མགོན་དཀར་ཡིད་བཞིན་ནོར་བུའི་མཆོད་བསྐང་དངོས་གྲུབ་ཀུན་སྩོལ།
མགོན་དཀར་ཡིད་བཞིན་ནོར་བུའི་མཆོད་བསྐང་དངོས་གྲུབ་ཀུན་སྩོལ་ཞེས་བྱ་བ་བཞུགས།
ཨོཾ་སྭཱ་སྟི། མགོན་དཀར་ཡིད་བཞིན་ནོར་བུའི་མཆོད་བསྐང་དངོས་གྲུབ་ཀུན་སྩོལ་ཞེས་བྱ་བ། བླ་མ་རྣམས་པ་ཕྱག་འཚལ་ལོ། །མཆོད་རྫས་རྣམས་བཤམས་ཤིང༌། སྔོན་འགྲོ་བཏང༌། བདག་མདུན་གཏོར་འབུལ་སོགས་ཀྱི་རྗེས་སུ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་གནས་ཁང་བྷྲུཾ་ལས་རིན་པོ་ཆེ་ལས་གྲུབ་པའི་ཐར་པ་ཆེན་པོའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་ནམ་མཁའ་དང་མཉམ་པའི་ནང་དུ་ལྷ་དང་མི་ལས་ཁྱད་པར་འཕགས་པའི་མཆོད་རྫས་སྣ་ཚོགས། བསྐང་རྫས་སྣ་ཚོགས། གྲུབ་རྫས་སྣ་ཚོགས། འདོད་ཡོན་སྣ་ཚོགས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་དང་ཐུགས་རྗེ་ལས་གྲུབ་པ་དང༌། ཁྱད་པར་དུ་ཡང་འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་ཡོ་བྱད་བསམ་གྱིས་མི་ཁྱབ་པ་ཡོངས་སུ་གང་བ། བླ་མ་དང་མགོན་པོ་ཡིད་བཞིན་ནོར་བུ་སངས་རྒྱས་དང་བྱང་སེམས།
འཁོར་ཚོགས་མཁའ་འགྲོ་གྲངས་མེད། ལས་མཛད་གནོད་སྦྱིན་བཞི། དམ་ཅན་རྒྱ་མཚོའི་ཚོགས་དང་བཅས་པ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཨོཾ་སརྦ་བིད་པུ་ར་པུ་ར་སུ་ར་སུ་ར་ཨཱ་ཝརྟ་ཡ་ཨ་ཝརྟ་ཧོ། ཨོཾ་བཛྲ་ས་སྤ་ར་ཎ་ཁཾ་སྭཱཧཱ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །བླ་མ་མགོན་པོ་དབྱེར་མེད་མཆོག །མགོན་དཀར་ཡིད་བཞིན་ནོར་བུ་ནི། །འཁོར་ཚོགས་མཁའ་འགྲོ་གྲངས་མེད་དང༌། །སངས་རྒྱས་བྱང་སེམས་དཔའ་བོ་དང༌། །གནོད་སྤྱིན་བཞི་དང་བཀའ་ཉན་རྣམས། །མཆོད་པའི་གནས་འདིར་གཤེགས་སུ་གསོལ། །མཆོད་པའི་གནས་འདིར་གཤེགས་ནས་ཀྱང༌། །མགོན་པོ་ཡིད་བཞིན་ནོར་བུ་ཚོགས། །སྣ་ཚོགས་མཆོད་པས་མཉེས་གྱུར་ནས། །འགྲོ་ཀུན་དཔལ་འབྱོར་རྒྱས་པ་དང༌། ཁྱད་པར་བདག་ཅག་དཔོན་སློབ་ཀྱིས། །ཆོས་འབྱོར་དགེ་ལེགས་འཕེལ་བ་དང༌། །ཀུན་མཁྱེན་སངས་རྒྱས་ཐོབ་བྱའི་ཕྱིར། འཁོར་བཅས་གནས་འདིར་གཤེགས་སུ་གསོལ། །
བཛྲ་ས་མཱ་ཛཿ པདྨ་ཀཱ་མ་ལ་སྟྭཾ། ཀུན་བཟང་མཆོང་སྤྲིན་རྒྱ་མཚོ་ལས་བྱུང་བའི། །ཡན་ལག་བརྒྱད་ལྡན་རབ་དཀར་འོ་མའི་མཚོ། །དྭངས་ཤིང་དྲི་མེད་རབ་དཀར་ཞབས་བསིལ་དང༌། །ཨུཏྤལ་པདྨ་ཨུ་ཏམ་ཝཱ་རའི་ཚོགས། །སྦྱར་དང་ལྷན་སྐྱེས་དྲི་ཞིམ་སྦོས་ཀྱི་ཚོགས། །ཉི་ཟླ་ནོར་བུ་སྣང་བྱེད་འོད་གསལ་དང༌། །ཀུར་གུམ་ག་བུར་ལ་སོགས་དྲི་བཟང་ཚོགས། །སྨན་རྣམས་འབྲས་དང་སྨན་མཆོག་རོ་་བརྒྱའི་ཟས། །རབ་སྙན་སྒྲ་དབྱངས་མཆོད་སྤྲིན་དཔག་མེད་ཀྱིས། །བླ་མ་མགོན་པོ་དབྱེར་མེད་ཐུགས་དམ་བསྐང༌། །མགོན་དཀར་ཡིད་བཞིན་ནོར་བུའི་ཐུགས་དམ་བསྐང། །མཁའ་འགྲོ་གྲངས་མེད་འབུམ་གྱི༴ །ལས་མཛད་གནོད་སྤྱིན་བཞིའི༴ །འཁོར་ཚོགས་དམ་ཅན་རྒྱལ་པོའི༴ །འཁོར་དང་བཅས་པ་མཆོད་པས་དགྱེས་གྱུར་ནས། བདག་ཅག་འཁོར་བཅས་ཆོས་འབྱོར་གོང་འཕེལ་ཞིང༌། །བྱང་ཆུབ་བར་གྱི་སྲུང་མ་ཁྱོད་ཀྱིས་མཛོད། །བཀྲ་ཤིས་རིན་ཆེན་བདུན་དང་འདོད་ཡོན་ལྔ། །བཀྲ་ཤིས་རྫས་བརྒྱད་བཀྲ་ཤིས་རྟགས་བརྒྱད་དང༌། །བཀྲ་ཤིས་ལྷ་མོ་བརྒྱད་ཀྱིས་མཆོད་སྤྲིན་སོགས། །བཀྲ་ཤིས་ཕུན་ཚོགས་མཆོད་རྫས་བཀྲ་ཤིས་ཀྱིས། །བླ་མ་མགོན་པོ༴ །མགོན་དཀར༴ །མཁའ་འགྲོ༴ །ལས་མཛད༴ །འཁོར་ཚོགས༴ །འཁོར་དང་བཅས༴ །བདག་ཅག༴ །བྱང་ཆུབ༴ །རབ་དཀར་མཚན་ལྡན་ཀུན་བཟང་ཀ་པ་ལར། །རབ་དཀར་ཡེ་ཤེས་བདུད་རྩི་རྒྱ་མཚོ་འཁྱིལ། །རབ་དཀར་ཕྱག་རྒྱ་ཡིད་ཀྱིས་བྱིན་རླབས་པའི༴ །
རབ་དཀར་ཡེ་ཤེས་བདུད་རྩི་རྒྱ་མཚོ་འདིས། །བླ་མ་མགོན་པོ༴ །མགོན་དཀར༴ །མཁའ་འགྲོ༴ །ལས་མཛད༴ །འཁོར་ཚོགས༴ །འཁོར་དང་བཅས༴ །བདག་ཅག༴ །བྱང་ཆུབ༴ །རབ་མཛེས་ལང་ཚོས་དྲེགས་པའི་སྨིན་ལེགས་མ། །དཀྱུས་རིངས་ཟུར་མིག་འདོད་པའི་མདའ་འཕེན་ཞིང༌། །བདེ་ཆེན་ཆགས་པས་མྱོས་པའི་རྣམ་འགྱུར་མཁས། །རབ་མཛེས་གསང་ཡུམ་ལྷ་མོ་འབུམ་ཕྲག་གིས། །བླ་མ་མགོན་པོ༴ །མགོན་དཀར༴ །མཁའ་འགྲོ༴ །ལས་མཛད༴ །འཁོར་ཚོགས༴ །འཁོར་དང་བཅས༴ །བདག་ཅག༴ །བྱང་ཆུབ༴ །རྣམ་དག་སངས་རྒྱས་བྱང་སེམས་འཕགས་ཚོགས་དང༌། །བདག་གཞན་སྔགས་སོགས་ཏིང་འཛིན་ཡེ་ཤེས་ལས། །གྲུབ་པས་བདག་པོའི་ཡོངས་སུ་མ་བཟུང་བའི། །མཆོད་པའི་སྤྲིན་ཕུང་རབ་དཀར་ཐམས་ཅད་ཀྱིས། །བླ་མ་མགོན་པོ༴ །མགོན་དཀར༴ །མཁའ་འགྲོ༴ །ལས་མཛད༴ །འཁོར་ཚོགས༴ །འཁོར་དང་བཅས༴ །བདག་ཅག༴ །བྱང་ཆུབ་བར་གྱིས༴ །ནས་འབྲས་གྲོ་སྲན་ཏིལ་སོགས་འབྲས་བུའི་ཚོགས། །ཤིང་ཏོག་ཀ་ར་བུ་རམ་རྒུན་འབྲུམ་དང༌། །ཤ་མར་ཐུད་སོགས་ཟས་མཆོག་སྟོང་ཕྲག་དང༌། །ཇ་ཆང་འོ་མ་བདུད་རྩི་སྦྲང་གི་བཅུད། །སྦྱར་དང་རང་བྱུང་བདུད་རྩི་རྒྱ་མཚོའི་ཚོགས། །གསེར་དངུལ་མུ་ཏིག་རིན་ཆེན་བཱཻ་ཌཱུརྻ། །མར་གད་བྱུ་རུ་གཡུ་དང་སྤོལ་ཤེལ་དང༌། །སྲ་བརྟན་མཛེས་པས་གོ་མཚོན་སྣ་ཚོགས་དང༌། །སྣམ་བུ་དར་ཟབ་སྲབ་
འཇམ་ལྷ་རྫས་ཀྱིས། །བླ་མ་མགོན་པོ༴ །མགོན་དཀར༴ །མཁའ་འགྲོ༴ །ལས་མཛད༴ །འཁོར་ཚོགས༴ །འཁོར་དང་བཅས༴ །བདག་ཅག༴ །བྱང་ཆུབ༴ །ཅང་ཤེས་རྟ་དང་གཡང་ཆགས་ལུག་གི་ཁྱུ། །འདོད་འཇོའི་བ་དང་ཁྱུ་མཆོག་གཡང་གི་ཚོགས། །སེངྒེ་སྟག་དོམ་དྲེད་སོགས་རྐང་བཞི་དང༌། །གཏེར་བུམ་དཔག་བསམ་ཤིང་དང་གཡས་འཁྱིལ་དུང༌། །རིན་ཆེན་རི་བོ་ཡིད་འོང་ཁང་བཟང་དང༌། །གཟུགས་མཛེས་དབྱངས་སྙན་དྲི་ཞིམ་རོ་མཆོག་གོས། །བསམ་ཀུན་རྫོགས་བྱེད་དགོས་འདོད་ནོར་བུ་ཡིས། །བླ་མ་མགོན་པོ༴ །མགོན་དཀར༴ །མཁའ་འགྲོ༴ ལས་མཛད༴ །འཁོར་ཚོགས༴ །འཁོར་དང་བཅས༴ །བདག་ཅག༴ །བྱང་ཆུབ༴ །རི་རྒྱལ་གླིང་བཞི་ཉི་ཟླ་གླིང་ཕྲན་བཅས། །སྟོང་གསུམ་བགྲང་ཡས་གཞི་དང་མེ་ཏོག་གིས། །རྒྱན་པའི་གངས་ཅན་མཚོའི་ཞིང་ཁམས་ཀུན། །རང་བཞིན་གྱིས་གྲུབ་མཆོད་རྫས་རྒྱ་མཚོ་དང༌། །དངོས་བཤམས་ཡིད་སྤྲུལ་ཆོད་སྤྲིན་མཐའ་ཡས་པས། །བླ་མ་མགོན་པོ༴ །མགོན་དཀར༴ །མཁའ་འགྲོ༴ །ལས་མཛད༴ །འཁོར་ཚོགས༴ །འཁོར་དང་བཅས༴ །བདག་ཅག༴ །བྱང་ཆུབ་བར་གྱི་བསྲུང་མ་ཁྱོད་ཀྱིས་མཛོད། །དེ་ནས་བསྟོད་པ་ནི། ལྷུན་སྡུག་ཀཱཻ་ལ་ཤའི་རི་བོ་ལྟར། །འོད་ཟེར་བྱེ་བས་འཁྱུད་པའི་དཔལ་འཕྲེང་ཅན། །དབང་སྡུད་མཁའ་འགྲོ་སྟོང་གི་བདག་པོ་ནི། །མྱུར་མཛད་སྤྱན་རས་གཟིགས་ལ་ཕྱག་འཚལ་བསྟོད། །འཛུམ་བག་བརྗིད་
པས་ཞལ་རས་ཡིད་ཙམ་ཁྲོ། །འདོད་དགུ་ཆར་འབེབས་དབང་གི་རྒྱལ་པོ་ཁྱོད། །ཆོས་ཉིད་ཐིག་ལེ་སྒོང་ང་འདོད་པའི་སེམས། །དངོས་སུ་གྱུར་པའི་སྐུ་ལ༴ །དངུལ་ཆུས་མདངས་གསལ་ཧཱུཾ་ཡིག་ལས་འཁྲུངས་པ། །སྐྱེ་འགྲོ་རེ་སྐོང་དབུལ་བའི་སྡུག་བསྔལ་སེལ། །དབུ་སྐྲ་གྱེན་བརྗེས་སྦྱི་བོ་མི་བསྐྱོད་རྒྱལ། །རྒྱས་གདབ་ཆེན་པོའི་དབང་བསྐུར་ཁྱོད་ལ་བསྟོད། ཁ་བ་རི་ལ་འཆར་ཁ་གསར་བ་ལྟར། ཁྱོད་ཞལ་སྨྀན་མཚམས་སིནྡྷུར་ཐིག་ལེ་འཛེས། །རིན་ཆེན་གདུའུ་འཁྲོལ་བའི་ཁྱག་དྲུག་པ། །བླ་མེད་ཕ་རོལ་ཕྱིན་པའི་ངོ་བོར་བསྟོད། །གྲི་གུག་ཡིད་བཞིན་ནོར་བུ་ཌཱ་མ་རུ། །ནོར་བུས་གཏམས་པའི་ཐོད་པ་བུམ་པར་བཅས། །རྩེ་གསུམ་དངོས་གྲུབ་འགུགས་པས་ལྕགས་ཀྱུ་བསྣམས། །ཕྱག་དྲུག་མགོན་པོ་ཁྱོད་ལ་གུས་པས་བསྟོད། །ལྷབ་ལྷུབ་དར་དང་སྟག་ལྦགས་ན་བཟའ་ཅན། །འོད་འབར་རིན་ཆེན་བརྒྱན་ཀྱིས་སིལ་ཁྲོལ་དང༌། །ནོར་བུས་ཆུན་འཕྱང་དུ་མས་རབ་བརྗིད་པའི། །གཟི་བྱིན་ལྷང་ངེ་འབར་ལ་ཕྱག་འཚལ་བསྟོད། །འདོད་པའི་ལོངས་སྤྱོད་ཆར་ཆེན་འབེབ་བྱེད་པ། །བི་ན་ཡ་ཀའི་སྟེང་ན་རོལ་པས་བཞུགས། །རབ་སྔོན་ཙནྡན་ལྗོན་པའི་ཚལ་ན་དགྱེས། །གནས་གསུམ་འཁའ་འགྲོའི་བདག་པོ་ཁྱོད་ལ་བསྟོད། །ཐུགས་ཀར་དབང་གི་ལྷ་མོ་ལང་ཚོ་མ། །འཆར་ཁའི་འོད་རིས་གསལ་བ་ཀློག་འཕྲན་ལྟར། །མཛེས་ཤིང་དངོས་གྲུབ་གཡོ་བའི་ལྕགས་ཀྱུ་འཛིན། །སྲིད་གསུམ་དབང་དུ་སྡུད་ལ་ཕྱག་འཚལ་བསྟོད། །དེ་ལྟར་བསྟོད་ཅིང་
གསོལ་བ་འདེབས་པ་དང༌། །སྙིང་ནས་ལྷ་མཆོག་ཁྱོད་ལ་གདུང་བ་ཡིས། །མཆོད་གཏོར་འབུལ་གྱིས་བདག་ལ་མཆོག་བསྩལ་ནས༌། །དཔལ་དང་འདོད་པའི་དོན་ཀུན་གྲུབ་པར་མཛོད། །ཐུགས་རྗེའི་སྤྲྀན་ཀྱིས་དཔལ་འབྱོར་རྒྱ་མཚོ་རྣམས། །གོང་ནས་གོང་དུ་འཕེལ་ཞིང་རྒྱས་པར་ཤོག །ཅེས་པ་མགོན་དཀར་ཡིད་བཞིན་ནོར་བུའི་བསྟོད་བསྐང་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་རང་ལོ་བཅུ་དགུ་པ་ལའོ།། །།མངྒ་ལཾ།། བཀྲ་ཤིས།།