བཛྲ་བྷཻ་ར་བའི་ལས་མཁན་ལེགས་ལྡན་ལྷའི་མགོན་པོའི་སྒྲུབ་ཐབས་ལས་སྦྱོར་དང་བཅས་པའི་ལག་ལེན།
བཛྲ་བྷཻ་ར་བའི་ལས་མཁན་ལེགས་ལྡན་ལྷའི་མགོན་པོའི་སྒྲུབ་ཐབས་ལས་སྦྱོར་དང་བཅས་པའི་ལག་ལེན་བཞུགས། སྙན་རྒྱུད་ཤིན་ཏུ་གསང་བ།
སངས་རྒྱས་ལ་ཕྱག་འཚལ་ལོ། །བཅོམ་ལྡན་འདས་འཇམ་དཔལ་འཇིགས་མཛད་ཆེན་པོའི་ལས་བྱེད་དྲག་པོ་ཆེན་པོ་ཞེས་བྱ་བ་དབང་ཕྱུག་ཆེན་པོའི་སྒྲུབ་ཐབས་ནི་འདི་ཡིན་ཏེ། འདི་ནི་མུ་སྟེགས་ལུགས་མ་ཡིན་ལ། རྙིང་མར་གྲགས་པའི་རླུང་ཞགས་ཀྱི་ལྷ་དང་ཡང་འདི་མི་འདྲ་སྟེ། འདི་ནི་ངེས་དོན་དུ་ཡེ་ཤེས་པ་ཡིན་ལ། དྲང་དོན་ཡང་ལྷ་ཆེན་པོ་གསུམ་གྱི་ཡ་གྱལ་དེ་ཡིན། ཅིག་ཤོས་དེ་ནི་འདིའི་འཁོར་དུ་གཏོགས་པ། བོད་ཁམས་ཉིད་ལ་གཙོ་བོར་སྤྱོད་པའི་དྲེགས་པ་གདུག་རྩུབ་ཅན་ཞིག་ཡིན་པར་སྣང་བས་སོ། །འདི་ནི་རྡོ་རྗེ་མཁའ་འགྲོའི་རྒྱུད་དང༌། ཏེ་ལོའི་རྟོག་པ་ཆེ་ཆུང་གཉིས་ལ་བརྟེན་པའི་མན་ངག་རྭ་ལོ་རྡོ་རྗེ་གྲགས་པའི་ཞལ་གདམ་ཡིན་ནོ། །ཏེ་ལོའི་རྟོག་པ་ཆེ་ཆུང་དེ་གཉིས་ཀྱང་འཇིགས་མཛད་ཆེན་པོའི་རྒྱུད་རྒྱས་པའི་དུམ་བུ་ཡིན་ནོ། །འདི་ལ་རྩ་བའི་བསྙེན་པ་ནི་རང་གི་མདུན་དུ་གཏོར་མ་སྤྱྀ་འགྲོའི་དང༌། ད་དྷུ་རའི་མེ་ཏོག །མེ་ཏོག་དམར་པོ་གཞན་དང༌། ཚིལ་ཆེན། ཤ་ཆེན། ཆང་རཀྟ། དུག་ཆུའི་མཆོད་ཡོན་སོགས་བཤམས། དཔལ་འཇིགས་མཛད་ཆེན་པོའི་བདག་བསྐྱེད་སྔོན་དུ་འགྲོ་བས་མཆོད་གཏོར་རྣམས་ཡི་དམ་གྱི་ཆོ་ག་བཞིན་དུ་བྱིན་གྱིས་བརླབས། སྟོང་པའི་ངང་ལས་རང་གི་ཐུགས་ཀ་ནས་ཧཱུཾ་གཅིག་སྤྲོས་པ་ཡོངས་སུ་གྱུར་པ་ལས། ལེགས་ལྡན་ལྷའི་མགོན་པོ་སྐུ་མདོག་རྩ་ཞལ་སྔོ་སྐྱ། ཞལ་ལྔ་གཡས་དམར། རྒྱབ་སེར། གཡོན་དཀར། སྟེང་ཞལ་དུད་ཁའོ། །སྟེང་ཞལ་ལྔ་པོ་ཐམས་ཅད་སྤྱན་གསུམ་པ། ཕྱག་བཞི་དང་པོ་གཉིས་ཀྱི་རྩེ་གསུམ་དང་ཁ་ཊཾ་ག །འོག་མ་གཉིས་ཀྱིས་
ཌཱ་མ་རུ་དང་ཆང་གིས་གང་བའི་ཤར་ལྷོ་ཐོད་པ་འཛིན་པ། སྟག་ལྤགས། མི་ལྤགས། གླང་ལྤགས། སྦྲུལ་དང་མགོ་འཕྲེང་སོགས་ཀྱིས་བརྒྱན་པ། རལ་པའི་ཐོར་ཚུགས་གངྒཱ་དང་ཟླ་བས་བརྒྱན་པ། ཞབས་གཡས་བསྐུམ་གཡོན་བརྐྱངས་པས་ཁྱུ་མཆོག་དཀར་པོའི་གདན་ལ་གནས་པ། གཡོན་གྱི་ཕྱོགས་ནས་ལྷ་མོ་གཽ་རི་དམར་མོས་འཁྱུད་པའོ། །རང་གི་སྙིང་ག་ནས་འོད་ཟེར་འཕྲོས། རང་བཞིན་གྱི་གནས་ནས་ལེགས་ལྡན་ལྷའི་མགོན་པོ་འཁོར་དང་བཅས་པ་བཛྲ་ས་མཱ་ཛཿ ཀ་པཱ་ལ་མཱ་ལཱ། ཨ་ལིཾ་ཀྲི་ཏེ་ཤྭ་ར་ཧཱུཾ་ཧཱུཾ། ཨ་གཙྪ་ཡ་ཨ་གཙྪ་ཡ་རུ་དྲ་ཨ་སྭཱཧཱ། ཞེས་སྤྱན་དྲངས། སུམ་བྟའམ་ཨ་མྲྀ་ཏས་བགེགས་བསྐྲད། ཛཿཧཱུཾ་བཾ་ཧོཿ སྙིང་པོའི་མཐར་ས་མ་ཡ་སྟྭཾ། ཞེས་དམ་ལ་བཞག །ཨོཾ་མ་ཧེ་ཤྭ་ར་ས་པ་རི་ཝ་ར་ཨརྒྷཾ་ནས་ཤཔྟའི་བར་གྱིས་མཆོད། ལྷ་ཡི་རྒྱལ་པོ་མཐུ་བོ་ཆེ། །འཇིག་རྟེན་གསུམ་ལ་དབང་བསྒྱུར་པ། །དྲག་པོ་མིག་གསུམ་བདེ་བྱེད་དེ། །ཨུ་མའི་བདག་པོ་ཁྱོད་ལ་བསྟོད། །དཔྲལ་བར་ཨོཾ། མགྲིན་པར་ཨཱ། ཐུགས་ཀར་ཧཱུཾ། ཐུགས་ཀ་ནས་དབང་གི་ལྷ་སྤྲོས་ཏེ་དབང་བསྐུར་ཏེ་རྡོ་རྗེ་རྩེ་ལྔ་པས་དབུ་བརྒྱན། སྤྱན་འདྲེན་གྱི་སྔགས་ཀྱི་མཐར་ཨ་ཀཱ་རོ་བཏགས་པས་གཏོར་མ་ཕུལ། རང་གི་ཐུགས་ཀའི་ས་བོན་གྱི་ཞབས་ཀྱུའི་ནང་དང༌། མདུན་བསྐྱེད་ཀྱི་ཐུགས་ཀར་སྔགས་འཕྲེང་བསམ་ལ། ཨོཾ་ཨཿརུ་དྲ་ཧཱུཾ་ཧཱུཾ་སྭཱཧཱ། ཞེས་བཟླས། ཐུན་འཇོག་ཁར་མཆོད་བསྟོད་བྱས་ཏེ། བཛྲ་མུཿ ཞེས་ཡེ་ཤེས་པ་ལྟེ་བའི་ས་བོན་ལ་བསྡུ། འདི་ལ་བསྙེན་པའི་གྲངས་ཀྱི་ངེས་པ་མེད་པའི་ཇི་ལྟར་བདེ་བའོ། །ལས་ཀྱི་བསྙེན་
པ་ནི་མཎྜལ་གྲུ་གསུམ་སྤྱྀ་དང་མ་ཐུན་པར་བཤམས། དབུས་སུ་རྩེ་གསུམ་བྲིས་གཏོར་མ་ནོར་བུ་མིག་གསུམ་ཤ་ཁྲག་གིས་བརྒྱན། མཆོད་གཏོར་བཤམས༌། རྩ་བའི་བསྙེན་པའི་སྐབས་ནི་མཁའ་འགྲོ་ཡིན། འདིར་ཤིན་ཏུ་ཁྲོ་བོར་བསྒྱུར། སྔར་གྱི་བསྙེན་པས་སྔགས་ལ་ཨོཾ་ཨ་ཎྲྀ་ཛ་ས་མ་ཡ། སྲོག་བྲིང་བྲིང་ཛ་ཛཿ ཞེས་བཏགས་པ་བཟླ་ཞིང༌། སྔགས་འཁོར་ཐུགས་ཀར་ནས་ལྟེ་བར་འཁོར་བའི་ལུགས་གཅིག་དང༌། ཐུགས་ཀའི་ཧཱུཾ་གི་མདུན་བསྐྱེད་ཀྱི་སྔགས་འབྲས་བུའི་ཞལ་ནས་ཅུང་ཟད་རེ་བླངས་ཏེ། རང་གིཐུགས་ཀའི་སྔགས་ལ་བསྟིམ་པའི་ལུགས་གཅིག་སྟེ་གཉིས་པོ་སྤེལ་གྱིན་བཟླ། ཚུལ་དེ་ལྟ་བུའི་ཞག་བདུན་སོགས་བྱའོ། །དཀྱིལ་འཁོར་ལ་ནུབ་རེ་བཞིན་བརྟན་བཞུགས་བྱ། གཤེགས་གསོལ་དང་བསྡུ་བ་མི་དགོས། འདི་དག་གི་སྐབས་རྣམས་སུ། མཧཱ་དེ་བ་ཨེ་ཛ། ཨུ་མ་དེ་བཱི་ཨེ་ཛ། དྷུ་པྲ་མ་ངྷུ་ཁྲག་ད་དུན་ཏི་མ་དུ་ཛཿ ཞེས་པ་རྦད་སྔགས་བརྒྱ་རྩ་རེའང་ཇི་ལྟར་འོས་པ་ཡང་བཟླ་ཞིང༌། མཧཱ་དེ་བ་ཏི་ཛ་ཏི་ཛ། སཾ་བྷྲ་མ་ན་རཀྵ་ཀང་ཀ་ལ་ཡ་ཧཱུཾ། དེ་བ་ར་ཛ་མ་ཧཱ་ནི་ཛ། དགྲ་བོ་མཱ་ར་ཡ་ཐུན་རྦད་ཤཀ་སེ་ན་ཛ་ཛ་ཧཱུཾ་ཧཱུཾ། ཙ་ཏུར་མུ་ཁ་རཀྵ་མ་ན། ཀང་ཀ་ལ་ཡང་ཧཱུཾ། མཧཱ་དེ་བ་ཨ་མུ་ཀ་མཱ་ར་ཡ་སོད། ཎི་ཧུར་ཐུམ་ཛ། ཤ་ཏྲུན་མཱ་ར་ཡ་རྦད། ཅེས་པ་ནི་བསད་སྔགས་དང་ཐུན་ཟོར་གཅིག་ཏུ་དྲིལ་བ་སྟེ། འདི་ཡང་ཉེར་གཅིག་སོགས་ཇི་ལྟར་འོས་པར་བཟླའོ། །དེ་ལྟར་ལས་ཀྱི་བསྙེན་པ་འགྲོལ་བའི་སྐབས་སུ་མདུན་བསྐྱེད་གཤེགས་བསྡུ་བྱེད། རྟེན་ཡོད་ན་བརྟན་བཞུགས་བྱ་མེད་ཀྱང༌། ཚན་པོ་ཆེ་ཙམ་མ་གཏོགས་འདིའི་བྲིས་འབུར་གྱི་སྐུ་བརྙན་བཞེངས་པའི་རྒྱུན་མེད་དོ། །སྒྲུབ་པ་ནི་སྔར་གྱི་དཀྱིལ་འཁོར་དང་འདྲ་བའི་མདུན་དུ་འབྲུབ་ཁུང་སྤྱྀ་དང་མཐུན་པ་དུག་གིས་བྱུག་པའི་ནང་དུ། གྲོག་མཁར་
བདུན་དང༌། ཟག་རྫས་དང༌། རྐང་རྗེས་བསྲེས་པའི་བག་ཟན་ཀྱི་ལིང་གའི་སྙིང་ཁར་བསད་སྔགས་ཀྱིས་མཐའ་བསྐོར་བའི་བྲིས་ལིང་བཅུག །དེ་དབུས་སུ་བཞག །རོ་གཡམ་གྱིས་ཁ་བཅད། མཚན་ངན་གཉིས་སུ་སྐམ་ཐུན་རློན་ཐུན་བཞག །རྩིབ་མའི་གཞི་དང༌། ཤུག་ཆེན་ཀྱི་མདའ་ལ་དུག་ཁྲག་གིས། བསད་སྔགས་བྲིས་པ་ཡང་བཤམས། དེ་གསུམ་ལ་སོགས་བསད་སྔགས་དྲུག་ཅུ་རེའམ་མཐུན་མོང་དུ་དྲུག་ཅུ་བཟླས་ཀྱང་རུང་སྟེ་ཐུན་རེ་བཞིན་དགོས་སོ། །ཆོ་ག་ནི་སྔར་བཤད་པ་བཞིན་ལས། གཏོར་འབུལ་གྱི་སྐབས་སྤྱན་འདྲེན་པའི་སྔགས་ཀྱི་མཐར། ཨེ་དཾ་བཱ་ལིང་ཏ་ཁ་ཁ་ཁཱ་ཧི་ཁཱ་ཧི་སརྦ་ཤ་ཏྲུན་ད་ཧ་ད་ཧ། པ་ཙ་པ་ཙ་མཱ་ར་ཡ་ཧཱུཾ་ཕན། ཞེས་བྱ། བཟླས་པའི་སྐབས་བོད་རྦད་གཅིག་ཏུ་དྲིལ་བ་དང་འཇུག་ཏུ་རྦད་སྔགས་ལ་བསད་སྔགས་བཏག་པ་ཅུང་ཟད་རེ་བཟླ། གཏོར་འབུལ་སོང་མཚམས་སུ་འབྲུབ་ཁུང་ཁ་ཕྱེ་ནས་ལིངྒ་དགུག་གཞུག་དྲག་ཏུ་བྱ། དེ་ནས་ལྷ་དང་དབྱེ་བའི་དམིགས་པ་དང་བཟླས་པ་བྱེད། ཡིད་དམ་གྱི་ཕྱག་མཚན་འདེབས་ཁ་རྣམས་སོང་བའི་རྗེས་སུ་བོད་རྦད་བསད་གསུམ་གཅིག་ཏུ་དྲིལ་བའི་སྔགས་བཟླ་བཞིན་དུ་ཐུན་གསུམ་པོ་ཅུང་ཟད་པ་རྡེག །བསྒྲུབ་བྱ་མྱོས་ཤིང་བཅིངས་ལ་ཐར་ས་མེད་པར་བསམ། འབྲུབ་ཁུང་ཁ་བཅད་དེ་རི་རབ་ཀྱིས་ཀྱང་མནན་པར་མོས། བསྒྲུབ་བྱ་འདི་ཞེས་བྱ་བ་སྟཾ་བྷ་ཡ་ལཾ། ཞེས་བརྗོད་དེ་ལྟར་བསྒྲུབས་པས་རྟགས་འབྱུང༌། དེ་ནས་ལས་ལ་སྦྱར་བ་ནི། གཞན་སྔ་མ་དང་འདྲ་བ་ལས། མདུན་བསྐྱེད་བཟླས་པའི་སྐབས་སུ་བོད་རྦད་བསད་གསུམ་གཅིག་ཏུ་དྲིལ་ནས་བཟླ། ཐུན་རེ་བཞིན་ལིང་ག་གསར་པ་རེ་ཡང་བཅས། དགུག་གཞུག་ལྷན་ཅིག་ཏུ་བྱས། ཐུན་བརྡེགས་པའི་བར་དུ་འདྲ་བ་ལས་འབྲུབ་ཁུང་ཁ་བཅད་དེ་མནན་ལིང་ག་གསར་བ་ཕུར་སྐོར་བྱས། ཕུར་བས་བཏབ་སྟེ་བསྒྲལ་ནས་གཏོང་མ་ལ་བཏབ། གཏོར་
སྔགས་ཀྱི་འབུལ་ལོ། །མི་རིང་པར་རྟགས་འབྱུང་ཞིང༌། མ་བྱུང་རུང་ཞག་བདུན་སོགས་སོང་བ་ན་འབྲུབ་ཁུང་གི་ལིང་ག་ཡང་ཕུར་བུས་བཏབ། རལ་གྲིས་གཏུབ་ནས། དུག་ཤིང་དམ་ཚེར་མ་ཅན་གྱི་ཤིང་ལ་མེ་སྦར་བའི་ནང་དུ་ཚུ་ཚན་ངྷ་རིའི་ཆོ་ག་ཞིབ་མོ་ནས་འབྱུང་བ་ལྟར་སྔགས་བཟླས་ཤིང༌། ཐལ་བ་ལམ་རྒྱ་གྲམ་དུ་མནན་པར་བྱའོ། །དེ་ནས་གཏོར་ཟོར་འཕང་བ་ནི་འོག་ཏུ་འཆད་པར་འགྱུར་རོ། །འདི་ནི་ལེགས་ལྡན་ལྷ་མགོན་ཉིད་སྒོས་སྒྲུབ་ཀྱི་ཚུལ་ཡིན་ལ། གཤྀན་རྗེའི་འཁོར་ལོ་གཏོད་ན་དེ་དང་སྦྲེལ་ཚུལ་ཤེས་དགོས་སོ། །ཚུ་ཚུན་རྡ་རིའི་ཆོ་ག་ཞིབ་མོའི་ལུགས་ལྟར་སྒྲུབ་ན། བདག་བསྐྱེད་ཀྱི་བཟླས་པ་སྟོང་ཙམ་སོང་བའི་མཐར། རང་གི་སྙིང་ག་ནས་རཾ་སྤྲོས་པ་ལས་ཉི་མ། ཕཊ་སྤྲོས་ཏེ་དེའི་སྟེང་དུ་འཁོར་བ་ལས་འོད་འཕྲོས། གདུག་པ་ཅན་ཐམས་ཅད་ཚར་བཅད་ཚུར་འདུས་ཡོངས་སུ་གྱུར་པ་ལས། རིན་པོ་ཆེའི་མིག་གསུམ་པ། དེ་ཞུ་བ་ལས་བྱུང་བའི་དབྱུག་ཏོར་གྱུར། དེ་ལས་ལྷ་ཆེན་པོ་སྐུ་མདོག་དམར་པོའམ་ནག་པོ་ཁྲོ་བོའི་ཆ་བྱད་རྫོགས་ཤིང་སྦྲུལ་གྱི་ཚངས་སྐུད་ཅན། གཡས་གྲི་གུག་འཕྱར་ཞིང་གཡོན་ཐོད་ཁྲག་བསྣམས་པ། ཞབས་གཉིས་གྱད་ཀྱི་དོར་སྟབས་ཀྱིས་བསྒྲུབ་བྱའི་ལུས་ལ་མནན་པ་ཞིག་སྒོམ། ཡེ་ཤེས་སྤྱན་འདྲེན་གོང་དུ་བཤད་པ་དང་འདྲ། རང་དང་ཕོ་ཉའི་ཐུགས་ཀར་ཕཊ་ཀྱི་མཐར་སྔགས་ཀྱི་བསྐོར་བར་བསྒོམ། ཨོཾ་རུ་དྲ་མ་ཧེ་ཥཱ་ར་ཡོ་ཀ་པྲ་ཤ་མ་མ་ཡོ་ག་སིངྔྷི་ད་ད་ཧི་མེ་སྭཱཧཱ། ཞེས་པ་ཅི་ནུས་སུ་བཟླ། ཐུན་འཇོག་ཁར་མཆོད་བསྟོད་བྱས་ལ་ཡེ་ཤེས་པ་གཤེགས། དམ་ཚིག་པ་བསྡུའོ། །འདི་ལ་གཙོ་བོ་བྱེད་ན་འབུམ་ཕྲག་བཞི། དེ་མིན་འབུམ་ཙམ་བཟླས་པས།
བསྙེན་པ་ཡིན། སྒྲུབ་པ་ནི་དེ་དང་འདྲ་བ་ལས། རང་དང་ལྷ་ཆེན་གྱི་ཐུགས་ཀ་ནས་འོད་ཟེར་འཕྲོས་སོ། །བསྒྲུབ་བྱ་མདུན་དུ་བཀུག་པ་ལ་གཙོ་བོའི་ཞབས་འོག་གི་གདོང་བརྙན་སྤྲོས་ཤིང་བསད་པའི་ལས་མཛད་པ་དང༌། ལྷ་ཆེན་གྱིས་ཀྱང་ཞབས་ཀྱིས་བཏེགས་ཤིང་གྲི་གུག་གིས་གཏུབས་པར་བསམ་ལ། ཧྲིཿཥྟིའི་མཐར་ཧཱུཾ་ཧཱཿད་ཧ་ད་ཧ། པ་ཙ་པ་ཙ། ཞེས་བཏེགས་ལ་ཁྲི་ཕྲག་ཅིག་བཟླ་བར་བྱའོ། །ལས་སྦྱོར་གི་ལས་ཚོགས་འཐོར་བུ་བ་རྣམས་ཆོ་ག་ཞིབ་མོ་ཉིད་ལས་གསལ། སྦྱིན་སྲེག་གི་བསད་ལས་ནི་མཆོད་གཏོར་དང་ལིང་ག་ལ་ཚུ་ཚུན་ངྷ་རའི། ཤ་རུས་བསྲེ་ཞིང༌། སྦྱིན་བསྲེག་འབུལ་བའི་སྔགས། ཨོཾ་རུ་དྲ་ནས་མི་སྭཱཧཱ་ཧཱུཾ་ཧ། ད་ཧ་ད་ཧ། པ་ཙ་པ་ཙ་ཨུཏྟེ་ཡ་ཧཱུཾ་ཕཊ། ཨོཾ་མ་མ་ཧུ་ཡ་ཏེ། ཆེ་གེ་མོ། །མཱ་ར་ཡ་ཕཊ། ཅེས་བཟླས་པའི་ཁྱད་མ་གཏོགས། གོང་རྩ་བའི་སྒྲུབ་ཐམས་ཀྱི་ལས་སྦྱོར་དང་འདྲའོ། །འདི་ནི་གཤིན་རྗེའི་འཁོར་ལོ་སྒྲུབ་པའི་ཆོ་ག་དང་སྦྲེལ་ཏེ་འཁོར་ལོ་དབང་ཕྱུག་ཆེན་པོ་ལ་གཏོད་པ་དང༌། འཁྲུལ་འཁོར་སྦྱིན་སྲེག་ཏུ་བྱེད་པ་ལ་ཤིན་ཏུ་བསྔགས། སྒོས་སུ་སྒྲུབ་ནའང་འཁྱེར་བདེའོ། །འདིའི་ཡི་གེ་རྙིང་པ་ལ་ལ་ན། ཚོགས་བདག་གི་གདོང་ཅན་ཟེར་བ་ཡོད་པས། གླང་པོ་ཆེའི་གདོང་ཅན་དང༌། གླང་གི་གདོང་ཅན་དང༌། མ་ཧེའི་གདོང་ཅན་ཏུ་འདོད་པ་སོགས་བྱུང་ཀྱང༌། རང་ལུགས་ཁྲོ་ཞལ་རང་དུ་བྱེད་པ་ལྟར་འཐད་དོ། །ཡང་ལས་མཁན་ཏེ་ལོའི་དྲག་པོ་བ་ནས་འབྱུང་བ་ལྟར་བསྒྲུབ་ན། ཐོག་མར་ཉེ་བའི་བསྙེན་པ་ནི། རང་གི་མདུན་ཏུ་བྷྲུཾ་ལས་དབྱུག་ཏོ་བྷྲུཾ་གྱིས་མཚན་པ་ཡོངས་སུ་གྱུར་པ་ལས་དབང་ཕྱུག་ཆེན་པོ་སྐུ་མདོག་དམར་པོ་ཞལ་གཅིག་ཕྱག་གཉིས། གཡས་མི་མགོ་རློན་པས་མཚན་པའི་དབྱུག་ཏོ་འཕྱར་
ཞིང༌། གཡོན་ཐོད་ཕྲག་ཐུགས་ཀར་འཛིན་པས། ཁྲག་ཆེན་དང་ཐལ་ཆེན་གྱིས་ལུས་ལ་བྱུག་པ། ཁྲོ་བོའི་ཆ་བྱད་རྫོགས་ཤིང༌། གཡོན་བརྐྱང་གི་སྟབས་ཀྱིས་མི་རོའི་གདན་ལ་བཞུགས་པ། འཁོར་སྲིན་པོ་ཕོ་མོ་དང༌། བྱ་དང་གཅན་གཟན་གདུག་པའི་ཚོགས་ཀྱིས་བསྐོར་བའོ། །རང་གི་སྙིང་ཁའི་སྔགས་འཕྲེང་ལས་འོད་འཕྲོས། སྟེང་ཞལ་དམར་མོའི་ཞལ་ནས་འཐོན། དབང་ཕྱུག་ཆེན་པོའི་སྤྱྀ་བོའི་ནས་ཞུགས། སྙིང་ཁའི་སྔགས་འཁོར་བསྐུལ་དེའི་འོད་ཟེར་འཁོར་ཚོགས་ལ་ཕོག་པའི་གཙོ་འཁོར་ཐམས་ཅད་དབང་དུ་འདུས་པར་བསམ། མཧཱ་དེ་བཱ་ད་ཥ་རར། ཞེས་པ་ཅི་ནུས་བཟླས། ཐུན་འཇོག་ཁར་དེ་ཉིད་མི་དམིགས་པར་བསྒོམ། དེ་ལྟར་ཞག་བདུན་སོང་ནས། སྔར་གྱི་སྔགས་ལ། དགྲ་པོ་མཱ་ར་ཡ་ཙིཏྷ་ཧུར་ཐུམ། ཞེས་པ་བཏགས་ཏེ་བཟླ། ཡང་ཞག་བདུན་སོང་བ་ན་སྔགས་དེའི་མ་དྲུག་ཏུ་ཡང༌། ན་མཿབ་ཧཱ་བྷཱུ་ཏ་དགྲ་བོ་མཱ་ར་ཡ་ཕཊ། ཅེས་པ་བཏགས་ཏེ་བཟླ། བདུན་གསུམ་ཉི་ཤུ་རྩ་གཅིག་གིས་བསྙེས་པ་རྫོགས་པ་ཡིན། འདི་སྐབས་གཏོར་མ་ཤ་ཁྲག་གིས་སྤག་ཤིང་ནོར་བུ་མིག་གསུམ་གྱིས་བརྒྱན་པ་རེ་བཤམས། བཟླས་པ་གང་བྱེད་པའི་སྔགས་ཀྱིས་མཐར་ཨ་ཀཱ་རོ་བཏགས་ནས་འབུལ། ལས་སྦྱོར་ཉིད་ལ་བལྟོས་པའི་བསྙེན་སྒྲུབ་ལས་གསུམ་ནི། དང་པོར་ཏེ་ལོའི་ཁྲག་དང་དུག་ཁྲག་སོགས་བསྲེས་པའི་སྣག་ཚས། འཁོར་ལོ་རྩིབས་བཞི་མུ་ཁྱུད་དང་བཅས་པའི་ལྟེ་བར། ཧྲྀཿཥྟཱིཿས་བསྐོར་བའི་དཀྱིལ་དུ་བསྒྲུབ་བྱའི་མིང་སྤེལ། མཱ་ར་ཡ་ཕཊ་དང་བཅས་པ་འབྲི། རྩིབས་བཞི་ལ་ཡི་གེ་བརྒྱད་པ་དང་དགུ་པ་ཚར་རེ།
མུ་ཁྱུད་ལ་ཡི་གེ་བཅུ་གཉིས་པས་བསྐོར། རྩིབས་མཆན་ལ་བསྒྲུབ་བྱ་འདི་ཞེས་བྱ་བ་མ་ཧེའི་ཤཱ་རས་མཱ་ར་ཡ། ཞེས་པ་འབྲི། དེ་ཡང་ལིང་གའི་ལུས་ལ་འབྲི་བ་ཡིན། དེ་ལ་དགུག་གཞུག་དང༌། སྲབ་རྩིས་བྱས། ཏེ་ལོའི་ལྤགས་པ་རླིད་བཤུས་སྡེར་མོ་དང་བཅས་པ་མཉེས་ནས་ཕྱི་ནང་བསྒྱུར་པའི་ལྤགས་པ་ལའང། གོང་གི་འཁོར་ལོ་དེ་འབྲི་དགོས་པ་ཡིནའང༌། ཏེའུ་མ་ལ་ངོས་འཛིན་མི་གཅིག་པ་ཡོད་པས། ཚུ་ཚུནྡྷ་ར་ལ་ཟེར་ན་བོད་ཀྱི་འདི་ལུས་ཆུང་བས་འཁོར་ལོ་ཇི་བཞིན་འབྲི་ཐུབ་པ་དཀའ་འོ། །ངེས་པ་ནི་ཚུ་ཚུན་ངྷ་ར་ཡིན་ནའང༌། བོད་ཀྱི་ཏེ་ལོར་གྲགས་པ་འདིས་དེའི་དོད་ཐུབ་པ། གྲུབ་ཐོབ་ཀྱི་དགོངས་པ་ཡིན་ན་དག་པ་མི་གཏོང་སྟེ། འདི་ལ་ནི་འཁོར་ལོ་ཤོང་བ་ལྷག་བཅས་སོང་བས་ཚར་གཉིས་བྲིས་ན་ལེགས་སོ། །གང་ལྟར་ནའང་རླིད་བཤུས་ཀྱི་ནང་དུ་བསྒྲུབ་བྱའི་བཤང་ལྕི། རྐང་རྗེས་ཀྱི་ས། སྐྲ་དང༌། ཕ་མེས་ཀྱི་རུས་པ་སོགས་རྫས་གང་རྙེད་ཀྱི་དབུས་སུ་སྔར་གྱི་འཁོར་ལོ་དང་བཅས་པ་བཅུག །རླིད་བཤུས་ཀྱི་བསྐྱལ་བ་རོ་སྐྲས་བཅིངས། འབྲུབ་ཁུང་སྤྱི་དང་མཐུན་པའི་ནང་དུ་བཅུག །དྲག་པོའི་མཆོད་རྫས་སྤྱྀ་དང་མཐུན་པ་ལ་ཏེ་ལོ་ཤ་ཁྲག་བསྲེས་པ་བཤམས། འབྲུབ་ཁུང་གི་དབུས་སུ་བསྒྲུབ་བྱ་སྒྱེལ་བའི་སྟེང་དུ་ལེགས་ལྡན་ཉིད་བསྒོམ། གཞན་གོང་དུ་བཤད་པ་དང་འདྲ་བ་ཞག་གསུམ་ལྔ་བདུན་ཚུན་ཆད་བྱེད་པ་ནི་ལས་སྦྱོར་གྱི་བསྙེན་པའོ། །དེ་ནས་གཞན་འདྲ་བ་ལས་འབྲུབ་ཁུང་ནང་གྀ་ལིང་ག་དང༌། རྐྱལ་བའི་ནང་གི་བྲིས་ལིང་གཉིས་ཀར་ལ་དམིགས་ནས་དགུག་གཞུག་ཡང་ཡང་བྱེད་ཅིང་སྔགས་ཡིག་དཔྱད་པ་ལ་དགུ་བ་བཏགས། བཅུ་བདུན་པ་དྲག་ཏུ་བཟླ། དབང་ཕྱུག་གི་ཞབས་ཀྱིས་མནན་
ཅིང༌། དབྱུག་པས་བརྡུངས་པས་མྱོས་ཤིང་ཐར་པ་མེད་པར་བསམ། ཞག་ཆས་བྱ་སྟེ་ལས་སྦྱོར་གྱི་སྒྲུབ་པའོ། །དེ་ནས་རྩ་བའི་སྒྲུབ་ཐབས་སུ་བཤད་པ་ལྟར་ལིང་ག་དང༌། རྐྱལ་པ་ལ་ཐུན་གྱིས་འདེབས་པ་ཞག་ཤས་བྱས་ནས། གཟའ་སྐར་དྲག་པོ་ལ་ལིང་ག་བསྒྲལ། ཏེ་ལོའི་ཤ་ཁྲག་རུས་གསུམ་བསྲེས། ཐབ་ནང་དུ་དབང་ཕྱུག་ཆེན་པོའི་བསྐྱེད་ལ་སྔགས་འབྲུ་བཅུ་བདུན་པ་ལ། བཅུ་གཉིས་པ་བཏགས་ཏེ་སྦྱིན་བསྲེག་ཕུལ། འདི་ལ་སྦོགས་ཆོག་དང་ཡང་ཆོག་གི་འཁོར་ལོ་སོགས་ཡོད་ཀྱང་ལག་ལེན་ལ་གཅིག་ཏུ་ངེས་པར་དགོས་པའང་མིན། སྔགས་ཀྱིས་རྐྱལ་པ་འཁོར་ལོ་དང་བཅས་པ་དེ་ཀ་སྦྱིན་སྲེག་ཏུ་འབུལ་བ་ཉིད་སྤོགས་ཆོག་ཡིན། འདི་དང་གཤིན་རྗེའི་འཁོར་ལོ་ཆེན་མོ་སྦྲེལ་ལུགས་ཀྱང་ཤེས་དགོས་སོ། །ད་ནི་འཁོར་བདག་པོ་གཤིན་རྗེ་གཤེད་ཀྱི་དྲུག་ཅུ་རྩ་བཞིའི་སྡེ་ཐུང་དུ་སྦྱོར་བས་གཏོར་བཟློག་གི་ཆོ་ག་ནི་འདི་ཡིན་ཏེ། དཀྱིལ་འཁོར་ཆེན་པོའི་ཕྱོགས་གང་ཡང་རུང་བ་ཟླ་གམ་སྔོན་པོའི་དཀྱིལ་འཁོར་དུ་ཆོས་འབྱུང་གྲུ་གསུམ་དམར་ནག་དེའི་དབུས་སུ་མི་རོ་ལ་དབྱུག་ཏོ་གནས་པ་ཞིག་འབྲི། ཆོས་འབྱུང་གི་རྩེ་མོའི་ཕྱོགས་སུ་གཏོར་མ་ནོར་བུ་མིག་གསུམ་གྱི་གཟུགས་ཅན་ཅིག་དང༌། མདུན་དུ་འཕེན་གཏོར་ཐོག་ལྡེའི་དབྱིབས་ཅན་དུག་ཁྲག་གིས་བྱུག་པ་འགོད། དྲག་པོའི་མཆོད་གཏོར་གྱིས་གཡོན་སྐོར་དུ་བསྐུར། བཤམ་བཀོད་རྣམས་སྔ་རོལ་ནས་སྡེབ་གཅིག་ལ་བྱ། དེའི་ཕྱིར་མཆོད་གཏོར་བྱིན་རླབས་རྒྱས་པ་ཡང་དཀྱུས་ཀྱི་དེ་ཀས་ཆོག །རྩ་བའི་གཏོར་མ་བསྔོ་བའི་རྗེས་སམ། དྲུག་ཅུ་རྩ་བཞི་ཕུལ་གྲུབ་མཚམས་ལས་ཀྱི་གཤིན་རྗེའི་སྔ་
ཕྱི་གང་རུང་དུ་སྦྱར་ཀྱང་རུང་སྟེ། འབྲུ་གསུམ་གྱིས་མཆོད་པ་བྱིན་རླབས་ཁ་གསོས། ཨོཾ་ཤུ་ནྱ་ཏ་ཞེས་པ་ནས། བཟླས་པའི་བར་གོང་བཞིན། དེ་ལ་བཟླས་པ་ནི་སྙིང་པོའི་སྔགས་ཐུང་ལ། ཨེ་ཨ་ཎྲྀ་སོགས་བཏགས། དེ་ལ་མཧཱ་དེ་བཱ་ཨེ་ཛ་སོགས་བཏགས་པ་སྟེ། བོད་རྦད་སྦྲེལ་པ་ཅི་འོས་པ་བཟླས། དེ་རྗེས་མཆོད་བསྟོད་ཞིག་བྱས་ནས། ལེགས་ལྡན་ལྷའི་མགོན་པོ་དེ་ཉིད་ལས་ཀྱི་སྲིན་པོ་མི་བཟད་པ་དབང་ཕྱུག་ཆེན་པོ་ཞལ་གཅིག་ཕྱག་གཉིས། གཡས་མི་མགོ་རློན་པས་མཚོན་པའི་དབྱུག་ཏོ་འཕྱར་བ་ནས་སོགས་ཀྱི་བསྐོར་བའོ། །མཧཱ་དེ་བ་དེ་ཥ་ར་ར་དགྲ་བོ་མ་ར་ཡ་ཙིཏྟ་ཧུར་ཐུམ། ཞེས་པ་ཉིད་ཅི་མང་བཟླ་ཞིང༌། དེ་ལ། མཧཱ་དེ་བ་ཏེ་ཛོ་སོགས་བཏག་གོ །རྐམ་རློན་མདའ་ཟེར་གསུམ་ལ་བཏབ། དྲག་པོའི་གཏོར་མ་ལ་དགྲ་བགེགས་དགུག་གཞུག་བྱ་སྟེ། སྙིང་པོ་ཡི་གེ་བརྒྱད་པ་ལ། ཨི་དཾ་བ་ལིང་སོགས་གོང་བཞིན་བཏག་ལ་ལན་ཉེར་གཅིག་ཙམ་དྲག་ཏུ་བཟླས། མཆོད་འཕྲེང་ལས་གཤིན་གྱི་དེ་འདོན་པ་སྤོས་ཏེ་མཆོད་པ་རྣམས་དྲག་གཏོར་ལ་བཏབ། སྔར་གྱི་བསྟོད་ཐུང་གི་མཐར། ལྷ་ཡི་རྒྱལ་པོ་རྫུ་འཕྲུལ་ཅན། །སྲིད་པ་གསུམ་གྱི་བྱེད་པོ་སྟེ། །སྡེ་བརྒྱད་ཡོངས་ཀྱི་དམག་དཔོན་ལགས། ཁྱོད་ཀྱིས་མི་ཐུབ་གང་ཡང་མེད། །ལྷ་མིན་གྲོང་ཁྱེར་སུམ་བརྩེགས་བཅོམ། །མདུང་རྩེ་གསུམ་པ་གཅིག་བསྐྱོད་པས། །ས་གཞི་ཆེན་པོ་རིང་དུ་འཕངས། །གདུག་པ་ཅན་ཀུན་འཇོམས་པ་པོ། །སྒྲུབ་པོ་རྣལ་འབྱོར་ཅན་རྣམས་ལ། །ཚེ་དང་བློ་གྲོས་དབང་ཕྱུག་སྟེར། །ཉམས་པ་ཀུན་གྱི་གཤེད་མ་མཛད། ཁྱུ་མཆོག་རྒྱལ་མཚོན་ལས་ལ་ཡ། །
དགྲ་བོའི་དབུག་ལ་ཐུམ་རིལ་ལི་ལི། །དགྲ་བོའི་མགོ་ལ་བཾ་རིལ་ལི་ལི། །དགྲ་བོའི་སྲོག་ལ་ཧུར་ཐུམ་ཛཿ །དགྲ་བོའི་སྙིང་ལ་བྲེང་ཤག་བྷྱོཿ །དམ་ཉམས་དགྲ་བོ་ཕུང་བར་མཛོད། །ལྷ་སྔགས་ཐམས་ཅད་གཤེད་དུ་ཕོབ། །མཛའ་བཤེས་གཉེན་དག་འཐབ་ཏུ་ཆུག །དགྲ་བགེགས་འཁོར་བཅས་ཐལ་བར་རློགས། ཁྱོད་ཀྱི་འཁོར་ནི་མི་བསྲུན་ཏེ། །ལོག་འདྲེན་བགེགས་བྱེད་བསམ་མི་ཁྱབ། །དགྲ་ལ་ལྟས་ངན་ཆོ་འཕྲུལ་ཕོབ། །གོད་ཁ་སྣ་དགུ་ཐོང་ལ་ཤོར། །མདངས་དང་བླ་ཚེ་ཕྲོག་ལ་ཤོག །དབང་ཐང་ལོངས་སྤྱོད་ཆོམ་ལ་ཤོག།གཙོ་འཁོར་གྲོགས་གཉེན་ཐམས་ཅད་དཀྲུག །རྒྱ་མཚོའི་མཐའ་དམར་བསྐྲོད་ལ་ཤོག །གླིང་བར་མུན་ནག་ཆེན་པོར་བསྒྱུར། །ལྷ་དང་གནོད་སྦྱིན་ཡི་དྭགས་དང༌། །ཀླུ་དང་སྲིན་པོ་མི་བཟད་པ། །མ་མོ་མཁའ་འགྲོ་དྲག་ཤུལ་ཅན། །སྡེ་བརྒྱད་འགོང་པོ་ཐེར་འབུམ་རྣམས། །ད་ལྟ་ཉིད་དུ་ལས་ལ་བསྐུལ། །དགྲ་བོའི་ཡུལ་མཁར་རྨང་ནས་བསྐྱེལ། །ཞིང་དང་ལོ་ཏོག་སད་སེར་ཆོམ། །མི་ནད་ཕྱུག་ནད་ཆར་ལྟར་ཕོབ། །བདུད་གཡོས་རི་ལྟར་སྙིལ་དུ་ཆུག །བསད་སྐྲད་དབྱེ་དང་རིངས་པར་མཛོད། །མཚོན་གྱི་བསྐལ་བ་དེར་ཐོང་ཞིག །ཐམས་ཅད་སྡང་བའི་དགྲ་ལ་བྷྱོཿ །ཐམས་ཅད་གནོད་པའི་བགེགས་ལ་བྷྱོཿ །བསམ་ངན་བྱེད་ཁའི་སྟེང་དུ་བྷྱོཿ །བཟློག་ཅིག་བསྒྱུར་ཅིག་ས་མ་ཡ། །ཞེས་དྲག་ཏུ་བསྐུལ་ལོ། །འདི་ལོགས་སུ་བྱེད་པ་ཡིན་ན་འདིར་ལིང་ག་སྒྲོལ་ཆོག་བྱ། ལིང་ག་ལ་རྩེ་གསུམ་དང་མངའི་འདེབས་པ་ངེས་པར་བྱ། གཞན་མང་ཉུང་ཇི་ལྟར་འོས་པ་སྦྱར་བས་ཆོག །དྲུག་ཅུ་
རྩ་བཞིའི་ལྡེའུ་ཐུང་ལ་སྦྱོར་ན་ལིང་སྒྲོལ་དཀྱུས་ཀྱི་དེས་ཆོག་པས། སྐབས་དེར་དམིགས་པ་གཏོད་ཀྱི་འདིར་མི་དགོས་སོ། །དེ་ནས་ཟོར་འཕང་བ་ནི་སྔར་བཞིན་བསྐུལ་ནས་ཐོག་མར་སྐམ་ཟོར། དེ་ནས་རློན་ཟོར། དེ་ནས་མདའ་ཟོར། དེ་ནས་གཏོར་མ་ཉིད་འཕེན་ཏེ། བསད་སྔགས་ཁོ་ན་དྲག་ཏུ་བཟླའོ། །འདི་ཡང་དྲུག་ཅུ་རྩ་བཞིའི་སྔོན་དུ་འཕང་དགོས་སོ། །དེ་ནས་ནང་དུ་འཁོར་ནས་གཏོར་མ་ནོར་བུའི་དབྱིབས་དེ་འཐེབས་ཀྱུ་གཅིག་གིས་བསོས། སྤྱན་འདྲེན་བསྔགས་ལ། ཨ་ཀཱ་རོ་བཏགས་པ་ཚར་གསུམ་གྱིས་ཕུལ། རྗེས་ཆོག་རྣམས་དཀྱུས་གྱྀ་ཞོར་ལ་འགྲུབ་པས་ལོགས་སུ་མི་དགོས་སོ། །ཞེས་པ་འདི་ཡང་རྭ་ལུགས་ཀྱི་ཡིག་རྙིང་གབ་འཁྲུགས་བསྡུས་ཤིང་མི་གསལ་བ་རྣམས་གསལ་བྱེད་དུ། རྒྱལ་ཁམས་པ་ཏཱ་ར་ནཱ་ཐས་སྨྲས་པ་སྟེ་དཔལ་རྡོ་རྗེ་འཇིགས་མཛད་ཆེན་པོའི་ལས་ཚོགས་ཀྱི་ཆ་ལག་ཏུ་གལ་ཆེ་བ་ཞིག་ཡིན་ནོ།། །།མངྒ་ལཾ།། དགེའོ། །འདི་བྲིས་དགེ་བས་སྐྱཻ་བ་ཀུན་ཏུ་ངེས་དོན་བསྟན་པའི་མི་མཐུན་ཕྱོགས་ཐམས་ཅད་གཞོམ་ནུས་པའི་རྒྱུར་གྱུར་ཅིག། དགེ་ལེགས་འཕེལ།། ཤུ་བྷཾ།