རྩེ་ལེ་སྣ་ཚོགས་རང་གྲོལ་གྱི་བཀའ་འབུམ།

གླེགས་བམ། ཆ༽

རྩེ་ལེ་སྣ་ཚོགས་རང་གྲོལ།

Nitartha international

Images scanned by TBRC

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

དཀར་ཆག

[Full Size]

འདིར་རྗེ་སྣ་ཚོགས་རང་གྲོལ་གྱི་བཀའ་འབུམ་ཆོས་ཚན་གྱི་རྣམ་གྲངས་ཇི་ལྟར་བཞུགས་པའི་རིམ་པ་བཀོད་པར་གླེགས་བམ། ཆ། པ་ལ། ཚེ་དཔག་མེད་གནམ་ལྕགས་རྡོ་རྗེ་དངོས་གྲུབ་ཀུན་འདུས་ཀྱི་དབང་བསྐུར་རྒྱས་པའི་རིམ་པ་ཇི་ལྟར་བྱ་ཚུལ་ལྡེབ། ༤༢ ཚེ་སྒྲུབ་གནམ་ལྕགས་རྡོ་རྗེའི་ཆ་རྐྱེན་དུ་གྱུར་པ་བཀའ་བརྒྱད་དངོས་གྲུབ་སྙིང་པོའི་དབང་ཆོག་ལྡེབ། ༣༧ ཟབ་ཆོས་རྟ་ཕག་ཡིད་བཞིན་ནོར་བུའི་དབང་བསྐུར་གྱི་ལས་རིམ་བལྟས་ཆོག་ཏུ་བཀོད་པ་ལྡེབ། ༣༠

[Full Size]

སྦས་ཡུལ་ལམ་ཡིག་པདྨ་དཀར་པོ་ལས་གསུངས་པའི་རྡོ་རྗེ་གྲོ་ལོད་ཀྱི་དབང་ཆོག་ལྡེབ། ༢༣ དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་སྲོག་དབང་བཀའ་གཏད་ཟབ་མོའི་ལས་རིམ་ལྡེབ། ༢༡ སྒམ་པོ་མཆོག་སྤྲུལ་གྱིས་འཇའ་ཚོན་ཟབ་གཏེར་ཆོག་སྒྲིགས་གིས་དྲི་རྨེད་གནང་བའི་ལན་ལྡེབ། ༤༧ ཕྱག་ཆེན་ཕྱོགས་ནས་དྲིས་ལན་ཡིད་བཞིན་ནོར་བུའི་དོ་ཤལ་ལ་ལྡེབ། ༢༦ ཡིག་དྲུག་དམིགས་རིམ་ལྡེབ། ༡ བྱང་སྡོམ་རྒྱུན་ཁྱེར་ཉམས་སུ་བླང་བའི་ཆོ་ག་རིན་ཆེན་མྱུ་གུ་ལྡེབ། ༡༦ དཔལ་ལྡན་བླ་མའི་དཀྱིལ་ཆོག་ངེས་དོན་བྱིན་རླབས་ཆུ་རྒྱུན་ལྡེབ། ༡༩ བཅས་བཞུགས།

ཚེ་དཔག་མེད་གནམ་ལྕགས་རྡོ་རྗེ་དངོས་གྲུབ་ཀུན་འདུས་ཀྱི་དབང་བསྐུར་རྒྱས་པའི་རིམ་པ་ཇི་ལྟར་བྱ་ཚུལ་ལྟས་ཆོག་མ།

[Full Size]

ཚེ་དཔག་མེད་གནམ་ལྕགས་རྡོ་རྗེ་དངོས་གྲུབ་ཀུན་འདུས་ཀྱི་དབང་བསྐུར་རྒྱས་པའི་རིམ་པ་ཇི་ལྟར་བྱ་ཚུལ་ལྟས་ཆོག་མ་ལགས།

[Full Size]

གང་གིས་མཚན་ཙམ་དྲན་པས་ཀྱང་། །འཆི་བདག་བདུད་ལས་རབ་རྒྱལ་ནས། །ཡེ་ཤེས་རྡོ་རྗེའི་མཆོག་སྩོལ་བའི། །ཚེ་དཔག་མེད་ལ་གུས་ཕྱག་འཚལ། །དེ་ཡི་དཀྱིལ་འཁོར་ཟབ་མོའི་སྒོར། །དད་ལྡན་སློབ་བུ་སྨིན་བྱེད་པའི། །ལས་རིམ་བླ་མའི་ཕྱག་བཞེས་ཉིད། །གང་ཡིན་འདིར་ནི་བྲི་བར་བྱ།། ༈ །།དེ་ལ་བཅོམ་ལྡན་ཚེ་དཔག་མེད་པའི་བྱིན་རླབས་དབང་བསྐུར་གྱི་རིགས་གསང་སྔགས་ཀྱི་རྒྱུད་སྡེ་ཐ་དད་པ་ལས་གསུངས་པའི་དགོངས་པ་ལྟར་བཀའ་གཏེར་སོ་སོ་ལས་རྣམ་གྲངས་མཐའ་ཡས་པ་ཞིག་འབྱུང་མོད་ཀྱི། འདིར་ནི་སྤྲུལ་པའི་རིག་འཛིན་ཧཱུྃ་ནག་མེ་འབར་གྱི་གཏེར་ཁ་ལས་བྱོན་པའི་ཚེ་སྒྲུབ་གནམ་ལྕགས་རྡོ་རྗེ་དངོས་གྲུབ་ཀུན་འདུས་ཀྱི་དབང་བསྐུར་ཇི་ལྟར་བྱ་ཚུལ་ལྟས་ཆོག་ཉིད་དུ་

[Full Size]

སྟོན་པ་ལ། སྔོན་དུ་བྱ་བའི་ལས་རིམ་དང་དབང་བསྐུར་དངོས་ཀྱི་རིམ་པ་གཉིས་ཀྱི་དང་པོ་ནི། ཟབ་ཆོས་འདི་དག་གི་དབང་ལུང་བཀའ་གཏད་ཡོངས་རྫོགས་ཐོབ་ཅིང་སྐྱེད་རྫོགས་བསྙེན་སྒྲུབ་སྨིན་གྲོལ་གྱི་ནུས་པ་རབ་འབྲིང་ཅི་རིགས་ཐོབ་པའི་བླ་མ་ལ། སྣོད་ལྡན་གྱི་སློབ་མས་དོན་གཉེར་གུས་པས་གསོལ་བ་བཏབ་པའི་དུས་བཟང་པོར། ཡིད་དང་མཐུན་བཀྲ་ཤིས་དགེ་མཚན་དང་ལྡན་པའི་གནས་དེར་དགོས་དགུའི་ཡོ་བྱད་འཛོམ་པར་བསག་ལ། དཀྱིལ་འཁོར་སྟ་གོན་ནི། དེ་ཡང་གང་ཞིག་ཆོས་བཀའ་ཡོངས་རྫོགས་ཀྱི་རྒྱུན་འཛིན་བསྟན་འགྲོའི་དོན་ཆེན་ནུས་པའི་སློབ་མ་ལྟ་བུ་ལ་འཇའ་ཚོན་ཟབ་གཏེར་གྱི་ཆོས་སྐོར་ཚང་མ་ཞལ་ཕྱེ་བའི་དབང་དུ་བགྱི་ན། ས་ཆོག་སྟ་གོན་སོགས་ནས་

[Full Size]

བཟུངས་སྟེ་སྒྲུབ་ཆེན་སྔོན་འགྲོའི་ལས་རིམ་ཐམས་ཅད་ཞི་ཁྲོ་ངེས་དོན་སྙིང་པོའི་ཁོག་འབུབས་ཁྱུང་ཆེན་ལྡིང་བ་ནས་ཇི་ལྟར་འབྱུང་བ་བཞིན་ལག་ཏུ་བླངས་སྟེ། སྒྲུབ་ཁང་ཡངས་པར་དབུས་སུ་ཞི་ཁྲོ་ངེས་དོན་དང་དཀོན་མཆོག་སྤྱི་འདུས་ལྷན་ཅིག་པའི་དཀྱིལ་འཁོར་ཆེན་མོ་བཞེངས་ཤིང་། དེའི་ཕྱི་རོལ་གྱི་ཤར་ཕྱོགས་སུ་འཕགས་པ་ཐུགས་རྗེ་ཆེན་པོ་ངན་སོང་རང་གྲོལ། ལྷོར་ཚེ་དཔག་མེད་དངོས་གྲུབ་ཀུན་འདུས་འདི་ཉིད། ནུབ་ཏུ་རྟ་ཕག་ཡིད་བཞིན་ནོར་བུ། བྱང་དུ་བཀའ་བརྒྱད་དངོས་གྲུབ་སྙིང་པོའམ་གུ་རུ་རྡོ་རྗེ་གྲོ་ལོད་གང་རུང་གི་དཀྱིལ་འཁོར་བྱ་ཞིང་། དེ་དག་གི་མཐའ་བསྐོར་བར་མཚམས་གང་རིགས་རྣམས་སུ་བཀའ་སྲུང་སོ་སོའི་གཏོར་མ་དབང་རྫས་རྣམས་བཤམ་ལ། སྒྲུབ་མཆོད་བསྙེན་པ་སོགས་ཀྱང་གཙོ་བོར་ཞི་ཁྲོའི་ཁོག་ཕུབ་ཀྱི་གཞུང་བསྲང་ཞིང་ཞར་ལ་དཀྱིལ་འཁོར་ཐ་དད་པའི་ཆོ་ག་དང་འཛབ་བསྙེན་སོགས་སྐབས་དང་སྦྱར་བ་དང་། དབང་གི་རིམ་པ་དག་ཀྱང་དེ་དང་མཚུངས་པར་རིམ་གྱིས་བསྐུར་ནས། མཐར། སྒྲུབ་ཆེན་རྗེས་ཀྱི་ལས་རིམ་མཐའ་དག་ཀྱང་ཁོག་འབུབ་ཆེན་མོ་ལྟར་བྱ་དགོས་ནའང་། འདིར་ནི་ཚེ་སྒྲུབ་ཉིད་ཁོ་ནའི་དབང་ཆོག་ཇི་ལྟར་བྱ་ཐབས་འཆད་པར་ཕྱིར། ས་ཆོག་སོགས་རྒྱས་པར་མ་གསུངས་པས། དཀྱིལ་འཁོར་གྱི་སྟེགས་བུ་ཅི་རིགས་ཀྱི་

[Full Size]

ཁར་རས་བྲིས་སམ་རྡུལ་ཚོན་གྱི་དཀྱིལ་འཁོར་བྱེད་ན་དུར་ཁྲོད་ནི་མི་དགོས་ཤིང་གཞན་འཁོར་ཡུག་སྒོ་རྫོགས་སྤྱི་མཐུན་གྱི་དབུས་སུ་ཐིག་ལེ་ལྔ་ཚོམ་ཕྱོགས་མདོག་གཞན་སྤྱི་མཐུན་ལས་ནུབ་དང་དབུས་གཉིས་ཁ་དོག་བརྗེས་ཏེ། དབུས་དམར་པོ། ནུབ་སྔོན་པོའི་ཐིག་ལེ་བྱས་པའི་ཀུན་གྱི་མཐའི་མུ་འཁྱུད་འཇའ་སྐོར་ལྔ་ལྡན་དང་། དེའི་ཕྱི་སྐོར་པདྨ་འདབ་བཞི་མཛེས་ཚོན་མུ་འཁྱུད་ཅན་དུ་བྱ་ལ། གལ་ཏེ་འབྲུའི་ཚོམ་བུ་བྱེད་པའི་ཚེ་ན། ལྟེ་བར་ཚོམ་བུ་གཞན་ལས་ལྔ་འགྱུར་གྱིས་ཆེ་བ་ནི་གཙོ་མཆོག་ཉིད་དང་། དེའི་ཕྱོགས་བཞིར་གསུམ་འགྱུར་ཙམ་བཞི་བགོས་པ་ནི་ཚེ་དཔག་མེད་རིགས་བཞི་ཡབ་ཡུམ། དེ་དག་གི་ཕྱི་སྐོར་དུ་ཉིས་འགྱུར་ཙམ་བཞི་དགོད་པ་ནི་རིགས་གསུམ་མགོན་པོ་དང་པད་འབྱུང་། དེའི་ཕྱི་རོལ་ཟུར་བཞི་ལ་མགྱོགས་མ་བཞི་དང་། ཕྱོགས་བཞིར་སྒོ་བ་ཡབ་ཡུམ་རྣམས་ཏེ་བརྒྱད་པོ་ནི་ཅུང་ཟད་ཆུང་བ་ཙམ་དུ་ལེགས་པར་དགོད་དོ། །དབང་རྫས་ནི་དཀྱིལ་འཁོར་གྱི་སྟེང་དུ་ཁྲིའུའམ་ཅོག་རྩེ་སོགས་ཀྱི་ཁར་བུམ་པ་མཚན་ལྡན་ཁ་བརྒྱན་ཅན་མགུལ་འཆིངས་ལྷའི་སྐུ་མདོག་དང་མཐུན་པ་གཟུངས་ཐག་རྡོ་རྗེ་སོགས་སྤྱི་མཐུན་བྱས་པ་འཛོམ་ན་ལྔ་

[Full Size]

བཤམ་པའི་ཁ་རྒྱན་གྱི་ཁྲོད་དུ་ཚེ་དཔག་མེད་རིགས་ལྔ་པོའི་སྐུ་རྟེན་ཙཀྐ་ལི་བཞུགས་པ་དང་། ཅིས་ཀྱང་མ་འབྱོར་ན་གཙོ་བུམ་གཅིག་པུར་བསྡུ་བ་ལས་འོས་མ་མཆིས་ལ། བུམ་རྫས་ལྔ་མཚན་ལྔ་དང་དཀར་མངར་སོགས་ཚིག་དང་མཐུན་པར་བསགས་པ་བུམ་ཆུར་བླུག་ནས་བུམ་པའི་གསུམ་གཉིས་དགང་ལ། བུམ་པ་རྣམས་ཁྲིའུའི་སྟེང་དུ་ཕྱོགས་མ་འགྲུལ་བར་བཀོད། དེ་དག་གི་བར་མཚམས་དང་མཐའ་བསྐོར་ཅི་རིགས་པར་ལྷ་སོ་སོའི་སྐུ་རྟེན་ཙཀྐ་ལི་དང་། ཐོད་པ་བདུད་རྩི་ཆང་གིས་བཀང་བ། ཚེ་རིལ་དཔོན་སློབ་ཐམས་ཅད་ཀྱི་གྲངས་ལས་མི་ཉུང་བ་ལ་འདི་ཉིད་ཀྱི་ཚེ་རིལ་སྒྲུབ་ཐབས་ནས་གསུངས་པའི་སྨན་རྫས་རྣམས་ཀྱི་ཕབས་རྒྱུན་དང་མངར་གསུམ་སོགས་བཏབ་པ་དང་། ཚེ་གཏོར་བུམ་གཟུགས་རྒྱན་གྱིས་མཛེས་པར་བྱས་པ་མེ་ལོང་གཡའ་དག །རྨ་བྱའི་མདོངས། འཕྲེང་བ་དམར་པོ། ཚེའི་གཟུངས་སྔགས་མཚལ་གྱིས་བྲིས་པ་ལྷན་ཅིག་པ་སོགས་བཤམ་ཞིང་། གཞན་ཡང་མཐའ་རྟེན་གྱི་དབང་ལ་དགོས་པའི་བཀྲ་ཤིས་རྟགས་བརྒྱད། དངོས་གྲུབ་གྱི་ཟས་སྣ། དར་ཟབ་ཀྱི་གོས་སྣ། སློབ་བུ་གཞན་དོན་ནུས་པ་ཡིན་ན་བཀའ་གཏད་ཡོངས་རྫོགས་བྱ་བའི་ཆོས་སྐོར་གྱི་གླེགས་བམ་དང་། དབང་གོས་

[Full Size]

པད་ཞྭ་རྡོར་དྲིལ་གདུགས་རྒྱལ་མཚན་རོལ་ཆ་སོགས་ཀྱང་འཛོམ་པར་སྟ་གོན་བྱས་ལ། སློབ་མ་ཕལ་པ་ལ་ནི་མི་དགོས་སོ། །ཁྱད་པར་ཚེ་སྲོག་གིས་གཏའམ་རྟེན་དུ་མདའ་དར་ལ་གསེར་གཡུ་དུང་ཆུང་བྱུ་རུ་མུ་མེན་ཁྲབ་བྱང་མིག་དགུ་རྣམས་བཏགས་པ་འབྲུ་དཀར་མོ་བྲེ་གང་ལས་མི་ཉུང་བ་ལ་གཙུག་སྟེ་དབང་རྫས་རྣམས་ཀྱི་རྒྱབ་ཕྱོགས་སུ་བཞག །ལས་བུམ་མམ་དུང་ཆོས་གང་རིགས་དྲི་བཟང་གི་ཆུས་བཀང་བ་ལ་རྡོར་སེམས་བསྐྱེད་བཟླས་བྱས་པ་དང་། མེ་ཏོག་ཅོད་པན་འདོར་བའི་ཡོ་བྱད་དང་མིག་དར་སོགས་མདོར་ན་འདིར་དགོས་པ་མཐའ་དག་མ་ཚང་བ་མེད་པར་ཚག་སུ་ཚུད་པར་བྱས་ནས་དཀྱིལ་འཁོར་གྱི་མཐའ་བསྐོར་གང་འོས་སུ་བཤམ་ཞིང་། སྨན་རག་གཏོར་མ་ཚོགས་ཀྱི་ལོངས་སྤྱོད། ཕྱི་ནང་གི་མཆོད་པ་མཐའ་དག་ཀྱང་གཙང་ཞིང་མཛེས་ལ་གྱ་ནོམ་པ་བཀོད་པས་ཁྱད་པར་འཕགས་པ་དང་ལྡན་པར་བྱ་བ་ནི་སྔོན་དུ་བྱ་བའི་ལས་རིམ་མོ། །དེ་ནས་སློབ་དཔོན་ཉིད་དཀྱིལ་འཁོར་དང་ཞལ་སྤྲོད་དུ་བཞུགས་ནས་མདུན་གྱི་ནམ་མཁར་སྐྱབས་གནས་ཚོགས་ཞིང་རྣམས་ལམ་གྱི་གསལ་བཏབ་ལ་ཐུན་མོང་གི་སྐྱབས་སེམས་ཚོགས་བསགས་

[Full Size]

རྣམས་སྤྱི་ལྟར་རམ། འདི་ཉིད་ཀྱི་ཆོས་སྤྱོད་ཆེན་མོ་ནས་འབྱུང་བ་ལྟར་བྱས་ལ། དེ་ནས་ལས་བྱང་གི་གཞུང་སྲང་སྟེ་བདག་མདུན་བུམ་སོགས་གཅིག་ཅར་དུ་བསྐྱེད་པ་ལ་སྤྱན་འདྲེན་བཞུགས་ཕྱག་མཆོད་བསྟོད་ཐམས་ཅད་ཚིག་དོན་མཐུན་པར་བྱས་པའི་མཐར་བཟླས་པའི་སྐབས་ལ་བབས་ཚེ། འཛབ་ཀྱི་དགོངས་པའི་ཏིང་འཛིན་ནི་ལས་བྱང་ཉིད་ལས་གསུངས་པ་བཞིན། བདག་ཉིད་གཙོ་མཆོག་གི་ཐུགས་སྲོག་ཧྲཱིཿདམར་གྱི་མཐའ་བསྐོར་སྔགས་འཕྲེང་པདྨ་རཱ་གའི་ཁ་དོག་ལྟ་བུས་བསྐོར་བ་ལས་འོད་འཕྲོས་མདུན་བསྐྱེད་ལྷ་ཚོགས་ཀྱི་ཐུགས་ཀར་ཕོག །དེ་དག་ལས་ཀྱང་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས་པས། འཁོར་འདས་སྣོད་བཅུད་བརྟན་གཡོ་ཀུན་གྱི་བཅུད་དང་ནུས་པ་དངས་མ་སྟོབ་རྩལ་བྱིན་རླབས་དངོས་གྲུབ་ཚེ་དཔལ་མཐའ་དག་བསྡུས་ནས་དབང་རྫས་རྣམས་ལ་ཐིམ་པར་དམིགས་ཤིང་ལས་གཞུང་གི་འཛབ་དང་ཚེ་གཟུངས་རིང་ཐུང་ལ་བཟླས་པ་ཅི་འགྲུབ་བྱ་ཞིང་། ཉིན་མཚན་ཐུན་བཞིའམ་གསུམ་སྤོས་དང་རོལ་མདའ་དར་སོགས་འཐོགས་ནས་ཚེ་འགུགས་མྱུར་འགྱོགས་ལྕགས་ཀྱི་དབུ་ནས་བཟུངས་

[Full Size]

སྟེ། བཀྲ་ཤིས་དཔལ་འབར་བྱིན་ཕོབ་ཅིག །ཅེས་པ་ཡན་ཆད་ཀྱི་ཚེ་དཔལ་བཀུག་བསྟིམ་ལ་འབད། ཚོགས་མཆོད་དང་ཆོས་སྲུང་ལ་གཏོར་འབུལ་བསྐངས་གསོ་ལ་ཡང་ནན་ཏན་དུ་བྱ་བ་དང་། འཛབ་ཀྱི་ཐུན་མཚམས་སུ་དབྱངས་གསལ་རྟེན་འབྲེལ་སྙིང་པོ་ཡང་ཅི་རིགས་བཟླས་པས་ཁ་གསོ་ཞིང་ངར་འདོགས་པ་སྟེ། དེ་ལྟ་བུའི་ཚེ་སྒྲུབ་ཞག་གྲངས་ཅི་ཙམ་མང་ཞིང་བྱིན་རླབས་ཆེ་བས་ན། ཡུལ་དུས་གང་ཟག་དང་བསྟུན་ལ་བསྒྲུབ་པར་བྱའོ། །གལ་ཏེ་དེ་ཙམ་དུ་བསྒྲུབ་པའི་ལོང་མེད་པའི་ཚེ་ནའང་ཆོ་གའི་རིམ་པ་གོང་དུ་སྨོས་པ་འདི་དག་ཆ་ཚང་བར་ཚར་གཅིག་དང་། བཟླས་པ་ཡང་སྟོང་ཕྲག་སོགས་གང་འགྲུབ་ཅི་ནས་ཀྱང་བྱས་ལ། དེ་ནས་དབང་བསྐུར་བྱ་བའི་སྐབས་ལ་ནམ་བབ་པའི་སྔོན་དུ། ལས་བྱང་གི་མཇུག་ཏུ་ཡོད་པའི་ཚེ་ལྷ་རྣམས་ལ་ཐུགས་དམ་གནད་ནས་བསྐུལ་བ་དེ་ཉིད་བྱས་པའི་མཐར། མདུན་སྐྱེད་ལྷ་ཚོགས་ཐམས་ཅད་ཀྱི་གནས་གསུམ་འབྲུ་གསུམ་ཐུགས་སྲོག་དང་བཅས་པའི་འོད་ཟེར་བདག་ལ་ཕོག་པ་ཙམ་གྱིས་སྒྲིབ་བཞི་དག་ཅིང་དབང་བཞི་ཐོབ། ལྷ་རྣམས་ཀྱི་ཕྱག་གི་བུམ་པ་ནས་འཆི་མེད་བདུད་རྩིའི་

[Full Size]

རྒྱུན་སྐར་མདའ་ལྟར་བྱུང་སྟེ་བདག་ཉིད་ཀྱི་ཚངས་བུག་ཏུ་ཞུགས་ནས་ལུས་ཐམས་ཅད་རྐྱལ་ལྟར་ཁེངས་པས་འཆི་མེད་ཀྱི་ཚེ་དང་འཁོར་འདས་ཀྱི་དཔལ་ཡོན་ཐམས་ཅད་ཡོངས་སུ་འཕེལ་རྒྱས་ཟད་མེད་དུ་གྱུར་པར་མོས་ལ་འཛབ་བཟླ་ཞིང་འཁོར་སུམ་ཡོངས་དག་ཆེན་པོར་མཉམ་པར་འཇོགས་པ་ནི་སློབ་དཔོན་བདག་ཉིད་འཇུག་ཅིང་དབང་བླང་བའོ།། ༈ །།དེ་ནས་སློབ་མ་རྗེས་འཛིན་གྱི་རིམ་པ་དངོས་ལའང་འདི་ཉིད་ཀྱི་དབང་གཞུང་ལས་གསུངས་པའི་ཐོག་མར་སློབ་མས་བླ་མ་ཉིད་ལ་དབང་གི་བསྙེན་སྒྲུབ་ལ་འཇུག་པར་ཞུ་པ་དང་། དམ་ཚིག་བསྲེ་བསྣན། སྒྲུབ་ཁང་གི་སྒོ་དྲུང་ནས་སྒོ་སྲུང་ལ་གསོལ་བ་གདབ་པ་སོགས་གསུངས་པ་ནི་དབང་སྒྲུབ་ཆེན་མོའི་སྐབས་ཁོ་ན་ལ་དམིགས་ནས་དཀྱིལ་འཁོར་ཕྱི་འཇུག་ན། འཇུག་ཐ་དད་ཀྱི་རིམ་པ་རྒྱས་པ་ལ་དགོངས་པར་གདའ་ནའང་། སྐབས་འདིར་ནི་ནང་འཇུག་འབའ་ཞིག་ལ་བསྡུ་ཕྱིར་གོང་མ་དེ་དག་མི་འཚལ་བས་ན། སློབ་མ་རྣམས་དང་དཀྱིལ་འཁོར་གྱི་བར་མཚམས་ཡོལ་བས་བཅད་ནས། སློབ་མས་ཕྱག་དངམཎྜལ་ཕུལ་ཞིང་། སློབ་དཔོན་གྱིས་ཀྱང་བགེགས་བསྐྲད་སྲུང་འཁོར་ཁྲུས་ཚག་སོགས་སྤྱི་གཞུང་ལྟར་རྒྱས་བསྡུས་གང་འཚམས་བྱས་པའི་རྗེས་ལ་

[Full Size]

ཟབ་མོའི་ཆོས་འཆད་པ་ནི།། ༈ །།ནམ་མཁའ་དང་མཉམ་པའི་འགྲོ་བ་ཐམས་ཅད་འཁོར་བ་ཐོག་མ་མེད་ནས་ཕ་མ་དྲིན་ཅན་དུ་མ་གྱུར་པ་གང་ཡང་མེད་པས། དེ་དག་ཐམས་ཅད་མྱུར་དུ་བླ་ན་མེད་པའི་བྱང་ཆུབ་རིན་པོ་ཆེ་ལ་འགོད་པར་བྱ། དེའི་ཆེད་དུ་དམ་པའི་ཆོས་གསན་སྙམ་པའི་ལྷག་པའི་བསམ་པ་རྣམ་པར་དག་པ་བྱང་ཆུབ་སེམས་བསྐྱེད་དང་ལྡན་པའི་ངང་ནས་ལེགས་པར་གསན་འཚལ། རྒྱལ་བའི་བསྟན་པ་དང་དམ་པའི་ཆོས་ནི་འཇིག་རྟེན་དུ་འབྱུང་བ་དཀོན་ཞིང་བརྙེད་པ་རབ་ཏུ་དཀའ་ལ། དལ་འབྱོར་སྐྱོན་མེད་ཐོབ་ཅིང་དབང་པོ་སྒོ་ལྔ་ཚང་ནས་དམ་པའི་ཆོས་དང་ཕྲད་པ་ནི་དེ་བས་ཀྱང་ཆེས་ཆེར་དཀའ་བ་ལགས་པས། ད་ལྟ་ཕུན་ཚོགས་རྟེན་འབྲེལ་འཛོམ་ཞིང་རང་དབང་ཐོབ་པའི་དུས་འདིར་ནམ་ཞག་གཏན་མདུན་བསྒྲུབ་པར་ཤིན་ཏུ་རན་ལ་རན་པར་མ་ཟད་ཕྱིས་པ་ལ་ཐུག་པར་ཉེ་སྟེ་

[Full Size]

ཅིའི་ཕྱིར་ན། ནམ་འཆིའི་ངེས་པ་ནི་སྤུ་ཙམ་མེད་ལ། ཤི་ཁར་ཕན་ངེས་ཀྱི་ལྷ་ཆོས་ལ་གདེངས་དང་གོམས་པ་ནི་མ་ཐོབ། གདེངས་མེད་དུ་འཆི་བའི་འགྲོ་ས་ནི་འཁོར་བ་ངན་སོང་མ་གཏོགས་མེད། ངན་འགྲོར་སྐྱེས་ནས་ནི་བསྐལ་པ་ནས་བསྐལ་པའི་བར་དུ་ཐར་པའི་དུས་མིན་འབྱུང་ལ། དེ་ཚེ་འགྱོད་ཀྱང་ཕན་ཐབས་རྡུལ་ཙམ་མེད་ཚེ་ཅི་བྱ་ཏོལ་མེད་མདུན་མ་གཏན་རླག་ཏུ་སོང་བ་ཡིན་པས། དེ་བས་ད་ལྟ་ཐབས་དགས་ལོང་གླག་ཡོད་དུས་ཕྱི་མའི་དོན་ཆེན་ཐར་པ་བྱང་ཆུབ་བསྒྲུབ་པ་ལ་ཅི་མྱུར་ཅི་ལྕོགས་སུ་འབད་དགོས། ལེ་ལོ་སྙོམས་ལས་སང་བྱ་སྣང་བྱའི་ངང་ལ་མི་ཚེ་རྨི་ལམ་གྱི་སྣང་བ་ཙམ་འདི་ཡུད་ཀྱི་ཟད་ནས་ཡོང་སྙམ་མེད་པའི་འཆི་བ་དེ་ནམ་མཁའི་ཐོག་ལྟར་བཙན་ཕོག་ཏུ་འབྱུང་བར་ཡིད་ལ་ལེགས་པར་བསོལ་མཛོད་ལ། སྒོ་གསུམ་དཀར་པོ་དགེ་བའི་ཕྱོགས་སུ་

[Full Size]

བརྩོན་པ་ཆེན་པོས་རེམས་ཤིང་འབད་ནས་འཆི་བའི་དུས་བྱུང་ཙ་ན་ངན་པའི་བློ་སྣ་ཕྱི་ལ་མ་ལུས་པ་ཞིག་དགོས་པ་ལགས། ཁྱད་པར་འོ་སྐོལ་འཛམ་གླིང་པའི་མི་ལ་ཚེའི་གྲངས་ཚད་མེད་ཅིང་ན་སོ་ལ་ལྟོས་པ་མེད་པར་ངེས་མེད་དུ་འཆི། ཡང་སྒོས་ད་དུས་བསྐལ་པའི་ཐ་མ་ཚེ་ལོ་སུམ་ཅུ་ཁ་རལ་གྱི་མཐར་ཐུག་ལ་སླེབ་པ་དུས་མིན་བློ་བུར་དུ་འཆི་བ་ཁོ་ན་མང་ལ། དེ་ལ་ཕན་དུ་རེ་བས་ཀུན་རྫོབ་ཀྱི་མེ་བོན་རྩིས་གསུམ་ལ་བརྟེན་པའི་རིམ་གྲོའི་རྣམ་གྲངས་ཇི་ཙམ་བྱས་རུང་ཚེ་ལ་འཐུད་དུ་མེད་ཅིང་འཆི་བ་ལ་བཤོལ་དུ་མེད་པར་འགྲོ་དགོས་ལ། རིམ་གྲོ་དེ་དག་གི་ཆེད་དུ་སྲོག་ཆགས་གསོད་པ་ལ་སོགས་སྡིག་པའི་བྱེ་བྲག་ཅི་དང་ཅི་བྱས་པའི་རྣམ་སྨིན་གྱི་འབྲས་བུས་སླར་ལ་ཚེའི་བར་ཆད་དང་ཕྱི་མའི་ངན་སོང་གི་གཏིང་རྡོར་འགྱུར་ཕྱིར། དེ་བས་ན་འཆི་བདག་གི་འཇིགས་

[Full Size]

ཆེན་དེ་ལས་སྐྱོབས་ཅིང་ཕན་པའི་ཐབས་མཆོག་ཏུ་གྱུར་པ་ནི་བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་ཤིན་ཏུ་རྣམ་ཤེས་གཟི་བརྗིད་ཀྱི་རྒྱལ་པོ་ཉིད་ལ་བརྟེན་དགོས་ཏེ། དེ་ནི་བྱང་ཆུབ་མཆོག་ཏུ་ཐུགས་སྐྱེད་པའི་དུས་ནས་བརྩམས་ཏེ། གང་ཞིག་བདག་གིས་མཚན་ཙམ་རྣ་བར་ཐོས་པས་ཀྱང་དུས་མ་ཡིན་པར་འཆི་བའི་འཇིགས་པ་ལས་ཡོངས་སུ་ཐར་བར་གྱུར་ཅིག །ཅེས་པ་ལ་སོགས་ཀྱི་སྨོན་ལམ་ཆེན་པོ་བརྒྱ་ཕྲག་བཏབ་པའི་བདེན་སྟོབས་དང་བྱིན་རླབས་ཀྱི་ནུས་པའི་ཁྱད་པར་ཡིན་པའི་ཕྱིར། དེ་ཉིད་ཀྱི་མཚན་ཙམ་ཐོས་པས་དུས་མིན་འཆི་བ་ཟློག་པར་འགྱུར་ན། བདེ་བ་ཅན་ཞིང་བཀོད་ཀྱི་མདོ་ནས་གསུངས་པའོ། །དེའི་དབང་དང་བྱིན་རླབས་སྨིན་གྲོལ་གྱི་གདམས་པ་ཐོབ་ཅིང་ཉམས་སུ་ལེན་པ་ལྟ་སྨོས་ཀྱང་ཅི་དགོས་ཏེ། དཔེ་ན་ཚེ་དཔག་མེད་པའི་རྒྱུད་དང་མདོ་གཟུངས་དབང་དང་སྒྲུབ་ཐབས་ཇི་སྙེད་ཞིག་མཆིས་པ་ལས། སྐབས་

[Full Size]

ལ་བབ་པ་འདི་ཉིད་ཀྱི་ལོ་རྒྱུས་མདོ་ཙམ་བརྗོད་པའི་དབང་དུ་བགྱི་ན། ངེས་པའི་དོན་དུ་རྒྱལ་བ་ཐམས་ཅད་ཆོས་སྐུ་མཉམ་པ་ཆེན་པོར་ཐ་མི་དད་ནའང་། གདུལ་བྱ་དྲང་དོན་གྱི་སྣང་ཚུལ་ཙམ་དུ། མི་མཇེད་ཀྱི་ཞིང་ཁམས་འདི་ནས་ནུབ་ཕྱོགས་སུ་སངས་རྒྱས་ཀྱི་ཞིང་ཁམས་བསམ་གྱིས་མི་ཁྱབ་པ་འདས་པའི་ཕ་རོལ་ན། ཞིང་ཁམས་རིན་པོ་ཆེ་བདེ་བ་ཅན་ཞེས་བྱ་བ་ཡོད་དེ། སྣོད་བཅུད་མཐའ་དག་ཡེ་ཤེས་རང་བྱུང་གི་བཀོད་པ་འབའ་ཤིག་ལས། མ་དག་འཁྲུལ་པ་ཨ་འཐས་ལས་སྣང་གི་ས་རྡོ་རི་བྲག་ཁང་ཁྱིམ་སོགས་ཀུན་རྫོབ་འདུས་བྱས་འབྱུང་བཞིའི་རྒྱུ་རྐྱེན་ལས་མ་གྲུབ་པར་ཡེ་ཤེས་འོད་ལྔའི་ཞིང་དང་གཞལ་ཡས་རྒྱ་ཁྱོན་ངོ་མཚར་གྱི་བཀོད་པ་དང་ཡོན་ཏན་ནི་རང་ཅག་སོ་སོ་སྐྱེ་བོའི་བློས་དཔག་ཅིང་བསམ་པར་ཡང་མི་ནུས་ན་ངག་ཏུ་བརྗོད་པ་ལྟ་ག་ལ་ནུས་ཤིང་། ཞིང་དེར་གནས་པའི་གང་ཟག་ཀྱང་ས་ཆེན་པོ་

[Full Size]

ལ་བཞུགས་པའི་བྱང་སེམས་འཕགས་པ་ཤ་སྟག་མ་གཏོགས་སྒྲིབ་པར་ལྡན་པ་ཕལ་པའི་སྐྱེ་འགྲོའི་རིགས་ནི་སྒྲ་ཡང་མི་གྲགས་ལ། དེའི་དབང་གིས་ཉོན་མོངས་པ་དང་མྱ་ངན་དང་སྡུག་བསྔལ་དང་འཐབ་འཁྲུག་མི་དགེ་ངན་འགྲོ་སོགས་ཀྱི་མིང་ཙམ་ཡང་མི་སྲིད་པའི་ཕྱིར་ན་བདེ་བ་ཅན་གྱི་ཞིང་ཞེས་བྱ་བ་སྟེ། དེ་བཞིན་གཤེགས་པ་རྣམས་ཀྱི་སྤྱོད་ཡུལ་ཁོ་ན་ལས་གཞན་མ་ཡིན་ནོ། །དེ་ལྟ་བུའི་ཞིང་གི་སྟོན་པ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ཚེ་མཐའ་ཡས་པ་ཡེ་ཤེས་སྣང་བའི་འོད་ཟེར་མཐའ་ཡས་པའི་དབང་པོ་ཅེས་བྱ་བ་སྟེ། འོ་སྐོལ་གྱི་སྟོན་པ་དཔལ་ཀུན་ཏུ་བཟང་པོའམ། དྲུག་པ་རྡོ་རྗེ་འཆང་ཆེན་པོ་ཉིད་ཀྱི་སྐུ་མི་ཟད་རྒྱན་གྱི་འཁོར་ལོའི་རྣམ་འགྱུར་ཡིན་ཞིང་། དེའི་འཁོར་གྱི་དཀྱིལ་འཁོར་ཐམས་ཅད་ཀྱང་ཉིད་ལས་ཀྱང་གཞན་མ་ཡིན་པའི་སངས་རྒྱས་བྱང་སེམས་མཚན་དང་རྣམ་འགྱུར་བསམ་

[Full Size]

ཡས་བསྟན་ཀྱང་ཉིད་ཀྱི་ཡོན་ཏན་མི་ཟད་པའི་རོལ་པ་འབའ་ཤིག་ལས། གདུལ་བྱ་དང་འདུལ་བྱེད་མཆོག་དམན་ཐ་དད་པ་ཚོགས་པ་ནི་མ་ཡིན་པས་ན་ཆོས་ཀྱི་དབྱིངས་ཟབ་མོ་རྒྱ་ཆད་ཕྱོགས་ལྷུང་མེད་པའི་ཏིང་ངེ་འཛིན་གྱི་དཀྱིལ་འཁོར་ལས་གཡོ་བ་མེད་པར་རྟག་པ་རྒྱུན་གྱི་འཁོར་ལོ་མོར་བཞུགས་སོ། །དེ་ལྟ་བུ་ཟབ་གསལ་གཉིས་སུ་མེད་པའི་ཡེ་ཤེས་ཀྱི་ཀློང་ནས་ཕྱོགས་རིས་མེད་པའི་ཐུགས་རྗེའི་རླབས་གཡོས་ཏེ། སྤྱིར་ཁམས་གསུམ་གྱི་སེམས་ཅན་ལས་ཉོན་གྱི་རྒྱ་མཚོར་ཐོག་མཐའ་བར་མེད་དུ་བྱིང་བ་རྣམས་དང་། ཁྱད་པར་མི་མཇེད་གླིང་བཞིའི་འཇིག་རྟེན་ལས་ཀྱང་འཛམ་གླིང་ལས་ཀྱི་ས་པ་རྣམས་བསྐལ་པ་རྩོད་ལྡན་གྱི་དུས་ལ་བབས་པའི་དབང་གིས་ཚེ་དང་གཟུགས་དང་བསོད་ནམས་ལོངས་སྤྱོད་རྣམས་རིམ་གྱིས་འགྲིབ་ཅིང་ཉོན་མོངས་ལས་ངན་གྱི་རྒྱུ་རྐྱེན་ཇེ་འཕེལ་དུ་གྱུར་པའི་འཐུས། བློ་བུར་གྱི་རྐྱེན་ངན་

[Full Size]

སྣ་ཚོགས་པས་བསྐྱོད་དེ་དུས་མིན་དུ་འཆི་ཞིང་ཤི་བ་རྣམས་ངན་འགྲོ་ངན་སོང་ལོག་པར་ལྟུང་བས་འོག་ནས་འོག་ཏུ་འགྲོ་བའི་ཉམས་ཐག་གི་སེམས་ཅན་རྣམས་ལ་དམིགས་མེད་ཐུགས་རྗེ་ཆེན་པོས་ཉེ་བར་དགོངས་ཏེ། ཉིད་ཀྱི་ཐུགས་ཀ་ནས་འོད་ཟེར་གྱི་གོང་བུ་གསེར་གྱི་རྡོ་རྗེ་རྩེ་ལྔ་པ་ལྟེ་བར་ཡི་གེ་ཧྲཱིཿཡིས་མཚན་པ་ཞིག་སྤྲོས་ནས། ཨུ་རྒྱན་དྷ་ན་ཀོ་ཥའི་ནུབ་བྱང་ཀླུ་རྫིང་ཕུག་གི་མཚོ་ལ་ཐིམ་པས་མེ་ཏོག་པདྨ་སྟོང་ལྡན་གྱི་སྡོང་པོ་ཁྲི་འཕངས་བདུན་བརྩེགས་ཀྱི་དབུས་ནས་གུ་རུ་པདྨ་འབྱུང་གནས་མངལ་སྐྱོན་དྲི་མས་མ་གོས་ཤིང་མཚན་དཔེ་ངོ་མཚར་གྱི་ཕུང་པོར་སྐུ་འཁྲུངས། རྒྱལ་པོ་སྤྱན་མེད་འབྱོར་ལྡན་གྱིས་སྲས་ཀྱི་སྐལ་བར་མཐོ་ལྕོག་དགུ་ལྡན་གྱི་ཕོ་བྲང་དུ་སྤྱན་དྲངས་ནས་ལོ་ལྔའི་བར་དུ་ཆོས་ཀྱི་རྒྱལ་སྲིད་བསྐྱངས་ཤིང་ཡུལ་ཁམས་བདེ་དགེ་ལ་བཀོད། སླར་ཡང་རྒྱལ་སྲིད་

[Full Size]

སྤངས་ཏེ་རྒྱ་གར་གྱི་ཡུལ་གླིང་ཕྱོགས་མཚམས་མཐའ་དབུས་ཀུན་ཏུ་ཞབས་ཀྱི་བཅགས་ཤིང་ཐོས་བསམ་སྒོམ་དང་འཆད་རྩོད་རྩོམ་གསུམ་གང་ལ་ཅིས་འདུལ་གྱི་སྒོ་ནས་བསྟན་འགྲོའི་སྒྲོན་མེ་གཅིག་པུ་པར་གྱུར་པ་ནས། གུ་རུ་ཉིད་མགོན་པོ་འོད་དཔག་མེད་ཀྱི་ཐུགས་རྗེའི་སྒྱུ་འཕྲུལ་ལ་སྐྱེ་འཆིའི་འཇིགས་པ་ཡེ་ནས་བྲལ་མོད་ཀྱང་། ཐུན་མོང་གི་གདུལ་བྱ་ངེས་ཤེས་བསྐྱེད་ཕྱིར་རི་བོ་པོ་ཏ་ལའི་ལྷོ་ཕྱོགས་ཀྱི་གནས་ཆེན་རཱ་ག་ར་ཏིའི་བྲག་ཕུག་མ་ར་ཏི་ཀའམ་ཟླ་གམ་དབང་གི་ཕུག་ཏུ་ལྷ་ལྕམ་མན་ད་ར་བ་སྒྲུབ་རྟེན་དུ་མཛད་ནས་འཆི་མེད་རིག་འཛིན་གྱི་སྒྲུབ་པ་ལ་བཞུགས་པས། མགོན་པོ་ཚེ་དཔག་མེད་ཀྱི་ལྷ་ཚོགས་ཐམས་ཅད་ཀྱིས་ཞལ་མངོན་སུམ་དུ་བསྟན་ཅིང་དབང་བཞི་ཡོངས་རྫོགས་སུ་བསྐུར་ཏེ་ཚེའི་གདམས་པ་རྒྱུད་ལུང་མན་ངག་ཐམས་ཅད་ཀྱི་བཀའ་གཏད་ཅིང་བྱིན་གྱིས་

[Full Size]

བརླབས་ནས་ཚེའི་ལྷ་ཚོགས་རྣམས་ཀྱང་གུ་རུ་ཡབ་ཡུམ་ལ་གཉིས་མེད་དུ་ཐིམ་པས་ཡབ་ཡུམ་གཉིས་ཀ་འཆི་མེད་འཇའ་ལུས་རྡོ་རྗེའི་སྐུ་གྲུབ་ནས། མནྡ་ར་བ་ལ་ཡང་རྒྱ་གར་གྱི་ཡུལ་ཁམས་རྣམས་སུ་མ་ཅིག་གྲུབ་པའི་རྒྱལ་མོར་མཚན་གྲགས། སློབ་དཔོན་ཉིད་ཀྱིས་དུས་རེ་ཤིག་སོ་ས་གླིང་གི་དུར་ཁྲོད་ཆེན་པོར་ཚེ་དཔག་མེད་པ་ཞལ་མཇལ་ནས་འཆི་མེད་ཀྱི་རྒྱུད་དང་གདམས་པ་རྣམས་གདུལ་བྱ་སྐལ་ལྡན་གྱི་རིགས་ལ་རྒྱ་ཆེར་སྟོན་ཞིག་པའི་རྗེས་སུ་གནང་བ་ཐོབ། སླར་ཡང་གཡའ་རི་གོང་གི་བྲག་ཕུག་ཏུ་བཞུགས་པའི་སྐབས་སུ་མགོན་པོ་ཚེ་དཔག་མེད་པས་དངོས་སུ་ལུང་བསྟན་ནས་བོད་ཡུལ་ཁ་བ་ཅན་གྱི་རྒྱལ་ཁམས་སུ་ལོག་འདྲེན་གདུག་པའི་འདྲེ་སྲིན་འདུལ་ཞིང་སངས་རྒྱས་ཀྱི་བསྟན་པའི་སྒྲོན་མེ་སྦར་ཕྱིར་བདག་གིས་ཐུགས་ལས་ཁྱོད་སྤྲུལ་པ་ཡིན་པས་ད་ནི་དེའི་དུས་ལ་བབས་སོ་ཅེས་བསྐུལ་ཞིང་།

[Full Size]

དེ་དང་མཐུན་པར་འཕགས་པ་སྤྱན་རས་གཟིགས་ཀྱིས་ཀྱང་ཡང་ཡང་དུ་བསྐུལ་བར་མཛད་པའི་མཐུས་རྒྱ་གར་དང་བལ་ཡུལ་གྱི་གདུལ་བྱ་རྣམས་བཏུལ་ནས་བོད་ཀྱི་ཕྱོགས་སུ་བྱོན་པ་དང་། བོད་ཀྱི་རྒྱལ་པོ་ཁྲི་སྲོང་ལྡེ་བཙན་ལ་མཁན་པོ་ཞི་བ་འཚོས་ལུང་བསྟན་ནས་བསམ་ཡས་ཀྱི་ས་འདུལ་ལ་སྤྱན་འདྲེན་པའི་ཕོ་ཉ་བརྫངས་པ་དང་མང་ཡུལ་གུང་ཐང་དུ་མཇལ་བས་ལམ་དུ་བོད་ཀྱི་ལྷ་འདྲེ་གདུག་པ་ཅན་རྣམས་རྫུ་འཕྲུལ་གྱིས་འདུལ་ཞིང་བསམ་ཡས་སུ་བྱོན་ཏེ། གཙུག་ལག་ཁང་གི་ས་འདུལ་རབ་གནས་མངའ་གསོལ་གྱི་བར་དུ་མཐར་ཕྱིན་པར་མཛད། ལོ་ཙཱ་བ་བརྒྱ་དང་རྩ་བརྒྱད་སོགས་དགེ་འདུན་གྱི་སྡེ་དང་བཤད་སྒྲུབ་ཀྱི་བསྟན་པ་རྒྱ་ཆེར་བཙུགས་ཏེ་བོད་ཡུལ་མཐའ་ཁོབ་མུན་པའི་གླིང་ཀུན་མདོ་སྔགས་དམ་ཆོས་ཀྱི་ཉི་འོད་གསལ་བའི་བཀའ་དྲིན་ནི་སུས་ཀྱང་འཁོར་བར་ག་ལ་

[Full Size]

ནུས། དེ་དག་གི་སྐབས་ཤིག་ཏུ་ཆོས་རྒྱལ་ཉིད་ཀྱིས་གསོལ་བ་བཏབ་པ་དང་གུ་རུ་རིན་པོ་ཆེས་ཀྱང་རྒྱལ་པོའི་སྐུ་ཚེ་ཉི་ཟླ་དང་མཉམ་ན་རྒྱལ་སྲིད་ཆོས་ཁྲིམས་ལ་འཕོ་འགྱུར་མེད་ཚེ་བོད་ཁམས་ཀྱི་བདེ་སྐྱིད་ཉམས་པ་མེད་པ་ལ་གཅིག་ཏུ་དགོངས་ཏེ། བྲག་དམར་གཡའ་མ་ལུང་དུ་ཚེའི་སྒྲུབ་པ་ཞག་བདུན་མཛད་པས་དཀྱིལ་འཁོར་གྱི་སྟེང་གི་ནམ་མཁར་ཚེའི་ལྷ་ཚོགས་དངོས་སུ་བྱོན་ནས་བུམ་ནང་དུ་ཐིམ་པ་དེ་ཉིད་རྒྱལ་པོ་ལ་དབང་བསྐུར་བ་བཞེད་ཀྱང་། སྡིག་བློན་ངན་པས་སྙན་ཕྲང་གསོལ་བས་རྒྱལ་པོ་ཉིད་ཀྱང་ཐེ་ཚོམ་གྱི་བློ་སྐྱེས་ནས་དབང་གི་སྣོད་དུ་མ་གྱུར་པས། སློབ་དཔོན་གྱིས་འཆི་མེད་ཚེ་ཆུ་རྣམས་མ་འོངས་སྙིགས་མའི་སེམས་ཅན་གྱི་དོན་ལ་དགོངས་ནས་གཏེར་གནས་སོ་སོར་གཏེར་དུ་སྦས། སླར་རྒྱལ་པོ་ཉིད་ཤིན་ཏུ་འགྱོད་ཏེ་མཐོལ་བཤགས་དང་ཞུ་འབུལ་ནན་ཏན་དུ་བགྱིས་ནས་ཚེ་བསྲིང་བར་གསོལ་བ་བཏབ་པའི་ངོར། བསམ་ཡས་ཨཱརྱ་

[Full Size]

པཱ་ལོའི་གླིང་དུ་ཚེའི་སྒྲུབ་པ་ནས་ཆོས་རྒྱལ་དང་ཡེ་ཤེས་མཚོ་རྒྱལ་གཉིས་ལ་ཚེ་དབང་གནང་བས། མཚོ་རྒྱལ་འཆི་མེད་ཀྱི་དངོས་གྲུབ་ཐོབ་ཀྱང་རྒྱལ་པོ་ཉིད་སྔར་སྡིག་བློན་གྱི་ངག་ལ་ཉན་ཏེ་ཐེ་ཚོམ་སྐྱེས་པའི་སྐྱོན་གྱིས་ཚེ་ཉི་ཟླ་དང་མཉམ་པ་ནི་མ་ཐོབ་ཀྱང་དགུང་ལོ་བཅུ་གསུམ་གྱི་རིང་དུ་བསྲིང་བར་གྱུར། སླད་དུ་གུ་རུ་རིན་པོ་ཆེ་ཉིད་ལྷོ་ནུབ་སྲིན་ཡུལ་དུ་འབྱོན་ལ་ཉེ་བ་ན། མཆིམས་ཕུ་བྲག་དམར་དགེ་གོང་དུ་ཚེ་སྒྲུབ་གནམ་ལྕགས་རྡོ་རྗེ་དངོས་གྲུབ་ཀུན་འདུས་ཀྱི་ཆོས་སྐོར་འདི་ཉིད་ཀྱི་སྒོ་ནས་མྱང་བན་ཏིང་འཛིན་བཟང་པོ་དང་མཚོ་རྒྱལ་གཉིས་ལ་དབང་དང་གདམས་པ་མ་ལུས་ཡོངས་སུ་རྫོགས་པར་གནང་ནས། མྱང་བན་ཁྱོད་ཚེ་འདིར་དམ་ཆོས་རྫོགས་པ་ཆེན་པོའི་ཉམས་ལེན་མཐར་ཕྱིན་ཏེ་ལྔ་ཕུང་ཟག་མེད་འོད་ལུས་སུ་གྲོལ་བར་གྱུར་བས་ཚེའི་སྒྲུབ་པ་ལ་ལྟོས་མི་འཚལ་ཀྱང་

[Full Size]

དུས་མ་འོངས་སྙིགས་མ་རྩོད་ལྡན་མཐར་ཐུག་པའི་དུས་ངན་ལ་སྤྱོད་པའི་སྐྱེ་འགྲོ་སྡུག་བསྔལ་གྱིས་མནར་བ་རྣམས་ཁྱོད་ཀྱི་སྤྲུལ་པས་འདུལ་བའི་དུས་དེར་ཟབ་ཆོས་འདི་དག་དང་འཕྲད་ནས་འགྲོ་ལ་ཕན་པ་རྒྱ་ཆེར་འབྱུང་བར་འགྱུར་བས་ཟབ་མོའི་གཏེར་དུ་སྦོས་ཤིག །ཅེས་སོགས་ལུང་བསྟན་བཀའ་གཏད་བྱིན་རླབས་མཛད་ཅིང་མྱང་བན་ཆེན་པོས་ཀྱང་དེ་དང་མཐུན་པའི་བདེན་ཚིག་སྨོན་ལམ་རྒྱ་ཆེར་བཏབ་ནས། ཆོས་སྐོར་རྣམས་གཏེར་ཤོག་ལ་བཀོད་ཅིང་གུ་རུ་ཉིད་ཀྱིས་རབ་ཏུ་གནས་པར་མཛད་པ་དང་ལྷན་ཅིག་གཏེར་རྫས་ཁྱད་འཕགས་མང་པོ་དང་བཅས་ཏེ་གཏེར་དུ་སྦ་བའི་གནས་ནི། སྤྱིར་བོད་ཡུལ་གྱིས་ས་གཞི་ཁབ་རྩེ་གང་ཙམ་ཡང་གུ་རུས་ཞབས་ཀྱིས་མ་བཅག་པ་ནི་མེད་ནའང་། ཁྱད་པར་འཕགས་པའི་སྒྲུབ་གནས་སུ་བྱིན་གྱིས་བརླབས་པའི་ཡོངས་གྲགས་ཀྱི་གནས་

[Full Size]

ཆེན་བཞི་དང་། བྱེ་བྲག་ཏུ། ལུང་ལྔ། གླིང་གཅིག །རྫོང་གསུམ། གངས་ཆེན་ཉི་ཤུ་དང་བཅས་པ་གསུངས་པའི་ལུང་ལྔའི་ནང་ཚན་གྱི། ཤར་ལྗོན་པ་ལུང་གི་གནས་སྒོ་འཛེང་འཕྲང་སྒོ་བཙུག་བྲག་ལ་གཏེར་དུ་སྦས་ཤིང་། དམ་ཅན་སྐྱེས་བུ་ཆེན་པོ་གཏེར་སྲུང་དུ་བཀོས། དེ་ནས་གུ་རུ་ཉིད་སྲིན་པོའི་ཁ་གནོན་ལ་གཤེགས་པའི་ཤུལ་དུ་མྱང་བན་གྱིས་རྫོགས་ཆེན་སྙིང་ཏིག་གི་དགོངས་པ་མངོན་དུ་གྱུར་པས་ཕྱི་རབས་ལ་ཕན་ཕྱིར་རྫོགས་པ་ཆེན་པོའི་གདམས་པ་སྙན་རྒྱུད་རྣམས་ནི་སྦས་བློ་གྲོས་དབང་ཕྱུག་སོགས་སྣོད་ལྡན་དག་ལ་སྨར་འཁྲིད་དུ་བསྟན། མན་ངག་དོན་གྱི་སྙིང་པོ་རྣམས་ཡི་གེར་བཏབ་ཅིང་གཏེར་དུ་བཏམས་ནས་སྐལ་ལྡན་དང་ཕྲད་པར་སྨོན་ལམ་བཏབ་ནས་བཞག་སྟེ། དགུང་ལོ་བརྒྱ་དང་ཉི་ཤུ་རྩ་ལྔ་པའི་ཐོག་ཏུ་ལུས་ཟག་མེད་འོད་ཕུང་དུ་ཡལ་ཞིང་། ཐུགས་རྗེའི་སྤྲུལ་པ་ནི་རྒྱུན་

[Full Size]

ཆད་མེད་པར་བྱོན་པ་ལས། འོ་སྐོལ་སྙིགས་མཐའི་གདུལ་བྱ་སྐྱབས་བྲལ་མགོན་མེད་རྣམས་ཀྱི་སྐྱབས་གནས་སུ་མཚུངས་བྲལ་འཇའ་ཚོན་སྙིང་པོའམ། སྔགས་འཆང་ཧཱུྃ་ནག་མེ་འབར་དུ་མཚན་འཆང་བའི་མཁྱེན་རྩེ་ནུས་གསུམ་གྱི་བདག་ཉིད་དམ་པར་བྱོན་ནས་ལུང་བྱང་དུས་རྟགས་དང་མཐུན་པར་ཉང་ལུང་མཛེང་འཕྲང་གི་གཏེར་གནས་དེ་ཉིད་ནས་ཚེའི་གདམས་པ་རྒྱུ་དང་མན་ངག་ཡོངས་སུ་རྫོགས་པ་དང་། སྐུ་རྟེན་ངོ་མཚར་ཅན་དུ་མ་དང་། གུ་རུའི་སྒྲུབ་རྫས། རྡོ་རྗེ། ཕུར་བུ། ཚེ་བུམ་ཚེ་ཆུ་དང་བཅས་པ་ཁྲོམ་གཏེར་དུ་གདན་དྲངས་ནས་གདུལ་བྱ་ངོ་མཚར་གྱི་གནས་ལ་བཀོད་ཅིང་ཟབ་ཆོས་ཚེ་ཆུ་དང་བཅས་པ་རྣམས་ཀྱིས་ཀྱང་བཀའ་བབ་སྐྱེས་ཆེན་དག་གི་སྐུ་ཚེ་བསྲིང་བ་དང་། མོས་ལྡན་གདུལ་བྱ་རྣམས་དུས་མིན་འཆི་བའི་བར་ཆད་ལས་སྐྱོབ་པར་མཛད་པའི་བཀའ་དྲིན་ནི་བསམ་བརྗོད་

[Full Size]

ཡུལ་ལས་འདས་ལ། འགྲོ་དོན་གྱིས་ཀྱང་རྒྱ་མཚོའི་གོས་ཅན་ཁྱབ་པ་མངོན་སུམ་ཚད་མར་གྱུར་པ་འདི་ལགས་མོད་ཀྱི། དེའི་ཕྱིར་ན་དེང་གི་སྐབས་འདིར་ཡང་གདམས་པ་ཟབ་མོ་འདི་ལྟ་བུའི་དབང་བསྐུར་ཞུ་བར་བྱེད་པ་ལ་དད་པ་འགྱུར་མེད་ཀྱིས་གསོལ་བ་བཏབ་ཅིང་གང་སྲུང་སྒྲུབ་ནུས་ཀྱི་དམ་ཚིག་ལ་གནས་དགོས་པ་ནི་སློབ་མའི་མཚན་ཉིད་ཀྱི་རྩ་བ་གལ་པོ་ཆེ་ཡིན་པས་ན། བདག་རྡོ་རྗེ་སློབ་དཔོན་ལ་མི་གཟུགས་ཕལ་པའི་སྣང་བ་མ་མཛད་པར། མགོན་པོ་ཚེ་དཔག་མེད་ཀྱི་ཐུགས་རྗེའི་གཟུགས་སྣང་དུ་མོས་པ་རྩེ་གཅིག་པའི་དག་སྣང་ཆེར་སྐྱེད་ནས་གསོལ་བ་གདབ་པའི་ཚིག་འདིའི་རྗེས་ཟློས་གནང་བར་ཞུ། ཀྱེ་མ། བདག་སོགས་མ་རིག་སེམས་ཅན་ལ། དུས་མིན་འཆི་བས་བར་གཅོད་ན། བླ་མ་དཀྱིལ་འཁོར་ཀུན་གྱི་གཙོ། །བདག་ལ་ཐུགས་རྗེས་བྱིན་རློབས་འཚལ། །དེ་ལྟར་གསོལ་

[Full Size]

བ་བཏབ་པའི་བུ་ལ་བླ་མ་ཚེ་དཔག་མེད་པས་མཁྱེན་བརྩེའི་སྒོ་ཕྱེས་ཏེ་བཀའི་གནང་བ་སྦྱིན་པ་ལ་ཡིད་རངས་པས་གསན་འཚལ། ཉོན་ཅིག་ལས་ཅན་བུ་རྣམས་ཀུན། །དཀྱིལ་འཁོར་འདི་ཉིད་མཐོང་ཙམ་གྱིས། །ལས་ངན་དག་ཅིང་ཚེ་དབང་ཐོབ། །གསང་སྔགས་ཟབ་མོའི་ཁྱད་ཆོས་ཡིན། །ཡིད་ལ་བཟུངས་ཤིག་ས་མ་ཡཱ། དེ་ལྟར་དབང་བསྐུར་ཟབ་མོ་ཐོབ་པར་བྱེད་པ་ལ་ཡང་སློབ་མའི་རྒྱུད་དག་ཅིང་སྣོད་དུ་རུང་དགོས། རྒྱུད་མ་དག་ཅིང་སྣོད་དུ་མ་གྱུར་པ་ལ་དབང་བསྐུར་ཀྱང་ཐོབ་པར་མི་འགྱུར་ཞིང་སྣོད་མིན་ལ་གསང་སྔགས་བསྟན་ན་སློབ་དཔོན་བདག་ཉིད་ལ་ཡང་ལྟུང་བའི་ཉེས་སྒྲིབ་འབྱུང་ཕྱིར་སློབ་མའི་རྒྱུད་སྦྱང་དགོས་པ་ན། དེའི་ཐབས་སུ་ནང་པ་སངས་རྒྱས་པའི་ཆོས་ཀྱི་སྣོད་རུང་དུ་བྱེད་པ་སྐྱབས་འགྲོ། ཐེག་པ་ཆེན་པོའི་ལམ་དུ་ཆུད་པར་བྱེད་པ་སེམས་བསྐྱེད། རྡོ་རྗེ་ཐེག་པའི་གྲལ་དུ་གཞུག་ཕྱིར་སྡོམ་པ་

[Full Size]

བཟུང་བ་དང་བཅས་པ་མེད་ཐབས་མ་མཆིས་ལ། དེ་དག་བླང་བའི་ཡུལ་ནི་བླ་མེད་རྡོ་རྗེ་ཐེག་པའི་སྐབས་འདིར་བླ་མ་ནི་དཀོན་མཆོག་མ་ལུས་པའི་བདག་ཉིད་དམ་འབྱུང་གནས་སམ་གཙོ་བོའམ་ཁྱབ་བདག་ཡིན་པས་ན་ཇི་སྐད་དུ། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །ཞེས་པ་ལྟར་རྡོ་རྗེ་སློབ་དཔོན་གྱི་སྐུ་གསུང་ཐུགས་ཡེ་ཤེས་ཀྱི་རང་བཞིན་ཉིད་ཕྱི་ལྟར་དཀོན་མཆོག་གསུམ། ནང་ལྟར་རྩ་བ་གསུམ། གསང་བར་སྐུ་གསུམ་མཐའ་དག་ཡོངས་སུ་རྫོགས་པའི་ངོ་བོ་ལ། རང་གཞན་མཁའ་ཁྱབ་རྫོགས་བྱང་གི་གོ་འཕངས་བསྒྲུབ་སླད་འབའ་ཞིག་ལ་གཅིག་ཏུ་བློ་ངེས་པས་སྐྱབས་སེམས་སྡོམ་བཟུང་རྣམས་ཞུ་བའི་འདུན་པ་ཚིག་དོན་མཐུན་པར་བདག་གིས་རྗེས་ཟློས་མཛད་པར་ཞུ། ཨེ་མ། ཕྱོགས་བཅུའི་སངས་རྒྱས་བྱང་སེམས་དང་། །བླ་མ་ཡི་

[Full Size]

དམ་མཁའ་འགྲོ་དགོངས། །རྐང་གཉིས་གཙོ་བོ་སངས་རྒྱས་དང་། །ཞི་བ་ཆགས་བྲལ་དམ་པའི་ཆོས། །ཚོགས་མཆོག་འཕགས་པའི་དགེ་འདུན་ལ། །བདག་ནི་གུས་པས་སྐྱབས་སུ་མཆི། །བྱིན་རླབས་རྩ་བ་བླ་མ་དང་། །དངོས་གྲུབ་རྩ་བ་ཡི་དམ་ལྷ། །ཕྲིན་ལས་མཛད་པའི་མཁའ་འགྲོ་ལ། །བྱང་ཆུབ་བར་དུ་སྐྱབས་སུ་མཆི། །སྐྱབས་གནས་ཀུན་གྱི་སྤྱན་སྔ་རུ། །སྒོ་གསུམ་གུས་པས་གཞན་དོན་དུ། །གནོད་པ་ལས་ཟློག་དགེ་བ་སྒྲུབས། །དགེ་བསྙེན་དགེ་ཚུལ་དགེ་སློང་སོགས། །སོ་སོ་ཐར་བའི་སྡོམ་པ་ལ། །རྒྱུན་དུ་གནས་ཤིང་དགའ་བ་བསྒོམ། །སྡོམ་པ་ཡོངས་སུ་བཟུང་བར་བགྱི།། ༈ །།སྐྱབས་གནས་ཐམས་ཅད་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་པར། །འགྲོ་དྲུག་སེམས་ཅན་ཐམས་ཅད་ལ། །ཕ་མ་བུ་ཡིས་འདུ་ཤེས་ཀྱིས། །མ་བསྒྲལ་བསྒྲལ་དང་མ་གྲོལ་གྲོལ། །དབུགས་དབྱུང་མྱ་ངན་འདས་ལ་འགོད། །སྨོན་པའི་

[Full Size]

བྱང་ཆུབ་སེམས་སྐྱེད་དོ། །སྔོན་གྱི་རྒྱལ་བ་ཐམས་ཅད་ཀྱང་། །སྡོམ་པ་ལ་ནི་གནས་པ་ལྟར། །འདི་གཟུངས་འཁོར་བ་མ་སྟོངས་བར། །བླ་མེད་འཇུག་པའི་བྱང་ཆུབ་སེམས། །དེ་བཞིན་བདག་གིས་བསྐྱེད་པར་བགྱི། །ཕར་ཕྱིན་དྲུག་ལ་སློབ་ཅིང་སྒྲུབས། །བརྩོན་འགྲུས་བདག་གིས་ཐམས་ཅད་བསྒྲལ། །ཀུན་དོན་ཚུལ་ཁྲིམས་གསུམ་ཡང་བཟུང་། །བདག་གིས་སེམས་སྐྱེད་སྡོམ་པ་བཟུང་། །བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་སྐྱེད་དོ། །ན་མོ། དཀོན་མཆོག་གསུམ་ནི་མི་སྤོང་བཞིན། །རྩ་གསུམ་བླ་མ་མི་སྤོང་ངོ་། །རྡོ་རྗེ་རིགས་ཀྱི་དམ་ཚིག་ཏུ། །རྡོ་རྗེ་དྲིལ་བུའི་ཕྱག་རྒྱ་དང་། །རྩ་བ་ཡན་ལག་དམ་ཚིག་རྣམས། །རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །པདྨ་རིགས་ཀྱི་དམ་ཚིག་ཏུ། །ཐེག་པ་གསུམ་དང་ཆོས་

[Full Size]

རྣམས་བཤད། །ལས་ཀྱི་རིགས་ཀྱི་དམ་ཚིག་ཏུ། །འགྲོ་བའི་དོན་ལ་བརྩོན་པར་བྱ། །རྩ་བ་ཡན་ལག་དམ་ཚིག་རྣམས། །མ་ལུས་དག་གི་ཡོངས་བཟུང་ངོ་།། ༈ །།དེ་ལྟ་བུའི་སྡོམ་པ་དང་དམ་ཚིག་སྤྱི་དང་ཁྱད་པར་མ་ལུས་པ་ལེགས་པར་ཐོབ་པས་གསང་སྔགས་ཀྱི་དཀྱིལ་འཁོར་དུ་འཇུག་ཅིང་མཐོང་བའི་སྣོད་དང་སྐལ་བ་ཅན་དུ་བསྒྲུབས་པ་ཡིན་ལ། འོན་ཀྱང་ཁྱེད་ཅག་གིས་ཚུལ་འདི་ལྟ་བུའི་སྣོད་དུ་མ་གྱུར་པ་དང་དཀྱིལ་འཁོར་ཆེན་པོ་འདི་མ་མཐོང་བ་དག་གི་རྣ་བར་མ་བརྗོད་ཅིག །གལ་ཏེ་དེ་ལས་འདའ་ཞིང་སྣོད་སྨིན་ལ་སྨྲ་བར་བྱེད་ན་ཁྱེད་བར་ཆད་ཀྱི་དབང་དུ་གྱུར་ནས་ཚེའི་དུས་བྱེད་ཅིང་ན་རཀ་དམྱལ་བའི་གནས་སུ་ལྷུང་བར་གདོན་མི་ཟ་བས་དམ་ཚིག་ཐུབ་པར་སྲུངས་ཤིག །ས་མ་ཡཱ། ཞེས་བརྗོད་པའི་འཕྲོར། རྡོ་རྗེ་སློབ་མའི་སྙིང་ཁར་བཞག་ལ། ཧྲཱིཿ འདི་ནི་བླ་མེད་ཚེ་ཡི་བདག །ཁྱོད་ཀྱི་སྙིང་གར་བསྟིམ་པ་ཡིས། །

[Full Size]

གལ་ཏེ་གཞན་ལ་བཤད་པ་ན། །དེ་མ་ཐག་ཏུ་དྲལ་ཏེ་གཤེགས། །བཛྲ་ས་མ་ཡ་ཨཱཿཧཱུྃ། ལས་བུམ་མམ་དུང་ཆོས་ཀྱི་ཆུ་ལྕེ་ལ་བཞག་ཅིང་། ཧྲཱིཿ འདི་ནི་དམ་ཚིག་རྡོ་རྗེའི་ཆུ། །དམ་ཚིག་སྲུང་ན་དངོས་གྲུབ་ཐོབ། །དམ་ཚིག་ཉམས་ན་དམྱལ་བར་ལྷུང་། །དེ་ཕྱིར་བདུད་རྩིའི་ཆུ་འདི་འགྲུབ། །ཨོཾ་བཛྲ་ཨུ་ད་ཀ་ཋཱ།། ༈ །།འདི་ལྟར་རྡོ་རྗེ་སེམས་དཔའ་དང་དམ་ཚིག་བདུད་རྩིའི་མནའ་ཆུར་བཅས་པ་ཁྱེད་ལ་བྱིན་ཞིང་སྙིང་ལ་བསྟིམ་པའི་མཐུས། ཁྱེད་ཅག་དམ་ཚིག་མ་ཉམས་པར་ཐུབ་ན་འཆི་མེད་ཡེ་ཤེས་སེམས་དཔའི་བྱིན་རླབས་སྙིང་ལ་ཞུགས་པས་མཆོག་མཐུན་གྱི་དངོས་གྲུབ་ཚེགས་མེད་དུ་ཐོབ་པར་འགྱུར་བ་དང་། དམ་ལས་འདའ་ན་རྡོ་རྗེ་བདུད་རྩི་ལྕགས་ཀྱི་སྡིག་པ་མགོ་དགུ་པར་གྱུར་ནས་སྙིང་ཁྲག་གཞིབ་ཅིང་མནར་མེད་པའི་དམྱལ་བ་ཆེན་པོར་བསྲེག་པར་འགྱུར་བ་སྟེ། དེས་ན་ཚུལ་

[Full Size]

འདི་ནི་དམ་ཚིག་ལ་གནས་ཀྱི་སྤྱན་པ་དང་དཔང་པོའི་ལེགས་ཉེས་ཀྱི་སྟངས་གཅོད་སྲུང་མ་དང་ཁྲིམས་བདག་ལྟ་བུ་ཡིན་པ་གོ་བར་བྱོས་ཤིག །སླར་ཡང་རྡོ་རྗེ་སློབ་མའི་སྤྱི་བོར་བཞག་ཅིང་། འོ་རིགས་ཀྱི་བུ། དེང་ནས་བརྩམས་ཏེ་ཁྱོད་ཀྱི་རྡོ་རྗེའི་སློབ་དཔོན་ང་ཡིན་པས། ང་ཡིས་ཅི་བསྒོ་བ་དེ་ཁྱོད་ཀྱིས་བྱ་དགོས་སོ། །དེ་ལས་འདས་ན་ཁྱོད་འཆི་བའི་དུས་བྱས་ནས་རྡོ་རྗེའི་དམྱལ་བར་འགྲོ་བར་གདོན་མི་ཟ་བས། དེས་ན་དམ་ཚིག་ཚུལ་བཞིན་སྲུང་ཤིག །ས་མ་ཡཱ། དེ་ནས་སེ་རས་དམར་པོའི་སྤྱན་དར་བཅིང་བ་དང་ལྷན་ཅིག་སྔགས་འདི་བརྗོད་དེ། ཨོཾ་ཙཀྵུ་བྷནྡྷ་ཝ་ར་མ་ན་ཡེ་སྭཱ་ཧཱ། མིག་དར་འདི་བཞིན་བཅིངས་པའི་དགོས་པ་གང་ཡིན་སྙམ་ན། འོ་སྐོལ་རྣམས་འཁོར་བ་ཐོག་མ་མེད་པ་ནས་རང་བྱུང་ཡེ་ཤེས་དོན་གྱི་དཀྱིལ་འཁོར་རང་ལ་དབྱེར་མེད་ལྷུན་གྲུབ་ཏུ་བཞུགས་ཀྱང་། ལྷན་སྐྱེས་ཀྱི་སྒྲིབ་པས་འབྲལ་མེད་དུ་འཐུམས་ཏེ་མ་མཐོང་བའི་ཚུལ་འདི་ལྟ་བུ་

[Full Size]

ཡིན་ནོ། །ཞེས་པའི་བརྡ་དང་དཔེ་མཚོན་པའི་ཕྱིར་ཡིན་ནོ། །ད་ནི་མཆོག་གི་དཀྱིལ་འཁོར་དམ་པ་མངོན་སུམ་དུ་མཐོང་བའི་ཕྱིར། དཀྱིལ་འཁོར་འདི་ཉིད་ཀྱི་ཕྱོགས་བཞིའི་ཚད་མེད་རྣམ་བཞིའི་སྒོ་མ་ལ་གསོལ་བ་གདབ་པ་འདིའི་རྗེས་ཟློས་མཛད་འཚལ། ཧྲཱིཿ དཀྱིལ་འཁོར་ཤར་སྒོའི་ལྷ་མོ་ལྕགས་ཀྱུ་མ། །ཞི་བའི་ལས་མཛད་སྐལ་ལྡན་ལྷ་དང་སྤྲོད། །དཀྱིལ་འཁོར་ལྷོ་སྒོའི་ལྷ་མོ་ཞགས་པ་མ། །རྒྱས་པའི་ལས་མཛད་སྐལ་ལྡན་ལྷ་དང་སྤྲོད། །དཀྱིལ་འཁོར་ནུབ་སྒོའི་ལྷ་མོ་ལྕགས་སྒྲོགས་མ། །དབང་གི་ལས་མཛད་སྐལ་ལྡན་ལྷ་དང་སྤྲོད། །དཀྱིལ་འཁོར་བྱང་སྒོའི་ལྷ་མོ་དྲིལ་བུ་མ། །དྲག་པོའི་ལས་མཛད་སྐལ་ལྡན་ལྷ་དང་སྤྲོད། མེ་ཏོག་ཅོད་པཎ་སློབ་མའི་ལག་ཏུ་གཏད་ནས་ཐལ་མོ་སྦྱར་བའི་བར་དུ་བཟུང་དུ་བཅུག་ལ། དེ་ལྟ་བུས་སྒོ་མ་ལ་གསོལ་བ་བཏབ་པས་སྤྲུལ་པའི་སྒོ་མ་རྣམས་ཀྱིས་ཚེའི་དཀྱིལ་འཁོར་ཆེན་པོའི་ཕྱོགས་བཞི་སྒོ་བཞི་ཕྱེས་ནས་

[Full Size]

ཁྱེད་རང་རྣམས་ཀྱི་བར་འཁྱམས་སུ་སླེབ་པའི་མོས་འདུན་མཛད་པ་དང་། ཞེས་པའི་སྐབས་འདིར་དཀྱིལ་འཁོར་གྱི་ཡོལ་བ་ཕྱེ་ཞིང་། མེ་ཏོག་འདི་ཉིད་ཕྱག་རྟེན་གྱི་ཚུལ་དུ་དཀྱིལ་འཁོར་ལྷ་ཚོགས་ལ་གུས་པས་ཕུལ་བས། རང་ཉིད་ཀྱི་ཚེ་རབས་སྔོན་ནས་ཡི་དམ་ལྷ་མཆོག་གང་ལ་བརྟེན་ཅིང་འབྲེལ་བ་ཡོད་པའི་རིགས་དེ་ཉིད་དང་རྗེས་སུ་མཐུན་པའི་དཀྱིལ་འཁོར་གྱི་ལྷ་དེས་མེ་ཏོག་བཞེས་ཤིང་བྱིན་གྱིས་རློབས་པར་གྱུར་ཅིག་སྙམ་པའི་མོས་གུས་བསྐྱེད་པའི་ངང་ནས་ཚིག་འདི་རྗེས་ཟློས་གནང་བའི་མཐར། བདག་གི་དྲིལ་བུའི་སྒྲ་བྱུང་མ་ཐག་མེ་ཏོག་དཀྱིལ་འཁོར་ལ་འཐོར་བར་མཛོད། ཧྲཱིཿ ཚེ་ཡི་དཀྱིལ་འཁོར་གསང་བའི་ཕོ་བྲང་འདིར། །ལས་ཀྱི་འབྲེལ་བའི་མེ་ཏོག་འདི་དོར་ན། །སྔོན་ནས་ལས་འཕྲོ་གང་ཡོད་ལྷ་དེ་ལ། །འབུལ་ལོ་ཡི་དམ་ལྷ་དང་མཇལ་བར་ཤོག །ཨོཾ་པུ་རུ་ཥཱ་ཡ་ཧོཿ ཞེས་པས་དྲིལ་བུ་བསིལ་ཞིང་དར་ཟབ་ལས་གྲུབ་པའི་ཅོད་པཎ་ནམ་ཅིས་ཀྱང་མ་འབྱོར་བའམ་སློབ་མ་ཧ་ཅང་མང་ནས་མ་

[Full Size]

ཤོམ་ན་འབྲུའི་མེ་ཏོག་སིལ་མས་ཀྱང་རུང་བ་དཀྱིལ་འཁོར་གྱི་དབུས་གཙོ་བོ་ལ་གཏད་དེ་དོར་བ་ཕྱོགས་གང་ལ་བབས་པ་སློབ་དཔོན་ནམ་ལས་སློབ་ཀྱི་བརྟག་ཅིང་རེ་རེ་ནས་ངོས་བཟུང་ལ་བརྗོད་དེ། འདི་ལྟར་མེ་ཏོག་ཅོད་པཎ་གང་ལ་བབས་པ་དེ་ཉིད་ལ་ཚེ་རབས་ཀྱི་ལྷ་སྐལ་ཞེས་བྱ་སྟེ། ཡི་དམ་གཞན་གང་དང་གང་བསྒྲུབ་པ་ལས་ཀྱང་ལྷ་སྐལ་གང་ཡིན་དེ་སྒྲུབ་ཐག་ཉེ་ཞིང་དངོས་གྲུབ་མྱུར་བ་ཡིན་ལ། དེ་ཡང་མེ་ཏོག་དབུས་ཀྱི་གཙོ་མཆོག་ལ་བབས་པ་ན་མཆོག་གི་དངོས་གྲུབ་ཐོབ་པའི་སྐལ་བ་དང་ལྡན་ཞིང་། ཚེའི་དཀྱིལ་འཁོར་འདི་ཉིད་པདྨ་གསུང་གི་རིགས་གཙོ་བོར་གྱུར་པའི་དབང་གིས་ཚེ་རབས་ཀྱི་ལྷ་སྐལ་ཡང་པདྨ་གསུང་གི་ལྷ་ཚོགས་བསྒྲུབ་པར་བསྔགས་པ་དང་། དབང་གི་གསང་མཚན་དུ་རིགས་འདུས་པདྨ་ཚེ་དབང་རྩལ། ཞེས་ཐོགས་པ་ཡིན་པས་མ་བརྗེད་པར་འཛིན་པ་ཞུ།། ༈ །།མེ་ཏོག་ཤར་དུ་བབས་ན་རྡོ་རྗེ་རིགས་ཀྱི་ལྷ་བསྒྲུབ་ན་

[Full Size]

འགྲུབ་ཉེ་ཞིང་ཞི་བའི་ཕྲིན་ལས་ལ་དབང་བ་ཡིན་པས་གསང་བའི་མཚན་ཡང་རྡོ་རྗེ་ཚེ་དབང་རྩལ་དུ་འཛིན་པ་དང་། ལྷོ་ཕྱོགས་སུ་བབས་ན་ཡོན་ཏན་རིན་ཆེན་རིགས་ཀྱི་ལྷ་འགྲུབ་ཅིང་རྒྱས་པའི་ཕྲིན་ལས་ལ་དབང་བས་ན་རཏྣ་ཚེ་དབང་རྩལ་དུ་གསང་མཚན་འཛིན་པ་དང་། ནུབ་ཏུ་བབས་ན་བདེར་གཤེགས་སྐུའི་རིགས་འགྲུབ་ཅིང་དབང་གི་ཕྲིན་ལས་ལ་མངའ་བརྙེས་པར་འགྱུར་ལ། གསང་མཚན་ནི་བུདྡྷ་ཚེ་དབང་རྩལ་དུ་འཛིན་པ་དང་། བྱང་དུ་བབས་ན་ལས་ཀྱི་རིགས་ཀྱི་ལྷ་འགྲུབ་སླ་ཞིང་མངོན་སྤྱོད་དྲག་པོའི་དངོས་གྲུབ་ལ་དབང་བར་འགྱུར་བས་ན། ཀརྨ་ཚེ་དབང་རྩལ་ཞེས་འཐོགས་པ་སྟེ་དེའི་ཕྱིར་སླར་ཡང་མེ་ཏོག་གི་ཅོད་པན་ཁྱེད་རང་རྣམས་ཀྱི་སྤྱི་བོར་བཅིངས་ཤིང་དབང་གི་གསང་མཚན་བཏགས་པའི་བྱིན་རླབས་ཕན་ཡོན་གྱིས། གནས་སྐབས་སུ་ཡང་བདུད་ཀྱི་བར་ཆད་ལས་སྐྱོབ་ཅིང་རིགས་དེ་དང་དེའི་ཡི་དམ་

[Full Size]

ལྷས་རྗེས་སུ་འཛིན་པར་འགྱུར་ལ། མཐར་ཐུག་ཏུའང་ད་ལྟའི་དཀྱིལ་འཁོར་གྱི་ཕྱོགས་གང་ལ་བབས་པ་དང་། མཐུན་པའི་ཞིང་ཁམས་སུ་གསང་མཚན་དང་རྗེས་སུ་མཚུངས་པའི་མཚན་དོན་དང་ལྡན་པར་འཚང་རྒྱ་བ་དང་། སྤྲུལ་པའི་འགྲོ་དོན་མཛད་ཚུལ་ཡང་ད་ལྟའི་ལས་བཞིའི་བཀའ་བབས་གང་ཡིན་དང་ཆ་མཐུན་པའི་སྒོ་ནས་སེམས་ཅན་གྱི་དོན་རླབས་པོ་ཆེ་སྤྱོད་པར་འགྱུར་བ་སྟེ། མདོར་ན་མེ་ཏོག་འདོར་བའི་སྒོ་ནས་ལྷ་དང་རིགས་ངེས་པར་བྱེད་པ་འདི་ནི་གསང་སྔགས་རྡོ་རྗེ་ཐེག་པའི་ཐབས་ཀྱི་ཁྱད་ཆོས་ལགས་པས་དགོངས་པ་འཚལ་ལོ། །ཞེས་ཅོད་པཎ་སློབ་མའི་སྤྱི་བོར་དབང་བསྐུར་ཞིང་། སྔགས་འཆང་དང་རྣལ་འབྱོར་སྤྱོད་པའི་ཆ་བྱད་ཅན་དག་ལ་ནི་ཅོད་པན་དེ་ཉིད་སྐྲའི་སེབ་ཏུ་འབྲལ་མེད་བཅང་དགོས་ལ། འོན་ཏེ་རབ་བྱུང་གི་ཆས་ཅན་ནམ། མེ་ཏོག་སིལ་མ་གཏོར་བ་ཡིན་ན། སློབ་དཔོན་གྱི་མེ་ཏོག་ལ་རྟེན་འབྲེལ་སྙིང་པོ་བཟླས་ལ་ཅུང་ཟད་རེ་སྤྱི་བོར་བླུག་པར་བྱ་སྟེ། འདི་

[Full Size]

ལ་དབང་གཞུང་ལ་ལར། དབང་ལ་སྔ་བ་ཅོད་པཎ་མིང་གིས་དབང་ཞེས་བྱའོ། །དེ་ནས་བླ་མ་ཚེ་དཔག་མེད་པའི་ཐུགས་རྗེའི་འོད་ཟེར་མིག་ཐུར་ལྟ་བུ་འཕྲོས་པས་ཁྱོད་རང་རྣམས་ཀྱི་མ་རིག་རྨོངས་མུན་བག་ཆགས་སྒྲིབ་གཡོགས་ཐམས་ཅད་བསལ་ནས་ཡེ་ཤེས་དག་པའི་སྤྱན་མངོན་པར་ཕྱེས་པའི་མོས་པ་མཛོད་ཅིག །ཧྲཱི༔ ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་མིང་ཐོག་གསལ་བ་ལྟར། །དེ་ནི་བུ་ཁྱོད་མ་རིག་ནད། །རབ་རིབ་རྒྱལ་བ་རྣམས་ཀྱི་བསལ། །ཡེ་ཤེས་སྤྱན་དུ་དབྱེ་བར་བྱ། །ཨོཾ་བཛྲ་ཙཀྵུ་ཕྱེས། སཱུརྱ་ཙནྜ་སྭཱ་ཧཱ། ཞེས་པས་སྤྱན་དར་དཀྲོལ་ནས། །ཨེ་མ་སྐལ་ལྡན་རིགས་ཀྱི་བུ། །དཀྱིལ་འཁོར་ཆེན་པོ་འདི་ལ་ལྟོས། །ད་ནི་དད་པ་རབ་ཏུ་སྐྱེད། །མཐོང་བ་ཙམ་གྱིས་གྲོལ་བ་ནི། །ལྷུན་གྲུབ་དཀྱིལ་འཁོར་འདི་ཡིན་ནོ། །འཆི་མེད་རྡོ་རྗེའི་དངོས་གྲུབ་ཐོབ། །ཁྱེད་ནི་སྐལ་བར་ལྡན་པ་ཡིན། །དེ་ཡང་དཀྱིལ་འཁོར་ལ་དབྱེ་ན་བཞི་སྟེ། ཕྱི་

[Full Size]

སྣོད་བཅུད་རང་བཞིན་གྱི་དཀྱིལ་འཁོར། །ནང་འབྱུང་ཁམས་ཕུང་པོའི་དཀྱིལ་འཁོར། །གསང་བ་རང་རིག་ཡེ་ཤེས་ཀྱི་དཀྱིལ་འཁོར། །ཐུན་མོང་བརྡ་བརྟགས་གཟུགས་བརྙན་གྱི་དཀྱིལ་འཁོར་དང་བཞི་ཡོད་ལ། བསྡུ་ན། མཚོན་བྱེད་དཔེའི་དཀྱིལ་འཁོར་དང་མཚོན་བྱ་དོན་གྱི་དཀྱིལ་འཁོར་གཉིས་ལ་འདུ་བས་ན་མཚོན་པར་བྱ་བའི་དོན་ངོ་སྤྲོད་པར་བྱེད་པ་ལ་མཚོན་བྱེད་དཔེ་ལ་ལྟོས་དགོས་ཕྱིར་དེས་ན་གཟུགས་བརྙན་གྱི་དཀྱིལ་འཁོར་འདི་ནི། དབུས་སུ་རིགས་ཐམས་ཅད་ཀྱི་ཁྱབ་བདག་མགོན་པོ་འོད་དཔག་ཏུ་མེད་པ་ཆོས་ཉིད་ཀྱི་སྐུ་ལས་ལོངས་སྤྱོད་རྫོགས་པ་ཁ་སྦྱོར་ཡན་ལག་བདུན་ལྡན་དུ་བཞེངས་པ་བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་རང་འོད་ཀྱི་ཡུམ་ཆེན་ན་བཟའ་དཀར་མོ་དང་གཉིས་མེད་ཟུང་འཇུག་བདེ་ཆེན་འདུ་འབྲལ་མེད་པར་བཞུགས་པའི་འཁོར་གྱི་དཀྱིལ་འཁོར་ཚེ་བདག་རྒྱལ་བ་རིགས་བཞི་ཡབ་ཡུམ་དང་། འཇམ་དབྱངས་སྤྱན་རས་གཟིགས་ཕྱག་

[Full Size]

རྡོར་པད་འབྱུང་སྟེ་རྣམ་པར་སྤྲུལ་པའི་སྐུ་བཞི། །ཚེའི་ཕོ་ཉ་འགྱོགས་བྱེད་ཀྱི་ལྷ་མོ་བཞི། སྒོ་བཞི་སྲུང་བའི་ཁྲོ་ཆེན་རྣམ་བཞི་རང་རིགས་ཀྱི་ཡུམ་དང་བཅས་པ་སྟེ་འཆི་མེད་ཚེའི་ལྷ་གཙོ་འཁོར་ཉེར་དྲུག་དང་། ཕྱིའི་འཁོར་ཡུག་ཏུ་ཚེ་ལ་དབང་བའི་དྲང་སྲོང་རིག་འཛིན་དཔའ་བོ་མཁའ་འགྲོ་སྤྲུལ་པ་ཡང་སྤྲུལ་བཀའ་སྲུང་དམ་ཅན་རྒྱ་མཚོའི་ཚོགས་ཀྱིས་བསྐོར་ནས་བཞུགས་པ་རྣམས་ཀྱི་ཞལ་མངོན་སུམ་དུ་མཐོང་བའི་མོས་པ་དང་དག་སྣང་མཛད་འཚལ་ཞིང་། །འདི་ལྟ་བུའི་གསང་སྔགས་ཟབ་མོའི་དཀྱིལ་འཁོར་ལན་གཅིག་མཇལ་བ་ཙམ་གྱིས་བསྐལ་པ་གྲངས་མེད་པའི་སྡིག་སྒྲིབ་ལས་ཉོན་གྱི་ཕུང་པོ་རི་རབ་ཙམ་ཡང་བྱང་བར་འགྱུར་ན། ཞུགས་ཅིང་དབང་བསྐུར་ཐོབ་པ་དང་བསྒོམ་ཞིང་བསྙེན་སྒྲུབ་བགྱིས་པ་ནི་སྨོས་ཀྱང་ཅི་དགོས་ཏེ། གནས་སྐབས་དང་མཐར་ཐུག་གི་

[Full Size]

དོན་ཆེན་བླ་ན་མེད་པ་གྲུབ་པར་འགྱུར་བས་ན་སྤྲོ་བ་དང་དགའ་བ་རྒྱ་ཆེན་པོ་སྐྱེད་མཛོད།། ༈ །།འདོར་ན་འདི་ཡན་ཆོད་ཀྱི་ལས་རིམ་རྣམས་ནི་ཁྱེད་ཅག་རྣམས་དབང་གིས་སྣོད་རུང་དུ་བསྒྲུབ་པའི་སྟ་གོན་ཡིན་ཏེ། ཇི་ལྟར་འཇིག་རྟེན་ན་རིན་ཆེན་གསེར་དངུལ་ལ་སོགས་ལས་བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་སོགས་བྱ་བར་འདོད་ན་དང་པོར་རྒྱུ་དེ་དག་བཞུ་འདུལ་གཡའ་འདོན་སོགས་དྲི་མ་སྦྱོང་ཞིང་ལས་སུ་རུང་བར་བྱ་བའི་ཐབས་ཇི་སྙེད་ཅིག་ནན་ཏན་དུ་འབད་ནས་རྒྱུ་དེ་དག་མཉེན་ཞིང་ལྷད་མེད་ལས་རུང་དུ་ནམ་གྱུར་པའི་ཚེ་སྐུ་གཟུགས་སོགས་གང་འདོད་བྱར་རུང་བའི་དཔེ་དེ་བཞིན་དུ། འདིར་ཡང་སློབ་མའི་རྒྱུད་ཀྱི་བག་ཆགས་སྒྲིབ་ཚོགས་རྣམས་སྦྱོང་ཞིང་དབང་དོན་གྱི་ཡེ་ཤེས་སྐྱེ་བའི་རྒྱུ་དང་སྣོད་དང་ཡུལ་དུ་རུང་བར་སྒྲུབ་ནས།། ༈ །།ད་ནི་དབང་དངོས་གཞི་ལ་འཇུག་པར་བྱེད་པ་ལ་ཡང་

[Full Size]

གསང་སྔགས་རྡོ་རྗེ་ཐེག་པའི་དབང་ནི་སེང་གེའི་འོ་མ་དང་འདྲ་སྟེ། དེ་བླུག་པའི་སྣོད་རིན་ཆེན་གསེར་དངུལ་མ་གཏོགས་སྣོད་ཕལ་པ་གཞན་གྱིས་མི་ཐུབ་པ་བཞིན། སློབ་མ་ཡི་དམ་ལྷའི་སྐྱེད་རིམ་དང་མི་ལྡན་པ་ལ་བསྐུར་དུ་མི་རུང་བས། དེས་ན་ཁྱེད་རང་རྣམས་ཡིད་གཞན་དུ་མ་ཡེངས་པར་དམིགས་པ་འདི་ལྟར་སྒོམ་པར་ཞུ།། ༈ །།ཨོཾ་སྭཱ་བྷཱ་ཝ་ཤུདྡྷཿསརྦ་དྷརྨཱ་སྭ་བྷཱ་ཝ་ཤུདྡྷོ྅ཧཾ། འཁོར་འདས་གཉིས་ཀྱིས་བསྡུས་པའི་ཆོས་ཐམས་ཅད་གདོད་མ་ནས་ཡེ་སྟོང་མཐའ་བྲལ་གྱི་རང་བཞིན་ཉིད་དུ་ལྷུན་གྱིས་གྲུབ་པའི་གསལ་མདངས་འགག་མེད་ཀྱི་སྣང་ཆར། འོ་སྐོལ་གནས་པའི་ཡུལ་དང་ཁང་ཁྱིམ་འདི་དག་ཐམས་ཅད་འཇིག་རྟེན་ཀུན་བརྟག་གི་གནས་ཁང་དུ་མ་སེམས་པར་པདྨོ་བདེ་བ་ཅན་གྱི་ཞིང་ཁམས་རྒྱན་དང་བཀོད་པ་ངོ་མཚར་མཐའ་ཡས་པའི་ཡེ་ཤེས་སྤྲུལ་པའི་ཕོ་བྲང་ཡིན་པར་མོས་པ་མཛད། བདག་རྡོ་རྗེ་སློབ་དཔོན་ཡང་

[Full Size]

མགོན་པོ་འོད་དཔག་མེད་པའི་སྐུའི་བཀོད་པ་ཁོ་ན་ཉིད་དུ་ངེས་ཤེས་རྩེ་གཅིག་བསྐྱེད་པའི་ངང་ནས། ཁྱེད་རང་རྣམས་ཀྱི་གདུག་པའི་སྟན་ཡང་མེ་ཏོག་པདྨ་དམར་པོ་འདབ་མ་སྟོང་ལྡན་གྱི་སྟེང་དུ་ཟླ་བ་ཉ་གང་བའི་གདན་དུ་གྱུར་པའི་དབུས་སུ་ཁྱེད་རྣམས་ཀྱི་ཤེས་རིག་གི་ངོ་བོ་ཡི་གེ་ཧྲཱིཿདམར་པོ་གཅིག་ཏུ་གྱུར་ཏེ། དེ་ལས་འོད་ཟེར་དམར་པོའི་ཚོགས་དཔག་ཏུ་མེད་པ་སྟེང་འོག་ཕྱོགས་བཅུའི་འཇིག་རྟེན་ཀུན་ཏུ་འཕྲོས་པས། རབ་འབྱམས་རྒྱལ་བ་སྲས་བཅས་ཐམས་ཅད་ལ་མཉེས་པའི་མཆོད་པ་ཕུལ། ཁམས་གསུམ་རིས་དྲུག་གི་སེམས་ཅན་ཀུན་གྱི་སྡིག་སྒྲིབ་སྡུག་བསྔལ་བསམ། སླར་འོད་ཟེར་རྣམས་ཚུར་འདུས་ནས་ཧྲཱིཿཡིག་ལ་ཐིམ་མ་ཐག་དེ་ཉིད་གནས་འགྱུར་ཏེ། ཁྱེད་རང་རྣམས་བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་སྐུ་མདོག་དམར་གསལ་དྭངས་ཤིང་འོད་དུ་འབར་བ། ཞལ་གཅིག་ཕྱག་གཉིས་མཉམ་གཞག་གི་སྟེང་དུ་འཆི་མེད་བདུད་རྩིའི་

[Full Size]

བུམ་པ་འཛིན་ཞིང་། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ་ཞི་འཛུམ་མཚན་དཔེའི་ཕུང་པོ་ལྟ་བས་མི་ངོམ་པའི་སྐུ་ལ་རིན་པོ་ཆེ་སྣ་ཚོགས་ཀྱི་དབུ་རྒྱན་ཐོར་ཚུགས་རྩེ་བྲན་དང་། སྙན་ཆ་མགུར་མཆུ་ཕྱག་ཞབས་ཀྱི་བདུ་བུ་དོ་ཤལ་སྐེ་རག་སོགས་ཀྱི་རྒྱན་དང་ལྷའི་དར་ཟབ་ཁ་དོག་སྣ་ཚོགས་པའི་ན་བཟའ་ལ་སོགས་ལོངས་སྤྱོད་རྫོགས་སྐུའི་ཆ་ལུགས་མཐའ་བདག་ཡོངས་སུ་རྫོགས་ཤིང་། ཡེ་ཤེས་འོད་ལྔའི་ཕུང་པོ་རྣམ་པར་འཁྲིག་པའི་ཀློང་ན་སྣང་ལ་རང་བཞིན་མེད་པའི་སྐུ་གཟི་བརྗིད་ཉི་མ་འབུམ་གྱི་འོད་མདངས་ལྟར་འབར་བ་ཞིག་ཏུ་གྱུར་པའི་ཏིང་འཛིན་བརྟན་པོ་མཛད་པར་ཞུ། འདི་སྐབས་གཏེར་གཞུང་གི་དབང་ཆོག་ཉིད་དུ་སློབ་མ་ལྷར་གསལ་བ་དང་ཡེ་ཤེས་དབབ་པ་སོགས་ཀྱི་གསལ་ཁ་མ་གསུངས་ཀྱང་བླ་མེད་སྤྱི་དང་ཁྱད་པར་གཏེར་ཆོས་ཀྱི་དབང་གཞུང་ཐམས་ཅད་ཀྱི་དགོངས་དོན་ཐུན་མོངས་མ་ཡིན་པ་དང་། མེད་མི་རུང་གི་སྐབས་དོན་དབང་གི་སྙིང་པོ་ཡིན་ཕྱིར་འདི་ལྟར་བྲིས་པ་ལགས།། ༈ །།དེ་ནས་

[Full Size]

རྡོ་རྗེ་སློབ་དཔོན་ལས་སློབ་འཁོར་བཅས་ཀྱིས་རོལ་མོ་སྤོས་དང་ཚེ་མདའ་དར་སྣ་བཏགས་པའི་གཡབ་རྫས་སོགས་ཡེ་ཤེས་འབེབས་པའི་ཡོ་བྱད་ཐམས་ཅད་འཐོགས་ཤིང་ལངས་ཏེ་དབྱངས་སྙན་པོ་དང་ལྡན་པས་བྱིན་འབེབས་བྱ་བའི་གྲབས་སུ་ཆུད་པ་དང་སློབ་དཔོན་གྱིས་དམིགས་པ་འདི་ལྟར་སྤྲད་དེ། དེ་ནས་དཀྱིལ་འཁོར་ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་གནས་གསུམ་དང་། བདག་ཉིད་རྡོ་རྗེ་སློབ་དཔོན་གྱི་གནས་གསུམ་འབྲུ་གསུམ་གྱི་འོད་ཟེར་དང་། ཁྱེད་རང་རྣམས་ཀྱང་ཚེ་དཔག་མེད་ཀྱི་སྐུར་གསལ་བའི་སྤྱི་བོར་ཡི་གེའི་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་མཐིང་ག་རེས་མཚན་པ་ལས་ཀྱང་རྒྱལ་བའི་ཐུགས་རྗེ་བསྐུལ་བའི་དད་པའི་འོད་ཟེར་ལྕགས་ཀྱུ་ལྟ་བུ་དཔག་ཏུ་མེད་པ་འཕྲོས་པས། ཕྱོགས་དུས་ཀྱིས་རྒྱལ་བ་སྲས་བཅས་ཐུགས་རྗེའི་བདག་ཉིད་རྣམས་དང་རྩ་རྒྱུད་བླ་མ་ཡི་དམ་ལྷ་ཚོགས་དཔའ་བོ་མཁའ་འགྲོ་ཚེ་ལ་དབང་བའི་དྲང་སྲོང་རིག་འཛིན་ཆོས་སྐྱོང་སྲུང་མའི་ཚོགས་དང་

[Full Size]

བཅས་པ་ཐམས་ཅད་མི་མངོན་དབྱིངས་ནས་བརྩེ་བ་ཆེན་པོས་དགོངས་ཏེ་མདུན་གྱིས་བར་སྣང་འདི་ཉིད་དུ་སྤྲིན་ཐིབ་པ་བཞིན་བྱོན་པའི་མོས་པ་དང་དད་གདུངས་ཀྱི་ཤུགས་བསྐྱེད་དེ་གསོལ་བ་གདབ་པ་ལ་འབད་པར་མཛོད་ལ་ཡིད་གཞན་དུ་ཡེངས་པར་མ་མཛད་ཅིག །ཧྲཱིཿ སྔོན་ཚེ་སྐལ་པའི་དང་པོ་ལ། །འཆི་མེད་ཆོས་འདི་སུ་ཡིས་སྒྲུབ། །སྒྲུབ་པའི་གནས་མཆོག་གང་དུ་ཡིན། །དངོས་གྲུབ་སྙིང་པོ་སུ་ཡིས་བརྙེས། །བཅོམ་ལྡན་སྣང་མཐའ་ཡབ་ཡུམ་གྱི། །བདེ་ཆེན་འབར་བའི་ཞིང་ཁམས་སུ། །སྐྱེ་འཆི་མེད་པའི་དངོས་གྲུབ་ཐོབ། །བགྲེས་རྒུད་མེད་པའི་གྲུབ་རྟགས་བརྙེས། །དེ་ཡི་བྱིན་རླབས་དུས་འདིར་སྩོལ། ཧྲཱིཿ རིག་འཛིན་དགའ་རབ་རྡོ་རྗེ་དང་། །མཁའ་འགྲོ་བདེ་ཆེན་རྒྱལ་མོ་ཡིས། །རི་བོ་ཆེན་པོ་་དཱནྟིག་ཏུ། །སྐྱེ་འཆི་མེད་པའི་དངོས་གྲུབ་ཐོབ། །བགྲེས་རྒུད་མེད་

[Full Size]

པའི་དངོས་གྲུབ་རྟགས་བརྙེས། །དེ་ཡིས་བྱིན་རླབས་དུས་འདིར་སྩོལ། །རིག་འཛིན་ཤྲཱི་སིང་ཧ་དང་། །མཁའ་འགྲོ་རིན་ཆེན་ཞི་བ་འཚོས། །སུ་ཟ་གླིང་གི་དུར་ཁྲོད་དུ། །སྐྱེ་འཆི་མེད༴ །བགྲེས་རྒུད་མེད༴ །དེ་ཡི་བྱིན་རླབས༴ །ཚེ་བདག་པདྨ་ཐོད་ཕྲེང་དང་། །མཁའ་འགྲོ་ལྷ་ལྕམ་མནྡྷ་རས། །བྲག་ཕུག་མ་ར་ཏི་ཀ་རུ། །སྐྱེ་འཆི༴ །བགྲེས་རྒུད༴ །དེ་ཡི༴ །པཎ་ཆེན་བི་མ་མི་དྲ་དང་། །མཁའ་འགྲོ་དབྱིངས་ཕྱུག་རྒྱལ་མོ་ཡིས། །ལྷུན་གྲུབ་གཏེར་གྱི་དུར་ཁྲོད་དུ། །སྐྱེ་འཆི༴ །བགྲེས་རྒྱུད༴ །དེ་ཡི༴ །སློབ་དཔོན་ཧཱུྃ་ཆེན་ཀ་ར་དང་། །བྲམ་ཟེ་བུ་མོ་བདེ་ལྡན་མས། །བྲག་དམར་བྱ་ཁྱུང་སྒྲུབ་གནས་སུ། །སྐྱེ༴ །བགྲེས༴ །དེ་ཡི༴ །གནུབས་བན་ནམ་མཁའི་སྙིང་པོ་དང་། །མཁའ་འགྲོ་ཤེལ་དཀར་རྡོ་རྗེ་མཚོས། །ལྷོ་བྲག་མཁར་ཆུའི་དབེན་གནས་སུ། །སྐྱེ༴ །བགྲེས༴ །དེ་ཡི༴

[Full Size]

མྱང་མན་ཏིང་འཛིན་བཟང་པོ་དང་། །མཁའ་འགྲོ་ཡེ་ཤེས་མཚོ་རྒྱལ་གཉིས། །བསམ་ཡས་བྲག་དམར་ཀེ་ཚང་དུ། །སྐྱེ༴ །བགྲེས༴ །དེ་ཡི༴ ཧྲཱིཿ སྔོན་དུས་ཚེ་ཡི་ཁུངས་རེ་བཟང་། །ད་ལྟ་ཚེ་ཡི་དཔལ་རེ་འདུ། །བཅོམ་ལྡན་ཚེ་ཡི་ལྷ་ཚོགས་རྣམས། །སྐུ་གསུང་ཐུགས་ཀྱི་འོད་ཟེར་འགྱེད། །སྣོད་བཅུད་དངོས་གྲུབ་ཐམས་ཅད་བསྡུས། །ཐུགས་དམ་དུས་བབས་ས་མ་ཡཱ། །སྤྲོས་པས་ཁམས་གསུམ་བཀྲག་མདངས་ལྡན། །བསྡུས་པས་ལུས་ལ་གཟི་མདངས་འབར། །བཅིངས་པས་རྡོ་རྗེ་ལུ་གུ་རྒྱུད། །བརྟན་པས་མི་འགྱུར་རྡོ་རྗེ་འདྲ། །སྐལ་ལྡན་བུ་ལ་བྱིན་ཆེན་ཕོབ། །ལས་ཅན་འདི་ལ་དངོས་གྲུབ་སྩོལ། །བླ་མའི་ལྷ་ཚོགས་འཇའ་འོད་འཐིབ། །ཡི་དམ་ལྷ་ཚོགས་འོད་ཟེར་འཁྲུག །མཁའ་འགྲོའི་ལྷ་ཚོགས་བྲོ་བརྡུངས་ལྡིར། །ཆོས་སྐྱོངས་ལྷ་ཚོགས་གར་ཉམས་ཁྱུག །འགྲོ་དོན་མཁའ་ཁྱབ་སྨིན་གྲོལ་མཛོད། །

[Full Size]

མོས་པའི་བུ་ལ་ལུང་སྟོན་འཚལ། །བཀའ་ཡིས་སྲུང་མ་ཐམས་ཅད་ཀྱིས། །རྒྱུད་འཛིན་བུ་ལ་གདོང་གྲོགས་མཛོད།། ༈ །།དེ་ལྟར་བྱིན་ཆེན་དབབ་ཅིང་གསོལ་བ་བཏབ་པ་ཙམ་གྱིས་མདུན་གྱི་ནམ་མཁར་བཞུགས་པའི་ཡེ་ཤེས་སེམས་དཔའི་ལྷ་ཚོགས་དེ་དག་མ་ལུས་པ་ཁྱེད་རང་དམ་ཚིག་སེམས་དཔའ་ལ་མཚོ་ལ་ཁ་བ་བབས་པ་ལྟར་སིབ་ཀྱི་ཐིམ་པས་ལུས་ངག་ཡིད་གསུམ་རྒྱལ་བའི་སྐུ་གསུང་ཐུགས་ཀྱི་རང་བཞིན་རྡོ་རྗེ་གསུམ་གྱི་ངོ་བོ་མི་ཟད་རྒྱན་གྱི་འཁོར་ལོ་གྱུར་པའི་ངེས་ཤེས་བརྟན་པོ་གནང་བར་ཞུ། ཞེས་བརྗོད་ནས། སློབ་དཔོན་གྱིས་ཀྱང་ཏིང་འཛིན་རྩེ་གཅིག་པས་མེ་ཏོག་ལ་རྩ་སྔགས་དང་རྟེན་འབྲེལ་སྙིང་པོས་རབ་ཏུ་གནས་པ་འཐོར་ཞིང་རོལ་མོ་དྲག་ཏུ་སྦིར་ལ། ཨོཾ་ཨཱཿཧཱུྃ། ཨོཾ་ཨ་མཱ་ར་ཎི་ཛཱི་ཝནྟཱི་ཏེ་ཡེ་སྭཱ་ཧཱ། ཨོཾ་བྷྲུྃ་ཏྲྃ་ཧྲཱི༔ཨཱཿ མུྃ་ལྃ་མཱྃ་པྱྃ་ཏཱྃ། མུྃ་ཧྲཱིཿཧཱུྃ་ཨཱཿ པུཥྤེ་དྷུ་པེ་ཨཱ་ལོ་

[Full Size]

ཀེ་གྷ་ནྡྷེ། ཧཱུྃ་ཧཱུྃ་ཧཱུྃ་ཧཱུྃ་ཛཿཧཱུྃ་བྃ་ཧོ། ཨཱ་ཝེ་ཤ་ཡ་ཨཱཿཨཿ ཀཱ་ཡ་ཝཀྩིཏྟ་ཏིཥྛ་བཛྲེ་སྭཱ་ཧཱ། ཞེས་པས་ཡེ་ཤེས་དབབ་ཅིང་བརྟན་པར་བྱའོ།། ༈ །།དེ་ལྟར་ཡེ་ཤེས་ཀྱི་ལྷ་བསྟིམ་ཞིང་དམ་ཡེ་དབྱེར་མེད་དུ་བསྲེས་པ་དེ་ཉིད་དབང་གི་དངོས་གཞི་གང་ཡིན་ལ། གཞི་རྫོགས་མཐའ་རྟེན་གྱི་ཡན་ལག་དང་བཅས་པ་བསྐུར་བའི་སྣོད་ལྡན་དུ་བྱས་པའི་ཆ་ནས་ནི་ཁྱད་པར་གྱི་སྟ་གོན་དུ་ཡང་འགྱུར་བ་གྲུབ་ནས་ད་ནི་ལུས་ངག་ཡིད་གསུམ་ཤེས་བྱའི་སྒྲིབ་པ་དང་བཞི་པོ་གནས་སུ་དག་པར་བྱ་བ་དང་། ལུས་ལྷ། ངག་སྔགས། སེམས་ཆོས་ཉིད། གང་ཤར་ཡེ་ཤེས་ཆེན་པོར་ཉམས་སུ་བླང་བའི་སྐལ་བ་རྒྱུད་ལ་འཇོག་པ་དང་། ཆོས་ལོངས་སྤྲུལ་གསུམ་ངོ་བོ་ཉིད་བདེ་བ་ཆེན་པོ་དང་བཅས་ཏེ་འབྲས་བུ་སྐུ་བཞི་འགྲུབ་པའི་རྟེན་འབྲེལ་གྱི་ས་བོན་བསྐྲུན་པ་དང་བཅས་པའི་དོན་ཕྱིར་དབང་བཞི་རིམ་ཅན་

[Full Size]

དུ་བསྐུར་བ་ཡིན་པས་ན། ཐོག་མར་ལུས་སྨིན་པར་བྱེད་པ་བུམ་པའི་དབང་བསྐུར་བའི་ཡུལ་ནི་ཁྱེད་རང་རྣམས་ཚེ་དཔག་མེད་ཀྱི་སྐུའི་རྣམ་པ་དམ་ཡེ་དབྱེར་མེད་ཉིད་ལ། དབང་བསྐུར་བའི་མཁན་པོ་ནི་དཀྱིལ་འཁོར་མངའ་བདག་རྡོ་རྗེ་སློབ་དཔོན་ཚེ་དཔག་མེད་པའི་ངོ་བོར་གནས་གྱུར་པ། དབང་བསྐུར་བའི་རྫས་ཀྱི་དངོས་པོ་ཡང་མཚོན་བྱེད་བརྡ་རྟགས་ཀྱི་བུམ་གཟུགས་ལ་ནང་དཀྱིལ་འཁོར་ཡོངས་རྫོགས་ཀྱི་བུམ་བཅུད་ཚེ་ལྷ་གཙོ་འཁོར་གྱི་ཕོ་བྲང་འདི་ཉིད་སྤྱི་བོར་བཞག་མ་ཐག །ལྷ་ཚོགས་རྣམས་ཀྱི་སྐུའི་ཆ་ཐམས་ཅད་ནས་འཆི་མེད་བདུད་རྩིའི་ཆུ་རྒྱུན་བབས་ཏེ་ཁྱེད་རང་རྣམས་ཀྱི་སྤྱི་གཙུག་ཚངས་བུག་ཏུ་ཞུགས་ནས་ལུས་ཐམས་ཅད་མེར་གྱི་ཁེངས་པས་འཆི་མེད་རྡོ་རྗེའི་སྐུ་འགྲུབ་པའི་ངེས་ཤེས་མཛད་པར་ཞུ། དབུས་ཀྱི་གཙོ་བུམ་འཐོགས་ལ། ཧྲཱིཿ བཀྲ་ཤིས་བུམ་པ་ལྷ་ཡི་གཞལ་ཡས་ཁང་། །

[Full Size]

ཕྱི་ནང་དབྱེར་མེད་འོད་ཀློང་འཇའ་ཟེར་འཁྱིལ། །བཅོམ་ལྡན་མགོན་པོ་ཚེ་ཡི་ལྷ་ཚོགས་བཞུགས། །རིགས་ཀྱི་བུ་ལ་དབང་བསྐུར་བྱིན་གྱིས་རློབས། །འགྱུར་མེད་རྡོ་རྗེའི་སྐུ་ཡི་དབང་ཐོབ་ཤོག །ཀཱ་ཡ་ཨ་བྷི་ཥཱིཉྩ་ཨོཾ། ཞེས་བུམ་དབང་སྤྱི་བོར་བསྐུར་ཞིང་རོལ་མོ་བསྒྲགས། མེ་ཏོག་འཐོར་ལ། དེ་ལྟར་བུམ་དབང་ལུས་ལ་བསྐུར་བས་ལུས་སྒྲིབ་དག་ནས་མི་ཤིག་རྡོ་རྗེ་ལྟ་བུའི་སྐུ་ཐོབ་པར་གྱུར་ཅིག །དེ་ནས་ཡང་ཕྱི་མཚོན་བྱེད་རྫས་ཀྱི་དངོས་པོ་མཚན་ལྡན་ཀཱ་པ་ལའི་རྣམ་པ་ལ། ནང་མཚོན་དོན་བཅུད་ཀྱི་ངོ་བོ་ཚེ་ལྷ་ཡབ་ཡུམ་བདེ་སྦྱོར་ལྷན་སྐྱེས་ཀྱི་བྱང་སེམས་བདུད་རྩིས་གང་བ་མགྲིན་པར་བཞག་ཅིང་བྱིན་པས། རྩ་ཁམས་ཡེ་ཤེས་ཀྱི་རང་བཞིན་དུ་གྱུར་ཞིང་བདེ་སྟོང་ཟག་མེད་གསང་དབང་གི་ཡེ་ཤེས་རྒྱུད་ལ་སྐྱེ་བའི་ངེས་ཤེས་མཛད་འཚལ། ཧྲཱིཿ དུང་ཆེན་སྣོད་དུ་བདུད་རྩི་སྨན་གྱིས་བཀང་། བཅོམ་ལྡན་ཡབ་ཡུམ་

[Full Size]

བྱང་སེམས་དཀར་དམར་རྫས། །ཐབས་ཤེས་དབྱེར་མེད་བྱང་ཆུབ་སེམས་ཀྱི་བཅུད། །སྐལ་ལྡན་རིགས་ཀྱི་བུ་ལ་དབང་བསྐུར་བས། །འགགས་མེད་ཚང་དབྱངས་གསུང་གི་དབང་ཐོབ་ཤོག །ཝཱཀ་ཨ་བྷི་ཥཱིཉྩ་ཨཱཿ ཞེས། ཐོད་པ་བདུད་རྩིས་མགྲིན་པར་བསྐུར་ཞིང་མེ་ཏོག་འཐོར་ཏེ། དེ་ལྟར་གསང་དབང་ངག་ལ་བསྐུར་བས་ངག་སྒྲིབ་དག་ཅིང་འགག་མེད་ཚང་དབྱངས་ལྟ་བུའི་གསུང་ཐོབ་པར་གྱུར་ཅིག། ༈ །།དེ་ནས་ཡང་མཚོན་བྱེད་དཔེའི་གཟུགས་བརྙན་མེ་ལོང་ཟླུམ་པོའི་རྣམ་པ་ལ། མཚོན་དོན་ཆོས་སྐུ་ཐིག་ལེ་ཉག་གཅིག་གསལ་ལ་ངོས་བཟུང་བྲལ་བའི་རྟགས་ཀྱི་དབང་སྙིང་གར་བསྐུར་བས། རིག་སྟོང་ཆོས་སྐུ་སྤྲོས་དང་བྲལ་བ་ཤེས་རབ་ཡེ་ཤེས་ཀྱི་དབང་དོན་རྒྱུད་ལ་སྐྱེས་པའི་ངེས་ཤེས་མཛད་འཚལ། ཧྲཱིཿ ཡེ་ཤེས་ལྔ་ལྡན་མེ་ལོང་དྲི་བྲལ་འདི། །གསལ་ཞིང་དག་

[Full Size]

ལ་སྙོག་བྲལ་སྟོང་གསལ་དང་། །ཕྱི་ནང་ཟུང་འཇུག་གཉིས་མེད་བསམ་བརྗོད་འདས། །ཐ་དད་མ་ཡིན་གཅིག་ཏུའང་གྲུབ་པ་མེད། །མཐའ་བྲལ་འཁྲུལ་མེད་ཐུགས་ཀྱི་དབང་ཐོབ་ཤོག །ཙིཏྟ་ཨ་བྷི་ཥཱིཉྩ་ཧཱུྃ། ཞེས། མེ་ལོང་སྙིང་གར་བཞག་ཅིང་མེ་ཏོག་འཐོར་ཏེ། དེ་ལྟར་ཤེར་དབང་སེམས་ལ་བསྐུར་བས་ཡིད་སྒྲིབ་དག་ནས་འཁྲུལ་མེད་ཡེ་ཤེས་མཆོག་གི་ཐུགས་ཐོབ་པར་གྱུར་ཅིག །དེ་ནས་ཡང་མཚོན་བྱེད་རྫས་ཀྱི་དངོས་པོ་ནི་གཏོར་མ་བུམ་གཟུགས་རྒྱན་དང་ལྡན་པ་ལ། མཚོན་བྱ་དོན་གྱི་ངོ་བོ་ནི་ཚེ་ལྷ་གཙོ་འཁོར་གྱི་དཀྱིལ་འཁོར་ཡོངས་རྫོགས་གནས་ལྔར་དབང་བསྐུར་བས་སྒོ་གསུམ་རྡོ་རྗེ་གསུམ་དུ་རྒྱས་ཐེབས་ཤིང་ཚིག་དབང་རིན་པོ་ཆེ་དོན་གྱི་ཡེ་ཤེས་རྒྱུད་ལ་སྐྱེས་པའི་ངེས་ཤེས་མཛད་པར་ཞུ། ཧྲཱིཿ ཕྱི་ལྟར་བདུད་རྩིའི་གཏོར་མ་སྨན་ལས་གྲུབ། །ནང་ལྟར་རིན་ཆེན་རྫས་མཆོག་ཉི་ཤུ་ལྔ། །གསང་བར་དམིགས་པའི་ཏིང་འཛིན་

[Full Size]

འཕྲོ་འདུ་གསལ། །དེ་ནི་རིགས་འདུས་ཚེ་དཔག་མེད་པའི་དབང་། །ཚེ་ཡི་དངོས་གྲུབ་དམ་པ་ཐོབ་པར་ཤོག །སརྦ་ཨ་བྷི་ཥཱིཉྩ་ཧྲཱིཿ ཞེས། གཏོར་མ་སྤྱི་མགྲིན་སྙིང་ལྟེ་གསང་བ་ལྔར་བཞག་ཅིང་། མེ་ཏོག་འཐོར་ལ། དེ་ལྟར་གཏོར་དབང་གནས་ལྔར་བསྐུར་བས་གཟུང་འཛིན་ཤེས་སྒྲིབ་ཐམས་ཅད་དག་ནས་སྐུ་བཞི་དབྱེར་མེད་ཀྱི་གོ་འཕངས་མྱུར་དུ་ཐོབ་པར་གྱུར་ཅིག །དབང་བསྡུས་པ་བྱེད་ན་འདི་ཡན་ཆད་ཀྱིས་ཀྱང་ཆོག་ཅིང་། འདིར་ནི་རྒྱས་པར་བསྐུར་བའི་ཚུལ་བཤད་པ་ཡིན་ཕྱིར་གཏེར་གཞུང་ཉིད་ཀྱི་ལུགས་བཞིན་སྟོན་ཏེ།། ༈ །།དེ་ལྟར་བླ་མེད་ཀྱི་དབང་བཞི་པོ་འདིར་མ་འདུས་པའམ་ཚང་བ་ཞིག་མེད་ནའང་། །སླར་ཡང་ནང་ནུས་པའི་དབང་ངམ། རྗེས་གནང་བརྟུལ་ཞུགས་ཀྱི་དབང་གི་ཚུལ་དང་མཐུན་པར། སྐུ་ཕྱག་རྒྱའི་དབང་། གསུང་གི་སྙིང་པོའི་དབང་། ཐུགས་རིག་པ་རྩལ་གྱི་དབང་དང་བཅས་པ་བསྐུར་བ་ཡིན་པས་

[Full Size]

ན། ཐོག་མར་ལྷ་སྐུ་ཕྱག་རྒྱའི་དབང་ལ་ཁྱེད་རང་རྣམས་སྔར་བཞིན་མགོན་པོ་ཚེ་དཔག་མེད་ཀྱི་སྐུར་གསལ་བ་ལས་མ་གཡོས་པའི་ངང་ནས། མདུན་གྱི་དཀྱིལ་འཁོར་ནས་ཚེ་བདག་རྒྱལ་བ་རིགས་ལྔ་རྣམས་ཀྱི་སྐུ་ལས་རང་འདྲའི་ཡེ་ཤེས་འོད་ཀྱི་སྐུ་རེ་མར་མེ་གཅིག་ལས་གཉིས་མཆེད་ལྟར་འཕྲོས་ནས་ཁྱེད་རང་རྣམས་ཀྱི་གནས་ལྔ་སོ་སོར་ཐིམ་པས། ཉོན་མོངས་དུག་ལྔའི་བག་ཆགས་དབྱིངས་སུ་དག་ཅིང་ཡེ་ཤེས་ལྔ་མངོན་དུ་གྱུར་པའི་མོས་པ་བརྟན་པོ་མཛད་པར་ཞུ། གཙོ་མཆོག་གི་སྐུ་དང་དབུས་ཀྱི་གཙོ་བུམ་ལྷན་ཅིག་འཐོགས་ནས། ཧྲཱིཿ སྐུ་སྤྲུལ་རྣམ་པར་སྣང་མཛད་ཚེ་དཔག་མེད། །གཉིས་མེད་མ་སྤངས་ཆོས་དབྱིངས་ཡེ་ཤེས་དང་། །སྐུ་མདོག་དཀར་གསལ་འཁོར་ལོ་ཚེ་བུམ་འཛིན། །སྐལ་ལྡན་བུ་ཡི་སྤྱི་བོར་ཞུགས་ཐིམ་ནས། །མི་འགྱུར་གཡུ་དྲུང་ལྟ་བུའི་སྐུ་ཐོབ་ཤོག །ཨོཾ་བུདྡྷ་ཨ་ཡུ་ཥེ་ཨ་བྷི་

[Full Size]

ཥཱིཉྩ་ཨོཾ། ཞེས་སྤྱི་བོར་བསྐུར།། ༈ །།དེ་ནས་པདྨ་ཚེ་དཔག་མེད་ཀྱི་སྐུ་དང་ནུབ་ཀྱི་བུམ་པ་འཐོགས་ལ། ཧྲཱིཿ གསུང་སྤྲུལ་སྣང་བ་མཐའ་ཡས་ཚེ་དཔག་མེད། །འདོད་ཆགས་མ་སྤངས་སོར་རྟོག་ཡེ་ཤེས་ངང་། །སྐུ་མདོག་དམར་གསལ་པདྨ་ཚེ་བུམ་འཛིན། །སྐལ་ལྡན་བུ་ཡི་མགྲིན་པར་ཞུགས་ཐིམ་ནས། །གྲགས་སྟོང་ཚངས་དབྱངས་ལྟ་བུའི་དབང་ཐོབ་ཤོག །ཧྲཱིཿཔདྨ་ཨཱ་ཡུ་ཥེ་ཨ་བྷི་ཥཱིཉྩ་ཧྲཱིཿ ཞེས་མགྲིན་པར་བསྐུར་རོ། །བཛྲ་ཚེ་དཔག་མེད་ཀྱི་སྐུ་དང་ཤར་བུམ་འཐོགས་ལ། ཧྲཱིཿ ཐུགས་སྤྲུལ་རྡོ་རྗེ་སེམས་དཔའ་ཚེ་དཔག་མེད། །ཞེ་སྡང་མ་སྤངས་མེ་ལོང་ཡེ་ཤེས་ངང་། །སྐུ་མདོག་མཐིང་གསལ་རྡོ་རྗེ་ཚེ་བུམ་འཛིན། །སྐལ་ལྡན་བུ་ཡིས་སྙིང་གར་ཞུགས་ཐིམ་པས། །མི་ཤིག་རྡོ་རྗེ་ལྟ་བུའི་དབང་ཐོབ་ཤོག །ཧཱུྃ་བཛྲ་ཨཱ་ཡུ་ཥེ་ཨ་བྷི་ཥཱིཉྩ་ཧཱུྃ། ཞེས། སྙིང་གར་སྦྱར་རོ། །རཏྣ་ཚེ་དཔག་མེད་ཀྱི་སྐུ་དང་ལྷོ་བུམ་འཐོགས་ལ། ཧྲཱིཿ ཡོན་ཏན་སྤྲུལ་པ་རིན་

[Full Size]

འབྱུང་ཚེ་དཔག་མེད། །ང་རྒྱལ་མ་སྤངས་མཉམ་ཉིད་ཡེ་ཤེས་ངང་། །སྐུ་མདོག་སེར་གསལ་རིན་ཆེན་ཚེ་བུམ་འཛིན། །སྐལ་ལྡན་བུ་ཡི་ལྟེ་བར་ཞུགས་ཐིམ་ནས། །མི་ནུབ་རྒྱལ་མཚན་ལྟ་བུའི་དབང་ཐོབ་ཤོག །ཏྲྃ་རཏྣ་ཨ་ཡུ་ཥེ་ཨ་བྷི་ཥཱིཉྩ་ཏྲྃ། ཞེས། ལྟེ་བར་བསྐུར་རོ། །ཀརྨ་ཚེ་དཔག་མེད་ཀྱི་སྐུ་དང་བྱང་བུམ་འཐོགས་ལ། ཧྲཱིཿ ཕྲིན་ལས་སྤྲུལ་པ་དོན་གྲུབ་ཚེ་དཔག་མེད། །ཕྲག་དོག་མ་སྤངས་བྱ་གྲུབ་ཡེ་ཤེས་དང་། །སྐུ་མདོག་ལྗང་གསལ་རྒྱ་གྲམ་ཚེ་བུམ་འཛིན། །སྐལ་ལྡན་བུ་ཡི་གསང་བར་ཞུགས་ཐིམ་ནས། །ཕྲིན་ལས་འགྲོ་འདུལ་ཚེ་ཡི་དབང་ཐོབ་ཤོག །ཨཿཀརྨ་ཨ་ཡུ་ཥེ་ཨ་བྷི་ཥཱིཉྩ་ཨཿ ཞེས་གསང་གནས་སུ་བསྐུར་རོ། །འདི་ལ་སྔ་གོང་དུ་དབུས་ཀྱི་གཙོ་བོ་དང་ནུབ་ཀྱི་གཙོ་བོ་བཞུགས་པ་གོ་བརྗེས་པ་དང་འདིར་མ་བརྗེས་པ་དང་ཐ་དད་པར་བྱུང་བ་འགལ་བར་མི་ལྟ་སྟེ། གོང་མ་ནི་དཀྱིལ་འཁོར་རིགས་གང་གཙོའི་ཁྱད་དོན་ཡིན་ཞིང་། སྐབས་འདིར་ནི་སྤྱི་འགྲོ་ལྟར་གྱི་སྐུ་ལྔ་ཡེ་ཤེས་

[Full Size]

ལྔའི་དག་སྦྱོར་ཡིན་པའི་གནད་དེ།། ༈ །།དེ་ནས་ཡུམ་ལྔའི་སྐུ་འཐོགས་ལ། དེ་ནས་ཡང་དཀྱིལ་འཁོར་ནས་རིགས་ཀྱི་ཡུམ་མཆོག་ལྔས་རང་འདྲའི་སྐུ་རེ་སྤྲོས་ཏེ་ཁྱེད་ཅག་ལ་ཐིམ་པས། འབྱུང་ལྔ་ཁམས་ལྔ་དབང་ཤེས་ལྔའི་འཛིན་རྟོགས་གནས་སུ་དག་ནས་གསལ་སྟོང་འཛིན་མེད་ཀྱི་དོན་མངོན་དུ་གྱུར་པའི་ངེས་ཤེས་མཛད་པར་ཞུ། ཧྲཱིཿ སྐལ་ལྡན་ལས་ཅན་རིགས་ཀྱི་བུ་རྣམས་ལ། །གོས་དཀར་སྤྱན་མ་མཱ་ཀི་དབྱིངས་ཕྱུག་སྒྲོལ། །ཚེ་ཡི་ཡུམ་མཆོག་ལྔ་ཡིས་དབང་བསྐུར་བས། །གཟུགས་སྒྲ་དྲི་རོ་རེག་བྱ་རང་བཞིན་བྲམ། །འཆི་མེད་གསལ་སྟོང་འཛིན་མེད་དབང་ཐོབ་ཤོག །མུྃ་ལྃ་མྃ་པྱྃ་ཏཱྃ་ཨ་ཡུ་ཥེ་ཨ་བྷི་ཥཱིཉྩ་ཧཱུྃ། ཞེས་སྤྱི་བོར་བསྐུར་རོ། །དེ་ནས་རིགས་བཞི་པོའི་སྐུ་འཐོགས་ལ་ཡང་དཀྱིལ་འཁོར་ཕྱོགས་བཞི་ནས་སྤྲུལ་པ་རྣམ་པ་བཞི་ལས་སོ་སོ་རང་འདྲའི་སྐུ་འཕྲོས་ནས་ཁྱེད་རང་རྣམས་ལ་ཐིམ་པས་མ་རིག་ལས་

[Full Size]

ཉོན་གྱི་སྒྲིབ་ཚོགས་དག་ནས། འཇམ་དབྱངས་ཀྱི་མཁྱེན་རབ། སྤྱན་རས་གཟིགས་ཀྱི་ཐུགས་རྗེ། །ཕྱག་རྡོར་གྱི་མཐུ་སྟོབས་པད་འབྱུང་གི་བྱིན་རླབས་ནུས་པ་ཐམས་ཅད་ཁྱེད་རང་རྣམས་ཀྱི་རྒྱུད་ལ་འཇགས་པའི་མོས་པ་གནང་འཚལ། ཧྲཱིཿ སྐལ་ལྡན་ལས་ཅན་རིགས་ཀྱི་བུ་རྣམས་ལ། །འཇམ་དབྱངས་སྤྱན་གཟིགས་ཕྱག་རྡོར་པད་འབྱུང་གི། །མཁྱེན་བརྩེ་ནུས་པ་བྱིན་རླབས་ཀུན་ཞུགས་ནས། །འགྲོ་དོན་ཐོག་མེད་སྲིད་གསུམ་ཟིལ་གྱིས་གནོན། །སྐྱེ་འཆི་མེད་པ་ཚེ་ཡི་དབང་ཐོབ་ཤོག །དྷཱིཿཧྲཱིཿཧཱུྃ་ཨཿ ཨ་ཡུ་ཥེ་ཨ་བྷི་ཥཱིཉྩ་ཧཱུྃཧཱུྃ། ཞེས། སྤྱིར་བོ་ཐོགས་གསུམ་དུ་བསྐུར་རོ། །ལྷ་མོ་བཞིའི་སྐུ་ཐོགས་ལ། ཡང་དཀྱིལ་འཁོར་གྱི་མཚམས་བཞི་ནས་ཚེའི་ལས་བྱེད་ཀྱི་ལྷ་མོ་མགྱོགས་བྱེད་བཞི་ལས་རང་འདྲའི་སྐུ་འཕྲོས་ཏེ་ཁྱེད་ཅག་ལ་ཐིམ་པས། རྟགས་ཆད་མུ་བཞི་གནས་སུ་དག་ནས་དགའ་བཞིའི་ཡེ་ཤེས་མངོན་དུ་གྱུར་པའི་

[Full Size]

མོས་པ་མཛོད། ཧྲཱིཿ སྐལ་ལྡན་ལས་ཅན་རིགས་ཀྱི་བུ་རྣམས་ལ། ལྷ་མོ་མགྱོགས་མ་བཞི་ཡི་དབང་བསྐུར་བས། པུཥྤེ་དྷུ་པེ་ཨ་ལོ་ཀེ་གནྡྷེ་མས། །དབང་བསྐུར་བྱིན་རླབས་རྟག་ཆད་གཉིས་འཛིན་བྲལ། །ཨ་འཐས་འཁྲུལ་པ་ཀ་ནས་དག་པར་ཤོག །པུཥྤེ་དྷུ་པེ་ཨ་ལོ་ཀེ་གནྡྷེ་ཨ་བྷི་ཥཱིཉྩ་ཧཱུྃ། ཞེས་སྤྱི་བོའམ་སྙིང་གར་བསྐུར་རོ། །སྒོ་བ་ཡབ་ཡུམ་བརྒྱད་ཀྱི་སྐུ་འཐོགས་ལ། དེ་ནས་ཡང་དཀྱིལ་འཁོར་གྱི་སྒོ་བཞི་ནས་སྒོ་བ་ཡབ་ཡུམ་རྣམས་ལས་རང་འདྲའི་སྐུ་འཕྲོས་ནས་ཁྱེད་རང་རྣམས་ལ་ཐིམ་པས། བདག་གཞན་ཆགས་སྡང་གི་རྟོགས་ཚོགས་དབྱིངས་སུ་གྲོལ་ཞིང་སྐྱེ་བ་རྣམ་བཞི་རྒྱུན་ཆོད་དེ། ཚད་མེད་རྣམ་བཞིས་འགྲོ་དོན་འགྲུབ་པའི་ནུས་ལྡན་དུ་ངེས་ཤེས་མཛད་པར་ཞུ། ཧྲཱིཿ སྐལ་ལྡན་ལས་ཅན་རིགས་ཀྱི་བུ་རྣམས་ལ། །རྣམ་རྒྱལ་གཤིན་རྗེ་རྟ་མགྲིན་

[Full Size]

བདུད་རྩི་འཁྱིལ། །ལྕགས་ཀྱུ་ཞགས་པ་ལྕགས་སྒྲོག་དྲིལ་འཁྲོལ་མ། །སྒོ་བ་ཡབ་ཡུམ་བརྒྱད་ཀྱི་དབང་བསྐུར་བས། །སྐྱེ་བ་རྣམ་བཞི་ལེན་པའི་སྒོ་ཆོད་ཅིག །ཧཱུྃ་ཧཱུྃ་ཧཱུྃ་ཧཱུྃ་ཛཿཧཱུྃ་བྃ་ཧོ། ཨ་བྷི་ཥཱིཉྩ་ཧཱུྃ། ཞེས་སྤྱི་བོའམ་ཡན་ལག་བཞི་པ་བསྐུར་རོ། །དེ་ལྟར་ལྷ་སྐུ་ཕྱག་རྒྱའི་དབང་གིས་ལུས་ཕུང་ཁམས་སྐྱེ་མཆེད་ལྷའི་རང་བཞིན་དུ་བྱིན་རླབས་ནས། དེ་ནས་གསང་སྔགས་ཀྱི་རང་བཞིན་དུ་བྱས་པའི་ཕྱིར་བླ་མ་ཚེ་དཔག་མེད་པ་དངོས་སུ་མོས་པའི་ལྗགས་ཀྱི་འོད་ཟེར་གཟུངས་སྔགས་ཡིག་འབྲུའི་ཚོགས་པདྨ་རྭ་གའི་ཕྲེང་བ་ལྟ་བུ་འཕྲོས་པ་ཁྱེད་རང་རྣམས་ཀྱི་ལྕེ་ལ་ཐིམ་པ་ཙམ་གྱིས། ངག་གི་སྒྲིབ་པ་དང་ཉེས་ཚོགས་མ་ལུས་པ་བྱང་ཞིང་དག་ནས། དབུགས་འབྱིན་འཇུག་གནས་གསུམ་དང་ངག་གི་སྨྲ་བརྗོད་ཐམས་ཅད་སྔགས་ཀྱི་རང་བཞིན་འབའ་ཞིག་ཏུ་རྒྱས་ཐེབ་པར་གྱུར་པའི་མོས་པ་མཛད་པར་ཞུ། ཚེ་གཟུངས་ཀྱི་སྔགས་བྱང་དང་འཕྲེང་བ་འཐོགས་ལ། ཧྲཱིཿ སྐལ་ལྡན་

[Full Size]

ལས་ཅན་རིགས་ཀྱི་བུ་རྣམས་ལ། །གཟུངས་སྔགས་རྒྱལ་པོ་གསང་བའི་ཡང་སྙིང་འདི། །སྔགས་དབང་ངག་ལ་བསྐུར་བས་ངག་སྒྲིབ་དག །གྲགས་སྟོང་ཆུ་བོའི་རྒྱུན་ལྟར་བཟླ་བར་གྱིས། །ནུས་ལྡན་རྡོ་རྗེའི་སྔགས་ཀྱི་དབང་ཐོབ་ཤོག །ཨོཾ་ཨ་མཱ་ར་ཎི་ཛི་ཝནྟི་ཡེ་སྭཱ་ཧཱ། ཞེས་པའི་གཟུངས་ཐུང་དང་འཆི་མེད་རྔ་སྒྲའི་གཟུངས་རིང་སོགས་ཀྱི་བཟླས་ལུང་བྱིན་ཞིང་། །དབང་རྫས་མགྲིན་པར་བཞག་ཅིང་དབང་བསྐུར་རོ། །དེ་ལྟར་སྔགས་དབང་ངག་ལ་བསྐུར་བས་ངག་རྒྱལ་བའི་གསུང་གི་འཁོར་ལོར་བྱིན་རླབས་ནས། ད་ནི་རིག་པ་རྩལ་གྱི་དབང་སེམས་ལ་བསྐུར་ཕྱིར་དབྱིངས་སྟོང་པ་ཉིད་མཚོན་པའི་མེ་ལོང་གཡའ་བྲལ་ལ་གསལ་མདངས་འགགས་མེད་མཚོན་པའི་རྨ་བྱའི་མདོང་འོད་ཤར་བ་སྣང་སྟོང་ཟུང་འཇུག་གི་བརྡ་དོན་གྱི་དབང་བསྐུར་བས། དབྱིངས་རིག་དབྱེར་མེད་འོད་གསལ་འདུས་མ་བྱས་པའི་དོན་མངོན་དུ་གྱུར་པའི་ངེས་ཤེས་

[Full Size]

མཛོད་ཅིག །མེ་ལོང་རྨ་བྱའི་མདོངས་འཐོགས་ལ། ཧྲཱིཿ སྐལ་ལྡན་ལས་ཅན་རིགས་ཀྱི་བུ་རྣམས་ལ། །རང་གསལ་རང་འོད་རྨ་བྱའི་མདོངས་འོད་འདི། །ཁྱེད་ལ་བསྟན་པས་གཉིས་འཛིན་དབྱིངས་སུ་དག །བསྒོམ་བྱ་སྒོམ་བྱེད་མཐོང་མཁན་སེམས་སུ་གྲོལ། །དབྱིངས་རིག་གཉིས་སུ་མེད་པའི་དབང་ཐོབ་ཤོག །བོ་དྷི་ཙིཏྟ་ཨ་བྷི་ཥཱིཉྩ་ཧཱུྃ། ཞེས་བསྟན་ཅིང་སྙིང་གར་བཏུག་གོ། །དེ་ནས་སླར་ཡང་དབང་དོན་ངོ་སྤྲད་དོ། །འོ་སྐལ་བ་དང་ལྡན་པ་རིགས་ཀྱི་བུ་རྣམས་ནམ་མཁའ་དྲི་མ་མེད་པའི་མཐའ་དབུས་ལ་ལྟོས་དང་། སེམས་ཉིད་མཐའ་དབུས་བྲལ་བ་ནམ་མཁའ་ལྟ་བུར་ཤེས་པར་གྱིས་ཤིག །ཤར་ལྷོ་ནུབ་བྱང་ལ་འགྱུ་བ་གང་ཤར་ཐོང་དང་། བཏང་མཁན་དང་འགྱུ་མཁན་ཐ་དད་མེད་པའི་འཚང་རིགས་པར་གྱིས་ཤིག །ཕྱག་མཚན་རྡོ་རྗེ་བསྟན་ནས། རྡོ་རྗེ་འདི་ལ་ལྟ་མཁན་གང་ཡིན་པ་རྟོགས་ཅིག །གཟུགས་སྣང་ལམ་མེ་བའི་ཤེས་པ་ཉིད་ལས་གཞན་པའི་བལྟ་བྱ་བལྟ་

[Full Size]

བྱེད་མེད་དོ། །དྲིལ་བུ་སིལ་ལ། དྲིལ་བུའི་སྒྲ་འདི་གང་ནས་བྱུང་། གང་དུ་ཐིམ། མཐའ་རྗེས་ཆོད་དང་། སེམས་ཉིད་འགག་མེད་ཀྱི་རྩལ་མདངས་དྲིལ་བུའི་སྒྲར་ཤར་བ་ཉིད་ལས་གཞན་མ་ཡིན་ནོ། །དེས་ན་འཁོར་འདས་ཀྱི་ཆོས་ཐམས་ཅད་རང་རིག་ཆོས་ཀྱི་སྐུ་ཐིག་ལེ་ཉག་གཅིག་ཡེ་ཐོག་དང་པོའི་ཤེས་པ་བཟོ་བཅོས་མ་བྱས་པ་འདི་ཀ་འཆི་མེད་རྡོ་རྗེ་མགོན་པོ་ཚེ་དཔག་མེད་པ་མངོན་སུམ་དུ་གཏན་ལ་ཕབ་པ་ཡིན་པས་ན། ཡིན་ལུགས་ངོ་ཤེས་པར་གྱིས་ཅིག །དེའི་རང་བཞིན་རང་མདངས་གསལ་ཆ་མ་འགགས་པ་འོད་ལྔར་ཤར་བ་ནི་འཆི་མེད་རྒྱལ་བ་རིགས་ལྔའོ། །དེའི་རང་རྩལ་ཡུམ་ལྔ་འབྱུང་བ་ལྔའོ། །དེའི་རིགས་རྩལ་གྱི་རྣམ་པར་འཕྲུལ་པ་རིགས་གསུམ་མགོན་པོ་དང་གུ་རུ་པདྨ། སྣང་ཆའི་བྱེ་བྲག་ཀུན་བརྟག་ཙམ་དུ་མགྱོགས་མ་བཞི། དྲན་པའི་སོ་མ་ཉམས་པ་ནི་སྒོ་བ་ཡབ་ཡུམ་

[Full Size]

བརྒྱད་དེ། དེ་ཐམས་ཅད་དཀྱིལ་འཁོར་གྱི་འཁོར་ལོ་གཅིག་ཏུ་ལྷུན་གྱིས་གྲུབ་པའི་རང་སེམས་གཅིག་ཆར་འདི་ཁོ་ན་ལ་སངས་རྒྱས་སྣང་བ་མཐའ་ཡས་ཞེས་མིང་ཙམ་བརྡ་ཙམ་དུ་བཏགས་སོ། །སྣང་བ་མཐའ་ཡས་ཞེས་པའི་དོན་ཡང་། སྣང་བའི་ངོ་བོ་ནི་སྟོང་པ་ཉིད་ཡིན་ལ། སྟོང་པའི་རང་མདངས་སྣང་བ་ཡིན་ཏེ། སྣང་སྟོང་གཉིས་ཐ་དད་ཀྱང་མ་ཡིན་གཅིག་ཏུའང་མ་གྲུབ་ཅིང་སྣང་ལ་ཨ་འཐས་སུ་མི་འཛིན་པའི་རང་ངོ་རིག་པ་ལ་སངས་རྒྱས་ཞེས་ཀྱང་བྱ། ཆོས་སྐུ་ཞེས་ཀྱང་བྱ། སྣང་བ་མཐའ་ཡས་ཞེས་ཀྱང་བྱ་བ་ཡིན་ལ། དེ་ལྟར་རྟོགས་ཚེ་སྐྱེ་འཆི་ཡེ་ནས་མ་བྱུང་མ་སྐྱེས་པའི་ཕྱིར་སངས་རྒྱས་ཚེ་དཔག་ཏུ་མེད་པ་ཅེས་པའི་དོན་གྱི་ངོ་བོ་ནི་དེ་ཡིན་ནོ། །དབང་ཐམས་ཅད་ཀྱི་སྙིང་པོ་རིག་པ་རྩལ་གྱི་དབང་ཡང་འདི་ཡིན་ནོ། །འདི་ལྟ་བུའི་དོན་སེམས་ལ་ཤར་ན་གསང་སྔགས་ཀྱི་དབང་ཐམས་ཅད་གཅིག་རྫོགས་སུ་ཐོབ་པའི་ཕྱིར་ཚིག་དབང་རིན་པོ་ཆེ་མཐར་ཐུག་དོན་གྱི་ཡང་བཅུད་

[Full Size]

འདི་ཡིན་པས་དེ་ལྟར་ཤེས་པར་མཛོད་ཅིག །དེ་ནས་རྗེས་མཐའ་རྟེན་གྱི་དབང་བསྐུར་བའི་དང་པོ་བུམ་པ་ལྔ་པོའི་དབུས་ཀྱི་གཙོ་བུམ་འཐོགས་ནས། དེ་ལྟར་བཅོམ་ལྡན་འདས་ཚེ་དཔག་མེད་ཀྱི་རྩ་བའི་དབང་བསྐུར་མ་ལུས་ཡོངས་རྫོགས་སུ་གྲུབ་ནས། ད་ནི་རྗེས་མཐའ་རྟེན་ཡན་ལག་གི་དབང་རྣམས་འབུལ་བ་ལ། ཐོག་མར་བུམ་པའི་ཡོན་ཏན་གྱི་ཆ་ཤས་དང་བུམ་རྫས་ཐ་དད་པའི་ནུས་པ་མཐའ་དག་བསྐུར་ཚིག་དང་མཐུན་པའི་བྱིན་རླབས་དང་ཡོན་ཏན་ཁྱེད་རང་རྣམས་ཀྱི་རྒྱུད་ལ་སྐྱེས་ཤིང་སྨིན་པའི་ངེས་ཤེས་མཛད་པར་ཞུ། ཧྲཱིཿ ལས་ཅན་སྐལ་ལྡན་རིགས་ཀྱི་བུ་རྣམས་ལ། །བུམ་པ་དཀར་སེར་དམར་ལྗང་མཐིང་འོད་འབར། །ངོ་བོ་ལྷ་ལ་རྣམ་པ་བུམ་པའི་ཚུལ། །གསལ་སྟོང་གཉིས་མེད་བདུད་རྩིའི་ཆུ་ཡིས་བཀངས། །བཀྲ་ཤིས་རིན་ཆེན་བུམ་ལྔས་དབང་བསྐུར་བས། །དྲི་ཞིམ་སྤོས་ཀྱིས་ཚད་པའི་གདུང་སེལ་

[Full Size]

ལྟར། །ཚད་མེད་བཞི་ལྡན་ཟག་མེད་བདུད་རྩི་ལྔས། །ཉོན་མོངས་དུག་ལྔའི་སྡུག་བསྔལ་སེལ་བར་ཤོག །ཨོཾ་བྷྲུྃ་ཏྲྃ་ཧྲཱིཿཨཿ ཨ་བྷི་ཥཱིཉྩ་ཧཱུྃ། ཞེས་སྤྱོ་བོར་བསྐུར་བའི་མཐར། སྐལ་ལྡན་རྣམས་ལ་དབུས་ཀྱི་བདུད་རྩི་ལྔའི་བུམ་པས་དབང་བསྐུར་བས་ཉོན་མོངས་པ་དུག་ལྔ་རང་སར་གྲོལ་བའི་དབང་ཐོབ་པར་གྱུར་ཅིག ཤར་བུམ་འཐོགས་ལ། ཧྲཱིཿ སྨན་མཆོག་དབང་ལག་ཏུ་ཏ་སླེ་ཏྲེས་དང་། །ཤུ་དག་དཀར་པོ་ཀཎྜ་ཀཱ་རི་ལྔས། །རླུང་མཁྲིས་བད་ཀན་འདུས་འཁྲུག་ནད་རྣམས་སེལ། །ནད་འཇོམས་ཆོས་ཉིད་རབ་ཏུ་བསྟེན་པར་ཤོག །བྷཻ་ཥ་ཛྱ་ཨ་བྷི་ཥཱིཉྩ་ཧཱུྃ། ཞེས་བསྐུར་ལ། སྐལ་ལྡན་རྣམས་ལ་སྨན་ལྔའི་བུམ་པས་དབང་བསྐུར་བས་བཞི་བརྒྱ་རྩ་བཞི་རྒྱུ་འབྲས་ཀྱི་ནད་ཀུན་ཞི་བའི་དབང་ཐོབ་པར་གྱུར་ཅིག །ལྷོ་ནུབ་འཐོགས་ལ། ཧྲཱིཿ གསེར་དངུལ་མུ་ཏིག་མུ་མེན་བྱུ་རུ་ལྔ། །ཡིད་བཞིན་ནོར་བུས་རེ་བ་ཀུན་བསྐོངས་

[Full Size]

ལྟར། འགྲོ་དོན་བསམ་པ་ཡིད་བཞིན་འགྲུབ་པ་དང་། །ཡོན་ཏན་རེ་བ་སྐོང་བའི་དབང་ཐོབ་ཤོག །རཏྣ་སརྦ་ཨ་བྷི་ཥཱིཉྩ་ཧཱུྃ། སྐལ་ལྡན་རྣམས་ལ་རིན་ཆེན་ལྔའི་བུམ་པས་དབང་བསྐུར་བས་འགྲོ་བའི་འདོད་དགུ་ཡིད་བཞིན་དུ་སྩོལ་བའི་དབང་ཐོབ་པར་གྱུར་ཅིག །ནུབ་བུམ་འཐོགས་ལ། ཧྲཱིཿ དྲི་མཆོག་ཛ་ཏི་ཙནྡ་དཀར་དམར་དང་། །ག་བུར་གུར་ཀུམ་དྲི་ལྔས་དབང་བསྐུར་བས། །མ་རིག་ལས་ངན་སྡུག་བསྔལ་དག་གྱུར་ཅིང་། །ཞི་རྒྱས་དབང་དྲག་ཕྲིན་ལས་ཀུན་འགྲུབ་ཤོག །ཤིནྟཾ་པུཥྚཾ་ཝཤཾ་མཱ་ར་ཡ་ཨ་ཥཱིཉྩ་ཧཱུྃ། སྐལ་ལྡན་རྣམས་ལ་དྲི་ལྔའི་བུམ་པས་དབང་བསྐུར་བས། ཚུལ་ཁྲིམས་རྣམ་པར་དག་པའི་དབང་ཐོབ་པར་གྱུར་ཅིག །བྱང་བུམ་འཐོགས་ལ། ཧྲཱིཿ འབྲུ་སྣ་ནས་འབྲས་གྲོ་ཏིལ་མོན་སྲན་ལྔ། །ཀ་ར་སྦྱང་རྩི་འོ་མ་ཞོ་དང་མར། །འབྲུ་སྣ་སྙིང་པོ་ལྔ་ཡི་དབང་བསྐུར་བས། །དགེ་བཅུ་ལྷུན་གྱིས་གྲུབ་པའི་དབང་

[Full Size]

ཐོབ་ཤོག །ཧྲྀ་ད་ཡ་སརྦ་ཨ་བྷི་ཥཱིཉྩ་ཧཱུྃ། སྐལ་ལྡན་རྣམས་ལ་འབྲུ་ལྔ་སྙིང་པོ་ལྔའི་བུམ་པས་དབང་བསྐུར་བས། འགྲོ་བའི་དབུལ་བ་སེལ་བའི་དབང་ཐོབ་པར་གྱུར་ཅིག །ཞེས་བསྐུར་ནས། སླར་ཡང་གཙོ་བུམ་འཐོགས་ནས། ཧྲཱིཿ མགུལ་ཆིངས་ཅོད་པན་དར་སྣ་ལྔ་ཡི་དབང་། །ཉོན་མོངས་དུག་ལྔ་ཡེ་ཤེས་ལྔ་རུ་གྱུར། །ཞིང་ཁམས་ལྔ་རྫོགས་ཡོན་ཏན་ལྔ་དང་ལྡན། ཁམས་གསུམ་དབང་དུ་འདུ་བའི་དབང་ཐོབ་ཤོག །ཝ་ཤམ་ཀུ་རུ་ཨ་བྷི་ཥཱིཉྩ་ཧཱུྃ། ཧྲཱིཿ ཁ་བརྒྱན་འབྲས་བུ་དཔག་བསམ་ཤིང་གི་དབང་། །ཡིད་བཞིན་ནོར་བུ་ལྟ་བུར་རེ་འདོད་སྐོང་། །འགྲོ་དོན་ཐོག་མེད་དགོས་འདོད་ལྷུན་གྱིས་གྲུབ། ཁམས་གསུམ་འགྲོ་ཀུན་སྨིན་ཅིང་གྲོལ་བར་ཤོག །ཨོཾ་ཨཱཿཧཱུྃ་ཨ་བྷི་ཥཱིཉྩ་ཛཿཧཱུྃ་བྃ་ཧོ། ཞེས་བསྐུར་ཞིང་བུམ་པ་བཞི་པོའི་ཆུ་གཙོ་བུམ་དུ་ཅུང་ཟད་རེ་བསྡོངས་ནས་སློབ་མ་ལ་བྱིན་ནོ།། ༈ །།དེ་ནས་ཚེ་རིལ་སྦྱིན་ཞིང་། ཧྲཱིཿ ཕྱི་ནང་དམ་རྫས་བདུད་རྩི་སྨན་ལས་གྲུབ། །རིལ་

[Full Size]

བུ་འདི་ཉིད་ཟོས་པས་མྱོང་གྲོལ་མཆོག །ཕྱི་ཡི་གདོན་ཞི་ནང་གི་ནད་རྣམས་སེལ། །ཐེ་ཚོམ་ཡིད་གཉིས་མེད་པར་ལོངས་སྤྱོད་ཅིག །ཨོཾ་བཛྲ་ཨཱ་ཡུ་ཥེ་སྭཱ་ཧཱ། ཚེ་ཆང་སྦྱིན་ལ། ཧྲཱིཿ རྩ་བརྒྱད་སྟོང་སྦྱར་བདུད་རྩི་ཨ་མྲྀ་ཏ། བཅོམ་ལྡན་ཡབ་ཡུམ་བྱང་སེམས་འདི་ཐུངས་པས། །སྟོང་ཕྲག་བདུན་ཅུ་རྩ་གཉིས་རྩ་འདབ་གྲོལ། །རླུང་སེམས་དབུ་མའི་ཀློང་དུ་གྲོལ་བར་ཤོག །ཨོཾ་ཨ་མྲྀ་ཏ་ཨཱ་ཡུ་ཥེ་སྭཱ་ཧཱ། དངོས་གྲུབ་ཀྱིས་ཟས་སྣ་སྣ་ཚོགས་ལག་ཏུ་གཏད་ནས། ཧྲཱིཿ ཡི་གེ་བྷྲུྃ་ལས་འདོད་ཡོན་བསམ་མི་ཁྱབ། །རོ་མཆོག་བཅུད་ལྡན་གཟའ་བཏུང་ལོངས་སྤྱོད་འདི། །ཅི་བསམ་ལྷུན་གྲུབ་འདོད་དགུའི་རེ་བ་སྐོངས། །མི་ཟད་ནམ་མཁའི་མཛོད་ལ་དབང་ཐོབ་ཤོག །ཨོཾ་བཛྲ་བྷྲུྃ་ཨ་ཡུ་ཥེ་སྭཱ་ཧཱ། དར་ཟབ་གོས་ཀྱི་རིགས་སྣ་ཚོགས་གཏད་ལ། ཧྲཱིཿ རེག་འཇམ་སྣ་ཚོགས་ལྷ་ཡིས་ན་བཟའ་འདི། །བསོད་ནམས་ལས་གྲུབ་ཕྱྭ་གཡང་བྱིན་འོད་

[Full Size]

ལྡན། །སྐྱེ་བ་འདི་དང་ཚེ་རབ་ཀུན་ཏུ་ཡང་། །ཚ་གྲང་སྐྱོབ་བྱེད་ན་བཟའི་དབང་ཐོབ་ཤོག །ཨོཾ་བཛྲ་སྤརྴེ་ཨཱ་ཡུ་ཥེ་ཨཱཿཧཱུྃ། བཀྲ་ཤིས་པའི་རྟགས་བརྒྱད་རྣམས་ལུས་ཀྱི་གནས་སོ་སོར་བཏུག་ཅིང་རྒྱས་བཏབ་ལ། ཧྲཱིཿ སྐལ་ལྡན་བུ་ལ་རྟགས་བརྒྱད་དབང་བསྐུར་བས། །དབུ་ལ་བཀྲ་ཤིས་གདུགས་ཀྱི་ཚ་གདུང་སྐྱོབ། །སྐུ་ལ་བཀྲ་ཤིས་མི་ནུབ་རྒྱལ་མཚན་འབར། །གསུང་ལ་བཀྲ་ཤིས་དུང་དཀར་གཡས་སུ་འཁྱིལ། །ཐུགས་ལ་བཀྲ་ཤིས་དཔལ་གྱི་བེའུ་བཀྲ། །ལྗགས་ལ་བཀྲ་ཤིས་པདྨོ་ལོ་འདབ་རྒྱས། །སྤྱན་ལ་བཀྲ་ཤིས་གསེར་ཉ་འོད་ཟེར་འཁྲུག །མགུལ་ལ་བཀྲ་ཤིས་རིན་ཆེན་བུམ་པ་ལྡིར། །ཕྱག་ཞབས་བཀྲ་ཤིས་འཁོར་ལོ་རྩིབས་སྟོང་བསྐོར། །རྟགས་བརྒྱད་བཀྲ་ཤིས་དབང་མཆོག་ཐོབ་པར་ཤོག །ཨོཾ་བཛྲ་ཨཱ་ཡུ་ཥེ་ཨཥྚ་མཾ་ག་ལ་ཨ་བྷི་ཥཱིཉྩ་ཧཱུྃ། ཞེས་བསྐུར་ཞིང་། ཚེའི་སྒྲུབ་ཆེན་སོགས་ཤིན་ཏུ་རྒྱས་པར་སྤྲོ་ན་སྐབས་འདིར་ཞི་ཁྲོ་ངེས་དོན་ནས་འབྱུང་བ་ལྟར་བཀྲ་ཤིས་པའི་རྫས་བརྒྱད་དང་རྒྱལ་སྲིད་རིན་ཆེན་བདུན་གྱིས་དབང་རྣམས་ཀྱང་

[Full Size]

བྱའོ། །དེ་ནས་སློབ་མ་སྤྱི་ཙམ་ལ་ནི་འདི་ནས་དབང་ཞབས་བསྡུ་བ་རྒྱས་གདབ་དང་བཅས་པ་བྱ་ཞིང་། གལ་ཏེ་སློབ་མ་ཆོས་ཀྱི་རྒྱུན་འཛིན་གཞན་དོན་ནུས་པ་དག་ཡིན་ན་རྡོ་རྗེ་སློབ་དཔོན་དུ་མངའ་གསོལ་ཞིང་ཆོས་ཀྱི་གཉེར་གཏད་ཕྱིར། །སེང་གེའི་ཁྲི་ལ་སློབ་མ་དེ་ཉིད་བཞག་ཅིང་། སྟེང་ནས་གདུགས་དང་བླ་བྲེས་འབུབ་པ་དང་། ཡོལ་བ་དར་འཕན་རྒྱལ་མཚན་སོགས་བཀྲམ། དབང་ཞུ་འདབ་ལྡན་རིགས་ལྔ་དང་དབང་གོས་སོགས་གསོལ། རྡོར་དྲིལ་ལག་ཏུ་གཏད། སྤོས་སོགས་མཆོད་པ་དང་རོལ་མོ་སྣ་ཚོགས་བསྒྲག་ཅིང་། ཆོས་བཀའ་ཡོངས་རྫོགས་ཀྱི་གླེགས་བམ་ལག་ཏུ་གཏད་པ་དང་བཅས་པས་མངའ་གསོལ་ཞིང་། དཀྱིལ་འཁོར་གཙོ་བོའི་སྐྱེད་རིམ་གསལ་དུ་བཅུག་ལ། ཧྲཱིཿ རིགས་ཀྱི་བུ་ཁྱོད་མ་འོངས་དུས་སུ་ཡང་། །མཁའ་ཁྱབ་སྐྱེ་འགྲོ་ཡོངས་ལ་ཆོས་སྟོན་ཅིང་། །ཚེ་དཔག་མེད་པ་མངོན་སུམ་ལྷུན་གྱིས་གྲུབ། ཁམས་གསུམ་སྤྱི་དཔལ་རིགས་འདུས་དབང་ཐོབ་ཤོག །ཨོཾ་བཛྲ་ཨཱ་ཡུ་ཥེ་སརྦ་དྷརྨ་ཨ་བྷི་ཥཱིཉྩ་ཧཱུྃ། ཧྲཱིཿ གཞན་ཡང་འཁོར་འདས་སྣོད་བཅུད་འཁོར་ཡུག་ཏུ། །

[Full Size]

དེང་ནས་སྲིད་གསུམ་བདག་པོར་མངའ་གསོལ་གྱི། །དཀྱིལ་འཁོར་ཡོངས་རྫོགས་ལྷུན་གྱིས་གྲུབ་པ་ཡི། །ཕྱི་ནང་གསང་བའི་དབང་རྫོགས་ཐོབ་པར་ཤོག །སརྦ་ཝ་ཤཾ་ཀུ་རུ་ཨ་བྷི་ཥཱིཉྩ་ཧཱུྃ། ཞེས་ཆོས་བཀའ་གཏད་ཅིང་བཀྲ་ཤིས་རབ་གནས་ཀྱང་བྱའོ། །དེ་ལྟར་དབང་རྒྱས་བསྡུས་གང་ལྟར་བསྐུར་ཡང་མཇུག་སྡུད་མཐའ་རྟེན་དབང་ཞབས་བསྡུ་བ་ནི། གཙོ་བུམ། ཐོད་པ། གཏོར་མ་དང་གསུམ་པོ་མཁར་གཞོང་སོགས་སུ་གདན་དྲངས་པ་སློབ་མའི་གནས་གསུམ་དུ་བཞག་ཅིང་། ཧྲཱིཿ སྐལ་ལྡན་ལས་ཅན་རིགས་ཀྱི་བུ་རྣམས་ལ། །འདོད་ཡོན་རྨད་བྱུང་གཏོར་མའི་དབང་མཆོག་རྫས། །དཀྱིལ་འཁོར་ཡོངས་རྫོགས་བུམ་པ་ཀཱ་པ་ལ། །རྣམ་དག་གསང་བའི་དབང་མཆོག་འདི་བསྐུར་བས། །སྐྱེ་འཆི་གཉིས་མེད་རང་བཞིན་དབང་ཐོབ་ཤོག །ཨོཾ་ཨཱཿཧཱུྃ། ཀ་ཡ་ཝཀྩིཏྟ་ཨ་བྷི་ཛཿཧཱུྃ་བྃ་ཧོཿ ཞེས་དབང་བསྐུར་བའི་མཐར། འདི་ལྟར་ཡོངས་རྫོགས་མཐའ་རྟེན་གྱི་དབང་བསྐུར་བས་དབང་རྫས་

[Full Size]

རྣམས་ཀྱི་ལྷ་ཚོགས་འོད་དུ་ཞུ་ནས་ལྔ་ལྡན་ཐིག་ལེའི་རྣམ་པར་གྱུར་པ་ཁྱེད་རང་རྣམས་ཀྱི་གནས་གསུམ་དུ་ཐིམ་པས་ཚེ་དཔག་མེད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་གཟི་མདངས་ཚེ་དཔལ་མཁྱེན་རྩེ་ནུས་སྟོབས་སོགས་མཆོག་ཐུན་མོང་གི་དངོས་གྲུབ་མ་ལུས་རྩལ་སྤྲུགས་སུ་ཐོབ་པའི་ངེས་ཤེས་དང་མི་འབྲལ་བ་མཛད་འཚལ་ལོ། །དེ་ལྟར་དབང་རྣམས་རྫོགས་པའི་མཐར་འཆི་མེད་རྒྱས་གདབ་ཀྱི་རབ་གནས་བྱ་བ་ནི། སློབ་དཔོན་གྱིས་རྡོ་རྗེ་དྲིལ་བུ་དང་ལྷན་ཅིག་ཚེ་མདའ་དར་སྣ་དང་བླ་སྲོག་གི་རྟེན་རྫས་ཚང་བར་བཏགས་པ་འཐོགས་ནས་རྒྱས་འདེབས་ཀྱི་ཚིག་དང་མཐུན་པར་སློབ་མའི་སྤྱི་བོ་སོགས་ལུས་ཀྱི་གནས་རྣམས་སུ་ཁྱབ་པའི་ཚུལ་བྱ་ཞིང་། རོལ་མོ་དབྱངས་དང་ལྡན་པས་ཐོག་མར་རྒྱས་གདབ་པའི་དམིགས་པ་འདི་ལྟར་སྤྲད་དེ། དེ་ནས་ཁྱེད་རང་རྣམས་ཀྱི་ཚེ་དང་བླ་སྲོག་བཀྲག་མདངས་གཟི་བརྗིད་མཐུ་སྟོབས་དབང་ཐང་སོགས་བསྐྱེད་ཅིང་བསྟིམ་པ་དེ་དག་རྐྱེན་གྱིས་མི་འཇིག་ཅིང་

[Full Size]

མི་ཉམས་པར་བྱ་བའི་ཕྱིར་བྱིན་རླབས་འགྱུར་མེད་ཀྱི་རྒྱས་བཏབ་དགོས་པས་ན། འཆི་མེད་སྒྲུབ་པའི་གཏའ་རུ་བཟུང་བའི་རྟེན་འབྲེལ་རྫས་ཀྱི་ཚེ་མདའ་འདི་ལས་འོད་ཟེར་རྡོ་རྗེའི་ལུ་གུ་རྒྱུད་དུ་འཕྲོས་པ་ཁྱེད་རང་རྣམས་ལ་ཕོག་པས་ལུས་ཐམས་ཅད་ཡེ་ཤེས་ཀྱི་རྡོ་རྗེའི་གོ་ཁྲབ་ཀྱིས་བར་འཚམས་མེད་པར་གཡོགས་ཤིང་བཏམས་ཏེ། ཕྱི་ནང་གསང་བའི་བར་ཆད་འགལ་རྐྱེན་བར་ཆད་གང་གིས་ཀྱང་གླག་མི་སྙེད་པར་གྱུར་པའི་མོས་པ་གནང་བར་ཞུ། ཧྲཱིཿ དཀྱིལ་འཁོར་ཆེན་པོའི་ལྷ་ཚོགས་རྣམས། །ཕྱོགས་བཞི་མཚམས་བརྒྱད་རིས་མེད་ནས། །གང་གི་ཚེ་ཉམས་འདིར་བསྡུས་ཤིག །ཚེ་གཏའ་གཉན་པོ་མི་ལ་བསྟིམ། །མི་དང་ཚེ་གཉིས་མ་བྲལ་ཞིག །ཧྲཱིཿ སྔོན་དུས་བསྐལ་པའི་ཐོག་མ་ལ། །འོག་མིན་སྟུག་པོ་བཀོད་པ་རུ། །མགོན་པོ་འོད་མི་འགྱུར་བའི་ཚེ། །ཞིང་མཆོག་ཆོས་དབྱིངས་ཕོ་བྲང་ན། །

[Full Size]

དྲུག་པ་རྡོ་རྗེ་འཆང་གི་ཚེ། །ནུབ་ཕྱོགས་བདེ་ཆེན་ཕོ་བྲང་ན། །སངས་རྒྱས་སྣང་བ་མཐའ་ཡས་ཚེ། །ཤར་ཕྱོགས་རི་བོ་ཏཱ་ལ་ན། །འཕགས་པ་སྤྱན་རས་གཟིགས་ཀྱི་ཚེ། །སྤྲོས་པས་ཁམས་གསུམ་བཀྲག་མདངས་ལྡན། །བསྡུས་པས་ལུས་ལ་གཟི་མདངས་འབར། །བཅིངས་པས་རྡོ་རྗེའི་ལུ་གུ་རྒྱུད། །སྐལ་ལྡན་རྣམས་ལ་དངོས་གྲུབ་སྩོལ། །ཁྱེད་ཀྱི་ཐུགས་དམ་དུས་ལ་བབས། ཧྲཱིཿ དེ་ནས་བར་གྱི་བསྐལ་པ་ལ། །མ་ར་ཏི་ཀའི་ཡང་དབེན་དུ། །རིག་འཛིན་པདྨ་ཡབ་ཡུམ་ལ། །ཚེ་དཔག་མེད་པ་དངོས་སུ་བྱོན། །སྐྱེ་འཆི་མེད་པར་དབང་ཡང་བསྐུར། །བགྲེས་རྒུད་མེད་པའི་དངོས་གྲུབ་ཐོབ། །ཁྱེད་ཀྱི་ཐུགས་དམ་དུས་ལ་བབས། ཧྲཱིཿ མ་འོངས་བསྐལ་དུས་སྙིགས་མ་ལ། །ཀོང་ཡུལ་ལྗོན་པའི་ནགས་ཚལ་དུ། །སྔགས་འཆང་ཧྲཱུཾ་ནག་མེ་འབར་ལ། །བདག་འདྲ་པདྨས་བྱིན་གྱིས་རླབས། །འཆི་མེད་

[Full Size]

ཆོས་ཀྱི་དངོས་གྲུབ་ཐོབ། །ཁྱེད་ཀྱི་ཐུགས་དམ་དུས་ལ་བབས། །སྒྲུབ་མཆོག་ཚེ་ཡི་དངོས་གྲུབ་འདི། །འབྱུང་བ་ལྔ་ལ་སྦ་སྲིད་ན། །དེས་ཀྱང་མི་ཐུབ་ཨ་ཏིར་སྦ། །ཆོས་ཀྱི་དབྱིངས་སུ་ཚེ་སྦས་པས། །དུས་གསུམ་སངས་རྒྱས་དགྲར་ལངས་ཀྱང་། །དེ་ལ་བཟུང་ཞིང་འཇིག་པ་མེད། །གཉིས་མེད་ཟུང་འཇུག་རང་བཞིན་ལ། །སྦ་སྲི་མ་དགོས་ཡེ་རྒྱས་བཏབ། །གཡུ་དྲུང་རྒྱལ་མཚན་རྡོ་རྗེའི་ཚེ། །སྤྲོས་པས་སྟོང་གསུམ་བཀྲག་མདངས། བསྲུངས་པས་ལུས་ལ་གཟི་བྱིན་སྐྱེད། །བཅིངས་པས་རྡོ་རྗེའི་ལུ་གུ་རྒྱུད། །སྙིང་པོ་ལྔ་བསྡུས་རྫས་ཀྱི་མཆོག །དེང་འདིར་ལུས་ངག་ཡིད་གསུམ་ལ། །འཁོར་གསུམ་ཡོངས་དག་ཚེ་སྦའོ། །རྒྱས་བཏབ་བཅོལ་ལོ་ཐུབ་པར་སྲུངས། །ཁྲོ་བོ་བཅུ་དང་ལོངས་སྤྱོད་བཅུད། །ཚེ་འདི་སྲུངས་ཅིག་སྲོག་གཏའ་སྡོམས། །བཀྲག་བཟང་དབྱངས་སྙན་དྲན་པ་གསལ། །ཚེ་སྤེལ་བསོད་ནམས་དཔལ་འབྱོར་རྒྱས། །མི་ནོར་ཆོས་ཀྱི་དངོས་གྲུབ་སྩོལ། །

[Full Size]

བཀྲ་ཤིས་རྟགས་བརྒྱད་རྒྱས་བཏབ་པོ། །བཀྲ་ཤིས་རྫས་བརྒྱད་རྒྱས་གདབ་པོོ། །ལུས་ངག་ཡིད་ལ་རྒྱས་གདབ་པོོ། །སྐུ་གཟུགས་ལྔ་ཡི་རྒྱས་གདབ་པོ། །ཡིག་འབྲུ་ལྔ་ཡི་རྒྱས་གདབ་པོ། །ཕྱག་མཚན་ལྔ་ཡི་རྒྱས་གདབ་པོོ། །འགྱུར་བ་མེད་པའི་སྐུ་ཐོབ་ཤོག །སྐྱེ་འཆི་མེད་པའི་དོན་རྟོགས་ཤོག །ཨོཾ་བཛྲ་རཏྣ་པདྨ་ཀརྨ་བུདྡྷ་ཨཱ་ཡུ་ཥེ་ནྀྲ་ཛཿ ཨཿཨཿཨཿ ཞེས་རྒྱས་འདེབས་བྱས་པའི་རྗེས་ལ། དེ་ནས་བཅོམ་ལྡན་འདས་ཚེའི་ལྷ་ཚོགས་རྣམས་ཀྱིས་ཁྱེད་རང་རྣམས་ལ་བདེན་ཚིག་བཀྲ་ཤིས་ཀྱི་གླུ་དབྱངས་སྒྲོགས་ཅིང་ཤིས་བརྗོད་མེ་ཏོག་གི་ཆར་ཆེན་དབབ་པའི་མོས་པ་མཛོད་ཅིག །ཅེས་བརྗོད་ལ་ཤིས་བརྗོད་རབ་གནས་རྒྱས་པར་བྱའོ། །དེ་ནས་སྐུ་དྲིན་བཏང་རག་གི་མཎྜལ་དང་ཚོགས་མཆོད། །སློབ་དཔོན་གྱིས་དཀྱིལ་འཁོར་ལྷ་ལ་བཏང་རག་བཟོད་གསོལ་བསྔོ་སྨོན་བཀྲ་ཤིས་དང་། །ཡེ་ཤེས་གཤེགས་ཅིང་དམ་ཚིག་པ་བསྡུ་བ་སོགས་རྗེ་ཆོག་ཐམས་ཅད་སྤྱི་གཞུང་ལྟར་བྱའོ། །དེ་ལྟར་འདི་ནི་ཤིན་ཏུ་རྒྱས་པའི་

[Full Size]

ལུགས་སུ་བྱ་ཚུལ་ཡིན་ལ། བསྡུས་པར་བྱེད་ན། དབང་བཤད་ཅི་རིགས་དང་སྐྱབས་སེམས་གསོལ་གདབ་མདོར་བསྡུས་བྱས་པའི་འཕྲོར་ཡེ་ཤེས་དབབ་ཅིང་བསྟིམ་མཐར། བུམ་ཐོད་མེ་ལོང་གཏོར་མ་དང་བཞིའི་དབང་བསྐུར་ནས་ཚེ་ཆུ་ཐོད་ཆང་ཚེ་རིལ་བྱིན་པའི་མཇུག་དུ་མདའ་དར་འཐོགས་ནས་དཀྱིལ་འཁོར་ཆེན་པོའི་ལྷ་ཚོགས་རྣམས། ཞེས་པའི་ཚིག་རྐང་ལྔའི་འཕྲོར། གཡུ་དྲུང་རྒྱལ་མཚན་རྡོ་རྗེའི་ཚེ། ཞེས་པ་མན་ཆད་ཀྱི་རྒྱས་གདབ་ལ་ཤིས་པ་བརྗོད་པས་ཆོག་པའོ། །ཚེ་སྒྲུབ་གནམ་ལྕགས་རྡོ་རྗེའི་དངོས་གྲུབ་ཀུན་འདུས་ཀྱི་དབང་བསྐུར་ཆེན་མོ་ཇི་ལྟར་བྱ་བའི་ཚུལ་སྒྲིགས་ཆགས་སུ་བགྱིས་པ་འདི་བཞིན་གྱིས་ཤིག་ཅེས། སྙིགས་དུས་འགྲོ་བའི་འདྲེན་པ་གཅིག་པུ་པར་གྱུར་པ་རྒྱལ་མཆོག་སྤྲུལ་པའི་སྐུ་བཟང་པོའི་མཚན་འཆང་བ་གང་གི་བཀའི་བདུད་རྩིའི་བཅུད་བཟང་སྙིང་ལ་ཡང་དག་སིམ་པའི་མཐུས། སྣ་ཚོགས་རང་གྲོལ་གྱི་བཙུན་པས་དཔལ་རི་གངས་ཀྱི་ལྷོ་ཕྱོགས་བདེར་གཤེགས་ཚེའི་ཕུག་ཏུ་ཟིན་རིས་སུ་བཀོད་པའི་དགེ་བས། མཆོག་གི་སྤྲུལ་པའི་སྐུ་དེ་ཉིད་སོགས་སྐྱེས་ཆེན་དམ་པ་རྣམས་ཀྱི་སྐུ་ཚེ་འཕེལ་བ་དང་། མཐའ་ཡས་པའི་འགྲོ་

[Full Size]

བ་ཀུན་ཀྱང་འཆི་མེད་རྡོ་རྗེའི་སྐུ་ཐོབ་པར་གྱུར་ཅིག །སརྦ་མངྒ་ལཾ། གཅིག་ཞུས་ཁུལ་ལགས།

ཚེ་སྒྲུབ་གནམ་ལྕགས་རྡོ་རྗེའི་ཆ་རྐྱེན་དུ་གྱུར་པ་བཀའ་བརྒྱད་དངོས་གྲུབ་སྙིང་པོའི་དབང་ཆོག

[Full Size]

ཚེ་སྒྲུབ་གནམ་ལྕགས་རྡོ་རྗེའི་ཆ་རྐྱེན་དུ་གྱུར་པ་བཀའ་བརྒྱད་དངོས་གྲུབ་སྙིང་པོའི་དབང་ཆོག་བཞུགས་སོ།

[Full Size]

ན་མོ་གུ་རུ་ས་མཱ་དཱ་ན་ཡེ། །དམིགས་མེད་སྤྲོས་བྲལ་ཀུན་བཟང་ནམ་མཁའ་ཆེར། །འགག་མེད་གཟུགས་སྐུ་ཆེ་མཆོག་ཉི་འོད་རྒྱས། །རོལ་རྩལ་བདུན་བརྒྱ་ཉེར་ལྔའི་འོད་ཟེར་ཚོགས། །སྤྲོ་མཁས་པདྨ་ཐོད་ཕྲེང་ལ་གཏུད་དེ། །སྒྲུབ་པ་བཀའ་བརྒྱད་འོ་མཚོ་བསུབ་པའི་བཅུད། །དངོས་གྲུབ་སྙིང་པོ་བདུད་རྩིའི་ཡང་ཞུན་གྱིས། །སྐལ་བཟང་སྣོད་ལྡན་འདོད་པ་འཇོ་བའི་དབང་། །ཇི་ལྟར་བྱ་ཐབས་གསལ་བར་འདིར་བཤད་ཉོན།། ༈ །།དེ་ལ་གསུམ་སྟེ། དང་པོར་དཀྱིལ་འཁོར་དབང་རྫས་ཀྱི་བཀོད་པ་གང་ལྟར་བྱ་བ། བར་དུ་སྙེན་སྒྲུབ་གཞུང་སྲོང་གིས་བྱིན་རླབས་ནུས་ལྡན་དུ་སྒྲུབ་པ། ཐ་མར་སློབ་མ་རྗེས་འཛིན་གྱི་དབང་བསྐུར་ཇི་ལྟར་བྱ་ཚུལ་དང་གསུམ་གྱི་དང་པོ་ནི། མདོ་རྒྱུད་མན་ངག་ལ་མཁས་ཤིང་ལྟ་དགོངས་ཏིང་འཛིན་དམ་ཚིག་སྡོམ་

[Full Size]

ལྡན་གྱི་བླ་མ་སྒྲུབ་པ་བཀའ་བརྒྱད་ལ་ནུས་པ་ཐོབ་པ་གང་དེར། དད་ལྡན་གཏོང་ཕོད་བརྩོན་འགྲུས་ངེས་འབྱུང་གི་བློ་དང་ལྡན་པའི་སློབ་མ་ཐེག་མཆོག་བླ་མེད་ཀྱི་སྣོད་རུང་གིས་སྙིང་ཐག་པ་ནས་གསོལ་བ་བཏབ་པའི་དུས་བཟང་པོ་ཉིད་ལ། འགལ་རྐྱེན་གྱིས་དབེན་ཞིང་མཐུན་རྐྱེན་ཚང་ལ་ཡིད་དང་མཐུན་པའི་གནས་སུ། སའི་ཆོ་ག་དང་སྟེགས་བུ་བཞེངས་པ་ཐིག་ཚོན་བྱིན་རླབས་སོགས་ཀྱི་ལས་རིམ་རྒྱས་པར་སྤྲོ་ན་སྒྲུབ་པ་བཀའ་བརྒྱད་གཏེར་སྙིང་གཞན་ནས་བླངས་ཀྱང་རུང་ལ། །གཏེར་ཁ་འདི་ཉིད་ལྟར་ན་ཞི་ཁྲོ་ངེས་དོན་སྙིང་པོའི་སྒྲུབ་ཁོག་ཆེན་མོ་ནས་གསུངས་པ་བཞིན་བྱ་ཞིང་། རྡུལ་ཚོན་དང་རས་བྲིས་ལྟ་བུ་ལ་ནི་འགྲུབ་ན་དཀྱིལ་འཁོར་ལིང་ཚེ་དགུ་རེ་རེ་ལའང་རྟ་བབས་ཡོངས་སུ་རྫོགས་པའི་ཕོ་བྲང་ཉི་མ་དགུ་ཤར་དུ་གྲགས་པ་ཉིད་དང་

[Full Size]

དེ་ལྟར་མ་གྲུབ་ན་ཕྱི་དཀྱིལ་འཁོར་ཡོངས་རྫོགས་ཀྱི་ལྟེ་བར་ལིང་ཚེ་དགུ་ཐིག་བཏབ་པའི་ནང་སོ་སོར་གསེར་གྱི་འཁོར་ལོ་རྩིབ་བཞི་པའི་ལྟེ་བ་མཐིང་ནག །མུ་ཁྱུད་ནང་མ་དམར་པོ་ཕྱི་མ་སྔོན་པོ་རྩིབ་མཁན་ལྗང་ཁུ། མཆན། རེ་མིག་དགུའི་བར་བཅད་རྣམས་སྟེང་གི་རྡོ་རྗེའི་གདུང་མིག་མང་རིས་ཀྱིས་དབྱིབས་ཅན། བར་འཁྱམས་དང་སྒོ་བཞི་ཕྱོགས་མདོག་སོགས་རེ་གཞན་ཐམས་ཅད་སྤྱི་མཐུན་ལས་ཕྱོགས་བཞིར་རྟ་བབས་ཀྱི་རྩེར་བུམ་གདན་བུམ་པ་བྲེ་ཆོས་འཁོར་ཆར་ཁེབས་ཉི་ཟླ་ཏོག་དང་བཅས་པ་མཆོད་རྟེན་གྱི་ལྟར་ཡོད་པ་དང་། ཕྱིའི་འཁོར་ཡུག་ལའང་དུར་ཁྲོད་ཀྱི་ཕྱི་རིམ་ལ་ཁྱད་པར་དུ་སྟེང་ནས་འཁོར་ལོ་རྩིབས་སྟོང་ཕུབ་ཅིང་། འོག་ནས་པདྨ་འདབ་སྟོང་བརྡལ་བ། མཐའ་སྐོར་རྡོ་རྗེའི་བྲག་གི་བཏམས་པ་དང་བཅས་པའི་མཚོན་བྱེད་རྣམས་ནི་སྒྲུབ་པ་བཀའ་བརྒྱད་དཀྱིལ་འཁོར་གྱི་ཁྱད་ཆོས་ཡིན་པ་དང་། ཕྱི་མཐར་ཡེ་ཤེས་ལྔ་ལྡན་གྱི་མེའི་ར་བ་དང་བཅས་ཏེ། མདོར་ན་བཀའ་བརྒྱད་ཀྱི་ཐིག་རྩ་ཚུལ་བཞིན་ཤེས་པའི་ཕྱག་བཞེས་མཐོང་རྒྱུད་ལྟར་བྲིའོ། །དབུས་ཀྱི་ལྟེ་བར་ཡང་ཟླ་གམ་དམར་པོ་སྒོ་གཅིག་པའི་དཀྱིལ་དུ་ཆོས་སྐུ་འགྱུར་མེད་ཀྱི་ཨེ་གྲུ་གསུམ་མཐིང་ནག་གིས་མཚན་པ་དང་བཅས་པ་བྱ་ལ། ཡང་། རྡུལ་ཚོན་སོགས་མ་གྲུབ་

[Full Size]

པའམ། སྤྲོས་པ་ཉེར་བསྡུའི་དཀྱིལ་འཁོར་བྱེད་ན། དྲི་བཟང་བདུད་རྩི་ཛཱ་གད་ཀྱིས་སྦགས་པའི་འབྲུའི་ཚོམ་བུ་དགུ་བཀོད་པས་ཀྱང་རུང་བ་ཉིད་དོ། །དབང་རྫས་ནི་དཀྱིལ་འཁོར་གྱི་ཁར་ཁྲི་རྐང་ངམ་མན་ལྗིའི་སྟེང་དུ་བཟངས་གཞོང་ཆེན་མོ་འབྲུ་མིས་བཀང་བའམ་ཡང་ན་ལྕོགས་རྩེ་སོགས་ཅི་རིགས་ཀྱི་སྟེང་དུ། བུམ་པ་མཚན་མགུལ་འཆིངས་མཐིང་ག་ཅན་ཁ་རྒྱན་གཟུངས་ཐག་རྡོ་རྗེ་སོགས་དང་ལྡན་པའི་ནང་དུ། ལྔ་ཚན་ལྔ་ཆུ་གཙང་འོ་མ་དང་བཅས་པས་བུམ་པའི་གསུམ་གཉིས་གང་བར་བྱས་པ་དབུས་སུ་བཞག་མཐའ་སྐོར་རྣམས་སུ་ཆེ་མཆོག་དཔལ་དགུ་ཁྱུང་ཆེན་དཀར་ནག་དང་བཅས་པའི་སྐུ་རྟེན་ཙཀྐ་ལི་དང་། རིགས་ལྔའི་དབུ་རྒྱན། རྡོ་རྗེ་དྲིལ་བུ། རཀྟའམ་ཐོད་པའི་ཕྲེང་བ། ལྕགས་ཕུར། གསང་དབང་གི་ཐོད་པ་བདུད་རྩིས་མངར་གསུམ་ཆོས་སྨན་རྣམས་སྦྱར་བ། ཤེར་དབང་གི་དམིགས་རྟེན་གཟུངས་མའི་གཟུགས་སམ་རྡོ་རྗེ་ཕག་མོ་ཡུམ་ཆེན་གནམ་ཞལ་གྱི་བྲིས་སྐུ་གང་རིགས། ཚིག་དབང་གི་མེ་ལོང་ཤེལ་རྡོ་དང་བཅས་པ་རྣམས་དགོད། གཞན་ཡང་ཁྲོ་བོའི་རྒྱན་ཆས་སྟག་ཤམ་ཀོ་རློན་གཡང་གཞི་ཐོད་ཕྲེང་སྦྲུལ་ཆུན་ཐལ་ཞག་ཁྲག་གསུམ་གྱི་བྱུག་རྫས་རྣམས་ཀྱང་དངོས་སམ་གཟུགས་

[Full Size]

བྲིས་ཇི་ལྟར་འབྱོར་པ་ཡང་བཤམ། དཀྱིལ་འཁོར་མཐའ་སྐོར་དུ་སྨན་རག་དཔལ་དགུའི་གཏོར་མ་དང་བླ་མ་མཁའ་འགྲོ་ཆོས་སྲུང་གཞི་བདག་སོགས་ཀྱི་གཏོར་མ་ཡང་ཅི་འབྱོར་པ་ཚོགས་ཀྱིས་ལོངས་སྤྱོད་དང་། ཐུན་མོངས་གིས་མཆོད་པ་གྱ་ནོམ་པ་སྤྱན་གཟིགས་བཀོད་པའི་ཁྱད་པར་སྣ་ཚོགས་ཀྱིས་མཛེས་ཤིང་བྱིན་ཆགས་པར་བཤམ་པ་ནི་དང་པོར་བྱ་བའི་ལས་རིམ་མོ།། ༈ །།གཉིས་པ་ནི་སློབ་དཔོན་འཁོར་བཅས་བདེ་བའི་སྟན་ལ་འཁོད་ནས། ནམ་མཁའ་མཉམ་པའི་སེམས་ཅན་གྱི་དོན་འབའ་ཤིག་པའི་སེམས་སྐྱེད་དང་ལྡན་པས་ཐུན་མོང་གི་སྐྱབས་སེམས་ཚོགས་བསགས་ཀྱི་རིམ་པ་སྤྱི་ལྟར་རམ། གཏེར་ཆོས་འདི་ཉིད་ཀྱི།།།ཆོས་སྤྱོད་ཆེན་མོ་ལྟར་བྱ། དེ་ནས་བཀའ་བརྒྱད་འདི་གའི་ལས་གཞུང་གི་ལྟ་བའི་མཚམས་གཅོད་ནས་བཟུངས་སྟེ་འཛབ་ཀྱི་རིམ་པ་ལ་ཐུགས་གི་བར་དུ་གྱེར་སྒོམ་ཟུང་འཇུག་ཏུ་བྱས་ལ། བདག་མདུན་དུས་གཅིག་ཏུ་གསལ་གདབ་པའི་ལྷ་ཚོགས་གཙོ་བོ་དཔལ་ཆེན་དགུ་ལ་རང་རང་གི་འཁོར་རྣམས་ཉི་མ་དང་འོད་གཉིས་མི་འབྲལ་བའི་ངང་ཚུལ་ལྟར་མོས་པས་བསྐྱེད། བུམ་པའི་ནང་དུའང་དཀྱིལ་འཁོར་ལིང་ཚེ་དགུ་པར་ལྷ་ཚོགས་མ་ཚང་བ་མེད་པར་མེ་ལོང་དུ་གཟུགས་བརྙན་ཤར་བ་བཞིན་གསལ་ནས་རང་

[Full Size]

གི་སྤྱན་འདྲེན་མཆོད་བསྟོད་ཐམས་ཅད་བདག་མདུན་བུམ་པའི་དཀྱིལ་འཁོར་གསུམ་ཁར་སྟབ་གཅིག་ཏུ་བྱ།། ༈ །།འཛབ་ཀྱི་སྐབས་ལ་བབས་ཚེ། ལྷ་རྣམས་ཀྱི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ཡིག་སོ་སོའི་སྐུ་མདོག་དང་མཐུན་པའི་མཐར་སྔགས་ཀྱི་ཕྲེང་བས་བསྐོར་བར་དམིགས་ཤིང་ལས་བྱང་ནས་འབྱུང་བ་ལྟར་གྱི་དཔལ་དགུའི་སྙིང་པོ་དང་། མཐར་སྤྱི་དྲིལ་གྱི་འཛབ་བཟླས་པ་ནི་བསྙེན་པ། དེ་ལྟར་བཟླས་ཚེ་ཐུགས་སྲོག་ས་བོན་དང་སྔགས་འཕྲེང་ལས་འོད་ཟེར་དཔག་མེད་འཕྲོས་པས་རྒྱལ་བ་རབ་འབྱམས་ལ་མཆོད་པ་ཕུལ་ཞིང་། ཁམས་གསུམ་སེམས་ཅན་གྱི་ལས་སྒྲིབ་སྦྱང་ཏེ་ཐམས་ཅད་དཔལ་ཆེན་ཧེ་རུ་ཀའི་ལྷ་ཚོགས་འབའ་ཤིག་ཏུ་གྱུར་ནས་སྟོང་ཁམས་ཐམས་ཅད་སྔགས་ཀྱི་རང་སྒྲས་འུར་དིར་དུ་གྱུར་པར་བསམ་པ་ནི་དབུགས་ཕྱིན་རྒྱུ་བ་དང་སྤྲད། ཡང་དབུགས་ནང་དུ་འཇུག་ཚེ་ཕྱོགས་བཅུའི་རྒྱལ་བ་མ་ལུས་པའི་བྱིན་རླབས་དབང་དང་དངོས་གྲུབ་གཟི་བྱིན་ནུས་མཐུ་མཐའ་དག་འོད་ཟེར་གྱི་རྣམ་པ་འབྲུ་གསུམ་ཚེའི་ཚུལ་དུ་ཚུར་བྱུང་ནས་བདག་མདུན་བུམ་པའི་ལྷའི་གནས་གསུམ་དུ་ཐིམ་པར་མོས་པ་ཏེ། དེ་ལྟར་སྤྲོ་བསྡུའི་བཟླས་པ་བྱེད་པ་ནི་སྒྲུབ་པ། དེ་ལྟ་བུའི་བདག་མདུན་གྱི་

[Full Size]

བསྐྱེད་བཟླས་སྤྲོ་བསྡུ་སོགས་དེ་དག་ཐམས་ཅད་ཀྱང་དོན་དམ་པར་བྱ་བྱེད་ལས་གསུམ་དབྱེར་མེད་ཀུན་བཟང་ཆེ་མཆོག་གི་དགོངས་ཀློང་རྣམ་པར་དག་པ་ཁོ་ནའི་རོལ་པ་ཉིད་ལས་གཞན་དུ་མ་ཡིན་པར་ཐག་ཆོད་པས། གདོད་ནས་མ་བཅིངས་མ་གྲོལ་བའི་ཏིང་འཛིན་ལྷུན་འབྱམས་ཀྱི་ངང་ནས་ལྷ་སྔགས་སེམས་གསུམ་ཐ་དད་མེད་པར་འཇོག་པ་ནི་སྒྲུབ་པ་ཆེན་པོ་སྟེ། དེ་ལྟར་བསྙེན་དང་སྒྲུབ་པ་སྒྲུབ་ཆེན་གསུམ་གཅིག་དྲིལ་གྱི་ཉམས་སུ་ལེན་ཚུལ་འདི་ནི་བཀའ་བརྒྱད་ཉིད་ཀྱི་དགོངས་པ་ཐུན་མོང་མ་ཡིན་པའི་སྐབས་དོན་ཡིན་ལ། གསང་སྔགས་ཀྱི་གཞུང་ལུགས་སྤྱི་དང་བྱེ་བྲག་པའི་བསྙེན་སྒྲུབ་ཡན་ལག་བཞིའི་འཆད་ཚུལ་འདི་དང་མི་འདྲ་བ་མཐའ་ཡས་པ་ཡོད་ཚེ། ཐེ་ཚོམ་གྱི་མགོ་འཁོར་མི་ལྡང་བར་བྱའོ། །དེ་ལྟར་འཛབ་བསྙེན་སྟོང་ཕྲག་ཙམ་གྱིས་བར་བར་དུ་སྟོང་ཚིགས་ཀྱི་མཆོད་བསྟོད་བྱ་ཞིང་། གཞན་ཡང་ཚོགས་མཆོད་བསྒྲལ་སྟབས་བསྐང་བ་སོགས་རྒྱས་པར་བྱས་ནས་སྒྲུབ་སྟེ། མཐར་མདུན་བསྐྱེད་ལྷ་ཚོགས་ཀྱི་གནས་གསུམ་འབྲུ་གསུམ་ལས་འོད་འཕྲོས་པའི་འོད་ཟེར་བདག་ཉིད་ཀྱི་གནས་གསུམ་དུ་བསྟིམ་པས་དབང་གཞི་བླངས་ཞིང་བདག་ཉིད་ལྷ་དང་དབྱེར་མེད་པའི་ངེས་ཤེས་

[Full Size]

སྐྱེད་དོ། །འདི་དག་ནི་བར་དུ་བྱིན་རླབས་ནུས་ལྡན་དུ་བྱ་བའི་ལས་རིམ་མོ།། ༈ །།གསུམ་པ་སློབ་མ་རྗེས་འཛིན་དངོས་གྱི་ལས་རིམ་ནི། སློབ་མ་ཇི་ཙམ་ཡོད་པ་དག་སྒོ་དྲུང་ནས་ལས་སློབ་ཀྱིས་ཡིག་བརྒྱའི་གཟུངས་ཆུས་ཁྲུས་བྱར་གཞུག་ལ་ནང་དུ་ཕྱག་བྱས་ནས་གྲལ་དུ་འཁོད་དེ་མཎྜལ་རྒྱས་པར་ཕུལ་བའི་མཇུག་ཏུ་སློབ་དཔོན་གྱིས་ཡིད་ཆེས་བསྐྱེད་པའི་ལོ་རྒྱུས་འཆད་པ་ནི།། ༈ །།ང་ནི་རྡོ་རྗེའི་རྫོང་ཆེན་ཏེ། །འཁོར་བའི་གཡུལ་ཆེན་དམག་དཔུངས་ལས། །འགྲོ་བའི་འཁྲས་པར་དམ་བཅས་ཀྱི། །གང་ཞིག་མཐར་འདོད་ལམ་འདིར་ཤོག །འཁོར་བའི་སྙིང་པོ་སྦྱང་བའི་ཕྱིར། །ང་ཡི་ཆོ་འཕྲུལ་བྱིན་རླབས་ཀྱིས། །བསྟན་པའི་སྙིང་པོ་དམ་པ་ཞིག །སྐལ་ལྡན་ཁྱོད་ལ་བསྟན་པར་བྱ། །དེའི་ཕྱིར་ནམ་མཁའ་རབ་འབྱམས་ཀྱི་མཐར་ཁྱབ་པའི་འགྲོ་བ་རྣམ་པ་སྣ་ཚོགས་པ་མཐའ་དག་བླ་མེད་རྫོགས་པའི་བྱང་ཆུབ་ལ་མྱུར་དུ་འཁོད་པར་བྱ་ཕྱིར། བདེར་གཤེགས་སྒྲུབ་པ་བཀའ་

[Full Size]

བརྒྱད་ཀྱི་དབང་བསྐུར་ཟབ་མོ་ཞུ་བར་བགྱི་སྙམ་པའི་ཐུགས་སྐྱེད་དང་ལྡན་པས་རྟོག་པ་གཞན་དུ་ཡེངས་པ་སོགས་ཆོས་ཉན་པའི་མི་མཐུན་ཕྱོགས་ཀུན་སྤངས་ཏེ་གསན་འཚལ། དེ་ཡང་རང་གཞན་གྱི་དོན་ཆེན་ཚེ་གཅིག་སངས་རྒྱས་སྒྲུབ་པ་ལ་ཐེག་ཆེན་གསང་སྔགས་རྡོ་རྗེ་ཐེག་པའི་ཉེ་ལམ་ཟབ་མོ་སྨིན་གྲོལ་གཉིས་ལ་མ་བརྟེན་པར་ཐབས་གཞན་གྱིས་ཐོབ་པར་མི་འགྱུར་ཞིང་། འབྲས་བུ་གསང་སྔགས་རྡོ་རྗེའི་ཐེག་པ་ནི་ཇི་ལྟར་ཨུ་དུམ་ཝ་རའི་མེ་ཏོག་དང་མཚུངས་པ་ཤིན་ཏུ་བཀོན་ཞིང་རྙེད་པར་དཀའ་སྟེ། ཕྱོགས་བཅུའི་འཇིག་རྟེན་གྱི་ཁམས་གང་གའི་ཀླུང་གི་བྱེ་མ་སྙེད་རྣམས་སུ་ཡང་རྒྱུའི་ཐེག་པ་སྡེ་སྣོད་གསུམ་གྱིས་གདུལ་བྱ་འདུལ་བ་འབའ་ཞིག་ལས། འབྲས་བུའི་ཐེག་པ་དར་བའི་ཞིང་ནི་འགའ་ཙམ་ལས་མ་མཆིས་ཏེ། དེ་ཅིའི་ཕྱིར་ཞེ་ན། སངས་རྒྱས་རྣམས་

[Full Size]

ནི་གདུལ་བྱ་ལ་ཉེ་རིང་ཕྱོགས་ཆའམ་ཆོས་ལ་སྦ་སྲི་དང་དཔེ་འཁྱུད་དུ་མཛད་པ་མ་ཡིན་མོད་ཀྱང་། སེམས་ཅན་རྣམས་བསོད་ནམས་དང་སྐལ་བ་བཟང་པོ་ཐེག་མཆོག་ཟབ་མོའི་སྣོད་དུ་གྱུར་པ་ཤིན་ཏུ་དཀོན་པའི་དབང་ལས་སོ། །དེ་བས་ན་འོ་སྐོལ་མི་འཇེད་ཀྱི་ཞིང་དང་དེ་ལས་ཁྱད་པར་འཛམ་གླིང་འདི་ཁོ་ན་གསང་སྔགས་ཀྱི་ཆོས་འབྱུང་བའི་སྐལ་བ་ཅན་འདིར་སྐྱེས་པ་དང་། འདས་མ་འོངས་ཀྱི་སངས་རྒྱས་རྣམ་འཕྲུལ་རྒྱ་མཚོ་རྒྱུད་མར་བྱོན་པ་རྣམས་ཀྱིས་མ་གསུངས་མ་གྲགས་པའི་ཟབ་མོ་རྡོ་རྗེ་ཐེག་པའི་ཡང་བཅུད་བཅོམ་ལྡན་འདས་ཤཀྱཱའི་དབང་པོ་ཁོ་ནའི་བསྟན་པ་འདི་ལ་བྱུང་ཞིང་རང་ཅག་གིས་སྤྱོད་དུ་ཡོད་པ་འདི་ནི་དབུལ་པོས་ཡིད་བཞིན་གྱི་ནོར་བུ་བརྙེད་པ་ཡིས་ཀྱང་འགྲན་དུ་ག་ལ་བཟོད་ཅིང་དཔེ་དང་རྒྱུའི་ཆར་ཡང་མི་ཕོད་ལ། འདི་ལྟ་བུ་དང་མཇལ་བའི་སྐལ་

[Full Size]

བཟང་དང་བསོད་ནམས་ཡོད་བཞིན་དུ་ཚེ་གཅིག་སངས་རྒྱས་སྒྲུབ་པའི་ཐབས་ལ་བརྩོན་ཞིང་འབད་པར་མི་བྱེད་ན་ནི། རྒྱ་མཚོའི་ཚོང་པ་རིན་པོ་ཆེའི་གླིང་དུ་ཕྱིན་ནས་སྟོང་པར་ལོག་པ་ལས་ཆེས་ཆེར་བླུན་པར་འགྱུར་བས་ན། ད་ལྟ་ཕུན་ཚོགས་སྣོད་བཅུད་འཛོམ་དུས་གཞི་དད་པ་བརྟན་པོའི་རྨང་བཏིང་། གྲོགས་བརྩོན་འགྲུས་དྲག་པོས་རྒྱུད་བསྐུལ། རྐྱེན་བླ་མ་མཚན་ལྡན་གྱིས་སྣ་དྲངས། ལམ་ཉམ་ལེན་ཟབ་མོའི་གཞུང་ཚུགས། ཐབས་སྨིན་གྲོལ་གནད་ཀྱི་ཁ་བསྒྱུར། རྒྱུད་དམ་ཚིག་གཙང་མས་མཚམས་སྦྱར་ཏེ། འཁོར་བ་དང་གཏན་དགྱེས་ཀྱི་འདུན་མ་ཞིག་ད་རེས་སྒྲུབ་དགོས་པ་ལགས། དེ་ལྟ་བུ་སྒྲུབ་པར་བྱ་བའི་ཆོས་ཀྱི་རྣམ་གྲངས་བཀའ་རྒྱ་ཆེ། ལུང་གྲངས་མང་། མན་ངག་གཏིང་མཐའ་མེད་པ་གཅིག་མཆིས་མོད་ཀྱང་མདོར་བསྡུ་ན། རྒྱུའི་ཐེག་པ་ལས་སྡེ་སྣོད་གསུམ་དང་འབྲས་བུའི་ཐེག་པ་ལ་རྒྱུད་སྡེ་བཞིའམ་དྲུག་གི་རིམ་པར་འདུས་

[Full Size]

ཤིང་། དེ་ཐམས་ཅད་ཀྱི་སྙིང་པོ་ནི་སྐྱེད་རྫོགས་སྒྲུབ་པ་བཀའ་བརྒྱད་ལ་མ་འདུས་པ་ནི་གང་ཡང་མ་མཆིས་པ་དང་། དེ་རྣམས་ཀྱི་དོན་ཇི་ལྟར་འདུས་ཞེ་ན། ཆོས་འདི་ལྟ་བུས་གང་ཟག་གི་ངར་འཛིན་གྱི་རྟོག་པ་འདུལ་བས་ན་འདུལ་བ་ཡང་ཡིན་ལ། གདམས་པའི་ཟབ་གནད་མདོར་བསྡུས་པས་ན་མདོ་སྡེ་དང་། བདེན་གཉིས་དབྱེར་མེད་རང་བྱུང་ཡེ་ཤེས་མངོན་དུ་བྱེད་པས་ན་མངོན་པ་སྟེ་རྒྱུའི་ཐེག་པ་སྡེ་སྣོད་གསུམ་པོ་འདིར་དོན་གྱིས་ཚང་བ་དང་། འབྲས་བུའི་ཐེག་པའི་རྒྱུད་སྡེ་བཞི་ཡང་ཚང་སྟེ། འཁོར་འདས་སྐུ་གསུམ་གྱི་རོལ་པར་འཆར་བར་བྱེད་པས་བྱ་བ་རིགས་གསུམ་གྱི་རྒྱུད་དང་། བདེན་གཉིས་སྐྱེད་རྫོགས་ཀྱི་ལམ་དུ་འཁྱེར་བས་སྤྱོད་རྒྱུད་གཉིས་ལྡན་དང་། གསལ་སྟོང་ཟུང་འཇུག་ཏུ་སྦྱོར་བས་ཡོ་ག་རྣལ་འབྱོར་གྱི་རྒྱུད་དང་། ཆོས་ཉིད་ཇི་བཞིན་པའི་དོན་ལ་བདེ་བླག་ཏུ་སྦྱོར་བས་རྣལ་འབྱོར་བླ་མེད་ཀྱི་

[Full Size]

ཐེག་པའི་མཆོག་རབ་ཀྱང་ཡིན་ནོ། །རྒྱུད་ལུང་མན་ངག་གསུམ་གྱི་དོན་ཡང་འདིར་འདུ་སྟེ། སྦྱང་གཞི་གཙོ་བོར་སྟོན་པའི་སྐོར་ནི་རྒྱུད་མ་ཧཱ་ཡོ་ག །སྦྱང་ཐབས་གཙོ་ཆེར་སྟོན་པ་རྣམས་ནི་ལུང་ཨ་ནུ་ཡོ་ག །སྦྱོང་བྱེད་གཙོ་བོར་སྟོན་པའི་སྐོར་ནི་མན་ངག་ཨ་ཏི་ཡོ་ག་སྟེ། དེ་ཐམས་ཅད་ཀྱི་དགོངས་པའི་གནད་དོན་མ་ལུས་འདིར་འདུས་ཤིང་ཚང་བ་ཡིན་པས་ན་གཞན་ལས་ཁྱད་དུ་འཕགས་པ་ལགས།། ༈ །།དེ་ལྟ་བུ་གསང་སྔགས་སྒྲུབ་པ་བཀའ་བརྒྱད་ཀྱི་ཆོས་སྐོར་འདི་ཉིད་བྱུང་ཚུལ་ལོ་རྒྱུས་ཀྱི་དབང་དུ་བགྱི་ན། བརྒྱུད་པའི་བབས་ཚུལ་ལྔའི་སྒོ་ནས་སྟོན་ཏེ། རྒྱལ་བ་དགོངས་པས་བརྒྱུད་པ། རིག་འཛིན་བརྡ་ཡི་རྒྱུད་པ། མཁའ་འགྲོ་གཏད་བརྒྱའི་བརྒྱུད། གང་ཟག་སྙན་ཁུང་གི་བརྒྱུད་པ། སྨོན་ལམ་དབང་བསྐུར་གྱི་རྒྱུད་པ་དང་ལྔ་ལས། དང་པོ་རྒྱལ་བ་དགོངས་བརྒྱུད་ནི། འཁོར་འདས་གང་དུ་ཡང་མ་གྲུབ་པའི་

[Full Size]

སྔོན་རོལ་ནས་རང་བྱུང་གདོད་མའི་མགོན་པོ་ཡེ་ཐོག་དང་པོའི་སངས་རྒྱས་འཁོར་འདས་ཀུན་གྱི་བྱེད་པོའམ་འབྱུང་གནས་སུ་གྱུར་པ། ཕྱོགས་བཅུ་དུས་བཞིའི་རྒྱལ་བ་ཐམས་ཅད་ཀྱི་སྤྲུལ་གཞིའམ་ཁྱབ་བདག་དམ་པ་དཔལ་ཀུན་ཏུ་བཟང་པོ་དེ་ཉིད་ཆོས་ཀྱི་དབྱིངས་མཁའ་ཀློང་རྣམ་པར་དག་པའི་ཕོ་བྲང་ཆེན་པོ་ཁ་དོག་དབྱིབས་ཀྱི་དངོས་པོ་ལས་འདས་པ་རང་སྣང་རྣམ་པར་དག་པའི་གཞལ་ཡས་སུ་དུས་བཞི་འཕོ་འགྱུར་མེད་པར་བཞུགས་པའི་ངང་ནས། གདུལ་བྱ་དང་འདུལ་བྱེད་ཐ་དད་དུ་འཛིན་པའི་རྟོག་པ་མི་མངའ་ཡང་། ཡེ་ཤེས་རང་བྱུང་གི་ཐུགས་རྗེ་དང་འགྲོ་བའི་སྨོན་ལམ་མོས་པ་རྒྱ་མཚོ་གཞི་མཐུན་པའི་རྟེན་འབྲེལ་ལས་གདུལ་བྱའི་ཆགས་སྡང་གི་བློ་རྟོག་གཞོམ་ཕྱིར་གཟུགས་སྐུ་ཞི་ཁྲོ་གཉིས་ཀྱི་སྒྱུ་འཕྲུལ་ཡེ་ཤེས་ཀྱི་སྐུའི་དཀྱིལ་འཁོར་མངོན་པར་སྣང་བ་ནི། ཞི་ཚུལ་གྱིས་འདུལ་བ་ལ་རིགས་ལྔའི་སངས་རྒྱས་ཡབ་ཡུམ་དང་དྲུག་

[Full Size]

པ་རྡོ་རྗེ་འཆང་ཆེན་པོ་ལ་སོགས་དང་། ཁྲོ་བོའི་རྣམ་འགྱུར་གྱིས་འདུལ་བ་ལ་དཔལ་ཆེན་པོ་ཧེ་རུ་ཀ་འཁོར་ལོ་བདེ་བའི་མཆོག་གི་དྲ་བ་སྡོམ་པ་ཅེས་ཀྱང་བྱ། ལྷན་ཅིག་སྐྱེས་པའི་ཡེ་ཤེས་དགྱེས་མཛད་རྡོ་རྗེ་ཞེས་ཀྱང་བྱ། གསང་བའི་བདག་ཉིད་ཐམས་ཅད་འདུས་པའི་ཧེ་རུ་ཀ་ཅེས་ཀྱང་བྱ། བླ་མེད་གསང་བ་མཆོག་གི་རྡོ་རྗེ་ཆེ་མཆོག་དབང་གི་རྒྱལ་པོ་ཀུན་བཟང་ཧེ་རུ་ཀ་ཅེས་ཀྱང་བྱ་བ་སྟེ། དབུ་དང་ཕྱག་ཞབས་མཐའ་ཡས་ཤིང་སྤྲུལ་པའི་རོལ་གར་བསམ་མི་ཁྱབ་པའི་རྫུ་འཕྲུལ་ལས་ཉིད་ལས་མི་གཞན་པའི་འཁོར་གྱི་དཀྱིལ་འཁོར་ཏིལ་གྱི་གང་བུ་ཁ་ཕྱེ་བ་བཞིན་སྤྲུལ་པ་དག་ལ། ཆོས་ཐམས་ཅད་ཀྱི་སྙིང་པོ་བདེ་བར་གཤེགས་པ་ཐམས་ཅད་འདུས་པའི་རྒྱུད་ལུང་མན་ངག་རྣམས། བརྗོད་པ་སྒྲ་ཚིག་ངག་གི་བྱ་རྩོལ་མ་མིན་པར་རང་བྱུང་རང་གསལ་རང་གྲོལ་གྱི་དགོངས་པ་གཙོ་འཁོར་མཉམ་པ་ཉིད་ཀྱི་ངང་ནས་ཟབ་

[Full Size]

གསལ་ཆོས་ཀྱི་འཁོར་ལོ་རྒྱུན་མི་འཆད་པར་དུས་གསུམ་དུས་མེད་དུ་བཞུགས་པས་ན་རྒྱལ་བ་དགོངས་པའི་རྒྱུད་པ་ཅེས་བྱ་སྟེ་སངས་རྒྱས་ཁོ་ནའི་སྤྱོད་ཡུལ་གྱི་མཚན་ཉིད་ཡིན་ནོ།། ༈ །།གཉིས་པ་རིག་འཛིན་བརྡའི་རྒྱུད་པ་ནི། སྟོན་པའི་སྟོན་པ་ཆོས་ཀྱི་སྐུ་ཀུན་བཟང་ཆེ་མཆོག་ཧེ་རུ་ཀ་ཉིད་ཀྱི་ཐུགས་རྗེའི་རང་རྩལ་ལས་བཀའི་སྡུད་པོ་བྱང་སེམས་རིག་འཛིན་གྱི་ཚོགས་མངོན་པར་སྤྲུལ་ཏེ། །དེ་ཡང་རྣམ་པར་སྨིན་པའི་རིག་འཛིན་དང་། ཚེ་ལ་དབང་བའི་རིག་འཛིན། ལྷུན་གྱིས་གྲུབ་པའི་རིག་འཛིན། ཕྱག་རྒྱ་ཆེན་པོའི་རིག་འཛིན། ས་ལ་གནས་པའི་རིག་འཛིན་ལ་སོགས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རིག་འཛིན་དཔག་ཏུ་མེད་པ་རྣམས་ཀྱིས་སྟོན་པའི་ཐུགས་རང་བྱུང་གི་ཡེ་ཤེས་ཀྱི་ཀློང་ནས་ཏིང་ངེ་འཛིན་གྱི་གཟིགས་སྟངས་དང་འོད་ཟེར་དང་ཕྱག་རྒྱ་སོགས་བརྡ་ཙམ་བསྟན་མ་

[Full Size]

ཐག་དོན་གྱི་དགོངས་གསང་མ་ལུས་པ་ཇི་ལྟ་བ་རྟོགས་ཤིང་མངོན་དུ་མཛད་པ་ལས་སྒྲ་ཚིག་མཚན་མའི་སྤྲོས་པ་ལ་ལྟོས་མི་དགོས་པ་ནི་སྟོན་འཁོར་ངོ་བོ་གཅིག་པའི་དོན་གྱི་ན་དགོངས་པ་ལ་ཁྱད་པར་མེད་ཅིང་། བཀའི་བསྡུ་བ་མཛད་པ་རྣམས་ལ་མ་གཏོགས་ལོག་རྟོགས་ཕྱོགས་རྟོགས་ཀྱི་སྐྱོན་གྱི་དྲི་མ་རྡུལ་ཆ་ཕྲ་མོ་ཙམ་གྱིས་ཀྱང་དགོས་པ་མེད་པ་ཡིན་ལ། དེ་ལྟ་བུ་རིག་པ་འཛིན་པ་ཆེན་པོ་རྣམས་ཀྱི་ནང་ནས་ཀྱང་གཙོ་བོ་ལྟ་བུར་གྱུར་པ་མཚན་གྱི་རྣམ་གྲངས་སུ་རྡོ་རྗེ་ཆོས་དང་། རྡོ་རྗེ་སྙིང་པོ་དང་། རྡོ་རྗེ་ཐོད་པ་རྩལ་དང་། ལག་ན་རྡོ་རྗེ་འཆང་བ་དང་། རིག་འཛིན་གྱི་རྒྱལ་པོ་ཀུཉྫ་ར་ཞེས་ཀྱང་བྱ་བ་ཞིག་སྟོན་པ་ཉིད་ཀྱི་ཐུགས་ལས་སྤྲུལ་ཏེ་གསང་སྔགས་རྒྱུད་སྡེ་རབ་འབྱམས་ཀུན་གྱི་བདག་པོར་དབང་བསྐུར་བར་མཛད་པ་འདི་ནི་ཡོངས་གྲགས་ཀྱི་མཚན་དོན་དུ་དཔལ་གསང་བའི་བདག་པོ་ཕྱག་ན་

[Full Size]

རྡོ་རྗེ་ཉིད་ཡིན་ཏེ། དེས་བདེ་བར་གཤེགས་པ་ཐམས་ཅད་འདུས་པའི་ཆོས་བཀའ་རྩ་བ་དང་ཡན་ལག་གི་རྒྱུད་སྡེ་ཟབ་ཅིང་རྒྱ་ཆེ་བ་བཅུད་ཀྱི་སྙིང་པོའི་ཡང་ཞུན་དུ་གྱུར་པ་རྣམས་གསེར་གྱི་གླེགས་བུ་ལ་བཻ་ཌཱུརྱ་ཞུན་མས་ཡི་གེར་བཏབ་ཅིང་རིན་པོ་ཆེ་སྣ་ཚོགས་ཀྱི་སྒྲོམ་བུར་བཅུག་ནས་རྒྱས་བཏབ་ཏེ་གསང་བའི་མཛོད་འཛིན་པའི་ཡེ་ཤེས་ཀྱི་མཁའ་འགྲོ་མ་རྣམས་ལ་གཏེར་དུ་གདམས་པར་མཛད་པ་ནི་རིག་འཛིན་བརྡའི་བརྒྱུད་པ་ཅེས་བྱའོ། །གསུམ་པ་མཁའ་འགྲོ་གཏད་རྒྱའི་བརྒྱུད་པ་ནི། དེ་ལྟར་རིག་འཛིན་གྱི་གཙོ་མཆོག་རྡོ་རྗེ་ཆོས་ཀྱིས་གསང་བ་ཟབ་མོའི་རྒྱུད་སྡེ་རྣམས་ཡེ་ཤེས་ཀྱི་མཁའ་འགྲོ་མ་སྤྱི་དང་ཁྱད་པར་མཁའ་འགྲོ་ཀུན་གྱི་གཙོ་མོ་རྡོ་རྗེ་ཕག་མོའམ་བདག་མེད་ལྷ་མོའམ་ཉི་ཟླ་ཐོད་ཕྲེང་མའམ་མཁའ་འགྲོ་ལས་ཀྱི་དབང་མོ་ཆེ་ཞེས་མཚན་གྱི་རྣམ་གྲངས་དུ་མར་གྲགས་པ་ལ་ཆེད་དུ་གདམས་སྟེ། ཀྱེ། མཁའ་འགྲོ་མ་གསང་

[Full Size]

བའི་མཛོད་འཆང་བ་ཁྱོད་རྣམས་ཀྱི་ཡིད་བཞིན་ནོར་བུ་དབང་གི་རྒྱལ་པོ་ལས་ལྷག་པའི་རྒྱུད་སྡེ་རིན་པོ་ཆེ་འདི་དག་ད་ལྟ་སྤེལ་བའི་སྣོད་དང་ཡུལ་དུ་གྱུར་པ་མ་མཆིས་པས་ཟབ་མོའི་གཏེར་དུ་སྡོམས་ལ། མ་འོངས་བསྐལ་པ་རྩོད་ལྡན་གྱི་དུས་སུ་འདི་དག་འཛམ་གླིང་མི་ཡུལ་དུ་སྣང་བར་བྱེད་པའི་རིག་པ་འཛིན་པ་འགའ་ཞིག་བདག་གི་ཐུགས་རྗེའི་འོད་ཟེར་ལས་སྤྲུལ་ནས་ཡུལ་གྲུ་ཐ་དད་པའི་འགྲོ་བའི་འདྲེན་པར་འབྱུང་བ་རྣམས་ལ་རང་རང་གི་རིག་དང་མཐུན་པའི་ཆོས་བཀའ་རྣམས་སོ་སོར་གཏོད་ཅིག །ཅེས་བཀའ་སྩལ་བ་བཞིན་ཡེ་ཤེས་ཀྱི་མཁའ་འགྲོ་མ་ལུས་ཀྱི་དབང་ཆེན་ལ་སོགས་པས་རྒྱུད་སྡེ་རྣམས་སྡེ་ཚན་སོ་སོར་ཕྱེས་ཏེ་རིན་པོ་ཆེའི་ཁ་དོག་རིག་དང་མཐུན་པའི་སྒྲོམ་བུར་སྩལ་བ་ལ་རྒྱ་རིམ་པ་དགུ་ཡིས་བཏབ་ནས། འཛམ་གླིང་གི་ལྟེ་བ་རྡོ་རྗེ་གདན་དང་ཉེ་བ་མཆོག་གི་དངོས་གྲུབ་བདེ་བླག་ཏུ་ཐོབ་པར་

[Full Size]

འགྱུར་བའི་གནས་དུར་ཁྲོད་ཆེན་པོ་བསིལ་བ་ཚལ་ལམ་རོ་མྱག་འདམ་བུའི་ཚལ་ཞེས་བྱ་བ་དེའི་དབུས་སུ་རང་བྱུང་གི་མཆོད་རྟེན་བདེ་བྱེད་རྩེགས་པའི་ནང་དུ་གཏེར་དུ་བཞུགས་སུ་གསོལ་ཏེ། དེ་ཡང་། མཆོད་རྟེན་གྱི་རྨང་ལ་ཟུག་པ་རྩ་བའི་ཚུལ་དུ་སྒྱུ་འཕྲུལ་ཞི་ཁྲོའི་རྩ་བ་དང་ཡན་ལག་གི་རྒྱུད་སྡེ་རྣམས་དང་། བང་རིམ་ལ་གྱེས་བ་མལ་གའི་ཚུལ་དུ་སྒྲུབ་པ་བཀའ་བརྒྱད་བྱེ་བྲག་པའི་རྒྱུད་སྡེ་བསམ་གྱིས་མི་ཁྱབ་པའི་བཞུགས་པའི་སྒྲོམ་བུ་བརྒྱད་པོ་ཕྱོགས་མཚམས་བརྒྱད་དུ་སྦས། བུམ་པར་བརྒྱད་པ་ལོ་འདབ་ཀྱི་ཚུལ་དུ་བདེ་བར་གཤེགས་པ་ཐམས་ཅད་འདུས་པའི་སྤྱི་རྒྱུད་ཚང་བར་རིན་ཆེན་སྣ་ལྔའི་སྦྲོམ་བུར་སྦས། བྲེ་ལ་གསལ་བ་མེ་ཏོག་གི་ཚུལ་དུ་གསང་བ་ཡོངས་རྫོགས་འདུས་པའི་རྒྱུད་ཆེན་ནི་རིན་ཆེན་ཤེལ་གྱི་བུམ་པར་སྦས། འཁོར་ལོ་ལ་སྨིན་པ་འབྲས་བུའི་ཚུལ་དུ་རང་བྱུང་རང་ཤར་རྩ་

[Full Size]

བ་ཡན་ལག་གི་རྒྱུད་རྣམས་བཻ་ཌཱིརྱའི་བུམ་པར་སྦས། ཏོག་ལ་བཅུད་ཀྱི་སྙིང་པོའི་ཚུལ་དུ་ཨ་ཏི་རྫོགས་པ་ཆེན་པོ་སངས་རྒྱས་མཉམ་སྦྱོར་དང་། ཀུན་ཏུ་བཟང་པོའི་དགོངས་པ་ཟངས་ཐལ་དུ་སྟོན་པ་ལ་སོགས་ཟབ་དོན་སྙིང་པོའི་སྐོར་རྣམས་ནོར་བུ་རིན་པོ་ཆེ་འོད་ཀྱི་སྙིང་པོའི་གའུར་སྦས་ཤིང་། དེ་ལྟ་བུའི་མཆོད་རྟེན་ཆེན་པོ་དེ་ལ་ཡེ་ཤེས་དང་ལས་ལ་གྲུབ་པའི་དཔའ་བོ་མཁའ་འགྲོའི་ཚོགས་དང་འཇིག་རྟེན་ཁམས་ཀྱི་ལྷ་མ་སྲིན་སྡེ་བརྒྱད་ཀུན་གྱི་ཉིན་མཚན་དུ་ཕྱག་སྐོར་མཆོད་པ་བཀུར་སྟི་བྱེད་པས་དུས་འདའ་བར་འགྱུར་ཏོ། །དེ་ནས་ཐུབ་པ་ཆེན་པོ་མྱ་ངན་ལས་འདས་ནས་མི་ལོ་ལྔ་བརྒྱར་ཉེ་བ་ན། གསང་བའི་བདག་པོ་རིག་འཛིན་རྡོ་རྗེ་ཆོས་ཀྱི་སྤྲུལ་པ་བཀྱེ་བའི་དུས་ལ་བབས་པར་གཟིགས་ནས། ཐུགས་ཆོས་དབྱིངས་རྣམ་པར་དག་པའི་རོལ་རྩལ་ཡེ་ཤེས་དགུ་ལས་རིག་འཛིན་རྣམ་པ་དགུར་སྤྲུལ་པར་མཛད་དེ། ཡེ་ཤེས་དགུ་གང་ཞེ་ན། ཆོས་

[Full Size]

དབྱིངས། མེ་ལོང་། མཉམ་ཉིད། སོར་རྟོགས། བྱ་གྲུབ་ཏེ་ཡེ་ཤེས་ལྔ་དང་། སྟོང་ཉིད་ཡེ་ཤེས། འདའ་བཀའ་ཡེ་ཤེས། དབྱིངས་སྒྲོལ་ཡེ་ཤེས། ཀློང་གྱུར་ཡེ་ཤེས་ཏེ། ཡེ་ཤེས་དགུའི་སྒྱུ་འཕྲུལ་གྱི་སྐུ་རིག་འཛིན་རྣམ་པ་དགུར་བྱོན་ཞིང་། སོ་སོ་ནས་ཐོས་བསམ་སྒོམ་པའི་འབྲས་བུ་མཐར་སོན་ནས་གྲུབ་པ་མཆོག་གི་ས་ལ་བཞུགས་བཞིན་པས་མངོན་པར་མཁྱེན་པའི་གཟིགས་པ་གཅིག་ཏུ་མཐུན་པར་དུར་ཁྲོད་བསིལ་བའི་ཚལ་གྱི་མཆོད་རྟེན་དུ་གསང་སྔགས་རྒྱུད་སྡེ་རབ་འབྱམས་ཀྱི་ཆོས་གཏེར་ཇི་ལྟར་བཞུགས་པ་དང་། དེ་དག་མི་ཡུལ་གྱི་གདུལ་བྱ་ལ་སྤེལ་བའི་དུས་ལ་ཉེ་བར་བབས་པ་ཡང་དགོངས་པ་གཅིག་ཏུ་གཞོལ་སྟེ། རིག་འཛིན་ཆེན་པོ་དགུ་རྣམས་དུས་གཅིག་ཏུ་མཆོད་རྟེན་གྱི་དྲུང་དུ་ཞལ་འཛོམ་ཞིང་ཚོགས་འཁོར་རྒྱ་ཆེར་བཤམས་ཏེ་གསོལ་བ་མགྲིན་གཅིག་ཏུ་བཏབ་པས། རྡོ་རྗེ་ཕག་མོ་ལས་ཀྱི་དབང་

[Full Size]

མོ་ཆེ་འཁོར་དང་བཅས་པས་ཟབ་མོའི་ཆོས་གཏེར་གྱི་རྒྱ་དཀྲོལ་ནས། རིག་འཛིན་དགུ་ལ་དབང་བསྐུར་ཞིང་བྱིན་གྱིས་བརླབས་པས་རྒྱུད་ལུང་མན་ངག་གི་དགོངས་པ་མངོན་དུ་གྱུར་པར་མཛད་པའི་མཐར་སོ་སོའི་རིགས་དང་མཐུན་པའི་སྒྲུབ་པ་བཀའ་བརྒྱད་བྱེ་བྲག་པའི་རྒྱུད་ཀྱི་གཏེར་སྒྲོམ་རྣམས་གཏད་དེ། དེ་ཡང་། འཇམ་དཔལ་སྐུའི་རྒྱུད་ལེའུ་ཁྲི་དྲུག་སྟོང་པ་དང་། ཟླ་གསང་ནག་པོ་ལེའུ་འབུམ་པ་དང་། གཞོན་ནུ་གདོང་དྲུག །མེ་ལྕེ་ཕྲེང་བ། རྡོ་རྗེ་ཐོག་འབེབས། མེ་རླུང་སྐྱིན་ཐང་འཁྲུག་པ་ལ་སོགས་མདོར་ན་འཇམ་དཔལ་ཞི་ཁྲོ་སྤྱི་དང་བྱེ་བྲག་གི་རྒྱུད་སྡེ་རྣམས་བསེ་སྒྲོམ་སྨུག་པོའི་ནང་དུ་བཞུགས་པ་དེ་ཉིད། སྐུའི་རིག་འཛིན་འཇམ་དཔལ་བཤེས་གཉེན་ལ་བཀའ་བབ་པ་ལ་བརྟེན་ནས། རྒྱལ་བའི་དགོངས་དོན་མ་ལུས་འཇམ་དཔལ་གཤིན་རྗེ་འཁོར་ལོ་རྣམ་པ་བཞིར་བསྡུས་ཏེ། གདུལ་བྱ་

[Full Size]

རྣམས་སྨིན་གྲོལ་གྱི་ལམ་ལ་བཀོད། དེ་བཞིན་དུ། པདྨ་གསུང་གི་རྒྱུད་རྟ་མཆོག་རོལ་པ། རྔོག་མ་ལེབ་རྒན། དབང་ཆེན་འདུས་པ། སྤུ་གྲི་གསང་བ། དྲེགས་པ་ཚར་གཅོད། ཡང་གསང་ཁྲོས་པ། ནཱ་ག་ཀླུ་འདུས་སོགས་རྟ་མགྲིན་དབང་གི་རྒྱུད་དཔག་ཏུ་མེད་པ་ཟངས་ཀྱི་སྒྲོམ་བུར་བཞུགས་པ་དེ་གསུང་གི་རིག་འཛིན་ཀླུ་སྒྲུབ་སྙིང་པོ་ལ་བཀའ་བབས་པས་གསང་སྔགས་ཀྱི་དགོངས་དོན་ཐམས་ཅད་ཀྱི་དབང་ཆེན་རྟ་སྐད་ཐང་གསུམ་གྱི་དགོངས་པར་བསྡུས་ནས་གདུལ་བྱ་འདུལ་བར་མཛད། ཡང་དག་ཐུགས་ཀྱི་རྒྱུད་ཁྲག་འཐུང་འདུས་པ་ཆེ་ཆུང་། གལ་པོ་ཆེ་ཆུང་། འཇིག་རྟེན་འདས་མདོ། སངས་རྒྱ་མཉམ་སྦྱོར། ཟླ་གསང་ཐིག་ལེ། གསང་བ་འདུས་པ། ཡེ་ཤེས་རྔམས་པ་གློག་གི་འཁོར་ལོ་སོགས་མདོ་བཞི་དོམ་ལྔ་ལ་སོགས་པའི་རྒྱུད་སྡེ་མཐའ་ཡས་པ་རྣམས་དངུལ་གྱི་སྒྲོམ་

[Full Size]

བུར་བཞུགས་པ་ནི་ཐུགས་ཀྱི་རིག་འཛིན་ཧཱུྃ་ཀ་ར་ལ་བབས་པས། ཆོས་ཐམས་ཅད་རུ་ལུ་འབྲུ་བརྒྱད་ཀྱི་དགོངས་པར་བསྡུས་ནས་སེམས་ཅན་གྱི་དོན་མཛད། བདུད་རྩི་ཡོན་ཏན་གྱི་བདུད་རྩི་བམ་པོ་བརྒྱད་པ། བདུད་རྩི་འཁོར་ལོ་འབར་བ། བདུད་རྩི་ཕྲེང་བ། བདུད་རྩིའི་བུམ་པ། བདུད་རྩི་རོལ་བ་ཆེ་ཆུང་། རྣམ་དག་དྲི་མེད། དངོས་གྲུབ་གཏེར་མཛོད། བདུད་རྩི་ཐིག་པ། དངོས་གྲུབ་ཉེ་བའི་སྙིང་པོ། བདུད་རྩི་ལས་རྒྱ་མཚོ་ལ་སོགས་བདུད་རྩི་སྨན་གྱི་རྒྱུད་སྡེ་གྲངས་མེད་པ་རིན་ཆེན་གསེར་གྱི་སྒྲོམ་བུར་བཞུགས་པ་ནི་ཆེ་མཆོག་ཡོན་ཏན་གྱི་རིག་འཛིན་བི་མ་མི་དྲའི་ཕྱག་ཏུ་བབས་པ། འཁོར་འདས་ཀྱི་ཆོས་ཐམས་ཅད་བདུད་རྩི་རྣམ་དག་གི་དགོངས་པར་གཏན་ལ་ཕེབས་ནས་སྐལ་ལྡན་སྨིན་གྲོལ་དུ་མཛད། ཕུར་པ་ཕྲིན་ལས་ཀྱི་རྒྱུད་བི་ཏོ་ཏ་མཱ་ལ་འབུམ་སྡེ་ལས། རྡོ་རྗེ་རྩེ་མོ། ཡེ་ཤེས་རྩེ་མོ། སངས་རྒྱས་རྩེ་མོ། མྱང་འདས་ཆེ་ཆུང་། གསང་བའི་

[Full Size]

དགོངས་རྒྱུད། དམ་པ་གསང་ཆེན། ཀཱི་ལ་ཡ་བཅུ་གཉིས་འབྱུང་བ་ལ་སོགས་ཕུར་པ་རྩ་བའི་རྒྱུད་དྲུག །ཡན་ལག་གི་རྒྱུད་ཉེར་བདུན། གཙོ་བོ་ལྷ་བུའི་རྒྱུད་ལྔ། ཡལ་གའི་རྒྱུད་བཅུ། ལོ་མའི་རྒྱུད་བཞི། མེ་ཏོག་གི་རྒྱུད་བཅུ། འབྲས་བུའི་རྒྱུད་བཞི། སྙིང་པོའི་རྒྱུད་གསུམ། ཁ་སྐོང་གི་རྒྱུད་བདུན་དང་། ཕྲ་མོའི་རྒྱུད་བསམ་གྱིས་མི་ཁྱབ་པ་དང་བཅས་པ་ལྕགས་ཀྱི་སྒྲོམ་བུར་བཞུགས་པ་ནི་ཕྲིན་ལས་ཀྱི་རིག་འཛིན་པྲ་བྷ་ཧསྟི་ལ་བཀའ་བབས་པས། ཆོས་ཐམས་ཅད་དུག་གསུམ་སྐུ་གསུམ་དུ་སྒྲོལ་བར་བྱེད་པ་ཕུར་བུ་ཐལ་འབྱིན་གྱི་དགོངས་པས་འགྲོ་བ་འདུལ་བར་མཛད། སྲིད་པ་མ་མོའི་རྒྱུད་ལ། མ་མོ་འབུམ་ཏིག་རྩ་བའི་རྒྱུད་ལ་ལེའུ་བརྒྱ་རྩ་བརྒྱད་དང་། དེའི་རྒྱུད་ཕྱི་མ་དང་བཅས་པའི་མ་མོ་སྲིད་པའི་བེམས་ཆེན་དང་གསང་བ་གཏན་ཚིག་ལེའུ་འབུམ་པ་སོགས་

[Full Size]

སྤྱིའི་རྒྱུད་དང་། བྱེ་བྲག་ཏུ། སྐུ་རྒྱུད་འབུམ་ཏིག་ཡང་སྙིང་། གསུང་རྒྱུད་ལམ་རྒྱུད་དང་ལས་རྒྱུད། ཐུགས་རྒྱུད་མ་མོ་གསང་མཛོད་དང་། སྒོ་རྒྱུད་ལ་དཀར་མོ་སྐུའི་རྒྱུད་དགུ། སྨུག་པོ་གསུང་གི་རྒྱུད་ལྔ། ནག་མོ་ཐུགས་ཀྱི་རྒྱུད་བདུན་དང་། སེར་མོ་ཡོན་ཏན་དང་ལྗང་མོ་ཕྲིན་ལས་ཀྱི་རྒྱུད་སོགས་དཔག་ཏུ་མེད་པ་རྣམས་མུ་མེན་གྱི་སྒྲོམ་བུར་བཞུགས་པ་ནི། དབྱིངས་ཀྱི་རིག་འཛིན་དྷ་ན་སཾ་སྐྲྀ་ལ་བཀའ་བབས་པ། གསང་སྔགས་ཀྱི་ལམ་མཐའ་དག་རྩ་རླུང་རྣམ་དག་གི་དགོངས་པར་བསྡུས་ནས་སྐལ་ལྡན་བྱང་གྲོལ་ལ་འགོད་པར་མཛད།། ༈ །།འཇིག་རྟེན་དྲེགས་བྱེད་འདུལ་བའི་རྒྱུད་ཀྱི་སྐོར་ལ། དྲེགས་པ་འདུས་པ་སྐུའི་རྒྱུད། ངན་སྔགས་ནག་པོ་གསུང་གི་རྒྱུད། སྲོག་ཏིག་ནག་པོ་ཐུགས་ཀྱི་རྒྱུད། ཡོན་ཏན་དྲེགས་པའི་གཏེར་རྒྱུད། ཕྲིན་ལས་དྲེགས་པའི་ལས་རྒྱུད་སོགས་སྤྱིའི་

[Full Size]

རྒྱུད་དང་། བྱེ་བྲག་ཏུ་དྲེགས་བྱེད་སྡེ་དཔོན་སུམ་ཅུ་སོ་སོའི་སྒོས་རྒྱུད་གྲངས་མེད་པ་དང་བཅས་པ་རྣམས་རིན་ཆེན་མཆོག་གི་སྒྲོམ་བུར་བཞུགས་པ་ནི། དྲེགས་པ་ཀུན་འདུལ་གྱི་སློབ་དཔོན་དེ་ཝ་ཙནྡྲའི་ཕྱག་ཏུ་བབས་པས། འཁོར་འདས་ཐམས་ཅད་ལྟ་བའི་རྫོང་དང་སྒོམ་པའི་འཕྲང་གཉིས་ལ་བསྡུས་ཏེ་གཏན་ལ་ཕབ་པར་མཛད་དོ།། ༈ །།མོད་པ་དྲག་སྔགས་ཀྱི་སྐོར་ལ་ཤེལ་འཕྲེང་དཀར་པོ་སྐུའི་རྒྱུད། དྲག་སྔགས་འདུས་པ་གསུང་གི་རྒྱུད། །ཙིཏྟ་དམར་འབྱིན་ཐུགས་ཀྱི་རྒྱུད། གཏེར་མཛོད་ཆེན་པོ་ཡོན་གྱི་རྒྱུད། ལས་མཐའ་སྣ་ཚོགས་སྟོན་པ་ཕྲིན་ལས་ཀྱི་རྒྱུད་སོགས་དྲག་སྔགས་སྤྱིའི་རྒྱུད། །སྔགས་བདག་དྲེགས་པ་བཅོ་བརྒྱད་སོ་སོའི་སྒོས་རྒྱུད་མཐའ་ཡས་པ་དང་བཅས་པ་རྣམས་ཕྲ་མེན་གཟིའི་སྒྲོམ་བུར་བཞུགས་པ་ནི་དྲག་སྔགས་ཀྱི་རིག་འཛིན་ཤིནྟཾ་གརྦྷ་ལ་བཀའ་

[Full Size]

བབས་པས། བསྟན་སྲུང་གི་དྲག་ལས་ཐམས་ཅད་ཀྱི་སྙིང་པོའི་གནད་ནི་དྲེགས་པའི་སྲོག་སྙིང་དང་ཕྲ་དོག་ཐབས་གནད་ཀྱི་མན་ངག་གཉིས་ལ་བསྡུས་ནས་འགལ་བྱེད་ཆམ་ལ་དབབ་པའི་ཕྲིན་ལས་ལ་མངའ་བརྙེས། དེ་ལྟ་བུ་སྒྲུབ་པ་བཀའ་བརྒྱད་པོ་ཐམས་ཅད་ཀྱི་སྤྱི་རྒྱུད་སྡེ་ལྔ་ཁ་སྐོང་གི་ལུང་ཆེན་ལྔ། བྱེ་བྲག་གིས་སྒོས་རྒྱུད་བཅུ་ལ་སོགས་པ་བདེ་བར་གཤེགས་པ་ཐམས་ཅད་འདུས་པའི་རྒྱུད་སྡེ་རྣམས་དང་། གཞན་ལས། ཞི་ཁྲོ་སྒྱུ་འཕྲུལ་གྱི་སྐོར་དང་། ཡོངས་རྫོགས་གསང་འདུས། རང་བྱུང་རང་ཤར། མཉམ་སྦྱོར་མ་བུ། དགོངས་པ་ཟངས་ཐལ་སོགས་ཚེས་གཅིག་སངས་རྒྱས་ཀྱི་ཟབ་དོན་མཐར་ཐུག་པའི་རྒྱུད་སྡེའི་སྙིང་པོ་ཐམས་ཅད་ནི་ཀུན་འདུས་ཀྱི་རིག་འཛིན་པདྨ་སམྦྷ་ཝ་ཉིད་ལ་བཀའ་བབས་ཤིང་། ཆོས་ཐམས་ཅད་དགོངས་པའི་ཀློང་ནས་རང་ཤར་ཡང་གདུལ་བྱའི་སྣང་ངོར་སྒྲུབ་པ་སྡེ་བརྒྱད་ཀྱི་རིག་འཛིན་

[Full Size]

སོ་སོ་དང་ཡང་གདམས་པ་གསན་རེས་དང་མན་ངག་གི་དགོངས་ཉམས་བདུར་བའི་ཚུལ་གྱི་སྒྲོ་འདོགས་གཏིང་ཆོད་དུ་མཛད། སློབ་དཔོན་བརྒྱད་པོ་དེ་དག་སོ་སོས་ཀྱང་རང་རང་ལ་ཇི་ལྟར་བཀའ་བབས་པའི་རྒྱུད་སྡེ་རྣམས་ལ་བརྟེན་ནས་དངོས་གྲུབ་རྣམ་གཉིས་ཡོངས་སུ་བརྙེས་ཤིང་རྒྱུད་རྣམས་ཀྱི་དགོངས་པ་འགྲོལ་བའི་བསྟན་བཅོས་འགྲེལ་ཊིཀ་སྒྲུབ་ཐབས་ལག་ལེན་མན་ངག་ལས་ཚོགས་སོགས་རྒྱ་ཆེར་མཛད་ནས་གདུལ་བྱའི་སྐལ་བ་དང་མཚམས་པའི་ཆོས་ཀྱི་ཕྲིན་ལས་མཐའ་ཡས་པ་ཇི་ལྟར་སྤེལ་བའི་ལོ་རྒྱུས་ནི་བརྗོད་ཀྱི་མི་ལང་མོད་ནའང་འདི་སྐབས་ཀྱི་བརྗོད་བྱའི་སྙིང་པོ་ནི། སློབ་དཔོན་ཆེན་པོ་པདྨ་འབྱུང་གནས་ཉིད་བོད་ཡུལ་མཐའ་ཁོབ་མུན་པའི་གླིང་དུ་སངས་རྒྱས་ཀྱི་བསྟན་པའི་སྒྲོན་མེ་སྦར་བར་མཛད་པའི་སླད་དུ་བྱོན་པ་ཡན་ཆད་

[Full Size]

ཀྱི་སྐོར་གོང་དུ་སྨོས་པ་འདི་དག་ནི་མཁའ་འགྲོ་གཏད་རྒྱའི་བརྒྱུད་པ་ཅེས་བྱ་བ་ཡིན་ནོ།། ༈ །།བཞི་པ་གང་ཟག་སྙན་ཁུང་གི་རྒྱུད་ཚུལ་ནི། དུས་གསུམ་སངས་རྒྱས་ཐམས་ཅད་ཀྱི་སྤྱི་གཟུགས་རིག་འཛིན་གྲུབ་ཐོབ་མ་ལུས་པའི་གཙོ་བོར་གྱུར་པའི་གུ་རུ་རིན་པོ་ཆེ་པདྨ་འབྱུང་གནས་དེ་ཉིད་ཀྱིས། བསམ་ཡས་མཆིམས་ཕུ་བྲག་དམར་སྐེ་ཚང་གི་སྒྲུབ་གནས་སུ་བདེ་བར་གཤེགས་པ་ཐམས་ཅད་སྒྲུབ་པ་སྡེ་དགུ་ལ་ཡོངས་སུ་འདུས་པའི་དཀྱིལ་འཁོར་ཆེན་པོ་ཞལ་ཕྱེས་ནས། སྐལ་ལྡན་རྗེ་འབངས་སྙིང་གི་བུ་དགུ་ལ་དབང་བསྐུར་བའི་དུས་སུ། རང་རང་གི་ཚེ་རབས་ཀྱི་ལྷ་སྐལ་ལ་མེ་ཏོག་ཅོད་པཎ་ཇི་ལྟར་བབས་པ་དང་མཐུན་པའི་དཀྱིལ་འཁོར་ལྷ་ཚོགས་ཀྱི་ཞལ་མཐོང་ཞིང་དངོས་གྲུབ་ཀྱི་མཚན་མ་གང་ལྟར་བརྙེས་པ་ནི། རྗེ་མངའ་བདག་ཁྲི་སྲོང་ལྡེ་བཙན་གྱི་མེ་ཏོག་དབུས་ཀྱི་གཙོ་བོ་ལ་བབས་པས། དཀྱིལ་འཁོར་ཆེན་པོ་གཅིག་གི་སྟེང་དུ་སྒྲུབ་པ་

[Full Size]

བཀའ་བརྒྱད་ཀྱི་དཀྱིལ་འཁོར་ཚང་ལ་མ་འདྲེས་ཡོངས་སུ་རྫོགས་པ་དང་ལྷ་ཚོགས་བདུན་བརྒྱ་ཉེར་ལྔ་མེ་ལོང་ནང་གི་གཟུགས་བརྙན་ལྟར་བཀྲ་ལམ་མེར་མཐོང་ཞིང་། དེ་ཐམས་ཅད་རང་སེམས་ཐིག་ལེ་ཉག་གཅིག་གི་ངང་དུ་དབྱེར་མེད་པར་རྟོགས་པར་བྱུང་ལ། འོན་ཀྱང་རྒྱལ་པོ་འཇིག་རྟེན་གྱི་གཡེང་བ་ཆེ་བས་ཚེ་དེར་མཆོག་གི་གྲུབ་པ་མ་ཐོབ་ཀྱང་སྐྱེ་བའི་རིམ་པ་བཅུ་གསུམ་པར་སྒྲུབ་པ་བཀའ་བརྒྱད་ཀྱི་གཏེར་གྱི་བདག་པོར་གྱུར་ནས་རང་གཞན་དོན་གཉིས་འགྲུབ་པར་ལུང་བསྟན་ཞིང་བྱིན་གྱིས་བརླབས། སློབ་མ་གཞན་བདུན་གྱིས་ནི་ཕྱོགས་བཅུའི་སངས་རྒྱས་དང་བྱང་སེམས་མཐའ་དག་རང་རང་གི་མེ་ཏོག་ཕོག་པའི་དཀྱིལ་འཁོར་ལྷ་ཚོགས་དེའི་རང་བཞིན་དུ་རྫོགས་པའི་ཞལ་མཐོང་ཞིང་ངེས་ཤེས་ཐོབ་ལ། ཇོ་མོ་མཚོ་རྒྱལ་གྱིས་ནི་སངས་རྒྱས་ཀྱི་དཀྱིལ་འཁོར་མ་ལུས་པ་བླ་མ་རྡོ་རྗེ་སློབ་དཔོན་ཉིད་ལ་དབྱེར་མེད་དུ་རྫོགས་

[Full Size]

པར་མཐོང་བས་བྱིན་རླབས་ཞུགས་ཚུལ་ནན་ཏར་བཟང་བར་བྱུང་ཞིང་། ནམ་མཁའི་སྙིང་པོའི་མེ་ཏོག་ཤར་ཡང་དག་ཐུགས་ཀྱི་དཀྱིལ་འཁོར་ལ་བབས་པས་གྲུབ་རྟགས་ནམ་མཁའ་ལ་འཕུར་ཞིང་ཉི་ཟེར་རྟ་རུ་གཞོན་ནུས་པ་དང་། གནུབས་བན་སངས་རྒྱས་ཡེ་ཤེས་ནི་ལྷོ་འཇམ་དཔལ་སྐུའི་དཀྱིལ་འཁོར་ལ་བབས་པས། བྲག་ལ་ཕུར་པ་བཏབ་པ་དང་ཉི་ཟླའི་སྟེང་དུ་གཤེགས་བཞུད་མཛད། རྒྱལ་བ་མཆོག་དབྱངས་ཀྱི་པདྨ་གསུང་གི་དཀྱིལ་འཁོར་འགྲུབ་པས་རྟ་མགྲིན་གྱི་སྐུར་དངོས་སུ་སྟོན་ཞིང་རྟ་སྐད་ཀྱི་འཛམ་གླིང་ཁྱབ་པར་བསྒྲགས། མཚོ་རྒྱལ་གྱི་མེ་ཏོག་བྱང་གི་ཕུར་པ་ཕྲིན་ལས་ལ་བབས་པ་དེ་སླར་ཡར་ནས་ལྷོ་ནུབ་རིག་འཛིན་གྱི་དཀྱིལ་འཁོར་ལ་བབས་པའི་རྟེན་འབྲེལ་གྱིས་བསད་གསོའི་སྟ་སྟངས་གྲུབ་ཅིང་ཚེའི་རིག་འཛིན་ཀྱང་ཐོབ། འབྲོག་མི་དཔལ་གྱི་ཡེ་ཤེས་ཤར་ལྷོ་བླ་མེད་ཧེ་རུ་ཀ་ལ་བབས་པས་ཏིང་འཛིན་

[Full Size]

གཅིག་གིས་ཉིན་ཞག་མང་པོར་འདའ་ཞིང་སྣང་སྲིད་ཀྱི་མ་མོ་ཐམས་ཅད་བྲན་དུ་འཁོལ་ནུས་རླངས་དཔལ་གྱི་སེངེྒས་ནུབ་བྱང་དྲེག་ཀུན་འདུལ་ལ་བབས་པས་འཇིག་རྟེན་དྲེགས་པ་ཅན་ཐམས་ཅད་ལས་ལ་འགྱེད་པ་དང་ཐུན་མོང་གི་དངོས་གྲུབ་ཅི་འདོད་ཀྱི་བཟའ་བཏུང་དང་རིན་ཆེན་གྱི་ཆར་འབེབ་ནུས་པ་བྱུང་། བཻ་རོ་ཙ་ན་བྱང་ཤར་སྟོབས་ལྡན་ནག་པོའི་དཀྱིལ་འཁོར་ལ་བབས་པས། མཆོག་གི་དངོས་གྲུབ་ཟག་མེད་འོད་ལུས་འགྲུབ་ཅིང་། ཐུན་མོང་གི་ངག་གི་བདེན་ཚིག་གྲུབ། གཉགས་ཛྙཱ་ན་ཀུ་མཱ་ར་ནི་ཆེ་མཆོག་ཡོན་ཏན་བདུད་རྩིའི་དཀྱིལ་འཁོར་ལ་བབས་པས་སྐུའི་བཀོད་པ་གཅིག་ལས་མང་པོར་སྤྲུལ་ཞིང་བསྡུ་བ་དང་མི་སྣང་བའི་སྤྲུལ་བསྒྱུར་སོགས་ལ་དབང་ཐོབ་ཅིང་། བྲག་སྐམ་ལ་ཕྱག་མཛུབ་བཙུགས་ནས་བདུད་རྩིའི་ཆུ་དབྱུང་བ་སོགས་འབྱུང་བ་ལྔ་ལ་དབང་བསྒྱུར་བ་སྟེ། དེ་ལྟར་བོད་ཀྱི་བཀའ་

[Full Size]

བབས་དགུ་ལ་སློབ་དཔོན་རིན་པོ་ཆེས་སྒྲུབ་པ་བཀའ་བརྒྱད་ཟབ་མོའི་དབང་བསྐུར། རྒྱུད་བཤད། མན་ངག་གནང་ནས་རྒྱུད་སྨིན་གྲོལ་དུ་གྱུར་པ་ལ་གང་ཟག་སྙན་ཁུང་གི་རྒྱུད་པ་ཅེས་བྱའོ། །ལྔ་པ་སྨོན་ལམ་དབང་བསྐུར་གཏེར་ཆོས་ཀྱི་རྒྱུད་ཚུལ་ནི། སྙིགས་དུས་འགྲོ་བའི་སྐྱབས་སུ་མཆོག་པདྨ་འབྱུང་གནས་ཀྱི་སྐལ་པ་རྩོད་ལྡན་ཐ་མར་སྐྱེས་པའི་སེམས་ཅན་ལས་ཉོན་རྒྱུ་འབྲས་ལ་སྤྱོད་པ་རྣམས་ལ་ཐུགས་རྗེ་བརྩེ་བས་དགོངས་ཏེ་དེ་ལས་སྐྱོབ་ཕྱིར་བདེ་གཤེགས་ཐམས་ཅད་འདུས་པའི་རྒྱུད་ལུང་རྣམས་ཀྱི་དགོངས་པའི་སྙིང་པོ་སྒྲུབ་ཐབས་མན་ངག་སྐྱེད་རྫོགས་སྨིན་གྲོལ་ལག་ལེན་དུ་གཏན་ལ་ཕབ་པར་མཛད་པའི་བཀའ་བརྒྱད་ཀྱི་ཆོས་སྐོར་ལ། བདེར་གཤེགས་འདུས་པ། གསང་བ་ཡོངས་རྫོགས། རང་བྱུང་རང་ཤར། ཐུགས་ཀྱི་མེ་ལོང་བླ་མེད་ཀུན་འདུས། དགོས་འདོད་ཀུན་འབྱུང་། རྡོ་རྗེ་རྭ་སྦག །དྲེགས་པ་ཡོངས་འདུལ་

[Full Size]

དངོས་གྲུབ་འདུས་པ། ཡང་གསང་བླ་མེད། ཁྲོ་མཁར་མ་དང་རྫོང་ཕྲེང་ལ་སོགས་སྒྲུབ་པ་བཀའ་བརྒྱད་ཀྱི་ཆོས་སྐོར་རྒྱས་བསྡུས་མཐའ་ཡས་པ་ཞིག་གཏེར་ཤོག་ལ་བཀོད་ཅིང་བྱིན་རླབས་རབ་གནས་བཀའ་གཏད་སྨོན་ལམ་གྱིས་མཚམས་སྦྱར་ནས་གཏེར་གནས་སོ་སོར་སྦས་པ་རྣམས་བཀའ་བབས་གང་ཡིན་གྱི་གཏེར་སྟོན་སྤྲུལ་སྐུ་རིམ་པར་བྱོན་པ་རྣམས་ཀྱི་གཏེར་ནས་གདན་དྲངས་ཤིང་འགྲོ་བའི་དོན་རྒྱ་ཆེར་མཛད་ཚུལ་མངོན་སུམ་ཚད་མར་གྱུར་པ་འདི་ལགས་མོད་ཀྱི།། ༈ །།ད་ལམ་གྱི་སྐབས་ལ་བབས་པའི་སྒྲུབ་པ་བཀའ་བརྒྱད་ཡང་དྲིལ་དངོས་གྲུབ་སྙིང་པོ་འདི་ཉིད་ནི་གུ་རུ་རིན་པོ་ཆེས་རྫོགས་ཆེན་གྱི་རྣལ་འབྱོར་མྱང་བན་ཏིང་འཛིན་བཟང་པོ་ལ་ཚེ་སྒྲུབ་གནམ་ལྕགས་རྡོ་རྗེ་དངོས་གྲུབ་ཀུན་འདུས་ཀྱི་ཟབ་ཆོས་གནང་བའི་སྐབས་སུ། དཔེར་ན། འཇིག་རྟེན་ན་ཚོང་

[Full Size]

པ་ནོར་ཆེ་ཡང་ནོར་ལ་དགྲ་སྡང་བས་དགྲ་འཇིགས་སྐྱོབ་པའི་སྐྱེལ་མ་གལ་ཆེ་བའི་དཔེ་ལྟར། ཚེའི་སྒྲུབ་པ་དངོས་གྲུབ་ཆེ་ཡང་བར་ཆད་སེལ་བའི་ཆ་རྐྱེན་ལ་དགོངས་ཏེ་གནང་ནས་ཉང་ལུང་ལྗོན་པའི་གནས་སྒོར་གཏེར་དུ་སྦས་པ་ལས། མྱང་བན་གྱི་སྤྲུལ་པ་གཏེར་སྟོན་ཆེན་པོ་འཇའ་ཚོན་སྙིང་པོས་གདན་དྲངས་པའི་བྱིན་རླབས་ཀྱི་ངད་མ་ཡལ་བ་འདི་ལྟ་བུ་ནི་གཏེར་ཆོས་སྨོན་ལམ་དབང་བསྐུར་གྱི་རྒྱུད་པ་ཅེས་བྱ་སྟེ། གུ་རུ་རིན་པོ་ཆེས་གཏེར་སྟོན་དེ་ཉིད་ལ་དང་པོར་མྱང་བན་ལ་བཀའ་གཏད། ལུང་བསྟན། སྨོན་ལམ་བཏབ་པ་ལ་བརྟེན་ནས་སྐུ་ཚེ་འདི་ལ་ཟབ་གཏེར་དང་མཇལ་ཞིང་དངོས་ཉམས་མནལ་ལམ་ཐམས་ཅད་ལ་ཡང་པདྨ་འོད་ཀྱི་གཞལ་ཡས་སུ་གུ་རུ་ཉིད་དང་མཇལ་ཞིང་བྱིན་གྱིས་རློབ་པར་མཛད་པས་ན་བླ་བརྒྱུད་ཀྱི་ཕྲེང་བ་མང་པོ་འདྲེན་མི་དགོས་ཤིང་དམ་སེལ་བརྒྱུད་པས་བར་མ་

[Full Size]

ཆད་པའི་ཡིད་ཆེས་ཁུངས་བཙུན་གྱི་གཏན་ཚིག་དེ་ལྟར་ལགས་པས་དད་མོས་ངེས་ཤེས་ཀྱི་གདུང་ཤུགས་བསྐྱེད་དེ་གསོལ་བ་གདབ་པའི་ཚིག་འདིའི་རྗེས་ཟློས་མཛད་པར་ཞུ། ཧོཿ རྡོ་རྗེ་སློབ་དཔོན་དགོངས་སུ་གསོལ། བདེར་གཤེགས་རྒྱལ་བའི་དཀྱིལ་འཁོར་འདིར། །བདག་ཅག་དད་པས་འཇུག་པར་འཚལ། །ཐུགས་རྗེས་དཀྱིལ་འཁོར་དུ་བཞུགས་གསོལ། །ཞེས་གསོལ་བ་གདབ་པའི་མཇུག་ཏུ། འབྲུའི་མེ་ཏོག་སིལ་མ་ལག་ཏུ་གཏད་ནས། དེ་ལྟར་ལྷ་དང་བླ་མ་དབྱེར་མེད་རྡོ་རྗེའི་སློབ་དཔོན་ལ་གསོལ་བ་བཏབ་པ་སྔོན་དུ་སོང་ནས་སློབ་དཔོན་གྱིས་ཀྱང་ཐུགས་རྗེའི་དགོངས་པས་རྗེས་སུ་གནང་བ་ཡིན་པས་ན། དཀྱིལ་འཁོར་གྱི་ལྷ་ལ་རིག་པའི་མེ་ཏོག་ཕུལ་བའི་མཚོན་བྱེད་དུ་མེ་ཏོག་སིལ་མ་འདི་ཉིད་ཐལ་མོ་སྦྱར་བའི་བར་དུ་བཟུང་ནས། རང་རང་གི་ཚེ་རབ་མང་པོའི་གོང་ནས་བསྙེན་ཅིང་སྒྲུབ་པའི་ལས་འཕྲོ་གང་ལ་མཆིས་

[Full Size]

པ་ཁོ་ནར་མེ་ཏོག་འབུལ་བའི་འདུན་པས་ཚིག་འདི་རྗེས་ཟློས་མཛད་པའི་མཐར་མེ་ཏོག་དཀྱིལ་འཁོར་ལ་འཐོར་བར་མཛོད་ཅིག རྣལ་འབྱོར་རིག་པའི་མེ་ཏོག་འདི། །དཀྱིལ་འཁོར་ལྷ་ལ་འབུལ་ལགས་ན། །སྔོན་ནས་ལས་འཕྲོ་གང་ཡོད་པའི། །ཡི་དམ་ལྷ་ལ་བབས་པར་ཤོག །དེ་ཝ་ཨཱ་བེ་ཤཱ་ཡ་ཨཿ ཅེས་མེ་ཏོག་འཐོར་ལ། འོ། དེ་ལྟར་མེ་ཏོག་ཕུལ་བ་རྣམས་དཀྱིལ་འཁོར་ཐམས་ཅད་ཀྱི་བདག་ཉིད་ཀུན་བཟང་ཆེ་མཆོག་ཧེ་རུ་ཀའི་ཐུགས་ཀར་བབས་པ་ཡིན་ཏེ། ཅིའི་ཕྱིར་ན། འཁོར་གྱི་དཀྱིལ་འཁོར་ཡེ་ཤེས་རྣམ་པ་དགུའི་རང་འོད་ལས་གྲུབ་པའི་ཚོམ་བུ་དགུའི་ལྷ་ཚོགས་མ་ལུས་པ་རྣམས་གཙོ་མཆོག་ཉིད་ཀྱི་རང་མདངས་ལས་གཞན་མ་ཡིན་ཏེ། ཇི་ལྟར་ཉི་མའི་དཀྱིལ་འཁོར་གྱི་འོད་སྟོང་ཕྱོགས་བཅུར་འཕྲོ་བ་ཐམས་ཅད་ཉི་མ་ཁོ་ནའི་རང་འོད་ལས་གཞན་གང་ཡང་མ་ཡིན་པ་བཞིན་ཏེ། ཅིའི་ཕྱིར་ཁྱེད་

[Full Size]

རང་རྣམས་ཀྱི་ཡི་དམ་ལྷའི་སྐལ་པར་དཔལ་ཆེན་པོ་ཆེ་མཆོག་ཧེ་རུ་ཉིད་བསྙེན་ཅིང་བསྒྲུབ་པར་བྱོས་ལ། ལྷ་དང་མི་འབྲལ་བའི་རྟགས་སུ་གནས་གསུམ་དུ་ཡིག་འབྲུ་གསུམ་གྱི་མཚན་མ་བཏབ་ཅིང་། གསང་བའི་མཚན་གདགས་པ་འདི་ནི་དཔེར་ན་ལྕགས་ལ་གསེར་འགྱུར་གྱི་རྫས་བྱུགས་པ་ཙམ་གྱིས་ལྕགས་ཉིད་གསེར་གྱི་དངོས་པོར་འགྱུར་བ་ལྟར། ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཡི་དམ་ལྷའི་ངོ་བོར་གནས་བསྒྱུར་བའི་ཐབས་ཀྱི་བྱེ་བྲག་ལགས་པས་དེ་ལྟར་ངེས་པར་གྱིས་ལ། གསང་བའི་མཚན་ཡང་རྡོ་རྗེ་ཆེ་མཆོག་འདུས་པ་རྩལ་ཞེས་མ་བརྗེད་པར་འཛིན་འཚལ། ཞེས། རི་བཟང་གི་ཆུའམ་བདུད་རྩི་སྨན་གྱི་ཀ་པཱ་ལ་ནས་བླངས་པ་སློབ་དཔོན་གྱིས་རྡོ་རྗེ་དང་བཅས་པའི་སྲིན་ལག་གིས་སློབ་མའི་དཔྲལ་མགྲིན་སྙིང་གར་ཐིག་ལེ་བྱའོ། །དེ་ནས་ཡེ་ཤེས་འབེབས་པའི་ཡོ་བྱད་སྤོས་དང་རོལ་མོ་སོགས་སྟ་གོན་བྱས་ནས།། ༈ །།དེ་ནས་ཁྱེད་

[Full Size]

རང་རྣམས་ལ་དབང་གི་དངོས་གཞི་ཡེ་ཤེས་ཀྱི་ལྷ་དབབ་པའི་ཕྱིར། ལུས་གནད་སྐྱིལ་ཀྲུང་མཉམ་གཞག་ལྟ་སྟངས་དང་ལྡན་པའི་ངང་ནས་སྔར་ནས་རླུང་སྦྱོར་གོམས་ན་ཁ་སྦྱོར་བུམ་པ་ཅན་འཛིན་པ་དང་། དེ་ལྟར་མི་ཤེས་ན་དབུག་རང་སོར་བཞག་ནས་སེམས་ཀྱི་རྟོགས་པ་གཞན་དུ་སྐད་ཅིག་ཀྱང་མ་ཡེངས་པར་དམིགས་པ་འདི་ལྟར་སྒོམ་པར་ཞུ། དེ་ཡང་ཁྱེད་རང་རྣམས་སྐད་ཅིག་དྲན་རྫོགས་སུ་ནམ་མཁའ་ལ་འཇའ་ཤར་བ་བཞིན་དུ་དཔལ་ཆེན་ཧེ་རུ་ཀ་རིགས་འདུས་ཕྱག་རྒྱ་མཆོག་གི་སྐུར་གྱུར་ཏེ། དེ་ཡང་སྐུ་མདོག་མཐིང་ལ་སྨུག་པའི་མདངས་ཀྱིས་བརྗིད་པ། ཞལ་གཅིག་ཕྱག་གཉིས་གཡས་གསེར་གྱི་རྡོ་རྗེ་རྩེ་དགུ་པས་གཡོན་ཐོད་པ་ཁྲག་གིས་བཀང་བ་དཀྲུག་པའི་ཚུལ་དུ་བསྣམས་པ། ཞལ་གདངས་ལྗགས་འདྲིལ་མཆེ་བ་གཙིགས་ཤིང་སྤྱན་གསུམ་སྡང་མིག་གློག་ལྟར་འཁྱུག་པའི་སྨིན་མ།

[Full Size]

དང་སྨ་ར་མེ་ལྕེ་འབར་བ། དབུ་སྐྲ་ཁམ་ནག་ནམ་མཁར་འཕྱོ་ཞིང་ཐོད་སྐམ་རིགས་ལྔ་རྩེ་བྲན་འོད་ཟེར་འབར་བས་བརྒྱན་པ། སྙན་ཆ་མགུར་ཆུ་ཕྱག་ཞབས་ཀྱི་རྒྱན་དུ་རིན་པོ་ཆེ་དང་རུས་རྒྱན་སྦྲུལ་གྱི་ཆུན་བུས་སྤྲས་པ། སྐུ་ལ་གླང་ཆེན་ཀོ་རློན་མི་པགས་གཡང་གཞི་སྟག་ལྤགས་ཤམ་ཐབས་ཏེ་བགོད་བའི་གོ་གསུམ་དང་། ཐོད་པ་སྐམ་རློན་རྙེད་པའི་འཕྲེང་བ་ཚར་གསུམ་དང་། ཐལ་ཆེན་རཀྟ་ཞག་གི་ཟོ་རིས་ཏེ་བྱུགས་པའི་རྫས་གསུམ་དང་། རྡོ་རྗེའི་གཤོག་པ་དང་ཡེ་ཤེས་ཀྱི་མེ་དཔུངས་སྟེ་དཔའ་བའི་རྟགས་གཉིས་དང་བཅས་ཏེ་དཔལ་གྱི་ཆས་རྣམས་སྐུ་ལ་རྫོགས་པར་བརྒྱན་ཞིང་། ཞབས་གཡས་བསྐུམ་གཡོན་བརྐྱང་གི་དོར་སྟབས་ཀྱིས་པད་ཉིའི་གདན་ལ་བཞེངས་ཤིང་འགྱིངས་པ། ཡུམ་ཆེན་ཁྲོ་མོ་གནམ་ཞལ་མ་མཐིང་ག་ཆ་ལུགས་ཡབ་དང་མཚུངས་པའི་ཕྱག་གཡས་ཡབ་ཀྱི་

[Full Size]

མགུལ་ནས་མཁྱུད་ཅིང་གཡོན་པས་ཐོད་ཁྲག་ཡབ་ཀྱི་ཞལ་དུ་སྟོབས་པ། ཞབས་གཡས་པ་ཡབ་དང་མཉམ་པར་བཤིབ་ཅིང་གཡོན་ཡབ་ལ་འཁྲིལ་བ། ཡབ་ཡུམ་གཉིས་ཀ་སྣང་ལ་རང་བཞིན་མེད་པ་གར་གུའི་ཉམས་ལྡན་གཟི་བརྗིད་གཏུམ་བརྔམས་ཀྱི་དཔལ་དུ་འབར་བར་གསལ་བའི་ཐུགས་ཀར་པདྨ་སྔོན་པོ་འདབ་བརྒྱད་ཀྱི་གདན་ལ་ཉི་མའི་སྟེང་དུ་ཐུགས་སྲོག་ཧཱུྃ་མཐིང་ནག་གི་མཐའ་སྐོར་དུ་ཡང་ཧཱུྃ་མཐིང་བརྒྱད་ཀྱིས་བསྐོར་བར་གསལ། སྤྱི་བོའི་སྟེང་གི་ནམ་མཁར་པད་ཟླའི་གདན་ལ་ཆོས་སྐུ་ཀུན་བཟང་ཡབ་ཡུམ་ལ་འཁོར་དུ་རྒྱུད་པ་ལྔ་ལྡན་གྱི་བླ་མ་རིག་འཛིན་གྲུབ་ཐོབ་རྒྱུད་པ་ཐམས་ཅད་འཇའ་འོད་ཐིབས་སེ་བཞུགས་པ་མོས་པ་མཛོད་ཅིག །དེ་ནས་བདག་རྡོ་རྗེ་སློབ་དཔོན་གྱི་ཐུགས་ཁའི་འོད་ཟེར་དང་། ཁྱེད་རང་རྣམས་ཀྱི་ཐུགས་ཀའི་ཧཱུྃ་ལས་འོད་ཟེར་ཕྱོགས་བཅུར་འཕྲོས་པས་བླ་མ་སྐུ་གསུམ་རྒྱ་བོད་ཀྱི་གྲུབ་ཐོབ་རིག་འཛིན་སོགས་རྩ་རྒྱུད་ཀྱི་བླ་མ་ཐམས་ཅད་སྤྱན་

[Full Size]

དྲངས་ཏེ་ཁྱེད་རང་རྣམས་ཀྱི་སྤྱི་བོའི་བླ་མ་རྣམས་ལ་ཐིམ། དེ་དག་ཐམས་ཅད་ཀྱང་འོད་ཀྱི་གོང་བུར་གྱུར་ཏེ་ཁྱེད་རང་རྣམས་ཀྱི་སྤྱི་གཙུག་ཏུ་ཐིམ་པའི་མོས་པ་རྩེ་གཅིག་ཏུ་མཛོད་ཅིག །ཅེས་དམིགས་པ་སྤྲད་པ་ལྟར་སློབ་དཔོན་གྱིས་ཀྱང་ཏིང་འཛིན་གཏད་ཅིང་གུ་རུའི་ཚིག་བདུན་གསོལ་འདེབས་ཀྱི་མཐར། ཨོཾ་གུ་རུ་སརྦ་ས་མ་ཡ་ཨཱ་ཝེ་ཤ་ཡ། ཨ་བྷི་ཥཱིཉྩ་ཨཿཨཿཨཿ ཞེས་རོལ་མོ་དང་བཅས་ཏེ་བསྟིམ་མོ། དེ་ནས་ཁྱེད་རང་རྣམས་ཀྱི་འོད་ཟེར་ཕྱོགས་བཅུ་མཐའ་མེད་དུ་འཕྲོས་པས། དུས་གསུམ་གྱི་སངས་རྒྱས་བྱང་སེམས་ཐམས་ཅད་ཡིད་དམ་ཞི་བ་དམ་པ་རིག་བརྒྱ། སངས་རྒྱས་ཞི་བཅུ་རྩ་གཉིས། དེ་ཉིད་རིགས་ལྔ། གསང་ཆེན་རིགས་གཅིག་ལ་སོགས་པའི་རྣམ་པར་བྱོན་ཏེ་ཁྱེད་རང་རྣམས་ཀྱི་ཐུགས་ཀའི་ཧཱུྃ་ལ་གཉིས་མེད་དུ་ཐིམ་པའི་མོས་པ་མཛོད་ཅིག །ཨོཾ་སརྦ་ཏཱ་ག་ཏ་དེ་ཝ་ཤིནྟཾ་ཀ་ས་མ་ཡ་ཨཱ་ཝེ་ཤ་ཡ་ཨཿཨཿ ཞེས་ནན་ཏན་དུ་

[Full Size]

བསྟིམ། དེ་ནས་ཡང་ཐུགས་ཀའི་ཧཱུྃ་ཡིག་དགུ་ལས་འོད་འཕྲོས། རྒྱུད་སྡེ་བཞི་དྲུག་གི་ཡི་དམ་དཀྱིལ་འཁོར་ལྷ་ཚོགས་དཔའ་བོ་དང་རྣལ་འབྱོར་མའི་ཚོགས་དང་ཆོས་སྲུང་དམ་ཅན་རྒྱ་མཚོར་བཅས་པ་རྣམས་དང་ཁྱད་པར་དུ་བདེ་གཤེགས་སྒྲུབ་པ་བཀའ་བརྒྱད་ཀྱི་ལྷ་ཚོགས་བདུན་བརྒྱ་ཉེར་ལྔ་སྤྲུལ་པ་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པ་དང་བཅས་ཏེ་དྲག་ཆར་རླུང་གིས་སྐྱོད་པ་ལྟར་བྱོན་ནས་ཁྱེད་རང་རྣམས་ཀྱི་ཐུགས་ཀའི་ཧཱུྃ་ཡིག་དགུ་ལ་སིབ་སིབ་ཐིམ་པའི་མོས་པ་རྩེ་གཅིག་ཏུ་མཛོད་ཅིག །ཨོཾ་མ་ཧཱ་ཤྲཱི་ཧེ་རུ་ཀ་ས་པཱ་རི་ཝ་ར། ཨཱ་བེ་ཤ་ཡ་དུ་ཏི་ཏེ། བཛྲ་ག་མ་ཨ་ནུརྟ་རཾ། ཨཱ་བེ་ཤ་ཡ་ཨཱ་བེ་ཤ་ཡ། ཏེ་པཱ་ཡ་ཏེ་པཱ་ཡ། ར་ར་ཙ་ལ་ཧ་ཛ་ཧཱུྃ་ཨཱཿཧཱ་ཛྷཱེ༚་སྭཱ་ཧཱ། ཞེས་རོལ་མོ་དྲག་པོ་དང་བཅས་པས་བསྟིམ་ཞིང་། གལ་ཆེ་ཞིང་འཛོམ་ན་ཡེ་ཤེས་འབེབས་པའི་རྫས་སྦྱོར་གྱི་དུ་བས་བདུག་པ་སོགས་ཀྱང་བྱ་

[Full Size]

བར་གསུངས་ལ། མཐར། མེ་ཏོག་འཐོར་ཞིང་རྡོ་རྗེ་སྤྱི་བོར་བཞག་ནས་ཏིཥྛ་བཛྲ་གྱི་སྔགས་དང་བཅས་པས་བརྟན་པར་བྱའོ། །དེ་ལྟར་ཡེ་ཤེས་དབབ་པ་འདི་གསང་སྔགས་ཀྱི་དབང་ལ་གལ་པོ་ཆེར་གསུངས་ཀྱང་། གཞུང་གི་དབང་ཆོག་ཏུ་བརྡ་ཙམ་ལས་མ་བསྟན་པར་སྣང་བས་འདིར་བཀའ་བརྒྱད་གཏེར་རྙིང་དག་ནས་ཁ་བཀངས་ལགས་སོ། །དེ་ནས་སློབ་དཔོན་གྱིས་དབང་བུམ་གདན་དྲངས་ལ། དེ་ལྟར་སྐལ་ལྡན་གྱི་བུ་རྣམས་ལ་དབང་གིས་ཡེ་ཤེས་དབབ་ཅིང་བསྟིམ་ནས། ད་ནི་སླར་ཡང་དེ་ལས་མི་འདའ་ཞིང་མི་འབྲལ་བའི་རྒྱས་གདབ་པའི་དབང་རྣམས་རིམ་ཅན་དུ་བསྐུར་བ་ཡིན་པས། དེས་ན་ཁྱེད་རང་རྣམས་སྔར་བཞིན་དཔལ་ཆེན་པོའི་སྐུར་གསལ་བཞིན་པའི་ངང་ནས། དབང་རྫས་ཀྱི་བུམ་པ་འདིའི་ནང་གཞལ་ཡས་ཁང་དགུ་རྫོགས་ཀྱི་དཀྱིལ་འཁོར་ལྷ་ཚོགས་དངོས་སུ་བཞུགས་པ་ཁྱེད་ཀྱི་གཙུག་ཏུ་བཞག་པའི་ཚེ། ལྷ་རྣམས་འོད་དུ་ཞུ་བའི་བདུད་རྩིའི་

[Full Size]

ཆུ་རྒྱུན་ནར་གྱི་བྱུང་སྟེ་སྤྱི་གཙུག་ཚངས་བུག་ཏུ་ཞུགས། ལུས་ཀྱི་ནང་ཐམས་ཅད་བདུད་རྩིས་མེར་གྱིས་གང་ནས། ཚེ་རབས་ཐོག་མེད་ཀྱི་ལས་དང་ཉོན་མོངས་པའི་སྒྲིབ་པ་དག་ཅིང་། ཡི་དམ་ལྷ་དང་གཉིས་སུ་མེད་པའི་གོ་འཕངས་ཐོབ་པར་མོས་པ་མཛད་འཚལ་ལོ། །ཧཱུྃ། བཀྲ་ཤིས་བུམ་པ་རིན་ཆེན་རྒྱན། །བདེར་གཤེགས་ཞི་ཁྲོ་འོད་དུ་ཞུ། །སྐལ་ལྡན་བུ་ལ་དབང་བསྐུར་བས། །སྒོ་གསུམ་བག་ཆགས་སྒྲིབ་བྱང་ཤོག །ཨོཾ་སརྦ་ཨ་བྷི་ཥཱིཉྩ་ཧཱུྃ། ཞེས་སྤྱི་བོར་དབང་བསྐུར་ཞིང་བུམ་ཆུ་ཐིག་པ་སྤྱི་གཙུག་ཏུ་བཏིག་ཅིང་ཁ་ཡར་བླུད་དོ། །དེ་ནས་རིགས་ལྔའི་དབུ་རྒྱན་འཐོགས་ནས། དེ་ལྟར་བུམ་པས་དབང་བསྐུར་བས་བདུད་རྩིའི་ཆུས་ལུས་ཁེངས་ཤིང་ཆུ་ལྷག་གྱེན་དུ་ལུད་པ་ལས་རིགས་ཀྱི་བདག་པོ་རྒྱལ་བ་རྣམ་པ་ལྔས་དབུ་རྒྱན་པའི་མོས་པ་མཛོད། ཧཱུྃ། སྐུ་གསུང་ཐུགས་ཡོན་ཕྲིན་ལས་ལྔ། །སྐུ་ལྔ་ཡེ་ཤེས་དུག་ལྔ་འཇོམས། །དབུ་

[Full Size]

རྒྱན་རིགས་ལྔས་དབང་བསྐུར་བས། །ཉོན་མོངས་བག་ཆགས་དག་པར་ཤོག །ཨོཾ་ཨཱཿཧཱུྃ་སྭཱ་ཧཱ། བཛྲ་ཨ་བྷི་ཥཱིཉྩ་ཧཱུྃ། ཞེས་སྤྱི་བོར་བསྐུར་རོ། །དེ་ནས་ཕྱག་མཚན་རྡོར་དྲིལ་འཐོགས་ལ། དེ་ལྟར་ཁྱོད་རྣམས་ལ་ཕུང་ཁམས་ལྟར་བྱིན་རླབས་ཤིང་རིགས་བདག་གི་རྒྱས་བཏབས་པ་ནི་རྒྱལ་བུ་རྒྱལ་རིགས་སྤྱི་བོ་ནས་དབང་བསྐུར་ཁྲུས་གསོལ་ཞིང་ཅོད་པན་བཅིངས་པ་དང་ཆེས་མཚུངས་ལ། ད་ནི་བཀའ་རྟགས་ཀྱི་ཕྱག་རྒྱ་གཏད་པ་དང་མཚུངས་པར་རྡོར་དྲིལ་ལག་ཏུ་གཏད་པས་ཐབས་ཤེས་ཟུང་འཇུག་གི་སྒོ་ནས་འགྲོ་བའི་དོན་ལ་སྤྱོད་ནུས་པར་གྱུར་པའི་མོས་པ་མཛོད། ཧཱུྃ། ཡེ་ཤེས་ལྔ་ལྡན་རྡོ་རྗེ་དང་། གསུང་དབྱངས་གྲགས་སྟོང་དྲིལ་བུ་གཉིས། །ཐབས་ཤེས་ཟུང་འཇུག་དབང་བསྐུར་བས། །མཉམ་ཉིད་དབྱེར་མེད་དབང་ཐོབ་ཤོག །ཛྙཱ་ན་བཛྲ་གྷཎྜེ་ཨ་བྷི་ཥཱིཉྩ་ཧཱུྃ་ཨཱཿ ཞེས་གཡས་གཡོན་དུ་གཏད་ནས་རྡོ་རྗེ་གསོར་ཞིང་དྲིལ་བུ་འཁྲོལ་དུ་

[Full Size]

གཞུག་གོ། །དེ་ནས་མཆོད་པ་རྣམ་ལྔ་སྨན་དཀ་གཏོར་མ་རྣམས་མཁར་གཞོང་ལྟ་བུའི་སྣོད་ཆེ་བ་གཅིག་ཏུ་བཅུག་ནས་ལག་ཏུ་གཏད་ཅིང་། དེ་ནས་ཕྱི་ནང་གི་མཆོད་རྫས་ཡོངས་རྫོགས་གཏད་པས་ནི་རྒྱལ་སྲིད་ཀྱི་མངའ་ཐང་ལོངས་སྤྱོད་ཐམས་ཅད་འབོགས་པ་དང་ཆོས་མཚུངས་པས། ཁམས་གསུམ་ཆོས་ཀྱི་རྒྱལ་པོར་གྱུར་པའི་མོས་པ་མཛོད། ཧཱུྃ། སྨན་རཀ་གཏོར་མ་མཆོད་པའི་རྫས། །དམ་རྫས་ཡོངས་རྫོགས་དབང་བསྐུར་བས། །ལྷ་དང་དམ་རྫས་བསྟེན་མཆོད་དང་། །སྒོམ་སྒྲུབ་འཆད་ཉན་དབང་ཐོབ་ཤོག །ས་མ་ཡ་ཨ་བྷི་ཥཱིཉྩ་ཧཱུྃ། དེ་ནས་དུར་ཁྲོད་ཆས་བརྒྱད་རྣམས་གཏད་ཅིང་། དེ་ལྟར་རྒྱས་པར་དབང་བསྐུར་ནས་རྒྱལ་པོའི་ཆ་བྱད་དང་དཔལ་བརྗིད་ཀྱི་གོས་རྒྱན་རྣམས་གྱོན་པར་དབང་ལྟར། དཔལ་ཆེན་ཁྲོ་རྒྱལ་འབར་བའི་རྒྱན་ཆས་རྟགས་ཀྱི་རྫས་རྣམས་གཏད་ཅིང་བཀོན་པས། མ་མོ་མཁའ་འགྲོ་རྣམས་ཀྱིས་རྗེ་དང་གཙོ་བོར་བསྐུར་བ་དང་། འཇིག་རྟེན་ཁམས་ཀྱི་དྲེགས་པ་ཅན་ཐམས་ཅད་དབང་དུ་འདུ་ཞིང་ཟིལ་གྱིས་གནོན་ནུས་

[Full Size]

པར་གྱུར་པའི་ངེས་ཤེས་མཛོད་ཅིག །ཧཱུྃ། དེ་རིང་སྐལ་ལྡན་བུ་ཁྱོད་ལ། །ཀོ་རློན་ཞིང་སོགས་ཐོད་ཕྲེང་དང་། །སྦྲུལ་ཆུན་སྟག་ཤམ་ལ་སོགས་ལ། །དཔལ་གྱི་ཆས་དབང་བསྐུར་ཐོབ་ཤོག །ཨོཾ་ཤྲཱི་ཧེ་རུ་ཀ་ཨ་བྷི་ཥཱིཉྩ་ས་མ་ཡ་ཤྲཱི་་ཡེ་ཧཱུྃ་སྭཱ་ཧཱ། ཛཿཧཱུྃ་བྃ་ཧོ། དེ་ལྟ་བུ་ཕྱི་ཐུན་མོང་རྫས་ཀྱི་དབང་རྣམས་རིམ་པར་བསྐུར་ནས། འཁོར་ལོ་བསྒྱུར་བའི་རྒྱལ་བུ་རྒྱལ་སར་དབང་བསྐུར་བ་ཇི་ལྟ་བས་ཁྱེད་རྣམས་ཆོས་ཀྱི་རྒྱལ་སྲིད་ལ་བཀོད་ཅིང་མངའ་གསོལ་བའི་བྱིན་རླབས་མཐུ་འབྲས་ཀྱིས། དམ་པ་ཆོས་ཀྱི་རྒྱལ་ཁབ་སུ་མངོན་པར་སངས་རྒྱས་པའི་གོ་འཕངས་ཐོབ་ནས་ནམ་མཁའ་མཉམ་པའི་འགྲོ་བའི་དེད་དཔོན་ཆེན་པོར་འགྱུར་བའི་རྟེན་འབྲེལ་གྱི་ས་བོན་རྒྱུད་ལ་བཞག་པ་ཡིན་པས་དེ་ལྟར་ཐུགས་ལ་ངེས་མཛོད། ཅེས་བརྗོད་ཅིང་ཤིས་བརྗོད་མདོར་བསྡུས་ཀྱང་བྱའོ། །དེ་ལྟར་ཕྱི་དབང་རྣམས་ལེགས་པར་ཐོབ་ནས། ད་ནི་གསང་སྔགས་

[Full Size]

ནང་དབང་ཟབ་མོ་བསྐུར་བ་ལ་སྟེ། ཡི་དམ་ལྷའི་དབང་གི་སྐུ་མི་ཟད་རྒྱན་གྱི་འཁོར་ལོར་བྱིན་གྱིས་རློབས་པ་དང་། བཟླས་ལུང་གསང་བའི་དབང་གིས་གསུང་མི་ཟད་རྒྱན་འཁོར་དུ་བྱ་བ་དང་། ཤེས་རབ་བརྡའི་དབང་གིས་ཐུགས་མི་ཟད་རྒྱན་འཁོར་དུ་རྟོགས་པར་བྱེད་པ་རྣམས་ཀྱི་དང་པོར་ཕྱག་རྒྱ་ལྷའི་དབང་ཞུ་བའི་ཡོན་དུ་མཎྜལ་འབུལ་བར་ཞུ། ཞེས་མཎྜལ་ཕུལ་བའི་རྗེས་ལ་སློབ་དཔོན་གྱིས་གཙོ་མཆོག་སྐུ་གདན་དྲངས་ཏེ། ཁྱེད་རང་རྣམས་ཀྱི་ལུས་གདོས་བཅས་གཟུགས་ཀྱི་ཕུང་པོ་མ་དག་མཚན་འཛིན་གྱི་བག་ཆགས་སྦྱངས་ཤིང་ཡི་དམ་ལྷའི་སྐུར་གསལ་བཏབས། བྱིན་གྱིས་རླབས། དབང་བསྐུར། རྒྱས་གདབ་པ་སོགས་བགྱིས་པའི་དོན་རྣམས་དྲན་པར་བྱོས་ལ། སླར་ཡང་ལྷ་ལ་ལྷ་བསྟིམ་པ་ནན་ཏན་དུ་བགྱི་བ་ཡིན་པས། དེ་ཡང་མདུན་གྱི་དཀྱིལ་འཁོར་འདི་ཉིད་འདུས་བྱས་ཀུན་རྫོབ་རྫས་ཀྱི་དངོས་པོ་ཙམ་དུ་མ་འཛིན་པར་ཡེ་ཤེས་རང་བྱུང་སྤྲུལ་པའི་གཞལ་

[Full Size]

ཡས་ཁང་ཆོས་ཉིད་རོལ་པ་ཆེན་པོའི་ཕོ་བྲང་རྒྱན་དང་བཀོད་པ་ཕུན་སུམ་ཚོགས་པའི་དབུས་ཀྱི་དཀྱིལ་འཁོར་སྙིང་པོའི་གཙོ་མཆོག་འཁོར་འདས་མ་ལུས་པའི་ཁྱབ་བདག་ཀུན་བཟང་ཆེ་མཆོག་ཧེ་རུ་ཀའི་སྐུ་ལས་རང་འདྲའི་སྐུའི་སྒྱུ་འཕྲུལ་གར་དགུའི་ཉམས་ཀྱི་རོལ་པ་ཉི་མ་འབུམ་གྱི་གཟི་མདངས་ལྟར་འབར་བ་བྱོན་ཏེ་ཁྱེད་རང་རྣམས་ཀྱི་སྤྱི་བོའི་གཙུག་ཏུ་ཐིམ་པའི་མོས་གུས་རྩེ་གཅིག་མཛོད། ཧཱུྃ། དཀྱིལ་འཁོར་ཡོངས་ཀྱི་གཙོ་བོ་ཆེ་བའི་མཆོག །བཅོམ་ལྡན་དཔལ་ཆེན་ཀུན་བཟང་ཧེ་རུ་ཀ །ཡབ་ཡུམ་སྲས་དང་བཅས་པས་དབང་བསྐུར་བས། །སྐལ་ལྡན་བུ་ལ་མཆོག་གི་དངོས་གྲུབ་སྩོལ། །ཨོཾ་བཛྲ་ཀྲོ་དྷ་མཧཱ་ཤྲཱི་ཧེ་རུ་ཀ་ཧཱུྃ་ཕཊཿ ཛཿཧཱུྃ་བྃ་ཧོ་ཨ་བྷི་ཥཱིཉྩ་ཨཿ ཞེས་རོལ་མོ་བསྒྲག་ཅིང་དཔོན་སློབ་གཉིས་ཀས་ཏིང་འཛིན་དང་ལྡན་པས་སྤྱི་གཙུག་ཏུ་དབང་བསྐུར་ཞིང་བསྟིམ་མོ། །དེ་ལྟར་གཙོ་བོ་གཞན་ཐམས་ཅད་ལ་རིག་འགྲེ་སྟེ། དེ་ནས་ལྷོ་ཕྱོགས་

[Full Size]

ཀྱི་དཀྱིལ་འཁོར་ཆེན་པོའི་གཙོ་བོ་འཇམ་དཔལ་གཤིན་རྗེའི་གཤེད་ལས་རང་འདྲའི་སྐུ་འཕྲོས་ཏེ་ཁྱེད་རང་རྣམས་ཀྱི་དཔྲལ་བའི་གནས་སུ་ཐིམ་པའི་མོས་པ་མཛོད། ཧཱུྃ། དཀྱིལ་འཁོར་ཡོངས་ཀྱི་སྐུ་མཆོག་གཤིན་རྗེའི་གཤེད། ཡབ་ཡུམ་སྲས་དང་བཅས་པས་དབང་བསྐུར་བས། སྐུ་ལྔ་ལྷུན་གྲུབ་ཡེ་ཤེས་ལྔ་དང་ལྡན། །སྐལ་ལྡན་བུ་ལ་སྐུ་ཡི་དངོས་གྲུབ་སྩོལ། །ཨོཾ་ཨ་ཀྲོ་ཏེ་ཡ་མཱནྟ་ཀ་ཧཱུྃ་ཕཊཿ ཛཿཧཱུྃ་བྃ་ཧོ། ཨ་བྷི་ཥཱིཉྩ་ཨཿ ཞེས་དཔྲལ་བར་བསྐུར་རོ། །དེ་ནས་ནུབ་ཕྱོགས་ཀྱི་དཀྱིལ་འཁོར་དབུས་ནས་དཔལ་ཆེན་རྟ་མགྲིན་དབང་གི་རྒྱལ་པོ་ལས་རང་འདྲའི་སྐུ་བྱོན་ཏེ། ཁྱོད་ཀྱི་མགྲིན་པའི་གནས་སུ་ཐིམ་པའི་མོས་པ་མཛོད། ཧཱུྃ། དཀྱིལ་འཁོར་ཡོངས་ཀྱི་གསུང་མཆོག་དབང་ཆེན་སྐུ། །ཡབ་ཡུམ་སྲས་དང་བཅས་པས་དབང་བསྐུར་བས། །འགག་མེད་གསུང་དབྱངས་འགྲོ་ཀུན་དབང་དུ་བསྡུད། །སྐལ་ལྡན་བུ་ལ་གསུང་གི་དངོས་གྲུབ་སྩོལ། །

[Full Size]

ཨོཾ་པདྨ་ཏ་ཀྲྀ་ད་ཧ་ཡ་གྲི་བ་ཧུ་ལུ་ཧུ་ལུ་ཧཱུྃ་ཕཊཿ ཛཿཧཱུྃ་བྃ་ཧོ་ཨ་བྷི་ཥཱིཉྩ་ཧཱུྃ། མགྲིན་པར་བསྐུར་རོ། །དེ་ནས་ཡང་དཀྱིལ་འཁོར་གྱི་ཤར་ཕྱོགས་ནས་དཔོན་བཛྲ་ཧེ་རུ་ཀ་འཕྲོས་ཏེ་ཁྱེད་ཀྱི་སྙིང་གར་ཐིམ་པར་སྒོམ་མཛོད་ཅིག །ཧཱུྃ། དཀྱིལ་འཁོར་ཡོངས་ཀྱི་ཐུགས་མཆོག་བཛྲ་སྐུ། །ཡབ་ཡུམ་སྲས་དང་༴ །གསལ་སྟོང་མཐའ་བྲལ་ཟུང་འཇུག་རྡོ་རྗེའི་ཐུགས། སྐལ་ལྡན་བུ་ལ་ཐུགས་ཀྱི༴ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊཿ ཛཿཧཱུྃ་བྃ་ཧོ་ཨ་བྷི༴ ཞེས་སྙིང་ཁར་བསྐུར་རོ། །ཡང་། བྱང་ཕྱོགས་དཀྱིལ་འཁོར་གྱི་གཙོ་བོ་ཕྲིན་ལས་རྡོ་རྗེ་གཞོན་ནུ་ལས་རང་འདྲའི་སྐུ་འཕྲོས་ནས་ལྟེ་བར་ཐིམ་པར་སྒོམ་མཛོད། ཧཱུྃ། དཀྱིལ་འཁོར་ཡོངས་ཀྱི་ཕྲིན་ལས་ཕུར་པའི་སྐུ། །རྡོ་རྗེ་གཞོན་ནུ་ཡབ་ཡུམ་སྲས་དང་བཅས། །བྱིན་རླབས་ཐོག་མེད་ནུས་མཐུའི་དབང་བསྐུར་བས། །སྐལ་ལྡན་བུ་ལ་ཕྲིན་ལས་དངོས་གྲུབ་སྩོལ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷན་བཾ་ཧཱུྃ་ཕཊཿ

[Full Size]

ཛཿཧཱུྃ་བྃ་ཧོ་ཨ་བྷི༴ ཞེས་ལྟེ་བར་བསྐུར་རོ། །དེ་ནས་ཤར་ལྷོའི་དཀྱིལ་འཁོར་གྱི་གཙོ་བོ་བླ་མེད་ཧེ་རུ་ཀ་འཕྲོས་ནས་གསང་བའི་གནས་སུ་ཐིམ་པར་སྒོམ་མཛོད། ཧཱུྃ། དཀྱིལ་འཁོར་ཡོངས་རྫོགས་བླ་མེད་ཧེ་ཏུ་ཀ །མ་མོ་རྦོད་གཏོང་ཚོགས་ཀྱི་དབུས་ན་བཞུགས། །ལྷ་མོ་མོ་རྒྱུད་མཁའ་འགྲོ་ཀུན་འདུས་དབང་། །སྐལ་ལྡན་བུ་ལ་མཁའ་འགྲོས་དངོས། །ཨོཾ་གུ་ཧྱ་ཛྙཱ་ན་ཤྲཱི་ཧེ་རུ་ཀ ཀྲོ་དྷེ་ཤྭ་རི་སྟཾྭ་མ་མ་ཡོ་གི་ནཱི་ཧཱུྃ་ཕཊ། ཛཿཧཱུྃ་བྃ་ཧོ་ཨ་བྷི༴ ཞེས་པས་གསང་བར་བསྐུར་རོ། །ཡང་། ལྷོ་ནུབ་ཀྱི་དཀྱིལ་འཁོར་ནས་རིག་འཛིན་སློབ་དཔོན་གྱི་སྤྲུལ་པ་འཕྲོས་ནས་སྤྱི་གཙུག་ཏུ་ཐིམ་པའི་མོས་པ་མཛོད། ཧཱུྃ། དཀྱིལ་འཁོར་ཡོངས་ཀྱི་བླ་མ་ཐོད་ཕྲེང་རྩལ། རྒྱ་བོད་གྲུབ་ཐོབ་རྩ་རྒྱུད་གུ་རུ་རྣམས། །ཡབ་ཡུམ་སྲས་བཅས་ཐུགས་རྗེའི་བྱིན་རླབས་དབང་། སྐལ་ལྡན་བུ་ལ་དངོས་གྲུབ་རྣམ་གཉིས་སྩོལ། །ཨོཾ་བཛྲ་གུ་རུ་པདྨ་སིདྡྷི་ཧཱུྃ་ཕཊཿ ཛཿཧཱུྃ་བྃ་ཧོ་ཨ་ཞེས་སྤྱི་གཙུག་ཏུ་བསྐུར་རོ། །

[Full Size]

ནུབ་བྱང་གི་དྲེགས་པའི་སྡེ་དཔོན་སུམ་ཅུའི་དཀྱིལ་འཁོར་གྱི་མངའ་བདག་དཔལ་དྲེགས་པ་ཀུན་འདུལ་ལས། རང་འདྲའི་སྤྲུལ་པ་འཕྲོས་ཏེ་ཁྱེད་ཀྱི་སྤུས་མོ་གཡས་སུ་ཐིམ་པར་སྒོམ་མཛོད་ཅིག །ཧཱུྃ། དཔལ་ཆེན་ཁྲོ་རྒྱལ་དྲེགས་པ་ཀུན་འདུལ་ནི། ཡབ་ཡུམ་སྲས་དང་འཁོར་ཚོགས་ཐམས་ཅད་ཀྱིས། ཆོས་སྐྱོངས་སྲུང་མ་ལས་ལ་འཁོལ་བ་དང་། སྐལ་ལྡན་བུ་ལ་མཐུ་རྩལ་དངོས་གྲུབ་སྩོལ། །ཨོཾ་བཛྲ་ཙཎྜ་སརྦ་དུཥྚཾ་ཧཱུྃ་ཕཊཿ ཛཿཧཱུྃ་བྃ་ཧོ་ཨ་བྷི༴ ཞེས་པུས་མོ་གཡས་སུ་བསྐུར་རོ། །དཀྱིལ་འཁོར་བྱང་ཤར་གྱི་གཙོ་བོ་དཔོན་སྟོབས་ལྡན་ནག་པོ་ལས་རང་འདྲའི་སྤྲུལ་པ་འཕྲོས་པ་སྤུས་མོ་གཡོན་པར་ཐིམ་པའི་མོས་པ་མཛོད། ཧཱུྃ། དཔལ་ཆེན་ཁྲོ་རྒྱལ་སྟོབས་ནག་པོ་ནི། ཡབ་ཡུམ་སྲས་དང་འཁོར་བཅས་མ་ལུས་པས། །འཇིག་རྟེན་དྲེགས་པ་འདུལ་བའི་དངོས་གྲུབ་ནི། །སྐལ་ལྡན་བུ་

[Full Size]

ལ་དབང་བསྐུར་བྱིན་གྱིས་རློབས། །ཨོཾ་སརྦ་ཡཀྵ་ས་མ་ཡ་ཧཱུྃ་ཕཊཿ ཛཿཧཱུྃ་བྃ་ཧོ་ཨ་བྷི་ཥཱིཉྩ་ཨཿ ཞེས་པུས་མོ་གཡོན་དུ་བསྐུར་རོ། །དེ་ནས་ཡང་གཙོ་མཆོག་གི་སྐུ་དཔུང་གཡས་གཡོན་གྱི་སྤྲུལ་པའི་ཁྱུང་ཆེན་དཀར་ནག་གཉིས་ལས་རང་འདྲའི་སྤྲུལ་པ་རེ་འཕྲོས་ནས་ཁྱེད་ཀྱི་དཔུང་པ་གཉིས་ལ་ཐིམ་པར་སྒོམ་མཛོད། །ཧཱུྃ་ཁྲོཾ། བྱ་ཁྱུང་རྒྱལ་པོ་དཀར་ནག་གཉིས། རྡོ་རྗེའི་མཆུ་ལ་རལ་གྲིའི་སྤུར་ལྕགས་ཀྱུའི་སྡེར་མོ་གནམ་ལྕགས་ར། ས་བདག་ཀླུ་འདུལ་དབང་ཐོབ་ཤོག །ཁྲོཾ་ག་རུ་ཌ་ཙ་ལེ་ཙ་ལེ་ཧཱུྃ་ཕཊཿ ཛཿཧཱུྃ་བྃ་ཧོ་ཨ་བྷི་ཥཱིཉྩ་ཨཱཿ ཞེས་དཔུང་པ་གཡས་གཡོན་ལ་བསྐུར་ཞིང་ཐིམ་མོ། །དེ་ནས་སླར་ཡང་དཀྱིལ་འཁོར་དགུའི་ལྷ་ཚོགས་བདུན་བརྒྱ་ཉེར་ལྔ་ཐམས་ཅད་མ་ལུས་པའི་སྐུ་སོ་སོ་ལས་མར་མེ་གཅིག་ལས་གཉིས་སུ་ཆེད་པའམ། ནམ་མཁའི་ཟླ་བ་མཚོ་རྫིང་གི་ནང་དུ་སྣང་བ་ལྟར་རྫུ་འཕྲུལ་སྐུའི་སྣང་བརྙན་རེ་རེ་ཁྱེད་

[Full Size]

རང་རྣམས་སོ་སོ་ལ་ཐིམ་པས་ཕུང་ཁམས་རྒྱལ་བའི་དཀྱིལ་འཁོར་ཆེན་པོར་གཟོད་ནས་ལྷུན་གྱིས་གྲུབ་བཞིན་པ་ལ་སླར་ཡང་གསལ་ཐེབས་ཤིང་བྱིན་རླབས་ཀྱི་ནུས་སྟོབས་ཆེས་ཆེར་འཕེལ་བར་གྱུར་པའི་མོས་པ་མཛོད་ཅིག །ཅེས་བརྗོད་ལ་དྲག་སྔགས་སྤྱི་དྲིལ་ཆེན་མོ་ཚར་གཅིག་བརྗོད་ཅིང་རོལ་མོ་བསྒྲག །མེ་ཏོག་འཐོར་རོ། །དེ་ལྟར་ལྷ་སྐུ་ཕྱག་རྒྱའི་དབང་གིས་ལུས་སྤྲུལ་པ་སྐུར་བྱིན་གྱིས་རླབས་ནས། གཉིས་པ་བཟླས་ལུང་གསང་བའི་དབང་གིས་ངག་སྨིན་པར་བྱེད་པ་ལ། དཀྱིལ་འཁོར་དགུའི་ལྷ་རྣམས་ཀྱི་ཐུགས་ཁར་ཉི་མའི་སྟེང་དུ་ཧཱུྃ་དང་སྔགས་ཕྲེང་སྐུ་མདོག་དང་མཚུངས་པར་འཁོར་བ་རྣམས་གྱེན་དུ་ནར་གྱི་བྱུང་བས་ཞལ་གྱི་སྒོ་ནས་འཐོན་པ་ཁྱེད་རང་རྣམས་ཀྱི་ཞལ་དུ་ཞུགས་ཏེ་ལྗགས་ཀྱི་སྟེང་པད་ཟླ་ལ་སྔགས་ཀྱི་འཁོར་ལོ་ལུ་གུ་རྒྱུད་དུ་འཁོར་བར་བསྒོམ་ཞིང་སྔགས་ཀྱི་རྗེས་ཟློས་ཀྱང་

[Full Size]

མཛད་པ་འཚལ། ཞེས། འཕྲེང་བའི་སྣ་རེ་ནས་དཔོན་སློབ་གཉིས་ཀས་བཟུང་ལ། རྒྱས་པར་ལས་གཞུང་གི་འཛབ་ལྟར་དཔལ་དགུ་སོ་སོའི་སྙིང་པོ་བཟླས་ལུང་འབོག་པའམ། མདོར་བསྡུ་ན། ཨོཾ་བཛྲ་མ་ཧཱ་ཀྲོ་རྡ་པདྨ་ཀྲོ་དྷི་ཤྭ་རི་བཛྲ་ཀཱི་ལི་ཀཱི་ལ་ཡ་ཧཱ་ཡཀྴ་ཀ་ལ་རུ་པ་ཀརྨ་རཾ་རཾ་ཛྭ་ལ་རཾ་ཧཱུྃ་ཕཊཿ ཅེས་ཚར་གསུམ་རྗེས་ཟློས་སློབ་མས་ཡེ་ཤེས་ན་དཔོན་སློབ་མགྲིན་གཅིག་ཏུ་ལན་བདུན་བཟླ་ཡང་རུང་ངོ་། གསང་དབང་དངོས་ནི། ཀཱ་པ་ལ་བདུད་རྩི་ཨ་མྲྀ་ཏ་ཛ་གད་མངར་གསུམ་སྦྱར་བས་གང་བ་འཐོགས་ཏེ།། ༈ །།དེ་ནས་ཕྱོགས་དུས་ཀྱི་རྒྱལ་བ་ཐམས་ཅད་འདུས་པའི་ངོ་བོ་དགོངས་བརྡ་སྙན་རྒྱུད་ཀྱི་བླ་མ་ཐམས་ཅད་དྲིན་ཅན་རྩ་བའི་བླ་མར་རོ་གཅིག་པ་ཉིད་དཔལ་ཆེན་པོ་ཆེ་མཆོག་ཡབ་ཡུམ་གྱི་སྐུར་བཞེངས་ཏེ་མ་ཆགས་ཐབས་ཀྱི་རོལ་པ་མ་མཉམ་སྦྱོར་བདེ་ཆེན་གྱིས་ལོངས་སྤྱོད་མཛད་པའི་དངོས་གྲུབ་བྱང་སེམས་ཀྱི་བདུད་རྩི་འདི་སྐལ་ལྡན་བུ་ལ་བྱིན་པས་

[Full Size]

ངག་ཐ་མལ་གྱི་བག་ཆགས་ལས་སྒྲིབ་ཉེས་ཚོགས་ཐམས་ཅད་དག་ཅིང་། རྩ་རླུང་ཐིག་ལེ་བདེ་བ་ཆེན་པོར་བྱིན་གྱིས་བརླབས་པའི་ངེས་ཤེས་བསྐྱེད་མཛོད་ཅིག །ཧཱུྃ། བླ་མ་བདེར་གཤེགས་ཡབ་ཡུམ་རྣམས། །གཉིས་མེད་སྦྱོར་བའི་བྱང་སེམས་འདིས། །སྐལ་ལྡན་ངག་ལ་དབང་བསྐུར་བས། །གསང་བའི་དབང་མཆོག་ཐོབ་པར་ཤོག །ཨོཾ་སརྦ་པཉྩ་ཨ་མྲྀ་ཏ། མ་ཧཱ་སུ་ཁ་ཨ་ཝེ་ཤ་ཡ་ཨཱཿཨཿ ཞེས། མགྲིན་པར་དབང་བསྐུར་ཞིང་བདུད་རྩི་བླུད་དོ། །དེ་ནས་ཡེ་ཤེས་ཀྱི་རིགས་མའི་སྐུ་གཟུགས་འཐོགས་ལ། དེ་ལྟར་གསང་དབང་ངག་ལ་བསྐུར་བས་ངག་ལོངས་སྤྱོད་རྫོགས་སྐུར་བྱིན་རླབས་ནས། གསུམ་པ་ཤེས་རབ་ཡེ་ཤེས་དབང་གིས་ཡིད་སྨིན་པར་བྱ་བ་ལ། གང་ཟག་གི་རྒྱུད་རིགས་ནུས་པ་སོགས་ཀྱི་རིམ་པ་དང་འཚམས་པའི་བསྐུར་ཐབས་ཀྱི་ཕྱག་བཞེས་ཀྱང་རྒྱས་བསྡུས་ཇི་སྙེད་གཅིག་མཆིས་ནའང་། སྐབས་

[Full Size]

འདིར་བབས་པ་ནི་བརྡ་དང་མཚོན་བྱེད་ལ་བརྟེན་ནས་དོན་གྱི་སྐལ་བ་ཅན་དུ་སྒྲུབ་པའི་ཐབས་ཡིན་ཏེ། དེས་ན་ཁྱེད་ཅག་རྣམས་དཀྱིལ་འཁོར་གྱི་བདག་པོ་གཙོ་མཆོག་ཧེ་རུ་ཀ་དངོས་ཀྱི་འདུ་ཤེས་དང་མ་བྲལ་བར་མཛད་པའི་ངང་ནས། རྒྱལ་བ་ཐམས་ཅད་ཀྱི་ཡུམ་གྱུར་ཆོས་ཐམས་ཅད་ཀྱི་འབྱུང་གནས་བདེ་བའི་ཡེ་ཤེས་མཆོག་གི་གསང་མཛོད་དུ་གྱུར་པ་ཡུམ་ཆེན་མོ་གནམ་ཞལ་དབྱིངས་ཕྱུག་མའི་སྐུའི་ཟློས་གར་མཚན་དཔེའི་རི་མོར་ཤར་བའི་དེ་ཉིད་གཏད་པ་ལ་བརྟེན་ནས། བླ་ན་མེད་པའི་མྱུར་ལམ་ཟབ་མོའི་སྣོད་ལྡན་དུ་གྱུར་པའི་མོས་པ་མཛོད། ཧཱུྃ། མཚན་ལྡན་ཡིད་འོང་གྲོགས་མཆོག་འདི། །བསྟེན་པས་བདེ་སྟོང་རྒྱུད་ལ་སྐྱེ། །ཐིག་ལེ་དབབ་བཟུང་འདྲེན་འགྲམ་གྱིས། །བདེ་ཆེན་ལྷན་སྐྱེས་རྟོགས་པར་ཤོག །ཨ་ཧོ་སུ་ཁ་ཧེ། ཞེས་གཏད་ལ། ཧཱུྃ། ཡབ་ཡུམ་གཉིས་ཀ་སྣང་སྟོང་ལྷ།

[Full Size]

རྡོ་རྗེ་པདྨ་བྱིན་རླབས་ཏེ། །དབབ་འཛིན་འདྲེན་བཀྲམ་འཕྲུལ་འཁོར་གྱིས། །བདེ་སྟོང་རང་ངོ་ཤེས་པར་བྱོས། ཨ་ནུ་རཱ་ག་བཛྲ་ཛྙཱ་ན་ཨཏྨ་ཀོ྅ཧཾ། དེ་ཡང་ཁམས་གསུམ་གྱི་སེམས་ཅན་སྤྱི་དང་ཁྱད་པར་འདོད་ཁམས་ཀྱི་འགྲོ་བ་ཐམས་ཅད་རྒྱུ་དུག་གསུམ་ཆགས་སྣང་ལ་བརྟེན་ཞིང་། རྐྱེན་ཕ་མའི་མཚམས་སྦྱོར་གྱི་མཐུ་ལས་འབྲས་བུ་སྐྱེ་འགྲོ་ཕོ་མོར་སྣང་བ་ནི་བརྡ་དང་སྦྱང་གཞི་ཡིན་ལ། དེ་ལ་ཆགས་སྡང་གི་རྟོག་པ་སྦྱང་ཕྱིར་དུ། ལྷ་ཡབ་དང་ཡུམ། ཆོས་ཐབས་དང་ཤེས་རབ། རྫས་རྡོ་རྗེ་དང་དྲིལ་བུ་ལ་སོགས་ཀྱི་བྱེ་བྲག་ཐམས་ཅད་ནི་མཚོན་བྱེད་ཀྱི་རྟགས་དང་སྦྱོང་བྱེད་ཡིན་ཞིང་། དེ་དག་ལ་བརྟེན་པའི་ཉམས་ལེན་གནད་དུ་བསྣུན་པས་ནི་སྤང་བྱ་དང་གཉེན་པོ་དབྱེར་མེད་དུ་འདྲེས་པས་ཆགས་སྡང་གི་རྩ་བ་ཟད། བདེ་བ་དང་སྡུག་བསྔལ་སེམས་ཐོག་ཏུ་རོ་མཉམ་

[Full Size]

པས་དགག་སྒྲུབ་ཀྱི་འཛིན་པ་ཞིག །ཕོ་མོ། བདག་གཞན། ཡབ་ཡུམ། སྣང་སྟོང་སོགས་ཀྱི་དབྱེ་གཞི་དང་དབྱེ་མཁན་གདོད་ནས་མ་གྲུབ་པའི་དབྱིངས་དང་ཡེ་ཤེས་ལྷན་སྐྱེས་ཟུང་དུ་འཇུག་པའི་རང་ངོ་ཡེ་ཇི་བཞིན་པའི་གནས་ལུགས་མཐོང་བ་ནི་མཚོན་བྱའི་དོན་དང་སྦྱང་འབྲས་ཀྱི་སྙིང་པོ་ཡིན་ཚེ། དེ་ལྟར་རྟོགས་པའི་ཐབས་དང་རྟེན་འབྲེལ་རྒྱུད་ལ་བཞག་པ་ཡིན་པས་ན་ཤེས་རབ་ཡེ་ཤེས་ཀྱི་དབང་ཞེས་བྱའོ། །ཞེས། ཤེར་དབང་གི་དོན་གྱི་ཡེ་ཤེས་ངོ་སྤྲོད་པའི་ས་བཅད་མ་སྟོངས་ཙམ་གྱིས་བསྐུར་བ་ལས། དཔེའི་ཡེ་ཤེས་ལ་བརྟེན་ནས་དགའ་བཞི་ལུགས་འབྱུང་ལུགས་ལྡོག་སོགས་ཀྱི་ངོ་སྤྲོད་རྒྱས་བཤད་མང་པོ་ཞིག་གསུམ་པའི་དབང་ཆོག་རྣམས་སུ་འབྱུང་མོད་ཀྱང་། ད་ལྟའི་གང་ཟག་ཕལ་མོ་ཆེའི་སྐལ་བར་མ་བབས་པས་འདི་ཙམ་གྱིས་ཆོག་པར་དགེའོ།། ༈ །།དེ་ནས་སླར་ཡང་དབང་ཐམས་ཅད་ཀྱི་མཐར་ཐུགས་བཞི་པ་ཚིག་དབང་རིན་པོ་ཆེའི་བརྡའ་ཚོན་བྱེད་མེ་ལོང་

[Full Size]

ཤེལ་རྡོ་ལྷན་ཅིག་འཐོགས་ཏེ། ཧཱུྃ། སེམས་ཉིད་ཀ་དག་ལྷུན་གྲུབ་དོན། །སྣང་སྟོང་ཟུང་འཇུག་སྒྱུ་མའི་སྐུ། །གདོད་ནས་ཡོངས་དག་གཉུག་མའི་གཤིས། །ཡང་དག་ངེས་དོན་རྟོགས་པར་ཤོག །ཛྙཱ་ན་པཉྩ་ཀཱ་ཡ་ཨ་བྷི་ཥཱིཉྩ་ཨཿཨཿཨཿ ཞེས་སྙིང་གར་དབང་བསྐུར་ཞིང་། སླར་ཡང་དབང་དོན་བཤད་དེ། དེ་ལྟར་ཆོས་སྐུར་གྲོལ་བར་བྱེད་པ་ཤེས་རབ་ཡེ་ཤེས་དང་བཞི་པ་ཚིག་དབང་རིན་པོ་ཆེ་བརྡ་དང་མཚོན་བྱེད་ཙམ་དུ་བསྐུར་ཡང་དོན་གྱི་དངོས་གཞི་ངོ་མ་འཕྲོད་ན་དབང་གི་གཟུགས་བརྙན་ཙམ་དུ་གྱུར་ནས་དགོས་པ་མི་འབྱུང་ཕྱིར། བརྡ་ཉིད་དོན་ལ་འབྱོར་བས་གལ་ཆེ་བས་ན། དེ་ཡང་མེ་ལོང་དང་ཤེལ་རྡོའི་དཔེ་ལ་ལྟོས་དང་། མེད་བཞིན་སྣང་བའི་གཟུགས་བརྙན་ཁ་དོག་དུ་མར་གསལ་བ་ཤར་ཡང་། ཤར་བ་ཉིད་དངོས་པོར་མ་གྲུབ་པའི་སྟོང་པར་འདུག་པ་དཔེ་འདི་ཇི་ལྟ་བར་རང་གི་སེམས་ཉིད་ཡེ་

[Full Size]

ནས་དངོས་པོ་དང་མཚན་མར་གྲུབ་པ་རྡུལ་ཕྲ་རབ་ཙམ་ཡང་མེད་ལ། མེད་པའི་རང་གདངས་འགགས་མེད་ཀྱི་གསལ་སྣང་སྣ་ཚོགས་སུ་ཤར། གང་ལྟར་འཆར་ཡང་དོན་ལ་བདེན་པས་དབེན་པ་འདི་ནི་སེམས་ཉིད་ཀྱི་གནས་ལུགས་སམ་ཆོས་ཉིད་ཡིན་པ་དང་། དེ་ཡང་སངས་རྒྱས་སྐུ་གསུམ་གྱི་ངོ་བོ་རང་བཞིན་ཐུགས་རྗེ་ཉིད་དུ་ཡེ་ནས་ལྷུན་གྲུབ་ཏུ་བཞུགས་པ་ཡིན་ཏེ། དེ་གང་ཡིན་ན། སེམས་ཀྱི་ངོ་བོ་སྟོང་པ་སྤྲོས་མཚན་ལས་འདས། འདས་པའི་དབྱིངས་ནི་ཆོས་སྐུ། དེའི་རང་མདངས་ཡེ་ཤེས་འགག་མེད་གསལ་རིག་ཏུ་སྣང་བ་ནི་ལོངས་སྐུ་གསལ་སྟོང་དབྱེར་མེད་ཀྱི་རྩལ་ལས་འཁོར་འདས་ཀྱི་རྟོགས་ཚོགས་ཅིར་ཡང་འཆར་བ་ནི་སྤྲུལ་སྐུ་སྟེ། དེ་གསུམ་ཡང་ཐ་དད་མ་ཡིན་པར་ད་ལྟའི་ཐ་མལ་ཤེས་པ་བཟོ་བཅོས་མ་བྱས་རྐྱེན་གྱིས་མ་བསྒྱུར་འཛིན་པས་མ་བསླད་པའི་རང་ངོ་ཧྲིག་གེ། ཡེར་རེ། རྗེན་ནེ་བ་འདི་ཀ་ལས་གཞན་

[Full Size]

གང་ཡང་ཡོད་པ་མ་ཡིན་པས། འདི་ནི་སྐུ་གསུམ་དབྱེར་མེད་ངོ་བོ་ཉིད་ཀྱི་སྐུ་ཡང་ཡིན་ལ། རིགས་དང་དཀྱིལ་འཁོར་ཐམས་ཅད་ཀྱི་བདག་ཉིད་ཀུན་བཟང་ཆེ་མཆོག་ཧེ་རུ་ཀ་ཡང་འདི་ཡིན་ནོ། །འདི་ལས་འཁོར་འདས་ཐམས་ཅད་འབྱུང་བས་ན་སྒྲུབ་པ་བཀའ་བརྒྱད་ཀྱི་ལྷ་ཚོགས་བདུན་བརྒྱ་ཉེར་ལྔ་ཡང་འདིར་འདུས་སོ། །འདི་ཉིད་རང་ངོ་རང་གིས་ཤེས་ན་དབང་ཐམས་ཅད་ཀྱི་སྙིང་པོ་ཚིག་དབང་རིན་པོ་ཆེའམ་རིག་པ་རྩལ་གྱི་དབང་དམ་པ་ཐོབ་པ་ཡིན་ནོ། །དེ་ཐོབ་པས་ནི་སྣང་སྲིད་འཁོར་འདས་ཀྱི་ཆོས་མ་ལུས་པ་ལ་དབང་བསྒྱུར་བ་ཡིན་ཕྱིར་ཆོས་ཉིད་དོན་གྱི་དབང་ཡང་དག་པ་ཐོབ་པ་ཡིན་པས་དེ་ལྟར་ཤེས་པར་མཛོད་ཅིག །དེ་ནས་རྗེས་གནང་མཐའ་རྟེན་ཕྲིན་ལས་ལས་སྦྱོར་དྲག་པོ་སྒྲོལ་དབང་གི་མཚོན་བྱེད་ཙམ་དུ། ལྕགས་ཕུར་ལག་ཏུ་གཏད་ཅིང་། དེ་ལྟར་དཔལ་ཆེན་བཀའ་བརྒྱད་འདུས་པའི་དབང་བཞི་ཡོངས་རྫོགས་སུ་ཐོབ་པའི་མཐའ་རྟེན་ཕྲིན་ལས་

[Full Size]

དྲག་པོ་གདུག་པ་འདུལ་བྱེད་ཕུར་པས་དབང་བསྐུར་བ་ཡིན་པས། ལྕགས་ཕུར་འདི་ཉིད་ངོ་བོ་དཔལ་ཆེན་པོ་ཆེ་མཆོག་ལྷ་དགུ་ལ་རྣམ་པ་ལས་བྱེད་སྤྲུལ་པའི་སྲས་མཆོག་བཛྲ་ཀཱི་ལ་ཡ་སྐུ་སྟོད་ཁྲོ་བོ་ཆེན་པོ་ཞལ་གཅིག་ཕྱག་གཉིས་ཕུར་བུ་འདྲིལ་བ་ལ་སྐུ་སྨད་གནམ་ལྕགས་ཀྱི་ཕུར་པ་མགར་གྱི་སོལ་མས་ནས་དྲངས་མ་ཐག་ལྟར་མེའི་ཚ་ཚ་འཕྲོ་བ་ཅན་དུ་གསལ་བ་འདི་ཁྱེད་ཀྱི་ལག་ཏུ་གཏད་ཅིང་དྲིལ་བ་ཙམ་གྱིས། མ་རུངས་གདུག་པའི་དགྲ་གེགས་ཚར་གཅོད་པའི་ནུས་པ་ཐོབ་པར་སྒོམ་མཛོད་ཅིག །ཧཱུྃ། ཕྲིན་ལས་མ་ལུས་སྒྲུབ་པའི་རྫས། །དྲག་པོའི་ལྕགས་ཕུར་ལྷར་གསལ་ནས། དྲག་སྔགས་བཟླ་ཞིང་དྲིལ་བར་བྱ། །ཕྲིན་ལས་ཐོགས་མེད་དབང་ཐོབ་ཤོག །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷན་བཾ་ཧཱུྃ་ཕཊཿ མཱ་ར་ཡ་ཧཱུྃ་ཕཊཿ ཧཱུྃ་ཀ་ར་ཧཱུྃ་ཨཿ འདི་སྐབས་བཀའ་བརྒྱད་ཀྱི་དབང་རྒྱས་པ་རྣམས་སུ་ལིང་ཆེན་ལ་དགུག་གཞུག་

[Full Size]

གདབ་ལས་རྒྱས་པར་བྱས་པའི་མཐར་གཙོ་བོ་དགུ་དང་ལས་ཕུར་བརྒྱ་རྩ་བརྒྱད་རྣམས་ཀྱིས་ཕུར་སྐོར་དང་བཅས་ཏེ་དྲག་པོ་སྒྲོལ་དབང་བསྐུར་བ་ཡིན་མོད་ཀྱང་། འདིར་ནི་སྤྲོས་པ་ཉེར་བསྡུའི་སྐབས་ཡིན་ཚེ་རི་ཙམ་གྱི་ཆོག་པའོ། །དེ་ཡང་བསྒྲལ་ལས་ཐམས་ཅད་ཀྱི་རྩ་བ་ནི་རྟོགས་པས་བསྒྲལ་བ་དང་ཐུགས་རྗེས་གཞན་བསྒྲལ་བ་གཉིས་ཡིན་ལ། སྒྲོལ་བའི་ཐབས་ཀྱང་དོན་ཆོས་ཉིད་ཀྱིས་བསྒྲལ་བ་དང་རྟགས་ཆོ་གས་བསྒྲལ་བ་གཉིས་དང་ལྡན་དགོངས་པ་ལས། དེ་ལ་དང་པོར་རྟོགས་པས་བདག་བསྒྲལ་བ་ནི། རང་རྒྱུད་ཀྱི་མ་རིག་པ་ངའམ་བདག་ཏུ་འཛིན་པ་འདི་ཁམས་གསུམ་འཁོར་བའི་རྩ་བ་ཡིན་ཞིང་བྱང་ཆུབ་ཏུ་མི་སྟེར་བའི་གནོད་བྱེད་ནི་འདི་ཁོ་ན་ཡིན་ཕྱིར། འདི་ཉིད་རང་རིག་པ་བྱང་ཆུབ་སེམས་ཀྱི་ཕུར་པ་སྐུ་གསུམ་དབྱེར་མེད་ཀྱི་དབལ་དང་ལྡན་པས་ཆོས་ཉིད་གནས་ལུགས་ཀྱི་ཧོམ་ཁུངས་སུ་མ་བཅོས་མཉམ་ཉིད་ཀྱི་ཏིང་འཛིན་གྱིས་བསྒྲལ་

[Full Size]

བ་ནི་དོན་ཆོས་ཉིད་ཀྱིས་བསྒྲལ་ཚུལ་ཡིན་པས་བསྒྲལ་ལས་ཀུན་གྱི་ཐོག་མར་འདི་ཉིད་གནད་དུ་ཐེབས་དགོས་པ་དང་། དེ་ལ་རང་དབང་ཐོབ་ནས་ཐུགས་རྗེས་གཞན་སྒྲོལ་བ་ནི། སྤྱིར་ཁམས་གསུམ་འཁོར་བའི་སེམས་ཅན། སྒོས་སུ་ལོག་རྟོགས་གདུག་པ་ཅན་གྱི་གདུལ་བྱ་རྣམས་ལ། ཞེ་སྡང་ཁོང་ཁྲོ་གནོད་སེམས་ཀྱིས་མ་ཡིན་པར་བླ་མེད་བྱང་ཆུབ་ལ་བགོད་སླད་འབའ་ཤིག་པའི་བློས་ཀུན་ནས་བསླང་སྟེ། ལྟ་བའི་རྫོང་ལ་གཞི་བཅའ། སྒོམ་པའི་ཕྲང་གི་གནད་བཟུང་། སྤྱོད་པའི་སྲོག་གི་མན་ངག་གཏན་ལ་ཕབ་ནས་ལོག་སྤྱོད་ཀྱི་སྐྱེ་འགྲོ་རྣམས་ཀྱི་ལས་ངན་གྱི་ས་བོན་རྒྱུན་བཅད་ཅིང་ཚོགས་གཉིས་ཀྱི་ཤིང་རྟ་ཐར་གླིང་དུ་བསྐྱོད་པའི་ཐབས་ཀྱི་ཆོ་གས་གདུལ་བྱ་བྱང་ཆེན་ལ་འགོད་པ་ལ་ཐུགས་རྗེས་གཞན་སྒྲོལ་བ་ཞེས་བྱ་བ་སྟེ། དེ་ལྟ་བུའི་གནད་དོན་རྒྱུད་ལ་སྦྱོར་འཚལ་ལོ།། ༈ །།དེ་ལྟར་བདེ་གཤེགས་

[Full Size]

ཀུན་འདུས་སྒྲུབ་པ་བཀའ་བརྒྱད་དངོས་གྲུབ་ཀྱི་སྙིང་པོའི་དབང་བསྐུར་ཟབ་པའི་མཐར་ཐུག་པ་འདི་ལྟ་བུ་ལེགས་པར་ཐོབ་པ་ཡིན་པས་ན། དབང་ཐོབ་པ་གཅིག་པུས་མི་ཆོག་སྟེ། དབང་སྲོག་དམ་ཚིག་ལ་རག་ལས་ཕྱིར་དམ་ཚིག་ཚུལ་བཞིན་བསྲུང་དགོས། དབང་ཐོབ་ནས་དམ་ཚིག་མ་བསྲུངས་ན་སྨན་མ་ཞུ་བ་དུག་ཏུ་གྱུར་པ་བཞིན་ཕན་པ་བས་གནོད་པ་ཆེ་བས་དམ་ཚིག་གི་ཆད་པས་ཚེ་འདིར་ཡང་མི་རུང་བ་སྣ་ཚོགས་པ་དང་ཕྱི་མ་རྡོ་རྗེའི་དམྱལ་བ་ཆེན་པོ་ནས་ཐར་བའི་དུས་མེད་པའི་སྡུག་བསྔལ་ཉམས་སུ་མྱོང་བར་འགྱུར་བ་དང་། དམ་ཚིག་ཚུལ་བཞིན་བསྲུངས་ན་གནས་སྐབས་དང་མཐར་ཐུག་གི་དོན་ཀུན་འབད་མེད་དུ་འབྱུང་ཞིང་མྱུར་དུ་བླ་མེད་རྫོགས་པའི་བྱང་ཆུབ་ཐོབ་པར་འགྱུར་བ་ལགས་པས་དེ་ལྟ་བུའི་ཁེ་ཉེན་ལ་བསམ་ནས་སྤང་བླང་ཚུལ་བཞིན་བསྒྲུབ་འཚལ་སྟེ། དམ་ཚིག་ཇི་ལྟར་

[Full Size]

བསྲུང་བའི་རིམ་པ་ལ་རྒྱས་པར་ནི་བསམ་གྱིས་མི་ཁྱབ་མོད་ཀྱང་སྙིང་པོ་འགག་དྲིལ་དུ། སྐུའི་དམ་ཚིག་ཏུ་ལུས་ཀྱི་མི་དགེ་བ་སྤངས་ནས་བསྐྱེད་རིམ་ལྷའི་རྣལ་འབྱོར་ལ་བརྩོན་པ་དང་། གསུང་གི་དམ་ཚིག་ཏུ་ངག་སྒྲིབ་མི་གསོག་ཅིང་བསྙེན་སྒྲུབ་པ་འབད་པ་དང་། ཐུགས་ཀྱི་དམ་ཚིག་ཏུ་ཡིད་ཀྱི་མི་དགེ་བ་མཐའ་དག་དང་ཁྱད་པར་གསང་སྔགས་ཀྱི་ཆོས་ལ་ལོག་ལྟ་སྤང་ཞིང་སྐྱེད་རྫོགས་ཟུང་འཇུག་བསྒོམ། རྡོ་རྗེ་སློབ་དཔོན་ལ་སངས་རྒྱས་སུ་ཐག་ཆོད་པའི་དད་གུས་ཀྱིས་གང་གསུང་གི་བཀའ་སྒྲུབ། ཁམས་གསུམ་སེམས་ཅན་ལ་ཕ་མའི་འདུ་ཤེས་ཀྱི་གནོད་ཚེ་སྤང་ཞིང་ཅི་ནུས་ཀྱི་ཕན་འདོགས་བྱ། རྒྱལ་བའི་བསྟན་པ་ལ་ཞུགས་པ་སྤྱི་དང་ཁྱད་པར་བླ་མ་དང་དཀྱིལ་འཁོར་གཅིག་པའི་མཆེད་ལྕམ་ལ་དག་སྣང་སྙིང་ནས་སྦྱངས་ཏེ་འཐབ་རྩོད་དང་ལོག་ལྟ་སྤང་བ་རྣམས་ནི་སྤྱིར་གཅེས་པའི་དམ་ཚིག་ཡིན་ལ། སྒོས་སུ་དབང་བཞིའི་དམིགས་

[Full Size]

བསལ་དུ་ནི། བུམ་དབང་ཐོབ་ནས་སྣོད་བཅུད་ཐ་མལ་དུ་མི་འཛིན་པར་ལྷའི་དཀྱིལ་འཁོར་དུ་ལྟ། གསང་དབང་ཐོབ་ནས་སྒྲ་སྐད་བརྗོད་ཚིག་དབུག་གི་འབྱུང་རྔུབ་མཐའ་དག་སྔགས་སུ་ཤེས་པར་བྱ། ཤེར་དབང་ཐོབ་ནས་བདེ་སྡུག་བཟང་ངན་གྱི་ཚོར་རྟོགས་ཐམས་ཅད་ཆོས་དབྱིངས་ལྷན་སྐྱེས་སུ་འཁྱེར་ཞིང་། ཤེས་རབ་མོ་རིགས་སུ་གྱུར་ཚད་ལ་ལོག་ལྟ་དང་ཆགས་སེམས་སྤང་། ཚིག་དབང་ཐོབ་ནས་ནི་སྒོ་གསུམ་ཐ་མལ་ཞེན་འཛིན་འཁྲུལ་ཕྱིར་མི་འབྲེང་བར་ཅིར་སྣང་ཆོས་ཉིད་དུ་འཁྱེར་བ་རྣམས་ཡིན་པས་དམ་ཚིག་འདི་དག་ལས་སྐད་ཅིག་ཀྱང་མི་འདའ་བར་བསྲུང་ན་སྨིན་གྲོལ་ཉམ་ལེན་གྱི་གནད་དོན་མ་ལུས་འདིར་གཞོལ་བ་ཡིན་པས་དེ་ལྟར་རྒྱུད་ལ་འདྲེ་བར་མཛོད་ཅིག །ཅེས་བརྗོད། དེ་ནས་དབང་བརྟན་པར་བྱེད་པའི་བཀྲ་ཤིས་ཀྱིས་ཚིགས་སུ་

[Full Size]

བཅས་པ་དབྱངས་དང་བཅས་པས་རྒྱས་པར་བརྗོད་ཅིང་རྟེན་འབྲེལ་སྙིང་པོ་བཟླས་པའི་མེ་ཏོག་གི་ཆར་ཕབ། ཚོགས་འཁོར་གྱི་དགའ་སྟོན་དང་བཏང་རག་གི་མཆོད་བསྟོད། རྗེས་ཀྱི་ལས་རིམ་མཐའ་དག་ནི་སྤྱི་གཞུང་ལྟར་བྱས་པས་འགྲུབ་པའོ། །དེ་ལྟར་ཚེ་སྒྲུབ་གནམ་ལྕགས་རྡོ་རྗེའི་བར་ཆད་སེལ་བྱེད་བཀའ་བརྒྱད་དངོས་གྲུབ་སྙིང་པོའི་དབང་ཆོག་སྒྲིག་ཆགས་སུ་བགྱིས་པ་འདི་ཡང་། སྐྱབས་མཆོག་སྤྲུལ་པའི་ཟླ་སྣང་འགྱུར་མེད་རྡོ་རྗེ་རྒྱལ་མཚན་དཔལ་བཟང་པོའི་མཚན་གྱིས་བཀའ་སྩལ་སྤྱི་བོས་བླངས་ནས་སྣ་ཚོགས་རང་གྲོལ་གྱིས་ཡི་གེར་བཀོད་པ་སརྦ་མངྒ་ལཾ། གཅིག་ཞུས་ཁུལ་ལགས།

ཟབ་ཆོས་རྟ་ཕག་ཡིད་བཞིན་ནོར་བུའི་དབང་བསྐུར་གྱི་ལས་རིམ་ལྟས་ཆོག་ཏུ་བཀོད་པ

[Full Size]

ཟབ་ཆོས་རྟ་ཕག་ཡིད་བཞིན་ནོར་བུའི་དབང་བསྐུར་གྱི་ལས་རིམ་ལྟས་ཆོག་ཏུ་བཀོད་པ་བཞུགས་སོ།

[Full Size]

རིགས་རྣམས་ཀུན་གྱི་ཁྱབ་བདག་གུ་རུ་རྗེ། གསལ་སྟོང་རང་མདངས་རྟ་ཕག་ཡབ་ཡུམ་བཅས། རང་རིགས་ངོ་བོ་རྟོགས་པའི་ཕྱག་བགྱིས་ནས། དེ་ཡི་དབང་གི་ལས་རིམ་བཀླག་ཆོག་བྲི། འདིར་རིག་འཛིན་ཆེན་པོ་ཧཱུྃ་ནག་མེ་འབར་གྱིས་ཉང་ལུང་ལྷ་རི་སྙིང་པོ་ནས་གཏེར་གྱི་དངོས་གྲུབ་ཏུ་བཞེས་པའི་ཟབ་ཆོས་རྟ་ཕག་ཡིད་བཞིན་ནོར་བུའི་སྨིན་བྱེད་ཀྱི་དབང་བསྐུར་ཇི་ལྟར་བྱ་བའི་ཚུལ་སྦྱོར་བ་དངོས་གཞི་རྗེས་དང་གསུམ་གྱི་དང་པོ་ལ། གནས་ཀྱི་ཁྱད་པར་སྐྱེ་བོ་དང་དམ་མེད་སྣོད་མིན་གྱིས་དབེན་པའི་སྒྲུབ་ཁང་ཡིད་དང་མཐུན་པར། གསང་སྔགས་བླ་མེད་ཀྱི་ཟབ་དོན་མ་དབང་འབྱོར་གདེངས་ལྡན་གྱི་བླ་མས། སློབ་མ་དད་དམ་གྱིས་འབྱོར་པའི་སྣོད་ལྡན་གྱི་གསོལ་བ་

[Full Size]

བཏབ་པའི་དུས་བཟང་པོར། དཀྱིལ་འཁོར་གྱི་བྱ་བ་རྒྱས་པར་སྤྲོ་ན་རྡུལ་ཚོན་གྱི་དཀྱིལ་འཁོར་སྤྱི་མཐུན་སྒོ་བཞི་རྟ་བབས་འཁོར་ཡུག་དུར་ཁྲོད་པད་རྡོར་མེ་རིས་མཚན་པའི་དབུས་སུ། པདྨ་འདབ་བཞི་ཕྱོགས་མདོག་གི་ལྟེ་བར་ཟླ་གམ་དམར་པོ་མདུན་སྒོ་གཅིག་དང་ལྡན་པར་བྱ་སྟེ། ཚུལ་འདི་ནི་གཞུང་འདིར་ཞལ་མ་གསལ་ཡང་རྟ་མགྲིན་གྱི་རྒྱུད་རྣམས་ཀྱིས་དགོངས་པ་ཡིན་ལ། གལ་ཏེ་རྡུལ་ཚོན་དཀྱིལ་འཁོར་མི་བཞེངས་ན་འབྲུའི་ཚོམ་བུ་ལྔ་པ་གཙོ་བོ་གསུམ་འགྱུར་གྱིས་ཆེ་བར་བཀོད་པས་རུང་བ་ཉིད་དོ། །དེའི་སྟེང་གི་དབུས་སུ་ཁྲིའུའམ་མན་རྫིའི་ཁར་བུམ་པ་མཚན་ལྡན་མགུལ་འཆིངས་དམར་པོ་ཁ་རྒྱན་གཟུངས་ཐག་ཅན་བུམ་ཆུ་ལ་ལྔ་ཚན་ལྔའི་ཁར་ཤ་ལྔ་བདུད་རྩི་ལྔ་བསྣན་པའི་བུམ་རྫས་སོ་ལྔ་པ་བཏབ་པ་

[Full Size]

བཤམ། མདུན་དུ་ཀཱ་པ་ལ་མཚན་དང་ལྡན་པར་ཛ་གད་མངར་གསུམ་སྦྱར་བ་བླུག་པའི་ཁར་དར་དམར་གྱིས་བཀབ་ལ་བཞག །གཡས་ཕྱོགས་སུ་རྡོ་རྗེ་དྲིལ་བུ་ལྷན་ཅིག་དང་བགྲང་འཕྲེང་། གཡོན་དུ་ཌ་མ་རུ་དང་ཐོད་ཁྲག །རྒྱབ་ཏུ་རྩ་གསུམ་གཅིག་དྲིལ་གྱི་གཏོར་མ་དཔལ་གཏོར་ཟུར་གསུམ་མེ་རི་དང་རྩེ་མོར་རྟ་མགོས་མཚན་ཞིང་ཞབས་སུ་པདྨ་འདབ་བཞི་ཅན་ཁ་དོག་དམར་པོ་ལ་དཀར་རྒྱན་མཛེས་ཚོན་དར་གྱི་གདུགས་ཕུབ་པ་བྱས་པ་བཤམ། དེ་དག་གི་ཕྱི་སྐོར་དུ་སྨན་རཀཱ་གཏོར་མ་ཕྱི་ནང་གསང་མཆོད་ཚོགས་ཀྱི་ཡོ་བྱད་དང་བཅས་པ་གྱ་ནོམ་པར་བཤམ་ཞིང་། གཞན་ཡང་ས་རྒྱན་གནམ་རྒྱན་བྲིས་སྐུ་སོགས་བཀྲི་ལ་བག་དྲོ་བྱིན་ཆགས་ཀྱི་བཀོད་པ་དང་ལྡན་པར་བྱ་བ་ནི་ཆོ་གའོ། །དེ་ནས་དངོས་གཞི་ཐོག་མར་སློབ་དཔོན་གྱི་བསྙེན་པ་ཁ་གསོ་ཞིང་དབང་རྫས་ཡོ་བྱད་བྱིན་རླབས་ནུས་ལྡན་དུ་སྒྲུབ་ཕྱིར་ཆོ་གའི་ལས་རིམ་ནི། སློབ་དཔོན་རང་ཉིད་ཚོགས་བསགས་སྒྲིབ་སྦྱོང་གི་སླད་དུ་འདི་ཉིད་ཀྱི་ཕྱི་སྒྲུབ་ནས་གསུངས་པ་ལྟར། མདུན་གྱི་ནམ་མཁར་ངོ་བོ་རྩ་བའི་བླ་མ་ལ་རྣམ་པ་བཅོམ་ལྡན་འདས་ཀྱི་ཆ་བྱད་ཅན་ལ་ལྟུང་བཤགས་ཀྱི་སངས་རྒྱས་སུམ་

[Full Size]

ཅུ་རྩ་ལྔ་སྐྱབས་གནས་དཀོན་མཆོག་ཐམས་ཅད་ཀྱིས་བསྐོར་བ་གསལ་བཏབ་ལ། སྐྱབས་སེམས་ཕྱག་འཚལ་ཡན་ལག་བདུན་པ་སོགས་ཀྱི་ཚོགས་བསགས་ཅིང་། མཐར། ཚོགས་ཞིང་རྣམས་རང་ལ་བསྟིམ་ནས་སྟོང་ཉིད་ཀྱི་དོན་ལ་མཉམ་པར་བཞག །དེའི་ངང་ནས་ལྟ་བའི་མཚམས་གཅོད་ནས་བཟུངས་སྟེ་ལས་བྱང་གི་གཞུང་བསྲང་ནས་བདག་བྱིན་གྱིས་བརླབ་ཅིང་། བཟླས་པའི་སྐབས་ལ་བབས་ཚེ། བདག་ཉིད་རྟ་ཕག་ཡབ་ཡུམ་རིགས་བདག་གུ་རུ་དང་བཅས་པ་གསལ་བའི་ངང་ནས་ལྷ་གསུམ་གའི་གནས་གསུམ་འབྲུ་གསུམ་གྱིས་མཚན་པ་ལས་ཁྱད་པར་དུ་རྟ་མགྲིན་གྱི་ཐུགས་ཀའི་ཧཱུྃ་གི་འོག་ཏུ་ཧྲཱིཿདང་ཕག་མོ་ལ་ཡིག་སྟེང་གཉིས་ཀ་དམར་གསལ་མེ་འོད་ལྟ་བུའི་ཡབ་ཀྱི་ཧྲཱིཿལ་སྔགས་འཕྲེང་རྣམས་གཡས་སྐོར་དུ་དམར་ཧྲཾ་མེ་བར་འཁོར་བ་ལས་འོད་འཕྲོས་པས། མདུན་གྱི་དཀྱིལ་འཁོར་ཡང་བདག་བསྐྱེད་ཇི་ལྟ་བར་སྐད་ཅིག་གིས་གསལ་བཏབ་པའི་ཐུག་སྲོག་གི་འོད་ཟེར་བདག་སྐྱེད་ཀྱི་ཐུགས་དཀར་ཕོག་པས། བདག་གི་སྔགས་འཕྲེང་རྣམས་གྱེན་དུ་ནར་གྱི་བྱུང་སྟེ་ཡབ་ཀྱི་ཞལ་ནས་ཡུམ་གྱི་ཞལ་དུ་ཞུགས་ཤིང་ཡུམ་གྱི་གསང་བ་ནས་ཡབ་ཀྱི་གསང་བར་བརྒྱུད་

[Full Size]

དེ་ཐུགས་ཀ་ནས་ཕར་འཕྲོས་པ་མདུན་བསྐྱེད་ཀྱི་ཐུགས་ཀ་དང་ཞལ་དང་སྐུའི་དབྱིབས་བརྒྱུད་ནས་ཐུགས་ཀ་ལས་ཚུར་བྱུང་བ་བདག་གི་ཐུགས་ཀར་སྔར་བཞིན་ཕོག་པའི་ཏིང་ངེ་འཛིན་ཡེངས་མེད་ཀྱིས་བཟླས་པ་ཅི་མང་བྱ་ཞིང་། ཐུན་འཇུག་ཏུ་དབང་རྫས་བུམ་པ་སོགས་ཐ་དད་རེ་རེ་ལ་ཡང་རྣམ་པ་རྫས་དེ་དང་དེའི་ཚུལ་ལ་ངོ་བོ་ལྷ་རུ་བསྐྱེད་པ་ལ་བདག་གི་ཐུགས་ཀའི་འོད་ཀྱིས་ཕོག་པ་ཙམ་གྱིས་སོ་སོའི་ནུས་པ་བསྐྱེད་ནས་བྱིན་རླབས་མཐུ་ལྡན་དུ་གྱུར་པར་མོས་ལ། དེ་ལྟར་ཆོ་ག་བཟླས་པ་དང་བཅས་པའི་སྒོ་ནས་དབང་གི་སྒྲུབ་པ་ཞག་དང་ཡུན་སྐབས་ཅི་རིགས་པར་བྱས་པའི་མཐར་མདུན་སྐྱེད་དབང་རྫས་དང་བཅས་པའི་ལྷ་ཚོགས་ཀྱི་གནས་གསུམ་འབྲུ་གསུམ་ཐུགས་སྲོག་ཧྲཱིཿམ་དང་བཅས་པ་ལས་འོད་ཟེར་བཞི་བདག་གི་གནས་སོ་སོར་ཐིམ་པས་དབང་རྣམས་ཡོངས་རྫོགས་སྐད་ཅིག་ལ་ཐོབ་པར་མོས་ལ། བདག་མདུན་ཐ་དད་དུ་འཛིན་པའི་རྟོག་རི་མོ་རང་ཡལ་མཉམ་ཉིད་ཆེན་པོར་ལ་བཟླ་བ་ནི་བདག་འཇུག་གི་མཆོག་རབ་ཕུལ་དུ་གྱུར་པའོ།། ༈ །།དེ་ནས་སློབ་མ་རྗེས་འཛིན་གྱི་རིམ་པ་དངོས་ནི། དབང་གཞུང་ཉིད་ལས། དང་པོར་སྔོན་འགྲོ་བགེགས་གཏོར་བཏང་། །

[Full Size]

དྲག་སྔགས་བརྗོད་ཅིང་བསྲུང་བཟློག་བྱ། །ཞེས་གསུངས་པ་ལྟར། སློབ་མ་རྣམས་གྲལ་དུ་འཁོད་པའི་མདུན་དུ། ངར་གླུད་འཆང་བུ་དང་བཅས་ལ་ཆབ་ཀྱིས་བྲན་པ་བཞག་སྟེ། སློབ་དཔོན་ལྷའི་ང་རྒྱལ་དང་ལྡན་པས། ཨོཾ་བྷྲུྃ་ཏྲྃ་ཧྲཱིཿཨཿ ཨོཾ་ལས་འདོད་པའི་ཡོན་ཏན་ལྔ། །བྷྲུྃ་ལས་རིན་ཆེན་གཞལ་ཡས་ཁང་། །ཏྲྃ་ལས་སྣ་ཚོགས་རཏྣའི་སྣོད། །ཧྲཱིཿ ལས་གསུང་དབྱངས་དྲུག་ཅུ་སྟེ། །ཨཱཿལས་ཅི་འདོད་ཕུན་སུམ་ཚོགས། །སོ་སོར་དགའ་འགུ་ཚིམ་བྱེད་པའི། །འདོད་དགུའི་ཡོ་བྱད་ཆེན་པོར་གྱུར། ན་མོ། དཀོན་མཆོག་ཐམས་ཅད་ཀྱི་ངོ་བོར་གྱུར་པ་བླ་མ་ཡི་དམ་མཁའ་འགྲོའི་སྐུ་གསུང་ཐུགས་ཡེ་ཤེས་རྡོ་རྗེ་ཆོས་ཉིད་རྣམ་པར་དག་པའི་བདེན་པ་ཆེན་པོའི་མཐུ་དང་ནུས་པས། དེང་འདིར་རྡོ་རྗེའི་སློབ་བུ་རྣམས་ལམ་སྨིན་བྱེད་ཟབ་མོར་དཀྲི་བར་བྱེད་པ་ལ་བར་དུ་གཅོད་ཅིང་ལོག་པར་འདྲེན་པའི་བགེགས་རིགས་འཁྲུལ་རྟོག་གི་རང་གཟུགས་ཨ་འཐས་ཇི་སྙེད་ཡོད་པ་ཐམས་ཅད་

[Full Size]

འདོད་ཡོན་ཕུན་སུམ་ཚོགས་པའི་གླུད་གཏོར་འདིས་ཚིམ་པར་བྱོས་ལ། འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་དབང་ཆེན་ཁྲོ་རྒྱལ་འབར་བའི་མཐུ་སྟོབས་འོད་ཟེར་དྲག་པོར་འཁྲུག་པས། ཁྱེད་ཀྱི་ལུས་ངག་ཡིད་གསུམ་རྡུལ་ཕྲན་ཕྱེ་མར་རླག་པར་འགྱུར་ཏ་རེ། ཨོཾ་ཧྲཱིཿཔདྨ་ཏ་ཀྲྀ་ཏཱ་བཛྲ་ཀྲོ་དྷ་ཧ་ཡ་གྲྀ་ཝ་ཧུ་ལུ་ཧུ་ལུ་ཧཱུྃ་ཕཊཿ སརྦ་བྷུ་ཏ་ཨུ་ཙྪ་ཊ་ཡ་ཕཊཿ ཅེས། ཐུན་དང་ཏིང་འཛིན་རོལ་མོ་དྲག་པོས་བསྐྲད་ལ། ཏིང་ངེ་འཛིན་ལས་སྤྲུལ་པའི་མཚོན་ཆའི་ར་བ་མེའི་གུར་ཁང་དང་བཅས་པ་སྤྲོ་ཞིང་། རྣམ་རྟོགས་མཚན་འཛིན་གྱི་བགེགས་ནི་རང་སེམས་ཀ་དག་ཆེན་པོས་བསྲུང་སྟེ། ཧྲཱིཿ ང་ནི་ཁྲོ་རྒྱལ་རྟ་མགྲིན་ཏེ། །རྟ་སྐད་རྔམས་སྒྲོག་བར་ཆད་སེལ། །སྐུ་ཡི་འོད་ཟེར་མཚོན་ཆའི་གུར། །མེ་རི་འབར་བས་ཕྱོགས་མཚམས་གཅོད། །མ་རྟོགས་འཁྲུལ་པའི་སེམས་ཅན་རྣམས། །རྣམ་རྟོགས་མ་རིག་བག་ཆགས་ཀྱིས། །ལྷ་དང་འདྲེ་བགེགས་བཞེས་སྣང་ཡང་། །

[Full Size]

རྣམ་པར་རྟོགས་པའི་བགེགས་ཡིན་ཕྱིར། །འདྲེ་བགེགས་རང་གི་སེམས་ལས་བྱུང་། །སེམས་ཉིད་ཆོས་སྐུའི་དོན་རྟོགས་ན། །བགེགས་དང་བར་ཆད་ག་ལ་ཡོད། །ཐམས་ཅད་རང་གྲོལ་ཆོས་སྐུའི་མཚམས། །འདི་ལས་སུ་ཡང་འདའ་མ་བྱེད། །ཤུ་ནྱཱ་ཏ་རཀྵ་ཧཱུྃ། དེ་ནས་སློབ་མ་རྣམས་ཀྱི་མཎྜལ་རྒྱས་པར་འབུལ་བའི་རྗེས་སུ་སློབ་དཔོན་གྱིས་ཟབ་མོའི་ཆོས་བཤད་པའི་རིམ་པ་ཡང་རྒྱས་པར་སྤྲོ་ན་དལ་འབྱོར་རྙེད་དཀའ་ཞིང་འཇིག་པར་སླ་བའི་ཚུལ་དང་། ལས་འབྲས་བསླུ་མེད་འཁོར་བའི་སྡུག་བསྔལ་ཐར་པའི་ཕན་ཡོན། ཐེག་པའི་བྱེ་བྲག་གསང་སྔགས་ཀྱི་ཆེ་བ་སོགས་སྐབས་བསྟུན་འཆད་པར་བྱ་ཞིང་། མདོར་བསྡུ་ན་འདི་ལྟར་འཆད་དེ། །ནམ་མཁས་གར་ཁྱབ་ཀྱི་སེམས་ཅན་ཐམས་ཅད་མྱུར་དུ་བླ་ན་མེད་པ་རྫོགས་པའི་བྱང་ཆུབ་ཀྱི་གོ་འཕངས་ལ་འགོད་པའི་ཆེད་ཁོ་ནར། རྩ་གསུམ་གཅིག་དྲིལ་རྟ་ཕག་ཡིད་བཞིན་ནོར་བུའི་དབང་བསྐུར་ཟབ་མོ་གསན་སྙམ་པའི་འདུན་པ་སྔོན་དུ་བཏང་ནས་ཡེངས་མེད་དུ་དགོངས་

[Full Size]

མཛོད། དེ་ལ་སྤྱིར་ཕྱོགས་དུས་ཀྱི་རྒྱལ་བ་རབ་འབྱམས་མ་ལུས་པ་གདུལ་བྱའི་སྣང་ངོར་ཞིང་དང་སྐུ་དང་མཛད་པའི་ཕྲིན་ལས་སྣ་ཚོགས་སུ་བསྟན་ཀྱང་དོན་དམ་ཆོས་སྐུ་བདེ་བ་ཆེན་པོ་ཐིག་ལེ་ཉག་གཅིག་ཡེ་ཤེས་ཀློང་ཡངས་ཆེན་པོར་དབྱེར་མེད་པར་བཞུགས་པ་དེ་ཉིད་འཁོར་འདས་ཐམས་ཅད་ཀྱི་སྔོན་རོལ་དུ་བྱང་ཆུབ་པའི་དོན་གྱིས། དང་པོའི་སངས་རྒྱས་ཀུན་ཏུ་བཟང་པོ་ཅེས་ཀྱང་བྱ། རིགས་དང་དཀྱིལ་འཁོར་ཐམས་ཅད་ཀྱི་ཁྱབ་བདག་ཏུ་གྱུར་ཕྱིར་རྒྱལ་བ་རྡོ་རྗེ་འཆང་ཆེན་པོ་ཅེས་ཀྱང་བྱ། གདུལ་བྱའི་ལོག་པར་རྟོགས་པ་མ་ལུས་ཐུགས་རྗེའི་ཁྲོ་ཚུལ་གྱིས་ཚར་གཅོད་པར་མཛད་ཕྱིར་དཔལ་ཧེ་རུ་ཀ་ཞེས་ཀྱང་བྱ་སྟེ། སངས་རྒྱས་མ་ལུས་ལུས་པ་མེད་པའི་ངོ་བོ་ཉིད་དུ་དུས་བཞི་འཕོ་འགྱུར་མེད་པའི་ངང་དུ་བཞུགས་སོ། །དེའི་ཚེ་རེ་ཤིག་གི་དུས་ན་ཁམས་གསུམ་སེམས་ཅན་གྱི་ལས་ཉོན་བག་ཆགས་པར་མཐུ་བརྟས་པའི་རང་གཟུགས་ལས་གྲུབ་པའི་སེམས་ཅན་

[Full Size]

ཆེན་པོ་མ་ཏྲྃ་རཱུ་ཏྲའམ་དྲག་པོ་འཇིག་བྱེད་ཅེས་བྱ་བ་མ་རུངས་གདུག་པ་ཅན་ཞིག་འཇིག་རྟེན་གྱི་ཁམས་འདིར་བྱུང་སྟེ། སྔོན་ནས་རྒྱལ་བའི་བཀའ་གསང་སྔགས་ཟབ་མོ་ལ་ཞུགས་ཀྱང་གབ་པའི་གསང་བ་མ་རྟོགས་ཤིང་སྦས་པའི་གསང་བ་མངོན་པར་འཆལ་ཏེ་སྦྱོར་སྒྲོལ་ལོག་མིན་དུ་སྤྱད་པས་ལས་ཀྱི་མཐའ་ལོག །ལྟ་བའི་གདེངས་འཆུག་ཅིང་སྤྱོད་པའི་བླང་དོར་ཕྱིན་ཅི་ལོག་པས་ཉོན་མོངས་ཀྱི་རྩལ་རྒྱས་ཏེ། ཞེ་སྡང་གི་མེ་འབར་བས་བྱང་སེམས་ཀྱི་ཆུ་རྒྱུན་སྐམ། འདོད་ཆགས་ཀྱི་མཚོ་འཁྲུག་པས་ཐར་པའི་གྲུ་བོ་ནུབ། གཏི་མུག་གི་མུན་པ་ཐིབས་པས་ཡིད་ཀྱི་ཀྱི་སྣང་བ་འགགས། ང་རྒྱལ་གྱི་ཐ་བ་བསྲ་བས་རྣམ་གྲོལ་གྱི་མྱུ་གུ་སྐྱེ་བའི་ཡུལ་དུ་མ་གྱུར། ཕྲག་དོག་གི་མཚོན་ཆ་རྣོན་པོས་རང་གཞན་ལས་ངན་སྡུག་བསྔལ་གྱི་ཟུག་རྔུ་ལ་

[Full Size]

སྦྱོར་ཞིང་། སྨོན་ལམ་ལོག་པའི་མཚམས་སྦྱོར་གྱི་སྟོབས་ལས་རང་དང་ལྟ་སྤྱོད་གཅིག་པའི་འཁོར་ཚོགས་གདུག་པ་ཅན་གྲངས་མེད་པས་བསྐོར་ཏེ། སྲིན་ཡུལ་ལངྐ་པུ་རིའི་དབུས་ཀྱི་རི་བོ་མ་ལ་ཡ་གནམ་ལྕགས་འབར་བའི་རྩེ་མོར་གནས་བཅས་ཤིང་། འཇིགས་སུ་རུང་བའི་ལུས་ལ་གཡང་གཞི་དང་ཀོ་རློན་ནི་གྱོན། སྦྲུལ་དང་མི་མགོ་ཐལ་ཆེན་ཁྲག་ཞག་གི་རྒྱན་དང་རྟགས་སུ་ནི་བྱས། གདུག་པའི་མཚོན་ཆ་སྣ་ཚོགས་ཀྱི་ལག་ཆ་ནི་འཐོགས། ཁ་རླངས་སྣ་རླངས་བ་སྤུའི་བུ་ག་ཀུན་ནས་ནད་དང་དུག་གི་ཆར་སྤྲིན་སྤྲོ་ཞིང་། ཉིན་ཞག་རེ་ལ་སྐྱེ་འགྲོ་སེམས་ཅན་གྲངས་ལས་འདས་པའི་སྲོག་དབུག་ཤ་ཁྲག་རུས་པ་ནང་ཁྲོལ་ལ་ཟས་སྐལ་དུ་བྱས་ནས་ཁམས་གསུམ་འཇིག་རྟེན་ཀུན་ལ་དབང་བསྒྱུར་ཏེ་གནས་སོ། །དེ་ལྟ་བུའི་ངང་ཚུལ་ངན་པས་འགྲོ་བ་ཐམས་ཅད་ཕྲལ་ཡུན་དུ་བཟོད་དཀའི་

[Full Size]

སྡུག་བསྔལ་ལ་སྦྱོར་བ་དེ་དཔལ་ཆེན་པོ་ཧེ་རུ་ཀས་གཟིགས་ནས་ཐུགས་རྗེས་འདུལ་བའི་དུས་ལ་བབས་པ་དགོངས་ཏེ་འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ་སྐུ་མི་ཟད་འབར་བ་དབང་ཆེན་པདྨ་ཧེ་རུ་ཀ་དབུ་ལྔ་དང་ལྡན་པས་ཡེ་ཤེས་ལྔ་ལྷུན་གྱིས་གྲུབ་པ་ཕྱག་བརྒྱད་པས་རྣམ་ཐར་བརྒྱད་ཡོངས་སུ་རྫོགས། ཞབས་བཞི་པས་ཕྲིན་ལས་རྣམ་བཞི་རྒྱུན་ཆད་མེད་པ། ཕྱག་མཚན་སྣ་ཚོགས་འབར་བས་འདུལ་ཐབས་ཀྱི་ཆོ་འཕྲུལ་བསམ་ཡས་འགྱེད་པ། ཡེ་ཤེས་མེ་དཔུང་རབ་ཏུ་འབར་བས་དུག་གསུམ་གཞོབ་ཏུ་བསྲེག་པའི་སྐུར་བཞེངས་ཏེ། སྲིད་གསུམ་ཟིལ་གྱིས་གནོན་ནུས་པའི་དབང་གི་རྟ་སྐད་དྲག་པོ་ལན་དགུར་གྲགས་པས་ཕྱོགས་བཅུའི་སངས་རྒྱས་ཐམས་ཅད་སྤྲིན་ཕུང་སྟིབས་པ་བཞིན་སྐད་ཅིག་ལ་འདུས་པར་གྱུར་ཏེ། དེའི་ཚེ་དཔལ་ཆེན་པདྨ་ཧེ་རུ་ཀས་བཀའི་འགྲོ་བ་འདི་ལྟར་མཛད་དེ།། ༈ །།ཀྱེ་མ་འདུས་པའི་ཚོགས་

[Full Size]

ཆེན་དག །འདས་པའི་དུས་ནས་སྔོན་བྱུང་ལྟར། །ད་ལྟའི་དུས་འདིར་བྱུང་བ་སྟེ། །དེ་བཞིན་གཤེགས་པའི་གསུང་རབ་ལ། །བདག་ཉིད་ཆེན་པོ་བརྟག་པ་ཡི། །ཁྲོ་བོའི་ཚུལ་དུ་སྔོན་བྱུང་བ། །དེ་ཚེ་སེམས་ཅན་ཐམས་ཅད་ཀུན། །ཤིན་ཏུ་ཁྲོ་དྲག་གཏུམ་པར་གྱུར། །ཤིན་ཏུ་ཁྲོ་དྲག་གཏུམ་པ་ཡིས། །འོ་དོད་འབོད་པར་ལྟུང་བར་འགྱུར། །མི་ཟད་སྡུག་བསྔལ་མཐའ་ལ་ཞེན། །ཇི་ལྟ་བ་ཡིས་ཐབས་ཀྱིས་གདུལ། ཞེས་བགྲོས་པ་ལ། ཕྱོགས་བཅུའི་བདེར་གཤེགས་ཐམས་ཅད་ཀྱང་དགོངས་པ་གཅིག་ཏུ་མཐུན་པར། ཤིན་ཏུ་གཏུམ་པའི་སེམས་ཅན་འདི། །དེར་བཞག་བག་ཆགས་ངན་པ་ཡིས། །བདུད་འཕེལ་རིག་འཛིན་རྒྱུད་གཅོད་ཅིང་། །བསྟན་པའི་གསུང་རབ་འཇིག་པར་འགྱུར། །ལས་ཀྱི་མུན་པར་འགྲོ་བ་འཁྱམས། །དུག་ནད་རིམ་ནད་ཕྲ་མེན་མ། །གནོད་སྦྱིན་གནོད་དང་ལོག་འདྲེན་གྱིས། །སྲིད་གསུམ་འཇིག་ཅིང་དམ་ཚིག་འདྲལ། །

[Full Size]

ཇི་ལྟར་འོས་པའི་ཐབས་ཀྱིས་ཐུལ། །སངས་རྒྱས་ཐམས་ཅད་འདུས་ནས་ཀྱང་། །མངོན་སྤྱོད་རོལ་པའི་ཐབས་ཆེན་གྱིས། །འཁོར་བ་བསྒྲལ་བའི་དུས་ལ་བབས། །ཅེས་དང་། ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ངོ་བོ་ལས། །ཁྲོ་བོར་དེ་བཞིན་གཤེགས་ཀུན་མཛད། །ཁྲོ་བོའི་ཚུལ་ཅན་ཁྲོས་པས་ཀྱང་། །འཇིག་རྟེན་གསུམ་དག་སྲེག་བྱས་ན། །སངས་རྒྱས་ཐུགས་རྗེས་ཁྲོས་པས་ཀྱང་། ཁམས་གསུམ་མ་ལུས་སྨོས་ཅི་དགོས། །ཅེས་བཀའ་བགྲོས་ཤིང་། གསང་བའི་བདག་པོ་ལ་སོགས་བྱང་ཆུབ་སེམས་དཔའི་ཚོགས་ཀྱིས་ཀྱང་བདེར་གཤེགས་རྣམས་ལ་གསོལ་བ་བཏབ་སྟེ། ཨེ་མའོ་བདེ་བར་གཤེགས་པ་རྣམས། །ཐུགས་རྗེ་ཆེན་པོའི་མངའ་བདག་ཅན། །དུལ་ལ་བབས་པའི་སྐལ་ཆེན་འདིར། །ལས་ལ་བབས་པའི་ཐུགས་རྗེ་ཡིས། །རྣམ་པར་སྨིན་པའི་འབྱུང་པོ་འདི། །བསྒྲལ་བར་མཛད་ན་ཐུགས་རྗེའི་

[Full Size]

མཆོག །ཞེས་སོགས་ཀྱིས་བསྐུལ་བ་ལས་ཕྱོགས་བཅུའི་སངས་རྒྱས་ཐམས་ཅད་ཀྱིས་ཀྱང་དྲེགས་པ་ཅན་དེ་འདུལ་བའི་གཉེན་པོར་དཔོན་རྟ་མགྲིན་དབང་གི་རྒྱལ་པོ་ཉིད་མངགས་ཤིང་ཐུགས་རྗེ་དང་ཕྲིན་ལས་ཀྱི་ནུས་སྟོབས་གཅིག་ཏུ་འདུས་བར་བྱིན་གྱིས་བརླབས་སོ། །དེ་ནས་དཔལ་ཆེན་པོ་རྟ་མགྲིན་རྒྱལ་པོས་རྫུ་འཕྲུལ་གྱི་ཤུགས་བསྐྱོད་དེ་མ་ལ་ཡ་གནམ་ལྕགས་འབར་བའི་རི་བོར་མཁའ་ལྡིང་ཟས་ལ་བབས་པ་ལྟར་གཤེགས་ནས། མ་ཏྲྃ་རུ་དྲ་ཆེན་པོ་དེ་ལ་བཀའ་སྩལ་བ། གདུག་པ་ཅན་ཁྱོད་འདི་ལྟ་བུའི་ལྟ་སྤྱོད་ངན་པའི་བརྟུལ་ཞུགས་འདི་ཞོག་ལ་ཆོས་ཉིད་བདེན་པའི་བཀའ་ལ་ཉོན་ཞིག །ཅེས་གསུངས་པས། རུ་ཏྲ་ང་རྒྱལ་གྱི་རློམ་པ་ཆེས་ཆེར་སྐྱེས་ཏེ། ཅི་ཁྱོད་འདྲ་བས་བདག་འདུལ་བའི་མཐུ་ནུས་འཆི་བར་སྨྲ་བའམ། སྲིད་པ་གསུམ་ན་བདག་ལས་ཆེ་བའི་དབང་ཕྱུག་སུ་ཞིག་ཡོད། ཅེས་ཟེར་ཞིང་སྲིན་པོ་གདུག་

[Full Size]

པའི་ངར་སྐད་རུ་ལུ་རུ་ལུ་ཞེས་པའི་སྒྲ་འབྲུག་ལྟར་འབྱིན་པས་ཁ་ཊྭྃ་གི་ལག་ཆ་འཁྲོལ་བར་བྱེད་དོ། །དེ་ནས་དབང་ཆེན་འབར་བས་གདུག་པ་ཅན་གྱི་རུ་དྲ་དེ་ཞི་བ་ཆེན་པོ་ཆོས་ཉིད་བདེན་པས་འདུལ་བའི་ཡུལ་དུ་མ་གྱུར་གཟིགས་ནས། ཁོའི་གདུག་པའི་ངར་སྐད་རུ་རུ་དེ་ཉིད་ཨོ་དང་ཧཱུྃ་གི་བར་དུ་བཅུག་ནས་ཡེ་ཤེས་ཀྱི་ཁྲོ་བོ་མ་ལུས་པའི་ཐུགས་སྔགས་སུ་བྱིན་གྱིས་བརླབས་ཏེ། དེའི་ཤམ་བུར། དམ་སྲི་རུ་དྲ་མཱ་ར་ཡ་ཛཿ མཱ་ར་ཡ་རྦད་ཀྱི་དྲག་སྔགས་ཀྱི་སྒྲ་འབྲུག་སྟོང་དུས་གཅིག་ལ་ལྡིར་བའི་སྐད་ལྟར་བསྒྲགས་ཅིང་། དེ་ཉིད་ཀྱི་གདུག་པའི་ལག་ཆ་ཁ་ཊྭྃ་ག་འཕྲོགས་ཏེ་ཁོ་རངས་གི་སྙིང་ལ་གཟིར་བ་ཙམ་གྱིས། གདུག་པ་ཅན་དེ་ལྗོན་ཤིང་རྩ་བ་བཅད་པ་བཞིན་འགྱེལ་ལོ། །སླར་ཡང་དཔལ་ཆེན་པོས། དམ་སྲི་རུ་དྲ་གམ་ས་རི་མཱ་ར་ཡ་རྦད། ལྟ་བུ་

[Full Size]

དུམ་ལྟ་བུ་དུམ། ཤིག་ཤིག །ཕྲུལ་ཕྲུལ། ཏྲིའུ་ཏྲིའུ། སྙིང་སྦུར་རྦད་ཛ་ཛཿ ཞེས་གསུངས་པ་ཙམ་གྱིས་ཁོའི་གཟུགས་ཕུང་དེ་ཚལ་པ་བརྒྱད་དུ་འཐོར་བ་དཔེན་པོས་འཛམ་བུ་གླིང་དུ་བོར་ཏེ་དུར་ཁྲོད་ཆེན་པོའི་གནས་བརྒྱད་དུ་བྱིན་གྱིས་བརླབས། ཁོའི་ཟགས་པ་རྒྱ་མཚོར་ལྷུང་བ་ལས་དཔག་བསམ་གྱི་ཤིང་སྐྱེས་པའི་རྩ་སྡོང་ཡལ་ག་མེ་ཏོག་ལོ་འབྲས་སྙིང་པོ་ཤུན་ལྤགས་དང་བཅས་པ་རྣམས་འཆི་མེད་ཀྱི་བདུད་རྩི་ཨ་མྲྀ་ཏའི་རྒྱུ་རུ་བྱིན་རླབས་ཤིང་། གཞན་ཡང་དོན་སྙིང་ནང་ཁྲོལ་ཤ་ཀྲག་རུས་བཅུད་རྐང་ཚིལ་རྩ་རྒྱུས་སྐྲ་སེན་བ་སྤུ་ཚུན་ཆད་འཇིག་རྟེན་གྱི་ཁམས་སུ་དེ་དང་དེའི་རིགས་མཐུན་གྱི་སྨན་དུ་འཁྲུངས་པར་མཛོད། ཁོའི་རྣམ་པར་ཤེས་པའི་ངོ་བོ་དེ་ལ་དུག་ལྔའི་བག་ཆགས་སྦྱངས་ཕྱིར་དཔལ་གྱི་ཞབས་དུ་རྔུབ་ཅིང་སྐུའི་དབྱིབས་བརྒྱུད་དེ་འོག་གི་སྒོར་བཏོན་པས་ལས་ངན་གྱི་འཁྲུལ་རྟོགས་བག་

[Full Size]

ཆགས་སྒྲིབ་གཡོགས་མ་ལུས་དུས་དེར་ཟད་ནས། སྔོན་གྱི་ཟབ་མོའི་ཆོས་ཚུལ་ཐོས་པའི་དོན་ཡང་བདེ་བླག་ཏུ་དྲན་ཞིང་། བར་དུ་རང་གི་ལྟ་ལོག་སྤྱོད་ཉེས་ཀྱི་ཚུལ་མཐའ་དག་ཇི་ལྟ་བར་གོ་ཞིང་འགྱོད་པའི་སེམས་བཟོད་གླག་མེད་པ་སྐྱེས་ནས། དཔལ་ཆེན་པོ་ཉིད་ལ་གདུང་བས་སྨྲེ་ངག་མཐོལ་བཤགས་མདོངས་གསོལ་དུ་བྱས་ཏེ། གཟི་བྱིན་རྒྱལ་པོ་བདག་ལ་དགོངས་སུ་གསོལ། །བདག་འདྲ་བླུན་རྨོངས་ལས་ངན་སྡིག་པོ་ཆེ། །ལས་ཀྱི་དབང་གིས་འདོད་པའི་ཁམས་འདིར་སྐྱེས། །སྐྱེས་པས་འགྱོད་དོ་ལས་ལ་ཡི་རེ་ཆད། །ཡི་ཆད་འགྱོད་ཀྱང་ལས་དབང་བཅོས་སུ་མེད། །ལས་ཀྱི་ཤུགས་ནི་ཆུ་བོའི་ཀླུང་དང་འདྲ། །ལས་དབང་ཆུ་ཀླུང་འཕྲལ་དུ་ག་ལ་བཟློག །རྣམ་སྨིན་ཐམས་ཅད་རང་གི་ལས་ལས་བྱུང་། །འདི་ལྟར་ལས་ཀྱི་རླུང་དམར་འདིས་བཏབ་པས། །བསྐལ་པ་གྲངས་མེད་བར་

[Full Size]

དུ་བདག་ཅག་རྣམས། །འཁོར་བའི་བརྩོན་ར་མུན་པར་འཁྱམས་ལགས་ན། །ཁྱེད་ཀྱི་ཐུགས་རྗེ་ཆེན་པོའི་བྱིན་རླབས་ཀྱིས། །ལས་དང་ཉོན་མོངས་སྒྲིབ་པ་ཀུན་བྱང་ནས། །མ་ལྟར་བྱམས་པའི་ཐུགས་རྗེས་སྐྱབས་ཏུ་གསོལ། །ཞེས་སོགས་རུ་དྲའི་སྨྲེ་བཤགས་ཀྱི་སྒོ་ནས་གསོལ་བ་བཏབ་ཅིང་། སླར་ཡང་། ཨེ་མ་དཔའ་བོ་ཐུགས་རྗེ་ཅན། །འབངས་ལ་ནན་ཏན་མ་ཆུང་ཞིག །བདག་གི་འཁོར་དང་བྲན་གཡོག་དང་། མ་དང་སྲིང་མོ་བུ་མོ་སོགས། །འབངས་སུ་འབུལ་ལོ་བཀའ་ལ་འཐོགས། །དབུས་ན་མཆིས་པའི་སྐལ་མེད་ཀྱི། །ཉིད་ཀྱི་དཀྱིལ་འཁོར་མཐའ་ལ་ཞོག །ཕུད་ལ་འཚལ་བའི་སྐལ་མ་མཆིས། །ལྷག་མ་ཞལ་ཆབ་བྲོན་ལ་སྩོལ། །བདག་ཅག་བཀའ་ལས་ཡོངས་མི་གདའ། །གལ་ཏེ་བཀའ་ལས་འདས་གྱུར་ན། །བདག་ཅག་རྣམས་ཀྱི་མགོ་ལུས་རྙིང་། །རུས་མྱག་ནས་ནི་ཚིམ་པར་འགྱུར། །ཞེས་པའི་མདའ་

[Full Size]

དོར་ཞིང་དམ་བཅས་པ་ལ། དཔལ་ཆེན་པོ་རྟ་མཆོག་ཧེ་རུ་ཀས་ཀྱང་ཚད་མེད་ཐུགས་རྗེ་ཆེན་པོས་རྗེས་སུ་བཟུང་སྟེ། མ་ཏྲྃ་རུ་དྲ་ནི་འོག་ཕྱོགས་ཐལ་བས་ཁེབས་པ་ཅེས་བྱ་བའི་ཞིང་ཁམས་སུ་དེ་བཞིན་གཤེགས་པ་ཐལ་བའི་དབང་པོར་འཚང་རྒྱ་བར་ལུང་བསྟན་ཞིང་། སྤྲུལ་པའི་རྣམ་རོལ་ནི་བསྟན་སྲུང་ཆེན་པོ་མ་ཧཱ་ཀཱ་ལར་བྱས་ནས་བསྐལ་བཟང་གི་སངས་རྒྱས་སྟོངས་གི་བསྟན་པ་མ་རྫོགས་ཀྱི་བར་དུ་དམ་པའི་ཆོས་སྐྱོངས་ཞིང་འགལ་བྱེད་ཚར་གཅོད་པའི་བདག་པོར་དབང་བསྐུར་མངའ་གསོལ་གཉེར་གཏད་གཟི་བྱིན་བསྐྱེད་ཅིང་དམ་ལ་བཞག རུ་དྲའི་འཁོར་དུ་གཏོགས་པའི་ས་འོག་ས་སྟེང་ས་བླའི་བདག་པོ་འཇིག་རྟེན་གྱི་དྲེགས་བྱེད་ཕོ་མོ་འབངས་འཁོར་དང་བཅས་པ་དེ་དག་ཐམས་ཅད་ཀྱིས་ཀྱང་རང་རང་གི་སྲོག་གི་སྙིང་པོ་མདོངས་གསོལ་དུ་ཕུལ་བ་ལ་དཔོན་པོས་ཀྱང་དམ་ཚིག་གི་རྡོ་རྗེ་སྤྱི་བོར་

[Full Size]

བཞག་ཅིང་བདུད་རྩི་ལྕེ་ལ་བླུགས་ནས་བཀའ་དང་དམ་ལས་མི་འདའ་བར་དཀྱིལ་འཁོར་གཉན་པོའི་སྲུང་མ་དང་དམ་ཚིག་ཅན་གྱི་གདོང་གྲོགས་དམ་ཉམས་རྣམས་ཀྱི་སྡང་གཅོད་དུ་བཀའ་བསྒོ་བར་མཛད་དོ། །དེའི་དུས་སུ་དཔལ་ཆེན་པོ་པདྨ་དབང་ཆེན་རྟ་མགྲིན་རྒྱལ་པོ་དེ་ཉིད་ཀྱིས་སྤྲུལ་པའི་དཀྱིལ་འཁོར་ཆེན་པོ་མངོན་པར་འདུ་མཛད་ཅིང་། ཉིད་ལས་མི་གཞན་པའི་འཁོར་གྱི་དབུས་ནས་སྤྲུལ་པ་པདྨའི་སེམས་དཔའ་དང་། དབང་གི་ལྷ་མོ་བདེ་བྱེད་མ་ལ་སོགས་པས་ཞུ་བ་པོར་མཛད་ནས། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་འདུས་པ་རྟ་མཆོག་རོལ་པ་ཆེན་པོའི་རྒྱུད་དང་། དབང་རྒྱལ་རྟ་མཆོག་རོལ་པའི་རྒྱུད་དང་། དཔལ་པདྨ་དབང་ཆེན་དྲེགས་པ་ཚར་གཅོད་ཀྱི་རྒྱུད་དང་དྲེགས་པ་དབང་སྡུད། དྲེགས་པ་གནད་འབེབས། དྲེགས་པ་ཟིལ་གནོན། དྲེགས་པ་ཐམས་ཅད་གཟན་ལ་འབེབས་པའི་རྒྱུད་ལ་སོགས་པ་

[Full Size]

དང་། །དབང་ཆེན་འདུས་པ་རྩ་བའི་རྒྱུད། །བཤད་པའི་རྒྱུད། མན་ངག་གི་རྒྱུད། བཀོལ་པ་དུམ་བུའི་རྒྱུད་སོགས་དང་། ནཱ་ག་ཀླུ་འདུལ་ཆེན་པོའི་རྒྱུད་མ་བུ་རྣམས་དང་། བདེར་གཤེགས་སྤྱི་དྲིལ་རྔོག་མ་ལེབ་རྒན་འབར་བའི་རྒྱུད་ཆེན་ལ་སོགས་རྟ་མགྲིན་དབང་གི་རྒྱུད་སྡེ་རབ་འབྱམས་མཐའ་ཡས་པ་གསུངས་ཤིང་། མཁའ་འགྲོ་དང་རིག་འཛིན་གྱི་ཚོགས་རྣམས་ཀྱིས་བཀའི་བསྡུ་བ་མཛད་དེ་འཛམ་གླིང་མི་ཡུལ་དུ་སློབ་དཔོན་ཆེན་ཀླུ་སྒྲུབ་སྙིང་པོ་དང་པདྨ་འབྱུང་གནས་སོགས་སྐྱེས་ཆེན་གྲུབ་ཐོབ་རྣམས་ལ་བཀའ་བབས་ཤིང་། རྒྱུད་ལ་བརྟེན་ནས་སྒྲུབ་ཐབ་མན་ངག་ལས་ཚོགས་དགོངས་འགྲེལ་དཔག་ཏུ་མེད་པ་པཎ་གྲུབ་སོ་སོས་མཛད་པ་ལ་བརྟེན་ནས། རྒྱ་བོད་དུ་དཔལ་རྟ་མགྲིན་ཁོ་ནའི་གྲུབ་ཐོབ་ཀྱང་གྲངས་མེད་པར་བྱོན་མོད་ཀྱི། ལོ་རྒྱུས་བསྡུས་པ་འཆད་ན་འདི་ནས་བཟུངས་ཏེ་བཤད་དོ། །ད་ལམ་གྱི་ཆོས་བཀའ་འདི་ཁོ་ནའི་ལོ་རྒྱུས་ཀྱི་དབང་དུ་བགྱི་ན། སློབ་དཔོན་ཆེན་པོ་པདྨ་འབྱུང་གནས་

[Full Size]

བོད་ཡུལ་དུ་བྱོན་ཁར་འཕགས་པ་སྤྱན་རས་གཟིགས་ཀྱིས་བཀའ་སྩལ་ཏེ། རིགས་ཀྱི་བུ་རིག་པ་འཛིན་པའི་དབང་ཕྱུག་ཁྱོད་ཀྱིས། བྱང་ཕྱོགས་ཁ་བ་ཅན་གྱི་རྒྱལ་ཁམས་དེ་བཞིན་གཤེགས་པས་ཞབས་ཀྱིས་མ་བཅགས་ཤིང་ཤིན་ཏུ་བགྲོད་པར་དཀའ་བའི་ས་ཕྱོགས་རི་བྲག་ཐམས་ཅད་མཚོན་ཆ་གཟིངས་པ་འདྲ་བ། ཆུ་ཀླུང་ཐམས་ཅད་རྦ་ཀློང་དྲག་པོར་འཁྲུག་པ། སྐྱེ་འགྲོ་ཐམས་ཅད་ཀྱང་གདོལ་བ་ཤ་ཟན་སྲིན་པོའི་རིགས་སུ་གཏོགས་པས་མདོག་ཞིང་ཤ་ཁྲག་ལ་དགའ་བ། གཡོ་སྒྱུ་ཆེ་ཞིང་སྡིག་པ་མི་དགེ་བ་ལ་སྤྱོད་པ་འབའ་ཤིག་ཡོད་པས་འདུལ་བར་དཀའ་བའི་ཞིང་ཡིན་ཀྱང་། བདག་ཉིད་ཀྱིས་རྒྱལ་བའི་སྤྱན་སྔར་སྨོན་ལམ་བཏབ་ཅིང་དམ་བཅས་པའི་འདུལ་ཡུལ་དུ་འགྱུར་ཕྱིར། བདག་གི་ཐུགས་རྗེ་ལས་སྤྲུལ་པ་ཁྱེད་ཀྱིས་ཀྱང་རྨད་བྱུང་ཐུགས་རྗེའི་རྫུ་འཕྲུལ་མཐའ་ཡས་པས་འཐུལ་བར་འགྱུར་གྱི། སྐྱེ་འགྲོ་ཕོ་རིགས་ཐམས་ཅད་འཕགས་པ་སྤྱན་

[Full Size]

རས་གཟིགས་ཀྱི་ཏིང་འཛིན་གྱིས་ཐུལ་ཞིག མོ་རྣམས་ཐམས་ཅད་སྒྲོལ་མ་གསང་བ་ཡེ་ཤེས་ཀྱི་ཏིང་འཛིན་གྱིས་འཐུལ་ཤིག མི་མ་ཡིན་གདུག་པ་ཅན་རྣམས་རྟ་མགྲིན་དབང་ཆེན་འབར་བའི་བརྟུལ་ཞུགས་དྲག་པོས་ཚར་ཆོད་ལ། དམ་པའི་ཆོས་ཀྱི་བསྟན་པ་དར་བར་གྱིས་ཤིག །ཅེས་གསུངས་པ་དང་མཐུན་པར་ སློབ་དཔོན་གྱིས་ཀྱང་བོད་ཡུལ་མཐའ་ཁོབ་ཀྱི་སྐྱེ་འགྲོ་ཕོ་མོ་རྣམས་འཕགས་མཆོག་ཐུགས་རྗེའི་བདག་པོ་ཡབ་ཡུམ་གྱི་སྒོ་ནས་སྨིན་གྲོལ་དུ་ མཛད་ཅིང་། བོད་ཀྱི་ལྷ་འདྲེ་གདུག་པ་ཅན་རྣམས་ནི་དབང་ཆེན་རོལ་པའི་གཟི་བྱིན་གྱིས་བཏུལ་ཞིང་དམ་ལ་བཏགས། ཁྱད་པར་དུ་རྒྱལ་པོའི་ཐུགས་དམ་དཔལ་གྱི་བསམ་ཡས་བཞེངས་པའི་ཐོག་མར་བར་ཆད་སེལ་ཕྱིར་ཨཱརྱ་པཱ་ལོ་རྟ་མགྲིན་གྱི་གླིང་སྔོན་ལ་བཞེངས་སུ་གསོལ་བས་ས་གཞི་དུལ་ཞིང་བར་ཆད་ཐམས་ཅད་ཞི་ནས་ཐུགས་དམ་གྱི་གཙུག་ལག་གེགས་མེད་དུ་

[Full Size]

འབྱོངས། དེ་དག་གི་སྐབས་སུ་སློབ་དཔོན་ཆེན་པོས་དཔལ་རྟ་མགྲིན་གྱི་ཆོས་སྐོར་རྒྱུད་དང་མན་ངག་མང་པོ་ཞིག་ཆོས་རྒྱལ་རྗེ་འབངས་ཐ་དད་ཀྱི་སྐལ་བ་དང་འཚམས་པར་གནང་བས། ངན་ལམ་རྒྱལ་བ་མཆོག་དབྱངས་ལ་སོགས་པས་རྟ་མགྲིན་གྱི་སྐུར་དངོས་སུ་བཞེངས་ཤིང་རྟ་སྐད་ཀྱིས་འཛམ་གླིང་ཁྱབ་པའི་གྲུབ་རྟགས་སྟོན་ནུས་པ་ཡང་བྱུང་ཞིང་ཆོས་རྣམས་གཏེར་ཁ་སོ་སོར་སྦས་པ་ལས། ཟབ་ཆོས་འདི་ཉིད་ནི་རྟ་མཆོག་གཙུག་གི་ནོར་བུའི་རྒྱུད་ཀྱི་དགོངས་དོན་མན་ངག་བསྡེབས་ནས། ཕྱི་མདོ་དང་བསྟུན་ཏེ་ལྟུང་བཤགས་སངས་རྒྱས་སོ་ལྔའི་སྒྲུབ་ཐབས། ནང་སྔགས་ལུགས་དང་མཐུན་པ་རྟ་མགྲིན་ཡང་གསང་ཁྲོས་པའི་སྒྲུབ་ཐབས། གསང་བ་མན་ངག་དང་མཐུན་པ་རྩ་གསུམ་གཅིག་དྲིལ་ཡིད་བཞིན་ནོར་བུའི་དབང་སྒྲུབ་ལས་ཚོགས་དང་བཅས་པ། དེ་ཁོ་ན་ཉིད་རྫོགས་རིམ་ཡེ་ཤེས་འཁོར་ལོའི་ཉམས་ལེན་རྫོགས་པ་ཆེན་པོ་ཡང་ཏི་འོད་གསལ་འཁོར་ཡུག་གི་ཟབ་དོན་སྙིང་པོར་དྲིལ་

[Full Size]

བ་དང་བཅས་པའི་ཆོས་སྐོར་འདི་ནི་མྱང་བན་ཏིང་འཛིན་བཟང་པོ་ལ་གནང་ཞིང་མ་འོངས་དྲག་སྤྱོད་བཞི་བཅུའི་ཡང་མཐའ་སུམ་ཅུ་ཁ་རལ་ལ་ཉེ་བའི་དུས་ན་ཟབ་ཆོས་འདི་ཉིད་ཀྱིས་འགྲོ་ལ་ཕན་པའི་ལུང་བསྟན་དབང་བསྐུར་སྨོན་ལམ་བཀའ་གཏད་མཛད་ནས། གཏོར་དཔེ་རྣམས་རིན་ཆེན་ཟངས་ཀྱི་སྦུ་གུར་བཅུག་ཅིང་གུ་རུ་ཡབ་ཡུམ་གྱི་བྱང་སེམས་དང་མཚོ་རྒྱལ་གྱི་དབུ་སྐྲ་སོགས་བྱིན་རླབས་ཀྱི་ཁྱད་པར་ཅན་དང་། རྟ་ཕག་ཡབ་ཡུམ་གྱི་སྐུ་རྟེན་ཙིཏྟ་རིན་ཆེན་འབར་བ་ཞེས་པ་ཡིད་བཞིན་གྱི་ནོར་བུ་སོགས་གཏེར་རྫས་ཁྱད་འཕགས་དུ་མ་དང་བཅས་ཏེ་རྒྱ་རིམ་པ་བདུན་གྱིས་བཏབ་ནས། ཀོང་ཡུལ་ཉང་ལུང་ལྗོན་པའི་ནགས་ཚལ་གྱི་སྐེད་པ་སྙལ་མོ་ལྷ་རི་ཞེས་འོད་དཔག་མེད་ཀྱི་སྐུ་བརྙན་བྲག་ལ་རང་བྱུང་དུ་གསལ་བའི་གནས་སུ་གཏེར་དུ་སྦས་ཤིང་། དྲང་སྲོང་གཟའ་བདུད་ཆེན་པོ་ལ་གཏེར་སྲུང་དུ་བཀའ་བསྒོས་ཏེ་བཞག་པ་ལས། ཕྱི་མའི་དུས་ན་ཇི་ལྟར་འབྱུང་

[Full Size]

ཚུལ་དུས་རྟགས་ལུང་བྱང་དང་རྗེས་སུ་མཐུན་པར། སྤྲུལ་པའི་རིག་འཛིན་ཆེན་པོ་ཧཱུྃ་ནག་མོ་མེ་འབར་གྱིས་ཀྱང་དུས་རྟགས་ལུང་བསྟན་ཇི་ལྟ་བའི་ཐོག་ཏུ་བབས་ནས་ཟབ་གཏེར་འདི་ཉིད་བཞེས་པར་བརྩམ་པ་ལ། བདུད་རིགས་ལོག་འདྲེན་གདུག་པ་ཅན་རྣམས་མ་བཟོད་པའི་ཆོ་འཕྲུལ་དྲག་པོ་གཡོས་ཏེ། གཅུགས་ཅན་མིའི་བར་ཆད་ཡུལ་ཕྱོགས་དེ་དག་གི་སྐྱེ་བོ་རྣམས་ཀྱིས་གཏེར་བཏོན་ན་ཡུལ་གྱི་ས་བཅུད་ཉམས་པར་འགྱུར་བས་སྲུང་དགོས་ཟེར་ནས་དམག་དཔུང་གོ་མཚོན་དང་བཅས་པས་གཏེར་གནས་ཀྱི་ལམ་འཕྲང་བཀག་ཅིང་སྐུ་ལ་བསྡོས། གཟུགས་མེད་ལྷ་འདྲེའི་བར་ཆད་རླུང་འཚུབ་ཐོག་སེར་ཤྭ་འོད་རི་ཉིལ་བ་སོགས་འཚུབ་འགྱུར་མཐའ་ཡས་པས་གཏེར་སྒོ་དགག་ཀྱང་། རིག་འཛིན་དེ་ཉིད་ཀྱིས་འགྲོ་བ་མིས་མི་ཐར་བའི་གཡང་རི་ལ་རྫུ་འཕྲུལ་གྱིས་ཆིབས་རྒྱུག་མཛད་ཅིང་བྲག་ལ་ཞབས་རྗེས་འཇོག་པ་སོགས་གྲུབ་རྟགས་ཡ་མཚན་

[Full Size]

དུ་མ་བསྟན་པས་མི་རྣམས་དབང་དུ་བསྡུས། ཁྲོ་རྒྱལ་རྟ་མགྲིན་འབར་བའི་ཏིང་འཛིན་ནུས་པའི་ཟེར་གྱིས་མི་མ་ཡིན་ཆམ་ལ་ཕབས་ཏེ་བར་ཆད་ཐམས་ཅད་ཟིལ་གྱིས་མནན་ནས་ཟབ་གཏེར་གེགས་མེད་དུ་ཐོབ་ཅིང་བཀའ་བབས་ལས་འཕྲོ་ཅན་གྱི་ཆོས་བདག་སྐྱེས་ཆེན་སོ་སོའི་ཕྱག་ཏུ་ཕྲོད་པར་མཛད་པའི་རྟེན་འབྲེལ་དགེ་ལེགས་ཀྱི་ཁྲི་གདུགས་ཕྱོགས་བཅུར་བརྡལ་བས་གདུལ་བྱའི་སྨིན་གྲོལ་གྱི་ལམ་བཟང་མངོན་པར་སྣང་བར་མཛད་པ་འདི་ལྟར་ལགས།། ༈ །།དེའི་ཕྱིར་ན་དེང་གི་དུས་འདིར་ཟབ་ཆོས་འདི་ཉིད་ཀྱི་དབང་བསྐུར་ལ་འཇུག་པའི་ལས་རིམ་གྱི་ཐོག་མར་གསང་སྔགས་ཟབ་མོའི་ཆོས་ལ་རྡོ་རྗེའི་སློབ་དཔོན་གྱི་བྱིན་རླབས་རྗེས་སུ་གནང་བ་མ་ཐོབ་པར་བབ་ཆོལ་དུ་འཇུག་ཏུ་མི་རུང་ལ། བཀའི་རྗེས་སུ་གནང་བ་ཐོབ་པར་བྱེད་པ་ལ་གུས་པས་གསོལ་བ་གདབ་གསོ། གསོལ་བ་གདབ་པའི་ཡུལ་

[Full Size]

བླ་མ་ལ་ཐ་མལ་མིའི་འདུ་ཤེས་བྱས་ན་བྱིན་རླབས་འཇུག་པའི་ཡུལ་དུ་མི་འགྱུར་ཕྱིར། བླ་མ་ནི་དུས་གསུམ་གྱི་རྒྱལ་བ་ཐམས་ཅད་གཅིག་ཏུ་འདུས་པའི་ངོ་བོ་ཉིད་ཡིན་ལ་ཡིན་པར་ཤེས་པའི་དག་སྣང་མོས་གུས་ཀྱི་གདུང་ཤུགས་བསྐྱེད་ནས་གསོལ་བ་གདབ་པའི་ཚིག་འདི་རྗེས་ཟློས་མཛད་པར་ཞུ། ཨེ་མ་བླ་མ་རིན་པོ་ཆེ། དཀོན་མཆོག་གསུམ་གྱི་ངོ་བོ་ཉིད། །བདག་ཅག་འཁོར་བའི་བཙོན་རར་ཆུད། །འདི་ལ་ཐུགས་རྗེས་གཟིགས་མཛོད་ལ། །དབང་མཆོག་དམ་པ་སྩལ་དུ་གསོལ། །དེ་ལྟར་གསོལ་བ་བཏབ་པའི་ལན་དུ་དམ་ཚིག་གི་སྐལ་བའི་ནུས་སྟོབས་འདྲི་ཞིང་གནང་བའི་སྐབས་དབྱེ་བ་ལ་གསན་པར་ཞུ། ཧོ། བུ་ཁྱོད་སུ་ཡིན་ཅིག་བྱ། །གསང་སྔགས་ཟབ་མོའི་དཀྱིལ་འཁོར་འདིར། །འཇུག་པའི་སྐལ་ལྡན་ལས་འཕྲོ་ཅན། །བརྒྱ་ལམ་དེ་ནི་རེ་འགའ་ཙམ། །རྩ་གསུམ་དམ་ཚིག་བསྲུང་ནུས་སམ། ཞེས་དྲིས་པ་འདིའི་ལན་དུ་རྩ་བ་དང་ཡན་ལག་གི་དམ་

[Full Size]

ཚིག་ཐམས་ཅད་སྲོག་ལ་བབས་ཀྱང་མི་ཉམས་པར་བསྲུང་སྙམ་པའི་ཞེ་ཐག་པའི་དམ་བཅའ་དང་བཅས་ཏེ་ཚིག་འདི་རྗེས་བཟློས་མཛད་པར་ཞུ།། ༈ །།བདག་ནི་རིགས་ཀྱི་བུ་གཅིག་པུ། །སྔོན་སྦྱངས་ལས་འཕྲོ་ཅན་ཡིན་ནོ། །རྩ་བའི་དམ་ཚིག་དབང་གིས་བསྲུང་། །ཐུགས་རྗེས་དགོངས་ལ་དབང་བསྐུར་ཞུ། ཞེས་ཞུ་ཞིང་བླ་མ་དང་དཀྱིལ་འཁོར་ལ་དངོས་སམ་ཡིད་ཀྱིས་ཕྱག་དང་བསྐོར་བ་ཅི་ནུས་བྱའོ། །སླར་གྲལ་དུ་འཁོད་པ་ལ་སྤྱན་དར་དམར་པོས་བཅིངས་ཤིང་མེ་ཏོག་བསིལ་མ་ལག་ཏུ་གཏད་ལ། དེ་ཡང་འོ་སྐོལ་སྐྱེ་འགྲོ་ཐམས་ཅད་འཁོར་བ་ཐོག་མ་མེད་པ་ནས་མ་རིག་པའི་བག་ཆགས་ངན་གོམས་མཐུ་བརྟས་ནས་འཁོར་བའི་རྒྱུ་འབྲས་ལ་ཡིད་ཆགས་པས་རང་བྱུང་ཡེ་ཤེས་ཀྱི་ཞལ་མ་མཐོང་བར་བསྒྲིབ་པའི་བརྡའ་མཚོན་པའི་ཕྱིར་མིག་དར་དམར་པོས་བཅིང་བ་ཡིན་ལ། ད་ནས་བླ་མའི་དྲིན་གྱིས་རང་བྱུང་དོན་གྱི་ལྷ་དང་མཇལ་བར་བྱ་ཕྱིར་རིག་པ་རང་བྱུང་གི་མེ་ཏོག་འདི་རྩ་གསུམ་ལྷ་ཚོགས་ཀྱི་དཀྱིལ་འཁོར་

[Full Size]

ལ་ཕྱག་རྟེན་ནམ་དབང་ཡོན་གྱི་ཚུལ་དུ་ཕུལ་བ་ཙམ་གྱིས། ཚེ་རབས་སྔོན་ནས་བསྒོམ་ཤིང་བསྒྲུབ་པའི་ལས་འཕྲོ་གང་ཡོད་ཀྱི་ལྷས་བྱིན་གྱིས་བརླབས་ནས་རང་རིག་ཡེ་ཤེས་རང་ངོ་མཐོང་བར་མཛད་དུ་གསོལ་སྙམ་པའི་མོས་གདུངས་ཀྱི་ངང་ནས་ཚིག་འདིའི་རྗེས་ཟློས་མཛད་པའི་མཐར་མེ་ཏོག་བསིལ་མ་དཀྱིལ་འཁོར་གྱི་ཕྱོགས་སུ་མཐོར་བར་མཛོད་ཅིག །ཧོ། རྩ་གསུམ་བླ་མའི་དཀྱིལ་འཁོར་འདིར། རང་རིག་སྣང་བའི་མེ་ཏོག་འབུལ། །སྔོན་ནས་ལས་ཀྱི་འཕྲོ་ཡོད་པའི། །ཡི་དམ་ལྷ་ལ་བབས་པར་ཤོག། ༈ །།དེ་ལྟར་མེ་ཏོག་ཕུལ་བ་དེ་ཉིད་རིགས་ཐ་དད་པའི་ལས་འཕྲོ་གང་ཡོད་ཀྱི་ལྷ་ལ་བབས་ཤིང་དེའི་རིགས་དང་མཚུངས་པའི་དབང་གི་གསང་མཚན་དང་ལས་དང་དངོས་གྲུབ་ཐོབ་པར་འགྱུར་བ་ཡིན་ནའང་། དེང་གི་སྐབས་འདིར་ནི་རིགས་ཀུན་འདུས་པ་རྩ་གསུམ་ཡོངས་རྫོགས་ཀྱི་དཀྱིལ་འཁོར་ལ་བབས་པ་ལགས་ཚེ་

[Full Size]

དེ་དང་མཐུན་པར་དབང་གི་གསང་མཚན་ཀྱང་རིགས་འདུས་དབང་ཆེན་དྲག་པོ་རྩལ་ཞེས་པའི་མིང་འཛིན་པར་ཞུ་ཞིང་གསང་བའི་མཚན་འདི་ཐོགས་པ་ཙམ་ནས་ལྷ་དང་དཔའ་བོ་མཁའ་འགྲོ་ཀུན་གྱི་དམ་ཚིག་གི་མཐུན་པའི་སྲས་དང་མཆེད་དུ་གཟིགས་ནས་བྱིན་གྱིས་རློབས་པར་འགྱུར་བ་དང་། གནས་སྐབས་སུ་བར་ཆད་ལས་སྐྱོབས་ཅིང་མཐར་ཐུག་ཀྱང་སངས་རྒྱས་ཀྱི་མཚན་འདི་ཉིད་དང་མཐུན་པར་འཚང་རྒྱ་བར་འགྱུར་བས་ན་གསང་མཚན་ནི་དོན་དང་དགོས་ཆེད་མང་པོ་དང་ལྡན་པ་ལགས།། ༈ །།དེ་ནས་རྡོ་རྗེ་སློབ་དཔོན་གྱི་ཐུགས་ཀ་ནས་འོད་གསེར་གྱི་ཁ་དོག་ལྟ་བུ་ལ་དབྱིབས་ནི་སྨན་པ་མིག་མཁན་གྱི་ཐུར་མ་འདྲ་བ་འཕྲོས་པས་ཁྱེད་རང་རྣམས་ཀྱི་མ་རིག་པའི་བག་ཆགས་སྒྲིབ་གཡོགས་མཐའ་དག་གསལ་བའི་མོས་པ་མཛོད་

[Full Size]

ཅིག །ཧོ། ཇི་ལྟར་མིག་མཁན་མིག་དབྱེ་ལྟར། ཁྱོད་ཀྱི་མ་རིག་ལིང་ཐོག་ནི། །རིག་པའི་ངང་དུ་དབྱེ་བས། །རྩ་གསུམ་ལྷ་ལ་ལེགས་པར་ལྟོས། ཅེས། བླ་མས་ཕྱག་མཚན་རྡོ་རྗེས་མིག་དབྱེ་བའི་ཕྱག་རྒྱ་དང་བཅས་པས་སྤྱན་དར་རྣམས་དཀྲོལ་ཏེ།། ༈ །།རིགས་ཀྱི་བུ་རྣམས་ལེགས་པར་ཉོན་ཞིག །གསང་སྔགས་ཟབ་མོའི་དཀྱིལ་འཁོར་དང་མཇལ་བ་ནི་ཚེ་རབས་དཔག་ཏུ་མེད་པ་ནས་བསོད་ནམས་ཀྱི་ཚོགས་ཆེན་བསགས་ཤིང་སྨོན་ལམ་གྱི་མཐུ་དང་ལྡན་དགོས་ཏེ། དེ་དང་མི་ལྡན་པར་ཐེག་ཆེན་བླ་མེད་ཀྱི་ཆོས་དང་མི་ཕྲད། ཕྲད་ཀྱང་དད་པར་མི་འགྱུར་མ་དད་པ་ལ་བྱིན་རླབས་འཇུག་པའི་སྐབས་མི་སྲིད་པས། དེ་བས་ན་ཁྱེད་ཅག་རྣམས་འདི་ལྟ་བུའི་གསང་མཆོག་བླ་ན་མེད་པའི་ཆོས་ལ་དད་ཅིང་དཀྱིལ་འཁོར་གཉན་པོའི་སྒོར་ཞུགས་པ་ནི་བསོད་ནམས་ཀྱི་སྐལ་བ་མཆོག་རབ་ཏུ་གྱུར་པ་ཡིན་ལ། འོན་ཀྱང་འདི་ལྟ་བུའི་

[Full Size]

སྒོར་ཞུགས་ཕྱིན་ཆད་གསང་མཆོག་རྡོ་རྗེ་ཐེག་པའི་དམ་ཚིག་གི་རྩ་བ་ཡན་ལག་དང་བཅས་པ་ཚུལ་བཞིན་བསྲུང་དགོས་དེ་མ་བསྲུང་ན་མནར་མེད་དམྱལ་བ་ཆེན་པོར་ལྷུང་ནས་ཐར་བའི་དུས་མི་འབྱུང་ཞིང་། དམ་ཚིག་མ་ཉམས་པར་བསྲུང་ན་ཚེ་གཅིག་བླ་མེད་བྱང་ཆུབ་ཀྱི་གོ་འཕངས་ཐོབ་པར་ནུས་པས་ན། དེ་ལྟ་བུའི་ཁེ་ཉེན་གྱི་རྒྱུ་འབྲས་ལ་ལེགས་པར་བསམ་ནས་བླངས་དོར་ཕྱིན་ཅི་མ་ལོག་པར་སྒྲུབ་དགོས་པ་ལགས། དེ་ནས་ཡེ་ཤེས་འབེབ་པར་བྱེད་པའི་རྫས་དང་ཡོ་བྱད་སྤོས་དང་རོལ་མོ་སོགས་གསར་ལ། དེ་ཡན་ཆད་ཀྱི་ལས་རིམ་རྣམས་ཀྱི་ཁྱེད་ཅག་དབང་གི་སྣོད་རུང་དུ་བསྒྲུབ་པའི་སྟ་གོན་ཡིན་ལ། ད་ནི་དབང་དངོས་གཞི་བསྐུར་བར་བྱ་བ་ལ་ཡང་། གསང་སྔགས་བླ་མེད་ཀྱི་སྐབས་འདིར་རྣམ་པ་ཀུན་ཏུ་སྒོ་གསུམ་དཀྱིལ་འཁོར་གསུམ་ལྡན་མ་གཏོགས་ཐ་མལ་འཁྲུལ་པའི་ཞེན་རྟོག་རང་ག་མས་

[Full Size]

ནི་སྐད་ཅིག་ཀྱང་རུང་བ་མ་ཡིན་པ་དང་། ཁྱད་པར་དབང་ཞེས་བྱ་བའི་དོན་ནི་ལྷ་ལ་ལྷ་བསྟིམ། སྔགས་ལ་སྔགས་སུ་གསལ་གདབ། ཆོས་ཉིད་ལ་ཆོས་ཉིད་དུ་ངོ་སྤྲོད་པ་ལ་དབང་དུ་བརྗོད་པ་ཡིན་གྱི། སོ་སྐྱེ་ཐ་མལ་པའི་མགོ་ཐོག་ཏུ་ཀུན་རྫོབ་མཚན་མའི་རྫས་ཀྱིས་བཏུག་ཅིང་རེག་པ་ཙམ་གྱིས་ནི་དབང་གི་དོན་འགྲུབ་པར་འགྱུར་བ་མ་ལགས་ཚེ། དེས་ན་དབང་བསྐུར་བའི་ཡུལ་ལྷར་བསྐྱེད་པའི་དམིགས་པ་འདི་བཞིན་དུ་སྒོམ་པར་ཞུ། དེ་ཡང་འོ་སྐོལ་རྣམས་གནས་པའི་ས་ཕྱོགས་འདི་དག་ཐ་མལ་གྱི་གནས་མ་ཡིན་པར་བདེ་ཆེན་དབང་གི་ཕོ་བྲང་ཡེ་ཤེས་འོད་ཀྱི་གཞལ་ཡས་སུ་མོས་པ་མཛད། བདག་རྡོ་རྗེ་སློབ་དཔོན་ལ་ཡང་ཕལ་པའི་མི་གཟུགས་ཀྱི་འདུ་ཤེས་མི་མཛད་པར་བདེར་གཤེགས་ཀུན་འདུས་རྩ་གསུམ་ཡོངས་རྫོགས་ཀྱི་ངོ་བོར་ངེས་ཤེས་བསྐྱེད་པ་གནང་། ཁྱེད་རང་སོ་སོ་རྣམས་ཀྱང་གདན་པདྨ་ཉི་ཟླ་བདུད་བཞི་བརྫིས་པའི་

[Full Size]

སྟེང་དུ། སྐད་ཅིག་དྲན་རྫོགས་སུ་ལྷ་ཐམས་ཅད་ཀྱི་སྤྱི་དཔལ་དབང་ཆེན་རྟ་མགྲིན་རྒྱལ་པོ་ཡུམ་མཆོག་རྡོ་རྗེ་ཕག་མོ་དང་གཉིས་ཀ་སྐུ་མདོག་དམར་གསལ་ཞལ་གཅིག་ཕྱག་གཉིས་གཡས་རྡོ་རྗེ་གྲི་གུག་འབར་བ་དང་གཡོན་ཐོད་པ་ཁྲག་གིས་བཀང་བ་འཛིན་ཞིང་། ཞལ་གདངས་ལྗགས་འདྲིལ་མཆེ་བ་རྣོ་དཔལ་དུ་གཙིགས་པ། སྤྱན་གསུམ་དམར་ཟླུམ་གློག་ལྟར་འཁྱུག་ཅིང་སྨིན་མ་ཨག་ཚོམ་མེ་ལྟར་འབར་བ། སྐུ་ལ་དུར་ཁྲོད་ཀྱི་ཆས་བརྒྱད་དང་རིན་ཆེན་རུས་རྒྱན་དར་དཔྱང་གིས་བརྒྱན་པ། །ཞབས་གཉིས་ཁྲོ་བོ་འདོར་སྟབས་ཀྱིས་བཞེངས་ཤིང་། ཡབ་ཀྱི་སྤྱི་བོར་རྟ་མགོ་ལྗང་ཞུར་དང་ཡུམ་གྱི་གཙུག་ཏུ་ཕག་ཞལ་མཐིང་ནག་གིས་མཚན་པའི་རང་སྒྲ་དྲག་པོས་སྣང་སྲིད་གཡོ་ནུས་པ། དབུ་སྐྲ་སྨུག་ནག་གྱེན་དུ་འཁྱིལ་བའི་དབུས་ན་རིགས་བདག་གུ་རུ་ཡིད་བཞིན་ནོར་བུ་པདྨ་སམྦྷ་བའི་ཆ་བྱད་ཞི་འཛུམ་ཅན། མཉམ་གཞག་

[Full Size]

ནོར་བུ་བསམ་འཕེལ་འཛིན་པས་རྡོ་རྗེའི་སྐྱིལ་ཀྲུང་གིས་བཞུགས་པ་སྟེ། དེ་ལྟར་རྩ་གསུམ་གཅིག་དྲིལ་སྐུ་རི་རབ་ལྷུན་པོ་ལྟར་བརྗིད་ཅིང་ཉི་མ་འབུམ་གྱི་གཟི་འོད་བཞིན་འབར་བ་ཡེ་ཤེས་མེ་དཔུང་གི་ཀློང་ན་གར་གུའི་ཉམས་ལྡན་གྱི་སྐུར་གསལ་བའི་སྤྱི་བོར་ཨོཾ་ཡིག་དཀར་པོ། མགྲིན་པར་ཨཱཿཡིག་དམར་པོ། ཐུགས་ཀར་ཧཱུྃ་ཡིག་མཐིང་ག དེའི་འོག་ཏུ་ཧྲཱིཿཡིག་མེའི་མདོག་ཅན་རྣམས་ལས་འོད་འཕྲོས་པས། འོག་མིན་བདེ་བ་ཆེན་པོའི་ཞིང་དང་། དཔལ་རི་པདྨ་འོད་ཀྱི་གཞལ་ཡས་ན་སྐྱབས་གནས་རྩ་གསུམ་ལྷ་ཚོགས་ཀྱི་ཐུགས་དམ་གྱི་རྒྱུད་བསྐུལ་ནས། ཡེ་ཤེས་ཐུགས་རྗེའི་རླབས་ཆེན་གཡོས་ཏེ་རྩ་གསུམ་ལྷ་ཚོགས་ཀྱི་འཁོར་དུ་སངས་རྒྱས་བྱང་སེམས་རྩ་རྒྱུད་བླ་མ་ཡི་དམ་དཔའ་བོ་མཁའ་འགྲོ་ཆོས་སྲུང་རྒྱ་མཚོས་བསྐོར་བ་དབྱར་གྱི་ཆར་སྤྲིན་ཐིབས་པ་ལྟར་བྱོན་ནས། ཁྱེད་རང་རྣམས་ལ་དམ་ཚིག་ཡེ་ཤེས་གཉིས་མེད་དུ་ཐིམ་པའི་མོས་པ་དང་དད་གུས་གདུང་

[Full Size]

བའི་ཤུགས་དྲག་པོ་བསྐྱེད་པར་མཛོད་ཅིག །ཨོཾ་ཨཱཿཧཱུྃ་ཧྲཱིཿ སརྦ་སིདྡྷི་ཕ་ལ་ཧཱུྃ། མ་ཧཱ་གུ་རུ་ཙིནྡྷ་མ་ཎི། ཧ་ཡ་གྲྀ་ཝ། བཛྲ་བཱ་ར་ཧི། ས་པ་རི་ཝཱ་ར་ཨེ་ཨ་ར་ལི་ཧྲིང་ཧྲིང་། ཕེ༚་ཕེ༚། ཛཿཧཱུྃ་བྃ་ཧོ། ཀ་ཡ་ཝཀཱ་ཙིཏྟ་ཏིཥྛ་བཛྲ་སྭཱ་ཧཱ། ཞེས། རྫས་སྔགས་ཏིང་འཛིན་ཐབས་དང་རྟེན་འབྲེལ་འཛོམ་པའི་སྒོ་ནས་བྱིན་དབབ་ཅིང་། མེ་ཏོག་ལ་རྩ་སྔགས་དང་རྟེན་འབྲེལ་སྙིང་པོ་བཟླས་པས་རབ་ཏུ་གནས་ཏེ་བརྟན་པར་བྱའོ།། ༈ །།དེ་ལྟར་རྩ་སྔགས་གསུམ་གྱི་ལྷ་ཚོགས་རང་དམ་ཚིག་ལ་ཡེ་ཤེས་པ་བསྟིམ་པ་ནི་དབང་གི་དངོས་གཞི་ཡིན་ལ། ཁྱེད་རང་རྣམས་ཀྱང་དམིགས་པ་གསལ་བ་དང་སྒོ་གསུམ་ཐ་མལ་གྱི་སྣང་བ་འགགས་པ་ཡེ་ཤེས་ཞུགས་པའི་རྟགས་ཀྱི་བྱེ་བྲག་ཅི་རིགས་ཉམས་སུ་མྱོང་བ་ལྟ་བུའི་ཚེ་ན་ནི། དབང་བཞི་ཡོངས་རྫོགས་འདི་ཀས་ཐོབ་པ་ཡིན་མོད་ཀྱི། འོན་ཀྱང་ཐོབ་པ་དེ་མི་ཉམས་བརྟན་པར་བྱ་བ་དང་། སྒོ་གསུམ་དཀྱིལ་འཁོར་གསུམ་

[Full Size]

གྱི་རང་བཞིན་དུ་བྱིན་གྱིས་བརླབས་པ་ནན་ཆགས་སུ་བྱ་ཕྱིར་སླར་ཡང་དབང་རྫས་ལ་བརྟེན་ནས་དབང་བཞི་མཐའ་བརྟེན་དང་བཅས་པ་འབུལ་བ་ཡིན་པས་ན། བུམ་པ་ལ་སོགས་དབང་རྫས་ཀྱི་དངོས་པོ་འདི་དག་ཀྱང་གནས་སྐབས་ལྟར་སྣང་ཙམ་དུ་བརྡ་དང་མཚོན་བྱེད་ཀྱི་དཔེར་སོ་སོའི་དབྱིབས་སུ་བསྟན་པ་མ་གཏོགས། དོན་ལ་རྩ་བ་གསུམ་གྱི་ངོ་བོ་ཉིད་དུ་བཞུགས་པ་ཡིན་ཏེ། དེ་ལྟར་ཡིན་པའི་གཏན་ཚིག་ཅི་ཡིན་ན། སྔགས་ཀྱི་ཐེག་པར་གཟུགས་སྣང་ཐམས་ཅད་ལྷའི་དཀྱིལ་འཁོར་ཡིན་ན་དབང་རྫས་ལྷ་མོས་ཀྱང་ཡིན་ལ། དེ་ལས་ཀྱང་རྡོ་རྗེ་སློབ་དཔོན་གྱི་ཆོ་ག་ཟབ་མོའི་སྒོ་ནས་ལྷར་བསྒྲུབས་ཤིང་བྱིན་གྱིས་བརླབས་པའི་དབང་རྫས་འདི་དག་གིས་དབང་བསྐུར་བས། སྒོ་གསུམ་སྒྲིབ་པ་དག་ཅིང་རྩ་གསུམ་གྱི་གོ་འཕངས་འགྲུབ་པའི་ནུས་པ་རྒྱུད་ལ་སྐྱེས་པའི་ངེས་ཤེས་མཛད་པ་ཞུ། ཨོཾ་ཧཱུྃ། བུམ་པ་གཞལ་ཡས་ཁང་གི་ནང་།

[Full Size]

བུམ་རྫས་རྩ་གསུམ་ལྷ་ཚོགས་གསལ། །དབང་བཞི་ཐོབ་ནས་སྒྲིབ་བཞི་དག་པའི་དོན། །སྐལ་ལྡན་བུ་མཆོག་ཁྱོད་ཀྱིས་ཐོབ་པར་ཤོག །ཨོཾ་ཨཱཿཧཱུྃ་ཧྲཱིཿ སརྦ་སིདྡྷི་ཕ་ལ་ཧཱུྃ། ཀཱ་ཡ་ཨ་བྷི་ཥཱིཉྩ་ཨོཾ་ཨོཾ་ཨོཾ། ཞེས། བུམ་པ་སྤྱི་བོར་བཞག་ཅིང་ཅིང་རོལ་མོ་བསྒྲགས། མེ་ཏོག་འཐོར་བའི་རྗེས་སུ། དེས་ནི་བུམ་དབང་ལུས་ལ་བསྐུར་བས་སྐྱེད་རིམ་སྐུའི་དབང་ཐོབ་ཅིང་། ལུས་སྤྲུལ་པའི་སྐུ་འགྲུབ་པའི་ས་བོན་ཐེབས་པ་ཡིན་པས། སྣང་བ་སྐུའི་འཁྱེར་པོ་དང་མི་འབྲལ་བའི་དམ་ཚིག་ལ་གནས་པར་མཛོད་ཅིག །ཧཱུྃ་ཨཱཿ དུས་གསུམ་དོན་མཛད་རྩ་གསུམ་ལྷ་ཚོགས་སྐུ། །དད་མོས་ཅན་ལ་བྱིན་རླབས་མངོན་སུམ་འབྱུང་། །དག་ཅིང་གསལ་ལ་སྒྲིབ་བྲལ་སྣང་སྟོང་འཆར། །སྐལ་ལྡན་བུ་མཆོག་ཁྱོད་ཀྱིས་ཐོབ་པར་ཤོག །ཨོཾ་ཨཱཿཧཱུྃ་ཧྲཱིཿ སརྦ་སིདྡྷི་ཕ་ལ་ཧཱུྃ། ཝཱཀ་ཨ་བྷི་ཥཱིཉྩ་་ཨཱཿཨཱཿཨཱཿ ཞེས་པས་ཐོད་པ་

[Full Size]

མགྲིན་པར་བཞག་ཅིང་བདུད་རྩི་སྦྱིན་ནས། དེས་གསང་དབང་ངག་ལ་བསྐུར་བས་རྫོགས་རིམ་གསུང་གི་དབང་ཐོབ་སྟེ། ངག་ལོངས་སྐུ་འགྲུབ་པའི་ས་བོན་ཐེབས་པས། གྲགས་པ་གསུང་གི་ཁྱེར་པོའི་དམ་ཚིག་ལ་གནས་པར་མཛད་འཚལ། ཧོ། རང་ལུས་ཕུང་པོ་ལྷ་དང་ལྷ་མོའི་དང་། །རྩ་གསུམ་ལྷ་ཚོགས་རིགས་རྣམས་ཀུན་གྱི་བདག །དུག་གསུམ་དག་ནས་སྐུ་གསུམ་ལྷུན་གྱིས་གྲུབ། །སྐལ་ལྡན་བུ་མཆོག་ཁྱེད་ཀྱིས་ཐོབ་པར་ཤོག །ཨོཾ་ཨཱཿཧཱུྃ་ཧྲཱིཿ སརྦ་སིདྡྷི་ཕ་ལ་ཧཱུྃ། ཙིཏྟ་ཨ་བྷི་ཥཱིཉྩ་ཧཱུྃ་ཧཱུྃ་ཧཱུྃ། ཞེས་རྡོར་དྲིལ་སྙིང་ཁར་བཞག་ཅིང་ལག་དུ་གཏད་དོ། །དེས་ནི་ཤེས་རབ་ཡེ་ཤེས་ཀྱི་དབང་མཆོག་སེམས་ལ་བསྐུར་བས། སྐྱེད་རྫོགས་ཟུང་འཇུག་ཐུགས་ཀྱི་དབང་ཐོབ་སྟེ། །ཡིད་ཆོས་སྐུར་གྲོལ་བའི་ས་བོན་རྒྱུད་ལ་ཐེབ་པ་ཡིན་པས། དྲན་རྟོགས་ཐུགས་ཀྱི་ཁྱེར་པོའི་དམ་ཚིག་ལས་མི་འདའ་བར་མཛད་འཚལ། ཧོ། སྐྱེ་མེད་གསལ་ལ་དྲན་འཛིན་ཞིག་

[Full Size]

སྔགས་བཟླས་ཆུ་བོའི་རྒྱུན་དང་མཚུངས། །གསལ་ཆ་མ་འགག་ལྷ་སྔགས་དབང་། །སྐལ་ལྡན་བུ་མཆོག་ཁྱོད་ཀྱིས་ཐོབ་པར་ཤོག །ཨོཾ་ཨཱཿཧཱུྃ་ཧྲཱིཿ སརྦ་སིདྡྷི་ཕ་ལ་ཧཱུྃ། ཞེས་པའི་རྩ་བའི་སྙིང་པོ་ལན་གསུམ་རྗེས་ཟློས་བྱ་བ་དང་ལྷན་ཅིག་བགྲང་འཕྲེང་གི་སྣ་གཅིག་སློབ་དཔོན་གྱིས་བཟུངས་ཞིང་སྣ་གཅིག་སློབ་མས་འདྲེན་པ་དང་བཅས་ཏེ་སྔགས་ཀྱི་བཟླས་ལུང་སྦྱིན་ལ། དབྱངས་གསལ་རྟེན་འབྲེལ་སྙིང་པོ་དང་བཅས་པའང་བརྗོད་ནས།། ༈ །།དེ་ལྟ་བུ་སྙིང་པོ་སྔགས་ཀྱི་དབང་འདི་མ་ཐོབ་པར་ཡི་དམ་ལྷའི་བསྙེན་སྒྲུབ་བཟླས་བརྗོད་ལ་མི་དབང་ཞིང་། །བྱས་ཀྱང་འབྲས་བུ་མི་འབྱུང་ལ། སྔགས་དབང་ངག་ལ་ཐོབ་ཕྱིན་ཆད་བཟླས་པ་སྔགས་ཀྱི་ནུས་པ་བདེ་བླག་ཏུ་འབྱུང་ཞིང་ལྷ་མྱུར་དུ་འགྲུབ་པར་འགྱུར་བས་ན་དུས་རྟགས་ཏུ་ཡི་དམ་རྩ་བ་གསུམ་གྱི་བསྙེན་སྒྲུབ་ལ་འབད་པར་ཞུ། ཧོ། སྣང་བ་དབང་སྡུད་ཌ་མ་རུ། །དངོས་གྲུབ་འབྱུང་བའི་ཐོད་ཁྲག་འདི། །མཁའ་འགྲོ་དཔའ་བོའི་སྲོག་གི་རྟེན། །

[Full Size]

དབང་མཆོག་དམ་པ་ཐོབ་པར་ཤོག །ཨོཾ་ཨཱ་ཧཱུྃ་ཧྲཱིཿ སརྦ་སིདྡྷི་ཕ་ལ་ཧཱུྃ། ཧ་རི་ནི་ས། ར་ཙ་ཧྲཱིཿཡ། ཨ་བྷི་ཥཱིཉྩ་ཧཱུྃ། ཞེས་པས་ལག་པ་གཡས་སུ་ཌ་མ་རུ་དང་གཡོན་དུ་ཐོད་ཁྲག་གཏད་ལ།། ༈ །།དེ་ལྟ་བུ་ཐབས་ཤེས་ཡབ་ཡུམ་མཚོན་པའི་ཕྱག་མཚན་གྱིས་དབང་བསྐུར་བས་དཔའ་བོ་མཁའ་འགྲོ་ཐམས་ཅད་རང་དབང་མེད་པར་ལུས་དང་གྲིབ་མ་ལྟར་འཁོར་ཞིང་ཞི་རྒྱས་དབང་དྲག་གི་ཕྲིན་ལས་ཐམས་ཅད་ཐོག་མེད་དུ་འགྲུབ་པར་འགྱུར་བས་ན། དམ་ཚིག་ལ་ཉེས་ལྟུང་མེད་པ་དང་། དུས་བཟང་རྣམས་སུ་ཚོགས་གཏོར་གྱི་མཆོད་པ་ལ་བརྩོན་དགོས་པ་ལགས། དེ་ལྟར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་ལྔ་རིམ་ཅན་དུ་བསྐུར་བས་རྩ་གསུམ་ཡོངས་རྫོགས་ཀྱི་བྱིན་རླབས་རྒྱུད་ལ་འཇུག་པའི་སྐལ་པ་ཅན་དུ་བྱས་ནས།། ༈ །།ད་ནི་རྩ་བ་གསུམ་པོ་ཡང་གུ་རུ་ཡིད་བཞིན་ནོར་བུ་ཉིད་ལ་འདུ་ཞིང་། ཆོས་ལོངས་སྤྲུལ་གསུམ་བརྒྱུད་པར་བཅས་པ་ཐམས་ཅད་གུ་

[Full Size]

རུ་ཉིད་ཀྱི་རྣམ་པར་རོལ་པ་འབའ་ཤིག་ཏུ་ངེས་པའི་མོས་གུས་དང་། གཏོར་མ་འདི་ཉིད་ཀྱང་གུ་རུའི་སྐུའི་བཀོད་པ་ཡོངས་སུ་རྫོགས་པ་མེ་ལོང་ནང་གི་གཟུགས་བརྙན་ལྟར་སྣང་ལ་རང་བཞིན་མེད་པར་གསལ་བ་ལ་སྙིང་ཁོང་རུས་པའི་གཏིང་ནས་མོས་གུས་ཀྱི་ཤུགས་སྐྱེད་དེ་གསོལ་བ་འདེབས་པ་ལ་འདུན་པ་རྩེ་གཅིག་ཡེངས་མེད་དུ་དྲིལ་བར་ཞུ། འདི་སྐབས་སུ་ལས་སློབ་ཀྱིས་དབང་གཏོར་དང་སྤོས་ཁྱེར་ཞིང་སློབ་དཔོན་གྱིས་ཌ་མ་རུ་དང་དྲིལ་བུ་འཐོགས་ལ་དབྱངས་སྙན་པོས་གསོལ་བ་གདབ་སྟེ།། ༈ །།ཆོས་སྐུ་སྣང་བ་མཐའ་ཡས་ལ་གསོལ་བ་འདེབས་སོ། །སྐལ་ལྡན་བྱིན་རླབས་དབང་བསྐུར་སྩོལ། །ལོངས་སྐུ་ཐུགས་རྗེ་ཆེན་པོ་ལ་གསོལ། སྐལ་ལྡན་བྱིན་རླབས༴ སྤྲུལ་སྐུ་རྟ་ཕག་ཡབ་ཡུམ་ལ༴ སྐལ་ལྡན༴ རིག་འཛིན་ཧཱུྃ་ནག་མེ་འབར་ལ༴ སྐལ་ལྡན༴ དྲིན་ཅན་རྩ་བའི་བླ་མ་ལ༴ སྐལ་ལྡན༴ ཀུན་འདུས་ཡིད་

[Full Size]

བཞིན་ནོར་བུ་ལ༴ སྐལ་ལྡན༴ ཞེས་གསོལ་བ་བཏབས་ནས་གཏོར་མ་གུ་རུ་ཡིད་བཞིན་ནོར་བུ་དང་ཐ་མི་དད་པ་ཁྱེད་རང་རྣམས་ཀྱི་སྤྱི་བོར་བཞག་པ་ཙམ་གྱིས། གུ་རུ་ཉིད་འོད་ཕུང་དུ་ལྟེམ་གྱི་ཞུ་ནས་ཁྱེད་རང་རྣམས་ལ་གཉིས་མེད་དུ་ཐིམ་པའི་མོས་པ་རྩེ་གཅིག་མཛད་པར་ཞུ། ཨོཾ་ཨཱཿཧཱུྃ། འགྲོ་བ་འདྲེན་མཛད་གུ་རུ་ཐོད་ཕྲེང་རྩལ། །ཨུ་རྒྱན་ཡུལ་བྱོན་འགྲོ་ཀུན་ལམ་སྣ་འདྲེན། །རྒྱ་གར་ཡུལ་བྱོན་ཐོས་བསམ་སྒྲོན་མེ་སྦར། །བོད་ཀྱི་ཡུལ་བྱོན་གདུག་པ་མ་ལུས་བཏུལ། །སྐུ་ཚབ་ལུང་བསྟན་གསུང་ཚབ་གཏེར་དུ་སྦས། །ཐུགས་དམ་དགོངས་པ་དད་ཅན་རྣམས་ལ་འབེབས། །སྨིན་གྲོལ་དབང་དང་གདམས་པ་མ་ལུས་ཀུན། །སྐལ་ལྡན་བུ་མཆོག་འདི་ལ་སྩལ་དུ་གསོལ། །འཆི་མེད་སྐུ་ཡི་དབང་མཆོག་སྩལ་དུ་གསོལ། །འགག་མེད་གསུང་གི་དབང་༴ འཁྲུལ་མེད་ཐུགས་རྗེ༴ མི་བརྗེད་གཟུངས་

[Full Size]

ཀྱི༴ དམ་པ་ཆོས་ཀྱི༴ འདོད་འབྱུང་ནོར་བུའི༴ ཨོཾ་ཨཱཿཧཱུྃ་ཧྲཱིཿ སརྦ་སིད་དྷི་ཕ་ལ་ཧཱུྃ། བ་ལི༚་ཏ་ཨ་བྷི་ཥཱིཉྩ་ཧཱུྃ། ཞེས་པས་གཏོར་དབང་བསྐུར་ཞིང་རོལ་མོ་བསྒྲགས། མེ་ཏོག་གི་ཆར་དབབ་སོ། །དེ་ལྟར་དབང་རྫས་སྤྱི་བོར་ཞུགས་པས་བུམ་དབང་ཐོབ། ལུས་སྒྲིབ་དག །བདེར་གཤེགས་སྐུའི་རྡོ་རྗེ་འགྲུབ། ལུས་ལྷ་སྒོམ་པ་ལ་དབང་འབྲས་བུ་སྤྲུལ་སྐུ་ཐོབ། །མགྲིན་པར་ཞུགས་པས་གསང་དབང་ཐོབ། ངག་སྒྲིབ་དག །བདེ་གཤེགས་གསུང་གི་རྡོ་རྗེ་འགྲུབ། ངག་སྔགས་བཟླས་པ་ལ་དབང་། འབྲས་བུ་ལོངས་སྐུ་ཐོབ། སྙིང་གར་ཞུགས་པས་ཤེས་རབ་ཡེ་ཤེས་ཀྱི་དབང་ཐོབ། ཡིད་སྒྲིབ་དག །བདེ་གཤེགས་ཐུགས་ཀྱི་རྡོ་རྗེ་འགྲུབ། རྫོགས་རིམ་སྒོམ་པ་ལ་དབང་། འབྲས་བུ་ཆོས་སྐུ་ཐོབ། ལྟེ་བར་ཞུགས་པས་བཞི་པ་ཚིག་དབང་རིན་པོ་ཆེ་ཐོབ། སྒོ་གསུམ་ཐ་དད་དུ་འཛིན་པའི་སྒྲིབ་པ་དག

[Full Size]

སྐྱེད་རྫོགས་གཉིས་མེད་སྒོམ་པ་ལ་དབང་། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་ཀྱི་སྐུ་འགྲུབ་པ་ཡིན་པས་དེ་ལྟར་ངེས་ཤེས་བསྐྱེད་མཛོད། དེ་ནས་དབང་ཐམས་ཅད་ཀྱི་སྙིང་པོའི་ཡང་སྙིང་རིག་པ་རྩལ་གྱི་དབང་ངམ། དོན་དམ་ཡེ་ཤེས་ཀྱི་དབང་བསྐུར་བར་བྱ་བ་སྟེ། འདི་ནི་ཀུན་རྫོབ་རྫས་ཀྱི་དབང་ལ་ལྟོས་མི་དགོས་པར་རང་བྱུང་ཡེ་ཤེས་རང་ངོ་སྤྲོད་པའི་དབང་ཡིན་པས་ན། ཁྱེད་རང་རྣམས་ཀྱང་ལུས་གནད་ལྟ་སྟངས་དང་ལྡན་པའི་ངང་ནས་སེམས་འདི་ཉིད་སྔར་འདས་ཀྱི་རྗེས་མི་འབྲེང་ཞིང་མ་འོངས་པའི་སྔུན་བསུ་མི་བྱེད། ད་ལྟའི་རིག་པ་ལ་དགག་སྒྲུབ་བཟོ་བཅོས་མི་བྱ་བར། རང་གསལ་རྗེན་པའི་ངང་དུ་འཇོག་པར་མཛོད་ཅིག །ཕཊཿ ཅེས་བརྗོད་པས་སློབ་མ་རྣམས་འགྱུར་རྟོག་སྔ་ཕྱིའི་བར་མཚམས་ཆོད་ནས་ཤེས་པ་གསལ་དྭངས་རྗེན་པར་འཆར་བ་དེ་ལ་འདི་ལྟར་ངོ་སྤྲོད་པར་བྱའོ། །ཀྱཻ། སྐལ་བ་དང་ལྡན་པའི་རིགས་ཀྱི་བུ་རྣམས་སེམས་མ་བཅོས་རང་བབས་

[Full Size]

ཀྱི་ངང་ནས་ལེགས་པར་ཉོན་ཞིག །དེ་ལྟ་བུའི་རྩ་བ་གསུམ་གྱི་དབང་བསྐུར་ཟབ་མོ་བརྡ་དང་ཐབས་དང་ཆོ་ག་ལ་བརྟེན་ནས་ལེགས་པར་བསྐུར་བ་ཐོབ་པ་ཡིན་ཞིང་། ད་ནི་དོན་དམ་པའི་རྩ་བ་གསུམ་ངོ་སྤྲོད་པར་བྱ་སྟེ། དེ་ཡང་བྱིན་རླབས་ཀྱི་རྩ་བ་བླ་མ་དངོས་གྲུབ་ཀྱི་རྩ་བ་ཡི་དམ། ཕྲིན་ལས་ཀྱི་རྩ་བ་མཁའ་འགྲོ་དང་གསུམ་པོ་དེའི་ངོ་བོ་དངོས་དེ་གང་ཡིན། གར་བཞུགས། མཚན་ཉིད་ཅི་ལྟ་བུ་ཡོད་སྙམ་ན། རྩ་བ་གསུམ་པོ་དེ་དག་ཕྱི་རོལ་གང་ནས་ཀྱང་མ་བྱུང་ཞིང་། གང་དུ་ཡང་མི་གནས། ངོ་བོ་ཅིར་ཡང་མ་གྲུབ། མཚན་ཉིད་ཅིར་ཡང་མ་ཡིན་ཏེ། འོ་ན་གང་ཡིན་ན། རང་གི་སེམས་ཀྱི་ངོ་བོ་ཡེ་གདོད་མ་ནས་སྤྲོས་པའི་མཐའ་ཐམས་ཅད་ལས་འདས་པའི་ཀ་དག་འདུས་མ་བྱས་པའི་ཡེ་ཤེས་སྟོང་པ་ཉིད་འདི་བླ་མ་སྐུ་གསུམ་དབྱེར་མེད་ཀྱི་ངོ་བོར་ཡེ་ནས་ལྷུན་གྱིས་འགྲུབ་པར་བཞུགས་པ་ཡིན་ཏེ། ཕྱི་རོལ་མཚོན་བྱེད་

[Full Size]

དཔེའི་བླ་མ་ནི་འདུས་བྱས་དྲང་དོན་ཙམ་དུ་ཟད་ལ། འདུས་བྱས་ཀྱི་ཆོས་ཐམས་ཅད་ནི་འཕོ་འགྱུར་སྐྱེ་འཇིག་འདུ་འབྲལ་མི་རྟགས་པའི་ཆོས་ཅན་ལས་མ་འདས་ཀྱི། འདུས་མ་བྱས་མཚོན་བྱ་དོན་གྱི་བླ་མ་འདི་ལ་ནི་རྟག་ཆད་འཕོ་འགྱུར་བྲི་གང་སྐྱེ་འཆི་འགྲོ་འོངས་འདུ་འབྲལ་སོགས་སྐྱོན་གང་གིས་ཀྱང་མ་གོས། རྒྱུ་རྐྱེན་ཅིས་ཀྱང་མ་བསྐྱེད། རྩོལ་སྒྲུབ་གང་ལའང་མ་བརྟེན་པར་དུས་གསུམ་ཀུན་ཏུ་རང་དང་འདུ་འབྲལ་སྐད་ཅིག་ཀྱང་མེད་པར་བཞུགས་ཅིང་བྱིན་གྱིས་རློབ་པར་མཛད་པ་ཡིན་ཕྱིར། དོན་དམ་རྩོལ་མེད་བདེ་བ་ཆེན་པོའི་བླ་མ་ཞེས་ཀྱང་བྱ། རིགས་པ་ཐམས་ཅད་ཀྱི་ཁྱབ་བདག་ཅེས་ཀྱང་བྱ། གུ་རུ་ཡིད་བཞིན་ནོར་བུ་ཞེས་ཀྱང་བྱ་བ་སྟེ། འདི་ཉིད་རང་རིག་རང་ངོ་ཤེས་པ་ནི་བྱིན་རླབས་བླ་མའི་དབང་ཡང་དག་པར་ཐོབ་པ་ཡང་ཡིན་ལ། བླ་མ་སྐུ་གསུམ་དབྱེར་མེད་ངོ་བོ་

[Full Size]

ཉིད་སྐུའི་རང་ཞལ་མངོན་སུམ་དུ་མཇལ་བ་ཡིན་པས་དེ་ལྟར་ངོ་ཤེས་པར་མཛོད་ཅིག །དེ་བཞིན་དུ། རང་གི་སེམས་སྟོང་པ་ཉིད་དེའི་གདངས་འགག་པ་མེད་པར་འོད་གསལ་ཞིང་སྒྲིབ་གཡོགས་དང་བྲལ་བས་འཁོར་འདས་ཀྱི་ཆོས་མ་ལུས་པ་མེ་ལོང་གི་གཟུགས་བརྙན་ནམ། ནམ་མཁའི་གཟའ་སྐར་རྒྱ་མཚོར་འཆར་བ་ལྟར་བཀྲ་ལམ་མེར་གསལ་ལ་ངོས་བཟུང་དངོས་པོ་མཚན་མར་མ་གྲུབ་པའི་སྟོང་གསལ་ཟུང་འཇུག་ཆེན་པོ་འདི་ནི་ཡང་དག་དོན་གྱི་ཡི་དམ་ལྷ་མཆོག་དམ་པར་གཟོད་མ་ཉིད་ནས་རང་ཤར་བ་ཡིན་ཏེ། སྣང་བའི་ཆ་ཐམས་ཅད་ཡི་དམ་ཡབ་ཀྱི་རང་བཞིན། སྟོང་པའི་ཆ་ཐམས་ཅད་དཔའ་མོ་ཡུམ་གྱི་རང་བཞིན། སྣང་སྟོང་ཐ་མི་དད་པ་ནི་ཡབ་ཡུམ་ཐབས་ཤེས་ཟུང་འཇུག་ཏུ་ཞུགས་པ་སྟེ། གསང་སྔགས་ཕྱི་ནང་རྒྱུད་སྡེ་གོང་འོག་སོགས་ཀྱི་དཀྱིལ་འཁོར་ལྷ་ཚོགས་ཇི་སྙེད་པ་ཐམས་ཅད་ཀྱི་རྩ་བ་འདིར་

[Full Size]

མ་འདུས་པ་འགའ་ཡང་མེད་ལ། གནས་སྐབས་སུ་མཚན་དང་རྣམ་འགྱུར་མི་འདྲ་བ་སྣ་ཚོགས་བསྟན་པ་ནི་གསལ་མདངས་འགག་མེད་རོལ་པའི་ཆོ་འཕྲུལ་གང་འདུལ་གྱི་ཕྲིན་ལས་ཡིན་པ་མ་གཏོགས་ངོ་བོ་ཐ་དད་མེད་པ་ཉིད་དེ། ཚུལ་འདི་ལྟར་དུ་རྟོགས་ཤིང་རིག་པ་ནི་ཡི་དམ་གྱི་ལྷ་མ་ལུས་པའི་དབང་དང་བྱིན་རླབས་ཡོངས་རྫོགས་སུ་ཐོབ་པ་ཡིན་ལ། ལྷ་དང་རང་ཉིད་ཐ་མི་དད་པ་གསལ་སྟོང་ཟུང་འཇུག་ཁྱབ་གདལ་གྱི་ཏིང་ངེ་འཛིན་ལས་མ་གཡོས་པ་ནི་ཡི་དམ་མ་སྒྲུབ་ལྷུན་གྲུབ་ཆེན་པོའི་གནད་ཀྱི་རྩ་བ་ཟིན་པའི་ཕྱིར་མཆོག་མཐུན་གྱི་དངོས་གྲུབ་མ་ལུས་རྩོལ་མེད་རང་ཤུགས་ལས་འབྱུང་བར་ཤེས་པར་གྱིས་ཤིག །དེ་ལྟར་རང་སེམས་གསལ་སྟོང་ལྷ་དང་བླ་མའི་ངོ་བོར་ངེས་ཤེས། ཐག་ཆོད་གདེངས་ཐོས་པ་དེའི་ཚེ། རྩལ་མདངས་ཅིར་ཡང་འཆར་བའི་རོལ་པ་ཉིད་མཁའ་འགྲོའི་རང་བཞིན་ཡིན་པར་ཤུགས་ལས་ཤེས་ཤིང་རྟོགས་པར་འགྱུར་བ་

[Full Size]

དེ་དག་གི་སྲོག་གནད་ཟིན་པར་ངང་གིས་འགྱུར་བ་སྟེ། དཔེར་ན་རྒྱལ་པོ་བཙོན་དུ་ཟིན་ན་འབངས་འཁོར་ཆམ་ལ་ངང་གིས་ཕེབས་པ་དང་མཚུངས་པ་ཉིད་དེ། དེ་ཡང་སེམས་ཀྱི་རྩལ་མདངས་འགྱུ་བྱེད་ཕྲ་རག་གི་རྟོགས་ཚོགས་བཟང་ངན་བསམ་གྱིས་མི་ཁྱབ་ཅིང་གྲངས་མེད་པ་ཅིར་ཡང་འཆར། གར་ཡང་རྒྱུགས། ཅི་ཡང་བྱེད་པར་སྣང་ལ། བརྟན་གཡོ་འཁོར་འདས་ཀུན་ལ་མ་ཁྱབ་པ་དང་མི་བྱེད་པ་གང་ཡང་མི་སྲིད་པའི་ཆོ་འཕྲུལ་ལ་དབང་བསྒྱུར་བ་འདི་ནི་མཁའ་འགྲོའི་ངང་ཚུལ་ཉིད་ཡིན་པ་དང་། དེ་ཉིད་ཀྱང་དོན་ལ་བླ་མ་ཡི་དམ་གྱི་རྣམ་འཕྲུལ། གསལ་སྟོང་དབྱེར་མེད་ཀྱི་རང་རྩལ། མེད་བཞིན་སྣང་ལ་རང་བཞིན་བདེན་དངོས་སུ་མ་གྲུབ་པའི་རྣམ་རོལ་ཡིན་ལ་ཡིན་པར་ཤེས་པ་ནི་མ་མོ་མཁའ་འགྲོ་ཐམས་ཅད་ཀྱི་སྲོག་དབང་ཐོབ་པ་ཡིན་པས། དེ་ལྟར་ཐོབ་ནས་ནི་རང་

[Full Size]

དབང་གཞན་ལ་མི་འཆོར་བར་གཞན་དབང་རང་གིས་བསྒྱུར་ཕྱིར། ཚོགས་དྲུག་ཡུལ་སྣང་གི་འཆར་སྒོ་བཟང་ངན་འབྲིང་གསུམ་དང་འགྱུ་དྲན་རྣམ་རྟོག་གི་བྱེ་བྲག་ཕྲ་རག་སྦོམ་གསུམ་ཅི་ལྟར་ཤར། གང་ལྟར་སྣང་། ཚུལ་ཇི་ལྟ་བུར་ཉམས་སུ་མྱོང་ཡང་དེ་ལ་ཨ་འཐས་ཀྱི་བདེན་ཞེན་དགག་སྒྲུབ་བཟང་ངན་ཆགས་སྡང་བླང་དོར་རེ་དོགས་སོགས་ཀྱི་མཚན་འཛིན་གང་ཡང་མི་བྱ་བར། གང་ཤར་སེམས་ཀྱི་རྣམ་རོལ། སེམས་ཉིད་གདོད་ནས་སྟོང་པ། སྟོང་པ་རིག་པའི་སྙིང་པོ་ཅན་དུ་རང་ངོ་རང་གིས་ཤེས། རང་ཐག་རང་གི་ཆོད། རང་དབང་རང་གིས་ཐོབ་པའི་ཀློང་དུ་ཆམ་སྐྱུར་རྒྱ་ཡན་ཁྱབ་གདལ་དུ་འཇོག་པ་ནི་མཁའ་འགྲོ་མ་ཚོགས་དབང་དུ་བསྡུད། ཆམ་ལ་དབབ། གནས་ལ་འབེབས། ལས་ལ་འགྱེད་པ་སོགས་ཐམས་ཅད་གཅིག་ཅར་དུ་འགྲུབ་པ་ཡིན་པས་དེ་ལྟར་ཤེས་པར་གྱིས་ཤིག །དེ་ལྟར་རྩ་བ་གསུམ་པོ་གཞན་

[Full Size]

ལོག་ནས་མི་འབྱུང་། མི་འཚོལ། མི་སྒྲུབ། མི་རེ་སྟེ། རང་དང་ཡེ་ནས་འབྲལ་མ་མྱོང་། བསྐྱེད་མི་དགོས། བསྒྲུབ་མི་འཚལ་སྟེ། ཟབ་མོའི་གནད་དོན་གྱི་སྙིང་པོ་འདི་ཉིད་རྟོགས་ཤིང་ཉམས་སུ་བླང་བ་ཁོ་ན་གལ་ཆེ་བ་ལགས། ཡང་འདི་སྙམ་དུ་སེམས་ཏེ། ཅི་འོ་ན་རྩ་བ་གསུམ་ཡེ་ནས་རང་ལ་ཡོད་ཡོད་པ། འགྲུབ་འགྲུབ་པ། དེ་ལྟར་ཡིན་ན། དབང་དང་སྐྱེད་རྫོགས་སྒྲུབ་ཐབས་སྒོམ་རིམ་བཟླས་སྔགས་ཕྲིན་ལས་ཁ་བསྒྱུར་སོགས་མཐའ་ཡས་པ་འདི་དག་ཅིའི་ཕྱིར་བྱེད་སྙམ་ན། གདོད་ནས་རང་ལ་རྒྱུ་ལྷུན་གྲུབ་ཏུ་ཡོད་པ་དེ་མ་རིག་མ་ཤེས་མ་རྟོགས་པར་གཉིས་འཛིན་འཁྲུལ་པའི་རྒྱ་མཚོར་ཐོག་མ་མཐའ་མེད་དུ་འཁྱམས་པ་འདི་ལ། རྐྱེན་བླ་མའི་མན་ངག་གི་འཚམས་སྦྱར་ནས། དཔེ་ཡིས་ངོ་སྤྲད། ཚིག་གིས་བརྡ་དཀྲོལ། དོན་གྱི་གནད་ལ་དབབ་ནས་སྨིན་བྱེད་ཀྱི་དབང་བསྐུར། གྲོལ་བྱེད་ཀྱི་མན་

[Full Size]

ངག་བསྟན་པས་མི་ཤེས་པ་ཤེས་པར་བྱས། ཤེས་པ་ཉམས་སུ་བླངས་ནས་གོོམས་པ་མངོན་དུ་གྱུར་ཚེ་རང་ལ་ཡོད་པ་རང་གསལ་འབྲས་བུ་འབྱིན་པར་བྱེད་པའི་ཐབས་ཡིན་ཏེ། ཇི་ལྟར་འཇིག་རྟེན་པ་རྣམས་ཀྱང་ཆུ་ལས་ཐར་འདོད་ན་རྐྱལ་ལ་གོམས་དགོས། དཀྱུས་ཐོག་གཅོད་པ་ལ་རྟ་རྩལ་སྦྱང་དགོས། གཡུལ་སྤྲོས་པ་ལ་རལ་སྐོར་དང་མདའ་རྩལ་ལ་སྦྱངས་ནས་མཁས་དགོས་པའི་དཔེ་བཞིན། འདིར་ཡང་སྤྲོས་མེད་ཀྱི་རང་བཞིན་གཏན་ལ་འབེབས་པར་བྱ་བ་ལ་སྤྲོས་བཅས་ཀྱི་སྒྲོགས་འདོགས་ལེགས་པར་ཆོད་དགོས་པའི་ཕྱིར་ན། བརྡའ་དང་ཐབས་ལ་བརྟེན་པས་དོན་རྒྱུད་ལ་ཁེལ་བར་བྱེད་པ་སངས་རྒྱས་རྣམས་ཀྱི་ཐབས་མཁས་ཐུགས་རྗེའི་ནམ་མཁར་

[Full Size]

ཕྲིན་ལས་རྨད་བྱུང་ལགས་པས་དེ་ལྟར་དགོངས་ཤིང་རྒྱུད་ལ་འབྱོར་བས་རང་གཞན་གྱི་དོན་འགྲུབ་པར་མཛད་འཚལ་ལོ། །དེ་ནས་ཕྱོགས་བཅུའི་རྒྱལ་བ་སྲས་བཅས་རྩ་རྒྱུད་བླ་མ་ཡི་དམ་མཁའ་འགྲོ་ཆོས་སྲུང་གི་ཚོགས་དང་བཅས་པ་མདུན་གྱི་ནམ་མཁར་སྤྲིན་ཕུང་ཐིམས་ལྟར་བྱོན་ནས་ཁྱེད་རང་རྣམས་ལ་དབང་དོན་གྱི་ཡེ་ཤེས་མ་སྐྱེད་པ་སྐྱེད་ཅིང་སྐྱེས་པ་རྣམས་མི་ཉམས་ཤིང་བརྟན་པར་རབ་ཏུ་གནས་ཕྱིར་མེ་ཏོག་གི་ཆར་ཕབ་ཅིང་ཤིས་བརྗོད་མཛད་པའི་མོས་པ་གནང་བར་ཞུ། ཞེས་པའི་ངང་ནས་བཀྲ་ཤིས་ཀྱི་ཚིག་བཅད་བརྗོད་ཅིང་མེ་ཏོག་འཐོར། སྐུ་དྲིན་གསོ་བའི་མཎྜལ་དང་ཚོགས་ཀྱི་དགའ་སྟོན་བྱ། དེ་ནས་དཀྱིལ་འཁོར་ལྷ་ཚོགས་ལ་བཏང་རག་གི་མཆོད་བསྟོད་དང་བཀའ་སྲུང་ལ་གཏོར་མ་ཕུལ་ཞིང་། མདུན་བསྐྱེད་ཀྱི་ཡེ་ཤེས་པ་གཤེགས་ཅིང་དམ་ཚིག་པ་བདག་ལ་བསྡུ་བ་དང་། བཟོད་གསོལ་བསྔོ་སྨོན་ཤིས་བརྗོད་ལ་སོགས་རྗེས་ཆོག་གི་རིམ་པ་སྤྱི་དང་མཐུན་པར་བྱའོ། །དེ་ལྟར་ཟབ་ཆོས་རྟ་ཕག་ཡིད་བཞིན་ནོར་བུའི་དབང་ཆོག་གཏེར་གཞུང་

[Full Size]

གི་སོར་བཞག་ཉིད་ཅུང་ཟད་བསྡུས་པའི་གཤིས་ཀྱི་སློབ་མ་རྣམས་ཀྱི་རྒྱུད་ལ་གོ་དོན་འཕྲོད་དཀའ་བ་དང་། གོ་དོན་མ་འཕྲོད་ན་དབང་གི་དགོས་དོན་མི་འབྱུང་ཚེ། དེས་ན་དམིགས་པ་དང་དོན་འཁྲོལ་གྱི་མཚམས་སྦྱོར་ཡོད་པ་བཞིན་གྱིས་ཤིག་ཅེས། སྐྱབས་མཆོག་རྒྱལ་བའི་སྤྱི་གཟུགས་མཉམ་མེད་སྒམ་པོ་ལ་དཔལ་བཟང་པོ་སྡེ་ཕྱོགས་ཐམས་ཅད་ལས་རྣམ་པར་རྒྱལ་བ་ཉིད་ཀྱིས་བཀའ་སྩལ་བ་གུས་པས་སྤྱི་བོར་བླངས་ཏེ། སྣ་ཚོགས་རང་གྲོལ་གྱིས་ཡི་གེར་བཀོད་པའི་དགེ་བས་འགྲོ་ཀུན་བྱང་ཆུབ་མཆོག་ལ་མྱུར་དུ་འཁོད་པར་གྱུར་ཅིག་མངྒ་ལཾ། གཅིག་ཞུས་ཁུལ་ལགས།

སྦས་ཡུལ་གྱི་ལམ་ཡིག་པདྨ་དཀར་པོ་ལས་གསུངས་པའི་གུ་རུ་རྡོ་རྗེ་གྲོ་ལོད་ཀྱི་དབང་ཆོག

[Full Size]

སྦས་ཡུལ་གྱི་ལམ་ཡིག་པདྨ་དཀར་པོ་ལས་གསུངས་པའི་གུ་རུ་རྡོ་རྗེ་གྲོ་ལོད་ཀྱི་དབང་ཆོག་བཞུགས་སོ།

[Full Size]

གུ་རུ་པདྨ་སིདྡྷི་ཧཱུྃ སྤྲོས་བྲལ་ཆོས་སྐུའི་མཁའ་ཀློང་ལས། །ལྷུན་གྲུབ་གཟུགས་སྐུའི་ཚ་ཟེར་སྤྲོ། །ལོག་རྟོགས་མུན་ཆེན་འཇོམས་མཛད་པའི། །པདྨ་དྲག་པོས་བྱིན་གྱིས་རློབས། གང་ཞིག་ཚེ་འདིའི་བྱ་བ་ལ་ཁོ་ཐག་གཏིང་ཆོད་ཀྱི་དཔའ་གདེངས་ལྡན་པའི་སྐལ་ལྡན་དག་སྦས་པའི་གནས་ཆེན་རྣམས་སུ་ཚེ་དང་སྒྲུབ་པ་མཉམ་པར་བགྲོད་ནུས་པའི་གང་ཟག་གམ། དེ་ལས་གཞན་ཡང་དམ་ལྡན་སྒྲུབ་བརྩོན་གྱི་སྐལ་བཟང་རྣམས་ལ། རྒྱལ་བའི་ཁྱབ་བདག་པདྨ་དྲག་པོ་རྡོ་རྗེ་གྲོ་ལོད་རྩལ་གྱི་བྱིན་རླབས་དབང་བསྐུར་ཟབ་མོ་བྱེད་པར་འདོད་ན། རང་བཞིན་རྫོགས་པ་ཆེན་པོའི་དོན་ལ་དབང་འབྱོར་བའི་སློབ་དཔོན་གྱིས། བཀྲ་ཤིས་བྱིན་ཆགས་པའི་གནས་སུ་

[Full Size]

དུས་ཀྱི་རྒྱལ་པོ་ཚེས་བཅུ་ལ་བབས་པའི་ཚེ། ཅོག་རྩེ་སོགས་སྟེགས་བཟང་པོའི་ཁར་མེ་ཏོག་གི་ཚོམ་བུ་ཆེ་བ་གཅིག་ལ་ཆུང་བ་བཞིས་བསྐོར་བ་དགོད་པ་ནི་གུ་རུ་མཁའ་འགྲོ་སྡེ་བཞི་མཚོན་པའི་དཀྱིལ་འཁོར་རོ། །དེའི་དབུས་སུ་མན་ཛི་སོགས་ཀྱི་སྟེང་དུ་དཔལ་གཏོར་ཟུར་གསུམ་མེ་རིས་མཚན་པ་རིན་ཆེན་འབར་བའི་དབྱིབ་ཅན་ཞབས་སུ་པད་འདབ་ཀྱིས་མཛེས་པའི་རྩེ་མོར་རྡོ་རྗེ་གྲོ་ལོད་ཀྱི་སྐུ་རྟེན་ཙཀྐ་ལི་གཟུག་ཅིང་དར་ཟབ་ཀྱི་གདུགས་ཆུང་དང་འཕན་ཕྲན་སོགས་ཀྱིས་བརྒྱན་པ་བཞག །དེའི་མཐའ་སྐོར་གྱི་གཡས་སུ་དབང་བུམ་རྒྱན་ལྡན་སྤྱི་མཐུན་དང་། གཡོན་དུ་རྡོར་སེམས་བསྐྱེད་བཟླས་བྱས་པའི་ལས་བུམ། མདུན་དུ་ཧཱུྃ་ཡིག་ཁ་དོག་ལྔ་ཙཀླི་ཐ་དད་རེ་ལ་བྲིས་པ་དང་། རྒྱབ་ཏུ་སྣ་ཚོགས་རྡོ་རྗེ། གཡས་

[Full Size]

ཟུར་དུ་རྡོ་རྗེ་རྩེ་དགུ་པ། གཡོན་ཟུར་དུ་ལྕགས་ཕུར། ཧཱུྃ་ཡིག་གི་མདུན་དུ་རཀྴའམ་ཐོད་ཕྲེང་གང་རུང་དང་བཅས་པའི་དབང་རྫས་རྣམས་བཤམས་ཤིང་། མཆོད་པའི་ཡོ་བྱད་ཅི་ལྟར་འབྱོར་པ་ཚོགས་ཀྱི་འཁོར་ལོ་དང་བཅས་པ་ཡང་རྒྱས་པར་བཤམ་པ་དེ་བཅའ་གཞིའི་རིམ་པའོ། །དེ་ནས་ལས་གཞུང་ཆོ་གའི་བྱ་བ་ནི། ཆོས་བཀའ་གཞན་ལྟར་བདག་མདུན་བུམ་སོགས་སྐྱེད་ཆོག་སྤྲོས་བཅས་ཀྱི་ལས་རིམ་བྱ་བའི་སྐབས་མ་ཡིན་ཏེ། འདི་ནི་རང་བཞིན་རྫོགས་པ་ཆེན་པོ་གསལ་སྟོང་ཟུང་འཇུག་ཁྱབ་གདལ་ཡེ་རྫོགས་ཆེན་པོའི་ཏིང་ངེ་འཛིན་གྱིས་བྱིན་གྱིས་རློབས་པའི་སྐབས་དོན་ཡིན་པས་ན། སློབ་དཔོན་ཉིད་མ་བཅོས་བཟོ་མེད་ཀྱི་གནས་ལུགས་གདོད་མའི་ཀ་དག་ཆེན་པོའི་ངང་ནས་ཨོཾ་ཨཱཿཧཱུྃ་ཞེས་བརྗོད་པ་ཙམ་གྱིས། ཕྱི་སྣོད་ནང་བཅུད་བདག་དང་དཀྱིལ་འཁོར་རྫས་དང་ཡོ་བྱད་སོགས་ཀུན་རྫོབ་ཀྱི་སྣང་བ་ཨ་འཐས་འདི་རང་སར་ཕྱམ་གྱི་བསྐུར་བའི་རང་ངོར། འགག་མེད་རིག་རྩལ་ནི་ཨོཾ། ཡེ་སྟོང་མཐའ་བྲལ་ནི་ཨཱཿ ཟུང་འཇུག་བློ་འདས་ནི་ཧཱུྃ་སྟེ། འབྲུ་གསུམ་གྱིས་དགོས་པའི་གནད་དོན་དྲན་པ་ནི་བསངས་སྦྱངས་བྱིན་རླབས་སོགས་སྔོན་འགྲོའི་ལས་རིམ་མཐའ་དག་གི་དོད་པོ་ཡིན་ལ། དངོས་གཞི་ནི། དེའི་

[Full Size]

ངང་ནས་རང་ཉིད་སྐད་ཅིག་གིས་གུ་རུ་རྡོ་རྗེ་གྲོ་ལོད་རྩལ་གྱི་ཆ་བྱད་དུ་ལམ་གྱི་གསལ་ནས་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་རིག་པའི་ངོ་བོ་ཧཱུྃ་དམར་མེའི་འོད་མདངས་ཅན་ལས་རང་གདངས་ཀྱི་ཧཱུྃ་དམར་གྲངས་མེད་པ་རྒྱུན་མི་ཆད་དུ་འཕྲོས་པས། མཐོང་ཐོས་ཀྱི་སྣང་སྲིད་ཐམས་ཅད་ངོ་བོ་རང་རིག་རྡོ་རྗེ་གྲོ་ལོད་ཡིན་པ་ལ་རྣམ་པ་ཧཱུྃ་ཡིག་རང་སྒྲ་སྒྲོག་པའི་ཚུལ་གྱིས་མེར་གྱི་གང་ནས། འཁོར་འདས་ཀྱི་དངོས་པོ་མ་ལུས་པ་སྐུ་རྡོ་རྗེ་གྲོ་ལོད། གསུང་གྲགས་སྟོང་ཧཱུྃ་སྒྲ། ཐུགས་མ་བཅོས་ཁྱབ་གདལ་གསུམ་གྱི་རང་བཞིན་འབའ་ཤིག་ཏུ་ཡེ་རྫོགས་ལྷུན་གྲུབ་ཆེན་པོར་བློ་ཐག་རྦད་ཀྱི་བཅད། ལེངས་ཀྱི་བསྐུར། ལྷོད་ཀྱི་གློད་པའི་ངང་ནས་ཧཱུྃ་ཧཱུྃ་ཧཱུྃ་ཞེས་ཤུགས་འབྱུང་དུ་བཟླ་བ་ནི་འདི་སྐབས་ཀྱི་བདག་མདུན་བུམ་གསུམ་དཀྱིལ་འཁོར་སྒྲུབ་མཆོད་འཛབ་བསྙེན་སྤྲོ་བསྡུ་བདག་འཇུག་བླང་བ་སོགས་མཐའ་དག་པའི་ལས་དང་བྱ་བའི་རིམ་པ་ཀུན་གཅིག་འཆར་དུ་འགྲུབ་པ་སྟེ། ཐེག་པའི་རྩེ་རྒྱལ་རྫོགས་པ་ཆེན་པོའི་སྙིང་པོའི་ཟབ་གནད་འདི་ལྟ་བུའི་ཁྱད་དོན་བློའི་ར་བར་མི་ཤོམ་པའི་གང་ཟག་དག་ནི་འདི་སྐབས་ཀྱི་ཡུལ་དུ་གྱུར་པའི་དཔོན་སློབ་མ་ཡིན་པ་ཤེས་

[Full Size]

པར་བྱའོ། །དེ་ལྟར་དབང་གི་སྒྲུབ་པ་ཁྱད་པར་སྨད་དུ་བྱུང་བ་སྔོན་དུ་བཏང་ནས། དངོས་གཞི་དབང་བསྐུར་གྱི་ས་ལ་ནམ་བབས་པ་ན། དབང་རབ་སྣོད་ལྡན་གྱི་སློབ་མ་གང་ཡོད་རྣམས་ལས་བུམ་གྱི་ཁྲུས་ནས་དབྱུང་ཞིང་ཡིག་བརྒྱ་བཟླས་ལ་ཉམས་ཆགས་བཤགས། གཉིས་འཛིན་གྱི་བགེགས་རིགས་མ་ལུས་རང་འཆོང་རྫུན་ཁུངས་སྡོང་ཞིང་། སླན་ཆད་འབྱུང་བ་མེད་པར་རྟོགས་པའི་སྲུང་བའི་འཁོར་ལོ་དང་ལྡན་པས། སྒོ་གསུམ་གཏན་འདུན་དང་བཅས་པ་མཎྜལ་དུ་ཕུལ་བའི་མཐར་བླ་མས་འདི་སྐད་བརྗོད་དེ། འོ། རིགས་ཀྱི་བུ་རྣམས་སྐལ་བ་དང་ལྡན་པས་གསང་མཆོག་ཐེག་པའི་ཡང་རྩེ་ལ་མོས་པ་ལམ་དུ་བྱེད་པ་ནི་ཁྱེད་ཅག་ཚེ་རབས་དཔག་ཏུ་མེད་པ་ནས་བསོད་ནམས་ཀྱི་ཚོགས་བསགས་ཤིང་སྨོན་ལམ་རྣམ་དག་གིས་མཚམས་སྦྱར་བ་ཡིན་པར་གདོན་མི་ཟ་ཞིང་། དེ་ལྟར་མ་ཡིན་ན་ཟབ་མོའི་ལམ་མཆོག་དང་ཕྲད་པར་མི་འགྱུར་ལ། གལ་ཏེ་ཕྲད་ཀྱང་དེ་ལ་དད་པར་ཡང་མི་འགྱུར་ཞིང་མ་དད་པ་ལ་བྱིན་རླབས་འཇུག་པ་མི་སྲིད་པ་སྟེ། དེས་ན་འདི་ལྟ་བུ་

[Full Size]

དང་ཕྲད་ཅིང་དད་ལ་བྱིན་རླབས་ཀྱི་ཡུལ་དང་སྣོད་དུ་གྱུར་པའི་ཕུན་ཚོགས་ལེགས་དགུ་འཛོམ་དུས་འདིར་དོན་ཆེན་སྙིང་པོ་སྒྲུབ་པ་ལ་འབད་དགོས་པ་དང་། དེ་སྒྲུབ་པར་བྱེད་པ་ཡང་མཚན་ལྡན་བླ་མའི་དྲིན་ལ་ལྟོས་དགོས་ཏེ། ཇི་ལྟར་འཇིག་རྟེན་ན་དགོས་འདོད་འབྱུང་བའི་ནོར་བུ་ལོན་པར་འདོད་པ་རྣམས་རྒྱ་མཚོའི་དེད་དཔོན་ལ་ལྟོས་དགོས་པ་དང་། འབྱུང་འདུས་གདོས་བཅས་ཀྱི་ལུས་ལ་འདུ་བའི་ནད་ཀྱི་ཉེན་པ་ན་སྨན་པ་མཁས་པ་ལ་བརྟེན་དགོས་པའི་དཔེ་དང་མཚུངས་ཕྱིར། འདིར་ཡང་འཁོར་བའི་གཅོང་ནད་སེལ་བ་དང་། སྨིན་གྲོལ་གྱི་ནོར་བུ་ལོན་པར་བྱེད་པ་ལ་བླ་མ་རྡོ་རྗེའི་སློབ་དཔོན་ལ་མ་བརྟེན་པར་ཐབས་གཞན་གང་གིས་ཀྱང་དེ་ལྟར་མི་འགྲུབ་པས་ན། བླ་མ་ལ་ཐ་མལ་མི་རུ་བཟུང་བའི་འདུ་ཤེས་སྤངས་ནས་སངས་རྒྱས་ཐམས་ཅད་གཅིག་བསྡུས་ཀྱི་ངོ་བོར་ཐག་ཆོད་པའི་

[Full Size]

དད་མོས་ཀྱིས་ཀུན་ནས་བླངས་ཏེ་གསོལ་བ་གདབ་པ་ནི་དང་པོར་གཅེས་པའི་ཐབས་གནད་ཡིན་ཕྱིར་དེ་ལྟར་ཡི་ལ་ངེས་པའི་སྒོ་ནས་གསོལ་གདབ་ཀྱི་ཚིག་འདིའི་རྗེས་ཟློས་མཛད་པར་ཞུ། ཧོ། བླ་མ་བདེར་གཤེགས་ཐམས་ཅད་ཀྱི། །ངོ་བོ་པདྨ་ཐོད་ཕྲེང་རྩལ། །བདག་ཅག་འདིར་འདུས་དད་ལྡན་ལ། །སིད་དྷི་དངོས་གྲུབ་རྣམ་གཉིས་སྩོལ། ཞེས་ལན་གསུམ་ཞུས་ལ། དེ་ལྟར་ཁྱོད་ཀྱིས་གུས་པས་གསོལ་བ་བཏབ་པས་ནི་བླ་མས་རྗེས་སུ་བཟུང་བར་རུང་བའི་སྣོད་དུ་གྱུར་པ་ཡིན་ནོ། ཧོ། སྐལ་ལྡན་སྐྱེས་བུ་ཁྱོད་རྣམས་ཀུན། །དལ་འབྱོར་ཐོབ་པ་གྲངས་མང་ཡང་། གསང་སྔགས་ཟབ་མོའི་སྒོར་ཞུགས་དཀོན། །དེང་ཉིད་བསོད་ནམས་ཚོགས་ལས་བྱུང་། །སླར་ཡང་ཟབ་མོའི་གདམས་ངག་ཉོན། དེ་ཡང་། གང་ཞིག་འཁོར་བའི་སེམས་ཅན་མཐའ་ཡས་ཤིང་མུ་མེད་པ་རྣམས་ཀྱི་ནང་ནས་ངེས་པར་འབྱུང་བའི་ཡིད་དང་

[Full Size]

མཐར་པ་འདོད་པའི་བློ་ལྡན་ནི་རེ་ཤིག་ཙམ་ལས་མི་འབྱུང་། ཐར་འདོད་ཀྱི་གང་ཟག་ཇི་ཙམ་པའི་ཁྲོད་ནས་ཀྱང་བླ་མེད་ངེས་གསང་ཟབ་མོའི་སྣོད་ལྡན་ནི་སྲིད་པ་ཙམ་དུ་ཟད་ལ། དེ་ལ་ཡང་ལོག་པའི་བཤེས་གཉེན་དང་གྲོགས་ངན་རྐྱེན་ངན་ནི་མང་ལ། ཡང་དག་པའི་མགོན་དང་བཤེས་དང་བཟང་པོའི་རྐྱེན་ནི་དཀོན་པས་ན། ངེས་པར་ལེགས་པའི་ལམ་ལ་འཇུག་པ་མཐར་སོན་པའི་ཐབས་ལ་ཆིག་དྲིལ་བུ་འབད་པའི་དུས་ནི་ད་རེས་ཁོ་ན་ཡིན་པས། ལས་ངན་འཁོར་བའི་གདོས་ཐག་བཅད་དེ་ཚེ་གཅིག་སངས་རྒྱས་ཀྱི་གོ་འཕངས་ལ་ཅི་སྙེགས་ཅི་འགྲུབ་ལ་རེམས་དགོས། རང་ཉིད་འབའ་ཤིག་དེ་ལྟར་ཐར་པ་གཅིག་པུས་ཀྱང་ཆོག་པ་མ་ཡིན་ཏེ། ཁམས་གསུམ་གྱི་འགྲོ་བ་ཐམས་ཅད་བདག་ཅག་གི་དྲིན་ཅན་ཕ་མར་མ་གྱུར་པ་ནི་གཅིག་ཀྱང་མེད་ཅིང་། དེ་

[Full Size]

དག་ཐོག་མཐའ་བར་མེད་དུ་སྲིད་པའི་སྡུག་བསྔལ་སྣ་ཚོགས་པས་གདུང་བ་དར་དྲག་ལ་ཡུན་རིང་ཞིང་བཟོད་པར་དཀའ་བ་འདི་དག་སྒྲོལ་ཞིང་འདོན་པའི་གཉེར་དང་དེད་དཔོན་ནི་འོ་སྐོལ་ཐེག་ཆེན་གྱི་སྒོར་ཞུགས་པ་རྣམས་ལ་བབས་པ་ཡིན། བབས་བཞིན་མི་བརྩོན་པར་འདོར་ན་ནི་ཐེག་ཆེན་བྱང་སེམས་ཀྱི་ཚུལ་ལས་ཉམས་པར་འགྱུར་ཕྱིར་དེ་བས་ན་བྱང་ཆེན་གྱི་སྤྱོད་པ་ལ་ནན་གྱིས་སློབ་ཅིང་རང་གཞན་གྱི་དོན་གཉིས་ལུས་ཐོབ་འདི་ལ་བསྒྲུབ་པར་བྱ་བ་དང་། དེ་འགྲུབ་པ་ལ་གེགས་སུ་གྱུར་པའི་འཁོར་བ་ཐོག་མེད་ནས་བསགས་པའི་ལས་ཉོན་བག་ཆགས་ཀྱི་སྒྲིབ་ཚོགས་ཅི་མཆིས་པ་ཐམས་ཅད་དེང་འདིར་ལྷ་དང་བླ་མ་དབྱེར་མེད་ཀྱི་སྤྱན་སྔར་སྙིང་ནས་མཐོལ་ཞིང་བཤགས་ལ། དེང་ཕྱིན་ཆད་འདི་ནས་བྱང་ཆུབ་ཀྱི་འབྲས་མཆོག་མ་ཐོབ་བར་དུ་སྒོ་གསུམ་གཏན་གྱི་མདུན་མ་དང་བཅས་པ་བླ་མའི་སྤྱན་སྔར་ལྟོས་

[Full Size]

མེད་དུ་འབུལ་བའི་འདུན་པ་རྩེ་གཅིག་མཛོད་ལ་ཚིག་འདི་བཞིན་རྗེས་ཟློས་ཀྱང་མཛད་པར་ཞུ། ན་མོ། བདེར་གཤེགས་རིགས་འདུས་སྤྱན་སྔ་རུ། སྔོན་ཆད་བག་མེད་ལས་ཉོན་སྒྲིབ། །མཐོལ་བཤགས་བྱང་བར་མཛད་དུ་གསོལ། །ཕྱིན་ཆད་སྒོ་གསུམ་ཉིད་ལ་འབུལ། །ལེགས་ཉེས་ཐམས་ཅད་ཁྱེད་རང་ཤེས། ཞེས་ཞུས་ལ། འོ། དེ་ཡན་ཆད་ཀྱིས་ཁྱེད་ཅག་གི་རྒྱུད་དག་པར་བསྒྲུབ་པ་ཡིན། ད་ནི་ཐེག་མཆོག་བླ་མེད་སྨིན་གྲོལ་གྱི་སྒོ་རུ་གཞུག་པར་བྱ་བའི་ཐབས་ཀྱི་བྱེ་བྲག་ནི་རབ་ཏུ་མང་མོད་ཀྱི། ཀུན་ལ་གཅེས་ཤིང་མེད་དུ་མི་རུང་བ་སྒོ་གསུམ་དཀྱིལ་འཁོར་གསུམ་ལྡན་དུ་བསྒྲུབ་ནས་ཡེ་ཤེས་རྡོ་རྗེ་མི་ཟད་རྒྱན་གྱི་འཁོར་བཅས་སྐུ་གསུམ་དབྱེར་མེད་ཀྱི་གོ་འཕངས་མངོན་དུ་བྱ་བ་ཉིད་མཆོག་ཏུ་ཟབ་པའི་ལམ་ཡིན་པས་ན། ད་ལམ་སྐབས་སུ་བབས་པའི་དོན་གྱི་སྙིང་པོར་ལུས་ལྷའི་

[Full Size]

དཀྱིལ་འཁོར་ནི་བླ་མ་ཡི་དམ་མཁའ་འགྲོ་ཆོས་སྐྱོངས་ཐམས་ཅད་གཅིག་བསྡུས་ཀྱི་བདག་ཉིད་རིགས་འདུས་རྡོ་རྗེ་གྲོ་ལོད་རྩལ་དུ་སྒྲུབ། ངག་སྔགས་ཀྱི་དཀྱིལ་འཁོར་ནི། རྒྱལ་བ་ཀུན་གྱི་བྱིན་རླབས་ཡེ་ཤེས་སྙིང་པོ་འབྲུ་གཅིག་ཧཱུྃ་གི་བཟླས་བརྗོད་ལ་དྲིལ། སེམས་ཆོས་ཉིད་ཀྱི་དཀྱིལ་འཁོར་ཐེག་པ་མཐའ་དག་གི་ཡང་བཅུད་རྫོགས་པ་ཆེན་པོ་རྩོལ་བྲལ་ཡེ་ཤེས་ཟང་ཐལ་དུ་ལམ་ཁྱེར་རྒྱུན་མི་ཆད་པའི་ཏིང་ངེ་འཛིན་ལ་སློབ་པར་བྱ་བ་ཡིན་ཞིང་། དེ་ལས་དང་པོར་སྙན་དུ་གསོལ་རྒྱུའི་དོན་སོར། རྡོ་རྗེ་གྲོ་ལོད་དུ་མཚན་གསོལ་བའི་ལོ་རྒྱུས་དང་གཏན་ཚིག་ཇི་ལྟ་བུ་ཡིན་ཞེ་ན། དེ་ཡང་ཕྱོགས་བཅུ་དུས་བཞིའི་རྒྱལ་བ་མ་ལུས་པའི་ཐུགས་རྗེ་ནུས་མཐུ་མཛད་ཕྲིན་ཡོན་ཏན་ཐམས་ཅད་གཅིག་བསྡུས་སུ་བྱིན་གྱིས་བརླབས་ནས་འགྲོ་བའི་འདྲེན་པར་མངག་པའི་སློབ་དཔོན་ཆེན་པོ་པདྨ་འབྱུང་གནས་ཉིད་ལ་བཅོམ་ལྡན་འདས་ཀྱིས་ལུང་བསྟན་ཚུལ་ནི། མྱང་འདས་ཀྱི་མདོ་རྒྱས་པར། ང་ནི་མྱ་

[Full Size]

ངན་འདས་འོག་ཏུ། ལོ་ནི་བཅུ་གཉིས་ལོན་པའི་ཚེ། ཨཽ་རྒྱན་ཡུལ་གྱི་ནུབ་བྱང་མཚམས། དྲི་མེད་ཀོ་ཤའི་མཚོ་གླིང་དུ། །གེ་སར་པདྨའི་སྙིང་པོ་ལས། ཀུན་ལས་ལྷག་པའི་སྐྱེས་བུ་འབྱུང་། །ཁྱེད་རྣམས་མྱ་ངན་མ་བྱེད་ཅིག །ནོར་བུའི་ནང་ནས་ཡིད་བཞིན་ལྟར། །མཐའ་ཡས་དབང་པོ་པདྨ་འབྱུང་། །འཇིག་རྟེན་མུན་པ་དེས་སེལ་འགྱུར། །ཞེས་གསུངས་ཚེ་ཀུན་ལས་ལྷག་པར་འབྱུང་བའི་ཚུལ་ལ་འཁོར་རྣམས་ཐེ་ཚོམ་སྐྱེས་པ་གཟིགས་ནས་སླར་གསུངས་པ། ཀྱེ་ཧོ། འཁོར་རྣམས་རྩེ་གཅིག་ཡིད་ཀྱིས་ཉོན། །ང་ཡི་སྤྲུལ་པ་དེ་ཉིད་ནི། །དུས་གསུམ་སྤྲུལ་པ་གཞན་ལས་འཕགས། །བགྲེས་རྒུད་མི་མངའ་གཞོན་ནུའི་ཚུལ། །སྐུ་མཆོག་སྤྲུལ་པ་གཞན་ལས་འཕགས། །བདུད་བཞི་ཐོག་མེད་ཉིད་ནས་བཅོམ། །དྲག་རྩལ་སྤྲུལ་པ་གཞན་ལས་འཕགས། །ཚེ་གཅིག་སངས་རྒྱས་ཐེག་ཆེན་སྟོན། །

[Full Size]

དགོངས་པ་སྤྲུལ་པ་གཞན་ལས་འཕགས། །འཛམ་གླིང་མཐའ་དབུས་ཀུན་འདུལ་སྟེ། །འགྲོ་དོན་སྤྲུལ་པ་གཞན་ལས་འཕགས། །བསྐལ་བཟང་འདི་ལ་འདས་གྲོངས་མེད། །སྐུ་ཚེ་སྤྲུལ་པ་གཞན་ལས་འཕགས། །ཅི་ཕྱིར་འོད་དཔག་མེད་ཉིད་དོ། །ཞེས་གསུངས་པ་དང་། དབུས་འགྱུར་ལུང་བསྟན་མདོ་ཕྱི་མར། །རྒྱལ་བ་རྣམས་ཀྱི་རབ་བསྔགས་པའི། །ང་ལས་ལྷག་པའི་སྐྱེས་བུ་འབྱུང་། །བདུད་དང་མུ་སྟེགས་ལ་སོགས་པ། །རྒོལ་བ་ངན་པ་དེ་ཡིས་འདུལ། །རྒྱ་གར་ཤར་ནུབ་ཐམས་ཅད་དུ། །སངས་རྒྱས་བསྟན་པ་དེ་ཡིས་འཛིན། །མ་འོངས་ཐ་མར་གྱུར་པ་ནི། །སྟོན་པའི་བཀའ་དང་དམ་ཆོས་རྣམས། །རྡོ་རྗེ་གདན་གྱི་བྱང་ཕྱོགས་ངོས། །རི་བོ་ནག་པོ་བཅུ་གསུམ་འདས། ཁ་བ་ཅན་གྱི་རྒྱལ་ཁམས་སུ། །བསྟན་པ་དར་ཞིང་རྒྱས་པར་བྱེད། །ཅེས་གསུངས་ཇི་བཞིན་དུ་སངས་རྒྱས་ཐམས་ཅད་ཀྱི་བྱིན་རླབས་ཀྱི་མཐུ་དང་འོད་དཔག་མེད་ཀྱི་ཐུགས་རྗེའི་འོད་ཟེར་ལས་སྤྲུལ་ཏེ་དྷ་ན་ཀོ་ཤའི་མཚོ་

[Full Size]

དབུས་པད་སྡོང་ལས་སྐུ་བལྟམས་ནས། རྒྱལ་པོ་ཨིནྡྲ་བྷུ་དྷི་འཁོར་བཅས་ཀྱི་གདན་དྲངས་པའི་དུས་སུ་སྤྲུལ་པའི་སྐུ་མཚན་དཔེས་བརྒྱན་པ་དེ་ཉིད་པད་སྡོང་གི་རྩེ་ནས་བླངས་ཏེ་གར་བཞག་ཏུ་མེ་ཏོག་པདྨ་རེ་དེ་འཕྲལ་ལ་སྐྱེས་པའི་སྟེང་དུ་བཞུགས་པ་བྱུང་སྟེ། །ཁྱིའུ་འདི་ནི་པདྨའི་འབྱུང་གནས་སུ་འདུག་གོ་ཅེས་གླེང་བ་དང་། པདྨ་ལས་སྐུ་འཁྲུངས་པ་གཉིས་ཀའི་རྒྱུ་མཚན་ལས་པདྨ་འབྱུང་གནས་སུ་མཚན་ཐོགས། དེ་ནས་ཕོ་བྲང་ཆེན་པོ་མཐོ་ལྕོག་དགུ་ལྡན་དུ་རྒྱལ་པོའི་སྲས་ཀྱི་སྐལ་བ་མཛད་པར་གསོལ་བ་བཏབ་ནས་ཨུ་རྒྱན་གྱི་རྒྱལ་ཁམས་གྲོང་ཁྱེར་འབུམ་ཕྲག་བཅུ་གཉིས་ཀྱི་རྒྱལ་པོར་མངའ་གསོལ་བས་མཚན་ཡང་པདྨ་རྒྱལ་པོར་གྲགས། སླར་ཡང་རྒྱལ་སྲིད་སྤངས་ནས་དུར་ཁྲོད་བསིལ་བ་ཚལ་ལ་སོགས་པར་མཁའ་འགྲོའི་ཚོགས་དཔོན་མཛད་ཅིང་པཎ་ཆེན་གྲུབ་ཐོབ་ཀུན་དང་ཆོས་ཀྱི་བགྲོ་

[Full Size]

མཛད་པའི་ཚེ་པཎྜི་ཏའི་ཆ་བྱད་དུ་སྤྲུལ་བས་མཚན་ཡང་པདྨ་སམྦྷ་ཝ་ཞེས་གྲགས་ཏེ། བོད་སྐད་དུ་པདྨ་ལས་སྐྱེས་ཞེས་འཁྲུངས་པ་ལས་བཏགས་པ་དང་། འཕགས་པ་ཀུན་དགའ་བོ་ལས་རབ་ཏུ་བྱུང་བའི་ཚུལ་མཛད་དུས་མཚན་ཤཱཀྱ་སེང་གེར་གསོལ་ཞིང་། སླད་དུ་སངས་རྒྱས་ཀྱི་བསྟན་ལ་འཕེལ་འགྲིབ་བྱུང་སྐབས་རྡོ་རྗེ་གདན་དུ་སྟོན་པའི་རྒྱལ་ཚབ་མཛད་ནས་ཆོས་ཀྱི་འཁོར་ལོ་བསྐོར་ཚེ་ཐུབ་པའི་སྐུ་དངོས་སུ་བསྟན་ནས་བསྟན་པ་གཞིར་བཞེངས་སུ་མཛད་པས་མཚན་ཡང་བསྟན་པའི་མངའ་བདག་ཤཱཀྱ་སེང་གེར་གྲགས། བྲམ་ཟེའི་ཁྱིའུ་སྤྲུལ་ནས་རིག་པའི་གནས་ལྔས་གཞན་ཕན་མཛད་པ་དང་། མ་ར་ཏི་ཀ་ཟླ་གམ་དབང་གི་ཕུག་ཏུ་ཚེའི་རིག་འཛིན་བསྒྲུབ་པའི་སྐབས་སོགས་སུ་སྔགས་འཆང་ལོངས་སྤྱོད་རྫོགས་པའི་ཆ་བྱད་དུ་བསྟན་པས་བློ་ལྡན་མཆོག་སྲེད་དུ་མཚན་གྲགས་པོ་པ་གླིང་དང་ཧ་ན་རྒོད་པ་ལ་

[Full Size]

སོགས་དུར་ཁྲོད་ཆེན་པོ་རྣམས་སུ་ཧེ་རུ་ཀ་རྣལ་འབྱོར་བརྟུལ་ཤུགས་སྤྱོད་པའི་ཆ་ལུགས་ཀྱིས་གཤེགས་ཅིང་མཁའ་འགྲོ་དང་ཞིང་སྐྱོང་གི་དཔའ་བོ་དང་དཔའ་མོ་ལྷ་སྲིན་དྲེགས་པ་ཅན་རྣམས་དབང་དུ་བསྡུས། ངེས་མེད་ཀྱི་ཡུལ་ཁམས་རྣམས་སུ་ཆུ་བོ་གྱེན་ལ་བཟློག་པ་དང་ཉི་མ་སྟོད་ལ་མནན་པ་སོགས་རྫུ་འཕྲུལ་དུ་མས་འགྲོ་དོན་མཛད་པས་ཉི་བ་འོད་ཟེར་རྩལ་དུ་མཚན་གྲགས། ལྷོ་ཕྱོགས་མཐར་སྐྱེས་ཀྱི་གྲོང་ཁྱེར་ལ་སོགས་པར་མུ་སྟེགས་ཀྱི་རྒྱལ་པོ་བླ་མཆོད་སྟོན་པ་ལྔ་བརྒྱ་དང་བཅས་པས་སངས་རྒྱས་ཀྱི་བསྟན་པ་ལ་གནོད་པ་ཆེར་བྱས་པའི་ཚེ། སྒྲ་ཚད་ལུང་རིགས་ཀྱི་ཆོས་སྒྲ་སེང་གེའི་ང་རོ་ལྟར་བསྒྲགས་པས་མུ་སྟེགས་ཀྱི་རྩོད་པ་བཟློག་ཅིང་ཕམ་པར་མཛད་པ་ལས། མུ་སྟེགས་གདུག་པའི་ངན་སྔགས་སྣ་ཚོགས་ཀྱི་བར་ཆད་རྩོམ་དུ་བྱུང་བ་རྣམས་ལ། མི་འཇིགས་དཔའ་བའི་རྟགས་སུ་

[Full Size]

སེང་གེའི་གཡང་གཞི་གསོལ་བའི་ཁྲོ་བོ་མཐིང་ནག་འཇིགས་རུང་གི་སྐུར་བཞེངས་ཏེ། སྡིག་མཛུབ་ཀྱི་རྩེ་ལས་གནམ་ལྕགས་ཀྱི་ཐོག་ཆར་ཕབ་པས་མུ་སྟེགས་ཀྱི་ཡོན་མཆོད་བདུད་སྡེ་དཔུངས་བཅས་ཐམས་ཅད་རྡུལ་དུ་བརླག་ཅིང་སངས་རྒྱས་ཀྱི་བསྟན་པ་ཟླ་བ་སྒྲ་གཅན་ལས་གྲོལ་བ་བཞིན་མཛད་པའི་མཚན་ཡང་སེང་གེ་སྒྲ་སྒྲོག་ཏུ་གྲགས། སླད་དུ་འོ་སྐོལ་བོད་ཡུལ་མཐའ་ཁོབ་མུན་པའི་གླིང་དུ་ཆོས་ཀྱི་སྣང་བས་དབེན་ཞིང་ལྷ་མ་སྲིན་གདུག་པ་ཅན་གྱིས་དབང་བྱས་པའི་ཡུལ་ཕྱོགས་འདིར་སངས་རྒྱས་ཀྱི་བསྟན་པ་འཛུག་པར་སྨོན་ལམ་བཏབ་པའི་ཆོས་རྒྱལ་ཁྲི་སྲོང་ལྡེ་བཙན་གྱི་ཐུགས་དམ་དཔལ་གྱི་བསམ་ཡས་བཞེངས་པར་བརྩམས་པ་ལ་བོད་ཀྱི་ལྷ་སྲིན་གདུག་པ་ཆེས་པས་ཅི་ལྟར་བྱས་ཀྱང་བརྩིགས་ཏུ་མི་སྟེར་ཞིང་། བྱང་སེམས་ཐུགས་རྗེའི་མངའ་བདག་མཁན་པོ་ཞི་བ་འཚོ་ལྟ་བུས་ཀྱང་མ་

[Full Size]

། ཐུལ་བ་ལ། སློབ་དཔོན་རིན་པོ་ཆེ་པདྨ་འབྱུང་གནས་སྤྱན་དྲངས་ནས་ཐོག་མར་ཧས་པོ་རིའི་རྩེ་མོར་བྱོན་ཏེ་ཆབ་གཏོར་གཟི་ཕོར་གང་ལ་སྣང་སྲིད་ཀྱི་ལྷ་འདྲེ་ཐམས་ཅད་ཚིམ་པའི་ལོངས་སྤྱོད་དུ་བྱིན་བརླབས་ནས་བསྔོས་ཤིང་ལྷ་འདྲེ་ཟིལ་གནོན་རྡོ་རྗེའི་འགུར་གྱིས་ཟིལ་གྱིས་མནན་ཞིང་བཀའ་འོག་ཏུ་བསྡུས། འགའ་ཞིག་བཀའ་ལ་མི་ཉན་པ་རྣམས་དྲག་པོའི་སྦྱིན་བསྲེག་ལན་གཉིས་སུ་མཛད་ནས་ཚར་བཅད། དེ་ནས་སླར་ཡང་བསམ་ཡས་ཀྱི་རྨང་འདིང་བའི་ཚེ་སློབ་དཔོན་ཉིད་མདོ་སྔགས་ཟུང་འཇུག་གི་ཆ་ལུགས་ཀྱི་རིག་འཛིན་དྲག་པོ་ཁྲོས་པའི་རྣམ་འགྱུར་རྡོ་རྗེ་གྲོ་ལོད་རྩལ་གྱི་སྐུར་བཞེངས་ནས་ཧཱུྃ་གི་གླུ་བླངས་ཤིང་རྡོ་རྗེའི་གར་མཛད་དེ། སྟེང་གི་ནམ་མཁའ་ལ་རྡོ་རྗེའི་འགྲོས་མཛད་པའི་གྲིབ་ཡོར་གང་བྱུང་དུ་གཙུག་ལག་ཁང་གི་ལྕགས་རིའི་རྨང་བཏིང་བ་ལས་ལྕགས་རི་ཟུར་མང་འཁོར་ལོ་རྩིབས་སྟོང་

[Full Size]

གི་དབྱིབས་སུ་བྱུང་། རྫུ་འཕྲུལ་ནུས་སྟོབས་དེ་ལྟ་བུས་སྣང་སྲིད་ཀྱི་ལྷ་སྲིན་ཐམས་ཅད་དབང་དུ་བསྡུས་ཤིང་ལས་ལ་བཀོལ་བས་ཐུགས་དམ་གཙུག་ལག་གེགས་མེད་དུ་འགྲུབ་ནས་དགེ་འདུན་གྱི་སྡེ་དང་བཤད་སྒྲུབ་ཀྱི་ཆོས་གྲྭ་བཙུགས། དེ་ནས་ཡང་རེ་ཤིག་གི་དུས་ན། མཁན་སློབ་ཆོས་གསུམ་གྱི་སྐུ་དྲིན་ལས་བོད་ཡུལ་དུ་སངས་རྒྱས་ཀྱི་བསྟན་པ་དར་ཞིང་རྒྱལ་ཁྲིམས་ཀྱི་དམ་རྒྱ་བཙན་པ་དེ་ལ་སྡིག་བློན་ནག་པོ་མ་རུངས་གདུག་པ་ཅན་གྱི་སྐྱེ་བོ་རྣམས་ཤིན་ཏུ་མ་ཟོད་པར། རྒྱལ་པོའི་སྙན་དུ་ཕྲ་མའི་ཞུ་བ་དུ་མར་ཕུལ་ཡང་རྒྱལ་པོ་ཐུགས་མ་གཡོས་པས་དེར་ཁོང་རྣམས་ཀྱི་གཞན་ཐབས་མ་སྙེད་པར། ལོ་པཎ་རྣམས་ཉིན་ཞག་རེ་ལ་དབུ་རྩེའི་བར་ཁང་ཆེན་མོར་ཚ་དྲོ་དང་ཆོས་ཀྱི་ཐུན་ལ་ལན་བཞི་རེ་ཚོགས་པའི་དུས་སུ་སྡིག་བློན་རྣམས་ཀྱིས་དམག་གིས་སྒོ་མནན་སྟེ་ལོ་པཎ་ཐམས་ཅད་དུས་གཅིག་ཏུ་སྐུ་དཀྲོང་བར་གྲོས་ངན་

[Full Size]

བཤམས་ཤིང་གཤེད་མ་བཀོས་པ་རྒྱལ་པོས་གསན་ཡང་སྡིག་བློན་དབང་བཙན་ཕྱིར་ཅི་བྱ་ཏོལ་མེད་དུ་གྱུར་པས། རིངས་སྟབས་སུ་སློབ་དཔོན་གྱི་དྲུང་དུ་ཚུལ་དེ་ཞུས་པ་ན། སློབ་དཔོན་ཆེན་པོའི་ཞལ་ནས། སངས་རྒྱས་ཀྱི་བསྟན་པ་དང་དམ་པའི་ཆོས་གང་དུ་དར་བར་བདུད་ཀྱི་བར་ཆད་ཀྱང་མང་བ་འདི་ནི་ཆོས་ཉིད་ཡིན་ཏེ། འོན་ཀྱང་རྒྱལ་པོ་ཆེན་པོ་ཐུགས་མ་བདེ་མི་འཚལ། ཁོ་བོ་པདྨ་འབྱུང་གནས་བདུད་དང་ལོག་འདྲེན་འདུལ་བའི་གཉེན་པོར་རྒྱལ་བ་ཀུན་གྱིས་མངགས་པ་ཡིན་པས་སྡིག་བློན་རྣམས་ཀྱི་བར་ཆད་བདག་གིས་བཟློག་པར་རྔོ་མ་ཐོགས་ལགས་ཀྱི། རྒྱལ་པོ་ཐུགས་རབ་མི་འཚལ་བས་ཅི་བདེ་བར་བཞུགས་ཤིག་ཅེས་གསུངས་སོ། །དེ་ནས་ནང་པར་ཉི་མ་ཤར་བ་ན་ལོ་པཎ་རྣམས་བར་ཁང་དུ་ཚ་བ་གསོལ་བར་ཚོགས་པ་དང་སྡིག་བློན་རྣམས་དམག་དཔུངས་གོ་མཚོན་སྤྱད་

[Full Size]

དེ་རྒྱུག་པ་ལ་སློབ་དཔོན་གྱིས་ཞི་བའི་ཕྲིན་ལས་ཀྱི་ཏིང་ངེ་འཛིན་མཛད་པས་ལོ་པཎ་ཐམས་ཅད་ཐུགས་རྗེ་ཆེན་པོའི་སྐུ་འབའ་ཤིག་ཏུ་གྱུར་པར་སྡིག་བློན་རྣམས་ཀྱིས་མཐོང་བས་ཅི་བྱའི་གླག་མ་རྙེད་པར་ལོག་ནས་སོང་། དེ་ནས་ཉིན་གུང་གི་དྲོ་བཞེས་ལ་ཚོགས་པའི་སྐབས་སུ་བདུད་དམག་རྣམས་རྒྱུག་པ་ལ། སློབ་དཔོན་གྱིས་རྒྱས་པའི་ཕྲིན་ལས་ཀྱི་ཏིང་ངེ་འཛིན་ལ་བཞུགས་པས། ལོ་པཎ་ཐམས་ཅད་ནོར་བུ་རིན་པོ་ཆེ་འོད་འབར་བ་ཤ་སྟག་ཏུ་གྱུར་ནས་ནང་ཐམས་ཅད་འོད་ཀྱིས་གང་བ་མཐོང་ནས་ཁོང་རྣམས་འདི་བྱེད་མ་བྱུང་བར་ལོག །སླར་ཕྱི་དྲོའི་ཆོས་ཐུན་ལ་ཚོགས་སྐབས་ཁོང་རྣམས་རྒྱུག་པ་ན། སློབ་དཔོན་དབང་གི་ཕྲིན་ལས་ཀྱི་དགོངས་པ་ལ་བཞུགས་པས། ལོ་པཎ་ཐམས་ཅད་ལྷའི་བུ་བུ་མོ་ལྟ་བས་ཆོག་མི་ཤེས་པ་གླུ་དང་གར་བྱེད་པ་ཁོ་ནར་གྱུར་པས་ནང་ཐམས་ཅད་གང་ཞིང་ཟིང་ལོང་དུ་གྱུར་པ་མཐོང་བས་ཁོང་རྣམས་མཚོན་ཆ་བསྐྱུར་ཞིང་ལྟད་

[Full Size]

མོ་ལ་ཡུན་རིང་ཡེངས་ཏེ་སྐྱེས་ནས་ལོག དེ་ནས་སྲོད་ཀྱི་ཐུགས་དམ་ལ་ཚོགས་པའི་དུས་སུ་ཁོང་རྣམས་ཀྱང་གྲོས་ངན་གྱི་མནའ་དམ་ཞིབ་ཏུ་བྱས་ནས་ཞེ་སྡང་གི་དཔའ་ངར་སྐྱེད་དེ་རྒྱུགས་པ་ལ། སློབ་དཔོན་ཉིད་བདུད་འདུལ་དྲག་པོ་གྲོ་ལོད་རྩལ་གྱི་སྐུར་བཞེངས་ཏེ། ཞལ་ནས་ཧཱུྃ་གི་ང་རོ་འབྲུག་ལྟར་སྒྲག་ཅིང་སྐུ་ལས་ཡེ་ཤེས་ཀྱི་མེ་དང་ཁྲོ་ཚོགས་ཀྱི་སྤྲུལ་པ་གྲངས་མེད་སྤྲོས་པས་བདུད་དམག་རྣམས་བྱ་སྤུ་རླུང་གི་གཏོར་བ་བཞིན་དེད་ནས། ཧས་པོ་རིའི་མར་ཟུར་གྱི་བྱེ་ཐང་རྣམས་སུ་བྲོས་ཏེ་འགྱེལ་ཞིང་བརྒྱལ་ནས་དབུགས་ཀྱི་འགྲོ་འོང་ཆད་དེ་རོ་ལྟར་གྱུར་པས་དེ་ནུབ་དེར་ལུས། ནང་པར་སློབ་དཔོན་གྱི་ཞལ་ནས། གདུག་པ་ཅན་དེ་དག་སྐྲག་ཅིང་དཔའ་བསྐོང་བའི་སླད་དུ་དེ་ལྟར་བགྱིས་པ་མ་གཏོགས་བསད་ན་འོ་སྐོལ་ལ་སྡིག་ཆེ་བས་མི་རུང་གསུངས་ནས་

[Full Size]

ཡུངས་དཀར་སྤར་བ་གང་ལ་རྫོགས་ཆབ་བཏབས་ནས་བསྐུར་ཏེ་དེ་རྣམས་ལ་འཐོར་ཞིག་གསུངས་པ་ལྟར་བྱས་པས། དམག་མི་དེ་དག་རིམ་པས་དབུགས་དང་དྲན་པ་གསོར་ཆུད་ཅིང་དལ་བུས་ཁྱར་ཁྱོར་དུ་ལངས་བྱུང་སྟེ། དེ་ཕྱིན་ཆད་བདུད་བློན་རྣམས་ཀྱི་བར་ཆད་རྩོམ་མ་ནུས་པར་གྱུར་ཏོ། །སླད་དུ་སློབ་དཔོན་ཉིད་ལྷོ་ནུབ་རྔ་ཡབ་གླིང་དུ་གཤེགས་ཁར་སྤ་དྲོ་སྟག་ཚང་སེང་ཕུག་གི་གནས་སུ་ཇོ་མོ་མཚོ་རྒྱལ་ལ་བཀའ་སྩལ་ཏེ། ཁོ་བོ་བོད་དུ་བསྟན་པ་དང་སེམས་ཅན་ལ་ཕན་པ་ཚེ་རབ་ཏུ་གྱུར་མོད་ཚེ། འོན་ཀྱང་བོད་འབངས་བསོད་ནམས་དམན་ཞིང་རྒྱལ་པོ་བློ་ཆུང་བའི་རྒྱུ་རྐྱེན་གྱིས། ཀླུ་མལ་གྲོ་གཟི་ཅན་དམ་ལ་མི་འདོགས་པར་ཞུས་པ་དང་། སྦྱིན་བསྲེག་ལན་གསུམ་པ་བགྱིད་དུ་མ་བཅུག་པ་སོགས་རྟེན་འབྲེལ་འགའ་ཞིག་འཆུག་པའི་མཐུས། མ་འོངས་པ་ན་

[Full Size]

སྐྱེ་འགྲོ་རྣམས་ལ་གཟའ་ཀླུ་རྒྱལ་པོའི་གནོད་པ་མང་བ་ཙམ་འབྱུང་སྟེ། འོན་ཀྱང་ཁོ་བོའི་རྗེས་སུ་འཇུག་ཅིང་བློ་འགེལ་བ་དང་། ཁྱད་པར་བདག་ཉིད་པདྨ་དྲག་པོ་རྡོ་རྗེ་གྲོ་ལོད་ཡི་དམ་དུ་བྱེད་པ་རྣམས་ལ་བདུད་རིགས་ཀྱིས་བར་ཆད་མི་ནུས་ལ། གནས་འདི་ཡང་དེ་ཉིད་སྒྲུབ་པའི་གནས་སུ་ཤིས་པར་གདའ་བས། ཁོ་བོས་དེང་འདིར་ལྷ་སྲིན་དྲེགས་པ་འདུལ་བའི་རྟེན་འབྲེལ་ཞིག་བྱའི། མཚོ་རྒྱལ་ཁྱོད་ཀྱིས་ཚོགས་འཁོར་བཤོམས་ལ་གསོལ་བ་ཐོབ་ཅིག་གསུངས་ནས། སློབ་དཔོན་ཉིད་རྡོ་རྗེ་གྲོ་ལོད་དྲག་པོའི་སྐུ་གནས་དེའི་རྒྱབ་རི་དང་ཆེ་ཆུང་མཉམ་པ་ཞིག་ཏུ་སྤྲུལ་ཏེ་ཧཱུྃ་སྒྲ་དྲག་པོར་སྒྲགས་པ་ཙམ་གྱིས། མོན་བོད་ཀྱི་ལྷ་འདྲེའི་རིགས་སུ་གྱུར་པ་མཐའ་དག་སྐད་ཅིག་ལ་ཁྲོམ་དུ་ཚོགས་པར་གྱུར་པ་རྣམས་ལ། སློབ་དཔོན་གྱི་ཞི་བས་བདེན་ཚིག་གི་ཆོས་གསུངས། རྒྱས་པས་

[Full Size]

འདོད་ཡོན་གྱི་ཆར་ཕབས། དབང་གིས་རང་རང་སྲོག་གི་སྙིང་པོ་བླངས། དྲག་པོའི་རྫུ་འཕྲུལ་སྐུ་དང་ཞལ་ནས་མེ་དཔུང་འབར་བས་ས་དང་བར་སྣང་ཁེངས་ཤིང་འུར་ཆོམ་གྱིས་སྒྲས་སྣང་སྲིད་གཡོ་བར་མཛད་པས། གདུག་པ་ཅན་གྱི་ལྷ་འདྲེ་ཐམས་ཅད་སྐྲག །དངངས། འདར། འགྱེལ། བརྒྱལ་བ་ལ་ཐུག་ཅིང་། དཔའ་བོ་ཆེན་པོའི་བཀའ་དང་དམ་ལས་འདའ་བར་མི་བགྱིད་དོ། །ཅེས་ཁས་བླངས་དམ་བཅས་མནའ་དོར་མཐའ་ཚིག་སྒྲགས་ཅིང་བཏུལ་ནས། མཐར་རྡོ་རྗེ་གྲོ་ལོད་ཉིད་གནས་དེའི་བྲག་རི་དེ་ལ་ཐིམ་པའི་ཚུལ་བསྟན་པས་རི་དེ་གྲོ་ལོད་ཀྱི་སྐུའི་དབྱིབས་ཤིན་ཏུ་གསལ་བར་གྱུར་པ་ད་ལྟ་ཀུན་གྱི་མཇལ་དུ་ཡོད་ལ། མདོར་ན་སློབ་དཔོན་རིན་པོ་ཆེ་རྒྱལ་བ་ཐམས་ཅད་ཀྱི་ཐུགས་རྗེ་ཡོངས་འདུས་ལ་རྫུ་འཕྲུལ་གྱི་རྣམ་འགྱུར་གཅིག་ཏུ་མ་ངེས་མོད་ཀྱང་། བོད་ཡུལ་འདིར་མི་དང་མི་མིན་གདུག་པ་ཅན་བཏུལ་

[Full Size]

བའི་སྐུའི་སྣང་བརྙན་ནི་འདི་ཁོ་ན་བསྟན་པར་མཛད་པ་ཤས་ཆེ་སྟེ། གང་འདུལ་གྱི་གཉེན་པོའི་རྟེན་འབྲེལ་གནད་དུ་ཆེ་བ་ཞིག་ཡིན་པར་སྣང་བ་དང་། མཚན་གྱི་ངེས་ཚིག་ཀྱང་སྒྲ་དོན་གཉིས་ལས། སྒྲའི་དབང་དུ་བགྱི་ན། ལེགས་སྦྱར་སྐད་དུ། ཀྲོ་དྷ་ལོ་ཀརྟོ་ར་ཞེས་པ་བོད་ཀྱི་སྐད་དུ་ཁྲོ་བོ་འཇིག་རྟེན་འདས་པ། ཅེས་བྱ་བ་ཡིན་པ་དང་། དེ་ཉིད་ཚིག་བསྡུད་དུ་བྱས་པས་གྲོ་ལོད་ཅེས་པར་འགྱུར་བས། དེ་ཡང་སྒྲ་ཟུར་ཉམས་ཏེ་གྲོ་ལོད་དང་། གྲོ་བོ་ལོད་སོགས་སུ་གྱུར་པ་ཡིན། །དོན་འགྱུར་གྱི་དབང་དུ་བྱ་ན། གྲོ་ལོད་ཅེས་པ་ནི་ཁྲོ་བོ་འཆོལ་བ་ལ་འཇུག་ཕྱིར་ཆོལ་པ་ནི་ངེས་པ་མེད་པའི་དོན་ཡིན་པས། ཁྲོ་བོ་འདི་ཉིད་ཀྱི་སྐུ་མདོག་ཕྱག་མཚན་ཆ་ལུགས་རྣམ་འགྱུར་ཅིར་ཡང་ངེས་མེད་ཀྱི་སྤྲུལ་སྒྱུར་མཛད་པར་མཚོན་པ་ལགས། དེ་ལྟ་བུ་བདུད་འདུལ་པདྨ་དྲག་

[Full Size]

པོ་རྡོ་རྗེ་གྲོ་ལོད་རྩལ་གྱི་སྒྲུབ་སྐོར་ཟབ་མོ་རྒྱས་བསྡུས་ཅི་རིགས་པ་གཏེར་ཁ་ཐ་དད་ལས་འབྱུང་ནའང་། འདི་ནི་སྦས་པའི་གནས་པདྨ་བཀོད་ཀྱི་ཞིང་སོགས་བགྲོད་པ་ལ་བར་ཆད་སེལ་བའི་ཆ་རྐྱེན་དུ་དགོངས་ནས། གནས་ཀྱི་ལམ་ཡིག་ལུང་བསྟན། གུ་རུའི་སྐུ་ཚབ་པདྨ་བཤེས་གཉེན། མྱོང་གྲོལ་སྐྱེ་བདུན་གྱི་ཤ་སོགས་དང་ལྷན་ཅིག་ཏུ་གུ་རུའི་སྒྲུབ་གནས་ཀོག་རོང་ཕུག་ཏུ་གཏེར་དུ་བཞུགས་པ་རིགས་འཛིན་ཆེན་པོ་འཇའ་ཚོན་སྙིང་པོས་གདན་དྲངས་པའི་སྐལ་ལྡན་གདུལ་བྱའི་བསོད་ནམས་ཀྱི་རྫིང་བུ་ཡོངས་སུ་གང་བའི་དགའ་སྟོན་རྨད་དུ་བྱུང་བ་འདི་ཉིད་ཀྱི་དབུ་མར་བ་ལེགས་པར་ཐོབ་ཕྱིར་སྣང་སྲིད་བླ་མའི་དཀྱིལ་འཁོར་ཡེ་གདོད་མ་ནས་ཡིན་ཀྱང་ཡིན་པར་མ་ཤེས་པའི་རྟོགས་སྒྲིབ་སྦྱོང་ཕྱིར་དུ་ཁྱེད་རང་རྣམས་ཀྱི་མོས་པའི་འདུན་གཏགས་འདི་ལྟར་མཛད་པར་ཞུ། ཨོཾ་ཨཱཿཧཱུྃ། ཞེས་བརྗོད་པའི་རྟེན་འབྲེལ་

[Full Size]

སྒྱུ་འཕྲུལ་ལས། བདག་རྡོ་རྗེའི་སློབ་དཔོན་ནི་རྗེ་བཙུན་པདྨ་ཐོད་ཕྲེང་ཧེ་རུ་ཀའི་ཆ་བྱད་རུས་རྒྱན་ཐོར་ཚུགས་ཅན། སྟག་ཤམ་དང་རས་ཀྱི་ན་བཟའ་གསོལ་ཞིང་རྡོ་རྗེ་ཐོད་པ་ཁ་ཊྭྃ་བསྣམས་ནས་སྣང་སྲིད་ཟིལ་གནོན་གྱི་ལྟ་སྟངས་མཛད་པར་མོས་པ་གནང་། ཁྱེད་རང་རྣམས་ཀྱང་སྐད་ཅིག་དྲན་རྫོགས་སུ་བདུད་འདུལ་དྲག་པོ་རྡོ་རྗེ་གྲོ་ལོད་རྩལ་སྐུ་མདོག་དམར་སྨུག་ཨམ་ཙིག་ཨག་ཚོམ་ཅན། སྤྱན་གསུམ་ཁྲོ་བོའི་གདངས་མིག་ཕྱོགས་བཅུར་གཟིགས་པ། དབུ་སྐྲ་ཁམ་སེར་གྱེན་དུ་འཁྱིལ་ཞིང་སྨིན་མ་ཨག་ཚོམ་ལས་མེ་འབར་བ། སྙན་ལ་དུང་གི་ཝང་མིག་དང་སྐུ་ལ་རུས་པའི་རྒྱན་དྲུག་གིས་སྤྲས་པ། དར་ངུར་སྨྲིག་གི་ཤམ་ཐབས་དང་དར་དམར་གྱི་ཆོས་གོས་གསེར་གྱི་པ་ཊ་རིས་ཅན་ལྷབ་ལྷུབ་ཏུ་གསོལ་བ། ཕྱག་གཡས་རྡོ་རྗེ་རྩེ་དགུ་དང་གཡོན་པ་ལྕགས་ཕུར་མེའི་

[Full Size]

ཚྭ་ཚ་འཕྲོ་བ་བསྣམས་ནས་གནོད་བྱེད་བདུད་ཀྱི་སྙིང་ལ་གཟིར་ཞིང་། སྐུ་གར་སྟབས་སུ་ལིང་ངེ་། འགྱིང་ཐབས་སུ་ལོག་གེ། མཆོངས་སྟབས་སུ་ལྡེམ་མེ་བའི་ཞལ་ནས་ཧཱུྃ་གི་སྒྲ་དབྱངས་སྒྲོག་ཅིང་རབ་འཇིགས་བསྐལ་པའི་མེ་སྤུང་གི་ཀློང་ནས་གཟི་བརྗིད་ཀྱི་དཔལ་དུ་འབར་བར་གསལ་བའི་ཐུགས་ཀར་ཧཱུྃ་ཡིག་དམར་གསལ་ལས་འོད་འཕྲོས་པས། ལྷོ་ནུབ་རྔ་ཡབ་ཟངས་མདོག་དཔལ་རི་པདྨ་འོད་ཀྱི་ཕོ་བྲང་དུ་རང་བྱུང་པདྨའི་རྒྱལ་པོའི་ཐུགས་དམ་གྱི་རྒྱུད་བསྐུལ་བས་སྐལ་ལྡན་བྱིན་གྱིས་རློབས་པའི་ཕྲིན་ལས་དུས་ལ་བབས་པར་གཟིགས་ནས། བསྒོམས་པ་ཇི་ལྟ་བའི་ཆ་བྱད་ཅན་དཔའ་བོ་མཁའ་འགྲོ་གྲངས་མེད་པའི་འཁོར་གྱིས་བསྐོར་བ་ནམ་མཁའི་ལམ་ལས་བྱ་རྒོད་ཟས་ལ་བབས་པ་བཞིན་བྱོན་ཏེ། ཁྱེད་རང་རྣམས་ལ་ཐིམ་པའི་མོས་པ་མཛོད་ཅིག །ཅེས་དམིགས་པ་སྤྲད་ལ། ཚིག་བདུན་གསོལ་འདེབས་དང་བཛྲ་གུ་རུའི་འཛབ་དབྱངས། སྤོས་དང་རོལ་མོ་

[Full Size]

སོགས་ཀྱིས་ཡེ་ཤེས་ཕབ་ཅིང་བསྟིམ་ནས་རབ་ཏུ་གནས་པར་བྱའོ། །དེ་ནས་དབང་བུམ་འཐོགས་ཏེ། ཀྱཻ། རིགས་ཀྱི་བུ་རྣམས་ལེགས་པར་ཉོན་ཞིག །དབང་ཞེས་བྱ་བའི་དོན་ནི་ཁྱེད་རང་དམ་ཚིག་སེམས་དཔའི་སྐུར་གསལ་བཏབ་པ་ལ་ཡེ་ཤེས་སེམས་དཔའ་སྤྱན་དྲངས་ནས་བསྟིམ་ཏེ། སྒོ་གསུམ་ལྷའི་སྐུ་གསུང་ཐུགས་དང་གཉིས་མེད་དུ་བསྲེ་བ་འདི་ཉིད་ཁོ་ན་ཡིན་ཀྱང་། སླར་ཡང་དེ་ལས་མི་འགྱུར་ཞིང་མི་འདའ་བའི་རྒྱས་འདེབས་ཀྱི་ཚུལ་དུ་དབང་རྫས་ཐ་དད་ཀྱིས་རིམ་པ་བཞིན་བསྐུར་བ་ཡིན་ཏེ་དེ་ལས་ཐོག་མར་བུམ་པའི་ནང་དུ་གུ་རུ་པདྨ་ཐོད་ཕྲེང་ཧེ་རུ་ཀའི་ཆ་བྱད་སྟོང་གསལ་འོད་སྐུར་བཞུགས་པའི་སྐུ་གསུང་ཐུགས་ལས་འོད་ཟེར་དཀར་དམར་མཐིང་གསུམ་འཕྲོས་ནས་ཁྱེད་ཀྱི་གནས་གསུམ་དུ་ཐིམ་པའི་དམིགས་པ་མཛོད་ཅིག །ཧཱུྃ། བརྡ་དབང་བུམ་པའི་དཀྱིལ་འཁོར་འདིས། རིགས་ཀྱི་བུ་ལ་དབང་བསྐུར་བས། སྒོ་གསུམ་དྲི་མ་བག་ཆགས་

[Full Size]

དག །ཐོད་ཕྲེང་རྩལ་དང་དབྱེར་མེད་ཤོག །གུ་རུ་པདྨ་སིདྡྷི་ཧཱུྃ། ཞེས་གནས་གསུམ་དུ་བཏུག་ཅིང་བུམ་ཆུ་ཡང་སྦྱིན་ནོ། །འདི་སྐབས་ཀྱི་དབང་བསྐུར་བའི་སྟབས་ཐམས་ཅད་ལ་ཧཱུྃ་སྒྲ་གསུམ་དྲིལ་བདུན་དྲིལ་གྱི་འཛབ་དབྱངས་ངེས་པར་མཛད་པ་རིག་འཛིན་འཇའ་ཚོན་པ་དེ་ཉིད་ཀྱི་ཕྱག་བཞེས་ལགས་སོ། །དེ་ལྟ་བུ་བུམ་དབང་བསྐུར་བ་དེས་ནི་འདི་སྐབས་ཀྱི་གུ་རུ་ཞི་བའི་དབང་དང་བྱིན་རླབས་ཡོངས་རྫོགས་སུ་ཐོབ་པ་ཡིན་པས། ཐོད་ཕྲེང་རྩལ་གྱི་བསྙེན་སྒྲུབ་ལས་སྦྱོར་གང་བྱེད་ཀྱང་བར་ཆད་མེད་ཅིང་འགྲུབ་མྱུར་བའི་དགོས་པ་ཡོད་པས་དེ་ལྟར་ཐུགས་ལ་ངེས་འཚལ། དེ་ནས་གྲོ་ལོད་རྩལ་གྱི་གཏོར་མ་སྐུ་རྟེན་དང་བཅས་པ་གདན་དྲངས་ནས། འོ། སྐལ་བ་དང་ལྡན་པའི་བུ་རྣམས། རིགས་འདུས་པདྨ་དྲག་པོ་རྡོ་རྗེ་ཁྲོ་ལོད་རྩལ་གྱི་སྐུ་དང་སྒྲུབ་གཏོར་འདི་སྤྱི་བོར་བཞག་པའི་དུས་སུ། སྐུ་འདི་ལས་རང་འདྲའི་སྐུ་གཉིས་པ་འོད་ཀྱི་རང་བཞིན་ཅན་རེ་བྱུང་ནས་ཁྱེད་རང་རྣམས་ལ་ཐིམ་པའི་མོས་པ་མཛོད་ཅིག །

[Full Size]

ཧཱུྃ། སྒྱུ་འཕྲུལ་སྐུ་གཟུགས་ལ་བ་ལི༚་དབང་། །རིགས་ཀྱི་བུ་ལ་བྱིན་འབེབས་ན། །སྣང་སྟོང་རྡོ་རྗེའི་སྐུ་འགྲུབ་ནས། །ཀུན་ཁྱབ་ཀུན་བྱེད་དབང་ཐོབ་ཤོག གུ་རུ་པདྨ་སིདྡྷི་ཧཱུྃ། ཞེས་སྤྱི་བོར་བསྐུར་ཞིང་ཧཱུྃ་འཛབ་གོང་བཞིན་བྱའོ།། ༈ །།བགྲང་ཕྲེང་འཐོགས་ཏེ། རིགས་ཀྱི་བུ་རྣམས་ལ་ཕྲེང་བ་ལག་ཏུ་གཏད་པ་དང་དུས་མཚུངས་པར། བདག་སློབ་དཔོན་གྱི་ལྗགས་ལས་ཧཱུྃ་ཡིག་གི་ཕྲེང་རྒྱུད་བྱུང་སྟེ་ཁྱེད་ཀྱི་ངག་ལ་ཐིམ་པའི་མོས་པ་མཛོད། ཧཱུྃ། བརྗོད་བྱའི་ཚིག་དབང་ཧཱུྃ་འདི་ཡིན། །བདེར་གཤེགས་ཀུན་གྱི་ཡང་སྙིང་སྟེ། །རིགས་ཀྱི་བུ་ལ་ཧཱུྃ་བསྟིམ་པས། །གྲགས་སྟོང་ཚངས་དབྱངས་དབང་ཐོབ་ཤོག །གུ་རུ་པདྨ་སིདྡྷི་ཧཱུྃ། ཧཱུྃ་འཛབ་སྔར་བཞིན་བྱ་ཞིང་ཕྲེང་བ་འདྲེན་དུ་གཞུག་གོ།། ༈ །།རྡོ་རྗེ་རྒྱ་གྲམ་སྙིང་ཁར་བཞག་ལ། རིགས་ཀྱི་བུ་རྣམས་ལ་ཐུགས་ཀྱི་རྟེན་སྣ་ཚོགས་རྡོ་རྗེ་སྙིང་གར་བཞག་པ་ཙམ་གྱིས། རིགས་འདུས་པདྨ་དྲག་པོ་གྲོ་ལོད་རྩལ་གྱི་ཐུགས་མཆོག་དྲི་བྲལ་གདོད་མའི་ཡེ་ཤེས་ཀྱི་དོན་

[Full Size]

མངོན་དུ་གྱུར་པའི་མོས་པ་མཛོད། ཧཱུྃ། ཕྲིན་ལས་བཞི་སྒྲུབ་རྒྱ་གྲམ་དབང་། །རིགས་ཀྱི་བུ་ལ་འདི་བསྐུར་བས། །རིག་པའི་རྩལ་དབང་ཐོབ་གྱུར་ནས། །ཐོད་ཕྲེང་རྩལ་དང་དབྱེར་མེད་ཤོག །གུ་རུ་པདྨ་སིདྡྷི་ཧཱུྃ། ཞེས་བསྐུར་ཞིང་ཧཱུྃ་འཛབ་བྱའོ། །དེ་ལྟ་བུའི་དབང་གིས་ཁྱེད་ཀྱི་སྒོ་གསུམ་གུ་རུའི་སྐུ་གསུང་ཐུགས་ཀྱི་ངོ་བོར་བྱིན་རླབས་ནས། ཕྱག་མཚན་འདི་བཞིན་གཏད་པས། །སྐྱེས་བུ་དཔའ་བོ་ལ་གོ་མཚོན་སྤྲད་པ་ལྟར། ཆེ་བའི་ཡོན་ཏན་རྫོགས་ཤིང་ཕྲིན་ལས་ཐོག་མེད་འགྲུབ་པར་གྱུར་བའི་མོས་པ་མཛོད་ཅིག །རྡོ་རྗེ་ལག་པ་གཡས་སུ་བཞག་ལ། ཧཱུྃ། གསེར་གྱི་རྡོ་རྗེ་རྩེ་དགུ་འདི། །ནམ་ཡང་འབྲལ་མེད་འཆང་བར་བྱ། །དོན་ལ་རང་རིག་རང་གསལ་བརྡ། །ཐབས་ཤེས་དབྱེར་མེད་དབང་ཐོབ་ཤོག །གུ་རུ་པདྨ་སིདྡིྷ་ཧཱུྃ། ལྕགས་ཕུར་གཡོན་དུ་གཏད་ལ། ཧཱུྃ། སྐུ་གསུམ་རང་བཞིན་ལྕགས་ཕུར་ཡིན། །རིགས་ཀྱི་བུ་ལ་འདི་གཏད་པས། །ཕྱི་ནང་བར་ཆད་རྡུལ་དུ་རློག །དུག་གསུམ་སྒྲོལ་བའི་དབང་

[Full Size]

ཐོབ་ཤོག །གུ་རུ་པདྨ་སིདྡྷི་ཧཱུྃ། དེ་ལྟར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་བསྐུར་ནས། ད་ནི་རྒྱལ་བ་ཀུན་གྱི་ཡེ་ཤེས་གཅིག་བསྡུས་སྙིང་པོ་ཧཱུྃ་གི་དབང་བསྐུར་བ་ཡིན་པས། ཁྱེད་རང་རྣམས་གུ་རུ་པདྨ་དྲག་པོ་གྲོ་ལོད་རྩལ་དུ་གསལ་བཞིན་པའི་སྤྱི་བོའི་གཙུག་ཏུ་སངས་རྒྱས་ཀུན་གྱི་སྐུ་རྡོ་རྗེའི་རང་བཞིན་ཧཱུྃ་དཀར་འོད་ཟེར་འབར་བ་ཞིག་བསྒོམ་པ་ལ། སློབ་དཔོན་གྱི་སྤྱི་གཙུག་ནས་ཧཱུྃ་དཀར་པོ་ཞིག་བྱུང་བ་ཁྱེད་ཀྱི་སྤྱི་བོའི་ཧཱུྃ་ལ་ཐིམ་པས། དེ་ལས་ཧཱུྃ་དཀར་གྲངས་མེད་འཕྲོས་ནས་སྣང་སྲིད་ཐམས་ཅད་ཧཱུྃ་དཀར་འབའ་ཤིག་གིས་མེར་གྱིས་གང་བའི་ཏིང་འཛིན་མཛད་པར་ཞུ། ཧཱུྃ་དཀར་གྱི་ཙཀླི་སྤྱི་བོར་བཞག་ལ། །དེ་ནས་སྤྱི་བོར་ཡི་གེ་ཧཱུྃ། དཀར་པོ་ཤེལ་ལྟར་གསལ་འཚེར་ཅན། །དེ་བཞིན་སྣང་སྲིད་ཡིད་ཡུལ་ཀུན། །ཧཱུྃ་དཀར་དྲི་མེད་འོད་ཟེར་འབར། །ཧཱུྃ་ལས་ཧཱུྃ་འཕྲོས་ཧཱུྃ་

[Full Size]

སྒྲ་སྒྲོག །ཅེས། ཧཱུྃ་དཀར་སྤྱི་བོར་བསྟིམ་ཞིང་ཧཱུྃ་ཉེར་གཅིག་པའི་འཛབ་དབྱངས་བྱའོ། །དེ་བཞིན་དུ་ཧཱུྃ་དམར་གྱི་ཙཀླི་འཐོགས་ནས། ཁྱེད་རང་གི་མགྲིན་པར་སངས་རྒྱས་ཐམས་ཅད་ཀྱི་སྐུ་གསུང་རྡོ་རྗེ་ཧཱུྃ་ཡིག་དམར་པོ་གསལ་བ་ལ། བདག་ཉིད་སློབ་དཔོན་གྱི་མགྲིན་པ་ནས་ཧཱུྃ་དམར་འཕྲོས་ནས་ཐིམ་པ་ཙམ་གྱིས་དེ་ལས་ཧཱུྃ་དམར་དཔག་མེད་འཕྲོས་ཏེ་སྣང་སྲིད་གང་བར་བསྒོམ་མཛོད། དེ་ནས་མགྲིན་པར་ཡི་གེ་ཧཱུྃ། །དམར་པོ་བྱུ་རུའི་མདོག་ལྟར་འཚེར། །དེ་བཞིན་སྣང་སྲིད་ཡིད་ཡུལ་ཀུན། །ཧཱུྃ་དམར་དྲི་མེད་འོད་ཟེར་འབར། །ཧཱུྃ་ལས་ཧཱུྃ་འཕྲོས་ཧཱུྃ་སྒྲ་སྒྲོག །ཅེས། ཧཱུྃ་དམར་མགྲིན་པར་བསྟིམ་ཞིང་ཧཱུྃ་དབྱངས་བྱའོ། །ཁྱེད་རང་གི་སྙིང་གར་སངས་རྒྱས་ཀུན་གྱི་ཐུགས་རྡོ་རྗེའི་ངོ་བོ་ཧཱུྃ་མཐིང་གསལ་བ་ལས་བླ་མའི་ཐུགས་ཀའི་ཧཱུྃ་མཐིང་ཐིམ་ཞིང་དེ་ལས་ཧཱུྃ་མཐིང་འཕྲོས་པས་སྣང་སྲིད་ཁེངས་པར་བསྒོམ་མཛོད། །དེ་ནས་སྙིང་གར་ཡི་གེ་

[Full Size]

ཧཱུྃ། སྔོན་པོ་ནམ་མཁའི་མདོག་ལྟ་བུ། །དེ་བཞིན་སྣང་སྲིད་ཡིད་ཡུལ་ཀུན། །ཧཱུྃ་སྔོན་དྲི་མེད་འོད་ཟེར་འབར། །ཧཱུྃ་ལས་ཧཱུྃ་འཕྲོས་ཧཱུྃ་སྒྲ་སྒྲོག །ཅེས། ཧཱུྃ་མཐིང་སྙིང་ཁར་བཞག་ཅིང་ཧཱུྃ་དབྱངས་བྱའོ། །དེ་ནས་ཡང་ཁྱེད་རང་གི་ལྟེ་བར་སངས་རྒྱས་ཀུན་གྱི་ཡོན་ཏན་གྱི་སྙིང་པོ་ཧཱུྃ་ཡིག་གསེར་མདོག་ལ་བླ་མའི་ལྟེ་བ་ནས་ཧཱུྃ་སེར་བྱུང་བ་ཐིམ་ཞིང་། སླར་ཧཱུྃ་སེར་གྱིས་སྟོང་ཁམས་གང་བ་འཕྲོ་བར་བསྒོམ་མཛོད། དེ་ནས་ལྟེ་བར་ཡི་གེ་ཧཱུྃ། སེར་པོ་གསེར་ལྟར་གསལ་འཚེར་ཅན། །དེ་བཞིན་སྣང་སྲིད་ཡིད་ཡུལ་ཀུན། །ཧཱུྃ་སེར་དྲི་མེད་འོད་ཟེར་འབར། །ཧཱུྃ་ལས་ཧཱུྃ་འཕྲོས་ཧཱུྃ་སྒྲ་སྒྲོག །ཅེས། ཧཱུྃ་སེར་ལྟེ་བར་བསྟིམ་ཞིང་ཧཱུྃ་དབྱངས་བྱའོ། །ཁྱེད་རང་གི་གསང་བའི་གནས་སུ་རྒྱལ་ཀུན་ཕྲིན་ལས་འདུས་པའི་ཡི་གེ་ཧཱུྃ་ལྗང་གུ་ལ་བླ་མའི་གསང་གནས་ཀྱི་ཧཱུྃ་ལྗང་ཐིམ་ཞིང་དེ་ལས་འཕྲོས་པའི་ཧཱུྃ་ལྗང་གིས་སྣང་སྲིད་གང་བར་

[Full Size]

བསྒོམ་མཛོད། དེ་ནས་གསང་བར་ཡི་གེ་ཧཱུྃ། །ལྗང་ཁུ་མར་གད་གསལ་འཚེར་ཅན། །དེ་བཞིན་སྣང་སྲིད་ཡིད་ཡུལ་ཀུན། །ཧཱུྃ་ལྗང་དྲི་མེད་འོད་ཟེར་འབར། །ཧཱུྃ་ལས་ཧཱུྃ་འཕྲོས་ཧཱུྃ་སྒྲ་སྒྲོག །ཅེས་པས་ཧཱུྃ་ལྗང་གསང་བར་བསྟིམ་ཞིང་ཧཱུྃ་དབྱངས་བྱའོ། །དེ་ལྟར་ཧཱུྃ་ཡིག་ལྔ་ལྡན་གྱིས་འཇིག་རྟེན་ནམ་མཁའ་ཐམས་ཅད་མེར་གྱིས་གང་ནས། ཕྱོགས་དུས་ཀྱི་རྒྱལ་བ་སྲས་བཅས་ཐམས་ཅད་ལ་མཉེས་པའི་མཆོད་པ་ཕུལ་ཞིང་ཀུན་ཀྱང་ཧཱུྃ་ཡིག་གེ་རྣམ་པའི་སྐུར་གྱུར། ཁམས་གསུམ་གྱི་སེམས་ཅན་ཀུན་གྱི་ལས་ཉོན་སྡིག་སྒྲིབ་སྡུག་བསྔལ་སྦྱངས་ཏེ་ཐམས་ཅད་ཡིག་གེ་ཧཱུྃ་གི་རང་བཞིན་དུ་གྱུར། བདུད་རིགས་འབྱུང་པོའི་བར་ཆད་ནད་གདོན་གནོད་པ་ཐམས་ཅད་ཞི་ཞིང་ཀུན་ཀྱང་ཧཱུྃ་གི་རང་བཞིན་ཁོ་ནར་གྱུར་པས། སྣང་སྲིད་སྣོད་བཅུད་ཀྱི་གཟུགས་སྣང་ཐམས་ཅད་ཧཱུྃ་ཡིག །སྒྲ་སྐད་མཐའ་དག་ཧཱུྃ་སྒྲ། རྟོགས་ཚོགས་ཐམས་ཅད་ཧཱུྃ་གི་འཕྲོ་འདུ་འབའ་ཤིག་ཏུ་གྱུར་པའི་ངང་ནས་ཧཱུྃ་སྒྲ་སྒྲོག་སྟེ། གཞན་ཡང་ཡིད་ལ་

[Full Size]

ཅི་འདོད་པ། །ཡི་གེ་ཧཱུྃ་གི་འཕྲོ་འདུ་བྱ། །ཧཱུྃ་ཡིག་གྲངས་མེད་ཕྱོགས་བཅུར་སྤྲོ། །ཅི་འདོད་འབྲས་བུ་འཕྲལ་དུ་འགྲུབ། །ཅེས་གསུངས་པའི་དགོངས་པ་ཡིན་ལ། གཞན་ཡང་འདིའི་ཕན་ཡོན་དང་བྱིན་རླབས་ནི་བསམ་གྱིས་མི་ཁྱབ་སྟེ། གུ་རུ་རིན་པོ་ཆེ་ཉིད་ཀྱི་ཞལ་ལུང་ལས། །ཧཱུྃ་གི་འཛབ་དབྱངས་རྒྱུན་དུ་བགྲངས་པ་ཡིས། །སྣང་སྲིད་སྣོད་བཅུད་ཐམས་ཅད་གཡོ་བྱེད་ན། །ལས་ཕྲན་སྐྱེ་འགྲོ་ཕལ་ལ་སྨོས་ཅི་དགོས། །དངོས་གྲུབ་འགྲུབ་རྟགས་རྨིས་ལྟས་བརྗོད་ལས་འདས། །མངོན་སུམ་དུ་ཡང་སེམས་ཉིད་གསལ་སྟོང་རྟོགས། །ཆོས་ཉིད་རང་བྱུང་རང་གསལ་རྒྱུད་ལ་འཆར། །དུག་གསུམ་ཉོན་མོངས་དགྲ་གེགས་ཚོགས་རྣམས་འཇོམས། །བར་ཆད་གདུག་པ་ཐམས་ཅད་ཞོར་ལ་ཞི། །ཚེ་ཡི་རིག་འཛིན་ལ་སོགས་ཐུན་མོང་དང་། །ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ། ཅེས་པ་དེ་ལྟ་བུའི་ཕན་ཡོན་དང་ལྡན་

[Full Size]

པ་ལགས། ཅེས་བརྗོད་ཅིང་། འདི་ཉིད་ཀྱི་གཏེར་གཞུང་ལས། འདི་ལ་དམིགས་པའི་འཕྲུལ་འཁོར་དང་། གར་དབྱངས་ཕྱག་རྒྱའི་ཆོས་སྐོར་རྣམས། །གཏེར་སྒྲུབ་དུས་སུ་ཌཱ་ཀིིས་སྟོན། ཞེས་གསུངས་ཕྱིར་གཏེར་བཏོན་ཆེན་པོ་ཉིད་ལ་དེ་ལྟར་བྱུང་བ་ནི་གོར་མ་ཆགས་ལ། ཐུན་མོང་གི་སྣང་ངོར་ནི་དབང་འདི་གཞན་གང་ལ་ཡང་མ་གནང་བའི་ཐོག་མར། ཀང་ལུང་ཤུའི་ཡུལ་དུ་དུས་བཟང་ཚེས་བཅུ་ཞིག་ལ་རིགས་བཟང་སྐལ་ལྡན་གྱི་དཔའ་བོ་དཔའ་མོ་འགའ་ཡང་ཚོགས་ཤིང་དད་ལྡན་མང་པོས་དབང་ཟབ་པ་ཅིག་གནང་བར་གསོལ་བ་བཏབ་ཅིང་ཚོགས་འཁོར་བཤམས་པས། རྗེ་དེ་ཉིད་ཀྱང་དེའི་ཉིན་ཐུགས་ཉམས་འབར་བའི་རྣམ་པ་དང་བཅས་ཏེ་དབང་བཀའ་འདི་ཉིད་གནང་བས། འཇའ་འོད་དང་མེ་ཏོག་གི་ཆར་ཡང་བྱུང་ཞིང་། ཧཱུྃ་གི་འཛབ་དབྱངས་ཀྱི་རྟ་ཡང་ཐུགས་ལ་རང་ཤར་དུ་བྱུང་སྟེ་སྐུ་གར་སྟབས་ལིང་ངེ་བའི་ངང་ནས་མཛད་པས་བྱིན་རླབས་ཀྱི་བབས་བཟང་ཞིང་། སླད་དུའང་དབང་འདི་ནམ་མཛད་ལ་ཐུགས་ཉམས་འབར་བ་ཡང་ངེས་པར་འོང་གི་འདུག་གསུངས་ཤིང་། དབྱངས་ནི། ཐོག་མར་ཧཱུྃ་རིགས་གཅིག་དང་། དེ་ནས་ཧཱུྃ་གསུམ་སྒྲིག་ལན་གཉིས་

[Full Size]

དང་། སླར་ཧཱུྃ་བདུན་སྒྲིག་ལན་གཉིས་རྣམས་བསྡོམ་པས་ཧཱུྃ་ཉེར་གཅིག་ཏེ་འགྲོ་བ་སྟེ། གཙོ་བོར་སློབ་དཔོན་གྱི་གསུངས་ལས་བླངས་བར་བྱའོ། །དེ་ལྟར་སྐལ་ལྡན་གྱི་བུ་རྣམས་ལ་ལུས་སྣང་སྟོང་ལྷའི་དཀྱིལ་འཁོར་རིགས་འདུས་རྡོ་རྗེ་གྲོ་ལོད་ཀྱི་ངོ་བོར་དབང་བསྐུར་ཞིང་བྱིན་གྱིས་རླབས། ངག་སྔགས་ཀྱི་འཁོར་ལོ་འབྲུ་གཅིག་ཧཱུྃ་གི་སྙིང་པོ་གྲགས་སྟོང་གཞོམ་མེད་རྡོ་རྗེའི་དབྱངས་ཀྱིས་འཁོར་འདས་ཀུན་གྱི་ཡེ་ཤེས་ཀྱི་ཕྱག་རྒྱས་བཏབས་ནས། ད་ནི་སེམས་ཆོས་ཉིད་ཀྱི་དཀྱིལ་འཁོར་རིགས་སྟོང་རྫོགས་པ་ཆེན་པོ་ཡེ་གྲོལ་བློ་འདས་སུ་བཟློ་བའི་རིག་པ་རྩལ་གྱི་དབང་བསྐུར་བར་བྱ་སྟེ། དེ་ཡང་གོང་དུ་སྨོས་པའི་སྣང་གྲགས་ཀྱི་དངོས་པོ་མ་ལུས་ཧཱུྃ་དུ་གྱུར་པ་དེ་ཐམས་ཅད་རྡོ་ཁལ་ལེན་ལ་ལྕགས་འདུ་བ་ལྟར་ཁྱེད་རང་རྣམས་ལ་འདུས་ཤིང་ཐིམ། ཁྱེད་རང་གི་ལུས་ལྷ་སྐུར་གསལ་བ་དེ་ཡང་ལྦུ་བ་ཆུ་ལ་ཐིམ་པ་ལྟར་འོད་དུ་ཞུ་ཞིང་ཡལ་ཏེ། རིག་པའི་

[Full Size]

ངོ་བོ་ཧཱུྃ་ཡིག་གེ་རྣམ་པ་ཞིག་ནམ་མཁར་ཡེར་རེ་ཡོད་པར་བསམ། དེ་ཡང་ཧཱུྃ་ཡིག་བསྒོམ་མཁན་གྱི་སེམས་དང་བསྒོམ་པའི་ཧཱུྃ་གཉིས་སུ་མ་གྲུབ་པའི་རང་ངོ་ལ་རྗེན་ནེ་ཧྲིག་གེ་ཡེར་རེ་གསལ་ལེ་བར་བཞག་པས། བཞག་མཁན་དང་བཞག་རྒྱུ་དངོས་པོར་མ་གྲུབ་ཀྱང་ཅང་མེད་སྟོང་པ་ཆད་མཐར་མ་ལྟུང་བའི། རིག་སྟོང་བློ་བྲལ་གྱི་ཡེ་ཤེས་ཀ་དག་གདོད་མའི་གནས་ལུགས་རང་ལ་རང་བྱུང་དུ་འཆར་བར་འགྱུར་གྱི། དེ་ཉིད་རང་ངོ་ཤེས་པ་ནི། དབང་ཐམས་ཅད་ཀྱི་ཡང་རྩེ་རིག་པ་རྩལ་གྱི་དབང་ཡང་ཡིན་ལ། ལྷ་ཐམས་ཅད་ཀྱི་ཁྱབ་བདག་རིགས་འདུས་པདྨ་དྲག་པོ་གྲོ་ལོད་རྩལ་ཡང་དེ་ཡིན་ཞིང་ཆོས་ཐམས་ཅད་ཀྱི་ཡང་བཅུད་ཨ་ཏི་རྫོགས་པ་ཆེན་པོ་ཡང་འདི་ཡིན་པ་དང་། གདམ་ངག་ཉམས་ལེན་མཐའ་དག་གི་རྩ་བ་ཟབ་པའི་མཐར་ཐུག་ཀྱང་འདི་ལས་མེད་ཀྱི། དེ་ལྟར་ཤེས་པར་གྱིས་ཤིག །དེ་ལྟར་ཡིན་པར་ཡང་གཞུང་

[Full Size]

ཉིད་ལས། རང་སེམས་ཧཱུྃ་དང་དབྱེར་མེད་བསྲེ། །སྐྱེས་རྫོགས་གཉིས་མེད་ཀློང་ཡངས་དང་། །མ་བཅོས་ལྷུག་པའི་ཡིག་གེ་ཧཱུྃ། །འདི་ཉིད་ཁོ་ན་བསྙེན་སྒྲུབ་མཆོག གུ་རུའི་གསང་སྒྲུབ་ཡང་སྙིང་ཧཱུྃ། །འབྲུ་གཅིག་ཨ་ཏིའི་ཁྱད་ཆོས་ཡིན། །ཞེས་པ་དང་། ཧཱུྃ་སྒྲུབ་ཞལ་གདམས་ལས། །ཀུན་གཞིའི་རང་བཞིན་ཆོས་ཉིད་དཀྱིལ་འཁོར་ནི། །མངོན་སུམ་བརྗོད་བྲལ་མཁའ་དབྱིངས་རྣམ་པར་དག །རང་བྱུང་རང་གསལ་ཉིད་དབྱིངས་འཛིན་མེད་ངང་། །སྐྱེ་མེད་ཀ་དག་ཟང་ཐལ་གནས་ལུགས་ལ། །གཟུགས་འཛིན་ཞེན་ཆག་ཕྲེང་ཐག་རྦད་ཀྱི་བཅད། །དེ་ལྟར་ཤེས་ན་ཀུན་གྱི་སྲོག་རྩ་ཡིན། །མ་སྒྲིབ་རྗེན་པ་ཧཱུྃ་དུ་གསལ་བ་ཡང་། །སྣང་བ་མ་འགགས་སྐྱེད་རིམ་རྩ་བ་ཡིན། །དེ་ཉིད་འཛིན་བྲལ་ངང་དུ་གནས་པ་ནི། །སྟོང་པའི་རང་མདངས་རྫོགས་རིམ་ངོ་བོ་སྟེ། །སྐྱེད་རྫོགས་གཉིས་མེད་སྲོག་གནད་གཅིག་

[Full Size]

པའི་ཀློང་། །འདི་དོན་མ་ནོར་གཏན་ལ་ཕེབས་པ་ན། །དུས་གསུམ་རིག་འཛིན་རྒྱལ་བའི་དགོངས་པ་ལོན། །གསང་སྔགས་སྲོག་རྩ་ཡོངས་ཀྱི་སྙིང་པོ་ཡིན། །དུས་གསུམ་རྒྱལ་བའི་ཐུགས་ཀྱི་ཡང་སྙིང་འདི། །བཟླས་པ་ཙམ་གྱི་ཆོས་སྙིང་རང་བྱུང་རྟོགས། །དམིགས་མེད་ཡུལ་བྲལ་རྒྱལ་བའི་དགོངས་པ་བརྙེས། །རྣམ་སྨིན་སྒྱུ་ལུས་འབྱུང་བཞིའི་ནད་དང་བྲལ། །རིག་འཛིན་ཚེ་དབང་མཆོག་དང་ཐུན་མོང་ཐོབ། །ཅེས་དང་། རིགས་སྔགས་གསང་སྔགས་སྒྲུབ་ཐབས་དཔག་ཡས་ཀྱང་། ལྷ་བསྒོམ་སྔགས་བཟླའི་ཉམས་ལེན་གཅིག་ལ་འདུས། །ཀུན་འདུས་སྙིང་པོ་ཡི་གེ་ཧཱུྃ་ལ་རྫོགས། །རྒྱལ་བའི་སྐུ་རྣམས་བླ་མ་ཉིད་ལ་འདུ། །གཅིག་བསྒོམ་ཡོངས་རྫོགས་དཀར་པོ་གཅིག་ཐུབ་ཡིན། །དེ་ལ་ཐམས་ཅད་མ་འདུས་གང་ཡང་མེད། །སྐུ་ཡི་རང་བཞིན་རྡོ་རྗེ་སློབ་དཔོན་ནི། །དུས་གསུམ་རྒྱལ་བ་མ་ལུས་ཐམས་ཅད་ཀྱིས། །དབང་བསྐུར་རྗེས་གནང་རྡོ་རྗེ་དྲག་པོ་རྩལ། །པདྨ་འབྱུང་གནས་དང་ཉིད་

[Full Size]

བསྒོམ་པ་ན། །བླ་མ་ཡི་དམ་མཁའ་འགྲོ་ཐམས་ཅད་འགྲུབ། །གསུང་གི་སྙིང་པོ་ཡི་གེ་ཧཱུྃ་བརྗོད་པས། །གསང་སྔགས་ཕྱི་ནང་སྙིང་པོ་འདི་ལ་རྫོགས། །འདི་ཉིད་ཟུང་སྦྲེལ་སྐྱེད་རྫོགས་མ་བུ་འབྲེལ། །སྐུ་གསུམ་ཞིང་ཁམས་གཅིག་ཅར་འབད་མེད་བགྲོད། ཅེས་སོགས་ཕན་ཡོན་རྒྱ་ཆེར་གསུངས་པ་བཞིན་དུ། སྒོ་གསུམ་དཀྱིལ་འཁོར་གསུམ་ལས་མི་འདའ་བའི་ངང་ནས་རང་གཞན་མཁའ་མཉམ་བླ་མེད་བྱང་ཆུབ་ཆེན་པོར་འཁོད་པའི་ཐབས་ལ་འབད་པར་ཞུ་ལགས། ཞེས། རྗེས་སུ་གདམས་ཤིང་བཀྲ་ཤིས་པའི་ཚིགས་སུ་བཅད་པ་རྒྱས་པར་བྱའོ། །རྗེས་ཀྱི་བྱ་བ་སྤྱི་དང་མཐུན་པ་ལས་ཁྱད་པར་འདི་ནི་རང་བཞིན་རྫོགས་པ་ཆེན་པོ་སྤྲོས་མེད་ཁྱབ་གདལ་གྱི་ངང་ལ་མཉམ་པར་བཞག་ཅིང་། དེ་ལྟར་མ་རྟོགས་པའི་འགྲོ་ལ་སྙིང་རྗེས་སྨོན་ལམ་གདབ་པ་ཙམ་ལས་གཞན་པའི་ཟར་ཟིར་མང་པོ་བྱ་བའི་སྐབས་མ་ཡིན་པ་ཡང་ཤེས་པར་བྱའོ། །དེ་ལྟར་གུ་རུ་

[Full Size]

རྡོ་རྗེ་གྲོ་ལོད་ཀྱི་དབང་གི་ཕྱག་བཞེས་ལ་ཉེ་བར་འཁོ་བ་འདི་ཡང་། མཆོག་གི་སྤྲུལ་པའི་སྐུ་སྙིགས་དུས་འགྲོ་བའི་མགོན་གྱུར་གཅིག་པུ་པ་འགྱུར་མེད་རྡོ་རྗེ་རྒྱལ་མཚན་གྱི་དགོངས་པ་ཉེ་བར་བསྐངས་ཕྱིར། མཁས་མཆོག་པདྨ་ལེགས་སྒྲུབ་རྩལ་གྱིས་ལྷག་བསམ་རྣམ་དག་གིས་སྒོ་ནས་ཡི་གེར་བཀོད་པ་ཤུ་བྷཾ། གཅིག་ཞུས་ཁུལ་ལགས།

དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་སྲོག་དབང་བཀའ་གཏད་ཟབ་མོའི་ལས་རིམ།

[Full Size]

དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་སྲོག་དབང་བཀའ་གཏད་ཟབ་མོའི་ལས་རིམ་བཞུགས་སོ།

[Full Size]

ན་མོ་གུ་རུ་མ་ཧཱ་ཀཱ་ལ་ཨ་དྭཱ་ཡ་བྷྱཿ སྙིང་རྗེའི་རླབས་གཡོས་གདུག་པ་འདུལ་སླད་དུ། །མི་ཟད་ཁྲོ་ཚུལ་འབར་བའི་ཕྲིན་ལས་ཀྱིས། །གདུལ་དཀའ་འདུལ་མཛད་རྡོ་རྗེ་ཐོད་ཕྲེང་རྩལ། །ཞབས་པད་སྤྱི་བོའི་རྒྱན་དུ་རྟག་བྱའོ། །དེ་ལ་འདིར་དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་སྒྲུབ་སྐོར་གཏེར་ཁ་སྔ་ཕྱི་མང་པོ་ཞིག་མཆིས་པའི་ནང་ནས། རིག་འཛིན་ཆེན་པོ་ཧཱུྃ་ནག་མེ་འབར་གྱིས་དབུ་རུ་ཞྭའི་ལྷ་ཁང་གི་ཉེ་ཆར་གཏེར་གནས་པ་ཞེས་པའི་མ་ནིང་ནག་པོའི་ཆོས་སྐོར་ལས་བྱུང་བའི་སྲོག་དབང་བཀའ་གཏད་ཆེན་པོ་ཇི་ལྟར་བྱ་བའི་ལས་རིམ་གོ་བདེར་སྟོན་པར་བྱ་སྟེ། དེ་ཡང་། འདི་ལྟ་བུ་

[Full Size]

བསྐུར་བར་བྱེད་པའི་སློབ་དཔོན་ནི་གང་ཡིན་གྱིས་རུང་བ་མ་ཡིན་ཏེ། ལྟ་བའི་གདེངས་ཀྱིས་སྣང་སྲིད་སེམས་སུ་ཤེས་པ། སྒོམ་པའི་ཉམས་ཀྱིས་ལྷ་དང་སྒོ་གསུམ་འདྲེས་པ། སྤྱོད་པའི་རྩལ་གྱིས་དྲེག་པ་ཟིལ་ནོན་པ་དང་། མ་མཐའ་ནའང་ཡི་དམ་ཕྱག་རྡོར་རྟ་མགྲིན་སོགས་ལ་བསྙེན་པ་ཚད་འཁྱོལ་དང་། ཁྱད་པར་དུ་སྒྲུབ་པ་བཀའ་བརྒྱད་ལ་བསྙེན་པ་བདུན་འབུམ་ཡན་དང་། མགོན་པོ་ཉིད་ཀྱི་རྩ་བསྙེན་བྱེ་བ་མ་ཐེམས་པར་འདིའི་དབང་གི་སློབ་དཔོན་རུང་བར་མ་བཤད་ལ། བསྐུར་ཡུལ་གྱི་སློབ་མ་ཡང་སྤྱིར་དང་དགས་དམ་ཚིག་གི་རུས་ཐུབ་ཅིང་ཡི་དམ་གང་རུང་ལ་གོང་བཞིན་ཚུལ་བཞིན་ཐེམ་པ། ཁྱད་པར་འདི་ཉིད་ཀྱི་བཀའ་གཏད་ཐོབ་ཕྱིན་ཆད་བསྙེན་སྒྲུབ་བསྐངས་གསོ་

[Full Size]

མཆོད་གཏོར་ལ་བརྩོན་ངེས་ཤིག་ལ་མ་གཏོགས་གཞན་ལ་བསྐུར་ན་བདག་ངན་ལ་ཁྱི་བཟང་བཙོང་པའམ། རྟ་རྒོད་ལ་བུ་ཆུང་སྐྱོན་པའི་དཔེ་ལྟར། ཕན་པ་ལས་གནོད་གྱོང་ཆེ་བར་འགྱུར་བས་ན་དེ་ལྟ་བུའི་ཁེ་ཉེན་དང་བླང་དོར་ཤེས་དགོས་སོ། །ཇི་ལྟར་བྱ་བའི་ཚུལ་ནི་གནས་དབེན་ཞིང་ཡིད་དང་མཐུན་པར། རབ་ལ་བཀའ་བརྒྱད་ཀྱི་སྒྲུབ་པ་ཆེན་མོའམ། དེ་མ་འཛོམ་ཡང་བཀའ་བརྒྱད་དངོས་གྲུབ་སྙིང་པོའི་དཀྱིལ་འཁོར་ཞལ་ཕྱེས་ནས། དེའི་ཟུར་ཞིག་ཏུ་འདི་ཉིད་ཀྱི་དབང་རྫས་རྣམས་བཤམས་པས་རུང་ལ། དེ་ལྟར་མ་གྲུབ་པར་འདི་ཁོ་ནའི་དཀྱིལ་འཁོར་བྱེད་ན། སྟེགས་བུ་མདའ་གང་སོགས་ཀྱི་རིགས་ཀྱི་ཁར་དཀྱིལ་འཁོར་སྒོ་རྫོགས་འཁོར་ཡུག་དུར་ཁྲོད་དཔལ་རྡོར་མི་རི་སོགས་ཀྱི་མཐུན་གྱི་ལྟེ་བར་གྲུ་གསུམ་མཐིང་ནག་ཟླ་གམ་གསུམ་དམར་པོའི་མཐའ་སྐོར་གྱི་མུ་འཁྱུད་ཐོད་རའི་ཕྱི་རིམ་འཁོར་ལོ་སེར་པོ་རྩིབས་བརྒྱད་རྩིབས་མཆན་སྔོན་པོ་ཅན་དུ་བྲིས། གལ་ཏེ་རྡུལ་ཚོན་མ་འབྱོར་བའམ་སྤྲོད་མེད་དུ་བྱེད་ན་ནས་ནག་ལ་གུ་གུལ་གྱི་ཆུས་སྦགས་པའི་འབྲུ་ཚོམ་དབུས་སུ་གཙོ་འཁོར་གསུམ་དང་། མཐའ་སྐོར་དུ་མགོན་པོ་འཁོར་ལྔ། དེ་ལྟར་ཡང་འཁོར་སྡེ་བརྒྱད་མཚོན་

[Full Size]

པའི་གྲངས་མཉམ་དགོད། དབང་རྫས་ནི། བུམ་པ་མཚན་ལྡན་མགུལ་ཆིངས་མཐིང་ག་ཅན་ཁ་རྒྱན་གཟུངས་ཐག་སོགས་ཚུལ་མཐུན་བུམ་རྫས་ཚང་བར་བྱས་ལ་དཀྱིལ་འཁོར་དབུས་སུ་བཀོད་པའི་མཐའ་སྐོར་རྣམས་སུ། ཙནྡ་གྱི་བེང་དང་སྐུ་རྟེན་ཙཀྐ་ལི། རྒྱུད་སྒྲུབ་ཐབས་ཀྱི་གླེགས་བམ་དང་ཐོད་པ་བདུད་རྩིས་གང་བ། ཕྱག་མཚན་གྲི་གུག་ཧཱུྃ་གིས་མཚན་པ་དར་ནག་ལ་མགོན་པོའི་ཞལ་བྲིས་པ། དེ་མ་འབྱོར་ན་ཨོཾ་ཧཱུྃ་རམ་རྣམས་བྲིས་པས་ཀྱང་རུང་། ལྕགས་སེ་སེང་ཕུར། དཔལ་གཏོར་རྒྱན་ལྡན་དར་ནག་གི་གདུགས་ཕུབ་ཅིང་གཟི་བརྗིད་དང་ལྡན་པར་བྱས་པ་རྣམས་བཤམས་པའི་མཐའ་སྐོར་དུ་ཕྱི་ནང་གི་མཆོད་པ་སྨན་རག་གཏོར་ཚོགས་སྤྱན་གཟིགས་རྣམས་ཀྱང་རྒྱ་ཆེར་བཤམས་ཞིང་ལིང་ག ཐུན་རྫས་སོགས་ཀྱང་སྒྲུབ་གཞུང་ལྟར་ཚགས་སུ་ཆུད་པ་སྟ་གོན་བྱས་ལ་དཀྱིལ་འཁོར་གྱི་འོག་ཏུ་འབག་རྩོགས་མ་སོང་བར་བཞག་པ་བྱའོ།། ༈ །།དེ་ལྟར་ཡོ་བྱད་བཤམས་དགོད་ཀྱི་ལས་རིམ་ཐམས་ཅད་ལེགས་པར་གྲུབ་ནས། ཆོ་གའི་གཞུང་གསང་བ་གི་དཔལ་མགོན་འདི་ཉིད་ངོ་བོ་ཆེ་མཆོག་ཧེ་རུ་ཀ་ཡིན་པའི་གནད་ཀྱིས་བདག་སྐྱེད་

[Full Size]

ནི་སྒྲུབ་པ་བཀའ་བརྒྱད་ཀྱི་ལས་གཞུང་གང་རིགས་ཤིག་མེད་ཐབས་མ་མཆིས་ཚེ། གཏོར་སྙིང་གང་འོས་སམ་དངོས་གྲུབ་སྙིང་པོའི་ལས་གཞུང་བསྲང་ནས་འཛབ་ཀྱི་སྐབས་ལ་བབས་པ་ན་བཀའ་བརྒྱད་ཀྱི་ལྷ་ཚོགས་སྤྱི་དང་ཁྱད་པར་ཆེ་མཆོག་གི་སྙིང་པོ་ཅི་འགྲུབ་བཟླས་ཏེ་བསྙེན་པ་ཁ་གསོ་ཞིང་ཐན་མཚམས་མཆོད་བསྟོད་ཀྱང་བྱ། དེ་ནས་མགོན་པོ་འཁོར་བཅས་ཀྱི་ལས་བྱང་ཆེན་མོ་རྒྱས་པར་བྱ་ཞིང་མདུན་སྐྱེད་བསྒྲུབ་སྟེ། དཀྱིལ་འཁོར་བུམ་པ་དང་བཅས་པ་དུར་ཁྲོད་རབ་ཏུ་འཇིགས་པའི་ཕོ་བྲང་དུ་མགོན་པོ་འཁོར་བཅས་དམ་ཚིག་པ་གསལ་ཞིང་སྤྱན་འདྲེན་གྱི་ཚེ་ཡེ་ཤེས་པ་བསྟིམ་ནས་མཆོད་བསྟོད་རྣམས་ཕུལ་ལ། དཔལ་མགོན་གྱི་ཐུགས་ཀར་ཉི་མའི་སྟེང་དུ་ཧཱུྃ་ལ་རྩ་སྔགས་མཐིང་ཞུན་གྱི་ཁ་མདོག་ལྟ་བུས་འཁོར་བར་དམིགས་ནས་བཟླ་ཞིང་བདག་ཉིད་ཆེ་མཆོག་གི་ཐུགས་ཀའི་སྔགས་ཕྲེང་ལས་འོད་འཕྲོས་མགོན་པོའི་ཐུགས་སྲོག་ལ་ཐིམ་པས་མགོན་པོ་ཉིད་མཐུ་སྟོབས་གཟི་མདངས་ཆེས་ཆེར་རྒྱས་ཤིང་ཕྲིན་ལས་ཐོག་མེད་བསྒྲུབ་པའི་བཀའ་ཉན་གསུང་སྒྲུབ་མཛད་པར་མོས་ལ་བསྙེན་པ་ལོང་ཁྱབ་དང་བསྟུན་ནས་ཅི་ཙམ་འགྲུབ་འགྲུབ་ཏུ་བྱ་བ་དང་། ཚོགས་མཆོད་བསྐང་གསོའི་རིམ་པ་སོགས་ཐམས་ཅད་ནན་ཏན་དུ་

[Full Size]

འབད་དོ། །ལར་ཡང་དཔོན་སློབ་གཉིས་ཀ་ལོང་ཁྱབ་གཏན་ནས་མེད་པར་ནི་ཚུལ་འདི་དག་བརྩམ་པར་ཡང་མི་བྱ་ལ། ཅི་སྟེ་བརྩམས་ནས་ནི་འཇིག་རྟེན་གྱི་བྱ་བྱེད་རྣམས་ལོང་ཡོད་ལ་འདི་དག་ལོང་མེད་དུ་བྱེད་པ་ནི་རིགས་པ་མ་ཡིན་པས། བྱ་བྲེལ་གཞན་མཐའ་དག་བཤོལ་ཏེ་འདི་ལྟ་བུ་གང་བྱེད་རྣམས་ལ་གནད་དུ་བསྣུན་དགོས་པར་ཡང་ཕྱི་རབས་ཀྱི་གང་ཟག་དག་གི་དགོངས་པ་འཚལ། དེ་ལྟར་སློབ་དཔོན་གྱིས་བྱ་བའི་ལས་རིམ་ཐམས་ཅད་ལེགས་པར་གྲུབ་པ་དང་། སྣོད་ལྡན་གྱི་སློབ་མ་བསྟན་པའི་རྒྱུན་དང་ཆོས་ཀྱི་སྲོལ་འཛིན་པར་ནུས་པ་གཅིག་གཉིས་སུ་གསུམ་ལ་མི་མང་བ་རྣམས་ལ་རྡོ་རྗེ་རྣམ་པར་འཇོམས་པའི་གཟུངས་ཆུས་ཁྲུས་བྱས་ནས། གུས་ཕྱག་དགུ་ཕྲུགས་མཎྜལ་དང་བཅས་པ་སྔོན་དུ་བཏང་སྟེ་མདུན་དུ་གུས་པས་འཁོད་པ་ལ་སློབ་དཔོན་གྱི་ལོ་རྒྱུས་འདི་བཞིན་འཆད་པར་བྱའོ། །གང་དག་སྐྱེ་བའི་ཕྲེང་རྒྱུད་དུ་མར་ལེགས་བྱས་བསོད་ནམས་མངོན་པར་འདུ་བགྱིས་པ་མང་པོ་ཉེ་བར་བསྟེན་པའི་འབྲས་བུས་འབྱོར་བའི་སྐལ་བཟང་ཁྱེད་ཅག །དེང་འདིར་ཟབ་མོ་གསང་སྔགས་

[Full Size]

ཀྱི་འཇུག་སྒོ་དོན་དུ་གཉེར་བ་ནི་ཤིན་ཏུ་ལེགས་ཀྱི། དེ་ལྟ་ན་བསམ་པའི་ཁྱད་པར་རྨད་དུ་བྱུང་བ་རྒྱུད་ལ་བསྐྱེད་དགོས་པས་ན། འདི་ལྟར་འཁོར་བའི་ཁམས་གཏིང་མཐའ་མེད་པར་ཐོག་མཐའ་བར་མེད་དུ་འཁྱམས་པའི་འགྲོ་བ་ནམ་མཁའི་མཐས་ཀླས་པ་མ་ལུས་ཐར་པ་དམ་པའི་བདེ་ཆེན་ལ་དགོད་པའི་ཕྱིར་དང་། དེའི་རྒྱུ་རྐྱེན་སངས་རྒྱས་ཀྱི་བསྟན་པ་རིན་པོ་ཆེ་བསྲུང་ཞིང་དཔལ་དང་སྐྱོང་བའི་འཕྲིན་ལས་བསྒྲུབ་ཕྱིར་དང་། བསྟན་པ་དེ་འཛིན་པར་བྱེད་པའི་གང་ཟག་དམ་པ་རྣམས་ལ་བར་ཆད་ལོག་སྒྲུབ་རྩོམ་པའི་མ་རུངས་གདུག་པ་ཅན་རྣམས་མངོན་སྤྱོད་དྲག་པོའི་སྟོབས་ཀྱིས་གཞོམ་པར་བྱ་བའི་སླད་དུ། དཔལ་ལྡན་མ་ཧཱ་ཀཱ་ལ་ལེགས་ལྡན་མ་ནིང་ནག་པོའི་དབང་ཟབ་མོ་ཞུ་སྙམ་པའི་འདུན་པ་མ་ཡེངས་པ་དང་ལྡན་པས་གསན་འཚལ། དེ་ལྟར་དོན་དུ་གཉེར་ནས་བསྒྲུབ་བྱའི་མགོན་པོ་དེ་ཉིད་ངོ་བོ་ནི་

[Full Size]

ཇི་ལྟ་བུ་ཞིག་ཡིན། རྣམ་པ་ནི་ཅི་ལྟ་བུ་ཡོད་སྙམ་ན། དེ་ལ་གཉིས་ཏེ། ཀུན་ཁྱབ་རྒྱུའི་མགོན་པོ་དང་། རྣམ་འཕྲུལ་རྟགས་ཀྱི་མགོན་པོ་གཉིས་ཡིན་ཏེ། མཚོན་བྱའི་དོན་དང་མཚོན་བྱེད་ཀྱི་དཔེ་གཉིས་ལ་འཇུག་ཅིང་། དེ་ལས་ཀུན་ཁྱབ་རྒྱུའི་མགོན་པོ་ནི་ཁམས་གསུམ་གྱི་སེམས་ཅན་ཐམས་ཅད་ཀྱི་རྒྱུད་ལ་ཡེ་ནས་གནས་པའི་ཀུན་གཞི་སྟེ། འདིའི་རང་ངོ་རང་གིས་ཤེས་ཤིང་རྟོགས་ནས་བདེར་གཤེགས་སྙིང་པོ་གདོད་མའི་སངས་རྒྱས་ཀུན་ཏུ་བཟང་པོ་ཅེས་བྱ་ཞིང་ཡེ་ཤེས་ཐུགས་རྗེ་ཡོན་ཏན་མ་ལུས་པའི་འབྱུང་གནས་སམ་བདག་ཉིད་དུ་གྱུར་པས་འཁོར་འདས་ཐམས་ཅད་ཀྱི་དཔལ་དང་མགོན་དུ་གྱུར་ཕྱིར། དཔལ་ཡེ་ཤེས་ཀྱི་མགོན་པོ་ཞེས་བྱ་ལ། འདི་ཉིད་རང་ངོ་རང་གིས་མ་རིག་པར་ང་དང་བདག་ཏུ་བཟུང་བས་འཁྲུལ་པའི་རྒྱུ་རྐྱེན་གྱི་རྩ་བར་གྱུར་ཅིང་དེ་ལས་དུག་གསུམ་ཉོན་མོངས་རྟོག་ཚོགས་ཀྱི་ཡལ་འདབ་གྱེས་

[Full Size]

ཏེ་ཁམས་གསུམ་རིས་དྲུག་སྡུག་བསྔལ་གྱི་འབྲས་བུ་སྨིན་པ་ལ་ནི་ངར་འཛིན་རུ་དྲའི་རྒྱལ་པོ་ཅེས་བྱ་སྟེ། བདུད་བགེགས་ལོག་འདྲེན་ཐམས་ཅད་ཀྱི་འབྱུང་ཁུངས་ཡིན་པས། དེས་ན་རང་སེམས་འདི་ཉིད་གཅིག་པུ་གྲོལ་འཁྲུལ་གྱི་ཁྱད་པར་ལས་སངས་རྒྱས་དང་སེམས་ཅན། འཁོར་བ་དང་མྱང་འདས། ལྷ་དང་འདྲེ། དཔལ་མགོན་དང་རུ་དྲ། དངོས་གྲུབ་དང་བར་ཆད་ལ་སོགས་བཟང་ངན་དང་ཕན་གནོད་དུ་བཏགས་པའི་མིང་གི་གདགས་གཞི་མ་ལུས་འདི་ཁོ་ན་ལས་གཞན་དུ་མ་མཆིས་པ་ནི་ཀུན་ཁྱབ་རྒྱུའི་མགོན་པོའམ། མཚོན་བྱ་དོན་གྱི་མགོན་པོའི་ངོ་བོ་ཡིན་ཏེ། རྒྱུད་ལས་ངོ་བོ་ཀུན་ཁྱབ་བྱང་ཆུབ་སེམས། རྟོགས་ན་ཀུན་བཟང་ཧེ་རུ་ཀ མ་རྟོགས་བདག་འཛིན་རུ་དྲའི་རྒྱུའོ། །ཞེས་གསུངས་པ་ལྟར་ཡིན་ནོ།། ༈ །།གཉིས་པ་ངོ་བོ་དེ་ཉིད་མཚོན་པར་བྱེད་པའི་དཔེའམ། །རྣམ་འཕྲུལ་རྟགས་ཀྱི་མགོན་པོའི་སྣང་ཚུལ་ནི་འདི་ལྟར་སྟེ་

[Full Size]

སྲིད་ཞི་འཁོར་འདས་བརྟན་གཡོ་མ་ལུས་པའི་ཁྱབ་བདག་དཔལ། ཀུན་ཏུ་བཟང་པོ་ཆོས་དབྱིངས་མཉམ་ཆེན་པོའི་ངང་ལས་རོལ་རྩལ་འགག་མེད་ཀྱི་གཟུགས་སྐུ་ཆེ་མཆོག་ཧེ་རུ་ཀ་ཁྲོ་བོ་ཐམས་ཅད་ཀྱི་རྗེ་བཙུན་དང་དཀྱིལ་འཁོར་མ་ལུས་པའི་མངའ་བདག་ཏུ་བཞེངས་ཏེ། དེ་ཉིད་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྣམ་རོལ་ལས་གསང་སྔགས་རྒྱུད་སྡེ་རྒྱ་མཚོའི་ལྷ་ཚོགས་ཇི་རྙེད་པར་སྤྲུལ་ཞིང་རང་སྐབས་ཀྱི་གདུལ་བྱེད་གདུལ་ཐབས་བསམ་གྱིས་མི་ཁྱབ་པའི་ཐུགས་རྗེའི་ཟློས་གར་བསྒྱུར་བ་ལས། དུས་རི་ཤིག་གི་ཚེ་ན། འཇིག་རྟེན་གྱི་ཁམས་འདིར་མ་རིག་འཁྲུལ་པའི་སྐྱེ་འགྲོ་རྣམས་ཉོན་མོངས་དུག་ལྔའི་བག་ཆགས་མཐུ་བརྟས་པའི་རང་གཟུགས་ཀྱི་དྲེགས་པ་རུ་དྲའི་སྡེ་ཚོགས་མང་པོ་འབྱུང་བར་གྱུར་ཏེ། ཞེ་སྡང་མེ་ལྟར་འབར་བ་ཨཱརྴ་རུ་དྲ་དང་། འདོད་ཆགས་ཆུ་ལྟར་འཁྲུག་པ་ཁ་ཏྲྃ་ཀ་

[Full Size]

རུ་དྲ་དང་། གཏི་མུག་མུན་ལྟར་འཐིབས་པ་མ་ཏྲཾ་ཀ་རུ་དྲ་དང་། ང་རྒྱལ་རི་་ལྟར་སྤུངས་པ་ཕོ་རྒྱུད་རུ་དྲའི་སྡེ་དང་། ཕྲག་དོག་རླུང་ལྟར་འཚུབས་པ་མོ་རྒྱུད་རུ་དྲའི་སྡེ་ཚོགས་དཔག་ཏུ་མེད་པ་བྱུང་ཞིང་། དེ་དག་ལས་འཕྲོས་པའི་འཁོར་དང་ཡང་འཁོར་གྱི་བྱེ་བྲག་བདུད་བཙན། ཀླུ། སྲིན་པོ། གནོད་སྦྱིན། གཟའ། རྒྱལ་འགོང་། མ་སངས། ཐེའུ་བྲང་། མུ་སྟེགས་དམ་སྲི་ལ་སོགས་པ་བསམ་གྱིས་མི་ཁྱབ་པ་རྣམས་ཀྱིས། ཐར་པ་དམ་པའི་ཆོས་བསྒྲུབ་པའི་གེགས་སུ་བྱེད་ཅིང་འགྲོ་བ་རྣམས་ཀྱི་མངོན་མཐོའི་ངེས་ལེགས་འཛོམས་པའི་བདུད་ཚོགས་དེ་དག་འདུལ་བའི་གཉེན་པོར། དཔལ་ཆེན་པོ་ཧེ་རུ་ཀའི་ཐུགས་རྗེ་ལས་སྤྲུལ་པའི་ཡེ་ཤེས་ཀྱི་མགོན་པོ་མ་ཧཱ་ཀཱ་ལ་ལེགས་ལྡན་ནག་པོ་ཆོལ་པའི་ཁྲོ་རྒྱལ་མ་ནིང་ནག་པོ་མངོན་པར་སྤྲུལ་ལོ། །དེ་ལ་མ་ནིང་ཞེས་པའི་མཚན་དུ་བརྗོད་པའི་ངེས་

[Full Size]

ཚིག་ཅི་ཡིན་སྙམ་ན། ཕོ་རྒྱུད་དང་མོ་རྒྱུད་ཀྱི་རིགས་དང་ལྡན་པ་གང་ཡང་འདིས་མི་འཐུལ་བའམ་གཉེན་་པོར་མ་གྱུར་པ་གཅིག་ཀྱང་མེད་ཅིང་ཐབས་ཤེས་གཉིས་སུ་མེད་པའི་ཡེ་ཤེས་ཀྱི་སྐུ་ཡིན་པས་ན་མ་ནིང་གི་མཚན་དུ་བཏགས་པ་ཡིན་ལ་སྐུའི་ཆ་ལུགས་རྣམ་འགྱུར་ཅི་ལྟ་བུ་ཞེ་ན། ཆོས་ཉིད་འགྱུར་བ་མེད་པའི་རྟགས་སུ་སྐུ་མདོག་མཐིང་ནག་ཏུ་འབར་བ། ཆོས་སྐུ་ཐིག་ལེ་ཉག་གཅིག་དང་ཐབས་ཤེས་ཟུང་དུ་འཇུག་པའི་རྟགས་སུ་ཞལ་གཅིག་ཕྱག་གཉིས་པ། །སྐུ་གསུམ་ལྷུན་གྱིས་གྲུབ་པའི་སྤྱན་གསུམ་གྱེན་ཐུར་ཐད་ཀ་གསུམ་དུ་གཟིགས་པ། འཁོར་བ་དོང་ནས་སྤྲུག་ཅིང་སྐྱེ་ཤིང་རྩ་བ་གཅོད་ཕྱིར་ཞལ་གདངས་ལྗགས་འདྲིལ་མཆེ་བ་གཙིགས་པ་བདག་ཏུ་འཛིན་པའི་རུ་ཏྲ་ཚར་གཅོད་པའི་རྟགས་སུ་ཁྲོ་གཉེར་སྨིན་མཚམས་སུ་བསྡུས་ཤིང་གཏམ་རྔམས་འཇིགས་སུ་རུང་བའི་ཚུལ་

[Full Size]

ཅན་གྱི་ཕྱག་གཡས་པས་ནི་འཁོར་བའི་གཡུལ་ལས་རྒྱལ་བའི་རུ་མཚོན་མདུང་རིང་དར་ནག་གི་ལྷུན་གྲུབ་ཆེན་པོ་མེ་ལྕེ་འབར་བ་ནམ་མཁར་འཕར་བ། གཡོན་པའི་ཕྱག་གིས་ནི་ངར་འཛིན་རྩད་གཅོད་ཁུངས་སྟོངས་དྲུང་ནས་ཕྱུང་བའི་སྙིང་དང་ཞགས་པ་བསྣམས་པ། དུག་གསུམ་ལམ་དུ་ལྷོངས་ཕྱིར་དབུ་སྐྲ་རལ་པ་སྦྲུལ་ནག་གི་རང་བཞིན་དུ་སྟིབས་པས་ས་བཞི་ཁེབས་པ། རྟོག་མེད་ཡེ་ཤེས་ལྔ་ལྡན་མངོན་པར་བྱང་ཆུབ་མཚོན་པའི་ཐོད་སྐམ་རིགས་ལྔ་རིན་ཆེན་རྩེ་བྲན་དར་དབྱངས་འཕུར་བས་དབུ་བརྒྱན་པ། དམ་ཚིག་ལྡན་པའི་སྒྲུབ་པ་པོ་ལ་དངོས་གྲུབ་རྒྱུན་ཆད་མེད་པ་རྩོལ་བའི་རྡར་ནོར་བུའི་སྙན་ཆ་མགུར་མཆུ་གསེར་སྐ་རིན་ཆེན་རྣམས་ཀྱིས་མཛེས་པར་སྤྲས་པ། གདུག་པ་ཅན་རྣམས་མཐུ་སྟོབས་དྲག་པོས་འདུལ་བའི་རྟགས་སུ་ཞིང་ལྤགས་ཀྱི་སྐེད་དཀྲིས་དང་སྟག་ལྤགས་ཀྱི་ཤམ་ཐབས་བྱས་པ། ཁམས་གསུམ་

[Full Size]

ཐུགས་རྗེས་ཁྱབ་ཅིང་ཆེ་བའི་ཡོན་ཏན་རྫོགས་པས་དར་ནག་བེར་ཆེན་རྡོ་རྗེའི་གསང་གོས་སྐུ་ལ་གསོལ་བ། བསྟན་པའི་རུ་དྲ་བསྒྲལ་བའི་སྙིང་དང་མགོ་བོའི་ཕྲེང་བ་ག་ཤར་བྱས་པ་སྟོང་གསུམ་སྐད་ཅིག་ལ་འཁོར་བའི་ རྫུ་འཕྲུལ་གྱིས་ཞབས་གཉིས་སག་ལྷམ་ནོར་བུའི་ཕྲ་ཅན་གསོལ་ནས་གྱད་ཀྱི་དོར་སྟབས་སུ་འགྱིངས་པ། སྤྲུལ་པའི་ལྷ་དམག་གྲངས་མེད་འགྱེད་པས་མ་རུངས་བདུད་ཀྱི་གཡུལ་ངོ་བཟློག་ཕྱིར་ཙནྡ་གྱི་བེང་ཆེན་སྐེད་ལ་བཙུགས་པ། རབ་ཏུ་འཇིགས་པ་ཤིན་ཏུ་རྔམས་པ། ཆེ་ལ་བརྗེད་པ། དྲག་པོར་ཁྲོས་པས་སྣང་སྲིད་ཐམས་ཅད་ཡོམ་ཡོམ་ཤིག་ཤིག་ཏུ་བྱེད་པའི་རྫུ་འཕྲུལ་གྱི་བཀོད་པ་གློག་ལྟར་འཁྱུག་ཅིང་ཉི་མ་འབུམ་གྱི་གཟི་འོད་ལྟར་འབར་བའི་སྐུ་བཞེངས་ནས། མ་ལ་ཡ་གནམ་ལྕགས་འབར་བའི་རྩེ་མོར་དུར་ཁྲོད་ཐོད་མཁར་མེ་རླུང་འཁྲུག་པའི་ཕོ་བྲང་ན་སྲིད་གསུམ་དྲེགས་པ་འདུལ་

[Full Size]

བའི་གཤེད་དང་གཉེན་པོར་བཞུགས་ཅིང་། རུ་དྲའི་སྡེ་ཚོགས་མཐའ་དག་རྡུལ་དུ་རློག་པར་མཛད་པ་སྟེ། དེ་ལྟ་བུའི་དཔལ་མགོན་མ་ཧཱ་ཀཱ་ལ་ངོ་བོ་གཅིག་གི་རོལ་པའི་སྒྱུ་འཕྲུལ་གྱི་བྱེ་བྲག་ནི་མཐའ་ཡས་ཏེ། མགོན་པོ་ཕྱག་བཞི་པ། ཕྱག་དྲུག་པ། ཞལ་བཞི་པ་ལ་སོགས་སྐུའི་རྣམ་འགྱུར་ལས་མཚན་དུ་བཏགས་པ་དང་། སེང་གདོང་། ཕག་གདོང་། བྱ་རོག་གདོང་སོགས་དབུ་དང་ཞལ་གྱི་ཁྱད་པར་དང་། བེང་དང་གྲི་གུག་བདུད་ཀྱི་སྤུ་གྲི་ལ་སོགས་ཕྱག་མཚན་ལས་བཏགས་པ་དང་། བེར་ནག་ཅན་དང་བེར་དམར་ཅན་སོགས་ན་བཟའ་ལས་བཏགས་པ་དང་། སྟག་ཞོན་སེང་ཞོན་རྟ་ཞོན་སོགས་གཞོན་པ་ལས་མཚན་དུ་བཏགས་པ་ལ་སོགས་ཀྱི་དབྱེ་བ་དང་རྣམ་གྲངས་ཇི་སྙེད་མཆིས་པའི་མགོན་པོ་མ་ལུས་པའི་རྩ་བ་ནི་ལེགས་ལྡན་མ་ནིང་ནག་པོ་འདི་ཁོ་ན་ཉིད་ལ་འདུས་པའོ། །དེ་ནས་ཡང་དུས་རེ་ཤིག་གི་ཚེ། མི་ཡུལ་

[Full Size]

གྱི་འཇིག་རྟེན་ན་དཀར་པོའི་དགེ་ལ་སྤྱོད་པ་ཉུང་བར་གྱུར་པའི་མཐུ་འབྲས་ཀྱིས། ལྷ་ཡུལ་སུམ་ཅུ་རྩ་གསུམ་དུ་ལྷ་མ་ཡིན་གྱི་དམག་དཔུངས་ལྷག་ནས་ལྷ་རྣམས་ཉམས་ཉེས་པར་གྱུར་པའི་ཚེ། བརྒྱ་བྱིན་ལྷའི་དབང་པོས་མངོན་པར་ཤེས་པས་བརྟག་པ་ན། མིའི་འཇིག་རྟེན་ན་སྡིག་སྤྱོད་ཉུང་ཞིང་དགེ་སྤྱོད་མང་ན་འདིར་ཡང་ལྷ་མིན་རྣམས་མཐུ་ཆུང་ཞིང་ལྷ་རྣམས་སྟོབས་ཆེ་བས་གཡུལ་ལས་རྒྱལ་བར་གྱུར་ལ། དཀར་པོའི་ཕྱོགས་རྣམ་པར་རྒྱལ་བའི་མཐུ་བྱིན་གྱིས་མིའི་འཇིག་རྟེན་དག་ཀྱང་བདེ་བར་འགྱུར་བ་ཡིན་ནའང་། དེང་གི་དུས་འདིར་ནི་དེ་ལས་ལོག་སྟེ་མི་རྣམས་སྡིག་སྤྱོད་མང་བའི་རྒྱུ་རྐྱེན་ལས་བདག་ཅག་ལྷའི་ཚོགས་མཐུ་ཆུང་ཞིང་། ནག་པོའི་ཕྱོགས་རྣམས་སྟོབས་འཕེལ་བ་འདི་ལ་ནི་འཐབ་ཀྱང་མི་ཐུབ་ཚེ། ལེགས་ལྡན་མ་ཧཱ་ཀཱ་ལ་དེ་ཉིད་བདུད་རིགས་

[Full Size]

ཀྱི་གཉེན་པོར་གྱུར་དེ་ཉིད་དཔུངས་ཚོགས་ཀྱི་དཔོན་དུ་སྤྱན་དྲངས་ན་བདུད་དམག་བཟློག་པར་འགྱུར་རོ་སྙམ་དུ་དགོངས་ནས། ལྷ་མོ་དུང་སྐྱོང་མའམ་ཨུ་མ་དེ་ཝི་སྤྱན་འདྲེན་དུ་མངགས་སྟེ་མ་ལ་ཡའི་ཕོ་བྲང་ནས་ལེགས་ལྡན་གྱི་རྒྱལ་པོ་མ་ཧཱ་ཀཱ་ལ་གདན་དྲངས་ཤིང་སུམ་ཅུ་རྩ་གསུམ་གྱི་གནས་ཀྱི་ལྷོ་ནུབ་ཆོས་བཟང་ལྷའི་བདུན་པར་ལྷའི་ཚོགས་རྣམས་ཀྱི་བསུ་བའི་བཀོད་པ་རྒྱ་ཆེན་པོས་བསུས་ཤིང་། ཨ་མོ་ལི་ཀའི་སྟེང་དུ་མཆོད་ཅིང་བསྙེལ་གསོས། རྣམ་པར་རྒྱལ་བའི་ཁང་བཟང་སུ་བརྒྱ་བྱིན་ལྷའི་དབང་པོ་དང་བཀའི་བགྲོ་བ་མཛད། ལྗོན་ཤིང་ཡོངས་འདུ་ས་བརྡོལ་གྱི་དྲུང་ན་ལྷའི་བུ་མོ་བྱེ་བ་མང་པོས་གླུ་གར་འདོད་ཡོན་གྱི་མཆོད་པ་བྱས། ཤར་ཤིང་རྟ་སྣ་ཚོགས་ཀྱི་སྐྱེད་མོས་ཚལ་དུ་ལྷའི་སྡེ་དཔོན་ཆེན་པོ་ཉེར་བརྒྱད་ཀྱིས་མཆོད་ཅིང་གཙང་རིས་ཀྱི་དཔལ་མགོན་བདུན་ཅུ་རྩ་

[Full Size]

ལྔས་བྲན་དུ་ཁས་བླངས། བྱང་ཕྱོགས་དགའ་བའི་ཚལ་དུ་ཡུམ་མཆོག་ཨུ་མ་དེ་ཝི་དང་མ་ཆགས་ཐབས་ཀྱི་རོལ་པ་མཛད་པ་ལས་སྤྲུལ་པའི་སྲས་ལྷ་ཆེན་ཚོགས་ཀྱི་བདག་པོ་དང་ལྷ་མོ་རེ་མ་ཏི་གཉིས་བྱུང་སྟེ་བསྟན་སྲུང་མ་མགོན་ལྕམ་དྲལ་དུ་བཀོས། ནུབ་ཕྱོགས་འདྲེས་ཚལ་བཟང་པོར་ལྷའི་ལོངས་སྤྱོད་སྣ་ཚོགས་ཀྱི་དགའ་སྟོན་རྒྱ་ཆེར་བྱས། དེ་ནས་ལྷོ་ཕྱོགས་རྩུབ་འགྱུར་གྱི་ཚལ་དུ་ལྷའི་དམག་དཔོན་དུ་མངའ་གསོལ་ཞིང་། དཔའ་བའི་ངར་བསྐྱེད། བསྲ་བའི་གོ་བགོས། རྣོ་བའི་མཚོན་འཐོགས་ཏེ་དམག་ཆས་སུ་ཞུགས་པ་དེའི་ཚེ། དཔལ་མགོན་ཉིད་མ་ནིང་སྲོག་བདུད་ཆེན་པོའི་ཆ་ལུགས་སུ་བཞེངས་ཏེ། བྲང་གི་དབུས་ནས་སྤྱན་གསུམ་དང་ཕྱག་ཞབས་ཀྱི་ལྟ་བུ་ཚིག་ཞི་ལ་སྤྱན་ཞིས་མཚན་པ་ལས་བདུད་བཙན་ཀླུ་གཤིན་རྗེའི་དམག་དཔོན་བཞི་སྤྲུལ་ནས་

[Full Size]

ཕོ་ཉར་བཀྱེས། སྤྱན་ནས་ཁྲག་འཛག་པས་ནད་ཀྱི་བུ་ཡུག་ནི་འཚུབས། ཞལ་ནས་མེ་འབར་བ་ལས་ཐོག་དང་མཚོན་ཆའི་ཚ་ཚ་ནི་འཕྲོ། ཕྱག་གཡས་གྲི་གུག་འབར་བས་དྲག་སྲོག་གཅོད་ཅིང་གཡོན་པ་ལྕགས་ཀྱི་པར་བུ་བསྣམས་པ་ལས་ལྷ་དམག་གྲངས་མེད་པའི་དཔུང་ཚོགས་འགྱེད་པ། མཆན་ཁུངས་དུ་ཁ་ཊྭཱྃ་འཁྲོས་ཤིང་དྲག་པོའི་རྐན་སྒྲ་བརྡེབས་པས་སྣང་སྲིད་ཀྱི་ཕོ་རྒྱུད་ཐམས་ཅད་ཕོ་ཉར་འགྱེད་པ་ལྟག་ཁུང་ནས་ཁྲོ་བོའི་སྤྱན་གཅིག་གཟིར་བས་སྲིད་པ་མོ་རྒྱུད་ཐམས་ཅད་དབང་དུ་བསྡུད་ཅིང་བྲན་དུ་འཁོལ་བ། བདུད་མདའ་དྲག་པོ་ཐོག་ལྟར་འཕེན་པས་དགྲའི་སྙིང་ལ་གཟེར་དུ་འདེབས་ཅིང་། བཏགས་རལ་དང་གཟིགས་ཤུབས་གློ་ལ་བཏགས་ནས་བདུད་རྟ་ནག་པོ་རྟིང་དཀར་རླུང་གཤོག་ཅན་ལ་ཆིབས་ཏེ་གཡུལ་དུ་ཞུགས་པའི་འཁོར་དུ། གནོད་སྦྱིན་ཆེན་པོ་བརྒྱད་ནི་ལྕགས་ཀྱི་བྱ་ཁྲར་སྤྲུལ་ནས་ཀླད་ལ་ལྡིང་

[Full Size]

གཤིན་རྗེ་བརྒྱད་སྟག་གཟིག་དོམ་དྲེད་དུ་སྤྲུལ་ནས་རོལ་དུ་ཁྲིད། ཀླུ་ཆེན་བརྒྱད་ནི་དྲུག་སྦྲུལ་ནག་པོ་ལྕེ་བརྒྱ་པར་བྱས་ནས་གློ་ནས་འཁྱུག །ལྷ་ཆེན་བརྒྱད་ནི་ཁྲོ་ཆུང་མཚོན་ཐོགས་སུ་སྤྲུལ་ནས་དབུ་སྐྲའི་སེབ་ནས་སྐར་མདའ་ལྟར་རྒྱུགས། ཕྱོགས་སྐྱོང་བཅུ་དང་རྒྱལ་ཆེན་བཞི་ནི་བཀའི་བློན་པོར་བྱས་ནས་ཅི་བཅོལ་གྱི་ལས་མཛད་ཅིང་། ལྷའི་དཔུངས་ཚོགས་བྱེ་བ་དུང་ཕྱུར་གྱིས་བསྐོར་ཏེ་འཆས་པས། ལྷ་མིན་བདུད་སྡེ་དམག་ཚོགས་ཐམས་ཅད་ལ་ལ་ནི་བསད། ལ་ལ་ནི་སྐྲག་ཅིང་བརྒྱལ། ཐམས་ཅད་ཀྱང་ན་བུན་རླུང་གི་བརྡབ་པ་ལྟར་བྱེར་ཞིང་འཐོར་བ་དང་། ལྷ་མ་ཡིན་གྱི་གྲོང་ཁྱེར་གསུམ་རྩིགས་རྣམས་ཀྱང་དཔལ་མགོན་གྱི་ཞལ་ནས་མེ་འབར་བས་བསྲེག་སྟེ་སྟོངས་པར་མཛད་ཅིང་། བདུད་སྡེ་དཔུངས་ཚོགས་མཐའ་དག་རྡུལ་དུ་རླག་པར་གྱུར་ཏོ། །

[Full Size]

དེའི་ཚེ་ལྷའི་དབང་པོ་འཁོར་དང་བཅས་པས་དཔལ་ལྡན་མགོན་པོ་ལ་བཏང་རག་གི་མཆོད་པ་རྒྱ་ཆེན་པོས་མཆོད་ཅིང་བསྟོད། ཕྱོགས་བཅུའི་སངས་རྒྱས་བྱང་སེམས་རྣམས་ཀྱིས་ཀྱང་ནག་ཕྱོགས་ཀྱི་བདུད་དཔུངས་བཏུལ་བ་ལ་རྗེས་སུ་བསྔགས་ཅིང་ལེགས་སོའི་གནང་བ་སྩལ་ཏེ། སླད་དུ་ཡང་སངས་རྒྱས་ཀྱི་བསྟན་པ་བསྲུང་བ་དང་། དམ་ཚིག་ལྡན་པའི་ཆོས་སྤྱོད་སྐྱོང་ཞིང་ལེགས་ཉེས་ཀྱི་སྟངས་གཅོད་པའི་ཆོས་སྐྱོང་ཀུན་གྱི་གཙོ་བོར་མངའ་གསོལ་ནས་བསྟན་པའི་གཉེར་གཏད་པར་མཛད་དོ། །དེ་ལྟ་བུའི་མཐུ་སྟོབས་ནུས་རྩལ་རྨད་དུ་བྱུང་བའི་དཔལ་ལྡན་ཡེ་ཤེས་ཀྱི་མགོན་པོ་ཉིད་ཀྱིས་སློབ་དཔོན་རིན་པོ་ཆེ་པདྨ་འབྱུང་གནས་བསིལ་བ་འཚལ་གྱི་དུར་ཁྲོད་དུ་བརྟུལ་ཞུགས་ཀྱི་སྤྱོད་པ་སྐྱོང་ཞིང་བཞུགས་པ་ལ་ཞལ་མངོན་སུམ་དུ་བསྟན་ཏེ་ཕྲིན་ལས་བསྒྲུབ་པར་ཞལ་གྱིས་བཞེས་ནས་

[Full Size]

མགོན་པོ་ཉིད་ཀྱི་རྒྱུད་སྒྲུབ་ཐབས་ལས་ཚོགས་མན་ངག་མཐའ་དག་པ་ཕུལ་ཏེ་ཕྱི་རབས་ཀྱི་གང་ཟག་སྣོད་ལྡན་ལ་བརྒྱུད་ནས་བསྟན་པ་བསྲུང་བའི་ཆ་རྐྱེན་དང་། དེ་དག་ཚུལ་དང་མཐུན་པར་གང་གིས་སྤྱོད་པ་ལ་དཔལ་མགོན་འཁོར་བཅས་ལུས་དང་གྲིབ་ལྟར་འཁོར་ནས་སྲུང་སྐྱོབ་བྱེད་པར་ཁས་བླངས་དམ་ཚིག་གི་བྲོ་བོར་ཏེ་མགོན་པོའི་འཁོར་གྱི་ལྷ་མ་སྲིན་སྡེ་བརྒྱད་ཀུན་གྱིས་ཀྱང་སློབ་དཔོན་གྱི་སྤྱན་སྔར་རང་རང་སྲོག་གི་སྙིང་པོ་མདོང་གསོལ་ཕུལ་ལོ། །དེ་ནས་སློབ་དཔོན་ཉིད་བོད་ཡུལ་དུ་འགྲོ་བའི་དོན་མཛད་པའི་དུས་དཔལ་མགོན་གྱི་རྒྱུད་དང་སྒྲུབ་བསྐོར་རྣམས་ཚར་མངར་ཞིག་གཏེར་ཤོག་ལ་བཀོད་ནས་ཟབ་གཏེར་ཐ་དད་དུ་སྦས་ཤིང་། དུས་ལ་ནམ་བབས་གཏེར་བཏོན་སོ་སོས་གདན་དྲངས་ཏེ་བསྟན་པའི་བཙས་དང་ཆ་རྐྱེན་དུ་གྱུར་པ་ལས།། ༈ །།སྐབས་འདིར་

[Full Size]

བབས་པ་ནི་མྱང་བན་ཏིང་འཛིན་བཟང་པོའི་ཆོས་སྐལ་དུ་རྩལ་བའི་བླ་མ་སྐུ་བཞིའི་སྒྲུབ་ཐབས་ཟབ་མོ་རྣམས་ཀྱི་སྤྱིའི་བཀའ་སྲུང་དུ་དཔལ་མགོན་གྱི་ཆོས་བསྐོར་ཤིན་ཏུ་ཟབ་ཅིང་རྒྱས་པ་ཆ་ལག་ཚང་བར་གཏེར་རྫས་ཁྱད་པར་ཅན་མང་པོ་དང་ལྷན་ཏུ་དབུ་རུ་ཞྭའི་ལྷ་ཁང་དང་ཉེ་བར་ཕ་བོང་བྱ་རོག་ནག་པོའི་ལྟོ་བ་ན་གཏེར་དུ་སྦས་པ་ལས་སླད་དུ་མྱང་བན་གྱི་སྐྱེ་མཐའ་རིག་འཛིན་ཆེན་པོ་ཧཱུྃ་ནག་མེ་འབར་གྱིས་གཏེར་ནས་གདན་དྲངས་པའི་བྱིན་རླབས་ཀྱི་དྲོད་མ་ཡལ་བ་ཡིད་ཆེས་ཁུངས་བཙུན་གྱི་གནས་སུ་གྱུར་པ་ལགས།། ༈ །།འདི་ལྟ་བུ་བཀའ་སྲུང་དྲག་རྩལ་ཅན་གྱི་སྲོག་དབང་བཀའ་གཏད་ཞུ་བར་བྱེད་པ་ལ་སློབ་མ་སྔོན་ནས་ཡི་དམ་གྱི་སྐྱེད་རིམ་གདེངས་སུ་གྱུར་པ་དང་སྣང་སྲིད་ཆོས་སྐུའི་རོལ་པར་ཤེས་པ་གཅིག་མེད་ན་ལྷ་འདྲེའི་

[Full Size]

ཞུད་མི་ཐུབ། སྲུང་མ་དམ་ལ་མི་འདུ། དྲེགས་པ་ཟིལ་གྱིས་མི་ནོན་ལ། ཁྱད་པར་དབང་ངེས་པར་ཐོབ་པར་བྱེད་པ་ལ་སྒོ་གསུམ་ཐ་མལ་གྱི་སྣང་ཞེན་མ་ཞུགས་གཅིག་ནན་ལྟར་གལ་ཆེ་སྟེ། ཐ་མལ་འཁྲུལ་རྟོག་རང་ག་མ་ལ་ནི་བྱིན་རླབས་ཡེ་ཤེས་འཇུག་པའི་ཡུལ་མ་ཡིན་པའི་ཕྱིར། དེས་ན་ཁྱེད་རང་རྣམས་སྐད་ཅིག་དྲན་རྫོགས་ཆུ་ལས་ཉ་འཕར་བ་ལྟར་སྒོ་གསུམ་གྱི་དངོས་པོ་འདི་ཉིད་དཔལ་ཆེན་ཆེ་མཆོག་ཧེ་རུ་ཀ་ཡབ་ཡུམ་གྱི་སྐུ་གསུང་ཐུགས་སུ་གནས་འགྱུར་ཏེ། དབུ་གསུམ་ཕྱག་དྲུག་ཞབས་བཞི་པ། གཡས་དཀར་གཡོན་དམར་དབུས་མཐིང་གི་ཞལ་གསུམ་རབ་ཏུ་ཁྲོས་པ། གཡས་ཀྱི་ཕྱག་གསུམ་གྱིས་རྡོ་རྗེ་དང་། གཡོན་པ་གསུམ་གྱིས་ཐོད་ཁྲག་བསྣམས་པ། ཞབས་བཞི་བརྐྱང་བསྐུམ་

[Full Size]

དོར་སྟབས་ཀྱིས་བཞེངས་ཏེ་ཡུམ་ཆེན་གནམ་ཞལ་དབྱིངས་ཕྱུག་ཁ་ཊྃྭཱ་ཐོད་ཁྲག་འཛིན་པ་གཉིས་མེད་དུ་འཁྲིལ་བ། རྡོ་རྗེ་རིན་པོ་ཆེ་གཤོག་པ་གདེང་ཞིང་དཔལ་གྱི་ཆས་བརྒྱད་ཡོངས་སུ་རྫོགས་པ། པད་ཉི་བདུད་བཞི་བརྫིས་པའི་གདན་སྟེང་མེ་སྤུངས་རབ་ཏུ་འབར་བའི་ཀློང་ན་གར་དགུའི་ཉམས་ལྡན་གྱི་སྐུར་གསལ་བའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་མཐིང་ནག་ལ་སྔགས་ཀྱི་ཕྲེང་བ་སྔོ་ཧྲཾ་མེད་གཡས་སུ་འཁོར་བ་ལ་འདུན་པ་གཏད་དེ་རྩ་སྔགས་འདི་ཉིད་བཟླ་བར་མཛོད་ཅིག །ཨཱོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊཿ ཅེས་དཔོན་སློབ་གཉིས་ཀས་བརྒྱ་སྟོང་སོགས་ཅི་འགྲུབ་བཟླའོ། །དེ་ནས་ཡང་། དཔལ་མགོན་དང་ཆེ་མཆོག་གཉིས་ངོ་བོ་ཐ་མི་དད་པའི་ཕྱིར་ཆེ་མཆོག་གི་སྔགས་ཕྲེང་གི་ཕྱི་སྐོར་དུ་མགོན་པོའི་

[Full Size]

སྲོག་སྔགས་འདི་ཉིད་མགར་གྱི་ཚ་ཚ་ལྟར་མེ་སྟག་ཕྲོཾ་མེ་གཡས་སྐོར་དུ་འཁོར་བར་དམིགས་ཏེ་བཟླ་བར་མཛོད་ཅིག །ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་ཧཱུྃ་ཛཿཅེས་གང་འགྲུབ་བཟླས་ལ། དེ་ནས་སློབ་མའི་མགོ་ལ་རིགས་ལྔའི་དབུ་རྒྱན་བསྐོན་པའམ་མོས་པས་ཀྱང་རུང་ཞིང་། བླ་མས་དབང་བུམ་གདན་དྲངས་ལ། དེ་ལྟར་སློབ་མའི་སྒོ་གསུམ་ལྷའི་སྐུ་གསུང་ཐུགས་ཀྱི་ངོ་བོར་བསྒྲུབ་པས་དབང་གིས་སྣོད་རུང་དུ་བྱས་ནས། སླར་ཡང་དེ་ལས་མི་འདའ་བའི་ཆེད་དུ་བུམ་པས་དབང་གི་རྒྱས་བཏབ་སྟེ་ཇི་ལྟར་ལྕགས་ལ་གསེར་འགྱུར་གྱི་རྩིས་ཐེབས་པ་བཞིན་བགྱི་བ་ཡིན་པས། བུམ་པ་གཞལ་ཡས་ཁང་གི་ནང་དུ་དཔལ་ཆེན་པོ་ཧེ་རུ་ཀ་དང་ཡེ་ཤེས་མགོན་པོ་ཐ་མི་དད་པར་བཞུགས་པ་འོད་དུ་ཞུ་ནས་ཁྱེད་ཀྱི་སྒོ་གསུམ་ལ་ཐིམ་ནས་གཉིས་མེད་དུ་གྱུར་པར་སྒོམ་མཛོད་ཅིག །ཧཱུྃ། དཔལ་ཆེན་

[Full Size]

། ཐུགས་ཀར་བུམ་ནང་དུ། མ་ནིང་འཁོར་བཅས་འདོད་དུ་འཁྱིལ། སློབ་མའི་མགོར་བཞག་གཉིས་མེད་ཐིམ། གསང་བ་སྒྲུབ་ཆེན་བུམ་དབང་བསྐུར། དཔལ་དགུའི་སྙིང་པོ་ཚང་བར་བརྗོད་པའམ། བསྡུ་ན། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ། མ་ཧཱ་ཀྲོ་དྷི་ཤྭ་རི་སྟཾྭ། ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་ཨ་བྷི་ཥཱིཉྩ་ཧཱུྃ། ཨོཾ་ཨཱཿཧཱུྃ་ཧོཿ ཞེས་པས་སྤྱིར་བསྐུར་ཞིང་བུམ་ཆུ་ཡང་བླུད་དོ། །དེ་ལྟར་དཔལ་ཆེན་པོ་དང་མ་ནིང་དབྱེར་མེད་ཀྱི་བུམ་དབང་བསྐུར་བས་དཔལ་མགོན་འཁོར་བཅས་སོགས་སྲུང་མ་དྲེགས་པ་ཅན་གྱིས་འཁུ་ལྡོག་མི་ནུས་ཤིང་བྲན་དུ་འཁོལ་ནུས་པའི་རྟེན་འབྲེལ་ཟབ་མོ་ཁྱོད་ཀྱི་རྒྱུད་ལ་བསྒྲིགས་པ་ཡིན་ནོ། །དེ་ནས་ཡེ་ཤེས་ཀྱི་མགོན་པོ་འཁོར་བཅས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒྲུབ་རྫས་ཀྱི་དབང་བསྐུར། སྔགས་ཀྱི་བྱིན་རླབས་བདེན་སྟོབས་ཀྱི་སྨོན་ལམ་གདབ་པ་དང་བཅས་པའི་ཚིག་དོན་དང་

[Full Size]

རྗེས་སུ་མཐུན་པར་ཐོབ་པའི་ངེས་ཤེས་བརྡན་པོ་ཡེངས་མེད་དུ་མཛད་པར་འཚལ་ལོ། །སྐུ་དྲིན་ཙཀྐ་ལི་དང་ཙནྡ་བེང་ཆེན་སྤྱི་བོར་བཞག་སྟེ། ཨོཾ་ཨཱཿཧཱུྃ་སྭཱ་ཧཱ། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊཿ མ་ཧཱ་ཀྲོ་དྷི་ཤྭ་རི་སྟཾྭ། ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་ཀཱ་ཡ་ཨ་བྷི་ཥཱིཉྩ་ཨོཾ། དཔལ་ཆེན་པོ་བྱིན་རླབས་ཀྱིས། ཡེ་ཤེས་མགོན་པོའི་སྐུ་མི་ཟད་རྒྱན་གྱི་འཁོར་ལོ་དང་གཉིས་མེད་པར་གྱུར་ཅིག །ཅེས་བསྐུར་ཞིང་མེ་ཏོག་ཀྱང་འཐོར་རོ།། ༈ །།གསུང་རྟེན་གླེགས་བམ་དང་ཐོད་པ་མགྲིན་པར་བཏུག་ཅིང་། ཆེ་མཆོག་ཡབ་ཡུམ་དང་དཔལ་མགོན་གྱི་རྩ་སྔགས་གོང་ལྟར་བརྗོད་པའི་འཇུག་ཏུ། ཝཱཀ་ཨ་བྷི་ཥཱིཉྩ་ཨཱཿདཔལ་ཆེན་པོའི་བྱིན་རླབས་ཀྱིས། ཡེ་ཤེས་མགོན་པོའི་གསུང་མི་ཟད་རྒྱན་གྱི་འཁོར་དང་གཉིས་སུ་མེད་པར་གྱུར་ཅིག །ཅེས། མེ་ཏོག་འཐོར་ཞིང་། བདུད་རྩི་ཡང་སྦྱིན་ནོ། །ཐུགས་རྟེན་གྲི་གུག་སྙིང་གར་བཞག་ལ། གོང་གི་རྩ་སྔགས་མཐར། ཙིཏྟ

[Full Size]

ཨ་བྷི་ཥཱིཉྩ་ཧཱུྃ། དཔོན་པོའི་བྱིན་གྱིས་རླབས་ཀྱིས། ཡེ་ཤེས་མགོན་པོའི་ཐུགས་མི་ཟད་རྒྱན་གྱི། ཅེས་མེ་ཏོག་འཐོར། ཡོན་ཏན་གྱི་རྟེན་དར་ནག་ཞལ་བྲིས་སློབ་བུའི་ལག་པ་གཡས་སུ་གཏད་ཅིང་། གོང་གི་རྩ་སྔགས་ཀྱི་མཐར། གུ་ཎ་ཧྲི་ད་ཨ་བྷི་ཥཱིཉྩ་སྭཱ། དཔལ་ཆེན་པོའི༴ ཡོན་ཏན་མི་ཟད་རྒྱན༴ ཅེས་མེ་ཏོག་འཐོར། ཕྲིན་ལས་ཀྱི་རྟེན་ལྕགས་གཡོན་དུ་གཏད་ལ། རྩ་སྔགས་ཤམ་དུ། བཛྲ་ཀཱི་ལི་ཀཱི་ལ་ཡ། ཀརྨ་མ་ཧཱ་ཨ་བྷི་ཥཱིཉྩ་ཧཱ། དཔོན་པོའི༴ ཕྲིན་ལས་མི་ཟད༴ ཅེས་བསྐུར་ཞིང་མེ་ཏོག་འཐོར་རོ། །དེ་ནས་སྦྱོར་སྒྲོལ་གྱི་བརྟུལ་ཞུགས་ནུས་པའི་དབང་བསྐུར་བ་ཐོག་མར་དྲག་པོ་སྒྲོལ་དབང་ནི། གོང་ནས་སྟ་གོན་བྱས་པའི་ལིངྒ་འབྲུབ་ཁུང་ངམ་ཐོད་ངན་ལྕགས་སྡོང་སོགས་གང་རིགས་སུ་བཅུག་ཅིང་ཁྲག་གིས་ལྤགས་པ་སློབ་མའི་མདུན་དུ་བཤམ། ཕུར་བུ་དང་རལ་གྲི་གྲི་གུག་སོགས་ཀྱི་ཕྱག་མཚན་མཚོན་ཆ། ཐུན་རྫས་དང་བཅས་པ་མདུན་དུ་གསར་ནས། དཔོན་སློབ་གཉིས་ཀ་ཆེ་མཆོག་དང་མགོན་པོ་ཐ་མི་དད་པར་གསལ་བའི་ངང་ནས་སྤྲོ་ན་འདི་ཉིད་ཀྱི་གདབ་ལས་ནས་བྱུང་བའི་ལས་རིམ་རྒྱས་པར་བྱ་བའམ། བསྡུ་ན།

[Full Size]

ལས་བྱང་གི་ཚོགས་ལས་ནས་བྱུང་བའི་འགུགས་འདྲེན་ནི། ན་མོ། རྩ་རྒྱུད་བླ་མ་ཡི་དམ་ལྷ་ཚོགས་དང་། །དཀོན་མཆོག་གསུམ་གྱི་བཀའ་ཡི་བདེན་སྟོབས་དང་། །རྩ་གསུམ་ལྷ་ཚོགས་ཆོས་སྐྱོང་སྲུང་མ་དང་། །ཁྱད་པར་དཔལ་མགོན་མ་ནིང་ནག་པོ་ཡི། །བདེན་པའི་བྱིན་རླབས་མཐུ་རྩལ་རྟེན་འབྲེལ་གྱིས། །ཕྱོགས་བཞི་མཚམས་བརྒྱད་དགྲ་གེགས་འབྱུང་པོའི་ཚོགས། །གནམ་པའི་གོ་བར་གར་ཡོད་གར་གནས་ཀྱང་། །རང་དབང་མེད་པར་གཟུགས་ལིང་འདི་ལ་ཁུག །ཨཾ་གུ་ཤ་ཛཿ པཱ་ཤ་ཧཱུྃ། སྥ་ཊ་བཾ། ཨཱ་ཝ་ཤ་ཡ་ཧོཿ ཞེས་པས་བཀུག་ལ། ཧཱུྃ། དཀྱིལ་འཁོར་ལྷ་ཚོགས་དུས་ལ་བབ། །དཔལ་མགོན་འཁོར་བཅས་དུས་ལ་བབ། །བྱང་ཆུབ་བསྒྲུབ་ལ་གནོད་བྱེད་འདིར། །བསྲུང་སྐྱོབས་བྱེད་པའི་ལྷ་དང་ཕྲོལ། །ཕོབ་ཅིག་རྣམ་པར་གཟིར་བར་གྱིས། །བཟུང་ཞིག་རྒྱོབ་ཅིག་རྣམ་པར་ཆིངས། །གྲོགས་དང་འཕྲོས་ལ་སྨྱོ་རུ་ཆུག །ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་

[Full Size]

ཤ་ཏྲུཾ་ཨ་མུ་ཀ མཱ་ར་ཡ་རྦད། དེ་ནས་དྲག་པོའི་མཐུན་རྫས་སློབ་མའི་ལག་ཏུ་གཏད་ལ། ཁྱེད་རང་དཔལ་མགོན་སྲོག་བདུད་ནག་པོའི་ང་རྒྱལ་གྱིས་དྲག་པོའི་ཐུན་དང་མཚོན་ཆའི་ཆར་པ་གདོན་བྱེད་ཀྱི་གཟུགས་ལ་ཕབ་པས་ལས་ངན་རྣམ་སྨིན་གྱི་ཕུང་པོ་རྡུལ་ཕྲན་ཕྱེ་མར་གྱུར་ཞིང་། རྣམ་པར་ཤེས་པའི་ངོ་བོ་ཡི་གེ་ཨཿཡི་ཚུལ་དུ་ཆེ་མཆོག་ཡབ་ཡུམ་གྱི་སྦྱོར་མཚམས་སུ་ཐིམ་སྟེ་བྱང་ཆུབ་ཀྱི་གོ་འཕངས་ལ་འཁོད་པའི་དམིགས་པ་མཛོད་ཅིག །ཅེས་བརྗོད་ནས་ལིངྒ་ལ་ཐུན་དབབ་ཏུ་གཞུག་ཅིང་། ཨོཾ་ཤྲཱི་མ་ཧཱ་ཀཱ་ལ་རུ་དྲ་ནག་པོ་དགྲ་བོའི་སྙིང་ལ་སུ་ཏྲི། ཙིཏྟ་རྦད། ཅེས་དྲག་ཏུ་བཟླས་ལ་སླར་ཕྱག་མཚན་གྱི་མཚོན་ཆས་ལིངྒ་གདུམ་བུར་གཏུབ་ཏུ་གཞུག་སྟེ། ཨོཾ་ཕཊཿམཱ་ར་ཡ་ཏེ་ཧཱུྃ་ཨཿསྥ་ར་ཎ་ཕཊཿ དེ་ནས་ལིང་རོ་རྣམས་མེ་ནང་དུ་དཔལ་མགོན་འཁོར་བཅས་གསལ་བ་ལ་འབུལ་ཞིང་། ཧཱུྃ། དམ་ཉམས་དགྲ་གེགས་འབྱུང་པོ་ཐམས་ཅད་ཀྱི། །ཕྱི་ཡི་དབང་པོ་སྒོ་ལྔ་མཆོད་པར་བཞེས། །ནང་གི་དོན་སྙིང་

[Full Size]

རྣམ་ལྔ་མཆོད་པར་བཞེས། །གསང་བའི་བླ་སྲོག་རྣམ་ཤེས་མཆོད་པར་བཞེས། །དེ་བཞིན་ཕུང་པོ་རྣམ་ལྔ་མཆོད་པར་བཞེས། །སངས་རྒྱས་བསྟན་པ་བསྲུང་ཕྱིར་བཞེས་སུ་གསོལ། །ཡཀྵ་ཀྲོ་དྷ་བ་ལིངྒ་ཡ་ཁཱ་ཧི། དེ་ལྟར་དྲག་པོ་སྒྲོལ་བའི་དབང་བསྐུར་ནས། གཉིས་པ་ཐབས་ཤེས་སྦྱོར་བའི་དབང་ནི་འདི་སྐབས་ཀྱི་གསང་དབང་གི་མཚོན་བྱེད་ཀྱང་ཡིན་པས། ཐོད་པའི་རཀྟ་སློབ་མའི་ལྕེ་ཐོག་ཏུ་བླུགས་ལ། ཁྱེད་རང་ཆེ་མཆོག་དཔལ་མགོན་དབྱེར་མེད་ཀྱི་ཡ་རྐན་ཁྲོ་བོ་ཡབ་དང་མ་རྐན་ཁྲོ་མོ་ཡུམ་གྱི་རང་བཞིན་ཐབས་ཤེས་མཉམ་སྦྱོར་གྱི་རོལ་པ་མཛད་པའི་བྱང་སེམས་དཀར་དམར་གྱིས་ལུས་ནང་རྩ་ཐམས་ཅད་ཁེངས་ཤིང་བདེ་སྟོང་ལྷན་སྐྱེས་ཀྱི་ཡེ་ཤེས་ཉམས་སུ་མྱོང་བར་སྒོམ་མཛོད་ཅིག །ཨོཾ་ཤྲཱི་མ་ཧཱ་ཀཱ་ལ་ཀི་ཀྲོ་དྷི་ས་མ་སྟཾྭ། བདེ་སྟོང་ཟུང་འཇུག་གི་ཉམས་དང་མི་འབྲལ་བར་གྱུར་ཅིག །ཅེས་མེ་ཏོག་འཐོར་རོ། །དེ་ནས་ཡོངས་རྫོགས་གཏོར་མའི་དབང་གིས་བྱིན་རླབས་རྩལ་

[Full Size]

ཡུགས་སུ་དབབ་པ་ནི་དཔལ་གཏོར་རྒྱན་ལྡན་གཟི་བརྗིད་ཅན་སློབ་དཔོན་གྱི་བཏེགས་ཅིང་། ཚིལ་ཆེན་དང་གུ་གུལ་བསྲེག །རོལ་མོའི་སྒྲ་དང་བཅས་པས་བྱིན་འབེབ་བྱ་སྟེ། ཧཱུྃ་ཧཱུྃ་ཧཱུྃ། འོག་མིན་གནས་མཆོག་དམ་པ་ནས། །ཞི་ཁྲོ་ཡོངས་རྫོགས་སྐུ་བཞེངས་ཤིག །གསང་བའི་དཀྱིལ་འཁོར་ཆེན་པོ་འདིར། །སྤྱན་འདྲེན་བཞུགས་གསོལ་མཆོད་པ་འབུལ། །བདག་དང་མོས་པའི་བུ་རྣམས་ལ། །དབང་བསྐུར་བྱིན་གྱིས་བརླབ་ཏུ་གསོལ། །བགེགས་དང་ལོག་འདྲེན་བར་ཆད་གསོལ། །ཕྱི་ནང་གསང་བའི་དབང་རྣམས་བསྐུར། །མཆོག་དང་ཐུན་མོང་དངོས་གྲུབ་སྩོལ། ཧཱུྃ། སྟེང་ཕྱོགས་དགའ་ལྡན་ལྷ་གནས་ནས། །ལྷ་ཆེན་དཔལ་འབར་བྱིན་ཕོབ་ཅིག །མོས་པའི་བུ་ལ་དབང་ཞིག་བསྐུར། ཧཱུྃ། ཨུ་ཙ་ལ་ཡི་དུར་ཁྲོད་ནས། །མ་ནིང་ནག་པོས་བྱིན་ཕོབ་ཅིག །གཞན་ཡང་མགོན་པོའི་ཚོགས་རྣམས་ཀྱིས། །དད་ལྡན་རིགས་ཀྱི་བུ་འདི་ལ་དངོས་གྲུབ་རྣམ་གཉིས་སྩལ་དུ་གསོལ།

[Full Size]

ནད་གདོན་བར་ཆད་ཞི་བ་དང་། །ཚེ་དང་བསོད་ནམས་རྒྱས་པ་དང་། །དགྲ་གེགས་འགུགས་ཅིང་སྒྲོལ་བ་དང་། །དྲག་པོ་མཐུ་ཡི་དབང་ཞིག་བསྐུར། །ད་ལྟ་ཉིད་དུ་བྱིན་གྱིས་རླབས། །ཨོཾ་ཤྲཱི་མ་ཧཱ་ཀཱ་ལ་བ་ལིནྟ་ས་མ་ཡ་ཨ་བྷི་ཥཱིཉྩ་ཧཱུྃ། ཞེས་སློབ་མའི་སྤྱི་བོར་གཏོར་མས་དབང་བསྐུར་བ་དང་ལྷན་གཅིག་ཏུ་སྒྲུབ་སྐོར་གྱི་པུསྟི་སྐུ་དང་བླ་རྡོ་སྒྲུབ་རྫས་སོགས་ལག་ཏུ་གཏད་ཅིང་བཀའ་བསྒོ་སྨོན་ལམ་སོགས་ནན་ཏན་བྱས་ལ། དེ་ལྟར་དབང་བསྐུར་བས་དཔལ་མགོན་གྱི་ལྷ་ཚོགས་ཐམས་ཅད་ཁྱེད་ཀྱི་ལུས་ངག་ཡིད་གསུམ་ལ་དབྱེར་མེད་དུ་ཐིམ་ནས་བྱིན་རླབས་མཐུ་སྟོབས་ནུས་རྩལ་བསམ་གྱིས་མི་ཁྱབ་པ་ལ་དབང་འབྱོར་ཐོབ་པའི་ངེས་ཤེས་བསྐྱེད་མཛོད། དེ་དབང་བསྐུར་བ་དེ་ཐམས་ཅད་ཀྱི་རྩ་བ་དབང་དོན་རྒྱུད་ལ་གོ་ཞིང་རྟོགས་དགོས་ཏེ། དེ་མ་རྟོགས་ན་མཚན་བཅས་རྫས་ཀྱི་དབང་ཇི་ཙམ་བསྐུར་ཡང་ཐོབ་པར་མི་འགྱུར་ལ། དབང་དོན་ནམ་རྟོགས་

[Full Size]

པ་དང་དབང་ཚུལ་བཞིན་ཐོབ་པ་ཡིན་པས་འདི་བཞིན་ཡིད་ལ་ཞོག་ཅིག །ཧཱུྃ། རིགས་ཀྱི་བུ་ཁྱོད་སྐལ་བ་བཟང་། །ཚུར་ཤོག་གསང་བའི་དཀྱིལ་འཁོར་འདིར། །དབང་དོན་འདི་རྣམས་གོ་བར་གྱིས། །བུམ་པ་ཕྱི་ཡི་དབང་བསྐུར་ཡིན། །ཐོད་པ་ནང་གི་དབང་བསྐུར་ཡིན། །བདུད་རྩི་གསང་བའི་དབང་བསྐུར་ཡིན། །ཙཀྐ་ལི་ནི་སྐུ་ཡི་དབང་། །སྒྲུབ་ཐབས་ཡིག་འབྲུ་གསུང་གི་དབང་། །རྡོ་རྗེ་གྲི་གུག་ཐུགས་ཀྱི་དབང་། །ཡོན་ཏན་ཕྲིན་ལས་དར་ཕུར་དབང་། །དྲེགས་པ་སྦྱོར་སྒྲོལ་ཐོད་ཁྲག་དབང་། །གཏོར་དབང་ཐུན་མོང་སྤྱི་ཡི་དབང་། །དེ་ལྟར་ཤེས་ན་དབང་མཆོག་ཐོབ། །ཅེས་པ་དེ་ལྟ་བུས་ཐུན་མོང་དབང་བསྐུར་བ་ལེགས་པར་ཐོབ་ནས། ད་ནི་ཁྱད་པར་དྲེགས་པའི་སྲོག་གི་དབང་དོན་དམ་པའི་སྙིང་པོར་ཇི་ལྟར་བསྐུར་ཞིང་ཐོབ་པའི་ཚུལ་ནི་འདི་ཡིན་ཏེ། །ཧོ། ཉོན་ཞིག་སྐལ་ལྡན་རིགས་ཀྱི་བུ། །ཁྱད་པར་དྲེགས་པའི་སྲོག་དབང་ནི། །གཞན་ན་ཡོད་པ་མ་ཡིན་ཏེ། །

[Full Size]

རང་གི་སེམས་ཉིད་རིན་པོ་ཆེ། །ཞི་བར་ཆོས་སྐུ་ཀུན་ཏུ་བཟང་། །ཁྲོ་བོར་ཆེ་མཆོག་ཧེ་རུ་ཀ །རིག་ན་སངས་རྒྱས་ཀུན་དངོས་ཡིན། །མ་རིག་དམྱལ་བ་རང་སེམས་ཡིན། །འཁོར་འདས་ཀུན་གྱི་རྩ་བ་སྟེ། །སྟོང་ལ་ཐེར་ཟུག་མ་འགག་པ། །ངར་འཛིན་རྣམ་རྟོག་མ་ནིང་སྐུ། །གཞན་ན་མེད་དོ་རང་རིག་དངོས། །དེ་ལྟར་རྟོགས་ན་སྲོག་དབང་ཐོབ། །ཀུན་བཟང་ཆེ་མཆོག་མ་ནིང་གསུམ། །ལོགས་ན་མེད་དོ་རང་སེམས་ཉིད། །མ་ནིང་རང་སེམས་ངོ་ཤེས་ན། །དྲེགས་པ་ཀུན་གྱི་སྟོང་སྲོག་ཐོབ། །ཡ་གི་ཀུན་ཏུ་བཟང་པོ་ནས། །མ་གི་ཐེའུ་བྲང་ཡན་ཆད་དུ། །ཀུན་སྲོག་སེམས་ཉིད་གཅིག་པུར་འདུས། །དཔེར་ན་ནམ་མཁའ་ཁྱབ་འཇུག་གིས། །ནམ་མཁའི་ཉི་ཟླ་ཟིན་པའི་དུས། །ཆུ་བྲན་ཀུན་གྱི་ཉི་ཟླ་ཟིན། །དེ་བཞིན་སྟོང་སྲོག་གཅིག་ལ་འདུད། །དེ་དོན་རྟོགས་ན་སྲོག་དབང་ཐོབ། །རང་རྩལ་མཐུ་སྟོབས་དབང་བསྐུར་རོ།

[Full Size]

ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་ཧཱུྃ་ཛཿ ཨེ་ཧུར་ཐུཾ་ཛཿརྦད་ཨ་བྷི་ཥཱིཉྩ་ཨཿ ཞེས་ཕྲེང་བའི་སྣ་རེ་དཔོན་སློབ་གཉིས་ཀྱིས་བཟུང་ནས་སྔགས་ཀྱི་རྗེས་སུ་གནང་བ་བྱས་ལ། སླར་ཡང་འདི་ཉིད་ཀྱི་སྲོག་དབང་བསྡུས་པ་ནས་གསུངས་པའི་ཞལ་གདམས་གཏད་རྒྱ་འདི་ཡང་བྱ་སྟེ། ཧོ། ད་ཡང་བུ་ཁྱོད་ཚུར་ཉོན་ཞིག །དཔལ་མགོན་མ་ནིང་ནག་པོ་ཡང་། །དཔལ་ཆེན་དངོས་ཀྱི་སྤྲུལ་པ་སྟེ། །དགོངས་པ་མྱ་ངན་འདས་མོད་ཀྱང་། །ཕྲིན་ལས་འཇིག་རྟེན་ཚུལ་དུ་མཛད། །མཆོད་བསྟོད་གུས་པས་བསྟེན་ཞིང་བསྒྲུབ། །ལས་མགོན་དང་ནི་སྡེ་བརྒྱད་སོགས། །མ་རུངས་ནག་པོའི་འཁོར་ཚོགས་རྣམས། །ད་རུང་འཇིག་རྟེན་བྱ་མ་བཏང་། །དགེ་བའི་ལས་ལ་མོས་ན་ཡང་། །དམ་ལ་མ་ཐོགས་ལས་ངན་པའི། །ས་བོན་རྩུབ་པས་ཕན་གནོད་ཆེ། །འགའ་ཞིག་བདེར་གཤེགས་ཞལ་མ་མཐོང་། །ཆོས་ལ་མི་དད་ནག་པོའི་ཕྱོགས། །རིང་ཐུང་ཆད་འབེབས་

[Full Size]

ལེགས་ཉེས་སྟོན། །གནས་མེད་ཟས་སུ་ཕུད་གཏོར་མྱུལ། །དེ་འདྲའི་དྲེགས་པ་མ་རུངས་པ། །གདོལ་བ་རྒོད་ཀྱི་རིགས་མང་བས། །ཨེ་མ་རྣལ་འབྱོར་བུ་ཁྱོད་ཀྱང་། །ལྟ་སྒོམ་བསྙེན་སྒྲུབ་ལ་སོགས་པ། །དྲོད་ཚོགས་རིམ་གྱིས་མ་ཐོབ་བར། །མངལ་གྱི་ལུས་ལ་བརྟེན་པ་ཡིས། །དཔའ་སྙེམས་བརྟུལ་ཞུགས་ང་རྒྱལ་གྱིས། །ལྷ་སྲིན་དྲེགས་པ་འདུལ་མི་བྱ། །བསོད་ནམས་རླུང་རྟ་གུས་དུས་སུ། །ཁོས་ཀྱང་ཡལ་བར་ཅི་ལ་འདོར། །རབ་འཇིགས་དྲེགས་པ་འདི་དག་ཀྱང་། །ཕལ་དུ་སྤྱི་མཐུན་རིགས་མ་འདས། །འཇིག་རྟེན་མཆོད་ཅིང་བསྟེན་བསྒྲུབ་ཕྱིར། །འདོད་ཡོན་གཏོར་རྫས་འཛོམ་ན་འགྲུབ། །སྒྲུབ་ལ་ཐེ་ཚོམ་སྐྱེས་པ་ན། །ལས་མི་འགྲུབ་པས་ཐེ་ཚོམ་སྤོང་། ལྷ་མ་བསྙེན་པར་འདྲེ་མི་བསྒྲུབ། །རང་རྒྱུད་འགྲོགས་ཀྱང་མི་བདེ་བས། །སྐྱོན་ཡང་ཤིན་ཏུ་མང་བར་གསུངས། །ཐམས་ཅད་ཆོས་སྐུའི་རང་རྩལ་དུ། །

[Full Size]

ཤེས་ན་ཕྲིན་ལས་ཀུན་འགྲུབ་སོ། །ཨེ་མ་བུ་ཁྱོད་ཁྱད་པར་དུ། །གཅེས་པའི་དབང་སྲོག་དམ་ཚིག་བསྲུང་། །འདས་དང་མ་འོངས་དངོས་གྲུབ་ཀུན། །བླ་མའི་ཐུགས་རྒྱུད་མཉེས་ན་འགྲུབ། །དེས་ན་འདི་ཞུས་བླ་མ་ལ། །རྩ་བ་སྐུ་གསུང་ཐུགས་དམ་བསྲུང་། །བཀའ་སྩལ་ཟུགས་ཡང་བཅག་མི་རུང་། །དངོས་པོ་ཀུན་ལ་མི་འབག་ཅིང་། །ལུས་སྲོག་ལོངས་སྤྱོད་དབུལ་བར་བྱ། །དབང་བསྐུར་སྒྲུབ་ཐབས་ཚང་བར་ཞུ། །ཉམས་ན་མགོན་པོས་རང་སྲོག་གཅོད། །དམ་གཙང་མ་ནིང་དངོས་སུ་འཁོལ། །བླ་མ་ཡི་དམ་ཆོས་སྐྱོང་རྣམས། །གཉིས་མེད་གཅིག་ཡིན་བརྙས་མི་བྱ། །དེས་ན་བླ་མ་སངས་རྒྱས་སྒོམས། །ཅི་མཉེས་བསྒྲུབ་ཅིང་འབངས་སུ་མཆི། །དེས་ནི་ཅི་བསམ་ཐམས་ཅད་འགྲུབ། །མཆོག་ཏུ་དམ་ཚིག་གཙོར་བཟུང་ཞིག །ཅེས། དམ་ཚིག་གི་བཀའ་རྒྱ་ནན་ཏན་དུ་གདབ་ཅིང་། སློབ་མས་ཀྱང་དེ་དང་མཐུན་པའི་དམ་བཅའ་ཞེས་བཅད་དྲག་པོ་བྱས་ལ་དེ་ལས་ནམ་ཡང་མི་འདའ་བ་

[Full Size]

ལ་འབད་པ་མཐར་འདོན་ནོ། །གཞན་ཡང་བཀའ་སྲུང་ཆོས་སྐྱོང་གི་དབང་དང་བཀའ་གཏད་ཐོབ་པའི་གང་ཟག་རྣམས་བསྐང་གསོ་རྒྱུན་གཏོར་དུས་གཏོར་ཐུན་གཏོར་སོགས་ལ་རྟག་ཏུ་འབད་དགོས་པ་ཡང་གལ་པོ་ཆེའི་དམ་ཚིག་གོ། །དེ་ལྟར་དབང་བསྐུར་བའི་མཐར། དབང་གི་ཡེ་ཤེས་བརྟན་པར་རབ་ཏུ་གནས་ཕྱིར་བཀྲ་ཤིས་ཀྱི་ཚིགས་སུ་བཅད་པ་རྒྱས་པར་བྱ་ཞིང་རྟེན་འབྲེལ་སྙིང་པོའི་མེ་ཏོག་གི་ཆར་ཕབ། བླ་མ་ལ་བཞེད་པ་མི་མངའ་ཡང་སློབ་མའི་བསོད་ནམས་སྤེལ་ཕྱིར་དངོས་པོ་དག་པ་དང་ལྷག་པར་དྲག་པོའི་ཕྲིན་ལས་འགྲུབ་པའི་རྟེན་འབྲེལ་གནད་དུ། མཚོན་ཆ་བཟང་པོའི་རིགས་ཀྱི་ཕྱག་རྟེན་འབུལ་བར་གསུངས། རྗེས་ལ་ཚོགས་ཀྱི་དགའ་སྟོན་དང་། བཀའ་སྲུང་རྣམས་ལ་བཏང་རག་གི་གཏོར་མ་ཡང་རྒྱ་ཆེར་འབུལ་ཞིང་། ཉེས་བྱས་བཤགས་པ་དང་དངོས་གྲུབ་བླང་བ། བསྔོ་སྨོན་ཤིས་བརྗོད་གཤེགས་གསོལ་བསྡུ་ཆོག་སོགས་ཐམས་ཅད་སྤྱི་དང་མཐུན་པར་བྱའོ། །དེ་ལྟར་དཔལ་མགོན་མ་ནིང་ནག་པོའི་དབང་བསྐུར་བཀའ་གཏད་ཀྱི་ལས་རིམ་ལྟས་ཆོག་འདི་ཉིད་ཀྱང་། སྙིགས་དུས་འགྲོ་བའི་སྐྱབས་གཅིག་མཆོག་གི་སྤྲུལ་པའི་སྐུ་རིན་པོ་ཆེ་འཇིགས་མེད་

[Full Size]

དགའ་བའི་རྡོ་རྗེ་ཕྱོགས་ཐམས་ཅད་ལས་རྣམ་པར་རྒྱལ་བའི་ཞལ་སྔ་ནས་བཀའ་སྩལ་པ་ལྟར་སྣ་ཚོགས་རང་གྲོལ་གྱིས་བཀོད་པའི་དགེ་བས། བསྟན་པ་དམ་པའི་ཆོས་ཀྱི་འགལ་རྐྱེན་མཐའ་དག་ཉེ་བར་ཞི་བར་གྱུར་ཅིག །མངྒ་ལཾ། གཅིག་ཞུས།

མཉམ་མེད་སྒམ་པོ་མཆོག་གི་སྤྲུལ་པའི་སྐུས་འཇའ་འཚོན་ཟབ་གཏེར་ཆོག་ཁྲིག་གིས་དྲི་མེད་གནང་བའི་ལན་དུ་གསོལ་བ་སྙིལ་བའི་ཆུ་སྐྱེས།

[Full Size]

མཉམ་མེད་སྒམ་པོ་མཆོག་གི་སྤྲུལ་པའི་སྐུས་འཇའ་འཚོན་ཟབ་གཏེར་ཆོག་ཁྲིག་གིས་དྲི་མེད་གནང་བའི་ལན་དུ་གསོལ་བ་སྙིལ་བའི་ཆུ་སྐྱེས་ཅེས་བྱ་བ་བཞུགས་སོ།

[Full Size]

རྒྱལ་བའི་ཐུགས་རྗེ་མ་ལུས་གཅིག་བསྡོམས་པ། །པད་འབྱུང་བི་མ་ཟླ་འོད་གཞོན་ནུ་རྣམས། །སྙིགས་མ་མཐའ་སྐྱབས་མཆོག་སྤྲུལ་པའི་སྐུར་བྱོན་པའི། །ཞབས་ཟུང་རྩིབས་སྟོང་འབར་བ་སྤྱི་བོས་མཆོད། །གང་གསུང་བདུད་རྩིའི་འོད་དཀར་ཟེག་མ་ཡིས། །བདག་བློའི་ཀུ་མུ་ཏྲ་མངོན་པར་ཕྱེས་མཛད་མཐུས། །ལྷག་བསམ་ཟེའུ་འབྲུ་རྒོད་པའི་འཛུམ་ཕྲེང་འདི། །མོས་ལྡན་མགུལ་བའི་རྒྱན་དུ་བྱིན་གྱིས་རླབས།། ༈ །།དེ་ཡང་བཀའི་བདུད་རྩི་ལྷུག་པར་བསྩལ་བའི་དོན་

[Full Size]

སྐོར་ཇི་བཞིན་དུ། སྤྱིར་གསང་སྔགས་སྔ་འགྱུར་གྱི་ཆོས་ཚུལ། སྒོས་སུ་རྒྱལ་དབང་པདྨའི་ཟབ་གཏེར། ཁྱད་པར་ཡང་ཟབ་དཀོན་མཆོག་སྤྱི་འདུས་སྐོར་གྱི་དགོངས་དོན་བབས་ལུགས་རྣམས་གྲུབ་མཐའ་ཐུན་མོང་བདག་དང་མི་མཐུན་པའི་ཚུལ་རྣམས་ལ། གང་ཟག་ཕལ་མོ་ཆེ་དག་སོམ་ཉིའི་འཁྱོག་ལ་འཕྱང་མོ་ཉུག་ཅིང་། །མཁས་པའི་མིང་ཁུར་འཛིན་ཀྱང་ཆོས་ཚུལ་གྱི་སྤྱན། རྒྱང་ཐུང་བ་དག་ནི་ལོག་ལྟའི་འཁུན་བུ་ལྡིར་བར་བྱེད་པ་ཆེས་མང་བར་བྱུང་དང་འབྱུང་འགྱུར་རྣམས་ནི་རང་རང་གི་བགོ་

[Full Size]

སྐལ་དུ་ཟད་ཕྱིར་ཐབས་ཀྱིས་དབེན་མོད་ཀྱི། ཐེག་པའི་ཡང་རྩེར་མངོན་པར་འཕགས་པའི་ཆོས་ཚུལ་གྱི་འཇིངས་ལ་མོས་པའི་བློ་དང་ཡང་པའི་ཁྱོན་གྱི་ཐུགས་མངའ་རྣམས་ནི་ཆོས་དབྱིངས་བསམ་གྱིས་མི་ཁྱབ་པའི་དོན་ལ་དབང་འབྱོར་ཚེ་ཡིན་ལུགས་ཇི་བཞིན་པ་ཁོང་དུ་ཆུད་པར་གྱུར་བ་ཆོས་ཉིད་ལགས་ཏེ། རྫོགས་པ་ཆེན་པོ་ནམ་མཁའ་ཆེའི་རྒྱུད་ལས། །རྒྱ་མཚོ་ཆེན་པོར་ཆུ་རླུང་ཀུན་འབབ་ཅིང་། །རྒྱ་མཚོའི་ནང་དུ་རོ་གཅིག་གནས་པ་ལྟར། །ཆོས་རྣམས་རྫོགས་པ་ཆེན་པོར་འདུས་གསལ་ཞིང་། །མ་བཅོས་ལྷུན་གྱིས་གྲུབ་པའི་ངང་དུ་གནས། །ཅེས་གསུངས་པ་བཞིན་ལགས་མོད་ཀྱི། དེའི་ཕྱིར་ན་སྐལ་དམན་གཞན་གྱིས་ཇི་ལྟར་ལོག་པར་བལྟས་ཤིང་བརྗོད་ཀྱང་། ཟབ་དོན་གྱི་དགོངས་པ་ནི་རང་ལུགས་སོར་བཞག་གི་གཞུང་ལམ་དུ་བཞུགས་པ་ཉིད་བྱིན་རླབས་མི་ཉམས་པའི་གནད་དོན་སྙིང་པོ་ཉིད་དུ་གྲུབ་ལ། །དེ་དག་གི་ཚུལ་ལ་ཇི་ལྟར་འཇུག་ཅིང་

[Full Size]

ལག་ཏུ་བླང་ཐབས་ཀྱི་ཆོག་སྒྲིག་སྐྱབས་མཆོག་ཉིད་ཀྱིས་ལེགས་པར་བརྩལ་བ་འདི་ལས་ལྷགས་སུ་གྱུར་པ་ཞིག་ནི་རྨོངས་པ་བདག་འདྲས་འབུལ་བར་རྔོ་མི་ཐོད་ཤིང་། འདི་ཉིད་ཀྱི་ནང་བསེས་ལ། བཀའ་ཕེབས་ལྟར། ཕྱི་ལྟར་པདྨ་འོད་འབར་དུ་བསྒྲུབ་པ་ནི་དཀོན་མཆོག་སྤྱི་འདུས་ཉིད་དང་། ནང་ལྟར་དཀྱིལ་འཁོར་ལྔ་ལྡན་དུ་བསྒྲུབ་པ་ནི་ཞི་ཁྲོ་ངེས་དོན་སྙིང་པོ། གསང་བ་བྱེ་བྲག་སོ་སོར་བསྒྲུབ་པ་ནི་གང་ཟག་གི་མོས་བློ་དང་བསྟུན་པའི་སྒོས་སྒྲུབ། ཡང་གསང་ཧཱུྃ་ནག་མེ་འབར་དུ་བསྒྲུབ་པ་ནི་སྤྲོས་མེད་ཆིག་དྲིལ་རྒྱུན་ཁྱེར་དུ་ཉམས་སུ་ལེན་པའི་དབང་དུ་མཛད་མོད་ཀྱང་། ད་ལམ་བཀའ་སྩལ་གྱི་དངོས་དོན་ལ་ནི། ཆོས་བཀའ་ཡོངས་རྫོགས་ཀྱི་ཆོག་སྒྲིབ་འདི་ཀའི་སྔོན་འགྲོ་བར་ཆད་བསལ་ཕྱིར་བགེགས་གཏོར་མཚམས་གཅོད་བསོད་ནམས་གསོག་ཕྱིར་སྐྱབས་སེམས་ཡན་ལག་བདུན་པ་སོགས་དང་། ཐུན་མོང་

[Full Size]

ཁྱད་པར་གྱི་མཆོད་གཏོར་བྱིན་རླབས། ཉམ་ཐག་སྦྱོང་ཕྱིར་རྡོར་སེམས་ཡིག་བརྒྱ། ཚོགས་གཉིས་རྫོགས་ཕྱིར་མཎྜལ་འབུལ་བ་དང་བཅས་པའི་རིམ་པ་རྣམས་ལ་ནི་ཞུ་དགོས་པར་མ་གྱུར་ལ། དངོས་གཞི་ལྷ་བསྐྱེད་པའི་སྔོན་འདིར། །ཆོས་སྤྱི་འགྲོ་ལྟར་ན་མངོན་བྱང་ལྔའམ། ཆོ་ག་གསུམ་སྐད་ཅིག་དྲན་རྫོགས་སོགས་ཀྱི་བསྐྱེད་ཚུལ་དུ་མ་དང་། མདོར་བསྡུས་པའི་དབང་དུ་ཡང་། །ཇི་ལྟར་དྭངས་པའི་ཆུ་ཀླུང་ལས། །ཉ་དག་མྱུར་དུ་འཕར་བ་ལྟར། །དེ་བཞིན་སྟོང་པའི་འོད་གསལ་ལས། །སྒྱུ་འཕྲུལ་དྲ་བ་བཞེངས་པར་འགྱུར། ཞེས་གསུངས་པ་བཞིན། སྭ་བྷཱ་བའམ་ཤུ་ནྱ་ཏ་སོགས་ཀྱི་སྔགས་ལ་བརྟེན་པའི་ཆོས་ཉིད་གདོད་མའི་དབྱིངས་ལས་རང་གསལ་ཡེ་ཤེས་ཀྱི་ལྷ་བསྐྱེད་དགོས་མོད་ཀྱི། གུ་རུ་རིན་པོ་ཆེ་པདྨ་འབྱུང་གནས་ཀྱི་གསུང་གི་གསང་བའི་ལས་གཞུང་མཐའ་དག་པར་ནི། དང་པོར་དེ་བཞིན་ཉིད་རྡོ་རྗེ་ལྟ་བུའི་ཏིང་ངེ་འཛིན་ཤེས་རབ་སྟོང་པ་

[Full Size]

ཉིད་ཡུམ་གྱི་ཚུལ་དང་། གཉིས་པ་ཀུན་ཏུ་སྣང་བའི་ཏིང་ངེ་འཛིན་སྒྱུ་མ་ལྟ་བུའི་རྩལ་མདངས་ནི་ཐབས་སྙིང་རྗེ་ཆེན་པོ་ཡབ་ཀྱི་ཚུལ་དང་། གསུམ་པ་དཔའ་བར་འགྲོ་བ་རྒྱུའི་ཏིང་ངེ་འཛིན་ནི་ཟུང་འཇུག་སྲལ་གྱི་ཚུལ་དུ། ཡིག་འབྲུ་ཕྱག་མཚན་ནམ་རྒྱུའི་ཧེ་རུ་ཀ་སོགས་སྤྲོ་བསྡུ་རྣམ་རོལ་གྱི་སྒོ་ནས་ལྷ་ཚོགས་བསྐྱེད་པ་འབའ་ཤིག་འབྱུང་ནའང་། རིག་འཛིན་ཆེན་པོ་འཇའ་ཚོན་སྙིང་པོའི་གཏེར་ཆོས་འདི་དག་ཕལ་ཆེ་བར་ཏིང་ངེ་འཛིན་གསུམ་སོ་སོར་མ་ཕྱེ་བར་གཞི་སྟོང་པ་ཉིད་ཁོ་ན་ལས་སྐད་ཅིག་དྲན་རྫོགས་སུ་བསྐྱེད་ཚུལ་ཉིད་གསུངས་སྣང་བའི་ཕྱིར། །དེས་ན། གོང་གི་འཕྲོའི་མཎྜལ་གྱི་འཇུག་ཐོབ་དེར། ལྷ་གང་སྔོན་ལ་བསྐྱེད་ཀྱང་། འདི་ལྟར་སྣང་སྲིད་གཉིས་བསྡུས་ཆོས་རྣམས་ཀུན། ཞེས་པའི་ཤོ་ལོ་ཀ་སྔགས་བཅས་བརྗོད་པ་ཉིད་དགོས་པར་གོ་ལ།། ༈ །།དེ་ནས་ལྷ་བསྐྱེད་པ་དངོས་ལ། བཀའ་རིན་པོ་ཆེ་ཇི་

[Full Size]

ལྟར་ཕེབས་བཞིན། ཆོས་སྤྱི་བབས་དང་བསྟུན་ན་ཆོས་ལོངས་སྤྲུལ་གསུམ་གྱི་ངེས་པ་དང་སྦྱར་བའི་བསྐྱེད་ཚུལ་ནི་ད་ལྟའི་ཆོག་སྒྲིགས་སུ་གནང་བ་བཞིན་ཤིན་ཏུ་འཐད་པར་གདའ་ལགས་ནའང་།། ༈ །།གུ་རུ་ཉིད་ཀྱི་སྒྲུབ་གཞུང་ཕལ་མོ་ཆེར་ནི་ཕྱི་སྤྲུལ་སྐུ་ནང་ལོངས་སྐུ། གསང་བ་ཆོས་སྐུར་བསྒྲུབ་པའི་གོ་རིམ་འབའ་ཤིག་གསུངས་པ་དང་། དེ་ཉིད་ལའང་ཡི་དམ་གྱི་ལྷ་གང་དང་གང་བསྐྱེད་ཅིང་བསྒྲུབ་ཀྱང་དོན་དམ་པར་བླ་མའི་སློབ་དཔོན་ཉིད་ཀྱི་ངོ་བོར་གདོད་ནས་ལྷུན་གྱིས་གྲུབ་པར་ཐག་ཆོད་པའི་ངེས་ཤེས་མེད་མི་རུང་ཕྱིར། ཐོག་མར་བླ་མའི་བསྒྲུབ་པ་གཞུང་སྲང་ལ། སླར་བླ་མ་ཉིད་ལྷག་པའི་ལྷར་བཞེངས་ནས་དངོས་གྲུབ་ཀྱི་དོན་འབྲས་སྩལ་བར་མཛད་པའི་ངེས་ཤེས་ཀྱི་སྒོ་ནས་ཡི་དམ་གང་མོད། བསྒྲུབ་པར་གསུངས་པ། འདི་གསང་སྔགས། རྙིང་ལུགས་ཀྱི་དགོངས་དོན་དམིགས་

[Full Size]

བསལ་ལྟ་བུར་གདའ་བས་ན། ཐོག་མར་གུ་རུ་ཞི་བ་ཉིད་ཀྱི་ལས་གཞུང་འཛབ་ཀྱི་རིམ་པ་ཡན་ཆད་གྲུབ་པར་བྱས་ལ། དེ་ནས་ལོངས་སྐུ་ཐུགས་རྗེ་ཆེན་པོ་དང་། དེ་ནས་ཆོས་སྐུ་སྣང་བ་མཐའ་ཡས་ཀྱི་སྒྲུབ་གཞུང་བསྲང་བ་ཉིད་འགབ་པར་མཐོང་ལགས་ཏེ། ཚུལ་འདི་ལ་གུ་རུ་ཉིད་ཀྱི་ཞལ་ནས་ཀྱང་། །ང་ཡི་རྗེས་འཇུག་སྐལ་ལྡན་ལས་ཅན་ཀུན། །བླ་མ་བསྒྲུབ་དང་ཡི་དམ་གང་རི་རིགས། །མཁའ་འགྲོ་ལ་སོགས་ཇི་ལྟར་བསྒྲུབ་འདོད་ཀྱང་། །ངོ་བོ་ང་ལ་རྣམ་པ་གཞན་གྱི་གཟུགས། །སྐུ་མདོག་ཕྱག་མཚན་སྟངས་སྟབས་ལ་སོགས་པར། །སྒྲུབ་པར་གྱུར་ན་གང་འདོད་འགྲུབ་གྱུར་ཞིང་། །ཇི་ལྟར་འདོད་པའི་དངོས་གྲུབ་སྩོལ་བར་ནུས། །དེ་ཚེ་ཐེ་ཚོམ་ཡིད་གཉིས་སྤངས་ལ་སྒྲུབ། །ཅེས་གསུངས་ཕྱིར་དང་། བསྐྱེད་ཚུལ་ཡང་ཆོས་སྤྱི་ལྟར་ཡི་དམ་གཅིག་གི་སྒྲུབ་མཆོད་གྲུབ་ནས་དེ་ཉིད་གཤེགས་བསྟིམ་བསྡུ་བ་སོགས་བྱས་རྗེས། ཡང་

[Full Size]

གཞན་ཞིག་གི་སྐྱེད་ཆོག་དབུ་འཛུག་པའི་ལས་རིམ་ལྟ་བུ་ནི་འདི་དག་ཏུ་གཏན་ནས་དགོས་པར་མ་གསུངས་ཕྱིར། ཆོ་ག་གཞུང་ཕྱི་མ་གང་དང་གང་གི་ལྷ་བསྐྱེད་པའི་སྐབས་ལ་བབ་པ་ན་གུ་རུ་རིན་པོ་ཆེ་ཉིད་སྐད་ཅིག་གིས་ལྷ་དེ་ཉིད་ཀྱི་རྣམ་པར་སྤྲུལ་པའི་ཚུལ་དུ་མོས་པ་ཁོ་ནས་འགྲུབ་པ་ལགས་ཏེ། དེ་ལྟར་ཡང་། གུ་རུའི་ཞལ་ནས། བདག་ནི་གང་ལྟར་མོས་པའི་སྐུར་སྣང་ཞིང་། སྣང་ཡང་སྐྱེ་མེད་རྡོ་རྗེ་སྙིང་པོའི་སྐུ། །དག་པས་སྣང་བ་དེ་དང་མཐུན་པར་བསྒོམ། །སྒོམ་དང་བསྒོམ་བྱའང་བློ་ཡི་སྤྱོད་ཡུལ་ཡིན། །ལེགས་པར་རྟོགས་ན་ང་ཉིད་ཀུན་ཏུ་བཟང་། །དོན་དམ་མ་བཅོས་ཐིག་ལེར་གཅིག་པའི་སྐུ། །དེ་ཉིད་རང་དང་གཉིས་སུ་མེད་པར་ལྟོས། ཅེས་དང་། དཀྱིལ་འཁོར་ཐམས་ཅད་བདེར་གཤེགས་ཐུགས་ཀྱི་ངང་། །མ་སྐྱེས་རྡོ་རྗེ་ལྷག་པའི་ལྷ་རུ་མཐོང་། །རང་བྱུང་ཡེ་ཤེས་རང་ཤར་ཡི་དམ་ལྷ། །གུ་རུའི་སྐུ་ཡི་རྣམ་འགྱུར་ཉིད་ཡིན་པས། །སྒྲུབ་ཐབས་མཐར་ཐུག་ཡིན་ནོ་རྟག་ཏུ་སྒོམས། ང་དང་

[Full Size]

གཉིས་སུ་མེད་པར་མངོན་སངས་རྒྱས། ཞེས་གསུངས་ཞིང་།། ༈ །།དེ་བཞིན་དུ། བདག་མདུན་ཐ་དད་རིམ་ཅན་དུ་སྒོམ་པ་ཐམས་ཅད་ཐུན་མོང་བའི་གདུལ་བྱ་དང་། དབང་པོ་འབྲིང་མན་ཆད་ལ་དགོངས་ནས་བསྟན་པ་ལགས་ཀྱི། དབང་རྣོན་སྐལ་རབ་ཀྱི་བློ་ལྡན་པ་ནི་བདག་བསྐྱེད་གཉིས་པོ་ཙམ་དུ་མ་ཟད་དེ། ཇི་ལྟར་སྣོད་ཀྱི་འཇིག་རྟེན་དུ་སྣང་བ་ཐམས་ཅད་ནི་འོད་གསལ་དབྱིངས་ཀྱི་ཞིང་ཁམས་བརྒྱ་ཆད་ཕྱོགས་ལྷུང་དང་བྲལ་བའི་གཞལ་ཡས་སུ་གདོད་ནས་གྲུབ་པ་དང་། བཅུད་ཀྱི་སེམས་ཅན་དུ་སྲིད་ཚད་ནི་ཀུན་བཟང་བླ་མའི་རྣམ་རོལ་སྐུ་གསུམ་ཡེ་ཤེས་ཀྱི་ལྷ་ཚོགས་སུ་རང་བྱུང་ཞིང་། དེ་ལྟ་བུའི་ཡིན་ཚུལ་ལམ་གནས་ཚུལ་འདི་ཉིད་ཀྱི་དབང་དུ་ནི། ཕྱི་ལྟར་སྣོད་དང་བཅུད། ནང་ལྟར་གཞལ་ཡས་དང་ལྷ་ཚོགས། གསང་བ་སྐུ་དང་ཞིང་ཁམས། དེ་ཁོ་ན་ཉིད་དུ་དབྱིངས་དང་ཡེ་ཤེས་དབྱེར་མེད་ཀྱི་ངང་དུ་འདུ་འབྲལ་མེད་པར་མཉམ་པ་ཉིད་དུ་གདོད་ནས་དག་པ་ཆེན་པོར་རྫོགས་ཚུལ་ནི། གཞུང་ཐམས་ཅད་ལས་ཀྱང་། སྐུ་དང་ཞིང་ཁམས་

[Full Size]

ཡེ་ནས་འདུ་འབྲལ་མེད། ཞེས་སོགས་གསུངས་པས་གསལ་མོད་ཀྱི།། ༈ །།དེའི་ཕྱིར་ན་བདག་མདུན་ཐ་དད་དུ་ལྟ་བའི་སྐབས་ཐོག་མ་ལགས་པས། ཅིར་སྣང་དག་པ་རབ་འབྱམས་གསང་གསུམ་མི་ཟད་རྒྱན་འཁོར་གྱི་ཀློང་ནས་ཆོ་གའི་ཚུལ་ཙམ་གྱི་བ་ནི་དོན་གྱི་གསལ་འདེབས་སུ་གདབ་པ་དང་། འོན་ཏེ་འདི་ལྟ་བུའི་ཚུལ་ནི་རྟོགས་པ་མངོན་གྱུར་གྱི་རྣལ་འབྱོར་ཆེན་པོ་དག་གི་སྤྱོད་ཡུལ་ཡིན་ཚེ། དང་པོ་ལས་ཀྱི་གང་ཟག་རྣམས་ཀྱིས་ཇི་ལྟར་བྱ་ཞེ་ན། དེ་ལྟ་བུའི་དོན་ཇི་ལྟ་བ་ཁོང་དུ་ཆུད་པར་མ་གྱུར་ཀྱང་། ཆོས་ཀྱི་དབྱིངས་བསམ་གྱིས་མི་ཁྱབ་པའི་གནས་ལ་མོས་པ་རྒྱ་ཆེན་པོས་ཀྱང་འགྲུབ་པར་འགྱུར་བ་ནི་ཆོས་ཉིད་ཀྱི་བདེན་པའི་སྟོབས་ལགས་ཤིང་། དེའི་ངང་ནས་ལྷ་དང་དཀྱིལ་འཁོར་གྱི་རྣམ་གྲངས་གང་ཇི་སྙེད་པ་ཐམས་ཅད་རང་རིག་བླ་མའི་རོལ་རྩལ་ཡིན་ལ་ཡིན་པར་བློ་ངེས་པ་ཁོ་ནས་དོན་ཀུན་འགྲུབ་པར་འགྱུར་བ་སྟེ། གུ་རུའི་ཞལ་ནས། ང་ལ་བརྟེན་ནས་ཚོགས་

[Full Size]

གཉིས་ཀྱི། །ཡོན་ཏན་བསྒྲུབ་པ་ཐམས་ཅད་ཀྱང་། །ང་ཡིན་ང་ནི་ཀུན་ཏུ་བཟང་། །ཀུན་བཟང་ཀུན་ལ་ཁྱབ་ཅིང་གདལ། །ཀུན་བྱེད་ཀུན་རིག་ཀུན་ཏུ་གསལ། །ཞེས་དང་། ང་ཡི་སྐུ་ཉིད་ཞི་བའམ། །ཡང་ན་ཁྲོ་བོར་བསྒོམ་ཀྱང་རུང་། །ཕྱག་རྒྱ་རྒྱན་གཅིག་པའམ་གཉིས། །ཞལ་ཕྱག་མང་ཉུང་ཅི་ལྟ་བུར། །སྒོམས་ཀྱང་འཁྲུལ་པ་ཡོང་ཡེ་མེད། །ཅི་ཕྱིར་ང་ནི་ཀུན་ཏུ་སྣང་། །ང་ཉིད་གཙོ་དང་འཁོར་དུ་བཅས། །མང་ཉུང་བློ་ཡི་བྱེ་བྲག་གིས། །ཇི་ལྟར་ནུས་པར་སྒོམས་ཡང་རུང་། །ཞེས་སོགས་གསུངས་ཕྱིར། དེས་ན་ཅིར་སྣང་བླ་མའི་དཀྱིལ་འཁོར་ཉིད་དུ་བསྒྲུབ་པའི་བདག་སྐྱེད་ཁོ་ནས་ཁོག་ཕུགས་ཏེ། ཡི་དམ་མཁའ་འགྲོ་ཐམས་ཅད་བླ་མའི་རྣམ་འགྱུར་དུ་ཤེས་པར་བྱ་བ་དང་། མཆོད་གཏོར་ཚོགས་འཁོར་སོགས་ཀྱང་རང་བྱུང་རང་ལ་མཆོད་པའམ། །ལྷ་ལ་ལྷ་མཆོད། ཆོས་ཉིད་ལ་ཆོས་ཉིད་རོལ། མཆོད་བྱ་མཆོད་བྱེད་གཉིས་མེད་དུ་ཤེས་

[Full Size]

པ་ནི་འདི་སྐབས་ཀྱི་དགོངས་དོན་སྙིང་པོ་ལགས་པ་དང་། ཡང་། གལ་ཏེ་ཞི་ཁྲོ་ངེས་དོན་གྱི་བཤགས་སྐོངས་ལྟ་བུ་བྱེད་པའི་ཚེ་ན་ནི། བདག་མདུན་ཐ་དད་པའི་བསྒྲུབ་ཚུལ་དེ་ཀའི་རང་གཞུང་ནས་འབྱུང་བ་ལྟར་དང་། གཞན་ཡང་། སློབ་མ་ལ་དབང་བསྐུར་བའམ། རབ་གནས་དང་གཤིན་དོན་སོགས་ཁྱད་པར་བའི་བྱ་བ་བསྒྲུབ་དགོས་པའི་སྐབས་སུ་ནི་བདག་མདུན་སོ་སོ་ལས་ཀྱང་མདུན་བསྐྱེད་གཙོ་ཆེར་བསྒྲུབ་ཚུལ་ནི་ཆོས་སྤྱི་འགྲོ་དང་མཚུངས་པ་ཉིད་ལགས།། ༈ །།བདག་སྐྱེད་འབའ་ཤིག་པའི་སྐབས་ཉིད་ལའང་། བླ་མ་ཡི་དམ་མཁའ་འགྲོ་རྣམས་ནི་གོང་དུ་སྨོས་པ་བཞིན་དབྱེར་མེད་ཀྱི་མོས་བློའི་ངང་ནས་སྔ་ཕྱིའི་རིམ་པ་ཡང་ཆོག་སྒྲིག་ཉིད་ལྟར་གྲུབ་རྗེས། བཀའ་སྲུང་ཆོས་སྐྱོང་གི་རིགས་རྣམས་ནི་བདག་སྐྱེད་ཀྱི་རྣམ་པར་སྤྲུལ་པ་ཡང་སྤྲུལ་གྱི་བྱེ་བྲག་བཀའ་ཉན་ཕོ་ཉའི་ཚུལ་དུ་རང་གི་མདུན་དུ་གུས་པས་འཁོད་པར་དམིགས་ནས་

[Full Size]

མཆོད་བསྟོད་དང་ཕྲིན་ལས་བཅོལ་བར་བྱ་ཞིང་། དེ་དག་གི་གཏོར་མ་ནི་བར་འདིར་མི་བསྐྱེལ་ཏེ། ཐམས་ཅད་ཀྱི་མཐར་ཟོར་ཟློག་སོགས་དྲག་ལས་ཀྱི་སྐབས་ཡིན་ན་དེ་དང་མཐུན་པར་ཟོར་དུ་འཕངས་ཤིང་། རྒྱུན་གྱི་བསྐངས་གསོ་ལྟ་བུ་ལ་ནི་འཆད་མདོའི་མཐར་གཏོར་མ་རྣམས་ཕྱིར་འབུལ་བ་ལགས་ཏེ། འདིའི་དགོས་དོན་ནི། སྲུང་མའི་གཏོར་མ་རྣམས་ཕྱིར་འབུལ་བ་དང་མཚུངས་པར་དེ་རྣམས་དགྱེས་པར་འགྱུར་བར་བཤད་ཅིང་། གཏོར་མ་མ་ཕུལ་གྱི་རིང་ལ་དེ་རྣམས་ཀྱང་དམ་ཚིག་གི་གྲལ་དུ་འདུས་ནས་བཞུགས་པ་ཡིན་ཕྱིར། ཚོགས་དང་བསྐངས་བ་སོགས་མཐའ་དག་གིས་མཉེས་པར་བྱས་ནས་མཐར་འཆད་མདོ་སོགས་ཀྱིས་སྔོན་གྱི་དམ་ཚིག་བསྒྲག་ཅིང་གཏོར་མ་ཕུལ་ནས་གཤེགས་སུ་གསོལ་བ་ལགས།། ༈ །།ཆོག་སྒྲིབ་འདིའི་ཆོས་སྲུང་རྣམས་ཀྱི་གོ་རིམ་ཀྱང་གཞན་ནི་འདི་ཁོ་ན་ལྟར་

[Full Size]

ལས། རྡོ་རྗེ་དེ་མོའི་གཏོར་ཆོག་ནི་ཐམས་ཅད་ཀྱི་རྗེས་ལ་བྱད་ན་འཐད་པར་སེམས་ཏེ། ཅིའི་ཕྱིར་ན། ཕོ་རྒྱུད་དང་མོ་རྒྱུད་ཀྱི་ཁྱད་པར་དང་། དེ་ལས་ཀྱང་མགོན་པོ་མ་ནིང་སོགས་ནི་ཡེ་ཤེས་པ་ཉིད་ཡིན་པ་དང་། གཟའ་དང་དམ་ཅན་ཡང་དོན་ལ་ཡེ་ཤེས་པ་ཡིན་ཀྱང་རྣམ་པ་ལྟར་ན་ཡེ་ཤེས་འཇིག་རྟེན་སོ་མཚམས་སུ་བཞུགས་པར་བཤད་ལ། དེ་མོ་ནི་ངོ་བོ་ཡེ་ཤེས་ཀྱི་མཁའ་འགྲོ་ཡིན་ནའང་། གནས་སྐབས་སུ་འཇིག་རྟེན་པ་ཁོ་ནའི་ཚུལ་འཛིན་ཕྱིར། དེས་ན་རྗེས་མར་བྱེད་པའི་རྒྱུ་མཚན་དེ་བཞིན་ལགས། ལར་ཡང་རྙིང་མའི་ཆོས་སྐོར་མང་པོར་བདག་མདུན་ཟུང་འཇུག་ཏུ་བསྒྲུབ་པའི་ཚུལ་འདི་ཁོ་ནར་འབྱུང་བ་ཐུགས་ལ་མ་ཤོང་བར། རྒྱུད་དེའི་དགོངས་པ་མ་ཡིན་པར་སྔགས་བཙུན་སྐྱེ་བོ་དག་གི་བློ་བཟོར་འདུག་གསུངས་མཁན་དང་། ལས་བྱང་ཚར་གཅིག་གིས་བདག་མདུན་བུམ་གསུམ་གའི་གོ་ཆོད་པར་འདོད་པ་ཡང་རྙིང་ཧྲུལ་བ་དག་གི་ཟོག་ཆོས་སུ་གདའ་གསུངས་

[Full Size]

པ་དང་། དབང་བསྐུར་གྱི་སྐབས་དག་ཏུའང་། གསར་མའི་ཕྱག་བཞེས་ལྟར་སློབ་དཔོན་བདག་ཉིད་དཀྱིལ་འཁོར་དུ་ཞུགས་ནས་སློབ་མ་ལ་ཇི་ལྟར་བསྐུར་བ་བཞིན་གྱི་བདག་འཇུག་མི་བྱེད་པར། ཏིང་ངེ་འཛིན་གྱི་བདག་འཇུག་གིས་ཆོག་པར་འདོད་པ་ཡང་རྙིང་མའི་ཆོས་གཞུང་དང་གང་ཟག་རྣམས་ཚད་ལྡན་དུ་མི་འགྱུར་ཚུལ་སོགས་ཀྱི་བཀའ་བཀྱོན་སྣ་ཚོགས་མཛད་མཁན་སྔ་ཕྱི་དཔག་མེད་བྱུང་མོད་ཀྱང་། ཐེག་པའི་བྱེ་བྲག་དང་རྒྱུད་སྡེའི་རིམ་པ་མཐའ་ཡས་པའི་ཚུལ་གྱི་ཐུགས་བསམ་མ་གནང་བའི་སྐྱོན་ཤ་སྟག་ཏུ་འདུག་ནའང་། སོ་སོའི་བཞེད་པ་དང་ནི་མ་མཐུན། རྙིང་མའི་རྒྱུད་ཀྱི་ལུང་ཁུངས་རྗོད་རུང་རྒྱུད་ཉིད་ཀྱང་ཚད་མར་མི་འཛིན་ཚེ། བཀའ་བཀྱོན་མཛད་པ་པོ་རྣམས་སྐུ་དབང་གིས་གཅོད་པ་ལས་གཞན་པའི་ཐབས་མ་མཆིས་མོད་ཀྱི། གསར་མའི་རྒྱུད་སྡེ་དུས་ཀྱི་འཁོར་ལོ་མན་

[Full Size]

ཆད་ཐམས་ཅད་ནི་མ་ཧཱ་ཡོ་གའི་སྡེ་མཚན་ཡིན་ལ། རྙིང་ལུགས་ལ་དེའི་སྟེང་དུ་ཨ་ནུ་དང་ཨ་ཏི་སོགས་ཡོད་ཕྱིར་ཆོས་སྐད་མི་མཐུན་པའི་རྒྱུ་མཚན་ནི་དེ་ལྟ་བུའི་ཁྱད་པར་ཡིན་ནའང་། བློ་ལ་མི་ཤོང་མཁན་རྣམས་ལ་བརྗོད་པའི་དགོས་པ་ནམ་ཡང་མ་མཆིས་ཤིང་། རྙིང་མ་བར་རློམ་པའི་གཏི་ཐུག་འགའ་ཞིག་ཀྱང་། དཀོན་མཆོག་སྤྱི་འདུས་ཀྱི་པས་བྱང་འདི་ལ་བཞུགས་གསོལ་མ་ཚང་འདུག་ཟེར་བ་སོགས་ཀྱང་སྣང་བ་ནི། ལྷ་ཉིད་རང་ལ་རང་ཉིད་ལྷ། ཞེས་སོགས་ཀྱི་དགོངས་པ་མ་ལོན་པ་དང་། དོན་དམ་པར་ནི། རང་སེམས་བླ་མ་ལྷ་རུ་གནས། ཞེས་པ་ལྟར་ལགས་ཀྱང་གནས་སྐབས་གདུལ་བྱའི་མོས་བློ་དང་བསྟུན་ནས་ཡེ་ཤེས་པ་སྤྱན་དྲངས་པའི་ཚུལ་ཙམ་བགྱིས་པ་དེ་ཡང་རང་རང་ལ་དབྱེར་མེད་བསྟིམ་ཞིང་དམ་ཡེ་བསྲེས་ཚར་ནས་ཕྱི་རོལ་དུ་བཞུགས་སུ་གསོལ་རྒྱུ་ག་ལ་འོངས་ཀྱང་། ཆོས་ཀྱི་གོ་རྒྱ་མ་འཁྲོལ་བའི་རིགས་ལ་ནི། ལོག་པའི་

[Full Size]

ལམ་ལ་མཐའ་མེད་ཕྱིར། དེ་དག་འདིར་ནི་སྤྲོ་བྱ་མིན། ཞེས་པ་ལྟར་གྱུར་མོད།། ༈ །།འགག་དོན་དུ་ཅི་ཞུ་ན། བཀའི་ཕེབས་ཚོགས་ལྟར་གྱི་ཆོག་སྒྲིག་གནང་ཚུལ་ལ། ཐོག་མར་དཀོན་མཆོག་སྤྱི་འདུས། དེ་ནས། ཐུགས་རྗེ་ཆེན་པོ་སྣང་བ་མཐའ་ཡས། དེ་ནས་རྟ་ཕག་རྣམས་རིམ་པ་བཞིན་དང་། འགུར་དྲག་ཀྱང་ཞི་བ་ཉིད་ཀྱི་མཇུག་ཐོག་ཏུ་བྱས་ནའང་རུང་མོད་ཀྱི་དྲག་ལས་ཟོར་ཟློག་སོགས་ལས་བྱེད་ཀྱི་ལྷར་མཛད་དགོས་པའི་དབང་གིས་སྐབས་འདིར་འདུག་པ་ཤིན་ཏུ་འཐད་པ་དང་། དེ་ནས་བཀའ་བརྒྱད་དང་བཅས་ཏེ་ཡི་དམ་གྱི་ལས་གཞུང་ཐམས་ཅད་གྲུབ་རྗེས་མཁའ་འགྲོ་སེང་གདོང་མ་དང་། དེ་ནས་བཀའ་སྲུང་རྣམས་རིམ་ཅན་དུ་བྱ་ཞིང་། དེ་མཐར་ཚོགས་ལས་བསྐང་བ་སོགས་དང་། དྲག་ལས་གཙོ་བོར་བྱེད་ན་བསྒྲལ་ལས་སྟབས་པ། དྲག་པོ་བཀའ་བརྒྱད་སེང་གདོང་ཆོས་སྐྱོང་སོགས་

[Full Size]

ཀྱི་དྲག་བསྐུལ་དང་། སྒོ་ཕྱེ་ལམ་བསྟན། འཆད་མདོ། གཏོར་ཟོར། བསྟན་སྐྱོང་། གཏོར་གཞོང་གི་འོག་ཏུ་དམ་སྲི་གནོན་པའི་བྲེ་སོགས་བྱ་བ་དང་། དྲག་ལས་བསྒྲུབ་སྐབས་མ་ཡིན་ན་ནི་ཚོགས་ལྷག་གི་མཇུག་ཏུ་འཆད་མདོ་བྱས་ལ་གཏོར་མ་རྣམས་འབུལ་ཞིང་། བཤལ་ཆུས་བསྟན་མ་བསྐྱང་། མཐར་རྗེས་ཆོག་གི་རིམ་པ་ཐམས་ཅད་ནི་གཞུང་ཉིད་ལྟར་མཛད་པ་དང་།། ༈ །།གོང་དུ་གུ་རུ་ཞི་བའི་འཛབ་ཀྱི་མཇུག་ཏུ་ཚེ་སྒྲུབ་ཀྱི་འཛབ་ནི་ལོང་ཁྱབ་དང་བསྟུན་ཞིང་། དབང་དང་འབྲེལ་ན་ནི་ངེས་པར་དགོས་ཏེ་ཚེ་འགུགས་ཀྱང་མཛད་ལ། དབང་དང་མི་འབྲེལ་ན་བདག་སྐྱེད་རྐྱང་སྒྲུབ་ཡིན་ཚེ། བུམ་པ་ཚེ་རིལ་ཆེ་ཆུང་སོགས་ཀྱང་དངོས་སུ་བཤམས་མི་དགོས་མོད་ཀྱི། དེ་དག་གི་དབང་ཚིག་རྣམས་ཆོག་སྒྲིག་གི་ཕྱག་དཔེར་བགོད་པ་གནང་འདུག་པ་ནི། དབང་གི་དུས་སུ་སློབ་དཔོན་གྱི་བརྗོད་པ་མ་གཏོགས་ཆོ་གའི་སྒྲིག་རིམ་ལ་ནི་མི་དགོས་པ་

[Full Size]

དགོངས་པར་མངའ་ལྟར་ལགས། མདོར་ན་ལས་བྱང་དེ་དག་སོ་སོའི་ལྷ་བསྐྱེད་པ་ཐམས་ཅད་གུ་རུ་ཉིད་ལྷ་དེ་དག་གི་རྣམ་པར་བཞེངས་པ་ཙམ་མ་གཏོགས། རེ་རེ་ལ་གཤེགས་བསྡུ་སོགས་ཀྱི་སྤྲོས་པ་གཏན་ནས་མི་འཚལ་བ་ནི་རྒྱུད་སྡེ་གོང་མར་གྱུར་པའི་ཁྱད་དོན་ལགས་པ་དང་།། ༈ །།ལོ་ཆེན་རིན་བཟང་གི་རྒྱུད་སྡེའི་རིམ་པ་སོ་སོའི་ལུགས་ལྟར་མཛད་པ་དང་། ཇོ་བོས་ཐམས་ཅད་གཅིག་ཏུ་དྲིལ་ཐབས་གནང་བ་དེ་གཉིས་གང་ཟག་རིམ་གྱིས་ས་དང་གཅིག་ཅར་བའི་ཁྱད་དོན་ལྟ་བུར་འདུག་མོད་ཀྱི། འདིར་ནི་ཆོག་གཞུང་འདི་དག་ཐམས་ཅད་རྒྱུད་སྡེ་གོང་མ་ཤ་སྟག་ཡིན་པའི་ཚུལ་ཡང་མཁྱེན་པ་ཡེ་ཤེས་ཀྱི་ཀློང་ཆེན་པོར་བཞུགས་པར་མཛད་དུ་གསོལ།། ༈ །།དེ་ལྟར་ཡང་རྗེ་ཉིད་རྒྱལ་བ་པདྨ་འབྱུང་གནས་ཀྱི་སྐུ་གསུང་ཐུགས་ཡེ་ཤེས་རྡོ་རྗེའི་སྒྱུ་འཕྲུལ་དུ་བྱོན་པ་ལགས་ཚེ། ཆོས་ཚུལ་འདི་དག་གི་གནས་ལ་མི་མཁྱེན་མི་གཟིགས་པ་

[Full Size]

རྡུལ་ཕྲ་རབ་ཙམ་ལྟ་ག་ལ་ཞིག་སྟེ། ཕྱི་རབས་རྗེས་འཇུག་གི་གདུལ་བྱ་ལ་དགོངས་ནས། བདག་ལ་གསང་སྔགས་རྙིང་ལུགས་ཀྱི་བབས་དང་འགྲོས་ལ་བསྟུན་པའི་སྐབས་དོན་སྨྲ་བར་གྱིས་ཤིག་པའི་བཀའ་རིན་པོ་ཆེ་ཇི་ལྟར་བསྩལ་བ་སྤྱི་བོར་བླངས་ཏེ། རང་གི་གོ་ཚོད་དང་། རིག་འཛིན་ཆེན་པོ་འཇའ་ཚོན་སྙིང་པོ་ཉིད་ཀྱི་ཕྱག་བཞེས་མཐོང་བ་བརྒྱུད་པ་ལྟར། ཅི་ནུས་སུ་ཡི་གེར་བཀོད་ནས་ཕུལ་བ་འདི་ཡི། དགེ་ཚོགས་སྟོན་ཀའི་ཟླ་ལྟར་དཀར་བའི་མཐུ་ནུས་ཀྱིས་མཁའ་མཉམ་འགྲོ་ཀུན་རྩ་གསུམ་དབྱེར་མེད་བླ་མ་མཆོག་གི་གོ་འཕང་ལ་འཁོད་པར་གྱུར་ཅིག །ཚུལ་འདི་གངས་ཅན་སྒྲུབ་རྒྱུད་མཐའ་དག་གི། གཙུག་རྒྱན་མཉམ་མེད་ཟླ་འོད་གཞོན་ནུ་ཡི། །སེང་གེའི་ཁྲི་ལ་ཡང་དག་གཟི་འབར་བའི། རྒྱལ་མཆོག་སྤྲུལ་པའི་སྐུ་དེའི་བཀའ་བཞིན་དུ། སྙིགས་མཐའི་ངང་ཚུལ་ལ་སྐྱོའི་སྤོང་བ་པ། སྣ་ཚོགས་རང་གྲོལ་

[Full Size]

རྒན་པོས་ཀོང་རོང་མཐིལ། རྒོད་ཚང་བྲག་གི་བྱ་སྐྱིབས་ག་ལ་བར། །བྲིས་ནས་ཕུལ་དགེས་གཞན་ཕན་འགྲུབ་པར་ཤོག །ཅེས། ཆུ་ཡོས་རྒྱལ་གྱི་ཟླ་བའི་དཀར་ཕྱོགས་མངོན་པར་འཕེལ་བའི་དུས་དགེ་བར་བྲིས་པ་མངྒ་ལཾ། ཡང་རེ་ཤིག་གི་ཚེ་མཚུངས་བྲལ་མཆོག་གི་སྤྲུལ་པའི་སྐུ་དེ་ཉིད་ཀྱིས་དྲི་བའི་ཆབ་ཤོག་སྩལ་བའི་ནང་ཚན་ཞིག་ཏུ། གསང་སྔགས་བླ་མེད་ཀྱི་དཀྱིལ་མཆོག་ཐམས་ཅད་དུ་གསུངས་པའི་ནང་མཆོད་ཀྱི་གཙོ་བོ་བདུད་རྩི་སྨན་གྱི་མཆོད་པ་དང་། རཀྟ་དམར་གྱི་མཆོད་པ་གཉིས་ཀྱི་ངོ་བོ་དང་དབྱེ་བ་སོགས་ལ་གཞུང་དང་བླ་མ་ཐ་དད་ཀྱི་ཕྱག་བཞེས་ངོས་འཛིན་སོགས་མི་འདྲ་བའི་ཁྱད་དོན་གྱི་དྲི་བ་འགའ་ཞིག་གནང་བའི་སྒེར་དོན་མདོར་བསྡུས་ཀྱི་མཆིད་ལན་ནི་སྔོན་དུ་ཕུལ་གྲུབ་པ་འདིར་མ་བཀོད་ཀྱང་། སྤྱི་དོན་འགའ་ཞིག་སླར་ཡང་ཞིབ་མནན་གྱི་ཚུལ་

[Full Size]

དུ་སྙན་དབང་རིན་པོ་ཆེར་གསོལ་བ་ནི།། ༈ །།དེ་ཡང་སྤྱིར་གསང་སྔགས་ཀྱི་ཡོ་བྱད་དམ་རྫས་མཐའ་དག་ལ་རེ་རེ་ནས་ཐབས་ཤེས་ཟུང་འཇུག་གི་མཚན་ཉིད་རྫོགས་མོད་ཀྱང་། སྐབས་འདིར་སྨན་རག་གཉིས་པོའི་མཚན་ཉིད་ལ་ནི་བདུད་རྩི་ནི་བྱང་ཆུབ་ཀྱི་སེམས་དཀར་ཆ་ཐབས་ཀྱི་རང་བཞིན་གཙོ་ཆེ་བས་དཀྱིལ་འཁོར་གྱི་གཡས་སུ་བཤམས་ཞིང་། ཚོགས་འཁོར་དང་གནས་ཁང་བདག་གཞན་སོགས་སྣོད་བཅུད་ཀྱི་དངོས་པོ་ཀུན་ལ་འཐོར་བ་ཙམ། འདི་ལ་གཞུང་ལ་ལར། འབྱོར་ན་གཏོར་མ་ཇི་ཙམ་ཡོད་པའི་གྲངས་དང་མཉམ་པར་བདུད་རྩིའི་སྣོད་བཤམས་པར་གསུངས་སོ། གྱིས་དྲ་དྲི་འབགས་རྩོགས་ཉེས་སྒྲིབ་གདོན་བགེགས་སོགས་མཐའ་དག་སེལ་ཞིང་བྱིན་གྱིས་རློབས་པའི་ནུས་པར་ལྡན་པའི་ཐབས་ཀྱི་དམ་རྫས་ཡིན་ལ།། ༈ །།རཀྟ་ནི་ཤེས་རབ་དམར་ཆ་ཡུམ་གྱི་རང་བཞིན་གཙོ་ཆེ་བས་ལྷ་ཚོགས་མ་ལུས་དགྱེས་པ་བསྐོངས་ཞིང་དམ་ཚིག་ཉན་པོའི་རྒྱུད་བསྐུལ་ནས་རང་བཞིན་གྱིས་ཕྲིན་ལས་ཐོགས་

[Full Size]

མེད་དུ་འགྲུབ་པར་བྱེད་པའི་ལྷ་ཚོགས་དབང་དུ་བསྡུད་པའི་དམ་ཚིག་གི་རྫས་ཡིན་ཕྱིར་དཀྱིལ་འཁོར་གྱི་གཡོན་གྱི་ཆར་གཤམས་པ་དང་།། ༈ །།གཏོར་མ་ནི་ཡབ་ཡུམ་ཐབས་ཤེས་སྣང་སྟོང་ཟུང་དུ་འཇུག་ཅིང་གཉིས་མེད་བདེ་བ་ཆེན་པོའི་ཀློང་དུ་ཐུགས་དམ་ཡོངས་སུ་སྐོང་བར་བྱེད་པའི་དམ་རྫས་ཀྱི་གཙོ་བོ་ཡིན་ཕྱིར་དབུས་སུ་བཤམས་པའི་གྲངས་མང་ན་ཇི་ལྟར་རིགས་པར་བཀོད་དེ། འདི་ལ་ནི་བྱེ་བྲག་ཏུ་ལྷ་བསྙེན་པའི་སྐབས་སུ་བདག་སྐྱེད་གཙོ་ཆེ་བས་གཏོར་ཞལ་རང་ཉིད་ལ་སྟོན་པར་བཤམས་པ་དང་། སྒྲུབ་པའི་སྐབས་སུ་མདུན་གཙོ་ཆེ་བས་གཏོར་ཞལ་དཀྱིལ་འཁོར་གྱི་སྟོན་པ་དང་། ལས་སྦྱོར་གྱི་སྐབས་སུ་དམིགས་ཡུལ་གཙོ་ཆེ་བས་གཏོར་ཞལ་དམིགས་བྱ་གང་ཡིན་གྱི་ཕྱོགས་སུ་སྟོན་དགོས་པར་བཤད་པ་སོགས་འབྱུང་མོད་ཀྱི།། ༈ །དེས་ན་གོང་གི་འཕྲོར། སྨན་རཀ་གཉིད་

[Full Size]

ཀྱི་ངོ་བོ་དང་བྱེད་ལས་བཤམས་ཚུལ་སོགས་སྤྱི་ཙམ་དུ་ནི་དེ་ལྟར་ལགས་ཤིང་།། ༈ །།བྱེ་བྲག་ཏུ་སོ་སོའི་རྒྱུ་དང་སྦྱར་ཚུལ་གྱི་རིམ་པའི་དབང་དུ་བགྱི་ན། དིང་སང་གི་ཆོ་ག་མཁན་པོ་ཕལ་མོ་ཆེས་ནི། སྣོད་གཉིས་ཀར་ཆང་ཕུད་ཕལ་པ་རེ་བླུགས་པ་ལ་བྱིན་རླབས་ཀྱི་ཚིག་བཤར་རེ་ཙམ་ངག་འདོན་བྱས་པ་དེས་བདུད་རྩི་དང་རཀྟའི་གོ་ཆོད་པ་ཡིན་རྒྱུར་རློམས་མོད་ཀྱང་། དེས་ནི་ལྷ་ཚོགས་ཐུགས་དམ་སྐོང་བ་དང་སྲུང་མ་ལ་འདུ་ནུས་པར་དཀའ་ཞིང་། དེ་མ་ནུས་ཚེ་དགོས་དོན་གྱི་དངོས་གྲུབ་དང་ཕྲིན་ལས་འགྲུབ་པ་སོགས་ཀྱང་ག་ལ་འབྱུང་སྟེ། ཆོ་གའི་གཟུགས་བརྙན་ཙམ་དུ་ཟད་མོད། ལྷ་དང་དམ་ཅན་འདུ་བར་བྱེད་པ་ལ་སྒྲུབ་པ་པོ་དམ་ཚིག་གཙང་ཞིང་ལྟ་དགོངས་དང་ལྡན་པ། སྔགས་ཚིག་དང་ཆོ་ག་དག་ཅིང་ཏིང་ངེ་འཛིན་གསལ་བ། རྫས་དང་ཡོ་བྱད་འཛོམས་ཤིང་གཙང་སྦྲ་འཐོན་པ་སོགས་དགོས་པར་གསུངས་པའི་ཕྱིར་རོ།། ༈ །།དེས་ན་དང་པོར་

[Full Size]

བདུད་རྩིའི་གཞི་མ་ནི་ཛ་གད་དཔའ་བོ་ཞེས་ཆང་སྣ་ལྔ་ཡིན་ཏེ། ནས་ཆང་། འབྲས། གྲོ་ཆང་། རྒུན་ཆང་། མེ་ཏོག་བྲང་ཆང་ཆང་དང་ལྔ་ཡིན་ལ། དེ་ལ་འདེབས་རྒྱུའི་རྫས་ནི་བདུད་རྩི་ཨ་མྲྀ་ཏ་སྟེ། སྤྱིར་བདུད་རྩི་ལ་ཆོས་བདུད་རྩི། དོན་བདུད་རྩི། རྟག་བདུད་རྩི། དམ་རྫས་བདུད་རྩི། སྨན་བདུད་རྩི་དང་ལྔ་ཡོད་པའི་ནང་ནས་སྐབས་འདིར་རྗེས་མ་གཉིས་པོ་ལ་འཇུག་པ་ལགས་ཤིང་། དེ་གཉིས་ཀྱི་དམ་རྫས་བདུད་རྩི་ནི་རང་བྱུང་ལུས་ཀྱི་བདུད་རྩི་ཆེ་ཆུང་གཉིས། བྱང་སེམས་ཐབས་ཤེས་གཉིས། ཤ་ཆེན་གྱི་དྭངས་མ་མ་དྷྱ་པ་ཞེས་པའམ་བོད་སྐད་དུ་དབུས་གནས་ཅེས་བྱ་བ་རྐང་དང་། གོ་རོ་ཙ་ན་གཉིས་པོ་གང་རུང་སྟེ། དེ་ལྟར་རྩ་བའི་བདུད་རྩི་ལྔ་ནི་དམ་རྫས་བདུད་རྩི་ཡིན་ལ། དེ་ལྔའི་སྐྱོབས་དང་འཕྲོད་དུ་འགྱུར་བའི་རྫས་རྣམས་ལ་ནི་སྨན་བདུད་རྩི་ཅེས་བྱ་སྟེ། དེ་ལྟར་རྩ་བ་དང་སྐྱོབས་རྣམས་ཚང་བར་སྦྱར་བ་ནི་རྩ་བརྒྱད་ཡན་ལག་སྟོང་

[Full Size]

སྦྱར་གྱི་བདུད་རྩི་ཡིན་པ་དང་།། ༈ །།བདུད་རྩི་ལྔའི་རྩ་བ་བརྒྱད་ལའང་། ཕྱིའི་རྩ་བ་བརྒྱད། ནང་གི་བརྒྱད། གསང་བའི་བརྒྱད། དེ་ཁོ་ན་ཉིད་ཀྱི་བརྒྱད་ཟུག་པ་རྩ་བའི་བདུད་རྩི་བརྒྱད། འདྲིལ་བ་སྡོང་པོའི་བརྒྱད། གྱེས་པ་ལོ་འདབ་ཀྱི་བརྒྱད། སྨིན་པ་འབྲས་བུའི་བདུད་རྩི་བརྒྱད་དེ། དེ་ལྟར་བདུད་རྩིའི་རྩ་བ་བརྒྱད་བརྒྱད་དྲུག་ཅུ་རྩ་བཞི་ཡོད་དོ།། ༈ །།ཡན་ལག་སྟོང་ནི། བདུད་རྩིའི་རྣམ་གྲངས་ལྔ་པོ་རེ་རེ་ལ་ནང་ཚན་བརྒྱ་བརྒྱ་ཡོད་པ་བསྡོམས་ལྔ་བརྒྱ་དང་། །དེ་རེ་རེའི་སྐྱོབས་ལྔ་བརྒྱ་རྣམས་བསྡོམས་པས་སྟོང་དུ་ཚང་བར་ཚུལ་བཞིན་སྦྱར་ནས་བསྒྲུབས་པ་དེ་ལ་བདུད་རྩི་འདི་དག་གི་ངོས་འཛིན་ནི་བདུད་རྩི་རྒྱུད་རྣམས་དང་སྨན་སྒྲུབ་ཀྱི་གཞུང་དག་ལས་འབྱུང་མོད་ཀྱི། འདི་ནི་ཡི་གེ་མང་བར་འགྱུར་བ་དང་། སོ་སྐྱེ་ཕལ་པའི་བློར་མི་ཤོང་བས་གསང་སྔགས་གསང་སྒྲོགས་རུ་འགྱུར་ཕྱིར་མ་བཀོད་དོ། །ཨ་མྲྀ་ཏ་ཞེས། བོད་སྐད་དུ་འཆི་མེད་དང་། ར་ས་ཡཱ་ན་ཏེ་བཅུད་ཀྱི་ལེན་དུ་གྲགས་པ་འདི་ཉིད་ཀྱི་ནུས་པ་ནི་བསམ་

[Full Size]

གྱིས་མི་ཁྱབ་སྟེ། བདུད་རྩི་མཆོག་གི་ལུང་བམ་སོ་བརྒྱད་པ། བདུད་རྩི་འཁོར་ལོ་འབར་བ། བདུད་རྩི་བུམ་པ། བདུད་རྩི་རིན་པོ་ཆེ་ཆོས་ཉིད་གསང་བའི་རྒྱུད་ལ་སོགས་པ་བདུད་རྩིའི་རྒྱུད་སྡེ་མཐའ་དག་ནས་རྒྱ་ཆེར་གསུངས་ཀྱང་འབྲི་བར་མ་ལང་མོད་ཀྱི། འགག་དོན་མདོར་བསྡུས་པའི་ཕན་ཡོན་དུ། ཨོ་རྒྱན་རིན་པོ་ཆེའི་གསུངས་ལས། བདེར་གཤེགས་མ་ལུས་མཆོད་པའི་རྫས། །བླ་མ་ཡི་དམ་བསྡུད་པའི་རྩི། །མཁའ་འགྲོ་ཀུན་གྱི་སྙིང་སྲོག་ཡིན། སོགས་དང་། བླ་མ་མཆོད་ན་བྱིན་རླབས་འབྱུང་། །ཡི་དམ་མཆོད་ན་དངོས་གྲུབ་སྟེར། །བདེར་གཤེགས་མཆོད་ན་ཐུགས་རྗེ་འབྱུང་། མཁའ་འགྲོ་མཆོད་ན་ལུང་ཡང་སྟོན། །སྒྲུབ་པ་པོའམ་སུས་ཟོས་ཀྱང་། །ཕྱི་ཡི་ནད་གདོན་སྡིག་སྒྲིབ་སེལ། །ནང་གི་སྐྱེད་རིམ་ཏིང་འཛིན་གསལ། །གསང་བ་རང་རིག་ཆོས་སྐུར་རྟོགས། །དམ་ཚིག་ཉམ་ཆགས་ཐམས་ཅད་སྐོངས། བཅངས་པས་དུས་མིན་འཆི་བ་ཟློག །

[Full Size]

གདུག་པའི་དུག་ཡང་འཇིལ་བར་ནུས། །བསྲེགས་པས་གདོན་བགེགས་ཐམས་ཅད་སྐྲོད། །བྱུག་པས་ནད་གདོན་མ་ལུས་འཇོམས། །ཞེས་དང་། འདི་ཉིད་བསྒྲུབས་པའི་གནས་དེ་ཡང་། །དུར་ཁྲོད་བསིལ་བའི་ཚལ་མཚུངས་ཏེ། །དཔའ་བོ་མཁའ་འགྲོ་ཐམས་ཅད་འདུ། །ས་ཡུལ་བྱིན་དང་ལྡན་པར་འགྱུར། །ཆར་ཆུ་ཕེབས་ཅིང་ལོ་ཕྱུགས་ལེགས། །གང་དུ་བསྒྲུབས་པའི་གནས་དེ་རུ། །སུ་དད་མི་རྣམས་ཏིང་འཛིན་འཆར། །འདི་ཟོས་ཚེ་ཡི་དུས་བྱས་ཀྱང་། །ཕོ་མོ་བཟང་ངན་མེད་པ་རུ། །རིག་པ་འཛིན་པའི་ས་ལ་གནས། །དེ་ཕྱིར་མཆོག་གི་དམ་རྫས་སོ། །ཞེས་གསུངས་པ་འདི་ཙམ་གྱིས་དོན་སྟོན་པར་འགྱུར་ཕྱིར། རྒྱས་པར་ནི་ཡི་གེ་མང་བར་འཛེམས་ནས་མ་བཀོག་པས།། ༈ །།དེས་ན་གོང་དུ་བརྗོད་པའི་ཆང་སྣ་ལྔ་པོ་ལ་ཨ་མྲྀ་ཏ་འདི་ཉིད་བཏབ་ཅིང་། གསང་སྔགས་གསར་མ་ལྟར་ན་བདུད་རྩི་རིལ་བུ་ཚུལ་དང་བསྒྲུབ་པ་ཉིད་བཏབ་ཀྱང་ཁྱད་པར་མ་

[Full Size]

མཆིས་ལ། འདིའི་བུངས་བསྐྱེད་ཅིང་ཁ་དོག་དྲི་རོ་བཟང་བར་བྱ་ཕྱིར་དུ་སྨན་བདུད་རྩིའི་ཕྱིའི་རྩ་བ་བརྒྱད་པོ་ཀ་ར་དང་སྦྱར་ནས་ཅི་འབྱོར་དུ་འདེབས་པ་ཡིན་ཏེ། བརྒྱད་པོ་དེ་ནི་སྔོན་དཔལ་ཆེན་པོས་རུ་དྲ་བཏུལ་བའི་ཚེ་ཁོའི་ཟག་པ་རྒྱ་མཚོར་ལྷུང་བ་བདུད་རྩིའི་ཤིང་དུ་སྐྱེས་པའི་རྩ་བ་ཀླུ་ཡུལ་དུ་ཟུག །སྡོང་པོ་མི་ཡུལ་དུ་སྐྱེས། ལོ་འདབ་མེ་ཏོག་འབྲས་བུ་རྣམས་ལྷ་ཡུལ་འཕྱོ་བ་བྱུང་ཞིང་། དེ་ལ་སྨན་གྱི་རྩ་བ་བརྒྱད་པོ་ཚང་བར་ཡོད་པ་ནི་ད་ལྟ་གཏེར་ནས་བྱོན་པའི་གུ་རུ་པདྨ་འབྱུང་གནས་ཉིད་ཀྱིས་བསྒྲུབས་པའི་དམ་རྫས་ཕབས་རྒྱུན་རྣམས་ལ་ཚང་བར་གསུངས་ལ། ད་ལྟ་ནི་དེ་དང་ཆ་མཐུན་པའི་སྨན་སྣ་བརྒྱད་པོ་འདི་འདེབས་པར་གཞུང་ལས་བཤད་དེ། རྩ་བ་མཱུ་ལ། སྡོང་པོ་ཙནྡ། ཡལ་ག་ལི་ཤི། ཤུན་པ་ཤིང་ཚ། ལོ་མ་གནྡྷ་ཏྲ། མེ་ཏོག་གུར་ཀུམ། འབྲས་བུ་ཛཱ་ཏི། སྙིང་པོ་ག་བུར་དང་བརྒྱད།

[Full Size]

ཡིན་པ་དང་། དེ་རྣམས་ཀྱི་ནང་ནས་གཞན་གོ་སླ་ཡང་། མཱུ་ལ་གསོ་རིག་གཞུང་ནས་འབྱུང་བའི་པུཥྐ་མཱུ་ལ་ཞེས་པ་དེ་ཡིན་ཞིང་། གནྡྷ་པ་ཏྲ་ནི་བོད་སྐད་དུ་དྲི་ཡི་ལོ་མ་ཞེས་པ་སྟེ། གསོ་རིག་ཏུ་ནི་དྲི་བཟང་ཞིའི་ནང་མཚན་གྱི་གོ་ལའམ་ག་ཡུ་ཞེས་པ་ལ་བཞེད་ཀྱང་། སྐབས་འདིར་ནི། རྒྱ་གར་གྱི་ཙནྡ་ལོ་མ་དངོས་རྙེད་ན་རབ། མ་རྙེད་ན་བོད་ཀྱི་ཙནྡ་ནི་ཤུགས་པ་ཡིན་ཕྱིར། ཀླུངས་ཤུགས་ཀྱི་ལོ་མ་གཙང་མས་རུང་བར་བཤད། དེས་ན་ཆང་སྣ་རྣམས་ལ་འདི་དག་ཚང་བར་སྦྱར་ཞིང་ཨ་རུ་ར་དང་ཀ་ར་ཡང་ཅི་འབྱོར་བཏབ་པ་བཤམས་ནས་བྱིན་གྱིས་བརླབ་དགོས་རུང་། ཆང་ཉིད་ཀྱང་ད་ལྟའི་ཆང་ཕལ་པ་གཙང་སྦྲ་མ་བྱས་པའི་ཉག་ཉོག་གང་རྙེད་ལ་བྱེད་པ་འདི་འདྲས་ནི། ཡེ་ཤེས་ཀྱི་ལྷ་ལ་གཙང་དམེའི་འཛིན་རྟོགས་མི་མངའ་ཡང་འཁོར་གྱི་མཁའ་འགྲོ་བཀའ་སྲུང་དམ་ཅན་གྱི་ཚོགས་རྣམས་རུ་ང་དང་འཁུ་ལྡོག་སྐྱེན་པས་

[Full Size]

དམ་ཚིག་གིས་རྫས་དང་མཆོད་གཏོར་ལ་འབགས་རྩོགས་ཤོར་ན་དེ་དག་མི་དགྱེས་པའི་བཀའ་ཆད་ཀྱི་ཉེས་སྐྱོན་ཇི་སྙེད་པ་ཡུལ་ཁམས་སྤྱི་དང་སྒོས་སུ་ཡོན་མཆོད་གང་ཡིན་རྣམས་ལ་ཕྲལ་དུ་འབྱུང་བས་ན། དམ་རྫས་ཚོགས་ཤིང་གཙང་བར་གལ་ཆེ་ཕྱིར། ད་ལྟ་བདག་ཅག་ནི་རང་གི་ཉེ་སྐོར་དུ་ཆང་གི་རིགས་ཀྱི་དྲི་ཙམ་རླུང་ཕྱོགས་སུ་ཡང་མི་བསྟེན་པའི་གཤིས་ཀྱིས། བདུད་རྩིའི་རྒྱུ་ནི་སྨན་སྒྲུབ་བྱེད་པའི་སྐབས་ནས་གོང་དུ་བརྗོད་པའི་ཆང་སྣ་ལྔ་པོ་རྒྱུ་དང་སྣོད་དང་ཡོ་བྱད་ལག་བྱད་མཁན་སོགས་གང་སྤྱིར་གཙང་སྦྲ་མཐའ་ཕྱིན་དུ་བྱས་པའི་ཆང་དེ་དག་རོ་ཡང་གཞན་ལས་ཁྱད་ཐོན་ཡ་མཚན་པར་འོང་སྣང་བ་དེ་ཉིད་རྩ་བའི་སྨན་རྣམས་དང་ཨ་མྲྀ་ཏ་སྦྱར་བའི་ཕྱེ་མ་རྒྱུན་དུ་ཚགས་ནས། ཚེས་བཅུ་སོགས་ནམ་དགོས་ཀྱི་སྐབས་སུ་ཕྱེ་མ་དེ་ཆུ་གཙང་ལ་ཀ་ར་དང་ལྷན་ཅིག་བཏབ་

[Full Size]

ནས་བཤམས་པ་ལགས། མདོར་ན་བདུད་རྩི་མཚན་ཉིད་དང་ལྡན་པའི་ཡོན་ཏན་དང་ནུས་པ་ནི། ཇི་སྐད་དུ། དགོངས་འདུས་ལས། །བདུད་རྩིའི་སྣོད་ནི་ཀ་པཱ་ལ། །བཅུད་ནི་བྱང་ཆུབ་སེམས་ཀྱི་རྒྱུན། །རྐྱེན་ནི་འབྲུ་གསུམ་ནུས་པས་བྱས། །དོན་ནི་སྐྱེ་འཆི་མེད་པ་ལ། །ལས་ནི་རྟོག་པའི་དྲ་བ་འཇོམས། །དེ་ཕྱིར་བདུད་རྩི་ཨ་མྲྀ་ཏ། །ལྷ་ལ་ཕོ་ན་དགྱེས་སྐོངས། །སྲིད་ལ་ཕོག་ན་དམ་ལ་འདུ། །རྣལ་འབྱོར་ལ་ཕོག་སྒྲིབ་པ་སྦྱོང་། དགྲ་ལ་ཕོག་ན་ཐལ་བར་རློག །བགེགས་ལ་ཕོག་ན་མྱོས་སུ་འཇུག །རྫས་ལ་ཕོག་ན་ནུས་པ་བསྐྱེད། །གང་ལ་ཕོག་ཀྱང་སྟོབས་དང་ལྡན། ཞེས་པ་དེ་ལྟ་བུའི་མཚན་ཉིད་དང་ལྡན་པར་བྱིན་གྱིས་རློབས་པར་གསུངས་པ་ལགས། གཉིས་པ་རཀྟ་ལ་ཡང་ངོ་བོ་དང་ངེས་ཚིག་དབྱེ་བ་རྣམས་ཀྱི་དབང་དུ་བགྱི་ན། །རཀྟའི་ངོ་བོ་ལ་ལྔ་སྟེ། སྲིད་པ་གཞིའི་རཀྟ་ནི་འབྱུང་

[Full Size]

བ་ཆུ། སྣང་བ་བརྡའི་རཀྟ་ནི་ཁ་དོག་དམར་པོ་གྱུར་ཚད། འགྱུར་མེད་དོན་གྱི་རཀྟ་ནི་སོར་རྟོག་ཡེ་ཤེས་ཀྱི་བདག་ཉིད་སྣང་བ་མཐའ་ཡས། འཁོར་བ་རྒྱུའི་རཀྟ་ནི་མའི་མངལ་ཁྲག །འབྲས་བུ་ཆེན་པོའི་རཀྟ་ནི་གདུག་པ་རཱུ་་ཏྲ་བསྒྲལ་བའི་སྙིང་ཁྲག་ཡིན་པར་བཤད།། ༈ །།རཀྟའི་མིང་གི་ངེས་ཚིག་ནི། སཾ་སྐྲྀ་ཏའི་སྐད་དུ་སྐད་དུ་རཀྟ། བོད་སྐད་དུ་ནི་ཁ་དོག་གི་སྐབས་སུ་ནི་དམར་པོ་ལ་འཇུག་བྱེད་ལས་ཀྱི་སྐབས་སུ་ནི་ཆགས་པ་ལ་འཇུག །དངོས་པོའི་སྐབས་སུ་ནི་ཁྲག་ལ་འཇུག་པ་སྟེ། སྐབས་འདིར་ནི་ཁྲག་ལ་དེ་ཐམས་ཅད་ཚང་བར་བཤད་དོ།། ༈ །།དབྱེ་བའི་རྣམ་གྲངས་ནི། རཀྟའི་རྩ་བ་བརྒྱད་དང་ཡན་ལག་སུམ་ཅུ་རྩ་ལྔ། དེའི་ཡན་ལག་ནི་གྲངས་ལས་འདས་པར་བཤད་དེ། དེ་ལས་རྩ་བ་བརྒྱད་ནི། ཡབ་ཀྱི་སྣ་གཡས་པའི་རཀྟ། ཡུམ་གྱི་པདྨའི་རཀྟ། སྲིད་པ་ཆགས་པའི་ལྟེ་ཁྲག །གཡུལ་

[Full Size]

དུ་བསད་པའི་དཔའ་བོའི་སྙིང་ཁྲག་སྟེ་ནང་གི་རྩ་བ་བཞི་དང་། སྟག་གཟིག་སོགས་གཅན་གཟན་གྱི་ཁྲག །བྱ་རྒོད་སོགས་འདབ་ཆགས་ཀྱི་ཁྲག་རྟ་བོང་སོགས་རྨིག་ཟླུམ་གྱི་ཁྲག །གཡག་སོགས་རྨིག་བྲག་གི་ཁྲག་སྟེ་ཕྱིའི་རྩ་བ་བཞི་པོ་བསྡོམས་པས་རཀྟའི་རྩ་བ་བརྒྱད་དོ།། ༈ །།ཡན་ལག་སུམ་ཅུ་རྩ་ལྔ་ལ། མཚལ། ལི་ཁྲི། བཙག །ལྡོང་རོས། རྡོ་དྲེག་སྟེ་སའི་རཀྟ་ལྔ། ཙནྡ་དམར་པོ། སེང་ལྡེང་། མཛོ་མོ་ཤིང་། གོརྴི་ཥ། ཤིར་ཤིང་དམར་པོ་སྟེ་ཤིང་གི་རཀྟ་ལྔ། པདྨ་རཱ་ག །བྱུ་རུ། མཆོང་དམར། མེ་ཤེལ། རྡོ་རྒྱུས་དམར་པོ། སྦལ་རྒྱབ་གང་རུང་སྟེ། འདི་གཉིས་མ་རྙེད་ན། ལྟར་བུ་དང་ཀཎྜ་ཀཱ་རི་དམར་པོ་ལ་རུང་བར་བཤད། རྡོའི་རཀྟ་ལྔ། ཧ་ལོ། ཁུག་ཆོས། གླང་སྣ། སེ་རྒོད། ལུག་རུ་དམར་པོ་སྟེ། མེ་ཏོག་གི་ཤིང་རཀྟ་ལྔ། ར་མོ་ཤག །ཉེ་ཤིང་ས་སྙ་ལོ། གྲོ་མ། ཉུང་མ་འདིའི་དངོས་དེ་ནི་མདོ་ཁམས་ཀློང་ཐང་སོགས་སུ་སྐྱེ་བའི་ཁྲག་ཉུང་ཞེས་པ་དེའོ། དམར་པོ་སྟེ། རྩ་བའི་

[Full Size]

རཀྟ་ལྔ། རྒུན་འབྲུམ། རམ་བུ། ཁ་སྲན་བྲེའོ། བ་མཁལ་སྨུག་པོ། ཀྱུ་རུ་ར་ཏེ། འབྲས་བུའི་རཀྟ་ལྔ། རྒྱ་སྐྱེགས། སིནྡྷུ་ར། འབྲི་མོག་བུ་རམ། བྲག་ཞུན་ཏེ་རྩིའི་རཀྟ་ལྔ་རྣམས་ཐམས་ཅད་དྲིལ་བས་རཀྟ་སུམ་ཅུ་རྩ་ལྔ་པོ་ནི་གཙོ་བོ་ལྟ་བུ་ཡིན་ལ། དེའི་ཡན་ལག་ཏུ་ནི། རྫ་ས་སོགས་ས་དམར་ཀྱི་རིགས་སུ་གྱུར་ཚད་དང་། རིན་ཆེན་ནལ་དང་ཟངས་སོགས་རྡོ་རིགས་དམར་པོ་ཐམས་ཅད། བཙོད་དང་འོམ་བུ་སོགས་ཤིང་ལྡུམ་དམར་པོ་ཐམས་ཅད། ཨུཏྤལ་དམར་པོ་དང་ཤང་དྲིལ་དམར་པོ་སོགས་མེ་ཏོག་དམར་པོ་ཐམས་ཅད་གཙོང་དམར་དང་ས་འདྲེས་སོགས་རྩ་བ་དམར་བའི་རིགས་ཐམས་ཅད། སྣ་མའི་འབྲས་བུ་དང་འོལ་མ་སི་སོགས་འབྲས་བུ་དམར་པོ་ཐམས་ཅད། འབྲས་དམར་དང་ཁྲོ་དམར་འབྲི་ར་ས་འཛིན་གཟིར་སོགས་འབྲས་བུའི་རིགས་དམར་བ་ཐམས་ཅད་དབྱི་མོང་།། ༈ །།དེ་ལྟར་རཀྟའི་རྣམ་གྲངས་སྤྱིར་བསྟན་ནས་

[Full Size]

སྐབས་འདིའི་དགོས་དོན་སྙིང་པོ་མདོར་བསྡུས་ཏེ་བཤད་པ་ནི། མ་ཧཱ་རཀྟ། མཱུ་ལ་རཀྟ། གུ་ཧེ་རཀྟ་དང་གསུམ་པོ་གསང་སྔགས་བླ་མེད་ཀྱི་ཆོག་གཞུང་ཕལ་ཆེར་དུ་འབྱུང་ཕྱིར། དེ་ལས་དང་པོ་མ་ཧཱ་རཀྟ་ནི་གདུག་པ་ཅན་བསྒྲལ་བའི་ཁྲག་ཆེན་ལ་འཇུག་ཅིང་། ད་ལྟ་ན་དམིགས་རྟེན་ཙམ་དུ་སྲོག་ཆགས་གཡག་དང་ར་སོགས་ཀྱི་ཁྲག་གཙང་མས་རུང་ལ།། ༈ །།གཉིས་པ་མཱུ་རཀྟ་ནི་སྣོད་བཅུད་ཆགས་པའི་རྒྱུའི་རྩ་བ་ལ་འཇུག་ཕྱིར། ཆུ་གཙང་མ་ལ་གོང་དུ་བརྗོད་པའི་སྨན་རྫས་དམར་པོའི་རིགས་རྣམས་ཅི་འཛོམས་དུ་བཏབ་པས་རུང་བ་དང་།། ༈ །།གསུམ་པ་གུ་ཧྱ་རཀྟ་ནི་མཚན་ལྡན་གྲོང་པའི་ཆོས་ཀྱི་མ་གོས་པའི་པད་རཀྟ་ལ་འཇུག་ཀྱང་། མ་རྙེད་པའམ་གང་ཟག་གི་བློར་མ་ཤོང་ན། སིནྡྷུ་ར་དང་། རཀྟ་བྱིན་རླབས་ཀྱི་སྐབས་སུ་ལྷ་མོ་རྡོ་རྗེ་སྒེགས་མོ་བསྐྱེད་པའི་གསང་བ་ནས་རཀྟའི་རྒྱུན་

[Full Size]

བབས་པ་སོགས་དམ་ཚིག་གི་རཀྟའི་རྒྱ་མཚོ་ལ་ཡེ་ཤེས་ཀྱི་རཀྟའི་ཆར་རྒྱུན་ཕབས་ཅིང་བསྟིམ་པ་དེ་ཀས་ཆོག་པ་སྟེ། མདོར་ན། རཀྟའི་མཆོད་པ་དངོས་སུ་བཤམས་ཞིང་འབུལ་རྒྱུ་ནི་འདིར་འདུ་ལ། ཡང་། པདྨ་མམ་སར་སྦྱར་བའི་རཀྟ་དང་། ཞེས་སོགས་ཆོག་གཞུང་ལས་གསུངས་བའི་དོན་ནི་ཐུགས་དམ་བསྐངས་རྫས་ཀྱི་རྣམ་གྲངས་བརྗོད་པ་སྟེ། པདྨའི་སྣོད་ནི་ཐོད་པ། མམ་ས་ནི་དགྲ་གེགས་བསྒྲལ་བའི་དབང་པོ་ལྔ་དང་དོན་རྙིགས་སོགས་དང་། རཀྟ་ནི་དེའི་སྙིང་ཁྲག་སོགས་ལ་འཇུག་པ་དང་། ཡང་། དུག་གསུམ་རྩད་གཅོད་ཀྱི་མཆོད་པ་ལ། གཏི་མུག་ཤའི་ཕུང་པོ། འདོད་ཆགས་ཁྲག་གི་རྒྱ་མཚོ། ཞེ་སྡང་རུས་པའི་རི་རབ་སོགས་གསུངས་པ་ནི། ངོ་བོ་ཉོན་མོངས་པ་དུག་གསུམ་པོ། རྣམ་པ་དགྲ་གེགས་ཀྱི་ཤ་ཁྲག་རུས་གསུམ་གྱིས་མཆོད་པས། འབྲས་བུ་སྐུ་གསུམ་དབྱིངས་སུ་སྦྱོར་བའི་ཐབས་དང་། ཡང་། རྟེན་འབྲེལ་བཅུ་གཉིས་མཱུ་ལ་རཀྟ་ཞེས་

[Full Size]

གསུངས་པའི་མཱུ་ལ་ནི་རྩ་བའི་སྐད་དོད་ཡིན་ཕྱིར། འཁོར་བར་འཁྱམས་པའི་རྒྱུ་ནི་རྟེན་འབྲེལ་བཅུ་གཉིས། བཅུ་གཉིས་པོའི་རྩ་བ་ནི་མ་རིག་པ་ལ་འདུས་པས། མ་རིག་པ་རྩད་ནས་ཆོད་པ་ནི་རིག་པ་ཡེ་ཤེས། རིག་པའི་ཡེ་ཤེས་རང་ངོ་ཤེས་ཤིང་མངོན་དུ་གྱུར་པ་ནི་འཁོར་བའི་ས་བོན་བཅོམ་པ་ཡིན་པའི་དོན་གྱིས། རྒྱུ་དྲུག་འཁོར་བ་བསྒྲལ་བའི་རཀྟ་ཅེས་ཀྱང་གསུངས་སོ། །གཞན་ཡང་། གནས་སྐབས་སུ་ལྷ་དང་ཆོས་སྲུང་མ་མགོན་ཕོ་རྒྱུད་མོ་རྒྱུད་སོ་སོ་ལ་རང་གི་དམ་རྫས་དང་བསྐངས་རྫས་ཀྱི་བྱེ་བྲག་ཐ་དད་པ་དགོས་པའི་རིགས་ནི་མཐའ་ཡས་ཏེ། དཔའ་བོའི་སྙིང་ཁྲག །ནལ་བུའི་ཁྲག །རྟ་ནག །གཡག་ལུག །རྭ། བྱ་དཀར་དང་མཚལ་བུ་དང་བྱ་ནག་གི་རིགས་ཀྱི་ཁྲག་སོགས་སྐབས་ཀྱི་དགོས་དོན་ཐ་དད་པའི་དམིགས་གསལ་དག་ནི་རང་རང་གི་སྒྲུབ་ཐབས་དང་ཆོག་གཞུང་སོ་སོ་ལས་འབྱུང་ཕྱིར། འདིར་སྨོས་མི་འཚལ་ལགས་ཀྱི།།

[Full Size]

༈ །།འོན་ཀྱང་འགག་དོན་དུ་དྲི་བའི་སྙིང་པོ་ནི། གསང་སྔགས་བླ་མེད་ཉམས་སུ་ལེན་པའི་གང་ཟག་ནི་ལྟ་བའི་གདེངས་ཀྱིས་འཁོར་འདས་སེམས་སུ་ཐག་ཆོད་པ། ཏིང་ངེ་འཛིན་གྱི་སྣང་སྲིད་དག་པ་རབ་འབྱམས་སུ་ཤར་བ། བརྟུལ་ཞུགས་ཀྱི་རྩལ་གྱིས་གང་བྱུང་ལམ་དུ་ལྷོངས་པ་ཅིག་དགོས་མོད་ཀྱང་། དེང་སང་ནི་དེ་ལྟ་བུ་དཀོན་ཏེ། ཇི་སྐད་དུ། གསང་སྔགས་པ་ལ་རབ་འབྲིང་མཐའ་གསུམ་ཡོད་པའི་སྔགས་པ་རབ་ལ་ཤར་བ་རྣམ་པ་ལྔ་འབྱུང་བ་ནི། སེམས་ཅན་སངས་རྒྱས་སུ་ཤར་བས་ལམ་ལ་བགྲོད་དུ་མེད་པར་ཤེས། སྣོད་བཅུད་དཀྱིལ་འཁོར་དུ་ཤར་བས་འབྲས་བུ་རང་བྱུང་ལྷུན་རྫོགས་སུ་ཤེས། སྡུག་བསྔལ་བདེ་ཆེན་དུ་ཤར་བས་སྣང་བ་སྣ་ཚོགས་ཆོས་ཉིད་དུ་འཁྱེར་ཤེས། ཉོན་མོངས་ཡེ་ཤེས་སུ་ཤར་བས་སྤང་བླངས་དགག་སྒྲུབ་རང་སར་གྲོལ་བའི་གནད་ཤེས། རྣམ་རྟོགས་ཆོས་ཉིད་དུ་ཤར་བས་ཆོས་སྐུ་རང་ལ་ཡེ་ནས་གནས་

[Full Size]

པའི་དོན་ཤེས་པ་སྟེ། དེ་ལྟར་ཤར་བ་ལྔ་དང་ལྡན་པ་ནི་དིང་སང་མི་རྙེད། ཡང་། སྔགས་པ་འབྲིང་ལ་གསལ་བ་རྣམ་པ་ལྔ་སྟེ། སྟོང་གསུམ་ལྷའི་གཞལ་ཡས་སུ་གསལ་བས་དཀྱིལ་འཁོར་ལ་ཆེ་ཆུང་ཡང་དོག་མེད་པ། ཕུང་ཁམས་ལྷ་རུ་གསལ་བས་བར་ཆད་གདོན་བགེགས་ཀྱི་ཡུལ་དང་བྲལ། སྣོད་ཀྱི་འཇིག་རྟེན་གཏོར་སྣོད་དུ་གསལ་བས་གཏོར་མཆོད་ལ་བཟང་ངན་གྱི་མཚན་འཛིན་མེད། སྣང་སྲིད་ཐམས་ཅད་དམ་རྫས་སུ་གསལ་བས་སྲུང་མ་དམ་ཅན་མི་དགྱེས་པའམ་མ་སྐོངས་པའི་སྐྱོན་ཟད། གནས་ལུགས་སྟོང་པ་ཉིད་དུ་གསལ་བས་སངས་རྒྱས་ཀྱི་ཆོས་མ་ལུས་རང་སེམས་ལ་རྫོགས་པ་སྟེ། དེ་ལྟ་བུ་ལྡན་པ་ཡང་དིང་རྙེད་པར་དཀའ་བས། ད་ལྟའི་གསང་སྔགས་པར་རློམས་པ་ཕལ་ཆེར་ནི་བཟུང་བ་རྣམ་པ་ལྔས་བཅིངས་པ་ཤས་ཆེ་སྟེ། སྐྱེད་རིམ་རྟག་བརྟན་ཐེར་ཟུག་ཏུ་བཟུང་བས་ལྷ་འགྲུབ་པའི་དུས་མེད། ཕྲིན་ལས་

[Full Size]

གྱེར་ལ་སྒོམ་མེད་དུ་བཟུང་བས་གསང་སྔགས་དམ་མེད་ལྟོ་ཕྱིར་བོན་གྱེར་དུ་སོང་། སྔགས་དང་སྙིང་པོ་རང་རྒྱུད་པར་བཟུང་བས་བྱིན་རླབས་དང་ནུས་པའི་རྒྱུ་མེད། རྫས་དང་གཏོར་ཆུང་བཤོས་བུར་བཟུང་ཞིང་ཟ་འདོད་དང་རྣབ་སེམས་ཀྱི་འབྲས་བུས་དཀོར་དེ་རྣམ་སྨིན་གྱི་འདམ་དུ་ཆུད། འབྲས་བུ་འཇིག་རྟེན་རྟགས་ཆད་དུ་བཟུང་བས་རུ་ཏྲའི་གོལ་སར་ལྟུང་འགྱུར་གྱི་གསང་སྔགས་པ་མང་བར་གདའ་བས།། ༈ །།དེས་ན། དམ་རྫས་སྨན་རག་གི་རྒྱུ་དང་དངོས་པོ་ཡང་གཞུང་ཅི་ལྟ་བའི་ཚུལ་ལྡན་ནི་གང་ཟག་གི་སྤྱོད་ཡུལ་དུ་མ་གྱུར་ཚེ། བདག་གིས་ནི། བདུད་རྩིའི་རྩ་བ་བརྒྱད་ཀྱང་ཕྱིའི་བརྒྱད་པོ་དངོས་སུ་སྦྱར་ཞིང་། ནང་དང་གསང་བའི་རྩ་བ་རྣམས་ནི་སྔོན་གྱི་ཕབས་རྒྱུན་དག་གིས་མཐུས་པར་བྱས། བདུད་རྩི་ལྔ་ཉིད་ཀྱང་སྔོན་གྱི་རིག་འཛིན་ཆེན་པོ་དགའ་རབ་རྡོ་རྗེ། ཤྲཱི་སིངྷ། བི་མ་ལ། པདྨ་འབྱུང་གནས་རྣམས་ཀྱིས་བསྒྲུབ་

[Full Size]

པའི་མཆོད་སྨན་གཏེར་བྱོན་དང་། འཕགས་པ་ཀླུ་སྒྲུབ་དང་ཏེ་ལོ་ནཱ་རོ་སོགས་ཀྱིས་བསྒྲུབ་པའི་བདུད་རྩི་རིལ་བུ། བོད་ཡུལ་དུའང་སློབ་དཔོན་ནམ་མཁའ་སྙིང་པོ། བཻ་རོ་ཙ་ན། ཛྙཱ་ན་ཀུ་མཱ་ར། སངས་རྒྱས་ཡེ་ཤེས་སོགས་ཀྱིས་བསྒྲུབ་སྨན་དང་། གཞན་ཡང་གསང་སྔགས་གསར་རྙིང་གི་སྐྱེས་ཆེན་གྲུབ་ཐོབ་རིག་འཛིན་གཏེར་བཏོན་སོ་སོས་བསྒྲུབ་པའི་ཕབས་རྒྱུན་རྣམས་ལ་ཚང་བ་དང་། དེར་མ་ཟད་བྱིན་རླབས་དམ་རྫས་ཀྱི་ཁྲོད་དུ་ཡང་། གུ་རུ་ཡབ་ཡུམ་གྱི་བྱང་སེམས་ཀྱིས་ཐོག་དྲངས། བྲམ་ཟེ་སྐྱེ་བ་བདུན་པ་དང་སྐྱེས་ཆེན་དམ་པ་རྩོད་མེད་མང་པོའི་སྐུ་ཤ །དབུ་ཀླད། ཤངས་མཚལ། གདུང་རུས། གསང་ཆེན་གསང་ཆབ་སོགས་བསམ་གྱིས་མི་ཁྱབ་པ་བཞུགས་ཕྱིར། །གང་ཟག་ཕལ་པའི་བདུད་རྩི་ལྔ་ལོགས་སུ་བླུགས་དགོས་པར་མ་གྱུར་ལ། ཤ་ལྔ་སོགས་ཀྱང་སྐྱེས་ཆེན་རྣམས་ཀྱི་ཆིབས་པ་ཞབས་རྗེས་འཇོག་ཅིང་རིང་བསྲེལ་བྱོན་པའི་རིགས་ཀྱི་ཤ་དང་། འགྲོ་མགོན་

[Full Size]

ཞང་རིན་པོ་ཆེས་ཆོས་སྐྱོང་འགྲུབ་པའི་མགོན་ཁྱི་མངོན་ཤེས་ཅན་གྱི་ཤ་སོགས་ལ་བྱས། གཞན་གླང་ཆེན་དང་རྨ་བྱ་སོགས་ནི་ཕལ་པ་ལས་མ་རྙེད་ཀྱང་གནས་དག་གནས་བསྒྱུར་གྱི་སྒྲུབ་པའི་གཞུང་བསྲང་ཕྱིར། དེས་ན་བདུད་རྩི་ཆོས་སྨན་ཁུངས་བཙུན་འདི་ལྟ་བུའི་དམ་རྫས་དང་སྦྱར་བའི་བདུད་རྩི་སྨན་མཆོད་འདིས་ནི་གཞུང་ནས་བཤད་པའི་ཕན་ཡོན་དང་ནུས་པ་འབྱུང་མཆེ་བར་རང་ཉིད་སེམས་ཤིང་།། ༈ །།དེ་བཞིན་དུ་རཀྟ་ཡང་ཅི་འཛོམས་ཀྱི་ངོས་ནས་འཚོགས་པར་སྦྱར་ཞིང་ཁྱད་པར་གནས་ཆེན་ཙཱ་རིའི་ཕག་མོའི་གསང་རྫས་སིནྡྷུ་ར་སོགས་ལ་ཡིད་བརྟན་བཅས་ནས་སྦྱར་བ་ཡིན་པས་ཁུངས་ཐུབ་ཏུ་མོས་པ་ལགས་པས་ན། ཆང་ཕུད་ཞིག་ལ་ཁྲག་བསྲེས་པ་ལ་རཀྟར་རློམས་པ་དག་དང་ཅུང་ཟད་མི་མཚུངས་པའི་རྒྱུ་མཚན་འཕྲོས་ཞོར་དུ་གསོལ་བ་འདི་ཡང་དགོངས་དབྱིངས་ཟབ་མོར་

[Full Size]

ཅགས་ངོས། །ཞལ་སློབ་བཀའ་འབངས་རྗེས་འཇུག་རྣམས་ཀྱང་གསང་སྔགས་ཀྱི་ཕྱག་བཞེས་ལ་ཚོད་ཡོད་རྩིངས་ཆོས་གཡས་མེད་དུ་མ་གྱུར་པའི་ལྟོ་སྤྱོད་ལ་དགོད་པར་མཛད་དུ་གསོལ། ཞེས། བདུད་རྩི་སྨན་རཀ་གི་སྐབས་དོན་གྱི་མཆིད་ལན་དུ་ཕུལ་བ་ཨ་ཐཱ།། ༈ །།ཡང་། རྗེ་ཉིད་ཀྱི་བཀའ་ཐམ་དུ་ཡང་ཟབ་དཀོན་མཆོག་སྤྱི་འདུས་སོགས་གཏེར་གསར་གྱི་ཆོག་སྒྲིག་སྨད་ལས་སྐོར་ལ་སླར་ཡང་དྲི་རྨེད་ཞིབ་ནན་དང་། ཁྱད་པར་སྔར་གྱི་ཕྱག་བཞེས་སྒྲིག་རིམ་མཛད་ཚུལ་རྣམས་ལ་མི་འཐད་པའི་ཀླན་ཀའི་ངག་ཁྱལ་ཟེར་མཁན་བྱུང་ཚུལ་གྱི་འཕྲོས་པ་དང་བཅས་པ་སྩལ་བའི་ཆར། སྒྲིག་རིམ་གྱི་གནང་ལུགས་ནི་ཟུར་དུ་ཕུལ་གྲུབ་པ་ལྟར་ལགས་ནའང་། སྐྱོན་འདེབས་ཀྱི་སྐུར་ཞུས་བྱེད་པ་དེ་དག་དོན་ལ་མི་གནས་ཚུལ་གྱི་རྒྱུ་མཚན་དོགས་སེལ་གྱི་འཕྲོས་དོན་འགའ་ཞིག་རྗེས་འཇུག་ལ་ཕན་པར་བསམ་སྟེ་སླར་ཡང་

[Full Size]

ཕུལ་བ་ནི།། ༈ །།དེ་ལ་སྤྱིར་གསང་སྔགས་བླ་མེད་ཀྱི་ཆོག་གཞུང་ཐམས་ཅད་དུ་བདག་མདུན་བུམ་གསུམ་ཐ་དད་དུ་མཛད་པ་མང་ཞིང་། བསྙེན་པའི་སྐབས་སོགས་སུ་བདག་སྐྱེད་ཁོ་ནས་ཆོག་པ་སོགས་ཀྱི་ཚུལ་ནི་གསར་རྙིང་དགོངས་པ་མཐུན་ནའང་།། ༈ །།ཁྱད་པར་བ་ནི་རྙིང་ལུགས་ལ་ཕྲིན་ལས་ཀྱི་གཞུང་ངམ་ལས་ཀྱི་བྱང་བུ་ཞེས་མིང་དུ་བཏགས་པའི། དཀྱིལ་འཁོར་ལྷ་ཚོགས་གང་དང་གང་ཡིན་པ་དེ་དག་བདག་བསྐྱེད་ཀྱི་ཚུལ་དུ་སྒོམ་ཐབས་ཀྱིས་ཁོག་ཕུབས་ཅིང་། མདུན་བསྐྱེད་དང་བུམ་པ་སོགས་སུ་བསྐྱེད་དགོས་པའི་སྐབས་དག་ཏུའང་བདག་བསྐྱེད་ཉིད་ལ་ཚིག་ཕྲད་ཀྱི་ཁ་བསྒྱུར་ཙམ་བྱས་པས་དོན་འགྲུབ་པ་སྔོན་འགྲོ་དངོས་གཞི་རྗེས་ཀྱི་ལས་རིམ་མཐའ་དག་ཀྱང་གཞུང་གཞན་ནས་དྲངས་མི་དགོས་པར་རང་གཞུང་གང་ཡིན་གྱི་ལས་བྱང་དེ་ཀ་གོ་ཆོད་ཅིང་ཆོ་གའི་ཡན་ལག་ཚང་བ། དབང་དང་རབ་གནས་སྦྱིན་སྲེག་

[Full Size]

གཤིན་དོན་སོགས་དང་། དྲག་པོའི་ལས་སྦྱོར་གྱི་རིགས་སོགས་གང་བྱེད་ཐམས་ཅད་ལ་ཡང་ཉེ་བར་འཁོ་ཞིང་མེད་མི་རུང་བ་འདི་ལྟ་བུ་ནི་གུ་རུ་རིན་པོ་ཆེ་པདྨ་འབྱུང་གནས་ཀྱིས་གསུངས་པའི་ཆོས་སྐོར་རྒྱས་བསྡུས་མཐའ་དག་ཀུན་ལ་དེ་དང་འཚམས་པའི་ལས་བྱང་རྒྱས་བསྡུས་གང་རུང་རེ་ནི་མེད་མི་སྲིད་ཅིང་། འདི་ལ་ཕྱིས་སུ་གསར་མའི་མཁས་གྲུབ་དག་གིས། ལས་གཞུང་དུ་མིང་བཏགས་པའི་བདག་སྐྱེད་རྐྱང་པ་རེ་ངག་འདོན་བྱས་པས་བདག་མདུན་བུམ་གསུམ་གའི་གོ་ཆོད་པར་འདོད་པ་རྙིང་མ་བ་རྣམས་ཀྱི་རྩིངས་ཆོས་སུ་འདུག་གསུང་བ་སོགས་མཛད་ནའང་། གུ་རུ་རིན་པོ་ཆེ་ཉིད་ཀྱི་དགོངས་པར་ནི་གང་ཟག་དབང་པོ་ཡང་རབ་རྣམས་དང་ཏིང་འཛིན་ལས་རུང་དག་གིས་ནི་ལས་བྱང་གཅིག་པུས་བདག་མདུན་བུམ་གསུམ་ཙམ་དུ་མ་སྣང་གྲག་སྣོད་བཅུད་ལྷ་སྔགས་ཀྱི་རོལ་པ་ཆེན་པོར་ལམ་དུ་ཁྱེར་བ་སྟེ། གོང་དུ་སྔགས་པ་རབ་ལ་ཤར་བ་རྣམ་པ་ལྔ་བཤད་པ་ལྟར་འབྱུང་

[Full Size]

མོད་ཀྱི། གཞན་མ་གང་ཟག་ལས་དང་པོ་པ་སོགས་ལ་བདག་ཉིད་ལྷའི་རྣལ་འབྱོར་དུ་བསྒོམ་པའི་ཚེ་ནི་ལས་བྱང་གི་གཞུང་ཇི་ལྟ་བ་བསྲང་བ་ཉིད་ཀྱིས་འགྲུབ་ལ། མདུན་བསྐྱེད་དང་བུམ་སྐྱེད་སོགས་ནི་བདག་སྐྱེད་ཀྱི་ཡན་ལག་གམ་བདག་ལས་སྤྲུལ་པའི་དཀྱིལ་འཁོར་ཡིན་ཕྱིར། དེ་དག་གང་དགོས་ཀྱི་སྐབས་སུ་ཡང་། ལྷའི་མངོན་རྟོག་གམ། སྤྱན་འདྲེན་མཆོད་བསྟོད་སོགས་གང་དང་གང་དགོས་པ་རྣམས་ལས་བྱང་གི་སྐབས་དེ་ནས་ཅི་འདོད་ཁོལ་ཕྱུངས་བྱས་ཆོག་པས་གཞན་ལ་ལྟོས་མི་དགོས་པ་ལ་དགོངས་ནས་མཛད་ཅིང་། སྐབས་དོན་གང་ལ་གང་དགོས་སྦྱར་ཆོག་པའི་དོན་གྱི་ཕྱིར། ལས་ཀྱི་བྱང་བུ་ཞེས་མིང་དུ་འདོགས་པར་མཛད་པ་ཡིན་གྱི། འདི་གཅིག་པས་བདག་མདུན་བུམ་གསུམ་ག་གོ་ཆོད་པར་གྱིས་གསུངས་པ་ནི་གུ་རུའི་གཏེར་ཆོས་གང་ལའང་མེད་ཅིང་། དེ་དང་རྗེས་སུ་མཐུན་

[Full Size]

པར་རྙིང་མ་བའི་གང་ཟག་ཆོས་བཞིན་མི་སྤྱོད་པའི་ཟོག་པོའི་རིགས་ལ་ནི་བདེན་པར་སུ་ཞིག་འཛིན་ལ་དེ་ལ་ཡིད་བརྟན་བྱེད་པ་པོ་ཉིད་འཁྲུལ་བ་ལས་གཞན་ཅི་སྟེ། རྙིང་མའི་ཆོས་ལ་སྤྱོད་པ་ཚད་ལྡན་རྣམས་ནི་གུ་རུའི་གསུང་དང་འགལ་བར་མི་བྱེད་པས། དེས་ན་བཀའ་བཀྱོན་དང་དག་པར་མཛད་པ་པོ་རྣམས་ཀྱང་དང་པོར་དགག་རྒྱུའི་དོན་དེ་ཀ་དགོངས་པ་ལོན་ངེས་སུ་མ་གནང་ན་ཅལ་སྒྲོག་རྗེས་འབྲང་ལ་བརྟེན་ནས་བཀའ་བཀྱོན་མཛད་རུང་མཛད་མཁན་རང་ཉིད་དབུ་སྟོངས་པའི་རྟགས་དང་རྩ་ལྟུང་གི་རྒྱུ་རྐྱེན་ལས་མི་འབྱུང་ལགས་ཅེས་ལས་བྱང་སྤྱི་བབས་ཀྱི་འཕྲོས་དོན་དུ་བགྱིས་ནས།། ༈ །།འདི་ཉིད་ཀྱི་སྒེར་དོན་འབུལ་རྒྱུར། རྩ་ལྟུང་དྲུག་པ་དང་བཅུ་གཉིས་པ་སོགས། ལས་གཞུང་རྒྱས་བསྡུས་སོ་སོ་ལ་ས་བཅད་སྒྲིག་རིམ་ཀྱང་སྤྱི་ཁོག་འདྲ་བ་ལ་ནང་ཚན་ཕྲན་བུ་མི་འདྲ་བ་དུ་མ་འབྱུང་བ་

[Full Size]

ནི། འགའ་ཞིག་རྒྱུད་སྡེའི་ཁྱད་པར། ལ་ལ་ནི་ལྷ་ཞི་ཁྲོའི་ཁྱད་པར། ལ་ལ་ནི་ལས་བྱེད་དམིགས་སྒོའི་ཁྱད་པར། སྐབས་ལ་ལར་ནི་སྤྲོས་བཅས་དང་སྤྲོས་མེད་གཉིས་སོ་སོའི་རྩལ་འདོན་ཚུལ་གྱི་ཁྱད་པར་སོགས་ལགས་ཚེ། ཐམས་ཅད་སྒྲིག་རིམ་ཚད་གཅིག་ཏུ་འབབ་པ་ནི་ནམ་ཡང་མི་འབྱུང་ནའང་། གུ་རུ་རིན་པོ་ཆེ་ཐམས་ཅད་མཁྱེན་ཅིང་གཟིགས་པས་གང་ལ་གང་འོས་སུ་མཛད་པ་ལ། རང་ཅག་སོ་སྐྱེ་ཚུར་མཐོང་གི་བློས་འདི་དང་འདི་ནི་མི་མཐུན་ནོ། །འདི་ནི་འདི་ལ་ལྷག་གོ། ཆད་དོ། །ཅེས་སོགས་ཀྱི་ཁ་ཚོན་གཅོད་དུ་ག་ལ་རུང་ཞིང་བཅད་པས་ཀྱང་ཅི་ཞིག་བྱ་སྟེ། རང་གཞུང་དེ་ནས་གང་གསུངས་པ་ལྟར་བྱས་པས་འགྲུབ་པ་ནི་ངང་ཚུལ་ལགས་ཤིང་། དེས་ན་རྗེས་ཀྱི་ལས་རིམ་རྣམས་ཀྱིས་དང་པོར་ཚོགས་མཆོད་བྱ་ཐབས་འབྱུང་བ་འདི་སྐབས། ཐོག་མར་ཚོགས་རྫས་བཤམས་ཤིང་བསངས་

[Full Size]

བྱིན་གྱིས་བརླབས་ཏེ། ཚོགས་མགྲོན་རྣམས་སྤྱན་དྲངས་བ་སོགས་ནི་གཞུང་ཕལ་ཆེར་མཐུན་ནའང་། སླར་ཚོགས་དེ་ཉིད་མང་དུ་སྤྲོས་ནས་འབུལ་ཚུལ་ལ་ལས་གཞུང་སོ་སོར་མི་གཅིག་པ་སྣ་ཚོགས་མཆིས་ཏེ། བླ་མ་དགོངས་པ་འདུས་པའི་ལས་བྱང་ཆེན་མོ་ཚངས་པའི་སྒྲ་དབྱངས་སོགས་ལས་ནི། དང་པོར་ཚོགས་བྱིན་གྱིས་བརླབས་གྲུབ་ནས་མ་སྤྲོས་པ་དེ་ལས་འོད་ཟེར་འདོད་ཡོན་གྱི་ལྷ་མོ་གྲངས་མེད་པ་འཕྲོས་པས་མཆོད་ཡུལ་ཐམས་ཅད་དགྱེས་སྐོངས་སུ་བྱེད་པས་ཚོགས་ཕུད་སྤྱིར་འབུལ་བ་ཡིན་ལ། སླར་བྱེ་བྲག་ཏུ་བསྒྲལ་སྟབས་ཀྱི་ལས་རིམ་ནི། ཚོགས་སྣོད་དེ་ཉིད་དྲག་པོའི་ཧོམ་ཁུང་དུ་གྱུར་པའི་ནང་དུ་ཚོགས་རྫས་ཀྱི་དངོས་པོ་དེ་དགྲ་བགེགས་ཀྱི་གཟུགས་ཕུང་དུ་དམིགས་ནས་བཀའ་བདེན་སྟོབས་ཀྱི་གནོད་བྱེད་རུ་དྲ་མ་ལུས་བཀུག་ཅིང་བསྒྲལ་བའི་ཚུལ་གྱིས་ཚོགས་དུམ་བུ་མང་དུ་སྤྲོས་ཏེ་དཀྱིལ་འཁོར་དུ་བྲན་

[Full Size]

ཅིང་སྟབས་པ་སྟེ། དེ་ལྟར་ཕྱག་བཞེས་འདི་ནི་ད་ལྟ་སྙིམ་ཕུ་བྱ་ཁྱུང་སོགས་དགོངས་འདུས་ཀྱི་བདག་པོ་རྣམས་ཇི་ལྟ་བར་མཛད་པ་འདི་ལུགས་གཅིག་དང་། ཡང་། བསྒྲུབ་པ་བཀའ་བརྒྱད་ཆེན་མོ་གཏེར་ཁ་གོང་འོག་སོགས་ལྟར་ན། ཚོགས་བྱིན་གྱིས་བརླབས་མ་ཐག་སྤྲོས་ནས་ཕུད་དང་པོ་དཀྱིལ་འཁོར་དུ་འབུལ་ཞིང་དེ་ཤུལ་སྣོད་ཐ་དད་པར་བཤམས་པས། དང་པོ་ཐུགས་དམ་བསྐངས། བར་པ་ཉམ་ཆགས་བཤགས། ཐ་མས་བསྒྲལ་སྟབས་བྱ་བ་སྟེ་ཚོགས་ཕུད་རིམ་པ་གསུམ། དེ་ཤུལ་བར་པ་ནི་སྒྲུབ་པ་པོ་རྣམས་དངོས་གྲུབ་ཏུ་རོལ། མཐར་ལྷག་མ་ཡང་ཡར་གནས་དཀྱིལ་འཁོར་པ་རྣམས་དང་། མར་གནས་བཀའ་སྡོད་ཕོ་ཉ་ཡང་གཡོག་དང་བཅས་ལ་འབུལ་རྒྱུའི་རིམ་པ་སོ་སོར་གསུངས་པ་དང་། འདི་ལའང་ནང་བསེས་ཀྱི་མི་འདྲ་བའི་ཁྱད་པར་ཡོད་དེ། བཀའ་བརྒྱད་བསྐྱེད་

[Full Size]

རྫོགས་ཆེ་འབྲིང་རྣམས་སུ་ནི། ཕུད་དང་པོ་གཡས་ཞལ་དཀར་པོ་ཆོས་ཀྱི་སྐུ་ལ་མཆོད། བར་པ་དེ་ལ་དགུག་བསྟིམ་བསྒྲལ་ལས་བྱས་ནས་དབུས་ཞལ་མཐིང་ག་སྤྲུལ་པ་སྐུ་ལ་བསྟབ། རྗེས་མ་དེས་གཡོན་ཞལ་དམར་པོ་ལོངས་སྤྱོད་རྫོགས་སྐུ་ལ་ཉམས་ཆགས་བཤགས་པ་སྟེ། འདིའི་ལུགས་གཅིག །ཡང་སྐྱེད་རྫོགས་ཆུང་ངུ་སོགས་བཀའ་བརྒྱད་བསྡུས་པའི་རིགས་ལ་མ་དང་གཞན་ཡང་བླ་མ་ལས་བྱང་དང་རྩ་གསུམ་ལས་བྱང་སོགས་ཕལ་ཆེར་དུ་ནི་ཚོགས་བྱིན་རླབས་བྱས་ནས་སྤྲོས་ཏེ། ཕུད་དང་པོ་གཏོར་མའམ་དཀྱིལ་འཁོར་དྲུང་དུ་ཕུལ་བ་དེས་མཆོད་བཤགས་བསྐང་བ་རྣམས་གཅིག་ཅར་དུ་བྱ་ལ། ཕུད་བར་པ་ནི་དཀྱིལ་འཁོར་དུ་ཚུར་སྤྱན་མ་འདྲོངས་པའི་མགྲོན་རིགས་གོང་འོག་བར་མ་ཀུན་ལ་ཕྱི་རོལ་ནམ་མཁའ་མཐོང་སར་གནམ་ཕུད་དུ་འཐོར། ཐ་མ་དེས་བསྒྲལ་སྟབས་བྱས་ནས་

[Full Size]

སྒྲུབ་པ་པོ་རྣམས་ཚོགས་ལ་རོལ་རྗེས་ལྷག་མའི་མགྲོན་རྣམས་ལ་ལྷ་གཏོར་བསྔོ་བའི་སྒྲིགས་རིམ་འདི་ལུགས་གཅིག་ཡིན་པས། གཏེར་གསར་གྱི་ལས་གཞུང་འདི་དག་ཏུ་ཡང་འདི་དང་མཐུན་པར་མཛད་པ་ལགས་ཤིང་། གང་ལྟར་ཡང་། ཚོགས་ལྷག་ནི་འཆད་མདོ་གཏོར་ཟོར་འཕངས་བ་སོགས་ཀྱི་སྔོན་དུ་བྱ་བར་གསུངས་པ་ནི་གཏེར་ཁ་གོང་འོག་རྒྱས་བསྡུས་ཕལ་ཆེར་མཐུན་པ་དང་། དེའི་དགོངས་པ་ཡང་། ཚོགས་བཤམས་ཞིང་བསངས་སྦྱངས་བྱིན་རླབས་ནས་བཟུང་སྟེ་ལྷག་མའི་ཆོ་ག་ཡན་ཆོད་འདི་ནི་ཚོགས་མཆོད་ཀྱི་ལས་རིམ་ཞེས་སྐོར་ཚོ་གཅིག་ཡིན་ལགས། ཐུགས་དམ་བསྐུལ་ཞིང་སྔོན་གྱི་མཐའ་ཚིག་གི་འཆད་མོད་བསྒྲགས་པ་དང་། དྲག་ལས་ལ་རྦད་ཅིང་གཏོར་ཟོར་ཟློག་དམོད་སྒྱུར་གཏོར་ཟོར་བསྟན་སྐྱོང་གཏོར་བྲོ་སོགས་ཀྱི་ལས་རིམ་རྒྱས་བསྡུས་གང་བྱེད་དེ་དག་སྐོར་ཚོ་གཅིག་ཏུ་

[Full Size]

འགྱུར་ཕྱིར། དེས་ན་འདི་གཉིས་པོ་སྡེ་ཚན་ཐ་དད་ལགས།། ༈ །།ཡང་། འགའ་ཞིག་གིས། ཡང་ཟབ་གཞུང་དུ། རྗེས་ནི་ཚོགས་ཀྱིས་ཁ་སྐོང་ཞིང་། ཞེས་པའི་ཚིགས་དེ་ཚོགས་ལྷག་གཞན་ཐམས་ཅད་ཀྱི་རྗེས་མར་བྱ་བའི་སྒྲུབ་བྱེད་དུ་འཆད་པ་དེ་ནི་མ་ཡིན་ཏེ། གཞུང་གི་ས་བཅད་ཀྱི་ཚིག་འདིའི་དགོངས་པ་ནི། ཆོ་ག་སྔོན་འགྲོ་ནས་བཟུང་སྟེ་དངོས་གཞིའི་རིམ་པ་འཛབ་བསྙེན་ཡན་ཆད་དང་། བཀའ་སྲུང་ཆོས་སྐྱོང་གི་བསྐང་གསོ་སོགས་མཐའ་དག་དང་། སྐབས་དོན་དམིགས་གསལ་དུ་སློབ་མ་སྨིན་བྱེད་སོགས་གང་དང་གང་དག་བགྱིས་པ་དེ་དག་ལ་ནོར་འཁྲུལ་ཆད་ལྷག་ཉམས་ཆག་དང་ལྷ་དང་བསྲུང་མ་ཐུགས་དམ་ཁོངས་པའི་རིགས་སོགས་ཀྱི་སྐྱོན་དུ་གྱུར་སྲིད་ན། དེ་དག་བཤགས་ཅིང་བསྐངས་བའི་ཐབས་སུ་ཚོགས་ཀྱི་མཆོད་པ་རྒྱ་ཆེར་བཤམས་ཤིང་ཕུལ་བས་སྐྱོན་དང་ཉེས་པ་དེ་དག་ཁ་སྐོང་ཤིང་གསོར་ཆུད་པར་

[Full Size]

འགྱུར་བ་ལ་དགོངས་པ་ཡིན་གྱི། ཚོགས་ལྷག་གཅིག་པུའི་སྒྲུབ་བྱེད་ནི་མ་ལགས་སོ།། ༈ །།གཞན་ཡང་ཆོ་གའི་སྒྲིག་རིམ་པ་བཅད་ཐམས་ཅད་གཅིག་ཏུ་མ་ངེས་ཕྱིར། ཚེ་དཔག་མེད་དང་སྤྱན་རས་གཟིགས་ཀྱི་ཆོས་སྐོར་སོགས་ཞི་བའི་ལྷ་འབའ་ཤིག་གི་ལས་གཞུང་དག་ཏུ་ནི་ཚོགས་ལས་གཞན་རྣམས་མཚུངས་ཀྱང་བསྒྲལ་སྟབ་ཀྱི་རིམ་པ་འདི་མི་འབྱུང་བ་ཡང་ཡོད་ལ། འདི་ནི་ལྷ་ཞི་ཁྲོ་འདྲེས་མ་དང་ཁྱད་པར་ཁྲོ་བོ་ཁྲོ་མོའི་རིགས་ཀྱི་དཀྱིལ་འཁོར་ལ་བསྔགས་པ་སྟེ། སྒྱུ་འཕྲུལ་གསང་སྙིང་གི་རྒྱུད་ལས། ཨེ་ཡི། ཚོགས་ཀྱི་དཀྱིལ་འཁོར་དུ། །འབར་བའི་གཏུམ་ཆེན་རྔམས་པ་ལ། །ཁྲོས་པའི་ཡིད་ཀྱིས་བསྐུལ་བྱས་ནས། །སངས་རྒྱས་བསོད་ནམས་སྐུ་ཡང་འཇིག །བདུད་རྩི་ལྔའམ་ཟད་ཉིད་ལ། །མཚན་མ་མིང་དུ་བཅས་པ་བྱ། །བཀུག་ནས་རྡོ་རྗེ་ཕུར་པ་གདབ། །རྡུལ་དུ་བྱས་ནས་ཚོགས་ལ་འབུལ།

[Full Size]

ཞེས་གསུངས་པའི་དགོངས་པ་ལགས།། ༈ །།དེས་ན་གོང་དུ་སྨོས་པ་ལྟར་སྐབས་འདིར་ལས་བྱང་སྤྱི་ཁྱབ་ཀྱི་འགྲོས་དང་མཐུན་པར་ཚོགས་ལྷག་ནི། བསྐུལ་དང་འཆད་མདོ་ཟོར་ཟློག་སོགས་མ་བྱས་པའི་གོང་དུ་བྱ་བར་བཤད་པ་དང་། འཆད་མདོ་ནི་སྲུང་མ་རྣམས་ལ་གཏོར་མ་ཕུལ་ནས་བཀའ་དང་དམ་ལས་འདར་མི་རུང་བའི་དམ་ཚིག་བསྒྲག་ཅིང་གནད་ལ་བཀར་བའི་ཐབས་ཡིན་པས། ཟོར་ཟློག་གི་གོང་དུ་བྱས་ན་ལས་དེ་ཉིད་མི་སྒྲུབ་པའི་དབང་མེད་པ་ལྟ་བུར་འགྲོ་བའི་གནད་འབེབས་སུ་འགྱུར་བ་དང་། ཟོར་ཟློག་མཐར་རམ། དྲག་ལས་མིན་ཀྱང་རྒྱུན་གཏོར་འབུལ་བའི་སྐབས་སུ་བགྱིས་ནའང་། བཅོལ་བའི་ཕྲིན་ལས་སྔར་བྱས་པ་རྣམས་ཀྱི་བཏང་རག་དང་། ཕྱིས་བྱེད་རྒྱུའི་གཉེར་གཟན་དུ་འགྲོ་བར་བཤད་པ་ལས། སྐབས་འདིར་ནི་གཏོར་ཟོར་གྱི་སྔོན་ལ་འཆད་མོད་དང་། གཏོར་མ་འཕངས་གྲུབ་རྗེས་གཏོར་གཞོང་རཀྟའམ་ཆང་ཕུད་ཀྱིས་

[Full Size]

བཤལ་བ་ལ་འབྲུ་གསུམ་གྱིས་བྱིན་རླབས་པ་ཕུལ་ནས་བསྟན་མ་བསྐྱངས་བ་ཕྱག་བཞེས་ལགས་ཤིང་། གཞུང་གཞན་མའི་སྐབས་སུ་ནི་སྒྲིག་རིམ་འདི་དང་མི་འདྲ་བ་ཡང་འབྱུང་ཕྱིར་རང་གཞུང་དེ་ཀའི་ལུགས་ལྟར་བྱས་པ་ཉིད་བྱིན་རླབས་ཆེ་བ་དང་། ལར་ཡང་། ཆོས་ཐམས་ཅད་དོན་ལ་དབྱེར་མེད་ནའང་གནས་སྐབས་གདུལ་བྱའི་དབང་གིས་ཐེག་པ་དང་རྒྱུད་སྡེའི་རིམ་པ་ཐ་དད་ཀྱི་རྣམ་པར་བྱུང་བ་རྣམས་རང་རང་གི་སྐབས་དོན་གང་ཡིན་དེ་ཉིད་རྒྱལ་གསུངས་དཔང་པོར་བཞག་ནས་བྱེད་དགོས་པ་མ་གཏོགས་གསང་སྔགས་ཕྱི་ནང་། བཀའ་གསར་རྙིང་། རྒྱུད་སྡེ་གོང་འོག་སོགས་ཅིག་ལ་ཡོད་པ་དེ་ཐམས་ཅད་ལ་དགོངས་ངེས་དང་། ལ་ལར་མེད་པ་དག་གཞན་ལ་ཡོད་པ་ཡང་འདོར་དགོས་པ་ལྟ་བུ་མ་ཡིན་ཚེ། རྒྱུད་འབྲེལ་ཐ་དད་དང་པཎ་གྲུབ་སོ་སོའི་ཕྱག་བཞེས་བཞིན་བྱེད་དགོས་ཕྱིར་

[Full Size]

རྙིང་ལུགས་ལ་གུ་རུ་རིན་པོ་ཆེའི་གཏེར་གཞུང་ཉིད་ཇི་ལྟ་བ་མ་གཏོགས་གཞན་དང་བསྟུན་དགོས་པ་མ་ཡིན་མོད་ཀྱི།། ༈ །།གཏེར་གསར་འདིར་ཡང་དཀོན་མཆོག་སྤྱི་འདུས་ཉིད་ཅུང་ཟད་བསྡུས་པའི་གཤིས་ཀྱིས། སྨད་ལས་དགྲ་གེགས་སྒྲོལ་བའི་སྐོར་སོགས་རྒྱས་པར་མགོན་པོ་མ་ནིང་གི་ཆོས་སྐོར་དུ་བསྟན་ཞིང་། ཉེར་མཁོ་འགའ་ཞིག་ནི་ཞི་ཁྲོ་ངེས་དོན་སྙིང་པོ་དང་བསྡེབས་རྒྱུར་སྣང་ནའང་། གཏེར་སྟོན་ཆེན་པོ་དེ་ཉིད་ཀྱི་འགྲོ་དོན་ཐོག་མར་མཛད་སྐབས་ཞི་ཁྲོ་དང་མགོན་པོ་སོགས་ཞལ་མ་ཕྱེས་པའི་གཤིས་ཀྱི་གཏེར་རྙིང་བཀའ་བརྒྱད་དགོངས་འདུས་སོགས་ནས་འགེབས་པར་མཛད་དགོས་བྱུང་བ་དང་། དེ་དག་ཀྱང་དུས་གཅིག་ལ་མ་ཡིན་པར་དགོས་ཆེད་དང་ཞུ་བ་པོ་སོགས་ཀྱི་སྟབས་ལས་ཕྲལ་ཕྲལ་དུ་སྡེབས་པ་གནང་གཤིས་ཀྱིས་ཆོ་གའི་སྒྲིགས་རིམ་ཚད་གཅིག་ཏུ་མེད་པར་ཐར་ཐོར་དུ་གྱུར་པ་ལྟ་བུ་

[Full Size]

འདི་ལགས་མོད་ཀྱང་བྱིན་རླབས་ཀྱི་བབས་ནི་ནམ་ཀྱང་མི་དམན་པར་འབྱུང་སྟེ། དེ་ཐམས་ཅད་གུ་རུའི་བཀའ་དྲི་མ་མེད་པ་ཤ་སྟག་ཡིན་པའི་ཕྱིར་རོ།། ༈ །།འདི་སྐབས་འཕྲོས་དོན་དུ་དེ་ཁར་སྔར་གྱི་ཕྱག་བཞེས་སུ་ཚོགས་ལྷག་ནི་ཐམས་ཅད་ཀྱི་རྗེས་སུ་མཛད་ཚུལ་སོགས་ལ་མི་འཐད་པའི་ཀླན་ཀ་སྣ་ཚོགས་ཟེར་ཞིང་། དཀྱིལ་འཁོར་པ་ཐམས་ཅད་དགྲ་ཕྱོགས་སུ་རྦད་བསྐུལ་གྱིས་གཤེགས་ཚར་ནས་ཤུལ་དུ་ལྷག་གཏོར་སུ་ལ་འབུལ། ཞེས་སོགས་ཀྱི་ངག་ཁྱལ་སྒྲོག་པར་བྱེད་པ་དག་ནི་གསང་སྔགས་ལྟ་སྒོམ་ཏིང་འཛིན་གནད་དོན་ཡིད་ལ་འཁོར་མ་མྱོང་བའི་རང་འཚང་སྟོན་པའི་གཏམ་དུ་ཟད་དེ། ཟེར་ཚུལ་དེ་ལྟར་ན་ལྷ་ཚོགས་རྣམས་དགྲ་ཕྱོགས་སུ་བྱོན་ནས་སླར་ཚུར་བྱོན་རྒྱུ་ཡེ་མེད་པ་ལྟ་བུར་འདོད་དགོས་ཕྱིར། སྒྲུབ་པ་པོ་རྣམས་ནང་དུ་ལོག་དུས་རྗེས་ཆོག་གི་དངོས་གྲུབ་བླངས་བ་དང་ཉེས་བྱས་བཤགས་པ་སོགས་ཀྱང་སུ་ལ་

[Full Size]

བྱེད་ཟེར་དགོས་པར་འགྱུར་ཞིང་། བསྔོ་སྨོན་བཀྲ་ཤིས་སོགས་བྱེད་པའི་དཔང་པོ་ཡང་མེད་པས་བྱས་ཀྱང་དོན་མེད་དོ་ཟེར་རམ། འདི་ལྟ་བུ་ནི་སྤྱོད་ལྡན་རྣམས་འཁྲེལ་གད་ཀྱི་རྒྱུར་འགྱུར་བ་ཉིད་ལས་འོད་ཅི་ཞིག། ༈ །།དེ་བས་ན་དཀྱིལ་འཁོར་ལྷ་ཚོགས་ཐམས་ཅད་དོན་དམ་ཆོས་དབྱིངས་ཀུན་ཏུ་བཟང་པོ་སྤྲོས་བྲལ་ཐིག་ལེ་ཉག་གཅིག་ལས་རྡུལ་ཙམ་གཡོས་པ་མེད་ཀྱང་། གནས་སྐབས་གདུལ་བྱའི་ཡུལ་དང་འཚམས་པའི་རྫུ་འཕྲུལ་སྤྲུལ་སྒྱུར་གྱི་ཟློས་གར་ནི་འཇིག་རྟེན་གྱི་ཁམས་རྒྱ་མཚོ་ཇི་སྙེད་པར་ཁེངས་ཞིང་ཕྲིན་ལས་རབ་འབྱམས་མཐའ་ཡས་པ་སེ་གོལ་གྱི་ཡུན་ཙམ་ལ་རྫོགས་པར་སྟོན་ཀྱང་ངོ་བོ་ལ་འཕོ་འགྱུར་འགྲོ་འོངས་བྱ་བྱེད་སོགས་ཀྱི་རྩོལ་རྟོག་དང་འཛིན་པ་ནི་སྐྲ་ཉག་བརྒྱར་བཤགས་པའི་ཆ་ཙམ་ཡང་ག་ལ་མཆིས་ཏེ། ཞིང་དང་དངོས་པོར་སྣང་ཡང་དངོས་པོར་མ་གྲུབ། སྐུ་ལྟར་སྣང་ཡང་མཚན་མར་མ་གྲུབ། མཛད་ཕྲིན་ལྟར་སྣང་ཡང་གཟུང་འཛིན་

[Full Size]

དུ་མ་གྲུབ་པའི་ཡེ་ཤེས་སྒྱུ་མའི་རོལ་པ་འབའ་ཤིག་ལས་གཞན་མ་ཡིན་ཚེ། ཐུགས་རྗེའི་རྣམ་རོལ་མཐའ་ཡས་པ་སྤྲོ། བསྡུ། གཤེགས། བཞུགས། ཅི་དང་ཅི་ལྟ་བུར་བསྟན་ཀྱང་ཆོས་སྐུའི་ཀློང་ལས་སྐད་ཅིག་ཀྱང་མ་འདས་ཏེ། ཇི་ལྟར་ནམ་མཁའི་དབྱིངས་སུ་སྤྲིན་གྱི་ཚོགས་ཇི་སྙེད་ཤར། འཕྲོས། དེངས། ཐིམ་པ་སོགས་ཅི་ལྟར་བྱས་ཀྱང་ནམ་མཁའ་ལས་གཡོས་པ་མེད་པ་བཞིན། རྒྱལ་བའི་མཛད་ཕྲིན་དང་རྣལ་འབྱོར་པའི་ཏིང་འཛིན་གྱི་སྤྲོ་བསྡུ་རྣམས་ཀྱང་དེ་དང་མཚུངས་པར་ཤེས་དགོས་པ་ཉིད་དེ། ཇི་སྐད་དུ། འབྲས་བུ་གསང་བ་བླ་ན་མེད་པའི་རྒྱུད་ལས། སྐུ་དོང་ཡེ་ཤེས་ཞིང་ཁམས་ལ། །འདུ་བའི་ཕྲིན་ལས་ཐམས་ཅད་ནི། །སྔ་ཕྱི་བྱེ་བྲག་ཐ་དད་མེད། །ཐམས་ཅད་བདེ་ཆེན་ལྷན་ཅིག་སྐྱེས། །ཉི་མའི་འོད་དང་སྣང་བྱེད་བཞིན། །ཡེ་ཤེས་སྣང་བའི་དཀྱིལ་འཁོར་དུ། །སངས་རྒྱས་ཐོག་མཐའ་མེད་པ་ཀུན། །ཡེ་ཤེས་སྣང་བ་གཅིག་ལ་སྤྱོད། ཞེས་སོགས་

[Full Size]

དང་། །སྐུ་རྒྱུད་ཤེལ་གྱི་རི་བོ་ལས་ཀྱང་། །ཐུགས་རྗེ་ངང་གི་སྤྲུལ་པ་ནི། །གང་ཡིན་གཙོ་བོ་དབྱེར་མེད་ཀྱི། །སྤྲུལ་པ་དཔག་མེད་འགྱེད་པ་ཡིས། །སྣང་སྲིད་འཇིག་རྟེན་ཐམས་ཅད་གང་། །སོ་སོའི་ཕྲིན་ལས་སྣ་ཚོགས་བྱེད། །ཡང་ནི་སོ་སོའི་དབྱིངས་སུ་ཐིམ། །དེ་བཞིན་གཅིག་ལས་གཅིག་སྤྲུལ་ཞིང་། །མར་མེ་གཅིག་ལས་གཅིག་འཕེལ་བས། །ཐམས་ཅད་མར་མེས་གང་བ་ལྟར། །སྡོང་པོ་གཅིག་ལས་ཡལ་ག་འབུམ། །སོ་སོར་དགྱེས་པ་ལྟ་བུར་སྤྲུལ། །དེ་དག་གདུལ་བྱའི་སྣང་ཚུལ་ཏེ། །ཟླ་བ་དང་ནི་ཆུ་སྣོད་བཞིན། གཅིག་ལས་མང་པོར་སྤྲུལ་སྣང་བའོ། །ཞེས་པ་དེ་ལྟ་བུའི་དགོངས་དོན་མ་གཏོགས་ན་གསང་སྔགས་ཟབ་མོའི་ཆོས་ཚུལ་ལ་འཇུག་པའི་ཐབས་མི་འབྱུང་ཞིང་། ཆོས་ཀྱི་དབྱིངས་ཟབ་མོ་བློ་ཁོག་ཏུ་མི་ཤོང་བཞིན་ཐེག་ཆེན་གསང་སྔགས་པར་ཁས་བླངས་ནས། དགོས་གལ་ཆེ་བའི་དོན་གྱི་སྙིང་པོ་རང་གི་རྒྱུད་ལ་མ་འབྱོར་བར། གཞན་ལ་ཚིག་ཤོ་ལོ་

[Full Size]

ཀ་རེ་གཉིས་ཀྱི་སྔ་རྟིང་ཙམ་ལའང་སྒྲོ་བཏགས་ཀྱི་སྐྱོན་འགེལ་བྱས་ཏེ། འདི་ནི་མཐོས་སོ། །འདི་ནི་དམས་སོ། །འདི་ནི་ནོར་རོ། །འདི་ནི་འཁྲུལ་ལོ་ཞེས་སྨྲ་བར་བྱེད་པ་ནི་རང་ཉིད་ངན་འགྲོའི་རྒྱུ་སྒྲུབ་པ་ཙམ་ལས་གཞན་པའི་དགོས་པ་ཅི་ཡང་མི་འབྱུང་གི། དེ་བས་ཀྱང་དང་པོར་གོང་དུ་སྨོས་པའི་གནས་ལུགས་ཡེ་ཇི་བཞིན་པའི་ཡིན་ཚུལ་འདི་ཐུགས་ལ་ཤོང་ཞིང་ངེས་པ་གཅིག་མཛོད་དང་། ཚིག་བརྗོད་སྔ་ཕྱི་ཕྲན་ཚོགས་ཀྱི་རིམ་པ་ལ་རག་མ་ལུས་པའི་དོན་ཞིག་འགྲུབ་ནས་འོང་གི། ཇི་སྐད་དུ། རང་རིག་རྩལ་གྱིས་ཡོངས་ལ་མ་གདལ་ན། ཕྲལ་གྱི་འཕྲོ་འདུས་ཉོན་མོངས་དངས་མི་འགྱུར་སྐད་ཅིག་ཙམ་ལ་རང་བྱུང་ཉིད་ཤར་བས། ཡོངས་སུ་རྫོགས་པའི་ཏིང་འཛིན་མ་སྒོམས་གསལ། ཞེས་དང་། དགོངས་པ་ཡིད་ཀྱི་ཏིང་འཛིན་མ་གསལ་ན། ཕྲལ་གྱི་སྤྲོ་བསྡུས་རང་རིག་ལྷ་མི་གསལ།

[Full Size]

ཆོས་ཉིད་རང་གསལ་རིག་པའི་གཏིང་རྟོགས་ན། ཏིང་ངེ་འཛིན་གྱི་ཆོ་འཕྲུལ་མ་བསྒོམས་གསལ། ཞེས། ཞི་ཁྲོ་དོན་ཁྲིས་གསུངས་པ་ལྟར་གྱི་དོན་རྒྱུད་ལ་འབྱོར་དགོས་པ་ལགས། ཞེས། ཀླན་ཀ་སྒྲོག་པ་པོ་ལ་གདམས་སོ།། ༈ །།རྒྱལ་བའི་སྤྱི་གཟུགས་མཆོག་གི་སྤྲུལ་པའི་སྐུའི། །བཀའ་མཆེད་ལན་དུ་ཅི་ནུས་ཕུལ་བ་ཡི། །ཞར་བྱུང་གཞན་གྱི་ངག་ཁྱལ་ཟློག་ཚིག་འདི། །མི་རྒན་ཤི་སྐྲ་དཀར་པོའི་ཁེབས་བཞིན་དུ། །དལ་གཏམ་ཡི་གེར་འགོད་པའི་ལོང་མེད་ཀྱང་། །དང་པོའི་ལས་ཅན་བློ་དམན་དད་ལྡན་དག །ཡིད་ཀྱི་འཆིང་བ་གཅོད་ལ་ཕན་ནམ་སྙམ། །སྨྲས་འདི་ཉེས་པའི་རྒྱུ་རུ་མ་གྱུར་ཅིག །ཤུ་བྷཾ།། ༈ །།ཡང་རེ་ཤིག་བཀའི་གླེགས་བུ་རིན་པོ་ཆེ་བསྩལ་བའི་ཁྲོད་ན། གཏེར་གསར་གྱི་ཆོས་བཀའ་ཐ་དད་པའི་བསྙེན་སྒྲུབ་ཀྱི་

[Full Size]

སྐབས་དོན་རྣམས་སྨྲ་བར་བྱོས་ཤིག་ཅེས་གསུངས་པའི་ཆར། སྤྱིར་ཡང་རིག་འཛིན་འཇའ་ཚོན་པའི་ཆོས་སྐོར་འདི་དག་ཕལ་མོ་ཆེའི་བབས་ཡུལ་ནི་རྙིང་ལུགས་ལས་ཀྱང་གསར་མ་ལུགས་ཁོ་ན་འདྲ་ཆེ་བ་ཞིག་ངེས་པར་སྣང་བ་ནི་བདག་འདྲ་བླུན་པོས་ཀྱང་མཐོང་ལ། གཞན་དག་གིས་ཀྱང་དེ་བཞིན་ཟེར་བ་དང་། ཁྱད་པར་རྙིང་མ་བར་རློམ་པ་རིག་འཛིན་དེ་ཉིད་ལ་མི་མོས་པ་དག་གིས་སྐུར་ཞུས་བྱེད་པའི་རྒྱུ་རྐྱེན་ཡང་དེ་འདྲའི་སྟབས་ཀྱིས་ཡིན་པར་སྣང་ལ། རྫོགས་རིམ་ངེས་དོན་ལྟ་སྒོམ་སྐབས་ཀྱི་ཆོས་སྐད་རྣམས་ལའང་མིང་རྫོགས་ཆེན་དུ་བཏགས་ཀྱང་དངོས་གཞི་ཕྱག་ཆེན་པོར་བཞག་ཏུ་འདུག་ཅེས་སྙད་འདོགས་བྱེད་མོད་ཀྱི། བདག་འདྲའི་བསམ་ཚོད་ལ་ནི། གུ་རུ་རིན་པོ་ཆེ་ཉིད་འཁོར་འདས་དུས་གསུམ་གསལ་ལེར་མཁྱེན་

[Full Size]

པས། གཏེར་བཏོན་སོ་སོའི་གོམས་འདྲིས་དང་མཐུན་པའི་ཆོས་བཀའ་གཏད་པ་ནི་ངེས་པར་ཡོད་འདུག་སྟེ། དཔེར་ན་མངའ་བདག་མྱང་ཞི་བྱེད་ལ་མཁས་པ་ལ་ཞི་བྱེད་ཀྱི་དགོངས་པ་དང་མཐུན་པའི་ཆོས་སྐོར་མང་དུ་གཏད། གུ་རུ་ཆོས་དབང་སྨན་རྩིས་ལ་མཁས་པས་སྨན་རྩིས་ཀྱི་སྐོར་མང་དུ་གནང་། དེ་བཞིན་དུ་རྒྱ་ཞང་ཁྲོམ་མཐུ་མཁན་ལ་མཐུ་གཏད་ཀྱི་སྐོར་དང་། བོན་པོ་བྲག་ཚལ་དང་བོན་གསས་ཁྱུང་འཐོགས་སོགས་ལ་བོན། ར་ཁྲག་གཏེར་བཏོན་མདོས་མཁན་ལ་མདོས་ཆོག །ར་མོ་ཤེལ་སྨན་དང་ཀུ་ཚ་སྨན་པ་སོགས་ལ་སྨན་དཔྱད་ཀྱི་གཏེར་ཁ་གཏད་པ་དང་། གཞན་ཡང་། རིན་ཆེན་གླིང་པའི་ཆོས་སྐོར་གྱི་བདག་པོ་རྗེ་རང་བྱུང་གིས་མཛད་དགོས་ཕྱིར་ཕྱག་ཆེན་ཆོས་དྲུག་སོགས་བྱུང་བ་དང་། ཆོས་སྐད་ཀྱི་བབས་འགྲོས་ཀྱང་། མངའ་རིས་

[Full Size]

པཎ་ཆེན་ས་སྐྱའི་སྐོར་ལ་མཁས་པས་གཏེར་ཆོས་ཀྱི་དབྱིབས་ཀྱང་ས་ལུགས་འདྲ་བ་དང་། འཕྲང་པོ་གཏེར་བཏོན་ཡང་གསར་མ། མཁས་ཕྱིར་གཏེར་ཆོས་ཀྱང་གསར་མའི་ཆོས་སྐད་འདྲ་བར་སྣང་ཚེ། རིག་འཛིན་ཆེན་པོ་འདི་ཉིད་ཀྱང་དང་པོའི་ཆོས་སྒོར་ཞུགས་ལུགས་དང་བསྟུན་ནས་གནང་བ་ཞིག་ཡིན་པར་ངེས་ཚེ། རྙིང་མའི་ཆོས་སྐད་འདྲ་པོ་མ་བྱུང་ཞེས་འཁུན་པ་དག་ནི་རང་ཉིད་མཐོང་རྒྱ་ཆུང་སྐྱོན་ལས་གཞན་མ་ཡིན་མོད། རང་བཞིན་བབས་ཀྱིས་ནི། གཏེར་སྟོན་གཏེར་ཆོས་སོགས་ཀྱི་སྐོར་འདི་ལ་ཆོས་མིག་རྡུལ་བྲལ་མ་ཐོབ་རིང་ལ་བརྟག་དཀའ་ཞིང་། གལ་ཏེ་བསླུས་ན་ནི་ཕུང་ཚབས་ཀྱང་ཆེ་ཕྱིར། རིག་འཛིན་ཆེན་པོ་དེ་ཉིད་ཀྱང་འགྲོ་དོན་མཛད་ནས་རྒྱང་ཙམ་མ་སོང་གི་བར་དུ། བདག་ཅག་ཀྱང་ལྐོག་

[Full Size]

གྱུར་གྱི་གནས་མི་ཤེས་ཚེ་ཧ་ཅང་དག་སྣང་བྱེད་སྔས་ས་ལ་དགའ་རྒྱུ་མི་འོང་ཞིང་། ལྷག་པར་རྟོགས་ལྡན་གྱི་རིགས་ལ་བཟང་ངན་སྣ་ཚོགས་ཤིག་མཐོང་བ་དང་། གཏེར་བཏོན་དེ་ཉིད་ཀྱང་ཐོག་མར་སྨན་པ་དང་། དེ་ནས་རྟོགས་ལྡན། སླར་གཏེར་བཏོན་དུ་གྱུར་ཚེ་དེ་འདྲ་ཅི་ཡིན་མི་ཤེས་ཅེས་གླེང་ཞིང་བཏང་སྙོམས་སུ་གནས་པ་ལ། སླད་དུ་རྗེ་ནོར་བུ་བརྒྱན་པས་བདག་རྐྱེན་མཛད་པར་ཐོས་ཕྲལ་ནས། ད་ནི་ཐེ་ཚོམ་མི་དགོས་ཏེ། རྗེ་དེ་ཉིད་ནི་སྤྱིར་སྐྱེས་ཆེན་རྩོད་བྲལ་ཡིན་པར་ལྟ་ཅི་སྨོས་ཀྱི། སྒོས་སུ་གསར་རྙིང་གཉིས་ཀར་མཁྱེན་གཟིགས་ཟླ་མེད་དང་། ཁྱད་པར་ཐུགས་དམ་མངོན་མཁྱེན་གྱིས་ལེགས་ཉེས་སྒྲིབ་བྲལ་དུ་གཟིགས་པས་ན། རྗེ་དེས་དེ་ལྟར་མཛད་ན་སོམ་ཉིད་མི་དགོས་ཞེས་བགྲོས་ཏེ་རིག་འཛིན་དེ་ཉིད་སྤྱན་དྲངས་པས། རྙིང་མ་བར་རློམ་པའི་ཨུ་ཚུགས་

[Full Size]

ཅན་གྱི། དབོན་རིགས་སོགས་མང་པོ་ཡང་། རྩེ་ལེ་བས་གཏེར་སྟོན་ཚད་ལྡན་དུ་མཐོང་ཡོད་པར་འདུག་པས་སྐྱབས་སུ་མཆི་ཞེས་འདུས་ཤིང་བཏུད། དེ་ལྟར་བདག་ཅག་གི་འབུལ་གསོལ་བཀུར་བསྟི་རྒྱ་ཅན་བྱེད་རྒྱུ་མེད་རུང་། ཀོང་པོ། སྤུ་བོ། ཁམས་དང་འཇང་ཡན་ཆད་ཀྱི་རྙིང་མའི་གདུལ་བྱར་གཏོགས་པ་ཐམས་ཅད་འདུས་ཤིང་འགྲོ་དོན་ཆེར་རྒྱས་བྱུང་སོང་བ་དང་། འཇང་ས་ཐམ་རྒྱལ་པོའི་ཞུ་ཡིག་འབུལ་བ་སོགས་ཀྱང་སྐུ་ཞབས་སུ་ཡར་ཕུལ་ཞིང་། མར་ལ་ཕྱག་ཐམ་དམ་རྫས་གཏེར་ཆོས་དད་རྟེན་སོགས་གནང་བའི་བརྡ་སྦྱོར་སོགས་ཀྱང་བདག་གིས་ཕྱག་ཕྱི་ཞུས་པ་ལ་མཉེས་ཚོར་ཡང་ཆེ་བར་མཛད་པ་བྱུང་ལགས་པ་སོགས་འཕྲོས་ཞུས་སུ་གསོལ་བ་དང་།། ༈ །།སྐབས་དོན་དངོས་ལ། དེ་ཡང་བདག་ནི་གཏེར་གསར་དཀོན་མཆོག་སྤྱི་འདུས་རྩ་གསུམ་ལ་གྲངས་

[Full Size]

བསྙེན་ལྷག་ཙམ་དང་། ཁྱད་པར་གུ་རུ་ཞི་བསྙེན་ལ་འབུམ་ཕྲག་བརྒྱ་དང་ཉེར་བརྒྱད་ཙམ་དང་། ཐུགས་རྗེ་ཆེན་པོའི་ཕྱི་སྒྲུབ་སྐྱེ་བདུན་སྒྲུབ་པ་དང་སྦྲགས་པ་ལ་བྱེ་བ་བརྒྱད་མ་གཏོགས། གཏེར་རྗེས་མ་རྣམས་སོ་སོའི་སྒེར་བསྙེན་མ་བྱས་ཏེ། རིག་འཛིན་དེ་ཉིད་ཀྱི་བཀའ་ལས། ཁྱེད་རང་ལ་བདག་གིས་ཆོས་འདི་ཐམས་ཅད་ཀྱི་བདག་པོར་དབང་བསྐུར། བྱིན་གྱིས་བརླབས། བཀའ་གཏད། ལུང་ཕོགས། མངའ་གསོལ་བ་འདི་ཀས་གཞན་དོན་བྱེད་དགོས་པ་བྱུང་ན་ནི་ཇི་ལྟར་འདོད་པ་གྱིས་ལ། ཁྱེད་རང་ཉམས་ལེན་ནི་བསྟན་པའི་བབས་ཀྱི་རྟེན་འབྲེལ་ཡིན་པས། གཏེར་སྙིང་རང་ལ་འབུངས་ཤིག །ཅེས་པའི་ཞལ་གདམས་ཡོད་པར་བརྟེན། དེ་ནས་བཟུང་སྟེ་རང་ཉིད་ཀྱང་གཅིག་ཅར་བའི་བློར་སོང་གཤིས་ཀྱིས། ཇོ་བོ་ཆེན་པོས་ལོ་ཆེན་རིན་བཟང་དང་། ཞང་སྣ་ཆུང་སྟོན་པ་སོགས་ལ། ཆོས་སྙིང་པོར་བསྡུས་ལ་ཉམས་སུ་ལོངས་

[Full Size]

ཤིག་གསུངས་པ་ལྟར་བགྱིད་ཁུས་ཀྱིས་སྣ་མང་གི་སྤྲོས་པ་བསྐྱུངས་པའི་ཁུས་ལགས་ཤིང་། ཅི་ཞུ་ན། དཀོན་མཆོག་སྤྱི་འདུས་ལ་ནི་གཞུང་གི་མཧཱའི་སྐྱེད་རིམ་ནས་ཞལ་གསལ་བ་དང་། དེ་ལས་སྤྲོས་པ་ཆེ་བར་འདོད་པ་དག་ནི་གཏེར་བཏོན་ཉིད་ཀྱིས་མཛད་པའི་ཡང་འགྲེལ་དུ་ཡོད་པ་ལྟར་བསྒོམ་པས་འགྲུབ་མོད་ལ།། ༈ །།ཚེ་སྒྲུབ་གནམ་ལྕགས་རྡོ་རྗེ་ནི་སྤྱིར་ཆོས་ཀྱི་བབས་ཚུལ་པད་གླིང་ཚེ་སྒྲུབ་སོགས་དང་མཐུན་ཤས་ཆེ་བ་དང་། བསྙེན་སྒྲུབ་ཀྱི་དམིགས་རིམ་སྐོར་ལ་ལར་གྲུབ་རྒྱལ་མ་སོགས་དང་ཡང་གཅིག་ཤས་ཆེ་བས། རྗེ་ཉིད་ལྟ་བུས་མི་དགོངས་རྒྱུ་ནི་ག་ལ་སྲིད་དང་། དེ་ཡང་གང་ཟག་སྐྱེད་རྫོགས་ལ་གོམས་ཤིང་སྤྲོས་པ་ཆུང་བའི་རིགས་ནི་རྒྱུན་འཁྱེར་གཉིས་གང་རུང་ཁོ་ནས་ཆོག་མོད་ཀྱང་། སྤྲོས་བཅས་ལ་མོས་པ་དང་། ཁྱད་པར་ཆོས་འདི་

[Full Size]

ཁོ་ན་ལ་མི་ཚེའི་ཆོས་སྐལ་དུ་བྱེད་མཁན་ལྟ་བུ་ཡིན་ན། ཐོག་མར་དབང་ལུང་རྣམས་ཡོངས་རྫོགས་ཞུས་ལ། ཐུན་མོང་གི་སྔོན་འགྲོ་དངོས་གཞི་རྗེས་ཀྱིས་ཉམས་ལེན་ཁ་སྐོངས་ལ་དགོས་རིགས་ཐམས་ཅད་ནི་བི་མ་ལའི་ཆོས་སྤྱོད་ལྟར་བློ་ལ་ངེས་པར་བྱ་ཞིང་། དངོས་གཞིའི་བསྙེན་སྒྲུབ་གཙོ་བོར་ཕྱི་སྒྲུབ་ལྷ་གཅིག་དཀར་པོ་ལ་གཞུང་ཇི་ལྟར་འབད། དེ་ནས་རྩ་རླུང་ཐིག་ལེའི་ཉམས་ལེན་སྔར་མི་ཤེས་ན་བླ་མས་ཟབ་ལམ་གྱི་ཁྲིད་ཚུལ་ལྡན་བཏབ་ཅིང་། དེ་དག་གི་གནད་ཤེས་པར་གྱུར་པ་ན་ཚེ་དཔག་མེད་ཀྱི་ནང་སྒྲུབ་རྟགས་ཐོན་དུ་འབད་དེ་རྗེས་གསང་སྒྲུབ་ལ་འབད་ནས་དེ་ཐམས་ཅད་ལ་གོམས་པ་ཐོབ་ན། མན་ངག་གསང་བའི་སྒྱུ་འཕྲུལ་གྱི་ལས་ཚོགས་རྣམས་དང་། གཞན་ཡང་། སྐུ་གསུང་ཐུགས་ཀྱི་ལས་སྦྱོར་དེ་དག་ཐམས་ཅད་ཚོགས་མེད་དུ་འགྲུབ་མོད། གལ་ཏེ་གང་ཟག་སྣོད་ལྡན་ཁྱད་པར་བའི་རིགས་འོག་སྒོ་བདེ་ཆེན་གྱི་སྐལ་ལྡན་ཡིན་

[Full Size]

པའི་ཚེ་ན་ནི་སྔོན་ལ་ནང་སྒྲུབ་གསང་སྒྲུབ་རྣམས་ལྷག་པར་གནད་བསྣུན་རྟགས་ཐོན་དུ་བྱེད་དགོས་པ་ནི་གལ་པོ་ཆེར་གདའ་བ་དང་། མདོར་ན་འདི་སྐབས་ཀྱི་ཕྱི་ནང་གསང་སྒྲུབ་ཐམས་ཅད་ལུས་དཀྱིལ་འབའ་ཤིག་ཡིན་ཕྱིར་མཚན་བཅས་ཀྱི་དཀྱིལ་འཁོར་སྒྲུབ་རྫས་བཤམས་མི་དགོས་པ་ཤས་ཆེ་བ་དང་། དམིགས་པ་དང་བཟླས་སྔགས་སོགས་ནི་གཞུང་ཉིད་ནས་ཤིན་ཏུ་ཞིབ་ཕྱིར་སླར་ཟིན་རིས་སོགས་དགོས་པའི་རིགས་མ་མཆིས་ལ། འོན་ཀྱང་སློབ་མ་གསར་བུ་བ་ལ་གནང་བའི་སྐབས་ལྟ་བུར་ནི་སྐྱེད་རྫོགས་ཀྱི་གོ་བརྒྱ་བཞི་ནས་མ་དཀྲོལ་ན་ཁོང་ཚོས་མི་གོ་ཚེ་སྤྱི་གཞུང་ལྟར་ཁྲིས་དགོས་པ་ལ།། ༈ །།ཐུགས་རྗེ་ཆེན་པོ་ལ་ནི་སྤྱིར་གཏེར་ཁ་ཐ་དད་ལ་ཐུན་མོང་ཆེན་པོའི་ཆོས་སྐོར་ཡང་རྒྱུད་སྡེ་གོང་འོག་སྣ་ཚོགས་དང་། ཕལ་ཆེར་ནི་བླ་མེད་ལུགས་ཤས་ཆེ་བ་ཙམ་འབྱུང་ནའང་། འདི་

[Full Size]

ནི་ཆོས་རྒྱལ་སྲོང་བཙན་ལུགས་དིང་སང་ཆོས་རྒྱུད་སྤྱི་ལ་ཡོངས་གྲགས་འདི་ཀ་དང་མཐུན་པ་ཉིད་དུ་གདའ་བ་དང་། འདི་ལ་དབང་གི་སྐབས་སོགས་སུ་བླ་མེད་ཀྱི་དབང་བཞི་རྫོགས་མདོར་བསྡུས་མཛད་པ་ཙམ་ལས། ཆོས་དཀའ་དངོས་གཞི་སྤྱོད་རྒྱུད་ཀྱི་ཕྱོགས་སུ་གཏོགས་པར་བཞེད་ཀྱང་། སྣང་སྲིད་གཞི་བཞེངས་ཀྱི་སྐྱེད་ཚུལ་དང་། ནང་སྒྲུབ་ཡུམ་བཅས་སོགས་བླ་མེད་དང་མཐུན་པར་གཞིར་བཅས་ལ། རྫོགས་རིམ་བྱེ་བྲག་པ་ཐབས་ལམ་སོགས་ཀྱང་བསྟན་འདུག་པ་རྣམས་ཀྱིས་རྒྱུད་སྡེ་གོང་འོག་ཐམས་ཅད་ཀྱི་གནད་དོན་ཚང་བར་གསལ་མོད་ཀྱི། འདིའི་ཉམས་ལེན་ལ། ཐོག་མར་སྔོན་འགྲོ་བཞི་སྦྱོར་ནི་གཙོ་བོར་ཁྲིད་ལ་བསྔགས་པ་ཡིན་མོད་ཀྱང་སྐྱེད་རིམ་བསྙེན་སྒྲུབ་ཀྱི་ཡང་ཐུན་མགོར་ཡོད་ན་ལེགས་པ་དང་། དངོས་གཞི་ནི། ཕྱི་སྒྲུབ་ཕྱག་སྟོང་སྤྱན་སྟོང་དེ་ཉིད་མིང་ཕྱི་སྒྲུབ་ཏུ་བཏགས་ཀྱང་དོན་

[Full Size]

ལ་ཐེག་ཆེན་གསང་སྔགས་ཀྱི་སྒོམ་རིམ་དཀྱིལ་འཁོར་གསུམ་ལྡན་ཟབ་པའི་སྙིང་པོ་ཡིན་པར་གདའ་བས། དབང་པོ་རབ་ཀྱི་བསྒོམ་ཚུལ་འདི་ལས་ལྷག་པའི་སྐྱེད་རྫོགས་གཞན་དགོས་པར་མ་གྱུར་ལ། འདི་ལ་འཁོར་ཚོགས་བསྐྱེད་པ་ནི་ཆོ་ག་དང་དབང་པོ་སོགས་མདུན་སྐྱེད་བསྒྲུབ་དགོས་ན་མ་གཏོགས། བདག་བསྐྱེད་རྒྱུན་གྱི་ཉམས་ལེན་ལ་ནི་སྣང་སྲིད་སྣོད་བཅུད་ཐམས་ཅད་འཕགས་པ་ཉིད་དུ་བྱས་ཚེ་འཁོར་ཟུར་དུ་བསྒོམ་དགོས་པ་མ་མཆིས་ལ། གཟུངས་རིང་དང་ཡིག་དྲུག་གང་བཟླ་ཡང་དམིགས་པ་ནི་གཞུང་ཉིད་ལྟར་གྱིས་འཐུས་པ་དང་། འདི་ལ་འབད་ནུས་ན། ནང་དང་གསང་བ་དེ་བཞིན་ཉིད་སྒྲུབ་སོགས་མཐར་ཆགས་སུ་ངེས་པར་དགོས་པ་ནི་མ་ལགས་མོད་ཀྱི། གལ་ཏེ་ཅིས་ཀྱང་དེ་ཐམས་ཅད་ཚང་བར་བསྙེན་འདོད་པ་ལྟ་བུས་ནི་སྔོན་ལ་ཕྱི་སྒྲུབ་འདི་ལོ་ཟླ་ཞག་

[Full Size]

ཇི་ཙམ་འདོད་པ་བྱས་ལ། དེ་ནས་ནང་གསང་རྣམས་ཀྱང་ཟླ་རེ་སོགས་སྤྱི་ལྟར་འདོད་པ་བྱས་པས་རུང་བ་དང་། ཁྱད་པར་བཀའ་ཐམ་དུ། ཆོས་ལོངས་སྤྲུལ་གསུམ་གྱི་སྤྱན་རས་གཟིགས་གསུམ་པོ་དེ་སེམས་དཔའ་གསུམ་བརྩེགས་ལྟར་ནང་ལ་ནང་བཅུག་ལྟ་བུར་དགོས་མི་དགོས་ཕེབས་པ་དེ་ནི། བདག་གིས། རིག་འཛིན་ཆེན་པོ་ཉིད་ལ་སྒེར་ཞུས་བཞིན་མ་བྱས་ཀྱང་། རང་གི་གོ་ཚོད་ལ་ནི་དེ་གསུམ་པོ་རང་ཉིད་གང་མོས་སུ། གང་རུང་གཅིག་སྒོམ་པ་མ་གཏོགས་དུས་གཅིག་ལ་གསུམ་ག་དགོས་པར་མི་སེམས་ཏེ། ཚེ་སྒྲུབ་རྒྱུན་འཁྱེར་གཉིས་དགོངས་པ་གཅིག་པར་གོ་ལ། དགོས་པ་ནི། གང་ཟག་སྤྲོས་མེད་དམ་ལོང་ཁྱབ་མེད་པའི་རིགས་ལ་དགོངས་སམ་སྙམ་སྟེ། གཞུང་ཉིད་ནས་ལྷ་གྲངས་གཙོ་འཁོར་གང་རུང་ལ་ཁོལ་འདོན་དུ་སྒྲུབ་ཀྱང་བྱིན་རླབས་ལྷག་པར་ཆེ་བ་ནི་སྤྲུལ་པའི་ཆོས་རྒྱལ་ཉིད་ཀྱི་ཞལ་ལུང་ཡིན་

[Full Size]

ཞེས་གསུངས་འདུག་པའི་ཕྱིར་རོ། །དེས་ན་སྐྱེད་ཆོག་རྒྱས་པའི་རིམ་པ་ལ་མོས་ན་དེའི་སྤྱན་འདྲེན་མཆོད་བསྟོད་སོགས་ཀྱང་གཞུང་ཉིད་ལྟར་བྱས་ལ། བསྡུས་པ་རྒྱུན་ཁྱེར་དག་ལ་ནི་སྐྱེད་རྫོགས་ཟུང་འཇུག་འཁོར་ཡུག་ཡིན་ཕྱིར་ཆུ་བོའི་རྒྱུན་ལྟར་མ་གཏོགས་བརྗོད་བྱ་མང་པོ་གཤེགས་བསྡུ་སོགས་མི་དགོས་པ་ནི་དགོངས་མངའ་ལྟར་དང་། འདི་ལ་ཡང་དབང་། རབ་གནས་གཤིན་དོན། བུམ་སྒྲུབ་སོགས་ལས་མཐའ་ཟུར་དགོས་ཡིན་ན་མ་གཏོགས། བདག་སྐྱེད་བསྙེན་པ་གང་ལ་ཡང་དཀྱིལ་འཁོར་སོགས་མི་དགོས་པ་ནི་སྤྱི་དང་མཐུན་ནོ། །གོང་ཞུས་ལྟར། ཆོས་ལོངས་སྤྲུལ་གསུམ་གྱི་ཐུགས་རྗེ་ཆེན་པོ་དེ་དག་ནང་ལ་ནང་བཅུག་ཏུ་བྱ་དགོས་པ་ཞིག་ཡིན་ན་ནི་ཕྱི་ནང་གི་གོ་རིམ་ཡང་གོ་ལོག་ལྟ་བུར་འགྱུར་བར་སྣང་སྟེ། དཔེར་ན་བཀའ་བརྒྱད་དངོས་གྲུབ་སྙིང་པོར་ཕྱི་སྤྲུལ་སྐུའི་ཆེ་མཆོག་དབུ་

[Full Size]

མང་ཕྱག་མང་རྣམས་ཀྱི་ནང་དུ་རིམ་པས་ཞལ་ཕྱག་ཉུང་དུ་བསྡུས་ནས། མཐར་ཐུགས་ཀའི་ཆོས་སྐུ་ཞལ་གཅིག་ཕྱག་གཉིས་པ་སྙིང་པོའི་ཧེ་རུ་ཀར་མཛད་པ་ལྟར། འདིར་ཡང་དེ་ལྟ་བུར་དགོས་པར་སེམས་ཀྱང་དེ་དང་མ་གཅིག་པར་ཕྱི་ནང་གོ་ལྡོག་ཏུ་སྣང་བས་དེས་ན་བདག་ནི་འདི་དག་ཐ་དད་གང་མོས་སུ་བསྒོམ་རྒྱུ་ཁོ་ནར་བརྩི་བ་ལགས།། ༈ །།སྙན་བརྒྱུད་གཙུག་རྒྱན་ནོར་བུའི་རྩ་བའི་བསྙེན་པ་ནི་ཁརྶ་པཱ་ཎི་བསྐྱེད་ཚུལ་གཞུང་བཞིན་ལ། བཟླས་པའི་སྐབས་སུ་ཡི་གེ་བཅུ་པ་ནི། ཨོཾ་ཨཱཿཧཱུྃ་ཧྲིཿཨོཾ་མ་ཎི་པདྨེ་ཧཱུྃ། ཞེས་པ་ཉིད་ཡིན་པ་དང་། བསྙེན་ཚད་བྱེ་བའམ་གང་འགྲུབ་སོང་བ་དང་། བླ་མ་སྐུ་གསུམ་རྣམས་ཀྱང་བསྙེན་ཚད་ཞག་གྲངས་སོགས་མོས་བློ་དང་བསྟུན་ཞིང་། འཇིགས་བྱེད་ནག་པོ་ནི་ཆེད་དུ་དྲག་ལས་བསྒྲུབ་དགོས་པའམ། ཁྱད་པར་བྱད་མ་ནང་འདྲས་ལྟ་བུ་ཟློག་པ་གཞན་གྱིས་མི་བཟློག་

[Full Size]

པའི་རིགས་ལ་འདི་ཉིད་བསྔགས་པ་ཡིན་ཞེས་རིག་འཛིན་ཆེན་པོ་དེ་ཉིད་གསུངས་བ་ལས། རྒྱུན་གྱི་ཉམས་ལེན་དཀྱུས་མར་དགོས་པ་ནི་མིན་པར་སྣང་ཞིང་། སྙན་རྒྱུད་ཉིད་ཀྱི་རྒྱུན་འཁྱེར་ནི། མཇུག་གི་ཡིག་ཆུང་ལ་འཁོད་པར་གནང་བ་རིག་འཛིན་ཆེན་པོ་ཉིད་ཀྱི་ཉམས་བཞེས་ཡིན་གསུངས་བ་དེ་སྐབས་ཐུགས་ཀར་རྩ་བའི་བླ་མ་རྣམ་ཤེས་ཀྱི་ཚུལ་དུ་གསལ་བ་དེ་རྗེ་བཙུན་མི་ཕམ་བློ་གྲོས་ལ་མཛད་མོད་ཀྱི། འོ་སྐོལ་གཞན་རྣམས་ཀྱིས་ནི་རིག་འཛིན་ཆེན་པོ་ཉིད་བསྒོམ་རྒྱུ་དང་། འཁོར་ཡང་འདོད་བསྟུན་བྱས་ཆོག་པར་གསུངས་པ་བཞིན། གུ་རུ་རིན་པོ་ཆེ། སྲོང་བཙན་སྒམ་པོ། མཉམ་མེད་རིན་པོ་ཆེ་རྣམས་ལ་མི་མོས་མཁན་མི་འབྱུང་ལ། རྒྱལ་བའི་དབང་པོ་སོགས་ཀྱི་དོང་དུ་རང་རང་གི་བླ་མ་གང་ཡིན་བསྐྱེད་པར་སྤྲོ་ན་དེ་བཞིན་བྱ། གཞན་ཞིབ་ཆ་མཐའ་དག་གཞུང་ཉིད་ནས་འབྱུང་བ་ལ་མ་འཐུས་པ་མེད་དོ།།

[Full Size]

༈ །།རྟ་ཕག་ཡིད་བཞིན་ནོར་བུ་ལ། ལྟུང་བཤགས་ལྷ་ཚོགས་ནི་མདུན་གྱི་ནམ་མཁར་སྐྱབས་ཡུལ་དུ་གསལ་རྒྱུ་ལགས་ཤིང་། བསྙེན་སྒྲུབ་དངོས་ཀྱི་དང་པོར་ཕྱི་སྒྲུབ་ནི་ཁརྶ་ས་ཎི་བསྐྱེད་ཚུལ་གཞུང་བཞིན་དང་། ནང་སྒྲུབ་ནི་དེ་གཉིས་རྟ་མགྲིན་དུ་གནས་བསྒྱུར་བ་སྟེ། རྟ་མགྲིན་འདི་ནི་ངོ་བོ་ལ་ཁྱད་ག་ལ་ཡོད་ཀྱང་གནས་སྐབས་ཀྱི་ཆ་ལུགས་རྣམ་འགྱུར་ནི་སྔོན་གཏེར་བཏོན་སྙེ་མོ་ཞུ་ཡས་ཀྱི་གཏེར་ནས་གདན་དྲངས་ཀྱང་འགྲོ་དོན་མ་བྱུང་བར་ཕྱིས་སྐྱེར་སྒང་པ་ཆེན་པོའི་ཕྱག་ཏུ་བབས་ཤིང་། ཁོང་གིས་མནལ་ལམ་བཟུང་ནས་རྔ་ཡབ་གླིང་དུ་གུ་རུ་ཉིད་ལ་ཞུས་ཤིང་སྤེལ་བས། དེང་སང་ཤངས་པའི་རྟ་མགྲིན་ཞེས་ཡོངས་གྲགས་དེ་དང་གཅིག་པར་གདའ་ལགས། གསང་སྒྲུབའམ་རྒྱུན་ཁྱེར་གྱི་ཉམས་ལེན་ནི། ཧྲཱིཿ བདག་ཉིད་དབང་ཆེན་ཡབ་ཡུམ་ནི། ཞེས་སོགས་གཞུང་ལས་བྱུང་བ་ལྟར་གསལ་ནས་ཡི་གེ་བཅུ་གཅིག་པ་ཟླ་བ་

[Full Size]

དང་། འདི་སྐྱེད་རྫོགས་ཟུང་འཇུག་ཐུན་མཚམས་བྲལ་བ་ཆུ་བོ་རྒྱུན་གྱི་ཉམས་ལེན་ཡིན་པར་གདའ་ལ། གོང་གི་ཕྱི་ནང་གི་སྒྲུབ་པ་གཉིས་པོ་སྔོན་ལ་མ་ཐུབ་པའི་ཚེ་ནའང་ཐོག་མ་ནས་དྲིལ་སྒྲུབ་འདི་ལ་ཆིག་དྲིལ་དུ་འབད་ཀྱང་ཆོག་པར་གསུངས་པ་ལགས།། ༈ །།རྡོ་རྗེ་གྲོ་ལོད་ལ། གུ་རུ་ཞི་བ་སྔོན་དུ་སྒྲུབ་ཅིང་ཡིག་བདུན་བསྙེན་ཚུལ་དང་། སླར་གྲོ་ལོད་ཉིད་ཀྱི་ཧཱུྃ་སྒྲུབ་དང་བཅས་པ་གཞུང་ཉིད་ཀྱིས་གསལ་མོད་ལ། བདག་གི་ཕུལ་བའི་དབང་ཆོག་འདིར་ཡང་ཞིབ་པར་བསྟན་ཡོད་པས། དབྱིངས་ཟབ་དམ་པར་བཅགས་པར་གསོལ།། ༈ །།དཔལ་མགོན་མ་ནིང་ལ་ནི། སྤྱིར་འདི་རིགས་ཀྱི་སྒྲུབ་པ་པོ་ཡང་། རྗེ་དེ་ཉིད་ལྟ་བུ་ལ་སྨོས་ཅི་དགོས་ཀྱི། གང་ཟག་ཕལ་པའི་རིགས་ལ་ནི་ལྟ་བ་རྒྱབ་ཀྱི་ལྷ་དང་གཉེན་པོ་སྟོབས་ཀྱི་ལྷ་སོགས་ལ་ནུས་གདེངས་

[Full Size]

ཚད་ལྡན་སྔོན་དུ་འགྲོ་དགོས་ཚེ། རྙིགས་དུས་ཀྱི་གང་ཟག་ཕྲལ་གྱི་འདོད་ཐག་ཉེ་ལ་ཕུགས་ཀྱི་ཁེ་གྱོང་མི་ཤེས་པ་མང་ཕྱིར་དེ་འདྲའི་རིགས་ཀྱིས་བསྒྲུབ་ཀྱང་གཅེར་བུའི་མདའ་ཁ་དང་། གོ་མེད་གཡུལ་ཞུགས་ཀྱི་དཔེར་ཟད་མེད་ཀྱི། འོན་ཀྱང་རྩ་བའི་བསྙེན་པ་ཙམ་ཞིག་བྱེད་པའི་དབང་དུ་བགྱི་ན། སྔོན་ལ་ཕྱག་རྡོར་རྟ་མགྲིན་གང་རུང་ངམ། རབ་ལ་ནི་ཆེ་མཆོག་གི་བསྙེན་པ་བཀའ་བརྒྱད་གཏེར་ཁ་གང་རུང་གི་ལུགས་ལྟར་གྲངས་བསྙེན་ཐེམས་པ་ཞིག་ནི་མེད་དུ་མི་རུང་དང་། དེ་ནས་འདི་ཉིད་ལ་ནམ་འཇུག་ཚེ་གནས་དབེན་ལ་མཚམས་དམ་པ་དང་། ཁྱད་པར་བུད་མེད་ཀྱི་རིགས་ཀྱིས་མི་མཐོང་བར། མགོན་པོའི་སྐུ་རྟེན་བྲིས་འབུར་ཅི་རིགས་བཤམས་པའི་དྲུང་དུ། གཏོར་མ་བཟང་པོ་གཟི་ལྡན་རྒྱུན་བཞག་ཞིག་དང་། ནུབ་རེ་ལ་འབུལ་རྒྱུའི་གཏོར་ཆུང་རེ་

[Full Size]

གཞན་ཡང་སྨན་རཀ་མཆོད་ཚོགས་སྤྱན་གཟིགས་མགོན་རྫས་གྱི་རིགས་ཀྱི་ནམ་པར་བཤམས་ལ་སྐྱབས་སེམས་བདུན་དག་སོགས་ཐུན་མོང་གི་སྔོན་འགྲོ་སྤྱི་མཐུན་གྱི་རྗེས་ལ། བདག་སྐྱེད་ཆེ་མཆོག་གི་བསྐྱེད་ཟླས་བརྒྱ་སྟོང་གང་རིགས་བྱས་ལ། དེ་ནས་རང་གི་མདུན་དུ་དུར་ཁྲོད་ཐོད་མཁར་མེ་རླུང་འཚུབ་ཅིང་དྲེག་བྱེད་སྤྲིན་ལྟར་འཐིབས་པའི་ཕོ་བྲང་གི་དབུས་སུ་ཆོས་འབྱུང་མཐིང་ནག་པད་ཉི་བམ་ཆེན་གྱི་གདན་ལ། བདག་གི་ཐུགས་ཀ་ནས་ཧཱུྃ་མཐིང་ནག་འཕྲོས་ཏེ་གདན་ཁར་བབས་པ་ལས་འོད་འཕྲོས་ཏེ་གདན་ཁར་བབས་པ་ལས་འོད་འཕྲོས། རྒྱལ་བ་མཆོད་ཅིང་འགྲོ་སྒྲིབ་སྦྱང་བ་དང་གདུག་པ་ཅན་ཚར་བཅད་ནས་འོད་ཟེར་ཚུར་འདུས་ཧཱུྃ་ལ་ཐིམ་པས་གནས་འགྱུར་ཏེ། དཔལ་མགོན་གྱི་སྐུ་ཆ་ལུགས་རྫོགས་པར་གསལ་བའི་གཡས་

[Full Size]

གཡོན་དུ་གཟའ་རྡོར་གཉིས། མདུན་དུ་ལས་མཁན་སྲོག་བདུད་དང་བཅས་པའི་མཐའ་སྐོར་དུ་སྡེ་བརྒྱད་སྤྲུལ་པ་ཡང་འཁོར་དང་བཅས་པ་ཉི་མ་དང་འོད་ལྟར་ཤུགས་འབྱུང་དུ་བསྐྱེད་ཅིང་། གནས་གསུམ་འབྲུ་གསུམ་ལས་འོད་འཕྲོས་པས། འོག་མིན། གསུམ་རྩེན། མ་ལ་ཡ། བསིལ་བ་ཚལ། ཨུ་ཙ་ལ། རྡོ་རྗེ་གདན། ནཱ་ལེནྜ་སོགས་བཞུགས་གནས་རྣམས་ནས་ཡེ་ཤེས་ཀྱི་མགོན་པོ་འཁོར་བཅས་སྤྱན་དྲངས་ནས་དམ་ཚིག་པ་ལ་དབྱེར་མེད་བསྟིམ། བདག་ཉིད་ཆེ་མཆོག་གི་ཕྱག་མཚན་རྡོ་རྗེ་མགོན་པོའི་སྤྱི་བོར་བཞག་ནས་བཀའ་བསྒོ་དམ་བསྒྲགས་པས་ཅི་གསུངས་སྒྲུབ་པར་ཞལ་གྱིས་བཞེས་པར་མོས་ཤིང་བདག་ཉིད་སྐྱེད་རྫོགས་དབྱེར་མེད་ཀྱི་དཔའ་གདེངས་ཆེར་བསྐྱེད། དེ་ནས་མགོན་པོའི་ཐུགས་ཀར་ཉི་མའི་གདན་ལ་ཧཱུྃ་མཐིང་ནག་གི་མཐར་སྔགས་ཕྲེང་ཁ་དོག་ནག་ལ་

[Full Size]

གཏིང་མདངས་དམར་བ་ལྕགས་བསྲེག་གི་འཁོར་ལོ་ལྟ་བུས་བསྐོར་བར་དམིགས་ནས། ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་ཧཱུྃ་ཛཿཞེས་བཟླས་པ་ཙམ་གྱིས་མགོན་པོ་འཁོར་བཅས་ཀྱིས་ཀྱང་སྦིར་རི་རི་བཟླ་བར་མཛད་ཅིང་། བདག་ཆེ་མཆོག་གི་ཐུགས་སྲོག་ཧཱུྃ་གི་འོད་ཟེར་ལྔ་ལྡན་མགོན་པོའི་ཐུགས་སྲོག་ལ་ཕོག་པས། ཐུགས་དམ་རྒྱུད་བསྐུལ། མགོན་པོའི་ཐུགས་སྲོག་ལས་འོད་མཐིང་ནག་ཉིད་གཙོ་བོར་གྱུར་པའི་ཁ་དོག་སྣ་ཚོགས་ཕྱོགས་བཅུར་འཕྲོས་པས། གདུག་པ་ཅན་མཐའ་དག་བཏུལ་རྒྱལ་བ་རབ་འབྱམས་ཀྱི་ཐུགས་རྗེ་ནུས་སྟོབས། ཁམས་གསུམ་སེམས་ཅན་གྱི་ཚེ་བསོད་བཀྲག་མདངས་ལོངས་སྤྱོད། འབྱུང་བ་བརྟན་གཡོ་མཐའ་དག་གི་བཅུད་དང་དངས་མ་སོགས་བསྡུས་ནས་མགོན་པོའི་ཐུགས་ཀར་ཐིམ་ཞིང་། ཐུགས་ཀ་ནས་སླར་ཡང་འོད་ཀྱི་ཚུལ་དུ་ནུས་བཅུད་

[Full Size]

དེ་དག་ཟད་མེད་དུ་བདག་གིས་ཐུགས་ཀར་ཐིམ་པར་བསམ་ལ། མི་ཚིག་དང་བྱ་བ་གཞན་དང་སྐད་ཅིག་ཀྱང་མ་འདྲེས་པར་བརྩེ་གཅིག་ཏུ་བསྙེན། ནུབ་རེ་བཞིན་བསྐང་གསོ་ཚོགས་མཆོད་དང་འབུལ་གཏོར་མ་ཆག་པར་བྱ་ཞིང་། ཐུན་མཐར་མགོན་པོའི་འཁོར་རྣམས་ཕོ་བྲང་དང་བཅས་པ་གཙོ་བོ་ཉིད་ལ་ཐིམ་ཞིང་། གཙོ་བོ་ཉིད་བདག་ལ་གཉིས་མེད་དུ་ཐིམ་པར་དམིགས་པ་དང་། བདག་སྐྱེད་ནི་མི་བསྡུ་བར་ལྷའི་ང་རྒྱལ་དང་འབྲལ་མེད་བྱའོ། །དེ་ལྟ་བུས་ཞག་ཉེར་གཅིག་སོགས་ཀྱིས་བསྙེན་པ་ཅི་མང་དང་། མཐའ་མ་ཡང་བྱེ་བ་ལས་མི་ཉུང་བ་བྱས་ན་ཆོ་འཕྲུལ་དང་རྟགས་ཀྱི་རྣམ་གྲངས་ཕྲན་ཚོགས་ཅི་བྱུང་ཡང་འཇིགས་སེམས་དང་ཞེན་རློམ་སྤང་ཏེ་རང་སེམས་ཀྱི་འཆར་ཚུལ་དུ་ཐག་བཅད་ལ་འཁུ་འཕྲིག་མི་བྱ། མཐར་ཐོན་པའི་ཉིན་མོ་བསྐང་གསོ་ཚོགས་འཁོར་

[Full Size]

བཤགས་བསྐོང་རྒྱས་པ་དང་། སྒྲུབ་གཏོར་དེ་ཡང་འབུལ་ཞིང་ཕྲིན་ལས་བཅོལ་ལ་ཡེ་ཤེས་པ་གཤེགས་ཅིང་དམ་ཚིག་པ་བདག་ལ་བསྡུ། བསྔོ་སྨོན་ཤིས་བརྗོད་སོགས་ཅི་ལྟར་རྒྱས་པ་དང་། རྒྱུན་པར་དང་དུས་བཟང་རྣམས་སུ་བསྐང་གསོ་གཏོར་འབུལ་ལ་བརྩོན་པར་བྱའོ། །དེ་ལྟར་རྩ་བསྙེན་འདི་ཙམ་ནི་འཁུ་ལྡོག་ཆུང་ཞིང་བཀྲ་ཤིས། མཐུ་ཆེན་གོས་འདོད་འབྱུང་བ་སོགས་གསུངས་ལ། འདི་ལས་སྤྲོས་པའི་གཞུང་གི་སྒྲུབ་པ་དངོས་རྣམས་ནི་དིང་སང་གི་གང་ཟག་འདི་དག་སྒྲུབ་པ་པོའི་འོས་གྱུར་ཀྱང་ཆེས་དཀོན་ལ། ཅི་སྟེ་ལན་ཅིག་འགྲུབ་ཀྱང་རྒྱུན་གྱི་དམ་ཚིག་མཆོད་གསོལ་ལས་སྦྱོར་སྒྲིགས་མ་རྣམས་ཀྱང་མཐའ་འཁྱོངས་པ་དཀའ་ཞིང་། དེ་དག་ཚུལ་བཞིན་མ་བྱུང་ན་ནི་རང་ཉིད་ལ་རང་གཤེད་འབེབ་པའི་རྒྱུར་ཟད་པས་ན། དེ་ལས་ཀྱང་

[Full Size]

དང་པོ་ནས་མ་ཙམ་པ་ཁེབས་ཆེ་ཞིང་། ལྷག་པར་དེ་ཁར་ནི་མཆོག་གི་གྲུབ་བརྙེས་ཟམ་མ་ཆད་པར་བྱོན་པའི་བཀའ་དྲིན་ལས། གྲི་གུག་ཅན་དང་ཏྲཀྴད་སོགས་གྲིབ་ལྟར་འགྲོགས་པ་ཡོད་བཞིན་དུ་ཆོས་སྐྱོང་སྣ་མང་བ་ལ་ཡ་མཚན་རྒྱུ་མེད་པ་ནི། དཔལ་ལྡན་འབྲུག་པའི་མགོན་མང་གི་ལོ་རྒྱུས་ངག་སྒྲོས་རྣམས་ལྟར་འགྱུར་བས་ན། སྔར་གྱི་རྣམས་ལ་གསོལ་མཆོད་མི་དམན་པར་མཛད་པར་གསོལ་བ་འདེབས་པ་ལགས། ཡང་གཏེར་གསར་ལས་འཕྲོས་པའི་སྐབས་དོན་ཟུར་གསལ་འབུལ་རྒྱུར། དགོངས་པ་རིན་པོ་ཆེས་མ་ཆོད་པ་གཅིག་ག་ལ་མཆིས་ཏེ། ཞི་ཁྲོ་ངེས་དོན་གྱི་འཛབ་ཏུ་ཕུར་བ་རྩ་སྔགས་ཀྱི་སྐབས་སུ། སྤྱིར་ནི་སྒྲ་པ་ལུགས་ལ། སརྦ་བི་གྷཱ་ནམ་ཞེས་པ་བགེགས་ཀྱི་སྐད་དོད་ཡིན་ཏེ། དཔེར་ན་ལས་བུམ་གྱི་ལྷ་བགེགས་མཐར་བྱེད་བསྐྱེད་པའི་རྩ་སྔགས་ཀྱང་། ཨོཾ་ཨཱཿབྷི་ག་ནམ་ཏ་ཀྲྀ་ཏ་

[Full Size]

ཧཱུྃ་ཕཊཿཅེས་སོགས་འབྱུང་མོད་ཅིང་། ས་ལུགས་ཀྱི་ཕུར་པའི་སྔགས་ཀྱང་། སརྦ་བི་གྷཱ་ནམ་བནྡྷ་ཧཱུྃ་ཕཊཿ ཅེས་འདོན་པའི་སྲོལ་ཡོད་པར་ཐོས་ཀྱང་། འདིར་སྒེར་དོན་རྙིང་ལུགས་སོར་བཞག་ལ་ནི། ཕུར་པའི་རྒྱུད་ལས་སྔགས་འདི་ཉིད་ཀྱི་སྔགས་བཏུའི་གཞུང་དཔང་པོར་བཞག་དགོས་ཕྱིར། དེ་ལས་ཐོག་མར་ཨོཾ་ཉིད་ཀྱི་སྒྲུབ་ཚུལ་ཡང་། ཇི་སྐད་དུ། ཐམས་ཅད་ཀུན་གྱི་དང་པོ་ལ། །དབྱངས་ཡིག་གཉིས་པས་འོག་ཏུ་བརྒྱན། ཞེས་པས། ཨ་ལ་རིང་པོ་འདོགས་ལུགས་དང་། །དེ་ལ་དབྱངས་ཀྱི་བཅུ་གསུམ་པའི། སྟེང་དུ་ཐིག་ལེས་མཛེས་པར་བྱ། ཞེས་པ་ན་རོ་དང་ཀླད་ཀོར་སྦྱར་ལུགས་བཤད་ནས། འདི་ནི་ཡེ་ཤེས་ལྔ་རྫོགས་ཏེ། སྔགས་རྣམས་ཀུན་གྱི་མགོ་རུ་བཞག །ཅེས་པས། ཨཱོཾ། དེ་ནས་ས་ཚན་གསུམ་པ་བཞག །བ། དེ་ནས་ཙ་ཚན་གསུམ་པ་བཞག །ཡ་ཚན་གཉིས་པས་འོག་

[Full Size]

བརྒྱན། ཛྲ། ཀ་ཚན་ཡི་གེ་དང་པོ་བཞག །དེ་ལ་དབྱངས་ཀྱི་གསུམ་པས་བརྒྱན། ཀི། ཡ་ཚན་ཡི་གེ་གསུམ་པ་བཞག །དེ་ལ་དབྱངས་ཡིག་གསུམ་པས་བརྒྱན། ལི། ཀ་ཚན་ཡི་གེ་དང་པོ་བཞག །དེ་ལ་དབྱངས་ཡིག་གསུམ་པས་བརྒྱན། ཀི། ཡ་ཚན་ཡི་གེ་གསུམ་པ་བཞག །ལ། ཡ་ཚན་ཡི་གེ་དང་པོ་བཞག །ཡ། ཤ་ཚན་ཡི་གེའི་གསུམ་པ་བཞག །ས། ཡ་ཚན་ཡི་གེ་གཉིས་པ་བཞག །དེ་འོག་ས་ཚན་གསུམ་པས་སྤྲས། རྦ། ས་ཚན་ཡི་གེ་གསུམ་པ་བཞག །དེ་ལ་དབྱངས་ཡིག་གསུམ་པས་བརྒྱན། །དེ་ལ་ཀ་ཚན་གསུམ་པར་ལྡན། བིག། ཏ་ཚན་ཡི་གེ་ལྔ་གཉིས་ལྡན། ནན། ས་ཚན་ཡི་གེ་གསུམ་པ་བཞག །དེ་ལ་དབྱངས་ཀྱི་བཅོ་ལྔས་བརྒྱན། བྃ། ཤ་ཚན་ཡི་གེ་བཞི་པ་བཞག །དེ་ལ་དབྱངས་ཡིག་དྲུག་པས་བརྒྱན། །སྟེང་ནས་ཐིག་ལེས་མཛེས་པར་བརྒྱན། ཧཱུྃ། ས་ཚན་ཡི་གེ་

[Full Size]

གཉིས་པ་བཞག །དེ་དང་ཊ་ཚན་དང་པོར་ལྡན། ཕཊཿ ཨཱོཾ་བཛྲ་ཀཱི་ལི་ཀཱི་ལ་ཡ། སརྦ་བིག་ནན་བྃ་ཧཱུྃ་ཕཊཿགསང་སྔགས་ཡི་གེ་བཅུ་བཞི་པ། །ཕུར་པ་ཕྲིན་ལས་སྙིང་པོ་སྟེ། གཙོ་འཁོར་བཅས་པའི་སྔགས་སུ་བཤད། ཅེས་གསུངས་པ་འདི་བཞིན་རྙིང་མའི་རྒྱུད་འབུམ་གྱི་ཕུར་པའི་རྒྱུད་གཞན་ལས་ཀྱང་འདི་ཁོ་ན་ལྟར་གསུངས་པ་དང་། འོན་ཀྱང་། འདི་ལ་དཔོན་སློབ་གོང་ར་ལོ་ཆེན་གྱི་གསུང་སྒྲོས་སུ། འདིའི་ཀི་གཉིས་རིང་པོར་བྱ་དགོས་ཏེ། རྒྱུ་མཚན་ནི། ཀཱི་ལི་ཀཱི་ལ་ཡ་ཞེས་ཕུར་བུ་ལ་འཇུག་ཅིང་། ཀི་ལི་ཀི་ལ་ཞེས་རིང་པོ་མེད་པ་ནི་ཅ་ཅའི་སྒྲ་ལ་འཇུག་པ་ཡིན་ཕྱིར། འདིར་རིང་པོ་ཐོབ་པ་ཡིན་ཞེས་སྒྲ་ས་ལུགས་དང་མཐུན་པར་མཛད་སྣང་ལ། བུ་གྷཱ་ནཾ་ནི་བགེགས་ལ་འཇུག་མོད་ཀྱི། འདིར་ནི་བི་གྣན་ཞེས་གཟིར་བའི་དོན་ཡིན་པར་གསུངས་པ་དང་། བནྡྷ་དང་བྃ་གཉིས་

[Full Size]

ཀ་འཆིང་བའི་དོན་ཡིན་ཀྱང་འདིར་བཤད་པའི་སྔགས་བཏུར་བྃ་ཉིད་དུ་གསུངས་པ་སྟེ་ཡིག་འབྲུའི་གྲངས་ཀྱང་། གསང་སྔགས་ཡི་གེ་བཅུ་བཞི་པ། ཅེས་པས། ཨཱོཾ་མ་བརྩིས་པའི་ཡིག་འབྲུ་བཅུ་པོ་ལ་ངོས་འཛིན་པ་ལགས་ཚེ། དེས་ན་བིགྣན་ཞེས་སོགས་རྙིང་ལུགས་སྒེར་དོན་གྱི་ཁྱད་པར་ཡིན་པ་ཡང་ཟབ་དབྱིངས་དམ་པར་བཞུགས་པར་གསོལ་བ་འདེབས་སོ། །གཅིག་ཞུས་ཁུལ་ལགས།

ངེས་དོན་ཕྱག་རྒྱ་ཆེན་པོའི་ཕྱོགས་ནས་དྲི་བ་ལ་ལན་དུ་བགྱིས་པ་ཡིད་བཞིན་ནོར་བུའི་དོ་ཤལ།

[Full Size]

ངེས་དོན་ཕྱག་རྒྱ་ཆེན་པོའི་ཕྱོགས་ནས་དྲི་བ་ལ་ལན་དུ་བགྱིས་པ་ཡིད་བཞིན་ནོར་བུའི་དོ་ཤལ་ཞེས་བྱ་བ་བཞུགས་སོ། །

[Full Size]

ན་མསྶཱ་ཙིཏྟ་དི་བུདྡྷ་ཡ། གདོད་ནས་དག་པའི་ཡེ་ཤེས་ཆོས་ཀྱི་སྐུ་མཆོག་དྲི་བྲལ་སངས་རྒྱས་དངོས། རང་བྱུང་རང་། རང་སེམས་གདོད་མའི་སངས་རྒྱས་ལ་ཕྱག་འཚལ་ལོ། །ཞལ་རང་ལ་གསལ་མཛད་དོན་རྒྱུད་བྱིན་རླབས་གཏེར་མངའ་བའི། མཉམ་མེད་དྲིན་ཅན་བླ་མ་མཆོག་ཉིད་རང་རིག་དབྱེར་མེད་རྟག་བཞུགས་ལ་འདུ་འབྲལ་མེད་པའི་ཕྱག་གིས་མཆོད་དོ་མཆོག་དངོས་བདེ་བླགས་གྲུབ་མཛད་གསོལ། ཞེས་མཆོད་པར་བརྗོད་པ་སྔོན་དུ་བཏང་ནས། སྐབས་འདིར། སེང་གཏམ་རྒྱལ་བའི་ཡང་དབེན་གྱི་སྒྲུབ་གྲྭ་ཆེན་པོ་ནས་

[Full Size]

ལུང་རྟོགས་ཡོན་ཏན་མཐའ་དག་གིས་འབྱོར་པ་མི་དམན་པའི་སྟོན་སྒོམ་སྨོན་ལམ་པའི་མཚན་འཆང་བ་གང་དེས། ཆོས་ཀུན་སྙིང་པོའི་མཐར་ཐུག་ངེས་དོན་ཕྱག་རྒྱ་ཆེན་པོའི་ཕྱོགས་ནས་དྲི་བའི་ཡི་གེ་རྣམ་དཔྱོད་ཀྱི་དཔལ་དུ་འབར་བ་ལྷ་རྫས་ཀྱི་རྟེན་དང་བཅས་ཏེ། རྒོད་ཚང་གི་དབེན་གནས་སུ་གནང་བར་མཛད་པ་ནི་ངོ་མཚར་ཆེ་མོད་ཀྱང་། སྤྱིར་རྒྱལ་བའི་བཀའི་དགོངས་དོན་ཇི་བཞིན་པ་དང་། ཁྱད་པར་ངེས་དོན་ཟབ་མོའི་ལེགས་བཤད་དྲི་མ་མེད་པ་ནི་དགེ་བའི་བཤེས་གཉེན་ཆེན་པོ་མཁས་ཤིང་གྲུབ་པ་བརྙེས་པ་

[Full Size]

རྣམས་ཀྱི་ཞལ་ལས་འབྱུང་ཕྱིར། དེ་ལྟ་བུ་རྣམས་ལ་འདྲི་བར་མཛད་པར་འོས་མོད་ཀྱི། བདག་འདྲ་བའི་རིགས་ནི་ཐོག་མ་ནས་སྐྱེས་ཐོབ་ཀྱི་ཤེས་རབ་དང་ནི་མ་ལྡན་ཅིང་ཐོས་བསམ་སྒོམ་པའི་སྦྱངས་འབྲས་ཀྱིས་འཕོངས་བ་དང་། ཆོས་ཀྱི་བསོད་ནམས་དམན་པའི་ལས་འབྲས་ཀྱི་རང་གཟུགས་ཞིག་ལ་གྲྭ་འཁོར་དག་གིས་སྐུ་སྐྱེའམ་བླ་མར་མིང་དུ་བཏགས་ནས། བསྔོ་བ་དང་ཟ་ཆོག་ཙམ་གྱི་སློབ་གཉེར་ལ་ཆོག་པར་བཟུང་ཞིང་དད་ཟས་གཤིན་དཀོར་གྱི་རིན་དུ་སྤྲོད་རྒྱུའི་བླ་གཟུགས་ལྟར་བཅོས་པའི་ངང་ལ་དལ་འབྱོར་གྱི་ལང་ཚོ་ཆེར་འདས་ཤིང་། དིང་སང་ཀྱང་སྣོད་བཅུད་དང་གཞན་གྱི་ངང་ཚུལ་ལ་ཡིད་སྐྱོ་བ་ཙམ་གྱི་རྐྱེན་ལ་བརྟེན་ནས་དབེན་ཁྲོད་འདི་དག་ཏུ་མཆིས་ཤིང་བདེ་དལ་དུ་གནས་པ་ཙམ་ལས། ཉམས་རྟོགས་ཡོན་ཏན་གྱི་ནོར་དང་མི་ལྡན་ཕྱིར་དྲི་བའི་ལན་ཚུལ་བཞིན་དུ་འབུལ་བའི་ནུས་སྟོབས་ནི་ཅུང་ཟད་ཀྱང་ག་ལ་མཆིས་ཏེ། འོན་ཀྱང་རྣམ་འདྲེན་དམ་

[Full Size]

ལྔ་ཕྲག་གསུམ་ཙམ་གྱི་ཐུགས་རྗེས་བསྐྱངས་པའི་གསུང་རྒྱུན་དག་ཇི་ལྟར་ཐོས་པ་དང་དྲན་པའི་ཆ་ཤས་ཙམ་ལ་བརྟེན་པའི་ལན་གྱི་རྣམ་པ་ས་བོན་ཙམ་ཞིག་འབུལ་བར་བགྱི་ན། དེ་ལ་ཐོག་མར་ཉིད་ཀྱི་དྲི་ཡིག་གི་ནང་ཚན་དུ། ཞི་གནས་ཀྱི་སྐབས་སུ། འཇིག་རྟེན་དང་འཇིག་རྟེན་ལས་འདས་པའི་གཞི་གནས་གཉིས་སུ་ཕྱེ་བ་ཇི་ལྟར་ཡིན། ཅེས་གསུང་འདུག་པར། དེ་ལ་སྤྱིར་འཁོར་བ་དང་མྱང་འདས་གང་དུ་ཡང་མ་ཕྱེ་བའི་སྔོན་རོལ་ན། སྣང་སྲིད་ཀྱིས་བསྡུས་པའི་ཤེས་བྱ་ལ་སྲིད་ཚད་ཀྱི་ཆོས་ཐམས་ཅད་རང་གི་ངོ་བོས་སྟོང་ཞིང་མ་སྐྱེས་མི་འགགས་སྤྲོས་པ་ཐམས་ཅད་ལས་འདས་པའི་དབྱིངས་དོན་དམ་པའི་གནས་ལུགས་སམ། བཞུགས་ཚུལ་ལམ། ཡིན་ཚུལ་ཇི་བཞིན་པའི་སྟོང་པ་ཉིད་ཀྱི་རང་བཞིན་གཞིའི་གནས་ལུགས་དེ་ལ་བློ་བུར་གྱི་འཁྲུལ་པའི་ལྷན་སྐྱེས་ཀྱི་མ་རིག་པ་མ་ཤར་བར་རང་རིག་ཡིན་ལུགས་ཀྱི་ཐོག་ཏུ་

[Full Size]

རང་ངོ་ཤེས་པ་ལ་ནི། གསང་སྔགས་སྙིགས་མའི་སྐབས་ཚོར། ངོ་བོ་ཀ་ནས་དག་པའམ། ཀུན་ཏུ་བཟང་པོ་ཞིག་ཐོག་ཏུ་གྲོལ་བ་ཞེས་ཟེར་ལ། ཕྱག་རྒྱ་ཆེན་པོའི་རང་སྐབས་སུ་ནི། གནས་ལུགས་ཕྱག་ཆེན་དུ་མིང་བཏགས་མོད་ལགས་ཤིང་། དེའི་རང་བཞིན་མ་རྟོགས་པར་རང་གི་གྲིབ་མས་རང་ཉིད་བསྒྲིབ་པ་ལྟར། ལྷན་སྐྱེས་ཀྱི་མ་རིག་པ་གསེར་ལ་གཡའ་སྐྱེས་པ་བཞིན་དུ་བྱུང་སྟེ་འཁྲུལ་ཞིང་འཁོར་བའི་ས་བོན་རིམ་ཅན་དུ་འཕེལ་བའི་དབང་གིས་སེམས་ཅན་རྣམས་འཁོར་བར་འཁྱམས་ཤིང་། དེ་ལྟར་འཁྲུལ་འཁྱམས་གྱུར་པའི་སྐབས་ན་ཡང་གཞིའི་ངོ་བོ་ལ་འགྱུར་བ་མེད་པའི་དབང་གིས་འཁྲུལ་པ་ལྡོག་ཏུ་བཏུབ་ཅིང་། བླ་མ་དང་གདམས་ངག་བརྩོན་འགྲུས་གསུམ་འཛོམས་ན་གྲོལ་བའི་སྐལ་བ་དང་ལྡན་པའི་ཕྱིར། དཔལ་འཕྲོང་གི་མདོར། བདེ་གཤེགས་སྙིང་པོ་འགྲོ་ཀུན་ཡོངས་ལ་ཁྱབ། ཅེས་སོགས་དང་། རྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད།

[Full Size]

འོན་ཀྱང་བློ་བུར་དྲི་མས་བསྒྲིབས། ཅེས་དང་། རྒྱུད་བླ་མར། སངས་རྒྱས་སད་ངན་སོགས་ཀྱི་དཔེ་དགུ་གསུངས་པ་དང་། གཞན་ཡང་མདོ་རྒྱུད་བསྟན་བཅོས་རྣམས་ནས་ལུང་དཔག་མེད་མཆིས་ཤིང་། འདི་ལ་རྫོགས་ཆེན་དུ་ནི་རང་བཞིན་ལྷུན་གྲུབ་དང་ཐུགས་རྗེ་ཀུན་ཁྱབ་སོགས་ཀྱི་རྒྱས་བཤད་དང་། ཕྱག་ཆེན་རང་ལས་ནི་འཁྲུལ་ལུགས་ཕྱག་རྒྱ་ཆེན་པོ་སོགས་མིང་དུ་བཏགས་པ་མཛད་ཕྱིར། མདོར་ན་གཞི་ལམ་འབྲས་གསུམ་གཏན་ལ་འབེབས་ཚུལ་ནི་ཆོས་ལུགས་ཐམས་ཅད་མཐུན་ཅིང་། གཞི་འབྲས་མངོན་དུ་བྱེད་པ་ལམ་གལ་ཆེ་བ་དང་། ལམ་ཉིད་ལའང་ཐེག་པའི་བྱེ་བྲག་མཐའ་ཡས་ཀྱང་མདོར་བསྡུས་ཚེ་མདོ་སྔགས་གཉིས་དང་། དེ་ལ་ཡང་མྱུར་ཟབ་སོགས་ཁྱད་ཆོས་མང་པོའི་སྒོ་ནས་སྔགས་ཁོ་ན་དང་། སྔགས་ཉིད་ལའང་འཇུག་སྒོ་སྨིན་གྲོལ་གཉིས་ལས། སྨིན་བྱེད་རྒྱས་བསྡུས་ཅི་རིགས་པའི་སྒོ་ནས་དབང་དོན་ངོ་འཕྲོད་པ་གལ་ཆེ་བ་དང་། དབང་གི་

[Full Size]

ཡེ་ཤེས་དེ་ཀ་ནན་ཆགས་སུ་བྱ་བའི་གྲོལ་བྱེད་ལ་ཡང་བསྐྱེད་རྫོགས་གཉིས་ལས། མཆོག་ཏུ་གཅེས་པའི་རྫོགས་རིམ་གྱི་རྣམ་གྲངས་མཐའ་ཡས་པའི་ནང་ནས་རྒྱལ་མཚན་གྱི་ཏོག་ལྟ་བུར་གྱུར་པ། གྲུབ་ཐོབ་ཐམས་ཅད་ཀྱི་གཞུང་ལམ་བླ་ན་མེད་པའི་དངོས་གཞི་ཕྱག་རྒྱ་ཆེན་པོའི་སྐབས་འདིར། ཞི་ལྷག་གཉིས་ཀྱི་སྒོ་ནས་གང་ཟག་རིམ་གྱིས་ས་གཙོ་བོར་འཇུག་ཐབས་བསྟན་པ་དང་། སྦྱངས་པ་མངོན་གྱུར་དང་གཅིག་ཅར་བའི་རིགས་ཅན་འགའ་ཞིག་ནི་མཐུན་མོངས་ཀྱི་སྔོན་འགྲོ་དང་ཞི་གནས་སོགས་ལ་མ་བརྟེན་པར་རྟོགས་གྲོལ་དུས་མཉམ་གྱུར་མོད་ཀྱི། གཞན་ཕལ་མོ་ཆེ་ལ་ནི་རིམ་ཅན་དུ་དཀྲི་དགོས་ཏེ། སྐྱོབས་པ་རིན་པོ་ཆེས་ཀྱང་། ཆོས་དང་དངོས་གཞི་ཀྱང་སྔོན་འགྲོ་ཟབ། ཅེས་གསུང་པ་བཞིན། སྔོན་འགྲོའི་བྱེ་བྲག་རྣམས། དལ་ནན་ཆགས་རྟགས་ཐོན་དུ་གལ་ཆེ་བ་དང་། ཁྱད་པར་ཞི་གནས་ཀྱི་སྐབས་

[Full Size]

འདིར་འཇིག་རྟེན་ལས་འདས་ཞི་གནས་གཉིས་སུ་ལོས་ཀྱང་ཕྱེ་སྟེ། ཅིའི་ཕྱིར་ན། སངས་རྒྱས་ཀྱི་ལམ་དུ་འགྲོ་བ་དང་མི་འགྲོ་བའི་ཁྱད་པར་ཡོད་པས་སོ། །དེ་ནས་ཞི་གནས་ཙམ་དུ་མིང་གཅིག་ཀྱང་དོན་ལ་ཁྱད་པར་ཆེ་སྟེ། འཇིག་རྟེན་པའི་ཞི་གནས་སྲིད་རྩེ་བསྒྲུབས་པའི་ཏིང་ངེ་འཛིན་གྱི་རིགས་ནི་མུ་སྟེགས་པ་རྣམས་ལ་ཡང་ཤིན་ཏུ་བརྟན་པར་ཡོད་ཅིང་། དེ་ལ་བརྟེན་ནས་ལྟར་སྣང་གི་རྫུ་འཕྲུལ་མངོན་ཤེས་སོགས་ཕུལ་དུ་ཕྱིན་པ་མཆིས་ཀྱང་། བྱང་ཆུབ་ཀྱི་རྒྱུར་ཏིལ་འབྲུ་ཙམ་ཡང་ག་ལ་འགྲོ་ཞིང་། ལྷ་རྣམས་ལའང་སྐྱེ་མཆེད་མུ་བཞི་མན་ཆད་ཐམས་ཅད་ལ་སོ་སོར་བསམ་གཏན་ཏིང་ངེ་འཛིན་ལ་བརྟན་པ་ཐོབ་ནའང་། ཡིད་དཔྱོད་ཀྱི་བསམ་གཏན་དང་བདེ་གསལ་མི་རྟོག་གསུམ་གང་རུང་ལ་ཞེན་འཛིན་དང་བཅས་ཕྱིར་ཏིང་ངེ་འཛིན་ལ་བསྐལ་པ་མང་པོར་གནས་ཀྱང་། ཉོན་མོངས་བག་ལ་ཉལ་གྱི་རྩ་བ་མ་སྤོངས་ཕྱིར་སླར་

[Full Size]

རྣམ་དཀར་གྱི་ལས་འབྲས་ཟད་པ་དང་ལྟུང་བར་འགྱུར་ལ། དེ་དག་ལས་ཅུང་ཟད་འཕགས་པའི་ཉན་རང་གི་བདག་མེད་བསྒོམ་པ་སོགས་ཀྱང་མཐར་འཛིན་ནམ་ཡིད་དཔྱོད་དང་ལུང་མ་བསྟན་དུ་འགོག་པའི་རིག་སོགས་ཀྱི་སྒྲིབ་ཅིང་ཕྱོགས་རེ་རྟོགས་པ་ཙམ་སོགས་མདོར་ན་སྔགས་ཕྱི་ས་མན་ཆད་རང་རང་གི་གྲུབ་མཐའི་ཕྱོགས་རེའི་ལྟ་བ་ཁོ་ནས་བཅིངས་པས། ལྷན་སྐྱེས་བཅོས་མིན་གྱི་ཡེ་ཤེས་དངོས་མ་རྟོགས་པས་ལམ་རིང་བ་དང་། སྔགས་ནང་པའམ་ཁྱད་པར་ཕྱག་ཆེན་གྱི་སྐབས་འདིར་འཇིག་རྟེན་ལས་འདས་པའི་ཞི་གནས་སམ་མཆོག་གི་ཞི་གནས་ཁོ་ན་མ་གཏོགས་གཞན་གྱིས་མི་རུང་བར་གསུངས་མོད། དེ་ཅི་ཞེ་ན། འཇིག་རྟེན་པའམ་དམན་པའི་ཞི་གནས་ཀྱིས་ནི་འཁོར་བའམ་མངོན་མཐོ་ཙམ་འགྲུབ་པའི་ཐབས་ཡིན་ལ། དེ་བསྒྲུབས་པས་ནི་མྱང་འདས་དང་ངེས་ལེགས་མི་འགྲུབ་པའི་ཕྱིར་ན། འདིར་འཇིག་རྟེན་ལས་

[Full Size]

འདས་པའི་ཞི་གནས་སམ་མཆོག་གི་ཞི་གནས་ཁོ་ན་བསྒྲུབ་དགོས་པ་དང་། དེ་ཉིད་ཀྱང་ལྷག་མཐོང་གི་མ་ཟིན་ན་ཞི་གནས་ཀྱི་སྒོམ་ཇི་ལྟར་བཟང་ཀྱང་ཕྱག་རྒྱ་ཆེན་པོའི་སྒོམ་དངོས་གཞིར་གོ་མི་ཆོད་པ་ནི་སྐྱེས་ཆེན་ཐམས་ཅད་གཞེད་པ་མཐུན་མོད་ཅིང་། དེ་ལ་མཚན་བཅས་ཀྱི་ཞི་གནས་རྣམས་ཀྱི་ཐོག་མར་སེམས་འཛིན་ཐབས་དང་། དེ་ནས་མཚན་མེད་ཀྱི་གཞི་གནས་དངོས་ལ་འཇུག་ཅིང་བསྒོམ་མེད་ཡེངས་མེད་ཀྱི་ངང་ལ་མཉམ་པར་བཞག་ཚེ། སོ་སོའི་བློ་ཁྱད་དང་མོས་གུས་ཆེ་ཆུང་ལས་སྒྲིབ་སྲབ་འཐུག་བརྩོན་པ་ཆེ་ཆུང་དང་མཐུན་པའི་ཉམས་རྟགས་འཆར་ལུགས་ཐ་དད་འབྱུང་མོད་ཀྱི། སྤྱི་ཁྱབ་ཏུ་ནི་གནས་པ་དང་པོ་རྣམ་རྟོག་གང་སྐྱེད་ངོས་ཟིན་པ་རེ་གཟར་གྱི་འབབ་ཆུ་ལྟ་བུ་དང་། དེ་ནས་རྣམ་རྟོག་རག་པ་མགོ་ནོན་ཞིང་རྐྱེན་སྣང་ཕྲ་མོས་མི་གནོད་

[Full Size]

པའི་གནས་པ་ཉམས་བར་མ་ཆུ་བོ་དལ་འབབ་ལྟ་བུ་དང་། དེ་ནས་ཤིན་ཏུ་བརྟན་ཅིང་ཉིན་མཚན་དང་སྐྱིད་སྡུག་ལེགས་ཉེས་སོགས་ཀྱི་བར་དུ་ཆོད་མི་དགོས་པར་གནས་ཉམས་ཁོར་ཡུག་ཏུ་འགྲོ་བ་རྒྱ་མཚོ་གཡོ་མེད་ལྟ་བུའི་ཞི་གནས་རྣམས་འཆར་ཞིང་། དེ་ཙ་ན་ཟག་བཅས་ཀྱི་མངོན་པར་ཤེས་པ་སོགས་ཡོན་ཏན་ལྟར་སྣང་བའི་རིགས་ཀྱང་མང་དུ་འབྱུང་བར་གསུང་མོད་ཀྱི། སྙིང་རུས་དང་མོས་གུས་ཞེན་ལོག་སོགས་མི་ལྡན་པར་ཞུ་ལོ་དང་སྒོམ་ལོ་ཙམ་གྱི་གང་ཟག་ལ་ནི་ལམ་རྟགས་རྣམས་ཚུལ་བཞིན་འཆར་བ་ནམ་ཀྱང་མི་འབྱུང་ལགས་མོད།། ༈ །།ཡང་། ཉིད་ཀྱི་དྲི་ཡིག་ཏུ་ལུང་འདྲེན་དང་བཅས་པ་མཛད་ནས། དངོས་གཞི་དྲན་པ་འདི་ལ་རྩོལ་བྱས་ཀྱི་དྲན་པ་དང་རྩོལ་མེད་ཀྱི་དྲན་པ་གཉིས་སུ་ཕྱེ་བ་ཇི་ལྟར་ཡིན། གསུང་འདུག་པར། དེ་ནི་ཉམས་ལེན་གོམས་སྟོབས་ཆེ་ཆུང་གི་ཁྱད་པར་ཡིན་མོད་ཀྱི། དེ་ཡང་ཉམས་ལེན་གྱི་སྐབས་སུ་

[Full Size]

གོང་དུ་བརྗོད་པ་ལྟར། སེམས་གནས་ཆ་གཙོ་བོར་བཏོན་པའི་དྲན་པ་བསྐྱངས་ཐབས་ལ་ཞི་གནས་དང་། གནས་དང་འགྱུ་འཕྲོ་གང་བྱུང་ཅིར་སྣང་ལམ་དུ་སློང་ཐབས་ཀྱི་དྲན་པ་ལ་ལྷག་མཐོང་དུ་བཏགས་ཤིང་། འདི་སྐབས་རྙིང་ལུགས་རྫོགས་ཆེན་སོགས་སུ་ཉམས་ལེན་བསྐྱངས་ཐབས་རིགས་དུ་མ་ཞིག་མཆིས་ཀྱང་། དིང་སང་གསར་མའི་དགེ་བའི་བཤེས་གཉེན་ཕལ་མོ་ཆེ་བའི་དགོངས་པར་ལྡན་པ་དཀའ་བར་གྱུར་པའི་གཤིས་ཀྱིས་འདིར་མ་བརྗོད་ལ། ཕྱག་རྫོགས་དབྱེར་མེད་ཀྱི་དགོངས་པ་མངོན་དུ་མཛད་པ་ཀུན་མཁྱེན་རང་བྱུང་ཞབས་དང་། དཔལ་མཁའ་སྤྱོད་པ་སོགས་ཀྱི་བཀའ་འབུམ་ན་གཟིགས་པས་མཐུས་ཤིང་། སྐབས་འདིར་ཕྱག་ཆེན་རང་གཞུང་ལྟར། སྒོམ་གྱི་དངོས་གཞི་དྲན་པ་ཁོ་ན་ལ་མཛད་པའི་ཚུལ་ལྟར་བརྗོད་ན། སྤྱིར་དྲན་པ་ཞེས་པའི་མིང་ཙམ་

[Full Size]

བཏགས་པ་ལ་ནི་རྣམ་པ་མང་ཀྱང་། འདི་སྐབས་སུ་ནི་རང་རིག་གི་དྲན་པའམ། ཡང་དག་གི་དྲན་པ་ཁོ་ན་དགོས་ལ། དེ་ལའང་ལས་དང་པོ་པས་ནི་མཉམ་གཞག་གི་ཚེ་དམིགས་བཅས་ཀྱི་བསྒོམ་རྒྱུའམ་བསྒྲུབ་རྒྱུ་གང་ཡང་མེད་པར་སེམས་འཕྲོ་གནས་བདེ་བསལ་མི་རྟོག་སོགས་ཅི་དང་ཅི་ལྟར་འཆར་བ་དང་། སྣང་བ་སྣ་ཚོགས་དང་ཚོགས་དྲུག་གི་བྱེ་བྲག་གང་སྣང་ཅི་ཤར་ཐམས་ཅད་ལ་དེའི་རྗེས་སུ་ཡང་མི་འབྲེང་། དགག་ཀྱང་མི་འགག་བརྟག་དཔྱད་ཀྱང་མི་བྱ་བར་རང་རིག་རང་གསལ་འཛིན་མེད་ཀྱི་དང་དུ་གློད་ཅིང་། ཚོར་བ་འགགས་པའམ་ལུང་མ་བསྟན་དུ་མི་འབྱམས་པར་གང་བར་ངོ་ཤེས་སུ་བྱེད་པ་ལ་དྲན་པ་ཞེས་བཏགས་ལ། དེ་ཉིད་རྗེས་ཐོབ་ཏུ་ཡང་ལམ་དུ་འཁྱེར་ཞིང་། མདོར་ན་བསྒོམ་རྒྱུ་སྤུ་ཙམ་ཡང་མི་བྱ་ལ། ཐ་མལ་འཁྲུལ་འཛིན་ཞེན་རྟོག་གི་དབང་དུ་སྐད་ཅིག་ཀྱང་མ་སོང་བར་བྱེད་པ་ལ་ཕྱག་རྒྱ་ཆེན་པོ་བསྒོམ་པ་ཞེས་བཏགས་མོད་ཀྱི།

[Full Size]

གང་ཤར་ལ་དྲན་རིག་གིས་ངོས་ཟིན་པའི་ཉམས་ལེན་འདི་ནི་ཕྱག་ཆེན་གཅིག་པུར་མ་ཟད་ཆོས་ལུགས་ཐམས་ཅད་ཀྱི་རྫོགས་རིམ་དྲི་མ་མེད་པ་ཀུན་དགོངས་གཞེད་གཅིག་ཏུ་མཐུན་པ་ལགས་ཤིང་། དྲན་རིག་དེ་ལས་ལྷག་པའི་སྒོམ་བཟང་བཟང་བ་ཞིག་འདོད་པ་ཐམས་ཅད་ནི་བཅོལ་མ་དང་ཞེ་འདོད་ཡིད་བྱེད་བློས་བྱས་ཀྱི་སྒོམ་ཁོ་ན་ཡིན་ཕྱིར་ཕྱག་ཆེན་དུ་མི་འགྲོ་སྟེ། ཇི་སྐད་དུ། ལྷ་མོ་བཞིས་ཞུས་པའི་མདོ་ལས། ཐུབ་པ་ཆེན་པོའི་ཆོས་རྣམས་ཀྱི། །ཕུང་པོ་བརྒྱད་ཁྲི་བཞི་སྟོང་ལ། །གང་གི་དེ་ཉིད་མི་ཤེས་ན། །དེ་དག་ཐམས་ཅད་འབྲས་བུ་མེད། ཅེས་དང་། ཞི་བ་ལྷས། སེམས་ཀྱི་གསང་འདི་མ་རིག་ན། །བདེ་འདོད་སྡུག་བསྔལ་བྲལ་འདོད་ཀྱང་། །བདེ་བ་འདོད་པ་ཙམ་གྱི་ལས། །དེ་ནི་ངལ་བ་ཁོ་ནར་ཟད། །ཅེས་གསུངས་པ་ལྟར། གང་ཤར་དྲན་པས་རིག་པ་ཙམ་ལས་ལྷག་པ་

[Full Size]

མི་དགོས་པ་དང་། དེ་ཉིད་ཆོས་ཐམས་ཅད་ཀྱི་སྙིང་པོ་ཡིན་པའི་ཚུལ་ཡང་། །རྗེ་རང་བྱུང་པས། ཡིད་བྱེད་བྲལ་བ་འདི་ནི་ཕྱག་རྒྱ་ཆེ། །མཐའ་དང་བྲལ་བས་དབུ་མ་ཆེན་པོ་ཡིན། །འདི་ནི་ཀུན་འདུས་རྫོགས་ཆེན་ཞེས་ཀྱང་བྱ། །གཅིག་ཤེས་ཀུན་དོན་རྟོག་པའི་གདེངས་ཐོབ་ཤོག །ཅེས་གསུངས་སོ། །དེ་ན་ལས་དང་པོ་པས་གང་ཤར་ཐམས་ཅད་ལ་འཛིན་མེད་དྲན་པས་སྐྱོང་བ་ཁོ་ན་ལ་སྒོམ་གྱི་མཐིལ་དུ་བྱ་ཞིང་། འདི་ཉིད་རེ་ཞིག་ལ་རྩོལ་བྱས་ཀྱི་དྲན་པ་ལྟ་བུ་ཡིན་རུང་། གཞན་གྱི་ཞེ་འདོད་དང་བཅོས་མས་མ་སླད་པར་ཉམས་སུ་བླངས་ན། མྱུར་དུ་སྩོལ་མེད་ཀྱི་དྲན་པར་འགྱུར་བར་གསུངས་པས། དེས་ན་དར་གཅིག་ལ་སྒོམ་ཡོད་མེད་ནི་དྲན་པ་ཡོད་མེད་ཁོ་ན་ལ་བྱ་དགོས་ཏེ། ཅིའི་ཕྱིར་ན། དྲན་མེད་ཀྱི་གནས་ཆའི་ཏིང་ངེ་འཛིན་ནི་ཆད་མཐའམ་འགོག་པར་འགྱུར་ལ། དྲན་མེད་ཀྱི་རྣམ་རྟོག་རང་ཁ་མ་ནི་འཇིག་རྟེན་ཐ་

[Full Size]

མལ་པ་དང་ཁྱད་མེད་ཡིན་ཕྱིར། དེ་གཉིས་གང་ཡང་ཕྱག་རྒྱ་ཆེན་པོའི་ལམ་དུ་མི་འགྲོ་བའི་ཕྱིར་རོ། །འོ་ན་དྲན་པས་བསྐྱང་བ་དེ་ཀ་བཅོས་མ་རུ་མི་འགྲོའམ་ཞེ་ན། དེ་ནི་སེམས་ཀྱི་གནས་ཚུལ་ལམ་བབས་ཚུལ་གང་སྣང་དེ་ཉིད་ལ་རང་ངོ་ཤེས་པར་བྱེད་པ་ཙམ་མ་གཏོགས་དགག་བསྒྲུབ་གཞན་བྱ་བ་མ་ཡིན་པའི་ཕྱིར་ན་བཅོས་མའི་སྐྱོན་དུ་མི་འགྱུར་ཏེ། དྲན་རིག་གིས་ཟིན་ཕྱིན་ཆད་ཅིར་ཤར་ཐམས་ཅད་ཆོས་སྐུའི་རང་བཞིན་དུ་མ་གྱུར་པ་རྡུལ་ཙམ་ཡང་མེད་དེ། ཇི་སྐད་དུ། སེམས་ཉིད་ངལ་གསོ་ལས། །གང་སྐྱེས་གཉུག་མ་ཉིད་ཡིན་ཕྱིར། །གང་ཤར་དྲན་པས་མ་བརྗེད་ན། །དེ་ཤར་སྟོང་པ་ཉིད་དག་ཏུ། །རྣལ་འབྱོར་དབང་ཕྱུག་གདོན་མི་ཟ། ཅེས་འདི་ལྟ་བུའི་གནད་ཀྱིས་ཟིན་ན་སྒོམ་དུ་

[Full Size]

མ་གྱུར་པའི་ཆོས་མེད་ཚེ། དགག་བསྒྲུབ་སྤང་བླངས་འཆིང་གྲོལ་ལས་འདས་པའི་དོན་མཐོང་བ་སྟེ། ཟླ་བ་སྒྲོན་མའི་མདོ་ལས་རིགས་ཀྱི་བུ། ཆོས་གཅིག་ཤེས་པས། ཡོན་ཏན་གྱི་ཆོས་ཐམས་ཅད་ཡོངས་སུ་རྫོགས་པར་འགྱུར་ཏེ། གཅིག་གང་ཞེ་ན། གང་གི་དེ་ཁོ་ན་ཉིད་ཡོངས་སུ་ཤེས་པའོ། །ཅེས་དང་། རིག་འཛིན་དགའ་རབ་རྡོ་རྗེ་ཟག་མེད་འོད་ཕུང་དུ་གཤེགས་པའི་ཞལ་ཆེམས་ལས། ཡིན་པར་གྲུབ་པ་མེད་པ་འདི། རང་མདངས་འཆར་ཚུལ་ཅིར་ཡང་མ་འགགས་པས། །སྣང་སྲིད་ཀུན་ཀྱང་ཆོས་སྐུའི་ཞིང་དུ་ཤར། ཤར་བ་དེ་ཉིད་རང་གི་ཐོག་ཏུ་གྲོལ། ཅེས་དང་། རྗེ་སྒམ་པོ་པས། རྣམ་རྟོག་སྒོམ་དུ་མ་ཤར་ན། །གང་བྱས་འཁོར་བའི་རྒྱུ་འབྲས་ཡིན། །སྒོམ་ཆེན་སྒོམ་གྱིས་མ་བཅིངས་ན། །གཞན་གྱིས་འཆིང་བར་མི་ནུས་པས། གོ་བའི་ལྟ་བ་རྒྱབ་ཏུ་བོར།

[Full Size]

བསྒོམ་པའི་ཉམས་མྱོང་རྨང་ནས་བཤིག །ཅེས་དང་། གྲུབ་ཐོབ་ཨོ་རྒྱན་པས། ཐ་མལ་ཤེས་པ་རང་ག་ནི། །མ་བསྒོམ་ཆོས་ཀྱི་སྐུ་རུ་ཤར། །སངས་རྒྱས་རང་གི་སེམས་ལས་བརྙེད། །འཁོར་འདས་རེ་དོགས་སུ་དགའ་གྱིས། ཅེས་དང་། ཁྲོ་ཕུ་ལོ་ཙས་ཉོན་མོངས་བཀག་པས་མ་ཁེག་ཚེ། །གདམས་ངག་རྒྱལ་པོ་སོར་གཞག་བྱུང་། །ངང་ལ་བཞགས་པས་དབྱིངས་སུ་ཡལ། །བླངས་དོར་བྱ་བའི་མིང་ཡང་མེད། ཅེས་སོགས་གསུངས་པ་ལྟར་གང་ཤར་དྲན་པས་སྐྱོང་བའམ་མ་བཅོས་བཟོ་མོད་དུ་གློད་པ་ལ་གོམས་ཚེ་རྩོལ་མེད་ཀྱི་དྲན་པ་ལ་དཀའ་ལས་མེད་དོ། །ཅིའི་ཕྱིར་ན། དྲན་པ་སྐྱོང་མཁན་དང་སྐྱོང་བ་གཉིས་སུ་མ་གྲུབ་པའི་ཕྱིར་རོ། །སྤྱིར་ཕྱག་ཆེན་རང་ལ་ཡང་བླ་མ་སོ་སོའི་གཞེད་ཚུལ་མང་བ་དང་། དབྱེ་བསྡུ་མཛད་ཚུལ་མི་འདྲ་བའི་དབང་གིས། འདིར་བཤད་མ་ཐག་པའི་ལུང་འདྲེན་འདི་

[Full Size]

དག་དང་། དྲན་པ་བསྐྱང་མཁན་དང་སྐྱོང་རྒྱུ་གཉིས་སུ་མེད་པ་སོགས་ཀྱི་ཆོས་སྐད་འདི་དག །རྣལ་འབྱོར་བཞིའི་སྐབས་ལྟར་ན་རོ་གཅིག་གི་ཆོས་སྐད་འདྲ་བར་སྣང་ཚེ། ལས་དང་པའི་ཉམས་ལེན་སྐྱོང་ཚུལ་བཤད་པའི་འཕྲོ་འདིར་མི་འགབ་བམ་སྙམ་ན། དེ་མ་ཡིན་ཏེ། དོན་དམ་ཉམས་ལེན་དངོས་རང་ཅིག་སྐྱོང་ཤེས་པའི་གང་ཟག་གསར་བུ་དང་། སངས་རྒྱས་ཀྱི་དགོངས་པ་དངོས་གཉིས་ལ་བརྟན་པ་ཐོབ་མ་ཐོབ་མ་གཏོགས་གཞན་གཅིག་སྟེ། དེ་ལྟར་མ་ཡིན་ན་ད་ལྟ་ཉམས་ལེན་བྱས་པའི་དོན་མེད་པར་འགྱུར་ཏེ། སངས་རྒྱས་ཀྱི་དགོངས་པ་མ་ཡིན་པ་ལ། ཉམས་སུ་བླངས་པ་ནི་སངས་རྒྱས་ཀྱི་རྒྱུར་འགྲོ་མི་སྲིད་པའི་ཕྱིར་རོ། །དེས་ན་འགག་ཏུ་ཧྲིལ་གྱི་དྲིལ་ན། མཚན་ཉིད་དང་ལྡན་པའི་བླ་མ་སངས་རྒྱས་ཞིག་ལ་མོས་གུས་དྲག་པོ་དང་མཉེས་པ་གསུམ་གྱིས་བརྟེན་ཅིང་གདམས་ངག་ཟབ་མོ་ཐོབ་རྗེས་ཚིག་ཚོགས་ཀྱི་རྣམ་གྲངས་ལ་མི་འབྱམས་

[Full Size]

པར། ཆིག་དྲིལ་གྱི་སྙིང་པོ་དང་དུ་ལེན་ནུས་ན་བྱིན་རླབས་ཀྱི་ཚན་ཁས་རང་གྲོལ་དུ་འགྲོ་བར་འདུག་རུང་། དེང་སང་རྙིགས་མའི་མཐའ་ལ་ཐུག་པའི་རང་ཚུལ་འདི་ལྟ་བུར། བླ་མ་དང་སློབ་མ་གཉིས་ཀའི་རྟེན་འབྲེལ་ཚད་ལྡན་ཞིག་ནི་ཨུ་དུམ་ཝ་ར་ལྟར་དཀོན་ཚེ། ཉམས་མྱོང་དང་རྟོག་པ་གཤའ་མར་འབྱུང་བ་རང་ནི་ཉིན་སྐར་དང་འདྲ་བར་སེམས་སོ།། ༈ །།ཡང་། ཉིད་ཀྱི་དྲི་ཡིག་ཏུ་ཕྱག་ཆེན་རྣལ་འབྱོར་བཞིའི་དང་པོ་རྩེ་གཅིག་ཆུང་ངུ་ལ་སྒོམ་གྱི་སྣ་ཟིན་ནམ་མ་ཟིན། གསུངས་འདུག་པར། སྤྱིར་གང་ཟག་གི་བློ་རིགས་དང་དབང་རིམ་ལ་བསམ་གྱིས་མི་ཁྱབ་པ་འབྱུང་ཀྱང་མདོར་བསྡུ་ན། གཅིག་ཅར་རིམ་གྱིས་ཐོད་རྒལ་བ་དང་གསུམ་དུ་འདུས་པས། དེ་དག་སོ་སོར་འཆར་ཚུལ་མི་འདྲ་བ་མཐའ་ཡས་ཕྱིར་ཕྱོགས་གཅིག་ཏུ་ངེས་བཟུང་ག་ལ་ནུས་ཤིང་། སྤྱི་ཁྱབ་ཏུ་ནི། རྩེ་གཅིག་སོགས་རྣལ་འབྱོར་བཞི་

[Full Size]

རིམ་ཅན་དུ་འཆར་བའི་དབང་དུ་དགྱི་ན། རྩེ་གཅིག་ཆུང་ངུ་ལ་སྒོམ་གྱི་སྣ་ལོས་ཀྱང་ཟིན་ཏེ། ཅིའི་ཕྱིར་ན། ལེགས་སྦྱར་གྱི་སྐད་དུ། ཡོ་ག་དང་། བོད་སྐད་དུ་རྣལ་འབྱོར་ཞེས་པའི་ངེས་ཚིག་ལྟར་ན། སེམས་ཉིད་མ་བཅོས་རྣལ་མའི་དོན་ལ་རང་དབང་འབྱོར་པ་ལ་རྣལ་འབྱོར་དུ་བརྗོད་པ་ཡིན་ཚེ། སྒོམ་གྱི་སྣ་ཙམ་ཡང་མ་ཟིན་པར་རྣལ་འབྱོར་གྱི་དོན་ཇི་ལྟར་བརྗོད། སྤྱིར་ཡང་སྒོམ་ཞེས་བྱ་བའི་མིང་ཙམ་འཇུག་པ་ནི་མང་མོད་ཀྱང་། འདི་སྐབས་སུ་ནི་ཆེད་དུ་སྒོམ་རྒྱུ་མེད་རུང་ཐ་མལ་དུ་སྐད་ཅིག་ཀྱང་མི་ཡེངས་པ་ལ་སྒོམ་སྐྱོང་བ་ཞེས་མིང་དུ་བཏགས་ཕྱིར་ཞི་གནས་ལའང་སྒོམ་པའི་མིང་ཙམ་ནི་བཏགས་མོད་ཀྱི། སྒོམ་དངོས་གཞི་ནི་ལྷག་མཐོང་གི་དོན་ངོ་འཕྲོད་པ་ལ་བྱ་དགོས་ཤིང་། ལྷག་མཐོང་རྟོགས་ཕྱིན་ཆད་རྩེ་གཅིག་གི་སྣ་ཟིན་པ་ཡང་ཡིན་ལ་སྣ་ངེས་པར་ཟིན་པ་ཡིན་པ་དང་། སྣ་ཟིན་ཙམ་གྱིས་

[Full Size]

ཆོག་པ་ནི་མ་ཡིན་པའི་ཕྱིར། ཤོར་ས་བཞི་དང་གོལ་ས་གསུམ་སོགས་འདྲ་མིན་རྣམས་སུ་མ་ཤོར་མཐར། འོ་ན་དགོས་པ་ནི་གོར་མ་ཆགས་པའོ།། ༈ །།ཡང་ཉིད་ཀྱི། ཞང་རིན་པོ་ཆེས་གསུངས་པ་ལུང་དུ་དྲང་བར་མཛད་དེ། རྩེ་གཅིག་དུས་སུ་ངོ་བོ་རྟོག་པ་དང་། རྩེ་གཅིག་མུན་པའི་དཀྱིལ་ན་འབྱམས་པ་སོགས་ཀྱི་དབྱེ་བ་གང་གིས་བྱེད་གསུངས་པ་ནི། དེ་ཡང་ཞི་ལྷག་ཟུང་འཇུག་གི་ཉམས་ལེན་སྐྱོན་མེད་གཅིག་ངོ་འཕྲོད་ནས། མཉམ་གཞག་གི་དུས་ན་མཚན་ཉིད་བཞི་ལྡན་དགོས་པར་གསུངས་ཏེ། བཞི་གང་ཞེ་ན། ཡུལ་མེད་དུ་རང་ངོ་ཤེས་པས་གསལ་བ་ཡིད་གཉིས་ཀྱི་འགྱུ་བ་ཆད་དངས་པ། བློའི་སྙོམ་བྱེད་དང་བྲལ་བས་ཕྲ་བ། གནས་ལུགས་གཞི་རྩ་མཆོད་པས་མི་རྟོག་པ་དང་བཞི་པོ། ཚང་བར་ཉམས་སུ་བླངས་ཚེ། ངོ་བོ་སྟོང་ལ་རྟོག་པ་མེད་པའི་རང་བཞིན་བདེ་གསལ་འགགས་མེད་ཞེན་

[Full Size]

བྲལ་དུ་ཡི་གེར་རྗེན་ནེ་ཧྲིག་གེ་བར་གནས་པ་དེ་ཉིད་གནས་ལུགས་ཀྱི་ངོ་བོ་རྟོགས་པ་ཡིན་མོད་ཅིང་། དེ་ཉིད་ཀྱང་རེས་ཡོང་རེས་མི་ཡོང་བར་མཐོ་དམན་ནམ་སྐྱེ་འབྲི་ལྟ་བུར་སྣང་བ་དང་། རྗེས་ལའང་གང་ཟག་གི་བློ་རིགས་ཀྱི་ཁྱད་པར་ལས། གཞན་ཞིག་ལ་བདེན་མེད་དུ་བུན་ནེ་ཕྱམ་མེ་བར་འགྲོ་ན་མཉམ་གཞག་གནད་དུ་སོང་བའི་སྐད་ཡིན་ལ། རྗེས་ཨ་འཐས་ཤས་ཆེ་ན་གནད་དུ་ཅུང་མང་སོང་བའི་རྟགས་ཡིན་པ་དང་། མདོར་ན་འདི་སྐབས་ཀྱི་མཉམ་གཞག་ལ་རྩེ་གཅིག་ཆུང་ངུར་བཞེད་པ་ལགས་ཤིང་། རྩེ་གཅིག་མུན་པར་འབྱམས་པ་ནི་ཞི་གནས་སྟེང་པོ་བ་ལྟ་བུ་ལ་གསུངས་ཕྱིར། དེ་ནི་གནས་ཆ་རྐྱང་པ་མ་ཤོར་སྟེ་ལྷག་མཐོང་གིས་མ་ཟིན་པས་རྩེ་གཅིག་མཚན་ཉིད་པར་མི་འགྲོ་ཞིང་། སྒོམ་སྐྱོན་ཅན་གྱི་རྣམ་གྲངས་ལགས་མོད།། ༈ །།ཡང་ཉིད་ཀྱིས། སྐབས་འདིར་ཉམས་ལེན་འདི་མཐར་འདོན་

[Full Size]

པའི་ཐབས་གང་གཙོ། ཅེས་གསུངས་བར། སྤྱིར་ཡང་ཆོས་ལམ་དུ་འགྲོ་བ་དང་མཐའ་ཕྱིན་པར་བྱེད་པའི་ཐབས་ནི། ངེས་འབྱུང་དག་སྣང་མོས་གུས་སྙིང་རྗེ་ཞེན་ལོག་བརྩོན་འགྲུས་སོགས་དགོས་ཚུལ་ནི་ཆོས་ཐམས་ཅད་མཐུན་མོད་ཅིང་། ཁྱད་པར་འདི་སྐབས་ཚོར་ཡང་ཚེ་འདིའི་བྱ་བྱེད་དང་རྣམ་གཡེང་དགྲ་ལྟར་སྤངས་ནས། བླ་མའི་རྣལ་འབྱོར་གསོལ་འདེབས་དབང་བཞི་བླངས་བ་སོགས་ཁ་ཚིག་ཙམ་མ་ཡིན་པར་སྙིང་ཐག་པ་ནས་བྱས་ཏེ་བྱིན་རླབས་འཇུག་ངེས་པའི་ཐབས་དང་། མཉམ་གཞག་ལ་ཆིག་དྲིལ་དུ་འབད་ཅིང་། རྗེས་ཐོབ་ཀྱང་དྲན་པ་རྩིས་སུ་བྱས་ལ། ཚེ་འདིར་སྣང་གི་བསམ་སྤྱོད་ཀྱི་བར་དུ་མ་ཆོད་པར་བྱ་བ་ཁོ་ན་མཆོག་ཏུ་གཅེས་པར་གསུངས་མོད་ཀྱི། དེང་སང་གི་སྒོམ་ཆེན་པར་མིང་བཏགས་ནས་ལོངས་སྤྱོད་དང་སྐྱིད་འདོད་ཀྱི་ཞེན་པ་བློ་ཕུགས་སུ་བཅངས་པ་རྣམས་ལ་ནི། རྩེ་གཅིག་ཆུང་ངུ་ཙམ་དུ་མ་

[Full Size]

ཟད་འཆི་བ་མི་རྟགས་བསྒོམ་པ་ཙམ་ཡང་བློ་ཡུལ་ལ་འཁོར་བའང་དཀའ་བར་སེམས་སོ།། ༈ །།ཡང་། ཉིད་ཀྱིས། རྩེ་གཅིག་སྐབས་སུ་ངོ་བོ་རྟོགས་པ་དེ་ལས་ལྷག་པ་རྟོགས་རྒྱུ་ཡོད་དམ་མེད། གསུངས་པ་ལ། ངོ་བོ་མཐོང་བའམ་གནས་ལུགས་རྟོགས་པ་ཙམ་ནི་དང་པོ་སེམས་ངོ་འཕྲོད་པའི་སྐབས་ནས་ཕལ་ཆེར་ལ་འབྱུང་ཡང་། ཚུལ་བཞིན་ཉམས་སུ་ལེན་ཅིང་བླ་མས་བྱིན་རླབས་ཞུགས་པ་རྣམས་ལ་རིམ་བཞིན་གོང་ནས་གོང་དུ་འབོགས་འདོན་རྒྱུ་དང་རྩལ་རྫོགས་རྒྱུ་ངེས་ཤེས་རྙེད་རྒྱུ་སོགས་དང་། དེ་ལ་བརྟེན་པའི་ཡོན་ཏན་གྱི་རྣམ་གྲངས་མང་དུ་འཆར་རྒྱུ་ནི་ལོས་ཀྱང་ཡོང་ལ། ངོ་བོ་རྟོགས་རྒྱུ་ལྷགས་སུ་ཡོད་མེད་ནི་གོང་དུ་བཤད་པ་ལྟར་གཙོ་བོར་གང་ཟག་གི་རིགས་ལ་རག་ལས་ཕྱིར་མཐའ་གཅིག་ཏུ་བརྗོད་པར་དཀའ་ཞིང་། རྒྱལ་སྲས་སྤོམ་བྲག་པ་དང་། དཔའ་བོ་ཆོས་དབང་ལྷུན་གྲུབ་སོགས་ལ་ནི་སྐུ་བུ་ཆུང་གི་རྣམ་པར་བཞུགས་སྐབས་ནས་

[Full Size]

ཏིང་ངེ་འཛིན་བཟང་པོ་རྩོལ་མེད་དུ་ཤར་ཞིང་། རྗེས་ནས་ཐུགས་དམ་དངོས་གསན་པའི་ཚེ་སྔར་གྱི་དེ་ལས་ལྷག་པའི་བོགས་འདོན་རྒྱུ་ཆེར་མ་བྱུང་བའི་ཚུལ་དང་།། ༈ །།རྗེ་སྒམ་པོ་པའི་སློབ་མ་ར་རྫི་རས་པ་དང་།། ༈ །།རྗེ་མཆོག་ཆོས་རྗེ་སོགས་ནི་བླ་མའི་གདན་ས་ཐོག་མར་མཐོང་བ་སོགས་ལས་རོ་གཅིག་གི་རྟོགས་པ་འཁྲུངས་ཚུལ་སོགས་ཀྱི་དཔེ་ལྟར། སོ་སོའི་སྐལ་བ་དང་བློ་ཁྱད་བྱིན་རླབས་ཞུགས་མ་ཞུགས་ཀྱི་སོ་མཚམས་སོགས་ལ་རག་ལས་པ་མ་ལགས་སམ། དོན་དུ་ནི་ངོ་བོ་ཙམ་རྟོགས་པ་ལ་ཁྱད་མེད་རུང་། ཉིད་ཀྱི་ཤུན་པའམ་ཞེན་འཛིན་སེམས་དག་མ་དག་གི་ཁྱད་པར་ནི་ཤིན་ཏུ་ཡང་ཆེ་བར་གསལ་ཞིང་། འདིར་འོག་མའི་མཉམ་གཞག་གོང་མའི་རྗེས་ཐོབ་ཏུ་འགྱུར་བར་ཡང་བཤད་ལ། ཁྱད་པར་མེད་ན་རྣལ་འབྱོར་བཞི་རིམ་ཅན་དུ་བཤད་པ་ཡང་དགོས་པ་

[Full Size]

མེད་པར་འགྱུར་བས་སོ། །ལར་ཡང་། སེམས་ཀྱི་ངོ་བོ་རྗེན་པར་མཐོང་བ་ཙམ་ནི་སླར་ཡང་། ཉམས་ལེན་ལ་བརྩོན་འགྲུས་ཞན་པས། རྣལ་འབྱོར་བཞི་རྫོགས་པར་འཆར་བའམ་ངོ་བོ་བྱེ་བྲག་ཏུ་རྟོགས་པ་ནི་དཀོན་པར་སྣང་མོད་ཀྱང་། དེ་དག་སོ་སོའི་ཐ་དད་དུ་རྟོགས་ཐུབ་ན། རྗེ་གྲུབ་ཐོབ་གོང་མ་རྣམས་ཀྱི་གདན་ས་བསྙེགས་པར་ནུས་མོད་ཀྱང་། ཚིག་དང་ཡི་གེའི་ཁ་ཁྱེར་ཙམ་མ་གཏོགས་བསྒོམས་པའི་ཉམས་མྱོང་ནང་ནས་ཤར་བའི་རྟོགས་ལྡན་གཤའ་མ་ཞིག་རང་གང་དུ་བཙལ་ཀྱང་རེ་ཞིག་དཀོན་པ་འདྲ་ལགས།།༈ །།ཡང་། ཉིད་ཀྱིས་འགྲོ་བའི་མགོན་པོ་ཞང་རིན་པོ་ཆེས་གསུངས་པ་བཞིན། སྤྲོས་བྲལ་དཔྱིད་རྟ་སྒལ་ཆད་ཀྱི་དཔེ་དྲངས་པའི་སྐྱོན་གྱི་བྱེ་བྲག་པ་ཆོས་སྐུ་དང་། རང་བཞིན་དང་། སྟོང་པར་རྟོགས་པ་སོགས་ཡོན་ཏན་གྱི་བྱེ་བྲག་རྣམས་ཀྱི་དབྱེ་བ་ཇི་ལྟར་འབྱེད། གསུངས་པ་དང་། སྤྲོས་བྲལ་དུས་གསུམ་

[Full Size]

འཁོར་འདས་དང་ཉམས་རྟོགས་སོགས་ཀྱི་སོ་མཚམས་ཇི་ལྟར་དབྱེ་དང་། རྣལ་འབྱོར་གོང་མ་གཉིས་ལའང་དེ་བཞིན་དུ་དབྱེ་བསྡུ་དང་སྐྱོན་ཡོན་སོགས་ཀྱི་རྒྱས་བཤད་ཀྱིས་ཅེས་གསུངས་འདུག་པ། དེ་ལྟ་བུའི་རྣལ་འབྱོར་བཞི་པོ་ཐམས་ཅད་ཀྱི་དབྱེ་བསྡུ་དང་དགོངས་དོན་གནད་འགག་སྐྱོན་སོགས་ཐམས་ཅད་ཚུལ་བཞིན་དུ་བརྗོད་ནུས་པ་ནི་སངས་རྒྱས་ཉིད་དམ། དེ་དང་མཚུངས་པའི་སྐྱེས་ཆེན་དཀར་འབྲུག་འབྲི་སྟག་ཚལ་ཐེལ་སོགས་ཀྱི་གྲུབ་ཐོབ་གོང་མ་རྣམས་དང་། རྒྱལ་བ་ཡབ་སྲས་ལྟ་བུ་རྣམས་མ་གཏོགས། གང་ཟག་ཐ་མལ་པ་དག་གིས་བརྗོད་པར་དཀའ་མོད་ཀྱང་། ཁྱད་པར་བདག་དང་བདག་འདྲའི་རིགས་ཅན་དག་གིས་ནི་སྨྲ་བར་ཅི་ཞིག་ནུས་ཏེ། ཅིའི་ཕྱིར་ན། དེ་དག་གི་གནད་དོན་ཚུལ་བཞིན་བརྗོད་པར་བྱེད་པ་ལ་རང་ཉིད་ཉམས་རྟོགས་ཀྱི་ས་མཚམས་དེ་ཐམས་ཅད་བསྒྲོད་ཅིང་མངོན་དུ་གྱུར་པ་ཞིག་དགོས་ལ། དེ་ལྟར་མ། གྱུར་བཞིན་ཁ་ཁྱེར་དུ་

[Full Size]

བཤད་པས་ནི་དོན་ལ་མི་འབབ་སྟེ། དཔེ་ཅི་དང་འདྲ་ན། རྡོ་རྗེ་གདན་དུ་མ་ཕྱིན་པས་དེའི་བཀོད་པ་བཤད་པའམ། གསོ་རིགས་མི་ཤེས་པར་སྨན་པ་བྱེད་པ་ལྟར་མཁས་གྲུབ་རྣམས་ཀྱིས་འཁྲེལ་བའི་རྒྱུ་ལས་མ་མཆིས་མོད། འོན་ཀྱང་རྣལ་འབྱོར་བཞིའི་མཚན་ཉིད་བརྡའ་མཚོན་ཙམ་ཞིག་བརྗོད་ན། དེ་ཡང་གནས་པའི་ཏིང་ངེ་འཛིན་ཇི་ལྟ་བ་ངོ་འཕྲོད་ཅིང་སྐྱོང་ཤེས་ལ་ཅུང་ཟད་མ་གོམས་པའི་དབང་གིས་སྐྱེ་འབྲིའམ་གསལ་འགྲིབ་ངེས་མེད་ལྟ་བུ་ནི་སྔར་བཤད་པ་ལྟར་རྩེ་གཅིག་ཆུང་ངུ། དེ་ལ་གོམས་ནས་ཇི་ཙམ་བསྒོམ་བསྒོམ་འོང་བ་རྩེ་གཅིག་འབྲིང་པོ། དེ་ཉིན་མཚན་འཁོར་ཡུག་ཏུ་འོང་བ་རྩེ་གཅིག་ཆེན་པོ། དེ་ནས་རྩེ་གཅིག་གི་ཉམས་ཀྱི་ཤུན་པ་བུད་ནས་སྟོང་ཉིད་བློ་བྲལ་རང་བཞིན་མེད་པར་རྟོགས་ཤིང་འཁོར་འདས་སོ་མཚམས་ཕྱེད་པ་ནི་སྤྲོས་བྲལ་ཆུང་ངུ་། ཉམས་རྟོགས་ཀྱི་

[Full Size]

ཤན་རང་བཞིན་དུ་ཆོད་ཅིང་འཁོར་འདས་ཀྱིས་བསྡུས་པའི་ཆོས་ཐམས་ཅད་གསལ་སྟོང་ཟུང་འཇུག་གི་ཀློང་དུ་ཐག་ཆོད་པ་ནི་སྤྲོས་བྲལ་འབྲིང་པོ། འདི་ཡན་ཆད་ནས་རྩ་བའི་དམ་ཚིག་མ་ཉམས་ན་བར་དོ་ཆོད་ཚར་བར་བཤད། དེ་ནས་རྣམ་རྟོག་ཕྲ་མོ་སྐྱེས་ཀྱང་སྐྱེ་གྲོལ་དུས་མཉམ་དུ་འགྲོ་ཞིང་བསྒོམ་པའི་རྩོལ་བ་ལས་འདས་པ་སྤྲོས་བྲལ་ཆེན་པོ། དེ་ནས་གཟུངས་འཛིན་སེམས་སུ་ཡལ། སྣང་སེམས་དངོས་སུ་འདྲེས་པས་རྫུ་འཕྲུལ་ཅུང་ཟད་ཀྱང་སྟོན་པར་ནུས་ལ། ཕྱི་ནང་གི་རྒྱུ་རྐྱེན་འབྲས་གསུམ་སོགས་རྟེན་འབྲེལ་རག་པ་བརྩི་ཤེས་པ་རོ་གཅིག་ཆུང་ངུ་། དེ་ནས་སེམས་ལ་རང་དབང་ཐོབ་ཅིང་སྣང་བ་ལ་རང་བྱན་ཚུད་པས་དྲན་ཀྱང་སྒོམ་ལ་མ་དྲན་ཀྱང་སྒོམ་ཁོ་ནར་སོང་བ་རོ་གཅིག་འབྲིང་པོ། དེ་ནས་རྟོགས་པ་མངོན་དུ་གྱུར་ཅིང་སྣང་ཆའི་རྟེན་འབྲེལ་

[Full Size]

རྩལ་རྫོགས་སུ་བསྒྲིགས་ཤེས་པས་རྫུ་འཕྲུལ་ལ་རང་དབང་ཐོབ་པ་རོ་གཅིག་ཆེན་པོ། དེ་ནས་ཤེས་བྱའི་སྒྲིབ་པའམ་རང་ངོ་ཤེས་པའི་རང་གྲིབ་ལྟ་བུ་ཞིག་མ་གཏོགས་ལས་ཉོན་གྱི་གྲིབ་པའམ་བག་ཆགས་ཐམས་ཅད་ཟད་ཅིང་མཉམ་རྗེས་ཐུན་མཚམས་ལས་འདས་པ་ནི་སྒོམ་མེད་ཆུང་ངུ་། ཕྱི་ནང་བ་དང་ནང་འཛིན་པའི་འགྱུ་དྲན་གྱི་ཆ་ཤས་ཙམ་ཀྱང་དག་ཅིང་ངོ་ཤེས་ཀྱི་དྲན་པ་ཡང་རང་སར་དག་ནས་འོད་གསལ་མ་བུ་འདྲེས་པ་ནི་སྒོམ་མེད་འབྲིང་པོ། དེ་ནས་དྲན་རིག་གི་ངོ་བོ་ཉིད་ཀྱང་བློ་འདས་སུ་གྲོལ་ཏེ་ང་བདག་གི་འཛིན་ཡུལ་དང་བྱེད་པོའི་མིང་ཙམ་ཡང་མེད་པར་ཆོས་ཟད་བློ་འདས་ཆེན་པོར་གྲོལ་བ་ལ་སྒོམ་མེད་ཆེན་པོར་བརྗོད་དོ། །དེ་ཡང་ཇི་སྐད་དུ། རྩེ་གཅིག་གནས་པ་བསྒོམ་དུ་བྱེད། །སྤྲོས་བྲལ་སྟོང་པས་ཁ་དོག་ཁྱེར། །རོ་གཅིག་བསྒོམ་པའི་བློ་ཙམ་ཡོད། །སྒོམ་མེད་བློ་ཟད་ཆོས་ཟད་ཡིན། ཅེས་གསུང་ལ། དེ་དག་མདོར་

[Full Size]

བསྡུས་པའི་ངོས་འཛིན་ལུགས་ནི། རྣམ་རྟོག་ལ་གཉེན་པོས་འཇུག་དགོས་ན་རྩེ་གཅིག །དྲན་ཙམ་ལ་ངོ་བོ་རྙེད་ན་སྤྲོས་བྲལ། སྣང་ཐོག་ཏུ་གྲོལ་ཐུབ་ན་རོ་གཅིག །བསྒོམ་བྱ་བསྒོམ་བྱེད་ཟད་པ་སྒོམ་མེད་དུ་གཞེད་དོ། །བོགས་འདོན་ནི། རྩེ་གཅིག་གི་བོགས་བརྩོན་འགྲུས་ཀྱིས་འདོན། །སྤྲོས་བྲལ་གྱི་བོགས་མོས་གུས་ཀྱིས་འདོན། །རོ་གཅིག་གི་བོགས་སྙིང་རྗེས་འདོན། །སྒོམ་མེད་ལ་བོགས་འདོན་རྒྱུ་དང་བྲལ་བའོ། །གེགས་སེལ་ནི། རྩེ་གཅིག་གི་གེགས་གཞག་ཐབས་ཀྱིས་བསེལ། །སྤྲོས་བྲལ་གྱི་གེགས་སྒོམ་ཉིད་ཀྱིས་བསེལ། རོ་གཅིག་སྒོམ་མེད་གཉིས་གེགས་ཀྱི་ཡུལ་ལས་འདས་པའོ། །ཅེས་གསུངས་སོ། །དེ་ལྟར་འདི་དག་ནི་བརྡའ་མཚོན་ཙམ་དུ་ལགས་ཤིང་། འདིར། ཀུན་མཁྱེན་རང་བྱུང་ཞབས་ཀྱིས་ནི་ཉམས་ཀྱིས་རྣལ་འབྱོར་བཞི་དང་རྟོགས་པའི་རྣལ་འབྱོར་བཞི་དབྱེ་བར་མཛད་ཅིང་། གཞན་ཡང་འདི་དག་གིས་རྒྱས་

[Full Size]

བཤད་ལྟར་ན།། ༈ །།རྗེ་སྒོམ་ཆུང་ཞབས་ཀྱི་ནི། ངོས་འཛིན་ལུགས་བཞི། རྟོགས་ཚུལ་བཞི། འཁོར་ས་བཞི། སྐྱེད་ཚུལ་བཞི། དྲི་མ་བཞི། དག་ཚུལ་བཞི། ས་མཚམས་བཞི། མཁྱེན་ཚུལ་བཞི་ལ་སོགས་པའི་ཕྲ་ཞིབ་དང་།། ༈ །།ཕག་མོས་གྲུབ་པས་རྣམ་གྲངས་བཞི་གསུམ་བཅུ་གཉིས་དང་།། ༈ །།རྗེ་འབྲུག་པས་ནི། ངོ་བོ་མཐོང་མ་མཐོང་། རྩལ་རྫོགས་མ་རྫོགས། རྣམ་རྟོག་སྒོམ་དུ་ཤར་མ་ཤར། ཡོན་ཏན་སྐྱེས་མ་སྐྱེས། ཀུན་རྫོབ་རྒྱུ་འབྲས་རྟེན་འབྲེལ་མ་བྱན་ཚུད་མ་ཚུད། གཞན་དོན་གཟུགས་སྐུ་དང་འགྲོ་དོན་གྱི་ས་ཐེབས་མ་ཐེབས་སོགས་ཀྱི་མུ་དབྱེ་དང་། ཕྱིས་ནས་སྒམ་པོ་པ་བཀྲ་ཤིས་རྣམ་པར་རྒྱལ་བས་ཀྱང་དེ་དང་མཚུངས་པ་དབྱེ་བར་མཛད་སྣང་ཕྱིར། ཕྲ་ཞིབ་ཀྱི་དབྱེ་བ་དང་དོག་གཅོད་ཐམས་ཅད་དེ་དག་ཏུ་མཛད་འཚལ་ཞིང་། ཁྱད་པར་སྙིང་པོ་དོན་གྱི་གཏེར་མཛོད་སོགས་ལ་ཁྱེད་རང་གི་གཟིགས་རྟོགས་གནང་ཡོད་འདུག་པས།། ༈ །།

[Full Size]

རྡོ་རྗེ་འཆང་དངོས་བཀའ་རྒྱུད་རིན་པོ་ཆེ་དེ་དག་གིས་གསུངས་པ་ལས་ལྷག་པ་ཞིག་དིང་སང་བདག་ལྟ་བུས་བཤད་ཤེས་ཀྱང་མི་ཤེས། དགོས་ཀྱང་མི་དགོས་པ་ལྟ་བུ་ལགས་པས་དེ་དག་རྣམས་སུ་སྒྲོ་འདོགས་གཅོད་པ་ཞུ་ཞིང་། འགགས་དོན་གྱི་མཆོག་ཏུ་ནི། ཉིད་མདོ་རྒྱུད་མན་ངག་མང་པོ་ལ་ཐོས་བསམ་མཛད་པ་ཞིག་ནི་གཞིར་བྱས་ལ། ཁྱད་པར་བླ་མ་མཆོག་ལ་བསྟན་ནས་ཟབ་མོའི་གདམ་ངག་ལ་སྒྲོ་འདོགས་ཆོད་པ་དང་། དིང་སང་ཀྱང་ཕྱག་རྒྱ་ཆེན་པོའི་ཟབ་བཞེས་དྲི་མ་མེད་པར་སྐྱོང་བ་གནང་ལོས་ཡོད་ཚེ། རང་རིག་ཆོས་སྐུའི་རང་ཞལ་མཇལ་བ་ལས་ལྷག་པའི་ཉམས་ལེན་གྱི་བོགས་འདོན་གཞན་ལ་རེ་བའི་ཡུལ་གྱིས་དབེན་པ་དང་། ཚིག་དང་ཡི་གེའི་སྤྲོས་པས་དགོས་པ་མེད་ཚེ། ལམ་རང་བྱུང་སྙིང་པོའི་རང་འགྲོས་ལ་འཇུག་པ་ནི་གནད་ཀྱི་གདམས་པ་ཡང་དག་པ་མ་ལགས་སམ། གཞན་ཡང་། ཉིད་ཀྱི་ཡི་གེར་

[Full Size]

སྤྲོས་བྲལ་གསུམ་གྱི་སྐབས་ན། འདིའི་ངར་འདོན་ལ་ཐབས་ཤེས་གང་གཙོ་གསུངས་སྣང་བ། འདི་ནི་སྤྲོས་བྲལ་ཁོ་ནར་མ་ཟད་ཐོག་མཐའ་བར་གསུམ་གང་དུའང་ཐབས་ཤེས་གཉིས་ཡ་བྲལ་ལམ་རྐྱང་པར་མ་སོངབ་ཟུང་དུ་འབྲེལ་བ་ཞིག་ནི་སྤྱིར་ཡང་རྡོ་རྗེ་ཐེག་པའི་ལམ་འདིར་ནན་ལྟར་གལ་ཆེ་ལ། ཁྱད་པར་འདི་དག་གི་སྐབས་ཚོར་ནི། ཤེས་རབ་སྟོང་ཉིད་ལ་ཇི་ཙམ་བསྒོམ་ཀྱང་བོགས་མ་འཐོན་ན། སྟོང་པ་མཐར་ལྟུང་ལ་ཉེ་བའི་རྟགས་ཡིན་ཚེ། ཐབས་ཀྱི་བྱེ་བྲག་སྣ་ཚོགས་ལ་ཁྱད་དུ་མི་གསད་པར་འབད་འབུངས་སྟོན་པས་བོགས་ངེས་པར་འབྱུང་བ་དང་།། ༈ །།ཡང་ཐབས་ལ་བོགས་མ་འཐོན་ཤེས་རབ་ཀྱི་རྩིས་མ་ཟིན་པར་ཐབས་བརྐྱང་ལ་ཤོར་བའི་རྟགས་ཡིན་པས། འདུས་བྱམས་རྩོལ་བྱས་ལ་ཨ་མ་འཐས་པར་ཆོས་དབྱིངས་སྟོང་པ་ཉིད་འཁོར་གསུམ་ཡོངས་དག་མ་བཅོས་ཀློང་ཡང་ཁྱབ་གདལ་འདུས་

[Full Size]

མ་བྱས་ཀྱི་ངང་དུ་གློད་པས་བོགས་ངེས་པར་འཐོན་པར་གསུངས་ལ། དམིགས་བསལ་དུ་ནི། སྤྲོས་བྲལ་འབྲིང་ཙམ་མན་ཆད་དུ་ནི་ཐབས་ལ་ནན་ཆེར་བྱ་བ་དང་། དེ་ཡན་ཆད་དུ་ནི་སྟོང་པ་ཁ་ཁྱེར་གྱི་གོགས་ལ་མ་ཤོར་བའི་ངོས་ནས་ཤེས་རབ་ལ་གཙོར་བྱ་བ་གནད་ཟབ་པར་གསུངས་ཤིང་། གཞན་དུ་ན། སྔར་བཤད་པ་གང་ཟག་གི་དབང་རིམ་ལ་ཡང་ལྟོས་ཕྱིར་གཅིག་ཏུ་མ་ངེས་པ་དང་། གང་ལྟར་ནའང་ཐབས་ཤེས་ཡ་མ་བྲལ་བ་ནི་གཅིག་ཏུ་གཅེས་པར་གོ་སྟེ། དཔེར་ན། བྱ་ནམ་འཕངས་གཅོད་པ་ལ་ཡང་འདབ་གཤོག་ཐམས་ཅད་ཚང་དགོས་པ་བཞིན་ནོ། །ཡང་། ཐབས་ཀྱི་རིམ་པའི་རིགས་ནི་རྒྱུད་སྡེའམ་ཉམས་ལེན་གྱི་རིམ་པ་སོ་སོའི་རང་གཞུང་དང་། བླ་མའི་མན་ངག་ཕྱག་བཞེས་ཀྱི་རྣམ་གྲངས་མཐའ་ཡས་ཕྱིར་རང་རང་གི་ལུགས་དང་མཐུན་པར་འབད་དགོས་པ་ཉིད་དོ།། ༈ །།ཡང་ཉིད་ཀྱིས། ཆུང་

[Full Size]

འབྲིང་གཉིས་ཀྱིས་བར་དོ་ཇི་ལྟར་བསྒྲོད། གསུངས་སྣང་བ་དེ་ཉིད་གོང་དུ་སྤྲོས་བྲལ་འབྲིང་པོ་ཡན་ལ་བར་དོ་མི་འབྱུང་བར་བཤད་པ་བཞིན་ཡིན་ལ།། ༈ །།ཡང་། བར་དོའི་སྒྲ་བཤད་དང་ཞིབ་དབྱེའི་དབང་དུ་བྱས་ན། རྙིང་ལུགས་ཀྱི་བར་དོ་ཐོས་གྲོལ་སོགས་དང་དགོངས་པ་མཐུན་པར་རྗེ་མི་ལས་བཀྲ་ཤིས་ཚེ་རིང་མ་ལ་གདམས་པའི་བར་དོ་འཕྲང་སྒྲོལ་གྱི་སྐབས་སོགས་སུ་ནི་འཁོར་འདས་ཀྱི་ཆོས་ཐམས་ཅད་བར་དོའི་རང་བཞིན་དུ་བསྟན་མོད་ཅིང་། དེ་དག་གི་རྒྱས་བཤད་ནི་འདིར་མ་བརྗོད་ལ། ཉིད་ཀྱིས་བྲིས་པ་ལྟར་གྱི་ཆོས་ཉིད་སྲིད་པའི་བར་དོའི་གྲོལ་ཚུལ་མདོར་བསྡུ་ན། རྣལ་འབྱོར་པ་བླ་མའི་དམ་ཚིག་དང་ཉམས་ལེན་ལ་ཞེ་ཐེག་པ་ནས་བརྩོན་འགྲུས་དང་ལྡན་པ་ཞིག་ལ་ནི། སྤྲོས་བྲལ་ཙམ་དུ་མ་སླེབ་རུང་རྩེ་གཅིག་ཆེན་པོ་སོགས་སུ་ཚེའི་དུས་བྱས་ཤིང་། མཚམས་སྦྱོར་ངན་པ་གཞན་གྱི་བར་དུ་མ་ཆོད་ན། གཞིའི་འོད་གསལ་རྒྱ་མཚོ་ལྟ་བུ་དང་མལ་གྱི་འོད་གསལ་

[Full Size]

ཆུ་སྣ་ལྟ་བུ་གཉིས་འདྲེས་ནས་གྲོལ་བ་ཤས་ཆེ་སྟེ། རྩེ་གཅིག་ཆེན་པོ་ཉམས་ཀྱི་འཁོར་ཡུག་དེ་ཉིད་བར་དོར་གཞིའི་འོད་གསལ་ཤར་བ་དང་འཕྲད་ཚེ་རྟོགས་པ་ཡང་དག་ཏུ་གྱུར་ནས་གྲོལ་བར་བཤད་དོ། །དེ་ཉིད་གྲོལ་ཐུབ་མི་ཐུབ་ཀྱི་ཚད་ནི་ད་ལྟ་གཉིད་ཀྱི་སྐབས་སུ་དགེ་སྦྱོར་ཁོར་ཡུག་སོང་མ་སོང་ཁོ་ནས་ཤེས་ལ། ནམ་དུའང་དམ་ཚིག་ལ་ཉེས་ལྟུང་མེད་པ་ཞིག་ནི་གལ་ཆེ་བ་ཁོ་ནར་གསུངས་སོ།། ༈ །།ཡང་ཉིད་ཀྱིས། སྒྲིབ་པ་གསུམ་ནམ་གྱི་དུས་ནས་བསགས་ལ་མཐར་ནམ་དུ་དག །ཅེས་གསུང་པ་ལ། འདི་ལ་སྒྲིབ་པ་གསུམ་པོ་རང་ཡང་འདྲེན་མི་གཅིག་པ་མང་ཀྱང་། སྤྱི་ཙམ་དུ་ནི། གོང་དུ་འཁྲུལ་ལུགས་ཕྱག་ཆེན་བཤད་པའི་སྐབས་ལྟར་གཞི་ལ་འཁྲུལ་པའམ་སྒྲིབ་པ་མེད་ཀྱང་བློ་བུར་གྱི་དྲི་མ་ཡིན་པ་དང་། དེ་ཉིད་ཀྱང་ལྷན་ཅིག་སྐྱེས་ཀྱི་མ་རིག་པ་ཤར་བ་ནས་བརྩམས་ཏེ་ལས་ཉོན་གྱི་

[Full Size]

སྒྲིབ་པ་བསགས་ཤིང་འཁོར་བ་འཁྱམས་ལ། འཁྱམས་བཞིན་དུ་བག་ཆགས་ལུ་གུ་རྒྱུད་དུ་མཚམས་སྦྱར་ནས་རྟེན་འབྲེལ་བཅུ་གཉིས་ཀྱི་འཁོར་ལོ་བསྐྱོད་པ་ལགས་མོད། མཐར་ནམ་གྱི་ཚེ་དག་ན། ཉམས་ལེན་ཟབ་མོའི་ལམ་འདིར་མི་འཇུག་པ་རྣམས་ལ་ནི་སླར་ཡང་ནས་ཡང་ནས་ཡང་དུ་ལམ་སྒྲིབ་མང་དུ་བསྣོན་ཅིང་འཁོར་བ་མཐའ་མེད་དུ་འགྱུར་བ་ལས་འོས་མ་མཆིས་ལ། འགའ་ཞིག་ལམ་ལ་མ་ཞུགས་ཀྱང་རྒྱལ་བའི་ཐུགས་རྗེ་དང་། རྣམ་དཀར་གྱི་འབྲས་བུ་དག་གིས་རྒྱུ་རྐྱེན་བྱས་ཏེ་གོང་དུ་འཕགས་པ་ཡང་འབྱུང་ཞིང་། བྱང་ཆུབ་ཀྱི་ཉེ་རྒྱུ་དངོས་ནི་ལམ་ཟབ་འདི་ལྟ་བུ་ལ་མ་བརྟེན་པའི་ཐབས་མེད་པ་དང་། འདི་སྐབས་ཀྱི་བརྗོད་དོན་དངོས་ནི། རྩེ་གཅིག་སྐབས་ཅི་རིགས་པ་མན་ཆད་ནས་ལས་ཉོན་གྱི་སྒྲིབ་པ་དག་པ་དང་། རོ་གཅིག་མན་ཆད་ནས་བག་ཆགས་ཀྱི་སྒྲིབ་པ་དག་པ་དང་། སྒོམ་མེད་ཆུང་འབྲིང་ཡན་ཆད་ནས་ཤེས་བྱའི་སྒྲིབ་པའམ་མཆོག་

[Full Size]

འཛིན་དང་ངེས་ཤེས་ལྟ་བུའི་དྲི་མ་མཐའ་དག་ཀྱང་དབྱིངས་སུ་ནུས་པས་བསྒོམ་མེད་ཆེན་པོ་མཐའ་ཕྱིན་པར་བརྗོད་ལ། དེ་ནས་གཞན་པའི་ཕྲ་ཞིབ་ཀྱི་དབྱེ་བ་དང་ས་མཚམས་མཚན་ཉིད་ཐེག་པ་ནས་གསུངས་པའི་ས་བཅུ་ལམ་ལྔ་དང་། འདིའི་རྣལ་འབྱོར་བཞི་གསུམ་བཅུ་གཉིས་སྦྱར་བའི་བཤད་པ་སོགས་ནི་བཀའ་བརྒྱུད་གོང་མའི་གསུང་སྒྲོས་རྣམས་ལས་འབྱུང་ཕྱིར། བློ་དམན་བདག་འདྲས་ཡང་སྐྱོར་དུ་བཤད་པས་ཅི་ཞིག་བྱ། མདོར་ན་དེ་དག་གི་སྐབས་ཚོར་བླ་མ་ལ་ལས་ནི་ས་བཅུ་ལམ་ལྔ་དང་རྣལ་འབྱོར་བཞི་སྦྱར་བ་སྐབས་སུ་མི་འབབ་པར་བཞེད། ལ་ལས་ནི་ཤིན་ཏུ་འབྱོར་པའི་ཚུལ་གསུངས་པ་སོགས་སྣ་ཚོགས་པར་སྣང་མོད་ཀྱང་། དོན་དམ་པར་ནི། གསང་བའི་མྱུར་ལམ་ཟབ་མོ་འདི་ལྟ་བུའི་འབྲས་བུ་མཐའ་ཕྱིན་ཚེ། ས་ལམ་གྱི་ཡོན་ཏན་མཐའ་དག་རང་བཞིན་ལྷུན་རྫོགས་སུ་གྱུར་པ་ཡིན་ཕྱིར་ཐེག་པ་

[Full Size]

འོག་མའི་ལམ་རིམ་དག་བསྒྲོད་ཀྱང་རུང་། མ་བསྒྲོད་ཀྱང་རུང་སྟེ། དོན་དུ་ཐམས་ཅད་རང་སྣང་ཡིན་པའི་ཕྱིར་དང་། འབྲས་བུ་མངོན་དུ་གྱུར་པའི་དུས་ན་ལམ་གྱི་བྱ་རྩོལ་ལས་འདས་པའི་ཕྱིར་རོ།། ༈ །།ཡང་ཉིད་ཀྱིས། སྣང་བའི་འོད་གསལ་དང་སྣང་མེད་ཀྱི་འོད་གསལ་གཉིས་སོ་སོར་གང་ནས་འཆར་ཞིང་ཇི་ལྟར་ངོས་འཛིན། གསུངས་པ་ལས། སྤྱིར་འོད་གསལ་གྱི་སྒྲ་ཙམ་འཇུག་པ་ནི་མང་མོད་ཀྱང་། ངེས་དོན་གྱི་སྐབས་འདི་དངས་པའམ། གསལ་བའམ། སྒྲིབ་གཡོག་མེད་པའམ། འཆར་སྒོ་འགགས་པ་སོགས་ལ་འཇུག་མེད་ཅིང་། དེ་ལ་སྣང་མེད་ཀྱི་འོད་གསལ་དང་སྣང་བའི་འོད་གསལ་གཉིས་སུ་ཕྱེ་བ་འདི་དག །ཆོས་དྲུག་གི་སྐབས་སོགས་སུ་བཤད་པའི་ཉམས་ཀྱི་འོད་གསལ་དང་རྟོགས་པའི་འོད་གསལ་རྣམས་དང་དོན་གཅིག་པར་གཞེད་ལ། དེ་ནས་འོད་གསལ་གྱི་མཆོག་ནི་གཞིའི་འོད་གསལ་ཡིན་ཞིང་། དེ་ལ་སྣང་མེད་ཀྱི་འོད་གསལ་དང་། སྟོང་ཉིད་ཀྱི་འོད་གསལ་

[Full Size]

དང་། དོན་དམ་པའི་འོད་གསལ་སོགས་སུ་བརྗོད་ལ། མདོ་ནས་ཀྱང་། སེམས་ཀྱི་རང་བཞིན་འོད་གསལ་བའོ། །ཅེས་གསུང་པ་འདི་ནི་འགྲོ་བ་ཀུན་ལ་ཡེ་ཁྱབ་ཏུ་གནས་མོད་ཀྱང་དེ་དང་ངོ་མ་ཤེས་པ་ཉིད་བླ་མའི་གདམ་ངག་གིས་ངོ་སྤྲད་པ་ལ་ལམ་གྱི་འོད་གསལ་དུ་བརྗོད་ཅིང་། རྟོགས་པའི་འོད་གསལ་ཀྱང་འདི་ཀ་ཡིན་པ་དང་། འདི་ནི་རྩེ་གཅིག་ནས་བཟུང་སྟེ་རང་ལ་རང་གསལ་དུ་འཆར་ནས། སྒོམ་མེད་ལ་མངོན་དུ་འགྱུར་བ་ལགས་མོད། འོད་གསལ་འདིའི་གདངས་སམ་གསལ་སྣང་ལྟ་བུའི་བྱེ་བྲག་ལ་ནི་དཔེ་དོན་རྟགས་གསུམ་གྱི་སྒོ་ནས་ངོ་སྤྲོད་ཅིང་ཉམས་སུ་བླངས་ཐབས་ཁྱད་པར་བ་བདག་ཉིད་རྙིང་མའི་རྫོགས་ཆེན་རྣམས་སུ་མཆིས་པ་དང་། དེར་མ་ཟད། སྤྱི་ལྟར་ནའང་ཕྱི་རོལ་འབྱུང་བ་ལྔ་སོགས་སྣོད་བཅུད་ཀྱི་རང་ཚུལ་དབྱིབས་དང་ཁ་དོག་སྣ་ཚོགས་པའི་འཆར་ཚུལ་འདི་ཐམས་ཅད་ཀྱང་། དོན་དུ་རང་སྣང་ལས་ལོགས་སུ་གྲུབ་

[Full Size]

པ་མེད་པས་ངོ་བོས་སྟོང་ཞིང་། རྣམ་པ་འགགས་མེད་ཅིར་ཡང་འཆར་བས་ན་སྣང་བའི་འོད་གསལ་ཡིན་པ་དང་། ནང་ལྟར་ན་རྩ་རླུང་ཁམས་ཀྱི་བྱེད་བཅིངས་དང་རྟེན་འབྲེལ་ལས་བྱུང་བའི་དུད་སོགས་རྟགས་བཅུའམ། དེ་ཙམ་དུ་ཡང་མ་ཟད་པར་དབང་པོ་དྲུག་གི་སྤྱོད་ཡུལ་དུ་གྱུར་ཚད་དང་། དག་པ་ལྷ་དང་ཞིང་ཁམས་ཀྱི་འཆར་སྒོ། མ་དག་འདྲེ་གདོན་འཁྲུལ་སྣང་གི་འཆར་སྒོ་སོགས་མཐའ་དག་ཀྱང་སྣང་བའི་འོད་གསལ་དུ་མ་གྱུར་པ་རྡུལ་ཙམ་ཡང་མེད་ལ། འདི་ཐམས་ཅད་གང་ཟག་ཐ་མལ་པ་རྣམས་ཀྱིས་ནི་དེའི་རང་བཞིན་མ་ཤེས་པས་མི་བདེན་པ་ལ་བདེན་པར་བཟུང་ཞིང་འཁྲུལ་པ་ཨ་འཐས་ཉིང་མཚམས་སྦྱར་བས་ཕན་གནོད་ཀྱི་རྒྱུ་ལྟར་བྱེད་ལ། ལམ་པའི་རྣལ་འབྱོར་རྣམས་ཀྱིས་ནི་དེ་དག་གི་ཡིན་ཚུལ་ཤེས་པའི་སྒོ་ནས་སྐབས་སོ་སོའི་གནད་ཀྱི་གདམས་པས་ཟིན་ཚེ་ཉམས་ལེན་གྱི་རྒྱུའམ་གྲོགས་སུ་ཤར་བ་དང་། འབྲས་བུ་མངོན་

[Full Size]

གྱུར་རྣམས་ལ་ནི་སྣང་མི་སྣང་། འཆར་མི་འཆར། འོད་གསལ་མི་གསལ་སོགས་ཀྱི་མིང་དང་ཐ་སྙད་ཀྱི་གདགས་གཞི་ཟད་ཅིང་། འཛིན་པའི་བཏོད་ཕུར་བུད་ཚེ་སྣང་སྲིད་འཁོར་འདས་ཀྱི་ཆོས་སོ་ཅོག་ཆོས་ཉིད་འདུས་མ་བྱས་པའི་ཀློང་དུ་རྒྱ་འབྱམས་པས་འོད་གསལ་ཡང་དག་གི་དོན་མཐར་ཕྱིན་པ་ཉིད་དོ། །དེས་ན་སྐབས་འདིར་རྣལ་འབྱོར་བཞི་ཚུལ་བཞིན་དུ་རྟོགས་པའི་གང་ཟག་དག་ལ་ནི་འོད་གསལ་གཉིས་པོ་ཟུང་འཇུག་ཁོ་ནར་རྟག་ཏུ་གནས་ཚེ། འདི་ཙམ་ནས་འཆར་དང་འདི་ལྟར་ངོས་བཟུང་ཞེས་པའི་ཟུར་གསལ་མི་དགོས་པར་གོ་ཞིང་། ཕྲ་ཞིབ་ཀྱི་གནད་རྣམས་ཅིས་ཀྱང་ཤེས་པར་འདོད་ན་བར་དོ་འཕྲང་སྒྲོལ་གྱི་འགྲེལ་པ་སོགས་སུ་བལྟ་བར་བྱའོ།། ༈ །།འགགས་དོན་གྱི་སྙིང་པོར་གསོལ་ན། རྣལ་འབྱོར་པ་གང་ཞིག་ཚེ་འདི་བློ་ཡིས་ཐོངས་ཤིང་སངས་རྒྱས་དོན་དུ་གཉེར་བ་ཁོ་ན་ཡིན་ཕྱིན་ཆད། བླ་མ་

[Full Size]

མཚན་ལྡན་གྱི་དྲུང་དུ་གནད་ཀྱི་གདར་ཤ་ལེགས་པར་གཅད་ལ། མི་མེད་ཀྱི་ལུང་སྟོངས་འགྲིམ་ཞིང་ལྟོ་དགོས་གཏམ་གསུམ་སོགས་ཆོས་བརྒྱད་ཀྱི་ཞེན་པ་གཏིང་ནས་བཏང་བས་ཚེ་དང་སྒྲུབ་པ་མཉམ་པ་ཞིག་ལ་ནི་གེགས་དང་བར་ཆོད་ཀྱི་ཡུལ་ལས་འདས་ཤིང་། རྣལ་འབྱོར་བཞི་སོགས་ཉམས་རྟོགས་དྲོད་རྟགས་ཇི་བཞིན་པ་མི་འཆར་བའི་ཐབས་ཀྱང་མ་མཆིས་ལ། བྱིན་རླབས་གཤའ་མ་ཞིག་ཞུ་ཤིང་རྟོགས་པ་ཚུལ་བཞིན་ཤར་ན་ཐུན་མོང་གི་དྲོད་རྟགས་ཡོན་ཏན་མངོན་ཤེས་རྫུ་འཕྲུལ་སོགས་ནི་མི་འདོད་ཀྱང་ཤུགས་ལ་འབྱུང་བ་དང་། ཡོན་ཏན་མངོན་དུ་གྱུར་ཚེ་སྒོམ་བྱུང་གི་ཤེས་རབ་ནང་ནས་ཤར་བ་ཞིང་ཆོས་ཀྱི་མཇེད་རང་ལ་བརྡོལ་བས་ཕྱི་རོལ་གྱི་ཚིག་དང་ཡི་གེ་ལ་རག་མ་ལུས་པ་དང་། ས་ལམ་གྱི་རིམ་པ་རྣམས་ཀྱང་བསྒྲོད་མ་བསྒྲོད་སླེབ་མ་སླེབས་སོགས་ཀྱི་གཉིས་འཛིན་དང་། རེ་དོགས་ཞེ་འདོད་མཐའ་དག་གཏན་ཟད་དུ་

[Full Size]

གྱུར་པ་དེ་འདྲ་ཞིག་ལ་བློ་ཕུག་མ་གཏད་ན། འོ་སྐོལ་གྱི་སྙིགས་མའི་སེམས་ཅན་ལས་ངན་བག་ཆགས་ཀྱི་ཕུང་པོར་གྱུར་ཚེ། མ་བསླབ་པར་ཤེས་འདོད། མ་སྒོམ་པར་ཉམས་རྟོགས་འབྱུང་འདོད། ཟླ་ཤས་ལོ་ཤས་ཙམ་ལ་གྲུབ་རྟགས་འཐོན་འདོད། སྙན་གྲགས་གདུལ་བྱ་འགྲོ་དོན་སོགས་གཞན་ལས་ལྷག་པ་ཞིག་འདོད་པའི་བདག་འཛིན་གྱིས་གོ་འཕངས་གང་ལས་ཀྱང་མཐོ་བ་ཞིག་བྱས་ནས་ཆོས་པའམ་རྟོགས་ལྡན་དུ་བརློམས་པ་ཁོ་ན་མང་ཚེ། འདི་ལྟ་བུའི་དུས་ལ་རྣལ་འབྱོར་བཞི་སོགས་པ་ལམ་གྱི་ཡོན་ཏན་དང་། མིང་སྙན་སྙན་རྣམས་བཤད་རུང་ངལ་བ་དོན་མེད་དང་། ཡི་གེའི་འཁྲེས་པོ་ལས་མི་འོང་བར་སེམས་པས། འདི་ཙམ་ལས་རྒྱས་པ་འབུལ་བར་མ་སྤོབས་ལགས་ཚེ། དགོངས་དབྱིངས་ཟབ་མོ་འཁྲེལ་འཁྲུངས་མེད་པ་ཡང་མཁྱེན་མཁྱེན་ལགས། ཨེ་མ། ཐུབ་བསྟན་ལྷ་ལམ་ཡངས་པའི་དབྱིངས་རུམ་ན། །སྒྲུབ་རྒྱུད་

[Full Size]

སྐར་ཚོགས་འབུམ་ཕྲག་བཀྲ་པའི་དབུས། །རབ་གསལ་དྭགས་རྒྱུད་ཟླ་སྣང་ཆེས་འབར་ཞིང་། །གདུལ་བྱའི་ཆུ་སྣོད་གང་འཚམས་དེར་འཕོ་བའི། །སྐད་ལྡན་ཀུན་དན་བཞད་མཛད་ཕྱག་ཆེན་འོད། །འགྲོ་བློའི་ཡིད་མུན་བསེལ་བའི་སྒྲོན་མཆོག་གང་། །སྙིགས་མཐའི་དམར་ཕྱོགས་ཚེས་ལོངས་སྤྱོད་བབས་དང་། །དུས་མེད་ལི་ཁྲིའི་སྤྲིན་བསྒྲིབས་ཀྱེ་མ་ཧུད། །རྣམ་འདྲེན་མུ་སྟེགས་དོ་ཤལ་རབ་འཐོར་ཞིང་། །སྒྲུབ་ཚོགས་ལོ་ཀའི་ཤ་ར་བྷ་རིར་འཛེགས། །འདི་སྣང་ལོངས་སྤྱོད་རྒྱགས་མཛེས་བསྒྱིངས་པ་ཡིས། །ཞེན་པ་ཕྱི་ནང་བསྒྱུར་ལོག་མ་གྱུར་གྲངས། །གཞུང་ལུགས་ཆུ་ཀླུང་ལྔ་བརྒྱས་ངོམ་ན་ཡང་། །གནས་ལུགས་ཀཻ་ལ་ཤ་རྩེ་མ་གཟིགས་པས། །སྲིད་འབྱོར་ཨ་ཝ་ལོས་བཏམས་མ་དྲོད་ཆེར། །རྟག་བརྟན་གདེང་ཅན་མང་པོས་པ་འདིས་བརྒྱན། །བཞད་པ་རྡོ་རྗེ་དཱུ་ཀུ་ལའི། །གོ་ཆས་མཛེས་མཐོང་འདྲན་པ་བཞིན། །བསྲ་བརྟན་བོགས་

[Full Size]

མཚོན་རབ་འཆང་བའི། །ཚོགས་འདིས་སྒྲུབ་རྒྱུད་ཆོས་དབྱིངས་གཤེགས། །ཕྱག་རྒྱ་ཆེར་གྲགས་ཁ་བའི་རྡུལ། །མངོན་བརྩེགས་ལ་གནས་གདོང་ལྔའི་ཚོགས། །རྟོགས་པའི་གཡུ་རལ་ལན་གཅིག་ཙམ། །སྤུག་ལོག་སྡེ་གཞོམ་ཅིས་མི་མཛད། །མ་ཧཱ་པ་ནའི་དཔལ་ལྡན་རྣམས། །ཐོག་རྩེའི་རལ་གྲི་མི་འཕྱར་ན། །བས་མཐའི་ཡུ་མོ་ཟུང་ནན་ལྟར། །བརྡུང་བའི་རྩོལ་བ་ངལ་བར་ཟ། །དལ་འབྱོར་རྐང་འཐུང་ཐོས་བསམ་ཡལ་འདབ་ནི། །མ་རྒྱས་གཉིས་སྐྱེས་འདུ་བའི་རྣམ་གཡེང་ལ། །མ་རང་ཚང་ཚིང་འཁྲིག་པའི་ནགས་ལྗོངས་སུ། །ཡིབ་ལ་རྣལ་འབྱོར་བཞི་ཡི་དྲིས་མ་གོས། །རིག་ལུང་སྨྲ་བའི་འཁུར་གྱི་མ་ནན་ཅིང་། །སྣ་ཚོགས་ཤེས་བྱའི་གསེར་འདྲས་ཡང་མ་གཡོག །མཁས་གྲུབ་གྲགས་སྐམ་མཆེ་དྲུག་མ་ལྡན་པའི། །ནགས་ཀྱི་གཉིས་ཐུང་སུ་ཞིག་ཅི་ཕྱིར་མགུ། སྨྲ་བའི་རྒྱུ་

[Full Size]

མེད་སྨྲ་བའི་སྤོབ་པའང་བྲལ། །སྨྲ་ལ་དགའ་མིན་སྨྲས་ཀྱང་ངལ་བར་ཟད། །དེ་ཕྱིར་དྲི་ལན་འདོན་པའི་འཁུར་བཞེས་ཅན། །གཞན་ལ་བྱཱཉྫའི་དྲི་གསུངས་སྤྲོ་བར་འོས། རྙིང་ལུགས་སྔགས་འཆང་གོག་པོའི་ཁྱུར་གནས་ཀྱང་། །བསྲུང་ཟློག་སད་གསུམ་ལམ་ལ་འཁྱོག་མ་མྱོང་། །ཉམས་རྟོགས་ལྦུ་འཕྲེང་དཀར་པོ་འཁྲིག་མིན་ཚེ། །བཤགས་ཚོགས་དཔའ་བརླབས་འཕྱོ་བའི་ནུས་རྩལ་དབེན། །སངས་རྒྱས་མངོན་སུམ་འགའ་གྲིབ་བསིལ་བབས་མཐུས། །མ་ཧཱ་པནྟིའི་རྫིང་བུ་ཉམས་དགའ་བར། །བཟོད་མེད་མལ་དུ་ཞེ་འདོད་ཅ་ཅོའི་བརྩོམ། །རབ་བསྐྱུང་གུ་ཡང་འཁྱིལ་ལས་གཞན་དུ་མིན། །བློས་བཅོས་བདེ་གསལ་མི་རྟོག་ལམ་རྟགས་ཀྱི། །ཡོན་ཏན་ལྟར་སྣང་བསླུ་མཁས་ལུས་ཕྲ་མ། །འབུམ་ལའང་སྨོན་པའི་འགྲམ་ཆུ་མི་ལྡང་ན། །རྣལ་འབྱོར་བང་རིམ་ལྷན་ལྷུན་བསྒྲོད་སེམས་བྲལ།

[Full Size]

གང་ཤར་ཅིར་སྣང་རིག་པའི་རྣམ་རོལ་ལ། །ཞེན་འཛིན་གསེར་གྱི་ལུག་རྒྱུད་མ་བརྐྱང་ཚེ། །བདེ་སྡུག་སྐྱེ་འཆི་འཁོར་འདས་ཅིར་བཏགས་ཀུན། །ཀུན་བཟང་ཡངས་པ་ཆེན་པོར་ཨེ་མ་ཧོ། །གདོད་ནས་དག་པའི་ཞིང་ཁམས་ཡངས་དོག་དང་། མཐའ་དབུས་ལས་འདས་འདུས་མ་བྱས་དབྱིངས་སུ། །རིག་སྟོང་བླ་མ་ཆོས་སྐུའི་རང་ཞལ་དངོས། །མཐོང་བྱ་མཐོང་བྱེད་མཚན་མའི་སྤྲོས་བྲལ་མཐོང་། །ལམ་འདིར་འཇུག་པའི་སྐལ་ལྡན་མིང་ཡང་མེད། །བདག་གི་ལྷག་བསམ་བདེན་པའི་མཐུ་ནུས་དང་། །རྨད་བྱུང་རྒྱལ་བའི་ཐུགས་རྗེ་སྟོབས་ལྡན་མཐུས། །སྒྲུབ་རྒྱུད་སྙིང་པོའི་བསྟན་མཆོག་རྒྱས་པར་སྨོན། །ཚུལ་བཞིན་དྲིས་ལ་དོན་མཐུན་ལན་ལྡོན་པའི། །ཆོས་སྤོབས་བྲལ་ཡང་རྣམ་དཀར་བསམ་པས་འདིར། །གནས་ལུགས་ཇི་བཞིན་བཤད་པའི་དགེ་འབྲས་ཀྱིས། །འགྲོ་

[Full Size]

ཀུན་ཡེ་ཤེས་ཕྱག་རྒྱ་ཆེ་འགྲུབ་ཤོག །དེ་ལྟར་ཆོས་ཐམས་ཅད་ཀྱི་སྙིང་པོའི་ཡང་ཞུན་མཆོག་ཏུ་གྱུར་པ་ངེས་དོན་ཕྱག་རྒྱ་ཆེན་པོ་ཞེས་ཉི་ཟླ་ལྟར་གྲགས་པའི་དགོངས་དོན་ལེགས་པར་རྟོགས་པའི་རྣལ་འབྱོར་པ་སྨོན་ལམ་གྱི་མཚན་ཅན་གང་དེས་དྲི་ཡིག་གནང་བ་ལ་བརྟེན་ནས། སྣ་ཚོགས་རང་གྲོལ་གྱིས་རང་ཉིད་ལ་འདི་དག་གི་དགོངས་དོན་རྟོགས་པའི་ཆ་ཤས་ཙམ་ཡང་མེད་རུང་། བཀའ་རྒྱུད་གོང་མའི་གསུང་རྒྱུན་དག་ལ་བརྟེན་དེ། ཚུལ་འདི་ཤར་ཕྱོགས་དཔལ་རི་གངས་ཀྱི་སྙེ་ངོག་གནས་ཆེན་རྒོད་ཚང་ཕུག་མཁའ་འགྲོས་འདུ་བའི་ཡང་དབེན་གྱིས་མཚམས་མལ་ནས། དགེ་སྦྱོར་གྱི་ཐུན་མཚམས་དག་ཏུ་བྲིས་པའི་དགེ་བས་འགྲོ་བ་ཐམས་ཅད་སྐུ་ཞི་དབྱེར་མེད་ངོ་བོ་ཉིད་ཀྱི་གོ་འཕང་མྱུར་དུ་ཐོབ་པར་གྱུར་ཅིག། བཀྲ་ཤིས། གཅིག་ཞུས་ལགས།

ཡིག་དྲུག་གི་དམིགས་རིམ་མདོར་བསྡུས།

[Full Size]

ཡིག་དྲུག་གི་དམིགས་རིམ་མདོར་བསྡུས་བཞུགས་སོ། །ཧྲཱིཿའཁོར་འདས་སྣོད་བཅུད་གདོད་ནས་དག་པའི་དབྱིངས། །འགག་མེད་རང་གསལ་ཕྱི་རོལ་ཡུལ་གནས་ཀུན། །རྣམ་དག་ཞིང་ཁམས་རི་བོ་ཏཱ་ལ་ཉིད། །བདག་གཞན་སྐྱེ་འགྲོའི་ཕུང་ཁམས་དབང་རྣམས། །འཕགས་མཆོག་སྤྱན་རས་གཟིགས་ཀྱི་སྐུ་གསུང་ཐུགས། ། སྣང་ཁམས་རང་བཞིན་མ་གྲུབ་འོད་ཀྱི་སྐུ། །དཀར་གསལ་ཞི་འཛུམ་ཞལ་གཅིག་ཕྱག་བཞི་པ། །དང་པོའི་ཕྱག་གཉིས་ཐུགས་ཁར་ཐལ་མོ་སྦྱར། །འོག་མ་གཡས་གཡོན་ཤེལ་འཕྲེང་པད་དཀར་འཛིན། །ལོངས་སྐུའི་ཆ་ལུགས་པད་ཟླར་རྡོར་དཀྱིལ་བཞུགས། །སྤྱི་གཙུག་བླ་མ་འོད་དཔག་མེད་པས་མཚན། །ཐུགས་ཀར་པདྨ་འདབ་དྲུག་ལྟེ་བར་ཧྲཱིཿམཐའ་སྐོར་ཡིག་དྲུག་འཁོར་ཞིང་འོད་ཟེར་འཕྲོས། །སེམས་ཅན་སྡུག་བསྔལ་ཀུན་ཞི་འགྲོ་དྲུག་ཚོགས། །འཕགས་པའི་སྐུར་གྱུར་ངག་སྔགས་ཡིད་ཆོས་ཉིད། །ཡེ་ཤེས་དཀྱིལ་འཁོར་ཁྱབ་གདལ་

[Full Size]

ཆེན་པོར་གྱུར། །ཨོཾ་མ་ཎི་པདྨེ་ཧཱུྃ། ཞེས་རྒྱུན་མ་ཆད་པར་བཟླ་ཞིང་། ཐུན་མཚམས་འཇོག་པའི་སྐབས་སུ་སྨོན་ལམ་གདབ་པ་ནི། སངས་རྒྱས་ཀུན་གྱི་ཐུགས་རྗེ་གཅིག་བསྡུས་པ། །སྤྱན་རས་གཟིགས་དབང་བསྙེན་ཅིང་བསྒྲུབ་པའི་མཐུས། །བདག་སོགས་མཁའ་ཁྱབ་སེམས་ཅན་ཐམས་ཅད་ཀུན། །ཐུགས་རྗེ་ཆེན་པོའི་གོ་འཕང་ཐོབ་པར་ཤོག །ཅེས་པའི་སྨོན་ལམ་གདབ་ཅིང་། བདག་གཞན་ཐམས་ཅད་ཐུགས་རྗེ་ཆེན་པོ་དངོས་ཡིན་པའི་དག་སྣང་མ་བརྗེད་པར་རྒྱུན་དུ་དྲན་པར་བྱའོ། །འདི་ནི་སྨིན་གྲོལ་བསྐྱེད་རྫོགས་གླིང་གི་འདུས་པ་རྣམས་ཀྱི་ཞལ་འདོན་མཛད་རྒྱུར། ཡོན་ཏན་དབང་ཕྱུག་དང་དོན་གཉིས་མཆོག་གྲུབ་སོགས་དོན་གཉེར་རྣམས་ཀྱི་ཡང་ཡང་བསྐུལ་བའི་ངོར་བཀོད་པ་དགེའོ།།

བྱང་སྡོམ་རྒྱུན་ཁྱེར་དུ་ཉམས་སུ་བླངས་བའི་ཆོ་ག་རིན་ཆེན་མྱུ་གུ།

[Full Size]

བྱང་སྡོམ་རྒྱུན་ཁྱེར་དུ་ཉམས་སུ་བླངས་བའི་ཆོ་ག་རིན་ཆེན་མྱུ་གུ་ཞེས་བྱ་བ་བཞུགས་སོ།

[Full Size]

ཚད་མེད་པའི་ཐུགས་རྗེའི་མངའ་བདག་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཐེག་ཆེན་བྱང་ཆུབ་ཀྱི་མཆོག་ཏུ་སེམས་བསྐྱེད་པའི་ཆོ་གའི་རིམ་པ་གསུམ་ལས། ཟབ་མོ་ལྟ་བའི་རྒྱུད་པ་ལས་བྱུང་བ་བཞིན་རྒྱུན་ཁྱེར་དུ་ཉམས་སུ་བླང་བའི་ཐབས་ནི། སྦྱོར་དངོས་རྗེས་གསུམ་ལས། སྦྱོར་བའི་ཚོགས་བསགས་པ། དངོས་གཞི་སྐྱབས་སེམས་བླང་བ། རྗེས་སྤྲོ་བ་བསྐྱེད་ཅིང་སྨོན་ལམ་གདབ་པ་རྣམས་ལས་དང་པོ་ནི། རྟེན་གྱི་དྲུང་དུ་མཆོད་པ་བཤམས་པ་ནི། རང་གི་མདུན་གྱི་ནམ་མཁར་དཀོན་མཆོག་མ་ལུས་པ་བསྐྱེད་ལ་

[Full Size]

དད་གུས་དྲག་པོས་ཚིག་དོན་མཐུན་པས་འདི་ལྟར་ཉམས་སུ་བླང་བར་བྱའོ། །ཕྱོགས་བཅུ་དུས་གསུམ་བཞུགས་པའི་སངས་རྒྱས་དང་། །ཆོས་དང་བྱང་ཆུབ་སེམས་དཔའི་ཚོགས་མཆོག་ལ། །བདག་དང་ཕ་མ་མཁའ་མཉམ་སེམས་ཅན་རྣམས། །གྲངས་མེད་ལུས་བཏུད་གུས་པས་ཕྱག་འཚལ་ལོ། །སེམས་ཅན་གྲངས་མཐའ་ཡས་ལ་ཡུན་རིང་དུ། །བདེ་བར་གཤེགས་ཀྱི་བདེ་བ་བླ་ན་མེད། །ཡིད་ལ་བསམ་པ་མཐའ་དག་རྫོགས་བྱེད་པ། །བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །བྱང་ཆུབ་སེམས་ཀྱི་གཞི་རྣམས་དང་། །མཆོད་རྟེན་ཀུན་ལས་བདག་

[Full Size]

ཕྱག་འཚལ་ལོ། །མཁན་པོ་དེ་བཞིན་སློབ་དཔོན་དང་། །བརྟུལ་ཞུགས་མཆོག་ལ་ཕྱག་འཚལ་ལོ། །མཆོད་པ་ནི། རིན་ཆེན་སེམས་དེ་བཟུང་བར་བྱ་བའི་ཕྱིར། །དེ་བཞིན་གཤེགས་པ་རྣམས་དང་དམ་པའི་ཆོས། །དཀོན་མཆོག་དྲི་མ་མེད་དང་སངས་རྒྱས་སྲས། །ཡོན་ཏན་རྒྱ་མཚོ་རྣམས་ལ་གུས་པས་མཆོད། །དངོས་བཤམས་ཡིད་ཀྱིས་བློས་བླངས་པའི། སྤྲུལ་དང་། །མཆོད་པའི་དངོས་པོ་ནམ་མཁའ་རབ་འབྱམས་ཁམས། །ཡོངས་བཀངས་མཆོད་འོས་རྣམས་ལ་བདག་འབུལ་གྱིས། །མཁའ་ཁྱབ་འགྲོ་བའི་དོན་དུ་བཞེས་སུ་གསོལ། །རྒྱལ་དང་དེ་སྲས་རྣམས་ལ་བདག་གི་ནི། །ལུས་དང་ལོངས་སྤྱོད་གཏན་དུ་འབུལ་གྱི་ན། །སེམས་དཔའ་མཆོག་རྣམས་བདག་ནི་ཡོངས་བཞེས་ཤིག །གུས་པས་ཁྱེད་ཀྱི་འབངས་སུ་མཆི་བར་བགྱི། །སྡིག་བཤགས་ནི། ཕྱོགས་རྣམས་ཀུན་ན་བཞུགས་པ་ཡི། །རྫོགས་སངས་རྒྱས་དང་བྱང་ཆུབ་སེམས། །ཐུགས་རྗེ་ཆེན་པོ་མངའ་རྣམས་ལ། །ཐལ་མོ་སྦྱར་ཏེ་གསོལ་བ་ནི། །ཐོག་མ་མེད་ལྡན་འཁོར་བ་

[Full Size]

ན། །ཚེ་རབས་འདིའམ་གཞན་དག་ལ། བདག་གིས་མ་འཚལ་སྡིག་བགྱིས་པའི། །བགྱིད་དུ་སྩལ་བ་ཉིད་དང་ནི། །རྗེས་སུ་ཡི་རང་གང་བགྱིས་པའི། །ནོངས་པ་དེ་ནི་མཐོལ་བགྱིས་ནས། །བསམ་པ་ཐག་པས་མགོན་ལ་བཤགས། །བདག་གིས་དཀོན་མཆོག་གསུམ་དང་ནི། ཕ་མའམ་བླ་མ་གཞན་དག་ལ། །ཉོན་མོངས་སྒོ་ནས་ལུས་ངག་དང་། །ཡིད་ཀྱིས་གནོང་བགྱིས་གང་ལགས་དང་། །ཉེས་པ་དུ་མའི་སྐྱོན་ཆགས་པའི། །སྡིག་ཅན་བདག་གིས་སྡིག་པ་གང་། །ཤུན་ཏུ་མི་ཟད་བགྱིས་པ་དང་། །ཐམས་ཅད་འདྲེན་པ་རྣམས་ལ་བཤགས། །བདག་ནི་མི་ཤེས་གཏི་མུག་པས། །རང་བཞིན་ཁ་ན་མ་ཐོ་བའི། །བཅས་པ་སྡིག་པ་གང་ཡིན་ལས། །གང་ཡང་རུང་བ་བགྱིས་པ་རྣམས། །མགོན་པོའི་སྤྱན་སྔར་མངོན་སུམ་དུ། །དེ་དག་ཐམས་ཅད་བཤགས་པར་བགྱི། །འདྲེན་པ་རྣམས་ཀྱི་བདག་གི་སྡིག །ནོངས་པ་ལག་པར་བཟུང་དུ་གསོལ། །འདི་ནི་བཟང་པོ་

[Full Size]

མ་ལགས་པས། །སླན་ཆད་བདག་ནི་ཡོངས་མི་བགྱིད། རྗེས་སུ་ཡི་རང་ནི། །སེམས་ཅན་ཀུན་གྱི་ངན་སོང་གི། །སྡུག་བསྔལ་ངལ་གསོའི་དགེ་བ་དང་། །སྡུག་བསྔལ་ཅན་དག་བདེར་གནས་ལ། །དགའ་བས་རྗེས་སུ་ཡི་རང་ངོ་། །བྱང་ཆུབ་རྒྱུར་གྱུར་དགེ་བསགས་པ། །དེ་ལ་རྗེས་སུ་ཡི་རང་ངོ་། །ལུས་ཅན་འཁོར་བའི་སྡུག་བསྔལ་ལས། །ངེས་པར་ཐར་ལ་ཡི་རང་ངོ་། །སྐྱོབས་པ་རྣམས་ཀྱིས་བྱང་ཆུབ་དང་། །རྒྱལ་སྲས་པ་ལའང་ཡི་རང་ངོ་། །སེམས་ཅན་ཐམས་ཅད་ཕན་མཛད་པའི། །ཐུགས་བསྐྱེད་དགེ་བ་རྒྱ་མཚོ་དང་། །སེམས་ཅན་ཕན་པར་མཛད་པ་ལ། །དགའ་བས་རྗེས་སུ་ཡི་རང་ངོ་། །ཆོས་འཁོར་བསྐུལ་བ་ནི། ཆོས་རྣམས་ཀུན་གྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ནི། །སེམས་ཅན་སྡུག་བསྔལ་མུན་ཐོམ་ལ། །ཆོས་ཀྱི་སྒྲོན་མེ་སྦར་དུ་གསོལ། །མ་རིག་ཉོན་མོངས་རྨོངས་པའི་འགྲོ། །ཆོས་ཀྱི་སྣང་བས་ཁྱབ་མཛད་གསོལ། །འཁྲུལ་པའི་གཅོང་རྙིང་ཟུག་རྔུའི་ནད། །དམ་ཆོས་བདུད་རྩིས་གསོ་མཛད་གསོལ།།

[Full Size]

༈ །།གསོལ་བའི་ཡན་ལག་ནི། ཕྱོགས་བཅུ་མཐའ་ཡས་ཞིང་རྣམས་ཀྱི། །རྒྱལ་བ་མྱ་ངན་འདའ་བཞེད་ལ། །ཐལ་མོ་སྦྱར་ཏེ་གསོལ་བ་ནི། །མགོན་པོ་མཆོག་ཉིད་ཁམས་གསུམ་གྱི། །ཐར་པའི་ལམ་མཁན་དམིགས་བུ་སྟེ། གང་ཚེ་ཞི་བའི་དབྱིངས་བཞུགས་པས། །འགྲོ་འདི་ལྡོངས་པར་མི་འགོད་ཅིང་། བསྐལ་པ་གྲངས་མེད་བཞུགས་པར་གསོལ། །དགེ་བ་བསྔོ་བ་ནི། དེ་ལྟར་འདི་དག་ཀུན་བྱས་ཏེ། །དགེ་བ་བདག་གིས་བསགས་པ་གང་། །དེས་ནི་སེམས་ཅན་ཐམས་ཅད་ཀྱི། །སྡུག་བསྔལ་མཐའ་དག་སེལ་བར་ཤོག །བདག་གི་བསོད་ནམས་འདི་ཡིས་ནི། །སེམས་ཅན་ཐམས་ཅད་མ་ལུས་པ། །སྡིག་པ་ཐམས་ཅད་སྤངས་ནས་ནི། །རྟག་ཏུ་དགེ་བ་སྤྱོད་པར་ཤོག །བདག་ནི་མགོན་མེད་རྣམས་ཀྱི་མགོན། །ལམ་ཞུགས་རྣམས་ཀྱིས་དེད་དཔོན་དང་། །བརྒལ་འདོད་རྣམས་ཀྱི་གྲུ་དང་ནི། །གཟིངས་དང་ཟམ་པ་ཉིད་གྱུར་ཅིག །ས་སོགས་འབྱུང་བ་ཆེན་པོ་དང་། །ནམ་མཁའ་

[Full Size]

བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག །དེ་བཞིན་ནམ་མཁའི་མཐས་གཏུགས་པའི། །སེམས་ཅན་ཁམས་རྣམས་རྣམ་ཀུན་ཏུ། །ཐམས་ཅད་མྱ་ངན་འདབ་བར་དུ། །བདག་ནི་ཉེར་འཚོའི་རྒྱུར་གྱུར་ཤོག །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་འཚང་རྒྱ་ཤོག །འགྲོ་ལ་ཕན་ཕྱིར་ཆོས་ཀྱང་སྟོན་བགྱིད་ཅིང་། སེམས་ཅན་སྡུག་བསྔལ་མང་གཟིགས་ཀུན་སྒྲོལ་ཤོག། ༈ །།གཉིས་པ་དངོས་གཞི་སྐྱབས་འགྲོ་སེམས་བསྐྱེད་བླང་བ་ནི། དཀོན་མཆོག་ལ་ཁ་ཞེ་མེད་པའི་དད་པ་དང་། མཁའ་མཉམ་སེམས་ཅན་ལ་བཟོད་མེད་ཀྱི་བྱམས་སྙིང་རྗེ་དང་། དེ་དག་སྒྲོལ་ཕྱིར་རང་ཉིད་སངས་རྒྱས་ཐོབ་འདོད་ཀྱི་འདུན་པ་རྩེ་གཅིག་དང་ལྡན་པས་སྐྱབས་སེམས་ལན་གསུམ་གྱི་བར་དུ་བླང་བར་བྱའོ། །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་

[Full Size]

བ་འདི་ནས་བཟུང་སྟེ། །བྱང་ཆུབ་སྙིང་པོ་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཞེས་སྐྱབས་འགྲོ་དང་། ཇི་ལྟར་སྔོན་གྱི་བདེར་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་ལྟར་རིམ་བཞིན་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། རིམ་པ་བཞིན་དུ་སློབ་པར་བགྱི། །ཞེས་ལན་གསུམ་དུ་ནན་ཏན་གྱིས་བླངས་པས་སྨོན་འཇུག་གཉིས་ཀ་ཐོབ་པ་ཡིན་ནོ།། ༈ །།གསུམ་པ་སྤྲོ་བསྐྱེད་སྨོན་ལམ་དང་བཅས་པ་ནི། དེ་ལྟ་བུའི་བྱང་སེམས་རིན་པོ་ཆེ་བླང་བ་ཐོབ་པས་ད་ནི་སངས་རྒྱས་སྒྲུབ་པ་ལ་མ་འབད་ན་མི་རུང་བས། བྱང་ཆུབ་སེམས་དཔའི་བསླབ་པ་རྣམས་ལ་སྤང་བླངས་ཚུལ་བཞིན་

[Full Size]

འབད་པར་བྱའོ་སྙམ་པའི་ཡིད་དམ་བརྟན་པོ་བྱ་ཞིང་། །དེང་འདིར་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །འགྲོ་བའི་མགྲོན་པ་སྲིད་པའི་ལམ་རྒྱུ་ཞིང་། །བདེ་བའི་ལོངས་སྤྱོད་སྤྱད་པར་འདོད་པ་ལ། །འདི་ནི་བདེ་བའི་མཆོག་ཏུ་ཉེར་གཏད་ནས། །སེམས་ཅན་མགྲོན་ཆེན་ཚིམ་པར་བྱེད་པ་ཡིན། །བདག་གིས་དེ་རིང་སྐྱོབས་པ་ཐམས་ཅད་ཀྱིས། །སྤྱན་སྔར་འགྲོ་བ་བདེར་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །སེམས་ཅན་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོངས་པར་ཤོག །བྱང་ཆུབ་སེམས་དཔའ་གང་དག་སར་ཞུགས་པ། །དེ་དག་

[Full Size]

ཀུན་གྱི་སྨོན་ལམ་འགྲུབ་གྱུར་ཅིག །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་མཁའ་འགྲོ་རྣམས་ཕམ་བྱས་ཏེ། །སྐྱེ་རྒ་ན་འཆིའི་རྦ་ཀློང་འཁྲུག་པ་ཡི། །སྲིད་པའི་མཚོ་ལས་འགྲོ་ཀུན་སྒྲོལ་བར་ཤོག །ཟབ་མོ་ལྟ་རྒྱུད་ལུགས་ཀྱི་བྱང་སྡོམ་ལེན་ཆོག །ཐུན་དང་པོའི་ཉམས་ལེན་རྫོགས་སོ།། ༈ །།རྒྱ་ཆེན་སྤྱོད་རྒྱུད་ཀྱི་སེམས་བསྐྱེད་བླང་བ་ལས། །སྨོན་འཇུག་གཉིས་ལ་སྦྱོར་དངོས་རྗེས་གསུམ་གྱི། སྦྱོར་བ་ལ་གསོལ་གདབ། སྐྱབས་འགྲོ། ཚོགས་བསགས་གསུམ་གྱི་དང་པོ་ནི། དཀོན་མཆོག་རྣམས་ལ་དད་གུས་སྙིང་ཐག་པ་ནས་བསྐྱེད་ཅིང་ཚིག་རྗེས་སུ་དོན་གསལ་ལ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་།

[Full Size]

བྱང་ཆུབ་སེམས་དཔའ་སེམས་དཔའ་ཆེན་པོ་ས་ཆེན་པོ་ལ་བཞུགས་པ་རྣམས་ཀྱིས་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ། བདག་མིང་འདི་ཞེས་བགྱིད་པ་ཡང་། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་གསོལ། ཞེས་ལན་གསུམ་གྱིས་གསོལ་བ་གདབ་པོ། གཉིས་པ་སྐྱབས་འགྲོ་ནི། སྐྱབས་དཀོན་མཆོག་རྣམས་ལ་འདུན་པ་རྩེ་གཅིག་པས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་སེམས་ཅན་ཐམས་ཅད་ཀྱི་སྡུག་བསྔལ་སེལ་བའི་སླད་དུ། །དུས་འདི་ནས་བཟུང་སྟེ་ཇི་སྲིད་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་དམ་པའི་

[Full Size]

ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་འཕགས་པ་བྱང་ཆུབ་སེམས་དཔའ་ཕྱིར་མི་ལྡོག་པའི་དགེ་འདུན་རྣམས་ལ་སྐྱབས་སུ་མཆིའོ། །ལན་གསུམ་གྱི་སྐྱབས་འགྲོ་བྱའོ། །གསུམ་པ་ཚོགས་བསགས་པ་ནི། ཚིག་དོན་འདྲེ་བའི་སྒོ་ནས་སངས་རྒྱས་ཐམས་ཅད་འདུས་པའི་སྐུ། སོགས་དང་། མགོན་པོ་ཐུགས་རྗེ་ཆོ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བའི་ངན་སོང་ལས་གྲོལ་ཞིང་། །གཅིག་ཏུ་དོན་དམ་མཆོག་གྱུར་པའི། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་བདག་ལ་རབ་ཏུ་གུས། །བྱང་ཆུབ་སེམས་དཔའ་ས་བཞུགས་པའི། །དགེ་འདུན་ལ་ཡང་ཕྱག་འཚལ་ལོ། །སྟེང་དང་འོག་དང་བར་དག་དང་། །ཕྱོགས་དང་ཕྱོགས་མཚམས་རྣམས་སུ་ཡང་། སྐུར་བཅས་སྐུར་

[Full Size]

ནི་མེད་པ་ཡི། །མཆོད་རྟེན་རྣམས་ལའང་བདག་འཚལ། །ཕྱག་བྱར་འོས་པ་ཐམས་ཅད་ལ། །ཞེས་སོགས་ཀྱིས་ཕྱག་འཚལ་ལོ། །མཆོད་ཡོན་མེ་ཏོག་བདུག་སྤོས་དང་། །སྣང་གསལ་དྲི་ཆབ་ཞལ་ཟས་དང་། །གདུག་དང་རྒྱལ་མཚན་རོལ་མོའི་སྒྲ། །བླ་མའི་ཚོགས་དང་དཀོན་མཆོག་མཆོད། །འཇིག་རྟེན་ཁམས་ནི་མཐའ་ཡས་པར། །བདག་པོས་ཡོངས་སུ་མ་བཟུངས་བའི། །མཆོད་པའི་ཡོ་བྱད་ཅི་མཆིས་པ། །བློ་ཡིས་བླངས་ཏེ་དབུལ་བར་བགྱི། །རབ་དང་ཡིད་ལས་བྱུང་གྱུར་པའི། །མཆོད་པའི་སྤྲིན་ནི་ཕུང་པོ་ནི། །མཁའ་དང་མཉམ་པ་དུ་མ་ཡིས། །ཡོན་ཏན་རྒྱ་མཚོ་སྲས་བཅས་མཆོད། །དེང་ནས་བྱང་ཆུབ་སྙིང་པོའི་བར། །བདག་གི་ལུས་དང་ལོངས་སྤྱོད་དང་། །དུས་གསུམ་རྒྱལ་བའི་དངོས་པོ་རྣམས། །གུས་པ་ཁྱེད་ལ་དབུལ་བར་བགྱི། །ཀུན་ནས་གཟིགས་པའི་སྤྱན་ལྡན་པའི། །ཡོན་གནས་དམ་པ་ཁྱེད་རྣམས་ཀྱིས། །བདག་ལ་བརྩེ་བས་ཉེར་དགོངས་ནས།

[Full Size]

བདག་གི་འདི་དག་བཞེས་སུ་གསོལ། །དེ་ནས་དངོས་གཞི་སྨོན་སེམས་བསྐྱེད་པ་ནི། །མཁའ་ཁྱབ་ཕ་མ་སེམས་ཅན་ལ་བྱམས་སྙིང་རྗེ་དྲག་པོ་དང་ལྡན་པས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ། སྐྱེ་བ་འདི་དང་སྐྱེ་བ་གཞན་དང་གཞན་དག་ཏུ། །སྦྱིན་པའི་རང་བཞིན་དང་ཚུལ་ཁྲིམས་ཀྱི་རང་བཞིན་དང་བསྒོམ་པའི་རང་བཞིན་གྱི་དགེ་བའི་རྩ་བ་ཅི་བགྱིས་པ་དང་བགྱིད་དུ་སྩལ་བ་དང་བགྱིད་པ་ལ་རྗེས་སུ་ཡི་རང་བའི་དགེ་བའི་རྩ་བ་དང་། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་རྣམས་དང་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་

[Full Size]

ནས་བཟུང་སྟེ་ཇི་སྲིད་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོར་སེམས་བསྐྱེད་པར་བགྱིའོ། །སེམས་ཅན་མ་བསྒྲལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་གྲོལ་བར་བགྱིའོ། །དབུགས་མ་ཕྱིན་པ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་འདས་པ་རྣམས་ཡོངས་སུ་མྱ་ངན་ལས་ཟློ་བར་བགྱིའོ། །ཞེས་ལན་གསུམ་གྱིས་སྨོན་སེམས། སྐྱེས་པར་ངེས་ཤེས་བྱ་ཞིང་། དེའི་བསླབ་བྱ་རྣམས་ལ་འབད་དོ། །སྤྲོ་ན། དེང་འདིར་བདག་ཚེ་འབྲས་བུ་སོགས། །སེགས་ཀྱིས་གཟེངས་བསྟོད་པ་ཡང་བྱ་ལ། བསྡུ་ན། བྱང་ཆུབ་སེམས་མཆོག་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག །སྐྱེས་པ་ཉམས་པ་མེད་པར་ཡང་།། གོང་ནས་གོང་དུ་འཕེལ་བར་ཤོག །ཅེས་སྨོན་ལམ་གདབ་སོ། །དེ་ལྟར་སྨོན་སེམས་བསྐྱེད་ནས།། ༈ །།འཇུག་པའི་

[Full Size]

སྡོམ་པ་བླང་བ་ལ་ཡང་གསོལ་བ་གདབ་པ། འདུན་པ་གསོ་བ། མྱུར་དུ་བསྐུལ་བ། བར་ཆད་དང་མི་ལྡན་པར་ཁས་བླངས་ཤིང་བསླབ་པ་དངོས་ལེན་པ་རྣམས་ཀྱི་དང་པོ་ནི། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལས་བདག་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བར་ལེན་པར་འཚལ་གྱི། དེ་ལ་གནོད་པ་མ་མཆིས་ན་བདག་ལ་ཐུགས་བརྩེ་བའི་སླད་དུ་ཅུང་ཟད་གསན་ཅིང་སྩལ་བའི་རིགས་སོ། །ཞེས་ལན་གསུམ་བརྗོད་དོ། །གཉིས་པ་ནི། འདི་ལྟར་བདག་སེམས་ཅན་མ་རྒལ་བ་བསྒྲལ་བ་དང་། མ་གྲོལ་བ་རྣམས་འགྲོལ་བ་དང་། །དབུགས་མ་ཕྱིན་པ་རྣམས་དབུགས་དབྱུང་བ་དང་ཡོངས་སུ་མྱ་ངན་ལས་འདས་པ་རྣམས་ཡོངས་སུ་མྱ་ངན་ལས་ཟློ་བ་དང་། །སངས་རྒྱས་ཀྱི་གདུང་རྒྱུན་མི་ཆད་པར་འདོད་ཅིང་། དེ་དག་ལ་བདག་སེམས་བསྐྱེད་

[Full Size]

པ་བརྟན་པ་དང་ཡིད་དམ་བརྟན་པར་བགྱིའོ། །གསུམ་པ་ནི། རང་གི་ལུས་ལོངས་སྤྱོད་ཐམས་ཅད་མཆོད་པའི་མཎྜལ་དུ་འབུལ་ཞིང་གསོལ་བ་གདབ་སྟེ། དངོས་སུ་བཤམས་དང་ཡིད་ཀྱིས་སྤྲུལ། །བདག་པོས་ཡོངས་སུ་མ་བཟུངས་དང་། བླ་ན་མེད་པའི་མཆོད་པའི་ཚོགས། །མ་ལུས་བློ་ཡིས་བླངས་ཏེ་འབུལ། །བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བའི་དངོས་པོ་ཀུན། །མ་ལུས་དཀོན་མཆོག་སྤྱན་སྔར་འབུལ། །འགྲོ་བའི་སྐྱབས་གྱུར་འཚང་རྒྱ་ཤོག །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བདག་ལ་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བར་མྱུར་དུ་སྩལ་དུ་གསོལ། ཞེས་ལན་གསུམ་བརྗོད་དོ། །བཞི་པ་ནི། བདག་མིང་འདི་ཞེས་བགྱི་བ་སྨོན་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལགས་ཤིང་བྱང་ཆུབ་སྨོན་ལམ་བཏབ་པ་ལགས་པས་ན། བྱང་ཆུབ་སེམས་དཔའ་ཐམས་ཅད་ཀྱི་བསླབ་

[Full Size]

པའི་གཞི་རྣམས་དང་། བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་དེ་དག་སངས་རྒྱས་དང་བྱང་ཆུབ་སེམས་དཔའ་རྣམས་ལས་བླང་བར་འཚལ་ལོ། །ཞེས་ལན་གཅིག་བརྗོད་ལ། བླང་བ་དངོས་ནི། མེད་སྣང་འཁྲུལ་པའི་སྡུག་བསྔལ་ལ་རྟག་ཏུ་སྤྱོད་པའི་སེམས་ཅན་རྣམས་སྒྲོལ་ཕྱིར་བདག་གིས་བྱང་ཆུབ་སེམས་དཔའི་ཚུལ་ཁྲིམས་བླང་ནས་བསྲུང་སྟེ་སངས་རྒྱས་ཐོབ་པར་བྱ་སྙམ་པ་རྩེ་གཅིག་པས། བདག་མིང་འདི་ཞེས་བགྱི་བ། ཕྱོགས་བཅུའི་དེ་བཞིན་གཤེགས་པ་དང་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་ཐམས་ཅད་ལ་གསོལ་བར་འཚལ་ཏེ། དེ་དག་གི་སྤྱན་སྔར་བྱང་ཆུབ་སེམས་དཔའི་བསླབ་པའི་གཞི་ཐམས་ཅད་དང་། བྱང་ཆུབ་སེམས་དཔའི་ཚུལ་ཁྲིམས་ཐམས་ཅད་དེ། སྡོམ་པའི་ཚུལ་ཁྲིམས་དང་དགེ་བའི་ཆོས་སྡུད་པ་དང་སེམས་ཅན་གྱི་དོན་བྱ་བའི་ཚུལ་ཁྲིམས་གང་ལ་སློབ་པའི་བྱང་ཆུབ་སེམས་དཔའ་རྣམས་ཀྱིས་བསླབ་པ་དང་། མ་བྱོན་པའི་བྱང་ཆུབ་སེམས་དཔའ་ཐམས་ཅད་སློབ་པར་འགྱུར་བ་དང་། ཕྱོགས་བཅུ་ན་ད་ལྟར་བྱུང་

[Full Size]

བའི་བྱང་ཆུབ་སེམས་དཔའ་ཐམས་ཅད་ད་ལྟ་སློབ་པའི་བྱང་ཆུབ་སེམས་དཔའི་བསླབ་པའི་གཞི་ཐམས་ཅད་དང་། བྱང་ཆུབ་སེམས་དཔའི་ཚུལ་ཁྲིམས་ཐམས་ཅད་དེ། སྡོམ་པའི་ཚུལ་ཁྲིམས་དང་དགེ་བའི་ཆོས་སྡུད་པ་དང་སེམས་ཅན་གྱི་དོན་བྱ་བའི་ཚུལ་ཁྲིམས་དེ་ཐམས་ཅད་བདག་གིས་ཡང་དག་པར་བླང་ངོ་། །ཞེས་ལན་གསུམ་གྱིས་འཇུག་པ་བྱང་སེམས་ཡོངས་སུ་རྫོགས་པ་སྔར་མ་ཐོབ་པ་ཐོབ་ཅིང་། ཐོབ་པས་གསོ་སྦྱོང་དུ་འགྱུར་བས། དེ་ལྟར་ངེས་ཤེས་བསྐྱེད་པར་བྱའོ། །མཇུག་ཆོག་མཁྱེན་པར་གསོལ་ཞིང་སྨོན་ལམ་གདབ་པ་ནི། བདག་བྱང་ཆུབ་སེམས་དཔའ་མིང་འདི་ཞེས་བགྱི་བས། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་ལ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་དབང་དུ་གྱུར་པར་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ཏུ་བཞུགས་པའི་འཕགས་པའི་མཆོག་ལྐོག་ཏུ་གྱུར་ཀྱང་ཆོས་ཐམས་ཅད་ལ་ལྐོག་ཏུ་མ་གྱུར་པའི་ཐུགས་མངའ་བ་ཐམས་ཅད་ལ་མཁྱེན་པར་གསོལ་ལོ། །

[Full Size]

ཞེས་ལན་གསུམ་བརྗོད། ཕྱོགས་བཅུའི་རྒྱལ་བ་དེ་དག་ཐམས་ཅད་བདག་གི་སྡོམ་པའི་དཔང་པོ་ལྟ་བུར་མཛད་པར་མོས་ཤིང་། ལས་ཅི་ལ་ཐུགས་ཀྱང་སྡོམ་པ་ལས་མི་འདའ་བར་བྱའོ། །བྱང་ཆུབ་སེམས་དང་མི་འབྲལ་ཞིང་། བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་བཟུང་སྟེ། །བདུད་ཀྱི་ལས་ཀྱང་སྤོང་བར་ཤོག །དངོས་འབྱོར་ཡིད་སྤྲུལ་མཆོད་པའི་ཚོགས། །བྱང་ཆུབ་སེམས་ཀྱི་ཡོན་དུ་འབུལ། །བདག་དང་མཁའ་མཉམ་འགྲོ་བ་ཀུན། །བྱང་ཆུབ་མཆོག་ལ་སྤྱོད་པར་ཤོག །བྱང་ཆུབ་སེམས་དཔའ་རྣམས་ཀྱི་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལ་བདེ་འབྱོར་ཤོག །ཅེས་སོགས་སྨོན་ལམ་རྒྱ་ཆེར་གདབ་བོ། །རྒྱ་ཆེན་སྤྱོད་རྒྱུད་ཀྱི་བྱང་སྡོམ་ལེན་པའི་རིམ་པ། ཐུན་བར་པའི་ཉམས་ལེན་རྫོགས་སོ།། ༈ །།སྨོན་འཇུག་དོན་དམ་ཟུང་འཇུག་ཏུ་ཉམས་སུ་ལེན་ཐབས་

[Full Size]

འགྲོ་མགོན་ཀླུ་སྒྲུབ་ཞབས་ཀྱིས་མཛད་པ་ལ། སྦྱོར་བ་ཚོགས་བསགས། དངོས་གཞི་སྐྱབས་སེམས་ཁྱད་པར་བ། རྗེས་བསྔོ་སྨོན་རྣམས་མཐར་ཆགས་སུ་སྟོན་པའི་ཉམས་ལེན་ཚིག་དོན་འདྲེ་བར་བྱ་སྟེ། ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ན་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། དམ་པའི་ཆོས་དང་། བྱང་ཆུབ་སེམས་དཔའི་དགེ་འདུན་ཆེན་པོ་དང་བཅས་པ་ཐམས་ཅད་ལ་ཕྱག་འཚལ་ལོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ། ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་ཚེ། ལུས་དང་ངག་དང་ཡིད་ཀྱིས་སངས་རྒྱས་དང་ཆོས་དང་དགེ་འདུན་དང་ཕ་མ་དང་སེམས་ཅན་དག་ལ་སྡིག་པ་མི་དགེ་བའི་ལས་བགྱིས་པ་དང་དགྱིད་དུ་སྩལ་བ་དང་བགྱིད་པ་ལ་རྗེས་སུ་ཡི་རང་བ་ཅི་མཆིས་པ་དེ་དག་ཐམས་ཅད་གཅིག་ཏུ་བསྡུས་ཤིང་བསྡོམས་

[Full Size]

ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་བླ་ན་མེད་པའི་སོ་སོར་བཤགས་པས་སོ་སོར་འཆགས་སོ། །མི་འཆབ་བོ། སླན་ཆད་འདི་ལྟ་བུ་མི་བགྱིད་དོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། །ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་བསོད་ནམས་ཀྱི་རྗེས་སུ་ཡི་རང་བ་བླ་ན་མེད་པ་ཐུགས་ཆུང་བ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། སངས་རྒྱས་དང་བྱང་ཆུབ་སེམས་དཔའ་དང་རང་སངས་རྒྱས་དང་འཕགས་པ་ཉན་ཐོས་ཐམས་ཅད་དང་། འགྲོ་བ་མ་ལུས་པའི་བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས། །སངས་རྒྱས་ཀྱི་གདུང་རྒྱུན་མི་འཆད་པར་བྱ་བའི་སླད་དུ་དུས་འདི་ནས་བཟུང་སྟེ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། ཡང་དག་པར་རྫོགས་པའི་སངས་རྒྱས་རྐང་གཉིས་ཀྱི་གཙོ་ལོ་སྐྱབས་སུ་

[Full Size]

མཆི་སྟེ། ཐུགས་རྗེ་ཆེན་པོ་དང་ལྡན་པ་ཐམས་ཅད་མཁྱེན་པ་ཐམས་ཅད་གཟིགས་པ་འཇིགས་པ་ཐམས་ཅད་དང་བྲལ་བ་སྐྱེས་བུ་ཆེན་པོ་སྐྱེས་བུ་ཁྱུ་མཆོག་བསམ་གྱིས་མི་ཁྱབ་པའི་སྐུ་བླ་ན་མེད་པའི་སྐུ་ཆོས་ཀྱི་སྐུ་མངའ་བ་ལ་སྐྱབས་སུ་མཆིའོ། །ཆོས་འདོད་ཆགས་དང་བྲལ་བའི་མཆོག་ལ་སྐྱབས་སུ་མཆི་སྟེ། །བླ་ན་མེད་པ་དེ་བཞིན་གཤེགས་པ་ལ་མངའ་བ་ཞི་བ་ཆོས་ཀྱི་སྐུ་སོ་སོ་རང་གི་རིག་པ་སྐྱབས་སུ་མཆིའོ། །དགེ་འདུན་དུལ་བའི་ཚོགས་ཀྱི་མཆོག་ལ་སྐྱབས་སུ་མཆི་སྟེ། ཕྱོགས་བཞིའི་འཕགས་པ་ཕྱིར་མི་ལྡོག་པའི་བྱང་ཆུབ་སེམས་དཔའ་ཆེན་པོའི་དགེ་འདུན་ལ་སྐྱབས་སུ་མཆིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ་བྱང་ཆུབ་ཀྱི་སྙིང་པོ་ལ་གནས་ཀྱི་བར་དུ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ། དུས་ཇི་ལྟ་བ་དང་སྟོབས་ཅི་མཆིས་པ་བཞིན་དུ་

[Full Size]

བདག་འབུལ་ཞིང་མཆིས་ན། མགོན་པོ་ཐུགས་རྗེ་ཆེན་པོ་དང་ལྡན་པ་དག །བདག་བཞེས་སུ་གསོལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག །སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཅན་ཐམས་ཅད་སྒྲོལ་བ་དང་སེམས་ཅན་ཐམས་ཅད་འགྲོལ་བ་དང་སེམས་ཅན་ཐམས་ཅད་དབུགས་དབྱུང་བ་དང་སེམས་ཅན་ཐམས་ཅད་མྱ་ངན་ལས་ཟློ་བ་དང་སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་ལ་འགོད་པའི་སླད་དུ། །ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། སེམས་ཅན་ཐམས་ཅད་སྒྲོལ་བ་དང་སེམས་ཅན་ཐམས་ཅད་འགྲོལ་བ་དང་སེམས་ཅན་ཐམས་ཅད་དབུགས་དབྱུང་བ་དང་སེམས་ཅན་ཐམས་ཅད་ཡོངས་སུ་མྱ་ངན་ལས་ཟློ་བ་དང་སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་ལ་འགོད་

[Full Size]

པའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ།། ༈ །།ཇི་ལྟར་སྔོན་གྱི་སངས་རྒྱས་བཅོམ་ལྡན་འདས་རྣམས་དང་བྱང་ཆུབ་སེམས་དཔའ་ཆེན་པོ་དེ་དག་གིས། དངོས་པོ་ཐམས་ཅད་དང་བྲལ་བ་ཕུང་པོ་དང་ཁམས་དང་སྐྱེ་མཆེད་དང་བཟུང་བ་དང་འཛིན་པ་རྣམ་པར་སྤངས་པ། ཆོས་བདག་མེད་པ་མཉམ་པ་ཉིད་ཀྱི་རང་གི་སེམས་གདོད་ནས་མ་སྐྱེས་པ། སྟོང་པ་ཉིད་ཀྱི་བྱང་ཆུབ་ཀྱི་སེམས་བསྐྱེད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། དངོས་པོ་ཐམས་ཅད་དང་བྲལ་བ་ཕུང་པོ་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་པར་སྤངས་པ། ཆོས་བདག་མེད་པ་མཉམ་པ་ཉིད་ཀྱིས་རང་གི་སེམས་གདོད་ནས་མ་སྐྱེས་པ་སྟོང་པ་ཉིད་ཀྱི་ངོ་བོ་ཉིད་ཀྱི་བྱང་ཆུབ་སེམས་བསྐྱེད་པར་བགྱིའོ། །ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས། བདུད་དཔུང་དང་བཅས་པ་མཐའ་

[Full Size]

དག་ཕམ་པར་མཛད་དེ་ཉིད་མངོན་པར་རྫོགས་པར་སངས་རྒྱས་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་བདུད་དཔུང་དང་བཅས་པ་མཐའ་དག་ཕམ་པར་བགྱིས་ཏེ། བདག་མངོན་པར་རྫོགས་པར་འཚང་རྒྱ་བར་བགྱིའོ། །ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས། ཉིད་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་བ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། བདག་ཉིད་མངོན་པར་རྫོགས་པར་འཚང་བརྒྱས་ནས་ཆོས་ཀྱི་འཁོར་ལོ་བསྐོར་བར་བགྱིའོ། །ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས། ཉིད་མངོན་པར་རྫོགས་པར་སངས་རྒྱས་ནས་ཚོགས་ཡོངས་སུ་བསྡུས་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། བདག་མངོན་པར་རྫོགས་པར་

[Full Size]

འཚང་རྒྱས་ནས་ཚོགས་ཡོངས་སུ་བསྡུ་བར་བགྱིའོ། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོངས་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །སྐྱབས་འགྲོ་སེམས་བསྐྱེད་འདི་ཡན་ཆད་ལན་གསུམ་དུ་བྱའོ། །རྗེས་བསྔོ་བ་སྨོན་ལམ་ནི། བདག་གིས་བྱང་ཆུབ་ཏུ་སེམས་བསྐྱེད་པའི་དགེ་བ་འདི་དང་། །གཞན་ཡང་བདག་གིས་བསོད་ནམས་ཅུང་ཟད་བགྱིས་པ་དང་བགྱིས་པར་འགྱུར་བ་དེ་དག་ཐམས་ཅད། ཕ་མ་ལ་སོགས་པའི་སེམས་ཅན་ཐམས་ཅད་དང་བདག་གི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །བདག་གི་བསོད་ནམས་འདིས་ཕ་མ་ལ་སོགས་པའི་སེམས་ཅན་མ་རྒལ་བ་རྣམས་བདག་གིས་བསྒྲལ་ལོ། །མ་གྲོལ་བ་རྣམས་བདག་གིས་འགྲོལ་ལོ། །དབུགས་མ་ཕྱིན་པ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་

[Full Size]

ཡོངས་སུ་མྱ་ངན་ལས་བཟླའོ། མངོན་པར་རྫོགས་པར་འཚང་མ་རྒྱས་པ་རྣམས་མངོན་པར་རྫོགས་པར་འཚང་རྒྱ་བར་བགྱིའོ། །སྐྱབས་མ་མཆིས་པ་དང་གནས་མ་མཆིས་པ་དང་དཔུང་གཉེན་མ་མཆིས་པའི་འཇིག་རྟེན་གྱི་སྐྱབས་དང་གནས་དང་དཔུང་གཉེན་དུ་གྱུར་ཅིག །དེ་ནས་བདག་སྦྱིན་པ་སྩོལ་བ་དང་ཚུལ་ཁྲིམས་བསྲུང་བ་དང་བཟོད་པ་སྒོམ་པ་དང་བརྩོན་འགྲུས་བརྩོམ་པ་དང་བསམ་གཏན་ལ་མཉམ་པར་བཞག་པ་དང་ཤེས་རབ་རྣམ་པར་སྤྱོད་པ་དང་ཐབས་མཁས་པ་ལ་བློས་པ་གང་ཅི་ཡང་རུང་སྟེ། དེ་དག་ཐམས་ཅད་སེམས་ཅན་ཐམས་ཅད་ཀྱི་དོན་དང་ཕན་པ་དང་བདེ་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ཏེ། འདས་པ་དང་མ་འོངས་པ་དང་ད་ལྟར་བྱུང་བའི་བྱང་ཆུབ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་ཐེག་པ་ཆེན་པོ་ལ་ཡང་དག་པར་ཞུགས་པ། ས་ཆེན་པོ་ལ་ཡང་དག་པར་གནས་པ་རྣམས་ཀྱི་རྗེས་སུ་

[Full Size]

མཐུན་པར་འཇུག་གོ། །འཕགས་པ་དགབདག་བྱང་ཆུབ་སེམས་དཔའ་ལགས་ཀྱི། །བྱང་ཆུབ་སེམས་དཔའ་ལགས་པར་བཟུང་དུ་གསོལ། ས་དང་ཆུ་དང་མེ་དང་རླུང་། རྩི་དང་ནགས་ཀྱི་ཤིང་ལྟ་བུར། །རྟག་ཏུ་སྲོག་ཆགས་ཐམས་ཅད་ཀྱི། །འདོད་རྒུ་དཔག་མེད་སྤྱོད་པར་ཤོག །མཐོང་བ་དང་ནི་རེག་པ་དང་། །ཐོས་པ་དང་ནི་དྲན་པས་ཀྱང་། །བདག་ནི་སེམས་ཅན་ཐམས་ཅད་ཀྱི། །ནད་རྣམས་གསོ་བར་བགྱིད་གྱུར་ཅིག །དགེ་བ་རྒྱ་ཆེན་གྱུར་པ་འདི་ཡིས་ནི། །འགྲོ་བའི་ནང་ནས་རང་བྱུང་སངས་རྒྱས་ཤོག །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་དགུའི་ཚོགས་རྣམས་བདག་གིས་སྒྲོལ་བར་ཤོག །ནམ་མཁའི་མཐར་ཐུག་གྱུར་པའི་ཇི་ཙམ་པ། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཇི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ཞེས་པའི་མཐར། སེམས་བསྐྱེད་ཡུལ་སྐྱེད་བྱ་སྐྱེད་བྱེད་དུ་འཛིན་པ་མི་རྟོག་པ་སྒྱུ་མ་མཁན་གྱི་སྤྲུལ་

[Full Size]

པའི་གཟུགས་བརྙན་ལྟ་བུ་དེ་ཐམས་ཅད་རྦ་རླབས་ཆུར་ཞི་བའི་ཆུ་འཛིན་མཁའ་ལ་ཐིམ་པ་ལྟ་བུའི་ངང་ནས་ཟབ་ཞི་སྤྲོས་བྲལ་གྱི་ཀློང་དུ་མཉམ་པར་འཇོག་པ་ནི་དོན་དམ་བྱང་ཆུབ་སེམས་ཀྱི་ཉམས་ལེན་ཡང་དག་པ་ཉིད་དང་། སེམས་གསུམ་ཀུན་གྱི་མཐར་ཐུག་འདིར་འདུ་བ་ལ་རྒྱུན་ཆད་མེད་པར་བརྩོན་པའི་རང་མདངས་སྙིང་རྗེ་སྒྱུ་མའི་རོལ་པས་མཁའ་མཉམ་གྱི་ཕྲིན་ལས་རླབས་པོ་ཆེ་ཡོངས་སུ་སྤྲོའོ། །བྱང་ཆུབ་སེམས་གསུམ་གྱི་ཉམས་ལེན་སྒྲིགས་ཆགས་ཀྱི་ངག་འདོན་འདི་དག་མདོ་དང་བསྟན་བཅོས་རྩོད་མེད་ཀྱི་གཞུང་ལས་ཇི་ལྟར་བྱུང་བ་རྣམས་ལག་ཏུ་བླངས་བདེ་བའི་ཕྱིར་མཐར་ཆགས་སུ་བཀོད་པ་མ་གཏོགས། རང་བཟོ་དང་བཅོས་སླད་ཀྱིས་མ་ནོགས་པ་འདི་ཡང་རྒྱལ་མཆོག་བཟང་པོའི་བཀའ་ཇི་ལྟ་བར། བྱང་སེམས་ལ་མོས་པའི་བཙུན་པ་རང་གྲོལ་བས་ཡི་གེའི་ལམ་དུ་སྣང་བར་བགྱིས་པའི་དགེ་བས་

[Full Size]

མཁའ་ཁྱབ་འགྲོ་ཀུན་བྱང་ཆུབ་མཆོག་ལ་འཁོད་པར་གྱུར་ཅིག །ཤུ་བྷཾ། གཅིག་ཞུས།

དཔལ་ལྡན་བླ་མའི་དཀྱིལ་འཁོར་ལ་ཆོ་ག་ངེས་དོན་བྱིན་རླབས་ཆུ་རྒྱུན།

[Full Size]

དཔལ་ལྡན་བླ་མའི་དཀྱིལ་འཁོར་ལ་ཆོ་ག་ངེས་དོན་བྱིན་རླབས་ཆུ་རྒྱུན་བཞུགས་སོ།

[Full Size]

ན་མོ་ཨུཏྟ་རེ་བྷྱཿ གང་ཞིག་འཁོར་བའི་འཇིགས་དང་ཞི་བའི་གཡང་ས་ལས། །ལེགས་སྐྱོབས་ངེས་པ་ཁོ་ནར་ཚེ་གཅིག་བྱང་ཆེན་ལ། །འགོད་མཁས་བླ་མ་མཆོག་ཞབས་ཡང་དག་བཏུད་བྱས་ནས། །དེ་ཉིད་མཆོད་དང་སྒྲུབ་པའི་ལས་རིམ་འདིར་འགོད་བྱ། །མཁའ་མཉམ་ཕ་མ་དྲིན་ཅན་རྣམས། །གཏན་བདེར་འགོད་པའི་བློ་ལྡན་གྱི། །སྐལ་བཟང་དད་པ་བརྟན་པོ་གང་། །བླ་མེད་སྒྲུབ་ཅིང་མཆོད་འདོད་པས། །ཡིད་མཐུན་གནས་ཁང་བྱི་དོར་བྱས། །སྐུ་གཟུགས་ལ་སོགས་མཆོད་

[Full Size]

པའི་རྟེན། །བཀྲམ་པའི་དྲུང་དུ་སྟེགས་བཟང་སོགས། །མེ་ཏོག་ཚོམ་བུ་ལྔ་དགོད་ཅིང་། །བླ་མའི་གཏོར་མ་རྒྱན་ལྡན་དང་། །བདུད་རྩིས་བཀང་བའི་ཐོད་པ་བཞག །རྣམ་ལྔའི་མཆོད་པ་རྒྱ་ཆེན་པོ། །སེར་སྣས་མ་བཅིངས་བསོད་ནམས་དང་། ཆང་ངམ་ཆུ་ལ་བདུད་རྩི་རིལ་བུ་བཏབ་པ་རང་གཞན་ཚོགས་གཉིས་སྤེལ་ཕྱིར་འགོད། །མཆོད་པའི་མཎྜལ་རྡོར་དྲིལ་དང་། །ཌ་མ་རུ་སོགས་རོལ་མོའི་ཚོགས། །འཛོམ་བྱ་གལ་ཏེ་རྣལ་འབྱོར་པ། །སྤྲོས་བྲལ་ལ་ནི་མོས་བློས་རུང་། །འཇིག་རྟེན་བྱ་བྲེལ་ཀུན་སྤངས་ཏེ།

[Full Size]

བདེ་བའི་སྟན་འཁོད་སྐྱབས་ཡུལ་ལ། །གུས་པས་སྐྱབས་སེམས་བདུན་དག་བྱ། ན་མོ། དམིགས་མེད་སྤྲོས་བྲལ་སངས་རྒྱས་ཆོས་ཀྱི་སྐུ། །འགག་མེད་རང་གསལ་དམ་ཆོས་ལོངས་སྤྱོད་རྫོགས། །གཉིས་མེད་ཐུགས་རྗེའི་སྤྲུལ་སྐུ་དགེ་འདུན་བཅས། །དཀོན་མཆོག་སྐུ་གསུམ་བླ་མར་སྐྱབས་སུ་མཆིའོ། །ལན་གསུམ། འགྲོ་ཀུན་བདེར་གཤེགས་སྙིང་པོར་ལྷུན་གྲུབ་ཀྱང་། །མ་རིག་ལྷན་སྐྱེས་སྒྲིབ་པས་འཁོར་བར་འཁྱམས། །རང་རིག་སྨོན་འཇུག་དོན་དམ་ཚད་མེད་བཞི། །ཡོངས་རྫོགས་བྱང་ཆུབ་སེམས་མཆོག་བསྐྱེད་པར་བགྱིའོ། །ལན་གསུམ། རང་སེམས་བླ་མར་རྟོགས་པས་གུས་ཕྱག་འཚལ་ལོ། །ཚོགས་དྲུག་ཞེན་པ་བྲལ་བའི་མཆོད་པ་འབུལ། །གཉིས་འཛིན་ཨ་འཐས་སྒྲིབ་ཚོགས་མཐོལ་ཞིང་བཤགས། །ཐུགས་རྗེ་རྒྱུན་ཆད་མེད་ལ་རྗེས་ཡི་རངས། །ཁྱབ་གདལ་ཡེ་ཤེས་ཆོས་འཁོར་བསྐོར་དུ་གསོལ། །མཆོག་ཏུ་མི་འགྱུར་ཆོས་སྐུར་བཞུགས་གསོལ་འདེབས། །མཁའ་ཁྱབ་འགྲོ་

[Full Size]

ཀུན་སྐུ་གསུམ་ཐོབ་ཕྱིར་བསྔོ། །འཁོར་བ་དོང་སྤྲུག་འགྲོ་དོན་འགྲུབ་པར་ཤོག། ༈ །།སྐབས་འདིར་ཆོག་གཞུང་གཞན་ལྟར་གྱི། །བགེགས་བསྐྲོད་སྲུང་འཁོར་འདིར་མི་དགོས། །སྣང་སྲིད་བླ་མའི་དཀྱིལ་འཁོར་ལ། །བསྲུང་བྱ་སྲུང་བྱེད་མཚན་མས་དབེན། །དེ་ནས་རང་རྒྱུད་སྦྱོང་བྱེད་པའི། །ཡིག་བརྒྱའི་རྣལ་འབྱོར་སྒོམ་བཟླས་བྱ།། ༈ །།ཆོས་ཀུན་སེམས་ཀྱི་རོལ་པའི་རང་བཞིན་ལས། །སྐད་ཅིག་དྲན་རྫོགས་བདག་ཉིད་རྡོ་རྗེ་སེམས། །དཀར་མཛེས་རྡོར་དྲིལ་ཕྱག་རྒྱས་ལོངས་སྐུའི་ཚུལ། །ཐུགས་ཀར་ཧཱུྃ་ལ་ཡིག་བརྒྱས་བསྐོར་བར་གྱུར། ཨོཾ་བཛྲ་སཏཱ་ས་མ་ཡ། མ་ནུ་པ་ལ་ཡ། བཛྲ་སཏྭ་ཏེ་ནོ་པ་ཏིཥྛ། དྲི་དྷོ་མེ་བྷ་ཝ། སུ་ཏོཥྱོ་མེ་བྷ་ཝ། པུ་པེ་ཥྱོ་བྷ་ཝ། ཨ་ནུ་རཀྟེ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙི༚ཏྟ་བྲཱི་ཡཿཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ

[Full Size]

བཛྲི་བྷ་ཝ་མཧཱ་ས་མ་ཡ་སཏྭ་ཨཱཿ ལོང་སྐབས་དང་བསྟུན་ནས་བཟླ། འཁོར་བ་ཐོག་མཐའ་མེད་པའི་བག་ཆགས་དང་། །ལས་ཉོན་དམ་སྡོམ་ཉམ་ཆགས་ཉེས་ལྟུང་རིགས། །མ་ལུས་སྔགས་དང་ཏིང་འཛིན་བྱིན་རླབས་ཀྱིས། །ཡོངས་དག་འགྲོ་བ་ཀུན་ཀྱང་དེ་བཞིན་གྱུར།། ༈ །།དེ་ནས་ལྷ་ཡི་རྣལ་འབྱོར་གྱིས། །གནས་ཁང་ཡོ་བྱད་མཆོད་རྫས་སོགས། །སྔགས་དང་ཏིང་འཛིན་ཟུང་འཇུག་པས། །བྱིན་གྱིས་བརླབ་པ་འདི་ལྟར་བྱ། །བདག་ཉིད་རྡོར་སེམས་ཐུགས་ཀའི་ཧཱུྃ་ཡིག་ལས། །ཡེ་ཤེས་འོད་འཕྲོས་སྣོད་བཅུད་ཀུན་ལ་ཕོག །གནས་ཡུལ་གདོས་བཅས་མ་ཡིན་ཆོས་དབྱིངས་ཞིང་། །མཆོད་རྫས་ཡོ་བྱད་ཀུན་བཟང་སྨོན་ལམ་ལས། །ལེགས་གྲུབ་བློ་ལས་འདས་པའི་མཆོད་སྤྲིན་ཚོགས། །ཟག་མེད་རྒྱུན་མི་ཆད་ཅིང་རབ་འབྱམས་ཞིང་། །མ་ལུས་ཡོངས་སུ་ཁྱབ་པའི་སྒྱུ་འཕྲུལ་ཆེ། །ཕྱི་ནང་གསང་བ་དེ་བཞིན་ཉིད་རྫོགས་གྱུར། །ཨོཾ་ཨཱཿཧཱུྃ། བཛྲ་སརྦ་པཱུ་ཛ་མེ་གྷ་

[Full Size]

ས་མུ་དྲ་སྥ་ར་ཎ་ས་མ་ཡེ་ཧཱུྃ་སྭཱ་ཧཱ།། ༈ །།དེ་ནས་སྒྲུབ་པའི་མཎྜལ་གྱི། །བླ་མའི་སྐྱེད་ཆོག་འདི་དག་ནི། །རང་སེམས་སྟོང་པའི་གསལ་མདངས་ལས། །ཤུགས་འབྱུང་རང་ཤར་ཉིད་དུ་བསྐྱེད། །མདུན་གྱི་ནམ་མཁར་ཡེ་ཤེས་འོད་ལྔ་ལས། །གྲུབ་པའི་གཞལ་ཡས་བཀོད་པ་བསམ་ཡས་དབུས། །པད་སྡོང་འདབ་བཞི་གེ་སར་ཉི་ཟླའི་སྟེང་། །ཕྱོགས་དུས་རྒྱལ་བ་སྲས་བཅས་མ་ལུས་པའི། །ཁྱབ་བདག་འཁོར་ལོའི་དབང་ཕྱུག་དྲིན་ཅན་རྗེ། །རྩ་བའི་བླ་མའི་ངོ་བོ་འཛམ་གླིང་གྲགས། །དཀར་དམར་མདངས་ལྡན་ཞི་དུལ་དགེ་སློང་ཚུལ། །སྒོམ་ཞྭའི་ཅོད་པཎ་ཆོས་གོས་རྣམ་གསུམ་དང་། །ལེ་རྒན་བེར་ཟླུམ་པདྨ་སྤུངས་འདྲ་གསོལ། །སྐྱིལ་ཀྲུང་མཉམ་གཞག་ཏིང་འཛིན་གཡོ་མེད་ཀྱིས། །སྣང་སྲིད་ཟིལ་གནོན་བྱིན་རླབས་འོད་འབར་བཞུགས། །སྟེང་གི་ནམ་མཁར་པད་ཟླ་འཇའ་འོད་ཀློང་། །རིགས་བདག་རྒྱལ་བ་ཀུན་ཡབ་

[Full Size]

རྡོ་རྗེ་འཆང་། །འགྱུར་མེད་མཐིང་གསལ་ཐབས་ཤེས་རྡོར་དྲིལ་བསྣོལ། །ལོངས་སྐུའི་ཆ་བྱད་མཚན་རྫོགས་རྡོར་སྐྱིལ་བཞུགས། །རྩ་བའི་བླ་མའི་གཡས་ཀྱི་པད་འདབ་སྟེང་། །ཧེ་རུ་ཀ་དཔལ་ཏེ་ལོ་ཤེས་རབ་བཟང་། །སྔོ་སང་རུས་རྒྱན་ཐོར་ཚུག་གྲུབ་དབང་ཆས། །ཆོས་འཁོར་ཕྱག་རྒྱ་རྡོར་སྐྱིལ་ལྟ་སྟངས་བཞུགས། །གཡོན་གྱི་པད་སྟེང་མཁས་གྲུབ་ན་རོ་པ། །སྨུག་ནག་ཅང་ཏེལ་ཐོད་པ་ཁ་ཊྭཱྃ་བསྣམས། །འགྱིངས་བག་གཡས་བརྐྱངས་དཔའ་བོའི་རོལ་སྟངས་ཅན། སྟག་ཤམ་རུས་རྒྱན་ཐོར་ལྕོག་བརྗིད་ལྡན་བཞུགས། རྒྱབ་ཀྱི་པདྨར་མངའ་བདག་ལོ་ཙཱ་བ། །ཚོ་ཞིང་སྣུམ་བརྗིད་བག་གྲོ་ལྷུན་ཆགས་སྐུ། །དབུ་སྐྲ་ལྕང་ལེ་དར་དཀར་ཕུ་དུང་དང་། །ཟབ་ཆེན་བེར་གསོལ་ཕྱག་གཉིས་ས་གནོན་མཛད། །མདུན་གྱི་པད་སྟེང་དབང་ཕྱུག་མི་ལ་རྗེ། །སྔོ་དངས་རས་དཀར་ན་བཟའ་སྒོམ་ཐག་ཅན། །དབུ་སྐྲ་སིལ་

[Full Size]

བུ་ཆོས་འཆད་མཉམ་གཞག་གིས། །གཙོ་ལ་ཞལ་གཟིགས་སེམས་དཔའི་སྐྱིལ་ཀྲུང་བཞུགས། །དེ་དག་རྣམས་ཀྱི་ཕྱི་རོལ་མཐའ་སྐོར་དུ། །རྒྱུད་ལུང་མན་ངག་མཛོད་འཛིན་བླ་རྒྱུད་ཚོགས། །མདོ་སྔགས་གྲུབ་པའི་ཆ་བྱད་ངེས་མེད་དུ། །གང་འདུལ་སྤྲུལ་པའི་དཀྱིལ་འཁོར་ཡོངས་རྫོགས་བཞུགས། །ཐམས་ཅད་ཆོས་སྐུའི་ངང་ལས་གཟུགས་ཀྱི་སྐུ། །སྣང་ལ་རང་བཞིན་མ་གྲུབ་འོད་དུ་འབར། །ཞིང་རྣམས་སྐུས་ཁྱབ་སྐུ་ཉིད་ཡེ་ཤེས་དབྱིངས། །ཟུང་འཇུག་མི་ཟད་རྒྱན་གྱི་འཁོར་ལོའོ། །ཀུན་གྱི་སྤྱི་བོར་འཁོར་ལོ་ཨོཾ་གྱིས་མཚན། །མགྲིན་པར་པདྨ་དམར་པོ་ཨཱཿཡིག་དང་། །ཐུགས་ཀར་རྡོ་རྗེ་སྔོན་པོ་ཧཱུྃ་མཚན་པའི། །འོད་ཀྱིས་རྒྱལ་ཀུན་ཐུགས་རྗེ་རྒྱུད་བསྐུལ་གྱུར།། ༈ །།དེ་ལྟར་བཟོད་ནས་ཆོས་སྐུ་ལ། །དམ་ཚིག་ཡེ་ཤེས་དབྱེར་མེད་ཀྱང་། །ཏིང་འཛིན་ཉམས་རྩལ་སྦྱོང་བའི་ཕྱིར། །ཐུགས་རྗེའི་མཐུ་ལྡན་བླ་མ་རྣམས། །ཡེ་ཤེས་སྤྱན་དྲངས་བྱིན་རླབས་མྱུར། །དད་གདུངས་མཆི་

[Full Size]

མ་གཡོ་ནུས་པས། །རོལ་མོའི་སྒྲ་དང་སྤོས་ཀྱི་སྤྲིན། །སྙན་པའི་དབྱངས་ཀྱིས་སྤྱན་འདྲེན་བྱ། །ཨོཾ་ཨཱཿཧཱུྃ། ཆོས་དབྱིངས་གདོད་ནས་དག་པ་འོག་མིན་ཞིང་། །ལྷུན་གྲུབ་ཡེ་ཤེས་རང་གསལ་ཕོ་བྲང་ནས། །སྐུ་གསུམ་ཡོངས་རྫོགས་བླ་མ་སྤྱན་འདྲེན་ནོ། །དད་གུས་དམ་ཚིག་གནས་འདིར་གཤེགས་སུ་གསོལ། །ཞིང་རྣམས་སྐུས་ཁྱབ་གཤེགས་བཞུགས་མི་དམིགས་ཀྱང་། །ཐུགས་རྗེའི་རྫུ་འཕྲུལ་ཅིར་ཡང་སྟོན་མཛད་ན། །གདུལ་བྱའི་ཡུལ་དང་མཐུན་པའི་བཀོད་ཡུལ་གྱིས། །ཟློས་གར་ཡང་དག་བསྒྱུར་བས་གཤེགས་སུ་གསོལ། །ཆོས་སྐུ་གཅིག་དང་དུ་མའི་སྤྲོས་བྲལ་ཡང་། །གཟུགས་སྐུ་ཡེ་ཤེས་རང་གདངས་འགག་མེད་ལས། །སྤྲུལ་སྐུ་གདུལ་བྱའི་གྲངས་མཉམ་དེ་སྲིད་ཀྱི། །རྣམ་འདྲེན་བླ་མའི་ཚོགས་རྣམས་གཤེགས་སུ་གསོལ། །ཁྱབ་བདག་རྡོར་འཆང་ཏེ་ལོ་ནཱ་རོ་དང་། །མངའ་བདག་ལོ་ཙ་རྗེ་བཙུན་རས་ཆེན་ཞབས།

[Full Size]

སྐུ་དྲིན་མཉམ་མེད་མགོན་པོ་འཛམ་གླིང་གྲགས། །རྩ་རྒྱུད་བླ་མའི་ཚོགས་བཅས་གཤེགས་སུ་གསོལ། །སྣང་གྲགས་བླ་མའི་ངོ་བོར་རོ་གཅིག་ཀྱང་། །གང་འདུལ་ཐུགས་རྗེའི་རྣམ་འགྱུར་སྣ་ཚོགས་པའི། །སངས་རྒྱས་སྲས་བཅས་ལྷ་དང་མཁའ་འགྲོའི་ཚོགས། །མ་ལུས་མཆོད་པའི་གནས་འདིར་གཤེགས་སུ་གསོལ། །ཨོཾ་སརྦ་ཏ་ཐཱ་ག་ཏ། མ་ཧཱ་གུ་རུ་རཏྣ་ས་པ་རི་ཝཱ་ར་བཛྲ་ས་ལཱ་ཛཿ ཛཿཧཱུྃ་བྃ་ཧོ།། ༈ །།སྤྱན་དྲངས་ཙམ་གྱིས་ནམ་མཁའི་ཁམས། །ཀུན་ཁེངས་ཉི་ཟེར་རྡུལ་བཞིན་དུ། །འོད་ཟེར་འཁྲིག་བྱོན་བླ་མའི་ཚོགས། །དམ་ཚིག་པ་ལ་ཐིམ་པར་མོས།། ༈ །།ཆོས་དབྱིངས་ཡེ་ཤེས་སྒྱུ་མའི་སྐུར་སྣང་བའི། །བླ་མ་མཆོག་ལ་གཉིས་འཛིན་མི་དམིགས་ཀྱང་། །བདག་སོགས་འགྲོ་བའི་གཉིས་འཛིན་ཞི་སླད་དུ། །སྐུ་དང་ཡེ་ཤེས་དབྱེར་མེད་བརྟན་པར་བཞུགས། ཛྙཱ་ན་ཀཱ་ཡཱ་དྭཱ་ཏིཥྛ་བཛྲ་ཧཱུྃ། དེ་ནས་རང་ལས་སྤྲུལ་

[Full Size]

པའི་ལུས། །ཞིང་གི་རྡུལ་རྙེད་མཁའ་མཉམ་གྱི། །འགྲོ་ཀུན་ལྷན་ཅིག་བླ་མ་ལ། །སྒོ་གསུམ་གུས་པས་ཕྱག་འཚལ་བྱ། །གང་སྐུ་མཚན་དཔེའི་ཆ་ཤས་གདུལ་བྱའི་མཁར། །འགྲིབ་མོད་རྟག་པར་གསལ་འོད་སྣང་གིས། །ཐར་ལམ་ངེས་ལེགས་སྟོན་པའི་སྒྲོན་མེ་མཆོག །ཕན་བདེའི་ཟླ་བ་ཁྱོད་ལ་ཕྱག་འཚལ་ལོ། །གང་གསུང་དགེ་བ་གསུམ་གྱི་བདུད་རྩིའི་ཆར། །ཉོན་མོངས་ཚ་གདུང་ཞི་མཛད་ཡེ་ཤེས་རྒྱུན། །བྱང་ཆུབ་མྱུ་གུ་བསྐྱེད་མཁས་ཐུགས་རྗེའི་བཅུད། །ཡིད་བཞིན་འདོད་འཇོ་ཁྱོད་ལ་ཕྱག་འཚལ་ལོ། །གང་ཐུགས་ཟབ་ཞི་སྤྲོས་བྲལ་རྟོག་མེད་ལས། །གུས་ལྡན་ཡིད་ལ་ཇི་ལྟར་བསམ་པའི་དོན། །མཆོག་ཐུན་དངོས་གྲུབ་འབྱུང་གནས་ཟླ་མོད་པའི། །རིན་ཆེན་གཏེར་ཁྱོད་ལ་ཕྱག་འཚལ་ལོ།། ༈ །།དེ་ནས་ཕྱི་ནང་གསང་བ་དང་། །དེ་ཁོ་ན་ཉིད་མཆོད་པ་ཀུན། །མཆོད་ཡུལ་མཆོད་བྱ་རང་སེམས་ཀྱི། །རོལ་པ་ཆེན་པོའི་

[Full Size]

གར་གྱིས་འབུལ། །ཞིང་ཁམས་རབ་འབྱམས་བྱེ་བ་ཕྲག་བརྒྱ་ཀུན། །མཆོད་ཡོན་བདུད་རྩི་ཡན་ལག་བརྒྱད་ལྡན་གྱིས། །ཡོངས་བཀངས་བླ་མ་མཆོག་ལ་འབུལ་ལགས་ཀྱི། །འགྲོ་ཀུན་བསམ་གཏན་རྒྱ་མཚོར་དབང་འབྱོར་ཤོག །བཛྲ་ཨརྒཾྷ་པྲ་ཏཱིཙྪ་ཧཱུྃ་སྭཱ་ཧཱ། འདབ་སྟོང་གེ་སར་རྒྱས་པའི་པདྨོའི་ཚོགས། དབང་པོའི་གཞུ་ལྟར་བཀྲ་བའི་མདངས་ཅན་གྱིས། །ནམ་མཁའ་ས་གཞི་ཀུན་བཀངས་འབུལ་ལགས་ན། །འགྲོ་ཀུན་བརྩོན་འགྲུས་མཆོག་ལ་སྦྱོར་བར་ཤོག །བཛྲ་པུཥྤེ་པྲ་ཏཱིཙྪ་ཧཱུྃ་སྭཱ་ཧཱ། སྤོས་ཀྱི་ཕྱེ་ཕུར་རི་རབ་མཉམ་པ་དང་། ཡིད་འོངས་གསུངས་ཞིམ་བདུག་པའི་སྤྲིན་ཚོགས་བཅས། །དཔག་ཚད་བྱེ་བར་ཁྱབ་པའི་དྲི་བཟང་མཆོད། །ཕུལ་བས་འགྲོ་ཀུན་ཚུལ་ཁྲིམས་རྣམ་དག་ཤོག །བཛྲ་དྷཱུ་པེ་པྲ་ཏཱིཙྪ་ཧཱུྃ་སྭཱ་ཧཱ། གང་གིས་མི་སྒྲིབས་རིན་ཆེན་སྣང་བའི་འོད། །ཉིན་མཚན་ཀུན་ཏུ་

[Full Size]

གསལ་དང་ཅི་མཆོག་འབྲུའི། །སྒྲོན་མ་འཇིག་རྟེན་མཐའ་དག་སྣང་བྱེད་འོད། །ཕུལ་བས་འགྲོ་ཀུན་ཤེས་རབ་གསལ་བར་ཤོག །བཛྲ་ཨ་ལོ་ཀེ་པྲ་ཏཱིཙྪ་ཧཱུྃ་སྭཱ་ཧཱ། འཁོར་བའི་ཚ་གདུང་ཀུན་སེལ་དྲི་ཡི་ཆབ། །མ་རིག་རྨོངས་པའི་ཐིབ་པོ་ཞི་བ་དང་། མངོན་མཐོ་ངེས་ལེགས་བདེ་ཆེན་བསྐྱེད་པའི་མཆོད། །ཕུལ་བས་འགྲོ་ཀུན་བཟོད་པའི་གོ་ལྡན་ཤོག །བཛྲ་གནྡྷེ་པྲ་ཏཱིཙྪ་ཧཱུྃ་སྭཱ་ཧཱ། ལྷ་ཡི་ཞལ་ཟས་རོ་བརྒྱའི་ཡོན་ཏན་གྱིས། །ཏིང་འཛིན་སྒོ་བརྒྱ་འབྱེད་ནུས་ཟས་མཆོག་བཤོས། །སྟོང་གསུམ་ཡོངས་བཀངས་བླ་མ་རྗེ་ལ་འབུལ། །འགྲོ་ཀུན་སྦྱིན་པའི་དཔལ་ལ་ལོངས་སྤྱོད་ཤོག །བཛྲ་ནཻ་ཝི་དྱ་པྲ་ཏཱིཙྪ་ཧཱུྃ་སྭཱ་ཧཱ། ཟིན་དང་མ་ཟིན་རྣམ་པར་གྲག་པའི་སྒྲ། གཏི་མུག་གཉིད་སློང་ལོག་ལྟའི་སྡེ་ཚོགས་སྐྲག །ཆོས་སྒྲས་འཇིག་རྟེན་ཁྱབ་བྱེད་རོལ་མོའི་ཚོགས། །ཕུལ་བས་འགྲོ་ཀུན་ཆོས་དབྱངས་ཐོབ་པར་ཤོག །བཛྲ་ཤབྟ་

[Full Size]

པྲ་ཏཱིཙྪ་ཧཱུྃ་སྭཱ་ཧཱ། ཕྱི་མཆོད་ཉེར་མཆོད་ཕུལ་བའི་རྗེས། །ནང་ལྟར་འདོད་ཡོན་ལྔས་མཆོད་དེ། །འཇིག་རྟེན་གཟུགས་ཀྱི་སྣང་བ་ཇི་སྙེད་པ། །མཛེས་དང་མི་མཛེས་བཏགས་པ་སེམས་ཀྱི་འཕྲུལ། །གང་སྣང་ངོ་བོ་སྟོང་པའི་མཆོད་འབུལ་བས། །འགྲོ་ཀུན་གཏི་མུག་རྣམ་སྣང་སྐུར་གྲོལ་ཤོག །བཛྲ་རཱུ་པ་པྲ་ཏཱིཙྪ་ཧཱུྃ་སྭཱ་ཧཱ། ཇི་ལྟར་གྲག་པའི་སྒྲ་རུ་གང་བཟུང་བ། །སྙན་དང་མི་སྙན་འཛིན་པས་ཕྱེད་པ་ཙམ། །ཐམས་ཅད་གྲགས་སྟོང་རང་གྲོལ་མཆོད་པར་འབུལ། །འགྲོ་ཀུན་ཞེ་སྡང་མི་སྐྱེད་སྐར་གྲོལ་ཤོག །བཛྲ་ཤབྟ་པྲ་ཏཱིཙྪ་ཧཱུྃ་སྭཱ་ཧཱ། ཚོར་བ་བཟུང་དང་ངན་པར་བཟུང་བའི་དྲི། གང་ཡང་རྣམ་པར་རྟོག་པས་བཏགས་པས་ན། །བློ་ཡིས་མ་བསླད་ཚོར་སྟོང་མཆོད་པ་ཡིས། འགྲོ་ཀུན་ང་རྒྱལ་རིན་འབྱུང་སྐུར་གྲོལ་ཤོག །བཛྲ་གྷནྡྷ་པྲ་ཏཱིཙྪ་ཧཱུྃ་སྭཱ་ཧཱ།

[Full Size]

ཐོག་མེད་བག་ཆགས་མཐུ་བརྟས་ཞིམ་མངར་རོ། །གང་ལ་སྤོང་ལེན་འཁྲུལ་པའི་འཁོར་ལོ་ནི། །རྒྱུན་བཅད་མྱོང་སྟོང་རོ་མཉམ་མཆོད་ཕུལ་བས། །འགྲོ་ཀུན་འདོད་ཆགས་སྣང་མཐའི་སྐུར་གྲོལ་ཤོག །བཛྲ་ར་ས་པྲ་ཏཱིཙྪ་ཧཱུྃ་སྭཱ་ཧཱ། ཅིར་སྣང་སྒྱུ་མར་མ་ཤེས་ཨ་འཐས་ཀྱིས། །རང་གཟུགས་རེག་བྱ་བཟང་ངན་དགག་སྒྲུབ་ཀུན། །ཆོས་ཉིད་ཀློང་དུ་ལ་ཟློའི་མཆོད་པ་ཡིས། །འགྲོ་ཀུན་ཕྲག་དོག་དོན་གྲུབ་སྐུར་གྲོལ་ཤོག །བཛྲ་སྤརྴེ་པྲ་ཏཱིཙྪ་ཧཱུྃ་སྭཱ་ཧཱ། གསང་བ་བདེ་སྟོང་ལྷན་སྐྱེས་ཀྱི། །མཆོད་པ་བླ་ན་མེད་པས་མཆོད། །གང་ཞིག་འཁོར་བའི་གཞི་རྩ་ཆགས་སྡང་གིས། །རྒྱུ་རྐྱེན་འབྲས་བུས་ཉོན་མོངས་ཀུན་བསྐྱེད་པའི། །མཚན་ཉིད་ཇི་བཞིན་རིག་པ་ལྷན་སྐྱེས་ཀྱི། །དགའ་བ་བཅུ་དྲུག་མཆོད་པ་ཀུན་གྱི་རབ། །ཐབས་ཤེས་ཟུང་འཇུག་འགྱུར་བྲལ་བདེ་བའི་མཆོག །ཟག་མེད་

[Full Size]

ཏིང་འཛིན་དབང་བསྒྱུར་བླ་མ་རྣམས། །བདེ་སྟོང་ཡེ་ཤེས་མཆོད་པའི་དགའ་སྟོན་ཆེར། །རོལ་ནས་སེམས་ཅན་སྡུག་བསྔལ་ཞི་བར་མཛོད། །གུ་ཧྱ་ཛྙཱ་ན་བ་ཧ་ཛ་མ་ཧཱ་པཱུ་ཛ་ཧོཿ ༈ །།དེ་ནས་མཆོད་པའི་ཡང་རབ་ནི། །དེ་ཁོ་ན་ཉིད་དོན་དམ་མཆོད།། ༈ །།ཆོས་རྣམས་ཀུན་གྱི་རང་བཞིན་མ་བཅོས་པ། །ཐོག་མཐའ་དབུས་མེད་འཁོར་དང་མྱང་འདས་བཞེས། །མཚན་མས་མ་བཅིངས་འཕོ་འགྱུར་བྲི་གང་བྲལ། །འདི་ནི་མཆོད་པའི་ནང་ནས་མཆོད་ཆེན་པོ། །མཆོད་ཡུལ་བླ་མ་གདོད་མའི་ཆོས་ཀྱི་སྐུ། །མཆོད་བྱེད་རང་གསལ་རང་རིག་རྣལ་འབྱོར་པ། །མཆོད་བྱའི་དངོས་ཀུན་རང་རྩལ་སྒྱུ་མའི་འཕྲུལ། །མཐའ་དག་བཟོད་ནས་ཡོངས་དག་མཆོད་པའོ། །སརྦ་དྷརྨཿ མ་ཧཱ་ཤུ་ནྱ་ཏ་པཱུ་ཛ་ཧོ།། ༈ །།དེ་ལྟར་ཀུན་རྫོབ་དོན་དམ་གྱི། །མཆོད་པའི་རིམ་པ་གྲུབ་

[Full Size]

པའི་རྗེས། །བླ་མའི་ཡོན་ཏན་དྲན་བྱའི་ཕྱིར། །བསྟོད་དབྱངས་ཚིག་དོན་མཐུན་པར་བྱ།། ༈ །།ཨེ་མའོ་ཡོན་ཏན་རྒྱ་མཚོའི་བླ་མ་ལ། །བདག་སོགས་ཚུར་མཐོང་སྐྱེ་བོས་བསྐལ་པ་བརྒྱར། །བསྔགས་ཀྱང་ཁྱོད་ཀྱི་བ་སྤུའི་ཁུངས་གཅིག་གི། །ཡོན་ཏན་ཆ་ཙམ་རྟོགས་པར་ནུས་མ་ལགས། །ཨེ་མའོ་གདོད་ནས་རབ་དག་སྤྲོས་པའི་ཚོགས། །ཉེར་ཞི་འདུས་མ་བྱས་པའི་ཆོས་ཀྱི་སྐུ། །ཆོས་རྣམས་ཀུན་གྱི་གནས་ལུགས་དེ་བཞིན་ཉིད། །གང་དེ་མགོན་པོ་ཁྱེད་ཀྱི་རང་བཞིན་ལགས། །ཨེ་མའོ་ཆོས་དབྱིངས་དག་པའི་ཞིང་ཁམས་ནས། །ངོ་མཚར་མཚན་རྫོགས་ཁ་སྦྱོར་ཡན་ལག་བདུན། །ལྷུན་གྲུབ་ངེས་པ་ལྔ་ལྡན་ཞིང་ཀུན་ཏུ། །ཡོངས་ཁྱབ་ལོངས་སྐུའི་དཀྱིལ་འཁོར་ཁྱེད་ཉིད་ལགས། །ཨེ་མའོ་ནམ་མཁའ་རབ་འབྱམས་མཐའ་ཀླས་པར། །འགྲོ་ཁམས་སྣ་ཚོགས་གང་ལ་གང་འདུལ་བའི། །ཐུགས་རྗེའི་བཀོད་སྤྲུལ་བགྲངས་ཡས་དུས་ཀུན་

[Full Size]

ཏུ། །རྒྱུན་ཆད་མེད་དེ་ཁྱེད་ཀྱི་མཚན་ཉིད་ལགས། །ཨེ་མའོ་རྡུལ་གཅིག་སྟེང་ན་རྡུལ་སྙེད་ཀྱི། །ཞིང་ཁམས་ཇི་སྙེད་སྐྲ་རྩེའི་ཁྱོན་ཙམ་དུའང་། །ཁྱེད་ཀྱི་ཐུགས་རྗེའི་བཀོད་པས་མ་ཁྱབ་པ། །ནམ་ཡང་སྲིད་མིན་འགོག་མེད་རྫུ་འཕྲུལ་ལགས། །ཨེ་མའོ་ཁྱོད་ཀྱི་ཐུགས་རྗེའི་ནུས་སྟོབས་ནི། །སེ་གོལ་ཡུན་ལའང་ཁམས་གསུམ་སྒྲོལ་ནུས་པའི། །མྱུར་བའི་ཤུགས་དང་བསྒྲུན་བྲན་མཐུ་སྟོབས་དཔུངས། །བྲི་གང་མེད་དེ་ཁྱེད་ཀྱི་ཕྲིན་ལས་ལགས། །ཨེ་མའོ་ཤེས་བྱའི་ཆོས་ཚུལ་ཇི་སྙེད་ཀུན། །ཁྱེད་ཐུགས་ཟབ་མོའི་འཇིངས་ལས་བྱུང་བའི་ཕྱིར། །ཆ་ཤས་ཚིག་འབྲུ་ཙམ་གྱིས་གདུལ་བྱའི་རྒྱུད། །བདེ་བླག་གྲོལ་བ་ཁྱེད་ཀྱི་འགྲོ་དོན་ལགས། ཨེ་མའོ་རྒྱལ་བའི་དཀྱིལ་འཁོར་ཕྱོགས་བཅུའི་ཞིང་། །ཀུན་ཁྱབ་ཀུན་ཏུ་ཕན་བདེའི་མཛད་ཕྲིན་དག །ཁྱོད་ཀྱི་ཐུགས་རྗེའི་འོད་ཟེར་ཉག་གཅིག་ལས། །བྱུང་ཡང་འདུ་འགོད་སྤྲོས་པས་

[Full Size]

བདེན་པ་ལགས། །ཨེ་མའོ་དཀོན་མཆོག་མ་ལུས་ཁྱེད་ཁོ་ནར། །འདུས་ན་སྐྱབས་གནས་སུ་ཞིག་ཅི་ཕྱིར་འཚོལ། །བདག་སོགས་མེད་སྣང་འཁྲུལ་པའི་འཁོར་རྒྱུན་འདི། །མཆོད་དེ་སྲིད་ཁྱེད་ཀྱིས་སྐྱབས་མཛད་གསོལ།། ༈ །།སྐབས་འདིར་ཕྱི་ནང་གསང་བ་ཡི། །མཎྜལ་མཆོད་པ་འདི་བཞིན་འབུལ།། ༈ །།ཨོཾ་ཨཱཿཧཱུྃ། གླིང་བཞི་འཇིག་རྟེན་རབ་འབྱམས་རྒྱུད་མཚམས་སྦྱོར། །རབ་འབྱམས་རྒྱ་མཚོའི་ཞིང་གི་འབྱོར་པའི་ཚོགས། །མ་ལུས་བློ་ཡི་བླངས་ཏེ་འབུལ་ལགས་ན། །དེ་སྙེད་འགྲོ་ཀུན་ཐུགས་རྗེས་བཟུང་དུ་གསོལ། །བདག་ལུས་ལོངས་སྤྱོད་བདོག་པ་ཅི་མཆིས་དང་། །ཕུང་ཁམས་སྐྱེ་མཆེད་འཕྲལ་ཡུན་འདུན་མར་བཅས། །བདག་ཏུ་བཟུང་བའི་དངོས་པོར་གྱུར་ཚད་ཀུན། །འབུལ་གྱི་བདག་འཛིན་ཞི་བར་བྱིན་གྱིས་རློབས། །དངོས་དང་དངོས་མིན་མཐའ་ལས་ཡོངས་གྲོལ་ཞིང་། །སྐྱེ་འགག་གནས་དང་འགྲོ་འོང་རྟག་ཆད་ཀྱི། །

[Full Size]

མིང་མཚན་ལས་འདས་གནས་ལུགས་མཎྜལ་མཆོད། །ཕུལ་བས་བླ་མ་མཆོག་དང་དབྱེར་མེད་ཤོག །གུ་རུ་རཏྣ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ།། ༈ །།དེ་ནས་བླ་མའི་དཀྱིལ་འཁོར་དང་། རང་སེམས་གཤིས་གདངས་རྩལ་གསུམ་པོ། །ཡེ་ནས་དབྱེར་མེད་ཤེས་པའི་ངང་། འཛབ་བསྙན་འདི་ནི་ཅི་འགྲུབ་བཟླ། །ཨོཾ་ཨཱཿཧཱུྃ་གུ་རུ་རཏྣ་སརྦ་སིདྡྷི་ཧཱུྃ། རིག་པ་མ་བཅོས་མ་ཡེངས་པས། །བཟླས་པ་བརྒྱ་སྟོང་ཁྲི་འབུམ་བཟླ། །བླ་མ་རྣམས་ཀྱི་གནས་སུ་འབྲུ། །གསུམ་ལས་འོད་ཟེར་དཀར་དམར་མཐིང་། །འབྱུང་སྟེ་རང་གི་གནས་གསུམ་ཐིམ། །སྒོ་གསུམ་ལས་ཉོན་སྒྲིབ་ཚོགས་དག །སྐུ་གསུང་ཐུགས་དབང་བྱིན་བརླབས་དང་། །དངོས་གྲུབ་ཡོངས་རྫོགས་ཐོབ་པར་དམིགས། །བསྙེན་སྒྲུབ་བྱེ་བ་ས་ཡ་ལས། །ཐ་མའི་གསོལ་འདེབས་ལན་གཅིག་གི། །ནུས་པ་འབུམ་ཕྲག་ཆར་མི་ཕོད།

[Full Size]

ལམ་ཟབ་བླ་མའི་དབང་ཐོབ་ན། །མྱུར་བ་ཉིད་དུ་མངོན་སངས་རྒྱ། །ཞེས་སོགས་རྒྱུད་ལུང་བརྗོད་མི་ལང་། །ཕན་ཡོན་ཉམས་ལེན་བརྩོན་ལ་རེག །ཐུན་མཚམས་གཏོར་མ་བདུད་རྩི་ཡི། །མཆོད་པ་འདིས་ཀྱང་ཚོགས་ཆེན་འཕེལ། །བདག་ཉིད་ལྷར་གསལ་ཐུགས་ཀའི་ཧཱུྃ་ཡིག་ལས། །ཨོཾ་ཨཱཿཧཱུྃ་འཕྲོས་བདུད་རྩི་གཏོར་མར་བཅས། །མ་དག་འབག་རྩོགས་སྐྱོན་སྦྱང་ཡེ་ཤེས་ཀྱི། བདུད་རྩིའི་རྒྱ་མཚོ་འདོད་ཡོན་ཕུན་ཚོགས་གྱུར། ཨོཾ་ཨཱཿཧཱུྃ། རང་བཞིན་གསལ་མདངས་ཐབས་མཆོག་གཏོར་མ་དང་། །ངོ་བོ་སྟོང་ཉིད་ཤེས་རབ་བདུད་རྩི་ཆེ། །གཉིས་མེད་ཏིང་འཛིན་མཐུ་ཡིས་བྱིན་རླབས་ནས། །རྗེ་བཙུན་བླ་མའི་ཚོགས་ལ་མཆོད་པར་འབུལ། །ཡི་དམ་ལྷ་དང་མཁའ་འགྲོ་ཆོས་སྲུང་རིགས། །མཆོད་འོས་ཀུན་ལ་མཆོད་པའི་སྤྲིན་ཕུལ་བས། །བྱང་ཆུབ་སྒྲུབ་པའི་འགལ་རྐྱེན་ཞི་བ་དང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཨོཾ་གུ་རུ་

[Full Size]

དེ་ཝ་ཌཱ་ཀི་ནཱི་དྷརྨ་པཱ་ལ་ས་པཱ་རི་ཝཱ་ར་ཨི་དཾ་བ་ལིངྟ། ཨ་མྲྀ་ཏ་པཱུ་ཛ་ཁ་ཁཱ་ཧི་ཁཱ་ཧི།། ༈ །།དེ་ནས་སྐབས་འདིར་འདོད་དོན་གྱི། །གསོལ་གདབ་ཐུགས་རྗེའི་ཕྲིན་ལས་ལ། །བསྐུལ་བའི་ཚིག་འདི་དད་གུས་དང་། གདུང་བའི་ཤུགས་བསྐྱེད་ནན་ཏན་བྱའོ། །ཕྱོགས་དུས་རྒྱལ་བ་ཐུགས་རྗེའི་མངའ་བདག་ཀུན། །ཡོངས་ཟླུམ་བདག་སོགས་སྙིགས་དུས་གདུལ་བྱའི་ཚོགས། འདུལ་མཛད་རྗེ་བཙུན་བླ་མ་ཚར་དངར་རྣམས། །མཁྱེན་བརྩེ་ཡེ་ཤེས་གཟིགས་པ་སྒྲིབ་མེད་ལ། །བདག་སོགས་རྨོངས་པས་སྙན་བསྐུལ་མི་འཚལ་ཡང་། །ལྔ་བརྒྱ་ཐ་མའི་དུས་ཀྱི་ངང་ཚུལ་དང་། །རིན་ཆེན་བསྟན་པ་གཟུགས་བརྙན་ལ་སྤྱོད་པའི། །རྣམ་འགྱུར་མི་བཟད་ངན་པའི་སྣང་ཚུལ་འདི། །མཁྱེན་པའི་སྤྱན་ལྡན་རྣམས་ཀྱིས་གཟིགས་བཞིན་དུ། །ཐུགས་རྗེའི་ནུས་སྟོབས་བཏང་སྙོམས་མི་འཇོག་ཅིང་། །རྨུ་རྒོད་གདུལ་བྱ་ཡལ་བར་

[Full Size]

མ་དོར་བར། །གདུལ་དཀའ་འདུལ་བའི་ཕྲིན་ལས་དུས་ལ་བབས། །སྣོད་བཅུད་འབྱུང་འཁྲུག་འཕོ་འགྱུར་རྦ་ཀློང་གིས། །སྐྱེ་འགྲོ་བཟོད་དཀའི་སྡུག་བསྔལ་དུ་མས་གཟིར། །ནད་མུག་འཁྲུག་རྩོད་འབྱུང་པོའི་འཚེ་སོགས། །མ་ལུས་མྱུར་དུ་ཞི་བར་བྱིན་གྱིས་རློབས། །བསྟན་ལ་ཞུགས་རྣམས་ཆགས་སྡང་ཀུན་སློང་གིས། །རྒྱུད་ཀྲུག་སྡོམ་གསུམ་རིང་དོར་བག་མེད་ཀྱི། །སྤྱོད་པས་དུས་འདའ་ཐོས་བསམ་སྒོམ་མི་བརྩོན། །མཐའ་དག་ཆོས་བཞིན་སྤྱོད་པར་བྱིན་གྱིས་རློབས། །རྒྱུ་འབྲས་དམ་སྡོམ་རིམ་གཉིས་རྒྱང་བསྲིང་ཞིང་། ཁ་ན་མ་ཐོའི་ཟས་དང་སྤྱོད་པས་གཡེངས། །དུག་གསུམ་མེ་འབར་རང་གཞན་རྒྱུད་བསྲེག་པའི། །ཆོས་གཟུགས་ཆོས་ལ་བསྒྱུར་བར་བྱིན་གྱིས་རློབས། །སྒྲུབ་རྒྱུད་རྣལ་འབྱོར་སྤྱོད་པའི་གང་ཟག་རྣམས། །ཟག་བཅས་ལམ་དང་སྟོང་ལྟས་མི་བསླུ་བར། །བདེ་སྟོང་ཟུང་འཇུག་

[Full Size]

ཡེ་ཤེས་ཕྱག་རྒྱ་ཆེ། །མ་ནོར་མངོན་དུ་འགྱུར་བར་བྱིན་གྱིས་རློབས། །ཡོན་ཏན་ལྟར་སྣང་ལམ་རྟགས་ཕྲ་མོ་ལ། །ཞེན་འདོད་ངར་འཛིན་ཁོང་སྲན་མི་ཞུགས་པར། །ས་ལམ་རྣལ་འབྱོར་བཞི་འབྲས་མཐའ་ཕྱིན་ཏེ། །སྐུ་བཞི་དབྱེར་མེད་འགྲུབ་པར་བྱིན་གྱིས་རློབས། །ཚེ་འདིའི་འདོད་དོན་དངོས་གྲུབ་ཕྲ་མོ་དང་། །ཆོས་བརྒྱད་ཁོང་དུ་བཅངས་པའི་འགྲོ་དོན་སོགས། །དོན་གཉིས་འདྲ་མིན་བདུད་ཀྱིས་མི་བསླུ་བར། །མཆོག་དངོས་ཡང་དག་འགྲུབ་པར་བྱིན་གྱིས་རློབས།། ༈ །།དེ་ནས་མཇུག་གི་ལས་རིམ་རྣམས། །བྱ་བའམ་གལ་ཏེ་དུས་བཟང་གི། །ཚོགས་མཆོད་བྱ་བར་སྤྲོ་འཛོམ་ན། །སྡིག་པས་བསྒྲུབ་པ་མ་ཡིན་པའི། །ཚོགས་ཀྱི་ལོངས་སྤྱོད་གང་འབྱོར་བཤམས། །ཐོད་པའི་བདུད་རྩི་འཐོར་བྱས་ལ། །བསངས་སྦྱངས་བྱིན་རླབས་འདི་བཞིན་བྱའོ། །ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། བདག་ཉིད་ཐུགས་ཀའི་

[Full Size]

ཧཱུྃ་ལས་རྃ་ཡྃ་ཁྃ། འཕྲོས་པ་ལས་བྱུང་ཡེ་ཤེས་མེ་རླུང་ཆུས། །ཚོགས་ཀྱི་འབག་རྩོགས་དྲི་མ་བསྲེགས་གཏོར་བཀྲུས། །ཨོཾ་ཨཱཿཧཱུྃ་འཕྲོས་སྦྱང་རྟོགས་སྦར་བ་ཡིས། །ཚོགས་རྫས་ངོ་བོ་ཡེ་ཤེས་བདུད་རྩི་ལ། །རྣམ་པ་གཟུགས་སྒྲ་དྲི་རོ་རེག་བྱ་ཆོས། །ཟག་མེད་འདོད་པའི་ཡོན་ཏན་བསམ་ཡས་ཀྱིས། །སྐྱབས་མཆོག་བླ་མའི་ཚོགས་རྣམས་མཉེས་བྱེད་གྱུར། །ཨོཾ་ཨཱཿཧཱུྃ། དེ་ནས་ཚོགས་མཆོད་མགྲོན་གྱུར་རྣམས། །སྤྱན་དྲངས་ཕྱིར་དུ་དད་གུས་ཀྱིས། །སྤོས་བསྲེག་ཅང་ཏེལ་དྲིལ་བུ་དང་། དབྱངས་སྙན་མགྲིན་གཅིག་འདི་སྐད་གྱེར། ཧཱུྃ། གནས་རང་བཞིན་ལྷུན་གྲུབ་ཆོས་ཀྱིས་དབྱིངས། །ཡུལ་དངོས་འཛིན་བྲལ་བའི་ཞིང་ཁམས་ནས། །དོན་ཆོས་སྐུ་སྤྲོས་དང་བྲལ་བའི་གདངས། །རྗེ་ཡེ་ཤེས་སྒྱུ་འཕྲུལ་བླ་མ་རྣམས། །གནས་དམ་ཚིག་གཙང་མའི་ཚོགས་ཁང་འདིར། །དུས་ཁྱད་པར་ཅན་གྱི་དགེ་མཚན་ལ། །བུ་མོས་གུས་གདུང་བས་སྤྱན་འདྲེན་ན། །ཚོགས་

[Full Size]

འཁོར་ལོའི་འདུ་བར་གཤེགས་སུ་གསོལ། །སྐུ་གསལ་སྟོང་འཇའ་འོད་ལམ་སེ་ལམ། །གསུང་རྡོ་རྗེའི་མགུར་དབྱངས་ཀྱུ་རུ་རུ། །ཐུགས་བདེ་སྟོང་ཏིང་འཛིན་ཆམས་སེ་ཆམ། །འདི་བྱིན་རླབས་འབེབ་ཅིང་གཤེགས་སུ་གསོལ། །གནས་གང་ཟག་མཆོད་རྫས་འཛོམ་པ་ཡིན། །དུས་ཚོགས་ཀྱི་འཁོར་ལོའི་དགའ་སྟོན་ལ། །རྗེ་བླ་མ་ཡི་དམ་མཁའ་འགྲོ་བཅས། །ཚོགས་མཆོད་པའི་མགྲོན་དུ་གཤེགས་སུ་གསོལ། གུ་རུ་དེ་ཝ་ཌཱ་ཀི་ནི་ས་མ་ཡ་ཨ་ཝེ་ཤ་ཡ་ཧྲིང་ཧྲིང་ཛཿ ༈ །།དེ་ནས་ཚོགས་ཀྱི་ཞལ་ཟས་ཀུན། །ཚན་པ་གསུམ་དུ་སྤྲོས་བཅས་ཏེ། །ཕུད་རྣམས་རིན་ཆེན་སྣོད་དུ་སྤུངས། །བླ་མའི་མཎྜལ་དྲུང་དུ་འབུལ། །བར་ས་རྣལ་འབྱོར་དཔོན་སློབ་རྣམས། །དངོས་གྲུབ་རྫས་སུ་རོལ་རྒྱུར་བཞག །ལྷག་རྣམས་ཐོད་པའི་སྣོད་དུ་སྤུངས། །ལྷག་མའི་མགོན་ལ་འབུལ་ཕྱིར་བཤམས། །ཐོད་པའི་བདུད་རྩིས་ཁྱབ་པར་བྲན།། ༈ །།ཧོཿ རྗེ་བཙུན་བླ་མ་མཆོག་

[Full Size]

དང་སྤྲུལ་པའི་ལྷ། །ཡི་དམ་མཁའ་འགྲོ་ཆོས་སྲུང་བཅས་རྣམས་ལ། །འདོད་ཡོན་རྨད་བྱུང་ཚོགས་ཀྱི་མཆོད་པ་འབུལ། །ཟག་མེད་དགྱེས་པ་ཆེན་པོར་རོལ་བར་མཛོད། །རྩ་རྒྱུད་བླ་མའི་ཐུགས་དམ་སྐོངས་ནས་ཀྱང་། ཚེ་གཅིག་སངས་རྒྱས་དངོས་གྲུབ་སྩལ་དུ་གསོལ། །ཡི་དམ་ལྷ་ཚོགས་ཐུགས་དམ་སྐོངས་ནས་ཀྱང་། །མཆོག་ཐུན་དངོས་གྲུབ་མ་ལུས་སྩལ་དུ་གསོལ། །དཔའ་བོ་མཁའ་འགྲོའི་ཐུགས་དམ་སྐོངས་ནས་ཀྱང་། །སྣམ་བཞིའི་ཕྲིན་ལས་ཐོགས་མེད་སྒྲུབ་མཛད་གསོལ། །ཆོས་སྐྱོང་སྲུང་མའི་ཐུགས་དམ་སྐོངས་ནས་ཀྱང་། །བསྟན་ལ་གནོད་པའི་དགྲ་གེགས་སྒྲོལ་མཛད་གསོལ། །ག་ཎ་ཙཀྲ་པཱུ་ཛ་ཁཱ་ཧི།། ༈ །།བར་འདིར་སྒྲུབ་པ་པོ་རྣམས་ལ། །དངོས་གྲུབ་ཚོགས་ཀྱི་ལོངས་སྤྱོད་བཀྱེ། ཕུང་ཁམས་ལྷ་ཡི་དཀྱིལ་འཁོར་ལ། །མཆོད་པའི་འདུ་ཤེས་ལྡན་པར་རོལ། །ཚོགས་ཀྱི་དམ་ལས་མི་འདའ་ཞིང་། །བག་མེད་ཐ་མལ་སྤྱོད་པ་སྤངས། །རྡོ་རྗེའི་གླུ་སོགས་བྱ་བ་ཡང་། །རྡོ་རྗེའི་སྐུ་ནི་མི་ཕྱེད་པའམ།

[Full Size]

ངེས་པའི་དོན་ལ་འཇུག་པའི་ཕྱིར། །གྲུབ་ཐོབ་རྣམས་ཀྱི་རྡོ་རྗེའི་མགུར། ཏེ་ལོ་ཞབས་ཀྱི་གངྒ་མ། །ནཱ་རོའི་ལྟ་བུ་མདོར་བསྡུས་དང་། །ཆོས་དྲུག་དྲིལ་བའི་མགུར་སོགས་དང་། །མར་པའི་སྟོང་ཉིད་སྙིང་རྗེ་མ། །ནང་གི་ཡན་ལག་བདུན་པ་སོགས། །མི་ལའི་ཐིམ་པ་ཉེར་བརྒྱད་དང་། །སྟོན་པ་དབུས་བཞུད་ལ་སོགས་དང་། །སྒམ་པོའི་བདེ་ཆེན་ཆོས་ཉིད་མ། །གསོལ་འདེབས་གངས་དཀར་མ་ལ་སོགས། །གཞན་ཡང་རྡོ་ཧ་བརྒྱད་སྐོར་དང་། །དམ་པའི་གྲུབ་ཐོབ་ལྔ་བཅུའི་གླུ། །ལ་སོགས་ངེས་དོན་རྟོགས་མགུར་རིགས། །དབྱངས་དང་བཅས་པའམ་མེད་ན་ཡང་། །གསལ་དག་སྙན་པས་བསྒྲགས་པ་ན། །བྱིན་རླབས་ཕེབས་དང་མཁའ་འགྲོ་དགྱེས། །རྣལ་འབྱོར་ཉམས་རྟོགས་འཕེལ་བར་བཤད། །དེ་མ་ཡིན་པ་འཇིག་རྟེན་པའི། །གླུ་གར་ཀུ་ཅི་ཅོད་པ་དང་། ཆོས་མིན་བག་མེད་སྤྱོད་པའི་རིགས། །བྱས་ན་ཚོགས་ཀྱི་

[Full Size]

དམ་ཉམས་ཤིང་། །བཀའ་སྲུང་མཁའ་འགྲོ་ཁྲོས་པ་ཡི། །བཀའ་ཆད་འཕྲལ་དུ་འབྱུང་བར་གསུངས། །དེས་ན་ཚུལ་བཞིན་སྤྱོད་པ་གཅེས།། ༈ །།ཚོགས་ལ་རོལ་བའི་རྗེས་ཐོག་དེར། །ཚོགས་ལྷག་གྲལ་གྱི་མཐའ་ལོགས་སུ། །མན་ཛིའི་ཁར་བཞག་བདུད་རྩིས་བྲན། །འབྲུ་གསུམ་ལན་གསུམ་བརྗོད་པ་དང་། ཨོཾ་ཨ་ཀཱ་རོ་མུ་ཁཾ། སརྦ་དྷརྨཱ་ནཾ། ཨཱདྱ་ནུཏྤནྣ་ཏྭཏ། ཨོཾ་ཨཱཿཧཱུྃ་ཕཊ་སྭཱ་ཧཱ། ཞེས་པའི་སྔགས་ཀྱིས་བྱིན་རླབས་པས། ལྷག་མའི་མགྲོན་རིགས་མཆོག་དམན་ཀུན། །རང་རང་ཅི་འདོད་རྫས་གྱུར་དམིགས། ཧཱུྃ། སྔོན་ཚེ་རྒྱལ་བ་རིག་འཛིན་གྲུབ་མཆོག་གི། །སྤྱན་སྔར་ཁས་བླངས་དམ་ཚིག་གཉེར་བཞེངས་པའི། །གནས་ཡུལ་དུར་ཁྲོད་རྒྱུ་བའི་ཌཱ་ཀི་མ། །ཡེ་ཤེས་ལས་དང་འཇིག་རྟེན་སྣ་ཚོགས་ཀྱི། །མཁའ་འགྲོ་ཤུགས་འགྲོ་བྲན་དང་ཡང་གཡོག་བཅས། །གཞན་ཡང་འཇིག་རྟེན་ཁམས་སྐྱོང་མཐུ་བོ་ཆེ། །བསྟན་པ་བསྲུང་

[Full Size]

ཞིང་རྣལ་འབྱོར་སྐྱོང་བའི་ཚོགས། །མ་ལུས་རྡོ་རྗེའི་ཕཾ་ཕབ་ཚོགས་ཀྱི་ལྷག །དམ་ཚིག་བདུད་རྩི་འདོད་ཡོན་ཕུན་ཚོགས་འདི། །བཞེས་ནས་སངས་རྒྱས་བསྟན་པ་དྲི་མེད་སྐྱོང་། །ཆོས་བཞིན་སྤྱོད་པའི་གང་ཟག་མཐུན་རྐྱེན་སྒྲུབས། །རྒྱལ་ཁམས་བདེ་ཞིང་སྦྱིན་བདག་བར་ཆད་ཞི། །བསྟན་ལ་གནོད་པའི་བདུད་སྡེ་ཐལ་བར་ལྷོགས། །རྣལ་འབྱོར་བདག་གི་ཇི་ལྟར་བཅོལ་བ་ཡི། །ཕྲིན་ལས་མ་གཡོལ་མྱུར་དུ་གྲུབ་མཛོད་ལ། །སྒྲུབ་རྒྱུད་བསྟན་པ་བསྲུང་ཞིང་སྐྱོང་མཛོད་ཅིག །བཛྲ་ཨ་ར་ལི་ཌ་ཀི་ནི་སརྦ་ས་མ་ཡ། །ཨུ་ཙིཊྚ་བ་ལིངྟ་ཁཱ་ཧི། ཞེས་བརྗོད་ལྷག་ལ་བཤལ་ཆུར་བཅས། གཙང་ཞིང་མཐོ་བའི་ཕྱོགས་སུ་འབུལ།། ༈ །།དེ་ནས་མཇུག་གི་ཆོ་ག་ལས། །དང་པོར་དངོས་གྲུབ་བླང་བ་ནི། བྱིན་རླབས་འབྱུང་གནས་རྩ་རྒྱུད་བླ་མའི་ཚོགས། །ཡེ་ཤེས་ཐུགས་རྗེ་རྒྱུན་ཆད་མ་མཆིས་ཀྱང་། །དེང་འདིར་མཆོད་ཅིང་

[Full Size]

བསྒྲུབ་པའི་དོན་འབྲས་བུ། །སྒྲུབ་མཆོག་བདག་ལ་དངོས་གྲུབ་ཆར་ཆེན་ཕོབ། །འཆི་མེད་ཚེ་དང་ཆོས་མཐུན་ལོངས་སྤྱོད་དང་། །ཏིང་འཛིན་ཉམས་རྟོགས་གོང་འཕེལ་ས་ལམ་བགྲོད། །མཆོག་གི་དངོས་གྲུབ་མྱུར་དུ་སྩལ་དུ་གསོལ། །ཀ་ཡ་ཝཀྩིཏྟ་སརྦ་སིདྡྷི་ཕ་ལ་ཧོ།། ༈ །།བླ་མའི་གཏོར་མ་བདུད་རྩི་བཅས། །དངོས་གྲུབ་རྫས་སུ་མྱང་བར་བྱའོ། །དེ་ནས་ཆོ་གའི་ཉེས་བྱས་བཤགས། །བདག་ཅག་མ་རིག་འཁྲུལ་པའི་བག་ཆགས་མཐུས། །བླ་མ་མཆོད་པའི་ལས་ལ་འགལ་འཁྲུལ་དང་། །སྒོ་གསུམ་ཉེས་དང་ཡོ་བྱད་མ་དག་སོགས། །ཅི་མཆིས་ཆོས་དབྱིངས་ཀློང་དུ་བཟོད་པར་གསོལ། །ཨོཾ་བཛྲ་སཏྭ་ས་མ་ཡ༴ དེ་ནས་དགེ་བའི་རྩ་བ་ནི། འགྲོ་ལ་བསྔོ་ཞིང་སྨོན་ལམ་གདབ། །བདག་གིས་དགེ་བ་ཀུན་ལས་མཆོག་རབ་ཕུལ། །དཔལ་ལྡན་བླ་མའི་གསང་གསུམ་དཀྱིལ་འཁོར་ཆེ། །བསྒྲུབས་ཅིང་མཆོད་པའི་དགེ་འབྲས་

[Full Size]

བླ་ན་མེད། །འདི་དང་འཁོར་འདས་ལམ་གསུམ་རྣམ་དཀར་ཀུན། །གཅིག་བསྡོམ་ཆོས་མིན་བསམ་པས་མ་བསླད་པར། །མཁའ་ཁྱབ་འགྲོ་ཀུན་རྫོགས་བྱང་ཐོབ་ཕྱིར་བསྔོ། །ལྷག་བསམ་མཐུ་དང་བླ་མའི་བྱིན་རླབས་ཀྱིས། །ནམ་མཁས་གར་ཁྱབ་དྲིན་ཅན་ཕ་མའི་ཚོགས། །ལས་ཉོན་འཁྲུལ་འཁོར་སྡུག་བསྔལ་ཤུགས་དྲག་གི། །རྒྱུ་རྐྱེན་འབྲས་བུར་བཅས་པ་རྒྱུན་ཆོད་ནས། །སྐུ་བཞི་ཡེ་ཤེས་རྡོ་རྗེ་བླ་མ་ཡི། །གོ་འཕང་མྱུར་ཐོབ་སྲིད་ཞི་གཏན་སྒྲོལ་ཤོག། ༈ །།དེ་ནས་རྟེན་འབྲེལ་མེ་ཏོག་གི། །ཆར་བབས་བཀྲ་ཤེས་གླུ་དབྱངས་བྱ།། ༈ །།ཆོས་དབྱིངས་མི་འགྱུར་རྡོ་རྗེའི་དཀྱིལ་འཁོར་གྱི། །ཁྱབ་བདག་རིགས་མཆོག་རྡོ་རྗེ་འཆང་དབང་གི། །ཐུགས་རྗེ་ཡེ་ཤེས་རྡོ་རྗེ་ཀུན་ཁྱབ་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག། །།ཐོག་མེད་མཁྱེན་པའི་ཤེས་རབ་ཕུལ་བྱུང་གིས། །ཆོས་ཀུན་གནས་ལུགས་ཤེས་རབ་ཟག་མོས་

[Full Size]

གཟིགས། །གྲུབ་དབང་ཏེ་ལོ་ཤེས་རབ་བཟང་པོ་ཡི། །བཀྲ་ཤིས་དེས་ཀྱང་དེང་། །ངེས་གསང་མཆོག་ཞུགས་ཡེ་ཤེས་མཁའ་འགྲོ་ཡིས། །ལུང་བསྟན་བླ་མས་ཡེ་ཤེས་མངོན་གྱུར་མཛད། མཁས་གྲུབ་ནཱ་རོ་ཡེ་ཤེས་དངོས་གྲུབ་ཀྱི། །བཀྲ་ཤིས་དེས་ཀྱང་། ཐེག་མཆོག་གསང་སྔགས་ཆོས་ཀྱི་བང་མཛོད་འཛིན། །རྒྱུད་ལུང་མན་ངག་ཆོས་ཀྱི་འཁོར་ལོ་བསྒྱུར། །སྒྲ་བསྒྱུར་མར་པ་ཆོས་ཀྱི་བློ་གྲོས་ཀྱི། །བཀྲ་ཤིས། སྒྲུབ་རྒྱུད་པད་ཚལ་བཞད་པའི་གངས་ཅན་ལྗོངས། །ཏིང་འཛིན་གེ་སར་གཞད་པའི་རྩེར་སོན་པ། །དབང་ཕྱུག་མི་ལ་གཞད་པ་རྡོ་རྗེའི་ཡི། བཀྲ་ཤིས་དེས། ཟས་གཙང་སྲས་པོ་འཛམ་གླིང་སྒྲོན་མཆོག་གི། །ངེས་དོན་བསྟན་པས་འཛམ་གླིང་ཁྱབ་མཛད་པའི། །ཕྲིན་ལས་མཉམ་མོ་འཛམ་གླིང་དྲགས་པ་ཡི། །བཀྲ་ཤིས་དེས། བཤད་སྒྲུབ་རྒྱུད་པའི་བླ་མ་ཐུགས་རྗེའི་གཏེར། །དྲིན་ཅན་རྩ་བའི་བླ་མ་ཡིད་བཞིན་ནོར། །དབྱེར་མེད་རང་རིག་

[Full Size]

བླ་མ་མངོན་གྱུར་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག། ༈ །།དེ་ནས་བླ་མའི་དཀྱིལ་འཁོར་རྣམས་ཐམས་ཅད་གཙོ་བོ་ཉིད་ལ་ཐིམ། །དེ་ཉིད་སྐར་མདའ་རྒྱུགས་པ་བཞིན། །ཚུར་བྱོན་བདག་གི་སྤྱོ་བོར་ཐིམ། །དེ་རྗེས་རང་ཉིད་རྡོར་སེམས་ཀྱང་། མཐའ་ནས་རིམ་འདུས་ཧཱུྃ་ལ་བསྡུ། །ཧཱུྃ་ཡང་གྱེན་རྫོགས་ཐིག་ལེ་དང་། །དེ་ཡང་མཁའ་ལ་སྤྲིན་ཡལ་ལྟར། །གྱུར་པའི་ངང་ནས་དུས་གསུམ་གྱི། །རྟོག་ཚོགས་སྤྲིན་བྲལ་མཁའ་བཞིན་བཞག །བླ་མ་ཆོས་སྐུའི་རང་ཞལ་མཇལ། །སླར་ཡང་རྗེས་ཐོབ་རིག་གདངས་ལས། །སྒོ་གསུམ་ལྷ་དང་བླ་མ་ནི། དབྱེར་མེད་རང་རིག་ཡེངས་མེད་བསྐྱངས། །ཨ་འཐས་འཁྲུལ་ཕྱིར་མི་འབྲང་ཞིང་། །ཆོས་བརྒྱད་ཞེན་འཁྲིས་རྦད་ཀྱི་བཅད། །ཚེ་འདིའི་བྱ་བ་ལེངས་ཀྱི་བཏང་། །སྐྱིད་སྡུག་གང་བྱུང་། ཐུགས་རྗེར་བསམ། །མོས་

[Full Size]

གུས་རྒྱུན་ཆད་མེད་པ་ནི། །བླ་མ་སྒྲུབ་པའི་དམ་ཚིག་གོ། །དེ་ལྟར་རྒྱལ་བའི་བཀའ་གསང་རྒྱ་ཆའི་ཡང་སྙིང་བཅུད། །གསང་སྔགས་རྩ་བ་རྡོ་རྗེ་སློབ་དཔོན་ཉིད་སྒྲུབ་པའི། །ལས་རིམ་འདི་ནི་དཀྱིལ་འཁོར་རྒྱ་མཚོ་མ་ལུས་པའི། །མཆོག་དང་ཕུལ་གྱུར་ཡང་རབ་སྐལ་བཟང་སྤྱོད་ཡུལ་ལོ། །ཀྱེ་མ་དིང་སང་ཆོས་ཀུན་རི་མོའི་མར་མེ་ལྟར། །སྣང་ཡང་དོན་བྱེད་ནུས་པས་དབེན་ཏེ་གཟུགས་བརྙན་ཙམ། །ཁྱད་པར་སྔགས་ཀྱི་སྨིན་གྲོལ་ཕྱག་ལེན་བྲོ་པ་ཡི། །གླུ་གར་བཞིན་དུ་ཟང་ཟིང་མང་བྱེད་དོན་གྱིས་སྟོངས། །དེ་ཕྱིར་ཚིག་ཉུང་དོན་གཙོར་སྟོན་པ་གྱིས་ཤིག་ཅེས། །འགྲོ་བའི་མགོན་པོ་ཟླ་འོད་གཞོན་ནུ་སླར་ཡང་དེང་། སྙིགས་དུས་སྒྲུབ་རྒྱུད་བསྟན་པའི་དཔལ་དུ་མངོན་བྱོན་པའི། མཆོག་གི་སྤྲུལ་སྐུ་ཐུབ་བསྟན་རིན་ཆེན་བཟང་པོའི་དཔལ། །གང་གི་བཀའ་འཆིད་ཛམྦུའི་གསེར་གྱི་ཅོད་པན་ཉིད། །གཙུག་ཏུ་བཅིངས་

[Full Size]

ནས་སྒྲུབ་རྒྱུད་བསྟན་པའི་ཞབས་རྟོགས་སུ། །སྨོན་པ་བཟང་ལྡན་སྣ་ཚོགས་རང་གྲོལ་ཀུ་སཱ་ལིས། །པཀྵུའི་ཀླུང་འགྲམ་ཀུན་ཏུ་སྣང་བའི་རི་བོའི་སྤོར། །བཀོད་པའི་དགེ་བ་བྱང་སེམས་ཆ་ཤས་ཡོངས་རྫོགས་ཀྱི། །མཐུ་ནུས་མངོན་པར་གསལ་ངེས་ངེས་དོན་སྒྲུབ་རྒྱུད་བསྟན། །རབ་རྒྱས་ཡུན་གནས་དེ་འཛིན་སྐྱེས་བུ་ཏིང་འཛིན་འཕེལ། །སྐྱེ་དགུས་གཙུག་བསྟེན་ཀུན་ཀྱང་རྡོ་རྗེ་འཆང་འགྲུབ་ཤོག །མསྟུ་སརྦ་ཛ་ག་ཏམ། དྭི་ཤུདྡྷ་ཀྲྀཏྲ་ཤུ་བྷི། གཅིག་ཞུད།