རྩེ་ལེ་སྣ་ཚོགས་རང་གྲོལ་གྱི་བཀའ་འབུམ།

གླེགས་བམ། ཁ༽

རྩེ་ལེ་སྣ་ཚོགས་རང་གྲོལ།

Nitartha international

Images scanned by TBRC

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

དཀར་ཆག

[Full Size]

འདིར་རྗེ་སྣ་ཚོགས་རང་གྲོལ་གྱི་བཀའ་འབུམ་ཆོས་ཚན་གྱི་རྣམ་གྲངས་ཇི་ལྟར་བཞུགས་པའི་རིམ་པ་བཀོད་པར་གླེགས་བམ། ཁ། པ་ལ། རང་གཞན་ལ་བསླབ་བྱ་གྲོས་འདེབས་ཀྱི་སྐོར་རྣམས་ཕྱོགས་གཅིག་ཏུ་བསྡེབ་པ་ལྷག་བསམ་རབ་དཀར་པདྨའི་ཕྲེང་བ་ལྡེབ། ༡༤༦ བསྟོད་ཚོགས་རིན་ཆེན་གསེར་གྱི་མཆོད་སྡོང་ལྡེབ། ༧ བདག་གཞན་དོན་གང་ལའང་སྦྱོར་རུང་བའི་བླ་མའི་རྣལ་འབྱོར་བྱིན་རླབས་འབྱུང་གནས་ལྡེབ། ༧ གསང་སྔགས་སྙིང་མའི་ཆ་གསུམ་གཏོར་ཆོག་

[Full Size]

ལྡེབ། ༡༧ སངས་རྒྱས་ཀྱི་དུས་ཆེན་རྣམས་དང་། གུ་རུའི་ཚེས་བཅུ་སོགས་ཀྱི་ངོས་འཛིན་རྒྱུ་མཚན་ཕན་ཡོན་བཅས་ལྡེབ། ༡༦ སྐུ་རྟེན་རྙིང་པ་ཞིག་གསོས་ཨརྒྷའི་ཆོ་ག་ཇི་ལྟར་བྱ་ཚུལ་ལྡེབ། ༦ ཆོས་ཐམས་ཅད་ཀྱི་སྙིང་པོ་ཕྱག་རྒྱ་ཆེན་པོའི་དོན་ཡང་དག་པར་རབ་ཏུ་གསལ་བར་བྱེད་པ་དྲི་མ་མེད་པའི་སྒྲོན་མ་ལྡེབ། ༥༢ བཅས་བཞུགས།

འདིར་རང་གཞན་ལ་བསླབ་བྱ་གྲོས་འདེབས་ཀྱི་སྐོར་རྣམས་ཕྱོགས་གཅིག་ཏུ་བསྡེབས་པ་ལྷག་བསམ་རབ་དཀར་པདྨའི་འཕྲེང་བ།

[Full Size]

འདིར་རང་གཞན་ལ་བསླབ་བྱ་གྲོས་འདེབས་ཀྱི་སྐོར་རྣམས་ཕྱོགས་གཅིག་ཏུ་བསྡེབས་པ་ལྷག་བསམ་རབ་དཀར་པདྨའི་འཕྲེང་བའོ། །

[Full Size]

ན་མོ་གུ་རུ། མཁྱེན་རབ་ནམ་མཁའི་ཁྱོན་ཡངས་པར། །ཐུགས་རྗེའི་ཉི་གཞོན་འོད་འབར་བས། །བསྐལ་བཟང་ཡིད་ཀྱི་མུན་སེལ་བ། །དྲིན་ཅན་བླ་མའི་ཞབས་ལ་འདུད། །དེ་ཡང་བདག་ནི་དལ་འབྱོར་གྱི་མི་ལུས་ཙམ་ཞིག་སྟེས་དབང་གིས་ཐོབ་མོད་ཀྱང་། ཐོས་བསམ་སྒོམ་གསུམ་གྱི་ཤེས་རབ་དང་མི་ལྡན་ཞིང་། བླ་མ་དགེ་བའི་བཤེས་གཉེན་དམ་པ་འགའ་དང་མཇལ་ནས་དེ་དག་གིས་ཐུགས་རྗེས་འཛིན་པར་མཛད་ནའང་། རང་ཉིད་སྐལ་བ་དམན་ཞིང་ཤེས་རབ་ཞན་པའི་དབང་གིས། ཡོན་ཏན་གྱི་ཆ་ཤས་འགའ་ཙམ་ཡང་ཐོབ་པར་མ་ནུས་ཏེ། ཇི་སྐད་དུ། མངོན་རྟོགས་རྒྱན་ལས། ལྷ་ཡི་རྒྱལ་པོས་ཆར་ཕབས་ཀྱང་། །ས་བོན་མི་རུངས་མི་འཁྲུངས་ལྟར། །སངས་རྒྱས་རྣམས་ནི་བྱོན་གྱུར་ཀྱང་། །སྐལ་

[Full Size]

བ་མེད་པས་བཟང་མི་མྱོང་། །ཞེས་པ་ལྟར་དང་། ཁྱད་པར་དུ་ཟབ་ཁྲིད་གདམས་པའི་སྙིང་པོ་མང་ཞིག་ཞུ་ལོ་བགྱིས་ཀྱང་། དེ་དག་རང་ཉིད་ཀྱི་རྒྱུད་ཐོག་ཏུ་མ་ཁེལ་བར་སྒོ་གསུམ་རྣམ་གཡེང་དང་སྙོམ་ལས་ཀྱི་དབང་དུ་གྱུར་ཅིང་། ཟབ་ཆོས་ཉམས་ལེན་གཤའ་མ་ཞིག་བྱེད་པའི་ལོང་མེད་པར་ཚེ་འདིའི་ཁེ་གྲགས་དང་འདུ་འཛི་སོགས་ཆོས་མིན་གྱི་བྱ་བ་ཤ་སྟག་ལ་མི་ཚེ་བསྐྱེལ་བ་ཞིག་བདག་ལ་བབས་གདའ་བ་ད་ནི་དེ་དག་ལས་རྒྱང་བསྲིངས་ཏེ་རྒྱལ་བས་བསྔགས་པའི་རི་ཁྲོད་དབེན་པར། རིའི་བུ་བྱས། ན་བུན་ལ་གོས་བྱས། གྱོང་ལྟོ་གོས་གཏམ་གསུམ་ལ་བསྐུར་ནས་ཚེ་དང་བསྒྲུབ་པ་མཉམ་པ་གཅིག་ཨེ་ཡོང་དང་། ཐ་མ་ཡང་འཇིག་རྟེན་གྱི་ཆགས་སྡང་ཞེ་སྡང་དང་། དཀོར་ནག་ལ་བག་མེད་དུ་སྤྱོད་མི་དགོས་ཙམ་

[Full Size]

ཞིག་གི་འདུན་པ་ནི་གཏན་དུ་ཡོད་ཀྱང་། རང་དབང་མེད་པར་འཆིང་བའི་ཞགས་པ་དམ་པོས་བཅིངས་ཞིང་ཁྲི་མུན་གྱི་ནང་དུ་ཆུད་པ་འདི་ལས་ཐར་ནས། རྗེ་མི་ལས། ང་ཤི་བ་དགྲ་ཡི་མ་ཚོར་ཞིང་། ན་བ་གཉེན་གྱི་མ་ཚོར་བར། རི་ཁྲོད་འདི་རུ་འཆི་ནུས་ན། སྤྲང་པོའི་བསམ་པ་འགྲུབ་པ་ཡིན། །ཅེས་གསུངས་པ་ལྟ་བུའི་ཆོས་ཚུལ་བཞིན་བྱེད་པའི་སྐལ་བ་དང་ལྡན་པ་ཞིག་བླ་མ་དཀོན་མཆོག་མཁྱེན་ཞེས་གསོལ་བ་བཏབ་ཅིང་། རང་གིས་རང་ཉིད་ལ་བསྐུལ་འདེབས་ཀྱི་ཚིག་འགའ་སྨྲས་པ་ནི།། ༈ །།རྗེ་འགྲོ་བའི་སྡེ་དཔོན་པདྨ་འབྱུང་། །མཚུངས་བྲལ་གྱི་བཀའ་རྒྱུད་བླ་མའི་ཚོགས། །ཆོས་མེད་ཀྱི་བུ་ངས་གསོལ་འདེབས་ཀྱིས། །རྒྱུད་བྱིན་གྱིས་རླབས་ཤིག་ཐུགས་རྗེ་ཅན། །བདག་སྙིགས་དུས་ཀྱི་བཙུན་གཟུགས་ཚུལ་ཆོས་མཁན། །བསོད་ནམས་ཀྱི་ལས་འཕྲོ་ཆུང་བའི་མཐུས། །རྩོད་ལྡན་གྱི་བསྟན་ཞབས་འདི་འདྲར་སྐྱེས། །ཆོས་མེད་ཀྱིས་བླ་མའི་ཚུལ་བཟུང་ཞིང་། །འཇིག་རྟེན་གྱི་བྱ་བ་ཁོ་ནས་མནར། །འདི་སྐྱུག་ནད་ཅན་གྱིས་

[Full Size]

ཟས་མཐོང་བཞིན། །བློར་དྲན་པ་ཙམ་གྱིས་འཚངས་ལ་ཕོག །ལར་འཇིག་རྟེན་ལས་ཀྱི་བྱ་བྱེད་འདི། །བདག་སྔར་ནས་མི་འདོད་ཡོད་བཞིན་དུ། །དུས་དིང་སང་ལྷག་པར་སྐྱོ་ཤས་འཕེལ། །ཚེ་མི་རྟག་ལ་ཁའི་ན་བུན་འདྲ། །དུས་དོ་ནུབ་འཆིའམ་ཆ་མེད་པར། །ཚེ་འདི་ཉིད་ཀྱི་བྱ་བྱེད་བགྱིས་བགྱིས་ནས། །རང་ཕྱི་མའི་དོན་ཆེན་ཡལ་བར་འདོར། །ལར་སྐྱེས་པའི་ཕ་ཡུལ་རྒྱབ་བསྐྱུར་ཞིང་། །མགོན་ཤཀྱའི་བསྟན་ལ་རབ་བྱུང་ཀྱང་། །ཆོས་ཚུལ་བཞིན་བྱེད་པའི་ལོངས་མེད་ཅིང་། །གནས་དབེན་པ་བསྟེན་པའི་དབང་མེད་པར། །གཞན་མགུ་བྱེད་ཐབས་ལ་འབད་པ་འདི། །ཕུག་རང་གཞན་གཉིས་ཀ་ཕུང་བའི་རྒྱུ། །དེ་ཡིན་པར་གོ་ཡང་རང་དབང་མེད། །འཁོར་གཡོག་གི་སྐྱོང་བྲན་ཞེ་སྡང་གི་རྒྱུ། །ནོར་རྫས་ཀྱི་བརྩོལ་བསྒྲུབ་རྣམ་སྨིན་གྱི་ལས། །ཡོན་བདག་གི་ངོ་སྲུང་ཆགས་སྡང་གི་གཞི། །

[Full Size]

བྱ་བྱེད་ཀུན་ཆོས་དང་མི་མཐུན་ཞིང་། །འཇིག་རྟེན་གྱི་བྱ་བས་གཡེངས་བ་ལ། །རྒྱལ་བསྟན་གྱི་ཞབས་ཏོག་ཡིན་པར་རློམ། །འདི་བསྐྱུར་ན་ནི་ཐེག་དམན་གྱི་ལྟ་བར་འགྲོ། །བྱས་ན་ནི་དགེ་སྦྱོར་གྱི་བར་ཆད་ཆེ། །བདག་འདི་འདྲའི་འཆིང་བས་མ་བཅིངས་པ། །ལས་ཅི་འདྲའི་རྣམ་སྨིན་འདིར་གྱུར་ཏམ། །སྐྱབས་མི་བསླུ་ངེས་པ་དཀོན་མཆོག་གསུམ། །རྗེ་སྐྱབས་གནས་དམ་པ་པདྨ་འབྱུང་། །ཁྱོད་ཐུགས་རྗེས་ནུས་པའི་དཔུང་བསྐྱེད་ལ། །བདག་འཁོར་བའི་འདམ་ནས་དྲངས་ཏུ་གསོལ། །དེ་ཡང་བདག་ནི་འཁོར་བའི་བྱ་བ་དང་འདུ་འཛིའི་ལས་ཀྱི་མནར་བ་འདི་ཉིད་སྤྱིར་ནི་རང་ལ་ཆོས་ཀྱི་བསོད་ནམས་དམན་པར་གོར་མ་ཆགས་ཤིང་། ཁྱད་པར་དུ་ནི་རང་གི་ཡིད་ལ་ཆོས་ཤ་སྟག་དེ་ལྟ་བུ་ཞིག་འདུན་པ་ཡོད་ཀྱང་། ད་དུང་ཅུང་ཞིག་བློ་ཐག་མ་ཆོད་པར་གཞན་གྱི་ངག་ལ་ཉན་པས་ལན་པ་དང་། ལེ་ལོ་ཕྱི་གཤོལ་གྱི་དབང་དུ་ཐལ་བར་འདུག་སྙམ་སྟེ། རང་གིས་རང་ཉིད་ལ་གྲོས་འདེབས་དྲན་པའི་ལྕགས་ཀྱུ་འདི་སྨྲས་སོ།། ༈ །།སྐྱབས་གནས་བླ་མའི་ཞབས་ལ་གུས་བཏུད་དེ། །

[Full Size]

ད་ནི་རང་གིས་རང་ལ་གྲོས་ཅིག་འདེབས། །དུས་མཐའི་སྤྲང་པོ་ཚུལ་འཆོས་མཁན་པོ་ཁྱེད། །བསྟན་པའི་སྒོར་ཞུགས་ལོ་མང་ལོན་མོད་ཀྱང་། །ད་དུང་ཆོས་དང་རང་རྒྱུད་མ་འདྲེས་པར། །རྣམ་རྟོག་བརྒྱུད་མར་སྤེལ་འདི་ཞེ་རེ་འཁྲེལ། །ད་ནས་ཆོས་དང་རང་རྒྱུད་བསྲེ་བ་འཐད། །ན་སོ་གཞོན་ཀྱང་ཚེ་ལ་ངེས་མེད་ཅིང་། །འབྱུང་འདུས་སྒྱུ་ལུས་ནམ་འདོར་ཆ་མེད་ཀྱང་། །ད་དུང་སྐྱིད་འདོད་ཚེ་འདིའི་ཞེན་པས་བཅིངས། །ད་ནི་ལོང་མེད་ཆོས་ལ་བརྩོན་པ་འཐད། །ཤི་དུས་ཆོས་མིན་ཅིས་ཀྱང་མི་ཕན་པར། །ཆ་ཡོད་བཞིན་དུ་ད་དུང་རྣམ་གཡེང་བྱེད། །ཆོས་མེད་ཆོས་པར་བརྫུ་འདི་ཞེ་རེ་འཁྲེལ། །ད་ནི་ཕྱི་མའི་དོན་མཆོག་སྒྲུབ་པ་འཐད། །འཁོར་གཡོག་ལོངས་སྤྱོད་ནོར་རྫས་ལ་སོགས་པ། །འདུ་འཛི་ཆོས་ཀྱི་བདུད་དུ་མི་བསམ་པར། །ད་དུང་འཇིག་རྟེན་ཁེ་གྲགས་ལོ་འདོད་སྒྲུབ། །ད་ནི་ངེས་པར་དབེན་པ་བསྟེན་པ་

[Full Size]

འཐད། །མཚན་ལྡན་བླ་མ་འགའ་དང་མཇལ་ན་ཡང་། །སྙིང་ནས་མོས་གུས་བཀུར་བསྟི་མི་བྱེད་པར། །འགྲན་སེམས་མཉམ་འགྲོགས་བྱེད་པ་ཞེ་རེ་འཁྲེལ། །ད་ནི་གུས་པས་གདམ་ངག་ཞུ་བ་འཐད། །དམ་ཚིག་སྡོམ་པ་ཚུལ་བཞིན་མི་སྲུང་ཞིང་། །དགེ་བའི་བཤེས་ཀྱི་མཚན་ཉིད་མི་ལྡན་པར། །ད་དུང་བཙུན་པའི་གྲལ་མགོར་བསྡོད་འདི་བླུན། །ད་ནི་གཅིག་པུར་རི་ཁྲོད་འགྲིམ་པ་འཐད། །ཐོས་པས་ཕྱི་ཡི་སྒྲོ་འདོགས་མ་ཆོད་ཅིང་། །སྒོམ་པས་ནང་གི་བཙན་ས་མ་ཟིན་པར། །ད་དུང་གཞན་ལ་ཆོས་བཤད་བྱེད་པ་བླུན། །ད་ནི་སྒྲུབ་པ་སྙིང་པོར་དྲིལ་བ་འཐད། །དབང་ཁྲིད་གདམས་པ་འགའ་ཞིག་ཐོབ་ན་ཡང་། །རང་རྒྱུད་ཐོག་ཏུ་མ་ཁེལ་ཞུ་ལོ་ཙམ། །ཆོས་དང་རང་སེམས་སོ་སོར་བསྡོད་འདི་བླུན། །ད་ནི་ཟབ་དོན་ཉམས་སུ་བླངས་བ་འཐད། །སྐྱེད་རིམ་ལྷ་ཡི་བསྙེན་སྒྲུབ་མ་རྫོགས་ཤིང་། །རྫོགས་རིམ་ལྟ་བའི་གདེངས་དང་

[Full Size]

མ་ལྡན་པར། །ཤི་གསོན་ཀུན་གྱི་སྐྱབས་གནས་བྱེད་པ་འཁྲུལ། །ད་ནི་ཐོག་མར་རང་སྐྱབས་འཚོལ་བ་འཐད། །སྨིན་བྱེད་དབང་གིས་རང་རྒྱུད་མ་སྨིན་ཅིང་། །གྲོལ་བྱེད་གདམས་པའི་རྩི་ཡི་མ་ཟིན་པར། །ད་དུང་གཞན་གྱི་འདྲེན་པ་བྱེད་པ་བླུན། །ད་ནི་ཐོག་མར་རང་དོན་བསྒྲུབ་པ་འཐད། །ནམ་ཞིག་བར་དོའི་འཕྲང་ལ་འགྲིམས་པའི་ཚེ། །འཁོར་གཡོག་མང་པོས་ཕན་པ་མེད་མོད་ཀྱང་། །ད་དུང་ཆོས་མེད་གྲོགས་མང་བརྟེན་འདི་བླུན། །ད་ནི་གཅིག་པུར་བསམ་གཏན་བསྒོམ་པ་འཐད། །འཆི་བདག་བདུད་ཀྱི་ཞགས་པས་བཏབ་པའི་ཚེ། །ལོངས་སྤྱོད་ནོར་གྱི་རྡུལ་ཙམ་ཕན་མེད་ནའང་། །ད་དུང་ནོར་རྫས་བསོགས་འཇོགས་བྱེད་འདི་བླུན། །ད་ནི་ཟང་ཟིང་སྲེད་པ་བསྐྱུངས་ན་འཐད། །འཁོར་འདས་གཉིས་ཀྱི་འདམ་ཁའི་སོ་མཚམས་སུ། །ད་རེས་འདམ་ཁ་ལོག་ན་གཏན་དུ་སྡུག །འཇིག་རྟེན་བྱ་བཞག་བྱས་པ་དོན་མེད་བོར། །

[Full Size]

ད་ནི་གཏན་གྱི་འདུན་མ་བསྒྲུབ་པ་འཐད། །འཁོར་བའི་ཆོས་ལ་སྤྲོས་པ་མ་ཆོད་ཅིང་། །དཀོན་མཆོག་གསུམ་ལ་བློ་གཏད་མ་བྱས་ན། །ད་དུང་རྟག་ཏུ་འཁོར་བར་འཁྱམ་འགྱུར་བས། །ད་ནི་དམ་པའི་ཆོས་ལ་འབུང་བ་འཐད། ཕ་ཡུལ་བདུད་ཀྱི་བརྩོན་རར་མ་ཤེས་ཤིང་། ཉེ་འབྲེལ་བདུད་ཀྱི་ཕོ་ཉར་མ་ཤེས་པར། །ཆགས་ཤིང་ཞེན་ན་ངན་འགྲོར་འཕེན་པའི་རྒྱུ། །ད་ནས་ཆགས་སྡང་རྩད་ནས་བཅད་པ་འཐད། །མཚན་ལྡན་བླ་མའི་ཞབས་ལ་མ་བཏུགས་ན། །ངན་སོང་འཁོར་བའི་སྐྱེ་སྒོ་སུ་ཡི་ཆོད། །ལུས་སྲོག་ལོངས་སྤྱོད་བླ་མའི་ཕྱོགས་བཏང་ནས། ཁ་ཞེ་མེད་པའི་སྐྱབས་གནས་བཅོལ་བ་འཐད། །རང་གིས་ཆོས་བཙལ་ཉམས་སུ་མ་བླངས་ན། །ཆོས་ཀྱིས་རང་ཉིད་འཚལ་བར་ག་ལ་འགྱུར། །ལུས་སྲོག་བློས་གཏང་དཀའ་བ་ལྷུར་བླངས་ནས། །ཟབ་མོའི་གདམ་ངག་ཉམས་སུ་ལེན་པ་འཐད། །དེ་ལྟར་ཆོས་མེད་དུས་མཐའི་སྙོམ་ལས་པས། །གནས་

[Full Size]

སྐབས་ཤིག་ཏུ་རང་གིས་རང་ཉིད་ལས། །བསླབ་བྱ་གྲོས་འདེབས་ཕྱིར་དུ་འདི་སྨྲས་པའི། །དགེ་བས་འགྲོ་ཀུན་བྱང་ཆུབ་མྱུར་ཐོབ་ཤོག། ༈ །།སྭསྟི། སྐྱབས་མཆོག་གསུམ་གྱི་ངོ་བོ་རྡོ་རྗེ་འཛིན། །མགོན་མཚན་ལྡན་གྱི་བླ་མ་རིན་པོ་ཆེ། །དེ་སྤྱི་གཙུག་ཏུ་མི་འབྲལ་རྒྱན་དུ་བཞུགས། །རྗེ་ཐུགས་རྗེའི་བདག་དེས་བྱིན་གྱིས་རློབས། །ང་སྙིགས་དུས་ཀྱི་ཆོས་གཟུགས་སྙོམ་ལས་པ། །ཡིད་སྐྱོ་བ་སོང་བའི་གླུ་འདི་བླངས། །ལྷ་དཔའ་བོ་མཁའ་འགྲོར་མཆོད་པ་འབུལ། །གྲོགས་རྡོ་རྗེའི་སྤུན་ཚོ་དགྱེས་པར་མཛོད། །ཕྱི་མཐའ་བྲལ་གྱི་ནམ་མཁའ་སྟོང་པ་དང་། །ནང་འཛིན་མེད་ཀྱི་རིག་པ་སྟོང་གསལ་གཉིས། །དེ་སྟོང་ཚུལ་འདྲ་ཡང་གསལ་བའི་ཁྱད། །སེམས་གསལ་སྟོང་ཟུང་གཅིག་མ་གོ་ན། །ལྷ་སྣང་སྟོང་དུ་གོ་བ་དེ་བས་དཀའ། །ལར་སྙིགས་དུས་ཀྱི་ཆོས་པའི་གཟུགས་འཛིན་པ། །བློ་གཉིས་འཛིན་གྱི་མདུད་པ་མ་གྲོལ་བར།

[Full Size]

གཞན་གསལ་སྟོང་སོགས་ངོ་སྤྲོད་བྱེད་པ་དེ། དེས་མུས་ལོང་གིས་ལམ་མཁན་བྱེད་པ་འདྲ། །ལར་གཉིས་འཛིན་འདི་འཁོར་བར་འཁྱམས་པའི་རྒྱུ། །ནམ་གཉིས་འཛིན་བྲལ་ན་སངས་རྒྱས་ཞེས། དེ་ལོགས་ནས་ཐོབ་རྒྱུ་ཞིག་མེད་པ་ལགས། འདི་རིག་པའི་ཁྱེའུ་ཆུང་ཁྱོད་མ་གོའམ། །ཞེས་སྙིགས་དུས་ཀྱི་བླ་མའི་ཚུལ་འཛིན་དེས། །ཚིག་སླབ་བྱ་རང་གི་རང་ལ་སྨྲས། རྟོགས་གྲོལ་གྱི་དོན་མཆོག་ཐོབ་པར་ཤོག །ཅེས་པ་འདི། འགའ་ཞིག་གི་ཆོས་སྐད་སེམས་དང་ནམ་མཁའ་གཅིག་ཟེར་བ་དང་། རྫོགས་རིམ་མི་ཤེས་ཀྱང་སྐྱེད་རིམ་ལས་སླ་ཟེར་བ་སོགས་ལ་ཅུང་ཟད་ཡིད་མ་རངས་ནས་སྨྲས་པ་སྟེ། དེ་ལྟར་འདི་ཡན་ཆད་རང་ལོ་གཞོན་ནུའི་ལོ་བཅོ་ལྔ་པ་དུས་འཁོས་ཀ་མེད་རུང་བླ་མའི་ཚུལ་བཟུང་ནས་འཇིག་རྟེན་གྱི་བྱ་བ་ལ་བསྟན་དོན་ཡིན་རྒྱུར་བསྒོམ་ཤིང་གྲྭ་འཁོར་ཡོན་བདག་གི་སྐྱོང་བསྟར་མི་ཡོང་བཞིན་དུ་བྱེད་དགོས་པའི་སྐབས་བྱུང་བའི་ཚེ་སྨྲས་པའོ། ཀྱཻ་མ། དལ་འབྱོར་བཅོ་བརྒྱད་ཀྱིས་བརྒྱན་པའི་མི་ལུས་དང་རིན་ཆེན། །ཐོབ་ནས་སྙོམ་ལས་སུ་བསྡད་ན་དོན་མེད་དུ་འགྱུར་བས། །མི་ཚེ་སྟོང་

[Full Size]

ཟད་དུ་མ་བཏང་ལྷ་ཆོས་ལ་འབུངས་དང་། །འདིར་བདེ་ཕྱི་མ་སྐྱིད་པའི་འདུན་མ་རང་ཡིན་ནོ། །ཚེ་སྲོག་ཙྭ་ཁའི་ཟིལ་འདྲ་ངེས་མེད་ཀྱི་ཚེ་ལ། །ལོང་ཡོད་ཕྱི་གཤོལ་དུ་བསྡད་ན་འཆི་བདག་གི་སླེབས་ཡོངས། །བློ་སྣ་ཆོས་ཕྱོགས་སུ་དྲིལ་ལ་བརྩོན་འགྲུས་སུ་གྱིས་དང་། །ཤི་དུས་འགྱོད་མེད་ཀྱི་གྲབས་གཅིག་ད་ལྟ་ནས་དགོས་སོ། །དཀའ་ལས་རྩོལ་སྒྲུབ་ཀྱིས་བསགས་པའི་ནོར་རྫས་དང་ལོངས་སྤྱོད། །འཆི་དུས་འཁྱེར་དབང་མེད་པར་ལག་སྟོངས་སུ་འགྲོ་དགོས། །ཞེན་མེད་ཆོག་ཤེས་ཀྱི་བང་མཛོད་ནོར་རྫས་ཀྱི་དམ་པ། །ཕྱི་མའི་ལམ་རྒྱགས་ཤིག་བསྒྲུབ་ན་དེ་འདྲ་ཞིག་དགོས་སོ། །དགོས་འདོད་ཀུན་འབྱུང་གི་ནོར་བུ་མཚན་ལྡན་གྱི་བླ་མ། །མོས་གུས་གསོལ་འདེབས་ལ་འབད་ན་བྱིན་རླབས་ཀྱི་ཆར་འབེབས། །བློ་སྙིང་བྲང་གསུམ་གྱི་གཏད་པ་འདི་ལ་རང་གྱིས་དང་། །འདི་ཕྱིའི་བདེ་ལེགས་ཀྱི་ལམ་ཞིག་དེ་ན་རང་གདའོ། །འཁོར་འདས་ཆོས་

[Full Size]

ཀུན་རྩ་བ་རང་རིག་དང་སྟོང་གསལ། །འཁྲུལ་སྣང་ཨ་འཐས་སུ་མ་བཏང་དྲན་ཤེས་ཀྱིས་བཟུང་དང་། །འཛིན་མེད་རང་གྲོལ་དུ་འགྲོ་བ་ནམ་མཁའ་དང་སྤྲིན་ལྟར། །ལྟད་མོ་ངོ་མཚར་ཅན་གཅིག་དེ་ན་རང་གདའོ། །ཆོས་མེད་སྙོམས་ལས་ཀྱི་སྤྲང་པོ་སྣ་ཚོགས་དང་རང་གྲོལ། །གཏད་མེད་གང་ཤར་དུ་སྨྲས་པའི་ཤུགས་འབྱུང་གི་གླུ་འདི། །དབེན་པའི་མཚམས་ཁང་ནས་སྨྲས་འདི་དད་ལྡན་རང་རྣམས་ཀྱི། །ཡིད་ཀྱི་རེ་བ་སྐོང་བའི་དགའ་སྟོན་དུ་གྱུར་ཅིག། ༈ །།བླ་མ་དང་རང་སེམས་དབྱེར་མེད་དུ་འདྲེས་པས། །གསོལ་བ་ལ་འདེབས་བྱ་འདེབས་བྱེད་དང་བྲལ་ཞིང་། །བྱིན་རླབས་སུ་རང་སེམས་རང་ངོ་ཤེས་པས། །བཀའ་དྲིན་གྱི་མཆོག་ཏུ་འདི་རང་ཆེ་བྱུང་། །གང་ཤར་གྱི་རང་ངོར་ཅེར་གྱི་བལྟས་ཙ་ན། །ཤར་མཁན་གྱི་ངོ་བོ་ལོགས་སུ་མ་རྙེད། །བལྟ་བྱ་དང་ལྟ་བྱེད་དབྱེར་མེད་དུ་སོང་བས། །ངོ་སྤྲོད་ཀྱི་མཆོག་ཏུ་འདི་རང་ཟབ་བྱུང་། །སྩོལ་བྱས་ཀྱི་མིགས་པས་རྣམ་རྟོག་སྤེལ་ཞིང་། །

[Full Size]

སྤང་བླང་གི་སྒོམ་གྱིས་བོགས་སྐྱེད་མི་འདུག །སྒོམ་མེད་ཀྱི་ངང་དུ་ཡེངས་མེད་སྐྱོང་བ། །གདམས་ངག་གི་གནད་དུ་འདི་རང་ཆེ་བྱུང་། །ཆོས་མེད་ཀྱི་སྤྲང་པོ་གཏད་མེད་བདག་འདྲས། །ངེས་མེད་ཀྱི་ཚིག་འདི་གང་ཤར་དུ་སྨྲས་པས། །ཐར་མེད་ཀྱི་འགྲོ་བ་སྡུག་བསྔལ་ལས་གྲོལ་ཏེ། །སྤྲོས་མེད་ཀྱི་གོ་འཕང་ཐོབ་པར་ཤོག་ཅིག །ཅེས་པ་རྣམས་རང་ལོ་ཉེར་གསུམ་པར་མཚམས་མལ་ནས་སྨྲས་པའོ།། ༈ །།ཨེ་མ། དལ་འབྱོར་རིན་ཆེན་རྙེད་པར་དཀའ་བ་ད་ལན་ལན་གཅིག་ཐོབ་དུས་འདིར། །དོན་མེད་ཚེ་འདིའི་བྱ་བ་བསྒྲུབ་ན་གཏན་གྱི་འདུན་མ་མི་འབྱུང་བས། །སྙིང་པོ་མེད་པའི་འཇིག་རྟེན་བྱ་བ་སྒྱུ་མའི་འཁྲུལ་འཁོར་འདྲ་བ་འདི། །སྤངས་ནས་དམ་པའི་ལྷ་ཆོས་བསྒྲུབ་པ་སྤྲང་པོ་ཁོ་བོའི་སྙིང་གཏམ་ཡིན། །ཚེ་འདི་མི་རྟག་རྩ་ཁའི་ཟིལ་དང་ལ་ཁའི་ན་བུན་ཇི་བཞིན་དུ། །ནམ་འཆི་ཆ་མེད་ངེས་མེད་ཚེ་ལ་རྣམ་གཡེང་བྱེད་དུ་མི་ཁོམ་པས། །སང་བྱེད་སྣང་བྱེད་ལོ་ཟླ་འདས་ནས་

[Full Size]

འཆི་བདག་བདུད་ཀྱིས་ཏུག་གེ་འོངས། །ད་ལྟ་ཉིད་ནས་ཆོས་ལ་བརྩོན་པ་སྤྲང་པོ་ཁོ་བོའི་སྙིང་གཏམ་ཡིན། །གཉེན་དང་ཉེ་འཁོར་ནོར་རྫས་ལོངས་སྤྱོད་བདུད་ཀྱི་ཕོ་ཉ་ཆོས་ཀྱི་དགྲ། །ཅིས་ཀྱང་དགོས་མེད་ཞེན་ལོག་སེམས་ཤིག་ཁ་ཞེ་མེད་པར་མ་སྐྱེས་ན། །འདོད་པའི་རེ་བ་སྒྱུ་མའི་ནོར་གྱིས་གང་བའི་དུས་ཤིག་མི་ཡོང་བས། །སེར་སྣ་སྤོང་ཞིང་ཆོག་ཤེས་བྱེད་པ་སྤྲང་པོ་ཁོ་བོའི་སྙིང་གཏམ་ཡིན། །མཚན་ལྡན་བླ་མ་དགོས་འདོད་ཀུན་འབྱུང་ཡིད་བཞིན་ནོར་བུ་རིན་ཆེན་ལ། །རྩེ་གཅིག་དད་པས་གསོལ་བ་བཏབ་ན་བྱིན་རླབས་དངོས་གྲུབ་ཆར་རྒྱུན་འབེབས། །མོས་པའི་བུ་ལ་ཐུགས་རྗེས་གཟིགས་པ་བླ་མ་ཀུན་གྱི་དམ་ཚིག་སྟེ། །དད་གུས་གསོལ་འདེབས་རྒྱུན་དུ་བྱེད་པ་སྤྲང་པོ་ཁོ་བོའི་སྙིང་གཏམ་ཡིན། །རྒྱལ་བའི་གསུང་རབ་མདོ་རྒྱུད་མན་ངག་དུ་མའི་བཅུད་གྱུར་དམ་པའི་ཆོས། །ཞི་ཕྱག་ལམ་རྫོགས་རྒྱ་ཆེན་ཆོས་ཀྱི་རྣམ་གྲངས་དཔག་ཏུ་མེད་མོད་ཀྱང་། །ཀུན་གྱི་དགོངས་མཐུན་མ་བཅོས་མཐའ་

[Full Size]

བྲལ་རང་རིགས་གསལ་སྟོང་ཟབ་མོའི་དོན། །སྒོམ་མེད་ཡེངས་མེད་རྒྱུན་དུ་སྐྱོང་བ་སྤྲང་པོ་ཁོ་བོའི་སྙིང་གཏམ་ཡིན། །ངོ་མཚར་སྤྲོ་བསྐྱེད་ཟབ་མོའི་གདམ་ངག་སྙིང་གཏམ་བསླབ་བྱ་མདོར་བསྡུས་འདི། །རང་ལ་སྤང་རྟོགས་ཡོན་ཏན་མེད་ཀྱང་ཕན་པའི་སེམས་ཀྱིས་སྨྲས་ལགས་པས། །སྐལ་ལྡན་ཁྱོད་ཀྱི་ཐུགས་ལ་འཆོང་ཞིག་བླངས་དོར་མ་ནོར་ཉམས་སུ་ལོངས། །འདི་ཡི་དགེ་བས་མཁའ་མཉམ་འགྲོ་ཀུན་སངས་རྒྱས་ས་ལ་མྱུར་འཁོད་ཤོག །ཅེས་པ་འདི་དགེ་བཤེས་བཀྲ་ཤིས་དོན་འགྲུབ་ཀྱི་བསྐུལ་ངོར་གདམས་པའོ། །དུས་གསུམ་རྒྱལ་བའི་ཐུགས་རྗེ་གཅིག་བསྡུས་པ། །སྲིད་གསུམ་འགྲན་ཟླ་ཀུན་བྲལ་པདྨ་འབྱུང་། ཁམས་གསུམ་འགྲོ་ལ་ཐུགས་རྗེ་རྩེར་དགོངས་ནས། །སྐུ་གསུམ་གོ་འཕང་མཆོག་ལ་འགོད་དུ་གསོལ། །ཀྱེ་མ་དིང་སང་སྙིགས་མའི་མཐར་ཐུག་པས། །སངས་རྒྱས་བསྟན་ཡང་ཕྱི་དྲོའི་ཉི་མ་བཞིན། །ནགས་ཕྱོགས་བདུད་རིགས་དབྱར་གྱི་ཆུ་ལྟར་རྒྱས། །དུས་ངན་

[Full Size]

འདི་འདྲ་ཤར་བས་སྐྱོ་ཤས་འཕེལ། །བསྟན་པ་འཛིན་པའི་བཤེས་གཉེན་ཚུལ་བཟུང་ཀུན། །བྱམས་དང་སྙིང་རྗེ་དག་སྣང་མོས་གུས་དང་། །ཐོས་བསམ་སྒོམ་དང་ཆོས་སྤྱོད་བཅུ་སོགས་ཀྱིས། །རང་གཞན་ཁ་ལོ་ཆོས་ལ་མི་བསྒྱུར་བར། །མདོ་རྒྱུད་མན་ངག་ཤེས་རྒྱ་གཞན་ལས་ཆུང་། །ཅུང་ཟད་ཤེས་ན་ཁེངས་པ་སུ་ལས་ཆེ། །ཆགས་སྡང་ཀུན་སློང་ཕྲག་དོག་འགྲན་སེམས་ཀྱི། །རང་དང་གཞན་རྒྱུད་རབ་ཏུ་ཚིག་བྱེད་ཅིང་། །ཡུལ་ལྗོངས་ཐམས་ཅད་ཀུན་ཏུ་མྱུལ་བྱས་ནས། ཁ་གསག་གཡོ་སྒྱུ་ཟོལ་ཟོག་དུ་མ་ཡིས། །བླུན་དད་ཅན་རྣམས་མགོ་བོ་བསྐོར་བྱེད་ཅིང་། །གཏོང་ཕོད་ཅན་གྱི་ནོར་རྣམས་བཟང་བཅོམ་བྱས། །ཇི་ཙམ་རྙེད་པའི་ཟང་ཟིང་དེ་དག་ཀྱང་། །སྦྱིན་དང་དཀོན་མཆོག་མཆོད་སོགས་མི་བྱེད་པར། །ལོག་པའི་ཕྱོགས་རྒྱར་དད་ཟས་ཆུད་གཟོན་ཞིང་། །ངན་སོང་གནས་སུ་རང་གཞན་ཁྱུ་དེད་པའི། །ཆོས་མིན་བླ་གཟུགས་མཐོང་ཚེ་སྐྱོ་ཤས་འཕེལ། །ངོ་ཤེས་འདྲིས་མེད་ཕྱོགས་མེད་

[Full Size]

རྒྱལ་ཁམས་སུ། །མི་མེད་དབེན་པའི་རི་ཁྲོད་འགྲིམ་བྱེད་ཅིང་། །དཀར་ནག་ལོག་འཚོའི་ཟས་རྣམས་སྤངས་ནས་སུ། །དཀའ་ཐུབ་དག་ལ་མེལ་ཚེ་བསྐྱལ་ན་བསམ། །དགེ་འདུན་སྡེ་དང་དགོན་གནས་འཛིན་རྣམས་ཀྱང་། །བསྟན་པའི་གཞིར་གྱུར་འདུལ་ཁྲིམས་བག་ཡོད་དང་། །སློབ་གཉེར་ཁ་སྟོན་བཟླས་པ་བསམ་གཏན་སོགས། །འདི་ཕྱིའི་དོན་གཉེར་བསྒྲུབ་ལ་མི་བརྩོན་པར། །དམ་ཚིག་སྡོམ་དང་ཐོས་བསམ་རྒྱབ་ཏུ་བསྐྱུར། །གཡོ་ཁྲམ་རང་མཐོང་འགྲན་སེམས་དང་དུ་ལེན། །དམན་ས་འཛིན་དང་བཙུན་ཚུགས་རིང་དུ་འདོར། །ཤ་ཆང་ལོངས་སྤྱོད་གོས་རྒྱན་གཙོ་བོར་འདོན། །བསྟན་དང་ཕྱི་མའི་དོན་ལ་མི་བསམ་པར། །ལོ་འདོད་གཏམ་སོགས་བྱུང་ན་ཆོག་པར་སེམས། །མིག་གི་འབྲས་ལྟར་བསྲུངས་ལ་འདུལ་ཁྲིམས་ཉིད། །མཆིལ་མའི་ཐལ་བ་བཞིན་དུ་བོར་བྱས་ནས། །བག་མེད་སྤྱོད་པས་དུས་ཀུན་འདའ་བཞིན་དུ། །དགེ་སྦྱོང་།།།།

[Full Size]

ཆོས་གོས་དུ་མས་བརྒྱན། །འདི་ཕྱིའི་སྐྱབས་གནས་རྩ་བའི་བླ་མ་ལ། །གུས་པས་ཅི་གསུངས་རྗེས་སུ་མི་བསྒྲུབ་པར། །ཅི་མཛད་དག་ལ་ལོག་ལྟ་སྐྱེད་བྱེད་ཅིང་། །གསུང་གཅོག་ཐུགས་ཀྲུག་སྐུར་འདེབས་ཁོ་ན་བྱེད། །རང་ལ་ནོར་རྫས་གནང་སྦྱིན་བྱུང་བའི་ཚེ། །བླ་མ་སངས་རྒྱས་དངོས་སུ་མཐོང་བྱེད་ཅིང་། །རང་མི་འདོད་པའི་ཚིག་གཅིག་གསུངས་ཙམ་ལའང་། །སྲང་མདོའི་ཁྱི་རྒན་ལས་ཀྱང་ལོད་པར་བལྟ། །ཚིག་ཙམ་ལའང་འཐབ་རྩོད་དུ་མ་བྱེད། །དཀོར་ཟས་ཆེད་དུ་སྡིག་པ་གང་ཡང་ཕོད། ཁེ་གྲགས་བསྒྲུབ་ཕྱིར་ཟོལ་ཟོག་ཅི་ཡང་ཤེས། །ཚུལ་མིན་བཙུན་གཟུགས་མཐོང་བས་སྐྱོ་ཤས་འཕེལ། །བསྟན་དོན་ཡིན་རྒྱུའི་ཆོས་མིན་བྱ་བྱེད་ཀྱིས། །དལ་འབྱོར་ཆུད་ཟོས་བྱེད་པ་འདི་སྤངས་ནས། །དབེན་པའི་གནས་སུ་སྤྲོས་མེད་སྤྱོད་ཞུགས་ཏེ། །སྨྲ་བཅད་འདག་སྦྱར་དག་ལ་གནས་ན་བསམ། །སྦྱིན་བདག་རྣམས་དང་སྐྱེ་བོ་ཕལ་ཀུན་ཀྱང་། །

[Full Size]

དམ་པ་རྣམས་དང་བསླུ་བྱེད་ཟོག་པོའི་རིགས། །ལེགས་པར་རྟགས་ནས་བཀུར་སྟིའི་འོས་གྱུར་རྣམས། །འགྱུར་མེད་དད་པས་སྤྱི་བོར་མི་འཁུར་བར། ཁ་མཁས་གཡོ་ཆེ་ཟོལ་ཟོག་ལ་གོམས་པས། །ངོ་སྲུང་ཁ་ལན་གཙོ་བོར་འདོན་རྣམས་དང་། །གནས་འགྱུའི་སེམས་ངོ་ཞིབ་ཏུའང་མི་ཤེས་པར། །འཁྲུལ་ཞིག་རྟོགས་ལྡན་གྲུབ་ཐོབ་ཡིན་ནོ་ཞེས། །མི་ཆོས་བླ་མའི་བརྫུན་གྱིས་མངོན་ཤེས་དང་། །ཁྲེལ་མེད་ཐོ་ཅོ་བྱེད་པའི་ཟོག་པོ་ལ། །དད་པས་སངས་རྒྱས་དངོས་ལྟར་མཐོང་བྱེད་ཅིང་། །ཞབས་གཏོགས་ལོངས་སྤྱོད་རྒྱ་མཚོ་ཆེར་བསྐྱིལ་ནས། །གཅེས་དགུའི་ནོར་རྫས་རི་ལྟར་སྤུངས་ཏེ་འབུལ། །གང་དྲན་བྱེད་པའི་སྤྱོད་ལ་ཡ་མཚན་དང་། །ཅི་དྲན་ཟེར་བའི་གཏམ་ལ་ཡིད་ཆེས་བྱེད། །ལོག་ལམ་འཁྲིད་པ་དེ་འདྲའི་རྗེས་འབྲངས་ནས། །ཆོས་མཐུན་དམ་པ་རྣམས་ལ་བརྙས་བྱེད་ཅིང་། །ཞབས་གཏོགས་མཐུན་རྐྱེན་ཅུང་ཟད་སྦྱར་ཚེ་ཡང་། ཚོགས་གཉིས་རྫོགས་དང་དགེ་ལ་མི་

[Full Size]

བསམ་པར། །ཟས་ལན་གནང་སྦྱིན་བཟང་དུ་བྱུང་ན་བསྟོད། །མ་བྱུང་བླ་མཆོད་རིང་དུ་སྤོང་བྱེད་པའི། །ཚུལ་མིན་ཡོན་བདག་མཐོང་ཚེ་སྐྱོ་ཤས་འཕེལ། །རྒྱལ་བས་བསྔགས་པའི་རི་ཁྲོད་ཉམས་དགའ་བར། །གཞན་ངོ་སྲུང་བའི་བྱ་བྱེད་ཀུན་སྤང་ནས། །སྲོག་འཚོ་ལྷག་སྐྱོབས་ཙམ་ལ་གཞི་བརྟེན་ཅིང་། །དམ་ཆོས་བསྒྲུབ་ལ་གཅིག་ཏུ་དྲིལ་ན་བསམ། །སྦྱང་ཡོན་ཀུན་གྱི་ཁྱད་པར་གྲགས་རྣམས་ཀྱང་། །སྡེ་སྣོད་རྒྱུད་གཞུང་བསྟན་བཅོས་གང་དང་གང་། །ཤེས་པ་དེ་དག་མ་ནོར་མཐར་ཕྱིན་ཅིང་། །རང་གི་རྒྱུད་ལས་འཁེལ་བར་མི་བྱེད་པར། །ཇི་ཙམ་ཤེས་བཞིན་ང་རྒྱལ་ལྷག་པར་ཆེ། །རང་ཉིད་མ་གཏོགས་གཞན་ཀུན་དུད་འགྲོར་མཐོང་། །ཁོ་བོས་ཡོན་ཏན་འདི་ཙམ་ཤེས་སོ་ཞེས། །ཀུས་འདེབས་དར་འཕྱར་དུང་འབུད་བྱེད་ལ་མཁས། །ཐོས་པའི་འགགས་དོན་རྒྱུད་ཐོག་བཀལ་ནས་ནི། །རང་གཞན་དོན་མཆོག་བསྒྲུབ་ལ་མི་འབད་པར། །མཁས་པར་གྲགས་དང་རྙེད་བཀུར་བྱུང་བ་

[Full Size]

ན། །དོན་གྱི་སྙིང་པོ་དེ་ཀ་ཡིན་པར་རློམ། །དོན་མ་འབྱོར་ན་ཚིག་གི་འཕྲེང་བ་ལ། །མཁས་ཀྱང་མཁས་པའི་མཚན་ཉིད་མི་འབྱུང་ཏེ། །འདབ་ཆགས་ནེ་ཙོས་ཡིག་དྲུག་ལ་སོགས་པ། །སྨྲ་བར་ཤེས་མོད་དོན་དུ་ཅི་ཞིག་རྟོགས། །དོན་མེད་ཚིག་ལ་མཁས་པའི་རློམ་སེམས་ཅན། །ཕྲག་དོག་ཆེན་པོས་གཞན་ཡིད་དཀྲུག་ག་བྱེད་པ། །སྔོན་བྱུང་ལེགས་སྐར་གཏམ་རྒྱུད་དང་མཚུངས་པའི། །མཁས་རློམ་དྲེགས་ལྡན་མཐོང་ཚེ་སྐྱོ་ཤས་འཕེལ།། ༈ །།མི་ཚེ་བར་སྣང་གློགས་འདྲ་ཡུད་ཙམ་འདིར། །ཟད་མཐའ་མེད་པའི་ཚིག་ལ་སྦྱངས་པ་ལས། །ཆོས་ཀུན་སྙིང་པོ་གཅིག་ཤེས་ཀུན་གྲོལ་དོན། །བླ་མའི་གདམ་ངག་གཅིག་ཐོག་དྲིལ་ན་བསམ། །ཟབ་ཁྲིད་ཞུས་ཤིང་བསྒོམ་པར་རློམ་རྣམས་ཀྱང་། །མཚན་ལྡན་ཉམས་མྱོང་ལྡན་པའི་བླ་མ་ལ། །སེམས་ཀྱི་ཕུ་ཐག་ལེགས་པར་ཆོད་བྱས་ནས། །སྙིང་རུས་ཆེན་པོས་ཉམས་སུ་

[Full Size]

མི་ལེན་པར། །དང་པོར་མི་རྟག་ངེས་འབྱུང་མི་སྐྱེས་པར། །སྔོན་འགྲོའི་ཁྲིད་རྐང་དམིགས་རིམ་བསྒོམ་ལོ་ཙམ། །བར་དུ་སེམས་ཀྱི་བརྡར་ཤ་མ་ཆོད་པར། །གནས་འགྱུ་རིག་པའི་རང་འཚང་ཤེས་པར་རློམ། །མཐའ་མར་ངོ་སྤྲོད་གནད་དུ་མ་འཁེལ་བར། །བདག་གི་ཟབ་མོའི་བསྒོམ་ཁྲིད་ཐོབ་བོ་ཞེས། །མང་པོའི་ཁྲོད་དུ་ངོམ་ཞིང་སྒྲོག་པར་བྱེད། །གནད་དོན་ཕྱོགས་ཙམ་གོ་བའང་མེད་པ་ལ། །ཉམས་ཁྲིད་ཐོས་ལོ་ཙམ་གྱིས་མཆོག་པར་འཛིན། །སེམས་ཀྱི་མཚན་ཉིད་ཙམ་ཡང་མི་ཤེས་རུང་། །ཆང་གྲལ་རྣམས་སུ་ཁ་ལྟ་གཞན་ལས་མཐོ། །ཆོས་དོན་རྒྱུད་ལ་མ་འབྱོར་དངོས་རྟགས་སུ། །ཉོན་མོངས་དུག་ལྔའི་ཟུར་མགོ་སུ་ལས་རག །ལུས་ངག་དགེ་སྦྱོར་ཚོགས་བསགས་སྒྲིབ་སྦྱོང་ཀུན། །བྱིས་པའི་རྩེད་མོ་འདྲ་ཟེར་རྒྱབ་ཏུ་བསྐྱུར། །རྒྱུ་འབྲས་བླང་དོར་བྱ་བ་མ་ལུས་ལ། །ཐེག་དམན་ཉན་རང་ཆོས་ཞེས་ཁྱད་དུ་གསོད། །

[Full Size]

འདི་ཡིན་མེད་པའི་མུན་སྒོམ་དོན་མེད་ལ། །སྒོམ་གྱི་སྙིང་པོར་རློམ་སྟེ་ཡིད་གཏན་བྱེད། །འགའ་ཞིག་གིས་ནི་འཁྲུལ་སྣང་ལུག་རྒྱུད་ལ། །གང་ཤར་རང་གྲོལ་ཡིན་ཟེར་རྗེས་སུ་འབྲང། །ཞག་གསུམ་ཙམ་ཡང་དབེན་པར་མ་སྡད་པར། །སྒོམ་ཆེན་ཡིན་ཞེས་རང་མཐོང་དྲི་ལས་མཐོ། །སྟོང་ལྟའི་ཚིག་གི་ཀུ་ཅོ་ཁྱི་ལས་ཆེ། །ནོར་རྫས་མཐོང་ན་འདོད་ཐག་གཞན་ལས་ཉེ། །རྐྱེན་ངན་བྱུང་ན་བློ་ཕུགས་སུ་ལས་རྒྱུག །རང་གི་སེམས་ལ་འཇོག་སོ་གཏན་མེད་པར། །གཞན་ལ་ཁྱད་གསོད་བརྙས་ཆོས་ལྷག་པར་ཆེ། །བླ་མའི་ཞབས་འདྲེན་མཆེད་གྲོགས་དམའ་འབེབས་པའི། །ཚུལ་མིན་སྒོམ་ཆེན་མཐོང་བས་སྐྱོ་ཤས་འཕེལ། །ཟབ་དོན་གནད་འགགས་ཚུལ་བཞིན་མ་རྟོགས་ཀྱང་། །སྲིད་པའི་ངང་ཚུལ་སྒྱུ་མར་རིག་བྱས་ནས། །ངེས་འབྱུང་སྐྱོ་ཤས་རྒྱུད་ལ་བརྟེན་བྱེད་ཅིང་། །བླ་མར་

[Full Size]

གསོལ་འདེབས་ཁོ་ན་འབད་ན་བསམ། །དེ་ལྟར་སྤྱི་ཡི་གནས་ཚུལ་དེ་བཞིན་ལས། །དགོས་སུ་རང་ཕྱོགས་འཁོར་སློབ་ཕལ་ཆེར་ཡང་། །དམ་པའི་ཆོས་དང་མཐུན་པ་དཀོན་པའི་ཚུལ། །ལེགས་པར་བརྟགས་ན་ཡིད་ཀྱི་སྐྱོ་ཤས་འཕེལ། །དང་པོར་འཕྲད་ཚེ་མོས་གུས་གཞན་ལས་ཆེ། །ལྷན་ཅིག་འབྲོག་ཚེ་མགུ་འཁང་བྱེད་རྒྱུ་མང་། །འཇུག་ཏུ་ནམ་ཡང་འཁོན་གྱོད་བྱེད་པར་བརྩམས། །སྙིགས་དུས་སློབ་དཔོན་ཀུན་གྱི་ངང་ཚུལ་ཡིན། །ཅི་ཡང་མ་སྨྲས་ཁ་རོག་བསྡད་ཙ་ན། །ཞལ་ཏ་སློབ་སྟོན་བཀའ་ཁྱབ་དགོས་སོ་སྐད། །དྲང་པོའི་གཏམ་དང་ཤ་ཚའི་ཚིག་སྨྲས་ན། །བཀའ་ཀྱོན་བྱུང་ཞེས་ཁོང་ཁྲོ་མེ་ལྟར་འབར། །ནོར་དང་ལོངས་སྤྱོད་ཕུགས་སུ་བཞག་པའི་ཚེ། །རྒྱུ་སྲེད་འཕང་སེམས་འཛིན་ཆགས་ཆེའོ་སྐད། །གང་འོས་གཞན་ལ་སྦྱིན་སོགས་བྱས་གྱུར་ན། །ཐམས་ཅད་མེད་པར་བྱས་ཞེས་འབར་ཞིང་བཤེ། །རང་གཞན་དོན་དང་ཕྲལ་ཕུགས་བྱ་བྱེད་

[Full Size]

སོགས། །གང་འཐད་འགྱོད་མེད་གྲོས་སུ་བྱས་གྱུར་ན། །ཉིད་ཀྱིས་གང་མཛད་དེ་ལ་འདུན་ནོ་སྐད། །གང་ཤར་ཐོག་ཏུ་གང་བབས་བྱས་པའི་ཚེ། །འདི་འདྲ་མིན་ཟེར་འབར་ཞིང་གྱོད་ཁ་བརྡུང་། །བྱེས་སུ་བསྒྲོད་དང་གཞན་ཡུལ་མྱུལ་ཙ་ན། །འགྲོ་འདུག་མང་པོ་ཚིག་པ་ཟ་ཞེས་བསུན། །ཟླ་ཤས་ཙམ་གཅིག་མཚམས་ལ་སྡད་གྱུར་ན། །ཟང་ཟིང་ནོར་གྱི་གདུལ་བྱ་མ་བྱུང་ལོ། །དབང་བསྐུར་ལ་སོགས་གཞན་དོན་བྱས་པ་ན། །དགེ་སྦྱོར་མ་བྱས་བར་ཆད་འོང་ཞེས་སྨྲ། །གཞན་དོན་བསྐྱུངས་ནས་འཚམས་ལ་འདུག་ཙ་ན། །དེས་ཀྱང་མི་ཐུས་ཡང་ནི་ཁང་ར་གདུང་། །ལྷན་ཅིག་བསྡད་ནས་ཟབ་ཆོས་བཤད་ན་ནི། །ཉན་མི་ཁོམ་པར་ཕྱོགས་སུ་འཐོར་ཞིང་འགྲོ། །དབེན་པར་རང་དོན་བསྒྲུབ་པའི་སྐབས་སུ་ནི། །བདག་ལ་དམ་ཆོས་ཞུ་ཞེས་ནན་གྱིས་བསྐུལ། །མཉམ་པོར་འགྲོགས་ཚེ་ཅི་ལས་ལོས་མཐོང་ཞིང་། །རྨི་ལམ་ཙམ་དུའང་

[Full Size]

དད་གུས་མི་སྐྱེ་བར། །སོ་སོར་འགྱེས་ཚེ་ཁྱེད་མེད་བདག་ཅག་རྣམས། །ཅི་ལྟར་བྱེད་ཅེས་འཁང་པའི་རྣམ་འགྱུར་སྟོན། །སྙིགས་དུས་སྐྱེ་བོ་བློ་སྣ་རབ་ཏུ་མང་། །དུག་ལྔ་རག་ཅིང་བློ་གཏད་མི་ཐུབ་པར། །ཅི་ལྟར་བྱས་ཀྱང་མགུ་བའི་དུས་མེད་པའི། །ཚུལ་འདི་མཐོང་ཚེ་སྐྱོ་ཤས་ལྷག་པར་འཕེལ། །རང་ལ་བླ་མའི་མཚན་ཉིད་མི་ལྡན་ཞིང་། །ཁོང་ཅག་སློབ་མའི་མཚན་ཉིད་མི་ལྡན་ཞིང་། །ཁོང་ཅག་སློབ་མའི་མཚན་ཉིད་དེ་བས་དཀའ། །རང་གཞན་གཉིས་ཕུང་མི་ཚེ་སྟོང་ཟད་ཀྱི། །བླ་མ་འདི་འདྲ་བྱེད་པར་ཅི་ལ་སྤྲོ། །དམ་པ་གོང་མའི་མཛད་སྲོལ་ཇི་བཞིན་དུ། །རྒྱལ་བས་བྱིན་གྱིས་བརླབས་པའི་ཡང་དབེན་མཆོག །གངས་ཁྲོད་གཡའ་སྤང་ནགས་འདབས་ལ་སོགས་སུ། །གྲོགས་མེད་གཅིག་པུར་བསྒྲུབ་ལ་བརྩོན་ན་བསམ།། ༈ །།དེ་ལྟར་གཞན་གྱི་སྐྱོན་འཚང་མང་བརྗོད་ཀྱང་། །གཙོ་བོར་རང་ཉིད་སྐྱོན་གྱི་ཕུང་པོ་སྟེ། །གཞན་སྐྱོན་སྨྲ་བའང་སྐྱོན་

[Full Size]

གྱི་ཆེ་ཤོས་ཡིན། །དེ་ཕྱིར་རང་སྐྱོན་ཐོབ་པར་མི་རིགས་སམ། །དལ་འབྱོར་ཐོབ་པ་ཡིད་བཞིན་ནོར་ལས་དཀོན། །ཐོབ་པ་འདི་ཡང་མི་རྟག་འཇིགས་པར་ངེས། །སྙོམ་ལས་ལེ་ལོར་བསྡོད་པར་མི་རིགས་ཀྱང་། །རྣམ་གཡེང་བྱེད་འདི་རང་སྐྱོན་མ་ཡིན་ནམ། །འཆི་དུས་ལྷ་ཆོས་དགོས་པར་ཤེས་བཞིན་དུ། །མི་ཚེ་ཡུད་ཙམ་ལོང་མེད་དུས་འདི་རུ། །ཆོས་ལ་མི་བརྩོན་ལྟོ་གོས་དོན་གཉེར་ཞིང་། །ཆོས་མིན་སྤྱོད་འདིའང་རང་སྐྱོན་མ་ཡིན་ནམ། །ཐོས་པ་བྱེད་ཚེ་སྒོམ་ལ་འབད་ན་བསམ། །བསྒོམ་པའི་ཚེ་ན་སྤྲོས་བཅས་ཚིག་ཕྱིར་འབྲེང་། །གཉིས་འཛིན་བློ་སྣས་དགོས་དོན་ཆལ་པ་རུ། །གཏོང་བ་འདི་ཡང་རང་སྐྱོན་མ་ཡིན་ནམ། །རང་དོན་སྒྲུབ་ཚེ་གཞན་ཕན་བྱེད་པར་སྤྲོ། །གཞན་དོན་བྱེད་ན་སྐྱོ་ངལ་བསྲན་མི་བཟོད། །དོན་གཉིས་བསྒྲུབ་པའི་བརྩོན་འགྲུས་གོ་ཆ་མཆོག །མེད་པ་འདི་ཡང་རང་སྐྱོན་མ་ཡིན་ནམ།

[Full Size]

ཆོས་ཀྱི་རྩ་བ་བཟོད་དང་བྱམས་སྙིང་རྗེ། །ཡིན་པར་གོ་ཡང་རྒྱུད་ལ་མི་སྟོན་པར། །རང་གི་འདོད་དོན་ཡིད་བཞིན་མ་བྱུང་ན། །ཁྲོ་ཞིང་འཁྲུག་པའང་རང་སྐྱོན་མ་ཡིན་ནམ། །གཞན་ལ་ཕན་པ་བསྒྲུབ་པར་རློམ་ན་ཡང་། །བདག་པས་གཞན་ཅེས་ལྷུར་ལེན་མི་བྱེད་པར། །གཞན་བདེ་འདོད་ཀྱང་རང་སྡུག་མི་འདོད་པར། །བདག་འཛིན་ཆེ་བའང་རང་སྐྱོན་མ་ཡིན་ནམ། །གཞན་ལ་དམ་ཆོས་འཆད་པར་རློམ་བྱེད་ཀྱང་། །རང་གི་རྒྱུད་ལ་ཆོ་དོན་མ་འབྱོར་པས། །ཆོས་དང་ཆོས་མིན་འདྲེས་མའི་ལས་ཉིད་ལ། །སྤྱོད་པ་འདི་ཡང་རང་སྐྱོན་མ་ཡིན་ནམ། །རང་ཉིད་ཕྱི་ནང་སྒྲོ་འདོགས་མ་ཆོད་པར། །གཞན་ལ་ཟབ་ཆོས་བཤད་པར་རློམ་པ་འདི། །རྒྱུད་མེད་མིའམ་ལོང་བས་ལམ་འཁྲིད་ལྟར། །གྱུར་པ་འདི་ཡང་རང་སྐྱོན་མ་ཡིན་ནམ། །ཚེ་འདིའི་རྐྱེན་སེལ་ཕྱི་མའི་གཏན་སྲིད་སོགས། །རང་དོན་བསྒྲུབ་པའི་ནུས་པའང་མེད་མོད་ཀྱང་། །གཞན་

[Full Size]

གྱི་དད་རྫས་གཤིན་སྐོར་བག་མེད་སྤྱོད། །ཚུལ་འདི་དག་ཀྱང་རང་སྐྱོན་མ་ཡིན་ནམ། །མཁྱེན་བརྩེ་ནུས་མཐུ་མངོན་ཤེས་རྫུ་འཕྲུལ་སོགས། །ལྡན་པར་མ་གྱུར་གཞན་དོན་འགྲུབ་པར་དཀའ། །གོ་ཞིང་རིག་ཀྱང་དོན་མེད་བྱ་བ་ལ། །འཇུག་པ་འདི་ཡང་རང་སྐྱོན་མ་ཡིན་ནམ། །དབེན་པའི་གནས་སུ་བསྒྲུབ་པ་ལྷུར་བླངས་ནས། །དམ་པའི་ཆོས་ལ་བརྩོན་པར་སྨོན་བཞིན་དུ། །ཐོག་ཏུ་མི་འགེལ་གཡེང་བའི་ངང་ཉིད་ལས། །བསྡོད་པ་འདི་ཡང་རང་སྐྱོན་མ་ཡིན་ནམ། །རང་ཉིད་འཁྲུལ་པའི་སྐྱོན་གྱི་རྒྱ་མཚོ་ཆེར། །ལས་ཉོན་རྦ་རླབས་ཤུགས་ཀྱིས་འཁྱེར་བཞིན་དུ། །ད་དུང་གཞན་གྱི་སྐྱོན་འཚང་སྨྲ་བྱེད་པ། །འདི་ནི་སྐྱོན་གྱི་ནང་ནས་སྐྱོན་ཆེན་ཡིན། །སྔོན་ཆད་རྣམ་གཡེང་འཁྲུལ་པ་ངང་དུ་སོང་། །ད་ནི་ཡིན་ལུགས་དོན་ལ་མི་བརྩོན་ན། །འཁོར་བར་སྐྱོ་ཡང་ཆོས་ཀྱི་མདོ་དོན་དེ། །

[Full Size]

འགྲུབ་པར་གདའམ་རང་གིས་རང་ལ་བསོམ། །གཞན་དོན་འཚོལ་བའི་ཀུན་རྟོག་ངན་པ་དེ། །རྒྱང་དུ་བསྐྱུར་ལ་རང་སྐྱོན་རྩད་ནས་ཆོད། །དྲེད་པོ་ཁ་ཆོས་མཁན་གྱི་སྤྲང་པོ་ཁྱོད། །ད་ནི་ཕན་པའི་གྲོས་འདེབས་འདི་ལ་ཉོན། །སྙིགས་དུས་སྐྱེ་བོ་རྨུ་རྒོད་དུག་ལྔ་ཧྲག །ཕར་ལ་ཕན་པའི་སླབ་བྱ་བྱས་གྱུར་ཀྱང་། །ཉན་པར་མི་བྱེད་སླར་ཡང་ལོག་ལྟ་སྐྱེ། །དེ་བས་རང་གྲོས་རང་ལ་གདབ་པར་གྱིས། །ཚེ་འདིའི་བྱ་བྱེད་སྒྱུ་མའི་རོལ་པ་འདི། །ཟིན་པའི་མཐའ་མེད་བྱས་ཀྱང་སྙིང་པོས་དབེན། །ཅམ་གྱི་ཞོག་ལ་ཆོས་ཕྱོགས་བྱ་བ་ཀུན། །ཧུར་གྱི་ཐོང་ལ་རྒྱུན་དུ་འབད་པར་གྱི། །རིག་གནས་ལ་སོགས་ཐོས་པའི་བྱེ་བྲག་རྣམས། །ཇི་ཙམ་བསླབ་ཀྱང་ཟད་མཐའ་མི་ཡོང་ཞིང་། །ཚེ་ལ་ངེས་མེད་ནམ་འཆི་ཆ་མེད་འདིར། །ཟབ་དོན་སྙིང་པོར་དྲིལ་ལ་བརྩོན་པར་གྱིས། །དལ་འབྱོར་འཚོ་བའི་མཐུན་རྐྱེན་ཟས་

[Full Size]

དང་གོས། །མེད་ཐབས་མེད་ཀྱང་ཆོ་ཤེས་མ་བྱས་ན། །ཇི་ཙམ་ཡོད་ཀྱིན་ཞེན་འདོད་འཕེལ་འགྱུར་བས། །སྲེད་པ་སྤོང་ལ་ཆོག་ཤེས་ལྡན་པར་གྱིས། །བྱེས་སུ་འཁྱམ་པ་སྟོང་སྐོར་ཡིན་མོད་ཀྱང་། །ས་གཅིག་བསྡོད་ཚེ་ཆགས་སྡང་འདུ་འཛི་འཕེལ། །དེ་བས་ཆགས་སྡང་རྣམ་གཡེང་བྲལ་བའི་ས། །ངེས་མེད་རྣམས་སུ་ཆོས་ལ་འབད་པར་གྱིས། །སྙིགས་དུས་ལྟར་སྣང་འདུ་འཛིའི་འགྲོ་དོན་དང་། །དད་ཅན་ཚོགས་པའི་ཟང་ཟིང་འདུ་ལོང་ཀུན། །བདུད་ཀྱི་གཡབ་མོ་ཆོས་ཀྱི་བགེགས་ཡིན་པས། །སྤངས་ནས་སྤྲོས་མེད་སྤྱོད་ལ་གནས་པར་གྱིས། །ཅིས་ཀྱང་ལས་ཀྱི་འཕེན་པས་འདུས་གྱུར་ཀྱང་། །རང་གི་དགེ་སྦྱོར་ཆོས་ཚུགས་མི་འདོར་ཞིང་། །གཞན་ཀྱང་ཅི་ནུས་ཆོས་ཕྱོགས་ཉིད་ལ་སྦྱོར། །གང་འབྲེལ་ལེགས་པའི་ལམ་ལ་གཟུད་པར་གྱིས། །རྒྱལ་བས་སེམས་ཅན་མོས་བློ་ཐ་དད་ལ། །དགོངས་ཏེ་ཆོས་སྒོ་མཐའ་

[Full Size]

ཡས་གསུངས་དེའི་ཕྱིར། །གྲུབ་མཐའི་ཆོས་ལུགས་སྣ་ཚོགས་ཐམས་ཅད་ལ། །སྐུར་འདེབས་སྤོང་ལ་དག་སྣང་འབྱོངས་པར་གྱིས། །མང་པོའི་འཁྲོ་དང་གྲོགས་ཀྱི་ནང་འདུག་ཚེ། །ལུས་ཀྱི་སྤྱོད་འགྲོས་ངག་གི་གླེང་བརྗོད་སོགས། །ཞི་ཞིང་དུལ་ལ་གཞན་ལ་མི་གནོད་པའི། །བག་ཡོད་སྤྱོད་ལ་རྒྱུན་དུ་གནས་པར་གྱིས། །དབེན་པར་ནང་དུ་ཡང་དག་འཇོག་པའི་ཚེ། །དོན་མེད་སྤྲས་སྤྲོས་བྱ་བྱེད་ཀུན་སྤངས་ནས། །ལོང་མེད་བརྩོན་འགྲུས་དྲག་པོའི་གོ་བགོས་ཏེ། །སྒྲུབ་པའི་དམ་བཅའ་མཐའ་རུ་འཁྱོལ་བར་གྱིས། །ཆོས་ལ་གནོད་པའི་རྐྱེན་ངན་མང་བ་དང་། །འཁྲུལ་པའི་སྣང་བ་བསླུ་ཁྲིད་མཁས་པའི་ཕྱིར། །ཡེངས་མེད་དྲན་པས་རྒྱུན་དུ་བསྐྱངས་བྱས་ནས། །ད་ལྟ་ཤི་ཡང་འགྱོད་མེད་གྲབ་ཆུད་ཀྱིས། །འདི་དང་ཕྱི་མ་བར་དོ་ཐམས་ཅད་ཀྱི། །གཏན་གྱི་སྐྱབས་གནས་དཔལ་མགོན་བླ་མ་ལ། །སྒོ་གསུམ་ཟོལ་མེད་གུས་པས་མཉེས་བྱས་ཤིང་།

[Full Size]

རྩེ་གཅིག་གསོལ་བ་འདེབས་ལ་བརྩོན་པར་གྱིས། །རང་དོན་གཙོ་བོར་སྡོམ་དང་དམ་ཚིག་བསྲུང་། །གཞན་དོན་གཙོ་བོར་དག་སྣང་བྱང་སེམས་སྦྱོངས། །ཀུན་གྱི་གཙོ་བོར་སྐྱེད་རྫོགས་ཟུང་འཇུག་བསྒོམ། །ཡེངས་མེད་དགེ་སྦྱོར་དག་ལ་འབད་པར་གྱིས། །དེ་སྔ་ཕན་ཆད་གཡེང་བས་མི་ཚེ་འདས། །ད་ནས་ཚེ་ལྷག་ཇི་ཙམ་ཐུབ་པའི་བར། །ལེ་ལོ་འཁྲུལ་འབྱམས་དབང་དུ་མ་གཏང་བར། །གྲོས་འདེབས་སླབ་བྱ་དེ་རྣམས་མཉན་པར་གྱིས། །དོན་མེད་འཇིག་རྟེན་འཁྲུལ་པའི་ལས་སྤངས་ནས། །དམ་པའི་ཆོས་ལ་ཡང་དག་བརྩོན་པ་ན། །རང་གཞན་དོན་ཀུན་འབད་མེད་ལྷུན་གྲུབ་ཅིང་། །སྐྱིད་པའི་ཉི་མ་ནང་ནས་འཆར་བར་འགྱུར། །རང་གཞན་འཁྲུལ་སྣང་སྐྱོན་གྱི་བྲག་རི་མཐོན་པོ་ཉིད། །སྐད་ཅིག་ཉིད་ལ་རྡུལ་དུ་རློག་བྱེད་གནམ་ལྕགས་ཐོག །ཚིག་དོན་ཟབ་མོའི་མེ་སྤུང་འབར་བས་

[Full Size]

གཏམས་པ་ཡིས། ཉོན་མོངས་འཁྲུལ་པའི་རི་བོ་རྩེད་ནས་གཅོད་གྱུར་ཅིག དེ་ལྟར་རང་གཞན་རྨོངས་པའི་འགྲོ་བ་མ་རིག་པའི་མུན་པ་ཆེན་པོས་འཐུམས་ཤིང་ལོག་པའི་ལམ་དུ་ཞུགས་པ་དག་ལས་བཟློག་ཏེ། འདི་ཕྱིར་ཕན་ཞིང་བདེ་བའི་ལམ་བཟང་མཆོག་ཏུ་གྱུར་པ་དམ་པའི་ཆོས་ཁོ་ན་བྱ་བ་ལ་ཞུགས་པར་གྱུར་ན་ཅི་མ་རུང་མཉམ་པའི་འདུན་པ་དྲག་པོས་ཆེད་དུ་བསྐུལ་ཞིང་། དོན་མེད་འཁྲུལ་པའི་ལས་ཀྱི་རང་གཞན་རྟག་ཏུ་མནར་བ་ལ་མི་བཟོད་པའི་སྐྱོ་ཤས་ཆེན་པོས་སྨྲས་པའི་ཚིགས་སུ་བཅད་པ་འདི་དག་གི་དོན་ལ་དཔྱོད་ལྡན་སྐལ་པ་ཅན་གྱི་སྐྱེས་བུ་བློ་གསལ་དག་གི་ལེགས་པར་རྟོགས་ཤིང་བསམ་རྒྱུད་ལ་ཕན་པའི་གདམ་ངག་དམ་པ་མཆོག་ཏུ་འགྱུར་བར་གོར་མ་ཆགས་ཤིང་། ཡང་། སྙིགས་དུས་ཀྱི་སྐྱེ་བོ་ལོག་ལྟའི་མེ་འབར་ཞིང་ཕྲག་དོག་གི་རླུང་མཚུབས་གི་བསམ་ཡུལ་དུ་འདི་སྙམ་དུ་འཆར་ཏེ། །ཀྱེ་མའོ། །འདི་ནི་ངེས་པར་གཞན་དག་ལ་སྐུར་པ་འདེབས་ཤིང་སྐྱོན་ཚང་བརྗོད་པའི་བསྟན་བཅོས་ངན་པའོ་སྙམ་དུ་སེམས་ཏེ་ཁྲོ་ཞིང་འཁྲུགས་ནས་ཚིག་དོན་འདི་དག་སྤོང་བར་བྱེད་པར་འགྱུར་ཏེ། དེ་དག་ནི་དམ་པའི་ཆོས་ལ་འཇུག་པའི་སྐལ་པ་མེད་པ་ནི་ཉིད་དེ། མགོན་པོ་བྱམས་

[Full Size]

པས། ལོག་པའི་ལམ་ལ་མཐའ་མེད་ཕྱིར། །དེ་དག་འདི་ནི་སྤྲོ་བྱ་མིན། །ཅེས་གསུངས་པ་དང་མཐུན་ཞིང་། དེ་ལྟར་མ་ཡིན་པའི་སྐྱེས་བུ་བློ་ལྡན་རྣམས་ལ་ཕན་པའི་ཕྱིར་དང་། གཙོ་བོར་རང་ཉིད་ཀྱི་སྐྱོན་འཚངས་དྲུང་ནས་འབྱིན་ཅིང་བློ་རྒྱུས་ཆོས་ལ་བསྐུལ་བའི་སྙིང་གཏམ་གདམ་ངག་ཟབ་དོན་གནད་ཀྱི་མདོ་འགགས་དམ་ཆོས་བདུད་རྩི་བུམ་བཟང་དམ་པར་སྨྲས་པ་ཡིན་གྱི། ཕྲག་དོག་སྡང་བའི་སེམས་ཀྱི་ཤུགས་ལས་བྱུང་བའི་ཚིག་རྩུབ་དུག་མདའ་རྣོན་པོས་གཞན་དག་ཕམ་པར་བྱ་ཕྱིར་སྨྲས་པ་ནི་མ་ཡིན་ནོ།། ༈ །།འདིར་སྨྲས་པ། ཐོགས་མེད་དུས་ནས་གོམས་ཤིང་འཐས་པ་ཡི། །བག་ཆགས་འཁྲུལ་པའི་རྒྱ་མཚོ་ཆེན་པོ་རུ། །དལ་འབྱོར་གྲུ་དང་རིག་པའི་འཚོང་པ་དག །ཉོན་མོངས་ལས་ངན་རླུང་གིས་རབ་བསྐྱེད་ནས། །ངན་སོང་སྲིན་པོའི་གླིང་དུ་ཕྱོགས་པར་གྱུར། །དེ་ལ་ལྷག་བསམ་དག་པས་རླུང་གཡོས་ཤིང་། །ཟབ་དོན་གདམས་པའི་བ་དན་འདི་འཕྱར་བས། །ཐར་པའི་རིན་ཆེན་གླིང་དུ་བདེར་ཕྱིན་བྱེད། །དེ་ཕྱིར་འདི་དོན་བླངས་དོར་འབད་པར་བྱོས། །སུ་ཞིག་འདི་ལ་ལོག་པར་བལྟ་བྱེད་པའི། །སྐྱེ་བོ་དེ་ལ་དགེ་ལེགས་ལམ་དག་ནི། །བྲག་ཕུག་བྱང་བལྟའི་ཉི་མ་

[Full Size]

ཇི་བཞིན་དུ། །རེ་བར་མ་བྱེད་རང་རང་ལས་འབྲས་སྤྱོད། །འོན་ཀྱང་འདི་ཡི་དགེ་ཚོགས་ཇི་སྙེད་ཀྱིས། །མཁའ་མཉམ་འགྲོ་དང་ཁྱད་པར་ལས་ངན་གྱི། འདམ་དུ་བྱིངས་བའི་འགྲོ་རྣམས་མྱུར་ཐར་ནས། །བྱང་ཆུབ་གོ་འཕང་མཆོག་ལ་རེག་གྱུར་ཅིག །ཅེས་པ་འདི། རང་གཞན་གྱི་སྐྱོན་འཚང་ངོས་འཛིན་ལ་བསམ་ནས། །སྨིན་གྲོལ་སྐྱེད་རྫོགས་གླིང་གི་ཡངས་ཐོག་ཆོས་དབྱིངས་རྩེར། རང་ལོ་ཉེར་གསུམ་པའི་སྐབས་ཤིག་ཏུ་ཡི་གེར་བཀོད་པ་འདི་ཡི་དགེ་བས་འགྲོ་བ་ཐམས་ཅད་སྐྱོན་བྲལ་ཡོན་ཏན་ཀུན་ལྡན་སངས་རྒྱས་ཀྱི་གོ་འཕང་དམ་པ་ཐོབ་པར་གྱུར་ཅིག །དཀོན་མཆོག་བླ་མེད་སྲིད་ཞིའི་དཔལ་མགོན་མཆོག །ཡིད་བཞིན་ནོར་ལྟར་འདོད་དགུའི་རེ་བསྐོངས་ཤིང་། །ལྷ་བཅས་འགྲོ་བའི་སྤྱི་བོའི་རྒྱན་གྱུར་བ། །མཚུངས་མེད་བླ་མའི་ཞབས་ལ་གུས་ཕྱག་འཚལ། །དད་པ་ཅན་གྱི་སྐལ་ལྡན་ཕོ་མོ་ལ། །ཕན་པའི་གྲོས་འདེབས་བཤད་ཀྱི་ཡིད་ལ་བཟུང་། །འདུས་བྱས་མི་རྟག་སྙིང་པོ་མེད་པའི་ཚུལ། །མི་སྡོད་འགྱུར་བའི་བརྡའ་སྟོན་འདི་ལ་གཟིགས། །རྟ་བདུན་ཉི་མ་གླིང་བཞི་བསྐོར་

[Full Size]

བར་བཞུད། །མུན་པའི་གྲིབ་སོས་ཕྱོགས་ཀུན་ཁྱབ་ཏུ་ཉེ། །སྔ་དྲོ་ཕྱི་དྲོའི་འགྱུར་ལྡོག་འདི་འདྲས་ཀྱང་། །མི་རྟག་འཆི་བའི་བརྡའ་རུ་མི་འདུག་གམ། །དཀར་གསལ་ཟླ་བའང་ནུབ་རིའི་ཕག་ཏུ་སོང་། །ཆུ་འཛིན་ལྷོ་སྤྲིན་ནམ་མཁའི་ཀློང་དུ་ཐིམ། །འཇའ་ཚོན་བཀྲ་ཡང་བར་སྣང་ཁམས་སུ་ཡལ། །དེས་ཀྱང་མི་རྟག་བསྐུལ་མར་མི་འདུག་གམ། །རི་བོ་ཀུན་ཀྱང་དར་དཀར་ཐོད་ཀྱིས་གཡོག །ལྗོན་ཤིང་ལོ་འདབ་རང་བཞིན་ས་ལ་ལྷུང་། །གསུང་སྙན་སྒྲོགས་པའི་བྱ་ཚོགས་ཕྱོགས་སུ་གྱེས། །འདིས་ཀྱང་མི་རྟག་བསྐུལ་མར་མི་འདུག་གམ། །ནེ་སིང་ལྗོངས་ཀྱི་ཁ་དོག་དུས་ཀྱི་བསྒྱུར། །མདངས་ལྡན་མེ་ཏོག་དོག་མོའི་ས་ལ་ཐིམ། །རྐང་དྲུག་བུང་བའི་པི་ཝང་སྒྲ་རྒྱུན་ཆད། །འདི་ཡང་མི་རྟག་བསྐུལ་མར་མི་འདུག་གམ། །ལོ་ཟླ་ཞག་དང་དུས་ཚོད་འགྱུར་ལྡོག་དང་། །དབྱར་དགུན་སྟོན་དཔྱིད་ནམ་ཟླའི་འགྱུར་ལྡོག་དང་། །ཉིན་མཚན་སྔ་ཕྱིའི་དུས་ཀྱི་

[Full Size]

འགྱུར་ལྡོག་སོགས། །འདིས་ཀྱང་མི་རྟག་བསྐུལ་མར་མི་འདུག་གམ། །རྒན་གཞོན་བར་གསུམ་ཀུན་ཀྱང་འཆི་ཚུལ་དང་། །ཕྱི་ནང་སྣོད་བཅུད་མི་རྟག་འགྱུར་ཚུལ་འདིས། །གཅིག་ཤི་གཉིས་ཤིའི་རེ་མོ་རང་ལ་བབས། །ནམ་འཆི་ཆ་མེད་ཡིན་པར་མ་ཤེས་སམ། །གསོན་པར་འདོད་ཀྱང་འཆི་བདག་བདུད་ཀྱིས་ཟིན། །འདུག་པར་འདོད་ཀྱང་འགྲོ་བའི་རི་མོ་བབས། །རྟག་ཏུ་རེ་ཡང་མི་རྟག་ངང་ཚུལ་སྟོན། །དེ་འདྲའི་དུས་ཤིག་མྱུར་དུ་མི་འོང་ངམ། །བསགས་པའི་ནོར་རྫས་ཕན་མེད་ཤུལ་དུ་ལུས། །བརྩིགས་པའི་ཁང་ཁྱིམ་གཞན་གྱིས་བདག་ཏུ་བཟུང་། །གཅེས་པའི་ལུས་ཀྱང་བྱ་ཁྱིའི་ཁ་ཟས་བྱེད། །གང་ལ་ཆགས་ཀྱང་སྙིང་པོ་ཅང་འདུག་གམ། །འཆི་དུས་ཕན་པའི་ལྷ་ཆོས་མི་བྱེད་ན། །ནོར་རྫས་ཕྱུག་ཀྱང་ཡི་དྭགས་གཏེར་བསྲུང་འདྲ། །རང་གི་རང་གིས་བསླུ་བའི་སྙིང་མེད་པོ། །འགྱོད་ཀྱང་ཕྱིས་པའི་དུས་གཅིག་མི་ཡོང་ངམ། །

[Full Size]

ཆུ་འབྲོག་དང་ས་ཞིང་འཛོམ་པ་ཡི། །ཕྱི་རོལ་གྱི་ཡུལ་ལ་ཕར་བལྟས་ཚེ། །བདེ་སྐྱིད་དུ་འཛོམ་ཡང་སྡོད་དབང་མེད། །བར་དོ་རུ་འཁྱམས་པའི་དུས་གཅིག་འོང་། །བཀྲག་མདངས་དཔའ་རྩལ་འཛོམ་པ་ཡི། །ཤ་ཁྲག་གི་ལུས་ལ་ཚུར་བལྟས་ཚེ། །འཆི་བདག་གི་བདུད་ཀྱི་བཅོམ་ནས་ཀྱང་། །ལུས་སེམས་གཉིས་བྲལ་བའི་དུས་ཤིག་འོང་། །དཀའ་ལས་ཀྱིས་རྩོལ་སྒྲུབ་བྱས་པ་ཡི། །ལོངས་སྤྱོད་དང་ནོར་ལ་ཕར་བལྟས་ཚེ། །སྦྲང་མ་ཡི་སྦྲང་རྩི་ཇི་བཞིན་དུ། །རང་དབང་དུ་མེད་པའི་དུས་ཤིག་འོང་། །ཡུན་རིང་དུ་འགྲོགས་པའི་གྲོགས་རྣམས་དང་། །མཛའ་བཤེས་དང་གཉེན་ལ་འཕར་བལྟས་ཚེ། །དགོས་དུས་སུ་མི་ཕན་སོ་སོར་གྱེས། །གཅིག་པུ་རུ་འགྲོ་བའི་དུས་ཤིག་འོང་། །འདུས་བྱས་ཀྱི་ཆོས་ལ་སྙིང་པོ་མེད། །མི་རྟག་ཅིང་འགྱུར་བའི་ཆོས་ཉིད་དེ། །ལྷ་ཆོས་གཅིག་སྙིང་ནས་མ་བྱས་ན། །ཅི་བྱས་ཀྱང་སྡུག་བསྔལ་

[Full Size]

ཁོ་ནའི་རྒྱུ། །ཚངས་པ་དང་བརྒྱ་བྱིན་ལ་སོགས་དང་། །འཁོར་སྒྱུར་གྱི་རྒྱལ་པོ་ཐམས་ཅད་ཀྱང་། །འཆི་བདག་གི་བདུད་ཀྱིས་ཟིན་པའི་ཚེ། །དབང་མེད་དུ་འགྲོ་བ་མ་ཐོས་སམ། །མི་ལུས་འདི་ལན་ཅིག་ཐོབ་གྱུར་ཅིང་། །རང་དབང་ཉིད་རང་གིས་ཐོབ་དུས་འདིར། །དོན་མེད་དུ་སྟོང་ལོག་མ་བྱེད་པར། །ནམ་གཞག་གི་འདུན་མ་སྒྲུབ་རེ་རན། །སྐྱེས་པའི་མཐའ་དེ་འཆི་ལས་འོས་མེད་པས། །ཚེ་ལ་བློས་གཏད་མེད་དོ་ཤེས་ལྡན་རྣམས། །ཕ་ཡུལ་བཟང་ཀྱང་བསྐྱུར་ནས་འགྲོ་བར་ངེས། །ཡུལ་ལ་ཞེན་པ་མ་ཆེ་ཤེས་ལྡན་རྣམས། །མཁར་ཁྱིམ་ལེགས་ཀྱང་དྲི་ཟའི་གྲོང་ཁྱེར་འདྲ། །གཏན་དུ་འདུག་དབང་མེད་དོ་ཤེས་ལྡན་རྣམས། །སྒྱུ་མའི་ནོར་རྫས་བསགས་ཀྱང་ཁྱེར་དབང་མེད། །སྦྱིན་པ་ཕྱོགས་མེད་མཐོང་དང་ཤེས༴ །གཅེས་པར་གསོས་ཀྱང་ཐལ་བའི་ཕུང་པོར་འགྱུར། །ལུས་ལ་སྙིང་པོ་མེད་དོ་ཤེས༴ །རིམ་འགྲོ་བྱས་ཀྱང་འཆི་བདག་བདུད་ཀྱིས་འཕྲོག །ཚེ་ལ་

[Full Size]

འཐུད་ཐབས་མེད་དོ༴ །སང་ཤི་སྣང་ཤི་སུས་ཀྱང་མི་ཤེས་པས། །བཤོམ་རའི་བློ་སྣ་མ་མང་༴ །སངས་རྒྱས་བསྟན་པ་ནུབ་ཁའི་ཉི་མ་འདྲ། །སྙོམ་ལས་སྡོད་ལོང་མེད་དོ༴ །མཚན་ལྡན་བླ་མ་ཡིད་བཞིན་ནོར་བུ་ལ། །རྩེ་གཅིག་གསོལ་བ་ཐོབ་དང་༴ །དམ་ཆོས་བདུད་རྩི་འཆི་གསོས་སྨན་མཆོག་འདྲ། །གུས་པས་དང་དུ་ལོང་དང་༴ །ད་ལྟ་མི་འབུང་འབུང་དུས་ནམ་ཞིག་བྱེད། །ཚེའི་དུས་ཚོད་ཟིན་ནམ༴ །དུས་ངན་ཁྱིམ་ཐབས་སྐྱིད་པའི་གོ་སྐབས་མེད། །འཁོར་བའི་ཞེན་པ་སྤོང་དང་༴ དིང་སང་མི་རྣམས་རི་མགོའི་ཉི་མ་འདྲ། །སུ་ལའང་བློ་གཏད་མི་ཐུབ༴ །རང་གི་འདུན་མ་རང་གིས་མ་སྒྲུབ་ན། །གཞན་གྱིས་ཕན་པར་དཀའོ༴ །ཕར་ལ་བློ་གཏད་ཆོས་ན་ཚུར་ལ་བསླུ། །གཞན་ཟེར་ཁ་ལ་མ་ཉན༴ །ཆོས་ཕྱོགས་མི་འབུངས་ཅི་བྱས་དོན་མེད་ཡིན། །དལ་འབྱོར་སྟོང་ཟད་མ་བྱེད༴ །སང་བྱ་སྣང་བྱའི་མི་ཚེ་ཟད་འགྱུར་བས། །

[Full Size]

ད་ལྟ་བརྩོན་འགྲུས་གྱིས་དང་༴ །ཤི་དུས་དགོས་པ་ཆོས་ལས་གཞན་མེད་པས། །གྲབས་བཤོམ་ཐོགས་མེད་གྱིས་དང་༴ །དགྲ་འདུལ་གཉེན་སྐྱོང་ཚེ་འདིའི་བྱ་བྱེད་ཀུན། །བྱས་ཀྱང་ཟིན་པ་མེད་དོ༴ །རང་གིས་བྱས་པའི་ལས་འབྲས་རང་ལ་སྨིན། །སྡིག་སྤོང་དགེ་བ་བསྒྲུབ་ཅིག༴ །སེར་གཟུགས་བྱས་ཀྱང་རྒྱུ་འབྲས་མི་འཛེམ་རྣམས། །བསྟན་པའི་ཞབས་འདྲེན་ཡིན་ནོ༴ །ཁ་ཆོས་མཁས་ཀྱང་རང་རྒྱུད་མ་འཐུལ་ན། །ཆོས་པའི་ཕུང་འདྲེ་ཡིན་ནོ༴ །རྒྱུ་འབྲས་ཤེས་རུང་ཁྱད་དུ་གསོད་བྱེད་ན། །དེ་ལས་ལྷོད་པ་མེད་དོ༴ །དིང་སང་སྐྱ་སེར་ཐམས་ཅད་ཆགས་སྡང་ཆེ། །སྐྱོ་ཤས་གཏིང་ནས་སྐྱེའོ༴ །ཕན་པར་སྨྲས་པའི་ཚིག་ལ་ཉན་མཁན་དཀོན། །དེ་བས་ཡིག་དྲུག་བགྲོང་དང་༴ །བླ་མ་མ་གཏོགས་རེ་ས་གང་ཡང་མེད། །གསོལ་བ་སྙིང་ནས་ཐོབ་དང་༴ །དམ་ཆོས་མ་གཏོགས་གང་ལའང་སྙིང་པོ་མེད། །བློ་སྣ་ཆོས་ལ་དྲིལ་དང་༴ །བློ་ཐག་རང་གིས་མ་བཅད་འགྲུབ་

[Full Size]

དུས་མེད། ཐེ་ཚོམ་རྦད་ཀྱི་ཆོད་དང་༴ །ངན་སོང་སྡུག་བསྔལ་བཟོད་པའི་གོ་སྐབས་མེད། །ལམ་སྣ་ད་ལྟ་འཚོལ་གཅིག༴ །བླ་གཟུགས་མང་ཡང་མཚན་ལྡན་ཤིན་ཏུ་དཀོན། །སྐྱབས་གནས་ལེགས་པར་འཚོལ་གཅིག༴ །སྐྱེས་བུ་དམ་པ་སུ་ཡིན་མི་ཤེས་པས། །གཞན་ལ་སྐུར་པ་མ་འདེབས༴ །འགྲོ་ཀུན་ཕ་མར་མ་གྱུར་གཅིག་ཀྱང་མེད། །ངན་ལོང་སྙིང་རྗེས་སྐྱོངས་ཤིག༴ །ཕྱི་མའི་ལམ་རྒྱགས་ད་ལྟ་བསྒྲུབ་དགོས་པས། །ནོར་རྫས་མཆོད་སྦྱིན་གྱིས་དང་༴ །ལབ་ལབ་མང་པོ་ངག་སྒྲིབ་བསོགས་པའི་རྒྱུ། །གསོལ་འདེབས་ཡིག་དྲུག་ཐོན་གཅིག༴ །གཞན་སྐྱོན་མཐོང་ཡང་རང་སྐྱོན་མི་ཚོར་བས། །ང་རྒྱལ་རང་མཐོང་སྤོངས་ཤིག༴ རང་སྣང་དག་ན་སངས་རྒྱས་ཐམས་ཅད་དངོས། །དག་སྣང་ཕྱོགས་མེད་གྱིས་ཤིག༴ །ཆོས་མཐུན་སླབ་བྱ་ཟབ་མོའི་གདམ་ངག་ཡིན། །མ་རྗེད་ཡིད་ལ་ཞོག་ཅིག་ཤེས་ལྡན་རྣམས། །ཨེ་མ་མདངས་གསུམ་རྨི་ལམ་

[Full Size]

དང་། །དེ་རིང་ཉིན་གང་སྣང་བ་ལ། ཁྱད་པར་རྡུལ་ཙམ་མ་མཆིས་ཏེ། །ཐམས་ཅད་འགྱུར་བའི་རང་བཞིན་ཉིད། །འཇིག་རྟེན་སྒྱུ་མའི་བསླུ་བྲིད་ལ། །ཨ་ཐས་ཞེན་ཆགས་བྱེད་པ་ཀུན། །བྱིས་པ་ནམ་མཁའི་འཇའ་ཚོན་ལ། །ཞན་དང་ཁྱད་པར་མ་མཆིས་སོ། །ད་ལྟར་མི་རྣམས་ཕལ་ཆེར་ཀུན། །དོ་ནུབ་འཆིའམ་ཆ་མེད་ཀྱང་། །ལོ་བརྒྱའི་བར་དུ་བསྡོད་རྩིས་ཀྱིས། །འཁོར་བའི་བཤོམ་ར་མང་པོ་བྱེད། །དགོས་ངོ་ཤེས་པའི་ལྷ་ཆོས་དེ། ཁོམ་ན་བྱེད་ཅིང་མི་ཁོམ་འཇོག །དགོས་མེད་འཇིག་རྟེན་བྱ་བྱེད་རྣམས། །རྟག་ཏུ་ཁོམ་རུང་མ་ཁོམ་རུང་། །སྙིང་རུས་བྱས་ནས་འབད་པ་འདི། །འཁྲུལ་ཚབས་དེ་ལས་ཆེ་བ་མེད། །ནམ་ཞིག་འཆི་བའི་དུས་ཀྱི་ཚེ། །ལུས་ནི་མེ་ཏོག་སད་ཁྱེར་འདྲ། །སེམས་ནི་བྱ་སྒྲོ་རླུང་ཁྱེར་འདྲ། །འཇིག་རྟེན་བར་དོའི་འཕྲང་རིང་ལ། །རང་དབང་མེད་པར་འཁྱམས་དུས་སུ། །སྡིག་ཅན་འགྱོད་པའི་དུས་གཅིག་འོང་། །དེ་ཚེ་འགྱོད་

[Full Size]

ཀྱང་བྱ་ཐབས་མེད། །ལས་ཀྱི་རླུང་གིས་དེད་བྱས་ཤིང་། །རྔམ་ཞིང་འཇིགས་པའི་ལས་མཁན་གྱིས། དམྱལ་བའི་གནས་སུ་འཁྲིད་པའི་ཚེ། །བུ་དང་ནོར་གྱིས་ཅི་ལ་ཕན། །གཤིན་རྗེའི་ཚོགས་པའི་ཁྲིམ་ར་ན། །ལས་ཀྱི་མེ་ལོང་སྟོན་པའི་ཚེ། །དགེ་སྡིག་སལ་ལེར་མཐོང་ཙ་ན། །ཟོལ་ལོ་ཟོག་བརྫུན་གྱིས་ག་ལ་ཐུབ། །རང་བྱས་ལས་ཀྱི་རྣམ་སྨིན་གྱིས། །དམྱལ་བའི་སྡུག་བསྔལ་མྱོང་དུས་སུ། །ཡུལ་དང་འཁོར་འབངས་ལོངས་སྤྱོད་ཀྱིས། །དེ་ཚེ་ཕན་པ་ག་ལ་ཡོད། །ད་ལྟ་རང་དབང་ཡོད་དུས་འདིར། །དགེ་བའི་ལས་ལ་མི་འབད་པར། ཤུལ་དུ་ཁ་ཆེམ་འཇོག་པ་ཀུན། །རང་གིས་རང་བསླུས་མ་ཡིན་ནམ། །མི་ཚེ་སྐད་ཅིག་ཡུད་ཙམ་ལ། །གཏན་གྱི་འདུན་མ་མི་བསྒྲུབ་པར། །འཇིག་རྟེན་བྱ་བས་གཡེང་བྱེད་པ། །ཕུང་ལ་དེ་བས་ཆེ་བ་མེད། །བླ་མ་སངས་རྒྱས་མཇལ་དུས་འདིར། །དད་པ་བརྩེ་གཅིག་མི་བྱེད་

[Full Size]

པར། །སྐུར་འདེབས་ལོག་བལྟ་བྱེད་པ་རྣམས། །སྡིག་ལ་དེ་བས་ཆེ་བ་མེད། །དལ་འབྱོར་ལན་ཅིག་ཐོབ་དུས་འདིར། །དཀར་པོ་དགེ་བ་མི་བསྒྲུབ་པར། །སྡིག་ལ་མེལ་ཚེ་སྐྱེལ་བ་ཀུན། །གྲོས་ལ་དེ་ལས་ཉེས་པ་མེད། །ཚེ་ལ་ལོང་མེད་དུས་འདི་ལ། །ཉིན་མོ་ཁ་ཡེངས་མིག་ཡེངས་དང་། །མཚན་མོ་གཉིད་ལ་བསྐྱལ་བྱེད་པ། །ནོར་ཚབས་དེ་ལས་ཆེ་བ་མེད། །རང་མགོ་རང་གི་འདོན་དུས་འདིར། །འགྱོད་མེད་གྲབས་སུ་མི་བྱེད་པར། །མི་ཚེ་སྟོང་ཟད་བྱེད་པ་ཀུན། །གྱོང་ལ་དེ་བས་ཆེ་བ་མེད། །ཁམས་གསུམ་འཁོར་བའི་སེམས་ཅན་རྣམས། །ལན་ཅིག་སྐྱེས་པའི་མཐའ་མ་དེ། །འཆི་བ་མ་གཏོགས་འགྲོ་ས་མེད། །དེ་ཚེ་ཕན་པ་ཆོས་ལས་མེད། །འདུས་བྱས་ཆོས་ལ་སྙིང་པོ་མེད། །འཁོར་བའི་ལས་ལ་ཟིན་པ་མེད། །ཇི་ཙམ་ཡོད་ཀྱང་ཆོག་ཤེས་མེད། །འདོད་པའི་བློ་ལ་གང་དུས་མེད། །བསགས་ཀྱང་ཤི་དུས་ཁྱེར་ཐབས་

[Full Size]

མེད། །ངན་སོང་སྡུག་བསྔལ་བཟོད་གླག་མེད། །བླ་མ་མ་གཏོགས་རེ་ས་མེད། །སྙིགས་དུས་ཚེ་ལ་ལོང་གླག་མེད། །དེ་རིང་འཆིའམ་ངེས་པ་མེད། །ཤི་ཁར་འགྱོད་ཀྱང་ཕན་པ་མེད། །ལམ་མཆོག་ཆོས་ལས་ལྷག་པ་མེད། །ལམ་སྣ་ད་ལྟ་ཟིན་པར་མཛོད། །རྙེད་པར་དཀའ་ཞིང་འཇིགས་པར་སླ་བའི་ལུས། །ཆུ་བུར་འདྲ་བ་འདི་ཉིད་འཚོ་བའི་ཕྱིར། །ཟས་སྐོམ་གོས་ཀྱིས་རྒྱུན་དུ་བསྐྱངས་བྱས་ནའང་། །ཤི་ཚེ་རོ་ཞེས་དུར་ཁྲོད་འདོར་བར་བྱེད། །དཀའ་བ་དུ་མས་རབ་ཏུ་འབད་བྱས་ཤིང་། །ལུས་སྲོག་བློ་ཡིས་བཏང་ནས་བཙལ་བའི་ནོར། །འཆི་དུས་ཤུལ་དུ་ལུས་ལུགས་འདི་མཐོང་ཚེ། །སྙིང་པོ་སྤུ་ཙམ་གང་ལའང་མི་འདུག་གོ། ཤ་ཁྲག་འབྲེལ་བའི་གཉེན་དང་བུ་སྲིང་སོགས། །ཤ་ཚ་སྙིང་ནས་བྱས་ཏེ་བསྐྱངས་ན་ཡང་། །མགུ་བའི་དུས་མེད་མཐའ་མ་དགྲ་རུ་ལྡང་། །བློ་གཏད་ཐུབ་པ་གང་ལའང་མི་སྣང་ངོ་། །ཚེ་འདིའི་

[Full Size]

བྱ་བ་བློ་ཡིས་བཏང་བྱས་ནས། །མི་མེད་རི་ཁྲོད་འགྲིམ་གཅིག་མ་ནུས་ན། །གང་ལ་བལྟས་ཀྱང་སྙིང་པོ་ཅི་ཡང་མེད། །བློ་སྣ་གཅིག་ཐོག་དྲིལ་བ་མི་འཐད་དམ། །ཤ་ཚ་སྙིང་གཏམ་བསླབ་བྱ་འདི་རྣམས་ཀྱི། །ཚིག་དོན་ཡིད་ལ་བསོམ་དང་དད་ལྡན་རྣམས། །ཕན་པའི་གདམ་ངག་ཡིན་ནོ་སེམས་ལ་འཆོང་། །དགེ་བས་འགྲོ་ཀུན་ཐར་ལམ་འདྲེན་པར་ཤོག །ཅེས་རང་གཞན་གྱི་བློ་སྣ་ཆོས་ལ་བསྒྱུར་ཕྱིར་སྨིན་གྲོལ་སྐྱེད་རྫོགས་གླིང་དུ་སྨྲས་པའོ།། ༈ །།ཀོང་རོང་ཤིང་ལོའི་ཚལ་གྱི་ཆར་གནས་པའི། །ཁོ་བོ་སྒྱུ་མའི་སྐྱེས་བུའི་བསམ་ཡུལ་དུ། །གོ་དོན་འདི་ལྟ་བུ་ཞིག་བྱུང་བའི་ཚུལ། །ངོ་མཚར་ཡ་མཚན་མེད་ཀྱང་ཅུང་ཟད་ཞུ། །ཅ་ཅོ་བྲག་ཆ་ལྟ་བུའི་ངག་འདི་ཡི། །ཆ་མེད་བརྫུན་གྱི་གཏམ་གྱི་མི་མགོ་བསྐོར། །ཇ་ཆང་ལོངས་སྤྱོད་འདུ་ལོང་གཙོ་བོར་སྟོན། །ཉ་མ་མགོ་སྐོར་ཙམ་ཞིག་ཡིན་པར་གོ། །ཏ་ཐཱ་ག་ཏའི་བསྟན་ལ་རབ་བྱུང་ཞིང་། །ཐ་དད་

[Full Size]

གྲུབ་མཐའི་ཚིག་ལ་སྦྱངས་བྱས་ཀྱང་། །ད་དུང་ཆོས་དང་རང་རྒྱུད་མ་འདྲེས་རྣམས། །ན་ཚོད་རྒས་ཀྱང་བསམ་མེད་ཡིན་པར་གོ། །པུ་ཏི་མང་པོའི་སློབ་གཉེར་བྱས་བྱས་ཀྱང་། །ཕུ་ཐག་སྒྲོ་འདོགས་སེམས་ལ་མ་ཆོད་ན། །ཐ་ཚ་སྨིག་རྒྱུའི་ཆུ་ལ་ཞེན་པ་ལྟར། །མུ་མེད་ཚིག་ལ་འབྱམས་ན་ཕུང་བར་གོ། །ཙ་ཐིག་རླུང་སེམས་གནད་རྣམས་མ་ཤེས་ཤིང་། །ཚ་གྲང་བཀྲེས་སྐོམ་ལམ་ཁྱེར་མི་ནུས་པར། །ཇ་ལང་ཐོ་ཅོ་བྱེད་པའི་རྟོགས་ལྡན་རྣམས། །ཝ་སོགས་དུད་འགྲོ་ལས་ཀྱང་ལོད་པར་གོ། །ཞ་ལར་སྲན་མ་ཆགས་འདྲའི་མི་ལུས་འདི། །ཟག་མེད་འོད་ཕུང་བསྒྲུབ་ལ་མི་བརྩོན་ན། །འར་རེ་འུར་རེའི་ངང་དུ་མི་ཚེ་ཟད། །ཡང་ཡང་དལ་འབྱོར་ཐོབ་པ་དཀའ་བར་གོ། །རང་རིག་གསལ་སྟོང་རང་ངོ་མ་ཤེས་ན། །ལང་ཚོ་རྒྱས་ཀྱང་ནམ་འཆིའི་ངེས་པ་མེད། །ཤངས་ཀྱི་ཟབ་བུ་ལུང་སོགས་གནས་ཆེན་དུ། །སངས་རྒྱས་

[Full Size]

བསྒྲུབ་ལ་བརྩོན་པ་དགོས་པར་གོ། །ཧ་ལའི་དུག་འདྲའི་འཁོར་བ་སྤངས་བྱས་ནས། །ཨ་ཏི་རྫོགས་ཆེན་བསྒོམ་ལ་བརྩོན་པ་ན། །འདི་ཕྱིར་སྐྱིད་པའི་འདུན་མ་དམ་པ་དང་། །རང་གཞན་དོན་གྱི་མཐར་ཐུག་ཡིན་པར་གོ། །ཡི་གེ་སུམ་ཅུའི་ཚིགས་སུ་བཅད་པ་འདི། །ཆོས་མེད་སྙོམ་ལས་ལེགས་གྲུབ་མིང་ཅན་གྱིས། །སྨིན་གྲོལ་སྐྱེད་རྫོགས་གླིང་དུ་བྲིས་པ་འདིའི། །དགེ་བས་འགྲོ་ཀུན་ཡིད་ཀྱི་མུན་སེལ་ཤོག །ཕྱོགས་དུས་ཀྱི་རྒྱལ་བ་གཅིག་བསྡུས་པའི། ཁམས་གསུམ་གྱི་སྐྱབས་མཆོག་པདྨ་འབྱུང་། །མོས་གུས་དང་ལྡན་པས་གསོལ་འདེབས་ན། །རྒྱུན་ལྡན་དུ་ཐུགས་རྗེས་བཟུང་དུ་གསོལ། །དལ་འབྱོར་གྱི་མི་ལུས་ཐོབ་དུས་འདིར། །དོན་མེད་དུ་སྟོང་ཟད་མ་གཏང་བར། །རང་དབང་ཉིད་རང་གི་ཐོབ་དུས་འདིར། །སངས་རྒྱས་ཞིག་བསྒྲུབ་པ་མི་འཐད་དམ། །ན་གཞོན་གྱི་དུས་སུ་གཡེང་བས་འཁྱེར། །རྒན་ཁོག་གི་དབང་པོ་འགྲིབ་

[Full Size]

ཅིང་གུད། །བྱེད་འདོད་ཀྱི་ངང་ལ་མི་ཚེ་འདས། །དམ་ཆོས་ལ་ཆིག་དྲིལ་མི་འཐད་དམ། །མདོ་རྒྱུད་དང་མན་ངག་བསྟན་བཅོས་སོགས། །ཆོས་སྒོ་ལ་གྲངས་ལས་འདས་མོད་ཀྱང་། །དགོས་དུས་སུ་ཕན་པར་དཀའ་བས་ན། །གདམ་ངག་གི་སྙིང་པོ་མི་འཚོལ་ལམ། །ཤེས་ཤེས་ཀྱི་རྣམ་གྲངས་མང་པོ་དང་། །གཞུང་ལུགས་ཀྱི་བཤད་པ་མཁས་གྱུར་ཀྱང་། །འཆི་དུས་སུ་བཤད་པས་མི་འཁོ་བས། །ཉམས་ལེན་ལ་བརྩོན་པས་འབད་པ་འཐད། །སྙིང་གཏམ་གྱི་བསླབ་བྱ་ཚིག་གསུམ་འདི། །ཤེས་འདོད་དང་གྲགས་འདོད་མ་ཡིན་ཏེ། །གཞན་རྒྱུད་ལ་ཕན་དང་རང་ཉིད་ལ། །གསལ་འདེབས་སུ་སྨྲས་པའི་དགེ་བ་དེས། །འགྲོ་ཀུན་ཀྱང་འདི་བཞིན་སྤྱོད་པར་ཤོག །དཔལ་ཐོད་འཕྲེང་སྩལ་དང་དབྱེར་མེད་པའི། །སྐྱབས་མཆོག་ཏུ་གྱུར་པ་བླ་མར་འདུད། །བདག་ཐོས་བསམ་སྦྱངས་པ་དམན་གྱུར་ཀྱང་། །རྗེ་མཚན་ལྡན་བླ་མའི་བཀའ་དྲིན་

[Full Size]

གྱིས། །ཆོས་ཐེག་པའི་ཡང་རྩེ་རྫོགས་ཆེན་དོན། །འདི་རྟོགས་པས་གུ་ཡང་བློ་སེམས་བདེ། །ཁོང་སྒོམ་ལ་ཉམས་ལེན་བྱེད་མཁན་འགའ། །དོན་ཀ་དག་བློ་འདས་ཆོས་སྐུ་ལ། །སླར་ཡིད་དཔྱོད་འཛིན་པས་བཅིང་བ་ཡི། །སེམས་བཅོས་མ་ཞིག་ལ་སྒོ་དུ་རེ། །དེ་ཡང་དག་སྒོམ་དུ་ངས་མ་མཐོང་། །གཞི་བདེ་གཤེགས་སྙིང་པོ་ཀ་དག་དེ། །སེམས་བློ་བུར་དྲི་མས་སྒྲིབ་པ་ལས། །རྗེ་བླ་མས་རང་རིག་རང་ངོ་སྤྲོད། །དོན་ཀ་དག་ཆོས་སྐུ་ཅེར་གྱི་མཐོང་། །དེ་མ་ཡེངས་ཙམ་དུ་སྐྱོང་བ་ལས། །སྒོམ་དམིགས་གཏད་བྱེད་རྒྱུ་ཅི་ཞིག་ཡོད། །སྒོམ་མེད་ལ་ཡེངས་མེད་རོལ་པ་འདི། །རྫོགས་ཆེན་གྱི་ཉམས་ལེན་མ་ཡིན་ནམ། །ཡིད་དཔྱོད་དང་བྲལ་བའི་ལྟ་བ་ལ། །ཡོངས་འཛིན་དང་བྲལ་བའི་སྒོམ་པས་བརྒྱན། །དགག་སྒྲུབ་བྲལ་བར་སྤྱོད་པ་ཡི། །རེ་དོགས་དང་བྲལ་བའི་འབྲས་བུ་ཐོབ། །ཐོབ་ཤར་དུ་བཏགས་པ་མིང་དང་ཚིག །མིང་ཚིག་ཀྱང་བློ་ཡིས་

[Full Size]

བཅོས་མ་སྟེ། །མ་བཅོས་པའི་རང་སེམས་རིག་སྟོང་འདི། །རང་བབས་སུ་ཞོག་ཅིག་རྣལ་འབྱོར་པ། ཨ་ལ་ལ་མཚན་ལྡན་བླ་མའི་དྲིན། །ད་དུང་ཐུགས་རྗེས་གཟུང་དུ་གསོལ། །རྗེ་བླ་མ་སངས་རྒྱས་ཀུན་ལས་ལྷག །ཡིད་བརྩེ་གཅིག་གུས་པས་གསོལ་བ་ཐོབ། །ལས་རྒྱུ་འབྲས་བསླུ་མེད་ཡིད་ལ་བསོམ། །དོན་བླང་དོར་གྱིས་ཤིག་རིགས་ཀྱི་བུ། །ཆོས་གསང་སྔགས་ཟབ་དོན་སྐྱེད་རྫོགས་གཉིས། །ཚུལ་བཞིན་དུ་སྤྱོད་གཅིག་སྐལ་ལྡན་པ། །ཚེ་མི་རྟག་ནམ་འཆིའི་ངེས་པ་མེད། །ཆོས་ལོང་མེད་སྒྲུབ་ཤིག་བྱ་བྲལ་བ། །དུས་ད་ལྟ་རང་དབང་ཡོད་དུས་འདིར། །ལམ་བྱང་ཆུབ་སྒྲུབ་ཤིག་རྣལ་འབྱོར་པ། །ཆོས་ཐེག་པའི་ཡང་རྩེ་རྫོགས་པ་ཆེ། །དོན་བློ་འདས་སྐྱོང་ཤིག་རྣལ་འབྱོར་པ། །ཚེ་འདིར་སྣང་འདུན་མ་ཡད་ཡུད་འདི། །ཕུགས་སྙིང་པོས་དབེན་པའི་གྲོགས་པོ་དག །དུས་དིང་སང་རང་མགོ་མ་སྒྲིམ་ན། །བདུད་བསླུ་བྲེད་མང་ངོ་ཤེས་ལྡན་རྣམས། །བློ་བརྩེ་གཅིག་

[Full Size]

བླ་མར་མ་གཏད་ན། །གཞན་ཕན་པར་དཀའོ་སྐྱེས་བུ་ཀུན། ཚིག་འདི་དག་ཡིད་ལ་འཆང་བ་ན། །དོན་ཟབ་ཆོས་ཡིན་ནོ་དད་ལྡན་རྣམས། །དགེ་འདི་དང་དུས་གསུམ་བསགས་པའི་མཐུས། །མ་ཁམས་སུམ་འགྲོ་ཀུན་སངས་རྒྱས་ཤོག །ཅེས་པའི་ལེ་མཚན་གོང་འོག་གསུམ་པོ་འདི་རྣམས་ནི། །ལྷོ་ཕྱོགས་མོན་གྱི་ཡུལ་ཕྱོགས་སུ་སྔ་འགྱུར་འོད་གསལ་སྙིང་པོའི་བསྟན་པ་གསལ་བར་མཛད་པའི་ཆོས་ཀྱི་རྗེ་རིན་པོ་ཆེ་པདྨ་དཀོན་མཆོག་གི་ཞལ་སྔ་ནས་ཀྱི་བཞེད་པ་ལྟར་བཀོད་པའོ། གྲོས་འདེབས་སྙན་པའི་རོལ་དབྱངས་བདུད་རྩིའི་ཆར་ཟིམ་ཞེས་བྱ་བ། སྲིད་ཞི་མ་ལུས་པའི་འདྲེན་པ་གཅིག་པུ་པར་གྱུར་པ་དཔལ་ལྡན་བླ་མ་དམ་པའི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། ཀྱེ་མ། དལ་འབྱོར་མི་ལུས་ནི་ཕུན་སུམ་ཚོགས་པ་ཐོབ། །རྣམ་རིག་བློ་གྲོས་ནི་གཟའ་སྐར་ལས་ཀྱང་བཀྲ། །དབང་པོ་སྒོ་ལྔ་ནི་ཤེལ་སྒོང་ལས་ཀྱང་དྭངས། །དཔལ་འབྱོར་བསོད་ནམས་ཀྱི་དཔག་བསམ་ལོ་འདབ་རྒྱས། །མངའ་ཐང་ལོངས་སྤྱོད་ཀྱི་འབྲས་བུ་ཡོངས་སུ་སྨིན། །འདི་

[Full Size]

འདྲའི་གནས་སྐབས་ནི་ཡང་ཡང་འཛོམ་པར་དཀའ། །ལེགས་ཉེས་སྤང་བླངས་ཤིག་ད་ལྟ་བསམ་དགོས་པས། །ལེགས་པར་བསོམ་མཛོད་དང་མི་དབང་རྣམ་པར་རྒྱལ། ཀྱེ་མ། སངས་རྒྱས་བསྟན་པ་ནི་མཁའ་ལྟར་རྒྱ་རེ་ཆེ། །བསྟན་འཛིན་སྐྱེས་བུས་ནི་ཉི་བཞིན་ཀུན་ལ་ཁྱབ། །ཐེག་པའི་འཇུག་སྒོ་ནི་སྐར་ཚོགས་ལས་ཀྱང་མང་། །ཟབ་མོའི་དམ་ཆོས་ནི་རྙིང་མའི་བཀའ་གཏེར་ཕྱུག །སྤྲོས་བྲལ་ཕྱག་ཆེན་ནི་དག་པོ་བཀའ་བརྒྱུད་མཁས། །དཀའ་སྤྱད་སྙིང་རུས་ནི་དཔལ་ལྡན་འབྲུག་པ་ཆེ། །སྙིང་རྗེ་བྱང་སེམས་ནི་བཀའ་གདམས་སློབ་རྒྱུད་བཟང་། །གཞུང་ལུགས་བཤད་བསྲོལ་ནི་ས་སྐྱ་འགྲན་ཟླ་བྲལ། །ཉན་ཐོས་འདུལ་ཁྲིམས་ནི་དགེ་ལྡན་སློབ་རྒྱུད་བརྩོན། །རྐྱེན་ངན་ལམ་ཁྱེར་ནི་ཞི་བྱེད་ཆོས་ཀྱིས་བྱེད། །རྣམ་རྟོག་དངོས་འཛིན་ནི་གཅོད་ཡུལ་ཟབ་མོས་འཇོམས། །དུས་འཁོར་སྦྱོར་དྲུག་ནི་ཇོ་ནང་ཆོས་ལུགས་མཁས། །

[Full Size]

ཨེ་མ་དེ་སོགས་ཀྱི་ཆོས་ལུགས་མཐའ་ཡས་ཀུན། །རྒྱལ་བ་ཐབས་མཁས་ཀྱིས་གང་འདུལ་གསུངས་པའི་ཕྱིར། །མཐར་ཐུག་འབྲས་བུ་ནི་སངས་རྒྱས་ཐོབ་པར་གཅིག །དག་སྣང་ཕྱོགས་མེད་གཅིག་ཀུན་ལ་མ་འབྱོང་ན། །གྲུབ་མཐའི་ཁ་འཛིན་གྱིས་སྡིག་ཆེན་བསོགས་པའི་རྒྱུ། །དེ་ལྟར་བསོམ་མཛོད་དང་མི་དབང་རྣམ་པར་རྒྱལ། ཀྱེ་མ། ལྷ་ཆོས་ཤ་སྟག་ཅིག་བྱེད་པ་མ་བྱུང་ཀྱང་། །འཇིག་རྟེན་ཆོས་ལུགས་དང་མཐུན་པའི་ངང་ཉིད་ནས། །དགེ་སྡིག་བླང་དོར་གྱི་གནས་ལ་བརྩོན་བྱས་པས། །ཐར་ལམ་ཟིན་པ་ཞིག་ད་རེས་མ་འབད་ན། །ལུས་འདི་མི་རྟག་པ་མེ་ཏོག་སད་ཁྱེར་འདྲ། །ནོར་རྫས་མི་རྟག་པ་སྦྲང་མའི་སྦྲང་རྩི་འདྲ། །གྲོགས་འཁོར་མི་རྟག་པ་ཚོང་འདུས་མགྲོན་པོ་འདྲ། །ཀུན་ཀྱང་མི་རྟག་སྟེ་མདངས་ཀྱི་རྨི་ལམ་འདྲ། །སང་འཆི་སྣང་འཆི་ཡང་ངེས་པ་མེད་པས་ན། །དམ་ཆོས་མ་གཏོགས་པ་ཅིས་ཀྱང་ཕན་པར་དཀའ། །གྲབ་བཤོམ་

[Full Size]

ཐོགས་མེད་གཅིག་ད་ལྟ་མ་བྱས་ན། །ཤི་ཁར་འགྱོད་པས་ནི་ཕན་པ་སྤྱི་ཡང་མེད། །ཐུགས་ལ་ཞོག་མཛོད་དང་མི་དབང་རྣམ་པར་རྒྱལ། ཀྱེ་མ། །ད་ལྟ་དལ་འབྱོར་དང་རང་དབང་ཐོབ་དུས་འདིར། །གཏན་གྱི་མདུན་མ་ཅིག་འགྲུབ་པར་མ་བྱས་ཚེ། །འཁོར་བ་གར་སྐྱེས་ཀུན་སྡུག་བསྔལ་གྱི་རང་བཞིན་ཡིན། །མེ་སྟག་ཙམ་ལ་ཡང་བག་ཟོན་བྱེད་ལུགས་ལ། །དམྱལ་བ་ཚ་གྲང་གི་སྡུག་བསྔལ་ག་ལ་བཟོད། །ཉིན་གཅིག་བཀྲེས་སྐོམ་ཀྱང་བཟོད་པར་མི་ནུས་ན། །ཡི་དྭགས་བཀྲེས་སྐོམ་རྣམས་སེམས་ཀྱིས་བཟོད་དམ་ཅི། །འཁུར་པོ་ལྗི་བ་གཅིག་འཁུར་བའི་སྡུག་བསྔལ་ལ། །དུད་འགྲོ་བཀོལ་སྤྱོད་སྡུག་བསྔལ་ཨེ་བཟོད་བསོམ། །ད་ལྟ་ཚེར་མ་ཞིག་ཟུག་པའི་ཟུག་རྔུ་ལ། །ལྷ་མིན་ཐབ་རྩོད་ཀྱི་མཚོན་ཆར་ཅི་ཕྱིར་བཟོད། །ཐག་རིང་ཞག་འགའ་ཞིག་འགྲོ་བའི་སེམས་ཁྲལ་ལ། །འཆི་འཕོ་ལྟུང་བྱེད་ཀྱི་སྡུག་བསྔལ་ག་ལ་བཟོད། །ཨེ་

[Full Size]

མ་འཁོར་བ་འདི་དེ་འདྲའི་རང་བཞིན་ལ། །ཅེས་ཀྱང་ད་ལེན་ནས་ལམ་སྣ་མ་ཟིན་ན། །ཟོ་ཆུའི་འཁྱུད་མོ་ལྟར་མཐའ་མེད་འཁོར་འགྱུར་བས། །དེ་ལྟར་མཁྱེན་མཛོད་དང་མི་དབང་རྣམ་པར་རྒྱལ། ཀྱེ་མ། འཁོར་བའི་སྡུག་བསྔལ་ལས་ཐར་བྱེད་ཕ་རོལ་ཕྱིན། །དགེ་བ་བཅུ་སོགས་དང་ཆོས་སྤྱོད་རྣམ་པ་བཅུ། །འདི་དག་ཐར་ལམ་གྱི་ཤིང་རྟ་ཆེན་པོ་སྟེ། །འབད་པས་བསྒྲུབ་པ་ན་མངོན་ཐོའི་དམ་པ་འགྲུབ། །སྦྱིན་པ་འདོད་འབྱུང་གི་བང་མཛོད་བཟང་པོ་འདྲ། །ཚེ་རབ་ཐམས་ཅད་དུ་མི་ཟད་གཏེར་ལ་སྤྱོད། །ཚུལ་ཁྲིམས་ཅང་ཤེས་ཀྱི་རྟ་མཆོག་རིན་ཆེན་འདྲ། །མཐོ་རིས་ཐར་ལམ་གྱི་ཞིང་དུ་བསྒྲོད་པར་བྱེད། །བཟོད་པ་འཇིགས་མེད་ཀྱི་གོ་ཆ་བཟང་པོ་འདྲ། །གཞན་རྐྱེན་གནོད་པ་ལས་སྐྱོབ་པའི་དམ་པའོ། །བརྩོན་འགྲུས་གཡུལ་བཟློག་གི་དཔའ་བོ་མཐུ་ལྡན་འདྲ། །ལེ་ལོ་རྣམ་གཡེང་གི་དམག་དཔུང་བཟློག་པར་བྱེད། །བསམ་གཏན་ཡུལ་མཁར་གྱི་བཙན་རྫོང་བཟང་པོ་འདྲ། །

[Full Size]

ཉོན་མོངས་དགྲ་ཀུན་གྱི་འཚེ་བ་བྲལ་བར་བྱེད། །ཤེས་རབ་རྣོ་དབལ་གྱི་རལ་གྲི་ངར་ལྡན་འདྲ། །ཐེ་ཚོམས་ལོག་རྟོག་གི་དྲ་བ་གཅོད་པར་བྱེད། །ཕ་རོལ་ཕྱིན་དྲུག་གི་ལམ་བཟང་དམ་པ་ལ། །རྟག་ཏུ་བརྩོན་མཛོད་མི་དབང་རྣམ་པར་རྒྱལ། །སྲོག་གཅོད་སྤོང་བ་ནི་འཆི་མེད་སྨན་མཆོག་འདྲ། །མ་སྦྱིན་ལེན་སྤོང་ནི་མ་རྨོས་ལོ་ཐོག་འདྲ། །ལོག་གཡེམ་སྤོང་བ་ནི་རྒྱལ་སྲས་མཐུ་བོ་འདྲ། འཆི་བའི་འཇིགས་ལས་སྐྱོབ། བརྫུན་ཚིག་སྤོང་བ། ལོངས་སྤྱོད་ཟད་མི་ཤེས་པ་ཐོབ་པར་འགྱུར། ས་ལེ་སྦྲམ་དང་འདྲ། །ཕྲ་མ་སྤོང་བ་ནི་འགྲོ་ཀུན་ཕ་མ་འདྲ། ཀུན་གྱི་སྤྱི་བོར་འཁུར། ཚིག་རྩུབ་སྤོང་བ་ནི་རྨ་བྱ་ འགྱུར་བ་མེད་པས་བཟང་ གཞོན་ནུ་འདྲ། ངག་ཁྱལ་སྤོང་བ་ནི་ ཐམས་ཅད་ཀྱི་བྱམས་པར་འགྱུར། འཁོར་ལོ་བསྒྱུར་རྒྱལ་འདྲ། ཀུན་གྱི་ཡིད་དུ་འོངས། རྣབ་སེམས་སྤོང་བ་ནི་རྫོགས་ལྡན་སེམས་ཅན་འདྲ། །ཡིད་ལ་གང་བསམ་འགྲུབ། གནོད་སེམས་སྤོང་བ་ལྷ་ཡི། རྟག་རུ་བདེ་སྐྱིད་དང་ལྡན་ གཞན་ལ་ཅི་སྨྲ་བསྟན།

[Full Size]

དབང་པོ་འདྲ། །ལོག་ལྟ་སྤོང་བ་ནི་རིན་ཆེན་གསེར་ཞུན་འདྲ། །དགེ་བའི་ལས་བཅུ་འདི་ཡིད་བཞིན་ནོར་བུ་འདྲ། །རྟགས་པར་འབྲལ་མེད་དུ་རྒྱུད་ལ་བསྟེན་པར་མཛོད། །ངན་པར་མི་འགྲོ་ཞིང་རྟག་ཏུ་ལེགས། །གཞན་ཡང་ཆོས་སྤྱོད་ཀྱི་རྣམ་གྲངས་བཅུ་རྣམས་ནི། །རྒྱལ་བ་སྲས་བཅས་ཀྱི་གཤེགས་ཤུལ་དམ་པ་སྟེ། །ཡི་གེ་འདྲི་བ་དང་མཆོད་དང་སྦྱིན་པ་དང་། །དམ་ཆོས་ཉན་པ་དང་ཀློག་དང་འཛིན་པ་དང་། །གཞན་ལ་འཆད་པ་དང་ཁ་ཏོན་དོན་སེམས་པ། །ཏིང་ངེ་འཛིན་བསྒོམ་པ་སྟེ་ཆོས་སྤྱོད་རྣམ་པ་བཅུ། །བློ་གྲོས་པད་ཚལ་གྱི་འདབ་སྟོང་རྒྱས་བྱེད་པའི། །མ་རིག་མུན་སེལ་གྱི་ཉི་མའི་སྙིང་པོ་འདྲ། །ལེགས་པར་རྟོགས་མཛོད་དང་མི་དབང་རྣམ་པར་རྒྱལ། །དོན་གྱི་སྙིང་པོ་རུ་ཧྲིལ་གྱི་དྲིལ་བ་ན། །ཡ་རབ་གོང་མ་བཀུར་སྟི་ཆེ་བ་དང་། །ངན་ལོངས་འབངས་འཁོར་སྐྱོང་བྲན་མཁས་པ་དང་། །རང་གཞན་ཐམས་ཅད་ཀུན་དགེ་བའི་ལམ་ལ་འགོད། །ཡ་རབ་

[Full Size]

མི་ཆེན་གྱི་སྤྱོད་པ་མཐར་ཐུག་ཡིན། །ཤེས་བྱའི་གནས་ཀུན་ལ་བློ་མིག་ཡངས་པ་དང་། །བླ་མ་དཀོན་མཆོག་ལ་དད་གུས་ཆེ་བ་དང་། །རྒྱུ་འབྲས་བླང་དོར་ལ་ཞིབ་ཏུ་འབད་པ་སྟེ། །ཤེས་རབ་བློ་ལྡན་གྱི་མཚན་ཉིད་མཐར་ཐུག་ཡིན། །ལེགས་ཉེས་བྱ་བྱེད་ཀུན་ལེགས་པར་གཞིག་པ་དང་། །མངའ་ཐང་སྟོབས་སྩལ་ལ་རང་ཚོད་ཟིན་པ་དང་། །ནོར་རྫས་ལོངས་སྤྱོད་ཀུན་དགེ་ཕྱོགས་སྤུང་བ་སྟེ། །མི་དབང་རྗེ་དཔོན་གྱི་འདུན་མའི་མཐར་ཐུག་ཡིན། །ཆོས་ཀྱི་རང་རྒྱུད་ལ་ཕན་པར་མ་ནུས་ན། །སེར་གཟུགས་བྱས་པ་ལ་དགོས་པ་ཅི་ཡང་མེད། །ཆོས་མེད་བཙུན་གཟུགས་ཀྱིས་རང་གཞན་བསླུ་བ་ལས། །ཁྱིམ་པ་བྱང་སེམས་ཉིད་མཆོག་ཏུ་ཁྱད་པར་འཕགས། །དེ་ལྟར་དགོངས་མཛོད་དང་མི་དབང་རྣམ་པར་རྒྱལ། ཀྱེ་མ། ད་ནི་ཐུབ་བསྟན་ཡང་ནུབ་རིའི་ཕྱོགས་སུ་ཉེ། །བསྟན་འཛིན་སྐྱེས་ཆེན་ཡང་ཕལ་ཆེར་ཞིང་གཞན་གཤེགས་

[Full Size]

ཆོས་པའི་གཟུགས་བརྙན་ཀུན་ཆོས་མིན་ཁོ་ན་སྤྱོད། །ཟབ་མོའི་དམ་ཆོས་ལ་ཚུལ་བཞིན་སྤྱོད་མཁན་དཀོན། །སྐྱེ་བོ་ཐམས་ཅད་ཀྱང་མི་དགེ་སྤྱོད་ལ་རེམ། །ནད་མུག་འཁྲུག་རྩོད་ཀྱིས་སེམས་ཅན་བདེ་སྐབས་མེད། །གང་ལ་བསམ་ན་ཡང་སྙིང་ནས་སྐྱོ་ཤས་འཕེལ། །ཉམ་ཆུང་བདག་འདྲས་ནི་ཇི་ལྟར་འབད་བྱས་ཀྱང་། སྲིན་བུ་མེ་ཁྱེར་གྱིས་མུན་པ་མི་བསལ་ལྟར། །ངལ་བ་དོན་མེད་ལས་འབྲས་བུ་ཅང་མ་མཆིས། །མཁས་གྲུབ་བཤེས་གཉེན་རྣམས་གྲུབ་མཐའི་ཁ་འཛིན་ཆེ། །བླ་མའི་གཟུགས་འཛིན་ཀུན་ཆོས་བརྒྱད་རྟ་བང་འགྲན། །བྱ་བཏང་སྒོམ་ཆེན་ཀུན་ཟོག་གི་མི་མགོ་བསྐོར། །ཡོན་བདག་ཕལ་ཆེར་ཀུན་མི་ཆོས་མཁན་ལ་དད། །གང་ལ་བལྟས་ན་ཡང་སྙིགས་མའི་མཐའ་ལ་ཐུག །ཅི་ལ་བསམ་ནའང་མི་མེད་ལུང་སྟོང་སུ། །ལྷ་ཆོས་ཁོ་ན་ཆིག་དྲིལ་མ་གཏོགས་པ། །ཅི་བྱས་དོན་མེད་ཀྱིས་མི་ཚེ་ཟད་པར་མཐོང་། །དེས་ན་རང་སེམས་ལ་

[Full Size]

རང་དབང་ཡོད་དུས་འདིར། །སྡིག་སྤོང་དགེ་བ་ཅི་ནུས་འབད་པར་ཞུ། །སླབ་བྱ་སྙིང་གཏམ་གྱི་གདམ་ངག་དགོས་ཞེས་པ། །བདག་ལ་ཡང་ཡང་དུ་བསྐུལ་བར་མཛད་པའི་ངོར། རང་གི་བསམ་ཡུལ་གང་དྲན་སྨྲས་པ་ལས། །སྙན་ངག་སྡེབ་སྦྱོར་སོགས་མཁས་པ་དགྱེས་པའི་ཚིག །བདག་འདྲ་བླུན་རྨོངས་གིས་ཤེས་པར་མ་གྱུར་མོད། །འོན་ཀྱང་ལྷག་བསམ་གྱི་སྤྲིན་ཕུང་འཁྲིག་ལས། །སྙིང་གཏམ་གདམ་ངག་སྦྲང་ཆར་ཕབ་པའི་མཐུས། །ཁྱོད་ཡིད་བློ་གྲོས་ཀྱི་པད་ཚལ་རྒྱས་པ་དང་། །འགྲོ་ཀུན་ཐར་ལམ་ལ་འདྲེན་བྱེད་མཆོག་ཏུ་ཤོག །ཅེས་པ་འདི། ཀོང་ཡུལ་སྣོད་མཛེས་མཁར་ནས་ས་སྐྱོང་གཞོན་ནུ་ལྷ་དབང་རྣམ་པར་རྒྱལ་བ་དེ་ཉིད་ལྷ་ཆོས་བྱ་དབང་མེད་པའི་མྱ་ངན་གྱི་མཆི་མ་གླགས་ཤིང་། བདག་ལ་སྙིང་གཏམ་གྱི་གདམ་ངག་སླབ་བྱ་ཚིག་སུ་བཅད་པ་སེམས་ལ་ཕན་པ་ཞིག་ཅིས་ཀྱང་དགོས་ཞེས་བསྐུལ་བའི་ངོར། དེ་ཉིད་ཀྱི་ཕོ་བྲང་དུ་བྲིས་པ་དགེ་ལེགས་འཕེལ།། ༈ །།དཔེ་དོན་ཟུང་

[Full Size]

དུ་འབྲེལ་བའི་གདམ་ངག་ནོར་བུའི་འཕྲེང་བ་ཞེས་བྱ་བ། །དཀོན་མཆོག་ཀུན་འདུས་རྩ་བའི་བླ་མ་དམ་པའི་ཞབས་ལ་ཕྱག་འཚལ་ཞིང་སྐྱབས་སུ་མཆི། ཀྱེ་མ། །བདག་ནི་རྣལ་འབྱོར་མི་ལུས་རིན་པོ་ཆེ། །ཡིད་བཞིན་ནོར་བུ་ལས་ལྷག་འདི་ཐོབ་ནས། །དམ་པའི་ཆོས་ལ་བརྩོན་པར་མ་བྱས་ན། །རིན་ཆེན་གླིང་ནས་སྟོང་ལོག་བྱེད་དང་འདྲ། །དེ་ཕྱིར་རང་གི་རང་ལ་ལེགས་བསམ་ནས། །འདི་ཕྱིའི་དོན་ཆེན་སྒྲུབ་ལ་འབད་པར་འཚལ། ཀྱེ་མ། །འཆི་བདག་བདུད་འདི་ནུབ་ཁའི་གྲིབ་པ་འདྲ། །བྲོས་པས་མི་ཐར་བཟློག་པའི་ཐབས་མེད་ན། །ད་དུང་ལོང་ཡོད་ངང་དུ་སྡོད་ཁོམ་མམ། །ད་ལྟ་ཉིད་ནས་བསྒྲུབ་ལ་བརྩོན་པར་འཚལ། ཀྱེ་མ། དགེ་བའི་ཤེས་གཉེན་སྨན་པའི་རྒྱལ་པོ་འདྲ། །འཁོར་བའི་གཅོང་ནད་འབྱིན་པའི་དྲིན་ཅན་ལ། །རྟག་ཏུ་བསྟེན་པས་དོན་གྱི་སྙིང་པོ་འབྱུང་། །སྐྱོ་ངན་མེད་པར་གུས་པས་བསྟེན་པར་འཚལ།

[Full Size]

ཀྱེ་མ། །ཟབ་མོའི་གདམ་ངག་ནོར་བུ་རིན་ཆེན་འདྲ། །དགོས་འདོད་འབྱུང་བ་རང་གི་རྙེད་དུས་འདིར། །དོན་མེད་འཇིག་རྟེན་བྱ་བ་ཀུན་སྤང་ནས། །མི་ཤེས་དབུལ་བ་བསེལ་ལ་འབད་པར་འཚལ། ཀྱེ་མ། སྒྱུ་མའི་ནོར་འདི་སྦྲང་མའི་སྦྲང་རྩི་འདྲ། །འདོད་པ་འཕེལ་ཞིང་སྡུག་བསྔལ་མ་ལུས་བསྐྱེད། །འཆི་ཚེ་ཐམས་ཅད་ཤུལ་དུ་ལུས་པ་ལ། །ད་ལྟ་ཉིད་ནས་ཞེན་པ་སྤོང་བར་འཚལ། ཀྱེ་མ། །གཉེན་བཤེས་གྲོགས་ཀུན་ཚོང་འདུས་མགྲོན་པོ་འདྲ། །སྐྱིད་དུས་འཛོམ་ལ་སྡུག་ན་སོ་སོར་གྱེས། འཆི་བའི་ཚེ་ནི་འབྲལ་བར་ཐག་ཆོད་ལ། །དེང་ནས་གཅིག་པུར་རི་ཁྲོད་འགྲིམ་པར་འཚལ། ཀྱེ་མ། །གཅེས་པའི་ལུས་ཀྱང་གཡར་པོའི་ནོར་དང་འདྲ། །མྱུར་དུ་དོར་ཞིང་འབྲལ་བའི་ཆོས་ཉིད་ལ། ད་ལྟ་བདག་འཛིན་ཞེན་ཆགས་བྱས་བྱས་ནས། །བསྐྱངས་ཀྱང་དོན་མེད་ཞེན་འཛིན་སྤང་བར་འཚལ། ཀྱེ་མ། འདྲ་འདྲ་མང་

[Full Size]

པོའི་འདུས་བྱས་འདུས་མ་བྱས། །སྣ་ཚོགས་ཆོས་ལ་དགག་བསྒྲུབ་བྱས་ན་ཡང་། །ངེས་པའི་དོན་གྱི་སྙིང་པོ་མ་རྟོགས་ན། །ཅི་ལྟར་བྱས་ཀྱང་ཀུན་རྫོབ་འཁྲུལ་པའི་ངང་། ཀྱེ་མ། །སེམས་ཀྱི་ངོ་བོ་སྟོང་པ་ནམ་མཁའ་འདྲ། །ནམ་མཁའ་ཉིད་ལ་དངོས་པོ་ངོས་བཟུང་མེད། །མེད་ཅེས་ཆད་ལྟ་ཅང་མེད་མ་ཡིན་པས། །རིག་སྟོང་ནམ་མཁའ་ལས་ཀྱང་ཁྱད་པར་འཕགས། ཀྱེ་མ། །སེམས་ཀྱི་གསལ་ཆ་ཉི་མའི་འོད་དང་འདྲ། །དེ་ཡང་ངོས་བཟུང་མཚན་བཅས་ཉིད་མ་ཡིན། །མཐོང་དང་རེག་དང་རེག་བྱ་ཅན་གྱི་ཉི་འོད་ལས། ཁྱད་པར་འཕགས་ཤིང་གསལ་ལ་འཛིན་མེད་ཉིད། ཀྱེ་མ། །སེམས་ཀྱི་འགྱུ་ཆ་རླུང་དང་འདྲ་བ་ཡང་། ཁང་ཁྱིམ་སོགས་ཀྱིས་སྒྲིབ་པར་ནུས་པ་ཡི། །མཚན་མའི་འགྲོ་འོང་ཅན་དེ་མ་ཡིན་པས། །དེ་ཕྱིར་འདྲ་ལ་མི་འདྲའི་ཁྱད་པར་འཕགས། ཀྱེ་མ། ཡོད་མེད་རྟག་ཆད་འགྲོ་དང་འོང་བ་སོགས། །ཀུན་བཏགས་དུ་མས་

[Full Size]

སེམས་ཀྱི་འཚང་མི་རྙེད། །ཐག་བརྒྱའི་མདུད་པ་གཅིག་གིས་འཁྲོལ་བ་ལྟར། །མ་བཅོས་ཀློང་ཡངས་རྟོགས་ན་གུ་རེ་ཡང་། ཀྱེ་མ། དིང་སང་ཆེན་པོར་གྲགས་པའི་བཤེས་གཉེན་འགའ། །ལྟ་སྒོམ་སྤྱོད་ལ་རྩོད་པའི་གཞི་བྱེད་ཀྱང་། །རང་གཞན་ཕྱོགས་ཆ་ཁས་ལེན་དགག་བསྒྲུབ་ཀྱི། །ལྟ་སྒོམ་སྤྱོད་པས་གྲོལ་བ་ཐོབ་བམ་ཅི། ཀྱེ་མ། མཐོ་དང་དམའ་བར་གླེང་བའི་ལྟ་བ་དེ། །ནམ་མཁའི་ཐོངས་ལ་སྦར་ཚོད་བྱེད་པ་འདྲ། །རིག་པ་དྲི་མེད་གཅེར་མཐོང་མ་ཤེས་ན། །ལྟ་བ་མཐོ་ཞེས་དཔག་ཚད་ཇི་ལྟར་གཞལ། ཀྱེ་མ། སྒོམ་པ་ཤེས་དང་མི་ཤེས་བརྟན་མི་བརྟན། །སྣ་ཚོགས་བརྗོད་ཀྱང་འཇའ་ཚོན་འཛིན་འདོད་འདྲ། །ཡང་དག་དོན་ལ་བསྒོམ་རྒྱུའི་དམིགས་གཏད་གང་། །རིག་པ་རང་སོ་ཟིན་ན་དེ་ཀ་རང་། ཀྱེ་མ། སྤྱོད་པའི་བྱེ་བྲག་བླང་དོར་བསམ་འདས་ཀྱང་།

[Full Size]

ཡང་དག་དོན་ཤེས་སྤྱོད་པ་རྩིས་གདབ་བྲལ། །ཉམས་རྟོགས་རང་མདངས་སྤྱོད་པར་ཤར་བ་ལ། །རུང་དང་མི་རུང་འཛིན་པའི་བརྟོད་ཕུར་བུ། ཀྱེ་མ། འབྲས་བུ་ཐོབ་ཏུ་རེ་བས་བྱས་བྱས་ཀྱང་། །བྱས་ཆོས་འདུས་བྱས་ཟད་ཅིང་འགྱུར་བའི་རྒྱུ། །འདུས་བྱས་བསྒྲུབས་པས་འདུས་མ་བྱས་ཐོབ་བམ། །དེ་ཕྱིར་རེ་དོགས་ཡོད་ན་འབྲས་བུ་མིན། ཀྱེ་མ། སྤྲོས་མེད་བློ་འདས་བྱར་མེད་ལ་སོགས་པ། །ལྟ་བའི་ཕྱོགས་སུ་སྤྱོད་པ་འབྲངས་པ་ན། །མྱོང་མེད་ཁ་ལྟས་རུ་དྲར་གོལ་བ་མང་། །བདེན་པ་གཉིས་ལྡན་དོན་ལ་སྤྱོད་པར་འཚལ། ཀྱེ་མ། དོན་གྱི་སྙིང་པོར་ཧྲིལ་གྱི་དྲིལ་བ་ནི། །ཕྱོགས་སུ་མ་ལྷུང་ལྟ་བའི་ཡང་རྩེ་ལ། །སྒོམ་མེད་ཡེངས་མེད་སྒོམ་གྱི་གནད་འགགས་ཉིད། །དུས་ཚོད་ཤེས་པ་སྤྱོད་པའི་རྒྱལ་པོ་ལགས། ཀྱེ་མ། འཁྲུལ་མེད་ལམ་འདི་རྟག་ཏུ་བསྟེན་པ་ན། །

[Full Size]

ཐོབ་ཤོར་མེད་པའི་འབྲས་བུ་མངོན་དུ་འགྱུར། །རེ་དགོས་མེད་པའི་ཆོས་ཀྱི་རྒྱལ་སྲིད་ལ། །རང་གཞན་དོན་གཉིས་འགྲུབ་པའི་དཔལ་འབྱོར་ཐོབ། ཀྱེ་མ། ད་ནི་ཐུབ་པའི་བསྟན་པའང་མཐའ་ལ་ཐུག །བཤེས་གཉེན་དམ་པ་རྣམས་ཀྱང་ཞིང་གཞན་གཤེགས། །ནགས་ཕྱོགས་བདུད་རིགས་རྣམས་ནི་མཐུ་སྩལ་རྒྱས། །གང་ལ་བསམས་ཀྱང་སྐྱོ་ཤས་འཕེལ་བའི་རྒྱུ། ཀྱེ་མ། སྙིགས་དུས་ཀྱི་མི་ཚེ་ཡུད་ཙམ་འདི་ཉིད་ལ། །ཤེས་ཤེས་ཁེ་གྲགས་བསྒྲུབ་ཏུ་མི་ཁོམ་པས། །ཉམས་ལེན་སྙིང་པོའི་དོན་ལ་དྲིལ་ནས་ཀྱང་། །གཏན་གྱི་འདུན་མ་བསྒྲུབ་ལ་ཤིན་ཏུ་རན། ཀྱེ་མ། སྦྱོར་དངོས་རྗེས་ཀྱི་དགེ་སྦྱོར་གཞུང་བསྲང་ནས། །སྙོམ་ལས་ལེ་ལོ་མེད་པར་མ་འབད་ན། །ཡིན་ཡིན་མང་ལ་བློ་གཏད་མི་ཁེལ་བའི། །ཆོས་དེས་རང་གཞན་གང་ལའང་ཕན་པར་དཀའ། ཀྱེ་མ།

[Full Size]

མི་རྟག་སྐྱོ་ཤས་ལས་འབྲས་བསམ་བྱས་ནས། །སྐྱབས་འགྲོ་སེམས་སྐྱེད་ཡིག་བརྒྱ་མཎྜལ་དང་། །བླ་མའི་རྣལ་འབྱོར་གསོལ་འདེབས་དབང་གཞི་བླངས། །ཆོས་སྤྱིའི་སྔོན་འགྲོ་ཡིན་པས་གནད་བསྣུན་གཅེས། ཀྱེ་མ། བར་དུ་ཆོས་སྤྱོད་གཏོར་མ་ཕྱི་ནང་དང་། །ཡི་དམ་བསྙེན་བསྒྲུབ་བཟླས་བརྗོད་རྫོགས་རིམ་ལ། །ཡེངས་མེད་བརྩོན་ཞིང་དེ་ཡང་ཆོས་བརྒྱད་སོགས། གནད་དུ་མི་འགྲོའི་སྐྱོན་དང་མ་འདྲེས་གཅེས། ཀྱེ་མ། དགེ་སྦྱོར་གང་བྱེད་ཀུན་གྱི་འཇུག་ཏུ་ཡང་། །སྤྲོས་མེད་བསྔོ་བ་སྟོང་ཉིད་དོན་ལ་བལྟ། །དེ་ལྟར་མ་རྟོགས་འཁྲུལ་པའི་འགྲོ་རྣམས་ལ། །སྙིང་རྗེས་ཀུན་བླངས་སྨོན་ལམ་རྒྱ་ཆེར་གདབ། ཀྱེ་མ། སྦྱོར་དངོས་རྗེས་ཀྱི་ཉམས་ལེན་ཁྲིག་རིམ་འདི། །རིག་འཛིན་གྲུབ་ཐོབ་རྣམས་ཀྱི་གཞུང་ལམ་ཉིད། །སྙིང་གཏམ་གདམ་ངག་ལྷུག་པར་སྨྲས་པ་ལགས། །རྩེ་གཅིག་ཉམས་སུ་ལོང་དང་དོན་ཆེན་འགྲུབ། ཀྱེ་མ། འདི་ལྟར་གདམས་པའི་

[Full Size]

དགེ་བས་འགྲོ་བ་ཀུན། དོན་མེད་འཁོར་བའི་བྱ་བ་རིང་དོར་ནས། དོན་གཉིས་ལྷུན་གྲུབ་གདོད་མའི་གཏན་སྲིད་ཟིན། ཁམས་གསུམ་འཁོར་བའི་རྒྱ་མཚོ་སྟོང་པར་ཤོག །ཅེས་པ་ནི། གཙང་ཉང་སྟོད་ཀྱི་ཕྱོགས་ནས་རིག་པ་འཛིན་པ་ནམ་མཁའ་རྡོ་རྗེ་ཞེས་བྱ་བའི་དགོངས་བཞེད་ལྟར་དུ་བཀོད་པའོ། ཀྱེ་མ། མི་ལུས་རིན་ཆེན་ཐོབ་དུས་འདིར། །དོན་མེད་སྟོང་ཟད་མ་བཏང་བུ། །ཚེ་སྲོག་རྩྭ་ཁའི་ཟིལ་འདྲ་ལ། །ལོང་ཡོད་ལེ་ལོ་མ་བྱེད་བུ། །དོན་མེད་འཇིག་རྟེན་བྱ་བ་ལ། །ཨ་འཐས་ཞེན་པ་མ་ཆེ་བུ། །ཟང་ཟིང་སྒྱུ་མའི་ནོར་རྫས་ལ། །སེར་སྣ་སྡུག་སྒུར་མ་བྱེད་བུ། །དགོས་མེད་ཚེ་འདིའི་བྱ་བྱེད་ལ། །མངོན་ཞེན་འཁྲི་བ་ཆོད་དང་བུ། །ནམ་ཀྱང་བློ་གཏད་མི་ཐུབ་པས། །གཉེན་ལ་གདུང་སེམས་མ་ཆེ་བུ། །མི་ཚེ་ཡུད་ཙམ་འདི་ཉིད་ལ། །དགྲ་ཞེས་འཁོན་འཛིན་སྤོང་ཞིག་བུ། །གཏན་དུ་ནམ་ཡང་མི་འགྲོགས་པས། །ཀུན་དང་མཐུན་པར་གྱིས་ཤིག་

[Full Size]

བུ། །སྐྱེས་ཆེན་སུ་ཡིན་མི་ཤེས་པས། །གཞན་ལ་སྐུར་པ་མ་བཏབ་བུ། །ཆོས་ཀུན་རང་སར་བདེན་པའི་ཕྱིར། །གྲུབ་མའི་ཁ་འཛིན་མ་བྱེད་བུ། །བློ་རྩེ་བླ་མར་མ་གཏད་ན། །རེ་ས་གཞན་ན་མེད་དོ་བུ། །སྙིང་རུས་ཆོས་ལ་མ་བྱས་ན། །ཅེས་ཀྱང་ཕན་པ་མེད་དོ་བུ། །རང་རྒྱུད་རང་གི་མ་བཏུལ་ན། །སེར་གཟུགས་དགོས་པ་མེད་དོ་བུ། །ལྟ་རྟོགས་སེམས་ལ་མ་བྱས་ན། །གཞན་ཀུན་ཀུན་རྫོབ་ཡིན་ནོ་བུ། །གཅིག་ཤེས་ཀུན་གྲོལ་མ་རྟོགས་ན། །ཆོས་ཀྱི་སྙིང་པོ་གཞན་མེད་བུ། །རང་ལ་རང་ཉིད་མ་འཁྲེལ་བའི། །སྡོམ་པ་མིག་ལྟར་སྲུངས་ཤིག་བུ། །ཚེ་དང་སྒྲུབ་པ་མ་གཉམ་ན། །ལོ་ཟླས་སངས་རྒྱས་མི་ཐོབ་བུ། །ཕྱི་མ་དོན་དུ་མི་གཉེར་བའི། །ཆོས་སྡེ་ཁ་ཆོས་ཡིན་ནོ་བུ། །ད་རེས་ལམ་སྣ་མ་ཟིན་ན། །དལ་འབྱོར་ཆུད་ཟོས་འགྱུར་རོ་བུ། །འཆི་བ་སྙིང་ནས་མ་དྲན་ན། །མི་ཚེ་སྟོང་ཟད་འོང་

[Full Size]

ངོ་བུ། །གཏན་གྱི་འདུན་མ་དམ་པའི་ཆོས། །འདི་ལ་རྩེ་གཅིག་འབུངས་དང་བུ། །སྙིང་གཏམ་གདམ་ངག་ཡིད་ལ་འཆོངས། །བླང་དོར་ཚུལ་བཞིན་མཛོད་དང་བུ། ཅེས། དད་ལྡན་བཟང་པོའི་མིང་ཅན་ལ་གདམས་པ་ཨྠིྀ།། ༈ །།གྲོགས་གསོན་དང་སྐལ་མཆོག་སྒྲུབ་པ་པོ། །ལམ་བླ་ན་མེད་པའི་རྫོགས་པ་ཆེ། །དོན་མ་ནོར་ཉམས་སུ་བླངས་ནས་ཀྱང་། །གནད་ཟབ་གསང་རྟོགས་པ་རྗེས་ཡི་རངས། །ཡོང་ད་དུང་བླ་མར་མོས་གུས་དང་། །ཡིད་དྲན་རིག་མ་ཡེངས་བྱ་ར་དང་། །སེམས་རྣམ་རྟོག་འགྱུ་བ་འོག་འབྱམས་ཀྱི། །དགྲ་རྐུན་བུ་འདི་ལ་བག་ཟོན་སོགས། །ལམ་མ་ནོར་གནད་དང་ལྡན་པར་འཚལ། །རང་རིག་ཆོས་སྐུ་ཡང་དག་ཀྱང་། །གོ་ཉམས་དང་ཤེས་སྒྲིབ་ཡིད་དཔྱོད་སོགས། །འདྲ་མིན་ནོར་ས་རབ་མང་བས། །ཞེན་འཛིན་དང་བྲལ་བ་ཞིག་གནད་དུ་ཆེ། །ཐ་མལ་གྱི་རིག་པ་བཅོས་མིན་དེ། །ཀ་དག་གི་ངོ་བོར་ལྷུན་གྲུབ་ཀྱང་། །

[Full Size]

རྒྱས་འདེབས་ཀྱི་སྒོམ་ཞེས་བློས་བཏང་གྱི། །རྣམ་རྟོག་གིས་སྒོམ་ཆེན་བསླུས་པ་མང་། །རིག་སྟོང་དང་ཀ་དག་ཆོས་སྐུ་དང་། །སྟོང་ཉིད་དང་སྤྲོས་མེད་སྒོམ་མེད་སོགས། །མིང་སྙན་ལ་གོ་བས་མ་གཞིག་པར། །རང་བབས་སུ་གློད་པ་ཞིག་གནད་དུ་ཆེ། །སངས་རྒྱས་དང་སེམས་ཅན་བཟང་ངན་སོགས། །རྣམ་རྟོག་གི་འཕྲེང་རྒྱུད་ཡིན་མོད་ཀྱང་། །ཚད་ཕེབས་ཀྱི་བཙན་ས་མ་ཟིན་པར། །གོ་ཡུལ་ཙམ་ཡིན་གྱི་དབྱེར་མེད་མིན། །ཉོན་མོངས་ཀྱི་དགྲ་བོ་དཔུང་ཆེན་འདི། །དྲན་རིག་གི་འབུར་འཇོམས་མ་བྱས་ན། །ཤར་གྲོལ་གྱི་ཡིན་ལུགས་ཤེས་ཙམ་གྱིས། །རང་གྲོལ་དུ་འགྲོ་བའང་ཅུང་ཟད་དཀའ། །བདེ་ཉམས་དང་གསལ་དང་མི་རྟོག་ཉམས། །ལམ་རྟགས་ཀྱི་འཆར་སྒོ་མཐའ་དག་ལ། །དགའ་བྲོད་དང་ཞེན་པས་མ་སླད་པར། །གང་བྱུང་དུ་བསྐྱུར་བ་ཞིག་གནད་དུ་ཆེ། །ཉམས་མྱོང་གི་འཆར་སྒོ་ཡིན་ཡིན་འདྲས། །རྣལ་འབྱོར་གྱི་ཐུགས་དམ་བཅོམ་པ་མང་། །ཅིར་ཤར་ལ་ཆེད་འཛིན་མི་

[Full Size]

བྱེད་པར། །ཡེངས་མེད་དུ་སྐྱོང་བ་ཞིག་གནད་དུ་ཆེ། །སྐྱིད་སྡུག་དང་བསྟོད་སྨད་ཆགས་སྡང་སོགས། །གཉིས་འཛིན་ཀུན་གཏན་ཟད་མ་སོང་བར། །སྒོམ་ཆེན་གྱི་གེགས་འཕྲང་མི་གྲོལ་བས། །དྲན་རིག་དང་རྟག་པར་འབྲལ་མེད་འཚལ། །མཉམ་གཞག་དང་རྗེས་ཐོབ་ལ་སོགས་དང་། །བློ་ཟད་དང་ཆོས་ཟད་སྒོམ་མེད་སོགས། ལམ་རིམ་གྱི་ཁ་སྐད་མཐའ་ཡས་ཀྱང་། །རེ་དོགས་དང་བྲལ་བ་ཞིག་གནད་དུ་ཆེ། །སྒོམ་ཆེན་དང་སྒྱུ་ལུས་འདི་མ་བྲལ་བར། །ཉམས་ལེན་ལ་རྒྱུན་དུ་མ་བརྩོན་ན། །གོལ་ས་དང་ནོར་ས་ཤོར་ས་སོགས། །གེགས་སྐྱོན་ཚོགས་མང་ངོ་རྣལ་འབྱོར་པ། །ད་དུང་དུ་བླ་མའི་མོས་གུས་རེམ། ཅེས་བསྟན་འཛིན་མཐར་ཕྱིན་ལ་གདམས་པ་ཨྠིྀ། །རྗེ་རྒྱལ་བ་ཀུན་འདུས་ཀྱི་པད་འབྱུང་། །དུས་སྙིང་པོ་བྱང་ཆུབ་ལ་ཐུག་གི་བར། །ཡིད་རྩེ་གཅིག་མོས་གུས་ཀྱི་གསོལ་འདེབས་ན། །དོན་སྙིང་པོ་གསང་ཆེན་གྱི་དངོས་གྲུབ་སྩོལ། །

[Full Size]

གདུང་དྲི་མེད་གྲུབ་མཆོག་གི་རིགས་ལས་འཁྲུངས། །ལམ་མཐའ་དག་ཐོས་བསམ་ལ་རང་བྱན་ཆུད། །དོན་ཉག་གཅིག་ཟབ་དོན་ལ་བརྩོན་པ་ཁྱེད། །གནད་ངེས་དོན་གདམ་ངག་ཅིག་དགོས་སོ་སྐད། །བདག་ཐོས་བསམ་བསྒོམ་གསུམ་གྱི་ནོར་གྱིས་དབེན། །ཕྲལ་རྣམ་གཡེང་དཀོར་ཟས་ཀྱི་གྲིབ་ཀྱིས་འཐུམ། །རྒྱུ་དེ་ཕྱིར་གནད་གདམས་དང་མི་ལྡན་ཀྱང་། །ཁྱེད་གཞེད་དོན་ཅུང་ཟད་ཅིག་འབུལ་གྱི་དགོངས། །གཞི་རིག་སྟོང་ཀ་དག་གི་ཡིན་ཚུལ་ལ། །ཚིག་དཔེ་དོན་སྦྱར་བཤད་ཀྱི་ཐབས་གནད་ལ། །སེམས་རིག་སྟོང་རང་བྱུང་གི་ཡེ་ཤེས་དོན། །རྗེ་བླ་མས་འཛུབ་ཚུགས་སུ་སྩལ་བ་གང་། །གནས་སྒོམ་མེད་ཡེངས་མེད་དུ་གློད་ཤེས་ན། །ལས་ཅི་བྱས་ཆོས་ཉིད་ཀྱི་རོལ་པ་ཉིད། །བཀའ་མདོ་རྒྱུད་གདམ་ངག་གི་བཤད་ཚིག་དང་། །རྗེ་གྲུབ་ཐོབ་གསར་རྙིང་གི་སྐྱེས་ཆེན་ཀུན། །དགོངས་གཅིག་མཐུན་གསལ་སྟོང་གི་ཟུང་འཇུག་དོན། །དེ་ངོ་ཤེས་འཛིན་མེད་དུ་སྐྱོང་བ་

[Full Size]

ལས། །བསྒོམ་མི་བསྒོམ་ཡེངས་འཕྲུལ་གྱི་ཐ་སྙད་བྲལ། །འཕྲལ་ཉོན་མོངས་ཕྲ་རག་གི་རྟོགས་ཚོགས་ཀུན། །གནད་མ་སྤང་རང་ཐོག་ཏུ་ལམ་དུ་ཁྱེར། །དོན་སྟོང་གསལ་སྤྲོས་བྲལ་གྱི་གནད་རིག་བཞིན། །ལས་རྒྱུ་འབྲས་ཕྲ་ཞིབ་ཀྱི་སྤང་བླང་སོགས། །ཀུན་ཁ་ཞེ་སྙིང་མཐུན་དུ་མཛད་པར་འཚལ། །དུས་དེང་སང་སྙིགས་དུས་ཀྱི་མཐའ་མ་འདིར། །ཚིག་ཐ་སྙད་རྣམ་གྲངས་ཀྱི་ལོངས་མེད་པས། །དོན་ཟབ་དྲིལ་ལ་མ་འབད་ན། །ལུས་དལ་འབྱོར་དོན་མེད་དུ་འཆི་ཉེན་ཡོད། །རྒྱུད་དེ་སླད་ཉམས་ལེན་ལ་རྒྱུན་བརྩོན་དང་། །དགེ་མ་ལུས་སེམས་ཅན་ལ་བསྔོ་སྨོན་གདབ། །ལས་ཅི་བྱེད་དམ་ཆོས་དང་མཐུན་ངེས་ཞུ། ཅེས་པ་འདི་ནི། གུ་རུ་རིན་ཆེན་ཆོས་ཀྱི་དབང་ཕྱུག་གི་གདུང་རིགས་ལས་འཁྲུངས་ཤིང་། །རིག་གྲོལ་གྱི་ཡོན་ཏན་དུ་མས་ཕྱུག་པའི་བླ་མ་དགེ་སློང་བསྟན་འཛིན་རྒྱ་མཚོ་དཔལ་གྱི་བཞེད་པ་ལྟར་བྲིས་པའོ།། ༈ །།ཨེ་མ་ཨ་ལ་ལ། །སྔོན་ཚེ་རབ་དཔག་མེད་ནས་ལེགས་སྦྱངས་ཤིང་།

[Full Size]

ཕ་བླ་མ་སངས་རྒྱས་སུ་ངེས་མཐོང་བས། །ཆོས་ཟབ་གནད་ངེས་དོན་གྱི་ལོངས་སྤྱོད་ལ། །དོན་མ་ནོར་ཉམས་ལེན་གྱི་སྲོག་ཤིང་ཁྱེད། །ལུས་དལ་འབྱོར་དོན་ལྡན་དུ་ཡང་དག་བྱས། །རྗེ་བླ་མའི་དྲིན་ལན་ཀྱང་མཆོག་ཏུ་གྱུར། །དེང་མི་ལུས་ལན་ཅིག་གི་དུས་ཚོད་འདིར། །གཏན་འདུན་མའི་ཡང་རྩེ་དེ་གྲུབ་པ་ལེགས། །ལུས་ན་ཚ་རྐྱེན་ངན་གྱི་སྣང་ཚུལ་དང་། །གནས་ཡུལ་གྲོགས་ཉེ་འབྲེལ་གྱི་འགལ་རྐྱེན་སོགས། །ཕྲལ་བར་ཆོད་དགེ་སྦྱོར་ལ་གནོད་འདྲ་བར། །བྱུང་ཐམས་ཅད་ལམ་རྟགས་ཀྱི་རྩལ་ལྷོངས་ཉིད། །མཐོ་སྲིད་རྩེ་ཚངས་པ་དང་བརྒྱ་བྱིན་ནས། །དམའ་ཐེའུ་རང་གྲོང་རྒྱུན་གྱི་བར་ཆད་སོགས། །གེགས་ཅིར་སྣང་ལྟས་ངན་ཉིད་གཡང་ཁུག་གི། །གནད་གང་བྱུང་བྱིན་རླབས་སུ་ཤེས་འདི་མཆོག །དོན་སྙིང་པོ་ཉམས་ལེན་གྱི་རྣལ་འབྱོར་པ། །འཕྲལ་བཟང་ངན་རྐྱེན་ཚོགས་ལ་ཉམ་ང་ན། །ཆོས་ཟབ་མོ་རྫོགས་ཆེན་གྱི་དགོས་པ་ཅི། །དཔལ་མི་ལ་རྣལ་འབྱོར་

[Full Size]

གྱི་དབང་ཕྱུག་ལའང་། །རྩ་རོ་རྐྱང་དང་དྷུ་ཏིར་རླུང་ཞུགས་རྐྱེན། །ཕྱི་ལིང་བ་བྲག་སྲིན་སོགས་ཆོ་འཕྲུལ་འཆར། །ཁོང་སྣང་སྲིད་ཕྱག་ཆེན་དུ་ལེགས་རྟོགས་པས། །གདོན་རང་རིག་སྲོག་རྙིང་དང་རང་འཚང་ཕུལ། །དེས་དེ་བཞིན་ཐོགས་བཅས་དང་ཐོགས་མེད་བདུད། །ཀུན་རྩ་རླུང་རྟེན་འབྲེལ་འཆར་སྒོ་ལས། །དོན་བདེན་པར་གྲུབ་ངེས་སུ་རྡུལ་ཙམ་མེད། །གནད་ཟབ་མོ་དམ་ཆོས་ཀྱི་ཡང་སྙིང་མཆོག །ལམ་མཐར་ཐུག་རྫོགས་ཆེན་གྱི་སྣང་མཆེད་ཐོབ། །དུས་དེང་སང་ཇི་ལྟར་དུ་འཆར་བ་ལ། །ཚུལ་ཉམས་ལེན་མཛད་ལུགས་ཀྱང་དེ་ཀ་ཉིད། །མིང་སྣང་མཆེད་ཐོབ་སོགས་དང་ཅིར་བཏགས་ཀྱང་། །གཉིད་མ་གཉིད་ཉིན་མཚན་སོགས་ནམ་དུ་ཡང་། །སེམས་མ་ཡེངས་དྲན་རིག་གིས་ཟིན་ཕྱིན་ཆད། །དེ་རིག་སྟོང་བཅོས་མིན་དུ་ལམ་ལམ་དུ་འཆར། །དེ་ནམ་འཆར་འོད་གསལ་གྱི་རང་བཞིན་ལགས། །ཉིན་སྐྱིད་སྡུག་ལེགས་ཉེས་སོགས་གང་ཤར་ཀུན། །དོན་སྟོང་ཉིད་བློ་བྲལ་

[Full Size]

དུ་བློ་ཐག་ཆོད། །རྩ་བ་རྣམ་རྟོགས་ཅིར་ཤར་ལ་ངོས་ཟིན་ན། །སླར་བཅོས་མའི་དགག་བསྒྲུབ་ཀྱིས་སླད་མི་དགོས། །རྐྱེན་བཟང་ངན་གང་བྱུང་གི་འཆར་སྒོ་ལ། །མདངས་རྨི་ལམ་འཁྲུལ་སྣང་དང་ཁྱད་མེད་པར། །ནམ་རྟོགས་ཚེ་ཆོས་ཉིད་ཀྱི་རོལ་པ་ལགས། །དོན་ཟབ་མོ་ཐོད་རྒལ་གྱི་འཆར་སྒོ་ནི། །སྐུ་ཐིག་ལེ་པདྨ་སོགས་ཅིར་འཆར་ཡང་། །བཟང་མི་བཟང་མཚན་བཅས་ཀྱི་སྤྲོས་དང་བྲལ། །གང་ཤར་ཡང་ཤར་ཐོག་ཏུ་མ་བཅོས་བཞག །དེ་མ་ཤར་ཡང་རང་བབས་སུ་ལྷན་ནེར་གློད། །ཀུན་མ་བཅོས་རང་རིག་ཏུ་ཤེས་པ་གནད། །དེ་རིག་པ་ཚད་ཕེབས་ཀྱི་སྣ་ཟིན་ཙམ། །ཡོང་ད་དུང་ཉམས་ལེན་ལ་མ་འབད་ན། །ཉམས་བོགས་སྐྱེད་གོང་འཕེལ་དེ་འགྲིབ་དོགས་ཡོད། །དེས་ད་དུང་གང་ཤར་ལ་ངོ་ཤེས་འཚལ། །ངོས་ཟིན་ན་དེ་ཀ་སངས་རྒྱས་ཉིད། །ཉམས་འཕེལ་སྐྱེད་འཆར་སྣང་གང་བྱུང་ལ། །དགའ་མི་དགའ་ཆགས་སྡང་སྣ་ཚོགས་ཀུན། །

[Full Size]

གནས་སྤྲོས་མེད་མ་བཅོས་ལམ་ཁྱེར་མཛོད། །ཅེས། རིག་པ་འཛིན་པ་ཚུལ་ཁྲིམས་བཟང་པོ་ལ་ཉམས་ལེན་གྱི་བོགས་འདོན་དུ་གདམས་པའོ། །གདོད་ནས་མ་བཅོས་འོད་གསལ་སྙིང་པོའི་དོན། །རང་རིག་ཆོས་ཀྱི་སྐུ་ལ་རབ་བཏུད་ནས། །སྐལ་ལྡན་ཁྱོད་ཀྱི་ཇི་ལྟར་དྲིས་པའི་ལན། །ཅུང་ཟད་བཤད་ཀྱི་ཐུགས་ལ་དགོངས་པར་མཛོད། །བདེ་གཤེགས་སྙིང་པོ་རང་རིག་ཆོས་ཀྱི་སྐུ། །ཀུན་ལ་ཡོད་ཀྱང་ཤེས་པ་ཤིན་ཏུ་དཀོན། །བླ་མའི་གདམས་པ་མཆོག་གི་མ་ཟིན་ན། །དབུལ་པོའི་ཁྱིམ་གྱི་རིན་ཆེན་གཏེར་དང་མཚུངས། །དེ་ལ་ལྟ་སྒོམ་སྤྱོད་འབྲས་མང་བཤད་ཀྱང་། །གནད་དོན་ཡིན་ལུགས་སྙིང་པོར་བསྡུས་པ་ནི། །བལྟ་བྱའི་ཡུལ་དང་ལྟ་མཁན་རིག་པ་གཉིས། །དབྱེར་མེད་གཅིག་པ་དེ་ཀ་ལྟ་བ་དངོས། །དེ་དོན་ཚུལ་བཞིན་རྟོགས་པའི་དོན་དེ་ཉིད། །མ་བཅོས་རང་བབས་དྲན་པས་སྐྱོང་བ་ལ། །སྒོམ་པ་ཞེས་བྱ་མིང་དུ་བཏགས་ལ་ལགས། །གང་

[Full Size]

ཤར་སེམས་དེ་མི་སྒོ་མ་ཡེངས་པར། །རྒྱུན་ལྡན་སྤྱོད་ལམ་ཀུན་ཏུ་འཁྱེར་བ་ལ། །སྤྱོད་པའི་མིང་དུ་བཏགས་པ་དེ་ཀ་ལགས། །དེ་དོན་མངོན་དུ་གྱུར་པའི་མཐར་ཐུག་ཚེ། །འབྲས་བུ་སངས་རྒྱས་ཐོབ་ཅེས་དེ་ལ་ཟེར། །ཧྲིལ་གྱི་དྲིལ་ན་ད་ལྟའི་ཐ་མལ་སེམས། །བཟང་ངན་འཕྲོ་གནས་འགྱུ་དྲན་ཅིར་ཤར་བ། །དེ་ཀའི་ངོ་བོར་རིག་པས་ངོས་ཟིན་ན། །སྒོམ་གྱི་མཆོག་གྱུར་དེ་ཉིད་གཅིག་པུས་ཆོག །ཨེ་མ་སྐྱེས་མཆོག་རྣལ་འབྱོར་པ། །སེམས་ཀྱི་འགྱུ་རྟོགས་སྣ་ཚོགས་ལ། །རྗེས་འབྲང་བརྟག་དཔྱད་བྱས་ན་ཡང་། །བུང་བས་ནམ་མཁའི་མཐའ་འཚོལ་འདྲ། །རང་སེམས་ཇི་ལྟར་ཤར་ཀྱང་རུང་། །ཤར་མཁན་དེ་ཀ་སྟོང་པ་ཉིད། །སྟོང་པ་ཉིད་དེ་གདོད་མ་ནས། །ལྷུན་གྱིས་གྲུབ་པའི་ཆོས་ཉིད་ལགས། །རྣམ་རྟོག་ཇི་ཙམ་འཕྲོ་ཡང་ལེགས། །འཕྲོ་མཁན་ངོ་བོ་བརྩད་བཅད་ན། །ཐམས་ཅད་ཆོས་སྐུའི་རོལ་རྩལ་ལས། །མ་དག་བླང་དོར་བྱ་རྒྱུས་དབེན། །སེམས་རིག་

[Full Size]

འཆར་སྣང་སྣ་ཚོགས་ཀྱང་། །ཐམས་ཅད་རིག་པའི་རྩལ་མདངས་ཉིད། །དགག་བསྒྲུབ་རེ་དོགས་བྱེད་དོན་ཆུང་། །རང་ངོ་རིག་ན་དེ་ཀས་ཆོག །བདེ་སྡུག་ཚོགས་དྲུག་ཆགས་སྡང་རྣམས། །ཤར་ཡང་རིག་པས་ཟིན་ཐོག་གློད། །མ་ཤར་ན་ཡང་གང་གར་བསྐྱུར། །ཡེངས་པ་མེད་པ་གནད་ཀྱི་མཆོག །མནར་མེད་དམྱལ་བའི་སྡུག་བསྔལ་དང་། །དཔག་མེད་ཞིང་ཁམས་བདེ་སྐྱིད་ཀུན། །རང་སེམས་སྣང་ཚུལ་ཁོ་ན་ལས། །རྡུལ་ཙམ་མེད་པར་རྒྱལ་བས་གསུངས། །སངས་རྒྱས་གོ་འཕང་མཐར་ཐུག་ལའང་། །རེ་དོགས་བྱས་ན་འཆིང་བའི་རྒྱུ། །གང་བྱུང་བླ་མའི་ཐུགས་རྗེའི་ལས། །བློ་གཏད་གཞན་དུ་བྱེད་དོན་ཆུང་། །ཨེ་མ་ད་དུང་རང་སེམས་ལ། །ཡེངས་འཛིན་མེད་པར་གློད་པ་དང་། །འགྲོ་ཀུན་ཕ་མའི་རང་བཞིན་ལ། །སྟོང་ཉིད་སྙིང་རྗེ་ཟུང་འཇུག་དང་། །དགེ་སྦྱོར་ཡེངས་མེད་སྐྱོང་བ་མཁྱེན། །དེ་ལྟར་གདམས་པ་ལ་བརྟེན་ནས། །

[Full Size]

ཉམས་རྟོགས་གོང་དུ་འཕེལ་བར་ཤོག །ཅེས་པ་འདི་ཡང་། བསྟན་འཛིན་མཐར་ཕྱིན་གྱི་ལྟ་གོམས་སྤྱོད་འབྲས་ཀྱི་གནད་འགགས་ཀྱི་ཚིག་འགའ་ཞིག་དྲི་བའི་ལན་དུ་སྦྱིན་པའོ།། ༈ །།ཨེ་མ་དད་ལྡན་རྣལ་འབྱོར་པ། །བྱང་ཆུབ་ལམ་བཟང་བསྒྲུབ་འདོད་ན། །ཐེག་པའི་མཐར་ཐུག་སྙིང་པོའི་སྙིང་། །དམ་ཆོས་རྫོགས་ཆེན་བསྒོམ་པར་ཞུ། །སྙིགས་དུས་ལོངས་མེད་མི་ཚེ་ཐུང་། །ཡུད་ཙམ་འདི་ལ་རྩེ་གཅིག་ཏུ། །ཟབ་དོན་སྙིང་པོ་མི་ལེན་ན། །ཐོས་ཐོས་ཤེས་རྒྱ་གྲངས་མང་ཀྱང་། །དགོས་དུས་ཕན་པ་དཀའ་མོར་མཆི། །བརྒྱད་ཁྲི་བཞི་སྟོང་ཆོས་ཀྱི་སྒོ། །མཐའ་དག་གཅིག་བསྡུས་གསལ་སྟོང་དོན། །རིག་པ་བྱང་ཆུབ་སེམས་སངས་རྒྱས། །མ་རྟོགས་ཚིག་ཚོགས་བརྒྱ་ཡོད་ཀྱང་། །འབྲས་བུའི་དམ་པ་གཞན་ན་མེད། །བླ་མ་ཡིད་བཞིན་ནོར་བུ་བརྙེད། །གདམ་ངག་བདུད་རྩིའི་ཆར་རྒྱུན་ཐོབ། །དལ་འབྱོར་སྙིང་པོ་ལེན་དུས་འདིར། །འཇིག་རྟེན་སྒྱུ་མའི་འཁྲུལ་འཁོར་སྤོངས། །ད་ལྟ་རང་དབང་ཡོད་

[Full Size]

དུས་འདིར། །གཏན་གྱི་འདུན་མ་འཆུགས་པས་ན། །རྙེད་དཀའི་དལ་འབྱོར་རིན་ཆེན་འདིར། །སྟོང་ཟད་འགྲོ་བ་ཨ་རེ་འཕང་། །དེ་ཕྱིར་ཚེ་ལྷག་གང་ཐུབ་འདིར། །སྒྲུབ་ལ་གཅིག་ཏུ་དྲིལ་བ་དང་། །སྒོམ་མེད་ཡེངས་འཛིན་བྲལ་བའི་དོན། །རང་བབས་རང་རིག་སྐྱོང་བར་ཞུ། །དེ་སྐད་ལྷག་བསམ་དགེ་བ་ཡིས། །ཁྱེད་ལ་སྙིང་གཏམ་སྨྲས་པའི་དགེས། །མར་གྱུར་འགྲོ་བའི་ཁམས་ཐམས་ཅད། །རྫོགས་པའི་སངས་རྒྱས་ཐོབ་གྱུར་ཅིག །ཅེས། འཕྱོངས་རྒྱས་པ་རིག་འཛིན་དབང་དྲག་ལ་གདམས་པའོ།། ༈ །།གདོད་མ་ཉིད་ནས་རང་བཞིན་འོད་གསལ་བའི། །བོན་ཉིད་ཀ་དག་ཆེན་པོར་ཕྱག་འཚལ་ནས། །བོན་ཆོས་དབྱེར་མེད་གཞི་ལམ་འབྲས་བུའི་དོན། །ལྟ་སྒོམ་སྤྱོད་འབྲས་ཚུལ་གྱིས་མདོ་ཙམ་བཤད། །འཁོར་འདས་ཀུན་གྱི་སྔོན་རོལ་བྱང་ཆུབ་པའི། །གདོད་མའི་མགོན་པོ་ཞེས་གྲགས་དག་པ་གཉིས། །དབྱེར་མེད་བདེ་གཤེེགས་སྙིང་པོ་

[Full Size]

འགྲོ་ཀུན་གྱི། །རྒྱུད་ལ་ཡེ་ནས་གནས་ཀྱང་མ་རིག་པའི། །ལྷན་ཅིག་སྐྱེས་དེས་བསྒྲིབས་ཏེ་མ་གཏོགས་པ། །སེམས་ཅན་ཀུན་གྱི་མཚན་ཉིད་གཞིའི་གནས་ལུགས། །དེ་དོན་དྲི་མེད་བལྟ་བྱ་ལྟ་བྱེད་དང་། །བྲལ་བ་བོན་ཉིད་ལྟ་བའི་མཐར་ཐུག་སྟེ། །དེང་སང་མཁས་པར་བརློམ་པའི་བླུན་པོ་འགའ། ལྟ་བ་ཆོས་སྐུ་ཡོད་མེད་མཐོ་དམན་བརྩོད། །མཐའ་བྲལ་དོན་ལ་ཚིག་གིས་བརྩོད་པ་འཁྲུལ། །བརྩོད་གཞི་ཅན་གྱི་ལྟ་བས་རྣལ་འབྱོར་བསླུ། །རང་བྱུང་རང་རིག་ལྟ་བ་མ་རྟོགས་པར། །ཚིག་མཐའ་བཙལ་བས་ལྟ་བའི་གཏིང་མི་དཔོག །དེ་ཕྱིར་མ་ནོར་བླ་མའི་གདམས་པ་གཅེས། །ལམ་གྱི་བསྒོམ་ཚུལ་རྒྱ་ཆེ་གྲངས་མང་ཡང་། །བོན་ཆོས་དབྱེར་མེད་རང་གི་གསལ་སྟོང་འདི། །ཆེད་དུ་བཅོས་པས་སྒོམ་པ་མ་ཡིན་ཞིང་། །རྣམ་རྟོགས་འཁྲུལ་པ་རང་གར་མ་ཤོར་བ། །རང་ངོ་རིག་ཐོག་གློད་པ་རྫོགས་ཆེན་ལམ། །དྲན་རིག་ཡེངས་

[Full Size]

མེད་སྐྱོང་བ་ཕྱག་རྒྱ་ཆེ། །གང་ཤར་རང་བབས་བསྐྱུར་བ་གཅོད་ཡུལ་མཆོག །སྡུག་བསྔལ་སེམས་སུ་གྲོལ་བ་ཞི་བྱེད་བཞེད། །གང་གིའང་མཐའ་ལ་མི་ཞེན་དབུ་མ་དངོས། །སྟོང་ཉིད་སྙིང་རྗེ་ཟུང་འཇུག་བློ་སྦྱོང་དོན། །ཐམས་ཅད་དགོངས་མཐུན་སྒོམ་མེད་ཡེངས་མེད་ཀྱི། །གནད་འདི་བོན་ཆོས་དབྱེར་མེད་སྒོམ་གྱི་མཆོག །བླ་མའི་གདམས་པ་ཚུལ་བཞིན་ཉམས་བླངས་ནས། །བསྒོམ་བྱུང་ཤེས་རབ་ནང་ནས་ཤར་བའི་ཚེ། །ཐེག་དགུ་བརྒྱད་ཁྲི་བཞི་སྟོང་དགོངས་དོན་ཀུན། །རང་རིག་ཐིག་ལེ་ཉག་གཅིག་གཅིག་པུར་འདུས། །དུ་མ་རོ་གཅིག་རང་བྱུང་ཡེ་ཤེས་དོན། །གསལ་བ་བསྐྱེད་རིམ་སྟོང་པ་རྫོགས་རིམ་དང་། །ཟུང་འཇུག་བོན་སྐུ་ཀུན་བཟང་རིག་པའི་གཤིས། །དེ་ཉིད་མངོན་སུམ་རང་ངོ་མ་རིག་ན། །ཐོས་ཐོས་ཤེས་ཤེས་བྱས་ཡུས་ཆེ་ན་ཡང་། །ཚེ་གཅིག་བྱང་ཆུབ་ཐོབ་པའི་ཐབས་གཞན་མེད། །དེས་ན་སྒོམ་པའི་གནད་འདི་ལྷག་པར་གཅེས།

[Full Size]

སྤྱོད་པའི་རིམ་པ་སྣ་ཚོགས་བསམ་འདས་ཀྱང་། །མདོར་བསྡུས་དུས་ཚོད་ཤེས་པ་གནད་དུ་ཚེ། །ཐོས་བསམ་དུས་སུ་བུང་བ་ལྟ་བུ་དང་། །ཉམས་ལེན་དུས་སུ་རི་དྭགས་ལྟ་བུ་དང་། །རང་དོན་དུས་སུ་ལྐུག་པ་ལྟ་བུ་དང་། །གཞན་དོན་དུས་སུ་གཉན་པ་ལྟ་བུ་གཅེས། །ཧྲིལ་གྱི་དྲིལ་ན་བསྟན་པའི་སྒོར་ཞུགས་ནས། །མཐར་ཐུག་བྱང་ཆུབ་སྙིང་པོར་ཐུག་གི་བར། །བདག་བས་གཞན་གཅེས་ཁོ་ན་ལྷུར་ལེན་ཅིང་། །འཇིག་རྟེན་ཁེ་གྲགས་དོན་གཉེར་མ་ཡིན་པར། །བླ་མེད་རྫོགས་བྱང་རྩེ་གཅིག་བསྒྲུབ་ནུས་པའི། །སྤྱོད་པ་དེ་ལ་གེགས་དང་གོལ་ས་བྲལ། །སྙན་གྲགས་ལོངས་སྤྱོད་ཚེ་འདི་དོན་གཉེར་བ། །དེ་ལ་སངས་རྒྱས་ཐོབ་པའི་སྐལ་བས་དབེན། །སྙིང་རྗེ་གཞན་ཕན་གོ་ཆ་རབ་བགོས་ནས། ཁ་ཞེ་མེད་པར་ཉམས་ལེན་རྩེ་གཅིག་འབད། །སྐྱིད་སྡུག་ལེགས་ཉེས་བཟང་ངན་ཅི་བྱུང་ཀྱང་། །གང་བྱུང་ལམ་ཁྱེར་དགེ་སྦྱོར་གནས་ཐོག་དྲིལ། །ཅིར་སྣང་ལམ་ཁྱེར་གནད་དང་

[Full Size]

མི་ལྡན་པའི། །སྒོམ་ཆེན་སྒོམ་གྱི་མུ་གེ་ཕོག་ཉེན་ཡོད། །བླང་དོར་ལས་འདས་སྤྱོད་པའི་རྒྱལ་པོ་སྟེ། །སྤྱོད་པའི་གནད་མེད་དོན་གྱི་སྙིང་པོ་ཅི། །དེ་ཕྱིར་ལམ་ཁྱེར་གནད་འདི་ཤིན་ཏུ་གཅེས། །མཐར་ཐུག་འབྲས་བུའི་དབྱེ་བ་གྲངས་མངས་ཀྱང་། །བོན་ཉིད་ཆོས་སྐུའི་རང་ངོ་མ་རིག་ན། །ཐོབ་དུ་རེ་བའི་འབྲས་བུ་ཡིད་སྨོན་ལུས། །ཐོབ་དང་མ་ཐོབ་མིང་གི་ཐ་སྙད་ཙམ། །ཐ་སྙད་མིང་ལ་ཞེན་པ་འཁྲུལ་པའི་བློ། །བོན་ཆོས་དབྱེར་མེད་སྐུ་གསུམ་འདུས་མ་བྱས། །སྐུ་གསུམ་ངོ་བོ་རང་རིག་སྟོང་གསལ་ཉིད། །སྟོང་གསལ་འཛིན་མེད་མངོན་དུ་གྱུར་པའི་ཚེ། །སྐུ་གསུམ་ཞིང་ཁམས་རང་ལ་ལྷུན་གྱིས་རྫོགས། །རང་བྱུང་རང་རིག་མཐའ་བྲལ་ཀ་དག་དོན། །འདི་ལས་གཞན་པའི་སངས་རྒྱས་གང་དུ་འཚོལ། །བཙལ་བས་བརྙེད་ན་ཀུན་རྫོབ་འདུས་བྱས་ཉིད། །ཀུན་རྫོབ་འདུས་བྱས་འཇིགས་ཅིང་འགྱུར་

[Full Size]

བའི་ཆོས། །མི་འཇིག་འགྱུར་མེད་བརྩན་ས་མ་ཟིན་ན། །ཀུན་རྫོབ་ཆོས་ཀྱི་དོན་དམ་རྟོགས་མི་འགྱུར། །དོན་དམ་མི་ཤིག་སྤྲོས་བྲལ་མངོན་གྱུར་ཆེ། །འབྲས་བུའི་མཆོག་གྱུར་བོན་ཉིད་ཀ་དག་དོན། །དོན་དེ་གཞན་ལས་མི་འབྱུང་རང་འབྱུང་ཉིད། །རང་རིག་གསལ་སྟོང་ཟུང་འཇུག་རྟོགས་པ་ན། །ས་ལམ་དྲོད་རྟགས་ཡེ་རྫོགས་ལྷུན་གྱི་གྲུབ། །སྐུ་གསུམ་དབྱེར་མེད་རང་ཆས་ཚང་བའི་ཚེ། །མཆོག་དངོས་གྲུབ་ན་ཐུན་མོངས་དངོས་གྲུབ་ཀུན། །མི་འདོད་རང་བཞིན་ཐོགས་མེད་ཆར་ལྟར་འབབ། །རང་དོན་སྤྲོས་མེད་ཟད་སར་འཁྱོལ་བའི་ཚེ། །གཞན་དོན་ཕྱོགས་མེད་ཡང་དག་བདེ་བླག་འགྲུབ། །དེ་ཕྱིར་རེ་དོགས་བྲལ་བའི་འབྲས་བུ་ལ། །རང་གཞན་གཏན་དོན་འགྲུབ་པར་འབད་པ་གཅེས། །དེ་ལྟར་བོན་ཆོས་དབྱེར་མེད་གདམས་པའི་དོན། །རང་ཉིད་ཇི་ལྟར་གོ་ཚུལ་ཅུང་ཟད་ཙམ། །ཡི་གེར་བཀོད་འདིས་ཁམས་གསུམ་འགྲོ་ཀུན་ཀྱང་། །བོན་ཆོས་གཉིས་

[Full Size]

མེད་ཆོས་སྐུར་གྲོལ་བར་ཤོག །ཅེས་བོན་ཆོས་གཉིས་ཀྱི་གཞི་ལམ་འབྲས་བུའི་ཚུལ་མདོར་བསྡུས་པ་འདི་ནི་རིག་པ་འཛིན་པའི་བླ་མ་དམ་པ་ནམ་བསོད་ནམས་ཀྱིས་བསྐུལ་བར་མཛད་པའི་ངོར་བཀོད་པ་དགེ་ལེགས་འཕེལ།། ༈ །།ཨེ་མ། སྔོན་བསགས་ཚོགས་གཉིས་འབྲས་བུ་ལེགས་སྨིན་པས། །རྣམ་དཔྱོད་དཔལ་འབྱོར་དགེ་ལེགས་ལང་ཚོ་ཅན། །ལུགས་གཉིས་བློ་གྲོས་སྐལ་པ་མཆོག་ལྡན་པའི། །སྐྱེས་བུ་ཁྱེད་ཀྱི་སྙན་དུ་འདི་སྐད་གསོལ། །ད་དུས་ངན་པ་རྩོད་ལྡན་མཐར་ཐུག་ཅིང་། །སངས་རྒྱས་བསྟན་པ་རྒོངས་ཁའི་ཉི་བཞིན་གྱུར། །བླ་མ་ཕལ་ཆེར་ཆོས་བརྒྱད་རྟ་བང་འགྲན། །ཆོས་པའི་གཟུགས་རྣམས་ཆགས་སྡང་མེ་རླུང་འཚུབས། །སྐྱེ་འགྲོ་མཐའ་དག་བདེ་བའི་གོ་སྐབས་བྲལ། །ནད་མཚོན་མུ་གེ་རྐྱེན་ངན་ཆར་ལྟར་འབབ། །གང་ལ་བལྟས་ཀྱང་སྐྱོ་ཤས་འཕེལ་བའི་རྒྱུ། །ཅི་ལ་བསམ་ཀྱང་དམ་པའི་ལྷ་ཆོས་ལས། །འདི་ཕྱིར་ཕན་པ་གཅིག་ཀྱང་མི་གདའ་བའི། །

[Full Size]

ཚུལ་འདིར་གཟིགས་ནས་དགེ་ལ་འབད་པར་ཞུ། ཀྱེ་མ། དལ་འབྱོར་མི་ལུས་ཡང་ཡང་ཐོབ་པ་དཀའ། །ཐོབ་པ་འདི་ཡང་ནམ་འཆིའི་ངེས་པ་མེད། །ཤི་བར་མ་ཟད་ངན་སོང་འཁོར་བར་འཁྱམས། །གང་དུ་སྐྱེས་ཀྱང་བདེ་བའི་གོ་སྐབས་མེད། །དེ་ཕྱིར་ད་ལྟ་རང་དབང་ཡོད་དུས་འདིར། །གང་ནུས་དགེ་ལ་འབད་ན་དོན་ཆེན་འགྲུབ། ཀྱེ་མ། །ནོར་རྫས་རྣམ་ཐོས་བུ་ལྟར་ཡོད་གྱུར་ཀྱང་། །མཆོད་སྦྱིན་མི་ནུས་སྦྲང་མའི་སྦྲང་རྩི་འདྲ། །བར་དོའི་འཕྲང་ལ་ལག་སྟོང་འགྲོ་བའི་ཚུལ། །བསམ་ནས་ཚོགས་གཉིས་བསགས་ན་སྙིང་པོ་ལོན། །འཁོར་ལོ་བསྒྱུར་འདྲའི་མངའ་ཐང་ཡོད་ཚེ་ཡང་། །རང་ཚོད་ཆོག་ཤེས་ངོམ་པ་མི་འབྱུང་ཞིང་། །གཤིན་རྗེའི་ཁྲིམས་རར་དབང་མེད་འགྲོ་ཙ་ན། །སྡིག་པ་བསགས་པའི་མི་རྣམས་འགྱོད་ཀྱང་ཕྱིས། ཀྱེ་མ། །འཇིག་རྟེན་འདི་ཡི་སྣང་བ་རྨི་ལམ་ཙམ། །དགྲ་འདུལ་གཉེན་སྐྱོང་མ་ཟིན་

[Full Size]

མ་ཆོག་པའི། །སྡུག་བསྔལ་ངང་ལ་རྟག་འཛིན་ཞེན་བྱས་ཀྱང་། །སྙིང་པོ་མེད་ཕྱིར་དོན་མེད་མི་ཚེ་ཟད། །རང་དབང་ཡོད་རིན་དགེ་ལ་མི་བརྩོན་པར། །མཆི་མ་ཕྲུམ་མེ་ཁ་ཆེམ་འཇོག་པའི་ཚེ། །ཉན་མཁན་དཀོན་ཞིང་ཕན་ཐོག་ཤིན་ཏུ་དཀའ། །དེ་བས་རང་དོན་རང་མགོ་བསྒྲིམ་པར་ཞུ། ཀྱེ་མ། །དོན་གྱི་སྙིང་པོ་ཧྲིལ་གྱི་དྲིལ་བ་ནི། །ཟང་ཟིང་ཅི་ཡོད་དགེ་ཕྱོགས་འབུང་བ་དང་། །ནང་ནུབ་སྐྱབས་འགྲོ་ཡིག་དྲུག་འབད་པ་དང་། །ཅི་ནུས་སྡིག་པའི་ལས་ལ་འཛེམ་པ་སྟེ། །ཁྱིམ་པའི་ཆོས་ཀྱི་ཉམས་ལེན་མཐར་ཐུག་ཡིན། །གཞན་ལ་ཁ་མང་ཕུང་ཀྲུག་མི་བྱེད་ཅིང་། །རང་གིས་མི་འགྲུབ་བློ་མང་མི་བྱ་བར། །ཀུན་དང་མཐུན་ཞིང་སེམས་བཟང་བློ་དྲང་བ། །འཇིག་རྟེན་ཆོས་ལུགས་བཟང་པོའི་མཚན་ཉིད་ཡིན། །དཔོན་ལ་ཉི་མགོའི་ཉི་འོད་མི་བྱེད་ཅིང་། །གཡོག་

[Full Size]

ལ་གཞུང་ངན་གསར་འགྲོགས་མི་བྱ་དང་། །རང་ཉིད་ང་རྒྱལ་ཕྲག་དོག་སྤོང་བ་ནི། །ཡ་རབ་སྤྱོད་པ་ཀུན་གྱི་གཙོ་བོ་ཡིན། །ཕྱོགས་མེད་ཆོས་ལ་དག་སྣང་འབྱོང་པ་དང་། །ཉེ་རིང་ཀུན་ལ་ཕན་སེམས་ཆེ་བ་དང་། །ངན་སྤྱོད་གཡོ་ཁྲམ་ཟོལ་ཟོག་སྤོང་བ་ནི། །སྐྱ་སེར་ཀུན་གྱི་འདུན་མའི་ཡང་རྩེ་ཡིན། ཀྱེ་མ། དུས་རྣམས་ཀུན་གྱི་ཉམས་ལེན་སྙིང་པོ་ནི། །རང་གི་སྤྱི་བོར་པདྨ་ཉི་ཟླའི་སྟེང་། །བླ་མ་ཀུན་འདུས་ཐུགས་རྗེ་ཆེན་པོ་བསྒོམ། །དེ་ཡི་ཐུགས་ཀར་ཟླ་སྟེང་ཧྲཱིཿདཀར་གྱི། །མཐའ་སྐོར་ཡིག་དྲུག་སྔགས་ཀྱིས་བསྐོར་བར་དམིགས། །སྔགས་ལས་འོད་འཕྲོས་རང་གཞན་འགྲོ་ལ་ཁྱབ། །འགྲོ་ཀུན་སྡིག་སྒྲིབ་སྡུག་བསྔལ་ཀུན་བྲལ་བསམ། །རྟག་ཏུ་ཡི་གེ་དྲུག་པ་ཅི་ནུས་བཟླ། །འདི་ནི་ལྷ་དང་བླ་མ་དབྱེར་མེད་ཀྱི། །བསྒོམ་བཟླས་ཟབ་པའི་སྙིང་པོ་མཐར་ཐུག་ཡིན། །གལ་ཏེ་འཆི་བའི་དུས་ལ་བབས་པ་ན། །རང་སེམས་བརྩེ་

[Full Size]

གཅིག་ལྷ་དེའི་ཐུགས་ཀར་གཏད། །ལྷ་ཉིད་དག་པའི་ཞིང་དུ་གཤེགས་པར་བསམ། །སྡིག་ཅན་བརྩན་ཐབས་སངས་རྒྱས་འཕོ་བའི་ཆོས། །འདི་ཀས་ཆོག་གི་རྩེ་གཅིག་འབད་པ་གཅེས། ཀྱེ་མ། །དེ་ལྟར་ཆོས་དང་འཇིག་རྟེན་བྱ་བྱེད་ཀྱི། །འདུན་མའི་སྙིང་པོར་འདི་དག་འབད་གྱུར་ན། །ཆོས་མེད་སེར་གཟུགས་དཀོར་ཟན་བྱེད་པ་བས། །ཁྱིམ་པ་བྱང་སེམས་ཁོ་ན་འདུན་མ་བརྟན། ཀྱེ་མ། །སྙིང་གཏམ་གདམ་ངག་ཕན་པའི་གྲོས་འདེབས་འདི། །དད་ལྡན་ཁྱེད་ལ་བརྩེ་བས་གདམས་པའི་དགེས། །འགྲོ་བ་ཀུན་ཀྱང་ཐར་པའི་ལམ་བཟང་ལ། །མྱུར་དུ་འཁོད་པའི་སྨོན་ལམ་འགྲུབ་གྱུར་ཅིག །ཅེས་པ་འདི་ནི། །དལ་འབྱོར་ལྡན་པའི་སྦྱིན་བདག་ཨོ་རྒྱན་བསྟན་འཕེལ་ལ་གདམས་པའོ།། ༈ །ཁམས་གསུམ་འདི་ན་འགྲན་གྱི་ཟླ་བྲལ་བ། །རྒྱལ་མཆོག་པདྨ་ཐོད་ཕྲེང་ཞབས་བཏུད་དེ། །སྐལ་ལྡན་དམ་ཆོས་སྙིང་ནས་མཛད་རྣམས་ལ། །

[Full Size]

སྙིང་གཏམ་གདམ་ངག་ཅུང་ཟད་གསོལ་གྱི་དགོངས། །དིང་སང་སྙིགས་མ་ལྔ་བརྡོའི་མཐའ་མ་འདིར། །ཚེ་ལ་ལོང་མེད་དེ་ཡང་སྡིག་ལ་སྐྱེལ། །མཚན་ལྡན་བླ་མ་སྣོད་ལྡན་སློབ་མའང་དཀོན། །བདུད་རིགས་ཟོག་པོས་འགྲོ་བའི་ཁ་ལོ་བསྐྱོད། །གང་ལ་བསམ་ཀྱང་མི་མེད་རི་ཁྲོད་དུ། །འཆི་བ་སྙིང་དྲན་དམ་ཆོས་རྩེ་གཅིག་ལས། །སྙིང་པོར་གྱུར་པ་ཅི་ཡང་འདུག་གམ་བསོམ། །མངའ་ཐང་ལོངས་སྤྱོད་ལྡན་ཀྱང་ལག་སྟོང་འཆི། །ཤེས་ཡོང་ང་རྒྱལ་ཆེ་ཡང་ཤི་ཁར་འགྱོད། །ངས་བྱས་སྡུག་ཡུས་མང་ཀྱང་དགོས་དུས་བསླུ། །གང་ལ་ལྟས་ཀྱང་སྐྱོ་བར་མི་གདའམ། །དེས་ན་རང་རྒྱུད་རང་གིས་ལེགས་བཏུལ་ནས། །བླ་མ་སངས་རྒྱས་མཐོང་བའི་མོས་གུས་དང་། །གདམ་ངག་ནོར་བུར་ཤེས་པའི་དང་བ་དང་། །ཅིས་ཀྱང་དགོས་མེད་ཤེས་པའི་ཞེན་ལོག་རྣམས། ཁ་དང་ཞེ་རུ་མཐུན་པར་མཛད་པར་ཞུ། །ཐམས་ཅད་གོང་དུ་འཁུར་

[Full Size]

བའི་དག་སྣང་དང་། །ངོས་ལྐོག་སྤུ་ཙམ་བྲལ་བའི་དམ་ཚིག་སྡོམ། །ཅི་བྱེད་ཆོས་དང་མཐུན་པའི་སྤྱོད་ལམ་སོགས། །རང་སེམས་འགྱོད་པ་མེད་པའི་དཔང་གཙུག་འཚལ། །དཀའ་སྤྱད་ཆོས་ལ་ནུས་པའི་སྙིང་རུས་དང་། །མཚན་ལྡན་བླ་མ་མཉེས་པའི་སྒྲུབ་པ་དང་། །སྒོམ་ཡུན་ཤི་དང་མཉམ་པའི་དམ་བཅའ་རྣམས། །རྟག་ཏུ་འགྱུར་ལྡོག་མེད་པར་མཛད་པར་འཚལ། །རྒྱུ་འབྲས་ཕྲ་ཞིང་ཕྲ་བའི་བླང་དོར་དང་། །གང་བྱུང་ཐུགས་རྗེར་ཤེས་པའི་དད་པ་དང་། །གཅིག་ཤེས་ཀུན་གྲོལ་རྟོགས་པའི་ཐག་ཆོད་བཅས། །ཆོས་ཀུན་ཉམས་ལེན་སྙིང་པོར་དྲིལ་བར་ཞུ། །དེ་ལྟར་ལྷག་བསམ་དག་པའི་སྙིང་གཏམ་འདིས། །རང་གཞན་དམ་པའི་ཆོས་ལ་འཁོད་གྱུར་ཅིག །ཅེས་པ་འདི་ནི། གྲུབ་ཐོབ་ཆེན་པོ་ཀུན་རྣམ་པའི་གྲ་པ་རྣམས་ལ་གདམས་པ་ཨྠིྀ།། ༈ །།ཨེ་མ་གསོན་དང་སྐལ་མཆོག་རྣལ་འབྱོར་པ། །དལ་འབྱོར་སྙིང་པོ་ལེན་དུས་ད་རེས་

[Full Size]

ཙམ། །འདི་ལ་དོན་མེད་སྟོང་ཟད་མ་བཏང་བར། །གཏན་འདུན་བྱང་ཆུབ་རྩེ་གཅིག་བསྒྲུབ་རེ་རན། །ཐོས་པ་ཆེ་ཡང་འཆི་ཁར་ཕན་ངེས་དཀའ། །ཐོབ་ཐོབ་མང་ཡང་རྒྱུད་ལ་ཁེལ་བ་དཀོན། །དེ་བས་དྲིན་ཅན་བླ་མའི་ཞལ་གྱི་བཅུད། །རྩེ་གཅིག་ཉམས་སུ་བླངས་ཏེ་མཐར་ཕྱིན་ཞུ། །ཆོས་ཀྱི་རྣམ་གྲངས་མང་ཡང་སྙིང་པོའི་བཅུད། །ཕྱག་རྫོགས་གནད་དོན་གཅིག་དྲིལ་གནས་ལུགས་དོན། །སྒོམ་མེད་ཡེངས་བྲལ་མ་བཅོས་གཉུག་མའི་གཤིས། །རྒྱུན་ཆད་མེད་པར་ཉམས་ལེན་བརྩོན་པར་འཚལ། །ཞེ་གཏིང་འགྱུར་མེད་དད་པས་བླ་མ་བསྟེན། །ཅིས་ཀྱང་དགོས་མེད་ཞེན་ལོག་རྒྱུད་ལ་དྲན། །འགྲོ་ཀུན་ཕ་མར་ཤེས་པའི་སྙིང་རྗེ་སྦྱོང་། །ཆོས་དོན་རྒྱུད་ལ་ལེགས་པར་འབྱོར་པ་ཞུ། །དེ་ལྟར་གདམས་པའི་མཁའ་མཉམ་འགྲོ་དྲུག་ཀྱང་། །འདི་བཞིན་སྤྱོད་པ་རྣམ་མཁྱེན་མངོན་

[Full Size]

གྱུར་ཤོག །ཅེས་པ་ནི་སྟོན་སྒོམ་ཀརྨ་ཆོས་འཁོར་གྱི་བཞེད་པ་ལྟར་བཀོད་པའོ། ཨེ་མ་ཀྱཻ་ལགས། ཕུན་སུམ་ཚོགས་པའི་དལ་འབྱོར་ལེགས་ཐོབ་ཐེགས་ཆེན་ཟབ་མོའི་བསྟན་དང་མཇལ། །རིམ་གཉིས་སྙིང་པོའི་དོན་གྱི་བཅུད་ལ་རང་དབང་འབྱོར་པའི་དུས་གཅིག་འདིར། །རྣམ་པ་སྣ་ཚོགས་སྒྱུ་མའི་འཁྲུལ་འཁོར་ཤིང་རྟའི་འཕང་ལོ་བསྐྱོད་མིན་པར། །ངེས་དོན་སྙིང་པོ་ནང་དུ་ཡང་དག་འཇོག་ལ་བརྩོན་པར་མཛོད་དང་ཀྭོ། ༡ །རྒྱལ་བ་གཉིས་མེད་གསུང་བ་དེ་ཡིས་འདུས་བྱས་མི་རྟག་གང་བསྟན་དང་། །དུས་གསུམ་སྒྲིབ་མེད་གཟིགས་པ་མངའ་བའི་སངས་རྒྱས་པདྨ་རྒྱལ་པོས་ཀྱང་། །སྙིགས་མ་ལྔ་བརྒྱ་མཐའ་མའི་རྣམ་འགྱུར་ལུང་དུ་སྩལ་གང་མངོན་སུམ་དུ། །གྱུར་བའི་ཚུལ་འདི་ཀྱེ་མ་ཀྱི་ཧུད་སྙིང་ནས་སྐྱི་གཡའ་གཟིགས་སམ་ཀྱཻ། ༢ །རིན་ཆེན་བསྟན་པ་གཟུགས་བརྙན་ལ་སྤྱོད་བསྟན་འཛིན་རྣམ་ཀྱང་ལུས་

[Full Size]

མེད་ཀྱི། །ནུས་པས་རབ་གཟིར་ཆགས་སྡང་རྨོངས་པའི་རྦ་ལ་གཡེང་ཞིང་སྐྱོ་ངོག་ལ། །རབ་སྤྱོད་ད་དུང་བསྟན་བརློམ་བདག་ལྟའི་རི་བོར་བསྒྱིངས་ཤིང་ངོ་མཐོན་སྨྲ། །འདི་མཐོང་ད་ནི་སྡེ་དགོན་གྲྭ་འཁོར་སྦྱིན་བདག་ངོ་ལྟ་སུ་ཞིག་སྤྲོ། ༣ །དམན་པའི་ས་བཟུང་གྱི་ན་ལྷགས་སྐྱོབ་ཙམ་ལ་རྟེན་བྱས་ཁ་འོག་ལུས། །བཙུད་ཀྱང་ད་དུང་མཐོ་དོགས་བསམ་སྦྱོར་ནག་པོའི་རྩོལ་བ་ལ་ཞུགས་མང་། །ལྷག་བསམ་ཟླ་བ་ལོག་ལྟའི་རཱ་ཧུ་ལ་གདོང་མཇུག་ལས་དབང་མེད་བཅོམ། །དེ་སླད་ཉམས་ཆུང་དབེན་པའི་མལ་དུ་གནས་ཀྱང་ད་དུང་ཅི་ཞིག་དགུ། ༤ །ངེས་འབྱུང་སྙིང་ནས་མ་ལྡན་ལྟོ་གོས་བདེ་ཐབས་གྲོགས་སྟོབས་ལ་སོགས་ཀྱིས། །ཉེ་བར་འཁོར་ཞིང་འདུས་པའི་སློབ་མའི་ཚོགས་བཅས་དེ་དང་དེ་དག་ཀྱང་། །ཐོས་བསམ་དོན་ཐོག་མི་འབེབས་དམ་སྡོམ་མོས་གུས་ཀ་ལིང་ནགས་གླང་བཞིན། །ཚུལ་འདིས་ད་ནི་

[Full Size]

མི་རྒན་སྐྱུག་ལོག་གཏིང་ནས་སྐྱེས་སོ་མཆི་མ་དཀུ། ༥ །ངེས་ལེགས་ལམ་ལ་གཞན་བཙུད་དོན་བྲལ་རང་ཉིད་ཨ་ཐང་ཆད་པར་བས། །གཞན་དོན་ཡིན་རྒྱུའི་གཡེང་བ་དུ་མས་མི་ཚེ་ཕལ་ཆེར་གསོག་གསོབ་ཟད། །ཕྱི་དང་ནང་གསང་གང་ལའང་འཕྲེངས་དང་ཆགས་པའི་བློ་ཡི་གྲུ་གུ་བརྡོག །ད་ནི་ལྔ་པའི་གནས་ལའང་འཚེར་བའི་འདུ་ཤེས་ཆུང་གྱུར་དགོངས་ལགས་སམ། ༦ །འོན་ཀྱང་སྙིང་གཏམ་སླབ་བྱ་གྱིས་ཞེས་གང་བསྒོ་བ། །མཐའ་དག་བརྗོད་པའི་སྤོབས་བྲལ་སྙིང་པོའི་དོན་ཀྱང་དབེན། །དེ་ལྟ་ནའང་རང་སེམས་དཀར་པོའི་ཀུ་མུཏྟ། །གང་གི་མགུལ་པའི་རྒྱན་དུ་དགྱེས་སམ་བཞེད་གྱུར་འབུལ། ༧ །རྟག་ཏུ་རང་བཞིན་བཟང་པོའི་གདེང་འཆང་ཞིང་། །ཟོལ་ཟོག་གཡོ་རྒྱུ་རྣམ་སྤངས་དགེ་འབད་ཀྱི། །མཐུན་མོངས་རྣམ་ཐར་བཟང་པོ་མཐའ་དག་ལ། །ཁྱེད་ཀྱིས་རང་དང་གཞན་ཡང་དཀྲི་བར་མཛོད། ༨ །

[Full Size]

ཟང་ཟིང་ནོར་ཕྱིར་འཇིག་རྟེན་བཤེས་ཀྱི་ཕྱིར། །གྲུབ་མཐའི་ཞེན་ཕྱིར་དགོན་གནས་འཁོར་གྱི་ཕྱིར། །རང་གི་ལུས་སྲོག་ཕྱིར་ཡང་འཁྲུག་ལོང་བརྩོད། །སྡིག་སྤོང་ཀུན་མཐུན་སྤྱོད་ཀྱིས་འཚོ་བར་མཛོད། ༩ །རིག་དང་རུས་དང་ཐོས་བསམ་རྣམ་དཔྱོད་སྒོམ། །ནོར་རྫས་ཡུལ་འཁོར་ཡོན་ཏན་ཇི་རྙེད་པ། །འཁོར་འདས་གཉིས་ཀྱིས་བསྡུས་པའི་རང་ཆེའི་བློ། །ནམ་ཡང་ཞེ་ནས་སྤོང་ལ་འབད་པར་མཛོད། ༡༠ །རང་དང་གཞན་ཕྱོགས་གཉིས་འཛིན་ཞེན་སེམས་ཀྱི། །ནང་མདངས་ཕྱི་རོལ་གསལ་བའི་ལུས་ངག་ཡིད། །ཉམས་འགྱུར་ཕྲ་རག་དུ་མའི་འཕྲལ་ཡུན་གྱི། །འདུན་མ་ཆུ་བོར་གཤེགས་འགྱུར་མཁྱེན་པར་མཛོད། ༡༡ །རང་སེམས་བཟང་རློམ་ཉེ་རིང་འཁོར་འདབས་སོགས། །སྣ་ཚོགས་རྣམ་འགྱུར་དུ་མས་བསྐྱངས་ན་ཡང་། །མགུ་མེད་ལོག་ལྟ་སྒྲོ་སྐུར་སླར་འཕེལ་བར། །གཟིགས་བཞིན་སྤྲོས་པའི་འཁོར་ལོ་གཞོམ་པར་མཛོད། ༡༢ །ནམ་དུའང་འཆི་བ་སྙིང་

[Full Size]

བསམ་བློ་སྣ་ཆོས་ལ་དྲིལ། །ཅི་བྱས་སྙིང་པོས་དབེན་གཟིགས་ཟབ་མོའི་གདམ་ངག་བསྒོམ། །ཉོན་མོངས་ངན་གོམ་ཤུགས་ཆེ་རང་སེམས་རང་གིས་འཐུལ། གྲུབ་ཐོབ་རྒྱུད་པའི་རྣམ་ཐར་རྗེས་སུ་བསྙེགས་ངེས་མཛོད། ༡༣ །སུ་འགྲོགས་ཆགས་སྡང་འཕེལ་ལས་ལེགས་པའི་ཡོན་ཏན་དཀའ། །རྣམ་མང་བློ་སྣ་རག་པོས་དོན་གྱི་ཐོག་འཁེལ་དཀོན། །ཡིན་ཡིན་མཛེས་འཐད་འདྲ་མང་རང་བློ་བདུད་ཀྱིས་ཁྱེར། །འཆི་ཁར་འགྱོད་མེད་གྲབས་བཤོམ་ད་ལྟ་བསྒྲུབ་པར་མཛོད། ༡༤ །ངེས་པར་ཕན་ངེས་བསླུ་བ་མེད་ངེས་གཏན་གྱི་འདུན་མ་འགྲུབ་ངེས་དམ་ཆོས་གཅིག་པུ་ཉིད། །མ་འབད་མི་ཚེ་གློག་ཙམ་འར་འུར་བུས་པའི་རྩེད་མོ་འདྲ་ལ་རང་གཞན་ཀུན་མགོ་འཁོར། །ཐུབ་བསྟན་ཉི་མ་ནུབ་རིར་ཕྱོགས་ཤིང་སྙིགས་མའི་རང་ཚུལ་ཡོངས་རྫོགས་མྱོང་འདིར་ལ་གོར་དུ། །ཡང་དག་བྱང་ཆུབ་སྙིང་པོ་བསྒྲུབ་ལས་ཅི་བྱས་

[Full Size]

རྨི་ལམ་རྒྱལ་སྲིད་ཡིན་པར་མཁྱེན་གཟིགས་མཛོད། ༡༥ །རང་སེམས་རང་དབང་རང་གི་གཟུགས་ནས་ཀྱང་། །སྒོ་གསུམ་ལས་སྤྱོད་དམ་ཆོས་གཞུང་མཐུན་པ། །ཡེ་ཤེས་སྤྱན་ལྡན་གཟིགས་པ་མི་ཁྲེལ་བར། །མཛོད་དང་སུ་མ་མགུ་ཡང་འགྱོད་པ་བྲལ། ༡༦ །བདག་ཉིད་མི་ཡི་ཁྱུ་ལས་རབ་འཐོན་ཏེ། །བས་མཐར་འཆི་བ་བསྒུགས་ཤིང་མཆིས་བཞིན་དུ། །མང་པོར་སྨྲས་ཀྱང་ཕན་མེད་ངལ་བའི་རྒྱུ། །དེ་ཕྱིར་འདི་ཙམ་དགོངས་པར་ཉེར་བསྟིམ་གསོལ། ༡༧ །སླད་མར་དངོས་སུ་མཇལ་སྨོན་གཞན་དུ་ན། །འདུས་བྱས་རང་འཚངས་བསྟན་ནའང་དམ་ཚིག་གཞུང་། །ལེགས་པར་བསྲང་ན་སྐྱེ་དང་སྐྱེ་བར་ཡང་། །འབྲལ་མེད་ཐེག་ཆེན་ཆོས་ལ་ལྷན་སྤྱོད་སྨོན། ༡༨ །ཅེས་པ་འདི། རྒྱལ་སྲས་ཀརྨ་ལས་གྲུབ་ཀྱིས། སྙིང་གཏམ་བསླབ་བྱ་དགོས་གསུང་བ་ལ་གདམས་པའོ།། ༈ །།ཆོས་དབྱིངས་ནམ་མཁའ་ཡངས་པ་ཀློང་ཆེན་གྱི་རབ་འབྱམས། །

[Full Size]

ཐུགས་རྗེའི་ཉི་གཞོན་འབུམ་ཕྲག་བྱིན་རླབས་ཀྱི་གཟི་འབར། །སྨོན་ལམ་ལས་འཕྲོའི་སྣང་བསྙན་གདུལ་བྱའི་ཞིང་དུ། །རྨད་བྱུང་རྫོགས་ཆེན་འོད་བརྒྱས་མ་རིག་གི་མུན་བསེལ། །ངོ་མཚར་གར་བསྒྱུར་གྱི་ལྟད་མོ་ནམ་མཁའ་ཡི་འཇིགས་མེད། །སྣ་ཚོགས་རང་གྲོལ་གྱི་ཟླ་དཀར་ཐུགས་ཡིད་ཀྱི་དབྱིངས་སུ། །ཆུ་ལ་ཆུ་བཞག་དང་མཚུངས་བདེ་ཆེན་དུ་རོ་གཅིག །འདི་བཟུང་སྐྱེས་རབས་འཕྲེང་བའི་ཞིང་ཁམས་ཀྱི་རྒྱན་དུ། །རྡོ་རྗེའི་གླུ་དབྱངས་ཀྱི་དགའ་སྟོན་རྒྱུན་ཆགས་སུ་སྒྲོགས་ཅིང་། །ཉམ་ཐག་མ་རྒན་གྱི་ཚོགས་རྣམས་ཕན་བདེ་ལ་འགོད་པའི། །རླབས་ཆེན་ཕྲིན་ལས་ཀྱི་སྒྱུ་འཕྲུལ་ཐབས་གཅིག་ཏུ་བྱའོ། །གུ་ཡངས་ཁྱབ་གདལ་གྱི་བྲོ་གར་ལྷུག་སྩོལ་དུ་མཛོད་ཅིག །ཅེས། འཁྲུལ་ཞིག་ཆེན་པོ་ནམ་མཁའ་འཇིགས་

[Full Size]

མེད་ཀྱི་དྲུང་དུ་ཕུལ་བའོ། །སྲིད་གསུམ་འདི་ན་འགྲན་གྱི་ཟླ་བྲལ་བ། །རྒྱལ་བའི་དབང་པོ་པདྨ་འབྱུང་གནས་ཞེས། །བྱིན་རླབས་ཐུགས་རྗེ་འོད་འབར་ལྷམ་མེ་བ། །གང་གི་ཞབས་ཟུང་ནོར་བུ་གཙུག་གིས་མཆོད། ཨེ་མ། །སྙིང་ནས་བརྩེ་གཅིག་བྱང་ཆུབ་བསྒྲུབ་བཞེད་ན། །འཇིག་རྟེན་འདི་ཡི་འདུན་མས་བསླུ་བསླུ་འདྲ། །བྱ་བ་རྙིང་ནས་ཐོངས་པར་མ་བྱས་ན། །ཆོས་པའི་གཟུགས་ཀྱི་རང་མགོ་བསླུ་བར་ངེས། །མཁས་མཁས་ཤེས་ཤེས་བྱས་ཡུས་ཆེ་ན་ཡང་། །རང་སེམས་ཁ་ལོ་ནང་དུ་མ་ཁུགས་ཚེ། །སྒོམ་ཆེན་སྒོམ་གྱིས་འཆིང་བ་མི་ཚོར་བས། །སྣང་སྲིད་ཆོས་ཉིད་རྒྱ་ཡན་ཀློང་དུ་གློད། །ཡུལ་སྣང་སེམས་སུ་ཤེས་པས་འཛིན་ཞེན་བསྐྱུར། །དུག་ལྔ་ཆོས་ཉིད་ཡེ་ཤེས་རང་ངོ་རིག །ཅིར་སྣང་མཉམ་ཉིད་ཆེན་པོར་ལ་ཟློས་པས། །མཉམ་རྗེས་ཐ་དད་འཛིན་པའི་བཏོད་ཕུར་བུད། །ལྟར་མེད་ཕྱོགས་བྲལ་ཆེན་པོའི་ལྟ་བ་ལ། །སྒོམ་

[Full Size]

མེད་ཡེངས་འཁྲུལ་བྲལ་བ་སྒོམ་པའི་མཆོག །གཏད་མེད་ཡོང་གྲོལ་སྤྱོད་པའི་རྒྱལ་པོ་ཡིས། །ཐོབ་ཤོར་བྲལ་བའི་འབྲས་བུ་རང་ལ་རྙེད། །བླ་མ་ཡི་དམ་ཕྱི་ནང་གཉིས་འཛིན་སྤངས། །སངས་རྒྱས་སེམས་ཅན་བཟང་ངན་བདག་གཞན་མེད། །སྐྱིད་སྡུག་ལེགས་ཉེས་རྨི་ལམ་རྒྱལ་སྲིད་འཇིགས། ཁྱབ་གདལ་རྫོགས་ཆེན་བརྩན་ས་ཟིན་པར་ཞུ། །ཅེས། རིག་པ་འཛིན་པའི་དབང་ཕྱུག་ཁྲག་འཐུང་ཧཱུྃ་དཀར་གྱི་བཞེད་པ་ཀོང་ཕྱིར་ཕུལ་བའོ།། ༈ །།ཀྱེ་མ་དེང་སང་སྙིགས་མའི་རང་ཚུལ་གྱི། །རྣམ་འགྱུར་འདི་ལ་གཟིགས་མཛོད་ལ། །ཅིས་ཀྱང་དགོས་མེད་བློ་སྣ་ལྟུང་། །མི་མེད་རི་ཁྲོད་འགྲིམ་པར་ཞུ། །མི་ཚེ་རྨི་ལམ་ཡུད་ཙམ་འདིར། །རྣམ་མང་ཚིག་ཚོགས་ལོང་མེད་པས། །ཟབ་དོན་རྫོགས་ཆེན་ཡང་སྙིང་ལ། ཁ་ཞེ་རྙིང་མཐུན་ཉམས་བཞེས་ཞུ། ཁ་ལྟ་གོ་དྲེད་མ་ཤོར་བར། །རང་རིག་རྗེན་པ་ཧྲིག་གེ་

[Full Size]

ལ། །བཟོ་བཅོས་ལྷད་ཀྱིས་མ་སླད་པར། །མ་བཅོས་ལྷུག་པ་སྐྱོང་བར་ཞུ། །ལམ་རྟག་ཡོན་ཏན་འཆར་སྒོ་སོགས། །རེ་དོགས་སྦུན་པས་མ་སྒྲིབ་པར། །ཤི་དང་མཉམ་པའི་སྒོམ་ཡུན་དང་། །གྲུབ་ཐོབ་ཁྱུ་ཕྱིར་བསྙེགས་པར་ཞུ། །དམ་ཚིག་སྡོམ་པ་དད་གུས་དང་། །དག་སྣང་སྙིང་རྗེ་རྒྱུ་འབྲས་ཀྱི། །རྟེན་འབྲེལ་ཁྱད་དུ་མི་གསོད་པར། །དོན་གཉིས་ཡོངས་གྲུབ་མཛད་པར་ཞུ། ཅེས་དབང་པོ་ནམ་མཁའ་ཕྲིན་ལས་ལྷུན་གྲུབ་ལ་གདམས་པའོ།། ༈ །།གསོན་དང་དགེ་བའི་བཤེས་གཉེན་མཆོག །ཐོས་བསམ་ཡོན་ཏན་མཐར་ཕྱིན་ནས། །ཡང་དག་སྙིང་པོའི་ལམ་ཞུགས་ཏེ། །དལ་འབྱོར་དོན་ལྡན་མཛད་པ་ལེགས། །ད་དུང་ཚེ་འདི་བློ་ཡིས་ཐོང་། །ལོངས་མེད་བསྒྲུབ་ལ་མྱུར་དུ་བརྩོན། ཁེ་གྲགས་ལོ་འདོད་རྙེད་བཀུར་དང་། །ཚེ་འདིའི་ཞེན་འཁྲིས་རྦད་ཀྱི་ཆོད། །རང་རིག་གདོད་ནས་དག་པའི་ཀློང་། །འཁོར་འདས་གཉིས་མེད་གཞི་རྩ་བྲལ།

[Full Size]

སྐྱེ་མེད་ཀློང་ནས་འགགས་མེད་འཆར། །འགྱུར་མེད་ལྟ་བའི་ཡང་རྩེ་ལགས། །བློ་འདས་སྟོང་ཉིད་ཆེན་པོ་ལས། །གསལ་རིག་མ་བཅོས་ཧྲིག་གེ་བར། །རང་བཞིན་རང་བབས་ཟུང་འཇུག་ཆེ། །བཅོས་མིན་གསལ་སྟོང་སྒོམ་པའི་ཆོག །གནས་སྐབས་ཅིར་འཆར་གང་བྱུང་ཀུན། །ཆོས་ཉིད་ངང་དུ་ཁྱབ་གདལ་གློད། །དག་སྣང་མོས་གུས་སྙིང་རྗེ་དང་། །དམ་སྡོམ་སྤྱོད་པ་འཛིན་མེད་སྤྱོད། །རང་རིག་རང་བབས་མངོན་གྱུར་ལས། །མཚན་བཅས་འབྲས་བུ་ཅི་ཞིག་བྱ། །ཐོབ་ཤོར་རེ་དོགས་ལས་འདས་པའི། །སྤྲོས་མེད་ཆོས་སྐུའི་གཏན་སྲིད་ཟིན། །མདོར་ན་རང་སེམས་གསལ་སྟོང་གི། །རང་གཞན་བཟོ་མེད་མཇལ་བ་ལས། །འཇུར་འཛིན་སྒོམ་གྱིས་མ་བཅིངས་པར། །གུ་ཡངས་ཁྱབ་དལ་མཛད་པར་ཞུ། །བདག་ནི་ཐོས་བསམ་སྒོམ་པའི་ནོར། །གང་གི་ཕྱོགས་ཀྱང་མི་ལྡན་པས། །གདམས་པའི་

[Full Size]

གནད་སྟོན་ནུས་མིན་ཀྱང་། །བཞེད་པ་སྐོང་ཕྱིར་གང་དྲན་སྨྲས། །དགེ་བས་འགྲོ་ཀུན་གྲོལ་བར་ཤོག །ཅེས་རིག་གྲོལ་དབང་ཕྱུག་ཀརྨ་མདོ་སྡེ་ལ་གདམས་པའོ།། ༈ །།རྒྱལ་ཀུན་ཐུགས་རྗེ་ཟབ་ཡང་ལྷ་ལམ་ལས། །རྨད་བྱུང་བསྟན་པའི་སྙིང་པོ་ཉི་གཞོན་འབུམ། །སྣང་མཛད་རིག་འདུས་བླ་མ་ཧེ་རུ་ཀ །སྙིང་ནས་གསོལ་བ་འདེབས་སོ་ཐུགས་རྗེས་སྐྱོང་། དེ་ཡང་ཐོས་བསམ་སྒོམ་འབྲས་ཀྱི་འབྱོར་པ་མི་དམན་ཅིང་། དཔལ་ལྡན་རྗེ་བཙུན་བླ་མ་མཆོག་གི་ཐུགས་རྗེ་བྱིན་རླབས་ཀྱིས་བློའི་པདྨོ་མངོན་པར་བྱེ་བའི་སྐལ་ལྡན་ཚུལ་ཁྲིམས་སྙིང་པོ་ཉིད་ཀྱིས་ཇི་ལྟར་གསུངས་པའི་དོན་གྱི་རྟོགས་ཚུལ་དེ་ལས་ལྷག་པ་ཞིག་ནི་བདག་འདྲར་མ་ཟད་སྐལ་བཟང་གི་སངས་རྒྱས་ཐམས་ཅད་མངོན་སུམ་དུ་བྱོན་ཀྱང་གསུང་དུ་མེད་པར་འཁུམས་ལགས་ཤིང་། ཁྱད་པར་རྗེ་བཙུན་གྲུབ་ཐོབ་ཆེན་པོ་རྟོགས་པའི་མངའ་བདག་དེ་ལྟ་བུའི་ཞབས་དྲུང་དུ་གདར་ཤ་ལེགས་པར་བཅད་ནས། དཀའ་དཔྱད་སྙིང་

[Full Size]

རུས་ཀྱི་གོ་ཆ་ཆེན་པོ་དང་ལྡན་པས་ཉམས་སུ་བླངས་པ་དེ་ལས་ཁྱད་པར་དུ་འཕགས་པའི་བོག་འདོན་ནུས་པ་ཞིག་ནི་ཁོ་བོ་ལྕགས་ལ་ནམ་ཡང་མ་མཆིས་ཤིང་འོན་ཀྱང་ད་དུང་ཡང་། རང་རིག་པ་ཡེ་གདོད་མ་ནས་དག་པ་ཆེན་པོར་ལྷུན་གྱི་གྲུབ་པའི་ངོ་བོ་ལ། བློ་བུར་ལྷན་སྐྱེས་ཀྱི་དྲི་མས་འཐུམས་པ་དབུལ་པོའི་ཁྱིམ་གྱི་ནོར་བུ་དེ་ཉིད་དང་། བླ་མས་ཐབས་མཁས་སྣ་ཚོགས་པའི་སྒོ་ནས་རང་ངོ་སྤྲད་དེ་སངས་རྒྱས་ལག་བཅངས་སུ་སྩལ་བ་འདི་ཉིད། ཐོག་མར་ཞི་གནས་ཀྱི་བྱེ་བྲག་གི་སྐབས་མཚོར་བསྒྲིམ་བཅུར་རྩད་དཔྱོད་སྣ་ཚོགས་པའི་རྟོགས་པར་བྱས་མོད་ཀྱི། ད་ནས་རང་བྱུང་གི་རང་འགྲོས་ཆོས་ཉིད་རྣམ་རོལ་ཆེན་པོའི་ངང་ནས། རང་ཤར་རང་རིག་རང་གྲོལ་ཆེན་པོར་ཉམས་སུ་བླངས་བ་ལས་སྤྲོས་པ་ཞིག་ནི་མི་དགོས་པར་ཐག་ཆོད་ལ། གནས་ན་ཆོས་ཉིད་ཀྱི་རང་ལུགས། འགྱུ་ན་ཡེ་ཤེས་ཀྱི་

[Full Size]

རོལ་རྩལ། ཅིར་སྣང་དོན་དམ་གྱི་བླ་མ་དང་ལྷའི་རང་བཞིན་ཁོ་ན་མ་གཏོགས། །བཟང་ངན་གྱི་བྱེ་བྲག་བདེན་གྲུབ་རྡུལ་ཙམ་མེད་པར་གང་ཤར་ཆོས་ཉིད་ཀྱི་དཀྱིལ་འཁོར་ཆེན་པོ། །དེ་ཉིད་ཀྱང་ཡེ་ནས་ཡིན་པ་མ་གཏོགས་གནས་སྐབས་བློས་བྱས་གོ་ཡུལ་གྱིས་བཅོས་པ་མ་ཡིན་པ་དང་། འཕྲལ་སྣང་རྣམ་རྟོག་གི་འཕྲོ་འདུ་རྣམས་ཀྱང་། གཞི་ལམ་རྒྱུ་སེམས་ཅན་གྱི་སྐབས་སུ་འཁྲུལ་རྟོགས་སྣ་ཚོགས་ཀྱི་འཆར་ཚུལ་ལམ་རྣལ་འབྱོར་པའི་སྐབས་སུ་ཉམས་མྱོང་འཆར་སྒོའི་བྱེ་བྲག །འབྲས་བུ་སངས་རྒྱས་ཀྱི་སྐབས་སུ་མཁྱེན་བརྩེ་མཛད་ཕྲིན་གྱི་རྣམ་རོལ་ཡིན་ཕྱིར། །དེས་ན་རྣམ་པར་རྟོག་པ་སྤོང་ཡང་མི་སྤོང་། བསྒྱུར་ཡང་མི་བསྒྱུར། དགག་ཀྱང་མི་དགག་པར། །རང་ཤེས་རིག་པའི་རྒྱལ་པོས་ངོས་ཟིན་ན་ཐམས་ཅད་ཀྱི་རོལ་པར་ལྷུན་གྱིས་གྲུབ་ཚེ་སྒོམ་དུ་མ་གྱུར་པའི་དངོས་པོ་སྐྲ་རྩེ་ཙམ་ཡང་མ་ལུས་ཤིང་། སྣང་གྲགས། སྐྱིད་སྡུག་

[Full Size]

བཟང་ངན། ལེགས་ཉེས་སོགས་མཐའ་དག་བདེན་མེད་སྒྱུ་མ་ཡེ་ཤེས་འཁོར་ལོ་ཉིད་དུ་ལ་བཟློས་ཤིང་། དེ་ཚེ་ཆོས་གཞན་བྱ་རྒྱུས་དབེན་ལ། འཁོར་འདས་བདེ་སྡུག་རེ་དོགས་ཀྱི་རྫུན་ཁུངས་དིབ་ཅིང་འབྲས་བུ་ཡེ་རྫོགས་ཆེན་པོར་གཏན་སྲིད་ཟིན་དེ་ལྟ་བུ་ཉམས་བཞེས་ལས་རྣམ་པ་ཀུན་ཏུ་མ་གཡོས་པར་གནང་འཚལ་ལགས།། ༈ །།ཐེག་ཆེན་བསྟན་དར་འགྲོ་རྣམས་བདེ་ལ་འཁོད། །བསྟན་འཛིན་སྐུ་ཚེ་ཕྲིན་ལས་མཐར་ཕྱིན་ཅིང་། །ཕྱོགས་དུས་གནས་སྐབས་དགེ་ལེགས་ཕུན་ཚོགས་འཕེལ། །མ་ལུས་ཀུན་བཟང་དགོངས་པའི་ཀློང་གྲོལ་ཤོག །བླ་མ་སངས་རྒྱས་བྱང་སེམས་ཡི་དམ་ལྷ། །དཔའ་བོ་རྣལ་འབྱོར་མ་ཚོགས་ཆོས་སྲུང་བཅས། །བྱིན་རླབས་ཐུགས་རྗེ་ཕྲིན་ལས་ནུས་སྟོབས་མཐུས། བཀྲ་ཤིས་རབ་འབྱམས་ཕྱོགས་མཐར་ཁྱབ་གྱུར་ཅིག །ཅེས་པ་ནི། སྟོན་སྒོམ་ཚུལ་ཁྲིམས་སྙིང་པོའི་རྟོགས་པ་ཕུལ་བའི་ལན་དུ་གདམས་པ་ཨྠྀི།

[Full Size]

ཨེ་མ་སྐལ་ལྡན་སྙིང་གི་བུ་ཁྱོད། །དལ་འབྱོར་དམ་པ་ལན་ཅིག་ཐོབ་འདི། །དོན་མེད་སྟོང་ཟད་ཡེངས་ལམ་མ་གཏངས། །རྩེ་གཅིག་སྒྲུབ་པ་སྙིང་པོར་དྲིལ་བས། །བླ་མའི་སྐུ་དྲིན་ཆོས་ཀྱིས་འཁོར་མཛོད། །འཇིག་རྟེན་བྱ་བ་སྨིན་ལམ་ཇི་བཞིན། །ཟང་ཟིང་སྙན་གྲགས་ཤེས་ཤེས་ཕེར་ཡོང་། །ཐམས་ཅད་བདུད་ཀྱི་གཡབ་ཤིང་ཁོ་ནར། །མཁྱེན་བཞིན་བྱ་བ་སྙིང་ནས་མཐོང་མཛོད། །རང་སེམས་ཡེ་ནས་སྐུ་གསུམ་ལྷུན་གྲུབ། སྣང་གྲགས་ལྷ་སྔགས་ཆོས་ཉིད་འཁོར་ལོ། །གང་ཤར་འཛིན་མེད་ཅེར་གྲོལ་ཀློང་ནས། །སྒོམ་མེད་ཡེངས་མེད་འཁོར་ཡུག་སྐྱོང་མཛོད། །འཇིག་རྟེན་བྱ་བློ་ཡིས་ཐེངས་ཀྱང་། །འཁོར་འདས་རེ་དོགས་གཉིས་འཛིན་སྒྲོགས་ཀྱིས། །རང་སེམས་འཆིང་བས་སྲིད་ལས་མི་འཕགས། །རེ་དོགས་ཞེན་འཛིན་ཐག་པ་ཆོད་མཛོད། །གང་བྱུང་བླ་མའི་ཐུགས་རྗེར་ཤེས་ཤིང་། །དཀའ་ཐུབ་སྙིང་རུས་ཡུས་ཀྱིས་མ་དྲེགས། །སྒོམ་ཡུན་ཤི་དང་མཉམ་པ་མཛོད་

[Full Size]

དང་། །འཁོར་བའི་གཡུལ་ལས་རྒྱལ་བར་ངེས་སོ། །སྙིང་གཏམ་ཚིག་གསུམ་གདམ་ངག་འདི་ཉིད། །རྣལ་འབྱོར་འཇའ་ལུས་བསྟན་འཛིན་མཆོག་ལ། །སྣ་ཚོགས་རང་གྲོལ་གང་དེས་སྨྲས་པའི། །དགེ་བས་མཁའ་ཁྱབ་འགྲོ་གྲོལ་གྱུར་ཅིག །ན་མོ་གུ་རུ། དེ་ཡང་ཆོས་ཐམས་ཅད་ཡང་སྙིང་རྫོགས་ཆེན་ཟབ་པའི་མཐར་ཐུག་གི་དགོངས་དོན་བླ་ན་མེད་པ་ཉིད། རྗེ་མཚན་ལྡན་བླ་མས་ལྷུག་པར་བསྟན་ཅིང་ངོ་སྤྲད་པའི་གནད་འགགས་དེ་ཉིད་ཁོ་ན་ལ་ཆིག་དྲིལ་དུ་འབད་ན། ཐེག་པའི་བྱེ་བྲག་གང་གདམས་པའི་གནད་གསང་མཐའ་དག་གི་རང་འཚང་ལོན་ལོན་ཕྱིར། ཀུན་རྫོབ་འཁྲུལ་པའི་ར་རི་བྱིས་པ་མགོ་སྐོར་གྱི་ཆོས་རྣམས་ཐམས་ཅད་རྨི་ལམ་གྱི་ལྟད་མོ་ལྟར་འགྱུར་བ་གོར་མ་ཆགས་ཤིང་། དེའི་ཚེ་ལམ་གྱི་ཆ་རྐྱེན་རྨི་ལམ་འོད་གསལ་རོ་སྙོམ་ཐབས་ལམ་སོགས་ཀྱི་ཟབ་གནད་རྣམས་ཀྱང་གནས་སྐབས་སུ་ལམ་རྟགས་ཀྱི་ཡོན་ཏན་དང་བོགས་འདོན་ཆེ་བར་གཞིར་བཅས་

[Full Size]

ཀྱང་། མཐར་ཐུག་དོན་གྱི་སྙིང་པོ་གནད་གསང་འདི་ཉིད་མ་རིགས་ན་ཁམས་གསུམ་གྱི་གོ་འཕང་ལས་མི་འདའ་བས། དེས་ན་ཀ་དག་རང་རིག་རང་བབ་ཆེན་པོར་བསྒོམ་མེད་མ་བཅོས་ལྷུག་པ་ཡེ་ཇི་བཞིན་པའི་གནས་ལུགས་ལ་བཟོ་བཅོས་ཀྱི་ལྷད་དང་མ་འདྲེས་པར། གུ་ཡངས་ཁྱབ་གདལ་ཆེན་པོའི་ངང་ལས་མ་གཡོས་ཤིང་། འགྲོ་འདུག་ཟ་ཉལ་སྐྱིད་སྡུག་དལ་བྲེས་ལེགས་ཉེས་ཐམས་ཅད་དང་བསྲེ་ཞིང་། སྟོང་ཉིད་སྙིང་རྗེ་ཟུང་འཇུག་ཆེན་པོའི་ཀློང་ནས། དཔལ་ལྡན་བླ་མ་མཆོག་གི་ཞབས་འབྲིང་ལ་བརྩོན་པར་ཞུ། འདིས་མཚོན་དགེ་བ་མ་ལུས་གཅིག་བསྡོམས་པའི། །དགེ་འབྲས་མི་ཟད་མཐུ་ཡིས་འགྲོ་ཀུན་ཀྱང་། །འདི་དོན་རྟོགས་ནས་འཁོར་བ་དོང་སྤྲུག་ཅིང་། །ཀུན་བཟང་ཡངས་པ་ཆེན་པོར་གྲོལ་བར་ཤོག །ཅེས་པ་ནི། བདེ་ཆེན་སྟོང་གསལ་མེ་དཔུངས་རྩལ་ལ་གདམས་པའོ།། ༈ །།ན་མོ་གུ་རུ་རཏྣ་བྷྱཿ སྐལ་ལྡན་སྤྲུལ་

[Full Size]

པའི་སྐྱེས་མཆོག་གསོན་མཛོད་དང་། །དམ་ཆོས་གཤའ་མ་སྙིང་ནས་མཛད་དགོངས་ན། ཁ་ཤས་ཚིག་གི་དགོས་དུས་ཕན་པར་དཀའ། །རང་ཉིད་མ་སྨིན་གཞན་དོན་སྐལ་བས་དབེན། །བྱ་བྱེད་བློ་མང་མི་ཚེ་སྟོང་ཟད་རྒྱུ། །དགོན་འཛིན་འཁོར་སྐྱོང་རང་དོན་རླག་པར་ཟད། །བྱ་བཏང་རི་ཁྲོད་གྲུབ་ཐོབ་ཕ་ཕོག་ཡིན། ཅིས་ཀྱང་བླ་མའི་གདམ་ངག་བསྒོམ་པར་ཞུ། །གདོད་པའི་གནས་ལུགས་ཆོས་སྐུ་རང་ལ་མཆིས། །མ་རྟོགས་འཁྲུལ་པས་འཁོར་བའི་གཏིང་རྡོ་བྱེད། །རིག་དང་མ་རིག་འཁོར་འདས་ལམ་གྱིས་ཕྱེས། །རང་རིག་རྗེན་པ་རྟོག་ན་དེ་ཀ་རང་། །གནས་ལུགས་རང་བབ་སྐྱོང་གནད་མི་ཤེས་ན། །འཇུར་སྒོམ་སྡུག་བཙིར་སྲོག་རླུང་ལྡང་བའི་རྒྱུ། །འཕྲོ་གནས་འགྱུ་རྟོགས་གང་ཤར་གདོད་དེད་ལས། །དགགས་བསྒྲུབ་རེ་དོགས་སྒོམ་གྱི་བྱུར་རྡོ་ལགས། །སྣང་གྲགས་རྒྱལ་བའི་དཀྱིལ་འཁོར་རང་སེམས་

[Full Size]

མདངས། །ལྷུན་གྲུབ་འོད་སྣང་སྣོད་བཅུད་དག་པའི་དབྱིངས། །ཐམས་ཅད་ཟུང་འཇུག་མཉམ་ཡང་ཁྱབ་གདལ་ཀློང་། །ཡོངས་འཛིན་ཞེན་པ་མེད་པར་སྐྱོང་མཛོད་དང་། །བདག་འཛིན་ཟད་ན་བར་ཆད་ཡུལ་དང་བྲལ། །དག་སྣང་འབྱོངས་ན་འགྲོ་དོན་ལྷུན་གྱི་གྲུབ། །ཉམས་རྟོག་མཐར་ཕྱིན་སངས་རྒྱས་བསྒྲུབ་རྒྱུས་དབེན། ཚེ་གཅིག་བྱང་ཆུབ་གཏན་སྲིད་འཛིན་པར་ཞུ། །ཅེས། སྤྲུལ་པའི་སྐུ་མཆོག་ཀུན་བཟང་ཆོས་དབྱིངས་རྣམ་རོལ་ལ་ཕུལ་བའོ། ཨེ་མ། སྐལ་ལྡན་རིག་པ་འཛིན་པ་ཁྱེད་ཀྱིས། །ཇི་ལྟར་བྲིས་པའི་དོན་འབྲས་དེ་བཞིན། །ཐེག་པའི་མཐར་ཐུག་རྫོགས་པ་ཆེན་པོའི། །ཉམས་ལེན་སྐྱོང་ཚུལ་འདི་བཞིན་མཛོད་དང་། །གཞི་ལམ་འབྲས་སོགས་ཁ་བཤད་མང་པོས། །སྒོམ་ཆེན་ལྟ་བ་ཁ་ཁྱེར་མིན་པར། །རང་རིག་སོ་ལ་མ་བཅོས་གནས་ལུགས། །དེ་ཉིད་བཟོ་མེད་ལྷུག་པར་ཞོག་དང་། །དེ་ལས་སྣང་བ་རྣམ་རྟོགས་ཅིར་འཆར། དགགས་བསྒྲུབ་

[Full Size]

སྤོང་བསྒྱུར་ཞེན་འཛིན་མེད་པར། །དེ་ཀའི་ངོ་ཐོག་ཅེར་གྱི་ལྟོས་དང་། །རྦ་རླབས་རྒྱ་མཚོའི་ངང་ལས་མི་འདའ། །རྐྱེན་ངན་ན་ཚ་སྡུག་བསྔལ་གང་བྱུང་། །སྟོང་ཉིད་ཡེ་ཤེས་དོན་དང་བསྲེ་ཞིང་། །ཀུན་རྫོབ་རྨི་ལམ་ལྟ་བུའི་ཚོར་བ། །འགྲོ་བའི་སྡིག་སྡུག་འཁུར་བློར་སེམས་བསྐྱེད། །སེམས་ཉིད་གནས་སམ་མཉམ་གཞག་ངོ་བོ། །འཕྲོ་བར་སྣང་ཡང་ཆོས་ཉིད་རང་རྩལ། །གནས་འགྱུ་གང་ཡང་རང་ངོ་རིག་ན། །ཐམས་ཅད་སྐུ་གསུམ་ལྷུན་གྲུབ་ཆེན་པོ། །ཉོན་མོང་ངན་གོམ་རང་ཁར་མི་གཏང་། །བཟང་ལོད་ངར་འཛིན་མངའ་ཐང་མི་བསྐྱེད། །རང་བབ་ཆོས་སྐུ་སྤྲོས་བྲལ་ཀློང་ནས། །དག་སྣང་མོས་གུར་སྙིང་རྗེར་རྩལ་སྦྱངས། །ཉིན་མཚན་རྨི་ལམ་འཆི་ཁ་བར་དོ། །ཐམས་ཅད་བདེན་མེད་སྒྱུ་མར་ཤེས་པས། །འཁོར་བའི་རུ་ལོག་ཆོས་སྐུ་ཁོར་ཡུག །ཀ་དག་ལྷུན་གྲུབ་བརྩན་ས་བཟུང་མཛོད། །ཉམས་ལེན་འགགས་དོན་ཚིག་

[Full Size]

གསུམ་གནད་དྲིལ། །མཁའ་འགྲོའི་ཚོགས་ཁང་རྒོད་ཚང་ཕུག་ནས། །མགུར་དབྱངས་སྙན་པོའི་གདབ་ལེན་ཕུལ་བས། །འདི་ཡི་དགེ་བས་འགྲོ་བ་གྲོལ་གྱུར་ཅིག །ཅེས་དབོན་པོ་ཀརྨ་དོན་འགྲུབ་ལ་གདམས་སོ།། ༈ །།སྲིད་པ་གསུམ་ན་ཟླ་བྲལ་བའི། །བླ་མ་ཡིད་བཞིན་ནོར་བུ་མཆོག །དམིགས་མེད་བརྩེ་ཆེན་ཐུགས་རྗེ་ཡིས། །དུས་དང་རྣམ་པ་ཐམས་ཅད་དུ། །གཡེལ་བ་མེད་པར་གཟིགས་སུ་གསོལ། །འཁོར་བ་མཐའ་མེད་གཏན་འཁྱམས་པའི། །ཉམས་ཐག་རྨོངས་པའི་འགྲོ་བ་ཀུན། །བདེ་ཆེན་བྱང་ཆུབ་སྙིང་པོའི་ཞིང་། །མྱུར་བ་ཉིད་དུ་བསྒྲོད་པར་ཤོག །ཀྱཻ། སྐལ་ལྡན་གྱི་རྣལ་འབྱོར་པ་གསོན་དང་། འཁོར་བའི་སྡུག་བསྔལ་ནི་ཤུགས་དྲག ཚེ་འདིའི་སྣང་བ་ནི་ཡུན་ཐུང་། བག་ཆགས་ངན་པ་ནི་ཚན་ཆེས། ཉམས་ལེན་སྙིང་པོ་རྩེ་གཅིག་ཏུ་དྲིལ་ནས་འཁོར་བའི་གཡུལ་ལས་ད་རེས་རྒྱལ་བ་ཞིག་མ་བྱུང་ན། ཅི་བྱས་དོན་མེད་ཀྱི་རང་བཞིན་ཁོ་ན་ལས་མ་འདས་

[Full Size]

པས། དེས་ན། གང་ལའང་ཞེན་པ་མེད་པར་ཚེ་འདི་བློ་ཡིས་ཐོང་ལ་ཅིས་ཀྱང་དགོས་མེད་བསོམ། རང་རིག་ཆོས་སྐུའི་རང་ཞལ་མ་མཐོང་ན་མི་ཚེ་ཆོས་ལ་བསྐྱལ་བར་བརློམ་ཀྱང་འཆི་ཁར་ཕན་པ་མེད། ཡེངས་མེད་དྲན་རིག་མ་བསྐྱངས་ན་རྣམ་རྟོག་རང་དགར་འཆོར། རྐྱེན་ངན་ལམ་དུ་མ་ལྷོངས་ན་སྒོམ་གྱི་བོག་མི་འཐོན། བླ་མ་སངས་རྒྱས་སུ་མ་མཐོང་ན་བྱིན་རླབས་ཀྱི་མཚན་ཁ་མི་འབབ། སྙིང་རུས་རྩེ་གཅིག་མ་བྱས་ན་ཉམས་རྟོགས་ཀྱི་དྲོད་རྟགས་མི་འབྱུང་བས། དེས་ན་སྐྱིད་སྡུག་ལེགས་ཉེས་བཟང་ངན་གྱི་འཆར་སྒོ་སྙེད་པ་གང་ཤར་རང་གྲོལ་ཁྱབ་གདལ་ཆེན་པོར་ཐག་ཆོད་པའི་ངང་ནས། དག་སྣང་མོས་གུས་སྙིང་རྗེ་བྱང་སེམས་དམ་སྡོམ་ཐམས་ཅད་རང་སེམས་དཔང་དུ་ཚུགས་པའི་ངང་ནས། དོན་གཉིས་ལྷུན་གྲུབ་ཏུ་མཛད་འཚལ། ཅེས་རྣལ་འབྱོར་མཐོང་གྲོལ་རྒྱལ་

[Full Size]

པོ་ལ་གདམས་སོ།། ༈ །།ཀྱེ་མ་དལ་འབྱོར་མི་ལུས་ཡང་ཡང་མི་ཐོབ་ད་རེས་སྟོང་ལོག་མ་བྱེད་དོན་དང་ལྡན་པར་མཛོད། འདུས་བྱས་མི་རྟག་མྱུར་དུ་འཆི་དུས་ཆོས་མིན་ཅིས་ཀྱང་ཕན་པ་མེད། འཁོར་བ་སྡུག་བསྔལ་ཁོ་ན་འདི་ལས་མྱུར་དུ་ཐར་ཐབས་དམ་པའི་ལྷ་ཆོས་འབད་ཆོས་ཀྱི་ རྣམ་གྲངས་མང་ཀྱང་སངས་རྒྱས་ཐོབ་པའི་ཉེ་ལམ་སྒོམ་ལས་གཞན་མ་ཡིན། སྒོམ་ཞེས་མིང་དུ་བཏགས་པ་དེ་ཡང་དོན་ལ་དམིགས་གཏད་བསྒོམ་རྒྱུ་རྡུལ་ཙམ་མེད། མ་རིག་འཁྲུལ་སྣང་འདི་ཡི་རྗེས་སུ་འབྲེང་ན་འཁོར་བའི་ས་བོན་ཉིད་དུ་འགྱུར། རང་སེམས་སྐུ་གསུམ་དབྱེར་མེད་ཡེ་ནས་ལྷུན་གྲུབ་རྟོགས་པས་ཅིར་ཤར་སྒོམ་གྱི་རང་བཞིན་ལགས། ཞེན་འཛིན་འཇུར་སྒོམ་མིན་པར་རང་རིག་རང་འགྲོས་བབ་ལུགས་སྐྱོང་བ་གནད་ཀྱི་དམ་པ་སྟེ། བློ་གྲོས་བཅོས་རྒྱས་འདེབས་མི་བྱེད་གང་སྣང་ཅིར་ཤར་རིག་པས་ངོ་ཤེས་ཙམ་གྱིས་ཆོག །རང་ངོ་ཤེས་པའི་

[Full Size]

ཆོས་སྐུ་ཁྱབ་གདལ་ཀློང་ནས་སྣང་གྲགས་བཟང་ངན་རྟོག་ཚོགས་ཐམས་ཅད་ལམ་དུ་ཁྱེར། ཀུནབཟང་ཐིག་ལེ་ཉག་གཅིག་དབྱིངས་ནས་དག་སྣང་མོས་གུས་སྙིང་རྗེའི་རྩལ་ཆེན་སྦྱོངས། ད་ལྟ་ཤི་ཡང་འགྱོད་མེད་གདེང་ཚད་ཀ་དག་ལྷུན་གྲུབ་བརྩན་ས་ཟིན་པར་མཛོད། འདི་ལྟར་གདམས་པའི་དགེ་བས་འགྲོ་ཀུན་འདི་དོན་རྟོགས་ནས་ཆོས་སྐུར་གྲོལ་བར་ཤོག །ཅེས་པ་ནི། དད་ལྡན་ནམ་མཁའ་ཆོས་དབང་ལ་གདམས་པ་ཨིྀྠ།། ༈ །།མཉམ་མེད་བླ་མའི་ཞབས་ལ་བཏུད་ནས། །དད་ལྡན་མཁའ་སྤྱོད་དབང་པོས་བསྐུལ་ངོར། །སྙིང་གཏམ་གདམ་ངག་ཅུང་ཟད་བཤད་ཀྱི། ཁ་ཁྱེར་མ་ཡིན་སེམས་ལ་སྦྱོར་མཛོད། །དལ་འབྱོར་མི་ལུས་སྐྱོན་མེད་ཐོབ་ཅིང་། །ཐེག་ཆེན་དགེ་བའི་བཤེས་དང་མཇལ་དུས། །རྣམ་གཡེངས་ལེ་ལོ་ཆོས་མིན་སྤངས་ཏེ། །བཀའ་སྤྱད་སྙིང་རུས་ཆོས་ཕྱོགས་གྱིས་དང་། །སྙིགས་དུས་ཆོས་པའི་གཟུགས་བརྙན་མང་ཀྱང་། །ཆོས་མཐུན་

[Full Size]

ཉིན་མོའི་སྐར་མ་ཇི་བཞིན། །སྡིག་སྤྱོད་བསྟན་པའི་ཆོམ་རྐུན་མང་བའི། ཚུལ་འདིར་བསོམ་ལ་རང་མགོ་སྒྲིམ་རན། །འཇིག་རྟེན་བྱ་བ་དོན་མེད་ལས་ལ། །ལུས་སྲོག་ལོངས་སྤྱོད་ཆུ་ལ་འཕོ་ལུགས། །འདི་འདྲ་བསམ་ནས་ཆོས་ཕྱིར་བརྩོན་འགྲུས། །འགྱོད་པ་མེད་ཅིག་ཅིས་ཀྱང་བགྱིས་དང་། །རང་སེམས་སངས་རྒྱས་རང་ངོ་ཤེས་ནས། །ཀ་དག་ལྷུན་གྲུབ་ཉམས་ལེན་རྩེ་གཅིག །གྲུབ་ཐོབ་གོང་མའི་རྣམ་ཐར་འཁྱོངས་ཤིང་། །འཆི་ཁར་འགྱོད་མེད་གྲབ་ཆུད་ཀྱིས་དང་། །རྣམ་རྟོག་འགྱུ་དྲན་ཕྲ་རག་ཀུན་ལ། །མི་འགེགས་མི་བསྒྱུར་རྗེས་སུ་མི་འབྲངས། །རང་བབས་མ་བཅོས་ལྷུག་པར་ཞོག་ལ། །ཅིར་སྣང་ཆོས་ཉིད་ཀློང་དུ་གློད་དང་། །དད་དང་དམ་ཚིག་བླ་མ་མཉེས་ཤིང་། །ཉམས་རྟོག་གོང་འཕེལ་དོན་གཉིས་འགྲུབ་པའི། །བྱ་བཏང་ཆོས་པའི་ཡང་རྩེ་གྱིས་ཞེས། །སྙིང་གཏམ་ཟབ་མོ་ཡིད་ལ་ཞོག་ཅིག །ཅེས་མཁའ་སྤྱོད་དབང་མོ་ལའོ། །

[Full Size]

རབ་འབྱམས་རྒྱལ་བའི་དཀྱིལ་འཁོར་མཐའ་ཡས་ཀྱི། །ཐུགས་རྗེ་མཁྱེན་རྩེ་མ་ལུས་གཅིག་བསྡུས་པའི། །དཔལ་ལྡན་བླ་མ་རིག་ཀུན་ཁྱབ་བདག་མཆོག །ཞབས་ལ་རྣམ་པ་ཀུན་ཏུ་ཕྱག་བགྱིའོ། ཨེ་མ། སྐལ་ལྡན་གྱི་རྣལ་འབྱོར་པ་ལེགས་པར་གསན་འཚལ། འོ་སྐོལ་ད་ལན་དལ་འབྱོར་གྱི་མི་ལུས་ཕུན་ཚོགས་ནི་ཐོབ། ཐེག་ཆེན་གྱི་བསྟན་མཆོག་རིན་པོ་ཆེ་དང་ནི་མཇལ། དམ་ཆོས་ཚུལ་བཞིན་སྤྱོད་པའི་སྐལ་བ་དང་རང་དབང་ཡོད་པའི་དུས་འདིར་མི་ཚེ་སྟོང་ཟད་དོན་མེད་དུ་མ་སོང་བར་གཏན་གྱི་མདུན་མ་ཡང་དག་འགྲུབ་པ་ཞིག་མཛད་འཚལ། བསྟན་པའི་རྣམ་གྲངས་ནི་མཐའ་ཡས། ཐེག་པའི་འཇུག་སྒོ་ནི་གྲངས་མང་། བཤད་པའི་ཚིག་ཚོགས་ནི་རྒྱ་ཆེ་ཡང་དོན་གྱི་སྙིང་པོ་ཉམས་ལེན་ཞིག་མ་ནུས་ན་ཆོས་ཀྱི་གླེགས་བམ་འབུམ་ཕྲག་བློ་ལ་ཡོད་ཀྱང་འཆི་ཁར་ཕན་ངེས་

[Full Size]

དཀའ་ཞིང་། ཐོས་བསམ་ཤེས་བྱའི་ཡོན་ཏན་དཔག་མེད་མཆིས་ཀྱང་སེམས་རྒྱུད་ཆོས་དང་མ་མཐུན་ན་ཉོན་མོངས་ཀྱི་དགྲ་བོ་མི་འཐུལ་ཅིས་ཀྱང་དགོས་མེད་ཀྱི་བློ་སྣ་ནང་ནས་མ་བསྟུང་ན་སྟོང་ཁམས་ལ་རང་དབང་བསྒྱུར་ཀྱང་འདོད་པ་མཆོག་ཤེས་མི་འབྱུང་། ནམ་འཆི་ཆ་མེད་ཀྱི་སྔ་གྲབ་མྱུར་དུ་མ་བྱས་ན་ཤི་ཁར་དགོས་ངེས་ཀྱི་དོན་ཆེན་མི་འགྲུབ། རང་སྐྱོན་རང་གིས་འདུལ་ཞིང་དག་སྣང་ཕྱོགས་མེད་མ་སྦྱངས་ན་ཆགས་སྡང་ཀུན་སློང་ཅན་ནི་ཐེག་ཆེན་གྱི་ཁྱུར་མི་ཆུད། ཁམས་གསུམ་རིས་དྲུག་གི་སེམས་ཅན་ཐམས་ཅད་དྲིན་ཅན་ཕ་མར་མ་གྱུར་པ་སུ་ཡང་མེད་པས་སྙིང་རྗེ་བྱང་སེམས་རྒྱུན་ཆད་མེད་པའི་སྒོ་ནས་སྨོན་ལམ་རྣམ་དག་མ་བཏབ་ན་གཞན་གྱི་གཏེར་ཁ་མི་ཕྱེད། དྲིན་ཅན་གྱི་བླ་མ་ལ་སངས་རྒྱས་ལས་ལྷག་པའི་མོས་གུས་མ་བྱས་ན་བྱིན་རླབས་ཀྱི་མཚན་ཁ་མི་འབྱུང་། བྱིན་རླབས་ཤ་མ་ཞིག་

[Full Size]

མ་ཞུགས་ན་ཉམས་རྟོགས་ཀྱི་མྱུ་གུ་མི་སྐྱེ། རྟོགས་པ་ནང་ནས་མ་ཤར་ན་ཁ་བཤད་དང་གོ་ཡུལ་སྐམ་པོས་བྱང་ཆུབ་ཀྱི་འབྲས་བུ་མི་སྨིན་ཅིང་། མདོར་ན་ཆོས་དང་རང་རྒྱུད་མ་འདྲེས་ན་ཆོས་པའི་གཟུགས་བརྙན་ཙམ་གྱིས་ནི་དགོས་པ་མི་ཡོང་ཚེ། སྲོག་འཚོ་ལྷག་སྐྱོབ་ཙམ་ལ་བརྟེན་ཅིང་ཅིས་ཀྱང་དགོས་མེད་བསམ། བླ་མའི་རྣལ་འབྱོར་བསྒོམ་ཞིང་གསོལ་འདེབས་ལ་བརྩེ་གཅིག་ཏུ་འབད། དགེ་སྦྱོར་ཅི་བྱེད་ཐམས་ཅད་ཕ་མ་སེམས་ཅན་གྱི་དོན་དུ་དམིགས། སྐྱིད་སྡུག་ལེགས་ཉེས་ཅི་བྱུང་དཀོན་མཆོག་གི་ཐུགས་རྗེར་བསྒོམ། རང་རིག་གང་ཤར་འཛིན་མེད་ཀྱི་ཀློང་ནས་མ་བཅོས་བཟོ་མེད་ལྷུག་པར་གཞག །རྣམ་རྟོག་གང་སྐྱེས་རང་ངོ་ཤེས་པར་བྱས་ན་ཐམས་ཅད་ཀྱི་རོལ་པར་གྲོལ། དམིགས་གཏད་མཚན་མའི་སྒོམ་རྒྱུ་སྤུ་ཙམ་མེད་ཀྱང་ཐ་མལ་འཁྲུལ་འབྱམས་ཀྱི་དབང་དུ་སྐད་

[Full Size]

ཅིག་ཀྱང་མི་བཏང་བར་སྤྱོད་ལམ་ཀུན་དུ་དྲིན་པ་ཡེངས་མེད་བྱ། །སྣང་གྲགས་ཚོགས་དྲུག་གང་བྱུང་ཅིར་ཤར་ཐམས་ཅད་བདེན་མེད་རྨི་ལམ་སྒྱུ་མའི་རྩལ་སྦྱངས་བྱས་ལ་བར་དོ་ཉམས་འོག་ཏུ་འཇུག །མདོར་ན་དུས་དང་རྣམ་པ་ཐམས་ཅད་དུ་ཅི་བྱེད་དམ་པའི་ཆོས་སུ་འགྲོ་བར་བྱས་ལ་དགེ་རྩ་འགྲོ་ཀུན་བྱང་ཆུབ་ཏུ་བསྔོ། དེ་ལྟར་མཛད་ན་བླ་མའི་དགོངས་པ་རྫོགས་ཤིང་། བསྟན་པའི་ཞབས་གཏོགས་འགྲུབ། བླ་མའི་དྲིན་ལན་འཁོར་ཞིང་དོན་གཉིས་ལྷུན་གྲུབ་ཏུ་འབྱུང་བར་འགྱུར་བས་འདི་བཞིན་ཐུགས་ལ་བཞག་པར་ཞུ་ཞིང་། བདག་དང་དངོས་སུ་འཕྲད་ཀྱང་གདམས་པ་འདི་ལས་ལྷག་པ་བཤད་རྒྱུ་མེད་པས། དུས་དང་རྣམ་པ་ཀུན་ཏུ་ཐུགས་ཉམས་སུ་བཞེད་འཚལ། །ཅེས། དགེ་སློང་ཀརྨ་དབང་ཕྱུག་ལ་གདམས་པའོ།། ༈ །།སྲིད་པ་གསུམ་ན་འདྲན་ཟླ་མ་མཆིས་པའི་སྐྱབས་གནས་མཆོག་གི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་

[Full Size]

རླབ་ཏུ་གསོལ། ཨེ་མ་སྐལ་ལྡན་གྱི་དགེ་སྦྱོངས་ལེགས་པར་གསན་འཚལ། །དལ་འབྱོར་ཕུན་ཚོགས་བརྙེད་པར་དཀའོ་ད་རེས་དོན་དང་ལྡན་པར་མཛོད། །ནམ་འཆི་ཆ་མེད་སྙིང་ནས་མ་བསམ་ལོང་ཡོས་ལེ་ལོས་མི་ཚེ་ཟད། །ཅིས་ཀྱང་དགོས་མེད་གཏིང་ནས་མ་དྲན་བདུད་ཀྱི་བསླུ་བྲིད་གཡོ་ཐབས་མཁས། །ཚེ་འདི་བློ་ཡིས་བཏང་ནས་གྲུབ་ཐོབ་གོང་མའི་རྣམ་ཐར་རྗེས་ཞུགས་མཛོད། །ཐོས་བསམ་སློབ་གཉེར་ཚིག་ཚོགས་མང་པོས་ངེས་དོན་སྙིང་པོའི་རང་ཞལ་བསྒྲིབས། །ལྟར་སྣང་མཛེས་པའི་སྤྲོས་བཅས་ཆོས་་ཀྱིས་སེམས་ཀྱི་བྱིའུ་ཆུང་སྒྲོག་ཏུ་འབད། །ང་བཟང་གྲུབ་མཐའ་ཞེན་ཕྱོགས་དག་གིས་རང་རྒྱུད་ལྐོ་སྐམ་རེངས་པའི་རྒྱུ། །བློ་ཡི་གཞུ་མོ་ནང་དུ་བཀུགས་ནས་ཆོས་དང་སེམས་སུ་འདྲེས་པར་མཛོད། །སྲོག་འཚོ་གྱི་ན་ལྷག་སྐྱབས་ཙམ་ལ་ཆོག་ཤེས་རང་ཚོད་རང་གིས་

[Full Size]

གཟུང་། །དོ་ནུབ་ཨེ་འཆི་དེ་བར་གཡེལ་མེད་དགེ་ལ་འབད་པ་ངང་གིས་བསྐུལ། །ཆོས་པའི་མལ་དུ་ཐ་མལ་རོ་ཁོག་ལུས་ན་སེར་གཟུགས་དགོས་པ་ཅི། །བླ་མའི་གདམ་ངག་རྩེ་གཅིག་ཉམས་བླངས་སྒྲུབ་པའི་ཞབས་གཏོགས་མཐར་ཕྱིན་མཛོད། །ཟབ་ཟབ་ཡིན་སྣ་ཁ་མང་ཀྱང་རང་སེམས་རང་ངོ་ཤེས་པ་དཀོན། ཐོབ་ཐོབ་ཞུ་ལོ་བསྒོམ་མོ་མཁན་ཚོ་རྐྱེན་ངན་བྱུང་དུས་རང་འཚངས་སྟོན། །མ་བཅོས་ཀློང་ཡང་རང་བབ་ངང་ནས་དྲན་རིག་ཡེངས་མེད་བྱ་རས་བསྐྱངས། །སྟོང་ཉིད་རང་རྩལ་མོས་གུས་དག་སྣང་སྙིང་རྗེའི་གྲོགས་དང་མ་བྲལ་མཛོད། །དམ་ཚིག་སྡོམ་པ་ངོས་ལྐོག་མེད་པར་ཚེ་དང་སྒྲུབ་པ་ལྷན་ཅིག་འགྲོགས། །ང་རྒྱལ་ཁེ་གྲགས་ལོ་འདོད་སྤངས་ཤིང་བཟང་ངན་འབྲིང་ཀུན་སྤྱི་བོར་འཁུར། །ཀུན་དང་མཐུན་པ་རང་འཚོ་ཐུབ་པས་ལོག་ལམ་མ་གོལ་བླ་མའི་དྲིན། །ལེགས་པར་བསམ་ནས་ཐར་པའི་

[Full Size]

གོ་འཕང་ད་ལན་ཐོབ་མཛོད་སྙིང་གཏམ་ལགས། །དེ་ལྟར་ལྷག་བསམ་དགེ་བ་ཡིས། །ལེགས་པར་གདམས་པ་འདིས་མཚོན་དགོས། །མ་གྱུར་མཁའ་མཉམ་འགྲོ་ཀུན་ཀྱང་། །མ་ནོར་བྱང་ཆེན་ལམ་ཞུགས་ཤོག །ཅེས་པ་འདི་ནི་དགེ་སྦྱོངས་ཀརྨ་རིག་འཛིན་ལ་གདམས་པའོ།། ༈ །།སྐྱབས་མཆོག་བསླུ་མེད་ཀྱི་བླ་མ་དང་། །དབྱེར་མེད་རང་རིག་ཆོས་ཀྱི་སྐུ། །ཡིན་ལུགས་རྟོགས་པའི་མནྜལ་དང་། །འདུ་འབྲལ་མེད་པ་ཕྱག་གིས་མཆོད། །སྲིད་ཞི་གཏན་སྒྲོལ་གྱི་དངོས་གྲུབ་ཞུ། ཨེ་མ། གསོན་དང་སྐྱེས་མཆོག་བླ་མའི་བུ། །སྔོན་འཁོར་བ་ཐོག་མེད་ད་བར་དུ། །ལུས་དེ་ཙམ་བླངས་ཤིང་དོར་བྱས་ཀྱང་། །སེམས་འཁྲུལ་པའི་བག་ཆགས་མ་སངས་པས། །འཁོར་བར་གཏན་འཁྱམས་འདི་ཨ་རེ་སྐྱོ། །དལ་འབྱོར་ཕུན་ཚོགས་ཐོབ་ནས་ཀྱང་། །མཚན་ལྡན་རྗེ་དང་མཇལ་གྱུར་ཞིང་། །རྒྱལ་བསྟན་

[Full Size]

མཆོག་ལ་ཞུགས་བྱས་ཀྱང་། །ཚེ་འདི་དོན་འབའ་ཞིག་བསྒྲུབ་པ་ལས། །ཆོས་སྙིང་པོར་དྲིལ་བ་དཀའ་བར་ཟད། །ཚིག་ཐོས་བསམ་ཀུན་ཐ་སྙད་ཀྱི་མགོ་སྐོར་དང་། །དོན་ཉམས་ལེན་ཡང་རེ་འདོད་ཀྱི་སྒྲོགས་ཀྱིས་བཅིངས། །ལས་བྱས་ཚད་རྣམས་ལྟོ་གོས་ཀྱི་ཁོལ་པོར་སོང་། །གང་ཅི་ལ་བསམ་རུང་ལྷ་ཆོས་དེ། །རྒྱུད་ཐོག་ཏུ་ཁོལ་བ་དིང་སང་དཀོན། །གཞན་དོན་དུ་བཏང་བའི་ཟར་ཟིར་ཀུན། །སག་ཤི་བྲོ་བའི་རྩེ་མོ་འདྲ། །ཐང་ཆད་ཆད་འབུངས་ཀྱང་དོན་གྱིས་དབེན། །འདི་བསམ་ཞིང་སྙིང་གི་དཀྱིལ་ནས་འགྱོད། །གོས་དམར་སེར་གྱོན་ཅིང་སྐྲ་བྲེག་པའི། །མི་རྨུ་རྒོད་ཚོགས་པའི་ཕོ་ཁྲོམ་ལ། །མིང་བསྟན་པར་བཏགས་ནས་ཆོས་མིན་འབད། །ད་འདི་འདྲའི་བླ་མར་མི་སྐྱེ་བར། །སྨོན་ལམ་དེ་ཁ་ཞེ་མེད་པར་འདེབས། །བློ་ཆགས་སྡང་དུག་ལྔའི་མེ་སྤུངས་སྟེང་། །དཀོར་ཟས་ནོར་གྱི་ཤིང་ཚན་ཆེར་

[Full Size]

བསྣན་པས། །བླ་མ་ལོག་ལྟས་བསྲེག་པའི་གྲྭ་སློབ་ལ། །བལྟས་ཀྱིན་བློ་ཕུག་སྤྲང་ལ་གཏོད་པར་སྤྲོ། །ལར་རྨི་ལམ་ཙམ་གྱི་མི་ཚེ་འདིར། །ལས་སྡིག་པའི་ས་བོན་དགོན་འཛིན་དང་། །རང་གཞན་གཉིས་ཕུང་གི་འཁོར་སྐྱོང་དེ། །སྔར་བྱས་པ་འགྱོད་ཅིང་འཁྲུལ་བས་སྐྱོ། །ད་རང་མགོ་འདོན་པ་ཡོང་ལ་རེ། །དེ་བདག་འདྲའི་ལོ་རྒྱུས་ཞུས་པ་ལགས།། ༈ །ཁྱེད་མཚུངས་བྲལ་པདྨ་བློ་གྲོས་སོགས། །ཕ་མཚན་ལྡན་གྱི་ཞལ་གདམས་ཐོབ་ངེས་ཚེ། །བློ་ཁ་འཇིག་རྟེན་འཁྲུལ་ཕྱིར་མ་འབྲངས་པར། །སེམས་ཆོས་དང་འདྲེ་ངེས་མཛད་པར་ཞུ། །ཆོས་གྲུབ་མའི་ཆགས་སྡང་ཁ་འཛིན་དང་། །རང་རྒྱལ་འདོད་མཐོ་འདོད་བཟང་འདོད་སོགས། །ངར་འཛིན་འདིས་ཆོས་པ་ཀུན་བཅོམ་པས། །དག་སྣང་གི་མིག་རྒྱ་ཆེ་བར་མཛོད། །ཐོས་བསམ་དང་བསླབ་ཤེས་ཡོན་ཏན་འདིས། །

[Full Size]

རང་རྒྱུད་སྐམ་རེང་དུ་གཏང་བ་མང་། །ཀུན་ཉོན་མོངས་ཀྱི་གཉེན་པོར་འགྱུར་ཐབས་ཞིག །གཏིང་དམ་པ་ནས་མཛོད་དང་སྙིང་གཏམ་ལགས། །སྙན་གྲགས་གདུལ་བྱའི་འདུ་ལོང་ལ། །མིང་འགྲོ་དོན་དུ་བཏགས་པའི་ནོར་སྡུད་དང་། །དམ་མེད་གཡོ་ཅན་ཚོགས་པའི་གྲྭ་འཁོར་སོགས། །བླ་མའི་སྐུ་ཚེ་བསྟུང་བའི་དུག་ཆེན་ལགས། །འཆི་བ་སྙིང་དྲན་གྱི་ངེས་འབྱུང་དང་། །ཅིས་ཀྱང་དགོས་མེད་ཀྱི་ཞེན་ལོག་དང་། །ཅི་མཛད་ལེགས་མཐོང་གི་མོས་གུས་སོགས། །ཞེ་ཐག་པར་བསྐྱེད་མཛོད་སྙིང་གཏམ་ལགས། །སྡོམ་དམ་ཚིག་ལ་རང་སེམས་དཔང་གཙུག་དང་། །ཆོས་ཉམས་ལེན་ལ་རང་རྒྱུད་འཐུལ་ནུས་དང་། །གཞན་འགྲོ་ཕན་ལ་རང་འདོད་འཁྲིས་མེད་རྣམས། །དགོས་ངེས་ཀྱང་དཀོན་པར་གཟིགས་ལགས་སམ། །ཆོས་ཐོབ་ཀྱང་ཉམས་སུ་མི་ལེན་དང་། །གཞན་ལ་འཆད་ཀྱང་རང་མ་སྨིན། །མཚོ་འགྲམ་དུ་སྐོམ་གྲིར་ཤི་

[Full Size]

བའམ། །སྨན་པ་རང་ནད་ཀྱིས་འཆི་དང་མཚུངས། །རང་དོན་བརྩན་ས་ཟིན་པའི་ཚེ། །གཞན་དོན་མ་འབད་ལྷུན་གྱིས་གྲུབ། །དུས་དིང་སང་གི་གཞན་དོན་ཕལ་མོ་ཆེ། །ལོང་བས་ལོང་ཁྲིད་དུ་གདའ་ལགས་མོད། །ལམ་བསྐྱེད་རིམ་ལ་བརྡའ་དོན་རྟགས་གསུམ་གྱི། །གནད་ཚུལ་བཞིན་ཤེས་པའི་ཉམས་ལེན་དགོས། །ཨ་འཐས་ཀྱི་བསྐྱེད་བཟླས་ཅི་འབད་ཀྱང་། །དངོས་གྲུབ་འབྱུང་བའི་རེ་ཐག་ཆོད། །ཆོས་ཕྱག་རྫོགས་དབུ་མ་ཞི་བྱེད་སོགས། །རྣམ་གྲངས་ཀྱི་བྱེ་བྲག་བསམ་འདས་ཀྱང་། །མ་བཅོས་རང་རིག་ཆོས་སྐུ་དངོས། །རྗེན་པར་མཐོང་མཁན་དཀོན་པར་ཟད། །སེམས་འགྱུ་བ་བཀག་པའི་སྡུག་བརྩིར་དང་། །རྣམ་རྟོག་རྗེས་འབྲེང་གི་འཁྲུལ་བློ་དང་། །སྒོམ་བྱེད་དོ་སྙམ་པའི་བློས་བྱས་སོགས། །ཀུན་བྱང་ཆུབ་ཀྱི་རྒྱུ་རུ་ག་ལ་འགྲོ། །ལྟ་བ་མཐོ་འདོད་ངར་འཛིན་ཡིན། །སྒོམ་

[Full Size]

པ་བཟང་འདོད་བཅོས་མ་ཉིད། །འབྲས་བུ་ཐོབ་འདོད་རེ་དོགས་ཏེ། །དེ་ཐམས་ཅད་འདོད་བློའི་བདུད་ཀྱི་ཟིན། །བདུད་རང་སེམས་ཀྱི་ཕུགས་སུ་བཅངས་བྱས་ནས། །ཕྱི་བསྲུང་འཁོར་བགེགས་བསྐྲད་འདྲེ་འདུལ་གྱི། །ཐབས་རྟེན་འབྲེལ་འབུམ་ཕྲག་བྱས་ན་ཡང་། །གེགས་བར་ཆད་བཟློག་པར་ཅི་ལ་འགྱུར། །ལར་འཁོར་འདས་དགྲ་གཉེན་ནད་གདོན་དང་། །སྐྱིད་སྡུག་སོགས་བག་ཆགས་འཁྲུལ་སྣང་ཙམ། །འདི་བདེན་པར་མི་བཟུང་ཁྱད་མི་གསད། །སེམས་རྩལ་མདངས་སུ་ཤེས་ན་གཞན་ཅི་དགོས། །ཕྱི་སྣང་གྲགས་ལྷ་སྔགས་ཕུང་ཁམས་ཀུན། །ཡེ་གདོད་ནས་དཀྱིལ་འཁོར་ཆེན་པོར་འགྲུབ། །དེ་མ་རྟོགས་འཁྲུལ་ངོའི་སྣང་བ་འདིར། །ཞེན་འཛིན་གྲོལ་ན་དབང་བཞི་ཐོབ། །མགོ་རྡོལ་རྡོལ་དུ་དབུ་མར་ཞུས་བྱས་ཤིང་། །རྣ་བ་ཚ་ཚར་ཆོས་ཉན་ཀྱང་། རང་སྣང་ལོག་པའི་སོལ་གདོང་དེ། །དངུལ་ཤུགས་ཀྱང་དཀར་པོ་འགྱུར་བར་དཀའ། །ཚེ་བསྐལ་པར་ཐོས་བསམ་སྒོམ་སྒྲུབ་ལ། །

[Full Size]

འབད་རློམ་ཀྱང་རང་རིག་གནས་ལུགས་གཤིས། །འདི་ཇི་བཞིན་མ་རྟོགས་ཐབས་གཞན་གང་། །ཅི་འབུངས་ཀྱང་བྱང་ཆུབ་ཐོབ་པར་དཀའ། །གནད་བླ་མའི་གདམ་ངག་བྱིན་རླབས་བཅུད། །དེས་གསེར་འགྱུར་རྩི་ཐོབ་བཞིན་དུ་གྲོལ།། ༈ །།ཀྱཻ། མང་དུ་བརྗོད་ཀྱང་ཚིག་ལ་ཟད་པ་མེད། །གནད་དོན་སྙིང་པོར་བསྐྱེད་རྫོགས་དབྱེར་མེད་དུ། །མ་ཡེངས་མི་སྒོམ་ཚོགས་དྲུག་ལྷུག་པར་ཞོག །སངས་རྒྱས་ཉེ་ལམ་ཐབས་གནད་འདི་ཀ་ཟབ། །བླ་མ་སངས་རྒྱས་ཐག་ཆོད་གསོལ་བ་གདབ། །འགྲོ་ཀུན་ཕ་མར་ཤེས་པའི་བྱམས་བརྩེ་བསྐྱེད། །ཅིར་སྣང་སེམས་སུ་རྟོགས་པས་ལམ་ཁྱེར་བྱ། །རྒྱུ་འབྲས་ཁྱད་དུ་མི་གསད་དགེ་བ་བསྒྲུབས། །འདི་སྐྱིད་ཞེན་འཛིན་མི་བྱ་ཐུགས་རྗེར་བསམ། །སྡུག་བསྔལ་སྐྱོན་དུ་མི་ལྟ་སྒྲིབ་པ་སྦྱོང་། །རྣམ་རྟོག་བཀག་པའི་མི་ཁེགས་རང་ངོ་ལྟོས། །ཉམས་ལ་བརློམ་སེམས་མི་བྱ་རང་བབས་གློད། །ཉམས་ལེན་རེས་འཇོག་མི་བྱ་རྒྱུན་

[Full Size]

འཐུད་འབུངས། །འབྲས་བུ་ཐོབ་རིངས་མི་འགོས་སྒྲུབ་སྙུགས་སྲིང་། །འབྲེལ་ཚད་དགེ་ལ་འཁོད་པའི་སྨོན་ལམ་ཐོབ། །ཉམས་ལེན་སྙིང་པོར་དྲིལ་དང་དོན་མཆོག་འགྲུབ། །བདག་འདྲའི་སྙིང་གཏམ་ཡིན་ནོ་ཐུགས་ལ་བསྟིམ། །དངོས་སུ་མཇལ་ཡང་བཤད་རྒྱུ་དེ་བས་མེད། །བྱང་ཆུབ་བར་དུ་མི་འབྲལ་སྨོན་ལམ་འཚལ། །འདི་ལྟར་གདམས་པའི་དགེ་དེས་འགྲོ་ཕན་ཤོག །ཅེས་ཁམས་ཀ་ཐོག་པ་བླ་མ་བཀྲ་ཤིས་བློ་གྲོས་པོས་བསྐུལ་ངོར་གདམས་པའོ།། ༈ །།ཀྱེ་མ། ལུས་དལ་འབྱོར་གྱི་ལྗོན་པ་ལེགས་བྱས་ཀྱང་། །རྐྱེན་བློ་བུར་གྱི་དགྲ་མགོ་མང་ལ་རྒོད། །འཆི་བ་ཐོག་བབས་སུ་བྱུང་ན་འགྱོད་མེད་ཀྱི། །གདེངས་ཆེན་གྲབས་ཆུད་མཛོད་དང་སྙིང་གཏམ་ལགས། ༡ །འཕྲལ་སྐྱིད་འདོད་ཀྱི་ལྟོ་གོས་རྩོལ་སྒྲུབ་ཀྱི། །ཕུག་དགོས་ངེས་ཀྱི་ལྷ་ཆོས་ཕྱི་བཤོལ་ལུས། །བར་དོའི་འཕྲང་རིང་ལ་འགྲོ་ཚེ་གཏན་རྒྱགས་སུ། །བླ་མའི་གདམ་ངག་སྒོམ་དང་སྙིང་གཏམ་ལགས། ༢ །ཚེ་འདིར་སྣང་

[Full Size]

ལ་མཛེས་པའི་ཆོས་བརྒྱད་དང་། །མི་ཐམས་ཅད་གང་བའི་ཟང་ཟིང་གིས། །རང་བློ་བཅོལ་ཆུང་གི་ཁ་ལོ་བསྒྱུར་ཉན་ཆེ། །ཞེན་ལོག་གཏིང་ནས་བསྐྱེད་མཛོད༴ ༣ །ཚིག་ཁ་བཤད་རྒྱ་ཆེའི་ཐོས་པ་དང་། །འཕྲལ་ཤེས་ཤེས་རྣམ་གྲངས་མང་པོ་ཀུན། །དགེ་སྦྱོར་རླུང་ཚུབས་ལ་བཀུར་བའི་ཉེར་ལེན་ཡིན། །སྤྲོས་མེད་ཆིག་དྲིལ་གྱིས་དང་སྙིང་༴ ༤ །རྗེ་བླ་མའི་དྲུང་དུ་སྡོད་ཙ་ན། །ཡིད་འགྱུར་མེད་མོས་གུས་མི་བྱེད་པར། །ཅི་མཛད་ལོག་ལྟ་རུ་མཐོང་བའི་གྲྭ་སློབ་མང་། དད་པའི་སྙིང་ཕུར་ཚུགས་དང་སྙིང་གཏམ༴ །གྲོགས་མང་པོའི་དབུས་ན་རང་འདོད་ཀྱི། །བློ་ང་རྒྱལ་མགོ་འཕངས་ཐོན་པོ་ཡིས། །མཆེད་ལྕམ་དམ་སེལ་གྱི་ཐལ་བས་མ་བྱུགས་པར། །དམན་ས་རྟག་ཏུ་བཟུང་མཛོད་སྙིང་གཏམ་ལགས། ༦ ཁོང་ཡོན་བདག་གི་གོ་སར་འགྲིམ་དུས་སུ། །རྒྱུ་ནོར་རྫས་འདོད་པའི་ཟོང་རིན་དུ། །ཟོལ་ཟོག་རྫུན་ཁྲམ་གྱིས་

[Full Size]

མི་མགོ་མ་བསླུ་བར། །རང་སེམས་དྲང་པོར་སྲོང་བ་སྙིང་༴ ༧ །གནས་དབེན་པའི་རི་ཁྲོད་འགྲིམ་ན་ཡང་། །སེམས་ཡེངས་མེད་དྲན་རིག་མ་ལྡན་ན། །ཕྱི་བ་སྤང་ཕུགས་སུ་ཉལ་འདྲས་དགོས་པ་མེད། །གར་འདུག་དགེ་སྦྱོར་འབུངས་མཛོད་སྙིང་༴ །ཆོས་རང་སེམས་ཀྱི་ཐོག་ཏུ་མ་འཁེལ་ན། །མིང་ཆོས་པར་བཏགས་ཀྱང་སྐྱེ་བོ་རང་། །ལུས་ཆས་ཇི་ལྟར་དུ་བསྒྱུར་ཀྱང་འཇིག་རྟེན་པ། །བློ་རྒྱུད་ནང་ནས་འཐུལ་ཅིག་སྙིང་༴ ༩ །སེམས་གང་ཤར་གྱིས་རང་ངོ་མ་ཤེས་ན། །སྒོམ་བློས་བྱས་ཀྱི་ལྷན་པ་ཅི་བཏབ་ཀྱང་། །གནས་ལུགས་ཆོས་ཉིད་ཀྱི་གཏིང་མཐའ་མི་རྟོགས་པས། །གང་ཤར་ལམ་དུ་ལྷོངས་མཛོད་སྙིང་གཏམ༴ ༡༠ །དོན་སྟོང་ཉིད་གཉུགས་མར་ཐག་ཆོད་ཀྱང་། །ལས་རྒྱུ་འབྲས་ཁྱད་དུ་མ་གསད་པར། །སྤྲོས་བཅས་སྤྲོས་མེད་ཀྱིས་ཉམས་ལེན་ཟུང་འཇུག་གིས། །མཁའ་མཉམ་སེམས་ཅན་དོན་མཛད་སྙིང་༴ ༡༡ ༈ །།སྙིང་གཏམ་བཅུ་གཅིག་གདམ་ངག་

[Full Size]

འདི། །ལྷུན་གྲུབ་ཡེ་ཤེས་འགྱུར་མེད་ལ། །མི་རྒན་སྣ་ཚོགས་རང་གྲོལ་གྱིས། །གདམས་སོ་ཐུགས་ལ་ལེགས་པར་འཆོངས། །དགེ་སྡེས་འགྲོ་ཕན་མཐའ་ཡས་ཤོག །རྗེ་རྒྱལ་བ་ཀུན་གྱི་སྤྱི་གཟུགས་མཆོག །ཕ་མཚན་ལྡན་བླ་མའི་ཞབས་པད་ལ། །ཡིད་དད་བརྒྱའི་འདུས་པས་ཕྱག་བགྱིད་ན། །མཐུ་མཁྱེན་བརྩེའི་གཟིགས་པ་གཡེལ་མེད་སྩོལ། །རིགས་གྲོལ་གྱི་ཡོན་ཏན་ཕུན་ཚོགས་པའི། ཡོངས་འཛིན་གྱི་བཤེས་གཉེན་རྡོ་རྗེ་འཛིན། །མཚན་གྲགས་པ་འགྱུར་མེད་འཆང་བ་གང་། །གནད་ཟབ་མོའི་སྙིང་གཏམ་བསྐུར་ཞིག་གསུངས། །ཁྱེད་ཐོས་བསམ་སྒོམ་ལ་མངའ་དབང་ཕྱུག །བདག་རྨོངས་པའི་ཚིག་ལ་མི་ལྟོས་ཀྱང་། །བཀའ་ཕེབས་སྒོ་བཟློག་པར་མི་རིགས་ཕྱིར། །གཏམ་ཅལ་ཅོལ་འགའ་ཞིག་གསོལ་བགྱིད་ན།། ༈ །།ཀྱེ་མ་ཐུབ་བསྟན་གྱི་ཉི་མ་ནུབ་རིར་གཞོལ། །རྩོད་ལྡན་གྱི་ཡངས་མཐའི་དུས་འདི་འདྲར། །

[Full Size]

དལ་འབྱོར་དང་རྣམ་གཡེངས་རྗེས་པ་ན། །འཆི་དུས་ལག་སྟོང་འགྲོ་བར་ངེས། །ཤི་ནས་ཀྱང་ཁམས་གསུམ་རིས་དྲུག་གི། །བརྩོན་དོང་དུ་ཆུད་ཡུན་དེ་སྔས་ཆོག །ད་དུང་དུ་འཁོར་བའི་སྒོ་གཤོམ་ལ། །འབུང་ནུས་པའི་མི་རྣམས་ཅི་ཞིག་བསམ། །ལས་འབྲས་ལ་བསླུ་བ་མེད་པ་དང་། །འཁོར་འདས་ཀྱི་སྐྱོན་ཡོན་བདེ་སྡུག་སོགས། །གསུང་རབ་ནས་ལན་བརྒྱར་བཤད་མཐོང་བཞིན། །སྤང་བླང་དེ་གོ་ལོག་བསྒྲུབ་མཁན་མང་། ཆོས་པ་རྣམས་ཆོས་ལ་བརྟེན་པའི་སྡིག །ནན་ན་དུ་བསྒྲུབ་པའི་སྙིང་ཁམས་དང་། །ཆགས་སྡང་གི་ལས་ཀྱི་སྙིང་རུས་ཙམ། །ཆོས་ཕྱོགས་སུ་འབད་ན་ཅི་མ་རུང་། །དེ་བས་ན་ད་ནི་དམ་ཆོས་ཀྱང་། །སྤྲོས་མེད་ལ་ཆིག་དྲིལ་མ་ནུས་ན། །སྤྲོས་བཅས་ཀྱི་རྣམ་དཔྱོད་ཅི་ཆེ་ཡང་། །རང་རྒྱུད་ཀྱི་ལྐོ་སྐམ་ཐུལ་བར་དཀའ། ཁ་བཤད་ཀྱི་འབྲུག་སྒྲ་ལྡིར་ཆེ་ཡང་། །ཉམས་ལེན་གྱི་སྦྲང་ཆར་མི་འབེབས་ན། །ལས་ཉོན་

[Full Size]

གྱི་ཐ་བ་སྲ་མོ་ནས། །བྱང་ཆུབ་ཀྱི་མྱུ་གུ་འཁྲུངས་པར་དཀའ། །མདོ་རྒྱུད་དང་ཐེག་པའི་རིམ་པ་དང་། །གྲུབ་མཐའ་སོགས་ཆོས་སྒོ་གྲངས་མེད་ཀུན། །རང་སེམས་ཀྱི་འདུལ་ཐབས་འབའ་ཞིག་ཏུ། །སངས་རྒྱས་ཀྱི་ཐབས་མཁས་ཕྲིན་ལས་ཉིད། །བཀའ་བརྒྱུད་པའི་གསལ་སྟོང་ཟུང་འཇུག་དང་། །ས་ལུགས་ཀྱི་འཁོར་འདས་དབྱེར་མེད་དང་། །རྙིང་མ་བའི་ཀ་དག་ལྷུན་གྲུབ་སོགས། །མཚན་མང་གི་དབྱེ་བསྡུ་ཅི་མཛད་ཀྱང་། །ཡིན་ལུགས་ཀྱི་ངོ་སྤྲོད་མཛུབ་ཚུགས་དེ། །རང་སེམས་ཀྱི་ཐོག་ཏུ་མ་ཕེབས་ན། །ཚིག་ཚོགས་ཀྱི་སྒྲུང་གཏམ་འབུམ་གླེང་ཀྱང་། །གང་ཟག་དང་ཆོས་གཉིས་ཐ་དད་ལུས། །དེ་ཕྱིར་དུ་ཆོས་ཀྱི་སྙིང་པོའི་གནད། །བླ་མ་དང་སློབ་མ་གདམ་ངག་གསུམ། །རྟེན་འབྲེལ་དུ་འཛོམ་པའི་འོག་རོལ་ན། །ཉམས་ལེན་ལ་འབད་པ་གནད་དུ་ཟབ། །མཚོན་བྱེད་ཀྱི་བླ་མའི་སྐུ་དྲིན་ལས།

[Full Size]

མཚོན་བྱའི་བླ་མའི་རང་ཞལ་དངོས། །སྒྲིབ་མེད་དུ་མཐོང་ཚེ་སྣང་སྲིད་ཀུན། །དོན་དམ་གྱི་བླ་མར་ལྷུན་གྱི་གྲུབ། །ཕུང་ཁམས་དང་སྐྱེ་མཆེད་འབྱུང་བ་ལྔ། །སྣོད་བཅུད་ཀུན་གདོད་ནས་དཀྱིལ་འཁོར་ལྷ། །ཡིན་ལུགས་ལ་ཡིན་པར་ཤེས་པའི་ཚེ། །རྒྱུ་ལམ་འབྲས་དབང་གི་འཁོར་ལོ་ཐོབ། །དབང་དོན་ཉིད་སེམས་ལ་མ་ཤར་ན། །བུམ་པ་བརྒྱ་མགོ་བོར་བཏང་བྱས་ཤིང་། །དབང་གཞུང་ལ་འབུམ་ཐེར་ཀླག་ན་ཡང་། །སྨིན་བྱེད་ཀྱི་ནུས་པ་ག་ལ་འཇོགས། གསང་སྔགས་སྙིང་པོ་རིམ་གཉིས་དོན། །གཉིས་པོ་ཡང་དོན་ལ་ངོ་བོ་གཅིག །གཅིག་ཚུལ་ནི་སྣང་སྟོང་དབྱེར་མེད་ཕྱིར། །ཟུང་འཇུག་ཏུ་རྟོགས་པས་ཉམས་ལེན་འཚལ། །འགག་མེད་ཀྱི་ཆ་ནས་རྣམ་པ་གསལ། །སྐྱེ་མཆེད་ཀྱི་རང་བཞིན་རྣམ་དག་དྲན། །ཟུང་འཇུག་གི་ཀློང་དུ་ང་རྒྱལ་བསྟན། །བསྐྱེད་རིམ་གྱི་གནས་གསུམ་སེམས་ལ་འཚངས། །ཡིན་ཚུལ་གནད་དོན་མ་རྟོགས་པར། །ཀུན་བརྟགས་ཀྱི་ལྷ་

[Full Size]

གཟུགས་བསྒོམས་བསྒོམས་ཀྱང་། །སོལ་ནག་ལ་དངུལ་དུ་བསྒོམ་པ་ལྟར། །མཆོག་མཐུན་གྱི་དངོས་གྲུབ་ག་ལ་འབྱུང་། །སྒྲ་གྲགས་ཀུན་སྔགས་ཀྱི་རང་བཞིན་ཉིད། །འབྱིན་འཇུག་གནས་འབྲུ་གསུམ་རྡོ་རྗེའི་བཟླས། །རྒྱུན་ལྡན་གྱི་བསྙེན་སྒྲུབ་རང་བྱུང་ལ། །རྩོལ་མེད་དུ་འགྲུབ་པའི་ཡ་མཚན་ལགས། །རྣམ་རྟོག་གི་རྦ་རླབས་ཟད་མེད་ཀྱང་། །ཆོས་ཉིད་ཀྱི་རྒྱ་མཚོ་ལས་མ་གཡོས། །བསྒོམ་མེད་ལ་བསྒོམ་བློའི་ལྷན་པ་ནི། །མི་དགོས་ཀྱང་ནན་གྱི་འདེབས་མཁན་མང་། །གནས་པ་ཅེས་བཟང་པོར་འཛིན་བྱེད་ཅིང་། །འགྱུ་བ་ཞེས་ངན་པར་བཟུང་བཟུང་བས། །བཟུང་འཛིན་གྱི་སྒྲོགས་གིས་སྒོམ་ཆེན་བཅིངས། །གཉིས་འཛིན་གྱི་ལམ་དུ་འོ་རེ་རྒྱལ། །ཚོགས་དྲུག་མིག་རྒྱུའི་ཆུ་རླུང་ལ། །བདེན་བཞེན་གྱི་རི་དྭགས་འབྲང་འབྲང་ཡང་། །ལོག་སྲེད་ཀྱི་སྐོམ་ཚད་སླར་ལ་འཕེལ། །རང་སྣང་གི་རོལ་པར་

[Full Size]

ཤེས་པ་གནས། །དྲན་འཛིན་གྱི་འཇུར་མདུད་དམ་པོ་ཡིས། །ནན་བཙིར་དུ་བསྡམས་ཀྱང་ངལ་བའི་རྒྱུ། །བཟོ་མེད་ཀྱི་ཤེས་པ་ཅང་ཤེས་རྟ། །རང་འགྲོས་ཀྱི་བཏང་ན་ཆུགས་པ་མེད། །བདེ་གསལ་དང་མི་རྟོག་ཉམས་སྣང་གི། །འཇའ་ཚོན་ལ་ཞེན་པའི་བྱིས་པ་འཁྲུལ། །འཁོར་འདས་ཀུན་སེམས་སུ་འདུས་པ་ལ། །ཉམས་སྣང་ལ་བདེན་འཛིན་ཅི་ཕྱིར་བྱེད། །བདེན་མེད་ལ་བདེན་པར་འཛིན་པའི་བློས། །ང་མེད་ལ་ངར་འཛིན་ས་བོན་བསྐྲུན། །ཁེངས་སེམས་ཀྱི་ཡལ་འདབས་འཕེལ་གྱུར་པའི། །དུག་སྡོང་གིས་རང་གཞན་ཕུང་བར་བྱེད། །མདོ་སྔགས་ཀྱི་གཞུང་ལུགས་མཐའ་དག་ནས། །དངོས་འཛིན་ལས་བཟློག་ཕྱིར་སྟོང་ཉིད་གསུངས། །སྟོང་ཉིད་ལ་ཞེན་པའི་སྐྲན་འདྲིལ་ན། །དེ་ཉིད་ལ་བཤིག་ཐབས་ཇི་ལྟར་བྱེད། །ཡོད་མཐའ་ཞེན་པའི་རྟག་མཐའ་དང་། །མེད་མཐའ་ནི་ཆད་པའི་ཕྱོགས་སུ་ལྷུང་། །དབུས་མ་ཡང་ཞེན་པར་མི་བྱེད་པའི། །མཐའ་

[Full Size]

དབུས་ཀྱི་སྒྲོག་བྲལ་ལྟ་བར་གསུངས། །གསུང་རབ་བལྟས་པའི་དཔྱད་སྒོམ་དང་། །ཉམས་ཐོག་ཏུ་ཕབས་པའི་འཇོག་སྒོམ་སོགས། །བསྒོམ་ཚུལ་དང་བཞེད་ཚུལ་མང་མོད་ཀྱི། །བྱིན་རླབས་ཀྱི་ལམ་ཉིད་ཟབ་པར་གསུངས། །ལྟ་བ་དང་སྒོམ་པ་སྤྱོད་པ་འབྲས། །མིང་སྙན་གྱི་སྒྲིག་རིམ་མང་མོད་ཀྱང་། །སེམས་ཉིད་ཀྱི་རང་ཚུལ་རང་རིག་གིས། །གཅེར་མཐོང་ཞིག་བྱུང་ན་ཆོག་པར་གདའ། །བལྟ་བྱ་དང་ལྟ་བྱེད་མ་གྲུབ་པར། །བསྒོམ་བྱ་དང་སྒོམ་བྱེད་ག་ལ་འབྱུང་། །སྤྱད་བྱ་དང་སྤྱོད་བྱེད་དངོས་པོས་དབེན། །དེ་ཕྱིར་དུ་ཐོབ་བྱ་ཐོབ་བྱེད་མེད། །མེད་བཞིན་དུ་སྣ་ཚོགས་སྣང་བའི་འཕྲུལ། །འཁོར་འདས་ཀྱི་བཀོད་པ་བསམ་ཡས་འདི། །ཇི་རྙེད་ཀུན་རྨི་ལམ་ཇི་ལྟ་བར། །སྐུ་གསུམ་གྱི་རྣམ་རོལ་ཆོས་ཉིད་དབྱིངས། །དབྱིངས་དོན་དེ་མངོན་དུ་གྱུར་པའི་ཚེ། །གཉིད་སད་པའི་རྨི་ལམ་ཇི་བཞིན་

[Full Size]

དུ། །ཞེན་འཛིན་གྱི་འཁྲུལ་པ་རང་སར་སངས། །ལྷུན་གྲུབ་ཀྱི་ཡེ་ཤེས་རྩལ་ཆེན་རྒྱས། །སངས་རྒྱས་ཅེས་གཞན་ནས་ཐོབ་མིན་པར། །རང་རིག་ཉིད་ཆོས་སྐུའི་གཏན་སྲིད་ཟིན། །རྩོལ་མེད་ཀྱི་འགྲོ་དོན་ཤུགས་འབྱུང་ཚེ། །སྐུ་གཉིས་ཀྱི་གོ་འཕང་མི་ཟེར་རམ།། ༈ །།ཨེ་མ། དེ་ལྟར་ཅལ་ཅོལ་བྱུང་རྒྱལ་སྨྲས་པའི་ཚིག །འདི་ལ་མཁས་ཁྱོད་འཁྲོལ་བར་མི་མཛད་ཅིང་། །འགལ་དང་མ་རྟོགས་སྐྱོན་ལ་མ་དགོངས་པར། །དགོངས་དབྱིངས་སྤྲོ་བ་བསྐྱེད་པའི་རོལ་མོར་མཛོད། །མ་ནོར་གདམས་པའི་ལེགས་བཤད་སྟོན་ནུས་པའི། །ཉམས་རྟོགས་དྲི་ཙམ་བདག་ལ་མ་མཆིས་ཀྱང་། །གཞན་ཕན་དཀར་པོའི་བསམ་པས་འདི་སྨྲས་པའི། །དགེ་བས་འགྲོ་ཀུན་ཆོས་ཉིད་དོན་རྟོགས་ཤོག །ཅེས་པ་ནི་བླ་མ་གྲགས་པ་འགྱུར་མེད་ལ་ཕུལ་བའོ།། ༈ །།ཀྱེ་ཧོ། །སེམས་ཀྱི་གནས་ལུགས་གདོད་ནས་མཁའ་ལྟར་

[Full Size]

ཁྱབ། །འཁོར་བ་མྱང་འདས་བདག་གཞན་དངོས་པོར་དབེན། །དངོས་པོ་མེད་ལས་སྣ་ཚོགས་དངོས་སྣང་བ། །ཆུ་ཟླའི་གཟུགས་བརྙན་འདྲ་འདི་མཚར་བའི་གནས། །སྣང་ཡང་བདེན་མེད་སྒྱུ་མའི་ལྟད་མོ་ལ། །མི་ཤེས་བྱིས་པ་རྣམས་ཀྱི་ཨ་འཐས་བརྩོད། །ཁྲོན་པའི་ནང་གི་སེང་གེའི་གཟུགས་ཀྱི་དཔེ། །ཇི་བཞིན་འཁྲུལ་ལ་འཁྲུལ་བསྣན་ལས་ཉོན་བསགས། །ཆོས་ཀུན་མཐར་ཐུག་དོན་དམ་བདེན་པའི་གནད། །གནད་ཀྱི་སྙིང་པོ་རང་སེམས་མ་བཅོས་ཤིས། །ཡིན་ལུགས་ཇི་བཞིན་རྟོགས་པའི་དོན་ཉིད་ལ། །གོམ་ན་ཐག་བརྒྱའི་མདུད་པ་གཅིག་འཁྲོལ་ཡང་། །དེ་ལྟར་མི་བརྩོན་ཐ་སྙད་ཚིག་མཐར་འཁོར། །གྲུབ་མཐའི་ཕྱོགས་རེར་ཨ་ཐང་ཆད་ཆད་འཐེན། །འཐེན་ཀྱང་དུ་མ་རོ་གཅིག་མ་ཐོབ་པར། །ཆོས་ཁམས་ཆེ་ཆེའི་སྐད་ཀྱིས་མགོ་བོས་འཁོར། །རྒྱལ་བའི་བཀའ་ལ་བཟང་དང་ངན་མ་

[Full Size]

གྲུབ། །གྲུབ་ཐ་མཐའ་དག་རང་རང་ངོས་ནས་ཟབ། །ཀུན་ཀྱང་འབྲས་བུ་སངས་རྒྱས་བསྒྲུབ་པར་གཅིག །ང་ཞེན་ཆགས་སྡང་བྱེད་རྣམས་སྙིང་རྗེའི་གནས། །མི་ཚེ་རྒོངས་ཁའི་ཉི་མ་ཡུད་ཙམ་འདིར། །གཏན་གྱི་འདུན་མ་བསྒྲུབ་ལ་ཤིན་ཏུ་རན། །རན་ཡང་མི་བརྩོན་ཚེ་འདིའི་དོན་བསྒྲུབ་པའི། །ཆོས་གཟུགས་ཁོ་ན་མང་བ་གཟིགས་ལགས་སམ། །གླེགས་བམ་འབུམ་ཕྲག་སློབ་གཉེར་བྱས་ན་ཡང་། །སེམས་གསང་ཇི་བཞིན་ཤེས་པ་ཤིན་ཏུ་དཀོན། །ལོ་བརྒྱར་མཚམས་སྒྲུབ་བྱས་པའི་ཡུས་ཅན་ཡང་། །རང་རྒྱུད་མར་ལྐོག་སྣུམ་གྱི་འཐུལ་མིན་འདྲ། །ཆོས་ཀྱི་སྙིང་པོར་རང་རྒྱུད་མ་འཐུལ་ན། །ཅི་བྱས་ལམ་དུ་འགྲོ་བ་སྲིད་མིན་ཚེ། །རང་སེམས་གཞུ་མོ་ནང་དུ་བཀུག་ནས་ཀྱང་། །ཆོས་དང་སེམས་སུ་འདྲེས་མཛོད་སྙིང་༴ །སེམས་ལ་སེམས་ཀྱིས་བརྩོན་དུ་མ་བཟུངས་བར། །གནས་སམ་འགྱུའམ་གང་ལྟར་

[Full Size]

འཆར་ཀྱང་རུང་། །འཆར་མཁན་ཁོ་རང་ངོ་རིག་མཛོད་དང་། །སྒྲོག་ཐག་ནང་ནས་གྲོལ་བའི་དུས་ཅིག་འོང་། །ཆོས་སྐུའི་རང་ཞལ་རང་ལ་འཆར་བཞིན་དུ། །མི་ཤེས་བཅོས་མའི་སྒོམ་གྱིས་བསླད་མཁན་མང་། །ཉམས་རྟོགས་རེ་བས་བསྒྲུབ་དང་དགོས་པས་བཅིངས། །དེ་འདྲས་ནམ་ཡང་བྱང་ཆུབ་ཐོབ་མི་འགྱུར། །ཡར་མཐའ་དྲུག་པ་རྡོ་རྗེ་འཆང་ཆེན་ནས། །མར་མཐའ་འཇའ་མིག་སྲིན་བུ་ཡན་ཆད་ལ། །བདེར་གཤེགས་སྙིང་པོ་བཟང་ངན་མ་མཆིས་ཚེ། །རེ་དོགས་ཞེ་འདོད་བྲལ་བའི་ཉམས་ལེན་འཚལ། །གཞི་ཡི་སྙིང་པོ་གསལ་སྟོང་ཟུང་འཇུག་དང་། །ལམ་གྱི་སྙིང་པོར་ཚོགས་གཉིས་ཟུང་འཇུག་འབད། །འབྲས་བུའི་སྙིང་པོར་སྐུ་གཉིས་ཟུང་འཇུག་འགྲུབ། །སྙིང་པོའི་ཉམས་ལེན་རྟག་ཏུ་བརྩོན་འཚལ་ལོ། །ཅེས། དགེ་སློང་ཀུན་དགའ་དབང་རྒྱལ་ལ་གདམས་པའོ།།

[Full Size]

༈ །།མཁྱེན་པའི་ནམ་མཁར་བརྩེ་བའི་འོད་སྟོང་རྒྱས། །མཛད་པའི་ཕྲིན་ལས་གདུལ་བྱའི་བློ་མུན་སེལ། །སྨིན་གྲོལ་པད་ཚལ་རྒྱས་མཛད་བླ་མ་མཆོག །བརྒྱུད་པར་བཅས་ཞབས་སྙིང་ནས་ལན་བརྒྱར་འདུད། །དམ་པ་དུ་མས་རྗེས་བཟུང་སྐལ་བ་ཅན། །ལུང་རྟོགས་ཡོན་ཏན་གྱིས་ཕྱུག་དགེ་བའི་བཤེས། །མཚོ་སྐྱེས་ལྷུན་གྲུབ་གང་གི་བཞེད་པའི་དོན། །སྐོང་ཕྱིར་ཟབ་དོན་ཚིག་འགའ་སྙན་དུ་གསོལ། །འཁོར་བ་མྱང་འདས་མ་ལུས་ཀུན་གྱི་གཞི། །སེམས་ཉིད་འདུས་མ་བྱས་པའི་གནད་ལུགས་ཉིད། །ཡེ་ནས་མ་འཁྲུལ་རང་ངོ་རིགས་ནས་གྲོལ། །དེ་ལ་ཆོས་སྐུའི་གྲོལ་གཞིའམ་ཀ་དག་ཟེར། །དེ་ལྟར་མ་རིག་རང་སྣང་འཆར་སྒོ་ལ། །གཞན་དུ་བཟུང་བའི་གཉིས་འཛིན་འཁྲུལ་པའི་རྐྱེན། །གཅིག་ལས་གཅིག་འཕེལ་ལུག་རྒྱུད་འཁོར་བར་འཁྱམས། ཁམས་གསུམ་འགྲོ་བའི་འཁྲུལ་གཞི་ཞེས་སུ་

[Full Size]

གྲགས། །དེ་ལྟར་འཁོར་བ་ཐོག་མེད་ད་བར་དུ། །ཇི་ཙམ་འཁྲུལ་ཡང་རིག་པའི་ངོ་བོ་ལ། །འཕོ་འགྱུར་བྲི་གང་སྤུ་ཙམ་མ་མཆིས་ཚེ། །བདེ་གཤེགས་སྙིང་པོ་ཡོངས་གྲུབ་ཅེས་པ་ལགས། །རྒྱལ་བས་ཆོས་སྒོ་བརྒྱད་ཁྲི་བཞི་སྟོང་ཀུན། །མཐའ་དག་སེམས་ཉིད་འདུལ་ཐབས་ཁོ་ན་རུ། །བསྟན་ཡང་གང་ཟག་སོ་སོའི་སྐལ་བའི་མཐུས། །མ་རྟོགས་ལོག་རྟོག་ཕྱོགས་རྟོགས་སྣ་ཚོགས་འགྱུར། །ལམ་རིམ་ཐེག་པའི་དབྱེ་བ་བསམ་ཡས་ཀྱང་། །སྐབས་འདིར་ཐེག་མཆོག་སྙིང་པོའི་ཉེ་ལམ་ཉིད། །ཕྱག་རྫོགས་དབྱེར་མེད་ལྟ་སྒོམ་སྤྱོད་གསུམ་གྱི། །འགག་དོན་སྙིང་པོར་དྲིལ་ནས་བརྗོད་བགྱི་ན། །ཐ་མལ་ཤེས་པ་མ་བཅོས་རང་བབས་ཀྱི། །གཤིས་ལ་བཟང་ངན་དགེ་སྡིག་བདག་གཞན་སོགས། །ཀུན་རྫོབ་མཚན་མའི་ལྷད་ཀྱི་མ་བསླད་པར། །ངོ་བོ་ངོས་བཟུང་མེད་པའི་སྟོང་པ་ཉིད། །རང་བཞིན་གསལ་

[Full Size]

གདངས་འགགས་མེད་ཅིར་ཡང་འཆར། །དེ་ཉིད་ཐ་དད་མ་ཡིན་ཟུང་འཇུག་ཆེ། །རྟག་ཆད་ཡོད་མེད་ཡིན་མིན་ལ་སོགས་ཀྱི། །སྒྲོ་བཀུར་གང་ཡང་མ་བྱས་མ་བཅོས་པའི། །གནས་ལུགས་ཡིན་ཚུལ་ཇི་བཞིན་རིག་པ་ལ། །ལྟ་བའི་དོན་ཆེན་རྟོགས་པ་ཅེས་སུ་བརྗོད། །དེ་ལྟར་རྟོགས་པར་བྱ་བའི་ཐབས་ཆོག་ནི། །ཐ་སྙད་ཚིག་མཐའ་གཅོད་པའི་ཐོས་བསམ་དང་། །འགྱུ་དྲན་བློ་བཟོ་མང་པོས་མི་འབྱུང་གི། །ཚོགས་རྫོགས་སྒྲིབ་པ་དག་པའི་རྒྱུ་རྐྱེན་དང་། །བླ་མའི་བྱིན་རླབས་ཞུགས་པ་ཉིད་ལ་རག །དོན་ལ་ལྟ་བ་ཟེར་ཡང་རང་སེམས་ཡིན། །རང་སེམས་བཟོ་མེད་རང་ངོ་མ་རིག་ན། །ལྟ་བ་མཐོན་པོར་བརློམ་ཡང་ཡིད་དཔྱོད་ཡིན། །ཡིད་དཔྱོད་ཚིག་གི་ལྟ་བས་འཚང་མི་བརྒྱ། །དེ་ཕྱིར་རང་རིག་རང་ངོ་ཤེས་པར་བྱ། །བསྒོམ་པའི་ཐབས་དང་ཁྲིད་ཚུལ་མཐའ་ཡས་ཀྱང་། །གང་ཟག་དབང་

[Full Size]

རིམ་སོ་སོར་དགོངས་པ་སྟེ། །ཀུན་གྱི་སྙིང་པོ་ཞི་ལྷག་ཟུང་འཇུག་ཏུ། །ཡང་དག་དྲན་རིག་ཡེངས་མེད་ཉིད་ལ་འདུས། །ཞི་གནས་ལྷག་མཐོང་རྣམ་དབྱེ་མང་མོད་ཀྱང་། །ཕྲ་རག་འགྱུ་རྟོག་ཞི་བ་ཞི་གནས་ལ། །གནས་མཁན་རང་ངོ་རིག་པ་ལྷག་མཐོང་ཉིད། །མཉམ་གཞག་རྗེས་ཐོབ་བཞེད་ཚུལ་མང་པོ་ཡང་། །གདུལ་བྱ་ཐ་དད་དཀྲི་ཐབས་བྱེ་བྲག་ཙམ། །མཐར་ཐུག་དོན་ལ་མཉམ་རྗེས་ཟུང་འཇུག་སྟེ། །སེམས་ཉིད་གནས་སམ་འགྱུའམ་གང་འཆར་ཀྱང་། །ཤར་མཁན་འགྱུ་མཁན་གནས་མཁན་ཁོ་རང་ཉིད། །གཅིག་པུ་དེ་ཀའི་རང་ངོ་རིག་པ་ན། །ཐམས་ཅད་མཉམ་གཞག་འབའ་ཞིག་ཁོ་ན་ཡིན། །རིག་པ་རྗེན་པའི་རང་ངོ་མ་རིག་ན། །གནས་ཀྱང་དམན་པའི་ཞི་གནས་ཙམ་ཉིད་དང་། །འགྱུ་ན་ཐ་མལ་འཁྲུལ་པ་ཨ་འཐས་ཏེ། །གང་ཡང་མཉམ་རྗེས་མ་ཡིན་

[Full Size]

འཁྲུལ་པ་རང་། །དེ་ཕྱིར་དྲན་རིག་ཡོད་མེད་གཅིག་པུར་འདུས། །རྫོགས་པ་ཆེན་པོ་ངོ་བོ་ལམ་བྱེད་དང་། །ཕྱག་རྒྱ་ཆེན་པོ་རྣམ་པ་ལམ་བྱེད་ཅེས། །ཅི་ལ་གྲགས་མོད་དེ་ཡི་ཁྱད་པར་ནི། །རྫོགས་ཆེན་རིག་ཐོག་གློད་པ་གཙོར་བྱེད་ཅིང་། །ཕྱག་ཆེན་དྲན་པ་ཁོ་ནར་རྩིས་སུ་བྱེད། །དེ་གཉིས་ཀྱང་ནི་དོན་ལ་ཁྱད་མེད་དེ། །ཕྱག་ཆེན་ཉིད་ནས་ཨ་འཐས་འཇུར་དྲན་སོགས། །བཅོས་མའི་ཡིད་བྱེད་མཐའ་དག་རྒྱང་བསྲིངས་སྟེ། །རྟོགས་ཆོས་ཡང་དག་རང་རིག་དྲན་པ་ལ། །སྒོམ་གྱི་དངོས་གཞིར་མཛད་ཕྱིར་དེ་ཉིད་ནི། །རྫོགས་ཆེན་ལུགས་ཀྱི་རིག་པའང་དེ་ཀ་ལགས། །དེས་ན་འགྲོ་འཆག་ཟ་ཉལ་འདུག་ལ་སོགས། །སྤྱོད་ལམ་ཀུན་དང་ཚོགས་དྲུག་གང་ལ་ཡང་། །མ་ཞེན་མི་དག་རྗེས་འབྲེངས་མི་བྱ་བར། །དྲན་ཙམ་རིག་ཙམ་ཅེར་མཐོང་བཟོ་མེད་སྐྱོང་། །རྣམ་རྟོག་སྐྱེས་ལ་སྐྱོན་དུ་མི་

[Full Size]

བལྟ་ཞིང་། །མི་རྟོག་པ་ལ་དགའ་བར་མི་སེམས་པར། །གང་དྲན་གང་སྣང་གང་ཤར་དེ་ཀའི་ངོར། །དྲན་རིག་རྗེན་པས་བསྐྱངས་བ་གཅིག་པུས་ཆོག །ཉོན་མོངས་དུག་ལྔ་ཆེད་དུ་མི་སྤོང་ཞིང་། །བདེ་གསལ་མི་རྟོག་ཆེད་དུ་མི་སྒྲུབས་པར། །གང་ཤར་ཐམས་ཅད་སྒོམ་དུ་ཁྱེར་བའི་གནད། །དྲན་རིག་ཅེར་རེ་འདི་ཀ་གཅིག་པུ་ལགས། །འདི་དོན་ཚུལ་བཞིན་རྟོག་ལ་ལྟ་བ་ཟེར། །དེ་ཉིད་རྒྱུན་དུ་སྐྱོང་བ་སྒོམ་པ་ཡིན། །སྤྱོད་ལམ་ཀུན་དང་བསྲེ་བ་སྤྱོད་པ་སྟེ། །བརྟན་པ་ཐོབས་ལ་འབྲས་བུའི་མིང་དུ་བཏགས། །གནས་སྐབས་རྐྱེན་ངན་སྣང་ཚུལ་ན་ཚ་དང་། །འདྲེ་དོན་རྣམ་རྟོག་ཉོན་མོངས་སྡུག་བསྔལ་དང་། །འཆི་བ་ལ་སོགས་བར་ཆོད་ཅི་བྱུང་ཡང་། །ཐབས་དང་གཉེན་པོ་གཞན་ནས་མི་འཚོལ་ཏེ། །གང་ཤར་ཀུན་གྱི་སེམས་ཉིད་ལས་མ་འདས། །སེམས་ཉིད་ཡེ་ནས་སྐུ་གསུམ་ངོ་བོར་

[Full Size]

གྲུབ། །དེ་ལ་ན་རྒྱུ་ན་མཁན་སྡུག་མཁན་དང་། །འཆི་རྒྱུ་འཆི་མཁན་ཐ་དད་ག་ལ་ཡོད། །དགྲར་སྣང་འདྲེར་འཛིན་འཁྲུལ་པའི་འཆར་སྒོ་ཙམ། །རྨི་ལམ་སྣང་ཚུལ་དག་དང་མཚུངས་བཞིན་དུ། །ཨ་འཐས་བདེན་འཛིན་བྱེད་པ་རྒོད་རེ་བྲོ། །འཁྲུལ་མཁན་རང་ངོ་བལྟ་བ་གནད་དུ་ཟབ། །རོ་སྙོམས་གདམ་ངག་ཟེར་ཡང་འདི་ཀ་ལགས། །ཕྱག་ཆེན་གཤིས་ལ་སྐྱེ་མེད་གདངས་འགགས་མེད། །རྩལ་སྣང་སྤྱིར་ཡང་འཆར་རྣམས་སྐུ་གསུམ་བཞེད། །དེ་མཐུན་རྫོགས་ཆེན་ངོ་བོ་ཀ་དག་དང་། །རང་བཞིན་ལྷུན་གྲུབ་ཐུགས་རྗེ་ཀུན་ཁྱབ་སྟེ། །སྐུ་གསུམ་དབྱེར་མེད་ཁྲེག་ཆོད་ཉམས་ལེན་ཡིན། །དེ་ཡི་ངང་ནས་འོད་གསལ་ཐོད་རྒལ་དོན། །ལས་རླུང་འཆིང་བྱེད་སྐུ་གསུམ་ཞུགས་སྟང་དང་། །སྒོ་གནད་ཡུལ་གནད་རླུང་རིག་གནད་དང་བཅས། །གནས་གསུམ་ཆོས་ཉིད་འཁོར་ལོའི་ཉམས་ལེན་ལ། །ཚུལ་བཞིན་བརྩོན་ན་ཆོས་ཉིད་མངོན་སམ་འཆར། །ཉམས་སྣང་

[Full Size]

གོང་འཕེལ་རིག་གདངས་ཚད་ལ་ཕེབས། །བལྟ་བྱ་ལྟ་བྱེད་འཆར་དང་མི་འཆར་སོགས། །ཆོས་ཅན་མཐའ་དག་ཆོས་ཉིད་ཀློང་དུ་ཟད། །ཐོས་པ་གསུམ་དང་གདེངས་བཞི་ལ་སོགས་ཀྱི། །ཡོན་ཏན་མཐར་ཕྱིན་ཟག་མེད་འོས་ལུས་འགྲུབ། །གང་འདུལ་ཐུགས་རྗེ་མཁའ་མཉམ་འགྲོ་ལ་འགྱེད། །ཐོས་རྒལ་འདི་ནི་སྐལ་ལྡན་འགའ་ཙམ་ལས། །ཀུན་གྱིས་ཡིད་ཆེས་དཀའ་ཞིང་ཉམས་ལེན་དཀོན། །ཞལ་རྒྱུན་ལག་ཁྲིད་གནད་བསྣུན་གལ་ཆེར་གདའ། །དེ་ལྟར་ཕྱག་རྫོགས་ཉམས་ལེན་བརྩོན་རྣམས་ཀྱི། །ཤོར་ས་བཞི་དང་གྲོལ་ས་གསུམ་ལ་སོགས། །རྣམ་དབྱེ་མཐའ་ཡས་བཀའ་རྒྱུད་གོང་མ་ཡིས། །གསུངས་པ་མང་ཕྱིར་བདག་འདྲས་བརྗོད་མི་དགོས། །དོན་ཀྱང་གེགས་དང་གོལ་སའི་ཆེ་ཤོས་ནི། །སེམས་ངོ་རྗེན་པར་མ་འཕྲོད་ལྟ་བ་མིན། །བློས་བྱས་ཉམས་སྣང་ལ་ཞེན་སྒོམ་པ་མིན། །

[Full Size]

སྤྱོད་ལམ་དྲན་རིག་མ་ཟིན་སྤྱོད་པ་མིན། །རེ་དོགས་གཉིས་འཛིན་ཡོད་ན་འབྲས་བུ་མིན། །བླ་མ་སངས་རྒྱས་མ་མཐོང་དད་གུས་མིན། །སྙིང་རྗེ་བྱང་སེམས་མེད་ན་ཐེག་ཆེན་མིན། །གཡོ་རྒྱུ་ངོས་ལྐོག་ཡོད་ན་མ་སྡོམ་མིན། །བློ་རྒྱུད་ཆོས་དང་མ་འདྲེས་ཆོས་པ་མིན། །རྐྱེན་ངན་སྒོམ་དང་མི་བསྲེ་སྒོམ་ཆེན་མིན། །རང་འདོད་ཕུག་སུ་བཅང་ན་འགྲོ་དོན་མིན། །ཤི་རུང་གསོན་རུང་མི་འབད་ཉམས་ལེན་མིན། །མིན་ཀྱང་ཡིན་པར་བརློམས་མཁན་མང་བར་གདའ།། ༈ །།ལྟ་བ་ཇི་ལྟར་མཐོ་བཞིན་རྒྱུ་འབྲས་ཞིབ། །ཉམས་རྟོགས་གོང་དུ་འཕེལ་བཞིན་ཐོ་ཅོ་ཆུང་། །རང་རྒྱུད་ཇི་ལྟར་དུལ་བཞིན་དག་སྣང་ཆེ། །ཡོན་ཏན་སྐྱེས་བཞིན་དམན་ས་ཟིན་དུ་འགྲོ། །བླ་མ་ཡུན་རིང་བསྟེན་བཞིན་མོས་གུས་འཕེལ། །ཐོས་བསམ་རྒྱ་ཆེ་བཞིན་དུ་ཁེངས་སེམས་མེད། །རྙེད་བཀུར་གྲགས་འདོད་ཆུང་དུ་གང་སོང་བ། །

[Full Size]

འདི་འདྲ་གྲུབ་རྟགས་ཀུན་གྱི་མཆོག་གྱུར་ཡིན། །ལམ་རྟགས་ཡོན་ཏན་འདི་བཞིན་མ་ལྡན་ན། །ཐོས་པ་ཇི་ཙམ་ཆེ་བ་ང་རྒྱལ་འཕེལ། །བསྒྲུབ་ཡུན་ཇི་ཙམ་རིང་བཞིན་སྡུག་ཡུས་ཆེ། །ཡི་དམ་ལྷ་ཞལ་མཐོང་ཡང་བཟང་འཁྲུལ་ཙམ། །མངོན་ཤེས་ཐོག་མེད་ཡོད་ཡང་མོ་མ་འདྲ། །རྫུ་འཕྲུལ་སྣ་ཚོགས་སྟོན་ཡང་མིག་འཁྲུལ་མཚུངས། །འགྲོ་དོན་ཟེར་ཡང་རྙེད་གྲགས་བསྒྲུབ་ཐོབས་རང་། །ལྷ་བུའི་བདུད་ཀྱི་ཆོས་པ་བསླུས་པ་མང་། །ཟག་བཅས་ཡོན་ཏན་ཕྲན་བུ་སྐྱེས་པ་ལ། །ངར་འཛིན་ཁེངས་སེམས་རང་མཐོང་ཆེར་སྐྱེས་ཏེ། །གེགས་ལ་གེགས་སུ་མ་ཤེས་འཕྲུལ་ཕྱིར་འབྲེང་། །ཆོས་པའི་ཕུང་ས་ཐམས་ཅད་འདི་ན་གདའ། །ཤོར་ས་གོལ་ས་ཆེ་ཤོས་འདི་འདྲས་བྱེད། །རྐྱེན་དང་བར་ཆོད་ཐམས་ཅད་འདི་ལས་འབྱུང་། །དེ་ཕྱིར་ངར་འཛིན་འདུལ་ཐབས་གལ་རེ།། ༈ །།གང་ཞིག་གེགས་སྐྱོན་

[Full Size]

མེད་པར་ཉམས་བླངས་ན། །རྣལ་འབྱོར་བཞི་དང་ས་བཅུ་ལམ་ལྔ་སོགས། །ཡོན་ཏན་མ་ལུས་དབྱར་གྱི་རྩི་ཐོག་བཞིན། །དུས་ལ་བབས་པས་འབད་མེད་ལྷུན་གྱི་གྲུབ། །མཐུན་མོངས་ཐེག་པའི་ལམ་ལྔ་ས་བཅུ་སོགས། །བྱང་ཕྱོགས་སོ་བདུན་ཡོན་ཏན་མཐའ་དག་ཀུན། །སྔགས་ཀྱི་ཐེག་ཆེན་མྱུར་ཟབ་སེས་ལམ་འདིར། །གྲངས་མེད་གསུམ་སོགས་མི་འགྱངས་གཅིག་ཆར་འགྲོད། །རྩེ་གཅིག་གསུམ་ལ་མཉམ་གཞག་རང་དབང་ཐོབ། །སྤྲོས་བྲལ་གསུམ་གྱི་མཉམ་རྗེས་དབྱེར་མེད་འགྲུབ། །རོ་གཅིག་གསུམ་ལ་སྣང་སེམས་གཉིས་སྣང་བགྲོད། །བསྒོམ་མེད་གསུམ་གྱིས་ཤེས་སྒྲིབ་མཐའ་དག་བྲལ། །ཚོགས་ཀྱི་ལམ་གསུམ་སྔོན་འགྲོའི་སྐབས་ནས་གྲོལ། །སྦྱོར་ལམ་གསུམ་ནི་རྩེ་གཅིག་གསུམ་གྱིས་བགྲོད། །སྤྲོས་བྲལ་དུས་ཚེ་མཐོང་ལམ་ཡེ་ཤེས་བརྙེས། །སྒོམ་ལམ་ས་བཅུ་རོ་གཅིག་གསུམ་གྱིས་ཐོབ། །བསྒོམ་མེད་མི་སློབ་མཐར་སོན་ནང་གི་ས། །

[Full Size]

བཅུ་གཅིག་བཅུ་གཉིས་བཅུ་གསུམ་སྐད་ཅིག་བགྲོད། །སྐུ་གསུམ་གོ་འཕང་མཆོག་བརྙེས་གཞན་དོན་མཛད། ༈ །འགའ་ཞིག་ཕར་ཕྱིན་ཐེག་པའི་ས་ལམ་གྱི། །ཡོན་ཏན་བརྒྱ་ཕྲག་མང་པོ་གསུངས་པ་རྣམས། །སྔགས་ཀྱི་ཉེ་ལམ་འདིར་བཞུགས་རྣལ་འབྱོར་ལ། །མངོན་པར་མི་སྣང་ཞེས་སུ་བསྐུར་འདེབས་ཀྱང་། །ཕྱི་རོལ་ཕལ་པའི་ངོ་ལ་མི་སྣང་མང་། ཁྱུང་ཕྲུག་སྒོ་ངར་གཤོག་དྲུག་རྒྱས་པ་དང་། །སེང་གེ་མངལ་ན་རྩལ་གསུམ་རྫོགས་པ་ལྟར། །རྣལ་འབྱོར་ལུས་རྒྱ་གྲོལ་དང་ཡོན་ཏན་སྣང་། །དེ་སྐད་ཟབ་མོའི་རྒྱུད་སྡེ་རྣམས་ལས་གསུངས། །རྣལ་འབྱོར་བཞི་དང་ས་ལམ་སྦྱར་བཤད་སོགས། །ཞིབ་རྒྱས་མ་ལུས་སྒྲུབ་རྒྱུད་གོང་མ་རྣམས། །ཇི་བཞིན་མངོན་དུ་གྱུར་ནས་གསུངས་པ་ལས། །ལྷག་པ་བདག་འདྲས་བརྗོད་རྒྱུ་ག་ལ་མཆི། །ཚུལ་བཞིན་ཉམས་སུ་ལེན་པའི་སྐལ་ལྡན་ལ། །ཡོང་ཡོང་ཐོབ་ཐོབ་བཤད་པ་མི་དགོས་པར། །

[Full Size]

ཡོན་ཏན་མངོན་གྱུར་རང་ལ་འབྱུང་བས་ན། །དེ་ཕྱིར་ཉམས་ལེན་ཁོ་ནས་ཆོག་པར་འགྲོ།། ༈ །།དེ་ལྟའི་ལམ་རྟགས་མཐའ་རུ་མ་ཕྱིན་པར། །ཚེ་ཡི་འདུ་བྱེད་ཟད་པར་ཉེ་བ་ན། །འཆི་རྐྱེན་མ་ངེས་འཆི་དུས་མི་ཐིངས་བས། །རྟག་ཏུ་འཆི་ཁའི་ཉམས་ལེན་གྲབ་ཆུད་བྱ། །རིང་བའི་འཆི་ལྟས་རིམ་གྲོས་ལྷུས་ཚུལ་སོགས། །འདི་རུ་མ་བརྗོད་ཉེ་བའི་འཆི་ལྟས་ནི། །རླུང་ལྔ་མལ་འཆུག་འཁོར་བའི་རྩ་མདུད་འཇིགས། །ས་ཁམས་ཆུར་ཐིམ་ལུས་ཀྱི་འཚོ་མི་ཐུབ། །ཤེས་པ་བྱིང་ཞིང་སྨིག་རྒྱུའི་འོད་གསལ་འཆར། །ཆུ་ཁམས་མེར་ཐིམ་ཁ་སྣའི་ཆུ་ཆད་སྐམ། །ཤེས་པ་རབ་འཚུབས་འོད་གསལ་དུ་བ་འཆར། །མེ་ཁམས་རླུང་ཐིམ་ཕྱི་རོལ་སྣང་བ་འགག །འོད་གསལ་སྲིན་བུ་མེ་ཁྱེར་ལྟ་བུ་འཆར། །རླུང་ཁམས་རྣམ་ཤེས་ལ་ཐིམ་དབུགས་བརྩེགས་སྡུད། །འོད་གསལ་སྒྲོན་མེ་འབར་བ་ལྟར་མཐོང་ཞིང་། །ཟུག་རྔུ་ཆེ་དང་འཁྲུལ་

[Full Size]

སྣང་སྣ་ཚོགས་འཆར། །དཀར་ཆ་ཐུར་འབབ་དཀར་ལམ་སྣང་བའི་ཚེ། །ཞེ་སྡང་ལས་གྱུར་རྟོག་པ་སོ་གསུམ་འགག །དམར་ཆ་གྱེན་ལྡོག་དམར་ལམ་སྣང་བ་འཆར། །འདོད་ཆགས་ལས་གྱུར་རྟོག་པ་བཞི་བཅུ་འགག །སྙིང་ཁར་ཕྲད་པས་ནག་ལམ་སྣང་བ་ན། །གཏི་མུག་རྟོག་པ་བདུན་འགག་དེ་ཡི་ཚེ། །དཀར་དམར་རླུང་སེམས་ལྷན་ཅིག་འདུས་པའི་མཐུས། །གཞི་ཡི་འོད་གསལ་དར་གཅིག་འཆར་འགྱུར་བས། །དེ་ལ་ད་ལྟའི་སྒོམ་གྱིས་སླབ་ནུས་ན། །ཡར་གྱི་ཟང་ཐལ་མཆོག་ཏུ་སྐད་ཅིག་གྲོལ། །དེ་ཚེ་སྒོམ་གྱི་དྲན་རིག་མ་སླབ་ན། །དཀར་ཆ་གསང་ལམ་དམར་ཆ་སྣ་སྒོར་བབས། །རྣམ་ཤེས་དབང་པོའི་སྒོ་དགུ་གང་རུང་འཐོན། །ལུས་ནང་དབུགས་ཆད་ལུས་སེམས་སོ་སོར་གྱེས། །སྒྲ་འོད་ཟེར་གསུམ་སྣ་ཚོགས་འཆར་བ་དང་། །རྙིང་ལུགས་ལྟར་ན་ཞི་ཁྲོའི་ལྷ་ཚོགས་འཆར། །གཞན་ཡང་སོ་སོའི་གོམ་འདྲིས་

[Full Size]

ཐ་དད་དང་། །དགེ་སྡིག་གང་ལ་འགྲིས་པ་དེ་ཚུལ་དང་། །མཐུན་པའི་འཆར་སྒོ་བརྗོད་ཀྱི་མི་ལངས་མོད། །ཐམས་ཅད་ཀུན་ལ་རང་སེམས་འཆར་སྒོ་ཉིད། །ཡིན་པར་ཤེས་ན་ནམ་ཤེས་གྲོལ་འགྱུར་ཡང་། །བག་ཆགས་ངན་པའི་སྟོབས་ཤུགས་དབང་བཙན་པས། །སྒོམ་གྱིས་མི་སློབ་ཨ་འཐས་འཁྲུལ་མཁན་མང་། །ཆོས་ཉིད་བར་དོ་རང་ངོ་མ་ཤེས་པས། །སྣང་བ་དེ་དག་གར་སོང་ཆ་མེད་ཡལ། །དེ་ནས་སྲིད་པ་བར་དོའི་སྣང་བ་ཤར། །ཡིད་ལུས་དབང་པོ་ཀུན་ཚངས་ཐོགས་མེད་རྒྱུ། །ཟས་སུ་དྲི་ཟ་རྫུ་འཕྲུལ་མངོན་ཤེས་ལྡན། །ཡ་ངའི་གཡང་གསུམ་འཇིག་པའི་དགྲ་གཞིས་མནར། །མ་ངེས་རྟགས་དྲུག་ལ་སོགས་ཀུན་འབྱུང་ཞིང་། །བྱ་སྒྲོ་རླུང་ཁྱེར་བཞིན་དུ་དབང་མེད་འཁྱམས། །སྣ་ཚོགས་སྡུག་བསྔལ་ཚོར་བ་གཞན་ལས་རག །བདུན་ཚིགས་བདུན་གྱི་ཕྱེད་ཙམ་ཚུན་ཆོད་དུ། །ཚེ་འདིའི་བག་ཆགས་ཤས་ཆེ་ཟིན་སླ་ཞིང་། །དེ་འདས་ཕན་ཆད་

[Full Size]

སྐྱེ་བ་ཕྱི་མ་ཡི། །སྣང་བ་དབང་བཙན་དེ་ནས་བསྒྱུར་བར་དཀའ། །དེ་ཕྱིར་དགེ་བ་མྱུར་ཁྱད་གནད་འདི་ཡིན། །འདི་དུས་འགྲོ་བ་རིས་དྲུག་གར་སྐྱེ་རྒྱུའི། །རྣམ་བྱང་འོད་ཀྱི་ལམ་དང་སྐྱེ་གནས་ཀྱི། །བཀོད་པ་མཐའ་དད་མཐོང་ཚུལ་འདི་ལྟ་སྟེ། །ལྷ་རུ་སྐྱེ་ན་གཞལ་ཡས་ཁང་པ་དང་། །ལྷ་མིན་དམག་འཁྲུག་མི་ལ་ཡུལ་གྲོང་སྣང་། །བྱོལ་སོང་བྲག་ཕུག་ཡེ་དགས་གྲོགས་སྟོང་དང་། །དམྱལ་བ་ལྕགས་ཁང་ལ་སོགས་མཐོང་འགྱུར་ཞིང་། ཁྱད་པར་ཕ་མ་ཆགས་སྤྱོད་མཐོང་བ་ལ། །ཆགས་སྡང་རྟོགས་པ་སྐྱེས་ནས་མངལ་འཇུག་པས། །དེ་ལ་མངལ་སྒོ་དགག་པའི་གདམས་པ་ཡང་། །རང་ཉིད་ཉམས་ལེན་གང་ལ་གོམས་པ་ཡི། །རབ་ཀྱིས་རྫོགས་རིམ་ཕྱག་རྫོགས་སྟོང་ཉིད་དང་། །འབྲིང་གིས་སྐྱེད་རིམ་ཐ་མས་ཞེན་ལོགས་སྒོམ། །ཡང་ན་བླ་མ་ཡབ་ཡུམ་བསྒོམ་པ་སོགས། །ཐ་མལ་ཆགས་སྡང་མི་སྐྱེའི་

[Full Size]

ཐབས་ལ་འབད། །མངལ་སྒོ་ཁེགས་པར་མ་ནུས་སྐྱེ་གནས་འདམས། །མི་ལུས་ཆོས་ལྡན་སྐྱེ་བའི་རྟེན་འབྲེལ་བསྒྲིགས། །ཡང་ན་དག་པའི་ཞིང་དུ་འདུན་པས་འཕོ། །དེ་ལྟར་བར་དོའི་གདམས་པ་ཐམས་ཅད་ཀྱི། །གཙོ་བོར་སྐྱེ་གནས་བར་དོའི་སྐབས་འདིར་རེམ། །དེ་བས་ད་ལྟ་རང་དབང་ཡོད་དུས་འདིར། ཤི་ནས་དགེ་ལ་རེ་ཡང་ཕྱིས་ཏེ་ཐལ། །དེས་ན་ཟབ་ལམ་ཆོས་དྲུག་གདམས་པ་དང་། །བར་དོའི་འཕྲང་སྒྲོལ་དགྲ་བཞི་ལམ་ཁྱེར་དང་། །ཐོས་གྲོལ་ལ་སོགས་གདམས་པ་གང་མོས་རྣམས། །ལོང་ཁྱབ་ཡོད་རིང་རྒྱུད་ལ་འགྲིས་པར་བྱ། །མདོར་ན་འདི་ཕྱི་བར་དོ་ཐམས་ཅད་དུ། །དགོས་ངེས་ཤེས་པ་རང་སེམས་གཉུག་མའི་གཤིས། །བཟོ་མེད་ལྷུག་པའི་སྐྱོང་ཚུལ་འདི་ཉིད་ནི། །གདམས་པ་ཀུན་གྱི་ནང་ནས་མཆོག་རབ་ལགས། །དེ་ཉིད་ངང་ནས་སྒོ་གསུམ་སྐད་ཅིག་ཀྱང་། །སྙོམ་ལས་མི་བྱ་སྤྲོས་བཅས་སྤྲོས་མེད་ལ།

[Full Size]

རྒྱུན་དུ་བརྩོན་པས་འཆི་ཁར་འགྱོད་མེད་འཚལ། །དགེ་སྦྱོར་གང་བྱེད་འགྲོ་ལ་ཕན་ཕྱིར་དུ། །སེམས་བསྐྱེད་རྩིས་ཟིན་བསྔོ་སྨོན་རྒྱ་ཡིས་གདབ། །རང་གིས་རང་ཉིད་ཆོས་ལ་དགོས་པར་མཛོད། ༈ །དེ་ལྟར་ཁྱེད་ཀྱི་ཇི་སྐད་བསྐུལ་བ་བཞིན། །གདམས་པའི་ཟབ་གནད་འགག་དོན་མདོར་བསྡུས་ཙམ། །ཡི་གེ་བྲིས་ནས་ཕུལ་བ་འདི་བཞིན་དུ། །ཐུགས་ལ་སྦྱོར་མཛོད་རྒྱུད་ལ་འདྲེས་ངེས་མཛོད། །རྒྱས་བཤད་སྤྲོ་བར་བདག་གི་ནུས་མིན་ཀྱང་། །ཉམས་སུ་ལེན་ཚུལ་འདི་ཀས་མ་ཆོག་མེད། །དངོས་སུ་ཕྲད་ཀྱང་བསྟན་རྒྱུ་འདི་ལས་ཅི། །དེས་ན་འདི་ཉིད་ཐུགས་ལ་བཅགས་པར་ཞུ། །སྐྱེ་བ་འདི་ནས་ཚེ་རབས་ཐམས་ཅད་དུ། །མི་འབྲལ་ཟབ་དོན་ཆོས་ཀྱི་དགའ་སྟོན་ལ། །ལྷན་ཅིག་སྤྱོད་པས་མཁའ་ཁྱབ་སེམས་ཅན་ཀུན། །སྐུ་གསུམ་གོ་འཕངས་མཆོག་ལ་འཁོད་པར་སྨོན། །ཞེས། བྱང་ཕྱོགས་རྔོད་

[Full Size]

ཀྱི་ཡུལ་ནས། བླ་མ་དགེ་སློང་མཚོ་སྐྱེས་ལྷུན་གྲུབ་པའི་བཞེད་པ་སྐོང་ཕྱིར་ཕུལ་བ་དགེའོ།། ༈ །།ཨེ་མ་གསོན་དང་སྐལ་ལྡན་ཛྙཱ་ན་བ། །དད་མོས་གདུང་བས་བླ་མ་དྲན་པ་འདི། །ཀུན་རྫོབ་རྩོལ་བྱས་བླ་མའི་རྣལ་འབྱོར་ཡིན། །བླ་མའི་ཐུགས་དང་རང་སེམས་འདྲེ་བ་ནི། །དོན་དམ་རྩོལ་མེད་བླ་མའི་རྣལ་འབྱོར་ཡིན། །རིག་པ་མ་བཅོས་ལྷུག་པར་འཇོག་པ་འདི། །ཀུན་ཁྱབ་ཆོས་སྐུའི་བླ་མའི་རྣལ་འབྱོར་ཡིན། །ཚོགས་དྲུག་སྣང་བ་གང་ཤར་ཞེན་མེད་འདི། །གསལ་མདངས་ལོངས་སྐུ་བླ་མའི་རྣལ་འབྱོར་ཡིན། །རྣ་རྟོག་འགྱུ་དྲན་རང་ངོ་ཤེས་པ་འདི། །སྣ་ཚོགས་སྤྲུལ་སྐུ་བླ་མའི་རྣལ་འབྱོར་ཡིན། །སངས་རྒྱས་ཐམས་ཅད་བླ་མའི་ངོ་བོར་གཅིག །དེ་ལྟར་ཤེས་ན་བྱིན་རླབས་ངང་གིས་འཇུག །ལྷ་ཚོགས་མ་ལུས་བླ་མའི་རྣམ་འགྱུར་ཚུལ། །ཡིན་པར་ཤེས་ན་དངོས་གྲུབ་ཟད་མེད་འབྱུང་། །མཁའ་འགྲོ་ཆོས་སྐྱོང་བླ་མའི་སྤྲུལ་པ་ཡིན། །དེ་བཞིན་གོ་ན་ཕྲིན་ལས་རང་བཞིན་འགྲུབ།

[Full Size]

སྣང་སྲིད་ཀུན་ཀྱང་བླ་མའི་དཀྱིལ་འཁོར་ཡིན། །དག་སྣང་འབྱོངས་ན་ཐུགས་རྗེ་ཀུན་ལ་ཡོད། །ཕྱི་རོལ་འབྱུང་བ་ཐམས་ཅད་བླ་མའི་སྤྲུལ། །གང་ལ་གང་མཁོའི་འགྲོ་དོན་མཛད་པ་ཡིན། །ནང་བཅུད་སྐྱེ་འགྲོ་ཐམས་ཅད་བླ་མའི་སྤྲུལ། །ཆོས་སྐུ་བདེ་གཤེགས་སྙིང་པོས་མ་ཁྱབ་མེད། །བདེ་སྐྱིད་ལོངས་སྤྱོད་ཐམས་ཅད་བླ་མའི་དྲིན། །གང་བསམ་ཡིད་བཞིན་དངོས་གྲུབ་སྩལ་བ་ཡིན། །ན་ཚ་རྐྱེན་ངན་ཀུན་ཀྱང་བླ་མའི་ཕྲུལ། །སྡུག་བསྔལ་མྱོང་བས་སྡིག་སྒྲིབ་ཟད་པར་བྱེད། །ཀུན་ཁྱབ་ཀུན་བྱེད་ཀུན་འབྱུང་ཀུན་ཏུ་བཟང་། །དེ་ཕྱིར་བླ་མའི་ལམ་ཁྱེར་གནད་དུ་ཟབ།། ༈ །།ཡང་ཅིག་གསོན་དང་དད་ལྡན་ཛྙཱ་ན་བ། །བླ་མ་རང་སེམས་དབྱེར་མེད་མ་རྟོགས་ན། །ཀུན་རྫོབ་གཟུགས་སྐུའི་བླ་མར་འདུ་འབྲལ་ཡོད། །རང་རིག་བླ་མ་ཆོས་སྐུར་ཤེས་པ་གནད། །བཟང་ངན་མཐའ་དག་བླ་མར་མ་རྟོགས་ན། །དག་སྣང་ཕྱོགས་མེད་འཆར་བའི་

[Full Size]

ཐབས་གཞན་མེད། །དག་སྣང་མ་འབྱོངས་སྣང་སྲིད་དགྲ་རུ་ལྡང་། །དེ་བས་གང་འདུལ་སྤྲུལ་པར་ཤེས་པ་གནད། །དགྲ་འདྲེ་རྐྱེན་ངན་བླ་མར་མ་ཤེས་ན། །བར་ཆད་གཅིག་ལ་གཟུར་ཡང་གཅིག་དང་འཕྲད། །བདག་འཛིན་བློ་ཡིས་མ་ཐེངས་འདི་ཀས་ལན། །གང་བྱུང་བླ་མའི་ཐུགས་རྗེར་ཤེས་པ་གནད། །འཆི་ཁའི་དུས་ནའང་བླ་མ་མ་དྲན་ན། །ཤེས་ཤེས་བྱས་བྱས་མང་ཡང་རྨི་ལམ་འདྲ། །རྣམ་ཤེས་གཅིག་པུ་བར་དོར་འཁྱམས་པའི་ཚེ། །རེ་ས་སྐྱབས་ཡུལ་གཞན་ན་གང་ཡང་མེད། །དེ་ཕྱིར་བླ་མའི་ལམ་ཁྱེར་ཟབ་གནད་འདི། །ཚིག་དང་ཡི་གེར་མ་བཞག་སེམས་ལ་འཆོང་། །བརྒྱད་ཁྲི་བཞི་སྟོང་ཆོས་ལས་འདི་ཉིད་ཟབ། །ཟབ་དང་མི་ཟབ་ཉམས་སུ་ལེན་ལ་རན། །ཉམས་ལེན་མི་བྱེད་ཟབ་ཀྱང་ཕན་པར་དཀའ། །དེ་ཕྱིར་བློ་སྙིང་བྲང་གསུམ་འདི་ལ་གཏོད། །ཟབ་དང་མི་ཟབ་ཉམས་སུ་ལེན་ལ་རན། །ཉམས་ལེན་མི་བྱེད་ཟབ་ཀྱང་ཕན་པར་དཀའ། །དེ་ཕྱིར་བློ་སྙིང་བྲང་གསུམ་འདི་ལ་གཏོད། །གདམས་པ་འདི་ཡིས་དད་ལྡན་སྨིན་པར་ཤོག །

[Full Size]

ཅེས། བླ་མའི་ལམ་ཁྱེར་གྱི་གདམས་པ་སྙིང་པོར་དྲིལ་བའི་ཞལ་གདམས་སྙིང་གཏམ་འདི་ཉིད་རྣལ་འབྱོར་པ་ཛྙཱ་ན་ཀིརྟི་ལ་གདམས་པ་ཨིྀྠ། །ཨེ་མ་ཧོ། །རབ་བྱམས་རྒྱལ་བའི་ཞིང་གི་སྒྲོན་མ་ཀུན། །གཅིག་ཏུ་བསྡུས་པའི་མཐུ་སྟོབས་ནུས་ཐུགས་རྗེ། །ཟླ་མེད་མ་ཧཱ་གུ་རུ་ཐོད་འཕྲེང་རྩལ། །གང་དེའི་སྒྱུ་འཕྲུལ་ཟློས་གར་སྙིགས་དུས་མགོན། །ཁམ་ཁྲུག་ཧེ་རུ་ནམ་མཁའ་འཇིགས་མེད་ཀྱི། །ཞབས་པད་སྲི་ཞུས་གཙུག་ཏུ་མཆོད་མཁས་པ། །སྡོམ་བརྩོན་རྣལ་འབྱོར་ཡེ་ཤེས་ཕུན་ཚོགས་པས། །ཐུགས་ཀྱི་ལྷག་བསམ་ལང་ཚོ་དཀར་པོ་དང་། །ལྷན་ཅིག་དཀར་ལ་འགྲན་པའི་ལྷ་གོས་མཆོག །དྲི་འཛིན་སེམས་བདེ་སྟེར་བའི་སྡོང་བུར་བཅས། །འཆི་མེད་ཤིས་བརྗོད་དབྱངས་ཀྱི་རྒྱུད་མང་སྒྲོ། །རབ་གསལ་ཡི་གེར་རྣམ་པར་སྤྲུལ་པའི་ཕྲེང་། །མི་གཤིག་ཕྱག་རྒྱས་ལེགས་བཏབས་མ་ཉམས་པར། །ཐ་འཁོབ་མུན་པའི་རོང་དུ་བདེར་

[Full Size]

འབྱོར་བས། །ཡིད་དབང་སྤྲོ་བའི་འདབ་བརྒྱ་རྒོད་པར་གྱུར། །དེ་དང་མཚུངས་པར་ཉེ་གནས་ཟུང་གནས་ལའང་། །ཕྱག་ཐམ་རྟེན་ལྡན་བསྩལ་བའི་དོན་ཆའང་ངེས།། ༈ །།ཀྱེ་ཧོ། སྲིད་པའི་བདེ་བ་རྨི་ལམ་ལས། །ཆོས་ཆེར་བསླུ་བའི་རྨིས་ཆེན་འདིར། །ཨ་འཐས་རྡོ་རྗེའི་སྲོག་འཛིན་བཞིན། །ངལ་བ་འབྲལ་མེད་བསྒྲུབ་རེམས་པའི། །རྩོད་ལྡན་འགྲོ་འདི་ཅི་ཞིག་བསམ། །དགྲ་གཉེན་འཇིག་རྟེན་བྱ་བྱེད་ཀྱི། །ལས་ལ་འབད་པའི་སྙིང་སྟོབས་ཙམ། །དམ་པའི་ཆོས་ཕྱོགས་ཁ་བསྟན་ན། །ཅི་མ་རུངས་ཏེ་གོ་ལོག་འཁྲུལ།། ༈ །།དེས་ན་དགེ་བའི་བཤེས་མཆོག་ཁྱེད། །ངོ་མཚར་གནས་མཆོག་དེ་ལྟ་བུར། །ཚེ་དང་སྒྲུབ་པ་མཉམ་པ་ཡི། །གོ་ཆ་དེ་བཞིན་ཨ་ལ་ལ།། ༈ །།འཁོར་འདས་ཀྱི་བྱེད་པོ་སེམས་ཉིད་ཀྱི། །གཤིས་ངོ་ལ་འགྱུར་

[Full Size]

བ་མེད་བཞིན་དུ། །སྣང་ངོ་རུ་སྣ་ཚོགས་འཆར་བ་འདིས། །གང་ཟག་རྣམས་ཅིར་ཡང་བྱེད་དུ་བཅུག །འགའ་ཞིག་གི་རྣམ་རྟོག་སྤོང་བསྒྱུར་བགེགས། །ཆུ་ཉིད་ཀྱི་ཆུ་རེག་བྱེད་པ་འདྲ། །འགག་ཞིག་ནི་བཅོས་མའི་དམིགས་པས་གཟིར། །ཆབ་རོམ་ལ་ཤེལ་དུ་ཞེན་དེ་མཚར། །ལ་ལ་དག་རྟོག་པའི་རྗེས་འབྲེང་བྱེད། །སྐྱི་སེར་གྱི་རྟ་ལ་ཞོན་པ་འདྲ། །ཕལ་ཆེར་ནི་སེམས་ལ་སེམས་ཀྱིས་བསྒོམ། །རང་ཉིད་ལ་རང་དུ་ཅི་ཕྱིར་བསྒོམ། །ལར་བཟང་བཟང་ཞིག་འདོད་པའི་སྒོམ་བློ་དང་། །ངན་ངན་ཞིག་སྤོང་བློའི་ལྷན་པ་འདི། །མི་དགོས་ཀྱང་ནན་གྱིས་འདེབས་བྱེད་པས། །སྒོམ་ཆེན་རྣམས་སྒོམ་གྱི་འོ་རྒྱལ་ལྷན། །བཅོས་མིན་ཀྱི་རིག་པ་ཅང་ཤེས་རྟ། །རང་འགྲོས་ལ་བཏང་ན་འཆུག་མི་སྲིད། །ཟབ་ཟབ་དང་ཡིན་ཡིན་ཁམས་ཆེ་ཆེའི། །གྲུབ་མཐའ་དང་

[Full Size]

ཆོས་ལུགས་ཞེན་ཕྱོགས་ཀྱི། །ཐང་འཐེན་དེ་ཤི་ལ་ཐུག་བྱེད་ཀྱང་། །སེམས་ཉིད་ཀྱི་རང་འགྲོས་ཤེས་པ་དཀོན། ཧ་ཧ། གཅིག་ཤེས་ཀུན་གྲོལ་གནད་ཀྱི་འཚང་རིག་ན། །ཅི་ལྟར་བྱས་ཀྱང་ཆོས་ཀྱི་དབྱིངས་ཉིད་དེ། །སྣོད་བཅུད་ཡེ་ནས་ལྷ་ཡི་དཀྱིལ་འཁོར་དུ། །ཡིན་ཚུལ་ཤེས་ན་སྐྱེད་རིམ་ལོགས་ན་མེད། །འགྲོ་ཀུན་བླ་མའི་རྣམ་འཕྲུལ་འབའ་ཞིག་པ། །ཡིན་པར་རྟོགས་ན་དག་སྣང་སྦྱང་དགོས་ཅི། །སྐྱིད་སྡུག་ཐམས་ཅད་བྱིན་རླབས་ཁོ་ན་རུ། །གོ་ན་བར་ཆད་རྐྱེན་ངན་ག་ནས་བྱུང་། །ཚོགས་དྲུག་གང་ཤར་འཛིན་མེད་ཞེན་མེད་དུ། །བསྐྱུར་ན་འགལ་མཐུན་དགག་བསྒྲུབ་དགོས་མེད་གྲོལ། །ཐ་མལ་ཤེས་རིག་ཟང་ཐལ་རྗེན་པ་ལ། །བསྒོམ་རྒྱུ་སྒོམ་བྱེད་གཉིས་སུ་དབྱེ་དོན་མེད། །ཡེངས་ཀྱི་དོགས་དང་མ་ཡེངས་སྐྱོང་སྙམ་པའི། །ཆུ་ལ་རི་མོ་འབྲི་ནས་ཅི་ཞིག་བྱ། །རང་ལུགས་རང་བབས་རང་སར་ལྷོད་

[Full Size]

ཀྱི་གློད། །བསྒོམ་རྒྱུ་མེད་ལ་རང་ངོ་ཤེས་རྒྱུ་ཡོད། །རང་ངོ་ཤེས་རྒྱུ་ཤེས་མཁན་གཉིས་མིན་པར། །གཅིག་ཐོག་བློ་ཐག་ཆོད་པ་གནད་དུ་ཟབ། །གཅིག་དང་དུ་མའང་མིང་ཙམ་ཚིག་ཙམ་སྟེ། །མིང་ཚིག་བརྗོད་པ་མང་པོས་མགོ་བོ་འཁོར། །རྣམ་རྟོག་ཆོས་སྐུར་བཞེད་དང་མི་བཞེད་དང་། །དྲན་པ་སྒོམ་དུ་རུང་དང་མི་རུང་དང་། །ཉམས་རྟོགས་ཤན་འབྱེད་མཉམ་རྗེས་དབྱེ་བསྡུ་དང་། །ཤོར་གོལ་གེགས་སེལ་ས་ལམ་བགྲོད་མཚམས་སོགས། །མིང་སྙན་ཚིག་གི་འཕྲེང་ཚོགས་མང་པོ་ཡིས། །སེམས་ཁྲལ་གཉེར་ཁག་མ་ལུས་ལིང་དོར་ནས། །བཟོ་མེད་ཆོས་སྐུའི་མལ་དུ་གཟིམས་མཛོད་དང་། །གཅིག་ཆོག་བློ་བདེའི་རྒྱལ་ས་ཟིན་པར་འགྱུར།། ༈ །།དེ་སྐད་ཅལ་ཅོལ་སྨྱོན་པའི་གཏམ་འདྲ་འདི། །མང་ཐོས་མཁྱེན་ལྡན་ཁྱེད་ཐུགས་མགུ་མིན་ཀྱང་། །དཀྱིལ་འཁོར་དམ་ཚིག་གཅིག་པའི་ནང་

[Full Size]

མཆོད་དུ། །འབུལ་གྱི་དབྱིངས་འཁྲེལ་མེད་པར་རོལ་དུ་གསོལ། །ཡི་གེའི་འདེགས་བྱེད་སྒྱུ་མའི་ནོར་རྫས་རིགས། །ལམ་རིང་དགྲ་ཡི་གཡབ་མོར་འགྱུར་དེས་ཅི། །དེ་ཕྱིར་བྱིན་རླབས་རྟེན་ཙམ་ཕྱི་ཚས་ལ། །རྟགས་ཀྱི་བཀྲ་བར་ས་གའི་ཚེས་ལ་ཕུལ། །ཞེས་པ་འདི་གནས་ཆེན་ཡར་ཀླུང་ཤེལ་ཕྲག་རུ། བླ་མ་དགེ་སློང་རིན་པོ་ཆེ་ཡེ་ཤེས་ཕུན་ཚོགས་ལ་ཕུལ་བའོ། །ཀྱེ་མ་གྲོགས་དག་དལ་འབྱོར་ཕུན་ཚོགས་ཀྱི། །མི་ལུས་ཐོབ་ཀྱང་ནམ་འཆིའི་ངེས་མེད་པ། །དོ་ནུབ་ཙམ་ཡང་མི་འཆིའི་གདེངས་མེད་པས། །སྙིང་ནས་ལོང་མེད་ཚུལ་འདི་གོ་ལགས་སམ། །འཆི་བར་གྱུར་པ་ཙམ་གྱིས་མི་ཆོག་པ། ཁམས་གསུམ་རིགས་དྲུག་གར་སྐྱེར་བདེ་བ་ནི། །ཅུང་ཟད་ཙམ་ཡང་གོ་སྐབས་མ་མཆིས་ན། །དེ་བས་སྐྱོབ་པའི་བློ་གཏད་གང་ལ་བྱེད། །རྒྱུ་འབྲས་ལས་ཀྱིས་བསླུ་བར་མི་སྲིད་ཚེ། །ཉིན་ཞག་རེ་ལའང་སྒོ་གསུམ་མི་དགེ་བ། །ཞོར་ལ་ཅི་ཙམ་འགྲོ་འདུག་ལེགས་བསོམ་དང་།

[Full Size]

སྐྱི་གཡའ་སྙིང་ནས་ཟ་བར་མི་གདའམ། །བསླབ་གསུམ་སྡོམ་པ་བསྲུང་ཀྱང་ཚུལ་འཆོས་འདྲེས། །ཐོས་བསམ་སློབ་གཉེར་བྱེད་ནའང་ཟ་ཐབས་ཙམ། །མཚམས་བསྒྲུབ་དགེ་སྦྱོར་བྱེད་རློམས་ཆོས་བརྒྱད་སྤེལ། །གང་ནའང་རང་རྒྱུད་ཐུལ་བའི་ཆོས་པ་དཀའ། །སྐྱེད་རིམ་བསྒོམ་ཡང་ཀུན་བཏགས་དྲི་མས་སྦགས། །བཟླས་བརྗོད་འབུངས་ཀྱང་བསྲུང་ཟློག་གསད་དོན་གཉེར། །རྫོགས་རིམ་བསྒོམ་འདོད་རྣམ་རྟོག་རྫིང་ཆུར་བསྐྱིལ། །བྱང་ཆུབ་ལམ་དུ་གང་གིས་བསྒྲོད་པར་བྱེད། །ཐོབ་ཐོབ་ཤེས་ཤེས་བགྲང་ཡང་རྒྱུད་མ་ཁེལ། །གཞན་སྐྱོན་མཐོང་མིག་རྣོ་ཡང་རང་མ་རིག །གྲབ་ཡུལ་ཡིད་སྨོན་ངང་ལ་མི་ཚེ་འདས། །དེང་སང་ཆོས་པའི་རྣམ་ཐར་དེ་འདྲར་ལགས། ༈ ཀྱེ་མ། སྙིང་ཐག་པར་ཆོས་ཅིག་བྱེད་པ་ན། །ཚེ་འདི་བློ་ཡི་ཐེངས་པ་དང་། །ལྟོ་གོས་སྐྱིད་འདོད་སྤོང་བ་དང་། །ཞེན་པ་ནང་ནས་

[Full Size]

ཟློག་པར་འཚལ། །སངས་རྒྱས་དངོས་ཀྱི་བླ་མ་དཀོན། །རྙེད་ཀྱང་དམ་ཚིག་སེལ་མེད་དཀོན། །ཅི་གསུངས་ཆོས་བཞིན་བསྒྲུབ་ནུས་དཀོན། །ཉམས་ལེན་རྩེ་གཅིག་བྱེད་པ་དཀོན། །དཀོན་དྲག་པས་དིང་སང་མི་རྙེད་པར། །ཆོས་ཁ་ལ་ཡོད་ཀྱང་གཏིང་ལ་མེད། །ཕྲལ་སྐྱིད་པོའི་ཆོས་ཅིག་མ་གཏོགས་པ། །ཕུགས་བྱང་ཆུབ་བསྒྲུབ་ནུས་སུ་ལའང་མེད། །ཕྲལ་རྣམ་དཔྱོད་ལྡན་པའི་ཆོས་ཙམ་ལ། །མི་སྐྱ་སེར་མེད་པ་ཡིད་སྨོན་ཡང་། །སེམས་ཚེ་འདིའི་དོན་ལ་ཞེན་ཞེན་ནས། །ནམ་འཆི་ཁར་འགྱོད་ཀྱང་ཕྱིས་ན་ཐལ། །གཅིག་ཤེས་ཀུན་གྲོལ་མ་བྱུང་ན། །མདོ་རྒྱུད་མན་ངག་མཐའ་དག་ལ། །མ་ཤིའི་བར་དུ་བསླབ་སྦྱངས་ཀྱང་། །ཀུན་ཤེས་གཅིག་སྡུགས་ལས་འགྲོ་ས་མེད། །ཆོས་མ་ཤེས་ཀྱི་དོགས་པ་བྱེད་མཁན་མང་། །མ་ནུས་ཀྱི་དོགས་མཁན་ཤིན་ཏུ་ཉུང་། །ཉམས་ལེན་ལ་འབུངས་ནུས་གཅིག་ཀྱང་

[Full Size]

མེད། །དོན་དེ་ཕྱིར་སྙིང་གཏམ་ཚིག་འདི་གསོན།། ༈ །།ཨེ་མ། འདི་ནས་བཟུང་སྟེ་རྣམ་པ་ཐམས་ཅད་དུ། །སྐྱིད་སྡུག་ལེགས་ཉེས་ན་ཚ་འཆི་རྐྱེན་སོགས། །གང་ལའང་བློ་རྩེ་དཀོན་མཆོག་ཁོ་ནར་གཏད། །སྐྱབས་སུ་འགྲོ་བའི་ཉམས་ལེན་རྩ་བ་ཡིན། །སེམས་ཅན་མཐའ་དག་དྲིན་ཅན་ཕ་མ་ལ། །དགྲ་གཉེན་ཆགས་སྡང་ཕྱོགས་འཛིན་ཉེ་རིང་སེམས། །སུ་ལ་བྱས་ཀྱང་ཕ་མ་གསད་དང་མཚུངས། །ཀུན་དང་མཐུན་པ་སེམས་བསྐྱེད་རྩ་བ་ཡིན། །བག་ཆགས་ངན་པ་ཐོགས་མེད་དུས་ནས་གོམས། །གཡོ་རྒྱུ་ཟོལ་ཟོག་སུས་ཀྱང་མ་བསླབ་ཤེས། །བཙན་དུག་ལྐོག་ཏུ་བཟོས་ཀྱང་འཆི་བ་བཞིན། །ངོས་ལྐོག་སྤོང་བ་དམ་སྡོམ་རྩ་བ་ཡིན། །བླ་མ་མཆེད་གྲོགས་སྣོད་བཅུད་ལྷ་སྔགས་དང་། །ཕུང་ཁམས་རྒྱལ་བའི་ཞིང་བསྒོམ་ལོག་ལྟ་སྤངས། །འཁྱེར་སོ་རྣམ་གསུམ་རྒྱུད་ལ་འགྲིས་བྱེད་པ། །དབང་བཞིའི་ཉམས་ལེན་ཀུན་

[Full Size]

གྱི་རྩ་བ་ཡིན། །སངས་རྒྱས་ཀུན་ཀྱང་བླ་མའི་ངོ་བོར་གཅིག །མཛད་ཚུལ་ཅིར་བསྟན་གང་འདུལ་ཕྲིན་ལས་ཉིད། །སྐྱོན་དུ་མཐོང་བ་རང་ཉིད་འཁྲུལ་ཚབས་ཆེ། །དག་སྣང་སྦྱོང་བ་བྱིན་རླབས་རྩ་བ་ཡིན། །འགྲོ་བའི་ཕུང་ཁམས་སྐྱེ་མཆེད་བཟོད་མ་ནས། །ལྷ་ཡི་ངོ་བོར་གྲུབ་ཀྱང་དེར་མ་རིག །དེ་ཉིད་རིག་པས་གསལ་གདབ་ཨ་འཐས་སྤོང་། །བརྡ་དོན་ཤེས་པ་སྐྱེད་རིམ་རྩ་བ་ཡིན། །གདོད་ནས་དག་པའི་ཡེ་སྟོང་མཐའ་བྲལ་གྱི། །གསལ་མདངས་འགགས་མེད་རོལ་རྩལ་ཅིར་ཡང་འཆར། །ཤར་ཡང་དོན་ལ་འཆར་བྱ་འཆར་བྱེད་མེད། །ཟུང་འཇུག་རྟོགས་པ་རྫོགས་རིམ་རྩ་བ་ཡིན། །ཡོད་མེད་རྟག་ཆད་དབུས་མཐའ་ལ་སོགས་པ། །གཉིས་ཆོས་ཐམས་ཅད་མ་སྤངས་ཡེ་གྲོལ་གྱི། །སེམས་ཉིད་གནས་ལུགས་ཇི་བཞིན་ཤེས་པ་ནི། །ཆོས་རྣམས་ཀུན་གྱི་ལྟ་བའི་མཐར་ཐུག་ཡིན། །དམིགས་པས་བཅོས་ནས་བསྒོམ་

[Full Size]

རྒྱུ་རྡུལ་ཙམ་མེད། །ཐ་མལ་འཁྲུལ་འབྱམས་སྐད་ཅིག་མི་འཆོར་བར། །མ་ཡེངས་མི་སྒོམ་ངང་ལ་དུས་འདའ་བར། །ཕྱག་རྫོགས་ཀུན་གྱི་སྒོམ་པའི་རྩ་བ་ཡིན། །ཆོས་ཀུན་རྨི་ལམ་སྒྱུ་མ་འདྲར་ཤེས་ནས། །དགག་བསྒྲུབ་མཚན་འཛིན་སྒྲོག་གིས་མ་བཅིངས་ཤིང་། །ཀུན་རྫོབ་རྒྱུ་འབྲས་ཁྱད་དུ་མི་གསོད་པར། །ཞེན་མེད་རྩོལ་བྲལ་སྤྱོད་པའི་རྩ་བ་ཡིན། །ཉོན་མོངས་དུག་ལྔ་རྩ་བ་ཡན་ལག་བཅས། །ལམ་དུ་མ་ལྷོངས་ཁ་ཆོས་སྟོང་སྐད་ཀྱིས། །གསང་སྔགས་བསྟན་པའི་ཞབས་ནས་མི་དྲང་བར། །ཆོས་དང་སེམས་འདྲེས་ལམ་ཁྱེར་རྩ་བ་ཡིན། །གང་དུ་སྡོད་ཀྱང་ཆོས་མིན་མི་བྱེད་ཅིང་། །ནམ་གྱི་དུས་ནའང་དགེ་སྦྱོར་མི་བཤོལ་དང་། །སྐད་ཅིག་ཙམ་ཡང་ལེ་ལོར་མི་འཆོར་བར། །ཉམས་ལེན་མཚམས་སྒྲུབ་ཀུན་གྱི་རྩ་བ་ཡིན། །ཅི་བྱེད་བླ་མེད་བྱང་ཆུབ་བསྒྲུབ་དོན་ལས། །ཚེ་

[Full Size]

འདིའི་ཆེད་དུ་སྤུ་ཙམ་མི་སེམས་པར། །དགེ་བ་མ་ལུས་འགྲོ་བའི་དོན་དུ་བསྔོ། །ཐེག་ཆེན་གཞན་དོན་ཀུན་གྱི་རྩ་བ་ཡིན། །ཉམས་ལེན་ཆོས་ཀྱི་རྩ་བའི་སྙིང་པོ་ཀུན། །མདོ་རུ་བསྡུས་ནས་གདམས་པའི་དགེ་བ་གང་། །མཁའ་མཉམ་འགྲོ་བ་ཀུན་ཀྱང་འདི་ལྟའི་དོན། །མ་ནོར་རྟོགས་ནས་འབྲས་མཆོག་འགྲུབ་གྱུར་ཅིག །ཅེས། ཆོས་དབང་ཡེ་ཤེས་ཀྱིས་བསྐུལ་ངོར་རྒོད་ཕུག་བྱ་སྐྱིབས་ནས་གདམས་སོ།། ༈ །།ཀྱེ་ཧོ་མདོ་རྒྱུད་མན་ངག་རྒྱ་ཆེན་ཆོས་ཀྱིས། །སྒོ་མོ་བརྒྱད་ཁྲི་བཞི་སྟོང་གསུངས་ཀྱང་། །ཀུན་གྱི་རྩ་བ་རང་སེམས་འདི་ཉིད། །འདུལ་ཐབས་གཅིག་བུ་མ་གཏོགས་གཞན་མེད། །སྨིན་བྱེད་དབང་གི་རྣམ་གྲངས་མང་པོའི། །བརྡ་ཐབས་རྟེན་འབྲེལ་སྣ་ཚོགས་དུ་མས། །བསྐུར་ཡང་རང་རིག་ཡེ་ཤེས་ངོ་བོ། །འདི་ཉིད་དབང་དོན་དངོས་གཞི་ཡིན་ནོ། །གྲོལ་བྱེད་གདམས་པའི་ཁྲིད་རིམས་ཀུན་གྱི། །ཕྱག་བཞེས་མན་ངག་ཟབ་ཟབ་མང་

[Full Size]

ཀྱང་། །སེམས་ཉིད་རྗེན་པ་བཟོ་བཅོས་མེད་འདི། །རང་ལ་རང་ངོ་སྤྲོད་ཐབས་ཁོ་ནར། །ཐམས་ཅད་མཐུན་ཡང་འཕྲོད་མཁན་དཀོན་ནོ། །གཤིས་ཀྱི་ངོ་བོ་སྤྲོས་བྲལ་ཆོས་སྐུ། །དེ་ཡི་རང་མདངས་འོད་གསལ་ལོངས་སྐུ། །འགག་མེད་ཅིར་ཡང་འཆར་གྲོལ་སྤྲུལ་སྐུ། །དེ་གསུམ་དོན་ལ་དབྱེར་མེད་རོ་གཅིག། ད་ལྟའི་ཐ་མལ་ཤེས་པ་འདི་ཡིན། །གནས་པའི་སེམས་ལ་བཟང་དུ་མ་ཞེན། །འགྱུ་བའི་རྣམ་རྟོག་ངན་དུ་མ་འཛིན། །གཉིས་ཀའི་རང་ངོར་ཅེར་གྱི་ལྟོས་དང་། །ལྟ་བ་ལྟ་མཁན་གཉིས་སུ་མེད་དོ། །མེད་ཀྱང་འཆར་ཚུལ་ཅིར་ཡང་མ་ངེས། །ནམ་མཁའི་སྤྲིན་དང་ཆུ་ཡི་རྦ་རླབས། ཤར་དང་ཐིམ་ཀུན་རང་ལས་མ་གཡོས། །དེ་བཞིན་རྣམ་རྟོག་བྱུང་ཚོར་ཐམས་ཅད། །རང་ལས་བྱུང་ཞིང་རང་གི་རང་གྲོལ། །དེ་ཡང་མིང་གི་བཏགས་ཚུལ་ཙམ་ཡིན། །དོན་ལ་སེམས་ཉིད་དངོས་པོ་མེད་ཕྱིར། །ཤར་དང་གྲོལ་བའི་

[Full Size]

དངོས་པོ་ཅི་འབྱུང་། །མེད་བཞིན་སྣང་བའི་སྒྱུ་འཕྲུལ་འདི་ལ། །ཨ་འཐས་ཞེན་འཛིན་དགག་སྒྲུབ་མ་བྱེད། །གུ་ཡངས་ཁྲོལ་ལེ་ལྷོད་དེར་ཞོག་དང་། །རིག་སྟོང་ཆོས་སྐུའི་རང་ཞལ་འཇོལ་དང་། །ཙབ་ཙུབ་བློ་སྣ་སྤན་སྤུན་མང་པོས། །རང་སེམས་རང་གིས་འཁྲུལ་དུ་མ་འཇུག །ཝལ་ལེ་ཁྱུག་མཆོག་ཅི་གར་ཐོང་དང་། །རྣམ་རྟོག་ལས་ལྷག་བསྒོམ་རྒྱུ་མི་དགོས། ཁོ་རང་བླ་མའི་མཆོག་ཏུ་འཆར་རོ། །ངེས་ཤེས་ཟབ་མོ་ནང་ནས་སྐྱེ་བོ། །སྐྱེས་ཀྱང་སྐྱེ་མཁན་ཁོ་རང་ཡིན་གྱི། །གང་ཤར་རང་ངོ་རིག་ལས་ལྷག་པའི། །སྒོམ་འདོད་སྒོམ་བློའི་ལྷན་པ་མ་རྒྱགས། །བསྒོམ་མོ་སྙམ་པའི་ཤེས་པ་དེ་ལས། །གཞན་པའི་སྒོམ་མཁན་སྒོམ་རྒྱུ་གར་འདུག །ཡེངས་སོ་འཕྲོས་སོ་འཁྲུལ་ལོ་སྙམ་མཁན། །དེ་ཉིད་ལས་གཞན་ཡེངས་མཁན་སུ་འདུག །དེ་ཕྱིར་སེམས་ཉིད་གཅིག་གི་རོལ་པར། །གང་ཡང་

[Full Size]

ཤར་མོད་ཤར་ཡང་སྟོང་ཉིད། །ཇི་ཙམ་འཆར་ཀྱང་དགག་སྒྲུབ་རྗེས་འབྲང་། །ཅི་ཡང་མི་བྱ་རང་སར་གློད་ལ། །མི་སྤྲོ་མི་བསྡུ་སྐྱུར་ལ་ཞོག་ཅིག །ཡང་དག་དོན་གཅིག་འདི་ལས་འབྱུང་ངོ་། །ལོ་བརྒྱའི་བར་དུ་ནན་གྱིས་བསྒོམས་པའི། །སྒོམ་ཆེན་སྒོམ་གྱིས་བཅིངས་པ་མང་ངོ་། །མི་བསྒོམ་བསྒྱུར་བའི་ཉམས་ལེན་འདི་ཡིས། །གཏན་འདུན་བྱང་ཆུབ་ཐོབ་པར་འགྱུར་རོ། །དེ་སྐད་གདམ་ངག་རྗེན་པར་ཕྱུངས་འདི། །ཚིག་ལ་མ་འབྱམས་རྒྱུད་ཐོག་འཁོལ་མཛོད། །ཅེས་པ་འདི་ཡང་ཉེ་གནས་པ་བསྟན་འཛིན་དར་རྒྱས་ལ་སྙིང་གཏམ་གདམས་པའི་སྙིང་ཁུར་སྨྲས་པ་ཨིྀྠ།། ༈ །།བསམ་གྱིས་མི་ཁྱབ་ཐུགས་རྗེའི་ཟློས་གར་གྱིས། །མཐའ་ཡས་འགྲོ་ལ་ཕན་བདེ་སྦྱིན་མཛད་པ། །མཚུངས་བྲལ་མ་ཧཱ་གུ་་མཉམ་རྡོར་བ། །རྩ་བའི་བླ་མ་དབྱེར་མེད་ལ་བཏུད་ནས། །གསོ་རིག་འཛིན་མཛད་བསོད་ནམས་རབ་བརྟན་མཚན། །གང་གི་སྙིང་

[Full Size]

གཏམ་བསླབ་བྱ་དགོས་གསུངས་བའི། །བཞེད་དོན་ཚིག་འགའ་སྙན་དུ་གསོལ་བགྱི་ན། ཁ་ཆོས་མ་མཛད་རྒྱུད་ལ་སྦྱོར་བར་ཞུ། །ཀྱེ་མ། །སྙིགས་དུས་རྩོད་ལྡན་མཐའ་མའི་ཡང་མཐའ་འདིར། །སྐྱེ་དགུ་ཐམས་ཅད་ལོག་ལམ་བློ་ཁ་ཕྱོགས། །ལེགས་པའི་ལམ་ལ་མདུན་མཁན་རབ་ཏུ་དཀོན། །རང་སྐྱོན་རང་གིས་ཚོར་མཁན་མ་མཆིས་ལགས། །སྨན་པར་མཚན་གསོལ་ས་སྟེང་ཁྱབ་ན་ཡང་། །སྙིང་ནས་ཕན་སེམས་ལྡན་པ་ཉིན་སྐར་ཙམ། །བློ་བཞག་དྲུག་གི་དམ་ཚིག་བསྲུང་མཁན་མེད། ཁེ་གྲགས་ཟས་ནོར་བསྒྲུབ་མཁན་མང་བ་ལག །ཡོན་ཏན་ལྡན་པའི་སློབ་དཔོན་བསྟན་ཡུན་ཐུང་། །སྙན་བརྒྱུད་ཕྱག་བཞེས་གདམས་པའི་གཏིང་མ་ལོན། ཁ་རྗེ་ཟ་ཐང་ལ་རོའི་སྨན་པ་མང་། །འགྲོ་ལ་ཕན་བདེ་སྟེར་ངེས་དཀོན་པ་ལགས། །དཔལ་ལྡན་རྒྱུད་བཞི་ཡིད་བཞིན་ནོར་བུ་དང་། ཁྱད་པར་ཟབ་མོ་མན་ངག་རྒྱུད་ཆེན་ཉིད། །

[Full Size]

དོར་ནས་ཤོག་དྲིལ་ཐང་ཐུང་བློ་གཏོད་པ། །རྒྱུད་པའི་བྱིན་རླབས་ཆུ་ཀླུངས་མི་འབྱུང་ལགས། །སྨན་པ་གཞན་ལ་དག་སྣང་མི་བྱེད་ཅིང་། །རང་གི་ཡོན་ཏན་ནོར་གྱི་ཟོང་དུ་བྱེད། །ཉོམས་ཆུང་ནད་པ་སྙིང་རྗེས་མི་སྐྱོང་བ། །གསོ་རིག་ཤེས་པའི་ཕན་ཡོན་མ་མཆིས་ལགས། །མདོ་རྒྱུད་ཀུན་ནས་གཞན་ཕན་སྨོན་ལམ། །འབད་པར་གསུངས་ན་དངོས་སུ་ཕན་ངེས་ནི། །གསོ་དཔྱད་ལས་ལྷག་གང་ཡང་མ་མཆིས་ན། །རང་འདོད་སྤངས་ནས་གཞན་ཕན་བསྒྲུབ་འཚལ་ལགས། །ཁྱེད་ཉིད་ཐུགས་དམ་ཡི་དམ་ལྷ་སྐལ་ནི། །སངས་རྒྱས་གླིང་དང་ཞིག་གླིང་ཆོས་སྐོར་ལ། །དད་མོས་ལྡན་པ་ཤིན་ཏུ་ལེགས་མོད་ཀྱང་། །གུ་འི་བླ་བསྒྲུབ་སྐབས་སུ་བབས་འོས་ལགས། །མཚན་ཉིད་ལྡན་པའི་བླ་མ་མཆོག་ཞིག་ལ། །སྡུག་བསྔལ་མུན་སེལ་ཐུགས་རྗེའི་ཉི་འོད་ཀྱི། །དབང་ལུང་ཁྲིད་ཞུས་ཉམས་སུ་ལེན་ནུས་ན། །ཆོས་

[Full Size]

བཀའ་གཞན་ལ་རེ་ལྟོས་མི་དགོས་ལགས། །ཕྱག་རྫོགས་ཉམས་བཞེས་སྔར་ནས་མཛད་མཆིས་ན། །དེ་ལས་སྤྲོས་པ་བདག་གི་ཅི་ཞིག་གསོལ། །བླ་མ་རེ་ལ་ཁྲིད་ཚུལ་མི་འདྲ་མང་། །གང་ལ་གོམས་བདེ་གདམ་ངག་ཟབ་པ་ལགས། །ཞུ་ཞུ་ཐོབ་ཐོབ་ཁ་གྲངས་བསགས་ན་ཡང་། །རང་རིག་རྗེན་པ་རང་ངོ་མ་ཤེས་ན། །ལྟ་སྒོམ་ཆོས་སྐད་བཟང་ཡང་དགོས་དུས་བསླུ། །རང་རྒྱུད་ལྐོ་སྐམ་འཐུལ་བར་དཀའ་བ་ལགས། །བྱིན་རླབས་ཚུལ་བཞིན་སྙིང་ལ་མ་ཞུགས་ན། །གདམས་པ་ཟབ་ཀྱང་རྒྱུད་ལ་སྐྱེ་མི་ནུས། །བྱིན་རླབས་འཇུག་ལ་དད་པའི་སྟོབས་ཤུགས་དགོས། །དད་པ་ཚུལ་ལྡན་དིང་སང་དཀོན་པ་ལགས། །འཁོར་འདས་ཀུན་གྱི་བྱེད་པོ་སེམས་ཉིད་འདི། །རྟག་ཆད་ཡོད་མེད་སྐྱེ་འགག་འགྲོ་འོངས་མེད། །མེད་བཞིན་སྣང་བའི་ཆོ་འཕྲུལ་ཟད་མེད་འཆར། །འཆར་མཁན་འཆར་རྒྱུ་སོ་སོར་མ་གྲུབ་ལགས།

[Full Size]

གདོད་ནས་དག་པའི་སྟོང་དབྱིངས་ཆེན་པོ་ཡི། །རྩལ་མདངས་རྣམ་པར་རྟོག་པའི་འཕྲོ་འདུ་འདི། །བཀག་པས་མི་ཁེགས་རྗེས་སུ་འབྲང་ན་འཁྲུལ། །གང་ཤར་རང་ངོ་རིག་པ་གལ་ཆེ་ལགས། །འཇུར་སྒྲིམ་གནས་ཆ་སྒྲུབ་པའི་སྡུག་ཙིར་གྱིས། །སྲོག་རླུང་རིན་གྱིས་ཉོ་བའི་སྒོམ་ཆེན་མང་། །རྣམ་རྟོག་རང་གར་ཤོར་ན་འཇིག་རྟེན་པ། །དེ་བས་རང་རིག་རང་བབས་སྐྱོང་བ་ལགས། །ཐ་མལ་འཁྲུལ་ཕྱིར་མི་འབྲེང་ཕྱག་རྒྱ་ཆེ། །བཟོ་མེད་རིག་ཐོག་གློད་པ་རྫོགས་ཆེན་དོན། །རྐྱོན་སྣང་དགག་སྒྲུབ་མི་དགོས་གཅོད་ཡུལ་དང་། །མཚན་འཛིན་ཕྱོགས་ལྷུང་མེད་པས་དབུ་མ་ལགས། །རྒྱལ་བ་ཐབས་མཁས་གདུལ་བྱ་སྣ་ཚོགས་ལ། །གང་འདུལ་ཆོས་ཀུན་མི་ཟབ་འགའ་མེད་ཀྱང་། །ཚིག་དང་ཡི་གེར་ལུས་ནས་རྒྱུད་མ་ཁོལ། །ཆོས་དང་གང་ཟག་སོ་སོར་སོང་བ་ལགས། །རང་རྒྱུད་ཆོས་ཀྱིས་

[Full Size]

མ་དུལ་ནོར་ལ་སྲེད། །གཞན་ལ་དག་སྣང་མི་འབྱོངས་ཁེགས་སེམས་ཅན། །ཆགས་བྲལ་ཆོས་གཏམ་སྟོང་ལྟ་ཁ་ཁྱེར་མཁན། །དེ་འདྲ་གསང་སྔགས་ཆོས་ཀྱི་ཞབས་འདྲེན་ལགས། །དེ་ཕྱིར་ཐོས་བསམ་ཡང་སྙིང་ཉམས་ལེན་གཙོ། །ཉམས་ལེན་སྙིང་པོར་སྐྱེད་རྫོགས་ཟུང་འཇུག་ཟབ། །ཤི་རུང་གསོན་རུང་བླ་མར་བློ་ཕུགས་གཏད། །བློ་སྣ་མང་པོས་ཕན་པ་མ་མཆིས་ལགས། །ལྟ་སྒོམ་སྙིང་པོར་ཕྱག་རྫོགས་དབྱེར་མེད་སྐྱོང་། །སྤྱོད་ལམ་སྙིང་པོར་སྒོ་གསུམ་ཆོས་མཐུན་བསྒྲུབ། །གཞན་དོན་སྙིང་པོར་གསོ་རིགས་ཕྱོགས་མེད་བསྐྱངས། །སྙིང་གཏམ་སླབ་བྱ་ལགས་སོ་ཐུགས་ལ་བསྟིམ། །ཞེས་དྭགས་པོ་དྲུང་འཚོ་བ་བསོད་ནམས་རབ་བརྟན་ལ་གདམས་པ་ཨྠིྀཿ །རྗེ་བཀའ་བརྒྱུད་ཀྱི་གཙུག་རྒྱན་སྒམ་པོ་པའི། །གདུང་དྲི་མེད་ལས་འཁྲུངས་པའི་ཆོས་ཀྱི་རྗེས། །བདག་མཐའ་ཁོབས་ཀྱི་བྱ་བྲལ་རྒན་པོ་ལ། །ཆོས་ཟབ་དོན་གྱི་སྙིང་གཏམ་སྨྲོས་ཤིག་

[Full Size]

གསུངས། །ཁྱེད་སྔོན་སྦྱངས་དང་རིགས་ཀྱིས་གྲུབ་པའི་མཐུས། །ཐུགས་མཁྱེན་རབ་ཀྱི་ཉི་གཞོན་གསལ་བས་ན། །བདག་མི་ཁྱེར་གྱི་འོད་ལ་ཅི་ཞིག་ལྟོས། །བཀའ་མི་ཆོག་པའི་ཕེབས་སྒོའི་ལན་འདི་ཕུལ། །སྤྱིར་ཐེག་པའི་རིམ་པ་བསམ་ཡས་དང་། །ཆོས་གྲུབ་མཐའི་བཞེད་གཞུང་དཔག་མེད་ཀུན། །དོན་དགོས་རྒྱུའི་སྙིང་པོ་གལ་ཆེ་བ། །སེམས་རང་རྒྱུད་འདི་འདུལ་ཐབས་འབའ་ཞིག་ལགས། །ཆོས་ང་བཟང་འགྲན་པའི་བང་རྩལ་དེ། །བློ་ཆགས་སྡང་གི་ཐང་ལ་རྒྱུག་རྒྱུགས་ཀྱང་། །སེམས་ངར་འཛིན་ཞི་བའི་མགྱོགས་དར་ནི། །མི་ངར་འཛིན་སུ་ཆོས་ལེན་པ་བྱེད། །ཕྲལ་འཇིག་རྟེན་གྱི་འདུན་མ་མཁས་འགྲན་དང་། །རྒྱུ་ནོར་རྫས་ཀྱི་བསྡུ་ཐབས་གང་མཁས་ལ། །མིང་ཆོས་པ་དང་ཡོངས་འཛིན་དུ་འབོད་དུས་འདིར། །སྒོམ་ཉམས་ལེན་དེ་ནམ་ལངས་ཀྱི་སྐར་མ་འདྲ། །ཟས་ཤ་

[Full Size]

ཆང་གི་དགའ་སྟོན་སྤྱོད་ཕྱིར་དུ། །མ་སེམས་ཅན་གྱི་སྲོག་དབུགས་འགམ་རེམས་པས། །གོས་ངུར་སྨྲིག་གི་ལྷབ་ལྷུབ་ཆེར་གཡོ་བ། །ཆོས་ལས་འབྲས་ལ་དབང་ཡོད་ཧ་ཅང་ཆེས། །ཕྱོགས་སྡེ་རིས་རྩོད་པའི་སྙིང་སྟོབས་དང་། །འབངས་མངའ་ཞབས་སྐྱོང་བའི་བློ་རྒྱ་དང་། །དཀོར་དད་ཟས་སྒྲུབ་པའི་སྒོ་བཤོམས་སོགས། །མིང་བསྟན་དུ་བཏགས་འདི་སུ་ཡིས་དྲན། །ཟས་བཏུང་བ་ཙམ་ཞིག་འཚོལ་ཐབས་སུ། །ལ་ལས་ཆོས་བཤད་དང་དབུ་མར་བཙོངས། །ལ་ལ་རྔ་བརྡུང་དང་དྲིལ་འཁྲོལ་འབད། །ལ་ལ་ཤོག་སློག་དང་བམ་སློག་རེམས། །ལ་ལས་གླུ་གར་དང་མཆམས་བྲོ་བརྩེ། །ལ་ལ་ལྟ་སྟངས་དང་སྒོམ་རྫུ་བྱེད། །ལ་ལས་མངོན་ཤེས་དང་རྫུ་འཕྲུལ་སྟོན། །ཕལ་ཆེར་ཐབས་ཀ་དང་ངོ་སྲུང་བརྩོན། །ཕྲལ་ཡོན་བདག་གི་མགོ་བསྐོར་འབད་འབད་ནས། །ཕུག་རང་མགོ་རང་གི་བསྐོར་བར་འཆི། །ལམ་བར་དོའི་འཕྲང་

[Full Size]

རིང་འགྲིམ་དུས་དེར། །རྒྱུ་ནོར་རྫས་རྣམས་གང་དུ་འགྲོའམ་ཅི། །ཕྱི་འབྱུང་བ་སྣོད་ཀྱི་གཡོ་འཁྲུགས་དང་། །ནང་སྐྱེ་འགྲོ་བཅུད་ཀྱི་རྣམ་འགྱུར་སོགས། །ཡིད་ཁོང་སྙིང་འདར་བའི་ཚུལ་འདི་འདྲར། །བློ་རྟག་འཛིན་ཅན་རྣམས་ཅི་བསམ་ན། །ལགས་དེ་ཕྱིར་མི་ཚེ་ཡུད་ཙམ་འདི། །གཏན་འདུན་མའི་རྩ་བར་མ་དྲིལ་ན། །རྐྱེན་འཆི་བ་ཐོག་བབས་འབྱུང་ངེས་པས། །གནད་སྙིང་པོའི་ཉམས་བཞེས་བརྩོན་པར་འཚལ། །དལ་འབྱོར་འདི་ཐོབ་པའི་དགའ་ཚོད་ལ། །སྟོང་ཟད་དུ་བཏང་ན་ཕུང་ཚབས་ཆེས། །འཆི་བ་ལ་རྒན་གཞོན་མ་ངེས་ཚེ། །ནམ་བྱུང་དུ་ཐོགས་མེད་གྲབས་ཆུད་དགོས། ཁམས་གསུམ་དུ་གར་སྐྱེ་སྡུག་བསྔལ་གྱི། །བཙོན་དོང་དུ་གོ་བས་འབྲོས་ཐབས་འབད། །རྒྱུ་འབྲས་ཀུན་བསླུ་མེད་ངེས་ཤེས་ཀྱིས། །རང་སེམས་ལ་དཔང་གཙུག་སྤང་བླང་འཚལ། །དཀོན་མཆོག་ལ་བློ་གཏད་སྙིང་གཏད་ཀྱི།

[Full Size]

སྐྱབས་འགྲོ་ནི་ཆོས་ཀྱི་གཞི་རྟེན་ལགས། །སེམས་ཅན་ཀུན་ཕ་མར་བློ་ངེས་པས། །སྨོན་འཇུག་གི་སྲབ་ཁ་ཐར་ལམ་བསྒྱུར། །སྡིག་སྒྲིབ་ཀྱིས་ངན་འགྲོའི་གཏིང་རྡོ་བྱེད། །འགྱོད་བཤགས་དང་ཡིག་བརྒྱས་དག་པར་སྦྱངས། །སྣོད་བཅུད་དང་སྒོ་གསུམ་གཏན་འདུན་བཅས། །མཎྜལ་དུ་ཕུལ་བས་ཚོགས་སོགས་འབད། །བྱིན་རླབས་ཀྱི་འབྱུང་གནས་བླ་མ་ལ། །གདུང་ཤུགས་ཀྱིས་གསོལ་བ་རྒྱུན་དུ་གདབ། །ཕུང་ཁམས་ཀུན་གཟོད་ནས་ལྷར་ཤེས་པའི། །སྐྱེད་རིམ་གྱིས་ཐ་མལ་ཞེན་རྟོག་དགག །ལོང་གཏམ་གྱིས་ངག་སྒྲིབ་མི་གསོག་པར། །རྡོར་བཟླས་དང་བསྙེན་པ་ཁ་ཏོན་རེམས། །འཁྲུལ་པ་ལ་འཁྲུལ་རྒྱུན་འཐུད་པ་འདིས། །ཐོགས་མེད་འཁོར་བར་འཁྱམས་ལགས་པས། །འཁྲུལ་མཁན་ཉིད་རང་ངོ་ཤེས་མཛོད་དང་། །འཁྲུལ་སྣང་གི་རྫུན་ཕུགས་དིབ་པར་འགྱུར། །རྣམ་རྟོག་གི་རྦ་གློང་སྙོལ་བའི་ཕྱིར། །ཞི་གནས་ཀྱི་རྨངས་གཞི་བརྟན་

[Full Size]

པ་དགོས། །གནས་ཆ་ལ་ཧ་ཅང་ཞེན་པ་ན། །ཐེག་དམན་གྱི་འགོག་པར་གོལ་ཉེན་མཆིས། །ལྷག་མཐོང་གི་རང་ཞལ་མ་རིག་ན། །ཞི་གནས་ཀྱི་ཉམས་མྱོང་ཅི་བཟང་ཡང་། །ཕྲལ་རྐྱེན་གྱི་རླུང་འཚུབས་ལྡང་ཙ་ན། །སྒོམ་ཆེན་པ་སྒོམ་དང་བྲལ་བ་མང་། །བློས་བྱས་ཀྱི་སྒོམ་པ་བཟང་ལགས་ཀྱང་། །ཕྱག་ཆེན་གྱི་དོན་ལ་ཉེ་བར་དཀའ། །སྒོམ་རྒྱུ་ཞིག་ཡོད་ན་ཕྱག་ཆེན་མིན། །ཡིན་ལུགས་ཀྱི་ལྟ་བ་ངོ་ཕྲོད་ན། །རང་བབས་སུ་གློད་པ་སྒོམ་པའི་གནད། །གློད་རྒྱུ་དང་གློད་མཁན་གཉིས་མིན་ཀྱང་། །བཅོས་སྒོམ་དུ་མི་བྱ་རང་བབས་བཞག །མ་ཡེངས་པ་གནད་དུ་ཆེ་མོད་ཀྱི། །ཡེངས་དོགས་ཀྱི་རྟོགས་པས་གཡེང་བ་མང་། །དྲན་པ་ལ་སྒོམ་དུ་བྱེད་ན་ཡང་། །ཡེངས་མཁན་དང་དྲན་མཁན་ཐ་དད་འཛིན། །ཐ་དད་དུ་བཟུང་ལ་གཉིས་འཛིན་ཟེར། །གཉིས་འཛིན་ནི་སྒོམ་

[Full Size]

གྱི་གེགས་སུ་ཆེ། །གངས་ཅན་འདིར་ཕྱག་ཆེན་ཆུ་མགོ་ནི། །རྗེ་ཟླ་འོད་གཞོན་ནུར་མ་ཐུག་མེད། །དིང་སང་གི་ཕྱག་ཆེན་སྒོམ་མཁན་ཕལ། །བློས་བྱས་ཀྱི་གནས་ས་སྐྱོང་མཁན་མང་། །རྗེ་དེས་གསུངས་གབ་པ་མངོན་ཕྱུངས་སོགས། །གནད་ཞལ་གདམས་རྣམས་དང་ཅུང་མ་མཐུན། །མཆུ་མགོ་དང་མ་མཐུན་ཆུ་འཇུག་དེ། །འདམ་རྙོག་གི་ལྷད་ལས་འོས་ཅི་ཞིག །བཅོས་མིན་གྱི་ངོ་བོ་སྐྱོང་བ་ལས། །འཇུར་འཛིན་གྱི་གནས་པ་སྒྲུབ་དོན་མེད། །གནས་འགྱུ་ལ་སྤང་བླང་བྱེད་བྱེད་ནས། །བྱེད་པ་པོ་འཁྲུལ་པའི་ངང་དུ་འབྱམས། །གང་ཤར་གྱི་རང་ངོ་ཕྱག་ཆེན་དུ། །ལམ་ཁྱེར་གྱི་ཉམས་ལེན་མ་ཤེས་ན། །གནས་དུས་ཉིད་སྒོམ་དུ་བཟུང་བཟུང་ནས། །བར་མཚམས་ཀུན་འཁྲུལ་པའི་ཡོ་ལང་ཉིད། །རྣམ་རྟོགས་དང་ཆོས་སྐུ་ཅིག་མི་ཅིག །རྩོད་གཞི་དེ་ཤི་ལ་ཐུག་བྱེད་ཀྱང་། །རྣམ་རྟོག་ཉིད་ཆོས་སྐུར་མ་ཤར་བ། །

[Full Size]

གཅིག་ཐ་དད་འཛིན་པ་ངལ་བར་ཟད། །གནས་འགྱུ་ཀུན་སྒོམ་དུ་ཁྱེར་ཤེས་ན། །སྒོམ་མིན་གྱི་འཁྲུལ་རྟོག་ལུས་རྒྱུ་མེད། །གསེར་གླིང་ན་ས་རྡོ་མི་རྙེད་བཞིན། །ཆོས་ཉིད་ལས་གཞན་པ་གང་ཡང་མེད། །གནས་ཆ་ལ་སྒོམ་དུ་བྱེད་ན་ཡང་། །གནས་ཉམས་དེ་སྒོམ་གྱི་ངོ་བོ་མིན། །གནས་མི་གནས་རང་ངོ་ཤེས་པ་དགོས། །དེ་ཤེས་ཚེ་འགྱུས་ཀྱང་སྒོམ་གྱི་ངང་། །གནས་འགྱུ་ལ་དགའ་འདམ་མ་དགོས་ཚེ། །ཚོགས་དྲུག་ཀྱང་སྒོམ་དུ་མ་གྱུར་མེད། །ཡིན་ཚུལ་ལ་ཉམས་མྱོང་མ་སྐྱེས་ན། །དེ་ཡིན་ནོ་སྙམ་ཀྱང་གོ་སྐམ་ཙམ། །གོ་བ་དང་ཚིག་ལ་ཞེན་པ་དང་། །རྒྱས་འདེབས་ཀྱི་ལྷན་པ་མི་གདབ་པར། །ཐ་མལ་གྱི་ཤེས་རིག་རྗེན་པ་འདི། །རང་བབས་སུ་སྐྱོང་དང་དེ་ཀས་ཆོག །ཐུན་མཚམས་ཀྱི་བཞག་ལེན་མི་བྱེད་ཅིང་། །གོ་ཡུལ་དང་ཁ་ལྟས་མ་བསླུས་པར། །མོས་གུས་དང་གསོལ་

[Full Size]

འདེབས་ནན་ཏན་བྱ། །དངོས་གྲུབ་དེ་ཚེ་གཅིག་སངས་རྒྱས་ཞུ། །མི་ཚེ་ནི་རྨི་ལམ་ཙམ་འདི་ལ། །སྐྱིད་སྡུག་གི་མདུན་མ་ཅི་དགར་བཏང་། །གཏན་འདུན་དེ་ཡལ་བར་མ་དོར་ན། །འཇིག་རྟེན་གྱི་འདུན་མ་བཅུགས་ཀྱང་བཟོད། །མཁའ་ཁྱབ་ཀྱི་འགྲོ་དོན་མི་སྒྲུབ་ན། །རང་ཕྱོགས་ཀྱི་འགྲོ་དོན་ཕྱོགས་ཆར་ཟད། །རླབས་ཆེན་གྱི་གཞན་དོན་སྒྲུབ་པ་ལ། །མཁྱེན་རྟོགས་ཀྱི་ནུས་པ་མཐར་ཕྱིན་དགོས། །དགེ་སྦྱོར་ཀུན་རང་འདོད་ཀྱིས་མ་སླད་པར། །སེམས་སྐྱེད་དང་བསྔོ་སྨོན་བཟང་པོས་སྤེལ། །སྐད་ཅིག་ཀྱང་ཐ་མལ་མི་སྡོད་པར། །རྩོལ་བཅས་དང་རྩོལ་མེད་ཉམས་ལེན་འཚལ། །དེ་སྐད་དུ་གསོལ་བའི་ཚིག་ཕྲེང་འདི། ཁ་ཆོས་སུ་མ་མཛད་རྒྱུད་ལ་སྦྱོར། །བདག་མི་རྒན་དངོས་སུ་ཕྲད་ན་ཡང་། །དོན་འདི་ལས་ལྷགས་སུ་ཞུ་རྒྱུ་མེད། །ཐུགས་མཁྱེན་དབྱིངས་ཟབ་མོར་བསྟིམ་པར་གསོལ། །ཚུལ་འདི་སྨྲས་དགེ་

[Full Size]

བ་གང་མཆིས་མཐུས། །མ་མཁའ་མཉམ་འགྲོ་བ་བྱང་ཆུབ་ཤོག །ཅེས། ཤར་དྭགས་ལྷ་སྒམ་པོ་ནས་ཞབས་དྲུང་གདུང་རྒྱུད་རིན་པོ་ཆེ་སྐུ་བགྲེས་པའི་དྲུང་གི་བཞེད་པ་སྐོང་ཕྱིར་ཕུལ་བ་མང་ག་ལམ།། ༈ །།དོན་རྒྱུད་བྱིན་རླབས་འབྱུང་གནས་རྩ་རྒྱུད་བླ་མའི་ཞབས། །གུས་པས་ལན་བརྒྱད་བཏུད་ནས་སྐྱབས་མཆི་གསོལ་བ་འདེབས། །བསྟན་པའི་ཞབས་འདེགས་བརྩོན་མཛད་བསྟན་རྡོར་སྐྱེས་མཆོག་གང་། །བཞེད་དོན་སྐོང་བའི་ཚིག་གསུམ་སྙན་དུ་གསོལ་ལ་དགོངས། །ཕུན་ཚོགས་དལ་འབྱོར་ཐོབ་འདི་རྨི་ལམ་སྣང་བ་ཙམ། །ནམ་མཁའི་ཐོག་ལས་འཇིགས་པའི་འཆི་བདག་མྱུར་དུ་འོང་། །ཚེ་འདིའི་སྣང་བས་བསླུས་ཤིང་ཤི་དུས་ལག་སྟོང་འགྲོ། །ལོང་མེད་དགེ་སྦྱོར་འབད་རབ་གྲབས་བཤོམ་མ་མཆིས་མཛོད། །ཐོས་པ་རྒྱ་མཚོས་ངོམས་ཀྱང་དགོས་དོན་ཉམས་ལེན་ཉིད། །མི་ཚེ་ཆོས་ལ་འབུངས་རློམས་སེམས་རྒྱུད་ཐུལ་མ་

[Full Size]

ཐུལ། །རྐྱེན་ངན་ཕྲ་མོ་ཙམ་གྱིས་ཆོས་པའི་ཚ་རྡོ་འབོར། །རང་སྐྱོན་ནན་གྱིས་བརྟུལ་བ་གལ་གྱི་ཆེ་ཤོས་ལགས། །རྒྱུ་འབྲས་ཁ་ནས་བཤོད་པའི་སྟོན་ཆེན་སྒོམ་ཆེན་མང་། །རང་སེམས་དཔང་དུ་འཛུག་མཁན་རིན་ཆེན་གསེར་ལས་དཀོན། །འདོད་པའི་ལོངས་སྤྱོད་མཐོང་ན་ལས་འབྲས་འཇའ་ལྟར་ཡལ། །རང་ཟོག་རང་ལ་འཚོང་བའི་ཆོས་པ་མང་ལ་གཟིགས། །ལྟོ་འབྲངས་ཉི་མས་དྲོས་ནས་འབོལ་བདེ་བཤོམས་པའི་ཚེ། །ཆོས་དང་མཐུན་མཐུན་འདྲ་བའི་སེམས་ཀྱི་ཁྱིའུ་ཆུང་འདི། །སྡུག་བསྔལ་ཨེན་ཙམ་བྱུང་དུས་ཆོས་དང་བླ་མ་བརྗོད། །བྱིས་པའི་རྣམ་ཐར་སྟོན་ན་འཆི་ཁར་ཅིར་འགྱུར་བསོམ། །འདུལ་སྡོམ་ཀུན་གྱི་རྩ་བ་དགེ་སྦྱོང་ཆོས་བཞི་དང་། །བྱང་ཆུབ་སེམས་ཀྱི་སྙིང་པོ་བདག་ལས་གཞན་ཅེས་བློ། །གསང་སྔགས་ལམ་གྱི་མཐར་ཐུག་ཁྱེར་སོ་རྣམ་པ་གསུམ། ཁ་ཚིག་ཙམ་ལ་མ་ལུས་རྒྱུད་ལ་འདྲེ་ངེས་ཞུ། །

[Full Size]

རྣལ་འབྱོར་མ་ཐོབ་བཞིན་དུ་ཤ་ཆང་བུད་མེད་དང་། །ཉོན་མོངས་ལམ་དུ་འཁྱེར་བའི་ཐོ་བཅོས་བསླུས་པ་མང་། །སྐྱོ་ཚའི་ཞིམ་ངར་ཙམ་ལའང་འཛིན་པ་ཆེ་ལུགས་ལ། །དུག་ལྔ་ལམ་ཁྱེར་ནུས་པ་རེ་ཤིག་འགོར་བ་ལགས། །གྲུབ་མཐའ་ཆོས་རྒྱུད་བརྩོད་པའི་བསྟན་པའི་གཞོགས་འཐེན་དང་། །ཆོས་ལ་བཟང་ངན་འཛིན་པའི་ཅལ་སྒྲོག་རྗེས་འབྲེང་དང་། །རང་ཕྱོགས་རྒྱལ་ན་དགའ་བའི་ཆགས་སྡང་ཁ་འཛིན་སོགས། །ཀུན་གྱི་ནན་ལྟར་འབད་མོད་སྤང་བྱའི་གཙོ་བོ་ལགས། །ཟང་ཟིང་རྙིང་ལ་གདུང་པ་ལན་ཚྭའི་ཆུ་འཐུང་འདྲ། །མི་ཆོས་ཕེར་ཡོང་མཁས་བཞིན་སྡིག་སྒྲིབ་ཁྲེས་པོ་ལྗི། །གདུལ་བྱ་ཕྲིན་ལས་གང་ཆེ་བུབ་པའི་སྔ་ལྟས་ཡིན། །བློ་ཁ་ནང་དུ་བཟློག་ན་གཏན་འདུན་འགྲུབ་པར་མཆི། །བླ་མའི་བཀའ་དང་མ་མཐུན་དམ་ཚིག་རྩ་བ་རུལ། །དམ་མེད་ཆོས་ལ་མཁས་ཀྱང་རུ་འདྲའི་

[Full Size]

གོ་འཕང་འགྲུབ། །རྟག་ཏུ་བླ་མ་མཉེས་བྱས་ཆོས་སྒོ་དེ་ཀས་ཆོད། །དད་དམ་དག་སྣང་ཅན་ལ་བྱིན་རླབས་ལྷུག་པར་འབབ། །གཞི་བྱེད་ལམ་གསུམ་མེད་པའི་ཉིན་མཚན་ནམ་དུ་ཡང་། །སྒོ་གསུམ་ཆོས་མིན་སྤང་ཞིང་སྙོམ་ལས་མི་བྱ་བར། །ཆོས་སྤྱོད་བཅུ་པོ་གང་རུང་ལག་ཏུ་བླང་བྱ་ཞིང་། །རྩི་བྱེད་མཁའ་མཉམ་འགྲོ་ལ་སེམས་བསྐྱེད་བསྔོ་སྨོན་སྤེལ། །གྲོགས་འཁོར་སློབ་མ་སྦྱིན་བདག་འབྲེལ་ཐོགས་ཐམས་ཅད་ལ། །ཅི་ནུས་ལྷག་བསམ་ཟོལ་མེད་སྡིག་སྤོང་དགེ་ལ་སྦྱོར། །རང་འདོད་ཕུག་བཅུག་མིན་པས་བསྟན་པའི་ཞབས་ཏོག་དང་། །དགེ་སྦྱོར་ཟུང་དུ་འབྲེལ་ལ་བརྩོན་པ་མཐའ་ཁྱོལ་ཞུ། །མི་རྒན་དབང་པོ་གུད་པའི་ཅལ་ཅོལ་གཏམ་ཚིག་འདི། །གང་ཁྱེད་ཐུགས་ལ་འཕྲོད་དང་དོན་ལ་འབབ་པ་དཀའ། །གལ་ཏེ་ཕན་སེམས་དཀར་བའི་ནུས་པའི་ཆ་མཆིས་ན། །དེ་མཐུས་སྐྱེས་

[Full Size]

མཆོག་ཁྱེད་སོགས་ཀུན་ལ་ཕན་པ་ཤོག །ཅེས་བླ་མ་སྐུ་སྐྱེས་པ་མི་ཕམ་བསྟན་པའི་རྡོ་རྗེ་ལ་ཕུལ་བའོ།། ༈ །།སྐལ་ལྡན་དད་ཅན་ནོར་བཟང་པས། །བཀའ་ཕྱག་ཆུ་བོ་ཉམས་འདྲེས་ཀྱི། །གདམས་པའི་སྙིང་པོ་མདོར་དྲིལ་བའི། །སྙིང་གཏམ་སྨྲོས་ཞེས་གང་གསུངས་བཞིན། །རྒྱལ་བས་གསུངས་པའི་ཆོས་སྒོ་ནི། །བརྒྱད་ཁྲི་བཞི་སྟོང་ལ་སོགས་ཀྱང་། །ཉམས་སུ་བླངས་བྱའི་སྙིང་པོ་ནི། །ལྟ་སྤྱོད་གཉིས་སུ་མ་ལུས་མེད། །ལྟ་བའི་མཐར་ཐུག་ཕྱག་རྒྱ་ཆེ། །སྤྱོད་པའི་མཆོག་རབ་བློ་སྦྱོངས་ཆོས། །ཟུང་དུ་འབྲེལ་བའི་ཟབ་བཞེས་འདི། །སྒམ་པོ་པ་ཡི་ཁྱད་ཆོས་ལགས།། ༈ །།ལྟ་བའི་མིང་དུ་བཏགས་མང་ཡང་། །ལྟ་རྒྱུའི་དངོས་པོར་གྲུབ་པ་མེད། །བལྟ་བྱའི་ཡུལ་དང་ལྟ་བྱེད་སེམས། །གཉིས་སུ་མེད་པའི་ངོས་བཟུང་བྲལ། །གཉིས་མེད་གཅིག་དང་དུ་མའང་མིན། །མེད་བཞིན་

[Full Size]

ཅིར་ཡང་སྣང་བཞིན་འཆར། །ཤར་ཡང་བདེན་པར་མ་གྲུབ་པའི། །རང་སེམས་འདི་ལ་ལྟ་བ་ཟེར། །བལྟས་པས་མཐོང་དུ་མ་མཆིས་ཀྱང་། །ཉམས་སུ་མྱོང་རྒྱུའི་ངེས་ཤེས་འབྱུང་། །ཉམས་མྱོང་ཞེན་པས་མ་བཅིངས་པར། །རིག་པ་རྗེན་པ་རང་བབས་སྐྱོང་། །རང་ངོ་རང་གི་ཤེས་པ་དེ། །ལྟ་བ་ཕྱག་རྒྱ་ཆེན་པོ་ཡིན། །ལྟ་བའི་དོན་ལས་མ་ཡེངས་པ། །སྒོམ་པ་ཀུན་གྱི་སྙིང་པོ་སྟེ། །ལྟ་སྒོམ་དབྱེར་མེད་གཉུག་མའི་ངང་། །མ་བཅོས་མ་ཡེངས་བསྐྱང་བར་འཚལ། །སྣང་སེམས་དབྱེར་མེད་ལྷན་ཅིག་སྐྱེས། །ལྟ་བ་འདི་ལ་འགྲིས་པར་མཛོད། །སྤྱོད་པ་བློ་སྦྱོང་གདམས་པ་ལ། །དོན་བདུན་ཐུན་བརྒྱད་དོན་བཞི་སོགས། །ས་བཅད་དབྱེ་ཚུལ་མང་ན་ཡང་། །སྙིང་པོར་རང་རྒྱུད་གདུལ་ཐབས་ཉིད། །ངར་འཛིན་འགོང་པོ་མ་ཐུལ་ན། །ཐོས་བསམ་སྒོམ་པ་བཟང་རློམས་ཀྱང་། །དུག་དང་འདྲེས་པའི་

[Full Size]

ཁ་ཟས་བཞིན། །རང་གཞན་གང་ལའང་ཕན་པ་མེད། །ཐུབ་པས་ཆོས་རྣམས་གང་བསྟན་ཡང་། །གདུལ་བྱའི་སེམས་རྒྱུད་འདུལ་ཕྱིར་ཡིན། །བདག་འཛིན་སླར་ལ་འཕེལ་བ་ཡི། །ཤེས་ཤེས་མང་པོའི་ཆོས་ཀྱིས་ཅི། །ཚིག་ཟུར་མཐོ་དམན་ཙམ་ལ་ཡང་། །མི་བཟོད་ཁོང་ཁྲོའི་མེ་འབར་ཞིང་། །ལས་འབྲས་ཁྱད་དུ་གསོད་བྱེད་པའི། །བདག་འཛིན་འདི་ཡིས་འཕྲལ་ཡུན་ཕུང་། །ཀུན་ལས་རང་ཉིད་ལྷག་པར་དུ། །བཟང་འདོད་རྒྱལ་འདོད་གྲགས་འདོད་དང་། །བདེ་སྐྱིད་འདོད་པའི་བློ་ངན་འདིས། །འཁོར་བ་ངན་སོང་གཞི་མར་བྱས། །ད་ནས་རྣམ་པ་ཐམས་ཅད་དུ། །སྐྱིད་ཀྱང་ཆོག་ལ་སྡུག་ཀྱང་ཆོག །གང་བྱུང་བླ་མ་དཀོན་མཆོག་དྲིན། །ཐུགས་རྗེར་ཤེས་པས་མོས་གུས་བསྐྱེད། །མཁའ་ཁྱབ་རིས་དྲུག་སེམས་ཅན་ཀུན། །ཕ་མར་མ་གྱུར་སུ་ཡང་མེད། །ཁྲོ་འཁྲུག་གནོད་འཚེ་ཅི་ཕྱིར་བྱེད། །ཐར་ལམ་འཁོད་པ་བསམ་སྦྱོར་འབད། །

[Full Size]

སོ་མཐར་དགེ་སྦྱོང་ཆོས་བཞི་དང་། །ཐེག་ཆེན་སྨོན་འཇུག་བྱང་སེམས་དང་། །གསང་སྔགས་དག་སྣང་ཞིང་སྦྱོང་སོགས། །གནད་དོན་མ་ལུས་འདི་རུ་གཞོལ། །དམ་ཆོས་བྱས་པའི་དོན་པོ་དེ། །རང་སྐྱོན་ཐུལ་བ་འབའ་ཞིག་དགོས། །སྐྱོན་ཟད་ཡོན་ཏན་རྫོགས་པ་ལ། །སངས་རྒྱས་ཞེས་སུ་བརྗོད་པ་ལགས། །ཕྱག་རྒྱ་ཆེ་དང་བློ་སྦྱོང་གི། །དམིགས་རིམ་ཙམ་ཞིག་ཤེས་སླ་ཡང་། །དོན་འདི་རྒྱུད་ལ་མ་འབྱོར་ན། །ཐོབ་ཐོབ་ཚིག་གི་ལམ་དུ་ཟད། ཁ་ལ་ཁྱེར་རྒྱུའི་ཆོས་མ་ཡིན། །ལག་ཏུ་བླངས་ཞིང་སེམས་ལ་སྦྱོར། །སྙིང་གཏམ་གོ་བདེར་སྨྲས་པ་འདིས། །ཁྱེད་ཐུགས་ཆོས་ཀྱིས་སྨིན་གྱུར་ཅིག །ཅེས་པ་འདི། སྐལ་ལྡན་མ་ི་བྷ་དྲ་ལ་གདམས་པ་ཤུ་བྷམ།། ༈ །།སྭསྟི་སིདྡྷི། རྒྱལ་བ་གང་ཞིག་འགྲོ་བའི་དོན། །ཆགས་ཐོག་མེད་པའི་ཕྲིན་ལས་ཀྱིས། །མངོན་མཐོ་ངེས་ལེགས་སྟེར་མཛད་པའི། །སྐྱབས་གནས་བླ་མ་དཀོན་མཆོག་ལ། །བདག་སོགས་

[Full Size]

མཁའ་མཉམ་སེམས་ཅན་ཀུན། །སྙིང་ནས་ཕྱག་འཚལ་སྐྱབས་མཆི་ན། །དམིགས་བྲལ་ཐུགས་རྗེ་ཆེན་པོ་ཡིས། །རྟག་པར་རྗེས་སུ་བཟུང་དུ་གསོལ། །བོད་ཡུལ་ཤར་ཕྱོགས་ཀོང་རོང་མཐིལ། །ཟད་མཐར་ཐུག་པ་རྒྱལ་བའི་གནས། །སྙིང་པོ་དཔལ་རི་གངས་ཆེན་འདིའི། །ཕྱོགས་བཞིར་གུ་རུའི་སྒྲུབ་ཕུག་ཡོད། །ཤར་ན་ཞི་བ་ཆོས་ཀྱི་ཕུག །ལྷོ་རུ་བདེར་གཤེགས་ཚེ་ཡི་ཕུག །ནུབ་ཏུ་མཁའ་འགྲོ་གསང་བའི་ཕུག །བྱང་ན་ཕྱག་རྡོར་འོག་མིན་ཕུག །ཕྲིན་ལས་བཞི་འགྲུབ་གནས་ཆེན་ཡིན། །དེ་ལས་བདེར་གཤེགས་ཚེ་ཕུག་འདིར། །གུ་རུས་བྱ་རྒོད་སྤྲུལ་ནས་བཞུགས། །རྒོད་ཚང་ཕུག་ཅེས་ཕལ་ལ་གྲགས། །སྐྱེས་ཆེན་མང་པོའི་བཞུགས་གནས་མཛད། །དཔའ་བོ་མཁའ་འགྲོ་ངང་གིས་འདུ། །སྐྱོ་ཤས་ངེས་འབྱུང་ཤུགས་ལ་འཆར། །ཏིང་འཛིན་ཉམས་རྟོགས་

[Full Size]

རང་བཞིན་འཕེལ། །ཕྱག་མཆོད་བསྐོར་བས་སྡིག་སྒྲིབ་འདག །འབྲེལ་ཚད་དོན་ལྡན་གནས་མཆོག་འདིར། །བདག་འདྲ་བན་ཆུང་བླ་མའི་གཟུགས། །སྣ་ཚོགས་རང་གྲོལ་མིང་འཆང་བས། །མི་ལོ་ཉི་ཤུ་རྩ་བཞིའི་བར། །མི་དང་མ་འཕྲད་དབེན་མཚམས་བགྱིས། །སྐྱབས་གནས་རྗེ་ལ་གསོལ་བ་བཏབས། །མཁའ་མཉམ་འགྲོ་ལ་སྙིང་རྗེ་བསྒོམ། །སྒོ་གསུམ་དམ་པའི་ཆོས་ལ་དྲིལ། །སྐྱེད་རིམ་སྣོད་བཅུད་དག་སྣང་སྦྱང་། །རྫོགས་རིམ་རླུང་རིག་ཡེ་ཤེས་བསྲེས། །ཟུང་འཇུག་རང་སེམས་བཟོ་མེད་གློད། །ཅིར་སྣང་ཆོས་སྐུའི་དཀྱིལ་འཁོར་ལ། །དགག་སྒྲུབ་མཚན་འཛིན་མ་བཅིངས་པར། ཁྱབ་གདལ་ཡེ་ཤེས་རོལ་པར་སྤྱད། །སྤྲོས་བཅས་སྤྲོས་མེད་དགེ་སྦྱོར་ཀུན། །མཁའ་ཁྱབ་འབྲེལ་ཚད་ལྟོས་བཅས་སོགས། །བླ་མེད་བྱང་ཆུབ་ཐོབ་ཕྱིར་བསྔོས། །མི་རྒན་བསམ་པ་མཐའ་རུ་ཕྱིན།

[Full Size]

ཕྱིན་ཆད་འདིར་བཞུགས་ཆོས་མཛད་ཀུན། །དབེན་པའི་སྒྲུབ་གནས་འདི་ལྟ་བུར། །འཇིག་རྟེན་བྱ་བས་མ་སླད་པར། །ཚེ་དང་སྒྲུབ་པ་མཉམ་མཛད་ཞུ། །གནས་འདི་མཇལ་དང་ཕྱག་སྐོར་བྱེད། །མཆོད་འབུལ་ཚོགས་འཁོར་བཤོམས་ལ་སོགས། །མཐོང་ཐོས་དྲན་རེག་ཐམས་ཅད་ཀྱང་། །ནད་གདོན་སྡིག་སྒྲིབ་བར་ཆད་ཞི། །ཚེ་དཔལ་བསོད་ནམས་འབྱོར་པ་འཕེལ། །ཅི་བསམ་ཆོས་མཐུན་ཉིད་དུ་འགྲུབ། །ཚེ་གཅིག་སངས་རྒྱས་ཐོབ་གྱུར་རིག །རྒྱལ་ཁམས་བདེ་ཞིང་སྐྱེ་འགྲོ་སྐྱིད། །བསྟན་པ་དར་དང་བསྟན་འཛིན་མཐུན། །ཇི་ལྟར་སྨོན་པ་ཀུན་འགྲུབ་པར། །སྐྱབས་གནས་རྣམས་ཀྱིས་བྱིན་གྱིས་རློབས། །མངྒ་ལཾ། །ཅེས་པ་འདི། དཔལ་གྱི་གནས་མཆོག་རྒོད་ཚང་ཕུག་ནས་བཅད་རྒྱ་གྲོལ་ཏེ་ཐང་འབྲོག་འོད་གསལ་རྩེ་མོའི་སྒྲུབ་གནས་སུ་འགྲོ་གདོང་ལ་ཡི་གེར་བཀོད་པའོ།། ༈ །།གྲུབ་རིགས་བཟང་པོའི་རྒྱུད་ལས་ལེགས་འཁྲུངས་པའི། །སྔགས་འཆང་རྡོ་རྗེ་འཛིན་པ་དོན་གྲུབ་པས། །སེམས་

[Full Size]

ལ་ཕན་པའི་སླབ་བྱ་དགོས་གསུང་བའི། །བཞེད་དོན་སྐོངས་ཕྱིར་སྙན་དུ་འདི་ལྟར་ཕུལ། །མི་ལུས་ཙམ་ཞིག་ཐོབ་པ་མང་ན་ཡང་། །དལ་འབྱོར་དོན་ལྡན་འགྲུབ་མཁན་ཤིན་ཏུ་དཀོན། །ཆོས་མེད་རྣམ་རིག་བཀྲ་ཡང་བླུན་པོར་ཟད། །ཐར་ལམ་ད་རེས་ཟིན་པ་གལ་ཆེ་ལགས། །སྐྱེས་ནས་མི་འཆི་བ་ནི་སུ་ཡང་མེད། །འཆི་བ་ཐོག་བབ་རྒན་གཞོན་མ་ངེས་ཚེ། །ཤི་ནད་ཕོག་ནས་འགྱོད་ཀྱང་བྱ་ཐབས་ཟད། །སྔ་གྲབས་འགྱོད་མེད་ཆུད་པ་གལ་ཆེ་ལགས། །རྒྱུ་འབྲས་དགེ་སྡིག་བདེ་སྡུག་བསླུ་བ་མེད། །ངོས་ལྐོག་ཡོ་རྒྱུ་མཁས་ཀྱང་རང་ཕུང་ཉིད། །བདེ་འདོད་སྡུག་བསྔལ་མི་འདོད་ཀུན་མཐུན་བཞིན། །བླང་དོར་གོ་ལོག་མ་སོང་དགོས་པ་ལགས། །ཚེར་མ་ཙམ་ཞིག་ཟུག་ཀྱང་མི་བཟོད་ན། །ངན་སོང་དམྱལ་བའི་སྡུག་བསྔལ་ཅི་ཞིག་བཟོད། །འཁོར་བ་གར་སྐྱེས་བདེ་བ་སྤུ་ཙམ་མེད། །མྱང་འདས་བྱང་ཆུབ་ཅི་འགྲུབ་རེམས་དགོས་ལགས། །

[Full Size]

ངན་སོང་འཁོར་བའི་འཇིགས་ཆེན་སྐྱབས་ནུས་ནི། །བླ་མ་དཀོན་མཆོག་ལས་གཞན་མ་མཆིས་ཚེ། །དད་གུས་དྲག་པོས་སྐྱབས་འགྲོ་གསོལ་འདེབས་ལ། །འབད་ན་དཀོན་མཆོག་ཐུགས་རྗེས་མི་བསླུ་ལགས། །མཁའ་ཁྱབ་སེམས་ཅན་ཐམས་ཅད་ཚེ་རབས་ཀྱི། །ཕ་མ་དྲིན་ཅན་མ་བྱས་སུ་ཡང་མེད། །དྲིན་ལན་མ་འཁོར་གནོད་སེམས་ཅི་ལ་བྱེད། །སྙིང་རྗེ་བྱང་སེམས་ཅི་སྒྲུབ་དགོས་ལགས། །བདེར་གཤེགས་མ་ལུས་ཚོགས་གཉིས་རྫོགས་ལས་བྱུང་། །ཚོགས་བསགས་སྒྲིབ་པ་མ་སྦྱང་དོན་མི་འགྲུབ། །རྟག་པར་ལུས་དང་ལོངས་སྤྱོད་སྒོ་གསུམ་ཀུན། །དཀར་ཕྱོགས་དགེ་ལ་སྦྱོར་བ་བརྩོན་དགོས་ལགས། །སངས་རྒྱས་ཐམས་ཅད་ངོ་བོ་དབྱེར་མེད་གཅིག །སོ་སོའི་དད་མོས་གར་ཡོད་བྱིན་རླབས་མྱུར། །བྱིན་རླབས་ཅེས་བྱ་དད་མོས་རང་གཟུགས་ཡིན། །དག་སྣང་གང་ཆེར་བྱིན་རླབས་འཇུག་པ་ལགས། །རང་ལ་སྐུ་དྲིན་གང་ཆེའི་བླ་མ་དེ། །ཨོ་རྒྱན་དངོས་ཡིན་ཐེ་ཚོམ་བྱ་མི་རུང་། །སྐྱིད་སྡུག་

[Full Size]

ན་ཚ་འཆི་རྐྱེན་གང་བྱུང་ཡང་། །བློ་གཏད་སྙིང་ནས་བྱེད་ནུས་དགོས་པ་ལགས། །གསང་སྔགས་ཟབ་མའི་ཆོས་སྒོར་ཞུགས་ཕྱིན་ཆད། །སྒོ་གསུམ་ཐ་མལ་འཁྲུལ་རྗེན་འབྲང་མི་རུང་། །ལུས་ལྷ་གསང་སྔགས་སེམས་ཉིད་ཆོས་དབྱིངས་སུ། །ཡེ་ནས་ཡིན་པའི་ངེས་ཤེས་དགོས་པ་ལགས། །འགྲོ་འདུག་བཟང་ཉལ་སྤྱོད་པ་གང་བྱེད་ཀྱང་། །ལྷ་དང་བླ་མ་ཡིད་ལ་དྲན་པ་དང་། །དགེ་བ་ཐམས་ཅད་སེམས་ཅན་དོན་དུ་བསྔོ། །རང་སེམས་རང་ཚོ་ཟིན་པ་གལ་ཆེ་ལགས། །མདོར་ན་ཉིན་མཚན་དུས་ཀུན་ཐམས་ཅད་དུ། །རང་སེམས་དཔང་ཚུག་དཀོན་མཆོག་མི་འཁྲེལ་བར། །ལུས་ངག་ཡིད་གསུམ་ཆོས་དང་ཅི་མཐུན་ལ། །མི་ཚེའི་ལྷག་མ་གང་བྱུང་འཁྱོལ་བར་མཛོད། །ཅེས་པ་ནི་སྔགས་འཆང་རྡོ་རྗེ་འཛིན་པ་དོན་འགྲུབ་ཚེ་རིང་ལ་གདམས་པའོ། །ན་མོ་གུ་རུ། །གང་གིས་མཚན་ཙམ་དྲན་པས་ཀྱང་། །བྱིན་རླབས་ནུས་པ་བསམ་ཡས་ཀྱིས། །གདུལ་བྱའི་རེ་བ་སྐོངས་མཛད་པའི། །པདྨ་འབྱུང་གནས་ཞབས་ལ་འདུད། །དད་ལྡན་

[Full Size]

མཁས་གྲུབ་རྒྱ་མཚོ་ཡིས། །ཞལ་གདམས་དགོས་བཞེས་བསྐུལ་བ་ལས། །བྱ་གྲལ་སྣ་ཚོགས་རང་གྲོལ་གྱི། །སྙིང་གཏམ་ཚིག་གསུམ་འདི་སྐད་ལོ། །མི་ལུས་ལན་ཅིག་ཐོབ་པ་འདི། །དོན་མེད་སྟོང་ཟད་བྱེད་མཁན་མང་། །ཡང་ཡང་དལ་འབྱོར་མི་ཐོབ་པས། །དགེ་ལ་འབད་པ་སྙིང་གཏམ་ཡིན། །མི་ཚེའི་ཉི་མ་རྨི་ལམ་ཙམ། །གཅིག་ཤི་གཉིས་ཤིའི་རེ་མོད་དེ། །རང་ལ་མྱུར་དུ་བབ་ངེས་པས། །འགྱོད་མེད་གྲབས་ཆུད་སྙིང་གཏམ་ཡིན། །དགེ་སྡིག་རྒྱུ་འབྲས་མི་བསླུ་བས། །སྐྱིད་དུ་རེ་ནས་སྡིག་བྱས་ཏེ། །ལྟོ་གོས་ནོར་རྫས་བསྒྲུབ་ན་ཡང་། །ཕན་མེད་གནོད་དོ་སྙིང་གཏམ་ཡིན། །ཕ་མ་བུ་ཚ་གཉེན་འཁོར་ལ། །ཤ་ཚའི་སེམས་ཀྱིས་འཇིག་རྟེན་འདིའི། །བྱ་བས་རང་དོན་རླགས་པ་མང་། །གཏན་འདུན་སྒྲུབ་པ་སྙིང་གཏམ་ཡིན། །འཇིག་རྟེན་ཕེར་ཕེར་ཡོང་ཡོང་གི། །བྱ་བྱེད་མང་ན་ཕུང་བའི་རྒྱུ།

[Full Size]

ཀུན་མཐུན་སྙོམ་ཆུང་སྤྱོད་པ་དང་། །དམན་པ་བཟུང་བ་སྙིང་གཏམ་ཡིན། །རང་སེམས་དྲང་པོའི་གཞུང་བསྲང་ན། །སུ་མ་མགུ་ཡང་འགྱོད་པ་མེད། །གཡོ་ཁྲམ་ཟོལ་རྫུན་མི་བྱ་བར། །བློ་ཐུབ་བྱེད་པ་སྙིང་གཏམ་ཡིན། །བླ་མ་དཀོན་མཆོག་མ་གཏོགས་པ། །གཏན་གྱི་སྐྱབས་གནས་ཐུབ་པ་མེད། །སྐྱིད་སྡུག་གང་བྱུང་བླ་མ་ལ། །གསོལ་བ་གདབ་པ་སྙིང་གཏམ་ཡིན། །བློ་རྒྱུད་ལས་སུ་མ་རུང་ན། །བཙུན་གཟུགས་བྱས་ཀྱང་ཆོས་པ་མིན། །དཀོར་གྱི་འཁུར་བཅས་ཐར་ལམ་མེད། །རང་རྒྱུད་ཐུལ་བ་སྙིང་གཏམ་ཡིན། །ཉམས་ལེན་གང་ཡང་མི་ནུས་པར། །ཤེས་ཤེས་མང་པོས་ཕན་པ་མེད། །ནུས་པ་ཡིག་དྲུག་གཅིག་པུས་ཀྱང་། །སངས་རྒྱས་འགྲུབ་པོ་སྙིང་༴ །དག་སྣང་ཕྱོགས་མེད་མ་བྱས་ན། །ཆགས་སྡང་ཀུན་སློང་སྒྲིབ་པ་ཆེ། །ཆོས་དང་གང་ཟག་ཐམས་ཅད་ལ། །སྐུར་པ་མི་འདེབས་སྙིང་༴ །སངས་རྒྱས་ཐམས་ཅད་བླ་མར་འདུས། །བླ་མའི་མཆོག་གྱུར་པདྨ་འབྱུང་། །གསོལ་

[Full Size]

བ་བརྩེ་གཅིག་བཏབ་ནུས་ན། །ཆོས་གོ་ཆོད་དོ་སྙིང་གཏམ་ཡིན། །མདོར་ན་འདི་ཕྱི་བར་དོ་གསུམ། །བླ་མ་དྲན་ཞིང་དགེ་ལ་འབད། །གཏན་གྱི་འདུན་མ་དེ་ཡིས་འགྲུབ། །ཐུགས་ལ་ཞོག་མཛོད་སྙིང་གཏམ་ཡིན། །སྙིང་གཏམ་བཅུ་གཉིས་ཚིག་བཅད་འདི། །མ་རྗེད་སྙིང་གི་དཀྱིལ་དུ་བསྟིམ། །འདི་ཡི་དགེ་བས་འགྲོ་ཀུན་ཀྱང་། །དམ་པའི་ཆོས་ལ་འཁོད་པར་ཤོག །ཅེས་མཁས་གྲུབ་རྒྱ་མཚོ་ལ་གདམས་པའོ།། ༈ །།གང་ལ་བརྟེན་ན་སྲིད་པའི་སྡུག་བསྔལ་ཀུན། །ཡང་དག་ཞི་མཛད་དཔལ་ལྡན་བླ་མའི་ཞབས། །འདི་བཟུང་ཚེ་རབས་ཀུན་ཏུ་བཏུད་བྱས་ནས། །སྙིང་གཏམ་ཚིག་གསུམ་བཤད་ཀྱི་ཡིད་ལ་བཟུང་། །དལ་འབྱོར་ལེགས་ཐོབ་སངས་རྒྱས་བསྟན་དང་མཇལ། །དབང་པོ་ཀུན་ཚང་རང་དབང་ཡོད་དུས་འདིར། །འཇིག་རྟེན་གཡེང་བ་བྱེད་པར་མི་ཁོམ་པས། །སྒོ་གསུམ་དགེ་ལ་འབོད་ཅིག་གཏན་འདུན་ཡིན། །ནམ་འཆི་ཆ་མེད་རྒན་གཞོན་ལ་མ་ལྟོས། །

[Full Size]

ཤི་རྐྱེན་ཅི་འདྲས་བྱེད་པ་མ་ངེས་ཚེ། །མི་ཚེ་རིང་པོའི་རྒྱགས་གྲབས་བྱ་དོན་མེད། །འཆི་དུས་འགྱོད་མེད་དགོས་སོ་བློ་སྣ་སྟུངས། །ཚེ་འདིར་ནོར་རྫས་གཉེན་འཁོར་འཇིག་རྟེན་གྱི། །ཕེར་ཡོང་ཇི་ཙམ་ཡོད་བཞིན་རྣམ་གཡེང་ཆེ། །ཆོས་དང་འགལ་བའི་རྒྱུ་རྐྱེན་དེ་ལས་འབྱུང་། །བློ་སྣ་ནང་དུ་ཁུག་དང་བསམ་པ་འགྲུབ། །དམ་ཆོས་སྙིང་པོར་རང་རྒྱུད་ཐུལ་དགོས་པས། །གཞན་གྱི་སྐྱོན་ལ་མ་བལྟ་རང་སྐྱོན་བརྟག །སྡོམ་པ་དམ་ཚིག་ཀུན་གྱི་རྩ་བ་ནི། །རང་སེམས་རང་གིས་འདུལ་བ་གལ་དུ་ཆེ། །བསླབ་ཤེས་ཡོན་ཏན་ཇི་ལྟར་ཆེ་བཞིན་དུ། །ངར་འཛིན་ཁེངས་སེམས་འཕེལ་ཞིང་དཀོར་ལ་ཧམ། །སྙིགས་དུས་ཆོས་པའི་བུབ་ས་འདི་ཡིན་པས། །སྙོམ་ཆུང་སྤྲོས་མེད་བྱས་ན་ཆོས་དང་མཐུན། །ལུས་སྲོག་འཚོ་ཙམ་ཇི་ལྟར་བྱས་ཀྱང་འོངས། །བག་མེད་ཆང་དང་དགེ་འདུན་དཀོར་ཟས་ལ། །ཅི་ཐོབ་བྱེད་པའི་བཙུན་གཟུགས་རྒྱལ་འགོངས་དངོས། །ཉེས་

[Full Size]

དམིགས་འཁུར་བཅས་ཐར་ལམ་རེ་ཐག་ཆད། །རྒྱུ་འབྲས་དགོ་ཞིང་ཤེས་ཀྱང་ཁྱད་གསད་ནས། །གཡོ་རྒྱུ་ཟོག་ཁྲམ་ཁོ་ནས་དུས་འདའ་ཡང་། །ཆོས་གོས་ཤམ་ཐབས་བཟང་པོས་བརྒྱན་བྱེད་པ། །རང་གིས་རང་ཉིད་བསླུ་ཞིང་ཕུང་ཚབས་ཆེ། །ཉིན་ཞག་རེ་ལ་སྐྱབས་འགྲོ་ཚར་གཅིག་ཀྱང་། །མི་ནུས་བཞིན་དུ་ལྟོ་གོས་འཚོལ་ཐབས་ལ། །ཉིན་མཚན་བར་མེད་རྒྱུགས་ཅིང་རེམས་པ་ཡི། །ཆོས་གཟུགས་འདི་འགྲོ་ས་ངན་སོང་ཡིན། །བླ་མ་དཀོན་མཆོག་རྣམས་ལ་བློ་ཁེལ་ན། །འདི་ཕྱིའི་དོན་ཆེན་དེ་ཡིས་འགྲུབ་ན་ཡང་། །ལོག་མིན་དྲན་རྒྱ་ཆེ་བས་དམ་ཚིག་རུལ། །དད་མེད་བྱིན་རླབས་འཇུག་པ་ཅི་ལ་སྲིད། །ཆོས་ལ་བཟང་ངན་ཡོད་པ་མ་ཡིན་ཀྱང་། །གང་ཟག་རང་སྣང་དག་དང་མ་དག་ཁྱད། །དེས་ན་རང་སེམས་དག་སྣང་ཕྱོགས་མེད་སྦྱོངས། །བློ་གཏད་གཅིག་ཐོག་དྲིལ་ན་དེ་ཀས་ཆོག །གཞིས་བྱེས་ལམ་དང་འགྲོ་འདུག་

[Full Size]

ནམ་དུ་ཡང་། །སྒོ་གསུམ་དགེ་སྦྱོར་ཞོར་ལ་མ་འབད་ན། །དལ་ཁོམ་ཤོམས་ལ་བསྒུགས་རིང་མི་ཚེ་ཟད། །འཆི་བདག་དལ་ཁོམ་བརྩི་བ་མི་སྲིད་དོ། །སྐྱིད་སྡུག་གང་བྱུང་བླ་མའི་བྱིན་རླབས་སུ། །ཤེས་ན་བར་ཆད་འབྱུང་བའི་རྒྱུ་རྐྱེན་ཟད། །ན་ཚ་སྡུག་བསྔལ་གང་ཡང་སྒྲིབ་སྦྱོང་དུ། །གོ་བར་བྱ་ཞིང་སྨོན་ལམ་བཟང་པོ་གདབ། །ཞེ་སྡང་ལ་སོགས་ཉོན་མོངས་དུག་ལྔའི་སེམས། །ནམ་སྐྱེས་ཉོན་མོང་རང་གར་མི་བཏང་བར། །རྒྱུ་འབྲས་དམ་སྡོམ་ཡིད་ལ་དྲན་པ་ཡིས། །ཆོས་པའི་ཞབས་འདྲེན་མི་འགྱུར་གཉེན་པོ་བསྟེན། །རང་ཉིད་རྒྱལ་འདོད་མཐོ་འདོད་གྲགས་འདོད་ཀྱི། །འཕྲལ་ཡུན་འདུན་མ་འཆུགས་ཅིང་ཆོས་དང་འགལ། །དེ་ཕྱིར་བཟང་ངན་འབྲིང་གོང་དུ་འཁུར། །དམན་པ་སྙིང་ནས་བཟུང་ན་དོན་ཆེན་འགྲུབ། །ཆོས་འདི་ལོ་ཟླ་གཅིག་གཉིས་མ་ཡིན་པར། །མི་ཚེ་གང་བྱུང་དེ་སྲིད་འཁྱོལ་དགོས་པས། །ན་སོ་སོང་བཞིན་ཆོས་དྲེད་

[Full Size]

བྱེད་མཁན་མང་། །རྒས་ཁ་ཤི་ཁར་ཞན་དུ་མ་སོང་དགོས། །མདོར་ན་འདི་ཕྱི་བར་དོ་ཐམས་ཅད་དུ། །བླ་མ་དྲན་ཞིང་ཉམས་ལེན་བརྩོན་པ་དང་། །དམ་སྡོམ་རྒྱུ་འབྲས་ངོ་ལྐོག་མེད་པ་རུ། །རང་སེམས་དཔང་འཇུག་དཀོན་མཆོག་མི་ཁྲེལ་བྱ། །སྒོ་གསུམ་སྙོམ་ལས་མི་བཞག་དགེ་ལ་འབད། །དག་སྣང་མོས་གུས་སྙིང་རྗེ་གོང་འཕེལ་བསླབ། །དོ་ནུབ་ཤི་ཡང་དམ་ཆོས་མ་གཏོགས་པ། །བསམ་མནོ་གཞན་དུ་མ་བྱེད་སྙིང་གཏམ་ཡིན། །སྙིང་གཏམ་སེམས་ལ་བཞག་ན་གདམ་ངག་ཡིན། །དོན་དེ་ལག་ཐོག་འཁེལ་ན་དམ་ཆོས་ཡིན། །ཆོས་དང་སེམས་སུ་འདྲེས་ན་ཆོས་པ་ཡིན། །འདི་བཞིན་ཐུགས་ལ་བཞོག་ཅིག་མ་བརྗེད་ཅིག །མི་རྒན་ལྷག་བསམ་བཟང་བའི་དྲང་གཏམ་འདི། །གཞན་ལ་སྐུར་ཞུས་མ་ཡིན་ཕན་ཕྱིར་ཡིན། །འདི་ལས་བྱུང་བའི་དགེ་ཚོགས་ཇི་སྙེས་མཐུས། །འགྲོ་ཀུན་དམ་པའི་ཆོས་ལ་འཁོད་གྱུར་ཅིག །ཅེས་དོན་གཉིས་

[Full Size]

མཆོག་གྲུབ་ལ་གདམས་པའོ།། ༈ །།དལ་འབྱོར་མི་ལུས་ཐོབ་པ་ད་རེས་ཙམ། །དོན་མེད་སྟོང་ཟད་མ་བྱེད་དོན་ལྡན་མཛོད། །འཆི་བ་ནམ་ཡོང་ངེས་པ་ཅི་ཡང་མེད། །ཤི་ཁར་འགྱོད་པ་མེད་པའི་གྲབས་ཆུད་མཛོད། །དགེ་སྡིག་རྒྱུ་འབྲས་བསླུ་བར་མི་སྲིད་པས། །དཀར་ནག་གོ་ལོག་མ་བསྒྲུབ་སྤང་བླང་མཛོད། །ཁ་ཡེངས་མིག་ཡེངས་ངང་ལ་མི་ཚེ་འགྲོ། །ནམ་ཁོམ་དགེ་སྦྱོར་གང་ལ་གང་འགྲོ་འབུངས། །རང་གི་སེམས་རྒྱུད་ཐུལ་བར་མ་ནུས་ན། ཁ་བཤད་མཁས་ཀྱང་ཆོས་པའི་ཞབས་འདྲེན་མང་། །དག་སྣང་མེད་ན་ཞོར་ལ་སྡིག་སྒྲིབ་སོགས། །དག་སྣང་ཕྱོགས་མེད་སྦྱང་བ་གནད་དུ་ཆེ། །ལྟོ་གོས་མ་འཛོམ་དགོས་པ་ཀུན་གྱིས་བྱེད། །དམ་ཆོས་མ་འགྲུབ་དགོས་པ་བྱེད་མཁན་དཀོན། །བླ་མའི་བྱིན་རླབས་དད་པ་ཁོ་ནར་རག །ལོག་ལྟ་མཁན་ལ་བྱིན་རླབས་འཇུག་ཡུལ་མེད། །དད་པ་ཟེར་ཡང་ཅི་མཛད་ལེགས་མཐོང་དགོས། །

[Full Size]

འགྱུར་ལྡོག་ཅན་གྱི་དད་པས་གོ་མི་ཆོད། །དམ་ཚིག་ཟེར་ཡང་ངོས་ལྐོག་མེད་གལ་ཆེ། །ཉིས་ལྟུང་ལྐོག་བསགས་རང་གི་རང་བསླུ་ཡིན། །འཇིག་རྟེན་འདུན་འགྲོས་ཤེས་པ་མང་ན་ཡང་། །ཆོས་ཀྱི་འདུན་གྲོས་བསླབ་མཁན་ཉན་མཁན་དཀོན། །དེ་ཕྱིར་ཚེ་འདིའི་དཀའ་ལས་མ་བསམ་པར། །ཕྱི་མའི་ལམ་སྣ་བསྒྲུབ་ཐབས་བསམ་པར་མཛོད། །འགྲོ་འདུག་ཉིན་མཚན་དུས་རྣམས་ཐམས་ཅད་དུ། །རྩ་བའི་བླ་མ་ཨོ་རྒྱན་ཆ་བྱད་ཅན། །སྤྱི་བོའི་སྟེང་གི་འཇའ་འོད་ཀློང་བཞུགས་བསམ། །ལེ་བདུན་ལ་སོགས་གསོལ་འདེབས་གང་ནུས་བྱ། །བཛྲ་གུ་རུའི་བཟླས་པ་རྒྱུན་དུ་བགྲངས། །ཅི་ཟ་ཅི་འཐུང་བླ་མ་མཆོད་པར་བསམ། །ན་ཚ་སྐྱིད་སྡུག་ལེགས་ཉེས་ཅི་བྱུང་ཡང་། །བསམ་པ་རེ་ས་བླ་མ་གཅིག་བུས་མཆོག །ཤི་ཁར་རིག་པ་བླ་མའི་ཐུགས་ཀར་གཏད། །ལམ་བཟང་འཕོ་བ་ཟེར་ཡང་འདི་ཉིད་ལགས། །ཉམས་ལེན་གཅིག་

[Full Size]

དྲིལ་བློ་ཐག་མ་བཅད་ན། །ཐོབ་ཐོབ་ཤེས་ཤེས་མང་ཡང་ཕན་པར་དཀའ། །དེ་བས་མོས་གུས་རྩེ་གཅིག་འདི་ལ་འབད། །མི་གཅིག་ཆོས་གཅིག་གཅིག་ཐོག་འདི་ལ་དྲིལ། །ངེས་ཤེས་འགྲོངས་པ་གནད་ཀྱི་མཐར་ཐུག་ཡིན། །ཤི་རུང་གསོན་རུང་ཉམས་ལེན་འདི་ཀས་ཆོག །ཁ་ལ་མ་ཁྱེར་སེམས་ལ་འདྲེ་བར་མཛོད། །ཅེས་ཡོན་ཏན་དབང་ཕྱུག་ལ་གདམས་སོ།། ༈ །།གང་ཞིག་དད་པས་གསོལ་བཏབ་ན། །བསླུ་བ་མེད་པའི་བྱིན་རླབས་མཆོག །ངེས་སྩོལ་སྒྲུབ་རྒྱུད་བླ་མའི་ཞབས། །འབྲལ་མེད་གུས་པས་བསྡུད་བྱས་ནས།། ༈ །།རིགས་རུས་མཆོག་ལས་ལེགས་བལྟམས་ཤིང་། །དམ་ཆོས་སྐལ་བ་བཟང་མོ་ཅན། །དགེ་བའི་ཐུགས་ལྡན་ཆོས་ཟུང་ལ། །རིང་མོའི་ས་ནས་མཆིད་འདི་གསོལ། །དད་པའི་སྙིམ་པས་ལེགས་འཐོར་བའི། །ཤིས་པ་བརྗོད་ཚིག་ཡིག་ཕྲེང་གིས། །གེ་སར་ཟེའུ་འབྲུ་རྣམ་གསལ་ནི།

[Full Size]

ལྷ་གོས་འདབ་བརྒྱ་གཡོ་བ་འབྱོར།། ༈ །།འཁོར་བ་དུག་གི་འདམ་རྫབས་ལ། །དུག་ཏུ་ཤེས་པས་རབ་སྤངས་ཏེ། །ཐར་གླིང་བྱང་ཆུབ་སྐམ་ས་རུ། །རིང་པར་བགྲོད་པ་ངོ་མཚར་ཆེ།། ༈ །།ཕྱོགས་དུས་རྒྱལ་བ་གངྒའི་ཀླུང་། །བྱེ་སྙེད་རྣམས་ཀྱི་སྤྱི་གཟུགས་ནི། །མཚན་ལྡན་བླ་མ་གང་དེ་ཡི། །ཞབས་པད་བསྟེན་པའི་སྐལ་བཟང་མ།། ༈ །།དད་པའི་མྱུ་གུ་སྐྱེ་འཕྲོ་ལ། །ལོག་ལྟའི་ཐན་པ་འབྱུང་ཉེན་ཡོད། །མོས་གུས་ཆུ་ལུད་མ་ཞན་ན། །ཐུགས་རྗེའི་ལོ་འབྲས་འབྱུང་བར་ངེས།། ༈ །།ཚེ་གཅིག་ཐར་ལམ་སྙེགས་དུས་འདིར། །ལས་ཉོན་བག་ཆགས་འཕྲང་འགག་དམ། །དུག་ལྔ་འཁྲུལ་ཞེན་ཇག་པ་རྒོད། །ངེས་འབྱུང་སྐྱེལ་མ་འབྲལ་མེད་མཛོད།། ༈ །།སེམས་ཉིད་ཕྱག་རྒྱ་ཆེན་པོ་ནི། །ཡེ་ནས་རང་ལ་ལྷུན་གྲུབ་ཀྱང་། །དབུལ་པོའི་ཁྱིམ་གྱི་གཏེར་ལྟ་བུ། །རང་ལ་རང་གི་མ་རིག་སྒྲིབ།། ༈ །།བླ་མའི་

[Full Size]

དྲིན་གྱིས་རྙེད་དུས་འདིར། །གཡེང་བའི་དགྲ་ལ་མ་ཤོར་བའི། །ཡེངས་མེད་དྲན་པའི་མེལ་ཚེ་དང་། །སྙིང་རུས་མཁར་པོ་བཟུང་འཚལ་ལོ།། ༈ །།ཚོགས་དྲུག་ཡུལ་སྣང་འཆར་སྒོ་འདི། །རང་སེམས་རྩལ་ལས་གཞན་མིན་ཡང་། །བྱིས་པ་འབག་འཆམ་མཐོང་བ་ལྟར། །བདེན་པར་འཛིན་པས་རྣམ་པར་འཁྲུལ།། ༈ །།འཁྲུལ་པའི་རང་འཚང་རིག་ཐབས་ལས། །གཞན་པའི་ལྟ་སྒོམ་མེད་ན་ཡང་། །སྒོམ་བློའི་ཞེན་པས་བཅིངས་པ་མང་། །མི་སྒོམ་མ་ཡེངས་མཁྱེན་པར་མཛོད།། ༈ །།སངས་རྒྱས་དངོས་ཀྱི་བླ་མ་བསྙེད། །གདམས་ངག་བདུད་རྩིའི་གཏེར་སྒོ་ཕྱེས། །ཕུན་སུམ་ཚོགས་པའི་དུས་གཅིག་འདིར། །ཉམས་ལེན་རན་པ་གལ་དུ་ཆེ།། ༈ །།ཆོས་སྒོར་ཞུགས་པ་མང་ལགས་ཀྱང་། །ཆོས་བཞིན་སྤྱོད་པ་ཉུང་ལུགས་དང་། མཐའ་རུ་ཕྱིན་པ་དཀོན་ཚུལ་དང་། །གཟིགས་ནས་ཚེ་དང་བསྒྲུབ་མཉམ་ཞུ།། ༈ །།མི་རྒན་

[Full Size]

མིག་དབང་མི་གསལ་བའི། །ཡིག་གཟུགས་སྲིན་པོའི་རྗེས་འདྲ་འདི། །གཟིགས་པར་དཀའ་ཡང་དོན་ལ་དཔྱོད། །ཐུགས་ལ་བཅག་ངེས་མཛད་པར་གསོལ།། ༈ །།དེ་སྐད་བྱིན་རླབས་མྱོང་གྲོལ་དང་། །བཅས་ཏེ་དབོ་ཟླའི་དཀར་ཚེས་ལ། །ཆོས་དབྱིངས་འོད་གསལ་རྩེ་མོ་ནས། །ཕུལ་འདིར་མཆེད་གཉིས་དགྱེས་ཅིག །ཅེས་པ་འདི། མཉམ་མེད་སྒམ་པོོ་པའི་རིགས་དབོན་སྐུ་མདུན་རྗེ་བཙུན་མ་མཆོད་གཉིས་ལ་ཕུལ་བའོ།། ༈ །།སྐལ་ལྡན་ཛྙཱ་ན་ཕ་ལ་ཡིས། །ཞལ་གདམས་དགོས་ཞེས་གང་གསུང་བ། །སངས་རྒྱས་མངོན་སུམ་དེར་བཞུགས་བཞིན། །བདག་འདྲའི་ཞལ་གདམས་ཅི་ཞིག་བྱ། །འོན་ཀྱང་བཞེད་པ་སྐོངས་སླད་དུ། །གང་དྲན་ཚིག་འགའ་སྨྲས་པ་འདི། །ཁྱེད་ཐུགས་རྒྱུད་དང་འདྲེས་པ་ཡི། །ལག་ལེན་ཐོག་ཏུ་ཁེལ་མཛད་ཞུ། །ཀྱེ་མ། ཚེ་འདི་མི་རྟག་ནམ་ཀྱང་འཆི། །ན་སོ་རྒན་གཞོན་མ་ལྟོས་པས། །བློ་སྣ་རིང་

[Full Size]

པོའི་སྒོ་བཤོམ་སྤོང་། །འཆི་དུས་འགྱོད་མེད་གྲབས་མཛོད་ཅིག །དབང་པོ་དྭངས་ཤིང་རིག་གསལ་ཡང་། །ཆོས་འདི་ཤེར་ལ་ཤེས་པ་དཀའ། །ཆོས་མིན་མ་སླབས་ཤེས་འགྱུར་བས། །བློ་རྒྱུད་ཆོས་དང་མཐུན་མཛོད་ཅིག །བླ་མའི་གཟུགས་ཙམ་འཛིན་པ་མང་། །མཚན་ཉིད་ལྡན་པ་གསེར་ལས་དཀོན། །སངས་རྒྱས་མངོན་གསུམ་མཇལ་དུས་འདིར། །ཞབས་ཏོག་ཅི་གསུངས་སྒྲུབ་མཛོད་ཅིག །རང་གི་འོད་དང་མཐུན་པ་ན། །དད་པ་ཆེ་སྐད་བྱེད་ན་ཡང་། །རང་འདོད་ཅུང་ཟད་མ་བྱུང་ན། །ལོག་ལྟ་སྐྱེ་བས་གཟབས་མཛོད་ཅིག །བླ་མའི་ཅི་གསུངས་བསྒྲུབ་ནུས་ན། །ཆོས་ཀྱི་སྐལ་བ་དེ་ཡིས་ཆོག །བླ་མ་མི་དགྱེས་ཐོས་བསམ་སྒོམ། །དོན་མེད་ཡིན་ནོ་དགོངས་མཛོད་ཅིག །སངས་རྒྱས་བསྟན་ལ་ཞུགས་ཕྱིན་ཆད། །དམ་ཚིག་སྡོམ་པ་གཙང་ངེས་དགོས། །རྒྱུ་འབྲས་མི་འཛེམས་བཙུན་གཟུགས་དེ། །རུ་འདྲ་ཡིན་

[Full Size]

པ་མཁྱེན་མཛོད་ཅིག །ཟ་འཐུང་དཀོར་གྱི་རང་བཞིན་ལ། །ཆོག་ཚོད་མེད་ན་ཁྱི་ལྟོགས་འདྲ། །ལུས་སྲོག་ཚེ་ཐུབ་ཁོ་ནས་ཆོག །འདོད་ཞེན་སྲེད་པ་སྤོང་མཛོད་ཅིག །ཐོབ་ཐོབ་ཞུས་ཞུས་མང་པོའི་ཆོས། །ཉམས་ལེན་མེད་ན་ཕན་པར་དཀའ། །བློ་གཏད་ཐུབ་པའི་ཆོས་ཅིག་ལ། །སྨར་འཇུས་ཉམས་སུ་ལོངས་མཛོད་ཅིག །གཞི་བྱེས་ལམ་གསུམ་ཉིན་མཚན་ཀུན། །ཅི་ནུས་དགེ་སྦྱོར་མ་བྱས་ན། །མཚམས་དང་དལ་ཁོམ་སྒུག་རིང་ལ། །མི་ཚེ་ཟད་པ་ཚོར་མཛོད་ཅིག །བླ་མ་མཆེད་གྲོགས་དྲག་ཞན་སུ། །གང་གི་སྐྱོན་ལ་མི་ལྟ་བར། །རང་སྐྱོན་བརྟག་ཅིང་ནན་གྱིས་སྤོངས། །ཀུན་ལ་དག་སྣང་འབྱོངས་མཛོད་ཅིག །མདོར་ན་མི་ཚེ་ཡུད་ཙམ་འདི། །དོན་མེད་ཟད་དུ་མ་བཅུག་པར། །བླ་མ་མཉེས་པའི་ཞབས་ཏོག་དང་། །མདོ་དོན་ཆོས་ལ་དྲིལ་མཛོད་ཅིག །

[Full Size]

མི་རྒན་བསླབ་བྱ་ཚིག་གསུམ་འདི། །སྙན་ངག་སྡེབ་སྦྱོར་མི་ལྡན་ཡང་། །དོན་ལ་དགོས་པའི་གནས་འགག་ཡོད། །ཐུགས་ལ་ལེགས་པར་བསྟིམ་མཛོད་ཅིག །སྙིང་གཏམ་སྙིང་ལ་བཅག་པ་དང་། །ལག་ལེན་ལག་ཐོག་འཁེལ་གྱུར་ནས། །ཚེ་འདི་ཚེ་རབས་ཀུན་ཏུ་ཡང་། །དོན་གཉིས་དོན་མཆོག་འགྲུབ་གྱུར་ཅིག །ཅེས་སྐྱབས་མཆོག་མཚུངས་པ་མ་མཆིས་པ་ལྷའི་ལྷར་གྱུར་པ་གང་གི་ཞབས་པད་ཉེ་བར་བསྟེན་པ་ཛྙཱ་ན་ཕ་ལའི་བཞེད་སྐོངས་སུ། རྒན་པོ་པདྨ་ལེགས་གྲུབ་ཀྱིས། འོད་གསལ་རྩེ་མོའི་དབེན་ཁྲོད་དུ་བྲིས་པ་ཨ་ཐཱ།། ༈ །།རིག་རུས་ཆོ་འབྲང་འཇིག་རྟེན་གྱི། །ཞེན་སྤངས་དམ་པའི་ཆོས་ཁོ་ནར། །ལེགས་བརྩོན་ངེས་དོན་མཆོག་གྲུབ་པའི། །མིང་དང་དོན་མཐུན་བསྐལ་བཟང་ཉིད།། ༈ །།ཇི་སྐད་གསུངས་ལྟར་འཁོར་འདས་ཆོས་མ་ལུས། །སེམས་གཉིས་གཅིག་པུའི་རོལ་པ་ལས་མ་འདས། །དེ་ལྟའང་རང་སེམས་རང་ཚོ་མ་ཟིན་པས། །རྨི་ལམ་

[Full Size]

འདྲ་བའི་འཁྲུལ་འཁོར་འདི་ཡིས་བསླུས།། ༈ །།རང་སེམས་ནོར་བུ་རིན་ཆེན་ལ། །ཡེངས་མེད་དྲན་པས་མ་ཆོད་ན། །ཉམས་རྟོགས་འདོད་དགུ་མི་འབྱུང་ཕྱིར། །རང་ངོ་རང་རིག་བྱི་དོར་འཚལ། ༈ །གནས་སྐབས་ལྟར་སྣང་གཡེང་བའི་བྱེ་བྲག་དང་། །རྗེ་བཙུན་བླ་མའི་བཀའ་ཡི་ཁོལ་པོ་སོགས། །ཀུན་ཀྱང་རང་རིག་དྲན་པས་ཁྱབ་ངོས་ནས། །ལྷག་བསམ་དག་པས་ལྷུར་བླངས་ཟོལ་མེད་འབུངས།། ༈ །།དྲན་པ་སྐྱོང་བའི་མཁན་པོ་དང་། །སྐྱོང་རྒྱུའི་ཤེས་པ་པོ་ལ་ནི། །ཐ་དད་མིན་ཕྱིར་གང་སྣང་གི། །འཆར་ཚུལ་ཝལ་པོ་འདི་ཀ་ལ།། ༈ །།མི་འཛིན་མ་ཞེན་དགག་སྒྲུབ་བཅོས་སླད་ཀྱིས། །བསྒྱུར་བཀོད་གང་ཡང་མི་བྱ་རང་གི་རང་། །རིག་ཙམ་དྲན་ཙམ་གུ་ཡངས་ཁྲོལ་ལེ་བ། །ཤེས་རིག་རྗེན་པ་འདི་ཀ་མ་བརྗོད་བྱ།། ༈ །།སེམས་ལ་སེམས་ཀྱིས་བཅིངས་པའི་ཉམས། །སྡུག་

[Full Size]

བཙིར་བསྒོམ་མཁན་མང་མོད་ཀྱི། །ཅི་ལྟར་འཆར་བའི་སྣང་སེམས་ཀུན། །ཤར་མཁན་རིག་ན་དེ་ཀས་ཆོག། ༈ །།དྲན་པ་རྒྱུན་ཆགས་རེ་ཞིག་དཀའ་ན་ཡངས། །འཁྲུལ་པའི་ཆོས་ལ་ཞེན་འཛིན་ཅི་ཆུང་གིས། །རྣམ་པར་རྟོག་པ་གཅིག་སྐྱེས་གཉིས་སྐྱེས་ལ། །ཅེར་ཅེར་ཧྲིག་ཧྲིག་ངོ་ཡིས་ཟིན་པར་མཛོད།། ༈ །།མཚན་སྣང་ཇི་བཞིན་ཟིན་པ་ལ། །ཉིན་སྣང་དྲན་རིག་འཁོར་ཡུག་དགོས། །དེ་ཡང་གཉིད་ཀྱི་ཐིམ་རིམ་གྱིས། །བར་དུ་ཆོད་པས་ཅུང་ཞིག་དཀའ།། ༈ །།འོན་ཀྱང་འོད་གསལ་འཛིན་ལ་གོམ་པའམ། །སྔོན་སྦྱངས་ཤུགས་དང་བླ་མའི་བྱིན་རླབས་སོགས། །རྟེན་འབྲེལ་མཚམས་སྦྱོར་མཐུ་ལ་མ་ངེས་ཏེ། །གཙོ་བོར་ཉིན་སྣང་འཕྲོ་མཐུད་གལ་ཆེ་ལགས།། ༈ །།རྟག་ཏུ་འཆི་བ་བསམ་ཞིང་ཅིས་ཀྱང་དགོས་མེད་དྲན། །བླ་མས་རང་སེམས་དབྱེར་མེད་རིག་པ་ཡེངས་མེད་བསྐྱངས། །རྒྱུ་འབྲས་

[Full Size]

བསླུ་མེད་བསམ་ཞིང་དམ་སྡོམ་སྲོག་བཞིན་བསྲུང་། །སྒོ་གསུམ་དགེ་ལ་རེམས་པའི་དགེ་རྩ་འགྲོ་ལ་བསྔོ།། ༈ །།རྒན་པོའི་སྙིང་གཏམ་ཚིག་གསུམ་འདི། །སྲིན་བུའི་རྗེས་འདྲའི་ཡིག་གཟུགས་སུ། །བཀོད་དེ་ཕུལ་འདིའི་རྣམ་དཀར་མཐུས། །ཁྱེད་ཐུགས་ཕྱག་རྒྱ་ཆེ་འགྲུབ་ཤོག། ༈ །།ཅེས་ཟབ་མོ་ངེས་པའི་དོན་བཟང་མཆོག་ཏུ་གྲུབ་པའི་སྐལ་པས་མངོན་པར་མཐོ་བ་གང་གི་བཞེད་དོན་སྐོངས་ཕྱིར་ལ་གཅིག་ཏུ་བསམ་ཏེ། སྣ་ཚོགས་རང་གྲོལ་གྱི་མིང་ཙམ་འཆང་བའི་རྨོངས་རྒན་གྱི། ཆོས་དབྱིངས་འོད་གསལ་རྩེ་མོའི་རི་བོར་བྲིས་པ་དགེ། ༈ །།སྙིང་གཏམ་ཚིགས་སུ་བཅད་པ་ལགས། །ཆོས་ཀུན་སྙིང་པོའི་མཐར་ཐུག་ཕྱག་རྒྱ་ཆེ། །སྟོན་མཛད་སྒྲུབ་རྒྱུད་བླ་མར་གུས་བཏུད་ནས། །ངེས་པའི་དོན་ལ་བརྩོན་པའི་རབ་གསལ་བ། །སྙིང་གཏམ་བཤད་འདི་ཐུགས་ལ་གཅེས་པར་ཟུང་། །བསྐལ་པ་གྲངས་མེད་སྐྱེ་བའི་འཕྲེང་རྒྱུད་ཀྱང་། །བསྟན་པའི་སྙིང་པོར་ཞུགས་པ་ད་རེས་ཙམ། །ད་དུང་ཕྱིས་ནས་འདི་ལྟར་འབྱོར་པ་དཀའ། །ད་ལྟ་གཏན་འདུན་སྒྲུབ་དུས་ལན་

[Full Size]

ཅིག་ལགས། །དལ་འབྱོར་ལུས་འདིའི་ལང་ཚོ་འཕྲལ་འཕྲལ་རྒུད། །ཚེ་ཡི་དབང་སྐལ་ལོ་ཟླ་ཞག་གི་ཟད། །མ་ཚོར་འཆི་བའི་དུས་ལ་ཏུག་གི་སླེབས། །འགྱོད་མེད་གྲབས་ཆུད་བྱ་བའི་དུས་ལ་བབས། །རིགས་རུས་སྟོབས་འབྱོར་གང་ཆེ་སྡིག་པའི་རྒྱུ། །ཡོན་ཏན་ཤེས་རྒྱའི་ཁེངས་པས་ངན་སོང་བསྒྲུབ། །འཇིག་རྟེན་ཕེར་ཡོང་ཅན་ཚོ་གཏན་ཕུང་འགྲོ། །རྩེ་གཅིག་སྒྲུབ་པ་ལས་གཞན་སྙིང་པོས་དབེན། །སྐྱིད་འདོད་ལྟོ་གོས་འཛོམ་ཆ་སྒྲུབ་སྒྲུབ་ནས། །དགོས་ངེས་ཕྱི་མའི་དོན་ཆེན་མ་གྲུབ་པས། །ཤི་ཁར་ཁ་ཆེམ་འཇོག་པའི་ཆོས་པ་འཁྲུལ། །བློ་སྣ་ཐུང་བའི་མི་ལ་ཁེ་གཅིག་ཡོད། །དམ་ཆོས་བྱེད་འདོད་ཡོད་པ་ཤིན་ཏུ་མང་། །བྱས་པར་རློམ་པའི་ཆོས་གཟུགས་དེ་བས་མང་། །སྙིང་ནས་རྩེ་གཅིག་ནུས་མཁན་རབ་ཏུ་ཉུང་། །ཆོས་དེ་རྒྱུད་ལ་ཁེལ་ངེས་དགོས་པ་ལགས། །འགྲོ་བའི་མགོན་པོ་མཉམ་མེད་འཛམ་གླིང་གྲགས། །གང་སྐུའི་

[Full Size]

བཀོད་པ་དངོས་སུ་མཇལ་དུས་འདིར། །ཅི་མཛད་ལེགས་མཐོང་མོས་གུས་རྩེ་གཅིག་པ། །གདམ་ངག་ཕུ་ཐག་གཅོད་ལ་འབད་དགོས་སོ། །རང་སེམས་བླ་མ་ཆོས་སྐུར་དབྱེར་མེད་ཀྱང་། །འདུས་བྱས་གཟུགས་སྐུའི་བླ་མར་འདུ་འབྲལ་ཡོད། །སྐུ་འབུམ་འདྲ་འབག་མཇལ་ཚེ་ཅུང་ཟད་ཕྱིས། །ད་ལྟ་ཅི་གསུང་བསྒྲུབ་པ་གལ་རེ་ཆེ། །ཚེ་འདིའི་སྐྱིད་སྡུག་རྨི་ལམ་སྣང་བ་ཙམ། །བསམ་མནོ་སྒོ་བཤོམ་མང་པོའི་ཐོག་བབས་དཀའ། །གང་འབྱུང་བླ་མའི་ཐུགས་རྗེར་ལམ་དུ་འཁྱེར། །བསམ་རྒྱུ་དགེ་སྦྱོར་ཁོ་ནར་ཧྲིལ་གྱི་དྲིལ། །རྣམ་རྟོག་འཆར་སྒོ་མང་བ་སྐྱོན་མེད་ཀྱང་། །དེ་ལ་ཞེན་འཛིན་བྱས་ན་ལས་ངན་གསོག །གཅིག་ཤར་གཉིས་ཤར་རང་ངོ་ཤེས་ཀྱིས་དང་། །རྣམ་རྟོག་ཆོས་སྐུར་ཤར་བ་དཀའ་ལས་མེད། །ལམ་རྟགས་ཉམས་རྟོགས་ཡོན་ཏན་ནམ་འོང་སྙམ། །རེ་འདོད་བྱས་ཚད་བདུད་ཀྱི་བསླུ་བྲིད་བྱུང་། །ཤི་རུང་གསོན་རུང་རིག་པ་

[Full Size]

རྗེན་པ་བསྐྱངས། །ནོར་འཁྲུལ་ཤོར་གོལ་དེ་ལ་ཡོང་དོན་མེད། །རོ་སྙོམས་བརྟུལ་ཞུགས་སྤྱོད་མཁན་མང་ལགས་ཀྱང་། །ཆོས་བརྒྱད་དྲི་མས་མ་སྦགས་གར་ཡང་དཀོན། །ཚིག་ཟུར་མཐོ་དམན་སྐྱོ་ཚའི་ཞིམ་མངར་ཙམ། །མི་བཟོད་རང་འཚང་སྟོན་པའི་སྒོམ་ཆེན་མང་། །རྒྱལ་བའི་ཆོས་ཀུན་རང་རྒྱུད་འདུལ་ཐབས་ཉིད། །མདོ་སྔགས་གཉིས་ཀ་ཉོན་མོངས་རང་དག་ཏུ། །མ་ཤོར་ཐབས་སུ་དགོངས་པ་གཅིག་པས་ན། །དོན་གྱི་གནད་འགག་ཟིན་པ་གལ་ཆེར་གདའ། །གཞི་བྱེས་ལམ་དང་ཚོགས་དབེན་ནམ་དུ་ཡང་། །རྒྱུ་འབྲས་དམ་སྡོམ་ངོས་ལྐོག་མེད་པ་ཡི། །སྤང་བླང་ཕྲ་མོའང་ཁྱད་དུ་མི་གསོད་པར། །ལྷ་དང་བླ་མ་མཉེས་པའི་སྤྱོད་པ་སྤྱད། །ཉིན་མཚན་སྙོམ་ལས་མི་སྡོད་དགེ་སྦྱོར་རེམས། །གཞན་གྱི་སྐྱོན་ལ་མི་རྟོག་རང་སྐྱོན་བརྟག །དགེ་འདུན་འགྲོ་བའི་དོན་བསྔོ་རང་འཁྲིས་སྤངས། །རྟག་ཏུ་དེ་བཞིན་མཛོད་

[Full Size]

ཅིག་སྙིང་གཏམ་ཡིན། །མང་དུ་བཤད་ཀྱང་ཚིག་ལ་ཟད་མཐའ་མེད། །དགོས་དོན་སེམས་ལ་ལེན་ན་གདམ་ངག་ཡིན། །གདམ་ངག་ཁ་ཁྱེར་མ་མཛད་ལག་ཐོག་ལོངས། །འདི་ཡིས་དགེ་བས་མཐོང་ཐོས་སྨིན་གྲོལ་ཤོག །ཅེས་དད་ལྡན་སྒམ་པོ་ཡེ་ཤེས་རབ་གསལ་ལ་དགེ་སྦྱོར་གྱི་གཞན་བསྐུལ་དུ་དམིགས་ནས། རྒན་པོ་པདྨ་ལེགས་གྲུབ་སྩལ་གྱིས་ཐང་འབྲོག་འོད་གསལ་རྩེ་མོའི་མཚམས་མལ་དུ་བྲིས་ཏེ་ཕུལ་བ་མངྒ་ལམ།། ༈ །།ཨེ་མ་སྐལ་ལྡན་ཐར་པ་སྒྲུབ་བཞེད་པའི། །རྒྱལ་བའི་ཞབས་འབྲིང་རབ་དགའ་གསོན་མཛོད་དང་། །དལ་འབྱོར་ལན་གཅིག་ཐོབ་འདི་སྟོང་ཟད་དུ། །ཤོར་ལེན་ཆོས་པས་ཆོས་ལ་འབད་རེ་རན། །རྟག་ཙམ་བསྒྱུར་ཞིང་བྱེད་བློའི་ཆོས་གཟུགས་འདིས། །འཆི་ཁར་མི་ཕན་དཀོར་གྱི་གཡབ་ཤིང་ལགས། །རྒྱལ་བ་སྒྲུབ་རྒྱུད་གོང་མའི་མཛད་སྲོལ་ལྟར། །སྒྲུབ་ལ་སྙིང་རུས་འབད་ན་དོན་ཆེན་འགྲུབ། །བླ་མ་སངས་རྒྱས་དངོས་དང་།

[Full Size]

མཇལ་དུས་འདིར། །ཅི་མཛད་ལེགས་མཐོང་དམ་ཚིགས་གཙང་མ་གཅེས། །རང་སེམས་ཆོས་ཀྱི་འཐུལ་བར་མ་གྱུར་ན། །ཤེས་ཤེས་མང་པོ་ཁེངས་པ་འཕེལ་བྱེད་ཡིན། །རྟག་ཏུ་རང་སེམས་གཙང་མར་མ་བྱས་ཚེ། །སྡོམ་པ་དམ་ཚིག་ཕྱི་དཀར་ནང་ནག་འབྱུང་། །རང་ཟོག་རང་ལ་འཚོང་པའི་བཙུན་གཟུགས་ཀྱིས། །ཆོས་གོས་རྣམ་དཔྱོད་གཙང་ཡང་རྒྱལ་འགོང་ཡིན། །རྒྱུ་འབྲས་བསླུ་མེད་རང་རྒྱུད་འདྲེས་ངེས་པས། །འཆི་ཁར་འགྱོད་པ་མེད་པའི་མདུན་གྲོས་འཚལ། །ཐོས་བསམ་སྒོམ་པའི་དོན་པོ་སེམས་འདུལ་ཐབས། །ཉོན་མོངས་ཁ་རྒྱལ་མི་བཏང་གཉེན་པོ་བསྟེན། །སྐྱིད་རུང་སྡུག་རུང་བླ་མར་བློ་འཁེལ་ན། །མོ་བོན་རྩིས་གསུམ་མི་དགོས་གཏན་དོན་འགྲུབ། །བླ་མས་གང་གསུང་ཐེ་ཚོམ་མེད་སྒྲུབ་པའི། །དམ་ཚིག་ཅན་ལ་བྱིན་རླབས་ངང་གིས་འཇུག །ཆོས་ཀྱི་སྙིང་པོ་ངེས་དོན་མ་རྟོགས་ན། །

[Full Size]

ལྟར་སྣང་གཟི་བརྗིད་ཆེ་ཡང་སངས་མི་རྒྱ། །འཁོར་བའི་ས་བོན་བདག་འཛིན་རྣམ་རྟོག་འདི། །ཕྱག་རྒྱ་ཆེན་པོར་འཁྱེར་ཐབས་གཅིག་དྲིལ་འབུངས། །ཉིན་མཚན་སྙོམ་ལས་སྤངས་ནས་དགེ་སྦྱོར་མཛོད། །རང་གཞན་དོན་ཀུན་ལྷུན་གྲུབ་འབྱུང་བ་ལགས། །ཅེས་ཁམས་གསུམ་འདྲེན་མཆོག་རྒྱལ་བ་སྤྲུལ་པའི་ཟླ་སྣང་བཟང་པོའི་མཚན་གྱི་ཞབས་འབྲིང་བ་ཐུབ་བསྟན་རབ་དགའི་བཞེད་པ་སྐོངས་ཕྱིར། སྤོང་བ་པ་རྒན་པོ་སྣ་ཚོགས་རང་གྲོལ་གྱི་ཕུལ་བ་དགེ།། ༈ །།དྲན་པ་ཙམ་གྱི་འཁོར་བའི་བག་ཆགས་ཞི། །མཐོང་ཐོས་རེག་པས་ཐར་པའི་ས་བོན་ཐེབས། །གསོལ་བ་བཏབ་ན་བྱིན་རླབས་འབྱུང་བ་ཡི། །མཚུངས་བྲལ་བླ་མའི་ཞབས་ཕྱག་འཚལ་ནས།། ༈ །།འདུས་མའི་མཐའ་མ་བྲལ་བའི་ཆོས་ཅན་གྱི། །རང་བཞིན་སྐྱེ་འགྲོ་ཀུན་གྱི་མཚན་ཉིད་ལས། །རིང་དུ་འགྲོགས་ནས་སོ་སོར་གྱེས་པ་ཡིས། །གྲོགས་ལ་སྙིང་གཏམ་འགྲོ་ཆོས་འདི་སྐད་གདམས།། ༈ །།དལ་

[Full Size]

འབྱོར་ཕུན་ཚོགས་ཐོབ་ཀྱང་རྟག་མི་ཐུབ། །ན་སོ་གཞོན་ཡང་ཚེ་ལ་ངེས་པ་མེད། །ཡོང་སྙམ་མེད་པར་འཆི་བ་ཐོག་བབ་འོང་། །ལོང་ཡོད་སྙོམ་ལས་བློ་སྣ་མ་རིང་མཛོད།། ༈ །།ལེགས་ཉེས་སྐྱིད་སྡུག་ཐམས་ཅད་སྔོན་གྱི་ལས། །ཕེར་ཡོང་སྒོ་བཤོམ་མཁས་ཀྱང་བཀོས་ཚད་རག །འདུན་མ་ཆོས་ཕྱོགས་དྲིལ་ན་བུབས་མི་སྲིད། །བློ་གཏད་བླ་མར་བགྱིས་དང་བསླུ་བ་མེད།། ༈ །།མི་ཁྱུར་སྡོད་ན་ལེགས་ལེགས་མཛེས་མཛེས་ཀྱི། །ཆོས་བརྒྱད་སྣང་ཤས་འདི་ལ་ཀུན་སྤྲོ་ཡང་། །མི་ཚེ་སྟོང་ཟད་གཏན་ཕུང་རྒྱུ་ཡིན་པས། །སྤྲོས་མེད་བྱ་བཏང་རི་ཁྲོད་འགྲིམ་ན་ལེགས།། ༈ །།བཟའ་བཏུང་གོས་རྒྱན་འབོལ་འབོལ་བཤོམ་བཤོམ་གྱི། །འདོད་པ་རྩོལ་སྒྲུབ་བྱས་བཞིན་ཆོག་ཤེས་མེད། །བེམ་དུགས་སྐྱོ་ཚ་རྣམས་ལ་བློ་ཐག་བཅད། །སྒྲུབ་རྒྱུད་སྐྱེས་ཆེན་རྣམས་ཀྱི་མཛད་སྲོལ་ལྟོས།། ༈ །།འཇིག་རྟེན་འཁོར་བའི་གཉེན་ལ་ཞེན་ཆགས་ཀྱིས། །གྲོང་ཡུལ་

[Full Size]

ཐག་ལྟར་བྲན་ནས་རྒྱུགས་བྱེད་པས། །མཐའ་མར་ཁྱི་རྒན་ལས་ཀྱང་ལོད་དེ་འཆི། །བཙུན་པའི་རྐང་འདྲེན་ཡིན་ནོ་རང་ཚུགས་བཟུང་།། ༈ །།གྲོགས་ངན་སྐྱེ་བ་དམན་པའི་བུད་མེད་དང་། །ཟས་ངན་སྨྱོ་བྱེད་རྫས་ཆེན་ཆང་རག་ལ། །ཞེན་སྲེད་གཏིང་ནས་སྤོང་བར་མི་བྱེད་ན། །ཐར་པའི་སྲོག་རྩ་ཆད་དོ་སྙིང་རུས་སྐྱེས།། ༈ །།གཉིད་དང་རྣམ་གཡེང་ལོང་གཏམ་དལ་འདུག་དང་། །ཉིན་པར་ཉལ་དང་དོན་མེད་བྱ་བྱེད་རིགས། །ཐོས་བསམ་སྒོམ་པའི་བར་ཆད་ཀུན་ལ་འཛེམ། །རང་ཁྲིམས་རང་ལ་བཅའ་བ་ཆོས་པའི་གནད།། ༈ །།རང་གིས་གཞན་སྐྱོན་མཐོང་བ་ཇི་ཙམ་ལས། །ལྷག་པ་གཞན་གྱིས་རང་ལ་མཐོང་འགྱུར་བས། །གཞན་སྐྱོན་མི་ལྟ་རང་སྐྱོན་འདུལ་ལ་འབད། །རང་སྣང་དག་ན་གཞན་སྐྱོན་མཐོང་མི་སྲིད།། ༈ །།ཆོས་ཀྱི་རྩ་བ་རྒྱུ་འབྲས་བསླུ་མེད་ཚུལ། །མདོ་རྒྱུད་མན་

[Full Size]

ངག་ཀུན་མཐུན་སྤང་བླང་བྱ། །དགེ་སྡིག་ཕྲ་མོ་ཙམ་ལའང་ཁྱད་མི་གསད། །ངོས་ལྐོག་མེད་པ་དམ་སྡོམ་རྩ་བ་ཡིན།། ༈ །།བླ་མའི་མཛད་པ་གང་འདུལ་སྒྱུ་འཕྲུལ་ལ། །སྐྱོན་དུ་བལྟས་ན་བྱིན་རླབས་སྐལ་བ་ཆད། །བླ་མ་མཆེད་གྲོགས་ཅི་མཛད་ལེགས་མཐོང་གི། །དག་སྣང་ཅན་ལ་ཐུགས་རྗེ་རྒྱུན་མི་ཆད།། ༈ །།རྟག་ཏུ་ལུས་ངག་ཡིད་གསུམ་ཆོས་མིན་ལས། །སྤངས་ནས་དགེ་སྦྱོར་ཆོས་སྤྱོད་བཅུ་ལ་འབད། །གཞིས་བྱེད་ལམ་གསུམ་ཁྱད་མེད་དགེ་སྦྱོར་ལ། །བརྩོན་ན་མི་ཚེ་ཆོས་ལ་འཁྱོལ་བར་འགྱུར།། ༈ །།ན་ཚ་རྐྱེན་ངན་སྡུག་བསྔལ་ཅི་བྱུང་ཡང་། །སྐྱབས་དང་རེ་ས་བླ་མ་དཀོན་མཆོག་ལ། །བློ་སྙིང་བྲང་གསུམ་ལིངས་བསྐྱུར་མི་ནུས་པར། །ཕན་ཐབས་གཞན་དུ་འཚོལ་ན་མིན།། ༈ །།རང་ཉིད་ཐོས་བསམ་སྒོམ་པ་ཕྱོགས་རེ་ཙམ། །གང་གིའང་ངེས་པ་བརྙེས་པ་མེད་བཞིན་དུ། །གྲུབ་མཐའ་ཆོས་རྒྱུད་གང་ཟག་སུ་དང་

[Full Size]

སུར། །ལོག་ལྟ་ཆགས་སྡང་སྐུར་འདེབས་བྱར་མི་རུང་།། ༈ །།ཅི་ཕྱིར་ཞེ་ན་རྒྱལ་རྣམས་ཐབས་མཁས་དང་། །ཐུགས་རྗེས་གདུལ་བྱའི་སྐལ་བ་གང་འཚམས་པར། །ཆོས་ཀྱི་རྣམ་གྲངས་གང་འདུལ་བསྟན་པས་ན། །ཆོས་ལུགས་ང་བཟང་ཕྱོགས་ཞེན་བྱར་མི་རུང་།། ༈ །།ཆོས་སྒོ་བརྒྱད་ཁྲི་བཞི་སྟོང་ཐམས་ཅད་ཀྱང་། །མཐར་ཐུག་རང་སེམས་འདུལ་ཐབས་ཁོ་ན་ཡིན། །དོན་ལ་སྣང་སྲིད་འཁོར་འདས་སེམས་སུ་གཅིག །བྱེ་བྲག་དུ་མར་སྣང་ཡང་རྨི་ལམ་ཙམ།། ༈ །།སེམས་ཉིད་སྟོང་པ་ངོས་བཟུང་བྲལ་བ་ལ། །ལྷ་དང་འདྲེ་རུ་བཟུང་བ་འཁྲུལ་འཛིན་ཡིན། །འཁྲུལ་ལ་འཁྲུལ་པར་མ་ཤེས་བདེན་འཛིན་འདིས། །འཁོར་བར་གཏན་འཁྱམས་གྱུར་པ་དེ་ཡིས་ལན།། ༈ །།ད་ནས་འཁྲུལ་མེད་རང་རིག་རྗེན་པ་འདི། །ཡེངས་མེད་འཛིན་བྲལ་མ་བཅོས་རང་བབས་སྐྱོང་། །ཚོགས་དྲུག་སྣང་བ་བཟང་ངན་ཅི་ཤར་ལ། །བདེན་ཞེན་མ་

[Full Size]

བྱེད་གཡས་མེད་བསྐྱུར་ལ་ཞོག། ༈ །།འཛིན་པ་མ་བྱས་འཁྲུལ་པའི་རྒྱུ་རྐྱེན་མེད། །འཁྲུལ་སྣང་ཟད་ན་ཆོས་སྐུ་རང་སེམས་ཡིན། །རང་སེམས་སངས་རྒྱས་མངོན་དུ་གྱུར་པའི་ཚེ། །ཆོས་ཀྱི་དགོས་དོན་གྲུབ་པ་ཡིན་ནོ་བུ།། ༈ །།མདོར་ན་དུས་དང་རྣམས་པ་ཐམས་ཅད་དུ། །མི་རྟག་འཆི་བ་དྲན་བྱ་སྦྱོར་འབུངས། །འཇིག་རྟེན་ཞེན་པ་བསྐྱུར་ལ་བྱ་བཏང་དྲིལ། །ཉོན་མོངས་དུག་ལྔ་རང་གར་མི་བཏང་ངོ་།། ༈ །།བླ་མ་སངས་རྒྱས་མཐོང་བས་གསོལ་བ་གདབ། །འགྲོ་ཀུན་ཕ་མར་ཤེས་པས་བྱང་སེམས་སྦྱོངས། །གང་ལའང་གནོད་འཚེ་སྤང་ཞིང་ཕན་པ་སྒྲུབ། །རང་རྒྱུད་ཆོས་ཀྱིས་ཐུལ་ཞིག་སྙིང་གཏམ་ཡིན།། ༈ །།ད་ནི་སྐལ་པའི་ཐ་མ་དུས་ངན་གྱི། །རྣམ་འགྱུར་མི་རུང་སྣ་དགུ་ཚང་ལུགས་ལ། །མི་ཚེ་རིང་པོའི་བློ་སྣ་མི་ཁོམས་པས། །སེམས་རྒྱུད་ནང་དུ་ཁུག་ཅིག་སྙིང་གཏམ་ཡིན།། ༈ །།སྣ་ཚོགས་རང་གྲོལ་རྒན་པོ་འཆི་ཁ་མས། །སེམས་ལ་བཅགས་པའི་སྙིང་གཏམ་ཟབ་

[Full Size]

མོ་འདི། ཁྱེད་ལ་བརྩེ་བས་གདམས་སོ་མ་བརྗེད་པར། །སྙིང་ལ་ཕན་པའི་བདུད་རྩིར་འགྱུར་བར་ཤོག །ཅེས་རང་གི་རྩ་གྲ་འཕྲིན་ལས་དོན་གྲུབ་པའི་སྐྱེ་བ་ལ་གདམས་པའོ།། ༈ །།རིགས་རུས་ལོངས་སྤྱོད་འཇིག་རྟེན་བདེ་འབྱོར་ལ། །མ་ཆགས་ངེས་པར་འགྱུར་བས་ཡིད་དྲངས་ཏེ། །བླ་མེད་བྱང་ཆུབ་སྒྲུབ་པའི་སྐལ་བ་ཅན། །གྲུབ་ཆེན་དྷརྨ་མ་ི་གསན་མཛོད་དང་། །དལ་འབྱོར་ཐོབ་ཅིང་ཆོས་སྒོར་ཞུགས་ན་ཡང་། །ནམ་འཆི་ཆ་མེད་སྙིང་ནས་མ་དྲན་ན། །ཀུན་རྫོབ་ཚེ་འདིའི་བྱ་བས་བསླུས་པ་མང་། །ལོང་མེད་རྒྱུད་ལ་བསྐྱེད་པ་གལ་དུ་ཆེ། ༡ །མདོ་རྒྱུད་མན་ངག་ཆོས་ཀུན་གདུལ་བྱ་ཡི། །བློ་རྒྱུད་གདུལ་ཐབས་ཁོ་ནར་གསུངས་ན་ཡང་། །ཐོས་བསམ་སྒོམ་ཡུས་ཁེང་སེམས་ཆེ་བ་མང་། །རང་རྒྱུད་གཏིང་ནས་ཐུལ་བ་གལ་དུ་ཆེ། ༢ །བླ་མ་མཚན་ལྡན་རྙེད་དཀའ་བརྙེད་ནས་ཀྱང་། །གདམ་ངག་བདུད་རྩིའི་བཅུད་ལ་སྤྱོད་དུས་འདིར། །མཉམ་འགྲོགས་ལོག་ལྟས་དམ་སེལ་

[Full Size]

འཇུག་པ་མང་། །ཅི་མཛད་ལེགས་མཐོང་མོས་གུས་གལ་དུ་ཆེ། ༣ །བག་ཆགས་འཁྲུལ་འཛིན་དབྱིངས་སུ་མ་ཐིམ་པར། །དེ་སྲིད་དགེ་སྡིག་རྒྱུ་འབྲས་བསླུ་བ་མེད། །སྒོམ་ཆེན་ལས་འབྲས་ཁྱད་དུ་གསད་མཁན་མང་། །དམ་སྡོམ་རྒྱུ་འབྲས་ཞིབ་པ་གལ་དུ་ཆེ། ༤ །ཆོས་སྒོ་བརྒྱད་ཁྲི་བཞི་སྟོང་ཇི་རྙེད་པ། །ཡང་སྙིང་ཕྱག་རྒྱ་ཆེན་པོར་མ་འདུས་མེད། ཁ་བཤད་ཚིག་གིས་དོན་ལ་སྒྲིབས་པ་མང་། །ངེས་དོན་སེམས་ལ་འབྱོར་པ་གལ་དུ་ཆེ། ༥ །སེམས་ཀྱི་འགྱུ་དྲན་རྟོག་ཚོགས་ཕྲ་རག་ལ། །མ་ཞེན་མ་དགག་རང་རིག་དྲན་པས་བསྐྱངས། །ནམ་མཁར་སྤྲིན་དང་རྦ་རླབས་ཆུར་ཐིམ་བཞིན། །རང་ཤར་རང་གྲོལ་གཏོང་བ་གལ་ཏུ་ཆེ། ༦ །རྐྱེན་དང་མ་ཕྲད་བདེ་བདེ་འདྲ་བའི་སྒོམ། །རྐྱེན་ངན་བྱུང་ཚེ་འཁྲུལ་དབང་ཤོར་མཁན་མང་། །འཁོར་འདས་ཐམས་ཅད་སེམས་སུ་ཐག་ཆོད་པས། །གང་ལའང་རེ་དོགས་སྤོང་བ་གལ་དུ་ཆེ། ༧ །མདོར་

[Full Size]

ན་ལུས་སེམས་མ་བྲལ་རིང་འདི་ལ། །བསམ་རྒྱུ་བླ་མ་བྱ་རྒྱུ་དམ་པའི་ཆོས། །ད་ལྟ་འཆི་ཡང་བླ་མའི་གདམ་ངག་ལས། །གཞན་པའི་བསམ་བློ་མི་བྱེད་གལ་དུ་ཆེ། ༨ །ཚེ་འདིའི་བྱ་བའི་ཁོ་ཐག་རྦད་ཀྱི་ཆད། །ཉིན་མཚན་ནང་ཡང་དགེ་སྦྱོར་རྩེ་གཅིག་འབད། །བླ་མར་གསོལ་གདབ་འགྲོ་ཀུན་སྙིང་རྗེས་བསྐྱངས། །ཚེ་དང་སྒྲུབ་པ་མཉམ་པ་གལ་ཆེ་ལགས། ༩ །གལ་ཆེན་དགུ་ཡི་སྙིང་གཏམ་མདོར་བསྡུས་ནི། །དད་ལྡན་ཆོས་མཛད་དམ་ཆོས་ནོར་བུ་ལ། །ཆོས་དབྱིངས་འོད་གསལ་རྩེ་མོའི་རི་ཁྲོད་ནས། །པདྨ་ལེགས་གྲུབ་སྩལ་གྱིས་གདམས་པ་དགེའོ། །རྒྱལ་བ་ཐམས་ཅད་བླ་མ་ཁོ་ནའི་འཕྲུལ། །ཡིན་ལ་ཡིན་པར་ཤེས་པའི་མོས་གུས་ཀྱིས། །རྟག་ཏུ་བཏུད་ནས་སྐལ་བཟང་དོན་གཉེར་བ། །ཡོན་ཏན་མིང་ཅན་དེ་ལ་འདི་ལྟར་གདམས། །དལ་འབྱོར་ཐོབ་འདི་སྟོང་ཟད་མ་བྱེད་པར། །ཅི་ནུས་དགེ་སྦྱོར་འབད་པ་གལ་

[Full Size]

རེ་ཆེ། །འཆི་བའི་ནམ་མཁའི་ཐོག་ལྟར་མྱུར་དུ་འོང་། །འཇིག་རྟེན་ཞེན་པ་མ་ཆེ་བློ་སྣ་བསྟུངས་། །ཚེ་འདིའི་བྱ་བ་ཟིན་པའི་དུས་ཚོད་མེད། །སྤྲོས་པ་བཅད་ན་ཟིན་པ་དེ་ཀ་ཡིན། །དགེ་སྡིག་སྤང་ཞིབ་མོར་མ་འབད་ན། །དཀར་ནག་བདེ་སྡུག་འབྲས་བུ་བསླུ་མི་སྲིད། །སངས་རྒྱས་ཀུན་དངོས་བླ་མའི་རྣམ་པར་ཐར། །ཅི་མཛད་ལེགས་མཐོང་མོས་གུས་འགྱུར་མེད་བྱ། །གསོལ་འདེབས་ནུས་ན་བྱིན་རླབས་ངང་གིས་འབྱུང་། །ཐུགས་རྗེ་ཆེ་ཆུང་དད་པ་ཉིད་ལ་རག །སྐྱིད་སྡུག་ལེགས་ཉེས་གང་བྱུང་བླ་མ་རྗེའི། །བྱིན་རླབས་ཁོ་ནར་ཤེས་ན་གཏན་མདུན་འགྲུབ། །གྲུབ་མཐའ་ཕྱོགས་འཛིན་ཆོས་པའི་ཕུང་འདྲེ་ཡིན། །དག་སྣང་ཕྱོགས་མེད་སྦྱང་ན་དོན་གཉིས་འགྲུབ། །འཁོར་འདས་ཀུན་གྱི་རྩ་བ་རང་སེམས་འདི། །འཁྲུལ་པའི་ངན་ལང་མི་བཏང་དྲན་པ་བསྟེན། །རྣམརྟོག་བཀག་པས་མི་ཁེགས་རང་ངོ་ལྟོས། །ལྟ་ས་ལྟ་མཁན་སེམས་ཉིད་ཁོ་རང་ཡིན། ཁོ་རང་

[Full Size]

རང་ངོ་རིག་ཐོག་ལྷོད་ཀྱི་གློད། །སྒོ་གསུམ་ཞེན་འཛིན་མེད་པ་གནད་དུ་ཆེ། །ཚོགས་དྲུག་ཡུལ་ཕྱིར་མ་འབྲང་རང་སར་ཞོག །ཞེན་པ་མེད་ན་འཆིང་བ་ཀུན་དང་བྲལ། །ན་ཚ་རྐྱེན་ངན་འཇིག་སྐྲག་ཅི་བྱུང་ཡང་། །སེམས་ཀྱི་འཆར་ཚུལ་ཡིན་པར་བློ་ཐག་བཅད། །ཤི་རུང་གསོན་རུང་ཆོས་དང་བླ་མ་ལས། །གཞན་པའི་བསམ་རྒྱུ་མེད་པར་ཐག་ཆོད་བྱ། །དགེ་བ་གང་བྱེད་མཁའ་ཁྱབ་སེམས་ཅན་རྣམས། །བྱང་ཆུབ་ཐོབ་ཕྱིར་བསྔོ་བ་སྨོན་ལམ་གདབ། །སྙིང་གཏམ་ཚིག་འདི་ཁ་ཁྱེར་མ་བྱེད་པར། །སེམས་ལ་འདྲེས་ངེས་མཛོད་ཅིག་དགེ་ལེགས་འཕེལ། །ཞེས་པ་འདི་ནི། མི་རིགས་སྐད་རིགས་མི་གཅིག་པའི་ཡུལ་ཁམས་ནས་འོངས་པའི་དད་ཅན་ཀརྨ་གུ་འི་མིང་ཅན་གྱིས་བསྐུལ་ངོར་གདམས་པའོ།། ༈ །།ན་མོ་གུ་རུ་རཏྣ་བྷྱཿ། གང་ཞིག་འཁོར་འདས་ཆོས་རྣམས་ཐམས་ཅད་ཀྱི། །གནས་ལུགས་ཇི་བཞིན་གཟིགས་

[Full Size]

པས་རྒྱལ་དགོངས་ཉིད། །འགྲོ་ལ་མངོན་སུམ་སྟོན་པའི་ཐུགས་རྗེའི་དཔལ། །གང་ལ་མངའ་བའི་སྒྲུབ་རྒྱུད་བླ་མའི་ཞབས། །གུས་པས་ལན་བརྒྱར་བཏུད་ནས་དེ་དོན་གྱི། །སྙིང་པོའི་ཡང་བཅུད་སྙན་ནས་སྙན་རྒྱུད་པའི། །ངེས་དོན་ཟབ་མོ་སྨྲོས་ཞེས་གང་གསུངས་ལྟར། །ཅི་ནུས་ཕུལ་འདི་ཐུགས་ལ་ཉེར་བསྟིམ་གསོལ། །དེ་ལ་སྤྱིར་འདས་མ་འོངས་ད་ལྟ་དུས་གསུམ་གྱི་སངས་རྒྱས་རྣམས་ཀྱིས་ཆོས་ཀྱི་འཁོར་ལོ་ཡོངས་སུ་བསྐོར་བར་མཛད་པ་ཐམས་ཅད་དོན་བཟང་པོ་ཚིག་འབྲུ་བཟང་པོ། སྐྱོན་ཐམས་ཅད་དང་བྲལ་ཞིང་ཡོན་ཏན་ཀུན་དང་ལྡན་པ། ཐོག་ཐ་བར་གསུམ་དུ་དགེ་བའི་གཏེར་གྱིས་གཏམ་པ་འབའ་ཞིག་ཉིད་ལས། བཟང་ངན་ནམ། མཐོ་དམན་ནམ། ཟབ་མི་ཟབ་སོགས་ཀྱི་ཁྱད་པར་ཅན་ཞིག་ནམ་ཡང་མ་ཡིན་མོད་ཀྱང་། ཆོས་དེ་དག་གིས་གདུལ་བར་བྱ་བའི་འགྲོ་བ་རྣམས་དབང་པོ་དང་ཁམས་དང་བསམ་པ་དང་སྐལ་བའི་རིག་ཐ་དད་

[Full Size]

པས། ཆོས་ཀྱིས་ཚིག་གཅིག་ཁོ་ན་ལ་ཡང་སོ་སོའི་རྒྱུད་ལ་གོ་མྱོང་རྟོགས་པའི་ཚུལ་མི་གཅིག་པ་མཐའ་ཡས་པ་ཞིག་ཏུ་འགྱུར་ལ། དེའི་མཐུས་ལམ་དང་འབྲས་བུ་མངོན་དུ་གྱུར་ཚུལ་ཡང་རིང་བ་དང་ཉེ་བ་དང་ཤིན་ཏུ་ཉེ་བ་དག་འབྱུང་བའི་དབང་གིས་ཐེག་པ་དམན་འབྲིང་ཆེན་པོའི་བྱེ་བྲག་ཏུ་ཐ་སྙད་བཏགས་མོད་ཀྱི། །དོན་དམ་པའི་མཐར་ཐུག་ཏུ་ནི་ཆོས་ཀྱི་དབྱིངས་གདོད་མའི་གནས་ལུགས་ཉིད་ལས་ནམ་ཡང་གཡོ་བ་མེད་ཅིང་འཁོར་འདས་དུས་གསུམ་གྱི་མཚན་མའི་སྤྲོས་པ་ཐམས་ཅད་ལས་འདས་པ་ཁོ་ན་སྟེ། ཆོས་ཐམས་ཅད་ཀྱི་རང་བཞིན་ནི་འདི་ལྟ་བུར་གདོད་ནས་ལྷུན་གྱིས་གྲུབ་པའོ། །དེ་ལྟ་མོད་ཀྱི་སངས་རྒྱས་རྣམས་ཐབས་མཁས་ཤིང་ཐུགས་རྗེའི་ནུས་པ་བསམ་མི་ཁྱབ་པས། གདུལ་བྱ་ཐ་དད་པའི་སྐལ་བ་དང་མོས་པ་ཇི་སྙེད་པ་དེ་དང་མཐུན་པའི་དམ་པའི་ཆོས་ཀྱི་སྒོ་དང་རྣམ་གྲང་མཐའ་ཡས་པ་བདག་གིས་སྙིང་པོ་ནི་མདོ་སྔགས་གཉིས་

[Full Size]

ལས་སྔགས་ཀྱི་ཐེག་པ། །དེ་ལ་རྒྱུད་སྡེའི་རིམ་པ་བཞིའི་དྲུག་ལས། འདིར་ཆད་པར་བྱ་བ་ནི་འབྲས་བུ་བླ་ན་མེད་པ་ཐམས་ཅད་ཀྱི་སྤྱི་ཕུད་དམ་པར་གྱུར་པ་ངེས་དོན་ཟབ་མོ་ཚེ་གཅིག་སངས་རྒྱས་ལག་བཅངས་སུ་སྟོན་པར་བྱེད་པའི་གདམས་པ། དེ་ལའང་ཕྱག་རྫོགས་གཉིས་ལས་སྐབས་འདིར་རྫོགས་པ་ཆེན་པོ་དང་། དེ་ཉིད་ལའང་ཕྱི་སེམས་སྡེ། ནང་ཀློང་སྡེ། གསང་བ་མན་ངག་གི་སྡེ། ཡང་གསང་བླ་ན་མེད་པ། ཨ་ཏི། སྤྱི་ཏི། ཡང་ཏི་དང་བཅས་པའི་ཟབ་མོ་རྒྱུད་སྡེ་འབུམ་ཕྲག་དྲུག་ཅུ་རྩ་བཞིའི་གྲངས་མེད་ཀྱི་རྒྱུད་དང་མན་ངག་མཐའ་ཡས་པའི་ནང་ནས། འདིར་ནི་ཡང་གསང་བླ་མེད་སྙིང་ཐིག་ཟབ་མོའི་ཉམས་ལེན་གྱི་འགག་བསྡུས་རྒྱུན་ཁྱེར་གྱི་ཚུལ་བརྡ་མཚོན་ས་བོན་ཙམ་ཞིག་སྟོན་པར་བྱེད་པ་ལགས།། ༈ །།བརྒྱད་ཁྲི་བཞི་སྟོང་ཆོས་ཀྱི་ཕུང་པོ་ལས། །ངེས་དོན་སྙིང་པོའི་ནོར་བུ་མ་བླངས་ན། །ཚེ་གཅིག་བྱང་ཆེན་འབྲས་བུ་མི་ཐོབ་

[Full Size]

ཀྱི། །ངེས་གསང་སྙིང་པོའི་ཉམས་ལེན་འབད་འཚལ་ལོ།། ༈ །།དེ་ལ་ཐོག་མར་གདམས་པ་འདི་ལྟ་བུ་སྟོན་པར་བྱེད་པའི་བླ་མ་ནི་གང་བྱུང་བྱུང་གིས་རུང་བ་མ་ཡིན་ཏེ། རྫོགས་པའི་རིམ་པ་སྤྱི་དང་ཁྱད་པར་རང་བཞིན་རྫོགས་པ་ཆེན་པོའི་དོན་ཕྱིན་ཅི་མ་ལོག་པ་ལ་གོམ་པ་མངོན་དུ་གྱུར་པས་བླ་མའི་རྒྱུད་བྱིན་གྱིས་རླབས་ནུས་པ་གཅིག་ལ་བསྟན་དགོས་ལ། དེས་ཀྱང་ཐོག་མར་སློབ་མའི་གཤིས་རྒྱུད་མ་སྨིན་པ་སྨིན་པར་བྱེད་པའི་དབང་བཞིའི་རིམ་པ་བསྐུར་ནས་དབང་དོན་གྱི་ཡེ་ཤེས་ཅུང་ཟད་ཉམས་སུ་མྱོང་བ་ཞིག་གལ་ཆེ་སྟེ། འདི་ནི་དཔེར་ན་ཞིང་ལ་ལོ་ཏོག་འདེབས་པའི་དང་པོར་རྨོ་ཁྲོལ་ཆུ་ལུད་ས་བོན་འདེབས་པ་སོགས་དང་ཚུལ་མཚུངས་པ་སྟེ། དེ་དག་ཚུལ་བཞིན་མ་བྱས་པར་ནི་ལོ་འབྲས་ཇི་ལྟ་བ་སྐྱེ་བ་དང་འབྱུང་བའི་གནས་མེད་པ་བཞིན་ནོ། །དེ་ལྟར་སྨིན་བྱེད་ཀྱི་དབང་ཐོབ་པའི་

[Full Size]

རྗེས་ལ་གྲོལ་བྱེད་ཀྱི་ཁྲིད་རིམ་དངོས་སྟོན་པར་བྱེད་པ་ལ་ཡང་སྔོན་འགྲོ་དངོས་གཞི་རྗེས་གསུམ་གྱི་སྲང་ནས་འདོན་དགོས་ཕྱིར། དེ་ཡང་། དལ་འབྱོར་རྙེད་དཀའ་བསམ་ནས་དམ་པའི་ཆོས་ལ་སྤྲོ་བ་བསྐྱེད། འཆི་བ་མི་རྟག་པ་བསམ་ནས་ཆོས་མ་གཏོགས་ཅིས་ཀྱང་དགོས་མེད་དང་། ཕྱི་བཤོལ་སྙོམ་ལས་ལ་མི་ཤོར་བར་ལོང་མེད་བརྩོན་འགྲུས་ཀྱི་ལྕགས་ཀྱིས་བསྐུལ། དཀར་ནག་གི་རྒྱུ་འབྲས་བསམ་ཞིང་དགེ་སྡིག་ཕྲ་ཞིང་ཕྲ་བ་ཚུན་གྱི་བླངས་དོར་ལ་བསླབ། རིས་དྲུག་འཁོར་བའི་སྡུག་བསྔལ་བསམ་ནས་འཁོར་བའི་ཞེན་པ་སྤང་ཞིང་ཐར་པའི་ཕན་ཡོན་ལ་ཡིད་ཆེས་པར་བྱ་བ་རྣམས་ནི་ཐུན་མོང་གི་སྔོན་དུ་འགྲོ་བ་སྟེ། ཆོས་ལ་བློ་འཇུག་ཅིང་ཁྲིད་པར་བྱེད་པའི་ཐབས་ཡིན་པས་རྒྱུད་ལ་འཁེལ་ངེས་ཤེས་པར་བྱའོ། །དེ་ནས་ཚོགས་བསགས་ཅིང་སྒྲིབ་པ་སྦྱོང་བར་མ་བྱས་ན་ཆོས་ཅི་བྱས་ལམ་དུ་མི་འགྲོ་བས། དང་པོར་

[Full Size]

མདུན་གྱི་ནམ་མཁར་སྐྱབས་གནས་དཀོན་མཆོག་མ་ལུས་མངོན་སུམ་ཏུ་ཁྲོམ་ཚོགས་པ་ལྟར་བཞུགས་དམིགས་ཏེ། རང་གཞན་མཁའ་ཁྱབ་ཀྱི་སེམས་ཅན་ཐམས་ཅད་ལྷན་ཅིག་ཏུ་འཁོར་བ་ངན་སོང་གི་སྡུག་བསྔལ་ལས་ཐར་ནས་མྱུར་དུ་སངས་རྒྱས་ཀྱི་གོ་འཕང་ལ་འཁོད་པ་ཅིག་བླ་མ་དཀོན་མཆོག་ཁྱེད་རྣམས་མཁྱེན་སྙམ་པའི་དད་གུས་དྲག་པོས་སྐྱབས་འགྲོ་བྱ་ཞིང་། སྐྱིད་སྡུག་ཅི་བྱུང་ཡང་རེ་ས་ལྟོས་ཡུལ་དཀོན་མཆོག་མ་གཏོགས་གཞན་ལ་མི་རེ་བར་བློ་ཐག་བཅད་ལ་ཕྱག་མཆོད་སྐྱབས་འགྲོ་ཁ་ཏོན་ལ་འབད། སྐྱེ་བ་འདིའི་ཕ་མའི་དྲིན་གྱི་ཆེ་ལུགས་ལ་བསམ་ནས་འགྲོ་བ་རིགས་དྲུག་མཁའ་ཁྱབ་ཀྱི་སེམས་ཅན་ཐམས་ཅད་ཀྱང་འཁོར་བ་ཐོག་མེད་ནས་ཕ་མ་དྲིན་ཆེན་མ་བྱས་པ་སུ་ཡང་མེད་པས། འདི་དག་ལ་དྲིན་ལན་ཆོས་ཀྱི་མ་གཞལ་ན། གཞན་གང་གིས་ཀྱང་དྲིན་ལན་འཁོར་བའི་ཐབས་མ་མཆིས་པ་ན། བདག་གི་ཚེ་གཅིག་བྱང་

[Full Size]

ཆུབ་སྒྲུབ་ཏེ་སེམས་ཅན་ཐམས་ཅད་འཁོར་བའི་སྡུག་བསྔལ་ལས་སྒྲོལ་བར་སེམས་བསྐྱེད་ཅིང་སྨོན་ལམ་བཟང་པོའི་མཚམས་སྦྱོར་བྱ། སངས་རྒྱས་ཐོབ་པ་ལ་བགེགས་དང་བར་དུ་གཅོད་པ་ནི་སྡིག་སྒྲིབ་ཉམས་ཆག་ཁོ་ན་ལན་པ་ཡིན་པས་དེ་དག་བཤགས་སྦྱངས་གལ་ཆེ་བའི་ཕྱིར། རང་གི་སྤྱི་གཙུག་པད་ཟླའི་གདན་སྟེང་ན་ངོ་བོ་རྩ་བའི་བླ་མ་ལ་རྣམ་པ་རྡོ་རྗེ་སེམས་དཔའི་ཆ་ལུགས་སྣང་ལ་རང་བཞིན་མེད་པ་འཇའ་འོད་ཀྱི་སྐུར་བསྐྱེད་པའི་ཐུགས་ཀར་ཟླ་སྟེང་ཧཱུྃ་དཀར་གྱི་མཐར་ཡིག་བརྒྱས་བསྐོར་བར་བསམ་ཞིང་ངག་ནས་བཟླས་པས། སྔགས་འཕྲེང་ལས་བདུད་རྩི་འོ་མ་ལྟ་བུའི་རྒྱུན་བབས་པ་རྡོར་སེམས་ཀྱི་ཞབས་ཀྱི་མཐེ་བོང་ལས་བདུད་རྩི་བརྒྱུད་ཅིང་རང་གི་སྤྱི་གཙུག་ཏུ་ཚངས་པའི་བུ་གར་ཞུགས་ནས་ལུས་ནང་ཐམས་ཅད་མེར་གྱི་གང་བ་དང་། ཉེས་ལྟུང་སྡིག་སྒྲིབ་ཀྱི་དངོས་པོ་མཐའ་དག་སོལ་ཁུ་ལྟ་བུ་ནག་འདུར་གྱི་དབང་པོ་དང་བ་སྤུའི་སྒོ་ཐམས་ཅད་ནས་ཕྱིར་འཐོན་ཏེ་

[Full Size]

དག་པར་བསམ། ཉམས་རྟོགས་རྒྱུད་ལ་སྐྱེ་བ་བྱེད་པ་ནི་བླ་མའི་བྱིན་རླབས་ཞུགས་པ་ལ་རག་ཅིང་། བྱིན་རླབས་འཇུག་ཐབས་ནི་མོས་གུས་གསོལ་འདེབས་ལ་རག་ལུས་པ། དད་པའི་མོས་གུས་ཞེན་པ་དེ་ཡང་ཁ་ཙམ་ཚིག་ཙམ་གསོལ་འདེབས་བྱེད་ལོ་ཙམ་གྱིས་ནི་ཅི་ཡང་མི་ཕན་གྱི། སངས་རྒྱས་ཐམས་ཅད་བླ་མའི་ངོ་བོར་འདུས་པ་ཡིན་ཕྱིར། བླ་མ་ནི་སངས་རྒྱས་ཀུན་ལས་ལྷག་པའོ་སྙམ་པའི་དག་སྣང་ཞེ་ཐག་པ་ནས་མེད་ན། བླ་མ་མི་རུ་བཟུང་བའི་སློབ་མ་ལ་བྱིན་རླབས་འཇུག་པར་མདོ་རྒྱུད་མན་ངག་གང་ནས་ཀྱང་མ་བཤད། བླ་མ་ལ་ཚོད་ཡོད་མཉམ་ལོག་ལྟ་བྱས་ན་མནར་མེད་པའི་དམྱལ་བར་ལྟུང་བར་རྒྱུད་ལུང་མན་ངག་ཐམས་ཅད་ཞལ་མཐུན་ཕྱིར། དིང་སང་གི་བླ་མ་དང་སློབ་མ་ཕལ་ཆེར་ཕན་ཚུན་ཟོལ་འགྲོགས་དང་བསྟུན་རེས་སུ་བྱ་དགོས་པའི་དུས་འདི་

[Full Size]

འདྲར་བྱིན་རླབས་ཚུལ་བཞིན་ཞུགས་པར་ཡང་ཤིན་ཏུ་དཀའ་བར་གདའ་མོད་ཀྱི། དེ་བས་ན། རང་ཉིད་ཡི་དམ་གྱི་ལྷ་གང་རུང་གི་སྐྱེད་རིམ་མོས་པ་ལམ་བྱེད་ཙམ་གྱི་སྤྱི་བོར་སེང་ཁྲི་པདྨ་ཉི་ཟླའི་གདན་སྟེངས་སུ། རང་ལ་སྐུ་དྲིན་ཆེ་བའི་རྩ་བའི་བླ་མ་དེ་ཉིད་ཆོས་སྐུ་ཀུན་ཏུ་བཟང་པོའམ། རྡོ་རྗེ་འཆང་ངམ། པདྨ་འབྱུང་གནས་ཀྱི་ཆ་བྱད་དུ་གསལ་བའི་གནས་གསུམ་ཡིག་འབྲུ་གསུམ་ལས་འོད་འཕྲོས་པས། ཕྱོགས་དུས་ཀྱི་སངས་རྒྱས་བྱང་སེམས་ཉན་ཐོས་རང་རྒྱལ་རྩ་རྒྱུད་ཀྱི་བླ་མ་བཀའ་གཏེར་བཤད་སྒྲུབ་མན་ངག་དོན་རྒྱུད་ཀྱི་བླ་མ་ཡི་དམ་ལྷ་ཚོགས་མཁའ་འགྲོ་ཆོས་སྐྱོང་སོགས་མདོར་ན་བྱིན་རླབས་དངོས་གྲུབ་ཀྱི་མངའ་བདག་མ་ལུས་ཆར་བབ་པ་ལྟ་བུར་བྱོན་ཏེ་སྤྱི་བོའི་བླ་མ་ཉིད་ལ་དབྱེར་མེད་དུ་ཐིམ་པས་བླ་མ་སྐྱབས་གནས་ཀུན་འདུས་ཡེ་ནས་ཡིན་བཞིན་པ་ལས་ཀྱང་ཐུགས་རྗེ་ནུས་པ་བྱིན་རླབས་གོང་འཕེལ་དུ་གྱུར་པའི་ངེས་ཤེས་བསྐྱེད་

[Full Size]

ལ། སྣང་སྲིད་སྣོད་བཅུད་བདག་ལུས་ལོངས་སྤྱོད་སྒོ་གསུམ་གཏན་དང་བཅས་པ་མཆོད་པའི་མཎྜལ་དུ་འབུལ་ཞིང་། དད་གདུང་མཆི་མ་འཁྲུག་པའི་མོས་གུས་ཀྱི་གསོལ་བ་གདབ། གསོལ་བ་འདེབས་རྒྱུའི་དོན་པོ་ཡང་གནས་སྐབས་ཚེ་འདིའི་འདོད་ཡོན་ཙམ་དོན་དུ་གཉེར་བར་མི་བྱ་སྟེ། རྩ་རྒྱུད་ཀྱི་བླ་མ་དཀོན་མཆོག་རྣམས་ཀྱི་ཐུགས་རྒྱུད་ལ་མངའ་བའི་མཁྱེན་པའི་ཡེ་ཤེས་བརྩེ་བའི་ཐུགས་རྗེ་མཛད་པའི་ཕྲིན་ལས། སྐྱབས་པའི་ནུས་མཐུ་ཉམས་རྟོགས་ཡོན་ཏན་ཅི་མཆིས་པ་དེ་ཐམས་ཅད་བདག་ཉིད་ཀྱི་རྒྱུད་ལ་བསྟིམ་ཞིང་འཕོས་ཏེ། སྐྱབས་གནས་དེ་དག་དང་དབྱེར་མ་མཆིས་པའི་གོ་འཕང་བདག་གིས་ཐོབ་ནས་མཁའ་ཁྱབ་འགྲོ་བའི་དོན་རླབས་ཆེན་རྒྱུན་ཆད་མེད་པ་འབྱུང་བར་བྱིན་གྱིས་བརླབ་ཏུ་གསོལ་སྙམ་པ་འབའ་ཞིག་ཏུ་གསོལ་བ་གདབ། དེ་ལྟ་བུས་གསོལ་བ་བཏབ་ན་

[Full Size]

མཆོག་གི་དངོས་གྲུབ་རྩོལ་མེད་དུ་ཐོབ་པར་འགྱུར་ལ། མཆོག་ཐོབ་ན་ཐུན་མོང་ཞར་ལ་འབྱུང་བ་ཆོས་ཉིད་ཡིན་པ་དང་། མདོར་ན་བྱིན་རླབས་ཞེས་པ་ནི་དད་པའི་རང་གཟུགས་ཡིན་ཕྱིར། དད་མོས་ཀྱི་སྟོབས་ཤུགས་ཆེ་ཆུང་དང་མཐུན་པའི་བྱིན་རླབས་ཀྱི་ཚན་ཁ་ཆེ་ཆུང་འབྱུང་བ་ཉིད་དོ། དེ་ལྟར་གསོལ་བ་རྩེ་གཅིག་བཏབ་པས་བླ་མའི་སྐུ་གསུང་ཐུགས་ཀྱི་གནས་གསུམ་ནས་འོད་ཟེར་དཀར་དམར་མཐིང་གསུམ་འཕྲོས་ཏེ། རང་ཉིད་ཀྱི་སྤྱི་བོ་མགྲིན་པ་སྙིང་ག་གསུམ་དུ་ཐིམ་པས་སྒོ་གསུམ་གྱི་ཉེས་སྒྲིབ་ཐམས་ཅད་བྱང་ཞིང་དག །དབང་བཞི་ཡོངས་རྫོགས་ཐོབ་ཅིང་འབྲས་བུ་སྐུ་བཞི་འགྲུབ་པའི་ས་བོན་རྒྱུད་ལ་འཇོགས་པའི་ངེས་ཤེས་དང་། སླར་ཡང་སྤྱི་བོའི་བླ་མ་ཉིད་རང་ལ་གཉིས་སུ་མེད་པར་ཐིམ་སྟེ་རང་སེམས་བླ་མའི་ཐུགས་དང་དབྱེར་མེད་པའི་ངང་ནས་རང་རིག་མ་བཅོས་བཟོ་མེད་དུ་མཉམ་པར་བཞག་པ་སྟེ། དེ་ལྟར་འདི་ཡན་ཆད་ཀྱི་

[Full Size]

ཉམས་ལེན་འདི་དག་ནི་གང་ཟག་ལས་དང་པོ་པ་ཉམས་ཁྲིད་ལ་འཇུག་པའི་སྔོན་འགྲོ་ཡང་ཡིན་ལ། རྒྱུན་དུ་ཉམས་སུ་ལེན་རྒྱུའི་ཁྲིད་རིམ་ཡང་ཡིན་ཕྱིར། །ཐུན་གྱི་ཐོག་མར་མེད་དུ་མི་རུང་བའི་གདམས་པ་ལགས་སོ།། ༈ །།སྐྱབས་འགྲོ་སེམས་སྐྱེད་ཆོས་ཀྱི་གཞི་མ་ཡིན། །ཡིག་བརྒྱ་མཎྜལ་ལམ་གྱི་མཐུན་རྐྱེན་ཡིན། །བླ་མའི་རྣལ་འབྱོར་ལམ་གྱི་སྙིང་པོ་སྟེ། །གསར་རྙིང་གྲུབ་ཐོབ་ཀུན་གྱི་གཤེགས་ཤུལ་ལགས།། ༈ །།དེ་ནས་དངོས་གཞི་ངེས་དོན་རང་བྱུང་གི་ཡེ་ཤེས་དངོས་ཇི་ལྟར་ཉམས་སུ་བླངས་བའི་ཐབས་ལ། གསང་སྔགས་གསར་རྙིང་གི་ངེས་དོན་སོ་སོར་ཁྲིད་ཚུལ་དང་ཕྱག་བཞེས་མི་འདྲ་བ་སྣ་ཚོགས་ཡོད་མོད་ཀྱང་། རྫོགས་ཆེན་སྙིང་ཏིག་ཟབ་མོའི་མན་ངག་ལས་ནི་སྐབས་འདིར་ཐོག་མར་ཕྱི་ནང་གསང་གསུམ་ཐུན་མོང་དང་ཐུན་མོང་མ་ཡིན་པའི་སྔོན་འགྲོ་རྣམས་རྒྱས་

[Full Size]

པར་བཤད་ཅིང་ཕྱག་ལེན་ལ་འདེབས་པ་ཡིན་མོད་ཀྱི། སྐབས་འདིར་ནི་དངོས་གཞིའི་ཉམས་ལེན་སྨར་འཇུས་ཉིད་སྟོན་པ་ཡིན་ཕྱིར་གཞན་རྣམས་བརྗོད་དགོས་པར་མ་གྱུར་ལ། དེ་ཡང་སྒོམ་ཐོག་ནས་ལྟ་བ་གཏན་ལ་འབེབས་པ་དང་། ལྟ་ཐོག་ནས་སྒོམ་པ་ངོས་ཟུང་བའི་ཕྱག་སྲོལ་གཉིས་ཡོད་པ་ལས། འདིར་ནི་སྒོམ་ཐོག་ནས་ལྟ་བ་ངོ་སྤྲོད་པའི་ལུགས་བཞིན་ཡིན་པས་ན། དེ་ལ་ཡང་ཆོས་སྤྱི་ནས་ཞི་གནས་ལྷག་མཐོང་རིམ་ཅན་དུ་སྟོན་པའི་དགོངས་པ་ལྟར། འདིར་ཡང་རྣལ་དུ་དབབ་པ་དང་། གསོར་འཇུག་པ་ཅེས་པའི་མིང་གིས་བསྟན་པར་མཛད་དེ། དང་པོ་ནི། དབེན་པའི་གནས་སུ་བདེ་བའི་གདན་ལ་ལུས་ངག་ཡིད་གསུམ་ཟོ་གློད་དེ། བྱ་བ་གཞན་དང་མ་འདྲེས་པའི་ངང་ནས་སེམས་ཉིད་འདས་མ་འོངས་ད་ལྟར་གྱི་བསམ་མནོ་འགྱུ་འཕྲོ་དགག་སྒྲུབ་བཟོ་བཅོས་གང་ཡང་

[Full Size]

མི་བྱ་བར། རང་སེམས་ལྷད་མེད་དུ་རྗེན་ནེ། གསལ་ལེ། ལྷན་ནེ་བར་བཞག་ཅིང་། དེ་ཡང་ཧ་ཅང་བསྒྲིམས་ན་སེམས་ཀྱིས་སེམས་བཅིངས་པ་རུ་སོང་ནས་བཅོས་མར་འགྲོ། ཧ་ཅང་རང་ལྷོད་དྲག་ན་མ་ཚོར་བར་འོག་འགྱུ་ཕྲ་མོ་ཤོར་བའམ་བྱིངས་རྨུགས་གཉིད་ཀྱི་དབང་དུ་ཐལ་བ་སོགས་ཀྱི་སྐྱོན་འབྱུང་ཕྱིར་གྲིམ་ལྷོད་རན་ཞིང་རང་ཚོ་ཟིན་པར་བསྐྱངས་པས། རང་སེམས་ཀྱི་གནས་ལུགས་ཇི་ལྟ་བ་རང་རྒྱུད་ལ་འཆར་བར་འགྱུར་བ་དེ་ནི་མཆོག་གི་ཞི་གནས་སམ། བསམ་གཏན་གྱི་གནས་པ་ཅེས་བྱ་བ་ཡིན་ནོ། །འདིས་སྒོམ་དངོས་ཀྱི་གོ་ཆོད་པ་མ་ཡིན་ཀྱང་སྒོམ་རྒྱུད་ལ་སྐྱེ་བར་བྱེད་པའི་གཞི་མར་མེད་མི་རུང་བ་ལྟ་བུ་ལགས།། ༈ །།དེ་ནས་ལྷག་མཐོང་གི་ངང་དུ་གསེར་འཇུག་པ་ནི། གནས་པའི་བསམ་གཏན་དེ་ཉིད་ཀྱི་ཐོག་ནས་གནས་མཁན་གྱི་སེམས་ཁོ་རང་ཇི་འདྲ་

[Full Size]

ཞིག་འདུག་བལྟས་པས། འདི་ལྟ་བུ་ཞིག་འདུག་གི་དངོས་པོ་ངོས་བཟུང་གང་ཡང་མེད་པའི། དྲན་བསམ་འགགས་མེད་དུ་འཆར་རྒྱུ་ཡོད་པ་ཤར་རྒྱུའི་རྣམ་རྟོག་དང་འཆར་མཁན་གྱི་རང་སེམས་དངོས་གཞི་ཡང་ཐ་དད་དུ་མ་གྲུབ་པ་ཞིག་འབྱུང་བ་དེ་ནི་སེམས་ཀྱི་ངོ་བོ་ཡིན་ཏེ། གོང་དུ་གནས་མཁན་དང་སླར་དེ་ལ་ལྟ་མཁན་གཉིས་ཀ་ཁོ་རང་ཁོ་ན་མ་གཏོགས་གཉིས་སུ་ནམ་ཡང་མེད་དོ། དེ་ལྟར་ལྟ་མཁན་ནམ་གནས་མི་གནས་འགྱུས་མ་འགྱུས་སོགས་ཚོར་མཁན་གྱི་ཤེས་པ་ཧྲིག་གེ་ཡེར་རེ་བ་ཞིག་ཡོད་པ་དེ་ཉིད་ལ་རིག་པ་ཅེས་བྱ་སྟེ། མདོ་སྡེ་དག་ལས། དྲན་དང་ཤེས་བཞིན་ཞེས་པ་དེ་ཡང་དེ་ཉིད་ཡིན་པ་དང་། ཕྱག་རྒྱ་ཆེན་པོ་སོགས་ལས་ནི་དྲན་པ་ཅེས་པའི་མིང་དུ་བཏགས་ལ། ཞི་བྱེད་ཀྱི་མན་ངག་རྣམས་སུ་ནི་ཐུགས་ཕྲད་ཀྱི་ཤེས་པ་ཅེས་ཟེར་བ་སྟེ། མདོར་ན་སེམས་ཀྱི་མཚན་ཉིད་ཉིད་ཇི་ལྟ་བར་ཤེས་པའི་ལྷག་

[Full Size]

མཐོང་གི་ཡེ་ཤེས་ཡིན་པས། སྒོམ་ཉམས་སུ་ལེན་རྒྱུའི་ངོ་བོ་དངོས་ཀྱང་ལྷག་མཐོང་གི་རིག་པ་རྗེན་པ་དེ་ཉིད་ཡིན་གྱི་ཞི་གནས་ཀྱི་ཉམས་སྣང་གནས་ཆ་རྐྱང་པ་ཙམ་ལ་ནི་མ་ཡིན་ནོ། །ལྷག་མཐོང་གི་རིག་པ་རྗེན་པ་དེ་ནི། དཔེར་ན་མཉམ་བཞག་ལ་བསྡད་ཐོག་དེར་གཞན་རྐྱེན་གཟུགས་སྒྲ་སོགས་ཀྱིས་སེམས་བསྐྱེད་པའི་རྐྱེན་མེད་རུང་རྣམ་རྟོག་ཞིག་ལྷག་གིས་ཤར་ཙ་ན་ལྷག་མཐོང་གི་རིག་པ་དེ་ཡོད་ན་རྣམ་རྟོག་གང་སྐྱེས་ཏེ་ངོ་ཡིས་ཙིར་གྱི་ཟིན་ནས། རྣམ་རྟོག་དེ་འཕྲོ་འཐུད་དབང་མེད་པར་སྒོམ་ཐོག་ཏུ་ལྷན་གྱི་འགྲོ་བ་ཡིན་ཞིང་། དྲན་རིག་དེས་མ་ཟིན་ན་རྣམ་རྟོག་གང་སྐྱེས་ཨ་འཐས་ལུ་གུ་རྒྱུད་དུ་འཁྲུལ་ནས་ཉོན་མོངས་འབའ་ཞིག་འཕེལ་བར་འགྱུར་བ་སྟེ། དེས་ན་སྒོམ་ཡོད་མེད་དམ། ཐུགས་དམ་གནད་དུ་སོང་མ་སོང་ནི་སེམས་གང་ཤར་ངོས་མི་ཟིན་

[Full Size]

ཁོ་ནར་རག་པ་དང་། འཁོར་འདས་ཀྱི་སོ་མཚམས་འདི་གཅིག་པུས་ཀྱང་ཕྱེ་བ་སྟེ། རང་ངོ་རིག་ན་སངས་རྒྱས་མ་རིག་ན་སེམས་ཅན་ཞེས་བྱ་བས་སོ། སྤྱིར་ཡང་སྒོམ་ཆེན་ཕལ་ཆེར་སྒོམ་ཞེས་གནས་གནས་སོ། བཟང་བཟང་པོ། བདེ་དང་གསལ་དང་མི་རྟོག་སོགས་རྒྱུད་ལ་འཆར་བ་ཞིག་འདོད་མཁན་རང་མང་མོད་ཀྱང་། དེ་དག་ནི་ཞེ་འདོད་ཀྱི་རྟོག་པ་ཁོ་ནས་བསླད་པ་ཡིན་ལ། སྒོམ་དངོས་ནི་ཞེ་འདོད་བློས་བྱས་ཡིད་བྱེད་གང་གིས་ཀྱང་མ་བསླད་པའི་ཐ་མལ་ཤེས་རིག་སོ་མ་རང་ངོ་རང་གིས་རིག་པ་ཉིད་དགོས་པ་དང་། དེ་ལྟ་བུའི་རིག་པ་ལྷད་མེད་དེ་ནི་ལྟ་བའི་དོན་དངོས་གཞི་ཡིན་ཕྱིར། དེ་ལས་ལྷག་པའི་ལྟ་བ་ཞེས་གཞན་ཞིག་དགོས་པ་མ་ལགས་སོ། །ལྟ་བའི་དོན་དེ་ཉམས་སུ་ལེན་པ་ནི་སྒོམ་པ། ཉམས་ལེན་དེ་སྤྱོད་ལམ་ཐམས་ཅད་དང་བསྲེ་བ་ནི་སྤྱོད་པ། དེ་དོན་མངོན་དུ་མ་གྱུར་ཚེ་

[Full Size]

འབྲས་བུ་མཐར་ཕྱིན་པ་ཡིན་པས་ན། ལྟ་སྒོམ་སྤྱོད་འབྲས་ཀྱི་རྣམ་གྲངས་མང་པོ་དང་། གཞན་ཡང་སངས་རྒྱས་ཆོས་དང་ས་ལམ་གྱི་ཡོན་ཏན་མང་པོ་མཐའ་དག་ཀུན་སེམས་ཉིད་དྲི་མེད་ཀྱི་ཐོག་ཏུ་འདུས་པ་ཉིད་ལས་གཞན་མ་མཆིས་ཀྱང་། འདོད་ཞེན་བཟང་འཛིན་རློམ་སེམས་ཀྱིས་མ་བཅིངས་པ་གལ་ཆེ་བས། སེམས་ཉིད་གནས་ན་གནས་མཁན་རང་ངོ་ཤེས་པས། འགྱུ་ན་འགྱུས་པར་ངོ་ཤེས་པ། ཚོགས་དྲུག་གི་སྣང་བ་གང་དང་ཅིར་ཤར་བ་ཐམས་ཅད་ལ་ཡང་ཤར་མཁན་ཁོ་རང་ངོ་ཤེས་ན་འཆར་སྒོ་གང་ལའང་དགག་སྒྲུབ་བྱ་དགོས་པར་གང་ཤར་རང་གྲོལ་དུ་འགྲོ་བ་ཆོས་ཉིད་ལགས། མདོར་སྡུ་ན་གནས་པ་དང་འགྱུ་བ་གཉིས་ཀ་ལ་རང་རིག་པས་ངོས་ཟིན་ན་ནི་གཉིས་ཀ་སྒོམ་གྱི་རང་བཞིན་ལས་མ་འདས་ལ། ངོས་མ་ཟིན་ན་གནས་ཀྱང་དམན་པའི་ཞི་གནས་ཙམ་ཡིན་ཞིང་། འཕྲོ་ན་

[Full Size]

འཁྲུལ་པའི་བག་ཆགས་ལས་མ་འདས་ཚེ་ཆོས་སུ་ནམ་ཡང་མ་སོང་བའི་ཕྱིར། དེས་ན་རྣམ་པ་ཐམས་ཅད་དུ་རང་རིག་རྗེན་ཅེར་རེ། ཧྲིག་གེ ཝལ་ལེ། ཁྱུག་གེ་བ་འདི་མ་བརྗེད་པར་སྐྱོང་བ་ལ་ཉམས་ལེན་གྱི་སྙིང་པོར་བྱའོ། །གལ་ཏེ་ཉོན་མོངས་པ་ཞེ་སྡང་ལྟ་བུ་ཞིག་སྐྱེས་པ་ན། ཞེ་སྡང་ལྷང་ངེ་བ་དེ་ཀའི་ངོ་བོ་ལ་རིག་པ་མདུང་ཚུགས་སུ་གཏད་ནས་ཉམས་སུ་བླངས་པས། ཞེ་སྡང་ཁོ་རང་ཚོ་མི་ཐུབ་པར་གཏད་མེད་དུ་ཕལ་འགྲོ་བ་ལས་གཞན་པའི་ལས་མི་གསོག་པ་ཡིན། དེ་བཞིན་ཉོན་མོངས་དུག་ལྔ་གཞན་རྣམས་ལའང་མཚུངས་ཏེ། གང་སྐྱེས་དེའི་རྗེས་སུ་ཕར་མི་འབྲང་ཞིང་། དེ་སྤོང་བའམ་དགག་པའམ་གཉེན་པོ་གཞན་བསྟེན་པ་སོགས་ཆོས་གཞན་དང་ཐེག་པ་འོག་མའི་ལུགས་ལྟར་བྱ་མི་དགོས་པར། དེ་ཉིད་ཀྱི་རང་ངོ་མ་རིག་པ་ཡེངས་མེད་རྩེ་གཅིག་ཏུ་གཏད་པས། དེ་ཉིད་ཀྱི་རང་ངོ་ལ་རིག་པ་ཡེངས་མེད་རྩེ་གཅིག་ཏུ་གཏད་

[Full Size]

པས། རྦ་རླབས་རྒྱ་མཚོར་ཐིམ་པའམ། འཁྱགས་རོམ་ཆུ་ནང་དུ་ཞུ་བ་ལྟར་རང་སར་ཐིམ་ཞིང་གྲོལ་བར་འགྱུར་བ་སྟེ། ཅིའི་ཕྱིར་ན་ཉོན་མོངས་དང་རྣམ་རྟོག་དེ་ཐམས་ཅད་དོན་དམ་པར་རིག་པ་ཁོ་རང་གི་རྩལ་ལས་ཤར་བ་མ་གཏོགས་གཞན་ནས་བྱུང་བ་མ་ཡིན་པས་རང་ངོ་ཤེས་ན་རང་གྲོལ་དུ་འགྱུར་བ་ནི་དཔེར་ན། སྤྲིན་ནམ་མཁའ་ལས་བྱུང་ཞིང་ནམ་མཁར་ཐིམ་པ་བཞིན། ཉོན་མོངས་དུག་ལྔ་རང་བྱུང་རང་གྲོལ་ལམ་དུ་འཁྱེར་བ་འདི་ནི་འབྲས་བུ་གསང་སྔགས་རྡོ་རྗེ་ཐེག་པའི་ཟབ་གནད་ཁོ་ན་ལགས།། ༈ །།དེ་ལྟ་བུ་རང་སེམས་རང་ངོ་རིག་པའི་ཉམས་ལེན་དང་མ་བྲལ་བའི་ངང་ནས། ནུབ་མོ་གཉིད་དུ་འགྲོ་ཁར་ཡང་རྣམ་པར་རྟོག་པ་ཐ་མལ་འཁྲུལ་འབྱམས་སུ་མི་བྱ་བར། རིག་པ་གསལ་ལེ་ཡེར་རེ་བའི་ངང་གི་འཕྲོ་ལ་གཉིད་དུ་འགྲོ་བ་ལ་སླབ། གཉིད་སད་པའི་ཚེ་དེ་མ་ཐག་རིག་པའི་ངོས་ཟིན་པར་བྱས་ལ། འཁྲུལ་པ་ལུག་རྒྱུད་ཀྱི་

[Full Size]

ཐག་པ་འདི་གང་ཐུང་ཐུང་ལ་གོམས་སུ་བཅུག་པ་གལ་ཆེ་བ་དང་།། ༈ །།གནས་སྐབས་ཀྱི་བྱ་བ་ཟ་འཐུང་སྨྲ་བརྗོད་འགྲོ་འདུག་ལ་སོགས་གང་ལ་ཡང་ཨ་འཐས་བདེན་འཛིན་ཞེན་ཆགས་ཀྱིས་བདག་ཏུ་བཟུང་བའི་བློ་ཀད་ཀད་ཁྲིག་ཁྲིག་ཏུ་བྱས་ཀྱང་། གང་ལའང་སྙིང་པོ་མེད་ཅིང་རྟག་མི་ཐུབ་ཕྱིར་དགོས་དོན་སྤུ་ཙམ་མ་མཆིས་པས་ཅི་ལ་ཡང་དངོས་འཛིན་དང་དགའ་མི་དགའ་ཞིམ་མངར། སྐྱིད་སྡུག །ལེགས་ཉེས་བཟང་ངན་སོགས་སུ་འཛིན་པའི་འཁྲུལ་རྟོག་འདི་ཅི་ཆུང་ཅི་ཟད་ཀྱི་ཐབས་ལ་རེམས་དགོས་ཏེ། འཁོར་བར་གཏན་དུ་འཁྱམས་པའི་རྒྱུ་རྐྱེན་ནི་ཆགས་སྡང་གི་རྟོགས་པ་ལ་བདག་འཛིན་ཨ་འཐས་ཀྱི་མཚམས་སྦྱར་ཏེ། མི་བདེན་པ་ལ་བདེན་པར་བཟུང་། མི་རྟག་པ་ལ་རྟག་པར་འཛིན། འདུས་བྱས་སྙིང་པོ་མེད་པ་ལ་སྙིང་པོ་རེ་བས། བདག་གཞན་དགྲ་གཉེན། ཁང་ཁྱིམ། ནོར་རྫས། གཉེན་འཁོར་ལ་སོགས་པའི་ཆེད་དུ་མི་

[Full Size]

བྱེད་དགུ་བྱེད་ཀྱི་བསམ་སྦྱོར་འཁྲུལ་པའི་ཡོ་ལངས་སྣ་ཚོགས་པ་ཅིག་བྱས་ཀྱང་། ཡིད་ལ་མེད་པ་གཅིག་ཏུ་འཆི་ནད་ཀྱིས་ཕོག་སྟེ། ཚེ་འདིའི་བྱ་བྱེད་སྔར་བྱས་པ། ད་བྱེད་རྒྱུ་ཐམས་ཅད་ལ་དོན་སྒོ་སྤུ་ཙམ་ཡང་མེད་པར་ཤུལ་དུ་ཅམ་གྱི་བཞག་ནས། རང་སེམས་འདི་གཅིག་བུ་བར་དོའི་ཕྲང་རིང་གཤག་དགོས་པའི་དུས་ཤིག་མྱུར་དུ་འོང་བར་ཐག་ཆོད་པའི་ཚུལ་ཡིད་ལ་བསམ་སྟེ། སྐྱབས་བླ་མ་དཀོན་མཆོག་ལ་ཁ་ཞེ་མེད་པར་བློ་བཀལ་ཞིང་ཕྱག་མཆོད་གསོལ་འདེབས་བྱ། མཁའ་མཉམ་ཕ་མ་སེམས་ཅན་ཀུན་ལ་བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་ཞིང་གནོད་སྤང་ཕན་པ་སྒྲུབས། འཁོར་འདས་ཐམས་ཅད་སེམས་སུ་ཤེས་ཤིང་སེམས་སྟོང་པ་ཉིད་དུ་ཐག་ཆོད་ཀྱང་སྟོང་ཉིད་ཀྱི་རང་མདངས་རྒྱུ་འབྲས་སུ་ཤར་བ་བསླུ་མེད་ཡིན་པས་དགེ་སྡིག་གི་བླངས་དོར་ཞིབ་ཏུ་བྱ། ལྟོ་གོས་དང་འཇིག་རྟེན་འཁྲུལ་པའི་བྱ་བ་ལ་ནི་སུས་ཀྱང་

[Full Size]

དལ་ཁོམས་མི་བརྩི་བར་ལུས་སྲོག་དཀའ་བ་ཁྱད་དུ་བསད་ནས་འབུངས་ནུས་པ་ལ། ཆོས་དང་དགེ་སྦྱོར་ལ་ཁོམས་མི་ཁོམས་བརྩི་ཞིང་ཆད་ལྷག་བསྡོམ་པ་ཙམ་དུ་བྱེད་པ་འདི་འདྲས་ཆོས་གོ་མི་ཆོད་པས། དལ་ཁོམས་སྐྱིད་སྡུག་མི་བརྩི་བར་སྤྲོས་བཅས་སྤྲོས་མེད་ཀྱི་དགེ་སྦྱོར་ལ་སྙིང་རུས་བསྐྱེད། ཉམས་ལེན་གྱི་སྙིང་པོ་ནི། རང་སེམས་འཁྲུལ་འབྱམས་སུ་མ་ཤོར་བར། བཅོས་མའི་སྒོམ་རྒྱུ་མེད་ཀྱང་ཡེངས་སུ་སྐད་ཅིག་ཀྱང་མི་རུང་བས། སེམས་ཉིད་རྗེན་པའི་རང་ངོ་ལྟ་བ་ལ་ཉིན་མཚན་རྟག་ཏུ་འབད། སྤྲོས་བཅས་ཀྱི་དགེ་སྦྱོར་ཕྱག་སྐོར། ཁ་ཏོན་བསྙེན་སྒྲུབ་བཟླས་བརྗོད་ཅི་ལྟ་བུ་ཞིག་བྱེད་ནའང་རིག་པ་མ་ཡེངས་ཙམ་གྱི་ངང་ནས་བྱས་ན། སྐྱེད་རྫོགས་ཟུང་འཇུག་གམ། འདུས་བྱས་འདུས་མ་བྱས་དབྱེར་མེད་དུ་འགྲོ་བའི་གནད་ཀྱིས། ཉམས་ལེན་ལ་གོལ་ས་དང་བར་ཆད་རྐྱེན་བགེགས་ཀྱི་ཡུལ་ལས་འདས་ཤིང་། རྒྱུ་བསོད་ནམས་དང་

[Full Size]

འབྲས་བུ་ཡེ་ཤེས་ཀྱི་ཚོགས་གཉིས་གོང་འཕེལ་དུ་རྫོགས་ནས། འབྲས་བུ་སྐུ་གཉིས་ཟུང་འཇུག་གི་གོ་འཕང་ཐོབ་པའི་ཐབས་ཀྱི་མཆོག་ཏུ་འགྱུར་བ་ལགས། དེའི་ཕྱིར་དགེ་བ་ཆེ་ཆུང་གང་དང་ཅི་བྱས་ཀྱི་ཕན་ཡོན་མ་ལུས་མཁའ་ཁྱབ་འགྲོ་ཀུན་བྱང་ཆུབ་ཐོབ་པའི་རྒྱུ་རྐྱེན་ཁོ་ནར་བསྔོ་ཞིང་སྨོན་ལམ་བཟང་པོའི་མཚམས་སྦྱོར་ལ་བརྩོན་པར་བྱའོ།། ༈ །།ནམ་ཞིག་འཆི་བའི་དུས་ལ་བབས་པའི་ཚེ། ཚེ་འདིའི་བྱ་བྱེད་ཀྱི་ལྷག་མའམ། ནོར་རྫས་ཉེ་དུ་སོགས་ལ་ཆགས་ཞེན་གྱི་བློ་ཐག་རྦད་ཀྱི་བཅད་ལ། སྤྱི་བོར་དྲིན་ཅན་རྩ་བའི་བླ་མ་ལམ་གྱི་གསལ་བཏབ་སྟེ། རྩེ་གཅིག་དད་གདུང་གི་ཡིད་ཀྱི་གསོལ་བ་བཏབ། འཆི་ཁའི་ཐིམ་རིམ་གྱི་ཟུག་ངུ་གནད་གཅོད་སྣ་ཚོགས་པ་དང་། རྟག་དང་དོན་གྱི་འོད་གསལ་གྱི་བྱེ་བྲག་དུ་མ་དང་། བར་དོ་དང་པོ་གཉིས་པ་གསུམ་པའི་

[Full Size]

འཆར་སྣང་སོགས་ངེས་མེད་ཇི་ལྟར་ཤར་ཡང་། ཐམས་ཅད་རང་སེམས་ཀྱི་ཆོ་འཕྲུལ་ལས་གཞན་གང་ཡང་མ་གྲུབ་པར་གདིང་ཐག་རྩ་བ་ནས་ཆོད་པར་བྱས་ལ། བླ་མ་རང་སེམས་དབྱེར་མེད་པའི་དྲན་རིག་མ་ཡེངས་པ་གཅིག་པུ་ལ་རྩེ་གཅིག་ཏུ་དྲིལ་ནུས་ན། འཆི་ཁ་དང་བར་དོ་སྔ་ཕྱི་ཐམས་ཅད་ཀྱི་གདམ་ངག་ཉམས་ལེན་འདི་གཅིག་པུས་ཆོག་ངེས་ལགས་པས་དགོངས་པའི་དབྱིངས་ཟབ་དམ་པར་ནན་ཏན་དུ་བསྟིམ་ཞིང་བཅགས་པར་མཛད་དུ་གསོལ།། ༈ །།ཨེ་མ་རྒྱལ་བའི་གསུངས་རབ་རྒྱ་མཚོ་མཐའ་དག་ཀུན། སེམས་ཅན་སངས་རྒྱས་བསྒྲུབ་པའི་ཐབས་སུ་གཅིག །དེ་ཡི་ཡང་རྙིང་ངེས་གསང་རྫོགས་པ་ཆེ། །བླ་མེད་ཐེག་པ་ཀུན་གྱི་ཡང་རྩེར་འབར། །ཐུགས་རྗེ་ཀུན་ཁྱབ་འགྲོ་ལ་ཡེ་བཞུགས་ཀྱང་། །ལྷན་སྐྱེས་དྲི་མས་བསྒྲིབས་གང་བསམ་བྱའི་ཕྱིར། ཁྲེག་ཆོད་ཐོད་རྒལ་གདམས་པའི་ཉིན་བྱེད་གསལ། །ཆོས་ཚུལ་འདི་ཡི་ཚིག་དོན་རབ་

[Full Size]

རྒྱས་རྣམས། །རྒྱུད་ལུང་མན་ངག་བསྟན་བཅོས་དུ་མ་ལས། །རིག་འཛིན་བརྒྱུད་པས་རྒྱ་ཆེར་བསྟན་མཛད་པས། །རྨོངས་རྒན་བདག་འདྲས་བཤད་པས་དགོས་པ་ཅི། །དེ་ལས་ཉམས་ལེན་སྙིང་པོ་ཉུང་བསྡུས་ཤིག །སྨྲ་བར་གྱིས་ཞེས་བཀའ་སྩལ་ཇི་བཞིན་དུ། །མིག་དབང་རྣམ་རིག་ནུས་པ་རྒུད་རྒུད་ན་ཡང་། །ལྷག་བསམ་དཀར་པོས་ཀུན་བླངས་ཕུལ་ལགས་པས། །བསོད་ནམས་སྟོབས་ཀྱི་འབྱོར་པའི་ས་སྐྱོངས་མ། །མཁྱེན་པ་སྤྱན་ཡངས་མངའ་མོད་གུང་ལོས་ལྕིད། །དེ་ཕྱིར་སྙིང་པོའི་ཟབ་བཞེས་དོན་གཉེར་བ། །ལེགས་སོ་རན་ནོ་བརྩོན་པར་མཛད་འཚལ་ལོ། །བཤད་ཚོགས་ལུང་འདྲེན་ཚིག་གིས་འདབས་བརྒྱ་ནི། །བཞད་པའི་སྐབས་མིན་མཛུབ་ཚུགས་བཅུད་དྲིལ་དུ། །ཕུལ་འདིའི་དགེ་ཚོགས་མཐུ་ཡིས་འགྲོ་ཀུན་ཀྱང་། །ངེས་དོན་ལམ་ཞུགས་ཚེ་གཅིག་སངས་རྒྱས་ཤོག །ཅེས་པ་འདི་ནི། གྲུབ་དབང་འགར་གྱི་ཆོས་ཀྱི་རྒྱལ་ཁབ་ཏུ་སེང་གེའི་ཁྲི་

[Full Size]

གནོན་པའི་གདུང་རིགས་དྲི་མ་མེད་པ་ལས་འཁྲུངས་ཤིང་ལུགས་གཉིས་ཀྱི་མཁྱེན་པའི་པད་ཚལ་རྒྱས་པས་མངའ་འབངས་རྐང་དྲུག་རྣམས་ཀྱི་རེ་གནས་མཆོག་ཏུ་གྱུར་པ་སྐུ་མདུན་དབོན་མོའི་དྲུང་བགྲེས་མོའི་བཞེད་པ་སྐོང་ཕྱིར། རྒན་པོ་མིག་དབང་གི་གསལ་ཞིང་འབྱུང་ཁམས་མ་སྙོམས་བཞིན་དུ་སྙིང་རུས་ཀྱི་གཞོན་པས་དྲངས་ཏེ། ཆོས་དབྱིངས་འོད་གསལ་རྩེ་མོར་ཡི་གེའི་ལམ་དུ་བཀོད་ནས་ཕུལ་བ་དགེ་ལེགས་སུ་གྱུར་ཅིག། ༈ །།རིགས་རུས་ཆོ་འབྲང་ལང་ཚོའི་འབྱོར་སྟོབས་ལ། །མ་ཞེན་དམ་པའི་ཆོས་ཀྱིས་ཐུགས་འཕྲོགས་པ། །རིག་པ་འཛིན་པའི་དབང་མོ་མིང་དོན་དང་། །མཐུན་པའི་སྐལ་བཟང་མ་དེ་ཤིས་གྱུར་ཅིག །དལ་འབྱོར་ཕུན་ཚོགས་ཐོབ་འདི་དོན་ཡོད་དུ། །མཛད་ཕྱིར་འཁོར་བའི་བཙོན་ར་རིང་སྤངས་ཤིང་། །མྱོས་བྱེས་དུག་གི་ཡོ་ལང་རབ་སྤོང་བའི། །དམ་བཅའ་བཟང་པོར་ཡི་རངས་དགེ་རྩའང་བསྔོ། །དམ་པའི་བཤེས་གཉེན་མཆོག་གི་ཟིན་པའི་མཐུས། །ལོག་པའི་ལམ་དུ་འགྲོ་ཉེན་ཆུང་མོད་ཀྱི། །འོན་ཀྱང་ཇི་སྲིད་ལུས་སེམས་འགྲོགས་

[Full Size]

ཀྱི་བར། །རང་ཚོ་ཆོས་ཀྱིས་ཟིན་ལ་འབད་པར་ཞུ། །སྐྱེས་མཐའ་འཆི་ཞིང་འབྱོར་པའི་མཐའ་རྒུད། །བསགས་མཐའ་ཟད་པ་འདུས་བྱས་ཆོས་ཉིད་ལ། །བློ་སྣ་རིང་བ་གང་ཞིག་འགྱོད་པའི་རྒྱུ། །འཇིག་རྟེན་བློ་རྒྱ་གང་ཆུང་ཆོས་དང་མཐུན། །མི་ཚེའི་ཉི་མ་ལོ་ཟླ་ཞག་གིས་མཛད། །འཆི་བདག་ནམ་མཁའ་ཐོག་ལྟར་ངེས་མེད་འོངས། །ན་སོ་གཞོན་སྙམ་ལེ་ལོ་བྱར་མི་ཁོམས། །ཆོས་ལ་སྙིང་རུས་བསྐྱེད་མཛོད་སྐལ་ལྡན་མ། །སངས་རྒྱས་མངོན་སུམ་བླ་མ་བཞུགས་དུས་འདིར། །བཀའ་ཆོས་བདུད་རྩིའི་ཟིལ་མངར་མ་འཐུང་ན། །གཏན་དུ་མཚན་ལྡན་བླ་མ་བརྙེད་པར་དཀའ། །དེད་དཔོན་འཛོམ་དུས་ནོར་བུ་ལེན་འཚལ་ལགས། །དད་གུས་ཤུགས་བསྐྱེད་གསོལ་བ་རྒྱུན་དུ་གདབ། །མཁའ་མཉམ་ཕ་མའི་ཚོགས་ལ་བྱང་སེམས་སྦྱང་། །དགེ་སྡིག་ཕྲ་ཞིང་ཕྲ་བའང་འདོར་ལེན་རེམ། །རང་རྒྱུད་ཆོས་ཀྱིས་ཐུལ་མཛོད་སྙིང་གཏམ་ལགས། །མི་

[Full Size]

རྒན་འཆི་ཁའི་གཏམ་ལ་དོན་སྙིང་ཡོད། །དོན་དེ་ཡལ་བར་མ་འདོར་ཐུགས་ལ་བསྟིམ། །དོན་མཆོག་ཆོས་ཀྱི་ཚིག་གི་འགྲོ་ཀུན་ཀྱང་། །ཞལ་ཁ་དམ་པའི་ཆོས་ལ་འགྱུར་བར་ཤོག །ཅེས་པ་འདི་ནི། མཉམ་པོ་སྒམ་པོ་པའི་གདུང་རིགས་ལས་འཁྲུངས་པའི་སྐུ་མདུན་མ་རིག་འཛིན་དབང་མོས་མྱོས་བྱེད་ཆང་གི་བཏུང་བ་སྤོང་བར་ཞལ་བཞེས་ཀྱི་དམ་བཅའི་ལན་དུ་ཕུལ་བའོ།། ༈ །ཆོས་ཉིད་དོན་ལ་རབ་མོས་པའི། །ཆོས་ཉིད་དབང་མོ་དད་ལྡན་མས། །ཡི་གེ་ལྷ་རྫས་མཚན་གྲངས་བཅས། །ཇི་ལྟར་གནང་བཞིན་ལེགས་སྨིན་ལགས། ཨེ་མ། །འཁོར་བ་སྡུག་བསྔལ་རྒྱ་མཚོ་ལས། །བདེ་བར་འཁྲུལ་ནས་ཞེན་མཁན་མང་། །སྡུག་བསྔལ་མཚན་ཉིད་ཤེས་ནས་ཀྱང་། །འཁོར་བ་སྤོང་བ་ངོ་མཚར་ཆེ། །མྱོས་བྱེད་ཆང་གིས་དུག་ཆེན་འདིས། །འཕྲལ་ཡུན་འདུན་མ་རླག་བྱེད་པའི། །ཕུང་རྫས་ཡིན་ཀྱང་གོ་མཁན་མེད། །སྤོང་བའི་དམ་བཅའ་རྗེས་ཡི་རངས། །དམ་པའི་ཆོས་ཀྱི་

[Full Size]

སྒོར་ཞུགས་ནས། །སྒོ་གསུམ་སྙོམ་ལས་མི་ཁོམས་ཀྱི། །ཐོས་དང་བསམ་དང་སྒོམ་པ་ལ། །ནན་ཏན་མཛོད་ཅིག་ཆོས་ཉིད་མ། །སངས་རྒྱས་དངོས་བྱོན་མཆོག་སྤྲུལ་ཆེ། །ཡིད་བཞིན་ནོར་བུ་རང་གི་གཅེན། །མཚན་ཉིད་ཀུན་ཚང་དགེ་བའི་བཤེས། །ཡོད་དུས་དམ་ཆོས་ཞུ་ལ་རེམས། །ན་སོ་གཞོན་དུས་དབང་པོ་གསལ། །རང་དབང་ཡོད་ཚེ་མ་འབད་ན། །རྒས་ཁོགས་དབང་པོ་འགྲིབས་པའི་ཚེ། །བྱེད་པར་འདོད་ཀྱང་ནུས་པ་མེད། །འཆི་བ་ནམ་ཡོངས་ཆ་མེད་ལ། །ན་སོའི་ངེས་པ་མ་མཆིས་ན། །གཞོན་ཞེས་ལེ་ལོ་མི་རུང་གི །དགེ་སྦྱོར་བརྩོན་མཛོད་ཆོས་ཉིད་མ། །འདི་དང་ཕྱི་མ་བར་དོ་སོགས། །ནམ་དུའང་སྐྱིད་སྡུག་ཅི་བྱུང་ཀྱང་། །བླ་མ་དཀོན་མཆོག་མ་གཏོགས་པ། །རེ་ཡུལ་མེད་དོ་གསོལ་བ་ཐོབ། །འགྲོ་དྲུག་སེམས་ཅན་མཐའ་དག་པ། །སྐྱེ་བ་གཏན་གྱི་ཕ་མ་ཡིན། །ཉེ་རིང་མེད་པར་བྱམས་

[Full Size]

སྙིང་རྗེས། །ཅི་ཕན་བསྒྲུབ་ཅིང་གནོད་འཚེ་སྤང་། །དད་དང་ངེས་འབྱུང་སོ་མ་འདི། །ཡལ་ནས་བློ་དྲེད་འགྲོ་བ་མང་། །མི་ཚེའི་མགོ་འཇུག་འཁྱོལ་བ་ཡི། །ཆོས་མཐུན་མཛོད་ཅིག་སྙིང་གཏམ་ལགས། །ཞེས་སྐུ་མདུན་མ་སྐུ་གཞོན་པ་ལ་ཕུལ་བའོ། །བཟང་པོའི་རྒྱུད་ལས་ལེགས་འཁྲུངས་ཤིང་། །རིན་ཆེན་བླ་མས་རྗེས་བཟུང་བ། །བཟང་པོའི་རིན་ཆེན་མིང་དོན་དང་། །མཐུན་པའི་སྐལ་བ་བཟང་ལྡན་དེས། །སྐྱེས་གནང་ཡི་གེའི་ལན་དོན་པོར། །སྙིང་ལ་བཅགས་པའི་སྙིང་གཏམ་ནི། །བསྲིང་ཞིག་གསུངས་ཞིག་སྲིན་བུའི་རྗེས། །ཇི་ལྟའི་ཡིག་མཆིད་འདི་སྐད་འབུལ། ཁམས་གསུམ་འཁོར་བའི་སྐྱེ་གནས་བཞིར། །སྐྱེས་པའི་ནང་པར་འཆི་བདག་གི། །བདག་ཏུ་མ་བཟུང་སུ་ཡང་མེད། །འཆི་བ་དྲན་མཛོད་སྙིང་གཏམ་ལགས། །ན་སོ་གཞོན་པའི་གདེང་བྲོད་ལ། །འཆི་བས་མི་འཇིགས་མ་ཡིན་གྱི། །རྣམ་གཡེང་ལེ་ལོ་སུས་བྱས་ཕུང་། །ལོང་མེད་དྲན་མཛོད་

[Full Size]

སྙིང་གཏམ་ལགས། །ཆོས་སྒོར་བཞུགས་པ་མང་ལུགས་ལ། །ཚུལ་བཞིན་བྱེད་པ་ཉུང་ལུགས་ཀྱིས། །མཐའ་རུ་ཕྱིན་མཁན་སྲིད་པ་ཙམ། །སྙིང་རུས་བསྐྱེད་མཛོད་སྙིང་གཏམ་ལགས། །བླ་མའི་གཟུགས་བརྙན་རབ་ཏུ་མང་། །མཚན་ལྡན་ཉིན་སྐར་ཤིན་ཏུ་དཀོན། །སངས་རྒྱས་མངོན་སུམ་མཇལ་དུས་འདིར། །དད་དམ་ལྡན་མཛོད་སྙིང་གཏམ་ལགས། །ཐོས་བསམ་སྒོམ་པའི་སྙིང་པོ་དེ། །རང་རྒྱུད་ཐུལ་བ་གལ་ཆེ་ན། །ངར་འཛིན་ཁེངས་རློམ་མ་ཞུགས་པར། །དམན་ས་འཛིན་མཛོད་སྙིང་༴ །སྡོམ་པ་དམ་ཚིག་རྩ་བ་དེ། །ངོས་ལྐོག་མེད་པའི་ཡིད་ཆེས་དགོས། །བཙན་དུག་ལྐོག་ཏུ་ཟ་འདྲ་བའི། །རང་ཕུང་མ་བྱེད་སྙིང་༴ །རང་རྒྱུད་དར་དཀར་ཟབ་མོ་འདི། །གྲོགས་ངན་སྣུམ་གྱིས་གོས་དོགས་ཡོད། །དྲི་མེད་ལྷག་བསམ་དག་པ་ཉིད། །ཆུད་མི་གཟན་མཛོད་སྙིང་༴ །འཇིག་རྟེན་བྱ་བ་ཟར་ཟིར་ལ། །བློ་སྣ་གང་འཇུག་ཕུང་བའི་རྒྱུ། །བློ་ཁ་ནང་དུ་བཟློག་

[Full Size]

ནས་ཀྱང་། །ཆོས་ལ་དྲིལ་མཛོད་སྙིང་༴ །དམ་ཆོས་སྙིང་པོ་ཕྱག་རྒྱ་ཆེ། །གནས་ལུགས་གདོད་མའི་ཡེ་ཤེས་དེ། །རང་དབང་ཐོབ་པའི་ཉམས་ལེན་ཞིག །མེད་ཐབས་མེད་དོ་སྙིང་གཏམ་ལགས། །རྒན་པོ་འཆི་ཁའི་སྙིང་གཏམ་འདི། །ཚིག་ལ་རྣམ་དཔྱོད་མི་ལྡན་ཡང་། །དོན་ལ་ལྷག་བསམ་བདེན་སྟོབས་ཡོད། །ཐུགས་ལ་འཆོང་མཛོད་ཕན་པ་འབྱུང་། །མིག་དབང་འགྲིབ་པའི་ཡིག་གཟུགས་འདི། །སྤྱན་ལམ་བྲིམས་པའི་རེ་མེད་ཀྱང་། །བཞེད་དོན་བསྐོངས་ཕྱིར་ཕུལ་བའི་དགེ། །མ་ལུས་འགྲོ་བའི་དོན་དུ་བསྔོ། །ཞེས། འཕན་ཡུལ་རྒྱ་མ་ཆོས་མཛད་བཟང་རིན་པར་ཕུལ་བའོ།། ༈ །།སྐྱེ་བ་མང་པོར་གོམས་པའི་བློ་གྲོས་ནི། །དུག་གསུམ་རྒྱུ་འབྲས་ཟུག་རྔུ་འབྱིན་པའི་མཆོག །རྨད་བྱུང་གསོ་བ་རིག་པའི་མཛོད་འཆང་བ། །གཞན་ཕན་བཟང་པོ་སྐུ་ཁམས་སྙོམས་ལགས་སམ། །བདག་ལས་གཞན་ཅེས་བྱང་ཆུབ་སེམས་བཟང་པོས། །འགྲོ་བ་ཕ་མའི་རང་བཞིན་

[Full Size]

ལ་ཕན་པ། །བསྒྲུབ་དེ་རྒྱལ་བའི་སྲས་མཆོག་ཀུན་གྱི་ལམ། །ཡིན་ཕྱིར་གཞན་ཕན་བཟང་པོ་མིང་དོན་མཐུན། །འདི་ན་སྤོང་བ་ལ་མོས་རྒན་པོ་ནི། །མི་ཚེའི་ལྷག་ཟླ་ཞག་འགའ་ཙམ་འདི། །རྒོད་ཚང་དབེན་པའི་ཕུག་པར་སྐྱེལ་སྙམ་ཡང་། །ཀློ་རོང་ས་ཆུ་ལུས་ལ་མ་ཕྲོད་པས། །རྒན་པོ་མཁར་བ་ལ་བརྟེན་ཡར་ལ་འོངས། །གང་དུ་གནས་ཀྱང་འཆི་བས་མི་ཚུགས་པའི། །ས་ཕྱོགས་གང་ཡང་ཡོད་པ་མིན་མོད་ཀྱང་། །རེ་ཤིག་འབྱུང་ཁམས་སྙོམ་པར་འོང་རེ་བས། །གནས་འདིར་མཆིས་རུང་རྒས་པའི་ནད་དང་འགྲོགས། །སྒྱུ་ལུས་བདེ་བའི་གོ་སྐབས་མི་གདའ་ཡང་། །སྐྱེས་མཐའ་འཆི་ལས་ནམ་ཡང་མི་འདའ་བར། །རྟག་ཏུ་ཡིད་ལ་ངེས་པའི་གནས་སྐབས་ལགས། །སྐལ་བ་བཟང་པོས་གཞན་ལ་ཕན་བརྩོན་ཁྱེད། །དལ་འབྱོར་ཕུན་ཚོགས་དོན་དང་ལྡན་

[Full Size]

ཕྱིར་དུ། །སྒོ་གསུམ་དགེ་སྦྱོར་བརྩོན་པ་མི་ལྷོད་བཞིན། །སྐྱབས་བྲལ་ཉམས་ཐག་སྡུག་བསྔལ་བསལ་བ་ལ། །སྔར་བཞིན་ལྷག་བསམ་གོ་ཆ་མི་ཉམས་མཛོད། །འདི་ཕྱི་བར་དོ་སྐྱིད་སྡུག་ཅི་བྱུང་ཡང་། །རེ་ས་བླ་མ་ལས་ལྷག་གཞན་མེད་པས། །སྨན་རྒྱལ་པད་འབྱུང་དགུ་་མཉམ་རྡོར་བ། །ཀུན་འདུས་རྩ་བའི་བླ་མ་དྲན་པར་མཛོད། །ཚེ་འདིའི་སྐྱིད་སྡུག་རྨི་ལམ་སྣང་བ་ཙམ། །འདི་ནི་གཡས་ཆུང་དེ་བས་གཏན་འདུན་ཞིག །སྒྲུབ་དུས་ད་རེས་ལགས་ཀྱི་ནམ་དུ་ཡང་། །དམ་ཆོས་རིན་ཆེན་ཡལ་བར་མི་འདོར་བའི། །ཉམས་ལེན་རྒྱུད་ལ་འཁེལ་མཛོད་གཞན་ཕན་བཟང་། །དེ་སྐད་གདམས་པའི་ཡིག་འཕྲེང་བྱིན་རླབས་རྟེན། །ལྷན་ཅིག་ཕྱི་ཐུམས་རྡོ་རྗེའི་རྒྱས་བཏབ་དེ། །ཆོས་དབྱིངས་འོད་གསལ་རྩེ་མོའི་རི་ཁྲོད་ནས། །སྣ་ཚོགས་རང་གྲོལ་རྒན་པོས་ཕུལ་བ་དགེ། །ཅེས་པ་འདི། འཚོ་མཛད་གཞན་ཕན་བཟང་པོ་ལ་གདམས་པའོ།། ༈ །།

[Full Size]

དད་ལྡན་ཆོས་མཛད་ཀུན་དགའ་དབང་རྒྱལ་དགོངས། །དལ་འབྱོར་ཕུན་ཚོགས་ཐོབ་ཀྱང་རྟག་མི་ཐུབ། །ན་ཚོད་འབྱུང་ཁམས་བདེ་ཡང་མྱུར་དུ་རྒུད། །སངས་རྒྱས་བསྟན་དང་སྐྱེ་འགྲོའི་སྤྱོད་ཚུལ་གཟིགས། །དལ་ཁོམས་ལོང་ཡོད་སྡད་པའི་དུས་མ་ལགས། །གཉེན་དང་ཡུལ་འཁོར་ཁང་ཁྱིམ་ནོར་རྫས་དང་། །འཇིག་རྟེན་ཕེར་ཡོང་ཤེས་ཤེས་རྣམས་གྲངས་ལས། །དབེན་པའི་རི་ལ་རང་སེམས་འདུལ་སྐྱོང་དང་། །དགེ་སྦྱོར་བྲེ་གསོག་ཕུལ་གསོག་མཛད་རེ་རན། །འཁོར་བ་ཐོག་མེད་བག་ཆགས་འཁྲུལ་འཁོར་གོམས། །ཚེ་འདིའི་བྱ་བ་བྱས་བཞིན་མང་དུ་འགྲོ། །ཅམ་གྱི་བཞག་ན་འཁྲུལ་པའི་འཁོར་རྒྱུན་ཆད། །འཆི་ཁའི་རྒྱགས་གྲབས་རན་ནོ་ངང་མ་རིང་། །འདི་བྱས་འདི་འོང་བསམ་མནོ་མང་པོ་དང་། །གཞན་གྱིས་དོགས་པ་སློང་བའི་གྲོས་འདེབས་སོགས། །ཐེ་ཚོམ་ཡིད་གཉིས་ཐག་པ་རྦད་ཀྱི་ཆོད། །བློ་རྩེ་ནང་དུ་ཁུག་པའི་དུས་ལ་བབས།

[Full Size]

མི་མེད་བྲག་ཕུག་ལྷ་ཡི་ཁང་བཟང་ཡིན། །སྐྱོ་ཚོ་རྡོར་དཀར་ཟས་དང་སྐོམ་གྱི་རབ། །བེམ་དུགས་བསྟུམ་ནས་གསོལ་འདེབས་ལྷང་ལྷང་སྒྲོགས། །དུས་གསུམ་རྒྱལ་བ་མཉེས་པའི་སྤྱོད་པ་ཡིན། །ནགས་ཁྲོད་དབེན་པར་འཆི་བ་མི་རྟག་སྒོམ། །དོ་ནུབ་ཤི་ཡང་འཚེར་དང་འགྱོད་མེད་ཀྱི། །འདུན་པའི་སྙིང་པོ་བླ་མ་དཀོན་མཆོག་ལ། །བློ་སྙིང་བྲང་གསུམ་གཏོད་དང་བསླུ་བ་མེད། །གཉིད་དང་སྙོམ་ལས་ལོང་གཏམ་རྒྱང་དུ་བསྲིང་། །དགོས་དགོས་བཤོམ་བཤོམ་འཛོམ་ཆའི་ཞེ་འདོད་སྤང་། །སྒོམ་ཆེན་རི་ཁྲོད་འགྲིམ་ནས་ཤི་བ་དེ། །ཆོས་པའི་གཏམ་ལ་སྙན་ནོ་འགྱོད་པ་མེད། །མཁའ་ཁྱབ་སེམས་ཅན་སྙིང་རྗེའི་ཁོངས་སུ་བཅུག །སྐྱབས་སེམས་ཡིག་བརྒྱ་ཚོགས་བསགས་སྒྲིབ་སྦྱོང་འབད། །བླ་མའི་རྣལ་འབྱོར་གསོལ་འདེབས་གདུང་ཤུགས་ལ། །ཉིན་མཚན་རྒྱུན་དུ་བརྩོན་མཛོད་གལ་རེ་ཆེ།། ༈ །།སྒོམ་ཞེས་བཟོ་བཅོས་

[Full Size]

དམིགས་པ་གང་ཡང་མེད། །སེམས་ལ་སེམས་ཀྱི་ལྟ་བ་གཅིག་པུ་ཡིན། །རྣམ་རྟོག་ཅི་ལྟར་ཤར་ཡང་གཡས་མེད་བསྐྱུར། །དགག་སྒྲུབ་རྗེས་འབྲེང་མ་བྱས་ཁོ་ནས་ཆོག །བཟང་པོའི་རྟོག་པ་སྐྱེས་ལ་དགའ་བྲོད་དང་། །ངན་པའི་རྟོག་པར་དགྲ་རུ་ལྟ་བ་སོགས། །སྤང་བླང་བྱས་བཞིན་ཆགས་སྡང་ཇེ་ཆེར་འགྲོ། །གཡས་མེད་འཛིན་མེད་བསྐྱུར་བ་གནད་དུ་ཟབ། །སྤྱོད་ལམ་རྣམ་བཞི་ཚོགས་དྲུག་འཆར་སྣང་རིགས། །གང་ལའང་དེར་འཛིན་ཞེན་པ་མི་བྱ་བར། །ཤེས་རིག་གསལ་ལེ་ཧྲིག་གེ་འདི་ཁོ་ན། །མ་ཡེངས་རང་བབས་སྐྱོང་དང་ནོར་ས་མེད། །ནད་གདོན་བར་ཆད་འགལ་རྐྱེན་བྱེ་བྲག་རིགས། །ཅི་ལྟར་བྱུང་ཡང་དགེ་སྦྱོར་བློས་མི་བཏང་། །ལེགས་ཉེས་མཐའ་དག་སེམས་ཀྱི་འཆར་ཚུལ་ཙམ། །ཡིན་ལ་ཡིན་པར་ཤེས་པའི་ཐག་ཆོད་བྱ། །ཉམས་རྟོགས་ལམ་རྟགས་ཡོན་ཏན་ལྟར་སྣང་

[Full Size]

བ། །འབྱུང་དུ་རེ་ན་རང་སེམས་དུས་ཀྱིས་ཁྱེར། །མོས་གུས་དག་སྣང་སྙིང་རྗེ་ཞེན་ལོག་དང་། །ངེས་འབྱུང་སྐྱེ་བ་གྲུབ་རྟགས་སྙིང་པོ་ཡིན། །འདི་དང་བར་དོ་སྐྱེ་བ་ཕྱི་མ་དང་། །མཐར་ཐུག་བྱང་ཆུབ་མ་ཐོབ་བར་དུ་ཡང་། །བླ་མ་རང་སེམས་དབྱེར་མེད་ཉམས་ལེན་ལས། །གཡེལ་མེད་རྒྱུད་ལ་འབྱོར་མཛོད་སྙིང་གཏམ་ལགས། །ཞེས་པ་འདི་ཡང་བླ་མ་ཆོས་མཛད་ཀུན་དགའ་དབང་རྒྱལ་ལ་ཡང་དག་པའི་གཞན་བསྐུལ་དུ་གདམས་པ་ཨིྀྠ།། ༈ །།དད་པའི་ཡིད་ཅན་སྒམ་པོ་དབང་གི་རྒྱལ། །དལ་འབྱོར་རིན་ཆེན་ཐོབ་པའི་དཀའ་ཚོད་ལ། །འཁོར་བ་སྡུག་བསྔལ་འདམ་ལས་ལེགས་ཐོན་ཏེ། །དམ་པའི་ཆོས་སྒོར་ཞུགས་པ་ངོ་མཚར་ཆེ། །བླ་མ་སངས་རྒྱས་དངོས་ཀྱི་ཞབས་ལ་ཟིན། །བསྟན་པའི་སྙིང་པོ་སྒྲུབ་རྒྱུད་རིན་ཆེན་མཇལ། །གང་ནས་བསམ་ཀྱང་ཕུན་སུམ་ཚོགས་དུས་འདིར། །སྙོམ་ལས་ལེ་ལོར་མ་སྡོད་དགེ་སྦྱོར་འབུངས། །ཚེ་ལ་ངེས་མེད་ནམ་ཡང་འཆི་ཐག་ཆོད། །དེ་ཚེ་དམ་པའི་ཆོས་

[Full Size]

རང་མ་གཏོགས་པ། །སྟོང་གསུམ་ཁ་ལོ་སྒྱུར་ཡང་ཕན་པ་མེད། །མི་རྟགས་ཞེན་ལོག་བསྒོམ་པ་གལ་དུ་ཆེ། །རང་སེམས་འཁོར་འདས་ཀུན་གྱི་བྱེད་པོ་འདི། །རང་དབང་ཐོབ་པའི་ཐབས་ལ་མི་འབད་ན། །ཕེར་ཡོང་རྣམ་རིག་བཀྲ་དང་ཤེས་ཤེས་ཀྱིས། །ཉོན་མོངས་འཁྲུལ་པའི་དགྲ་བོ་གཞོམ་མི་ནུས། །རྒས་ཁར་ལྟོགས་ཀྱི་དོགས་པ་བྱེད་མཁན་མང་། །ཤི་ཁར་ཉམས་ལེན་མེད་དོགས་བྱེད་མཁན་ཉུང་། །ཚེ་གཅིག་བྱང་ཆུབ་སྒྲུབ་ནུས་སུ་ཡང་མེད། །བློ་སྣ་གཅིག་དྲིལ་མཛོད་དང་རང་ལ་ཕན། །ཆོས་བརྒྱད་མགོ་ཁྱེར་མཐོན་པོའི་ཆོས་གཟུགས་རྣམས། །རྐྱེན་ངན་སྣ་རྡོ་ཕོག་ཚེ་བུབས་ཚབས་ཆེ། །རང་རྒྱུད་ཆོས་ཀྱིས་ཐུལ་བའི་སྙོམ་ཆུང་ལ། །དཀོན་མཆོག་བླ་མའི་ཐུགས་རྗེས་བསླུ་བ་མེད། །གསོལ་བ་ཐོབ་དང་བྱིན་རླབས་ཤུགས་ཀྱིས་འབྱུང་། །ཞེན་ལོག་བསྒོམ་དང་འདོད་དགུ་ལྷུན་གྱི་གྲུབ། །དགེ་སྦྱོར་འབུངས་དང་འཆི་ཁར་འགྱོད་འཚེར་བྲལ། །རང་འགོ་

[Full Size]

རང་གི་འདོན་པ་གལ་རེ་ཆེ། །རྣམ་རྟོག་ཁ་ཡན་མ་བཏང་རང་ངོ་ལྟོས། །ཚོགས་དྲུག་ཞེན་འཛིན་མ་བྱེད་གཏད་མེད་བསྐྱུར། །རིག་པ་རྗེན་པ་སྐྱོང་དང་གོལ་ས་མེད། །རེ་དོགས་བཅོས་མ་མ་བྱེད་ཟབ་གནད་ཡིན། ཁ་བཤད་ཚོག་ཚོགས་ཆེ་བས་དོན་མི་རྟོགས། །བླ་མའི་བྱིན་རླབས་ཞུགས་ན་དཀའ་ཚེག་མེད། །བྱིན་རླབས་དད་པའི་ཤུགས་ལ་རག་ལས་པས། །དད་པས་གསོལ་འདེབས་བརྩོན་མཛོད་གནད་འགག་ཡིན། །སྙིང་གཏམ་གནད་བསྡུས་ཡི་གེར་བཀོད་པ་འདིས། ཁྱེད་ཡིད་དམ་པའི་ཆོས་ཀྱི་སྨིན་ནུས་ཤིང་། །ཚེ་དང་སྒྲུབ་པ་མཉམ་པས་གཏན་འདུན་འགྲུབ། །མཁའ་མཉམ་མ་རྒན་ཐར་ལམ་འགོད་གྱུར་ཅིག །ཅེས། ཆོས་མཛད་སྒམ་པོ་དབང་རྒྱལ་ཞེས་པ་ལ་གདམས་པའོ། །དགེ་ལེགས་འཕེལ།

བསྟོད་པའི་ཚོགས་རིན་ཆེན་གསེར་གྱི་མཆོད་སྡོང་།

[Full Size]

བསྟོད་པའི་ཚོགས་རིན་ཆེན་གསེར་གྱི་མཆོད་སྡོང་ཞེས་བྱ་བ་བཞུགས་སོ།

[Full Size]

ན་མཿཤཱཀྱ་མུ་ན་ཡེ། གསེར་མདོག་ལྷུན་པོ་ལྟ་བུར་བརྗིད་པའི་སྐུ། །འཇིག་རྟེན་གསུམ་ན་འགྲན་ཟླ་ཀུན་བྲལ་ཞིང་། །ལྷ་བཅས་འགྲོ་བའི་གཙུག་བརྒྱན་མཆོག་གྱུར་པ། །ཐུབ་དབང་ཞབས་ཀྱི་པདྨོར་གུས་ཕྱག་འཚལ། །ཉོན་མོངས་བརྒྱད་ཁྲི་བཞི་སྟོང་རབ་བཅོམ་ཞིང་། །སྐྱོན་བྲལ་མཚན་དང་དཔེ་བྱད་ལྡན་པའི་སྐུ། །སྐྱེ་མེད་ཆོས་སྐུར་མྱ་ངན་ལས་འདས་པ། །བསྟན་པའི་མངའ་བདག་བཅོམ་ལྡན་འདས་ལ་འདུད། ཁྱེད་ཉིད་སྔོན་ཚེ་རྫ་མཁན་བུར་གྱུར་ཚེ། །བདེ་གཤེགས་ཤཱཀ་ཐུབ་ཆེན་པོ་དེ་ཉིད་ལ། །གུས་

[Full Size]

པའི་སེམས་ཀྱིས་རྫ་ཕོར་ཅིག་ཕུལ་ནས། །བྱང་ཆུབ་མཆོག་ཏུ་ཐུགས་བསྐྱེད་མཛད་དེར་འདུད། །གང་ཚེ་ཁྱེད་ནི་དགའ་ལྡན་ཞིང་ཁམས་ནས། །གླང་ཆེན་ཐལ་དཀར་མཆོག་ཏུ་སྐུ་སྤྲུལ་པ། །སེར་སྐྱའི་གྲོང་དུ་ཟས་གཙང་སྲས་ཉིད་དུ། །འགྲོ་བའི་མགོན་ཉིད་ལྷུམས་སུ་ཞུགས་དེར་འདུས། །ཟླ་བཅུ་ལོན་ཚེ་བཙུན་མོ་སྒྱུ་འཕྲུལ་མ། །ལྷོ་ཕྱོགས་ལུམྦྷིའི་ཚལ་བྱོན་བཞུགས་པའི་ཚེ། །རྩིབས་ལོགས་གཡས་ནས་ཡུམ་ལ་གནོད་མེད་པར། །ལྟད་བཟང་བཅས་ཏེ་བལྟམས་པར་མཛད་དེར་འདུད། །བལྟམས་མ་ཐག་ཏུ་ཕྱོགས་བཞིར་

[Full Size]

བྱོན་པ་ལས། །ཞབས་ཀྱི་རྗེས་ལ་པདྨའི་སྡོང་པོ་འཁྲུངས། །ལྷ་དབང་ཀླུ་རྒྱལ་སོགས་ཀྱི་ཕྱག་བྱས་ཤིང་། །འགྲོ་བའི་གཙུག་གི་རྒྱན་གྱུར་ཁྱེད་ལ་འདུད། །དེ་ནས་རིག་གནས་སློབ་པའི་གྲྭར་བྱོན་ནས། །ཀུན་གྱི་བཤེས་གཉེན་ཞེས་བྱའི་སློབ་དཔོན་ལ། །ཡིག་བརྩིས་རིག་གནས་འཕོང་དང་སྒྱུ་རྩལ་ཀུན། །ཐོག་མེད་གཞན་ནས་ལྷག་པར་མཁྱེན་དེར་འདུད། །གྲགས་འཛིན་མ་དང་ས་མཚོ་རི་དྭགས་སྐྱེས། །བཙུན་མོ་དྲུག་ཁྲིའི་ཚོགས་དང་རོལ་མཛད་ཅིང་། །སླར་ཡང་ཐམས་ཅད་སྙིང་པོ་མེད་དགོངས་ནས། །རྒྱལ་སྲིད་ལོངས་སྤྱོད་སྤང་བར་མཛད་ལ་འདུད། །རབ་ཏུ་བྱུང་དགོངས་ཕོ་བྲང་ཡང་ཐོག་ནས། །རྒྱལ་ཆེན་བཞི་སོགས་ལྷ་ཡིས་མཆོད་པས་བསུས། །རྣམ་དག་དྲུང་དུ་ཉིད་ཀྱི་དབུ་སྐྲ་ཡང་། །ཉིད་ཀྱི་བཅད་ཅིང་རབ་ཏུ་བྱུང་ལ་འདུད། །ནཻ་རཉྫ་རའི་འགྲམ་དུ་གཤེགས་པའི་ཚེ། །ལོ་དྲུག་བར་དུ་ཁམས་ཀྱི་ཟས་སྤངས་ཏེ། །སྟན་ཐོག་གཅིག་ཏུ་གཡོ་མགུལ་ཙམ་མེད་པར། །

[Full Size]

ཏིང་འཛིན་ངང་དུ་གཡོ་མེད་བཞུགས་དེར་འདུད། །སངས་རྒྱས་ཀུན་གྱི་བྱང་ཆུབ་རབ་བསྐུལ་ཞིང་། །རྩྭ་ཡི་ཆུན་བུ་སྟན་དུ་བསྣམས་ནས་ཀྱང་། །མ་ག་རྡ་ཡི་རྡོ་རྗེའི་གདན་སྟེང་དུ། །བྱང་ཆུབ་སྙིང་པོར་གཤེགས་པར་མཛད་ལ་འདུད། །འོད་ཟེར་སྤྲོས་པས་བདུད་ཀྱི་གནས་ཀྲོག་ཅིང་། །བདུད་དང་བརྩོད་དེ་ས་ལྷས་དཔངས་མཛད་དེ། །བདུད་དམག་རྣམས་ཀྱི་གཡོ་བར་མ་ནུས་པའི། །བདུད་ལས་རྒྱལ་བའི་མགོན་པོ་དེ་ལ་འདུད། །ཐོ་རང་དུས་སུ་མངོན་པར་སངས་རྒྱས་ཏེ། །མེ་ཏོག་ཆར་བབས་ས་ཆེན་རབ་ཏུ་གཡོས། །ལྷ་མི་ཀུན་གྱི་ངོ་མཚར་མཆོག་གྱུར་པ། །འགྲོ་བའི་བླ་མ་བཅོམ་ལྡན་འདས་ལ་འདུད། །ཚངས་པས་བསྐུལ་ཞིང་ཝ་ར་་སེ་རུ། །འཁོར་ལོ་དང་པོ་བདེན་བཞིའི་ཆོས་གསུངས་ཚེ། །ལྔ་སྡེ་བཟང་པོ་ལྷ་བྲན་བརྒྱད་ཁྲི་ཀུན། །བདེན་པ་མཐོང་བར་མཛད་ལ་ཕྱག་འཚལ་འདུད། །བྱ་རྒོད་

[Full Size]

སྤུངས་རིར་ཆོས་འཁོར་བར་པའི་ཚེ། །སྐུ་ལས་འོད་ཟེར་གྲངས་མེད་ཕྱོགས་བཅུར་འཕྲོས། །ངན་སོང་གསུམ་གྱི་སྡུག་བསྔལ་ཞི་མཛད་ཅིང་། །ཐམས་ཅད་དེ་ལ་འཁོད་པར་མཛད་དེར་འདུད། །ལྷ་གནས་ཀླུ་གནས་གྲོང་ཁྱེར་པདྨ་ཅན། །ཆོས་འཁོར་མཐའ་མ་ངེས་དོན་སྙིང་པོ་གསུངས། །སྐུ་ལས་འོད་སྤྲོས་འོད་རྩེར་པད་སྡོང་ལ། །སངས་རྒྱས་སྐུ་བཞུགས་རྫུ་འཕྲུལ་བསྟན་ལ་འདུད། །ནམ་ཞིག་འདུས་བྱས་མི་རྟག་བརྡའ་བསྟན་ཕྱིར། །དགུང་ལོ་བརྒྱད་བཅུར་གྲོང་ཁྱེར་རྩྭ་མཆོག་ཏུ། །མེ་ཏོག་ཆར་བབས་ས་ཆེན་གཡོས་གྱུར་ཅིང་། །ཡོངས་སུ་མྱ་ངན་འདས་ལ་ཕྱག་འཚལ་འདུད། །སྐུ་གདུང་རིང་བསྲེལ་ཆ་བརྒྱད་རབ་ཏུ་བགོས། །ཡུལ་ཕྱོགས་བརྒྱད་ཀྱི་རྒྱལ་པོས་སོ་སོར་འཁྱེར། །དད་པའི་རྟེན་དུ་ས་སྟེང་ཀུན་ཏུ་ཁྱབ། །ཚོགས་གཉིས་ཞིང་དུ་གྱུར་ལ་ཕྱག་འཚལ་འདུད། །དེ་ལྟར་ཁྱེད་ཀྱི་ཡོན་ཏན་རྒྱ་མཚོ་ལས། །ཅུང་ཟད་ཙམ་ཞིག་བདག་གི་བསྟོད་པའི་མཐུས། །འགྲོ་ཀུན་

[Full Size]

འཁོར་བའི་འདམ་ལས་ཐར་ནས་ཀྱང་། །ཕྱིར་མི་ལྡོག་པ་བདེ་ཆེན་ས་ཐོབ་ཤོག །གཞན་ཡང་དགེ་དེས་དུས་རྣམས་ཐམས་ཅད་དུ། །ནགས་ཕྱོགས་བདུད་ཀྱི་ཕྱོགས་རྣམས་ཕམ་བྱས་ཤིང་། །འགྲོ་མགོན་ཁྱེད་ཀྱི་བསྟན་པ་འདི་ཉིད་ནི། །ནུབ་པ་མེད་པར་གོང་ནས་གོང་འཕེལ་ཤོག །འཇིག་རྟེན་ཁམས་འདིར་འཁྲུག་རྩོད་མུ་གེ་དང་། །རིམས་ནད་ལ་སོགས་མི་མཐུན་ཀུན་ཞི་ནས། །འགྲོ་རྣམས་བདེ་སྐྱིད་ཕུན་སུམ་ཚོགས་པ་དང་། །མཐར་ཐུག་མངོན་པར་རྫོགས་པར་སངས་རྒྱས་ཤོག། ༈ །།འཇམ་དཔལ་དབྱངས་ལ་བསྟོད་པ་ནོར་བུའི་དྲ་བ་ཞེས་བྱ་བ། །ངག་གི་དབང་ཕྱུག་ལ་ཕྱག་འཚལ་ལོ། །མཁྱེན་རབ་ཤེས་བྱའི་མཁའ་ཀློང་ཡངས་པ་ལས། །མཁྱེན་བརྩེ་ནུས་པའི་རྟ་བདུན་འོད་ཟེར་གྱིས། །འགྲོ་བློའི་མ་རིག་མུན་པ་སེལ་མཛད་པ། །འགྲོ་བའི་སྐྱབས་གཅིག་འཇམ་དཔལ་དབྱངས་ལ་འདུད། །པད་ཟླའི་སྟེང་ན་ཆུ་ཤེལ་ལྟར་དཀར་ཞིང་།

[Full Size]

དབུ་བརྒྱན་མགུལ་མཁན་ཕྱག་གདུབ་ཞབས་གདུབ་དང་། །སེ་མོ་དོ་དང་རིན་ཆེན་དོ་ཤལ་སོགས། །སྣ་ཚོགས་བརྒྱན་གྱི་མཛེས་པར་སྤྲད་ལ་འདུད། །འོད་ཟེར་འབུམ་ཕྲག་ཕྱོགས་བཅུར་རབ་འཕྲོས་པས། །འགྲོ་ཀུན་ངན་འགྲོའི་འཇིགས་ལས་སྐྱབས་མཛད་ཅིང་། །བདེ་ཆེན་ཐར་པའི་གླིང་དུ་འདྲེན་པ་ཡི། །རྣམ་གྲོལ་ལམ་སྟོན་འཇམ་དཔལ་དབྱངས་ལ་འདུད། །མཚན་དཔེའི་རབ་བརྒྱན་སྟོན་ཟླ་ལྟར་མཛེས་ཤིང་། །ཡན་ལག་དྲུག་ཅུའི་ཆོས་སྒྲ་ལེགས་སྒྲོགས་མཛད། །མཁྱེན་བརྩེ་ཡེ་ཤེས་མཆོག་གི་ཐུགས་མངའ་བ། །འགྲན་ཟླ་ཀུན་བྲལ་འཇམ་དཔལ་དབྱངས་ལ་འདུད། །ནམ་མཁའི་འཇའམ་ཆུ་ཟླ་ཇི་བཞིན་དུ། །བག་ཆགས་མཚན་མའི་ངོས་བཟུང་དང་བྲལ་ཞིང་། །སྣང་སྟོང་སྐྱེ་མེད་དབྱིངས་ལས་སྐུར་སྤྲུལ་པ། །སྒྱུ་འཕྲུལ་གར་མཁན་འཇམ་དཔལ་དབྱངས་ལ་འདུད། །སྣ་ཚོགས་འཇའ་འོད་སྤྲིན་ཕུང་འཁྲིག་པའི་དབུས། །འོད་ལྔའི་ལྷ་མོ་མཛེས་པའི་གར་སྟབས་ཅན། །སྤོས་

[Full Size]

དང་མེ་ཏོག་རོལ་མོའི་བྱེ་བྲག་གིས། །ཀུན་ནས་མཆོད་པ་དེ་ལ་ཕྱག་འཚལ་འདུད། །མགོན་པོ་ཁྱོད་ཀྱི་ཐུགས་རྗེའི་འོད་ཟེར་གྱིས། །བདག་བློའི་གཏི་མུག་ཐིབ་པོ་ཀུན་བསལ་ནས། །རབ་བཟང་བློ་ཡི་པདྨོ་རྒྱས་གྱུར་ཅིང་། །མཁྱེན་རབ་ཆུ་གཏེར་ཆེ་ལ་མངའ་བརྙེས་ཤོག །བརྩེ་ལྡན་ཁྱེད་ཀྱི་ཐུགས་རྗེ་ཡིས། །བདག་སོགས་འགྲོ་ཀུན་རྗེས་བཟུང་སྟེ། །སྡུག་བསྔལ་འདི་ལས་ཐར་ནས་ཀྱང་། ཁྱེད་དང་དབྱེར་མེད་འགྱུར་བར་ཤོག། ༈ །།ན་མོ་ལོ་ཀེ་ཤྭ་ར་ཡ། །གང་གི་ཐུགས་རྗེ་པད་དཀར་དྲི་མེད་ལས། །དངོས་གྲུབ་མཛད་མེད་སྦྲང་རྩིའི་བཅུད་ཆེན་གྱིས། །རྐང་དྲུག་དད་ལྡན་གདུལ་བྱ་ཚིམ་མཛད་པ། །འགྲོ་བའི་སྐྱབས་གཅིག་སྤྱན་རས་གཟིགས་ལ་འདུད། །བཅོམ་ལྡན་ཚེ་དཔག་མེད་དང་རྡོ་རྗེ་འཆང་། །སྣང་མཐའ་རིགས་ལྔ་ཀུན་བཟང་ཤཱཀྱ་ཐུབ། །སངས་རྒྱས་སྟོང་སོགས་དུས་གསུམ་རྒྱལ་ཀུན་གྱི། །ཐུགས་རྗེ་གཅིག་བསྡུས་སྤྱན་རས་གཟིགས་

[Full Size]

ལ་འདུད། །འགྲོ་དྲུག་ཀུན་དང་ཁྱད་པར་བོད་ཁམས་འདི། །ཉིད་ཀྱིས་གདུལ་བྱའི་ཞིང་དུ་གྱུར་གཟིགས་ནས། །དུས་རྣམས་རྟག་ཏུ་ཐུགས་རྗེའི་ལྕགས་ཀྱུ་ཡིས། །ཡོངས་སུ་བཟུང་མཛད་སྤྱན་རས་གཟིགས་ལ་འདུད། །མེ་ཡི་འོབ་དང་ཁྲི་མུན་ཆུད་འདྲ་བའི། །སྡུག་བསྔལ་འདམ་དུ་མནར་བའི་འགྲོ་བ་ཀུན། ཁྱེད་ཀྱི་ཐུགས་རྗེ་བརྩེ་བས་མ་སྐྱབས་ན། །མགོན་མེད་ཉམས་ཐག་སེམས་ཅན་སུ་ལ་རེ། །ཐུགས་རྗེ་ཆེན་པོས་བདག་སོགས་རྗེས་བཟུང་ནས། །རི་དྭགས་རྒྱར་ཆུད་ལྟ་བུའི་འགྲོ་བ་ཀུན། །མྱུར་བ་ཉིད་དུ་ཁྱེད་ཀྱི་ཞབས་དྲུང་དུ། །སྐྱེས་ནས་ཆོས་ཀྱི་བདུད་རྩི་འཐུང་བར་ཤོག །དེ་ལྟར་སྐྱེ་དང་ཚེ་རབས་ཐམས་ཅད་དུ། མགོན་དང་དཔུང་གཉེན་བླ་མར་ཁྱེད་གྱུར་ཅིང་། །བདག་ཀྱང་རྡོ་རྗེ་འཛིན་པའི་ས་ཐོབ་ནས། །མྱུར་དུ་གཞན་དོན་བྱེད་ལ་མངའ་བརྙེས་ཤོག། ༈ །།སྒྲོལ་མ་ལ་བསྟོད་པ་ལྷའི་རྔ་སྒྲ་ཞེས་བྱ་བ། །རྗེ་བཙུན་མ་འཕགས་མ་སྒྲོལ་མ་ལ་

[Full Size]

ཕྱག་འཚལ་ལོ། །རྒྱལ་བ་ཀུན་གྱི་ཡུམ་གྱུར་བཅོམ་ལྡན་ཐུགས་རྗེ་ཅན། །འགྲོ་བ་རྣམས་ལ་མ་ལྟར་བརྩེ་བའི་ཐུགས་མངའ་ཞིང་། །དུས་རྣམས་ཀུན་ཏུ་སེམས་ཅན་དོན་ལ་རབ་བརྩོན་མཛད། །ཐུགས་རྗེའི་བདག་ཉིད་རྗེ་བཙུན་སྒྲོལ་མའི་ཞབས་ལ་འདུད། །པད་ཟླའི་སྟེང་ན་ཏཾ་ཡིག་དག་ལས་སྐུར་སྤྲུལ་པ། །སྐུ་མདོག་སྔོ་ལྗང་བཅུ་དྲུག་ན་ཚོད་དང་ལྡན་ཞིང་། །དར་གྱི་ན་བཟའ་རིན་ཆེན་འཕྲེང་བ་དོ་ཤལ་སོགས། །སྣ་ཚོགས་བརྒྱན་གྱིས་མཛེས་པར་སྤྲས་པ་དེ་ལ་འདུད། །གང་ན་སུ་ཞིག་ཁྱེད་ཀྱི་མཚན་ཙམ་ཐོས་པས་ཀྱང་། །དེ་དག་འཇིགས་པ་བརྒྱད་དང་བཅུ་དྲུག་ལ་སོགས་པ། །མི་མཐུན་གནོད་པས་ཕྱོགས་རྣམས་ཀུན་ལས་ཐར་མཛད་པ། །སྐྱབས་ཀྱི་མཆོག་གྱུར་རྗེ་བཙུན་སྒྲོལ་མའི་ཞབས་ལ་འདུད། །དེང་འདིར་ཁྱེད་ལ་ཅུང་ཟད་བསྟོད་པའི་བསོད་ནམས་དེས། །ཚེ་རབས་ཀུན་ཏུ་འཕགས་མ་ཁྱེད་ཀྱིས་རྗེས་བཟུང་སྟེ། །སྲིད་དང་ངན་འགྲོའི་འཇིགས་པ་ཀུན་

[Full Size]

ལས་ཐར་ནས་ཀྱང་། །རྫོགས་པའི་བྱང་ཆུབ་དམ་པ་མྱུར་དུ་ཐོབ་པར་ཤོག། ༈ །།ན་མོ་གུ་རུ་བྷྱཿ། སྟོབས་བཅུའི་སྟོབས་ཀྱིས་བདུད་རྣམས་རབ་བཅོམ་ཞིང་། །བྱམས་ལྡན་བྱམས་པའི་ཐུགས་ཀྱིས་འགྲོ་རྣམས་ལ། །བརྩེ་ལྡན་བརྩེ་བས་རྗེས་སུ་བཟུང་མཛད་པ། །ཐུགས་རྗེ་ཐུགས་མངའ་དེ་ལ་གུས་པས་འདུད། །གང་ཚེ་འདྲེན་མཆོག་བླ་མ་ཁྱེད་ཉིད་ནི། །གང་དག་སེམས་ཅན་རྣམས་ཀྱི་དོན་སླད་དུ། །གང་ལ་གང་འདུལ་གཟུགས་སུ་སྤྲུལ་ནས་ཀྱང་། །གང་འདིར་འགྲོ་དོན་གཡེལ་མེད་མཛད་ལ་འདུད། །སྒྲིབ་གཉིས་བག་ཆགས་ཐམས་ཅད་རབ་སྦྱངས་ཤིང་། །སྒྲིབ་ཚོགས་མ་ལུས་རང་སར་དག་མཛད་པ། །སྒྲིབ་སོགས་སྐྱོན་གྱི་མ་གོས་ཆོས་ཀྱི་རྗེ། །སྒྲིབ་པ་ཀུན་བྲལ་བླ་མའི་ཞབས་ལ་འདུད། །མཁྱེན་བརྩེ་ནུས་པ་མ་ལུས་ཕུལ་ཕྱིན་ཞིང་། །མཁྱེན་རབ་ཤེས་བྱའི་དོན་ལ་མངའ་བརྙེས་པའི། །མཁྱེན་ལྡན་འགྲོ་བའི་དོན་མཛད་ཆོས་ཀྱི་རྗེ།

[Full Size]

མཁྱེན་པའི་མངའ་བདག་བླ་མའི་ཞབས་ལ་འདུད། །ལེགས་སྐུ་བསོད་ནམས་བརྒྱ་ལས་གྲུབ་པའི་སྐུ། །ལེགས་བཤད་རྒྱ་མཚོ་སྙན་པར་སྒྲོག་པའི་གསུངས། །ལེགས་པར་རྟག་ཀྱང་སྐྱོན་དང་བྲལ་བའི་ཐུགས། །ལེགས་པའི་ལམ་སྟོན་བླ་མའི་ཞབས་ལ་འདུད། ཁྱེད་ནི་འགྲོ་བའི་སྐྱབས་གནས་དམ་པ་དེ། ཁྱེད་ཀྱི་མཚན་ཐོས་མཐོང་དང་རེག་པས་ཀྱང་། ཁྱེད་ཉིད་ལྟ་བུའི་འགྲོ་དོན་ནུས་པ་དང་། ཁྱེད་བཞིན་ཆོས་ཀྱི་མཚན་ཉིད་རབ་རྟོགས་ཤོག །སྡུག་བསྔལ་གྱིས་གཟིར་འཁོར་བའི་སེམས་ཅན་ཀུན། །སྡུག་བསྔལ་འདམ་ཆུད་སླར་ཡང་ཆགས་པ་ལ། །སྡུག་བསྔལ་ཀུན་ལས་སྐྱབས་མཛད་ཁྱོད་ཀྱིས་ནི། །སྡུག་བསྔལ་འདི་ལས་མཐར་བར་མཛད་དུ་གསོལ། །ས་དང་ལམ་རྣམས་རིམ་གྱིས་བསྒྲོད་པ་དང་། །ས་ལམ་བར་ཆོད་འགལ་རྐྱེན་ཀུན་ཞི་ནས། །ས་བཅུའི་བྱང་སེམས་ཀུན་དང་དགོངས་པ་མཉམ། །ས་གསུམ་སྐྱེ་དགུའི་འདྲེན་པར་བདག་གྱུར་ཅིག །རྣམ་གསུམ་ཚུལ་ཁྲིམས་

[Full Size]

གོ་ཆ་རབ་བགོས་ཏེ། །རྣམ་མང་འགྲོ་བློའི་སྐལ་བ་དང་མཚམ་པར། །རྣམ་དག་ཆོས་ཀྱི་བདུད་རྩིས་སྨིན་བྱས་ཤིང་། །རྣམ་མཁྱེན་ས་ལ་རང་གཞན་ཀུན་སྒྲོད་ཤོག །དེ་ལྟར་འདི་དག་རྣམས་ནི་རང་ལོ་བཅུ་ནས་བཅུ་དགུའི་བར་སྐབས་རྣམས་སུ་བརྩམས་པའི་སྡེ་མཚན་ཡིན་ཚེ། སྤྱིར་བདག་འདྲ་ཐོས་བསམ་གྱི་ནོར་གྱིས་དབེན་ཅིང་། ཁྱད་པར་ན་གཞོན་བྱིས་པའི་རྩོམ་པར་སོང་བའི་དབང་གིས་ཟློས་དང་འགལ་རྨོངས་པའི་ཆ་ཅི་མཆིས་ཐམས་ཅད་མཁྱེན་པའི་སྤྱན་ལྡན་རྣམས་ལ་བཟོད་པར་གསོལ་ཞེས། རང་ཉིད་སྙིང་ཐག་པ་ནས་གསོལ་བ་འདེབས་པ་ལགས། མངྒ་ལམ། ༡ ཞུས།

བདག་དོན་གཞན་དོན་གང་ལའང་སྦྱོར་རུང་བའི་བླ་མའི་རྣལ་འབྱོར་བྱིན་རླབས་འབྱུང་གནས།

[Full Size]

བདག་དོན་གཞན་དོན་གང་ལའང་སྦྱོར་རུང་བའི་བླ་མའི་རྣལ་འབྱོར་བྱིན་རླབས་འབྱུང་གནས་བཞུགས་སོ།

[Full Size]

ནམ་མཁའ་དང་མཉམ་པའི་སེམས་ཅན་ཐམས་ཅད་སྐུ་བཞི་དབྱེར་མེད་ངོ་བོ་ཉིད་ཀྱི་གོ་འཕངས་ལ་དགོས་པར་བྱ། དེའི་ཆེད་དུ་ལམ་ཟབ་བླ་མའི་རྣལ་འབྱོར་གྱི་རིམ་པ་ལེགས་པར་གསན་ཏེ་ཐུགས་ཉམས་སུ་བཞེད་སྙམ་པའི་ངང་ནས་མ་ཡེངས་པར་གསན་འཚལ། དེ་ལ་སྤྱིར་ཁམས་གསུམ་འཁོར་བ་སྡུག་བསྔལ་གྱི་རྒྱ་མཚོ་ལས་སྒྲོལ་ཞིང་། མཐོ་རིས་དང་ཐར་པའི་ལམ་བཟང་སྟོན་པར་བྱེད་པ་ནི་བླ་མ་དམ་པ་ཉིད་ཡིན་ཞིང་། གནས་སྐབས་དང་མཐར་ཐུག་ཐམས་ཅད་ཀྱི་དགོས་འདོད་མ་ལུས་འབྱུང་བའི་ནོར་བུ། དགེ་ལེགས་ལམ་དུ་འཁྲིད་པའི་དེད་དཔོན། ཉོན་མོངས་ནད་རྣམས་འཇོམས་པའི་སྨན་པ། ངན་འགྲོའི་འཇིགས་ལས་སྐྱོབས་པའི་སྐྱེལ་མ་ལྟ་བུ་སྟེ། མདོར་ན་ལེགས་པའི་ཡོན་ཏན་ཐམས་ཅད་ཀྱི་འབྱུང་ཁུངས་དམ་པ་ཡིན་པར། བཀའ་མདོ་རྒྱུད་ལུང་མན་ངག་ཐེག་པ་གོང་འོག་

[Full Size]

གསང་སྔགས་གསར་སྙིང་ཐམས་ཅད་ནས་དགོངས་བཞེད་གཅིག་ཏུ་མཐུན་པའི་ལུང་བརྗོད་ལས་འདས་པ་མཆིས་མདོ་ཀྱང་སྙན་དུ་གསོལ་མི་འཚལ་ཞིང་། དེ་ཉིད་ལ་ཡང་ཆོས་ཀུན་རྟེན་ཅིང་འབྲེལ་འབྱུང་གི་རང་བཞིན་ཁོ་ན་ཡིན་ཕྱིར། བླ་མའི་བྱིན་རླབས་རྒྱུད་ལ་འཇུག་པར་བྱེད་པ་ལ་དད་པ་དང་མོས་གུས་རྩེ་གཅིག་པའི་ངང་ནས་གསོལ་བ་འདེབས་པ་གལ་ཆེ་སྟེ། དཔེར་ན་ཡིད་བཞིན་གྱི་ནོར་བུ་རིན་པོ་ཆེ། དེ་ཉིད་ལས་གང་ལ་ཅི་འདོད་ཀྱི་ལོངས་སྤྱོད་འབྱུང་བ་ཆོས་ཉིད་ཡིན་ཀྱང་། རྒྱལ་མཚན་གྱི་རྩེར་བཞུགས་ཤིང་མཆོད་པར་མ་བྱས་ན་མི་འབྱུང་བའི་དཔེ་ལྟར། བྱིན་རླབས་འབྱུང་བའི་ཐབས་ལ་བླ་མའི་རྣལ་འབྱོར་བསྒོམ་ཞིང་གསོལ་བ་འདེབས་པ་ཉིད་ཁོ་ན་

[Full Size]

གཙོ་ཆེ་བའི་ཕྱིར། དེས་ན་འདི་ལྟར་དུ་བསྒོམ་སྟེ།། ༈ །།རང་གི་ལུས་གདོས་བཅས་ཤ་ཁྲག་གི་ཕུང་པོ་འདི་ཉིད་སྐད་ཅིག་གིས་ཡི་དམ་གྱི་ལྷའི་ངོ་བོར་ལམ་གྱིས་གསལ་བའི་སྤྱི་བོར་སེང་ཁྲི་པདྨ་ཉི་ཟླ་བརྩེགས་པའི་སྟེང་དུ་ངོ་བོ་རྩ་བའི་བླ་མ་ལ་རྣམ་པ་སློབ་དཔོན་རིན་པོ་ཆེ་པདྨ་འབྱུང་གནས་སྐུ་མདོག་དཀར་ལ་དམར་བའི་མདངས་དང་ལྡན་ཞིང་གཞོན་ནུ་ལོ་བརྒྱད་པའི་ན་ཚོད་ལྟ་བུ་ཤིན་ཏུ་མཛེས་པ་ལས་ཀྱང་གཟི་འོད་རབ་ཏུ་འབར་བ། ཞལ་གཅིག་ཕྱག་གཉིས་གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་འཛིན་ཅིང་། གཡོན་མཉམ་གཞག་གི་སྟེང་ན་མཚན་ལྡན་གྱི་ཐོད་པ་འཆི་མེད་ཚེ་བུམ་གྱིས་མཚན་པ་འཛིན་ཅིང་། དབུ་ལ་པད་ཞྭ་རྒོད་ཕྲུ་དར་སྣ་རྡོ་རྗེ་ཉི་ཟླས་བརྒྱན་པ་གསོལ་བ། སྐུ་ལ་ཟབ་ཆེན་གྱི་བེར་ཕོད། དར་དམར་གྱི་ཆོས་གོས། ཟ་འོག་གི་བེར་ཆམ་དང་བཅས་པ་

[Full Size]

གསོལ་ཞིང་གཟི་བརྗིད་ཀྱི་ལྷུན་ཆགས་པ། མཆན་གཡོན་དུ་ཡུམ་ཆེན་མཚོ་རྒྱལ་ཁ་ཊྭཱཾ་གྱི་རྣམ་པར་འཛིན་པ། ཞབས་སྐྱིལ་ཀྲུང་གིས་བཞུགས་ཤིང་ཐུགས་རྗེ་ཡེ་ཤེས་ཀྱི་འོད་ཟེར་ཀུན་ཏུ་འཕྲོ་བ། སྣང་ལ་རང་བཞིན་མེད་པ་སྟོང་གསལ་འཇའ་འོད་ཀྱི་སྐུར་ལམ་མེར་བཞུགས་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། །ཐུགས་ཀར་ཧཱུྃ་སྔོན་པོས་མཚན་པ་ལས་འོད་ཟེར་དཀར་དམར་མཐིང་གསུམ་སྟེང་འོག་ཕྱོགས་མཚམས་ཐམས་ཅད་དུ་འཕྲོས་པས། ཕྱོགས་བཅུའི་རྒྱལ་བ་སྲས་བཅས་རྣམས་དང་དགོངས་བརྡའ་སྙན་བརྒྱུད་བཀའ་གཏེར་བཤད་སྒྲུབ་སོགས་རྩ་རྒྱུད་ཀྱི་བླ་མ་ཐམས་ཅད་དང་། རྒྱུད་སྡེ་བཞི་དྲུག་གསང་སྔགས་ཕྱི་ནང་གི་ཡི་དམ་ལྷ་ཚོགས། གནས་གསུམ་གྱི་དཔའ་བོ་དང་མཁའ་འགྲོ་ཆོས་སྲུང་དམ་ཅན་རྒྱ་མཚོ་སོགས་མདོར་ན་མཆོད་འོས་སྐྱབས་གནས་བྱིན་རླབས་དངོས་གྲུབ་

[Full Size]

ཀྱི་མངའ་བདག་ཐམས་ཅད་ལ་ཕོག་པས། ཐུགས་དམ་གྱི་རྒྱུད་བསྐུལ་ཞིང་བདག་ལ་ཐུགས་རྗེས་དགོངས་ཏེ། སྣང་སྲིད་ཐམས་ཅད་རོལ་མོའི་སྒྲ་དང་སྤོས་དྲིས་འཚུབ་ཅིང་སྟེང་འོག་ཕྱོགས་མཚམས་ཀུན་ནས་ཁ་བ་བུ་ཡུག་འཚུབ་པ་ལྟར་བྱོན་ནས། རང་གི་སྤྱི་བོའི་བླ་མ་ལ་སིབ་ཀྱིས་ཐིམ་པས་བླ་མ་ཉིད་གཟི་བརྗིད་ཀྱི་དཔལ་དུ་འབར་བ་ལས་ཀྱང་ཆེས་ཆེར་བྱིན་རླབས་ཀྱི་འོད་མདངས་ཉི་མ་འབུམ་ལྟར་གསལ་ཞིང་། ཐུགས་རྗེའི་དགོངས་པ་རྨད་དུ་བྱུང་བས་བདག་ལ་གཟིགས་ཏེ། བླ་མ་སངས་རྒྱས་ཀྱི་བྱིན་རླབས། ཡི་དམ་ལྷ་ཚོགས་ཀྱི་དངོས་གྲུབ། མཁའ་འགྲོ་ཆོས་སྐྱོང་གི་མཐུ་སྟོབས་སོགས། མཆོག་མཐུན་གྱི་དངོས་གྲུབ་མ་ལུས་སྩལ་སྤྲུག་ཏུ་བདག་ལ་རྒྱུན་ཆད་མེད་པར་གནང་བར་གྱུར། ཅེས་བསྒོམ་ལ། ཕྱི་ནང་སྣང་སྲིད་བདག་གཞན་ཀུན་གྱི་ལུས་དང་ལོངས་སྤྱོད་མཆོད་པའི་དངོས་པོར་གྱུར་ཚད་ཐམས་ཅད་ལྟོས་པ་མེད་པར་འབུལ་ཞིང་། མཎྜལ་འབུལ་ཚིག་ཅི་རིགས་

[Full Size]

རྒྱས་བསྡུས་སྐབས་དང་སྦྱར་ལ་ཕུལ། སླར་ཡང་དེང་ནས་བཟུང་སྟེ་རྫོགས་པའི་སངས་རྒྱས་མ་ཐོབ་ཀྱི་བར་དུ་སྐྱིད་སྡུག་ལེགས་ཉེས་ཅི་དང་ཅི་ལྟར་བྱུང་རུང་རེ་ས་སྐྱབས་གནས་ཀྱི། དམ་པ་ཁྱོད་ལས་གཞན་དུ་མེད་ཅིང་། བདག་ཕ་མ་མཁའ་མཉམ་གྱི་འགྲོ་བ་མཐའ་དག་འཁོར་བ་ངན་སོང་གི་སྡུག་བསྔལ་ལས། ཐར་ནས་བླ་མེད་བདེ་བ་ཆེན་པོའི་གོ་འཕང་ཐོབ་པ་ཞིག་ཁོ་ན་མཁྱེན་སྙམ་པའི་དད་གུས་གདུང་ཤུགས་དྲག་པོ་དང་ལྡན་པའི་ངང་ནས། གསོལ་འདེབས་རྒྱས་བསྡུས་གང་འོས་ཚིག་དོན་མཐུན་པར་བྱ་ཞིང་། རྒྱུད་པའི་བླ་མ་གང་དང་གང་གི་མཚན་དང་གསོལ་འདེབས་བྱེད་ཀྱང་། སྤྱི་བོའི་རྩ་བའི་བླ་མ་ཨོ་རྒྱན་གྱི་ཆ་བྱད་དུ་བཞུགས་པ་དེ་ཉིད་ཀྱི་ངོ་བོ་ལས་གཞན་དུ་མ་གཡོས་པའི་དད་འདུན་རྩེ་གཅིག་ཕུར་ཚུགས་སུ་བྱེད་པ་ནི་གདམ་ངག་གི་ཟབ་གནད་དམ་པ་དེ། ཅིའི་ཕྱིར་རྒྱལ་བ་ཐམས་ཅད་རྣམ་པ་སོ་སོ་གང་ལ་གང་འདུལ་གྱི་ཚུལ་དུ་སྐུར་བསྟན་ཀྱང་ངོ་བོ་གཅིག་ལས་མ་གཡོས་ཤིང་། རང་རང་གི་སྣང་ངོར་སྐལ་བ་དང་མཚམས་

[Full Size]

པའི་སྐུ་གཟུགས་དེར་སྣང་བ་ཉིད་ལ་གསོལ་བ་བཏབ་པས་རྒྱལ་བ་ཀུན་ལ་གསོལ་བ་བཏབ་པར་འགྱུར་ཏེ། ངོ་བོ་གཅིག་པའི་ཕྱིར་རོ། དེ་སྙད་དུ་ཡང་། །ཨ་ཏི་བཀོད་པ་ཆེན་པོའི་རྒྱུད་ལས། །དྲིན་དང་ལྡན་པའི་བླ་མ་དེ། །སྙིང་གི་དཀྱིལ་ལམ་སྤྱི་བོའི་གཙུག །ཡན་ལག་མཐིལ་དུ་གང་བསྒོམ་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡི་འཛིན་པར་འགྱུར། །ཅེས་དང་། གཞན་ཡང་། བསྙེན་སྒྲུབ་བྱི་བ་ས་ཡ་ལས། །བླ་མའི་གསོལ་འདེབས་ལན་ཅིག་དགའ། །ནུས་པ་འབུམ་ཕྲག་ཆར་མི་འཕོད། །ཞེས་པ་ལ་སོགས་པའི་ལུང་བརྗོད་ལས་འདས་པ་མཆིས་ཤིང་། །བླ་མ་ཐོ་བརྩེགས་སུ་བསྒོམ་པ་དང་། །ཁྲོམ་ཚོགས་སུ་བསྒོམ་པ་དང་། །དཀྱིལ་འཁོར་ལྟར་བསྒོམ་པ་དང་། །གྲལ་ཐབས་སུ་བསྒོམ་པ་སོགས་ཀྱི་ལུགས་མང་ཀྱང་། གང་ཟག་སྤྲོས་བཅས་ལ་མོས་པ་དག་ལ་དགོངས་པ་ཡིན་གྱིས། དོན་དུ་ནི་ཐམས་ཅད་ཀུན་འདུས་བླ་མ་ནོར་བུ་ལུགས་སུ་བསྒོམ་པ་འདིར་མ་འདུས་པ་མེད་ཅིང་། བྱིན་རླབས་མཆོག་ཏུ་མྱུར་བའི་ཟབ་གནད་ཀྱི་སྙིང་པོ་ཡིན་ཕྱིར་འདི་ཉིད་ལ་

[Full Size]

འབད་པར་བྱ་ཞིང་།། ༈ །།གསོལ་འདེབས་ཀྱི་མཐར་དབང་གཞི་ལན་ཐབས་ཀྱང་། སྐུ་གསུང་ཐུགས་དང་དབང་གཞི་སོ་སོར་དབྱེ་བར་མཛད་པ་མང་ཡོད་ཀྱང་། འདིར་སྤྲོས་མེད་ཆིག་དྲིལ་དུ་ཉམས་སུ་བླང་བར་བྱ་སྟེ།། ༈ །།དེ་ལྟར་སྙིང་ཁོང་རུས་པའི་གཏིང་ནས་གསོལ་བ་བཏབ་པ་ལ་བརྟེན་ནས། བླ་མའི་སྐུ་གསུང་། ཐུགས་ལས་འོད་ཟེར་དཀར་དམར་མཐིང་གསུམ་འཕྲོས་པས། རང་གི་ལུས་ངག་ཡིད་གསུམ་ལ་ཕོག །སྒོ་གསུམ་གྱི་སྡིག་སྒྲིབ་ཉམས་ཆགས་ཐམས་ཅད་དག །བུམ་གསང་ཤེར་ཡེ་ཚིག་དབང་དང་བཅས་པ་ཐོབ། ལམ་སྐྱེད་རྫོགས་ཟུང་འཇུག་སྒོམ་པ་ལ་དབང་། འབྲས་བུ་སྐུ་གསུམ་དབྱེར་མེད་ངོ་བོ་ཉིད་ཐོབ་པའི་རྟེན་འབྲེལ་མཐའ་དག་འགྲིག །སླར་བླ་མ་ཉིད་འོད་དུ་ལྟེམ་གྱི་ཞུ་ནས་རང་སེམས་དང་དབྱེར་མེད་དུ་འདྲེས་པར་གྱུར། ཅེས་བསམ་ལ། འདས་མ་འོངས་ད་ལྟར་དུས་གསུམ་གྱི་རྟོག་པ་

[Full Size]

བཟང་ངན་གང་གིས་ཀྱང་མ་བསླད་ཅིང་། དྲན་མེད་ཧད་པོར་མ་སོང་བའི་གསལ་སྟོང་ཟུང་འཇུག་ཁྱབ་གདལ་ཆེན་པོའི་ཀློང་དུ་བཅོས་སླད་དང་བྲལ་བར་མཉམ་པར་འཇོག་པ་ནི་སངས་རྒྱས་ཀྱི་དགོངས་པ་ཞེས་པའམ། གདོད་མའི་གནས་ལུགས་ཅེས་སམ། ཆོས་སྐུའི་ངོ་བོ་ཞེས་པ་ཡང་དེ་ལས་ལོག་ན་མེད་པའི་ཕྱིར། རང་རིག་བླ་མ་དང་དབྱེར་མེད་པའི་ཕྱིར་ན་གསོལ་བ་འདེབས་མཁན་དང་འདེབས་ཡུལ་གཞན་མེད་ཅིང་མ་གྲུབ་པ་དེ་ཁོ་ན་ཡང་དག་དོན་གྱི་བླ་མའི་རྣལ་འབྱོར་མཆོག་ཏུ་གྱུར་པས་དེ་ཁོ་ན་ཉིད་ལ་བརྩོན་པར་བྱ་ཞིང་། དེ་ཉིད་དམིགས་མེད་ཀྱི་བསྔོ་བའི་མཐར་ཐུག་ཡིན་ཀྱང་། བསྔོ་བ་སྨོན་ལམ་གྱི་ཚིག་བརྗོད་པར་སྤྲོ་ན། དེ་ལྟར་མ་རྟོག་པའི་སེམས་ཅན་འཁོར་བར་འཁྱམས་པ་རྣམས་ལ་དམིགས་ཏེ་སྟོང་ཉིད་སྙིང་རྗེ་དབྱེར་མེད་ཀྱི་ངང་ནས་སྨོན་ལམ་གྱི་རིགས་གང་འོས་བརྗོད། ༈སླར་རྗེས་ཐོབ་ཀྱི་ལམ་ཁྱེར་དུ། རང་ལུས་ཡི་དམ་ལྷའི་ང་རྒྱལ་དང་སྤྱི་བོའི་རིགས་ཀྱི་བདག་པོ་བླ་མ་ཉིད་འབྲལ་མེད་དུ་བཞུགས་པར་མོས་པའི་དྲན་པ་རྒྱུན་ལྡན་གྱི་ངང་ནས། ངག་གི་སྨྲ་བརྗོད་ཐམས་ཅད་གསོལ་འདེབས་

[Full Size]

ཁོ་ན་རུ་དམིགས། རང་ཉིད་ལམ་དུ་ཞུགས་ཏེ་འགྲོ་བའི་དུས་སུ་གཡས་ཕྱོགས་ཀྱི་བར་སྣང་ལ་བླ་མ་བཞུགས་པ་ལ་སྐོར་བ་བྱེད་པར་བསམ། ཉལ་བའི་ཚེ་རང་གི་སྙིང་པདྨ་འདབ་བརྒྱད་ཁ་ཟུམ་པའི་ནང་དུ་བླ་མ་བཞུགས་པར་མོས། བཟའ་བཏུང་ལ་ལོངས་སྤྱོད་པའི་སྐབས་སུ་ཡང་སྙིང་གི་པདྨ་ཁ་བྱེ་བར་བླ་མ་བཞུགས་པ་ལ་མཆོད་པ་འབུལ་བར་བསམ། ལུས་ལ་ནད་ཀྱི་རྣམ་པ་ཅི་བྱུང་ཀྱང་གང་དུ་ན་བའི་སར་བླ་མའི་སྐུ་ཆུང་ལ་སྐྱེ་མཆེད་འདོད་པར་གསལ་བའི་སྐུ་ལས་བདུད་རྩིའི་རྒྱུན་བབས་པས་ནད་ཐམས་ཅད་སངས་ཀྱི་དག་པར་བསམ། དེ་ལས་གཞན་པའི་དུས་ཐམས་ཅད་དུ་སྤྱི་བོར་བླ་མ་བཞུགས་པ་ལ་མོས་གུས་དུང་ངེ་བ་རྒྱུན་ལྡན་དུ་བྱས་པས། རང་ཉིད་འཆི་ཀར་འཕོ་བའི་གདམས་པ་ཡང་དེ་ཀས་ཆོག་པའི་ཕྱིར་ཡེངས་མེད་དུ་འབད་པར་བྱ། དེ་ལྟར་འདི་ལྟ་བུ་ལ་རྒྱུན་ལྡན་དུ་ཉམས་སུ་བླང་བ་ནི་ཆོས་ཐམས་ཅད་ཀྱི་སྙིང་པོའོ། རིག་འཛིན་གྲུབ་ཐོབ་ཐམས་ཅད་ཀྱི་གཤེགས་ཤུལ། ཟབ་དོན་གདམས་པ་ཀུན་གྱི་གནད་འགག །སྨིན་བྱེད་དབང་བསྐུར་ཐམས་ཅད་ཀྱི་མཆོག་

[Full Size]

གྱུར། །གྲོལ་བྱེད་ཟབ་འཁྲིད་ཐམས་ཅད་ཀྱི་གཙོ་བོ། །སྡིག་བཤགས་སྒྲིབ་སྦྱོང་ཐམས་ཅད་ཀྱི་དམ་པ། ཅི་བྱེད་ཆོས་སུ་འགྲོ་བའི་མན་ངག་ཡང་སྙིང་དུ་གྱུར་པ་ཉིད་དེ། གདམས་ངག་ཐམས་ཅད་ཀྱི་མཐར་ཐུགས་འདི་ལྟ་བུ་ཅིག་ལ་ཉམས་ལེན་མ་བྱས་ན། དེང་སང་གི་སྙིགས་དུས་ཀྱི་སེམས་ཅན་ཚེ་ཐུང་ཞིང་གཡེང་བ་ཆེ་བ། འདོད་པ་ཆེ་ཞིང་སྙིང་རུས་ཆུང་བ། བློ་སྣ་མང་ལ་གང་བྱེད་མཐར་བསྐྱེལ་བ་ཉུང་བས། མི་ཚེ་ཧྲིལ་པོར་ཆོས་བྱས་པར་བརློམས་ཀྱང་ཤི་བའི་དུས་སུ་བློའི་གཏད་པ་ཅི་ཡང་མེད་པར་ཐུམས་ཀྱི་འགྲོ་བ་མང་ཞིང་། དེ་ཚེ་ཤུལ་དུ་དགེ་བ་བྱེད་པ་ལ་རེ་ཞིང་བློ་སྣ་ཕྱི་ལ་ལུས་པ་རྣམས་ནི་བྱས་པ་དོན་མེད་མི་ཚེ་སྟོང་ཟད་རང་གི་རང་བསླུས་སུ་སོང་བ་ཡིན་པས། དེས་ན་ད་ལྟ་རང་དབང་ཡོད་དུས་གཏན་གྱི་མདུན་མ་བསྒྲུབ་པའི་ཐབས་ཟབ་མོ་འདི་ལྟ་བུ་ལ་བརྩོན་ཏེ། རང་བཞིན་དོན་གཉིས་འགྲུབ་པའི་ལམ་བཟང་འདི་ཉིད་ལ་རྒྱུན་ལྡན་དུ་འབད་པར་མཛད་འཚལ། ༈དེ་ལྟར་བླ་མའི་རྣལ་འབྱོར་འདི་ཉིད་རང་གི་ཉམས་སུ་ལེན་པའི་སྐབས་སུ་ནི་ཡིག་ཆེན་གྱི་ཚིག་རྣམས་ངག་འདོན་དུ་

[Full Size]

གསོལ་འདེབས་གང་རིག་དང་སྦྱར་ནས་བྱ་ཞིང་ཡིག་ཆུང་གི་དོན་རྣམས་སེམས་ལ་འགྲིས་པར་བྱ། གང་ཟག་གཞན་ལ་བཤད་པའི་ཚེ་ན་ནི་ཐམས་ཅད་སྦྲེལ་ནས་བཤད་པར་བྱའོ། །འདི་ལྟ་བུ་ཞིག་དགོས་ཞེས་དྲིན་ཅན་དྷརྨའི་མཚན་ཅན་གྱིས་བསྐུལ་བར་མཛད་པའི་ངོར་བཀོད་པའོ། །འདིས་ཀྱང་མཁའ་ཁྱབ་འགྲོ་བ་ཐམས་ཅད་དཔལ་ལྡན་བླ་མ་མཆོག་གི་གོ་འཕངས་དམ་པ་མྱུར་དུ་ཐོབ་པར་གྱུར་ཅིག །དགེའོ། ༡ཞུས་ཁུལ།

གསང་སྔགས་རྙིང་ལུགས་ལྟར་གྱི་ཆ་གསུམ་གཏོར་ཆོག་རྒྱས་པ།

[Full Size]

གསང་སྔགས་རྙིང་ལུགས་ལྟར་གྱི་ཆ་གསུམ་གཏོར་ཆོག་རྒྱས་པ་བཞུགས་སོ། །

[Full Size]

དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། མདོ་རྒྱུད་ཐུན་མོང་ནས་གསུངས་པའི་ཆ་གསུམ་གཏོར་མ་ཇི་ལྟར་བྱ་བའི་ལམ་རིམ་ནི། སྤྱིར་གསང་སྔགས་གསར་སྙིང་ཐུན་མོང་ལྟར་ན་རྣལ་འབྱོར་ཡོ་གའི་རྒྱུད་སྡེ་དག་ལས་གསུངས་པ་དིང་སང་ཆོས་རྒྱུད་ཕལ་མོ་ཆེས་ཕྱག་ལེན་ལ་མཛད་བཞིན་བཞིན་པ་ཡིན་མོད་ཀྱི། འདིར་གསང་སྔགས་རྙིང་ལུགས་ལ་གྲགས་པའི་འདུས་པ་མདོའི་དཀྱིལ་ཆོག་དང་། ཞི་ཁྲོ་བཀའ་བརྒྱད་བདེ་གཤེགས་འདུས་པ་སོགས་ལས་ཇི་ལྟར་གསུངས་བཞིན་བཀོད་པར་བྱ་བ་ལ། དེ་ཡང་ཆུ་གཏོར་སོགས་ཀྱི་སྐབས་དང་འབྲེལ་བའི་ཚེ་ནི་གཏོར་རྫས་བཤམས་དགོས་སོགས་སྐབས་དེ་དང་མཐུན་པར་ཁྱེར་བདེ་ཙམ་ལས་འོས་མེད་རུང་། གང་ཞིག་ནད་པ་སོགས་ཀྱི་དོན་

[Full Size]

ནམ། དེ་ལས་གཞན་ཡང་རུང་བར་ཆ་གསུམ་ཆེད་གཏད་དུ་གཏོང་བ་ལ་ནི། སྟེགས་གཙང་མའི་ཁར་མེ་ཏོག་སེལ་མ་བཀྲམ་ལ། རིན་ཆེན་གྱི་སྣོད་བཟང་པོ་གསུམ་ལ་གཏོར་མ་ཟླུམ་པོ་པད་འདབ་སྦྱར་བ་གསུམ་གྱི་དང་པོ་ཕྱོགས་སྐྱོང་རྒྱལ་ཆེན་སོགས་ཀྱི་དེ་ལ་དཀར་གསུམ་མངར་གསུམ་ཟས་སྣ་བཟང་པོ་སོགས་གཙོ་ཆེར་བླུགས། གཉིས་པ་སྡེ་བརྒྱད་སོགས་རིས་དྲུག་གི་གཏོར་མ་དེ་ལ་ཤ་ཆང་སོགས་བཟའ་བཏུང་ཤས་ཆེ་བ་དང་། གསུམ་པ་ལན་ཆགས་བགེགས་རིགས་ཀྱི་གཏོར་མ་ནི་ནད་པའི་ལུས་བསྒྲེས་པའི་ཟན་གྱི་ཆང་བུ་སོགས་ཀྱང་བླུག་ཏུ་རུང་ལ་གཞན་ཡང་འབྲུ་ཆེན་དང་ལ་ཕུག་བྲ་ཁུར་སྣུམ་སྔོ་ཚོད་སོགས་ཟས་སྐོམ་བཟང་ངན་སྣ་ཚོགས་པ་སྤུངས་པ་དང་། གཏོར་མ་གསུམ་གར་འབྲུ་སྨན་ཤིང་ཏོག་ཟས་སྣ་སོགས་ཇི་ལྟར་སྣ་འཛོམ་

[Full Size]

ཞིང་ཚང་བ་ལེགས་ལ། རིན་ཆེན་མཆོད་རྡར་སོགས་ཡོད་ནའང་བརྡར་ཏེ། མདོར་ན་འདོད་ཡོན་རྒྱ་གང་ཆེར་བསགས་ལ་བླུག་ནས་བཤམས་པ་དང་ལྷན་ཅིག་ཕྱི་མཆོད་སྣ་ལྔ་ཚང་བ་ཡང་བགྲམ་ལ་བཀོད་པས་མཛེས་པར་བྱའོ། ཆོ་ག་དངོས་ལ། ཆུ་གཏོར་དང་འབྲེལ་བ་ན་དེ་ཀའི་བདག་བསྐྱེད་སྤྱན་རས་གཟིགས་སྔོན་དུ་ཡོད་པས་འཐུས་ཤིང་། གསུམ་པ་བགེགས་གཏོར་སྐབས་སུ་སྤྱན་རས་གཟིགས་ཉིད་རྟ་མགྲིན་དུ་གནས་བསྒྱུར་བར་བྱ་བ་ཡིན་ལ། ཆུ་གཏོར་གྱི་ཞོར་མ་ཡིན་པ་ཆ་གསུམ་ཟུར་དུ་བྱེད་པ་ཡིན་ན། བདག་བསྐྱེད་རྡོར་སེམས་བསྐྱེད་པར་གསུངས་པས་ན། སྐྱབས་སེམས་ཡན་ལག་བདུན་པ་སྤྱི་མཐུན་སྔོན་དུ་བཏང་ལ། ཨོཾ་སྭ་བྷ་ཝ་ཤུདྡྷཿ སརྦ་དྷརྨཿ སྭ་བྷཱ་བ་ཤུདྡྷོ྅ཧཾ། བདག་གཞན་སྣང་སྲིད་འཁོར་འདས་ཀྱི་དངོས་འཛིན་བག་ཆགས་ཐམས་ཅད་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས། པད་དཀར་ཟླ་བའི་གདན་གྱི་སྟེང་དུ་རང་རིག་ཡི་གེ་ཧཱུྃ་དཀར་པོའི་རྣམ་པར་གསལ་བ་ལས་འོད་འཕྲོས། རྒྱལ་བ་མཆོད། སེམས་ཅན་གྱི་དོན་བྱས་

[Full Size]

འོད་ཟེར་ཚུར་འདུས་ཧཱུྃ་ལ་ཐིམ། ཡོངས་སུ་གྱུར་པ་ལས་རང་ཉིད་རིགས་དང་དཀྱིལ་འཁོར་ཐམས་ཅད་ཀྱི་ཁྱབ་བདག་དཔལ་རྡོ་རྗེ་སེམས་དཔའ་སྐུ་མདོག་ཟླ་བའི་འོད་མདངས་ལྟར་དཀར་ཞིང་གསལ་འཚེར་ཞི་འཛུམ་ཅན། ཕྱག་གཡས་གསེར་གྱི་རྡོ་རྗེ་ཐུགས་ཀར་བསྟོད་དེ་འཛིན་ཅིང་གཡོན་པས་དངུལ་གྱི་དྲིལ་བུ་དཀུར་བསྟེན་པ། དར་གྱི་ན་བཟའ་དང་རིན་པོ་ཆེའི་རྒྱན་ཆ་ལུགས་སྣ་ཚོགས་པས་མཛེས་ཤིང་བརྗིད་པ། འོད་ལྔའི་ཀློང་ན་རྡོ་རྗེའི་སྐྱིལ་ཀྲུང་གིས་བཞུགས་པར་གསལ་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ་ལས་འོད་འཕྲོས་པས། ཕྱོགས་བཅུའི་རྒྱལ་བ་སྲས་བཅས་མ་ལུས་དཔལ་རྡོ་རྗེ་སེམས་དཔའི་རྣམ་པར་བྱོན་ནས་བདག་དང་དབྱེར་མེད་དུ་ཐིམ་པར་གྱུར། ཧཱུྃ། ཡེ་ཤེས་ཕུང་པོ་མཁའ་འདྲ་བའི། །སྐུ་གསུང་ཐུགས་ཀྱི་བདག་ཉིད་ཆེ། །སྤྲུལ་པ་ཀུན་གྱི་འབྱུང་གནས་གཙོ། །རྡོ་རྗེ་སེམས་དཔའ་གཤེགས་སུ་

[Full Size]

གསོལ། །བཛྲ་ས་མཱ་ཛཿ ཛཿཧཱུྃ་བྃ་ཧོཿ སླར་ཡང་གནས་གསུམ་འབྲུ་གསུམ་ལས་འོད་འཕྲོས་པས་དབང་གི་ལྷ་རིགས་ལྔ་འཁོར་བཅས་སྤྱན་དྲངས་པ་རྣམས་ཀྱི་བདུད་རྩིའི་བུམ་པས་དབང་བསྐུར་ནས་བུམ་པའི་ཆུས་ཚངས་བུག་དུ་བབས་པས་སྐུ་གང་། དྲི་མ་དག་ཆུ་ལྷག་མ་ཡར་ལུད་པས་རིགས་ལྔས་དབུ་བརྒྱན་པར་གྱུར། རང་གི་གནས་གསུམ་གྱི་འོད་ཟེར་མཆོད་རྫས་རྣམས་ལ་ཕོག་པ་ཙམ་གྱིས། མ་དག་འབགས་རྩོགས་ཀྱི་དྲི་མ་ཐམས་ཅད་དང་བྲལ་ཏེ། ཀུན་ཏུ་བཟང་པོའི་མཆོད་སྤྲིན་བླ་ན་མེད་པ་ནམ་མཁའ་རབ་འབྱམས་ཀྱི་མཐར་ཁྱབ་ཅིང་རྒྱུན་མི་ཆད་པའི་རྒྱལ་བ་ཀུན་གྱི་སྤྱོད་ཡུལ་རྨད་དུ་བྱུང་བའི་རང་བཞིན་དུ་གྱུར། ཨོཾ་རྒྱལ་བ་རྒྱ་མཚོ་ཡེ་ཤེས་ཀྱིས། །སྲིད་པ་རྒྱ་མཚོ་མཐའ་ཡས་ཀུན། །སྤྱོད་པ་རྒྱ་མཚོ་རྨད་བྱུང་བས། །ཀུན་བཟང་མཆོད་སྤྲིན་མཆོག་ཏུ་རོལ།

[Full Size]

བཛྲ་སཏྭ་ས་པ་རི་ཝ་ར་བཛྲ་ཨརྒཾྷ། པདྱཾ། པུཥྤེ། དྷཱུ་པེ། ཨཱ་ལོ་ཀེ གནྡྷེ། ནཻ་ཝདྱ། ཤཔྟ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་་ས་མ་ཡེ་ཨཱཿཧཱུྃ། ཧཱུྃ། རྣམ་དག་སྒྲིབ་པ་སྲིད་གསུམ་སྐྱོན་བྲལ་ཞིང་། །སྟོན་ཀའི་ཟླ་གསལ་དྲི་མེད་ཞལ་མངའ་བ། །བཅོམ་ལྡན་བདེར་གཤེགས་རྡོ་རྗེའི་དཀྱིལ་འཁོར་གཙོ། ཁྱབ་བདག་རྡོ་རྗེ་སེམས་ལ་ཕྱག་འཚལ་བསྟོད། ཐུགས་ཀར་ཟླ་བ་ཉ་གང་བའི་གདན་སྟེང་དུ་ཧཱུྃ་ཡིག་དཀར་པོའི་མཐའ་སྐོར་དུ་སྔགས་ཀྱིས་བསྐོར་བ་ལས་འོད་ཟེར་གྲངས་མེད་འཕྲོས་པས་འགྲོ་བ་མཐའ་དག་གི་སྡིག་སྒྲིབ་ཉོན་མོངས་སྡུག་བསྔལ་ཞི་བར་གྱུར། ཨོཾ་བཛྲ་སཏྭ་ཧཱུྃ། ཞེས་ལོང་ཁྱབ་དང་བསྟུན་ནས་ཅི་ནུས་བཟླས་པའི་མཐར། བཛྲ་སཏྭ་ས་པ་རི་ཝ་ར་བཛྲ་ཨརྒཾྷ་སོགས་ཀྱིས་མཆོད་ཅིང་། མི་མཉམ་པའི་ལྷ་ཁྱོད་རྟག་ཏུ་བདག་ལ་ནི། །ཐུགས་རྗེའི་

[Full Size]

སྤྱན་གྱིས་གཟིགས་ཤིང་རྟག་ཏུ་འགྲོ་བའི་དཔལ། །བྱང་ཆུབ་མཆོག་གི་སྤྱོད་པ་སྒྲུབ་པར་དམ་བཅས་པའི། བདག་གི་རེ་བའི་འབྲས་བུ་འདི་ཡང་མཆིས་པར་མཛོད། །དེ་ལྟར་འདི་ཡན་ཆད་ནི་བདག་ནུས་ལྡན་དུ་སྒྲུབ་པའི་ཆོ་ག་སྟེ། ཅི་ནས་ཀྱང་མེད་དུ་མི་རུང་ཞིང་། གལ་ཏེ་ཆུ་གཏོར་གྱི་བདག་བསྐྱེད་དང་འབྲེལ་བ་ཡིན་ན་འདི་མེད་ཀྱང་ཆོག་གོ །དེ་ན་ཆ་གསུམ་གཏོར་མ་བྱིན་རླབས་བྱ་སྟེ། བསང་ཆུ་གཙང་མ་འཐོར་ལ། ཨོཾ་བཛྲ་ཡཀྵ་ཧཱུྃ། ཨོཾ་སྭ་བྷཱ་བ་ཤུདྡྷཿ སརྦ་དྷརྨཿ སྭ་བྷཱ་ཝ་ཤུདྡྷོ྅ཧཾ། གཏོར་མའི་ཉེས་སྒྲིབ་མཐའ་དག་སྦྱང་ཞིང་གདོད་ནས་རྣམ་པར་དག་པའི་ངོ་བོར་ལྷུན་གྱིས་གྲུབ་པར་གྱུར། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐ་ཁཾ་ཨུཏྒ་ཏེ་སྥ་ར་་ཨི་མཾ་ག་ག་ན་ཁཾ་སྭཱ་ཧཱཿ གཏོར་རྫས་འདོད་པའི་ཡོན་ཏན་ཟད་མེད་དུ་འཕེལ་བར་གྱུར། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊཿ

[Full Size]

མགྲོན་སོ་སོའི་ཡིད་ལ་ཇི་ལྟར་འདོད་པའི་དངོས་པོར་གྱུར། ན་མ་སྶརྦ་ཏ་ཐཱ་ག་ཏ་ཨ་བ་ལོ་ཀི་ཏེ། ཨོཾ་སམྦྷ་ར་སམྦྷ་ར་ཧཱུྃ། མགྲོན་རིགས་མཆོག་དམན་བར་མ་ཀུན་གྱིས་ཕམ་རྒྱལ་འཐབ་རྩོད་མེད་པར་ཐོབ་ཅིང་ཚིམ་པར་གྱུར། སརྦ་ཀ་རི་སརྦ་སིདྡྷི་ཧཱུྃ། མགྲོན་ཐམས་ཅད་དགྱེས་པས་བདག་གིས་ཇི་ལྟར་བསྒོ་བའི་བཀའ་ཉན་ཅིང་གསུང་སྒྲུབ་པར་གྱུར། །བདག་གི་བསམ་པའི་སྟོབས་དང་ནི། ཅེས་སོགས་ནས། །ཐོག་པ་མེད་པ་འབྱུང་གྱུར་ཅིག དེ་ནས་དང་པོར་མགོན་པོ་ཡོན་ཏན་གྱི་མགྲོན་དུ་གྱུར་པ་གཙང་མ་རིས་ཀྱི་དཔལ་མགོན་བདུན་ཅུ་སོགས་སྤྱན་དྲངས་པ་ནི། ཨོ་བཛྲ་སཏྭ་ཧཱུྃ། ཛཿཧཱུྃ་བྃ་ཧོཿ བདག་ཉིད་རྡོར་སེམས་ཐུགས་སྲོག་ཧཱུྃ་ལས་བྱམས་དང་སྙིང་རྗེ་དགའ་བ་བཏང་སྙོམས་ཀྱི་འོད་ཟེར་ལས་སྤྲུལ་པའི་ལྷ་མོ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའི་ཕྱག་རྒྱ་ཅན་

[Full Size]

གྲངས་མེད་པ་འཕྲོས་ཏེ་ཡོན་ཏན་གྱི་མགྲོན་རྣམས་སྤྱན་དྲངས་པར་གྱུར། ཕྱོགས་སྐྱོང་འཇིག་རྟེན་སྐྱོང་བ་དབང་དང་ལྡན། །ཐུགས་རྗེ་ཐབས་མཁས་ཐུགས་དམ་དཀྱེལ་པོ་ཆེ། །ལྷ་དང་དྲང་སྲོང་གཤིན་རྗེ་སྲིན་པོ་ཀླུ། །རླུང་ལྷ་གནོད་སྦྱིན་བགེགས་གཟའ་རྒྱུ་སྐར་པ། །དེ་དག་སོ་སོའི་དབང་པོའི་སྐུར་སྟོན་པ། །ཕྱོགས་བཅུའི་འཇིག་རྟེན་སྐྱོང་བ་བཞུགས་སོ་འཚལ། །བསྟན་པ་རྒྱས་པའི་སླད་དུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱི་གཤེགས་སུ་གསོལ། །ཚངས་པ་དང་ནི་བརྒྱ་བྱིན་དང་། །རྒྱལ་ཆེན་བཞི་དང་ཕྱོགས་སྐྱོང་བཅུ། །ཕྱི་ཡི་མགོན་པོ་ཐུགས་དམ་ཅན། །དམ་ཚིག་དབང་གིས་སྤྱན་འདྲེན་གྱི། །མཆོད་ཕྱིར་གནས་འདིར་གཤེགས་སུ་གསོལ། །ཨོཾ་ད་ཤ་དིཀ་ལོ་ཀ་པ་ལ་ཨ་ཏི་པ་ཏ་ཡེ། ས་པ་རི་ཝ་ར་ས་མ་ཛཿ ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་ཕྱོགས་སྐྱོང་

[Full Size]

མགོན་པོ་རྣམས། །མཆོད་ཡོན་བཞེས་ནས་འདི་ཉིད་དུ། །བཞུགས་ཤིང་བདག་ལ་དགྱེས་པར་མཛོད། །ག་ག་ན་ས་མ་ཡ་ཧཱུྃ། ཞེས་བརྗོད་པས། མདུན་དུ་རིན་པོ་ཆེའི་གཞལ་མེད་ཁང་སྒོ་རྐྱང་རྟ་བབ་མེད་པ་ཡངས་ཤིང་རྒྱ་ཆེ་བར་པདྨའི་གདན་ལ་བཞུགས་པར་བསམ་ནས། ཧཱུྃ། །དག་ཅིང་གཙང་མར་སྦྱར་བ་ཡི། མཆོད་ཡོན་མེ་ཏོག་སྤོས་རབ་དང་། །མར་མེ་ཞལ་ཟས་གཏོར་མ་དྲི། །རོལ་མོ་བསྟོད་དབྱངས་བཅས་པ་འདི། །འཇིག་རྟེན་སྐྱོང་བའི་ཚོགས་ལ་འབུལ། །ཐུགས་རྗེས་བརྩེ་བར་དགོངས་ནས་ཀྱང་། །བསྟན་པ་བསྲུང་ཕྱིར་བཞེས་སུ་གསོལ། །ཨོཾ་ད་ཤ་དིཀ་ལོ་ཀ་པ་ལ་ས་པ་རི་ཝ་ར་གྲྀཧྣེ་དཾ། ཨརྒཾྷ་སྭཱ་ཧཱ། པུཥྤེ་སྭཱ་ཧཱ། ཞེས་སོགས་ཀྱི་མཐར། ཤཔྟ་སྭཱ་ཧཱ། ཞེས་མཆོད་ནས། བསྟོད་པ་ནི། དབང་པོ་རྡོ་རྗེ་འཆང་བའི་ལྷ། །ལྷ་ཡི་རྒྱལ་པོ་གདོན་གྱི་བདག །ཤར་ཕྱོགས་

[Full Size]

དྲི་ཟའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །ཆོད་ཅིང་བསྟོད༴ །གཤིན་རྗེ་བེ་ཅོན་འཆང་བའི་ལྷ། །མ་མོའི་རྒྱལ་པོ་གདོན་གྱི་བདག །ལྷོ་ཕྱོགས་གཤིན་རྗེའི༴ མཆོད་ཅིང་༴ །བདེན་དང་བྲལ་བ་ལེགས་ལྡན་ལྷ། །སྲིན་པོའི་རྒྱལ་པོ་གདོན་གྱི་བདག །ལྷོ་ནུབ་སྲིན་པོའི༴ །མཆོད་ཅིང་༴ །ཞགས་པ་ཐོགས་པ་ཆུ་ཡི་ལྷ། །ཀླུ་ཡི་རྒྱལ་པོ་གདོན༴ །ནུབ་ཕྱོགས་ཆུ་ལྷའི་ཚོགས་བཅས་ལ། །མཆོད་ཅིང་༴ །རླུང་སྟེ་སྲོག་ཀྱང་འཛིན་པའི་ལྷ། །རིག་འཛིན་རྒྱལ་པོ་གདོན༴ །ནུབ་བྱང་རླུང་ལྷའི་ཚོགས་བཅས་ལ། མཆོད་ཅིང་༴ །གནོད་སྦྱིན་ལག་ན་དབྱིག་ཏེ་ཐོགས། །ནོར་སྲུང་རྒྱལ་པོ་གདོན་གྱི་བདག །བྱང་ཕྱོགས་གནོད་

[Full Size]

སྦྱིན་ཚོགས་བཅས་ལ། མཆོད་ཅིང་༴ །དབང་དང་ལྡན་པ་འདྲེན་པའི་ལྷ། །འབྱུང་པོའི་རྒྱལ་པོ་གདོན༴ །བྱང་ཤར་དབང་ལྡན་ཚོགས༴ མཆོད༴ །སྟེང་གི་ཚངས་པ་ཆེན་པོ་དང་། །ཉི་མ་ཟླ་བ་གཟའ་ཆེན་པོ། །གཟའ་དང་རྒྱུ་སྐར་ཚོགས་བཅས་ལ། མཆོད༴ །འོག་གི་ཀླུ་སྟེ་ས་ཡི་ལྷ། །ས་འཛིན་ལག་པ་ཆེན་པོ་དང་། །དམ་ཚིག་ཤེས་པའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཟབ་ཅིང་རྒྱ་ཆེ་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོོ། །སྤྱན་མི་བཟང་དང་རྣམ་ཐོས་སྲས། །རྒྱལ་ཆེན་རྣམས་ལ་ཕྱག་འཚལ་བསྟོད། །ཨོཾ་ཨིནྡྲ་ཡེ་སྭཱ་ཧཱཿ ཨགྣི་ཡེ་སྭཱ་ཧཱ། ཡ་མ་ཡེ་སྭཱ་ཧཱ། ནཻ་རི་ཏྱ་སྭཱ་ཧཱ། ཝ་རུ་་ཡེ་སྭཱ་ཧཱ། བ་ཡ་བེ་སྭཱ་ཧཱ། ཀུ་ཝེ་ར་ཡེ་སྭཱ་ཧཱ། ཨི་ཤ་ དབང་པོ་ མེ་ལྷ་ གཤིན་རྗེ་ སྲིན་པོ་ ཆུ་བདག་ རླུང་ལྷ་ གནོད་སྦྱིན་

[Full Size]

ནཱ་ཡེ་སྭཱ་ཧཱཿ བྲ་ཧྨ་ི་སྭཱ་ཧཱ། སུརྻ་ཙནྡྲ་ཡེ་སྭཱ་ཧཱ། པྲ་སྠི་བྷྱཿསྭཱ་ཧཱ། ན་ག་བྷྱཿསྭཱ་ཧཱ། ཨོཾ་དྷྲྀ་ཊ་རཥྚ་ཡེ་སྭཱ་ཧཱ། ཨོཾ་བི་རུ་དྷ་ཀཱ་ཡེ་སྭཱ་ཧཱ། ཨོཾ་བི་རུ་པཀྵ་ཡེ་སྭཱ་ཧཱ། ཨོཾ་བཻ་ཤྲ་མ་་སྭཱ་ཧཱ། ན་མོ་ཆོས་རྣམས་རང་བཞིན་རྣམ་དག་ཅིང་། །རྒྱལ་བ་སྲས་བཅས་ཐུགས་རྗེ་དང་། །སྔགས་དང་ཕྱག་རྒྱའི་ནུས་པ་དང་། །ཏིང་འཛིན་སྨོན་ལམ་མཐུ་དག་ལས། །དྲི་རོ་བཅུད་ལྡན་ལྷ་ཡི་ཟས། །གནས་གོས་བགོ་བ་རྒྱན་ལ་སོགས། །འདོད་པའི་ཡོན་ཏན་ཀུན་ལྡན་ཞིང་། །དབང་པོའི་ཡུལ་ཀུན་ཚིམ་བྱེད་པ། །ཡིད་བཞིན་ནོར་བུ་དཔག་བསམ་ཤིང་། ཁྲུས་ཀྱི་རྫིང་བུ་སྐྱེད་ཚལ་རྟ། །བུམ་པ་བཟང་པོ་ལ་སོགས་པ། །ཀུན་བཟང་རྣམ་འཕྲུལ་མཆོད་སྤྲིན་ཚོགས། །འདི་ དབང་ལྡན་ ཚངས་པ་ ཉི་ཟླ་ ས་བདག་ ཀླུ་ ཡུལ་འཁོར་སྲུང་ འཕགས་སྐྱེས་པོ་ དེ་ནས་གཏོར་མ་འབུལ་བ་ནི་ མིག་མི་བཟང་ རྣམ་ཐོས་སྲས་

[Full Size]

ནས་འཁོར་བ་ཇི་སྲིད་བར། །བསམ་གྱི་མི་ཁྱབ་འབྱུང་གྱུར་ཅིག །དེ་ལྟར་འབུལ་བའི་མགྲོན་དང་ཡུལ། །ཚངས་པ་བརྒྱ་བྱིན་རྒྱལ་ཆེན་བཞི། །ཕྱོགས་སྐྱོང་ལྷ་ཀླུ་གཟའ་སྐར་སོགས། །ཐུབ་པའི་བསྟན་དང་འཁོར་སྐྱོང་བའི། །དམ་ཚིག་ལྡན་པའི་ཚོགས་ལ་འབུལ། །དེ་དག་སོ་སོར་ཆོས་དང་ནོར། །འཇིག་རྟེན་འདས་དང་མ་འདས་ཀྱི། །འདོད་ཡོན་ཕུན་ཚོགས་བསམ་མི་ཁྱབ། །ཁྱེད་ལ་འབྱུང་ཞིང་གནས་གྱུར་ཅིག །ཤར་ཕྱོགས་རྡོ་རྗེ་ཅན་གྱི་ལྷ་ཚོགས་འཁོར་དང་བཅས། །གཏོར་མ་འབུལ་བ་འདི་དག་བཞེས་སུ་གསོལ། །མེ་དང་གཤིན་རྗེ་བདེན་བྲལ་སྲིན་པོའི་བདག །ཆུ་བདག་རླུང་བདག་ནོར་གྱི་བདག་པོ་དང་། །དབང་ལྡན་ལྷ་སྟེ་འབྱུང་པོའི་བདག་པོ་དང་། །སྟེང་གི་ཉི་ཟླ་ཚངས་པ་ཆེན་པོ་དང་། །ལྷ་རྣམས་ཀུན་དང་གང་དག་ས་གཏིང་ཀླུ། །རི་ཡི་

[Full Size]

ལྷ་དང་གནོད་སྦྱིན་ཚོགས་བཅས་ལ། །འདོད་ཡོན་རྨད་བྱུང་གཏོར་མ་འབུལ་བ་རྣམས། །རབ་ཏུ་དགྱེས་པ་ཡིད་ནི་བཞེས་ནས་ཀྱང་། །རང་རང་ཕྱོགས་སུ་ལེགས་པར་རབ་བཞུགས་ཏེ། །རང་གི་བུད་མེད་མཛའ་བཤེས་གཉེན་འདུན་དང་། །ནང་མི་དམག་དང་དཔུངས་བཅས་ལྷན་ཅིག་ཏུ། །མེ་ཏོག་དྲི་དང་བྱུག་པ་གཏོར་མར་བཅས། །འདི་རྣམས་གསོལ་ཞིང་ལེགས་པར་བསྣམས་ནས་ཀྱང་། །བདག་གི་ལས་ཀྱི་འབྲས་བུ་མཆིས་པར་མཛོད། །རྟག་ཏུ་སྐྱེ་མེད་ཆོས་ནི་དེ་བཞིན་གཤེགས། །སེམས་ཅན་ཐམས་ཅད་བདེ་བར་གཤེགས་དང་མཚུངས། །བྱིས་པའི་བློ་ཅན་མཚན་མར་འཛིན་པ་དག །འཇིག་རྟེན་དག་དང་མེད་པའི་ཆོས་ལ་སྤྱོད། །ངག་རྣམས་བསྲུང་ཞིང་ཡིད་ཀྱིས་རབ་བསྡམ་སྟེ། །ལུས་ཀྱིས་མི་དགེ་བ་དག་མི་བྱེད་ཅིང་། །ལས་ལམ་གསུམ་པོ་འདི་དག་རབ་བླངས་ན། །དྲང་སྲོང་གསུང་པའི་ལམ་ནི་ཐོབ་པར་འགྱུར།

[Full Size]

"ཕྲིན་ལས་གཞོལ་བ་ནི། སྔོན་ཚེ་རྒྱལ་བའི་སྤྱན་སྔ་རུ། །བསྟན་པ་བསྲུང་ཞིང་འཁོར་རྣམས་བཞི། །རྗེས་འཇུག་སྐྱེས་བུ་དམ་ལྡན་རྣམས། །བསྲུང་ཞིང་སྐྱབས་པར་ཞལ་བཞེས་པའི། །སྲོག་སྙིང་བདེན་ཚིག་ཕུལ་བ་བཞིན། །བདག་དང་རྒྱུ་སྦྱོར་ཡོན་བདག་ལ། །སྐྱོབས་པའི་སྐལ་ཡུལ་དམན་ན་ཡང་། །སྲུང་མ་ཁྱེད་ཅག་ཐུགས་རྗེ་ཡིས། །འགལ་རྐྱེན་ནད་གདོན་བར་ཆད་རིགས། །ཐམས་ཅད་མྱུར་དུ་ཞི་བར་མཛོད། །ཚེ་དབང་དཔལ་དང་ལོངས་སྤྱོད་རྣམས། །ཕུན་ཚོགས་རྒྱས་དང་འཕེལ་བར་མཛོད། །ཡེ་ཤེས་དང་ནི་འཇིག་རྟེན་གྱི། །དངོས་ཀུན་དབང་དུ་འདུ་བར་མཛོད། །ལན་ཆགས་གནོད་འཚེའི་བསམ་སྦྱོར་ངན། །མ་ལུས་རྡུལ་དུ་རླག་པར་མཛོད། ཁྱེད་ཀྱི་ཐུགས་དམ་མ་གཡེལ་བར། །བསྟན་པ་བསྲུང་ཞིང་བདག་ཅག་གི། །སྐྱོན་ཞི་ཡོན་ཏན་ཀུན་འཕེལ་ནས། །བསམ་པ་ཆོས་མཐུན་འགྲུབ་པར་མཛོད། ཁྱོད་ཀྱི་ཐུགས་དང་འགལ་

[Full Size]

བའི་ལས། །བདག་སོགས་རྨོངས་ཤིང་འཁྲུལ་པའི་རྒྱུས། །མི་དགེ་སྤྱོད་དང་མཆོད་པ་དམན། །རྒྱུ་ངན་ཕུད་ཉམས་དྲི་མས་དགོས། །བྱིང་རྒོད་མ་དག་འགལ་འཁྲུལ་སོགས། །ཉམས་ཆགས་ཅི་བསགས་མཐོལ་ཞིང་བཤགས། །བཟོད་བཞེས་ཚངས་པ་སྩལ་བ་དང་། །ལས་ཀྱི་དངོས་གྲུབ་མ་ལུས་སྩོལ། །ཨོཾ་པྲ་ཏི་ཙིཏྟཱ་རི་མ་ཧཱ་ས་མ་ཡ་ཧ་ན་ཧ་ན་ཧཱུྃ་ཕཊཿ བཛྲ་མུཾ། ཡ་ཧི་གཙྪ། མགོན་པོ་ཡོན་ཏན་གྱི་མགྲོན་རྣམས་རང་གནས་སུ་གཤེགས་པར་གྱུར། ཞེས་པས་གཏོར་མ་དང་པོ་གཤེག་གོ། །གཏོར་མ་བར་པ་ནི་རིས་དྲུག་སྙིང་རྗེའི་མགྲོན་དུ་གཏོགས་པའི་སྟོང་གསུམ་གྱི་མི་དང་མི་མ་ཡིན་པའི་རིགས་མཐའ་དག་ལ་བསྔོ་བ་ཡིན་ཏེ། བྱིན་རླབས་གོང་གི་དེ་ཀའི་འཐུས་པར་བྱ་བའམ། སྤྲོ་ན་འདིར་ཡང་སྔ་མ་ལྟར་ལན་གཅིག་བྱས་ལ་མགྲོན་སྤྱན་དྲངས་པ་ནི། ཡང་། བདག་ཉིད་རྡོ་རྗེ་སེམས་དཔའི་ཐུགས་སྲོག་ཧཱུྃ་ལས་བྱང་ཆུབ་སེམས་ཀྱི་འོད་ཟེར་ལྕགས་ཀྱུ་ལྟ་བུ་གྲངས་མེད་

[Full Size]

འཕྲོས་པས། སྟོང་གསུམ་འཇིག་རྟེན་ཁམས་ཀྱི་ལྷ་ཀླུ་སྡེ་བརྒྱད་མི་དང་མི་མིན་འབྱུང་པོ་མཐུ་བོ་ཆེ་རིས་དྲུག་ཐམས་ཅད་སྐད་ཅིག་གིས་བཀུག་ནས་འདུས་པར་གྱུར། །ལྷ་དང་ཀླུ་དང་གནོད་སྦྱིན་ལྟོ་འཕྱེ་གྲུལ། །ནམ་མཁའ་ལྡིང་དང་འདབ་བཟང་ལུས་སྲུལ་པོ། དྲི་ཟ་སྲིན་པོ་གདོན་གྱི་རིགས་རྣམས་དང་། །གང་དག་ས་ལ་གནས་པའི་རྫུ་འཕྲུལ་ཅན། །བུ་མེད་གཡོག་འཁོར་ཚོགས་དང་བཅས་རྣམས་ལ། །བདག་གི་པུས་མོ་ས་ལ་བཙུག་ནས་ནི། །ཐལ་མོ་སྦྱར་བས་ཁྱོད་ལ་གསོལ་འདེབས་ན། །གསན་ནས་ཕན་གདབ་སླད་དུ་འདིར་གཤེགས་ཤིག །སྲིད་པའི་རྩེ་ནས་མནར་མེད་ཡན་ཆད་ཀྱི། །སྐྱེ་བ་རྣམས་བཞིས་བསྡུས་པའི་སེམས་ཅན་རྣམས། །གཏན་པ་མེད་པའི་མཆོད་སྦྱིན་གནས་འདི་རུ། །དགའ་དང་གུས་པའི་ཡིད་ཀྱིས་འདུ་བར་གྱིས། ཨོཾ་དེ་བ། ལྷ་ ན་ག་ ཀླུ་ ཡཀྵ་ གནོད་སྦྱིན་ རཀྴ་ས་ སྲིན་པོ་ གནྡྷྷ་ དྲི་ཟ་

[Full Size]

།ཨ་སུ་ར། ག་རུ་ཌ། ཀིནྣ་ར། མ་ཧོ་ར་ག །མི་ནུ་ཥྱ། ཨ་མ་ནུ་ཥྱ། སརྦ་ཤུ་ཏ། པྲེ་ཏ། པི་ཤ་ཙ། ཨ་ནྲྀ་སུ་ཏྲི་པྲེ་དུ་ཛཿ ས་པ་རི་ཝ་ར་ས་མཱ་ཛཿ མཆོག་དམན་བར་མའི་མགྲོན་ཀུན་ལ། །སྤོས་དང་མེ་ཏོག་མར་མེ་དྲི། །ཞལ་ཟས་གཏོར་མ་བསྟོད་དབྱངས་བཅས། །བདག་གིས་ཕུལ་ཞིང་བསྔོས་པ་ཡིས། །དགྱེས་ཤིང་བྱམས་པའི་སེམས་ལྡན་ཏེ། །སོ་སོའི་སྡུག་བསྔལ་ཀུན་བྲལ་ཤོག །སརྦ་བྷུ་ཏ། ཀ་མ་གུ་་སརྦ་པཱུ་ཛ་བ་ལིནྟ་གྲྀ་ཧྞེ་དཾ་པྲ་ཏཱིཙྪ་སྭཱ་ཧཱ། །འབྱུང་པོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡི་གནས་རྣམས་དང་། །ཤར་ནུབ་རི་དང་ཉི་ཟླའི་ཁྱིམ་རྣམས་དང་། །རི་བོ་ཀུན་ལ་གང་དག་གནས་པ་དང་། ལྷ་མིན་ ནམ་མཁའ་ལྡིང་ ལྟོ་འཕྱེ་ཆེན་པོ་ མི་ མི་མ་ཡིན་ འབྱུང་པོ་ཐམས་ཅད་ ཡི་དྭགས་ ཤ་ཟ་ འགྲོ་བ་རིས་དྲུག་

[Full Size]

རིན་ཆེན་གླིང་ན་ལྷག་པར་གང་གནས་དང་། །ཆུ་བོ་ཀུན་དང་ཆུ་ཡི་མདོ་རྣམས་དང་། །མཚོ་དང་རྫིང་བུ་ལྡེང་ཀ་ཆུ་དགོས་དང་། །གཡའ་ཆུ་སིལ་མ་ཅན་ལ་གང་གནས་དང་། །གྲོང་དང་ཕྱུགས་ལྷས་གྲོང་ཁྱེར་སྟོང་པ་དང་། ཁང་སྟོང་དག་དང་ལྷ་ཡི་ཁང་པ་དང་། །གཙུག་ལག་ཁང་དང་མཆོད་རྟེན་གནས་རྣམས་དང་། །དཀའ་ཐུབ་གནས་དང་གླང་ཆེན་བྲེས་དང་ནི། །རྒྱལ་པོའི་དཀོར་ཁང་དག་ན་གང་གནས་དང་། །ལམ་སྲང་གསུམ་མདོ་དང་ནི་བཞི་མདོ་དང་། །གང་དག་ལམ་པོ་ཆེ་དང་ཤིང་གཅིག་དྲུང་། །དུར་ཁྲོད་ཆེན་པོ་ནགས་ཚལ་ཆེན་པོ་དང་། །སེང་གེ་དྲེད་དང་གཅན་ཟན་གནས་རྣམས་དང་། །འབྲོག་ཆེན་འཇིགས་སུ་རུང་བར་གང་གནས་དང་། །གང་དག་གླིང་མཆོག་དག་ན་གནས་པ་དང་། །ལྷུན་པོ་དུར་ཁྲོད་དག་ལ་གནས་པ་རྣམས། །རབ་ཏུ་དགྱེས་ཤིང་མགུ་བར་གྱུར་ནས་སུ། །

[Full Size]

འཕྲེང་བ་མེ་ཏོག་དྲི་དང་བྱུག་པ་དང་། །བསྟོད་དང་གཏོར་མར་བཅས་པ་གུས་འབུལ་ན། །འདི་དག་བཞེས་ཏེ་བཏུང་ཞིང་བསྣམས་ནས་སུ། །བདག་གི་ལས་ཀྱི་འབྲས་བུ་མཆིས་པར་མཛོད། །སྲིད་རྩེ་མནར་མེད་ཡན་ཆད་ཀྱི། །རྒྱུད་དྲུག་སྐྱེ་བཞི་འགྲོ་དྲུག་གི། །སེམས་ཅན་མ་ལུས་ཐམས་ཅད་དང་། ཁྱད་པར་གྲོགས་བྱེད་ལྷ་མགོན་རིགས། །དེ་དག་སོ་སོའི་སྤྱོད་ཡུལ་དུ། །གང་མོས་ཅིས་འདུལ་ཆོས་དང་ནོར། །འདས་དང་མ་འདས་བདེ་བ་ཀུན། །སོ་སོའི་ཡིད་དང་ཚུལ་མཐུན་པར། །ནམ་མཁའ་ཇི་སྲིད་མཐར་ཐུག་བར། །སྐལ་བར་འབྱུང་ཞིང་ཐོབ་གྱུར་ཅིག །དེ་དག་ཐམས་ཅད་མ་ལུས་ཀྱི། །སྡིག་བྲལ་སྒྲིབ་བྱང་ཚོགས་རྫོགས་ཏེ། །ཐར་པ་ཟབ་ཅིང་རྒྱ་ཆེའི་ཆོས། །བླ་མེད་སྒྲུབ་པའི་རྒྱུར་གྱུར་ཅིག །དེ་ཡི་དགེ་བས་བདག་སོགས་ཀྱི། །ལས་དབང་མི་དང་མི་མིན་གྱི། །གནོད་འཚེ་

[Full Size]

ནད་དང་སྡུག་བསྔལ་དང་། །བཀྲ་མི་ཤིས་དང་རྨི་ལམ་ངན། །རྦོད་གཏོང་ཉེས་སྐྱོན་ཞི་གྱུར་ཅིག །ཚེ་རིང་ནད་མེད་མཐུ་དང་ནི། །དཔལ་དང་གཟི་བརྗིད་དངོས་གྲུབ་ཚོགས། །འཇིག་རྟེན་པ་དང་འདས་རྣམས་ཀྱི། །ལེགས་པའི་ཡོན་ཏན་འཕེལ་གྱུར་ཅིག །མི་དང་མི་མིན་གང་ཡང་རུང་། །ཚེ་སྲོག་མཐུ་བྱིན་ལོངས་སྤྱོད་དང་། །དཔལ་དང་གཟི་བརྗིད་འཕྲོག་བྱེད་སོགས། །བར་ཆད་མ་ལུས་སེལ་གྱུར་ཅིག །སེམས་ཅན་དམྱལ་བའི་སྡུག་བསྔལ་དང་། །ཡི་དྭགས་བཀྲེས་ཤིང་སྐོམ་པ་དང་། །དུད་འགྲོ་བཀོལ་སྤྱོད་བརྡེག་འཚོག་སོགས། །སྡུག་བསྔལ་མ་ལུས་ཞི་གྱུར་ཅིག །སེམས་ཅན་ཐམས་ཅད་བདེ་ལྡན་ཞིང་། །སྡུག་བསྔལ་ཀུན་ལས་གྲོལ་ནས་ནི། །དེ་བཞིན་གཤེགས་པས་བསྔགས་མཛད་པའི། །བྱང་ཆུབ་དམ་པ་ཐོབ་གྱུར་ཅིག །ཇིི་ལྟར་འཇིག་རྟེན་ལས་དང་ཉོན་མོངས་རྒྱུར་བཅས་བྱེད་

[Full Size]

རྒྱུར་ལྡན་གྱུར་པ། །ལས་དང་ཉོན་མོངས་པ་དང་ཟློག་རྒྱུ་དེ་ཡང་འདྲེན་པས་རབ་ཏུ་གསུངས། །གང་ན་འཆི་འཕོ་སྐྱེ་དང་རྒས་དང་རྒུད་པའི་སྡུག་བསྔལ་མི་གནས་པ། །ཐར་པའི་མཆོག་སྟེ་སྨྲ་བའི་ཁྱུ་མཆོག་དེ་ཡིས་རང་གིས་མཁྱེན་ཏེ་གསུངས། །མགྲོན་རྣམས་ཐུགས་དང་འགལ་བ་ཅི་བསགས་པ། །བདག་གིས་མཐོལ་བཤགས་བཟོད་པར་བཞེས་ནས་ཀྱང་། །ཟབ་མོའི་ཆོས་ཀྱི་རྒྱུད་ཚིམ་བདེ་གཤེགས་བཀའ། །མ་འདའ་རང་གནས་སོ་སོ་བདེ་བར་དེངས། །བཛྲ་མུཾ། ཡ་ཧི་གཙྪ། ཞེས་པའི་རིས་དྲུག་ནི་མགྲོན་ཐམས་ཅད་གཤེགས་ཅིང་གཏོར་མ་བར་པ་གཤེགས་པར་བྱའོ། །གསུམ་པ་ལན་ཆགས་བགེགས་རིགས་ཀྱི་གཏོར་མ་བསྔོ་བ་ནི། བྱིན་རླབས་གོང་ལྟར་ལས། ཨོཾ་པདྨ་ཏ་ཀྲིད་ཧ་ཡ་གྲཱྀ་ཝ་ཧཱུྃ་ཕཊཿ ཞེས་པའི་གསང་སྔགས་བརྗོད་པ་ཙམ་གྱིས་རང་ཉིད་དཔལ་རྡོ་རྗེ་སེམས་དཔའ་གནས་འགྱུར་ཏེ་སྐད་ཅིག་གིས་ཁྲོ་

[Full Size]

རྒྱལ་རྟ་མགྲིན་དབང་གི་རྒྱལ་པོ་དམར་ནག་དབྱུག་ཏོ་དང་མེ་དཔུངས་བསྣམས་པ་གར་དགུའི་ཉམས་ལྡན་ཁམས་གསུམ་མ་ལུས་ཟིལ་གྱིས་གནོན་པའི་སྐུར་གྱུར། ཧྲཱིཿ རིག་པའི་རྒྱལ་པོ་རྟ་མཆོག་ཧེ་རུ་ཀ །བྱམས་ཆེན་རབ་སྤྲུལ་ཁྲོ་བོ་འབུམ་གྱིས་བསྐོར། །སྟོང་ཉིད་དབྱིངས་ལས་བགེགས་རྣམས་རྡུལ་དུ་རློག །འཇིགས་གཟུགས་མེ་ལྟར་འབར་ལ་ཕྱག་འཚལ་བསྟོད། །དེ་ནས་བགེགས་དགུག་ཕྱིར་རྡོར་དྲིལ་དང་བཅས་པས་ལྕགས་ཀྱུའི་ཕྱག་རྒྱ་བཅས་ལ། ན་མོ། ཆོས་ཐམས་ཅད་རང་བཞིན་གྱི་རྣམ་པར་དག་ཅིང་ཅིར་ཡང་མ་གྲུབ་ལ་ཇི་ལྟར་བསམ་བཞིན་འགགས་མེད་དུ་འབྱུང་བའི་བདེན་པ་དང་། དུས་གསུམ་གྱི་སངས་རྒྱས་ཐམས་ཅད་ཀྱི་ཡེ་ཤེས་ཆེན་པོ་ཐུགས་སུ་ཆུད་ཅིང་། སེམས་ཅན་གྱི་དོན་ལ་དགོངས་པ་སྐད་ཅིག་ཀྱང་མི་གཡེལ་བའི་བདེན་པ་དང་། དུས་གསུམ་གྱི་བདེ་བར་གཤེགས་པ་རྣམས་ཀྱི་དགོངས་པ་སྐོངས་

[Full Size]

ཤིང་སེམས་ཅན་གྱི་མགོན་སྐྱབས་མཛད་པ་ཞལ་གྱིས་བཞེས་པའི་སྲུང་མ་ཁྱད་པར་ཅན་རྣམས་ཀྱི་བདེན་པ་དང་། བདག་གི་ལྷག་པའི་བསམ་པས་དེ་བཞིན་གཤེགས་པའི་གདུང་གསོབ་ཅིང་སེམས་ཅན་གྱི་དོན་བྱ་བར་སེམས་བསྐྱེད་སྨོན་ལམ་ཏིང་ངེ་འཛིན་གྱི་བདེན་པའི་བྱིན་གྱིས་བརླབས་ཀྱིས། གདུག་ཅིང་སྡང་བའི་སེམས་དང་ལྡན་པས་གནོད་པར་བྱེད་པའི་བགེགས་ཀྱི་རིགས་སུ་གྱུར་པ་ཐམས་ཅད་གནས་འདིར་གཏོར་མའི་མགྲོན་དུ་སྐད་ཅིག་ཐང་ཅིག་ཡུད་ཙམ་ལ་འདི་ཉིད་དུ་མཆིས་པར་གྱུར་ཅིག །ཏྲི་ཡཾ་ཛཿ སརྦ་བྷུ་ཏ་བཛྲ་ཨངྐུ་ཤ་ཛཿ བཛྲ་པ་ཤ་ཧཱུྃ་བཛྲ་སྥོ་ཊ་བཾ། བཛྲ་གྷཎྜེ་ཧོཿ ཞེས་བཀུག་ནས་ཆུ་གཙང་མ་ལ་བདག་གི་ཐུགས་ཀའི་འོད་ཟེར་འཕྲོས་པས་ཐིམ་པར་བསམ་ལ་བགེགས་རིགས་རྣམས་ཀྱི་ལྕེ་ཐོག་ཏུ་བཞག་པར་དམིགས་ནས་གཏོར་མའི་ཉེ་སྐོར་ཐམས་ཅད་དུ་འཐོར་ཏེ། ཧཱུྃ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་

[Full Size]

བསྲུང་ན་དངོས་གྲུབ་མཆོག །རྡོ་རྗེ་བདུད་རྩིའི་ཆུ་འདིས་འགྲུབ། །ཅི་ཏེ་དམ་ལས་འགལ་གྱུར་ན། །དེ་མ་ཐག་ཏུ་སྙིང་འགས་ཤིང་། །རྡོ་རྗེ་འཛིན་རྒྱལ་ཁྲོས་ནས་ནི། །འདུན་རྒྱུད་རིགས་ནི་བརླག་པར་འགྱུར། ཨོཾ་བཛྲ་ས་མ་ཡ་ཧ་ན་ཧ་ན་ཧཱུྃ་ཕཊཿ །བགེགས་རིགས་ལན་ཆགས་མགྲོན་རྣམས་ལ། །སྤོས་དང་མེ་ཏོག་མར་མེ་དྲི། །ཞལ་ཟས་བཟའ་བཏུང་འདོད་ཡོན་ཚོགས། །ལན་ཆགས་སྦྱང་ཕྱིར་ཕུལ་བ་ཡིས། །དགྱེས་ཤིང་བྱམས་སེམས་ལྡན་གྱུར་ཅིག །ཨོཾ་གུངྐ་ར་གུངྐུ་རེ་སྭཱ་ཧཱ། པི་ཙི་པི་ཙི་སྭཱ་ཧཱ། གུམ་གུམ་སྭཱ་ཧཱ། སརྦ་པཱུ་ཛ་གྲྀཧྞེ་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། ཚད་མེད་གཏོར་མ་རྒྱ་ཆེན་འདི། །བཀའ་དང་སྔགས་དང་ཕྱག་རྒྱ་དང་། །བདག་གི་བསམ་པའི་སྨོན་ལམ་མཐུས། །རྒྱལ་བའི་མཛད་པ་ལྷུན་གྲུབ་དང་། །རྡོ་རྗེ་འཆང་དབང་ཞི་དང་

[Full Size]

ཁྲོ། །ཀུན་གྱི་རང་བཞིན་ལྟ་བུ་ཡིས། །དམ་ཉམས་རྡུལ་དུ་རློག་བྱེད་ཅིང་། །བཀའ་དང་དམ་ལ་གནས་པ་རྣམས། །ཡོན་ཏན་ཅི་འདོད་ཐོབ་བྱེད་པའི། །དམ་རྫས་བདུད་རྩིའི་གཏོར་མ་འདི། །བདག་དང་རྒྱུ་སྦྱོར་ཡོན་བདག་གི །ཚེ་རབས་ལན་ཆགས་གང་མཆིས་ལ། །ཤ་ཁྲག་ལོངས་སྤྱོད་དཀོར་དང་བླུད། །གང་འདོད་དངོས་པོར་སྩོལ་བགྱིས་ན། ཁྱེད་རྣམས་ཤ་ཁོན་སེམས་ཞི་ནས། །ཕན་པའི་སེམས་སྐྱེའི་རྒྱུ་རྐྱེན་དང་། །འདོད་ཡོན་དཔག་མེད་ཐོབ་གྱུར་ཅིག །གང་ཞིག་མཚན་མོ་རྒྱུ་བ་ཡིས། །འབྱུང་པོ་རྣམས་དང་ཤ་ཟ་དང་། །སྲིན་པོ་ཤ་རྗེན་ཟ་བ་དང་། །སེམས་ཅན་རྣམ་པ་སྣ་ཚོགས་དང་། །ལྗོན་ཤིང་གེལ་པ་སོགས་གནས་དག །དེ་དང་དེ་ལ་གཏོར་མ་ནི། །བཟའ་བ་ཤ་ཆང་ལ་ཕུག་བཅས། །འབྲས་ཆེན་འབྲས་བུ་མང་པོ་དང་། །མཆོད་པ་འདི་ཡིས་མགུལ་བྱོས་ལ། །གནོད་པའི་བསམ་སྦྱོར་ཞི་

[Full Size]

བ་དང་། །བདག་ཅག་རྣམས་ལ་ཕན་པའི་ཡིད། །དེ་རིང་ཕྱིན་ཆད་བསྐྱེད་པར་གྱིས། །བཀའ་དང་བདེན་ཚིག་འགལ་བ་དང་། །ཐུབ་པའི་བསྟན་དང་འཁོར་གཙེས་ན། །སྡིག་པར་གྱུར་པས་ཁྱོད་ཉམས་ནས། །ཚེ་འཕོས་དམྱལ་ཁམས་བརྒྱད་འགྱུར་ཞིང་། །བྱང་ཆུབ་སེམས་ནི་མ་སྐྱེས་བར། །སྡུག་བསྔལ་མནར་མེད་མྱོང་བར་འགྱུར། །བདག་ཅག་སྟོན་པའི་རྗེས་ཞུགས་ཤིང་། །སེམས་བསྐྱེད་དམ་ཚིག་ནོས་པ་ལ། །ཁྱོད་ཀྱིས་བཀའ་དང་དམ་འགལ་ན། །འདིར་ནི་གནོད་སྦྱོར་བྱས་གྱུར་ན། །དམ་ཚིག་ཉམས་པའི་རྣམ་སྨིན་དང་། །ཡེ་ཤེས་ལྷ་ཡི་ཆད་པས་གཟིར། །།།མེ་དབལ་གནོད་སྦྱིན་གྱིས། །ཁྱོད་ཀྱི་སྙིང་ཁྲག་རྔུབས་འཐུང་སྟེ། །མི་བཟད་སྡུག་བསྔལ་མྱོང་བར་འགྱུར། །དེ་བས་གནོད་སྦྱོར་སླར་བསྡུས་ལ། །ཕྱིན་ཆད་མི་གནོད་དམ་བཅའ་ཞིང་། །གཞན་གྱིས་

[Full Size]

གནོད་པའང་ཁྱེད་ཀྱིས་བསྲུང་། །དེ་ལྟར་ཁྱོད་ཀྱིས་ཤེས་གྱིས་ལ། །དེ་བཞིན་གཤེགས་པའི་བཀའ་མ་བཅག །དམ་པའི་ཆོས་ཀྱི་ཚུལ་མ་དྲལ། །རྣལ་འབྱོར་བདག་གི་དམ་མ་འདའ། །དམྱལ་བ་ཆེན་པོའི་རྒྱུ་མ་གསོག འཆི་བའི་སྲོག་ལ་ཀུན་ཀྱང་འཛེམ། །མཚོན་ཆས་མི་འཇིག་གང་ཡང་མེད། །རང་གི་ལུས་ལ་དཔེ་ལོང་ལ། །གཞན་ལ་གནོད་པར་མ་བྱེད་ཅིག །ཨོཾ། ཆེན་པོའམ་ཆུང་ངུ་གང་ཡང་རུང་། །ལུས་ལ་མངོན་པར་གནོད་གྱུར་པའི། །ནད་དེ་མྱུར་དུ་ཕྱུངས་མཛོད་ལ། །གདོན་ཁྱོད་རང་གི་གནས་སུ་དེངས། །དེང་འདིར་བདག་གིས་ཁྱོད་མཆོད་པས། །མགུ་ཞིང་རབ་ཏུ་ཚིམ་བྱོས་ལ། །སྔོན་གྱི་ལན་ཆགས་ཡོད་ན་ཡང་། །མཆོད་སྦྱིན་འདི་ཡིས་འཁོར་བར་གྱིས། །ཤ་ཁོན་བུ་ལོན་ཉམས་ཆགས་སོགས། །མ་ལུས་འདི་ཡིས་དག་པར་གྱིས། །

[Full Size]

བླ་མེད་བྱང་ཆུབ་ཐོབ་པའི་རྒྱུར། །མཆོད་སྦྱིན་གཏོར་མ་འདིས་གྱུར་ཅིག །གནས་འདིར་ཆགས་དང་ཞེན་བྱེད་ན། །བཀའ་དང་དམ་ལས་འདས་གྱུར་པའི། །ཆད་པས་ཕོག་པར་ཁྱོད་འགྱུར་གྱི། །རང་གི་གནས་སུ་ད་སོང་ཞིག །སརྦ་བྷུ་ཏ་གཙྪ། ཞེས་ཁྲོ་བོའི་ཏིང་འཛིན་གྱིས་བསྐྲད་དོ། །དེ་ནས་ཆུ་གཏོར་དང་འབྲེལ་ན་དེའི་མཇུག་ཆོག་རྣམས་བྱ་ཞིང་། འདི་ཉིད་བསྐྱང་པ་ཡིན་ན་ཉེས་བྱས་བཤགས་པ་ནི། །མ་འབྱོར་བ་དང་ཉམས་པ་དང་། །གང་ཡང་བདག་བློ་རྨོངས་པ་ཡིས། །ལེགས་བྱས་འདི་ལ་ཉེས་གྱུར་གང་། །དེ་ཀུན་བཟོད་པར་མཛད་དུ་གསོལ། །ཞེས་དང་ཡིག་བརྒྱ་བཟླ། །སྦྱིན་པ་རྒྱ་ཆེན་བགྱིས་པ་འདི་ཡིས་མཐུས། ཞེས་སོགས་དང་། །སངས་རྒྱས་སྐུ་གསུམ་བརྙེས་པ་སོགས་ཀྱི་བསྔོ་སྨོན་རྒྱས་བསྡུས་སྐབས་སྦྱར་བྱ་ཞིང་། ཤིས་བརྗོད་ནི། །སྟོན་མཆོག་དམ་པ་ལྷ་མིའི་མཆོད་འོས་པ། །སངས་རྒྱས་ཕྱག་འཚལ་དེང་འདིར་

[Full Size]

བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་ལེགས་ཤོག །ཞི་བ་ཆགས་བྲལ་ལྷ་མིའི་མཆོད་འོས་པ། ཆོས་ལ་ཕྱག་འཚལ༴ །ཚོགས་མཆོག་དམ་པ་ལྷ་མིའི་མཆོད་འོས་པ། །དགེ་འདུན་ཕྱག་འཚལ༴ །འབྱུང་པོ་གང་དག་འདིར་ནི་ལྷག་གྱུར་ཏེ། །ས་འམ་འོན་ཏེ་བར་སྣང་འཁོད་ཀྱང་རུང་། །སྐྱེ་དགུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པར་ཤོག །སོགས་རྒྱས་པར་བྱས་པའི་མཐར། བདག་བསྐྱེད་རྟ་མགྲིན་ཡང་འོད་དམར་པོའི་གོང་བུར་གྱུར་ནས་འཇའ་ལྟར་ཡལ་བར་དམིགས་ལ་ཆོས་ཐམས་ཅད་ཀྱི་རང་བཞིན་ཡེ་སྟོང་མཐའ་བྲལ་ཆེན་པོའི་ངང་ནས་རྗེས་སྤྱོད་ལ་འཇུག་གོ། །ཆ་གསུམ་གྱི་གཏོར་ཆོག་རྒྱས་པ་འདི་ནི་གསང་སྔགས་སྔ་འགྱུར་གྱི་ལུགས་སྤྱི་དང་། ཁྱད་པར་ཞི་ཁྲོ་བཀའ་བརྒྱད་བདེ་གཤེགས་འདུས་པ་ལས་ཇི་ལྟར་བྱུང་བ་དང་མཐུན་པ་ལས་བརྗོད་བྱ་ཅུང་ཟད་ཉུང་ངུ་བསྡུས་ཏེ་ལྟས་ཆོག་

[Full Size]

མར་བཀོད་པ་འདི་ནི། དབུ་མཛད་ཨོ་རྒྱན་རྡོ་རྗེ་སོགས་དོན་གཉེར་དག་གི་ངོར། སྣ་ཚོགས་རང་གྲོལ་རང་ལོ་རི་གཅིག་པར་ཆོས་དབྱིངས་འོད་གསལ་རྩེར་བྲིས་པ་མངྒ་ལམ། དགེའོ། དགེའོ། དགེའོ།

སངས་རྒྱས་ཀྱི་དུས་ཆེན་རྣམས་དང་། གུ་རུའི་ཚེས་བཅུ་སོགས་ཀྱིས་ངོས་འཛིན་རྒྱུ་མཚན་ཕན་ཡོན།

[Full Size]

སངས་རྒྱས་ཀྱི་དུས་ཆེན་རྣམས་དང་། གུ་རུའི་ཚེས་བཅུ་སོགས་ཀྱིས་ངོས་འཛིན་རྒྱུ་མཚན་ཕན་ཡོན་སོགས་བཞུགས་སོ།

[Full Size]

བླ་མ་དང་བྱང་ཆུབ་སེམས་དཔའ་ཐུགས་རྗེའི་མངའ་བདག་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །འདིར་དད་པ་དང་ལྷག་བསམ་དགེ་བའི་ཡིད་ཅན་དག་ལ་ཕན་པའི་སེམས་ཀྱིས། དུས་ཆེན་གྱི་རྣམ་གྲངས་འགའ་ཞིག་གི་དབྱེ་བ་དང་ཕན་ཡོན་བརྗོད་པར་བྱ་བ་ལ་སྤྱི་དང་བྱེ་བྲག་ཁྱད་པར་དང་གསུམ་ལས། དང་པོ་སྤྱི་ཁྱབ་ནི། ཟླ་བ་རེ་རེའི་ཉ་སྟོང་བརྒྱད་གསུམ་ལ་དུས་ཆེན་གསུམ་ཞེས་བྱ་སྟེ། ཚེས་བཅོ་ལྔ་ནི་སངས་རྒྱས་སྣང་བ་མཐའ་ཡས་ཀྱི་དུས་བཟང་དང་། གནམ་གང་ནི་བཅོམ་ལྡན་འདས་ཤཱཀྱའི་དབང་པོ་དང་། ཚེས་བརྒྱད་ནི་

[Full Size]

སངས་རྒྱས་སྨན་པའི་རྒྱལ་པོའི་དུས་ཆེན་དུ་གསུངས་ཏེ། དུས་བཟང་འདི་གསུམ་ལ་དགེ་བའི་རིགས་ཆེ་ཆུང་གང་བྱས་དེ། དུས་ཚེས་གཞན་ལ་བྱས་པ་ལས་བརྒྱ་འགྱུར་དུ་འཕེལ་བར་གསུངས་སྟེ། དཔེར་ན་མར་མེ་ལྷ་བཤོས་སོགས་གཅིག་ཕུལ་ན་བརྒྱ་ཕུལ་བ་དང་ཚོགས་མཉམ་པར་འགྱུར་བ་དང་། ཕྱག་སྐོར་སོགས་གཅིག་བྱས་པ་ཡང་བརྒྱ་རུ་འགྱུར་ཞིང་། ཡིག་དྲུག་ལྟ་བུ་འཕྲེང་སྐོར་གཅིག་བཟླས་ན་འཕྲེང་སྐོར་བརྒྱ་བཟླས་པ་དང་མཉམ་པའི་ཕན་ཡོན་འབྱུང་ལ། འཇིག་རྟེན་ཁྱིམ་པ་ཕོ་མོ་རྣམས་ཀྱང་དུས་བཟང་

[Full Size]

འདི་རྣམས་བསྙེན་གནས་སྨྱུང་གནས་སོགས་བསྲུང་ན་མ་འོངས་པའི་ཚེ་རབ་ཐམས་ཅད་དུ་ཡང་ནད་དང་མཚོན་དང་མུ་གེའི་བསྐལ་པ་ལས་ཐར་བར་གསུངས་ཤིང་། ཕན་ཡོན་ཆེ་ལ་དུས་ཆེན་འདི་དག་ལ་སྡིག་པ་མི་དགེ་བའི་ལས་བྱས་ནའང་སྡིག་པ་བརྒྱ་འགྱུར་དུ་ཆེ་བ་ཡང་ཤེས་པར་བྱའོ།། ༈ །།བྱེ་བྲག་ཏུ་སངས་རྒྱས་ཀྱི་དུས་ཆེན་བཞི་ནི། ཆོ་འཕྲུལ་ཆེན་པོ་དང་། མངོན་པར་བྱང་ཆུབ་པ་དང་། ཆོས་འཁོར་བསྐོར་བ་དང་། ལྷ་ལས་བབས་པའི་དུས་ཆེན་དང་བཞི་ལས། དང་པོ་ཆོ་འཕྲུལ་ཆེན་པོའི་དུས་མཆོད་ནི་དགུན་ཟླ་ཐ་ཆུང་སྟེ་དིང་སང་བོད་ཡུལ་ན་ཧོར་ཟླ་དང་པོར་གྲགས་ས་པ་འདི་ཡིན་ཏེ། དེ་ཡང་སྔོན་སྟོན་པ་ཉིད་དགུང་ལོ་ལྔ་བཅུ་ལ་ཕེབས་སྐབས་སུ། མུ་སྟེགས་སྟོན་པ་དྲུག་འཁོར་བརྒྱད་ཁྲི་བཞི་སྟོང་དང་བཅས་པ་རྣམས་དུས་རྟག་པར་སྟོན་པ་འཁོར་བཅས་ལ་ཕྲག་དོག་དང་ཆགས་

[Full Size]

སྡང་གིས་བར་ཆད་གང་བྱས་ཀྱང་མ་ཐུབ་པའི་དབང་གིས་དེ་སྐབས། རྫུ་འཕྲུལ་འགྲན་པར་ནན་གྱིས་ཞུས་པ་ལ། རྒྱལ་པོ་ཆེན་པོ་དག་དང་སྦྱིན་བདག་རྣམས་ཀྱིས། སྲིན་བུ་མི་ཁྱེར་ལྟ་བུ་ཁྱེད་ཅག་གིས་དེ་བཞིན་གཤེགས་པ་ཉི་མའི་དཀྱིལ་འཁོར་ལྟ་བུ་ལ་ཇི་ལྟར་འགྲན་པར་ནུས་ཀྱི། དེ་སྐད་མ་སྨྲ་ཞིག་བྱས་ཀྱང་ཁོང་རྣམས་མ་ཉན་པས། སྟོན་པ་ལ་ཞུས་པས་གནང་སྟེ། དེ་དུས་དང་མ་འོངས་པའི་འགྲོ་བ་མང་པོ་དགེ་བའི་རྩ་བ་སྐྱེས་པའི་རྒྱུར་འགྱུར་བ་དགོངས་ནས་ཆོ་འཕྲུལ་འགྲན་པར་ཞལ་གྱིས་བཞེས་པ་ན། རྒྱ་གར་གྱིས་ཡུལ་ཁམས་ཐམས་ཅད་ཀྱི་རྒྱལ་པོ་དང་སྐྱེ་བོ་མཐའ་ཡས་པ་ཆོ་འཕྲུལ་ལ་ལྟ་བའི་ཆེད་དུ་འདུས་ཤིང་། ལྷ་ཀླུ་དྲི་ཟ་གྲུལ་བུམ་གནོད་སྦྱིན་སོགས་མི་མ་ཡིན་པའི་རིགས་མཐའ་དག་པའང་སྤྲིན་བཞིན་བཏིབས་པར་གྱུར་ཏེ། ཐོག་

[Full Size]

མར་ཚེས་གཅིག་གི་ཉིན་མོ་གཉན་ཡོད་དུ་རྒྱལ་པོ་གསལ་རྒྱལ་གྱིས་བཅོམ་ལྡན་འདས་འཁོར་བརྒྱད་ཁྲི་དང་བཅས་པ་དང་། མུ་སྟེགས་པ་ཡང་དེ་དང་གྲངས་མཉམ་པ་ཐམས་ཅད་ལ་བསྙེན་ཅིང་བཀུར་བ་རྒྱ་ཆེར་བྱས་པའི་ཚེ། སྟོན་པས་ཚེམས་འབྲུ་བའི་ཤིང་བུ་སོར་བཞི་པ་གཅིག་ས་ལ་བཙུགས་མ་ཐག་དཔག་བསམ་གྱིས་ལྗོན་པ་མཆུ་ཞེངས་དཔག་ཚད་ལྔ་བརྒྱ་པ་ལོ་མ་མེ་ཏོག་འབྲས་བུ་ཐམས་ཅད་དུས་གཅིག་ལ་རྒྱས་ཤིང་སྨིན་པ་ལ་རླུང་གིས་བསྐྱོད་ཚེ་ཆོས་ཀྱི་སྒྲ་འབྱུང་བ་དེ་ལྟ་བུ་སྐྱེས་པའི་རྫུ་འཕྲུལ་གྱི་ཆོ་འཕྲུལ་ངོ་མཚར་བ་བསྟན་པ་ནི། མུ་སྟེགས་པ་རྣམས་ནི་སྟོན་པའི་ཐུགས་རྗེའི་གཟི་བྱིན་གྱིས་ཟིལ་གྱིས་ནོན་ནས་ཆོ་འཕྲུལ་ཅི་ཡང་སྟོན་རྒྱུ་མ་བྱུང་། དེ་བཞིན་དུ། ཚེས་གཉིས་ལ་ཡུལ་སྒྲ་སྒྲོག་གི་རྒྱལ་པོ་ཨུ་ཏྲ་ཡཱ་ནས་མཆོད་ཅིང་བསྙེན་བཀུར་བའི་ཚེ། སྟོན་པའི་

[Full Size]

སྐུའི་གཡས་གཡོན་དུ་ནོར་བུ་རིན་པོ་ཆེའི་རི་བོ་དཔག་ཚད་བརྒྱ་པ་གཉིས་སྤྲུལ་བ་ལས་འདོད་དགུ་འབྱུང་ཞིང་། དེ་མཐོང་བས་སྐྱེ་འགྲོ་མཐའ་དག་སེམས་རྣམ་པར་གྲོལ་བའི་གོ་འཕང་ལ་བཀོད་པའི་ཆོ་འཕྲུལ་བསྟན་ཞིང་། མུ་སྟེགས་པ་རྣམས་ཀྱིས་གང་ཡང་མ་བྱུང་། ཚེས་གསུམ་གྱི་ཉིན་རྒྱལ་པོ་ཤུནྩི་དྷ་ལས་བསྙེན་བཀུར་ཞིང་། ཞབས་བསིལ་བའི་ཆུ་ས་ལ་འཕོས་པ་དེ་སྤོས་ཀྱི་ཆུ་ཡན་ལག་བརྒྱད་ལྡན་གྱི་རྫིང་བུ་དཔག་ཚད་ལྔ་བཅུ་པར་གྱུར་པ་དེ་འཐུང་དང་རེག་པའི་འགྲོ་བ་ཐམས་ཅད་ཟག་མེད་ཀྱི་བདེ་བ་ལ་བཀོད། ཚེས་བཞི་ལ་རྒྱལ་པོ་ཨིནྟྲས་མཆོད་ཅིང་སྤོས་ཆུའི་རྫིང་དེ་ལས་ཕྱོགས་མཚམས་སུ་ཡུར་བ་ཆེན་པོ་བརྒྱད་བརྒྱད་དུ་གྱུར་པ་ལ་སྤོས་ཆུའི་རྒྱུན་ཆེར་བབས་པའི་ཆུ་སྒྲ་ཐམས་ཅད་ཆོས་ཀྱི་སྒྲ་དབྱངས་གྲགས་པས་སྐྱེ་དགུ་ངོ་མཚར་ལ་བཀོད།

[Full Size]

ཚེས་ལྔ་ལ་རྒྱལ་པོ་ཚངས་བྱིན་གྱིས་མཆོད་པའི་ཚེ་ཉིད་ཀྱི་ཞལ་གྱི་སྒོ་ལས་འོད་ཟེར་གསེར་གྱི་ཁ་དོག་ཅན་དཔག་མེད་སྤྲོས་པས་སྟོང་ཁམས་ཁྱབ་ཅིང་ངན་སོང་གི་གནས་སྟོངས་པར་མཛད་པས་འགྲོ་བ་རྣམས་དད་པ་ལ་བཀོད། ཚེས་དྲུག་ལ་ཡངས་པ་ཅན་གྱིས་ལི་ཙ་བི་རྣམས་ཀྱིས་མཆོད་པའི་ཚེ། འཁོར་ཐམས་ཅད་ཀྱི་རྒྱུད་ལ་མངོན་པར་ཤེས་པ་ཤར་ནས་གཅིག་སེམས་གཅིག་གིས་ཤེས་ནུས་པར་གྱུར་པའི་ཆོ་འཕྲུལ་མཛད། ཚེས་བདུན་ལ་སེར་སྐྱའི་གྲོང་ཁྱེར་གྱི་ཤཱཀྱ་རྣམས་ཀྱིས་མཆོད་པའི་དུས་སུ། འཁོར་ལོ་བསྒྱུར་བའི་རྒྱལ་པོའི་ཚུལ་དུ་སྤྲུལ་ཏེ། གདུལ་བྱ་རྣམས་བྱང་ཆུབ་ཀྱི་མཆོག་ཏུ་སེམས་བསྐྱེད་པ་ལ་བཀོད། འདི་ཐམས་ཅད་ལ་མུ་སྟེགས་སྟོན་པ་དྲུག་པོས་ཆོ་འཕྲུལ་ཅི་ཡང་སྟོན་རྒྱུ་མ་བྱུང་ངོ་། །དེ་ནས་ཚེས་བརྒྱད་ཀྱི་ཉིན་ལྷའི་དབང་པོ་བརྒྱ་བྱིན་གྱིས་མཆོད་ཅིང་།

[Full Size]

སྐུའི་གཡས་གཡོན་ནས་ཚངས་པ་བརྒྱ་བྱིན་གྱིས་འདུད་པའི་ངང་ནས། མུ་སྟེགས་འདུལ་བའི་དུས་ལ་བབས་པར་དགོངས་ཏེ། ཕྱག་གཡས་པས་བཞུགས་ཁྲི་ལ་གནོན་པའི་ཚུལ་མཛད་པ་ཙམ་གྱིས། འབྲུག་གི་སྒྲ་ཆེན་ལྟ་བུ་གྲགས་མ་ཐག་བཞུགས་ཁྲིའི་འོག་ནས་རབ་ཏུ་ཁྲོ་ཞིང་འཇིགས་པའི་སྲིན་པོ་ཆེན་པོ་ལྔ་བྱུང་ནས་མུ་སྟེགས་སྟོན་པ་དྲུག་གི་ཁྲི་བཤིག་ཅིང་། རལ་པ་ནས་བཟུང་སྟེ་དྲུད་པ་སོགས་བྱས་ནས་བསྡིགས། ཁྲོ་རྒྱལ་ལག་ན་རྡོ་རྗེས་ཀྱང་ཕྱག་མཚན་གྱི་རྡོ་རྗེ་མེ་འབར་བ་དེ་དག་གི་མགོ་ལ་གཟེར་ཞིང་བསྣུན་པས་ཁོང་རྣམས་རང་རང་གི་རྫུ་འཕྲུལ་གྱིས་གླིང་གཞན་དུ་འབྲོས་པར་སེམས་དཔའ་ལ། ཕྱག་རྡོར་གྱིས་མཐུས་ཆར་རླུང་ཆེན་པོས་བརྡས་ཏེ། སྟོན་པ་དྲུག་པོ་འཁོར་མང་པོ་དང་བཅས་པ་ཆུ་ལ་མཆོངས་ནས་ཤི། དེ་དག་གི་ཁྲོད་ནས་ལས་

[Full Size]

འཕྲོ་སད་པའི་རིགས་ཅན་སྟོང་ཕྲག་དྲུག་ཅུ་ནི་སྟོན་པ་ཉིད་ལ་སྐྱབས་ཞུས་ཤིང་བསྟན་ལ་ཞུགས་པས་དགྲ་བཅོམ་ཐོབ། དེའི་རྐྱེན་གྱིས་ཉན་ཐོས་མང་པོ་ཡང་དགྲ་བཅོམ་གྱི་གོ་འཕངས་མངོན་དུ་བྱས་པ་དང་། སྟོན་པ་ཉིད་ཀྱི་སྐུའི་བ་སྤུའི་ཁུང་བུ་རེ་རེ་ནས་འོད་ཟེར་གྲངས་མེད་དང་སྤྲུལ་པ་མཐའ་ཡས་པ་སྤྲོས་ཏེ་ཕྱོགས་བཅུའི་ཞིང་དུ་འགྲོ་བའི་དོན་མཛད་ཅིང་། ས་རྣམ་པ་དྲུག་ཏུ་གཡོས་ལྷས་ཀྱང་མེ་ཏོག་གི་ཆར་ཕབས་སོ། །དེ་ལྟར་འདི་ཡན་ཆད་དུ་མུ་སྟེགས་རྣམས་ཆོ་འཕྲུལ་སྟོན་རྒྱུ་མ་རྙེད་ཀྱང་། འགྲན་སེམས་ཀྱིས་ཁྲི་སོགས་སྟོན་པ་དང་མཉམ་དུ་བཤིབས་ཤིང་ཆགས་སྡང་བྱེད་པ་ལ། འདི་ནས་བཟུང་སྟེ་ཁོང་རྣམས་ཚར་ཆོད་པའི་དབང་གིས། ཚེས་གཅིག་ནས་བརྒྱད་ཀྱི་བར་དུ་འགྲན་ཟླ་དང་བཅས་པའི་ཆོ་འཕྲུལ། བརྒྱད་ནས་བཅོ་ལྔའི་བར་དུ་འགྲན་ཟླ་དང་བྲལ་བའི་ཆོ་འཕྲུལ་ཞེས་གྲགས་

[Full Size]

ཀྱང་ཁོང་རྣམས་ཀྱི་འགྲན་རྒྱུ་མ་བྱུང་བ་དེ་བཞིན་ནོ། །ཆོ་འཕྲུལ་གྱི་ཚེས་བརྒྱད་འདི་ལ་སྟོན་པ་ཉིད་སྐུ་བལྟམས་པའི་དུས་ཆེན་ཡིན་པར་ཡངས་བཤད་ཅིང་། སྤྱི་ཁྱབ་ཡོངས་གྲགས་ལ་དབོ་ཟླའི་ཚེས་བརྒྱད་ལ་བལྟམས་པར་བཤད་ཀྱང་། བཅོམ་ལྡན་འདས་ལ་ཁྱིམ་བདག་མགོན་མེད་ཟས་བྱིན་གྱིས། བཅོམ་ལྡན་འདས་ཉིད་ཟླ་བ་གང་ལ་བལྟམས་པ་ལགས། ཞུས་པས་ན། དགུན་ཟླ་ཐ་ཆུང་ལའོ། །ཞེས་བཀའ་སྩལ་བར་རྒྱ་རོལ་གྱི་མདོ་ནས་གསུངས་པ་དང་སྦྱར་ན་ཚེས་བརྒྱད་འདི་ལ་ཡིན་པར་གསལ་ལོ། །དེ་ནས་ཚེས་དགུའི་ཉིན་ལྷའི་རྒྱལ་པོ་ཚངས་པས་མཆོད་ཅིང་། དེ་ཚེའི་སྐུའི་ཁྱོན་རབ་ཏུ་ཆེ་བ་ཚངས་པའི་འཇིག་རྟེན་དང་མཉམ་པར་སྤྲུལ་ནས་དེ་ཐམས་ཅད་དུ་ཆོས་ཀྱིས་གསུངས་སྒྲས་ཁྱབ་པའི་ཆོ་འཕྲུལ་མཛད། ཚེས་བཅུ་ལ་རྒྱལ་པོ་ཆེན་པོ་བཞིས་མཆོད་ཅིང་། ཉིད་སྐུའི་ཁྱོན་རབ་ཏུ་ཆེ་བ་རྒྱལ་

[Full Size]

ཆེན་བཞིའི་གནས་ནས་འོག་མིན་ལ་ཐུག་པར་སྤྲུལ་ཏེ་ཆོས་ཀྱི་སྒྲས་སྟོང་ཁམས་ཁྱབ་པར་མཛད། ཚེས་བཅུ་གཅིག་ལ་ཁྱིམ་བདག་མགོན་མེད་ཟས་སྦྱིན་གྱིས་མཆོད་པའི་ཚེ། འཁོར་གྱི་དཀྱིལ་འཁོར་དབུས་ན་བཞུགས་བཞིན་དུ་སྐུ་གཟུགས་མི་སྣང་བར་ཚངས་པའི་གསུང་གིས་ཆོས་སྒྲས་འཇིག་རྟེན་གང་བར་མཛད་དེ་ལྷ་མི་ཀུན་དགའ་བར་གྱུར། ཚེས་བཅུ་གཉིས་ལ་ཁྱིམ་བདག་ཙི་ཏྲས་བསྙེན་བཀུར་ཞིང་བྱམས་པའི་ཏིང་ངེ་འཛིན་ལ་བཞུགས་པའི་སྐུ་ལས་འོད་ཟེར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁྱོན་ཐམས་ཅད་གང་བར་སྤྲོས་ཤིང་། འོད་ཀྱིས་རིག་པའི་སེམས་ཅན་ཀུན་ཀྱང་བྱམས་པ་ལ་གནས་པར་མཛད། ཚེས་བཅུ་གསུམ་ལ་རྒྱལ་པོ་ཤུནྩི་དྷ་ལས་སླར་ཡང་མཆོད་ཅིང་། སྐུའི་ལྟེ་བ་ལས་འོད་ཟེར་རྒྱུན་མི་ཆད་པ་སྤྲོས་པའི་འོད་ཟེར་རེ་རེའི་རྩེར་སྟོན་པ་ཉིད་ཀྱི་སྐུ་རེ་རེ་སྤྲུལ་པས་ནམ་མཁའ་ཁྱབ་པར་བསྟན་ནས་ཆོས་

[Full Size]

གསུངས། ཚེས་བཅུ་བཞི་ལ་རྒྱལ་པོ་ཨུ་ཏྲ་ཡཱ་ན་བཙུན་མོར་བཅས་པས་བསྙེན་བཀུར་ཞིང་མེ་ཏོག་གཏོར་བ་ལས། མེ་ཏོག་ཐམས་ཅད་མཁའ་ལ་སྤྲིན་བཞིན་བཏིབས་ཅིང་། མེ་ཏོག་རེ་རེའི་སྟེང་ན་རིན་པོ་ཆེ་ཤིང་རྟ་རྒྱན་གྱི་སྤྲས་པ་རེ་རེ་ལ་སྟོན་པ་རེ་རེ་བཞུགས་ནས་ཆོས་གསུང་བར་བསྟན། ཚེས་བཅོ་ལྔ་ལ་རྒྱལ་པོ་གཟུགས་ཅན་སྙིང་པོས་མཆོད་ཅིང་། དེ་ཚེ་འཁོར་ཐམས་ཅད་ཀྱིས་ལྷའི་མིག་གིས་སེམས་ཅན་དམྱལ་བའི་གནས་ཐམས་ཅད་མངོན་སུམ་དུ་མཐོང་བའི་ཆོ་འཕྲུལ་བསྟན་ནས། ཐམས་ཅད་སྐྲག་ཅིང་སྐྱོ་བ་སྐྱེས་ནས་འཁོར་བར་ཞེན་པ་ཆོད་དེ་བླ་ན་མེད་བྱང་ཆུབ་ལ་བློ་ངེས་པར་མཛད་པ་སྟེ། དེ་ལྟར་ཚེས་གཅིག་ནས་བཅོ་ལྔའི་བར་འདི་ལ་རྫུ་འཕྲུལ་གྱི་བཀོད་པ་མི་འདྲ་བ་རེ་བསྟན་ནས། གདུལ་བྱ་རྣམས་བྱང་ཆུབ་ལ་འཁོད་པར་

[Full Size]

མཛད་པ་ཡིན་ཕྱིར་ཆོ་འཕྲུལ་ཆེན་པོའི་དུས་མཆོད་ཅེས་གྲགས་ཤིང་། བདེར་གཤེགས་མཆོད་རྟེན་བརྒྱད་ཀྱི་ནང་མཚན་ཆོ་འཕྲུལ་ཆེན་པོའི་མཆོད་རྟེན་སྒོ་མང་ཡང་འདི་དུས་མཉེན་ཡོད་ཀྱི་གྲོང་ཁྱེར་དུ་བཞེངས་པའོ།། ༈ །།གཉིས་པ་མངོན་པར་བྱང་ཆུབ་པའི་དུས་ཆེན་ནི། དཔྱིད་ཟླ་ཐ་ཆུང་ཧོར་ཟླ་བཞི་པའི་ཚེས་བཅོ་ལྔ་སྟེ། བཅོམ་ལྡན་འདས་དགུང་ལོ་སོ་ལྔ་ལ་བབས་པའི་སྐབས་ཀྱི་དུས་ཚེས་འདི་ལ་མ་ག་རྡ་རྡོ་རྗེ་གདན་བྱང་ཆུབ་ཀྱིས་སྙིང་པོ་ལ་བཞུགས་སྟེ། སྲོད་ལ་བདུད་ཀྱི་དམག་དཔུངས་རྣམས་བྱམས་པའི་ཏིང་ངེ་འཛིན་གྱིས་བཏུལ་ཞིང་། ནམ་གུང་བསམ་གཏན་ལ་མཉམ་པར་བཞག་པས། ཐོ་རང་གི་དུས་སུ་ཕྱོགས་བཅུའི་སངས་རྒྱས་ཐམས་ཅད་ཀྱིས་དབང་བསྐུར་ནས་མངོན་པར་རྫོགས་པ་སངས་རྒྱས་པར་བསྟན། དེ་ཚེ་མཁའ་ལ་ཟླ་བ་གཟས་ཟིན་པ་དང་། ས་གཡོ་ཞིང་མེ་ཏོག་གི་ཆར་

[Full Size]

བབས། ལྷ་རྣམས་ཀྱི་མཆོད་པའི་སྤྲིན་གཏིབས། སེར་སྐྱའི་ཕོ་བྲང་ན་སྲས་སྒྲ་གཅན་འཛིན་དང་ཀུན་དགའ་བོ་སོགས་འཁྲུངས་པ་དང་དུས་མཚུངས་སུ་བྱུང་། འདི་ནི་གཙོ་བོར་སངས་རྒྱས་པའི་དུས་མཆོད་ཡིན་ལ། ཡུམ་གྱིས་ལྷུམས་སུ་ཞུགས་པ་དང་། མཐར་མྱ་ངན་ལས་འདས་པའི་དུས་ཀྱང་ཟླ་ཚེས་འདི་ལ་ཡིན་པར་བཞེད་མཁན་མང་བས་ན། དུས་ཆེན་གསུམ་འཛོམ་པར་གྲགས་པས་འགྱུར་ཆེ་ལ། བྱང་ཆུབ་ཆེན་པོའི་མཆོད་རྟེན་ཡང་མ་ག་རྡར་འདི་དུས་བཞེངས་སོ།། ༈ །།གསུམ་པ་ནི། སངས་རྒྱས་ནས་ཞག་བདུན་ཕྲག་བདུན་གྱི་རིང་ལ་ཆོས་མ་གསུངས་པས། ཚངས་པ་དང་བརྒྱ་བྱིན་གྱིས་གསོལ་བ་བཏབས་པའི་ངོར། དབྱར་འབྲིང་ཧོར་ཟླ་དྲུག་པའི་ཚེས་བཞིའམ་བརྒྱད་ལ། ཝ་ར་་སིར་འཁོར་ལོ་དང་པོ་བདེན་བཞིའི་ཆོས་འཁོར་ཐོག་མར་གསུངས་པ་ཡིན་ཕྱིར། ཆོས་འཁོར་

[Full Size]

གྱི་དུས་ཆེན་དུ་གྲགས་ལ། འདི་ནི་བདུན་ཕྲག་བདུན་ཚངས་མ་ཐག་ཏུ་ཆོས་འཁོར་བསྐོར་བའི་ལུགས་ལྟར་ན་ཚེས་བཞིའམ་ལྔ་ལ་དུས་མཆོད་བྱེད་པ་དང་། ལ་ལའི་བཞེད་ཀྱིས། སངས་རྒྱས་ཉིད་རྫུ་འཕྲུལ་གྱིས་བྱོན་པ་ལ་མ་ངེས་མོད་ཀྱང་། ཐུན་མོང་ལྟར་ན་རྡོ་རྗེ་གདན་དང་། ཝ་ར་་སི་གཉིས་པོ་ས་ཁད་འགྱངས་ཕྱིར་ལམ་ཞག་གི་ཚུལ་མཛད་པའི་དབང་གིས། ཚེས་བརྒྱད་ལ་ཆོས་འཁོར་དབུ་གཙུགས་པས། ཆོས་འཁོར་དུས་མཆོད་ཚེས་བརྒྱད་ལ་ཡིན་པར་བཞེད་པ་ཡང་ཡོད་པས། དེ་གཉིས་གང་མོས་ལ་བྱར་རུང་བར་གསུངས་ལ། འདི་དུས་ཆོས་འཁོར་མཆོད་རྟེན་སྒོ་མང་རེ་རེ་བཞིན་ལྷ་ཁང་གིས་བརྒྱན་པ་ཡངས་གྲོང་ཁྱེར་ཀ་ཤི་ན་བཞེངས་ནས་ཡོད་དོ།། ༈ །།བཞི་པ་ནི། བཅོམ་ལྡན་འདས་ཀྱི་ཡུམ་སྒྱུ་འཕྲུལ་མ་སུམ་ཅུ་རྩ་གསུམ་དུ་འཁྲུངས་པ་དེ་ལ་དྲིན་ལན་བསབས་ཕྱིར་

[Full Size]

ཆོས་སྟོན་པར་དགོངས་ཏེ་དབྱར་གནས་ཟླ་བ་གསུམ་དེར་བཞུགས་ཤིང་ཡུམ་སོགས་སྨིན་པར་མཛད་ནས་སྟོན་འབྲིང་ཧོར་ཟླ་དགུ་པའི་ཉ་ལ། ལྷ་རྣམས་ཀྱིས་ནམ་མཁར་རིན་པོ་ཆེ་བཻཌཱུརྱ་དང་གསེར་དང་དངུལ་གྱི་སྐས་གསུམ་བཙུགས་པ་ལ་སྟོན་པ་ཉིད་ཚངས་པ་དང་བརྒྱ་བྱིན་གྱིས་ཞབས་འབྲིང་བགྱིས་བཞིན་བབས་ནས་གྲོང་ཁྱེར་གསལ་ལྡན་དུ། ཉན་ཐོས་ཀྱི་འཁོར་ཚོགས་དང་། སྐྱེ་དགུ་འདུས་པའི་དབུས་སུ་བྱོན་པའི་དུས་ཡིན་པས། ལྷ་ལས་བབས་པའི་དུས་མཆོད་ཅེས་གྲགས་ཤིང་། འདི་ཡང་ཚེས་བཅོ་ལྔ་ལ་བྱེད་པ་དང་། ཉེར་གཉིས་ལ་བྱེད་པ་འདམ་ཁ་ཡིན་ཏེ། སྤྲུལ་པའི་མཛད་པ་ལ་མཐའ་གཅིག་ཏུ་མ་ངེས་པས་གདུལ་བྱའི་མོས་བློ་དང་བསྟུན་ཆོག་པར་བཞེད་ཅིང་། ལྷ་ལས་བབས་པའི་མཆོད་རྟེན་བང་རིམ་གྱི་དཀྱིལ་དུ་ཐེམ་སྐས་ཅན་གྲོང་ཁྱེར་

[Full Size]

གསལ་ལྡན་དུ་བཞེངས་ནས་ཡོད་དོ།། ༈ །།དེ་ལྟར་སངས་རྒྱས་ཀྱི་དུས་ཆེན་བཞི་པོ་འདི་དག་ལ་དགེ་སྡིག་གང་བྱས་ཀྱིས་འགྱུར་ཁྱད་ནི་ས་ཡ་ཕྲག་བརྒྱའི་འགྱུར་དུ་འགྲོ་བར་བཀའ་བསྟན་བཅོས་ཐམས་ཅད་མཐུན་པར་གསུངས་ཏེ། དེ་ཉིད་གོ་བདེ་བའི་དཔེར་བགྱིས་ན། དུས་ཆེན་འདི་དག་ལ་བསམ་པ་རྣམ་དག་གི་ངང་ནས། སྐྱེ་བོ་ཐ་མལ་པ་སྤྲང་པོ་ལྟ་བུ་ཞིག་ལ་ནས་ཕུལ་གང་སྦྱིན་པར་གཏོང་ན་ནས་ཕུལ་ས་ཡ་ཕྲག་བརྒྱ་བཏང་བའི་དགེ་བར་འགྱུར་ཞིང་། སྦྱིན་པའི་ཡུལ་གྱི་ཁྱད་པར་ལས་བསོད་ནམས་འགྱུར་ཁྱད་ཆེས་ཆེར་གོང་དུ་འཕེལ་བ་ཡིན་ཏེ། སོ་སོ་སྐྱེ་བོ་ཕལ་པ་ལ་སྦྱིན་པའི་དགེ་བ་དེ་ལས་ཀྱང་། བྲམ་ཟེ་གཅིག་ལ་སྦྱིན་ན་ཁྲི་ཕྲག་གི་འགྱུར་དང་། དེ་ལས། ནད་པ་གཅིག་ལ་སྦྱིན་པ་དང་། རིམ་པ་བཞིན། སྨན་པ་དང་། ཡིག་མཁན་དང་། ལྷ་བཟོ་བ་དང་།

[Full Size]

རབ་འབྱུང་ཚུལ་འཆལ་དང་། ཚུལ་ཁྲིམས་ལྡན་པ་དང་། དགྲ་བཅོམ་པ་དང་། གསང་སྔགས་ཀྱི་རྣལ་འབྱོར་ཅན་དང་། བླ་མ་རྡོ་རྗེའི་སློབ་དཔོན་རྣམས་རིམ་པ་ལྟར་འབུམ་འགྱུར་གྱི་ཚོགས་གོང་འཕེལ་དུ་གསུངས་སོ། །དེ་ཡང་ལུང་ལས། ནས་ཕུལ་གང་ནི་ལྷག་བསམ་རྣམ་དག་གིས། །གཞན་ལ་སྦྱིན་པར་བཏང་ཞིང་ཕུལ་བ་དེ། །ས་ཡ་ཕྲག་བརྒྱ་སྦྱིན་པར་འདིར་འགྱུར་ཏེ། །ནས་ཕུལ་འབུམ་ཕྲག་བརྒྱད་དང་ཁྲི་ཕྲག་གསུམ། །གསུམ་སྟོང་གསུམ་བརྒྱ་སུམ་ཅུ་རྩ་དྲུག་དང་། །བྲེ་དྲུག་ཕུལ་བཞི་སྦྱིན་པའི་འབྲས་བུར་འགྱུར། ཞེས་གསུངས་པ་འདི་ནི་སོ་སྐྱེ་ཕལ་པ་ལ་སྦྱིན་པའི་ཕན་ཡོན་ཡིན་ཏེ། ཡུལ་གྱིས་འགྱུར་ཁྱད་ནི་གོང་དུ་བཤད་མ་ཐག་པའི་འབུམ་འགྱུར་འབུམ་འགྱུར་དུ་འཕེལ་བ་དེ་ལྟ་བུའོ། །གཞན་ཡང་། ཉི་མ་གཟས་ཟིན་པའི་སྐབས་སུ་དགེ་སྡིག་གང་བྱས་ཁྲི་འགྱུར་དུ་གསུངས་པ་སྟེ།

[Full Size]

དཔེར་མཚོན་ན། དེ་དུས་མར་མེའམ་ཡོན་ཆབ་ལྷ་བཤོས་སོགས་གཅིག་ཕུལ་བ་དེ་ཁྲི་ཕྲག་གཅིག་ཕུལ་བ་དང་ཕན་ཡོན་མཉམ་པར་འགྱུར་བ་དང་། ཡིག་དྲུག་སོགས་རྡོག་པོ་གཅིག་བགྲང་ན་ཁྲི་ཚོ་གཅིག་ཏུ་འགྱུར། བཟང་སྤྱོད་དང་ཤེར་སྙིང་སོགས་ཁ་ཏོན་ཚར་གཅིག་བྱས་ནའང་ཁྲི་ཕྲག་བཏོན་པ་རུ་འགྱུར་ལ། དེ་དང་མཚུངས་པར། སྡིག་པ་ཡང་། དཔེར་ན་ཤིག་དང་ལྗི་བ་ལྟ་བུ་གཅིག་བསད་ན་ཁྲི་ཚོ་བསད་པ་རུ་འགྱུར་བ་དེ་བཞིན་དགེ་སྡིག་ཆེ་ཆུང་ཐམས་ཅད་མཚུངས་སོ། །ཟླ་བ་གཟའ་འཛིན་གྱི་དུས་སུ་སྟོང་འགྱུར་ཡིན་པས་དགེ་སྡིག་གང་ཡང་གཅིག་བྱས་པ་དེ་སྟོང་ཕྲག་བྱས་པར་འགྱུར་ཚུལ་གོང་བཞིན་ནོ། །གལ་ཏེ་སངས་རྒྱས་ཀྱི་དུས་ཆེན་དེ་དག་གང་རུང་དང་གཟའ་འཛིན་འཛོམ་པའི་སྐབས་ལྟ་བུ་ལ་ནི་ལྷག་པར་འགྱུར་ཆེ་ཚུལ་ནི། ལུང་ལས། ཉི་མ་གཟའ་ཡིས་ཟིན་པའི་དུས། །

[Full Size]

བྱེ་བ་ཕྲག་ནི་འབུམ་འགྱུར་དང་། །ཟླ་བར་བྱེ་བ་བདུན་འགྱུར་ཏེ། །དུས་མཆོད་བཞི་དང་གཟའ་འཛིན་འཛོམ། །དེ་དུས་བསོད་ནམས་ཁྱད་པར་འཕགས། ཅེས་གསུངས་པས་ན། སྤྱིར་ཡངས་ཉ་སྟོང་བརྒྱད་གསུམ། ཁྱད་པར་གསང་སྔགས་ཀྱི་དུས་མཆོད་རྣམས་དང་། ཉི་ཟླ་གཟའ་འཛིན་གྱི་དུས་སོགས་ལ་ལུས་དང་ལོངས་སྤྱོད་ཀྱི་དགེ་རྩ་བསྒྲུབ་ནུས་ན་མཆོག་ཏུ་ལེགས་མོད་ཀྱི། དེ་མ་བྱུང་ཡང་སྡིག་པ་མི་གསོག་པ་ཞིག་ལྷག་པར་གལ་ཆེའོ།། ༈ །།དེ་ལྟར་དུས་བཟང་གིས་མཆོད་པ་དང་སྦྱིན་པ་བྱེད་པའམ་དགེ་སྦྱོར་ལ་འབད་པའི་ཕན་ཡོན་སྤྱིར་ནི་རྒྱལ་བའི་བཀའ་དང་བསྟན་བཅོས་རྣམས་ལས་རྒྱ་ཆེན་གསུངས་པ་དག་དང་མཐུན་པ་ལས་ཀྱང་ཁྱད་པར་དུ། དུས་བཟང་ལ་དགེ་སྡིག་གི་སྤོང་ལེན་མ་ནོར་བར་བྱས་པའི་འབྲས་བུ་ནི་འདི་ལྟར་གསུངས་ཏེ། དཀོན་མཆོག་གསུམ་ལ་མ་གུས་པ་དང་། བླ་མའམ་

[Full Size]

མཆེད་གྲོགས་བསུན་ཕྱུངས། །ནད་པ་ཕོ་མོ་བསྙན་མི་བཀུར། །དད་ཟས་ཟ་ཞིང་དགེ་མི་སྦྱོར། །རྒྱུན་གཏོར་ཆག་དང་སྡུག་འཕོངས་ལ། །ཡོད་བཞིན་སྦྱིན་པ་མི་གཏོང་བའི། །སྒྲིབ་པ་འདི་ཡིས་བྱང་ནས་ནི། །བྱང་ཆུབ་དམ་པའི་རྒྱུར་འགྱུར་རོ། །ཞེས་སོ། སྐྱེ་བོ་ཕལ་པ་སོགས་ལ་དེ་ལྟར་འགྱུར་བར་གསུངས་ཤིང་།། ༈ །ཁྱད་པར་རབ་ཏུ་བྱུང་བ་རྣམས། །སྐྱེ་བའི་ཡུལ་ལ་ཆགས་པ་དང་། །འཇིག་རྟེན་ཉེ་དུ་རྣམས་ལ་ཞེན། །སྡིག་པའི་གྲོགས་ལ་བསྟེན་པ་དང་། །མ་དག་དངོས་པོ་བརྒྱད་འཆང་དང་། །བུད་མེད་རིགས་ལ་ཡིད་ཆགས་དང་། །ཤ་དང་ཆང་གི་རོ་ལ་སྲེད། །འདུ་འཛི་གཡེང་ལ་དགའ་བ་དང་། །ཆོས་མིན་བྲེ་མོའི་གཏམ་མང་སོགས། །དེ་དག་གིས་ཀྱང་དུས་མཆོད་བཞི། །བརྩོན་ཞིང་དམ་བཅའ་བྱས་པ་ན། །དལ་འབྱོར་ཆོས་ལྡན་སྐྱེས་ནས་ཀྱང་། །རིམ་གྱིས་བྱང་ཆུབ་ཐོབ་པར་འགྱུར། །ཞེས་དང་། །ཤི་

[Full Size]

མ་ཐག་ཏུ་དམྱལ་བ་རུ། །སྐྱེ་བའི་ལས་ནི་བཅུ་ཡོད་དེ། །ཐེག་པ་གསུམ་གྱིས་ཆོས་འབྲེལ་བའི། །བླ་མར་དམ་ཚིག་ཉམས་པ་དང་། །བྱང་སེམས་སྐྱེས་བུ་དམ་པ་ལ། །ཡང་ཡང་ངན་སེམས་བསྐྱེས་པ་དང་། །རྙེད་བཀུར་ཟས་ནོར་བསྒྲུབ་པའི་ཕྱིར། །ཆོས་མིན་ཆོས་ལྟར་བཅོས་པ་དང་། །རང་ལས་གཞན་པའི་གང་ཟག་ནི། །སྡིག་པའི་ལས་ལ་སྦྱོར་བ་དང་། །དགེ་སློང་བཞི་སྡེ་ཡན་ཆོད་ཀྱི། །སྤྱི་རྫས་གཡོ་སྒྱུས་སྤྱོད་པ་དང་། །འཛའ་ཤེས་བློ་གཏད་བསླུས་པ་དང་། །སོ་སོ་ཐར་པ་རིས་བདུན་ལ། །རྩ་ལྟུང་གང་རུང་བྱུང་བ་དང་། །དཀོན་མཆོག་བླ་མ་སྤངས་པ་དང་། །འཚམས་མེད་ལྔ་པོ་གང་རུང་བྱས། །སངས་རྒྱས་བསྟན་པའི་སྒོར་ཞུགས་ནས། །འཐབ་རྩོད་དྲག་པོ་བྱེད་པ་རྣམས། །ཤི་མ་ཐག་ཏུ་དམྱལ་བ་རུ། །མདའ་འཕངས་བཞིན་དུ་འགྲོ་ངེས་པ། །

[Full Size]

དེ་དག་གིས་ཀྱང་དུས་མཆོད་བཞིའི། །དམ་བཅའ་མ་ཉམས་བྱས་གྱུར་ན། །སྔར་གྱི་ལས་འབྲས་མི་བསླུའི་ཕྱིར། །དར་གྱི་ཕོ་ལོང་བརྡབ་ཡུན་ཙམ། །དམྱལ་བའི་སྡུག་བསྔལ་ཉམས་མྱོང་ནས། །དུས་མཆོད་བཟུང་བའི་ཕན་ཡོན་གྱིས། །དེ་དག་མྱུར་དུ་ཐར་ནས་ཀྱང་། །བྱང་ཆུབ་ས་བོན་ཐོབ་པར་འགྱུར། །ཞེས་གསུངས་སོ།། ༈ །།གོང་དུ་མ་དག་པའི་དངོས་པོ་བརྒྱད་གསུངས་པ་དེ་དག་གང་ཡིན་སྙམ་ན། འཇིག་རྟེན་པའི་ཁང་ཁྱིམ། ༡ བདག་ཏུ་བཟུང་བའི་ས་ཞིང་། ༢ འཐབ་རྩོད་བྱེད་པའི་གོ་མཚོན། ༣ ཚོང་དང་བུན་སྐྱེད༴ ༤ རྟ་དང་ཁལ་མ། ༥ འབྲོག་དང་བཞོས་མ། ༦ ཤ་༧དང་ཆང་༨སྟེ་བརྒྱད་པོ་དགེ་སྦྱོང་གིས་བསྟེན་དུ་མི་རུང་བའི་དངོས་པོ་བརྒྱད་དོ།། ༈ །།དེ་ལྟར་ཕྱི་མདོ་ལུགས་ཀྱི་དུས་ཆེན་རྣམས་ཀྱིས་ངོས་འཛིན་ཕན་ཡོན་དང་བཅས་པ་བཤད་ནས། ཁྱད་པར་ནང་གསང་སྔགས་ཀྱིས་དུས་

[Full Size]

ཆེན་བཤད་པ་ལ། མངོན་སྤྱོད་དྲག་ལས་སོགས་ཀྱི་སྐབས་ནས་གསུངས་པའི་གཉན་པོ་དུས་བརྒྱད་སོགས་ནི་འདི་སྐབས་དགོས་པ་ཆུང་ཚེ་ཞིབ་ཏུ་མ་བརྗོད་ལ། དེ་རིགས་དོན་དུ་གཉེར་བ་དག་ལ་དགོས་ན། བིཥྚི་འཆར་བའི་ཚེས་གྲངས་རྣམས་ཡིན་ཕྱིར་དེ་ཀས་གོ་མོད་ཀྱི།། ༈ །།འདིར་གསང་སྔགས་བླ་མེད་སྤྱི་ལ་ནི་ཡར་ངོའི་བཅུ་དང་། མར་ངོའི་ཉེར་ལྔ་གཉིས་པོ་འདི་ལ་ཕྱི་རོལ་གྱི་ཡུལ་ཉེར་བཞི་སོགས་སུ་དཔའ་བོ་མཁའ་འགྲོ་རྣམས་འདུས་ཏེ་ཚོགས་ཀྱི་འཁོར་ལོ་ལ་སྤྱོད་དུས་དང་། ནང་དུ་རྡོ་རྗེ་ལུས་ཀྱིས་གནས་དང་ཉེ་བའི་གནས་སོགས་སུ་དཀར་དམར་ཐབས་ཤེས་ཀྱི་འཁོར་ལོའི་འདུ་བ་ཆེན་པོའི་དུས་ཡིན་པས་ན། ཟབ་མོ་ཚོགས་ཀྱི་འཁོར་ལོ་སོགས་རིམ་པ་གཉིས་ཀྱི་རྣལ་འབྱོར་ལ་འབད་པའི་དུས་བཟང་ཡིན་པར། སྔགས་ནང་པའི་རྒྱུད་སྡེ་ཀུན་བཞེད་པ་མཐུན་པ་དང་།། ༈ །།ཡང་། གསང་

[Full Size]

སྔགས་རྙིང་ལུགས་ལྟར་ན། གུ་རུ་རིན་པོ་ཆེ་པདྨ་འབྱུང་གནས་ཀྱི་མཛད་པ་ཁྱད་པར་ཅན་སྟོན་ཚུལ་དང་མཐུན་པའི་ཡར་ངོའི་ཚེས་བཅུའི་དུས་མཆོད་བཟུང་བའི་ཕན་ཡོན་དང་བསོད་ནམས་བསམ་ལས་འདས་པ་ཡོད་དེ། དེ་ཡང་ལོ་གཅིག་ཟླ་བ་བཅུ་གཉིས་ཀྱི་ཚེས་བཅུ་རྣམས་ཀྱི་ནང་ནས།། ༈ །།རྒྱལ་ཉ་འཛོམ་པ་ཧོར་ཟླ་བཅུ་གཉིས་པའི་ཚེས་བཅུ་ནི། གུ་རུ་རིན་པོ་ཆེ་ཉིད་རྒྱལ་པོ་ཨིནྡྲ་བྷུ་ཏིས་ཕོ་བྲང་དུ་གདན་དྲངས་ནས། པདྨ་རྒྱལ་པོར་མཚན་གསོལ་ཞིང་རྒྱལ་སྲིད་བཟུང་བའི་དུས་ཆེན་ཡིན་ནོ།། ༈ །།མཆུ་ཉ་ཟླ་བ་དང་པོའི་ཚེས་བཅུ་ནི་རྒྱལ་སྲིད་སྤངས་ནས་དུར་ཁྲོད་བསིལ་བ་ཚལ་དུ་བརྟུལ་ཞུགས་ཀྱི་སྤྱོད་པ་ལ་གཤེགས་པའི་དུས་མཆོད་ཡིན་ནོ།། ༈ །།དབོ་ཟླ་གཉིས་པའི་ཚེས་བཅུ་ནི། ཟ་ཧོར་གྱི་ཡུལ་དུ་སློབ་དཔོན་པྲ་བྷ་ཧ་སྟིའི་སྤྱན་སྔར་སྐུ་རབ་ཏུ་བྱུང་བའི་དུས་ཆེན་ཡིན། ནག་ཉ་ཟླ་བ་གསུམ་

[Full Size]

པའི་ཚེས་བཅུ་ནི། ཟ་ཧོར་རྒྱལ་པོའི་གསོན་སྲེག་བྱས་པས་མ་ཚུགས་པའི་དུས་ཆེན་ཡིན། ས་ཀ་ཟླ་བ་བཞི་པའི་ཚེས་བཅུ་ནི། ཨོ་རྒྱན་གྱི་ཡུལ་དུ་ལྷ་ལྕམ་མནྡ་ར་དང་ཡབ་ཡུམ་ལྷན་ཅིག་བཞག་བདུན་དུ་མེ་ལ་བསྲེག་པས་མ་ཚུགས་པའི་དུས་ཆེན་ཡིན། སྣྲོན་ཉ་ཟླ་བ་ལྔ་པའི་ཚེས་བཅུ་ནི། ལྷོ་ཕྱོགས་མཐར་སྐྱེས་ཀྱི་གྲོང་ཁྱེར་དུ་མུ་སྟེགས་སྟོན་པ་ལྔ་བརྒྱ་བཏུལ་ཞིང་སེང་གེ་སྒྲ་སྒྲོག་ཏུ་མཛད་དེ་ཐོག་ཕབས་པས་མུ་སྟེགས་ཀྱི་རྒྱལ་ཁམས་རླག་པར་མཛད་པའི་དུས་ཆེན་ཡིན། ཆུ་སྟོད་ཟླ་བ་དྲུག་པའི་ཚེས་བཅུ་ནི་གུ་རུ་ཉིད་རྡ་ན་ཀོ་ཥའི་པད་སྡོང་ལས་སྐུ་བལྟམས་པའི་དུས་ཆེན་གཙོ་བོ་ཡིན། གྲོ་བཞིན་ཟླ་བ་བདུན་པའི་ཚེས་བཅུ་ནི། མཐའ་ཁོབ་ཟང་གླིང་མུ་སྟེགས་རྒྱལ་པོས་གུ་རུ་ཉིད་ཟངས་ཁཱ་སྦྱར་དུ་བཅུག་ནས་ལྕགས་ཟེར་བཏབས་ཏེ་ཆུ་ཀླུང་ཆེན་

[Full Size]

པོར་བསྐྱུར་བས། གུ་རུ་ཉིད་ནམ་མཁར་གཤེགས་ཤིང་ཆུ་གྱེན་དུ་འཁྱིལ་ནས་རྒྱལ་པོའི་ཕོ་བྲང་འཇིགས་པར་ཉེ་བ་ན། བཟོད་གསོལ་དང་སྐྱབས་ཞུས་ཤིང་ནང་པའི་བསྟན་པ་ལ་བཅུག་པའི་དུས་ཆེན་ཡིན། ཁྲུམ་ཟླ་བ་བརྒྱད་པའི་ཚེས་བཅུ་ནི། གུ་རུ་ལ་མུ་སྟེགས་རྣམས་ཀྱིས་ཟས་དུག་ཅན་དང་མཐོང་དུག་དང་རེག་དུག་དང་རྫི་དུག་སོགས་དུག་རིགས་སྣ་ཚོགས་པས་སྐུ་དཀྲོང་བར་འདོད་པ་ལ། གང་གིས་ཀྱང་མ་གནོད་ཅིང་སྐུ་གཟི་མདངས་ཆེས་ཆེར་རྒྱས་པར་བསྟན་པའི་དུས་ཆེན་ཡིན། ཐ་སྐར་ཟླ་བ་དགུ་པའི་ཚེས་བཅུ་ནི། བལ་ཡུལ་ཡང་ལེ་ཤོད་དུ་བལ་བོད་ཀྱི་ལྷ་སྲིན་རྣམས་ཀྱིས་བར་ཆད་བརྩོམས་པ་ལ། རྡོ་རྗེ་ཕུར་པའི་སྒྲུབ་པ་མཛད་དེ་དམ་ལ་བཏགས་ཤིང་བཀའ་སྲུང་དུ་བཀོལ་བའི་དུས་ཆེན་ཡིན། སྨིན་དྲུག་ཟླ་བ་བཅུ་པའི་ཚེས་བཅུ་ནི་བོད་ཡུལ་ཕྱོགས་ཕེབས་ཏེ་ལྷ་སྲིན་གདུག་པ་ཅན་རྣམས་ཐོག་མར་བཏུལ་བའི་དུས་ཆེན་

[Full Size]

ཡིན། མགོ་ཉ་ཟླ་བ་བཅུ་གཅིག་པའི་ཚེས་བཅུ་ནི། བསམ་ཡས་མཆིམས་ཕུར་ཡོན་མཆོད་བཀའ་བགྲོས་ནས་བོད་ཡུལ་གངས་ཅན་གྱིས་མཐའ་དབུས་ཀུན་ཏུ་ཟབ་གཏེར་བྱེ་བ་ཕྲག་སྦེད་པའི་སྟ་གོན་མཛད་ཅིང་། ཡུལ་གྲུ་ཐ་དད་པའི་གཞི་བདག་ཆེ་དགུ་དབང་དུ་བསྡུས་ནས་སོ་སོར་གཏེར་སྲུང་གཉེར་གཏད་ལུང་བསྟན་མཛད་པའི་དུས་ཆེན་ཡིན་ལ། ལྷག་པར་སྤྲེལ་ལོ་སྤྲེལ་ཟླའི་ཚེས་བཅུ་ནི་གུ་རུ་ཉིད་སྐུ་འཁྲུངས་པ་དང་། མང་ཡུལ་གུང་ཐང་ལ་ཁ་ནས་ལྷོ་ནུབ་རྔ་ཡབ་གླིང་དུ་གཤེགས་པ་གཉིས་ཀའི་དུས་ཆེན་ཡིན་པས། ཉིད་ཀྱི་བཀའ་ལས་ཀྱང་། སྤྱིར་ཚེས་བཅུ་ཡིན་ནོ་ཅོག་དང་ཁྱད་པར་དེའི་དུས་སུ་ཚེས་བཅུའི་དུས་མཆོད་བྱེད་པ་ཐམས་ཅད་ཀྱི་སར་གུ་རུ་ཉིད་ངེས་པར་འབྱོན་པའི་དམ་ཚིག་དབུ་མནའ་བཞེས་པ་ཡིན་ཕྱིར། འོ་སྐོལ་གདུལ་བྱའི་དད་མོས་ཀྱི་ལྕོགས་ན་སངས་རྒྱས་ཀྱི་བཀའ་ལ་བསླུ་བ་

[Full Size]

མེད་ཕྱིར། དུས་མཆོད་འཛིན་ཅིང་ཚོགས་མཆོད་དང་གསོལ་འདེབས་དགེ་སྦྱོར་སོགས་བརྩོན་པར་བྱའོ། །ཚེས་བཅུའི་མཆོད་པ་བྱས་པའི་ཕན་ཡོན་རྒྱས་བཤད་ནི། གཏེར་ཁ་སོ་སོའི་གཞུང་ནས་མཐའ་ཡས་པར་གསུངས་ཤིང་། ཤུད་བུ་ཆོས་གྲགས་ཀྱི་གཏེར་མའི་ཚེས་བཅུ་ཕན་ཡོན་སོགས་ལས་ཟླ་བ་བཅུ་གཉིས་པོ་ཐ་དད་ཀྱི་ཚེས་བཅུ་སོ་སོའི་ཕན་ཡོན་ཀྱང་རྒྱས་པར་གསུངས་པ་ཡོད་མེད་ཀྱིས། འགག་དོན་སྙིང་པོར་ནི། འོ་སྐོལ་གང་ཟག་སོ་སོའི་ལས་སྒྲིབ་ཀྱིས་འཐུམས་ཆེས་པས་མ་མཐོང་བ་མ་གཏོགས། གུ་རུ་ཉིད་དངོས་སུ་བྱོན་ཞིང་བྱིན་གྱིས་རློབས་པར་ཞལ་གྱིས་བཞེས་པ་ལས་ལྷག་པ་བརྗོད་མ་དགོས་སོ། །དེ་ལྟར་རྒྱལ་བའི་དུས་ཆེན་རྣམས་ཀྱི་རྒྱུ་མཚན་འདི་བཞིན་ཡི་གེར་འཁོད་པ་གྱིས་ཞེས་དོན་གཉེར་བྱེད་པ་འགའ་བྱུང་ཡང་རང་ཉིད་ཀྱིས་མ་གྲུབ་པར་འགྱངས་པ་ལས། སླད་དུ་དོན་གཉིས་མཆོག་གྲུབ་

[Full Size]

པས་ནན་ཏན་དུ་བསྐུལ་བ་ལ་བརྟེན་ནས། སྣ་གྲོལ་རང་གྲོལ་རྒན་པོས་མི་མཐོང་བཞིན་དུ་གཞན་ལ་ཕན་དུ་རེ་བའི་ལྷག་བསམ་གྱིས་བྲིས་པ་མངྒ་ལཾ།། །དགེའོ། །གཅིག་ཞུས་ཁུལ་ལགས།

སྐུ་རྟེན་རྙིང་པ་ཞིག་གསོས་བྱེད་པ་ལ་ཨརྒྷའི་ཆོ་ག་ཇི་ལྟར་བྱ་ཚུལ།

[Full Size]

སྐུ་རྟེན་རྙིང་པ་ཞིག་གསོས་བྱེད་པ་ལ་ཨརྒྷའི་ཆོ་ག་ཇི་ལྟར་བྱ་ཚུལ་བཞུགས་སོ།

[Full Size]

སངས་རྒྱས་དང་བྱང་ཆུབ་སེམས་དཔའ་ཐུགས་རྗེའི་མངའ་བདག་རྣམས་ལ་ཕྱག་འཚལ་ཞིང་སྐྱབས་སུ་མཆིའོ།། ༈ །།བྱིན་གྱིས་བརླབ་པར་མཛད་དུ་གསོལ། གང་ཞིག་རྒྱལ་བའི་སྐུ་གསུང་ཐུགས་ཀྱི་རྟེན་རྙིང་པ་ཞིག་གསོས་བགྱི་བར་འདོད་པའི་རིགས་ལ་ཨརྒྷའི་ཆོ་ག་ཇི་ལྟར་བྱ་བའི་ཐབས་ཀྱི་རིམ་པ་ཅུང་ཟད་བསྟན་པར་བྱ་སྟེ། དེ་ཡང་མདོ་རྒྱུད་རྣམས་ལས་རྟེན་ཆུང་བ་ཆེ་རུ་གཏོང་བའམ། འོ་རྒྱལ་བའི་གནས་ལས་བཞུགས་ཡུལ་ལེགས་པའི་སར་སྤོ་བ་སོགས་ནི་བསོད་ནམས་ལྷག་པར་ཆེ་ལ། ཆེན་པོ་ཆུང་དུ་གཏོང་བ་དང་། སྐུ་རྒྱུ་

[Full Size]

སོགས་ངན་དུ་གཏོང་བ་ནི་གཏན་ནས་མི་རུང་བར་གསུངས་ལ། བཞུགས་ཡུལ་སྤོ་བར་བྱ་བའམ། ཞིག་གསོས་ངེས་པར་དགོས་པ་དག་ལ་ཨར་ཆོག་མེད་དུ་མི་རུང་བ་དང་། དེ་ཇི་ལྟར་བྱ་བའི་ཚུལ་ལའང་། དེའི་ལྷ་གང་ཡིན་གྱི་དམ་ཚིག་ཡེ་ཤེས་རྣམས་རེ་ཤིག་བཞུགས་གནས་སྤོ་བའི་ཐབས་ཀྱི་རྣམ་གྲངས་ལ་རྒྱུད་སྡེའི་རིམ་པ་སོ་སོའི་ཁྱད་ཀྱིས། སྔགས་བླ་མེད་གོང་མ་ལ་ལར་ནི། རྡོ་རྗེ་སློབ་དཔོན་སྐྱེད་རྫོགས་ཀྱི་ནུས་ལྡན་ཡིན་ན་རྟེན་དེ་དག་གི་ལྷ་ཚོགས་ཀྱང་སློབ་དཔོན་ཉིད་ཀྱི་ཐུགས་ཀའི་ས་བོན་ལ་བསྟིམ་པའི་ཚུལ་གསུངས་པ་

[Full Size]

དང་། དུས་འཁོར་སོགས་ལས་ནི། ལག་གི་རྡོ་རྗེ་ལ་བསྟིམ་ཐབས་དང་། གཞན་དག་ཏུ་བུམ་པ་མཚན་ཉིད་དང་ལྡན་པ་ལ་ཁ་རྒྱན་མགུལ་ཆིངས་གཟུངས་ཐག་ནང་བཅུད་སོགས་ཚང་བར་བྱས་པ་ལ་བསྟིམས་ཚུལ་སོགས་ཐ་དད་དུ་མར་བཤད་མོད་ཀྱང་། སྐབས་འདིར་རྒྱུད་སྡེ་གོང་འོག་སྤྱི་མཐུན་ལྟར་མེ་ལོང་ལ་བསྟིམ་པའི་ཐབས་ཉིད་སྟོན་པར་བྱ་བ་སྟེ། འདི་ལ་སྔོན་འགྲོ་དངོས་གཞི་རྗེས་དང་གསུམ་གྱི་དང་པོར་སྔོན་དུ་འགྲོ་བ་ནི་ལྷ་རྟེན་གང་ཡིན་པ་དེ་དག་གི་དྲུང་དུ་མཆོད་པའི་རིམ་པ་སྤྱི་ལྟར་དང་ཆ་གསུམ་གྱི་གཏོར་མ་སོགས་ཀྱང་ཅི་འབྱོར་བཤམས་ལ། སློབ་དཔོན་ཉིད་རྡོར་དྲིལ་ཐོགས་ལ་བདེ་བའི་སྟན་ལ་འཁོད་ནས། མཁའ་མཉམ་འགྲོ་ལ་ཕན་ཕྱིར་བདག་གིས་རྟེན་སྤོ་བའི་ཆོ་ག་བགྱིའོ་སྙམ་པའི་སེམས་བསྐྱེད་ཀྱིས། སྐྱབས་སེམས་ཡན་ལག་བདུན་དང་མཆོད་པ་བྱིན་རླབས་སོགས་བྱ་ཞིང་། བདག་ཉིད་།།།

[Full Size]

པའི་ལྷ་གང་ཡང་རུང་བའི་སྐྱེད་ཆོག་མཆོད་བསྟོད་སོགས་ཚང་བར་བྱས་ལ། ཡི་དམ་དེ་ཉིད་ཀྱི་བཟླས་པ་གང་འགྲུབ་ལོང་སྐབས་དང་བསྟུན་ཏེ་བྱ་བ་ནི་གལ་པོ་ཆེ་ཡིན་ཏེ། ཐོག་མར་བདག་ཉིད་ནུས་ལྡན་དུ་བྱའོ། །དེ་ནས་དངོས་གཞི་ལ། གང་སྤོ་རྒྱུའི་ལྷ་ཚོགས་དེ་ཐམས་ཅད་མངོན་སུམ་ལྟ་བུར་ཡིད་ཀྱིས་གསལ་བ་ལ། མདོ་སྔགས་གང་ཡིན་གྱི་ལྷ་དང་མཐུན་པའི་མཆོད་པ་འབུལ་ཚིག་རྒྱས་བསྡུས་ཀྱང་གང་ཡིན་གྱིས་མཆོད་ཅིང་སྤྱི་མཐུན་ལྟར་ན། འཇིག་རྟེན་ཁམས་ནི་དཔག་མེད་ན། །མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་སྣང་གསལ་དྲི་ཆབ་དང་། །ཞལ་ཟས་རོལ་མོ་ལ་སོགས་པའི། །མཆོད་རྫས་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ཐུགས་རྗེས་དགོངས་ཏེ་བཞེས་སུ་གསོལ། །ཨོཾ་སརྦ་ཏ་

[Full Size]

ཐཱ་ག་ཏ་ས་པ་རི་ཝཱ་ར་བཛྲ་ཨརྒྷཾ། པཱདྱཾ། པུཥྤེ། དྷུ་པེ། ཨཱ་ལོ་ཀེ། གྷནྡྷེ། ནཻ་ཝིདྱ། ཤཔྟ་པྲ་ཏཱི་ཙྪ་པཱུ་ཛ་ཨཱཿཧཱུྃ། ཞེས་པས་མཆོད་ཅིང་། རྟེན་གྱི་ལྷ་ཚོགས་གང་ཡིན་དེ་དག་གི་བསྟོད་པ་ཤེས་ན་དེ་ཉིད་ཀྱིས་བསྟོད་ཅིང་། མི་ཤེས་ན་སྤྱི་བསྟོད་རྒྱུད་ནས་གསུངས་པ་འདི་བྱས་ཀྱང་བྱིན་རླབས་ཆེ་སྟེ། མཉམ་མེད་མི་གཡོ་མཉམ་མེད་མཆོག་གི་ཆོས་ཉིད་ཅན། །ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་མེད་དམ་པའི་མཆོག་ཆོས་ཅན། །ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དཔེ་ནི་ནམ་མཁའ་དང་ཡང་བསྐྲུན་དུ་ཡོད་མ་ཡིན། །དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་

[Full Size]

མེད་པར་ཐུགས་རྗེའི་ཤུགས་ལས་བྱུང་། །སྨོན་ལམ་གྲུབ་པ་འགོག་པ་མེད་པའི་ཆོས་ཉིད་ཅན། །འགྲོ་བའི་དོན་སྒྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང་། །ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡི། །བདེ་བར་གཤེགས་པའི་གོ་འཕང་དམ་པ་བསྙེས་གྱུར་ཀྱང་། ཁམས་གསུམ་རྣམས་ལ་དངོས་གྲུབ་མཆོག་སྩོལ་མཛད་པ་ཡི། །ཐུགས་རྗེའི་སྤྱོད་པ་མི་གཡོ་འགགས་པར་སོངས་མི་འགྱུར། །ཨེ་མའོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ནས་གོ་འཕང་མཆོག་བརྙེས་པ། ཁམས་གསུམ་རྣམས་ལ་རྟག་ཏུ་དངོས་གྲུབ་མཆོག་སྩོལ་མཛད། །མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པས། །དམ་ཚིག་མཆོག་གསུམ་དངོས་གྲུབ་མ་ལུས་བདག་ལ་སྩོལ། ཞེས་

[Full Size]

པས་བསྟོད་ནས། ཉེས་ཚོགས་སྦྱང་ཕྱིར་ཡིག་བརྒྱ་ཡང་བརྗོད། སངས་རྒྱས་ཐམས་ཅད་ཀྱི་སྤྱན་སྔར་དམ་བཅས་པས་དཀོན་མཆོག་གསུམ་གྱི་ཕྲིན་ལས་སྒྲུབ་པའི་སྲུང་མ་གཙང་རིས་ཀྱི་དཔལ་མགོན་བདུན་ཅུ་རྩ་ལྔ་རྣམས་ལ་ཆ་གསུམ་གྱི་གཏོར་མ་རྒྱས་པར་བཏང་། དེ་ནས་མེ་ལོང་གཙང་མ་གཡའ་དག་ཅིག་ལེགས་པར་ཕྱིས་ལ་སྤོས་དུད་ཀྱིས་བསངས་ནས་ལག་ཏུ་ཐོགས་ཏེ། ཧཱུྃ། ཞེས་བརྗོད་པ་ཙམ་གྱིས་རང་ཉིད་ཡི་དམ་དུ་གསལ་བའི་ལྕེ་རྡོ་རྗེ་རྩེ་ལྔ་པར་གྱུར་ནས། ངག་གི་བརྗོད་ཚིག་མཐའ་དག་བདེན་པའི་ཚིག་གྲུབ་པའི་ནུས་པ་དང་ལྡན་པར་དམིགས་ཤིང་། རྟེན་གཤེགས་རྒྱུ་གང་ཡིན་དེ་དག་གི་གཟུགས་བརྙན་མེ་ལོང་དེ་ཉིད་ལ་འཆར་དུ་བཅུག་ཅིང་། དྲིལ་བུ་སིལ་ལ།། ༈ །།ཐུགས་རྗེ་མངའ་བའི་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །ཐུགས་རྗེ་ཡེ་ཤེས་སྤྱན་ལྡན་པ། །ཀུན་གྱིས་བྱིན་གྱིས་

[Full Size]

བརླབས་པའི་ཕྱིར། །བདག་ཉིད་རྡོ་རྗེ་སློབ་དཔོན་གྱིས། །སློབ་མ་རྣམས་ལ་བརྩེ་བ་དང་། ཁྱེད་རྣམས་ལ་ཡང་མཆོད་པའི་ཕྱིར། །ཡོ་བྱད་ཅི་འབྱོར་བ་དག་གིས། ཁྱེད་ཀྱི་རྟེན་རྣམས་སྤོ་བར་འཚལ། །ཚོགས་པ་ཐམས་ཅད་རབ་གནས་པ། །ཀུན་གྱིས་བྱིན་གྱིས་བརླབ་ཏུ་གསོལ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདེན་པའི་བྱིན་རླབས་ཀྱིས། རྟེན་རྣམས་ཀྱི་དམ་ཚིག་པ་དང་ཡེ་ཤེས་པ་མཐའ་དག་མེ་ལོང་གི་གཟུགས་བརྙན་ལ་ཐིམ་པར་གྱུར། ཛ་ཧཱུྃ་བྃ་ཧོཿ ཞེས་པའི་ཚིག་རྣམས་ལན་གསུམ་དུ་བརྗོད་པས། ལྷ་ཚོགས་ཐམས་ཅད་མེ་ལོང་གི་གཟུགས་བརྙན་ལ་མོས་ཤིང་ཐིམ་པར་ངེས་ཤེས་བསྐྱེད་ཅིང་། མེ་ལོང་དེ་ཉིད་མགོ་མཇུག་མ་ལོག་པར་ན་བཟའ་

[Full Size]

གསོལ་ནས་མཆོད་གྲལ་དུ་བཞུགས་སུ་གསོལ་བ། སླར་མཆོད་བསྟོད་མདོར་བསྡུས་བྱ་ཞིང་། རྟེན་འབྲེལ་སྙིང་པོ་བཟླས་པའི་མེ་ཏོག་ཀྱང་འཐོར་ལ་ཤིས་པ་བརྗོད་དོ།། ༈ །།རྗེས་སུ་རྟེན་རྣམས་སྔར་ལས་མི་དམན་པར་ནམ་གྲུབ་པའི་ཚེ། རབ་ཏུ་གནས་པའི་ཆོ་ག་རྒྱས་བསྡུས་ཅི་ལྟར་འགྲུབ་པ་བྱ་ཞིང་དེ་སྐབས་དངོས་གཞིའི་ཡེ་ཤེས་པ་བསྟིམ་པའི་དུས་སུ།། ༈ །།མེ་ལོང་གཟུགས་བརྙན་གྱི་ལྷ་ཚོགས་དེ་ཐམས་ཅད་རྟེན་ཉིད་ལ་ཐིམ་ནས་གཉིས་སུ་མེད་པར་གྱུར། ཞེས་བརྗོད་ཅིང་ངེས་ཤེས་ཀྱང་བྱའོ། །དེ་ལྟར་མ་གྲུབ་ཀྱི་རིང་ལ་མེ་ལོང་དེ་ཉིད་རྟེན་འགྲལ་དུ་བཞུགས་པ་མ་གཏོགས་ལས་གཞན་བཀོལ་དུ་མི་རུང་ངོ་། །ཡང་གལ་ཏེ་སྔར་གྱི་རྟེན་སྙིང་པ་དེ་དག་ཇི་ལྟ་བ་བཞེངས་པའི་སྐབས་ཐོབ་མེད་པ་ལྟ་བུ་ལ་

[Full Size]

ནི། ལྷ་གང་ཡིན་དེ་དག་ཚང་བའི་ཐང་སྐུ་ལྟ་བུ་གང་འགྲུབ་བཞེངས་ལ། མེ་ལོང་གི་ལྷ་ཚོགས་བསྟིམ་ཚུལ་སྔ་མ་ལྟར་བྱ་དགོས་པ་ཉིད་དོ།། ༈ །།དེ་ལྟར་རྟེན་ཞིག་གསོས་སོགས་ལ་ཨརྒྷའི་ཆོ་ག་འདི་བཞིན་མེད་མི་རུང་དུ་གསུངས་ཀྱང་། ལག་ལེན་གྱི་ཡིག་ཆ་དཀོན་པར་སྣང་ཞིང་། རང་གི་ཇི་ལྟར་ནུས་པའི་ཡི་གེ་ལྟས་ཆོག་ཏུ་བགྱིས་པ་འདི་ནི། ཀོང་ཡུལ་བུ་ཆུ་ལྷ་ཁང་གི་ཇོ་བོའི་དབུ་ལ་གསེར་ཐོག་འབུལ་བའི་དུས་སུ་དེ་མོ་སློབ་དཔོན་པས་བཀའ་ཡིས་བསྐུལ་བར་མཛད་པ་བཞིན། ཕྱི་རབས་རྗེས་སུ་འཇུག་དག་ལའང་ཕན་པར་སྲིད་དམ་སྙམ་པའི་ལྷག་བསམ་གྱིས་བྲིས་པའི་དགེ་བས་མཁའ་ཁྱབ་ཀྱི་འགྲོ་བ་བྱང་ཆུབ་མཆོག་ལ་འགོད་པའི་རྒྱུར་གྱུར་ཅིག །དགེའོ། གཅིག་ཞུས།།

ཆོས་ཐམས་ཅད་ཀྱི་སྙིང་པོ་ཕྱག་རྒྱ་ཆེན་པོའི་དོན་ཡང་དག་པ་རབ་ཏུ་གསལ་བར་བྱེད་པ་དྲི་མ་མེད་པའི་སྒྲོན་མ།

[Full Size]

ཆོས་ཐམས་ཅད་ཀྱི་སྙིང་པོ་ཕྱག་རྒྱ་ཆེན་པོའི་དོན་ཡང་དག་པ་རབ་ཏུ་གསལ་བར་བྱེད་པ་དྲི་མ་མེད་པའི་སྒྲོན་མ་ཞེས་བྱ་བ་བཞུགས་སོ།

[Full Size]

ན་མོ་མ་ཧཱ་མུ་དྲ་ཡེ། །གདོད་མ་ཉིད་ནས་ཡོངས་དག་པའི། །གནས་ལུགས་སྤྲོས་མཚན་ཀུན་གྱིས་དབེན། །ཆོས་ཉིད་འོད་གསལ་ཡེ་ཤེས་མཆོག །ཇི་བཞིན་རྟོགས་པའི་ཕྱག་གིས་མཆོད། །གཤིས་ངོར་གང་ཡང་གྲུབ་མིན་ཀྱང་། །སྣང་ཆར་སྣ་ཚོགས་ཤར་བའི་འཕྲུལ། །དབྱེར་མེད་གཉུག་མའི་རང་འགྲོས་ཉིད། །རང་ངོ་སྤྲོད་ཕྱིར་འདི་བཤད་བྱ། དེ་ཡང་རྒྱལ་བའི་བཀའ་རབ་འབྱམས་མཐའ་ཡས་པ་ཀུན་གྱིས་དགོངས་པའི་སྙིང་པོ་ནི་འགྲོ་བའི་ཁམས་ལ་དེ་

[Full Size]

བཞིན་གཤེགས་པའི་ཡེ་ཤེས་ཀྱི་སྙིང་པོ་གནས་པ་དེ་ཉིད་མངོན་གྱུར་དུ་བྱ་བའི་སླད་དུ་ཆོས་ཀྱི་རྣམ་གྲངས་སམ་ཐེག་པའི་བྱེ་བྲག་མཐའ་ཡས་པར་བསྟན་མོད་ཀྱི། གདུལ་བྱའི་མོས་པ་དང་བསྐལ་པ་ཐ་དད་པ་དེ་དང་དེ་དག་ལ་འདུལ་བྱེད་ཀྱི་ཆོས་སྒོ་དང་གདམས་པའི་རྣམ་གྲངས་ཀྱང་དེ་སྙེད་དུ་འབྱུང་བ་ནི། སངས་རྒྱས་རྣམས་ཀྱི་ཐུགས་རྗེའི་ཕྲིན་ལས་ཀྱི་མཐུ་སྟོབས་ཁྱད་པར་སྨད་དུ་བྱུང་བ་ཉིད་ཡིན་པ་དང་། དེ་དག་ལས་མཆོག་ཏུ་གྱུར་པའི་ཉེ་ལམ་འབྲས་བུ་གསང་སྔགས་རྡོ་རྗེ་ཐེག་པ་ཀུན་གྱི་རྩེ་མོའི་དོན་མཐར་ཐུག་

[Full Size]

པ། སེམས་ཉིད་སྐུ་གསུམ་ལྷུན་གྲུབ་ཀྱི་རང་ཞལ་མངོན་སུམ་བདེ་བླགས་སུ་སྟོན་པར་བྱེད་པའི་ཐབས་མཆོག །གྲུབ་མཆོག་རིག་འཛིན་ཀུན་གྱིས་བགྲོད་པ་གཅིག་པའི་གཞུང་ལམ་ཕྱག་རྒྱ་ཆེན་པོ་ཞེས་ཉི་ཟླ་ལྟར་གྲགས་པ་འདི་ཉིད་དགོངས་དོན་ཉེ་བར་མཁོ་བའི་གནད་འདུས་ཅུང་ཟད་བསྟན་པར་བྱ་སྟེ། འདི་ལའང་དོན་ཚན་རྣམ་པ་གསུམ་གྱིས་སྟོན་པ་ལས། གསུམ་གང་ཞེ་ན། གཞི་ཕྱག་རྒྱ་ཆེན་པོ་དངོས་པོ་གཤིས་ཀྱི་གནས་ལུགས་འཁྲུལ་གྲོལ་གཉིས་ཀྱི་སྒོ་ནས་ལྟ་བའི་དོན་མདོར་བསྟན་པ་དང་། ༡ ལམ་ཕྱག་རྒྱ་ཆེན་པོ་རང་བྱུང་རང་བབས་ཞི་ལྷག་གཉིས་ཀྱི་སྒོ་ནས་ཉམས་ལེན་པ་ལམ་ཇི་ལྟར་བགྲོད་ཚུལ་རྒྱས་པར་བཤད་པ་དང་། ༢ འབྲས་བུ་ཕྱག་རྒྱ་ཆེན་པོ་དྲི་བྲལ་དོན་གྱི་སངས་རྒྱས་སྐུ་གསུམ་མངོན་དུ་གྱུར་པས་འགྲོ་བའི་དོན་མཛད་ཚུལ་བཤད་པས་འགགས་བསྡུ་བ་དང་གསུམ་གྱིས་སྟོན་པའི་

[Full Size]

དང་པོ་ནི། དེ་ཡང་འཁོར་བ་དང་མྱ་ངན་ལས་འདས་པ་གང་དུའང་མ་གྲུབ་ཅིང་ཕྱོགས་དང་རིས་སུ་མ་ཆད་པའི་རང་ངོ་ལ་བདེ་སྡུག་ཡིན་མིན་ཡོད་མེད་རྟག་ཆད་བདག་གཞན་ལ་སོགས་པའི་མིང་འདོགས་ཀྱི་ཐ་སྙད་གང་གིས་ཀྱང་མ་གོས་ཤིང་མ་བསླད་པས་སྒྲོ་སྐུར་གྱི་མཐའ་དང་བྲལ་བ། ངོ་བོ་ཅིར་ཡང་མ་གྲུབ་པའི་གནད་ཀྱིས། རྣམ་པའམ་མཚན་ཉིད་ཅིར་ཡང་འཆར་བའི་གཞིར་རུང་ལ། གང་ལྟར་ཤར་ཡང་དོན་ལ་བདེན་པར་མ་གྲུབ་པ་སྟེ། སྐྱེ་འགག་གནས་གསུམ་གྱི་མཐའ་དང་བྲལ་བའི་སྟོང་པ་ཆེན་པོ་འདུས་མ་བྱས་པའི་ཆོས་ཀྱི་དབྱིངས་དེ་ཉིད་སྐུ་གསུམ་ལྷུན་གྲུབ་ཀྱི་རང་བཞིན་ཉིད་དུ་ཡེ་ནས་ཡིན་པ་དེ་ལ། གཞི་དངོས་པོ་གཤིས་ཀྱི་གནས་ལུགས་ཕྱག་རྒྱ་ཆེན་པོ་ཅེས་བྱ་བ་སྟེ།། ༈ །།གསང་བ་སྙིང་པོའི་རྒྱུད་ལས། གཞི་རྩ་མེད་པའི་སེམས་ཉིད་འདི། །ཆོས་རྣམས་

[Full Size]

ཀུན་གྱི་རྩ་བ་ཡིན། །ཅེས་གསུངས་པ། དེ་ནི་གང་ཟག་གཅིག་ཙམ་མམ། སངས་རྒྱས་གཅིག་ཙམ་མམ། སངས་རྒྱས་གཅིག་ཙམ་གྱི་ཐུགས་རྒྱུད་ལ་ཡོད་པ་ལྟ་བུ་ནི་ཡིན་ཏེ། སྣང་སྲིད་འཁོར་འདས་མཐའ་དག་གི་དངོས་གཞིར་ཁྱབ་པ་ཡིན་ཞིང་། འདིའི་གནས་ཚུལ་ལམ་ཡིན་ཚུལ་རྟོགས་ཤིང་རིག་པ་ན་སངས་རྒྱས་ཞེས་བྱ་བ་དང་། དེར་མ་རྟོགས་མ་རིག་པ་ན་སངས་རྒྱས་ཞེས་བྱ་བ་དང་། དེར་མ་རྟོགས་མ་རིག་ཅིང་འཁྲུལ་པ་ཤར་བ་ལ་སེམས་ཅན་ཅེས་བྱ་བ་སྟེ་འཁོར་བར་འཁྱམ་པའི་གཞི་བྱེད་པའི་ཕྱིར་དེས་ན་འཁོར་འདས་ཀྱི་སྤྱི་གཞི་ཞེས་སུ་གྲགས་པ་སྟེ། བྲམ་ཟེ་ཆེན་པོ་ས་ར་ཧ་པས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལས་སྲིད་དང་མྱ་ངན་འདས་འཕྲོ་བ། །ཅེས་གསུངས་པ་ལྟར། །ངོ་བོ་གཅིག་ལ་སྣང་ཚུལ་ཐ་དད་དམ། རྟོགས་མ་རྟོགས་ཀྱི་ཁྱད་པར་ཙམ་ལ་རྣམ་པ་སོ་སོར་སྣང་མོད་ཀྱི། དེ་

[Full Size]

གཉིས་གང་གི་ཚེ་ནའང་རང་གི་ངོ་བོ་ལ་བཟང་ངན་དང་འཕོ་འགྱུར་སོགས་ཀྱི་སྐྱོན་གྱིས་མ་གོས་པར་གདོད་ནས་སྐུ་གསུམ་དབྱེར་མེད་ཆེན་པོར་གནས་པ་འདི་ལ། ཐུན་མོང་ཐེག་པའི་སྐབས་རྣམས་སུ་ནི་འགྱུར་བ་མེད་པའི་ཡོངས་གྲུབ་ཅེས་ཀྱང་བྱ་སྟེ། ཐོག་མའི་གཞིའི་གནས་ལུགས་ཡིན་ནོ། །དེ་ལྟ་བུའི་གནས་ཚུལ་དེ་ལ་རྟོགས་མ་རྟོགས་གཉིས་ཀ་མ་ཡིན་པའི་བཏང་སྙོམས་ལུང་མ་བསྟན་དུ་གནས་པ་དེ་ལ་ཀུན་གཞི་ཞེས་བྱ་བ་སྟེ། འཁོར་འདས་གཉིས་ཀའི་གཞི་བྱེད་པའི་ཕྱིར་རོ། །ཀུན་གཞི་དེ་ཉིད་ཀྱང་ཅི་ཡང་མེད་པའི་སྟོང་པ་ཕྱང་ཆད་མ་ཡིན་པར་རང་གསལ་གྱི་ཤེས་པ་འགག་མེད་འཆར་རུང་དུ་ཡོད་པ་དེ་ལ་ཀུན་གཞིའི་རྣམ་ཤེས་ཅེས་བྱ་བ་སྟེ། མེ་ལོང་དང་དེའི་དངས་ཆ་ལྟ་བུའོ། །ཀུན་གཞི་གཅིག་པུ་དེ་ལས་

[Full Size]

འཁོར་འདས་སོ་སོར་གྱེས་ཚུལ་ནི། རང་གསལ་གྱི་ཤེས་པ་དེའི་རིག་ཆའམ་ཡེ་ཤེས་ཀྱི་ཆ་ངོ་བོ་སྟོང་ཞིང་རང་བཞིན་གསལ་ལ་དབྱེར་མེད་རིག་པའི་སྙིང་པོ་དེ་ནི་སངས་རྒྱས་ཀྱི་ཡོན་ཏན་དང་ཡང་དག་པའི་ལམ་གྱི་ཆོས་ཐམས་ཅད་ཀྱི་ས་བོན་དང་རྒྱུ་ཉིད་ཡིན་པའི་ཕྱིར། སྦྱོར་བ་དོན་གྱི་ཀུན་གཞི་ཡང་ཟེར། བདེར་གཤེགས་སྙིང་པོ། རང་རིག་ཆོས་སྐུ་ཤེས་རབ་ཕར་ཕྱིན། རང་སེམས་སངས་རྒྱས་ལ་སོགས་མྱ་ངན་ལས་འདས་པའི་ཆོས་ཀྱི་རྣམ་གྲངས་ལས་བཏགས་པའི་མིང་ཐམས་ཅད་འདིར་མཐུན་ཅིང་། ལམ་ལ་ཞུགས་པ་རྣམས་ཀྱིས་མངོན་དུ་བྱ་རྒྱུ་དང་རང་ངོ་སྤྲོད་རྒྱུ་ཡང་འདི་ཡིན་ནོ། །ཡང་། ཀུན་གཞི་ལུང་མ་བསྟན་དེའི་གཏི་མུག་གི་ཆ་ལས་རང་ངོ་རང་གི་མ་རིག་ཅིང་གནས་ལུགས་མ་རྟོགས་པར་རང་གིས་རང་ཉིད་བསྒྲིབས་པ་དེ་ལ་ལྷན་ཅིག་སྐྱེས་པའི་མ་རིག་པ་ཅེས་ཀྱང་བྱ། ཐོག་མེད་དུས་ཀྱི་མུན་ཆེན་

[Full Size]

ཞེས་ཀྱང་བྱ་སྟེ། འདི་ལ་བརྟེན་ནས་ཉོན་མོངས་དང་འཁྲུལ་རྟོག་མཐའ་དག་འབྱུང་ཕྱིར་བག་ཆགས་སྣ་ཚོགས་པའི་ཀུན་གཞི་ཞེས་ཀྱང་བྱ་བ། སེམས་ཅན་ཐམས་ཅད་ཀྱི་འཁྲུལ་གཞི་ཡིན་ནོ། །དེ་ཡང་དགོངས་པ་ཟང་ཐལ་གྱི་རྒྱུད་ལས། གཞི་ལས་རིག་པ་མ་ཤར་བས། ཅི་ཡང་དྲན་མེད་ཐོམ་མེ་བ། དེ་ཀ་མ་རིག་འཁྲུལ་པའི་རྒྱུ། ཅེས་གསུངས་ཤིང་། མ་རིག་པ་འདིའི་འཁོར་གྱི་ཚུལ་དུ་ཆགས་པ་བར་མ་དང་། བརྗེད་ངས་ལ་སོགས་གཏི་མུག་ལས་གྱུར་པའི་རྟོག་པ་བདུན་ཡང་ཡོད་དོ། །དེ་ལྟ་བུའི་ལྷན་སྐྱེས་ཀྱི་མ་རིག་པ་དེ་ལས་ང་དང་བདག་ཏུ་འཛིན་པའི་རྣམ་པར་རྟོག་པ་ཤར། བདག་ལ་བརྟེན་ནས་གཞན་དུ་བཟུང་བ་བྱུང་ཞིང་། རང་སྣང་ལ་རང་སྣང་དུ་མ་ཤེས་པར་ཕྱིའི་ཡུལ་དུ་བཟུང་སྟེ། གཟུང་འཛིན་གྱི་རྟོག་པ་ངོ་མ་ཤེས་པས་འཁྲུལ་པའི་མགོ་རྩོམ་དེ་ལ་ཀུན་ཏུ་བཏགས་པའི་མ་རིག་

[Full Size]

པ་ཟེར། །ཡིད་ཀྱི་རྣམ་ཤེས་ཀྱང་ཟེར་ཏེ། ཡུལ་སེམས་ཐ་དད་དུ་འཁྲུལ་པའི་སེམས་ཡིན་ལ། འདིའི་འཁོར་དུ་ཆགས་དང་ཞེན་པ་ལ་སོགས་འདོད་ཆགས་ལས་གྱུར་པའི་རྟོག་པ་བཞི་བཅུ་རྣམས་ཡོད་དོ། །དེ་ནས་ཡིད་ཀྱི་རྣམ་ཤེས་དེའི་རྩལ་ལས་བག་ཆགས་འཁྲུལ་པ་སྣ་ཚོགས་པ་ཤར་ཞིང་རྒྱས་པ་དང་། དེའི་གྲོགས་སུ་ལས་རླུང་ཁྱབ་བྱེད་ཀྱི་རྐྱེན་དང་། ཀུན་གཞི་མ་རིག་པའི་རྒྱུ་སོགས་རྟེན་ཅིང་འབྲེལ་འབྱུང་གི་མཐུ་བརྟས་པའི་དབང་གིས་ལུས་སྣང་སེམས་གསུམ་ཚང་བར་གྲུབ་ཅིང་། སྒོ་ལྔའི་དབང་ཤེས་ཀྱི་བྱེ་བྲག་དང་ཚོགས་དྲུག་གི་སྣང་རྟོག་ཤར་བ་ལ་གཞན་དབང་ཞེས་ཀྱང་བྱ། རྩ་བའི་རླུང་ཆེན་ལྔ་དང་ཡན་ལག་གི་རླུང་ཕྲན་ལྔ་སོགས་ཀྱི་རྣམ་རྟོག་གི་བཞོན་པ་བྱས་ཤིང་རང་སྣང་འཁྲུལ་འཛིན་གོམས་པའི་མཐུ་ལས་གྲུབ་པའི་སྣོད་བཅུད་དུ་སྣང་བས་གཞི་རྟེན་དང་ཡུལ་དུ་བྱས་ནས་མཐའ་དག་བསྐྱེད་པའི་ཕྱིར་ན་ཉོན་མོངས་

[Full Size]

པ་ཅན་གྱི་ཡིད་ཀྱང་ཟེར། དབང་པོ་སྒོ་ལྔ་སོ་སོར་རྒྱུ་ཞིང་ཞེན་ཆགས་སོགས་ཀྱི་བྱད་པོ་ཡིན་ཕྱིར་སྒོ་ལྔའི་རྣམ་པར་ཤེས་པ་ཡང་ཟེར་ལ། འདིའི་འཁོར་དུ་ཆགས་བྲལ་བར་མ་ལ་སོགས་ཞེ་སྡང་ལས་གྱུར་པའི་རྟོག་ཚོགས་སུམ་ཅུ་རྩ་གསུམ་ཀྱང་ཡོད་དེ། དེ་ལྟར་རྩ་བ་བག་ཆགས་སྣ་ཚོགས་པའི་ཀུན་གཞི་དང་། ཡན་ལག་རང་བཞིན་བརྒྱད་ཅུའི་རྣམ་རྟོག་རྣམ་རིམ་གྱིས་མཆེད་ཅིང་འཁྲུལ་པ་ལུ་གུ་རྒྱུད་དུ་གྱུར་པས་འཁོར་བ་མཐའ་མེད་དུ་འཁྱམས་པ་འདི་ནི་མ་རྟོགས་སེམས་ཅན་གྱི་འཁྲུལ་ཚུལ་ཡིན་ལ། ཀུན་གཞི་ལ་འཁོར་འདས་ཀྱི་ཆོས་ཐམས་ཅད་ཀྱི་བག་ཆགས་ས་བོན་གྱི་ཚུལ་དུ་གནས་པའི་མཐུས། ནང་གི་ལུས་བརྡོས་བཅས་རག་པ་དང་། རྩ་རླུང་ཐིག་ལེ་དངས་སྙིགས་སྣ་ཚོགས་པའི་དངོས་པོ་དང་། ཕྱིར་རོལ་ཏུ་འཁོར་འདས་ཁམས་གསུམ་སྣོད་བཅུད་ཀྱི་དངོས་པོ་ཐམས་ཅད་གཅིག་ལ་གཅིག་བརྟེན་གྱི་ཚུལ་དུ་སྣང་བ་འདི་དག་ཀྱང་

[Full Size]

དོན་ལ་མེད་བཞིན་ཀུན་རྫོབ་ཏུ་སྣང་བའི་ཆོ་འཕྲུལ་རྨི་ལམ་གྱི་ཡུལ་སྣང་ལྟ་བུ་འདི་ལ་རྟག་འཛིན་ཨ་འཐས་བདེན་ཞེན་ལ་ཆེས་ཆེར་གོམས་པས་ཁམས་སུམ་རིགས་དྲུག་གི་བདེ་སྡུག་བཏང་སྙོམས་སྣ་ཚོགས་ལ་སྤྱོད་ཅིང་། འཁོར་བའི་རྒྱུ་འབྲས་ཟོ་ཆུའི་འཁྱུད་མོ་ལྟ་བུ་ལ་རྟག་ཏུ་འཁོར་བ་ནི་སེམས་ཅན་སྤྱིའི་མཚན་ཉིད་ལགས་མོད་ཀྱི། དེ་ལྟར་འཁྲུལ་ཞིང་འཁོར་བར་འཁྱམས་དུས་ཀྱང་ཁམས་བདེར་གཤེགས་སྙིང་པོའམ་རིག་པའི་ངོ་བོ་ལ་ནི་ངན་དུ་སོང་བའམ་འགྲིྲིབ་པར་འགྱུར་བ་ནི་རྡུལ་ཙམ་ཡང་མེད་དེ། རྟག་གཉིས་ཀྱི་རྒྱུད་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་བློ་བུར་དྲི་མས་བསྒྲིབས། ཅེས་གསུངས་ལ། དོན་དམ་པར་ནི་ཡེ་གདོད་མའི་གནས་ལུགས་ཀྱང་སྐུ་གསུམ་དབྱེར་མེད་དུ་ལྷམ་མེ། བར་དུ་འཁྲུལ་སྣང་བློ་བུར་གྱི་དྲི་མས་བསྒྲིབས་དུས་ཀྱང་གཤིས་ཀྱི་རང་ངོ་སྐུ་གསུམ་དུ་ལྷང་ངེ་། མཐར་སྒྲིབ་བྱེད་སངས་ནས་

[Full Size]

མཁྱེན་གཉིས་རྒྱས་པའི་འབྲས་བུ་མངོན་དུ་གྱུར་དུས་ཀྱང་སྐུ་གསུམ་དུ་ལྷན་ནེར་བཞུགས་པ་ཉིད། དེའི་ཕྱིར་ན་འཁྲུལ་རྟོག་མ་རིག་པའི་དྲི་མ་དང་མ་བྲལ་ཙམ་ལ་འཁྲུལ་གྲོལ་གཉིས་སུ་ཐ་སྙད་བཏགས་པ་སྟེ། རྒྱུད་བླ་མ་ལས། ཇི་ལྟར་སྔར་བཞིན་ཕྱིས་དེ་བཞིན། འགྱུར་བ་མེད་པའི་ཆོས་ཉིད་དོ། ཅེས་སོ། དེ་བས་ན་སེམས་ཉིད་གདོད་ནས་དག་པའི་ངོ་བོར་ལྷུན་གྱི་གྲུབ་ཀྱང་བློ་བུར་གྱི་འཁྲུལ་པའམ་ལྷན་སྐྱེས་ཀྱི་མ་རིག་པ་ནི་གསེར་ལ་གཡའ་སྐྱེས་པ་བཞིན་རང་ལས་བྱུང་བས་རང་ཉིད་བསྒྲིབས་པ་འདི་སྦྱོང་ཞིང་དག་པར་བྱེད་པའི་ཐབས་ཀྱི་བྱེ་བྲག་སྣ་ཚོགས་གསུངས་ལ། ངོ་བོ་ནི་དུས་གསུམ་འཕོ་འགྱུར་བྲལ་བའི་རང་བྱུང་ཡེ་ཤེས་མཚན་མའི་སྤྲོས་པས་དབེན་པ་ཉིད་ཤེས་རབ་ཀྱི་ཆ་དངོས་ཡིན་ཕྱིར། དེས་ན་ལམ་ཐམས་ཅད་ཐབས་ཤེས་གཉིས་ལ་འདུ་བ་ནི་རྒྱལ་བའི་དགོངས་

[Full Size]

དོན་མཐར་ཐུག་པའོ། །ཅི་འོ་ན་སྔར་བཤད་པའི་ཀུན་གཞི་གཅིག་པུ་ལས་འཁོར་འདས་གཉིས་སུ་གྱེས་པ་མི་ཐད་དམ་སྙམ་ན་དེ་ནི་དཔེར་ན་སྨན་ག་པུུར་གཅིག་གིས་ནད་ཚ་གྲང་སོ་སོ་ལ་ཕན་གནོད་ཐ་དད་བྱེད་པ་དང་། དུག་གི་དངོས་པོ་གཅིག་ལ་སྔགས་སོགས་ཐབས་ཀྱིས་ཟིན་ན་སྨན་དུ་འགྱུར་ལ། ཐབས་དང་བྲལ་བས་ཟོས་ན་འཆི་བར་འགྱུར་བཞིན། འདིར་ཡང་ཀུན་གཞིའི་ངོ་བོ་གཉིས་ལ་རིག་ཅིང་རང་ངོ་ཤེས་ན་གྲོལ་བ་དང་། མ་རིག་ཅིང་བདག་ཏུ་བཟུང་ན་འཁྲུལ་བ་སྟེ། རྟོགས་མ་རྟོགས་ཁོ་ནས་ཁ་བསྒྱུར་བ་ཉིད། འཕགས་པ་ཀླུ་གྲུབ་ཀྱིས། ཉོན་མོངས་དྲ་བས་གཡོགས་པ་ན། སེམས་ཅན་ཞེས་ནི་བརྗོད་པར་བྱེད། དེ་ཉིད་ཉོན་མོངས་བྲལ་གྱུར་ན། སངས་རྒྱས་ཞེས་ནི་བརྗོད་པའོ། །ཅེས་སོ། དེ་ལྟར་ན་ཆོས་ཀུན་སྙིང་པོ་ངེས་དོན་ཕྱག་རྒྱ་ཆེན་པོའི་གདམས་པའི་ཐབས་ཀྱིས་ཟིན་ན་

[Full Size]

གཞི་ཕྱག་རྒྱ་ཆེན་པོ་གནས་ལུགས་ཀྱི་རང་སོ་ཟིན། ལམ་ཕྱག་རྒྱ་ཆེན་པོས་འཁྲུལ་རྟོག་གི་དྲི་མ་སྦྱང་། འབྲས་བུ་ཕྱག་རྒྱ་ཆེན་པོ་སྐུ་གསུམ་གྱི་རྒྱལ་ས་ཟིན་ཏེ་དོན་གཉིས་ཀྱི་གཏེར་ཁ་ཕྱེ་བའི་ཕྱིར། སྐལ་ལྡན་སྣོད་དང་ལྡན་པའི་གང་ཟག་གིས་བྱིན་རླབས་བཅུད་དང་ལྡན་པའི་བླ་མ་མཚན་ཉིད་ཚང་བ་བཙལ་ལ། ནོར་བཟང་དང་རྟག་ཏུ་ངུའི་ལོ་རྒྱུས་སམ། ཏེ་ལོ་པ་དང་ནཱ་རོ་ཞབས་ཀྱི་རྣམ་ཐར་ལྟ་བུས་བསྟེན་ཅིང་། རྡོ་རྗེ་ཐེག་པའི་ལམ་གྱི་འཇུག་སྒོའི་གཙོ་བོ་སྨིན་བྱེད་ཀྱི་རིམ་པ་རྒྱས་བསྡུས་ཅི་རིགས་པས་རྒྱུད་སྨིན་ངེས་སུ་བྱ་བ་དང་། གྲོལ་བྱེད་ཀྱི་གདམས་པའི་སྣ་ཁྲིད་ལ་མཆོག་ཏུ་གཅེས་པ་ཐུན་མོང་དང་ཁྱད་པར་གྱི་སྔོན་འགྲོ་མཐའ་དག་སླ་ཆོས་དང་སྒྱིད་སྙོམས་ཁྱད་སོད་དུ་མ་སོང་བར་རེ་རེ་ནས་རྟགས་འཐོན་དུ་འབད་པ་དང་། ཁྱད་པར་དུ་ཡང་བླ་མ་ལ་མོས་

[Full Size]

གུས་ཀྱི་རྣལ་འབྱོར་ལ་ཁ་ཞེ་མེད་པའི་ཉམས་ལེན་རྩལ་འདོན་དུ་བྱས་ཏེ་བྱིན་རླབས་ཀྱི་ཚན་ཁ་འབབས་ངེས་སུ་བྱེད་པ་ནི། བཀའ་རྒྱུད་རིག་འཛིན་གྲུབ་ཐོབ་ཀུན་གྱི་ཕྱག་བཞེས་སྙིང་པོ་དམ་པའོ། །དེ་ཡང་། ཞི་བྱེད་ཆུ་ཀླུང་ཆེན་པོའི་རྒྱུད་ལས། བརྗོད་བྲལ་ལྷན་ཅིག་སྐྱེས་པའི་ཡེ་ཤེས་འདི། །ཚོགས་བསགས་སྒྲིབ་པ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བསྟེན་ན་རྨོངས་པར་ཤེས་པར་བྱ། ཅེས་སོ། །དེ་ནས་དངོས་གཞི་ཉིད་ལའང་རྒྱུད་པ་སོ་སོའི་ཕྱག་སྲོལ་གྱི་བབས་ལས་ལྟ་ཐོག་ནས་སྒོམ་པ་ངོས་བཟུང་བ་དང་། སྒོམ་ཐོག་ནས་ལྟ་བ་གཏན་ལ་འབེབས་པ་སོགས་ཁྲིད་ཚུལ་གང་བྱེད་ཀྱང་། གཙོ་བོར་བླ་མ་རྒྱུད་པའི་བྱིན་རླབས་ཞུགས་པ་ཞིག་ཁོ་ན་གལ་ཆེ་ཞིང་། ལྟ་བ་དངོས་ནི། སྤྱིར་ཐེག་པའི་བྱེ་བྲག་དང་གྲུབ་མཐའི་

[Full Size]

རྣམ་གྲངས་ཐ་དད་ལ་ལྟ་བའི་བཞེད་ཚུལ་བསམ་གྱིས་མི་ཁྱབ་ཀྱང་། རང་རང་གི་ངོ་བོར་ནི་དེ་དང་དེ་དག་བདེན་པར་གཞི་གྲུབ་ཅིང་། ཐེག་པ་མཐའ་དག་རྒྱལ་བའི་ཕྲིན་ལས་ཀྱི་སྒོ་རབ་འབྱམས་མཐའ་ཡས་པའི་བཀོད་པ་ཡིན་ཕྱིར་དག་དང་མ་དག་བཟང་ངན་ལ་སོགས་སུ་བདག་ནི་མི་སྨྲ་ཞིང་ཀུན་ལ་རྗེས་སུ་ཡི་རངས་ལ། སྐབས་འདིའི་ལྟ་བ་དེ་ནི། སེམས་ཉིད་ཡེ་གདོད་མ་ནས་ཡོངས་དག་ཆེན་པོར་ལྷུན་གྱིས་གྲུབ་ཅིང་འདས་མ་འོངས་ད་ལྟར་དུས་གསུམ་དུ་སྐྱེ་འགག་གནས་དང་འགྲོ་འོང་གི་སྤྲོས་པ་དང་བྲལ་བ། འཁོར་འདས་ལམ་གསུམ་དུ་འཛིན་པའི་དམིགས་མཚན་གྱིས་མ་བསླད་པ། ཡོད་མེད་ཡིན་མིན་རྟག་ཆད་བཟང་ངན་མཐོ་དམན་ལ་སོགས་ཀྱི་སྒྲོ་སྐུར་མ་བྱས་པ། འཁོར་འདས་ཀྱིས་བསྡུས་པའི་སྣང་སྲིད་ཀྱི་ཆོས་ཐམས་ཅད་ལ་དགག་སྒྲུབ་སྤོང་ལེན་བསྒྱུར་བཀོད་མ་བྱས་པའི་

[Full Size]

ཡེ་ནས་གནས་ཚུལ་ལམ་ཡིན་ཚུལ་ཇི་ལྟ་བའི་རང་བཞིན་སྣང་སྟོང་དབྱེར་མེད་དུ་ཁྲིག་གེ། གསལ་སྟོང་ཟུང་འཇུག་ཏུ་ལམ་མེ། ཡེ་གྲོལ་ཁྱབ་གདལ་དུ་ཤིག་གེ། འདུས་མ་བྱས་ལྷུན་གྲུབ་ཏུ་ཆམ་མེ་བ་འདི་ནི་ལྟ་བའི་དངོས་གཞིར་ཡིན་ལུགས་ཇི་བཞིན་དུ་གདོད་མ་ནས་རང་བྱུང་ལ། དེ་ཉིད་འཁོར་འདས་ཀུན་གྱི་ངོ་བོར་ཡེ་ཁྱབ་ཏུ་གྱུར་པ་འདི་ལས་གཞན་པའི་ལྟ་བ་ཞེས་ཁོལ་བུའམ་དུམ་བུར་རིས་སུ་ཆད་པ་ཞིག་མེད། དེ་ལྟ་བུ་ཡེ་ནས་ཡིན་ཚུལ་ཤེས་པས་གཉིས་འཛིན་གྱི་བརྫུན་མཚང་རིགས་པ་ལ་ལྟ་བ་རྟོགས་པ་ཡང་ཟེར། སེམས་ངོ་མཐོང་བ་ཡང་ཟེར། ཆོས་དོན་རིགས་པ་ཡང་ཟེར་སྟེ། རྡོ་ཧ་མཛོད་ལས། རྟོགས་པར་གྱུར་ན་ཐམས་ཅད་དེ་ཡིན་ཏེ། དེ་ལས་གཞན་ཞིག་སུས་ཀྱང་ཤེས་མི་འགྱུར། ཅེས་གསུངས། དོན་ལ་སྣང་སྲིད་འཁོར་འདས་ཐམས་ཅད་སྐུ་གསུམ་གྱི་རོལ་པ་ཡིན་པ་དང་། རང་གི་སེམས་ཉིད་ཀྱང་སྐུ་གསུམ་གྱི་རང་

[Full Size]

བཞིན་ཉིད་དང་། དེ་དག་ཉིད་ཀྱང་དོན་དམ་ཆོས་ཉིད་ཀྱི་དབྱིངས་ལས་འདའ་བ་མེད་ཅིང་། དེ་ཡང་འཁོར་བའི་ཆོས་ཐམས་ཅད་ནི་སེམས་ཀྱི་མཚན་ཉིད་ཀྱི་ཚུལ་དང་། ལམ་གྱི་ཆོས་ཐམས་ཅད་ཆོས་ཀྱི་ཡོན་ཏན་གྱི་ཚུལ་དང་། འབྲས་བུའི་ཆོས་ཐམས་ཅད་སེམས་ཀྱི་ནུས་པའི་ཚུལ་དུ་ཚང་བ་སྟེ། སེམས་ཉིད་ཁོ་རང་གི་གཤིས་སྐྱེ་མེད་ཆོས་སྐུ། གདངས་འགགས་མེད་ལོངས་སྐུ། རྩལ་ཅིར་ཡང་འཆར་བ་སྤྲུལ་སྐུ། དེ་གསུམ་ཀྱང་ངོ་བོ་དབྱེར་མེད་དུ་ལྷུན་གྱིས་གྲུབ་ཅིང་། དེ་ལྟར་ཡིན་ལུགས་རང་ངོ་ཤེས་ཤིང་ཐག་ཆོད་པ་ནི་ལྟ་བ་སྐྱོན་མེད་ཕྱིན་ཅི་མ་ལོག་པ་ཡང་དག་པར་རྟོགས་པ་ཅེས་བྱ་ལ། འདི་ལས་གཞན་པའི་ལྟ་བ་མཐའ་དང་བྲལ་མ་བྲལ་མཐོ་ཁྱད་བཟང་ངན་ལ་སོགས་དམིགས་གཏད་ཀྱི་མཚན་མ་དང་བློས་བྱས་ཡིད་དཔྱོད་ཀྱི་རྟོག་པས་བཏགས་པའི་ལྟ་སྒོམ་གང་ཡང་ཕྱག་རྒྱ་ཆེན་པོའི་ལྟ་བར་མ་གསུངས་སོ།

[Full Size]

གཉིས་པ་ལམ་ཕྱག་རྒྱ་ཆེན་པོའི་སྒོམ་པ་ཞི་ལྷག་དང་སྐྱོན་ཡོན་མཉམ་རྗེས་རྣལ་འབྱོར་ས་ལམ་བགྲོད་ཚུལ་སོགས་བསྟན་པ་ནི། དེ་ཡང་སྤྱིར་སྒོམ་པ་ཅེས་པའི་མིང་འཇུག་པ་ནི་མང་ལ། གྲུབ་མཐའ་སོ་སོ་ལ་རང་སྐབས་ཀྱི་བསྒོམ་ཚུལ་ཀྱང་མཐའ་ཡས་ནའང་། འདིར་ནི་སྔར་བཤད་མ་ཐག་པའི་ལྟ་བ་གནས་ལུགས་ཀྱི་དོན་དེ་རྒྱུད་ལ་གོམས་འདྲིས་སུ་བྱ་བ་ལ་སྒོམ་པའི་མིང་དང་ཐ་སྙད་དུ་བཏགས་པ་ཙམ་མ་གཏོགས། དངོས་པོ་ཁ་དོག་དབྱིབས་ཅན་ལྟ་བུ་བློས་བཅོས་ནས་བསྒོམ་པའམ། སེམས་ཀྱི་འགྱུར་དྲན་འཆར་སྣང་བཀག་པའི་བཅོས་མའི་སྟོང་ཉིད་ལྟ་བུ་ཞིག་ཆེད་དུ་བསྒོམ་པ་ནི་གཏན་མ་ཡིན་ཏེ། རང་སེམས་བབས་བཟོ་མེད་དུ་སྐྱོང་བ་ཁོ་ན་ཡིན་ལ། བྱེ་བྲག་ཏུ། གང་གི་དབང་པོ་དང་བློ་རིགས་སྣ་ཚོགས་པའི་ཕྱིར། ཅིག་ཆར་དབང་པོ་རྣོན་པོ་སྦྱངས་པ་མངོན་གྱུར་དག་ལ་ནི་

[Full Size]

ཞི་ལྷག་རིམ་ཅན་དུ་དཀྲི་མི་དགོས་པར་ངོ་འཕྲོད་པ་དང་གྲོལ་བ་དུས་མཉམ་དུ་འགྱུར་བ་དག་འབྱུང་མོད་ནའང་། གཞན་ཕལ་པ་དག་ལ་ནི་རིམ་གྱིས་ཁྲིད་དགོས་ཕྱིར་ཐོག་མར་ཞི་གནས་ཀྱི་རིམ་པ་མཚན་བཅས་ཤིང་བུ་རྡེའུ་ལྷ་སྐུ་ཡིག་འབྲུ་ཐིག་རླུང་གི་སྦྱོར་བ་སོགས་ལ་བསླབ་ཅིང་། དེ་དག་ལ་ངེས་པ་རྙེད་ནས་སླར་མཚན་མེད་མཆོག་གི་ཞི་གནས་ལ་འཇུག་པར་བྱ་སྟེ། ཞི་གནས་དངོས་ནི་མཉམ་པར་བཞག་ཐབས་གསུམ་གྱི་སྒོ་ནས་སྟོན་ཏེ། དེ་ཡང་ཕྱི་ནང་གི་ཡུལ་རྐྱེན་གྱི་རྗེས་སུ་སེམས་ཡེངས་པ་མ་ཡིན་པར་ཡེངས་མེད་སོ་མར་བཞག་པ་དང་། སྒོ་གསུམ་ཧ་ཅང་བསྒྲིམས་པས་བཅིངས་པ་མ་ཡིན་པར་རྩོལ་མེད་རང་བབས་ལྷུག་པར་བཞག་པ་དང་། རྣམ་རྟོག་གི་ངོ་བོ་དང་དྲན་རིག་གཉིས་ཡ་བྲལ་ཐ་དད་གཉེན་པོ་བསྟེན་པ་ལྟ་བུ་མ་ཡིན་པར་

[Full Size]

རང་རིག་རང་གསལ་རང་དངས་སུ་བཞག་པ་སྟེ། འདི་གསུམ་ལ་མིང་གི་རྣམ་གྲངས་གཞན་དུ། མ་ཡེངས། མི་བསྒོམ། བཟོ་མེད་ཅེས་ཀྱང་བྱ་ལ། ཐུན་མོང་གི་ཐེག་པར་གསུངས་པའི་རྣམ་པར་ཐར་པའི་སྒོ་གསུམ་ཡང་འདིར་ཚང་སྟེ། སེམས་དེ་ཀ་སྔར་འདས་པའི་བྱ་བྱེད་སོགས་ལ་འདི་བྱས་འདི་བྱུང་གི་རྗེས་གཅོད་མི་བྱ་བ་ནི་རྣམ་པར་ཐར་པའི་སྒོ་མཚན་མ་མེད་པ་ཅེས་བྱ་བ་དང་། དེ་ལྟའི་སེམས་ལ་བློས་བྱས་ཀྱི་བསྒྱུར་བཀོད་དང་འདི་སྣང་འདི་བྱའི་དགག་སྒྲུབ་མེད་པ་ནི་རྣམ་པར་ཐར་པའི་སྒོ་སྟོང་པ་ཉིད་དང་། མ་འོངས་པར་འདི་དང་འདི་བཞིན་འབྱུང་འགྱུར་གྱི་རྔུན་བསུ་དང་། སྒོམ་ཡོང་དུ་རེ་བ་དང་མི་ཡོང་གི་དོགས་པ་ལྟ་བུའི་འདོད་འདུན་མེད་པ་ནི་རྣམ་པར་ཐར་པ་སྨོན་པ་མེད་པའི་སྒོ་ཞེས་བྱ་ཞིང་། མདོར་བསྡུ་ན། རང་སེམས་རང་བབས་བཅོས་བསླད་མེད་པར་འཇོག་པ་ཉིད་ལ་འདུས་སོ། །

[Full Size]

དེའི་ངང་ནས་རྣམ་པར་རྟོག་པ་ཅིག་ཁྱུགས་ཀྱི་ཤར་བའི་ཚེ་ན། གང་ཤར་བ་དེ་ལ་རྗེས་འཐུད་དུ་མ་སོང་བར་རང་ངོ་ཧྲིག་གིས་ཤེས་པར་བྱ་བ་ཁོ་ནས་ཆོག་གི། ཆེད་དུ་བཀག་པའམ། སྒོམ་ལ་ཚུར་བཀུགས་པའམ། གཉེན་པོ་གཞན་གྱིས་གཅུན་པ་སོགས་གང་ཡང་མི་བྱ་སྟེ། དེ་དག་གང་བྱས་ཀྱང་སེམས་ཉིད་མ་བཅོས་བཟོ་མེད་སྐྱོང་བའི་གནད་མ་ཡིན་ཅིང་། ལམ་གྱི་བྱེ་བྲག་གཞན་ལས་སྣ་ཚོགས་འབྱུང་མོད་ཀྱང་། འདི་སྐབས་སུ་ནི་གང་ཤར་རང་ངོ་ཤེས་པའི་ལམ་ཁོ་ན་ཡིན་པས་ཐབས་གཞན་བཙལ་ན་ཕྱག་རྒྱ་ཆེན་པོའི་སྒོམ་དུ་མི་འགྱུར་ཏེ། དེ་ཡང་བྲམ་ཟེ་ཆེན་པོས། འགྲོ་རྣམས་བསམ་གཏན་སྩོལ་བས་བསླད། །སྒོམ་རྒྱུ་ཅི་ཡང་མེད་པ་ལ། །ཡེངས་སུ་སྐད་ཅིག་མི་འདོད་པས། །ཕྱག་རྒྱ་ཆེན་པོ་བསྒོམ་པ་ཡིན། །

[Full Size]

ཅེས་གསུངས་ཤིང་། དེ་ལྟར་སེམས་ཀྱི་གནས་ལུགས་ཇི་བཞིན་པའི་ཐོག་ཏུ་མཉམ་པར་གཞག་པས། ཞི་གནས་ཀྱི་ཉམས་གསུམ་པོ་རིམ་ཅན་དུ་འཆར་བར་འགྱུར་ཏེ། གང་ཞེ་ན། དང་པོར་སེམས་ཆེར་རྒོད་ཅིང་འཕྲོ་བའི་རྟོག་པ་སྔར་ལས་ཀྱང་མང་དུ་སོང་བ་ལྟ་བུའི་བར་མཚམས་འགར་ཅུང་ཟད་ཙམ་རེ་གནས་པ་ཞིག་འབྱུང་བའི་འཕྲོ་བ་དེ་ལ་སྐྱོན་དུ་མི་བལྟ་སྟེ། སྔོན་ཆད་འཕྲོ་བ་ཤ་སྟག་ཡིན་ཀྱང་ངོས་མ་ཟིན་པ་དེ་འདི་སྐབས་འཕྲོ་གནས་ཀྱི་དབྱེ་བ་ཤེས་པ་ཡིན་ཚེ། ཞི་གནས་དང་པོ་རི་གཟར་གྱི་འབབ་ཆུ་ལྟ་བུ་ཅེས་བྱ། དེ་ལྟར་བསྐྱངས་པས་རྣམ་རྟོག་ཕལ་ཆེར་མགོ་ནོན་ཏེ་འཇམ་ཉལ་གྱི་འགྲོ་ཞིང་ལུས་སེམས་བདེ་འབོལ་གྱི་སོང་བས་བྱ་བྱེད་གཞན་ལ་ཞེན་པ་མི་འཇུག་པར་མཉམ་བཞག་ལ་སྤྲོ་ཞིང་། ཐེང་རེ་ཙམ་ལས་གཞན་རྟོག་པའི་འགྱུ་འཕྲོ་མེད་པའི་གནས་པ་ཤས་ཆེར་

[Full Size]

གྱུར་པ་ནི། ཞི་གནས་བར་མ་ཆུ་བོ་དལ་འབབས་ལྟ་བུ་དང་། སླར་ཡང་རྣམ་གཡེང་མེད་པར་བརྩོན་པས་ཉམས་སུ་བླངས་ན། ལུས་ཀྱི་ཚོར་བའི་ཟུག་རྔུ་གང་ཡང་མེད་པར་བདེ་ཆམ་མེ། སེམས་གསལ་དངས་རྟོག་པ་མེད་པར་ཉིན་མཚན་འདས་པ་མི་ཚོར་ཞིང་ཇི་ཙམ་མཉམ་པར་གཞག་གི་བར་དུ་གཡོ་བ་མེད་ཅིང་རྐྱེན་གྱིས་མི་གནོད་ལ། ཉོན་མོངས་མངོན་གྱུར་ཞི་ཞིང་ཟས་གོས་སོགས་ཀྱི་ཞེན་པ་ཆེར་མི་འབྱུང་བ་དང་། ཟག་བཅས་ཀྱི་མངོན་ཤེས་དང་གསལ་སྣང་གི་ཉམས་ཀྱི་བྱེ་བྲག་སྣ་ཚོགས་འཆར་བ་སོགས་ཐུན་མོང་གི་ཡོན་ཏན་ལྟར་སྣང་བ་དུ་མ་འབྱུང་བ་ནི་ཞི་གནས་མཐར་ཐུག་རྒྱ་མཚོ་མི་གཡོ་བ་ལྟ་བུ་ཞེས་བྱ་ཞིང་། འདི་སྐབས་སུ་བླ་མ་ཉམས་མྱོང་ཅན་དང་མ་ཕྲད་ཅིང་སྙིང་རུས་ཆེ་ལ་ཐོས་པ་ཆུང་བའི་སྒོམ་ཆེན་པ་མང་པོ་ཡོན་ཏན་ལྟར་

[Full Size]

སྣང་བ་ལ་རློམ་སེམས་སྐྱེས་ཤིང་། སྐྱེ་བོ་དག་གིས་ཀྱང་གྲུབ་ཐོབ་ཏུ་མཐོང་བ་ལ་བརྟེན་ནས་རང་གཞན་མང་པོ་ཕུང་ཉེན་ཡོད་པས་གཟབས་འཚལ་ལོ། དེ་ལྟར་ཞི་གནས་ཀྱི་སྒོམ་རྐྱང་པས་ནི། ཕྱག་རྒྱ་ཆེན་པོའི་ཉམས་ལེན་དངོས་གཞིར་རུང་བ་མ་ཡིན་ཀྱང་གཞི་རྟེན་གྱི་ཚུལ་དུ་ངེས་པར་གལ་ཆེ་བར་གསུངས་ཤིང་། དེ་ཡང་། རྒྱལ་བ་ལོ་རས་ཀྱིས། གསལ་ཆ་མེད་པའི་ཞི་གནས་ལྟེང་པོ། །བསྒོམ་ཡུན་རིང་ཡང་དོན་མི་རྟོགས་ཀྱི། ལྟར་སྟངས་རིག་པའི་ངར་དང་ལྡན་པས། ཐུན་ཆུང་འཕྲོ་ལ་འཐུད་ཅིང་བསྒོམ་ཅིག །ཅེས་གསུངས་སོ། །དངོས་གཞི་ལྷག་མཐོང་ནི། དེ་ཡང་སེམས་ཀྱི་ངོ་བོ་ལ་དབྱིབས་ཁ་དོག་སོགས་མཚན་མ་དངོས་ཅན་དུ་གྲུབ་མ་གྲུབ་དང་། བྱུང་གནས་འགྲོ་གསུམ། སྐྱེ་འགགས་ཡོད་མེད་རྟག་ཆད་མཐའ་དབུས་ལ་སོགས་ཀྱི་བརྡར་ཤའི་ཐེ་ཚོམ་ཕུ་ཐག་མ་

[Full Size]

ཆོད་ན་ལྟ་བ་ཡིན་ལུགས་ཀྱི་ཐོག་ཏུ་མི་ཕེབས། དེ་མ་ཕེབས་ན་སྒོམ་རང་བབས་རང་འགྲོས་ཀྱི་སྐྱོང་ཚུལ་མི་ཤེས། དེ་མ་ཤེས་ཚེ་ཞི་གནས་བླུན་རྨོངས་དང་སྡུག་བཙིར་སེམས་འཛིན་གྱི་སྙིང་རུས་ཇི་ཙམ་བྱས་ཀྱང་ཁམས་གསུམ་འཁོར་བའི་རྒྱུ་འབྲས་ལས་མ་འདས་ཚེ། དེས་ན་བླ་མ་མཚན་ལྡན་གྱི་དྲུང་དུ་སྒྲོ་ལྟོག་གཅད་ཅིང་། ཁྱད་པར་གསང་སྔགས་བྱིན་རླབས་ཀྱི་ལམ་པ་ཡིན་ཕྱིར་མོས་གུས་གསོལ་འདེབས་ལ་འབད་པས་རྒྱུད་པའི་བྱིན་རླབས་ཀྱི་རྟོགས་པ་འཕོ་ཐབས་ལ་འབུངས། དེ་ལྟར་བྱས་ཚེ་རང་གི་རིག་པ་ཡེ་གདོད་མ་ནས་ཆོས་སྐུའི་ངོ་བོར་ལྷུན་གྲུབ་ཏུ་ཡོད་པའི་ཚུལ་སྔར་ལྟ་བའི་སྐབས་སུ་བཤད་པ་བཞིན། མངོན་སུམ་རྟོག་བྲལ་གྱི་ཡེ་ཤེས་ཡོད་མེད་ཡིན་མིན་རྟག་ཆད་གང་གི་ཡང་མཐར་མ་ལྷུངས་ཤིང་། གསལ་རིག་སྟོང་གསུམ་དབྱེར་མེད་དུ་མྱོང་ཞིང་ཤེས་

[Full Size]

ཀྱང་དཔེས་མཚོན་དུ་མེད་ལ་ཚིག་གིས་བརྗོད་ཐབས་ཟད་པ། རང་བྱུང་རང་གསལ་དུ་ཧྲིག་གེ་བ་འདི་ལ་ལྷག་མཐོང་ཞེས་མིང་དུ་བཏགས་མོད་ཀྱི། འདི་ཉིད་དངོས་པོ་སོ་སོ་སྐྱེ་བོའི་དུས་ནས་རང་དང་འདུ་འབྲལ་སྐད་ཅིག་མེད་ཀྱང་གདམ་ངག་དང་བྱིན་རླབས་ཀྱིས་མ་ཟིན་པས་ངོ་མ་ཤེས། བར་དུ་ཞི་གནས་ལ་མཉམ་པར་གཞག་མཁན་ནམ། གནས་མི་གནས་བལྟ་མཁན་སོགས་ཐམས་ཅད་ཁོ་རང་ཡིན་ཀྱང་རང་གིས་རང་མ་མཐོང་བ་ལྟ་བུར་གྱུར་པ་སྟེ། ཐ་མལ་པའི་དུས་ཀྱི་རྣམ་རྟོག་ལུ་གུ་རྒྱུད་དུ་འཕྲོ་བ་དེ་ཉིད་ལྷག་མཐོང་ཁོ་རང་རྣམ་རྟོག་ཏུ་སྣང་བ་ལས་གཞན་མིན་ལ། ཞི་གནས་ཀྱི་ཉམས་དང་བདེ་གསལ་མི་རྟོག་དེ་ཐམས་ཅད་ལྷག་མཐོང་གི་རིག་པ་ཁོ་རང་དག་ཏུ་ཤར་བ་ལས་གཞན་མིན་ཀྱང་། བློ་བྲལ་རྗེན་པའི་རང་ངོ་མ་རིག་ན་གནས་ཆ་རྐྱང་པ་སོང་ནས་བྱང་ཆུབ་ཀྱི་རྒྱུ་རུ་

[Full Size]

མི་འགྲོ་བ་ཡིན་ཞིང་། རང་ངོ་མཐོང་ཕྱིན་ཆད་ནི་གནས་འཕྲོ་གང་ཡང་ལྷག་མཐོང་ངམ་ཕྱག་རྒྱ་ཆེན་པོར་མ་གྱུར་པ་ཅི་ཡང་མེད། ལོ་རས་ཀྱི། ཚོགས་དྲུག་ཡུལ་དུ་ཅིར་ཤར་ཀྱང་། ཡིད་ཀྱི་འཛིན་པ་མ་ཞུགས་ན། ཐམས་ཅད་རང་སྣང་རང་གྲོལ་ཡིན། དབྱེར་མེད་རྟོགས་བསམ་སྒོམ་ཆེན་ཀུན། ཅེས་གསུངས་སོ། །དེ་ཡང་སྤྱི་ལྟར་ན། རྣམ་རྟོག་རང་སར་ཞི་ནས་སེམས་བདེ་གསལ་མི་རྟོག་གི་ངང་དུ་གནས་པ་ནི་ཞི་གནས། སེམས་ཀྱི་ངོ་བོ་རང་གསལ་ཡུལ་མེད་སྒྲོ་སྐུར་དང་བྲལ་བ་རྗེན་ནེ་ལྷང་ངེར་མཐོང་བ་ནི་ལྷག་མཐོང་། ཅེས་པ་དང་། ཡང་རྣམ་རྟོག་འཕྲོ་འདུ་བྲལ་བ་ཞི་གནས། འགྱུ་བ་རང་ངོ་ཤེས་པ་ལྷག་མཐོང་། ཅེས་སོགས་མང་ཡང་དོན་ལ་ནི་གང་སྣང་ཅིར་ཤར་ཐམས་ཅད་ཞི་ལྷག་དབྱེར་མེད་ཁོ་ན་ལས་མ་འདས་ཏེ། གནས་པ་དང་འགྱུ་བ་ནི་སེམས་ཁོ་རང་གཅིག་པུའི་

[Full Size]

རོལ་པ་ལས་མ་འདས་པས། དེ་གཉིས་གང་གི་ཚེ་ཡང་རང་ངོ་ཤེས་ན་ལྷག་མཐོང་གི་རང་བཞིན་ཉིད་དང་། ཕྱི་རོལ་ཚོགས་དྲུག་གི་སྣང་བ་གང་ལ་ཡང་ཨ་འཐས་ཀྱི་ཞེན་པ་མ་ཞུགས་པ་ནི་ཞི་གནས། འཆར་སྒོ་འགག་མེད་དུ་སྣང་བ་ལྷག་མཐོང་སྟེ། སྣང་ཐོག་ཏུ་ཞི་ལྷག་ཟུང་འཇུག་ཚང་། རྣམ་རྟོག་ལྷངས་ཀྱི་ཤར་ཚེ་རང་ངོ་ཧྲིག་གིས་ཤེས་པར་བྱེད་པ་ཞི་གནས། དེ་ཉིད་རང་སེམས་བློ་བྲལ་རྗེན་པར་གྲོལ་བ་ལྷག་མཐོང་སྟེ། རྟོག་ཐོག་ན་ཡང་ཞི་ལྷག་ཟུང་འཇུག །ཡང་། ཉོན་མོངས་པ་ཤིན་ཏུ་དྲག་པོ་ཞིག་སྐྱེས་པའི་ཚེ་ནའང་དེའི་རྗེས་སུ་ཨ་འཐས་མ་སོང་བ་རང་ངོ་ལ་བལྟ་བ་ནི་ཞི་གནས། བལྟ་མཁན་གྱི་རིག་པ་དང་བལྟ་བའི་ཉོན་མོངས་སོ་སོར་མ་གྲུབ་པའི་གསལ་སྟོང་རྗེན་པ་ནི་ལྷག་མཐོང་སྟེ། ཉོན་མོངས་ཀྱི་ཐོག་ཏུ་ཡང་ཞི་ལྷག་ཟུང་འཇུག་ཚང་སྟེ། མདོར་ན་སེམས་ཉིད་རང་གི་ངོ་བོ་

[Full Size]

ལ་ནི་གནས་འགྱུ་འཕྲོ་འདུ་བཟང་ངན་དུ་གྲུབ་པ་མེད་ཅིང་། དེ་དག་ཏུ་སྣང་བ་རྣམས་ནི་རོལ་རྩལ་ལས་འགག་མེད་ཀྱི་འཆར་ཚུལ་ཙམ་ཡིན་ཚེ། ཞི་གནས་ལྷག་མཐོང་ཀྱང་དེ་བཞིན་དུ་དབྱེར་མེད་ཟུང་འཇུག་ཁོ་ནར་གྲུབ་ཀྱང་། རྣམ་པ་ལྟར་གང་ཟག་གིས་འཇུག་པ་བདེ་བའི་སླད་དུ་མིང་དང་དབྱེ་བ་སོ་སོར་བསྟན་ལ། གོང་དུ་ཞི་གནས་རྐྱང་པས་ཕྱག་ཆེན་གྱི་སྒོམ་དངོས་གཞི་རུ་གོ་མི་ཆོད་པར་བཤད་པའི་རྒྱུ་མཚན་ཡང་། གནས་ཆ་གཅིག་པུ་ནི་འཇིག་རྟེན་གྱི་བསམ་གཏན་ཞེས། ཕྱི་རོལ་མུ་སྟེགས་པ་དང་། ནང་པའི་ཡང་ཉན་རང་གི་བསམ་གཏན་དག་དང་། ལྷ་གནས་རྣམས་ཀྱི་ཏིང་འཛིན་དང་ཐུན་མོང་བ་ཡིན་ཕྱིར། སྔགས་ཀྱི་དབང་བཞི་པའི་ལམ་དངོས་མ་ཡིན་པ་དང་། ཁྱད་པར་གནས་ཉམས་ལ་ཞེན་འཛིན་ཡོད་པ་ནི་ཕྱག་རྒྱ་ཆེན་པོར་མི་རུང་ལ། ཕྱག་ཆེན་ནི་སྣང་སྲིད་ཆོས་

[Full Size]

སྐུ་ལམ་བྱེད་ཀྱི་སྐབས་ཡིན་ཚེ། གནས་པ་དང་འགྱུར་བ་གཉིས་ལ་བཟང་ངན་དང་སྒོམ་ཡིན་མིན་གྱི་སྤང་བླང་བྱེད་ན་སྣང་སྲིད་ཆོས་སྐུ་ཅིར་སྣང་ཕྱག་ཆེན་གང་ཤར་བཟོ་མེད་དུ་མི་རུང་བས་སོ།། ༈ །།དེ་ལྟར་ཞི་ལྷག་གི་དོན་མདོ་ཙམ་སྨོས་ནས། ད་ནི་སྐྱོན་ཡོན་དང་གོལ་སའི་བྱེ་བྲག་ཅུང་ཟད་འཆད་དེ། འདི་ལའང་སྤྱིར་མཉམ་བཞག་སྐྱོང་ཚུལ་མ་ཤེས་པའི་ནོར་ས་དང་། བྱེ་བྲག་ཏུ་གོལ་ས་དང་། ཤོར་སའི་རྣམ་གྲངས་སྐྱོན་སེལ་བཤད་པ་དང་གཉིས་ཀྱི། དང་པོ་ནི། དེ་ཡང་ཕྱག་རྫོགས་ལམ་གཅོད་ཞི་བྱེད་སོགས་སྒོམ་གྱི་མན་ངག་ཟབ་རྒྱས་མཐའ་ཡས་པ་ཀུན་གྱི་དགོངས་པའི་གནད་གཅིག་ཏུ་མཐུན་པར་རང་སེམས་མ་བཅོས་པར་འཇོག་པ་ཉིད་ལགས་ཀྱང་། གང་ཟག་སོ་སོའི་གོ་ཚུལ་གྱི་དབང་གིས་སྣ་ཚོགས་ཞིག་སྣང་མོད་དེ། དེ་ལས་སྒོམ་ཆེན་པ་འགའ་ཞིག་ནི། ཚོགས་དྲུག་གི་སྣང་བ་ཕྲ་རགས་ཐམས་ཅད་

[Full Size]

འགགས་པའི་ཤེས་པ་རྟོགས་མེད་ཁོ་ན་ལ་སྒོམ་དུ་འཛིན་པར་གདའ་སྟེ། དེ་ནི་ཞི་གནས་ལྡེང་པོར་གོལ་བ་དང་། འགའ་ཞིག་ནི་དྲན་རིགས་གིས་མ་ཟིན་པའི་གཏི་མུག་ལུང་མ་བསྟན་ལ་སྒོམ་བརྟན་པོ་རུ་རློམ། ལ་ལས་ནི་སེམས་གསལ་སེང་ངེ་བ་དང་། བདེ་ལྷན་ནེ་བ་དང་། སྟོང་ཆམ་མེ་བ་སོགས་ལ་སྒོམ་དུ་འཛིན་ཏེ་ཉམས་ལ་ཞེན། ལ་ལས་རྟོག་པ་སྔ་མ་འགགས་ནས་ཕྱི་མ་སྐྱེས་པའི་བར་གྱི་ཤེས་པ་ཧད་པོ་ཁོ་ན་དགོས་པར་འདོད་དེ་སྒོམ་དུམ་བུ་རུ་ཆད། ཡང་ལ་ལས་ནི་སེམས་ཉིད་ཆོས་སྐུ་ཡིན་ནོ། །སྟོང་པ་ཡིན། ངོས་བཟུང་མེད་དོ་སྙམ་པ་སོགས་ཡིད་ལ་བཅངས་པ་དང་། དེ་བཞིན་དུ་ཐམས་ཅད་བདེན་པར་མ་གྲུབ་པའོ། །སྒྱུ་མ་ལྟ་བུའོ། །ནམ་མཁའ་ལྟ་བུའོ། །སྙམ་པ་ལ་སོགས་པའི་འཛིན་སྟངས་ལ་སྒོམ་དུ་འདོད་པ་ནི་བློས་བྱས་ཡིད་དཔྱོད་ཀྱི་མཐར་ལྷུངས་

[Full Size]

འགའ་ཞིག་ནི། གང་དྲན་ཅིར་ཤར་ཐམས་ཅད་སྒོམ་གྱི་རང་བཞིན་ཡིན་ཟེར་ནས། རྣམ་རྟོག་ཐ་མལ་བའི་དབང་དུ་བཏང་བས་སྨྱོན་པར་གོལ། གཞན་དག་ཕལ་ཆེར་ནི་འགྱུ་བ་ལ་སྐྱོན་དུ་བལྟ་ཞིང་དགག་པ་དང་། འགྱུས་པ་དེ་ཚུར་བཀུག་ནས་སྒོམ་ལ་འཇོག་པར་འདོད་ཅིང་། འཇུར་དྲན་དམ་པོས་སྡུག་འཚིར་དུ་འཆིང་བར་བྱེད་པ་སོགས་ཏེ། མདོར་ན་སེམས་ཉིད་འདི་གནས་སམ། འགྱུའམ། རྣམ་རྟོག་དང་ཉོན་མོངས་སུ་ཀར་རེ་འདུག་གམ། བདེ་གསལ་མི་རྟོག་གང་རུང་དུ་ལྷན་ནེར་འདུག་གམ། གང་ལྟར་སྣང་ཀྱང་དེ་ཀའི་རང་ཐོག་ཏུ་བཟོ་བཅོས་སྤོང་བསྒྱུར་མི་དགོས་པར་གཉུག་མ་ལྷན་སྐྱེས་ཀྱི་རང་འགྲོས་བསྐྱངས་ཤེས་པ་ནི་ཤིན་ཏུ་དཀོན་པར་མཆིས་ཚེ་ངེས་དོན་གྱི་མདོ་རྒྱུད་དང་། གྲུབ་ཐོབ་རྒྱུད་པའི་བཀའ་འབུམ་མན་ངག་ཁྲིད་ཡིག་སོགས་ཀྱི་དགོངས་པ་དངོས་བསྟན་དང་མཐུན་པའི་ཉམས་

[Full Size]

ལེན་སྐྱོན་མེད་ཞིག་དགོས་པར་སྣང་ངོ་།། ༈ །།བྱེ་བྲག་གི་གོལ་ས་དང་ཤོར་སའི་དབྱེ་བསལ་ནི་སྒྲུབ་རྒྱུད་གོང་མ་རྣམས་ཀྱི་གསུང་ལས་ཞིབ་རྒྱས་འབྱུང་མོད་ཀྱི། འདིར་ཡང་རྐང་གྲངས་བརྡ་ཚོན་ཙམ་བཤད་ན། དེ་ཡང་མཉམ་གཞག་གི་སྐབས་སུ་བདེ་གསལ་མི་རྟོག་གསུམ་གང་རུང་གི་ཉམས་ལ་ཞེན་ན། འདོད་ཁམས། གཟུགས་ཁམས། གཟུགས་མེད་ཀྱི་ཁམས་དང་གསུམ་དུ་སྐྱེ་བའི་རྒྱུ་བྱེད་ལ། དེ་དག་ཏུ་སྐྱེས་ནས་ཚེ་ཚད་རྫོགས་པ་དང་སླར་ངན་སོང་དུ་ལྷུང་བ་ལས་སངས་རྒྱས་ཀྱི་ལམ་དུ་མི་འགྱུར་ཞིང་། དེ་ཚུལ་ཞིབ་ཏུ་དབྱེ་ན། བྱེ་བྲག་ཏུ་སྙོམས་འཇུག་གི་བསམ་གཏན་དགུ་ཡོད་དེ། དེ་ཡང་ཞི་གནས་ལ་མཉམ་པར་བཞག་ཚེ། གཟུང་འཛིན་རག་རྟོག་མེད་ཀྱང་བསྒོམ་བྱ་སྒོམ་བྱེད་ཀྱི་བློས་བཅིང་བ་ནི་བསམ་གཏན་དང་པོའི་ཏིང་ངེ་འཛིན་ཅེས་བྱ་སྟེ།

[Full Size]

ཅིའི་ཕྱིར་ན། བསམ་གཏན་དང་པོའི་ལྷ་གནས་རྣམས་ན་དེ་ལྟར་བསྒོམ་པ་ཡིན་ཚེ། དེ་ལྟ་ཡང་དེ་བཞིན་བསྒོམ་ན་བསམ་གཏན་དང་པོ་པའི་ལྷ་རུ་སྐྱེ་བའི་རྒྱུ་བྱེད་དོ། །དེ་བཞིན་དུ། རྟོག་དཔྱོད་ཀྱི་ཤེས་པ་མེད་ཀྱང་དགའ་བདེའི་ཏིང་ངེ་འཛིན་གྱི་རོ་མྱང་བར་བྱེད་པ་ནི་བསམ་གཏན་གཉིས་པ། སེམས་གཡོ་བ་མེད་ཅིང་དབུགས་ཀྱི་འབྱུང་རྔུབ་ཙམ་ལ་བརྟེན་པ་ནི་བསམ་གཏན་གསུམ་པ། རྣམ་རྟོག་ཐམས་ཅད་དང་བྲལ་ལ་གསལ་བའི་གོ་མ་འགགས་པ་ནམ་མཁའ་ལྟ་བུའི་ཏིང་ངེ་འཛིན་ནི་བསམ་གཏན་བཞི་པ་སྟེ། དེ་ལྟར་འདི་དག་ནི་འཇིག་རྟེན་པའི་ཏིང་ངེ་འཛིན་རྣམས་ཀྱི་ནང་ནས་ནི་མཆོག་ཏུ་གྲགས་ཤིང་ལྷག་མཐོང་གི་གཞི་རྟེན་ཡིན་ཀྱང་། ཞེན་པས་བསྒོམས་ན་ཕྱག་ཆེན་གྱི་གོལ་སར་འགྱུར་ཏེ་བསམ་གཏན་གྱི་ལྷ་དེ་དག་ཏུ་སྐྱེ་བའི་རྒྱུ་ཡིན་པའི་ཕྱིར་རོ། །ཡང་ཆོས་ཐམས་ཅད་ནམ་མཁའ་ལྟར་མཐའ་

[Full Size]

ཡས་སོ། སྙམ་པ་དང་། ༡ རྣམ་པར་ཤེས་པ་འདི་ནི་ཕྱོགས་སུ་མ་ལྷུང་མ་གྲུབ་ཅིང་མཐའ་ཡས་པའོ། །སྙམ་པ་དང་། ༢ འདུ་ཤེས་ནི་མེད་པ་དང་ཡོད་པ་མ་ཡིན་ཏེ་བློས་བྱར་མེད་དོ། །སྙམ་པ་དང་། ༣ སེམས་འདི་ནི་ཅི་ཡང་མེད་པའི་སྟོང་པའོ་སྙམ་པ་སྟེ། ༤ དེ་ལྟར་རིམ་པ་བཞི་པོ་འདི་ངང་ལ་འཇོག་ན། ནམ་མཁའ་མཐའ་ཡས། རྣམ་ཤེས་མཐའ་ཡས། ཡོད་མིན་མེད་མིན་ཅི་ཡང་མེད་པ་སྟེ། གཟུགས་མེད་སྐྱེ་མཆེད་མུ་བཞིར་གོལ་བའི་སྐྱོན་ཅན་ནོ། །དེ་ཐམས་ཅད་ཀྱི་རྟོག་པ་སྤང་བའི་སེམས་ཉིད་ཡུལ་ལ་འཇུག་པ་བཀག་ཅིང་རླུང་སེམས་རྒྱུ་བ་ཆད་པར་གནས་པ་ནི་ཉན་ཐོས་ཞི་བའི་ཏིང་འཛིན་ཡིན་ཏེ། འདི་ཞི་གནས་ཀྱི་མཐར་ཐུག་ཏུ་བཤད་ཀྱང་ལྷག་མཐོང་གིས་མ་ཟིན་ཚེ། འདི་སྐབས་ཀྱི་སྒོམ་སྐྱོན་མེད་ནི་མ་ཡིན་ནོ། །དེ་ལྟར་སྙོམས་འཇུག་

[Full Size]

གི་བསམ་གཏན་དགུ་པོ་དག་སོ་སོས་གནས་སྐབས་སུ་མངོན་ཤེས་རྫུ་འཕྲུལ་སོགས་འགྲུབ་པའི་ཡོན་ཏན་ཙམ་ཡོད་ཀྱང་། འདིར་ནི་མཐར་ཐུག་གི་འབྲས་བུ་རྫོགས་བྱང་ཉིད་བསྒྲུབ་པ་ལས། ཀུན་རྫོབ་ལྟར་སྣང་གི་ཡོན་ཏན་མི་བསྒྲུབས་ཅིང་། གལ་ཏེ་ཤུགས་ཀྱིས་འགྲུབ་ཀྱང་དེ་ལ་ཞེན་པ་དང་རློམ་སེམས་སྐྱེས་ན་བྱང་ཆུབ་ཀྱི་བར་ཆད་དངོས་ཡིན་པའི་ཚུལ་རྣམས་ཤེས་དགོས་སོ།། ༈ །།དེ་ལྟར་ནོར་སའམ་གོལ་ས་བཤད་ན་ད་ནི་ཤོར་ས་བརྒྱད་ཀྱི་རྣམ་གྲངས་སྟོན་ཏེ། དེ་ཡང་སེམས་ཉིད་རྣམ་ཀུན་མཆོག་ལྡན་སྣང་སྟོང་ཟུང་འཇུག་རྒྱུ་འབྲས་རྟེན་འབྲེལ་འགགས་མེད་དུ་མེ་རྟོགས་པར། སྟོང་པ་ཁ་ལྟ་ལ་འབྱམས་པ་ནི་སྟོང་ཉིད་གཤིས་ལ་ཡེ་ཤོར་དུ་སོང་བ་ཞེས་བྱ་བ་ཡིན་པས། དེའི་སྐྱོན་རིག་པར་བྱ་ཞིང་། ༡ དེ་བཞིན་དུ། སྒོམ་ལ་ཞུགས་ནས་དོན་ཡིན་ཚུལ་ཙམ་གོ་ཡང་། ཉམས་མྱོང་རྒྱུད་ལ་མ་སྐྱེས་ཤིང་

[Full Size]

སྐྱེས་པ་དག་ཀྱང་བརྗེད་དེ། གཞན་ལ་ཚིག་འཆད་ཤེས་ཀྱང་དོན་རང་གི་རྒྱུད་ལ་མེད་པ་དེ་ལ་གཤིས་ཀྱི་ཕྲལ་ཤོར་ཞེས་བྱའོ། ༢ །ཡང་། ད་ལྟ་དགོས་རྒྱུ་འདི་ལམ་ཡིན་ལ། ཕྱིས་ནས་འབྲས་བུ་གཞན་ཞིག་ཐོབ་རྒྱུར་འདོད་པ་ལ། ལམ་གྱི་ཡེ་ཤོར་ཟེར་ལ། ༣ རང་སེམས་ཐ་མལ་ཤེས་པ་སྐྱོང་བ་འདིས་གོ་མི་ཆོད་པར་བློས་བྱས་ཀྱི་སྒོམ་བཟང་བཟང་པོར་འདོད་པ་ཅིག་ལོགས་སུ་འཚོལ་བ་ལ། ལམ་གྱི་ཕྲལ་ཤོར་ཞེས་བྱ། ༤ ཡང་། ཉོན་མོངས་ལྟ་བུ་སྐྱེས་པའི་ཚེ་དེའི་རང་ངོ་ལམ་ཁྱེར་མི་ཤེས་པར། ཐེག་པ་འོག་མ་ལྟར་ཐབས་གཞན་ཞིག་བསྒོམ་པ་ནི། གཉེན་པོའི་ཡེ་ཤོར་ཟེར། ༥ རྣམ་རྟོག་ལྟ་བུ་གང་སྐྱེས་ལམ་དུ་ལྷོངས་མ་ཤེས་པར། རྐྱེན་དེ་བཀག་པའམ། བཤིག་ནས་སྒོམ་ལ་ཕབ་དགོས་ན། གཉེན་

[Full Size]

པོའི་ཕྲལ་ཤོར་དུ་གོལ། ༦ ཡང་། སེམས་ཉིད་ཡེ་སྟོང་རྩ་བྲལ་གྱི་ཡིན་ཚུལ་མ་གོ་བར། རང་བཞིན་མ་གྲུབ་པའོ། །སྟོང་ཉིད་དུ་གྱུར་པའོ། །སྙམ་པ་ལ་སོགས་བློས་བཅོས་པ་དང་། ཉི་ཚེ་བའི་སྟོང་པ་སོགས། སྟོང་ཉིད་རྒྱས་འདེབས་སུ་ཡེ་ཤོར་དང་། ༧ སྔོན་མ་རྣམ་རྟོག་གི་རྗེས་སུ་འབྲེངས་ནས་ཡེངས་སོ། །ད་སླར་ལེགས་པོར་བསྒོམ་མོ་སྙམ་པའི་རྟོག་པ་ཁོ་རང་འཕྲོ་འཐུད་པའི་ངང་ལ་སོང་བའམ་དྲན་རིག་མེད་ཀྱང་ཡོད་དོ་སྙམ་པ་ལ་སོགས་རྒྱས་འདེབས་ཕྲལ་ཤོར་ཏེ། ༨ མདོར་ན་གནས་ལུགས་ཀྱི་རང་མཚང་མ་རིག་ཅིང་ཡིན་ལུགས་ཀྱི་སྒྲོ་འདོགས་མ་ཆོད་པའི་གནད་ཀྱིས། སྒོམ་འདྲ་མིན་དུ་ཤོར་བའི་རིགས་འདི་དག་དང་གཞན་ཡང་སྣ་ཚོགས་འབྱུང་ཉེན་ཡོད་ལ་འདྲ་མིན་གྱི་སྒོམ་ལ་ཇི་ཙམ་འབུངས་ཀྱང་ངལ་བ་དོན་མེད་དང་། འགའ་ཞིག་གིས་ནི་གནས། ཞི་གནས་འགོག་པ་བསྒོམས་པས་ཀླུར་སྐྱེ་བ་སོགས།

[Full Size]

ངན་ལེན་གྱི་རྒྱུ་རྐྱེན་བྱེད་པས། དེ་ན་སྒོམ་མ་ནོར་བ་ཞིག་གལ་ཆེ་བ་དང་། གཞན་ཡང་འགའ་ཞིག་གིས་སེམས་རྟོག་མེད་བྱིང་རྨུགས་ལ་ཞི་གནས་སུ་འཛིན་པ་དང་། རྟོག་པས་བརྟགས་དཔྱད་ལ་ལྷག་མཐོང་དུ་བརློམ་པ་དང་ཨ་འཐས་འཇུར་འཛིན་ལ་དྲན་པར་འདོད་པ་དང་། བཏང་སྙོམས་ལུང་མ་བསྟན་ལ་བཅོས་མིན་དུ་ནོར་བ་དང་། གནས་ལུགས་ཀྱི་རང་ཞལ་མ་མཐོང་བའི་ཐ་མལ་པའི་ཤེས་པ་ཕལ་པ་དང་བཟོ་བཅོས་མེད་པའི་གཉུག་མ་ཐ་མལ་ཤེས་པ་གཉིས་ནོར་བ་དང་། ཏིང་འཛིན་བཟང་ཞེན་ནམ། ཟག་བཅས་ཀྱི་བདེ་བ་ཙམ་ལ་ཟུག་རྔུ་མེད་པ་རང་བཞིན་མཆོག་གི་བདེ་བར་འདོད་པ་དང་། གནས་ལུགས་ཡུལ་མེད་རང་ངོ་ཤེས་པའི་ངེས་པ་མ་རྙེད་པར་སྣང་ཡུལ་ལ་ཞེན་འཛིན་ཞུགས་པ་དང་ཡུལ་མེད་འཛིན་པ་བྲལ་བའི་

[Full Size]

རང་གསལ་འགགས་མེད་གཉིས་ནོར་བ་དང་། གསལ་ཆ་འགག་པའི་གཏི་མུག་ལ་མི་རྟོག་ཡེ་ཤེས་སུ་ནོར་བ་སོགས། མདོར་བསྡུས་ན། ནོར་འཁྲུལ་འདྲ་མིན་ཤོར་གོལ་གྱི་རིགས་མཐའ་དག་འབྱུང་བའི་རྒྱུ་ནི། དང་པོར་ཚོགས་བསགས་སྒྲིབ་སྦྱོང་སོགས་སྔོན་འགྲོ་ལ་གནད་དུ་མ་བསྣུན་པས་ལས་ངན་གྱི་དྲི་མ་མ་དག་པ་དང་། བར་དུ་བྱིན་རླབས་ཀྱི་རླན་གྱིས་མ་ཐུལ་བས་རང་རྒྱུད་ཐ་རྒོད་རེངས་པ་དང་། དངོས་གཞི་སྒྲོ་འདོགས་ཐམས་ཅད་སེམས་ཐོག་ཏུ་མ་ཆོད་པས་ཁ་ཆོས་ཚིག་འབྱམས་སུ་དྲེད་པ་དང་། ཐ་མར་ཉམས་ལེན་རྒྱུད་ལ་མ་ཁེལ་བས་ཆོས་མིན་འཇིག་རྟེན་མིན་གྱི་སེར་གཟུགས་སྒྲུབ་རྒྱུད་བསྟན་པའི་རླ་ཚོང་དུ་གྱུར་པའི་རིགས་ཅན་མང་པོ་སྙིགས་མའི་ཡང་ཐ་འདིར་མཆིས་ཏེ་སའི་སྙིང་པོ་འཁོར་ལོ་བཅུ་པའི་མདོ་ལས། ལས་ཀྱི་རྣམ་སྨིན་རྒྱུ་འབྲས་མི་འདོད་པ། དེ་ནི་མུ་སྟེགས་ཆད་པར་སྨྲ་བ་སྟེ། ཤི་མ་ཐག་

[Full Size]

ཏུ་མནར་མེད་དམྱལ་བར་སྐྱེ། འདི་ནི་གཞན་ཕུང་རང་ཡང་རླག་པར་བྱེད། །ཅེས་གསུངས་པ་དེ་ལྟ་བུར་མ་གྱུར་པའི་རང་མགོ་བསྒྲིམ་པ་ལ་འབད་པ་གལ་ཆེ་བར་གདའོ། དེ་ལྟར་ལྟ་སྒོམ་ནོར་འཁྲུལ་ཤོར་གོལ་གྱི་དབང་དུ་མ་སོང་བར་མཉམ་བཞག་ལ་རྩེ་གཅིག་ཏུ་འབད་ཅིང་། རྗེས་ཤེས་ཀྱང་བློས་བཏང་ཐ་མལ་འཁྲུལ་འབྱམས་ལ་མི་བསྡད་པར་དྲན་རིག་གིས་ཟིན་པར་བྱས་ན། གང་ཟག་གི་བློ་ཁྱད་དང་དབང་པོའི་རིམ་པ་གང་ཡིན་དང་མཐུན་པའི་ཉམས་རྟོགས་འབྱུང་ལ། སྤྱིར་སྙམ་བྱེད་ཀྱི་སྐབས་འདི་ལ་མཁས་གྲུབ་སོ་སོའི་བཞེད་པ་མི་གཅིག་པ་དུ་མའི་དབང་གི་ངོས་འཛིན་ཚུལ་ཐ་དད་པ་མང་པོ་འབྱུང་སྟེ། ལ་ལས་རྣལ་འབྱོར་བཞིའི་སྤྲོས་བྲལ་མན་ཆད་ལ་མཉམ་རྗེས་དངོས་བསྟན་མེད་པར་གསུངས་པ་དང་། འགའ་ཞིག་གིས་ཉམས་ཀྱི་མཉམ་རྗེས་དང་རྟོགས་པའི་

[Full Size]

མཉམ་རྗེས་སོ་སོར་དབྱེ་བ་དང་། ལ་ལས་རྣལ་འབྱོར་བཞི་སོ་སོ་ལ་རང་པའི་མཉམ་རྗེས་རེ་ཐ་དད་དུ་གསུངས་པ་སོགས་མཐའ་ཡས་མོད་ཅིང་། དེ་བཞིན་དུ་ཉམས་དང་རྟོགས་པའི་ཁྱད་པར་ཀྱང་སྣ་ཚོགས་པའི་ཚུལ་དང་། རྩེ་གཅིག་གསུམ་ག་ཉམས་ཁོ་ན་ལས་རྟོགས་པ་དངོས་མིན་པར་གསུངས་པ་དང་། འགའ་ཞིག་གིས་ནི་སྒོམ་མེད་ལ་ཟིན་ཚེ་སེམས་ཀྱི་ངོ་བོ་མཐོང་བར་བཞེད་པ་སོགས་ཕྲ་ཞིབས་ཀྱི་དབྱེ་ཆོས་གྲངས་མེད་པ་ཞིག་སྣང་ལ། གང་ཟག་གི་མོས་ཁམས་བསམ་ཡས་ཇི་སྙེད་ཀྱི་གདུལ་ཐབས་ལ་དགོངས་པའི་ཐུགས་རྗེའི་རྣམ་རོལ་ཡིན་ཕྱིར་བདེན་པ་ཁོ་ནར་གོར་མ་ཆགས་ཕྱིར་སྐྱབས་སུ་མཆི་ཞིང་། ཁོ་བོ་ནི་དེ་ལྟ་བུའི་ས་མཚམས་རྣམས་སུ་མ་སླེབ་མ་མཐོང་མི་ཤེས་པས་འདི་དང་འདི་ནི་ཡིན་ཞིང་འཐད་ལ་འདི་དང་འདི་དག་ནི་མ་ཡིན་ཅིང་མི་འཐད་པའི་གཏན་ཚིག་འདིའོ་ཞེས་ཅི་ཞིག་སྨྲ་སྟེ།

[Full Size]

དམུས་ལོང་གིས་ཁ་དོག་བཟང་ངན་གྱི་དབྱེ་བ་མི་ནུས་པ་ལྟ་བུའོ། འོན་ཀྱང་རང་སྐལ་གྱི་གོ་ཚོད་ཙམ་ལ་བརྟེན་ནས་མདོ་ཙམ་བརྗོད་ན། དེ་ཡང་མཉམ་རྗེས་ཀྱི་མིང་འདོགས་དང་བརྡ་མཚོན་ནི་རིམ་གཉིས་བསྒོམ་ཏོ་ཅོག་ལ་ཡོད་པར་གྲུབ་ལ། ཅིའི་ཕྱིར་ན། ཉམས་སུ་ལེན་རྒྱུའི་དངོས་དོན་དེ་ཉིད་བྱ་བྱེད་གཞན་དང་མ་བསྲེས་པར་ཆིག་དྲིལ་དུ་བྱེད་པ་ནི་མཉམ་བཞག་དང་། དེ་ཉིད་ཐུན་མཚམས་སོགས་སུ་གཞན་དང་བསྲེ་བ་ལ་རྗེས་ཐོབ་ཀྱི་ཐ་སྙད་དང་། དེ་དུས་ཀྱི་ཤེས་པ་ལ་རྗེས་ཤེས་དང་། སྣང་བ་རྗེས་སྣང་དུ་ཐ་སྙད་གདགས་ཚུལ་ནི་ཀུན་མཐུན་པའི་ཕྱིར། སྐབས་འདི་དག་ཏུའང་། ལས་དང་པོ་པ་རྣམས་སྒོམ་དངོས་ལ་འབད་དུས་མཉམ་བཞག་དང་། བྱ་བྱེད་འགྲོ་འཆག་ཟ་ཉལ་སོགས་ཀྱི་ཚེ་ནི་རྗེས་ཀྱི་མིང་གདགས་སུ་རུང་ལ། རྣལ་འབྱོར་དམ་པ་རྣམས་ལ་ནི་

[Full Size]

རྟག་ཏུ་ཡེངས་འཁྲུལ་མེད་ཚེ་མཉམ་རྗེས་དབྱེར་མེད་དམ། སྒོམ་ཁོར་ཡུག་ཅེས་བྱའོ། །དེ་བཞིན་དུ་ཉམས་རྟོགས་གཉིས་ཀྱི་ཤན་འབྱེད་ཡང་། ས་མཚམས་མཐོ་དམན་གང་དུ་ཡང་རུང་བའི་དགེ་སྦྱོར་དེ་ཉིད་སེམས་ཀྱི་ངོ་བོ་དང་མ་འདྲེས་པར་སྤང་བྱ་དང་གཉེན་པོ་ལྟ་བུའམ། བསྒོམ་བྱ་སྒོམ་བྱེད་ཐ་དད་ལྟ་བུ་ནི་ཉམས་ཡིན་ལ། དེ་དང་སེམས་གཉིས་ཐ་མི་དད་པར་སེམས་ཁོ་རང་དེའི་ངོ་བོར་ཤར་ཞིང་ཐག་ཆོད་ཀྱི་ངེས་པ་ཐོབ་པ་ལ་རྟོགས་པ་ཅེས་བྱ་སྟེ། མདོར་ན་འདི་གཉིས་ནི་སྒོམ་གྱི་སྐབས་གཅིག་པུར་མ་ཟད་དེ། བླ་མའི་རྣལ་འབྱོར་རམ། སྙིང་རྗེ་བྱང་སེམས། བསྐྱེད་རིམ་སོགས་ལམ་གྱི་ཉམས་ལེན་ཕལ་མོ་ཆེ་ལ་འགྲོ་སྟེ། དཔེར་བྱས་ན། རྡོ་རྗེ་གདན་ལྟ་བུ་ཅིག་གི་དབྱིབས་དང་བཀོད་པའི་གནས་ཚུལ་རྣམས་གཞན་གྱི་ངག་ལས་ཐོབ་པའི་དོན་འོལ་སྤྱི་ཙམ་རང་གི་ཡིད་ལ་ཤར་ཞིང་གཞན་

[Full Size]

དག་ལ་འཆད་ནུས་པ་དེ་ལ་གོ་བ་ཟེར། ཐག་རིང་མོ་ནས་རྡོ་རྗེ་གདན་མཐོང་བའམ། བཀོད་པ་རི་མོར་བྲིས་པ་བལྟ་མྱོང་བས་དོན་ཕལ་ཆེར་ཙམ་བློ་ངོར་ཆུད་པ་དེ་ལ་མྱོང་བའམ་ཉམས་ཞེས་བྱ། རྡོ་རྗེ་གདན་དུ་རང་ཉིད་ཀྱིས་ཕྱིན་ནས་ཞིབ་ཏུ་མཐོང་ཞིང་ངེས་པ་དེ་ལ་རྟོགས་པ་ཤར་བ་ཟེར་བའི་དཔེ་དེ་ལྟ་བུ་དང་མཚུངས་ལ། དེ་རྣམས་ཀྱང་བློ་ངོར་ཆུད་སླད་ནི་གང་ཟག་སོ་སོའི་དབང་པོའི་རིམ་པ་གསུམ་གྱི་ཁྱད་པར་ཏེ། དེ་ཡང་བརྡ་བསྟན་པ་ཙམ་མམ་སྐད་ཅིག་ཙམ་ལ་གོ་མྱོང་རྟོགས་པ་ཤར་ནས་དཀའ་བས་འབད་མི་དགོས་པར་ཡོན་ཏན་མྱུར་དུ་རྫོགས་པ་ནི། ཅིག་ཅར་བའི་རིགས་ཞེས་བྱ་སྟེ་སྐྱེས་ཆེན་སྦྱངས་པ་མངོན་གྱུར་རྣམས་སོ། །ཡང་ཉམས་རྟོགས་ཡོན་ཏན་རྣམས་གོ་རིམ་མ་ཡིན་པར་མཐོ་དམན་ངེས་མེད་འཕེལ་འགྲིབ་ཅན་དུ་འཆར་

[Full Size]

བ་ནི་ཐོད་རྒལ་བ་ཅེས་བྱ་སྟེ་འབྲིང་པོའོ། །གཞན་གང་ཟག་ཐུན་མོང་བ་སྤྱི་ལ་ཉམས་ལེན་བརྩོན་འགྲུས་ཆེ་ཆུང་ལྟར་གྱི་གོ་རིམ་ངེས་ཅན་དུ་ན་འཕར་བའི་རིགས་ལ་རིམ་གྱིས་པ་ཅེས་བྱ་སྟེ་ཕལ་པ་རྣམས་སོ། །དེས་ན་རིམ་གྱིས་པ་དང་མཐུན་པའི་ལམ་རིམ་ལ་གཞན་གཉིས་པོའང་འདུ་བས་དེ་ལྟར་དུ་འཆད་དེ། སྤྱིར་ཐེག་པ་ཐུན་མོང་བ་ནས་གསུངས་པ་ལ་ས་བཅུ་དང་ལམ་ལྔས་སངས་རྒྱས་སུ་བགྲོད་མོད་ཀྱི། འདིར་མཉམ་མེད་དྭགས་རྒྱུད་ཡབ་སྲས་ལ་རྒོས་སུ་གྲགས་པའི་རྣལ་འབྱོར་རིམ་པ་བཞི་དང་། དེ་རེ་རེ་ལ་ཆེ་ཆུང་འབྲིང་དུ་ཕྱེ་བའི་བཅུ་གཉིས་པོ་འདི་ནི་རྒྱུད་གསང་བ་བསམ་གྱིས་མི་ཁྱབ་པའི་ལུང་གི་དགོངས་པ་རྗེ་ཟླ་འོད་གཞོན་ནུས་གསལ་བར་མཛད་པ་སྟེ། རྒྱུད་དེ་ཉིད་ལས། སེང་གེ་རྣམ་པར་བསྒྱིངས་པའི་ཏིང་འཛིན་གྱིས། མི་གཡོ་རྩེ་གཅིག་

[Full Size]

དངས་པའི་ཤེས་པ་གསལ། །རང་རིག་ཡེ་ཤེས་ཁོང་ནས་སད་པར་བྱེད། །བཟོད་པ་བརྟན་པོས་ངན་སོང་སྡུག་བསྔལ་སྤོང་། །གཉིས་པ་སྒྱུ་མ་ལྟ་བུའི་ཏིང་འཛིན་གྱིས། །སྤྲོས་དང་བྲལ་བའི་མཉམ་བཞག་ཆེན་པོ་ལས། །བསམ་གྱིས་མི་ཁྱབ་ཏིང་འཛིན་རྩལ་དུ་འཆར། །དྲོད་ཐོབ་ནས་ནི་སྐྱེ་ལ་དབང་བ་ཡིན། །གསུམ་པ་དཔའ་བར་འགྲོ་བའི་ཏིང་འཛིན་གྱིས། །དུ་མ་རོ་གཅིག་ས་བཅུའི་རྟོགས་པ་ཤར། །དུས་གསུམ་རྒྱལ་བའི་སྲས་པོ་གཞན་དོན་མཛད། །རྩེ་མོ་ཐོབ་ནས་འཕེལ་བ་རྒྱུན་མི་འཆད། །བཞི་པ་རྡོ་རྗེ་ལྟ་བུའི་ཏིང་འཛིན་གྱི། །བསྒོམ་དུ་མེད་པའི་ཉམས་ལེན་བརྩོན་པ་ལས། །མཁྱེན་པའི་ཡེ་ཤེས་སངས་རྒྱས་ཞིང་ཁམས་མཐོང་། །མ་བཙལ་ལྷུན་གྲུབ་ཆོས་མཆོག་ཆེན་པོའི་ངང་། །ཅེས་གསུངས་པ་འདི་དང་དགོངས་མཐུན་ལང་ཀར་གཤེགས་པའི་མདོ་རུ་ཡང་རྒྱ་ཆེར་

[Full Size]

བསྟན་པ་དང་། སློབ་དཔོན་ཤཱནྟི་པས་ཀྱང་གསལ་བར་མཛད་ཚུལ་རྣམས། སྤྱན་སྔ་ཐམས་ཅད་མཁྱེན་པ་སོགས་ཀྱིས་ཞིབ་མོར་ཕྱེས་ཤིང་། གཞན་ཡང་རྙིང་ལུགས་ཀྱི་ཕྱག་ཆེན་དག་ཏུའང་གུ་རུ་རིན་པོ་ཆེས་མདོར་བསྡུས་ནས་གསུངས་ཏེ། དེ་ཡང་གནད་ཀྱི་ཟིན་ཏིག་ལས། དགེ་སྡིག་སེམས་སུ་དག་པས་ན། །མི་དགེའི་ལས་རྣམས་ངང་གིས་སྤོང་། ཅེས། རྩེ་གཅིག་དང་། སེམས་ཉིད་སྤྲོས་དང་བྲལ་བས་ནི། །གཟུང་དང་འཛིན་པ་ཐམས་ཅད་སྤོང་། ཅེས། སྤྲོས་བྲལ་དང་། སྣང་བ་ཆོས་ཀྱི་སྐུར་ཤར་བས། །རྣམ་པར་རྟོག་པ་ཤུགས་ཀྱི་སྤོང་། ཅེས་རོ་གཅིག་དང་། འཁོར་འདས་རང་བཞིན་མེད་ཤེས་པས། །གཉིས་སུ་འཛིན་པ་ཐམས་ཅད་སྤང་། ཅེས། བསྒོམ་མེད་བསྟན་ཡང་དག་སྤོང་བ་བཞི་དང་རྣལ་འབྱོར་བཞིའི་དོན་སྦྱར་ནས་གསུངས་པ་དང་། ཡང་། དྲོད་ནི་སེམས་ཀྱི་ངོ་བོ་མཐོང་། །རྩེ་

[Full Size]

མོས་སྐྱེ་མེད་ཆོས་སྐུར་རྟོགས། །བཟོད་པ་འཁོར་འདས་བླང་དོར་མེད། །ཆོས་མཆོག་འཁོར་འདས་སེམས་སུ་ཐིམ། ཅེས། སྦྱོར་ལམ་ངེས་བྱེད་བཞི་དང་རྣལ་འབྱོར་བཞི་སྦྱར་ཏེ་གསུངས་པ་སོགས་དགོངས་མཐུན་དུ་མཆིས་ཤིང་། རྣལ་འབྱོར་བཞི་པོ་དེ་དག་གི་དངོས་དོན་ཇི་ལྟར་འཆར་ཚུལ་རིམ་པ་དང་། ཞར་ལ་མདོ་ལུགས་ཀྱི་ས་བཅུ་ལམ་ལྔ་རྫོགས་ཚུལ་རྣམས་ས་བོན་ཙམ་བརྗོད་ན། རྩེ་གཅིག །སྤྲོས་བྲལ། རོ་གཅིག །བསྒོམ་མེད་དང་བཞི་ལས་དང་པོ་རྩེ་གཅིག་གི་རྣལ་འབྱོར་ནི། དེ་ཡང་སྐལ་ལྡན་གང་ཞིག་ཚེའི་ཞེན་པ་ཆོད་ཅིང་བླ་མ་ལ་སངས་རྒྱས་དངོས་སུ་མཐོང་སྟེ་བྱིན་རླབས་གཤའ་མ་ཞུགས་ཤིང་མཉམ་པར་གཞག་པའི་ཚེ་བདེ་གསལ་མི་རྟོག་ངང་ལ་གནས་ཤིང་ངེས་ཤིང་རྙེད་ལ། རྣམ་རྟོག་ཤར་བ་བདག་ཀྱང་ངོ་ཤེས་པས་རང་གྲོལ་དུ་འགྲོ་བ་ལ་སྒོམ་

[Full Size]

ཡིན་སྙམ་པའི་འཛིན་པ་དང་བཅས་པ་འབྱུང་བ་དེ་ནི་རྩེ་གཅིག་ཆུང་ངུ་སྟེ། སྒྲུབ་རྒྱུད་གོང་མ་དག་རྩེ་གཅིག་གསུམ་ག་ཞི་གནས་ཁོ་ནར་བཞེད་ཀྱང་། རང་ཉིད་ཀྱི་གོ་ཚོད་ལ་ནི་གང་ཟག་གི་རིམ་པ་ཐ་དད་ཀྱི་ཁྱད་ནི་ལོས་ཀྱང་མཆིས་ལ། གཞན་ནི་གཤིས་ཀྱི་ཡིན་ལུགས་ཤེས་པ་ཅིག་ལ་ནི་ནམ་ཀྱང་ཞི་ལྷག་ཟུང་འཇུག་ཏུ་ཚང་བ་ཆོས་ཉིད་ཡིན་ཕྱིར། འདིར་ཡང་ལྷག་མཐོང་གིས་ཟིན་པར་གོའོ། །འདི་སྐབས་ཀྱི་རྗེས་ཤེས་ནི་ཨ་འཐས་ཤས་ཆེ་ཞིང་། གཉིད་ཀྱི་སྐབས་སུའང་ཐ་མལ་པ་དང་ཁྱད་ཆེར་མི་འབྱུང་སྟེ། མདོར་ན་འདི་དུས་ནི་དང་པོའི་སྐབས་ཡིན་ཚེ་ཉམས་ལེན་སྐྱོང་བདེ་མི་བདེ་སྣ་ཚོགས་མཐོ་དམན་དུ་ཡོང་ངོ་། །རྩེ་གཅིག་འབྲིང་གི་ཚེ། མཉམ་གཞག་ལ་ཇི་ཙམ་འདོད་པ་ལྟར་གནས་ནུས་ཤིང་། རེས་འགའ་མ་བསྒོམས་ཀྱང་ཏིང་འཛིན་

[Full Size]

འཆར། རྗེས་ཤེས་ཀྱང་ཨ་འཐས་ཆུང་དུ་འགྲོ་སྟེ། སྣང་བ་གུ་ཡངས་སངས་ཀྱི་འགྱུར་བ་དང་། གཉིད་ལ་ཡང་སྐབས་འགར་དགེ་སྦྱོར་གྱིས་སླེབ་པ་སྟེ། མདོར་ན་ནམ་བསྒོམ་བསྒོམ་འོང་བའི་དུས་ཡིན་ནོ། །དེ་ནས་རྩེ་གཅིག་ཆེན་པོ་ནི་མཉམ་བདེ་གསལ་མི་རྟོག་པའི་ཉམས་དེ་ཉིན་མཚན་ཁོར་ཡུག་ཏུ་འོང་བ་དང་། རྗེས་སྣང་རྗེས་ཤེས་སོགས་ཀྱི་དབྱེ་བ་མེད་པར་ཏིང་འཛིན་དེ་ལ་རྒྱ་འབྱམས་སུ་འགྱུར། ཕྱི་ནང་གི་སྲིན་བུ་མེད་ཅིང་འདོད་ཡོན་ལ་ཞེན་པ་མི་འཇུག་པ་དང་། མངོན་ཤེས་རྫུ་འཕྲུལ་སོགས་ཀྱང་ཐོབ་པར་གསུངས་ཤིང་། འོན་ཀྱང་འདི་མན་ཆད་བཟང་ཞེན་གྱི་ཉམས་དང་མ་བྲལ་ཞིང་སྒོམ་འཛིན་གྱི་བློས་འཆིང་བ་མ་གྲོལ་བར་མཆིས་སོ། །དེ་ལྟར་རྩེ་གཅིག་གསུམ་གྱི་སྣ་ཟིན་གྱི་དབང་རིམ་གྱི་ཁྱད་དང་བརྩོན་འགྲུས་ཆེ་ཆུང་སོགས་ལས། རང་སའི་ཁྱད་

[Full Size]

པར་དུ་མ་ཡོད་དེ། དེ་ཡང་བདེ་གསལ་མི་རྟོག་གི་ངོ་བོ་དེ་ཀ་ལ་རང་རིག་ངེས་ཤེས་ཀྱི་གདེངས་རྙེད་མ་རྙེད་ཀྱི་བྱེ་བྲག་ལ་རྩེ་གཅིག་ངོ་བོ་མཐོང་མ་མཐོང་དུ་དབྱེ་བ་དང་། དེ་བཞིན་དུ། ཉམས་དེ་འཁོར་ཡུག་དང་རེས་འཇོག་གི་ཁྱད་ལ་རྩལ་རྫོགས་མ་རྫོགས་སུ་འབྱེད་པ་དང་། རྣམ་རྟོག་ཤར་ཚད་དྲན་པས་སླེབ་ཙམ་གྱིས་སྒོམ་དུ་འགྲོ་མི་འགྲོ་ལ། རྣམ་རྟོག་སྒོམ་དུ་ཤར་མ་ཤར་ཞེས་བརྗོད་པ་དང་། བློ་རྒྱུད་ལས་རུང་དུ་གྱུར་མ་གྱུར་ལ་ཡོན་ཏན་སྐྱེས་ཀྱི་ཐ་སྙད་དང་། རྗེས་ཤེས་སུ་བཅོས་མིན་གྱི་སྙིང་རྗེས་སྐྱེ་མི་སྐྱེའི་ཁྱད་ཀྱིས་གཟུགས་སྐུའི་ས་བོན་ཐེབས་མ་ཐེབས་དང་། རྒྱུ་འབྲས་རྟེན་འབྲེལ་ལ་ངེས་ཤེས་རྙེད་མ་རྙེད་ཀྱིས་ཀུན་རྫོབ་ལ་བྱན་ཚུད་མ་ཚུད་ཀྱི་དབྱེ་བ་འདི་རྣམས་ཀྱིས་འཛིན་དགོས་པར་བཀའ་རྒྱུད་གོང་མ་རྣམས་གསུངས་སོ། དེ་ལྟ་བུའི་

[Full Size]

རྩེ་གཅིག་གི་ཉམས་མྱོང་ཇི་ལྟར་སྐྱེས་བཞིན་དུ་བདག་ལྟའི་རློམ་སེམས་དང་བཟང་ཞེན་གྱི་སྐྱོན་དབང་དུ་མ་ཤོར་བར་གསོལ་འདེབས་དང་ཉམས་ལེན་ལ་འབད་ན། སྤྲོས་བྲལ་དུ་འཕར་བར་འགྱུར་བ་སྟེ། དེ་ཡང་སེམས་ཀྱི་ངོ་བོ་སྐྱེ་འགགས་གནས་གསུམ་གྱི་མཐའ་དང་བྲལ་བའི་ཡིན་ལུགས་ཚུལ་བཞིན་རྟོགས། རྗེས་ཤེས་ཀྱང་དྲན་པས་ནམ་ཟིན་མཉམ་གཞག་གི་ངང་དུ་སོང་བས་གྲོལ་ཡང་། དྲན་པས་མ་ཟིན་ན་ཨ་འཐས་སུ་འཆར་ལ། རྨི་ལམ་དུ་ཡང་འཁྲུལ་མ་འཁྲུལ་ངེས་མེད་དུ་འབྱུང་ཞིང་། གང་ལྟར་འདི་སྐབས་སུ་སྣང་སྲིད་ཀྱི་ཆོས་ཐམས་ཅད་སྟོང་པ་ཉིད་ཁོ་ནའོ་སྙམ་པ་ལ་སོགས་པའི་སྟོང་འཛིན་དང་བཅས་པ་འདི་སྤྲོས་བྲལ་ཆུང་ངུ་ཡིན་ལ། སྤྲོས་བྲལ་འབྲིང་གི་ཚེ། སྟོང་འཛིན་དེ་དང་རྣམ་རྟོག་གི་རང་བཞིན་ལ་བདེན་ཞེན་སོགས་དག་ཀྱང་། ཕྱིའི་སྣང་བ་ལ་བདེན་འཛིན་ཅུང་ཞིག་མ་དག་

[Full Size]

པ་དང་། རྗེས་དང་གཉིད་ཀྱི་སྐབས་ལའང་འཁྲུལ་འཛིན་ཨ་འཐས་ཡོད་མེད་སྣ་ཚོགས་འབྱུང་ཞིང་། དགེ་སྦྱོར་ལ་མཐོ་དམན་འཕེལ་འགྲིབ་ཀྱང་དུ་མ་འབྱུང་ངོ་། སྤྲོས་བྲལ་ཆེན་པོ་ནི་འཁོར་འདས་དང་ཕྱིང་སྣང་སེམས་སོགས་ལ་སྒྲོ་འདོགས་གཏིང་ནས་ཆོད་དེ། སྣང་མི་སྣང་སྟོང་མི་སྟོང་སོགས་ཀྱི་ཞེན་པ་ལས་གྲོལ། ཉིན་སྣང་ཕལ་ཆེར་སྒོམ་ལ་རྒྱུན་ཆད་མེད་ལ། རྨི་ལམ་དུ་འཁྲུལ་འཛིན་སྐབས་འགར་འོང་བར་བཤད་ཅིང་། འོན་ཀྱང་འདི་དུས་དྲན་པ་རྒྱུན་ཆད་མེད་པར་ནི་མ་འགྱུར་པས་ཟུང་དྲན་ཅུང་ཞིག་དགོས་པ་ཉིད་དོ། །མདོར་ན་སྤྲོས་བྲལ་གྱི་སྐབས་འདི་དག་ཏུ་སྟོང་ཉམས་གཙོ་བོར་འཆར་ཞིང་གང་ལའང་བདེན་འཛིན་མེད་པའི་ཉམས་ཁོ་ན་ཤར་བའི་གནད་ཀྱིས། མོས་གུས་དག་སྣང་སྙིང་རྗེ་སོགས་ཀྱང་ཆུང་དུ་འགྲོ་བ་སྲིད་པས། སྟོང་པ་དགྲར་ལངས་ཀྱི་གེགས་དབང་དུ་མ་

[Full Size]

ཤོར་བ་གལ་ཆེ་ཞིང་། འདི་སྐབས་སུ་སྟོང་འཛིན་ཉམས་ཀྱི་དྲི་མའམ་ངེས་ཤེས་ཀྱི་ཆ་དག་མ་དག་གི་ཁྱད་པར་ལ་སྤྲོས་བྲལ་ངོ་བོ་མཐོང་མ་མཐོང་གི་དབྱེ་བ་དང་། སྣང་ཐོག་སྟོང་ཐོག་གང་ཡང་ལ་རེ་དོགས་བྲལ་མ་བྲལ་ལམ་སྒྲོ་འདོགས་ཆོད་མ་ཆོད་ལ། རྩལ་རྫོགས་ཀྱི་ཐ་སྙད་དང་། འགྱུ་རྟོག་མཐའ་དག་སྟོང་ཉིད་ཁོ་ནར་རང་ངོ་ཤེས་པའི་མཉམ་བཞག་རྟོགས་པ་དེ་ཉིད་རྗེས་སྣང་དང་གཉིད་གཉིས་ཀར་སླེབ་མ་སླེབ་ལ། རྣམ་རྟོག་སྒོམ་དུ་ཤར་མ་ཤར་དང་། རྟོགས་དོན་གྱི་བདེན་པ་མཐོང་བའི་ཡོན་ཏན་བརྒྱ་ཕྲག་བཅུ་གཉིས་སོགས་གྲུབ་རྟགས་ཀྱི་སྣང་ཆ་དང་འབྲེལ་མ་འབྲེལ་ལ་ཡོན་ཏན་སྐྱེས་མ་སྐྱེས་དང་། སྟོང་ཉིད་ཀྱི་རྩལ་མདངས་རྒྱུ་འབྲས་སུ་ཤར་ཚུལ་ལ་ངེས་ཤེས་རྙེད་ནས་སེམས་བསྐྱེད་སྨོན་ལམ་གྱི་རྟེན་འབྲེལ་བསྒྲིགས་ཤེས་མི་ཤེས་ལ་ཀུན་རྫོབ་ལ་བྱན་ཚུད་མ་ཚུད་དང་། གཟུགས་

[Full Size]

སྐུའི་ས་བོན་ཐེབས་མ་ཐེབས་སོགས་ཀྱི་དབྱེ་བའི་ས་མཚམས་ཤེས་དགོས་པར་གསུངས་སོ།། ༈ །།དེ་ལྟ་བུའི་སྤྲོས་བྲལ་གྱི་རྟོགས་པ་མཐར་ཕྱིན་ནས། འཁོར་འདས། སྣང་སྟོང་། བསྐྱེད་རྫོགས། ཀུན་རྫོབ་དོན་དམ་ལ་སོགས་གཉིས་ཆོས་ཀྱི་དབྱེ་བ་དང་མིང་འདོགས་མཐའ་དག་ཕྱག་རྒྱ་ཆེན་པོར་རོ་གཅིག་པར་རྟོགས་ཤིང་། ལམ་གྱི་ཆོས་ཇེ་སྙེད་མ་ལུས་རང་རིག་གི་ཐོག་ཏུ་འདྲིལ་ཐུབ་ཀྱང་། དེ་ལ་མྱོང་འཛིན་ནམ་ངེས་ཤེས་ཀྱི་འཁྲིས་ཅུང་ཟད་ཡོད་པའི་བར་ནི་རོ་གཅིག་ཆུང་ངུ་། མྱོང་འཛིན་དེ་ཉིད་དག་ནས་སྣང་སེམས་དབྱེར་མེད་ཀྱི་རྟོགས་པ་མངོན་དུ་གྱུར་ཅིང་། རྟོགས་བྱའི་ཡུལ་དངོས་དང་རྟོགས་མཁན་གྱི་རིག་པ་སོ་སོར་མ་གྲུབ་གཅིག་ཏུའང་མི་འཛིན་ཏེ། གཟུང་འཛིན་གཉིས་ལས་གྲོལ་བ་ནི་རོ་གཅིག་འབྲིང་པོ། །ཆོས་ཐམས་ཅད་དུ་མ་རོ་གཅིག་ཏུ་ཤར་བའི་མཐུ་ལས་རོ་གཅིག་གི་རྟོགས་པ་དེ་ཉིད་དུ་མ་

[Full Size]

རུ་འཆར་བའི་ཡེ་ཤེས་ཀྱི་རྩལ་རྒྱས་པ་ནི་རོ་གཅིག་ཆེན་པོ་སྟེ། སྒྲུབ་རྒྱུད་གོང་མ་རྣམས་ཀྱིས་མཉམ་རྗེས་འདྲེས་པ་མཚན་ཉིད་པ་དེ་འདི་སྐབས་སུ་འབྱུང་བར་གསུངས་སོ། །དེ་ཡང་གང་ཤར་གྱི་སྣང་རྟོག་རྣམས་གཤིས་ངོའི་ཆ་ནས་ཆོས་སྐུའམ་ཕྱག་ཆེན་དུ་ཡེ་ནས་ཡིན་ནའང་། སྣང་ངོའམ་འཁྲུལ་ངོ་ལ་ཨ་འཐས་དང་གཟུང་ སྣང་བ་རྣམ་རྟོག་ འཛིན་སོགས་སུ་ཡོད་པ་འདི་ལ་རང་རིག་གི་དྲན་པས་སླེབ་ན་རང་སར་གྲོལ་བ་ནི་རྣལ་འབྱོར་འོག་མ་རྣམས་ལ་ཡོད་མོད་ཀྱང་། སྐབས་འདིར་སླེབ་ཚེ་དྲན་པས་ཟིན་རྒྱུའམ་ངོ་ཤེས་རྒྱུའི་ངོ་བོ་ལོགས་སུ་མ་དགོས་པར་གང་སྣང་ཅིར་ཤར་གྱིས་ཆོག་པར་འགྱུར་བ་ཡིན་ཚེ། དེ་ལྟར་དུ་གྱུར་མ་གྱུར་ལ་རོ་གཅིག་གི་ངོ་བོ་མཐོང་མ་མཐོང་དུ་དབྱེ་བ་དང་། གཉེན་པོའི་ཞེན་འཛིན་ཕྲ་མོ་ཡོད་མེད་དམ། རོ་གཅིག་དུ་མར་འཆར་

[Full Size]

མི་འཆར་གྱི་ཁྱད་ལ་རྩལ་རྫོགས་མ་རྫོགས་སུ་འབྱེད་པ་དང་། ཚོགས་དྲུག་གི་སྣང་བ་ཟང་ཐལ་དུ་འཆར་བའི་སྒོ་ཐམས་ཅད་ལ་བཅིངས་གྲོལ་མེད་པར་གྱུར་མ་འགྱུར་ལ་རྣམ་རྟོག་སྒོམ་དུ་ཤར་མ་ཤར་གྱི་ཐ་སྙད་དང་། མཁྱེན་པའི་ཡེ་ཤེས་ཀྱིས་ཕྱི་ནང་གི་ཆོས་སོ་ཅོག་ལ་དབང་བསྒྱུར་ཞིང་སྤྲུལ་བསྒྱུར་རྫུ་འཕྲུལ་ལ་རང་དབང་ཐོབ་མ་ཐོབ་ལ་ཡོན་ཏན་སྐྱེས་མ་སྐྱེས་སུ་བཏགས་པ་དང་། སྣང་སེམས་འདྲེས་པས་རོ་གཅིག་དུ་མར་འཆར་བའི་རྟོགས་པའི་རྟེན་འབྲེལ་སྣང་སྲིད་རང་དབང་བསྒྱུར་བའི་རྒྱུ་འབྲས་ལམ་དུ་ལྷོངས་མ་ལྷོངས་ལ། ཀུན་རྫོབ་ལ་བྱན་ཚུད་དུ་བྱེད་པ་དང་། ཀུན་ཁྱབ་རྩོལ་མེད་ཀྱི་སྙིང་རྗེའི་ཤུགས་ལས་གཞན་དོན་གྱི་གཏེར་ཁ་ཕྱེ་མ་ཕྱེ་ལ། གཟུགས་སྐུའི་ས་བོན་ཐེབས་མ་ཐེབས་སུ་བརྗོད་པའི་ཚུལ་རྣམས་ཡོད་དོ།། ༈ །།དེ་ནས་རོ་གཅིག་མཐར་

[Full Size]

ཚེ། ཆེད་དུ་བསྒོམ་མ་བསྒོམ་ཡེངས་མ་ཡེངས་ལ་སོགས་པའི་གཉིས་སྣང་དག་ནས་སྣང་བ་ཐམས་ཅད་སྒོམ་དུ་ཡེ་ཡིན་ཆེན་པོར་གྲོལ་ལ། འོན་ཀྱང་མཚན་མོའི་དུས་དང་གཞན་དུའང་རྗེས་སྣང་གི་བག་ཆགས་སྒྱུ་མ་ལྟ་བུའི་འཛིན་པ་ཕྲ་མོ་ཙམ་སྐྱེ་བ་ནི་བསྒོམ་མེད་ཆུང་ངུ་། སྒྱུ་འཛིན་དེ་ཡང་རྩ་བ་ནས་དག་ཅིང་ཉིན་མཚན་ཁོར་ཡུག་ཏུ་མཉམ་བཞག་ཆེན་པོ་གཅིག་ཏུ་གྱུར་ཏེ་གཤིས་ལུགས་མངོན་དུ་གྱུར་ཀྱང་། ཡེ་ཤེས་ཀྱི་རང་གྲིབ་རྣམ་ཤེས་ཀྱི་ཆ་ཕྲ་མོ་རང་གསལ་དུ་ཡོད་པ་དེ་ཤེས་བྱའི་དྲི་མ་ཡིན་པས། དེ་དང་མ་བྲལ་བ་ནི་བསྒོམ་མེད་འབྲིང་པོ། མི་རྟོག་ངོ་མ་ཤེས་སམ། ཤེས་གྲིབ་ཕྲ་མོ་ཀུན་གཞིའི་རྣམ་ཤེས་ཀྱི་ལྷག་རོལ་ལྟ་བུ་དེ་ཉིད་ཀྱང་གཏན་ནས་སངས་ཏེ། འོད་གསལ་མ་བུ་འདྲེས་ཤིང་ཐམས་ཅད་ཡེ་ཤེས་ཀྱི་

[Full Size]

ཀློང་འབྱམས་ཆོས་སྐུ་ཐིག་ལེ་ཉག་གཅིག་ཏུ་སྨིན་པ་དེ་ལ་བསྒོམ་མེད་ཆེན་པོའམ། ཡང་དག་པར་རྫོགས་པའི་སངས་རྒྱས་ཞེས་བྱ་སྟེ་འབྲས་བུ་མཐར་ཕྱིན་པའོ། །དེ་ཡང་རོ་གཅིག་མངོན་གྱུར་གྱི་རྟོགས་པ་དེ་ཀ་ལ་སླར་བསྒོམ་རྒྱུའི་གོམས་པར་བྱ་རྒྱུ་ལྟ་བུའི་མྱོང་ཤེས་དག་མ་དག་གི་ཁྱད་པར་ལ་བསྒོམ་མེད་ཀྱི་ངོ་བོ་མཐོང་མ་མཐོང་ཟེར། རྟོགས་པའི་ཡེ་ཤེས་དེ་ལ་མི་ཤེས་ཀྱི་དྲི་མའམ་ཤེས་བྱའི་བག་ཆགས་ཕྲ་ཞིང་ཕྲ་བའི་རྣམ་པ་ཐམས་ཅད་ཟད་ལ་བསྒོམ་མེད་རྩལ་རྫོགས་ཀྱི་དབྱེ་བ་དང་། ཀུན་གཞིའི་བག་ཆགས་ཉིད་ཆོས་དབྱིངས་ཡེ་ཤེས་ཀྱི་ངང་དུ་ཐིམ་མ་ཐིམ་ལ་རྣམ་རྟོག་བསྒོམ་དུ་ཤར་མ་ཤར་གྱི་ཐ་སྙད་དང་། གདོས་བཅས་འཇའ་ལུས་དང་སེམས་ཉིད་ཆོས་སྐུ། ཞིང་ཁམས་དག་པ་རབ་འབྱམས་སུ་སྣང་མི་སྣང་ངམ་གྲོལ་མ་གྲོལ་ལ་ཡོན་ཏན་སྐྱེས་མ་སྐྱེས་དང་། སྐུ་གསུང་ཐུགས་མི་ཟད་རྒྱན་འཁོར་

[Full Size]

གྱིས་མཁའ་ཁྱབ་ཀྱི་འགྲོ་དོན་རྩོལ་མེད་དུ་མཛད་མི་མཛད་ལ། གཟུགས་སྐུའི་ས་བོན་མངོན་དུ་གྱུར་མ་གྱུར་དང་། སངས་རྒྱས་ཀྱི་ཆེ་བའི་ཡོན་ཏན་ཐམས་ཅད་རྫོགས་མ་རྫོགས་ལ་ཀུན་རྫོབ་ཀྱི་ཆ་ཤས་མཐའ་དག་དབྱིངས་སུ་དག་མ་དག་སོགས་ཀྱི་དབྱེ་བ་ཕྲ་ཞིབ་མ་ལུས་པ་རྣམས་བཀའ་རྒྱུད་གོང་མ་རྣམས་ཀྱིས་གསལ་བར་མཛད་མོད་ཅིང་།། ༈ །།མདོར་ཧྲིལ་གྱིས་དྲིལ་བའི་དོན་ལས། མཉམ་བཞག་ལ་ཇི་ཙམ་འདོད་པར་གནས་ཐུབ་པ་ལ་རྩེ་གཅིག་ཟེར། ཐ་མལ་གྱི་ཤེས་པ་རང་ངོ་ཤེས་ཤིང་གཞི་རྩ་མེད་པར་རྟོགས་པ་ལ་སྤྲོས་བྲལ་ཟེར། འཁོར་འདས་གཉིས་སྣང་གི་འཛིན་པ་རིག་ཐོག་ཏུ་གྲོལ་བ་ལ་རོ་གཅིག་ཟེར། ངེས་ཤེས་དང་བག་ཆགས་ཀྱི་དྲི་མ་ཐམས་ཅད་དག་པ་ལ་སྒོམ་མེད་ཟེར་བ་སྟེ། །རྣལ་འབྱོར་བཞིའི་ངོ་བོ་ནི་འདིར་འདུས་ཤིང་། བྱེ་བྲག་ཏུ་

[Full Size]

རྩེ་གཅིག་གི་མཉམ་རྗེས་ཀྱི་ཁྱད་ནི་གནས་མི་གནས་ལ་འདོད་ཅིང་། སྤྲོས་བྲལ་གྱི་མཉམ་རྗེས་ནི་དྲན་མ་དྲན་དང་། རོ་གཅིག་ཡན་ཆད་ནི་མཉམ་རྗེས་འདྲེས་པས་དབྱེར་མེད་དོ། །ཡང་། རྣམ་རྟོག་གི་རང་བཞིན་མི་རྟོག་པར་འཆར་བ་ནི་རྩེ་གཅིག །སྟོང་ཉིད་དུ་འཆར་བ་སྤྲོས་བྲལ། མཉམ་ཉིད་དུ་འཆར་བ་རོ་གཅིག །བློ་འདས་སུ་ཤར་བ་ལ་བསྒོམ་མེད་ཅེས་བྱ། ཡང་། རྩེ་གཅིག་དུས་སུ་འཁྲུལ་པ་རང་ག་མར་འཆར། སྤྲོས་བྲལ་ནས་གཞི་མེད་རྩ་བྲལ་དུ་རྟོགས། རོ་གཅིག་གི་ཚེ་འཁྲུལ་པ་ཡེ་ཤེས་སུ་འཆར། །བསྒོམ་མེད་ལ་འཁྲུལ་མ་འཁྲུལ་གྱི་མིང་དང་བྲལ་ལོ། །གཞན་ཡང་། རྩེ་གཅིག་གནས་འགྱུ་གཉིས་དབྱེར་མེད་དུ་རྟོགས་པ་ནི་མཆོག་ཡིན། སྤྲོས་བྲལ་ལ་འཁྲུལ་གྲོལ་དབྱེར་མེད། རོ་གཅིག་ལ་སྣང་སེམས་དབྱེར་མེད། བསྒོམ་མེད་ལ་སྣང་སེམས་

[Full Size]

དབྱེར་མེད་རྣམས་ནི་སོ་སོའི་རྩལ་རྫོགས་པའམ། མཆོག་ཏུ་གྱུར་པར་གསུངས་པ་དང་། ཡང་། རྩེ་གཅིག་སེམས་ཉིད་ཨ་འཐས་ཀྱི་དུས། སྤྲོས་བྲལ་གྱི་སེམས་ཉིད། མཉམ་རྗེས། རོ་གཅིག་གི་སེམས་ཉིད་ཟུང་འཇུག །བསྒོམ་མེད་སེམས་ཉིད་མངོན་གྱུར། ཅེས་གསུངས་པ་དང་། གཞན་ཡང་། རྩེ་གཅིག་གི་ཚེ་རྣམ་རྟོག་གི་མགོ་ནོན། སྤྲོས་བྲལ་གྱི་རྣམ་རྟོག་རྩ་བོ་ཆོད། རོ་གཅིག་གི་རང་བྱུང་ཡེ་ཤེས་ནང་ནས་ཤར། བསྒོམ་མེད་ནི་དེ་ལ་བརྟན་པ་ཐོབ་པའོ། །ཅེས་སོགས། མདོར་ན་དབྱེ་བསལ་དང་རྣམ་གྲངས་ཀྱི་རིམ་པ་ནི་བརྗོད་ཀྱིས་མི་ལངས་ཤིང་ཟད་མཐའ་མེད་པ་ཞིག་སྣང་མོད་ཀྱི། འགག་དོན་དུ་དགོས་གལ་ཆེ་བ་ནི་གནས་ལུགས་སེམས་ཀྱི་རང་མཚང་ཇི་བཞིན་པ་ཞིག་ངོ་ཤེས་ནས། བློས་བྱས་ཀྱིས་མ་བསླད་པའི་རང་བབས་ཐ་མ་ཤེས་པའི་

[Full Size]

རང་འགྲོས་སྐྱོང་ཚུལ་ཤེས་པ་ཞིག་ཁོ་ན་གལ་ཆེ་བར་གདའ་སྟེ། ཡེ་ཤེས་ཀྱི་མཁའ་འགྲོ་ནེ་གུ་མའི་ཞལ་ནས། ཅིར་སྣང་སྒོམ་དུ་མ་ཤེས་ན། །གཉེན་པོ་བསྟེན་གྱིས་ག་ལ་ལངས། །ཡུལ་རྐྱེན་སྤངས་པས་མི་སྤོངས་ཏེ། །སྒྱུ་མར་ཤེས་ན་རང་སར་གྲོལ། ཅེས་གསུངས་ཤིང་། དིང་སང་གི་ཆོས་པར་རློམ་པ་ཕལ་མོ་ཆེ་ནི་འཇིག་རྟེན་གྱི་འཁྲི་བ་དམ་པོས་བཅིངས་ཤིང་། ཚེ་འདིའི་ལྟོ་གོས་སྐྱིད་འདོད་ཟང་ཟིང་ཡོ་བྱད་འཛོམ་ཆ་དོན་དུ་གཉེར་བ་ཁོ་ན་དང་། ལ་ལ་ནི་ཐ་སྙད་ཐོས་རྒྱ་ཤེས་རློམ་ང་རྒྱལ་གྱི་དུག་གིས་སྨྱོས་ནས་རང་སེམས་ལ་རང་དབང་མ་ཐོབ། འགའ་ཞིག་ཙམ་ངེས་དོན་སྒོམ་ཕྱོགས་ལ་བློ་འདུན་པར་གྱུར་ཀྱང་། བླ་མ་དང་གདམ་ངག་ཟོལ་མེད་ཀྱིས་འཕོ་ཏེ། སྡུག་བཙིར་འཇུར་སྒོམ་གྱི་བཙོན་དུ་ཆུད་ཅིང་། གུ་ཡངས་ཁྱབ་གདལ་གྱི་ཉམས་ལེན་མ་ཤེས་པས་སྲོག་རླུང་རིན་གྱིས་

[Full Size]

ཉོ་བའི་བླུན་སྒོམ་མང་ལ། གཞན་དག་ཕལ་ཆེར་ནི་ནག་པོ་ཁ་འབྱམས་གློ་བའི་ཐུག་པའམ་རྦུད་པའི་རྐྱལ་སྟོང་འདྲ་བའི་སྒོམ་ཆེན་གྱིས་རི་ཀླུངས་གང་བའི་དུས་འདི་འདྲར། རྣལ་འབྱོར་བཞིའི་ཡོན་ཏན་བརྗོད་རུང་མྱ་ངམ་གྱི་ཐང་ལ་ཆུའི་ཡོན་ཏན་བཤད་པ་ལྟ་བུ་ལས་མ་མཆིས་ཤིང་དགོས་པ་ཆུང་ལ། ཉམས་རྟོགས་ལྷད་མེད་སྐྱེས་པའི་སྐལ་ལྡན་ཕོ་ཐོག་ཆོད་པ་དག་ནི་བསྒོམས་བྱུང་གི་ཤེས་རབ་ནང་ནས་ཤར་བའི་ཕྱི་རོལ་གྱི་ཚིག་དང་ཡི་གེ་ལ་རག་མ་ལུས་ཕྱིར་བདག་འདྲའི་མ་མཐོང་རྒྱང་གྱི་གཏམ་རྒྱུད་ལྟ་བུའི་བཤད་ཚོགས་ལ་དགོས་པ་མེད་པར་འཁུམས་སོ། །གང་ཞིག་སྐལ་བཟང་བརྩོན་འགྲུས་ཅན་དམ་པ་བསྟེན་ཅིང་བྱིན་རླབས་ཞུགས་ཏེ་ཉམས་ལེན་ཕུར་ཚུགས་སུ་བགྱིད་ནུས་པའི་གང་ཟག་ཚད་ལྡན་དག་གིས་

[Full Size]

འདི་དང་གཞན་ནས་བཤད་པའི་རྣལ་འབྱོར་བཞི་ཇི་ལྟ་བའི་ཉམས་རྟོགས་ཤར་བ་དག་ལ་ནི། ཐེག་པ་ཐུན་མོང་ལྟར་གྱི་ལམ་ལྔ་དང་ས་བཅུའི་རིམ་པ་རྣམས་ཀྱང་ཤུགས་ལ་ཚང་ཞིང་བགྲོད་པ་སྟེ།། ༈ །།ཏིང་འཛིན་རྒྱལ་པོའི་མདོ་ལས། མི་གང་ཏིང་འཛིན་མཆོག་འདི་འཛིན་པ་ནི། །ཆོས་འཛིན་དེ་དག་གང་དུ་སོང་བ་ཡང་། །ཤིན་ཏུ་སྤྱོད་པ་ཞི་ཞིང་ཡིད་རང་བཞིན། །རབ་ཏུ་དགའ་དང་དྲི་མེད་འོད་བྱེད་དང་། །འོད་འཕྲོ་སྦྱངས་དཀའ་མངོན་དུ་གྱུར་པའི་ས། །རིང་དུ་སོང་དང་མི་གཡོ་ལེགས་པའི་བློ། །ཆོས་སྤྲིན་ས་བཅུ་པོ་ཡང་ཐོབ་པར་འགྱུར། ཅེས་གསུངས་ཤིང་། དེ་ཡང་དང་པོ་ཚོགས་ལམ་ཆུང་འབྲིང་ཆེ་གསུམ་ལ་དྲན་པ་ཉེ་བར་བཞག་པ་བཞི་དང་། ཡང་དག་པར་སྤོང་བ་བཞི། རྫུ་འཕྲུལ་གྱི་རྐང་པ་བཞི་རྣམས་འབྱུང་བ་ལས། ཕྱག་རྒྱ་ཆེན་པོའི་མན་ངག་གི་མྱུར་ལམ་འདིར་

[Full Size]

དེ་ཐམས་ཅད་ཚང་བའི་ཚུལ་ནི། དེ་ལ་དང་པོར་སྔོན་འགྲོ་ཐུན་མོང་བའི་ནང་ཚན་གྱི། འཁོར་བའི་སྡུག་བསྔལ་དལ་འབྱོར་རྙེད་དཀའ། །ཚེ་མི་རྟག་བསམ་པ་སོགས་ལ། ལུས་མི་གཙང་བར། དྲན་པ་ཉེ་བར་གཞག་པ་དང་། ཚོར་བ་སྡུག་བསྔལ་བར་དྲན་པ། སེམས་མི་རྟག་པར་དྲན་པ། ཆོས་བདག་མེད་པར་དྲན་པ་ཉེ་བར་གཞག་པ་དང་བཞི་པོ་ཤུགས་ཀྱིས་ཚང་ཕྱིར། དེ་དག་ལ་གནད་དུ་བསྣུན་ཏེ་མྱོང་བའམ་ངེས་ཤེས་སྐྱེས་ཚེ། ཚོགས་ལམ་ཆུང་ངུ་བགྲོད་པ་ཅེས་བྱའོ། །དེ་བཞིན་དུ་མི་དགེའི་ཆོས་རྣམས་མི་བསྐྱེད་ཅིང་སྐྱེས་པ་རྣམས་སྤོང་བ་དང་། དགེ་བའི་ཆོས་རྣམས་བསྐྱེད་ཅིང་སྐྱེས་པ་རྣམས་གོང་དུ་སྤེལ་བ་སྟེ། དེ་ལྟར་ཡང་དག་སྤོང་བ་བཞི་རྣམས་ནི་འདིར་སྐྱབས་འགྲོ་སེམས་བསྐྱེད་ཡིག་བརྒྱ་མཎྜལ་རྣམས་ལ་འདུས་ཕྱིར། ཚོགས་ལམ་འབྲིང་པོ་བགྲོད། དེ་ནས་

[Full Size]

བླ་མའི་རྣལ་འབྱོར་གྱི་སྐབས་སུ་རྫུ་འཕྲུལ་གྱི་རྐང་པ་བཞི་སྟེ། དེ་ཡང་བླ་མ་ལ་མོས་གུས་རྩེ་གཅིག་བྱེད་པ་ནི་འདུན་པ་རྫུ་འཕྲུལ་གྱི་རྐང་པ། གསོལ་བ་འདེབས་པ་ནི་བརྩོན་འགྲུས་ཀྱི་རྐང་པ། དབང་བཞི་ལེན་པ་ནི་སྤྱོད་པའི་རྐང་པ། མཐར་བླ་མ་རང་སེམས་དང་བསྲེ་བ་ནི་སེམས་ཀྱིས་ཏིང་འཛིན་རྫུ་འཕྲུལ་གྱི་རྐང་པ་སྟེ། དེ་དག་གིས་ཚོགས་ལམ་ཆེན་པོ་བགྲོད་པའོ། །དེ་ཡང་ཕར་ཕྱིན་ཐེག་པར་ཚོགས་ལམ་མཐར་ཕྱིན་པའི་ཡོན་ཏན་དུ་དག་པའི་ཞིང་ཁམས་བགྲོད་ཅིང་སངས་རྒྱས་སྤྲུལ་པ་སྐུའི་ཞལ་མཐོང་བ་སོགས་འབྱུང་བར་གསུངས་པ་ལ། འདིར་ནི་བླ་མ་མཆོག་ཉིད་སངས་རྒྱས་སྐུ་གསུམ་གའི་ངོ་བོར་གྱུར་པ་དང་། དེ་ཉིད་ཀྱི་གདུལ་ཞིང་ཐམས་ཅད་སྤྲུལ་པའི་ཞིང་ལས་མ་འདས་ཕྱིར། དོན་གྱི་དགོངས་པ་མཐུན་པ་ཉིད་དོ།། ༈ །།དེ་ནས་རྩེ་གཅིག་གི་སྐབས་ཆུང་འབྲིང་ཆེ་གསུམ་ནི་སྦྱོར་ལམ་ཡིན་ཅིང་། སེམས་ཀྱི་ངོ་བོ་

[Full Size]

མཐོང་བ་ལ་དྲོད་ཅེས་བྱ་བ་དང་། དེ་ལ་ངེས་ཤེས་སྐྱེས་པ་ལ་རྩེ་མོར་བརྗོད་པ་དང་། རྐྱེན་གྱིས་མི་གནོད་པ་ལ་བཟོད་པ་ཞེས་པ་དང་། རྩེ་གཅིག་གི་ཉམས་ཀྱི་ཁོར་ཡུག་ལ་སྦྱོར་ལམ་འཇིག་རྟེན་ཆོས་མཆོག་ཏུ་བཞེད་པ་སྟེ། འདི་དག་གི་སྐབས་སུ་ཡོན་ཏན་གྱི་བྱེ་བྲག་ཏུ་དབང་པོ་ལྔ་ཡང་འབྱུང་སྟེ། གང་ཞེ་ན། ངེས་ཤེས་ཚད་མེད་སྐྱེས་པ་དད་པའི་དབང་པོ་དང་ཡེངས་མེད་དོན་ལ་བལྟ་བ་དྲན་པའི་དབང་པོ། ལེ་ལོས་བར་མི་ཆོད་པ་བརྩོན་འགྲུས་ཀྱི་དབང་པོ། སྒོམ་ལ་རྒྱུན་ཆད་མེད་པ་ཏིང་འཛིན་གྱི་དབང་པོ། ངེས་པའི་དོན་རྟོགས་པ་ཤེས་རབ་ཀྱི་དབང་པོ་དང་ལྔ་འབྱུང་ཞིང་། དེ་ལྔ་པོ་སོ་སོ་ནས་རྩལ་རྫོགས་པའམ་སྟོབས་སུ་གྱུར་པ་ལ་སྟོབས་ལྔར་ཡང་བརྗོད་པ་སྟེ། དེ་ལྟར་རྩེ་གཅིག་གསུམ་མངོན་དུ་གྱུར་པས་སྦྱོར་ལམ་མཐར་ཕྱིན་ནས། སྤྲོས་

[Full Size]

བྲལ་ལ་སླེབ་པ་དང་སྔར་མ་མཐོང་བའི་རྟོགས་དོན་གྱི་བདེན་པ་མཐོང་ལམ་བགྲོད་པ་སྟེ། འདི་སྐབས་སུ་ཕར་ཕྱིན་ཐེག་པར་བྱང་ཆུབ་ཀྱི་ཡན་ལག་བདུན་བསྒོམས་པར་གསུངས་པ་རྣམས་ཀྱང་འདིར་ཤུགས་ལ་འབྱུང་བ་ཉིད། དེ་ཡང་ཆོས་ཀྱི་གནས་ལུགས་ཀྱི་དོན་ཇི་བཞིན་པའི་ངང་ལ་གནས་པས། ཏིང་འཛིན་བྱང་ཆུབ་ཀྱི་ཡན་ལག་དང་། ཉོན་མོངས་དང་མ་འདྲེས་པས་ན་ཆོས་རྣམ་པར་འབྱེད་པ་བྱང་ཆུབ་ཀྱི་ཡན་ལག །ཏིང་འཛིན་དེ་ཉིད་དྲན་པ་ཙམ་གྱིས་མཐོང་སྤངས་ཀྱི་དྲི་མ་རང་སར་དག་པས་དྲན་པ་བྱང་ཆུབ་ཀྱི་ཡན་ལག །ལེ་ལོ་གཡེང་བ་ལས་གྲོལ་བས་བརྩོན་འགྲུས་བྱང་ཆུབ་ཀྱི་ཡན་ལག །ཟག་མེད་ཀྱི་དགའ་བདེ་ལ་སྤྱོད་པས་དགའ་བ་བྱང་ཆུབ་ཀྱི་ཡན་ལག །སྤང་བྱ་མ་ལུས་དག་པས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག །

[Full Size]

འཁོར་འདས་མཉམ་ཉིད་དུ་རྟོགས་པས་བཏང་སྙོམས་བྱང་ཆུབ་ཀྱི་ཡན་ལག་དང་བདུན་པོ་རྫོགས་པར་འགྱུར་ལ་གཞན་ཡང་མཐོང་ལམ་གྱི་ཡོན་ཏན་དུ་མ་དང་ཏིང་འཛིན་གྱི་སྒོ་མཐའ་ཡས་པ་ཐོབ་པར་གསུངས་སོ། །དེ་ཡང་འགའ་ཞིག་གི་བཞེད་ཀྱིས། སྤྲོས་བྲལ་གསུམ་གའི་རྩལ་རྫོགས་ནས་རོ་གཅིག་ཏུ་ན་འཕར་བའི་ཚེ། སྒོམ་ལམ་དང་ས་དང་པོ་ཟིན་པར་བཞེད་ལ། གཞན་དག་ཕལ་ཆེར་ནི་སྤྲོས་བྲལ་ངོ་བོ་མཐོང་ཞིང་མཐོང་ལམ་སྐྱེས་པའི་རྗེས་ཐོག་དེ་ཀར་ས་དང་པོ་ཐོབ་པར་བཤད་པ་མང་སྟེ་གང་ཟག་གི་དབང་པོ་རིམ་ལས་མཐའ་གཅིག་ཏུ་མ་ངེས་པར་མངོན་ཏེ། ལམ་བགྲོད་ཁམས་ཆེ་ཆུང་དང་མྱུར་བུལ་གྱི་ཁྱད་སྣ་ཚོགས་འབྱུང་བར་གོར་མ་ཆགས་སོ། །དེ་ལྟར་གྱི་མཐོང་ལམ་གྱི་རྟོགས་པ་གཤའ་མ་སྐྱེས་ཚེ་ཡོན་ཏན་ཐམས་ཅད་ཀྱི་འབྱུང་ཁུངས་སམ། གཞི་རྟེན་བྱེད་

[Full Size]

ཕྱིར་ས་ཞེས་བྱ་བ་ཐོབ་པ་སྟེ། །སངས་རྒྱས་ཕལ་ཆེན་གྱི་མདོ་ལས། ས་ཐོབ་གྱུར་མ་ཐག་ཏུ་འཇིགས་པ་ལྔ་དང་བྲལ། །འཚེ་བ་མེད་དང་འཆི་དང་ངན་འགྲོར་མི་ལྟུང་དང་། །འཁོར་གྱི་ནང་དུ་འཇིགས་བྲལ་དེ་ལ་བག་ཚ་མེད། །ཅེས་གསུངས་པ་ལྟར། ས་བཅུའི་ཡོན་ཏན་རྣམས་གོང་ནས་གོང་དུ་འཕེལ་བར་འགྱུར་ལ། །ས་ཐོབ་ཡན་ཆད་ལ་སྒོམ་ལམ་ཅེས་བྱ་བ་སྟེ། ཅིའི་ཕྱིར་ན། མཐོང་ལམ་གྱི་དོན་དེ་ལ་གོམས་པར་བྱེད་པས་ན་དེ་སྐད་དུ་བརྗོད་ལ། །འདི་དུས་འཕགས་ལམ་ཡན་ལག་བརྒྱད་ལ་སྤྱོད་པ་སྟེ། དེ་ཉིད་ལའང་མཉམ་བཞག་ཐམས་ཅད་ཟག་མེད་ཀྱི་ཏིང་འཛིན་ཁོ་ན་དང་། རྗེས་སྣང་འཕགས་ལམ་ཡན་ལག་བརྒྱད་དེ་གོམས་པར་བྱེད་པ་ལ་ཟག་བཅས་སུ་བཤད་ཅིང་། བརྒྱད་པོ་གང་ཞེ་ན། ཡང་དག་པའི་ལྟ་བ་དང་། རྟོགས་པ་དང་། ངག་དང་། ལས་ཀྱི་མཐའ་དང་། འཚོ་བ་དང་། རྩོལ་བ་དང་། དྲན་པ་དང་།

[Full Size]

ཡང་དག་པའི་ཏིང་འཛིན་ཏེ། མདོར་ན་འདི་དག་ཐམས་ཅད་ཕྱིན་ཅི་མ་ལོག་པའི་ཆོས་ཅན་འབའ་ཞིག་ཏུ་འགྲུབ་ཕྱིར། ཐེག་པ་འོག་མ་དག་གི་ལས་ཁྱད་པར་དུ་འཕགས་པའི་ལྡོག་ཆོས་དུ་མ་ཅན་ཤ་སྟག་གོ། །ས་རྣམས་ཀྱི་དང་པོ་ནི། ཡོན་ཏན་ཁྱད་པར་ཅན་དེ་ལ་དགའ་བ་མཆོག་ཏུ་གྱུར་པའི་ཕྱིར། ས་དང་པོ་རབ་ཏུ་དགའ་བ་ཅེས་བྱ་ཞིང་། འདི་དུས་མཉམ་བཞག་སྐྱེ་མེད་རྟོག་བྲལ་གྱི་ངང་དང་། རྗེས་སྒྱུ་མ་ལྟ་བུའི་སྒོ་ནས་སེམས་ཅན་གྱི་དོན་ལ་མགོ་དང་ཡན་ལག་སོགས་གཏང་བ་ལ་ཡང་ཉམ་ང་དང་ཞུམ་པ་མེད་པའི་སྦྱིན་པའི་ཕ་རོལ་ཏུ་ཕྱིན་པ་གཙོ་བོར་བསྒྲུབས་པས་ལམ་བགྲོད་པ་སོགས། ཕ་རོལ་ཏུ་ཕྱིན་པ་བཅུ་དང་ས་བཅུ་པོ་རིམ་ཅན་དུ་སྦྱར་ནས་གསུངས་པ་དག་ཐུན་མོང་ཐེག་པར་ཞིབ་རྒྱས་འབྱུང་མོད་

[Full Size]

ཀྱི། འདིར་ནི་སྤྲོས་བྲལ་དང་པོར་ཏིང་ངེ་འཛིན་གྱི་དགའ་བ་ཆེར་རྒྱས་པས་ས་དང་པོ་རབ་ཏུ་དགའ་བ། སྒོམ་ཡངས་ཀྱི་དྲི་མ་དང་བྲལ་བས་ས་གཉིས་པ་དྲི་མ་མེད་པ། རྟོགས་དོན་གྱི་རྩལ་ལས་འགྲོ་བའི་དོན་བྱེད་པས་ས་གསུམ་པ་འོད་བྱེད་པ། སྤྲོས་བྲལ་འབྲིང་པོར། སངས་རྒྱས་ཀྱི་ཆེ་བའི་ཡོན་ཏན་གོང་དུ་འཕེལ་བས་ས་བཞི་པ་འོད་འཕྲོ་བ། སྟོང་ཉིད་སྙིང་རྗེ་ཟུང་འཇུག་གི་རྟོགས་པས་བག་ཆགས་ཀྱི་དྲི་མ་སྦྱངས་དཀའ་ཐམས་ཅད་སྦྱོང་བས་ལྔ་པ་སྦྱངས་དཀའ་བ། སྤྲོས་བྲལ་ཆེན་པོ་མངོན་དུ་གྱུར་ཏེ་འཁོར་འདས་སྐྱེ་མེད་དུ་རྟོགས་པས་དྲུག་པ་མངོན་གྱུར་གྱི་ས་རྣམས་ནོན་པ་སྟེ། འདི་མན་ཆད་ཉན་རང་རྣམས་དང་ཐུན་མོང་གི་སར་བཤད་ལ། དེ་ནས་མཉམ་རྗེས་འཁོར་འདས་སོགས་གཉིས་སྣང་ཕལ་ཆེར་ཟུང་འཇུག་ཏུ་གྲོལ་ཏེ་རོ་གཅིག་གི་རྟོགས་པ་ཤར་བའི་ཐོག་མར་ས་བདུན་

[Full Size]

པ་རིང་དུ་སོང་བ། རོ་གཅིག་འབྲིང་པོར་རྟོགས་ཆོས་ཡང་དག་གི་དྲན་པ་ལས་གཡོ་བ་མེད་པས་བརྒྱད་པ་མི་གཡོ་བའི་ས། རོ་གཅིག་ཆེན་པོར་གཉིས་སྣང་སྒྱུ་མ་ལྟ་བུ་ཕྲ་མོ་ཙམ་མ་གཏོགས་གཞན་དྲི་མ་ཕལ་ཆེར་དག་པས་ས་དགུ་པ་ལེགས་པའི་བློ་གྲོས། གཉིས་སྣང་ཕྲ་མོ་དེ་ཡང་རང་སར་དག་སྟེ་ས་ལམ་གྱི་ཡོན་ཏན་མཐར་ཕྱིན་ལ། འོན་ཀྱང་ཀུན་གཞིའི་རྣམ་ཤེས་ཀྱི་ལྷག་མའི་དྲི་མའམ་བག་ཆགས་ཀྱི་འཛིན་ཆ་ཤེས་བྱའི་སྒྲིབ་པ་ཕྲ་ཞིང་ཕྲ་བ་ཞིག་ཡོད་པའི་བར་དེ་ལ་འདིར་བསྒོམ་མེད་ཆུང་འབྲིང་དང་། ཐུན་མོང་བ་ལྟར་ན་ས་བཅུ་པ་ཆོས་ཀྱི་སྤྲིན་ཞེས་བྱ་ཞིང་། དེ་ལྟར་འདི་མན་ཆད་ནི་བྱང་སེམས་ས་བཅུའི་དབང་ཕྱུག་རྣམས་དང་སྐལ་བ་མཉམ་པའི་ཡོན་ཏན་མངའ་ལ། དེ་ནས་མི་རྟོག་ངོ་མ་ཤེས་ཀྱི་དྲི་མའམ་ཤེས་

[Full Size]

བྱའི་བག་ཆགས་ཕྲ་མོ་དེ་ཉིད་ཀྱང་རྡོ་རྗེ་ལྟ་བུའི་ཡེ་ཤེས་ཀྱི་ངོ་བོ་རང་བྱུང་རང་རིག་ཆེན་པོར་ཐིམ་ཞིང་སྒྲིབ་བྱེད་མཐའ་དག་གཏན་བྲལ་དུ་གྱུར་ནས། ཇི་ལྟ་བ་དང་ཇི་སྙེད་པའི་ཡེ་ཤེས་ཀྱི་རྩལ་དང་མཁྱེན་བརྩེ་ནུས་པའི་སྟོབས་རྣམས་ཡོངས་སུ་རྫོགས་པའི་ཚེ་ཕྱི་ཐུན་མོང་ཐེག་པར་མཐར་ཕྱིན་པའི་ལམ་མཆོག་རྫོགས་པའི་སངས་རྒྱས་ཀྱི་གོ་འཕངས་དངོས་དང་། ཕྱག་རྒྱ་ཆེན་པོའི་སྐབས་འདིར་ནི་བསྒོམ་མེད་ཆེན་པོར་བརྗོད་ལ། གསང་སྔགས་སྤྱི་ལྟར་ན་འདི་དུས་ལས་ཉོན་བག་ཆགས་ཀྱི་སྒྲིབ་ཆ་ཟད་པས་ལམ་སྦྱང་བགྲོད་དངོས་བྱེད་རྒྱུ་མེད་ཀྱང་། ཡོན་ཏན་གྱི་འཕེལ་ཆའི་ལྡོག་ཆོས་སམ་ཁྱད་ཆོས་ཀྱི་བྱེ་བྲག་ལས་བཏགས་ཏེ། བཅུ་གཅིག་ཀུན་ཏུ་འོད་དང་། བཅུ་གཉིས་མ་ཆགས་པདྨའི་ས་སྟེ། ཐུན་མོང་མ་ཡིན་པ་ནང་གི་ས་གཉིས་པོ་སྐད་ཅིག་ལ་མངོན་དུ་བྱས་ནས། རང་དོན་ཆོས་སྐུ་མཐར་ཕྱིན་པའི་

[Full Size]

རོལ་རྩལ་ལས་གཞན་དོན་གཟུགས་སྐུས་མཁའ་ཁྱབ་འགྲོ་བའི་དོན་ཆེན་འཁོར་བ་མ་སྟོངས་ཀྱི་བར་དུ་རྒྱུན་མི་འཆད་པར་མཛད་པ་ལ་བཅུ་གསུམ་རྡོ་རྗེ་འཛིན་པ་སངས་རྒྱས་ཀྱི་ས་ཉིད་དུ་གསུངས་སོ། །འདི་དག་ལས་ས་ལམ་གོང་དུ་བགྲོད་རྒྱུ་ཡོད་པའི་བར་ནི་སློབ་ལམ་དུ་བརྗོད་ཅིང་། གོང་དུ་བགྲོད་ཡུལ་མེད་པར་མཐར་ཐུག་ཚེ་མི་སློབ་པའི་ལམ་དུ་བརྗོད་པ་སྟེ། བཅུ་གསུམ་རྡོ་རྗེ་འཛིན་པ་ནི་གསང་སྔགས་ནང་པའི་འབྲས་བུ་མཐར་ཕྱིན་པ་ཉིད་དོ། དེ་ལྟ་བུའི་ས་རྣམས་ཐོབ་པའི་ཚེ་ཡོན་ཏན་ཁྱད་པར་ཅི་ལྟ་བུ་ཡོད་ཅེ་ན། ས་དང་པོ་ཐོབ་པ་ཙམ་གྱིས་ཕྱོགས་བཅུར་སྤྲུལ་སྐུའི་ཞིང་ཁམས་བརྒྱ་དུས་གཅིག་ལ་བགྲོད་ནུས་པ་དང་། སངས་བརྒྱའི་བྱའི་ཞལ་བལྟ་ཞིང་ཆོས་ཉན་པ་དང་། ལུས་སྲོག་ལོངས་སྤྱོད་རྒྱལ་སྲིད་བུ་དང་ཆུང་མ་སོགས་ཀྱང་ལྟོས་མེད་དུ་གཏོང་ནུས་པའི་སྦྱིན་པ་མི་འདྲ་བ་བརྒྱ་ཕྲག་དུས་

[Full Size]

གཅིག་ལ་བྱེད་ནུས་པ་དང་། འོད་དམར་པོ་སྤྲོ་ཞིང་དཀར་པོར་བསྡུ་བ་དང་། སེར་པོར་སྤྲོས་ནས་སྔོན་པོར་འཁྱིལ་བ་དང་། མང་པོར་སྤྲོས་ཤིང་ཉུང་ངུར་བསྡུ་བ་སོགས་འོད་ཟེར་མི་འདྲ་བ་བརྒྱ་དུས་གཅིག་ལ་འགྱེད་ནུས་པ་དང་། གདུལ་བྱ་མི་འདྲ་བ་བརྒྱ་ལ་སོ་སོའི་ཁམས་དབང་བསམ་པ་དང་མཐུན་པའི་ཆོས་སྒོ་བརྒྱ་ཕྲག་དུས་གཅིག་ལ་སྟོན་ནུས་པ་དང་། དཔའ་བར་འགྲོ་བ་དང་། དཔུངས་བཀོད་པ་དང་། སེང་གེ་རྣམ་པར་འགྱིངས་པ་ལ་སོགས་རྒྱལ་བའི་ཡུམ་ལས་གསུངས་པའི་ཏིང་ངེ་འཛིན་མི་འདྲ་བ་བརྒྱ་ལ་དུས་གཅིག་ཏུ་སྙོམས་པར་འཇུག་ནུས་པ་དང་། ནམ་མཁའ་ལ་འགྲོ་ཞིང་ས་ལ་འཛུལ་བ། རི་བྲག་ལ་ཐོག་པ་མེད་ཅིང་ཆུ་ལ་མི་བྱིང་བ། སྟོད་ནས་མེ་འབར་ཞིང་སྨད་ནས་ཆུ་འབྲུབ་པའམ། དེ་གཉིས་རེ་མོས་དང་། གཅིག་ལས་མང་པོར་སྤྲུལ་ཞིང་མང་པོ་གཅིག་ཏུ་བསྡུ་བའི་

[Full Size]

སྤྲུལ་བསྒྱུར་སོགས་རྫུ་འཕྲུལ་གྱི་བཀོད་པ་མི་འདྲ་བ་བརྒྱ་ཕྲག་དུས་གཅིག་ལ་སྟོན་ནུས་པ་སྟེ། དེ་ལྟར་ཡོན་ཏན་བརྒྱ་ཕྲག་བདུན་ལ་དབང་འབྱོར་བར་འགྱུར་ལ། དེ་བཞིན་དུ་རིམ་པས། ས་གཉིས་པ་ལ་ཡོན་ཏན་དེ་ལྟ་བུ་སྟོང་ཕྲག་བདུན། བཞི་པར་འབུམ་ཕྲག་བདུན། ལྔ་པ་ལ་བྱེ་བ་ཕྲག་བདུན། དྲུག་པར་ས་ཡ་བདུན། བདུན་པར་དུང་ཕྱུར་བདུན། བརྒྱད་པར་ཐེར་འབུམ་བྱ། དགུ་པར་ཐེར་འབུམ་ཆེན་པོ་བདུན། བཅུ་པ་ལ། དེད་འདྲེན་ཕྲག་བདུན་དང་། བཅུ་གཅིག་པར་རབ་བཀྲམ་ཕྲག་བདུན། བཅུ་གཉིས་པ་ལ་རབ་བཀྲམ་ཆེན་པོ་ཕྲག་བདུན་དུ་འགྱུར་ཞིང་བཅུ་གསུམ་རྡོ་རྗེ་འཛིན་པ་སངས་རྒྱས་སྐུ་གསུམ་བདག་ཉིད་མངོན་དུ་གྱུར་པའི་ཆེ་བའི་ཡོན་ཏན་གྱི་རྣམ་གྲངས་ནི་མཐའ་ཡས་ཕྱིར་སུ་ཞིག་གིས་ཚད་འཛིན་པར་མི་ནུས་ཏེ་བློའི་ར་བ་ལས་བརྒལ་བའི་ཆོས་

[Full Size]

ཉིད་དོ། །དེ་ལྟ་བུ་ཐུན་མོང་ཐེག་པ་ནས་གསུངས་པའི་ས་བཅུ་ལམ་ལྔ་ཐམས་ཅད་ཐེག་པའི་ཡང་རྩེ་ཕྱག་རྒྱ་ཆེན་པོའི་ལམ་འདིར་མ་འདྲེས་ཡོངས་རྫོགས་སུ་ཚང་ཕྱིར། རྣལ་འབྱོར་བཞི་པོ་ཚུལ་བཞིན་མངོན་དུ་གྱུར་པའི་གང་ཟག་ལ་ས་ལམ་གྱི་ཡོན་ཏན་མཐའ་དག་ཀྱང་རིམ་གྱིས་ཅིག་ཅར་དུ་རྫོགས་པ་ཆོས་ཉིད་ཡིན་ལ། འོན་ཀྱང་ལྟར་སྣང་དུ་ལ་ལར་དེ་དག་སོགས་ཀྱི་ཡོན་ཏན་མངོན་མཚན་ཅན་དུ་སྣང་མི་སྟོན་པ་ནི་གསང་སྔགས་གསང་བའི་ཉེ་ལམ་གྱི་ཡ་ཚུལ་ཀྱང་ཡིན་ལ། གཞན་ཡང་དཔེར་ན་འདབ་ཆགས་དང་གཅན་གཟན་སོགས་སེམས་ཅན་ཕལ་མོ་ཆེ་ནི་མའི་མངལ་ནས་བཙས་ཏེ་ཡུན་རིང་པོར་མ་སོང་གི་བར་དུ་ལུས་རྩལ་མི་རྫོགས་ཤིང་རིམ་གྱིས་མ་དང་མཉམ་པར་འགྱུར་མོད་ལ། འདབ་ཆགས་ཀྱི་དབང་པོ་བྱ་ཁྱུང་དང་། གཅན་གཟན་གྱི་རྒྱལ་པོ་སེང་གེ་ནི་སྒོང་ཤུན་དང་མའི་མངལ་དུ་

[Full Size]

རྩལ་རྫོགས་པར་གྱུར་པ་དེ་གཞན་གྱིས་མི་མཐོང་མོད་ཀྱང་། ནམ་ཞིག་བཙས་པར་གྱུར་མ་ཐག་རྩལ་གསུམ་རྫོགས་པའི་མཐུས། མ་དང་ལྷན་ཅིག་ནམ་འཕངས་གཅོད་པ་སོགས་རང་གི་བྱ་བ་མཐའ་དག་ནུས་པ་དེ་བཞིན་དུ། འདིར་ཡང་རྣལ་འབྱོར་པ་གང་ཞིག་གདོས་བཅས་ལུས་ལ་འཐུམ་པའི་རིང་ལ་མངོན་རྟགས་གསལ་བར་མི་སྣང་ཡང་། ནམ་ཞིག་ལུས་རྒྱ་གྲོལ་བ་དང་ཡོན་ཏན་གྱི་རྩལ་ཆེན་རྫོགས་པའི་འབྲས་བུ་སྨིན་པ་དུས་མཚུངས་པར་འགྱུར་བ་དང་། འོན་ཏེ་ཐབས་ཤེས་ཟུང་འཇུག་གི་ལམ་ལ་གནད་དུ་བསྣུན་པ་གང་ཞིག་ལ་ལུས་ཐོག་འདི་ནས་རྫུ་འཕྲུལ་མངོན་ཤེས་སོགས་ཀྱི་ལམ་རྟགས་གསལ་བར་སྣང་བའང་ཤིན་ཏུ་མང་ལ་དོན་དམ་པར་ནི། དབྱིངས་དང་ཡེ་ཤེས་མཉམ་པ་ཉིད་བློ་ལས་འདས་པའི་ཆོས་ཉིད་རང་སེམས་དངོས་པོ་གཤིས་ཀྱི་གནས་ལུགས་གཉུག་མ་

[Full Size]

དོན་གྱི་ཡེ་ཤེས་ལ་རང་དབང་མ་ཐོབ་ན། བསྐྱེད་རྫོགས་རྩ་རླུང་ཐིག་ལེ་སོགས་ཀྱི་ཉམས་ལེན་དྲོད་རྟག་སྣ་འགའ་ཙམ་ལ་དགའ་བྲོད་མཆོག་འཛིན་བཟང་ཞེན་མངོན་རློམ་གྱི་འགོང་པོ་ཕུགས་སུ་ཞུགས་པའི་གྲུབ་ཐོབ་ཀྱི་རང་གཞན་ངན་འགྲོར་ཁྱུང་དེད་བྱེད་པ་ནི་དིང་སང་གི་དུས་འདིར་ཤིན་ཏུ་མང་བས། དཔྱོད་ལྡན་རྣམས་ཀྱིས་གཟིགས་འཚལ་ལོ། །དེ་ལྟར་ལྟ་སྒོམ་ས་ལམ་གྱི་རིམ་པ་ཅུང་ཟད་བསྟན་ནས། ཞར་ལ་བོགས་འདོན་ལམ་འཁྱེར་གྱི་སྤྱོད་པའི་ཚུལ་ཡང་མདོ་ཙམ་འཆད་དེ། དེ་ཡང་སྤྱིར་གསང་སྔགས་ཀྱི་ལམ་ཕལ་མོ་ཆེ་ལས་སྤྱོད་པའི་རྣམ་གྲངས་ནི། སྤྲོས་བཅས། སྤྲོས་མེད། ཤིན་ཏུ་སྤྲོས་མེད་ཀྱི་སྤྱོད་པ་གསུམ་མམ་གསང་སྤྱོད། ཚོགས་སྤྱོད། རིག་པ་བརྟུལ་ཞུགས་ཕྱོགས་ལས་རྣམ་རྒྱལ་སོགས་དབྱེ་རིམ་མང་ཡང་། ཕལ་ཆེར་བསྐྱེད་རྫོགས་ཐུན་མོང་གི་བོགས་

[Full Size]

འདོན་ཤས་ཆེ་ཞིང་། འདིར་ནི་གཉུག་མ་བློ་བྲལ་གྱི་རང་འགྲོས་སྐྱོང་བ་ཀུན་ཏུ་བཟང་པོའི་སྤྱོད་པ་ཁོ་ན་གཅེས་ཏེ། དེ་ལས་དང་པོར་སྔོན་འགྲོ་ཚོགས་བསགས་སྒྲིབ་སྦྱོང་བྱིན་རླབས་འཇུག་ཐབས་ཀྱི་རིམ་པའི་སྐབས་སུ་ཡང་ཚེ་འདིའི་བྱ་བྱེད་འཇིག་རྟེན་ཆོས་བརྒྱད་ཀྱི་དྲི་མ་གང་གིས་ཀྱང་མ་བསླད་ཅིང་། རང་སེམས་རང་ལ་མི་ཁྲེལ་བའི་ཉམས་ལེན་གྱི་སྤྱོད་པ་ཀུན་ཏུ་བཟང་པོ་ལ་འབད། བར་དུ་དངོས་གཞི་ལྟ་སྒོམ་གྱི་བརྡར་ཤ་གཅོད་ཅིང་རང་རིག་གཏན་ལ་འབེབས་པའི་དུས་སུ་ཡང་བློ་མང་གི་གཟེར་མགོ་ནང་ནས་བརྡུང་ལ་སྒྲོ་འདོགས་ཀྱི་སྙེམ་ཐག་སེམས་ཐོག་ཏུ་བཅོད། གཅིག་ཤེས་ཀུན་ལ་མཁས་ཤིང་ཀུན་ཤེས་གཅིག་ཏུ་གྲོལ་བའི་སྤྱོད་པ་ཀུན་ཏུ་བཟང་པོ་ལ་འབུངས། མཐར་ཉམས་ལེན་གྱི་བོགས་འདོན་པར་བྱེད་པའི་ཐབས་ཀྱི་སྤྱོད་པའི་བྱེ་

[Full Size]

བྲག་ཀྱང་། གཞུང་དང་མན་ངག་རྣམས་ནས་སྣ་ཚོགས་འབྱུང་མོད་ཀྱི། འགགས་དོན་གྱི་སྙིང་པོར་ནི། འཇིག་རྟེན་གྱི་འཁྲི་བ་རྦད་ཀྱིས་བཅད་དེ་མི་མེད་དབེན་པའི་རི་ཁྲོད་འགྲིམ་པ་རི་དྭགས་རྨས་མ་ལྟ་བུའི་སྤྱོད་པ་དང་། རྐྱེན་ངན་ལ་ཡ་ང་བག་ཚ་མེད་པ་སེང་གེ་རི་སུལ་བསྙེགས་པ་ལྟ་བུའི་སྤྱོད་པ་དང་། འདོད་ཡོན་ལ་ཆགས་ཞེན་མེད་པ་བར་སྣང་གི་རླུང་ལྟ་བུའི་སྤྱོད་པ་དང་། ཆོས་བརྒྱད་ལ་དགག་སྒྲུབ་ཀྱི་འཁྲིས་མི་འཇུག་པ་སྨྱོན་པ་ལྟ་བུའི་སྤྱོད་པ་དང་། རང་སེམས་ཀྱི་རང་འགྲོས་ཁ་ཡན་དུ་སྐྱོང་བ་ལས་གཞན་པའི་གཉིས་འཛིན་གྱི་ཐག་པས་མི་བཅིང་བ་ནམ་མཁའ་མདུང་བསྐོར་ལྟ་བུའི་སྤྱོད་པ་རྣམས་ལ་སྤྱད་ཅིང་། ཡེངས་འཁྲུལ་རྣམ་གཡེང་རེ་དོགས་ཀྱི་འཆིང་བ་བཅད། རྟགས་མཚན་ཉམས་རྟོགས་དངོས་གྲུབ་སོགས་ཡོང་བར་འདོད་པའི་ཁོང་མཚང་སྤུ་རྩེ་ཙམ་ཞུགས་ཀྱང་གནས་ལུགས་ཆོས་སྐུའི་རང་ཞལ་སྒྲིབ་བྱེད་འབའ་

[Full Size]

ཞིག་ཡིན་པས། བཟོ་མེད་གཤིས་ཀྱི་འདུག་ཚུལ་སྐྱོང་བ་ཁོ་ན་ལ་དྲིལ་བ་ནི་ལམ་ཁྱེར་གྱི་སྤྱོད་པ་ཀུན་ཏུ་བཟང་པོ་མཆོག་ཏུ་གྱུར་པ་དང་། གནས་སྐབས་སུ་རྐྱེན་གྱི་བྱེ་བྲག་ལྟར་སྣང་བའི་རྣམ་རྟོགས། ཉོན་མོངས། སྡུག་བསྔལ། འཇིག་སྐྲག་ན་ཚ་འཆི་བ་དང་བཅས་པ་གང་བྱུང་ཀྱང་། གཉེན་པོའམ་ཕན་ཐབས་གཞན་ལ་མི་རེ་མི་ལྟོས་པར། གནས་ལུགས་ཕྱག་རྒྱ་ཆེན་པོའི་ཉམས་ལེན་གྱི་དངོས་གཞིར་ཤེས་པ་ནི་བོགས་འདོན་ཐམས་ཅད་ཀྱི་རྒྱལ་པོ་ཡིན་པས། །འདི་ལྟ་བུ་ཉམས་སུ་ལེན་ནུས་པའི་རྣལ་འབྱོར་དེ་ནི། འཁོར་འདས་སྣང་སྲིད་ཀུན་ལ་རང་དབང་བསྒྱུར་ཕྱིར། བར་ཆད་ཀྱི་ཡུལ་དང་བྲལ། དངོས་གྲུབ་ཀྱི་མཚོ་ཆེན་རྡོལ། སྒྲིབ་གཉིས་ཀྱི་མུན་པ་སངས། གྲུབ་རྟགས་ཀྱི་ཉི་མ་ཤར། སངས་རྒྱས་སེམས་ལ་བསྙེད། གཞན་དོན་གྱི་གཏེར་ཁ་ཕྱེ་བ་ཆོས་ཉིད་ཡིན་ཀྱང་། གཅིག་ཆོག་གི་

[Full Size]

ནོར་བུ་ལག་ཏུ་ལེན་པ་དེ་ཐང་ལ་བསྐྱུར་ནས། བྱིས་པ་པད་ཚལ་དུ་སླེབ་པ་ལྟར་འདི་བྱེད་འདི་བཟང་གི་ཡིད་སྨོན་ལ་མི་ཚེ་སྐྱེལ་བའི་སྒོམ་ཆེན་ཤ་སྟག་སྣང་བ་འདི་ནི་ཡིད་སྐྱོ་བའི་རྒྱུར་གདའ་ལགས་སོ། དེ་ལྟར་གཞི་ལམ་ལྟ་སྒོམ་གྱི་རང་བཞིན་མདོ་ཙམ་བསྟན་ནས། ད་ནི་འབྲས་བུ་ཕྱག་རྒྱ་ཆེན་པོ་སྐུ་གསུམ་དབྱེར་མེད་དམ། སྐུ་གཉིས་ཟུང་འཇུག་གི་དོན་བཤད་པས་མཇུག་བསྡུ་བ་ནི། རྣལ་འབྱོར་གང་ཞིག་གནས་ལུགས་གཞིའི་ཕྱག་ཆེན་གྱི་རང་ཞལ་མཐོང་ཞིང་། ལྟ་སྒོམ་ལམ་གྱི་ཕྱག་ཆེན་ལ་ཉམས་ལེན་གནད་དུ་བསྣུན་པས་གོམ་པ་མཐར་ཕྱིན་པ་དེ་ཉིད། མཐར་ཐུག་འབྲས་བུའི་ཕྱག་ཆེན་དོན་དམ་ཆོས་སྐུ་མངོན་དུ་གྱུར་པ་དེའི་ཚེ། ཆོས་སྐུའི་ངོ་བོ་ནི་རང་རིག་བཅོས་མིན་གདོད་མའི་ཡེ་ཤེས་འཕོ་འགྱུར་བྲི་གང་མེད་པ་ཁམས་གསུམ་སེམས་ཅན་ཀུན་གྱི་རྒྱུད་ལ་ཡེ་ཁྱབ་ཏུ་བཞུགས་པ།

[Full Size]

འདི་ཉིད་ལམ་ཉམས་ལེན་གྱི་ཐབས་གནད་ཟབ་མོས་མངོན་དུ་བྱས་པ་སྟེ། འདི་ལས་གཞན་པའི་སངས་རྒྱས་སམ། ཆོས་སྐུ་ཞེས་པ་སྔར་མེད་གསར་བྱུང་ནི་མ་ཡིན་ནོ། །འདིའི་མཚན་ཉིད་ནི། གནས་ལུགས་ཇི་ལྟ་བ་དང་ཤེས་བྱ་ཇི་སྙེད་པའི་མཁྱེན་པའི་ཡེ་ཤེས་མངའ་བའི་ཕྱིར་མཁྱེན་པ་གཉིས་ལྡན་ཡང་ཟེར་ལ། གདོད་ནས་ངོ་བོ་རྣམ་པར་དག་པ་དང་བློ་བུར་ལྷན་སྐྱེས་ཀྱི་དྲི་མ་དག་པའི་ཕྱིར། དག་པ་གཉིས་ལྡན་ཀྱང་ཟེར་ཏེ། དོན་ལ་ཤེས་བྱའི་ཆོས་ཐམས་ཅད་ལ་མི་མཁྱེན་པའམ་མི་གཟིགས་པའི་དྲི་མ་དང་བྲལ་ཞིང་། ཡོན་ཏན་གྱི་ཆ་མཐའ་དག་ཡོངས་སུ་རྫོགས་པ་ཉིད་དོ། །ཆོས་སྐུའི་དེའི་གདངས་སམ་ཡེ་ཤེས་ཀྱི་རོལ་པ་འགག་མེད་དུ་ལོངས་སྤྲུལ་གཉིས་ཤར་བ་སྟེ། སྐུ་གསུམ་པོ་དེ་ལ་ཟུང་འཇུག་ཡན་ལག་བདུན་ལྡན་གྱི་ཡོན་ཏན་

[Full Size]

མངའ་བ་སྟེ། བདུན་གང་ཞེ་ན། འོག་མིན་གྱི་གནས་སུ་སེམས་དཔའ་རྣམས་ལ་ཟབ་རྒྱས་གསང་སྔགས་ཀྱི་ཆོས་འཁོར་ལ་རྟག་པ་རྒྱུན་གྱི་ལོངས་སྤྱོད་མཛད་ཕྱིར། ལོངས་སྤྱོད་ཀྱི་ཡན་ལག་དང་། ༡ མཚན་དཔེ་རྫོགས་པའི་ཡེ་ཤེས་ཀྱི་སྐུ་ཉིད་རང་འོད་ཀྱི་ཡུམ་དང་སྦྱོར་བས་ཁ་སྦྱོར་གྱི་ཡན་ལག་དང་། ༢ ཟག་མེད་ཀྱི་བདེ་བ་ཆེན་པོ་རྒྱུན་ཆད་མེད་པས། བདེ་བ་ཆེན་པོའི་ཡན་ལག་དང་གསུམ་ནི་ལོངས་སྐུའི་ཁྱད་ཆོས་ཡིན་ལ། ༣ དམིགས་མེད་ཀྱི་ཐུགས་རྗེ་མཁའ་ལྟར་ཁྱབ་པ་ནི། སྙིང་རྗེས་ཡོངས་སུ་གང་བའི་ཡན་ལག ༤ །ཕྲིན་ལས་རྒྱ་ཆེན་པོ་འཁོར་བའི་མཐའ་མཉམ་རྟོག་མེད་ལྷུན་གྲུབ་ཏུ་འབྱུང་བ་ནི། རྒྱུན་མི་ཆད་པའི་ཡན་ལག ༥ །མྱང་འདས་ཞི་བའི་མཐར་མི་གནས་པ་ནི། །འགོག་པ་མེད་པའི་ཡན་ལག་སྟེ། ༦ འདི་གསུམ་ནི་སྤྲུལ་པ་སྐུའི་ཁྱད་ཆོས་ཡིན་པ་དང་། སྟོང་ཉིད་སྙིང་

[Full Size]

རྗེ་ཟུང་འཇུག་སྤྲོས་པ་ཐམས་ཅད་དང་བྲལ་བ་ནི། རང་བཞིན་མེད་པའི་ཡན་ལག་སྟེ། ༧ འདི་ནི་ཆོས་སྐུའི་ཁྱད་ཆོས་སུ་འདྲེན་པ་སྟེ། དེ་ལྟར་ཡན་ལག་བདུན་ལྡན་དང་། ཡང་། དབང་ཕྱུག་གི་ཡོན་ཏན་བརྒྱད་དང་ལྡན་པར་ཡང་འདྲེན་ཏེ། དེ་ཡང་སྐུ་གང་ལ་གང་འདུལ་རྣམ་པ་ཐམས་ཅད་དང་ལྡན་པ་ནི་སྐུའི་དབང་ཕྱུག ༡ །གང་འདུལ་ཆོས་འཁོར་རྒྱུན་མི་འཆད་པ་ནི་གསུང་གི་དབང་ཕྱུག ༢ །རྟོག་མེད་ཐུགས་རྗེ་མངའ་བ་ནི་ཐུགས་ཀྱི་དབང་ཕྱུག ༣ །རྫུ་འཕྲུལ་ཐོག་པ་མེད་པ་ནི་རྫུ་འཕྲུལ་གྱི་དབང་ཕྱུག ༤ །འཁོར་འདས་དུས་གསུམ་མཉམ་ཉིད་རོ་གཅིག་ཏུ་མངོན་པར་བྱང་ཆུབ་པ་ནི་ཀུན་འགྲོའི་དབང་ཕྱུག ༥ །རི་རབ་སོ་གཉིས་ཀྱི་རྡུལ་གྲངས་མཉམ་པའི་ལྷ་མོས་འདོད་ཡོན་གྱིས་མཆོད་ཀྱང་འདོད་པས་གོས་པ་མེད་པ་ནི་འདོད་པའི་དབང་ཕྱུག་པ་

[Full Size]

ཡིད་བཞིན་ནོར་བུ་ལྟར་འགྲོ་བའི་རེ་འདོད་ཡིད་མཐུན་དུ་སྐོང་བས་ཅི་འདོད་བསྐྱེས་པའི་དབང་ཕྱུག ༧ །འོག་མིན་ཆོས་དབྱིངས་ཕོ་བྲང་ན་ཁམས་གསུམ་ཆོས་ཀྱི་རྒྱལ་པོར་རྟག་ཏུ་བཞུགས་པ་ནི་གནས་ཀྱི་དབང་ཕྱུག་སྟེ། ༨ དེ་ལྟར་དབང་ཕྱུག་བརྒྱད་ལྡན་དུ་འདྲེན་པ་འདི་ནི་གཙོ་ཆེར་ལོངས་སྐུའི་ཡོན་ཏན་གྱི་རྣམ་གྲངས་ཡིན་ལ།། ༈ །།སྤྲུལ་པའི་སྐུ་ནི། ཆོས་ལོངས་གཉིས་ཀྱི་རྣམ་པར་འཕྲུལ་པ་བསམ་ཡས་ཀྱི་གདུལ་བྱ་འགྲོ་བའི་ཆུ་སྣོད་ཇི་སྙེད་པར་འདུལ་བྱེད་སྤྲུལ་པའི་ཟླ་སྣང་དེ་སྙེད་དུ་འབྱུང་སྟེ། བཟོ་དང་སྐྱེ་དང་བྱང་ཆུབ་ཆེན་པོ་ལ་སོགས་གང་ལ་གང་འདུལ་གྱི་སྤྲུལ་བཀོད་རབ་འབྱམས་མཐའ་ཡས་པར་འབྱུང་བ་ནི་སངས་རྒྱས་རྣམས་ཀྱི་སྐུ་གསུང་ཐུགས་ཀྱི་གསང་བ་མི་ཟད་རྒྱན་གྱི་འཁོར་ལོ་ཞེས་བྱ་ཞིང་། དེ་ལྟར་འབྱུང་བའི་རྒྱུ་ནི་ད་ལྟ་ལམ་གྱི་སྐབས་སུ་དོན་དམ་

[Full Size]

སྟོང་ཉིད་ཕྱག་རྒྱ་ཆེན་པོ་ལ་གནད་དུ་བསྣུན་པའི་འབྲས་བུ་དངོས་ནི་ཆོས་ཀྱི་སྐུ་འགྲུབ་ཅིང་། དེའི་ཡན་ལག་གམ་ཐབས་ཀྱི་ཆར་སེམས་བསྐྱེད་སྨོན་ལམ་སོགས་རྣམ་པར་དག་པ་བགྱིས་པའི་མཐུ་ལས་སྤྲུལ་པའི་སྐུ་དང་། བསྐྱེད་རིམ་ཟབ་མོ་བསྒོམ་པའི་རྒྱུ་འབྲས་ལས་ལོངས་སྤྱོད་རྫོགས་པའི་སྐུ་སྟེ་ཉམས་ལེན་དེ་དག་ཀྱང་སོ་སོ་ཡ་བྲལ་རེས་འཇོག་ལྟ་བུས་ནི་མ་ཡིན་པར་ཐབས་ཤེས་ཟུང་འཇུག་འཁོར་གསུམ་ཡོངས་དག་ཆེན་པོར་འབད་པའི་མཐུ་འབྲས་ལས། སྐུ་གསུམ་འདུ་འབྲལ་མེད་པའི་ངོ་བོར་གཏན་སྲིད་ཟིན་པར་འགྱུར་བའོ། །དེ་ལྟར་སྔར་བཤད་པའི་སྐུ་གསུམ་པོ་དང་གཞན་ཡང་སྐུ་བཞིའམ་ལྔ་སོགས་ཀྱི་དབྱེ་བ་དུ་མ་རྣམས་ཀྱི་ངོ་བོ་གཅིག་ལ་ཡོན་ཏན་དང་བྱེད་ལས་ལྟ་བུའི་ཆ་ནས་མིང་སོ་སོར་བཏགས་པ་སྟེ།

[Full Size]

ད་ལྟ་སེམས་ཉིད་ཀྱི་གཤིས་གདངས་རྩལ་གསུམ་ལ་དེ་ཚེ་སྐུ་གསུམ་དུ་བརྗོད་པ་ཉིད་ལས་གཞན་མ་ཡིན་ནོ། །འདི་སྐབས་སུ་རྒྱུའི་ཐེག་པ་དང་སྔགས་འོག་མའི་རྒྱུད་སྡེ་སོགས་སུ་དེ་དང་དེའི་སྐབས་དོན་ལ་དགོངས་པ་དང་། ལྡེམ་པོར་དགོངས་པའི་ལུང་ཕྱོགས་རེའི་ཁ་འཛིན་གྱི་བཞེད་སྲོལ་སྣ་ཚོགས་ཏེ། ཆོས་ཀྱི་སྐུ་ལ་ཞལ་ཕྱག་ཏུ་གྲུབ་མ་གྲུབ་དང་། དེའི་ཞིང་ཁམས་དངོས་བསྟན་ཡོད་མེད་སོགས་དང་། སངས་རྒྱས་ལ་རང་རྒྱུད་ཀྱིས་བསྡུས་པའི་ཡེ་ཤེས་ཡོད་མེད་དང་། གཟུགས་སྐུ་གཉིས་ལ་རང་སྣང་གི་ཚོར་བ་ཡོད་མེད་སོགས་ཀྱི་རྩོད་གཞི་དང་དགག་སྒྲུབ་དུ་མས་ཟིང་ཟིང་པོར་བྱེད་པར་སྣང་མོད་ཀྱི། དེ་ཐམས་ཅད་རང་རང་གི་སྐབས་དེར་ནི་དེ་ཉིད་བདེན་པ་ཡིན་མོད་ཀྱང་། ཐེག་པའི་བཅུད་ཀྱི་སྙིང་པོ་འདི་དག་གི་སྐབས་སུ་ནི་འོག་མ་ལྟ་གྲུབ་ལ་ལྟོས་མི་འཚལ་ཞིང་། ཐམས་ཅད་དང་

[Full Size]

མཐུན་ལ་ཐམས་ཅད་ལས་ཁྱད་པར་དུ་གྱུར་པ་ཞེས་པའི་དགོངས་པ་ཡིན་ལ། དེ་ལྟ་བུའི་དགོངས་པ་དེ་གང་ལ་ཟེར་ན། འཁོར་འདས་སྣང་སྲིད་ཀྱི་བསྡུས་པའི་ཆོས་སོ་ཅོག་ཐམས་ཅད་ལ། བདེན་མི་བདེན། ཡོད་མེད། ཡིན་མིན། སྐྱེ་འགག །འགྲོ་འོང་། རྟག་ཆད་ལ་སོགས་པར་གང་ལའང་མི་ཞེན། མི་འཛིན། མི་དགག །མི་བསྒྲུབ་སྟེ། ཅིའི་ཕྱིར་ན། གང་མེད་པར་སྨྲ་ན་ཆད་པའི་མཐར་ལྷུང་ཞིང་། ཡོད་པར་བྱས་ན་ནི་རྟག་པའི་མཐའ་དང་། ཡོད་མེད་གཉིས་ཀ་མ་ཡིན་ནོ་སྙམ་དུ་འཛིན་ནའང་བློས་བྱས་ཀྱི་རང་བཞིན་ལས་མ་འདས་པའི་ཕྱིར། གཞན་སྣང་གི་ངོར་ནི། ཡོད་ན་ཡོད་དུ་ཆུག་སྟེ་འགགས་མེད་ཀྱི་འཆར་སྒོ་ཟད་མཐའ་མེད་ཅིང་རྒྱུ་འབྲས་རྟེན་འབྲེལ་ལ་བསླུ་བ་མེད་པའི་ཕྱིར་དང་།

[Full Size]

གང་ཞིག་མེད་པ་རྣམས་ཀྱི་ངོར་ནི་མེད་དུ་ཆུག་སྟེ། གཤིས་ངོར་གང་དུ་ཡང་གྲུབ་པ་མེད་པའི་རང་བཞིན་སྟོང་པ་ཉིད་ལས་མ་གཡོས་པའི་ཕྱིར་དང་། ཡོད་མེད་གཉིས་ཀ་མ་ཡིན་པ་ཡང་བདེན་དུ་ཆུག་སྟེ། མཐའ་གང་དུ་ཡང་མ་ལྷུངས་ཤིང་ཕྱོགས་དང་རིས་སུ་མ་ཆད་པའི་ཕྱིར་རོ། །དེ་བས་ན་ཕྱི་རོལ་སྣོད་བཅུད་དུ་སྣང་བའི་དངོས་པོ་ཐམས་ཅད་ནི་མ་དག་སེམས་ཅན་གྱི་བག་ཆགས་ལས་སྣང་འཁྲུལ་པའི་ངོར་ནི་འབྱུང་ལྔ་གདོས་བཅས་ཨ་འཐས་ཀྱི་ཚུལ་དང་། ལམ་པའི་རྣལ་འབྱོར་རྣམས་ཀྱིས་ངོར་ནི་རང་སེམས་འགགས་མེད་ཀྱི་སྣང་བ། སངས་རྒྱས་བྱང་སེམས་རྣམས་ལ་ནི་ཡེ་ཤེས་རང་གསལ་གྱི་ཞིང་ཁམས་ཏེ། དོན་དམ་པར་ནི་ཐམས་ཅད་སེམས་ཉིད་ཀྱི་ཆོ་རོལ་ཁོ་ན་ཉིད་དེ་བཞིན་དུ། ནང་གི་སེམས་དང་། སེམས་བྱུང་གི་རྟོག་ཚོགས་རྣམས་ཀྱང་མ་དག་འཁྲུལ་པའི་སྐྱེ་འགྲོ་རྣམས་ལ་ནི་ལས་ཉོན་

[Full Size]

བག་ཆགས་ཀྱི་རང་བཞིན། ལམ་པའི་རྣལ་འབྱོར་རྣམས་ལ་ནི་ལྟ་སྒོམ་ཉམས་རྟོགས་ཀྱི་བྱེ་བྲག་བདེར་གཤེགས་སྐུ་གསུམ་གྱི་སངས་རྒྱས་རྣམས་ལ་ནི་མཁྱེན་བརྩེ་ཡེ་ཤེས་ཀྱི་རོལ་པ་སྟེ། དེས་ན་རྒྱུའམ་གཞིའི་གནས་ལུགས་ལ་ནི་ཁྱད་པར་རྡུལ་ཙམ་མ་མཆིས་ནའང་། བློ་བུར་ཀུན་བཏགས་ཀྱི་སྒྲིབ་པས་ཆེར་འཐུམས་པ་དང་། ཅུང་ཟད་འཐུམས་པ་དང་། སྒྲིབ་པ་བྲལ་བ་དང་བཅས་པའི་ཁྱད་པར་དུ་གྱུར་ཕྱིར། གཞི་ལམ་འབྲས་གསུམ་གའི་ངོ་ སེམས་ཅན་རྣམས་ བོ་སྐུ་གཉིས། རྣལ་འབྱོར་པ་ ཟུང་འཇུག་གམ་སྐུ་ སངས་རྒྱས་རྣམས། གསུམ་དབྱེར་མེད་ཉིད་ལས་མ་འདས། སྔར་ མི་འདའ། ད་ལྟ་ མ་འོངས་པར་ འདའ་བར་མི་འགྱུར་བའི་དོན་གྱི་སྙིང་པོ་རང་སེམས་མ་བཅོས་ཕྱག་རྒྱ་ཆེན་པོའི་ངང་དུ་གློད་པ་ཁོ་ན་གནད་དུ་ཆེ་ཡི། འདུས་མ་བྱས་ཀྱི་ཆོས་ལ་འདུས་བྱས་བློའི་སྒྲོ་བཏགས་སྐུར་

[Full Size]

འདེབས་བྱས་ཏེ་ཚིག་གི་མཐའ་ལ་ཞེན་ཅིང་ཕྱོགས་རེའི་གྲུབ་མཐའ་ལ་རྩོད་པར་བྱེད་པ་རྣམས་ནི། བྱིས་པའི་སྐྱེ་བོ་དག་གིས་ནམ་མཁའ་མཐའ་རྒྱ་རྩོད་པ་དང་མཚུངས་ཕྱིར། བཟོ་མེད་ལྷུག་པའི་ངང་དུ་ཕྱམས་གདལ་མཉམ་ཉིད་ཆེན་པོར་ཞོག་མཛོད་དང་རྣལ་འབྱོར་བཞི་དང་། ས་བཅུ་ལམ་ལྔ་སྐུ་གསུམ་ལྷུན་གྲུབ་ཀྱི་འབྲས་བུ་དང་བཅས་པའི་དབྱིངས་སུ་བགྲོད་བྱ་བགྲོད་བྱེད་ཀྱི་མཚན་མ་ལས་འདས་པའི་ངང་དུ་གྲོལ་བར་གདོན་མི་ཟ་བ་ཉིད་དོ། །ཀྱེ་ཧོ། གདོད་ནས་ཡེ་གྲོལ་བདེར་གཤེགས་སྙིང་པོའི་ཁམས། ལྷུན་གྱིས་གྲུབ་པའི་སངས་རྒྱས་སྐུ་གསུམ་ཉིད། །འགྲོ་བ་འཇག་མིག་སྲིན་བུ་ཡན་ཆད་ལ། །རྟག་ཏུ་འབྲལ་མེད་བཞུགས་ཀྱང་མ་རིག་སྒྲིབ། །གདུལ་བྱ་ཇི་སྙེད་འདུལ་བྱེད་ཆོས་ཀྱི་སྒོ། །དེ་སྙེད་བསྟན་ཀྱང་རང་སྣང་མ་དག་འཁྲུལ། །ལམ་ནོར་ལམ་ལོག་ལམ་གོལ་ལམ་ འཇིག་རྟེན་པ་རྣམས་ མུ་སྟེགས་པ་ ཉན་རང་རྣམས་ གསང་སྔགས་འོག་མ་པ་རྣམས་

[Full Size]

གྱིས་བཅིངས། ཡང་དག་ལམ་བཟང་བགྲོད་པ་ཨུ་དུམ་ཝར། མཐའ་མ་གྲུབ་ཀྱང་མཐར་འཛིན་སྒྲོག་ཏུ་ཆུད། རང་ལ་ཡོད་ཀྱང་མི་ཤེས་དབུལ་མོའི་གཏེར། མ་བཅོས་རང་བྱུང་བཅོས་མའི་ལྷད་ཀྱིས་བསླད། །ཡིན་ལུགས་རང་ཚང་མི་རིག་ཅི་ཞིག་ཉེས། །སྟོབ་འབྱོར་ཅན་རྣམས་བསོད་ནམས་བདུད་དུ་བབས། །ཐོས་པས་དྲེག་ཀུན་རྒྱུད་རྐོ་སྣུམ་དྲེད་ཁྱེར། །བླུན་སྒོམ་འཇུར་བསྒྲིལ་བྱེ་མར་སྣུམ་ཚིར་འབད། །གནས་ལུགས་ཕྱག་ཆེན་སུ་ཞིག་གནད་དུ་བཞུགས། །ཀྱི་ཧུད། མདོ་སྔགས་ཉི་ཟླ་ཟུང་གི་བསྟན་མཆོག་ནི། །ཆུ་ལྷ་མོར་གཤེགས་ཐུན་མཚམས་ལི་ཁྲིའི་སྤྲིན། །ཡལ་གའི་ཚུལ་ལ་མི་སྐྱོ་འདིར་སྣང་གི །ཆེད་དུ་དལ་འབྱོར་རྡུལ་དུ་གཏོང་འདི་ཅི། མི་ སྒོམ་པ་ ལྟ་བ་ལ་ སྤྱོད་པ་ འབྲས་བུ་ སྒོམ་གྱི་སྐལ་བ་མེད་ སྒོམ་ལ་ཡིད་མི་ཆེས་ བསྒོམ་གྱི་གནད་མ་གོ་

[Full Size]

མེད་རི་ཡི་ཁྲོད་དུ་སྲོག་འཚོའི་ཟས། གྱི་ན་ཙམ་ལ་ལེགས་བརྟེན་གཏན་འདུན་མཆོག །གཉུག་མའི་རང་ཞལ་ལྟ་མཛད་སྒྲུབ་རྒྱུད་ཀྱི། །ལུགས་དེ་བསྟན་པ་མིན་པར་གཟིགས་སམ་ཀྱཻ། བསྟན་པའི་དོན་ཞེས་བསྟན་པ་བསྣུབ་པའི་ལས། །སྒྲུབ་བརྩོན་ཡང་དག་སྒྲུབ་ལ་མི་བརྩོན་པའི། དུས་འདིར་བདག་འདྲའི་ཡིག་སྣ་འདི་འདྲའི་རིགས། །སུ་ལ་ཅི་མཁོ་སུ་ཞིག་དང་དུ་ལེན། །རང་ལ་མི་དགོས་གཞན་གྱིས་མི་འགུ་བའི། ཡིག་ནག་དཔེ་ཡིས་ཕུག་ཀུན་བརྒྱངས་ན་ཡང་། །སེམས་རྒྱུད་འགའ་ཡང་ཐུལ་བའི་ནུས་མེད་ཕྱིར། །སྣག་ཤོག་སོར་མོའི་ངལ་བ་ཙམ་དུ་ཟད། །རིང་མོའི་དུས་ནས་ནན་གྱིས་རབ་བསྐུལ་བར། །མཛད་པ་གང་གི་གསུང་ངོ་མི་ལྡོག་ཕྱིར། །སྤྱི་རྟོལ་སྐྱེས་ནས་སྨྲས་ལས་དོན་མཐུན་གྱི། །ཚིག་

[Full Size]

དོན་སྐྱོན་བྲལ་དགོས་པའི་མཐུ་ཡིས་དབེན། །བརྗོད་བྱེད་ཚིག་ལ་དབང་བའི་རྣམ་དཔྱོད་དང་། །བརྗོད་བྱ་དོན་ཆེན་རྟོགས་པའི་ཉམས་མྱོང་སོགས། །གང་ཡང་མེད་བཞིན་སྨྲས་འདིས་མཁས་གྲུབ་རྣམས། །བཞད་བགད་འཕེལ་བའི་རྒྱུ་རུ་འགྱུར་ལས་ཅི། །འོན་ཀྱང་ངན་བློས་མ་སྒྲིབ་ལྷག་བསམ་འོད། །ཀུན་དགའི་གེ་སར་བཞད་པའི་འཕྲེང་མཛེས་གང་། །རང་སྐལ་མཚུངས་པའི་སྒོམ་ཆུང་གསར་བུ་འགའི། །རྣ་བའི་རྒྱན་འགྱུར་སྲིད་མཐའ་མི་ཁེགས་ཙམ། །འདི་བྲིས་དགེ་དང་འཁོར་འདས་ལམ་གསུམ་གྱི། །ཟག་བཅས་ཟག་མེད་དགེ་ཀུན་གཅིག་སྡོམས་མཐུས། །སྒྲུབ་རྒྱུད་བསྟན་པ་ཕྱོགས་མཐར་ཁྱབ་རྒྱས་ཤིང་། །འགྲོ་ཀུན་ཕྱག་རྒྱ་ཆེ་འབྲས་མངོན་འགྱུར་ཤོག །དེ་ལྟར་ངེས་དོན་ཕྱག་རྒྱ་ཆེན་པོ་ཉམས་སུ་ལེན་པ་པོ་རྣམས་ལ་བོགས་འདོན་དང་ལམ་རིམ་

[Full Size]

གྱི་རྟག་ཚད་ལ་ཉེ་བར་མཁོ་བའི་ཡི་གེ་ཞིབ་རྒྱས་ཞིག་བགྱིས་ཞེས། སྨན་སྒོམ་རིག་པ་འཛིན་པ་ཚུལ་ཁྲིམས་བཟང་པོས་རིང་མོ་ཞིག་ནས་ཡང་ཡང་བསྐུལ་བར་མཛད་མོད་ཀྱང་། དེ་ལྟ་བུ་ཟབ་རྒྱས་མཐའ་ཡས་པ་སྒྲུབ་རྒྱུད་གོང་མ་རྣམས་ཀྱི་བཀའ་འབུམ་དག་ལས་འབྱུང་ཕྱིར་སླར་བྲིས་པའི་དགོས་པ་ཡང་མ་མཆིས་པ་དང་། ཁྱད་པར་རང་ཉིད་ལ་སྐྱབས་གནས་དྲིན་ཅན་རྣམས་ཀྱིས་ཐུགས་རྗེས་དགོངས་ཏེ་ལམ་ཟབ་ཕྱག་ཆེན་གྱི་རིགས་གྱུར་ལ། ལྷན་ཅིག་སྐྱེས་སྦྱོར། ཡི་གེ་བཞི་པ། གངྒ་མ། ཡི་གེ་མེད་པ། བརྡ་རྩ་དང་གྲུབ་སྙིང་གི་སྐོར། གསང་བ་བསམ་གྱིས་མི་ཁྱབ་པ། ཡེ་ཤེས་གསལ་བྱེད། ལྔ་ལྡན། ཡིད་བཞིན་ནོར་བུ། གནད་ཀྱི་གཟེར་དྲུག །སྨར་འཁྲིད་སྐོར་མང་པོ་སོགས་གསར་མ་ལ་གྲགས་པ་དག་དང་། སྙིང་ལུགས་ཀྱི་ཕྱག་ཆེན་ཀློང་ཡངས་མཐའ་བྲལ་ཉི་མའི་སྙིང་པོ། རིག་པ་གཅིག་སྐྱེས། མ་རིག་མུན་སེལ། གཉུག་མ་གཅེར་མཐོང་ལ་སོགས་པ་གཏེར་བྱོན་གྱི་རིགས་མང་པོ་དང་བཅས་པ་སྐུ་དྲིན་དུ་སྩལ་བ་ཐོབ་མོད་ཀྱང་། རང་ཉིད་ལས་ཉོན་དང་རྣམ་གཡེང་གི་རྦ་ལ་འཕྱན་པས། དེ་དག་གི་ཉམས་རྟོགས་ཀྱི་

[Full Size]

ཆ་ཤས་ཅུང་ཟད་ཙམ་ཡང་རྒྱུད་ལ་མ་སྐྱེས་ཚེ་འདི་བཞིན་བཀོད་པའི་ནུས་སྟོབས་མ་མཆིས་རུང་། བསྐུལ་བ་པོའི་ངག་མི་བཟློག་ཕྱིར་ལོང་འགྲོས་མུན་ཚེ་ལྟ་བུར་བྲིས་པ་འདི་ལ། མཁས་གྲུབ་དཔྱོད་ལྡན་རྣམས་ཀྱིས་མི་ཁྲེལ་བར་གསོལ་བ་སྙིང་ནས་འདེབས་ཤིང་། འདིའི་དགེ་བས་མ་རྒན་མཁའ་ཁྱབ་ཀྱི་འགྲོ་བ་མཐའ་དག་བླ་མེད་བྱང་ཆུབ་ཀྱི་གོ་འཕངས་དམ་པ་ཚེ་འདིར་ཐོབ་པར་གྱུར་ཅིག །མངྒ་ལཾ་བྷ་ཝནྟུ། རྒོད་ཚང་པ་མིན་རྒོད་ཚང་པར་གྲགས་པའི་མི་རྒན་སྙོམས་ལས་པས། ལས་སྟོད་རྒོད་ཚང་མ་ཡིན་པའི། དཔལ་རི་རྒོད་ཚངས་ཕུག་ཏུ་བྲིས། དགེའོ། དགེའོ། དགེའོ། ༡ཞུས་ཁུལ་ལགས།