དཔལ་ལེགས་ལྡན་ནག་པོ་ཏྲཀྴད་ལྕམ་དྲལ་གྱི་གཏོར་ཆོག
དཔལ་ལེགས་ལྡན་ནག་པོ་ཏྲཀྴད་ལྕམ་དྲལ་གྱི་གཏོར་ཆོག་ཞེས་བྱ་བ་བཞུགས།
ཨོཾ་སྭཱ་སྟི། བླ་མ་ལ་ཕྱག་འཚལ་ལོ། །དཔལ་ལེགས་ལྡན་ནག་པོ་ཏྲཀྴད་ལྕམ་དྲལ་གྱི་གཏོར་ཆོག་ནི། གཏོར་མ་དཔལ་གཏོར་བཤོས་བུ་ཟླུམ་པོ་དམར་གྱི་བརྒྱན་པ་མཆོད་པ་དང་བཅས་བཤམས། དུས་བཟང་པོར་བསྙེན་པ་ལ་སོགས་པའི་སྐབས། ཐུན་གཏོར་གྲུ་གསུམ་དེ་ཡང་བཤམས། རྒྱུན་དུ་ཐུན་གཏོར་གྲུབ་ན་ལེགས་མོད་མ་གྲུབ་ཀྱང་མི་འགལ། དེ་ནས་ཡི་དམ་གྱི་བདག་བསྐྱེད་སྔོན་དུ་འགྲོ་བའི་བཟླས་པ་ཅུང་ཟད་བྱ། མཆོད་པ་གཏོར་མ་བྱིན་རླབས་ཡིད་དམ་གང་བྱེད་ཀྱིས་ལུགས་བཞིན་བྱེད། དེ་ནས། ཨོཾ་ཨ་མྲྀ་ཏས་བསངས། སྭ་བྷཱ་ཝས་སྦྱངས། རང་གི་མདུན་དུ་ཧཱུཾ་ལས་བསྲུང་འཁོར་གྱི་ནང་དུ། དུར་ཁྲོད་ཆེན་པོའི་དབུས་སུ་བྷྲཱུཾ་ལས་ཕྱི་རིན་པོ་སྣ་ཚོགས་ལས་གྲུབ་པ། གྲུ་བཞི་པ། ནང་ཐོད་མཁར་འབར་བའི་གཞལ་མེད་ཁང༌། ཤར་མིའྀ་ཐོད་པའི་རྩིག་པ། ལྷོར་རྟའི་ཐོད་པ། ནུབ་སྤྲེའུ་ཐོད་པ། བྱང་ལུག་གི་ཐོད་པའི་རྩིག་པ་ཟླུམ་པོ། དེའི་ནང་
དུ་གྲུ་གསུམ་ནག་པོ་བདུན་བརྩེགས། ལྕགས་ཀྱི་མཁར་ཟུང་དྲུག་པ་དབུས་སུ་མི་རོ་རྟ་རོ་གཅལ་དུ་བཀྲམ་པ། གསེར་གྱི་ཁྲི་དང༌། པད་ཉིད་བརྩེགས་པའི་གདན་ལ། རཾ་ལས་དཔལ་ཡེ་ཤེས་ཀྱི་མགོན་པོ་སྐུ་མདོག་དམར་ནག་སྲིན་པོ་ཁྲོས་པའི་གཟུགས། སྡང་མིག་འབར་བའི་སྤྱན་གསུམ་མཆེ་བ་གཙིགས་པ། སྨ་ར་དང་སྨིན་མ། དབུ་སྐྲ་ཁམ་ནག་འབར་ཞིང་ལྡིང་པ། གཡས་ཀྱི་ཞལ་ཤྭ་ན་མུ་ཁ་སེར་པོ་ཤེལ་མིག་ཅན། ཕྱག་བཞིའི་གཡས་གཉིས་ན་དུག་གི་སྡོང་པོ་མེ་འབར་བ་དང༌། བདུད་ཀྱི་ཞགས་པ་ནག་པོ། གཡོན་གཉིས་ན་ཁྲམ་ཤིང་དང་ཐོད་པ་སྙིང་བཅས་འཛིན་པ། དར་ནག་གི་འཇོལ་བེར་དྲེད་མོའི་བཅིང་སླག །སེང་གེའི་ལྤགས་པའི་གོ་སླག་ཅན་དང༌། གསེར་གྱི་སྐ་རགས། སག་ཏིའི་ལྷྭམ། ཐོད་སྐམ་གྱི་དབུ་རྒྱན། ཐོད་རློན་གྱི་དོ་ཤལ་ལ་སོགས་པའི་རྒྱན་དང་ཆ་བྱད་རྫོགས་པ།
བདུད་རྟ་ནག་པོ་རྟིང་དཀར་ལ་ཆིབས་པ། ཁམས་གསུམ་འདར་ཞིང་སྐྲག་པར་བྱེད་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །དེའི་གཡོན་དུ་བྷྱོཿལས་དཔལ་ལྡན་ལྷ་མོ་རེ་མ་ཏི། མ་མོ་ཡོངས་ཀྱི་གཙོ་མོ། ནག་མོ་སྤྱན་གསུམ་མཆེ་བ་གཙིགས་པ། ཕྱག་གཡས་ན་རལ་གྲི་དང་ཞིང་ལྤགས། གཡོན་གཉིས་ན་ཐོད་ཁྲག་དང་ནེའུ་ལེ་བསྣམས་པ། གླང་ཆེན་ལྤགས་པའི་སྟོད་གཡོགས་དང༌། བ་གླང་སྤགས་པའི་སྨད་གཡོགས་ཅན། རེ་ལྡེའི་ཤམ་བུ་དང༌། སྦྲུལ་རིགས་བཞིའི་སྐ་རགས་དང༌། ལྟེ་བ་ནས་ཉི་མ་དང༌། སྤྱི་གཙུག་ནས་ཟླ་བ་འཆར་བ། དྲེའུ་རྟ་རྐང་གསུམ་ལ་ཆིབས་པ། ཁྲག་མཚོའི་དབུས་སུ་མེ་རླུང་འཚུབས་མའི་དཀྱིལ་ན་བཞུགས་པ། དེ་ལྟར་ལྕམ་དྲལ་གཉིས་ཀྱི་སྐུའི་འཁོར་དུ་སྤྲུལ་པའི་མོན་པ་ཕོ་བདུན་མོ་བདུན། ལས་བྱེད་ཤྭ་ན་བདུན། གནོད་སྦྱིན་བརྒྱད་ལྕགས་ཀྱི་བྱ་ཁྲ་བརྒྱད་ཀྱི་གཟུགས་འཛིན་པ། གཤིན་རྗེ་བརྒྱད། སྟགགཟིགས། དོམ། དྲེད། འཕར་བ། སེང་གེ སྤྱང་ཁྱི་བརྒྱད་དུ་སྤྲུལ་པ། བདུད་རྒྱལ་ཉི་ཁྲི་ཆིག་སྟོང་ལྷ་དམག་འབུམ་སྟེ་ལྷ་མ་སྲིན་སྡེ་བརྒྱད་རྣམས་སྤྲིན་དཔུང་འཁྲིགས་པ་ལྟར་འཁོད་པར་གྱུར། རང་གི་སྙིང་ཁ་ནས་འོད་ཟེར་འཕྲོས། འདོད་རྒྱལ་ཁང་དང༌། ཨུ་ཙ་ལའི་དུར་ཁྲོད་དང་མུ་ལེ་སྟེང་ལ་སོགས་པ་ནས། དཔལ་ཡེ་ཤེས་ཀྱི་མགོན་པོ་ལྕམ་དྲལ་འཁོར་བཅས་བཛྲ་ས་མཱ་ཛཿ སྔོན་ཚེ་ཤཀྱ་སེངྒའི་སྤྱན་སྔ་རུ། །ལྷ་ཆེན་ཁྱོད་ཀྱི་ཇི་ལྟར་དམ་བཅས་བཞིན། །
འཕྲིན་ལས་རྣམ་བཞིའི་ལས་ལ་སྤྱན་འདྲེན་ན། །སངས་རྒྱས་བསྟན་པ་བསྲུང་ཕྱིར་གཤེགས་སུ་གསོལ། །ཛཿཧཱུཾ་བཾ་ཧོ། ཨརྒྷཾ་ནས་ཤཔྟའི་བར་གྱིས་མཆོད། ཧཱུཾ་ལྷ་མིན་དམག་ཚོགས་གཡུལ་བཟློག་ཅིང༌། །ལྷ་དམག་དཀར་པོའི་དབུགས་འབྱིན་པ། །ལྷ་ཆེན་དཔལ་འབར་འཁོར་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུཾ། རྒྱལ་བ་རིགས་ལྔའི་དབང་བསྐུར། སྐུ་གང༌། དྲི་མ་དག །ཆུའི་ལྷག་མ་ཡར་ལུད་པ་ལས་མི་བསྐྱོད་པའི་དབུ་རྒྱན། ཨོཾ་ཤྲཱི་མཧཱ་ཀ་ལ་ཏྲཀྴད་མཧཱ་ཀ་ལ་སིངྔྷི་ཡཾ་དུ་ཛ་ཛཿ ཞེས་གཙོ་བོ་དང༌། ཨོཾ་རོ་རུ་རོ་རུ་དྲི་ཙ་པ་ལ་ཨ་ཤུག་མེ་མ་ཧཱུཾ་མ་བྷྱོ་ཛ་ཛཿ ཞེས་ལྷ་མོའི་སྔགས་ཏེ་མགོན་པོའི་ཕྱེད་ལྷ་མོའི་གྲངས་སུ་བཤད། དེ་ནས་གཏོར་མ་འབུལ་ཏེ། ཨོཾ་མཧཱ་ཀ་ལ་ཏྲི་ཡཾ་ཛཿ ས་མ་ཡ་ས་མ་ལོ་ཀི་ནི་མུན་བྷྱོ་ཧཱུཾ་ཕཊ། བཱ་ལིང་ཨེ་དམ་གྲིཧྣ་ཁ་ཁ་ཁཱ་ཧི་ཁཱ་ཧི་བྷུཉྫ་ཧོ། རཀྟ་པི་བ་ཏོ་ས་མ་ཡ་སྭཱཧཱ། ཨོཾ་དེ་བི་མ་ཧཱ་ཀ་ལི་རེ་མ་ཏྲི་ཨེ་དཾ་བཱ་ལིང་ཏ་ཁ་ཁ་ཁཱ་ཧི་ཁཱ་ཧི་མཧཱ་པཉྩ་ཨ་མྲྀ་ཏ་ལ་ཁ་ཧི། མཧཱ་རཀྟ་ལ་ཁཱ་ཧི། ཞེས་ལན་གསུམ་མམ། ལྔའམ། བདུན་ལ་སོགས་པས་ཕུལ། དཔལ་ཡེ་ཤེས་ཀྱི་མགོན་པོ་མཧཱ་ཀ་ལ། རྣལ་འབྱོར་གྱི་དགྲ་ལྷ་བདུད་འདུལ་གྱི་དབང་ཕྱུག །དུག་གསུམ་ཀྱི་སྨན་པ། རིག་འཛིན་གྱི་སྲོག་ཤིང༌། གཙུག་ལག་ཁང་དང་དཀྱིལ་འཁོར་གྱི་སྲུང་མ། ལྷ་ཡི་དེད་དཔོན་ཆེན་པོ་སྲོག་བདུད་ནག་པོ་ཐོད་པའི་ཕྲེང་བ་ཅན་འཁོར་དང་བཅས་རྣམས་བ་ལིང་རྒྱན་གྱི་གཏོར་
མ་འདི་བཞེས་ཤིག་ཁཱ་རཾ་ཁཱ་ཧི། དཔལ་ལྡན་གཉན་གྱི་རེ་མ་ཏི། །བདུད་ཀྱི་ཡུམ་ལ་གཤིན་རྗེའི་ལྕམ། །ནག་མོ་དྲེའུ་ལ་བཞོན་པ། །གཅེར་བུ་བོང་བུ་ལ་བཞོན་པ། །མགྱོགས་མ་རླུང་ལ་བཞོན་པ། འཁོར་ནག་མོ་འབུམ་དང་བཅས་པ་རྣམས་བ་ལིང་རྒྱན་གྱི་གཏོར་མ་འདི་བཞེས་ཤིག །ཁ་རཾ་ཁཱ་ཧི། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་ཨཱཿཧཱུཾ། གིས་ནང་མཆོད་འབུལ། ཧཱུཾ་དད་པ་དང་ནི་དམ་ཚིག་གིས། །ཚུར་བྱོན་སྲོག་བདུད་མ་རུང་བ། །མངོན་ཤེས་རྫུ་འཕྲུལ་ཐབས་ཀྱི་གཙོ། །དྲག་པོའི་ཞལ་ལ་གཏུམ་པའི་སྐུ། །སྲིན་པོའི་གཟུགས་ཀྱིས་གདུག་པ་ཅན། །ཚར་གཅོད་བྱང་ཆུབ་སེམས་དཔའ་སྟེ། །གྲོང་ཁྱེར་སུམ་བརྩེགས་འཇིགས་པར་བྱེད། །གཏུམ་པོ་ཁྱོད་ལ་བདག་བསྟོད་དོ། །བྷྱོཿ མ་ཡི་ནང་ནས་མ་གཅིག་མ། །སྲིང་གི་ནང་ནས་སྲིད་གཅིག་མ། །དཔལ་ལྡན་གཉན་གྱི་རེ་མ་ཏི། །བདུད་ཀྱི་ཡུམ་ལ་གཤིན་རྗེའི་ལྕམ། །མ་བཅོས་ཆོས་སྐུ་བདེ་བ་ཆེན་པོ་ནི། །སྲིད་དང་ཞི་བར་མི་གནས་མཉམ་པ་ཉིད། །ཡོན་ཏན་འཕྲིན་ལས་འཚམས་པའི་སྐུར་སྟོན་པ། །དཔལ་དང་ལྡན་པའི་ལྷ་མོ་ཁྱོད་ལ་བསྟོད། །མཆོད་སྦྱིན་གཏོར་མ་འདི་བཞེས་ལ། །སོགས་ནས། ཀུན་འགྲུབ་ཤོག་ཅེས་པའི་འདོད་དོན་ཞུ།ཐུན་གཏོར་ཡོད་ན་སྐབས་འདིར་འབུལ་ཏེ། ཧཱུཾ་སྲིད་གསུམ་དབང་བསྒྱུར་མགོན་པོ་ཡབ་ཡུམ་དང༌། །སྟོབས་ལྡན་ཕོ་ཉ་མངགས་གཞུགས་འཁོར་དང་བཅས། །ཤིན་ཏུ་འཇིགས་ཁྲོས་དྲག་ལ་རྔམ་པའི་གཟུགས། །
རྣོ་བའི་མཚོན་འཛིན་མགྱོགས་པའི་ཤུགས་ཅན་རྣམས། །ཟག་མེད་བདུད་རྩིའི་གཏོར་མ་འདི་བཞེས་ཤིག །སྨན་རག་ཕུད་ཀྱི་གཏོར་མ་འདི་བཞེས་ཤིག །ཛ་གད་དཔའ་བོའི་སྨན་ཕུད༴ །ཛམ་བུ་ཊ་ཀའི་ཞལ་ཟས༴ །དམ་ཉམས་དགྲ་བོའི་ཤ་ཁྲག༴ །སྔར་བཅོལ་ལེགས་པའི་གཏང་རག་གཉན་པོར་འབུལ། །ད་བཅོལ་ལེགས་པའི་གསོལ་འདེབས་གཉན་པོར་བཞེས། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །འགལ་རྐྱེན་ནད་གདོན་བར་ཆད་ཞི་བ་དང༌། །ཚེ་དང་བསོད་ནམས་དཔལ་འབྱོར་རྒྱས་པ་དང༌། ཁྱད་པར་སངས་རྒྱས་བསྟན་པ་སྐྱོང་བ་དང༌། །བླ་མས་བཅོལ་བའི་འཕྲིན་ལས་སྒྲུབ་པར་མཛོད། །རྒྱལ་བའི་བཀའ་དང་དམ་ཚིག་བདེན་པ་བཞིན། །བྱང་ཆུབ་སྒྲུབ་པའི་བར་ཆད་བྱེད་པ་ཡི། །སྡང་བའི་དགྲ་དང་གནོད་པའི་བགེགས་ལ་སོགས། །ཐམས་ཅད་རྡུལ་ཕྲན་བཞིན་དུ་བརླག་པར་མཛོད། །བསྟན་པ་རྒྱས་པའི་ལས་འདི་མྱུར་དུ་སྒྲུབ། །རྣལ་འབྱོར་བཅོལ་པའི་འཕྲིན་ལས་འགྲུབ་པར་མཛོད། །ཅེས་འདོད་དོན་ཞུ། ཡིག་བརྒྱ། བཟོད་གསོལ། གཤེགས་གསོལ། བརྟན་བཞུགས། སྨོན་ལམ་རྣམས་གང་འགྲུབ་བྱ། ཞེས་དཔལ་ཡེ་ཤེས་ཀྱི་མགོན་པོ་ལྕམ་དྲལ་གྱི་གཏོར་ཆོག་རྒྱུན་གྱི་ཉམས་ལེན་ཞེས་བྱ་བ་འདི་ཡང་ས་སྐྱོང་གཞོན་ནུ་དམ་པའི་མངའ་བདག་ཀུན་དགའ་རབ་བརྟན་དབང་གི་རྒྱལ་པོའི་བཀས་བསྐུལ་ནས། ཏཱ་ར་ནཱ་ཐས་སྨྲས་པའོ།། །།སྔོན་ཚེ་བླ་མ་གོང་མའི་སྤྱན་སྔ་རུ། །ཆོས་བཞིན་སྒྲུབ་པར་མཛད་པའི་གང་ཟག་ལ། །བར་ཆད་བསྲུང་ཞིང་སྐྱོང་བར་ཞལ་བཞེས་པའི། །མཐུ་ལྡན་ཏྲཀྴད་ཆེན་པོའི་བཀྲ་ཤིས་ཤོག །དགེའོ། །འདི་བྲིས་དགེ་བས་ངེས་དོན་བསྟན་པའི་མི་མཐུན་ཕྱོགས་ཐམས་ཅད་གཞོམ་པའི་རྒྱུར་གྱུར་ཅིག། ཤུ་བྷཾ།། བཀྲ་ཤིས།།