དཔལ་རྡོ་རྗེ་འཇིགས་བྱེད་ཁྲོས་པའི་རྒྱུད་ཀྱི་རྒྱལ་པོ།
དཔལ་རྡོ་རྗེ་འཇིགས་བྱེད་ཁྲོས་པའི་རྒྱུད་ཀྱི་རྒྱལ་པོ་ཞེས་བྱ་བ་བཞུགས་སོ།
རྒྱ་གར་སྐད་དུ། ཤྲཱི་བཛྲ་བྷཻ་ར་བ་ཏན་ཏྲ་ཀྲོ་དྷ་རཱ་ཛ་ན་མ། བོད་སྐད་དུ། དཔལ་རྡོ་རྗེ་འཇིགས་བྱེད་ཁྲོས་པའི་རྒྱུད་ཀྱི་རྒྱལ་པོ་ཞེ་བྱ་བ། དཔལ་རྡོ་རྗེ་འཇིགས་བྱེད་ཆེན་པོ་ཁྲོ་བོའི་རྒྱལ་པོ་ལ་ཕྱག་འཚལ་ལོ། །དེ་ནས་རྡོ་རྗེ་འཇིགས་བྱེད་ཀྱི། །སྒྲུབ་པ་ཡང་དག་རབ་བཤད་དེ། །དེས་ནི་ལྷ་རྣམས་ཐམས་ཅད་ལ། །དྲག་ཤུལ་ཆེ་ཤིང་འཇིགས་པར་བྱེད། །དེ་ལ་ཐོག་མར་སྔགས་པས་ཡིད་དུ་འོང་བའི་གནས་གང་ཡང་རུང་བར་གནས་ལ། དགོས་པ་ཐམས་ཅད་བསྒྲུབ་པར་བྱའོ། །དེ་ལ་གནས་བསྲུང་བ་ནི། དུར་ཁྲོད་དམ། ཆུ་ཀླུང་གི་འགྲམ་མམ། ཤིང་གཅིག་གམ། མཚན་མ་གཅིག་པའམ། གཞི་མདོའམ། རིའི་རྩེ་མོའམ། ཁང་སྟོང་ངམ༌། མ་མོའི་ཁྱིམ་མམ། ལྷའི་ཁང་པའམ། འཐབ་མོའི་གནས་སམ། གྲོང་ཁྱེར་རམ། ནགས་ཁྲོད་དམ། གྲོང་བར་ལ་སོགས་པའི་གནས་སྔགས་པ་གནས་ཏེ། འཇིགས་བྱེད་ཆེན་པོའི་རྒྱུད་འདིར་དབང་བསྐུར་བའི་རྣལ་འབྱོར་བས། དབང་
དང༌། དགུག་པ་དང༌། བསད་པ་དང༌། བསྐྲད་པ་དང༌། དབྱེ་བ་དང༌། རེངས་པ་དང༌། རལ་གྲི་དང༌། མིག་སྨན་དང༌། ས་འོག་དང༌། རི་ལུ་དང༌། རོ་དང༌། བཅུད་ཀྱིས་ལེན་པ་དང༌། ནོར་དང༌། འབྱུང་པོ་དང༌། རོ་ལངས་དང༌། ཤ་ཟ་དང༌། གནོད་སྦྱིན་དང༌། གནོད་སྦྱིན་མོ་དང༌། ཀླུ་ལ་སོགས་པ་ཆོ་ག་འདིས་བསྒྲུབ་པར་བྱའོ། །དེ་ལ་ཆོ་ག་ནི། དང་པོར་རེ་ཞིག་སྔགས་པའི་མི་རོ་བསྲེགས་པའི་ཐལ་ཆེན་གྱིས་ལུས་བྱུགས་ཏེ། མཚན་ཕྱེད་ན་གཅེར་བུ་སྐྲ་གྲོལ་བར་བྱས་ལ། མ་ཧེའི་གདོང་ཅན་གྱི་རྣལ་འབྱོར་གྱི་ཀུན་ཏུ་སྤྱོད་པས་དུར་ཁྲོད་ལ་སོགས་པར་དཀྱིལ་འཁོར་བྲི་སྟེ། གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །དྲིལ་བུ་དར་གྱི་འཕན་ལ་སོགས། །མེ་ཏོག་འཕྲེང་བས་རྣམ་པར་བརྒྱན། །གྲྭ་རྣམས་དག་ནི་ཐམས་ཅད་དང༌། །སྒོ་ཁྱུད་ཀྱི་ནི་ཐིགས་རྣམས་སུ། །རྡོ་རྗེ་རིན་ཆེན་གྱིས་སྤྲས་པའི། །ཟླ་བ་ཕྱེད་པའང་དེ་བཞིན་ནོ། །དེ་དབུས་འཁོར་ལོ་བྲི་བ་ནི། །རེ་མིག་དགུ་པ་
ཚོམ་བུའོ། །སྒོ་གཅིག་པ་ནི་དབྱེ་བར་བྱ། །ལྷག་མ་ཡོངས་སུ་བཅད་པར་བྱ། །དེ་དབུས་མི་རོ་བྲི་བར་བྱ། །ཤར་དུ་མགོ་བོ། ལྷོར་ལག་པ། ནུབ་ཏུ་རྒྱུ་མ། བྱང་དུ་རྐང་པ། ཤར་གྱི་གྲྭར་ཐོད་པ། ལྷོར་ཐོད་ཚལ། ནུབ་ཏུ་དུར་ཁྲོད་ཀྱི་རས། བྱང་དུ་སྐྱེས་བུ་གསལ་ཤིང་ལ་བཙུགས་པའོ། །འདི་དག་ནི་འཁོར་ལོའི་དབུས་སུ་མཚན་མའི་ཕྱག་རྒྱའོ། །དེ་ནས་འཁོར་ལོའི་ཕྱི་རོལ་གྱི་ཕྱག་རྒྱ་རྣམས་ནི། ཤར་ཕྱོགས་ཀྱི་སྣམ་བུ་དག་ལ། གྲི་གུག་དང༌། མཚོན་རྩེ་གཅིག་པ་དང༌། གཏུན་ཤིང་དང། ཆུ་གྲི་དང༌། རྡོ་རྗེ་རྩེ་གཅིག་པ་དང༌། ལྕགས་ཀྱུ་ལ་སོགས་པ་བྲིའོ། ལྷོ་ཕྱོགས་ཀྱི་སྣམ་བུ་ལ། སྟ་རེ་དང༌། མདའ་དང༌། ཁ་ཊྭཾ་ག་དང༌། དབྱུག་ཏོ་དང༌། འཁོར་ལོ་དང༌། རྡོ་རྗེ་ཞགས་པ་ལ་སོགས་པ་བྲིའོ། །ནུབ་ཀྱི་སྣམ་བུ་ལ། རྡོ་རྗེ་དང༌། རྔེའུ་ཆུང་དང༌། ཕུབ་དང༌། གཞུ་དང༌། དྲིལ་བུ་དང༌། རླུང་གི་རས་ལ་སོགས་པ་བྲིའོ། །བྱང་གི་སྣམ་བུ་ལ། སྡིགས་འཛུབ་དང༌། འཕན་རྩེ་གསུམ་པ་དང༌། གླང་པོ་ཆེའི་ལྤགས་པ་དང༌། རྡོ་རྗེ་ཐོ་བ་དང༌། མདུང་དང༌། མེ་ཐབ་ལ་སོགས་པ་བྲིའོ། །སྒོ་བཞི་དང་གྲྭ་བཞིར་རོ་ལངས་ཆེན་པོ་བྲིའོ། །གལ་ཏེ་མཆོག་གི་དངོས་གྲུབ་འདོད་ན། མར་ཁུ་ཆེན་པོའི་མར་མེ་འབུལ། མི་དང༌། བོང་བུ་དང༌། རྔ་མོང་དང༌། ཁྱི་དང༌།
ཝ་དང༌། མ་ཧེ་དང༌། གླང་པོ་དང༌། བ་གླང་དང་ལུག་དང༌། རི་དྭགས་དང༌། ཕག་ལ་སོགས་པའི་ཤ་རྣམས་དབུལ་བར་བྱའོ། །གཞན་ཡང་བྱ་རྒོད་དང༌། འུག་པ་དང༌། བྱ་རོག་དང༌། ཁྲ་དང༌། ཆུ་སྐྱར་དང༌། ཐིང་རིལ་དང༌། བཞད་དང༌། རྨ་བྱ་དང༌། རི་སྐེག་དང༌། བྱ་ཆེན་པོ་ལ་སོགས་པའི་ཤ་རྣམས་དབུལ་བར་བྱའོ། །ཤིན་ཏུ་མཉམ་པར་བཞག་པས། བཟའ་བ་དང༌། སྟོན་མོ་དང༌། སྦྱིན་སྲེག་དང༌། གཏོར་མའི་ལས་བྱའོ། །དཀྱིལ་འཁོར་གྱི་གྲྭ་ཐམས་ཅད་དུ་ཁྲག་གི་ཆག་ཆག་བྱའོ། །དཔལ་རྡོ་རྗེ་འཇིགས་བྱེད་མ་ཧེའི་གདོང་གི་སྦྱོར་བ་ལ་གནས་པས་ལྷ་བཤོས་ཐམས་ཅད་དབུལ་བར་བྱའོ། །ཕྱི་ནས་སྔགས་པ་སྔོན་དུ་བསྙེན་པ་བྱས་པས་བདག་དང་ཤིན་ཏུ་མཐུན་པ་བཞིའམ། བདག་གཅིག་པུ་རྣམ་པར་སྣང་མཛད་ཀྱིས་ལུས་བྱུགས་གཅེར་བུར་ཕུད་སྐྲ་སིལ་ལ། མཚན་ཕྱེད་ན་ཅང་ཏེའུ་དཀྲོལ་པས། ཧ་ཧ་ཞེས་བྱ་ཞིང་ཤིན་ཏུ་མཉམ་པར་བཞག་སྟེ། རྡོ་རྗེ་འཇིགས་བྱེད་ཆེན་པོའི་དཀྱིལ་འཁོར་དུ་དངོས་གྲུབ་འདོད་པས་འཇུག་པར་བྱའོ། །རབ་ཏུ་ཞུམ་པའི་ཆང་ལ་སོགས་པ་བཏུང་བ་དང༌། བཟའ་བའི་རོ་རྣམས་དབུལ་བར་བྱའོ། །ཕྱི་ནས་དེའི་དབུས་སུ་འདོད་པའི་དངོས་གྲུབ་དམིགས་ཏེ། དེའི་སྟེང་དུ་དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་བསམ་པར་བྱའོ། །དེའི་མདུན་དུ་གཡས་བསྐུམ་
དུ་གནས་ལ་ང་རྒྱལ་དང་བཅས་པས། སེམས་རྩེ་གཅིག་ཏུ་ཤིན་ཏུ་མཉམ་པར་བཞག་པས་ཡི་གེ་བཅུ་པའི་སྔགས་བཟླ་བར་བྱའོ། །དེ་ནས་འཇིགས་པ་ཆེན་པོ་བྱུང་ན། དེ་ལ་སྔགས་པས་འཇིགས་པར་མི་བྱ་སྟེ། གལ་ཏེ་འཇིགས་པར་གྱུར་ན་དེ་ལ་བགེགས་ཆེན་པོའི་བར་ཆད་འབྱུང་ངོ༌། །བར་ཆད་བྱུང་ན་དངོས་གྲུབ་མི་འགྲུབ་པའོ། །དེའི་ཕྱིར་སྔགས་པས་འཇིགས་པར་མི་བྱ་སྟེ། དེ་ལ་དཔལ་རྡོ་རྗེ་འཇིགས་བྱེད་ཆེན་པོ་དགྱེས་སོ། །དགྱེས་ནས་ཁྱོད་ལ་མཆོག་ཅི་ཞིག་སྦྱིན་ཞེས་གསུངས་པ་དང༌། དེ་ལ་རིག་འཛིན་གྱིས་སྨྲས་པ། རལ་གྲི་དང༌། ས་འོག་དང༌། མིག་སྨན་དང༌། རོ་དང༌། བཅུད་ཀྱིས་ལེན་པའམ། གཞན་ཡང་ཡིད་ལ་འདོད་པའི་དངོས་གྲུབ་བདག་ལ་ངེས་པར་སྩོལ་ཅིག་ཅེས་བརྗོད་ན། དེ་ལ་ཐེ་ཚོམ་མེད་པར་སྩོལ་ལོ། །གལ་ཏེ་སྔགས་པས་མཆོག་མ་གྲུབ་ཀྱང༌། དེ་ཡིས་ཕྲ་མོའི་ལས་ཐམས་ཅད་ངེས་པར་འགྲུབ་བོ། །འདི་ནི་འཇམ་དཔལ་མཆོག་རྡོ་རྗེ་འཇིགས་བྱེད་ཆེན་པོའི་འཁོར་ལོའི་སྦྱོར་བའི་རྒྱུད་ལས་དཀྱིལ་འཁོར་བསྟན་པ་སྟེ། རྟོག་པ་དང་པོའོ། །དེ་ནས་ལས་ཀུན་གྱི་རྗེས་སུ་འབྲང་བའི་དངོས་གྲུབ་ཐམས་ཅད་རབ་ཏུ་སྦྱིན་པའི་ཆོ་ག་བཤད་དེ། དེ་ལ་རིམ་པ་ཇི་ལྟ་བ་བཞིན་དུ། བསད་པ་དང༌། བསྐྲད་པ་ལ་སོགས་པ་སྔགས་པ་ཁྲོས་པས་དཔལ་རྡོ་རྗེ་འཇིགས་བྱེད་ཆེན་པོའི་སྦྱོར་བ་ལ་གནས་པས་བྱ་སྟེ། དང་པོར་རེ་ཞིག་སྔགས་པས་བསད་
པར་བྱ་སྟེ། དེ་ཅིའི་ཕྱིར་ཞེ་ན། འདི་ལ་ནི་སྔགས་དང་ལྷའི་སྦྱོར་པ་དང་ལྡན་པས། ཐོག་མར་ནི་དེ་བྱ་སྟེ། དེའི་སྦྱཽར་བ་གཙོ་བོ་ཡིན་པའི་ཕྱིར་རོ། །དེ་ལ་འདི་ཡི་ལས་ནི་ཇི་ལྟར་བསད་པར་འདོད་པས་སྔགས་པས་དུར་ཁྲོད་ཀྱི་རས་ལ། དུག་དང༌། ཁྲག་དང༌། ལན་ཚྭ་དང༌། སྐེ་ཚེ་དང༌། ནིམ་པ་དང༌། དྷ་དྷ་དུ་རའི་དང་ཁུ་བ་ཡིས་རྡོ་རྗེ་འཇིགས་བྱེད་ཆེན་པོའི་འཁོར་ལོ་ལེ་ཚེ་བཅུ་དྲུག་པ་དང༌། བྱ་རོག་ཆེན་པོའི་སྒྲོ་རྩའི་སྙུ་གུའམ། མིའི་རུས་པའི་སྙུ་གུས། གཅེར་བུ་སྐྲ་བཤིག་པ། ཁ་ལྷོར་བལྟས་ཏེ་མ་ཧེའི་གདོང་ཅན་གྱི་སྦྱོར་བས་བྲི་བར་བྱའོ། །མེ་གཉིས་ཀྱི་དབུས་སུ་སྒྲུབ་བྱའི་མིང་དང་བཅས་པར་བཞག་ལ། དེ་ཡི་གེ་བཅུ་པས་བསྐོར། ཧཱུཾ་བརྒྱད་ཀྱང་བྲི། ཐུར་དུ་ཕཊ་བརྒྱད་བྲི། བདག་ཉིད་ཚ་བའི་མར་གྱིས་ལུས་བྱུག་ལ། ཐོད་པ་གཉིས་ཀྱི་བར་དུ་འཁོར་ལོ་བཅུག་ལ། སྒྱེད་བུ་གསུམ་གྱི་སྟེང་དུ་བཞག་ལ། དུར་ཁྲོད་ཀྱི་མགལ་བས་མེ་རབ་ཏུ་སྦར་ཏེ། རྐང་པ་གཡོན་པས་མནན་ལ། ཡི་གེ་བཅུ་པའི་སྔགས་བཟླས་སོ། །དེ་ཡིས་སྐད་ཅིག་གིས་ཐེ་ཚོམ་མེད་པར་འཆིའོ། །གཞན་ཡང་རིམས་ཀྱིས་ཐེབས་པར་འདོད་ན། འཁོར་ལོ་དེ་ཉིད་མིའི་ཉ་ཕྱིས་གཉིས་ཀྱི་དབུས་སུ་ལེགས་པར་བཞག་ལ། མེ་དུར་གྱི་འོག་ཏུ་བཅུག་ན་རིམས་ནད་ཀྱིས་འཛིན་ཏོ། །དེ་ལེ་ཚེ་བཅུ་དྲུག་པའི་འཁོར་ལོ་རབ་ཏུ་སྦྱོར་བ་
གཞན་གསུངས་དེ། འོན་ཀྱང་འདི་ཡི་ཁྱད་པར་ནི། ཡི་གེ་སུམ་ཅུ་རྩ་གཉིས་པའི་སྔགས་དང་ལྡན་པ། ཡི་གེ་བཅུ་པའི་སྔགས་བསྒྲུབ་བྱའི་མིང་དང་བཅས་པ་ལྷན་ཅིག་ཏུ་ཡི་གེ་དང་སྔགས་སྤཻལ་བ་དགོད་དོ། །སྔོན་དུ་གསུངས་པའི་རྫས་དང་ལྷན་ཅིག་ཏུ་བྱ་རོག་གིས་ཟས་བཏོགས་པའི་ལྷག་མ་མི་གཙང་བ་དང༌། རྣམ་པར་སྣང་མཛད་དང་ལྷན་ཅིག་དུར་ཁྲཽད་ཀྱི་རས་ལ་བྱུགས་ཏེ། དེ་ལ་སྔོན་དུ་གསུངས་པའི་ཚོགས་འཁོར་ལོ་བྲིས་ཏེ། དུར་ཁྲོད་དུ་སྦས་ན་འཆི་བར་འགྱུར་རོ། །ཤིང་གཅིག་གི་དྲུང་སྦས་ན་སྐྲོད་པར་འགྱུར་རོ། །མཚན་མ་གཅིག་པར་སྦས་ན་དབྱེ་བར་འགྱུར་རོ། །ཆུའི་ནང་དུ་སྦས་ན་རེངས་པར་འགྱུར་རོ། ཁྱིམ་དུ་བཞག་ན་ཞི་བར་འགྱུར་རོ། །ཕྱུང་ནས་ལེགས་པར་བཀྲུས་ནས་གྲོལ་བར་འགྱུར་རོ། །གཞན་ཡང་རབ་ཏུ་སྦྱོར་བ་གསུངས་པ། གཤིན་རྗེའི་འཁོར་ལོ་སྔོན་གྱི་ཆོ་གས་དུར་ཁྲོད་ཀྱི་རས་ལ་བྲིས་ཏེ། དུར་ཁྲོད་དམ། ལམ་བཞི་མདོ་དང༌། ཤིང་གཅིག་དང༌། གྲོག་མཁར་དང༌། ཆུ་འགྲམ་དང༌། མཚན་མ་གཅིག་པ་དང། རྒྱལ་པོའི་སྒོ་ཁང་དང༌། རྣམ་པར་སྣང་མཛད་དང༌། རྡོ་རྗེའི་ཆུ་དང༌། དུར་ཁྲོད་ཀྱི་སོལ་བར་བསྒྲུབ་བྱའི་གཟུགས་བརྙན་སོར་བརྒྱད་པ་བྱས་ལ། དེའི་སྙིང་གར་སྔགས་བཅུག་སྟེ། མའི་རུས་པའི་ཕུར་བུ་གནས་ལྔ་རུ་གདབ་པར་བྱའོ། །ཚིགས་ཐམས་ཅད་ལ་ཚེར་མ་རྣོན་པོས་དགང་བར་བྱའོ། །དེ་ཐོད་པ་གཉིས་ཀྱི་དབུས་སུ་བཅུག་སྟེ། དེར་གྲོག་མཁར་དང་གནས་བདུན་གྱི་ཡིས་གཤིན་རྗེའི་གཟུགས་གྲུ་
གང་ཙམ་ཞལ་གཙིགས་པ། གསུས་པ་ཆེ་བ། ཞལ་གཅིག་པ། ཕྱག་གཉིས་པ། ཕྱག་ན་རལ་གྲི་དང་ཞགས་པ་འཛིན་པ། གཅེར་བུ་སྐྲ་སིལ་བུར་བྱས་པ། དེའི་སྙིང་གར་ཐོད་པ་གཉིས་བཅུག་སྟེ། ཉི་མ་ཕྱེད་དམ་ནམ་ཕྱེད་ནམ་དུར་ཁྲོད་དམ། རོ་བསྲེགས་པའི་སར་སྦ་སྟེ། ཤིན་ཏུ་རིང་བར་བརྐོས་ཏེ་མགོ་ལྷོར་བསྟན་ལ། ཁ་ཐུར་དུ་སྦུབ་ལ་སྦའོ། །ཁྱིམ་དུ་འོངས་པ་དང༌། ཤིན་ཏུ་ང་རྒྱལ་དང་ལྡན་པས་མ་ཧེ་གདོང་གི་སྦྱོར་བས་བསྒྲུབ་བྱའི་མིང་དང་བཅས་པའི་ཡི་གེ་བཅུ་པའི་སྔགས་བཟླས་པར་བྱས་ན་ཉི་མ་གསུམ་གྱིས་འཆིའོ། །བྱུང་ནས་དཀྲུས་ན་ཐར་པར་འགྱུར་རོ། །དེ་ནས་རེངས་པའི་རབ་ཏུ་སྦྱོར་བར་གསུངས་ཏེ། ཏེའུ་ལོ་བི་ལྤགས་པ་དུག་ལ་སོགས་པའི་རྫས་ཀྱིས་ཡི་གེ་བཅུ་པའི་སྔགས་བྲིས་ལ། ལྤགས་པ་དེ་བསྒྲུབ་བྱའི་རྐང་རྗེས་ཀྱི་རྡུལ་དང༌། གཅིན་བཏང་བའི་ཤུལ་གྱི་སས་བཀང་ལ། བསྒྲུབ་བྱ་དེའི་སྐྲས་བཅིང་བར་བྱའོ། །ཕྱི་ནས་བོང་བུའི་གཅིན་དང༌། རྣམ་པར་སྣང་མཛད་དང་ལྷན་ཅིག་ཏུ་བརྫིས་ལ། བླུག་མ་ཡང་དག་པར་དགང་བར་བྱ་སྟེ། དེ་རུ་འཁོར་ལོ་བཅུག་ལ་རོ་བསྲེགས་པའི་མེ་ལ་བཞག་སྟེ། རྐང་པ་གཡོན་པས་མནན་ལ། གཤིན་རྗེའི་སྦྱོར་བས་ཡི་གེ་བཅུ་པའི་སྔགས་བཟླས་པ་བྱས་ན་ཞག་གཅིག་གིས་རེངས་པར་བྱེད་དོ། །འདི་ནི་ཕྱིས་མི་གྲུབ་པའི་རབ་ཏུ་སྦྱོར་བའོ། །སྔགས་པ་ཤིན་ཏུ་ཁྲོས་པས་རབ་ཏུ་སྦྱོར་བ་བྱའོ། །
གཞན་ཡང་དབྱེ་བའི་རབ་ཏུ་སྦྱོར་བ་ནི། གཤིན་རྗེ་འཁོར་ལོ་སྔོན་གྱི་ཆོ་གས་བྲིས་ལ། གནས་བདུན་གྱི་སས་མ་ཧེ་དང་རྟ་བྱས་ལ། དེ་གཉིས་གཅིག་གི་སྟེང་དུ་གཅིག་བཞག་ལ། དེ་གཉིས་ཀྱི་སྙིང་གར་འཁོར་ལོ་བཅུག་སྟེ། ནིམ་པའི་ཤིང་དྲུང་དུ་སྦའོ། །འཁོར་ལོ་ཡང་མ་ཧེ་དང་རྟའི་ཁྲག་གིས་བྲིས་ཏེ། ཤིན་ཏུ་མཉམ་པར་བཞག་པས་ཞག་གསུམ་གྱིས་འབྱེད་པར་བྱེད་དོ། །དེ་ནས་སྔགས་པས་བསྐྲད་པར་འདོད་ན། གནས་བདུན་གྱིས་ས་རྔ་མོའི་གཟུགས་བྱས་ལ། དེ་ཡི་རྒྱབ་ཏུ་ཡི་གེ་ཡཾ་ཡོངས་སུ་གྱུར་པའི་རླུང་གི་དཀྱིལ་འཁོར་ཟླ་བ་ཕྱེད་པའི་རྣམ་པ་དམིགས་ཏེ། དེའི་སྟེང་དུ་བསྒྲུབ་བྱ་དམིགས་ལ། དེ་ཡི་རྒྱབ་ཏུ་གཤིན་རྗེའི་གཟུགས་ལག་པས་དབྱུག་པ་འཛིན་པ་དམིགས་ལ། དེའི་དབྱུག་པས་བརྡེག་ཅིང་ཁ་ལྷོར་བལྟས་ནས་འཁྲིད་པར་རྣམ་པར་བསམ་པར་བྱའོ། །འཁོར་ལོ་དེ་དེའི་སྙིང་ཁར་གོང་དུ་གསུངས་པའི་ཆོ་གས། བསྒྲུབ་བྱའི་མིང་དང་སྤཻལ་བ་ཡང་དག་པར་བྲིས་ལ་བཅུག་ན་ཞག་བདུན་གྱིས་ཐེ་ཚོམ་མེད་པར་སྐྲོད་པར་འགྱུར་རོ། །དེ་ནས་གཞན་ཡང་རབ་ཏུ་སྦྱོར་བ་གསུངས་པ། ཉི་མའི་ཚེས་ལ། གཏུམ་པོའི་ལུས་ཚ་བའི་མར་ཁུས་བྱུགས་ལ། ནིམ་པའི་ཤིང་ལ་འཛེགས་ནས་དེར་བཞག་ལ། དེའི་ལུས་ཀྱི་མར་ཁུ་ཉ་ཕྱིས་ཀྱི་བཞུར་ལ་དེར་གནས་པ་བཟུང་ངོ༌། །མར་ཁུ་དེ་བླངས་ནས་ལྷ་ཆེན་པོའི་རྒྱལ་མཚན་སྔོན་པོའི་རས་སམ། དེ་མ་རྙེད་ན་
དཀར་པོ་བླངས་ལ། བསྲེག་པའི་བར་གྱི་དུ་བའི་དྲེག་པ་དེ་དང་མར་ཁུ་དེ་གཅིག་ཏུ་བྱས་ལ། བསྐྲད་པར་འདོད་པ་དེའི་ལྷམ་ལ་དེ་བསྐུ། དེའི་ལག་པ་དང་རྐང་པ་གཉིས་ལ་ཡང་བྱུགས་ན། སྐད་ཅིག་གིས་སྐྲོད་དོ། །དེ་ནས་གཞན་ཡང་རབ་ཏུ་སྦྱོར་བ་གསུངས་པ་ནི། དུར་ཁྲོད་ཀྱི་རས་སམ། གྲོ་གའི་ལོ་མ་ལ་རླུང་གི་དཀྱིལ་འཁོར་དུར་ཁྲོད་ཀྱི་གསོལ་བ་དང་བྱ་རོག་གི་ཁྲག་དང་བྱ་རོག་གི་རྐང་གི་སྙུ་གུས་བྲི་བར་བྱ་སྟེ། རླུང་གི་དཀྱིལ་འཁོར་གྱི་དབུས་སུ་བསྒྲུབ་བྱའི་མིང་དང་སྤེལ་ལ། གཏོར་མ་ཟ་བའི་མགྲིན་པར་བཅིངས་ལ། བྱ་རོག་བཟུང་ནས་མ་ཧེའི་གདོང་གི་སྦྱོར་བས་གནས་པས་ཁ་ལྷོར་བལྟས་ལ་བཏང་སྟེ། དེ་སྐད་ཅིག་གིས་བྱ་རོག་བཞིན་ས་ཀུན་ཏུ་སྐོར་རོ། །གཞན་ཡང་བསྐྲད་པ་ནི། ཚ་བའི་མར་ཁུས་བསྐུས་ལ། ནིམ་པའི་ཤིང་ལས་གཏོར་མ་ཟ་བའི་ཚད་རྐྱང་ལ། ཚད་དེ་བའི་ནགས་ཀྱི་ཤིང་གི་མེས་བསྲེགས་པའི་ཐལ་བ་དེ་བླངས་ལ། གང་གི་མགོར་བླུགས་པ་དེ་བསྐྲོད་པར་འགྱུར་རོ། །གཞན་ཡང་དབྱེ་བའི་རབ་ཏུ་སྦྱོར་བ་ནི། བྱ་རོག་དང༌། འུག་པའི་གཤོག་པ་དང། བྲམ་ཟེ་དང༌། གཏུམ་པོའི་སྐྲ་གཅིག་ཏུ་བྱས་ལ། ད་རུ་རའི་ཤིང་ལ་མེ་རབ་ཏུ་སྦར་ཏེ། དུ་བ་མེད་པའི་མེས་བསྲེགས་ཏེ། དེའི་ཐལ་བ་བླངས་ལ་ཡི་གེ་བཅུ་པའི་སྔགས་བཟླས་ནས། བུད་མེད་དང་སྐྱེས་པ་གཉིས་ཀྱི་
བར་དུ་ཐལ་བ་བཞག་ན། དེ་སྐད་ཅིག་གིས་དབྱེ་བར་འགྱུར་རོ། །དེ་ནས་དུར་ཁྲོད་ཀྱི་རས་བླངས་དེ་དུག་ལ་སོགས་པའི་རྫས་ཀྱི་སྦགས་པའི་བར་དུ་བཅུག་ལ། བསྒྲུབ་བྱའི་མིང་བྲིས་ལ་སྲེ་མོའི་སྤུ་དང་སྦྲུལ་གྱི་ལྤགས་པ་བླངས་ཏེ་བསྲེས་ནས་སྡོང་བུ་བྱས་ཏེ། གང་དང་གང་གི་ཁྱིམ་དུ་སྦར་བ་དེ་ཕན་ཚུན་འཐབ་པར་འགྱུར་རོ། །དེ་ནས་གསང་བར་འདོད་པས་ནི། བཤང་གཅི་ལས་གཟུགས་བརྙན་བྱས་ལ། དེ་ཡི་སྟེང་དུ་དུག་གི་ཕྱེ་མས་རབ་ཏུ་བྱུགས་ལ། དུར་ཁྲོད་ཀྱི་མེ་ལ་གཅེར་བུ་སྐྲ་བཤིག་པ་བྱས་ལ་ཁ་ལྷོར་བལྟས་ཏེ། མ་ཧེའི་གདོང་གི་སྦྱོར་བས་ནམ་ཕྱེད་ན་དེ་བཏུབས་ལ་དུར་ཁྲོད་ཀྱི་མེ་ལ་བསྲེག་གོ །གང་གི་མིང་དང་བཅས་པར་བྱས་ན་དེ་སྐད་ཅིག་གི་མཆིའོ། །རྡོ་རྗེ་འཇིགས་བྱེད་ཆེན་པོ་ཉིད་ཀྱིས་རབ་ཏུ་སྦྱོར་བ་འདི་གསུངས་སོ། །དེ་ནས་བསྐྲད་པར་འདོད་པས་རྒྱལ་མཚན་གྱི་རས་ལ་ལེ་ཚེ་བཅུ་དྲུག་པའི་འཁོར་ལོ། སྔོན་དུ་གསུངས་པའི་རྫས་དང་དུར་ཁྲོད་ཀྱི་སོལ་བས་གང་གིས་མིང་དང་བཅས་པ་བྲིས་ཏེ། ནིམ་པའི་ཤིང་ལ་རྒྱལ་མཚན་བཞག་ན་དེ་སྐྲོད་པར་འགྱུར་རོ། །དེ་ནས་རེངས་པར་འདོད་པའི་གཤིན་རྗེའི་འཁོར་ལོ་གཡམ་པའམ་རས་ལ། བ་བླ་དང་ཡུང་བས་གོང་གི་མིང་དང་བཅས་པ་ལེགས་པར་བྲིས་ནས་བཞག་ན་དེ་རེངས་པར་འགྱུར་རོ། །གལ་ཏེ་སྔགས་པས་དབང་དུ་བྱ་བར་འདོད་ན། གྲོག་མཁར་གྱིས་དང༌། གུར་གུམ་དང༌། གྷི་ཧཾ་དང་ལྷན་ཅིག་
ཏུ་བྱས་ཏེ། བསྒྲུབ་བྱ་ཕོའམ། གལ་ཏེ་མོའི་གཟུགས་བརྙན་ཚད་གསོར་བཅུ་དྲུག་པ་བྱས་ལ། འགི་ཧཾ་དང་སྲིན་ལག་གིས། ཁྲག་གིས་གྲོ་ག་ལ་གཤིན་རྗེའི་འཁོར་ལོ་བྲིས་ཏེ། དེའི་སྙིང་གར་བཅུག་ནས་རང་གི་ཁྱིམ་དུ་བཞག་ལ། མེ་ཏོག་དམར་པོ་དུས་གསུམ་དུ་དབུལ་བ་དང༌། ཁ་ནུབ་ཏུ་བལྟས་ལ་ཡི་གེ་བཅུ་པའི་སྔགས་བཟླས་པ་བྱས་ན། ཞག་བདུན་གྱི་བརྒྱ་བྱིན་ཡང་དབང་དུ་འགྱུར་བ་ཕྲ་མོའི་མི་ལྟ་ཅི་སྨོས། དེ་ནས་ཡང་དགུག་པར་འདོད་ན། དེ་ལ་ཐོད་པ་ལ་འཁོར་ལོ་འགི་ཧཾ་དང་སྲིན་ལག་གི་ཁྲག་གིས་བྲིས་ཏེ། སེང་ལྡེང་གི་མེ་ལ་བསྲེ་ཞིང་གང་ལ་བྱ་བའི་མིང་དང་བཅས་པར་བཟླས་ན། དེ་སྐད་ཅིག་གིས་རླུང་གི་ཤུགས་བཞིན་འགུག་པར་འགྱུར་རོ། །དེ་ནས་སྔགས་པས། སྨྱོ་བར་འདོད་ན། ད་རུ་རའི་འབྲས་བུ་བླངས་ལ་ཤ་ཆེན་དང་ལྷན་ཅིག་ཏུ། ཤིང་སྲིན་གྱི་ཟོས་པའི་ཕྱེ་མ་དང་བསྲེས་ནས་བཟའ་བ་དང་བཏུང་བ་ལ་སྦྱིན་ནོ། །སྔགས་ཀྱང་བཟླས་པར་བྱ་སྟེ། དེ་སྐད་ཅིག་གིས་སྨྱོ་བར་འགྱུར་ཞིང་ཞག་བདུན་གྱིས་འཆིའོ། །དེ་ནས་གཞན་ཡང་རབ་སྦྱོར་བ་གསུངས་པ་གཤིན་རྗེའི་སྔགས་དུར་ཁྲོད་ཀྱི་རས་ལ་དུལ་ལ་སོགས་པའི་རྫས་ཀྱིས་བྲིས་ཏེ་མར་མེ་ཆེན་པོ་དང༌། རྣམ་པར་སྣང་མཛད་ཀྱིས་གཟུགས་བརྙན་བྱས་ལ། དེའི་སྙིང་གར་འཁོར་ལོ་བཅུག་ནས་ཕའི་ནགས་སུ་སོང་ལ། རོ་བསྲེགས་པའི་མེ་ལ་མཚོན་རྣོན་པོས་
བཏུབས་ནས། རྣམ་པར་གཙིགས་པའི་སྦྱོར་བས་རྣལ་འབྱོར་པས་གནས་ལ། རྣམ་པར་སྣང་མཛད་ཀྱིས་ལུས་བྱུགས་ཏེ། ཁ་ལྷོར་བལྟས་ནས་བསྲེགས་ན་དེའི་མོད་ལ་འཆིའོ། །དེ་ནས་བྲལ་བའི་ཆོ་ག་འབྱུང་བ་ནི། བྱ་རོག་དང་འུག་པའི་རུས་པ་བླངས་ལ། དེ་གཉིས་ལ་ལྕགས་ཀྱུའི་ཚེར་མས་བསྒྲུབ་བྱའི་མིང་དང་ལྷན་ཅིག་ཏུ། ཡི་གེ་བཅུ་པའི་སྔགས་བྲིས་ལ་གཅིག་པུ་གནས་སུ་གནས་ཏེ། གང་གི་མིང་དང་བཅས་པར་བཟླས་ཤིང༌། དེ་གཅིག་ལ་གཅིག་བླུད་ན་འབྲལ་བར་འགྱུར་རོ། །གཤིན་རྗེའི་འཁོར་ལོ་གྲོ་གའི་འདབ་མ་ལ། བུད་མེད་དང་སྐྱེས་པའི་མིང་བྲིས་ནས་སྦལ་པའི་གསུས་པར་བཅུག་ལ། གང་གིས་མིང་དང་བཅས་པ་ཐེམ་པའི་འོག་ཏུ་སྦས་ན། དེའི་ཡན་ལག་མཚོན་གྱིས། གཏུབ་པར་འགྱུར་རོ། །དེ་ནས་བུ་མོ་རེངས་པའི་རབ་ཏུ་སྦྱོར་བ་ནི་གཤིན་རྗེའི་སྔགས་དུར་ཁྲོད་ཀྱི་རས་ལ་དུག་ལ་སོགས་པས་བྲིས་ཏེ། རོ་བསྲེགས་པའི་སོལ་བས་གཟུགས་བརྙན་མཐོ་གང་ཙམ་གྱི་ཚད་ཁ་གཙིགས་པར་བྱས་ཏེ། དེའི་སྙིང་གར་འཁོར་ལོ་བཅུག་ནས་རྐང་པ་གཡོན་པས་མནན་ལ། མ་ཧེའི་གདོང་གི་སྦྱོར་བས་ཆེ་གེ་མོ་བུ་མོ་རེངས་པར་གྱུར་ཅིག །ཅེས་ཡི་གེ་བཅུ་པའི་སྔགས་བཟླས་ན་རེངས་པར་འགྱུར་རོ། །འདིའི་ལས་རྣམས་ནི་གཞན་སུ་ལ་ཡང་སྨྲ་བར་མི་བྱའོ། །གལ་ཏེ་སྔགས་པ་རྨོངས་པའི་བདག་ཉིད་ཀྱིས་ཕྱེད་ན་དམྱལ་བར་ངེས་པར་ལྟུང་ངོ༌། །
དཀོན་མཆོག་གསུམ་ལ་གནོད་པ་བྱེད་པ་དང༌། བླ་མ་ལ་བརྙས་པ་དང༌། དམ་ཚིག་དང་བྲལ་བ་དང༌། སྔགས་དང་རྒྱུད་ལ་འཕྱ་བར་བྱེད་པ་དང༌། སེམས་ཅན་ལ་འཚེ་བ་འདི་རྣམས་ལ་ཕན་པའི་ཕྱིར། སྔགས་པས་སྙིང་རྗེས་གདུང་བའི་སེམས་ཀྱིས་གནོད་པས་སྦྱོར་བ་རབ་ཏུ་བྱའོ། །གལ་ཏེ་གཞན་ལ་བྱས་ན་དམ་ཚིག་ཉམས་ནས་ཚབ་ཆེན་པོར་འགྲོ་བའོ། །རྒྱུད་གཞན་ལས་ཀྱང་གསུངས་པ། སློབ་དཔོན་ལ་ནི་སྣོམ་བྱེད་དང༌། །ཐེག་པ་ཆེན་པོ་སྐུར་བ་དང༌། །སྔགས་རྒྱུད་རབ་སྦྱོར་ཡེ་ཤེས་ལ། །འཕྱ་བར་བྱེད་པའི་མི་གང་ནི། །དེ་ནི་འབད་པས་གསད་པར་བྱ། །ཡང་ན་གནས་ནས་གཡོ་བར་བྱ། །རྣལ་འབྱོར་སྙིང་རྗེ་མེད་པ་ཡིས། །གཞན་ལ་རུང་རུང་བྱས་ན་ནི། དེ་ལ་དེ་བཞིན་ལས་དེ་ནི། །ཕྱིར་སྒྲོག་པར་ནི་འབྱུང་བར་འགྱུར། །ཅིའི་ཕྱིར་སེམས་ཅན་མཐོ་བ་བརྩམ་ཕྱིར། །རྣལ་འབྱོར་པ་ནི་འདི་ལའོ། །འདི་ནི་འཇམ་དཔལ་མཆོག་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་ལས་ཐམས་ཅད་གྲུབ་པའི་རྟོག་པ་སྟེ་གཉིས་པའོ། །དེ་ནས་ཇི་ལྟ་བའི་ཆོ་གས་སྔགས་བཏུ་བ་རབ་ཏུ་གསུངས་ཏེ། རབ་ཏུ་གཙང་བའི་གནས་སུ། །སྔགས་པའི་གནས་ལ་སྔགས་བཏུ་བར་བྱའོ། །ཇི་ལྟར་དྲུག་པའི་དང་པོ་དང༌། །ལྔ་པ་ལ་ཡང་ལྔ་པ་དང༌། །དྲུག་པ་ཡི་ནི་གཉིས་པ་ལ། །དབྱངས་ཡིག་
གཉིས་པ་དང་ལྡན་པ། །གཉིས་པ་ཡི་ནི་གསུམ་པ་ལ། །ཡང་ནི་དབྱངས་ཡིག་གཉིས་པ་ལྡན། །དྲུག་པ་ཡི་ཡང་དང་པོ་དང༌། །ཡང་ནི་དྲུག་པའི་དང་པོ་སྦྱིན། །དབྱངས་ཡིག་བཅུ་གསུམ་དང་ལྡན་པ། །ལྔ་པ་ཡི་ཡང་ལྔ་པ་ལ། །དབྱངས་ཡིག་བཅུ་གཅིག་དང་ལྡན་པ། །དྲུག་པ་ཡི་ཡང་དང་པོ་དང༌། །ཡང་ནི་དྲུག་པའི་དང་པོ་སྦྱིན། །ལྔ་པ་ཡི་ཡང་ལྔ་པ་ལ། །བཅུ་དང་གཅིག་གིས་མནན་ལྡན་པ། །བཞི་པ་ཡི་ནི་གསུམ་པ་ལ། །བཅུ་གསུམ་པ་ཡི་མཉམ་མནན་པ། །དྲུག་པ་ཡི་ཡང་གཉིས་པ་ལ། །དབྱངས་ཡིག་ལྔ་པ་དང་ལྡན་པ། །གསུམ་པ་ཡི་ནི་ལྔ་པ་དང༌། །རླུང་གི་ས་བོན་དེ་ནས་སྦྱིན། །དབྱངས་ཡིག་བཅུ་གསུམ་ཡང་དག་ལྡན། །བཞི་པ་ཡི་ནི་གསུམ་པ་དང༌། །དེ་ནི་རླུང་གིས་ས་བོན་སྦྱིན། །དྲུག་པ་ཡི་ནི་དང་པོ་དང༌། །བཞི་པ་ཡི་ནི་གསུམ་པ་དང༌། །དེ་ནས་རླུང་གི་ས་བོན་ནོ། །དབྱངས་ཡིག་བཅུ་གསུམ་པ་དང་ལྡན། །བཞི་པ་ཡི་ནི་ལྔ་པ་ལ། །དབྱངས་ཡིག་གསུམ་པ་དང་ལྡན་པ། །དེ་ནས་མེ་ཡིས་ས་བོན་བྱིན། །རླུང་གི་ས་བོན་དེ་བཞིན་ནོ། །དེ་ནས་ཡི་གེ་ཐ་མ་སྦྱིན། །དབྱངས་ཡིག་བཅུ་གཅིག་པ་དང་ལྡན། །རླུང་གི་ས་བོན་དེ་བཞིན་མཆོག །དྲུག་པ་ཡི་ནི་དང་པོ་དང༌། །དེ་ནས་ཡི་གེ་ཐ་མ་སྦྱིན། །དབྱངས་ཡིག་བཅུ་གཅིག་པ་དང་ལྡན། །ཡང་ནི་རླུང་གི་ས་བོན་དང། །གཉིས་པ་ཡི་ནི་དང་པོ་དང༌། །གཉིས་
པའི་གཉིས་པ་དང་ལྡན་པ། །བཞི་པ་ཡི་ནི་ལྔ་པ་ལས། །དབྱངས་ཡིག་གསུམ་པ་དང་ལྡན་པ། །དེ་ནས་མེ་ཡི་ས་བོན་དང༌། །དབྱངས་ཡིག་གཉིས་པར་ལྡན་པ་དང༌། །ལྔ་པ་ཡི་ནི་ལྔ་པ་དང༌། །དེ་ནས་རླུང་གིས་ས་བོན་སྦྱིན། །ཐོག་མར་རྣམ་པར་སྣང་མཛད་བྱིན། །མཆོག་གི་དབང་ཕྱུག་དང་སྦྱར་བ། །སྟེང་དུ་ས་བོན་སྟོང་པས་བརྒྱན། །ལྔ་པ་ཡི་ནི་གཉིས་པ་དང༌། །གསུམ་པ་ཡི་ནི་དང་པོ་ནི། །མཁས་པས་གཉིས་སུ་བརྗོད་པར་བྱ། །འདི་ནི་དཔལ་ལྡན་འཇམ་པའི་མཆོག། འཇིགས་བྱེད་ཆེན་པོའི་རྒྱུད་འཁོར་ལོ། །མ་ཧེའི་གདོང་ཅན་རྩ་སྔགས་ཏེ། །འབུམ་བཟླས་པས་ནི་ལས་ཀུན་བྱེད། །འདི་ནི་སྔགས་ཀྱི་རྒྱལ་པོ་སྟེ། །མ་བྱུང་འབྱུང་བར་མི་འགྱུར་རོ། །བདུན་པ་ཡི་ནི་བཞི་པ་ལ། དབྱངས་ཡིག་བཞི་པ་དང་ལྡན་པ། འོག་ཏུ་མེ་ཡིས་ས་བོན་སྦྱིན། །དེ་ནས་མངའ་བདག་བཅུ་དྲུག་མཐའ། །བདུན་པ་ཡི་ནི་གཉིས་པ་ལ། །དབྱངས་ཡིག་བཞི་པ་དང་ལྡན་པ། །གསུམ་པ་ཡི་ནི་དང་པོ་ལ། །མེ་ཡི་ས་བོན་འོག་ཏུ་གདགས། །མངའ་བདག་བཅུ་དྲུག་མཐའ་མ་སྟེ། །དྲུག་པ་ཡི་ནི་བཞི་པ་ལ། །དབྱངས་ཡིག་གསུམ་པ་དང་ལྡན་པའོ། །དང་པོ་ཡི་ནི་དང་པོ་ལ། །དབྱངས་ཡིག་
གསུམ་པ་དང་ལྡན་ཏེ། །འོག་ཏུ་མེ་ཡིས་ས་བོན་སྦྱིན། །བཞི་པ་ཡི་ནི་དང་པོ་ལ། །དབྱངས་ཡིག་གཉིས་པ་དང་ལྡན་པའོ། །བཞི་པ་ཡི་ནི་ལྔ་པ་ནི། །མཁས་པ་ཡིས་ནི་ལན་གཉིས་བརྗོད། །ཐོག་མར་རྣམ་པར་སྣང་མཛད་སྦྱིན། །སྡེ་ཚན་བདུན་གྱི་ས་བོན་ལ། །དབྱངས་ཡིག་དྲུག་པ་དང་ལྡན་པ། །སྤྱི་བོ་རུ་ནི་ཐིག་ལེས་བརྒྱན། །ལྔ་པ་ཡི་ནི་གཉིས་པ་དང༌། །གསུམ་པ་ཡི་ནི་དང་པོའོ། །འདི་ནི་སྔགས་ཀྱི་རྒྱལ་པོ་སྟེ། །མ་ཧེའི་གདོང་ཅན་སྦྱོར་བ་ཡིས། །ཐམས་ཅད་ལས་ནི་བྱེད་པའོ། །ལས་ཀྱི་སྔགས་སུ་གྲགས་པ་སྟེ། །གསུམ་འབུམ་བཟླས་ནས་ལས་ཀུན་བྱེད། །དྲུག་པ་ཡི་ནི་དང་པོ་དང༌། །ལྔ་པ་ཡི་ཡང་ལྔ་པ་ལ། །དབྱངས་ཡིག་གཉིས་པ་དང་སྦྱར་བ། །བཞི་པའི་ལྔ་པས་བརྟེན་པར་བྱ། །བཞི་པའི་དང་པོ་འོག་ཏུ་བཞིག །དང་པོ་ཡི་ནི་དང་པོ་དང༌། །ཐོག་མར་རྣམ་པར་སྣང་མཛད་སྦྱིན། །སྡེ་ཚན་བདུན་གྱི་ཐ་མ་ལ། །དབྱངས་ཡིག་དྲུག་པ་དང་ལྡན་པར། །དྲན་པ་དེ་བཞིན་མཐར་སྦྱིན་ནོ། །སྟོང་པའི་ལྷ་ཡི་མཉམ་མནན་པ། །ལྔ་པ་ཡི་ནི་གཉིས་པ་དང༌། །གསུམ་པ་ཡི་ནི་དང་པོའོ། །འདི་ནི་མ་ཧེའི་གདོང་པ་ཡི། །སྙིང་པོའི་སྔགས་སུ་རབ་ཏུ་གྲགས། །ཡི་གེ་རེ་རེ་འབུམ་བཟླས་པས། །འཇིག་རྟེན་གསུམ་གྱི་ལས་ནི་གང༌། །ཅི་ཡང་རུང་བ་ཐམས་ཅད་བྱེད། །སྔགས་བཏུ་བའི་ཆོ་གའི་སྐབས་འདིར་མཆོད་པར་བྱའོ། །འདི་ནི་འཇམ་དཔལ་མཆོག་དཔལ་རྡོ་རྗེ་འཇིགས་བྱེད་ཆེན་
པོའི་རྒྱུད་ལས་སྔགས་བཏུ་བའི་རྟོག་པ་སྟེ་གསུམ་པའོ། །དེ་ནས་རྡོ་རྗེ་འཇིགས་བྱེད་ཀྱི་སྒྲུབ་པ་ཆོས་ཐམས་ཅད་བདག་མེད་པ་སྔོན་དུ་སོང་བས་ལྷའི་དམིགས་པ་ཡང་དག་པར་བཤད་པར་བྱ་སྟེ། དང་པོ་རང་བཞིན་གྱིས་དག་པའི་སྔགས་བརྗོད་པར་བྱའོ། །ཆོས་ཐམས་ཅད་བདག་མེད་པའི་ངོ་བོར་བྱས་ནས་ནམ་མཁའི་དཀྱིལ་དུ་ཡཾ་གྱི་རྣམ་པ་ལས་གྲུབ་པའི་རླུང་གི་དཀྱིལ་འཁོར་མདོག་དུ་བའི་རྣམ་པར་བསམ་མོ། །དེའི་སྟེང་དུ་དང་པོའི་དབྱངས་ཡིག་ལས་གྱུར་པའི་ཟླ་བའི་དཀྱིལ་འཁོར་དམིགས་ཏེ། དེའི་སྟེང་དུ་དྷིཿའི་རྣམ་པ་ལས་འཇམ་དཔལ་གཞོན་ནུའི་གཟུགས་སུ་གྱུར་པར་བྱའོ། །དེའི་སྙིང་གར་ཨའི་རྣམ་པ་ལས་གྲུབ་པའི་ཉི་མའི་དཀྱིལ་འཁོར་བསྒོམས་ཏེ། ཉི་མའི་དཀྱིལ་འཁོར་དེ་ལས་འོད་ཟེར་འཕྲོས་པས་ཕྱོགས་བཅུ་མཐའ་ཡས་མུ་མེད་པ་ན་བཞུགས་པའི་དེ་བཞིན་གཤེགས་པ་རྣམས་དང༌། བྱང་ཆུབ་སེམས་དཔའ་དང༌། རིག་པའི་ལྷ་མོ་དང༌། ཁྲོ་བོ་ལ་སོགས་པ་ཤིན་ཏུ་བསྐུལ་དེ། ཡང་འོངས་ནས་ཉི་མའི་དཀྱིལ་འཁོར་ལ་ཞུགས་པར་བསམ་མོ། །དེ་ཡིས་འཇམ་དཔལ་དང་དེ་བཞིན་གཤེགས་པ་ལ་སོགས་པ་དེ་རྣམས་གཅིག་ཏུ་གྱུར་ནས་ཉི་མའི་དཀྱིལ་འཁོར་དུ་བསམ་པར་བྱའོ། །འོད་ཟེར་འབར་བའི་རྣམ་པས་དཔག་ཚད་སྟོང་ཕྲག་བརྒྱར་ཁྱབ་པར་བསམ་པར་བྱའོ། །དེའི་སྟེང་དུ་ཧཱུཾ་མདོག་ནག་པོའི་འོད་ཟེར་ལྔ་དང་ཡང་དག་པར་ལྡན་པར་
བསམ། ཧཱུཾ་དེ་ལས་འོད་ཟེར་གྱི་རྣམ་པ་འཕྲོས་པས་སྔོན་དུ་གསུངས་པ་བཞིན་དུ་ཡང་ཞུགས་ཏེ། ཡི་གེ་དེ་ལས་རྡོ་རྗེ་ཆེན་པོ་རྣམ་པར་གདེངས་པ་ཁ་དོག་ནག་པོ་འོད་ཟེར་ལྔ་དང་ལྡན་པ། རྣམ་པར་དམིགས་པར་བྱ་སྟེ། རྡོ་རྗེ་དེ་ལས་ཕྲ་མོའི་རྣམ་པའི་སངས་རྒྱས་དང༌། བྱང་ཆུབ་སེམས་དཔའ་དང༌། ཁྲོ་བོ་དང༌། རིག་པའི་ལྷ་མོས་ནམ་མཁའི་དབུས་ཏིལ་གྱི་གོང་བུ་ལྟར་གང་ཉི་མ་ལ་གནས་པ་རྣམ་པར་བསམ་པར་བྱའོ། །དེ་ནས་སངས་རྒྱས་ལ་སོགས་པ་རྣམས་ཀྱིས་སེམས་ཅན་ཡོངས་སུ་སྨིན་པར་བཏུལ་ནས་བྱང་ཆུབ་ལ་རབ་ཏུ་བཀོད་དེ། དེ་ཡང་དེ་དང་ལྷན་ཅིག་ཏུ་བསྡུས་ནས་རྡོ་རྗེའི་གཟུགས་བརྙན་ལ་རབ་ཏུ་ཞུགས་པར་བསམ་མོ། །རྡོ་རྗེའི་གཟུགས་བརྙན་དེ་ཉིད་ཞལ་དགུ་པ་མ་ཧེའི་གཟུགས་ཅན། འཇིགས་པའི་དུས་ཀྱི་མེ་ལྟར་འབར་བ། རྡོ་རྗེ་འཇིགས་བྱེད་ཆེན་པོ་ཁམས་གསུམ་ཟ་བར་ནུས་པ། ཞལ་གཙིགས་པ་ཧ་ཧ་ཞེས་ལྗགས་འགྲིལ་བ། རྣམ་པར་གཙིགས་པའི་ཁྲོ་གཉེར་འཇིགས་པ། ཁྲོ་གཉེར་གྱི་འགྲམ་ན་སྨིན་མ་དང་སྤྱན་འཇིགས་པ་ཆེན་པོའི་དུས་ལྟར་འཕྲོ་བ། སྒྲ་སྒྲོག་པ། མིའི་ཁྲག་དང༌། ཚིལ་དང༌། ཞག་དང༌། རྐང་ཟ་བ་འཇིག་རྟེན་དང་འཇིག་རྟེན་ལས་འདས་པའི་ལྷ་ལ་སོགས་པ་ལ་སྡིགས་མཛུབ་བྱེད་པ། བརྒྱ་བྱིན་དང༌། ཚངས་པ་དང༌། དབང་ཕྱུག་ཆེན་པོ་དང༌། ཁྱབ་འཇུག་དང༌། གཞོན་ནུ་རྣམས་ཁ་སྦུབ་ཏུ་བྱས་ནས་ཞབས་ཀྱི་འོག་ཏུ་མནན་པ། འཇིགས་
སུ་རུང་བའི་ཐོད་པའི་ཐོད་བྱས་པ། ཐོད་པ་བརྩིགས་པའི་རྩེ་མོ་འཇིགས་པ་ཆེན་པོ་ཅན། ཕེཾ་ཞེས་ཐོད་པའི་འཕྱང་འཕྲུལ་གྱིས་བརྒྱན་པ། ཞབས་བཅུ་དྲུག་པ། གཅེར་བུའི་གཟུགས་མཚན་མ་གྱེན་དུ་འགྲེང་བ། གཡོན་བརྐྱང་བ། གསུས་པ་ཆེ་བ། སྐྲ་གྱེན་དུ་བརྫེས་པ། འཇིགས་པ་ཆེན་པོར་བྱེད་པ། ཕཊ་ཅེས་སྒྲ་སྒྲོག་པ། ཕྱག་སུམ་ཅུ་རྩ་བཞི་དང་ལྡན་པ། གླང་པོ་ཆེའི་ལྤགས་པ་རློན་པ་འཛིན་པ། དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་རྣམ་པར་བསམ་པར་བྱ་སྟེ། དེ་ལྟར་ཤིན་ཏུ་བསམ་པ་བརྟན་པས་བྱས་ཏེ། དེ་ཁོ་ན་ཉིད་ཀྱི་སྦྱོར་བ་ལ་ཤིན་ཏུ་མཉམ་པར་བཞག་པས་སྔགས་པས་རྟག་ཏུ་བསྒོམ་པར་བྱ་སྟེ། གཡས་དང་པོ་ན་རྡོ་རྗེ་གྲི་གུག་གཉིས་པ་ན། མདུང་རྩེ་གཅིག་པ། གསུམ་པ་ན་གཏུན་ཤིང༌། བཞི་པ་ན་ཆུ་གྲི་དང༌། ལྔ་པ་ན་རྡོ་རྗེ་རྩེ་གཅིག་པ། དྲུག་པ་ན་སྟ་རེ། བདུན་པ་ན་མདུང༌། བརྒྱད་པ་ན་མདའ། དགུ་པ་ན་ལྕགས་ཀྱུ། བཅུ་པ་ན་དབྱུག་ཐོ། བཅུ་གཅིག་པ་ན་ཁ་ཊཾ་ག །བཅུ་གཉིས་པ་ན་འཁོར་ལོ། །བཅུ་གསུམ་པ་ན་རྡོ་རྗེ། བཅུ་བཞི་པ་ན་རྡོ་རྗེ་ཐོ་བ། བཅོ་ལྔ་པ་ན་རལ་གྲི། བཅུ་དྲུག་པ་ན་ཅང་ཏེའུའོ། །གཡོན་པའི་ཕྱག་དང་པོ་ན་ཐོད་པ། གཉིས་པ་ན་མགོ་བོ། གསུམ་པ་ན་ཕུབ། བཞི་པ་ན་རྐང་པ། ལྔ་པ་ན་ཞགས་
པ། དྲུག་པ་ན་གཞུ། བདུན་པ་ན་རྒྱུ་མ། བརྒྱད་པ་ན་དྲིལ་བུ། དགུ་པ་ན་ལག་པ། བཅུ་པ་ན་དུར་ཁྲོད་ཀྱི་རས། བཅུ་གཅིག་པ་ན་སྐྱེས་བུ་གསལ་ཤིང་ལ་བཙུགས་པ། བཅུ་གཉིས་པ་ན་མེ་ཐབ། བཅུ་གསུམ་པ་ན་ཐོད་ཚལ། བཅུ་བཞི་པ་ན་སྡིགས་མཛུབ། བཅོ་ལྔ་པ་ན་འཕན་རྩེ་གསུམ་པ། བཅུ་དྲུག་པ་ན་རླུང་གིས་འཕྱར་བའི་རས། ཕྱག་གཉིས་ཀྱིས་གླང་པོ་ཆེའི་ལྤགས་པ་རློན་པ་འཛིན་པའོ། །ཞབས་གཡས་ཀྱི་དང་པོས་མི། གཉིས་པས་མ་ཧེ། །གསུམ་པས་གླང༌། བཞི་པས་བོང་བུ། ལྔ་པས་རྔ་མོང༌། དྲུག་པས་ཁྱི། བདུན་པས་ལུག །བརྒྱད་པས་ལྕེ་སྤྱང༌། ཞབས་གཡས་པས་འདི་དག་མནན་པའོ། །ཞབས་གཡོན་པས་དང་པོ་བྱ་རྒོད། གཉིས་པས་འུག་པ། གསུམ་པས་བྱ་རོག །བཞི་པས་ནེ་ཙོ། ལྔ་པས་ཁྲ། དྲུག་པར་ཁྱུང་ཆེན། བདུན་པས་རེ་སྐེག །བརྒྱད་པས་བཞད། གཡོན་པས་འདི་དག་མནན་པའོ། །དཔལ་རྡོ་རྗེ་འཇིགས་བྱེད་ཆེན་པོའི་ཞལ་ནི་རབ་ཏུ་གནག་པ། མ་ཧེའི་རྣམ་པར་ཤིན་ཏུ་ཁྲོས་པ་ཅན། རྭའི་གཡས་སུ་ཞལ་གསུམ་པ། དང་པོ་སྔོན་པོ། གཉིས་པ་དམར་པོ། གསུམ་པ་སེར་པོ་སྟེ། མངའ་བདག་གི་ཞལ་གསུམ་ཤིན་ཏུ་ཁྲོས་པའོ། །རྭའི་གཡོན་པར་ཞལ་གསུམ་དཀར་པོ་དང། དུད་ཁ་དང༌། ནག་པོ། རབ་ཏུ་ཁྲོས་པ་གཙིགས་པའི་ཞལ་
བསམ་པར་བྱའོ། །རྭ་གཉིས་ཀྱི་བར་དུ་དབུས་ཀྱི་ཞལ་དམར་པོ་རབ་ཏུ་འཇིགས་པ། ཞལ་ནས་ཁྲག་འཛག་པར་བསམ་པར་བྱའོ། །སྟེང་དུ་འཇམ་དཔལ་གྱི་ཞལ་ཅུང་ཟད་སེར་བ་ཡིད་ཙམ་ཁྲོ་བ་གཞོན་ནུའི་བརྒྱན་གྱིས་བརྒྱན་པ། སྤྱི་བོར་རལ་པ་ལྔ་དང་ལྡན་པ་རྣམ་པར་བསམས་ཏེ། ཞལ་ཐམས་ཅད་སྤྱན་གསུམ་པར་བསྒོམས་ཏེ། འདི་ལྟར་བདག་ཉིད་རྩེ་གཅིག་ཏུ་དམིགས་སོ། །དེ་ལྟར་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་དེ་བདག་ཉིད་ཡིན་པར་བསྒོམས་ནས། ཤིན་ཏུ་མཉམ་པར་བཞག་པས་དཔའ་བོའི་གནས་ལ་གནས་པའི་རྣལ་འབྱོར་པས། ཕྱི་ནས་སྔགས་བཟླས་པར་བྱ་སྟེ། བཟླས་པའི་དུས་སུ་རང་གིས་སྙིང་གར་ཉི་མའི་དཀྱིལ་འཁོར་དེའི་སྟེང་དུ་རང་གིས་སྔགས་ཀྱིས་རྣམ་པ་བསམ་ཏེ་འབར་བ་དང༌། ཕྱི་ནས་མ་ཡེངས་པའི་ཡིད་ཀྱིས་བཟླས་པ་བྱའོ། །འདི་སྦྱོར་ལ་གནས་སྔགས་པ་ཡིས། །རྟག་ཏུ་འཇིགས་མེད་ལས་ཀུན་བྱ། །དུར་ཁྲོད་གནས་ལ་བསྒོམ་བྱ་ཞིང༌། །རྟག་ཏུ་བདུད་རྩི་ལྔ་རྣམས་བཟའ། །འདི་ཡི་སྒྲུབ་ལས་གྲུབ་གཞན་མིན། །གཞན་ཡང་མར་མེ་ཆེ་བཟའ་ཞིང༌། །མཚན་མོ་རྒྱུ་བའི་རྣལ་འབྱོར་པས། །གསུམ་འབུམ་རྩ་བའི་སྔགས་བཟླས་བྱ། །འདི་ཟློས་པ་ཡི་སྔགས་པ་ཡིས། །ཐམས་ཅད་ལས་ནི་བྱེད་པར་གྱུར། །འདི་འཇམ་དཔལ་མཆོག་རྡོ་རྗེ་
འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་སྒོམ་པའི་རྟོག་པ་སྟེ་བཞི་པའོ། །དེ་ནས་དཔལ་རྡོ་རྗེ་འཇིགས་བྱེད་ཆེན་པོའི་གསང་བའི་བྲིས་སྐུའི་མཆོག་རབ་ཏུ་བཤད་པ། དཔའ་བོའི་རས་སམ། ཞིང་ལ་བཀལ་བའི་རས་སམ། མེ་ཏོག་ཅན་གྱི་རས་སམ། རབ་ཏུ་འཛག་པའི་རས་སམ། བུ་བཙས་པའི་རས་སམ། དེ་མ་རྙེད་ན་རས་གཞན་གང་ཡང་རུང་བ་བླངས་ལ། འདིར་དངོས་པོ་ཀུན་ཀྱིས་མོས་པ་རྣམ་པར་རྟོག་པ་མེད་པ་མི་ཁྲོག །གཙང་བ། མཁས་པ། གཞུངས་པ། རང་བ་དང་ལྡན་པ། བརྩེ་བ་ཅན། སྲིད་པ་དང་བྲལ་བ། འདི་ལྟར་ཡོན་ཏན་དང་ལྡན་པ། ཤིན་ཏུ་རི་མོ་མཁས་པའི་ལག་པར་བྲི་བར་བྱའོ། །གལ་ཏེ་དངོས་གྲུབ་འདོད་པས་དཔའ་བོའི་ཡོན་སྦྱིན་ནོ། །དེ་ལ་ཆོ་ག་ནི། གསང་བའི་གནས་སུ་གནས་ལ་ཤིན་ཏུ་མཉམ་པར་བཞག་པས་བྲི་བར་བྱ་སྟེ། རི་མོ་མཁན་དང༌། སྒྲུབ་པ་པོས་མཐོང་བ་ལས་འཇིག་རྟེན་པ་གཞན་གྱིས་མི་མཐོང་བར་བྲི་བར་བྱ་སྟེ། ཞབས་བཅུ་དྲུག་པ། ཕྱག་སུམ་ཅུ་རྩ་བཞི་པ། ཞལ་དགུ་པ། གཅེར་བུ་ཁ་དོག་ནག་པོ། གཡོན་བརྐྱང་བ། འཇིགས་པ་ཆེན་པོ་ཡང་འཇིགས་པར་བྱེད་པའི་རྣམ་པ་ཅན། མཚན་མ་གྱེན་དུ་འགྲེང་བའི་རྣམ་པ་ཅན་གྱི་ཐད་ཀ་བྲི་བར་བྱའོ། །ཞལ་དང་པོ་མ་ཧེའོ། །རྭའི་གཡས་སུ་
ཞལ་གསུམ་སྟེ། སྔོན་པོ་དང༌། དམར་པོ་དང༌། སེར་པོ་ཤིན་ཏུ་ཁྲོས་པ་བྲི་བར་བྱའོ། །གཡོན་དུ་དཀར་པོ་དང༌། དུད་ཁ་དང༌། ནག་པོའོ། །དེ་གཉིས་ཀྱི་དབུས་སུ་རབ་ཏུ་དམར་བ་བྲི་བར་བྱ། དེའི་སྟེང་དུ་འཇམ་དཔལ་གྱི་ཞལ་སེར་པོ་ཅུང་ཟད་ཁྲོ་བ་བྲི་བར་བྱའོ། །ཕྱག་གཡས་པ་ན་རྡོ་རྗེ་གྲི་གུག་དང༌། མཚོན་རྩེ་གཅིག་པ་དང༌། གཏུན་ཤིང་དང༌། ཆུ་གྲི་དང༌། རྡོ་རྗེ་རྩེ་གཅིག་པ་དང༌། སྟ་རེ་དང། མདུང་དང༌། མདའ་དང༌། ལྕགས་ཀྱུ་དང། དབྱུག་ཏོ་དང༌། ཁ་ཊྭཱཾ་ག་དང། འཁོར་ལོ་དང༌། རྡོ་རྗེ་དང༌། རྡོ་རྗེ་ཐོ་བ་དང༌། རལ་གྲི་དང༌། ཅང་ཏེའུའོ། །ཕྱག་གཡོན་པ་ཐོད་པ་དང། མགོ་བོ་དང༌། ཕུབ་དང་རྐང་པ་དང༌། ཞགས་པ་དང༌། གཞུ་དང༌། རྒྱུ་མ་དང༌། དྲིལ་བུ་དང༌། ལག་པ་དང༌། དུར་ཁྲོད་ཀྱི་རས་དང༌། སྐྱེས་བུ་གསལ་ཤིང་ལ་བཙུགས་པ་དང༌། མེ་ཐབ་དང༌། ཐོད་ཚལ་དང༌། སྡིགས་མཛུབ་དང༌། འཕན་རྩེ་གསུམ་པ་དང༌། རླུང་གིས་བསྐྱོད་པའི་རས་སོ། །ཕྱག་གཉིས་ཀྱིས་གླང་པོ་ཆེའི་ལྤགས་པ་རློན་པ་འཛིན་པ་བྲིའོ། །ཞབས་གཡས་པས་མི་དང༌། མ་ཧེ་དང༌། གླང་དང༌། བོང་བུ་དང༌། རྔ་མོང་དང༌། ཁྱི་དང། ལུག་དང༌། ཅེ་སྤྱང་རྣམས་སོ། །ཞབས་གཡོན་པས་བྱ་རྒོད་དང༌། འུག་པ་དང༌། བྱ་རོག་དང༌།
ནེ་ཙོ་དང༌། ཁྲ་དང༌། ཁྱུང་ཆེན་དང༌། རི་སྐེག་དང༌། བཞད་རྣམས་སོ། །འདི་ལྟ་བུར་འདུག་པའི་རྡོ་རྗེ་འཇིགས་བྱེད་ཆེན་པོ་བྲི་བར་བྱའོ། །དེའི་ཕྱི་རོལ་ཏུ་དུར་ཁྲོད་ཆེན་པོ་ཡང་བྲི་སྟེ། འཇིགས་པ་ཆེན་པོར་བྱེད་པའི་གནོད་སྦྱིན་དང༌། སྲིན་པོ་དང༌། ཞིང་སྐྱོང་དང༌། རོ་ལངས་དང་ལྡན་པ། སྐྱེས་བུ་མདུང་རྩེ་བཙུགས་པའི་གཟུགས་དེར་བསྟན་པར་བྱ། ནྱ་གྲོ་ཏའི་ཤིང་གི་སྟེང་ནས་སྐྱེས་བུ་འཕྱང་བ་བསྟན་པར་བྱ། སྐྱེས་བུ་བསྲེགས་པ་ཡང་བྲི། མདུང་གིས་ཕུག་པ་ཡང་བྲི། སྣ་ཚོགས་པའི་བྱ་རྒོད་དང༌། བྱ་རོག་དང༌། ཁྱི་དང༌། ཅེ་སྤྱང་ཧ་ཧ་འབྱིན་པ་བྲི། སྒྲུབ་པ་པོ་རྣམས་ཀྱང་བྲི་སྟེ། བཅོམ་ལྡན་འདས་ལ་རྩེ་གཅིག་ཏུ་ལྟ་བ་གཅེར་བུ་སྐྲ་བཤིག་པ། ཕྱག་རྒྱ་ལྔས་བརྒྱན་པ། ཅང་ཏེའུ་དང༌། ཐོད་པ་དང༌། ཁ་ཊྭཾ་ག་འཛིན་པ། ཐོད་པས་སྤྱི་བོར་བརྒྱན་པ། རྒོད་ཅིང་དུར་ཁྲོད་དེར་འཇུག་པ་བྲིའོ། །འདི་ནི་གསངབའི་བྲིས་སྐུ་སྟེ། གནས་གཅིག་ཏུ་ལེགས་པར་བཞག་ལ། ཤ་ཆེན་གྱིས་སྤཽས་དབུལ། དེའི་མདུན་དུ་རུས་ཆེན་གྱི་འཕྲེང་བས་བཟླས་པ་བྱ། སྔགས་པས་མཉམ་པར་བཞག་པས་དུས་གསུམ་དུ་འབད་པས་བྲིས་སྐུ་བསྲུང་ངོ༌། །གཞན་ཡང་གང་དུ་ཡང་མི་བཞག་གོ །གཞན་གང་གི་མདུན་དུ་ཡང་མི་དགྲམ་མོ། །ལྡག་པ་དང༌། བཏུང་བ་དང། བཟའ་བ་དང༌། སྟོན་མོ་ནི་ཤ་ཆེན་རྟག་ཏུ་
མཚན་མོ་བཟའོ། །གལ་ཏེ་མཆོག་གི་དངོས་གྲུབ་འདོད་ན། དུས་གསུམ་དུ་རྣམ་པར་སྣང་མཛད་དང༌། ཁྲག་གིས་སྤོས་བྲིས་སྐུའི་མདུན་དུ་དབུལ་ལོ། །འདི་ནི་འཇམ་དཔལ་མཆོག་དཔལ་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་བྲིས་སྐུའི་ཆོ་གའི་རྟོག་པ་སྟེ་ལྔ་པའོ། །དེ་ནས་སྦྱིན་སྲེག་གི་ལས་ཀྱི་ཆོ་ག་གསུངས་པ། ཇི་ལྟར་སྔོན་གྱི་རིམ་པ་སྟེ། དང་པོ་རེ་ཞིག་སྔགས་པས་ཕའི་ནགས་སུ་ཕྱིན་ལ། མཚན་ཕྱེད་ན་སྦྱིན་སྲེག་གི་ལས་ཀུན་བྱ་སྟེ། གོང་དུ་གསུངས་པའི་ལྷའི་སྦྱོར་བ་ལ་གནས་པས་ལས་ཐམས་ཅད་བྱའོ། །དེ་ལ་ལས་ནི་འདི་རྣམས་ཡིན་ཏེ། གལ་ཏེ་གསད་པར་འདོད་ན། དེར་མིའི་རུས་པ་དང༌། རྣམ་པར་སྣང་མཛད་དང༌། བོང་བུའི་སྦངས་དང༌། ཚེར་མ་དང༌། སྐྲ་དང༌། སེན་མོ་དང༌། དེ་དག་ཐམས་ཅད་མར་ཁུས་སྤུས་ལ། མ་ཧེའི་ཞལ་གྱི་སྦྱོར་བས་ཤིན་ཏུ་མཉམ་པར་བཞག་ལ་ཁ་ལྷོར་བལྟས་ཏེ། རོ་བསྲེགས་པའི་མེ་ལ་གང་གི་མིང་དང་བཅས་པ་བརྒྱ་རྩ་བརྒྱད་བསྲེག་ན་དེ་ཞག་བདུན་གྱིས་འཆིའོ། །ཡང་ན་ཕྱོགས་གཅིག་ཏུ་གནས་ལ། མེ་ཐབ་གྲུབ་གསུམ་བྱས་ལ། དེ་རུ་སྔོན་ཏུ་གསུངས་པའི་རྫས་ཀྱི་གཏུམ་པོའི་མེ་ལ་སྦྱིན་བསྲེག་བྱའོ། །སྦྱོར་བ་དེས་ནི་ལས་དེ་ཉིད་འགྲུབ་བོ། །དེ་ནས་འབྲལ་བར་འདོད་ན། བྱ་རོག་དང༌། འུག་པ་དང༌། རྨ་བྱའི་སྒྲོ་དང༌། སྦྲུལ་གྱི་ཤུན་པ་དང༌། སྐྲ་དང༌། འབྲས་ཕུབ་དང༌།
མ་ཧེ་དང༌། རྟའི་ཤ་ལྷན་ཅིག་ཏུ་གང་གི་མིང་དང་བཅས་པ་དུར་ཁྲོད་ཀྱི་མེ་ལ་བསྲེགས་ན་དེ་དང་འབྲལ་བར་འགྱུར་རོ། །ཡང་ན་དུར་ཁྲོད་ཀྱི་ཤིང་ལ་གཏུམ་པོའི་མེ་རབ་ཏུ་སྦར་ལ་ཁྱྀམ་དུ་གནས་ཏེ། གོང་གི་རྫས་དེ་བསྲེགས་ན་རྡོ་རྗེ་འཛིན་པ་ལྟ་བུ་ཡང་ཉི་མ་བདུན་གྱིས་འབྲལ་ལོ། །དེ་ནས་བསྐྲད་པར་འདོད་ན། བྱ་རོག་གི་ཤ་དང༌། རྔ་མོའི་སྦངས་དང༌། ལྷན་ཅིག་ཏུ་ཆང་དང་ཡང་དག་པར་ལྡན་པ། རླུང་གིས་དཀྱིལ་འཁོར་གྱི་དབུས་སུ་དུར་ཁྲོད་ཀྱི་མེ་རབ་ཏུ་སྦར་ལ། གཅེར་བུ་སྐྲ་བཤིག་པར་བསྒྱུར་ནས། ཁ་ལྷོར་ཕྱོགས་སུ་བལྟས་ཏེ་ཆེ་གེ་མོའི་མིང་དང་བཅས་པ་ལག་པ་གཡོན་པའི་སྦྱིན་བསྲེག་སྟོང་བྱས་ན་སྐྲོད་པ་ལས་གཞན་མིན་ནོ། །དེ་ནས་རེངས་པར་འདོད་ན། པ་བླ་དང༌། ཡུང་བ་དང༌། ལྡིང་རིས་དང༌། འགི་ཧཾ་དང་བཅས་པས་དཀྱིལ་འཁོར་གྲུ་བཞི་པ་བྱས་ལ། ཁ་བྱང་དུ་བལྟས་ཏེ། ལས་ཀྱི་རྗེས་སུ་འབྲང་བའི་སྦྱོར་བ་དམིགས་ནས། གང་གི་མིང་དང་བཅས་པས་སྦྱིན་སྲེག་བྱས་ན་ཉི་མ་བདུན་གྱིས་རེངས་པར་འགྱུར་རོ། །དེ་ནས་གྲོང་བསྐྲད་པར་འདོད་ན། ནིམ་པའི་ཤིང་ལ་མེ་རབ་ཏུ་སྦར་ལ། ཁྱིའི་ཤ་དང༌། སྦལ་པའི་ཤ་དང༌། རྔ་མོང་གི་སྦངས་དང༌། བྱི་ལིའི་ཁྲག་དང༌། གཅིག་ཏུ་སྤྲུལ་ཏེ། གཤིན་རྗེའི་སྦྱོར་བ་ལ་གནས་པས་གྲོང་གི་མིང་དང་བཅས་པར་ཡི་གེའི་སྔགས་ཀྱིས་རླུང་གི་དཀྱིལ་འཁོར་གྱི་དབུས་སུ་སྦྱིན་སྲེག་སྟོང་ཕྲག་བཅུ་བྱས་ན་གྲོང་སྐྲོད་
པར་འགྱུར་རོ། །ལས་དེ་རྣམས་ནི་ཤིན་ཏུ་མཉམ་པར་བཞག་པས་བྱ་བའམ། ཡང་ན་སྔགས་པ་ཉིད་ཀྱིས་ཀྱང་ལས་དེ་དག་མི་བྱ། གཞན་སུ་ལ་ཡང་མི་བསྟན་ཏོ། །དེ་ནས་བུ་མོ་རེངས་པར་འདོད་ན། ཚེར་མ་དང༌། དུག་དང༌། སྐེ་ཚེ་དང་བཅས་པར་རང་གི་ཁྲག་གིས་སྤྲུས་ནས་ཡི་གེ་བཅུ་པའི་སྔགས་དང་བཅས་པས་བུ་མོ་ཆེ་གེ་མོ་རེངས་པར་གྱུར་ཅིག །ཅེས་དུར་ཁྲོད་ཀྱི་མེ་ལ་སྦྱིན་སྲེག་སྟོང་བྱས་ན་རེངས་པ་ལས་གཞན་མིན་ནོ། །དེ་ནས་ཞི་བར་བྱ་བར་འདོད་ན། མར་དང༌། སྦྲང་རྩི་དང༌། འོ་མ་དང༌། དུར་བ་དང་བཅས་པར་བ་ལ་ཤའི་ཤིང་ལ་མེ་རབ་ཏུ་སྦར་ནས་ཞི་བར་འདོད་པའི་དམིགས་པས། ཡུལ་གྱི་ཤར་ཕྱོགས་སུ་ཁ་བལྟས་ཏེ་གནས་པས། དུས་གསུམ་དུ་སྦྱིན་སྲེག་བརྒྱ་རྩ་བརྒྱད་བྱས་ནས་དེས་ཡུལ་ཞི་བར་འགྱུར་རོ། །དེ་ནས་རྒྱས་པར་འདོད་ན། ཏིལ་དང༌། འབྲས་དང༌། ནས་དང༌། །མར་དང་བཅས་པས་ཨུ་དུམ་ཝ་རའི་ཤིང་ལ་མེ་རབ་ཏུ་སྦར་ནས་ལས་ཀྱི་རྗེས་སུ་འབྲང་བའི་ལྷའི་སྦྱོར་བ་དམིགས་ཏེ། ཁ་བྱང་དུ་བལྟས་ནས་མཉམ་པར་བཞག་པས་དུས་གསུམ་དུ་སྦྱིན་སྲེག་སྟོང་བྱས་ན་རྒྱས་པར་འགྱུར་རོ། །དེ་ནས་དགུག་པ་འདོད་ན། ཀེ་ཚེས་གཟུགས་བརྙན་བྱས་ལ་སེང་ལྡེང་གི་མེ་ཡིས་དབུས་སུ་བརྒྱ་རྩ་བརྒྱད་དུ་བསྲེགས་ཏེ་དེས་འགུགས་སོ། །ཉི་མ་བདུན་གྱིས་གང་འདོད་པ་ཐེ་ཚོམ་མེད་པར་འགྱུར་རོ། །དེ་ནས་སྨྱོ་བར་བྱེད་
པར་འདོད་ན། བྱ་རྒོད་ཆེན་པོའི་ཚང་དང་ཤ་ཆེན་བསྲེགས་ན་སྨྱོ་བར་འགྱུར་རོ། །དེ་ཕུབ་མའི་མེ་ལ་བསྲེགས་ན་བདེ་ལེགས་སུ་འགྱུར་རོ། །དེ་ནས་ནོར་ནོར་མ་ཡིན་པར་འདོད་ན། ཤིང་བལ་གྱི་མེ་ལ་ད་རུ་རའི་འབྲས་བུ་དང་བཅས་པར་མཚན་མོ་བརྒྱ་རྩ་བརྒྱད་སྦྱིན་སྲེག་བྱས་ན་ཤིན་ཏུ་ཆུད་ཟོས་པར་འགྱུར་རོ། །ཨ་རུ་ར་བསྲེགས་ན་སླར་རྫས་དེ་ཉིད་དུ་འགྱུར་རོ། །རྗེ་བཙུན་གྱི་མདུན་དུ་ཤ་ཆེན་ཆང་དང་བཅས་པ། ཟླ་བ་དྲུག་ཏུ་མཚན་མོ་སྦྱིན་སྲེག་བརྒྱ་རྩ་བརྒྱད་བྱས་ན་ཡུལ་ཐམས་ཅད་ཀྱི་བདག་པོར་འགྱུར་རོ། །བ་གླང་གི་ཤ་ཁྲག་དང་བཅས་པ་གང་གིས་མིང་དང་བཅས་པར་སྦྱིན་སྲེག་སྟོང་བྱས་ན་ཇི་སྲིད་འཚོའི་བར་དུ་བྲན་དུ་གནས་པར་ཐེ་ཚོམ་མེད་དོ། ཁྱི་ཤ་རྡོ་རྗེའི་ཆུ་དང་བཅས་པར་མཚན་མོ་གང་གི་མིང་དང་བཅས་པར་སྦྱིན་སྲེག་བརྒྱ་རྩ་བརྒྱད་བྱས་ན། བདག་ཉིད་ནོར་དང་བཅས་པར་དབང་དུ་འགྱུར་རོ། །རྟའི་ཤ་རྣམ་པར་སྣང་མཛད་དང་བཅས་པ་སྦྱིན་སྲེག་བརྒྱ་རྩ་བརྒྱད་གནས་གཅིག་ཏུ་གནས་པས། མཚན་མོ་རྒྱལ་པོ་ལ་དམིགས་ནས་བྱས་ན་ཞག་བདུན་གྱིས་འཁོར་དང་བཅས་པར་དབང་དུ་འགྱུར་རོ། །གླང་པོའི་ཤ་ཁུ་བ་དང་བཅས་པས་འཇིག་རྟེན་ཀུན་ལ་དམིགས་ཏེ་མཚན་མོ་སྦྱིན་སྲེག་སྟོང་བྱས་ན་ཞག་བདུན་གྱིས་དབང་དུ་འགྱུར་རོ། །ཉ་དང་ཤ་དང་ཆང་དང་བཅས་པས་འཇིགས་པ་མེད་པར་སྦྱིན་སྲེག་བརྒྱ་རྩ་བརྒྱད་བྱས་ན་བུད་མེད་ཐམས་ཅད་དབང་དུ་འགྱུར་རོ། །དེ་ནས་བསྐྲད་པར་འདོད་ན། བྱ་རོག་གི་ཤ་གཞན་དང་མ་འདྲེས་
པར་གང་གི་མིང་དང་བཅས་པར་སྦྱིན་སྲེག་སྟོང་བྱས་ན་ཉི་མ་བདུན་གྱིས་རྡོ་རྗེ་འཛིན་པ་ལྟ་བུ་ཡང་རབ་ཏུ་འབྲོས་པར་འགྱུར་ན་ཕྲ་མོ་གཞན་ལྟ་ཅི་སྨོས། དེ་ནས་བྱ་རོག་གི་ཚང་དང༌། འབྲས་ཀྱི་ཕུབ་མ་དང༌། ལྷན་ཅིག་ཏུ་དྷ་རུ་རའི་ཤིང་ལ་མེ་རབ་ཏུ་སྦར་ཏེ། ཡི་གེ་བཅུ་པའི་སྔགས་གང་གི་མིང་དང་བཅས་པར་ནམ་ཕྱེད་ན་སྦྱིན་སྲེག་བྱས་ན་ཉི་མ་བདུན་གྱིས་སྐྲོད་པར་འགྱུར་རོ། །དེ་ནས་དབང་དུ་བྱ་བར་འདོད་ན། སེང་ལྡེང་གི་མེ་ལ་ཏིལ་དང་འབྲས་དང་བུད་མེད་ཀྱི་མེ་ཏོག་དང་ལྷན་གཅིག་ཏུ་རྡོ་རྗེ་ཆུ་དང་བསྲེས་ཏེ། རྣལ་འབྱོར་གྱི་གཟུགས་དམར་པོར་དམིགས་ནས་ཁ་ནུབ་ཏུ་བལྟས་ཏེ། ཡི་གེ་བཅུ་པའི་སྔགས་གང་གིས་མིང་དང་བཅས་པ་སྔགས་པས་བསྲེགས་ན་ཉི་མ་བདུན་གྱིས་དབང་དུ་འགྱུར་ཏེ། ཇི་སྲིད་འཚོའི་བར་དུ་མི་འབྲལ་ལོ། །དེ་ནས་དགུག་པར་འདོད་ན། བདུད་རྩི་ལྔ་དང་བཅས་པར་སེང་ལྡིང་གི་མེ་ལ་གང་གི་མིང་དང་བཅས་པ་སྦྱིན་སྲེག་བརྒྱ་རྩ་བརྒྱད་བྱས་ན་དེ་སྐད་ཅིག་གཅིག་གིས་འོང་བར་འགྱུར་རོ། །ལས་འདི་རྣམས་ནི་སྔོན་དུ་བསྙེན་པ་བྱས་པའི་སྔགས་པས་བྱའོ། །གཞན་པས་བྱས་ན་སྔགས་པ་ལ་འཇིག་རྟེན་པས་འཕྱ་བར་འགྱུར་རོ། །ཇི་ལྟར་བྱེ་བྲག་མི་བྱ་སྟེ། །གང་ལའང་བྱེ་བྲག་སྦྱིན་མི་བྱ། །བྱེ་བྲག་ཕྱེ་ན་སྔགས་པ་ཡིས། །དངོས་གྲུབ་འགྲུབ་པ་མ་ཡིན་ནོ། །རྒྱུད་གཞན་དག་ལས་ཀྱང་གསུངས་ཏེ། །ཇི་ལྟར་བྱེ་བྲག་མ་སྐྱེས་ན། །དེ་
བཞིན་བྱ་བའི་བྱེ་བྲག་སྨྲས། །རྡོ་རྗེ་སེམས་དཔས་ཀྱང་མི་འགྲུབ། །གང་གི་མདུན་དུའང་སྔགས་པ་ཡིས། །དེ་ཕྱིར་ལས་རྣམས་མཐོང་མི་བྱ། །གཞན་དང་ལྷན་ཅིག་ཏུ་མི་བྱ། །གལ་ཏེ་སྔགས་པས་ལས་བྱ་འདོད། །དེ་དག་གཅིག་པུ་ཉིད་ཀྱིས་བྱ། །སྔགས་པ་དེ་ཡིས་ལས་ཀུན་འགྲུབ། །འདི་ནི་འཇམ་དཔལ་མཆོག་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་སྦྱིན་སྲེག་གི་ལས་ཀྱི་ཆོ་ག་རྒྱ་ཆེ་བའི་རྟོག་པ་སྟེ་དྲུག་པའོ། །དེ་ནས་བསམ་གཏན་གྱི་ལས་ཀྱི་ཆོ་ག་ཇི་ལྟ་བ་ཡང་དག་པར་གསུངས་ཏེ། བསམ་གཏན་ཙམ་གྱིས་སྦྱོར་བ་དགོས་པ་ཐམས་ཅད་སྒྲུབ་པར་བྱ་སྟེ། དེའི་ཆོ་ག་ནི། དང་པོར་རེ་ཞིག་རྣལ་འབྱོར་པ་མ་ཧེའི་གདོང་པའི་སྦྱོར་བ་ལ། གནས་པ། སྔོན་དུ་བསྙེན་པ་བྱས་པས་ལས་ཐམས་ཅད་བྱའོ། །རཾ་ཡོངས་སུ་གྱུར་པའི་མེའི་དཀྱིལ་འཁོར་ཀུན་ཏུ་གསལ་ཞིང་འབར་བ་རྣམ་པར་བསམ་ལ། དེའི་སྟེང་དུ་བསྒྲུབ་བྱ་གཅེར་བུ་སྐྲ་བཤིག་པ་བྱེད་པར་གྱུར་པ་བདག་གིས་མདུན་དུ་རྣམ་པར་བསམ་མོ། །དེ་ནས་རང་གི་ལུས་ལས་ཁྲོ་བོའི་གཟུགས་བརྙན་མང་བ་རྣམ་པར་སྤྲོས་ཏེ། ཁྲོ་བོ་དེ་རྣམས་ཀྱིས་རལ་གྲིས་རྒྱབ་ཅིང་ཁྲག་འཐུང་བར་བསམ་པར་བྱའོ། །བསྒྲུབ་བྱ་དེའི་ཤ་ཟ་བ་དང༌། རྒྱུ་མ་དྲངས་པར་བསམ་པར་བྱའོ། །འདི་སྐད་སྨྲས་ཏེ། དཀོན་མཆོག་གསུམ་ལ་གནོད་པར་བྱེད་པ་དང༌། བླ་མ་ལ་སྐུར་བ་འདེབས་པ་ལ་རྒྱོབ་ཅིག །སོད་ཅིག་སོད་ཅིག །
བསམ་ཤིང་བརྗོད་པ་ཙམ་གྱིས། རྡོ་རྗེ་འཛིན་པ་ཡང་ཞག་བདུན་གྱིས་འཆི་ན། ཕྲ་མོ་སྲོག་ཆགས་གཞན་ལྟ་ཅི་སྨོས། དེ་ནས་གཞན་ཡང་བསམ་གཏན་གྱི་རབ་ཏུ་སྦྱོར་བ་ནི། མ་ཧེའི་གདོང་ཅན་གྱི་ང་རྒྱལ་གྱིས་གནས་ཏེ། ལས་ཐམས་ཅད་སྒྲུབ་པར་བྱའོ། །མེའི་དཀྱིལ་འཁོར་གྱི་དབུས་སུ་བསྒྲུབ་བྱ་འདར་བར་རྣམ་པར་བསམ་ལ། དེའི་མདུན་དུ་སྲིན་པོ་མང་པོ་བསམ་པར་བྱ་སྟེ། སྲིན་པོ་དེ་དག་ཐ་དད་པའི་ལུས་ཅན་མ་རུངས་པ། ཤིན་ཏུ་གཏུམ་པས་ཤ་ཟ་བ་དང༌། ཁྲག་འཐུང་བར་རྣམ་པར་བསམ་པར་བྱའོ། །གཞན་ཡང་རྣམ་པ་སྣ་ཚོགས་པའི་བྱ་རྣམས་ཏེ། བྱ་རྒོད་དང༌། བྱ་རོག་དང༌། འུག་པ་དང༌། ལྕེ་སྤྱང་དང༌། ཁྱི་རྣམས་ཀྱིས་ཤ་ཟ་བ་དང༌། ཁྲག་འཐུང་བར་རྣམ་པར་བསམ་པར་བྱའོ། །བསམ་གཏན་འདིའི་སྦྱོར་བས་ཐེ་ཚོམ་མེད་པར་འཆིའོ། །དཔག་ཚད་བརྒྱ་ན་གནས་པས་སྐྱེས་བུ་ཡང་བཟུང་སྟེ་བསམ་གཏན་ཙམ་མོ། །སྔགས་པས་བསམ་པ་བརྟན་པར་བྱའོ། །དེ་ནས་དབྲལ་བར་འདོད་ན། མ་ཧེའི་སྙིང་གར་བསྒྲུབ་བྱ་བསམ་པ་སྟེ། བསྒྲུབ་བྱ་གཞན་རྟའི་སྙིང་གར་བསམ་པར་བྱའོ། །རྟ་དང་མ་ཧེ་གཉིས་ཕན་ཚུན་འཐབ་པར་བྱེད་པར་བསམ་སྟེ། ཇི་སྲིད་རྟ་དང་མ་ཧེ་གཉིས་ཕྱེ་མར་མ་གྱུར་གྱི་བར་དུ་བྱའོ། །ཕྱི་ནས་བསྒྲུབ་བྱ་དེ་གཉིས་རབ་ཏུ་མི་འཛག་པར་བསམ་པར་བྱས་ན། བསམ་པ་ཙམ་གྱིས་ཉི་མ་བདུན་གྱིས་ངེས་པར་འཐབ་པར་འགྱུར་ཏེ་གཞན་དུ་མིན་ནོ། །དེ་ནས་བསྐྲད་པར་འདོད་ན།
དེ་རུ་ཡཾ་ཡོངས་སུ་གྱུར་པའི་རྔ་མོ་བསམ་པར་བྱ་སྟེ། ཡང་དེའི་རྒྱབ་ཏུ་ཡཾ་གྱིས་རྣམ་པ་ལས་གྱུར་པའི་རླུང་གི་དཀྱིལ་འཁོར་ཟླ་བ་ཕྱེད་པའི་རྣམ་པར་བསམ་མོ། །དེའི་སྟེང་དུ་བསྒྲུབ་བྱ་གཅེར་བུ་སྐྲ་བཤིག་པར་བྲེད་པར་གྱུར་པར་བསམ་པར་བྱ་སྟེ། མ་ཧེའི་གདོང་ཅན་གྱིས་སྦྱོར་བ་ལ་གནས་པས། དེའི་རྒྱབ་ཏུ་གཤིན་རྗེའི་གཟུགས་ལག་པས་དབྱུག་པ་འཛིན་པ། སྐྲ་བསྲལ་པ་རྣམ་པར་བསམ་པར་བྱ་སྟེ། རྔ་མོ་དེ་ཁ་ལྷོར་བསྟན་ལ་བཏང་ངོ༌། །དེའི་མིང་དང་བཅས་པར་གཤིན་རྗེའི་སྔགས་བརྗོད་པར་བྱས་ན། རྣལ་འབྱོར་པས་འདི་བསམ་པ་ཙམ་གྱིས་ཞག་བདུན་ན་འདི་ལྟར་རྡོ་རྗེ་འཛིན་པ་ཡང་སྐྲོད་པར་འགྱུར་རོ། །གཞན་ཡང་བསམ་གཏན་གྱི་རབ་ཏུ་སྦྱོར་བ་ནི། བྱ་རོག་གིའམ། བྱ་རྒོད་ཀྱི་རྒྱབ་ཏུ་བསྒྲུབ་བྱ་སྐྲ་བྲོལ་བ་གཅེར་བུ་རྣམ་པར་བསམ་མོ། །དེའི་རྒྱབ་ཏུ་གཤིན་རྗེ་རྣམ་པར་བསམ་པར་བྱ་སྟེ། ལག་ན་ཐོ་བ་ཐོགས་པ། བསྒྲུབ་བྱའི་སྐྲ་བཟུང་སྟེ། དེ་ལ་མ་ཧེའི་གདོང་ཅན་གྱིས་བཀའ་བསྒོ་སྟེ། ཁ་ལྷོ་རུ་བལྟས་ནས་སོང་བར་བསམ་སྟེ། རྩེ་གཅིག་པའི་སྦྱོར་བས་ཞག་བདུན་གྱིས་སྐྲོད་པར་འགྱུར་རོ། །དེ་ནས་དགུག་པར་བྱེད་ན། ཡི་གེ་ཡཾ་ལས་རླུང་གི་དཀྱིལ་འཁོར། དེའི་སྟེང་དུ་ཨ་ལས་བྱུང་བའི་ཟླ་བའི་དཀྱིལ་འཁོར། དེའི་སྟེང་དུ་གཤིན་རྗེ་གཟུགས་ལྕགས་ཀྱུ་དང་ཞགས་པ་ལག་ན་ཐོགས་པ་རྣམ་པར་བསམ་མོ། །མ་ཧེའི་གདོང་གི་རྣལ་འབྱོར་ལ་གནས་པས་དེ་ལ་བཀའ་བསྒོ་བ། གཤིན་རྗེ་སོང་ལ་ཡུལ་ཆེ་གེ་མོ་ནས་བུ་མོ་
ཆེ་གེ་མོ་མྱུར་དུ་ཁུག་གཅིག །དེ་སྐད་བསྐུལ་བས་ཡཾ་ཡིག་གིས་བསྐྱོད་དེ། སོང་བར་རྣམ་པར་བསམ་པར་བྱའོ། །བསམ་གཏན་འདི་ཡི་རབ་ཏུ་སྦྱོར་བ་ལ་གནས་པས། སྔགས་པས་ཁམས་གསུམ་དུ་གཏོགས་པའི་བུད་མེད་བཀུག་ལ་རོལ་བར་བྱའོ། །ཇི་ལྟར་བསམ་པ་བརྟན་པར་འགྱུར་ནས། འདིའི་རབ་ཏུ་སྦྱོར་བའི་དེ་དག་བྱའོ། །གཞན་གྱིས་མི་བྱའོ། །དེ་ནས་དུག་གིས་ཟིན་པ་བསླང་བའི་སྦྱོར་བ་གསུངས་ཏེ། རང་གི་སྙིང་གར་པདྨ་དཀར་པོ་འདབ་མ་བརྒྱད་པ་རྣམ་པར་བསམ་ལ། དེའི་སྟེང་དུ་དབྱངས་ཡིག་གསུམ་པ་མདོག་དཀར་པོ་དང༌། འདབ་མར་ཕཊ་བརྒྱད་བསམ་པར་བྱ། དེ་ལས་ལྷག་མ་ཞེས་བྱ་བའི་ཀླུའི་གཟུགས་རྣམ་པར་བསམ་སྟེ། དེའི་སྤྱི་བོར་ཡི་གེ་ཨི་ཁ་དོག་དཀར་པོ་ལས་བདུད་རྩི་འཛག་པར་བསམ་པར་བྱའོ། །ཀླུ་དེའི་མིག་རྣམས་ནས་བདུད་རྩི་འཕྲོས་ནས་བསྒྲུབ་བྱ་དེའི་ལུས་ལ་ཐིམ་པར་བསམ་པར་བྱ་སྟེ། བསམ་གཏན་འདིའི་སྦྱོར་བས་ཁམས་གསུམ་ཡོངས་སུ་གང་བའི་དུག་ཀྱང་མེད་པར་འགྱུར་རོ། །དུག་ཁུར་སྟོང་ཡང་ཟ་ནུས་སོ། །དེ་ནས་ཞུ་བའི་བསམ་གཏན་གྱི་སྦྱོར་བ་རབ་ཏུ་གསུང་བ་ནི། བསྒྲུབ་བྱ་མདུན་དུ་བསམས་ཏེ། དེའི་རྐང་པ་གཉིས་ལ་ཡི་གེ་ཡཾ་ལས་བྱུང་བའི་རླུང་གི་དཀྱིལ་འཁོར་བསམ་པར་བྱ། དེའི་སྟེང་དུ་གསང་བའི་གནས་སུ་མེའི་དཀྱིལ་འཁོར་གྲུ་གསུམ། ཁ་དོག་དམར་པོ་རཾ་གྱིས་བྱིན་གྱིས་རླབས་པ་བསམ། དེའི་སྟེང་དུ་སྙིང་གར་སའི་དཀྱིལ་འཁོར་གྲུ་བཞི་པ། ཁ་དོག་
སེར་པོ་ལཾ་གྱིས་བྱིན་གྱིས་བརླབས་པ་བསམ། དེའི་སྟེང་དུ་དཔྲལ་བར་ཟླ་བའི་དཀྱིལ་འཁོར་བསམ། དེའི་དབུས་སུ་ཡི་གེ་བཾ་མགོ་ཐུར་དུ་གནས་པ་ལས་བདུད་རྩི་འཛག་པར་བསམ་ཏེ། དེ་ནི་ལེགས་པར་རྣམ་པར་བསམས་ནས་རླུང་གིས་མེ་རབ་ཏུ་སྦར་ཏེ་མེ་དེས་དབང་ཆེན་གྱི་དཀྱིལ་འཁོར་བསྲེགས་པར་རྣམ་པར་བསམ། དབང་ཆེན་གྱི་དཀྱིལ་འཁོར་གྱི་དྲོད་ཀྱིས་བདུད་རྩིའི་དཀྱིལ་འཁོར་དེ་ཞུ་བའི་རྣམ་པར་བསམ་པར་བྱ་སྟེ། འདིའི་སྦྱོར་བ་ཙམ་གྱིས་བུད་མེད་ཞུ་བར་འགྱུར་ཏེ། འོ་མའི་ཤིང་བཞིན་ཞུ་བར་བྱེད་པར་ཐེ་ཚོམ་མེད་དོ། །དེ་ནས་རྒྱལ་པོའམ། རྒྱལ་པོའི་བློན་པོ་དབང་དུ་བྱ་བར་འདོད་ན། སྔགས་པའི་མ་ཧེའི་གདོང་ཅན་གྱི་རྣལ་འབྱོར་ལ་རབ་ཏུ་གནས་ལ། བདག་ཉིད་མདོག་དམར་པོ་བསམས་ཏེ། བསྒྲུབ་བྱ་གང་དུ་གནས་པ་དེའི་སྟེང་དུ་གནས་ལ། ཕྱི་ནས་རང་གི་ལུས་ལས་འཇམ་དཔལ་མདོག་དམར་པོ་ཕྱག་ན་ལྕགས་ཀྱུ་དང་ཞགས་པ་ཅན་རབ་ཏུ་བྱུང་སྟེ། འཇམ་དཔལ་དེས་བསྒྲུབ་བྱའི་སྙིང་ཁ་དང་མགྲིན་པར་བཅིངས་ནས་དགུག་པར་བསམ་མོ། །འཇམ་དཔལ་གྱི་སྐུ་ལ་རབ་ཏུ་གཞུག་གོ །བསྒྲུབ་བྱེད་མྱོས་པར་བསམ་པར་བྱ་སྟེ། བསམ་གཏན་འདི་ཡི་སྦྱོར་བས་དེའི་སྙིང་གར་ཡི་གེ་བཅུ་པའི་སྔགས་རྣམ་པར་བསམ་པར་བྱའོ། །ཡང་ཁ་དོག་དམར་པོའི་སྒྲུབ་པ་པོའི་ཡེ་ཤེས་ཀྱི་གཟུགས་ཀྱིས་ཡི་གེ་དེ་ལ་གཞུག་པར་བྱའོ། །དེ་ནས་བསྒྲུབ་བྱ་དང་སྔགས་གཅིག་ཏུ་འགྱུར་བར་བྱའོ། །བསམ་གཏན་
འདིའི་རབ་ཏུ་སྦྱོར་བས་ཉི་མ་བདུན་གྱིས་འཁོར་ལོ་སྒྱུར་བ་ཡང་དབང་དུ་འགྱུར་ཏེ། ཇི་སྲིད་འཚོའི་བར་དུ་ཐེ་ཚོམ་མེད་དོ། །རབ་ཏུ་མཉམ་པར་བཞག་པའི་སྔགས་པས་མི་གཡོ་བའི་བསམ་གཏན་གྱིས་བྱའོ། །རྒྱུད་གང་ལ་ཡང་མི་སྦྱིན་ནོ། །གལ་ཏེ་སྔགས་ཀྱང་མི་བསྟན། དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་གྱི་བསམ་གཏན་གང་ལ་ཡང་མི་སྦྱིན་ནོ། །སྨྲ་བར་ཡང་མི་བྱ། སྔགས་ཀྱི་དབྱེ་བ་ཡང་མི་བྱ། བྲི་སྐུ་ཡང་གང་གིས་མདུན་དུ་ཡང་མི་དགྲམ། ཐང་ཀ་ཡང་གསལ་བར་བཞག་གོ །རྒྱུད་པ་འདིའི་རབ་ཏུ་སྦྱོར་བ་དང༌། བཟླས་པ་དང༌། སྨྲ་བ་གཞན་སུ་ལ་ཡང་འགའ་ཙམ་ཡང་མི་བཟླ། གལ་ཏེ་ཡང་བཟླས་ན་དམ་ཚིག་ཉམས་པར་གྱུར་པས། དཔལ་འཇིགས་བྱེད་ཆེན་པོ་དང༌། གཞན་ཡང་རྣལ་འབྱོར་མ་རྣམས་ཀྱིས་དང༌། མཁའ་འགྲོ་མ་རྣམས་ཀྱིས་ཟའོ། །དེའི་ཕྱིར་སྔགས་པས་སུ་ལ་ཡང་མི་སྦྱིན་ནོ། །སྔགས་པས་གཞན་ལ་སྦྱིན་ན། དེ་དང་སློབ་མར་བཅས་པ་དམ་ཚིག་ཉམས་ཏེ། འཇིག་རྟེན་འདི་ནི་འཇིགས་པ་ཆེན་པོར་གྱུར། འཇིག་རྟེན་ཕ་རོལ་ཏུ་དམྱལ་བར་འགྲོ་བར་ཐེ་ཚོམ་མེད་དོ། །དེ་ནས་སྦྱིན་ན། དམ་ཚིག་མ་ཉམས་པ་དང༌། རྣམ་པར་རྟོག་པ་མེད་པ་དང༌། དམ་པའི་བརྟུལ་ཞུགས་ཅན། དཔའ་བོ་བླ་མ་ལ་གུས་པ། དུལ་བ་ཅན། དེ་བཞིན་
གཤེགས་པའི་བསྟན་པ་ངེས་པར་འཛིན་པ། རྒྱུད་སྦས་པ། མི་ཁྲོ་བ། སྙིང་རྗེ་དང་ལྡན་པ། བཟླས་པ་དང་བསམ་གཏན་ལ་ཕྱོགས་པ་དང༌། རྣམ་པར་སྨིན་པ་ལ་འཛེམ་པ་དང༌། འདི་ལྟ་བུའི་ཡོན་ཏན་གྱི་ཁྱད་པར་དང་ལྡན་པ་ནི། སློབ་མ་བཟང་པོ་སྟེ། དཀྱིལ་འཁོར་དམ་པ་དཔལ་རྡོ་རྗེ་འཇིགས་བྱེད་ལ་མཆོག་ཏུ་གུས་པ། སྙིང་རྗེ་ཆེན་པོའི་ཡིད་བརླན་པ། རྣམ་པར་རྟོག་པ་མེད་པ། རབ་ཏུ་རྟོག་པ་ལ་ཤིན་ཏུ་རྣམ་པར་བསམས་ཏེ། བླ་མས་དེ་ལྟ་བུའི་སློབ་མ་ལ་དཔལ་རྡོ་རྗེ་འཇིགས་བྱེད་ཆེན་པོའི་རྒྱུད་སྦྱིན་ནོ། །དཔལ་རྡོ་རྗེ་འཇིགས་བྱེད་ཆེན་པོའི་འཁོར་ལོ་རྒྱུད་འབུམ་པ་ནས་བྱུང་བ། རྟོག་པའི་ཕྱོགས་བཀླགས་པས་འདི་ནི་འཇམ་དཔལ་མཆོག་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་བསམ་གཏན་གྱི་ལས་སྒྲུབ་པའི་རྟོག་པ་སྟེ་བདུན་པའོ། །སྔགས་པས་གཞན་ལ་བྱིན་ན་དེ་དང་སློབ་མར་བཅས་པར་དམྱལ་བར་འགྲོ་བར་ཐེ་ཚོམ་མེད་དོ། །འཇིག་རྟེན་འདིར་ནི་འཇིགས་པ་ཆེན་པོར་འགྱུར་རོ། །འཇིག་རྟེན་ཕ་རོལ་ཏུ་ནི་དམྱལ་བར་འགྲོའོ། །དམ་ཚིག་ཀྱང་ཉམས་པར་འགྱུར་རོ། །ཉེར་རྒྱུད་སྦྱིན་ནོ་ཞེས་པའི་རྗེས་ལ་ཡོད། ཁ་ཅིག་ཏུའོ། །གྲུབ་པ། དཔལ་འཇིགས་བྱེད་ཆེན་པོ་མ་ཧེའི་གདོང་ཅན་དངོས་གྲུབ་སྒྲུབ་པའི་རྟོག་པ། དཔལ་ཨུ་རྒྱན་གྱི་གནས་ཆེན་པོ་ནས་འཇམ་དཔལ་གྱི་རྒྱུད་ལས་བྱུང་བ། རྒྱུད་ཀྱི་རྒྱལ་པོ་ཆེན་པོ་དཔལ་རྡོ་རྗེ་འཇིགས་བྱེད་ཆེན་
པོ་ཞེས་བྱ་བ། བླ་མ་དམ་པ། དཀྱིལ་འཁོར་ཆེན་པོའི་སློབ་དཔོན་དཔལ་ལ་ལི་ཏ་བཛྲས་ཕྱུང་ནས་མཛད་པ་རྫོགས་སོ།། །།ནུས་བཞིན་ཤེས་རབ་བླ་མ་ཡི། །བཀའ་འདི་བསྒྱུར་བའི་དགེ་བ་གང༌། །དེ་ཡིས་བསྟན་ལ་རྙེད་པ་དང༌། །ཞལ་ནི་ཉེ་བར་སྟོན་གྱུར་ཅིག །སླད་ཀྱིས་པཎྜི་ཏ་བྷ་རོ་ཕྱག་རྡུམ་དང། ལོ་ཙྪ་བ་དགེ་སློང་རྡོ་རྗེ་གྲགས་ཀྱིས་ཀྱང་བཅོས་ཤིང་གཏན་ལ་ཕབ་པའོ། །རྒྱུད་རྒྱལ་འདི་ལ། ཞང་ཅོག་གྲུ །རོང་ཟོམ། རྭ་ལོ། བ་རི། ནག་ཚོ། གྱི་ཇོ། མལ་གྱོ། ཁུ་དངོས་གྲུབ། པཎྜི་ཏ་ས་མན་ཏས་བསྒྱུར་པ་སྟེ། འགྱུར་བརྒྱད་ཡོད་ཅེས་སྔོན་དུས་གྲགས། དུས་ཕྱིས་སྐྱིད་རོང་ལོ་ཙཱ་བ་ངག་དབང་གིས་དབུས་གཙང་ཀུན་ཏུ་བཙལ་བས། སྔ་མ་བཞི་པོ་དང༌། བརྒྱད་པོ་དར་མ་འདུས་པ་ལྷ་བཙད་པོ་མུ་ནེ་རཱ་ཛའི་འགྱུར་དང༌། ཚིགས་བཅད་མ་དང་གཞན་གཅིག་སྟེ་འགྱུར་བྱང་མ་ཐེབས་པ་གཉིས་མཐོང་གསུང་ལ། ཁྱུང་བོས་ཀྱང་འགྱུར་དང་པོ་གསུམ་དང༌། མལ་འགྱུར་དང༌། མ་ནིང་ཆོས་ཤེས་དང༌། ཚིགས་བཅད་མ་སྟེ། འགྱུར་དྲུག་མཐོང་ངོ༌། །རྭ་འགྱུར་ལ། འགྱུར་སྔ་མ་ཞང་གི་འགྱུར་བྱང་ཡོད་མེད་གཉིས་སྣང་བ། ཚིག་རིགས་མི་འདྲ་བ་ཅུང་ཟད་གདའ། རཱ་བའི་ཊཱིཀྐ་རྙིང་པ་རྣམས། ང་ཡི་འགྱུར་བྱང་མེད་པ་དེ་ཁོ་ན་ལ་འབྲུ་གནོན་པར་འདུག །མལ་འགྱུར་དེ་ཡང་ལོ་ཙཱ་བ་ཁྱུང་པོ་ཆོས་རྩོན་གྱི་འགྱུར་ལ་འགྱུར་བཅོས་མཛད་པར་འདུག་པས། མ་ནིང་
པ་དང༌། ཆོས་བརྩོན་གྱི་འགྱུར་འདི་གཉིས་ཀྱང༌། སྔགས་ཀྱི་བརྒྱད་ལ་མི་ཐེ་བས་སྤྱིར་འགྱུར་མི་འདྲ་བ་བཅུ་གཅིག་ནི་ངེས་པར་བྱུང་སྣང་ངོ༌། །ཞང་འགྱུར་དང། རོང་ཟོམ་འགྱུར་ལ་སྔགས་ཏུ་ཚིག་ལྷུག་པར་ཡོད། གཞན་མཐོང་བ་བཞི་ལ་ཚིགས་བཅད་དུ་སྣང༌། སྤྱིར་དཔེ་རྙིང་ཁོ་རང་ལ་བརྟགས་དུས། འགྱུར་གཞན་ལ་རྭའི་འགྱུར་བྱང་བཏགས་པ་དང༌། འགྱུར་མི་གཅིག་པ་ཕན་ཚུན་ཞུ་དག་བྱས་པ་ཚིག་རིགས་འགྲེས་པ་དང༌། ཚིག་སྣ་རིང་ཐུང་དང༌། མཆན་བུ་དཀྱུས་ལ་ཤོར་བ་སོགས་སྣ་ཚོགས་སྣང་ཡང༌། རྒྱ་བོད་ཀྱི་འབྲེལ་བ་ཇི་སྙེད་པ་ཞིག་ལ་གཏུགས་ཤིང༌། རྭ་འགྱུར་སྔ་མའི་སྟེང་དུ་ཡིག་ནོར་རྒྱུད་པ་འགའ་རེ་འདུག་པ་ཐམས་ཅད་སྤངས་ཏེ། བརྟག་དཔྱད་ཐུབ་ངེས་པར་ཞུས་དག་བྱེད་པ་པོ་ནི་ཏཱ་ར་ནཱ་ཐའོ། །འདིའི་རྒྱ་དཔེ་མ་མཐོང་བས། བོད་སྐད་ཁོ་ནའི་ཞུས་དག་ལས། གཞན་འགྱུར་བཅོས་ཐབས་མ་བྱུང་ཡང༌། འགྱུར་མི་གཅིག་པ་རྣམས་བསྡུར་བ་དང༌། བཤད་པ་རྣམས་ཀྱི་དོན་ལ་དཔྱད་པ་ན། ཚིག་ཟུར་ཚུན་ཆད་དག་མ་དག་ཕྱིན་ཅི་མ་ལོག་པ་གསལ་བར་རྟོགས་པའི་རྒྱུད་ཉིད་ལས་སོ།། །།ཞུས་དག། མངྒ་ལཾ།། ཤུ་བྷཾ་སྟུ་སརྦ་ཛ་ག་ཏཾ།།