བསྲུང་འཁོར་རྡོ་རྗེ་བྲག་རྫོང་མའི་བརྒྱུད་འདེབས།
བསྲུང་འཁོར་རྡོ་རྗེ་བྲག་རྫོང་མའི་བརྒྱུད་འདེབས་བཞུགས།
ཨོཾ་སྭཱ་སྟི། རིགས་ཀུན་ཁྱབ་བདག་རྒྱལ་བ་རྡོ་རྗེ་འཆང༌། །ཟུང་འཇུག་ཡེ་ཤེས་མཆོག་མངའ་རྡོ་རྗེའི་གུར། །གྲུབ་པ་མཆོག་གི་ས་བརྙེས་མཆོག་སྲེད་ལ། །གསོལ་བ་འདེབས་སོ་བདག་རྒྱུད་བྱིན་གྱི་རློབས། །པཎ་ཆེན་གྲུབ་པའི་རྩེར་སོན་ནོར་གླིང་པ། །མཁས་པའི་ཕུལ་ཕྱིན་དད་བྱེད་གོ་ཆའི་ཞབས། །འཇིག་རྟེན་མིག་གཅིག་རིན་ཆེན་བཟང་པོ་ལ། །གསོལ་བ༴ །རིག་སྔགས་ནུས་པ་མཐར་ཕྱིན་བྲག་སྟེང་པ། །གངས་ཅན་བསྟན་པའི་བདག་པོ་ས་ཆེན་ལ། གསོལ་བ༴ །མཁས་དབང་རིག་འཛིན་མངའ་བརྙེས་བསོད་ནམས་རྩེ། །གསང་སྔགས་རྒྱ་མཚོའི་མཐར་སོན་རྗེ་བཙུན་པ། །ལྔ་རིགས་མཁས་པའི་གཙུག་རྒྱན་ས་པཎ་ལ། །གསོལ་བ༴ དམ་ཆོས་འཁོར་ལོ་བསྒྱུར་བ་
འཕགས་པའི་ཞབས། །དམ་ཅན་བྲན་དུ་འཁོལ་བ་ཀུན་དགའ་གྲགས། །མཁས་བཙུན་བཟང་པོ་དཔལ་འཛིན་ཀུན་བསོད་ལ། །གསོལ་བ༴ །གསང་ཆེན་གདམས་པའི་མཛོད་འཛིན་རིན་ཆེན་རྒྱལ། ཁམས་གསུམ་འགྲོ་བའི་བླ་མ་ཆོས་ཀྱི་རྗེ། །ངུར་སྨྲིག་འཛིན་དབང་དཔལ་ལྡན་ཚུལ་ཁྲིམས་ལ། །གསོལ་བ༴ །དབང་ལུང་གདམས་པའི་གཏེར་མཛོད་ངོར་ཆེན་ལ། །རྡོ་རྗེ་འཛིན་པ་བློ་གྲོས་དབང་ཕྱུག་ཞབས། །སྨྲ་བ་ཟླ་མེད་པཎ་ཆེན་ཆོས་རྗེ་ལ། །གསོལ་བ༴ །རིན་ཆེན་བྱང་ཆུབ་ཐུགས་མངའ་གཞོན་ནུའི་མཚན། །བརྟུལ་ཞུགས་གྲུབ་པའི་དཔའ་བོ་གྲོལ་མཆོག་ཞབས། །རབ་ཞི་དུལ་བའི་དཔལ་འཛིན་རྗེ་རིང་དབོན། །གསོལ་བ༴ །མ་ལུས་རིགས་ཀྱི་ཁྱབ་བདག་རྡོ་རྗེ་འཛིན། །བཤེས་གཉེན་དམ་པར་སྣང་བ་སྒྲོལ་བའི་མགོན། །ཟབ་དོན་སྨྲ་བའི་ཁྱུ་མཆོག་ཡེ་ཤེས་ཞབས། །གསོལ་བ༴ །ནུས་མཐུའི་རླབས་མངའ་ཀུན་དགའ་དོན་ཡོད་དང༌། །མཚན་ལེགས་དར་རྒྱས་ཀུན་དགའ་དོན་གྲུབ་དང༌། །ཡོན་ཏན་ལྷུན་གྲུབ་རྩ་བའི་བླ་མ་ལ། །གསོལ་བ༴ །ཡོན་ཏན་གཏེར་མཛོད་རིན་ཆེན་མཉམ་བཞག་དང༌། །གདམ་པའི་མཛོད་འཛིན་ངག་དབང་ཡོན་ཏན་དང༌། །ཟབ་ལམ་མཐར་ཐུག་ཀུན་དགའ་དར་རྒྱས་ཞབས། །གསོལ་བ༴ ཁྱབ་བདག་བླ་མ་ཀུན་དགའ་བློ་བཟང་དང༌། །
ཟབ་དོན་སྤེལ་མཛད་ངག་དབང་བསམ་གཏན་སོགས། །མཆོག་གསུམ་ཀུན་འདུས་རྩ་བརྒྱུད་བླ་མ་ལ། །གསོལ་བ༴ །རྡོ་རྗེ་བྲག་རྫོང་དམར་ནག་འཇིགས་རུང་བར། །མི་ཕྱེད་བསྲུང་བའི་འཁོར་ལོ་བརྟན་བཞུགས་པའི། །རབ་འཇིགས་ཁྲོ་ཆེན་རྣམ་བཅུའི་ཏིང་འཛིན་གྱིས། །མི་མཐུན་གཡུལ་ལས་རྒྱལ་བར་བྱིན་གྱིས་རློབས། །དུས་གསུམ་རྒྱལ་བ་ཀུན་གྱིས་ཡེ་ཤེས་ལས། །རྣམ་པར་འཕྲུལ་བའི་རིགས་སྔགས་སྒྲ་བརྒྱ་པ། །གྲགས་སྟོང་བརྗོད་བྲལ་རྣམ་མང་བཟླས་བརྗོད་ཀྱིས། །གསང་སྔགས་ནུས་པ་བརྟན་པར་བྱིན་གྱིས་རློབས། །ཞི་རྒྱས་དབང་དང་དྲག་པོའི་མངོན་སྤྱོད་ཀྱིས། །འཕྲིན་ལས་ཐོགས་པ་མེད་པར་ཀུན་འགྲུབ་ནས། །གང་ལ་གང་འདུལ་འགྲོ་བའི་དོན་སྤྱོད་ཅིང༌། །ཐུབ་བསྟན་ཉིན་མོར་བྱེད་པར་བྱིན་གྱིས་རློབས། །རྡོ་རྗེ་ནག་པོ་ཆེན་པོར་གུར་གྱིས་མགོན་པོའི་བསྲུང་འཁོར་རྡོ་རྗེ་བྲག་རྫོང་མའི་བརྒྱུད་པའི་གསོལ་འདེབས་འདི་ཡང་དགེ་སློང་བརྟན་པའི་རྡོ་རྗེ་བས་བསྐུལ་བའི་ངོར། དགེ་སློང་ཡེ་ཤེས་རྒྱ་མཚོས་ཐུན་གཅིག་ལ་བྲིས་པ་དགེའོ།། །། དགེ་ལེགས་འཕེལ།།བརྒྱུད་འདིའི་ཁ་སྐོང་ནི་ཡང་ན། ལུང་རིག་སྨྲ་བའི་ཁྱུ་མཆོག་སྒྲོལ་བའི་མགོན། །མཐུ་སྟོབས་འགྲན་ཟླ་མེད་པར་དོན་ཡོད་ཞབས། །ངག་ནུས་མཐར་ཕྱིན་མཚན་ལེགས་སངས་རྒྱས་ལ། །གསོལ་བ༴ །མཐུ་སྟོབས་མཁྱེན་པའི་བྱིན་རླབས་རྣམ་པར་རྒྱལ། །གནས་ལུགས་མཐར་ཕྱིན་ཡོན་ཏན་ལྷུན་གྲུབ་ཞབས། །གདམས་པའི་མཛོད་འཛིན་ངག་དབང་རྣམ་པར་རྒྱལ། །གསོལ་བ༴ །དམ་པས་རྗེས་གཟུང་ཀུན་དགའ་དར་རྒྱལ་མཚན། །རྡོ་རྗེ་འཛིན་དངོས་འཕྲིན་ལས་རྣམ་རྒྱལ་ཞབས། །མཐུ་སྟོབས་མངའ་བདག་ལྷུན་གྲུབ་རྒྱ་མཚོ་ལ། །གསོལ་བ༴