རྗེ་བཙུན་རྡོ་རྗེ་གྲགས་པའི་ཞལ་གཟིགས་པའི་ལུགས་སུ་གྲགས་པ་མ་མོ་སྲོག་གཟེར་གྱི་སྒྲུབ་ཐབས་ཀླག་ཆོག
རྗེ་བཙུན་རྡོ་རྗེ་གྲགས་པའི་ཞལ་གཟིགས་པའི་ལུགས་སུ་གྲགས་པ་མ་མོ་སྲོག་གཟེར་གྱི་སྒྲུབ་ཐབས་ཀླག་ཆོག་བཞུགས།
ན་མོ་གུ་རུ། དཔལ་ཧེ་རུ་ཀས་བྱིན་གྱིས་རློབས་ཤིག །དཔལ་ལྡན་ནག་མོ་རེ་མ་ཏི། ཉམས་པའི་སྲོག་རྩ་དམར་པོ་གཟིར་བ། ཞེས་བྱ་བའི་སྒྲུབ་ཐབས་ལས་བྱུང་བའི་མན་ངག་ལ། གཞུང་ནས་མི་གསལ་བའི་མན་ངག་ལག་ལེན་ཁ་འགེངས་དགོས་རྣམས། མཁའ་འགྲོ་ཆེན་མོའི་ལུགས་ལྟར་བྱེད་པ་དང༌། ཉི་མ་སྨོད་རྒྱུད་ཀྱི་ལུགས་བཞིན་བྱེད་པའི་སྲོལ་གཉིས་ཀ་ཡོད། དང་པོ་ནི། མཁའ་འགྲོ་ཆེན་མོའི་སྒྲུབ་ཐབས་སུ་བཤད་ཟིན་པ་ལྟར་ལ་འདོད་པ་སྤོས་པས་ཁྱབ། གཉིས་པའི་དབང་དུ་བྱས་ནས། རང་ཉིད་བཅོམ་ལྡན་འདས་ཁྲོ་བོ་གཤིན་རྗེ་གཤེད་པོའི་བདག་བསྐྱེད་སྔོན་དུ་བཏང༌། མཆོད་གཏོར་བཤམས། བགེགས་བསྐྲད། མཆོད་པ་བྱིན་རླབས་བྱ། མདུན་བསྐྱེད་བསངས་སྦྱངས་མི་དམིགས་ཏེ། སྟོང་པའི་ངང་ལས་ཧཱུཾ་ཡིག་ལས་བྱུང་བའི་བསྲུང་འཁོར་གྱི་དབུས་
སུ་ཡཾ་ལས་རླུང༌། རཾ་ལས་མེ། བཾ་ལས་རཀྟའི་རྒྱ་མཚོའི་མཐའ་བྲག་རིས་བསྐོར་བ། དབུས་སུ་རྡོ་རྗེའི་ས་གཞི་ལ་བྷྲུཾ་ལས་ཐོད་པ་འབར་བའི་གཞལ་ཡས་ཁང་གྲུ་བཞི་སྒོ་བཞི་འཇིགས་པའི་རྒྱན་ཐམས་ཅད་ཀྱིས་བརྒྱན་པའོ། །བྷྲུཾ་བི་ཤྭ་བི་ཤུདྡྷཻ་ཀ་པ་ལ་བྷྲུཾ། དེའི་དབུས་སུ་ཨེ་ལས་སྨུག་ནག་གྲུ་གསུམ་འབར་བའི་དཀྱིལ་འཁོར་རོ། །གཉིས་པ་ཧཱུཾ་དེའི་དབུས་སུ་སྲིན་པོའི་བོང་བུ་ཀ་དམར་རླུང་གི་གཤོག་པ་ཅན། མཇུག་མའི་ཕྱོགས་སུ་མིག་ཡོད་པ། ཞིང་ཆེན་གྱི་ལིང་ག་དང་བཅས་པའོ། །དེའི་སྟེང་དུ་བྷྱོཿཡིག་ནག་པོ་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། འཁོར་འདས་ཀྱི་ནུས་མཐུ་ཐམས་ཅད་ཚུར་བསྡུས་ཏེ་བྷྱོཿཡིག་ལ་ཐིམ། ཨོཾ་དེ་བཱི་མཧཱ་ཀཱ་ལི་ཧཱུཾ། དེ་ལས་དཔལ་ལྡན་གཉན་གྱི་རེ་མ་ཏཱི་སྐུ་མདོག་མཐིང་ནག །ཞལ་གཅིག་ཕྱག་
གཉིས་སྤྱན་གསུམ་པ་གཡས་རལ་གྲི་མེ་འབར་བ་འཕྱར་ཞིང༌། གཡོན་ཐོད་ཁྲག་ཐུགས་ཀར་འཛིན་པ་མཆེ་བ་གཙིགས་ཤིང་འཇིགས་སུ་རུང་བའི་སྒྲ་སྒྲོག་པ། རལ་པ་མུན་པ་ལྟར་གཏིབས་པ། སྟག་ལྤགས་ཀྱི་སྨད་དཀྲིས་ཅན་རེ་ལྡཻའི་ཤམ་བུ་དང༌། ཞིང་ལྤགས་དང་གླང་ལྤགས་སྦྱར་བའི་སྟོད་གཡོགས་གསོལ་བ། ཐོད་སྐམ་གྱི་དབུ་རྒྱན། ཐོད་རློན་གྱི་དོ་ཤལ། སྦྲུལ་གྱི་རྒྱན་ཅན། དུར་ཁྲོད་ཀྱི་ཆས་རྫོགས་པ། ལྟེ་བ་ནས་ཉི་མ་དང༌། སྤྱི་གཙུག་ནས་ཟླ་བ་འཆར་བ། སྲིན་པོའི་བོང་བུ་གྭ་དམར་ལ་ཆིབས་ཤིང༌། མེ་རླུང་འཚུབ་མའི་དབུས་ན་གནས་པའོ། །འཁོར་བདུད་མོ་ནག་མོ་འབུམ་སྡེ་ཐམས་ཅད་ཀྱང་གྲི་གུག་དང་ཐོད་ཁྲག་འཛིན་པའོ། །དེའི་ཐུགས་ཀར་ཡང་ཡི་གེ་བྷྱོ་ཡིག་གོ །ཐུགས་ཁའི་བྷྱོཿལས་བྷྱོཿཡིག་མང་པོ་སྤྲོས་ཏེ་བདུད་མོ་འབུམ་སྡེར་གྱུར། རང་གི་སྙིང་ཁ་ནས་འོད་ཟེར་འཕྲོས། སྲོག་བདག་ཆེན་མོ་བཛྲ་ས་མཱ་ཛཿ ནག་མོ་ཏིང་ལཾ་མ་མ་དུན་བྷྱོཿ ཛཿཧཱུཾ་བཾ་ཧོཿ ནག་མོ་དུན་བྷྱོཿདུན་བྷྱོཿ ཞེས་སྤྱན་དྲངས་ཤིང༌། གཉིས་སུ་མེད་པར་ཐིམ། ནག་མོ་རག་མོ་དུན་ཏིང་མ་མ་ན་མཿཨ་ཨ་ཧི། ཞེས་པས་ཕྱག་འཚལ། ཏྲག་རག་ཤ་མ་ཧི་ཀུ་ལ་པདྨ་ས་མ་ཡ་ཏིཥྟ་ལྷན། བཞུགས་སུ་གསོལ། བྷྱོ། དཔལ་ལྡན་ལྷ་མོ་ནག་མོ་རེ་མ་ཏི། ལྷ་མོ་ཆེན་པོ་ནམ་གྲུ་མ། །རྫོང་མོ་ཆེན་མོ་དཀའ་བཟློག་མ། །ནག་མོ་ཆེན་མོ་ཁ་འབར་མ། །བྱིས་པ་ཀུན་གྱི་དུང་བྱེད་མ། །དུར་ཁྲཽད་འབར་བའི་ལོ་མ་ཅན། །རཀྵ་ཆེན་མོ་ཙ་མུནྚ། །ནམ་མཁའི་ཁམས་ཀྱི་མཐུ་མོ་ཆེ། །བར་སྣང་
ཁམས་ཀྱི་གློག་མ་སྤྲིན། ཁ་ནས་མེ་འབར་རྒྱ་མཚོ་སྐེམས། །ལག་ན་རྡོ་རྗེ་རི་རབ་བསྙིལ། །རལ་པ་ནག་པོ་སྟོང་ཁམས་ཁྱབ། །ཞལ་ནས་ཁྲག་གི་རྒྱ་མཚོ་འཁྱིལ། །ཉིན་གྱི་དུས་སུ་གྲོགས་བྱེད་མ། །མཚན་གྱི་དུས་སུ་རྒྱུག་བྱེད་མ། །ནག་མོ་འཁོར་བཅས་ཐུགས་དམ་བསྐང༌། །ཤ་ཆེན་ཚོགས་ནི་རི་ལྟར་སྤུངས། །ཙིཏྟ་ཚོགས་ནི་རྫ་ལྟར་ལྷག །རཀྟ་རྒྱ་མཚོ་རྦ་ཀློང་འཁྱིལ། །འཁོར་བཅས་ཐུགས་དམ་བསྐོང་གྱུར་ཅིང༌། །ནག་མོ་ཁ་ལ་ཛ་ཡ་དུ་ས་མ་ཡ་ཧོ། རུ་ལུ་རུ་ལུ་དུན་བྷྱོཿ སྙིང་ཁ་ལ་མ་ཧི་དུན་བྷྱོཿ ཨརྒྷཾ་ནས་ཤཔྟའི་བར་གྱིས་མཆོད། མ་མོ་ནག་མོ་སནྟི་སནྟ་ཀུ་ལུ་ཀུ་ལུ་ཧ་ཧ་ཧ། མཧཱ་མཾ་ས་ཁ་ཧི། མཧཱ་རཀྟ་ཁ་ཧཱི། མཧཱ་པཉྩ་ཨམྲྀ་ཏ་ཁ་ཧཱི། དེ་ནས་བཟླས་པ་ནི། རང་གི་མདུན་དུ་མ་མོ་ཉེ་བར་སྤྱན་དྲངས། ཐུགས་ཀར་བྷྱོཿཡིག་སྔགས་འཕྲེང་དང་བཅས་པ་གསལ་བཏབ། མཆོད་ཅིང་ཐུགས་རྒྱུད་བསྐུལ་བར་བསམ་ལ། ཨོཾ་མཧཱ་ཀཱ་ལ་རེ་མ་ཏི་མ་མ་རུ་ལུ་རཀྵ་རེ་མ་ཏི། རུ་ལུ་རུ་ལུ་བྷྱོཿཛཿཛཿ ཞེས་པ་ནི་རྩ་བའི་བསྙེན་པའི་སྔགས་སོ། །ཨོཾ་རུ་རུ་ཙ་ཏུར་ཨ་ཤུག་མེ་པྲ་ཏི་རུ་དྲ་ཁ་ཤག་རག་མོ་ཧཱུཾ། རཀྵ་ཙིཏྟ་ས་མ་ཡ། ཀུ་རུ་ཁ་ཙིཏྟ་ནན། ཞེས་པ་འདི་བསྒྲུབ་པའི་སྐབས་ཀྱི་བོད་པའོ། །ཨོཾ་རུ་རུ་བོ་ཏི་ཧཱུཾ། ཏིཥྛ་བ་ཏོ་སི་རཀྨོ་སྙིང་ཁ་ལ་རཀ་མོ་ཐུན་མོ་ཐུན་བྷྱོཿཛ་ཛཿ རྦད་པའོ། །ཨོཾ་ཥུ་ལུ་རེ་མ་ཏི་ས་མ་ཡ་པྲ་མ་ཧ་སྟི་པྲ་མ་མ་རག་མོ་རུ་ལུ་རུ་ལུ་བྷྱོཿཛ་ཛ། ཁ་རཀ་དྲི་ཁིམ་ཛ་ཛ། ཁ་ལེ་ཐུན་བྷྱོཿཐུན་མ་མ་བྷྱོཿ ཐུན་བརྡེག་པའི་སྔགས་སོ། །ཧཱུཾ་ཀ་མོ་རྣི་ཤ་ཀུ་རུ་ཐུན་རྦད།
རཀ་མོ་ཨརྱ་ཛ་ཛ་དྲི་ཁེབས་ཁ་ལེ་བྷྱོཿབྷྱོཿཛ་ཛ། ས་མཱ་ཡ་དགྲ་བོའི་མཱ་ར་ཡ་ཧཱུཾ་ཕཊ། བསད་པའི་སྔགས་སོ། །མཐར་འབྲུ་གསུམ་གྱི་གཏོར་མ་བྱིན་རླབས་ཁ་གསོས་ལ། དགྲ་བགེགས་ཐམས་ཅད་བཀུགས་ཅིང་བསྟིམ་པར་མོས་ཏེ། བསྙེན་སྔགས་ཀྱི་མཐར། ཨེ་དམ་བ་ལིང་ཏ་ཁ་ཁ་ཁ་ཧཱི་ཁ་ཧཱི། བྷུཉྫ་ཧོ་རཀྟ་སི་བ་ས་མ་ཡ་སྭཱཧཱ། ལན་བདུན་གྱིས་གཏོར་མ་འབུལ། ཨརྒྷཾ་ནས་ཤཔྟའི་བར་གྱིས་མཆོད། བྷྱོཿ རྒྱ་མཚོའི་ཀློང་ན་མེ་འབར་ཁྱོད། །མཚོ་རྣམས་སྐེམས་པར་ནུས་མ་སྟེ། །བུད་མེད་ཐམས་ཅད་ཞི་མཛད་ཕྱིར། །ལྷ་ཆེན་སྐུའི་ཕྱེད་དུ་བཞུགས། །རྫོང་དང་དཀའ་བཟློག་ནག་མོ་ཆེ། །ལྷ་དང་ལྷ་མིན་ཕྱག་བྱས་མ། །མི་ནད་གང་ཡིན་ཁྱོད་ཀྱི་ཤེས། །དེ་ལ་འཇིགས་པ་མེད་པར་འགྱུར། །གཤིན་རྗེ་ལྕམ་མོ་བདུད་ཀྱི་ཡུམ། །ནད་དོ་ཅོག་གི་བདག་མོ་སྟེ། །འདོད་པ་ཁམས་ཀྱི་དབང་ཕྱུག་མ། ཁྱོད་ལ་བསྟོད་དེ་ཕྱག་ཀྱང་འཚལ། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། འདོད་པ་ཀུན་འགྲུབ་ཤོག །གི་བར་གྱིས་འཕྲིན་ལས་བཅོལ། ཡི་གེ་བརྒྱ་པས་ལྷག་ཆད་ཁ་སྐོང་ཞིང་བཟོད་པར་གསོལ་ལོ། །རྟེན་ཡོད་ན་བརྟན་ཞུགས་དང༌། མེད་ན་གཤེགས་གསོལ་བྱ། འདི་ནི་གཏོར་ཆོག་ཙམ་ཡིན་ལ། ལྷ་མོའི་བསྐང་བ་ནི། རེ་མ་ཏཱི་སྤྱི་དང་མཐུན་པས་ཆོག་གི །འདི་ལ་ཡིག་རྙིང་རྒྱས་པ་ལོགས་སུ་མེད། འདིའི་རྩ་བའི་བརྙེན་པ་བྱེད་ན། གནས་དབེན་པར་བྲིས་སྐུའི་མདུན་དུ་གཏོར་མ་དང༌། མཆོད་པ་དང༌། སྨན་དང༌། རཀྟ་རྣམས་བཤམས། ཡང་ན་རྡོ་ལེབ་ལྟ་བུའི་སྟེང་དུ་གྲི་ཁྲག་དང་མཚལ་ཐིག་བསྲེས་པའི་གྲུ་གསུམ་ཆོམ་བུ་དང་བཅས་པ་བྲིས། སྐུའི་ཚབ་ཏུ་བྱས་ནའང་ལེགས། དེ་ནས་སྔོན་འགྲོ་གཏོར་མ་དང༌། བགེགས་
གཏོར་རྒྱ་ཆེན་བཏང༌། མཚམས་བཅད་བསྲུང་འཁོར་བསྒོམ། གནས་དང་ཡོ་བྱད་བྱིན་གྱིས་བརླབས། བདག་བསྐྱེད་སྔོན་དུ་འགྲོ་བས། སྨན་རཀ་གཏོར་མ་རྣམས་ཡི་དམ་གྱི་ལུགས་སུ་བྱིན་གྱིས་བརླབས། ཡི་དམ་གྱི་མདུན་བསྐྱེད་ཡོད་ན་མཆོད་གཏོར་འབུལ་བ་ཡན་ཆད་བྱ། ཡི་དམ་གྱི་མདུན་བསྐྱེད་མེད་ཀྱང་ཆོག །དེ་ནས་ལྷ་མོ་ཉིད་ཀྱི་རིམ་པ་ནི་གོང་དུ་བཤད་པ་བཞིན་ཡིན་པ་ལ། བཟླས་པའི་སྐབས་སུ་སླེབས་པ་ན་དང་པོར་བསྙེན་སྔགས་དེ་ཉིད་འབུམ་ཕྲག་ཉི་ཤུ་རྩ་བཞི་བཟླ། དེ་བར་དུ་གཞན་རྣམས་ཚར་གསུམ་ཙམ་རེ་སྦྱོར་བ་མ་གཏོགས་བཟླས་པ་བྱེད་མི་དགོས། དེ་སོང་ནས་བསྙེན་སྔགས་ཅུང་ཟད་རེ་སྔོན་དུ་བཏང༌། བོད་པ་ཁྲི་ཕྲག་བཞི་བཟླས་ཏེ། དེ་སོང་ནས་གཉིས་པོ་དེ་ཅུང་ཟད་རེ་བཟླས་པའི་རྗེས་སུ་རྦད་པ་བཞི་ཁྲིའོ། །དེ་རྗེས་གསུམ་པོ་དེ་ཅུང་ཟད་བཟླས་ནས་ཐུན་སྔགས་བཞི་ཁྲིའོ། དེ་ནས་སྔགས་ལྔ་ཚར་གཅིག་ཏུ་དྲིལ་ནས་ཁྲི་ཕྲག་གཅིག་བཟླས་པར་བྱེད་དེ། འོན་ཀྱང་བཞི་ཁྲི་བཟླས་ནས་བཟང་ངོ༌། །བསྙེན་པའི་སྐབས་འདིར་བསྐང་བ་དང་བཤགས་པ་ཡང་ཡང་བྱ། དེ་ཙམ་གྱི་རྩ་བའི་བསྙེན་པ་གྲུབ་པ་ཡིན་ནོ། །འདི་ནི་མདོར་བསྡུས་པའི་ལུགས་ཡིན་པས། སྒྲུབ་པ་དང་ལས་སྦྱཽར་གཅིག་ཏུ་དྲིལ། རྦད་པ་དང་བསད་པ་ཡང་གཅིག་ཏུ་དྲིལ་བ་ཡིན་པས་སོ་སོར་མི་དགོས་སོ། །འདི་ལ་དང་པོར་དཀོན་མཆོག་མཆོད་པ་དང༌། གསུང་རབ་སྒྲོག་པ་དང༌། ཚ་ཚ་གདབ་པ་དང༌། སྨོན་ལམ་ཁྱད་པར་ཅན་འདེབས་པ་དང༌། བགེགས་གཏོར་གཏོང་བ་དང༌། གཞི་བདག་ལ་གཏོར་མ་གཏོང༌། སྡེ་བརྒྱད་སྤྱི་ལའང་མཆོད་གཏོར་བདེན་བདར་དང་བཅས་པ་འབྲུབ་ཁུང་བསྐྱེད་དེ་བྱ། །མཚམས་བཅད། བསྲུང་འཁོར་
བསྒོམ། རྫས་རྣམས་ཚོགས་པར་བྱ། ཡི་དམ་དང་ཆོས་སྐྱོང་གི་བསྙེན་པ་ཁ་གསོ། དེ་ནས་གྲོག་མཁར་བདུན་གྱིས་ས་ལ་སྟེགས་བུ་གྲུ་བཞི་པའི་དབུས་སུ། འབྲུབ་ཁུང་གྲུ་གསུམ་ཁ་ཁྱེར་ཅན་ཅིག་བྱ། ཁ་ལ་དུག་ཁྲག་གི་བྱུགས་པའི་རྩར་ཉི་ཤུ་རྩ་གཅིག་དང༌། ཕུར་བུ་ཉི་ཤུ་རྩ་གཅིག་སྲིན་མོ་འགྲོས་སུ་བཙུགས། གྲུ་གསུམ་གྱི་འདེབས་རང་ལ་བསྟན། རྩེ་མོའི་ཕྱོགས་སུ་ཐང་ཀའམ། ཙ་ཀ་ལི་མདའ་དར་ལ་བཏགས་པ་བཞུགས། སྟེགས་བུའི་ལྷོ་ནུབ་ཀྱི་ཟུར་ལ་བརྟེན་གཏོར། དབུས་སུ་སྔགས་ཀྱི་ཤོག་དྲིལ་བཙུགས་པ་གྲི་རྒོད་ཀྱི་ཤས་བརྒྱན་པ། ནལ་བུའི་སྙིང་མ་ཉམས་པ་མདའ་ཐུང་ལ་བརྟག་པ་གཅིག་ཀྱང་བཙུག །བྱང་ཤར་གྱི་ཟུར་ལ་ཐུན་ཁང་བྱ་སྟེ། དེར་འུག་པའི་སྒྲོ་ངར་མི་རིམས་ཁྲག་དང༌། དུག་ཁྲག་བླུག །ཤར་ལྷོར་གྲི་ཐོད་དུ་གྲི་ཁྲག་དང༌། ཁྲག་སྣ་ཚོགས་བླུག །ནུབ་བྱང་དུ་མཛེ་ཁྲག་དང༌། རམ་བུ་དང༌། དུག་གིས་བཀང་བའི་ཕག་ཐོད་བཞག །ཡུངས་ཀར་ཡུངས་ནག་སོགས་སྐམ་ཐུན་རྣམས་ཐོད་ངན་དུ་བླུགས་ཏེ་ཕྱོགས་ཇི་ལྟར་འོས་པར་བཞག །ཆོས་འབྱུང་གྲུ་གསུམ་ཉིས་བརྩེགས་ཀྱི་ལྟེ་བར་བསད་སྔགས་མིང་དང་བཅས་པ་འབྲི། ཟུར་དྲུག་ལ་ཡན་ལག་དྲུག་འོག་ཏུ་མནན་པའི་ཚུལ་དུ་བྲི། ཕྱིའི་མུ་ཁྱུད་ལ་རྦད་སྔགས་དང་ཐུན་སྔགས་ཀྱིས་བསྐོར་བ་འབྲི། རྟེན་གཏོར་གྱི་འོག་ཏུ་མནན། ཚིལ་ཆེན་བྱུག་པའི་ཤོག་བུ་ལ་ལིང་ག་འབྲི་ཚུལ་སྤྱི་དང་འདྲ་བ་ལས། སྙིང་ཁར་ཆེ་གེ་མོ་ཨ་ཀརྵ་ཡ་ཛ། བྷནྡྷ་བྷནྡྷ་མ་ར་ཡ་ཧཱུཾ་ཕཊ། ཅེས་པ་འབྲི། དེའི་མཐའ་བསད་སྔགས་མགོ་བོ་ཕྱིར་བསྟན་གྱིས་བསྐོར། དེའི་ཕྱི་ནས་ཐུན་སྔགས་ཀྱིས་བསྐོར། དེའི་ཕྱི་ནས་བསྙེན་སྔགས་དང་འབོད་རྦད་ཀྱིས་བསྐོར། ཐམས་ཅད་ལ་འདི་ཞེས་བྱ་བ་མཱ་ར་ཡ་སོད་བྷྱོཿབྷྱོཿཡ་ཡ་ཆུམ་ཆུམ། ཞེས་པས་མཐའ་བརྟེན་
དེ་ལ་རྫས་བཅུག །དགུག་གཞུག་མང་དུ་བྱས་ཏེ་མགོ་ནས་མར་བསྒྲིལ་ནས། ཤི་སྐྲས་བཅིངས་ཏེ་བག་ཟན་བཙོས་པ་ལ་རྫས་བསྲེས་པའི་ཉ་བོའི་ལྟེ་བར་བཅུག །དེ་འབྲུབ་ཁུང་གི་དབུས་སུ་བཞག་སྟེ། མི་ཤི་བའི་སྐྲའི་སྲད་བུ་ཡན་ལག་ལྔ་ནས་བཅིངས། དེའི་སྣོད་དེ་སྐྱེར་ཕུར་ལ་བཅིངས་ནས། རྟེན་གཏོར་གྱི་མདུན་དུ་ཕུར་བུ་ལ་བཏོད། ཐུན་མོང་མ་ཡིན་པའི་དམ་རྫས་ནལ་བུའི་ཤ་ཁྲག་བསྲེས་པའི་རྒྱུ་བཟང་པོའི་གཏོར་མ་བརྗིད་ལྡན་གཅིག་གཡས་ཕྱོགས་སུ་བཤམས། དེ་ཀ་འདྲ་བ་ཞིག་གཡོན་ཕྱོགས་སུ་ཐག་ཅུང་ཟད་རིང་བར་གཏའ་གཏོར་གྱི་ཚུལ་དུ་བྱེད། དེ་དར་ནག་གིས་གཡོག་པའི་སྒྲོམ་དུ་བཅུག་ཀྱང་རུང༌། གཞན་ཡང་ཤ་ཁྲག་དམར་གྱི་བརྒྱན་པའི་གཏོར་མ་སྤྱི་གཏོར་གྱི་ཚུལ་དུ་གང་བདེར་བསྒྲིག །གོང་དུ་བཤད་པའི་བྲིས་ལིང་དེ་ཁ་འདྲ་བ་གཅིག་བྱས་ལ། ལིང་ག་ཆེན་པོའི་འོག་ཏུ་འདིང་བའམ། འབྲུབ་ཁུང་གི་ནང་ལོག་ལ་མགོ་གཞུག་ལྡོག་སྟེ་བཀྲམ་ཡང་རུང༌། གཞོན་ནུ་མ་གཙང་མའི་ལག་པའི་སྲིན་ལག་ལ་གཡབ་དར་ནག་པོ་བཏབ་པ་དང༌། མནན་པ་དང་སྦྱིན་སྲེག་གི་ཡོ་བྱད་རྣམས་ཀྱང་ཚང་བར་བྱ། ལས་ལ་འཇུག་པའི་སྔོན་དུ། སྔོན་འགྲོ་གཏོར་མ་དང༌། གནས་ཡོ་བྱིན་རླབས་བྱ། བགེགས་བསྐྲད། མཚམས་བཅད། མཐོ་གཟུག །བསྲུང་འཁོར་སྒོམ་པ་རྣམས་ཉི་མ་དང་པོ་ལ་བྱ། ཞག་ཕྱི་མ་རྣམས་ལ་གནས་ཡོ་བྱིན་རླབས་ངེས་པར་བྱ། སྔོན་འགྲོ་གཏོར་མ་འགྲུབ་ན་ལེགས། དེ་ནས་ཐུན་དང་པོ་ལ་ཡི་དམ་གྱི་བདག་བསྐྱེད་བཟླས་པ་དང་བཅས་པ་སྔོན་དུ་བཏང༌། ལས་སྦྱོར་གྱི་སྐབས་འདིར་ཡི་དམ་གྱི་མདུན་བསྐྱེད་མཆོད་གཏོར་ཡང་གལ་ཆེ་བས་དུས་སྐབས་འདིར་བྱེད། སླར་ཡང་མཆོད་པ་རྣམས་རྒྱས་པར་བྱིན་
གྱིས་རླབས། སྨན་ཕུད་རཀྟ་བྱིན་གྱིས་རླབས་པ་ནན་ཏན་གྱི་བསྐྱེད། དེ་རྗེས་མདུན་བསྐྱེད་བསངས་སྦྱངས་སོགས་གོང་བཞིན་བྱས་ནས་བསྐང་བ་ལ་ཐུག་གི་བར་དུའོ། །དེ་ནས་རང་ཉིད་ཡི་དམ་གནས་གྱུར་པའི་དཔལ་ལྷ་མོ་ནག་མོར་བསྒོམ། སྙིང་པོ་ལན་འགའ་ཟུར་ཟུང་བརྗོད། བར་དེར་ལིང་ག་བསྐྱེད་ཅིང༌། དགུག་གཞུག་ལན་མང་དུ་བྱ། སྙིང་པོ་དང་འབོད་རྦད་བསད་གསུམ་སྦྲེལ་བའི་མཐར། ཆྒཻ་མོའི་བླ་སྲོག་ཐམས་ཅད་ཨ་ཀརྵ་ཡ་ཛཿཛཿཞེས་བཏགས་པ་བརྒྱ་ཙམ་རེ་བཟླས་ནས། དེ་ནས་སྔགས་ལྔ་ཆར་སྦྲེལ་བ་ཁོ་ན་བཟླ། བཟླས་པ་པོ་ལྷ་དང་ཕྲལ་བ་དང༌། དགུག་གཞུག་བཅིང་བ་དང༌། ལྡག་ཚད་བཅག་པའི་དམིགས་པ་དྲག་ཏུ་བྱ། ཐུན་རྣམས་ལ་ཡང་གཟུང་ཐག་བཏགས་ཏེ་སྔགས་ལྔ་ཆར་གཅིག་ཏུ་དྲིལ་བ་དེ་ཀ་ཐུན་རེ་བཞིན་བརྒྱ་ཕྲག་སོགས་བཟླས་པ་དེས་ཆོག །ཐུན་སྔགས་ལོགས་པ་མི་དགོས། ཐུན་རེ་རེ་བཞིན་གཏོར་མ་ཁ་གསོས་ཏེ་འབུལ། གཏའ་གཏོར་དེ་འགྲུབ་ན་ཐུན་དེ་བཞིན་དང༌། དེ་ཙམ་མ་གྲུབ་ན་ཐུན་ཐ་མ་ལ་ཁ་གསོས་ཤིང་བྱིན་རླབས་བྱེད་ཚུལ་སྤྱི་དང་འདྲ། ཐུན་མཚམས་སུ་འབྲུབ་ཁུང་རོ་རས་སམ་གཡམ་པས་ཁ་བཅད། དེ་ལྟར་ཞག་བདུན་ཚུན་ཆད་ལ་ཁུགས་པའི་རྟགས་འབྱུང༌། ལིང་ག་ལ་སྒྲ་ཚག་ཚག་ཐག་ཐོག་བྱུང་ན་རྟགས་ཡིན། ལར་འདི་རྦད་བསད་གཅིག་ཏུ་དྲིལ་བ་ཡིན་པས། ཁུག་པའི་རྟགས་ལ་དགུག་སྡོད་རང་ཡང་མི་དགོས། ཞག་བདུན་སོང་ནས་རྟགས་མ་བྱུང་རུང༌། བསད་ལས་ལ་ཞུགས་པས་མཆོག །དེ་ཡང་བྱ་བའི་རིམ་པ་རྣམས་སྔ་མ་དང་འདྲ་བ་ལས། བཟླས་པའི་སྔོན་གྱི་དགུག་གཞུག་ཚར་གསུམ་བྱས་ནས། དགུག་པའི་སྔགས་
ཅུང་ཟད་ཙམ་བཟླ། མང་དུ་བཟླས་མི་དགོས། དེ་རྗེས་བཟླས་པ་དངོས་སྔགས་བརྒྱ་བརྒྱ་ཙམ་སོང་མཚམས་སུ་ཐུན་བརྡེག་པའི་སྲོལ་ཡོད། འོན་ཀྱང་འདི་ལྟར་ལེགས་པ་འཕྲེང་རྡོག་དྲུག་ཅུ་པ་གཅིག་ལ་སྔགས་ལྔ་པོ་སྦྲེལ་ནས་བགྲངས་ཏེ་འཕྲེང་སྐོར་རེ་རེའི་མཐའ་མ། གཉིས་གཉིས་ཀྱི་མཐའ་མ། གསུམ་གསུམ་གྱི་མཐར་ཐུག་སྔགས་བསད་སྔགས་སྦྲེལ་བ་ཁོ་ན་ཚར་དགུ་དགུ་ལིང་ག་ལ་ཐུན་རྡེག་གོ །ལིང་གའི་སྙིང་གར་རོ་སྐྲས་གཟུངས་ཐག་བཏགས། བཟླས་པ་བྱེད་པའི་ཚེ་དེའི་སྣེ་ནས་བཟུང༌། བཟླས་པ་འཇོག་ཙ་ན་རྡོ་རྗེ་ལ་བཏག་སྟེ། དེའི་སྙིང་གར་མནན་ནོ། །བཟླས་པ་དཀྱུས་ཀྱི་དམིགས་པའི་སྐབས། རང་དང་མདུན་གྱི་ལྷ་མོ་གཉིས་ཀར་གྱི་ཕྱག་གཡོན་པར་ལྕགས་ཀྱུ་དང་ཞགས་པ་འཛིན་པས་བཅིངས་ཤིང་འཐེན་འཐེན་འདྲེན་པར་བསམས། རླུང་ཕྱིར་འཕྲོས་པའི་བདག་མདུན་གཉིས་ཀའི་ས་བོན་སྔགས་ཕྲེང་ལ་མཁའ་འགྲོ་མ་ཤིན་ཏུ་ཁྲོས་པ། གྲི་ཐོད་འཛིན་པ་མང་པོ་སྤྲོས་ནས། མདུན་གྱི་བསྒྲུབ་བྱའི་སྙིང་ག་ནས་ཞུགས། ལུས་ཀྱི་ཁོག་ནང་དུ་སོང་ནས་གནད་ཐམས་ཅད་གྲི་གུག་གིས་བཅད། ཁྱད་པར་སྲོག་རྩ་བཅད་ཅིང་རྩ་བ་ནས་བཏོན། སྙིང་ག་ནས་རྣམ་ཤེས་མར་མེ་ལྟར་འབར་བ་དེ། ཕྱག་གཡོན་པའི་ཐོད་པས་དུག་ཁྲག་བླུག་ཏེ། ཐུམ་ཐུམ་བསད་པར་བསམ། བསྒྲུབ་བྱའི་ཚེ་སྲོག་ལུས་ཀྱི་དྭངས་བཅུད་རྣམས་བདུད་རྩིའི་རང་བཞིན་ཧཱུཾ་དུ་གྱུར་པ་སྟེ། མཁའ་འགྲོ་མ་དེ་རྣམས་ཀྱིས་ཚུར་བླངས་ནས། རླུང་ནང་དུ་ཡོང་བ་དང་བསྟུན་བདག་དང་མདུན་བསྐྱེད་ཀྱི་སྣ་སྒོ་ནས་ཞུགས་ཏེ། སྙིང་གའི་ས་བོན་སྔགས་ཕྲེང་ལ་ཐིམ་པས་བཀྲག་མདངས་བཅུད་དུ་གྱུར་ནས། བསྒྲུབ་བྱའི་ཚེ་དང་དབང་ཐང་
ཐམས་ཅད་རང་ཉིད་ལ་བྱུང་ཞིང་རྒྱ་ཆེར་འཕེལ་བར་བསམ། དམིགས་པའི་གྲངས་ལ་སྤྱིར་ངོས་བཟུང་དང་མི་དགོས་ཀྱང༌། སྔགས་སྦྲགས་མ་ལན་དྲུག་དྲུག་ལ་དེ་དམིགས་པ་དེ་ཚར་རེ་བསྒོམས་ནས་མཚམས་པར་འོང་བས་ལག་ལེན་ལ་དེ་ལྟར་བྱ་ཞེས་བླ་མས་གསུང༌། དེ་འདྲ་ལན་དགུ་སོང་ནས་ཐ་མའི་སྔགས་ལན་དྲུག་ལ་འགོག་བཟླས་བྱ་སྟེ། རླུང་འབུད་པའི་ཚེ་བདག་དང་མདུན་བསྐྱེད་ཀྱི་ཤངས་ཀྱི་སྒོ་ནས་འཐོར་རླུང་དྲག་པོ་མི་བཟད་པ་སྤྲོས་ཏེ། བསྒྲུབ་བྱའི་རྣམ་ཤེས་མར་མེ་ལྟ་བུ་ནི་བསད། ལུས་ཐམས་ཅད་ཤག་ཤིག་ཏུ་བཏང་བར་བསམ། རླུང་ནང་དུ་ཡོང་ཙ་ན་ཁོའི་རྩ་རླུང་ཐིག་ལེའི་དྭངས་མ་དང༌། བསྲུང་བ། ནུས་པ། དགེ་ལེགས། ཚེ་སྲོག་བསོད་ནམས་དབང་ཐང་ཐམས་ཅད་ཐིག་ལེ་དཀར་པོའི་རྣམ་པར་དྲངས་ཏེ། རང་དང་མདུན་བསྐྱེད་ཀྱི་ཤངས་ཀྱི་སྒོ་ནས་ཞུགས་ཏེ། ཐུགས་ཀའམ་ལྟེ་བར་ཐིམ་པས་མདངས་དང་བདེ་བ་རྒྱས་པར་བསམ། དེ་ནས་ཐུན་གྱི་སྐབས་ཐོག་མར་སྐམ་ཐུན་མཚོན་ཆའི་ཆར་དུ་འབེབས། སྲིན་མོ་མི་བཟད་པ་མང་པོས་བཅོམ་པར་ཡང་བསམ། དེ་ནས་རློན་ཐུན་དང་པོ་དུག་གི་ཆར་པ་དང༌། གཉིས་པའི་ནད་ཀྱི་ཆར་ཕབས་པས་མཚོ་འཁྱིལ་ཏེ་གཞི་གཅིག་ཏུ་དུམ་བུར་བསམ། གསུམ་པ་མཁའ་འགྲོ་མ་མང་པོ་སྤྲུལ་ནས་བཅོམ་པར་བསམ། ཚུལ་དེ་ལྷ་བུའི་བསད་ལས་བརྩམས། མཐུན་ཕྱི་མ་རྣམས་ལ་རང་ཉིད་ཡི་དམ་གྱི་ངོ་བོ་མ་མོར་སྒོམ་པ་དེ་ཀས་ཆོག །ཡང་ཕར་ཕྱག་འཚལ་བའི་རྨི་ལམ་བྱུང་ན་ཡི་དམ་གྱི་བདག་བསྐྱེད་དང་བཟླས་པ་མང་ཙམ་བྱ། སྔགས་དག་པོར་བཟླ་བ་དང༌། བར་བར་དུ་བསྐང་བཤགས་གལ་ཆེ། གཟས་པ་པོ་བསད་པ་དང༌། བཤས་བྱེད་པ་དང༌། ནང་ཁྲོལ་སོགས་ཤ་ཟོས་པ་དང༌། དངོས་
སུ་རང་ཉིད་སྐྱུག་མེར་བ་སོང༌། འཇོམ་པར་བྱུང་ན་བསད་པའི་རྟགས་ཡིན་ཏེ། དེ་ཡང་གཞུང་ལས། ཐུན་ལས་མེ་སྟག་འཕྲོ་ན་ཟོར་འཕེན་པར་བཤད། དེ་ལར་མ་བྱུང་ན་སྦྱིན་སྲེག་དང་མནན་ཙམ་ཞིག་བྱེད་པ་འདྲ་བ་ཞིག་བྱུང་ནའང༌། ད་ལྟ་ལག་ལེན་དུ་འདེབས་རྒྱུ་ལ་འཕང་བསྲེགས་མནན་གསུམ་གར་བྱ་སྟེ། བསད་རྟགས་ལན་གཅིག་ཙམ་ལ་མ་བཞག་པར། ད་དུང་ཡུན་བསྲིངས་ཏེ་བསྒྲུབས་པས་རང་བསད་རྟགས་ལན་གཉིས་གསུམ་དུ་བྱུང་ན་ངེས་ཅན་ཡིན་པས། ཐུན་རྟགས་བྱུང་རུང་མ་བྱུང་རུང་མྱུར་བུལ་དང་སྟོབས་ཆེ་ཆུང་གིས་ཁྱད་ཙམ་ལས་འགྲུབ་པར་ནི་ངེས། འབྲུ་ནག་གི་ཕྱེ་ལ་དུག་ཁྲག་བསྲེས་པ་ལ་ཟོར་གཏོར་གཅིག་བཅོས་དུག་ཁྲག་གིས་བྱུག །བྲ་བོ་སྲན་ནག་སྐེ་ཚེ་སོགས་བླུག །ཞག་གཅིག་གཉིས་གསུམ་ཚུན་ཆོད་དུ་ཐུན་གཞན་རྣམས་དང་ལྷན་ཅིག་དམིགས་པ་གཏད་དེ་བསྒྲུབས། རློན་ཐུན་གསུམ་དང༌། སྐམ་ཐུན་གྱི་སྣོད་དུ་ལྷག་མ་ཅུང་ཟད་རེ་བཞག །གཞན་རྣམས་ཐོད་ངན་ནམ་ལྕགས་སྣོད་དུ་བླུག །ལིང་ག་ལ་སྔར་བཏབ་ཟིན་པ་འབྲུབ་ཁུང་ན་ཡོད་པའི་དེ་ནས་ཀྱང་ཅུང་ཟད་བླུག །དྲག་སྔགས་བཟླ་ཞིང་ཐུན་རྣམས་གཅིག་ཏུ་བསྲེས། རང་ཉིད་དྲག་པོའི་ཆས་སུ་ཞུགས། སྐད་ཅིག་དྲན་རྫོགས་ཀྱིས་ཡི་དམ་དུ་བསྐྱེད་ནས་སྔགས་དྲག་ཏུ་བཟླ། མ་མོ་དྲག་ཏུ་བསྐུལ། དེ་ནས་རང་ཉིད་ལྷ་མོའི་སྐུར་བསྒྱུར་བའི་ང་རྒྱལ་གྱིས་དགྲ་ཡུལ་མཐོང་བའམ། དེ་མིན་ནའང་རི་རྩེ་སོགས་དམིགས་པ་གསལ་ས་གཅིག་ཏུ་སོང་ནས། བདེན་བདར་དང་དམོད་བཅོལ་དྲག་ཏུ་བྱས་པའི་མཐར། སྔགས་ལྔ་སྦྲེལ་ལན་བདུན་བཟླས་པའི་མཇུག་ལ་གཏོར་མ་འཕངས། ཐུན་སྔགས་
བསད་སྔགས་སྦྲེལ་བ་འབའ་ཞིག་བཟླ་བཞིན་དུ་ཐུན་རྣམས་ཆ་ཤས་ཆ་ཤས་ནས་ཟད་ཟད་དུ་འཕང༌། མི་ལྤགས་སམ། རོ་ཤུན་གྱི་དོལ་མོ་ཀ་གདབ་བོ། །དེ་ནས་ནང་དུ་འོང་ནས་འབྲུབ་ཁུང་གི་ལིང་ག་བསྒྲལ་ཏེ་གཏོར་མ་ལ་ཅུང་ཟད་བཏབ། ལིང་རོ་གཞན་ནལ་བུའི་ཤ་ཁྲག་དང༌། གཞན་ཡང་དྲག་རྫས་སྤྱི་དང་མཐུན་པས་བསྲེག་རྫས་རྣམས་དང༌། སྔར་གྱི་ཐུན་མོང་མ་ཡིན་པའི་གཏོར་མ་དང་བཅས་པ། ལིང་གའི་མཐུའི་ཐུན་རོ་ཐམས་ཅད་ཀྱང་བླངས་སྦྱིན་སྲེག་བྱ། དཔལ་ལྷ་མོ་ཉིད་མེ་ལྷ་ཡིན་པས་མེ་ལྷ་འཇིག་རྟེན་པའི་ཆོ་ག་དགོས། སྔགས་ལྔ་སྦྲེལ་གྱི་མཐར་ཨགྣེ་ཡེ་ཀྲོ་དྷ་ཛྭ་ལ་རཾ་རཾ། ཆེ་གེ་མོ། མ་ར་ཡ་ཕཊ། ཅེས་པ་ནི་བསྲེགས་རྫས་འབུལ་བའི་སྔགས་སོ། །འདིར་ལིང་ག་གསེར་བ་གཅིག་ཀྱང་བསྒྲལ་ནས་འབུལ། སྔགས་ནི་དྲུག་ཅུ་ལ་སོགས་པའི་ཇི་ལྟར་འོས་པའོ། །དེ་ནས་འབྲུབ་ཁུང་ནང་གི་བྲིས་ལིང་དེ་དང༌། གཏོར་གདན་གྱི་བྲིས་ལིང་དེ་གཉིས་ཁ་སྦྱར། མགོ་ནས་དྲིལ་ཏེ་གཡག་རྒོད་ཀྱི་རྭ་ནང་དུ་བཅུག །དུག་རིགས་བརྡུངས་པའི་ཕྱེ་མ་དང༌། སྦྱིན་སྲེག་གི་ཐལ་བ་ཚོམ་བུ་ཙམ་ཞིག་རྣམས་བཅུགས་ཏེ། ལམ་རྒྱ་འགྲམ་མམ། ཀླུ་གཉན་གནས་སའམ། དུར་ཁྲོད་དམ། མཆོད་རྟེན་གྱི་འོག་ཏུ་མནན་པར་བྱའོ། །སྔར་གྱི་བཏབ་གཏོར་དེ་ཐོབ་ཐང་ལ་ཕྱི་རྟགས་བྱུང་ན་འབུལ་བ་ཡིན་ཀྱང༌། དེ་ཙམ་འཇོག་མི་ཐུབ་ན། སྐབས་འདིར་འབུལ་ལོ། །ཡང་བསད་རྟགས་ནང་རྟགས་བྱུང་ན་འབུལ་བ་གཅིག་ཀྱང་ཡོད་དེ། དེ་ལ་ནི་རྟགས་གཏོར་ཞེས་བྱའོ། །དེ་ནས་ཚོགས་ཀྱི་འཁོར་ལོ་དང་དགའ་སྟོན་བྱ་ཞིང༌། ནམ་སྨད་བསྐང་བཤགས་དང་དངོས་གྲུབ་བླང་བ་ནན་ཏན་ཏུ་བསྐྱེད། གཏོར་མ་གསར་
བ་དང༌། ཐུན་གཏོར་ཡང་བཤམས་ཤིང་བསྔོས་ནས། སྐྱ་རེངས་དང་པོ་ཤར་བ་ན་ཁང་སྟེང་དར་འཕྱར། རོལ་མོ་བརྡུངས། གཏོར་མ་གསར་བ་དེ་དག་དང༌། སྔར་གྱི་ཐུན་མོང་གི་གཏོར་མ་དེ་སྤྱི་བཏབ་ཀྱི་ཚུལ་གྱིས་བཏང༌། འཕྲིན་ལས་བཅོལ། སྨོན་ལམ་བཏབ། བཀྲ་ཤིས་བརྗོད་དོ། །དེ་ནས་སྒྲུབ་ཁང་དུ་རྗེས་ཆོག་དང་ཉེར་བསྡུ་བྱས་ཏེ་སྤྱིར་དང་མཐུན་ནོ། །སྒྲུབ་ཐབས་འདི་ནི་མཐུ་སྟོབས་ཀྱི་དབང་ཕྱུག་ཏུ་ལོ་ཙཱ་བ་རྡོ་གྲགས་པ་ཉིད་ཀྱིས་ཞལ་གཟིགས་པའི་དཔལ་ལྷ་མོའི་སྒྲུབ་ཐབས་གསར་མ་དེ་ཡིན། འདི་ལ་ཐུན་དྲུག་ལ་སོགས་པའི་རྣམ་གྲངས་མང་པོ་དེ་མི་དགོས་པར་གཅིག་ལ་འདུས་པས་ལག་ལེན་ཤིན་ཏུ་འཁྱེར་བདེ་བ་ཡིན་ནོ། །སྤྱིར་ལྷ་མོ་ཉིད་ཆོས་སྐྱོང་གི་མཐིལ་དུ་བྱེད་ན་མདོས་ཆོག་གལ་ཆེ་བ་ཡིན་པར་འདུག །མ་མོ་སྤྱིའི་མདོས་ཆོག་དང༌། ལྷ་མོའི་སྤྱི་བསྐང་གི་ཆོ་ག་རྒྱས་པ་ནི་ཡི་གེ་རྙིང་པ་གཞན་དུ་བལྟ་བར་བྱ་ཡི། འདིར་བྲིས་པས་མང་བ་ཡིན་ནོ། །ཞེས་པ་འདི་ཡང་རྭའི་རིགས་སུ་སྐྱེས་ཤིང༌། འཇམ་དཔལ་རྡོ་རྗེ་གྲགས་པའི་བཀའ་བརྒྱུད་ཅུང་ཟད་འཛིན་པ། རྒྱལ་ཁམས་ཏཱ་ར་ནཱ་ཐ་ཞེས་བྱ་བས་གཞུང་གི་གསལ་བྱེད་དུ་མན་ངག་ལག་ལེན་ཀླག་ཆོག་གི་ཚུལ་དུ་བྲིས་པའོ།། །།མངྒ་མཾ། དགེའོ།།