རྡོ་རྗེ་འཇིགས་བྱེད་བསྡུས་པའི་སྒྲུབ་ཐབས་དང་སློབ་མ་རྗེས་འཛིན།
རྡོ་རྗེ་འཇིགས་བྱེད་བསྡུས་པའི་སྒྲུབ་ཐབས་དང་སློབ་མ་རྗེས་འཛིན་བཞུགས་སོ།
ན་མོ་བཛྲ་བྷེ་རཱ་ཝ་ཡ། གང་ཞིག་ཡེ་ཤེས་འབར་བའི་མེ་ལྕེ་ཡིས། །མ་ལུས་བདུད་སྡེའི་ཚང་ཚིང་ཀུན་བསྲེགས་ནས། །བདེན་གཉིས་སྣང་བྱེད་ཡེ་ཤེས་འོད་བརྒྱ་འགྱེད། །རྡོ་རྗེ་སློབ་དཔོན་དཔའ་བོ་ཆེ་ལ་འདུད། །བསྡུས་པའི་སྒྲུབ་ཐབས་འདིར་ཞུགས་ན། །དྲག་ཤུལ་སྤྱོད་པ་མཐའ་དག་ནི། །སྐད་ཅིག་གཅིག་གིས་འགྲུབ་འགྱུར་ཞེས། །དུས་གཞན་ཞིག་ན་བླ་མ་གསུང༌། འདིར་སྒྱུ་གྲྭ་འཕྲུལ་དྲྭ་བའི་རྒྱུད་ལས་ཀྱང་གསུངས་ཤིང༌། དཔལ་ཁ་སྦྱོར་ཐིག་ལེ་ལས་གསལ་བར་བསྟན་པ་དཔལ་རྡོ་རྗེ་འཇིགས་བྱེད་ཀྱི་རྟོག་པ་བསྡུས་པ་ཞེས་བྱ་བའི་གཞུང་གི་དོན། མཆོག་ཏུ་བསྡུས་པ་དཔལ་རྡོ་རྗེ་འཇིགས་བྱེད་ཆེན་པོའི་སྒྲུབ་ཐབས་སྒོམ་པར་འདོད་པས། དུར་ཁྲོད་ལ་སོགས་པ་དབེན་པའི་གནས་སུ་སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་སྒོམ་བཟླས་རྣམས་སྔོན་དུ་བཏང་ཞིང༌། རང་སྐད་ཅིག་གི་འཇིག་མཛད་དུ་གསལ་བའི་སྙིང་ཁར་པད་ཉི་ལ་གནས་པའི་ཧཱུཾ་ལས་འོད་ཟེར་འཕྲོས། དཔལ་རྡོ་རྗེ་འཇིགས་བྱེད་ཆེན་པོའི་ལྷ་ཚོགས་ཐམས་ཅད་མདུན་གྱི་ནམ་མཁར་བཛྲ་
ས་མཱ་ཛ། ན་མོ་གུ་རུ་བྷྱཿ ན་མོ་བཛྲ་བྷེ་ར་ཝ་མཎྜལ་བྷྱ། བཛྲ་ལཱ་སྱ། སོགས་ཀྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །སོགས་བདུན་རྣམ་དག་བྱ། ཚད་མེད་བཞི་སྤྱི་དང་མཐུན། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭཱ་བྷ་ཝ་ཨཏྨ་ཀོ྅ཧཾ། སྟོང་པའི་ངང་ལས་ཧཱུཾ་ཡིག་ལས་གྲུབ་པའི་བསྲུང་འཁོར་གྱི་དབུས་སུ་ཆོས་ཀྱི་འབྱུང་གནས་ཆེན་པོ་མི་ཟད་ཅིང་འཇིགས་པའི་དུར་ཁྲོད་ཆེན་པོ་བརྒྱད་ཀྱི་ཡོངས་སུ་བསྐོར་བའི་ནང་དུ་ཐོད་རུས་འབར་བའི་གཞལ་མེད་ཁང་ཡངས་ཤིང་རྒྱ་ཆེ་ལ་དཔངས་མཐོ་བ་དེའི་དབུས་སུ། ཡཾ་ལས་རླུང་གི་དཀྱིལ་འཁོར་ཟླ་གམ་དུད་ཁ་ལ་གནས་པའི་སྣ་ཚོགས་པདྨ་དང་ཉི་མའི་གདན། དེའི་སྟེང་དུ་ཟླ་བ་ལ་གནས་པའི་དྷིཿལས་རང་ཉིད་འཇམ་དཔལ་ཞི་བར་འགྱུར་བའི་ཐུགས་ཀར་ཉི་མའི་དཀྱིལ་འཁོར་དེའི་འོད་ཀྱིས་སངས་རྒྱས་བྱང་ཆུབ་སེམས་དཔའ་རིག་མར་བཅས་པ་ཐམས་ཅད་དུ་གདུལ་དཀའ་འདུལ་བའི་རྣམ་པ་ཅན་དུ་སྤྱན་དྲངས་ཏེ་རང་ལ་ཐིམ། རང་ཉིད་ཀྱང་ཐུགས་ཀའི་ཉི་མ་ལ་ཐིམ།
དེ་ཉིད་འབར་བ་དང་བཅས་ཤིང་དཔག་ཚད་བརྒྱད་སྟོང་གི་ཚད་དུ་གྱུར། དེའི་འགྱུར་བ་ལས། ཧཱུཾ་དང་རྡོ་རྗེ་འབར་བ་ཆེན་པོའོ། །ཡང་འོད་ཟེར་སྤྲོ་བསྡུས་མཁའ་དབྱིངས་གང་བའི་འཇིགས་མཛད་རྡོ་རྗེའི་ཚོགས་རྣམས་བདག་ཉིད་ལ་འདུས་པ་ལས། རྡོ་རྗེ་འཇིགས་བྱེད་ཆེན་པོའི་སྐུར་གྱུར། ཨོཾ་ཧྲཱིཿཥྟིཿཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱཧཱ། རང་ཉིད་རྡོ་རྗེ་འཇིག་བྱེད་སྐུ་མདོག་དུས་མཐའི་སྤྲིན་ལྟར་རབ་ཏུ་གནག་པ། ཞལ་བཞི་ཕྱག་བརྒྱད་ཞབས་བཞི་པ། སྐུ་སྦོམ་ཞིང་ཐུང་ལ་གསུས་ཁྱིམ་ཆེ་བ་གཅེར་བུ་ལིང་ག་གྱེན་དུ་བསྒྲེང་བ། སྡང་བ་དང་གདུག་པ་ཅན་ཐམས་ཅད་ཀྱི་ཤ་དང་རྐང་དང་ཚིལ་ཟ་བ་ཧ་ཧཱ་དང་ཧཱུཾ་ཧཱུཾ་དང་ཕེཾ་ཀྱི་སྒྲ་གནམ་དུ་འབོད་པ། འཇིག་རྟེན་དང་འཇིག་རྟེན་ལས་འདས་པའི་ལྷ་ཐམས་ཅད་ལ་སྡིགས་མཛུབ་བྱེད་པ། རྩ་བའི་ཞལ་མཐིང་ནག་མ་ཧེ་ཁྲོས་པའི་གདོང༌། རྡོ་རྗེའི་རྭ་གདེང་བས་ཕྱོགས་ཐམས་ཅད་གནོན་པ། གཡས་ཞལ་དཀར་པོ་རྒྱ་ཆེར་བཞད་ཅིང༌། གཡོན་ཞལ་དམར་པོ་རབ་ཏུ་འཇིགས་པ། ཡ་སོས་མ་མཆུ་མནན་པ། དབུའི་གཙུག་ཏུ་འཇམ་དཔལ་གྱི་ཞལ་གསེར་མདོག་ཡིད་ཙམ་ཁྲོ་བ། ཟུར་ཕུད་ལྔ་དང་ལྡན་པའོ། ཁྲོ་ཞལ་ཐམས་ཅད་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། སྨ་ར་དང་སྨིན་མ་དང་དབུ་སྐྲ་ཁམ་སེར་མེ་ལྟར་འབར་བ། ཕྱག་གཡས་པ་རྣམས་ཀྱི་རྡོ་རྗེས་མཚན་པའི་
གཏུན་ཤིང་དང༌། རལ་གྲི་དང༌། འཁོར་ལོ་དང༌། ཅང་ཏེའུ་རྣམས་འཛིན་པ། གཡོན་པ་རྣམས་ཀྱིས་རྡོ་རྗེས་མཚན་པའི་ཁ་ཊཾ་ག་དང༌། ཐོད་ཁྲག་དང༌། མདའ་གཞུ་དང༌། ཞགས་པ་བསྣམས་པ་སྟེ། རལ་གྲི་དང་ཐོད་ཁྲག་ཐུགས་ཀར་སྟེང་འོག་ཏུ་འཛིན་པ། དང་པོ་གཉིས་ཀྱི་གླང་པོ་ཆེའི་ལྤགས་པ་ཡང་བརྒྱངས་ཏེ་བསྣམས་པའོ། །ཞབས་མདུན་མ་གཉིས་གཡོན་བསྐུམ་གཡས་བརྐྱང་ཞིང༌། རྒྱབ་མ་གཉིས་གར་གྱི་ཚུལ་གྱིས་མནན་པ། སྐུ་ལ་རུས་པའི་རྒྱན་དྲུག་དང་ཀླུ་ཆེན་པོ་བརྒྱད་ཀྱིས་དཀྲིས་པ། ཐོད་སྐམ་ལྔའི་དབུ་བརྒྱན་དང༌། ཁྲག་འཛག་མགོ་བོ་ལྔ་བཅུའི་དོ་ཤལ་ཅན། སྐུ་ལས་སྤྲུལ་པའི་རྡོ་རྗེ་ཕོ་ཉའི་ཚོགས་ཀྱིས་ནམ་མཁའི་ཁམས་རྒྱས་པར་འགེང་བ། འཇིགས་དུས་ཀྱི་མེ་ལྟ་བུའི་དབུས་ན་བཞུགས་ཤིང༌། སྲིད་པ་གསུམ་གྱི་བལྟ་བར་ཡང་མི་བཟོད་པའི་བདག་ཉིད་དུ་གྱུར། མིག་ཏུ་ཀྵཾ། རྣ་བར་ཛྲཾ། སྣ་ལ་ཁཾ། ལྕེ་ལ་གཾ །དཔྲལ་བར་སྐཾ། ལྟེ་བར་སཾ། སྤྱི་བོར་ཨཾ་དཀར་པོ། མགྲིན་པར་ཨཱཿ དམར་པོ། སྙིང་ཁར་ཧཱུཾ་སྔོན་པོ་སངས་རྒྱས་ཐམས་ཅད་སྐུ་གསུང་ཐུགས་རྡོ་རྗེའི་རྣམ་པར་སྤྱན་དྲངས་ཏེ་གནས་གསུམ་གྱི་ཡི་གེ་འབྲུ་གསུམ་ལ་ཐིམ། རང་གི་སྙིང་གར་ཡེ་ཤེས་སེམས་དཔའ་འཇམ་དཔལ་ཞི་བ། དེའི་ཐུགས་ཀར་ཏིང་ངེ་འཛིན་སེམས་དཔའ་རྡོ་རྗེའི་ལྟེ་བར་ཉི་མ་ལ་ཧཱུཾ། དེ་ལས་
འོད་ཟེར་འཕྲོས། ཡེ་ཤེས་སེམས་དཔའ་དཔལ་རྡོ་རྗེ་འཇིགས་བྱེད་དབང་གི་ལྷ་དང་བཅས་པ་བཛྲ་ས་མཱ་ཛཿ མཆོད་ཡོན་ཉེར་སྤྱོད་ལྔས་མཆོད། ཨོཾ་ཨ་བྷི་ཥིཉྩ་ཏུ་མཾ་སརྦ་ཏཱ་ཐ་ག་ཏ། ཞེས་སོལ་བ་བཏབ་པས། ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུཾ། སུ་ར་ཏ་སྟྭོཾ་ཨཱ་ཧཾ། ཞེས་གསུངས་ཤིང་དབང་བསྐུར་ཏེ་མི་བསྐྱོད་པས་དབུ་བརྒྱན། ཛཿཧཱུཾ་བཾ་ཧོཿ ཞེས་དེ་ཐམས་ཅད་རང་ལ་གཉིས་སུ་མེད་པར་ཐིམ། གཤིན་རྗེ་གཤེད་ཀྱི་དམ་རྒྱ་བཅས་གནས་གསུམ་དུ་གཏུགས་ལ། རྩ་སྔགས་དང༌། སྙིང་པོ་དང༌། ཉེ་སྙིང་རྣམས་བརྗོད་དོ། །དེ་ནས་སྒེག་སོགས་བརྒྱད་ཀྱིས་མཆོད་པ་དང༌། གཟུགས་སྒྲ་ལ་སོགས་དྲུག་པོ་ནི། །སོགས་དང༌། དུར་ཁྲོད་རྒྱན་གྱི། སོགས་ཀྱི་མཆོད་ཅིང་བསྟོད། བདུད་རྩི་མྱང་བ་འཇིགས་བྱེད་སྒྲུབ་ཐབས་རྭ་ལུགས་སྤྱི་དང་འདྲ། བཟླས་པའི་དམིགས་པ་ཡང་འདྲ་སྟེ། རྩ་སྔགས་ཡི་གེ་སོ་གཉིས་དང༌། སྙིང་པོ་བཅུ་པ་དང༌། ཉེ་སྙིང་བདུན་པ་རྣམས་སྤྱི་དང་འདྲ་བ་དང༌། ཧྲཱིཿཥྟིཿ ཡི་གེ་བཅུ་བཞི་པ་ཁྱད་པར་དུ་བཟླའོ། །མཐར་སྙིང་ཁའི་འོད་ཟེར་གྱི་སྣོད་བཅུད་དཀྱིལ་འཁོར་འཁོར་ལོ་གྱུར་པ། གཞལ་ཡས་ཁང་ལ་ཐིམ། དེ་རང་ཉིད་ལ་ཐིམ། རང་ཡེ་ཤེ་སེམས་དཔའ་ལ་ཐིམ། དེ་ཏིང་ངེ་འཛིན་སེམས་དཔའ་ལ། དེ་ཡང་སྟོང་པ་ཉིད་དུ་སྦྱང་ངོ༌། །སྟོང་པའི་ངང་ལས་རང་ཉིད་ཕྱག་གཉིས་པའི་ང་རྒྱལ་དང་ལྡན་པས། སྲུང་བའི་དོན་དུ་སྐྱེ་མཆེད་དང་གནས་གསུམ་བྱིན་གྱིས་རླབས་སོ། །དགེ་བ་བསྔོ། འདི་ལ་སྲུང་འཁོར་མི་བསྡུ་བ་མན་ངག་ཡིན་
ནོ། །གཏོར་མ་འབུམ་ཚུལ་ནི། བྱིན་རླབས་སོགས་ཐམས་ཅད་རྡོ་རྗེ་འཇིགས་བྱེད་རྭ་ལུགས་རྒྱས་པ་དང་འདྲ་བ་ལས། འབུལ་བའི་སྔགས་ནི། ཡི་གེ་བཅུ་པའི་མཐར་མཧཱ་བཛྲ་བྷཻ་ར་ཝ་མཧཱ་ཨ་དྷི་པ་ཏི་ཨི་དཾ་བ་ལིང་ཁ་ཁ་ཁཱ་ཧི་ཁཱ་ཧི་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ལན་བདུན་གྱི་འབུལ་བ་ནི་ཁྱད་པར་རོ། །ཚུལ་འདིས་སྙིང་པོ་འབུམ་ཕྲག་བཅུ་བཟླ་བ་ནི་བསྙེན་པའོ། །ཡང་གཞན་ཡང་སྔར་དང་འདྲ་བ་ལས། དབང་བསྐུར་རྒྱས་བཏབ་ཀྱི་རྗེས་སུ། རང་གི་ཡེ་ཤེས་ཀྱི་སྣང་བ་ལས་གྲུབ་པའི་འཁོར་བཞི་སྐད་ཅིག་གི་གྲུབ་པ་ནི། མདུན་དུ་རཾ་ལས་རྡོ་རྗེ་སྲིན་པོ་སྨུག་ནག་རལ་གྲི་དང་ཐོད་པ་འཛིན་པ་ཁྱིའི་གདོང་པ་ཅན། གཡས་སུ་ཡ་ལས་ལས་ཀྱི་གཤིན་རྗེ་སྔོ་སྐྱ་བེ་ཅོན་ཐོགས་པ། གཡོན་དུ་མ་ལས་དུས་མཚན་མ་དམར་མོ་རྩེ་གསུམ་འཛིན་པ། རྒྱབ་ཏུ་ཧཱུཾ་ལས་དཔལ་མགོན་ནག་པོ་གྲི་གུག་དང་ཐོད་ཁྲག་འཛིན་པ། ཐམས་ཅད་ཀྱང་རལ་པ་མུན་ལྟར་གཏིབ་པ། སྟག་ལྤགས་ཀྱིས་སྨད་དཀྲིས་དང༌། མི་ལྤགས་ཀྱི་སྟོད་གཡོགས་གསོལ་བ། སྦྲུལ་རྒྱན་དང་མི་མགོའི་འཕྲེང་བ་ཅན། གཡོན་བརྐྱང་གི་སྟབས་ཀྱི་མི་རོའི་གདན་ལ་བཞུགས་པ་ཁྲོ་བོའི་ཆ་བྱད་ཡོངས་སུ་རྫོགས་པའོ། །ཞེས་བསྐྱེད་ནས་མཆོད་བསྟོད་ཡན་ཆད་སྔར་བཞིན་བྱ། གཙོ་བོའི་བཟླས་པ་སོང་རྗེས་སུ་འཁོར་བཞི་པོ་ལ་གཙོ་བོའི་བཞི་ཆ་རེ་བཟླ་སྟེ། ཨོཾ་བཛྲ་རཀྵ་ས་བྷ་ཀྵ་ས་ཤ་ཏྲུཾ་ཨི་ཏི་ཕཊ། རྡོ་རྗེའི་སྲིན་པོའོ། །ཨོཾ་ཀ་ལ་རཱུ་པ་ཧཱུཾ་ཕཊ།
ལས་ཀྱི་གཤིན་རྗེའོ། །བྷྱོ་ཀཱ་ལ་ཏྲི་བྷྱོཿ དུས་མཚན་མའོ། །ཨོཾ་མཧཱ་ཀཱ་ལ་རུ་པ་ཤ་ཧཱུཾ་ཕཊ། ནག་པོ་ཆེན་པོའོ། །གཏོར་འབུལ་གྱི་སྐབས་འཁོར་བཞི་ཡང་སྤྱན་དྲངས་ནས། སོ་སོའི་སྙིང་པོའི་མཐར། ཨཱ་ཀ་རོ་བཏགས་པས་འབུལ། ནག་པོ་ཆེན་པོ་ལ་ཤ་ས་ནས་ཀྱང་ལྷག་པོར་འབུལ་བ་ཡིན་ནོ། །འཁོར་གྱི་བསྟོད་པ་བསྡུས་པ་ནི། དབང་ཕྱུག་ཆེན་པོའི་དཀྱིལ་འཁོར་གནས་མཆོག་ཏུ། །དབང་མེད་དང་པས་འདུས་པ་དང༌། །ཡེ་ཤེས་སྤྲུལ་པའི་ལྷ་ཚོགས་ལ། །གུས་པས་ཕྱག་འཚལ་བསྟོད་པར་བགྱི། །ཞེས་པ་ཙམ་གྱིས་ཆོག་སྟེ་ཉེ་བའི་བསྙེན་པའོ། །སྒོམ་དོན་དང་མཐུན་པར་དཀྱིལ་འཁོར་བྲིས་ལ། དམ་རྫས་མཆོད་གཏོར་ཚོགས་པ་བྱས་ནས། བདག་མདུན་ཐ་མི་དད་པའི་ཚུལ་གྱིས་ཟླ་བ་དྲུག་ལ་སོགས་པར་གཙོ་འཁོར་གྱི་སྔགས་སྦྲེལ་ནས་བཟླས་སྒོམ་བྱེད་པ་ནི་སྒྲུབ་པའོ། །འཁོར་གྱི་སྔགས་བསྡུ་ན། རཾ་ཡཾ་བྷྱོ་ཧཱུྃ། ཞེས་པ་ཙམ་གྱི་ཆོག་གོ །དེ་ཉིད་དང་འདྲ་བ་ལས་ཐུན་མཚམས་ཀྱི་སྐབས་མ་གཏོགས། བདག་མདུན་དབྱེར་མེད་དུ་བསྒོམ་བཟླས་བྱེད་པ་སྟེ། ཟླ་བ་ཕྱེད་ནས་ཟླ་བ་དྲུག་གི་བར་བྱེད་པ་ནི། སྒྲུབ་པ་ཆེན་པོའོ། །དེ་ནས་ནི་ལས་ལ་སྦྱར་བས་ཇི་ལྟར་བདེ་བར་འགྲུབ་པར་འགྱུར་རོ། །འདི་ལ་སྒྱུ་འཕྲུལ་དྲྭ་བ་དང༌། ཁ་སྦྱོར་ལས་འཁོར་རྡོ་རྗེ་སྲིན་པོ་གཅིག་པུ་ལས་གསུངས་ཀྱང༌། གཞན་རྣམས་བླ་མའི་མན་ངག་ལས་འབྱུང་ལ། འདིའི་རྟོགས་པ་བསྡུས་པ་ལས་ཀྱང་དོན་གྱི་མ་བཤད་དོ། །ཡང་མདུན་དུ་རྡོ་རྗེ་སྲིན་པོ་གཤིན་རྗེ། དུས་མཚན་གསུམ་གསུམ་སྦྲགས་སུ་ཆད་པའི་ལུགས་ཀྱང་ཡོད་དེ། འདམ་ཁ་ཡིན་པའི་ཕྱིར་ཇི་ལྟར་བདེ་བར་བྱའོ། །སྒྲུབ་ཐབས་
འདིའི་དབང་ཆོག་གམ། བྱིན་རླབས་ཀྱི་ཆོ་ག་ནི། སྟེགས་བུ་ཡངས་པ་ལ་ཆོས་འབྱུང་གྲུ་གསུམ་མཐིང་ཁ་མེ་རིས་བསྐོར། ཕྱི་ཟླུམ་སྐོར་ཡང་རྡོ་རྭ་དང་མེ་རིས་སྐོར། གྲུ་ཆད་དམར་པོ་བྱའོ། །དབུས་ཉི་གདན་ལ་ཚོམ་བུ་ནག་པོ་ལྔ་བཀོད། དེའི་སྟེང་དུ་མཉྫི་ལ། ཐོད་པ་ཤས་གང་བའི་དཀྱིལ་དུ། འཁྲུལ་འཁོར་དང་རལ་གྲི་བཙུགས། བདུད་རྩི་ལྔས་ཀྱང་སྦགས། ཕྱོགས་བཞིར་སྟེགས་བུར་དམར་གཏོར་རེ་ཡང་བཀོད། མདུན་དུ་འབུལ་གཏོར་གཉིས། ཕྱི་མཆོད། ནང་མཆོད། ཁྲག་གི་ཨརྒྷཾ་ཤ་ཆེན་གྱི་བདུག་སྤོས། ཤ་རུས་ཀྱི་ཞལ་ཟས་རྣམས་ཀྱང་ཁྱད་པར་དུ་བཤམ། སྔོན་འགྲོ་གཏོར་མ་དང༌། གནས་ཡོ་བྱིན་རླབས་སྔོན་དུ་འགྲོ་བས། གོང་བཞིན་བདག་བསྐྱེད་སྒོམ། བཟླས་པ་ཅུང་ཟད་བྱ། མདུན་བསྐྱེད་བསངས་སྦྱངས། སྟོང་པའི་ངང་ལས་ཧཱུཾ་ཡིག་ལས། ཞེས་པ་ནས། དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་ནང་དུ། དེའི་དབུས་སུ་ཐོད་རུས་འབར་བའི་གཞལ་མེད་ཁང༌། ཞེས་པ་ནས། པདྨ་དང་ཉི་མའི་གདན། དེའི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། རྡོ་རྗེ་འཇིགས་བྱེད་ཆེན་པོའི་སྐུར་གྱུར། ཅེས་པ་ནས། མི་བཟོད་པའི་བདག་ཉིད་དུ་གྱུར། མདུན་དུ་རམ་ལས༴ སོགས་འཁོར་བཞི་བསྐྱེད། མིག་ཏུ་ཀྵིཾ་ནས་མཆོད་བསྟོད་བདུད་རྩི་མྱང་བའི་བར་ཡང་བདག་བསྐྱེད་དང་འདྲ་བ་ལས། འཁོར་རྣམས་ལ་རིགས་བདག་གཙོ་བོ་ཕྱག་གཉིས་པས་དབུ་བརྒྱན་པའམ། གཙོ་འཁོར་ཐམས་ཅད་ལ་མི་བསྐྱོད་པས་དབུ་བརྒྱན། ཅེས་པ་དང༌། བདག་མདུན་གྱི་འདོན་པ་སྤོ་ཚུལ་ཤེས་དགོས་སོ། །བར་འདིར་བཟླས་པ་
ཅུང་ཟད་བྱ། དེ་ནས་གཏོར་མ་འབུལ་ཏེ། གཏོར་མ་དང་པོ་ལྷ་ལྔ་ལ་འབུལ། གཉིས་པ་ཕྱོགས་སྐྱོང་བཅུ་ལ་འབུལ། ཐུན་མོང་དུ་སློབ་མའི་རྒྱུད་བྱིན་གྱིས་རློབ་པར་གསོལ་བ་བཏབ། གང་ཡང་རུང་བའི་བུམ་པ་དྲི་བཟང་གི་ཆུས་བཀང་ནས། ཨོཾ་བཛྲ་ཨ་མྲྀ་ཏ་ཀུན་ཌ་ལི་ཧ་ན་ཧ་ན་ཧཱུཾ་ཕཊ། ཅེས་བྱ་བའི་སྔགས་ཀྱི་ཡིག་འབྲུ་རབ་ཏུ་འབར་བའི་རང་བཞིན་དུ་བསམ། སྔགས་དེ་ཉིད་བརྒྱ་སྟོང་དང༌། ཨ་བྷི་ཥེ་ཀ་ཏ་ཉེར་གཅིག་བཟླས། འདི་སློབ་མ་རྣམས་དང་པོར་ཁྲུས་བྱ་བའི་བུམ་པ་དེ་ཡིན་ནོ། །ཡང་སྟེགས་བུ་གཞན་ཞིག་གི་སྟེང་དུ་དབང་བསྐུར་བའི་བུམ་པ་འཆའ་སྟེ། དེ་ཡང་ཐོད་པའམ། རིན་པོ་ཆེའི་བུམ་པ་ཡང་རུང་ལ། ཤིང་གི་སྣོད་དུ་བྱ་བ་མིན་གསུང༌། དེས་ན་ཕལ་ཆེར་ལག་ལ་རྫའི་བུམ་པ་ཞིག་ཁྲག་དང་ཆང་སྲེས་པའི་སྤོས་ཆུས་བཀང༌། ནག་པོར་བྱུག་ཁ་རྒྱན་མི་དགོས། ཐོད་པ་ཆང་གིས་བཀང་བས་ཁ་བཅད། དེའི་དབུས་སུ་ལྷ་ལྔ་པོ་སྐད་ཅིག་གིས་གསལ་བཏབ་ནས་སྔགས་བརྒྱ་བརྒྱ་ཙམ་བཟླའོ། །ཀཱ་པ་ལའི་མྱོས་བྱེད་སོ་སོའི་སྔགས་ཀྱི་མཐར་འབྲུ་གསུམ་བཏགས་པས་ཕུལ། རྡོ་རྗེའི་འཕྲེང་བ་ཞིག་ལ་གཙོ་བོའི་སྔགས་ལན་བརྒྱ་བཟླ་ཞིང༌། ཧཱུཾ་ལས་བྱུང་བ་རྒྱལ་བ་མི་བསྐྱོད་པའི་བདག་ཉིད་དུ་མོས། ཨོཾ་ཨཱཿབཛྲ་དྷྲིཀ་ཧཱུཾ་སྭཱཧཱ། ཞེས་པའང་བརྒྱ་བརྒྱད་བཟླའོ། །དེ་ནས་སློབ་མ་རྣམས་ལ་བགེགས་སྦྱང་བ་དང༌། སྡིག་པ་སྦྱང་བ་དང༌། ཁྲུས་རྣམས་སྔོན་དུ་སོང་ནས་སེམས་བསྐྱེད་གསལ་བཏབ། ཆོས་བཤད་བྱ། སློབ་མས་མཎྜལ་ཕུལ། དགའ་ཆེན་ཁྱོད་བདག །སོགས་ཀྱིས་གསོལ་བ་བཏབ། འདི་ནི་ཁྱོད་ཀྱི་དམྱལ་བའི་ཆུ། །སོགས་ཀྱིས་དམ་ལ་བཞག །དཀྱིལ་
ཆོག་ལས་འབྱུང་བ་ལྟར་ཡེ་ཤེས་དབབ་པ་བྱ། ལྷ་ངོ་བསྟན། ཨེ་མ་ཧོ་སངས་རྒྱས་སློབ་དཔོན་ཆེ། །ཨེ་མ་ཧོ་ཆོས་དང་ཚོགས་ཀྱི་མཆོག །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །ཅེས་ལན་གསུམ། དེ་ནས་སློབ་མ་གཙོ་བོ་བསྐྱེད། སྙིང་ཁར་ཡང་གཙོ་བོ་དང༌། ལྟེ་བར་འཁོར་བཞི་སྒོམ། རེ་རེ་བཞིན་བཟླས་ལུང་ཕོག་རེ་རེ་བཞིན་སྔགས་བཟླས་པའི་བུམ་པའི་ཆུའི་དབང་ལན་ལྔ་བསྐུར་དགོས་ཏེ། དབང་བསྐུར་རྡོ་རྗེ་ཆེན་པོ་ནི། །སོགས་ཀྱི་མཐར་སོ་སོའི་སྔགས་ཀྱི་མཇུག་ལ། ཨ་བྷི་ཥིཉྩ། བཏགས་པས་སོ། །དེ་རྗེས་གཙོ་བོའི་དམ་རྫས་དང༌། འཁོར་རྣམས་ཀྱི་གཏོར་དབང་ཡང་རིམ་བཞིན་དུ་བྱ། རྡོ་རྗེ་འཕྲེང་བ་ལ་མེ་ཏོག་སྣ་ཚོགས་བཅིངས་ཏེ། སློབ་མའི་མགོ་བོར་དབང་བསྐུར་ཏེ། ཨུ་དུམ་ཝ་ར་མནྟ་ར། །ཞེས་སོགས་བརྗོད། ཐོད་པའི་དབུས་ཀྱི་རལ་གྲི་ལག་ཏུ་གཏད་ལ། སངས་རྒྱས་ཀུན་གྱི་རལ་གྲི་ཆེ༴ སོགས། རྡོར་དྲིལ་གཏད་ལ། ཤེས་རབ་ཐབས་ཀྱི་རང་བཞིན་བདག །སོགས། བདུད་རྩི་ལྔའི་རང་བཞིན་དུ་བྱིན་གྱིས་བརླབས་པའི་ནང་མཆོད་སྦྱིན་ལ། བཏུང་བ་རིན་ཆེན། སོགས་བརྗོད། གཤིན་རྗེ་གཤེད་ཀྱི་དྲག་པོའི་འཁོར་ལོ་ལག་ཏུ་གཏད་ལ། བསྒྲལ་བར་བྱ་བའི་ཡུལ་ལྔ་ནི། །འཁོར་ལོ་དང་ནི་ཏིང་ངེ་འཛིན། །སྔགས་སམ་སྨན་གྱི་གསད་བྱ་སྟེ། །ཡང་ན་གནས་ལས་སྤོས་པར་བྱ༌། །ཞེས་དང་རྩ་སྔགས་ལ། ཨབྷིའི་ཥིཉྩ་བཏགས་པ་བརྗོད་དོ། །སློབ་མའི་རྗེས་ཀྱི་བྱ་བ་སྤྱི་དང་འདྲ་ཞིང༌། ཚོགས་འཁོར་
ཆོ་གས་ཚོགས་བཏང༌། དཀྱིལ་འཁོར་གྱི་རྗེས་ཀྱི་བྱ་བའང་གཞན་གྱི་འདྲེའོ། །ཀུན་ལ་ཡོངས་སུ་མ་གྲགས་ཀྱང༌། །རྒྱུད་དོན་ཤེས་པ་རྣམས་དགའ་བ། །མཁས་པའི་སྙིང་ལ་ཞེན་པ་ལྟར། །གསལ་པོར་བཀོད་པ་འདི་ཉིད་དོ། །དངོས་གྲུབ་ཀུན་གྱི་སྒྲུབ་པའི་ཐབས །འཇུག་སྒོ་ཙམ་ཞིག་བརྗོད་པ་ལས། །དགེ་བ་ཅུང་ཟད་གང་བསགས་ཏེ། །རྡོ་རྗེ་འཇིགས་བྱེད་དཔལ་ཐོབ་ཤོག །འདི་ལ་རྡོ་རྗེ་འཇིགས་བྱེད་རྒྱས་པ་སྒྲུབ་ཐབས་རྭ་ལུགས་སྔོན་དུ་ཤེས་པ་གལ་ཆེ་ལ། དེ་ནས་འདི་ཙམ་ཁོ་ནས་འགྲུབ་སྟེ། མཆོག་ཏུ་བསྡུས་པ་རྡོ་རྗེ་འཇིགས་བྱེད་ཀྱི་སྒྲུབ་ཐབས་སློབ་མའི་རྗེས་ཟུང་དང་བཅས་པ་གསལ་པོར་བཀོད་པ་འདི་ཡང༌། སློབ་བུ་དམ་ཚིག་ཅན་སྔགས་འཆང་དཀོན་མཆོག་ལེགས་འཛིན་གྱི་བསྐུལ་ནས། ཏཱ་ར་ནཱ་ཐས་སྦྱར་བའོ།། །།བཀྲ་ཤིས།། ཞུས་དག །འདི་བྲིས་དགེ་བས་མ་རྒན་སེམས་ཅན་ཐམས་ཅད་གཤིན་རྗེ་དུས་དགྲའི་རྒྱལ་བའི་གོ་འཕང་ཐོབ་པར་རྒྱུར་གྱུར་ཅིག །