྣམས་ཀྱི་ནང་ནས་དགྲ་ལ་སོགས་པ་རྣམས་ལ་བཟོད་པ་བསྒོམ་པ་དང༌། དེ་ལྟ་བུའི་སྙིང་རྗེ་དེ་ཡང་རྐྱེན་གྱིས་མི་འཕྲོག་པའི་ཕྱིར་སེམས་ཅན་གང་ཅི་ཡང་རུང་བ་བདག་རང་ལ་གནོད་པའི་སེམས་ཀྱིས་བསད་པར་བྱའོ་སྙམ་དུ་སེམས་པའི་དགྲ་ལ་སོགས་པའི་དྲིན་དྲན་པ་དང་བྱམས་པའི་སེམས་སྐྱེ། དེ་ལ་སྙིང་རྗེ་
སྐྱེ་སྟེ། གལ་ཏེ་དེ་ཡང་རྒྱུད་ལ་མི་སྐྱེ་བར་ཁོང་དུ་ཆུད་པར་མ་གྱུར་ན། ཕ་མ་དང་དགྲ་སོགས་གཟུགས་བརྗེ་ཞིང་བསྒོམ་པར་བྱ་ལ་ཡང་ན་རེ་ཞིག་སྡུག་བསྔལ་གཙོ་བོར་མི་བསམ་པར་འགྲོ་རྣམས་བདེ་བར་གྱུར་ན་ཅི་མ་རུང་ཞེས་བྱམས་པ་བསྒོམ་པར་བྱ་ཞིང༌། ཕྱིས་ནས་ངེས་པར་སྙིང་རྗེ་ལ་ནན་ཏན་དུ་བྱ་སྟེ། གཞན་དུ་ནི་བྱང་ཆུབ་ཀྱི་སེམས་རྒྱས་པར་མི་འགྱུར་རོ། །དེ་ལྟར་འགྲོ་བ་ཀུན་བྱང་ཆུབ་ལ་འགོད་པར་འདོད་པས་སྙིང་རྗེ་ལ་བསྒོམ་པར་བྱ་དགོས་ཏེ། དེ་མེད་ན་རང་གི་དོན་ཉིད་སེམས་པས་ན་གཞན་དོན་ལ་བཏང་སྙོམས་པར་འགྱུར་བས་གནོན་པ་དང༌། སྡུག་བསྔལ་ལ་བཟོད་པ་ཡང་ནན་ཏན་དུ་བྱ་དགོས་ཏེ། གཞན་ཡང་བླ་ན་མེད་པའི་བྱང་ཆུབ་ལས་ཕྱིར་ལྡོག་པར་འགྱུར་ཏེ། གཞན་གྱིས་གནོད་པ་བྱས་པས་ཁྲོ་བའམ་སྐྱོ་བར་འགྱུར་བ་དང༌། བྱང་ཆུབ་ཀྱི་ཕྱིར་བསྐལ་བ་གྲངས་མེད་པར་དཀའ་བ་མེད་པར་དུ་མ་འབད་དགོས་པའི་ཕྱིར། དེ་ལ་ཡིད་སྐྱོ་བས་བྱང་ཆུབ་ཆེན་པོ་བསྒྲུབ་པར་མི་བྱེད་ལ། སྙིང་རྗེ་མཚུངས་པ་མེད་པ་དང་ལྡན་པའི་གང་ཟག་རྣམས་དེ་དག་བཟོད་པར་འགྱུར་བའི་ཕྱིར་རོ། །འདི་རྣམས་ནི་བྱང་ཆུབ་ཀྱི་སེམས་མི་ཉམས་ཤིང་འཕེལ་རྒྱས་སུ་བྱེད་པའི་ཐབས་ཡིན་ནོ། །དེ་ལྟར་ན་ཐབས་དེ་རྣམས་ལ་ནན་ཏན་དུ་འབད་ན་རིམ་གྱིས་ཏེ། གང་ཟག་དབང་པོ་དམན་པས་དང་པོར་སོ་སོའི་སྐྱེ་བོས་བྱ་སླ་བའི་སྦྱིན་པ་སོགས་ལ་འབད་ན། ཕྱི་ནས་ཕ་རོལ་དུ་ཕྱིན་པ་ཐམས་ཅད་ལ་ཡང་དག་
པར་བསླབ་པར་བྱའོ། །དེ་ཡང་ཇི་སྐད་དུ། ཚོད་མ་ལ་སོགས་སྦྱིན་པ་ལ། །འདྲེན་པའི་ཐོག་མར་སྦྱོར་བ་མཛད། །དེ་ལ་གོམ་ནས་ཕྱི་ནས་ནི། །རིམ་གྱིས་རང་གི་ཤ་ཡང་གཏོང༌། །དེའི་རྒྱུ་མཚན་ཡང༌། གང་ཚེ་རང་གི་ལུས་ལ་ནི། །ཚོད་སོགས་ལྟ་བུའི་བློ་སྐྱེས་ནས། །དེ་ཚེ་ཤ་ལ་སོགས་གཏོང་བ། །དེ་ལ་དཀའ་བ་ཅི་ཞིག་ཡོད། །ཅེས་སོ། །དེ་ལ་ཕ་རོལ་དུ་ཕྱིན་པའི་རྣམ་པར་བཞག་པའི་རྒྱན་ལས། གྲངས་དང་དེ་ཡི་མཚན་ཉིད་གོ་རིམ་དང༌། །ངེས་པའི་ཚིག་དང་གོམས་པའི་ཡོན་ཏན་དང༌། །དེ་དག་རབ་དབྱེ་བསྡུ་དང་མི་མཐུན་ཕྱོགས། །ཡོན་ཏན་ཕན་ཚུན་རྣམ་ངེས་ཡིན་ཞེས་བྱ། །ཞེས་སོགས་རྒྱས་པར་གསུངས་པ་ལས། །འདིར་མདོར་བསྡུས་ཏེ་བཤད་ན། མཚན་ཉིད་དང༌། དབྱེ་བ་དང༌། ངོ་བོ་དང༌། གྲངས་ངེས་དང༌། གོ་རིམ་དང༌། ངེས་ཚིག་དང༌། འབྲས་བུའོ། །སྡོམ་ནི། མཚན་ཉིད་དབྱེ་བ་ངོ་བོ་དང༌། །གྲངས་དང་གོ་རིམ་ངེས་ཚིག་འབྲས། །དེ་ལ་དང་པོ་ནི། རྗེ་བཙུན་གྱིས། སྦྱིན་པ་མི་མཐུན་ཕྱོགས་ཉམས་དང༌། །རྣམ་པར་མི་རྟོག་ཡེ་ཤེས་ལྡན། །འདོད་པ་ཐམས་ཅད་ཡོངས་རྫོགས་བྱེད། །སེམས་ཅན་རྣམ་སྨིན་དེ་རྣམ་གསུམ། །དེ་བཞིན་དུ་ཤེས་རབ་ཀྱི་བར་དུ་གསུངས་ཏེ། སྦྱྀན་པ་ནས་ཤེས་རབ་ཀྱི་བར་དུ་ཕར་ཕྱིན་དུ་འགྱུར་བ་ལ་ཁྱད་པར་བཞི་དང་ལྡན་པ་དགོས་ལ། དེ་དག་ནི་སྦྱྀན་པའི་མི་མཐུན་ཕྱོགས་སེར་སྣ་ཉམས་པ། སྦྱིན་པ་སྦྱིན་བྱ་
ལེན་པོ་གཏོང་པོས་སྟོང༌། །ཞེས་པ་ལྟར། སྦྱྀན་པའི་འཁོར་གསུམ་རྣམ་པར་མི་རྟོག་པའི་ཤེས་རབ་ཀྱིས་ཟིན་པས། ཟང་ཟིང་དང་ཆོས་ལ་སོགས་པའི་སྦྱིན་པས་འདོད་པ་ཐམས་ཅད་ཡོངས་སུ་རྫོགས་པར་བྱེད། ཟང་ཟིང་སོགས་ཀྱིས་འགྲོ་བ་བསྡུས་ནས་རྒྱུད་སྨིན་པར་བྱེད་པས་མཚམས་སྦྱར་བའོ། །དེ་ལྟར་ཆོས་བཞི་དང་ལྡན་པའི་གཏོང་པའི་སེམས་པ་ནི་སྦྱྀན་པའི་ཕ་རོལ་དུ་ཕྱིན་པའོ། །དེ་བཞིན་དུ་ཚུལ་ཁྲིམས་ཀྱི་མི་མཐུན་ཕྱོགས་ཚུལ་འཆལ་ལ་སོགས་པ་དང༌། བཟོད་པའི་མི་མཐུན་ཕྱོགས་ཁོང་ཁྲོ་ལ་སོགས་པ་དང༌། ལེ་ལོ་སོགས་བརྩོན་འགྲུས་ཀྱི་མི་མཐུན་ཕྱོགས་དང༌། རྣམ་གཡེངས་སོགས་བསམ་གཏན་གྱི་མི་མཐུན་ཕྱོགས་དང༌། ཤེས་འཆལ་སོགས་ཤེས་རབ་ཀྱི་མི་མཐུན་ཕྱོགས་རྣམས་ཉམས་པ་དང༌། རང་རང་གི་འཁོར་གསུམ་རྣམ་པར་རྟོག་པའི་ཤེས་རབ་ཀྱིས་ཟིན་པ་དང༌། ཚུལ་ཁྲིམས་ཕུན་སུམ་ཚོགས་པས་ཡིད་དང་བ་སོགས་དཔག་ཏུ་མེད་པས་དང༌། བཟོད་པས་གཞན་གྱིས་གནོན་པ་བྱས་པས་བཟོད་པ་ལ་སོགས་པས་དང༌། བརྩོན་པས་གཞན་གྱི་གྲོགས་བྱེད་པ་དང༌། བསམ་གཏན་གྱིས་མངོན་ཤེས་ལྔ་སོགས་ཀྱིས་དང༌། ཤེས་རབ་ཀྱིས་བླང་དོར་གྱི་གནས་དང་གནས་མ་ཡིན་པ་རྣམ་པར་འབྱེད་པ་ལ་སོགས་པས་གཞན་གྱི་འདོད་པ་ཡོངས་སུ་རྫོགས་པར་བྱེད་པ་དང༌། དེ་ཀུན་གྱིས་ཀྱང་འདོད་པ་རྫོགས་པར་བྱས་ནས་ཆོས་བསྟན་པས་སྔ་མ་ལྔས་རྒྱུད་
སྨིན་པར་བྱེད་པ་ལ་མཚམས་སྦྱོར་ལ་དྲུག་པས་སྨིན་པར་བྱེད་པ་སྟེ། དེ་ལྟར་ཆོས་བཞི་བཞི་དང་ལྡན་པས་སྤོང་བའི་སེམས་པ་ཚུལ་ཁྲིམས་དང༌། མི་འཁྲུགས་པ་ནི་བཟོད་པ་དང༌། སྤྲོ་བའི་ནི་བརྩོན་འགྲུས་དང༌། རྩེ་གཅིག་པའི་བསམ་གཏན་དང༌། རབ་ཏུ་རྣམ་པར་འབྱེད་པའི་སེམས་པ་ནི་ཤེས་རབ་བོ། །གཉིས་པ་དབྱེ་བ་ནི། སྦྱྀན་པ་ལ། ཟང་ཟིང་མི་འཇིགས། ཆོས་ཀྱི་སྦྱིན་པའོ། །ཟང་ཟིང་ལ་གཏོང་བ་དང༌། ཤིན་ཏུ་གཏོང་བ། གཏོང་བ་ཆེན་པོའོ། །ཚུལ་ཁྲིམས་ལ་ཉེས་སྤྱོད་སྡོམ་པ་དང༌། དགེ་བ་ཆོས་སྡུད་དང༌། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་གྱི་དང་པོ་ལ། སོ་སོར་ཐར་པ་རིགས་བདུན་ནོ། །བཟོད་པ་ལ་སྡུག་བསྔལ་དང་ལེན་གྱི་དང༌། གནོད་པ་ལ་ཇི་མི་སྙམ་པ་དང༌། ཆོས་ལ་ངེས་པའི་བཟོད་པ་དང་གསུམ་མོ། །བརྩོན་འགྲུས་ལ་གོ་ཆའི་བརྩོན་འགྲུས། སྦྱོར་པའི་བརྩོན་འགྲུས། མི་ལྡོག་པའི་བརྩོན་འགྲུས་སོ། །བསམ་གཏན་ལ་མཐོང་ཆོས་ལ་བདེ་བར་གནས་པའི་བསམ་གཏན། ཡོན་ཏན་མངོན་པར་བསྒྲུབ་པའི་བསམ་གཏན། སེམས་ཅན་གྱི་དོན་བགྱིད་པའི་བསམ་གཏན་ནོ། །ཤེས་རབ་ལ། ཀུན་རྫོབ་ལ་དམིགས་པ་དོན་དམ་ལ་དམིགས་པ། སེམས་ཅན་ལ་དམིགས་པའི་ཤེས་རབ་བོ། །གསུམ་པ་ངོ་བོ་ནི། ལན་དང་རྣམ་པར་སྨིན་པ་ལ་མི་རེ་བའི་སྦྱིན་པ་ཡང་སྲིད་ལ་འདུན་པ་དང་བྲལ་བའི་ཚུལ་ཁྲིམས། སེམས་ཅན་ལ་ཁོང་ནས་ཞེས་འགྲས་པ་མེད་པའི་བཟོད་པ།
རང་བཞིན་གྱི་དགེ་བའི་ཆོས་མཐའ་དག་ལ་ངང་གིས་སྤྲོ་བའི་བརྩོན་འགྲུས། བསམ་གཏན་གཟུགས་མེད་ཀྱི་སྙོམས་འཇུག་བསལ་བའི་ཏིང་ངེ་འཛིན། ཐབས་སྙིང་རྗེ་ཆེན་པོ་དང་ཡ་མ་བྲལ་བའི་ཤེས་རབ་རྣམས་སོ། །དེ་ཀུན་ཡང་རྟེན་དམ་པ་བྱང་ཆུབ་ཀྱི་སེམས་དང་ལྡན་པ། དངོས་པོ་དམ་པ་སྦྱྀན་སོགས་ཀྱི་དངོས་པོ་རྣམས་ཕྱོགས་རེ་བ་མིན་པས་རིས་མེད། ཆེད་དུ་བྱ་བ་དམ་པ་གཞན་དོན་དུ་སྦྱོར་བ། ཐབས་དམ་པ་འཁོར་གསུམ་རྣམ་པར་མི་རྟོག་པའི་ཤེས་རབ་ཀྱིས་ཟིན་པ། བསྔོ་བ་དམ་པ་བྱང་ཆུབ་ཆེན་པོར་བསྔོ་བ་དུག་མེད། དག་པ་དམ་པ་སྒྲིབ་གཉིས་དངོས་ཀྱི་གཉེན་པོར་སྤྱོད་པ་སྟེ་དམ་པ་དྲུག་དང་ལྡན་པས་ཉམས་སུ་བླང་ངོ༌། །བཞི་པ་ནི་ཅིའི་ཕྱིར་ཕྱིན་དྲུག་ཏུ་གྲངས་ངེས་ཞེ་ན། བྱང་ཆུབ་སེམས་དཔའ་ཆོས་ཐམས་ཅད་ནི་མདོར་ན་བསླབ་པ་གསུམ་མོ། །དེའང་སྦྱིན་པས་ལོངས་སྦྱོད་ཐམས་ཅད་ལ་ཆགས་པ་དང་བྲལ་བར་བྱས་པ་ལས་ཚུལ་ཁྲིམས་ཕུན་སུམ་ཚོགས་པར་འགྱུར་ལ། ཚུལ་ཁྲིམས་ལ་ཁྲོས་ཀྱང་སླར་མི་ཁྲོ་བ་སོགས་ཀྱིས་དགེ་སྦྱོང་དུ་བྱེད་པའི་ཆོས་བཞི་དང་ལྡན་པར་འགྱུར་བས་བཟོད་པ་སྟེ། དེ་ལྟར་གསུམ་ནི་ལྷག་པ་ཚུལ་ཁྲིམས་བསླབ་པའི་ངོ་བོ་ཡིན་ལ། བསམ་གཏན་ནི་ལྷག་པ་ཏིང་ངེ་འཛིན་དང༌། ཤེས་རབ་ནི་ལྷག་པ་ཤེས་རབ་ཀྱི་བསླབ་པ་དང༌། བརྩོན་འགྲུས་ནི་ཐམས་ཅད་ཀྱི་གྲོགས་སུ་འགྱུར་བས་ན། དེའི་ཕྱིར་གྲངས་ངེས་པའོ། །ལྔ་པ་གོ་རིམ་
ནི། སྔ་མ་སྔ་མ་ལས་ཕྱི་མ་ཕྱི་མ་སྐྱེ་བས་ན། སྔ་མ་ལས་ཕྱི་མ་མཆོག་ཏུ་གྱུར་པས་སྔ་མ་རྣམས་རགས་པ་ལ་ཕྱི་མ་རྣམས་ཕྲ་བའི་ཕྱིར་བསྟན་སྟེ། ཇི་སྐད་དུ། སྔ་མ་མ་བསྟན་ཕྱི་མི་སྐྱེ། །དམན་དང་མཆོག་ཏུ་གནས་ཕྱིར་དང༌། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན་ཞེས་སོ། །དྲུག་པ་སྒྲ་དོན་ནམ་ངེས་ཚིག་ནི། རྗེ་བཙུན་གྱིས། དབུལ་བ་འདོར་བར་བྱེད་པ་དང༌། །བསིལ་བ་ཐོབ་དང་ཁྲོ་བཟོད་དང༌། །མཆོག་སྦྱཽར་བ་དང་ཡིད་འཛིན་ལ། །དོན་དམ་ཤེས་པའི་ཕྱིར་བཤད་དོ། །འདི་ནི། སཾ་ཀྲྀ་ཏའི་སྐད་ལས་ཤེས་དགོས་ཏེ། དེ་ཡང་དཱ་ན་ཞེས་པ། ད་རི་ཏྲ་ངན་པར་འགྲོ་བ་ལའོ། །ཞེས་པའི་དབྱིངས་ལས་དཱ་ནི་དབུལ་བ་ཡིན་ལ། ན་ནི་བཤན་ཏེ་དེ་ཡིས་བཀའ་བས། དེ་ལྟར་དབུལ་བ་འདོར་བས་སྦྱིན་པའོ། །ཤཱི་ལ་ལས་ཤཱི་ཏ་བསིལ་བ་དང་ཊུལ་བྷ་ཥ་ཐོབ་པ་ལའོ། །ཞེས་པའི་བྱིངས་ལས་ལ་ཐོབ་པ་སྟེ། དེ་ལྟར་ན་བསིལ་བ་ཐོབ་པས་ཚུལ་ཁྲིམས་སོ། །དེ་ཡང་ཡུལ་གྱི་ཚ་བའི་གདུང་བས་མི་བརྫི་བར་བསིལ་བ་ཐོབ་པའོ། །ཀྵནྟིཿལས་ཀྵམུ་དཀའ་ཐུབ་དང་བཟོད་པ་ལ་ཡང་ངོ༌། །ཞེས་པའི་དབྱིངས་ལས་སྡུག་བསྔལ་གྱི་ཚོགས་ལ་སྲན་ཚུགས་པར་བཟོད་པས་བཟོད་པའོ། །བིརྱ་ལས་བཱི་ནི་བིར་རྣམ་པར་གནོན་པ་ལའོ། །ཞེས་པའི་བྱིངས་ལས། དཔའ་བ་དང་རྟུལ་ཕོད་པ་ལ་འཇུག་པས་མཆོག་གི་སྙིང་སྟོབས་མ་ཞུམ་པར་སྦྱཽར་བའི་དོན་ཀྱིས་བརྩོན་འགྲུས་སོ། །དྷྱེ་ན་ཞེས་པ་དྷྱེ་སེམས་
པ་ལའོ། །ཞེས་པའི་བྱིངས་ལས་སེམས་པའི་རྒྱུན་གཞན་དུ་ཡེང་བ་མེད་པར་སྒོ་གཏན་བཅུག་པ་ལྟར་མི་གཡོ་བའི་དོན་གྱིས་ན་བསམ་གཏན་ནོ། །པྲཛྙཱ་ནི་ཛྙཱ་ཁོང་དུ་ཆུད་པའམ་རྟོགས་པ་ལའོ། །ཞེས་པའི་བྱིངས་ལས་ཉེར་བསྒྱུར་པྲ་སྔོན་དུ་བཞག་པས། རབ་ཏུ་ཁོང་དུ་ཆུད་པའམ་རབ་ཏུ་རྟོགས་པ་ཞེས་པ་ཡིན་ཏེ། དེ་ལྟར་རབ་ཏུ་རྟོགས་བྱའི་ཡུལ་ནི་དོན་དམ་པ་ཡིན་ལ། དོན་དམ་པ་ནི་འཕགས་རྒྱུད་ཀྱི་མཉམ་བཞག་ཡེ་ཤེས་ཡིན་པས། དོན་ནི་དེའི་སྤྱོད་ཡུལ་དུ་གྱུར་པ་སྟེ། དེའི་ཕྱིར་དམ་པའི་དོན་ཤེས་པས་ཤེས་རབ་བོ། །བདུན་པ་འབྲས་བུ་ནི། གནས་སྐབས་སུ། སྦྱྀན་པས་ལོངས་སྤྱཽད་ཁྲིམས་ཀྱིས་བདེ། །བཟོད་པས་གཟུགས་བཟང་བརྩོན་པས་བརྗིད། །བསམ་གཏན་གྱིས་བདེ་བློ་ཡིས་གྲོལ། །ཞེས་རིན་ཆེན་འཕྲེང་བར་གསུངས་པ་ལྟར་རོ། །མཐར་ཐུག་གི་འབྲས་བུ་སྦྱྀན་སོགས་དང་པོ་གསུམ་བསོད་ནམས་ཀྱི་ཚོགས་ཏེ། གཟུངས་སྐུའི་དངོས་རྒྱུ་དང༌། ཤེས་རབ་ནི་ཡེ་ཤེས་ཀྱི་ཚོགས་དང༌། བསམ་གཏན་ཕལ་ཆེར་ཡང་ཡེ་ཤེས་ཀྱི་ཚོགས་ཏེ། དེའི་ཕྱིར་དེ་གཉིས་ཆོས་ཀྱི་སྐུའི་དངོས་རྒྱུ་དང༌། བརྩོན་འགྲུས་ཀྱིས་ཐམས་ཅད་ཀྱི་གྲོགས་བྱེད་དོ། །འདིར་བསམ་གཏན་དང་ཤེས་རབ་ནི་གཙོ་བོར་བཤད་པར་བྱ་བ་ཡིན་མོད། དེ་ལྟ་མོད་ཀྱི་སྐབས་སུ་བབ་པའི་མདོར་བསྡུས་བསྒོམ་ཚུལ་ཅུང་ཟད་བཤད་ཟིན་ལ། འདི་སྐབས་ཀྱི་ཏིང་ངེ་འཛིན་ནི་ཏིང་ངེ་འཛིན་རྣམ་པ་ལྔའི་མདོར། རིན་ཆེན་བཟང་པོ་ལྟ་བུ་དང༌།
རབ་འབྱམས་རྒྱ་མཚོའི་ཏིང་ངེ་འཛིན་དང༌། ཡང་དག་པའི་མཐའ་དང༌། སྤྱོད་པ་མཆོག་ཏུ་སྤྱོད་པ་དང༌། འདོད་དགུར་བསྒྱུར་བ་རྣམས་ཀྱི་ཕྱི་མ་ཡིན་ལ། ཤེས་རབ་ནི་དེའི་མཐའི་ཏིང་ངེ་འཛིན་ཡིན་ལ། འདི་དག་གི་རྣམ་པར་བཞག་པ་ནི་ཡི་གེ་མང་བའི་འཇིགས་པས་རེ་ཞིག་བཏང་སྙོམས་སུ་བྱའོ། །ཕ་རོལ་ཕྱིན་པ་འདི་དག་ལ། །གང་རྣམས་སློབ་པར་འདོད་དེ་དག །བླ་མེད་བྱང་ཆུབ་འདོད་དགུར་བསྒྱུར། །གཞན་དུ་མཁས་པ་རྣམས་ཀྱང་འཁྱམས། །ཞེས་ཀྱང་སྨྲས་སོ། །གཞན་ཡང་བྱང་ཆུབ་སེམས་དཔའ་སྙིང་རྗེ་ལ་བསླབ་པར་བྱེད་པ་རྣམས་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པར་བྱའོ། །བརྗོད་པར་བྱའོ། །བསྙོན་པར་བྱ་ཞིང་བསྒོམ་པར་བྱའོ། །ཞེས་ཏེ། འདིའི་བསྒོམ་ཚུལ་འོག་ནས་ཅུང་ཟད་བཤད་པར་བྱའོ། །དེ་ལ་འཕགས་པ་སྤྱན་གཟིགས་ནི་སྔོན་གྱི་སྨོན་ལམ་གྱིས་དབང་ལས་རྒྱལ་བ་ཀུན་གྱི་ཐུགས་རྗེའི་བདག་ཉིད་དུ་བཞུགས་པ་སྟེ། དེ་ཡང་ཇི་སྐད་དུ། ཟག་མེད་དབྱིངས་ནས་སངས་རྒྱས་རྣམས། །སྔོན་གྱི་ལུས་རྗེས་འབྲང་ཕྱིར་དང༌། །མཁའ་ལྟར་ལུས་ནི་མེད་པའི་ཕྱིར། །གཅིག་མིན་དུ་མ་ཉིད་ཀྱང་མིན། །ཞེས་གསུངས་པ་དྲན་པར་བྱའོ། །ད་ནི་དེ་ལྟར་ཅུང་ཟད་བཤད་པས་གྲུབ་པའི་དོན། ཉམས་སུ་བླང་པ་རིམ་པ་མདོར་བསྡུས་ན་འདི་ཡིན་ཏེ། རྣམ་པར་དབེན་པའི་རི་བོ་དང༌། ནགས་འདབ་ཆུ་ངོགས་ལ་སོགས་པ་སྐྱེ་བོའི་རྒྱུ་འགྲུལ་དང༌། བཀླག་ཅོར་དང༌། བྱ་གྷྲ་དང༌། ཆོམ་རྐུན་ལ་སོགས་པས་བགྲོད་
པར་མི་འགྱུར་ཞིང་འཇིགས་པ་མེད་པའི་གནས་སུ། དཀོན་མཆོག་གི་རྟེན་དག་བཞུགས་སུ་གསོལ་བའམ། གཅིག་ཏུ་དགོས་པ་པ་ཡང་མ་ཡིན་པས་མེད་ཡང་རུང་སྟེ། དེ་ལྟ་ན་ཕྱོགས་བཅུའི་རབ་འབྱམས་མ་ལུས་པའི་རྒྱལ་བ་སྲས་དང་བཅས་པ་ཀུན་ལ་དང་པའི་སེམས་དང༌། འགྲོ་བ་ཀུན་ལ་མཐར་ཐུག་ཏུ་ངེས་པར་ཕན་གདགས་པའི་བློས། སངས་རྒྱས་སྲས་བཅས་མ་ལུས་པའི་སྤྱན་སྔར་འདུག་པར་བསམ་ནས་སྔར་བཤད་པ་ལྟར་དོན་དྲན་བཞིན་པས་ཡན་ལག་བདུན་པ་ལན་མང་དུ་བྱའོ། །དེ་ལ་ཕྱག་འཚལ་བའི་སྐབས་སུ་བདག་དང་འགྲོ་བ་ཀུན་གྱི་ལུས་ཀྱང་ཞིང་ཁམས་རྒྱ་མཚོའི་རྡུལ་སྙེད་དུ་སྤྲུལ་ནས་ཕྱག་འཚལ་བར་སྒོམས་པ་དང༌། མཆོད་པའི་སྐབས། བདག་སོགས་སེམས་ཅན་རྣམས་ཀྱིས་དུས་གསུམ་དུ་བསགས་པའི་དགེ་བ་རྣམས་དང༌། སེམས་ཅན་རྣམས་ཀྱི་དོན་དུ་བདག་གི་ལུས་ཀྱང་དབུལ་བར་བྱ་སྟེ། རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་ཀུན་གཏན་དུ་དབུལ་བར་བགྱི། །སེམས་དཔའ་མཆོག་རྣམས་བདག་ནི་ཡོངས་བཞེས་ཤིག །གུས་པས་ཁྱེད་ཀྱི་འབངས་སུ་མཆི་བར་བགྱི། །བདག་ནི་ཁྱེད་ཀྱི་ཡོངས་སུ་བཟུང་བས་ན། །སྲིད་ན་མི་འཇིགས་སེམས་ཅན་ཕན་པར་བགྱིད། །ཞེས་བཀའ་སྩལ་པ་ཡང་བརྗོད་ལ་དོན་བསམ། །དེ་ལྟར་གནས་སྐབས་འདི་དག་ཏུ་ཡང༌། །སྤྱིར་སེམས་ཅན་ཐམས་ཅད་དང༌། ཁྱད་པར་གནོད་བྱེད་ཐམས་ཅད་ལ་ཆེས་ཆེར་བསྒོམ་པར་བྱའོ། །དེ་ནས་འཁོར་བའི་ཉེས་དམིགས་དང༌།
འདོད་པ་རྣམས་ནི་སྣོག་ཆུང་ཞིང་ཉེས་པ་མང་པ་དང༌། དབེན་པའི་ཕན་ཡོན་དང༌། དལ་འབྱོར་རྙེད་དཀའ་དང༌། འདུས་བྱས་མི་རྟག་པ་དང༌། ལས་དང་འབྲས་བུ་མི་བསླུ་བ་རྣམས་ཡིན་ལ་ཡང་ཡང་བསམ་པར་བྱ་ཞིང༌། ཐབས་དུ་མས་ཞིབ་མོ་ནས་སྒོམ་པར་བྱ་སྟེ། ཐུན་གྱི་སྐབས་སུ་རེ་ཞིག་དེ་དག་ལ་ནན་ཏན་དུ་སྒོམ། ཐུན་མཚམས་སུ་མཆོད་པ་དང༌། སྐྱབས་སུ་འགྲོ་བ་བྱང་ཆུབ་ཀྱི་སེམས་བསམ་པ་དང༌། གསུང་རབ་ཀློག་པ་དང༌། ཕྱག་དང་བསྐོར་བ་སོགས་སྤྲོས་བཅས་ཅི་རིགས་པ་ལ་ནན་དུ་བྱའོ། །ཇི་ཞིག་ལྟར་ན། ཡིད་ལ་བྱེད་པ་དེ་དག་ཅུང་ཟད་གོམ་པ་ན། དེ་ནས་དངོས་གཞི་ལ་འཇུག་སྟེ། དེ་ཡང་མདུན་དུ། བཅོམ་ལྡན་འདས་མི་འཁྲུགས་པའམ། འོ་སྐོལ་གྱི་སྟོན་པ་བཅོམ་ལྡན་འདས་ལྟ་བུའི་རྒྱལ་བའི་སྐུ་གཟུགས་རི་མོར་བྲིས་ལ། གསེར་སོགས་ཧ་ཅང་འཆོར་བག་ཆེ་བ་མ་ཡིན་པ་ཞིག་མདུན་དུ་བཞག་ལ། དེ་ལ་མིག་གཏད་དེ། སེམས་མ་ཡེངས་པ་ཙམ་དུ་བཟུང༌། དེ་ལ་གོམས་ནས་མིག་སྣ་རྩེའི་ཐད་ཀར་བལྟས་ནས་མདུན་དུ་རྒྱལ་བའི་སྐུ་བརྙན་བསམ་ལ། དེ་ལ་མ་ཡེངས་བ་ཙམ་དུ་སེམས་བཟུང༌། དེ་ལ་གོམས་ནས་སེམས་ལ་སེམས་བཞག་ནས་རྩེ་གཅིག་ཏུ་བསྒོམ། དེ་སྐབས་སེམས་གཡེངས་བ་མ་ཚོར་བར་ཅུང་ཟད་འགྱུ་ན། ཡང་ནས་ཡང་དུ། བླན་ཏེ་བསྒོམ ནམ་གནས་པ་ན། སྐད་ཅིག་རེ་རེ་ནས་འཕྲོ་མཐུད། དེ་ནས་ཡང་ཅུང་ཟད་གཡེངས་པ་དེའི་
ཚེ་བསྒོམ་པ་ལ་སྤྲོ་བའམ། མ་ཡིན་བརྟག་ལ་སྤྲོ་ན། བྱིང་རྒོད་རྣམ་རྟོག་གང་གིའང་དབང་དུ་མ་སོང་བར་སེམས་འཇོག་གོ་སྙམས་པའི་འདུན་པ་ཆེས་དྲན་པ་བཏང་ལ་ཤུགས་འཕྱུང་ནས་རྩེ་གཅིག་ཏུ་བཞག །གལ་ཏེ་མི་སྤྲོ་བའམ། འཇོག་ཅིང་སྔ་མ་ལས་ཕྱི་མ་ཡུན་ཐུང་ཞིང་མི་གསལ་བ་དང༌། སེམས་དུབ་ཅིང་སྐྱོ་ན། འཁོར་འདས་དང༌། ཁྱིམ་དང༌། དབེན་པ་དང༌། ཉོན་མོངས་དང༌། མཉམ་པར་འཇོག་པ་རྣམས་ཀྱི་ཕན་ཡོན་དང༌། ཉེས་དམིགས་རྣམས་དྲན་བཞིན་པས། ཅུང་ཟད་འདུག་ནས་བསྒོམ་པ་དང་ཐུན་ཆུང་ལ་གྲངས་མང་བར་བྱེད་ཅེས་གྲགས་པ་བཞིན་དུ་བྱའོ། །ཡང་སེམས་ཡན་ཏེ་མི་འགྲོ་ཡང་རྣམ་རྟོག་ཆུ་བུར་ལྟ་བུ་མང་པོས་སེམས་དབྱེན་སྤྱོས་ནས། རྣམ་རྟོག་སྐྱེ་བའི་ཚེ་དེ་ཉིད་ལ་སེམས་གཏན་ནས་ཡང་མི་དམིགས་པར་བཞག །དེ་ལྟ་བུ་བྱུང་ཚད་སྐྱེས་ཚད་ལ་སྦྱོར། དེ་ལྟར་འབད་པས་ཅི་ཙམ་ན། སེམས་དུམ་ཞིག་ནི་གནས་ལ་སྐབས་འགར་ནི་འཁྲུག་གོ །དེ་ནི་སེམས་གནས་པ་ལ་ཕྱོགས་པ་ཞེས་བྱའོ། །དེ་ནས་སྔོན་འདོད་ཡོན་སྤྱོད་པ་དྲན་པ་དང༌། འདོད་ཡོན་སེམས་པ་དང༌། ཚེ་འདིའི་བྱ་བས་སེམས་བྲེལ་ན་འདོད་ཡོན་གྱི་ཉེས་དམིགས། འཁོར་བའི་སྡུག་བསྔལ་ཚེ་མི་རྟག་པས་ནམ་འཆི་ཆ་མེད། ཚེ་འདི་བ་རྣམས་ཀྱི་གདེངས་དེས་ཅི་འདྲ་ཞེས་དྲན་པས་བཟློག །ཡང་རྣམ་རྟོག་སྐྱེས་པ་ན། ཀུན་རྟོག་ལས་ནི་འདོད་སྐྱེ་ཞིང༌། །འདོད་པ་ལས་ནི་སྡིག་པར་འགྱུར། །འགྲོ་རྣམས་
རྣམ་པར་འཁྱམས་བྱེད་པའི། །འདོད་པའང་ཀུན་ཏུ་རྟོག་ལས་འབྱུང༌། །ཞེས་སེམས་འཁྲུགས་པའི་རྒྱུ་རྣམ་རྟོག་གི་ཉེས་དམིགས་དྲན་པར་བྱའོ། །ཡང་མཉམ་པར་འཇོག་པ་ལ་མི་དགའ་བ་སྐྱེས་ན། འབྲས་བུ་ཞི་བ་དང༌། ལམ་མཉམ་པར་འཇོག་པའི་ཡོན་ཏན་དྲན་པས་འདུལ་ཞིང༌། གོང་དུ་བཤད་པའི་ཐབས་སྣ་ཚོགས་ཀྱིས་ཀྱང་འདུལ་བར་བྱ་སྟེ། བྱིང་ན་སྤྲོ་བ་དང༌། རྒོད་ན་མི་རྟག་པའི་འདུ་ཤེས་སོགས་ཞུམ་པས་འདུལ། གཞན་ཡང་འདོད་ཆགས་ལ་མི་སྡུག་པ། ཞེ་སྡང་ལ་བྱམས་སྙིང་རྗེ། གཏི་མུག་ལ་བདག་མེད་བསྒོམ་པས་བཟློག་ནས་མཉམ་པར་འཇོག་གོ །དེ་ལ་གོམས་པས་ཇི་ཞིག་ནས་སྒྲིམ་སྟེ་བཞག་ན་གནས་པས་བྱིང་རྒོད་ཀྱི་གོ་སྐབས་མི་འབྱུང་ཞིང༌། མ་བསྒྲིམ་ན་འབྱུང་བ་དེ་ལྟ་བུ་ལ་ཏིང་འཛིན་གྱི་སྒོ་ཞེས་བྱའོ་དེ་ལ་གོམས་ནས་སེམས་རྩོལ་མེད་གནས་པ་འབྱུང་བས་དེ་ཚེ་དེ་སེམས་སྒྲིམ་པར་ལྷོད་དེ་ཤིག་གེ་བ་ལ་མཉམ་པར་བཞག་འཇོག་སྟེ་ཞི་གནས་སོ། །དེ་ལ་རིང་དུ་གོམས་ནས་ལྷག་མཐོང་བསྒོམ་སྟེ། དེ་ཡང་ཐོག་མར་རང་ལུས་ལ་དམིགས་རྟེན་བྱས་ནས། ལྷོད་དེ་གློད་ནས་བཞག་པའི་ངང་ནས་ལུས་དང་སེམས་དེ་བདག་གི་ཕུང་པོ་འདི་དག་སེམས་ཙམ་ཉིད་དོ་སྙམས་པ་ཡང་ཡང་སྒོམ། དེ་གོམ་ནས་འདི་དག་ནི་བྲག་ཆ་ལྟར་རྟེན་འབྱུང་ཙམ་མ་གཏོགས་སྟོང་པའོ་སྙམ་དུ་ཡང་ཡང་བསྒོམ། དེ་ཡང་གོམ་ནས་སྣང་བ་ཐམས་ཅད་དང་ཁྱད་པར་བདེན་འཛིན་ཤས་ཆེ་བ་རྣམས་ལ་ཆེད་ཆེར་བསྒོམ། དེ་ཡང་འདི་ཞི་གནས་གྲུབ་རྗེས་ལྷག་མཐོང་བསྒོམ་པ་ཡིན་པས་ཐོག་མར་སྐབས་འགའ་ཞིག་ཙམ་དུ་ལྷག་མཐོང་ཕལ་
ཆེར་ཞི་གནས། དེ་ཡང་ཞི་གནས་ཇེ་ཉུང་དང་ལྷག་མཐོང་ཇེ་མང་ཡང་ལྷག་མཐོང་སྟོབས་ཆེས་རྩུབ་ན། ཞི་གནས་ཇེ་མང་བསྒོམ་པས་ཇི་ཞིག་ལྟར་ལ་ཆ་མཉམ་པར་འགྱུར། དེ་ལྟར་འཇུག་ལྡོག་ཡང་ཡང་བསྒོམ་པས་དབང་པོ་རབ་གྱིས་མཐའ་བྲལ་རྗེས་མཐུན་གྱི་ཤེས་རབ་དང་སེམས་གནས་པ་རོ་མཉམ་དུ་འགྱུར། དབང་པོ་དམན་པས་ནི། དེ་ནས་སྟོང་པའི་གདེང་དེ་ལ། མི་དམིགས་པར་ཞེན་པ་མེད་པས་མཉམ་པར་འཇོག་པ་སོགས་སྔར་བཞིན་བསྒོམ་པས་འགྲུབ་བོ། དེ་ལ་གོམ་ནས་རྗེས་ཐོབ་ཏུ་ཡང་དེ་འདྲའི་ཏིང་ངེ་འཛིན་ཏེ་ཡང་ཡང་དྲན་ཞིང་ལས་ལ་འཇུག་སྟེ། ཚུལ་འདི་དང་ལྡན་བཞིན་པས་སྦྱིན་སོགས་སྤྱད་པས་ནི། རྣམ་པར་མི་རྟོག་ཡེ་ཤེས་ལྡན། ཞེས་པ་ལ་ཕྱོགས་པར་འགྱུར་གྱི། མི་རྟོག་པ་ཙམ་པོས་ནི་མ་ཡིན་ནོ། །དེ་ནས་རིན་ཆེན་བཟང་པོ་ལྟ་བུའི་ཏིང་ངེ་འཛིན་དང༌། རབ་འབྱམས་རྒྱ་མཚོ་དང༌། ཡང་དག་པའི་མཐའི་ཏིང་ངེ་འཛིན་རྣམས་ཀྱི་ནང་གི་དབྱེ་བ་སོ་སོ་ནས་རིམ་བཞིན་བསྒོམ་པའི་ཆོས་མཆོག་གི་བར་དུ་བགྲོད་པར་འགྱུར་ལ། འདི་དག་ཡི་གེ་མང་བས་འཇིགས་ནས་མ་བྲིས་སོ། །སྐྱེས་བུ་ཆེ་ཞེས་རབ་ཏུ་གྲགས་སྨྲ་བས། །ཕྱོགས་འདི་མཁས་མང་གོ་མཚམས་བྲལ་བ་བཞིན། །བརྟགས་ཚེ་ཇི་ལྟར་མཆོད་སྦྱིན་འོས། །དེ་ལྟར་སྙིང་པོ་མེད་པས་ཉོན་མོངས་སོ། །དེའི་ཕྱིར་རེ་ཞིག་ཆོག་གོ །ད་ནི་ཀུན་རྫོབ་བྱང་སེམས་བསྒོམ་ཚུལ་བཤད་དེ། དེ་ལ་འདི་ནི་ཐམས་ཅད་ཀྱིས་བསྒོམ་པར་བྱའོ། །དེ་ཡང་བདག་དང་འགྲོ་བ་ཐམས་ཅད་སངས་
རྒྱས་ཐོབ་པར་བྱ་སྙམས་པའི་བློའི་ཤུགས་དང་བཅས། ཐོག་མར་སེམས་ཅན་རྣམས་ཀྱི་སྡུག་བསྔལ་དང༌། དེ་ལས་ཐར་བར་མི་ནུས་པའི་འགྲོ་བ་རྨོངས་པ་རྣམས་དྲན་བཞིན་པས་འདི་རྣམས་སྙིང་རེ་རྗེ། སྡུག་བསྔལ་བསྐྱབས། བདེ་བ་ལ་འགོད་པར་བྱ་ཞེས་ཡང་ཡང་བསྒོམ། དེའི་སྙིང་རྗེ་མི་སྐྱེ་ན་སེམས་ཅན་ཐམས་ཅད་ཕ་མར་ཤེས་པར་དྲིན་དྲན་པའི་སྒོ་ནས་དང༌། འདི་རྣམས་ཆོས་ཀུན་བདེན་མེད་ཁོང་དུ་མ་ཆུད་པས། ལས་ངན་བསགས་པའི་དབང་ལས་སྡུག་བསྔལ་ལ་སྤྱོད་པ་འདི་ལྟ་བུ་ཀྱེ་མ་སྙམ་དུ་ཡང་ཡང་བསམ། དེ་ལ་གོམ་ནས་སྐྱེ་དཀའ་བ་གནོད་བྱེད་རྣམས་ལ་སྔར་བཞིན་དུ་སྒོམ་དེའི་ཀྱང་མི་སྐྱེ་ན། ཡང་འདི་དག་བདག་ཆོས་ལ་བསྐུལ་བའོ་སྙམ་དུ་དྲིན་དྲན་བཞིན་པས་བསྒོམ། གཞན་ཡང་འདི་དག་ལ་ཕ་མ་ཁོ་ན་ཡིན་པ་ལ་མ་རིག་པས་འཁྱམས་ནས། བདག་ལ་གནོད་པ་བྱས་པས་ངན་སོང་དུ་ལྷུང་བ་འདུག་པས་སྙིང་རྗེ་སྙམ་པ་ཡང་ཡང་དུ་བསྒོམ་པས་ཞེ་སྡང་གིས་བརྫི་བར་མི་ནུས་སོ། །དེས་ཀྱང་མ་སྐྱེས་ན་གཟུགས་བརྗེ་ཞིང་བསྒོམས་པས་སྐྱེ་བར་འགྱུར་ཏེ། དེ་དག་ལ་གོམས་ནས། ཡང་སྙིང་རྗེས་བསྐུལ་ནས་སངས་རྒྱས་ཀུན་ལ་གསོལ་བ་བཏབ་ནས་དངོས་སུ་བྱོན་ནས་ཆོས་གསུང་བ་དང༌། འོད་ཟེར་སྤྲོ་བ་ལ་སོགས་པས་སྐད་ཅིག་དེ་ལ་སེམས་ཅན་གཅིག་ཀྱང་མ་ལུས་པར་སངས་རྒྱས་ཐོབ་པར་བསྒོམ། ཁྱད་པར་གནོད་བྱེད་གདོན་དང་དགྲ་སོགས་ལ་གཙོ་ཆེར་བསྒོམ་པར་བྱ་སྟེ། དེ་ལྟར་ན་འདི་དག་བདག་གཞན་མཉམ་པ་བསྒོམ་ཚུལ་ལོ། །གལ་ཏེ་ཆེས་མཆོག་ཏུ་གྱུར་པ་བརྗེ་བ་བསྒོམ་
པར་འདོད་ན། དབུགས་རྔུབ་པ་དང་ལྷན་ཅིག་སེམས་ཅན་གྱི་སྡིག་སྡུག་ལེན། དབྱུང་བ་དང་ལྷན་ཅིག་རང་གི་བདེ་དགེ་སེམས་ཅན་ལ་སྦྱྀན་པར་བྱ་སྟེ་ཚུལ་འདི་སྔོན་གྱི་དམ་པ་ཆེས་མང་བ་རྣམས་ཀྱིས་རྒྱ་ཆེར་གསུངས་སོ། །དེའི་སྐབས་སུ་མགོན་པོ་སྤྱན་རས་གཟིགས་ཕྱག་བཞི་པ་ལ་མཆོད་པ་ལ་སོགས་པ་བྱ་སྟེ། སློབ་དཔོན་དུ་བུདྡྷ་གུ་ཧྱ་སོགས་ཀྱིས་མཛད་པའི་མཎྜལ་གྱི་ཆོ་གར་བལྟའོ། །བསྒོམ་ཚུལ་སྔགས་ལས་འབྱུང་བ་ལྟར་མདོར་བསྡུས་སུ་བཤད་ན། སྐྱབས་འགྲོ་སེམས་བསྐྱེད། སྟོང་པར་སྦྱངས། པད་ཟླ་ལ། ཧྲཱིཿ ལས་མགོན་པོ་སྤྱན་རས་གཟིགས་ཕྱག་བཞི་པ། ཕྱག་དང་པོ་གཉིས་ཐལ་མོ་སྦྱར་བ། འོག་མ་གཉིས་ཤེལ་འཕྲེང་དང་པདྨ་དཀར་པོ་འཛིན་པ། རྡོ་རྗེ་སྐྱིལ་ཀྲུང་ཅན། རྒྱན་ཐམས་ཅད་ཀྱིས་བརྒྱན་པ་ཡེ་ཤེས་ཀྱི་སྐུ་ཅན་ཞིག་མདུན་དུ་ལམ་གྱིས་གྲུབ་པར་བསྒོམ། གནས་གསུམ་དུ་ཡི་གེ་འབྲུ་གསུམ། ཐུགས་ཀར་ཧྲཱིཿརྣམས་བཀོད། ཡེ་ཤེས་པ་དགུག་གཞུག་བྱ། དབང་བསྐུར་རིགས་བདག་གི་རྒྱས་བཏབ་ནས། ཨོཾ་མ་ཎི་པདྨེ་ཧཱུཾ། ཞེས་བཟླས་ཏེ། མདུན་བསྐྱེད་ཀྱི་ཐུགས་རྒྱུད་བསྐུལ། ཐུགས་ཀའི་ས་བོན་ལས་འོད་ཟེར་འཕྲོས་སེམས་ཅན་ཐམས་ཅད་ལ་ཕོག་པས་སངས་རྒྱས་ཐོབ་པར་བསྒོམ། ཡང་ན་ཇོ་བོ་ཁ་སར་པ་ནི་དཀར་པོ་མཆོག་སྦྱིན་དང་པདྨ་ཅན་རོལ་སྟབས་སུ་བཞུགས་པ་བསྒོམ་ནས་བཟླས་པའི་ཚེ། ཨོཾ་ཨཱཿཧྲཱིཿསྭཱཧཱ། ཞེས་བཟླ་བ་ནི། ཁྱད་
པར་ཙམ་ཡིན་ལ་གཞན་འདྲའོ། །དེ་ལ་སེམས་ཅུང་ཟད་བརྟན་ནས་རང་ཡང་དེ་ལྟར་སྒོམ། དེ་ཡང་བརྟན་ནས་དངོས་པོ་ཐམས་ཅད་རྗེ་བཙུན་ལོ་ཀི་ཤྭ་རར་བསྒོམ། དེ་དག་གིས་སྐབས་ཐམས་ཅད་སྙིང་རྗེ་ཁོ་ན་བསྒོམ་པར་བྱ་སྟེ། སྙིང་རྗེས་བོགས་དབྱུང་པའོ། །མདོར་ན་དེ་ལྟར་བྱང་ཆུབ་ཀྱི་སེམས་རྣམ་པ་གཉིས་རེ་ཞིག་རེས་འཇོག་རེས་འཇོག་ཏུ་བསྒོམ། ཕྱི་ནས་གཅིག་གིས་གཅིག་ལ་རྒྱས་བཏབ་ཀྱིན་བསྒོམ་པས་ཇི་ཞིག་ལྟར་ལ་རོ་མཉམ་དུ་འགྱུར་རོ། །དེ་ཀུན་ལ་ཐུན་མགོར་ཡན་ལག་བདུན་པ་ལ་ནན་ཏན་དང༌། མཇུག་ཏུ་རྒྱལ་བ་དང་སར་བཞུགས་ཀྱི་སེམས་དཔའ་རྣམས་ཀྱི་ཞལ་སྔ་ནས་མཛད་པའི་སྨོན་ལམ་ཡང་དག་པ་གདབ་པར་བྱའོ། །འགའ་ཞིག་ལམ་འདི་རྒྱས་འདེབས་ཀྱིས་བཅིངས་པ་ཡིད་ལ་བྱེད་པའི་དུས་འདའ་བ་རྣམ་རྟོག་གི་དྲི་མ་ལ་ཞེན་པའོ་ཞེས་སྨྲ་བ་དག་འབྱུང་སྲིད་ནའང༌། དམ་པའི་ཆོས་ལ་རྒྱལ་བ་ཉིད་ཚད་མ་ཡིན་ལ་ཕན་པའི་བློ་ཁོ་ནས་བྲིས་པའི་ཕྱིར་དང༌། ལོག་པར་གཅེས་པ་མེད་པས་མི་འཇིགས་སོ། །འདི་སྐད་ཀྱང་བསམ་སྐད། བདག་འཛིན་འདུལ་བ་ཉིད་ཀྱི་ཕྱིར། །རྟོག་པས་བཅིང་པ་ཉིད་ནའང་བླ། །གཞན་དུ་རྨོངས་པའི་རང་བཞིན་ལས། །གྲོགས་དག་ཐར་པ་ཡོད་དམ་ཅི། །ཉོན་མོངས་སྐྱེས་ཚེ་གཉེན་པོས་མ་ཕྱིན་ན། །ཆོས་ཀྱི་དགོས་པ་སྟོང་ཞེས་དམ་པས་གསུངས། །རྫོགས་སངས་རྒྱས་ཀྱི་གསུངས་ལས་ཕྱིར་ཕྱོགས་ན། །ཇི་ལྟར་བསྒོམ་ཆེན་ཡིན་ཞེས་བསམ་པའི་རིགས། །འགྲོ་འདི་འཁོར་བར་སྤྱོད་ལ་རབ་
དགའ་བས། །ལོག་པར་སྤྱོད་ལ་ཉེ་བར་བརྒྱུག་པ་མཐོང༌། །ལུས་མེད་ཕོ་ཉའི་རྣམ་འཕྲུལ་དཔག་མེད་པས། །དམ་ཆོས་རྗེས་འབྲང་འདི་ན་སྨོན་བྱེད་པ། །ཡིད་འོང་ཚུལ་ཁྲིམས་དྲི་བསྲུང་ཐོས་མང་པོའི། །འདབ་རྒྱས་ལ་འོད་སྒྲུབ་པའི་སྙིང་པོ་ཅན། །ནག་པོའི་རྩ་ལག་མ་ཥི་དིར་མི་མོས། །ངན་སྐྱུག་ཁོང་བུར་བརྒྱུག་པ་དེ་ཡི་ལུགས། །ལེགས་ལྡན་ལེགས་བྱས་ཕྲག་ཅན་གྱིས། །གང་གི་ཞབས་ཟུང་ཉེར་བསྟེན་ནས། །འབུམ་ཕྲག་བསྟོད་དབྱངས་འདབ་བརྒྱའི་འཕྲེང་བཅས་ཕྱོགས་གྲོལ་བཀང་ནས་མཆོད་བྱས་པ། །བཅོམ་ལྡན་དེ་ཡི་བཀའ་དྲིན་དྲན་པས་རྟག་ཏུ་ཕྱག་འཚལ་ནམ་ཡང་སྐྱོངས༌། །སྙིང་ནས་ཁྱོད་ལས་སྐྱབས་གཞན་སྤངས་ནས་ཁྱོད་ཀྱི་གསུང་བཞིན་བསྒྲུབ་པར་ཤོག །ལམ་མདོར་བསྡུས་པ་རྫོགས་སོ།། །།བདག་གི་འདི་དང་མ་ལུས་དགེ་བ་ཡི། །མ་གྱུར་སེམས་ཅན་ཚོགས་རྣམས་མ་ལུས་པ། །མྱུར་དུ་བླ་མེད་བྱང་ཆུབ་སྐུ་གསུམ་དངོས། །རྟག་ཅིང་བདེ་བའི་གོ་འཕང་མྱུར་ཐོབ་ཤོག །ཤཱཀྱའི་དགེ་སློང་ཀུན་དགའ་སྙིང་པོས་རྩ་བ་སྔགས་དང་སྦྱར་བ་ལས། མཁྱེན་ཡང་མའི་དབང་པོའི་བཀས་བསྐུལ་ཏེ་རྒྱས་འགྲེལ་སྦྱར་བའོ། །རང་ལོ་བཅུ་དགུ་པ་ལ་ལི་ཁཾ་ཏི། ཨོཾ་ཨ་ཐམངྒ་ལཾ་ཡ་པོཥྟི་ཀཾ་ཀུ་རུ། ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། །མངྒ་ལཾ།། །།