 གཡུ་ཁོག་བྱ་བྲལ་བ་ཆོས་དབྱིངས་རང་གྲོལ་གྱི་གསུང་འབུམ།པོད། ཨཱཿ༽གཡུ་ཁོག་བྱ་བྲལ་བ་ཆོས་དབྱིངས་རང་གྲོལ།སི་ཁྲོན་མི་རིགས་དཔེ་སྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཡེ་ཤེས་བླ་མའི་བར་ལྡེབ་དང་ཟིན་བྲིས་སྐོར།ཡེ་ཤེས་བླ་མའི་བར་ལྡེབ་དང་ཟིན་བྲིས་སྐོར་བཞུགས། རང་ཤར་ལས། ཐུགས་རྗེའི་འབྲེལ་ཐག་མ་ཆད་ཅིང་། །བརྩེ་གདུང་རྒྱུན་མ་ཆད་པ་ཡི། །སློབ་དཔོན་སློབ་མའི་འབྲེལ་བའོ། །ཞེས་གསུངས། གྲུབ་ཐོབ་བིཪྺ་པས། འདྲེན་པ་གཞན་ལ་མི་ལྟོས་གདེངས་དང་ལྡན་གྱུར་ཀྱང་། །བཀའ་དྲིན་ཅན་གྱི་བླ་མ་སྤྱི་བོའི་གཙུག་ཏུ་བསྒོམ། །ཞེས་སོ། །ཕྱིའི་རུ་ཤན་སྐབས་མདུན་གྱི་ནམ་མཁར་དུས་གསུམ་སངས་རྒྱས་འདུས་པའི་བདག་ཉིད་མཚུངས་མེད་དྲིན་ཆེན་གྱི་བླ་མ་དེ་ཉིད་སྐུ་མདོག་མཐིང་ག་ཧེ་རུ་ཀ་ཡི་ཆས་ཅན་ཞལ་གཅིག་ཕྱག་གཉིས་སྤྱན་གསུམ། ཕྱག་གཡས་སྡིག་མཛུབ་མཛད་པ། གཡོན་ཐོད་ཁྲག་བསྣམས་པ། སྐུ་སྨད་ལ་སྟག་ཤམ་གསོལ་བ། དབུ་སྐྲ་ཐོར་ཚུགས་བཅིང་པ། ཞལ་རང་ལ་གཟིགས་ནས་བཞུགས་ཡོད་པ། དེ་ཡང་སྣང་ཆ་ནས་སྤྱན་གྱི་དཀར་ནག་དང་རྒྱན་གྱི་བྱེ་བྲག་སོགས་མ་འདྲེས་པར་གསལ་ཞིང་སྟོང་ཆ་ནས་འཇའ་ལུས་སྒྱུ་མའི་སྐུ་ཅན་ཆུ་ཟླ་ལྟ་བུ་སྣང་སྟོང་ཟུང་འཇུག་གི་སྐུར་སྐད་ཅིག་དྲན་རྫོགས་ཀྱི་ཚུལ་དུ་གསལ་མཐར་རང་ལ་བསྟིམ་ནས། སྐབས་སྐབས་སུ་མདུན་མཁར་གསལ་བའོ། ༈ །སྤྱིར་བྱིང་རྨུགས་དང་འཁྲུལ་འབྱམས། བྱེ་བྲག་འཁྲུལ་བ་དང་འབྱམས་པ་སོགས་བྱུང་ཚེ་སྡིག་མཛུབ་རང་གི་སྙིང་གར་གཏད་པ། སྤྱན་གསུམ་རང་ལ་ཧུར་གྱིས་གཟིགས་པར་བསྒོམས་པས་ཉམས་དེ་ལས་སད་པ་དང་འཁྲུལ་བ་གཏོར་བའི་དགོས་པ་ཡོད། ༈ རྡོ་རྗེའི་རྩེ་འདུག་སྐབས། ཧེ་རུ་ཀ་ཡི་སྐུ་ཆས་གོང་ལྟར་དང་། ཞབས་གཉིས་༼མངོན་བྱང་གི་བཞུགས་སྟངས་ཅན།༽མཉམ་པའི་སྟབས་ཀྱིས་བཞེངས་པ། ཆོས་ཀྱི་དབྱིངས་ལ་རང་བྱུང་རང་སྣང་གི་སྟོན་པ་དབྱིངས་ལས་ཤར་ཞིང་དབྱིངས་ལ་ཐིམ་པ་ཡིན་ཕྱིར་བསྡུ་རིམ་མི་དགོས་གསུངས། རྒྱས་གདབ་ཡན་ཆད་ལ་གསལ་ཚུལ་འདི་དང་འདྲ་ལ། འོད་ཞུ་བྱས་ནས་སྙིང་དབུས་སུ་ཆོས་སྐུ་གཞིར་གནས་ཀྱི་རིག་པ་དང་དབྱེར་མེད་དུ་འདྲེས་ནས་ཧཱུྃ་ཡིག་མཐིང་ནག་གཅིག་ཏུ་གྱུར་པ་སོགས་སོ། །རིགས་དྲུག་བསྲེག་སྦྱང་སྐབས་བླ་མའི་རྣལ་འབྱོར་ལྟར་གསལ་དགོས་གསུངས། ༈ གཞན་ཡང་ནད་གདོན་འཇིགས་བརྒྱད་ཞི་བར་འདོད་ན། སྙིང་གར་བླ་མ་དཀར་པོ་ལས་འོད་ཟེར་དཀར་པོ་འཕྲོས་པས་ཞི་བའི་ལས་མཛད་པར་བསམ་ལ་གསོལ་བ་གདབ། དེ་བཞིན་ཚེ་བསོད་ཡེ་ཤེས་རྒྱས་པར་འདོད་ན་ལྟེ་བར་བླ་མ་སེར་པོ། འདོད་དགུ་དབང་དུ་བྱེད་ན་མགྲིན་པར་བླ་མ་དམར་པོ། དགྲ་བགེགས་གནོད་བྱེད་ཚར་གཅོད་ན་ལག་མཐིལ་དུ་བླ་མ་ལྗང་གུ་ལས་འོད་ཟེར་མེ་མཚོན་ཐོག་གི་ཆར་པ་སྤྲོ། དབྱིངས་སུ་འཕོ་བར་འདོད་ན་བླ་མ་སྤྱི་གཙུག་ཏུ་བསྒོམ་པའི་ཐུགས་ཀར་རིག་པ་འཕོ་ཚུལ་གྲོང་འཕོ་གྲོང་འཇུག་ལྟར་དང་། ཡང་ན་རིག་པ་མིག་ནས་འཕོ་ཚུལ་སྐུ་དང་ཡེ་ཤེས་ལ་འཇུག་ལུགས་ལྟར་རོ། །གསལ་བའི་ཏིང་ངེ་འཛིན་སྐྱེ་བར་འདོད་ན་སྨིན་མཚམས་སུ་ཐིག་ལེ་དཀར་པོའི་ནང་དུ་བླ་མ་བསྒོམ། བདེ་བར་འདོད་ན་གསང་གནས་ཀྱི་ཐིག་ལེ་དམར་པོའི་ནང་དུ་བླ་མ་བསྒོམ། མི་རྟོག་པ་འདོད་ན་དབུ་མའི་ནང་དུ་ཐིག་ལེ་མཐིང་ག་ལ་བླ་མ་བསྒོམ་ནས་གསོལ་བ་གདབ་སྟེ། མདོར་ན་ཡིད་བཞིན་ནོར་བུ་ལྟར་གང་འདོད་པ་དེ་བཞིན་ཏུ་གསོལ་བ་བཏབས་པས་འགྲུབ་པ་ཡིན་ནོ། ༈ །ཡེ་ཤེས་བླ་མའི་རུ་ཤན། ཚིག་བདུན། མཚོ་དབུས་གེ་སར༴ རྒྱལ་བ་ཀུན་གྱི་སྤྱན་སྔར་ཐུགས་བསྐྱེད༴ སྔགས་དྲུག་ཕྱག་དྲུག༴ སྡེ་བརྒྱད་མཆོད་པ། རིག་འཛིན་རྩ་བརྒྱུད༴ སངས་རྒྱས་ཀྱི་བསྟན་པ་དར་བ༴ ས་ཕྱོགས་འདིར་གནས༴ ཀྭ་ཡེ་ཕ་རི༴ ལན་གསུམ། རླུང་རོ་བསལ། ཧཱུྃ་ཨོ་རྒྱན་ཡུལ་གྱི༴ དུས་གསུམ་སངས་རྒྱས་ཐམས་ཅད་ཀྱི་ངོ་བོ་སྐུ་བཞིའི༴ དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ༴ དཔལ་ལྡན་རྩ་བའི༴ ༀ་ཨ་ཧཱུྃཿ ལྕེ་དབང་རཾ་ཡིག་ལས་བྱུང༴ དབྱངས་གསལ་རྟེན་སྙིང་ལན་བདུན། བླ་མ་མཁྱེན༴སོགས་ནས་ངག་འདོན། ངོ་བོ་ཉིད་སྐུའི་གོ་འཕང་གི་སྐལ་བ་རྒྱུད་ལ་བཞག །བླ་མ་རྡོ་རྗེ་འཛིན་པ༴ སོགས་ལན་གསུམ་དང་། ལྷག་མེད་མྱ་ངན༴ སོགས་ལན་གསུམ་བྱ། དེ་ནས་རུ་ཤན་བྱ། དེ་ནས་ཉིན་དང་པོར་ཟབ་མདོ་ཚར་གཅིག་བཟློག་པ་མི་དགོས། ནམ་ཞིག་ཚེ་ཡི༴ ངག་འདོན་མཇུག་ཕུད། དཔལ་རིའི་སྨོན་ལམ་འདོན་སིདྡྷི་དབྱངས་བྱ། ༈ ཉིན་གཉིས་པ་ཕན་ཆད་རླུང་རོ་བསལ་བ་མན་ཆད་གོང་དང་འདྲ། ཟབ་མདོ་མི་དགོས། དེ་ལྟར་ཕྱིའི་རུ་ཤན་ཞག་སོ་ལྔ། ལུས་སྦྱང་བདུན། ངག་སྦྱང་ལ། རྒྱས་གདབ་བདུན། རྩལ་སྦྱང་བདུན། མཉེན་བཙལ་བདུན། ལམ་གཞུག་བདུན། སེམས་སྦྱང་བདུན། རིགས་དྲུག་བསྲེག་སྦྱང་སྤྱིར་མགོ་ནས་བཟུང་ནང་ནུབ་དང་ཐུན་མཚམས་རྣམས་སུ་འདོན། ཁྱད་པར་འདིར་ཞག་བཅུ་བཞི། རྣལ་དབབ་བཅུ་བཞི། སོར་གཞུག་གསུམ། ༈ སྤྱིར་སྔ་ཐུན་ཕྱི་ཐུན་གཉིས་རེ་དགོས། ཕྱི་ཐུན་ལ་སྐྱབས་སེམས་དང་བླ་མ་ཡང་ཏིག་གི་བླ་མའི་རིམ་པ་དངོས་གྲུབ་རྒྱ་མཚོའི་ཆོས་ཐམས་ཅད་རང་བཞིན་གྱིས་མ་སྐྱེས་པའི་ངང་ལས་ཞེས་སོགས། དར་ཅིག་གློད་ལ་སྒོམས་ཞེས་པའི་མཚམས་དེར་རུ་ཤན་བྱ། བསྔོ་སྨོན་བྱའོ། ༈ །སྤྱིར་འོག་མ་རྣམས་སྦྱངས་སྐབས་གོང་མ་རྣམས་ཀྱང་ཅུང་ཟད་རེ་བྱ། རྣལ་དབབ་ཕན་མི་དགོས། ༈ དཔལ་སྤྲུལ་རིན་པོ་ཆེའི་ཞལ་རྒྱུན་བླ་མ་ལུང་རྟོགས་ནས་གསུངས་པ། ཀྭ་ཡེ་ཕ་རི་གཡས་ལ་གནས་པ། །ཚུ་རི་གཡོན་ལ་གནས་པ། །གངས་རི་དཀར་ལ་གནས་པ། །སྲིབ་རི་ནག ས་ལ་གནས་པ། །སྐྱེ་བ་ཤིང་ལ་གནས་པ། །གོར་མོ་རྡོ་ལ་གནས་པ། །འབབ་པ་ཆུ་ལ་གནས་པ། །འགྲོ་བ་ལམ་ལ་གནས་པའི་སྣང་ཞིང་སྲིད་པའི་སྡེ་བརྒྱད་འབྱུང་པོ་ཐམས་ཅད་ཉོན་ཅིག །བདག་རྣལ་འབྱོར་པ་མིང་འདི་ཞེས་བགྱི་བས། གནས་འདི་ན་སེམས་ཅན་ཐམས་ཅད་ཀྱི་དོན་དུ་འཁོར་འདས་རུ་ཤན་གྱི་སྤྱོད་པ་བྱེད་པ་ཡིན་པས་ཁྱེད་རྣམས་ཀྱིས་ཀོ་ལོང་དང་རུ་ང་ཕྲག་དོག་མ་བྱེད་ཅིག །ཅེས་ཕྲིན་ལས་བཅོལ་གསུངས། ༈ རྫོགས་པ་ཆེན་པོ་སེམས་ཉིད་རང་གྲོལ་ལས། འཛིན་མེད་གླང་ཆེན་ཐང་ལ་ཡན་པ་ནི། །རང་གྲོལ་འགྲོས་ཅན་གཉིས་མེད་དྲྭ་བས་མཛེས། །བླང་དོར་རེ་དོགས་འདམ་བུའི་ཚལ་འཇོམས་ཤིང་། །རྟོགས་པའི་སྟོབས་འཆང་གཉིས་མེད་རྒྱལ་མོར་འཇུག །ཅེས་དང་། རྐྱེན་ངན་ལམ་ལྷོངས་མཉམ་རྗེས་བསྲེས་པའི་ཕྱིར། །རང་ཉིད་དུར་ཁྲོད་མཚོ་གླིང་ཚོང་འདུས་སོགས། །ཡུལ་གྱིས་སེམས་ལ་གཡེངས་བའི་གནས་སོང་ནས། །ལུས་ནི་བྲོ་གར་ངག་གིས་གླུ་ལེན་ཅིང་། །སེམས་ནི་ཀུན་རྟོག་སྣ་ཚོགས་སྤྲོས་བཅས་ལ། །སྐད་ཅིག་རང་གྲོལ་ལྟ་སྒོམ་ངང་དུ་བསྲེ། །ཕྱི་ནས་ཐམས་ཅད་ལམ་དུ་ལྷོངས་པ་ཡིན། །ཞེས་དང་། སེམས་ཉིད་རང་གྲོལ་ལས། སྐབས་སུ་ངང་དྭངས་རྩེ་གཅིག་དོན་ལ་བཞག །རྩེ་གཅིག་ཞི་གནས་ཏིང་འཛིན་འགྲུབ་པར་འགྱུར། །དེ་བཞིན་རིག་པ་དལ་དུ་མི་གཞུགས་པར། །ཕྱི་ནང་ཀུན་རྟོག་དུག་ལྔ་འཕྲོར་བཅུག་ལ། །སྐད་ཅིག་རང་གྲོལ་ལྷག་མཐོང་རྩལ་སྦྱང་བྱ། །དགག་སྒྲུབ་རྐྱེན་ངན་སེམས་ཀྱི་གཟིགས་མོར་འཆར། །རེ་འགའ་རི་རྩེ་དུར་ཁྲོད་ལུང་སྟོང་སོགས། །དགའ་འཇིགས་མྱ་ངན་སྐྱེ་བའི་གནས་སོང་ནས། །ལུས་ནི་མཆོང་རྒྱུག་གར་དང་ཕྱག་རྒྱར་བསྒྱུར། །ངག་ནི་ཅ་ཅོ་གླུ་ལེན་འོ་དོད་འབོད། །སེམས་ནི་འགྲོ་དྲུག་བདེ་སྡུག་སྣ་ཚོགས་བསམ། །སྐད་ཅིག་མི་དལ་བརྩོན་པས་རང་གྲོལ་སྦྱངས། ལྟ་སྒོམ་སྤྱོད་པ་ཐོག་ཏུ་ཕེབས་སོ་བལྟ། ཞེས་སོ། ། ༈ ཐེག་མཆོག་རིན་པོ་ཆེའི་མཛོད་ལས། སྨིན་པ་དེ་གྲོལ་བར་བྱེད་པའི་གདམས་ངག་གི་རྣམ་པར་བཞག་པ་ལ་གཉིས་ཏེ། གདམས་ངག་སྤྱིའི་འབྲེལ་དགོད་པ་དང་། ལག་ལེན་ཉམས་སུ་བླང་བའོ། །དང་པོ་ནི་སྤྱིར་གདམས་ངག་གི་འདེབས་ལུགས་ཐམས་ཅད་བསྡུས་ན་གསུམ་སྟེ། ཁྲིད་ཀྱི་ལུགས་སུ་གདབ་པ། ངོ་སྤྲོད་ཀྱི་ལུགས་སུ་གདབ་པ། མགྲོན་པོ་ལ་བརྒལ་བ་ལ་ཚང་སྤྲུགས་སུ་གདབ་པའོ། །ཞེས་གསུངས། ཚིག་དོན་རིན་པོ་ཆེའི་མཛོད་ལས། དང་པོ་ནི་སྔོན་འགྲོ་གསུམ་གང་རུང་སྔོན་དུ་སོང་ནས་དངོས་གཞི་ངོ་སྤྲོད། དེ་རྗེས་རྒྱབ་ཆོས་ཀྱིས་ཡིད་ཆེས་པར་བྱེད་པའོ། །དེའང་སྐྱེས་བུ་སྤྲོས་པ་ཅན་ཐུན་མོང་གི་དྲོད་རྟགས་ལ་དགའ་བས་སྐུ་གསུམ་གྱི་སྣ་ཁྲིད་པ་འབྱུང་བཞིའི་སྒྲ་དོན་ལ་སྔོན་དུ་སྦྱངས་ནས་དངོས་གཞི་ངོ་སྤྲོད་པའོ། །བརྩོན་འགྲུས་ཅན་བརྟུལ་ཞུགས་ལ་དགའ་བས་རིག་པའི་སྣ་ཁྲིད་པ་འཁོར་འདས་རུ་ཤན་འབྱེད་པའི་སྤྱོད་པ་ལ་སྔོན་དུ་སྦྱངས་ནས་དངོས་གཞི་ངོ་སྤྲོད་པའོ། །ལེ་ལོ་ཅན་རྟོག་དཔྱོད་ལ་དགའ་བས་སེམས་ཀྱི་སྣ་ཁྲིད་པ་ལུས་ངག་སེམས་ཀྱི་སྔོན་འགྲོ་སྔོན་དུ་སྦྱངས་ནས་དངོས་གཞི་ངོ་སྤྲད་པ་ཡིན་ནོ། །གཉིས་པ་ངོ་སྤྲོད་ཀྱི་ལུགས་སུ་གདབ་པ་ནི། ལས་འཕྲོ་སད་པ་ཁ་ཅིག་ལ་སྙེ་མ་མགུལ་པ་ནས་འཆང་བ་ལྟར་དབང་གི་རྗེས་ལ་ངོ་སྤྲད་ནས་ཉམས་སུ་ལེན་པའོ། །གསུམ་པ་ཚང་སྤྲུགས་སུ་གདབ་པ་ནི། ལས་ཅན་འཆི་ཁ་མ་ཁ་ཅིག་ལ་རང་འོད་སྒྲོན་མ་ལ་བརྟེན་ནས་མངོན་སུམ་ངོ་སྤྲད་དེ་ཆོས་ཉིད་བར་དོའི་གདམས་ངག་འདེབས་པ་ཡིན་ནོ། །འདི་ལ་ཁ་ཅིག་གིས་ཚོང་པ་ལྟ་བུའི་ལམ་ཞུགས་ལ་སྦྱར་བ་ནི་གདམས་ངག་གི་ཕྱོགས་མ་མཐོང་བས་དོན་མ་གོ་བ་ཞེས་བྱའོ། །ཞེས་སོ། །ཐེག་མཆོག་རིན་པོ་ཆེའི་མཛོད་ལས། དང་པོའི་ནང་དུ་ཕྱིི་མ་གཉིས་འདུ་སྟེ། ངོ་སྤྲོད་ཅར་ཕོག་ཏུ་གདབ་པ་ཁྲེགས་ཆོད་དང་ཐོད་རྒལ་ཡིན་ལ། ཚང་སྤྲུགས་སུ་གདབ་པ་བར་དོའི་གདམས་ངག་ཡིན་ནོ། །གཉིས་པ་ལག་ལེན་ཉམས་སུ་བླང་བ་ལ། སྔོན་འགྲོ་དང་། དངོས་གཞི་ཉམས་སུ་བླང་བའི་རིམ་པའོ། །དང་པོ་ལ་གཉིས་ཏེ། སྔོན་འགྲོའི་འཐད་པ་དང་། སྔོན་འགྲོ་དངོས་སོ། དང་པོ་ལ་གསུམ་ལས། སྔོན་འགྲོ་ནི་དཔེར་ན་འཇིགས་བཅས་ཀྱི་ལམ་དུ་འགྲོ་བ་ལ་སྔོན་དུ་འཇིགས་པའི་སྐུང་ཉུལ་ནས་ལམ་དུ་བློ་བདེ་བར་འགྲོ་བ་དང་འདྲ་བར། དངོས་གཞི་ལ་ཡ་ང་བག་ཚ་མེད་པར་འགྲོ་བར་བྱེད་པའོ། །སྔོན་འགྲོ་ནི་དཔེར་ན་སོ་མཚམས་ཀྱི་གྲོང་ལ་འོབས་དང་འཇིགས་ཟོན་བྱས་པས་བཙན་པོར་སོང་ནས་གང་གིས་ཀྱང་གླག་མི་རྙེད་པ་དང་འདྲ་ལ། དངོས་གཞི་དེ་ལྟར་བྱས་པས་ནང་གི་མི་བློ་བདེ་ཞིང་ཉམ་ང་མེད་པ་དང་འདྲ་བས་ན་སྔོན་འགྲོ་དང་དངོས་གཞི་གཉིས་སུ་ངེས་ལ། སྔོན་འགྲོ་ནི་འཇིགས་པའི་སྐྱེལ་མ་བཟང་པོ་དང་འདྲ་ལ། དངོས་གཞི་རང་ལ་རྫས་དང་ལྡན་པ་མཐར་ཐོན་པ་དང་འདྲའོ། །དེ་ཡང་སྔོན་འགྲོ་མེད་ན་དངོས་གཞི་ཁྱད་པར་ཅན་གྱི་གནད་ཡོད་ཀྱང་། སྐྱེལ་མ་མེད་པར་འཇིགས་བཅས་ཀྱི་ལམ་དུ་འགྲོ་མི་ནུས་པ་དང་འདྲ་ལ། དངོས་གཞིའི་གནད་མེད་པས་སྔོན་འགྲོའི་མན་ངག་སྤྱད་ཀྱང་འབྲས་བུ་མི་འབྱུང་བས་ན། དེ་གཉིས་ཟུང་དུ་འབྲེལ་བས་དོན་འགྲུབ་པ་ནི་འཇིག་རྟེན་གྱི་སོ་ནམ་ལ་སོགས་པ་བྱེད་པ་ཕོ་མོ་ཟུང་འབྲེལ་གྱིས་འགྲུབ་པ་དང་འདྲའོ། །ཞེས་སོ།། གཉིས་པ་སྔོན་འགྲོ་དངོས་ལ་སྐུ་གསུམ་གྱི་སྣ་ཁྲིད་པར་བྱེད་པ་འབྱུང་བ་བཞིའི་སྒྲ་དོན་ལ་བསླབ་པ། རིག་པའི་སྣ་ཁྲིད་པར་བྱེད་པ་འཁོར་འདས་རུ་ཤན་འབྱེད་པའི་སྤྱོད་པ་ལ་བསླབ་པ། སེམས་ཀྱི་སྣ་ཁྲིད་པར་བྱེད་པ་ལུས་ངག་སེམས་ཀྱི་སྔོན་འགྲོ་ལ་བསླབ་པ་དང་གསུམ་ལས། དང་པོ་ནི་ཐལ་འགྱུར་ལས། སྐུ་གསུམ་བསླབ་པའི་རིམ་པ་ཉིད། །འབྱུང་བའི་ཡོན་ཏན་གཙོ་བྱས་ཏེ། །མཆོག་ཏུ་ས་ཆུ་མེ་རླུང་གི །སྒྲ་ལ་བསླབ་པས་ངེས་པར་འགྲུབ། །ཅེས་པ་ལྟར། ཆུ་སྒྲ་ལ་བསླབ་པས་གཞན་དོན་དུ་ལུས་ཀྱི་རྫུ་འཕྲུལ་འགྲུབ་པ་སྤྲུལ་སྐུའི་མངོན་ཤེས་དང་། ས་སྒྲས་སྤྲུལ་སྐུ་དང་ངག་རིགས་དྲུག་གི་སྐད་གོ་བ་ལོངས་སྐུའི་མངོན་ཤེས་གཉིས། མེ་སྒྲས་སེམས་ཀྱིས་གཞན་སེམས་མཁྱེན་པ་ཆོས་སྐུའི་མངོན་ཤེས་འགྲུབ་ལ ། རླུང་སྒྲས་ནི་སྐུ་གསུམ་ཐུན་མོང་གི་བསླབ་བྱ་སྟེ། སྒྲ་བཞི་རྣལ་འབྱོར་དུ་བྱ་བའི་རིམ་པ་ལ་བསླབ་ཚུལ་ནི། ས་རིལ་ཁ་དོག་ཚོན་གྱིས་བསྒྱུར་བ་ལག་གི་འདུ་བྱེད་ཀྱི་སྒྲ་ལ་གོམས་པ་སོགས་དུང་ཡིག་ཅན་དང་ཐལ་འགྱུར་རྒྱུད་ལས་གསུངས་སོ། །དེ་ལྟར་འབྱུང་བཞིའི་སྒྲ་དོན་ལ་སྦྱངས་སྲོལ་སྔོན་ཡོད་ཀྱང་ད་ལྟ་ལག་ལེན་ལ་འདེབས་པ་མེད་གསུངས། གཉིས་པ་རིག་པའི་སྣ་ཁྲིད་པར་བྱེད་པ་འཁོར་འདས་རུ་ཤན་འབྱེད་པའི་སྤྱོད་པ་ལ་བསླབ་པ་ནི། འཁོར་འདས་རུ་ཤན་ཞེས་པ་རང་བྱུང་གི་ཡེ་ཤེས་འཆར་བར་བྱེད་པའི་ཐབས་མེ་ལོང་གཡའ་ཕྱི་བ་ལྟ་བུའི་གདམས་ངག་སྟོན་པ་སྟེ། ངོ་བོ་ནི་རང་བྱུང་གི་སེམས། ངེས་ཚིག་འཁོར་འདས་གཉིས་འཛིན་གྱི་བག་ཆགས་དྭངས་སྙིགས་འབྱེད་པ། མིང་གི་དབྱེ་བ་འཁོར་འདས་ཤན་འབྱེད། དྭངས་སྙིགས་འབྱེད་པ། ཐབས་ཁྱད་པར་ཅན་གྱིས་རང་ངོ་རྗེན་པར་སྟོན་པ་ཞེས་བྱ། དཔེ་མེ་ལོང་གི་གཡའ་ཕྱི་བའམ། གསེར་ལ་ནག་མཚུར་བཏབ་པ་ལྟར་བག་ཆགས་ཀྱི་དྲི་མ་ཐབས་ཀྱིས་བཀྲུས་ནས། ངོ་བོ་དྲི་མེད་བློ ས་མ་བྱས་པ་རང་བཞིན་གྱིས་རྟོགས་པའོ། །གསེར་ཡིག་ཅན་ལས། འཁོར་འདས་ཞེས་པ་ཁམས་གསུམ་གྱི་སེམས་ཅན་དང་སྐུ་དང་ཞིང་ཁམས་སོ། །རུ་ཤན་ཞེས་པ་དག་མ་དག་གཉིས་སོ། །ཕྱེད་པའོ་ཞེས་པ་འཛིན་པ་བྲལ་བའོ། །ཞེས་སོ། །ཇི་ལྟར་དབྱེ་ཚུལ་ནི། བདག་གིས་སེམས་ཅན་ཐམས་ཅད་ཀྱི་དོན་དུ་མ་དག་སྒོ་གསུམ་འཁོར་བའི་འཁྲུལ་སྣང་གི་བག་ཆགས་ཐམས་ཅད་དག་པ་མྱང་འདས་ཆེན་པོ་ཆོས་སྐུ་ཐིག་ལེ་ཉག་གཅིག་གི་ཀློང་དུ་རུ་ཤན་དབྱེ་བར་བྱའོ་སྙམ་དུ་སེམས་བསྐྱེད། དེ་ནས་ལུས་ཀྱི་རུ་ཤན་ནི་འགྲོ་བ་རིགས་དྲུག་གི་ལུས་ཀྱི་རྣམ་འགྱུར་དང་། དེ་བཞིན་ངག་གི་རུ་ཤན་ནི་རིགས་དྲུག་གི་སྒྲ་སྐད། སེམས་ཀྱིས་དྲན་ཚད་ཐམས་ཅད་ངག་གིས་བརྗོད་པ་དང་། ཡིད་ཀྱི་རུ་ཤན་ནི་དུས་གསུམ་འཁྲུལ་བའི་རྟོག་ཚོགས་ཀྱི་འཕྲོ་འདུ་ཐམས་ཅད་བཙན་ཐབས་སུ་སློང་བར་བྱས་ནས་སྒོ་གསུམ་ངལ་དུབ་ཀྱི་རྣམ་པར་ཤར་ཏེ་སྙེམ་ཐག་ཆོད་པའི་རྗེས་ཤེས་ཀྱི་ངོ་བོར་བལྟ་ཞིང་ངལ་གསོ། མདོར་ན་ལུས་ཀྱི་སྤྱོད་པ་དང་། ངག་གི་སྨྲ་བརྗོད་དང་། སེམས་ཀྱི་དྲན་བས མ་ཐམས་ཅད་ཐབས་སྣ་ཚོགས་ཀྱིས་བསླངས་པ་དང་། དེ་ལ་ཞེན་པ་མེད་པར་འཕྲོ་རྦད་ཀྱིས་བཅད་ནས་སྦྱངས་པ་ནི་སྣང་བའི་ཡུལ་ལ་འཁྲུལ་པའི་ཞེན་པ་གཅོད་པའི་མན་ངག་ཡིན་གསུངས། དེ་ཡང་ཕྱི་སྣང་བ་ལ་བདེན་ཞེན་མེད་པ་སྒྱུ་མའི་གྲོང་ཁྱེར་ལྟ་བུ། ནང་འཁྲུལ་བ་ལ་སྤང་བླང་བྲལ་བ་བར་སྣང་གི་བྱ་རྗེས་ལྟ་བུ། གསང་བ་རིག་སྟོང་ལ་ངོས་བཟུང་མེད་པ་རྐྱེན་གསུམ་བྲལ་བའི་ནམ་མཁའ་ལྟ་བུ་མངོན་དུ་མ་གྱུར་གྱི་བར་དུ་འབད་དགོས་གསུངས། དེ་ཡང་མཁའ་འགྲོ་ཡང་ཏིག་གི་ཁྲིད་ཡིག་རིན་ཆེན་གསེར་ཕྲེང་ལས། གཞི་བདག་ལ་གཏོར་མ་བྱིན་ནས་ད་ནི་སེམས་ཅན་ཐམས་ཅད་ཀྱི་དོན་དུ་འཁོར་འདས་རུ་ཤན་དབྱེ་སྙམ་དུ་སེམས་བསྐྱེད་ནས། ལུས་རྡོ་རྗེ་མེ་འབར་བའི་སྤྱི་བོར་བླ་མའི་རྣལ་འབྱོར་བསྒོམ་པར་གསུངས་པ་དང་། དབང་ཆོག་པདྨའི་དྲྭ་བ་ལས། རྣམ་པར་ཤེས་པའི་ཚོགས་བརྒྱད་གནས་སུ་དག་པ་དང་བར་ཆད་ཞི་བར་བྱ་བའི་ཕྱིར་ཡིག་འབྲུ་བརྒྱད་ཀྱི་གོ་བགོ་བ་ནི། སློབ་མ་དེ་དག་བླ་མའི་སྐུ་སྔོ་ནག་རབ་ཏུ་འཇིགས་ཤིང་སྐྲ་བརྫེས་ལ། མཆེ་བ་གཙིགས་ཤིང་ལྗགས་འདྲིལ་བར་བསམ་པའི་སྤྱི་བོར་ལཾ་སེར་པོ། དཔྲལ་བར་ཨེ་མཐིང་ག ལྐོག་མར་སུ་སེར་པོ། མགྲིན་པར་ཁཾ་དུད་ཁ། ནུ་མ་གཉིས་ལ་ཧཱ་དཀར་པོ། ལྟེ་བར་རཾ་དམར་པོ། རྐང་མཐིལ་གཉིས་སུ་ཡཾ་ལྗང་གུ་རེ་བསམ་དུ་བཅུག་ལ། བླ་མའི་ཐུགས་ཀ་ནས་ཧཱུྃ་སྔོན་པོ་འཕྲོས་ནས་སློབ་མའི་སྙིང་ནང་དུ་སོང་བས་ཧཱུྃ་དུ་གྱུར་བར་བསྒོམ་ཞིང་བླ་མས་ཧ་ཧ་ཞེས་ངར་བསྐྱེད་ལ་ལན་གསུམ་བརྗོད་པར་གསུངས་པ་དང་། དབང་ཆོག་ཡེ་ཤེས་ཆུ་བོ་ལས་ཀྱང་ཡི་གེ་བརྒྱད་ཀྱི་གོ་བགོ་ཚུལ་གསུངས་པའང་འདི་དང་འདྲ་བ་དང་། བི་མའི་པྲ་ཁྲིད་ལས་ཡི་གེ་བརྒྱད་ཀྱི་གོ་བགོ་ཚུལ་ལ་སྙིང་གར་ཧཱུྃ་སྔོ་སྐྱ་དང་། ཕཊ་ནག་པོ་བསྒོམ་པ་ཙམ་ལས་གཞན་རྣམས་འདྲ་བ་ཡིན་ནོ། །ཡང་དབང་ཆོག་པདྨའི་དྲྭ་བ་ལས། སློབ་མ་ཀུན་དམིགས་པ་གསལ་པོས་གཏོར་མ་རེ་ཁྱེར་ནས་སོང་སྟེ་གཞི་བདག་དང་མཁའ་འགྲོ་རྣམས་ལ་སྦྱིན་ནས། བདག་ལུང་པ་འདིར་སྤྱོད་པ་ཞག་གསུམ་བྱེད་པས་བར་དུ་གཅོད་པ་མ་གཏང་ཞིག་ཅེས་བཀའ་བསྒོ་ལ། དང་པོ་ལུས་ཀྱི་སྤྱོད་པ་བརྩམ་པ་ནི། གཅེར་བུ་བྱས་ཏེ་ཌ་མ་རུ་དཀྲོལ་ཞིང་ཁ་ཊཱཾ་ག་ཐོག་ནས་སྐྲ་བརྫེས་ལ་ལངས་ནས་རྒྱུགས་པ་དང་། སྒུར་ནས་རྒྱུགས་འགྲོ་བ་དང་། མཆོངས་ནས་འགྲོ་བ་དང་། འཁྲབ་པ་དང་ལུས་བསིག་པ་དང་། སྤྱིའུ་ཚུགས་དང་། རྒྱབ་འགྲོ་དང་། ཉལ་བ་དང་། འཕྲེས་པ་དང་། གར་བསྒྱུར་བ་དང་། ཕྱག་རྒྱ་དང་ཡན་ལག་སྤྲུགས་པ་དང་། མགོ་འགྲིལ་བ་དང་། ཨ མ་གཙིག་དང་། མཆེ་བ་གཉེར་བ་དང་། རྐང་ལག་ཡ་རེ་བཙུགས་ནས་འགྲོ་བ་དང་། འབུ་སྲིན་གྱི་ནུར་འགྲོས་དང་། སྟག་མོའི་མཆོངས་སྟངས་ལ་སོགས་པ་ལུས་ཀྱི་རྣམ་འགྱུར་དྲན་དགུ་ཅོག་བྱས་པའི་མཐར་ཕྱག་འཚལ་བ་དང་། བསྐོར་བ་དང་། ལྷའི་སྟངས་སྟབས་དང་ཕྱག་རྒྱ་བྱས་ལ་འཕྲོ་བཅད་ནས། མཚན་མོ་བདེ་བའི་མལ་དུ་འགུལ་འཕྲི ག་མེད་པར་ཉལ་བས་རྣལ་དུ་དབབ་བོ། །དེ་ལྟར་བྱས་པས་ལུས་རུ་ཤན་ཕྱེད་པའི་རྟགས་ལ་ལུས་ལ་ཆགས་ཞེན་མེད་པ་དང་། ལུས་མེད་སྙམ་པ་དང་། ཚ་གྲང་མེད་པ་དང་། བཀྲེས་སྐོམ་མེད་པ་དང་། ངལ་དུབ་མེད་པ་དང་། ནམ་མཁའ་ལ་འགྲོ་བར་སྙམ་པ་དང་། བདེ་དྲོད་འབར་བ་ལ་སོགས་པ་འབྱུང་ངོ་། །དེ་ལྟ་བུ་མ་བྱུང་གི་བར་དུ་བསྐྱར་བས་ལུས་ཀྱི་རུ་ཤན་ཕྱེད་ངེས་སོ། །དགོས་པ་ནི་ལུས་ཀྱི་བར་ཆད་ཞི། སྡིག་སྒྲིབ་དག སྤྲུལ་སྐུར་གྲོལ། སངས་རྒྱས་ཐམས་ཅད་ཀྱི་སྐུ་རྡོ་རྗེ་མི་འགྱུར་བ་དང་གཉིས་སུ་མེད་པར་འགྱུར་བ་ཡིན་ནོ། ། ༈ དེ་ནས་ངག་གི་སྤྱོད་པ་ནི། རང་གི་སྒྲ་སྐད་ཐམས་ཅད་བླ་མའི་གསུང་དུ་བསམ་ལ། ངག་གིས་བརྗོད་པ་སྣ་ཚོགས་བྱ་བ་ནི། ལྷའི་སྐད་སྙན་པའི་གླུ་དང་དབྱངས་གསལ་བྱེད་ཀྱི་ཡི་གེ་དང་། སིལ་སྙན་ལྟ་བུ་ལ་སོགས་པ་དང་། ཀླུའི་སྐད་པི་ཝཾ་ལྟ་བུ་དང་། བུམ་ལྡིར་ལྟ་བུ་དང་། གནོད་སྦྱིན་གྱི་སྐད་བྲག་རི་ཉིལ་བ་ལྟ་བུ་དང་། མིའམ་ཅིའི་སྐད་རྒྱུད་མང་དང་སྤྲིན་གྱི་ང་རོ་ལྟ་བུ་དང་། སྲིན་པོའི་སྐད་ར་ལ་ར་ལ་རི་ལི་རི་ལི་ལ་སོགས་པ་སེར་སྤྲིན་གྱི་འབྲུག་སྒྲ་ལྟ་བུ་དང་། ལྷ་མ་ཡིན་གྱི་སྐད་ཞི་བའི་འབྲུག་སྒྲ་ལྟ་བུ་དང་། དམྱལ་བའི་སྐད་ཚ་གྲང་གི་སྡུག་བསྔལ་སྨྲེ་སྔགས་འདོན་པ་དང་། ཡི་དྭགས་བཀྲེས་སྐོམ་གྱི་འཁུན་སྒྲ་དང་། དུད་འགྲོའི་མྱ་ངན་གྱི་བཤུག་སྒྲ་དང་། མི་སྐྱེ་རྒ་ན་འཆིའི་རང་སྒྲ། གཞན་ཡང་སྐད་ཀྱི་རྣམ་པ་ཤེས་ཚད་བརྗོད་དོ། །རྟ་དང་གླང་དང་ར་ལུག་དང་བོང་བུ་དང་། ཅེ་སྤྱང་དང་། སྟག་གཟིག་དང་། དུར་བྱ་དང་། འུག་པ་དང་། བྱ་རོག་དང་། སྐྱ་ག་དང་། ཁྱི་དང་ཝའི་སྐད་ལ་སོགས་པ་བརྗོད། བར་བར་དུ་ཕཊ་མང་པོ་བརྗོད་ཅིང་། ཧ་དང་ཧཱུྃ་དང་ༀ་ལ་སོགས་པ་ཆོས་སུ་འགྱུར་བའི་སྒྲ་སྐད་དང་། ཆོས་འཆད་པའི་སྐད་ཀྱིས་མཐའ་བསྡུས་ནས། མཚན་མོ་གང་ཡང་མི་བརྗོད་པའི་ངང་ལ་ཉལ་བས་ངག་གི་རུ་ཤན་ཕྱེད་དོ། །དེ་ཡང་སཾ་ཀྲི་ཏའི་སྐད་རང་རྡོལ་བ་དང་། སྔར་མི་ཤེས་པའི་ཆོས་མང་པོ་རང་རྡོལ་བ་དང་། དབྱངས་སྙན་པོ་ལ་སོགས་པ་འབྱུང་ཞིང་། ངག་སྨྲ་སྙིང་མི་འདོད་པ་དང་། མཆོག་ཏུ་བདེ་བ་དང་བརྗོད་དུ་མེད་པའི་དོན་ལ་སོགས་པ་འོང་ངོ་། །མ་བྱུང་གི་བར་ལ་བསྐྱར་རོ། །དགོས་པ་ནི་ངག་གི་བར་ཆད་ཞི་བ་དང་། སྡིག་སྒྲིབ་དག་པ་དང་ལོངས་སྐུར་གྲོལ་བ་དང་། གསུང་རྡོ་རྗེའི་ངོ་བོ་དང་དབྱེར་མེད་པའོ། ། ༈ དེ་ནས་སེམས་ཀྱི་སྤྱོད་པ་ནི། རང་གི་དྲན་བསམ་སྣ་ཚོགས་སུ་སྤྲོས་པ་ཐམས་ཅད་བླ་མའི་ཐུགས་སུ་དྲན་པས་འགྲོ་དྲུག་སོ་སོའི་བདེ་སྡུག་འཁོར་འདས་ཀྱི་ཆོས་དང་ཆོས་མ་ཡིན་པ་དྲན་ཚད་སྤྲོ་ཞིང་། སེམས་ནམ་མཁའི་དཀྱིལ་དུ་འཕང་བ་དང་། རྒྱ་མཚོའི་གཏིང་དུ་འཕང་པ་དང་། རི་བྲག་གི་ནང་དུ་ཟང་ཐལ་དུ་འཕང་པ་དང་། དགའ་བ་དང་མི་དགའ་བ་དང་། བདེ་བ་དང་སྡུག་བསྔལ་བ་དང་། སྐྱེ་ཤི་བཀྲེས་སྐོམ་ལ་སོགས་པ་དང་། སྔར་ཕྱིན་མྱོང་བ་དང་མ་མྱོང་བའི་ཡུལ་དུ་འགྲོ་བ་དང་། འགྲོ་དྲུག་སོ་སོའི་གནས་སུ་འཕང་པ་དང་། ནམ་མཁའ་ས་གཞི་ཐམས་ཅད་དམྱལ་བ་དང་། ཡི་དྭགས་དང་། དུད་འགྲོ་དང་། མི་དང་། ལྷ་དང་། ལྷ་མ་ཡིན་དང་། སངས་རྒྱས་དང་བྱང་ཆུབ་སེམས་དཔའ་དང་། ཉན་རང་དང་། མཆོད་རྟེན་དང་། ལྷ་ཁང་དང་། སྐྱེད་མོས་ཚལ་དང་། དག་པའི་ཞིང་གིས་གང་བར་མོས་པར་བྱ་ཞིང་། རང་གི་དགྲ་དང་གཉེན་དང་བར་མས་གང་བར་བསམ་ལ། ཆགས་སྡང་དུ་སྤྱོད་ཅིང་རྗེས་མེད་དུ་རྩལ་སྦྱོང་ངོ་། །རྗེས་ལ་ཆོས་ཀྱི་ཚིག་དོན་ལ་བློ་བཞག་སྟེ། ལྟ་སྒོམ་སྤྱོད་འབྲས་ལ་གནས་པར་བྱའོ། །རྟགས་ནི་སེམས་གསལ་བ་དང་། ཡངས་པ་དང་། འཁྲུལ་རྟོག་འགགས་པ་དང་། བྲོད་པ་དང་། བདེ་གསལ་མི་རྟོག་པའི་ཏིང་ངེ་འཛིན་སྐྱེ་བ་དང་། ཡེ་གྲོལ་ནམ་མཁའ་ལྟ་བུའི་རྟོག་པ་ཁོང་ནས་འཆར་རོ། །དེ་ལྟར་མ་བྱུང་བའི་བར་དུ་བསྐྱར་རོ། །དགོས་པ་ནི་སེམས་ཀྱི་བར་ཆད་ཞི་བ་དང་། སྡིག་པ་འདག་པ་དང་། ཆོས་སྐུར་གྲོལ་བ་དང་། ཐུགས་རྡོ་རྗེའི་ངོ་བོར་སངས་རྒྱས་པའོ། །འོ་ན་སྐུ་གསུམ་ཐོབ་པ་དེ་དང་། རྡོ་རྗེ་གསུམ་དུ་མྱ་ངན་ལས་འདའ་བ་དེ་གཉིས་ལ་ཁྱད་ཡོད་དམ་ཞེ་ན། ཡོད་དེ། ལུས་ངག་ཡིད་གསུམ་སྐུ་གསུམ་དུ་ཐོབ་པ་ནི། ཕྱིར་གསལ་འགྲོ་བ་ལ་སྣང་བ་ཡིན་ལ། སངས་རྒྱས་ཀྱི་སྐུ་གསུང་ཐུགས་རྡོ་རྗེ་གསུམ་དུ་མྱ་ངན་ལས་འདའ་བ་ནི་ནང་གསལ་གདོད་མའི་གཞི་ཐོག་ཏུ་ཕྱིན་པའོ། །གསུམ་པ་སེམས་ཀྱི་སྣ་ཁྲིད་པ་ལུས་ངག་ཡིད་གསུམ་གྱི་སྔོན་འགྲོ་ནི། ཁྲིད་ཡིག་ནོར་བུའི་ལུགས་ལ་ཕྱི་ལུས་ངག་ཡིད་གསུམ་གྱི་སྔོན་འགྲོས་སྒོ་གསུམ་གྱི་འཁྲུལ་བ་གཞིག་པ། ནང་ལུས་ངག་ཡིད་གསུམ་གྱི་སྔོན་འགྲོས་སྒོ་གསུམ་གྱི་སྒྲིབ་པ་སྦྱོང་བ། གསང་བ་ལུས་ངག་ཡིད་གསུམ་གྱི་སྔོན་འགྲོས་སྒོ་གསུམ་གྱི་གནས་ལུགས་བསྟན་པ་དང་གསུམ་གསུངས་པ་ལས། དང་པོ་ལ་གཉིས་ལས་རུ་ཤན་ནི་གོང་དུ་བཤད་ཟིན། གཉིས་པ་སྔོན་འགྲོ་དངོས་ལ་གསུམ་ལས། དང་པོ་ལུས་སྦྱོང་བ་ནི། སངས་རྒྱས་ཀྱི་འདས་རྗེས་གཉིས་པ་ལས། སྐྱིལ་ཀྲུང་མཐིལ་སྤྲད་དྲང་པོར་བསྲང་། །སྤྱི་བོར་ཐལ་མོ་སྦྱོར་བར་བྱ། །ཞེས་དང་། དངོས་གཞི་འོད་གསལ་སྙིང་པོའི་དོན་ཁྲིད་ལས། རྐང་པའི་མཐིལ་གཉིས་སྤྲད། རྟིང་པ་གསང་བར་གཏད་ནས་ལུས་ཀྱི་ཆ་བསྲངས་ནས་ལག་གཉིས་མགོ་ལ་མ་རེག་པར་སྤྱི་བོར་ཐལ་མོ་སྦྱར་ཞིང་རྡོ་རྗེ་སྔོན་པོ་མེ་འབར་བ་གཅིག་ཏུ་བསྒོམ། ཞེས་དང་། གཞན་དུ་རྡོ་རྗེ་རྩེ་གསུམ་པ་ཡར་ཚངས་པའི་འཇིག་རྟེན་དང་མར་གསེར་གྱི་ས་གཞི་ལ་ཐུག་པ་ཡེ་ཤེས་ཀྱི་མེ་དཔུང་འབར་བར་བསྒོམ། དེ་ནས་མེ་ལྕེའི་རྩེ་ལས་རང་མདོག་དང་མཚུངས་པའི་རྡོ་རྗེ་ནས་འབྲུ་ཙམ་པ་གྲངས་མེད་ཕྱོགས་བཅུར་འཕྲོ་བས་ནད་གདོན་བགེགས་སོགས་བར་གཅོད་ཐམས་ཅད་ཚར་བཅད་ནས་སླར་རང་ལུས་ཀྱི་རྡོ་རྗེ་ལ་ཐིམ་པར་བསམ། ཞེས་གསུངས། མཁའ་འགྲོ་ཡང་ཏིག་གི་ཁྲིད་ཡིག་ངེས་དོན་སྙིང་པོ་ལས། ལག་པ་སྤྱི་བོར་མ་རེག་པར་ཐལ་མོ་སྦྱར་ཏེ་བསྐྱང་༔ རྐང་པའི་མཐིལ་སྤྲད་དེ་བསྐྱེད༔ རྐེད་པ་བསྲངས་ལ་རྡོ་རྗེ་མཐིང་ག་མེ་འབར་བའི་ལྟེ་བ་ལ་ཧཱུྃ་གིས་མཚན་པ་གཅིག་ཏུ་བསྒོམ་ལ་ཞག་གཅིག་འབད་ནས༔ ཧཱུྃ་ལས་ཧཱུྃ་འཕྲོས་ནམ་མཁའ་གང་བས༔ ཧཱུྃ་སྒྲ་འབྲུག་སྟོང་ལྡིར་བ་ཙམ་བསྒྲགས༔ ཧཱུྃ་རྣམས་ནམ་མཁའི་དཀྱིལ་ན་ཕར་འགྲོ༔ རང་ཉིད་རྡོ་རྗེར་གྱུར་བའི་ཕྱི་ནང་ཟང་ཐལ་དུ་སོང༔ རྡོ་རྗེ་ཡང་ཇེ་མཐོར་འགྲོ་ཞིང་ཧཱུྃ་སྒྲས་ནམ་མཁའ་གང་བར་བསམ་ལ༔ ཧཱུྃ་ཧཱུྃ་ཧཱུྃ་ཞེས་སྙན་ལ་གདངས་རིང་བ་ཞག་གསུམ་རིམ་པ་བཞིན་འབད་དོ༔ དེ་ནས་མཚན་མོ་ཉལ་དུས་རྣམས་སུ་དྲན་བསམ་ཡིད་ལ་མི་བྱེད་པའི་ངང་དུ་རྣལ་ལ་དབབ་པ་ཡང་བྱའོ༔ ཞེས་དང་། ཡང་ཏི་སངས་རྒྱས་མཉམ་སྦྱོར་གྱི་ཁྲིད་ཡིག་ཡེ་ཤེས་རང་ཤར་ལས། ལག་གཉིས་མགོ་བོར་མ་རེག་པར་སོར་མོ་རྣམས་བསྡམས་ཤིང་གུང་མོ་བསྒྲེང་བའི་ཕྱག་རྒྱ་སྤྱི་གཙུག་ཏུ་བཅའ་བར་གསུངས་ཀྱང་འདིར་ཀུན་མཁྱེན་ཡབ་སྲས་ཀྱི་བཞེད་པ་དང་བསྲེ་བར་མི་བྱ་གསུངས། ཁྲིད་ཡིག་ཟབ་ལམ་གསལ་བྱེད་ལས། རྐང་མཐིལ་གཉིས་སྦྱར། སོར་མོ་བཅུ་ས་ལ་བཙུགས་པུས་མོ་ཕྱིར་བསྒྱང་། སྒལ་ཚིག་དྲང་པོར་བསྲང་། ལག་པ་གཉིས་སྤྱི་བོར་མ་རེག་པར་ཐལ་མོ་སྦྱར། གྲུ་མོ་གཉིས་ཐད་སོར་ཕྱི་ནང་བསྐྱངས། མགྲིན་པ་ཨོལ་མདུད་ནོན་པར་བྱས། ཉྭ་བཞི་ཤུགས་བྱུང་ནས་བསྒྲིམས། ཞེས་སོ། །ཉག་གཏེར་རིན་པོ་ཆེས། འཇམ་དབྱངས་མཁྱེན་བརྩེ་དབང་པོའི་ཕྱག་བཞེས་ལ་ཐལ་མོ་ཁོང་སྟོང་མེད་པར་སྦྱར་བ་ཡིན་གསུངས། དེ་ལྟར་ལངས་འདུག་གི་ཕྱོགས་གཉིས་ལས། ས་ལ་འདུག་པའི་ཕྱོགས་འདི་ནི་སྔོན་འགྲོ་རུ་ཤན་གྱི་སྐབས་དང་། དངོས་གཞི་ཐོད་རྒལ་གྱི་རྩ་བའི་བཞུགས་སྟངས་ལྔའི་སྐབས་སུ་ཀུན་མཁྱེན་ཆེན་པོས་བཞེད་པ་ཡིན་ནོ། །ལངས་པའི་ཕྱོགས་ནི་སྨིན་གླིང་གཏེར་ཆེན་དང་། ཀུན་མཁྱེན་འཇིགས་གླིང་། ཀོང་སྤྲུལ་རིན་པོ་ཆེ་སོགས་ཀྱིས་བཞེད་པ་ཡིན་ནོ། །གཉིས་པ་ངག་སྦྱོང་པ་ལ་བཞི། རྒྱས་གདབ་པ། རྩལ་སྦྱངས་པ། མཉེན་བཙལ་བ། ལམ་དུ་གཞུག་པའོ། །དང་པོ་རྒྱས་གདབ་པ་ལའང་གཉིས་ལས། ཕྱི་སྣང་བ་ལ་རྒྱས་གདབ་པའི་སྐབས། རང་གི་སྙིང་གར་གཞིར་གནས་ཀྱི་རིག་པ་ཧཱུྃ་སྔོན་པོ་གཅིག་ཏུ་གྱུར་བར་བསམ་ལ། ཧཱུྃ་གླུ་སྙན་ལ་རིང་བ་བླངས་པས་སྙིང་གི་ཧཱུྃ་ལས་ཧཱུྃ་མང་པོ་སྣ་བུག་གཡས་ནས་ཕར་འཕྲོ་བར་བསམ་ལ་ཧཱུྃ་གསུམ་རིང་པོར་བརྗོད། ནང་ཕུང་པོ་ལ་རྒྱས་གདབ་སྐབས་ཕྱི་རོལ་གྱི་ཧཱུྃ་རྣམས་སྣ་བུག་གཡོན་ནས་ཚུར་ཞུགས་ཏེ་ཁོང་དུ་ཐིམ་པར་བསྒོམ་ཞིང་ཧཱུྃ་གོང་མ་ལས་ཅུང་ཟད་ཐུང་བར་བརྗོད། ཡང་ན་ཕར་སྙིང་ག་ནས་འཕྲོས་ཚུར་དབང་པོའི་སྒོ་ནས་ཞུགས་པའོ། །ཁྲིད་ཡིག་ནོར་བུའི་ལུགས་ལ། ཕྱི་སྣང་བ་ལ་རྒྱས་གདབ་སྐབས་ཕྱི་རོལ་གྱི་སྣང་བ་ཐམས་ཅད་ཧཱུྃ་དུ་ཤར་ཤར་གསལ་བ་ལ། ཧཱུྃ་ཆུང་མང་པོས་གང་ནས་སྟེང་འོག་ཕྱོགས་མཚམས་ཐམས་ཅད་འོད་གསལ་གྱི་ཞིང་ཁམས་ཧཱུྃ་ཡེ་ཤེས་ལྔའི་རང་འོད་དང་བཅས་པས་མེ་རེ་རེ་ཁེངས་པར་བསམ་མོ། །དེའང་རི་ཧཱུྃ་ཆེན་གྱི་རྩི་ཤིང་ནགས་ཚལ་ཧཱུྃ་ཆུང་ལ་ལོ་འདབས་ཧཱུྃ་ཕྲན་དུ་བསམ་པ་དང་། ནང་ཕུང་པོ་ལ་རྒྱས་གདབ་སྐབས། ཕྱིའི་ཧཱུྃ་དེ་རྣམས་རང་གི་ཁོག་པའི་ནང་དུ་ཁ་སྣ་དང་བ་སྤུའི་ཁུ ང་བུ་ནས་ཚུར་ལ་སིབ་སིབ་ཐིམ་ནས་ལུས་ཀྱི་ནང་གང་བར་བསམ་མོ། །དེ་ཡང་རི་ལྟ་བུའི་ཧཱུྃ་ཆེ་བ་ནང་དུ་འཇུག་དུས་རང་གི་ལུས་ཀྱང་དེ་དང་འཚམས་པའི་ཆེ་བའམ། ཡང་ན་ཏིལ་འབྲུ་ཙམ་གྱི་ནང་དུ་ཚུད་པར་བསམ། ཞེས་གསུངས་སོ། །གཉིས་པ་རྩལ་སྦྱང་པ་ལའང་གཉིས་ལས། དང་པོ་ཕྱི་སྣང་བ་ལ་རྩལ་སྦྱང་པའི་སྐབས། ཟབ་དོན་རྒྱ་མཚོའི་སྤྲིན་ཕུང་ལས། ཧཱུྃ་མཐིང་ནག་ཆེ་ཆུང་གང་ལ་འབིགས་པའི་ཡུལ་དང་འཚམས་པར་གསུངས་པ་དང་། གཉིས་པ་ནང་ཕུང་པོ་ལ་རྩལ་སྦྱངས་སྐབས། ཧཱུྃ་མཐིང་ན ག་མཐོ་གང་བ་རང་གི་ལུས་ལ་ཕྱིར་ཐལ་ནང་ཐལ་བར་མཚམས་མེད་པར་ཕུག་པར་བསམ་པ་དང་། མཁའ་འགྲོ་ཡང་ཏིག་གི་ཁྲིད་ཡིག་ནོར་བུའི་ལུགས་ལ། ཕྱི་སྣང་བ་ལ་རྩལ་སྦྱང་སྐབས་ཧཱུྃ་མཐིང་ནག་ཡེ་ཤེས་ལྔའི་མེ་འོད་རེག་པ་ཙམ་གྱིས་ཐལ་བྱུང་དུ་འབིགས་པར་ནུས་པས་གང་འབིགས་པའི་ཡུལ་དང་འཚམས་པར་གསུངས་པ་དང་། ནང་ཕུང་པོ་ལ་རྩལ་སྦྱང་སྐབས། རང་གི་ལུས་ཆེ་ཆུང་ཅི་རིག་པར་སྤྲུལ་ལ་ཧཱུྃ་དེས་ཁོ་ཁོལ་མེད་པར་ཕུག་པས་ལུས་སུ་སྣང་བ་རགས་པར་མ་གྲུབ་པར་ཆུའི་ཟླ་བ་ལྟ་བུར་མོས་པར་བྱའོ། །ཞེས་སོ། །ཁྲིད་ཡིག་ཟབ་ལམ་གསལ་བྱེད་ལས། ཕྱི་སྣང་བ་ལ་རྒྱས་གདབ་དང་། ཕྱི་སྣང་བ་ལ་རྩལ་སྦྱང་པ་གཉིས་ལ་སྙིང་ཁར་ཧཱུྃ་སྔོན་པོ་ཞིག་བསྒོམ་པ་ལ་གསལ་སྣང་ཐོན་པར་བྱེད་དགོས་གསུངས། གཞན་ཡང་སྙིང་ཁར་གཞིར་གནས་ཀྱི་རིག་པ་ཧཱུྃ་ཡིག་མཐིང་ནག་མེ་འབར་བ་ཞིག་ཏུ་གསལ་བ་ལས། ཧཱུྃ་ཚ་བ་དུས་མཐའི་མེ་ལྟ་བུ། མྱུར་བ་གློག་ལྟ་བུ། རྣོ་བ་སྤུ་གྲི་ལྟ་བུ། མཐོ་བ་སྲིད་རྩེ། དམའ་བ་གསེར་གྱི་ས་གཞི། མང་བ་རྡུལ་སྙེད། ཉུང་བ་གཅིག་པུ། དངོས་པོ་ཀུན་ལ་ཟང་ཐལ་བས་དང་པོ་ཕྱིའི་སྣང་བ་ཐམས་ཅད་ཁྲལ་ཁྲོལ་དུ་བཏང་ནས་དངོས་མེད་དུ་སྦྱངས། དེ་ནས་རང་གི་ལུས་རྒྱབ་མདུན་སྟོད་སྨད་ཐམས་ཅད་ནས་ཐོགས་པ་མེད་པར་ཕུག་ནས་མཐར་དངོས་མེད་དུ་བཏང་བར་བསམས་ཏེ་ཧཱུྃ་དྲག་ལ་ངར་ཐུང་བར་བརྗོད། སྤྱིར་འདི་འདྲའི་རྩལ་སྦྱང་རྣམས་གྱད་ཕྲུག་གིས་རྩལ་སྦྱང་པས་འཕྲུལ་ཕྱོགས་མེད་དུ་འབྱོངས་ཏེ་དགྲ་ཐུལ་བ་ལྟ་བུའི་གདམས་ངག་ཡིན་ཏེ། རྣལ་འབྱོར་པས་རིག་པའི་རྩལ་སྦྱངས་པས་གང་ཤར་ལམ་དུ་ལོངས་ཏེ། མཐར་ལྟ་བས་ཡན་ཐུབ། སྒོམ་པས་ཡེངས་ཐུབ། སྤྱོད་པས་རྐྱེན་ཐུབ་ཏུ་གྱུར་པ་ཡིན་གསུངས། གསུམ་པ་མཉེན་བཙལ་བ་ནི། ཟབ་མོ་ཡང་ཏིག་གི་ཁྲིད་ཡིག་སངས་རྒྱས་མཉམ་སྦྱོར་ལས། མདུན་དུ་དམིགས་རྟེན་བཙུག་ལ་ཧཱུྃ་ཕྲེང་བ་བརྒྱུས་པའམ་ཐག་པ་ལྟ་བུས་དཀྲིས་པ་དང་། ཡང་རིམ་གྱིས་ཕྱིར་འགྲོ་བ་ལ་སེམས་བཟུང་ཞིང་ཧཱུྃ་སྙན་པར་བརྗོད་ཅེས་གསུངས། དེ་ཡང་ཡིག་འབྲུ་ལངས་སྟབས་དམིགས་རྟེན་ལ་དཀྲི་ཚེ་ཧཱུྃ་གཅིག་གི་ཞབས་སུ་གཅིག་གི་དབུ་ཚུད་པ་ལུ་གུ་རྒྱུད་ཀྱིས་གཡས་བསྐོར་དུ་དཀྲི་བར་གསུངས། ཁྲིད་ཡིག་ནོར་བུའི་ལུགས་ལ། ཤིང་སྡོང་དང་རི་ལ་སོགས་པ་ལ་ཧཱུྃ་གིས་གྲུ་གུ་ལྟར་དཀྲིས་ནས་ཕྱིར་འགྲོ་བ་ལ་ཤེས་པ་གཏད་ཅིང་ཧཱུྃ་གི་གླུ་རིང་པོར་བླང་ངོ་ཞེས་གསུངས། གཞན་ཡང་རང་ལུས་ཧཱུྃ་དུ་གྱུར་ནས་དེ་ལས་ཧཱུྃ་གི་ཕྲེང་བ་འཕྲོས་པར་ཡང་གསུངས། དེ་ལྟར་མཉེན་བཙལ་བ་ནི་དམིགས་པ་གང་ལའང་བསྒྱུར་ཏུ་བཏུབ་པའི་དགོས་པ་ཡོད་དོ། །གཉེན་བཤེས་མཐུན་པས་ཡིད་བསྒྱུར་བ་བཞིན་ནོ། །ཞེས་གསུངས། བཞི་པ་ལམ་དུ་གཞུག་པ་ནི། མ་དག་འཁོར་བའི་གནས་ལ་ང་དང་བདག་ཏུ་བཟུང་བའི་ཆགས་སོགས་ཉོན་མོངས་པའི་སྒྲིབ་པ་སྦྱངས་ཤིང་གཞན་དོན་གཟུགས་སྐུ་འགྲུབ་པའི་རྟེན་འབྲེལ་དུ་རང་ཉིད་ཧཱུྃ་དུ་གྱུར་ནས་མགྲོན་པོ་ལམ་དུ་ཞུགས་པ་བཞིན་མིག་གིས་མཐོང་བའི་ས་ཕྱོགས་དང་མི་མཐོང་བའི་ས་ཕྱོགས་ནམ་མཁས་གར་ཁྱབ་དང་། ཁྱད་པར་དུ་དམྱལ་བ་སོགས་འགྲོ་བ་རིགས་དྲུག་གི་གནས་ཐམས་ཅད་དུ་ས་ལ་མ་རེག་ཙམ་དུ་སོང་ནས་གང་དུ་སོང་བའི་ཡུལ་ཕྱོགས་ཀྱི་མ་དག་པའི་སྣང་བ་དེ་ཐམས་ཅད་འཇའ་ལྟར་ཡལ་ནས་ཆོས་ཀྱི་དབྱིངས་ཀྱི་རང་བཞིན་དུ་སྦྱང་བ་དང་། དག་པ་སངས་རྒྱས་ཀྱི་ཞིང་དུ་རང་དོན་ཆོས་སྐུ་འགྲུབ་ཅིང་ཤེས་བྱའི་སྒྲིབ་པ་སྦྱང་བའི་རྟེན་འབྲེལ་དུ་སླར་ཡང་ཧཱུྃ་དྲག་པོར་བརྗོད་པས་ཧཱུྃ་དེ་བར་སྣང་ལ་རྒྱངས་ཀྱིས་སོང་སྟེ་རྣམ་གྲོལ་གྱི་ཞིང་ལྔ་བགྲོད་པར་བསམ། ལམ་ཞུགས་ཀྱི་སྐབས་འདིར་རང་ཉིད་ཧཱུྃ་མཐིང་ག་ཁྲུ་གང་བ་ཞིག་ཏུ་གསལ་བ་དང་ཧཱུྃ་དཀར་པོ་འོད་ལྔ་ལྡན་དུ་དམིགས་ཚུལ་ཡང་གསུངས། གསེར་ཕྲེང་ལས། མདུན་ན་ཕར་སྲིན་འགྲོས་ལྟ་བུའི་ལམ་ཕར་འཁྱོགས་ཚུར་འཁྱོགས་པ་རྒྱང་རིང་པོར་རྩེ་ཟད་མཚམས་ལ་ཐུག་པར་བསམས་ནས་ཧཱུྃ་རིང་པོར་བརྗོད་ཅེས་གསུངས། ཁྲིད་ཡིག་ནོར་བུའི་ལུགས་ལ་ཁྲུ་རེའི་སར་རི་མོ་སྲིན་འགྲོས་སུ་བྱས་ལ། མཐོང་སྣང་མ་ཟད་ཀྱི་བར་ལམ་གཏོད་པ་ལ་ཧཱུྃ་ཁྲུ་གང་བ་མཐིང་ནག་གཅིག་མགྲོན་པོ་འགྲོ་བ་ལྟར་སོང་ནས་མཐོང་བ་ལས་འདས་པའི་ཕྱོགས་སུའང་སྔར་བཞིན་སོང་སྟེ་ཕྱིར་མི་ལྡོག་པར་ཧཱུྃ་དེ་སོང་བར་བསམ་ཞིང་ཧཱུྃ་གླུ་རིང་པོར་བླང་ངོ་ཞེས་དང་། ཁྲིད་ཡིག་སངས་རྒྱས་མཉམ་སྦྱོར་ལས། རི་མོ་སྲིན་འགྲོས་ལྟ་བུ་དང་། རྒྱང་རིང་པོའི་ལམ་མཐོང་ཚད་ན་ཕར་ཕར་ཧཱུྃ་ཞིག་ནི་སོང་ནས་ལ་ཕར་ལྟོའི་རྒྱབ་དང་། སྔར་ཕྱིན་པའི་ཡུལ་ཁམས་རྣམས་སུ་འགྲོ་ཞིང་། རྗེས་ལ་ལུང་སྟོང་མདའ་ཤར་དུ་བལྟ་བ། ཕུ་ནུབ་ལ་བསྟན་པ། དོག་ཅིང་ཉམ་ང་བ་ནགས་རོང་དང་ཆུ་རྒྱུན་འབབ་སར་ཕྱིན་པས་མཐའ་མེད་པ་ལ་ཧཱུྃ་གཅིག་པུས་འགྲོ་བར་བསམ་ཞིང་ཧཱུྃ་རིང་ལ་སྙན་པར་བརྗོད། ཅེས་དང་། ཁྲིད་ཡིག་ཟབ་ལམ་གསལ་བྱེད་ལས། རང་གི་ལུས་དང་རླུང་སེམས་གཅིག་དྲིལ་ཧཱུྃ་ཡིག་སྔོན་པོའི་རྣམ་པ་ཅན་དུ་བྱས་ལ་མདུན་ན་ཕར་སྲིན་འགྲོས་ལྟ་བུའི་ལམ་ལ་ཞུགས་ནས་སོང་སྟེ་འཁྱོགས་མཚམས་སུ་ཅུང་ཟད་ངལ་གསོ་ཞིང་། རྒྱང་རིང་པོའི་མཐའི་ཚད་མེད་པའི་ཕ་རོལ་དུ་སོང་བར་བསམ་ཞིང་། ཧཱུྃ་རིང་པོར་བརྗོད་ལ་རང་བབས་སུ་ངལ་གསོ། ཡང་སྔར་བཞིན་ཚུར་ལོག་ནས་རང་སོར་གནས་པ་ལ་ངལ་གསོ་ཞེས་གསུངས། གསུམ་པ་སེམས་སྦྱོང་བ་ལ། བྱུང་ས་སྣོད་བཅུད་ལ་བརྟགས་ན་རྐྱེན་གསུམ་བྲལ་བའི་ནམ་མཁའ་ནི་བློས་བཏགས་པ་ཙམ། རླུང་གི་དཀྱིལ་འཁོར་ནི་རྡུལ་གྱི་ཚོགས་པ་དང་། དེ་བཞིན་ས་ཆུ་ལ་སོགས་པ་དང་འགྲོ་དྲུག་གི་ལུས་རྡུལ་ཕྲན་དང་། ངག་དུས་གསུམ། སེམས་སྐད་ཅིག་མ་ཆས་བྱས་པ། བསམ་གཏན་བཞིའི་འོད་ལུས་དང་། གཟུགས་མེད་བཞིའི་སེམས་རྒྱུན་ཡང་སྐད་ཅིག་མར་ཤེས་པས་གནས་ས་དང་འགྲོ་ས་མེད་པ་དེའི་ཤུགས་ཀྱིས་ཤེས་སླའོ། །ཁྲིད་ཡིག་ནོར་བུ་ལས། དང་པོ་བྱུང་ས་ལ་བརྟགས་པ་ནི་སེམས་ནི་དང་པོ་གང་ནས་བྱུང་ཕྱི་ནང་གི་ཡུལ་དང་ལུས་རྡུལ་ཕྲན་དུ་གཞིག་ཅིང་བརྟགས་པ་ན་མ་རྙེད་པ་ནི་སེམས་ཡེ་སྟོང་རྩ་བ་དང་བྲལ་བའི་དོན་རྟོགས་པའོ། །གཉིས་པ་ད་ལྟ་གང་ན་གནས་བརྟགས་པས་མ་རྙེད་པ་ནི་གཞི་མེད་ངོས་གཟུང་དང་བྲལ་བར་རྟོགས་པའོ། །གསུམ་པ་ཐ་མ་གར་འགྲོ་བརྟགས་པས་མ་རྙེད་པ་ནི་སེམས་འགྲོ་འོང་མེད་པའི་དོན་རྟོགས་པའོ། །ཞེས་སོ། །སྔོན་འགྲོ་གསུམ་གྱིས་ལྷག་མཐོང་མ་སྐྱེས་པ་བསྐྱེད་པ་ཞེས་གསུངས་པ་ནི། རྩད་བཅད་པ། མཚང་བཙལ་བ། བྱུང་གནས་འགྲོ་གསུམ་ལ་བརྟགས་པ་རྣམས་སོ། །གཉིས་པ་ནང་ལུས་ངག་ཡིད་གསུམ་གྱི་སྔོན་འགྲོས་སྒོ་གསུམ་གྱི་སྒྲིབ་པ་སྦྱོང་བ་ནི། ཟབ་དོན་རྒྱ་མཚོ་ལས། དེའང་གོང་གི་སྔོན་འགྲོ་གསུམ་གྱིས་ཕྱི་འཁྲུལ་བའི་རྐྱེན་སྣང་ཟད་ཀྱང་ནང་ལུས་ངག་ཡིད་གསུམ་གྱི་འཁྲུལ་བའི་རྒྱུ་དང་ས་བོན་མ་ཟད་པས་དེ་ཟད་པར་བྱ་བའི་ཕྱིར་ལུས་ངག་ཡིད་གསུམ་ནང་ལྟར་འཁོར་བ་དང་རུ་ཤན་དབྱེ་དགོས་སོ་གསུངས། དེ་ཡང་བག་ཆགས་སྒྱུ་ལུས་ཀྱི་ཕུང་པོ་འདི་གྲུབ་པ་ཙམ་ནས་འགྲོ་བ་རིགས་དྲུག་ཏུ་འཕེན་བྱེད་ཀྱི་ས་བོན་རྒྱུན་ཆགས་སུ་གནས་དྲུག་ཏུ་གནས་པ་ཡིན་ལ། འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་སེར་སྣ་དང་དྲུག་གིས་ཀུན་ནས་བསླངས་པའི་ལས་བསགས་སྟོབས་ཆེ་ཆུང་གི་དབང་གིས་འཆི་ཁར་རླུང་སེམས་རིགས་དྲུག་གི་ས་བོན་གང་རུང་སྟེང་དུ་འདུས་ནས་གནས་དེ་དང་དེར་སྐྱེ་བ་ཡིན་གསུངས། སྐལ་ལྡན་འཇུག་ངོགས་ལས། ལྷའི་ས་བོན་ང་རྒྱལ་ཏེ་དེ་ལ་དབྱེ་ན་བདུན། ལྷ་མིན་གྱི་ས་བོན་ལྟ་བ་སྟེ་དེ་ལ་དབྱེ་ན་ལྔ། མིའི་ས་བོན་ཐེ་ཚོམ། དུད་འགྲོའི་ས་བོན་གཏི་མུག་གམ་མ་རིག་པ་སྟེ་འདི་གཉིས་དོན་གཅིག་པར་མདོ་ལས་བཤད་དོ། །ཡི་དྭགས་ཀྱི་ས་བོན་འདོད་ཆགས། དམྱལ་བའི་ས་བོན་ཁོང་ཁྲོའམ་ཞེ་སྡང་སྟེ། དེ་དག་གི་འཁོར་ནི་ཁྲོ་བ་ལ་སོགས་ཉེ་ཉོན་རྣམས་ལས་ཅི་རིགས་པར་སྦྱར་བ་རྣམས་སོ། །ཞེས་གསུངས། ང་རྒྱལ་བདུན་ནི། རང་ལས་ཡོན་ཏན་ཆུང་བ་ལ་དམིགས་ནས་འདི་ལས་བདག་ཆེ་ལ། མཚུངས་པ་དང་མཉམ་མོ་སྙམ་པ་ང་རྒྱལ་ཙམ་མམ་ཆུང་བའི་ང་རྒྱལ། མཚུངས་པ་བས་ཀྱང་བདག་ཆེའམ་འཕགས་ལ་ཆེ་བ་དང་མཉམ་པར་འཛིན་པ་ཆེ་བའི་ང་རྒྱལ། ཆེ་བ་ལས་ཀྱང་བདག་འཕགས་སྙམ་པ་ང་རྒྱལ་ལས་ཀྱང་ང་རྒྱལ། ང་འོ་སྙམ་དུ་ཉེར་ལེན་གྱི་ཕུང་པོ་ལྔ་ལ་བདག་དང་བདག་གིར་ལྟ་བ་ངའོ་སྙམ་པའི་ང་རྒྱལ། གོང་མའི་ཡོན་ཏན་མ་ཐོབ་པ་ལ་ཐོབ་བོ་སྙམ་པ་མངོན་པའི་ང་རྒྱལ། ཆེས་འཕགས་པ་བས་བདག་ཅུང་དམན་མོད་ཀྱི་འོན་ཀྱང་བཟང་ངོ་སྙམ་པ་ཅུང་ཟད་སྙམ་པའི་ང་རྒྱལ། ཡོན་ཏན་མིན་པའི་སྐྱོན་ཉིད་ཡོན་ཏན་དུ་རློམ་ནས་ང་རྒྱལ་བ་ལོག་པའི་ང་རྒྱལ་བའོ། །ལྟ་བ་ལྔ་ནི། མཁས་འཇུག་རྩ་བ་ལས། འཇིགས་ཚོགས་ལ་ལྟ་བ་ནི། ཉེ་བར་ལེན་པའི་ཕུང་པོ་ལྔ་ལ་བདག་དང་བདག་གི་བར་ལྟ་བ་སྟེ། ལྟ་བ་གཞན་གྱི་རྟེན་བྱེད་པའོ། །མཐར་འཛིན་པའི་ལྟ་བ་ནི། བདག་གམ་ཕུང་པོ་ལྔ་ལ་རྟག་པ་དང་ཆད་པར་འཛིན་པ་སྟེ། དབུ་མའི་ལམ་གྱིས་ངེས་པར་འབྱུང་བ་ལ་བར་དུ་གཅོད་པའི་ལས་ཅན་ནོ། །ལོག་པར་ལྟ་བ་ནི། ལས་རྒྱུ་འབྲས་ལ་སོགས་ཡོད་པའི་དོན་ལ་མེད་པར་ལྟ་བ་སྟེ། དགེ་རྩ་གཅོད་པར་བྱེད་པའི་ལས་ཅན་ནོ། །ལྟ་བ་མཆོག་འཛིན་ནི་གོང་གི་ལྟ་བ་ངན་པ་གསུམ་དང་ལྟ་བའི་གནས་ཉེར་ལེན་གྱི་ཕུང་པོ་ལྔ་ལ་མཆོག་དང་དམ་པར་ལྟ་བ་སྟེ་ལྟ་ངན་ལ་མངོན་དུ་ཞེན་པར་བྱེད་པའོ། །ཚུལ་ཁྲིམས་དང་བརྟུལ་ཞུགས་མཆོག་འཛིན་ནི། འདག་གྲོལ་མ་ཡིན་པའི་ཚུལ་ཁྲིམས་དང་བརྟུལ་ཞུགས་དང་དེའི་གནས་ཕུང་ལྔ་ལ་འདག་གྲོལ་ངེས་འབྱིན་དུ་ལྟ་བ་སྟེ། ངལ་བ་འབྲས་བུ་མེད་པར་བྱེད་པའི་ལས་ཅན་ནོ། །ཞེས་དང་། ཐེ་ཚོམ་ནི། བདེན་པའི་དོན་ལ་ཡིད་གཉིས་ཟ་བ་སྟེ། དགེ་བའི་ཕྱོགས་ལ་མི་འཇུག་པའི་ལས་ཅན་ནོ། །ཞེས་གསུངས། སྐལ་ལྡན་འཇུག་ངོགས་ལས། འདིར་སྦྱོང་བྱེད་ཀྱི་གཉེན་པོ་བསྒོམ་པ་ནའང་། བརྟེན་པའི་ས་བོན་དྲུག་པོ་དེ་བདག་མེད་རྟོགས་པའི་ཤེས་རབ་ཀྱི་མེས་བསྲེགས་པ་དང་། རྟེན་གྱི་ས་བོན་དྲུག་པོ་དེ་ཡི་གེ་གསུམ་ལས་འཕྲོས་པའི་འོད་ཟེར་གྱི་མེས་བསྲེག་པ་སྟེ། དེ་ལྟ་བུའི་རིགས་དྲུག་སྲེག་སྦྱོང་བྱས་ན་དོན་ལ་གནས་པ་ཡིན་ནོ། །ཞེས་གསུངས། དེ་ལ་ཐབས་མཆོག་ཟབ་མོའི་མན་ངག་གིས་རྟེན་རིགས་དྲུག་གི་ས་བོན་སྦྱང་། བརྟེན་པ་ལས་ཉོན་གྱི་བག་ཆགས་གཏོར། འཁོར་བར་སྐྱེ་བའི་རྒྱུན་དབྱིངས་སུ་གཅོད་པ་ཡིན་ཏེ། དེ་ཡང་བག་ཆགས་ཀྱི་ལུས་འདི་མ་རིག་གསུམ་གྱི་རྒྱུས་བསྐྱེད་པའི་ཕྱིར་རིགས་དྲུག་གི་ས་བོན་ཉིད་དུ་གནས་པ་དང་། ཆོས་སྐུ་གཞིར་གནས་ཀྱི་རིག་པ་འདི་སྐུ་གསུམ་དངོས་ཡིན་ཕྱིར་སྐུ་གསུམ་ཡི་གེ་གསུམ་གྱི་རང་བཞིན་དུ་ཤར་བ་ཡིན། དེ་ལ་སྦྱང་བྱ་ནི། སྤྱི་བོར་ལྷ་ཡི་ས་བོན་ཨ་དཀར་སྐྱ་ན་བུན་དཀར་སེར་གྱི་རྣམ་པ་ཅན་དང་བཅས་པ། མགྲིན་པར་ལྷ་མིན་གྱི་ས་བོན་སུ་སེར་སྐྱ་ན་བུན་ལྗང་ནག་གི་རྣམ་པ་ཅན་དང་། སྙིང་ཁར་མིའི་ས་བོན་ནྲྀ་སྔོ་སྐྱ་ན་བུན་ཁ་དོག་སྣ་ཚོགས་ཀྱི་རྣམ་པ་ཅན་དང་། ལྟེ་བར་དུད་འགྲོའི་ས་བོན་ཏྲི་དམར་ནག་རང་མདོག་གི་ན་བུན་དང་བཅས་པ། གསང་བར་ཡི་དྭགས་ཀྱི་ས་བོན་པྲེ་ཐལ་སྐྱ་ན་བུན་ཅན་དང་། རྐང་མཐིལ་དུ་དམྱལ་བའི་ས་བོན་དུ་ནག་པོ་ན་བུན་སྔོ་དམར་གྱི་རྣམ་པ་ཅན་དང་། གཞན་ཡང་ཏྲི་ལྗང་ནག་དང་། པྲེ་དམར་སྐྱའང་གསུངས་པས་གང་ལྟར་ཡང་རུང་། མཐོ་རིས་གསུམ་གྱི་ཡིག་མགོ་གྱེན་དང་ངན་སོང་གསུམ་གྱི་ཡིག་མགོ་ཐུར་བསྟན་དུ་གསལ་གསུངས། སྦྱོང་བྱེད་སངས་རྒྱས་ཀུན་གྱི་ངོ་བོ་བླ་མའི་སྐུ་གསུང་ཐུགས་ཀྱི་རང་བཞིན་ཡི་གེའི་རྣམ་པར་ཤར་བ་སྤྱི་བོར་ༀ་དཀར་པོ། མགྲིན་པར་ཨཱ་དམར་པོ། སྙིང་གར་ཧཱུྃ་མཐིང་ག་རྣམས་ལས་ཉི་མ་འབུམ་གྱི་འོད་ལྟར་བཀྲག་མདངས་གཟི་བྱིན་འབར་ནས། འབྲུ་གསུམ་བཟླས་པའི་རྐྱེན་གྱིས་འོད་ཟེར་དཔག་ཏུ་མེད་པ་བྱུང་འགྲོ་བ་རིགས་དྲུག་གི་ས་བོན་བག་ཆགས་དང་བཅས་པ་དངོས་མེད་དུ་སྦྱངས་བར་བསམ་མོ། །མས་ནས་སྦྱངས་པ་དང་། ཡས་ནས་སྦྱངས་པ་དང་། ཅིག་ཆར་དུ་བསྲེགས་པ་སོགས་རང་རང་གི་ཁམས་དང་སྦྱར་དགོས་གསུངས། ཟབ་དོན་རྒྱ་མཚོ་ལས། སྦྱང་གཞི་འགྲོ་བའི་གནས་དྲུག་ཏུ། སྦྱོང་བྱེད་སྐུ་གསུམ་གྱི་ཡི་གེས་སྦྱོང་བ་ནི། རང་གི་ལུས་ཀྱི་སྤྱི་བོར་ཨ་དཀར་པོ་ལྷའི་བག་ཆགས་དཀར་པོ་སྒྲིབ་པའི་རྣམ་པ་ཅན་ཏུ་འདུག་པར་བསམ། དེ་བཞིན་ཏུ་མགྲིན་པར་སུ་ལྗང་སེར་ལ་ལྷ་མ་ཡིན་གྱི་བག་ཆགས། སྙིང་ཁར་ནྲྀ་སྔོ་སྐྱ་ལ་མིའི་བག་ཆགས། ལྟེ་བར་ཏྲི་དམར་ནག་ལ་དུད་འགྲོའི་བག་ཆགས། གསང་བར་པྲེ་ལྗང་གུ་ལ་ཡི་དྭགས་ཀྱི་བག་ཆགས། རྐང་མཐིལ་དུ་དུ་དུད་ཁ་ལ་དམྱལ་བའི་བག་ཆགས་རྣམས་འདུས་པར་བསྒོམ་པའི་སྤྱི་བོར་སྐུའི་ས་བོན་ༀ་དཀར་པོ་ལས་འོད་ཟེར་འཕྲོ་བ། མགྲིན་པར་ཨཱཿདམར་པོ་ལས་འོད་ཟེར་འཕྲོ་བ། སྙིང་ཁར་ཧཱུྃ་མཐིང་ག་ལས་འོད་ཟེར་འཕྲོ་བའི་འོད་ཀྱིས་ས་བོན་དྲུག་ལུས་ངག་ཡིད་གསུམ་གྱི་སྒྲིབ་པ་མ་རིག་འཁྲུལ་བའི་བག་ཆགས་ཐམས་ཅད་ཐུལ་ཐུལ་ཚིག་པར་བསམ་ཞིང་བཟླའོ། །ༀ་ཨཱཿཧཱུྃ། འབུམ་ཚོ་བདུན་དབྱངས་སྙན་པོས་གླུ་དང་བཅས་པས་བཟླའོ། །དེའི་དུས་སུ་བདག་ཇི་ལྟ་བ་བཞིན་སེམས་ཅན་ཐམས་ཅད་ཀྱི་གནས་གསུམ་གྱི་ཡི་གེ་ལས་མེ་འབར་ས་བོན་དྲུག་ཚིག་པར་བསམ་ཞིང་བཟླས་སོ། །ཞེས་དང་། གཞན་དུ་འབྲུ་གསུམ་ལས་ཡེ་ཤེས་ཀྱི་འོད་ཟེར་མེ་ལྕེའི་ཕྲེང་བ་ལྟར་འཕྲོས་པས་ལུས་ངག་ཡིད་གསུམ་གྱི་སྡིག་སྒྲིབ་རིགས་དྲུག་གི་ས་བོན་མ་རིག་འཁྲུལ་པའི་བག་ཆགས་ཐམས་ཅད་ཐུལ་གྱིས་ཚིག་ནས་མི་གནས་པར་བྱས་ཏེ་ལུས་ངག་ཡིད་གསུམ་རྒྱལ་བའི་སྐུ་གསུང་ཐུགས་སུ་བྱིན་གྱིས་བརླབས། རིགས་དྲུག་གི་གནས་ཐམས་ཅད་འོད་ཟེར་གྱི་འདུ་འཕྲོས་ཁྱབ་ཅིང་རིགས་དྲུག་སོ་སོའི་སྡིག་སྒྲིབ་བག་ཆགས་དང་བཅས་པ་ཐམས་ཅད་ཐུལ་གྱིས་བསྲེགས་ནས་རྒྱལ་བ་ཐམས་ཅད་ཀྱི་ཡོན་ཏན་ཡོངས་སུ་རྫོགས་པར་བསམ་ཞིང་དབྱངས་དང་བཅས་པའམ་དབྱངས་མེད་ཀྱང་རུང་བར་གསུངས་པ་དང་། གསེར་ཕྲེང་ལས། སྦྱང་བྱ་རང་ཉིད་ཐ་མལ་བའི་སྤྱི་བོའི་ནང་དུ་ཨ་དཀར་ནག་ལ་ལྷའི་བག་ཆགས་དང་ང་རྒྱལ། མགྲིན་པར་སུ་སེར་ནག་ལ་ལྷ་མ་ཡིན་གྱི་ཕྲག་དོག ། སྙིང་གར་ནྲྀ་སྔོ་ནག་ལ་མིའི་འདོད་ཆགས། ལྟེ་བར་ཏྲི་དམར་ནག་ལ་དུད་འགྲོའི་གཏི་མུག །གསང་བར་པྲེ་ལྗང་ནག་ལ་ཡི་དྭགས་ཀྱི་སེར་སྣ། རྐང་མཐིལ་དུ་དུ་དུད་ཁ་ལ་དམྱལ་བའི་ཞེ་སྡང་གི་བག་ཆགས་རྣམས་ཡི་གེའི་ཁ་དོག་དང་མཐུན་པར་ཡོད་པ་ལ་ལས་དང་ཉོན་མོངས་པ་འཁོར་དང་བཅས་པ་སོལ་དོང་ནས་དུ་བ་འཕྱུར་བ་ལྟར་བསམ་ལ། སྦྱོང་བྱེད་སྐུ་གསུང་ཐུགས་ཀྱི་ཡི་གེ འང་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། སྙིང་ཁར་ཧཱུྃ་མཐིང་ག་གསུམ་ལས་ཡེ་ཤེས་ཀྱི་མེ་འབར་བས་ཡི་གེ་དྲུག་བག་ཆགས་དང་བཅས་ཐམས་ཅད་བསྲེགས་ནས་འཁོར་བ་ངན་སོང་གི་རྒྱུ་འབྲས་ཐམས་ཅད་དག་སྟེ་ལུས་ཤེལ་གོང་ཕྱིས་པ་ལྟར་བསམ་ཞིང་ༀ་ཨཱཿཧཱུྃ་དབྱངས་དང་བཅས་པས་བརྗོད་དོ་ཞེས་གསུངས་སོ། །གསུམ་པ་གསང་བ་ལུས་ངག་ཡིད་གསུམ་གྱི་སྔོན་འགྲོས་སྒོ་གསུམ་གྱི་གནས་ལུགས་བསྟན་པ་ལ། ཞི་གནས་དང་ལྷག་མཐོང་ཟུང་འཇུག་གསུམ་བསྟན་པ་ལས། འདིར་ཞི་གནས་ལ་རྣལ་དུ་དབབ་པ་དང་། སོར་གཞུག་པ་གཉིས་ལས། དང་པོ་ནི་མཁའ་འགྲོ་ཡང་ཏིག་གི་ཁྲིད་ཡིག་ནོར་བུ་ལས། བདེ་བའི་མལ་དུ་ཉལ་ལ་ལུས་སྒུལ་བསྐྱོད་དང་བྲལ་བ། ངག་སྨྲ་བརྗོད་དང་བྲལ་བ། སེམས་དྲན་བསམ་དང་བྲལ་བས་སོས་དལ། ཁོང་ལྷོད་བག་ཕབ་ལ་ཕྱམ་གྱིས་སྐྱེ་མེད་བསམ་བརྗོད་དང་བྲལ་བའི་ངང་ལ་འཇོག་པའོ། །ཞེས་པ་ལྟར་རྣལ་མ་ནི་མ་བཅོས་པའི་དོན་དང་དབབ་པ་ནི། དེ་ལ་རང་བབས་སུ་འཇོག་པའི་ཕྱིར་རྣལ་དུ་དབབ་པའོ། །གཉིས་པ་སོར་གཞུག་པ་ལ་གསུམ་ལས། དང་པོ་ཉན་ཐོས་ཀྱི་ལྟ་སྟངས་རྣམ་སྣང་གི་ཆོས་བདུན་ནི། རྐང་པ་སྐྱིལ་ཀྲུང་། ལག་པ་མཉམ་བཞག །སྒལ་ཚིགས་དྲང་པོ། ལྕེ་ཡ་རྐན། དབུགས་དལ་བ། མིག་སྣ་རྩེ། མགྲིན་པ་ཡིད་ཙམ་དགུག་པར་མཉམ་པར་བཞག་གོ །གཉིས་པ་བྱང་ཆུབ་སེམས་དཔའི་ལྟ་སྟངས་སྐྱིལ་ཀྲུང་སོགས་གོང་དང་འདྲ་ལ་མིག་བར་སྣང་ལ་མདའ་གང་ཙམ་དུ་བལྟའོ། །གསུམ་པ་ཁྲོ་བོའི་ལྟ་སྟངས་ནི། ཟབ་དོན་ལས། རྐང་པ་གྱད་ཀྱི་དོར་ཐབས་སུ་བགྲད། མིག་བར་སྣང་ལ་གྱེན་དུ་བགྲད། ཧ་ཧ་དང་ཧི་ཧི་ལ་སོགས་པ་བརྗོད་ཅིང་སེམས་སྤྲོས་པ་དང་བྲལ་བར་བཞག་གོ་ཞེས་དང་། ཁྲིད་ཡིག་ནོར་བུའི་ལུགས་ལ་ཁྲོ་བོའི་ལྟ་སྟངས་ལ་གསུམ་གསུངས་པ་ལས། དང་པོ་གྱད་ཀྱི་དོར་སྟབས་ནི། ལངས་ཏེ་གོམ་པ་བགྲད་མིག་ཧད་པོར་བལྟས་ལ་ཞི་གནས་བསྒོམ་མོ། །གཉིས་པ་འཇིགས་པའི་སྒེག་འགྲོས་ནི། གོམ་པ་དལ་གྱིས་འདོར་ཞིང་ཞི་གནས་དང་བསྲེས་སོ། །གསུམ་པ་སེང་གེའི་མཆོང་སྟངས་ནི། མཆོང་རྒྱུག་རྒོད། སེམས་དགག་སྒྲུབ་ཏུ་འཕྲོར་བཅུག་ནས་ཞི་གནས་ཀྱི་དོན་ལ་རྩལ་སྦྱངས་པས་ཕྱིས་སྤྱོད་ལམ་ཐམས་ཅད་ཞི་གནས་སུ་འཆར་རོ། །ཞེས་དང་། ཟབ་དོན་རྒྱ་མཚོའི་སྤྲིན་ཕུང་ལས། དེ་ལྟར་ཉན་ཐོས་ཀྱི་ལྟ་སྟངས་ཀྱིས་ལུས་ངག་ཡིད་གསུམ་མི་གནས་པ་གནས་པར་བྱ། བྱང་ཆུབ་སེམས་དཔའི་ལྟ་སྟངས་ཀྱིས་གནས་པ་བརྟན་པར་བྱ། ཁྲོ་བོའི་ལྟ་སྟངས་ཀྱིས་བརྟན་པ་གྲོལ་བར་བྱའོ། །ཞེས་གསུངས། གཞན་དུ་ཞི་གནས་ཀྱི་རང་བཞིན་རྒྱུད་ལ་བསྐྱེད་པ་ལ་གསུམ་ལས། དང་པོ་སྔོན་འགྲོ་རྣལ་དུ་དབབ་པས་ཞི་གནས་མ་སྐྱེས་པ་སྐྱེད་པར་བྱེད་པ། གཉིས་པ་དངོས་གཞི་ཉན་ཐོས་དང་བྱང་ཆུབ་སེམས་དཔའི་ལྟ་སྟངས་ཀྱིས་སོར་གཞུག་པས་སྐྱེས་པ་ངོ་སྤྲད་དེ་ཉམས་སུ་བླང་ཚུལ། གསུམ་པ་རྗེས་ལ་གྱད་སོགས་ལྟ་སྟངས་གསུམ་གྱིས་རྐྱེན་དང་བསྲེས་ཏེ་བོགས་ད བྱུང་ཞིང་རྩལ་སྦྱངས་པ འོ། །ཞེས་གསུངས། ལྷག་མཐོང་དང་ཟུང་འཇུག་གཉིས་ནི་ཁྲིད་ཡིག་ནོར་བུ་ལས་ཤེས་པར་བྱའོ། ། དོན་གཉིས་པ་དངོས་གཞི་ཟག་པ་མེད་པའི་ཡེ་ཤེས་རྒྱུད་ལ་བརྟན་པའི་ཐབས་ལ་གཉིས་ཏེ། དངོས་གཞིའི་སྒྲ་བཤད་པ་དང་། དོན་གྱི་འགྲོས་དབྱེ་བའོ། །དང་པོ་ལ་ཚིག་གི་མཐའ་བཅད་པ་དང་། དོན་གྱི་ཐོག་ཏུ་དབབ་པ་གཉིས་ལས། དང་པོ་ནི་དངོས་གཞི་ཞེས་པ་ལ་མུ་བཞི་ལས། གཞི་ཡིན་ལ་དངོས་མ་ཡིན་པ་ཕོ་བྲང་མཐོང་ནས་རྒྱལ་པོ་མ་མཐོང་བ་ལྟར་རྫོགས་པ་ཆེན་པོ་ཁ་ཅིག་གིས་ཆོས་གཞི་ལ་ལུས་ནས་ལག་ཏུ་བླང་དུ་མེད་པར་ཆོས་ཉིད་ཁ་འབྱམས་སུ་སོང་བས་འཆི་ཁར་ཐ་མལ་དུ་འཆི་བ་རྣམས་སོ། །དངོས་ཡིན་ལ་གཞི་མ་ཡིན་པ་ནི་རྒྱལ་པོ་མཐོང་ཡང་དེའི་མཚན་ཉིད་གཏན་ལ་མ་ཕེབས་པ་ལྟར། མན་ངག་ཁ་ཅིག་ཐོག་མ་གནད་ཐོག་ཏུ་ཕེབས་ཀྱང་ཐ་མ་ཚིག་གིས་མཐའ་མ་ཆོད་པའི་རྗེས་ལ་དེའི་ཐོག་ཏུ་མི་གནས་པར་པྲ་ཡས་པ་རྣམས་སོ། །དངོས་དང་གཞི་གཉིས་ཀ་མ་ཡིན་པ་ནི་རྒྱལ་པོ་དང་ཕོ་བྲང་གང་ཡང་མ་མཐོང་བ་ལྟར་ཐེག་པ་ཐུན་མོངས་པ་སྤྱིའི་ཚིག་གིས་ལྟ་སྒོམ་ཡིད་དཔྱོད་ཀྱི་ལམ་དུ་བྱས་ནས་དོན་ངོ་མ་འཕྲོད་པས་ཐ་མ་གར་འགྲོ་ངོ་མི་ཤེས་པ་རྣམས་སོ། །དངོས་དང་གཞི་གཉིས་ཀ་ཡིན་པ་ནི། རྒྱལ་པོ་ཡང་མཐོང་མཚན་ཉིད་ཀྱང་ལེགས་པར་ཤེས་པ་དང་འདྲ་བར། མངོན་སུམ་སྙིང་ཐིག་གི་གནད་རིག་པ་དངོས་སུ་མཐོང་བས། ལྟ་སྒོམ་ཡིན་སྙམ་ལ་རག་མ་ལས། གཞི་མཐོང་བས་ལྡོག་པའི་ས་མེད་པར་འཁོར་འདས་དུས་གཅིག་ལ་ཆོད་པའི་རྣལ་འབྱོར་བ་ཞེས་བྱའོ། །དེའང་ཆོས་ཉིད་མངོན་སུམ་གྱི་གནད་བླ་མས་བསྟན་པ་མཐོང་ནས་ཡིད་ཆེས་ཀྱང་། བརྩོན་འགྲུས་ཀྱིས་ཉམས་སུ་མ་བླངས་ན་ཚེ་འདི་ཉིད་ལ་ཟག་བཅས་མི་སྣང་བར་སངས་མི་རྒྱ་ལ། ཕྱི་མ་ལའང་འདི་དང་འཕྲད་དཀའ་བས་འཇིག་རྟེན་རྒྱབ་ཏུ་བོར་ནས་ཉམས་སུ་ལེན་པ་གལ་ཆེའོ། །གལ་ཏེ་གནད་ཡོད་ཀྱང་ཉམས་སུ་མ་བླངས་ན་ས་འོག་གི་གཏེར་དང་འདྲ་བས་ཕན་ཐོག་པ་མ་ཡིན་ནོ།། གཉིས་པ་དོན་གྱི་ཐོག་ཏུ་དབབ་པ་ནི། རིག་པ་རང་ཐོག་ཏུ་ཕབ་ནས་དངོས་སུ་ངོ་སྤྲད་པ་རྡོ་རྗེ་ལུ་གུ་རྒྱུད་ཀྱི་སྣང་བ་མཐོང་བ་ལ་ཟེར་རོ། །དེའང་དངོས་སུ་བསྟན་དུ་མེད་པར་རིག་པ་ཞེས་ཐུན་མོང་བ་རྣམས་ཀྱིས་བརྗོད་ཀྱང་ཐོག་ཏུ་མི་ཕེབས་ཏེ། རྡོ་རྗེ་གདན་མ་མཐོང་བར་དེའི་ལོ་རྒྱུས་བཤད་པའམ། དམུས་ལོང་བཤད་པ་བཟང་པོས་ཁ་དོག་གཞན་ལ་འཆད་པ་དང་འདྲའོ། །རེས་རིག་པ་སྐྱེ་མེད་སྟོང་པ་ཡིན་སྙམ། རེས་སྣ་ཚོགས་འཆར་བ་ཡིན་སྙམ། དེ་གཉིས་ཚིག་གི་ཁྲིད་ཁ་ལེགས་ལེགས་པོས་ངོ་བོ་སྟོང་པ་ནམ་མཁའ་འདྲ་བ་འཆར་ཚུལ་མ་འགགས་པ་མེ་ལོང་གི་གཟུགས་བརྙན་འདྲའོ། །ཞེས་བཤད་ཀྱང་། ད་ལྟ་ཡོད་ཡོད་པོ། ཕུག་ན་སྟོང་ཕྱམ་ཅི་ཡང་མེད་པ་ཅིག་ཁོ་ན་ལ་གདེངས་འཆའ་བས། ཐེག་པ་རིམ་དགུའི་ལྟ་སྒོམ་སྤྱོད་པས་སངས་མི་རྒྱ་སྟེ། ཡིད་དཔྱོད་ཚིག་གི་འགྲོ་ལྡོག་གིས་ཉམས་རེས་སྐྱེ་འགྲིབ་ཅུང་ཟད་རེ་བྱུང་དུས། རེས་ཡིན་སྙམ་གྱི་སྟེང་དུ་རྩལ་སྦྱོང་རྟོགས་པ་སོ་མ་ཞིག་འཁྲུངས་སྙམ་ནས་ཡིད་སོས། རེས་མིན་སྙམ་གྱི་དོང་དུ་སེམས་ལྷུང་། མི་དགའ་གདུང་བའི་ལྐོག་གནོང་ཀྱིས་འཚེར་ཞིང་། ངེས་པར་ཅི་ཡིན་ད་ལྟ་ཤི་ན་ཅི་བྱ་སྙམ་དུ་ཆོས་མེད་པོ་འཁོར་བའི་བཤལ་ཐག་བྱེད་པས་རིག་པའི་དོན་ལ་མཐོང་དུས་མེད་དེ། སློབ་དཔོན་དགའ་རབ་རྡོ་རྗེའི་ཞལ་སྔ་ནས། ཡིད་དཔྱོད་འཛིན་པའི་ལྟ་བ་ཉོན་རེ་མོངས། །དེ་ལ་བརྟེན་པའི་སྒོམ་པ་ཡི་རེ་མུག །དེ་ལས་བྱུང་བའི་སྤྱོད་པ་ཐང་རེ་ཆད། །དེ་ལ་འབྲས་བུའི་རེ་བ་ཡོངས་རེ་འཁྲུལ། ཞེས་ལེགས་པར་གསུངས་པ་ཐོག་ཏུ་བབས་སོ། །འདིར་རིག་པ་ལུ་གུ་རྒྱུད་མཐོང་བ་ནི་རིག་པའི་རང་བཞིན་ལ་བཟང་ངན་དང་འཕོ་འགྱུར་མེད་པར་ཐམས་ཅད་དེའི་ངང་ལས་འགྲོ་ས་གཞན་མེད་པས་གཞི་ཞེས་བྱ་སྟེ་གཞན་ཏུ་འཆོལ་མི་སྲིད་དོ། །ཞེས་སོ། །རྣམ་མཁྱེན་ཤིང་རྟ་ལས། མངོན་སུམ་ཡིད་དཔྱོད་ལ་རག་མ་ལས་པར་སྟོན་པ་ཡིན་པས་ལམ་ཁྱད་གནམ་ས་ལྟ་བུ་ཡོད་ལ། རང་སྡེ་ཕྱོགས་གཅིག་ཏུ་ཟབ་པར་སྟོན་པ་གསང་སྐོར་མན་ཆད་དུ་དཔེ་དོན་རྟགས་གསུམ་གྱི་རིག་པའི་གཞལ་ཚུལ་ཙམ་འདྲ་ཡང་། འདི་ནི་དཔྱོད་ལྡན་གྱིས་རྟེན་གསུམ་གཞལ་བ་ལྟར་དངོས་དང་གཞི་གཉིས་ཀའི་མཚན་ཉིད་གཏན་ལ་ཕེབས་པ་དང་མཚུངས་ལ། གཞན་དུ་ནི་གཞི་མཐོང་ཡང་དངོས་གཏན་ལ་མ་ཕེབས་པ་བྱིས་པས་ལྷ་ཁང་ལ་བལྟས་པ་དང་མཚུངས་པ་ཡིན་ནོ་གསུངས། དཔལ་སྤྲུལ་རིན་པོ་ཆེས་ཡེ་ཤེས་བླ་མའི་དངོས་གཞིའི་སྒྲ་བཤད་ཐེག་མཆོག་མཛོད་ལས་གསུངས་པ་ལྟར་ཡིན་ཚུལ་ཡེ་ཤེས་བླ་མ་ལ་ཕྱག་མཆན་བཏབ་པ་བླ་མ་ལུང་རྟོགས་ལ་གནང་བ་དང་། སྐྱབས་རྗེ་བཀའ་དྲིན་ཅན་ལ་དཔལ་སྤྲུལ་རིན་པོ་ཆེ་དང་། མཁན་ཆེན་པདྨ་བཛྲ། ཞབས་དྲུང་རིན་པོ་ཆེ་རྣམས་ཀྱིས་ཀྱང་། དངོས་ནི་ལྷུན་གྲུབ་ཐོད་རྒལ་གྱི་ཞིང་སྐུ་ཕོ་བྲང་གསུམ་ཡིན་ཚུལ་གསུངས་པ་ནི། ཆོས་ཉིད་མངོན་སུམ་གྱི་དུས་ན་དབྱིངས་ཐིག་རིག་གསུམ་དང་། ཉམས་གོང་འཕེལ་གྱི་མཇུག་རྫོགས་པ་ན་སྐུ་རྐྱང་པ་དང་། ཚད་ཕེབས་ཀྱི་ཚེ་དབྱིངས་ཐིག་རིག་གསུམ་ཞིང་སྐུ་ཕོ་བྲང་གསུམ་གྱི་རང་བཞིན་དུ་འཆར་ཚུལ་གསུངས། དེ་ཡང་ཐེག་མཆོག་མཛོད་ལས། གཞི་ཡིན་ལ་དངོས་མ་ཡིན་པ་ཕོ་བྲང་མཐོང་ནས་རྒྱལ་པོ་མ་མཐོང་བ་ལྟར། རྫོགས་པ་ཆེན་པོ་ཁ་ཅིག་གི་ཆོས་གཞི་ལ་ལུས་ནས་ལག་ཏུ་བླང་དུ་མེད་པ་སོགས་གསུངས་པ་ནི། མན་ངག་སྡེའི་ཕྱི་སྐོར་དུ་གཞི་གདོད་མའི་གནས་ཚུལ་རྒྱ་ཆེར་བཤད་པ་ལས། ལམ་ཉམས་སུ་ལེན་ཚུལ། བར་དོའི་འཆར་ཚུལ། མཐར་ཐུག་གི་འབྲས་བུའི་གྲོལ་ཚུལ་མ་བཤད་པས་གཞི་ཡིན་ལ་དངོས་མ་ཡིན་པའོ། །དངོས་ཡིན་ལ་གཞི་མ་ཡིན་པ་ནི་རྒྱལ་པོ་མཐོང་ཡང་དེའི་མཚན་ཉིད་གཏན་ལ་མ་ཕེབས་པ་ལྟར། མན་ངག་ཁ་ཅིག་ཐོག་མ་གནད་ཐོག་ཏུ་ཕེབས་ཀྱང་ཐ་མ་ཚིག་གི་མཐའ་མ་ཆོད་པས་རྗེས་ལ་དེའི་ཐོག་ཏུ་མི་གནས་པར་པྲ་ཡས་པ་རྣམས་སོ། །གསུངས་པ་ནི། ནང་སྐོར་དུ་ལམ་དཔེ་དོན་རྟགས་གསུམ་གྱིས་ངོ་སྤྲད་པ་ཙམ་བཤད་ཀྱང་གཞིའི་གནས་ཚུལ་དང་མཐར་ཐུག་གི་འབྲས་བུའི་གྲོལ་ཚུལ་མ་བཤད། དཔེ་དོན་རྟགས་གསུམ་ནི། དེ་ཡང་གཞི་གནས་ཡེ་ཤེས་རང་ལ་ཡོད་པ་དེ་ད་ལྟར་ལམ་དུས་ན་དཔེ་དོན་རྟགས་གསུམ་གྱིས་མཚོན་ནས་ངོ་སྤྲད་པ་ཙམ་ཡོད་དེ་དཔེ་རྡོ་རྗེ་སེམས་དཔའི་མེ་ལོང་ཞེས་ཤེལ་རྡོ་ལ་བརྟེན་ནས་ཀ་དག་དང་ལྷུན་གྲུབ་ཀྱི་གདངས་ཡོད་ཚུལ་ངོ་སྤྲོད་པ་དང་། རྟགས་སྒྲོན་མ་གཏེམ་པའི་སྣང་བ་མངོན་སུམ་དང་། དོན་དེ་ལྟ་བུའི་གནས་ལུགས་དེ་ཕྱིས་བར་དོའི་དུས་མངོན་སུམ་འཆར་བས་ངེས་ཤེས་སྐྱེ་ན་གྲོལ་ཞེས་པ་ལས་ཚེ་འདིར་དངོས་སུ་ཉམས་སུ་ལེན་ཚུལ་ནི་མེད་གསུངས་ནས་སྤྱིར་བསྟན་པ་དང་། བྱེ་བྲག་གསང་སྐོར་དུ་ལམ་གྱི་བྱེ་བྲག་བསྒོམ་པ་ཙམ་བསྟན་ཀྱང་གཞིའི་གནས་ཚུལ་དང་མཐར་ཐུག་གི་གྲོལ་ཚུལ་རྣམས་མ་བཤད། ལམ་གྱི་སྒོམ་ཚུལ་ནི་ཕྱག་མཆན་ལས། སྒྲོན་དྲུག་གི་རྣམ་བཞག་སོགས་བསྟན་ནས་ཚེ་འདིར་ཀ་དག་བདེ་བ་ཆེན་པོའི་ཡེ་ཤེས་ཀྱི་རང་གདངས་ལྷུན་གྲུབ་ཀྱི་སྣང་བ་དབྱིངས་ཐིག་ལེ་ལ་སོགས་པ་ལུས་ཀྱི་བྱེད་པ་གནད་དུ་བཅིང་ནས་ཉམས་སུ་བླང་བ་ཙམ་ཡོད་ཀྱང་། རྟགས་སྣང་བ་བཞིའི་ལམ་གྱི་ཚོད་འཛིན་དང་། གྲུབ་དོན་མཐར་ཐུག་འཕོ་ཆེན་གྱི་སྐུར་བཞེངས་པ་སོགས་མན་ངག་མང་པོ་གབ་པས་གནད་མཐར་ཐུག་པ་མིན་ནོ། །དངོས་དང་གཞི་གཉིས་ཀ་ཡིན་པ་ནི། རྒྱལ་པོ་ཡང་མཐོང་མཚན་ཉིད་ཀྱང་ལེགས་པར་ཤེས་པ་དང་འདྲ་བར་མངོན་སུམ་སྙིང་ཐིག་གི་གནད་རིག་པ་དངོས་སུ་མཐོང་བས། ལྟ་སྒོམ་ཡིན་སྙམ་ལ་རག་མ་ལས། གཞི་མཐོང་བས་ལྡོག་པའི་ས་མེད་པར་འཁོར་འདས་དུས་གཅིག་ལ་ཆོད་པའི་རྣལ་འབྱོར་པ་ཞེས་བྱའོ། །ཞེས་གསུངས་པ་ནི། ཡང་གསང་བླ་མེད་དུ་གཞི་གདོད་མའི་གནས་ལུགས། ལམ་ལྟ་སྒོམ་སྤྱོད་གསུམ། འབྲས་བུ་མཐར་ཐུག་གི་གྲོལ་ཚུལ་དང་བཅས་ཏེ་ཀ་དག་དང་ལྷུན་གྲུབ་རྒྱས་པར་བསྟན་པ་ཡིན་ཏེ་སློབ་དཔོན་བི་མ་ལའི་སྒྲོན་མ་སྣང་བྱེད་ལས། ཕྱི་སྐོར་ལུས་དང་འདྲ་སྟེ་ཐ་སྙད་རྒྱ་ཆེར་བསྟན། །༼ལུས་རྫོགས་པར་ཡོད་ཀྱང་དོན་སྙིང་ལྔ་ལ་སོགས་པ་མེད་ན་རོ་དང་འདྲ།༽ ནང་སྐོར་མིག་དང་འདྲ་༼ མིག་གིས་ཕྱི་མཐོང་ཡང་རང་མི་མཐོང་། ༽སྟེ་མཐོང་བ་བརྡ་ཡི་ཆོས། །གསང་སྐོར་སྙིང་དང་འདྲ་སྟེ་དྲན་བྱེད་ཟུངས་ཀྱི་ཆོས། །༼སྙིང་གཅིག་པུས་དོན་བྱེད་མི་ནུས་ཏེ་སྔ་ལས་བག་ཙམ་འཕགས་སོ། །༽འདི་ནི་ལུས་ཀུན་རྫོགས་ཏེ་༼ལུས་ལ་ནད་མེད་དབང་པོ་སྐྱོན་མེད་༽ པའི་སྐྱེས་བུ་འདྲ། །ཞེས་གསུངས། མདོར་ན་སྐྱབས་རྗེ་བཀའ་དྲིན་ཅན་གྱིས་གོང་དུ་དངོས་གཞིའི་སྒྲ་བཤད་སྐབས། རྫོགས་པ་ཆེན་པོ་ཁ་ཅིག་གིས་ཆོས་གཞི་ལ་ལུས་པ་སོགས་གསུངས་པ་ནི་ཕྱི་སྐོར་ལ་གསུངས་པ་དང་། ཡང་མན་ངག་ཁ་ཅིག་ཐོག་མ་གནད་ཐོག་ཏུ་ཕེབ་ཀྱང་སོགས་གསུངས་པ་ལ། གསང་སྐོར་གཞིར་བཞག་ཡིན་ལ། ནང་སྐོར་འཇོག་ཆོག་གམ་མི་ཆོག་དཔྱོད། འདི་ནི་ཤིན་ཏུ་གལ་ཆེ་བས་ཡང་ཡང་ཞིབ་ཆ་བྱེད་དགོས་གསུངས་པ་དང་། ཡེ་ཤེས་བླ་མ་ལས་མུ་བཞིར་བཤད་པའི་སྐབས། ཁྲེགས་ཆོད་ལས་ཐོད་རྒལ་དངོས་སུ་རྩལ་དུ་བཏོན་པ་མི་སྣང་བས་ཕལ་བས་ཤིན་ཏུ་གོ་དཀའ་ཡང་འདིར་ཀུན་མཁྱེན་སྔ་ཕྱིའི་བཞེད་པ་དངོས་ནི་ཞིང་སྐུ་ཕོ་བྲང་གསུམ་གྱི་འཆར་གཞི་ལས་དང་པོ་བའི་སྐབས་སུ་དབྱིངས་ཐིག་རིག་གསུམ་ཡིན་ལ་ཁྱད་པར་ལྷག་མཐོང་ཐམས་ཅད་ཀྱི་རྒྱལ་པོ་རིག་པ་རྟོག་མེད་རྡོ་རྗེ་ལུ་གུ་རྒྱུད་ཡིན་ཚུལ་འདི་ཉིད་མ་ཤེས་ན་ཁྲེགས་ཆོད་ལས་ཁྱད་དུ་འཕགས་ཚུལ་བདུན་སོགས་མི་ཤེས་པས་ཕན་ཚུན་འཁྲུགས་ཤིང་མགོ་རྨོངས་པར་འགྱུར་རོ། །ཞེས་གསུངས། མན་ངག་རྫོགས་པ་ཆེན་པོའི་རྒྱུད་ཕྱི་མ་ལས། ནང་དབྱིངས་རྣམ་དག་སྒྲོན་མའི་ཀློང༔ རིག་པ་བཅུད་དུ་སྨིན་པ་ལ༔ ཕྱེད་སྐུར་འཆར་བ་ཉམས་གོང་འཕེལ༔ རིགས་ལྔའི་ཚོམ་བུ་ཚད་ཕེབས་ཉམས༔ ཞེས་དང་། རྣམ་མཁྱེན་ཤིང་རྟ་ལས། ཁྲེགས་ཆོད་དུ་རེ་ཞིག་དབང་རྣོན་གྱིས་གཞི་བྲལ་དང་། རྟུལ་པོས་སྒྱུ་མ་ལྟ་བུར་རྒྱས་འདེབས་པའི་ཡིད་དཔྱོད་ཙམ་ལས་མེད་པ་ཐོད་རྒལ་དུ་གནད་ལ་བརྟེན་པའི་འོད་ལྔ་དབྱིངས་རིག་གི་སྣང་བ་ཡུལ་དུ་འཆར་བས་ཐོག་མ་ནས་ཕྱི་འབྱུང་གི་སྣང་ཆ་ཐ་མལ་བའི་བག་ཆགས་ལྡོག་པར་འགྱུར་བའི་ཁྱད་ཡོད། ཅེས་གསུངས། གཉིས་པ་དོན་གྱི་འགྲོས་དབྱེ་བ་ལ་རྣམ་པ་བཞི་སྟེ། དང་པོ་ལུས་ངག་སེམས་ཀྱི་གནད་གཟིར་བ། གཉིས་པ་གནད་གསུམ་ལ་བརྟེན་ནས་མངོན་སུམ་རང་ཐོག་ཏུ་དབབ་པ། གསུམ་པ་སྣང་བ་བཞི་ཇི་ལྟར་འཆར་བའི་རིམ་པ། བཞི་པ་མཐའ་རྟེན་གྱི་མན་ངག་བཞི་པོ་གོང་མ་རྣམས་ཀྱི་རྒྱབ་རྟེན་ནམ་ནན་ཆགས་སུ་བྱུང་བ་སོགས་ཐེག་མཆོག་རིན་པོ་ཆེའི་མཛོད་ལས་ཤེས་པར་བྱའོ། ༈ སྟོན་པ་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་སྡེ་སྣོད་གསུམ་དང་ཕྱི་རྒྱུད་གསུམ། ལོངས་སྐུའི་སྟོན་པ་རྡོ་རྗེ་འཆང་གི་བསྟན་པ་བསྐྱེད་རྫོགས་གཉིས། ཆོས་སྐུའི་སྟོན་པ་ཀུན་ཏུ་བཟང་པོའི་བསྟན་པ་ཨ་ཏི་ཡོ་གའོ། །དེ་ནས་སློབ་དཔོན་དགའ་རབ་རྡོ་རྗེས་འོག་མིན་དུ་དཔལ་རྡོ་རྗེ་སེམས་དཔའ་ལ་རང་བཞིན་རྫོགས་པ་ཆེན་པོའི་དབང་དང་ཡང་གསང་བླ་ན་མེད་པའི་གདམས་པ་དང་བཅས་པ་ཡོངས་སུ་རྫོགས་པར་ཞུས། དེ་ནས་རི་མ་ལ་ཡ་རིན་པོ་ཆེ་རྣམ་པར་སྤྲུལ་པའི་རྩེ་མོར་རྡོ་རྗེ་དབྱིངས་ཀྱི་མཁའ་འགྲོ་མ་བདེ་བའི་རོ་ལྡན་མ་དང་། བདེ་བྱེད་སེར་མོ་ཡོན་ཏན་མཐའ་ཡས་པའི་མཁའ་འགྲོ་མ་གཉིས་ཀྱིས་ཞུས་ཏེ། རང་བཞིན་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་ལོ་གསུམ་དུ་གླེགས་བམ་དུ་བཀོད། དེ་ནས་སློབ་དཔོན་འཇམ་དཔལ་བཤེས་གཉེན་གྱིས་རང་བཞིན་རྫོགས་པ་ཆེན་པོའི་ཆོས་རྣམས་སེམས་ཀློང་མན་ངག་གི་སྡེ་གསུམ་དུ་ཕྱེ་བ་ཡིན་ཏེ། ཨ་ཏི་བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་བྲལ་ལ་མན་ངག་གོ །ཞེས་གསུངས། མན་ངག་སྡེ་དེ་དག་གི་སྙིང་པོ་ཐིག་ལེ་མཆོག་གི་ཆོས་ཉིད་ལ་སྙན་རྒྱུད་དང་བཤད་རྒྱུད་གཉིས་སུ་ཕྱེ། ཐིག་ལེ་མཆོག་གི་ཞེས་པ་ནི་ལྷུན་གྲུབ་སྣང་བའི་འོད་གསལ་ལ་གཙོ་བོར་གསུངས་པའོ། །མན་ངག་སྡེ་ནི་སེམས་ཀློང་གཉིས་ལས་ཆེས་ཁྱད་པར་དུ་འཕགས་པ་ཡིན་ཏེ། ཨ་ཏི་བཀོད་པ་ཆེན་པོ་ལས། ཀྱཻ་རྡོ་རྗེ་འཛིན་པ། དེ་ལྟར་གཏན་ལ་མ་ཕབ་ན། །ཡིད་དཔྱོད་འཛིན་པ་རྣམས་དང་ནི། །ཁྱད་པར་ཅི་ཡང་མེད་པར་འགྱུར། །དེ་ཕྱིར་ངེས་གསང་སྙིང་པོ་འདི། །མུན་པ་ལས་ནི་མར་མེའམ། །བ་གླང་རྣམས་ལས་གླང་ཆེན་ནམ། །གཅན་ཟན་རྣམས་ལས་སེངྒེ་འམ། །རྐང་ཐང་རྣམས་ལས་རྟ་པ་བཞིན། །ཀུན་གྱི་ནང་ནས་ཁྱད་པར་འཕགས། །ཞེས་གསུངས། དེ་ནས་སློབ་དཔོན་ཤྲཱི་སེང་ཧས། བཤད་རྒྱུད་ལ། ཕྱི་སྐོར། ནང་སྐོར། གསང་སྐོར། ཡང་གསང་བླ་ན་མེད་པའི་སྐོར་དང་བཞིར་ཕྱེ་བ་ཡིན་ཏེ། སློབ་དཔོན་བི་མ་ལའི་སྒྲོན་མ་སྣང་བྱེད་ལས། ཕྱི་སྐོར་ལུས་དང་འདྲ་སྟེ་ཐ་སྙད་རྒྱ་ཆེར་བསྟན། །ནང་སྐོར་མིག་གིས་ཕྱི་མཐོང་ཡང་རང་མི་མཐོང་མིག་དང་འདྲ་སྟེ་མཐོང་བ་བརྡ་ཡི་ཆོས། །གསང་སྐོར་སྙིང་དང་སྙིང་གཅིག་པུས་དོན་བྱེད་མི་ནུས་ཏེ་སྔ་མ་ལས་བག་ཙམ་འཕགས་འདྲ་སྟེ་དྲན་བྱེད་གཟུངས་ཀྱི་ཆོས། །འདི་ནི་ལུས་ཀུན་རྫོགས་པའི་སྐྱེས་བུ་འདྲ། །རྫོགས་པའི་སྐྱེས་བུ་འདྲ་སྟེ་ལུས་ལ་ནད་མེད་དབང་པོ་སྐྱོན་མེད། ཞེས་གསུངས། དེ་ཡང་སེམས་ཀློང་མན་ངག་གི་དགོངས་པ་དང་ཁྱད་པར་ནི། ཐེག་མཆོག་མཛོད་ལས། དེ་ཡང་རང་སེམས་མ་ཡིན་པའི་ཆོས་ལོགས་ན་མེད་པས་སྣ་ཚོགས་སེམས་ཀྱི་སྡེའོ། །འདི་དག་ནི་སེམས་རང་བྱུང་གི་ཡེ་ཤེས་ལས་གཞན་ཏུ་གྱུར་པ་འགོག་པ་ལ་དགོངས་པ་ཙམ་མོ། །ཆོས་ཉིད་ཀུན་ཏུ་བཟང་མོའི་ཀློང་ལས། འགྲོ་ས་གཞན་མེད་པར་སྨྲ་བ་ཀློང་གི་སྡེའོ། །འདི་དག་ནི་བརྗོད་བྱ་ཆོས་ཉིད་ཀྱི་ཀློང་ལས་གཞན་འབྱུང་འགོག་པ་ལ་དགོངས་པ་ཙམ་མོ། །ཡིན་ལུགས་གནད་ཐོག་ཏུ་འབེབས་པ་མན་ངག་གི་སྡེའོ། །འདི་དག་ནི་གནད་མ་ཡིན་པ་གཞན་དུ་ཁ་འབྱམས་དོན་ལས་འགྱང་པ་འགོག་པ་ལ་དགོངས་པས་ཀུན་གྱི་རྩེ་མོར་ཕྱིན་པའོ། །ཞེས་དང་། སེམས་སྡེ་སེམས་ཡིན་ལ་ལ་ལས་ཡིད་དཔྱོད་དུ་འཛིན་ལ། ཀློང་སྡེ་ཆོས་ཉིད་དུ་འཛིན་པས་ཡིད་དཔྱོད་དུ་སོང་བ་ལས། མན་ངག་སྡེ་ནི་གནས་ལུགས་རང་གསལ་དུ་བྱེད་པས་འཕགས་སོ། །ཞེས་གསུངས། དཔལ་སྤྲུལ་རིན་པོ་ཆེས། ཡེ་ཤེས་བླ་མ་ལ་ཕྱག་མཆན་བཏབ་པ་དང་ཞལ་རྒྱུན་ལ། དང་པོ་སེམས་སྡེ་ལ་སྨིན་གྲོལ་རྒྱབ་བརྟེན་དང་བཅས་པ་རྒྱ་ཆེར་བཞུགས་པའི་གདམས་པའི་འགག་དོན་ཕྱོགས་མཚོན་ན། སྤྱིར་སྔ་འགྱུར་རྙིང་མའི་ཆོས་སྐད་ལ། མདོ་སྒྱུ་སེམས་གསུམ་ལས་ཡོངས་སུ་གྲགས་པ་ལྟར། མདོ་ཚོགས་ཆེན་འདུས་པ། རྒྱུད་སྒྱུ་འཕྲུལ་དྲྭ་བ། སེམས་ཕྱོགས་རྫོགས་པ་ཆེན་པོ་ཞེས་བཞག་པས་སེམས་ཕྱོགས་རྫོགས་ཆེན་ཡིན་ནས་བཟུང་གཙོ་བོ་སེམས་དང་སེམས་ཉིད་ཀྱི་ཟླས་དབྱེ་བའི་སེམས་ཉིད་རང་བྱུང་གི་ཡེ་ཤེས་རྩལ་དུ་བཏོན་ནས་སྟོན་པ་རྫོགས་ཆེན་གྱི་བབས་ཡིན་ཀྱང་མན་ངག་གི་ཟབ་ཁྱད་ཀྱིས་ནང་གསེས་སེམས་ཀློང་མན་ངག་གི་རིམ་པས་ཇེ་ཟབ་ཏུ་ཡོད་པས། སེམས་ཀློང་གཉིས་ཁ་འབྱམས་གཞི་བྲལ་གཉིས་ལ་གདིང་འཆའ་འོ་ཞེས་བློ་བྲལ་གྱི་ཡེ་ཤེས་རྗེན་ཅེར་དུ་སྟོན་མི་ནུས་ཤིང་ཕྱོགས་རེ་ཙམ་ནུས་ཀྱང་བསྐྱང་ལུགས་ཀྱི་ཁྱད་ཡོད་པས་སེམས་སྡེའི་ཀ་དག་ཁྲེགས་ཆོད་ཀྱི་དགོངས་པ་འདི་རིག་འཛིན་གོང་མ་རྣམས་ཀྱི་ཕྱག་ཆེན་སྣང་བ་བཞི་རིམ་དང་ངོ་བོ་ཕྱོགས་མཚུངས་སུ་གསུངས། མན་ངག་ལམ་གྱི་རིམ་པ་ནི་ཕྱག་ཆེན་ལས་ཟབ་པ་ཡིན། གཙོ་ཆེར་ཆོས་དབྱིངས་རིན་པོ་ཆེའི་མཛོད་དུ་སྡེ་གསུམ་རྫོགས་པ་ཆེན་པོ་ཀ་དག་ཁྲེགས་ཆོད་ཀྱི་གནས་ལུགས་གཅིག་ཏུ་བསྟན་པ་ལས་ཁྱད་མ་ཕྱེ་བས་དོན་གྱི་འགག་དོན་དེ་ལྟ་བུ་ཤེས་དགོས་སོ། །གྲུབ་མཐའ་འཛིན་ཚུལ་ལ་འོག་མ་འོག་མ་ལས་གོང་མ་གོང་མ་ཁྱད་པར་དུ་འཕགས་པའི་འཕགས་ཆོས་རེ་ཡོད་པས། དེའི་དབང་དུ་བྱས་ན་སེམས་སྡེའི་སྐབས་སེམས་ཉིད་རང་བྱུང་གི་ཡེ་ཤེས་སྟོན་པ་ཀུན་བྱེད་རྒྱལ་པོ་ཀ་དག་སྟོང་པ་ཆེན་པོ་དང་། འདི་ལྟར་འཁོར་འདས་བཟང་ངན་སྤང་བླང་དེ་དག་གི་སེམས་སེམས་བྱུང་གི་བྱུང་ཚོར་བཟང་ངན་ཐམས་ཅད་ཆོས་ཉིད་བྱང་ཆུབ་ཀྱི་སེམས་དེའི་རྩལ་ཡིན། རོལ་པ་ཡིན། འཆར་ཚུལ་ཡིན། ཆོ་འཕྲུལ་ཡིན། བྱང་ཆུབ་ཀྱི་སེམས་དེ་ལྟར་སྣང་བ་ལས་ལོགས་སུ་ཆོས་མེད་པས། ཀུན་བྱེད་རྒྱལ་པོ་ཀུན་བྱེད་གཅིག་མི་བྱེད། །ཀུན་བྱེད་བྱང་ཆུབ་སེམས་ལ་བྱ་རྒྱུ་མེད། །གསུངས་པ་ལྟར་ཡིན་ཏེ། འཁོར་བ་སྤང་དུ་མེད། མྱང་འདས་སྒྲུབ་དུ་མེད་འཁོར་འདས་ཀྱི་ཆོས་ཐམས་ཅད་ཆོས་ཉིད་བྱང་ཆུབ་སེམས་ཁོ་རང་གི་ངང་ཡིན་པས་རྩལ་གྱི་འཆར་ཚུལ་བཟང་ངན་སྣ་ཚོགས་གང་ཤར་གང་སྣང་གི་ཐོག་ཏུ་ཞོག་ལ་མཉམ་པར་བཞག་དགོས་གསུངས་པས་དོན་དུ་སྣང་བ་ལ་རིག་པས་རྒྱས་གདབ་པ་ཡིན་ནོ། །དེང་སང་ཁྲིད་ཡིག་ཕལ་ཆེར་གང་ཤར་གྱི་རིག་པའི་ངོ་བོ་བསྐྱང་དགོས་གསུངས་པ་ཡང་འདི་དང་གནད་གཅིག་ཏུ་སོང་བས་ཡང་གསང་བླ་མེད་ཀྱི་དགོངས་པར་མི་འགྲོ་བས་ཤན་ཕྱེ་དགོས། འདི་ལྟར་བསྐྱངས་ན་སྣང་བ་ལ་སྟོང་པས་རྒྱས་གདབ་པ་ཡིན་པས་གཉེན་པོར་ཤོར་བ་དང་། ཀུན་མཁྱེན་གྱིས། སྣང་བ་གང་སྣང་གང་ཤར་གྱི་ཐོག་ཏུ་བཞག་ནས་སྐྱོང་བ་འདི་ཡང་ན་ཞི་གནས་ལྟེང་པར་འགྲོ། ཡང་ན་རྒོད་པར་འགྲོ་གསུངས་པས་རིག་པ་བློ་བྲལ་གྱི་ཡེ་ཤེས་ཀྱི་རང་ཚུགས་མ་ཟིན་པའི་མཉམ་པར་བཞག་པ་ཡུལ་ལ་ལྟོས་དགོས་པས་མཉམ་བཞག་ལྟོས་འཇོག་ཅན་དང་། རྐྱེན་ཁར་ལུས་པ་དང་། སྣང་རྟོག་བཟང་ངན་ལ་སོགས་པ་གང་ཤར་ལ་ཆེད་ཏུ་བལྟས་པས་གཟུང་འཛིན་ཅན་དུ་འགྲོ་བས་ཡང་གསང་བླ་མེད་དང་བསྟུན་ན་ལམ་གྱི་གོལ་ས་མ་ཆོད་པའི་སྐྱོན་ཡོད་པ་ཡིན་ནོ། ། ༈ གཉིས་པ་ཀློང་སྡེ་ལའང་སྨིན་གྲོལ་རྒྱབ་བརྟེན་དང་བཅས་པ་མང་དུ་ཡོད་ཅིང་ཀློང་དཀར་ནག་ཁྲ་གསུམ་གྱི་དབྱེ་བ་སོགས་ཤིན་ཏུ་རྒྱ་ཆེ་རུང་གནས་ལུགས་ཀྱི་བབས་དོན་ཕྱོགས་མཚོན་ཏེ། ཟབ་གསལ་ཞེས་གཉིས་སུ་བསྡུ་ན་ཟབ་པ་ནི་ཀློང་ཆེན་པོ་ཡུམ་ལྔའི་མཁའ་ཀློང་རྣམ་པར་དག་པ་རྒྱལ་བ་ཐམས་ཅད་བསྐྱེད་ཅིང་སྡུད་པ་ཆོས་ཀྱི་དབྱིངས་ཀྱི་ཀློང་ལས་བྱུང་བའི་ཆོས་སུ་མ་གཏོགས་པ་འཁོར་འདས་བཟང་ངན་གྱི་སྣང་བ་གང་ཡང་མེད་པས་འཁོར་འདས་ཀྱི་ཆོས་སུ་སྣང་བ་གང་ཇི་སྙེད་ཅིག་ཡོད་པ་རྣམས་ཀློང་ཆེན་ཀུན་ཏུ་བཟང་མོའི་ཆེ་བའི་རྒྱན་དང་། རོལ་བ་དང་། ཆོ་འཕྲུལ་ཡིན་ཞེས་འདོད། གསལ་བ་ནི་སེམས་ཉིད་རྩལ་སྣང་དང་བཅས་པ་ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་ས་མེད་པར་ཡེ་གྲོལ་རང་དག་ཏུ་འདོད་པའོ། །དེ་ལྟ་བུའི་གནས་ལུགས་དེའི་རྒྱུན་མཉམ་པར་བཞག་ཏེ་བསྐྱངས་པའི་ལམ་རྟགས་ཀྱི་ཡོན་ཏན་ལ། ཤེས་ཉམས་ལ་བདེ་བའི་ཉམས་དང་གསལ་དྭངས་ལ་གཞན་སེམས་ཤེས་པའི་མངོན་ཤེས་དང་། སྣང་བ་ཟང་ཐལ་དུ་མཐོང་བ་དང་། དག་པའི་ཞིང་ཁམས་མཐོང་བ་དང་། མི་རྟོག་པའི་ཉམས་རྟོག་པ་གཡོ་མི་ཤེས་པའི་ཉིན་མཚན་འདྲེས་པ་སོགས་དང་། གཙོ་བོ་རླུང་ཉམས་རྟགས་བཅུའི་སྟོང་གཟུགས་དུས་འཁོར་ལ་སོགས་པ་དང་མཐུན་པར་འཆར་བས་སྟོང་གཟུགས་ཀྱི་རྣམ་པ་ལྷ་སྐུ་ཐིག་ལེ་ཚོམ་བུ་ལ་སོགས་པ་གྲངས་མེད་འཆར་ཞིང་། དེའི་རྩལ་ལས་དད་པ་དང་སྙིང་རྗེ་སོགས་ཀློང་རྡོལ་དུ་འབྱུང་བས་འདི་ལྟ་བུའི་ཟབ་གསལ་གཉིས་མེད་ལ་ཀློང་སྡེ་རྡོ་རྗེའི་ཟམ་པ་ཞེས་རླུང་རྟགས་ལས་སྟོང་གཟུགས་ཀྱི་ལྷ་སྐུ་སོགས་འཆར་བས་མན་ངག་སྡེ་དང་མཚམས་སྦྱོར་བའི་ཟམ་པ་ལྟ་བུ་ཡིན་གསུངས། གངས་ཅན་ལྗོངས་ན་སྔོན་གྱི་ཟུར་གནུབ་ལ་སོགས་པའི་དུས་དང་། བཻ་རོའི་སློབ་མ་སྤང་རྒན་མི་ཕམ་མགོན་པོ་ནས་རིམ་བྱོན་ཕལ་ཆེར་གྲུབ་པ་རྣམས་ཀློང་སྡེའི་སྒོ་ནས་ལུས་རྡུལ་ཕྲན་དུ་དེ ངས། སེམས་ཆོས་ཉིད་དུ་དེངས་ནས་ཀ་དག་གི་ས་ལ་སངས་རྒྱས་པ་ཡིན་ནོ། །སེམས་སྡེའི་སྒོ་ནས་ལུས་རྡུལ་ཕྲན་དུ་དྭངས་རྒྱུ་ཡོད་མེད་མ་ངེས་གསུངས། གསུམ་པ་གསང་བ་མན་ངག་གི་སྡེ་ལ་སྐོར་བཞི་ལས། དེ་ཡང་ཕྱི་སྐོར་དུ་གཞི་གདོད་མའི་གནས་ཚུལ་རྒྱ་ཆེར་བཤད་པ་ལས། ལམ་ཉམས་སུ་ལེན་ཚུལ། བར་དོའི་འཆར་ཚུལ། མཐར་ཐུག་གི་འབྲས་བུ་གྲོལ་ཚུལ་མ་བཤད། དེ་ཡང་གཞི་གདོད་མའི་གནས་ཚུལ་ནི། སྤྱིར་སེམས་ཅན་ཀྱི་ཁམས་ལ་ཀུན་རྫོབ་རྒྱུའི་རྩ་རླུང་ཐིག་ལེའི་རང་བཞིན་ཅན་གྱི་རྟེན་རྡོ་རྗེའི་ལུས་ཀྱི་གྲུབ་ཚུལ་དང་། དེ་ལ་བརྟེན་པ་ཡེ་ཤེས་ཀྱི་རྩ་རླུང་གི་ཐིག་ལེ་གནས་ཚུལ་དང་། སྙིང་ག་ན་གཞིར་གནས་ཀྱི་ཡེ་ཤེས་ཡོད་ཚུལ་དཔེ་བྱས་ན་ས་འོག་ན་རིན་པོ་ཆེའི་གཏེར་ཡོད་ཅེས་པའི་ལོ་རྒྱུས་བཤད་པ་བཞིན་རྗེས་ནས་བར་དོ་ནས་འཆར་འོང་། དེ་དུས་ངོ་ཤེས་ན་གྲོལ་འགྲོ་བ་ཡིན་ཅེས་བསྟན་པ་ལ་འོད་གསལ་ལྷུན་གྲུབ་ཀྱི་ལམ་འདིར་དངོས་སུ་ཉམས་སུ་བླང་བའི་མན་ངག་གི་གནད་མེད་པའི་ཆོས་གཞི་ལ་ལུས་པར་གསུངས་པ་དེ་འོང་བ་ཡིན། ནང་སྐོར་དུ་ལམ་དཔེ་དོན་རྟགས་གསུམ་གྱིས་ངོ་སྤྲད་པ་ཙམ་བཤད་ཀྱང་། གཞིའི་གནས་ཚུལ་དང་། མཐར་ཐུག་གི་འབྲས་བུ་གྲོལ་ཚུལ་མ་བཤད། དེ་ཡང་གཞིར་གནས་ཡེ་ཤེས་རང་ལ་ཡོད་པ་དེ་ད་ལྟ་ལམ་དུས་ན་དཔེ་དོན་རྟགས་གསུམ་གྱིས་མཚོན་ནས་ངོ་སྤྲད་པ་ཙམ་ཡོད་དེ། དཔེ་དོན་རྟགས་གསུམ་ནི་དཔེ་རྡོ་རྗེ་སེམས་དཔའི་མེ་ལོང་ཞེས་ཤེལ་རྡོ་ལ་བརྟེན་ནས་ཀ་དག་དང་ལྷུན་གྲུབ་ཀྱི་གདངས་ཡོད་ཚུལ་ངོ་སྤྲོད་པ་དང་། རྟགས་སྒྲོན་མ་གཏེམ་པའི་སྣང་བ་མངོན་སུམ་དང་། དོན་དེ་ལྟ་བུའི་གནས་ལུགས་དེ་ཕྱིས་བར་དོའི་དུས་མངོན་སུམ་འཆར་བས་ངོ་ཤེས་ན་གྲོལ་ཞེས་པ་ལས་ཚེ་འདིར་དངོས་སུ་ཉམས་སུ་བླང་བ་ནི་མེད་གསུངས། གསང་སྐོར་དུ་ལམ་གྱི་བྱེ་བྲག་བསྒོམ་པ་ཙམ་བསྟན་ཀྱང་། གཞིའི་གནས་ཚུལ་དང་། མཐར་ཐུག་གི་གྲོལ་ཚུལ་རྣམས་མ་བཤད། ལམ་གྱི་བསྒོམ་ཚུལ་ནི་སྒྲོན་དྲུག་གི་རྣམ་བཞག་སོགས་བསྟན་ནས་ཚེ་འདིར་ཀ་དག་བདེ་བ་ཆེན་པོའི་ཡེ་ཤེས་ཀྱི་རང་གདངས་ལྷུན་གྲུབ་ཀྱི་སྣང་བ་དབྱིངས་ཐིག་ལེ་ལ་སོགས་པ་ལུས་ཀྱི་བྱེད་པ་གནད་དུ་བཅིངས་ནས་ཉམས་སུ་བླང་བ་ཡོད་ཅིང་། རྟགས་སྣང་བ་བཞིའི་ལམ་གྱི་ཚོད་འཛིན་དང་། གྲུབ་དོན་མཐར་ཐུག་འཕོ་ཆེན་གྱི་སྐུར་བཞེངས་པ་སོགས་མན་ངག་མང་པོ་གབ་པས་གནད་མཐར་ཐུག་མིན་ནོ། །ཡང་གསང་བླ་ན་མེད་པ་རྡོ་རྗེ་སྙིང་པོ་འདིར་ནི། གཞི་གདོད་མའི་གནས་ལུགས། ལམ་ལྟ་སྒོམ་སྤྱོད་གསུམ། འབྲས་བུ་མཐར་ཐུག་གི་གྲོལ་ཚུལ་དང་བཅས་པ་རྒྱས་པར་བསྟན་པ་ཡིན་པས། ཀུན་ལས་ཁྱད་པར་དུ་འཕགས་པ་ལུས་དབང་ཡོངས་སུ་རྫོགས་པའི་སྐྱེས་བུས་བྱ་བ་ཐམས་ཅད་སྒྲུབ་ནུས་པ་བཞིན། ལམ་ཕྱོགས་རེ་བ་དང་། མན་ངག་གི་གནད་ཕྲན་བུ་རེ་ཙམ་མ་ཡིན་པར་འདི་གཅིག་པུའི་ལམ་ལ་བརྩོན་ན་ལམ་རྐྱེན་གཞན་གྱིས་ཁ་གསབ་མི་དགོས་པར་དབང་རབ་ཚེ་འདིར་གྲོལ་བ། འབྲིང་བར་དོ། ཐ་མ་རང་བཞིན་སྤྲུལ་སྐུའི་ཞིང་དུ་དབུགས་འབྱིན་ནས་གྲོལ་བ་ཡིན་པས་ཁྱད་པར་དུ་འཕགས་གསུངས། འདིའི་གནད་གཏན་ལ་དབབ་པ་ལ། རྒྱུད་སྡེ་བསམ་གྱིས་མི་ཁྱབ་ཀྱང་གསང་ཆེན་ངེས་པའི་རྒྱུད་ཆེན་པོ་བཅུ་བདུན་དང་། སྔགས་སྲུང་ཁྲོས་མའི་རྒྱུད་དང་བཅོ་བརྒྱད། ཡང་མན་ངག་གི་དབང་དུ་བྱས་ན། མན་ངག་བརྒྱ་དང་བཅུ་དགུ་སྟེ། རྒྱུད་མན་ངག་དག་གི་དགོངས་དོན་ལེགས་པར་བཀྲལ་ནས་འཆད་པའི་ཤིང་རྟའི་སྲོལ་འབྱེད་གངས་ཅན་གྱི་ལྗོངས་ན་ཡོངས་སུ་གྲགས་པ་ཨོ་རྒྱན་གྱི་སློབ་དཔོན་ཆེན་པོ་པདྨ་དང་བི་མ་ལ་མི་ཏྲ་གཉིས་ཡིན། དེ་ཡང་པདྨའི་བཀའ་སྲོལ་མཁའ་འགྲོ་སྙིང་ཐིག་གིས་གཙོ་བོར་བཏགས་གྲོལ་འདས་རྗེས་ལ་སོགས་པའི་དགོངས་པ་གཙོ་བོར་བཏོན་ནས་གསུངས་པ་དང་། བི་མ་ལས་གདམས་པའི་གནད་རྣམས་གཅིག་ཏུ་བསྡུས་པ་གསང་བ་སྙིང་ཐིག་གི་སྙིང་དང་འདྲ་བ་ཞེས་ཟབ་པ་པོད་བཞི་ཞེས། དང་པོ་གསེར་ཡིག་ཅན། གཉིས་པ་ཟངས་ཡིག་ཅན། གསུམ་པ་དུང་ཡིག་ཅན། བཞི་པ་གཡུ་ཡིག་ཅན་དང་བཞིའོ། །ཕྲ་ཡིག་ཅན་ཟངས་ཡིག་ཅན་གྱི་ཁོངས་སུ་གཏོགས་པ་ཡིན་ཞེས་སོགས་གསུངས། ༼༈༽ ཡིད་བཞིན་མཛོད་ཀྱི་ལེའུ་བཅུ་གཉིས་པའི་འགྲེལ་བ་ལས། མུ་སྟེགས་པའི་གྲུབ་མཐའ་བཤད་པའི་སྐབས་སུ། སྒོམ་བསམ་གཏན་ལ་དད་པ་བདུན་ནི། ཕུར་བུ་པས་ཀུན་རྫོབ་ཀྱང་མེད་པར་བསྒོམ་པ་དང་། གྲངས་ཅན་པས་རྣམ་འགྱུར་ཆད་པའི་སྟོང་པ་བསྒོམ་པ་དང་། ཉི་མ་པས་སྣང་བ་སྤང་བའི་སྟོང་པ་བསྒོམ་པ་དང་། ཛ་ཡ་དྷ་ར་བས་ཚོགས་དྲུག་ཡུལ་དང་བཅས་པ་རྐྱེན་དུ་བལྟས་ཏེ་མི་རྟོག་པ་རྩེ་གཅིག་ཏུ་བསྒོམ་པ་དང་། བྱེ་བྲག་པས་དྲན་པ་སྐྱོན་དུ་བལྟས་ནས་དྲན་མེད་གཅིག་ཏུ་བསྒོམ་པ་དང་། ཞི་བ་བས་ཐམས་ཅད་སེམས་སུ་བརྟགས་ནས་སེམས་ཉིད་མ་ཡེངས་པར་བསྒོམ་པ་དང་། རིག་བྱེད་པས་བདེ་སྡུག་དང་རྟོག་མི་རྟོག་གང་ཡང་སྤངས་ནས་ནམ་མཁའ་ལྟར་བསྒོམ་པའོ། །ཞེས་གསུངས་སོ། །༼༈༽ ཀུན་གཞི་དང་ཆོས་སྐུའི་ཁྱད་པར་ནི། ཀུན་གཞི་ལ་དབྱེ་ན། ཡེ་དོན་གྱི་ཀུན་གཞི། སྦྱོར་བ་དོན་གྱི་ཀུན་གཞི། བག་ཆགས་སྣ་ཚོགས་པའི་ཀུན་གཞི། བག་ཆགས་ལུས་ཀྱི་ཀུན་གཞི་དང་བཞིར་གསུངས་ཀྱང་མདོར་ན། མི་ཕམ་རིན་པོ་ཆེའི་དོན་གྱི་ཀུན་གཞི་བདེ་གཤེགས་སྙིང་པོ་ཟག་མེད་ཀྱི་ཆོས་ཀུན་གྱི་གཞི་ཡིན་ལ། འཁོར་བའི་ཀུན་གཞི་ཟག་བཅས་ཀྱི་ཆོས་ཀུན་གྱི་གཞི་ཡིན་པས་ཀུན་གཞིར་གསུངས། དེ་ལྟ་བུའི་བག་ཆགས་སྣ་ཚོགས་པའི་འཁོར་བའི་ཀུན་གཞི་དེའི་ངོ་བོ་གང་ཡིན་སྙམ་ན་རྣམ་པར་ཤེས་པ་ཇི་སྙེད་ཅིག་འཕྲོ་བའི་གཞིར་གྱུར་པ། ཤེས་པ་ཕྱོགས་སུ་མ་ལྷུང་བ། སྣོད་བཅུད་རྒྱ་ཆེན་པོ་ལ་དམིགས་པ། ཡུལ་གྱི་སྤུ་རིས་མི་འབྱེད་པ། རང་གི་ངོ་བོ་ལ་རྣམ་རྟོག་རགས་པའི་རླབས་ཞི་བ་རྒྱ་མཚོ་ལྟ་བུའི་ངང་དུ་རྩེ་གཅིག་ཏུ་གནས་པའི་གཟུགས་མེད་ཀྱི་ཏིང་ངེ་འཛིན་གྱི་སས་བསྡུས་པ་དང་། རང་གི་ངོ་བོ་ཤེས་པ་གསལ་ཞིང་རྟོག་པ་མེད་པ་གཟུགས་ཁམས་ཀྱི་སས་བསྡུས་པ་དེ་ནི་ཤེས་པ་སྔ་མ་རྣམས་ཀྱི་བག་ཆགས་འཛིན་ཞིང་ཕྱི་མའི་རྟེན་དུ་གྱུར་པ་སྟེ། ཡང་ཏིག་ནམ་མཁའ་ཀློང་ཡངས་ལས། གང་དུ་མི་རྟོག་རྩེ་གཅིག་ལུང་མ་བསྟན། །གསལ་ཞིང་རིག་ཙམ་རྟོག་པ་མེད་པ་དང་། །ཞེས་སོགས་གསུངས་པ་དང་། མཁའ་འགྲོ་ཡང་ཏིག་ལས། དེ་ཡང་ཕྱོགས་རེས་དཔེར་མཚོན་ན། སྐྱེས་བུ་གཅིག་ངལ་གསོ་བ་ལྟ་བུའི་ཚེ་ཤེས་པ་དར་ཅིག་གང་དུ་མི་རྟོག་པར་ལུང་མ་བསྟན་དུ་གནས་པ་ཀུན་གཞི། དེ་ལས་དར་ཅིག་སྣང་ཡུལ་མ་འགགས་པར་ལམ་མེ་གསལ་ཡང་དེར་འཛིན་མ་ཞུགས་པས་གསལ་ལ་རྟོག་མེད་ཀྱི་རྣམ་པ་དེ་ཀུན་གཞིའི་རྣམ་པར་ཤེས་པར་གསུངས། དེ་ལྟ་བུའི་ཀུན་གཞི་ལས་འདས་པའི་རིག་སྟོང་དབྱེར་མེད་ཀྱི་ཆོས་སྐུ་དེ་ཉིད་ངོ་འཕྲོད་ནས་དེའི་ངང་ལ་གནས་པའི་ཚེ་གཉུག་སེམས་ལས། དབྱིངས་རིག་དབྱེར་མེད་སོ་སོ་རང་གིས་རིག་པའི་གནས་ལུགས་དེའི་ངང་ནས། བག་ཆགས་སྣ་ཚོགས་འཛིན་པའི་འཕོ་འགྱུར་ཅན་གྱི་སེམས་མེད་པས་ཀུན་གཞིའི་རྣམ་ཤེས་ཇི་ལྟར་ཡིན། ཕྱི་ཚོགས་དྲུག་གི་ཡུལ་དང་། ནང་བདག་ཏུ་འཛིན་པའི་བློ་དང་། དེའི་ཡུལ་དུ་གྱུར་བའི་མཚན་མ་ཅུང་ཟད་ཀྱང་མེད་པས་སྒོ་ལྔའི་རྣམ་ཤེས་དང་ཡིད་དང་ཉོན་ཡིད་ཇི་ལྟར་ཡོད་དེ། སྤྲོས་བྲལ་དོན་གསལ་ཆེན་པོའི་རྒྱུད་ལས། འཕེལ་འགྲིབ་མེད་པས་ཀུན་གཞིའི་རྣམ་ཤེས་ལས་གྲོལ། གཟུང་འཛིན་མེད་པས་ཡིད་ཀྱི་རྣམ་ཤེས་ལས་གྲོལ། སྐྱེ་འགག་མེད་པས་སྒོ་ལྔའི་རྣམ་ཤེས་ལས་གྲོལ་ཞིང་ལོག་པའོ། །ཞེས་དང་། གྲུབ་མཐའ་རིན་པོ་ཆེའི་མཛོད་ལས། རྟེན་ཀུན་གཞིའི་རྣམ་པར་ཤེས་པའི་སེམས་དང་། ཉོན་ཡིད། ཡིད་ཤེས་དང་། སྒོ་ལྔའི་རྣམ་ཤེས་རྣམས་མེད་པའི་ཏིང་ངེ་འཛིན་ལས། མངོན་སུམ་ལ་ལྟ་བས་ན་ནང་ཀུན་རྟོག་འཕྲོ་འདུ་མེད་པས་འདོད་པའི་སེམས་ལོག གསལ་བའི་ངང་ལ་གསལ་བར་འཇོག་བྱེད་ཀྱི་གཉེན་པོ་མེད་པས་གཟུགས་ཀྱི་སེམས་ལོག ། རྟོག་མེད་རྩེ་གཅིག་ལ་ཆོས་ཉིད་ཀྱི་ངང་དུ་ཞེན་པའི་བློ་མེད་པས་གཟུགས་མེད་ཀྱི་སེམས་ལོག་པས་གསུམ་པའི་སེམས་ཉེ་བར་ཞི་བའོ། །ཞེས་གསུངས། ༼༈༽ ཤིན་ཏུ་གལ་ཆེ་བ་ཡང་གསང་བླ་མེད་ཀྱི་སྐབས་སུ་རང་བཞིན་རྫོགས་པ་ཆེན་པོའི་སྙིང་ཐིག་གི་ལྟ་བ་དངོས་དང་གཞི་གཉིས་ཀ་ཡིན་ཚུལ་ཡང་ཡང་གསུངས་པ་འདི་ཉིད། དཔལ་སྤྲུལ་རིན་པོ་ཆེས། ཡེ་ཤེས་བླ་མའི་དངོས་གཞིའི་སྒྲ་བཤད། ཐེག་མཆོག་མཛོད་ལས་གསུངས་པ་ལྟར་ཡིན་ཚུལ་ཡེ་ཤེས་བླ་མ་ལ་ཕྱག་མཆན་བཏབ་ནས་བླ་མ་ལུང་རྟོགས་ལ་གནང་བ་དང་། ཞབས་དྲུང་རིན་པོ་ཆེ་སོགས་ཀྱིས་ཀྱང་། དངོས་ནི་ལྷུན་གྲུབ་ཐོད་རྒལ་གྱི་ཞིང་སྐུ་ཕོ་བྲང་གསུམ་ཡིན་ཚུལ་སྐྱབས་རྗེ་རིན་པོ་ཆེ་ལ་གསུངས་པ་ཆོས་ཉིད་མངོན་སུམ་གྱི་དུས་ན་དབྱིངས་ཐིག་རིག་གསུམ་དང་། ཉམས་གོང་འཕེལ་གྱི་མཇུག་རྫོགས་པ་དང་ཚད་ཕེབས་ཀྱི་མགོ་ཟིན་ཚེ་དབྱིངས་ཐིག་རིག་གསུམ་ཞིང་སྐུ་ཕོ་བྲང་གསུམ་གྱི་རང་བཞིན་དུ་འཆར་ཚུལ་གསུངས། ཐེག་མཆོག་མཛོད་ཀྱི་རིམ་ཁང་བཅོ་བརྒྱད་པ་ལས་གསུངས་པ་ལྟར་མི་ཤེས་པར། གནས་འདི་ལ་མགོ་རྨོངས་པའི་གླེན་སྒོམ་དང་རྟོག་གེ་རྣམས་ཁྲེགས་ཆོད་རྐྱང་བ་ལ་སྦྱར་ནས། བཤད་ཁུལ་བྱས་པ་འདི་ནི་བཞད་གད་ཀྱི་གནས་སོ། །དེ་ཡང་ཐེག་མཆོག་མཛོད་ལས། དངོས་གཞིའི་སྒྲ་བཤད་ལ། ཚིག་གི་མཐའ་བཅད་པ་དང་། དོན་གྱི་ཐོག་ཏུ་དབབ་པ་གཉིས་ལས། དང་པོ་དངོས་གཞི་ཞེས་པ་ལ་མུ་བཞི་གསུངས་པ་ལས་གཞི་ཡིན་ལ་དངོས་མ་ཡིན་པ་སོགས་གོང་ལྟར་རོ། །རྡོ་གྲུབ་རིན་པོ་ཆེས་གཞི་ཞེས་པ་གཞི་ལམ་འབྲས་བུ་གསུམ་གྱི་ཟླས་དྲངས་པའི་གཞི་དང་། དངོས་ཞེས་པ་མངོན་སུམ་དུ་རྟོགས་པ། གླིང་སྤྲུལ་གྱིས། དངོས་ཞེས་པ་རྟོགས་བྱའི་དོན་དངོས་དང་། གཞི་ཞེས་པ་རྟེན་ནམ་རྒྱུའམ་ཐབས་ཞེས་པའི་དོན་དུ་གསུངས། མཁན་པོ་ང ག་ཆུང་གིས། གཞི་ཞེས་པ་རྗོད་བྱེད་དང་། དངོས་བརྗོད་བྱ་ལ་གསུངས། ༼༈༽ རང་ལུགས་ངོ་སྤྲོད་སྤྲས་པ་ལས། སྣང་བ་སེམས་སུ་ངོ་སྤྲད་པ། སེམས་ཉིད་སྟོང་པར་ངོ་སྤྲད་པ། སྟོང་པ་རིག་པར་ངོ་སྤྲད་པ་གསུམ་གསུངས་པ་ལ། དགོངས་གཞི་ནི་ཕྱི་ཡུལ་ལ་དོན་གཞན་དུ་བདེན་པར་འཛིན་པ་རྣམས་དྲང་བའི་ཕྱིར་དང་། དགོས་ཆེད་ནི། ཕྱི་རོལ་དོན་དུ་གྲུབ་པར་འཛིན་པའི་བདེན་ཞེན་སྤང་བ་ཙམ་དང་། དངོས་ལ་གནོད་བྱེད་ནི ། སྣང་བ་སེམས་ཡིན་ན་སེམས་ལ་དབྱིབས་དང་ཁ་དོག་སོགས་ཡོད་དགོས་པར་ཐལ་བ་དང་། སེམས་འགགས་དུས་སྣང་བ་དུས་དེར་འགགས་པར་ཐལ་བ་ལས། སེམས་མེད་པའི་སྐབས་སུའང་སྣང་བ་ཡོད་འདུག་པས་ཀྱང་གནོད་པ་ལ་སོགས་མང་ཞིང་དེ་གསུམ་སྒྲ་ཇི་བཞིན་པ་ཡིན་ན་ཕན་ཚུན་འཆོལ་བས། རིག་པ་འཁྲུལ་བར་ཐལ་བ་དང་སྣང་བ་མིག་ལ་སོགས་པས་མི་མཐོང་བར་ཐལ་བ་དང་། སེམས་མ་འཁྲུལ་བར་ཐལ་སྟེ། དེ་གསུམ་ངོ་བོ་རྫས་གཅིག་ཡིན་པའི་ཕྱིར་རོ། །གསུངས། དེ་རྣམས་ནི་འོག་མ་ཁ་དྲང་བ་ཙམ་ལས་སྙིང་ཐིག་གི་དགོངས་པའི་ཕྱོགས་སུ་མི་ཉེ་བའི་ཚུལ་ནི་རྒྱུད་རང་ཤར་ལས། སྣང་བ་སེམས་ཀྱི་རྣལ་འབྱོར་ནི། །ཐམས་ཅད་ང་ཡི་སེམས་ལས་བྱུང་། །སེམས་ཉིད་རྟོགས་ན་ཇི་བྱར་ཡོད། །དེ་ཀུན་ཀུན་ཏུ་རྗོད་བྱེད་པ། །ང་ཡིས་གྲོལ་བར་མ་བཤད་དོ། །ཞེས་གསུངས་པ་ལྟར་ཤེས་དགོས་པ་ནི་ཤིན་ཏུ་གལ་ཆེ་བ་ཡིན་ནོ། །དེ་ལྟར་སྣང་སེམས་གཉིས་ཀ་གཅིག་ཏུ་འདོད་ན་སྐྱོན་མཐའ་ཡས་པ་ཡོད་པ་རྣམས། ཀུན་མཁྱེན་ཆེན་པོས་སྣང་བ་སེམས་སུ་འདོད་པ་ནི་ལོག་རྟོག་མུན་པ་ཆེན་པོ་ཡིན་པས་བསལ་དགོས་ཞེས་སྤྱིར་ཐེག་མཆོག་རིན་པོ་ཆེའི་མཛོད་སོགས་དང་། བྱེ་བྲག་ཡིད་བཞིན་རིན་པོ་ཆེའི་མཛོད་འགྲེལ་པདྨ་དཀར་པོ་ལས་རྒྱས་པར་བཀག་ཡོད་པ་ལ་གཟིགས་ཤིག མི་ཕམ་རིན་པོ་ཆེའི་དབུ་མ་རྒྱན་འགྲེལ་དང་དེའི་དོགས་སེལ་གྱི་སྐབས་སུ་ཡང་ཐ་སྙད་དུ་སེམས་ལས་གཞན་པའི་ཕྱི་དོན་མེད་ན། ལུས་སེམས་གཉིས་ཀ་རྫས་གཅིག་ཏུ་འདོད་པ་མུ་སྟེགས་རྒྱང་འཕེན་པའི་གྲུབ་མཐའ་ཡིན་ཚུལ་དང་། གནས་སྣང་སོགས་མི་ཕྱེད་པར་རི་ལ་སོགས་པ་སེམས་ཡིན་ཞེས་ཟེར་བ་ལ་ལུང་དང་རིགས་པས་ཚར་བཅད་པ་དང་། བཀའ་དྲིན་ཅན་ཀྱིས་ཀྱང་ཡེ་ཤེས་བླ་མ་གསུངས་པའི་སྐབས་གོང་དུ་བཤད་པའི་ལུང་གོང་འོག་གཉིས་ཀའི་བརྗོད་བྱའི་དོན་འདི་ལྟར་དུ་གསུངས་པ་ཡིན་ནོ། །གཞན་ཡང་སྣང་སེམས་མ་བུ་འཕྲད་ཚུལ་གསུངས་པ་དང་། དཔེ་དོན་གྱི་འོད་གསལ་བཤད་པའི་སྐབས། སྣང་བ་དང་སྣང་ཡུལ་ཕྱེ་ཚུལ་སོགས་རང་རང་གི་དགོངས་དོན་ཇི་ལྟ་བ་བཞིན་ཤེས་དགོས་པས་ཕན་ཚུན་བསྲེ་བསླད་མི་ཕྱེད་པར་གལ་ཆེ། ༼༈༽ བྱེ་མདོ་གཉིས་ལ་ཕྱི་རོལ་གྱི་དོན་ཡོད་པར་སྨྲ་བ་ཟེར། སེམས་ཙམ་པའམ་རྣམ་པར་ཤེས་པ་ཙམ་དུ་སྨྲ་བ་དེའི་མིང་རྣལ་འབྱོར་པའང་ཟེར་སེམས་ཙམ་པ་ལ་དཀར་དམར་སྣ་ཚོགས་སུ་སྣང་བ་ཤེས་པ་དང་བཅས་པ་འདི་ཐམས་ཅད་རང་གི་སེམས་ཀྱི་རྣམ་པར་འདོད་པ་རྣམ་བདེན་པ་དང་། ཤེས་པའི་རྣམ་པར་རྫུན་པ་གཉིས་ལས། དང་པོ་ནི་དོན་དུ་སྣང་བ་རང་གི་ཤེས་པའི་རྣམ་པ་ཕྱིར་ཤར་བ་ཙམ་སྟེ། རྫིང་འགྲམ་གྱི་ནོར་བུ་ཤིང་གི་ཡལ་ག་ལ་བཏགས་པས་ནོར་བུ་ཀེ་ཀེ་རུའི་གཟུགས་བརྙན་ཆུ་ནང་དུ་ཤར་བ་ན་ནོར་བུའི་རྣམ་པ་ཕྱི་རོལ་དུ་ཤར་བ་བཞིན་ནོ། །ཞེས་འདོད་དོ། །རྣམ་བདེན་པ་ལ་སྒོང་ང་ཕྱེད་ཚལ་བ། གཟུང་འཛིན་གྲངས་མཉམ་པ། སྣ་ཚོགས་གཉིས་མེད་པ་གསུམ། གཉིས་པ་རྣམ་རྫུན་པ་ནི་ཕྱི་དོན་གྱི་རྣམ་པ་ཡིན་གྱི་ཤེས་པར་བདེན་པ་མ་ཡིན་ལ། དེ་འཇལ་བྱེད་ཀྱི་ཤེས་པ་ཡང་རྫུན་པས་གཞལ་བྱའི་མྱོང་བ་བདེན་པ་བས་གཞལ་བ་ནི་མེད་དེ། ཡུལ་ཤེས་གཉིས་ཀ་ཡང་འཁྲུལ་སྣང་རྫུན་པའི་རང་བཞིན་ཅན་དུ་འདོད་དོ། །འདི་ལ་དྲི་བཅས་པ་དང་དྲི་མེད་པ་གཉིས་ལས། དང་པོ་ནི། ད་ལྟའི་རྣམ་པ་སྣ་ཚོགས་སུ་སྣང་བ་དང་དེ་འཇལ་བའི་ཤེས་པ་གཉིས་ཀ་བློའི་དྲི་མ་ཉིད་སྣང་ཙམ་ལས། དོན་དམ་པར་གཉིས་སུ་མེད་པའི་ཡེ་ཤེས་ཁམས་ཀྱི་ཡོན་ཏན་བཅས་པ་ཙམ་ཞིག་ཡོད་ཀྱི། རྣམ་ཤེས་སུ་གྲུབ་པ་ཅི་ཡང་མེད་དོ། །སངས་རྒྱས་ཀྱི་ཆོས་སྐུ་ལྷག་མ་མེད་པ་ནི། གཉིས་སུ་མེད་པའི་ཡེ་ཤེས་ཉིད་དེ། དྲི་མ་མེད་པའི་དེ་བཞིན་ཉིད་ཡིན་ལ་ལྷག་བཅས་ཀྱི་གནས་སྐབས་ན་བག་ལ་ཉལ་གྱི་དྲི་མ་ཅུང་ཟད་ཡོད་པས་འཁྲུལ་བར་སྣང་བ་གཟིགས་པ་དང་། རོ་རྒྱབ་སྙུང་བ་ལ་སོགས་པ་ཡོད་དོ། །ཞེས་པ་དང་། ད་ལྟའི་སེམས་ལ་ཉོན་མོངས་པ་དང་ཡེ་ཤེས་འདྲེས་པར་གནས་པའི་དྲི་མ་ཉོན་མོངས་པའི་ཆ་རྫུན་པ་བསལ་བས། ལྷག་མ་མེད་པའི་ཡེ་ཤེས་དག་པ་མངོན་དུ་བྱེད་པའོ། །ཞེས་འདོད་དོ། །ཐེག་མཆོག་མཛོད་ལྟར་ལགས། ༈ སེམས་ཙམ་པས་ཕྱི་དོན་དུ་མེད་པར་རང་སེམས་དུ་འདོད་པ་དང་དེའང་རྣམ་བདེན་པ་ལྟར་ན་རྣམ་པ་ཇི་ལྟར་སྣང་བ་བཞིན་ཏུ་སེམས་སུ་བདེན་པར་འདོད། རྣམ་རྫུན་པ་ལྟར་ན་རྣམ་པ་དེ་དང་སེམས་འཁྲུལ་བའི་རྫུན་སྣང་དུ་འདོད། སེམས་ཙམ་པས་གང་ཟག་གི་བདག་མེད་པར་མ་ཟད། ཆོས་བདག་གཟུང་འཛིན་གཉིས་ཀས་སྟོང་ཡང་གཉིས་མེད་ཀྱི་ཤེས་པ་མི་སྟོང་བས་གཞན་སྟོང་དུ་འདོད། དབུ་མ་པས་ཆོས་ཐམས་ཅད་རང་སྟོང་དུ་འདོད། ༼༈༽ སེམས་ཉིད་ངལ་གསོའི་འགྲེལ་བ་ཤིང་རྟ་ཆེན་མོ་ལས། དེའང་ཡིད་ཀྱིས་སྐད་ཅིག་དང་པོར་རིག་ཀྱང་དཔྱོད་པས་རྗེས་མ་མཐུད་ན་ལས་མི་སོག་པར་རྣལ་འབྱོར་གྱི་དབང་ཕྱུག་ཐམས་ཅད་འདོད་དེ། ཇི་སྐད་དུ། ཏོག་ཙེ་པའི་དོ་ཧ་ལས། ཚོགས་དྲུག་ཡུལ་གྱི་རྣམ་པར་ཤེས། །འཛིན་པས་མ་བསླད་དེ་ཁོ་ན། །ལས་མེད་རྣམ་པར་སྨིན་པ་མེད། །མཁའ་བཞིན་དྲི་མ་མེད་པར་མཐོང་། །ཞེས་དང་། རྫོགས་ཆེན་ལས། སྒོ་ལྔའི་རྣམ་ཤེས་གསལ་བ་ལ། །ཡིད་ཀྱིས་ཞེན་རྟོག་མ་ཞུགས་ན། །རྒྱལ་བའི་དགོངས་པ་དེ་ཀ་རང་། །ཞེས་དང་། སྒྲ་ཐལ་འགྱུར་རྩ་བའི་རྒྱུད་ལས། མ་གོལ་བ་ཡི་བསྒོམ་པ་ནི། །དབང་པོའི་སྒོ་རྣམས་གསལ་བའོ། །ཞེས་དང་། དཔལ་ས་ར་ཧས། བསམ་དང་བསམ་བྱ་རབ་ཏུ་སྤངས་ནས་སུ། །བསམ་མེད་བུ་ཆུང་ཚུལ་དུ་གནས་བྱ་ཞིང་། །ཞེས་དང་གྲུབ་ཆེན་ཤ་བ་རི་པས། རླུང་ནི་མི་བཟུང་ཡིད་ནི་མི་བཅིང་བར། །མ་བཅོས་ཤེས་པ་བུ་ཆུང་ལྟ་བུར་ཞོག ། ཅེས་བུ་ཆུང་གི་རྒྱུད་ལ་སྒྲ་དོན་འདྲེས་རུང་ཡོད་དུ་ཆུག་ཀྱང་འདྲེས་འཛིན་མེད་ལ། སྐྱེས་མ་ཐག་པ་རྟོག་དཔྱོད་ཞུགས་མི་ཤེས་པ་ལ་དཔེར་བྱས་སོ། །རྣམ་ཤེས་དེ་དག་གིས་ལས་སོག་ཚུལ་ནི། ཀུན་མཁྱེན་ཆེན་པོས། དེ་ཡང་ཆགས་སྡང་རགས་པས་དགེ་སྡིག་གི། །འདོད་པར་འདུ་བྱེད་བག་ཆགས་ཀུན་གཞིར་བརྟེན། མི་རྟོག་གསལ་སྣང་གཟུགས་སུ་འདུ་བྱེད་ལ། །མི་རྟོག་རྩེ་གཅིག་གཟུགས་མེད་བག་ཆགས་བརྟེན། །འཁོར་བའི་རང་བཞིན་གློ་བུར་སྒྲིབ་པ་གཉིས། །དུས་རྣམ་ཀུན་ཏུ་ཉེ་བར་བརྟེན་པ་མིན། །ཞེས་སེམས་ཉིད་ངལ་གསོ་ལས་གསུངས་པ་དང་། གང་དུ་མི་རྟོག་རྩེ་གཅིག་ལུང་མ་བསྟན། །གསལ་ཞིང་རིག་ཙམ་རྟོག་པ་མེད་པ་དང་། །གཡོ་བའི་ཀུན་རྟོག་སྣ་ཚོགས་རྣམ་པ་གསུམ། །གཟུགས་མེད་གཟུགས་དང་འདོད་པའི་སེམས་ཉིད་དེ། །ཏིང་འཛིན་དེ་ལས་ཁམས་གསུམ་ཉེ་བར་སྐྱེ། །འཁོར་བ་ཉིད་ལས་གྲོལ་བའི་སྐབས་མེད་དོ། །ཞེས་ཁྲེགས་ཆོད་ཀྱི་ཡང་ཡིག་ནམ་མཁའ་ཀློང་ཡངས་ལས་གསུངས་པ་དང་། བདེ་གསལ་མི་རྟོག་སྲིད་གསུམ་སོ་སོའི་སེམས། །འདོད་གཟུགས་གཟུགས་མེད་སྲིད་པར་འཁོར་བ་ལས། །གྲོལ་བའི་སྐབས་མེད་མུ་སྟེགས་རྣམས་ལའང་ཡོད། །ཅེས་ཁྱུང་ཆེན་གཤོག་རྫོགས་ལས་གསུངས་སོ། །༼༈༽ ཐེག་མཆོག་རིན་པོ་ཆེའི་མཛོད་ལས། རིག་པ་རང་སྣང་གི་ལམ་བཟང་རྡོ་རྗེ་སྙིང་པོའི་གསང་བ་ཆེན་པོ་ནི། ཐུན་མོང་གི་ཐེག་པ་ལས་གནད་བདུན་གྱིས་འཕགས་ཏེ། ལམ་གཞན་རྣམས་ཤེས་རབ་ཆེ་བས་མྱུར་དུ་རྟོགས་ཤིང་གྲོལ། ཆུང་བས་མི་གྲོལ་བ་ལས། འདི་ནི་མཐོང་བ་དབང་པོའི་གནད་ཀྱིས་བརྩོན་འགྲུས་ཆེ་ཆུང་ཙམ་ལས་དབང་པོ་ལ་རྣོ་རྟུལ་མེད་པའི་གནད། གཞན་རྣམས་རང་རང་གི་ཆོས་ཉིད་ཡིད་དཔྱོད་ལ་གདེངས་སུ་འཆའ་བ་སྟོང་སྒོམ་མུན་འཕེན་ལས། འདི་ནི་བློའི་ཡིད་དཔྱོད་ལ་མི་ལྟོས་པར་མངོན་སུམ་བལྟར་ཡོད་པས་ཡིད་དཔྱོད་ལ་མི་ལྟོས་པའི་གནད་དང་། གཞན་རྣམས་རྗོད་བྱེད་ཚིག་གི་རིམ་པ་ལ་ལྟོས་འཆའ་བ་དོན་གདོད་ནས་རྟོགས་སུ་རེ་བ་ལས། འདི་ནི་ཚིག་ལ་འབྲུ་གཅིག་མ་ལྟོས་པར་དོན་མངོན་སུམ་དུ་མཐོང་བས་ཚིག་གིས་སངས་མི་རྒྱ་བའི་གནད་དང་། གཞན་རྣམས་རང་རང་གི་གནས་ལུགས་ཀྱི་དོན་བློའི་ཡུལ་དུ་བྱས་པའི་གཞི་ལམ་འབྲས་བུའི་རྣམ་དཔྱོད་དུས་ལ་ལྟོས་པ་ལས། འདི་ནི་རང་གསལ་མངོན་དུ་གྱུར་བས་བློས་བྱས་རྟོག་པའི་གཞི་ལམ་ལ་མི་ལྟོས་པར་བྱང་ཆུབ་རང་ལས་འཆར་བས་འབད་རྩོལ་དང་བླང་དོར་མེད་པའི་གནད་དང་། གཞན་རྣམས་རྩ་རླུང་དང་ཐིག་ལེ་ལ་སོགས་པ་ན་སོ་གཞོན་དུས་དར་བས་བྱང་ཆུབ་འགྲུབ་ལ། རྒན་དུས་འབྱུང་བའི་སྟོབས་ཟད་དུས་མི་གྲོལ་བར་འདོད་པ་ལས། འདི་ནི་རང་བྱུང་འོད་གསལ་གྱི་ཉི་ཟླ་ཁོང་ནས་འཆར་བས་བརྩོན་འགྲུས་དང་ལྡན་ན་ན་སོ་ལ་རྒན་གཞོན་མེད་པར་གྲོལ་བའི་གནད་དང་། གཞན་རྣམས་མཐར་ཐུག་གི་འབྲས་བུ་སྐུ་གསུམ་དུ་འདོད་པ་ལ་ལྟོས་འཆའ་བ་ལས། འདི་ནི་སྐུ་གསུམ་ལམ་སྣང་དུ་འཆར་བས་མཐར་ཐུག་འོད་གསལ་ཀ་དག་གི་ཀློང་དུ་ལྷུན་གྲུབ་རིག་པའི་གཏན་སྲིད་ཟིན་པའི་གནད་དང་། དེ་ལྟར་བདུན་གྱིས་ཆེ་བས་ཐུན་མོང་གི་ཐེག་པ་ཉན་ཐོས་ནས་གསང་སྔགས་ཕྱི་ནང་གི་རིམ་དགུ་ཀུན་ལས་འཕགས་སོ། །ཞེས་དང་། ཚིག་དོན་རིན་པོ་ཆེའི་མཛོད་ལས། རིག་པ་རང་སྣང་གི་བློ་ཅན་རྣམས་ཀྱིས་ཉམས་སུ་བླང་བའི་རིམ་པ་ལ། ཐུན་མོང་ལས་གནད་བདུན་གྱིས་འཕགས་ཏེ། རིག་པ་ཅེར་མཐོང་དུ་རྟོགས་པས་དབང་པོ་ལ་རྣོ་རྟུལ་མེད་པའི་གནད། ཆོས་ཉིད་དབང་པོས་མཐོང་བས་ཤེས་རབ་ལ་ཆེ་ཆུང་མེད་པའི་གནད། གནས་ལུགས་རང་ངོ་རྟོགས་པས་ཚིག་གིས་ཆོས་ཉིད་མི་མཐོང་བའི་གནད། བླང་དོར་འབད་རྩོལ་མེད་པས་ན་སོ་ལ་རྒན་གཞོན་མེད་པའི་གནད། རང་རིག་ལ་དྲི་མ་མེད་པས་ལས་ལ་བཟང་ངན་མེད་པའི་གནད། ཆོས་ཉིད་བསམ་རྫོགས་ལས་འདས་པས་ལྟ་སྒོམ་གཞི་ལམ་ལ་མི་ལྟོས་པའི་གནད། འབྲས་བུ་ཀ་དག་ཡིན་པས་སྐུ་གསུམ་ལམ་སྣང་དུ་ཤར་ཏེ། ཁམས་གསུམ་དུ་ཕྱིར་མི་ལྡོག་པའི་གནད་དོ། །ཞེས་དང་། ཁྲེགས་ཆོད་ལས་ཁྱད་པར་བདུན་གྱི་འཕགས་ཏེ། ཉམས་ལེན་ལག་ལེན་དང་འབྲེལ་བའི་ཁྱད་པར། ལུས་གནད་རྩའི་ཁྱད་པར། སྣང་བྱེད་སྒོའི་ཁྱད་པར། མཐོང་བ་དབང་པོའི་ཁྱད་པར། རང་གནད་མངོན་སུམ་གྱི་ཁྱད་པར། སྣང་བ་འོད་ཀྱི་ཁྱད་པར། ཉམས་སྣང་གོང་འཕེལ་གྱི་ཁྱད་པར་རོ། །དང་པོ་ནི། ཕྱིའི་དབྱིངས་ནམ་མཁའ་སྟོང་པ་ལ་ནང་གི་དབྱིངས་རིག་པ་ལུ་གུ་རྒྱུད་དངོས་སུ་གཅེར་མཐོང་དུ་སྟོན་པའི་ལག་ཁྲིད་ཟམ་མ་ཆད་པས་ཡིད་དཔྱོད་རྟོག་པའི་ཤེས་རབ་ལ་རག་མ་ལས་ཏེ་གདམས་པའི་ངོ་བོ་ལ་བར་དུ་བསྲེ་བསླད་དང་རྟོག་བཟོས་ཟབ་མི་ཟབ་བྱར་མེད་པས་ཆེས་འཕགས་ཏེ། ཡི་གེ་མེད་པ་ལས། རིག་པའི་རང་བཞིན་དུ་ཀུན་ལ་ཁྱབ་ཀྱང་ཆོས་ཀྱི་སྐུ་གདམས་ངག་ལ་ཐུག་གོ། ཞེས་སོ། ། གཉིས་པ་ནི། ཁྲེགས་ཆོད་ལ་རིག་པ་ལུས་ལ་གནས་ཀྱང་དེའི་གནད་མེད་པ་ལས། འདིར་གནད་ཁྱད་པར་ཅན་ཡོད་དེ། ཐལ་འགྱུར་ལས། ཡུལ་གནད་དབང་ལ་དབང་གནད་སེམས། །སེམས་གནད་མིག་ལ་མིག་གནད་རྩ། །དེས་ན་ལུས་ཀྱི་འདུག་སྟངས་ལས། །བག་ཆགས་ལུས་ཀྱི་འབྲེལ་ཆོད་དང་། །སངས་རྒྱས་དགོངས་པ་རྫོགས་པའོ། །ཞེས་སོ། ། གསུམ་པ་ནི། རིག་པ་མི་རྟོག་པར་གནས་པ་ལ་ཁྲེགས་ཆོད་དུ་ཡིད་ཀྱི་སྒོ་རྟོག་བཅས་ཀྱི་གདངས་ལས་ཡེ་ཤེས་འཚོལ་བ་ལས་འདིར་རིག་པ་རྟོག་མེད་འོད་གསལ་གྱི་གདངས་མིག་ནས་འཆར་བ་ངོས་འཛིན་པས་ཀྱང་འཕགས་ཏེ། ཐལ་འགྱུར་ལས། ཡེ་ཤེས་གནད་ནི་མིག་ནས་འབྱུང་། །མིག་གིས་གཟིགས་སྟངས་ཤེས་པ་ཡིས། །ཆོས་ཀྱི་དབྱིངས་དང་ལྷན་གཅིག་སྤྱོད། །ཅེས་སོ། །མཐོང་བ་དབང་པོའི་ཁྱད་པར་ནི། ཁྲེགས་ཆོད་དུ་ཡུལ་སྣང་ཚོགས་དྲུག་གི་སྣང་བ་འཛིན་པའི་དབང་པོས་མཐོང་བས་རྟོག་པ་སྣ་ཚོགས་སུ་འཆར་བ་རྒྱུན་མི་འཆད་པ་ལས་འདིར་འོད་རྩ་དྭངས་པའི་དབང་པོས་ལུ་གུ་རྒྱུད་གཅེར་མཐོང་དུ་མཐོང་དུས་རྟོག་པ་དུས་གཅིག་ལ་འགག་ཅིང་ཡེ་ཤེས་ཀྱི་སྣང་ཆ་དཔག་ཏུ་མེད་པ་འཆར་བ་ནི། རྒྱུད་དེ་ཉིད་ལས། ལུ་གུ་རྒྱུད་དུ་གཅེར་མཐོང་བས། །རྣམ་རྟོག་འགྱུ་བའི་དྲན་པ་འགགས། །བྱ་ལམ་ནམ་མཁར་འགྲོ་བ་བཞིན། །ཆོས་ཀྱི་དབྱིངས་ལས་འགྲོ་ས་མེད། །གཞན་མེད་རིག་སྣང་རྣམ་དག་པས། །འཁྲུལ་བར་སྣང་བའི་རྒྱུ་རྐྱེན་ཟད། །ཅེས་སོ། །རང་གནད་མངོན་སུམ་གྱི་ཁྱད་པར་ནི། ཁྲེགས་ཆོད་དུ་ཡེ་ཤེས་དངོས་སུ་བལྟར་མེད་ལ་འདིར་དངོས་སུ་མཐོང་བས་ཕྱིས་མངལ་གྱི་གྲོང་ཁྱེར་རྒྱུན་གཅོད་པའི་ཆེ་བས་འཕགས་ཏེ། ཐལ་འགྱུར་ལས། ཆོས་ཉིད་མངོན་སུམ་ཁྱད་པར་གྱིས། །དབང་པོ་རྣོ་དང་རྟུལ་མེད་པར། །སེམས་ཅན་ཐམས་ཅད་སངས་རྒྱས་ལས། །གཞན་དུ་གནས་པ་མ་ཡིན་ནོ། །ཞེས་པ་དང་། མངོན་སུམ་རྙེད་པའི་སྐལ་ལྡན་ལ། །ཁམས་གསུམ་འཁོར་བ་མིང་མེད་པས། །སྲིད་གསུམ་གདར་ཤ་ཆོད་པའོ། །ཞེས་སོ། །སྣང་བ་འོད་ཀྱི་ཁྱད་པར་ནི། ཁྲེགས་ཆོད་དུ་འཁྲུལ་སྣང་ལས་མི་སྣང་ལ་འཁྲུལ་སྣང་འཛིན་པའི་ཤེས་པ་ནི་འཁྲུལ་ཤེས་སུ་འགྱུར་བས་དོན་ལ་གཟུང་འཛིན་ལས་མི་འདའ་སྟེ། དེ་ཉིད་ལས། དེ་ལྟར་སྣང་ཆའི་བྱེད་པ་ལས། །གཟུང་དང་འཛིན་པ་གཉིས་སུ་ཤར། །གཟུང་བ་ཡུལ་ལ་འཛིན་པ་སེམས།། ཡུལ་སེམས་འདུས་པས་དུག་གསུམ་མོ། །ཞེས་སོ། །འདིར་ནི་རིག་པའི་ཡེ་ཤེས་ལ་འབྱུང་བ་དག་པས་འཁྲུལ་སྣང་མི་སྣང་བར་རང་འོད་སྣང་བས་འཕགས་ཏེ། དེ་ཉིད་ལས། འབྱུང་བ་དག་པའི་ཆ་ལས་ནི། །ལས་སུ་མེད་ལ་ཆིག་རྫོགས་པའི། །ཉི་མ་ལ་ནི་འོད་བཞིན་དུ། །རང་ཆས་སྒྲིབ་པ་མེད་པའོ། །ཞེས་སོ། །དེ་ཡང་གཞི་རིག་པ་ལ་རང་འོད་ཡོད་པས་རང་སྣང་ལམ་འོད་དུ་འཆར་ལ། དེ་ཉིད་ལམ་དུ་བྱས་པས་འབྲས་བུ་ལོངས་སྤྱོད་རྫོགས་པའི་སྐུ་ལས་ཀ་དག་ཆོས་ཀྱི་སྐུར་གྲོལ་ནས་ཕྱིར་མི་ལྡོག་པ་སྟེ། དེ་ཉིད་ལས། དེ་ཡང་གཞི་ལ་རྫོགས་པའི་གནད། །རང་བཞིན་མ་བཅོས་མངོན་དུ་སྣང་། །ལམ་ནི་སྒྲོན་མས་མཚམས་སྦྱར་ནས། །མངོན་སུམ་ཉིད་དུ་སྣང་བའོ། །འབྲས་བུ་གང་དུ་བཟློག་པ་མེད། །འདོད་དང་རེ་དོགས་ཡུལ་ལས་འདས། །རང་སྣང་ཀ་ནས་དག་པར་རྫོགས། །ཤེས་འཛིན་རྟོག་པ་ཀུན་ཟད་པའོ། །ཞེས་སོ། །ཉམས་སྣང་གོང་འཕེལ་གྱི་ཁྱད་པར་ནི། ཁྲེགས་ཆོད་དུ་ཤེས་པ་(གཅད་) ཁམས་བརྟན་དུ་འགྲོ་བ་ཙམ་ལས་ནང་ཤེས་པའི་ཉམས་ཏིང་ངེ་འཛིན་དུ་མ་དང་། སྤྱན་དང་མངོན་ཤེས་དང་། ཕྱི་སྣང་བའི་ཉམས་འོད་དང་སྐུ་ལ་སོགས་པ་མེད་ལ། འདིར་ཉམས་སྣང་ཁྱད་པར་ཅན་གོང་ནས་གོང་དུ་འཆར་ཏེ། ཐལ་འགྱུར་ལས། ཤེས་པའི་ཉམས་ཟད་སྣང་བ་སྟེ། །འཕེལ་སྟོབས་ཟླ་བ་ཡར་ངོ་བཞིན། །སྣང་བ་རེ་ལ་ཉམས་རེའོ། །དྲོད་དང་ཚད་དང་རྟགས་ལས་ནི། །བདེན་གཉིས་ཟུང་འཇུག་རྟོག་མཐའ་ཟད། །ཅེས་སོ། །ཐེག་མཆོག་མཛོད་དུ་ས་བཅད་བདུན་གསུངས་པའི་གཉིས་པ་དང་གསུམ་པ། ལྔ་པ་དང་དྲུག་པ་རྣམས་གཉིས་རེའི་སྒྲ་ཡེ་ཤེས་བླ་མའི་སྐབས་འདིར་འདོམས་ཡོད་པ་སོ་སོའི་ལྡོག་ཆ་ནས་བརྗོད་ན། དང་པོ་སྣང་བ་འོད་ཀྱི་ཁྱད་པར། ཁྲེགས་ཆོད་ཀྱིས་ས་རྡོ་ཞེས་སོགས་གསུངས་པ་ནི་ཁྲེགས་ཆོད་ཀྱིས་ཕྱི་འཁྲུལ་སྣང་གི་ས་རྡོ་རི་བྲག་ལ་སོགས་པ་དག་པར་བྱེད་མི་ནུས་ཤིང་། ཡུལ་དུ་བྱེད་པས་སྒྱུ་མ་དང་གཞི་མེད་ལ་སོགས་པའི་རྒྱས་འདེབས་ཡིད་དཔྱོད་ལ་ལྟོས་པས། སེམས་ཀྱི་རྣམ་ཤེས་ཚོགས་པའི་ཆོས་ལ་བརྟེན་ཞིང་མྱུར་དུ་མི་འགྲོལ་བ་ཉིད། ཐོད་རྒལ་འོད་ལྔ་དབྱིངས་ཐིག་གི་སྣང་བ་ཡུལ་དུ་བྱེད་པས། འཁྲུལ་སྣང་གི་མིང་མེད་ཡིད་དཔྱོད་ཀྱི་རྒྱས་འདེབས་མི་དགོས་ཤིང་། སེམས་ཀྱི་ཆོས་མིག་གི་རྣམ་ཤེས་ལ་སོགས་པ་རང་འགག་ལ་སྦྱོང་བས་འཁོར་བ་མིང་མེད་དུ་ལ་ཟློས་ཏེ། དེའི་ཚེ་དེས་འོད་དུ་གྲོལ་བའི་ཁྱད་ཞུགས་པ་ནི། ཐལ་འགྱུར་ལས། འདི་ནི་རང་ཡུལ་བསྟན་པ་ལས། །འཁོར་རྐྱེན་འཇུག་པ་མ་ཡིན་པར། །ཟང་མ་ཉིད་དང་ཐལ་བྱུང་དུ། །ཡུལ་དང་ཤེས་པའི་སྣང་ཆ་ལས། །ཐད་ཀ་སོ་སོའི་གཞི་ལས་གྲོལ། །ཞེས་སོ། །གཉིས་པ་ཉམས་ལེན་ལག་ལེན་དང་འབྲེལ་བའི་ཁྱད་པར་དང་། གསུམ་པ་རང་སྣང་མངོན་སུམ་དུ་གཟིགས་པའི་ཁྱད་པར། རིག་པ་ཡེ་ནས་འོད་གསལ་སོགས་གསུངས་པའི། ཉམས་ལེན་ལག་ལེན་དང་འབྲེལ་བའི་ཁྱད་པར་ནི། རིག་པ་ཡེ་ནས་འོད་གསལ་དུ་གསུངས་ཏེ་ཁྲེགས་ཆོད་ཀྱིས་སྟོང་པར་འཇལ་བ་ལས་རང་འོད་མི་མཐོང་བ་དེ། ཐོད་རྒལ་གྱིས་གནད་གཅུན་པས་ཆོས་ཉིད་ངོ་བོའི་འོད་གསལ་ནང་དུ་ཟིན་དུས། ཆོས་ཅན་རང་གདངས་ཀྱི་འོད་གསལ་ཕྱིར་སྣང་བ་ལག་ལེན་ལ་བསྟན་དུ་ཡོད་པས་འཕགས་ཏེ། རང་ཤར་ལས། རང་སྣང་རིག་པའི་རྒྱལ་པོ་འདི། །ཀུན་ལ་ཡོད་དེ་རྟོགས་པ་མེད། །ཅེས་སོ། །རང་སྣང་མངོན་སུམ་དུ་གཟིགས་པའི་ཁྱད་པར་ནི། རིག་པའི་ཡེ་ཤེས་ཁྲེགས་ཆོད་བལྟར་མེད་ཀྱིས་རྒྱས་བཏབ་ནས་མཐོང་དུ་མེད་པ་གཅིག་ཏུ་ཐག་གཅོད་པ་དེ། ཐོད་རྒལ་དུ་ཡེ་ཤེས་ཀྱི་མཐོངས་ཕྱེ་བས་ཆོས་ཉིད་ཀྱི་ཉི་ཟེར་གསལ་བ་ནི། ཐལ་འགྱུར་ལས། ཆོས་ཉིད་མངོན་སུམ་སྣང་བ་ཡིས། །ཡིད་དཔྱོད་འཛིན་པའི་ལྟ་བ་བསྣུབ། །ཅེས་སོ། །བཞི་པ་ལུས་གནད་རྩའི་ཁྱད་པར། ཁྲེགས་ཆོད་དུ་རགས་པའི་སོགས་གསུངས་པ་ནི། ཁྲེགས་ཆོད་དུ་རགས་པ་རྩ་རླུང་ལ་བརྟེན་པ་ལས། ཐོད་རྒལ་དུ་འོད་རྩ་དྭངས་པ་ངོས་བཟུང་ནས་སྒྲོན་མ་དངོས་ལམ་དུ་བྱེད་པ་སྟེ། དེ་ཉིད་ལས། གཞན་ཡང་རྩ་དང་འཁྲུལ་འཁོར་གྱིས། །རང་བཞིན་སྣང་བའི་ཡེ་ཤེས་ལྔ། །ཆུ་བུར་མིག་གིས་མཐོང་བའོ། །ཞེས་སོ། །ལྔ་པ་སྣང་བྱེད་སྒོའི་ཁྱད་པར་དང་། དྲུག་པ་མཐོང་བ་དབང་པོའི་ཁྱད་པར་ཁྲེགས་ཆོད་དུ་དབང་པོ་སོགས་གསུངས་པ་ནི། སྣང་བྱེད་སྒོའི་ཁྱད་པར་ནི། ཁྲེགས་ཆོད་དུ་དབང་པོ་དྲུག་གི་སྒོ་མ་དག་པ་སེམས་ཀྱི་ཆོས་ལ་དྭངས་འཚོལ་བ་ལས་ཐོད་རྒལ་དུ་དག་པ་འོད་གསལ་གྱི་སྒོ་ཡེ་ཤེས་ཀྱི་རླུང་གིས་བསྐུལ་བས་སྒྲོན་མ་བཞིའི་སྣང་བ་འཆར་བས་འཕགས་ཏེ། དེ་ཉིད་ལས། སྒོ་ནས་ཇི་ལྟར་འབྱུང་བ་ནི། །འཇུག་པའི་རླུང་གིས་བསྐུལ་བ་ཡིས། །སྒྲོན་མ་བཞི་ལས་ལས་བཞིར་འབྱུང་། །ཞེས་སོ། །མཐོང་བ་དབང་པོའི་ཁྱད་པར་ནི་ཁྲེགས་ཆོད་ཀྱིས་བལྟར་མེད་རིག་པ་ནང་དྭངས་ཀྱི་དབང་པོ་ལ་དྭངས་འཚོལ་བ་ལས། ཐོད་རྒལ་དུ་ཕྱི་ནང་ཡེ་ཤེས་ཟང་ཐལ་གྱི་དབང་པོའི་དབྱིངས་དང་ཡེ་ཤེས་འདུ་འབྲལ་མེད་པའི་སྣང་བ་ལ་དངོས་སུ་དཔྱོད་པའི་ཁྱད་ཞུགས་ཏེ། ཐལ་འགྱུར་ལས། དག་པ་དབྱིངས་ཀྱི་སྒྲོན་མ་ལ། །ཐིག་ལེ་སྐུ་དང་འཁྲུལ་སྣང་དག །རང་བཞིན་ཉིད་དང་ངོ་བོ་ཉིད། །གཉིས་མེད་འདུ་འབྲལ་མེད་པར་སྣང་། །ཞེས་སོ། །བདུན་པ། ཉམས་མྱོང་འཕེལ་སྣང་གི་ཁྱད་པར་ནི། ཁྲེགས་ཆོད་གྱིས་ཕྱི་ཡུལ་སྣང་སེམས་ཀྱི་འཁྲུལ་བ་སྣང་དུ་བཅུག་ནས་སྤོང་ལེན་མེད་པའི་ངང་དུ་རྒྱས་འདེབས་པས་མྱུར་དུ་དེ་དག་མི་གྲོལ་བ་ཉིད། ཐོད་རྒལ་དུ་གནད་གཅུན་པས་སྐད་ཅིག་ནས། ཕྱི་ནང་གི་འཁྲུལ་སྣང་འཁྲུལ་འཛིན་དང་བཅས་པ་རང་སངས་ཏེ། མ་སྤངས་གནས་སུ་དག་པ་རྒྱས་འདེབས་ལ་མི་ལྟོས་ཤིང་། ཡེ་ཤེས་ཀྱི་འཕེལ་སྣང་ཟླ་བ་ཡར་ངོ་བཞིན་གོང་དུ་འཕེལ་ཏེ་སྣང་བ་བཞི་ཚད་དུ་ཕྱིན་ནས་མྱུར་དུ་གྲོལ་བ་ཉིད། དེ་ལས། སྣང་ཚུལ་འཁྲུལ་བ་མ་ཡིན་ལ། །རྒྱུ་རྐྱེན་དག་པའི་རང་བཞིན་ལ། །དངོས་དང་དངོས་མེད་རང་དག་ནས། །སྒོ་ལྔའི་ཡུལ་ཞེན་དག་པ་དང་། །འབྱུང་བའི་རགས་པ་དག་པ་དང་། །ཡེ་ཤེས་དག་པ་འཕེལ་སྣང་སྟོན། །དེ་ལས་ཟད་པའི་ཆོས་ཉིད་དོ། །ཅེས་སོ། །ཕྱི་མ་འདི་ཡེ་ཤེས་བླ་མར་དངོས་སུ་མི་གསལ་བས་དཔྱོད། ༈ རི༷ག་པ༷་ནི་ངོ་བོ། རང་བཞིན། ཐུགས་རྗེ་གསུམ་གྱི་གདངས་གསེར་གྱི་སྐུད་པ་ལྟ་བུ་ལ་ཐིག་ལེ་སྤྲས་པའོ། །རྡོ༷་རྗེ༷་ནི་སངས་རྒྱས་སེམས་ཅན་ཀུན་ལ་ངོ་བོ་བཟང་ངན་མེད་པར་མཉམ་པའོ། །ལུ༷་ནི་ལུ་མའི་ཆུ་ལས་ཆུ་འཕེལ་འགྲིབ་མེད་པར་འབྱུང་བ་དང་འདྲ་བར་སྐུ་དང་ཡེ་ཤེས་འཆར་བར་བྱེད་པའོ། གུ༵༷་ནི་དེའི་ནང་དུ་ལྟ་སྒོམ་འགུག་པར་བྱེད་དོ། རྒྱུད༷་ནི་འཁོར་འདས་ལ་ཁྱབ་ཅིང་སྣང་བ་དེའི་ཚོགས་རྣམས་ལས་སྐུ་དང་ཐིག་ལེ་འཕྲོ་བ་དང་མཆེད་པ་དང་། འདུ་བ་ལ་སོགས་པ་གསལ་བར་བྱེད་པའོ། ། ༼༈༽ ཐོད་རྒལ་གྱི་རྒྱབ་ཡིག་ཉི་ཟླ་གཟའ་སྐར་ལས། སེམས་དང་ཡེ་ཤེས་ཀྱི་དབྱེ་བ་ལ་གཉིས་ལས། དང་པོ་སེམས་ཀྱི་དབྱེ་བ་ལ་བརྒྱད་དེ། གནས། ངོ་བོ། ལམ། སྒོ། ཡུལ། རྩལ། བྱེད་ལས། འབྲས་བུའོ། །གནས་ནི་གློ་བ་ན་རྩ་གྲོ་སོག་གི་སྦུ་གུ་ཙམ་རླུང་གིས་གང་བ་ལས། དབུགས་ཐམས་ཅད་མཆེད་པའི་རྟེན་བྱེད་པ་སྙིང་ག་དང་འབྲེལ་བ་ན་གནས་ཏེ། གསེར་ཕྲེང་ལས། གནས་ནི་རླུང་ཅན་གྲོང་ན་གནས། ཞེས་སོ། ངོ་བོ་དེ་ནི་སྙིང་གའི་རིག་གདངས་རླུང་དང་འདྲེས་པས་རྣམ་པར་རྟོག་པའོ། །རླུང་དེ་རྟ་ལོང་བ་རྐང་ཅན་དང་། རིག་གདངས་མི་འཕྱེ་བོ་མིག་ཅན་གཉིས་འཕྲུལ་བ་ལྟ་བུའོ། །ལམ་ནི་གློ་བ་ནས་རྩ་འདབ་སོ་སོ་ལ་སོང་བའི་རླུང་གིས་སྒོ་ལྔའི་ཡུལ་ལ་རྟོག་པའི་ཕྱིར་ཁ་སྣ་དང་དབང་པོ་སོ་སོའི་སྒོ་ལ་རླུང་རྒྱུ་བའི་རྩ་ལམ་ཡིན་ནོ། །སྒོ་ནི་དབང་པོ་སོ་སོ་དང་ཁ་སྣའོ། །ཡུལ་ནི་གཟུགས་ལ་སོགས་པ་ཚོགས་དྲུག་གི་ཡུལ་དྲུག་གོ །རྩལ་ནི་གཟུང་འཛིན་དགག་སྒྲུབ་ལ་སོགས་པའི་རྣམ་རྟོག་རྣམས་སོ། །བྱེད་ལས་ནི་ལས་དང་ཉོན་མོངས་དང་བག་ཆགས་དུ་མ་གསོག་པར་བྱེད་དོ། །འབྲས་བུ་ནི་འཁོར་བའི་སྡུག་བསྔལ་ཐམས་ཅད་སྐྱེད་པར་བྱེད་དོ། །གཉིས་པ་ཡེ་ཤེས་ཀྱི་དབྱེ་བ་ལ་ཡང་བརྒྱད་ལས། གནས་ནི་ཙིཏྟ་རིན་པོ་ཆེ་མཆོང་གུར་ཕུབ་པ་འདྲ་བའི་དབུས། འོད་གསལ་གྱི་རྩ་འདབ་བཞིའི་ལྟེ་བ་ལ་དྭངས་མའི་དྭངས་མ་ཉུང་འབྲུ་ཙམ་ལ་བརྟེན་པ་ནི། མུ་ཏིག་ཕྲེང་བ་ལས། གནས་པ་ཐུགས་ཏེ་ཙིཏྟའི་དཀྱིལ། ཞེས་སོ། །ངོ་བོ་ནི་རིག་པའི་ཡེ་ཤེས་ཏེ་ངོ་བོ་སྟོང་། རང་བཞིན་གསལ། ཐུགས་རྗེ་འགག་པ་མེད་པར་མར་མེའི་སྙིང་པོ་ལྟ་བུ་འོད་དང་སྐུར་འབར་བ་སྟེ། ཐལ་འགྱུར་ལས། ཙིཏྟ་རིན་ཆེན་གཞལ་ཡས་ན། །ངོ་བོ་ཀ་ནས་དག་པའི་ཆ། །སྟོང་གསལ་འདུས་པ་སྐུ་ཡི་གདངས། །ཞལ་ཕྱག་རྫོགས་པ་བུམ་སྐུའི་ཚུལ། །ལྷུན་གྲུབ་འོད་ཀྱི་གོང་བུར་གནས། །ཐུགས་རྗེ་ཁ་དོག་སོ་སོར་གསལ། །ཞེས་སོ། །དེའི་རྩལ་དུང་ཁང་ན་ཁྲོ་བོའི་དཀྱིལ་འཁོར་དུ་གནས་པ་ནི། རྡོ་རྗེ་སེམས་དཔའ་སྙིང་གི་མེ་ལོང་ལས། དེ་ལས་བྱུང་བའི་ཡེ་ཤེས་ཀྱིས། །གནས་ནི་ཀླད་པ་དུང་ཁང་ན་གནས་སོ། །དེའང་ཁྲོ་བོའི་སྐུ་ཉུང་འབྲུ་ཙམ་ལ་སྤྱན་ཕུལ་ཐག་ཙམ་དུ་བཞུགས་སོ། །འོད་དང་འོད་ཟེར་གྱི་ཚུལ་དུ་གནས་སོ། །ཞེས་སོ། །ལམ་ནི་སྙིང་ནས་མིག་ཏུ་འབྲེལ་བའི་རྩ་ཀ་ཏི་ཤེལ་གྱི་སྦུ་གུ་ཅན་ཏེ། གསེར་ཕྲེང་ལས། རིན་ཆེན་རྒྱ་མཚོར་འབྲེལ་བའི་རྩ། །དཀར་འཇམ་ཁོག་པ་སྟོང་པ་ནི། །ཐིག་ལེ་ཁྲག་གིས་མ་གོས་པ། །ཡེ་ཤེས་ཆེན་པོ་དེ་ནས་རྒྱུ། །ཞེས་སོ། །འབྲེལ་ལུགས་ནི། སྙིང་གའི་རྩེ་ནས་སྒལ་ཚིགས་འདབས་མ་ལ་འཁྲི ལ་ཏེ། མགྲིན་པའི་རྩེའུ་ཆུང་གཡས་གཡོན་གྱི་འདབ་ནས་རྣ་བ་གཉིས་ལ་འཁྲིལ་ཏེ་ཀླད་པ་ནས་མིག་གི་ཨ་འབྲས་ཆུའི་སྒྲོན་མ་གཉིས་ལ་ཟུག་ནས་གནས་པ་སྟེ། སྔ་མ་ལས། ལམ་དེ་ལས་བྱུང་བའི་འོད་ཟེར་ནི། མེ་ལོང་གི་དཀྱིལ་ལྟར་གསལ་ལ་དྭངས་པའོ། །དཔེར་ན་ཉའི་མིག་བཞིན་ཏུ་འོད་ཟེར་དུ་སྣང་བའོ། །དེ་དང་རིག་པ་འབྲེལ་བའི་རྩ་ནི། སྙིང་གའི་རྩེ་མོ་ནས་དར་དཀར་གྱི་སྐུད་པ་ཙམ་སྒལ་ཚིགས་ཀྱི་འདབས་ནས་ཡར་ཡོད་དོ། །དེ་ནས་ལམ་བྱུང་ནས་མགོ་ཡི་ནང་ན་ཡར་འཇུག་སྟེ་རྩ་དེའང་རྩེའུ་ཆུང་གཡས་གཡོན་ནས་ཀླད་པ་འབྲེལ་ལོ། །དེའང་རྣ་བའི་གཡས་གཡོན་ནས་ཐོན་ནས་མིག་ཏུ་འབྲེལ་ལོ། །དེས་ན་མིག་ནམ་མཁའ་ལ་ལྡོག་རྩ་གཅུན་ནས་བལྟས་པས་ཡེ་ཤེས་ཀྱི་སྣང་བས་གང་བར་འགྱུར་རོ། །ཞེས་སོ། །སྒོ་གང་ནས་འཆར་བ་ནི་མིག་གཉིས་ནས་འཆར་སྟེ། ཐལ་འགྱུར་ལས། རྒྱང་ཞག་ཆུའི་སྒྲོན་མ་ནི། །ཡེ་ཤེས་འཆར་བའི་སྒོ་རུ་བསྟན། །ཞེས་སོ། །མིག་གི་རྩའི་རྩ་བ་ནི། ལྟེ་བ་དང་སྙིང་གར་འབྲེལ་ལོ། །སྙིང་ག་ནས་མགྲིན་པར་འབྲེལ་ལོ། །མགྲིན་པ་ནས་དུང་ཁང་དུ་གཡས་སུ་འཁྱིལ་བའི་རྩ་འདབ་བཞིར་གྱེས་པའི་དབང་པོ་ཡུལ་ལ་འཆར་བར་བྱེད་པའི་རྩ་འདབ་ག ཅིག་ལས་རྩེ་མོ་ལྔར་གྱེས་ཏེ། སྒོ་ལྔ་སོ་སོའི་རྟེན་བྱེད་པ་ལས་སྐྱོན་ཡོན་དབང་པོ་དྭངས་བྱེད་ཀྱི་རྩ་ཞེས་བྱ་བ་ཁ་ཆེ་ལ་རྩ་བ་ཕྲ་བ། བ་མེན་གྱི་རྭ་ལྟ་བུའི་ཡལ་ག་གཉིས། མིག་གི་ཨ་འབྲས་ཀྱི་དྭངས་མ་གཉིས་ལ་ཟུག་ནས་དཀར་ནག་ཕྱེད་མ་ཆུའི་རང་བཞིན་དྭངས་ལ་གསལ་བ་བྱུང་བས། རྒྱང་ཞགས་ཆུའི་སྒྲོན་མ་ཞེས་བྱའོ། །དེ་ལ་བརྟེན་ནས་ཐིག་ལེ་སྟོང་བའི་སྒྲོན་མ་རྨ་བྱའི་མདོངས་ལྟ་བུར་འཆར་རོ། །དེའི་གདངས་དབྱིངས་རྣམ་པར་དག་པའི་སྒྲོན་མ་ཡི་གེ་ན་རོ་ལྟ་བུར་འཆར་རོ། །དེའི་རྩལ་ཤེས་རབ་རང་བྱུང་གི་སྒྲོན་མ་ཤེས་པའི་རྩལ་དུ་མར་འཆར་རོ། །དེ་ཡང་ཤེལ་སྦུག་ཅན་ནི་འོད་རྩ་ཡིན་ལ། དབང་པོ་དྭངས་བྱེད་ནི་མིག་གི་དབང་རྟེན་ཟར་མའི་མེ་ཏོག་ལྟ་བུའི་རྩ་ཡིན་ནོ། །མིག་གི་ནང་རིག་པ་དངོས་ཕྱིར་ལྟ་བ་དང་ཕྱི་སྣང་བ་གཟུགས་རྣམས་ཀྱི་སྣང་བ་ནང་དུ་ལྟ་བའི་བར་གྱི་སྒོ་མེ་ཤེལ་དྲི་མ་མེད་པས་ཆོད་པ་ལྟ་བུ་སྟེ་ནང་གི་འོད་གདངས་ཕྱིར་གསལ་བ་ལྟར། ཕྱིའི་གཟུགས་བརྙན་ནང་དུ་ཤར་བ་གཉིས་མི་སྒྲིབ་པར་གསལ་བར་མཐོང་བའི་ཕྱིར་རོ། །རིག་པ་དངོས་ཀྱི་གདངས་འཆར་བ་རྩ་སྒོ་བཞི་སྟེ། མིག་གཉིས་འོད་སྣང་དངོས་སུ་འཆར་བ་དང་། སྙིང་ནས་དབུ་མའི་དབུས་སུ་སྙིང་པོ་འོད་གསལ་གྱི་རྩ་ལས་དུང་ཁང་གི་ཁྲོ་བོ་དང་། དེའི་གདངས་རྩ་རྣམས་གྱི་ཐིག་ལེ་དང་། དབུ་མའི་འོད་རྩ་ལས་འཁོར་ལོ་བཞིའི་དབུས་ཀྱི་འོད་གསལ་ཐིག་ལེ་ཆེན་པོ་དང་། སྤྱི་བོ་ནས་རྟོག་པ་མེད་པའི་སྐུ་ཚངས་བུག་ལ་འཆར་ཏེ་ཚད་ཕེབས་ཀྱི་ཐིག་ལེ་ལྔ་བརྩེགས་སམ་དགུ་བརྩེགས་སུ་འཆར་བའི་རྟེན་ཅན་འཕོ་བའི་རྩ་སྒོ་དམ་པ་དེ་དང་། སྙིང་ནས་གློ་བར་རིག་གདངས་སེམས་སུ་འཆར་བ་སྟེ། དེ་ལྟར་མིག་གཉིས་དབུ་མའི་འོད་རྩ་གློ་བའི་གདངས་རྩ་དང་བཅས་པ་རྣམས་ཏེ། མུ་ཏིག་ཕྲེང་བ་ལས། ལམ་ནི་རྩ་བཞི་འགྱུ་བྱེད་རླུང་། །འཆར་བྱེད་སྒོ་ནི་མིག་སོགས་སོ། །ཞེས་སོ། །ཕལ་གྱིས་མིག་རྩ་གཉིས་ལམ་དུ་ངོས་བཟུང་བ་ནི། རྒྱ་ཆུང་བས་མ་གོ་བར་ཟད་དོ། །གདངས་བཞི་འཆར་བའི་རྩ་བཞི་ངོས་བཟུང་ལ། ཉམས་ལེན་གྱི་ཚེ་མིག་ནས་རིག་པ་ཐོན་ཅིང་དེའང་མིག་གཉིས་ནས་རིག་པའི་རང་བཞིན་འོད་གདངས་འཆར་ལ། དབུ་མའི་འོད་རྩ་ལས་ངོ་བོ་སྟོང་གདངས་འཆར་ཞིང་། གློ་བའི་རྩ་ལས་ཐུགས་རྗེ་རིག་གདངས་འཆར་བ་ཡིན་ནོ། །ཡུལ་གང་ན་འཆར་ན་ཕྱིའི་དབྱིངས་ནམ་མཁའ་ལ། ནང་གི་དབྱིངས་རྣམ་པར་དག་པའི་སྒྲོན་མ་འོད་ལྔར་སྣང་བའི་ནང་དུ་འཆར་ཏེ། སྒྲོན་མ་འབར་བ་ལས། དབྱིངས་ནི་ཕྱི་དང་ནང་དུ་སྟེ། །ཕྱི་དབྱིངས་ནམ་མཁའ་སྤྲིན་བྲལ་ལ། །ནང་དབྱིངས་སྒྲོན་མ་དག་ཏུའོ། །ཞེས་པ་དང་། ཀུན་ཏུ་བཟང་པོ་ཐུགས་ཀྱི་མེ་ལོང་ལས། ཀུན་ལ་ཡོད་པའི་མེ་ལོང་འོད་པོ་ཆེ། །དཔེར་ན་མེ་ལོང་དཀྱིལ་འཁོར་དྭངས་པ་དེར། །གང་བསྟན་གཟུགས་བརྙན་དེ་བཞིན་འོང་བ་ལྟར། །དེ་བཞིན་རྣམ་དག་སྟོང་པའི་ནམ་མཁའ་ལ། །དོན་གྱི་སྙིང་པོ་མ་འདྲེས་ཚོམ་བུ་ལྔ། །མ་བསྐྱེད་རྫོགས་པའི་ཚོམ་བུ་རང་ལ་གནས། །ཞེས་པ་དང་། སེང་གེ་རྩལ་རྫོགས་ལས། འཛིན་ཆགས་མེད་པའི་རང་སྣང་ནམ་མཁའ་ལ། །ཞེ་འདོད་མེད་པའི་སྒྲོན་མ་རྣམ་གཉིས་གསལ། །སྤང་ཐོབ་མེད་པའི་ཆོས་སྐུའི་སྣང་བ་མཐོང་། །ཕྱོགས་དང་འདྲ་བའི་འོད་ཀྱི་མུ་ཁྱུད་འཛིན། །བདག་དང་བྲལ་བ་སྒྱུ་མའི་སྐུ་ལྔར་སྣང་། །ཞེས་སོ། །རིག་པའི་རྩལ་ནི། ནང་གསལ་ཐམས་ཅད་མཁྱེན་པའི་ཡེ་ཤེས་ལྔ་དང་། ཕྱི་གསལ་ཇི་ལྟ་བ་དང་ཇི་སྙེད་མཁྱེན་པའི་རྣམ་པར་ཤར་རོ། །བྱེད་ལས་ནི། འཁོར་བའི་འཁྲུལ་སྣང་འཁྲུལ་འཛིན་ཐམས་ཅད་དང་བྲལ་བར་བྱས་ཏེ། དབྱིངས་གདོད་མའི་ངང་ལ་སྦྱོར་བའོ། །འབྲས་བུ་ནི། ཁམས་ལ་སྒྲིབ་པའི་དྲི་མ་བག་ཆགས་སྣ་ཚོགས་པའི་ཀུན་གཞི་ལ་བརྟེན་པའི་ཆ་དང་བཅས་པ་དག་ནས་ཉི་མ་སྤྲིན་དང་བྲལ་བ་ལྟར་ཤེས་རབ་རིག་པའི་ཡེ་ཤེས་དྲི་མ་མེད་པས་རང་རིག་བྱང་ཆུབ་ཏུ་མཐར་ཕྱིན་པར་བྱས་ནས་སྐུ་དང་ཡེ་ཤེས་ཀྱི་དགོངས་པ་ལ་རྟག་ཏུ་བཞུགས་པའོ། །དེའང་ངོ་སྤྲོད་སྤྲས་པ་ལས། གཞི་ཉིད་འབྲས་བུ་སྨིན་བྱེད་ཤེས་རབ་སྟེ། །ཤེས་རབ་སྐུ་རུ་སྨིན་པ་ཡི། །ངོ་བོ་ཉིད་སྐུ་ཆོས་སྐུ་དེ། །ཡེ་ཤེས་ཆོས་ཀྱི་སྐུ་རུ་སྨིན། །ཞེས་སོ། །ཁམས་ཡེའི་སངས་རྒྱས་ཡིན་ཀྱང་། ལམ་དུས་རིག་པའི་ཤེས་རབ་ཀྱིས་བླང་དོར་བར་མ་བྱས་ན་དྲི་བཅས་ལས་གྲོལ་དུས་མེད་པས། གདམས་པ་ཟབ་མོ་ཉམས་སུ་ལེན་པ་གཅེས་ཏེ་གཞིའི་ཆོས་སྐུ་དེ་འབྲས་བུ་མངོན་གྱུར་ཡེ་ཤེས་ཀྱི་སྐུ་བྱང་ཆུབ་ཏུ་སྨིན་པར་བྱ་དགོས་པའི་ཕྱིར་རོ། །དེ་དག་གིས་ཡེ་ཤེས་ཀྱི་དབྱེ་བ་བཤད་ཟིན་ཏོ། །ཞེས་གསུངས་སོ། །ཐེག་མཆོག་མཛོད་ལས། ས་བཅད་བརྒྱད་རང་ཤར་ལྟར་གསུངས་པ་ནི། རྟེན་ནི་གཟུགས་ཀྱི་ཕུང་པོ་བྱང་ཁོག་སྟོད་དོ། །གནས་ནི་སྙིང་རིན་པོ་ཆེ་ཟུར་བརྒྱད་པའི་དབུས་འོད་རྩའི་དྭངས་མ་འོད་ལྔའི་དབུས་ཞི་བའི་སྐུ་ཉུང་འབྲུ་ཙམ་ལ་རིག་པ་གནས་སོ། །ལམ་ནི་རྩ་བཞི་ནས་རྒྱུའོ། །སྒོ་ནི་མིག་གཉིས་སོ། །གདངས་ནི་སྒྲོན་མ་གཉིས་ཏེ་ཐིག་སྒྲོན་དང་། །རྨ་བྱའི་མདོངས་ན་རོ་དབྱིངས་སྒྲོན་ལྟ་བུའོ། །ཡུལ་ནི་ནམ་མཁའ་སྤྲིན་དང་བྲལ་བ་ལ་ཆོས་ཉིད་སྟོང་པ་སེམས་ངོ་དང་བྲལ་བའོ། །དུས་ནི་འདི་ཉིད་དམ་བར་དོའི་སྣང་བ་ཤར་དུས་འགྲོ་ས་ནི་ལྷུན་གྲུབ་ཀྱི་འཆར་སྒོ་བརྒྱད་དེ་ངོ་ཤེས་པ་རྣམས་དབྱིངས་སུ་འགྲོ་ལ་མ་ཤེས་པ་རྣམས་འཁོར་བར་འཁྱམས་པས་ལམ་ཁ་བྲག་བཞིན་ནོ། །གྲོལ་ས་ནི་ཀ་དག་གི་སྣང་བའོ། །ཞེས་དང་། ཚིག་དོན་མཛོད་ལས། རྟེན་ནི་གཟུགས་ཀྱི་ཕུང་པོའོ། །གནས་ནི་ཙིཏྟ་རིན་པོ་ཆེ། །ཕོ་བྲང་ནི་འོད་ལྔ་ཀུན་འདུས་ཀྱི་གཞལ་ཡས་ཁང་ངོ་། །སྣང་བ་ནི་སྒྲོན་མ་གཉིས་སོ། །ཞེས་སོགས་གསུངས། སྐལ་ལྡན་འཇུག་ངོགས་ལས། འདིར་མི་འདྲ་བའི་ཁྱད་པར་དབུ་མ་ལ་བརྟེན་པའི་དག་པ་ཡེ་ཤེས་ཀྱི་འོད་རྩ་ཀ་ཏི་གསེར་གྱི་རྩ་ཆེན་དུ་གྲགས་པ་གང་ཞིག་ཐོག་རེག་གི་རྣམ་པར་མེད་པའི་ཕྱིར་སྙིང་ནས་ལམ་ཕྱུང་སྟེ་ཡར་སྣེ་གསུམ་དུ་གྱུར་བའི་དབུས་མ་ཤེལ་སྦུག་ཅན་ཞེས་བྱ་བ་ཚངས་བུག་ཏུ་དང་། གཡས་གཡོན་དར་དཀར་སྣ ལ་མ་དང་ཕྲ་ལ་འཁྲིལ་བ་གཉིས་ལྟག་པ་ནས་གུག་སྟེ་མིག་གཉིས་ལ་ཟུག་ཅིང་དེ་དག་ལ་བརྟེན་པའི་ཤེས་རབ་རང་བྱུང་གི་སྒྲོན་མ་དང་ཐིག་ལེ་སྟོང་པའི་སྒྲོན་མ་དང་། རྣམ་དག་དབྱིངས་ཀྱི་སྒྲོན་མ་སོགས་སྒྲོན་མ་བཞིའམ་དྲུག་ཏུ་བཞག་པ་རྣམས་ལམ་དུ་བྱས་ནས་གོམ་པ་ཉིད་ཡིན་ནོ། །ཞེས་གསུངས། ༈ སངས་རྒྱས་ཀྱི་སྙིང་པོའམ་རིག་པ་ཡེ་ཤེས་དེ་ཉིད་འཁྲུལ་སྣང་གདོས་བཅས་ཀྱི་ལུས་དང་འབྲེལ་བའམ་གནས་པའི་བྱིན་རླབས་ཀྱིས་ཡེ་ཤེས་ཀྱི་སྣང་བ་འཆར་བའི་ཚུལ་ཡང་། བཞུགས་གནས་དངོས་ནི་སྙིང་རིན་པོ་ཆེ་དཔལ་གྱི་བེའུའི་དབུས་སུ་གནས་ལ། དེའི་གདངས་ནི་དུང་ཁང་བྷན་དྷ་འབར་བའི་གཞལ་ཡས་དང་། ལྟ་བྱེད་མིག་གི་གཞལ་ཡས་དང་། འགྱུ་བྱེད་རྩའི་གཞལ་ཡས་ན་གནས་ཏེ། ཐལ་འགྱུར་ལས། ཙིཏྟ་རིན་ཆེན་གཞལ་ཡས་སུ། །རིན་ཆེན་འདུས་པ་ཟུར་བརྒྱད་སྒོ། །ཡེ་ཤེས་ལྔ་དང་སྐུ་ལྔ་སྟེ། །རླུང་དང་ཤེས་པའི་རྩལ་ཡང་ལྔ། ཐམས་ཅད་ལྔ་ལྔའི་རང་བཞིན་ནོ། །ཞེས་གསུངས་སོ། །དེའང་ངོ་བོ་སྐུར་གནས་པ་བུམ་པའི་སྐུ་ལྟ་བུ། རང་བཞིན་འོད་དུ་གནས་པ་བུམ་ནང་གི་མར་མེ་ལྟ་བུ། ཐུགས་རྗེའི་འོད་ཟེར་དུ་གནས་པ་ཉི་མའི་འོད་ཟེར་ལྟ་བུའོ། །སྙིང་གའི་འོད་གསལ་ལས་སྒོ་བཞིར་གྱེས་པས་རྩ་བཞི་སྟེ། ཀ་ཏི་གསེར་གྱི་རྩ་ཆེན་ནས་འོད་གསལ་གྱི་སྣང་བ་འབྱུང་བའི་རྟེན་བྱེད། དར་དཀར་སྣལ་མ་ནས་ཕྱི་ཡུལ་ལ་འཇུག་པའི་རྟེན་བྱེད། ཕྲ་ལ་འཁྲིལ་ནས་རང་འཆར་བའི་རྟེན་བྱེད། ཤེལ་སྦུག་ཅན་ནས་རང་སྣང་བའི་རྟེན་བྱེད་དོ། །སྟོང་པ་རང་གྲོལ་ནི་ཚངས་བུག་ལ་ཟུག་པ་སྟེ་ལུ་གུ་རྒྱུད་སྐུའི་རྟེན་བྱེད་པ་དང་བསྡོམས་ན་ནང་རྩ་ལྔ་སྟེ་ཡེ་ཤེས་ལྔའི་འོད་ཡིན་ལ། རང་བཞིན་དུ་གཞིར་བྱེད་པས་སྒྲོན་མ་བཞིའི་འཕེལ་སྟོན། འོད་ཀྱི་རྩ་བཞི་ནས་འོད་གསལ་དག་པའི་ཐིག་ལེ་རྒྱུ་བས་དེ་ལ་བརྟེན་པའི་འོད་གསལ་བསྒོམ་པ་སྟེ། དེའང་ཀ་ཏི་གསེར་གྱི་རྩ་ཆེན་ན་གཞིའི་ཐིག་ལེ་བཟང་པོ་ངོ་བོ་རང་བཞིན་ཐུགས་རྗེ་གསུམ་གྱི་བདག་ཉིད་སྙིང་ག་ལ་བརྟེན་ནས་གནས་སོ། །དར་དཀར་སྣལ་མ་ན་ལམ་གྱི་ཐིག་ལེ་བཟང་པོ་སྒྲོན་མ་བཞི་དང་བཅས་པ་ཆུའི་སྒྲོན་མ་སྟེ་གཡས་ནའོ། །ཕྲ་ལ་འཁྲིལ་ན་བཟང་པོའི་རྩེ་མོའི་ཐིག་ལེ་ཉམས་གོང་འཕེལ་གྱི་སྣང་བ་སྣ་ཚོགས་པ་གཡོན་ནའོ། །ཤེལ་སྦུག་ཅན་ན་ཚད་ཕེབས་ཀྱི་སྣང་བའི་རྟེན་ནང་གསལ་ཡེ་ཤེས་ཀྱི་འཆར་གཞིར་གནས་སོ། །སྟོང་པ་རང་གྲོལ་ན་རྡོ་རྗེ་ལུ་གུ་རྒྱུད་ཀྱི་སྐུ་གནས་པའོ། །ཡེ་ཤེས་ཀྱི་སྣང་བ་ཕྱིར་གསལ་དུ་འཆར་བའི་སྒོ་ནི་མིག་གཉིས་ཡིན་ལ། དེའང་མིག་གཡས་ནས་རྒྱང་ཞགས་ཆུའི་སྒྲོན་མ་དང་ཤེས་རབ་རང་བྱུང་གི་སྒྲོན་མ་གཉིས་ཏེ་ཇི་སྙེད་མཁྱེན་པའི་ཡེ་ཤེས་ཐབས་སྣང་བའི་རང་བཞིན་དུ་འཆར་ལ། མིག་གཡོན་ནས་ཐིག་ལེ་སྟོང་པའི་སྒྲོན་མ་དང་དབྱིངས་རྣམ་དག་གི་སྒྲོན་མ་གཉིས་ཇི་ལྟ་བ་མཁྱེན་པའི་ཡེ་ཤེས་ཤེས་རབ་སྟོང་པའི་རང་བཞིན་དུ་འཆར་ཞིང་། དེའི་དབུས་ཚངས་པའི་བུ་ག་ནས་རིག་པ་རྟོག་མེད་ཀྱི་ལུ་གུ་རྒྱུད་ཐིག་ལེ་བརྩེགས་མར་སྣང་བའོ། ། ༈ ཤན་འབྱེད་ལས། ཡང་དུས་ཕྱིས་གསར་ཕྱོགས་ཀྱི་ཝལ་མང་དགེ་བཤེས་ན་རེ། རྙིང་མ་པ་རྣམས་ཀྱིས་སྙིང་གི་ནང་ན་སངས་རྒྱས། གློ་བའི་ནང་ན་སེམས་ཅན། དེ་གཉིས་ལམ་བརྒྱུད་ཕར་འགྲོ་ཚུར་འགྲོ་བྱེད་ཅེས། མི་རིགས་པའི་མཚར་གཏམ་དུ་བསྒྲགས་པ་རང་ཉིད་མཁས་པར་རློམ་ཡང་བླུན་པོའི་རང་རྟགས་བསྟན་པ་མ་ཤེས་པར་ཟད་དེ། འདི་དང་པོ་འབྲི་གུང་དཔལ་འཛིན་གྱི་ལོག་རྟོག་སྟེ། བི་མ་ལ་ཡི་སྙིང་ཐིག་ལས། སེམས་ནི་གློ་བའི་ནང་ན་གནས། །རིག་པ་སྙིང་དང་གློ་བའི་ནང་། །ཡུངས་འབྲུ་ཙམ་གྱི་ལྷ་སྐུར་ལོ། །འདི་འདྲ་མུ་སྟེགས་ཆོས་ལུགས་ཡིན། །ཞེས་ཟེར། དེ་ལ་ཝལ་མང་ཁྱོད་སེམས་དང་སེམས་ཅན་གྱི་སྒྲ་དོན་ཙམ་གྱི་གོ་བའང་མ་ཆགས་པར་འདུག་ན། གཞན་དགག་པའི་ཁུར་ལེན་པ་བཞད་གད་ཀྱི་གནས་སོ། །ཇི་ལྟར་ཞེ་ན་གློ་བར་ལས་རླུང་ལ་ཞོན་པའི་སེམས་དང་། སྙིང་ན་ཡེ་ཤེས་ཀྱི་རླུང་ལ་ཞོན་པའི་ཡེ་ཤེས་གནས་པར་བཤད་ན། གློ་བར་སེམས་ཅན་རང་རྒྱུད་པ་གཅིག་དང་། སྙིང་ན་སངས་རྒྱས་རང་རྒྱུད་པའི་གང་ཟག་གཉིས་སུ་གོ་བ་བཞད་གད་དེ། །སེམས་ཅན་ཟེར་དུས་གང་ལ་སེམས་ཡོད་པའི་གང་ཟག་སྟོན་ཏེ་མིག་ལྡན་ཞེས་པ་བཞིན་ནོ། །སེམས་གློ་བར་གནས་པ་ལ་མི་རིགས་པ་ཅི་ཡོད་དེ། གཞན་དག་ཀྱང་མིག་ཤེས་ལ་གནས་ནས་གཟུགས་མཐོང་བ་སོགས་ཡན་ལག་གི་རླུང་ལྔ་ལ་ཞོན་པའི་རྣམ་ཤེས་ལྔ་དབང་པོ་ལྔ་ལ་རྒྱུ་ཞེས་བཤད་པ་བཞིན་ནོ། །ཁྱོད་ལྟར་ན་མིག་གི་ནང་ལ་གཟུགས་མཐོང་བའི་སེམས་ཅན་གཅིག ། རྣ་བར་སྒྲ་ཐོས་པའི་སེམས་ཅན་གཅིག་སོགས། སེམས་ཅན་རིགས་མི་གཅིག་པ་དྲུག་སྐྱེས་བུ་གཅིག་གི་ལུས་ལ་གནས་སོ་སོར་ཡོད་པར་འགྱུར་རོ། །ཡང་དེར་མ་ཟད་རྣམ་རྟོག་རེ་རེའང་སེམས་ཡིན་པས་དེ་དག་རིགས་མི་གཅིག་པའི་སེམས་ཅན་ཚད་མེད་པ་ལུས་གཅིག་ལ་ཡོད་པ་དང་། རླུང་ཉི་ཁྲི་ཆིག་སྟོང་དྲུག་བརྒྱ་ལ་ཞོན་པའི་རྣམ་ཤེས་དེ་སྙེད་ཀྱི་སེམས་ཅན་ལུས་ཀྱི་བ་སྤུའི་མཐར་ཐུག་པར་གནས་པར་ཁས་ལེན་དགོས་སོ། །དེ་བཞིན་དུ་ལུས་ལ་ཡེ་ཤེས་གནས་པ་ནི། དཔལ་དུས་ཀྱི་འཁོར་ལོའི་རྒྱུད་ལས། ལུས་ལས་མ་གཏོགས་གང་ཞིག་ཁྱབ་བྱེད་ཐར་བ་སྟེར་བའི་སངས་རྒྱས་འགའ་ཡང་ཡོད་མ་ཡིན། །སེམས་ཅན་རྣམས་ནི་སངས་རྒྱས་ཡིན་ཏེ་སངས་རྒྱས་ཆེན་པོ་གཞན་འདིར་འཇིག་རྟེན་ཁམས་ན་ཡོད་མ་ཡིན། །ཞེས་དང་། ཀྱཻ་རྡོ་རྗེའི་རྒྱུད་ལས། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤང་། །དངོས་པོ་ཀུན་ལ་ཁྱབ་པ་པོ། །ལུས་ལ་གནས་ཀྱང་ལུས་སྐྱེས་མིན། །ཞེས་དང་། སམྦུ་ཊི་ལས། རང་གི་ལུས་ལ་སངས་རྒྱས་བཞུགས། །གཞན་དུ་གང་ནའང་སངས་རྒྱས་མེད། །མི་ཤེས་མུན་པས་བསྒྲིབས་པ་རྣམས། །ལུས་ལས་གཞན་དུ་སངས་རྒྱས་འདོད། །རྟོག་པ་ཐམས་ཅད་རྣམ་སྤངས་པའི། །ཡེ་ཤེས་ཆེན་པོ་ལུས་ལ་གནས། །དངོས་པོ་ཀུན་ལ་ཁྱབ་པ་སྟེ། །ལུས་ལ་གནས་ཀྱང་ལུས་མི་སྐྱེ། ཞེས་དང་། གཉིས་མེད་རྣམ་རྒྱལ་ལས། སེམས་ཅན་ཀུན་གྱི་སྙིང་ལ་ནི། །ཐུགས་ཀྱི་གསང་བ་སྙིང་པོ་བཞུགས། །དེ་ཉིད་སྙིང་པོ་གསུམ་ལྡན་པ། །བདེ་གཤེགས་སྙིང་པོ་འཇུག་པ་ཉིད། །ཅེས་དང་། བྲམ་ཟེ་ཆེན་པོས་ཀྱང་། མཁས་པ་རྣམས་ཀྱིས་བསྟན་བཅོས་འཆད་པའི་ཚེ། །ལུས་ལ་ཡེ་ཤེས་ཡོད་པ་མ་རྟོགས་སོ། །ཞེས་དང་། རྡོ་རྗེ་དྲིལ་བུ་པས། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་ལ་འགྱུར་བ་མེད། །དེ་སྒོམ་བྱེད་པའི་སྐྱེ་བོ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་གསུངས་པ་སོགས་ལུང་མཐའ་ཡས་མོད། དེ་ཙམ་གྱིས་གོ་ནུས་ཤིང་དེའི་རང་བཞིན་རྒྱས་པར་བཤད་ན། རྒྱུད་སྡེ་འགའ་ལ་སྙིང་གར་འོད་ལྔའི་ཐིག་ལེར་བཤད། རྫོགས་ཆེན་ནས་ཁྲོ་བོའི་སྐུ་ཡོངས་རྫོགས་སུ་གསུངས། ཀླད་པ་སོགས་རྩ་འཁོར་དུའང་དེའི་ཆས་ཁྱབ་པར་མ་ཟད། ཆོས་ཉིད་ཡིན་པས་ཆོས་ཅན་ཀུན་ལའང་ཁྱབ་སྟེ། བརྟན་གཡོ་ཀུན་ཁྱབ་ཀྱི་ཡེ་ཤེས་ཡིན་པའི་ཕྱིར་འོད་གསལ་བའི་ཡེ་ཤེས་རྣམ་པ་ཐམས་ཅད་པ་ཡིན་པ་ལ། འོད་ལྔའི་ཐིག་ལེ་ཡིན་པས་རུང་རྒྱུ་དང་། སྐུ་ཡོད་པས་མི་རུང་རྒྱུ་ཅི་ཞིག་ཡོད། གཞན་ཡང་སྨིན་མཚམས་སོགས་ན་གནས་ཉེར་བཞིའི་དཔའ་བོ་མཁའ་འགྲོ་ཡབ་ཡུམ་བཞུགས་པར་གསུངས་པ་དང་། གཟུགས་རྣམ་སྣང་སོགས་རིགས་ལྔ་རིགས་བརྒྱ་རིགས་གསུམ་གྱི་ལྷ་གྲངས་མེད་ཀྱང་སྐྱེས་བུ་གཅིག་གི་ལུས་ལ་ཡོད་པས། ཁྱེད་ལྟར་ན་གློ་སྙིང་གི་ནང་ན་སངས་རྒྱས་སེམས་ཅན་གཉིས་འདུག་ནས་ལམ་གཅིག་ལ་ཕར་འགྲོ་ཚུར་འགྲོ་བྱེད་པ་ལ་བཞད་གད་མི་འདུག་གི། སྐྱེས་བུ་གཅིག་གི་ལུས་ལ་སངས་རྒྱས་དང་སེམས་ཅན་གྱི་གྲོང་ཁྱེར་ཚད་མེད་པ་ཕར་རྒྱུ་ཚུར་རྒྱུ་ཡོད་འདུག་པ་ཡ་མཚན་ཆེའོ། །དེས་ན་སེམས་ལུས་ལ་གནས་ཤིང་དེ་ཡང་རྩ་རླུང་ཐིག་ལེ་ལ་བརྟེན་ནས་སྣ་ཚོགས་སུ་འཕོ་བ་རྒྱུད་སྡེ་སྤྱི་ནས་གསུངས། རྒྱུད་སྡེ་སོ་སོའི་ཟབ་གནད་འཁོར་ལོ་ལྔ་ནས་ཉེར་བཞི་སོགས་ཁྱད་པར་མི་འདྲ་བ་དུ་མའང་ཡོད། ཁྱད་པར་རྒྱུད་སྡེ་སྤྱི་ལས་དབུ་མར་ཡེ་ཤེས་ཀྱི་རླུང་རྒྱུ་ཞིང་དེ་ལ་བརྟེན་ནས་ཡེ་ཤེས་འཆར་བ་དང་། རོ་རྐྱང་དུ་ལས་རླུང་རྒྱུ་ཞིང་དེས་མ་དག་འཁོར་བའི་རྣམ་ཤེས་བསྐྱེད་པར་གསུངས་པ་ཐམས་ཅད་འདོད་པས། དེ་ལྟར་ན་དབུ་མའི་ནང་ན་སངས་རྒྱས། རོ་རྐྱང་ན་སེམས་ཅན། དེ་གསུམ་རྩ་བ་གཅིག་འདུས་ཀྱི་སུམ་མདོར་ལམ་ལ་འགྲོ་ཞེས་ཁྱོད་ཀྱི་ལུགས་ལ་དེ་ཡང་ཁས་ལོངས་ཤིག །དེས་ན་གློ་སྙིང་གཉིས་ན་ལས་རླུང་དང་ཡེ་རླུང་ལ་བརྟེན་པའི་རྣམ་ཤེས་དང་། ཡེ་ཤེས་གཙོ་བོར་གནས་པར་གསུངས་པ་ནི་རྫོགས་ཆེན་གྱི་ཁྱད་ཆོས་ཏེ། དེ་བཞིན་ཏུ་ཡེ་ཤེས་ཀྱི་འོད་ལྔ་སོགས་རྒྱུད་གཞན་ན་སྦས་པ་འདིར་གསལ་བའི་གནད་ག ཏེམས་པས་ཡེ་ཤེས་འཆར་བའི་གནད་ཁྱད་པར་ཅན་ཡོད་ལ། ལས་རླུང་གི་རྩ་བ་རོ་རྐྱང་ལ་གནས་ཀྱང་། གཏམ་འབྱིན་སོགས་ཀྱི་རླུང་ནི་གློ་བ་ལ་གཙོ་བོར་བརྟེན་པ་ཡིན་ཏེ་གློ་བ་དབུགས་མཚོ་ཞེས་གསུངས་པ་བཞིན་ནོ། །དེས་ན་སེམས་ཀྱི་རྟོག་པ་རྣམས་ལས་རླུང་ཕྲ་རགས་ཀྱིས་བསྐྱེད་པས། བཞོན་པའི་རླུང་གང་དུ་གནས་པ་ལ་བརྟེན་ནས་དེ་ཡི་རྣམ་ཤེས་དང་ཡེ་ཤེས་ཀྱང་གནས་པའི་གནད་འདིས་རླུང་ལ་གནད་དུ་བསྣུན་ན་འཁྲུལ་བ་འགགས་ཤིང་ཡེ་ཤེས་འཆར་བ་རྣལ་འབྱོར་བླ་མེད་ཀྱི་མན་ངག་ཡིན་ན་འདི་ལ་འཕྱར་ཁ་གཏོང་རྒྱུ་ཅི་འདུག་གམ། ཁྱེད་ནས་རླུང་དབུ་མར་ཞུགས་ནས་ཐིམ་པའི་ལག་རྗེས་ལ་འོད་གསལ་དང་སྒྱུ་ལུས་འབྱུང་བར་འདོད་པ་མིན་ནམ། དེས་ན་རྒྱུད་སྡེའི་དགོངས་ཟབ་འདི་འདྲ་འཆད་པ་ལྟ་ཅི་ཁྱོད་ལ་གོ་ཕྱོགས་ཙམ་ཡང་མི་འདུག་པས་རྟོག་གེའི་ནང་ནས་ཐ་ཆད་ཡིན་བཞིན་དུ། ད་དུང་ངོ་ཚ་བོར་ཏེ་གཞོན་ནུ་བུམ་སྐུ་གཅོག་པའི་ཐོ་བ་ཟེར་བའི་གཞུང་རྩོམ་པ་ནི་རང་ཉིད་དམྱལ་བར་འགྲོ་འདོད་ཀྱིས་བདུད་ཀྱིས་སྤོབས་པ་བྱིན་པ་གོར་མ་ཆགས་ཏེ། ད་དུང་དེའི་ཞོར་ལ་མི་ཤིགས་ཏི་ལ་ཀ་ཤི་བའི་ལྟོ་རྒྱུ་ཞིག་ཀྱང་ཞར་ལ་ཁྱོད་ཀྱི་གློ་རྒྱན་དུ་རང་བྱུང་དུ་སྐྱེས་ནས་ན་རག་གི་གྲོང་དུ་ཆབ་ཆོབ་སིལ་སིལ་འབྱོན་གྲབ་འདུག་པས་མཁས་པ་རྣམས་ཀྱིས་སྙིང་རྗེ་མཛོད་ཅིག །སྙིང་ལ་བཞུགས་པའི་ཡེ་ཤེས་འདི་ཡང་གདོད་མ་ནས་ལྷན་སྐྱེས་གཞི་ཡི་ཡེ་ཤེས་ཡིན་གྱི། གང་ཟག་རང་ངོའི་སྒྲིབ་པ་སྤངས་ཟིན་དག་པ་གཉིས་ལྡན་གྱི་སངས་རྒྱས་མཚན་ཉིད་པ་མིན་ཏེ། དྲི་བཅས་དེ་བཞིན་ཉིད་དུ་འདོད་པས་ན། སེམས་དང་སེམས་ཀྱི་ཆོས་ཉིད་ཡེ་ཤེས་གཉིས་འབྲེལ་མེད་རྒྱང་ཆད་ཀྱི་གང་ཟག་གཉིས་གློ་སྙིང་ནང་ན་ཡོད་པར་གོ་བའི་ཚིག་འདིས་རྒྱུད་སྡེའི་དགོངས་པ་མི་ཤེས་པའི་མཚང་ཁྱོད་རང་ལ་འཁོར་གྱི་རྫོགས་པ་ཆེན་པོའི་རྒྱུད་ཀྱི་དགོངས་པ་ལ་སྐྱོན་ག་ལ་ཡོད། ཅེས་གསུངས། ༈ སེམས་དང་རིག་པའི་ཁྱད་པར་གསུངས་ལན། སེམས་རིག་གཉིས་ཀྱིས་ཟླས་ཕྱེ་བའི་སེམས་ཞེས་བྱ་བ་ནི། ལས་རླུང་རྟ་རྒོད་ལོང་བ་ལྟ་བུ་དང་། རིག་པ་མི་འཕྱེ་བོ་ལྟ་བུ་དེ་གཉིས་ཕྲད་པར་གྱུར་བ་ལ་སེམས་ཞེས་བྱ་ཞིང་། སེམས་དེ་ལ་དབྱེ་ན་རྣམ་པར་ཤེས་པའི་ཚོགས་བརྒྱད་ཡོད་ལ། དེའང་ད་ལྟ་ནས་ཚོགས་བརྒྱད་ཀྱི་ཡུལ་ཀུན་མ་འགགས་བཞིན་ཏུ་གདོད་མའི་འོད་གསལ་གྱི་རིག་པ་ངོས་ཟིན་རྒྱུ་ཡོད་པ་འདི་འོད་གསལ་རྫོགས་པ་ཆེན་པོའི་ལམ་གྱི་ཁྱད་ཆོས་ཡིན། ལམ་གཞན་བླ་མེད་ཡིན་ཡང་དེ་ཉིད་ངོས་ཟིན་ཕྱིར་རྩ་ཐིག་རླུང་གསུམ་ལ་གནད་དུ་བསྣུན་ཏེ། སྣང་གསུམ་མཐའི་འོད་གསལ་ངོས་ཟིན་དགོས་པ་དེ་ནི་རྩོལ་བའི་ལམ་ཡིན་གསུངས། དེ་ཕྱིར་སེམས་དང་རིག་པའི་ལ་ཤན་ལེགས་པར་ཕྱེས་ཏེ་རིག་པ་ཉིད་རྣམ་པར་ཤེས་པའི་ཚོགས་བརྒྱད་དང་བྲལ་ཏེ་རྗེན་པར་ཤར་བའི་ཚེ་དཔེ་ཡི་འོད་གསལ་ཤར་བ་ཡིན་ཏེ། སྣང་གསུམ་མཐའི་འོད་གསལ་ཉམས་སུ་མྱོང་བ་དང་རྫོགས་ཆེན་གྱི་རིག་ངོ་རྗེན་པར་རྟོགས་པ་གཉིས། འཇིག་རྟེན་ལས་འདས་པའི་ཤེས་རབ་ཀྱི་དབང་པོའམ་སོ་སོ་རང་རིག་པས་མངོན་སུམ་དུ་མཐོང་བ་ཡིན་གྱི་རྗེས་དཔག་ལ་ལྟོས་པ་མ་ཡིན་ནོ། །འོ་ན་ཆོས་ཉིད་ཀྱི་བདེན་པ་གཟིགས་པའི་འཕགས་ལམ་ས་དང་པོ་ཡིན་ནམ་ཞེ་ན། མ་ཡིན་ཏེ་ད་ལྟ་སྔགས་མཚན་བཅས་ཀྱི་ལམ་གྱི་འོད་གསལ་ཤར་བ་དང་། མཚན་མེད་འོད་གསལ་རྫོགས་ཆེན་གྱི་རིག་ངོ་འཕྲོད་པ་དེ་གཉིས་དཔེ་ཡི་འོད་གསལ་དངོས་ཤར་བ་ཆུ་ནང་གི་ཟླ་གཟུགས་ལྟ་བུ་ཡིན་ལ། དེ་ནི་ཟླ་བའི་གཟུགས་བརྙན་ཆུ་ལ་ཤར་བ་ལ་ཟླ་བ་དངོས་ལ་ཡོད་པའི་རྣམ་པ་རྣམས་སྣང་བ་དང་འདྲ་བ་ཡིན་ནོ། །གཞན་སྐྱེས་བུ་དམ་པ་མང་པོས་འདི་ནི་རྗེས་དཔག་གི་རྟོག་པ་མ་ཡིན་ཏེ། རང་གིས་མངོན་སུམ་དུ་རྟོགས་པ་ཡིན་པས་སྔགས་ཀྱི་མཐོང་ལམ་ཡིན་ཞེས་གསུངས་ཏེ། ཡོན་ཏན་བརྒྱ་ཕྲག་བཅུ་གཉིས་སོགས་མེད་པ་ནི་ལུས་རྒྱས་སྒྲིབ་པ་སོགས་སུ་འཆད་པ་དང་། རང་ལུགས་ཀུན་མཁྱེན་ཀློང་ཆེན་རབ་འབྱམས་དང་། འཇམ་མགོན་མི་ཕམ་རིན་པོ་ཆེ་རྣམ་གཉིས་ཀྱིས་སྔགས་ཀྱི་མཐོང་ལམ་དངོས་མིན་ཡང་ཆོས་ཉིད་དེ་བཞིན་ཉིད་དངོས་སུ་རྟོགས་པ་ཡིན། མཐོང་ལམ་ལ་ཡོན་ཏན་བརྒྱ་ཕྲག་བཅུ་གཉིས་སོགས་ཡོད་དགོས་པས། འདི་རང་རིག་མངོན་སུམ་ཡིན་ཡང་དཔེ་ཡི་ཡེ་ཤེས་སུ་བཞེད། དོན་གྱི་ཡེ་ཤེས་ཟླ་བ་དངོས་མཐོང་བ་ལྟ་བུ་མཐོང་ལམ་དུ་བཞེད་དོ། །ཡོན་ཏན་རིན་པོ་ཆེའི་མཛོད་ལས། གང་དག་སེམས་ལས་འདས་པའི་རིག་པ་ནི། །རང་བཞིན་རྫོགས་པ་ཆེན་པོའི་ཁྱད་ཆོས་ཡིན། །ཞེས་གསུངས་པ་འདི་གཉིས་དཔེ་ཡི་སྒོ་ནས་ཕྱེ་ན། སེམས་ནི་ཁ་ཕྱིར་བལྟས་སུ་ཡུལ་སྣ་ཚོགས་པའི་རྗེས་སུ་འབྲངས་ནས་དེ་དང་དེར་འཛིན་ཅིང་དཔྱོད་པས་ཚེས་བཅོ་ལྔའི་ཟླ་བ་རང་འོད་ཕྱིར་འཕྲོས་ཏེ་ཡུལ་ཐམས་ཅད་ཁྱབ་ཅིང་འདྲེས་པ་ལྟ་བུ་དང་། རིག་པ་ནི་གནམ་སྟོང་གི་ཟླ་བ་རང་འོད་ཕྱིར་མི་འཕྲོ་བར་གཏིང་ན་གསལ་བ་དང་འདྲ་བར་རང་གནས་ཀྱི་རིག་པ་དྭངས་གསལ་འགགས་པ་མེད་པ་མེ་ལོང་ལ་གཟུགས་བརྙན་ཚུར་ཤར་བ་ལྟར། སྣང་ཡུལ་ཐམས་ཅད་མ་འགགས་པར་བཀྲ་ལམ་མེ་གསལ་ཡང་ཕར་ཡུལ་ཐོག་ཏུ་མི་འཆོར་ཞིང་། རིག་པ་གསལ་ངར་དང་ལྡན་པའི་རང་ཚུགས་མ་ཤོར་བས་བྱིང་རྨུགས་ཀྱང་མེད་ལ། རྩལ་ལས་ཤར་བའི་རྟོག་པ་ཐམས་ཅད་བག་ཆགས་གསོག་ལོང་མེད་པར་རང་གྲོལ་དུ་སོང་ནས་རྒོད་པ་དང་བྲལ་བ་ཡིན་ནོ། །དེ་ལྟར་དཔེ་དོན་གྱི་སྒོ་ནས་ཤན་འབྱེད་ཚུལ་མང་ངོ་། །མདོར་ན་རྣམ་ཤེས་ཚོགས་བརྒྱད་ཀྱི་ཆོས་ཉིད་ནི་ཡེ་ཤེས་ཡིན་ཏེ། ཚོགས་བརྒྱད་ནི་ཆོས་ཅན་དང་། དེའི་རང་བཞིན་ཆོས་ཉིད་ཀྱི་ཡེ་ཤེས་གཉིས་ནི། གཅིག་ཐ་དད་གང་དུའང་ཁས་བླང་བར་མི་བྱ་སྟེ། དགོངས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་དུ་ཡང་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་པ་ལྟར། དེའི་ཕྱིར་དེ་གཉིས་ཐ་སྙད་དུ་གཅིག་མ་ཡིན་ཏེ་སེམས་རྟོགས་པ་ཙམ་གྱིས་སེམས་ཀྱི་ཆོས་ཉིད་ཡེ་ཤེས་མི་རྟོགས་པ་དང་། ཆོས་ཅན་དང་ཆོས་ཉིད་ཡིན་པ་སོགས་ཀྱི་ཕྱིར་རོ། །དོན་དམ་པར་ཐ་དད་མིན་ཏེ། སེམས་ཀྱི་རང་བཞིན་ཡེ་ཤེས་ཡིན་པས་ཡེ་ཤེས་རྟོགས་དུས་སེམས་ཀྱང་དེ་ལས་ཐ་དད་དུ་མ་དམིགས་པའི་ཕྱིར་དང་། སྙིང་ཁ་ཆོས་ཀྱི་འཁོར་ལོ་ནས་འོད་གསལ་རིག་པའི་ཡེ་ཤེས་དེ་ཉིད་སད་པའི་ཚེ། སེམས་ཞེས་བྱ་བ་རྡུལ་ཕྲ་བ་ཙམ་ཡང་མེད་དོ། །གང་ཤར་ཐམས་ཅད་རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོར་ཤར་ནས་རིན་ཆེན་གསེར་གླིང་དུ་ཕྱིན་དུས་ས་རྡོ་ཕལ་པ་བཙལ་ཀྱང་མི་རྙེད་པ་ལྟ་བུ་ཡིན་པས་འདི་ནི་ཤིན་ཏུ་གལ་ཆེ་བས་དགོངས་ཆུབ་ཞུ། ༈ ཐེག་མཆོག་མཛོད་ལས་ལུས་ཟང་ཐལ་ལ། རྣམ་ཤེས་ཀུན་གཞིའི་ཆ་རྟོག་མེད་ཡུལ་རིག་མེ་སྟག་འཕྲོ་བ་བཞིན་གསལ་དྭངས་པ། ཕྱིར་ཞིང་སྣང་དང་ནང་དུ་རང་སྣང་གི་སྣང་ཆ་གཉིས་མཐོང་བས་ལུས་སེམས་འབྲེལ་ཆོད། ཅེས་དང་། འདིའི་དུས་སུ་མཐོང་བྱེད་ཀྱང་ཀུན་གཞིའི་རྣམ་པར་ཤེས་པའི་ཆ་སྐར་མདའ་འམ་མེ་སྟག་འཕྲོ་བ་ལྟ་བུ་དང་། རིག་པའི་ཐུགས་རྗེ་ཤེས་རབ་ཀྱི་ཆ་གཉིས་ཡོད་པས། མཐོང་བྱ་ཕྱི་ནང་གཉིས་མཐོང་བའི་ཤེས་པའི་ཆར་བྱུང་བའོ། །ཞེས་སོ། །ཚིག་དོན་མཛོད་ལས། དེ་ཡང་རིག་པ་ལ་ཕྲ་བའི་རླུང་མེ་སྟག་སོ་མ་འཕྲོ་བ་དེས་རྟ་བྱས་ནས་འཁོར་བའི་སྣང་ཆ་མཐོང་བ་མ་འགགས་པའི་རྟེན་བྱེད་ལ། རིག་པ་དངོས་ལ་ཡེ་ཤེས་ཀྱི་རང་གདངས་ཡོད་པའི་ཆས་མྱ་ངན་ལས་འདས་པའི་མཐོང་ཆ་མ་འགགས་པས་སྣང་བ་གཉིས་འཛིན་པ་སྟེ། རྒྱང་ཞགས་ཀྱིས་གཉིས་ཀྱི་ཆ་འཛིན་དང་གཅིག་པར་སྣང་ངོ། །དོན་ལ་ལྷུན་གྲུབ་ཀྱི་སྒོ་ཡོད་པའི་ཆ་ལས་ཤར་བ་ཡིན་ནོ། །ཞེས་སོ། ༈ །སངས་རྒྱས་ཀྱི་སྙིང་པོའམ་རིག་པ་ཡེ་ཤེས་དེ་ཉིད་འཁྲུལ་སྣང་གདོས་བཅས་ཀྱི་ལུས་དང་འབྲེལ་བར་གནས་པས་བྱིན་རླབས་ཡེ་ཤེས་ཀྱི་སྣང་བ་འཆར་བའི་ཚུལ་ཡང་བཞུགས་གནས་དངོས་ནི་སྙིང་རིན་པོ་ཆེ་དཔལ་གྱི་བེའུའི་དབུས་སུ་གནས་ལ། དེའི་གདངས་ནི་དུང་ཁང་བྷནྫ་འབར་བའི་གཞལ་ཡས་དང་། ལྟ་བྱེད་མིག་གི་གཞལ་ཡས་དང་། འགྱུ་བྱེད་རྩའི་གཞལ་ཡས་ན་གནས་ཏེ། ཐལ་འགྱུར་ལས། ཙིཏྟ་རིན་ཆེན་གཞལ་ཡས་སུ། རིན་ཆེན་འདུས་པ་ཟུར་བརྒྱད་སྒོ། །ཡེ་ཤེས་ལྔ་དང་སྐུ་ལྔ་སྟེ། རླུང་དང་ཤེས་པའི་རྩལ་ཡང་ལྔ་། ཐམས་ཅད་ལྔ་ལྔའི་རང་བཞིན་ནོ། །ཞེས་གསུངས་སོ། །དེའང་ངོ་བོ་སྐུར་གནས་པ་བུམ་པའི་སྐུ་ལྟ་བུ། རང་བཞིན་འོད་དུ་གནས་པ་བུམ་ནང་གི་མར་མེ་ལྟ་བུ། ཐུགས་རྗེས་འོད་ཟེར་དུ་གནས་པ་ཉི་མའི་འོད་ཟེར་ལྟ་བུའོ། །སྙིང་གའི་འོད་གསལ་ལས་སྒོ་བཞིར་གྱེས་པའི་རྩ་བཞི་སྟེ། ཀ་ཏི་གསེར་གྱི་རྩ་ཆེན་ནས་འོད་གསལ་གྱི་སྣང་བ་འབྱུང་བའི་རྟེན་བྱེད། དར་དཀར་སྣལ་མ་ནས་ཕྱི་ཡུལ་ལ་འཇུག་པའི་རྟེན་བྱེད། ཕྲ་ལ་འཁྲིལ་ནས་རང་འཆར་བའི་རྟེན་བྱེད། ཤེལ་སྦུག་ཅན་ནས་རང་སྣང་བའི་རྟེན་བྱེད་དོ། །སྟོང་པ་རང་གྲོལ་ནི་ཚངས་བུག་ལ་ཟུག་པ་སྟེ། ལུ་གུ་རྒྱུད་སྐུའི་རྟེན་བྱེད་པ་དང་བསྡོམས་ན་རྩ་ལྔ་སྟེ་ཡེ་ཤེས་ལྔའི་འོད་ཡིན་ལ། རང་བཞིན་དུ་གཞིར་བྱེད་པས་སྒྲོན་མ་བཞིའི་འཕེལ་སྟོན། འོད་ཀྱི་རྩ་བཞི་ནས་འོད་གསལ་དག་པའི་ཐིག་ལེ་རྒྱུ་བ་དེ་ལ་བརྟེན་ནས་འོད་གསལ་བསྒོམ་པ་སྟེ། དེའང་ཀ་ཏི་གསེར་གྱིི་རྩ་ཆེན་ན་གཞིའི་ཐིག་ལེ་བཟང་པོ་ངོ་བོ་རང་བཞིན་ཐུགས་རྗེ་གསུམ་གྱི་བད ག་ཉིད་སྙིང་ག་ལ་བརྟེན་ནས་གནས་སོ། །དར་དཀར་སྣལ་མ་ན་ལམ་གྱི་ཐིག་ལེ་བཟང་པོ་སྒྲོན་མ་བཞི་དང་བཅས་པ་ཆུའི་སྒྲོན་མ་སྟེ་གཡས་ནའོ། །ཕྲ་ལ་འཁྲིལ་ན་བཟང་པོའི་རྩེ་མོའི་ཐིག་ལེ་ཉམས་གོང་འཕེལ་གྱི་སྣང་བ་སྣ་ཚོགས་པ་གཡོན་ནའོ། །ཤེལ་སྦུག་ཅན་ན་ཚད་ཕེབས་ཀྱི་སྣང་བའི་རྟེན་ནང་གསལ་ཡེ་ཤེས་ཀྱི་འཆར་གཞི་གནས་སོ། །སྟོང་པ་རང་གྲོལ་མ་རྡོ་རྗེ་ལུ་གུ་རྒྱུད་ཀྱི་སྐུ་གནས་པའོ། །ཡེ་ཤེས་ཀྱི་སྣང་བ་ཕྱིར་གསལ་དུ་འཆར་བའི་སྒོ་ནི་མིག་གཉིས་ཡིན་ལ་དེའང་མིག་གཡས་ནས་རྒྱང་ཞགས་ཆུའི་སྒྲོན་མ་དང་ཤེས་རབ་རང་བྱུང་གི་སྒྲོན་མ་གཉིས་ཏེ་ཇི་སྙེད་མཁྱེན་པའི་ཡེ་ཤེས་ཐབས་སྣང་བའི་རང་བཞིན་དུ་འཆར་ལ། མིག་གཡོན་ནས་ཐ ིག་ལེ་སྟོང་པའི་སྒྲོན་མ་དང་དབྱིངས་རྣམ་དག་གི་སྒྲོན་མ་གཉིས་ཇི་ལྟ་བ་མཁྱེན་པའི་ཡེ་ཤེས་ཤེས་རབ་སྟོང་པའི་རང་བཞིན་དུ་འཆར་ཞིང་། དེའི་དབུས་ཚངས་པའི་བུ་ག་ནས་རིག་པ་རྟོག་མེད་ཀྱི་ལུ་གུ་རྒྱུད་ཐིག་ལེ་བརྩེགས་མར་སྣང་བའོ།། ༼༈༽ བྱ་བ་དགུ་ཕྲུག་ནི། ཉམས་ལེན་གནད་ཀྱི་སྒྲོན་མ་ལས། དེ་ཡང་ལུས་ཀྱི་ཕྱིའི་བྱ་བ་ཚོ ང་དང་སོ་ནམ་ལ་སོགས་པ་འཇིག་རྟེན་གྱི་འདུ་འཛི་དང་གཡེང་བ། ནང་གི་བྱ་བ་ཐུན་མོང་གི་ཆོས་སྤྱོད་ཕྱག་དང་བསྐོར་བ་ལ་སོགས་པ། གསང་བའི་བྱ་བ་ཐུན་མོང་མ་ཡིན་པའི་ཕྱག་རྒྱ་གར་ལ་སོགས་པ་སྟེ། མདོར་ན་གཡོ་བྱེད་ལུས་ཀྱི་སྤྲོས་པ་མཐའ་དག་གཏོང་ཞིང་། ངག་གི་ཕྱིའི་བྱ་བ་ངག་འཁྱལ་གཏམ་ཚིག་རྩུབ་ལ་སོགས་པ་འཇིག་རྟེན་ཐ་མལ་བའི་ངག་གི་སྨྲ་བརྗོད། ནང་གི་བྱ་བ་ཐུན་མོང་གི་འདོན་བཟླས་ཁ་ཏོན། གསང་བའི་བྱ་བ་ཐུན་མོང་མ་ཡིན་པའི་བཟླས་བརྗོད་ལ་སོགས་པ་སྟེ། མདོར་ན་སྨྲ་བརྗོད་དང་འཇུག་པ་མཐའ་དག་བཏང་ལ། སེམས་ཀྱི་ཕྱིའི་བྱ་བ་འཇིག་རྟེན་གྱི་རྣམ་རྟོག །ནང་གི་བྱ་བ་ཐུན་མོང་གི་ཆོས་ལ་རྟོག་དཔྱོད་དང་བསམ་མནོ། གསང་བའི་བྱ་བ་ཐུན་མོང་མ་ཡིན་པའི་བསྐྱེད་རིམ་ལ་སོགས་པའི་བློས་བྱས་ཀྱི་སྒོམ་པ་ཐམས་ཅད་དོ། །མདོར་ན་དྲན་བསམ་ཡིད་ཀྱི་འཕྲོ་འདུ་ཐམས་ཅད་བཏང་ལ་སྒོ་གསུམ་དལ་བ་བསྟེན་པར་བྱའོ། །ཞེས་དང་། རྡོ་གྲུབ་རིན་པོ་ཆེས། ལུས་ཀྱི་ཕྱིའི་བྱ་བ་ཁྱིམ་གྱི་སོ་ནམ་ལ་སོགས་པ་དང་། ནང་གི་བྱ་བ་ཕྱག་སྐོར་དཀའ་སྤྱད་ལ་སོགས་པ་དང་། གསང་བའི་བྱ་བ་ཕྱག་རྒྱ་གར་མཆོད་ལ་སོགས་པ་དང་། ངག་གི་ཕྱིའི་བྱ་བ་བྲེ་མོའི་ཀྱལ་ཀ་དང་། ནང་གི་ཁ་ཏོན་ཀློག་བཟླས། གསང་བའི་བསྙེན་སྔགས་བཟླས་སྒྲུབ་ལ་སོགས་པ་དང་། སེམས་ཀྱི་ཕྱིའི་བྱ་བ་ཆགས་སྡང་འཁོན་འཛིན་ལ་སོགས་པ་དང་། ནང་གི་ལྟ་བ་གྲུབ་མཐའི་རྗེས་དཔྱོད་ལ་སོགས་པ་དང་། གསང་བའི་ལྷ་ཡི་བསྐྱེད་རིམ་གྱི་སྤྲོས་པ་ལ་སོགས་པ་དེ་དག་ཐམས་ཅད་ལས་རླུང་འཕེལ་བ་མཐུ་ཆེ་བར་བྱེད་པ་ཤ་སྟག་ཏུ་ངེས་ཤིང་ཇི་ལྟ་ཇི་ལྟར་ལས་ཀྱི་རླུང་རྣམ་རྟོག་སྤྲོས་པའི་ཁ་ལོ་བ་དབང་བཙན་པ་དེ་ལྟ་དེ་ལྟར་འོད་གསལ་གཉུག་མ་ཆོས་ཟད་ཀྱི་ཡེ་ཤེས་ཆེན་པོའི་བཞོན་པའི་ཤིན་ཏུ་ཕྲ་བའི་རླུང་བག་ལ་ཞ་བར་འགྱུར་ལ། ཇི་སྲིད་དེ་མངོན་དུ་མ་གྱུར་བ་དེ་སྲིད་དུ་རང་བཞིན་ཡེ་གནས་ཀྱི་རིག་པ་ཐེར་ལ་མི་འབུད་པ་ཡིན་པས་རྩ་བ་འདི་ལ་ཐུག་གོ །ཞེས་གསུངས་སོ། །༼༈༽ ཨ་ཏི་ཟབ་དོན་ལས། དང་པོ་ཁྱུང་གི་འདུག་སྟངས་ནི༔ རྐང་མཐིལ་གཉིས་སྤྲད་ལུས་དྲང་པོར་བསྲངས༔ ལག་པ་རྡོ་རྗེའི་ཁུ་ཚུར་བརླ་སྟེང་དུ་ཕབ༔ མཇིང་པ་ཅུང་འགུགས༔ མིག་སྨིན་ཕྲག་གི་ནམ་མཁར་བལྟས་ཏེ་ཉམས་སུ་བླང་ངོ་༔ གཉིས་པ་སྟག་སྐྱུག་གི་འདུག་སྟངས་ནི༔ རྐང་པ་སྔར་བཞིན་ལ་རྡོ་རྗེ་ཁུ་ཚུར་གསང་བར་ཕབ༔ ལྟག་རྩ་འཐེན༔ མགྲིན་པ་གུག༔ མིག་གཉིས་སྨིན་ཕྲག་ཏུ་བསྒྲིལ་ཏེ་ཐད་སོར་བལྟས་ལ་ཉམས་སུ་བླང་ངོ༔ གསུམ་པ་སྐྱེས་བུ་ནི༔ ལུས་ཙོག་པུ་ལ་ལག་གཉིས་བར་ལྷུ་ལ་འཁྱུད༔ མཇིང་པ་བག་ཙམ་གྱེན་དུ་བཏེག་ལ་ནམ་མཁར་ཧྲིལ་པོར་བལྟས་ལ་བྷྱེཾ་མོ༔ བཞི་པ་ཝ་ཡི་འདུག་སྟངས་ནི༔ རྐང་པ་དྲང་སྲོང་ལྟ་བུ་ལ་ལག་པ་མཐེ་བོང་འཆང་བའི་ཁུ་ཚུར་རྐང་མགོའི་གཞོག་གཉིས་སུ་ཕབ༔ དཔུང་པ་གྱེན་དུ་འཐེན་ཞིང་བརྒྱང༔ རྒལ་ཚིགས་བསྲངས་མིག་གཉིས་ཅུང་ཟད་ཟུམ་བུས་གཡས་གཡོན་གྱི་ཟུར་ལ་ཁྲིད་དེ་ཉམས་སུ་བླང་ངོ༔ ལྔ་པ་བྱ་རྒོད་ནི༔ རྐང་པ་རྡོ་རྗེའི་འདུག་སྟངས་ཅུང་ཟད་མདུན་ཏུ་བཟུང༔ ལག་གཉིས་ཁུ་ཚུར་དཔྱི་མགོའི་རྩར་བཙུགས༔ རྒལ་ཚིགས་བསྲངས༔ ལྟག་རྩ་འཐེན༔ མིག་གཉིས་ཤིན་ཏུ་ཟུམ་པས་ཟུར་གཉིས་ལ༔ལུ་གུ་རྒྱུད་ལྡིང་ཐབས་ཀྱིས་ཁྲིད་ལ་བལྟའོ༔ དྲུག་པ་གྱད་ཀྱི་འདུག་སྟངས་ནི༔ རྐང་པ་སྐྱིལ་ཀྲུང་གྲུ་མོ་བརླ་སྟེང་དུ་བཙུགས༔ ལག་མཐིལ་གཉིས་ཀྱིས་འདན་༼འགྲམ་༽ པ་སྐྱོར༔ སྒལ་ཚིགས་བསྲང་ཅི་ཐུབ་བྱ༔ མིག་ཟུ མ་བུས་ཕབ་ལྡོག་གིས་གཡོན་གྱི་ནམ་མཁར་ལུ་གུ་རྒྱུད་འཁྲིད་ལ་བསྒོམ༔ བདུན་པ་ཆུ་སྲིན་ནི༔ རྐང་པ་སྐྱིལ་ཀྲུང་ལ་ལག་པ་པུས་མོ་ལ་བཀབ༔ ལུས་བསྲང༔ མཇིང་པ་ཅུང་ཟད་དགྱེ་བས་མིག་ཟུར་གཡས་སུ་ཁྲིད་ལ་ཟུམ་གྱིས་ལྟ་ཞིང་སྒོམ༔ ཞེས་གསུངས། ༼༈༽ ཐེག་མཆོག་རིན་པོ་ཆེའི་མཛོད་ལས། ངག་གི་གནད་སྨྲ་བ་བཅད་ལ་བསྟེན། ཐལ་འགྱུར་ལས། ངག་ནི་བསླབ་དང་གནས་པ་དང་། །ལ་བཟླ་བརྟན་པར་བྱ་བའོ། །ཞེས་པས་དང་པོ་ངག་བསླབ་པ་ནི། སྨྲ་བ་ཇེ་ཉུང་ཐ་མལ་གྱི་གཏམ་སྨྲ་བ་བཅད་པ་ལ་ཐུན་ཆུང་ངུ་བསླབ། དེ་ནས་རིང་དུ་བསླབ། སྐབས་སུ་སྨྲ་རྒྱུ་མེད་ཀྱང་གཅིག་པུ་སྨྲའོ། །གནས་པ་ནི་སྔགས་དང་བརྗོད་པ་ལ་སོགས་པ་དགེ་བའི་བརྗོད་པ་མི་དགག །གཞན་དང་ཚིག་འབྲུ་གཅིག་ཀྱང་མི་འདྲེའོ། །འདིའི་དུས་ན་ལུས་ཀྱི་བརྡས་གོ་བར་བྱེད་པའོ། །ལ་བཟླ་བ་ནི་སྔགས་ལ་སོགས་པ་བརྗོད་པ་ཐམས་ཅད་མི་བྱའོ། །བརྟན་པ་ནི། ཅི་ཡང་མི་བརྗོད་པའི་ངང་ལས་མི་འདའ་བར་བྱེད་པ་སྟེ་ལུས་ཀྱི་བརྡ་ཙམ་ཡང་མི་བྱ་བ་ཡིན་ནོ། །ས་བོན་གྱི་རྒྱུད་ལས། ངག་ནི་ཇི་ལྟར་ལྐུགས་པ་བཞིན། །སུ་དང་བརྡ་ཙམ་ཉིད་མི་བྱ། །འདི་ལྟར་སུ་ཡིས་བྱས་པའི་མི། །སེམས་ཀྱི་འཕྲོ་འདུ་རང་ཆོད་དོ། །ཞེས་སོ། །ངག་གི་སྨྲ་བ་བཅད་པས་བརྗོད་དུ་མེད་པའི་དོན་རྒྱུད་ལ་སྐྱེ་སྟེ། འགྲོ་བ་གཞན་དང་ངག་མ་འདྲེས་པས་ལུས་འབྱོངས་པའི་དགོས་པ་ཡོད། ལུས་འབྱོངས་པས་སངས་རྒྱས་དང་བྱང་ཆུབ་སེམས་དཔའ་དང་། མཁའ་སྤྱོད་ཀྱི་མཁའ་འགྲོ་མ་རྣམས་ཀྱིས་བྱིན་གྱིས་བརླབས་ནས་ལུས་སྒྱུ་མའི་སྐུར་གྲོལ་བའོ། །དེ་ནས་བརྗོད་བྱ་བཀག་པས་ངག་འབྱོངས་ཏེ། རྟགས་སུ་མི་མ་ཡིན་པ་རྣམས་དང་བརྡ་འཕྲོད་ཅིང་གཏམ་ཟེར་བ་དག་འོང་། ངག་གི་བརྗོད་པ་བཀག་པས་ཡིད་འབྱོངས་ཏེ་དེའི་རྟགས་སུ་སྔོན་དུ་མི་མ་ཡིན་གྱི་གཟུགས་མཐོང་བ་དང་། དེ་ནས་མངོན་པར་ཤེས་པ་དུམ་བུ་པ་འཆར་རོ། །དེ་ལྟར་ངག་གི་གནད་ཀྱིས་ལུས་སེམས་ཀྱི་འབྲེལ་གཅོད་པའི་གནད་ཀྱི་གདམས་པའོ། །ཞེས་དང་། གནད་གསུམ་ཆོས་ཉིད་ཀྱི་འཁོར་ལོ་ལས། ངག་གི་གནད་ལ་སྨྲ་བ་བཅད་པ་དང་། རླུང་དལ་བས་སྟོང་པར་བྱ་བ་གཉིས་ལས། སྨྲ་བ་མ་བཅད་ན་ངག་གི་བརྗོད་པས་སེམས་འཁྲུགས་ཤིང་རྩོད་པ་དང་བཅས་པས་དུས་འདའ་བ་དང་། སྒྲིབ་པར་འགྱུར་བ་དང་། ཏིང་ངེ་འཛིན་ལས་ཉམས་པ་ལ་སོགས་པའི་ཉེས་པ་དུ་མ་ལ་རེག་པས་མི་སྨྲ་བ་ལ་བསླབ་བོ། དེ་ཡང་དང་པོ་ལུང་སྟོང་ལ་སོགས་པའི་དབེན་པར་སོང་ལ། ཅི་ཙམ་བརྗོད་པར་འདོད་ཅིང་གང་ལ་ཞེན་པའི་སྨྲ་བརྗོད་དེ་ཉིད་བརྒྱ་སྟོང་དུ་མར་བརྗོད་ཅིང་། འདས་མ་འོངས་ད་ལྟར་གྱི་བརྗོད་པའི་རྣམ་པ་རྣམས། དྲན་པས་བསླངས་ནས། སྐད་ཅིག་ཀྱང་མི་དལ་བར་བརྗོད་པས་ཐང་ཆད་པས་བརྗོད་སྙིང་མི་འདོད་པར་འགྱུར་པ་ན། ཉིན་རེ་བས་ངག་ཇེ་ཉུང་ལ་བཏང་ལ་ཟླ་བ་གཅིག་ལ་གཞན་དང་མི་སྨྲ་བ་དང་། དེ་ནས་ཞག་བཅུ་ན་རང་གི་སྔགས་དང་ཁ་ཏོན་ཙམ་ཡང་མི་བརྗོད་པ་ལ་བསླབས་པས་བརྗོད་དུ་མེད་པའི་དོན་རྒྱུད་ལ་སྐྱེ་བར་བྱེད་དོ། །རླུང་དལ་བས་སྟོང་པར་བྱ་བ་ནི། འགྲོ་འོང་ལས་ཀྱི་རླུང་ནི་རང་སོར་བཞག་པས་རྟོག་ཚོགས་ཉོན་མོངས་པའི་རླུང་བག་ལ་ཞ་སྟེ། རིག་པ་ཡེ་ཤེས་ཀྱི་རླུང་དབྱིངས་སུ་འཁྱིལ་བ་ནི། གནད་གཅིག་ཏུ་ཡོད་པའི་ཕྱིར་རོ། །དེ་ཡང་གློ་བ་ན་འགྲོ་འོང་གི་རླུང་རྟའི་ཚུལ་ཏུ་ཡོད་པ་ལས། སྙིང་ནང་ན་རྩ་གྲོ་སོག་གི་སྦུག་མ་ཙམ་ན་ཚུར་ཡེ་ཤེས་ཀྱི་གདངས་ཞུགས་པ་མི་ལྟར་སོང་བ་གཉིས་འདྲེས་པས་སེམས་ཞེས་བྱ་བ་འབྱུང་སྟེ། རླུང་ཟད་པ་དང་འགགས་པ་ན་རྟོག་པ་འགགས་ནས་མི་རྟོག་པ་སང་བག་དང་བཅས་པ་འོང་བ་ནི། དེའི་ཚེ་རླུང་རང་ཞི། ཡེ་ཤེས་ཀྱི་གདངས་སྙིང་ནང་ན་མི་གཡོ་བར་བཞུགས་པའི་གནད་ཀྱིས་སོ། །སྙིང་ནས་འཁོར་ལོ་བཞིའམ་ལྔར་ཡེ་ཤེས་ཀྱི་གདངས་ཞུགས་པ་ན། འཁོར་ལོ་བཞི་ནས་སྦྱང་བྱ་ལས་ཀྱི་རླུང་འགྱུ་བ་དང་བཅས་པ་དང་། སྦྱོང་བྱེད་ཡེ་ཤེས་ཀྱི་རླུང་འགྱུ་བ་མེད་པ་དང་། གདངས་ཉིད་སྦྱང་གཞི་རིག་པའི་ཡེ་ཤེས་སུ་ཞུགས་པས་སྣ་བུག་གཉིས་རོ་རྐྱང་གི་རྩ་ནས་ཞུགས་པའི་རླུང་འཁོར་ལོ་བཞིའི་རྩ་ནང་དུ་ཟིན་པས། རྟོག་མེད་ཀྱི་ཡེ་ཤེས་སུ་འཆར་བ་ཡང་འགྱུ་བ་རང་ཐིམ་སྟེ། གློ་བའི་རླུང་ཐིམ་པ་དང་གནད་གཅིག་གོ །དེས་ན་ཁ་སྣའི་རླུང་དལ་བུས་རང་སོར་ཞི་བ་ལ་བསླབ་ཅིང་སྙིང་ཐིག་པས་རླུང་ཁ་ནས་དྲང་ཞིང་དལ་བུས་བྱ་བ་ལ་བསླབ་པའི་གནད་དམ་པ་སྟེ། འདི་ལྟར་རྩ་རླུང་པ་གཞན་གྱིས་སྣ་ནས་དྲངས་པས་འཁོར་ལོ་བཞིར་སྦྱང་བྱའི་རླུང་སྟོབས་སུ་གྱུར་ནས་གེགས་རྣམ་པ་སྣ་ཚོགས་སུ་འབྱུང་སྟེ། ཡེ་ཤེས་ཀྱི་རླུང་ཅུང་ཟད་ཟིན་ཡང་རྩ་བའི་ཡེ་ཤེས་སྙིང་ནང་ནས་འཕྲོས་པ་ངོས་ཀྱང་མ་ཟིན་ཆ་མེད་པས་འཁྲུལ་འཁོར་དང་དམིགས་པ་སྣ་ཚོགས་ལ་བསྟེན་དགོས་ཤིང་། ཡོན་ཏན་སྐྱེ་བ་ལྟར་སྣང་ཡང་། རྩ་བ་མ་ཆོད་པས་རྣལ་མ་ཞིག་མི་ཡོང་བའི་གནད་དེ་ཡིན་ནོ། །ཞེས་གསུངས། ༼༈༽ ཐེག་མཆོག་རིན་པོ་ཆེའི་མཛོད་ལས། དབྱིངས་ཀྱི་སྒྲོན་མ་ལ་ཕྱི་ནང་གཉིས་ལས། ཕྱི་ནམ་མཁའ་དག་པའི་དཀྱིལ་ན་འོད་གདངས་སྔོ་རི་བ་གཅིག་ཐོག་མར་སྣང་བའོ། །ནང་དེ་ལས་མཆེད་པ་ལྟར་ཤར་ཏེ། འོད་ལྔའི་མདངས་ཁ་དོག་ལྔར་གསལ་བའོ། །ཞེས་དང་། ཡུལ་གྱི་གནད་ནི་ཕྱིའི་དབྱིངས་ཀྱི་ཡུལ་ནམ་མཁའ་སྟོང་པ་སྤྲིན་དང་བྲལ་བ་ཡིན་ལ། ནང་གི་དབྱིངས་ཀྱི་ཡུལ་སྨིན་མཚམས་ཀྱི་མཛོད་སྤུ་ལ་གཏད་པས་དབྱིངས་སྣང་མཐིང་ག་དང་། དེ་ལས་མཆེད་པ་རྣམ་ལྔའི་རང་གདངས་ཏེ། ཐལ་འགྱུར་ལས། དབྱིངས་ནི་ཕྱི་དང་ནང་དུ་སྟེ། །ཕྱི་ནི་སྤྲིན་བྲལ་མཁའ་ལ་འཛིན། །བག་རྡུལ་ཆར་གྱིས་དྭངས་དུས་སུ། །མཁས་པས་མངོན་སུམ་གནད་གཟིར་དང་། །ནང་གི་སྒྲོན་མ་ལམ་དུ་བྱའོ། །ཞེས་སོ། །དེ་ཡང་ཕྱི་རིག་པ་འཆར་བའི་ཡུལ་ཡིན་ལ། ནང་ཉམས་འཕེལ་བའི་ཡུལ་ཏེ། རིག་པ་དང་ཉམས་གཉིས་སུ་མེད་པ་ལས་འཁོར་འདས་འདྲེས་པ་ཞེས་བྱའོོ། །དེའང་ས་ཆུ་མེ་རླུང་གི་དངོས་པོ་རགས་པ་ལ་ཡུལ་དུ་གཏད་པས་མི་གྲོལ་ཏེ། དང་པོ་སྣང་བ་འཆར་དུ་མི་འདོད། ཕྱིས་ཤར་དུས་གཏད་ཀྱང་དངོས་པོ་རགས་པ་ལྟར་ཤེས་པའང་དེ་དང་མཐུན་པ་སྐྱེ་བས་སྟོང་ཉིད་བསམ་དུ་མེད་པའི་ཉམས་ནང་ནས་མི་འཆར་ལ། ནམ་མཁའ་སྟོང་པ་ལ་རིག་པ་སྟོང་པ་གཏད་པས་ཡུལ་ནམ་མཁའ་དང་མཐུན་པའི་ཉམས་སྟོང་གསལ་འཕྲོ་འདུ་དང་བྲལ་བ་ཕྱལ་ཡས་པ་ཅིག་འཆར་བས། དངོས་པོ་མཚན་མ་དང་བྲལ་བའི་དགོས་པ་ཡོད་དོ། །ཞེས་གསུངས། ཚིག་དོན་རིན་པོ་ཆེའི་མཛོད་ལས། ཕྱིའི་ཡུལ་ནམ་མཁའ་སྟོང་པ་ལ་རིག་པ་གཏད་པས་དེ་དང་མཚུངས་པའི་ཉམས་སྟོང་གསལ་རྣམ་དག་ཏུ་འཆར་བའི་ཕྱིར་ནམ་མཁའ་བཤད་དེ། ཐལ་འགྱུར་ལས། འདི་ཉིད་ཡུལ་གནད་འདི་ལྟ་སྟེ། །སྤྲིན་བྲལ་ཕྱི་ཡུལ་སྟོང་པ་ལ། །རྣལ་འབྱོར་ནམ་མཁའི་བྱ་ལམ་གནས། །འདི་དང་མ་བྲལ་ཆོས་ཉིད་དོ། །ཞེས་དང་། དེ་ཉིད་ལས། ཡུལ་ལ་སྣང་བའི་མཚན་ཉིད་ནི། །ནམ་མཁའ་སྔོ་བསངས་རྗེས་མེད་ལ། །འོད་དང་ཁ་དོག་དབྱིངས་ཉིད་དང་། །ཡེ་ཤེས་ལྔ་ཡི་རང་སྣང་གསལ། །ཞེས་གསུངས། ཐེག་མཆོག་མཛོད་ལས། དབྱིངས་ཀྱི་མཐུན་དཔེ་ནི། ཡི་གེ་ན་རོ་བཞིན་ཏུ་གཤོག་པ་གཉིས་བསྡོམས་པས་ན་རོ་གཅིག་འགྲུབ་པ་ལྟར་ཕྱིའི་དབྱིངས་མཐིང་ག་དང་དེ་ལས་ཤར་བའི་སྣང་བ་གཉིས་བསྡོམས་པས་དབྱིངས་ཀྱི་སྒྲོན་མ་ཞེས་གཅིག་ཏུ་བཏགས་ཤིང་། ན་རོའི་གཟུགས་ལྟར་མཐིང་ཀ་ཁྱབ་ཆེན་ཡང་དང་པོ་སྨིན་མཚམས་སུ་སྣང་དུས་རེ་ཁ་ནག་པོའི་རྣམ་པ་དྲང་ཙམ་འཁྱོགས་དང་བཅས་པ་ལས། དེ་ཉིད་ལ་གཏད་དུས་ཕྱིའི་འཇའ་ཚོན་སྣ་ལྔ་ལྟར་བར་སྣང་ལ་སྣང་བ་སྟེ། སྒྲོན་མ་འབར་བ་ལས། དཔེར་ན་ཡི་གེ་ན་རོ་བཞིན། །གཉིས་ཀྱིས་བཟུང་སྟེ་བསྡོམས་པས་གཅིག །ནག་པོ་བསྒྱུར་དུ་བཏུབ་པ་མིན། །དེ་ལ་གོམས་པའི་གདེ ངས་རྙེད་ནས། བར་སྣང་འཇའ་ཚོན་ཇི་བཞིན་ཏུ། །ཁ་དོག་མ་འདྲེས་ཡོངས་སུ་རྫོགས། །ཞེས་གསུངས་སོ། །ཨ་ཏི་ཟབ་དོན་ལས། གསང་བའི་ནམ་མཁའ་ནི་སྙིང་མཆོང་གུར་སྨུག་པོའི་ནང་ན་རྩའི་རྒྱལ་པོ་གསེར་གྱི་ཉི་མ་ཅན་ཞེས་བྱ་བ་ཆོས་སྐུ་ཡེ་ཤེས་ལྔ་ལྡན་དུ་སྟོང་སེང་ངེ་གནས་པའོ༔ ནང་གི་ནམ་མཁའ་ནི་སྙིང་དང་མིག་ཏུ་འབྲེལ་བའི་རྩ་དར་དཀར་གྱི་སྐུད་པ་ཙམ་པ་འཇམ་མཉེན་འཁྲིལ་བའི་མཚན་ཉིད་དང་ལྡན་པ་ནང་ཁྲག་དང་ཆུ་སེར་གྱིས་མ་གོས་པའི་སྟོང་པ་དྭངས་སེང་ངེ་བའི་ལམ་དེའོ༔ ཕྱིའི་ནམ་མཁའ་ནི་བར་སྣང་སྤྲིན་དང་ན་བུན་སོགས་མེད་པའི་དྭངས་སེང་ངེ་བ་འདིའོ༔ དེའི་ཕྱིར་ནམ་མཁའ་སུམ་བསྒྲིལ་ལ་གཅིག་ཏུ་བསྒོམ་པ་ནི༔ ཕྱིའི་ནམ་མཁའ་སྟོང་པ་ལ་གཏད་པའི་འབེན་བཅས་བསྒོམས་པས༔ གསང་བའི་ནམ་མཁའ་སྙིང་ནང་གི་རིག་པ་རྡོ་རྗེ་ལུ་གུ་རྒྱུད་དེ༔ ནང་གི་ནམ་མཁའི་ལམ་ལ་བརྒྱུད་དེ་ཕྱི་རོལ་གྱི་ནམ་མཁའ་ལ་མངོན་སུམ་དུ་མཐོང་བར་འགྱུར་ལ༔ དེ་ལ་རིག་པ་གཅིག་ཏུ་དྲིལ་ཏེ་ཉམས་སུ་ལེན་པ་ནི་ནམ་མཁའ་གསུམ་འབྲེལ་བའི་ཉམས་ལེན་ནོ༔ ཞེས་གསུངས། ༼༈༽ ཐེག་མཆོག་རིན་པོ་ཆེའི་མཛོད་ལས། དེ་ཡང་མངོན་སུམ་དེ་ཡེ་ཤེས་ཀྱི་མཐོང་བ་རྣམ་པར་དག་པའི་མིག་གིས་མཐོང་ནས་མཐོང་བའི་དུས་དེར་གྲོལ་བ་སྐྱེས་བུའི་སྙིང་ལ་མདས་ཟིན་པ་ལྟ་བུའོ། །ཆོས་ཉིད་ཀྱི་མཐོང་བ་རྣམ་པར་དག་པའི་མིག་གིས་མཐོང་ན་སྐད་ཅིག་དང་པོ་ལ་དེའི་བྱེ་བྲག་ཕྱེད། གཉིས་པ་ལ་དེ་ཉིད་རྟོགས་ནས་གྲོལ་བ། རྡིང་ཐག་གི་མདུད་པ་བསླབ་པས་ཤེས་ལ། ཤེས་པས་གྲོལ་བ་ལྟ་བུའོ། །ཤེས་རབ་ཀྱི་མིག་གིས་མཐོང་བ་སྐད་ཅིག་དང་པོ་ལ་ཚིག་ལ་རྟོག་པའི་བྱེ་བྲག་ཕྱེད། གཉིས་པ་ལ་ལུ་གུ་རྒྱུད་ཀྱི་མཚན་ཉིད་མངོན་པར་རྟོགས། གསུམ་པ་ལ་མངོན་པར་རྫོགས་པར་སངས་རྒྱའོ། །རྡོ་རྗེའི་མིག་གིས་མཐོང་ན་ཡེ་ཤེས་དག་པའི་སྣང་བ་རྒྱ་ཆེར་མཐོང་ནས་དེ་ཉིད་ལ་ཅུང་ཞིག་གོམས་ནས་གྲོལ་བར་ངེས་སོ། །ཆུ་བུར་གྱི་མིག་གིས་མཐོང་ན་སྣང་བ་བཞི་མཐར་ཕྱིན་དགོས་སོ། །མིག་དེ་དག་ཀྱང་། ལྷུན་གྲུབ་སར་གནས་ཕྱག་རྒྱ་ཆེ། །ཚེ་དབང་གི་རྣམ་རིམ་པ་བཞིན། །ཡེ་ཤེས་ཆོས་ཉིད་ཤེས་རབ་དང་། །རྡོ་རྗེ་ཆུ་བུར་མིག་ཤེས་བྱ། །དེའང་ཆུ་བུར་མིག་གིས་མཐོང་བའི་ཚེ་ཕྲ་བ་དང་། འཁྱུག་པ་དང་། འགྲོ་བ་དང་། འོང་བ་དང་། འབྱེད་པ་དང་། འདུ་བ་དང་འགུལ་འཕྲིག་ཏུ་སྣང་བས་ཉི་མ་དང་། ཟླ་བ་དང་། སྒྲོན་མའི་རྟེན་གསུམ་གྱི་ཐབས་ལ་བརྟེན་ནས་ཁྲིད་པའི་གནད་རབ་ཏུ་གཅེས་སོ། །ཞེས་གསུངས་པ་དང་། ཚིག་དོན་རིན་པོ་ཆེའི་མཛོད་ལས། རང་སྣང་ལྷག་མཐོང་གི་རིག་པ་ལུ་གུ་རྒྱུད་དེ་ཉིད་ཤེས་རབ་ཀྱི་མིག་གིས་མཐོང་ན་སྐད་ཅིག་མ་དང་པོ་ལ་ཚིག་ལ་རྟོག་པའི་བྱེ་བྲག་ཕྱེད། གཉིས་པ་ལ་ལུ་གུ་རྒྱུད་ཀྱི་མཚན་ཉིད་མངོན་པར་རྟོགས། གསུམ་པ་ལ་མངོན་པར་རྫོགས་པར་འཚང་རྒྱའོ། །ཆུ་བུར་གྱི་མིག་གིས་མཐོང་ན་སྣང་བ་བཞི་མཐར་ཕྱིན་དགོས་སོ། །དེའང་ཆུ་བུར་གྱི་མིག་གིས་མཐོང་བའི་ཚེ་ཕྲ་བ་དང་། འཁྱུགས་པ་དང་། འོང་བ་དང་། འགྲོ་བ་དང་། བྱེ་བ་དང་། འདུ་བར་སྣང་སྟེ་སུཪྱ་དང་། ཙནྡྲ་དང་། ཨཱ་ལོ་ཀེ་གསུམ་ལ་བསླབ་པས་མཆོག་ཏུ་འགྱུར་རོ། །ཤེས་རབ་ཀྱི་སྤྱན་ནི་རིག་འཛིན་གྱི་ས་རྣམས་ལ་ཡོད་ལ། ཆུ་བུར་གྱི་མིག་ནི་མི་རྣམས་ལ་ཡོད། ཅེས་གསུངས། ༈ ཤེས་རབ་ཀྱི་མིག་སོགས་དྲིས་པའི་གསུངས་ལན་འདི་རྣམས་ནི་སྐྱེས་འཕགས་གྱི་གཟིགས་ཚུལ་ལ་གསུངས་པ་སྟེ། དེའང་རིག་འཛིན་རྣམ་བཞིའི་ས་ལ་བཞུགས་པ་རྣམས་ཀྱིས་རང་སྣང་ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད་དེ་ཉིད་ཡེ་ཤེས་ཀྱི་མིག་རྣམ་པར་དག་པས་མཐོང་ཚེ་སྐད་ཅིག་གཅིག་ལ་གྲོལ་བ་དང་། ཆོས་ཉིད་ཀྱི་མིག་གིས་མཐོང་ན་སྐད་ཅིག་གཉིས་པ་ལ་གྲོལ་བ་དང་། ཤེས་རབ་ཀྱི་མིག་གིས་མཐོང་ན་སྐད་ཅིག་གསུམ་ལ་མངོན་པར་རྫོགས་པར་འཚང་རྒྱ་བ་དང་། རྡོ་རྗེའི་མིག་གིས་མཐོང་ན་དེ་ཉིད་ལ་ཅུང་ཞིག་གོམས་ནས་གྲོལ་བ་དང་། ཆུ་བུར་གྱི་མིག་གིས་མཐོང་ན་སྣང་བ་བཞིའི་མཐར་ཕྱིན་དགོས་སོ་གསུངས། མིག་དེ་དག་ཀྱང་། ལྷུན་གྲུབ་སར་གནས་ཕྱག་རྒྱ་ཆེ། །ཚེ་དབང་གི་རྣམ་རིམ་པ་བཞིན། །ཡེ་ཤེས་ཆོས་ཉིད་ཤེས་རབ་དང་། །རྡོ་རྗེ་ཆུ་བུར་མིག་ཤེས་བྱ། ཞེས་གསུངས་པ་བཞིན་ནོ།། ༼༈༽ བདེན་གཉིས་ཤིང་རྟ་ལས། དད་པ་མེད་ན་སྐྱབས་འགྲོ་དང་གསོལ་འདེབས་འབུམ་ཐེར་ལ་འབད་ཀྱང་གཏི་མུག་གིས་འགྲོ་བ་ངག་འཁྱལ་ཁོགས་པའི་རྒྱུ་ཙམ་དང་། ཤེས་རབ་ཆེ་བས་སྐྱབས་འགྲོའི་རྣམ་པར་བཞག་པ་ལ་མཁས་ཀྱང་འདུན་པས་འགྲོ་བ་དང་། ཞེ་སྡང་གིས་འགྲོ་བ་ཙམ་མོ། །ཞེས་གསུངས་ཏེ། དཀོན་མཆོག་གསུམ་གྱི་ཡོན་ཏན་དང་སྐྱབས་འགྲོའི་ཕན་ཡོན་སོགས་མི་ཤེས་པར། ཚིག་ཙམ་གྱིས་སྐྱབས་སུ་འགྲོ་བ་ནི་གཏི་མུག་གིས་འགྲོ་བ་དང་། ཤེས་རབ་ཆེ་བས་སྐྱབས་འགྲོའི་རྣམ་པར་བཞག་པ་ལ་མཁས་ཀྱང་། ཡིད་ཆེས་ཀྱི་དད་པ་མེད་པས་འདུན་པས་འགྲོ་བ་དང་། རང་ཉིད་སྐྱབས་འགྲོའི་རྣམ་བཞག་ལ་མཁས་ཀྱང་། གཞན་ཁ་དྲང་བའི་ཆེད་མ་ཡིན་པར། སྡང་ཞེན་གྱི་རྣམ་པས་སྐྱབས་འགྲོའི་རྣམ་བཞག་སོགས་བརྗོད་པ་ཞེ་སྡང་གིས་འགྲོ་བའོ། ། ༼༈༽ ཡང་ཟབ་ཡེ་ཤེས་འཁོར་ལོ་ལས། མཚན་མོ་ཡེ་ཤེས་གནད་དུ་བསྣུན་པ་ལ་གསུམ་ལས། སྲོད་ལ་དབང་པོ་གནད་དུ་བསྡུ་བ་ནི། དྲང་སྲོང་གི་ལུས་གནད་བཅས་ཏེ། རླུང་རོ་གསུམ་ཕྱིར་བུས་ལ། འཇམ་རླུང་དལ་གྱིས་ནང་དུ་བཟུང་ཞིང་། འོག་རླུང་འཐེན་ཏེ་སྟེང་རླུང་མནན། རྩ་ཨ་ཝ་དྷུ་ཏི་མདའ་སྨྱུག་ཙམ་དཀར་སྔོ་གསང་བ་ནས་སྤྱི་བོར་སླེབ་པའི་ནང་། ལྟེ་བའི་ཐད་དུ་པདྨ་འདབ་བཞིའི་དབུས་སུ་ཨ་ཐུང་དམར་པོ་རེག་བྱ་ཚ་བ་ལས་མེ་འབར་བ་ཡར་སོང་། སྤྱི་གཙུག་གི་ཧྃཿདཀར་པོ་ཐུར་དུ་ལྟ་བ་ལ་རེག་པས་ཐིག་ལེ་དཀར་པོའི་རྒྱུན་བབས། ཨ་ལ་ཕོག་མེ་ཡིས་གསོས་བྱས་ཆེར་འབར་བས་ལུས་དང་བག་ཆགས་བསྲེག །བདེ་བ་རྒྱས་པ་ལ་སེམས་བཟུང་ཞིང་བསྒོམས་པས་དྲོད་དང་ཡེ་ཤེས་སྐྱེ་བར་འགྱུར་རོ། །ནམ་ཕྱེད་ཤེས་བྱ་བུམ་པར་དྲིལ་བ་ནི། གཡས་ཕབ་ལ་ཉལ་ཏེ། དབུ་མ་གསལ་གདབས་པའི་ནང་ཐམས་ཅད་ཨ་དཀར་པོ་དོང་ཙེ་བརྩེགས་པ་ལྟར་གང་ཞིང་། ཁྱད་པར་སྙིང་ག་ཉིད་པདྨ་དམར་པོ་འདབ་མ་བཞི་པ་ཁ་ཅུང་ཟད་ཕྱེ་བ་གཅིག་བསམ་པའི་ཨ་ལ་ཨ་གཞན་རྣམས་རིམ་གྱིས་ཐིམ་པར་བསམ་ལ། སྙིང་གར་རླུང་ཁ་སྦྱར་ནས་བཟུང་ཞིང་། གསལ་སྟོང་ས་ལེར་བསྒོམས་ནས། གཉིད་དུ་འགྲོ་ཁར་སྙིང་གི་པད་འདབ་ཟུམ་པའི་ནང་དུ། ཨ་དེ་དཀར་ལ་འོད་འབར་བ་བུམ་ནང་གི་མར་མེ་ལྟར་གསལ་བ་ལ་སེམས་གཏད་ནས་ཉལ་བས་གཉིད་འོད་གསལ་དུ་འཆར་རོ།། དེ་ནས་གཉིད་སད་དུས་རྨི་ལམ་མེད་པར་གསལ་སྟོང་དུ་སེང་ངེ་འདུག་ན། ཉམས་དེ་མ་ཤོར་བར་འཕྲོ་མཐུད་ལ་བསྒོམ་མོ། །རྨིས་ན་རྨི་ལམ་དང་རྣམ་རྟོག་ཐམས་ཅད། སྙིང་ནང་གི་ཨ་ལ་བསྡུ་ཞིང་། གོང་ལྟར་བསྒོམ་པས་འོད་གསལ་དུ་འཆར་རོ། །དེའང་གཉིད་དུ་སོང་ལ་ཉེ་འཁོར་གྱི་གཟུགས་མཐོང་། སྒྲ་ཐོས། དྲི་ཚོར། རོ་མྱོང་། རེག་བྱ་ཚོར། གཏམ་གྱི་དོན་རིག་ལ་རྟོག་པ་མི་སྐྱེ། གཉིད་སད་རྒྱུ་འབྱུང་བ་ཡིན་ནོ། །དེ་ལྟ་བུའི་ངང་ལ་གོམས་པས་དུས་ཐམས་ཅད་དུ་ཆོས་ཐམས་ཅད་རྫོགས་པ་ཆེན་པོ་གཉིས་སུ་མེད་པའི་དོན་ལས་མི་གཡོ་བ་ཡིན་ནོ། །དེས་ནི་གཉིད་གསལ་སྟོང་དུ་འཆར་བས་འོད་གསལ་མངོན་དུ་བྱེད་པའོ། །ཐོ་རངས་རིག་པ་རང་གསལ་ལ་བཞག་པ་ནི། དེ་ནས་ཐོ་རངས་ལངས་ཏེ་སེང་གེའི་འདུག་སྟངས་ཀྱིས་ཧ་ཞེས་དབུགས་རིང་བ་གསུམ་ཕྱིར་བུས་ལ་བཟུང་ཞིང་། སྙིང་གའི་ཨ་དེ་ཚངས་བུག་ནས་ཐོན་ཏེ། སྤྱི་བོ་གཞུ་གང་ཙམ་གྱི་ནམ་མཁའ་ལ་ལིང་ངེར་འདུག་པ་ལ་རིག་པ་གཏད་དེ་མ་ཡེངས་པར་བསྒོམ་ཞིང་རླུང་ཕྱིར་བཟུང་བའི་ངང་ལ་གནས་པས་གང་ལའང་མི་རྟོག་པའི་ཏིང་ངེ་འཛིན་སྐྱེའོ། །དེ་ནས་མིག་དང་ཤེས་པ་ཇེ་དམར་གྱུར་ཏེ། མིག་ཕྱེད་བཙུམ་དུ་སྨད་ལ་ལྟ་ཞིང་ཤེས་པའི་ཨ་དེ་སྙིང་གར་བསྡུས་པས་རྒོད་པ་ཞི། ཡང་བྱིང་བ་སྙམ་བྱེད་ན་སྔ་མ་བཞིན་སྟོད་ལ་བསྒོམ་པས་བྱིང་རྒོད་མེད་པའི་ཡེ་ཤེས་ངང་གིས་མི་རྟོག་པ་ཆུ་བོའི་རྒྱུན་བཞིན་འཆར་བ་ཡིན་ནོ། །དེ་ལྟར་མཚན་མོའི་ཐུན་གསུམ་རིམ་པ་བཞིན་བསྒོམ་པས། བདེ་བ་དང་། གསལ་བ་དང་། རྣམ་པར་མི་རྟོག་པའི་ཡེ་ཤེས་ཏིང་ངེ་འཛིན་དམ་པས་བརྒྱན་པ་ཐུགས་རྡོ་རྗེའི་ངོ་བོ་ལམ་དུ་འཆར་བ་ནི་སྐུ་གསུམ་འདུ་འབྲལ་མེད་པའི་དགོངས་པའོ། །ཞེས་དང་། གནད་གསུམ་ཆོས་ཉིད་འཁོར་ལོ་ལས། བཞུགས་སྟངས་དང་། གཟིགས་སྟངས་བསྟུན་ནས་རླུང་དལ་བུས་ཕྱིར་ཁ་ནས་སོང་བ་ནང་དུ་ཡང་དལ་བུས་བརྔུབས་ཏེ་དལ་གཅིག་རྩོལ་བ་ལྷོད། དེའི་ངང་ནས་ཅུང་ཟད་འཐེན་ཏེ་བཟུང་ནས། ནམ་མཁའ་ལ་མིག་གཏད་པའི་སར་ཨ་དམར་པོ། ཨཨཨཨཨ་༼བརྩེགས་མའོ ལྔ་བརྩེགས་པ་ལ་མ་ཡེངས་པར་སེམས་བཟུང་ཞིང་ཧུར་ཐོན་པས་རིག་པ་སང་བག་དང་བཅས་པ་འབྱུང་ངོ་། །དེ་ནི་རྟོག་དཔྱོད་མེ་དང་འདྲ་བ་དག་པར་བྱེད་པའི་བསམ་གཏན་དང་པོར་སྐྱེ་བའི་ཡན་ལག་སྟེ་མེ་རླུང་རང་ལོག་གི་དགོངས་པ་ཞེས་བྱའོ། །དེ་བཞིན་ཏུ་ཨཨཨཨ་དཀར་པོ་བཞི་བརྩེགས་ལ་གཏད་པས་ཉམས་དགའ་བདེ་ཆུ་དང་འདྲ་བ་དག་ནས་བསམ་གཏན་གཉིས་པར་སྐྱེ་བའི་ཡན་ལག་འདིར་ཆུ་རླུང་རང་ཟད་ཀྱི་དགོངས་པ་ཞེས་བྱའོ། །དེ་ནས་ཨཨཨ་ལྗང་གུ་སུམ་བརྩེགས་ལ་གཏད་པས་དྲན་རྟོག་གི་གཡོ་བ་ཟླུམ་མོ་རླུང་དང་འདྲ་བ་དག་ནས་བསམ་གཏན་གསུམ་པར་སྐྱེ་བའི་ཡན་ལག་རླུང་འདེགས་རླུང་རང་ཟད་ཀྱི་དགོངས་པ་ཞེས་བྱའོ། །དེ་ནས་ཨཨ་སེར་པོ་ཉིས་བརྩེགས་ལ་གཏད་པས་དྲན་པས་བཅིངས་པའི་གཉེན་པོའི་ལས་དག་ནས་བསམ་གཏན་བཞི་པར་སྐྱེ་བ་ཡན་ལག་དྲན་གཞི་རང་ཟད་ཀྱི་དགོངས་པ་ཞེས་བྱའོ། །དེ་ནས་ཨ་མཐིང་ཀ་རྐྱང་པ་གཅིག་ལ་གཏད་པས་གཟུང་འཛིན་ཞེན་རྟོག་གི་དྲི་མ་སྤང་གཉེན་ཆ་དང་བཅས་པ་ལས་གྲོལ་ནས། གཟུགས་མེད་པ་དང་འགོག་པའི་ཡེ་ཤེས་རྣམ་པར་མི་རྟོག་པ་སྐྱེ་བའི་ཡན་ལག་ནམ་མཁའ་རང་ཟད་ཀྱི་དགོངས་པ་ཞེས་བྱའོ། །མན་ངག་འདི་དག་ནི་རྟོག་དཔྱོད་རགས་པ་ནས་བཟུང་སྟེ་དྲན་པ་དབྱིངས་སུ་མ་དག་གི་བར་འབྱུང་བ་ལྔའི་རྣམ་པ་དང་། འཛིན་རྟོག་དབྱིངས་སུ་ཐིམ་པར་བྱེད་པའི་གནད་གལ་པོ་ཆེའོ། །དེའང་དང་པོ་ཨ་ལ་ཤེས་པ་གཏད་ནས་དར་ཅིག་ནས་དམིགས་མེད་ཕྱམ་གྱིས་འགྲོ་བ་དེའི་ངང་དང་མི་འབྲལ་བ་ནི་ཉམས་སུ་མྱོང་བའོ།། ༼༈༽ དེ་ཡང་རྒྱུ་དང་འབྲས་བུའི་སར་བཏགས་པའི་རིམ་པ་བཅུ་དྲུག་ཀྱང་ཚེ་འདིར་འོད་ལུས་སུ་གྲོལ་བ་དང་། བར་དོར་གྲོལ་བ་གཉིས་ལ་ཚང་སྟེ། རིག་པ་རང་ཤར་ལས། ས་ཞེས་བྱ་བ་ནི་མེད་པ་མ་ཡིན་ནོ། །བདེན་པ་མཐོང་བའི་གང་ཟག་གཅིག་ལ་ས་རྣམས་རྫོགས་ནས་ཡོད་དོ། །དེའང་ངོ་སྤྲོད་བསྟན་པའི་གང་ཟག་དེ། དང་པོ་བདེན་པ་མཐོང་བའི་དུས་ན་དེ་ལ་དགའ་བ་སྐྱེས་པ་ནི་ས་དང་པོ་རབ་ཏུ་དགའ་བའོ། །དེ་ནས་རང་གི་སྣང་བ་ཡིན་པར་ངོ་ཤེས་པ་ནི་ས་གཉིས་པ་དྲི་མ་མེད་པ་ཐོབ་པའོ། །དེ་ནས་དེ་ལ་གོམས་པ་ནི་ས་གསུམ་པ་འོད་བྱེད་པའི་ས་ནོན་པའོ། །དེ་ནས་དེ་ལ་གོམས་ནས་འོད་ཀྱི་སྣང་བ་མཐོང་བ་ནི་བཞི་པ་འོད་འཕྲོ་བའི་ས་ནོན་པའོ། །དེ་ནས་ཡེ་ཤེས་ཀྱི་སྣང་བ་མཐོང་བ་དེ་ལ་གོམས་ནས་ཉོན་མོངས་པ་ཐམས་ཅད་རང་བཞིན་གྱིས་སྦྱང་ནས་ཡེ་ཤེས་མཐོང་པ་ནི་ལྔ་པ་སྦྱང་དཀའི་ས་ནོན་པའོ། །དེ་ནས་འོད་ལས་ཐལ་བའི་སྐུ་མངོན་དུ་གྱུར་པ་དེ་ནི་ས་དྲུག་པ་མངོན་དུ་གྱུར་བའི་ས་ནོན་པའོ། །དེ་ནས་གོམས་པ་མཐར་ཕྱིན་ནས་ཉོན་མོངས་པ་རིང་དུ་སོང་བ་ནི་ས་བདུན་པ་རིང་དུ་སོང་བའི་ས་ནོན་པའོ། །དེ་ནས་དེའི་ངང་ལས་མི་གཡོ་བ་ནི་བརྒྱད་པ་མི་གཡོ་བའི་ས་ནོན་པའོ། །དེ་ནས་ཡོན་ཏན་རྫོགས་པ་ནི་དགུ་པ་ལེགས་པའི་བློ་གྲོས་ཀྱི་ས་ནོན་པའོ། །དེ་ནས་ཡེ་ཤེས་ཀྱི་སྣང་བ་ལ་རང་གི་ཤེས་པ་ཟིན་ནས་སྣང་བ་ལྷུག་པར་ཤར་བ་ན་ཆོས་ཐམས་ཅད་སྤྲིན་ལྟ་བུར་མཐོང་ནས་གོམས་པ་ནི་བཅུ་པ་ཆོས་ཀྱི་སྤྲིན་ལྟ་བུའི་ས་ནོན་པའོ། །དེ་ནི་གང་ཟག་བདེན་པ་མཐོང་བའི་སྦུབས་འདི་ཉིད་མ་བོར་བ་ལ་ས་ནོན་པའོ། །གང་ཟག་སྦུབས་བོར་བ་རྣམས་ཀྱིས་ནི་འདི་ལྟར་ནོན་པ་ཡིན་ཏེ། འཁྲུལ་སྣང་འགགས་ནས་ཚོམ་བུའི་སྣང་བ་ཤར་བ་ན་བཅུ་གཅིག་ཀུན་ཏུ་འོད་ཀྱི་ས་ནོན་པ་ཡིན་ནོ། །དེ་ནས་སྣང་བ་དེ་ལའང་མ་ཆགས་པར་ཕྱི་ནང་གི་ཆོས་ཐམས་ཅད་ཀྱིས་མ་གོས་པ་ནི་བཅུ་གཉིས་མ་ཆགས་པདྨ་ཅན་གྱི་ས་ནོན་པ་ཡིན་ནོ། །དེ་ནས་རང་གི་ཐུགས་ཀ་ནས་ཡེ་ཤེས་ཀྱི་ཟེར་ཐག་ཤར་ནས་ནམ་མཁའི་མཐོངས་ནས་འོད་ཀྱི་ཚོམ་བུ་ལྔ་འཁོར་ལོའི་ཚུལ་དུ་གནས་པ་ནི་བཅུ་གསུམ་ཡི་གེ་འཁོར་ལོ་ཚོགས་ཆེན་གྱི་ས་ནོན་པའོ། །དེ་ནས་ཡེ་ཤེས་ཀྱི་སྣང་བ་ལ་གནས་པ་ནི་ས་བཅུ་བཞི་པ་ཏིང་ངེ་འཛིན་ཆེན་པོའི་ས་ནོན་པ་ཡིན་ནོ། །དེ་ནས་ལྷུན་གྲུབ་ཀྱི་ས་ལ་ངེས་པ་རྙེད་པ་ནི་བཅོ་ལྔ་པ་རྡོ་རྗེ་འཛིན་གྱི་ས་ཐོབ་པའོ། །དེ་ནས་ཀ་དག་གི་ས་ལ་ཡེ་ཤེས་ལྷུག་པར་ཤར་ནས་དེའི་གོང་ན་གཞན་མེད་པ་ནི་བཅུ་དྲུག་ཡེ་ཤེས་བླ་མའི་ས་ཐོབ་པའོ། །ཞེས་གསུངས། ༈ འདིར་གདམས་ངག་ཁྱད་པར་དུ་འཕགས་པའི་གནད་ཀྱིས་རླུང་རང་ཞིར་འཇོག་པ་ལས་རྩ་འདབ་སོ་སོའི་རླུང་རང་དག་ལ་སོང་དུས་ཀྱི་རྩའི་ཡེ་ཤེས་ཀྱི་རླུང་རང་ས་ནས་རང་གསལ་བས་དག་པ་ཡེ་ཤེས་ཀྱི་སྣང་བ་སྐུ་དང་། ཞིང་ཁམས་དང་འོད་ཀྱི་རང་བཞིན་ལས་མ་དག་པའི་འཁྲུལ་སྣང་འཆར་བའི་སྐབས་མེད་ཅིང་དབུ་མའི་འོད་ཀྱིས་རྩ་རྣམས་འཕེལ་བས་རྩ་མདུད་ཀྱི་རྣམ་པ་རྣམས་རིམ་གྱིས་འོད་དུ་ཡལ་བའི་ཡོན་ཏན་ལས་སའི་མངོན་རྟོགས་རྣམས་རང་སྣང་དུ་འཆར་རོ། །དེའང་རྩ་མདུད་དང་པོ་གཉིས་འོད་དུ་ཡལ་བས། ཕྱིར་སྣང་འོད་ཀྱི་ནང་དུ་སངས་རྒྱས་ཀྱི་ཞིང་ཁམས་བརྒྱ་ཕྲག་འཆར་ལ། དེ་དག་ཏུ་འོད་ཟེར་འགྱེད་པ་དང་། རང་སྣང་དུ་འདུས་པས་བགྲོད་པ་དང་། ལུས་འགུལ་བས་ཞིང་བརྒྱ་གཡོ་བ་དང་། ནང་དུ་ཆོས་ཉིད་མི་རྟོག་པའི་ཏིང་ངེ་འཛིན་བརྒྱ་ལ་འཇུག་ཅིང་ལྡང་བས་མཚོན་བརྒྱ་ཕྲག་བཅུ་གཉིས་ཀྱི་ཡོན་ཏན་ཁྱད་པར་ཅན་འཆར་བ་ལ་སོགས་པ་ཐུན་མོང་མ་ཡིན་པའི་ཉམས་རྟོགས་གོང་དུ་འཕེལ་བའི་མངོན་རྟོགས་ཁྱད་པར་འཕགས་པ་རང་སྣང་ལ་རྩོལ་མེད་དུ་འཆར་བར་འགྱུར་རོ། ༈ །དེ་ཡང་སྣང་བའི་འཆར་ཚུལ་དང་སྦྱར་ན། དེ་ལ་སྣང་བའི་ས་བཅུ་དྲུག་གི་ངོ་བོ་ནི། ཆོས་ཉིད་མངོན་སུམ་ཀྱི་སྣང་བ་མཆེད་པ་མིག །ཉེ་བར་མཆེད་པ་མིག་གི་དེ་ཁོ་ན་ཉིད། ཐོབ་པ་ལུ་གུ་རྒྱུད་མཐོང་བ་ཉེ་བར་ཐོབ་པ། དེ་ལ་གོམས་པ་རྙེད་པ་ཉམས་གོང་འཕེལ་གྱི་སྣང་བ་མཆེད་པ་འོད། ཉེ་བར་མཆེད་པ་ཐིག་ལེ། ཐོབ་པ་ཐིག་ལེ་ཁ་དོག་ལྔར་གསལ་བ། ཉེ་བར་ཐོབ་པ་འགུལ་བ་འཕྲིག་པ་ལས་ཟེར་སྣ་ཚོགས་སུ་འཕྲོ་བ། ཚད་ཕེབས་ཀྱི་སྣང་བ་མཆེད་པ་སྐུ། ཉེ་བར་མཆེད་པ་ཡབ་ཡུམ་དུ་སྣང་བ། ཐོབ་པ་ཚོམ་བུ་ལྔ་ལྔ་དང་ལྡན་པ། ཉེ་བར་ཐོབ་པ་དཀྱིལ་འཁོར་རྫོགས་པ། ཟད་པ་ལ་སྣང་བ་མཆེད་པ་སྐུ་དང་ཡེ་ཤེས་ལ་མི་གནས་པ། ཉེ་བར་མཆེད་པ་སྟོང་པ་གཏད་མེད། ཐོབ་པ་བརྗོད་དུ་མེད་པ། ཉེ་བར་ཐོབ་པ་བལྟར་མེད་པའི་ཆོས་ཉིད་གང་དུའང་མ་གྲུབ་པ་དང་བཅུ་དྲུག་གོ།། ༼༈༽ ཉམས་གོང་འཕེལ་གྱི་སྐབས་སུ། ཡེ་ཤེས་ལྔའི་ཁ་དོག་གི་སྣང་བ་འཆར་བ་ནི། རྡོ་རྗེའི་རིགས་རྣམ་དག་པས་མེ་ལོང་ལྟ་བུའི་ཡེ་ཤེས་ཁ་དོག་དཀར་པོའི་རྣམ་པར་འཆར་བ། རྡོ་རྗེ་མི་བསྐྱོད་པའི་གདངས་དཀར་ལ་འཚེར་བ་འཆར་བའོ། །དེ་བཞིན་གཤེགས་པའི་རིགས་ཆོས་ཀྱི་དབྱིངས་ཀྱི་ཡེ་ཤེས་ཁ་དོག་མཐིང་ཀའི་སྣམ་བུ་དང་། རྣམ་པར་སྣང་མཛད་ཀྱི་གདངས་མཐིང་ག་གནག་པ་འཆར་བའོ། །རིན་པོ་ཆེའི་རིགས་མཉམ་པ་ཉིད་ཀྱི་ཡེ་ཤེས་ཁ་དོག་སེར་པོའི་སྣམ་བུ་ཅན་དང་། རིན་ཆེན་འབྱུང་ལྡན་གྱི་གདངས་རབ་ཏུ་སེར་བ་གསེར་ཞུན་ལྟ་བུར་འཆར་བའོ། །པདྨའི་རིགས་སོ་སོར་རྟོགས་པའི་ཡེ་ཤེས་ཁ་དོག་དམར་པོའི་སྣམ་བུ་དང་། སྣང་བ་མཐའ་ཡས་ཀྱི་གདངས་རབ་ཏུ་དམར་བ་བྱུ་རུའི་མདོག་ལྟ་བུར་འཆར་བའོ། །ལས་ཀྱི་རིགས་བྱ་བ་གྲུབ་པའི་ཡེ་ཤེས་ཁ་དོག་ལྗང་གུའི་སྣམ་བུ་དང་། དོན་ཡོད་གྲུབ་པའི་གདངས་རབ་ཏུ་ལྗང་གུ་ཨིནྟྲ་ནི་ལའི་རྣམ་པ་ལྟར་འཆར་བའོ། །དེ་དག་གི་ཕྱི་རིམ་མཐིང་ག་རྡོ་རྗེའི་ར་བས་ཀུན་ནས་བསྐོར་བ་ནི་ཡེ་ཤེས་དེ་དག་ཐ་དད་པ་མ་ཡིན་པའོ། །སོ་སོས་གཙོ་བྱས་པའི་ཁ་དོག་ལྔ་ལྔར་གསལ་བ་ནི་རིགས་དང་རིགས་ཀྱི་ཁྱད་པར་ལས་བྱུང་བའོ། །དབྱིངས་ཀྱི་སྣང་བ་ནི་མེ་ལོང་ལྟ་བུ་གྱེན་འགྲེང་དུ་སྣང་བ། མཉམ་པ་ཉིད་ཀྱི་རྩིབ་ཤར་དུ་འབྱུང་བ། སོ་སོར་རྟོགས་པའི་གྲུ་ཆད་དུ་སྣང་བ། བྱ་བ་གྲུབ་པའི་རེ་ལྡེའི་རྣམ་པ་ཙམ་དུ་སྣང་བ། ཆོས་དབྱིངས་ཡེ་ཤེས་ཡུལ་གྲུ་ཙམ་དུ་སྣང་བའོ། །ཡེ་ཤེས་ལྔ་ཡི་དབྱིབས་ཀྱི་སྣང་བ་འཆར་ཏེ། མེ་ལོང་ལྟ་བུའི་དབྱིབས་མིག་ཚགས་ཀྱི་རྣམ་པ་དང་འདྲ་བ། དེ་ལ་གོམས་པ་ལ་མིག་མང་རིས་སུ་འཆར་བ། མཉམ་ཉིད་དྲྭ་བ་ཕྱེད་པར་འཆར་བ་དེ་ལ་གོམས་ན་དྲྭ་བར་སྣང་བའོ། །སོ་སོར་རྟོག་པའི་མེ་ཏོག་གི་ཚོམ་བུར་འཆར། དེ་ལ་གོམས་ན་པདྨ་སྟོང་ལྡན་དུ་འཆར་བའོ། །བྱ་བ་གྲུབ་པའི་མཚོན་ཆ་ལྟ་བུར་འཆར་བ། དེ་ལ་གོམས་ན་འཁོར་ལོ་ལ་སོགས་པའོ། །ཆོས་དབྱིངས་ཡེ་ཤེས་མཁར་ཐབས་སུ་འཆར་བ་ནི་གཞལ་ཡས་ཁང་ཉེ་བར་མཚོན་པའོ།། ༼༈༽ སྔོན་ཡུལ་མ་གྷ་དྷ་ན། ཚོས་མཁན་ཀོའུ་རི་མ་བྱ་བ་ཞིག་གྲོང་མཐར་ལོ་མའི་སྤྱིལ་བུ་ན་ཚོས་བྱེད་པ་ན་ཚོས་སྣོད་ཀྱི་ཁ་ཤིང་ལོས་བཀབ་ནས་མེ་ཏོག་བཏུར་སོང་ཤུལ་དུ་ཝ་མོ་ཞིག་དེར་འོང་ནས་ཚོས་སྣོད་ཀྱི་སྟེང་དུ་སོང་བས་ནང་དུ་ལྷུང་བས་སྤུ་ཚོས་ཀྱིས་བསྒྱུར་བས་དུར་ཁྲོད་དུ་སོང་ནས་སྤྱང་ཀི་ལ་ཁོ་མོ་ལྷ་ཡུལ་ཀྱི་རི་དྭགས་ཤ་ར་ཎ་ཡིན་ནོ། །ཞེས་རྫུན་སྨྲས་པས་སྤྱང་ཀིས་གཅན་ཟན་ཐམས་ཅད་ལ་དེའི་བསྔགས་པ་བརྗོད་པས་གྲགས་པའི་རྗེས་སུ་འབྲངས་ནས་གཅན་ཟན་ཐམས་ཅད་དེའི་འཁོར་དུ་གྱུར་ཏོ། །ཝ་མོ་དེའི་མས་སྨྲས་པ། ཀྱེ་བུ་མོ་ཚོད་མའི་ཆུ་ལ་ཁྲུས་བྱས་ནས། །དམན་པའི་ས་ལ་གནས་ན་བདེ། །རྒྱུད་ངན་པགས་པས་ང་རྒྱལ་བ། །ཡུན་དུ་འགྲོགས་ན་ཕུང་བར་ངེས། །ཞེས་བགོས་ཀྱང་མ་ཉན་ནོ། །ཝ་མོ་སེང་གེས་ཁུར་ནས་སོང་བ་ན་མོས་སྐད་བཏོན་པས་སེང་གེས་ཝ་ཡིན་པར་ཤེས་ནས་ཁྲོས་ཏེ་སྐད་བསྒྲགས་པས་མོ་བརྒྱལ་ནས་ས་ལ་ལྷུང་བ་དང་། གཅན་གཟན་ཐམས་ཅད་ཀྱིས་འདིས་བདག་ཅག་བསླུས་སོ་ཞེས་ཝ་མོའི་སྤུ་ཐམས་ཅད་བཏོགས་ཏེ་སྡུག་བསྔལ་བར་བྱས་སོ། །ལྷ་ཞིག་གིས་སྨྲས་པ། སེམས་ཀྱི་སྟོབས་ཀྱིས་མི་འགྲོ་ཞིང་། །པགས་པས་ང་རྒྱལ་འགྲོ་བྱེད་པ། །རྒྱུན་དུ་བདེ་བར་མ་གྱུར་ཏེ། །སྤུ་དང་བྲལ་བས་ཝ་རྫུན་ཕུང་། །ཞེས་སོ། ༈ །མཁན་པོ་ཨ་ངག་གིས། སྔོན་མི་ཡུལ་དུ་རི་དྭགས་ཤ་ར་ཎ་ཡོད་པ་དེ་ཉིད་འགྲོ་བའི་དུས་རྐང་ལག་གིས་སྲོག་ཆགས་རྣམས་བརྗི་བར་དོགས་ནས་སྣ་ནས་རླུང་ཆེན་པོས་བསལ་ཏེ་འགྲོ་བ་ཡིན་ཞེས་གསུངས། ༼༈༽རིག་པ་ཚད་ཕེབས་བཤད་པའི་སྐབས། ཐེག་མཆོག་མཛོད་ལས། དེའང་སྣང་བ་གོང་མ་གཉིས་སུ་ཉོན་ཡིད་དང་ཡིད་ཤེས་ཀྱི་དྲི་མ་མངོན་གྱུར་སྦྱངས་ནས། འདི་ཐོབ་པའི་ཚེ་ཚོགས་བརྒྱད་ཀྱི་དང་པོ་བདུན་དག་པས། ཕྲ་རགས་ཀྱི་དྲི་མ་ལས་གྲོལ་ཞིང་། ལུས་སེམས་ཀྱི་འབྲེལ་ཆོད་པའོ། །ཞེས་དང་། ཕྲ་རགས་འགྱུ་བའི་སེམས་དག་ཀྱང་། ཀུན་གཞིའི་རྣམ་ཤེས་ཙམ་གྱི་སེམས་ཡོད་གསུངས། ༈ མཐོང་ནས་གོམས་པར་བྱས་པས། ཉམས་གོང་འཕེལ་ལ་སོགས་པའི་སྣང་བ་མ་སྐྱེས་པར་ཟད་པ་ཡང་ཡོད་དེ། འདི་ནི་བློ་མཆོག་ཅིག་ཆར་པ་ཞེས་བྱའོ། །དེའང་སྔོན་དུ་སྦྱངས་པའི་ལས་འཕྲོ་ཅན་བླ་མ་ལ་གུས་པ་གཞན་ལས་ཆེ་བ་རེ་རེ་ཙམ་གྱི་ཟད་ལུགས་ཏེ་སྲིད་པ་ཙམ་མོ། །ཞེས་དང་། ངེས་ཚིག་སྐབས། ཆོ༵ས་ཞེས་པ་ལུས་ངག་སེམས་ཀྱི་ཚོགས་པའི་ཆོས་ཉོན་མོངས་དང་བཅས་པ་ཡིན་ལ། ཉིད༵་ནི་དེ་སྦྱོང་བྱེད་ལམ་གྱི་སྣང་བ་འོད་གསལ་བསྒོམ་པའི་ཆ་དང་བཅས་པ་སྟེ། ཟད༵་པ༵་ནི་སྟོང་པ་སྟེ། བློའི་སྒོམ་པ་ཡུལ་སྣང་དང་བཅས་པ་རང་ལོག་ནས་མེད་ལ། མི་དམིགས་པ་ཞེས་བྱ་གསུངས། ཐལ་འགྱུར་ལས། སྐུ་དང་ཡེ་ཤེས་མེད་པ་དང་། །ཆོས་རྣམས་ཟད་པའི་སར་ཕྱིན་པ། །འབྲས་བུའི་ཆོས་ཉིད་ཡིན་པར་འདོད། །ཅེས་ཚིག་འདི་གསུམ་ལ་འཁྲུལ་ནས། འབྲས་བུའི་ཀ་དག་ལ་སྐུ་དང་ཡེ་ཤེས་མེད་པར་འདོད་པའི་སྙིང་ཏིག་པ་བྱུང་བས། དེ་ནི་ནོར་བ་ཆེན་པོ་སྟེ། ཕྱི་སྣང་གདངས་ཀྱི་སྐུ་དང་ཡེ་ཤེས་ཤེལ་འོད་ནང་དུ་ལོག་པ་ལྟ་བུའི་ཆ་ལ་དེ་སྐད་གསུངས་པ་དེའི་དགོངས་པ་མ་ལོན་པར་ཟད་དོ། །དོན་ལ་ནང་དབྱིངས་སུ་མེད་ན་ལྷུན་གྲུབ་དང་འགལ་བ་དང་། འདུས་མ་བྱས་ཡིན་པས་ཕྱིས་མེད་གཏན་བརླག་ཏུ་སོང་༷བ་དང་འགལ་བ་དང་། ཡང་དབྱིངས་ལས་སྐུ་དང་ཡེ་ཤེས་ཀྱི་འཆར་གཞི་ལས་སེམས་ཅན་གྱི་དོན་འབྱུང་བ་དང་འགལ་བ་དང་། ཀུན་ཏུ་བཟང་པོ་གཞིའི་དབྱིངས་དག་པ་མཐར་ཕྱིན་ནས་སེམས་ཅན་དང་སངས་རྒྱས་ལ་ལམ་སྟོན་པའི་ཐུགས་རྗེ་དང་མཛད་པ་བསྟན་པ་དང་འགལ་བ་ལ་སོགས་པ་སྐྱོན་དུ་མ་ཡོད་པས་ཉེས་ཆ་དེ་ལྟ་བུ་ཁས་བླང་བར་མི་འོས་སོ། །ཞེས་གསུངས། ༈ ཚིག་དོན་མཛོད་ལས། ལུས་སེམས་འབྲེལ་བ་ཆོད་པའི་ཚད་ནི་ལུས་རྡོས་པ་དག་པས་རྩ་རླུང་དག །དེ་དག་པས་གློ་བུར་དུ་འདུས་པའི་ལུས་སེམས་གཉིས་ཀྱི་ཚོགས་པ་ཞིག་པས་འབྲེལ་ཆད་པའོ། །ཕྲ་བ་རིག་པའི་ཆ་ལ་བག་ལ་ཉལ་བ་ཙམ་གྱི་སེམས་དེ་ཉིད་སྐར་མདའ་འཕྲོ་བ་ལྟར་སྐད་ཅིག་རེ་ཤར་ཡང་དབྱིངས་སུ་ཡལ་བས་ཀུན་ནས་ལྡང་བའི་ལས་རྒྱུན་ཆོད། འདིར་འཁོར་བ་བསྐྱེད་ཅིང་འཇུག་པའི་ལུས་ངག་སེམས་གསུམ་གྱི་ཚོགས་པ་མངོན་གྱུར་ལོག་ནས་ཤིན་ཏུ་ཕྲ་བ་བག་ལ་ཉལ་ཙམ་ཡོད་པའི་ཆ་ལས་སྐར་མདའ་རྒྱུག་པའི་ཆ་ཙམ་དུ་བྱུང་སྟེ། སྣང་ཆ་གཉིས་པོ་དེ་འཛིན་པའི་དུས་སོ། །ཞེས་དང་། དེ་ཡང་རིག་པ་ཕྲ་བའི་རླུང་མེ་སྟག་ཏུ་འཕྲོ་བ་ལྟ་བུ་དེས་སེམས་ཕྲ་བ་དེའི་རྟ་བྱས་ནས་འཁོར་བའི་སྣང་ཆ་མཐོང་བ་མ་འགགས་པའི་རྟེན་བྱེད་ལ། རིག་པ་དངོས་ལ་ཡེ་ཤེས་ཀྱི་རང་གདངས་ཡོད་པའི་ཆས་མྱ་ངན་ལས་འདས་པའི་མཐོང་ཆ་མ་འགགས་པས་སྣང་བ་གཉིས་འཛིན་པ་སྟེ། རྒྱང་ཞགས་ཀྱིས་གཉིས་ཀྱི་ཆ་འཛིན་པ་དང་གཅིག་པར་སྣང་ངོ། །དེ་ཡང་ལྷུན་གྲུབ་ཀྱི་སྒོ་ཡོད་པའི་ཆ་ལས་ཤར་བ་ཡིན་ནོ། །ཞེས་དང་། ཐེག་མཆོག་མཛོད་ལས། དེའང་སྣང་བ་གོང་མ་གཉིས་སུ་ནི་ཉོན་ཡིད་དང་ཡེ་ཤེས་ཀྱི་དྲི་མ་མངོན་གྱུར་སྦྱངས་ནས། འདི་ཐོབ་པའི་ཚེ་ཚོགས་བརྒྱད་ཀྱི་དང་པོ་བདུན་དག་པ་ནས། ཕྲ་རགས་ཀྱི་དྲི་མ་ལས་གྲོལ་ཞིང་། ལུས་སེམས་ཀྱི་འབྲེལ་ཆོད་པས། ཕྱི་སྣང་བའི་ཡུལ་རིག་པ་ལ་སྣང་ཞིང་། དཔྱོད་བྱེད་རྣམ་ཤེས་ཀྱི་ཆ་ཀུན་གཞིའི་རྣམ་པར་ཤེས་པའི་དབང་པོས་བདག་རྐྱེན་བྱེད་པ་ནི། སྐར་མདའ་ནམ་མཁའ་ལ་རྒྱུག་པའི་ཚོད་ཙམ་དུ་སྐད་ཅིག་མ་ལ་དཔྱོད་བྱེད་རང་ཤར་བ་དེ་རང་གྲོལ་བས་གཉེན་པོ་ལ་སོགས་པ་ལ་མི་ལྟོས་པར་དག་པ་ནི། སྣང་བ་གོང་མ་གཉིས་ཀྱི་དུས་སུ་རླུང་ཕྱིར་འཕང་ཞིང་ནང་དུ་མ་བཟུང་བས། རྟོག་པ་སྐད་ཅིག་གཉིས་པར་མི་སྡོད་པའི་རྩལ་འབྱོངས་པ་ལས་བྱུང་སྟེ། ལུས་ཟང་ཐལ་ལ། རྣམ་ཤེས་ཀུན་གཞིའི་ཆ་རྟོག་མེད་ཡུལ་རིག་པ་མེ་སྟག་འཕྲོ་བ་བཞིན་གསལ་དྭངས་པ། ཕྱིར་སྣང་ཞིང་སྣང་དང་། ནང་དུ་རང་སྣང་གི་སྣང་ཆ་གཉིས་མཐོང་བས་ལུས་སེམས་འབྲེལ་ཆད་དེ། ཁམས་གསུམ་དུ་ཕྱིར་མི་ལྡོག་པའི་ས་མཆོག་དཀྱིལ་འཁོར་ཆེན་པོར་གྲུབ་པའོ། ཞེས་དང་། འདིའི་དུས་སུ་མཐོང་བྱེད་ཀྱང་ཀུན་གཞིའི་རྣམ་པར་ཤེས་པའི་ཆ་སྐར་མདའ་འམ་མེ་སྟག་འཕྲོ་བ་ལྟ་བུ་དང་། རིག་པའི་ཐུགས་རྗེ་ཤེས་རབ་ཀྱི་ཆ་གཉིས་ཡོད་པས། མཐོང་བྱ་ཕྱི་ནང་གཉིས་མཐོང་བའི་ཤེས་པའི་ཆར་བྱུང་བའོ། །འདིའི་དུས་སུ་གཉེན་པོས་ཆེད་དུ་ལྟ་སྟངས་འཆའ་བ་ལ་སོགས་པ་མེད་དེ་རྟག་ཏུ་ཆོས་ཉིད་ཀྱི་འཁོར་ལོ་ལས་མི་འདའ་བས། ཉམས་ལེན་གྱི་ཚད་རྫོགས་པ་ཞེས་བྱའོ།། ༼༈༽ མི་ཕམ་རིན་པོ་ཆེས། དེ་ལྟར་ཉམས་སུ་བླང་བ་མཐར་སོན་པས་འཁྲུལ་སྣང་གི་རྐྱེན་ཟད་པར་སྤངས་ནས། གཡོ་བྱེད་ཀྱི་རླུང་ཡང་འགགས་ཏེ་ཡུལ་དང་ཡུལ་ཅན་དུ་སྣང་བ་མ་ལུས་པ་ཟད་དེ། ནང་དབྱིངས་གཞོན་ནུ་བུམ་པ་སྐུ་གཞི་ལས་འཕགས་པ་གཞི་སྣང་ཟུང་འཇུག་གདོད་མའི་དབྱིངས་སུ་མངོན་པར་བྱང་ཆུབ་པ་སྟེ། ཆོས་ཉིད་ཀྱི་དབྱིངས་སུ་ཆོས་ཅན་མཐའ་དག་ཟད་པ་ལ་ཆོས་ཉིད་ཟད་པར་ཞེས་པའི་བར་གྱི་ཐ་ཚིག་མི་མངོན་པའམ་ཡང་ན་ཟད་པ་སྟེ་རྫོགས་པ་མཐའ་དག་སྟེ། ཆོས་ཉིད་ཀྱི་དབྱིངས་འབའ་ཞིག་ཏུ་རྩལ་རྫོགས་པ་ལ་ཆོས་ཉིད་ཟད་པ་ཞེས་བྱའོ། །ཞེས་གསུངས། ཐེག་མཆོག་མཛོད་ལས་ཟད་ལུགས་ནི། རིམ་གྱིས་དང་། ཅིག་ཆར་གཉིས་ལས། རིམ་གྱིས་ཟད་པ་ནི་སྣང་བ་བཞི་ཚད་དུ་ཕྱིན་པའི་དུས་སོ། །ཅིག་ཆར་ཟད་པ་ནི་དང་པོ་ཆོས་ཉིད་མངོན་སུམ་མཐོང་ནས་བསྒོམས་པར་བྱས་པས། ཉམས་གོང་འཕེལ་ལ་སོགས་པའི་སྣང་བ་མ་སྐྱེས་པར་ཟད་པ་ཡང་ཡོད་དེ། འདི་ནི་བློ་མཆོག་ཅིག་ཅར་པ་ཞེས་བྱའོ། །དེའང་སྔོན་དུ་སྦྱངས་བའི་ལས་འཕྲོ་ཅན་བླ་མ་ལ་གུས་པ་གཞན་ལས་ཆེ་བ་རེ་རེ་ཙམ་གྱི་ཟད་ལུགས་དེ་སྲིད་པ་ཙམ་མོ། །ཞེས་དང་། ངེས་ཚིག་སྐབས། ཆོས་ཞེས་པ་ལུས་ངག་སེམས་ཀྱི་ཚོགས་པའི་ཆོས་ཉོན་མོངས་པ་དང་བཅས་པ་ཡིན་ལ། ཉིད་ནི་དེ་སྦྱོང་བྱེད་ལམ་གྱི་སྣང་བ་འོད་གསལ་བསྒོམ་པའི་ཆ་དང་བཅས་པ་སྟེ། ཟད་པ་ནི་སྟོང་པ་སྟེ། བློའི་སྒོམ་པ་ཡུལ་སྣང་དང་བཅས་པ་རང་ལོག་ནས་མེད་ལ། མི་དམིགས་པ་ཞེས་བྱ་གསུངས། ཐལ་འགྱུར་ལས། སྐུ་དང་ཡེ་ཤེས་མེད་པ་དང་། །ཆོས་རྣམས་ཟད་པའི་སར་ཕྱིན་པ། །འབྲས་བུའི་ཆོས་ཉིད་ཡིན་པར་འདོད། །ཅེས་ཚིག་འདི་གསུམ་ལ་འཁྲུལ་ནས། འབྲས་བུ་ཀ་དག་ལ་སྐུ་དང་ཡེ་ཤེས་མེད་པར་འདོད་པའི་སྙིང་ཐིག་པ་བྱུང་བས། དེ་ནི་ནོར་བ་ཆེན་པོ་སྟེ། ཕྱིར་སྣང་གདངས་ཀྱི་སྐུ་དང་ཡེ་ཤེས་ཤེལ་འོད་ནང་དུ་ལོག་པ་ལྟ་བུའི་ཆ་ལ་དེ་སྐད་གསུངས་པ་དེའི་དགོངས་པ་མ་ལོན་པར་ཟད་དོ། །དོན་ལ་ནང་དབྱིངས་སུ་མེད་ན་ལྷུན་གྲུབ་དང་འགལ་བ་དང་། འདུས་མ་བྱས་ཡིན་པས་ཕྱིས་མེད་གཏན་བརླག་ཏུ་སོང་བ་དང་འགལ་བ་དང་། ཡང་དབྱིངས་ལ་སྐུ་དང་ཡེ་ཤེས་ཀྱི་འཆར་གཞི་ལས་སེམས་ཅན་གྱི་དོན་འབྱུང་བ་དང་འགལ་བ་དང་། ཀུན་ཏུ་བཟང་པོ་གཞིའི་དབྱིངས་དག་པ་མཐར་ཕྱིན་ན་སེམས་ཅན་དང་སངས་རྒྱས་ལ་ལམ་སྟོན་པའི་ཐུགས་རྗེ་དང་མཛད་པ་བསྟན་པ་དང་འགལ་བ་ལ་སོགས་པ་སྐྱོན་དུ་མ་ཡོད་པས་ཉེས་ཆ་དེ་ལྟ་བུ་ཁས་བླང་བར་མི་འོས་སོ། །ཞེས་གསུངས། ༼༈༽ ཐེག་མཆོག་མཛོད་ལས། ཚད་ཕེབས་ཡོལ་ནས་ཟད་པའི་མགོ་རྩོམ་དུས་ན་རང་གི་རྐང་ལག་བཞིའི་སོར་མོ་འོད་ལྔར་གསལ་བ་ཙམ་ཡོད་པས། སྐབས་འདི་ནས་ནང་དབྱིངས་སུ་ཕར་འཇུག་པ་དང་། ཕྱིར་སྣང་དུ་ཚུར་ལྡོག་པའི་ས་མཚམས་ཡོད་དེ། དེའང་སྐུའི་རྣམ་པ་དེས་ད་རེས་སེམས་ཅན་གྱི་དོན་དངོས་སུ་རྒྱ་ཆེར་མི་འབྱུང་ན། སོར་མོའི་འོད་ལ་རིག་པ་གཏད་པས་ཕྱི་སྣང་དང་། རང་ལུས་ཀྱི་འོད་གསལ་རྣམས་ནང་དབྱིངས་སུ་ཇེ་ཐིམ་ལ་འགྲོ་ཞིང་། ཐད་ཀའི་དངོས་སྣང་མཐིང་ཁ་དག་པ་ཙམ་ལས། འོད་ལུས་སུ་ཡལ་བ་ཤེལ་འོད་ནང་དུ་ཐིམ་པ་ལྟར། ལུས་དང་སྣང་བའི་རང་གདངས་ཀྱང་ལོག་སྟེ་ནང་གསལ་ལྷུན་གྲུབ་རིན་པོ་ཆེའི་སྦུབས་ན་སྐུ་དང་ཡེ་ཤེས་ཀྱི་གཏིང་གདངས་ཙམ་ལ་རིག་པ་བཞུགས་ནས། ཕྱི་སྣང་མཐིང་གར་སྣང་བའི་ཆ་ཙམ་ཡང་མེད་པར། ཤེལ་གོང་རང་དངོས་སུ་གྲིབ་མ་ལ་གནས་པ་བཞིན། རིག་པ་ཆོས་སྐུར་སངས་རྒྱས་ཏེ་འཁྱིལ་བའོ། །ཕྱིར་སྣང་དུ་ཚུར་ལོག་ན་སྐུ་དེས་སངས་རྒྱས་ཀྱི་མཛད་པ་དང་མཚུངས་པ་འགྲུབ་པའི་རྟགས་ཏེ། དེའང་སྐྱེ་བ་དང་འཇུག་པ་ལ་དབང་བ་ལས་རིག་པ་སེམས་ཅན་ལ་ཐུགས་རྗེས་གཏད་པས་ཅི་ཡང་མེད་པ་ཀ་དག་གི་སྣང་བ་དེ་རང་ལོག་ནས། འཁྲུལ་སྣང་གི་སྣང་བ་འདི་མེ་ལོང་གི་གཟུགས་བརྙན་ལྟར་སྣང་ཞིང་། རང་གི་སྐུ་དེ་ཡང་ཆུའི་ཟླ་བ་ལྟར་ཡེ་ཤེས་སྒྱུ་མའི་སྐུར་རང་སྣང་ལ་ཟང་ཐལ་བས་འབྱུང་བའི་གནོད་པ་དང་བྲལ་ཞིང་རྡོ་རྗེའི་སྐུ་ཐོབ་པ་སྟེ། སེམས་ཅན་གྱི་དོན་དུ་འཕོ་བ་ཆེན་པོའི་སྐུར་བཞེངས་པ་ཞེས་བྱའོ། །ཞེས་གསུངས། ༈ ཨ་ཏི་ཟབ་དོན་ལས། ད་དུང་ཉམས་ལེན་དེ་དང་འབྲལ་མེད་བྱས་པས༔ རང་གི་ཤ་ནི་འོད་སེར་པོར་འགྱུར་རོ༔ ཁྲག་ནི་འོད་དཀར་པོ༔ དྲོད་ནི་དམར་པོ༔ དབུགས་ནི་ལྗང་གུ༔ སེམས་ནི་སྐྱེ་མེད་དུ་ཡལ་ལ༔ འདི་དུས་སྐྱེ་བ་ལ་རང་དབང་ཐོབ་པས་སེམས་ཅན་གྱི་དོན་དུ་བསམ་བཞིན་སྐྱེ་བ་སྣ་ཚོགས་སུ་སྟོན༔ རླུང་ལ་རང་དབང་ཐོབ་པས་འབྱུང་བ་ལྔ་ལ་དབང་བསྒྱུར་ནུས༔ སེམས་ལ་དབང་ཐོབ་པས་སྐུ་གསུང་ཐུགས་ཡོན་ཏན་ཕྲིན་ལས་རྣམ་པ་ལྔ་ལྔར་ལོངས་སྤྱོད༔ འོད་ཀྱི་ནང་ན་ལག་སོར་བཀྲམ་པ་ཙམ་ལས་མི་སྣང་ལ༔ དེ་ལ་སྣང་བ་གཏད་ཅིང་བཞག་པས༔ སྣང་བ་ཚུར་ལོག་སྟེ་འཕོ་བ་ཆེན་པོའི་སྐུ་སྐྱེ་འཆི་བྲལ་བ་རྡོ་རྗེའི་སྐུ་ཐོབ་ནསཿ སེམས་ཅན་གྱི་དོན་རྒྱ་ཆེན་པོ་འགྲུབ་པར་འགྱུར་རོ༔ འདི་དུས་ལུས་དུར་ཁྲོད་ཀྱི་རོ་ལྟར་ལུས་ཉམ་ང་བྲལ་བ་སོགས་རྟགས་རྣམས་རྫོགས༔ འགྲོ་བ་གཟུགས་ཅན་ནམ་གཟུགས་མེད་མང་པོ་ལ་རང་གི་རིག་པ་བཅུག་པས་སྐད་ཅིག་མ་ཉིད་ལ་སེམས་ཅན་གྲངས་མེད་པ་གྲོལ་བར་བྱེད་ལ༔ རང་ཉིད་ཀྱང་གཞན་ངོར་སྣང་བ་དང་མི་སྣང་བའི་ཚུལ་མཐའ་ཡས་པའི་སྒོ་ནས་སེམས་ཅན་གྱི་དོན་བྱེད་ད༔ གལ་ཏེ་འགྲོ་བའི་དོན་མི་མཛད་ན༔ ལག་སོར་གྱི་འོད་ལ་ལྟ་བ་སྤངས་ཏེ༔ འོད་གསལ་གྱི་ངང་ལ་མ་གཡོས་པར་བཞག་པས་ལག་སོར་ཡང་དེ་ཉིད་དུ་ཡལ་ཏེ༔ སྣང་བ་ཕྱིའི་འོད་གསལ་དངཿ ཕུང་པོ་ནང་གི་འོད་གསལ་དང༔ རིག་པ་གསང་བའི་འོད་གསལ་གསུམ་དབྱེར་མེད་བློ་འདས་བྲི་གང་མེད་པར་འདྲེས་ནས༔ སངས་རྒྱས་གཞོན་ནུ་བུམ་པ་སྐུའི་ཞིང་ཁམས་སུ་ཆོས་ཀྱི་སྐུར་འཕོ་འགྱུར་མེད་པར་འཚང་རྒྱའོ༔ ཞེས་དང་། དཔལ་སྤྲུལ་རིན་པོ་ཆེས། སྤྱིར་འོད་གསལ་གྱི་སྣང་བཞི་ལ། ཐོད་རྒལ་དུ་ལུགས་འབྱུང་དང་། ཁྲེགས་ཆོད་དུ་ལུགས་ལྡོག་གཉིས་དང་། རྫོགས་པ་ཆེན་པོའི་སྐུ་གསུམ་ལམ་སྣང་དུ་བཞེད་པ་ལའང་། རང་སྣང་ཡེ་ཤེས་ཀྱི་ལམ་དུ་ལུགས་ལྡོག་དང་། གཞན་སྣང་ཐུགས་རྗེའི་ངོས་ནས་ལུགས་འབྱུང་གཉིས་ལས། འདིར་ཕྱི་མ་གཉིས་ལྟར་བཤད་ན། སྤྲོས་བྲལ་རིག་པའི་ཡེ་ཤེས་ཆོས་ཉིད་ཟད༵་པའི༵་དགོངས་པ་རང་གནས་ཀ་དག་གི་གནས་ལུགས་ཡེ་ཇི་བཞིན་པའི་རྟོགས་པ་ནི་ཆོས་སྐུའི་ཡེ་ཤེས་ཡིན་ལ། དེ་ཉིད་བསྒོམ་མེད་ངང་གནས་ཀྱི་བསྒོམས་པས་ཚད་ལ་ཕེབས༵་ཏེ་རིག་པ་ཡེ་ཤེས་ཀྱི་རྣམ་རོལ་ལྷག༵་པར༵་རྒྱས༵་པ་ནི། མེ་ལོང་ལ་སོགས་པ་ཡེ་ཤེས་བཞིའི་ངོ་བོ་ཡིན་པས་ལོངས་སྐུའི་དཀྱིལ་འཁོར་ཐམས་ཅད་ཀྱི་འཆར་གཞི་ཡིན། རྟོགས་པ་མངོན༵་སུམ༵་གྱི་ཡེ་ཤེས་དེ་ཉིད་ཐུགས་རྗེའི་རྩལ་རྫོགས་ཏེ་ཅི་སྣང་ཡེ་ཤེས་ཀྱི་ངང་ལས་མི་འདའ་བཞིན་ཏུ་སངས་རྒྱས་ཀྱི་མཛད་པས་འགྲོ་བ་འདུལ་བ་ཇི་ལྟ་དང་ཇི་སྙེད་མཁྱེན་པའི་ཡེ་ཤེས་ཀྱི་ངོ་བོ་སྤྲུལ་སྐུའི་སྣང་བ་ཡིན་ཞེས་གསུངས། ཆོས་དབྱིངས་མཛོད་འགྲེལ་ལས། རབ་དེས་ཁྲེགས་ཆོད་ཀྱི་སྣང་བཞི་གོ་བཟློག་ནས་རྟགས་ཚད་ལ་ཕེབས་པ་སྟེ། དེའང་དང་པོ་རིག་པ་ཀ་དག་རྗེན་པ་ཆོས་ཉིད་ཟད་པའི་སྣང་བ་རང་ངོ་ཤེས་པ། ཆོས་སྐུའི་རྒྱལ་པོའི་དགོངས་པ་དེ་འདུ་འབྲལ་མེད་པར་སྐྱོང་དུས། གཅིག་དང་དུ་མའི་མཐའ་ལས་གྲོལ་བའི་རིག་པ་ཟང་ཐལ་དུ་ཚད་ལ་ཕེབས་པ་སྟེ། ཕྱི་ནང་གི་རྐྱེན་སྣ་ཚོགས་ཆོས་ཉིད་དུ་གྲོལ་བའི་ངང་ལས་མི་འདའ་བར་བསྐྱངས་པས། དགག་སྒྲུབ་དང་ཉོན་མོངས་དང་རྟོག་པ་རང་དག་རང་ཟད་ནས་ཉམས་ཕྱོགས་མེད་དུ་རང་ཤར་འཛིན་མེད་རང་གར་རྒྱ་གྲོལ་དུ་ཤར་ནས། མཐར་འགྱུར་གྱི་ཉམས་ཟད་དེ་རིག་པ་དང་པོའི་གཞི་ལ་ཕེབས་དུས། ཆོས་ཉིད་མངོན་གསུམ་གྱི་སྣང་བ་ཐད་ཀར་ཤར་བས། དང་པོའི་ཀ་དག་ལ་རྗེན་པར་རང་ཐོག་ན་གནས་པའོ། །ཞེས་དང་། དེ་ཉིད་ལས། ལམ་ལྔ་ནི། ཡེ་ཤེས་ལྔའི་སྣང་བ་མཚོན་པ་ལས། ཆོས་དབྱིངས་ཡེ་ཤེས་ཀྱི་ལམ་སྤྲོས་བྲལ་དོན་གྱི་རང་ངོ་ཆོས་ཉིད་ཟད་པའི་སྣང་བ། དེ་ཉིད་ལས་མེ་ལོང་ཡེ་ཤེས་ཀྱི་ལམ་རྒྱ་ཆད་ཕྱོགས་ལྷུང་དང་བྲལ་བའི་རང་རིག་གསལ་གདངས་ཆེན་པོ་ཉིན་མཚན་གྱི་རྣལ་འབྱོར་རིག་པ་ཚད་ཕེབས་ཀྱི་སྣང་བ་དང་། དེ་ལས་མཉམ་ཉིད་ཡེ་ཤེས་ཀྱི་ལམ་ཉམས་ཀྱི་ཡོན་ཏན་གོང་དུ་འཕེལ་བའི་སྣང་བ་དང་། ཉམས་ལ་འཛིན་ཞེན་གྱི་མཐའ་དང་བྲལ་བའི་རང་སྣང་སོ་སོར་རྟོག་པའི་ཡེ་ཤེས་ཀྱི་ལམ་ཆོས་ཉིད་མངོན་སུམ་གྱི་སྣང་བ་སྟེ། རང་རིག་དང་པོའི་གཞི་ལས་མ་གཡོས་པར་བསྟན་པ་དང་། དེ་ལས་བྱ་བ་གྲུབ་པའི་ཡེ་ཤེས་ཀྱི་ལམ་རིག་པ་ཀ་དག་ཏུ་གྲོལ་བས་ཟང་ཐལ་རྗེན་པའི་ཆོས་ཉིད་རང་ངོ་ལ་གནས་པ་སྟེ། ཁྲེགས་ཆོད་ཀྱི་སྐབས་འདིར་ཐོད་རྒལ་ལས་གོ་ལྡོག་པར་བསྟན་པ་ཡང་། བི་མ་ལས། དེ་དག་ཡང་ནི་ལྡོག་པ་ཡིས། །རང་རིག་ཐོག་མའི་གཞི་ལ་སྐྱེལ། །ཞེས་གསུངས་པའི་དོན་ཏོ། །མཁའ་འགྲོ་ཡང་ཏིག་ལས། འོ་ན་ཀ་དག་གཅིག་པུས་ཀྱང་གྲོལ་ན༔ དེ་ལ་སྣང་བ་བཞི་ཇི་ལྟར་བརྩི་སྙམ་ན༔ དང་པོ་ཀ་དག་སྤྲོས་པ་དང་བྲལ་བའི་ཡེ་ཤེས་རང་ངོ་ཤེས་པ་ནི་ཆོས་ཉིད་མངོན་སུམ་གྱི་སྣང་བའོ༔ དེའི་ངང་ལ་གོམས་པས་ཕྱི་སྣང་བ་སྣ་ཚོགས་ལ་གཟུང་འཛིན་གྱི་བློ་མི་སྐྱེ༔ ནང་རྟོག་པ་སྣ་ཚོགས་ལ་འཕྲོ་འདུའི་སེམས་མི་འཇུག༔ གསང་བ་བདེ་གསལ་མི་རྟོག་པའི་ཉམས་བཟང་པོ་ཇེ་ཆེར་འཕེལ་ནས་ཉམས་གོང་འཕེལ་གྱི་སྣང་བ་ཞེས་བྱའ༔ དེའི་ངང་ལ་གོམས་པས་གཟུང་འཛིན་གཉིས་འཛིན་གྱི་རྟོག་པ་རང་སར་གྲོལ་ཏེ༔ འཛིན་མེད་མཐའ་གྲོལ་གྱི་རྟོགས་པ་མངོན་ཏུ་གྱུར་ནས༔ འཁོར་འདས་རེ་དོགས་དང་བྲལ་དུས༔ སྤྱན་དང་མངོན་ཤེས་དང༔ ཐུན་མོང་གི་དངོས་གྲུབ་ཞོར་ལ་འགྲུབ་པ་ན༔ རིག་པ་ཚད་ཕེབས་ཀྱི་སྣང་བ་ཞེས་བྱའོ༔ དེའི་ངང་ལ་ཅིར་ཡང་འཛིན་པ་མེད་པར་གནས་པས་ལས་དང་བག་ཆགས་དང་གཟུང་འཛིན་འཁྲུལ་རྟོག་ཐམས་ཅད་ཟད་པ་ནི༔ ཆོས་ཉིད་ཟད་པའི་སྣང་བའོ༔ ཞེས་གསུངས། ༼༈༽ བེམ་པོ་ལ་རིག་པ་བཅུག་པས་འགུལ་བར་ནུས་པའི་དུས་ན། མི་སུམ་སྟོང་ལ་རིག་པ་བཅུག་ན་མ་བསྒོམས་པར་མི་སུམ་སྟོང་པོ་དེས་ཆོས་བྱ་མི་དགོས་པར་སྐྱེ་བ་འདི་ལ་སངས་རྒྱས་ཟེར་བ་མི་འཐད་ཅེས་པ་ལ། སྔོན་རྒྱལ་པོ་ཨིནྟྲ་བྷུ་ཏི་མཁའ་སྤྱོད་དུ་གཤེགས་པའི་ཚེ། ཨུ་རྒྱན་གྱི་འཁོར་འབངས་ཐམས་ཅད་དུས་གཅིག་ལ་གཤེགས་པ་དང་། དམ་པ་སངས་རྒྱས་ཀྱི་བླ་མ་བདག་ཉིད་ཆེན་པོ་མཁའ་སྤྱོད་དུ་གཤེགས་པའི་ཚེ། རྒྱལ་པོ་དྲུག བཙུན་མོ་དྲུག དྲང་སྲོང་དྲུག བྲམ་ཟེ་དྲུག ཁྱིམ་བདག་དྲུག དེད་དཔོན་དྲུག་སྟེ། སོ་དྲུག་མཁའ་སྤྱོད་དུ་གཤེགས་པ་དང་། ཏནྡྲི་པ་སོནྡྷ་ན་རའི་སྐྱེ་བོའི་ཚོགས་དཔག་ཏུ་མེད་པ་དང་བཅས་ཏེ་ལུས་དེ་ཉིད་ཀྱིས་མཁའ་སྤྱོད་དུ་གཤེགས་པ་དང་། ཀཾ་ཀ་པ་རང་གི་འཁོར་དང་ཀླུ་ན་ག་རའི་སྐྱེ་བོའི་ཚོགས་ཐམས་ཅད་དང་བཅས་ཏེ་ལུས་དེ་ཉིད་ཀྱིས་མཁའ་སྤྱོད་དུ་གཤེགས་པ་དང་། ཀུ་ཀུ་རི་པ་གྲོང་ཁྱེར་ཀ་སི་ལ་པ་ཀླུའི་སྐྱེ་བོའི་ཚོགས་དང་བཅས་པ་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ། །བདག་ཉིད་འཚང་རྒྱ་བའི་ཚེ་རྟེན་འབྲེལ་གྱི་ཆེ་བས་རྒྱུད་ཅིག་ཆར་གྲོལ་བའི་དུས་ཡིན་པས། རིག་མ་དང་། བར་ཆད་སེལ་བའི་ཆོས་སྐྱོང་དང་། དངོས་གྲུབ་སྟེར་བའི་བླ་མ། གསོལ་བ་འདེབས་པའི་སློབ་མ་དང་བཅས་པ་སངས་རྒྱས་པར་བཤད་དོ། །ཞེས་ལོག་རྟོག་ཀུན་འཇོམས་རྡོ་རྗེ་ཕ་ལམ་སོགས་ལས་གསུངས་སོ།། ༼༈༽ རྨི་ལམ་གྱི་མཚན་མ་བཟང་ངན་འཕགས་པ་བཞི་པ་སྒྲུབ་པ་ཞེས་བྱ་བའི་མདོ་ལས། འཇམ་དཔལ་གཞོན་ནུར་གྱུར་པས་ལྷ་ཡི་བུ་དཔལ་བཟང་ལྡན་ལ་གསུངས་པ་འདི་ལྟ་སྟེ། སྒྲིབ་པའི་རྒྱུ་མཐུན་གྱི་རྨི་ལམ་བཞི་ནི། ཁྲོན་པ་རྡུལ་ཅན་གྱི་ནང་ནས་ཟླ་དཀྱིལ་མཐོང་བ་དང་། མཚེའུ་རྫིང་ཁྲོན་རྙོག་པ་ཅན་གྱི་གཏིང་ན་ཟླ་དཀྱིལ་མཐོང་བ་དང་། བར་སྣང་སྤྲིན་ཆེན་པོས་གཡོག་ཅིང་དེ་ལས་ཟླ་དཀྱིལ་མཐོང་བ་དང་། བར་སྣང་ལ་རླུང་རྡུལ་དུ་བས་འཁྲིགས་པར་མཐོང་ཞིང་དེ་ལས་ཟླ་དཀྱིལ་མཐོང་བ་བཞིན་ནོ། །ཡང་ལས་ཀྱིས་སྒྲིབ་པའི་རྒྱུ་མཐུན་པའི་རྨི་ལམ་བཞི་ནི། གཡང་ས་ཆེན་པོ་ནས་གཡང་ལ་ལྷུང་བ་དང་། ལམ་མཐོ་དམན་ཅན་དུ་ཞུགས་པ་དང་། ལམ་དོག་པར་ཞུགས་པ་དང་། ཕྱོགས་བསླད་ཅིང་འཇིགས་པ་མང་པོ་མཐོང་བ་བཞིའོ། །ཉོན་མོངས་པས་སྒྲིབ་པའི་རྒྱུ་མཐུན་གྱི་རྨི་ལམ་བཞི་ནི། དུག་སྲོག་འཁྲུགས་པ་དང་། གཅན་གཟན་གཏུམ་པོ་ཕལ་མོ་ཆེའི་སྒྲ་ཐོས་པ་དང་། རང་གཡོན་ཅན་གྱི་ནང་ན་གནས་པ་དང་། རང་ལུས་དྲི་མ་ཅན་དང་གོས་དྲི་མ་ཅན་དུ་མཐོང་བ་བཞིའོ། །གཟུངས་ཐོབ་པའི་རྒྱུ་མཐུན་གྱི་རྨི་ལམ་བཞི་ནི། གཏེར་ཆེན་པོ་རིན་པོ་ཆེ་སྣ་ཚོགས་ཀྱིས་གང་བ་མཐོང་བ་དང་། རྫིང་བུ་མེ་ཏོག་པདྨ་རྒྱས་པས་ཡོངས་སུ་གང་བ་མཐོང་བ་དང་། བདག་གོས་དཀར་པོའི་ཕྲུག་རྙེད་པར་མཐོང་བ་དང་། ལྷ་ཞིག་གིས་སྤྱི་བོའི་གཙུག་ན་གདུགས་འཛིན་པར་མཐོང་བ་དང་བཞིའོ། །ཏིང་ངེ་འཛིན་ཐོབ་པའི་རྒྱུ་མཐུན་གྱི་རྨི་ལམ་བཞི་ནི། བུ་མོ་བཟང་མོ་རྒྱན་བཟང་པོས་བརྒྱན་པས་མེ་ཏོག་སིལ་མ་འབུལ་བར་མཐོང་བ་དང་། ནམ་མཁའ་ལ་བྱ་ངང་པ་དཀར་པོའི་ཐལ་དཀར་གྱིས་ཁྱུ་སྐད་འབྱིན་ཅིང་འགྲོ་བར་མཐོང་བ་དང་། དེ་བཞིན་གཤེགས་པ་འོད་མང་པོས་བརྒྱན་པའི་ཕྱག་སྤྱི་བོར་འཇོག་པ་མཐོང་བ་དང་། དེ་བཞིན་གཤེགས་པ་མེ་ཏོག་པདྨ་ལ་བཞུགས་ཤིང་བསམ་གཏན་མཛད་པར་མཐོང་བ་དང་བཞིའོ། །དེ་བཞིན་གཤེགས་པ་མཐོང་བའི་རྒྱུ་མཐུན་གྱི་རྨི་ལམ་བཞི་ནི། ཟླ་བའི་དཀྱིལ་འཁོར་འཆར་བར་མཐོང་བ་དང་། ཉི་མའི་དཀྱིལ་འཁོར་འཆར་བར་མཐོང་བ་དང་། མེ་ཏོག་པདྨ་ཁ་འབུས་པ་མཐོང་བ་དང་། ཚངས་པའི་དབང་པོ་རབ་ཏུ་ཞི་བའི་སྤྱོད་ལམ་ཅན་མཐོང་བ་དང་བཞིའོ། །བྱང་ཆུབ་སེམས་དཔའི་རང་གི་མཚན་ཉིད་ཀྱི་རྒྱུ་མཐུན་པའི་རྨི་ལམ་བཞི་ནི། ཤིང་ས་ལ་ཆེན་པོ་འདབ་མ་མེ་ཏོག་འབྲས་བུ་སྣ་ཚོགས་ཀྱིས་གང་བར་མཐོང་བ་དང་། བར་བའི་སྣོད་གསེར་གྱིས་གང་བར་མཐོང་བ་དང་། ནམ་མཁའི་ངོས་གདུགས་དང་རྒྱལ་མཚན་བ་དན་གྱིས་གང་བར་མཐོང་བ་དང་། འཁོར་ལོས་བསྒྱུར་བའི་རྒྱལ་པོ་ཆེན་པོ་མཐོང་བ་དང་བཞིའོ། །བདུད་འདུལ་བའི་རྒྱུ་མཐུན་པའི་རྨི་ལམ་བཞི་ནི། གྱད་ཆེན་པོས་གྱད་ཀུན་མནན་ནས་བ་དན་ཐོགས་ཏེ་འགྲོ་བ་མཐོང་བ་དང་། དཔའ་བོ་ཆེན་པོ་གཡུལ་ལས་རྒྱལ་ཏེ་འགྲོ་བར་མཐོང་བ་དང་། རྒྱལ་པོར་དབང་བསྐུར་མཐོང་བ་དང་། བདག་ཉིད་བྱང་ཆུབ་སྙིང་པོ་ལ་འདུག་ཅིང་བདུད་འདུལ་བར་མཐོང་བ་དང་བཞིའོ། །ཕྱིར་མི་ལྡོག་པའི་རྟགས་ཀྱི་རྒྱུ་མཐུན་པའི་རྨི་ལམ་བཞི་ནི། མགོ་ལ་ཐོད་དཀར་པོས་བཅིང་བ་དང་། བདག་གཏན་པ་མེད་པའི་མཆོད་སྦྱིན་བྱེད་པ་དང་། བདག་ཆོས་ཀྱི་སྟན་ཆེན་པོ་ལ་འདུག་པ་དང་། དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་བཞུགས་ཤིང་ཆོས་སྟོན་པར་མཐོང་བ་དང་བཞིའོ། །བྱང་ཆུབ་སྙིང་པོ་ཐོབ་པའི་རྒྱུ་མཐུན་པའི་རྨི་ལམ་བཞི་ནི། བུམ་པ་མཐོང་བ་དང་བྱ་ཙ་ཤས་བསྐོར་བ་མཐོང་བ་དང་། གང་དང་གང་དུ་འགྲོ་བ་དེར་ཤིང་ཐམས་ཅད་ལྡང་ཞིང་འདུད་ལ་ཕྱག་འཚལ་བར་བྱེད་པ་དང་། གསེར་གྱི་ཁ་དོག་ལྟ་བུའི་སྣང་བ་ཆེན་པོ་མཐོང་བ་དང་བཞིའོ། །ཞེས་གསུངས་པས་མཚོན་ནས་རྨི་ལམ་གྱི་མཚན་མའི་བཟང་ངན་ཀྱང་ཤེས་པར་བྱས་ནས་སྐྱོན་བསལ་བ་དང་ཡོན་ཏན་སྒྲུབ་པའི་ཐབས་བསྟེན་པར་བྱའོ། །ཞེས་གསུངས། ༼༈༽ ཐེག་མཆོག་རིན་པོ་ཆེའི་མཛོད་ལས། བར་དོ་སྤྱིའི་རྣམ་པར་བཞག་པ་ལ། ངོ་བོ། ངེས་ཚིག །དབྱེ་བ། སྣང་ལུགས། ས་མཚམས་དང་ལྔ་ལས། དང་པོ་ངོ་བོ་ནི། ཕྱི་ཡུལ་གྱི་ཆོས་ནང་གི་བློ་ལ་སྣང་བའི་གནས་སྐབས་སོ། །དེའང་ནང་དབྱིངས་ཀ་དག་ལས་གཞན་དུ་སྣང་བ་ཐམས་ཅད་བར་དོའི་གནས་སྐབས་ཏེ། གཞི་སྣང་སྐུ་དང་ཡེ་ཤེས་སུ་སྣང་བའི་རང་གདངས་གཟུགས་སྐུ་གཉིས་ཀྱི་མཛད་པ་འཆར་བའི་རང་ངོའི་སྣང་ཆ་ནི་དག་པ་ཆོས་ཉིད་ཀྱི་བར་དོ་ཡིན་ལ། འཁྲུལ་སྣང་འགྲོ་དྲུག་གི་ཆོས་སོ་ཅོག་མ་དག་པ་འཁྲུལ་བའི་བར་དོ་ཡིན་ནོ། །དག་མ་དག་གི་ཆོས་དེ་གཉིས་གང་གི་བར་ན་ཡོད་ན་ཀ་དག་གི་དབྱིངས་ནས་ཕྱིར་བསྐྱོད་པས་སླར་ཀ་དག་ཏུ་ནུབ་དགོས་པའི་ཕྱིར་གཤིས་ཀ་དག་གི་བར་ན་ཡོད་པའོ། །དང་པོ་ཡང་དེ་ནས་བྱུང་། ད་ལྟ་ཡང་དེའི་འཆར་ཚུལ་གྱི་ཕྱི་ནང་གི་བར་ན་གནས། ཐ་མ་ཡང་དེའི་ངང་དུ་སྐྱེལ་དགོས་པའི་ཕྱིར་རོ། །ཀ་དག་གི་དབྱིངས་ལ་བར་དོ་མེད་དེ། དེ་ཉིད་ཆོས་གཞན་སྔ་ཕྱི་ལ་མི་ལྟོས་ཤིང་གང་གིའང་བར་ན་འཇུག་པ་མི་སྲིད་དེ། འཕོ་འགྱུར་དང་སྣང་སྟོང་གི་མཐའ་ལས་འདས་པའི་ཕྱིར་རོ། །ཐལ་འགྱུར་ལས། ཐོག་མ་ཉིད་ཀྱི་ཀ་དག་ལ། །འཁྲུལ་གཞི་ཙམ་དུ་བརྗོད་དུ་མེད། །དེ་བཞིན་མ་འཁྲུལ་བ་ཡང་ཅི། །ཞེས་སོ། །གནས་འདི་ཡང་ཤེས་རབ་ཡོད་ན་ཆིངས་རླབས་པོ་ཆེའོ། །གཉིས་པ་ངེས་ཚིག་ནི། བར་ཞེས་པ་གོང་འོག་སྔ་ཕྱི་གང་རུང་གི་དབུས་ཀྱི་ཆོས་ཡིན་པའི་ཆ་ནས་བརྗོད་དེ། དཔེར་ན་རྨི་ལམ་བར་དོ་གཉིད་དུ་འགྲོ་ཁ་དང་སད་པ་གཉིས་ཀྱི་བར་ན་ཡོད་པ་བཞིན་ནོ། །མ་ཞེས་པ་དབུས་མཚོན་པའོ། །དོ་ཞེས་པ་ཐོག་མཐའ་གཉིས་ཟུང་དུ་འཇུག་པའི་འབྲེལ་ཐག་ལྟ་བུར་དབུས་སུ་གནས་ཏེ་དོ་ཡའི་དབུས་ཀྱི་འབྲེལ་ཐག་བཞིན་ནོ། །གསུམ་པ་དབྱེ་ན། ཐུན་མོང་དང་ཐུན་མོང་མ་ཡིན་པ་གཉིས་ལས། ཐེག་པ་ཐུན་མོང་བ་ཁ་ཅིག་ནི། སྐྱེ་ཤི་བར་དོ་དང་། རྨི་ལམ་བར་དོ། ཆོས་ཉིད་བར་དོ་དང་། སྲིད་པ་བར་དོ་ལ་སོགས་པ་འདོད་ཀྱང་ཐུན་མོང་མ་ཡིན་པའི་ཐེག་པ་གསང་བ་རྒྱལ་པོ་འདིར། རང་བཞིན་གྱི་བར་དོ། འཆི་ཁའི་བར་དོ། ཆོས་ཉིད་ཀྱི་བར་དོ། སྲིད་པའི་བར་དོ་དང་བཞིར་བཞེད་དེ། ཐལ་འགྱུར་ལས། བར་དོའི་ཆོས་ཉིད་འདི་ལྟ་བུ། །རབ་ཏུ་གསང་བའི་ཆོས་ཉིད་བཤད། །དབྱེ་ན་རྣམ་པ་བཞི་དག་ལས། །ཞེས་སོ། །བཞི་པ། ཚིག་དོན་རིན་པོ་ཆེའི་མཛོད་ལས། སྣང་ལུགས་ལ་བཞི་ལས། རང་བཞིན་དུ་གནས་པའི་བར་དོའི་སྣང་ལུགས་ལའང་སྤྱིར་བསྟན་པ་དང་། བྱེ་བྲག་ཏུ་བཤད་པ་གཉིས་ལས། དང་པོ་ལ་ཁམས་གསུམ་སྤྱི་བཙན། གནས་རིགས་ཐ་དད། གང་ཟག་སྒོས་བཙན་གསུམ་ལས། སྤྱི་བཙན་ལ་ཀུན་གཞིའི་སྟེང་དུ་བག་ཆགས་སོ་སོར་བཞག་པའི་དབང་གིས་རྩ་བ་མ་རིག་པ་གཟུང་འཛིན་དུ་སེམས་ལ་སྣང་བ། ཕྱི་ཡུལ་ལྔར་ཡུལ་ཀྱི་རྣམ་པར་སྣང་བ། ལུས་སུ་སྣང་བ། བདེ་སྡུག་བར་མ་དགའ་གདུང་དུ་སྣང་བ། ཆགས་སོགས་ཉོན་མོངས་པ་ཀུན་དུག་ལྔར་སྣང་བས་གཅིག་ནས་གཅིག་ཏུ་འཁོར་བར་སྣང་བའི་ཕྱིར་ཁམས་གསུམ་སྤྱིའི་སྣང་བ་ཞེས་བྱའོ། །དེ་ལས་གནས་རིགས་ཐ་དད་པར་སྣང་ཚུལ་བརྗོད་ཀྱིས་མི་ལང་ཡང་རིས་སུ་བསྡུ་ན་དྲུག་པོ་རྣམས་ཡུལ་དང་ལུས་དང་བདེ་སྡུག་ཕལ་ཆེར་ལས་མཐུན་གྱིས་ཆ་སོ་སོར་ནས་ཕྱེ་བ་བསྡེབས་ནས་འགྲོ་བ་དྲུག་སྟེ། རང་རང་གི་ལས་མཐུན་པའི་ལྷ་རྣམས་ཀྱི་གནས་དང་བདེ་བ་ལ་སོགས་པ་ནས་མི་དང་ལྷ་མིན་ལ་སོགས་པ་སྟེ། འདི་དག་ཐམས་ཅད་ལ་དངོས་པོ་གཅིག་ལ་མཐུན་པར་ནི་མེད་དེ། ཆུ་གཅིག་པུའང་། ལྷས་བདུད་རྩིར་མཐོང་བ་ལ་སོགས་པ་དང་། སྤྲིན་གཅིག་པུ་ལའང་གཞན་འཕྲུལ་དབང་བྱེད་ལ་སོགས་པར་རིན་པོ་ཆེ་དང་མེ་ཏོག་གི་ཆར་དུ་བབ་ལ། སུམ་ཅུ་རྩ་གསུམ་དང་རྒྱལ་ཆེན་སྡེ་བཞིར་བདུད་རྩིའི་ཆར་དང་། མི་ལ་ཆུ་དང་། དུད་འགྲོ་ལ་ཡོངས་སུ་གདུངས་བ་ལ་བཏུང་དུ་རུང་བ་ཙམ་དང་། ཡི་དྭགས་ལ་རྣག་ཁྲག་གི་ཆར་དང་། དམྱལ་བ་ལ་མེ་མདག་གི་ཆར་དུ་འབབ་པར་མཐོང་སྟེ། བདེན་གཉིས་ལས། དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པར་མཐོང་བ་ཡིན། །ཞེས་སོ། །དེ་དག་ཀྱང་ཕྱི་རོལ་ན་དོན་གཞན་བདེན་པར་གྲུབ་པ་མེད་པའི་ཐ་དད་དུ་སྣང་ལ། དེ་ཡང་སོ་སོའི་ལས་ཐ་དད་ལས་དེ་ལྟར་སྣང་བ་སྟེ། སྤྱོད་འཇུག་ལས། ལྕགས་བསྲེགས་ས་གཞི་སུ་ཡིས་བྱས། །མེ་ཚོགས་འདི་དག་གང་ལས་བྱུང་། །དེ་འདྲ་དེ་དག་ཐམས་ཅད་ཀྱང་། །སྡིག་སེམས་ཡིན་པར་ཐུབ་པས་གསུངས། །ཞེས་པ་བཞིན་ནོ། །དེ་དག་ལས་ཀྱང་གང་ཟག་སྒོས་བཙན་ལ་སྣང་བ་ནི། གནས་རིགས་སོ་སོ་བ་དེ་དག་གི་འགྲོ་བ་རྣམས་ཀྱང་ལ་ལ་བདེ། ལ་ལ་སྡུག ལ་ལ་བར་མར་གནས་ཏེ། སྣང་ཚུལ་ཡང་ལྷས་བྱིན་གཅིག་ལའང་དགྲ་གཉེན་བར་མ་གསུམ་སོ་སོར་འཛིན་པ་དང་། ལ་ལའི་ཟས་ལ་ལ་ལས་དུག་ཏུ་སྣང་བ་དང་། ལ་ལའི་སྣང་བ་ལ་ལ་ལས་མུན་པར་སྣང་བ་ལ་སོགས་པ་ནང་མི་མཐུན་པ་ཤིན་ཏུ་མང་བ་རྣམས་ཏེ། འདི་དག་ཀྱང་རང་རང་གི་འདོད་ཚུལ་གྱུར་བ་སྟེ། འཕགས་པ་དཀོན་མཆོག་བརྩེགས་པའི་ཆོས་ཀྱི་རྣམ་གྲངས་ལས། ལས་ནི་སྣ་ཚོགས་སུ་བྱེད་པའི་ཕྱིར་རི་མོ་མཁན་ལྟ་བུའོ། །ཞེས་གསུངས་པ་བཞིན་ནོ། །བྱེ་བྲག་ཏུ་བཤད་པ་ནི། རང་བཞིན་དུ་གནས་པའི་བར་དོ་ལ་ཕུང་པོ་ལྔས་བཅིངས་པས་སྐུ་ལྔའི་སྣང་བ་རང་འགགས་པ་དང་། ཁམས་དང་སྐྱེ་མཆེད་ཀྱིས་བཅིངས་པས་འོད་དང་ཁ་དོག་གི་སྣང་བ་རང་འགགས་པ་དང་། ལས་དང་ཉོན་མོངས་ཀྱིས་བཅིངས་པས་ཡེ་ཤེས་དང་ཆོས་ཉིད་ཀྱིས་སྣང་བ་རང་འགགས་པའོ། །འཆི་ཁ་མའི་བར་དོའི་སྣང་ཚུལ་ནི། ལུས་ཀྱི་འབྱུང་བ་འཁྲུགས་པས་ཕྱི་ཡུལ་གྱི་སྡུག་བསྔལ་ཉམས་སུ་མྱོང་། སེམས་བྱུང་ཚོར་གྱི་ལམ་སྟོར་བས་ནང་སེམས་ཀྱིས་སྡུག་བསྔལ་ཉམས་སུ་མྱོང་། གཟུང་འཛིན་གྱི་མཚོ་རྡོལ་བས་ལུས་སེམས་འབྲེལ་བའི་རྟེན་སྟོར་གྱིས་དོགས་པའི་སྡུག་བསྔལ་ཉམས་སུ་མྱོང་སྟེ། དོན་ལ་ཤི་བའི་དོགས་པའི་སྡུག་བསྔལ་ལ་གནས་པའོ། །ཆོས་ཉིད་བར་དོའི་སྣང་ཚུལ་ནི། ཕུང་པོ་བདག་འཛིན་གྱི་རྟེན་བོར་བས་སྐུ་དང་ཡེ་ཤེས་ཀྱི་སྣང་བ་རང་ཤར། ལས་དང་བག་ཆགས་ཀྱི་འབྲེལ་ཐག་ཆད་པས་རང་བཞིན་བབས་ཀྱི་བསམ་གཏན་ལ་ངང་གིས་གནས། དབང་པོ་འཛིན་བྱེད་ཀྱི་ཡུལ་སྟོང་བས་རང་སྣང་དག་པའི་འོད་གསལ་ལ་སྤྱོད་པའོ། །སྲིད་པ་བར་དོའི་སྣང་ཚུལ་ནི། ཕྱི་ལུས་ཀྱི་སྲིད་པ་ཡིད་ཀྱི་ལུས་ཅན་རྨི་ལམ་གྱི་སྣང་བ་ལྟར་ས་ཟིན་མེད་པ། ནང་སེམས་ཀྱི་སྲིད་པ་སྙེམས་བྱེད་དུ་མ་ལ་འཇུག་ཅིང་ཀུན་ཏུ་རྟོག་པ། ལུས་སེམས་གཉིས་འདུས་ཀྱི་སྲིད་པ་གང་ལའང་ཐོགས་མེད་དུ་རྒྱུ་ཞིང་སྣ་ཚོགས་སྡུག་བསྔལ་ལ་སྤྱོད་པའོ། །ཞེས་གསུངས། ཐེག་མཆོག་རིན་པོ་ཆེའི་མཛོད་ལས། ལྔ་པ་ས་མཚམས་ནི་བཞི་ལས། རང་བཞིན་གནས་པའི་བར་དོའི་ས་མཚམས་མའི་མངལ་ནས་ཐོན་ནས་ཐ་མ་འཆི་རྐྱེན་གྱིས་ནད་ཀྱིས་བཏབ་པ་ཚུན་ཆད་དོ། །དེ་ནས་ནང་དབུགས་ཁྲོག་གིས་མ་ཆད་པའི་བར་ལ་འཆི་ཁ་མའི་བར་དོའོ། །ནང་དབུགས་ཆད་ནས་འོད་གསལ་ཤར་ཏེ་ལྷུན་གྲུབ་ཀྱི་སྣང་བའི་བར་ནི་ཆོས་ཉིད་བར་དོའོ། །དེ་ནས་ལྷུན་གྲུབ་ནུབ་སྟེ་ཡད་ཡུད་རྨི་ལམ་ལྟར་ཤར་ནས་མའི་མངལ་དུ་ཚུད་པ་ཚུན་ཆོད་སྲིད་པ་བར་དོའི་ས་མཚམས་སོ། །དེའང་འཆི་ཀའི་ཚེ་དུས་ཐ་མའི་ངོ་སྤྲོད་མཚོན་པ་རྣམས་ལ་མགྲོན་པོ་ལ་བརྒལ་བ་ལ་ཚང་སྤྲུགས་སུ་གདབ་པའི་གདམས་ངག་ཅེས་བྱའོ། །དེའང་འཆི་ཀའི་མི་དེ་མགྲོན་པོ་ལམ་ཞུགས་ཡིན་ལ། འཆི་བའི་སྡུག་བསྔལ་ལ་ཆེན་པོ་ཡིན་ཞིང་། དེའི་ལམ་སྣང་སྣ་ཚོགས་པ་རང་སྣང་དུ་མ་ཤེས་ན་དགྲར་ལྡང་བའི་ཚང་ཡོད་ལ། ཤེས་ན་གྲོགས་སུ་འཆར་བའི་ཚང་ཡོད་པས། འཆི་ཀའི་སྤྲུགས་དེར་འདེབས་པ་ལ། ཚང་སྤྲུགས་སུ་འདེབས་པའི་གདམས་ངག་ཅེས་དཔེ་དོན་དེ་འཐད་དོ། །ཞེས་གསུངས། ༼༈༽ ཚིག་དོན་རིན་པོ་ཆེའི་མཛོད་ལས། རྣལ་འབྱོར་བའི་གདམས་ངག་ནི་ཆོས་འདིའི་སྐལ་ལྡན་རྣམས་ལ་དུས་འདིར་གདབ་པར་བྱ་སྟེ། རང་ལ་གསལ་པོ་ཡོད་ན་དེས་ཆོག་པས་སྐབས་འདིར་དྲན་པར་བྱ་སྟེ། ཡུལ་དང་གནས་ལ་འཇུག་པ་དང་། སྐུ་དང་ཡེ་ཤེས་ལ་འཇུག་པའི་གནད་གཉིས་གང་རུང་ལམ་ཁྱེར་དུ་བྱེད་པའོ། །དང་པོ་ནི་འཕོ་བ་སྟེ། རླུང་ཐ་མ་ཕྱིར་འགྲོ་དུས་སྙིང་ནས་རིག་པ་བླ་མའི་སྐུ་ཚོན་གང་བ་འོད་ཟེར་ལྔ་དང་བཅས་པའམ། ཨཿ དཀར་པོ་ཞིག་ཏུ་བསམ་ལ་ཚངས་བུག་ནས་ཡར་རྒྱང་གིས་སོང་བར་བསམ་དུས་ཧིཀ་ཉེར་གཅིག་བརྩེགས་མར་བརྗོད་པས་གྲོལ་བར་ངེས་སོ། །གཉིས་པ་ནི་བཞུགས་སྟངས་གསུམ་མམ་སེང་གེ་ཉལ་ལུགས་ཀྱིས་ཤེས་པ་མིག་ལ་གཏད། མིག་དབྱིངས་རིག་ལ་གཏད་ནས་ཀ་དག་གི་ངང་ལ་འཕྲོ་འདུ་མེད་པར་བཞག་པས་སྐད་ཅིག་དེ་ཉིད་ལ་གྲོལ་ལོ། །དབྱིངས་རིག་མི་གསལ་ན་ཆོས་ཉིད་ཀྱི་བར་དོའི་འཆར་ལུགས་རྣམས་ལ་ཡིད་ཆེས་པ་མ་ཉམས་པར་བྱས་པས་མི་བརྟན་པོ་ལ་འཕྲིན་བཅོལ་དུས་གྲོགས་ཕྱི་ནང་སྟེང་འོག་གང་དུ་ཕྱིན་པ་དེར་འཕྲིན་བཅོལ་བ་ལྟར་ཆོས་ཉིད་རང་ངོ་ཤེས་ནས་གྲོལ་བར་ངེས་སོ། །རང་ལ་གདམས་ངག་དེ་དག་མི་གསལ་ཞིང་གདེངས་མེད་ན་བླ་མའམ་མཆེད་གྲོགས་དམ་ཚིག་གཙང་བ་ཞིག་གིས་གསལ་གདབ་སྟེ། མངོན་སུམ་གྱི་སྣང་བ་བསྟན་ལ་དེའི་ངང་དུ་བལྟར་བཅུག་ལ། ད་ལྟའི་རིག་པ་འདི་ཀ་བར་དོར་འཆར་བ་ལ་ཆོས་ཉིད་ཀྱི་བར་དོ་ཟེར་བས་རང་སྣང་དུ་ངོ་ཤེས་པར་གྱིས་ཞེས་པ་དང་། དེ་ལྟའི་རིག་པ་རྗེན་པ་འདི་ཀ་དག་གི་གྲོལ་ས་ཡིན་པས་འདིའི་ངང་ལ་མ་འགྱུར་བར་ལྟོས་ཤིག་ཅེས་ཁྲེགས་ཆོད་དང་ཐོད་རྒལ་གྱི་དོན་གསལ་གདབ། །ཅེས་གསུངས། སྒོམ་ཕྱོགས་དྲིས་ལན་ལས། ཁྱེད་རང་གི་ཐོད་རྒལ་ཉམས་ལ་ལྷ་༼ཞལ་རྒྱུན་ལ། དབྱིངས་ཐིག་གི་དབུས་སུ་ལུག་རྒྱུད་ཤར་བ་ལ་འཕོས་ཀྱང་འདྲ་གསུངས། མཆན།༽ སྐུ་འཆར་གྱིན་འདུག་གསུངས་པ་དེ་ཉིད་མང་ཉུང་ཇི་ལྟར་འདུག་ཀྱང་མངོན་དགའ་ལ་སོགས་རང་བཞིན་སྤྲུལ་སྐུའི་ཞིང་ཁམས་སུ་ཐག་རྦད་ཀྱིས་ཆོད་ལ་རང་གི་རིག་པ་འོད་གོང་གི་རྣམ་པར་སྙིང་དབུས་ནས་ཐོན། རྒྱང་ཞགས་ཆུའི་སྒྲོན་མ་མིག་གི་སྒོ་ནས་ཐོན་ཏེ་ལྷ་སྐུའི་ཐུགས་ཀར་འཕོས་ལ། ལྷ་དང་རང་སེམས་གཉིས་སུ་མེད་པའི་ངང་ལ་མཐོང་བྱ་མཐོང་བྱེད་ཀྱི་གཉིས་འཛིན་དང་བྲལ་ནས་རང་བབས་སུ་བསྒོམ་པར་ཞུ། འདི་རྒྱུད་ཉི་ཟླ་ཁ་སྦྱོར་གྱི་མན་ངག་བཤད་དུ་ཕངས་པ་ཞིག་ཡིན་པ་གསང་རྒྱ་ཞེས་གསུངས། ༼༈༽ དེ་ཡང་ཁྱབ་བྱེད་འབྱུང་བ་ལྔ་ཕྲག་ལྔ་སྟེ་ཉི་ཤུ་རྩ་ལྔ་རང་གི་ལུས་ལ་རང་བཞིན་གྱིས་ཚང་བས་ཡེ་ཤེས་ཀྱི་གདངས་དང་རྩལ་ལ་སོགས་བྱེད་པ་སྟེ། རང་ཤར་ལས། འབྱུང་བ་ཆེན་པོ་ལྔ་ནི་རང་གི་ལུས་ལ་ཚང་ངོ་། །དེ་ཡང་རླུང་རྣམ་པ་ལྔས་ཡེ་ཤེས་ཀྱི་གདངས་བྱེད་དོ། །མེ་རྣམ་པ་ལྔས་ཡེ་ཤེས་ཀྱི་རྩལ་བྱེད་དོ། །ས་རྣམ་པ་ལྔས་ཡེ་ཤེས་ཀྱི་ངོ་བོ་བྱེད་དོ། །ཆུ་རྣམ་པ་ལྔས་ཡེ་ཤེས་ཀྱི་ཡུལ་བྱེད་དོ། །ནམ་མཁའ་རྣམ་པ་ལྔས་ཡེ་ཤེས་ཀྱི་གནས་བྱེད་དོ། །ཞེས་གསུངས་པ་ལྟར། དེ་ལ་ས་ལྔའི་གནས་ཚུལ་ནིི། ཀུན་ཏུ་སྣང་བའི་ས་རིག་པ་དང་ལྷན་ཅིག་ཏུ་གནས། མི་འགྱུར་བ་རྡོ་རྗེའི་ས་སྒྲོན་མ་དང་ལྷན་གཅིག་ཏུ་གནས། ཐམས་ཅད་འབྱུང་བ་རིན་པོ་ཆེའི་ས་ཐིག་ལེ་དང་ལྷན་ཅིག་ཏུ་གནས། སྣང་བ་སྟོན་པ་ཀུན་ཏུ་མཐའ་ཡས་པའི་ས་དབྱིངས་ཡེ་ཤེས་གཉིས་དང་ལྷན་གཅིག་ཏུ་གནས། སྒྲུབ་པ་མཐར་ཕྱིན་པའི་ས་ཤེས་རབ་དང་ལྷན་ཅིག་ཏུ་གནས་སོ། །ཆུ་ལྔ་ལས། འགྱུར་བ་མེད་པའི་ཆུ་རྩ་ཐམས་ཅད་ལ་གནས། ཞི་བ་གསལ་དག་གི་ཆུ་རྒྱུས་པ་ཐམས་ཅད་ལ་གནས། ཡོན་ཏན་རྒྱས་པའི་ཆུ་ཁྲག་ཐམས་ཅད་ལ་གནས། ཆགས་པ་མེད་པའི་ཆུ་ཆུ་སེར་ཐམས་ཅད་ལ་གནས། འཛིན་མེད་རྫོགས་པའི་ཆུ་མིག་གི་ནང་ན་གནས་སོ། །མེ་ལྔ་ལས། ཕྱི་ནང་ཀུན་ཏུ་ཁྱབ་བྱེད་ཀྱི་མེ་གློ་བ་ན་གནས། ཕྱི་ནང་ཀུན་གསལ་གྱི་མེ་མིག་གཉིས་དང་ཡན་ལག་ལ་གནས། ཕྱི་ནང་ཀུན་ཏུ་མཉམ་པའི་མེ་ཤ་ལྤགས་བར་ན་གནས། ཕྱི་ནང་གི་བྱ་བ་རྟོགས་པའི་མེ་རྐང་མཐིལ་གཉིས་ན་གནས། ཕྱི་ནང་གི་བྱ་བ་སྒྲུབ་པའི་མེ་ལག་མཐིལ་གཉིས་ན་གནས་སོ། །རླུང་ལྔ་ལས། སྲོག་འཛིན་པའི་རླུང་སྲོག་རྩ་ན་གནས། བཀྲག་མདངས་གཟི་མདངས་བསྐྱེད་པའི་རླུང་སྨིན་ཕྲག་ན་གནས། མེ་དང་མཉམ་དུ་གནས་པའི་རླུང་ཕོ་བ་ན་གནས། ཀུན་ཏུ་ཁྱབ་བྱེད་ཀྱི་རླུང་ལུས་ཀུན་ལ་ཁྱབ་པར་གནས། སྙིང་རྗེ་མེད་པ་བསྐལ་པ་ལས་ཀྱི་རླུང་སྙིང་དང་སྙིང་ཤུན་གྱི་བར་ན་གནས་སོ། །ནམ་མཁའ་ལྔ་ལས། ཀུན་ལ་ཁྱབ་པའི་ནམ་མཁའ་རིག་པ་དངོས་དང་དབྱེར་མེད་དུ་གནས། ཡུལ་མེད་གསལ་དྭངས་ཀྱི་ནམ་མཁའ་འོད་ལྔ་དང་དབྱེར་མེད་དུ་གནས། མ་འདྲེས་དག་པའི་ནམ་མཁའ་རྣམ་པར་དག་པ་དང་དབྱེར་མེད་དུ་གནས། དོན་ལ་མཚོན་བྱེད་ཀྱི་ནམ་མཁའ་རྟགས་ཀྱི་ཡེ་ཤེས་ཐིག་ལེ་སྟོང་པ་དང་དབྱེར་མེད་དུ་གནས། དག་པའི་ཞིང་དུ་སྒྲོལ་བྱེད་ཀྱི་ནམ་མཁའ་སྐུ་དང་ཡེ་ཤེས་ཀྱི་སྣང་བ་ཐམས་ཅད་དང་དབྱེར་མེད་དུ་གནས་སོ། ༈ །རང་ཤར་ལས། ཀྱེ་གྲོགས་པོ་དག་སེམས་ཅན་རྣམས་དབུགས་འཕོ་བའི་ཚེ་ཕྱིའི་འབྱུང་བ་ལྔ་ནང་གི་འབྱུང་བ་ལྔ་ལ་ཐིམ། ནང་གི་འབྱུང་བ་ལྔ་གསང་བའི་འབྱུང་བ་ལྔ་ལ་ཐིམ། གསང་བའི་འབྱུང་བ་ལྔ་ཡོངས་སུ་རྫོགས་པའི་འབྱུང་བ་ལྔ་ལ་ཐིམ། ཞེས་དང་། ནམ་མཁའ་ནམ་མཁའ་ལ་ཐིམ་པ་ནི་སྤྱི་ཀུན་ལ་ཁྱབ་པའི་ནམ་མཁའ་སྒྲོན་མ་རྣམ་པར་དག་པ་ལ་ཐིམ་མོ། །ཡུལ་མེད་གསལ་དྭངས་ཀྱི་ནམ་མཁའ་རིག་པ་ལ་ཐིམ་མོ། །མ་འདྲེས་དག་པའི་ནམ་མཁའ་དབྱིངས་ལ་ཐིམ་མོ། །དོན་མཚོན་བྱེད་ཀྱི་ནམ་མཁའ་ཤེས་རབ་ལ་ཐིམ་མོ། དག་པའི་ཞིང་དུ་བསྒྲོད་བྱེད་ཀྱི་ནམ་མཁའ་ཉི་ཤུ་རྩ་གཅིག་དོན་ལ་ཐིམ་མོ། །དེ་ནི་ནང་གི་འབྱུང་བ་ཞེས་བྱའོ། །རྩ་བ་འཛིན་པའི་སྲོག་ཐིག་ལེ་ལ་ཐིམ་མོ། །སྐྱོབ་བྱེད་ཀྱི་སྲོག་མཁའ་ལ་འཁྱིལ་ལོ། །རྣམ་པར་ཕྲ་བའི་སྲོག་ལུས་ལ་འཁྱིལ་ལོ། །མི་གཙང་བའི་སྲོག་ནམ་མཁའ་ལ་ཡལ་ལོ། །རྣམ་པར་འདར་བྱེད་ཀྱི་སྲོག་དབྱིངས་སུ་ཐིམ་མོ། །དེ་ནི་གསང་བའི་འབྱུང་བ་ཞེས་བྱའོ། །དྭངས་སྙིགས་འབྱེད་པའི་རླུང་ཚོམ་བུ་ལ་ཐིམ་མོ། །དྲོད་བསྐྱེད་པའི་རླུང་འོད་ལ་ཐིམ་མོ། །གསལ་འགྱུར་གྱི་རླུང་སྐུ་ལ་ཐིམ་མོ། །རྣམ་པར་སྡུད་པའི་རླུང་ཡེ་ཤེས་ལ་ཐིམ་མོ། །རྣམ་པར་གཟེངས་བསྟོད་པའི་རླུང་ཐུགས་རྗེ་ལ་ཐིམ་མོ། །རྣམ་པར་ཤེས་པ་བསྐྱོད་པའི་རླུང་སྟོང་པ་ལ་ཐིམ་མོ། །རྣམ་པར་ཡིད་འཇུག་པའི་རླུང་གཉིས་མེད་ལ་ཐིམ་མོ། །རྣམ་པར་མདངས་དང་ལྡན་པའི་རླུང་མཐའ་གྲོལ་ལ་ཐིམ་མོ། །རྣམ་པར་བསྲེག་པའི་རླུང་བདེ་བ་ཆེན་པོ་ལ་ཐིམ་མོ། །རྣམ་པར་རྒོད་པའི་རླུང་གསལ་བ་ལ་ཐིམ་མོ། །གཞི་ལ་ཁྱབ་བྱེད་ཀྱི་རླུང་མཁའ་གསལ་ལ་ཐིམ་མོ། །འཕྲལ་ལ་ཁྱབ་བྱེད་ཀྱི་རླུང་གཏིང་གསལ་ལ་ཐིམ་མོ། །དངང་ཞིང་སྐྲག་པ་ཁྱབ་བྱེད་ཀྱི་རླུང་ཡུལ་ལ་ཐིམ་མོ། །དྲན་པ་ཁྱབ་བྱེད་ཀྱི་རླུང་བར་དོ་ལ་ཐིམ་མོ། འཛིན་པས་ལུས་ཀུན་ལ་ཁྱབ་པའི་རླུང་རང་སྣང་ལ་ཐིམ་མོ། །རྣམ་པར་སྐྱོད་བྱེད་ཀྱི་རླུང་གིས་རིག་པ་མཁའ་ལ་བསྐྱོད་དོ། །རྣམ་པར་གྲོལ་བྱེད་ཀྱི་རླུང་བར་དོ་ལ་ཐིམ་མོ། །འཛིན་པས་ལུས་ཀུན་ལ་ཁྱབ་པའི་རླུང་རང་སྣང་ལ་ཐིམ་མོ། །རྣམ་པར་སྐྱོད་བྱེད་ཀྱི་རླུང་གིས་རིག་པ་བསྐྱོད། རྣམ་པར་གྲོལ་བྱེད་ཀྱི་རླུང་གིས་ཕྱི་ནང་གི་ཆོས་དང་ཕྲལ་ལོ། །རྣམ་པར་ཟློག་བྱེད་ཀྱི་རླུང་གིས་རིག་པ་ཉིད་གཞི་ལ་ཟློག་པའོ། །རྣམ་པར་མྱུར་བྱེད་ཀྱི་རླུང་གིས་རིག་པའི་ཡུལ་མཐོང་བར་བྱེད་དོ། །སྐད་ཅིག་མའི་རླུང་གིས་སྐད་ཅིག་མ་གསུམ་ལ་ཀ་དག་གི་སར་ཕྱིན་པར་བྱེད་པའོ། །དེ་ནི་ཡོངས་སུ་རྫོགས་པའི་འབྱུང་བའོ། །ཞེས་གསུངས། ༼༈༽ རིག་པ་འོད་གསལ་གྱི་ཐིམ་ཚུལ་ནི། རླུང་ལྔ་དབྱིངས་སུ་ཐིམ་ནས། སྙིང་གའི་ཡེ་ཤེས་སུམ་བརྩེགས་གདངས་གློ་བར་འཇུག་པའི་རྟ་དང་བྲལ་བས་རྩལ་རང་ལ་ཐིམ་ནས་སེམས་དང་སེམས་ལས་བྱུང་བ་ཀུན་གཞི་དང་བཅས་པ་འཁོར་བའི་ཆོས་སོ་ཅོག་བག་ལ་ཞ་བས། དར་ཅིག་འཁོར་འདས་རྒྱབ་གྱེས་པའི་དུས་དེར། རིག་པ་དར་དཀར་ནས་ལམ་བཏོད་དེ་ཆུའི་སྒྲོན་མ་ནས་དབྱིངས་རྣམ་པར་དག་པའི་ནམ་མཁའ་ལ་ཐོན་ནས་རང་སྣང་དུ་འཆར་ཏེ། ཐོག་མར་གྲོལ་བའི་བར་ལ་ཐིམ་ཚུལ་བརྒྱད་ཀྱིས་མཐར་ཕྱིན་པར་འགྱུར་བ་ནི། རང་ཤར་ལས། བདེན་པ་མཐོང་བའི་སེམས་ཅན་རྣམས་ལ་འདི་ལྟར་ཤེས་པར་བྱའོ། །རིགས་ཀྱི་བུ་དེ་མྱ་ངན་ལས་འདས་པའི་ཚེ་ལུས་ཀྱི་ཟུངས་ཤོར་ནས་ཡེ་ཤེས་ཀྱི་སྣང་བ་གཞི་ནས་འཕགས་ནས། ཡེ་ཤེས་ཀྱི་མཁའ་ལ་བསྐྱོད་པའི་ཚེ། རིག་པ་མིག་ལམ་ནས་བྱུང་ནས་མཁའ་ལ་བསྐྱོད་དེ། དེ་ཡང་འདི་ལྟར་ཤེས་པར་བྱའོ། །ཙིཏྟའི་དཀྱིལ་ན་རིག་པ་ཐིག་ལེ་ལ་ཐིམ་མོ། །ཐིག་ལེ་སྒྲོན་མ་ལ་ཐིམ་མོ། །སྒྲོན་མ་འོད་ལ་ཐིམ་མོ། །འོད་སྐུ་ལ་ཐིམ་མོ། །སྐུ་ཚོམ་བུ་ལ་ཐིམ་མོ། །ཚོམ་བུ་ཡེ་ཤེས་བཞི་ལ་ཐིམ་མོ། །ཡེ་ཤེས་ལྷུན་གྲུབ་ལ་ཐིམ་མོ། །ལྷུན་གྲུབ་ཀ་དག་ཆེན་པོ་ལ་ཐིམ་ནས་ས་ཟིན་པའོ། །གང་གིས་བདེན་པ་མཐོང་བ་རྣམས་ཀྱི་གྲོལ་ལུགས་དང་ཐིམ་ལུགས་དེ་ལྟར་སྣང་ངོ་ཞེས་སོ།། ༼༈༽ ཐེག་མཆོག་རིན་པོ་ཆེའི་མཛོད་ལས། བྱ་བ་གྲུབ་པའི་ཡེ་ཤེས་ཀྱི་ས་བོན་གྱི་ཆ་ལས་རྩལ་མ་རྫོགས་པས་ཀ་དག་ལ་རྫོགས་པའོ། །དེ་ཡང་འོད་གཉིས་འདུས་ཀྱི་གདངས་ཀྱི་ཆ་ཙམ་དུ་ཡོད་པས། ཀུན་གསལ་དུ་ཡེ་ཤེས་ལྔའི་སྣང་བ་ཐམས་ཅད་བཤད་དོ། །འདིར་ད་དུང་ཀ་དག་ཏུ་གྲོལ་མ་ཟིན་པ་དང་སྦྱར་ནས་བཞི་སྦྱོར་དུ་བཞག་སྟེ། བློ་རྩིང་པ་དག་བྱ་བ་གྲུབ་པའི་སྣང་བ་མེད་པར་འདོད་པ་ནི་ཧ་ཅང་མི་རིགས་པའོ། །རྩལ་མ་རྫོགས་པས་མི་སྣང་ན་ཐམས་ཅད་མི་སྣང་བར་ཐལ་ཏེ། རྩལ་ཐམས་ཅད་མཐར་ཕྱིན་གྱི་དུས་ལས་མི་རྫོགས་པའི་ཕྱིར་རོ། །དེས་ན་སྐབས་འདིར་རགས་པའི་སྣང་བ་བཞི་སྦྱོར་ཏེ། གྲོལ་བ་མ་ཡིན་པས་རྩལ་མ་རྫོགས་ཞེས་གོ་དོན་བླང་ལ་ཡེ་ཤེས་བཞི་སྦྱོར་དུ་ཁས་བླང་བར་བྱའོ། །དེ་ནས་ལྷུན་གྲུབ་རིན་པོ་ཆེའི་སྣང་བའི་ཆ་མཐོང་ལ། དངོས་ཀྱི་འབྲས་བུ་མ་རྫོགས་པ་ཚུན་ཆད་དུ་ཡེ་ཤེས་བཞིའི་ཡོན་ཏན་དུ་སྣང་བ་ལ། ཡེ་ཤེས་ལྔའི་རྣམ་པ་བྱ་བ་གྲུབ་པའི་རང་ངོ་མི་སྣང་ལ། ས་བོན་གྱི་ནུས་པ་ཡོད་པས་ཡེ་ཤེས་ལྔའི་རྣམ་པར་བྱུང་བའོ། །དེ་ཡང་དེ་དག་ཀུན་ལ་ཡང་ཡེ་ཤེས་ལྔའི་ས་བོན་ཁྱབ་བྱེད་དུ་ཡོད་པས་སོ། །ཡེ་ཤེས་བཞིའི་སྣམ་བུ་བཞིའི་སྟེང་ན་ཐིག་ལེ་བཞི་ལ། སྟེང་ན་ཐིག་ཆུང་ལྔ་ལྔ་མཎྜལ་ལ་ཚོམ་བུ་བཀོད་པ་ལྟར་ཡོད་དོ། །དེ་དག་གི་སྟེང་ན་འོད་ཟླུམ་པོ་རྨ་བྱའི་གདུགས་འཁོར་བ་འདྲ་བ་ནི་ཡེ་ཤེས་ལྔའི་དབྱིངས་ཀྱི་སྣང་བ་སྟེ། དབུས་མཐིང་ག་ཁ་དོག་ལྔའི་མུ་ཁྱུད་ཀྱིས་འཁོར་བ་འཆར་རོ། །འདི་ནི་ལྷུན་གྲུབ་འཆར་བའི་ས་བོན་དུ་དུས་འདིར་འབྱུང་བའོ། །དེ་དག་ནི་རྡོ་རྗེ་སེམས་དཔའ་ཁོང་སེང་གི་ལམ་ཞེས་བྱའོ། །ཞེས་གསུངས་སོ།། ༼༈༽ ཐེག་མཆོག་རིན་པོ་ཆེའི་མཛོད་ལས། དེ་དག་ཏུ་གྲོལ་བར་བྱེད་པ་གནད་ཀྱི་མན་ངག་རྒྱས་པར་བཤད་པ་ལས། ཆོས་ཉིད་དོན་གྱི་མན་ངག་གིས་གནད་དུ་བརྡེག་པ་ནི། ཚེ་འདི་དང་བར་དོ་གཉིས་ཀར་གནད་དུ་བསྣུན་ཐབས་བསྟན་པ་སྟེ། ངོ་བོ། རང་བཞིན། ཐུགས་རྗེ་གསུམ་གྱི་གནད་གསུམ་ལས། ངོ་བོའི་གནད་ནི་རང་ཐོག་ཏུ་ངོ་ཤེས། ཡིན་ཐོག་ཏུ་ཐག་གཅོད། གྲོལ་ཐོག་ཏུ་གདེངས་བཅའ་བ་དང་གསུམ་ལས། དང་པོ་ནི་རང་བཞིན་འོད་དུ་སྣང་ཡང་། ངོ་བོ་རིག་གདངས་གཅིག་ལས་མ་འདས་པའི་ངང་གི་རིག་པ་སྟོང་གསལ་ཟང་ག་དེ། ཀ་དག་གི་རང་ངོ་ཡིན་པར་ཐག་བཅད་པ་ནི། མཐར་ཐུག་གི་གྲོལ་ས་ཅེར་མཐོང་དུ་ངོ་སྤྲད་པའོ། །གཉིས་པ་ནི་དེའི་ངང་དེ་བཏང་བཞག་མེད་པར་རང་བཞིན་གྱིས་བསམ་གཏན་དུ་ཐག་རྦད་ཀྱིས་བཅད་ལ་མ་ཡེངས་ལ་མི་འཛིན་པས་བསྒོམ་པའོ། །གསུམ་པ་ནི། དེའི་ཚེ་བསྒོམ་བྱ་སྒོམ་བྱེད་ལས་འདས་པའི་རིག་པ་ཟང་ཐལ་དུ་ཤར་ཞིང་གྲོལ་བས་བཟང་ངན་གྱི་རྟོག་ཚོགས་མ་སྤངས་བར་རང་གྲོལ་བའི་གདེངས་ལ་ཡིད་ཆེས་ཤིང་ལ་ཟློས་པར་བྱེད་པ་སྟེ། གནད་གལ་པོ་ཆེའི་ཆིངས་གཅིག་ཐལ་ལོ། །རང་བཞིན་གྱི་གནད་ལ་སྣ་ཚོགས་སུ་སྣང་ཡང་སྣང་ངོ་ལས་དོན་རང་གསལ་རྗེན་པའི་ཡེ་ཤེས་གཅིག་ཏུ་འུབ་ཆུབ་པར་བསྡུས་ཏེ་རང་གསལ་རང་བྱུང་གི་ཡེ་ཤེས་སུ་ལ་བཟླས་ནས་བསྒོམས་པས་དེའི་འཛིན་པ་ཡང་གྲོལ། ལས་གཞན་ཡང་མེད་པར་ནི། འོད་སྣང་ཆོས་ཉིད་དུ་གྲོལ་བའི་གདམས་པ་སྟེ། ཕར་ལ་བལྟས་པས་ཚུར་ལ་གསལ་བའི་རིག་པ་སྐད་ཅིག་རྗེན་པར་བུད་པའི་ངོ་བོ་ངོ་སྤྲད་པ་སྟེ། སྣང་བ་ལ་བལྟས་ན་མཐའ་ཡས་ཀྱང་། རིག་པ་ལ་བལྟས་ན་གཅིག་ཀྱང་མེད་པ་ཟང་མར་རང་ཤར་བས། གྲོལ་ས་བར་གྱིས་བཏབ་པའི་མན་ངག་གནད་གལ་པོ་ཆེའི་ཆིངས་གཉིས་པ་ཐལ་ལོ། །ཐུགས་རྗེའི་གནད་ནི། །ཕྱིའི་གདུལ་ཡུལ་སྣ་ཚོགས་པའི་རྐྱེན་རེ་ལ་ནང་གི་འདུལ་བྱེད་དམ་འཆར་བའི་རིག་པ་དུ་མ་འཕྲོ་དུས། ཕྱིར་འཕྲོ་བའི་རྗེས་མི་གཅད། རང་ངོ་མི་བརྟག །ནང་དུ་མི་དགག་པར་གང་ཤར་དེ་ཀའི་ཐད་དེར་ཅོག་གིས་བཞག་ལ། བར་མེད་ཀྱི་ཤེས་པ་རྗེན་པར་ཟང་ངེ་ཐལ་ལེ་བ་དེ་ངོས་བཟུང་བས་གྲོལ་ས་གཅེར་མཐོང་དུ་ཟིན་ཏེ། ཤར་གྲོལ་རང་མལ་གྱི་རིག་པ་ཧར་སངས་བར་མེད་རྗེན་པར་ཟང་ཐལ་བ་དེ་ཀ་འདི་དང་བར་དོའི་ཤེས་པ་འཆར་བྱེད་མ་འགགས་པ་ལ་ངོས་བཟུང་བས། ཀ་དག་ཐུགས་རྗེའི་རིག་པ་ཟིན་ནས་གྲོལ་བ་སྟེ། གནད་གལ་པོ་ཆེའི་ཆིངས་གསུམ་པ་ཐལ་ལོ། །འདི་གསུམ་ནི་གསང་བ་སྙིང་གི་བདུད་རྩི་ཡང་ཞུན་གྱི་ཐིགས་པ་རབ་ཏུ་གསང་བ་སྟེ། ཁ་འདུམ་ལ་ཆོད་ཆེ་བ། མདོ་འདུས་ལ་ཆིངས་ཆེ་བ། གནད་ཟབ་ལ་གལ་ཆེ་བ། སྙིང་གི་བུ་མཆོག་དག་ལས་གཞན་ལ་གསང་བའི་རྒྱས་གདབ་པའི་མན་ངག་གོ །ཞེས་གསུངས། ༼༈༽ ཐེག་མཆོག་མཛོད་ལས། རང་བཞིན་སྤྲུལ་པར་དབུགས་འབྱིན་ལུགས་ལ། རང་བཞིན་ཅེས་པ་ལ་གཉིས་ཏེ་གནས་པའི་རང་བཞིན་དང་། བགྲངས་བའི་རང་བཞིན་ནོ། །གནས་པ་ནི་ཡེ་ནས་འདི་ཉིད་ལམ་སྣང་དུ་གནས་ཏེ། གཞི་སྣང་ལྷུན་གྲུབ་ཀྱི་སྒོའི་ལོངས་སྐུའི་ཕྱོགས་བཞི་ན་སྣང་བའོ། །ཞིང་བཅུ། དབུས་དུར་ཁྲོད་མེ་རི་འབར་བ་དང་བཅུ་གཅིག་ཡོད་ཀྱང་། འདིར་རྣམ་གྲོལ་དབུགས་ཆེན་འབྱིན་པ་ལྔ་ངོས་བཟུང་བའོ། །བགྲངས་བ་ནི་ཕ་རོལ་ཏུ་ཕྱིན་པས་བཅུ་གཅིག་ཀུན་ཏུ་འོད་ཀྱི་སར་འདོད་དེ་སངས་རྒྱས་ཀྱི་སྣང་བ་ཁྱད་པར་ཅན་གྱི་སའོ། །ཞེས་དང་། སྤྲུལ་པ་ཞེས་པ་ནི་ཞིང་བཞི་དབུས་དང་ལྔ་ནི་སངས་རྒྱས་རིགས་ལྔའི་སྤྲུལ་པའི་ཞིང་ཁམས་ཡིན་ནོ། །ཞེས་གསུངས། ཞིང་བཅུ་གཅིག་ནི། རྫོགས་པ་རང་བྱུང་ལས། ཤར་ཕྱོགས་ཀྱི་འཇིག་རྟེན་གྱི་ཁམས་ན། མངོན་པར་དགའ་བའི་ཞིང་ཁམས་ན། སྟོན་པ་རྡོ་རྗེ་སེམས་དཔའ་ཞེས་བྱ་བ་སྐུས་འདུལ་བའི་ཆོས་སྟོན་ཏོ། །ཞེས་དང་། ལྷོ་ཕྱོགས་ན་དཔལ་དང་ལྡན་པ་ཞེས་བྱ་བའི་ཞིང་ཁམས་ཡོད་དེ། དེ་ན་སྤྲུལ་པ་སྐུའི་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་རིན་ཆེན་འབྱུང་ལྡན་ཞེས་བྱ་བ། ཡོན་ཏན་གྱི་སྒོ་ནས་འདུལ་བའི་ཆོས་སྟོན་ཏོ། །ཞེས་དང་། ནུབ་ཕྱོགས་ན་པདྨ་བརྩེགས་པ་ཞེས་བྱ་བའི་ཞིང་ཁམས་ཡོད་དེ། དེ་ན་སྤྲུལ་པའི་སྐུ་སྣང་བ་མཐའ་ཡས་ཞེས་བྱ་བ་ཡོད་ཀྱིས། དེ་ན་གསུང་གིས་འདུལ་བའི་ཆོས་སྟོན་ཏོ། །ཞེས་དང་། བྱང་ཕྱོགས་ན་ལས་རབ་ཡོངས་སུ་རྫོགས་པའི་ཞིང་ཁམས་ཡོད་དེ། དེ་ན་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་སྤྲུལ་པའི་སྐུ་དོན་ཡོད་གྲུབ་པ་ཞེས་བྱ་བ་ཡོད་ཀྱིས། དེར་ཕྲིན་ལས་ཀྱིས་འདུལ་བའི་ཆོས་སྟོན་ཏོ། །དེ་ལ་རིགས་ཀྱི་བུ་ཁྱོད་མ་འཇིགས་པར། ཕྲིན་ལས་ཀྱི་འདུལ་བའི་ཆོས་ཉོན་ལ། ཕྱི་ནང་གི་སྒྲོ་འདོགས་ཆོད་ལ་ཆོས་ཉིད་ཀ་དག་གི་སར་བཞུད་ཅིག །བྱང་ཤར་མཚམས་ན་སྟོབས་རྣམ་པར་བཀོད་པ་ཞེས་བྱ་བའི་ཞིང་ཁམས་ཤིན་ཏུ་ཡངས་པ་ཞེས་བྱ་བ་ཡོད་དེ། དེ་ན་དཔལ་ཕྱག་ན་རྡོ་རྗེ་ཞེས་བྱ་བ་ཡོད་ཀྱི། དེ་ལ་རིགས་ཀྱི་བུ་ཁྱོད་མ་འཇིགས་པར་མཐུ་སྟོབས་ཀྱི་དབང་ཞུས་ལ་བདུད་དང་ཉོན་མོངས་པའི་སྟོབས་ཟིལ་གྱིས་ནོན་ལ། ཆོས་ཉིད་ཀ་དག་གི་སར་བཞུད་ཅིག །ཤར་ལྷོ་མཚམས་ཀྱི་འཇིག་རྟེན་གྱི་ཁམས་ན་ཞིང་ཁམས་ཐུགས་རྗེས་བརྒྱན་པ་ཞེས་བྱ་བ་ན། བཅོམ་ལྡན་འདས་ཐུགས་རྗེ་ཐམས་ཅད་ཀྱི་བདག་པོ་སྤྱན་རས་གཟིགས་དབང་ཕྱུག་ཅེས་བྱ་བ་ཡོད་ཀྱིས། དེ་ལ་རིགས་ཀྱི་བུ་ཁྱོད་འཇིགས་པར་མ་བྱེད་པར་བཅོམ་ལྡན་འདས་དེ་ལ་རྫུ་འཕྲུལ་གྱི་དབང་ཞུས་ལ། ཐུགས་རྗེ་ཕྱོགས་བཅུར་མཛད་ཅིང་ཀ་དག་གི་སར་བཞུད་ཅིག །ལྷོ་ནུབ་ཀྱི་འཇིག་རྟེན་གྱི་ཁམས་ན་ཞིང་ཁམས་འཇམ་པའི་མགོན་ཞེས་བྱ་བ་ཡོད་དེ། དེ་ན་བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ཞེས་བྱ་བ་ཡོད་ཀྱིས། དེ་ལ་རིགས་ཀྱི་བུ་ཁྱོད་མ་འཇིགས་པར་ཆོས་ཐམས་ཅད་ཀྱི་སྤྱན་ཁོང་དུ་ཆུད་པར་བྱེད་པའི་དབང་ཞུས་ལ། སྣང་སྲིད་ཀྱི་ཆོས་ཐམས་ཅད་བཤད་ཅིང་ཀ་དག་གི་སར་བཞུད་ཅིག །ནུབ་བྱང་གི་འཇིག་རྟེན་ན་ཞིང་ཁམས་ཡིད་འཁྲུགས་པ་ཐམས་ཅད་ཞི་བར་བྱེད་པ་ཞེས་བྱ་བ་ཡོད་དེ། དེ་ན་བཅོམ་ལྡན་འདས་མི་འཁྲུགས་པ་ཞེས་བྱ་བ་ཡོད་ཀྱིས། དེ་ལ་རིགས་ཀྱི་བུ་ཁྱོད་མ་འཇིགས་པར་ཆོས་ཐམས་ཅད་ཀྱི་དེ་བཞིན་ཉིད་སྟོན་པའི་དབང་ནོས་ལ། ཆོས་ཉིད་ཀ་དག་གི་སར་བཞུད་ཅིག །སྟེང་གི་ཕྱོགས་ན་ནམ་མཁའ་རྣམ་པར་དག་པ་ཞེས་བྱ་བའི་འཇིག་རྟེན་ཡོད་དེ། དེ་ན་བཅོམ་ལྡན་འདས་ནམ་མཁའི་རྒྱལ་པོ་ཞེས་བྱ་བ་ཡོད་ཀྱིས། དེ་ལ་རིགས་ཀྱི་བུ་ཁྱོད་མ་འཇིགས་པར་དེ་ལ་ལྟ་བའི་གནས་ལུགས་རྫོགས་པ་ཆེན་པོ་གཞིའི་དབང་དེ་ནོས་ལ། ཆོས་ཉིད་ཀྱི་གཞི་སྣང་ལ་བཞུད་ཅིག །འོག་གི་ཕྱོགས་ན་ཞིང་ཁམས་མི་གཡོ་བ་ཞེས་བྱ་བ་ཡོད་དེ། དེ་ན་བཅོམ་ལྡན་འདས་འོད་སྲུང་ཆེན་པོ་ཞེས་བྱ་བ་ཡོད་ཀྱིས། དེ་ལ་རིགས་ཀྱི་བུ་ཁྱོད་མ་འཇིགས་པར་དེ་ལ་རང་རིག་མངོན་པར་སྣང་བ་ཞེས་བྱ་བའི་དབང་དེ་ནོས་ལ་ཆོས་ཉིད་རང་སྣང་གི་ནམ་མཁའ་ལ་བཞུད་ཅིག ཕྱོགས་བཅུའི་འཇིག་རྟེན་གྱི་དབུས་ན་དུར་ཁྲོད་ཆེན་པོ་མེ་རི་འབར་བ་ཞེས་བྱ་བ་ཡོད་དེ། དེ་ཡང་ཤིན་ཏུ་ཡ་ང་བ། འཇིགས་ཤིང་སྐྱི་བུང་བ། སྐྲག་ཅིང་སྔངས་པ་ཅིག་ཡོད་དེ། དེ་ན་བཅོམ་ལྡན་འདས་པདྨ་དབང་གི་རྒྱལ་པོ་བྱ་བ་ཡོད་ཀྱིས། རིགས་ཀྱི་བུ་ཁྱོད་དེ་ལ་མ་འཇིགས་པར་བཅོམ་ལྡན་འདས་དེ་ལ་རིག་པ་རང་གནས་ཀྱི་དབང་ཞེས་བྱ་བ་དེ་ནོས་ལ་ཆོས་ཉིད་རང་སྣང་གི་ནམ་མཁའ་ལ་མ་འཇིགས་མ་སྔངས་མ་སྐྲག་པར་སོང་ཞིག །ཞེས་གསུངས་ཀྱང་། འདིར་རྣམ་གྲོལ་དབུགས་ཆེན་འབྱིན་པའི་ཞིང་ལྔར་གསུངས། ཐེག་མཆོག་རིན་པོའི་མཛོད་ལས། དེ་དག་ཀྱང་བཅོམ་ལྡན་འདས་རྡོ་རྗེ་འཆང་གི་བྱིན་རླབས་ལས་རང་བཞིན་གྱིས་བཀོད་པའི་ཕྱིར་རང་བཞིན་སྤྲུལ་པའི་ཞིང་ཞེས་བྱའོ། །ཞིང་ཁམས་དེ་དག་གི་རྒྱུ་ནི་སྙིང་ག་ན་མེ་ལོང་ལྟ་བུ་ལ་སོགས་པ། ཡེ་ཤེས་རིན་པོ་ཆེ་རང་གསལ་བའི་རང་གདངས་དང་། དུང་ཁང་ན་ཁྲོ་བོའི་དཀྱིལ་འཁོར་དུ་ཡེ་ནས་བཞུགས་པའི་སྣང་བ་ལས་ཤར་བ་ཡིན་ནོ། །ཞེས་གསུངས། ཟབ་དོན་བདུད་རྩིའི་སྤྲིན་ཕུང་ལས། འཇིག་རྟེན་གྱི་ཁམས་དེ་ཡང་རང་སྣང་རྣམ་པར་དག་པ་ལྷུན་གྲུབ་ཀྱི་གདངས་ལས་ཤར་བ་སྟེ། ཐེག་པ་ཐུན་མོང་པའི་རིགས་ལྔའི་ཞིང་ལྟར་ཕྱོགས་ག་ཤེད་ན་ཡོད་པ་ནི་མ་ཡིན་ནོ། །དེའང་སྔར་ཆོས་ཉིད་ཀྱི་བདེན་པ་མཐོང་བའི་གནད་ཀྱིས་ལྷུན་གྲུབ་ཀྱི་སྣང་བ་ལས་ཤར་བའི་རང་བཞིན་སྤྲུལ་སྐུའི་ཞིང་དེ་ཉིད་རང་སྣང་ལ་སྣང་བའོ། །ཤར་ལ་སོགས་པའི་ཕྱོགས་སུ་བཤད་པ་ནི་སྙིང་ནས་ཤར་ཏེ་མདུན་གྱི་འོད་གསལ་གྱི་གདངས་ལས་སྣང་བ་དང་སྣང་བ་དེ་ཡོད་པས་དེ་སྐད་ཅེས་བྱའོ། །དེ་བཞིན་ཏུ་ཕྱོགས་གཞན་རྣམས་ཀྱང་དེས་མཚོན་ཏེ། སྙིང་གི་དབུས་ན་ཆོས་སྐུ་ཀུན་བཟང་ཡབ་ཡུམ་གྱི་གདངས་ལས། བར་ན་རིགས་ལྔ་འཇའ་ཚོན་ལྟ་བུ། དེའི་གདངས་ལས་ཕྱི་རོལ་སྤྲུལ་པའི་ཞིང་དང་སྐུར་སྣང་བ་སྟེ། རང་བཞིན་སྤྲུལ་པའི་ཞིང་དང་། འགྲོ་བ་འདུལ་བའི་སྤྲུལ་པའི་སྐུ་དང་མ་དག་པ་སྤྲུལ་པའི་སྐུ་མངོན་པར་སྣང་བ་ཡིན་ནོ། །ཞེས་གསུངས། ༈ སྤྱིར་གོལ་ཤོར་ནོར་གསུམ་ཡོད་ཀྱང་ཤོར་ས་བཞི་ནི། འཁོར་འདས་རང་གྲོལ་ལས། ངོ་བོ་གདོད་ནས་དག་པ་ཡི། །ཀ་དག་ཕྱོགས་ཡན་མ་རྟོགས་བཞིན། །སྟོང་པ་ལོག་ནས་བསྒྲུབ་པ་དང་། །གཤིས་ལ་ཤོར་བ་ཞེས་སུ་བཤད། །རང་རིག་ཟང་ཐལ་ཆེན་པོ་ལ། །རྒྱུ་འབྲས་ལྷུན་གྲུབ་མ་ཤེས་པར། །སྟོང་ཉིད་ལམ་ནས་འབྲས་བུ་གཞན། །བཙལ་བ་ལམ་དུ་ཤོར་བའོ། །སྤང་གཉེན་གཉིས་ལས་རབ་འདས་པའི། །སྦྲུལ་མདུད་ཞིག་ལྟར་ངང་གནས་ལས། །ཉམས་མྱོང་སྟེང་དུ་གཉེན་པོར་གཞན། །བསྒོམ་ན་གཉེན་པོར་ཤོར་བའོ། །གསལ་སྟོང་ལྷུན་གྲུབ་མ་རྟོགས་བཞིན། །བློ་དང་རྣམ་རྟོག་རྗེས་འབྲང་ནས། །རྒྱུ་འབྲས་མེད་པར་སྐུར་འདེབས་པ། །འདི་ནི་རྒྱས་འདེབས་སྟོང་པའོ། །ཞེས་དང་། གཞན་ཡང་། དགག་སྒྲུབ་བྲལ་བའི་རིག་པ་ལ། །ཤེས་བྱ་གཤིས་ལ་ཤོར་བ་ཟད། །སྐུ་གསུམ་ལྷུན་གྲུབ་ཆེན་པོ་ལ། །སྟོང་ཉིད་ལམ་དུ་ཤོར་བ་བྲལ། །ཡེ་ནས་ཤར་གྲོལ་དུས་མཉམ་ལ། །གཉེན་པོ་གཞན་ནས་བཙལ་བ་སྤང་། སྒོམ་དང་མི་སྒོམ་བློ་བྲལ་ལས། །རྒྱས་འདེབས་འཛིན་པ་རང་སར་ཡལ། །ཞེས་སོ། །དགེའོ། ། ལྕེ་བཙུན་ཁྲིད་ཡིག་གི་ཟིན་བྲིས།ཐིག་ལེ་གསང་རྫོགས་ལས། སྤྲོ་ན་བླ་མའི་རྣལ་འབྱོར་རེ་སྔོན་དུ་འགྲོ་དགོས་གསུངས། བསྡུ་ན། ཐུན་སྤྱིའི་སྔོན་འགྲོ་འདི་ཕྱིན་ཆད་ཀྱི་ཐུན་ཐམས་ཅད་ཀྱི་སྔོན་དུ་འགྲོ་དགོས་པ་སྟེ། ཡིད་དང་མཐུན་ཞིང་དབེན་པའི་གནས་སུ་བདེ་བའི་སྟན་ལ་ལུས་གནད་དྲང་པོར་བསྲང་། ཐོག་མེད་ནས་བསགས་པའི་སྡིག་སྒྲིབ་བགེགས་དང་བར་ཆད་ཐམས་ཅད་དག་པར་མོས་ལ་རླུང་རོ་ལན་གསུམ་བསལ་ནས་ཅི་བདེར་བཞག །སེམས་རྣམ་གཡེང་གི་རྟོག་པའི་རྗེས་སུ་མི་འབྲང་བར། ནམ་མཁའ་དང་མཉམ་པའི་སེམས་ཅན་ཐམས་ཅད་གདོད་མའི་མགོན་པོའི་གོ་འཕང་ལ་འགོད་པའི་སླད་དུ་ཟབ་གསང་རྫོགས་པ་ཆེན་པོའི་ལམ་ཉམས་སུ་བླང་བར་བགྱིའོ་སྙམ་པའི་སེམས་བསྐྱེད་སྙིང་ཐག་པ་ནས་མི་འབྲལ་བས། མདུན་གྱི་ནམ་མཁར་ཡེ་ཤེས་འོད་ལྔའི་ཐིག་ལེའི་ཀློང་དུ་ངོ་བོ་རྩ་བའི་བླ་མ་ཉིད་རྣམ་པ་བི་མ་ལ་མི་ཏྲ་སྐུ་མདོག་དཀར་གསལ་ཤངས་རྩེར་ཨ་དཀར་པོས་མཚན་པ་དར་སྔོན་པོའི་སྟོད་གཡོག་དང་ཆོས་གོས་གསོལ་ཞིང་ཕྱག་མཉམ་བཞག་ཐོད་ཞལ་བདུད་རྩིའི་བཀང་བ་བསྣམས་པ། འོད་དང་གཟི་བརྗིད་རབ་ཏུ་འབར་ཞིང་ཞབས་རྡོ་རྗེའི་སྐྱིལ་མོ་ཀྲུང་བཅས་རང་ལ་དགྱེས་པས་དགོངས་པར་བསམ་ལ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་སོགས༴ བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་དུ་བཏབ་པས། བླ་མའི་སྐུ་ལས་ཡེ་ཤེས་ཀྱི་འོད་ཟེར་མཐའ་ཡས་པ་བྱུང་། རང་ལ་ཐིམ་པས་སྒོ་གསུམ་གྱི་སྒྲིབ་པ་བསལ། མཐར་བླ་མ་ཉིད་འོད་ཕུང་དུ་གྱུར་ནས་རང་ལ་ཐིམ་པས་རྒྱུད་བྱིན་གྱིས་བརླབས་པར་བསམ་ལ་རིག་པ་འཛིན་མེད་དུ་འཇོག་གོ །ཞེས་གསུངས་སོ། ༈ །དེ་ཡང་སྤྱིར་དབང་བཞིས་ལམ་རྫོགས་པའི་ཚུལ་ནི། སྤྲོས་བཅས་ཀྱིས་ཚོགས་ལམ་བཅུ་གཉིས་རྫོགས་པའི་ཡོན་ཏན་ཐོབ་པའི་རྟེན་བྱེད། སྤྲོས་མེད་ཀྱིས་སྦྱོར་ལམ་ངེས་འབྱེད་ཆ་བཞི་རྫོགས་པའི་རྟེན་བྱེད། ཤིན་ཏུ་སྤྲོས་མེད་ཀྱིས་མཐོང་ལམ་རྫོགས་པའི་རྟེན་བྱེད། རབ་ཏུ་སྤྲོས་མེད་ཀྱིས་སྒོམ་ལམ་ས་དགུ་རྫོགས་པའི་རྟེན་བྱེད་པའོ། ༈ །དེ་ཡང་སློབ་དཔོན་དགའ་རབ་རྡོ་རྗེས་འོག་མིན་དུ་དཔལ་རྡོ་རྗེ་སེམས་དཔའ་ལ་རང་བཞིན་རྫོགས་པ་ཆེན་པོའི་དབང་དང་། ཡང་གསང་བླ་ན་མེད་པའི་གདམས་པ་དང་བཅས་པ་ཡོངས་སུ་རྫོགས་པ་ཞུས། དེ་ནས་རི་མ་ལ་ཡ་རིན་པོ་ཆེ་རྣམ་པར་སྤྲུལ་བའི་རྩེ་མོར་རྡོ་རྗེ་དབྱིངས་ཀྱི་མཁའ་འགྲོ་མ་བདེ་བའི་རོ་ལྡན་མ་དང་། བདེ་བྱེད་སེར་མོ་ཡོན་ཏན་མཐའ་ཡས་པའི་མཁའ་འགྲོ་མ་གཉིས་ཀྱིས་ཞུས་ཏེ། རང་བཞིན་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་རུ་ཕྱེ་བ་ཡིན་ཏེ། ལོ་གསུམ་ན་གླེགས་བམ་དུ་བཀོད། དེ་ནས་སློབ་དཔོན་འཇམ་དཔལ་བཤེས་གཉེན་གྱིས་རང་བཞིན་རྫོགས་པ་ཆེན་པོའི་ཆོས་རྣམས་སེམས་ཀློང་མན་ངག་གི་སྡེ་གསུམ་དུ་ཕྱེ་བ་ཡིན་ཏེ། ཨ་ཏི་བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་ཅན་ལ་མན་ངག་གོ །ཞེས་གསུངས། སེམས་ཀློང་མན་ངག་གི་དགོངས་པ་དང་ཁྱད་པར་ནི། ཐེག་མཆོག་མཛོད་ལས། དེ་ཡང་རང་སེམས་མ་ཡིན་པའི་ཆོས་ལོགས་ན་མེད་པས་སྣ་ཚོགས་སེམས་ཀྱི་སྡེའོ། །འདི་དག་ནི་སེམས་རང་བྱུང་གི་ཡེ་ཤེས་ལས་གཞན་དུ་ངོ་བོ་དང་རྩལ་དང་རོལ་བ་གསུམ་དུ་གྱུར་པ་འགོག་པ་ལ་དགོངས་པ་ཙམ་མོ། །ཆོས་ཉིད་ཀུན་ཏུ་བཟང་མོའི་ཀློང་ནས་སྐུ་གསུང་ཐུགས་ཀྱི་རྒྱན་ལས་འགྲོ་ས་གཞན་མེད་པར་སྨྲ་བ་ཀློང་གི་སྡེའོ། །འདི་དག་ནི་བརྗོད་བྱ་ཆོས་ཉིད་ཀྱི་ཀློང་ལས་གཞན་འབྱུང་འགོག་པ་ལ་དགོངས་པ་ཙམ་མོ། །ཡིན་ལུགས་གནད་ཐོག་ཏུ་འབེབས་པ་མན་ངག་གི་སྡེའོ། །འདི་དག་ནི་གནད་མ་ཡིན་པ་གཞན་དུ་ཁ་འབྱམས་དོན་ལས་འགྱངས་པ་འགོག་པ་ལ་དགོངས་པས་ཀུན་གྱི་རྩེ་མོར་ཕྱིན་པའོ། །ཞེས་གསུངས། གྲུབ་མཐའ་མཛོད་ལས། སེམས་སྡེ་སེམས་ཡིན་པ་ལ་ལ་ལས་ཡིད་དཔྱོད་དུ་འཛིན་ལ། ཀློང་སྡེ་ཆོས་ཉིད་དུ་འཛིན་པས་ཡིད་དཔྱོད་དུ་སོང་བ་ལས། མན་ངག་གི་སྡེ་ནི་གནས་ལུགས་རང་གསལ་དུ་བྱེད་པས་འཕགས་སོ། །ཞེས་གསུངས། མན་ངག་གི་སྡེ་ནི་སེམས་ཀློང་གཉིས་ལས་ཆེས་ཁྱད་པར་དུ་འཕགས་པ་ཡིན་ཏེ། ཨ་ཏི་བཀོད་པ་ཆེན་པོ་ལས། ཀྱེ་རྡོ་རྗེ་འཛིན་པ། དེ་ལྟར་གཏན་ལ་མ་ཕབ་ན། །ཡིད་དཔྱོད་འཛིན་པ་རྣམས་དང་ནི། །ཁྱད་པར་ཅི་ཡང་མེད་པར་འགྱུར། །དེ་ཕྱིར་ངེས་གསང་སྙིང་པོ་འདི། །མུན་པ་ལས་ནི་མར་མེའམ། །བ་གླང་རྣམས་ཀྱི་གླང་ཆེན་ནམ། །གཅན་གཟན་རྣམས་ལས་སེང་གེའམ། །རྐང་ཐང་རྣམས་ལས་རྟ་པ་བཞིན། །ཀུན་གྱི་ནང་ནས་ཁྱད་པར་འཕགས། །ཞེས་གསུངས། མན་ངག་སྡེ་དེ་དག་གི་སྙིང་པོ་ཐིག་ལེ་མཆོག་གི་ཆོས་ཉིད་ཐིག་ལེ་མཆོག་ཅེས་པ་ནི། ལྷུན་གྲུབ་སྣང་བའི་འོད་གསལ་ལ་གཙོ་བོར་གསུངས་པས་དེ་ལ་སྙན་རྒྱུད་དང་བཤད་རྒྱུད་གཉིས་སུ་ཕྱེ། སྙན་རྒྱུད་ལ་དབྱེ་ན་མང་ཡང་། ཡི་གེ་དང་བཅས་པ་དང་ཡི་གེ་མེད་པའི་སྙན་རྒྱུད་ཆོས་ཉིད་དོན་གྱི་མན་ངག་གོ །དེ་ནས་སློབ་དཔོན་ཤྲི་སེང་ཧས་བཤད་རྒྱུད་ལ། ཕྱི་སྐོར། ནང་སྐོར། གསང་སྐོར། གསང་བ་བླ་ན་མེད་པའི་སྐོར་དང་བཞིར་ཕྱེ་བ་ཡིན་ཏེ། སློབ་དཔོན་བི་མ་ལའི་སྒྲོན་མ་སྣང་བྱེད་ལས། ཕྱི༵་སྐོར༵་ལུས༵་དང༵་འདྲ༵་སྟེ༵་ཐ༵་སྙད༵་རྒྱ༵་ཆེར༵་བསྟན༵། ལུས་རྫོགས་པར་ཡོད་ཀྱང་དོན་སྙིང་ལྔ་ལ་སོགས་པ་མེད་ན་རོ་དང་འདྲ། ནང༵་སྐོར༵་མིག༵་དང༵་འདྲ་༵ སྟེ༵་མིག་གིས་ཕྱི་མཐོང་ཡང་རང་མི་མཐོང་མཐོང་༵ བ༵་བརྡ༵་ཡི༵་ཆོས༵། གསང་༵ སྐོར༵་སྙིང༵་དང༵་འདྲ༵་སྟེ་༵ དྲན༵་བྱེད༵་ཟུང༵་གི༵་ཆོས༵། སྙིང་གཅིག་པུས་དོན་བྱེད་མི་ནུས་ཏེ་སྔ་མ་ལས་བག་ཙམ་འཕགས་སོ། །འདི༵་ནི༵་ལུས༵་ཀུན༵་ཏེ་ལུས་ལ་ནད་མེད་དབང་པོ་སྐྱོན་མེད་རྫོགས༵་པའི༵་སྐྱེས༵་བུ་༵ འདྲ༵། ཞེས་གསུངས་པ་ལྟར། ཕྱི་སྐོར་དུ་གཞི་གདོད་མའི་གནས་ཚུལ་རྒྱ་ཆེར་བཤད་པ་ལས་ལམ་ཉམས་སུ་ལེན་ཚུལ། བར་དོའི་འཆར་ཚུལ། མཐར་ཐུག་འབྲས་བུའི་གྲོལ་ཚུལ་མ་བཤད། ནང་སྐོར་དུ་ལམ་དཔེ་དོན་རྟགས་གསུམ་གྱི་ངོ་སྤྲད་པ་ཙམ་བཤད་ཀྱང་གཞིའི་གནས་ཚུལ་དང་། མཐར་ཐུག་འབྲས་བུའི་གྲོལ་ཚུལ་མ་བཤད། གསང་སྐོར་དུ་ལམ་གྱི་བྱེ་བྲག་བསྒོམ་པ་ཙམ་བསྟན་ཀྱང་གཞིའི་གནས་ཚུལ་དང་མཐར་ཐུག་གི་གྲོལ་ཚུལ་རྣམས་མ་བཤད། ཡང་གསང་བླ་མེད་དུ་གཞི་གདོད་མའི་གནས་ལུགས། ལམ་ལྟ་སྒོམ་སྤྱོད་གསུམ། འབྲས་བུ་མཐར་ཐུག་གི་གྲོལ་ཚུལ་དང་བཅས་པ་རྒྱས་པར་བསྟན་པའོ། །ཡང་གསང་བླ་ན་མེད་པའི་རྒྱུད་ཀྱི་རྣམ་གྲངས་མདོར་བསྟན་པ་ནི། ཐེག་མཆོག་མཛོད་ལས་བརྗོད་བྱ་རྒྱ་མཚོ་ལྟར་ཟབ་ཅིང་རྒྱ་ཆེ་བར་སྟོན་པ་རིག་པ་རང་ཤར་གྱི་རྒྱུད། ཉི་མ་ལྟར་གསལ་བར་སྟོན་པ་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད། ཐེག་པ་འོག་མ་རྣམས་ཟིལ་གྱིས་གནོན་པར་སྟོན་པ་སེང་གེ་རྩལ་རྫོགས་ཆེན་པོའི་རྒྱུད། མི་འགྱུར་བའི་ཆོས་ཉིད་སྟོན་པ་རི་རྒྱལ་ལྟ་བུའི་རྒྱུད་དཔལ་ཡི་གེ་མེད་པ། འཁྲུལ་པའི་འཁོར་ལོ་གཅོད་པར་སྟོན་པ་འཁོར་ལོ་ལྟ་བུའི་རྒྱུད་བཀྲ་ཤིས་མཛེས་ལྡན། སྡེ་སྣོད་ཀུན་གྱི་སྒོ་འབྱེད་པར་སྟོན་པས་ལྡེའུ་མིག་ལྟ་བུའི་རྒྱུད་སྒྲ་ཐལ་འགྱུར། གོལ་ས་གཅོད་པར་སྟོན་པ་རལ་གྲི་ལྟ་བུའི་རྒྱུད་ཀུན་ཏུ་བཟང་པོ་ཐུགས་ཀྱི་མེ་ལོང་། སྒྲོན་མའི་སྣང་བ་སྟོན་པར་བྱེད་པས་གསལ་ཤིང་ལྟ་བུའི་རྒྱུད་སྒྲོན་མ་འབར་བ། ཚིག་དོན་གསེར་ལ་གཡུས་སྤྲས་པ་ལྟར་སྟོན་པས་གསེར་ཞུན་ལྟ་བུའི་རྒྱུད་ནོར་བུ་ཕྲ་བཀོད། ཡིད་ཆེས་ངེས་པའི་ཚིག་གིས་བར་མ་དོ་ལ་གསལ་འདེབས་པས་མ་བུ་འབྲེལ་བ་ལྟ་བུའི་རྒྱུད་ཉི་ཟླ་ཁ་སྦྱོར། མེ་ལོང་གི་ནང་དུ་གཟུགས་བརྙན་བསྟན་པ་ལྟ་བུར་དཔེ་དོན་སྦྱར་ཏེ་སྟོན་པས་མེ་ལོང་ལྟ་བུའི་རྒྱུད་ངོ་སྤྲོད་སྤྲས་པ། མུ་ཏིག་གི་ཕྲེང་བ་བརྒྱུས་ལེགས་པ་ལྟར་མན་ངག་ཁྲིགས་ཆགས་སུ་སྟོན་པ་མུ་ཏིག་ཕྲེང་བའི་རྒྱུད། སྦྲུལ་གྱི་མདུད་པ་ལྟར་གཞུང་ཚིག་རང་གྲོལ་དུ་སྟོན་པ་སྦྲུལ་མདུད་ལྟ་བུའི་རྒྱུད་རིག་པ་རང་གྲོལ། ཁྱུང་ཆེན་པོ་ནམ་མཁའ་ལ་རྩོལ་སྒྲུབ་མེད་པར་འགྲོ་བ་ལྟ་བུའི་རྒྱུད་ཀུན་ཏུ་བཟང་པོ་ཐུགས་ཀྱི་མེ་ལོང་གི་རྒྱུད། དབང་དང་བྱིན་རླབས་ཆུ་བོའི་རྒྱུན་བཞིན་སྟོན་པས་ཆུ་བོ་ལྟ་བུའི་རྒྱུད་རྫོགས་པ་རང་བྱུང་། རྒྱལ་པོའི་གདུང་མི་འགྱུར་བས་རྒྱལ་ས་ཟིན་པ་ལྟ་བུའི་རྒྱུད་སྐུ་གདུང་འབར་བ། ཕྱུག་པོ་བང་མཛོད་གང་འདོད་འབྱུང་བ་ལྟ་བུའི་རྒྱུད་རིན་པོ་ཆེ་སྤུངས་པ། སྤུ་གྲི་ངར་མས་གང་ལ་རེག་པ་གཅོད་པ་ལྟར་འགལ་བྱེད་ཆམ་ལ་འབེབས་པ་སྤུ་གྲི་ལྟ་བུའི་རྒྱུད་ནག་མོ་ཁྲོས་མ་དང་བཅོ་བརྒྱད་དོ།། དེའང་ནག་མོ་ཁྲོས་མ་ནི་བསྟན་པ་བསྲུང་བའི་ཕྱིར་རྒྱུད་འཕྲོས་པ་ཡིན་ལ། གཞན་བཅུ་དྲུག་སྒྲ་ཐལ་འགྱུར་གྱི་རྩ་བ་ལས་འཕྲོས་པ་ཡིན་ཏེ། སྒྲ་ཐལ་འགྱུར་ཆེན་པོའི་རྒྱུད་ལས། འོད་ཀྱི་ཡང་ཞུན་བཅུ་བདུན་བཤད། །རང་ཤར་བ་དང་རང་གྲོལ་དང་། །རང་བྱུང་ཉིད་དང་རྩལ་རྫོགས་དང་། །མཛེས་ལྡན་དག་དང་ཕྲ་བཀོད་དང་། །མུ་ཏིག་ཕྲེང་དང་ཡི་གེ་མེད། །དབྱིངས་དང་༼ རྡོ་རྗེ་སེམས་དཔའི་སྙིང་གི་མེ་ལོང་ངམ་༽ཐུགས་ཀྱི་མེ་ལོང་དང་། །ཉི་ཟླ་ཁ་སྦྱོར་ངོ་སྤྲོད་སྤྲས། །སྐུ་གདུང་འབར་དང་རིན་ཆེན་སྤུངས། །སྒྲོན་མ་འབར་དང་ཀློང་ཆེན་དྲུག །དེ་ལྟར་བཅུ་དྲུག་རིམ་པ་རྣམས། །ཐལ་འགྱུར་ལས་ནི་ངེས་འཕྲོས་ནས། །གདུལ་ཡུལ་སེམས་ཅན་རྣམས་ལ་སྣང་། །ཞེས་སོ། །དགོས་ཆེད་རྒྱས་པར་བཤད་པ་དང་། གོ་རིམ་ངེས་པས་མཇུག་བསྡུ་བ་ཐེག་མཆོག་མཛོད་ལས་ཤེས་པར་བྱའོ། །རང་བཞིན་རྫོགས་པ་ཆེན་པོ་སྡེ་གསུམ་ལས། དེ་དག་ལས་ཁྱད་པར་བསྡུས་པའི་ཐིག་ལེ་རང་གནད་ལ་དབབ་པ་འདི་ལ་རྣམ་གྲངས་དང་གཅིག འགྱུར་ལུགས་དང་གཉིས་ལས། རྣམ་གྲངས་ལ་གཉིས་ཏེ། སྙན་རྒྱུད་དང་། བཤད་རྒྱུད་གཉིས་སོ། །བཤད་རྒྱུད་ལ། ཐིག་ལེ་རང་གནད་ལ་དབབ་པ་འདི་ལ། ཕྱི་སྐོར་དང་གཅིག །ནང་སྐོར་དང་གཉིས། གསང་སྐོར་དང་གསུམ། ཡང་གསང་བླ་ན་མེད་པའི་སྐོར་དང་བཞི་སྟེ་རྒྱ་གར་གྱི་ཡུལ་ན་རྣམ་གྲངས་བཞི་བཞུགས་སོ། །ཕྱི་སྐོར་ནང་སྐོར་གསང་སྐོར་གྱི་འགྱུར་ལུགས་ནི། ཕྱི་ཤིང་སྒྲོམ་སྐྱ་མོའི་སྐོར་དང་གཅིག །ནང་བསེ་སྒྲོམ་སྨུག་པོའི་སྐོར་དང་གཉིས། གསང་བ་དངུལ་གྱི་གའུ་སྤར་ཁ་ཅན་གྱི་སྐོར་དང་གསུམ་བོད་དུ་འགྱུར་རོ། །ཕྱི་ཤིང་སྒྲོམ་སྐྱ་མོའི་སྐོར་ལ་ཐུགས་རྗེ་ཆོས་ཀྱི་འཁོར་ལོ་ཕྱི་ལྟར་དུ་བསྐོར་བ། ཟུག་པ་རྩ་བའི་ཚུལ་དུ་འགོད་པ་ལ། སྐུའི་རྒྱུད་པདྨ་འཁྱིལ་བ། གསུང་གི་རྒྱུད་རྡོ་རྗེ་རྩེ་མོ་འདུས་པ། ཐུགས་ཀྱི་རྒྱུད་རིན་པོ་ཆེ་སྤུངས་བ། ཡོན་ཏན་གྱི་རྒྱུད་བསོད་ནམས་འཇམ་དཔལ་བརྩེགས་པ། ཕྲིན་ལས་ཀྱི་རྒྱུད་མཁའ་གསལ་ཉི་མ་དང་ལྔ་སྟེ། རྩ་བའི་རྒྱུད་སྡེ་ཆེན་པོ་ལྔ་བོད་དུ་འགྱུར་རོ། །གྱེས་པ་ཡལ་གའི་ཚུལ་དུ་འདུག་པ་ལ། འཁོར་བ་དོང་སྤྲུག །རྨ་བྱ་མཇིང་བསྣོལ། ཡེ་ཤེས་བླ་མ། ལྷ་མོ་འོད་ཟེར་ཅན་གྱི་རྒྱུད་དང་བཞི་སྟེ། མན་ངག་གི་རྒྱུད་སྡེ་ཆེན་པོ་བཞི་བོད་དུ་འགྱུར་རོ། །རྒྱས་པ་ལོ་འདབ་ཀྱི་ཚུལ་དུ་འདུག་པ་ལ། ཞལ་ཆེམས་གསུམ་པ། མཚན་ཉིད་བཞི་ལྡན། ཐིག་པ་གསུམ་པ། བདུད་རྩི་ཡང་ཞུན་གྱི་བཅུད་དང་བཞི་སྟེ། ལུང་གི་བཀའ་ཆེན་པོ་བཞི་བོད་དུ་འགྱུར་རོ། །གསལ་བ་མེ་ཏོག་གི་ཚུལ་དུ་འདུག་པ་ལ། པོ་ཏི་སྨུག་པོ་ཆེ་ཆུང་གཉིས་བོད་དུ་འགྱུར་རོ། །སྨིན་པ་འབྲས་བུའི་ཚུལ་དུ་འདུག་པ་ལ། སེམས་ཕྱོགས་ཆེན་མོ་མཛོད་ཀྱི་རྒྱུད་འགྱུར་རོ། །དེ་ཚོ་ནི་ཕྱི་ཤིང་སྒྲོམ་སྐྱ་མོའི་འགྱུར་ལུགས་སོ། །ནང་བསེ་སྒྲོམ་སྨུག་པོའི་སྐོར་ལ། རྟོགས་པ་ཡེ་ཤེས་ཀྱི་འཁོར་ལོ་ནང་ལྟར་དུ་བསྐོར་བ་ལ། ཀུན་ཏུ་བཟང་པོའི་སྒོམ་ཉམས་དྲུག་པ། ཡེ་ཤེས་ལག་སྤྲད། མཆོངས་པ་ལྔ་ལྡན། ཐིག་ལེ་གསང་བ་བརྡའི་རྒྱུད། ཚོགས་ཀྱི་འཁོར་ལོ་གསང་བ་ཆེ་ཆུང་གཉིས། འཕྲུལ་གྱི་ལྡེ་མིག་གསུམ་སྐོར་ནམ་མཁའ་གཉིས་པ། རྒྱུད་སེམས་བསྲེ་བའི་མན་ངག་རྣམས་ལྟོ་སྦྱོར་གྱི་དགོངས་པ་སྐུ་གསུམ་བྱ་ལོག་གི་རྒྱུད། བྱ་ལོག་གསལ་བ་སྒྲོན་མའི་རྒྱུད། ལྷུན་གྲུབ་ཡོངས་རྫོགས་ཀྱི་རྒྱུད། ཇི་བཞིན་གནས་པ་བཀོད་པའི་རྒྱུད། དྲི་མེད་རྣམ་དག་འོད་གསལ་བའི་རྒྱུད་ལ་སོགས་ཏེ་རྒྱུད་སྡེ་ཆེན་པོ་བཅུ་གསུམ་བོད་དུ་འགྱུར་རོ། །དེ་ཚོ་ནི་བསེ་སྒྲོམ་སྨུག་པོའི་འགྱུར་ལུགས་སོ། །གསང་བ་བཻཌཱུཪྱ་རིན་པོ་ཆེ་བསེའི་གའུ་དངུལ་གྱི་སྤར་ཁ བ་ཅན་གྱི་སྐོར་ལ། ཕྱག་ན་རྡོ་རྗེ་མེ་ལྕེ་ཕྲེང་བའི་རྒྱུད། མཁའ་འགྲོ་མ་གཙུག་ན་མེ་འབར་བའི་རྒྱུད། འཇམ་དཔལ་ཡེ་ཤེས་རྒྱན་གྱི་རྒྱུད། འཇམ་དཔལ་དགོངས་པ་འདུས་པའི་རྒྱུད། ཡོངས་སུ་གྲགས་པའི་སྤུ་གྲི་སྡེ་དྲུག །བཤད་པའི་རྒྱུད། ཀལ་པོ་དུམ་བུའི་རྒྱུད། རིན་པོ་ཆེ་ཨ་ཏི་ཆེ་གཟེར་མིག་ཆེ་ཆུང་གཉིས་ཏེ། རྒྱ་གར་ནས་བོད་ཡུལ་གླིང་དུ་འགྱུར་རོ། །དེ་ཚོ་ནི་གསང་བ་བཻཌཱུཪྱ་རིན་པོ་ཆེ་བསེའི་གའུ་དངུལ་གྱི་སྤར་ཁབ་ཅན་གྱི་འགྱུར་ལུགས་སོ། །དེ་རྣམས་གཉག་ཛྙཱ་ནའི་སྒྲ་བསྒྱུར་རོ། །གཞན་ཡང་སྤྱི་རྒྱུད་ཐིག་ལེ་ཀུན་གསལ་དང་། ཟབ་མོ་རྒྱུད་ལྔ་ལ་སོགས་པ་དང་། སྙན་རྒྱུད་ཡི་གེ་ཅན་དཔེ་དང་བཅས་པ་དང་། སྙན་བརྒྱུད་ཡི་གེ་མེད་པའི་ངོ་སྤྲོད་དམར་ཁྲིད་ཀྱི་གདམས་ངག་རྣམས། བསམ་ཡས་མཆིམས་ཕུའི་བྲག་དམར་གེ་གོང་དུ། ཉང་བན་མཆོག་ཏིང་འཛིན་བཟང་པོ་ལ་བཤད་ཅིང་ཛྙཱ་ནས་བསྒྱུར་བ་ལགས་སོ། །དེ་ལས་ཀྱང་ཁྱད་པར་དུ་གྱུར་པ་རྫོགས་པ་ཆེན་པོ་ཡང་གསང་བླ་ན་མེད་པ། མངོན་སུམ་སྙིང་ཐིག་གི་སྐོར་ལ་རྒྱུད་བཅུ་བདུན། ཁྲོས་མ་ནག་མོའི་རྒྱུད་དང་བཅོ་བརྒྱད་སོགས་སོ། །འདི་རྗེས་ཀྱི་ཁ་སབ་ཡིན། སྒྲ་ཐལ་འགྱུར་རྩ་བའི་རྒྱུད་ལས། གཞན་ཡང་རྒྱུད་ཀྱི་ཆོས་ཉིད་བཤད། །ཡང་དག་ཆོས་ཉིད་སྒྲ་ལས་ཐལ། །རང་གི་ངོ་བོ་ཡི་གེ་མེད། །རང་རིག་ཡེ་ཤེས་སྒྲོན་འོད་འབར། །ཆོས་ཉིད་དག་པའི་བཀྲ་ཤིས་མཛེས། །ལྟ་བ་འཇིགས་བྲལ་སེང་རྩལ་རྫོགས། །རང་རིག་སྨིན་པའི་རྫོགས་རང་བྱུང་། །ལུ་གུ་རྒྱུད་འབྲེལ་མུ་ཏིག་ཕྲེང་། །ཉམས་ཀྱི་སྣང་བ་ནོར་ཕྲ་བཀོད། །རང་གནས་སྣང་བའི་སྙིང་མེ་ལོང་། །གོལ་ས་རང་གཅོད་ཐུགས་མེ་ལོང་། །གཞན་ནས་མ་བྱུང་རང་བྱུང་ཉིད། །རང་བྱུང་ཡིན་པས་རང་གྲོལ་ལས། །དབྱིངས་སུ་གཅིག་པས་ཀློང་ཡང་དྲུག །ཡོན་ཏན་རྫོགས་པའི་རིན་ཆེན་སྤུངས། །རང་རིག་བསྟན་པའི་ངོ་སྤྲོད་སྤྲས། །སྣང་བ་དག་པས་ཉི་ཟླ་སྦྱོར། །རིག་པ་སྨིན་ཕྱིར་སྐུ་གདུང་འབར། །འདི་དག་རྣམས་ཀྱང་གཞི་ལས་ཤར། །འདི་ལྟར་ཆོས་ཉིད་བརྗོད་མེད་པས། །ཐ་སྙད་ཚིག་གི་གཞི་མར་ཤར། །ཚིག་བརྗོད་རིམ་པས་རྣམ་དག་པས། །དེ་ལྟར་བརྗོད་མེད་པ་ལ་གསལ། །དེ་ཕྱིར་ཚིག་རིམ་མཐའ་ཟད་པའོ། །ཞེས་གསུངས་སོ། །སློབ་དཔོན་ལོ་རྒྱུས་ཀྱི་ཆེ་བས་མཛད་པའི་སློབ་དཔོན་གྱི་ཡོན་ཏན་བསྟན་པ་དང་། བསྡུས་དོན་མན་ངག་གི་ཆེ་བས་ས་བཅད་ཀྱི་དམིགས་གསལ་བར་བསྟན་པ་དང་། ཟབ་པ་མཚན་གྱི་ཆེ་བས་མན་ངག་གི་གཞུང་བདེ་བླག་ཏུ་རྟོགས་པར་བསྟན་པ་དང་། འཇུག་སྒོ་ཐེག་པའི་ཆེ་བས་རྒྱུད་བཅུ་བདུན་གང་ལ་བརྟེན་ཅིང་མན་ངག་གི་ཁུངས་གསལ་བར་བསྟན་པ་དང་། དགོས་ཆེད་གང་ཟག་གི་ཆེ་བས་དོན་གང་ཡིན་པ་གསང་སྔགས་སྣོད་ཀྱི་ཁྱད་པར་བསྟན་པ་དང་ལྔས་བསྟན་ནོ། །སེམས་སྡེ་ལ་ལུགས་གཉིས་ཏེ་གཞི་གནས་རང་གྲོལ་གྱི་རྫོགས་ཆེན་དང་། འདོད་པ་རང་ཤར་གཉིས་སོ། །ཀློང་སྡེ་ལ་གསུམ་སྟེ། ཀློང་དཀར་པོ་མུ་བཞི་ལམ་ཁྱེར་དུ་སྨྲ་བ་དང་། ཁྲ་བོ་རབ་འབྱམས་སུ་སྨྲ་བ་དང་། ནག་པོ་རང་གྲོལ་དུ་སྨྲ་བའོ། །དེ་ལ་འདི་ནི་མན་ངག་གི་སྡེ་སྟེ། འདི་ལ་ཡང་གསུམ་སྟོན་ཏེ། སྟོན་པས་ཁ་འཐོར་བའི་ཚུལ་དུ་གསུངས་པ་དང་། ཁ་གཏམ་གྱི་ཚུལ་དུ་བཀའ་སྩལ་བ་དང་། རྒྱུད་རང་གཞུང་གི་ཚུལ་དུ་བཀའ་སྩལ་བའོ། །དེ་ལས་རྒྱུད་རང་གཞུང་ངོ་། །དེ་ལའང་བཞི་སྟེ། གཏར་ཀ་གེགས་སེལ་གྱི་ཚུལ་དུ་བཀའ་སྩལ་བ་དང་། གབ་པ་མངོན་བྱུང་གི་ཚུལ་དུ་བཀའ་སྩལ་བ་དང་། ལྟ་བ་སྒང་དྲིལ་ཏེ་བཀའ་སྩལ་བ་དང་། བཤད་པ་རང་གསལ་གྱི་ཚུལ་དུ་བཀའ་སྩལ་བ་བཞི་ལས། འདི་ནི་བཤད་པ་རང་གསལ་ལོ། །འདི་ལ་ཡང་གསུམ་སྟེ། འཁྲུལ་གཞི་གཞི་ལ་ལྡོག་པའི་ཚུལ་དུ་བཀའ་སྩལ་བ་དང་། འཁྲུལ་བ་བདའ་འདེད་ཀྱི་ཚུལ་དང་། ཐིག་ལེ་རང་གནད་ལ་ཕབ་སྟེ་བཀའ་སྩལ་བའོ། །དེ་ལ་འདི་ཐིག་ལེ་རང་གནད་ལ་ཕབ་སྟེ་བཀའ་སྩལ་བའོ། །འདི་ལ་གཉིས་ཏེ། སྙན་ནས་སྙན་དུ་བརྒྱུད་པ་སྙན་བརྒྱུད་དང་། རྒྱུད་ལུང་དཀྱུས་ལ་བརྟེན་ནས་བཤད་པའི་བརྒྱུད་པ་གཉིས་ལས་འདི་བཤད་རྒྱུད་དོ། །དེ་ལ་བཞི་ཡོད་པ་ལས། འདི་ནི་གསང་བ་བླ་ན་མེད་པའོ། ༈ །བི་མ་ལས་གལ་ཏེ་སྐྱེས་བུ་དེ་ནི་འདི་ལྟར་ཉམས་སུ་ལེན་པའི་དུས་ན་བར་ཆད་ཀྱི་དབང་དུ་གྱུར་ན་ཡང་། འདི་ལྟ་སྟེ། ལུས་ངག་གི་སྤྱོད་པ་སྔོན་དུ་འགྲོ་བ་འཁོར་འདས་རུ་ཤན་འབྱེད་པའི་དུས་འདས་སོང་ན་སྐྱེས་བུ་དེ་ནི་རང་བཞིན་སྤྲུལ་སྐུའི་ཞིང་ཁམས་སུ་དབུགས་དབྱུང་ནས་ལོ་ལྔ་བརྒྱ་ན་བར་ཆད་མེད་པར་སངས་རྒྱ་བ་ཐེ་ཚོམ་མེད་དོ། །ལུས་ཀྱི་གནད་གཅུན་པའི་དུས་སུ་བར་ཆད་ན་བར་དོའི་སྣང་བ་ཐམས་ཅད་ལྷུན་གྲུབ་རིན་པོ་ཆེའི་སྣང་བ་ལ་ཐིམ་ལུགས་བརྒྱད་དང་བཅས་ཏེ་སངས་རྒྱ་བ་ཡིན་ནོ། །སྣང་བ་གོང་ནས་གོང་དུ་འཕེལ་བའི་ཚེ་བར་ཆོད་ན་བར་དོ་གཉིས་པ་ཡེ་ཤེས་བཞིའི་སྣང་བར་སངས་རྒྱ་བར་ངེས་སོ། །རང་རིག་པ་ཉིད་ཚད་ལ་ཕེབས་མ་ཕེབས་ཀྱི་མཚམས་སུ་ཚེའི་དུས་བྱས་ན་བར་མ་དོ་དང་པོར་ཚོམ་བུ་ལ་ངེས་པ་ཐོབ་སྟེ། ཞག་ལྔ་སྐད་ཅིག་མ་རྣམ་པ་གསུམ་གྱི་ཆ་ལ་གྲོལ་བར་ངེས་སོ། །ཞེས་གསུངས་སོ། ༈ །ཆོས་དབྱིངས་རིན་པོ་ཆེའི་མཛོད་ཀྱི་འགྲེལ་བ་ལུང་གི་གཏེར་མཛོད་ལས། གཟུང་འཛིན་གཉིས་སུ་མེད་པར་རྟོགས་པའི་རིག་པ་ནི་ཕྱོགས་མེད་ལྷུན་གྲུབ་ཆེན་པོ་སྟེ་འདི་ལྟར། ལུས་དང་ཡུལ་དང་སྣང་བའི་གཏད་མེད་པར། །ནམ་མཁའི་ཀློང་ཡངས་མཉམ་པར་ཕྱམ་གདལ་བས། །ནང་གི་ཆོས་ཞེས་བདག་ཏུ་འཛིན་པ་མེད། །གང་ལ་གཟུང་བ་དང་ནི་འཛིན་པ་མེད་པར་རྟོགས་པའི་རིག་པ་དེའི་ངོ་བོ་ལ་ནི་རང་བྱུང་ཡེ་ཤེས་སུ་ཐ་སྙད་བཏགས་ཀྱང་། རང་རིག་རང་གསལ་ལོ་ཞེས་རྣལ་འབྱོར་སེམས་ཙམ་པ་ལྟར་མི་འདོད་དེ། ཕྱི་ནང་མེད་པས་ནང་གི་སེམས་སུ་མ་གྲུབ་པ་དང་། རང་བཞིན་མེད་པས་རང་གི་རིག་པ་ཁོ་ནར་མ་གྲུབ་པ་དང་། གཟུང་འཛིན་ཡོད་མ་མྱོང་བས་དེ་གཉིས་དང་མ་བྲལ་བར་མ་གྲུབ་པ་དང་། ཚོར་རིག་གི་ཡུལ་ན་མེད་པས་མྱོང་བ་གཉིས་མེད་དུ་མ་གྲུབ་པ་དང་། སེམས་དང་སེམས་བྱུང་མེད་པས་རང་གི་སེམས་སུ་མ་གྲུབ་པ་དང་། གསལ་མི་གསལ་མེད་པས་རང་གསལ་དུ་མ་གྲུབ་པའི་ཕྱིར་རོ། །རིག་མ་རིག་ལས་འདས་པས་རིག་པ་ཙམ་དུའང་གདགས་སུ་མེད་པ་འདི་ནི། མཐའ་བྲལ་ཡོངས་སུ་རྫོགས་པ་ཆེན་པོ་ཞེས་བྱ་སྟེ། མཚོན་ཚིག་གི་ཐ་སྙད། རང་བྱུང་གི་ཡེ་ཤེས་དང་། བྱང་ཆུབ་ཀྱི་སེམས་དང་། ཆོས་སྐུ་དང་། དབྱིངས་ལྷུན་གྲུབ་ཆེན་པོ་དང་། རིག་པ་རང་གསལ་རྗེན་པ་ཞེས་བརྗོད་ཀྱང་། བརྡ་ཤེས་པའི་ཕྱིར་བཏགས་པ་ཙམ་ལས་རང་ངོ་བརྗོད་མེད་ཆེན་པོར་རྟོགས་པར་བྱའོ། །དེ་ལྟར་མ་ཡིན་པར་མིང་ལ་དོན་དུ་ཞེན་ན། སེམས་ཙམ་པའི་རང་རིག་རང་གསལ་གཟུང་འཛིན་གཉིས་མེད་ཀྱི་ཤེས་པ་དང་ཁྱད་པར་མི་རྙེད་དོ། །འདིར་བློ་གྲོས་མ་སྦྱངས་ལ་འདི་པར་འདོད་པའི་མུ་ཅོར་དུ་སྒྲོགས་པ་དག་དེ་གཉིས་གཅིག་དུ་འཛིན་པས་རང་རིག་འདི་ཁོ་བོ་ཅག་གི་ཤེས་སོ་ཞེས་མངོན་པའི་ང་རྒྱལ་སྨྲ་བར་ཟད་དོ། །ཞེས་གསུངས་སོ། ༈ །རིག་པའི་ཡེ་ཤེས་ལྔ་ཚན་དུ་གནས་པས། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ༔ ཅེས་པ་དང་། རང་ལུས་རྡོ་རྗེ་སངས་རྒྱས་ཉིད༔ རང་གི་ལུས་ལ་སངས་རྒྱས་བཞུགས༔ གཞན་ནས་སངས་རྒྱས་བསྟན་དུ་མེད༔ ཅེས་པའོ། །དེ་ཡང་རིག་པའི་ཡེ་ཤེས་ཉིད། རྣམ་པ་ཡུལ་དེ་ཉིད་ལ་རིག་པའི་ཡེ་ཤེས་སྣང་བས། རྣམ་པར་སྣང་མཛད་སྐུ་རང་བྱུང་བས་དེ་ཉིད་གཞན་ནས་བཙལ་མི་དགོས་པའོ། །རྡོ་རྗེ་རིགས་ཀྱི་ངོ་བོ་མི་འགྱུར་བ་དེ་ལ་རྣམ་རྟོག་གིས་མི་བསྐྱོད་པས། རིག་པ་ཉིད་རྡོ་རྗེ་མི་འགྱུར་བའི་སྐུར་བྱུང་བའོ། །ཡང་རིག་པའི་ཡེ་ཤེས་དེ་ཉིད་ལས་ཉམས་གོང་འཕེལ་གྱི་སྣང་བ་ལ་སོགས་ཏེ། ཡོན་ཏན་གྱི་འཕེལ་སྒོ་དཔག་ཏུ་མེད་པ་བྱུང་བས། རིན་ཆེན་འབྱུང་ལྡན་དུ་རང་བྱུང་བའོ། །ཡང་རིག་པའི་གསལ་ཆ་འོད་ཟེར་མཐའ་ཡས་པར་སྣང་བས། སྣང་བ་མཐའ་ཡས་འོད་དཔག་མེད་དུ་རང་བྱུང་བའོ། །ཡང་རིག་པ་ཡེ་ཤེས་ཉིད་ཡེ་ཤེས་ངོ་བོར་ཡོད་ལ། དེ་ཉམས་སུ་བླང་བས་འགྲུབ་ངེས་ན། དོན་ཡོད་གྲུབ་པར་རང་བྱུང་བའོ། །དེ་ལྟར་རྫོགས་པ་ཆེན་པོའི་རྣལ་འབྱོར་བས་ཡི་དམ་གྱི་ལྷ་གཞན་ནས་བཙལ་ཞིང་བསྒོམ་དུ་མེད་དེ། ཚི་ཆད་པའི་ནད་དང་བྲལ་བའོ། །ཡང་རང་གི་སེམས་ཉིད་རིགས་ལྔར་འབྱུང་སྟེ། རིག་པ་སྐྱེ་མེད་ཀྱི་དབྱིངས་སུ་རྩལ་འགག་མེད་གཤེགས་ཤིང་ཐིམ་པས་ན། དེ་བཞིན་གཤེགས་པའི་རིགས་ཡིན་ལ། དེའི་ངོ་བོ་རྐྱེན་གྱིས་མི་འགྱུར་བས་རྡོ་རྗེའི་རིགས་སོ། །དེ་ལ་ཡོན་ཏན་ཐམས་ཅད་རང་རྫོགས་སུ་གནས་པས་རིན་པོ་ཆེའི་རིགས་ཡིན་ལ། །དེའི་ངོ་བོ་སྐྱོན་གྱིས་མ་གོས་པས་པདྨའི་རིགས་སོ། །ཐམས་ཅད་རིག་པའི་ཆོ་འཕྲུལ་གྱི་ལས་སུ་འདུག་པས་ལས་ཀྱི་རིགས་ཞེས་བྱའོ། །དེ་ཡང་རིག་པ་ཉིད་ཡེ་ཤེས་ལྔར་གནས་ཏེ་ཆོས་སྤྱི་དང་རང་གི་མཚན་ཉིད་དམ། གཟུགས་ཅན་ཐམས་ཅད་རིག་པའི་ངང་ལས་གསལ་བས་མེ་ལོང་ལྟ་བུའི་ཡེ་ཤེས་སོ། །ཆོས་སྣ་ཚོགས་ཆོས་ཉིད་སྐྱེ་བ་མེད་པའི་ཀློང་དུ་མཉམ་པས་མཉམ་པ་ཉིད་ཀྱི་ཡེ་ཤེས་སོ། །དེ་ཉིད་ཀྱི་ངང་ལས་ཡོན་ཏན་གྱི་ཆ་མ་འདྲེས་པར་སོ་སོར་གསལ་བས་སོ་སོར་ཀུན་ཏུ་རྟོག་པའི་ཡེ་ཤེས་སོ། །དེ་ཡང་འབད་རྩོལ་གྱིས་བསྒྲུབ་མི་དགོས་ཏེ། ཡེ་ནས་རང་གསལ་ལྷུན་གྲུབ་ཏུ་གནས་པས་བྱ་བ་གྲུབ་པའི་ཡེ་ཤེས་སོ། །དེ་ཐམས་ཅད་ཐ་དད་མ་ཡིན་ཏེ། ཆོས་ཉིད་སྟོང་ཉིད་དུ་རོ་གཅིག་པས་ཆོས་ཀྱི་དབྱིངས་ཀྱི་ཡེ་ཤེས་སོ། །དགའ་རབ་རྡོ་རྗེའི་གསང་བའི་ཞལ་ཆེམས་ལས། ངོ་རང་ཐོག་ཏུ་སྤྲད་པ་དང་། ཐག་གཅིག་ཐོག་ཏུ་བཅད་པ་དང་། གདེང་གྲོལ་ཐོག་ཏུ་བཅའ་བ་སྟེ་ཚིག་གསུམ་གནད་དུ་བརྡེགས་པ། འཇམ་དཔལ་བཤེས་གཉེན་གྱི་ཕྱག་གཡས་པའི་མཐིལ་དུ་བཻཌཱུཪྱ་མཐིང་གའི་ཞུན་མས་བྲིས་པ་རིན་པོ་ཆེ་ཤེལ་གྱི་ཟ་མ་ཏོག་སེན་གང་བ་དུར་ཁྲོད་ཆེན་པོ་བསིལ་བ་ཚལ་དུ་བབས་སོ། །འཇམ་དཔལ་བཤེས་གཉེན་གྱི་ཞལ་ཆེམས་སམ། རིག་པའི་གདངས་ཡུལ་བཙལ་བ་དབྱིངས་ཐིག་ལུག་རྒྱུད་ནམ་མཁའ་སྤྲིན་བྲལ་དང་༡། ལུས་ཀྱི་གནད་གཟིར་བ་འདུག་སྟངས་དང་༢། འགྲོ་འོང་གི་ལམ་བཅད་རང་སར་འཇོག་པ་རླུང་ཕྱིར་འཛིན་དང་༣། གཏད་སའི་འབེན་གཟུད་པ་དབྱིངས་རྣམ་དག་སྒྲོན་མའི་གནད་དང་༤། མི་འགུལ་བ་གསུམ་ལ་གཞི་༼ ལུས་འདུག་སྟངས་ལས་མི་འགུལ་བ། མིག་གཟིགས་སྟངས་ལས་མི་འགུལ་བ། སེམས་བཞག་ཐབས་ལས་མི་འགུལ་བ།༽ བཅའ་བ་དང་༥། ཡུང་འབྲུ་ཙམ་གྱི་ལྷ་སྐུ་སྣ་ཚོགས་ཤར་བ་ཡིན། རྒྱ་ཆེ་བའི་ནམ་མཁའ་སྤར་གྱིས་བཟུང་བ་རིག་པའི་རང་ངོ་ཟིན་པ་སྟེ་སྒོམ་ཉམས་དྲུག་པ་༦། ཤྲི་སེང་ཧའི་ཕྱག་མཐིལ་དུ་རིན་པོ་ཆེའི་ཟ་མ་ཏོག་གི་ནང་དུ་བཻཌཱུཪྱ་མཐིང་ཁའི་ཞུན་མས་བྲིས་པ་གཅིག་དུར་ཁྲོད་ཆེན་པོ་སོ་ས་གླིང་དེ་ཉིད་དུ་བབས་སོ། །ཤྲི་སེང་ཧའི་ཞལ་ཆེམས། གསལ་བའི་ཡེ་ཤེས་ཟང་ཐལ་གྱི་གཟེར་གྱིས་འཁོར་འདས་གཉིས་ཀྱི་མཚམས་སུ་བཏབ་པས་སྤྱོད་པ་ལ་དོར་བ་བསྟན། སྒྲོན་མ་རང་སྣང་ཡེ་ཤེས་ཀྱི་གཟེར་གྱིས་ཡུལ་སྣོད་བཅུད་རྒྱ་ཆེན་པོ་ཀུན་གཞི་སེམས་གཉིས་ཀྱི་བར་ལ་བཏབ་པས་སྒོམ་པ་ལ་དོར་བ་བསྟན། ངོ་བོ་རང་དག་གི་གཟེར་བློ་དངོས་གཉིས་ཀྱི་བར་ལ་བཏབ་པས་ལྟ་བ་ལ་དོར་བ་བསྟན། ལྟ་བ་གྲོལ་ཡན་གྱི་གཟེར་རྟག་ཆད་གཉིས་ཀྱི་བར་དུ་བཏབ་པས་ཡིན་༼ ཡུལ་ཅན་རྟོག་བཅས་༽ཚུལ་ལ་དོར་བ་བསྟན། རིག་པ་ཆོས་ཡིན་མིན་གྱི་གཟེར་ཆོས་ཐ་དད་ཅན་ཆོས་ཉིད་ཀྱི་བར་དུ་བཏབ་པས་ཉམས་མྱོང་སྒོམ་ལ་དོར་བ་བསྟན། སྒོ་ལྔ་རྒྱ་ཡན་གྱི་གཟེར་བྱིང་༼གཟུང་འཛིན་གྱི་སྒྲོག་རང་སར་གྲོལ་བ་གསལ་བའི་ངར་ཆ་༽རྒོད་༼ ཆགས་སེམས་༽གཉིས་ཀྱི་༼དགེ་མི་དགེ་གཉིས་ལ་བཟུང་བ་ལ་༽བར་ལ་བཏབ་པས་དགོངས་པ་སྤྱོད་པ་ལ་དོར་བ་བསྟན། ཆོས་སྐུ་ཡེ་རྫོགས་ཀྱི་གཟེར་སྣང་༼ ཀ་ལྷུན་གཉིས་༽སྟོང་གཉིས་ཀྱི་བར་ལ་བཏབ་པས་འབྲས་བུ་ལ་དོར་བ་བསྟན་པ་གཟེར་བུ་བདུན་པ། རིན་པོ་ཆེའི་ཟ་མ་ཏོག་སེན་གང་བ་གཅིག་ཡེ་ཤེས་མདོའི་ཕྱག་མཐིལ་དུ་བཀྲ་ཤིས་ཁྲི་སྒོར་བབས་སོ། །ཛྙཱ་ན་སུ་དྲའི་ཞལ་ཆེམས། སྤྱོད་པ་ཐམས་ཅད་རྩལ་སྦྱོང་བར་འདོད་ན། སྣང་བ་གཅེར་བཞག་ཏུ་སྣང་བ་ཐམས་ཅད་ཞོག་ཅིག སྒོམ་པ་ཐམས་ཅད་ལ་སྟོབས་རྙེད་པར་འདོད་ན། རྒྱ་མཚོ་ཅོག་བཞག་གི་དགོངས་པས་བློ་དངོས་གཉིས་གཅིག་ཏུ་དྲིལ་ལ་ཞོག་ཅིག །ལྟ་བ་ཐམས་ཅད་རང་གྲོལ་བར་འདོད་ན། རི་བོ་ཅོག་བཞག་གི་ལྟ་བས་ཆོས་ཐམས་ཅད་ཟད་སར་སྐྱོལ་ཅིག །འབྲས་བུ་ཐམས་ཅད་ལས་རང་སར་གནས་པར་འདོད་ན། རིག་པ་ཅོག་བཞག་གི་ལྟ་བས་མན་ངག་ལ་འཁྲུལ་བ་ཐམས་ཅད་རང་སར་གྲོལ་བར་ཞོག་ཅིག་ཅེས་བཞག་ཐབས་བཞི་པ་བི་མ་ལ་མི་ཏྲའི་ཕྱག་གཡས་པའི་མཐིལ་དུ་རིན་པོ་ཆེའི་ཟ་མ་ཏོག་སེན་གང་བ་གཅིག་བབས་སོ། །འདི་རྣམས་རྒྱས་པར་ཤེས་འདོད་ན་གསེར་ཡིག་ཅན་བི་མའི་སྙིང་ཐིག་དང་། གནད་གསུམ་ཆོས་ཉིད་ཀྱི་འཁོར་ལོ་སོགས་ལས་ཤེས་པར་བྱའོ། །རང་ཤར་ལས། དེ་ཡང་འདི་ལྟ་སྟེ། ཟིལ་གྱིས་མི་ནོན་པ་སེང་གེ་ལྟ་བུའི་རིག་པ་དང་། ཁྱད་པར་གླང་པོ་ཆེ་ལྟ་བུའི་རིག་པ་དང་། མཁའ་ལྡིང་ཁྱུང་ལྟ་བུའི་རིག་པ་དང་། མ་འདྲེས་ལ་ཡོངས་རྫོགས་པ་འཇའ་ཚོན་ལྟ་བུའི་རིག་པ་དང་། ཐམས་ཅད་བསྲེག་པ་མེ་ལྟ་བུའི་རིག་པ་དང་། ཡངས་ཤིང་གོ་སྐབས་འབྱེད་པ་ནམ་མཁའ་ལྟ་བུའི་རིག་པ་དང་། བསྐྱོད་པ་རླུང་ལྟ་བུའི་རིག་པ་དང་། ཐེ་ཚོམ་མེད་པ་ཐི་བྱ་ཚང་དུ་འཇུག་པའི་རིག་པ་དང་། ཟབ་པ་རྒྱ་མཚོ་ལྟ་བུའི་རིག་པ་དང་། གཟུང་དུ་མེད་པ་ཆུ་ཟླ་ལྟ་བུའི་རིག་པ་དང་། ཀུན་ཏུ་མཐའ་ཡས་པ་བར་སྣང་ལྟ་བུའི་རིག་པ་དང་། དྲི་མ་མེད་པ་མན་ཤེལ་ལྟ་བུའི་རིག་པ་དང་། གོས་པ་མེད་པ་པདྨ་ལྟ་བུའི་རིག་པ་དང་། རྒྱུན་ཆད་མེད་པ་ཆུ་བོའི་གཞུང་ལྟ་བུའི་རིག་པ་དང་། འགག་པ་མེད་པ་ལྦུ་བ་ལྟ་བུའི་རིག་པ་དང་རྣམ་པ་བཅོ་ལྔ་སྟེ། ༈ དེ་ཡང་སློབ་དཔོན་དགའ་རབ་རྡོ་རྗེས། རང་བཞིན་རྫོགས་པ་ཆེན་པོའི་རྒྱུད་ལུང་མན་ངག་རྣམས་གླེགས་བམ་དུ་བཀོད། དེ་ནས་སློབ་དཔོན་འཇམ་དཔལ་བཤེས་གཉེན་གྱིས་རང་བཞིན་རྫོགས་པ་ཆེན་པོའི་ཆོས་རྣམས་སེམས་ཀློང་མན་ངག་གི་སྡེ་གསུམ་དུ་ཕྱེ་ནས། དེ་དག་གི་སྙིང་པོ་ཐིག་ལེ་མཆོག་གི་ཆོས་ཉིད་ལ། སྙན་བརྒྱུད་དང་། བཤད་རྒྱུད་གཉིས་སུ་ཕྱེ། དེ་ནས་སློབ་དཔོན་ཤྲཱི་སེང་ཧས་བཤད་རྒྱུད་ལ། ཕྱི་སྐོར། ནང་སྐོར། གསང་སྐོར། གསང་བ་བླ་ན་མེད་པའི་སྐོར་དང་བཞི་ཕྱེ་བ་ཡིན་ལ། དེ་དག་གི་བཞེད་ཚུལ་ནི། སློབ་དཔོན་བི་མ་ལའི་སྒྲོན་མ་སྣང་བྱེད་ལས། ཕྱི་སྐོར་ལུས་དང་འདྲ་སྟེ་ཐ་སྙད་རྒྱ་ཆེར་བསྟན། ནང་སྐོར་མིག་དང་འདྲ་སྟེ་མཐོང་བ་བརྡ་ཡི་ཆོས། གསང་སྐོར་སྙིང་དང་འདྲ་སྟེ་དྲན་བྱེད་ཟུང་གི་ཆོས། འདི་ནི་ལུས་ཀུན་རྫོགས་པའི་སྐྱེས་བུ་འདྲ། ཞེས་གསུངས་པ་ལྟར་ཕྱི་སྐོར་དུ་གཞི་གདོད་མའི་གནས་ཚུལ་རྒྱ་ཆེར་བཤད་པ་ལས། ལམ་ཉམས་སུ་ལེན་ཚུལ་བར་དོའི་འཆར་ཚུལ་མཐར་ཐུག་འབྲས་བུའི་གྲོལ་ཚུལ་མ་བཤད། ནང་སྐོར་དུ་ལམ་དཔེ་དོན་རྟགས་གསུམ་གྱིས་ངོ་སྤྲད་པ་ཙམ་བཤད་ཀྱང་གཞིའི་གནས་ཚུལ་དང་མཐར་ཐུག་འབྲས་བུའི་གྲོལ་ཚུལ་མ་བཤད། གསང་སྐོར་དུ་ལམ་གྱི་བྱེ་བྲག་བསྒོམ་པ་ཙམ་བསྟན་ཀྱང་གཞིའི་གནས་ཚུལ་དང་མཐར་ཐུག་གི་གྲོལ་ཚུལ་རྣམས་མ་བཤད། ཡང་གསང་བླ་མེད་དུ་གཞི་གདོད་མའི་གནས་ལུགས། ལམ་ལྟ་སྒོམ་སྤྱོད་གསུམ། འབྲས་བུའི་མཐར་ཐུག་གི་གྲོལ་ས་དང་བཅས་པ་རྒྱས་པར་བསྟན་པའོ། །ཡང་གསང་བླ་ན་མེད་པ་དེ་ལ་རྒྱུད་ཐམས་ཅད་ཀྱི་སྒོ་དང་ལྡེ་མིག་ལྟ་བུ་སྒྲ་ཐལ་འགྱུར་རྩ་བའི་རྒྱུད་ལ་སོགས་རྒྱུད་བཅུ་བདུན་དང་སྔགས་སྲུང་ཁྲོས་མའི་རྒྱུད་སྤུ་གྲི་ལྟ་བུ་དང་བཅོ་བརྒྱད། དེ་དག་གི་དགོངས་ཉམས་གཅིག་ཏུ་དྲིལ་བ་ལ། རྒྱ་ཆེ་བ་པཎྜི་ཏའི་སྐོར་དང་། ཟབ་པ་ཀུ་སུ་ལུའི་སྐོར་དང་གཉིས། དང་པོ་ཀློང་ཆེན་མཛོད་བདུན། གཉིས་པ་ལ་པདྨའི་མཁའ་འགྲོ་སྙིང་ཐིག །བི་མ་ལའི་གསང་བ་སྙིང་ཐིག་སྟེ་མ་གཉིས། བུ་མཁའ་འགྲོ་ཡང་ཐིག །བླ་མ་ཡང་ཐིག་གཉིས། དེ་གཉིས་ཀའི་ཡང་ཏིག་ནི་ཟབ་མོ་ཡང་ཏིག་གོ །དེ་དག་གི་དགོངས་ཉམས་གཅིག་ཏུ་དྲིལ་བ་ནི་རྫོགས་པ་ཆེན་པོ་ཀློང་ཆེན་སྙིང་ཐིག་དང་། རྫོགས་པ་ཆེན་པོ་མན་ངག་སྡེའི་བཅུད་ཕུར་མན་ངག་ཐམས་ཅད་ཀྱི་རྒྱལ་པོ་ཀློང་ལྔའི་ཡི་གེ་དུམ་བུ་གསུམ་པ་ལྕེ་བཙུན་ཆེན་པོ་སེང་གེ་དབང་ཕྱུག་ལ་འཇའ་ལུས་འཕོ་བ་ཆེན་པོའི་སྐུར་བཞེངས་པ་པཎ་ཆེན་བི་མ་ལ་མི་ཏྲའི་ཡེ་ཤེས་ཀྱི་སྐུ་དངོས་སུ་བྱོན་ནས་གནང་བའི་ཟབ་ཏིག་གོ ། ༈ དང་པོ་ནི། གྲུབ་མཐའ་མཛོད་ལས། རྒྱུད་དེ་དག་སོ་སོའི་དོན་གྱི་ཆིངས་སྡུད་ཚུལ་གྱི་སྒོ་ནས་བཤད་པ་ནི། རང་ཤར། རང་གྲོལ། ཡི་གེ་མེད་པ་གསུམ་ནི་རྒྱུད་ཀྱི་སྙིང་པོ་གསུམ་སྟེ། རྗེ་འབངས་འཛོམ་པ་ལྟ་བུའོ། །ནོར་བུ་ཕྲ་བཀོད། མེ་ལོང་གཉིས་དང་གསུམ་ནི་རྒྱུད་ཀྱི་དྭངས་མ་གསུམ་སྟེ་རྒྱུད་ཐམས་ཅད་ཀྱི་དོན་མཐོང་བས་རི་རྒྱལ་གྱི་རྩེར་ཕྱིན་པ་ལྟ་བུའོ། །མུ་ཏིག་ཕྲེང་བ། སེང་གེ་རྩལ་རྫོགས། བཀྲ་ཤིས་མཛེས་ལྡན་གསུམ་ནི་རྒྱུད་ཀུན་གྱི་དགོངས་དོན་ཟབ་མོ་གསལ་བའི་མེ་ཏོག་གསུམ་སྟེ་ཉི་མ་གསུམ་ཤར་བ་ལྟ་བུའོ། །རྫོགས་པ་རང་བྱུང་གི་རྒྱུད་ནི་ཀུན་གྱི་སྡོམ་འདུས་པ་གཅིག་སྟེ་མཁར་གྱི་རྨང་རྡོ་ལྟ་བུའོ། །ངོ་སྤྲོད་སྤྲོས་པ་ནི་དཔེ་དོན་གསལ་བའི་སྣང་བ་གཏིང་ནས་རྫོགས་པ་སྟེ་མཁར་རྩེ་སྒྲོན་མེ་ལྟ་བུའོ། །ཉི་ཟླ་ཁ་སྦྱོར་ནི་བར་དོར་གྲོལ་བའི་ཡེ་ཤེས་གཡུལ་བཟློག་སྟེ་སྐར་ཁུང་བཏོད་པ་ལྟ་བུའོ། །རིན་ཆེན་སྤུངས་པ་དང་སྐུ་གདུང་འབར་བ་ནི་རྒྱུད་ཀྱི་མ་ཚང་བ་ཁ་སྐོང་གི་ཡན་ལག་སྟེ་བ་གམ་ལྟ་བུའོ། །སྒྲོན་མ་འབར་བ་ནི་ཉམས་ལེན་གསལ་བའི་རྣལ་འབྱོར་གྲོལ་བའི་རྒྱུད་དེ་རྒྱལ་པོ་ཕོ་བྲང་གི་རྩེར་བཞུགས་པ་ལྟ་བུའོ། །ཀློང་དྲུག་པ་ནི་དགོངས་པ་དྲང་ཐད་དུ་སྟོན་པས་སྙིང་དང་འདྲ་ཞིང་མཚན་འཛིན་གྱི་དམག་མི་འཇུག་པས་སྒོ་བཅད་པ་ལྟ་བུའོ། །ཐལ་འགྱུར་ནི་རང་གི་གྲུབ་པའི་མཐའ་གསལ་ཞིང་ཕ་རོལ་གྱི་རྒོལ་བས་མི་ཚུགས་པས་གསང་བ་རང་གཞུང་སྟེ་ལྕགས་རི་ལྟ་བུའོ། །ནག་མོ་ཁྲོས་མ་ནི་འགལ་བྱེད་ཚར་གཅོད་པའི་མཚོན་ཆ་ལྟ་བུ་སྟེ་སྒོ་སྲུང་གོ་ཞུབ་ཅན་ལྟ་བུའོ། ། ༈ པཎ་ཆེན་བི་མ་མི་ཏྲས་དབུ་རྩེ་བར་ཁང་དུ་གསང་བ་མཆོག་གི་རྒྱུད་ལུང་མན་ངག་རྣམས་རྒྱལ་སྲས་མུ་ནེ་བཙད་པོ་སོགས་ལ་གསུངས། དེ་ནས་གདམས་པའི་གནད་རྣམས་གཅིག་དུ་བསྡུས་པ་། ཟབ་མོའི་པོ་ཏི་བཞི་ནི་མཆིམས་ཕུ་བྲག་དམར་གེ་གོང་དུ་གཏེར་དུ་སྦས་ནས། རྒྱ་ནག་པོའི་རི་བོ་རྩེ་ལྔ་ལ་གཤེགས་སོ། །ལྕེ་བཙུན་སེང་གེ་དབང་ཕྱུག་ནི། ཉང་རུང་པོའི་ཡུལ་ཉང་མཚོ་བྱ་བ་ན། ཡབ་ལྕེ་ཐུབ་པའི་དབང་པོ་དང་། ཡུམ་ཁྱུང་མོ་བཟའ་ལེགས་པའི་སྲས་སུ་འཁྲུངས། གནས་བརྟན་ལྡང་མ་ལྷུན་རྒྱལ་གྱིས་སྣོད་ལྡན་དུ་གཟིགས་ནས་གདམས་ངག་རྣམས་རྫོགས་པར་གནང་། དེ་ནས་ལྕེ་བཙུན་འུ་ཡུག་ནུབ་མའི་ཤུགས་གསེབ་དུ་བཞུགས་པའི་ཚེ། ནུབ་གཅིག་གི་རྨི་ལམ་ན་ཨ་ཙ་ར་ཞིག་བྱུང་ནས། བདག་ནི་བི་མ་མི་ཏྲ་མཁས་པ་སྟེ༔ སྐལ་ལྡན་སྙིང་པོའི་ཡང་བཅུད་དོན་འདོད་ན༔ མཆིམས་ཕུ་བྲག་དམར་གེ་གོང་ཡར་ལྡེབས་ལ༔ གསང་བ་སྙིང་ཐིག་སྙིང་དང་འདྲ་བ་ཡོད༔ དེ་དག་ཁྱེར་ལ་འོ་ཡུག་ཕྱི་གོང་དུཿ སུས་ཀྱང་མཐོང་བ་མེད་པར་ལོ་བདུན་སྒོམས༔ ཟག་བཅས་ཕུང་པོ་སྣང་བ་མ་ཡིན་ནོ༔ ཞེས་པ་ཐོས་ནས། མཆིམས་ཕུར་བྱོན་དུས་བུད་མེད་དུང་སོ་འཁོར་མ་ཡོད་པ་གཡུའི་སྨིན་མ་ཅན་ཞིག་གིས་དཔེ་རྣམས་བཏོན་ནས་བྱིན་པ་བླངས་ཏེ། འོ་ཡུག་ཕྱི་གོང་རྫ་ཡི་ར་བར་བཞུགས་པས། བི་མ་དངོས་བྱོན་ནས་ཟླ་བ་ཕྱེད་དུ་དབང་ཁྲིད་གདམས་པ་དང་བཅས་པ་ཐམས་ཅད་རྫོགས་པར་གནང་སྟེ་རྒྱ་ནག་དུ་གཤེགས་སོ། །དེ་ནས་ལྕེ་བཙུན་གྱིས་ལོ་བདུན་བསྒོམས་པས་ལྷག་མེད་འགྲུབ་ནས་བཞུགས་དུས། སྤྲུལ་པའི་སྐུ་རྒྱལ་བ་ཞང་སྟོན་དང་མཇལ་ནས་གདམས་པའི་སྣོད་མཁྱེན་ཏེ་གསང་བ་སྙིང་ཐིག་གི་དབང་ཁྲིད་གདམས་པ་དང་བཅས་པ་རྫོགས་པར་གནང་ནས། ལོ་བརྒྱ་ཉི་ཤུ་རྩ་ལྔ་ན་ནམ་མཁའ་ལ་འོད་ཟེར་གྱི་ཕུང་པོ་གཅིག་ཏུ་གཤེགས་ཏེ། བསམ་གྱིས་མི་ཁྱབ་པའི་ཏིང་ངེ་འཛིན་རྒྱ་མཚོ་ལ་སྙོམས་པར་ཞུགས་སོ། །དེའི་ཚེ་དུས་ན་ལན་ཅིག་སྟོན་ཟླ་ར་བའི་ཚེས་ལ་ཡེ་ཤེས་དང་ལས་དང་འཇིག་རྟེན་གྱི་མཁའ་འགྲོ་མ་སྤྲིན་བཞིན་དུ་གཏིབས་ནས་ཚོགས་ཀྱི་འཁོར་ལོའི་འདུ་བ་རྒྱ་ཆེན་པོ་ལ་ལོངས་སྤྱོད་པའི་ཚེ། ཨོ་རྒྱན་གྱི་ཌཱཀྐིའི་གཙོ་མོ་དཔལ་གྱི་བློ་གྲོས་མས་རྡོ་རྗེ་ལྟ་བས་བལྟས་ཏེ༔ ཕྱག་རྣལ་འབྱོར་གྱི་ལུགས་སུ་བཙལ་ནས་འདི་སྐད་ཅེས་གསོལ་ཏོ༔ ཨེ་མ༔ ཨེ་མ༔ མ་འོངས་པའི་ཚེ་ན་སྙིང་ཐིག་སྙིང་པོའི་རྣལ་འབྱོར་པ་རྣམས་ཀྱིས་ཉམས་ལེན་མཐར་ཐུག་གང་ལ་བགྱི༔ ཕྲིན་ལས་ཀྱི་གཞུང་གང་ལྟར་བསྲིང༔ སྙིང་པོའི་མཐར་ཐུག་གང་དུ་ལ་བཟླ་ཞེས་གསོལ་བ་ན༔ ཤྲི་ཧེ་རུ་ཀ་སེང་ཧེ་ཤྭ་ར་ཉིད་དལ་ཅིག་དབྱིངས་ཀ་དག་ཟང་ཐལ་གྱི་ཏིང་ངེ་འཛིན་ལ་སྙོམ་པར་ཞུགས་པས་སྐུ་མི་སྣང་བ་འོད་ཀྱི་རང་བཞིན་དུ་གྱུར་ཏོ༔ དེའི་མཁའ་འགྲོ་རྣམས་ཀྱི་མགྲིན་གཅིག་ཏུ་གདུང་བའི་དབྱངས་ཀྱིས༔ ཀྱེ་མ་ཀྱེ་ཧུད་ཀྱེ་མ་ཀློང༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཡེ་ཤེས་སྐུ་ཡིས་ཉི་མ་ཡིས༔ མ་རིག་འཐིབ་པོ་བསལ་དུ་གསོལ༔ རྡོ་རྗེའི་གསུང་གི་བདུད་རྩི་ཡིས༔ འཁོར་བའི་ཚ་གདུང་བསིལ་བར་མཛོད། ཅེས་གསོལ་བ་བཏབ་པས་ལྷུན་གྲུབ་རིག་རྩལ་གྱི་ཏིང་ངེ་འཛིན་ལ་འཕོས་པའི་དེ་མ་ཐག་པར་ཡེ་ཤེས་ཀྱི་སྐུ་མངོན་སུམ་དུ་སྣང་བར་མཛད་ནས་ཞལ་ཆེམས་གསང་བའི་གནད་དུམ་བུ་གསུམ་པ་འད ས་རྗེས་ཀྱི་ཚུལ་དུ་བབས་པའ༔ ཀློང་ལྔའི་དུམ་བུ་གསུམ་པ་ལས༔ འདི་ནས་མ་འོངས་སྙིགས་མ་ལྔ་ཆེས་བདོ་ཞིང་བོད་ཁམས་ཀླ་ཀློའི་འཇིགས་པས་བསྟན་ཞབས་སྡུད་པ་ལ་ཉེ་བ་ན༔ སྙིང་ཐིག་སྙིང་པོའི་དོན་ལ་མོས་པའི་རྣལ་འབྱོར་པ༔ ལྟར་སྣང་ཐ་མལ་པ་རྣམས་དང་ཤིན་ཏུ་མཉམ་པར་སྤྱོད་པ༔ གསང་བ་སུས་ཀྱང་བརྟག་པར་དཀའ་བ༔ ཆོས་ཐམས་ཅད་སྒྱུ་མ་ལྟ་བུ་ཉམས་འོག་དུ་ཚུད་པས་གང་གིས་ཀྱང་ཟིལ་གྱིས་མི་གནོན་པ༔ སྨིན་མཚམས་སུ་དཔའ་བོའི་རྒྱ་རྟགས་ཀྱིས་སྤྲས་པ༔ སློབ་དཔོན་འཇམ་དཔལ་བཤེས་གཉེན་གྱི་བྱིན་གྱིས་བརླབས་པ་ཐུགས་ཕྲད་ཤེས་རབ་ཀྱི་གཏེར་བརྡོལ་བ༔ ཁྱད་པར་ངེས་པའི་དོན་ལ་ངེས་ཤེས་རྙེད་ཅིང་བདག་དང་བདག་གི་བཀའ་སྲོལ་ཟོལ་མེད་པ་ཁོ་ན་ལ་མོས་པ་མི་འཕྲོག་པར་བརྟན་པ་འོད་གསལ་སྤྲུལ་པའི་རྡོ་རྗེ་ཞེས་བྱ་བ་དུས་རིང་མོ་ནས་འབྱུང་བར་འགྱུར་བའི་དོན་དུ་བསྟན་ཏོ༔ དེའི་ཕྱིར་དེའི་སླད་དུ༔ རེ་ཞིག་ཡེ་ཤེས་ཊཱཀྐི་མ་རྣམས་ཀྱིས་ཀློང་ལྔའི་ཡི་གེར་བཟུང་ལ༔ དུས་སུ་བབས་པའི་ཚེ་གང་ཟག་དེའི་རྒྱུད་ལ་བྱིན་གྱིས་བརླབས་པས་སད་པར་གྱིས་ཤིག༔ སྐལ་ལྡན་ཅིག་ཆར་བའི་རིགས་ཅན་འགའ་ཞིག་ལ་ཕན་པར་འགྱུར་རོ༔ ཞེས་སོ། །ཐིག་ལེ་གསང་རྫོགས་ལས། བསླུ་མེད་རྡོ་རྗེའི་ལུང་གིས་བསྟན་པའི་དོན་བཞིན་གངས་ཅན་ལྗོངས་ཀྱི་བསྟན་འགྲོ་རིས་སུ་མ་ཆད་པ་མཐའ་དག་གི་གཙུག་རྒྱན་མཁས་ཤིང་གྲུབ་པ་ཡོངས་ཀྱི་འཁོར་ལོས་སྒྱུར་བ་བཀའ་བབ་བདུན་གྱི་གསང་མཛོད་འཆང་བའི་ངོ་མཚར་སྤྲུལ་བའི་གཏེར་ཆེན་པདྨ་འོད་གསལ་མདོ་སྔགས་གླིང་པའམ་མཚན་གཞན་འོད་གསལ་སྤྲུལ་པའི་རྡོ་རྗེ་དགུང་གྲངས་ཉེར་བཞིར་སོན་པ་ཆུ་མོ་ཡོས་ཀྱི་ལོ་སྣྲོན་ཟླ་བའི་ཡར་ཚེས་བརྒྱད་ཀྱི་ཉིན་པར་འོ་ཡུག་མཐིལ་རམ་ལྡིངས་མ་དགོན་དང་ཉེ་བར་ཕེབ་པའི་དུས་ཀྱི་ཚེ་ཐ་མལ་གྱི་སྣང་བ་རང་འགགས་དབྱིངས་སུ་ཐིམ་པའི་འོད་གསལ་གྱི་སྣང་ཆར་ལྕེ་བཙུན་ཆེན་པོ་འོད་ལུས་སུ་གཤེགས་པའི་གནས་དུས་སྟོན་འཁོར་གྱི་ཚོམ་བུའི་བཀོད་པ་ཇི་ལྟ་བ་བཞིན་གསལ་བར་ཤར་ཞིང་མན་ངག་གི་གཞུང་བཀའ་སྩལ་བ་ཉིད་ཐུགས་ལ་བཀྲ་ལམ་གྱིས་སད་པ་ལྟར་གསང་བའི་གནས་རྗེས་སུ་དྲན་པའི་ཆོ་འཕྲུལ་ཆེན་པོས་གཏན་ལ་ཕབ་སྟེ་ཤིན་ཏུ་གསང་བའི་རྒྱས་བཏབ། ཕྱིས་དགོངས་གྲངས་སོ་བརྒྱད་དུ་སོན་པ་མེ་མོ་སྦྲུལ་གྱི་ལོར་སྔགས་སྲུང་ཨེ་ཀ་ཛ་ཊཱིས གསང་སྒོ་དབྱེ་བར་བསྐུལ་བ་ལྟར་ཞེས་གསུང་པ་བཞིན། ཐོག་མར་བློ་གྲོས་མཐའ་ཡས་པའི་སྡེ་སོགས་ལ་སྨིན་གྲོལ་ཚང་སྤྲུགས་སུ་བསྩལ། ཕྱིས་དགུ ང་གྲངས་ང་དགུར་སོན་པ་ས་ཕོ་སྟག་གི་ལོར་དུས་ཆེན་ཐ་སྐར་ཟླ་བའི་ཚེས་བཅོ་ལྔའི་ཉིན་འབྲུག་པ་རིན་པོ་ཆེ་བརྩེ་བ་ཆེན་པོས་རྗེས་སུ་བཟུང་དེ་སྨིན་གྲོལ་གྱི་གདམས་པ་ཚང་སྤྲུགས་སུ་གདམས་ཏེ། བཀའ་ལུང་གི་ཕྲེང་བ་ཡང་ཡང་གནང་ཞིང་ཆོས་འདིའི་བདག་པོ་ཡིན་ཞེས་གཏད་པ་ཡིན་ནོ། ༈ །ཡིད་བཞིན་མཛོད་འགྲེལ་པདྨ་དཀར་པོ་ལས། རོ་མའི་དྭངས་མ་དཀར་པོ་དང་། རྐྱང་མའི་དམར་པོ་ཞེས་དང་། །ཡབ་ཀྱི་རི་བོང་ཅན་ཧྃ་འཛག་པའི་ངང་ལ་དར་ཅིག་བློ་གནས་པ་ནི་དགའ་བའོ། དེ་ནས་སྤྱི་བོ་ནས་མགྲིན་པར་གཡོས་པ་ཉིད་སྙིང་གར་བབས་པ་ནི་མཆོག་དགའ་འོ།། ལྟེ་བའི་བར་ནི་དགའ་བྲལ་ལོ། །གསང་བར་བབས་པ་ནི་ལྷན་ཅིག་སྐྱེས་དགའ་འོ། །ཞེས་སོ། ༈ །སྤྱིར་སྟོང་པ་དང་། སྟོང་པ་ཆེན་པོ་དང་། ཤིན་ཏུ་སྟོང་པ་དང་། ཐམས་ཅད་སྟོང་པ་རྣམས་གསུངས་ཀྱང་། ཀློང་ཆེན་སྙིང་ཐིག་གི་རིག་འཛིན་འཁྲུལ་འཁོར་སྦས་དོན་གསལ་བ་ལས། སྟོང་པ་དང་། ཤིན་ཏུ་སྟོང་པ་དང་། སྟོང་པ་ཆེན་པོ་དང་ཐམས་ཅད་སྟོང་པའང་ཟེར་རབ་ཏུ་སྟོང་པ་ཞེས་གསུངས། འཇམ་དབྱངས་མཁྱེན་བརྩེའི་དབང་པོའི་བློ་མཚོ་ལས་བྱུང་བའི་མཆོད་ཕྲེང་བསྡུས་པ་རྡོ་རྗེ་སྒྲ་མའི་མཆོད་སྤྲིན་ལས། སྟོང་པའི་ཡེ་ཤེས་དགའ་བར་རྗེས་ཆགས་གཟུགས།། ཞེས་དང་། ཤིན་ཏུ་སྟོང་པ་ལས་བྱུང་མཆོག་དགའི་དངོས། །ཞེས་དང་། ཐམས་ཅད་སྟོང་པ་ཁྱད་པར་དགའ་བའི་དཔྱིད། །ཞེས་དང་། རབ་ཏུ་སྟོང་པ་ལྷན་སྐྱེས་ཡེ་ཤེས་དངོས། །ཞེས་གསུངས་སོ། །ཡུམ་ཀའི་ཟིན་བྲིས་ལས། སྤྱིའི་ཚོགས་མཆོད་ཀྱི་སྐབས་སུ་སྤྱི་བོ་ཛ་ལནྡྷ་ར་སོགས་གསུངས་པ་ནི། གནས་ཡུལ་དེ་རྣམས་ཕྱི་རོལ་དུ་མི་བལྟ་བར་སྤྱི་བོ་སོགས་རང་ལུས་ཀྱི་ཆ་དེ་དང་དེའི་རང་བཞིན་དུ་ཤེས་པས་ཚོགས་མཆོད་ཕུལ་ན་ཕྱིའི་དཔའ་བོ་མཁའ་འགྲོ་མཉེས་པ་ཉིད་ཀྱིས་རྩ་ཐིག་གི་སྐྱོན་དང་རྒུད་པའི་ཆ་རྣམས་སེལ་ཞིང་ཡོན་ཏན་གོང་འཕེལ་དུ་འགྲོ་བའི་ཐབས་མཁས་སུ་འགྱུར་པ་ལ་དགོངས་པར་བཤད་ན།བསུན་བཟློག་ངོ་མཚར་སྣང་བའི་ཡིག་ཆུང་གི་དོན་དང་འབྱོར་ཏེ་དེའི་རིགས་པས་ཕྲ་བའི་ལུས་དཀྱིལ་ལ་ཕྱི་རོལ་གྱི་ཡུལ་ཆེན་དང་། དེ་ན་བཞུགས་པའི་དཔའ་བོ་ཌཱཀྐི་དངོས་སུ་ང་རྒྱལ་བཞག་སྟེ་ཚོགས་ལ་རོལ་བས་གནས་པ་ཡུལ་གྱི་མཁའ་འགྲོ་མཉེས་ཤིང་དབང་དུ་འདུ་བའང་མཚོན་ནུས། ཚུལ་འདི་བསྙེན་དམིགས་སུ་ཡང་འཁྱེར་ཆོག་གོ། ཛ་ལནྡྷ་ར་སོགས་བརྒྱད་ཚན་དང་པོ་ཐུགས་ཀྱི་འཁོར་ལོ་དེའི་ལྷ་རྣམས་སྐུ་མདོག་སྔོན་པོ། གཉིས་པ་གསུང་འཁོར་ལྷ་རྣམས་དམར་པོ། གསུམ་པ་སྐུ་འཁོར་ལྷ་རྣམས་དཀར་པོ། གསུམ་ཀའི་དཔའ་བོ་ཐམས་ཅད་ཞལ་གཅིག་ཕྱག་བཞི་དང་པོ་གཉིས་རྡོར་དྲིལ། འོག་མའི་གཡས་ན་ཌཱ་མ་རུ་དང་གཡོན་ན་ཁ་ཊཱཾ་ཀ ཐོར་ཚུགས་དར་དཔྱང་ཅན། རྣལ་འབྱོར་མ་རྣམས་ཞལ་གཅིག་ཕྱག་གཉིས་གྲི་ཐོད་ཅན། སྐྲ་གྲོལ་བ། དེ་ཐམས་ཅད་སྤྱན་གསུམ་པ་རུས་རྒྱན་ཅན་ནོ། །བཞུགས་པའི་དཔའ་བོ་རྣལ་འབྱོར་མ༔ ཞེས་པ་མཁའ་འགྲོ་ཡབ་ཡུམ་ཉེར་བཞི་དང་། མཁའ་འགྲོ་དང་ནི་མཁའ་འགྲོ་མ༔ ཞེས་པ་དེ་དག་གི་འཁོར། དབུ་སྐྲ་ཐོར་ཚུགས་དཔའ་བོ། ལྕང་ལོའི་ཟར་བུ་སོགས་མཁའ་འགྲོ་མ་ལ་འགྲེལ་བར་བཤད་དོ། །ཞེས་གསུངས། ༈ རུ་ཤན་དང་པོ་ཐེག་མཆོག་མཛོད་ལས། ལུས་ཀྱི་སྤྱོད་པ་བྱས་པས་ཕྱི་ལུས་ཀྱི་ལས་ཟད་བྱེད་པ་ལ་མི་སྤྲོ་བ་དང་། ལུས་ཀྱི་སྡིག་པ་འདག་པའི་དགོས་པ་ཡོད་དོ། །འཁོར་ལོ་རྣམ་པར་བརྩེགས་པ་ལས། ལུས་ཀྱི་རུ་ཤན་སུས་བྱེད་པ། །འདིས་ནི་འཁོར་བའི་བག་ཆགས་འབྱོངས། །ཞེས་དང་། ཐེག་མཆོག་མཛོད་ལས། ངག་དུ་གང་བརྗོད་དེའི་སྐྱེ་བར་ཕྱིས་མི་འཇུག་པ་དང་། ཡེ་ཤེས་འཁོར་ལོ་གྲོལ་བའི་དགོས་པ་ཡོད་དེ། འཁོར་ལོ་བརྩེགས་པ་ལས། ངག་གི་རུ་ཤན་སུས་བྱེད་པ། །འཁོར་བའི་བརྗོད་པ་སྟོང་པར་ངེས། །ཞེས་དང་། ཐེག་མཆོག་མཛོད་ལས། དེ་ལྟར་ཉིན་མང་དུ་དྲན་པར་བྱས་པས་ཕྱིས་ཁམས་གསུམ་གྱི་འཁོར་ལོར མི་འཇུག་སྟེ། རྡོ་རྗེ་ཁང་བུ་བརྩེགས་པ་ལས། གང་གིས་བསམ་པའི་འཁོར་ལོ་ཉིད། །སུ་ཡིས་བསྐོར་བར་ནུས་པ་ལ། །ཕྱི་ནས་དེ་ཡི་སེམས་རྒྱུན་འགག །ཅེས་གསུངས། རུ་ཤན་གསུམ་པའི་ལུས༵་གནས༵་ལ༵། ཀྱེ་རྡོ་རྗེ་ལས། ལུས་ལ་ཡེ་ཤེས་ཆེན་པོ་གནས།། རྟོག་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པའོ། །ལུས་ལ་གནས་ཀྱང་ལུས་སྐྱེས་མིན། །ཞེས་དང་། སམྦྷུ་ཊི་ལས། རང་གི་ལུས་ལ་སངས་རྒྱས་བཞུགས། །གཞན་ཏུ་གང་ནའང་སངས་རྒྱས་མེད། །ཅེས་དང་། གཉིས་མེད་རྣམ་རྒྱལ་ལས། སེམས་ཅན་ཀུན་གྱི་སྙིང་ལ་ནི། །ཐུགས་ཀྱི་གསང་བ་སྙིང་པོ་བཞུགས། །དེ་ཉིད་སྙིང་པོ་གསུམ་ལྡན་པ། །བདེ་གཤེགས་སྙིང་པོ་འཇུག་པ་ཉིད།། ཅེས་དང་། ས་ར་ཧས། མཁས་པ་རྣམས་ཀྱིས་བསྟན་བཅོས་འཆད་པའི་ཚེ། །ལུས་ལ་ཡེ་ཤེས་ཡོད་པ་མ་རྟོགས་སོ། །ཞེས་དང་། རྡོ་རྗེ་དྲིལ་བུ་པས། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་ལ་འགྱུར་བ་མེད། །ཅེས་དང་། སློབ་དཔོན་བི་མ་ལས། དྲན་པའི་ཆོས་ཉིད་རོ་མྱང་བ་ནི་དགའ་བ། དྲན་ཚད་དུ་རོ་གཅིག་པ་མཆོག་དགའ། སྐྱེ་མེད་ངང་དུ་རྟོགས་པ་ནི་ལྷན་ཅིག་སྐྱེས་པའི་དགའ་བ། བློ་འདས་ཆེན་པོ་སྤྲོས་པ་དང་བྲལ་བ་ནི་དགའ་བྲལ་ལོ། །ཞེས་གསུངས་སོ། །ཆོས་བོར་བ་ཚིག་ལས་འདས་པ། ཆོས་ཟད་པ་རང་བཞིན་མ་རྙེད། ཆོས་ལས་འདས་པ་གདམས་པ་རྣམས་ཀྱང་མ་རྙེད། ༈ དགུ༵་ཕྲུག༵་སུ༵། ཉམས་ལེན་གནད་ཀྱི་སྒྲོན་མ་ལས། དེ་ཡང་ལུས་ཀྱི་ཕྱིའི་བྱ་བ་ཚོང་དང་སོ་ནམ་ལ་སོགས་པ་འཇིག་རྟེན་གྱི་འདུ་འཛི་དང་གཡེང་བ། ནང་གི་བྱ་བ་ཐུན་མོང་གི་ཆོས་སྤྱོད་ཕྱག་དང་བསྐོར་བ་ལ་སོགས་པ། གསང་བའི་བྱ་བ་ཐུན་མོང་མ་ཡིན་ཕྱག་རྒྱ་གར་ལ་སོགས་སྟེ། མདོར་ན་གཡོ་བྱེད་ལུས་ཀྱི་སྤྲོས་པ་མཐའ་དག་བཏང་ཞིང་། ངག་གི་ཕྱིའི་བྱ་བ་ལོང་གཏམ་ཚིག་རྩུབ་ལ་སོགས་པ་འཇིག་རྟེན་ཐ་མལ་བའི་ངག་གི་སྨྲ་བརྗོད། ནང་གི་བྱ་བ་ཐུན་མོང་གི་འདོན་ཟློས་ཁ་ཏོན། གསང་བའི་བྱ་བ་ཐུན་མོང་མ་ཡིན་པའི་བཟླས་བརྗོད་ལ་སོགས་པ་སྟེ་མདོར་ན་སྨྲ་བརྗོད་ངག་གི་འཇུག་པ་མཐའ་དག་བཏང་ལ། སེམས་ཀྱི་ཕྱིའི་བྱ་བ་འཇིག་རྟེན་གྱི་རྣམ་རྟོག །ནང་གི་བྱ་བ་ཐུན་མོང་གི་བྱ་བ་ཆོས་ལ་རྟོག་དཔྱོད་བསམ་མནོ། གསང་བའི་བྱ་བ་ཐུན་མོང་མ་ཡིན་པའི་བསྐྱེད་རིམ་ལ་སོགས་པའི་བློས་བྱས་ཀྱི་སྒོམ་པ་ཐམས་ཅད་སྟེ། མདོར་ན་དྲན་བསམ་ཡིད་ཀྱི་འཕྲོ་འདུ་ཐམས་ཅད་བཏང་ལ་སྒོ་གསུམ་དལ་བ་བསྟེན་པར་བྱའོ། །ཞེས་གསུངས། ༈ སྣང་བ་བཞིའི་སྐབས་སུ། ཐེག་མཆོག་མཛོད་ལས། ཆོས་ཉིད་མངོན་སུམ་གྱི་སྣང་བ་ཞེས་པ་ལ། ཆོས་ཉིད་ཀྱི་སྒྲ་ཉེ་བར་སྦྱར་བ་ལ་བཞི་ལས། འཁོར་བ་ལ་ཆོས། མྱང་འདས་ལ་ཆོས་ཉིད་ཅེས་པས་འདི་ཆོས་ཉིད་དོ། །སྣང་བ་ལ་ཆོས། སྟོང་པ་ལ་ཆོས་ཉིད་བརྗོད་པས་འདི་ཆོས་ཉིད་དོ། །གནད་མེད་པས་མི་གྲོལ་བ་ཆོས། ཡོད་པས་གྲོལ་ངེས་པ་ལ་ཆོས་ཉིད་དུ་གྲགས་པའི་འདི་ཆོས་ཉིད་དོ། །དབྱིངས་ལ་ཆོས། རིག་པ་ལ་ཆོས་ཉིད་དུ་གྲགས་པའི་འདི་གཉིས་ཀ་དབྱེར་མེད་དུ་འདོད་པའོ། །མངོན་པ་ནི་དབང་པོའི་སྤྱོད་ཡུལ་ལ་དངོས་སུ་བལྟར་ཡོད་པའོ། །ཞེས་དང་། གསུམ་ནིི་རྣམ་གྲངས་ཏེ་ཕྱི་རུ་ལུས་ངག་ཡིད་གསུམ་གྱིས་གཞི་བཅའ་བ། ནང་དུ་ཆོས་ཉིད་ཡུལ་གྱི་གནད། འཆར་བྱེད་སྒོའི་གནད། རླུང་རིག་གནས་པའི་གནད་གསུམ་གྱིས་ལམ་གསལ་བ་དང་། གསང་བར་གོམས་པ་ཚད་ཀྱི་རིམ་པ། སྨིན་པ་རྟགས་ཀྱི་རིམ་པ། མཐར་ཐུག་ཟད་པའི་རིམ་པ་དང་གསུམ་གྱིས་ཚད་གཟུང་བ་དང་། བླ་ན་མེད་པར་སྣང་བ་འོད། སྨིན་པ་ཐིག་ལེ། རྫོགས་པ་སྐུ་དང་གསུམ་གྱིས་འབྲས་བུ་རྫོགས་པའི་ཕྱིར། གསུམ་ཚན་བཞིར་ངེས་པས་གསུམ་ཞེས་བྱའོ། །ཞེས་དང་། སྣང་བ་ནི་གང་སྣང་ན་ནི་ཆོས་ཉིད་སྣང་ལ། ཡུལ་གང་ལ་སྣང་ན་དབྱིངས་ལ་སྣང་། ཚུལ་ཇི་ལྟར་སྣང་ན། འོད་དང་། འོད་ཁྱིམ། རིག་པ་ལུ་གུ་རྒྱུད་དང་བཅས་པ་སྣང་། སྣང་བ་དེ་ཉམས་སུ་བླངས་བ་ལས། འབྲས་བུ་རྡོས་བཅས་མི་སྣང་བར་སངས་རྒྱ་བའོ། །ཞེས་དང་། ཚིག་དོན་མཛོད་ལས། སྣང་བ་ནི་དབྱིངས་རིག་གི་འཕེལ་ལས་ཐིག་ལེ་སུམ་སྦྲེལ་དུ་སྣང་བ་ཚུན་ཆད་དོ། །ཞེས་སོ། །ཐེག་མཆོག་མཛོད་ལས། ཉམས་སུ་བླང་ལུགས་ནི་དང་པོ་ཐུན་ཆུང་ལ་གྲངས་མང་དུ་བྱ། གཉིས་པ་ལ་ཐུན་བསྐྱེད་ཅིང་ཡུན་བསྲིང་། གསུམ་པ་ལ་ཉིན་མཚན་མེད་པར་ཉམས་སུ་བླང་ཞིང་དབྱིངས་ཀྱི་ར་བར་རིག་པ་བཅུག་པ་ལས་མི་འགུལ་བར་བྱའོ། །ཞེས་སོ། །ཉམས་གོང་འཕེལ་སྐབས། ཚིག་དོན་མཛོད་ལས། ཉམས་ཞེས་པ་ལ་ཤེས་ཉམས་དང་སྣང་ཉམས་གཉིས་ལས། ཤེས་ཉམས་ལ་ཤེས་པ་དགའ་བདེའི་ཉམས་བདེ་གསལ་མི་རྟོག་པའི་འཕེལ་འགྲིབ་དང་། ཞེས་དང་། ཐེག་མཆོག་མཛོད་ལས། མཐར་འགྱུར་གྱི་ཉམས་ནི་རླུང་ཉམས་ཀྱི་ཆ་སྟེ། སྲིན་བུ་མེ་ཁྱེར་ལྟ་བུ་ད ང་། སྤྲིན་ལྟ་བུ་དང་། དུ་བ་ལྟ་བུ་དང་། སྨིག་ཟིལ་ལྟ་བུ་དང་། ཟླ་བ་ཤར་བ་ལྟ་བུ་དང་། སྐར་མ་ཤར་བ་ལྟ་བུ་དང་། ནམ་སྲོས་པ་ལྟ་བུ་ལ་མཐིང་གའི་སྣང་བ་ཡོད་པ་ལྟ་བུ་དང་། ཉི་མ་ཤར་བ་ལྟར་ཕྱི་ནང་ཟང་ཐལ་བར་སྣང་བ་དང་བརྒྱད་དེ། འཆར་ནུབ་དང་གསལ་འགྲིབ་ཏུ་བྱུང་བས། མི་བརྟན། ཚིག་མི་ཐུབ། འགྱུར་འགྲོ་བས་མཐར་འགྱུར་གྱི་ཉམས་ཞེས་བྱ་སྟེ། རླུང་གཡོ་བའི་ཉམས་ཡིན་པའི་ཕྱིར་རོ། །འདི་དག་བྱར་ཡོད་དེ་རླུང་སེམས་དག་དགོས་པའི་ཕྱིར་རོ། །སྣང་བའི་ཉམས་ནི་རིག་པའི་རང་གདངས་འོད་གསལ་ཆེན་པོ་སྟེ། གནས་སྐབས་སུ་ཕྱིར་སྣང་འཕེལ་ཞིང་ཚད་ལ་ཕེབས་ནས། རང་གདངས་གཞི་ཐིམ་ལ་ནང་དུ་བཟློག་པས་ཕྱིར་གསལ་དུ་ཟད་དགོས་ཏེ། ལྷུན་གྲུབ་ཀ་དག་གི་དབྱིངས་སུ་ཐིམ་དགོས་པའི་ཕྱིར་རོ། །ནང་གསལ་དུ་རང་འོད་ཀྱི་ཀློང་ན་རིག་པ་སྐུ་དང་ཡེ་ཤེས་ཀྱི་ཕོ་བྲང་ལ་ཡེ་བཞུགས་ལྷུན་གྲུབ་ཆེན་པོ་འཕོ་འགྱུར་མེད་པའོ། །ཞེས་དང་། དེ་དག་ཀྱང་གཅིག་སྐྱེས་གཅིག་འགགས་པས་ཉམས་ཞེས་བྱའོ། །དེ་ཡང་སྔ་མ་བས་ཁྱད་པར་དུ་འགྱུར་བས་གོང་འཕེལ་ཞེས་བྱའོ། །ཡེ་ཤེས་ལྔའི་ཁ་དོག་གི་སྣང་བ་ནི་རྡོ་རྗེའི་རིགས་རྣམ་པར་དག་པས། མེ་ལོང་ལྟ་བུའི་ཡེ་ཤེས་ཀྱི་རང་འོད་འོད་ཁ་དོག་དཀར་པོའི་རྣམ་པར་འཆར་བ་དང་། དེ་ཉིད་རྡོ་རྗེ་མི་བསྐྱོད་པའི་གདངས་དཀར་བ་ལ་འཚེར་བར་འཆར་བའོ། །དེའི་འོག་ཏུ་དེ་བཞིན་གཤེགས་པའི་རིགས་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ཁ་དོག་མཐིང་གའི་རྣམ་པར་འཆར་བ་དང་། རྣམ་པར་སྣང་མཛད་ཀྱི་གདངས་མཐིང་ལ་གནག་པར་འཆར་རོ། །རིན་པོ་ཆེའི་རིགས་རྣམ་པར་དག་པ་ལས་མཉམ་པ་ཉིད་ཀྱི་ཁ་དོག་སེར་པོའི་སྣམ་བུ་དང་། རིན་ཆེན་འབྱུང་ལྡན་གྱི་གདངས་རབ་ཏུ་འཚེར་བ་གསེར་ཞུན་སྦྱངས་པ་ལྟ་བུར་འཆར་རོ། །པདྨའི་རིགས་རྣམ་པར་དག་པ་ལས་སོ་སོར་རྟོགས་པའི་ཡེ་ཤེས་ཀྱི་ཁ་དོག་དམར་པོའི་སྣམ་བུ་དང་། སྣང་བ་མཐའ་ཡས་ཀྱི་གདངས་དམར་ལ་རབ་ཏུ་དམར་བ་ལ་བྱི་རུའི་མདོག་ལྟ་བུར་འཆར་རོ། །ལས་ཀྱི་རིགས་རྣམ་པར་དག་པ་ལས། བྱ་བ་གྲུབ་པའི་ཡེ་ཤེས་ཀྱི་ཁ་དོག་ལྗང་གུའི་ཁ་དོག་སྣམ་བུར་འཆར་བ་དང་། དོན་ཡོད་གྲུབ་པའི་གདངས་རབ་ཏུ་ལྗང་བ་ཨིནྡྲ་ནཱི་ལའི་རྣམ་པ་ལྟར་འཆར་བའོ། །དེ་དག་གི་ཕྱི་རིམ་མཐིང་ག་རྡོ་རྗེའི་ར་བས་ཀུན་ནས་བསྐོར་བ་ནི། ཡེ་ཤེས་དེ་དག་ཐ་དད་པ་མ་ཡིན་པར་མཚོན་པའོ། །དེ་ལས་སྣང་བའི་འཕེལ་ནི་འོད་ལྔ་སོ་སོའི་གཙོ་བྱས་པའི་ཁ་དོག་ལྔ་ལྔར་གསལ་བ་ནི། རིགས་དང་རིགས་ཀྱི་ཁྱད་པར་ལས་བྱུང་བའོ། །ཞེས་དང་། དེ་དག་གི་ལམ་སྐྱེ་བའི་རིམ་པ་ནི་བརྩོན་འགྲུས་རབ་རྣམས་ལ་རབ་དུ་ཞག་ལྔ་ལྔའོ། །འབྲིང་རྣམས་ལ་ཞག་བདུན་བདུན། ཐ་མ་རྣམས་ལ་ཞག་ཉེར་གཅིག་ན་གོང་མའི་སྣང་བ་འགགས་ནས་འོག་མའི་སྣང་བ་དེ་དག་དུ་རྣམ་པར་སྣང་བའོ། །ཁ་དོག་དང་དབྱིབས་ཀྱི་བར་འདི་ནི་ཐང་ཅིག་ཏུ་གནས་པ་དག་འབྱུང་ངོ་། །དེ་ནས་དེ་དག་འབྱུང་ངོ་། །དེ་ནས་དེ་དག་ནུབ་ནས་ཀྱང་ཡེ་ཤེས་ལྔའི་དབྱིངས་ཀྱི་རྣམ་པར་འཆར་ཏེ། མེ་ལོང་ལྟ་བུའི་དབྱིབས་མིག་ཚགས་ཀྱི་རྣམ་པ་དང་འདྲ་བར་འགྱུར་རོ། །དེ་ནི་ཁ་དོག་རབ་དུ་སྤེལ་ལེགས་པ་ལས་བྱུང་བའོ། །དེ་ལ་གོམས་པ་ལས་མིག་མང་རིས་འཆར་ཏེ། འདི་ནི་སྔོན་དུ་འགྲོ་བ་ཚད་དུ་ཕྱིན་པ་ལས་འབྱུང་བའོ། །དེ་ནས་མཉམ་པ་ཉིད་དྲྭ་བ་ཕྱེད་པར་འཆར་ཏེ་དེ་ནི་རླུང་གི་སྦྱངས་པ་དག་པ་ལས་བྱུང་བའོ། །དེ་ལས་དྲྭ་བར་སྣང་བ་ནི་སྔོན་འགྲོ་དག་ཅིང་ཚར་གཅོད་པ་ལས་བྱུང་བའོ། །དེ་ནས་སོ་སོར་རྟོག་པའི་མེ་ཏོག་གི་ཚོམ་བུར་འཆར་བ་ནི། གཟིགས་སྟངས་འགྲུབ་པ་ལས་བྱུང་བའོ། །དེ་ཡང་པདྨ་སྟོང་ལྡན་དུ་འཆར་བ་ནི་སྔོན་འགྲོ་འབྱུང་བ་ལས་བྱུང་བའོ། །དེ་ནས་བྱ་བ་གྲུབ་པའི་མཚོན་ཆ་ལྟ་བུར་འཆར་བ་ནི། རང་བཞིན་མ་བཅོས་པ་ལས་བྱུང་བའོ། །དེ་ནས་འཁོར་ལོ་ལ་སོགས་པའི་རྣམ་པ་སྣ་ཚོགས་སུ་སྣང་བ་སྔོན་འགྲོ་མཐར་ཕྱིན་པ་ལས་བྱུང་བའོ། །དེ་ནས་ཆོས་ཀྱི་དབྱིངས་ཀྱི་ཡེ་ཤེས་མཁར་ཐབས་སུ་འཆར་བ་ནི། རིག་པ་མིག་ནས་དྲངས་པ་ལས་བྱུང་བའོ། །དེ་ལ་ཟ་འོག་གུར་ཁྱིམ་ལྟ་བུ་ནི་སྔོན་འགྲོ་དག་པར་བྱས་པ་ལས་བྱུང་བའོ། །དེ་དག་ཀྱང་བརྩོན་འགྲུས་ཀྱི་ཁྱད་ཀྱིས་ཞག་གསུམ་དང་། བདུན་དང་བཅུ་བཞི་ན་གཅིག་སྐྱེ་གཅིག་འགགས་པའོ། །དེ་ཕན་ཆད་ནི་ཉམས་གོང་འཕེལ་གྱི་སྣང་བ་སྟེ་འདི་དག་གི་སེམས་ཀྱི་སྔོན་འགྲོའི་དུས་ན། རྟོག་པ་ཐ་དད་པར་བསླངས་བ་དེ་འགགས་པའི་རྟགས་ཡིན་ནོ། །ཞེས་སོ། །རིག་པ་ཚད་ཕེབས་སྐབས། ཚིག་དོན་མཛོད་ལས། རིག་པ་ཞེས་པ་ལ། གཞི་འཛིན་གྱི་རིག་པ་སྙིང་ག་ན་གནས་པ་དང་། གཞི་གནས་ཀྱི་རིག་པ་ངོ་བོ་རང་བཞིན་ཐུགས་རྗེ་གསུམ་དང་། ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད་དང་། ཡུལ་སྣང་གི་རིག་པ་སྟོང་ཉིད་གང་དུའང་མི་ཕྱེ་བ་དང་བཞི་ལས། འདིར་རྡོ་རྗེ་ལུ་གུ་རྒྱུད་དོ། །ཚ༵ད་ནི་སྐུ་ཤར་བ་སྟེ་སེམས་དཔའ་རང་རྐྱང་དང་། ཡབ་ཡུམ་དང་། ཚོམ་བུ་དང་། གཙོ་འཁོར་དང་། དཀྱིལ་འཁོར་རྫོགས་པའོ། །ཕེབས༵་ནི་སྣང་བ་དེ་ཀུན་རང་ས་ན་རྫོགས་པ་སྟེ། དབང་པོ་ལྔ་ལ་སོགས་པ་ལྔ་ཚན་གྱི་ཆོས་དག་བྱ་དུ་མ་དག་པར་བྱེད་པའོ། །སྣང་བ་ནི་འོད་དང་ཟེར་དང་སྐུའི་རྣམ་པའོ། །ཞེས་དང་། ཐེག་མཆོག་མཛོད་ལས། དེ་དག་ནི་ཟླ་བ་ཉ་གང་བའི་རྣམ་པ་དང་འདྲ་སྟེ་ཡར་གྱི་འཕེལ་ཟད་པས་དཀྱིལ་འཁོར་རྫོགས་དེ་རང་ངོ་ལ་བཅོས་སུ་མེད་པའོ། །ཞེས་སོ། །ཆོས་ཉིད་ཟད་པའི་སྐབས། ཚིག་དོན་མཛོད་ལས། ཟད་ལུགས་ནི་གཉིས་ལས། རིམ་གྱིས་ཟད་པ་ནི་སྣང་བ་བཞི་ཚད་དུ་ཕྱིན་པའི་དུས་སོ། །ཅིག་ཆར་དུ་ཟད་པ་ནི་ཆོས་ཉིད་མངོན་སུམ་མཐོང་ནས་གོམས་པར་བྱས་ནས་ཉམས་གོང་འཕེལ་དང་ཚད་ཕེབས་ཀྱི་སྣང་བ་མ་སྐྱེས་པར་ཟད་པ་ཡང་ཡོད་དེ་འདི་ནི་བློ་མཆོག་ཅིག་ཆར་པ་ཞེས་བྱའོ། །གང་ལྟར་ཡང་ཟད་པའི་དུས་འདིར་གདོས་བཅས་དྭངས་པ། ཉོན་མོངས་དྭངས་པ། སྣང་བ་དྭངས་པ་གསུམ་འབྱུང་ལ། ཆོས་ཉིད་ཀྱི་ཏིང་ངེ་འཛིན་ལ་ངང་གིས་གནས་པས་ཡེ་ཤེས་རྫོགས་པའི་སྐུ་ཐོབ་པ་ཞེས་བྱའོ། །ཞེས་དང་། ཐེག་མཆོག་མཛོད་ལས། ཆོས་ཉིད་ཟད་པའི་ངོ་བོ་ནི། ཕྱི་འོད་ལྔའི་སྐུ་དང་བཅས་པ་ཟད། ནང་གདོས་བཅས་རྟོག་ཚོགས་དང་བཅས་པ་ཟད། ཉམས་སྣང་གི་ཡུལ་ཟད། ཀ་དག་གི་སྣང་བ་ནམ་མཁའ་ལྟ་བུའི་ངང་ལ་རིག་པ་གནས་པའོ། །ཞེས་དང་། ཆོས་ཞེས་པ་ལུས་ངག་ཡིད་གསུམ་གྱི་ཚོགས་པའི་ཆོས་ཉོན་མོངས་དང་བཅས་པ་ཡིན་ལ། ཉིད་ནི་དེ་སྦྱོང་བྱེད་ལམ་གྱི་སྣང་བ་འོད་གསལ་བསྒོམ་པའི་ཆ་དང་བཅས་པ་སྟེ། ཟད་པ་སྟོང་པ་སྟེ། བློས་སྒོམ་པ་ཡུལ་སྣང་དང་བཅས་པ་རང་ལོག་ནས་མེད་ལ་མི་དམིགས་པ་ཞེས་བྱའོ། །མ་དག་པའི་ཕྱི་ཡུལ་སྣང་། ནང་རང་ལུས། གསང་བ་ཉོན་མོངས་པའི་རྟོག་ཚོགས་དང་དེ་དག་གཡོ་བྱེད་ཀྱི་ལས་རླུང་རྣམས་རིག་ཐོག་ཏུ་རང་སར་དག་ནས་སླར་སྐྱེ་བའི་གནས་མེད་པར་ཟད་སར་འཁྱོལ་བ་ཡིན་ཏེ། ཐལ་འགྱུར་ལས། ཆོས་ཉིད་ཟད་པའི་སྣང་བ་ཡིས། །ཁམས་གསུམ་འཁོར་བའི་རྒྱུན་ཐག་གཅོད། །ཅེས་སོ། །གང་ལྟར་ཡང་ལམ་སྣང་ལྷག་མ་མེད་པར་རང་གི་སེམས་ཉིད་གདོད་མའི་གྲོལ་ས་མཐར་ཐུག་ཀ་དག་ཀློང་ཆེན་ཡངས་པ་མཚན་མའི་སྤྲོས་པ་ཐམས་ཅད་ལས་རབ་ཏུ་འདས་ཤིང་ནང་གསལ་ཤིན་ཏུ་ཕྲ་བའི་ཡེ་ཤེས་ཆེན་པོ་ཐིམ་ལ་མ་རྨུགས་པ་རྒྱ་ཆད་ཕྱོགས་ལྷུང་བྲལ་བའི་ངོ་བོར་འུབ་ཀྱིས་འདྲེས་ཏེ་དབྱེར་མེད་རོ་གཅིག་དུ་གྱུར་བས་དག་པ་གཉིས་ལྡན་མཐར་ཐུག་པའི་གཏན་སྲིད་ཚེ་འདིར་ཟིན་པ་ཡིན་ལགས། ཞེས་གསུངས། ༈ དབང་པོ་ཉི་ཤུ་རྩ་གཅིག་ནི། དང་པོ་བདུན་ནི། རབ་ཀྱི་ཐ་མ་དང་། རབ་ཀྱི་འབྲིང་དང་། རབ་ཀྱི་རབ་དང་། རབ་ཀྱི་ཕུལ་དང་། རབ་ཀྱི་མཆོག་དང་། རབ་ཀྱི་རྩེ་མོ་དང་། རབ་ཀྱི་མཐར་ཕྱིན་པའོ། །དེ་དག་ཀྱང་རང་སྣང་རྟོགས་སླ་བའི་ཆ་ནས་གཞག་པའོ། །འབྲིང་ལ་བདུན་ཏེ། འབྲིང་གི་ཐ་མ་དང་། འབྲིང་གི་འབྲིང་དང་། འབྲིང་གི་རབ་དང་། འབྲིང་གི་ཕུལ་དང་། འབྲིང་གི་མཆོག་དང་། འབྲིང་གི་རྩེ་མོ་དང་། འབྲིང་གི་མཐར་ཕྱིན་པའོ། །དེ་བཞིན་ཏུ་ཐ་མ་ལ་ཡང་བདུན་ཏེ། ཐ་མའི་ཐ་མ་དང་། ཐ་མའི་འབྲིང་། ཐ་མའི་རབ་དང་། ཐ་མའི་མཆོག་དང་། ཐ་མའི་ཕུལ་དང་། ཐ་མའི་རྩེ་མོ་དང་། ཐ་མའི་རྩེ་ཟིན་པའོ། ༈ །ཇི་ལྟར༵་ཤར༵་ན༵། ཐེག་མཆོག་མཛོད་ལས། རང་སྣང་འཆར་ཚུལ་གྱི་རྣམ་པས་དོན་བསྡུ་བ་ལ་བཞི་ལས། ཞི་བ་ནི་བར་དོ་དང་པོ་འོད་གསལ་ལས་ཚོམ་བུའི་སྣང་བ་ཤར་བའོ། །རྒྱས་པ་ནི་བར་དོ་གཉིས་པ་ཡེ་ཤེས་བཞི་སྦྱོར་གྱི་སྣང་བ་ཤར་བའོ། །དབང་ནི་བར་དོ་གསུམ་པ་ལྷུན་གྲུབ་རིན་པོ་ཆེའི་སྒོ་བརྒྱད་མཐོང་བའོ། །དྲག་པོ་ནི་རང་སྣང་དུ་གྲོལ་ཏེ་ཀ་དག་གི་ས་ལ་གཏན་སྲིད་ཟིན་པ་བར་དོ་བཞི་པའི་ཡེ་ཤེས་དབྱིངས་སུ་འཁྱིལ་བ་སྟེ། རང་ཤར་ལས། ཕྲིན་ལས་རྣམ་པ་བཞི་ཡི་དོན། །ལམ་ལ་རྫོགས་ལུགས་འདི་ལྟ་སྟེ། །ཞི་བའི་ལམ་ནི་འདི་ལྟ་སྟེ། །བར་དོ་དང་པོ་ཚོམ་བུ་ལ། །སྐུ་ཡི་སྣང་བ་མཐོང་བ་སྟེ། །ཞི་བའི་ལམ་ནི་ཡང་དག་འདོད། །བར་དོ་གཉིས་པའི་ཡེ་ཤེས་ལྔ། །ཡེ་ཤེས་ངོ་བོ་མཐོང་བ་དེ། །རྒྱས་པའི་ལམ་ཉིད་ཡིན་པར་འདོད། །བར་དོ་གསུམ་པ་ལྷུན་གྲུབ་ལ། །རང་གི་དེ་ཉིད་མཐོང་བ་ནི། །གོམས་པ་ཚད་དུ་ཕྱིན་པ་དང་། །དབང་གིས་ཆོས་ཉིད་ཡིན་པར་གསུངས། །ཀ་དག་ཆོས་ཉིད་རྫོགས་པ་ལས། །ཐོགས་པ་མེད་པར་ཕྱིན་པ་སྟེ། །དྲག་པོའི་ཆོས་ཉིད་ཡིན་པར་གསུངས། །ཞེས་སོ། ༈ །ཉི་ཟླ་ཁ་སྦྱོར་ལས། སྒོམ་བྱེད་ཕན་ཆད་མིག་མི་འཛུམ་པར་ཧྲིག་གེ་ལྟ་བ་གནད་ཡིན་ནོ། །དེ་ལྟར་བྱས་པས་དཔེར་ན་རྒྱ་མཚོར་གཟའ་སྐར་ལ་སོགས་པའི་གཟུགས་བརྙན་ཅི་སྣང་བ་ཐམས་ཅད་བཀྲ་ཡལ་ལེ་སྣང་ཡུལ་དུ་ཡོད་ལ་གཟུང་ཡུལ་དུ་མེད་པས་རྒྱ་མཚོ་ལ་མ་གོས་པ་བཞིན་ཏུ། རྣལ་འབྱོར་པའི་མིག་ལམ་དུ་ཕྱི་སྣང་ཤར་ཚད་སྣང་ངོར་སྣང་ཡང་། སྣང་ཐོག་ཏུ་ཤེས་པ་མ་ཤོར་བས་གཟུང་ཡུལ་མེད། དེས་མ་གོས་པས། ཕྱི་སྣང་བས་ཤེས་པ་མ་གོས། ནང་ཤེས་པས་སྣང་བ་མ་བཟུང་། སྣང་ཤེས་འབྲེལ་དོན་ཆད་པས་གཟུང་འཛིན་ཡུལ་མེད་དུ་སངས་ཏེ་ཚོགས་དྲུག་ལྷུག་པའི་སྒོམ་པ་ཞེས་བྱའོ། །ཉམས་ལེན་གནད་ཀྱི་སྒྲོན་མེ་ལས། རླུང་རླུང་ལ་ཐིམ་པས་ཕྱི་དབུགས་རྒོད་ཅིང་དབུགས་བརྩེགས་མར་འབྱུང་། ཁྲོག་གིས་འཆད་དོ། །རླུང་རྣམ་པར་ཤེས་པ་ལ་ཐིམ་པས་ནང་དབུགས་ཆད་ཅིང་དལ་ཅིག་བརྒྱལ་ནས་དྲན་མེད་དུ་འགྱུར་རོ། །ཞེས་དང་། ཆོས་ཉིད་བར་དོར་རང་སྣང་དུ་ཡིད་ཆེས་པ་ལ་ཐིམ་ཚུལ་ལྔས་ངོས་ཟིན་པར་བྱ་བ་ལས། དང་པོ་ནི་རྣམ་ཤེས་ནམ་མཁར་ཐིམ་པའི་ཚེ་སྙིང་དབུས་ནས་རིག་པ་འོད་རྩ་ལ་ཞུགས་ཏེ་མིག་ཏུ་གནས་པའི་སྐད་ཅིག་དང་པོ་ལ་ཀ་དག་གི་སྣང་བ་སྟོན་ཀའི་ནམ་མཁའི་སྤྲིན་དང་བྲལ་བ་ལྟ་བུར་འཆར་ཏེ། དེ་ཉིད་གདོད་མའི་གྲོལ་གཞི་བསམ་འདས་ཆེན་པོར་ཤེས་ན་དེའི་ངང་དུ་བཞག་པས་གྲོལ་ལོ། །དེ་ནས་ནམ་མཁའ་འོད་གསལ་ལ་ཐིམ་པས་སྐད་ཅིག་དང་པོར། འོད་ལྔའི་སྲད་བུའམ་སྐས་ཀྱི་འགྲམ་པ་ལྟ་བུར་ཤར་བ་ངོ་ཤེས་པའི་དུས་སུ་ཡར་གྱི་ཟང་ཐལ་དུ་གྲོལ་ལོ། །དེ་ནས་སྐད་ཅིག་གཉིས་པར་ཐུགས་རྗེའི་ཟེར་ཐག་ལས་ནམ་མཁའི་དབྱིངས་སུ་ཐམས་ཅད་འོད་ལྔའི་སྣང་བ་བསམ་གྱིས་མི་ཁྱབ་པར་ཤར་དུས། སྒྲ་འོད་ཟེར་གསུམ་ཁྲོ་བོའི་དཀྱིལ་འཁོར་དུ་ཤར་བ་ལ་རང་སྣང་དུ་ངོ་ཤེས་ན་རང་རིག་ཁྲོ་བོའི་སྐུ་ལ་ཐིམ་ནས་འཚང་རྒྱའོ། །ཞེས་སོ། །ཐོད་རྒལ་གྱི་རྒྱབ་ཡིག་ཉི་ཟླ་གཟའ་སྐར་ལས། དེ་ནས་རླུང་རྣམ་པར་ཤེས་པ་ལ་ཐིམ་པས་ཕྱི་ནང་གི་དབུགས་ཆད་དེ་དར་ཅིག་བརྒྱལ་བ་ལས། རྣམ་ཤེས་ནམ་མཁར་ཐིམ་སྟེ་རྟོག་མེད་ནམ་མཁའ་འདྲ་བའི་ངང་ལ་དལ་ཅིག་གནས་ནས། རིག་པ་མིག་ནས་ཐོན་དུས། ནམ་མཁའ་འོད་གསལ་ལ་ཐིམ་པས་ཡེ་ཤེས་ལྔའི་སྣང་བ་དང་སྒྲ་འོད་ཟེར་གསུམ་གྱིས་རང་སྣང་ཁྱབ་དུས་རང་ངོ་ཤེས་པར་བྱའོ། །དེ་ནས་འོད་གསལ་ཟུང་འཇུག་ལ་ཐིམ་པས་ཚོམ་བུའི་སྣང་བ་བསམ་གཏན་གྱི་ཞག་ལྔར་གནས་པ་དང་། དེ་ནས་ཟུང་འཇུག་ཡེ་ཤེས་ལ་ཐིམ་པས། ཡེ་ཤེས་བཞིའི་སྣང་བ་ཤར་བ་དང་། དེ་ནས་ཡེ་ཤེས་ལྷུན་གྲུབ་ལ་ཐིམ་པས་ཡར་ཀ་དག ཐད་ཀར་ལོངས་སྐུ། མར་རང་བཞིན་སྤྲུལ་པ་དང་། འགྲོ་འདུལ་གྱི་ཞིང་སྣང་དུས་རང་ངོ་ཤེས་པ་གཅེས་སོ། །ཞེས་སོ། ༀ་བྱིན་རླབས་ཐམས་ཅད། ཨཱཿ མཆོག་ཐུན་མོང་གི་དངོས་གྲུབ། ཧཱུྃ་ཞི་རྒྱས་དབང་དྲག་གིས་མཁའ་མཉམ་འགྲོ་བའི་དོན་མཛད་པ། ཞེས་སོ།། །། འོད་གསལ་རྫོགས་པ་ཆེན་པོ་བླ་མ་རིན་པོ་ཆེའི་ཁྲིད་རྒྱུན་ཉི་མའི་དཀྱིལ་འཁོར།འོད་གསལ་རྫོགས་པ་ཆེན་པོ་བླ་མ་རིན་པོ་ཆེའི་ཁྲིད་རྒྱུན་ལྟར་གནད་འགག་གསལ་བར་བསྟན་པ་ཉི་མའི་དཀྱིལ་འཁོར་བཞུགས་སོ།། རྒྱལ་ཀུན་ངོ་བོ་པདྨ་འབྱུང་གནས་དང་། །བི་མའི་སྒྱུ་འཕྲུལ་ཆོས་དབྱིངས་རང་གྲོལ་དང་། །དྭགས་པོ་ཟླ་འོད་རོལ་གར་བློ་བཟང་རྗེ། །འབངས་ལྔའི་རོལ་གར་སྟག་ཤམ་རྡོ་རྗེ་དང་། །རྩ་བརྒྱུད་བླ་མ་རྣམས་ལ་ཕྱག་འཚལ་ལོ། །དེ་ལ་འདིར་ཁྱབ་བདག་འཁོར་ལོའི་མགོན་པོ་ཆོས་དབྱིངས་རང་གྲོལ་གྱི་ཁྲིད་རྒྱུན་ལྟར་འོད་གསལ་རྫོགས་པ་ཆེན་པོ་ཀློང་ཆེན་སྙིང་ཐིག་གི་གནད་འགག་ཐམས་ཅད་གསལ་བར་བསྟན་པ་ལ་བླ་མ་དང་སྔགས་སྲུང་དབྱིངས་ཀྱི་རྗེ་མོ་སོགས་ཀྱིས་བཀའ་གནང་སྩོལ། །དད་པ་ཅན་ལ་བྱིན་རླབས་འཕོ་བའི་སྟོབས་ཀྱིས་ངོ་སྤྲད་པ། ཤེས་རབ་ཅན་ལ་གནས་ལུགས་ལྟ་བའི་ཐོག་ཏུ་ངོ་སྤྲད་པ། བརྩོན་འགྲུས་ཅན་ལ་ཉམས་མྱོང་སྒོམ་པའི་ཐོག་ཏུ་ངོ་སྤྲད་པའོ། །རྫོགས་ཆེན་གྱི་ལུགས་ལ་ཤེས་རབ་ཅན་ལ་གནས་ལུགས་ལྟ་བའི་ཐོག་ཏུ་ངོ་སྤྲད་པ་འདི་ལྟ་ཐོག་ནས་སྒོམ་པ་ཚོལ་བའི་ལུགས་ནི། དང་པོ་གཞི་སྨིན་པར་བྱེད་པའི་དབང་བླ་མ་མཚན་ཉིད་དང་ལྡན་པའི་མདུན་ནས་ལེགས་པར་ཐོབ་དགོས། སློབ་མ་མཚན་ཉིད་དང་ལྡན་པ། དཔེར་ན་སེངྒེ་དཀར་མོའི་འོ་མ་འདི་རིན་པོ་ཆེའི་སྣོད་མིན་ན་སྣོད་གཞན་གྱིས་མི་ཐུབ། དེ་བཞིན་དུ་དད་པ་མོས་གུས་དང་མ་ལྡན་ན་གསང་སྔགས་ཀྱི་སྣོད་དུ་མི་རུང་། སྲོག་དམ་ཚིག་ཡིན་པས། དཔྲལ་བའི་མིག་ལྟར། ཁོག་གི་སྙིང་ལྟར་སྲུང་དགོས། བསྲུངས་ན་ཚེ་འདིར་སངས་རྒྱས་ཐོབ། །ཉམས་ན་དམྱལ་བར་ལྟུང་ཏ་རེ། །དེ་བས་དམ་ཚིག་རྟག་ཏུ་སྲུངས། །ཞེས་དང་། ཕྱིན་ཆད་ཉམས་སུ་ལེན་དགོས། མི་ལེན་ན། སྣོད་བཅག་ནི་རེད། བཅུད་མ་མཁའ་འགྲོ་སྟོང་གི་སྙིང་ཁྲག་ལྟ་བུ་ཨོ་རྒྱན་པདྨའི་ཐུགས་ཀྱི་དགོངས་པའི་བཅུད་ཕོས་པ་ཡིན་པས་ཤིན་ཏུ་མ་གཟབ་ན་གསང་བསྒྲགས་ཀྱི་ཉེས་པ་ལྕི་བས་གཟབ་ནན་ཞུ་ཞུ། གཉིས་པ་ལམ་དབང་ཆུ་རྒྱུན་རྣལ་མ་ནི། ལམ་ཟབ་བླ་མའི་རྣལ་འབྱོར་ལ་བརྟེན་ནས་དབང་བཞི་བླང་བའོ། །གསུམ་པ་མཐར་ཐུག་འབྲས་བུའི་དབང་ངོ་། །མཉམ་བཞག་ཐུན་དུ་བཅད་སྐབས། དང་པོ་བླ་མའི་རྣལ་འབྱོར་དབང་བཞིའི་དམིགས་པ་བླ་མ་འོད་ཞུ་ཐུགས་ཡིད་དབྱེར་མེད་བསྲེས་ལ། སྤྱི་ལྟར་ངོ་བོ་རྩ་བའི་བླ་མ་རྣམ་པ་གུ་རུ་རིན་པོ་ཆེ་བསྒོམ། ཉམས་ལེན་ལྟར་ཕྱོགས་བཅུའི་དུས་གསུམ་གྱི་སངས་རྒྱས་རྣམས་དང་བྱང་ཆུབ་སེམས་དཔའི་ཚོགས་དང་། རིག་པ་འཛིན་པའི་བླ་མ་དམ་པ་རྣམས་ཆོས་ཀྱི་དབྱིངས་གཅིག་གི་ངང་དུ་བཞུགས་པ་ཡིན་པས། ཆོས་ཀྱི་དབྱིངས་དེ་ལ་རིགས་མི་འདྲ་བ་མེད་པའི་གནད་ཀྱིས་རང་གི་རིག་པའི་ངོ་བོ་སྟོང་ཆེན་ཀ་དག་གི་དབྱིངས་དང་སྐྱབས་ཡུལ་རྣམས་ཐུགས་དགོངས་དབྱེར་མེད་ཡིན་པའི་ངེས་ཤེས་ཡོད་དགོས། གེགས་དང་གོལ་ས་མེད་པ་བོགས་འདོན་སོགས་ཡོན་ཏན་དུ་མ་དང་ལྡན་པ་ཡིན་ནོ། །ཐུན་བསྡུ་སྐབས་བསྔོ་སྨོན་གྱིས་མཐའ་བརྒྱན་པར་བྱའོ། ། དང་པོ་ཐུན་མོང་ཕྱིའི་སྔོན་འགྲོས་རང་རྒྱུད་ལེགས་པར་སྦྱངས་བ་ཤིན་ཏུ་གལ་ཆེ། ཐུན་མིན་ནང་གི་སྔོན་འགྲོ་ལ། སྔོན་འགྲོ་སེམས་ཀྱི་ཁང་བུ་བཤིགས་པ། དངོས་གཞི་རིག་པའི་རང་ངོ་སྤྲད་པ། རྗེས་ཉམས་ལེན་སྐྱོང་ཚུལ་དང་གསུམ་མོ། །དང་པོ་རྟོག་པ་རྩད་བཅད་པ། དེ་ལ་ང་ཟེར་བའི་གང་ཟག་དེ་ནི་ཡེ་ཐོག་མ་ནས་ད་ལྟ་ལ་མ་ཐུག་གི་བར་དུ་ཁམས་གསུམ་འཁོར་བའི་གནས་སུ་འཁྱམས་པ་ཡིན་ཏེ། ད་ཁྱོད་གཞན་ཞིག་གིས་དེད་ནས་འོང་བ་ཡིན་དང་། ཁྲིད་ནས་འོང་བ་ཡིན་དང་། གཅིག་གིས་འཕེན་བཏང་བ་ཡིན་ནམ་བརྟགས། དེ་ནི་མ་ཡིན་ནོ། །ད་ཁྱོད་ཀྱི་གཞི་ལུས་ངག་ཡིད་གསུམ་པོ་ལས་འཁོར་བར་འཁྱམས་མཁན་དང་སངས་རྒྱས་སུ་འགྱུར་བ་པོ་དེ་གང་ཞིག །བདེ་སྡུག་གི་རྟེན་དང་དགག་སྒྲུབ་བྱེད་པ་པོ་དེ་སུ། སྐྱེ་བ་སྔ་ཕྱི་བརྒྱུད་འཕེན་དང་འཁོར་མཁན་དེ་ལུས་ངག་ཡིད་གསུམ་པོ་དེ་སོ་སོར་གང་ཡིན་བརྟགས། ཚོགས་པ་གཅིག་པས་བྱེད་ན་བརྟགས་ཤིང་དཔྱད་པའི་ཚེ། སྐྱེ་བ་སྔར་ནས་འདིར་འོང་བ་པོ། འདི་ནས་ཕྱི་མར་འགྲོ་བ་པོ་སུ་ཡིན་ན་སེམས་རྒྱུན་དེ་ཡིན། དཔེར་ན་རྨི་ལམ་གྱི་གནས་སྐབས་སུ་འདི་སྣང་དལ་གཅིག་འགག་ནས་ཀུན་གཞིའི་ངང་ནས་ལས་རླུང་སེམས་ཕྲ་བ་གཡོ་དུས་སྐད་ཅིག་དང་པོ་ལ་ལུས་དང་ངག་མ་གྲུབ་ཅིང་གཉིས་པ་ཕན་ཆད་ལ་ཕྱིའི་ཡུལ་སྣང་དང་ནང་གི་བདག་ལུས་ཕུང་ཁམས་སྐྱེ་མཆེད་ངག་གི་སྒྲ་སྦྱར་སོགས་དུ་མ་ཡིད་ལུས་སུ་གྲུབ་པ་ཡིན། དེ་ལྟ་བུའི་ཕྱི་ནང་སྣོད་བཅུད་ཀྱི་ཆོས་ཐམས་ཅད་སེམས་འཁྲུལ་སྣང་གི་བག་ཆགས་ལས་གྲུབ་པ་ཡིན་པས་ན་སེམས་གཙོ་ཆེ་ཟེར་བ་ཡིན་ནོ། །དེ་སེམས་འདིའི་ཡུལ་གང་ལ་འཛིན་ན་ངའོ་བདག་གོ་ཟེར་བ་ནི་འཛིན་པ་གང་ཟག་གི་བདག་ཡིན། ངའི་རྒྱུ་ནོར་སོགས་བདག་གི་ལུས་ཟེར་བ་ནི་གཟུང་བ་ཆོས་ཀྱི་བདག་ཡིན་ནོ། །གང་ཟག་གི་བདག་ནི་ལུས་ངག་ཡིད་གསུམ་གཅིག་བདེན་རིལ་བོ་དེ་ལ་ང་ཟེར་བདག་ཟེར། ལུས་ངག་ཡིད་གསུམ་གཅིག་བདེན་དུ་འཛིན་པ་དེ་ལ་བདག་འཛིན་ཡང་ཟེར། ངར་འཛིན་ལྷན་སྐྱེས་ཀྱང་ཟེར་བས་ན། ང་བདག་གཟུང་འཛིན་འདི་ནི་འཁོར་བའི་རྩ་བ་སྡུག་བསྔལ་གྱི་འབྱུང་ཁུངས་ས་ལམ་གྱི་བཀག་རྡོ་ཡིན་པས་རྐུན་པོ་ངོས་ཟིན་པ་ལྟ་བུ་ཡིན་ནོ། །གཉིས་པ་མཚང་བཙལ་བ་ནི། ད་ནི་ཁྱོད་ཀྱི་ལུས་ངག་ཡིད་གསུམ་པོ་མིན་པའི་ང་ཟེར་བ་ཞིག་ཨེ་ཡོད་བརྟགས་པས་དེ་ནི་མེད་དོ། །ང་ཟེར་ས་དེ་ལུས་ངག་ཡིད་གསུམ་ལ་ཟེར་བས་གསུམ་པོ་དེ་སོ་སོ་མ་ཡིན་གཅིག་བདེན་དུ་བཟུང་ནས་ང་ཟེར་བ་ཡིན་པས་ཁྱོད་ཀྱི་དེ་ལྟར་འདོད་ན་ཁྱོད་ཀྱི་ལུས་འདི་མིག་གིས་མཐོང་བྱ་དང་། ངག་འདི་རྣ་བས་ཐོས་བྱ་ཞིག་ཡིན་པས་ཁྱོད་ཀྱི་ཡིད་འདི་གཟུགས་དབྱིབས་ཁ་དོག་སོགས་སྣང་དགོས་པའི་སྐྱོན་འབབ་ནི་རེད། ངག་དང་ཡིད་གཅིག་ཡིན་ན་ཡིད་འདི་ཚོར་དགོས་པའི་སྐྱོན་འབབ་ནི་རེད། ལུས་ངག་ཡིད་གསུམ་གཅིག་ཡིན་ན་ལུས་ངག་གཉིས་མཐོང་ཐོས་མི་རུང་བའི་སྐྱོན་འབབ་ནི་རེད། དུ་མ་ཡིན་ན་ཁྱོད་དུ་མ་ཡོད་དགོས་པའི་སྐྱོན་འབབ་ནི་རེད། རྒྱུ་མཚན་ཅིའི་ཕྱིར་ན། ཁྱོད་ཀྱི་ཕུང་པོ་ལྔ་པོའི་ནང་ནས་གཟུགས་ལྟ་བུ་གཅིག་ལ་མཚོན་ན། སྐྲ་ཉི་ཁྲི་ཆིག་སྟོང་། སེན་མོ་ཉི་ཤུ། སོ་སུམ་ཅུ་རྩ་གཉིས། རུས་པའི་དུམ་བུ་སུམ་བརྒྱ་དང་རེ་བཞི། དོན་སྣོད་བཅུ་གཉིས། ཤ་ལྤགས་ཁྲག་ཆུ་སེར་རྐང་ཀླད་པ་ཀླད་རྒྱས་རྩ་རྒྱུས་ཆུ་རྒྱུས་ལ་སོགས་པའི་གྲངས་ཡོད་དགོས་པའི་སྐྱོན་འབབ་ནི་རེད། དེ་དག་ཐམས་ཅད་སོ་སོར་རྡུལ་ཕྲན་ཆ་མེད་དུ་ཕབ་དུས་ཁྱོད་དེའི་གྲངས་ཡོད་དགོས་པས་མི་རུང་ངོ་། །ངག་གི་བརྗོད་པ་ལྟ་བུ་ལ་མཚོན་ན་རྐན་དང་མཆུ་དང་ལྕེ་དང་མགྲིན་པ་དང་རླུང་གི་འགྲོ་འོང་སོགས་དུ་མ་ཚོགས་དགོས་པས་མི་འཐད་དོ། །ཡིད་ཀྱི་རྟོག་ཚོགས་དུ་མ་འཕྲོ་བས་ཁྱོད་དེའི་གྲངས་ཡོད་དགོས་པའི་སྐྱོན་འབབ་ནི་རེད། དེ་ལྟ་བུས་བརྟག་ཤིང་དཔྱད་པའི་ཚེ་ལུས་རྡུལ་ཕྲན་ཆ་མེད་དུ་དྭངས་དུས་ལུས་ཡེ་ནས་མ་གྲུབ་པས་སྣང་སྟོང་ཆུ་ཟླ་ལྟ་བུ་དང་། ངག་ཡེ་ནས་མ་གྲུབ་པས་རྗེས་མེད་རང་ཡལ་གྲགས་སྟོང་བྲག་ཆ་ལྟ་བུ་དང་། སེམས་ཡེ་ནས་མ་གྲུབ་པས་རྟོག་ཚོགས་རང་ཡལ་རྗེས་མེད་ནམ་མཁའི་བྱ་རྗེས་ལྟ་བུའོ། །དོན་དམ་རང་ངོས་ནས་མ་གྲུབ་ཅིང་ཐ་སྙད་སྣང་ཚུལ་དུ་མར་སྣང་བའོ། །དེ་ལྟར་དུ་མ་ཡོད་པས་རིལ་བོར་གཅིག་བདེན་འགོག་ནི་རེད། ཕུང་པོ་དུ་མ་འདུས་པ་ལས་བྱུང་བའི་འདུས་བྱས་སྐད་ཅིག་མ་ཡིན་པས་རྟག་འཛིན་འགོག་ནི་རེད། གཅིག་དང་ཐ་དད་གང་དུ་མ་གྲུབ་པའི་མཚང་རིག་པ་ཡིན་ནོ། །ང་བདག་དང་ཆོས་ཀྱི་བདག་གཏན་ལ་ཕབ་པའོ། །གསུམ་པ་བྱུང་གནས་འགྲོ་གསུམ་ལ་བརྟགས་པ་ནི། ང་མེད་ལ་ང་རུ་འཛིན། བདག་མེད་བདག་ཏུ་འཛིན་པ་འདི་དང་པོ་གང་ནས་བྱུང་། བར་དུ་གང་ལ་གནས། ཐ་མ་གང་དུ་འགྲོ་བརྟག བྱུང་མཁན། གནས་མཁན། འགྲོ་མཁན་དང་ཡུལ་ཡུལ་ཅན་དྲུག་གི་སྒོ་ནས་བརྟག་དགོས་ཏེ། དེ་ཡང་ཕྱི་སྣང་བ་སྣོད་ཀྱི་འཇིག་རྟེན། བར་གཡོ་བ་བཅུད་ཀྱི་སེམས་ཅན། ནང་བདག་ལུས་ཕུང་ཁམས་སྐྱེ་མཆེད་ལ་སོགས་པ་གང་ནས་བྱུང་གང་ལ་གནས། གང་དུ་འགྲོ་བརྟགས་ཤིང་དཔྱད་དུས། དང་པོ་བྱུང་བའི་རྒྱུ་མེད་པས་སྐྱེ་བའི་རྒྱུ་སྟོང་། བར་དུ་གནས་པའི་མཁན་པོ་མེད་པས་མཁན་པོ་རང་གི་ངོ་བོ་སྟོང་། ཐ་མ་འགྲོ་བའི་མཚན་ཉིད་མེད་པས་འགགས་པ་རང་གི་མཚན་ཉིད་སྟོང་པའོ། །དེ་ལྟ་བུའི་གནད་དོན་ལེགས་པར་རྟོགས་ན་ཤིང་སྡོང་པོའི་རྩ་བ་བཅད་ཙ་ན་ལོ་འདབས་ཐམས་ཅད་ངང་གིས་སྐམ་པ་བཞིན་ནོ། ༈ །རྫོགས་ཆེན་པས། གཅིག་དང་དུ་མ་བརྟག་པའི་སྐབས་སུ་གང་ཟག་གི་བདག་གཏན་ལ་ཕབ་པ་ཡིན་ནོ། །བྱུང་གནས་འགྲོ་གསུམ་བརྟགས་པའི་སྐབས་སུ་ཆོས་ཀྱི་བདག་གཏན་ལ་ཕབ་པ་ཡིན་གསུངས།༼ ཡི་གེ་འདི་ལ་ཡིད་བརྟན་མི་བྱ་བར་བརྟགས་ཤིང་དཔྱད་དགོས་པ་ཡིན་ནོ། །མཆན།༽ ཕྱི་ནང་སྣོད་བཅུད་ཀྱི་ཆོས་ཐམས་ཅད་བློས་ཕར་བཏགས་པ་མ་གཏོགས་དོན་རང་ངོས་ནས་གྲུབ་པ་རྡུལ་ཙམ་མེད། ཕྱི་སྣོད་འཇིག་རྟེན་ནང་བཅུད་སེམས་ཅན་བར་འདོད་ཡོན་གྱི་བཀོད་པ་ཐམས་ཅད་བློས་བཏགས་པ་ཙམ་ལས་བདེན་གྲུབ་ཡོད་མེད་བརྟགས་ནས་བདེན་མེད་སྒྱུ་མ་རྨི་ལམ་ལྟ་བུ་ཡིན་པར་ཐག་ཆོད་ཚེ་ངེས་ཤེས་དེའི་ངང་ལ་འཇོག་དགོས། དེའི་ཚེ་དབུ་མ་ཐལ་འགྱུར་བའི་ལྟ་བ་དང་། རྫོགས་ཆེན་པའི་བྱུང་གནས་འགྲོ་གསུམ་ལྟ་བ་གང་མཐོ་ཞེ་ན་བྱུང་གནས་འགྲོ་གསུམ་ལྟ་བས་མཐོ། དབུ་མས་ངེས་ཤེས་ལྕགས་སྐུད་སྒྲིམ་མ་ལྟ་བུ་དགོས་པ་ཡིན། རྫོགས་ཆེན་བྱུང་གནས་འགྲོ་གསུམ་སྐབས་ངོ་བོའི་གདངས་ལས་ཤར་ཆ་འགག་མེད་ཡོད་དགོས་པ་དེ་ཁྱད་གཞིའི་སྟེང་ནས་ཁྱད་ཆོས་དེ་རེད་གསུངས། བྱུང་གནས་འགྲོ་གསུམ་ལྟ་བ་སྣང་སྟོང་ཟུང་འཇུག །སྣང་བཞིན་པའི་གནས་སྐབས་ན་སྟོང་། སྟོང་བཞིན་པའི་གནས་སྐབས་ན་སྣང་། སྣང་སྟོང་ཟུང་འཇུག་ཆུ་ཟླ་ལྟ་བུ། སྟོང་ཉིད་བཞི་སྦྲགས་ནི། གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་ཀྱང་སྟོང་པ་ཉིད་གཞན་མ་ཡིན་ནོ། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཞེས་སོ། ། ༈ དངོས་གཞི་རིག་པའི་རང་ངོ་སྤྲད་པ་ལ། སེམས་དང་རིག་པའི་དབྱེ་བ། རྣམ་ཤེས་དང་ཡེ་ཤེས་དབྱེ་བ། ཀུན་གཞི་ཆོས་སྐུའི་དབྱེ་བ། དང་པོ་ནི། བཞི་ཆ་གསུམ་བྲལ་གྱི་དགོངས་པ་ནི། དུས་གསུམ་གྱི་རྟོག་པ་དང་བྲལ། བཞི་པའི་ཆ་རིག་སྟོང་ཐིག་ལེ་ཉག་ཅིག་འདི་ངོས་འཛིན་དགོས་པ་རེད། རིག་པ་ནི་འདུས་མ་བྱས་པ་དཔེར་ན་དངུལ་ཆུ་རྡུལ་དང་མ་འདྲེས་པ་ལྟ་བུ། རིག་པའི་ཀློང་ནས་ཤར་ཆ་ཕྲ་རགས་ཅི་ཙམ་ཤར་ཀྱང་ཕན་གནོད་མེད་པར་རང་ངོར་དྭངས་འགྲོ་བ་ཡིན། སེམས་ནི་མ་རིག་པ་འདུས་བྱས་སྐྱེ་འགག་ཅན་དཔེར་ན་ས་ནང་དུ་ཆུ་ཐིགས་ལྷུང་བ་ལྟ་བུ། ཡུལ་གང་ཤར་ན་དེར་འཛིན་ནས་འཁྲུལ་བ་ཡིན། རྣམ་ཤེས་དང་ཡེ་ཤེས་རླུང་གིས་དབྱེ་དགོས་གསུངས། ཀུན་གཞི་དང་ཆོས་སྐུའི་དབྱེ་བ་ནི། ཀུན་གཞི་དེ་ལ་གཉིས་ལས། དང་པོ་ཡེ་དོན་གྱི་ཀུན་གཞི་ནི་བདེ་གཤེགས་སྙིང་པོ་ཟག་མེད་ཀྱི་ཆོས་ཁམས་རྒྱ་མཚོ་ལྟ་བུ་སྐུ་དང་ཡེ་ཤེས་ཀྱི་འཆར་གཞི་ཡིན། གཉིས་པ་མ་དག་འཁོར་བའི་ཀུན་གཞི་ནི་ཟག་བཅས་ཀྱི་ཆོས་གཙོ་སེམས་རྣམ་ཤེས་ཚོགས་བརྒྱད་དང་འཁོར་སེམས་བྱུང་ལྔ་བཅུ། ཕྲ་བ་ཀུན་རྟོག་བརྒྱད་ཅུ་༼ འདོད་ཆགས་རྟོག་པ་བཞི་བཅུ། ཞེ་སྡང་རྟོག་པ་སོ་གསུམ། གཏི་མུག་རྟོག་པ་བདུན་མཆན། ༽དང་བཅས་པའི་འཆར་གཞི་ཡིན། ཀུན་གཞི་ནི་རྟོག་པ་སྔ་མའི་བག་ཆགས་བསོགས་པའི་སྣོད་ལྟ་བུ། རྟོག་པ་ཕྱི་མ་རྣམས་མཆེད་པའི་རྟེན་བྱེད་ནི་རེད་གསུངས། ཀུན་མཁྱེན་ཆེན་པོས། སྐྱེས་བུ་གཅིག་ངལ་བསོ་ལྟ་བུའི་ཚེ་ཤེས་པ་དར་ཅིག་གང་དུ་ཡང་མི་རྟོག་པར་ལུང་མ་བསྟན་དུ་གནས་པ་ཀུན་གཞི་དང་། དེ་ལས་དར་ཅིག་སྣང་ཡུལ་མ་འགགས་པར་ལམ་མེ་གསལ་ཡང་དེར་འཛིན་མ་ཞུགས་པས་གསལ་ལ་རྟོག་མེད་ཀྱི་རྣམ་པ་དེ་ཀུན་གཞིའི་རྣམ་ཤེས་ཡིན་གསུངས། ཀུན་གཞིའི་རྣམ་ཤེས་དེ་ལས་སྒོ་ལྔའི་རྣམ་ཤེས་འཆར། དེ་ལས་ཡིད་རྟོག་བཅས་མཆེད། དེ་ལས་ཉོན་ཡིད་མཆེད་ནི་རེད། ཡིད་རྟོག་དང་ཉོན་ཡིད་རྣམས་མ་འགགས་བར་དུ་སྒོ་ལྔ་ཆ་མཉམ་ཡོད་ནི་མངོན་ནི་མ་རེད། ཡིད་རྟོག་དང་ཉོན་ཡིད་གཉིས་རགས་པ། སྒོ་ལྔའི་རྣམ་ཤེས་ཕྲ་བ། ཀུན་གཞིའི་རྣམ་ཤེས་ཤིན་ཏུ་ཕྲ་བ་ཡིན་གསུངས། ཀུན་གཞིའི་རྣམ་ཤེས་མཆེད་འགག་གི་རྣམ་པ་ཅན་དང་། སྒོ་ལྔའི་རྣམ་ཤེས་སྐྱེ་འགག་གི་རྣམ་པ་ཅན་དང་། ཡིད་ཤེས་དང་ཉོན་ཡིད་གཉིས་གཟུང་འཛིན་གྱི་རྣམ་པ་ཅན་ཡིན། སྒྲ་ཐལ་འགྱུར་རྩ་བའི་རྒྱུད་ལས། མ་གོལ་བ་ཡི་སྒོམ་པ་ནི། །དབང་པོའི་སྒོ་རྣམས་གསལ་བའོ། །ཞེས་སྒོ་ལྔ་ཆ་མཉམ་དུ་ཡོད་དུས་གནས་ཆ་ཡོད་ནི་རེད། གནས་ཆ་དེ་ལ་དྭངས་ཆ་མ་ཐོན་ན་དུད་འགྲོར་སྐྱེ་འགྲོ་ནི་རེད། གསལ་ཆ་ཐོན་ན་ལྷོད་ཆ་མ་ཐོན་ནས་རང་རྒྱུད་ལ་ཞེན་འཛིན་གྱི་འཆིང་བས་བཅིང་ཡོད་ནི་རེད། དེ་ལྷོད་ཐབས་ནི། རེས་ལྷོད། རེས་གྲིམ། དེ་ཡང་ཡང་སྤེལ་མ་བྱེད་བཅུག་ན་ཉི་མ་བདུན་བརྒྱད་ཙམ་རེའི་ལྷོད་ཤེས་འོང་ནི་རེད་གསུངས། ལྷོད་ཆ་ཐོན་ནས་ཤར་ཆ་ཡོད་ནི་རེད་ན་རྟོག་པ་རྗེས་མཐུད་མེད་པར་གྲོལ་འགྲོ་དགོས། མ་གྲོལ་ན་འདོད་ཁམས་སུ་གོལ་བས་དེ་རྣམས་དང་མ་ལྡན་ན་གོལ་ས་གསུམ་ཡོད་ནི་རེད། ཡིད་ཤེས་ཀྱི་སྟེང་ན་ཉམས་བདེ་གསལ་མི་རྟོག་གསུམ་པོ་ལ་འཛིན་ཞེན་ཡོད་ན་ཁམས་གསུམ་དུ་གོལ་ནི་རེད། སྒོ་ལྔ་ལས་མིག་ཤེས་སྟེང་ནས་གོལ་ན་གཟུགས་ཁམས་སུ་སྐྱེ་འགྲོ། དེ་ལྟར་གོལ་ས་བདུན་པོ་དེ་དག་སྒོ་ལྔ་ཆ་མཉམ་དུ་ལེགས་པར་བཞག་ཤེས་ན་གོལ་ས་ཆོད་འགྲོ་གསུངས། ཡང་རྟོག་བཅས་ཡིད་ཀྱི་ཤེས་པ་དེས་ཡུལ་ཕྱི་འཛིན་དང་ནང་འཛིན་གཉིས་བྱེད་ནི་རེད། ཕྱི་འཛིན་ནི་འདས་པའི་རྗེས་གཅོད། མ་འོངས་པའི་མདུན་བསུ། ད་ལྟའི་ཕྱི་ནང་གི་མཚན་འཛིན་བྱེད། ཡུལ་གཟུགས་སྒྲ་ལ་སོགས་པ་ལ་མཚན་མར་འཛིན་ནི་རེད། ནང་འཛིན་ནི་མཉམ་བཞག་གི་དུས་ཡུལ་བདེ་བ་ལ་ཡུལ་ཅན་ཡིད་ཤེས་དེས་ཡུལ་བདེ་བར་འཛིན། གསལ་བ་ལ་གསལ་བར་འཛིན། མི་རྟོག་པ་ལ་སྟོང་པར་འཛིན། ཉོན་ཡིད་ཀྱིས་ཐུན་བཅད་དུས་མཉམ་བཞག་ལེགས་པར་ཡོང་ན་དགའ་བའི་འདོད་ཆགས། བྱིང་རྒོད་སོགས་སྐྱེ་དུས་དེ་ལ་མི་དགའ་བའི་རྣམ་པ་ཞེ་སྡང་སོགས་སྐྱེ་བ་ཡིན། ཉམས་བདེ་གསལ་མི་རྟོག་གསུམ་གང་སྐྱེ་ཚེ། ཡུལ་དེ་ཡུལ་ཅན་ཡིད་ཀྱི་ཤེས་པས་ཡུལ་དེ་ལ་འཛིན་ཅིང་ཞེན་ནས་ཡང་ཡང་གོམས་པའི་སྟོབས་ཀྱིས་ཡུལ་དང་ཡུལ་ཅན་གཉིས་མེད་དུ་འདྲེས་ཏེ་རྟོག་མེད་ཚུལ་དུ་གནས་ནི་རེད་གསུངས། དུས་གསུམ་གྱི་རྣམ་རྟོག་དང་མ་འདྲེས་པའི་ཤེས་པ་གསལ་སྟོང་བཟོ་བཅོས་མེད་པ་ཞིག་དེ་ན་ཤར་ཡོད་པ་དེ་ལ་རིག་པ་ཟེར། དེ་ནི་རྣམ་རྟོག་ཐམས་ཅད་ཀྱི་འཆར་གཞི་དང་གྲོལ་ས་ཡིན་པས་ཀ་དག་གཞིའི་རིག་པའམ་ཆོས་སྐུ་ཡིན་ནོ། །རྗེས་ཉམས་ལེན་གྱིས་སྐྱོང་ཚུལ་ནི། ལྟ་བ། སྒོམ་པ། སྤྱོད་པ། འབྲས་བུ་དང་བཞི་ལས། དང་པོ་རང་ངོ་འཕྲོད་པ་ལྟ་བ་ནི། ལྟ་བ་སྤྲོས་བྲལ་གྱི་རང་བཞིན་འདི་ལམ་སྒོམ་པས་ཉམས་སུ་བླངས་ན། དེ་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། སྐྱོབས་པའི་ནུས་མཐུ་སོགས་ཡོད་ལ། མཁྱེན་ཆ་འགག་པ་མེད་པ་ཀུན་ཤེས་ཀུན་རིག་གི་ཆ། དབྱིངས་སྤྲོས་པའི་མཐའ་ཐམས་ཅད་དང་བྲལ་བ། རང་གདངས་འགག་པ་མེད་པའི་ཡེ་ཤེས་རིག་སྟོང་ཟུང་འཇུག་གི་ལྟ་བ་ངོས་ཟིན་དགོས་པས། འདས་པའི་རྟོག་པ་འགགས། མ་འོང་པའི་རྟོག་པ་མ་སྐྱེས་ཀྱི་བར་དེ་ན་ཤར་ཡོད་པ་དེ་རིག་པ་རེད་གསུངས། མདོ་ལྟར་བདེ་གཤེགས་སྙིང་པོ། རྫོགས་ཆེན་པས་གཉུག་མའི་སེམས་འོད་གསལ་གྱི་རིག་པ་ཤར་ཡོད་པ་རེད་གསུངས། ད་ལྟའི་ཤེས་རིག་མ་འགགས་ས་ལེ་བ། །ཀུན་བཟང་གདོད་མའི་མགོན་པོ་དེ་ཀའོ། །ཅིར་ཡང་མ་གྲུབ་སྟོང་དབྱིངས་ཀུན་བཟང་མོ། །དེ་ཉིད་རྟོགས་ན་སྐད་ཅིག་རྫོགས་སངས་རྒྱས། །ཞེས་དང་། ཤེས་རིག་རང་ཚུགས་མ་ཤོར་ན། །འདི་ལས་ལྷག་པ་གཞན་ན་མེད། །ཅེས་དང་། ཁྲེགས་ཆོད་ཚིག་བརྒྱའི་མདོ་འགག་ནི། །རྗེན་པར་ཕུད་ལ་ས་ལེར་སྐྱོངས། །ཞེས་དང་། མ་ཡེངས་མི་སྒོམ་དོན་གྱི་རང་ཞལ་བལྟ། །འཁོར་འདས་ཆོས་སྐུ་ཡེ་སངས་རྒྱས་པའོ། །ཞེས་སོ། །ལྟ་བ་ཡིན་མིན་གྱི་རེ་དོགས་མེད་པ་ལ། ངེས་ཤེས་གཏིང་ནས་སྐྱེས། ཁོ་ཐག་ནང་ནས་ཆོད་དགོས་སོ། །གཉིས་པ་ངང་ལ་གནས་པ་སྒོམ་པ་ནི། དང་པོ་འཁྲུལ་བའི་སྐབས་དྲན་པས་ཟིན་པ་ནི་རྫི་བུ་ལྟ་བུའི་དྲན་པ་དེ་འདུ་བྱེད་ཀྱི་དྲན་པ་ཟེར། རིག་ཐོག་ཏུ་ཐོན་དུས་ཆོས་ཉིད་ཀྱི་དྲན་པའི་རྣམ་ལྡན་དུ་འདུ་བྱེད་ཀྱི་དྲན་པ་དྭངས་དགོས་གསུངས། གནས་ལུགས་མ་བཅོས་པའི་སྒོམ་པ་ནི་བཟུང་དྲན་འགྱུ་དྲན་ཞིག་གིས་བཟུང་བའི་བཅོས་མ་གློ་བུར་བའི་བསྒོམ་ལྟར་སྐྱེ་ཨེ་ཤེས་བལྟས་ཀྱང་མི་ཤེས་ལ་དགོས་ཀྱང་མི་དགོས། རིག་པ་མངོན་སུམ་རྟོགས་པ་ནས་བཟུང་། མེ་ཡིན་ན་ཚ་བ་དང་ཆུ་ཡིན་ཙམ་ནས་བརླན་པ་བཞིན་ཏུ་ཆོས་ཉིད་རང་བབས་ཀྱི་དྲན་པ་རིག་པ་དང་ངོ་བོ་གཅིག་པར་ཡོད་པ་ལས་བཅོས་སྒོམ་ལྟར་འཛིན་མི་དགོས་པར་ཐག་ཆོད་དགོས། དེ་ལྟར་བརྟགས་པས་སྔར་གྱི་ཆོས་ཉིད་རང་བབས་ཀྱི་བསམ་གཏན་བཟུང་དྲན་འགྱུ་དྲན་གང་གིས་ཀྱང་བཟུང་མི་དགོས་པར་དེའི་སྟེང་ནས་བཤད་དགོས། དེ་ལྟ་བུའི་སྒོམ་པ་དེ་རྫོགས་ཆེན་རང་ལུགས་ཀྱི་མིང་བཏགས་ན་ཆོས་ཉིད་ཀྱི་དྲན་པ། གཉུག་མའི་དྲན་པ། བློ་འདས་ཀྱི་དྲན་པ། རྩོད་བྲལ་རང་བཞག་གི་དྲན་པ། དྲན་མཆོག་རྒྱལ་པོ་ཞེས་མིང་ལྔ་བཏགས་ཀྱང་དོན་ཆོས་ཉིད་རང་བབས་ཀྱི་བསམ་གཏན་དང་དོན་གཅིག་ཡིན་ནོ། །མ་བཅོས་པར་ལྷོད་པོ་འཇོག་དགོས་གསུང་པ་ལྟར་བཅའ་བཅོས་རེ་དོགས་བློ་སྣ་ཚབ་ཚུབ་མི་བྱེད་པར་དྭངས་བ་རྒྱ་མཚོ་ལྟ་བུ། སང་བ་མེ་ཏོག་ལྟ་བུ། གསལ་བ་ཉི་ཟླ་ལྟ་བུ། སྤྲིན་མེད་པའི་ནམ་མཁའ་ལྟ་བུ། ཆུ་ཆད་པའི་རང་ཐག་ལྟ་བུ། ལས་ཟིན་པའི་སྐྱེས་བུ་ལྟ་བུ་ལྷོད་པོར་འཇོག་དགོས། བྱིང་ཆ་དྭངས་པའི་དྭངས་ཆ། རྨུགས་ཆ་སངས་བའི་གསལ་ཆ། སྟོང་ཆ་དག་པའི་རྗེན་ཆ། སེམས་བྱིང་བ་རགས་པ་རྣམ་རྟོག་དང་། ཕྲ་བ་དཔེ་མེ་ལོང་ལ་ཧས་བཏབ་པ་ལྟ་བུ། མཉམ་བཞག་ངར་ཆ་ཉམས་པ་དེ་ལ་ཟེར། རྨུགས་པ་གསལ་ཆ་སྒྲིབ་བྱེད་ལ་ཟེར། འཐིབ་པའི་ས་བུད་ནས་རྒྱ་ཡན། ཀུན་མཁྱེན་འཇིགས་བྲལ་གླིང་པས། སེམས་གསལ་སྟོང་ཞི་གནས་འཛིན་པ་ཅན། །ཡིད་རྟོག་དཔྱོད་ཀྱི་ལྷག་མཐོང་གཡོ་འཕྲུལ་པོ། །དབྱིངས་ལུང་མ་བསྟན་གྱི་བྱར་མེད་གསུམ། །འདི་གསུམ་པོ་རྫོགས་ཆེན་ཁྱུ་ནས་བུད། །སྒོམ་དྲན་འཛིན་གཉེན་པོའི་འཆིང་བ་དང་། །བློ་ཆེད་འཛིན་བྱས་པའི་སྟོང་ཉམས་ཅན། །བློ་གོ་ཡུལ་དྲེད་པའི་རྒྱས་འདེབས་གསུམ། །ཁྱོད་གསུམ་ཡང་རྫོགས་ཆེན་ཁྱུ་ནས་བུད། །སེམས་འདུ་ཤེས་གྲུང་པོའི་ལྟ་སྒོམ་དང་། །བློ་གོ་རར་འཐུམ་པའི་ཉམས་ཞེན་དང་། ཡིད་མྱང་བྱའི་དྲི་མས་སྦག་དེ་གསུམ། །ཁྱེད་གསུམ་ཡང་རྫོགས་ཆེན་ཁྱུ་ནས་བུད། །ཅེས་སོ། །ཨ་འཐས་འཇུར་བུས་བཅིངས་གྱུར་ན། །ཡེ་ཤེས་རང་ངོ་ཕར་ཕར་བསྒྲིབས་ནས་འགྲོ། །ཞེས་དང་། བཅའ་བཅོས་མེད་པར་རང་ངང་ལ་དྭངས་ས་ལེ་ཡངས་ཁྲོལ་ལེ་ཡེངས་མེད་འཛིན་མེད་དུ་བསྐྱངས་བ་གནད་ཡིན་ནོ། །ཉག་བླས་མཉམ་བཞག་གི་རང་ས་མ་ཟིན་ན་བྱིང་བ་ལས་འདའ་མི་ནུས་གསུངས། ཨོ་རྒྱན་ཆེན་པོས། ཡུན་ཐུང་གྲངས་མང་ཁང་སྟོང་ཐིག་པ་དགོས། གསུངས། ལས་དང་པོ་བས་སྣང་བ་དྭངས་དུས་ཡུན་ཐུང་གྲངས་མང་ཉིན་གཅིག་ལ་དྲན་པ་བརྒྱ་སོགས་བསྟེན་ཀྱང་ཆོག །མ་དྭངས་དུས་ཡིན་མིན་ཐམས་ཅད་སྒོམ་དུ་བརྩི་མི་ཉན། བྱིང་རྨུགས་འཐིབ་གསུམ་གྱི་སྐྱོན་གྱིས་གོས་འོང་གསུངས། རྣམ་རྟོག་རྒོད་པའི་དུས་སུ་ཕཊཿཀྱིས་གཅོད་དགོས་སོ། །གསུམ་པ་གང་ཤར་རང་གྲོལ་གྱི་སྤྱོད་པ་ནི། རྩལ་ཕྲ་རགས་ཅི་ཙམ་ཤར་ཡང་རྗེས་མཐུད་མེད་པར་གྲོལ་དགོས་པ་དཔེར་ན་རྒྱ་མཚོའི་རླབས་ལ་བསམས་ན་རླབས་ཐམས་ཅད་ཀྱང་རྒྱ་མཚོའི་རྣམ་རོལ་རྣམ་འགྱུར་ཡིན་པས་ན་རྒྱ་མཚོ་ལས་ལོགས་སུ་ངན་པ་ཞིག་གང་ཡང་མེད། ཚུར་དེད་ན་རྒྱ་མཚོ་རང་གི་ངོ་བོ་ལས་གཞན་དུ་འཕྱོ་ས་མེད་པར་རང་གི་ཀློང་དུ་གཅིག་པའམ། དཔེ་དེ་བཞིན་དུ་ཀུན་རྫོབ་འཁྲུལ་བའི་ཆོས་ཐམས་ཅད་ཕར་དེད་ན་ཡེ་ཤེས་ཆེན་པོ་གཅིག་གི་ཆོ་རོལ་རྣམ་རོལ་རྣམ་འགྱུར་ཡིན་པས་ངན་པ་མེད། ཚུར་དེད་ན་ཐམས་ཅད་ཡེ་ཤེས་ཆེན་པོ་གཅིག་གི་ཀློང་ལས་མི་འདའ་ཞིང་གཅིག་པས་བཟང་ངན་རང་ངོ་ན་མེད། ཕར་དེད་ཚུར་དེད་འདིའི་ཐོག་ནས་ཤེས་དགོས་སོ། །ཁྲེགས་ཆོད་ལམ་ཤར་གྲོལ་ལྷ་མཛེས་པ་ལ་རྒྱན་བཏགས་པ་ལྟ་བུ་ཡིན་གསུངས། རྣམ་རྟོག་གི་རྗེས་སུ་མི་འབྲང་། མི་བཀག །ཡེ་གྲོལ་ཞེས་པ་ནི། གཞི་རིག་སྟོང་ཟུང་འཇུག་གི་ལྟ་བ་དེ་ཉིད་ཡེ་གདོད་མ་ནས་གྲོལ་བའི་བདག་ཉིད་ཅན་ཡིན་ཏེ། ད་གཟོད་འབད་པས་སུས་ཀྱང་གྲོལ་མི་དགོས་ཞེས་འབད་པ་དང་རྩོལ་བའི་སྒོ་ནས་སུས་ཀྱང་གྲོལ་མི་དགོས་ཏེ། གྲོལ་བ་མེད་དེ་གྲོལ་གཞི་རྡུལ་ཙམ་མེད། །ཅེས་གསུངས་སོ། །ཤར་གྲོལ་ཞེས་ཁང་སྟོང་གི་རྐུན་མ་ལྟ་བུའི་གྲོལ་ཚུལ་ནི་ཁང་སྟོང་ལ་ཤོར་རྒྱུ་དང་། རྐུན་མ་ལ་ཐོབ་རྒྱུ་མེད་པ་ལྟར། རྟོག་ཚོགས་གང་ཤར་ཐམས་ཅད་བག་ཆགས་བསོགས་ལོངས་མེད་པར་ལྟ་བའི་ཀློང་དེར་གྲོལ་བའོ། །རང་གྲོལ་ཞེས་སྦྲུལ་གྱི་མདུད་པ་ལྟ་བུའི་གྲོལ་ཚུལ་ནི། སྦྲུལ་མདུད་དེ་གཞན་རྐྱེན་ལ་ལྟོས་མི་དགོས་པར་རང་སྟོབས་ཀྱིས་ཞིག་འགྲོ་བ་ལྟར། རྟོག་ཚོགས་གང་ཤར་ཐམས་ཅད་གཞན་ལ་ལྟོས་མི་དགོས་པར་རང་སྟོབས་ཀྱི་རང་གྲོལ་བའོ། །ཅེར་གྲོལ་ཞེས་སྔར་འདྲིས་ཀྱི་མི་དང་འཕྲད་པ་ལྟར་རྟོག་པ་ཡུལ་ལ་གཡེང་བའི་ཚེ་དྲན་པས་ཟིན་ཙམ་ནས་དྲན་མཁན་ཆོས་ཉིད་དུ་སྟོར་བའི་དུས། ཐོག་མའི་སྐྱོང་ཚུལ་མ་ནོར་བ་ཡིན་གསུངས་སོ། །བཞི་པ་སྐུ་གསུམ་ལྷུན་གྲུབ་འབྲས་བུ་ནི། ངོ་བོ་ཞེས་པ་དེ་དབྱིབས་དང་ཁ་དོག་དང་བྲལ་བ་དེ་སྟོང་པ་ཆོས་སྐུ། སྟོང་བཞིན་དུ་གོ་མཁན་ཚོར་མཁན་ཐ་མལ་གྱི་ཤེས་པ་རྗེན་པ་དེ་རང་བཞིན་གསལ་བ་ལོངས་སྐུ། ཐུགས་རྗེ་ཀུན་ཁྱབ་ཕྱི་གསལ་ལྟར་སེམས་ཀྱི་རྣམ་པར་རྟོག་པའི་འཆར་སྒོ་ཇི་སྙེད་ཡོད་པ་སྤྲུལ་སྐུ། མཉམ་བཞག་སྐབས་ལྟ་བ་སྒོམ་པ་སྤྱོད་པ་འབྲས་བུ་རྣམས་གཞི་ཀློང་གཅིག་ཏུ་རྫོགས་པ་ཡིན་ནོ། །ངོ་བོ་སྟོང་ཉམས་ངར་ཆ་དང་ལྡན་པ། རང་བཞིན་གསལ་ཉམས་སངས་ཆ་དང་ལྡན་པ། ཐུགས་རྗེའི་རིག་ཉམས་གྲོལ་ཆ་དང་ལྡན་པ། ཚོགས་ལམ་རི་མོ་བྲིས་པའི་ཟླ་བ་ལྟ་བུ་པས་གོ། སྦྱོར་ལམ་ཆུ་ཟླ་ལྟ་བུ་པས་མྱོང་། མཐོང་ལམ་གནམ་ཟླ་ལྟ་བུ་པས་རྟོགས། གྲོགས་ཁྱོད་ཡོང་བ་ཚོར་ཙམ་ན། །གནས་ལུགས་ཐོག་ཏུ་ཕེབ་འདུག་ཀྱང་། །ད་དུང་དེ་ལ་གོམས་གྱུར་ན། །ཡོང་ཚོར་ཙམ་གྱི་དྲན་པ་དེ། །ཡུལ་མེད་སངས་བའི་དུས་ཤིག་ཡོད། །དེ་ཚེ་དྲན་སྣང་ཡེ་ཤེས་སུ། །འཆར་བའི་མགོ་བོ་བརྩམ་པ་ཡིན། །དེ་ཡི་ངང་མདངས་བསྐྱང་གྱུར་ན། །ནམ་ཞིག་ཡོངས་ཡུལ་ཚོགས་དྲུག་བཅས། །ཉི་མ་སྤྲིན་ལས་གྲོལ་བ་བཞིན།། དེ་དག་མདོར་ན་འདི་ལྟར་ལགས། །ཤེས་བྱ་ཡུལ་དང་ཤེས་བྱེད་བློ། །གཉིས་སུ་མེད་པའི་ཡེ་ཤེས་ནི། །མཉམ་པ་ཉིད་དུ་ཤར་བའི་ཚེ། །ཡེངས་ཡུལ་ཆོས་ཉིད་སོང་བ་ཡིན། །ཞེས་སོ། །རྫོགས་པ་ཆེན་པོ་འབྲས་བུ་ལམ་བྱེད་སྙེ་མའི་མགུལ་བ་ནས་འཆང་བ་ལྟ་བུ་ཡིན་ནོ། །ཐེག་མཆོག་ཨ་ཏི་རྫོགས་པ་ཆེན་པོའི་རང་ལུགས་སུ་ཀ་དག་སྤྲོས་པ་དང་བྲལ་བའི་ཡེ་ཤེས་ཆེན་པོ་ད་ལྟའི་ཤེས་པ་ཟང་ཀ་མའམ་རིག་སྟོང་གོ་མ་འགགས་པའི་གནས་ལུགས་ཁོ་ནའི་རང་གཤིས་ལ་ལྟ་ཞིང་། འཁོར་བ་མེད་སྣང་དུ་ཤེས་པ་དང་སྐུ་གསུམ་ལམ་སྣང་དུ་རྫོགས་པ། འབྲས་བུ་ཟེར་བ་གུད་ནས་ཐོབ་པའང་མ་ཡིན་པ་ད་ལྟའི་རིག་པ་ཆེན་པོའི་སྟེང་དུ་ཡེ་རྫོགས་སམ་གཞི་རྫོགས་སུ་ཡོད་པས། གང་སྣང་ཡེ་ཤེས་ཀྱི་རོལ་བ། ཐམས་ཅད་རིག་རྩལ་གྱི་རང་བཞིན་བསལ་བཞག་བྲལ་བ་སྣང་སྲིད་དག་མཉམ་ཆེན་པོར་རྟོགས་པས་འབྲས་བུའི་ཆོས་རྣམས་ཀྱང་རིག་པ་ཁོའི་རང་ངོར་ཡེ་རྫོགས་སུ་འདུག་པ་ཐག་ཆོད་ནས་གཉིས་མེད་ཀ་དག་ཆེན་པོའི་གྲོལ་ས་ལ་གནས་ཀྱང་། རྟག་ཁྱབ་ལྷུན་གྲུབ་ཆེན་པོའི་སྐུར་བཞེངས་ཏེ་འགྲོ་བའི་དོན་བྱེད་པ་རྒྱུན་མི་ཆད་པ་འབྱུང་བ་ཡིན་ནོ། །འཕྲོས་དོན་ནི། མི་ཕམ་རིན་པོ་ཆེས། དེ་ཡང་རང་ལུགས་རྡོ་རྗེ་རྩེ་མོའི་གྲུབ་མཐའ་སྙོགས་མི་སྙོགས་ཀྱི་གནད་ནི། ཐོས་བསམ་རྒྱ་ཆེན་པོ་དང་བསགས་སྦྱང་ཕྱི་ཚུལ་ཇི་ལྟར་ཕུན་སུམ་ཚོགས་པར་བྱས་ཀྱང་། དེ་ཁོ་ནས་ཐུན་མིན་ལམ་གྱི་གྲུབ་མཐའ་ཟིན་པའི་ངེས་པ་མེད་ཅིང་། རྫོགས་པ་ཆེན་པོའི་དོན་བརྒྱུད་དང་ལྡན་པའི་བླ་མ་སེམས་ཉིད་ཆོས་སྐུར་ངོ་སྤྲོད་པའི་མན་ངག་སྙན་ཁུང་བརྒྱུད་ནུས་པ་རང་དང་སྐལ་བ་མཉམ་པའི་མི་ཡི་ཚུལ་དུ་བསྟན་པའི་བཤེས་གཉེན་ཆེན་པོ་དེ་ལྟ་བུ་གང་ན་ཡོད་ཀྱང་། ཡོན་ཏན་དེ་ཁོ་ནས་སངས་རྒྱས་དང་མཚུངས་པར་རྙེད་དཀའ་བའི་འདུ་ཤེས་ཀྱིས་སྒོ་གསུམ་གཡོ་ཟོལ་མེད་པར་གུས་པས་བསྟེན་ནས་ཐུགས་མཛོད་ལོན་པ་དེ་གཅིག་པུས་རྡོ་རྗེ་སྙིང་པོའི་གྲུབ་མཐའ་སྙོགས་པ་འབྱུང་བས་ན། རྒྱལ་བ་རིག་འཛིན་བརྒྱུད་པ་དང་བཅས་པས་ཡང་ཡང་གསུངས་པ་ལྟར། གསང་སྔགས་སྙིང་པོའི་ལམ་ཚོལ་རྣམས་ཀྱིས་བླ་མ་མཚན་ཉིད་དང་ལྡན་པ་དབང་བཞི་པའི་ཡེ་ཤེས་ལ་མྱོང་བ་ཅན་བསྟེན་པར་བྱ་བ་ལས། གཞན་གང་གིས་ཀྱང་མི་ཕན་པ་འདི་ཁོ་ན་མི་ཤེས་སུ་མི་རུང་བའི་གནད་ཡིན་པས། རིག་འཛིན་གོང་མ་རྣམས་ཀྱི་ལམ་མ་ནོར་བ་འདི་ལ་ལམ་ཉིད་དུ་ངོ་ཤེས་པའི་ངེས་ཤེས་སུ་ལ་ལྡན་པ་དེ་ལ་གསང་སྔགས་སྙིང་པོའི་སྐལ་བ་ཡོད་པའི་ཕྱིར། ཐོབ་གྲངས་དང་བཟླས་གྲངས་བླ་མ་མང་པོ་བསྟེན་པའི་གྲངས་ཙམ་ཞིག་ལ་བློ་གདེངས་མི་འཆའ་བར། རང་སེམས་ཆོས་སྐུར་ངོ་སྤྲོད་པའི་མན་ངག་ཟབ་མོ་དཔལ་ལྡན་བླ་མའི་ཞལ་ནས་མཉན་ཏེ། དེ་ལ་ནན་ཏན་སྙིང་པོར་བྱ་བ་འདི་ཁོ་ན་བཤད་བཤད་ཀྱི་སྙིང་པོ། སྒྲུབ་སྒྲུབ་ཀྱི་འབྲས་བུ། བཙལ་བཙལ་གྱི་དོན་པོ་ཡིན་པས་གནད་འདི་མ་སྟོར་བར་གྱུར་པ་ཅིས་ཀྱང་གལ་ཆེའོ། །ཞེས་གསུངས་པ་ལྟར། ཚེ་རབས་སྔོན་ལས་ཀྱི་བླ་མ་ཟེར་རྒྱུ་བོ། གསུང་པས་རྒྱུད་ལ་ཕན་ཐོག་པ། ངེས་ཤེས་འདྲོངས་པ་དེ་ལ་དགའ་བ་ཞིག་ཡིན་ནི་རེད། འདི་ནས་བྱང་ཆུབ་བར་དུ་གསོལ་བ་བཏབ། ཐུགས་ཡིད་དབྱེར་མེད་བསྲེ། ཡེ་ཤེས་བླ་མ་འདི་མངོན་དུ་གྱུར་ནས་བཟུང་སྟེ་ནམ་ཡང་འབྲལ་བ་མེད་པར་བསྒོམ། ཞེས་སོ། །རྗེ་མི་ལས། སྒོམ་ཏུ་མེད་ཀྱང་རྩལ་ལ་སྦྱངས་རྒྱུ་ཡོད། །རྣལ་འབྱོར་སྒོམ་པ་བཤིགས་ཀྱིན་བཟང་། །ཕུ་ཆུ་དྲག་པོ་བརྡབ་ཀྱིན་བཟང་། །ཞེས་གསུངས་པ་ལྟར་རྩལ་སྦྱངས་གནད་ལྡན་སྦྱང་ཐུབ་ན་བྱིང་རྨུག་འཐིབ་གསུམ་སེལ་བ་དང་བོགས་ཐོན་པའི་དགོས་པ་ཡོད་དོ། །ཉག་བླ་པདྨ་བདུད་འདུལ་གྱིས་ས་སྟེང་གསེར་གྱི་མཆོད་རྟེན་གྱིས་བཀང་བ་བས། ངེས་པའི་ཏིང་འཛིན་དུས་གཅིག་སྒོམ་པ་འཕགས། སྐྲ་རྩེ་ནས་ཆུ་ཐིག་པང་དུ་ལྷུང་ཚེ་བར་སྒོམ་ན་བསྐལ་བ་གཅིག་གི་སྡིག་པ་འདག །ཅེས་སོ། །ཉག་བླས། མཉམ་བཞག་ལ་ནན་ཏན་ཡུན་བསྲངས་ཏེ་སྙིང་རུས་མ་ཐུབ་ན་ཁ་ལྟ་སྟོང་སྐད་ཀྱི་ལྟ་རྒོག་དང་། འགྲོ་འདུག་ལམ་ཁྱེར་གྱིས་སྒོམ་སྣང་ཙམ་གྱིས་སེམས་རྒྱུད་གྲོལ་ཤིན་ཏུ་དཀའ་འོ། །སྤྱོད་ལམ་སྐབས་དྲན་པ་བསྟེན་ན་འཁྲུལ་བའི་དོད་པོ་མིན་ཀྱང་། མཉམ་བཞག་བརྟན་ཆ་མེད་ན་བྱིང་བ་ལས་མི་འདའ་གསུངས། རང་གིས་དང་པོ་དད་པ་དམ་ཚིག་དང་ཕྱིན་ཆོད་བསྒོམ་དགོས་ཟེར་ཚེ། ཐམས་ཅད་ཀྱིས་དེ་ལྟར་སྒྲུབ་པར་ཐག་བཅད་ནས། རིང་ལམ། ཉེ་ལམ། མྱུར་ལམ། ཤིན་ཏུ་མྱུར་ལམ་ཐེག་པ་རིམ་དགུའི་ཡང་རྩེ་ལ་ཧེབ་ལང་ནས་ཁྱེད་ཤེས་ཁྱེད་མཁྱེན་ཟེར་ཀྱང་། ལག་ཏུ་ལེན་དུས་མཁྲིས་ནད་ཅན་གྱི་སྔོན་དུ་བཙོ་ཟན་འཇོག་པ་ལྟར་སྒོམ་མཁན་ཉིན་མོའི་སྐར་མ་ལྟ་བུ་གཅིག་གཉིས་རེ་ཟུང་ཙམ་ལས་དཀོན་པ་མཐོང་ཆོས་རེད། བླ་མ་རིན་པོ་ཆེས། རིག་ངོ་འཕྲོད་དུས་བསོད་ནམས་ཟད་སོང་ན་མ་གཏོགས་བསྒོམ་དགོས་ནི་རེད། སངས་རྒྱས་ཐམས་ཅད་ཀྱི་དགོངས་པ་ཆོས་ཐམས་ཅད་ཀྱི་གནས་ལུགས་མངོན་སུམ་འདི་ནི། ཞིང་ལས་སོ་ནམ། ཕྱུགས་ཀྱི་འཚོ་སྐྱོང་དཀོར་ཁ་གྲོང་ཆོག །གོར་ལི། ཤ་སྐལ། ཇ་ཐོ། ནས་སྤར། འཁོར་བའི་བྱ་བཞག་སོགས་ཀྱིས་བྱ་བ་གང་ལའང་བརྗེ་མི་བྲ་ངེས་པ་རེད། སྨྱོན་པ་སོས་ཐང་འདུག་མི་ཚུགས་པ་རྣམས་ནི། མན་ངག་གི་གནད་མ་ལོན་པའི་མཚང་བུད་པ་ཡིན། མཉམ་བཞག་ཏུ་སྐུ་གསུམ་གྱི་བཞུགས་ཚུལ་ནི། ཁྱད་ཆོས་གསུམ་དང་ལྡན་པའི་བདག་ཉིད་ཅན་ངོ་བོ་སྟོང་ཉམས་ངར་ཆ་དང་ལྡན་པ། རང་བཞིན་གསལ་ཉམས་སངས་ཆ་དང་ལྡན་པ། ཐུགས་རྗེ་རིག་ཉམས་གྲོལ་ཆ་དང་ལྡན་པས་རྟོག་པ་གང་ཤར་ཀྱང་བག་ཆགས་བསོགས་ལོང་མི་འདུག །རྗེས་ཐོབ་སྐབས་སུ་ལས་རྒྱུ་འབྲས་དེ་ལ་དེ་ལས་ཞིབ་ཆ་ཆེ་བ་ཡིན། སྟོང་ཉིད་རྒྱུ་འབྲས་སུ་ཤར་ནིའི་ཉམས་ལེན་པ་ཞིག་ཡིན་ན་ལས་རྒྱུ་འབྲས་ཀྱི་གནས་ལ་མི་ཞིབ་ཐབས་གཏན་ནས་མེད་གསུངས། རྒྱལ་བའི་བཀའ་ཚད་མ། བླ་མའི་ལུང་ཚད་མ། རང་གི་རིག་པ་ཚད་མ་གསུམ་དང་དད་པ་སྙིང་རྗེ་ངེས་འབྱུང་གསུམ་རང་ཤུགས་ཀྱིས་རྡོལ་ཚེ་གཞན་ལ་ཐེ་ཚོམ་གཅད་མི་དགོས། རྫོགས་པ་ཆེན་པོ་ཀློང་ཆེན་སྙིང་ཐིག་ལྟར་འཁོར་ལོའི་མགོན་པོའི་ཁྲིད་རྒྱུན་ལྟར་ཉམས་སུ་ལེན་ཚུལ་གནད་རྣམས་ཕྱོགས་བསྒྲིགས་བྱས་པ་ལ་ཉེས་འགལ་གང་མཆིས་བླ་མ་དང་སྲུང་མའི་དྲུང་དུ་མཐོལ་ལོ་བཤགས་སོ། །དད་ལྡན་བསྟན་པ་ཚེ་རིང་གིས་གསང་ཆེན་མེ་ཏོག་ཚལ་གྱི་དཔལ་རིའི་ནང་ཁྱབ་བདག་འཁོར་ལོའི་མགོན་པོའི་སྐུ་འདྲ་ཞིག་བཞེངས། རང་གཞན་ཐམས་ཅད་ཀྱི་དོན་དུ་ལམ་གྱི་དཀའ་གནད་མངོན་ཕྱུང་ཞིག་བྲི་དགོས་ཞེས་བསྐུལ་ཚེ་ཞལ་ངོ་མ་ལྡོག་ཙམ་དུ་དྷརྨ་རང་གི་འབྲེལ་ཡོད་མཆེད་གྲོགས་རྣམས་དང་གཞན་ལ་འཆད་ཐུབ་པ་རེ་ཡོད་ན་གལ་ཆེ་སྙམ་ནས་བྲིས་པ་ཡིན་པས་ཁོང་རྣམས་ཀྱིས་གཟིགས་རྟོགས་མཛད་ནས་ཉམས་སུ་གནད་ལྡན་ཞིག་ལེན་པ་སྐུ་མཁྱེན། དད་རྟེན་ཡང་ཉམས་སུ་ལེན་ན་མ་གཏོགས་ཉམས་སུ་ལེན་མི་ནུས་ཀྱང་ཡི་གེ་རེ་འཚག་ནས་དེ་དཔེ་ཉོབ་ནང་དུ་གར་སོང་མ་གོ་ན་ཉམས་ཆགས་དང་སྔགས་ཀྱི་སྲུང་མ་རྣམས་ཀྱིས་འཁུ་ལྡོག་ཡོད་པས་གཟབ་པར་མཛོད། ཉམས་སུ་ལེན་པའི་གང་ཟག་མཐོ་དམན་ཆེ་ཆུང་ཐམས་ཅད་མི་གནས་ཆོས་སྐུའི་གཏན་སྲིད་ཟིན་པའི་རྒྱུར་གྱུར་ཅིག །སརྦ་མངྒ་ལམ།། །། ལྕགས་སྐོང་བདུད་འཇོམས་རིན་པོ་ཆེའི་ཞལ་རྒྱུན་ཟིན་བྲིས།གྲུབ་དབང་ལྕགས་སྐོང་གཏེར་ཆེན་རིན་པོ་ཆེ་ཁྲག་འཐུང་བདུད་འཇོམས་རྡོ་རྗེའི་ཞལ་རྒྱུན་མཚུངས་མེད་དཔལ་ལྡན་བླ་མ་གཡུ་ཁོག་བྱ་བྲལ་ཆོས་དབྱིངས་རང་གྲོལ་རིན་པོ་ཆེས་བསྩལ་བའི་ཟིན་བྲིས་བཞུགས་སོ།། གྲུབ་དབང་གཏེར་ཆེན་བླ་མའི་༼སྒེའུ་གཏེར་གྱི་༽ཞལ་རྒྱུན་མཚུངས་མེད་བླ་མ་རིན་པོ་ཆེ་༼གཡུ་ཁོག་བྱ་བྲལ་བས་༽ དགྱེས་བཞིན་དུ་བསྩལ་བ་ཉམས་ཀྱིས་དོགས་ནས་ཤ་ཟིན་སྤུ་ཟིན་དུ་བྲིས་པ་ལ། རྒྱལ་མོའི་གཡུང་དྲུང་ཚེ་བརྟན་གྱིས་སྣང་སྦྱང་ཞེས་པའི་དོན་དྲིས་པ་ལ། འཁྲུལ་སྣང་ལས་གྲུབ་པའི་ཕྱི་ནང་སྣོད་བཅུད་ཡུལ་ཡུལ་ཅན་གྱི་འཁྲུལ་བ་དང་བཅས་པ་སྣང་སྟོང་ཟུང་འཇུག་ཏུ་སྦྱང་དགོས་པས། དེ་སྦྱོང་བྱེད་ཡིན་པས་སྣང་སྦྱང་ཟེར་ནི་རེད་གསུངས། སྣང་སྦྱང་གི་དབུ་ཞབས་ཐམས་ཅད་མཚན་དོན་འདིས་ཁེབས་དགོས། རང་བཞིན་ཞེས་པའི་སྟེང་འདི་ནས་སྣང་སྦྱང་གི་ལྟ་བའི་ཁོག་གི་གནད་དེ་འཛིན་དགོས། རང་བཞིན་ཞེས་པས་འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་རང་བཞིན་ནམ་གནས་ལུགས་དེ་སྟོང་པ་ཉིད་རེད། དེ་རྟོགས་པས་རྟག་ལྟ་དང་རྟག་འཛིན་གཏོར་ནི་རེད། སྟོང་ཉིད་དེ་ཡང་སྟོང་གསུམ་ཞིག་སོང་ཤུལ་འདྲ་འདྲའི་ཆད་ལྟ་ཞིག་མ་རེད། འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་ཀྱི་རང་བཞིན་སྟོང་པ་ཉིད་ལས་འགག་མེད་དུ་སྣང་བའི་ཆ་ནས་མེད་པ་ཅང་མེད་ཆད་མཐའ་དང་ཆད་འཛིན་གཏོར་ནི་རེད། འཁོར་འདས་ལམ་གསུམ་སོ་སོར་ཕྱེ་ནས་བཤད་ན། འཁོར་བའི་ཆོས་ཕུང་པོ་ཁམས་དང་སྐྱེ་མཆེད་ཀྱི་རྣམ་བཞག །རྣལ་འབྱོར་ལམ་གྱི་སྣང་བ་མཉམ་བཞག་དང་རྗེས་ཐོབ། འབྲས་བུ་སྐུ་དང་ཡེ་ཤེས་གསང་གསུམ་མི་ཟད་པ་རྒྱན་གྱི་འཁོར་ལོའི་ཆོས་ཐམས་ཅད་ངོ་བོ་སྟོང་པ་ཉིད་ཡིན་པས་རྟག་་མཐའ་དང་རྟག་འཛིན་གཏོར་ནི་རེད། ཨོ་ཡ། དེ་སྟོང་པ་ཉིད་ཡིན་པའི་གནད་ཀྱིས་སྣང་བ་འགག་མེད་ཤར་བས་ཆད་མཐའ་དང་ཆད་འཛིན་གཏོར་ནི་རེད། ཨ་ལེ། དེ་ཚོ་ས་ལྟ་བུ་གཅིག་ལ་སྦྱར་ན་ས་ཡི་རང་བཞིན་སྟོང་པ་ཉིད་ཟེར་དུས་ས་འདི་མེད་སོང་ནི་མ་རེད། ས་འདི་མེད་སོང་ན་སའི་སྟོང་ཉིད་ཟེར་རྒྱུ་ཟིག་འཇོག་རྒྱུ་ཡོད་ནི་མ་རེད། སའི་སྟོང་ཉིད་ཟེར་རྒྱུ་བོ་དེ་སྟོང་གསུམ་ཞིག་སོང་ཤུལ་འདྲ་འདྲའི་སྟོང་ལྷུབ་༼ཕྱག་གིས་ས་ལ་བརྡབ་ནས་མཆན་༽སེ་བུད་སོང་ནིའི་མེད་སྣང་སྟོང་སྣང་ཟིག་ལ་གོ་ཉན་ནི་མ་རེད་མི་ཆད་ལྟ་རེད། ཨ་ལེ་དཀར་པོ་དགེ་བ་སོ་ཆད་འགྲོ་ནི་ཤར་འཛམ་ཐང་མ་རེད་ན། ཨོ་ཡ་སེམས་ཅན་ཐམས་ཅད་ཀྱིས་ས་འདི་རིལ་པོ་གཅིག་བདེན་དུ་བཟུང་ཡོད་པས། དེའི་ངོ་བོའམ་རང་བཞིན་རྟག་བརྟན་བདེན་གྲུབ་དང་བྲལ་བ་རྒྱུ་རྐྱེན་གྱིས་བྱས་པ་ཅན་གྱི་རང་བཞིན་ཅན་ཡིན་པར་ཤེས་ན་དེའི་སའི་རང་བཞིན་ལ་རིལ་པོར་གཅིག་པུར་བདེན་པར་འཛིན་པའི་རྟག་འཛིན་དང་རྟག་མཐའ་གཏོར་ནི་རེད། ཅང་མི་ཤེས་ནི་ཚོས་ད་འཁོར་འདས་ལམ་གསུམ་གྱི་ཆོས་ཐམས་ཅད་རྒྱུ་རྐྱེན་ལས་སྐྱེས་པ། བྱས་པའི་རང་བཞིན་ཙམ་དུ་རྟོགས་ན་དེ་ཚོ་བདེན་མེད་ཀྱི་ཕྱོགས་སུ་ཉེ་ནི་རེད། དེ་ཚོ་འུ་ཅིག་ཕན་ནི་རེད། སའི་སྣང་ཆ་འདི་ཡོད་ན་ས་དང་སའི་སྟོང་ཉིད་གཉིས་ཀ་ཟུང་འཇུག་ཏུ་ཁ་ཉན་ནི་མ་རེད། སའི་སྟོང་ཉིད་ཤ་ཚ་མ་ཟིག་མིན་ནིའི་་རྟགས་ལ་སྟོང་པ་ཉིད་ཀྱིས་ས་རུ་སྣང་ཟེར་དུས་ཨ་ལེ་སའི་ཆོས་ཉིད་དམ་རང་བཞིན་སྟོང་ཉིད་དེས་ཆོས་ཅན་ས་རུ་སྣང་བའི་སྣང་ཆ་འགག་མེད་འདི་རྒྱལ་བའི་ཕྱག་གིས་བཀབ་ཀྱང་ཁོག་ནི་མ་རེད། དེ་འདྲའི་སྣང་སྟོང་ཟུང་འཇུག་ཟེར་རྒྱུ་དེ་མཛུ་བུ་གཤིབ་གཤིབ་བྱས་ཡོད་ནི་ཟིག་ལ་གོ་ཉན་ནི་མ་རེད། ཨ་ལེ་གང་སྣང་བའི་ངོ་བོ་འདི་སྟོང་ཉིད་དང་། སྟོང་པའི་རང་བཞིན་འདི་ལས་སྣང་བ་འགག་མེད་དུ་ཤར་བའི་སྣང་སྟོང་ཟུང་འཇུག་གི་ལམ་འདི་ཤེས་དགོས་ནི་རེད། ཨ་ལེ་ཁྱེད་ཆ་གེ་གཅིག་ཚང་གི་ཡ་ལོག་ནས་མ་ལོག་ལ་ཁ་གདངས་མིག་གཅེར་ནས་དྲིལ་བུ་ཚོའི་མགོ་རྒན་མོ་ཚོས་རྡོ་རིས་འཛིན་འཛིན་བྱས་ནས། ཟུང་འཇུག་ལམ་ལ་མ་བརྟེན་པར། །མཐར་ཕྱིན་འབྲས་བུ་ཐོབ་མི་འགྱུར། །ཟེར་དུས་བསམ་གྱི་ཟིག་ཡོད་ཨི་མི་དགོས། ཨོ་ཡ། སྣང་བའི་ཆོས་འདི་ཐམས་ཅད་འོག་གི་བདག་མེད་གཉིས་ཀྱི་སྐབས་སུ་བཤད་པ་ལྟར་སོ་སོར་ངོས་ཟིན་པར་བྱས་ནས་གང་སྣང་གང་མཐོང་ཐམས་ཅད་སྣང་སྟོང་ཟུང་འཇུག་ཏུ་མཉམ་བཞག་མ་ཟད་རྗེས་ཐོབ་ཏུ་བུན་བུན་ཤིག་ཤིག་ཏུ་འཆར་ཐུབ་པ་ཟིག་མ་འོང་གི་བར་དུ་ཉིན་ན་བསྒོམ། མཚན་ན་བསམ་དགོས་ནི་རེད། འདི་མདོ་སྔགས་ཐུན་མོང་གི་ལམ་ཡིན་པས་འདི་ཉན་པ་ལ་དབང་བསྐུར་མི་དགོས་སྐྱད་དེའི་རེད། སྒྱུ་མའི་དཔེ་བཅུ་ཡན་ཆད་ཕོ་སྐྱ་མོ་ཉོག་སུས་ཉན་ཀྱང་ཆོག་ནི་རེད། སྟོང་པ་ལས་སྣང་བ་འཆར་ཚུལ་འོག་གི་སྒྱུ་མའི་དཔེ་བརྒྱད་ཀྱི་ཚུལ་དུ་འཆར་བས། འདིར་སྦྱར་ནས་བཤད་ཆོག །དེ་ཡན་ཆད་ན་རྫོགས་ཆེན་གྱི་མིང་ཙམ་རེ་ལས་ཡོད་ནི་མ་རེད། དེ་མན་ཆད་ལུང་ཙམ་བཏོན་ཀྱང་ཆོག་གསུངས། ཁོང་རིག་གིས་དེ་འདྲ་བྱེད་གསུངས། འདི་ཡན་ཆད་བཤད་ལོས་ཆོག །ཁྱེད་ཆ་གེ་གཅིག་ཚང་གི་ཡ་ལོག་ནས་མར་འཁོར་དེ་ཐོས་གྲོལ་འདོན་དུས་ཤེས་བྱ་སྒྱུ་མའི་དཔེ་བཅུ་དེ་བཞིན་དུ།། འཁོར་འདས་ཆོས་རྣམས་ཁྱོད་ཀྱིས་ཤེས་པར་གྱིས། །ཟེར་དུས་རྒད་པོ་ལ་ཟེར་ནི་ཡིན་ད། རྒན་མོ་ལ་ཟེར་ནི་ཡིན། ཁྱེད་ཆ་གེ་བཏོན་ནི་རེད། ངས་བཤད་ནི་རེད། ཅི་ཁྱད། ཨ་ལེ་འཁོར་འདས་ལམ་གསུམ་གྱི་ཆོས་ཐམས་ཅད་སྣང་སྟོང་ཟུང་འཇུག་ཏུ་ཤེས་ནས་གཡས་སུ་ལོག་ནས་མི་བཞག །གཡོན་དུ་ལོག་ནས་མི་བཞག་པར་ཤ་ཕོ་ཆེན་གྱིས་གངས་གཤག་གཤག་བྱས་ནས་འགྲོ་ཚུལ་གྱི་གནད་ཡག་པོ་ཟིག་ཤེས་ན་སྣང་སྦྱང་གི་ཁོག་འདིས་བཟུང་ཡོད་པས་དེ་ཚོ་ཤེས་ནས་མན་ངག་གི་ཆིངས་ལྔ་གྲོགས་སུ་ཡོད་ན་ལམ་གནད་རེ་ཟིན་ནི་རེད། ཟ་གྱི་མེད་ནི་ཚོ་བུད་ཏ་སོང་ད་ཆོག་ནི་རེད། མགོས་ཐུ་ར་བཤད་ན་དེ་རེད། རྔ་མས་ཡར་ར་བཤད་ན་དེ་རེད། དེ་མིན་ནི་ཟིག་ཅིག་བཤད་ཀྱི་ཡོད་ནི་མ་རེད། སྣང་སྦྱང་གི་གནད་འདིའི་མཚམས་ནས། ཉི་ཟླ་གཟས་འཛིན་འཛིན། གདུག་པ་ཀླུས་འཛིན་འཛིན། གཅན་གཟན་གཏུམ་པོས་འཛིན་འཛིན་བྱས་ཏེ་གནད་རྣམས་ཟིན་དགོས་ནི་རེད། ཐེངས་རེ་མན་ངག་གི་ཆིངས་ལྔ་གསུངས། ཐེངས་རེ་དྲུག་གསུངས། གཅིག་ཁོང་གིས་མི་དྲན་གི་གསུངས། ལྔ་ནི་འཁོར་བ་ལ་ངེས་འབྱུང་། ༡ སེམས་ཅན་ལ་སྙིང་རྗེ། ༢ ཀུན་ལ་དག་སྣང་། ༣ མཆེད་གྲོགས་ལ་བརྩེ་གདུང་། ༤ བླ་མ་ལ་མོས་གུས་༥ དང་ལྔའོ། །འཁོར་བ་ལ་ངེས་འབྱུང་ཡོད་ན་སོ་ཐར་གྱི་མདོ་མི་འཆོར། ཐེངས་རེ་མདོ་འཛིན་གསུངས། ཐེངས་རེ་འཁོར་བ་ལ་ངེས་འབྱུང་གི་མདོ་མ་ཤོར་ན་སོ་ཐར་གྱི་གནད་རྫོགས་ནི་རེད་གསུངས། བརྩེ་བའི་སྙིང་རྗེ་ཡོད་ན་བྱང་སེམས་ཀྱི་མདོ་མི་འཆོར། ཀུན་ལ་དག་སྣང་ཡོད་ན་གསང་སྔགས་ཀྱི་མདོ་མི་འཆོར། མཆེད་གྲོགས་ལ་བརྩེ་གདུང་མེད་ན་དམ་ཚིག་ཉམས་པའི་གྲིབ་གྱིས་ཉམས་རྟོགས་རྒྱུད་ལ་སྐྱེ་ནི་མ་རེད། ས་ལམ་གྱི་བར་ཆད་དུ་འགྱུར། བླ་མ་ལ་མོས་གུས་མེད་ན་ཡོན་ཏན་སྣ་གཅིག་རྒྱུད་ལ་མི་སྐྱེ་བ་དང་། ཁྱད་པར་འོད་གསལ་རྫོགས་ཆེན་གྱི་ལམ་འདི་ཐོས་པས་མི་རྟོགས། བསྐྱེད་རིམ་ཀྱིས་མི་རྟོགས། བླ་མ་བྱིན་རླབས་ཅན་དང་འཕྲད་ཚེ། དེའི་དགོངས་རྒྱུད་ཀྱི་བྱིན་རླབས་སློབ་མའི་མོས་གུས་ཀྱིས་བསྐུལ་ནས་བདག་རྒྱུད་ལ་འཇུག་དགོས་པས་ཤིན་ཏུ་གལ་ཆེ་ནི་རེད། དེ་ལྟ་བུའི་མན་ངག་གི་ཆིངས་ལྔ་མེད་ན་སྣང་སྟོང་ཟུང་འཇུག་གི་ལྟ་བ་འདི་ཡང་སྤྲང་པོའི་སྤྲང་དབྱུག་འདྲ་འདྲ་ཟིག་ཡིན་ནི་རེད། རྒྱ་འཇམ་གྱིས་སྤྲང་དབྱུག་ཅི་འདྲ་རེད་ཞུས་དུས། ཨ་ལེ། ཁྱོས་སྤྲང་དབྱུག་མི་ཤེས་ནི་ཨེ་ཡིན། སྤྲང་དབྱུག་ལ་མགོ་མེད། རྔ་མ་མེད། ཡལ་ག་མེད། ལོ་མ་མེད། པགས་ཤུན་མེད་ནིའི་སྐྱ་ཤང་ཤང་ཞིག་ཡིན་ནི་བོ་ཨེ་མི་ཤེས་གསུངས། ༈ བདག་མེད་གཉིས་ཀྱི་སྐབས་སུ་ཨོ་ཡ་རྟ་མ་བརྒྱུག་གོང་གི་རྒྱན་ཟིག་འཇོག་དགོས། མདའ་མ་འཕང་གོང་གི་འབེན་ཟིག་འཇོག་དགོས། དེ་དཔེ་རེད། དོན་བོད་ཕྱི་རབས་པ་ཚོས་བདེན་འཛིན་ཉོན་སྒྲིབ་ཏུ་འདོད་པས་འཁོར་རྩ་ཆོས་ཀྱི་བདག་འཛིན་ལ་བྱེད་པ་དང་། གསང་སྔགས་སྔ་འགྱུར་བའི་ལུགས་ལ་འཁོར་རྩ་གང་ཟག་གི་བདག་འཛིན་དུ་འཇོག་པ་གཉིས་ལས་ཕྱི་མའི་དགོངས་པ་ལྟར། ཁམས་གསུམ་འཁོར་བའི་རྩ་བ་ནི་གང་ཟག་གི་བདག་འཛིན་ཡིན། གང་ཟག་གི་བདག་འཛིན་དེ་ལ་བརྟེན་ནས་ལས་དང་ཉོན་མོངས་པ་འབྱུང་། དེ་ལ་བརྟེན་ནས་འཁོར་བ་སྡུག་བསྔལ་གྱི་རང་བཞིན་འདི་གྲུབ་པ་རེད། རྒྱུ་མཚན་དེས་འཁོར་བའི་ཕྱི་ནང་སྣོད་བཅུད་ཀྱིས་བསྡུས་པའི་འབྲས་བུ་སྡུག་བསྔལ་གྱི་ཆ་འདི་ཐད་སོར་སྤང་རྒྱུ་ཆུད་ནི་མ་རེད། དེའི་རྩ་བ་ཀུན་འབྱུང་ལས་དང་ཉོན་མོངས་གཉིས་སྤང་དགོས་ནི་རེད། དེ་གཉིས་ཀྱི་ཕུག་གང་ཟག་གི་བདག་འཛིན་ལ་ཐུག་ཡོད་ནི་རེད། ཡང་ན་བདག་འཛིན་འདི་ལྡོག་ན་ལས་དང་ཉོན་མོངས་པ་གཉིས་ཀ་ལྡོག །འདི་གཉིས་ལྡོག་ན་ཁམས་གསུམ་འཁོར་བའི་སྡུག་བསྔལ་ཐམས་ཅད་ལྡོག་འགྲོ་བས། གང་ཟག་གི་བདག་འཛིན་འདི་ཆུ་བརྒྱའི་མགོའི་བོ་ཐོ་ནག་རིས་མ་གཅིག་པུ་དེ་ཡིན་ནི་རེད། ཨ་ལེ། ཁ་ནང་དུ་སྐོར་ནས་དེ་ངོས་གཅིག་ཟིན་དགོས་ནི་རེད། དེ་ངོས་མ་ཟིན་ན་མེད་སྣང་སྟོང་སྣང་ཟིག་གིས་ནི་སྤུ་ཙམ་ཕན་ནི་ཤར་འཛམ་ཐང་རེད་ན། ཨ་ལེ་བདག་འཛིན་ཟེར་རྒྱུ་བོ་དེའི་མིང་ལ་གཅིག་ལྟོས་དང་། བདག་འཛིན་དེ་འཛིན་མཁན་ཞིག་དང་འཛིན་མཁན་དེ་ལ་འཛིན་རྒྱུ་ཞིག་ཡོད་པས་ཟེར་ནི་ཨི་མི་ཡིན། བདག་འཛིན་དེ་འཛིན་རྒྱུའི་ཡུལ་དེ་ལ་གང་ཟག་གི་བདག་ཟེར་ནི་རེད། ངར་འཛིན་དེ་འཛིན་མཁན་ཞིག་དང་། འཛིན་མཁན་དེ་ལ་འཛིན་རྒྱུ་ཞིག་ཡོད་ནི་འི་ཨེ་མི་ཡིན། ངར་འཛིན་དེའི་འཛིན་རྒྱུའི་ཡུལ་དེ་ལ་ང་ཟེར་ནི་རེད། ཨོ་ཡ། དེས་ན་ང་དང་ངར་འཛིན་གྱི་ཁྱད་པར། བདག་དང་བདག་འཛིན་གྱི་ཁྱད་པར་ཕྱེས་ནས་བདག་འཛིན་གྱི་བདག་དེ་མེད་གི་མ་ཟེར་ཡོད་གི་རྫོས། ངར་འཛིན་གྱི་ཡུལ་གྱི་ང་དེ་མེད་གི་མ་ཟེར་ཡོད་གི་རྫོས། ཡོད་ནས་ངོས་འཛིན་ནི་རེད་མི་མེད་ན་ངོས་འཛིན་རྒྱུ་ཡོད་ནི་མ་རེད། ཁ་ནང་ལ་བསྐོར་ནས་བཙལ་ན་བདག་འཛིན་གྱི་བློ་ཕྱིན་ཅི་ལོག་དེས་ཕུང་པོ་ལ་བདག་ཏུ་བཟུང་ནི་རེད་ཕུང་པོ་དེ་བདག་ཡིན་ནི་མ་རེད། ཨོ་ཡ། ཤེས་ནི་ཚོས་ཕུང་པོ་ལྔ་ཟེར་ན་ཉན་ནི་རེད། མི་ཤེས་ནི་ཚོས་ལུས་ངག་ཡིད་གསུམ་ཟེར་ན་ཉན་གི། འཛིན་ཚུལ་ངར་འཛིན་ཕྱིན་ཅི་ལོག་གི་བློ་དེས་ཕུང་པོ་འདི་ལ་ང་འོ་༼ ཕྱག་གིས་སྐུ་ལ་བརྒྱབ་ནས་མཆན་༽ བདག་གོ་ཞེས་ཆ་ཕྱེ་རྒྱུ་མེད་པའི་རིལ་པོ་གཅིག་བདེན་བྱ་མོ་ནག་མོའི་སྒོ་ང་ལྟ་བུར་འཛིན་ནི་རེད། བདག་འཛིན་ཕྱིན་ཅི་ལོག་འདིས་དུ་མར་འཛིན་ཤེས་ནི་མ་རེད། གཅིག་ཏུ་འཛིན་ནི་རེད། མི་རྟག་པ་དང་མི་བདེན་པར་འཛིན་ཤེས་ནི་མ་རེད། རྟག་པ་དང་བདེན་གྲུབ་ཏུ་འཛིན་ནི་རེད། མདོར་ན་རང་གི་ཕུང་པོ་ལ་དམིགས་ནས། བདག་འཛིན་དང་ངར་འཛིན་གྱི་ཡུལ་གྱི་ང་དེ་དང་བདག་དེ་མདའ་སྔུན་གྱི་འབེན་དང་འདྲ་འདྲ་ཟིག་འཆར་བ་དེ་ལ་ཟེར་ནི་རེད། ཨ་ལེ་བདག་འཛིན་གྱི་ཡུལ་བདག་དེ་ངོས་ཟིན་ན་བདག་འཛིན་དང་ངར་འཛིན་དེ་ངོས་ཟིན་ནི་རེད། བདག་འཛིན་བྱེད་ཀྱི་རྟོག་པ་དེ་ལ་བདག་འཛིན་ཟེར་ནི་རེད། ང་འཛིན་བྱེད་ཀྱི་རྟོག་པ་དེ་ལ་ངར་འཛིན་ཟེར་ནི་རེད། ཨོ་ཡ། དེ་འདྲའི་བདག་དེ་ངོས་བཟུང་ནས་ཆད་རྟག་གཉིས་ཀའི་མཐའ་དང་བྲལ་བར་རྟོགས་ནས་དེའི་ངང་དུ་བཞག་ན་ཡུལ་ཅན་གང་ཟག་གི་བདག་འཛིན་རང་ཤུགས་ལ་ལྡོག་འགྲོ་བ་ལས་ལོགས་སུ་སྤང་དགོས་ནི་མ་རེད། མེ་ཟིག་གཏན་ནས་མེད་ན་དུ་བ་རང་ལོག་ལ་བུད་འགྲོ་ནི་རེད། སྔོན་པོ་ཟིག་གཏན་ནས་མེད་ན་སྔོ་འཛིན་མིག་ཤེས་ཟིག་གཏན་ནས་ཡོད་ནི་མ་རེད། དེ་དཔེ་རེད། དོན་གང་ཟག་གི་བདག་མེད་ཚུལ་ཤེས་ན་བདག་འཛིན་ལྡོག་ཚུལ་དེ་ལྟར་རོ། །རེ་འགའ་རང་གི་རྩག་པ་ཟུར་དུ་བཞག་ནས་འདི་སུས་རྩག་པ་རེད་དྲིས་ཚེ། ངའི་རྩག་པ་རེད་ཟེར་ནས་༼ཕྱག་ཟུར་དུ་བསྐྱངས་ནས་མཆན་༽ཕྱུགས་དང་ཕྱུགས་རྫི་ལྟར་བདག་བྱེད་པའི་ང་དེ་བདག་བྱེད་ཡུལ་ལས་ཟུར་དུ་ཡན་གར་དུ་ཡོད་པ་ལྟ་བུར་བཀར་ནས་འཆར་བ་དེ་ལ་ང་ཡི་བའམ་བདག་གི་བ་ཟེར་ནི་རེད། ཨ་ལེ་རང་གི་སེན་མོ་བཅད་ནས་མདུན་དུ་བཞག་ནས་འདི་ཅི་ཡིན་དྲིས་ཚེ་འདི་ངའི་སེན་མོ་རེད་ཟེར་ནི་རེད། དེ་བཞིན་དུ་སེན་མོ་དེ་རྡུལ་དུ་ཕབ་ནས་རྡུལ་རྣམས་ལྷན་དུ་སྤུང་ནས་བཞག་སྟེ། འདིའི་རྡུལ་འདི་ཅི་ཡིན་དྲིས་ཚེ་འདི་ངའི་སེན་མོའི་རྡུལ་རེད་ཟེར་ནས་ཁྱི་རྒན་གྱིས་གོད་རོ་བསྲུང་བསྲུང་བྱས་ཡོད་པ་འདི་ཚོ་ངོས་ཟིན་དགོས་ནི་རེད། དེ་བཞིན་དུ། མགོ་དང་ལག་པ་སོགས་སུ་ངའི་ཞེས་འཛིན་ནི་རེད། ང་ཡི་བ་དེ་ལ་རང་རྒྱུད་ཀྱིས་བསྡུས་པའི་ང་ཡི་བ་དང་། རང་རྒྱུད་ཀྱིས་མ་བསྡུས་པའི་ང་ཡི་བ་གཉིས་ཡོད་ནི་རེད། བདག་གམ་བདག་འཛིན་དང་ངར་འཛིན་དང་ང་ཡིར་འཛིན་པའི་ཡུལ་དེ་བདག་གམ་ང་དེ་རེད། རེས་འགའ་ཁྱོད་ཐུང་ང་རིང་ཞེས་ལུས་ལ་དམིགས་ནི་རེད། རེས་འགའ་ང་སྐད་སྙན་ཞེས་ངག་ལ་དམིགས། རེས་འགའ་ང་བློ་འཕྲུལ་ཆེ་ཟེར་ནས་སེམས་ལ་དམིགས་ནི་རེད། ཨ་ལེ་ཚོ། འཁོར་བ་ཐོག་མེད་ནས་གང་ཟག་གི་བདག་འཛིན་ལས་ལས་ཉོན་སྡུག་བསྔལ་སོགས་བྱུང་ཚུལ་དཔེར་ན་སྐས་ཀྱི་ཐེམ་པ་འདྲ་འདྲ། མཛོ་རྒན་གྱི་རྭ་ཚིགས་འདྲ་འདྲ་ཞིག་ཡིན་ནི་རེད། ཨོ་ཡ་བདག་འཛིན་ཕྱིན་ལོག་གིས་བཟུང་བ་ལྟར་གྱི་ཡུལ་བདག་གམ་ང་ཞིག་ཡོད་ནི་མ་རེད། དེའི་ཡུལ་ཕུང་པོ་རིལ་པོ་གཅིག་དུ་སྣང་ཡང་གཅིག་མ་རེད། མང་པོ་ཞིག་རེད། ལོས་ཡིན། རགས་པ་ཞིག་ཏུ་ཕྱེ་ནའང་ཕུང་པོ་ལྔ་ཡོད་ནི་རེད། དེའི་ནང་གི་རང་གི་གཟུགས་ཕུང་འདིའང་མགོ་རྐང་ལག་ལྔ། སྐྲ་ཉི་ཁྲི་ཆིག་སྟོང་། བ་སྤུ་བྱེ་བ་ས་ཡ། སོ་སུམ་ཅུ། སེན་མོ་ཉི་ཤུ། དོན་སྣོད་བཅུ་གཉིས། རུས་པའི་དུམ་བུ་སུམ་བརྒྱ་དང་དྲུག་ཅུ་ཡོད་ནི་རེད། འདི་གཅིག་ཅི་འ་ཡིན། དེ་ལྟར་བརྟགས་ཏེ་བཙལ་ན་བདག་འཛིན་གྱི་ཡུལ་གྱི་གང་ཟག་གི་བདག་དེ་བློ་ཕྱིན་ལོག་གི་ངོར་དེ་ལྟར་བཟུང་བ་ལས་མེད་པར་ཤེས་པས་བདག་འཛིན་གཏན་ལ་ཕབ་མི་དགོས་པར་ལྡོག་འགྲོ་བ་ནི་ཁྱེད་ཆ་གས་ཨི་མི་ཤེས། ཁྱེད་ཆ་གའི་ཡ་ཐོད་ན་མིག མགོ་ཟུར་ན་རྣ་བ། ཡ་ཆུང་ནང་ན་སེམས་ཡོད་ན་ལྟོས་ད་ཨེ་མི་རིག །ཁྱེད་ཆ་གའི་མིག་རྒྱལ་འགོང་གི་བཀབ་ཡོད་ནི་མ་རེད་ད། རྣ་བ་བདུད་གི་བཀབ་ཡོད་ནི་མ་རེད་ད། གསུངས། ཨ་ལེ་དེ་འདྲའི་བདག་དང་ང་ཟིག་ཡོད་ན་ཡོད་ཚུལ་ཇི་ལྟར་ཡིན་ཁ་ནང་དུ་ལོག་ནས་བརྟག་དགོས་ནི་རེད། རང་གི་ལུས་ལྟ་བུ་ཡང་ཆ་ཤས་སོ་སོར་ཕྱེས་ནས་གོང་ལྟར་བརྟགས་ན་རྒྱུ་རྐྱེན་དུ་མ་འདུས་པའི་བདག་ཉིད་ལས་སྐྱེས་པའི་རྟག་པ་གཅིག་བདེན་ཇི་ལྟར་ཡོད་ཞིབ་ཏུ་བརྟགས་ནས་ཉིན་བསྒོམ། མཚན་བསམ་བློ་བཏང་ནས་གཏན་ལ་ཕབ་ནས་ང་དང་བདག་དེ་སྣང་ཙམ་མ་གཏོགས་དེ་རིལ་པོ་གཅིག་བདེན་གྱི་ང་དང་ང་ཡི་བ་དང་། བདག་གི་བ་ཞིག་མེད་པར་སྟོང་ཆམ་གྱིས་སོང་བའི་སྟེང་དུ་ལྷོད་དེ་མཉམ་པར་བཞག་ནས་བསྒོམ། ཡང་གོང་བཞིན་གཏན་ལ་ཕབ་ཏེ་ཡང་ཡང་ཉིན་ན་བསྒོམ། མཚན་ན་བསམ་ནས་མཉམ་བཞག་མ་ཚད་རྗེས་ཐོབ་ཏུ་སྣང་སྟོང་ཟུང་འཇུག་ཏུ་བུན་བུན་ཤིག་ཤིག་འཆར་བ་ཟིག་མ་ཡོང་གི་བར་དུ་བསྒོམ་དགོས་ནི་རེད། ཨ་ལེ་ཚོ། འཁོར་བ་ཐོག་མེད་ནས་འཁྱམས་པའི་ང འམ་བདག་དེ་ངོས་བཟུང་ནས་གནད་དེ་སྲོག་རྩ་སྒ་མདའ་ཟིག་མ་བྱས་པར། ང་མེད་ཁྱོད་མེད་ཟིག་དེ། ཡ་ཁ་མ་ཁ་མ་ཟད་ཀྱི་བར་དུ་བཤད་ཀྱང་ང་བདག་གི་འཛིན་པའི་སྤུ་ཟིག་ཆོད་ནི་ཤར་འཛམ་ཐང་རེད་ན། མ་མཐའ་དེ་འདྲ་རེ་མ་ཤེས་ན། ཕུང་པོ་ལྔ་པོ་འདི་འདུས་བྱས་རྒྱུ་རྐྱེན་ལས་སྐྱེས་པ་དང་རྟག་བརྟན་མེད་ཚུལ་རེ་ཤེས་ན་བདག་མེད་གི་ཕྱོགས་ནི་ཉེ་ནི་རེད། གོང་གི་མཉམ་བཞག་ངེས་པའི་ཤེས་རབ་དེ་ལ་སྐབས་འདིའི་ལྟ་བ་ཟེར་ནི་རེད། འོག་གི་སྒྱུ་མའི་དཔེ་བཅུ་འདིར་ཡར་སྦྱར་ཏེ། སྟོང་པ་ལས་སྣང་ཕྱོགས་འཆར་ཚུལ་གོ་བ་ལེན་དགོས། ཆོས་ཀྱི་བདག་དང་བདག་འཛིན་ལ་ཡང་དཔྱད། ཁ་སྤོས་པས་ཆོག་གསུངས། སྣང་སྦྱང་གི་མགོ་རྔ་ཐམས་ཅད་གནད་དེས་བཟུང་ཡོད། གནད་དེ་རྣམས་གཅན་གཟན་གཏུམ་པོས་འཛིན་འཛིན། གདུག་པ་ཀླུས་འཛིན་འཛིན་བྱས་ནས་འཛིན་དགོས་ནི་རེད། ཁྲིད་གསུང་སྐབས་ཡི་གེ་གང་ཡོད་ཀྱི་སྟེང་ནས་གསུངས་ཀྱི་ཡིན་པས་ཉིན་གཅིག་ཁྲིད་སྐབས་སུ། གཅིག་གིས་ཟིན་བྲིས་ཅན་ཞིག་མདུན་དུ་བཞག་ནས་གསུངས་ཚེ། ཨ་ལེ་འདི་ཚོའི་ནང་ན། གཟུང་བ་ཆོས་ཀྱི་བདག །འཛིན་པ་གང་ཟག་གི་བདག་བརྫས་ཡོད་གི། ང་ནི་དཔེ་ཆ་མེད། ཡི་གེ་གང་ཡོད་གི་ཐོག་བཤད་གི་འདུག་ནི་ཡིན། ཨོ་ཡ། ད་ང་འབྲོང་ཡར་སོང་གི་རྗེས་ན་རྣི་ལི་ཁེར་འདུག་རེད། ད་སུ། གནད་ཅང་གོ་ནི་མེད་གི། ཚེས་བཅུ། བན་བཀྲ། ཧོར་བླ་ཕུན་ཚོགས་ཚོས་འདི་འདྲ་བྲིས་མེད་ཨི་གོ། ཕྱིན་ཆད་དཔེ་རེ་ཆུད་ན་ལྟོས། མཁྱེན་སྤྲུལ་གི་སྣང་སྦྱང་འདི་ཞུ་དག་གྱིས་ཞེས་བསྐུལ་ནས་གླིང་སྤྲུལ་ཁྱེད་གཉིས་ཁ་ཐུག་ནས་ཞུ་དག་བྱས་ཡོད། དེ་ཚོའི་ནང་ན་འདི་འདྲ་ཟེར་ཨེ་ཡོད་ལྟོས། འདི་ཁ་བྲལ་བཏང་ནི་འདྲ་འདྲ་ཟིག་ཨེ་རེད་ལྟོས། དེ་ཡིན་ན་གཟུང་བ་ཡིན་ཚད་ལ་ཆོས་ཀྱི་བདག་དང་། འཛིན་པ་ཡིན་ཚད་གང་ཟག་གི་བདག་ལས་མེད་ནི་འདྲ་འདྲ་ཟིག་ཁས་བླང་ཡོད་ནི་རེད། དེ་འཐད་ནི་མ་རེད། གནད་དེ་དག་འཆུག་རུང་ནི་མ་རེད། ༈ མན་ངག་གི་ཆིངས་ཆེན་པོ་ལྔ་དང་ལྡན་པའི་གང་ཟག་ཟིག་གིས་འདི་ཉམས་སུ་ལེན་དགོས་ནི་རེད། ཕྱི་ནང་གསང་བའི་ནམ་མཁའི་སྐབས་སུ་ནམ་མཁའ་མིག་གིས་མ་བོར་ཙམ་གྱིས་ཆོག་ཟེར་གྱི་དེ་ཕྱིའི་བེམ་སྒོག་འདི་མ་རེད། ཨ་ལེ་དམ་ཉམས་ཆ་ག །ཁྱེད་ཆ་གའི་ཡ་ཐོད་ཀའི་མིག་བུད། རྣ་བ་བདུད་གི་བཀབ་ནི་ཨེ་རེད། སྒོམ་པའི་ཚེ་ན་ཅི་ཡང་མི་བསྒོམ་སྟེ། ནམ་མཁའ་མིག་གིས་མ་བོར་ཙམ་གྱིས་ཆོག་ཅེས་པའི་སྐབས་སུ། སྒོམ་པའི་ཚེ་ནའམ་དམིགས་པའི་ཚེ་ན་ཞེས་སམ། ལྟ་བའི་ཚེ་ན་ཞེས་པའི་ཚིག་གི་ནུས་པས་ནམ་ཞིག་མི་བསྒོམ་པའི་དུས་ཞིག་ཡོད་པ་ཤུགས་ལ་བསྟན་ནི་རེད། དེ་གསང་བའི་ནམ་མཁའི་སྟེང་དུ་འཁྱེར་དགོས་ནི་རེད། དཔལ་ཡུལ་བ་ལ་སོགས་པས་ཤིང་མཆུ་རྡོ་ལི་ལྷ་སྐུ་ཡིག་འབྲུ་སོགས་ལ་དམིགས་རྟེན་བྱེད་པར་འདུག་ཀྱང་། དེ་ཚོ་རྒྱལ་བའི་བཀའ་ན་གསུངས་ཡོད་པས་མིན་ཟེར་རྒྱུ་ཡོད་ནི་མ་རེད། ཨ་ལེ། ངའི་དམིགས་རྟེན་འདི་གཞན་དང་མི་འདྲ། ནམ་མཁའ་འདི་རྒྱ་ཆེ་ཁྱོན་ཡངས་མཐའ་དབུས་སྟེང་འོག་ཕྱོགས་མཚམས་སོགས་མེད་པར་སྣོད་བཅུད་ཐམས་ཅད་ལ་ཁྱབ་ཡོད་པས་ན་གཞན་ཐོགས་བཅས་ཀྱི་དམིགས་རྟེན་ཟིག་དང་འདྲ་ནི་མ་རེད། རྡོ་ལི་ཤིང་མཆུ་སོགས་ལ་གཏད་ན། བར་གཅིག་ན་འགུལ་ཚོ་ཨི་མི་ཡོང་། ཨ་ལེ། རྐྱེན་གསུམ་དང་བྲལ་བའི་ནམ་མཁའ་ཟིག་དགོས་ནི་རེད། རྐྱེན་གསུམ་ནི་ཉིན་མོའི་ཉི་འོད་དམར་པོ། མཚན་མོའི་ཟླ་འོད་སྐྱ་བོ། ཉེར་དགུ་གནམ་སྟོང་སོགས་ལ་མཚན་མོ་མུན་པ་ནག་པོ་སྟེ་གསུམ་ལ་ཟེར་ནི་རེད། དེ་གསུམ་དང་བྲལ་བ་ཟིག་ཡོད་གསུངས་ཟིག ཡོད་ནི་ཨི་མི་ཡིན། དེ་འདྲའི་རྐྱེན་གསུམ་བྲལ་ཟིག་ཅང་རིག་རྒྱུ་ནི་མེད་གི མེད་ནི་ཨོའི་རེད། ཨོ་ཡ་དེ་འདྲའི་རྐྱེན་གསུམ་བྲལ་གྱི་ནམ་མཁའ་སྟེང་གི་སྔོན་པོ་དེ་ལ་གོ་ནི་མ་རེད། བར་སྣང་སྟོང་པ་གོ་སྐབས་ཕྱེ་བ། རྡུལ་དུ་གྲུབ་པའི་བེམ་པོས་སྟོང་པ། གསལ་ཞིང་རིག་པ་ཤེས་པས་སྟོང་པ། དེ་ལ་ངོས་འཛིན་ནི་རེད། ཨོ་ཡ། དེ་འདྲའི་རྐྱེན་གསུམ་བྲལ་གྱི་ཕྱིའི་ནམ་མཁའ་དེ་ལ་ནང་གི་སེམས་དེ་མདུང་ཚུགས་སུ་ལུས་ངག་ཡིད་གསུམ་འཇུག་པ་གཅིག་དྲིལ་གྱི་ཆེད་དུ་གཏད་ནས་བསྒོམ་དགོས་གསུངས། ཅི་ཙམ་ལ་གཏད་དགོས་པའི་ཚད་ནི་རང་གི་ཁམས་ཀྱིས་ཤེས་དགོས། ནམ་མཁའི་ཁམས་ཅན་ལ་ཡང་ཡང་གཏད་ཀྱང་ཞིག་སོང་ནས་གཏད་རྒྱུ་མེད་པ་རྒྱ་གར་དུ་ཨིནྡྲ་བྷོ་དྷི་དང་། བོད་དུ་ཡང་དེ་དང་ཕྱོགས་འདྲའི་ནམ་མཁའི་ཁམས་ཅན་ཡོད་ཀྱང་དཀོན་གསུངས། རླུང་ཁམས་པས་གཏད་ཆེ་ན་སྨྱོ་འོང་བ་དང་། ཆུ་ཁམས་གསལ་ཉམས་དང་། མེ་ཁམས་ལ་འཕེལ་འགྲིབ་འགྱུར་ལྡོག་མ་ངེས་པ་འབྱུང་བ་དང་། ས་ཁམས་པ་སྲ་འཐས་ལྟར་བརྟན་པ་ཡིན་པ། ཁམས་ཀྱི་དབང་གིས་རང་གི་ཉམས་མྱོང་ལ་དཔག་པ་མ་གཏོགས་མཐའ་གཅིག་ཏུ་འདི་ཙམ་ལ་ཕྱིའི་ནམ་མཁའ་ལ་དམིགས་རྟེན་བཟུང་དགོས་ཟེར་ཐག་མི་ཆོད། དེ་ལྟར་བློ་མིག་སེམས་གསུམ་འཇུག་པ་གཅིག་དྲིལ་བྱས་ནས། ཕྱིའི་ནམ་མཁའ་ལ་མདུང་ཚུགས་སུ་གཏད་ནས་རིམ་བཞིན་འཛིན་སྟ ངས་ཀྱི་རྩོལ་བ་ཇེ་ལྷོད་དུ་རིམ་གྱིས་བཏང་ནས་ཕྱི་ཡི་ནམ་མཁའ་ལ་བརྟེན་ནས་ནང་གི་ནམ་མཁའ་སེམས་ཉིད་སྟོང་གསལ་མཐའ་དབུས་སྤྲོས་པ་དང་བྲལ་བ་མངོན་དུ་གྱུར་པ་ན་ནང་གི་ནམ་མཁའ་ཟེར་ནི་རེད། དེའི་ཚེ་ཕྱི་ནང་གི་ནམ་མཁའ་མངོན་དུ་གྱུར། ཕྱིའི་ནམ་མཁའ་དབྱིངས་སུ་དག །ནང་གི་ནམ་འཛིན་གྱི་བློ་བོར་ནས། འདས་པ་སྔོན་བསུ། མ་འོངས་རྗེས་གཅོད། ད་ལྟའི་ཕྱི་ནང་གི་མཚན་འཛིན་ཇི་སྙེད་ཤར་བ་དེ་དག་བྱ་མ་རྗེས་སུ་བུ་ཁྲིད་པ་ལྟ་བུ་དང་། གཉེན་པོས་འབུར་འཇོམས། དྲན་པས་རྗེས་སླེབས། ཐོད་སྐྱེས་རྦད་ཆོད་ཀྱིས་སྐྱོན་གསུམ་དང་བྲལ་བར་དུས་གསུམ་ཡིད་ཀྱི་རྟོག་ཚོགས་གང་དུ་ཇི་སྙེད་ཤར་བ་དེ་དག་ཐམས་ཅད་ཤར་གྲོལ་འགག་མེད་དུ་སོང་ནས་བག་ཆགས་བསོག་ལོང་མེད་པར་སྦྲུལ་གྱི་མདུད་པ་ཞིག་པ་ལྟར་གྲོལ་ནས་ཉམས་ཞེན་གྱི་ཤུན་པ་ལ་ཁའི་ན་བུན་བཞིན་དུ་ཡལ། དུས་གསུམ་ཡིད་ཀྱི་མཚན་རྟོག་བསེ་ལུང་ལྕགས་ཀྱི་རྒྱ་མདུད་བཞིན་ཏུ་འཐོར་ནས་ཤར་གྲོལ་དུ་སོང་བ་ལ་གྲོལ་བ་ཟེར་ནི་རེད། ཤར་གྲོལ་མཚན་ཉིད་པ་གསང་བའི་ནམ་མཁའི་སྐབས་སུ་འོང་རྒྱུ་ཡིན་ཀྱང་འདི་ནས་ཤར་གྲོལ་གྱི་མགོ་ཚུགས་ཤིང་ཁྲེགས་ཆོད་ཀྱི་ཚོགས་ལམ་ཆུང་ངུ་ཙམ་རེ་ཨི་མི་ཡིན། ཁྲེགས་ཆོད་ཀྱི་ལམ་ནི་ཤར་གྲོལ་གྱི་སྟེང་ནས་འཇོག །ཐོད་རྒལ་གྱི་ལམ་ནི་སྣང་བ་བཞིའི་སྟེང་ནས་འཇོག་དགོས་པས་ལམ་སྣེ་རེ་ཟིན་ནི་རེད། ནང་གི་ནམ་མཁའི་སྟེང་དུ་བཞག་ཀྱང་ཕྱིའི་ནམ་མཁའ་ལ་གཏད་ཡོད་པའི་རྟགས་སུ་དུས་གསུམ་གྱི་རྟོག་ཚོགས་འགྱུ་བར་བྱེད་ཀྱི་ཡོད་ནི་མ་རེད། དེ་མེད་ན་གྲོལ་ཆ་མེད་པའི་གནས་ཆ་ཙམ་ལས་ཡོད་ནི་མ་རེད། ཕྱིའི་ནམ་མཁའི་སྐབས་སུ་རྩེ་གཅིག་གི་དྲན་པ་སྤང་ལ་བེ་ཕུར་བཏབ་པ་ལྟ་བུ་རེད། ནང་གི་ནམ་མཁའི་དུས་མཉམ་བཞག་གི་ངང་བརྗེད་ན་དེའི་སྟེང་དུ་འཇོག་བྱེད་ལ་གཉུག་མའི་དྲན་པ་ཟེར་ནི་རེད། དེས་དྲན་ཙམ་ནས་དྲན་མཁན་རང་ཡལ་དུ་འགྲོ་དགོས་ནི་རེད། དེ་རང་ཡལ་དུ་དྭངས་ནུས་ན་དྲན་པ་ཡང་ཡང་འདྲེན་ན་བཟང་ནི་རེད། དཔེར་ན་མེ་དཔུང་ཆེན་པོའི་ནང་དུ་རྩྭ་སྦུར་འཕང་ནི་འདྲ་འདྲ་ཟིག་ཡིན་ནི་རེད། ཨ་ལེ་ཁ་ནང་དུ་བསྐོར་ནས་དྲན་པ་བཤིགས་ཏེ་རང་དྭངས་ལ་འགྲོ་མ་ནུས་ན་དྲན་པའི་ལྕགས་མཁར་དུ་ཚུད་འགྲོ་ནི་རེད། དེ་ཚུད་སོང་ན་སྒོམ་ཆེན་བརྒྱ། གྲུབ་པ་སྟོང་གིས་ཀྱང་བཤིག་རྒྱུ་ཆུད་ནི་མ་རེད། ཨ་སྐྱབས་བདེ་ལེགས་འདྲ་འདྲ་ཟིག་ཡིན་གྱི་བོ་རེད། ནམ་འཛིན་གྱི་བློ་མ་བོར་ན་གནས་ཆ་ཡོད་ཀྱང་གྲོལ་ཆ་ཡོད་ནི་མ་རེད། གྲོལ་ཆ་མེད་སྐྱད་གྲོལ་རྒྱུ་ཤར་ཆ་མེད་ནི་རེད། དུས་གསུམ་གྱི་ཤར་ཆ་འཆར་བཅུག་དགོས། མ་ཤར་ན་གྲོལ་རྒྱུ་མེད་པས་ཤར་གྲོལ་གྱི་ལྷག་མཐོང་མི་འོང་ནི་རེད། དེ་ལྟར་ཤར་གྲོལ་དུ་སོང་བའི་ཆ་ནས་ལྷག་མཐོང་དང་། སེམས་གནས་པའི་ཆ་ནས་ཞི་གནས་སུ་བཞག་རྒྱུ་འདི་ངའི་ལུགས་ཡིན། ཞི་གནས་སྔོན་དུ་བསྒྲུབས་ནས་ལྷག་མཐོང་གཟོད་བསྒོམ་དང་། ལྷག་མཐོང་སྔོན་ལ་བསྒོམས་ནས་ཞི་གནས་རྗེས་སུ་བསྒྲུབ་རྒྱུ་དེ་ཚོ་ཨ་ལེ་ངའི་ལུགས་མ་རེད་གསུངས། དེ་ལྟར་ན་ཤར་གྲོལ་གྱི་མགོ་ཚུགས་པའི་ལམ་རྒྱུད་ལྡན་གྱི་གང་ཟག་དེས་ལོང་བས་གླང་རྔ་འཛིན་འཛིན་བྱས་ནས་གསང་བའི་ནམ་མཁར་གཏུག་དགོས། ནང་གི་ནམ་མཁའི་སྟེང་དུ་ས་མ་ཟིན། གྲོལ་ཆ་མ་ཐོབ་ན་དབང་ཤེས་རྟོག་མེད་ཁ་ཕྱིར་ལྟ་རེད། མིག་གི་དབང་པོ། དབང་པོ་གཞན་ལས་རྒྱུ་ཤིན་ཏུ་དྭངས་ནི་རེད། མིག་ཤེས་དབང་ཤེས་གཞན་ལས་ཁྱབ་རྒྱ་ཆེ་ནི་རེད། དེ་ལ་ཕྱིའི་བར་སྣང་སྐྱ་སེང་ངེ་བ་འདི་ཤར་ནས་དེ་གཉིས་འདྲེས་སོང་ནི་འདྲ་འདྲ་ཧང་དུང་ངེ་དེ་ནི་ནམ་མཁའི་རྣམ་པ་མིག་ལམ་དུ་ཤར་བ་ལ་ལམ་བྱེད་ནི་རེད། འདི་ལ་གོལ་ན་ཆོས་ཉིད་ཀྱི་གཤིས་ལུགས་ལ་རྒྱབ་གཏད་ནི་རེད། གཅིན་གཏང་ན་ལྷྭམ་ཡུའི་ནང་དུ་ཤོར་ནི་རེད། ཨ་ལེ་འདི་གོལ་ས་ཟིག་ཡིན་ནི་ཤར་འཛམ་ཐང་མ་རེད་ན། སྒེའུ་ལི་དཔལ་ལྡན་གྱིས་འདི་བསྒོམས་ན་གང་དུ་སྐྱེ་ལགས་ཞུས་ཚེ། ཆིངས་ལྔ་དང་བྲལ་བའི་གོལ་ས་འདིས། མཐོ་ན་ནམ་མཁའ་མཐའ་ཡས་སྐྱེ་མཆེད་པ་དང་། འབྲིང་ན་ལྷ་ཚེ་རིང་པོར་འཕེན་སྤྱད་རེ་ཡིན་ཐང་། ཆོས་ཐམས་ཅད་ནམ་མཁའ་ལྟར་མཐའ་ཡས་སོ་སྙམ་དུ་སྒོམ་པ་དང་ཕྱོགས་འདྲ་ནི་རེད། ཨ་ལེ་ཡང་ན་དྲན་པ་བྱ་རོག་གི་སོ་བ་འདྲ་བ་དེས་དྭངས་ཆ་སྒྲིབ་པའི་བྱིང་བ་དང་། གསལ་ཆ་སྒྲིབ་པའི་རྨུག་པ་གཉིས་འདྲེས་ནས་བསྒོམས་པས་བྱི་བ་སོགས་དུད་འགྲོ་ལ་སྐྱེ་ནི་རེད། ཨ་ལེ་དེས་ནི་ནང་གི་ནམ་མཁའི་སྟེང་དུ་ཕྱོགས་ཙམ་ཉེ་ནི་མ་རེད། འདིས་ངར་འཛིན་དང་ཉོན་ཡིད་གཉིས་ཁོག་ཡོད་ནི་མ་རེད། ཚོགས་དྲུག་གི་རྟོག་པ་ཨི་ཟིག་ཁོག་ལོས་ཡོད། ནང་གི་ནམ་མཁའི་སྟེང་དུ་བཞག་ཀྱང་ཕྱིའི་ནམ་མཁར་གཏད་ནས་གོལ་ཡོད་པ་ཡིན་མིན་བརྟགས་ན། ཕྱི་རུ་ཁ་ཆར་བུ་ཡུག་འཚུབ་དུས་སོགས་ལ་སྒོ་སྐར་ཁུང་རྣམས་འདན། ཞྭ་གྱོན་མིག་བཙུམ་ནས་བསྒོམ་ན་སྒོམ་མི་ཐུབ་པར་བཀྱིག་བཞག་ཡོད་ནི་འདྲ་འདྲ་ཞིག་དང་གཉིད་དུབ་འགྲོ་བ་ཡིན་ནི་རེད། ཡང་རེ་འགའ་རི་ཆེན་པོའི་རྩེ་ནས་ནམ་མཁའ་དྭངས་པའི་དཀྱིལ་དུ་བལྟས་ནས་བསྒོམ་ན་ཤིན་ཏུ་དྭངས་པའང་ཡོང་རྒྱུ་དེ་གོལ་ས་ཡིན་པའི་རྟགས་རེད། དེ་དུས་ཁ་ནང་དུ་སྐོར་མིག་བཙུམ་ནས་འོད་གསལ་ནང་ནས་ཨི་འཆར་བལྟ་དགོས། ནུབ་མོ་ཉལ་དུས། སྒོ་སྐར་རྣམས་འདན་མལ་སར་ཉལ་ཏེ་སྐྲག་ཡོང་སྐྱད་མགོ་བཏུམ། མིག་བཙུམ་ནས་གཉིད་དུས་འོད་གསལ་འཆར་འོང་རྒྱུ་དེ་ཕྱི་ན་མེད་ནིའི་རྟགས་རེད། ནང་གི་ནམ་མཁའ་ལ་མཉམ་པར་བཞག་དུས་རྟོག་བཅས་ཡིད་ཀྱི་ཤེས་པ་གཙོ་བོ་དང་ཉོན་ཡིད་གཉིས་མི་འཆར་ཤར་ནའང་དྭངས་འགྲོ་ནི་རེད། དེ་ལོས་འགྲོ། རྒད་པོ་ཞིག་གིས་མལ་གསོས་ནའང་འགག་གི་ནི། ཀུན་གཞི་དང་ཀུན་གཞིའི་རྣམ་ཤེས་གཉིས་ཀ་སད་སྟོན་དགོས། གཏོར་སྟོན་དགོས། སྒོ་ལྔའི་ཤེས་པ་ལྔ་དུས་གཅིག་ལ་འགག་མེད་དུ་ཤར། ཤར་ཀྱང་ཡུལ་ཐོག་ཏུ་མི་ཤར་བར་སྒོ་ལྔ་ཆ་མཉམ་ལྷུ་མི་འཐོར་བ་ཞིག་དགོས། ལྷུ་འཐོར་ནས་ཡུལ་ཐོག་ཏུ་འབྲ ང་དུས་ཡང་ན་མིག་ཤེས་གཟུགས་ལ་གཏད་དུས་གཟུགས་མཐོང་ཡོང་། ཡང་རྣ་ཤེས་སོགས་འགག་མེད་དུ་ཡོད་པའི་རྟགས་སུ་སྒྲ་སོགས་ཡུལ་ལྔ་འགག་མེད་དུ་ཤར་ནི་རེད། སྒོ་ལྔའི་རྣམ་ཤེས་དྭངས་སང་འདི་རྟོག་མེད་ཡིན་པས་ལས་བསགས་ནི་མ་རེད། དེ་བཀག་དགོས་ནི་མ་རེད། མིག་གི་རྣམ་པར་ཤེས་པའི་རང་བཞིན་དེ་གསལ་རིག་ཞིག་རེད། ཡུལ་མི་གསལ་བ་གསལ་བས་གསལ་བ། ཡུལ་རྣམ་པར་ཤེས་པས་ནི་རྣམ་ཤེས། ཡུལ་རྣམ་པར་རྟོག་པས་རྣམ་རྟོག་ཟེར་ནི་རེད། གསལ་རིག་ཟེར་རྒྱུ་དེ་གསལ་མོ་མཆོད་མེ་བལྟམས་ནི་འདྲ་འདྲ་ཞིག་ཡིན་ནི་མ་རེད། སྤྱིར་ཤེས་པ་འདི་དག་འོད་གསལ་གྱི་ཆ་ལས་ཤར་བ་སེང་གེ་དཀར་མོའི་བུ་འདྲ་འདྲ་ཟིག་ཡིན་ནི་རེད། མིག་གི་རྣམ་པར་ཤེས་པ་ལྟ་བུ་རེ་ལའང་། ཤེས་ཆ་ཟིག་སྟོང་ཆ་ཟིག །ཟུང་འཇུག་གི་ཆ་གསུམ་རེ་ཕྱེ་རྒྱུ་ཡོད། མིག་ཤེས་དེ་མཁྱེན་པའི་ཡེ་ཤེས་ལ་ཤར་བའི་རྟགས་སུ་ཤེས་ཆ་ཟིག་ཡོད་ནི་རེད། ཡེ་ཤེས་དེ་དབྱིངས་ལས་ཤར་བའི་རྟགས་སུ་སྟོང་ཆ་ཟིག་ཡོད་ནི་རེད། འཆར་གཞི་དབྱིངས་ཡེ་ཟུང་འཇུག་དུ་ཡོད་པའི་རྟགས་སུ་མིག་གི་ཤེས་པའང་སྣང་སྟོང་ཟུང་འཇུག་ཏུ་ཤར་ནི་རེད། མིག་གི་རྣམ་ཤེས་ཤར་ནས་སྣང་ན་མི་སྟོང་ནི་ཟིག་དང་། སྟོང་ན་མི་སྣང་ནི་ཟིག་ཡོད་ནི་མ་རེད། གསལ་རིག་གི་ཆ་དེ་ཡབ་རེད། དབྱིངས་ཀྱི་ཆ་དེ་ཡུམ་རེད། སྣང་སྟོང་གཉིས་ཀྱི་ཟླས་ཕྱེ་ན་གསལ་བའི་ཆ་ཐབས། སྟོང་པའི་ཆ་ཤེས་རབ་རེད། འདི་དགག་འདུག་ཅི་དགོས། སྒོ་ལྔའི་རྣམ་ཤེས་འདི་འཆར་ཀ་བཞག་ན་གྲོལ་དགོས་ནི་མ་རེད། འོ་ན། ཡིད་ཤེས་དང་ཉོན་ཡིད་གཉིས་ཀའང་འཆར་ཁ་བཞག་ན་སེང་གེའི་བུ་དང་འདྲ་ནས་གྲོལ་ཨེ་དགོས་ཟེར་ན། དེ་གཉིས་རྐྱེན་ལོག་པ་དང་འཕྲད་དུས་འཁོར་བར་འཕེན་པའི་ལས་བསགས་ནི་འི་གྲོལ་དགོས་ནི་རེད། ལ་ལས་ཁོའི་དུས་གསུམ་གྱི་རྟོག་པ་མེད་ཤུལ་ན་ཤེས་པ་དྭངས་གསལ་ཞིག་ཡོད་གི་དེ་རིག་པ་རེད་ཤར་འཛམ་ཐང་མི་ཟེར་གི་ན། ཨ་ཁ། ཐང་ང་རྒྱག་གྱི་བོ། དེའི་ཤུལ་ན་རྣམ་རྟོག་གཅིག་གི་མི་ཚད་ལྔ་ཡོད་ནི་རེད། ཀུན་གཞིའི་རྣམ་ཤེས་ཀྱི་སྟེང་ང་ཐོན་ན་དྲུག་ཡོད་ནི་རེད། སྒོ་ལྔའི་རྣམ་ཤེས་དེ་ནམ་འགག་ན། ཤི་དུས། གཉིད་དུས། བརྒྱལ་དུས་སོགས་སེམས་མེད་པའི་གནས་སྐབས་ལྔ་ལ་འགགས་ནི་རེད། དེ་མ་གཏོགས་པའི། ཆོས་ཉིད་ཟད་པའི་དུས་སུའང་འགག་མེད་དུ་ཤར་ཡོད་ནི་རེད། ཨ་ལེ་ཆོས་ཉིད་ཟད་པའི་དུས་ན་སྒོ་ལྔའི་ཤེས་པ་མེད་ནི་ཟིག་ཨོའི་ཡོད་གསུངས། དེ་ལྟར་ནང་གི་ནམ་མཁར་སེམས་ཉིད་སྟོང་གསལ་སྤྲོས་པ་དང་བྲལ་བའི་ཉམས་དེ་ཤར་འོང་དུས་དེར་ཡང་འདྲེས་ཤིང་གོམས་ན་ཀློང་དུ་གྱུར་ཚེ་དྭངས་བའི་མཚོ་ལ་གཟའ་སྐར་ཤར་བ་བཞིན་དུ་ཡུལ་ལྔ་པོ་དུས་གཅིག་ལ་ཚུར་དབང་ཤེས་ཀྱི་ངོར་ཤར་ཡོང་ནི་རེད། མེ་ལོང་ནང་གི་གཟུགས་བརྙན་དང་། རྒྱ་མཚོའི་གཟའ་སྐར་རྣམས་ཚུར་མེ་ལོང་དང་རྒྱ་མཚོའི་ནང་དུ་ཤར་ནི་རེད། ཕར་མེ་ལོང་རྒྱ་མཚོ། གཟུགས་བརྙན་གཟའ་སྐར་གྱི་ངོས་ལ་ཤར་ནི་མ་རེད། དེ་ལྟར་ཡུལ་ལྔ་དུས་ཅིག་ཆར་དུ་ཚུར་ལ་འཆར་་འོང་བ་ནི་འཆར་གཞིའི་འོད་གསལ་དང་། ཐག་ཉེ་བའི་གནད་ཀྱིས་ཤར་འཛམ་ཐང་མ་རེད་ན། ཨ་ལེ་དེ་དང་བར་ན་རྣམ་ཤེས་ཚོགས་བདུན་ལས་བརྒལ་ཚར་བས་ཀུན་གཞི་ལས་ཡོད་ནི་མ་རེད། སྒོ་ལྔ་ཆ་མཉམ་ལྷུ་མ་འཐོར་ན་ཉོན་ཡིད་དང་། ཡིད་ཤེས་རྒྱ་མཚོ་ཆེན་པོ་གཉིས་མགོ་འབུར་བ་ལྟ་བུ་རེ་ཤར་ཡང་རང་ཞིར་བུད་འགྲོ་ནི་རེད། དེ་དུས་དྭངས་སེང་ངེ་བའི་ཤེས་པ་དེ་སྒོ་ལྔ་རེད། ཡིད་དང་ཉོན་ཡིད་ཀྱིས་གོས་ནི་མ་རེད། སངས་རྒྱས་ཐུགས་རྗེ་ཅན་གྱིས་རྟོག་པ་མི་མངའ་བའི་ཚུལ་གྱིས་དུས་གསུམ་ཆགས་ཐོགས་མེད་པར་མཁྱེན་ཚུལ་ཡང་འདི་ཡར་ལ་བཟང་སོང་ནི་རེད། འདི་ཕར་ཕར་སྒོམ་ན་འདིའི་སྟེང་ནས་བསྒོམ་པ་རྒྱ་མཚོ་ཅོག་བཞག་ཀྱང་བཞག་འོང་ཆོག་ནི་རེད། སྒོ་ལྔ་ཆ་མཉམ་ལྷུ་མ་འཐོར་བར་བཞག་ན་གནད་ཐམས་ཅད་དེ་ལ་ཚང་ཡོད། འཇོག་ཚུལ་འདི་གྲུབ་ཆེན་ཤ་བ་རི་པ་དང་ས་ར་ཧ་པ་སོགས་ཀྱིས། སེམས་མེད་བུ་ཆུང་ལྟ་བུར་བཞག ། ཅེས་བུ་ཆུང་ལྕོགས་༼གཅག་༽ ར་ནང་ན་ཡོད་པ་ལ་ཉོན་ཡིད་འཆར་ནི་མ་རེད། སྒོ་ལྔ་འགག་མེད་དུ་དུས་གཅིག་ལ་ཤར་བ་དེ་དཔེ་བྱས་ནི་རེད། རྫོགས་ཆེན་བཀའ་གཏེར་གཉིས་ཀྱི་ལུགས་ལ། ལས་དང་པོ་པས་གནད་དེ་ངོས་ཟིན་རྒྱུ་གལ་ཆེ་གསུངས། སྒོ་ལྔ་འགག་མེད་དུ་ཤར་ལུགས་ཐོས་གྲོལ་དབང་བཤད་དུ་ཡོད། ཁྱེད་ཆ་གས་ལོས་ཤེས། ཨ་ལེ། མིག་གི་རྣམ་པར་ཤེས་པ་གཟུགས་འགག་མེད་དུ་སོགས་གསུངས་པ་ལྟར་རེད། དེའི་སྟེང་ནས་མན་ངག་གི་ཆིངས་ལྔ་དང་ལྡན་པས་ཉམས་སུ་བླངས་ན་ལམ་ཡང་དག་པ་རེད། ད་དུང་གཞིའི་དྲི་མ་ཙམ་བྲོ་ནི་ཤར་འཛམ་ཐང་རེད་ན། དེ་ལྟ་བུའི་ནང་གི་ནམ་མཁའི་ངང་དུ་མཉམ་པར་བཞག་ནས། རབ་གི་སྔ་དྲོ་ཕྱི་འཕྲེད། མིན་ན་ད། ཇ་བར་ཤག་ཤག་ཞིག་ལ་བཞག་ན་ཁ་ཉན་དུས་གཟོད་ཤན་འབྱེད་རྣམས་ཕུད་ནས་ངོ་སྤྲད་དགོས་ནི་རེད། དེ་མ་ཐུག་གི་བར་དུ་ཁབ་མིག་ཞིག་གི་ནང་དུ་གཡག་ཟིག་མ་ཚད་ལུག་ཟིག་བཤའ་ས་ཡོད་ནི་མ་རེད། དེའི་སྟེང་ང་ཤན་ཕྱེ་རྒྱུ་ལག་ནི་མ་རེད། གསང་བའི་ནམ་མཁའ་ནི་གཞི་སྐུ་གསུམ་འདུ་འབྲལ་མེད་པར་བཞུགས་པ་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་འཆར་གཞི་རེད། རྒྱུའི་སྟེང་ན་མེད་པའི་འབྲས་བུ་ཞིག་ཡོད་ནི་མ་རེད། ཨ་ལེ། གཞི་ནམ་མཁའ་དེ་བདག་འཛིན་གཉིས་ཀྱིས་བསྒྲིབས་སོང་ནི་རེད། དེའི་སྟེང་ན་བྱིང་རྨུག་འཐིབ་གསུམ་སོགས་ཀྱང་། གཉིག་སྐྲང་སྟེང་ན་ཁུ་ཚུར་རེད། རང་གི་སྙིང་ཁ་ན་བཞུགས་པའི་གཞི། སྐུ་གསུམ་འདུ་འབྲལ་མེད་པའི་འོད་གསལ་དེ་བླ་མའི་མན་ངག་གི་ཤན་འབྱེད་ལ་བརྟེན་ནས་སད་དགོས་ནི་རེད། དེ་སད་ན་ཕྱི་ནང་གསང་བའི་ནམ་མཁའ་གསུམ་མངོན་དུ་གྱུར། ཕྱི་ནང་གི་ནམ་མཁའ་གཉིས་དབྱིངས་སུ་དག །ནམ་འཛིན་གྱི་བློ་དང་བྲལ་ནི་རེད། ཡིད་དང་ཤེས་རབ་ཀྱི་ཤན་འབྱེད་ལ། ཡིད་ནི་གཙོ་སེམས་ཡིད་ཀྱི་ཤེས་པ་འཁོར་བའི་སེམས་བྱུང་ཤེས་རབ་དེ་ལ་ཟེར་ནི་རེད། འཕགས་པའི་མཉམ་བཞག་ལ་ཐུག་གི་བར་དུ་ཤེས་རབ་འདི་ལ་བརྟེན་ནས་བསྒོམ་ནི་རེད། དེ་དབྱེ་ན་ཐོས་བསམ་སྒོམ་གསུམ་གྱི་ཤེས་རབ་གསུམ་ཡོད། སྒོམ་པའི་ཤེས་རབ་མཚན་ཉིད་པ་མེད། དོན་སྤྱིའི་སྒོ་ནས་སྒོམ་ཚུལ་ཡོད། དེ་འདྲའི་ཤེས་རབ་དེ་ལ་དགག་རྟོག་སྒྲུབ་རྟོག་གཉིས་ཡོད། མངོན་རྗེས་གཉིས་ལས་རྗེས་དཔག་ཡིན། དགག་རྟོག་མེད་དགག་འཛིན་པའི་རྟོག་པ་དང་། སྒྲུབ་རྟོག་མ་ཡིན་དགག་འཛིན་པའི་རྟོག་པ་ལ་ཟེར། འཕགས་པའི་མཉམ་བཞག་གི་དུས་སུ། གཙུབ་ཤིང་གཙུབ་སྟན་གྱི་དཔེ་ལྟར་ཤེས་རབ་འདི་དགག་ནི་རེད། བློ་དང་རིག་པ་བཟང་ངན་ཤེས་རབ་འདི་མཆོག་དམན་ཡོད་པས་ཟེར། འདི་ལ་ཡིད་ཟེར་བའི་དོན། ཡིད་ཤེས་དེའི་འཁོར་གྱི་ཤེས་རབ་དེའི་རྣམ་ལྡན་དུ་ཡིད་ཤེས་དེ་སྐྱེ་ནུས་པའི་ཕྱིར་ཡིད་ཟེར་ནི་རེད། ཆོས་ཉིད་མངོན་སུམ་རྟོགས་པའི་ཤེས་རབ་ནི་འོད་གསལ་ཡེ་ཤེས་ཀྱི་རང་རྩལ་ལས་ཤར་ནི་རེད། མདོ་ལྟར་ན་འཕགས་པའི་མཉམ་བཞག་ཡེ་ཤེས་ཀྱི་རྩལ་ལས་དང་། སྔགས་ལྟར་ན་དོན་གྱི་འོད་གསལ་ལས་ཤར་བའི་ཤེས་རབ་རེད། འཕགས་པའི་མཉམ་བཞག་ལས་ལྡང་བའི་རྗེས་ཐོབ་ཡེ་ཤེས་སྔར་གྱི་ཤེས་རབ་རྗེས་དཔག་གི་ཕྱོགས་སུ་བསྡུ་གསུངས། ཤེས་རྒྱུད་འདི་དུམ་བུ་གཉིས་སུ་ཕྱེ་ན་ཁ་ཡེས་མ་རེད། སེམས་ལ་རྟོག་བཅས་ཡིད་ཀྱི་རྣམ་ཤེས། རྟོག་མེད་སྒོ་ལྔའི་རྣམ་ཤེས། ཤིན་དུ་རྟོགས་མེད་ཀུན་གཞིའི་རྣམ་ཤེས། ཚོགས་བརྒྱད་སེམས་བྱུང་དང་བཅས་པ་ཡོད། སེམས་བྱུང་ཚོ་ཞིབ་པར་མ་ཤེས་རུང་ཚོགས་བརྒྱད་ཀྱི་རྟོག་པ་ཤར་དུས་འདི་རེད་བསམ་ནས་ངོས་འཛིན་རྒྱུ་ཆུད་དགོས། དེ་ཆུད་ན་སེམས་ཁ་ཡེས་ཤེས་ནི་རེད། སྒོ་ལྔའི་རྣམ་ཤེས་ནི་གཟུགས་མཐོང་མཁན། སྒྲ་ཚོར་མཁན། དྲི་སྣོམ་མཁན། རོ་མྱོང་མཁན། ལུས་ཀྱི་རེག་བྱ་འཁྱག་མི་འཁྱག་མྱོང་མཁན་ཙམ་ཞིག་རེད། དེ་ཕན་ཡུལ་རྟོག་དཔྱོད་མི་ཤེས་ནི་རེད། ཐ་ན་ཐོས་གྲོལ་གྱིས་ཤེས། གཟུགས་མཛེས་མི་མཛེས་སོགས་རྟོག་མཁན་ཡིད་ཤེས་དང་ཆགས་སོགས་ཀྱི་ངོ་བོར་སྐྱེ་མཁན་ཉོན་ཡིད་གཉིས་རེད། དབང་ཤེས་དང་ཀུན་གཞིའི་རྣམ་ཤེས་གཉིས་རྟོག་མེད་རེད། ཨ་ལེ། ངར་འཛིན་ཉོན་ཡིད་འདིས་དམིགས་པ་ཀུན་གཞི་ལ་དམིགས་ནས་རྣམ་པ་ངར་འཛིན་དུས་ཞིག་ཀྱང་ཡོད་ནི་རེད། གཞུང་གཞན་དུ་ཉོན་ཡིད་ཁ་ནང་ལྟ། དམིགས་པ་ཀུན་གཞི་ལ་དམིགས་ནས། རྣམ་པ་ངར་འཛིན། འཁོར་ཀུན་འགྲོ་དགུ་དང་མཚུངས་པར་ལྡན་ཞེས་མི་ཕམ་ཚང་གིས་གསུངས། ཀུན་གཞི་མ་གཏོགས་པའི་ཚོགས་བདུན་པོ་ནང་གི་སྐབས་ནས་ངོས་ཟིན་ཡོད་དགོས། ཀུན་གཞི་གསང་བའི་ནམ་མཁའ་ངོ་སྤྲད་དུས་ངོས་བཟུང་ནི་རེད་གསུངས། ཀུན་གཞི་དེ་ཅི་འདྲ་རེད་དྲིས་ཚེ། ཨོ་ཡ་ཀུན་གཞི་ཟེར་རྒྱུ་བོ་ནི་ངོ་བོ་རྣམ་པར་མི་རྟོག་པ། དཔྱོད་པ་མེད་པ། དམིགས་པ་སྣོད་བཅུད་རྒྱ་ཆེན་པོ་ལ་དམིགས་པ། རྣམ་པ་ཡུལ་གྱི་སྤུ་རིས་མི་འབྱེད་པ་ཕྱི་ན་གཏད་ཀྱི་མེད། ནང་ན་བསྒོམ་གྱི་མེད། བར་ན་བཞག་མེད། མར་ལ་དུབ་མེད། ཡར་ལ་འཕྲུལ་གི་མེད། བློས་བསླད་མ་ཞུགས་ནི་འདྲ་འདྲའི་རྟོག་མེད་སྟོང་སེང་གི་རྣམ་པ་ཅན་ཞིག་ཡིན་ནི་རེད། ཀུན་གཞིའི་རྣམ་ཤེས་དྭངས་ལ་གཡོ་བ་མེད་པའི་རྣམ་པ་ཅན་ཞིག་ཡིན་ནི་རེད། དེ་ཁྱེད་ཆ་གས་དྲི་འི་འདུག་མི་དགོས་དང་། སྒོམ་ཆེན་ཡ་ད་ཟིག་མིན་ན་དེའི་སྟེང་དུ་ཐོན་རྒྱུ་མ་རེད། དེའི་རག་འ་བདག་དང་བདག་འཛིན་ཚོ་ངོས་ཨེ་ཟིན་ལྟོས་ད། དེའི་གལ་ཆེ་ནི་རེད། ཀུན་གཞི་བཞི་ཡོད་པའི་ནང་གི་ཡེ་དོན་གྱི་ཀུན་གཞི་ཟེར་རྒྱུ་དེ་ཁམས་བདེ་གཤེགས་སྙིང་པོ་རེད། ཀུན་གཞི་ཆོས་སྐུ་ང་དང་མཉམ། །ཞེས་དེ་ལ་གསུངས་ནི་རེད། དེ་སྒྲིབ་བྱེད་ཀྱི་བག་ཆགས་སྣ་ཚོགས་པའི་ཀུན་གཞི་ནི། ངོ་བོ་རྟོག་མེད་རྣམ་པ་གསལ་རིག་ཅན་ཁམས་གསུམ་འཁོར་བའི་འཁྲུལ་གཞི་རེད། ཀུན་གཞི་བཞི་པོ་མ་ཤེས་ནའང་། དེ་གཉིས་ཀ་ཤེས་དགོས། ཀུན་མཁྱེན་ཀློང་ཆེན་པའི་མཁའ་འགྲོ་ཡང་ཏིག་ཏུ་ཀུན་གཞི་ངོས་འཛིན་ཚུལ། ཐང་ཆེན་པོ་ཞིག་ཏུ་བརྒྱུག་བརྒྱུག་ནས་ང ལ་ཆད་དུས་མལ་གསོས་ན་དཀའ་བའི་ཤུགས་ཀྱིས་རྟོག་པ་རྣམས་རེ་ཞིག་འགག་པའི་ཤུལ་ཏུ་སྟོང་ཧང་ངེ་ཟིག་ཡོད་རྒྱུ་དེ་ཀུན་གཞི་རེད། དེའི་སྟེང་ནས་ཅུང་ཟད་གསལ་ཆ་ཐོན་པ་ཀུན་གཞིའི་རྣམ་ཤེས་རེད། དེ་རྩོལ་བའི་སྟོབས་ཀྱིས་མངོན་དུ་གྱུར་ཚུལ་རེད། འདི་གཉིས་ངོ་བོ་གཅིག་ཡིན་པས་ལམ་གོམ་སྟོབས་ཀྱིས་ཀུན་གཞིའི་སྟེང་དུ་སླེབ་པ་རྣམས། རང་རང་གི་ཁམས་ཀྱི་དབང་གིས། སྟོང་ཆ་དང་གསལ་ཆ་གཉིས་གང་གི་ཕྱོགས་མངོན་དུ་གྱུར་གོ་ནི་མ་རེད། བླ་མ་མི་ཕམ་ཚང་གིས། ཤེས་མཁན་ཟིག་འ་ཡིན་ནི། ཅི་ཤེས་འདི་ཤེས་ཡང་མེད་ནི། གོ་མཁན་ཟིག་འ་ཡིན་ནི། ཅི་གོ་འདི་གོ་མེད་ནི་ཟིག །བླ་མ་ལ་ལས་བཏང་སྙོམས་ལུང་མ་བསྟན་དུ་ངོས་འཛིན། ལ་ལས་མ་རིག་པར་ངོས་འཛིན། དོན་ཀུན་གཞི་རེད། འདི་སྒོམ་གྱི་དངོས་གཞི་མཚན་ཉིད་པ་མིན་ཀྱང་། ལས་དང་པོ་པས་དང་པོ་འདི་ལ་མ་བརྟེན་པར་འགྲོ་ཚུལ་མེད་གསུངས། དེ་བླ་མའི་གསུང་མིན། སེམས་རྣམ་ཤེས་ཚོགས་བརྒྱད་ངོས་ཟིན་དུས། དེའི་ཤུལ་ན་འཆར་གཞི་ཞིག་ལྷག་ཡོད་ན། དེ་མདོ་ལྟར་ན་བདེ་གཤེགས་སྙིང་པོ། སྔགས་ལྟར་ན་འོད་གསལ་གསང་བའི་ནམ་མཁའ་རེད། དྭངས་སང་ངེ་ཟེར་རྒྱུ་དེ་དུབ་མེད་ནིའི་མིང་རེད། གསལ་སང་ངེ་ཟེར་རྒྱུ་དེ་རྨུག་པས་མ་བསྒྲིབས་པའི་མིང་རེད། དེ་འོད་གསལ་མ་རེད། ཐན་མགོ་དགུ་ཞིག་མིན་པ་དེ་ལ་ཚང་ནི་རེད། དེ་མིན་ནིའི་འོད་གསལ་ཞིག་ངོས་ཟིན་དགོས་ནི་རེད། གཞི་ནམ་མཁའ་ཡིན་ཟེར་དུས་དེ་ལ་གཏད་ནི་རེད། སེམས་ཡེ་གནས་ཀྱི་ཤེས་པ་དེ་རེད། འདི་ནི་དུར་ཁྲོད་ཀྱི་འདྲེ་ངན་ཟས་སུ་ཤ་ཟ་བ། སྐོམ་དུ་ཁྲག་འཐུང་བ། ལས་སུ་སྲོག་གཅོད་པ་རྣམས་ཀྱི་རྒྱུད་ནའང་ཡོད་ནི་རེད་དང་ངོས་ཟིན་ནི་མ་རེད། སེམས་དང་རིག་པའི་ཤན་ཕྱེ་དུས་ཁ་ནང་དུ་བསྐོར་ནས་རང་གི་ཤེས་རྒྱུད་ལ་རང་གིས་བལྟས་ན་ཁ་ཕྱི་ལ་བསྐོར་ནས་དོམ་ཡིག་འདྲ་འདྲ་ཟིག་འ་བལྟས་ནིའི་ཉན་ནི་མ་རེད། ཤའི་ཆེ་ས། ཀོའི་འཐུག་ས་ནང་ན་ཡོད་ནི་རེད། ཧ་རང་གོ། ངོ་རང་ཤེས། ངང་མངོན་གྱུར་ཟེར་རྒྱུ་དེའང་གསང་བའི་ནམ་མཁའི་སྟེང་དུ་འཁྱེར་ཤེས་དགོས། ༈ རྒྱ་ཚོགས་འཇམ་དཔལ་གྱིས། ནམ་མཁའ་འདི་གཞི་ཨི་ཡིན་ལགས་ཞུས་ཚེ། ཨ་ལེ་དམ་ཉམས་ཆ་ག ཁྱེད་ཆ་གི་མིག་རུབ་ནི་མིན་ན། ཤེས་མེད་བེམ་སྟོང་ནམ་མཁའ་ལྟ་བུ་ནི་མ་ཡིན་ནོ་ཞེས་དང་མཐར་སངས་རྒྱས་པ་ན་སྐུ་དང་ཡེ་ཤེས་ཀྱི་རོལ་བ་འབྱམས་ཀླས་གསུངས་ཡོད་ནི་བོ་མ་རིག་ནི་ཨི་ཡིན། ཕྱིའི་ནམ་མཁའ་གཞི་ཡིན་ན་ནམ་མཁའ་གསུམ་བཤད་པ། དགོས་པ་ལ་ཡོད་ནི་མ་རེད་གསུངས། སློབ་དཔོན་སྦ་སྒོམ་པས། ནམ་མཁའ་འདི་ཁོང་དུ་ཆུད་པར་གྱིས་ཤིག །དེ་རྟོགས་ན་སྒོམ་མེད་ཀྱི་གཟེར་ཆེན་ཐེམ་པ་ཡིན་གསུངས་རྒྱུ་དེ་ཕྱིའི་ནམ་མཁའ་ལ་བརྟེན་ནས་ནང་གི་ནམ་མཁའ་ཁོང་དུ་ཆུད། ནང་གི་ནམ་མཁའ་ལ་བརྟེན་ནས་གསང་བའི་ནམ་མཁའ་ཁོང་དུ་ཆུད་དགོས་ནི་རེད། ཕྱིའི་ནམ་མཁའ་དཔེར་བཞག་ནི་རེད། ཕྱིའི་ནམ་མཁའ་སྣོད་བཅུད་ཐམས་ཅད་ལ་ཁྱབ་པ་བཞིན་དུ་ཆོས་ཀྱི་དབྱིངས་ཀྱིས་འཁོར་འདས་ལམ་གསུམ་ལ་ཁྱབ་ཡོད་ནི་རེད། ནམ་མཁའ་འདི་ལ་མཐའ་དབུས་ཕྱོགས་ལྷུང་མེད་པ་བཞིན་དུ་ཆོས་ཀྱི་དབྱིངས་ལ་མཐའ་དབུས་ཕྱོགས་ལྷུང་མེད་ནི་འི་ཕྱི་རོལ་དཔེའི་ནམ་མཁའ་གསུངས་ནི་རེད། ནམ་མཁའ་བསྒོམ་དུས་ནད་གདོན་སྡིག་སྒྲིབ་གང་ཡིན་ཀྱང་རྨི་ལམ་དབྱིངས་སུ་སད་པ་ལྟར་སྟོང་ཉིད་ཆོས་ཀྱི་དབྱིངས་སུ་དག་པར་བསམ་ན་ནད་པ་སོགས་ལ་ཅིག་ཕན་ནི་རེད། ༈ ཡང་ཐོག་མེད་ཀྱི་དུས་ནས་འཁྲུལ་བ་འདིས་སྡུག་བསྐོའི་བསྐོའི་འི་ཕྱི་ནང་སྣོད་བཅུད་ཕུང་ཁམས་སྐྱེ་མཆེད་ཐམས་ཅད་ཀྱི་འཁྲུལ་སྣང་ཐམས་ཅད་རྨི་ལམ་དབྱིངས་སུ་སད་པ་དང་སྒྱུ་མའི་འཁྲུལ་འཁོར་དབྱིངས་སུ་ཞིག་པ་ལྟར་སོང་བར་བསམས་ནས་ནང་གི་ནམ་མཁའི་སྟེང་དུ་བཞག་ན་ཅིག་ཕན་གྱི་རེད། སྟོང་སྦྱང་ཟེར་རྒྱུ་དེ་རེད་གསུངས། ནམ་མཁའ་སྒོམ་དུས་དུས་གསུམ་གྱི་རྟོག་ཚོགས་རྣམས་བླ་མའི་མན་ངག་གི་བཞག་སྟོབས་ཀྱིས་རྣམ་རྟོག་ཐམས་ཅད་ཤར་གྲོལ་དུ་འགྲོ། གསང་བའི་ནམ་མཁའི་སྐབས་སུ་རྣམ་རྟོག་ཐམས་ཅད་བཞག་ཐབས་ལ་མ་ལྟོས་པར་གང་ཤར་ཐམས་ཅད་རྒྱ་གྲོལ་དུ་འགྲོ། སྤྱིར་ན་མདོ་སྔགས་གཉིས་ཀའི་བསྒྲུབ་བྱ་ཆོས་གཟུགས་ཀྱི་སྐུ་ཡིན་པ་མཚུངས་ཀྱང་། མདོ་ཕར་ཕྱིན་ཐེག་པས་བསྐལ་བ་གྲངས་མེད་གསུམ་ལ་སྦྱིན་སོགས་ཕར་ཕྱིན་སྔ་མ་ལྔས་བསོད་ནམས་ཀྱི་ཚོགས་དང་། གཟུགས་སྐུ་བསྒྲུབ་གཞི་བྱ། ཕྱི་མས་ཡེ་ཤེས་ཀྱི་ཚོགས་དང་ཆོས་སྐུ་བསྒྲུབ་གཞི་བྱས་ཏེ་ཚོགས་གཉིས་བསགས་པའི་སྒོ་ནས་སྐུ་གཉིས་བསྒྲུབ་ནི་རེད། སྔགས་བླ་མེད་ཀྱི་སྐབས་སུ་ཆོས་གཟུགས་ཀྱི་བསྒྲུབ་གཞིར་བསྐྱེད་རྫོགས་གཉིས་སྒོམ་པ་དང་། རྫོགས་རིམ་རྐྱང་པའི་སྐབས་སུ་སྒྱུ་ལུས་གཟུགས་སྐུའི་སྒྲུབ་གཞི་དང་། དོན་གྱི་འོད་གསལ་ཆོས་སྐུའི་སྒྲུབ་གཞིར་འཇོག་ནི་རེད། འོད་གསལ་རྫོགས་ཆེན་གྱི་སྐབས་སུའང་ཆོས་གཟུགས་གཉིས་ཀྱི་སྒྲུབ་གཞི་དེ་རང་རྒྱུད་ལ་བཙལ་དགོས། ལུས་ངག་ཡིད་གསུམ་ནི་ཤུལ་དུ་བསྐྱུར་རྒྱུ་རེད། དེ་ནི་མི་འཇོག གང་འཇོག་ན། ཀ་དག་ཁྲེགས་ཆོད་ཀྱི་ལྟ་བ་དེ་སངས་རྒྱས་ཀྱི་ཐུགས་ཆོས་སྐུ་དངོས་ལམ་དུ་བྱེད་པ་དང་། ལྷུན་གྲུབ་ཐོད་རྒལ་གྱི་སྣང་བ་སངས་རྒྱས་གཟུགས་སྐུ་དངོས་ལམ་དུ་བྱེད་པར་གོ་དགོས། ཁྲེགས་ཆོད་རྐྱང་བ་ཡིན་ན་གཟུགས་སྐུ་གཉིས་ཀྱི་འཆར་གཞི་ལམ་དུ་བྱེད་ཟེར་རྒྱུ་མ་གཏོགས་དངོས་ལམ་དུ་བྱེད་ཨོའི་ཟེར་གསུངས། ཤ་རུས་པས་མི་རྟེན་ན་ཚེ་གཅིག་གིས་རྡོ་རྗེ་འཆང་གི་གོ་འཕང་ཐོབ་འོང་སྤྱད་པོ་སྐུ་གཉིས་དངོས་ལམ་དུ་བྱེད་ནི་གི་རེད་གསུངས། རང་གིས་སངས་རྒྱས་ཐོབ་པ་ལ་རང་རྒྱུད་ཀྱི་རིག་པ་སྐུ་གསུམ་འདུ་འབྲལ་མེད་པ་འདི་མ་གཏོགས་འདི་ལས་གཞན་པའི་སངས་རྒྱས་ཞིག་རྙེད་རྒྱུ་ཡོད་ནི་མ་རེད། ཕྱོགས་བཅུའི་སངས་རྒྱས་ཀྱི་ཞིང་ཁམས་བརྒྱར་སོང་ན་སངས་རྒྱས་ཞིག་ཉོ་རྒྱུ་ནི་མི་རྙེད། བཙོང་རྒྱུ་ནི་མེད། སྦྱིན་རྒྱུ་ནི་མེད། བཙལ་རྒྱུ་ནི་མེད། རྒྱལ་བ་རིགས་ལྔའི་ཐུགས་ཀར་བསྟིམ་ནའང་རྒྱུད་ཐ་དད་རེད། རྒྱལ་བའི་སྲས་སུ་གྱུར་ཟེར་བས་ཤེས་ནི་རེད། དེ་དང་རྒྱུད་གཅིག་ཏུ་སོང་ནི་མ་རེད། དེ་ལ་དགོངས་ནས་སངས་རྒྱས་གཞན་དུ་མི་རྙེད་གསུངས་ནི་རེད་མ་གཏོགས་སྤྱིར་སངས་རྒྱས་ཟིག་མེད་ཟེར་ནི་མ་རེད། ཕྱོགས་བཅུའི་སངས་རྒྱས་ས་ཆེན་པོའི་རྡུལ་གྱིས་བགྲངས་ཀྱང་མི་ཟད་ཀྱི་ཟིག་ཡོད་ནི་རེད། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། གསུངས་རྒྱུ་དེ་རེད། ཨ་ལེ། དམ་ཉམས་ཆ་ག དེ་མེད་ཟེར་ན་ཁ་ནང་ནས་མེ་འབར། སྣ་ནང་ནས་དུ་བ་འཕྱུར་འོང་རྒྱུ་འཛམ་ཐང་མ་རེད་ན། རང་གིས་སངས་རྒྱས་ཞིག་བསྒྲུབ་དགོས་ན་ནི་སངས་རྒྱས་ཀྱི་རྒྱུ་ཞིག་ས་ན་མེད། གནམ་ན་མེད། སེམས་ཅན་རང་རང་གི་རྒྱུད་ན་ཡོད་ནི་རེད། སངས་རྒྱས་ཀྱི་རྒྱུ་དེ་འདྲ་དེ། ངོ་མ་ཤེས་པ་མ་གཏོགས་དུར་ཁྲོད་ཀྱི་འདྲེ་མོ་ནག་ལི་མ་ཡན་ཆད་ཀྱི་རྒྱུད་ནའང་ཡོད་ནི་རེད། སེམས་ཅན་གཞན་ན་མེད་གསུངས་པའང་རྣམ་ཤེས་ཚོགས་བརྒྱད་ལས་གཞན་པའི་སེམས་ཅན་ཞིག་བཙལ་མི་དགོས་ནི་རེད། སྤྱིར་སེམས་ཅན་ཞིག་གཞན་ན་མེད་ཟེར་ན། ཁྱོད་གཅིག་པུ་ལས་གཞན་མེད་ནི་ཨི་རེད། ཨེ་མ། སངས་རྒྱས་ང་ལ་སེམས་ཅན་ང་། ཞེས་པའང་དེ་ལ་གཏད་ནི་རེད། སངས་རྒྱས་མེད་ལ་སེམས་ཅན་མེད། ཅེས་པའང་། དེ་དང་། ཡར་ལ་རེ་བའི་སངས་རྒྱས་གཅོད། །མར་ལ་དོགས་པའི་འཁོར་བ་གཅོད། །ཅེས་དང་། ཐོད་རྒལ་གྱི་སྐབས་ཀྱི་གདེངས་བཞི་ཡང་འདིའི་སྟེང་ནས་གོ་དགོས་གསུངས། གཞིའི་སངས་རྒྱས་ང་ལ་ངོ་མ་ཤེས་པར། ཁམས་གསུམ་འཁོར་བར་འཁྱམས་དུས་སེམས་ཅན་ང་། ཞེས་སོ། །གཅིག་སངས་རྒྱས་དུས་ཀུན་སངས་རྒྱས་ཞེས་པ་ལ། འཁོར་འདས་གཉིས་ཀའི་གཞི་གཅིག་ནི་གི། གཅིག་སངས་རྒྱས་ན་ཀུན་སངས་རྒྱས་ཟེར་ནི་མ་རེད། རྟ་ཤུལ་བན་ཆེན་ཁྱོད་དེ་རིང་སངས་རྒྱས་སོང་ན་གཟིགས་པ་མཐར་ཐུག་ཐོབ་ནི་རེད། གནས་ཚུལ་མཐར་ཐུག་གཟིགས་ནི་གི་དེའི་ངོར་ཆོས་ཐམས་ཅད་མངོན་པར་རྫོགས་པར་སངས་རྒྱས་ནི་རེད། ཞིང་ཁམས་འདིའི་ཆུའི་རྡུལ་ཕྲ་རབ་གཅིག་གི་ཁོང་ན་སངས་རྒྱས་ཀྱི་ཞིང་ཁམས་བྱེ་བ་བརྒྱ་སྟོང་གྲངས་མེད་པ་གཟིགས་ནི་རེད། དེ་ལ་སྟོན་འཁོར་གྱི་རྣམ་པ་སྨོས་ཅི་དགོས། དེ་ལྟར་ཆུའི་རྡུལ་བྱེ་བ་ཕྲག་བརྒྱ་སྟོང་གི་བར་དང་། ཆོས་ཐམས་ཅད་དེ་ལྟར་དུ་གཟིགས་ནི་རེད། གནས་སྙིང་ཁ་ཆོས་ཀྱི་འཁོར་ལོ་ན་སངས་རྒྱས་ནི་རེད། འོག་མིན་ཆོས་ཀྱི་དབྱིངས་ཀྱི་ཕོ་བྲང་དེ་ལ་ཕྱོགས་དང་དུས་ཀྱིས་གཞལ་རྒྱུ་ཡོད་ནི་མ་རེད། ཨོ་ཡ། དེ་བན་ཆེན་གཅིག་གི་རང་སྣང་ལ་སངས་རྒྱས་ནི་རེད་མ་གཏོགས། བན་ཆེན་སངས་རྒྱས་ནི་གི། ལྷ་རྩེ་བའི་བན་ཆུང་པདྨ་རྡོ་རྗེ་ལ་ཕན་གནོད་ཡོད་ནི་མ་རེད། ལྷ་རྩེ་བའི་བན་ཆུང་པདྨ་རྡོ་རྗེ་སངས་རྒྱས་སོང་ན་དེས་རྟ་ཤུལ་བན་ཆེན་ལ་ཕན་གནོད་ཡོད་ནི་མ་རེད། ཨ་ལེ། དེ་ཚོ་ཤེས་ན་ཀུན་ལ་དག་སྣང་ཟེར་རྒྱུ་དེ་ཡོང་ནི་རེད། དེ་ཙམ་མ་ཤེས་ན། ཐ་ན་གཟུགས་སྣང་ཐམས་ཅད་སྐུ་རྡོ་རྗེ་ཕུང་པོའི་གྲོང་ཁྱེར། སྒྲ་གྲགས་པ་སྔགས་ཀྱི་རང་བཞིན། དྲན་རྟོག་ཐམས་ཅད་ཐུགས་ཡེ་ཤེས་ཆེན་པོའི་རང་བཞིན་དུ་ཤེས་དགོས་ནི་རེད། དེ་ཤེས་ན། ཨ་ལེ་ཐོག་ཡོག་ནི་བསྒྱུར་འཇོག་ནི་ཤར་འཛམ་ཐང་མ་རེད་ན་འོ། དེ་མིན་ནེ་ཡུལ་ཕྱོགས་རེས་འགའ་བ་ཞིག་གི་བླ་སེར་གྲགས་པ་ཅན་ཞིག་ལ་དུས་རེས་འགའ་བ་ཞིག་ལ་དག་སྣང་བྱེད་རྒྱུ་དེ་ཚོ་བཟང་ལོས་བཟང་ད། སྡུག་ཐུག་ས་ཟད་གི་གྲོ་མ་བྲག་ལ་བསྐོ་ནི་ཨོས་རེད། ཆུ་གཅིག་པུ་ལའང་འགྲོ་བ་དྲུག་གི་སྣང་ཚུལ་དྲུག་ཡོད་ནི་རེད། དམྱལ་བས་ཁྲོ་ཆུ་ཁོལ་མར་སྣང་། ཆུ་བུར་མེ་སྟག །རླངས་པ་མེ་ལྕེ་རུ་སྣང་། ཡི་དྭགས་ལ་རྣག་ཁྲག་སོགས་སུ་སྣང་ནི་རེད། ལས་དག་པ་ཞིག་གིས་གཟིགས་ན་མ་མ་ཀིར་སྣང་ནི་རེད། འགྲོ་བ་རྣམས་ཀྱི་སྐད་གདངས་སྔགས་སུ་གནས་པའི་རྟགས་ལ། ལུག་གིས་འབའ་ཟེར། ཡར་ངན་ཟིག་ཤི་ན་ཨུ་ཨུ་ཟེར་ནས་འཁུན་པ་འདེབས་ནི་རེད། ཡང་ན་ཨི་ཨི་ཟེར་ནི་རེད། འབྱུང་བཞིའི་སྒྲ་ཡང་སྔགས་ཀྱི་རྣམ་པར་གནས་པ་ཡིན། རུ་ཤན་སྐབས་འབྱུང་བཞིའི་སྒྲ་དོན་བསླབ་པའང་གནད་དེའི་རེད། དང་པོ་འཇིག་རྟེན་པའི་གཏམ། ཐ་མ་ལས་དག་དུས་ཆོས་ཀྱི་སྒྲ། ༈ གཉུག་མའི་སེམས་སེམས་ཉིད། སེམས་ཡེ་གནས་ཀྱི་ཤེས་པ་རྣམས་དོན་གཅིག་མིང་གི་རྣམ་གྲངས་རེད། གཉུག་མ་ཟེར་རྒྱུ་དེ་ཡེ་གདོད་མ་ནས་གནས་པའི་དོན་རེད། ཞིང་སྐུ་ཕོ་བྲང་གསུམ་པོ་ཡེ་ཤེས་རང་སྣང་ལས་གྲུབ་པའི་ཆ་ནས་རང་གཟུགས་རང་གིས་མཐོང་། རང་སྒྲ་རང་གིས་ཐོས་གསུངས། གཉུག་མར་གནས་པའི་འདྲེ་རྒན་ཟེར་རྒྱུ་དེ་གནའ་ནས་ཡོད་པའི་འདྲེ་རྒན་ལ་གོ་དགོས་པ་ལྟར་རོ། ༈ །བཅུད་ཀྱི་སེམས་ཅན་གྲངས་མང་བ་ནི་ཆོས་ཀྱི་བདག་ཡིན། ཞེས་དང་། ལུས་ཅན་གྱི་ལུས་དེ་གང་ཟག་གི་བདག་ཡིན། ཞེས་པ་ནི་སེམས་ཅན་གྱིས་བཟུང་བ་ལྟར་གྱི་སངས་རྒྱས་ཟིག་ཡོད་ན་དེའི་ཞིང་དང་ཕུང་ཁམས་སྐྱེ་མཆེད་རྣམས་ཆོས་ཀྱི་བདག་དང་། དེའི་ངར་འཛིན་ཡུལ་གྱི་ལུས་དེ་གང་ཟག་གི་བདག་ཡིན་ཏེ། ཡིན་ཚུལ་བདག་དང་བདག་འཛིན་ངོས་བཟུང་བའི་སྐབས་ནས་ཤེས་དགོས། དང་པོ་ཡུལ་འཁོར་བའི་རྫུན་ཕུག་རྡིབ་དུས། ཁམས་གསུམ་འཁོར་བའི་སྡུག་བསྔལ་ལས་དང་ཉོན་མོངས་པ་ལས་བྱུང་། ལས་དང་ཉོན་མོངས་པ་བདག་འཛིན་ལས་བྱུང་བ་ཡིན་པས། བདག་འཛིན་གྱི་ཡུལ་ཕུང་པོ་བདག་ཏུ་སྣང་བ་དེ་གཏན་ལ་ཕབ་པས་བདག་འཛིན་ལྡོག་གོ །དེ་ལྡོག་པས་ལས་དང་ཉོན་མོངས་པ་ལྡོག་གོ།། དེ་ལྡོག་པས་རང་གི་ངོས་སྐལ་གྱི་ཁམས་གསུམ་འཁོར་བ་དོང་ནས་སྤྲུགས་ཚུལ་ཤེས་དགོས་སོ། ༈ །སངས་རྒྱས་ལ་མིག་ཡོད་པར་མ་སེམས་ཤིག་ཅེས་པ་སེམས་ཅན་ལ་སྣང་རྒྱུའི་མིག་ཡོད་པར་མ་སེམས་ཤིག་ཅེས་པ་སྟེ། གང་དག་ང་ལ་གཟུགས་སུ་ཞེས་སོགས་ལྟར། སངས་རྒྱས་ཀྱི་བ་སྤུའི་ཁུང་བུ་ཙམ་ཡང་སེམས་ཅན་གྱིས་དཔག་ནུས་པ་མིན། སྤྱིར་སངས་རྒྱས་ལ་མིག་མེད་ཟེར་ན་ཚར་སོང་ནི་རེད། སངས་རྒྱས་ཀྱི་བ་སྤུའི་ཁུང་བུ་གཅིག་གིས་ཤེས་བྱ་ཐམས་ཅད་མཁྱེན། ལོས་མཁྱེན་ཡེ་ཤེས་ཀྱི་ཕུང་པོ་རེད། སངས་རྒྱས་ཀྱི་ཞིང་རྡུལ་ཕྲ་བ་གཅིག་གིས་སངས་རྒྱས་ཀྱི་མཛད་པ་སྟོན་ནི་རེད། ལོས་སྟོན་ཡེ་ཤེས་ཀྱི་ཕུང་པོ་རེད། སེམས་ཅན་རང་ག་མ་ཞིག་གི་སྒོ་གསུམ་གྱི་ཡུལ་དུ་གྱུར་བའི་སངས་རྒྱས་ཞིག་ཨེ་ཡོད། གཡག་བཤས་བཤའ་བཤའ་བྱས་ནས་བརྟགས་པས་མཐོང་རྒྱུ་ག་ལ་ཡོད། ཡེ་ཤེས་རང་སྣང་ལས་གྲུབ་པའི་སྐུ་དང་ཞིང་དང་། གཞལ་ཡས་ཁང་དང་རྒྱན་རྟ་བབ་ཁ་དོག་སྣ་ཚོགས་པ་སོགས་ཡོད་ཟེར་དགོས་ནི་རེད། བོད་ཕྱི་རབ་པས་མཆོག་གི་སྤྲུལ་སྐུ་སངས་རྒྱས་དངོས་ཡིན་ཟེར་ནི་རེད། སྔ་རབ་པས་དངོས་མིན་ཟེར་ནས་རྩོད་ནི་རེད། ཅེས་གསུངས་སོ། །དགེའོ། །བཀྲ་ཤིས། ཆོས༵་ཉིད་ཀ་དག་ཀློང་ཆེན་ཕྱམ་བརྡལ་བར། །ལྷུན་གྲུབ་སྐུ་གསུམ་དབྱིངས༵་སྣང་དཀྱིལ་འཁོར་རྫོགས། །རང༵་བྱུང་ཡེ་ཤེས་སྣང་སེམས་ཡེ་གྲོལ༵་བ། །ངེས་དོན་བླ་མའི་རང་ཞལ་མྱུར་མཇལ་ཤོག། །། རིག་འཛིན་བླ་མའི་ཞལ་རྒྱུན་ཚིག་གསུམ་གནད་བརྡེག་གི་དོན་བསྡུས་མན་ངག་གསེར་གྱི་ཐིག་ལེ།རིག་འཛིན་བླ་མའི་ཞལ་རྒྱུན་ཚིག་གསུམ་གནད་བརྡེག་གི་དོན་བསྡུས་མན་ངག་གསེར་གྱི་ཐིག་ལེ་བཞུགས་སོ། ། བླ་མ་ལ་ཕྱག་འཚལ་ལོ། །ལྟ་སྒོམ་སྤྱོད་གསུམ་གྱི་ནང་ནས་དང་པོ་ལྟ་བ་ངོ་སྤྲད་པ་ནི། སྐྱེ་མེད་ཆོས་སྐུའི་ཀློང་ན་འགག་མེད་ཟང་ཐལ་རྗེན་པའི་རིག་ཆ་ཞིག་ཡོད་པ་དེ་ནི། སེམས་རྣམ་པར་ཤེས་པའི་ཚོགས་བརྒྱད་ལས་འདས་པའི་རིག་པའི་ཡེ་ཤེས་ཡིན་ལ་དེ་ནི་སྔོན་མེད་གསར་བྱུང་ཞིག་མ་ཡིན་ཏེ། ཡེ་གདོད་མ་ནས་ཇི་བཞིན་པར་བཞུགས་པ་དེ་ཉིད་བླ་མའི་མན་ངག་གིས་སད་པར་བྱས་ནས་ངོ་སྤྲད་པ་ཡིན་ནོ། །རང་ངོ་འཕྲོད་པ་ལྟ་བ་ཡིན། ངོ་རང་ཐོག་དུ་སྤྲད་པའི་གནད་དང་པོའོ། །གཉིས་པ་སྒོམ་པས་ཐག་བཅད་པ་ནི། རིག་སྟོང་ཟུང་འཇུག་ཆོས་སྐུ་ཐིག་ལེ་ཉག་གཅིག་དེ་ཉིད་ཀྱི་རང་ངོ་བསྐྱང་བ་དེ་ནི་གསང་སྔགས་རྡོ་རྗེ་ཐེག་པའི་རྒྱུད་སྡེའི་ཉམས་ལེན་ཐམས་ཅད་ཀྱི་སྙིང་པོ། དབང་བཞི་པའི་དོན་གྱི་ཡེ་ཤེས། སྒྲུབ་བརྒྱུད་ཡིད་བཞིན་ནོར་བུའི་ཁྱད་ཆོས། རྒྱ་བོད་གསར་རྙིང་གི་གྲུབ་བརྙེས་ཀྱི་དགོངས་པ་རྨ་མེད་པ་ཡིན་པས་ན་ཡིད་ཆེས་ཀྱིས་ཁོ་ཐག་ནང་ནས་བཅད། ངེས་ཤེས་གཏིང་ནས་སྐྱེས་ནས་བློ་ཐག་རྦད་ཀྱིས་བཅད་དགོས་ཏེ། ངེས་དོན་བསྡུས་རྒྱུད་ལས། དེ་ཕྱིར་ཆོས་སྐུ་འགྱུར་བ་མེད། །འཛིན་བྲལ་སེམས་མེད་ཡེ་ཤེས་སྐུ། །དེ་དོན་འབྲལ་མེད་བྱང་ཆུབ་ཀློང་། །སེམས་བྲལ་ཏིང་འཛིན་རྒྱུན་དུ་གནས།། དེ་ལས་གཞན་མེད་ཁོ་ཐག་བཅད། །དེ་ལྟར་ཆོས་སྐུ་རང་གནས་ཀྱི་ཡེ་ཤེས་རྗེན་པ་འཁྲུལ་མ་མྱོང་བའི་སངས་རྒྱས་སུ་བློ་ཐག་བཅད་ནས་དེའི་རྒྱུན་སྐྱོང་བ་འདི་གལ་ཆེ། ངང་ལ་གནས་པ་བསྒོམ་པ་ཡིན། ཐག་གཅིག་ཐོག་ཏུ་བཅད་པའི་གནད་གཉིས་པའོ། །གསུམ་པ་སྤྱོད་པ་རང་གྲོལ་དུ་འགྲོ་བའི་ཚུལ་ནི། གསེར་གླིང་དུ་ཕྱིན་དུས་ས་རྡོ་ཕལ་བ་བཙལ་ཀྱང་མི་རྙེད་པ་བཞིན་དུ་གང་ཤར་རང་གྲོལ་གྱི་གནད་འདི་དང་ལྡན་ན་གནས་འགྱུ་རྣམ་རྟོག་གང་སྐྱེས་སྒོམ་དུ་ཤར་ནས་འཁྲུལ་བ་རང་མཚན་པ་བཙལ་ཀྱང་མི་རྙེད་པར་འགྱུར་བས་ན་གདེངས་གྲོལ་ཐོག་དུ་བཅའ་བ་ཡིན་ནོ། །གང་ཤར་རང་གྲོལ་སྤྱོད་པ་ཡིན། གདེངས་གྲོལ་ཐོག་དུ་བཅའ་བའི་གནད་གསུམ་པའོ། །དེ་ལྟ་བུའི་གནད་གསུམ་རང་བཞིན་རྫོགས་པ་ཆེན་པོའི་ལྟ་སྒོམ་སྤྱོད་འབྲས་བཞི་ཀ་དག་རིག་པ་ཟང་ཐལ་གྱི་ངང་དུ་ཆིག་ཆོད་དུ་འཁྱེར་བའི་གནད་ཡིན་པས་ཐེག་པ་ཐམས་ཅད་ཀྱི་རྩེ་རྒྱལ་སྙིང་ཐིག་རྡོ་རྗེ་སྙིང་པོའི་ལམ་གནད་འབྲས་བུའི་ཐུས་ཀ་འདི་ལས་ལྷག་པ་མེད་པས་ན། སྐུ་གསུམ་ལྷུན་གྲུབ་འབྲས་བུ་ཡིན། ལྟ་སྒོམ་སྤྱོད་འབྲས་གང་གི་དུས་སུ་རིག་སྟོང་ཟུང་འཇུག་ཆོས་སྐུ་ཐིག་ལེ་ཉག་གཅིག་གི་ངང་དེ་ལས་འདའ་བ་མེད་པས་ན། དེ་ལས་མི་འདའ་དམ་ཚིག་ཡིན། ཅེས་པ་འདི་ནི་དུང་དཀར་དགོན་ནས་མིང་དུ་མཁན་པོ་དགེ་བཟང་ཟེར་བ་དོན་དུ་ཆོས་འཇིག་རྟེན་གང་ཐད་ནས་ཡོན་ཏན་སྣ་གཅིག་མེད་པའི་སྤྲང་རྒན་མདོ་མེད་བླུན་པོ་དུག་ཧྲུལ་ཅན་གྱིས་ཚིག་གསུམ་གནད་བརྡེག་གི་ནང་ནས་དོན་གྱི་གནད་བྲི་མ་ཤེས་རུང་མགོ་མཇུག་མེད་པའི་ཚིག་བླ་མའི་ཞལ་རྒྱུན་ལྟར་བྲིས་པ་ཡིན་ནོ། ༈ །བདེ་སྡུག་ཐམས་ཅད་ཉམས་ཀྱིས་རྫུན་རིས་ལ། །ངོ་ཤེས་ཙམ་ན་གེགས་སེལ་གནད་དུ་ཆེ། །སྤང་བླང་བཅོས་བསླད་མེད་པར་རང་སར་ཞོག །བཅས་བཅོས་རེ་དོགས་གེགས་དང་གོལ་ས་ཡིན། །རྟོགས་པ་རྐྱེན་མེད་ལམ་གྱི་ངོ་བོ་ནི། །ཅི་ཡང་མ་ཡིན་སྤྲོས་པའི་མཐའ་དང་བྲལ། །མ་བལྟས་མ་བསྒོམ་མ་བཟུང་རང་ཡན་ནོ། །ཤུགས་འབྱུང་ཧར་སངས་དེ་ནི་ཡང་དག་གོ། རྟོག་པས་དཔྱད་མཐའ་ལས་འདས་སྟོང་པ་ཉིད། །ཚིག་དཔེ་དོན་གྱིས་མི་མཚོན་མཚན་མ་མེད། །རང་ལས་གྲོལ་བ་མེད་པའི་སྨོན་པ་མེད། །ཉམས་སྣང་ཕྱིན་ཅི་ལོག་ཏུ་བསྒྱུར་བའི་རྐྱེན། །འདྲེ་གདོན་བགེགས་ཀྱི་གནོད་པར་འཛིན་པ་ཡི། །སྨན་དཔྱད་རིམ་གྲོ་ཅི་ཕན་བསྒྲུབ་གྱུར་ན། །ཐམས་ཅད་གནོད་པ་ཆེན་པོར་འགྱུར་བ་ལས། །ཕན་པ་མི་འབྱུང་སྲོག་གི་གཤེད་དུ་འབབས། །དེ་ཕྱིར་རྣལ་འབྱོར་ལམ་དུ་ཞུགས་པ་དག །བདེ་སྡུག་ན་ཚ་ཉམས་སུ་ཤེས་གྱུར་ན། །ས་ལམ་གྱིས་བསླང་ཉམས་ནི་མ་ཡིན་ཀྱང་། །འཁོར་བ་འཁྲུལ་བའི་གཤིས་ཉམས་ཡིན་པའི་ཕྱིར། །རྐྱེན་ངན་དངོས་གྲུབ་མཆོག་ཏུ་བསྒྱུར་བ་དང་། །ལྟས་ངན་གཡང་དུ་ལེན་པའི་མན་ངག་ཡིན། དེ་ཕྱིར་འཁྲུལ་བའི་སེམས་སྣང་བདེ་སྡུག་ཀུན། །ཐམས་ཅད་ཉམས་སུ་ཤེས་པ་གནད་དུ་གཅེས། །ཆོས་ཉིད་སྒྱུ་མར་བདེན་པའི་མངོན་སུམ་རིག་པ་ཡིས། །འཁོར་འདས་སྒྱུ་མ་རོལ་པའི་རྒན་པོས་སྨྲས། །བླ་མའི་རྒྱུད་འདི་མི་ཤེས་པར། ཉམས་སུ་ལེན་པར་འདོད་པར་དེ། ཁ་བྲག་ལམ་དུ་ཕུར་བ་འདྲ། །ཞེས་སོ།། །། ཚིག་གསུམ་གནད་བརྡེག་གི་ཟིན་བྲིས་ཀྱི་དོན་བཀྲོལ་བ།བླ་མ་ལ་ཕྱག་འཚལ་ལོ། མཆོད་པར་བརྗོད་པའི་དང༷་པོ༷་དཀོན༷་མཆོ༷ག་ཀུན༷་འདུས༷་ཞེས་པའི་སྐབས་སུ། སྤྱིར་གསང་སྔགས་རྙིང་མ་བ་ཞིག་ཡིན་དུས་གུ་རུ་རིན་པོ་ཆེ་བླ་མར་བཟུང་དགོས་པས་ཆོས་སྐུ་རྡོ་རྗེ་འཆང་ནས་བརྒྱུད་པའི་བླ་མ་ཐམས་ཅད་མར་བསྡུ། ད་ལྟའི་ཀ་ཁ་སུམ་ཅུ་སློབ་པའི་སློབ་དཔོན་ཐམས་ཅད་ཡར་བསྡུས་ནས་ངོ༷་བོ༷་རྩ༷་བའི་བླ༷་མ༷་ལ་རྣམ་པ་ཨོ་རྒྱན་ཆེན་པོ་སྐྱབས་གནས་ཀུན་འདུས་སུ་ཤེས་པ་སྔགས་ལྟར་གྱི་ཡིན། ཐུགས་སངས་རྒྱས། གསུང་དམ་ཆོས། སྐུ་དགེ་འདུན། མཆོག་གསུམ་ཀུན་འདུས། སྐུ་བླ་མ། གསུང་ཡི་དམ། ཐུགས་མཁའ་འགྲོ་སྟེ། རྩ་གསུམ་ཀུན་འདུས། སྐུ་སྤྲུལ་སྐུ། གསུང་ལོངས་སྐུ། ཐུགས་ཆོས་སྐུ་སྟེ་སྐུ་གསུམ་ཀུན་འདུས་སུ་ཤེས་དགོས་པ་དང་། འདས་མ་འོངས་ད་ལྟར་གྱི་སངས་རྒྱས་ཐམས་ཅད་འདུས་པ་སྐྱབས་འགྲོ་དགུའི་བདག་ཉིད་དུ་དམིགས་ནས་དེ༷་ལ༷་ཕྱག༷་འཚལ༷་བ༷་དང་། སྐྱབས་སུ་འགྲོ་བ་ཁོ༷་ནས༷་ཀྱང་དེ་རྣམས་ལ་ཕྱག་འཚལ་བ་དང་སྐྱབས་སུ་འགྲོ་བའི་ཕན་ཡོན་ཡོད་པར་གསུངས་ཏེ། བློ་བླ་མར་གཏོད་པ་སྐྱབས་འགྲོ་ཡི་མཐར་ཐུག །ཅེས་དང་། ཁམས་འདུས་དད་པས་གསོ་ནུས་པ་སོགས་གསུངས། དྲན་པས་གདུང་བ་སེལ་བ་ཞེས་སོ། །ལོག་ལྟ་བྱས་ན་ཡང་དེ་དང་འདྲ་བའི་ཉེས་པ་མཚུངས་གསུངས། ༈ རྩ་རྒྱུད་ཀྱི་བླ་མ་སོགས་ཀྱི་སྐབས་རྒྱལ་བ་དགོངས་བརྒྱུད་ཀློང་ཆེན་རབ་འབྱམས། རིག་འཛིན་བརྡ་རྒྱུད་འཇིགས་མེད་གླིང་བ། གང་ཟག་སྙན་རྒྱུད་རྫ་ཁྲ་མའི་བླ་མ་གསུམ་གྱི་མཚན་དོན་དང་འབྲེལ་ན་རང་སེམས། དེའི་ཕྱིར་བརྒྱུད་གསུམ་འདུ་བ་ཡིན་ཏེ། ཇི་ལྟར་འདུ་སྙམ་ན་བརྒྱུད་པ་གསུམ་གྱི་བླ་མའི་དགོངས་པའི་ཐུགས་བཅུད་རྟོགས་ཤིང་རྒྱུད་ན་བཞུགས་པའི་ཆ་ནས་དེར་འདུ་བ་ཡིན་གསུངས། ༈ དང་པོ་ལྟ་བ་མདོར་བསྟན་ནི། དབྱིངས་སྤྲོས་པ༴ དབྱིངས་དེ་ལ་དབྱེ་ན་ཕར་ཕྱིན་ཐེག་པའི་ལམ་གྱི་ཉན་རང་དང་བྱང་སེམས་རྣམས་ཀྱིས་ཀ་བ་དང་བུམ་པ་སོགས་ཀྱི་བདེན་གྲུབ་བཀག་ཙམ་གྱི་སྟོང་ཉིད་ཐ་ཤལ་བའམ་ཕྱང་ཆད་པ་དེ་ནི་ཀ་བ་ཡོད་པའི་དུས་སུ་སྟོང་ཉིད་ཀྱ ང་ཡོད། རྫས་རྒྱུན་ཞིག་པའི་དུས་སུ་སྟོང་ཉིད་ཀྱང་མེད། སྟོང་ཉིད་དང་དབྱིངས་དེའང་། སྟོང་གཞིའི་སེམས་བག་ཆགས་མ་འཁྲུལ་བ་ལས་གྲུབ་པ་ཡིན་པས་ན། དུས་འཁོར་བསྡུས་རྒྱུད་ལས། ཕུང་པོ་རྣམ་དཔྱད་སྟོང་པ་ཉིད། །ཆུ་ཤིང་བཞིན་དུ་སྙིང་པོ་མེད། །ཅེས་གསུངས་པ་བཞིན་ནོ། །འོ་ན་མདོའི་སྟོང་ཉིད་ལ་དགོས་པ་མེད་དོ་སྙམ་ན་མ་ཡིན་ཏེ། སྲིད་རྩེའི་དངོས་གཉེན་སྟོང་ཉིད་བདུད་རྩི་ལྟ་བུ་དེ་ཡིན། རྫོགས་ཆེན་ལྟར་ན་དབྱིངས་སྤྲོས་བྲལ་འདི་ནི་གདོད་མའི་སྟོང་ཆེན་གྱི་དབྱིངས་སམ་རིག་པ་ཀ་དག་གི་དབྱིངས་དེ་ལ་འཕོ་འགྱུར་མེད་པ། སྔགས་ལྟར་ན་སྐུ་དང་ཡེ་ཤེས་ཀྱིས་བརྒྱན་པའི་དབྱིངས། དེ་ཉིད་ལས། རྣམ་པ་ཀུན་གྱི་མཆོག་ལྡན་པའི། །སྟོང་ཉིད་དེ་དང་འདྲ་མ་ཡིན། །ཞེས་པ་ལྟར་རྣམ་ཀུན་མཆོག་ལྡན་གྱི་སྟོང་ཉིད་མི་ཕམ་ལ་སོགས་པས་གསུངས་པ་ཡིན་ནོ། །དབྱིངས༷་སྤྲོས༷་པའི༷་མཐའ་ཐམས་ཅད་དང༷་བྲལ༷་བའི་༷ཆོས༷་ཉིད༷་དེའི་ཡིན་ལུགས་བདེ༷་བར་གཤེགས༷་པ་ཞེས་སངས་རྒྱས་ཀྱི་མཚན་ཡིན་ལ། རང་གདངས་འགགས་པ་མེད་པའི་ཡེ་ཤེས་ནི་སྙིང༷་པོ༷། དེ་གཉིས་ཟུང་འཇུག་གི་ཆ་ནས་ཀློང༷་ཆེན༷་པོ༷་ན་ཞེས་པས་འཆར་གཞི་བསྟན། དེ་ལས་འཆར་ཆོས་ནི་མ་དག་འཁོར་བ་དང་། དག་པ་མྱང་འདས་གཉིས་ཀྱི་སྣང་བ་རབ་འབྱམས་སམ། ཡང་ན་ཆགས་སྡང་སོགས་དུས་གསུམ་ཡིད་ཀྱི་འཁྲུལ་རྟོག་དང་ཉམས་ཞེན་སོགས་མ་དག་འཁོར་བ་དང་། དག་པ་མྱང༷་འདས༷་ལྷུན་གྲུབ་ཐོད་རྒལ་གྱི་སྣང་ཆ་དབྱིངས་དང་ཡེ་ཤེས་ཐིག་ལེ་སོགས་ཀྱི་སྣང་༷བ༷་རབ༷་འབྱམ༷ས། ༈ དེ༷་ལྟ་༷བུའི༷་ལྟ༷་བ༷་སྤྲོས༷་བྲལ༷་གྱི༷་རང༷་བཞི༷ན་འདི་ལམ་སྒོམ་པས་ཉམས་སུ་བླངས་ན། དེ་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། སྐྱོབ་པའི་ནུས་མཐུ་སོགས་ཡོད་ལ། མཁྱེན་ཆ་ནི་འགག་པ་མེད་པ་ཀུན་ཤེས་ཀུན་རིག་གི་ཆ་རིག་སྟོང་ཟུང་འཇུག་གི་ལྟ་བ་དེ་ཉིད། ཤེས་རབ་ལྷག་མཐོང་གིས་གཏན་ལ་འབེབས་པའི་གཞི་བདུན་སྐྱོན་ཅན་དང་། སྐྱོན་མེད་རང་གཞུང་གི་གཞི་བཤད་ན་ལེགས་གསུངས་སོ། །སྟོང་ཉིད་དེའང་སྙིང་རྗེ་བརྩེ་བ་ཆེན་པོའི་བདག་ཉིད་དུ་བཞུགས་ཡོད་པ་ནི་བརྩེ་བའི་སྙིང་རྗེ། དུས་སྐད་ཅིག་ལ་དུས་གསུམ་ཡིད་ཀྱི་འཁྲུལ་རྟོག་ལས་སྐྱོབ་པས་ན་སྐྱོབ་པའི་ནུས་མཐུ། དབྱིངས་སྤྲོས་བྲལ་ཤེས་རབ་ལྷག་མཐོང་གི་ཆ་ཞི༷་གནས། ཐབས་བརྩེ་བའི་སྙིང་རྗེའམ། དུས་གསུམ་ཡིད་ཀྱི་འཁྲུལ་རྟོག་ཞི་བ་ཐབས་དང་། རིག་པའི་ངང་དུ་རྩེ་གཅིག་ཏུ་གནས༷་པའི་མཉམ་པར། ༈ སྤྱོད༷་པ༷་རྒྱལ༷་བའི༷་མྱུ་༷གུ༷་ཞེས་པའི་སྐབས། མྱུ་གུ་བཟང་པོ་ལས་སྡོང་པོ་མེ་ཏོག་འབྲས་བུ་སོགས་འཁྲུངས་པ་ལྟར། མཉམ་བཞག་སྐབས་ཚོགས་ཆེན་ཡེ་རྫོགས་ནི་ཕྱིན་དྲུག་ཚང་བ་ཡིན་པས་དེའི་སྟོབས་ཀྱིས་རྗེས་ཐོབ་སྤྱོད་ལམ་གྱི་སྐབས་སུའང་ཕྱིན་དྲུག་འབད་མེད་རང་ཤུགས་ཀྱིས་འབྱུང་བ་ནི་རིག་སྟོང་ཟུང་འཇུག་རྟོགས་བྱེད་ཀྱི་གྲོགས་སུ་བྱང་ཆུབ་སེམས་དཔའ་འམ། ༈ ཚེ་འདིར་ཀ་དག་ཞེས་པའི་སྐབས། རབ་ཚེ་འདིར་གྲོལ་བ་འཆི་མེད་གཉུག་མའི་བཙན་ས་ཟིན་པ། ཐིམ་རིམ་གྱི་མགོ་རྩོམ་པའི་ཚེ་གྲོལ་བ་ཚེ་འདིར་གྲོལ་བའི་ཕྱོགས་སུ་བསྡུ། འབྲིང་འཆི་སྲིད་ཆོས་སྐུའི་འོད་གསལ་ཤར་བའི་ཚེ་གྲོལ་བ་ཁྲེགས་ཆོད་ཀྱི་གྲོལ་བ། ཆོས་ཉིད་བར་དོ་ཐོད་རྒལ་གྱི་གྲོལ་བ། ཐ་མ་སྲིད་པ་བར་དོ། ཡང་ཐ་སྐྱེ་བ་ཕྱི་མ། ལོ་བཅུ་དྲུག་གམ་མིན་ཀྱང་རང་ལོ་ཉེར་ལྔའི་དུས་འོད་གསལ་རྫོགས་ཆེན་གྱི་ཆོས་དང་འཕྲད་ནས་ཚེ་དེ་ཉིད་ལ་གྲོལ་བ་རྫོགས་ཆེན་ལྟར་བཀའ་གཏེར་སྤྱིའི་འདོད་ལུགས་ཡིན་ནོ། ༈ །ལྟ་བ་རྒྱས་བཤད་སྐབས། ལྟ་བ་ཀློང་ཆེན་རབ་འབྱམས་ནི། ལ་བཟླ་གསུམ་གྱི་ཉམས་ལེན་གྱིས་སེམས་ཀྱི་གསང་ལ་བརྡེག་པ་ཞེས་གནད་ལ་བརྡེག་པ། དཔེར་ན་ཤན་པ་སྲོག་གི་གནད་ལ་མཁས་པ་བཞིན་འཁྲུལ་བའི་སྲོག་གཅོད་པར། སྤྱིར་མཚན་ཉིད་ཐེག་པའི་ལྟ་བ་ལུང་རིགས་ཀྱིས་གཏན་ལ་ཕབ་པ་ཞེས་ལུང་རྒྱལ་བའི་བཀའ། རྗེས་འཇུག་གི་བསྟན་བཅོས་རྣམས་དང་། རིགས་པ་ནི། ཤིང་རྟ་རྣམ་བདུན། དབུ་མའི་གནད་བཞི། ཡོད་མེད་སྐྱེ་འགོག །མཐའ་བཞི་སྐྱེ་འགོག རྡོ་རྗེ་གཟེགས་མ། གཅིག་དུ་བྲལ་སོགས་ཀྱིས་གཏན་ལ་འབེབས་པ་དང་། གསང་སྔགས་ཐུན་མོང་པའི་ཐབས་ལམ་དབང་གསུམ་པའི་དཔེའི་ཡེ་ཤེས་ལ་བརྟེན་ནས། ༈ འདིར་སྒྲུབ་རྒྱུད་དམ་པ་ཞེས་པའི་སྐབས། རང་ལུགས་འདིར་ཆོས་སྐུ་རྡོ་རྗེ་འཆང་ནས་ད་ལྟའི་རྩ་བའི་བླ་མའི་བར་གྱི་བརྒྱུད་པའི་ཕྱག་བཞེས་ནི། སེམས་ཀྱི་ཡལ་ས་འམ་འགྱུ་བའི་ཡལ་ས་ངོ་སྤྲོད་པ་ཡིན་ལ། ངོ་སྤྲོད་ལུགས་ནི། སྔོན་འགྲོ་སེམས་ཀྱི་ཁང་བུ་བཤིག་པའི་མན་ངག་ལ་བརྟེན་ནས་རགས་པའི་རྣམ་རྟོག་ཡུན་རིང་པོའི་བར་དུ་དྭངས་སུ་བཞག་པའི་ཚེ། དེས་ཤུལ་དེ་ན་གནས་ཆ་བདེ་གསལ་མི་རྟོག་པའི་ཉམས་གསུམ་ཡོད་པ་ལས། དེ་གསུམ་གང་རུང་ལས་མི་འདས། དེ་གསུམ་དང་བྲལ་དགོས་ཏེ། གཏོར་བྱེད་ཀྱི་ཡི་གེ་ཕཊཿ སྒྲ་དྲག་པོ་བྱས་པའི་ཚེ་ཉམས་ཞེན་གྱི་ཤུན་པ་རྣམས་འཐོར་བའི་ཚེ། སྐྱེ་མེད་ཆོས་སྐུའི་ངང་ནས་འགག་མེད་ཟང་ཐལ་རྗེན་པའི་རིག་ཆ། སེམས་རྣམ་ཤེས་ཚོགས་བརྒྱད་མ་ཡིན་པ། དེ་ལས་འདས་པའི་ཡེ་ཤེས་སྔར་མེད་གསར་བྱུང་རྒྱུད་ལ་སྐྱེས་པ་མ་ཡིན་པས། ཡེ་ནས་ཇི་བཞིན་པར་བཞུགས་པ་དེ་བླ་མའི་མན་ངག་གིས་ངོ་སྤྲོད་པ་ཡིན་པས་ན། ཞེས་སོ། །སེམས་རིག་བྱེ་བྲག་ཕྱེད་པ་ཙམ་ཡིན། བྱེ་བྲག་རིག་པ་ངོས་བཟུང་བ་ཙམ་ཡིན་གསུངས། འདི་ཡན་ཆོས་དབྱིངས་མཛོད་ལེའུ་དགུ་པའོ། །ངོ་སྤྲད་པའི་རིག་པ་དེ་ཡང་སྐྱེ་བ་མེད་པ་ཡིན་ཏེ། རྒྱུ་དང་རྐྱེན་གང་གིས་མ་བསྐྱེད་པ་སྤྲོས་པའི་མཐའ་ཡོད་མེད་གཉིས་ཀ་གཉིས་མིན་སོགས་མཐའ་བཞིའམ་བརྒྱད་ལས་འདས་པའི་ཡེ་ཤེས་ལེའུ་བཅུ་པའི་ཤན་འབྱེད་ཀྱི་འཕྱོངས་ཡིན་ནོ། །ངོ་བོ་སྟོང་པས་རྟག་པའི་མཐའ་དང་བྲལ། རང་བཞིན་གསལ་བས་ཆད་པའི༴ ཟུང་དུ་འཇུག་པས་ཐ་དད་ཀྱི༴ རྩལ་སྣང་སྣ་ཚོགས་སུ་འཆར་བའི་ཆ་ནས་གཅིག་པུའི་མཐའ་དང་བྲལ་བ་ཡིན་ནོ། །སེམས་ཀྱི་ཤེས་པ་སྐད་ཅིག་ཆ་མེད། གཟུང་བ་རྡུལ་ཕྲན་ཆ་མེད་ལྟ་བུ་ནི་མ་ཡིན་ལ། རིག་པ་ནི་ངག་གི་བརྗོད་བྱའི་ཡུལ་ལས་འདས་པ། རྩོལ་མེད་དེ་རྟོག་མེད་ཡིན། རིག་པ་རང་གི་ངོ་བོ་ལ་འཁྲུལ་གྲོལ་མེད་པའི་རང་གནས་ཡེ་ཤེས་བརྗོད་བྲལ། སེམས་ནི་སྐད་ཅིག་སྐྱེ་འགག་ཅན། རྒྱུ་གསུམ་རྐྱེན་བཞི་ལས་གྲུབ་པ་ཡིན་ནོ། །ཀློང་ཆེན་དང་མི་ཕམ་སོགས་ཀྱི་བཞེད་ལུགས་ཕར་ཕྱིན་ཐེག་པའི་ལམ་ནས་འཕགས་པའི་མཉམ་བཞག་སྐབས་རིག་པ་མངོན་སུམ། སྔགས་ཀྱི་རིག་པ་མངོན་སུམ་ངོ་འཕྲོད་པ་གཉིས་ལ་དགོངས་ནས། དོན་དམ་བློ་ཡི་སྤྱོད་ཡུལ་མིན། །ཞེས་གསུངས་ཡང་མདོ་ལམ་ནས་ཚོགས་སྦྱོར་ལམ་དང་། སྔགས་ཀྱི་ལྟ་བ་དོན་སྤྱི་ཙམ་ཡིད་ངོར་ཤར་བ་གཉིས་ལ་དགོངས་ནས། དོན་དམ་བློ་ཡི་སྤྱོད་ཡུལ་ཡིན། །ཞེས་པ་ལྟར་འགྲེ ལ། སེམས་ཅན་ཐམས་ཅད་ཀྱི་རྒྱུད་ལ་བདེ་གཤེགས་སྙིང་པོ་ཡེ་ནས་བཞུགས་པ་ལ་ཆོས༷་སྐུ༷་གཞི༷་གནས༷་ཀྱི་རིག་པ༷་ཟེ༷ར། དེ་བླ་མའི་མན་ངག་གིས་ངོ་སྤྲོད། དེ་ལ་གོམས་ནས་སྒྲིབ་པ་ཅི་རིགས་པ་དག་པའི་རྣལ༷་འབྱོ༷ར་ལམ༷་གྱི༷་ལྟ༷་བ༷་ཡིན། ངོ་སྤྲད་པ་དེ་ནི་གཞིའི་འོད་གསལ་དེ་ལས་གཞན་མ་ཡིན་པས་འདི་ཁོ༷་ནའོ༷། ༈ །རྫོགས་ཆེན་སྐབས་ཚོགས་སྦྱོར་གྱི་དུས་སུ། ཡིད་ཀྱི་ཤེས་པ་རྫིང་བུ་ལྟ་བུ་ལ། རིག་སྟོང་ཟུང་འཇུག་དོན་སྤྱི་ཟླ་གཟུགས་ཆུ་ལ་འཕོས་པ་ལྟ་བུ་ཡིན། མངོན་སུམ་རྟོགས་དུས་ཡིད་ཤེས་ནུབ་ཚེ་ཟླ་བ་དངོས་ཤར་བ་བཞིན་ནོ། །དང་པོ་ལྟ་བ་ལྟ་ཡུལ་གཉིས། ལྟ་མཁན་ཡིད་ཤེས། ལྟ་ཡུལ་རིག་སྟོང་གི་ཡེ་ཤེས་གཉིས་དབྱེར་མེད་དུ་གྱུར་བའི་ཚེ། བསྒོམ་མེད་འོད་གསལ་གྱི་འཁོར་ལོའི༴ དེའང་ལས་དང་པོ་པའི་ཚེ་རིག་པ་སྐད་ཅིག་དེ་མངོན་སུམ་ཤར་བའི་ཚེ། དེའི་ངང་ལ་ཡོད་སྐབས་དེ་ལས་གཞན་བསྒོམ་ཏུ་མེད་པས་འོད་གསལ། མ་བསྒོམ་ན་ཨེ་ཆོག་སྙམ་ན། འཁྲུལ་བ་རྒྱ་འབྱམས་སུ་སོང་བའི་ཐ་མལ་དང་ཁྱད་མེད། རིག་པ་རང་གི་ངོ་བོ་ལ་འཕོ་འགྱུར་མེད་ཀྱང་། གློ་བུར་རྣམ་རྟོག་གི་དྲི་མས་བསྒྲིབས་ཏེ། དྲི་མ་དག་ཚེ་སྐུ་གསུམ་སྟོན་པའི་སྐུར་བཞེངས་པ་ཡིན་ནོ་གསུངས། རིག་པ་མཐོང་བའི་ཆ་ནས་སྐད་ཅིག་མ། གནས་པའི་ཆ་ནས་དུས་གསུམ་འཕོ་འགྱུར་མེད་པ་ཡིན་གསུངས། ༈ ལྟ་བའི་ངོ་མ་འཕྲོད་ན་བསྒོམ་པའི་ངང༴ རྣལ་འབྱོར་ལམ་པ་བས་ལྟ་ཐོག་ནས་སྒོམ་པ་བཙལ་བ་ནི། དང་པོ་ལྟ་བ་ངོ་སྤྲད་ནས་དེ་ལ་གོམས་པ་སྒོམ་པ་ཡིན། སྒོམ་ཐོག་ནས་ལྟ་བ་བཙལ་བ་ནི་ངོ་མི་འཕྲོད་པ་རྣམས་ཡུན་རིང་པོའི་བར་སྒོམ་དུ་བཅུག་ནས་མཐར་ངོ་མ་སྤྲད་ན་རྩ་ཁམས་ཀྱིས་ངོ་མི་འཕྲོད་པའང་ཡོད་པ་ཡིན་ནོ། །ཞེས་གསུངས། རང་ངོ་འཕྲོད་པ་ལྟ་བ། ངང་ལ་གནས་པ་སྒོམ་པ། གང་ཤར་རང་གྲོལ་སྤྱོད་པ་ཞེས་གསུངས། ༈ དེ་ནས་སྒོམ་པ་རྒྱས་བཤད་ནི། ངང་བཞག་ཆུ་བོའི་རྒྱུན་གྱིས་སྒོམ་པའམ། རང་བཞིན་བབ་ཀྱི་བསམ་གཏན་ནི། རིག་པ་རང་གི་ངོ་བོ་ལ་འཁྲུལ་གྲོལ་མེད་པ་ཐོག་མེད་ནས་ད་ལྟའི་བར་དང་། ད་ནས་སངས་རྒྱས་ཀྱི་བར་དུས་གསུམ་དུ་འཕོ་འགྱུར་མེད་པ། བཅོས་མ་མ་ཡིན་པས་རིག་པའི་ངང་བཞག་དཔེ་ཆུ་བོའི་རྒྱུན་ལྟ་བུ་གསུངས། བསམ་གཏན་ཐབས་ལམ་མ་བརྟེན་བྱིང་རྒོད་བྲལ། ཞེས་གསུངས། ཀློང་དྲུག་པ་ལས། མ་བཙལ་བཞག་པའི་སྒོམ་པ་དང་། །རྩ་རླུང་སེམས་ཀྱི་ངལ་གསོ་གཉིས། །འདྲའོ་འདྲའོ་ནོར་ར་རེ། །ཞེས་སོགས་གསུངས། རིག་པའི་རང་དུས་དེ་ན་གནས་པ་ལ་བསྒྲུབ་རྒྱུ་མེད། འཕྲོ་བ་ལ་དགག་བྱ་མེད་པར། རྩ་ཐིག་རླུང་སེམས་ཀྱི་ཐབས་ལ་བརྟེན་པ་ནི་འཕོ་འགྱུར་ཅན་ནོ། ༈ །ཀུན་འབྱུང་གི་བདེན་པ༴ དགེ་མི་དགེ་ལུང་མ་བསྟན་གསུམ་འཁོར་བའི་ཕྱོགས་ཀྱི་རྒྱུ། འབྲས་བུ་སྡུག་བསྔལ་བདེན་པ་ཁམས་གསུམ་སྣོད་བཅུད། མྱང་འདས་ཕྱོགས་ཀྱི་རྒྱུ་ལམ་བདེན། འབྲས་བུ་འགོག་བདེན་ནོ། །རྣམ༷་རྟོ༷ག་དེ༷་གའི༷་རང༷་བཞིན༷་ཞེས་པ་འཆར་གཞི་ལ་ཆོས༷་སྐུ༷་གཞིའི༷་འོད༷་གསལ༷་གཞི་གནས་པའི་འོད་གསལ་ཞེས་པའི་དོན། རྒྱུད་ན་བཞུགས་པའི་ཆ་ནས་གཞི། སད་པར་བྱ་བའི་ཆ་ནས་ལམ། སྒྲིབ་པ་དག་པའི་ཆ་ནས་འབྲས༷་བུ༷་འོད་གསལ་ཞེས་བརྗོད་པ་ཡིན། འོད༷་གསལ༷་མ༷་བུ༷་འཕྲོ༷ད་པ༷་ཞེས་བྱ་བའང་དེ་ཉིད་ཡིན་ནོ། །དེ༷་ལྟར༷་ནམ༷་ཡ༷ང་བླ་མས་ངོ་སྤྲད་པའི་ལྟ༷་བ༷་རང༷་གི༷་ངོ་བོ་ཤེས་པའི་འོད་གསལ་གྱི་རིག་པ་དེ༷་དྲན༷་པར༷་བྱས༷༴ ༈ རིག་པ་དེ་ཉིད་རྗེན་ལ་ཤར་བའི་ཚེ་རྣམ་རྟོག་དགེ་མི་དགེ་ལུང་མ་བསྟན་གང་ཤར་ཡང་ངན་པ་དགག་པ་དང་སྤང་མི་དགོས། བཟང་པོ་བསྒྲུབ་༷པའ༷མ་བླང་༷མི༷་དགོས༷་པ༷་གནད༷་དམ༷་པ༷་ཡིན་པས། ལས་དང་པོ་པས་རིག་པ་ངོ་འཕྲོད་ཀྱང་ཉམས་བདེ༷་གསལ༷་མི༷་རྟོག༷་པ༷་གཉུག༷་མའི༷་རིག་པའི་རང༷་ཞལ༷་འགེབ༷་པའི༷་ཉམས༷་ཞེན་རྣམས༷་དང་བྲལ༷་དགོས། རིག་པའི་རང་ཚུགས་མ་ཤོར་བ་ཉམས་གསུམ་པོ་སྐུ་གསུམ་གྱི་བསྒྲུབ་གཞི་རིག་པ་ཡུན་རིང་དུ་གནས་པའི་གྲོགས་ཡིན་པས། ཉམས་ཀྱི་གོས། རྣམ་རྟོག་གི་ཟས་གསུངས་པ་ཡིན་པས། རིག་པའི་ཡེ༷་ཤེས༷་ཁོ༷ང་ནས༷་ཤར༷་བའམ༷་གསལ་བ་ཡིན་ཏེ། ༈ བརྗོད༷་མེད༷་ཀྱི་དབྱིངས༷་བསྟན། དེའི་གདངས་འགག་པ་མེད་པའི་ཡེ་ཤེས་རིག༷་ཆ༷་ཟུང་འཇུག་ནི། ཕྱོགས་མཐའ་དབུས་ཐམས་ཅད་དང་བྲལ་བའི་ཟང་ཐལ༷་ལེ༷་མཉམ༷་བཞག༷་དང༷་རྗེས༷་ཐོབ༷་ཀྱི༷་སྒོམ༷་པ་སོ་སོར་མེད་ཅེས་གསུངས། དེ་ཡང་རིམ་སྐྱེས་པ་ལ་མཉམ་བཞག་དང་རྗེས་ཐོབ་གང་གི་ཚེ་རིག་ཆའི་ངང་བསྐྱངས་པ་ལས་གཞན་མེད་པར་བསྟན་པ་དང་། ཅིག་ཆར་བས་མཉམ་རྗེས་འདྲེས་ནས་གང་ཤར་ཚད་རིག་པའི་རྣམ་ལྡན་དུ་གྱུར་ནས་འགྲེལ་ཚུལ་གཉིས་སོ། ༈ །རང་གནས་ཕྱལ༷་བ༷་ནི་རིག་པའི་ངང་དུ་ཀུན་ལ་ཁྱབ་ཅིང་བརྡལ་༷བའི༷་ཆ་དང་། འཁྲུལ་པ་རྒྱ་འབྱམས་པའི་ཕྱལ་བ་ཞེས་བརྗོད་པ་ཚིག་གི་གྲོགས་མི་ཤེས་སོ། ༈ །ཡང་ཐོས་གྲོལ་ཅིག་ཆར་བའི་རིགས་ཅན་དེ་ལ་བླ་མའི་མན་ངག་གིས་ལྟ་བ་ངོ་སྤྲད་པ་ཙམ་གྱིས་རྟོགས་པ་དང་གྲོལ་བ་དུས་མཉམ་པ་སྟེ། རྟོགས་གྲོལ་དུས་མཉམ་ཨིནྟྲ་བྷུ་ཏི་བཞིན་ཞེས་སོ། །ཕྱི་སྣང༷་བའི་ཡུལ་དང་། ནང་འཛིན་པའི་སེམས༷་གཉིས་ཐོག་མའི་གཞི༷་ལ་གྲོལ༷་བས་ཆེན༷་པོ༷། དཔེ་ཉི་མའི་དཀྱིལ་འཁོར་བཞིན། རིག་པ་ལ་རྣམ་རྟོག་གིས་གནོད་མི་ནུས་པ་ཡིན། རིམ༷་གྱིས༷་པས༷་འཁྲུལ༷་བའི༷་གཞན༷་དབང༷་དུ༷་རྣམ་རྟོག་གི་རྗེས་འབྲང་བས། རིག་པའི་རང་དབང་ཡིན་ན་འཁྲུལ་བ་སོགས་ཉོན་མོངས་པས་གནོད་མི་ནུས་པ་ཡིན་པས་ཤར་གྲོལ་ཡིན། ༈ མཉམ༷་བཞག༷་རང༷་ས༷་ཞེས་པའི་སྐབས། ལྟ་བའི་གདངས་མ་ཤོར་སྒོམ་པའི་ངང་མ་ཤོར་བར་ལྷག་མཐོང་གི་རྩལ་སྦྱང་མ་ཐུབ་ན་ཉམས་མྱོང་གི་ཡེ་ཤེས་རྗེས༷་ཐོབ༷་སྤྱོད༷་ལམ༷་གྲུབ་ཐོབ་སྤྱོད་པ་གཤེགས་པ་དང༷་བསྲེ༷་མི༷་ནུས༷་པས་གཉེན་པོས་རྐྱེན་ཐུབ་དུས་གང་ཤར་གྱིས་ཚུགས་མི་ཐུབ་ཅེས་གསུངས། གཉེན་པོས་རྐྱེན༷་མ༷་ཐུབ༷་ན་རྣམ༷་རྟོག༷༴ རྗེས་ལ་ཐོབ་པའི་ཡེ་ཤེས་ཟང་ཐལ་དུ༴ ༈ རིག་སྟོང་ཆོས་སྐུའི་ལྟ་བ་དེ་ཉིད་ལས་བསྒོམ༷་བྱ༷་གཞན༷་ལོགས་ཤིག༷་ནས་ཚོལ༷་མི༷་དགོས༷། ༈ བྱ་བྱེད་ལས་གསུམ་དང་རྣམ་རྟོག་བཟང་ངན་བར་མ་ཐམས་ཅད་དཔེ་མི་རྒན་བྱིས་པའི་རྩེད་མོ་ལྟ་བ་བཞིན་རྩིས་མེད་རྟོག་མེད་སྒྱུ་མ་ལྟ་བུ་གར་གཏད་ངེས་པ་མེད་པ། སྣང་བ་དུམ་ཆོད་དུ་སྦྱང་བ་དང་། སྤྱི་ལ་སྦྱང་བ་གཉིས་ཀྱིས་གང་སྣང་ཁྲལ་ཁྲོལ་དུ་འགྲོ་གསུངས། འཕྲོས་དོན་ནི། ལས་དང་པོ་བའི་སྐབས་ཞི་གནས་མཚན་བཅས་དང་མཚན་མེད་དམ་རྟེན་བཅས་དང་རྟེན་མེད་གཉིས་ལས། དང་པོ་ནི། མཚན་བཅས་དམིགས་རྟེན་ལ་སེམས་གཏད་པ་དང་། མཚན་མེད་དམིགས་རྟེན་མེད་པར་གནས་ཆའི་ངང་དུ་བཞག་པ་ནི་ཞི་གནས། ཕྱི་ནང་སྣོད་བཅུད་དཔྱོད་བྱེད་ཀྱི་ཤེས་རབ་ཀྱིས་གཏན་ལ་དབབ་པ་ནི་ལྷག་མཐོང་། ཡང་སེམས་རྒོད་པ་དང་བྲལ་བ་ཞི་གནས། བྱིང་རྨུག་གཉིད་གསུམ་དང་བྲལ་བ་ལྷག་མཐོང་། སེམས་འཛིན་གྱི་བསམ་གཏན་དང་བྲལ་བ་ཞི་གནས། རྣམ་ཤེས་ཀྱི་རྟོག་དཔྱོད་དང་བྲལ་བའི་ལྷག་མཐོང་། ཞེས་གསུངས་སོ། །འདིར་རིག་པའི་ངོ་བོ་ཡེ་སྟོང་སྤྲོས་པ་དང་བྲལ་བའི་དབྱིངས་གནས་བྱ་གནས་བྱེད་དང་བྲལ་བའི་ཞི་གནས། དབྱིངས་དེའི་གདངས་འགག་པ་མེད་པའི་ཡེ་ཤེས་ལྷག༷་མཐོང་ཡིན་པས་དེ་གཉིས་དབྱེར༷་མེད༷། ཆོས༷་ཉིད༷་ཀྱི་འཆར་གཞིའི་རིག་པ་དེ་ཉིད་ཡིན་ལ། དེ་ནི་ཡང་དག་གཉུག༷་མའི༷་དྲན་པས་རང༷་ངོ༷་རྒྱུན་སྐྱོང༷་བ༷་དང་། རྗེས་ཐོབ་སྐབས་ཡེངས་ཚེ་དྲན་པ་ཡང་ཡང་བསྟེན་ནས་རང་ངོ་སྐྱོང་བ་དེ་ནི་བློ་འདས་ཆོས་སྐུའི་དོན་ལ་མི་བལྟ་བར། བློས༷་བྱས༷་པའི་བཅོས༷་མ༷་ཐམས་ཅད་སྟོང་པའོ་ཟེར་བ་སོགས་པའི་རྗེས་སུ་འབྲང་ན་མ་རིག་པའི་གཟེབ༷ས་སུ༷༴ ལྟ་བའི་ཐོག་ཏུ་བློ༷་ཐག༷་རྦད་ཀྱིས་ཆོད༷་དགོས༷་པས༷་ཁྲེགས་ཆོད་དང་ཐག་ཆོད་དོན་གཅིག་གོ། ༈ །སྤྱོད་པ་རྒྱས་པར་བཤད་པ་ནི། ད་ནི་དེ་དག་གི་ཚེ་གྲོལ་ལུགས་ལ་སྤྱི་དང་བྱེ་བྲག་གཉིས། སྤྱི་ལ་འབད་བཅས་དང་འབད་མེད་གཉིས། འབད་བཅས་སྣང་བ་ཡུལ་གྱི་བློ་ཅན་ཡིན་ལ། དེ་ནི་རྣམ་རྟོག་གང་ཤར་བ་ངོས་བཟུང་ནས་མ་བཅོས་པར་འཇོག་པ་ནི་འགྱུ་བ་གནས་དག་གི་དགོངས་པ་བསྐྱངས་པ་དེ་ཡིན་ནོ། །འབད་མེད་ནི་རིག་པ་རང་སྣང་གི་བློ་ཅན་ཏེ། དེ་ནི་རིག་པ་རྗེན་པར་ཤར་ཡོད་པའི་ཚེ་བཟང་རྟོག་ངན་རྟོག་ལུང་མ་བསྟན་གསུམ་གྱི་རྟོག་པ་གང་ཤར་ཐམས་ཅད་ཤར་ཙམ་ནས་རྡོ་ཚན་ལ་ཁ་བ་བབས་པ་ལྟར་ཤར་གྲོལ་རྗེས་མཐུད་མེད་པའོ། །བྱེ་བྲག་ལ་གྲོལ་ཚུལ་ལྔ་ཡོད་དེ། ཡེ་གྲོལ། རང་གྲོལ། ཅེར་གྲོལ། མཐའ་གྲོལ། གཅིག་གྲོལ་དང་ལྔ་ཡོད་ཀྱང་། དེ་དག་གི་གནད་རང་གྲོལ་མངོན་སུམ་དུ་སྟོན་པ་གསུམ་པོ་ཐུན་མིན་གྱི་ཁྱད་ཆོས་སོ། །ཉམས་ལེན་ལ་ཤར་གྲོལ་གྱི་གདེངས༷་མེད༷་ན༷་སེམས༷་གནས༷་བསམ་གཏན༷་ཙམ་ལ་ངལ༷་གསོ༷་བ་ནི། ཡུན་རིང་པོའི་མགྲོན་པོས་རེ་ཞིག་ངལ་གསོ་བ་ལྟ་བུའི་སྒོམ་ནི། དཔེ་མུ་སྟེགས་ལྷག་སྤྱོད་ལོ་བཅུ་གཉིས་ལ་བསམ་གཏན་ལ་གནས་པ་བཞིན་ནོ། །ཞེས་པས་རང་ལྟ་མཆོག་འཛིན་བདུད་ཀྱིས་བསླུས་པ་ཡིན་གསུངས་སོ། །བས མ་གཏན་སེམས་གནས་ཀྱི་སྒོམ༷་ཙམ༷་གྱིས་ནི་ཁམ༷ས་གོང༷་མའི༷་གོལ༷་ས༷་ལས༷་མི༷་འདའ༷་ཞིང་། རྣམ་ཤེས་ཚོགས་བདུན་གྱི་ཟག་བཅས་དགེ་བས་མཐོ་རིས་གསུམ། མི་དགེ་བས་ངན་སོང་གསུམ་དུ་འཕེན། ཀུན་གཞིའི་སྟེང་ནས། བདེ་བའི་ཉམས་ལ་གོམས་པ་ཤས་ཆེ་ན། འདོད་ལྷ་དྲུག་གི་ཐོག་མ། གསལ་བ་ཤས་ཆེ་ན་གཟུགས་མེད་ཁམས་བདུན་ནས་འཕགས་པའི་ས་ལྔ་མ་གཏོགས་པའི་སོ་སོའི་སྐྱེ་བོའི་ས་བཅུ་གཉིས། མི་རྟོག་པ་ལ་གོམས་པ་ཤས་ཆེ་ན། སྐྱེ་མཆེད་མུ་བཞི་དང་། ཚོགས་དྲུག་བཀག་ན་ལྷ་ཚེ་རིང་པོ་རྣམས་སུ་སྐྱེ་བའོ། །རྒྱུ་མཚན་དེའི་ཕྱིར་ན་ཁམས་གསུམ་གྱི་བྱེད་པོ་སེམས་ཡིན་གསུངས་སོ། །སེམས་གནས་ཙམ་ལ་ཤར་གྲོལ་གྱི་གནད་མེད་པས་ཆགས༷་སྡང༷༴ དགེ་སྡིག་གི་ལས་འདུ༷་བར་བྱེད༷་པས་ན༷། ༈ ལྟ་བ་རིག་སྟོང་ཟུང་འཇུག་དེ་ཉིད་ཇི་བཞིན་པར་མ་རྟོགས་ན་ཐག་ཆོད་ཀྱི་བློ་གདེངས་མི་ཐོབ་པའམ་མི་ཁེལ་བས་ན། སྟོང་པ་དམ་པས་མདུན་ནས་ཚོལ། ཞེས་སོ། །དེའི་ཕྱིར་ན་གོང་ན་བཤད་པའི་ཤར་གྲོལ་གྱི་གནད་དེ་གལ་ཆེ་ལ། གྲོལ་ཚུལ་ནི། གང་ཟག་གཅིག་གི་རྒྱུད་ལ་བཟང་རྟོག་ངན་རྟོག་ལུང་མ་བསྟན་གསུམ་ལས་མེད་དེ། །བཟང་རྟོག་ནི་གྲོལ་བ་མ་ཟད་ངོས་ཟིན་པའང་དཀའ་སྟེ། དད་པ་དང་སྙིང་རྗེ་ལྟ་བུ་སྐྱེས་པའི་ཚེ། ཡུལ་དཀོན་མཆོག་གསུམ་བདེན་གྲུབ། ཡུལ་ཅན་རང་བདེན་གྲུབ་ཏུ་བཟུང་ན། དད་པ་སོགས་བདེན་གྲུབ་ཀྱི་རྣམ་པར་ཤར་བ་ཡིན། སྙིང་རྗེའང་དེའང་མཚུངས་སོ། །དེ་ལྟར་དགོས་ན་བདེན་མེད་དབྱིངས་ཀྱི་རྒྱན་དུ་ཤར་བའམ་གྲོལ་དགོས། ཡང་འཆི་བ་མི་རྟག་སོགས་སྐྱེས་ན། དེའང་སྐྱེ་འཆི་མཚན་འཛིན་གྱི་རྟོག་པ་དབྱིངས་སུ་དྭངས་དགོས། ཡང་ན་ཟས་གོས་གནས་མལ་ཡོ་བྱད་ཀྱི་སྐྱིད་སྣང་སོགས་ཤར་བའི་ཚེ་གྲོལ་བ་ཕར་ཞོག །སྣང་བ་ལྟར་དུ་ཞེན། ཞེན་པ་ལྟར་དུ་འཐས་ནས་ལས་གསོག་པ་ཡིན་གསུངས། ངན་རྟོག་ཆག༷ས་སྡང༷་རྨོང༷ས་གསུམ་ཡང་གྲོལ་དགོས་མ་གཏོགས། ཕན་མེད་གནོད་མེད་ཀྱི་རྣམ་རྟོག་ལུང་མ་བསྟན་རྣམས། ཐ་མལ་པས་ཀྱང་ལག་ལེན་ལ་མི་བཏབ། བཏབ་ཚོད་མེད། རྣམ་རྟོག་ཕྲ་རགས་ཐམས་ཅད་གྲོལ་དགོས་པས་ཁ་ཕོ་མ་མཐོ། རང་རྒྱུད་ལ་བརྟག་དཔྱད་ཀྱིས། གྲོལ་ལུགས་ཀྱི་གནད་གང་ལྟར་ན་གྲོལ་གཞི་རིག་སྟོང་ཟུང་འཇུག །གྲོལ་བྱ་བཟང་རྟོག་ངན་རྟོག་ལུང་མ་བསྟན་གསུམ། གྲོལ་ཚུལ་ལྔ་ལ་སོགས་པས་གྲོལ་བས། ཡེ་གྲོལ་ཡིན་པས་བསྐྱལ་གཞི་མེད། །རང་གྲོལ་ཡིན་པས་གཉེན་པོ་མེད། །ཅེར་གྲོལ་ཡིན་པས་མཐོང་སར་ཡལ། །གཅིག་གྲོལ་ཡིན་པས་སྔ་ཕྱི་མེད། །རང་ཤར་རང་གྲོལ་ཉམས་ལེན་གྱི་སྲོག་ཡིན། མི་གྲོལ་བ་མེད་པས་རེས་འགའ་ལྟ་བུ་མ་ཡིན། མཉམ་བཞག་གི་སྐབས་སེམས་བྱུང་འོག་འགྱུ་ནི། རྣམ་རྟོག་སྣ་ཚོགས་ཤར་བ་གྲོལ་མ་ཐུབ་པའི་ཚེ་དྲན་པ་ཡང་ཡང་བསྟེན་དགོས། རྩིས་ཟིན་གྱི་རྟོག་པ་ཆུ་ལ་རི་མོ་བྲིས་པ་ལྟ་བུ། མཉམ་བཞག་དེ་ཕུབ་མ་ལྟ་བུ། འོག་འགྱུའི་རྟོག་པ་ཆུ་ལྟ་བུ། འོག་འགྱུའི༷་རྟོག་པ་ས་རྡོ་ལ་རི་མོ་བྲིས་པ་ལྟ་བུས་ནི་འཁོར་བའི་ལས་གསོག །ཕྲ༷་བ་ཉམས་བདེ་གསལ་མི་རྟོག་སོགས་དང་རགས་པ་ཚོགས་དྲུག་གི་ཡུལ་ལ་འགྱུ་བའི་རྣམ༷་རྟོག༷་ཅི༷་སྐྱེས༷་ཐམས༷་ཅད༷་ཐོག་མའི་གཞི་ན་མེད། མཐར་ཕྱིན་འབྲས་བུའི་དུས་ན་མེད་པའི་འཁྲུལ་པ་ཅི་སྐྱེས་ཐམས་ཅད་ཤར་གྲོལ། ༈ བློས་བྱས་འཇུར་དྲན་གཞོན་ནུ་མས་བལ་འཁལ་བ་ལྟ་བུ་ཕྲ་སྦོམ་འཇུ་རུ་ཅན་ཡིན། གནས་ན་བྱ་ར་བ་ལྟ་བུ། འཕྲོ་ན་ཕྱུགས་རྩིས་ལྟ་བུ་རྣམ་རྟོག་ཐམས་ཅད་ངོས་བཟུང་ནས་དགག་སྒྲུབ་བྱེད་པ་མ་ཡིན་པར་རིག་ངོ་འཕྲོད་པའི་གང་ཟག་ཡིན་ན་རང༷་བབ༷་གཉུག་༷མའི༷་དྲན༷་པ༷་དང༷་མ༷་བྲལ༷་བར༷་དྲན་སྣང་ཡེ་ཤེས་ཀྱི་འཁོར་ལོ། རྣམ་རྟོག་ཤར་ཙམ་ནས་དྲན་མཁན་ཆོས་ཉིད་དུ་གྲོལ་ན་ཐོག་མའི་སྐྱོང་ཚུལ་མ་ནོར་བ་ཡིན་པས་ན། དྲན་པ་རང་གྲོལ་ཐིག་ལེའི་ངང་། ཇི་སྐད་དུ། བློས་བྱས་འཇུར་བ་དྲན་པ་ནི། །ཀློད་ན་གྲོལ་བར་ཐེ་ཚོམ་མེད། །ཅེས་སོ། ༈ །རྣམ༷་རྟོག༷་ཅི༷་ཤར༷་རང༷་ངོ༷་ཤེས༷་པ༷་ཙམ༷་གྱིས་འཁྲུལ༷་བའི༷་ལས༷་རྒྱུན༷་མི༷་ཆོད༷་པས༷། འགྱུ་བ་ངོ༷་ཤེས༷་པ༷་དང་མཉ༷མ་དུ༷་རིག༷་པའི༷་རང༷་ངོ༷་ཅེར༷་གྱིས༷་མཐོང༷་བའི༷་རྣམ་རྟོག་ཤར་བ་ཙམ་ནས་མཉམ་བཞག་དང་རྗེས་ཐོབ་ཀྱི་ལྟ་བ་དེ་ཉིད་སྔར༷་འདྲིས༷་ཀྱི༷་མི་དང་འཕྲད་པ་བཞིན་དུ་རྟོག་དཔྱོད་མེད་པར་ལྟ་བ་རིག་སྟོང་ཟུང་འཇུག་གི་ཡེ༷་ཤེས༷་དེ་ཉིད༷་ངོས༷་བཟུང༷་ནས༷་ང༷ང་དུ༷་བཞག་གོ། ༈ །རིག་པ་རྗེན་ལ་ཤར་ཡོད་པའི་ཚེ་གང་ཅི༷་ཤར༷་བ༷་ཐམས༷་ཅད༷་མི༷་དགག༷་པར་རྩལ་གྱི་རྣམ་རྟོག་ཇི་ཤར་ཐམས་ཅད་ལྷག་མཐོང་གི་རྩལ་སྦྱང་ཡིན་པས་ཤར༷་དུ་བཅུག༷་ལ༷། གང༷་ཤར༷་ཐམས་ཅད་རིག་པའམ་གཉུག༷་མའི༷་ངང༷་དུ་༷དག༷་པ༷་ཡིན་པས། ཆོས༷་སྐུའི༷་རྩལ༷་སྦྱོང༷་བའམ༷་མངོན་དུ་འགྱུར་བྱེད་ཀྱི་ཐབས་སམ་གྲོགས་ཡིན་པས་རྟོག་པ་གང༷་ཤར༷་ཐམས༷་ཅད༷་རིག༷་པ༷་རང་ཉིད་ཀྱི་རྩལ༷་དུ་འཆར་ཞིང་། དུག༷་ལྔའི༷་རྣམ༷་རྟོག༷་ཅི༷་ཙམ༷་རགས༷་པ་ཞེ་སྡང་དྲག་པོ་ལྟ་བུ་སྐྱེས༷་ཀྱང༷། ལྟ་བ་ཕྱིན་ཅི་མ་ལོག་པ་ངོ་འཕྲོད་པའི་གང་ཟག་དེའི་རིག་པ་དེ་ཙམ་དུ་གྲོལ༷་བའི༷་ནུས་པའམ། རིག༷་པ༷་གསལ༷་ངར༷་དང༷་ལྡན༷་པས༷་ན༷། དཔེར་ན་སྐྱེས་བུ་ཁ་ཟས་དང་གཉིད་སོགས་ཀྱིས་ལུས་སྟོབས་རྒྱས་པ་བཞིན། གང༷་ཅི༷་ཤར༷་བ་རིག༷་སྟོང༷་རྗེན༷་པས༷་རྟོག་ཚོགས་ཟས་སུ་ཟ་བའོ། ༈ །རིག༷་པ༷་རང་གི་ངོ༷་བོ༷་ཟང༷་མ་ཐལ༷་བྱུང་ཕྱི་ནང་སྒྲིབ་གཡོག་དང་བྲལ་བ་ཡེ་ཤེས་ཡིན་གྱི༷་དེའི་ངང༷་ལས༷་རིག་པའི་རང༷་རྩལ༷་དུ༷་འཆར༷་བའི༷་ཚེ༷་ན་བླང༷་བྱ་བཟང་རྟོག་དང་དོར༷་བྱ་ངན་རྟོག་ཐམས་ཅད་སྤང་བླང་མེད༷་པར༷་གྲོལ་བ་བསྐྱངས༷་བས༷། རྣམ་རྟོག་ཤར༷་བའི༷་དུས༷་ནས༷་རང་སར་གྲོལ༷་བ༷་དཔེ་ནམ་མཁའི་བྱ་ལམ་ལྟ་བུ། ཆོས༷་སྐུའི༷་ཡོོ༷་ལངས༷་སམ་རང་བཞིན་ལས༷་མ༷་འདས༷་པས༷་ན༷་ཇི༷་འགྱུ༷་ཆོས༷་སྐུ༷་རྒྱལ༷་པོའི༷་རྩལ། སེམས༷་རྟེན༷་མ༷་རིག༷་བདེན་འཛིན་ལས་གྲུབ་པའི་འཁྲུལ༷་བ་ངའོ་སྙམ་པའི་གང་ཟག་གི་བདག་དང་། ཀ་བ་སོགས་ཆོས་བདག་གཟུགས་སོགས་བདེན་གྲུབ་དུ་འཛིན་པ་དེའི་གཉེན་པོ་རིག༷་པ༷་ཡེ༷་ཤེས༷། འོད་གསལ་རྒྱུན་ཆད་མེད་པ་ཞེས་འཁྲུལ་བའི་རྒྱུན་བཅད་པ་ཡིན། འགྱུ༷་བ༷་གང༷་སྐྱེས༷་རང༷་གི༷་ངོ༷་བོ༷་སྟོང༷་པ་རིག་པ་ལས་མི་གཞན་པ་རྒྱ་མཚོ་ལས་རླབས་བཞིན་རང་བྱུང་རང་ཐིམ་པའོ། ༈ །རྣམ༷་རྟོག༷་སྒོམ༷་དུ༷་ཤར༷་བ་ནི་གང་ཤར་བ་ཐམས་ཅད་སྒོམ་དུ་འཁྱེར་ཤེས་པ་ཡིན། གནས༷་འགྱུའི༷་བར༷་ལག༷་འགྱེལ༷་ཞེས་པ་རིག་པ་རྗེན་པར་ཤར་ནས་རླུང་སེམས་ཤིན་ཏུ་དྭངས་པའི་ཚེ་རྣམ་རྟོག་མི་འཆར། གལ་ཏེ་ཤར་ཀྱང་དེའི་ངང་ལས་མི་འདའ་བས་གནས་པའི་གོ་ས་མི་བཀག །གནས་ན་ཤར་ཆ་འགག་པ་མེད་པས་ཤར་བའི་གོ་ས་མི་བཀག་པས་ན། འཆར༷་ལུགས༷་སྔར༷་དང༷་འདྲ༷་བ༷་ལ། ༈ ཐ་མལ་བས་རྣམ་རྟོག་ལ་སྣང་བ་ལྟར་དུ་ཞེན། ཞེན་པ་ལྟར་དུ་འཐས་ནས་བདེན་གྲུབ་ཏུ་ཤར་ནས་དགེ་སྡིག་གི་ལས་འདུ་བར་བྱེད་པས་འདུ་བྱེད། ༈ འགྲེལ་ཚུལ་ལ་སྔར༷་འདྲེས༷་པའི་རྗེས་ཐོབ། སྦྲུལ༷་མདུད༷་མཉམ་བཞག་སྐབས་ལྟར་གསུངས་པ་ཞལ་རྒྱུན་ནོ། །གཞུང་གི་འགྲེལ་ཚུལ་གང་ཟག་ལམ་པ་བ་ལྟར་དུ་ཤེས་པའོ། །ཡང་དབང་པོ་རབ་འབྲིང་ཐ་མ་གསུམ་དུ་ཡང་བཞེད་པ་ཡོད་གསུངས། ཁང༷་སྟོང༷་རྐུན༷་མ༷་ཞེས་པ་ས་མི་འཆོར་བས་རྣམ་རྟོག་ལ་ཐོབ་རྒྱུ་མེད། རིག་པ་ལ་ཤོར་རྒྱུ་མེད་པ་ཡིན་ནོ། །དཔེ་རྡོ་རྗེ་དང་ཕ་ལམ་རལ་གྲི་ལྟ་བུའོ། །དེ་ལྟ་བུའི་གྲོལ༷་ལུགས་༷་ཀྱི། ༈ སྒོམ་པ་ཤེས་ཀྱང་ཞེས་པའི་དོན། སྟོང་ཆ་སོགས་ཡིད་ཤེས་ཀྱི་དམིགས་པར་བཟུང་ནས་གཉིས་འཛིན་གྱི་མཚན་མ་མ་ཞིག་པ་དེ་ཡིན། མི་ཕམ་པས་སོ། ༈ །གོལ་ས་གསུམ་ནི། དང་པོ་རྒྱུ་བསམ་གཏན༷་ཙམ༷་ལ༷་གདེངས༷་བཅས༷་ནས་འབྲས་བུ་ཤི་མ་ཐག་ཁམས༷་གོང༷་མའི༷་བསམ ༷་གཏན༷་དུ༷་སྐྱེ་བ་ཡིན། གཉིས་པ་གནས༷་འགྱུ༷་ངོ༷་ཤེས༷་པ༷་ཙམ༷་གྱིས༷་ནི་ཆོག༷་སྙམ་ན་ཐ་མལ་བ་དང་ཁྱད་མེད་པའོ། །གསུམ་པ་ཐམས་ཅད་སྟོང་པའམ་ཆོས༷་སྐུ༷འོ་ཞེས་སོགས་བློས༷་བྱས༷་ཀྱི་རྒྱས༷་བཏབ་པ་སྟོང་ཉིད་རྒྱས་འདེབས་སུ་ཤོར་བ་ཡིན་པས་རྐྱེན༷་ངན༷་དང༷་འཕྲད་ཚེ༷་རྟོག་པའི་དུག་རོ་ལྡང་བ་ཡིན་ནོ། ༈ །རྣམ༷་རྟོག༷་གང༷་སྐྱེས༷་འཆར་བའམ་བསླངས༷་ནས༷་འཁྲུལ་རྟོག་བཟང་ངན་བར་མ་ཐམས་ཅད་ཡེ་༷ཤེས་སུ་དག༷་ཚེ༷། རྐྱེན༷་ངན༷་པ་གང་བྱུང་ཡང་གྲོགས༷་སུ༷་འཆར་བ་ཞེས་པ། རྐྱེན་ངན་གྲོགས་སུ་འཆར་བ་འོད་གསལ་གྱི་ཕ་ཕོག །ཅེས་སོ། །རྒྱུ་ཉོན༷་མོངས༷་པའི་རྟོག་པ་གང་ཤར་ལམ༷་དུ༷་འཁྱེར་བར་བྱེད༷་པ་ནི་སྔགས་ཀྱི་ལམ་བདེན། འབྲས་བུ་འཁོར༷་བ༷་མ༷་སྤངས༷་བར་གནས༷་ཚུལ་སྐུ་དང་ཡེ་ཤེས་སུ༷་དག༷་པ་ནི་འགོག་བདེན། སྲིད༷་པ་འཁོར་བ་དང་། ཞི༷་བ་མྱང་འདས་ཀྱི་འཆིང༷་བ༷་མཐའ་དག་ལས༷་གྲོལ༷་ཏེ༷། སེམས་སེམས་བྱུང་གི་རྟོག་པ་ཐམས་ཅད་འཆར་གཞི་ལས་ཤར་ཆོས་ཡིན་པས་རྣམ་རྟོག་ཐམས་ཅད་ཕར་དྭངས་ཚེ་འོད་གསལ་རང་རིག་པའི་ཡེ་ཤེས་ཤར་ཡོད་པས། ཡེ་ཐོག་མ་མེད་པ་ནས་སེམས་དང་ལྷན་སྐྱེས་ཀྱི་ཡེ་ཤེས་ཡིན་པས་ན། འཆར་ཆོས་མེད་ན་འཆར་གཞི་མེད། ལྡོག་ཆ་ནས་ཤེས་དགོས། ལྟ་བའི་སྟེང་ནས་སྒོམ་པའི་ངོ་སྤྲོད་པ་དེའི་སྟེང་དུ་གདེངས༷་གྲོལ༷་ཐོག༷་ཏུ༷་བཅའ༷་བ༷་སྟེ༷་གནད༷་གསུམ༷་པའོ༷། ༈ །ལྟ་སྒོམ་སྤྱོད་གསུམ་གྱི་བསྡུས་དོན་ནི། ལ་བཟླ་གསུམ་གྱི་གནད་དེ་ལ་བརྟེན་ནས་ལྟ༷་བ་སྒོམ༷་པ་སྤྱོད༷་པ་གསུམ་དང་། ད་ལྟ་ནས་སྐུ་གསུམ་གྱི་བསྒྲུབ་གཞིའི་འབྲས༷་བུ༷་ལམ་བྱེད་བཞི་ཀ༷་ཚང་བ། དེ་ལས་མི་འདའ་བ་དམ་ཚིག་དང་ལྔ༷་པོ༷་རིག་པ་ཟང་ཐལ། ༈ ལྟ་བ་ལ་དབྱེ་ན་ཆོས་ཅན་ལྟ་བའི་ལྟ་བ་གནས་ཚུལ་དག་པ་སྐུ་དང་ཡེ་ཤེས་སུ་རྟོགས་པའོ། །ཆོས་ཉིད་ལྟ་བའི་ལྟ་བ་ནི་དེའི་རང་བཞིན་ཡེ་སྟོང་སྤྲོས་པ་དང་བྲལ་བའི་དབྱིངས་སོ། །འདིར་རང་རིག་ལྟ་བའི་ལྟ་བ་ནི་མངོན༷་སུམ་༷རྗེན༷་པའི༷་ཡེ༷་ཤེས༷་དེ༷་ཉིད༷་ལས་གྲོལ་བ་ཞིག་ནམ༷་རྟོགས་ཀྱང་རིག་པ་ཡེ་ཤེས། ༈ ལྟ༷་སྒོམ༷་ངོ་བོ་གཅིག་ལ་ལྡོག་ཆ་ཐ་དད་དུ་ཕྱེ་བས་དུ༷་མ༷་རོ༷་གཅིག། ༈ ཐེག་པ་བརྒྱད་པོ་འོད་གསལ་རྫོགས་ཆེན་གྱི་ཐེག་པའི་ལམ༷་སྟེགས༷་སམ༷་གྲོགས༷་ཡིན་ཏེ། དཔེར་ན་བཞོན་པ་བཟང་པོ་ལྟ་བུ་ནི་འདིའི་ཐེག་པ་ཡིན། འདིར་ཐེག་པ་ནི་མཐར་ཐུག་གི་འབྲས་བུ་ཡིན་ནོ། །ཁྲེགས་ཆོད་ཀྱི་ཀ༷་དག༷་གི་རིག་༷པ༷་དང༷་། ཐོད་རྒལ་གྱི་ཤེས༷་རབ༷་རང༷་བྱུང༷་གི༷་སྒྲོན༷་མ༷་གཉིས་དོན་གཅིག་པས་དེའི་རང༷་ཞལ༷་མཇལ༷་བས༷་དེ་ལ་གོམས་པའི་ཚེ་དེའི༷་རྩལ༷་ཐམས་ཅད་རིམ་བཞིན་སྒོམ༷་བྱུང༷་གི༷་ཤེ༷ས་རབ༷། ༈ ཆོས་ཅན་གྱི་སྣང་ཚུལ་ཆོས་ཉིད་ཀྱི་གནས་ཚུལ་ཐམས་ཅད་མཁྱེན༷་པའི༷་ཀློང་། དཔེར་ན་དབྱར༷་གྱི༷་ཆུ༷་བོ༷་ལྟར༷་རྡོལ༷་བ༷་དང་། ལྟ་བའི་བསྡུས་དོན་རིག་པའི་ངོ་བོ་ཡེ་སྟོང་སྤྲོས་པ་དང་བྲལ་བའི་གདོད་མའི་སྟོང་ཆེན་གྱི་དབྱིངས་དེ་ཉིད་ཀྱི་གཤིས༷་ནི་བརྩེ་བའི་སྙིང༷་རྗེ༷་ཆེན༷་པོའི༷་རྣམ་པར་ཤར་ནས་ཡུལ་རྐྱེན་དང་འཕྲད་ཚེ་བརྩེ་བའི་ཐུགས་རྗེ་ཕྱོགས་དང་རིས་སུ་ཆད་པ་མེད་པར་གཞན་སེམས་ཅན་གྱི་ཁམས་ལ་འཇུག༷་པ༷་ནིི༷་མཚན་ཉིད་དམ་ཆོས༷་ཉིད༷་ཡིན༷་པས༷་ན༷། ལྟ་བ་མ་ནོར་བ་ངོ་འཕྲོད་ནས་དེ་ཉམས་སུ་བླངས་ན་སྙིང་རྗེ་རྩོལ་བས་བསྒོམ་མི་དགོས་གསུངས། མཁྱེན༷་བརྩེ༷་འབྲེལ༷་བའི༷་སྒོམ༷་པ༷་དང་། སྒོམ་པའི་བསྡུས་དོན། དེ་ལྟར་རྣམ་ཀུན་མཆོག་ལྡན་གྱི་སྟོ༷ང་ཉིད་༷དམ་གདོད་མའི་སྟོང་ཆེན་གྱི་དབྱིངས་དེ་ཉིད་དང་བརྩེ་བའི་སྙིང༷་རྗེ༷་ཆེན་པོ་ཟུང༷་དུ༷་འཇུག༷་པའི༷་ལམ༷་གྱི༷་གནད༷། རང༷་རྩལ༷་དུ༷་འཆར༷་ལ༷་མཉམ་བཞག་ལ་ཡེ་ཤེས་ཀྱི་ཚོགས་དང་རྗེས་ཐོབ་སྐབས་དེ༷་ལྟ་༷ བུའི༷་སྤྱོད༷་པ༷་རྒྱུ་བསོད་ནམས་ཀྱི་ཚོགས་ཕྱིན་དྲུག་སོགས། ཞི་བ་ཕྱོགས་གཅིག་པ་ལྟ་བུར་མི་གོལ། སྤྱོད་པའི་བསྡུས་དོན་ནོ། ༈ །ཤིན་ཏུ་ཟབ་པར་གདམས་པ་ནི། སྙིང༷་ཐིག༷་རྡོ༷་རྗེ༷་སྙིང༷་པོ༷་འོད་གསལ་རྫོགས་པ་ཆེན་པོ་གཞི་ལམ་འབྲས་བུའི་གནད༷་ཐམས་ཅད་སྨན་གྱི་འཐུས༷་ཀ༷་ལྟར་བསྡུས་པ་འདི༷་ལས༷་ལྷག༷་པ༷་གཞན་ཞིག་མེད༷་པས༷་འོ་མ་སྲུབ་པ་ལས་མར་ལྟ་བུ་མན་ངག་གི་ཉི ང༷་ཁུར་ངེས་ཀྱང་། བླ༷་མ༷་དམ༷་པའི༷་ཞལ༷་ལུང༷་ཇི་ལྟ་བ་བཞིན་དོན་ལ་ནོར༷་ས༷་མེད༷་པ༷་ཚིག་ལ་ལྷག་ཆད་མེད་པ་ལས། ༈ ཆོས་གཏེར་མ་ཡིན་པའི་འཇིག༷་རྟེན༷་གྱི་ནོར་གཏེར༷་ཕལ༷་པ༷། ༈ སྙིང་ཐིག་གི་ལུགས་འདིར་ཡང་དག་སངས་རྒྱས་ལྕེ་བཙུན་སེང་གེ་དབང་ཕྱུག་ལྟ་བུ་གདུང་དང་རིང་བསྲེལ་མ་བཞག །མངོན༷་རྫོགས༷་སངས་རྒྱས་ཀུན་མཁྱེན་ཀློང་ཆེན་རབ་འབྱམས་ལྟ་བུ་གདུང་དང་རིང་བསྲེལ་འགྲོ་བའི་ཚོགས་བསགས་པའི་དོན་དུ་བཞག་པ། དེ་ལྟ་བུའི་སངས༷་རྒྱས༷་དེ་ལ་རྒྱལ༷་བ༷་ཐམས་ཅད་ཀྱི་དགོངས༷་བརྒྱུད༷་ཀྱི་ཐུགས་བཅུད་རྟོགས༷་ཤིང༷་ཀུན་མཁྱེན་ཆེན་པོ་སྐུ་མྱ་ངན་ལས་འདས་ནས་ལོ་ལྔ་བརྒྱ་ལྷག་ཙམ་སོང་བའི་རྗེས་སུ་རིག༷་འཛིན༷་འཇིགས༷་མེད༷་གླིང༷་པས༷་མཛོད་བདུན་སོགས་ལ་གཟིགས་པས་ངེས་ཤེས་ཡང་དག་མ་སྐྱེས་པའི་ཚེ་མཆིམས་ཕུ་ནགས་ཀྱི་འདབས་སུ་ལོ་གསུམ་དུ་ཀུན་མཁྱེན་ཆེན་པོ་ལ་གསོལ་བ་རྩེ་གཅིག་ཏུ་བཏབ་ཅིང་བླ་སྒྲུབ་ཐིག་ལེའི་རྒྱ་ཅན་ལ་བརྟེན་ནས་བསྒྲུབས་པས་ཡེ༷་ཤེས༷་ཀྱི༷་སྐུས༷་ལན་གསུམ་དུ་ཞལ་མངོན༷་སུམ༷་དུ༷་བསྟན༷་ནས༷་རིག༷་འཛིན༷་བརྡ༷་རྒྱུད༷། ཡེ་ཤེས་བླ་མ་ལས། གནད་གསུམ་གྱི་མན་ངག་འདི་ཀུན་མཁྱེན་བླ་མས་ཁོ་བོའི་བགོ་སྐལ་དུ་བཞག་ནས་མཆིམས་ཕུ་ནགས་ཀྱི་དུར་ཁྲོད་དུ་ཕྱིན་པ་ཡིན་ནོ། །གསུངས་སོ། །དེས་ཁོ་བོ་དཔལ་སྤྲུལ་རྡོ་རྗེ་འཆང་བདག་གི་དྲིན༷་ཆེན༷་རྩ༷་བའི༷་བླ༷་མ༷་འཇིགས་མེད་རྒྱལ་བའི་མྱུ་གུ་ལ༷་ཞལ༷་ནས༷་སྙན༷་དུ༷་བརྒྱུད༷་དེ༷་གདམས༷་པ་ཟབ་མོ་ངག་གིས་བརྗོད་བྱའི་སྒོ་ནས་ལྟ་བའི་ངོ་སྤྲོད་བཏབ་ནས་ཆོས་ཉིད་མངོན་སུམ་དུ་མཇལ་ཏེ། དེ་ལྟ་བུའི་གདམས་པ་ཟབ་མོ་འདི་ཉམས༷་སུ༷་མི་ལེན༷་པའི༷་གང༷་ཟག༷་སྔགས་རྫོགས་ཆེན་ལ་མི་དད་ཅིང་ཐེ་ཚོམ་གྱི་སྐུར་བ་འདེབས་པ་རྣམས་ལ་བསྟན་དུ་ཕངས་ཤིང་། འདི་ལྟ་བུའི་གདམས་པ་ཟབ་མོ་ཉམས་སུ་ལེན་པ་སྔགས་རྫོགས་ཆེན་ལ་དད་པ་དང་ངེས་ཤེས་ཡང་དག་པ་སྐྱེས་ནས་ཉམས༷་སུ༷་ལེན༷་པའི༷་གང༷་ཟག༷་ལ༷་བསྟན༷་པར༷་བྱ༷་བ་སྟེ། ཞེས་ཟབ་པར་གདམས་པ་ཡིན་གསུངས། ཞེས་པ་འདི་ཡང་འབངས་ཀྱི་ཐ་ཤལ་སྙོམས་ལས་མཁན་དེས་བྲིས་པ་དགེ་ལེགས་འཕེལ།། ཚིག་གསུམ་གནད་བརྡེག་གི་ཟིན་བྲིས་བླ་མའི་ཞལ་རྒྱུན།ཚིག་གསུམ་གནད་དུ་བརྡེག་པའིི་མན་ངག་བླ་མ་དམ་པ་དག་གི་ཞལ་ལུང་དང་བཅས་པ་བཞུགས། མཚུངས་མེད་ཐུགས་རྗེའི་མངའ་བདག་དྲིན་ཆེན་རྩ་བའི་བླ་མ་ལ་ཕྱག་འཚལ་ལོ། །འདིར་ལྟ་སྒོམ་སྤྱོད་པའི་གནད་ཉུང་ངུར་ཉམས་སུ་ལེན་པའི་ཚུལ་འཆད་པར་འདོད་ནས། དང་པོ་དང་པོ་བླ་མ་དཀོན་མཆོག་ཀུན་འདུས་ཀྱི་ཀྱི་ངོ་བོ་བླ་མ་ཡིན་པའི་ཕྱིར་དེ་ལ་ཕྱག་འཚལ་བ་ཁོ་ནས་སྐྱབས་གནས་ཇི་སྙེད་པ་ལ་ཕྱག་འཚལ་བར་འགྱུར་བའི་ཕྱིར། མཚོན་བྱེད་དཔེའི་བླ་མ་གཟུགས་སྐུ་ཞལ་ཕྱག་གི་རྣམ་པ་དེ་ཉིད་ཡིན་ལ། མཚོན་བྱ་དོན་གྱི་བླ་མ་སྙིང་དབུས་ཀྱི་འོད་གསལ་དེ་ཉིད་བླ་མའི་མན་ངག་གིས་སད་པར་བྱས་ནས་དེ་ཉིད་ཉམས་སུ་བླང་བ་སྐྱེ་མེད་དོན་གྱི་བླ་མ་ཡིན་པས་ན་བླ་མ་ལ་ཕྱག་འཚལ་ལོ། །ཞེས་སོ། །དེ་ནས་བཤད་བྱའི་དོན་ལྟ་སྒོམ་སྤྱོད་གསུམ་ཡང་རྩ་རྒྱུད་ཀྱི་བླ་མ་ཐམས་ཅད་རང་སེམས་དང་དབྱེར་མེད་པར་ཤེས་ནས་ཉམས་སུ་བླངས་ན་ལྟ་སྒོམ་སྤྱོད་གསུམ་ཡང་རིག་པའི་ཡེ་ཤེས་དེར་འདུ་བ་ཡིན་པས་ན་ལྟ་སྒོམ་སྤྱོད་གསུམ་༼ཉེ་བརྒྱུད་ཀྱི་༽རྩ་བརྒྱུད་ཀྱི་བླ་མའི་མཚན་དོན་དང་སྦྱར་ནས་འཆད་པའི་དང་པོ་ནི། དབྱིངས་སྤྲོས་པ་དང་བྲལ་བའི་ཆོས་ཉིད་༼མདོ་ལྟར་༽བདེར་གཤེགས་སྙིང་པོའི་༼ཕ་རྒྱུད་ལྟར་གཞི་རྒྱུད་སོགས་༽ ཀློང་ཆེན་པོ་༼རིག་པའི་དབྱིངས་༽ ན་༼རོལ་པ་༽འཁོར་འདས་ཀྱི་སྣང་བ་རབ་འབྱམས་ཇི་སྙེད་པ་ཐམས་ཅད་ཆོས་ཉིད་མཉམ་པ་ཉིད་དུ་རྫོགས་པའི་༼མཉམ་པ་ཆེན་པོའི་༽དོན་ཤེས་པ་ནི་ལྟ་བ་ཡིན་པས་ན། ལྟ་བ་ཀློང་ཆེན་རབ་འབྱམས་ཡིན། དེ་ལྟ་བུའི་ལྟ་བ་སྤྲོས་བྲལ་༼གནས་ལུགས་༽ གྱི་རང་བཞིན། མཁྱེན་ཆ་ཤེས་རབ་༼ རྣམ་པར་མི་རྟོག་པའི་ཡེ་ཤེས་ལྷག་མཐོང་འགྱུ་བ་རང་གྲོལ་དུ་དག་པས་རྒོད་པའི་མཐའ་དང་བྲལ་བའི་ཞི་གནས། གསལ་བའི་ངར་དང་མ་བྲལ་བས་བྱིང་བའི་མཐའ་དང་བྲལ་བའི་ལྷག་མཐོང་ངོ་། ༽ལྷག་མཐོང་གིས་གཏན་ལ་འབེབས་ཤིང་སྟོང་ཉིད་དེ་ཡང་སྙིང་རྗེ་བརྩེ་བ་ཆེན་པོའི་ཞི་གནས་ཀྱི་༼རིག་པ་ནི་ཤེས་རབ་རང་བྱུང་གི་སྒྲོན་མའི་ངོ་བོ་ཡིན་པས་ན་ཤེས་རབ་ཆེར་འགྲོ་བ་དང་། ཐུགས་རྗེ་ཀུན་ཁྱབ་ཀྱི་ཡེ་ཤེས་ཡིན་པས་སྙིང་རྗེ་ཆེར་འགྲོ་བ་དང་། ཤེས་རབ་སྙིང་རྗེ་ཟུང་འཇུག་གམ་སྟོང་ཉིད་སྙིང་རྗེ་ཟུང་འཇུག་༽ཐབས་དང་མ་བྲལ་བར་རྩེ་གཅིག་ཏུ་མཉམ་པར་འཇོག་པ་སྟེ། སྟོང་ཉིད་སྙིང་རྗེ་དང་འབྲེལ་བ་ནི་བསྒོམ་པ་ཡིན་པས་ན། བསྒོམ་པ་མཁྱེན་བརྩེའི་འོད་ཟེར་ཡིན། དེ་ལྟ་བུའི་ལྟ་བསྒོམ་དང་ལྡན་པའི་ངང་ནས་རྒྱལ་བའི་མྱུ་གུ་བྱང་ཆུབ་སེམས་དཔའ་རྣམས་ཀྱི་ཚུལ་དང་མཐུན་པའི་གཞན་ཕན་ཕ་རོལ་དུ་ཕྱིན་པ་དྲུག་༼ རིག་པ་གསལ་ངར་ལྡན་པའི་དུས། གང་དུའང་མི་འཛིན་པ་སྦྱིན་པ། མ་ཆགས་པ་ཚུལ་ཁྲིམས། ངང་ལ་མི་སྐྲག་པ་བཟོད་པ། མི་བརྩོན་པ་བརྩོན་འགྲུས། རིག་པ་རང་བབས་ཀྱི་བསམ་གཏན། ཞི་གནས་རང་བྱུང་གི་ཤེས་རབ་དང་དྲུག ཐུན་མོང་མ་ཡིན་པ་ཀུན་ཏུ་བཟང་པོའི་སྤྱོད་པ་སོགས་༽ཉམས་སུ་ལེན་པ་ནི་སྤྱོད་པ་ཡིན་པས་ན། སྤྱོད་པ་རྒྱལ་བའི་མྱུ་གུ་ཡིན། དེ་ལྟ་བུའི་ལྟ་བསྒོམ་སྤྱོད་སྤྱོད་གསུམ་ཉམས་སུ་ལེན་པའི་གང་ཟག་དེ་༼ཤིན་ཏུ་༽སྐལ་བ་དང་ལྡན་པར་སྟོན་པའི་ཕྱིར། དེ་ལྟར་ཉམས་སུ་ལེན་པ་ལ། དེའང་གནས་དབེན་པའི་རི་ཁྲོད་བརྟེན་ནས་ཚེ་འདིའི་བྱ་བ་བཏང་སྟེ་རྩེ་གཅིག་ཏུ་ཉམས་སུ་ལེན་ནུས་ན་ཚེ་འདིར་ཀ་དག་གི་གཞི་ཐོག་ཏུ་གྲོལ་བར་འགྱུར་བས་ན། ཚེ་གཅིག་སངས་རྒྱས་ལ་ཐང་མེད། དེ་ལྟར་མིན་ཀྱང་དེ་ལྟ་བུའི་༼བློ་བྲལ་གྱི་༽ ལྟ་སྒོམ་སྤྱོད་གསུམ་ལ་བློ་ཁ་ཕྱོགས་པ་ཙམ་ཡོད་ཀྱང་། ཚེ་འདིར་རྐྱེན་ངན་ལམ་དུ་ཁྱེར་ཤེས་པ་དང་། ཚེ་འདིའི་བྱ་བཞག་རེ་དོགས་མང་པོ་མི་སྐྱེ་ཞིང་། ཕྱི་མ་བདེ་བ་ནས་བདེ་བར་འགྲོ་བར་འགྱུར་བས་ན། མིན་ཀྱང་བློ་བདེ་ཨ་ལ་ལ། དེ་ལྟ་བུའི་ཕན་ཡོན་དང་ལྡན་པའི་ལྟ་སྒོམ་སྤྱོད་གསུམ་རིམ་བཞིན་འཆད་པ་ལས། དང་པོ་ལྟ་བ་ཉམས་སུ་ལེན་ཚུལ་རྒྱས་པར་འཆད་འདོད་ནས།༼ལྟ་བ་ལ་ཤན་འབྱེད་པ་ནི། ཐེག་པ་རྣམས་ཀྱི་ཡིད་དཔྱོད་དང་། །ཆོས་ཉིད་མངོན་སུམ་ལྟ་བ་གཉིས། །ལྟ་བའི་ངང་ནས་འདྲ་ན་ཡང་། །འདྲའོ་འདྲའོ་ནོར་ར་རེ།༽ ལྟ་བ་ཀློང་ཆེན་རབ་འབྱམས་ནི། དེ་ཡང་དོན་གདམས་ངག་ཚིག་གསུམ་ཉམས་ལེན་གྱི་གནད་ལ་བརྡེག་པས་འཁྲུལ་བའི་སྲོག་གཅོད་པར་བྱེད་པ་ཡིན་པས་ན། ཚིག་གསུམ་དོན་གྱི་གནད་དུ་བརྡེགས། དང་པོ་ལྟ་བ་ངོ་མ་འཕྲོད་པ་ངོ་སྤྲོད་པའི་ཐབས་ལ། སྤྱིར་མཚན་ཉིད་ཐེག་པ་ནས་ལྟ་བ་ལྟ་བ་ལུང་༼སྡེ་སྣོད་གསུམ་དང་༽རིག་༼པ་གཞི་ཀ་དག་༽གིས་༼ མཐའ་བཞི་དག་༽གཏན་ལ་འབེབས་པ་དང་། གསང་སྔགས་ཐུན་མོང་པ་རྣམས་ཀྱིས་དབང་གསུམ་པའི་༼ བདེ་བ་ཆེན་པོའི་དབང་གི་༽དཔེའི་ཡེ་ཤེས་ལ་བརྟེན་ནས་༼འཇུག་ལྡང་སོགས་ཀྱིས་༽ བཞི་པའི་དོན་གྱི་ཡེ་ཤེས་ངོ་སྤྲོད་པ་སོགས་༼སྒོམ་ཐོག་ནས་ལྟ་བ་ཚོལ་བ་༽སོགས་ལུགས་མང་ཡང་། ༼མཛོད་ལས། སྟོན་པའི་བསྟན་པ་རྣམ་གཉིས་ཏེ། སོགས་ལྟར་བཤད་སྒྲུབ་གཉིས་ལས།༽འདིར་སྒྲུབ་རྒྱུད་དམ་པ་རྣམས་ཀྱི་ཕྱག་བཞེས་ལྟར་ན། སེམས་ཀྱི་ཡལ་ས་༼ཡེ་གཞི། གྲོལ་གཞི། གྲོལ་ས། ༽ངོ་སྤྲོད་པ་སྟེ། དེ་ཡང་སེམས་འཁྲུལ་རྟོག་གི་རྦ་རླབས་འཚུབ་པའི་དབུས་ན། ཡུལ་གྱི་རྗེས་སུ་འབྲང་བའི་རྣམ་རྟོག་རགས་པ་དག་གིས་རང་གི་སེམས་ཉིད་ཀྱི་རང་ཞལ་སྒྲིབ་པས་ན་ངོ་སྤྲད་ཀྱང་མི་འཕྲོད་པ་དེའི་ཕྱིར་རགས་པའི་རྣམ་རྟོག་དངས་སུ་འཇུག་པའི་ཕྱིར་༼རྫོགས་ཆེན་གྱི་སྐབས་རླུང་རང་སར་འཇོག་དགོས་པའི་རྒྱུ་མཚན་ནི་འགྲོ་འོང་ལས་ཀྱི་རླུང་རང་དངས་ལ་སོང་ཚེ་ཀུན་རྟོག་ཉོན་མོངས་པའི་རླུང་དག་ནས་རིིག་པ་ཡེ་ཤེས་ཀྱི་རླུང་དབྱིངས་སུ་འཁྱིལ་བ་ནི་རྫོགས་ཆེན་གྱི་ཁྱད་ཆོས་ཡིན།༽དང་པོ་རང་སེམས་ལྷོད་དེ་བཞག །འོན་ཀྱང་རང་སེམས་མ་བཅོས་པར་བཞག་པ་ཉིད་འོད་གསལ་བའི་ཡེ་ཤེས་ཡིན་ལ། བློ་བྱས་བཅོས་མའི་ལམ་གྱིས་གནས་ལུགས་མི་རྟོགས་པས་ན། མ་བཅོས་ལྷན་ཅིག་སྐྱེས་པའི་ཡེ་ཤེས་རང་ལ་གནས་པ་མཚོན་པའི་ཕྱིར། མི་སྤྲོ་མི་བསྡུ་རྣམ་རྟོག་མེད། ལས་དང་པོ་པའི་གནས་སྐབས་ན། སེམས་བཞག་གཉུག་མའི་ངང་བསྐྱངས་ཀྱང་། གནས་ཆ་བདེ་གསལ་མི་རྟོག་ཉམས་ཀྱི་ཞེན་པ་དང་བཅས་པའི་ངང་ལས་འདའ་མི་སྲིད་པས་ན། ངང་ལ་ཕྱམ་གནས་ལྷོད་དེའི་དུས། །རིག་ངོ་མཐོང་ནས་རིག་ཐོག་ཏུ་ཡོད་ཚེ་བདེ་གསལ་མི་རྟོག་སོགས་རྐྱེན་གང་ཡིན་ཀྱང་རབ་རིག་པའི་གསལ་འདེབས་ཡིན། མིན་ཀྱང་རིག་པའི་ངང་མ་ཤོར་ན་མི་སྐྱོན་གསུངས། དེ་ལྟ་བུའི་ཉམས་ཞེན་གྱི་སྦུབས་དང་བྲལ་ནས་རིག་པ་༼ རྣམ་རྟོག་གི་གོས་ཧྲུལ་དང་བྲལ་ནས་༽ གཅེར་བུ་ཟང་མ་ཐལ་བྱུང་གི་གནས་ལུགས་རྗེན་པར་སྟོན་པའི་ཕྱིར། ཐོལ་བྱུང་བློ་རྡེལ་ཕཊ་ཅིག་རྒྱབ། རྣམ་རྟོག་གི་རྒྱུན་ཐག་གཅོད་པ་དང་། བློས་བྱས་ཀྱི་སྒོམ་པ་འཇིག་པ་ལ་གནད་དུ་ཆེ་བས་ཕཊ་སྒྲ་དེ་ཡང་དྲག་ལ་ངར་ཐུང་བ་དགོས་པས། དྲག་ལ་ངར་ཐུང་ཨེ་མ་ཧོ། དེའི་ཚེ་ན་སེམས་འདི་ཡིན་འདི་མིན་གྱི་གཟའ་གཏད་ཐམས་ཅད་དང་བྲལ་བ་ནི་༼གྲོལ་ས་ཉིད་ནི་ཐོག་མ་ལའོ། །ཞེས་པ་ལྟར། ༽གྲོལ་བ་མངོན་དུ་གྱུར་བ་ཡིན་པས་ན། ཅི་ཡང་མ་ཡིན་ཧད་དེ་བ། དེ་ལྟ་བུའི་གཏད་སོ་དང་བྲལ་བའི་ཆོས་སྐུ་དེའི་ངང་ལ་༼རྟོག་བྲལ་གྱི་རིག་པ་མངོན་དུ་རྟོགས་པ། ཟང་ཐ ལ་ནི་ཆགས་ཐོགས་བྲལ་བའི་དོན་ཏེ་ཆགས་ཐོགས་མེད་པའི་དོན་ནི། ཕར་དངོས་པོ་ཐམས་ཅད་ཟིལ་གྱིས་གནོན་པ། ཚུར་གང་གིས་ཀྱང་མི་ཚུགས་པ།༽ ཟང་ཐལ་རྗེན་པའི་རིག་ཆ་སེམས་ལས་འདས་པའི་ཡེ་ཤེས་༼ཤན་འབྱེད་ལ། ཀུན་གཞི་དང་ཆོས་སྐུ། སེམས་དང་རིག་པ། བདེན་གཉིས། ༽ཇི་བཞིན་པར་བཞུགས་པས་ན། ཧད་དེ་བ་ལ་ཟང་ཐལ་ལེ། དེ་ལྟ་བུའི་ཟང་ཐལ་དེ་ཡང་སྐྱེ་འགག་༼ངོ་བོ་སྟོང་པས་ཡོད་པའི་མཐའ་ལས་གྲོལ། རང་བཞིན་གསལ་བས་མེད་པའི་མཐའ་ལས་གྲོལ། ཆོས་སྐུ་ཐིག་ལེ་ཉག་གཅིག་གི་རང་བཞིན་ཡིན་པས་དུ་མའི་མཐའ་ལས་གྲོལ་ལོ། །ཡེ་ཤེས་ལྔའམ་ཉེར་ལྔ་སོགས་ཀྱི་བདག་ཉིད་དུ་བཞུགས་པས་གཅིག་པའི་མཐའ་ལས་གྲོལ་བས་ན་རིག་པའི་ཡེ་ཤེས་སུ་རྟོགས་པས་ཆད་མཐའ་སེལ། གསལ་བས་རྟག་མཐའ་སེལ་ཏེ་སྣང་སྟོང་དབྱེ་བསལ་མེད་པའི་ཕྱིར།༽ཡོད་མེད་༼ཕུང་ལྔའི་རྟོག་པ་མ་འགག་བཞིན་དུ་སྣང་མ་མྱོང་བ་ནམ་མཁའི་བྱ་ལམ་བཞིན་རྗེས་མེད་རང་ཡལ་སོང་ན་རིགས་ལྔའི་ངོ་བོར་གྲོལ་བ་ཡིན་པར་གུ་ཎས་གསུངས།༽ ལ་སོགས་པའི་མཐའ་ལས་འདས་ཤིང་ངག་དང་ཡིད་ཀྱི་རྩོལ་རྟོག་གི་ཡུལ་ལས་འདས་པའི་རང་གནས་ཡེ་ཤེས་བརྗོད་བྲལ་གྱི་གནད་ཡིན་པས་ན། ཟང་མ་ཐལ་བྱུང་༼རིག་པ་བསམ་བྱ་དང་བྲལ་བ་༽བརྗོད་དུ་མེད། ༼ཟང་མ་ཐལ་བྱུང་ཞེས་དྲན་བསམ་རྗེས་མེད་དུ་སོང་བ་འཁོར་འདས་རྒྱ་གྲོལ་རྟོགས་པའོ་ཞེས་ཡོན་དགས་གསུངས།༽དེ་ལྟ་བུའི་གནད་དོན་དེ་ཆོས་སྐུ་གཞི་གནས་ཀྱི་རིག་པ། རྣལ་འབྱོར་ལམ་གྱི་ཀ་དག སྤྲོས་བྲལ་དོན་གྱི་ལྟ་བ་ཡིན་པས་འདི་ཁོ་ན་ངོ་མ་ཤེས་ཀྱི་བར་དུ་ཇི་ལྟར་བསྒོམ་ཤིང་ཉམས་སུ་བླངས་ཀྱང་༼དགའ་རབ་རྡོ་རྗེའི་ཞལ་སྔ་ནས། ཡིད་དཔྱོད་འཛིན་པའི་ལྟ་བ་ཉོན་རེ་མོངས། །དེ་ལ་བརྟེན་པའི་བསྒོམ་པ་ཡི་རེ་མུག དེ་ལ་སྤྱོད་པའི་སྤྱོད་པ་ཐང་རེ་ཆད། དེ་ལ་འབྲས་བུར་རེ་བ་ཡོངས་རེ་འཁྲུལ། ཞེས་པ་ལྟར།༽ བློས་བྱས་བཅོས་མའི་ལྟ་སྒོམ་ལས་མི་འདའ་བས། རང་བཞིན་རྫོགས་པ་ཆེན་པོའི་ལམ་དང་གནམ་ས་བས་རིང་ཞིང་སྒོམ་མེད་འོད་གསལ་གྱི་འཁོར་ལོའི་གནད་མེད་པས་ན། འདི་ཁོ་ན་ངོ་ཤེས་པ་དང་པོ་གལ་ཆེ་བས། ཆོས་སྐུའི་རིག་པ་ངོས་ཟུངས་ཤིག །དེའང་ལྟ་བའི་རྟོགས་ཚད་རྐྱེན་དང་འཕྲད་ཚེ་ཤེས་ཏེ། དང་པོ་རྐྱེན་ངན་དུ་ཤེས། བར་དུ་ལམ་དུ་སློང་། ཐ་མ་འོད་གསལ་གྱི་ཉམས་ལྡན་དུ་ཤར་དགོས། དེ་ཡང་དགྲ་ལྟ་བུས་གནོད་པ་བྱས་ཚེ། གཟུགས་ཀྱིས་ཉེ་བར་ལེན། ཚོར་བས་ཉམས་སུ་མྱོང་། འདུ་ཤེས་ཀྱིས་དེ་ལ་མཚན་མར་འཛིན། འདུ་བྱེད་ཀྱིས་འཁོར་བའི་ལས་བསགས་པས། རྣམ་ཤེས་ཀྱིས་རྣམ་པར་ཤེས། དེ་དུས་ཀྱི་འཆར་གཞིའི་རིག་པ་ངོས་ཟིན་པར་བྱས་ན། ཕུང་ལྔ་རིགས་ལྔའི་ངོ་བོར་གྲོལ་བའོ། །དེའི་བདེ་བ་དང་ཉོན་མོངས་སོགས་ལ་རིགས་བསྒྲེས་སོ། །དེ་ལྟ་བུའི་དོན་དེ་ཚིག་གསུམ་གནད་དུ་བརྡེག་པའི་དང་པོ་ཡིན་ཞིང་ལྟ་བ་ངོ་མ་འཕྲོད་ན་སྒོམ་པས་ངང་སྐྱོང་རྒྱུ་མི་འོང་པས་དང་པོ་ལྟ་བ་ངོ་འཕྲོད་པ་གལ་ཆེ་ལ། དེ་ཡང་རང་གནས་ཀྱི་ཡེ་ཤེས་རང་ལ་གནས་པ་ཉིད་ངོ་སྤྲོད་པ་ཡིན་གྱི་གཞན་ནས་བཙལ་དུ་ཡོད་པ་མ་ཡིན། སྔར་མེད་རྒྱུད་ལ་སྐྱེས་པ་མ་ཡིན་པས་ན། ངོ་རང་ཐོག་ཏུ་སྤྲད་པ་སྟེ་གནད་དང་པོའོ། །༼ཤེས་རབ་རང་རྩ་ལ་རྫོགས་པ་དང་། །ཡིད་ཀྱི་དྲན་པ་ཕྱི་ཤོར་གཉིས། །འདྲའོ་འདྲའོ་ནོར་ར་རེ། །ངོ་སྤྲོད་པའི་སྐབས་འདིར་ལ་བཟླའི་ཟུར་འདོགས་དགོས།༽དེ་ནས་སྒོམ་པ་ཉམས་སུ་ལེན་ཚུལ་རྒྱས་པར་འཆད་པ་ལ། ༼གནས་ཚུལ་གྱི་སྒོ་ནས་རིག་པ་རྒྱུན་མ་ཆད་པ་དང་མཉམ་བཞག་གི་དབང་དུ་བྱས་ནས་རྟོགས་པ་ཀློང་དུ་གྱུར་པའི་དུས་ནས་ཆོས་ཉིད་ཟད་པའི་དུས་ལྟ་བུ་ཡིན་ཀྱང་ད་ལྟ་ལས་དང་པོ་པའི་དུས་སུ་གདོད་མ་གཞིའི་འོད་གསལ་གཤིས་དེར་ཕེབས་ནས་ཉམས་སུ་བླངས་ན་དེ་དང་ཕྱོགས་མཚུངས་སོ། །ལྟ་སྒོམ་ཆིག་ཆོད་དུ་སོང་ན་མ་གཏོགས་སྒོམ་དགོས། སྒོམ་དང་བསམ་གཏན་ཤན་འབྱེད། གནས་ལུགས་མ་བཅོས་པའི་སྒོམ་པ་དང་། བློས་བྱས་བཅོས་མའི་སྒོམ་གཉིས་ཤན་འབྱེད་དེ།༽ངང་བཞག་ཆུ་བོའི་རྒྱུན་གྱི་སྒོམ་པ་དུས་དང་གནས་སྐབས་ཐམས་ཅད་དུ་ཡོད་པས་གནས་འཕྲོ་ལ་༼གནས་པ་མི་སྒྲུབ། འགྱུ་བ་མི་དགག །མཉམ་པ་མི་སྒྲུབ།༽དགག་སྒྲུབ་མེད་པར་གནས་ན་ཆོས་སྐུའི་རང་ངོ། འཕྲོ་ན་ཡེ་ཤེས་ཀྱི་རང་རྩལ་དུ་སྐྱོང་བས་ན། དེ་ནས་འཕྲོའམ་གནས་ཀྱང་རུང་། སེམས་རྣམ་རྟོག་གི་རྩལ་ལས་ཀུན་འབྱུང་གི་བདེན་པ་ཁྲོ་ཆགས་སོགས་ཉོན་མོངས་པ་དང་། སྡུག་བསྔལ་གྱི་བདེན་པ་སྐྱིད་སྡུག་སོགས་དང་༼ལམ་བདེན་དང་སོགས་༽ ཚོར་བའི་རོ་མྱོང་གང་སྐྱེས་ཀྱང་རྣམ་རྟོག་དེ་དག་གི་༼འཆར་གཞི་༽རང་བཞིན་ཆོས་ཉིད་དུ་ཤེས་ན་ཆོས་སྐུའི་ཡོ་ལང་དུ་གྱུར་བས་ན། ཁྲོ་འམ་ཆགས་སམ་སྐྱིད་དམ་སྡུག དེ་ལྟར་མ་ཟད་སྤྱིར་༼བློ་བྲལ་གྱི་གནས་ལུགས་༽ ལྟ་བས་ངོ་འཕྲོད་ཀྱང་སྒོམ་པས་ངང་མ་འཁྱོ ངས་པར་༼ལྟ་སྒོམ་གྱི་ལ་མ་བཟླས་ན་༽འཁྲུལ་འབྱམས་ཐ་མལ་དུ་ཤོར་ན་རྣམ་རྟོག་རང་རྒྱུད་པས་འཁོར་བར་འཆིང་ཞིང་། ཆོས་དང་རང་རྒྱུད་སོ་སོར་སོང་ནས་ཐ་མལ་པ་དང་ཁྱད་མེད་པར་འགྱུར་བས་མི་སྒོམ་༼པའི་སྒོམ་༽པ་རང་བཞག་ཆེན་པོ་དང་ནམ་ཡང་མི་འབྲལ་བ་ཞིག་དགོས་པས་ན། ༼ངང་བཞག་ཆུ་བོའི་རྒྱུན་གྱི་སྒོམ་པ་གནས་ཚུལ་གྱི་སྒོ་ནས་རིག་པ་རྒྱུན་མ་ཆད་པ་དང་། མཉམ་བཞག་གི་དབང་དུ་བྱས་ནས་རྟོགས་པ་ཀློང་དུ་གྱུར་བའི་དུས་ནི་ཆོས་ཉིད་ཟད་པའི་དུས་ལྟ་བུ་ཡིན་ཀྱང་། ད་ལྟ་ལས་དང་པོ་བའི་དུས་སུ་གདོད་མ་གཞིའི་འོད་གསལ་གྱི་གཤིས་དེར་ཕེབས་ནས་ཉམས་སུ་བླངས་ན་དེ་དང་ཕྱོགས་མཚུངས་སོ།༽། དུས་དང་གནས་སྐབས་ཐམས་ཅད་དུ། དེ་ལྟར་གནས་འཕྲོ་སོགས་གང་གི་ཚེའང་ཉོན་མོངས་པ་དང་རྣམ་རྟོག་ཐ་དད་པ་རེ་རེས་འདུལ་བ་མ་ཡིན་གྱི། རྣམ་རྟོག་དང་གཉེན་པོ་གང་སྐྱེས་ཀྱང་གཉེན་པོ་ཆིག་ཆོད་ཀུན་གྲོལ་སྔར་ངོ་སྤྲད་པའི་ལྟ་བ་དེ་གཅིག་པུ་ངོས་འཛིན་པ། ༼གཅིག་གྲོལ་གྱི་གནད་འདི་ལ་འདུ་བས་༽ངོ་ཤེས་ཆོས་སྐུ་ངོས་ཟུངས་ལ། དེ་ཡང་རྣམ་རྟོག་དང་ཉོན་མོངས་གང་སྐྱེས་ཀྱང་དེ་ཉིད་ཆོས་སྐུའི་ཡེ་ཤེས་ལས་ལོགས་ཤིག་མ་ཡིན་གྱི་༼རྩལ་ལམ་རོལ་པའི་༽ རྣམ་རྟོག་དེ་གའི་རང་བཞིན་ཆོས་སྐུ་གཞིའི་འོད་གསལ་དངོས་ཡིན་པས་དེ་ངོ་ཤེས་ན་གཞི་གནས་མའི་འོད་གསལ་ཞེས་བྱ་ལ། སྔར་བླ་མས་ངོ་སྤྲད་པའི་རང་རིག་འོད་གསལ་གྱི་ལྟ་བ་རང་ངོ་ཤེས་པ་ནི་ཉམས་ལེན་ལམ་གྱི་འོད་གསལ་ཞེས་བྱ་སྟེ། གཞི་ལམ་གྱི་འོད་གསལ་གཉིས་དབྱེར་མེད་དུ་གྱུར་པའི་རང་ངོར་གནས་པ་ནི་འོད་གསལ་མ་བུ་འཕྲོད་པ་ཞེས་བྱ་བས་ན། སྔར་འདྲིས་འོད་གསལ་མ་བུ་སྤྲད། ༼སྔར་འདྲིས་འོད་གསལ་མ་བུ་ཞེས་པ་སྙིང་གི་དམར་ཁྲིད་ལས། ཆོས་ཐམས་ཅད་རང་བཞིན་མེད་པ་དེ་ཆོས་ཉིད་མ༵། རང་བཞིན་མེད་པར་ཤེས་པ་དེ་ཆོས་ཉིད་བུ༵། གཟུང་བ་ཞེས་བྱ་བ་ནི། ཕྱིའི་དངོས་པོ་ཡུལ་ལ་བདེན་པར་ཞེན་པའོ། །འཛིན་པ་ཞེས་བྱ་བ་ནི། ནང་གི་སེམས་ལ་ལོག་པར་འཛིན་པའོ། །ཞེས་སོ།།༽དེ་ལྟར་ནམ་ཡང་ལྟ་བ་ངོ་ཤེས་པའི་འོད་གསལ་དེ་དྲན་པར་བྱས་ནས་དེའི་ངང་ལ་བཞག་པ་ལས། རྩལ་གྱི་རྣམ་རྟོག་དང་ཉོན་མོངས་པ་ལ་དགག་སྒྲུབ་དང་སྤང་བླང་མི་བྱ་བ་ནི་གནད་གྱི་དམ་པ་ཡིན་པས་ན། བརྗོད་མེད་རིག་ཆའི་ངང་ལ་བཞག དེ་ལྟ་བུའི་ངང་དེ་ཡུན་རིང་དུ་བསྐྱང་པ་ན། ལས་དང་པོ་ཚེ་བདེ་གསལ་མི་རྟོག་པའི་ཉམས་ཀྱིས་གཉུག་མའི་རང་ཞལ་འགེབས་པས་༼སྤྲོས་སོགས་༽ཉམས་ཀྱི་ཤུན་པ་དང་བྲལ་ནས་༼གཤིས་ཀྱི་བཞུགས་ཚུལ་གྱི་མི་རྟོག་པ་སོགས་འཆར་དགོས་ཏེ་ངོ་བོ་མི་རྟོག་པའི་སྟོང་ཉམས་སྟོང་གསལ་ནམ་མཁའི་དཀྱིལ་ལྟ་བུ་ངར་དང་ལྡན་པ། རང་བཞིན་གསལ་བའི་ཉམས་ཀུན་གསལ་ཉི་ཟླའི་དཀྱིལ་འཁོར་ལྟ་བུ་སངས་བག་དང་བཅས་པ། ཐུགས་རྗེའི་རིག་ཉམས་གྲོལ་ཆ་དང་བཅས་པ་ཟག་བཅས་འགྱུར་བདེའི་བསླད་པ་དང་བྲལ་བའི་བདེ་ཆེན་གྱི་ཡེ་ཤེས་༽རིག་ངོ་རྗེན་ལ་བུད་ན་ཡེ་ཤེས་ཁོང་ནས་གསལ་བ་ཡིན་ཏེ། ཇི་སྐད་དུ། རྣལ་འབྱོར་སྒོམ་པ་བཤིག་གྱིན་བཟང་། །ཕུ་ཆུ་དྲག་པོ་བརྡབ་ཀྱིན་བཟང་། །ཟེར་བ་ལྟར་ཡིན་པས་ན། གནས་བདེ་གསལ་སྤྲོ་ཡང་ཡང་བཤིག དེ་ཡང་ཇི་ལྟར་བཤིག་ཅེ་ན། གནས་བདེ་གསལ་བའི་ཉམས་སྐྱེ་བདོ་བའི་ཚེའམ་དགའ་སྤྲོ་དང་སྐྱིད་སྣང་སོགས་༼བར་ཆད་བདུད་ཀྱི་རྟགས། འཕེལ་འགྲིབ་ཉམས་ཀྱི་རྟགས། དེ་ལ་སྣང་ཉམས་དང་ཤེས་ཉམས་གཉིས། ཤེས་ཉམས་ལ་ཤེས་པ་དགའ་བདེའི་ཉམས་དང་མཐར་འགྱུར་གྱི་ཉམས་གཉིས། མི་འགྱུར་བ་གསང་བའི་རྟགས་ལ། འཇིག་རྟེན་པའི་ཉམས་དང་འཇིག་རྟེན་ལས་འདས་པའི་ཉམས་གཉིས།༽ འཆར་བདོ་བ་དེའི་ཚེ་སྡུད་བྱེད་ཐབས་ཀྱི་ཡི་ཕ་དང་། གཅོད་བྱེད་ཤེས་རབ་ཀྱི་ཡི་གེ་ཊ་གཉིས་འབྲེལ་བའི་ཕཊཿསྒྲ་དྲག་པོ་ཐོག་ལྷུང་བ་ལྟ་བུས་༼ཉམས་རྟོགས་ཤན་འབྱེད། ལ་བཟླ། ལུས་ཀྱི་རྣམ་འགྱུར། མིག་གི་ལྟ་སྟངས། ངག་གི་བརྗོད་པ། སེམས་ཀྱི་བསྒོམ་བློ་བཤིག་པ་རྣམས་ཀྱིས་ཉམས་བཤིག ཉམས་རྟོག་བསྲེ།༽ ཉམས་ཞེན་གྱི་ཤུན་པ་ཐལ་གྱིས་གཏོར་དགོས་ཏེ། ཐབས་ཤེས་ཡི་གེ་གློ་བུར་འབེབས། དེ་ལྟར་ཉམས་མྱོང་གི་གནད་དང་མ་བྲལ་བའི་བརྗོད་མེད་ཀྱི་རིག་པ་ཟང་ཐལ་བ་དུས་དང་རྣམ་པ་ཐམས་ཅད་དུ་སྐྱོང་བ་ལས། མཉམ་བཞག་རྗེས་ཐོབ་ཀྱི་སྒོམ་པ་ཐ་དད་དུ་མེད་པས མཉམ་བཞག་རྗེས་ཐོབ་ཐ་དད་མེད། དེ་ཕྱིར་ཐུན་གྱི་ངོ་བོའི་སྒོམ་དང་ཐུན་མཚམས་སྤྱོད་ལམ་གྱི་དུས་ཀྱི་སྒོམ་སོ་སོར་མེད་པས། ཐུན་དང་ཐུན་མཚམས་དབྱེ་བ་མེད། དེ་ལྟར་མི་སྒོམ་པའི་སྒོམ་པ་ཆེན་པོ་རང་གནས་ཕྱལ་བའི་ཡེ་ཤེས་ཆུ་བོའི་རྒྱུན་གྱི་རྣལ་འབྱོར། སྒོམ་རྒྱུ་རྡུལ་ཙམ་མེད་ལ། ཡེངས་སུ་སྐད་ཅིག་ཀྱང་མེད་པ་ནི། ཇི་སྐད་དུ། བསྒོམ་མ་མྱོང་དང་འབྲལ་མ་མྱོང་། །མི་བསྒོམ་དོན་དང་མི་འབྲལ་བ། ༼ཞེས་པ་གང་ཤར་སྒོམ་ཡིན་པས་ན་བློས་བཅོས་པའི་བསྒོམ་རྒྱུ་མེད་པས་སྒོམ་མ་མྱོང་། ཡེངས་ནས་དོན་མེད་འཆལ་བ་མིན་པས་རང་ཐོག་ཏུ་འཇོག་པ་དེ་དང་འབྲལ་མ་མྱོང་། མི་སྒོམ་པའི་དོན་དེ་ལྟ་བུ་དང་རྒྱུན་དུ་མི་འབྲལ་བར་བགྱིའོ། །ཞེས་པའི་དོན་ནོ། །འདི་བྱང་གཏེར་ཀ་དག་གི་སྐབས་སུ་ཡང་ཟབ་མོ་གནད་ཀྱི་ཐེམ་བཅུ་ལས། ཨོ་རྒྱན་ཆེན་པོས་མཁའ་འགྲོ་ཡེ་ཤེས་མཚོ་རྒྱལ་ལ་རིག་འཛིན་ཤྲཱི་སེང་ཧའི་སྤྱན་སྔར་གདམས་ངག་ཟབ་མོ་འདི་ཞུས་པའི་དུས་སུ། བསྒོམ་མ་མྱོང་དང་འབྲལ་མ་མྱོང་། །མི་བསྒོམ་དོན་དང་མི་འབྲལ་བ། །དེ་ཉིད་རང་སྐྱོང་བས་མཆོག་ཐུན་མོང་གི་དངོས་གྲུབ་ཐོབ་ཟིན་ཅེས་གསུངས། གཏེར་བརྒྱུད་རྣམ་ཐར་ལས། གཏེར་སྟོན་དབོན་པོ་དྲག་རྩལ་གྱི་གཏེར་གནས་དཀོན་མཆོག་གསུམ་གྱི་ལྷ་ཁང་ཞེས་བྱ་བ་ནས། རྫོགས་ཆེན་གུ་རུ་བཞི པ། གུ་རུ་བཞིའི་ལོ་རྒྱུས་ཀྱི་མཚན་ཤྲཱི་སེང་ཧའི་རྫོགས་རིམ་བླ་མ་དམར་ཁྲིད་ཟེར་བའི་པོ་ཏི་གདན་དྲངས། འདིའི་ནང་ནས་གང་ཤར་རང་གྲོལ་དུ་འགྲོ་བས་སྒོམ་ཡིན་པས་ན་སོགས།༽ ཞེས་པའི་དོན་ཡིན་པས། དབྱེར་མེད་ངང་དུ་རྒྱུན་དུ་གནས། དེ་ལྟར་རང་བཞིན་རྫོགས་པ་ཆེན་པོའི་རང་ལམ་སྒྲ་ཇི་བཞིན་པའི་སྣོད་དུ་གྱུར་ཅིང་། ཐོས་གྲོལ་ཅིག་ཆར་བའི་རིགས་ཅན་ཡིན་ན། ༼སེམས་ཉིད་རང་བྱུང་གི་ཡེ་ཤེས་གདོད་མ་ནས་གྲོལ་བ་འཆར་གཞི། དེས་རང་ས་ཟིན་པའི་གནད་དེས། གང་སྣང་ཅི་ཤར་ཐམས་ཅད་འཆར་ཆོས་ཡེ་ཤེས་ཀྱི་རྣམ་རོལ་དུ་ཤར་བ་ལས་སྣང་སེམས་མ་བུ་འདྲེས་པའམ། སྣང་སེམས་གཞི་གྲོལ་ཆེན་པོ་སྟེ། རྒྱ་གྲོལ་རྣལ་འབྱོར་ནམ་ལངས་ཉི་ཤར་འདྲ། །ཞེས་པ་ལྟར་རྟོག་པ་རྒྱ་གྲོལ། ཤེས་རྒྱུད་གཏད་གྲོལ་དུ་འགྲོའོ།༽ །སྣང་སེམས་གཞི་གྲོལ་ཆེན་པོ་ཅི་ཤར་ཆོས་སྐུའི་ཡོ་ལངས་སུ་གྱུར་ནས་སྒོམ་བྱ་༼ཡུལ་དང་༽སྒོམ་བྱེད་༼ཀྱི་བློ་༽མེད་ཀྱང་དེ་ལས་གཞན་པའི་༼ལྟ་བ་ཞིག་ཤེས་ན་ཡང་༽རྣམ་རྟོག་འཁྲུལ་བའི་གཞན་དབང་དུ་གྱུར་པའི་སྐལ་དམན་རིམ་གྱིས་པའི་གང་ཟག་རྣམས་བརྟན་པ་མ་ཐོབ་ཀྱི་བར་༼དུ་མི་གཡོ་གསུམ་ལྡན་གྱི་སྒོ་ནས་༽སྒོམ་དགོས་པས་ན། ༼བརྟན་པ་ཐོབ་པ་དེ་ཡང་གོམས་ཚད་རྨི་ལམ་གྱིས་འཛིན་དགོས་ཏེ་ཉིན་མོ་སྣང་བ་རིམ་གྱིས་བསྡུས་ཏེ་ནམ་མཁའ་བསླད་བྱེད་ཀྱི་རྐྱེན་གསུམ་དང་བྲལ་བ་ལྟ་བུའི་གཞིའི་འོད་གསལ་དངོས་སུ་ཤར་བ་དེ་ངོས་ཟིན་ན་རྣལ་འབྱོར་པ་ཡིན། མ་ཟིན་ན་མ་རིག་པའམ་ཀུན་གཞི་དང་ལུང་མ་བསྟན་དུ་འགྲོའོ།།༽ འོན་ཀྱང་བརྟན་པ་མ་ཐོབ་བར། །སྒོམ་པ་དེ་ཡང་བསམ་གཏན་གྱི་རྒྱུ་༼འཇིག་རྟེན་སྤང་བ། རྣམ་རྟོག་དོར་བ། དབེན་པ་བསྟེན་པ། ཚུལ་ཁྲིམས་སྲུང་བ་༽ཚང་བ་ལ་ཉམས་མྱོང་སྐྱེ་བར་འགྱུར་གྱི། འདུ་འཛི་༼འདི་རྗེ་རིན་པོ་ཆེས། མང་པོ་ཚུར་འདུ༵་བ་དང་། མང་པོའི་ནང་དུ་ཕར་འཛུ༵ལ་བ་གསུངས།༽དང་རྣམ་གཡེང་གི་ཁྲོད་དུ་ཅི་ཙམ་སྒོམ་ཡུན་བསྲངས་ཀྱང་ཉམས་མྱོང་མི་སྐྱེ་བས་ན། འདུ་འཛི་སྤངས་ནས་སྒོམ་པ་གཅེས། སྒོམ་པའི་ཚེ་ཡང་༼ཐུན་དང་ཐུན་མཚམས་དབྱེ་ནས་ཐུན་གྱི་སྔོན་འགྲོ་སྤྱི་ལྟར་དང་དངོས་གཞི་མི་གཡོ་གསུམ་ལྡན། རྗེས་དག་སྣང་དྲན་ནས་བསྔོ་སྨོན་བྱའོ། །༽མཉམ་རྗེས་ཀྱི་ཉམས་ལེན་ཐ་དད་དུ་མེད་ཀྱང་དང་པོ་མཉམ་བཞག་རང་ས་མ་ཟིན་ན། ཉམས་མྱོང་གི་ཡེ་ཤེས་རྗེས་ཐོབ་དང་བསྲེ་མི་ནུས་པས། སྤྱོད་ལམ་རྒྱུན་གྱི་ལམ་ཁྱེར་ལ་འབད་པར་བྱས་ཀྱང་༼རྣམ་རྟོག་རྒྱུན་མི་ཆོད་པར་༽སྤྱི་འབྱམས་གཤིས་ཤོར་གྱི་གོལ་ས་ལྡང་བ་ཡིན་པས་ན། མཉམ་བཞག་ཐུན་དུ་བཅད་ལ་བྱ། དེ་ལྟར་ཉམས་ལེན་ཐུན་དུ་བཅད་ནས་མཉམ་བཞག་ངོ་བོ་སྐྱོང་བའི་བློ་གཏད་ཁེལ་བ་ལྟ་བུའི་ཉམས་ལེན་ཡོད་ཀྱང་རྗེས་ཐོབ་སྤྱོད་ལམ་དང་བསྲེས་ནས་རྒྱུན་དུ་སྐྱོང་མ་ཤེས་ན། གཉེན་པོས་རྐྱེན་མི་ཐུབ་ཅིང་རྣམ་རྟོག་རྐྱེན་གྱིས་ཁྲིད་ནས་ཐ་མལ་བར་འཆོར་བས་ན་རྗེས་ཤེས་ཟང་ཐལ་དུ་སྐྱོང་བ་གལ་ཆེ་བས། དུས་དང་གནས་སྐབས་ཐམས་ཅད་དུ། དེའི་ཚེའང་སྒོམ་བྱ་གཞན་ཞིག་ཚོལ་མི་དགོས་ཀྱིས། མཉམ་བཞག་ཆོས་སྐུའི་ལྟ་བ་དེ་ཉིད་དང་མ་བྲལ་བའི་ངང་ནས་བྱ་བྱེད་དང་རྣམ་རྟོག་ཐམས་ཅད་རྩིས་མེད་རང་ཡན་དགག་སྒྲུབ་མེད་པར་༼ཁྲིག་ཆོད་འཁྲུལ་ཞིག་ཟེར་བ་ལྟར་༽ ཆད་ཆོད་ཡད་ཡུད་དུ་སྐྱོང་བ་ཡིན་པས་ན། ཆོས་སྐུ་གཅིག་པོའི་ཡོ་ལངས་ཀྱང་། དེ་ལྟ་བུའི་ཉམས་ལེན་༼རིག་པའི་ངོ་བོ་༽ཞི་ལྷག་དབྱེར་མེད་དུ་སྤྲོས་བྲལ་གཉུག་མའི་རྣལ་འབྱོར་མ་བཅོས་ལྷན་ཅིག་སྐྱེས་པ། ཆོས་ཉིད་ཀྱི་རང་ངོ་སྐྱོང་བ་དེ་ནི་གསང་སྔགས་རྡོ་རྗེ་ཐེག་པའི་རྒྱུད་སྡེའི་ཉམས་ལེན་ཐམས་ཅད་ཀྱི་སྙིང་པོ། དབང་བཞི་པའི་དོན་གྱི་ཡེ་ཤེས་༼ཉེ་བའི་༽སྒྲུབ་རྒྱུད་ཡིད་བཞིན་ནོར་བུའི་ཁྱད་ཆོས། རྒྱ་བོད་གསར་རྙིང་གི་གྲུབ་བརྙེས་བརྒྱུད་པ་དང་བཅས་པ་ཐམས་ཅད་ཀྱི་དགོངས་པ་རྨ་མེད་པ་ཡིན་པས་ཡིད་ཆེས་ཀྱི་བློ་ཐག་བཅད་ལ་༼དབུ་མའི་གཏན་ཚིགས་སོགས་༽མན་ངག་གཞན་ལ་འགྲམ་ཆུ་མི་ལྡང་བར་མ་བྱས་ན། གླང་པོ་ཁྱིམ་དུ་བཞག་ནས་གླང་རྗེས་ནགས་སུ་ཚོལ་བ་ལྟར། བློས་བྱས་བཅོས་མའི་གཟེབས་སུ་ཆུད་ནས་གྲོལ་བའི་དུས་མེད་པས། རང་གི་ཉམས་ལེན་ལ་༼དབང་གི་དམ་ཚིག་ལྟ་བ་ཡིན་པས། དེ་བས་དམ་ཚིག་ཅེས་བྱ་བ། །རང་གི་ལྟ་བ་ཡིན་པར་བརྗོད། ལམ་སྐྱབས་འགྲོ་ནས་བླ་མའི་རྣལ་འབྱོར་དང་བསྐྱེད་རྫོགས་ཐམས་ཅད་འདིར་འདུས་པར་༽ བློ་ཐག་ཆོད་དགོས་པས་ན།་དེ་ལས་གཞན་མེད་ཁོ་ཐག་བཅད། དེ་ལྟར་ཆོས་སྐུ་རང་གནས་ཀྱི་ཡེ་ཤེས་རྗེན་པ། འཁྲུལ་མ་མྱོང་བའི་སངས་རྒྱས་སུ་བློ་ཐག་བཅད་ནས་དེའི་རྒྱུན་སྐྱོང་བ་ནི་གནད་ཀྱི་གསང་ཚིག་གཉིས་པ་ཡིན་པས་གལ་ཆེ་བས་ན། ཐག་གཅིག་ཐོག་ཏུ་བཅད་པ་སྟེ་གནད་གཉིས་པའོ། །༼ཡེ་གཞི་གྲོལ་གཞི་ངོས་བཟུང་། གྲོལ་རྒྱུ་གཉིས་ཆོས་ཐམས་ཅད་ལྟ་སྒོམ་ཆིག་ཆོད་དུ་སོང་ན་གདེངས་གྲོལ་ཐོག་ཏུ་བཅའ་མི་དགོས་མ་གཏོགས་གཞན་ཐམས་ཅད་ལ་དགོས།༽ད་ནི་དེ་དག་གི་ཚེ་གྲོལ་ལུགས་ཀྱི་གདེངས་མེད་ན་༼ཀུན་གཞི་རྟོག་མེད་སོགས་༽ སེམས་གནས་ངལ་གསོའི་སྒོམ་ཙམ་ཁམས་གོང་མའི་གོལ་ས་ལས་མི་འདའ་ཞིང་། དེའི་ཚེ་ཆགས་སྡང་གི་རྐྱེན་མི་ཐུབ་འདུ་བྱེད་ཀྱི་ལས་༼འོག་འགྱུའི་རྣམ་རྟོག་སོགས་༽རྒྱུན་མི་ཆོད།༼ སྐྱིད་བརྒྱགས་ཉི་མས་དྲོས་ཚེ་ཆོས་པའི་གཟུགས། །རྐྱེན་ངན་ཐོག་ཏུ་བབ་དུས་ཐ་མལ་བ། །ཞེས་པ་ལྟར་༽ཐག་ཆོད་ཀྱི་བློ་གདེངས་མི་ཐོབ་པས་༼གྲོལ་ལུགས་ཀྱི་གནད་༽ དེ་གལ་ཆེ་ལ། དེ་ཡང་འདོད་པའི་ཡུལ་ལ་ཆགས་པ་དྲག་པོ་སྐྱེ་བའམ། མི་འདོད་པའི་ཡུལ་ལ་ཞེ་སྡང་དྲག་པོ་སྐྱེ་བའམ། མཐུན་རྐྱེན་ལོངས་སྤྱོད་སོགས་འབྱོར་བའི་དགའ་བ། མི་མཐུན་པའི་རྐྱེན་དང་ན་ཚ་སོགས་སྡུག་བསྔལ་གྱི་ཚོར་བ་གང་བྱུང་ཡང་། དེའི་ཚེ་རིག་པའི་རྩལ་ལྷོ ང་བ་ཡིན་པས་༼མཉམ་རྗེས་གཉིས་ཀའི་གྲོལ་ལུགས་༽གྲོལ་གཞིའི་ཡེ་ཤེས་ངོས་ཟིན་པ་གལ་ཆེ་ལ།༼དཔེར་ན་སྒེག་མོ་རྡོ་རྗེ་ཆང་ཚོང་མས་འདོད་ཆགས་ལམ་དུ་བྱེད། རིགས་ངན་ཡན་ལག་མེད་མས་ཞེ་སྡང་ལམ་དུ་བྱེད། གྲུབ་ཐོབ་ལྭ་བ་པས་གཏི་མུག་ལམ་དུ་བྱེད། བྱིས་པའི་རྩེད་མོ་ཅན་གྱིས་རྩེད་མོ་ལམ་དུ་བྱེད་པ་ལྟར་ཡིན་པས།༽དེ་ཚེ་ཆགས་སྡང་དགའ་སྡུག་དང་། གཞན་ཡང་ཉམས་ལེན་ཤར་གྲོལ་གྱི་གནད་མེད་ན། སེམས་བྱུང་འོག་འགྱུའི་རྣམ་རྟོག་ཅི་སྐྱེས་ཐམས་ཅད་ཀྱིས་འཁོར་བའི་ལས་གསོག་པ་ཡིན་པས་༼ཀུན་གཞིར་གོལ་བ་གཟུགས་མེད། ཀུན་གཞིའི་རྣམ་ཤེས་གཟུགས་ཁམས། རྣམ་རྟོག་རགས་པས་འདོད་ཁམས་༽ཕྲ་རགས་ཀྱི་རྣམ་རྟོག་ཅི་སྐྱེས་ཤར་གྲོལ་རྗེས་མེད་དུ་སྐྱོང་བ་གནད་ཡིན་པས་ན། ༼རིག་ཀྱང་མི་འཕྲོ་འདོད་ཁམས་ཀྱི་སེམས་ལས་གྲོལ། གསལ་ཡང་མི་འཛིན་གཟུགས་ཁམས་ཀྱི་སེམས་ལས་གྲོལ། མི་རྟོག་ཀྱང་རིག་གདངས་སྣང་ཡུལ་མ་འགགས་པས་གཟུགས་མེད་ཀྱི་སེམས་ལས་གྲོལ་བས་ཁམས་གསུམ་ཡོངས་གྲོལ་གྱི་དགོངས་པ། ཞེས་པ་ལྟར་དང་། འཇིགས་གླིང་གིས། དྭངས་མ་ཡུལ་མེད་རིག་པའི་ཡོན་ཏན་ཡིན། །ཅེས་དང་། ཆོས་མཛོད་ལས། གཅིག་ཀུན་འདུས་སོགས། སྙན་བརྒྱུད་ཏི་ཀ་ལས། སྒོམ་པ་ཤེས་ཀྱང་གྲོལ་མ་ཤེས་སོགས། ཕྲ་རགས་ཀྱི་རྣམ་རྟོག་ཅི་སྐྱེས་ཤར་གྲོལ་རྗེས་མེད།༽ གློ་བུར་རྣམ་རྟོག་མ་ལུས་པ། དེས་ན་རྣམ་རྟོག་གང་སྐྱེས་པ་ཐམས་ཅད་འོག་འགྱུ་འཁྲུལ་འབྱམས་སུ་མ་སོང་བར་བློ་བྱས་འཇུར་དྲན་མ་ཡིན་པར་རང་བབ་གཉུག་མའི་དྲན་པ་དང་མ་བྲལ་བའི་ངང་ནས་རྣམ་རྟོག་ཅི་ཤར་རང་ངོ་ཤེས་པར་བྱས་ལ། ཤར་གྲོལ་རྗེས་མཐུད་མེད་པའི་ངང་ནས་ཆུ་ལ་རི་མོ་བྲིས་པ་ལྟར་སྐྱོང་དགོས་པས་ན། ངོ་ཤེས་ངང་ལ་རྗེས་མཐུད་མེད། དེའི་ཚེ་རྣམ་རྟོག་རང་གྲོལ་དུ་མ་དག་ན་རྣམ་རྟོག་ངོ་ཤེས་པ་ཙམ་གྱིས་འཁྲུལ་བའི་ལས་རྒྱུན་མི་ཆོད་༼ངོ་ཤེས༵་རྩལ་རྫོགས་རང་གྲོལ༵་དུ་གཏོང་བ་ལས་དང་པོ་པ་དང་བརྟན་པ་མ་ཐོབ་པ་གཉིས་ཀས་ངོ་མ་ཤེས་ན་འོག་འགྱུ་འཆོར། རྩལ་རྫོགས་མ་བཅུག་ན་ཕྱིས་རྐྱེན་དྲག་པོ་མི་ཐེག །རང་གྲོལ་དུ་མ་བཏང་ན་འདུ་བྱེད་ཀྱི་ལས་བསགས། ཀུན་མཁྱེན་ཆེན་པོས། སྔ་མའི་ཤེས་པ་ཕྱི་མས་དྲན་བྱས་ཏེ། །ཚོར་ཙམ་ཉིད་ཀྱིས་གཉུག་མའི་དོན་མཐོང་ཞེས། །སྐྱེ་འགག་གྲངས་འདེབས་རྟོག་པའི་འཕྲོ་མཐུད་ལ། །གཉིས་མེད་དོན་དུ་འཛིན་པའི་སྒོམ་པ་འཁྲུལ། །ཞེས་གསུངས།༽ ངོ་ཤེས་པ་དང་མཉམ་དུ་རང་ངོ་ཅེར་གྱིས་མཐོང་བ་སྔར་འདྲིས་ཀྱི་ཡེ་ཤེས་དེ་ཉིད་ངོས་བཟུང་ནས་ངང་ལ་བཞག་པས་རྣམ་རྟོག་རྗེས་མེད་དུ་དག་པ་ཉིད་དུ་གནད་ཆེ་བས། གྲོལ་བའི་ཆོས་སྐུ་ངོས་བཟུང་བས། དཔེར་ན་ཆུ་ལ་རི་མོ་ད་ལྟ་བྲིས་པ་ད་ལྟ་ཞིག་ནས་བྲིས་པ་དང་ཡལ་བ་དུས་མཉམ་པ་ལྟར། རྣམ་རྟོག་སྐྱེས་པ་དང་གྲོལ་བ་དུས་མཉམ་དུ་སོང་ནས་རང་ཤར་རང་གྲོལ་རྒྱུན་ཆད་མེད་པ་ཡིན་པས།༼འཁྲུལ་ཞིག ཁྲེགས་ཆོད། གྲོལ་བ། གདེངས་གྲོལ་ཐོག་ཏུ་འཆོས་པ་རྣམས་ཟེར་རོ། ༽དེས་ན་ཤར་བ་མི་དགག་པར་ཅི་ཤར་འཆར་དུ་བཅུག་ལ་གང་ཤར་གཉུག་མའི་ངང་དུ་དག་པའི་ལམ་ཁྱེར་ཉིད་ཉམས་ལེན་གྱི་གནད་དུ་འཛིན་དགོས་པས་ན། རང་ཤར་རང་གྲོལ་རྒྱུན་ཆད་མེད། དེ་ལྟར་རྣམ་རྟོག་ལ་༼རིག་ཐོག་ནས་༽ ཆོས་སྐུའི་རྩལ་སྦྱོང་བས། རྟོག་པ་གང་ཤར་རིག་པ འི་རྩལ་སྦྱང་དུ་འཆར་ཞིང་། དུག་ལྔའི་རྣམ་རྟོག་ཅི་ཙམ་རགས་པར་སྐྱེས་ཀྱང་། དེའི་ཚེ་གྲོལ་བའི་རིག་པ་གསལ་ངར་དང་ལྡན་པས་ན། ཅི་ཤར་རིག་སྟོང་རྗེན་པའི་ཟས། རྣམ་རྟོག་གང་འགྱུ་ཚད་ཐམས་ཅད་རིག་ངོ་ཟང་ཐལ་གྱི་ངང་ལས་རང་རྩལ་དུ་འཆར་བའི་ཚེ་༼དགེ་སྡུག་གི་རྟོག་པ་༽བླང་དོར་མེད་པར་བསྐྱངས་པས་ཤར་དུས་ནས་གྲོལ་བར་སྐྱེས་པས་ཆོས་སྐུའི་ཡོ་ལང་ལས་མ་འདས་པས། ཅི་འགྱུ་ཆོས་སྐུ་རྒྱལ་པོའི་རྩལ། སེམས་རྟོག་མ་རིག་འཁྲུལ་གཟུགས། སེམས་༼རླུང་སྣང་བ་གསུམ་རིག་པར་གྲོལ་ཏེ།༽ རིག་པ་ཡེ་ཤེས་ཆོས་སྐུའི་ཀློང་དུ་དག་པས་འོད་གསལ་རྒྱུན་ཆད་མེད་པའི་ཀློང་དུ་རྣམ་རྟོག་འགྱུ་བ་གང་སྐྱེས་རང་ངོ་སྟོང་པས་ན། རྗེས་མེད་རང་དག་ཨ་ལ་ལ། དེ་ལྟ་བུའི་ལམ་ཁྱེར་ལ་རྒྱུན་རིང་བར་སྒོམ་པའི་ཚེ་རྣམ་རྟོག་སྒོམ་དུ་ཤར་༽ བའི་ཡེངས་ཡུལ་ཆོས་ཉིད་དུ་ཤར་ནས༽གནས་འགྱུའི་བར་ལག་འགྱེལ། ཤར་བས་གནས་པ་ལ་མི་གནོད་པས། ༼གནས་པས་ཤར་བ་མི་དགག་༽འཆར་ལུགས་སྔར་དང་འདྲ་བ་ལས། དེའི་ཚེ་རྩལ་གྱི་རྣམ་རྟོག་དགའ་སྡུག་རེ་དོགས་སུ་འཆར་ཚུལ་ཐ་མལ་པའི་སྐྱེ་བོ་གཞན་༼དཔལ་དགེ་སྤྲུལ་སྐུས། རྣམ་པ་ཐ་མལ་གྱི་ཤེས་པ་འཇིག་རྟེན་པའི་རྣམ་རྟོག་རང་ག་མ་དང་ཁྱད་པར་སྤུ་ཙམ་ཡང་མེད་ལ་ངོ་བོ་དེར་འཛིན་པའི་ས་ལེ་ཧྲིག་གེ་བ། མཉམ་བཞག་ཡུལ་ཕུད་རྗེས་ཐོབ་སྣང་སྟེང་བག་ཆགས་གཡའ་དག་ཤེས་པ་ངོས་བཟུང་དང་བྲལ་ཀྱང་རྣམ་རྟོག་ལྟར་སྣང་བ་ཅིག་གོ །དེ་ཆོས་སྐུ་དངོས་ཡིན་རྣམ་རྟོག་མི་མངའ་ཅི་ཡང་ས་ལེར་མཁྱེན་ཞེས་གསུངས་པ་དང་འདྲ་ཡང་། དྲུས་མའི་ཐག་པ་མེས་ཚིག་མ་ཚིག་གི་དཔེ་གཉིས་སོགས་༽ཐ་མལ་པ་ལ་དགག་སྒྲུབ་ཨ་འཐས་སུ་ཤར་ནས་འདུ་བྱེད་ཀྱི་ལས་གསོག་ཅིང་། ཆགས་སྡང་གི་གཞན་དབང་དུ་གྱུར་པ་ལྟ་བུ་མ་ཡིན་པར། རྣལ་འབྱོར་པ་ལ་ཤར་དུས་ནས་གྲོལ་བར་སྐྱེས་པས། དང་པོ་རྣམ་རྟོག་ངོ་ཤེས་པས་གྲོལ་བ་སྔར་འདྲིས་ཀྱི་མི་དང་འཕྲད་པ་ལྟ་བུ། བར་དུ་རྣམ་རྟོག་རང་གིས་རང་གྲོལ་བ་སྦྲུལ་གྱི་མདུད་པ་ལྟ་བུ། ཐ་མལ་རྣམ་རྟོག་ཕན་མེད་གནོད་མེད་དུ་གྲོལ་བ་ཁང་སྟོང་དུ་རྐུན་མ་ཞུགས་པ་ལྟ་བུ་སོགས་གྲོལ་ལུགས་ཀྱི་གནད་དང་ལྡན་པས་ན། གྲོལ་ལུགས་ཁྱད་པར་གནད་དུ་ཆེ། དེས་ན་ཇི་སྐད་དུ། སྙན་རྒྱུད་ཏི་ཀ་ལས། སྒོམ་པ་ཤེས་ཀྱང་གྲོལ་མ་ཤེས། །བསམ་གཏན་ལྷ་དང་ཅིས་མ་འདྲ། །ཞེས་པ་ལྟར་གྲོལ་ལུགས་ཀྱི་གནད་འདི་ལྟ་བུ་དང་མི་ལྡན་པའི་སྒོམ། སེམས་གནས་ཀྱི་བསམ་གཏན་ཙམ་ལ་གདེངས་འཆའ་བ་དག་ཁམས་གོང་མའི་བསམ་གཏན་དུ་གོལ་ལ། གནས་འགྱུ་ངོ་ཤེས་པས་ཆོག་པར་འདོད་པ་རྣམས་ནི་འཁྲུལ་རྟོག་ཐ་མལ་པ་དང་ཁྱད་མེད། སྟོང་ཉིད་ཆོས་སྐུ་ལ་སོགས་བློས་བྱས་ཀྱི་རྒྱས་འདེབས་པ་དག་ཀྱང་རྐྱེན་ངན་དང་འཕྲད་ཚེ་གཉེན་པོས་རང་མཚང་སྟོན་པས་རང་ཚུགས་མི་ཐུབ་པས་ན། ༼གྲོལ་ལུགས་༽འདི་མེད་སྒོམ་པ་འཁྲུལ་བའི་ལམ། ཤར་གྲོལ། རང་གྲོལ། ཅེར་གྲོལ་༼གཞིའི་བཞུགས་ཚུལ་ཡེ་ནས་འཕོ་འགྱུར་མེད་པས་ཡེ་གྲོལ། གང་ཟག་གི་སྣང་ཚུལ་དང་མཐའ་བཞིའི་འཛིན་སྟངས་དབྱིངས་སུ་ནུབ་པས་མཐའ་གྲོལ། རིག་པ་སྙིང་དབུས་སུ་སད་ཚེ་གང་ཤར་རྟོག་ཚོགས་ཐམས་ཅད་བག་ཆགས་བསགས་ལོང་མེད་པར་གྲོལ་བས་རང་གྲོལ། སྣང་བ་མ་སྤངས་སྣང་ཐོག་ཏུ་གྲོལ། འགྱུ་བ་མ་སྤངས་འགྱུ་ཐོག་ཏུ་གྲོལ་བ་ཅེར་གྲོལ། དེས་ན་རང་གྲོལ་མཉམ་བཞག་དང་ཏིང་ངེ་འཛིན་གྱི་རྒྱ་མ་རལ་བ། ཅེར་གྲོལ་རྗེས་ཐོབ་ལ་བཞག་ན་ཆོག་མཆན་༽ སོགས་མིང་ཇི་ལྟར་བཏགས་ཀྱང་། རྣམ་རྟོག་རང་གྲོལ་རྗེས་མེད་དུ་དག་པའི་གྲོལ་ཚུལ་འདི་རང་གྲོལ་མངོན་སུམ་དུ་སྟོན་པའི་གནད་དུ་གཅིག་པ་རང་བཞིན་རྫོགས་པ་ཆེན་པོའི་༼ཡང་གསང་བླ་མེད་ཀྱི་༽ཁྱད་ཆོས་༼ཀུན་མཁྱེན་ཆེན་པོས་རིག་པ་ལྟ་བ། འཇིགས་གླིང་གིས། དྲན་མཆོག་རྒྱལ་པོའི་སྒོམ་པ། ཨ་བུས། གྲོལ་ལུགས་སྤྱོད་པ་འདི་ཁྱད་ཆོས་གསུམ་ལྡན་ཐུན་མོང་མ་ཡིན་པར་བཞེད། ཕྱག་ཆེན་སོགས་ལ་གྲོལ་བ་ཡོད་ཀྱང་གྲོལ་ལུགས་མེད། ཉན་ཐོས་ལྟར་མི་སྤང་། ལས་དང་པོ་པ་ལྟར་མི་བཀག །བྱང་སེམས་ལྟར་མི་སྦྱང་། སྔགས་ཐུན་མོང་པ་ལྟར་རྣ་བར་ཆུ་ཞུགས་པ་སླར་ཆུས་འདོན་པ་ལྟར་མི་བསྒྱུར། ལམ་དུ་བྱེད་ཚུལ་མདོར་ན་རང་ངོ་ཤེས་པ་ལྟ་བ་ལགས། ཡོན་དགས་གསུངས། ༽ཐུན་མོང་མ་ཡིན་པ་དེ་ལྟ་བུའི་གནད་དང་ལྡན་ན། ཉོན་མོངས་པ་དང་རྣམ་རྟོག་གང་སྐྱེས་ཆོས་སྐུའི་ཀློང་ནས་འཁྲུལ་རྟོག་ཡེ་ཤེས་སུ་དག རྐྱེན་ངན་གྲོགས་སུ་འཆར། ཉོན་མོངས་ལམ་དུ་བྱེད། སྡུག་བདེན་འགོག་བདེན་དང་། ཉོན་མོངས་པ་ལམ་དུ་ཤར་བས་༽འཁོར་བ་མ་སྤང་པར་གནས་སུ་དག་ནས་སྲིད་ཞིའི་འཆི ང་བ་ལས་གྲོལ་ཏེ་བྱར་མེད་རྩོལ་སྒྲུབ་དང་བྲལ་བའི་ངང་དུ་ལ་བཟླ་བས་ན། འདི་ལྡན་མ་བསྒོམ་ཆོས་སྐུའི་ངང་། དེ་ལྟ་བུའི་གྲོལ་ལུགས་ཀྱི་གདེངས་འདི་མེད་ན། ལྟ་བ་མཐོ་མཐོ་དང་སྒོམ་པ་ཟབ་ཟབ་ཇི་ལྟ་བུ་རྒྱུད་ན་ཡོད་པར་རློམ་ཀྱང་སེམས་ལ་མི་ཕན། ཉོན་མོངས་པའི་གཉེན་པོ་མི་འགྲོ་བས་ཡང་དག་པའི་ལམ་མ་ཡིན་ལ། རང་ཤར་རང་གྲོལ་གྱི་གནད་འདི་དང་ལྡན་ན། ལྟ་བ་མཐོ་མཐོའི་འཛིན་སྟངས་དང་། སྒོམ་པ་ཟབ་ཟབ་ཀྱི་གཏད་སོ་རྡུལ་ཕྲ་རབ་ཙམ་ཡང་མེད་ཀྱང་། རང་རྒྱུད་གཉིས་འཛིན་གྱི་འཆིང་བ་ལས་གྲོལ་བར་མི་འགྱུར་མི་སྲིད་ཅིང་། གསེར་གླིང་དུ་ཕྱིན་དུས་ས་རྡོ་ཕལ་བ་བཙལ་ཀྱང་མི་རྙེད་པ་ལྟར། གནས་འགྱུ་དང་རྣམ་རྟོག་གང་སྐྱེས་སྒོམ་དུ་ཤར་ནས་འཁྲུལ་བ་རང་མཚན་པ་བཙལ་ཀྱང་མི་རྙེད་པར་འགྱུར་བས་ན། འདི་ཁོ་ན་ཉམས་ལེན་གནད་དུ་འགྲོ་མི་འགྲོའི་ཤན་འབྱེད་པའི་གནམ་ཐིག་ལྟ་བུ་ཡིན་པས། ༼དེ་ཡང་རྟགས་སྤྱོད་པས་འཛིན་པ་ནི། འཁོར་བ་ལ་ངེས་འབྱུང་། རྒྱུ་འབྲས་ལ་ཡིད་ཆེས། སེམས་ཅན་ལ་བྱམས་སྙིང་རྗེ། གནས་ཚུལ་ལ་དག་སྣང་། བླ་མ་ལ་མོས་གུས། མཆེད་གྲོགས་ལ་བརྩེ་གདུང་། སྒོམ་བྱུང་གི་ཤེས་རབ་སོགས་ཡོད་མེད་ཀྱིས་ཤེས་སོ། །གདེངས་གྲོལ་ཐོག་ཏུ་བཅའ་བ་སྟེ་གནད་གསུམ་པའོ། །༼རྒྱུད་ལ་བཞུགས་པའི་ཆ་ནས་གཞི། ཉམས་སུ་ལེན་པའི་ཆ་ནས་ལམ། སྒྲིབ་པ་དག་པའི་ཆ་ནས་འབྲས་བུ།༽དེ་ལྟ་བུའི་གནད་གསུམ་པོ་འདི་ནི་རང་བཞིན་རྫོགས་པ་ཆེན་པོའི་ལྟ་སྒོམ་སྤྱོད་འབྲས་བཞི་ཀ་རིག་པ་ཀ་དག་ཟང་ཐལ་གྱི་ངང་དུ་ཆིག་ཆོད་དུ་༼ལམ་དུ་༽འཁྱེར་བའི་གནད་མ་ནོར་བ་དེ་ཡིན་པས་སྒོམ་པ་དང་སྤྱོད་པའི་མན་ངག་ཀྱང་ཡིན་མོད། འོན་ཀྱང་གཞུང་ལུགས་པ་སྤྱིའི་ཆོས་སྐད་ལྟར་ཤེས་བྱ་བློའི་ཡུལ་ལ་ལུང་རིགས་གཏན་ཚིགས་ཀྱིས་གཞལ་ནས་ལྟ་བ་༼ དབྱིངས་སྟོང་ཉིད་༽གཏན་ལ་འབེབས་པ་ལྟར་འདིར་མི་འདོད་པས་༼ན་སོ་རྒན་གཞོན། ཤེས་རབ་ཆེ་ཆུང་། དབང་པོ་རྣོ་རྟུལ།ལུས་ལ་བཟང་ངན་མེད། འོག་མ་རྩ་རླུང་སོགས་ལ་ཡོད།༽ མངོན་སུམ་རྗེན་པའི་ཡེ་ཤེས་དེ་ཉིད་ནམ་རྟོགས་ཀྱང་རིག་པ་ཡེ་ཤེས་ཀྱི་ལྟ་བ་ཡིན་ལ། ལྟ་སྒོམ་དུ་མ་རོ་གཅིག་ཡིན་པས། གནད་གསུམ་ཀ་ལྟ་བའི་ཉམས་ལེན་དུ་བཤད་ཀྱང་མི་འགལ་བས། གནད་གསུམ་ལྡན་པའི་ལྟ་བ་ལ། དེ་ལྟ་བུའི་ཉམས་ལེན་འདི་ནི་རང་བཞིན་རྫོགས་པ་ཆེན་པོའི་ཀ་དག་གི་ལམ་གནད་མ་ནོར་བ། ཐེག་པ་རིམ་དགུའི་རྩེ་མོར་གྱུར་པ་དེ་ཉིད་ཡིན་ལ། རྒྱལ་པོ་བྱོན་པས་ན་འཁོར་དཔུང་༼སྡུད་པ་ལས། འཁོར་ལོས་སྒྱུར་རྒྱལ་ལམ་གང་ནས་ནི་རྟག་འགྲོ་ལ། །ལམ་དེ་ཉིད་ནས་རིན་ཆེན་བདུན་དང་དཔུང་ཚོགས་ཀུན། །གང་ནས་རྒྱལ་བའི་ཤེས་རབ་ཕ་རོལ་ཕྱིན་མི་འགྲོ། །དེ་ཉིད་ནས་ནི་ཡོན་ཏན་ཆོས་ཀུན་འགྲོ་བར་འགྱུར། ༽མེད་པ་མི་སྲིད་པ་བཞིན་དུ་ཐེག་པ་ཐམས་ཅད་ཀྱི་ལམ་གནད་༼ མ་རྟོགས་ཚེ་༽འདིའི་ལམ་སྟེགས་སམ་༼རྟོགས་ཚེ་༽ གྲོགས་སུ་འགྲོ་བ་དང་། ༼གནས་སྐབས་ལམ་གྱི་འབྲས་བུ་ནི་རྟགས་སྒོ་གསུམ་ལ་འཆར། ཚད་རྨི་ལམ་གྱིས་བཟུང་བའོ། །༽དེར་མ་ཟད་ཀ་དག་གི་རིག་པ་ཤེས་རབ་རང་བྱུང་གི་སྒྲོན་མའི་རང་ཞལ་མཇལ་བའི་ཚེ།༼ཀ་དག་གི་རིག་པ་ཤེས་རབ་རང་བྱུང་གི་སྒྲོན་མའི་ངོ་བོ། གདངས་རྡོ་རྗེ་ལུ་གུ་རྒྱུད། རྩལ་སྒོམ་བྱུང་གི་ཤེས་རབ་ཏུ་འཆར་རོ། །༽དེ་ཡི་རྩལ་སྒོམ་བྱུང་གི་ཤེས་རབ་ཏུ་འབར་ནས་མཁྱེན་པའི་ཀློང་དབྱར་གྱི་ཆུ་བོ་ལྟར་རྡོལ་བ་དང་། སྟོང་ཉིད་ཀྱི་གཤིས་སྙིང་རྗེ་ཆེན་པོར་ཤར་ནས་བརྩེ་བའི་ཐུགས་རྗེ་༼བློ་སྦྱོང་སྐབས་རིས་བཅས་འདིར་༽རིས་མེད་པར་འཇུག་པ་ནི་ཆོས་ཉིད་ཡིན་པས་ན། མཁྱེན་བརྩེ་འབྲེལ་བའི་སྒོམ་པ་དང་། དེ་ལྟར་སྟོང་ཉིད་སྙིང་རྗེ་ཟུང་དུ་འཇུག་པའི་ལམ་གནད་མངོན་སུམ་དུ་གྱུར་པའི་ཚེ། ལམ་ཕ་རོལ་དུ་ཕྱིན་པ་དྲུག་གིས་བསྡུས་པའི་རྒྱལ་བའི་སྲས་ཀྱི་སྤྱོད་པ་རྒྱ་མཚོ་ལྟ་བུ་ཉི་མ་དང་། འོད་ཟེར་ལྟར་རང་རྩལ་དུ་འཆར་ལ། དེ་ལྟ་བུའི་སྤྱོད་པ་༼ཚོགས་གཉིས་ཟུང་འཇུག་༽བསོད་ནམས་ཀྱི་ཚོགས་དང་འབྲེལ་བས་ཅི་བྱེད་གཞན་དོན་དུ་འགྱུར་ཞིང་ཡང་དག་པའི་ལྟ་བ་ཞི་བདེར་མི་གོལ་བའི་གྲོགས་སུ་འགྱུར་བས་ན། རྒྱལ་སྲས་སྤྱི་ཡི་སྤྱོད་པ་གྲོགས། དེ་ལྟ་བུའི་ལྟ་སྒོམ་སྒོམ་སྤྱོད་གསུམ་འདི་བྱོན་བཞུགས་འབྱོན་འགྱུར་གྱི་རྒྱལ་བ་ཀུན་གྱི་དགོངས་པའི་མཐིལ་ཡིན་པས་ན། དུས་གསུམ་རྒྱལ་བའི་ཞལ་བསྡུར་ཀྱང་། ཐེག་པ་ཐམས་ཅད་ཀྱི་རྩེ་རྒྱལ་སྙིང་ཐིག་རྡོ་རྗེ་སྙིང་པོའི་ལམ་གནད་༼གབ་སྦས་ཀྱི་གསང་བ་འདིར་མངོན་དུ་ཕྱུང་བས་༽འབྲས་བུའི་འཐུས་ཀ་འདི་ལས་ལྷག་པ་མེད་པས། འདི་ལས་ལྷག་པའི་གདམས་ངག་མེད། གདམས་ངག་འདིའི་བརྗོད་བྱའི་དོན་ནི་བརྒྱུད་པའི་མན་ངག་གི་ཉིང་ཁུར་ངེས་ཀྱང་རྗོད་བྱེད་ཀྱི་ཚིག་ཉུང་ངུ་འདི་ཙམ་གྱི་སྡེབ་སྦྱོར་ཡང་རིག་པའི་རྩལ་ལས་འཆར་དགོས་པས་ན། རིག་རྩལ་ཆོས་སྐུའི་གཏེར་སྟོན་གྱིས། དེ་དག་གི་དོན་སྒོམ་པའི་ཤེས་རབ་ཀྱིས་ཉམས་སུ་མྱོང་བ་ཙམ་མེད་ཀྱང་། བླ་མ་དམ་པའི་ཞལ་ལུང་ནོར་བ་མེད་པ་ལས་ཐོས་པའི་ཤེས་རབ་ཀྱིས་སྒྲོ་འདོགས་ལེགས་པར་བཤད་དེ། བསམ་པའི་ཤེས་རབ་ཀྱིས་གཏན་ལ་ཕབས་ནས་བཀོད་པ་ཡིན་པས་ན། ཤེས་རབ་ཀློང་ནས་གཏེར་དུ་བླངས། འཇིག་རྟེན་གྱི་གཏེར་ཕལ་བ་འཕྲལ་གྱི་དབུལ་བ་སེལ་བ་ཙམ་དང་མི་འདྲ་བས་༼ཞིང་འདིའི་སྲིད་ཞིའི་རྒུད་པ་ཐམས་ཅད་༽སེལ་བས། ས་རྡོའི་བཅུད་དང་འདི་མི་འདྲ། ལྟ་བའི་གནད་གསུམ་པོ་འདི་ཚིག་གསུམ་གནད་དུ་བརྡེགས་པ་ཞེས་སྤྲུལ་པའི་སྐུ་དགའ་རབ་རྡོ་རྗེ་མྱ་ངན་ལས་འདས་པའི་ཚེ། ནམ་མཁའ་འོད་ཕུང་གི་དཀྱིལ་ནས་སློབ་དཔོན་འཇམ་དཔལ་བཤེས་གཉེན་ལ་གནང་སྟེ་དགོངས་པ་དབྱེར་མེད་དུ་གྱུར་པའི་མན་ངག་ཡང་དག་པ་ཡིན་པས་ན། དགའ་རབ་རྡོ་རྗེའི་ཞལ་ཆེམས་ཡིན། །དེ་ལྟ་བུའི་གདམས་ངག་གི་དོན་གནད་དུ་འབྱོར་བས་ཀུན་མཁྱེན་ཆོས་ཀྱི་རྒྱལ་པོ་སྐུ་ཚེ་དེ་ཉིད་ལ་ཀ་དག་ཆོས་ཟད་ཀྱི་དགོངས་པ་མངོན་དུ་གྱུར་ནས་༼བར་དོར་འཚང་རྒྱ་བའི་རྟགས། གདུང་དང་རིང་བསྲེལ་འཇའ་འོད་སྐུ་དང་ས་གཡོ་བ་སོགས་མངོན་དུ་སྣང་བས་༽མངོན་པར་རྫོགས་པར་སངས་རྒྱས་ཏེ་རྒྱལ་བ་དགོངས་བརྒྱུད་རྫོགས་ཤིང་༼ཡེ་ཤེས་བླ་མ་ལས་གནད་གསུམ་གྱི་མན་ངག་འདི་ཀུན་མཁྱེན་བླ་མས་ཁོ་བོའི་བགོ་སྐལ་དུ་བཞག་ནས། མཆིམས་ཕུ་ནགས་ཀྱི་དུར་ཁྲོད་དུ་ཕྱིན་པ་ཡིན། ཞེས་གསུངས།༽དེས་རིག་འཛིན་འཇིགས་མེད་གླིང་པ་ལ་ཡེ་ཤེས་ཀྱི་སྐུ་མངོན་དུ་བསྟན་ནས་རིག་འཛིན་བརྡ་བརྒྱུད་ཀྱི་ཚུལ་དུ་བྱིན་གྱིས་བརླབས། དེས་ཁོ་བོ་ཅག་གི་དྲིན་ཆེན་རྩ་བའི་བླ་མ་ལ་ཞལ་ནས་སྙན་དུ་བརྒྱུད་དེ་གདམས་ངག་གི་ངོ་སྤྲོད་བཏབ་ནས། ཆོས་ཉིད་མངོན་སུམ་དུ་མཇལ་དེ་འགྲོ་བའི་དཔལ་མགོན་དུ་བཞུགས་པ་ལས་ཐོབ་པའི་གདམས་ངག་ཡིན་པས་ན། བརྒྱུད་པ་གསུམ་གྱི་ཐུགས་བཅུད་ཡིན། འདི་ལྟ་བུའི་མན་ངག་གསེར་གྱི་ཡང་ཞུན། སྙིང་གི་ཐིག་ལེ་ལྟ་བུ་འདི། ཉམས་སུ་མི་ལེན་པའི་གང་ཟག་ལ་བསྟན་དུ་ཕངས་ཤིང་། གདམས་ངག་སྲོག་ལྟར་བཙའ་ཞིང་གནད་དོན་ཉམས་སུ་བླངས་ནས་ཚེ་གཅིག་གིས་སངས་རྒྱས་སྒྲུབ་པའི་གང་ཟག་ལ་མི་བསྟན་དུ་ཕངས་པས་ན། སྙིང་གི་བུ་ལ་གཏད་དོ་རྒྱ། ཟབ་དོན་ཡིན་ནོ་སྙིང་གི་གཏམས། །སྙིང་གཏམས་ཡིན་ནོ་དོན་གྱི་གནད། །དོན་གནད་ཡལ་བར་མ་དོར་ཅིག །གདམས་ངག་ཟགས་སུ་མ་འཇུག་ཅིག །ཅེས་མཁས་པ་ཤྲཱི་རྒྱལ་པོའི་ཁྱད་ཆོས་ཅུང་ཟད་བཀྲལ་བ་རེ་ཞིག་རྫོགས་སོ། །དགེའོ། །དགེའོ། །དགེའོ། །དགེའོ། ། ཁྲེགས་ཆོད་སྟོང་པའི་ཡེ་ཤེས་ཀྱི་མན་ངག་བླ་མའི་ཞལ་ལུང་ཁྱབ་བརྡལ་ཉི་མའི་འཁོར་ལོ།ཁྲེགས་ཆོད་སྟོང་པའི་ཡེ་ཤེས་ཀྱི་མན་ངག་བླ་མའི་ཞལ་ལུང་ཉམས་ལེན་གནད་དུ་དྲིལ་བ་ཁྱབ་བརྡལ་ཉི་མའི་འཁོར་ལོ་བཞུགས། གཞོན་ནུ་བུམ་སྐུའི་མཁའ་དབྱིངས་སུ། །ནང་གསལ་ཐིམ་ལ་མ་རྨུགས་པའི། །ཕྲ་བའི་ཡེ་ཤེས་ཀུན་མཁྱེན་རྗེ། །སྙིང་གི་དབུས་ན་འདུ་འབྲལ་མེད། །དེ་ལའང་འདིར་ལས་དང་པོ་པས། ལུས་ངག་ཡིད་གསུམ་ལ་བརྟག་པའི་སྐབས་སེམས་གཙོ་ཆེ་ཟེར་བ་ཡིན་ཀྱང་། སྲིད་རྩའི་བདག་འཛིན་དང་མ་རིག་ལྷན་སྐྱེས་གཉིས་གཅིག་གམ་སྙམ་ན་མི་གཅིག་སྟེ། བདག་འཛིན་ནི་ལྟ་བ་གསལ་བའི་རང་བཞིན་ཅན་དང་། མ་རིག་པ་ནི་མི་ཤེས་པ་མི་གསལ་བའི་རང་བཞིན་ཅན་ཡིན། སྲིད་རྩའི་བདག་རྟོག་དེ་གང་གི་དབང་གིས་སྐྱེ་ན་མ་རིག་པའི་དབང་གིས་སྐྱེས་པ་ཡིན། དེ་ནི་བདག་ཏུ་རྨོངས་པ། བདག་ཏུ་ལྟ་བ། བདག་ཏུ་ང་རྒྱལ་བ། བདག་ལ་ཆགས་པ་སྟེ་འཁོར་ཐུན་མིན་བཞི་དང་། ཀུན་འགྲོ་ལྔ་སྟེ་འཁོར་དགུ་ལྡན་གྱི་བདག་ཉིད་ཅན་ཏེ། ཀུན་གཞི་ལ་དམིགས་ནས་ང་ཡོད་པར་འཛིན་པའི་ཕྱིར་སེམས་གཙོ་ཆེ་ཟེར་བ་ཡིན་ལ། དེ་ལྟར་མ་ཤེས་ན་འགྲོ་འདུག་སོགས་སྤྱོད་ལམ་ཐམས་ཅད་ལ་སེམས་གཙོ་ཆེ་ཟེར་བ་ནི་རྟགས་ལྟར་སྣང་བ་ཡིན་ཏེ་ལུས་དང་ངག་མེད་པར་སེམས་ཀྱིས་བསམ་པ་ཙམ་གྱིས་འགྲོ་འདུག་སྨྲ་བརྗོད་སོགས་མི་བྱེད་པའི་ཕྱིར་རོ། །བྱུང་གནས་འགྲོ་གསུམ་གྱི་སྐབས་སེམས་བཙལ་ནས་སྐྱེ་འགག་གནས་གསུམ་དང་བྲལ་བར་གཏན་ལ་དབབ་པ་ཡིན། དེ་ཡང་སེམས་ལ་ངོ་བོ་གང་ཡང་མེད་པ་ལ་དང་པོ་སྐྱེ་རྒྱུ་མེད་པས་སྐྱེ་བའི་རྒྱུས་སྟོང་། དང་པོ་མ་སྐྱེས་པ་ལ་བར་དུ་གནས་པའི་མཁན་པོ་མེད་པས་གནས་པའི་ངོ་བོས་སྟོང་། བར་དུ་མི་གནས་པ་ལ་ཐ་མ་འགག་རྒྱུ་མེད་པས་འགག་པ་རང་གི་མཚན་ཉིད་ཀྱིས་སྟོང་། དེ་ཕྱིར་གདོད་ནས་སྐྱེ་འགག་གནས་གསུམ་དང་བྲལ་བ་ཡིན་ཏེ་གང་དུ་བཙལ་ཀྱང་མི་རྙེད་པ་ཡིན། ས་པཎ་གྱིས། དང་པོ་སྐྱེ་བ་མེད་པ་ལ། །གནས་པ་འགག་པ་ག་ལ་སྲིད། །སྐྱེ་འགག་མེད་པར་བསམ་པ་ནི། །རྣམ་རྟོག་ཡིན་གྱི་ཞོག་ལ་ཐོངས། །ཞེས་གསུངས་པ་བཞིན་ཤེས་པར་བྱའོ། །སེམས་རིག་གི་ལ་ཤན་འབྱེད་པའི་སྐབས་སུ་གང་ཟག་དབང་རྟུལ་དང་དབང་རབ་གཉིས། དང་པོ་སྣང་བ་ཡུལ་གྱི་བློ་ཅན་ནི་སེམས་ཀྱི་རྙོགས་མ་མ་དྭངས་བའི་རིགས་ཡིན་པས་སེམས་ལས་འདས་པའི་ཡེ་ཤེས་ལམ་དུ་བྱེད་དཀའ་བའི་ཕྱིར་ཐོག་མར་རིག་ངོ་ལ་ལྟ་བའི་སྔ་ལོགས་སུ་སེམས་ལ་བལྟ་བ་གལ་ཆེ་སྟེ། དེ་ལའང་ཕྱག་ཆེན་ལྟར་གནས་འགྱུ་རིག་གསུམ་གྱི་དབང་དུ་བྱས་ན། གནས་པ་ནི་རྟོག་ཚོགས་ཀྱི་འཕྲོ་འདུ་ཐམས་ཅད་ཞི་ནས་རླབས་དང་བྲལ་བའི་རྒྱ་མཚོ་བཞིན་གནས་པའི་ཆ་དང་། འགྱུ་བ་ནི་བཟང་ངན་གྱི་རྟོག་ཚོགས་གང་རུང་སྟེ་འཕྲོ་བའི་ཆར་གཏོགས་པ་རྣམས་དང་། རིག་པ་ནི་གནས་པའི་རྒྱུན་སྐྱོང་བ་ན་འགྱུ་བའི་དབང་བཙན་དང་མི་བཙན་ལ་རྟོག་བྱེད་ཀྱི་ཤེས་བཞིན་དེ་ཡིན་ནོ། །འདི་དག་ནི་སོ་སོའི་སྐྱེ་བོ་རྣམས་ལམ་ལ་བཀྲི་བའི་ཆེད་དུ་བཤད་པ་ཙམ་ཡིན་ལ། ཚུལ་ཇི་ལྟར་ན་གནས་པའི་ཚེ་རྣམ་ཤེས་ཀྱི་ངོར་སྟོང་པའི་སྣང་ཚུལ་སྣང་བ་ཙམ་ལས་ཁྱད་ཆོས་མེད་པ་ཡིན་ཏེ། ཤནྟ་པུ་རི་བས། གསལ་སྟོང་རིག་པ་ངར་དང་མི་ལྡན་པའི། །ཞི་བར་གནས་ཙམ་དུད་འགྲོའི་ཁྲོད་ནའང་མང་། །ཞེས་གསུངས་པ་བཞིན་ནོ། །འགྱུ་བའི་ཚེ་གང་ཤར་གྱི་ངོ་བོ་ལ་བལྟ་བ་དང་། རང་ངོས་འཛིན་པ་དང་། གཤིས་ཐོག་ཏུ་ཀློད་པ་སོགས་ཡང་དག་པའི་ལམ་མ་ཡིན་པའི་ཚུལ་ཀུན་མཁྱེན་ཞལ་ལུང་ལས། དེ་ལ་བལྟ་བྱའི་རྣམ་རྟོག་དང་། ལྟ་མཁན་གྱི་དྲན་པ་གཉིས་སུ་ཡོད་པས་གཉིས་འཛིན་ནི་འཁོར་བའི་རྩ་བ་སྡུག་བསྔལ་གྱི་འབྱུང་ཁུངས་ས་ལམ་གྱི་བཀག་རྡོ་ཡིན་ཕྱིར་གནས་ཀྱང་ངོ་ཤེས་འགྱུས་ཀྱང་ངོ་ཤེས་པ་འདི་རྟོགས་པ་ཀློང་དུ་གྱུར་པའི་ཚེ་ནོར་ས་རྔམ་པོ་ཆེ་ཡིན་ཞེས་གསུངས་སོ། །དྲན་པའམ་རིག་པ་ནི་ལས་དང་པོ་བའི་གང་ཟག་ལ་དགོངས་ནས་དྲན་པ་སྒོམ་གྱི་དངོས་གཞིར་བསྟན་ནས་ཁྲིད་པའི་སྐབས་ཡིན་ཏེ། གནས་འགྱུ་རིག་གསུམ་གང་ཡིན་ཀྱང་རུང་སྟེ་དྲན་པའི་ར་བ་ལས་མ་འདས་པའི་ཕྱིར་འདུ་བྱེད་ཀྱི་དྲན་པའི་ཐ་སྙད་སྦྱར་བ་དང་། གཞན་ཡང་རེས་འགའ་ཡུལ་ལ་གཡེང་དུས་ང་གཡེང་འདུག་སྙམ་ནས་མ་བཅོས་པར་འཇོག་རྒྱུ་འདྲ་བ་ཞིག་ཡོད་པ་དེ་ནི་སྟོང་འཛིན་འདུ་ཤེས་ཀྱི་དྲན་པ་དང་། རེས་ཡེང་བ་ཚོར་ཙམ་ནས་ཡེང་མཁན་ཆོས་ཉིད་དུ་སྟོར་བ་ནི་ཐོག་མའི་སྐྱོང་ཚུལ་མ་ནོར་བ་ཡིན་ཀྱང་། སླར་དེ་ལ་ཡང་བསྐྱར་ཚོར་མཁན་ལ་བརྟག་དགོས་པ་ནི་ཆོས་ཉིད་ལ་རྟོག་གེའི་བློས་གནོད་བསྐྱལ་བ་ཡིན་ནོ། །ཡང་རེས་འགའ་བློ་ལ་ཅི་ཤར་ཐམས་ཅད་མ་བཅོས་པར་བཞག་པའི་རྗེས་ལ། ཅི་ཡང་མེད་པར་སྟོང་ཕྱལ་ཕྱལ་དུ་སོང་བ་དེ་ལ་ངེས་ཤེས་སྐྱེས་ནས་ཀ་དག་གི་དགོངས་པ་འདིར་འདུག་སྙམ་པ་ནི་སྟོང་འཛིན་དང་། ངེས་ཤེས་རྙེད་པ་ནི་རྟག་འཛིན་འདུ་ཤེས་ཀྱི་དྲན་པ་ཡིན་ལ། དེ་ལྟ་བུའི་འཇུར་དྲན་གྱིས་བཅིངས་པའི་སྒོམ་ཆེན་པ་རྣམས་ལ་དྲན་སྣང་ཡེ་ཤེས་ཀྱི་འཁོར་ལོ་རུ་ཤར་ནས་མཐའ་གྲོལ་ཀློང་ཡངས་ཆེན་པོའི་ངང་དུ་མི་ཚེ་ཉི་མ་འཛད་དུ་འཇུག་པའི་ལས་འཕྲོ་ཞིག་མེད་པས་ཅི་ཚུགས་དྲག །ཡང་མཉམ་བཞག་གནད་དུ་མ་སོང་ན་ཅི་ཡིན་འདི་ཡིན་མེད་པའི་ལུང་མ་བསྟན་ཐོམ་ཡོ་རེ་བ་ཞིག་གི་ངོ་བོ་བརྗོད་མི་ཤེས་པ་ལྟ་བུ་ཞིག་འཆར་བ་ཡིན། དེ་ལ་བརྟན་པ་ཆེར་ཐོབ་པའི་ཚེ་ན་ཡུལ་རྐྱེན་གྱིས་མི་འཕྲོག་པའི་ཉམས་ཡིན་ཏེ། ཉིན་མཚན་འཁོར་ཡུག་ཏུ་འབྱམས་ཀྱང་སྙིང་པོ་ཅི་ཡང་མེད་དེ་སྟོང་ཧད་ཧད་པོ་དེ་ལ་རིག་པའི་དྭངས་ཆ་མེད་ན་ཐུགས་དམ་གྱི་ངོ་བོ་ཇི་ལྟར་བཟང་ཡང་ཉམས་ཙམ་མྱོང་བ་ཡིན་ཀྱང་། འདི་ལ་དེང་སང་གི་བཤེས་གཉེན་རྣམས་ཀྱིས་རྟོགས་པ་ཉིན་མཚན་འདྲེས་པར་ངོ་སྤྲོད་བྱེད་པར་འདུག་པས་ལོང་བས་ལོང་བ་ཁྲིད་ནས་མི་ཚེ་སྟོང་པར་འཛད་པ་ལས་ཡོན་ཏན་སྐྱེ་བའི་རེ་བ་ཟད་པ་ཞིག་སྣང་སྟེ། ཀུན་མཁྱེན་འཇིགས་བྲལ་གླིང་པས། སེམས་གསལ་སྟོང་ཞི་གནས་འཛིན་པ་ཅན། །ཡིད་རྟོག་དཔྱོད་ཀྱི་ལྷག་མཐོང་གཡོ་འཁྲུལ་པོ། །དབྱིངས་ལུང་མ་བསྟན་གྱི་བྱར་མེད་གསུམ། །འདི་གསུམ་པོ་རྫོགས་ཆེན་ཁྱུ་ནས་བུད། །སྒོམ་དྲན་འཛིན་གཉེན་པོས་འཆིང་པ་དང་། །བློས་ཆེད་འཛིན་བྱས་པའི་སྟོང་ཉམས་ཅན། །བློ་གོ་ཡུལ་དྲེད་པའི་རྒྱས་འདེབས་གསུམ། །ཁྱེད་གསུམ་ཡང་རྫོགས་ཆེན་ཁྱུ་ནས་བུད། །སེམས་འདུ་ཤེས་གྲུང་པོའི་ལྟ་སྒོམ་དང་། །བློ་གོ་རར་འཐུམ་པའི་ཉམས་ཞེན་དང་། །ཡིད་མྱོང་བྱའི་དྲི་མས་སྦགས་དེ་གསུམ། །ཁྱེད་གསུམ་ཡང་རྫོགས་ཆེན་ཁྱུ་ནས་བུད། །ཅེས་སོ། །ཡང་འགའ་ཞིག་གིས་འདས་པའི་རྟོག་པ་འགག །མ་འོངས་པའི་རྟོག་པ་མ་སྐྱེས། ད་ལྟའི་ཤེས་པ་ངོས་བཟུང་ནས་སྟོང་པའི་ཉམས་ཤུགས་ཆེ་བ་དེ་ལ་བསྒོམ་བྱའི་སྙིང་རྡོ་མཛད་ཀྱང་བྱིས་པའི་རྣམ་ཐར་ཙམ་དུ་ཟད་པ་ནི། ཡིད་བཞིན་མཛོད་ལས། སྐད་ཅིག་ཡུད་ཙམ་ངོས་བཟུང་འགྱུར་བའི་ཕྱིར། །སྔ་ཕྱི་སྒོམ་མིན་བར་དེར་སུ་ཡིས་བཅུག །དེ་འདྲའི་ལམ་ངན་མདོ་རྒྱུད་དང་འགལ་བས། །ཐར་བ་འདོད་ན་རིང་དུ་སྤང་བར་བྱ། །ཞེས་དང་། ཕྱག་རྒྱ་ཆེན་པོ་གཉུག་མའི་དེ་ཉིད་གསལ་བྱེད་ལས་ཀྱང་། སྔ་མ་འགག་ནས་ཕྱི་མའི་བར་གྱི་སྟོང་ཆ་ཆོས་ཉིད་དུ་མཐོང་བ་ནི་སྒོམ་ཆེན་ལ་མུ་གེ་ལྡང་བའི་ཚུལ་གསུངས་ཡོད་པས་ཤེས་པར་བྱའོ། །ཡང་བཤེས་གཉེན་དམ་པས་མ་ཟིན་པའི་བླུན་སྒོམ་མུན་རྡོ་འཕེན་པ་འགའ་ཞིག་ལ། འོད་གསལ་མཐའ་དབུས་དང་བྲལ་བའི་ཀློང་དུ་གང་ཤར་ཡེ་ཤེས་ཀྱི་རོལ་པར་འཆར་བའི་མན་ངག་གིས་དབེན་ནས་ཤེས་པ་གསལ་སྟོང་རྩེ་གཅིག་ཏུ་གནས་དུས་དེའི་ངང་ལས་ཐོལ་གྱིས་ཤར་བའི་རྣམ་རྟོག་དེ་རིག་ཅིང་གཤིས་ཐོག་ཏུ་ཀློད་ནས་དེའི་རྒྱུན་སྐྱོང་བར་འདུག་ཀྱང་། དེ་ནི་གཟུགས་མེད་ཀྱི་ལྷ་དང་རྗེས་སུ་མཐུན་པའི་མཉམ་བཞག་ཡིན་པར་ཀུན་མཁྱེན་གཉིས་པས་བཞེད་པའོ། །གཞན་ཡང་གང་ཤར་གྱི་རྟོག་ཚོགས་མ་བཅོས་པར་བཞག་ན་ཆོས་ཉིད་ཡིན་ཞེས་སྒོམ་ཆེན་པ་རྣམས་ཀྱི་ཐུགས་དམ་གྱི་ངོ་བོར་མཛད་ནས་གཞན་ལ་མེད་པའི་ཟབ་ཆོས་སུ་འཆད་པ་འདི་ལའང་། རྟོགས་པ་མཐོན་པོར་སླེབས་པའི་རྣལ་འབྱོར་པས་དཔྱད་ན་རྣམ་འབྱེད་ཤིན་ཏུ་ཕྲ་བ་ཡོད་པས་འདི་ཡང་ཐེག་རྩེའི་ཤིན་ཏུ་རྣལ་འབྱོར་གྱི་དགོངས་པ་མིན་ཏེ། གང་ཤར་མ་བཅོས་པར་ཇི་ལྟར་འཇོག་ནུས་ཏེ་ཤར་བའི་རྟོག་ཚོགས་དེ་ལ་མཐོང་བར་བྱ་བའི་དབྱིབས་དང་ཁ་དོག་ལ་སོགས་གཟུགས་སུ་གྲུབ་པ་རྡུལ་ཙམ་ཡང་མེད་པས་དེ་ལ་གཞག་རྒྱུའི་རྣམ་རྟོག་དང་། འཇོག་མཁན་གྱི་དྲན་པ་གཉིས་སུ་ཕྱེ་བ་ནི་ནམ་མཁའི་པདྨོའི་ཁ་དོག་བརྗོད་པ་ཙམ་དུ་ཟད་ལ། ཡང་ཞི་གནས་ཀྱི་མྱོང་བར་སྦྲང་མ་རྩི་ལ་འབྱར་བ་ལྟ་བུའི་སྒོམ་ཆེན་རྣམས་མ་གཡེང་བའི་ཚེ་དྲན་པ་ཙམ་གྱིས་སེམས་རྟོག་མེད་དུ་གནས་ལ། དྲན་པས་གསལ་མ་ཐེབས་ན་ཐ་མལ་པ་དང་ཁྱད་མེད་པ་ཡིན་ཏེ། འདི་དུས་མ་ཡེངས་མི་སྒོམ་ལ་ལྟ་བའི་མཐིལ་བཅོལ་ན་བདེ་བར་སྣང་ངོ་། །འདིར་ཀུན་མཁྱེན་ཡབ་སྲས་ཀྱི་རྗེས་འབྲང་བརྒྱུད་པ་དང་བཅས་པའི་རང་ལུགས་ཀྱི་ཁྱད་ཆོས་འདི་ལ། དྲན་པ་རང་ཡལ་དུ་སོང་བའི་ཚེ་དྲན་སྣང་ཡེ་ཤེས་ཀྱི་འཁོར་ལོ་རུ་ཤར་ནས་ཆོས་ཉིད་ཀྱི་ངང་དུ་རྒྱ་འབྱམས་པ་ལ་དྲན་པ་ལོགས་སུ་འཚོལ་དགོས་པ་མིན་ཏེ། ལྟ་བ་བཟང་པོའི་ཤུབས་ནས་བཏོན་པ་ལ་དྲན་པས་གང་ལ་འཛིན། གཡེང་ཡུལ་ཆོས་ཉིད་དུ་སོང་བ་ལ་ཡེང་བའི་མཁན་པོ་སུས་བྱེད། དགོངས་པ་ཀློང་ནས་གྲོལ་ཏེ་གཏད་མེད་ཡེ་སངས་ཀུན་ཏུ་བཟང་པོའི་དགོངས་པ་ལ་སླེབ་པ་ཞིག་ལགས་སོ། །གནས་ལུགས་རིན་པོ་ཆེའི་མཛོད་ལས་ཀྱང་། དམིགས་གཏད་ཆོས་མེད་ཧར་སངས་རྒྱ་ཡན་པ། །མ་ཡེངས་དྲན་པ་ཟད་པའི་དགོངས་པ་ནི། །མཁའ་ལྟར་ཕྱལ་ཡས་སྒོམ་དང་མི་སྒོམ་མེད། །འདི་ནི་ཀུན་བཟང་དགོངས་པའི་ཀློང་ཆེན་ནོ། །ཞེས་སོ། །དེ་ལྟ་ནའང་རྟོག་གེ་དང་གླེན་སྒོམ་རྣམས་ལ་རང་བཞིན་རྫོགས་པ་ཆེན་པོའི་ལས་འབྲེལ་མེད་པ་ནི། ཀུན་མཁྱེན་ངག་གི་དབང་པོས། ཨ་ལ་ལ་འདི་ཐེག་པ་གཞན་ལས་ཁྱད་པར་གནམ་ས་བས་ཀྱང་ཆེ་སྟེ། བསྟན་ཡང་མི་རྟོགས། བཤད་ཀྱང་མི་གོ། ད་དུང་ཆོས་ཀྱི་ཁ་འཛིན་ཙམ་ལས་ངོ་སྤྲོད་སྔ་མའི་སྟེང་དུ་འཇོག་པ་རྣམས་ལ། རང་བཞིན་རྫོགས་པ་ཆེན་པོའི་གསང་བ་སྙིང་ཐིག་གི་ལས་འབྲེལ་མེད་པས། ཅི་བྱས་ཀྱང་འཚང་རྒྱ་བ་ལ་སྔ་འདྲེས་གཅིག་གིས་ཉེ་བར་མ་སོང་བ། ཡི་མུག་ལ་དགོད་འཆོར་པ་མཚར་ཆེའོ། །ཞེས་གསུངས་པའི་དོན་ཐོག་ཏུ་ཕེབས་པ་ཉིད་དོ། །དེའི་ཕྱིར་སེམས་དང་རིག་པའི་ལ་ཤན་འབྱེད་པ་ལ། གནས་པ་ངོ་བོའི་ཤན་འབྱེད་པ་ལའང་གཉིས་ལས། དང་པོ་སེམས་ཀྱི་ངོ་བོ་ནི་ཤེས་པ་ཚོགས་དྲུག་གི་ཡུལ་ལ་གཡེངས་ཀྱང་དྲན་པས་ཟིན་པ་ཙམ་ནས་སེམས་གསལ་སྟོང་དུ་གནས་པ་ཞིག་དང་། ཡང་དྲན་ཙམ་ནས་ཧད་དེ་གནས་པ་ཞིག་དང་། ཡང་སྒོ་ལྔའི་གདངས་མ་འགག་པ་ལ་ཡིད་ཀྱི་རྣམ་ཤེས་ཅིར་ཡང་མི་རྟོག་པའི་འཆར་ཚུལ་གསུམ་ཡོད་པ་ནི་སེམས་ཀྱི་ངོ་བོ་མཐོང་བ་ཡིན་ལ། དེའི་ངང་དུ་དྲན་པ་བསྟེན་ན་དེ་གསུམ་གས་ཀྱང་བྱིས་པ་ཉེར་སྤྱོད་ཀྱི་བསམ་གཏན་ཙམ་སྐྱེ་བའི་རྟེན་བྱེད་པ་ནི། དགོན་རྩེ་སྤྲུལ་སྐུའི་དྲིས་ལན་དུ་གསུངས་ཡོད་པས་ཤེས་པར་བྱའོ། །གཉིས་པ་རིག་པའི་ངོ་བོ་ནི། ཡེ་གྲོལ་ཡིན་ཏེ། གློ་བུར་བ་མ་ཡིན་པར་ཐོག་མ་ནས་གྲོལ་ཏེ། ཡེ་ཞེས་པ་ནི་བྱས་པ་དང་རྩོལ་བ་མེད་པའི་དོན་ཏེ། གང་ནས་ཀྱང་མ་བྱུང་། གང་དུའང་མ་སོང་། གར་ཡང་གནས་པ་མེད་པ་དང་། གྲོལ་ཞེས་པ་ནི་དགྲོལ་བ་ལྟ་བུ་མ་ཡིན་པས། ལྟ་སྒོམ་གྱིས་འབད་མི་དགོས། རང་ལུགས་སུ་གནས་པ་ལ་བཅས་བཅོས་མེད་པའི་དོན་ཡིན་ལ། དེ་ལའང་ཚུལ་ཇི་ལྟ་བུ་ཞེ་ན། ཡེ་ཤེས་རང་གསལ་དུ་ལྷག་གེ དབྱིངས་སྟོང་ཉིད་དུ་ལྷང་ངེ་། རིག་པ་ཀ་དག་ཏུ་རྗེན་ནེ། གྲོལ་ན་བྱུང་ཚོར་གྱི་རྟོག་པ་ཐམས་ཅད་གདོད་མའི་དབྱིངས་སུ་གྲོལ། གནས་ན་སྐུ་གསུམ་གྱི་ངང་དུ་གནས། འཕྲོ་ན་ཡེ་ཤེས་ཀྱི་རོལ་པར་ཤར། མཉམ་ན་གཉིས་མེད་ཀྱི་ངང་དུ་མཉམ་པ་ཡིན་གསུངས། འཕྲོ་བ་རྩལ་གྱི་ཤན་འབྱེད་ལའང་གཉིས་ལས། དང་པོ་སེམས་ཀྱི་རྩལ་ནི། དཔེར་ན་བཅོ་ལྔའི་ཟླ་འོད་ཡུལ་དང་འདྲེས་པ་བཞིན་དུ་གཟུང་བ་དང་འཛིན་པ་ལས་མ་འདས་པའི་ཆོས་སོ། །གཉིས་པ་རིག་པའི་རྩལ་ནི། རང་གྲོལ་ཡིན་ཏེ། རང་གིས་རང་གྲོལ་བ་མ་གཏོགས་གཉེན་པོ་གཞན་མེད་པའི་དོན་ཡིན་ཏེ་བློ་ལ་ཅི་ཤར་ཐམས་ཅད་རང་བྱུང་གི་ཡེ་ཤེས་སུ་ཤར་ནས་འཛིན་རྟོག་ཡེ་གྲོལ་དུ་སོང་བ་ནི་དཔེར་ན་རིན་པོ་ཆེའི་གསེར་གླིང་དུ་ཕྱིན་དུས་ས་རྡོ་ཕལ་པ་བཙལ་ཀྱང་མི་རྙེད་པ་བཞིན་ནོ། །དེ་ལྟ་བུའི་སེམས་རིག་གི་ལ་ཤན་ལེགས་པར་འབྱེད་དགོས་པ་ཡིན་ལ། ཐེག་མཆོག་རིན་པོ་ཆེའི་མཛོད་ལས་ཀྱང་། སེམས་རྟོག་མེད་དང་རིག་པ་རྟོག་མེད་གཉིས་མི་རྟོག་པར་འདྲ་ཡང་རིག་པ་ཟང་ཐལ་ལ། སེམས་ལྷན་ནེར་གནས་ཤིང་འཁྱིལ་བའི་ཁྱད་ཡོད། རིག་པ་རང་ཤར་ཡུལ་ལ་སྣང་བ་དང་། རྣམ་རྟོག་རང་ཁར་ཤོར་བ་གཉིས་ཡུལ་ལ་འཕྲོ་བར་འདྲ་ཡང་། རིག་པ་ཐལ་ཕྱུང་དུ་ཤར་ནས་འཛིན་མེད་དུ་གྲོལ་ལ། རྣམ་རྟོག་གཟུང་འཛིན་དུ་ཞེན་པས་ཡུལ་ཕྱིར་འབྲང་བའི་ཁྱད་ཡོད། ཅེས་གསུངས་པ་བཞིན་ནོ། །གཞན་ཡང་རྟོག་ཚོགས་ཀྱི་འཕྲོ་འདུ་དང་བྲལ་བའི་ངང་ལ་གནས་དུས་གནས་ཆའི་མི་རྟོག་པ་དེ་ཉིད་ཞི་གནས་ཡིན་པས་སྒོམ་དུ་འདོད་པ་མིན་ཏེ། འདི་དུས་ཀྱི་རིག་པ་དྭངས་གསལ་རྙོགས་མ་དང་བྲལ་བའི་དྲན་རིག་སོ་མའི་དབྱིངས་ན་ཡེ་ཤེས་རིག་པའི་དྭངས་ཆ་ཟང་ཐལ་དུ་འདུག་པ་དེ་ཉིད་ངོས་ཟིན་པ་ནི་གནད་དམ་པ་ཡིན། ཡང་རིག་པ་ཡུལ་ལ་འཆར་དུས་གང་ཤར་ལ་བལྟ་བ་སོགས་སྒོམ་དུ་འདོད་པ་མིན་ཏེ། འདི་ཆོས་སྐུ་འཕོ་མེད་རྒྱལ་པོའི་རང་རྩལ་ལས་རོལ་པ་འགག་མེད་དུ་ཤར་ནས་ཕན་གནོད་མེད་པར་གྲོལ་བ་ཁང་སྟོང་གི་རྐུན་མ་ལྟ་བུ་དེ་ཉིད་རྣལ་འབྱོར་གྲུབ་པའི་དབང་ཕྱུག་གི་ལམ་ཡིན་པར་པཎ་ཆེན་བི་མ་ལའི་རྗེས་འབྲངས་རྣམས་ཀྱིས་བཞེད་པ་ཡིན་ནོ། །དེ་ལྟ་བུའི་དོན་འདི་མ་རྟོགས་ན། སེམས་རྩེ་གཅིག་ཏུ་ནང་དུ་གནས་པ་དང་། ཕྱི་ཡུལ་ཐོག་ཏུ་འཕྲོ་བ་སོགས་ལ་བལྟ་བ་དེ་སྒོམ་གྱི་ངོ་བོར་འཛིན་པ་ནི་ཤིན་ཏུ་འཁྲུལ་བར་འགྱུར་ཏེ། གནས་པ་ཙམ་ནི་བསམ་གཏན་གྱི་ལྷ་དང་འདྲ་ལ། འཆར་བ་ཙམ་ནི་ཐ་མལ་གྱི་རྟོག་པ་དང་འདྲ་བས་བསྒོམས་ཀྱང་སངས་རྒྱས་ཐོབ་པས་རེ་བ་ཞིག་མེད་པར་སྣང་ངོ་། །ངོ་བོ་ཡེ་གྲོལ་དང་རྩལ་རང་གྲོལ་ཞེས་པའང་། གཉིས་མེད་རང་བྱུང་གི་ཡེ་ཤེས་ཡིན་ཀྱང་། དེ་ལྟར་མ་རྟོགས་པའི་སྒོམ་ཆེན་རྣམས་ཀྱིས་ངོ་བོ་དང་རྩལ་ཞེས་པའང་གནས་པ་དང་འཆར་བ་གཉིས་ཡིན་སྙམ་ནས། ངོ་བོ་མི་རྟོག་པར་འཇོག ། རྩལ་ཤར་གྲོལ་དུ་སྐྱོང་བ་རྣམས་ལ། རིགས་བདག་ཆེན་པོ་ཀུན་མཁྱེན་ངག་གི་དབང་པོས། ལུང་རིགས་ཀྱི་སྡེར་མོས་བསྣད་པར་གྱུར་པ་ནི། ཉམས་ལེན་ཆ་གཉིས་སུ་སོང་བའི་གནད་མ་གོ་ངོ་མ་འཕྲོད་པའི་རྣམ་འགྱུར་ཡིན་ཞེས་གསུངས། རྩལ་དང་རོལ་བ་ཞེས་པའང་། རྩལ་ནི་འཆར་ཚུལ་མ་འགག་མེ་ལོང་གཡའ་དག་པའི་ངོས་ལྟ་བུ་དང་། རོལ་བ་ནི་སྣ་ཚོགས་སུ་ཤར་བའི་ཆོས་སྒྱུ་མའི་དཔེ་བརྒྱད་ལྟ་བུའོ། །ཀུན་གཞི་དང་ཆོས་སྐུའི་དབྱེ་བའང་། ཀུན་གཞི་ནི་འཁོར་བ་དང་མྱ་ངན་ལས་འདས་པ་ཀུན་གྱི་གཞི་ཡིན་ཏེ། རྩལ་སྣང་གི་རྟོག་ཚོགས་ཐམས་ཅད་བག་ལ་ཉལ་བའི་ལུང་མ་བསྟན་དེའི་ངང་དུ་ཡེ་ཤེས་རིག་པའི་དྭངས་ཆ་ལྐོག་ཏུ་གྱུར་པ་ནི་རྙོགས་མ་ཅན་གྱི་ཆུ་དང་འདྲ་སྟེ། གནད་གསུམ་ཤན་འབྱེད་ལས། ཀུན་གཞི་འཁོར་འདས་ཀུན་གྱི་གཞི་ཡིན་ཏེ། །རྙོགས་མ་ཅན་གྱི་ཆུ་དང་ཁྱད་པར་མེད། །བག་ལ་ཉལ་གྱི་གཏི་མུག་མགོ་རྨོངས་ནས། །ཡེ་ཤེས་རིག་པའི་དྭངས་ཆ་ལྐོག་ཏུ་གྱུར། །ཅེས་སོ། །ཆོས་སྐུ་ནི་ཆུའི་རྙོགས་མ་དྭངས་བ་དང་འདྲ་སྟེ། ལུང་མ་བསྟན་གྱི་ཆ་ལས་ལྡོག་ནས་རིག་སྟོང་ཆོས་སྐུའི་ཡེ་ཤེས་ཐིག་ལེ་ཉག་གཅིག་ཁྱད་ཆོས་དྲུག་དང་ལྡན་པའི་ཆོས་དབྱིངས་སུ་གདོད་མའི་ཡེ་གཞི་དང་། ཡེ་ཤེས་ཐིམ་བྱའི་རིག་པ་གཉིས་མེད་ཟུང་འཇུག་ཆེན་པོར་གདོད་ནས་བཞུགས་པ་ཡིན་ནོ། །སེམས་དང་ཡེ་ཤེས་གཉིས་ཀྱི་ཤན་འབྱེད་པ་ལའང་། གནས་དང་། སྒོ་དང་། ལམ་དང་། ཡུལ་དང་། བྱེད་ལས་སོགས་མང་དུ་གསུངས། མདོར་ན་གློ་བ་ན་འགྲོ་འོང་ལས་ཀྱི་རླུང་རྟ་རྒོད་ལོང་བ་ལྟ་བུའི་ཚུལ་དུ་ཡོད་ལ། སྙིང་ནང་ན་ཡེ་ཤེས་ཀྱི་གདངས་མི་འཕྱེ་བོ་འདྲ་བ་ཡོད་པ་དེ་གཉིས་འཕྲད་པའི་ཚེ་ལས་རླུང་གིས་རིག་གདངས་ཁུར་ནས་འཁྲུལ་བའི་ཆ་ལ་སེམས་ཟེར་བ་ཡིན་ནོ། །ལས་རླུང་ཟད་པའམ་འགག་ན་རྟོག་པ་འགགས་ཏེ་རླུང་ཕར་གྱེས་རིག་པ་ཚུར་འདུས་ནས་རིག་ག དངས་ཡེ་ཤེས་ཀྱི་རླུང་གིས་བསྐྱོད་པས་རིག་སྟོང་ཆོས་སྐུའི་འོད་གསལ་འཆར་བ་ལ་ཡེ་ཤེས་སུ་བཞེད་པ་ཡིན་ནོ། །དེའི་ཕྱིར་དོན་དམ་ཡེ་ཤེས་ཀྱི་རྩ་རླུང་འཛིན་རྩོལ་དང་བྲལ་བའི་མན་ངག་གིས་འགྲོ་འོང་ལས་ཀྱི་རླུང་རང་སོར་བཞག་པའི་ཚེ་ན་རྟོག་ཚོགས་ཉོན་མོངས་པའི་རླུང་བག་ལ་ཞ་ནས་རིག་པ་ཡེ་ཤེས་ཀྱི་རླུང་དབྱིངས་སུ་འཁྱིལ་བའི་གནད་གཅིག་དགོས་པ་ཡིན་ལ། དོན་འདི་ལྟ་བུའི་ཟབ་མོའི་སྙན་བརྒྱུད་ཀྱི་དགོངས་པའི་ཞེ་ཕུག་དཔལ་མགོན་བླ་མ་དམ་པའི་དྲིན་ལས་ཅུང་ཟད་ཐོས་པས་རྣལ་འབྱོར་པ་ཉམས་མྱོང་ཅན་དང་མཇལ་ན་ངོ་མཚར་གཏམ་གྱི་མཆོད་སྤྲིན་སྤྲོ་རྒྱུར་ཡོད་ཀྱང་འདིར་རེ་ཞིག་དེ་ཙམ་མོ། །སྤྱིར་སེམས་དང་ཡེ་ཤེས་ལ་ཤན་འབྱེད་པའི་བླ་མའི་མན་ངག་མེད་ན་སེམས་ལས་འདས་པའི་ཡེ་ཤེས་རྟོགས་པར་དཀའ་བ་སྟེ། ཡིད་བཞིན་རིན་པོ་ཆེའི་མཛོད་ཀྱི་འགྲེལ་བ་པདྨ་དཀར་པོ་ལས། དེང་སང་སེམས་དང་སེམས་བྱུང་གི་རྟོག་པ་མ་འགག་པར་རང་སོ་ན་ཡོད་ཅིང་། ཚོར་བ་དགའ་མི་དགའ་དང་། རླུང་དང་འགྱུ་བ་མ་དག་པར་སངས་རྒྱས་ཀྱི་དགོངས་པའི་ངང་ལ་གནས་པར་འདོད་པ་ནི། འཇིག་རྟེན་གྱི་བསམ་གཏན་ཡང་མ་གྲུབ་ན་འཇིག་རྟེན་ལས་འདས་པའང་འགྲུབ་རེ་ཀན་ནོ། །ཞེས་གསུངས་པ་བཞིན་ནོ། །སྐུ་གསུམ་ཞེས་པའང་། དེང་སང་གི་གླེན་སྒོམ་མུན་རྡོ་འཕེན་པ་རྣམས་ཀྱིས། ཀུན་གཞི་རྟོག་མེད་ཀྱི་ཞི་གནས་ལ་ཆོས་སྐུ་དང་། ཀུན་གཞིའི་རྣམ་པར་ཤེས་པ་གསལ་ལ་མི་རྟོག་པ་ཙམ་ལ་ལོངས་སྐུ་དང་། ཚོགས་དྲུག་གི་ཤེས་པ་རྟོག་པ་ཕྱིར་ཤར་བ་ལ་སྤྲུལ་སྐུ་ཞེས་ཕྱིན་ཅི་ལོག་རྟོག་གི་སྣང་བ་ཡིན་ཏེ། སྐུ་གསུམ་ལྟ་སྨོས་ཀྱང་ཅི་དགོས། ཐ་ནའང་འདོད་གཟུགས་ཀྱི་བསམ་གཏན་ཙམ་ལས་ན་མ་འཕར་བ་ཡིན་ཏེ། ཀུན་མཁྱེན་ཆེན་པོས། གང་དུ་མི་རྟོག་རྩེ་གཅིག་ལུང་མ་བསྟན། །གསལ་ཞིང་རིག་ཙམ་རྟོག་པ་མེད་པ་དང་། །གཡོ་བའི་ཀུན་རྟོག་སྣ་ཚོགས་རྣམ་པ་གསུམ། །གཟུགས་མེད་གཟུགས་དང་འདོད་པའི་སེམས་ཉིད་དོ། །ཞེས་གསུངས། འདིར་རྫོགས་པ་ཆེན་པོའི་སྐུ་གསུམ་ལམ་སྣང་གི་རིག་པ་ནི། ངོ་བོ་ཀ་དག་གི་རིག་པ་དངོས་པོ་དང་མཚན་མར་མ་གྲུབ། རང་བཞིན་ལྷུན་གྲུབ་ཀྱི་རིག་པ་འོད་གསལ་ཕྲ་བའི་ཡེ་ཤེས་ནང་གསལ་དུ་གནས། ཐུགས་རྗེ་ཀུན་ཁྱབ་ཀྱི་རིག་པ་མཁྱེན་པའི་ཡེ་ཤེས་རྒྱས་པའི་འཆར་གཞི་བྱེད་པ་ཡིན་ཏེ། སྐུ་གསུམ་འདུ་འབྲལ་མེད་པར་ཉི་མའི་སྙིང་པོ་ལྟར་དུ་བཞུགས་པ་ཡིན་ནོ། །འདི་ལའང་རྟོག་གེ་བ་ན་རེ། ངོ་བོ་ཀ་དག་ཡིན་ན། འཁོར་བ་ཡོད་མ་མྱོང་བས། སེམས་ཅན་འཁྲུལ་བ་མི་འབྱུང་བར་ཐལ། རང་བཞིན་ལྷུན་གྲུབ་ཡིན་ན་སེམས་ཅན་སུ་ཡང་འབད་མེད་དུ་གྲོལ་བར་ཐལ། ཀ་དག་དང་ལྷུན་གྲུབ་གཉིས་གཞི་གཅིག་ལས་རྫས་འགལ་བར་ཐལ་ལོ་ཞེ་ན། དེ་ལྟར་མི་བསམས་ཏེ། ངོ་བོ་ཀ་ནས་དག་པས་སེམས་ཅན་འཁོར་བ་མེད་ཀྱང་། ལྷུན་གྲུབ་ཀྱི་རྩལ་ལམ་རོལ་བ་ཙམ་ལས་དེ་ལྟར་སྣང་བ་ནི་མི་འགལ་བ་ཡིན་གསུངས་སོ། ། དོན་གཉིས་པ་རིག་པ་རང་སྣང་གི་བློ་ཅན་ནི། སེམས་ཀྱི་རྙོགས་མ་དྭངས་བའི་གང་ཟག་ཡིན་ཏེ། རང་ངོ་ཀ་དག་ལས་མི་གཡོ་བའི་མཉམ་བཞག་གི་ངོས་ནས་ཕུང་པོ་ལྔ་དང་བྲལ་ཞིང་། ལྷུན་གྲུབ་ཀྱི་གདངས་འགགས་པ་མེད་པའི་རྗེས་ཐོབ་ལའང་། རྣམ་པར་ཤེས་པའི་ཚོགས་བརྒྱད་ཀྱི་དྲི་མས་མ་གོས་ཤིང་ཆོས་ཀྱི་དབྱིངས་སྤྲོས་པ་དང་བྲལ་བ་ནམ་མཁའ་ལྟ་བུའི་ཀློང་དུ་རིག་པའི་ཡེ་ཤེས་གནམ་སྟོང་གི་ཟླ་བ་ལྟ་བུ་ནང་གསལ་ཐིམ་ལ་མ་རྨུགས་པའི་ཕྲ་བའི་ཡེ་ཤེས་དེ་ལ། རྟོག་གེ་བས་གོ་རྒྱུ་དང་། གླེན་སྒོམ་གྱིས་མྱོང་རྒྱུའི་སྒྲོ་བཏགས་མེད་དེ། གདོད་ནས་གཟུང་བ་དང་འཛིན་པ་ཡོད་མ་མྱོང་བས། འགོག་པའི་སྙོམས་འཇུག་ལྟ་བུའི་ལུང་མ་བསྟན་གྱི་ངང་དུ་དྲན་བསམ་ཚོར་བ་ཐམས་ཅད་འགགས་ནས་བརྒྱལ་བའམ་གཉིད་འཐུག་གི་གནས་སྐབས་ལྟར་མཁྱེན་གཉིས་ཀྱི་ཡེ་ཤེས་མེད་པའང་མ་ཡིན། སེམས་ཙམ་པ་ལྟར་གཟུང་འཛིན་གཉིས་སྟོང་གི་ཤེས་པ་རང་རིག་རང་གསལ་ཀུན་གཞིའི་རྣམ་ཤེས་ལྟ་བུའང་མ་ཡིན། བློས་མཐའ་བྲལ་དུ་གཞལ་བའི་མཚོན་དཔེ་ནམ་མཁའ་ལྟ་བུའི་སྟོང་བ་ལ་རྩིས་གཞིར་བྱེད་པའི་དབུ་མ་པ་ལྟ་བུའང་མིན་ཏེ། འདིར་འོད་གསལ་རྫོགས་པ་ཆེན་པོའི་རང་ལུགས་ནི། ཀུན་མཁྱེན་དྲི་མེད་འོད་ཟེར་གྱིས། སེམས་འགགས་ཆ་ནི་ཁྲེགས་ཆོད་དང་། །ཡེ་ཤེས་རང་གསལ་ཐོད་རྒལ་གཉིས། །ཟུང་འཇུག་རང་བྱུང་ཡེ་ཤེས་ཏེ། །སྙིང་ཐིག་གསང་བའི་ལམ་དུ་བཤད། །ཅེས་གསུངས་པ་བཞིན། ཁྲེགས་ཆོད་སྟོང་པའི་ཡེ་ཤེས་དང་ཐོད་རྒལ་སྣང་བའི་འོད་གསལ་གཉིས་གདོད་ནས་ཟུང་འཇུག་ཆེན་པོར་བཞུགས་པ་ལ་འཕགས་ལམ་རྫོགས་པ་ཆེན་པོ་ཞེས་སྙིང་ཐིག་གསང་བའི་ལམ་དུ་བཤད་པ་ནི། འཁོར་འདས་ཡེ་གྲོལ་གྱི་དགོངས་པ་ཡིན་ཏེ། སུ་ཡང་འཁོར་མ་མྱོང་སྟེ་འཁོར་བ་ཡེ་ཟད། སུ་ཡང་འདའ་མ་མྱོང་སྟེ་མྱང་འདས་ཡེ་གྲོལ། བསྒོམ་པས་སངས་རྒྱས་མ་ཐོབ། མ་བསྒོམ་པས་འཁོར་བར་མ་འཁྱམས། སྣང་སྲིད་གཞི་གྲོལ་གྱི་དགོངས་པ་རྒྱ་ཡན་ལྷུན་འབྱམས་སུ་སོང་ནས་བྱར་མེད་ཆོས་སྐུའི་གཏན་སྲིད་ཟིན་པས། རེ་དོགས་གཉིས་འཛིན་གྱི་འཕྲང་ལས་གྲོལ་ཏེ། བསྒོམ་པས་ཆོག བཞག་པས་ཆོག བོར་བས་ཆོག །གདོད་མའི་མགོན་པོ་མིའི་རྫུ་ལ་ཞུགས་པ་ཀུན་མཁྱེན་དྲི་མེད་འོད་ཟེར་གྱིས། རང་བབས་ལྷུན་གྲུབ་ཀྱི་དགོངས་པ་ཆུ་བོ་དང་འདྲ་ཡང་། གཅིག་གིས་ཀྱང་ཁོ་བོའི་དགོངས་པ་མ་ལོན་པར་ཡ་ཆ། ཐམས་ཅད་ཡེ་ཟིན་དུ་འདུག་སྟེ་ཡང་བྱེད། ཡེ་གྲོལ་དུ་འདུག་སྟེ་ཡང་གྲོལ། ཡེ་བཞག་ཏུ་འདུག་སྟེ་ཡང་འཇོག ཡེ་བསྒོམ་དུ་འདུག་སྟེ་ཡང་བསྒོམ། ཡེ་བལྟས་སུ་འདུག་སྟེ་ཡང་བལྟ། ཡེ་བགྲོད་དུ་འདུག་སྟེ་ཡང་བགྲོད། བྱར་མི་འདུག་སྟེ་བྱེད་མི་དགོས། བྱས་པས་ཟིན་པ་མེད། བྱ་མི་བྱའི་རྩིས་ལས་འདས། བསྒོམ་མི་དགོས། བསྒོམ་དུ་མེད། སྒོམ་པ་ལས་འདས། བསྒོམ་ཞིང་ཕོངས། ལྟ་མི་དགོས་བལྟར་མེད། བལྟ་བྱ་ལས་འདས། གང་ལ་བལྟ། བཙལ་མི་དགོས། བཙལ་དུ་མེད། འཚོལ་བ་ལས་འདས། རྙེད་པ་མེད། འདི་ལྟར་ཟང་མ་ཐལ་བྱུང་དུ་འདུག་སྟེ། བཤད་ཀྱང་མི་གོ་བའི་མི་ལ་རྟོགས་པའི་ལས་འབྲེལ་མེད་པས་དགོད་བྲོ་ཞེས་གསུངས་པ་བཞིན་ནོ། །དེ་ལྟ་བུའི་འོད་གསལ་རྫོགས་པ་ཆེན་པོའི་ཉམས་ལེན་མཐར་སོན་པའི་ཚེ་ཁྲེགས་ཆོད་སྟོང་པའི་ཡེ་ཤེས་ཀྱི་ཀློང་དུ་སེམས་དང་སེམས་བྱུང་གི་རྟོག་ཚོགས་ཐམས་ཅད་ཆོས་ཉིད་དུ་དྭངས་ནས་སྟོང་པ་ལ་འཛིན་པའི་སེམས་མེད་པས། ཀ་དག་གི་སར་གྲོལ་དུ་ཉེ་བ་དང་། ཐོད་རྒལ་སྣང་བའི་འོད་གསལ་གྱི་ཀློང་དུ་ལྷུན་གྲུབ་སྣང་བཞི་ཟད་པའི་ཚེ་སྣང་བ་ལ་གཟུང་བའི་ཡུལ་མེད་པས། ཕྱི་འབྱུང་ལྔ་དང་ནང་ཕུང་ལྔས་བསྡུས་པའི་ཆོས་ཐམས་ཅད་རྡུལ་ཕྲན་དུ་དེངས་ནས་ལྷུན་གྲུབ་ཏུ་གྲོལ་བའི་ཚེ་སྐྱེ་འཇིག་གཉིས་ལ་རང་དབང་ཐོབ་ཅིང་། འཕོ་ཆེན་གྱི་སྐུར་བཞེངས་ནས་གདོད་མའི་རྒྱལ་ས་རུ་སླེབས་པ་ཞིག་ལགས་སོ། །ཨ་ཧོ། ཁྱབ་བརྡལ་གྱི་དགོངས་པ་མཐའ་དབུས་དང་བྲལ་སོང་། །ཡོད་པ་ནི་མ་ལགས་ངོས་བཟུང་ནི་མི་འདུག ། མེད་པ་ནི་མ་ལགས་སངས་རྒྱས་ཀྱི་དགོངས་པ། །འགལ་འདུ་ཡང་མ་ཡིན་ཟུང་འཇུག་གི་སྦུབས་སུ། །ཀློང་ཆེན་གྱི་བུ་རྒྱུད་ད་ལྟ་ནས་ཕེབས་འགྲོ། །དགེའོ། །སརྦ་མངྒ་ལཾ། ། སྒོམ་ཕྱོགས་ཀྱི་དྲིས་ལན་འབྲེལ་མེད་འུག་པའི་རྫུན་དྲུགསྒོམ་ཕྱོགས་ཀྱི་དྲིས་ལན་འབྲེལ་མེད་འུག་པའི་རྫུན་དྲུག་ཅེས་བྱ་བ་བཞུགས། གདོད་ནས་མངོན་པར་བྱང་ཆུབ་ནས། །མིང་ཡང་སངས་རྒྱས་དོན་སངས་རྒྱས། །དཔལ་དང་ལྡན་པའི་རྣལ་འབྱོར་ཏེ། །སྙིང་དབུས་མི་ཤིགས་འཁོར་ལོར་རོལ། །སྡེ་གསུམ་ཀློང་དགུའི་ཤིང་རྟ་མཆོག །འདྲེན་མཛད་འཕགས་ཡུལ་བྱོན་རྣམས་དང་། །ཀུན་མཁྱེན་ཡབ་སྲས་ལ་སོགས་པའི། །བསིལ་ལྡན་ལྗོངས་སུ་བྱོན་རྣམས་རྒྱལ། །རྗེ་ཡི་སློབ་འབངས་ཐ་ཤལ་བ། །འདི་ན་ཆོས་མེད་སྤྲང་པོ་བདག །སྐོམ་པས་གདུང་བའི་གླང་ཆེན་བཞིན། །ཁྱོད་དྲུང་པདྨའི་རྫིང་བུ་རུ། །འཇུག་པའི་བློ་ནི་ཉིན་རེ་བཞིན། །ཡར་ངོའི་ཟླ་ལྟར་འཕེལ་གྱུར་ཀྱང་། །རྣམ་གཡེང་ལྕགས་ཀྱུ་རྣོན་པོ་ཡིས། །སྔོན་ནས་ད་བར་གཞན་དབང་གྱུར། །གྲོགས་ཁྱོད་སྒོམ་ཕྱོགས་དྲིས་པའི་ཚོགས། །འདི་རུ་འབྱོར་ཀྱང་བླུན་རྨོངས་བདག །སྦྱངས་པ་དམན་ཞིང་བློ་གྲོས་ཆུང་། །སྡེབ་སྦྱོར་མཁས་པ་མེད་མོད་ཀྱང་། །འོན་ཀྱང་འཁོར་འདས་གཉིས་ཀྱི་ཆོས། །སྣང་ངོར་ཇི་ལྟར་འཆར་ན་ཡང་། །རིག་ངོར་བདེན་འཛིན་འཆིང་བ་ལས། །འདས་པའི་ཀློང་ནས་ལྟ་མགུར་འཐེན། །ཨ་ཧོ། ཆོས་རྣམས་ཀུན་གྱི་རྩ་བ་ནི། །འཁོར་བར་ཞེན་ལོག་ངེས་འབྱུང་དང་། །གཞན་ཕན་དོན་གཉེར་བྱང་ཆུབ་སེམས། །སྣང་སྲིད་རྣམ་དག་དག་སྣང་ཞེས། །འཕགས་བོད་མཁས་པས་ལན་བརྒྱར་གསུངས། ཐོས་དང་བསམ་དང་སྒོམ་པ་དང་། །བསྐྱེད་དང་རྫོགས་པའི་རིམ་པ་སོགས། །ལམ་བཟང་བླ་མའི་རྣལ་འབྱོར་ལགས། །ཅིར་སྣང་བླ་མར་འཆར་བ་ཡི། །དད་པས་མཆི་མ་བསླང་ནུས་ན། །ཐུགས་རྒྱུད་དགོངས་པའི་བྱིན་རླབས་དེ། །རྒྱུད་ལ་འཕོ་བར་ཐེ་ཚོམ་མེད། །ལམ་མཆོག་འདི་ལ་རྒྱབ་ཕྱོགས་ནས། །ཐ་སྙད་ཚིག་ལ་ཞེན་པ་དང་། །གླེན་སྒོམ་ཨུ་ཚུགས་བྱེད་པ་སོགས། །རྒྱལ་བསྟན་ཡིན་སྙམ་བདག་ལ་མེད། །ཉིད་ཀྱི་དྲི་བ་དང་པོའི་སྐབས། །དེང་དུས་སྒོམ་ཆེན་འགའ་ཞིག་གིས། །རྣམ་རྟོག་བྲལ་བའི་གནས་ཆ་ལ། །ཡང་ཡང་བསྒོམས་པའི་ནུས་མཐུ་ཡིས། །ཉིན་མཚན་འཁོར་ཡུག་འདྲེས་པ་མཐོང་། །ཏིང་འཛིན་སྐྱོན་ཅན་སྐྱོན་མེད་སོགས། །གང་ཡིན་དྲིས་པའི་ལན་དེ་སྨོས། །གསུངས་ཀྱང་འདི་ལ་བརྟག་ཅིང་དཔྱོད། །སེམས་ཀྱི་གནས་ཆ་བརྟན་ན་ཡང་། །དེ་ཡི་འཛིན་ཞེན་མ་གྲོལ་ན། །ཉིན་མཚན་འཁོར་ཡུག་འདྲེས་པ་སོགས། །ཉམས་སྣང་ཙམ་ལས་རྟོགས་པ་མིན། །ཕལ་ཆེར་འཇུར་དྲན་རྩེ་གཅིག་གིས། །རྒྱུན་གྱི་བདེ་གསལ་མི་རྟོག་པའི། །བསམ་གཏན་གཉིད་དུ་དྲངས་པ་ལ། །འོད་གསལ་ཟིན་པར་རློམ་པ་མང་། །སྐབས་འགར་ཡེངས་འཁྲུལ་མེད་པ་ཡང་། །རྣམ་རྟོག་ཞི་བའི་གནས་ཆ་ལ། །གོམས་པའི་བག་ཆགས་ཁོ་ན་ལས། །དགོངས་པ་ཀློང་ནས་གྲོལ་བ་མིན། །དྲི་བ་གཉིས་པའི་སྐབས་སུ་ཡང་། །མ་གཡེང་ཙམ་དུ་བསྒོམ་པའི་ཚེ། །དྲན་པའི་རྫི་བོ་མ་བོར་ན། །སྒོམ་མེད་རྟོགས་ཞེས་ཐོས་གསུངས་ཀྱང་། །མ་གཡེང་ཙམ་དུ་བསྒོམ་པ་ནི། །ཤེས་བྱའི་སྒྲིབ་པ་ཡིན་པར་བཤད། །དེ་ཉིད་སྤང་བར་མ་ནུས་ན། །བློ་ལས་འདས་པའི་ཆོས་ཉིད་མིན། །ཅིའི་ཕྱིར་མ་གཡེང་ཙམ་བསྒོམ་པའི། །བློ་དེ་མཐའ་ལས་མ་འདས་ཕྱིར། །སེམས་ཀྱི་དྲན་འཛིན་ཕྲ་མོ་ལ། །དམིགས་པའི་ཏིང་འཛིན་ཡོད་ཅེས་སྨྲ། །དྲན་བྱ་བྲལ་བའི་ཆོས་ཉིད་ལ། །བསྒོམ་མེད་ཅེས་སུ་གྲགས་ན་ཡང་། །དྲན་པའི་རྫི་བོ་མ་བོར་ན། །དེ་ལ་བསྒོམ་མེད་ཇི་ལྟར་རུང་། །བསྒོམ་མེད་ཅེས་པའང་ཐ་སྙད་ཙམ། །དོན་ལ་མེད་པ་ཉིད་འདོད་ན། །མེད་པའི་མཐའ་ལ་གནས་པའི་ཕྱིར། །ལྟ་དེ་ཡང་དག་མ་ཡིན་ཏེ། །སྤྲོས་བྲལ་ཉིད་དུ་རུང་བ་མིན། །གལ་ཏེ་ཆད་པར་ལྟ་བ་དེ། །ཡང་དག་ལྟ་བ་ཉིད་ཡིན་ན། །མུ་སྟེགས་ཆད་ལྟའང་གྲོལ་བར་འགྱུར། །དེ་ལ་སོགས་པའི་དགག་བཞག་རྣམས། །དུ་མ་སྨྲ་རྒྱུ་ཡོད་མོད་ཀྱང་། །འདི་རུ་ཡི་གེ་མང་དོགས་ནས། །མི་སྨྲ་རེ་ཞིག་དེ་ཙམ་མོ། །འདི་འོ་སྙམ་པའི་ཆེད་འཛིན་དང་། །ཡིན་ནོ་སྙམ་པའི་ངེས་ཤེས་སོགས། །མཉམ་པའི་དབྱིངས་སུ་མ་ཟད་ན། །ཆོས་ཉིད་དོན་དེ་ཇི་ལྟར་རྟོགས། །ཆོས་ཉིད་དོན་དེ་མ་རྟོགས་ན། །སྲིད་རྩ་འབྱིན་བྱེད་གཞན་མེད་ཀྱང་། །ཉམས་རྟོགས་ཟབ་མོའི་བགྲོ་གླེང་འདི། །བློ་མིག་དོག་ལ་དགོས་པ་ཆུང་། །འོན་ཀྱང་དྲི་བ་གསུམ་པའི་སྐབས། །རྣམ་རྟོག་སྔ་ཕྱི་འགག་པའི་བར། །སྟོང་པའི་གནས་ཆ་ངོ་འཕྲོད་ན། །མཉམ་ཉིད་ལྟ་བར་འདོད་གསུངས་ཀྱང་། །ཆེད་འཛིན་བྱས་པའི་སྟོང་ཉམས་དེ། །མཉམ་པ་ཉིད་ཀྱི་ཡེ་ཤེས་མིན། །ཡིན་མིན་ཀློང་ཆེན་རབ་འབྱམས་ཀྱི། །ལེགས་བཤད་ཡིད་བཞིན་མཛོད་ལ་དྲིས། །རྣམ་རྟོག་ཞི་བའི་དྭངས་ཆ་ཙམ། །ལྷག་མཐོང་གསལ་བའི་ཡེ་ཤེས་མིན། །གནས་ཆ་ཡོད་ཀྱང་གྲོལ་ཆ་མེད། །སྒོམ་ཆེན་འགའ་ཞིག་འདི་ན་འཆིང་། །སྔ་མ་འགགས་ནས་ཕྱི་མའི་བར། །སྟོང་པའི་ཉམས་ཤུགས་ཆེ་བ་ཞིག །བསྒོམ་བྱའི་སྙིང་རྡོ་མཛད་མོད་ཀྱང་། །དེ་ལ་སུ་ཞིག་ཡིད་རྟོན་བྱེད། །འོན་ཀྱང་ཕྱག་རྫོགས་མན་ངག་ལས། །འདི་འདྲའི་རྣམ་བཞག་བཤད་ནའང་། །དེ་ནི་མོས་སྤྱོད་གང་ཟག་རྣམས། །ཆོས་ཀྱི་དབྱིངས་སུ་དྲང་ཕྱིར་དང་། །ཆོས་ཉིད་བདེན་པ་མཐོང་ཕྱིར་དང་། །གནས་ལུགས་མ་བཅོས་རྟོགས་ཕྱིར་དུ། །གསུངས་པ་ཡིན་གྱི་སྒྲུབ་བརྒྱུད་ཀྱི། །བསྟན་པ་དཀྲུགས་པའི་ཆེད་དུ་མིན། །ལམ་དང་གོལ་སའི་རྣམ་དབྱེ་དེ། །ཞིབ་ཏུ་མཁྱེན་པར་མ་མཛད་ན། །ཤེས་བྱ་སྒྱུ་མ་ལྟ་བུ་རུ། །འདོད་པ་མུ་སྟེགས་བྱེད་ལ་ཡོད། །ཆོས་ཀུན་གདོད་ནས་མ་གྲུབ་ཅེས། །འཛིན་པ་མེད་ཅིང་རྟོག་པ་མེད། །དྭངས་ལ་འགགས་པ་མེད་པ་ཡི། །ལྟ་བའི་ཉམས་ལེན་བོན་ལའང་ཡོད། །ཐམས་ཅད་སྟོང་པ་ཉིད་དོ་ཞེས། །རྒྱུ་འབྲས་བསླུ་མེད་ཁྱད་བསད་ནས། །ལྟ་སྤྱོད་ཟུང་དུ་མ་འབྲེལ་ན། །དོན་གྱི་དམ་པར་འོས་སམ་ཅི། །མི་སྟོང་བདེན་གྲུབ་ལྟ་བ་དང་། །སྟོང་པ་ཕྱང་ཆད་འདོད་པ་དང་། །གླེན་སྒོམ་ཉམས་ལ་ཆགས་པ་སོགས། །ལྟ་དེ་སྤྲོས་པ་ཅན་དུ་སྣང་། །ཚིག་ལ་འཆེལ་བའི་རྟོག་གེ་རྣམས། །ཐེག་པའི་གཟེབ་ཀྱིས་འཆིང་བ་ལས། །གཉུག་མའི་ཡིད་ནི་སྒྲིབ་བྲལ་དུ། །རང་ལ་གནས་ཀྱང་ངོ་མ་ཤེས། །དེང་སང་གངས་རིའི་ལྗོངས་འདི་ན། །གང་ཟག་ཕལ་བའི་བློ་སྐྱོན་གྱིས། །ཡིད་དཔྱོད་སེམས་ཀྱིས་གྲུབ་པའི་མཐའ། །རྫོགས་པ་ཆེན་པོར་སྨྲ་བ་མང་། །སྣ་ཚོགས་གྲུབ་མཐའི་ཆོས་རྣམས་ཀྱིས། །མི་ཤེས་བྱིས་པ་ཡིད་བསླུས་ནས། །རིམ་རྩོལ་བྲལ་བའི་ཐེག་པ་ལ། །འཇུག་པ་འདི་ནི་རིང་དུ་གྱུར། །སྲིད་མཐའ་འགོག་པའི་ལྷག་མཐོང་དང་། །ཞི་མཐའ་འགོག་པའི་སྙིང་རྗེ་གཉིས། །ཟུང་འཇུག་འོད་གསལ་འདུས་མ་བྱས། །ཚུལ་འདི་ཐེག་པ་མཆོག་གི་ལམ། །ཆོས་རྣམས་རང་བཞིན་སྟོང་པ་ཉིད། །སྐྱེ་འགག་གནས་གསུམ་དང་བྲལ་བའི། །རྐྱེན་གྱིས་མ་བསྐྱེད་འདུས་མ་བྱས། །སྟོན་པ་བདེ་བར་གཤེགས་པའི་གསུང་། །སྙིང་པོ་བསྟན་པའི་མདོ་སོགས་ནས། །བདེ་གཤེགས་སྙིང་པོ་རྒྱ་ཆེར་བཤད། །འཁོར་ལོ་བར་པའི་མདོ་རྣམས་སུ། །རྣམ་པར་ཐར་པའི་སྒོ་གསུམ་བསྟན། །དེ་ཉིད་གསང་སྔགས་ཐུན་མོང་ལས། །རང་བཞིན་གཞི་ཡི་རྒྱུད་ཅེས་བྱ། །ཐུན་མིན་སྔགས་ཀྱི་རྒྱུད་སྡེ་ལས། །རང་བྱུང་གདོད་མའི་ཡེ་གཞི་ཞེས། །ཆོས་སྐུའི་གཤིས་འདི་གདོད་མ་ནས། །བཅིངས་པ་མེད་ཅིང་གྲོལ་བའང་མེད། །ཆད་པ་མེད་ཅིང་རྟག་པ་མེད། །རྩོལ་ཞིང་སྒྲུབ་མེད་ཡེ་སངས་རྒྱས། །ཡེ་གྲོལ་ཡིན་པས་འབད་རྩོལ་མེད། །རང་གྲོལ་ཡིན་པས་གཉེན་པོ་མེད། །ཤར་གྲོལ་ཡིན་པས་སྔ་ཕྱི་མེད། །ཅེར་གྲོལ་ཡིན་པས་མཐོང་སར་ཡལ། །དེ་ཡི་རང་བཞིན་ཉིད་ཤེས་ན། །གང་ཤར་ཆོས་སྐུའི་ཡོ་ལངས་ཏེ། །རྒྱུ་འབྲས་སྔ་ཕྱི་འབྲེལ་བ་ཡིས། །བག་ཆགས་བསོགས་ལོང་མེད་པར་གྲོལ། །གཉེན་པོའི་རྩོལ་བ་དབྱིངས་སུ་ཞི། །དྲན་འཛིན་སེམས་ཀྱི་འཆིང་ཐག་ཆད། །གཟུང་འཛིན་མདུད་རྒྱ་ལྷོད་པོར་གྲོལ། །སྣ་ཚོགས་ཉམས་ཀྱི་ཤུན་པ་འཐོར། །ལུང་མ་བསྟན་གྱི་སྟོང་ཆ་དེངས། །སྣང་བའི་ཡུལ་གྱི་རྫུན་ཕུག་རྡིབ། །འཛིན་པ་སེམས་ཀྱི་རྟོད་ཕུར་ཐོན། །གཉིས་མེད་མཉམ་པའི་བར་ལག་འགྱེལ། །གནས་ན་སྐུ་གསུམ་ངང་དུ་གནས། །འཕྲོ་ན་ཡེ་ཤེས་རོལ་པར་འཆར། །གྲོལ་ན་གདོད་མའི་དབྱིངས་སུ་གྲོལ། །མཉམ་ན་གཉིས་མེད་ངང་དུ་མཉམ། །འདི་ནི་ཆོས་སྐུའི་རང་གཤིས་ལས། །སྐྱེས་བུའི་རྩོལ་སྒྲུབ་བྱས་པ་ཡིས། །ས་ལམ་སྦྱང་བསྒྲོད་ལ་སོགས་པའི། །བསྒོམས་པས་གྲོལ་བ་མ་ཡིན་ཞེས། །དེ་སྐད་སྨྲ་བའི་སྤྲང་སྨྱོན་ལ། །མཁས་པའི་གཞུང་ལ་སྦྱངས་པ་དང་། །གྲུབ་པའི་ཉམས་ལ་འདྲིས་ཆ་མེད། །ཚུལ་འདི་ཁོ་བོས་རང་བཟོ་སྟེ། །ཁྱོད་ཀྱིས་ཡིད་བརྟན་མི་རུང་མོད། །འོ་ན་ཅིའི་ཕྱིར་བྲིས་ཞེས་ན། །ཉིད་ཀྱིས་ཡང་ཡང་བསྐུལ་བའི་ཕྱིར། །བཞེད་སྐོང་ལྡོག་མིན་ཙམ་དུ་ལགས། །ཞེས་གྲུབ་ཆེན་བུདྡྷ་ཤྲཱི་ཝན་གྱི་སློབ་འབངས་ཐ་ཤལ་བ་སྙོམ་ལས་མཁན་པདྨ་བཛྲ་༼གཡུ་ཁོག་བྱ་བྲལ་གྱི་མཚན་གཞན་༽གྱིས་གསེར་ཡུལ་གྱི་དབེན་རི་བཀྲ་ཤིས་དུང་དཀར་གཡས་འཁྱིལ་ནས་བྲིས་པའོ། །དགེ་ལེགས་འཕེལ།། །། གནས་ལུགས་རྡོ་རྗེའི་ཚིག་རྐང་གི་འགྲེལ་བ།འདིར་ཀུན་མཁྱེན་འཇིགས་མེད་གླིང་པའི་དགོངས་གཏེར་གནས་ལུགས་རྡོ་རྗེའི་ཚིག་རྐང་འདི་ཉིད་འཆད་པར་བྱེད་པ་ལ་དོན་གསུམ་སྟེ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་དང་གསུམ་ལས། དང་པོ་ལའང་མཚན་གྱི་དོན་དང་། མཆོད་པར་བརྗོད་པ་དང་གཉིས་ལས། དང་པོ་ནི། གནས་ལུགས་རྡོ་རྗེའི་ཚིག་རྐང་བཞུགས། ཞེས་པས་བསྟན་ལ། དེ་ལ་འདིར་ཆོས་ཐམས་ཅད་རང་བཞིན་སྟོང་པ་ཉིད་སྐྱེ་འགག་གནས་གསུམ་དང་བྲལ་བ། ངོ་བོ་ཡེ་ནས་དག་པ་ནམ་མཁའ་ལྟ་བུ། རྐྱེན་གྱིས་མ་བསྐྱེད་པའི་འདུས་མ་བྱས་པ་དེ་ལ། སྟོན་པ་བདེ་བར་གཤེགས་པའི་གསུང་གི་གསང་བ་ཟབ་མོ་དེ་བཞིན་གཤེགས་པའི་སྙིང་པོ་བསྟན་པའི་མདོ་སོགས་ལས་ཁམས་བདེ་བར་གཤེགས་པའི་སྙིང་པོ་ཞེས་རྒྱ་ཆེར་བཤད་པ་ཡིན་ཏེ། ཏིང་འཛིན་རྒྱལ་པོ་ལས། དག་པ་དྭངས་པ་འོད་གསལ་བ། །མི་འཁྲུགས་འདུས་མ་བྱས་པ་ཉིད། །བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་བདེ་བར་གཤེགས་པའི་སྙིང་པོའི་ངོ་བོ་ཡེ་ནས་དག་ཅིང་། དྲི་མ་གློ་བུར་བ་འདི་ཉིད་གདོད་མའི་གཤིས་ལ་མ་ཞུགས་པས་དྭངས་གསལ་རྙོགས་མ་དང་བྲལ་བའི་ཆོས་ཉིད་དེ་ནི་སྟོང་པ་ཕྱང་ཆད་པ་ལྟ་བུ་མ་ཡིན་པས་རང་བཞིན་གྱིས་འོད་གསལ་བ། ཡོད་མེད་ལ་སོགས་གང་གི་ཕྱོགས་སུ་མ་ལྷུང་ཞིང་སྤྲོས་པའི་མཐའ་དང་བྲལ་བས་མི་འཁྲུགས་པ་རྐྱེན་གྱིས་མ་བསླད་པས་འདུས་མ་བྱས་པ་ཉིད་དོ། །དེ་ཉིད་འཁོར་ལོ་བར་བའི་མདོ་རྣམས་སུ་རྣམ་ཐར་སྒོ་གསུམ་གྱི་རང་བཞིན་དུ་བསྟན་པ་ཡིན་ཏེ། ཚངས་པས་ཞུས་པའི་མདོ་ལས། ཆོས་ཐམས་ཅད་ནི་སྟོང་པ་ཉིད་ཀྱི་རང་བཞིན་ཅན་དམིགས་པ་དང་བྲལ་བའོ། །ཆོས་ཐམས་ཅད་ནི་མཚན་མ་མེད་པའི་རང་བཞིན་ཅན་ཏེ་རྣམ་པར་རྟོག་པ་དང་བྲལ་བའོ། །ཆོས་ཐམས་ཅད་ནི་སྨོན་པ་མེད་པའི་རང་བཞིན་ཅན་ཏེ་བླང་བ་དང་དོར་བ་མེད་པའོ། །ཞེས་བསྟན་པ་ཡིན་ནོ། །འདིར་གསང་སྔགས་ཐུན་མིན་གྱི་རྒྱུད་སྡེ་རྣམས་སུ་གདོད་མའི་ཡེ་གཞིའམ་ཆོས་སྐུ་གཞི་གནས་ཀྱི་རིག་པ་སོགས་གསུངས་པ་ཡིན་ཏེ། གྲུབ་མཐའ་རིན་པོ་ཆེའི་མཛོད་ལས། གདོད་མའི་ཡེ་གཞི་རང་བྱུང་གི་ཡེ་ཤེས་རྒྱ་ཆད་ཕྱོགས་ལྷུང་མེད་པ་དེ་ཉིད་ངོ་བོ་སྟོང་པ་ནམ་མཁའ་ལྟ་བུ། རང་བཞིན་གསལ་བ་ཉི་ཟླ་ལྟ་བུ། ཐུགས་རྗེ་ཀུན་ཁྱབ་འོད་ཟེར་ལྟ་བུ། དེ་གསུམ་ངོ་བོ་དབྱེར་མེད་སྐུ་གསུམ་ཡེ་ཤེས་ཀྱི་རང་བཞིན་དུ་ཡེ་ནས་གནས་པར་བསྟན་པ་ཡིན་ལ། དེ་ལྟ་བུའི་རང་བྱུང་གི་ཡེ་ཤེས་འདི་ལ་མིང་གི་རྣམ་གྲངས་ངེས་ཚུལ་ཡང་རྟོགས་ན་མྱ་ངན་ལས་འདས་པའི་གཞི་བྱེད་ཅིང་། མ་རྟོགས་ན་འཁོར་བ་བྱུང་བའི་ཆ་ནས་དབྱིངས། ཡེ་ནས་འདུས་མ་བྱས་ཡིན་པས་རང་བཞིན་ལྷུན་གྲུབ་ཀྱི་སངས་རྒྱས། སངས་རྒྱས་ཀྱི་ཆོས་རྣམས་ཚང་བར་ཡོད་པས་བདེ་བར་གཤེགས་པའི་སྙིང་པོ། དྲི་མས་སྒྲིབ་ཆ་ནས་དོན་གྱི་ཀུན་གཞི། ངོ་བོ་གདོད་ནས་དག་པས་འོད་གསལ་བའི་ཡེ་ཤེས། ཡོད་མེད་སྒྲོ་སྐུར་གྱི་མཐའ་ལས་འདས་པས་ཟབ་མོ་སྟོང་པ་ཉིད་དང་དབུ་མའི་ལྟ་བ། སྤྲོས་པ་ཐམས་ཅད་ལས་གྲོལ་བས་ཤེས་རབ་ཀྱི་ཕ་རོལ་ཏུ་ཕྱིན་པ། གདོད་ནས་འཕོ་འགྱུར་མེད་པས་དེ་བཞིན་ཉིད་སོགས་གསུངས་པ་ཡིན་ནོ། །དེ་ལྟ་བུའི་ཀ་དག་གདོད་མའི་གནས་ལུགས། མ་བཅོས་ཐ་མལ་གྱི་ཤེས་པ་ཟང་མ་ཐལ་བྱུང་གི་ཆོས་སྐུ། ཡེ་ཤེས་རིག་པའི་དྭངས་ཆ་དེ་ཉིད་རྡོ་རྗེའི་ཆོས་བདུན་གྱི་རང་བཞིན་ཅན་དུ་བསྟན་པ་ནི། ཀུན་མཁྱེན་རང་བྱུང་རྡོ་རྗེའི་ཞལ་སྔ་ནས། རྟོག་གེ་རྣམས་ཀྱི་བློས་མི་ཆོད་པ། ཐ་སྙད་ཀྱི་རིག་པས་མི་ཤིགས་པ། གནས་ལུགས་ཇི་ལྟ་བ་བཞིན་བདེན་པ། སྐལ་དམན་གྱིས་རྟོགས་པར་དཀའ་བས་སྲ་བ། ངོ་བོ་ལ་འཕོ་འགྱུར་མེད་པས་བརྟན་པ། འཁོར་འདས་ཀུན་ལ་ཁྱབ་ཅིང་འཇུག་པས་ཐོགས་པ་མེད་པ། གང་གིས་ཀྱང་རྫི་བར་མི་ནུས་པས་མ་ཕམ་པ་སྟེ། ཞེས་པ་ལྟར་ཐོག་མའི་སངས་རྒྱས་ཀུན་ཏུ་བཟང་པོ་ཆོས་སྐུའི་ཆོས་སྐུ་འཁོར་འདས་ཀྱི་སྤྱི་མྱེས་ཆེན་པོ་དེའི་རང་བཞིན་མངོན་སུམ་རང་གནས་སུ་ངོ་སྤྲོད་པའི་མན་ངག ། རྡོ་རྗེའི་གསུང་འཁྲུལ་མེད་ཀྱི་ཚིག་རྐང་བཞི་བཅུ་སོགས་ཀྱིས་བསྟན་པ་ཡིན་ནོ། །གཉིས་པ། དཔལ་ཀུན་ཏུ་བཟང་པོ་དེའང་འོད་གསལ་རྫོགས་པ་ཆེན་པོའི་གདམས་པ་འདི་ཉིད་སྟོན་པའི་ཐོག་མར། སྟོན་པ་ཐུན་མོང་མ་ཡིན་པ་དཔལ་ཀུན་ཏུ་བཟང་པོ་ཐོག་མ་དང་ཐ་མ་མེད་པའི་སྟོན་པ་ཀུན་བྱེད་ཡེ་ཤེས་ཀྱི་རྒྱལ་པོ་སེམས་ལས་མ་བྱུང་བའི་སངས་རྒྱས། ལུང་ལས་མ་བྱུང་བའི་མན་ངག །རྒྱུ་ལས་མ་བྱུང་བའི་འབྲས་བུ་སྟེ་རང་བྱུང་གི་ཆོས་གསུམ་དང་ལྡན་པའི་དཔལ་གདོད་མའི་མགོན་པོ་དེ་ལ་བློའི་འདུ་བྱེད་དང་བྲལ་བའི་སྒོ་ནས་ཕྱག་འཚལ་བ་ཡིན་ནོ། །གཉིས་པ་ལ། གཞི་ལམ་འབྲས་གསུམ་ངོས་བཟུང་བ། ཞི་ལྷག་གཉིས་བསྟན་པ། རིག་པ་སྐུ་གསུམ་དུ་བསྟན་པ། དེ་ཉིད་ལྷུན་གྲུབ་ཏུ་ངོ་སྤྲད་པ། ལྟ་སྒོམ་སྤྱོད་གསུམ་དབྱིངས་སུ་དག་ཚུལ་བསྟན་པ། གོལ་རྐྱེན་སྤང་བར་བྱ་བ། ཐག་ཆོད་པར་བསྟན་པ་དང་བདུན། དང་པོ། གཞི་ཡི་གནས་ལུགས་སོགས། གདོད་མའི་གཞི་ཡི་གནས་ལུགས་སྤྲོས་པའི་མཐའ་བཞིའམ་བརྒྱད་དང་བྲལ་བའི་ཆོས་ཉིད་དེ་བཞིན་ཉིད་ཀྱི་དབྱིངས་སུ་ཆོས་ཅན་གྱི་སྣང་བ་ཅིར་ཡང་འཆར་དུ་རུང་བ་དཔེར་ན་མེ་ལོང་གཡའ་དག་པའི་ངོས་ལྟ་བུ་ཡིན་ཏེ། ཚུལ་ཇི་ལྟར་ཞེ་ན་འོད་གསལ་མཐའ་དབུས་དང་བྲལ་བའི་ཀློང་དུ་གང་ཤར་ཡེ་ཤེས་ཀྱི་རོལ་པར་ཤར་ནས་འཁོར་འདས་གང་གི་ཡང་ཕྱོགས་སུ་མ་ལྷུང་ཞིང་གདོད་མའི་གཞི་ཡི་གནས་ལུགས་སྤྲོས་པའི་མཐའ་ཀུན་དང་བྲལ་བའི་ཚུལ་བསྟན་པ་ཡིན་ནོ། །གཞི་སྣང་དེ་ཡང་མ་དག་འཁོར་བའི་གནས་སྐབས་ཀྱི་ཀུན་གཞི་ལུང་མ་བསྟན་གྱི་ངོ་བོ་ལས་ཁྱད་དུ་འཕགས་པའི་གཞི་དེ་ཉིད་རྣལ་འབྱོར་པའི་རང་ངོར་མངོན་སུམ་དུ་སྣང་བའི་ཚེ་ན་འཁྲུལ་རྟོག་ཨ་འཐས་ཀྱི་འཛིན་ཞེན་ཐམས་ཅད་མ་སྤངས་རང་གྲོལ་དུ་སོང་བའི་ཆ་དེ་ལ་རིག་པ་ཀ་དག་ཞེས་གསུངས་པ་ཡིན་ལ། ལྷུན་གྲུབ་ཀྱི་གདངས་འགག་པ་མེད་པའི་རིག་པ་རྡོ་རྗེ་ལུ་གུ་རྒྱུད་དེ་ཉིད་དབང་པོའི་ཡུལ་ལ་མངོན་སུམ་དུ་མཐོང་བའི་ཚེ་ན་ཆོས་ཀྱི་སྐུ་མཐོང་བ་ཡིན་ཏེ། རྫོགས་ཆེན་གྱི་རྒྱུད་རྣམས་སུ། རིགས་ཀྱི་བུ་ཆོས་ཀྱི་སྐུའི་ཞལ་ལ་བལྟ་བར་འདོད་ན་རིག་གདངས་རྡོ་རྗེ་ལུ་གུ་རྒྱུད་ལ་གོམས་པར་གྱིས་ཤིག །ཅེས་སོ། །ལམ་ལ་སོགས༴ དེ་ལྟ་བུའི་གཞི་དང་གཞི་སྣང་གི་རིག་པ་དེ་ཉིད་འདུས་མ་བྱས་པ་ཡིན་ཏེ། འདུས་བྱས་རྐྱེན་གཞན་ལ་ལྟོས་པ་ནི་མིན་ཏེ། ལམ་ལ་བྱ་རྩོལ་དང་བྲལ་བའི་དབྱིངས་སུ་འཕྲལ་བྱུང་དགག་སྒྲུབ་ཀྱི་ཤེས་པ་དེ་ཉིད་ཡེ་ནས་དག་ཚུལ་བསྟན་པ་ཡིན་ནོ། །དེ་ཉིད༴ ལམ་དུས་ཀྱི་རིག་པ་ཀ་དག་དེ་ཉིད་མངོན་གྱུར་དུ་རྟོགས་ཤིང་གྲོལ་བ་ཀློང་དུ་གྱུར་ན་མཐར་གྱི་གྲོལ་སའི་དབྱིངས་ཀ་དག་ཆེན་པོའི་ཀློང་དུ་སངས་རྒྱས་པར་འགྱུར་རོ། །འབྲས་བུ༴ དེ་ལྟ་བུའི་གཞི་ལམ་འབྲས་བུའི་ཆོས་དེ་རྣམས་སྦྲ་ཁྱིམ་ལྟ་བུའི་གུད་དུ་བཅད་པ་ནི་མ་ཡིན་ཏེ། རྒྱུད་བླ་མ་ལས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པ་བཞིན་གཞི་འབྲས་ཀྱི་ངོ་བོ་གཅིག་ཏུ་གསུངས་པ་ཡིན་ནོ། །གཉིས་པ། འབྲས་ཉིད་སོགས༴ མཐར་ཐུག་གི་འབྲས་བུ་དེ་ཉིད་མངོན་དུ་མ་གྱུར་པ་རྒྱུ་རུ་ཡོད་པའི་དུས་སུ་གང་ཤར་གྱི་རྟོག་ཚོགས་ཐམས་ཅད་ཆམ་གྱིས་བཞག་པའི་གནས་ཆ་དེ་ཉིད་ཞི་གནས་ཡིན་ཏེ། དཔེར་ན་རྒྱ་མཚོ་རླབས་དང་བྲལ་བ་ལྟ་བུ་ཡིན་གསུངས། ཐོལ་གྱིས་སོགས༴ ཆོས་ཉིད་ཀྱི་གདངས་སམ་རྩལ་ལས་ཐོལ་གྱིས་ཤར་བའི་རྣམ་པར་རྟོག་པ་དེ་ཉིད་རིག་པའི་གདངས་ཡིན་ཏེ། ཧྲིག་གེ་སོགས༴ དེ་ཉིད་ཧྲིག་གེར་རིག་པའི་ཚེ་ན་རང་བྱུང་གི་ཡེ་ཤེས་སམ་ལྷག་མཐོང་གསལ་བའི་ཡེ་ཤེས་སུ་འདོད་པ་ཡིན་ཏེ། ཅེར་གྱིས༴ རྟོག་ཚོགས་ཐམས་ཅད་ཅེར་གྲོལ་དུ་སོང་ནས་ཆོས་ཀྱི་དབྱིངས་སུ་ཡལ་བ་ནི་གདོད་མའི་ངང་དུ་གནས་པ་ཡིན་ནོ། །གསུམ་པ། གཉུག་མར་སོགས༴ གཞི་བཅིང་གྲོལ་མེད་པའི་གནས་ལུགས་ཆོས་ཟད་ཀ་དག་གི་དགོངས་པ་མ་བཅོས་གཉུག་མར་གནས་པ་ཐ་མལ་གྱི་ཤེས་པ་འདི་ཀ་སྤུ་མ་བརྗེ་མདོག་མ་བསྒྱུར་བར་རང་ངོ་འཕྲོད་པར་གྱུར་ན། ཕྱི་སྣང་བའི་ཡུལ་གྱིས་མ་གོས་ཤིང་། ནང་འཛིན་པའི་སེམས་ཀྱིས་མ་བསླད་པས་རིག་སྟོང་ཆོས་ཀྱི་སྐུའི་ཡེ་ཤེས་དེ་ཉིད་མངོན་སུམ་དུ་རྟོགས་པ་ཡིན་ནོ། །ཤེས་བཞིན་སོགས༴ ལྷུན་གྲུབ་ཀྱི་གདངས་འགག་པ་མེད་པ་འཁོར་འདས་ཀྱི་འཆར་གཞི་མ་འགག་པར་ཤེས་བཞིན་དུ་འཆར་བ་དེ་ཉིད་ལོངས་སྤྱོད་རྫོགས་པའི་སྐུ་ཞེས་བརྗོད་པ་ཡིན་ནོ། །གནས་གྱུར་སོགས༴ ཐུགས་རྗེའི་རྩལ་ཡུལ་ཐོག་ཏུ་ཤར་ཡང་བག་ཆགས་བསོག་ལོང་མེད་པར་དྲན་རྟོག་རྗེས་མེད་དུ་ཡལ་ནས་ཤར་བ་དང་གྲོལ་བ་དུས་མཉམ་དུ་སོང་ནས་གནས་གྱུར་གཉིས་མེད་ཀྱི་ཡེ་ཤེས་ཆེན་པོ་དེ་ལ་དབང་འབྱོར་ནས་ཆོས་སྐུ་འཕོ་མེད་རྒྱལ་པོའི་རང་རྩལ་ལས་རོལ་པ་འགག་མེད་དུ་ཤར་བ་དེ་ཉིད་སྤྲུལ་པའི་སྐུ་རུ་འདོད་པ་ཡིན་ནོ། །དེ་ལྟ་བུའི་སྐུ་གསུམ་གྱི་རིག་པ་འདུ་འབྲལ་མེད་པ་དེ་ཉིད་ལ་གསུངས་པའམ་ཟེར་བ་ཡིན་ནོ། །བཞི་པ། ལྷོད་དེ༴ བློ་གཉིས་འཛིན་གྱི་མདུད་རྒྱ་ལྷོད་གྲོལ་དུ་སོང་ན། གཞི་ཀ་དག་གི་ངོ་བོ་ངོས་བཟུང་དང་བྲལ་བ་ནི། བློས་བསམ་དུ་མེད་ཅིང་ཚིག་གིས་སྨྲར་མི་བཏུབ་པ་བརྗོད་བྱའི་ཡུལ་ལས་འདས་པ། རྗོད་བྱེད་ཀྱི་མཁན་པོ་སྟོར་བ། རེ་དོགས་ཀྱི་འཕྲང་ལས་གྲོལ་བའི་ཡེ་ཤེས་ཟང་ཐལ་གྱི་ཆོས་སྐུ་དེ་ཡི་ངང་དུ་ཉིན་མཚན་བར་མེད་དུ་གནས་ཀྱང་། དེ་ལ་དེར་འཛིན་གྱི་རྣམ་པར་རྟོག་པ་ཕྲ་མོ་ཙམ་ཡང་མེད་པ་ཡིན་ཏེ། ཀུན་མཁྱེན་ཀློང་ཆེན་པས། ཀ་དག་རྣལ་མར་རྟོགས་པ་མཐར་ཕྱིན་ཡང་། །དེ་དག་རྟོགས་པར་འདོད་པ་པོ་མེད་ཅིང་། །རྟོགས་པ་ཉིད་ལ་རློམ་པའི་སེམས་མེད་པས། །སྒྱུ་མའི་རྣལ་འབྱོར་དཔེ་དང་བྲལ་བ་ཡིན། །ཞེས་གསུངས་སོ། །ཧྲིག་གེར་སོགས༴ ལྷུན་གྲུབ་ཀྱི་རྩལ་ལས་ཧྲིག་གེར་ཤར་བའི་འགྱུ་བ་དེ་ཉིད་རང་གྲོལ་དུ་སོང་ནས་ངོས་བཟུང་དང་བྲལ་བ་ནི། ཐལ་འགྱུར་ལས། ཡེ་ནས་གྲོལ་བས་བསྐྱར་གཞི་མེད། །རང་གིས་གྲོལ་བས་གཉེན་པོ་མེད། །ཅེར་གྱིས་གྲོལ་བས་མཐོང་སར་ཡལ། །ཞེས་པ་ལྟར། གཅེར་གྲོལ་ལ་ངོ་བོ་མེད་པའི་གནད་ཀྱིས་ཕྲ་རགས་ཀྱི་རྟོག་ཚོགས་གང་ཤར་ཐམས་ཅད་ངོ་ཤེས་པ་ཙམ་གྱིས་གྲོལ་བ་སྔར་འདྲིས་ཀྱི་མི་དང་འཕྲད་པ་ལྟ་བུར་གྲོལ་བ་དང་། རང་གྲོལ་ལ་གཉེན་པོ་མེད་པའི་གནད་ཀྱིས་གང་ཤར་གྱི་རྟོག་ཚོགས་ཐམས་ཅད་རང་ཤར་རང་གྲོལ་དུ་སོང་བ་སྦྲུལ་གྱི་མདུད་པ་ལྟར་གྲོལ་བ་དང་། ཡེ་གྲོལ་ལ་བསྐྱར་གཞི་མེད་པའི་གནད་ཀྱིས་གཞི་རང་གནས་ལ་ཤོར་ཐོབ་མེད་པར་གདོད་མའི་ངང་དུ་གནས་པ་ཁང་སྟོང་དུ་རྐུན་མ་ཞུགས་པ་ལྟར་ཕན་གནོད་མེད་པར་གྲོལ་བ་ཡིན་ནོ། །ལྷང་ངེར་སོགས༴ གཞན་ཡང་ཤར་གྲོལ་དུས་མཉམ་ཡིན་པས་སྔ་ཕྱི་མེད། །ཅེས་པ་ལྟར། བློ་ལ་གང་ཤར་ཐམས་ཅད་ཆོས་ཀྱི་དབྱིངས་སུ་ལྷང་ངེར་གྲོལ་བ་ནི། དཔེར་ན་ཆུ་ལ་རི་མོ་ད་ལྟ་བྲིས་པ་ད་ལྟ་ཞིག་ནས་བྲི་བ་དང་ཡལ་བ་དུས་མཉམ་པ་ལྟར་རྣམ་རྟོག་གང་ཤར་ཐམས་ཅད་ཤར་བ་དང་གྲོལ་བ་དུས་མཉམ་དུ་སོང་ནས་རང་ཤར་རང་གྲོལ་རྒྱུན་ཆད་མེད་པ་འདི་ག་ཀུན་མཁྱེན་ཆོས་ཀྱི་རྒྱལ་པོས་རང་བཞིན་རྫོགས་པ་ཆེན་པོའི་ཁྱད་ཆོས་སུ་བཞེད་པ་ཡིན་ནོ། །དེ་ལྟ་བུའི་རང་ངོ་ཀ་དག་ལས་མི་གཡོ་བའི་མཉམ་བཞག་གི་ངོས་ན་ཕུང་པོ་ལྔ་དང་བྲལ་ཞིང་། ལྷུན་གྲུབ་ཀྱི་གདངས་འགགས་པ་མེད་པའི་རྗེས་ཐོབ་ལའང་རྣམ་པར་ཤེས་པའི་ཚོགས་བརྒྱད་ཀྱི་དྲི་མས་མ་གོས་ཤིང་། མཉམ་རྗེས་རིས་མེད་དུ་སོང་བ་དེ་ཉིད་ལ་རྗེས་ཤེས་ཀྱི་མིང་མེད་པ་ཡིན་ཏེ། དཔེར་ན་རིན་ཆེན་གསེར་གླིང་དུ་ཕྱིན་དུས་ས་རྡོ་ཕལ་བ་བཙལ་ཀྱང་མི་རྙེད་པ་ལྟར། བློ་ལ་གང་ཤར་ཐམས་ཅད་ཡེ་ཤེས་ཀྱི་རོལ་པར་ཤར་ནས་ཐ་མལ་གྱི་འཁྲུལ་བ་རང་མཚན་པ་བཙལ་ཀྱང་མི་རྙེད་པ་ཡིན་ལ། འདི་ཡི་དུས་ན་གཟུང་འཛིན་གཉིས་བསྡུས་ཀྱི་ཆོས་རྣམས་མ་སྤངས་རང་གྲོལ་དུ་སོང་བ་ནི། དཔེར་ན་ནམ་ལངས་ཉི་མ་ཤར་བའི་དུས་ན་མདང་གི་མུན་པ་རང་ཡལ་རྗེས་མེད་ལ་སོང་ཡང་འདི་དང་འདིར་སོང་བྱ་བ་མེད་པ་དང་འདྲ་སྟེ། དྷ་ཀི་བཛྲ་གྱི་ཞལ་ནས། རྒྱ་གྲོལ་རྣལ་འབྱོར་ནམ་ལངས་ཉི་ཤར་འདྲ། །ཆོས་སྐུའི་སྣང་བ་ཡིན་ནོ་ཨེ་མ་ཧོ། །ཞེས་གསུངས་པ་ལྟར་རྟོགས་ན་སྐུ་གསུམ་ལམ་སྣང་གི་རྣལ་འབྱོར་མ་བཅོས་ལྷུན་གྱིས་གྲུབ་པ་དེ་ལ་ཟེར་བ་ཡིན་ནོ། །ལྔ་པ། ལྟ་བ་སོགས༴ དེ་ལྟར་རྟོགས་པའི་ཚེ་ན་བལྟ་བྱའི་ཡུལ་དང་ལྟ་མཁན་གྱི་དྲན་པ་གཉིས་སུ་མེད་ལ། རིག་པའི་གསལ་ཆ་ཉམས་པའི་བྱིང་བ་དང་རྣམ་རྟོག་ཡུལ་ཕྱིར་འཕྲོ་བའི་རྒོད་པ་དང་བྲལ་བ་ཡིན་ནོ། །སྒོམ་པ་སོགས༴ བློ་གཏད་སོ་དང་བཅས་པའི་བསམ་གཏན་བསྒོམས་ཀྱང་སངས་མི་རྒྱ་བའི་ཚུལ་ནི། སེང་གེ་རྩལ་རྫོགས་ལས། བསམ་གཏན་བསྒོམས་པས་ཆོས་ཉིད་དོན་མི་མཐོང་། །རང་སྣང་ཏིང་འཛིན་བསམ་པའི་ཕྱོགས་དང་བྲལ། །བློ་བྲལ་ཆོས་ཉིད་ནམ་མཁའི་མཐའ་དང་མཉམ། །དམིགས་པ་དག་གི་ཡུལ་ལ་འཛིན་རྟོག་མེད། །ཅེས་པ་ལྟར་བསྒོམ་རྒྱུ་རྡུལ་ཙམ་མེད་པ་ལ། གདོད་མའི་ལྷུམས་སུ་ཞུགས་པ་ཞེས་བཏགས་པ་ཡིན་ནོ། །སྤྱོད་པ༴ དེ་ལྟར་རྟོགས་པ་ཀློང་དུ་གྱུར་ན་མཉམ་པར་གཞག་བྱ་འཇོག་བྱེད་དང་བྲལ་བ་ལ། རྗེས་ཤེས་ཀྱི་སྤྱོད་པ་རང་མཚན་པ་མེད་ལ། འཁོར་འདས་ཀྱི་ཆོས་ལ་དགག་སྒྲུབ་སོགས་གཟའ་གཏད་ཐམས་ཅད་དང་བྲལ་བའི་དུས་ཡིན་ནོ། །ཆོས་ཉིད་དོན་གྱི་རྣལ་མ་ལ། རིག་པའི་ཡེ་ཤེས་དབང་འབྱོར་བ་དང་། འཁོར་འདས་ཀྱི་ཆོས་ཐམས་ཅད་མཉམ་པ་ཉིད་དུ་དབང་བསྒྱུར་བས་ན་གྲུབ་པའི་དབང་ཕྱུག་ཆེན་པོ་དེ་ལ་ཟེར་བ་ཡིན་ནོ། །དྲུག་པ་ཐོལ་གྱིས་སོགས༴ སེམས་གསལ་སྟོང་དུ་གནས་པའི་ཚེ་ན། ཐོལ་གྱིས་ཤར་བའི་རྣམ་པར་རྟོག་པ་དེ་ཉིད་རིག་ཅིང་དེ་ཀའི་རྒྱུན་སྐྱོང་བར་བྱས་པ་ན། གཤིས་ལ་ཤོར་བའི་ལྷག་མཐོང་ཡིན་ལ། ལྷག་མཐོང་མཚན་ཉིད་པ་མིན་ཏེ། དེའི་མིང་ལ་རྗེས་ཐོབ་འདོགས་ན་ཐོག །རྣམ་པར་རྟོག་པ་གང་ཤར་ཐམས་ཅད་ཆོས་ཀྱི་སྐུར་གྲོལ་བ་ནི་མིན་ཏེ། ཉོན་མོངས་པ་གང་སྐྱེ་ཐམས་ཅད་དང་པོ་ཡུལ་ལ་ཤར། བར་དུ་རིག་པའམ་དྲན་པས་ཟིན། ཐ་མ་རང་སར་བཞག་པས་རྟོག་ཚོགས་ཡུལ་མེད་རྩ་བྲལ་དུ་སོང་བའི་འགྱུ་བ་གནས་དག་གི་དགོངས་པ་ཙམ་ཡིན་ནོ། །ཆོས་ཉིད་རང་ས་ན་གྲོལ་བའི་གནད་ཀྱིས་ཉོན་མོངས་པ་དང་རྣམ་པར་རྟོག་པ་གང་སྐྱེས་ཀྱང་ཚུགས་མི་ཐུབ་པར་ཐད་ཀར་ཞིག་ནས་ཤར་གྲོལ་དུས་མཉམ་དུ་གྲོལ་བའི་རང་བཞིན་ཅན་དུ་དེའི་རྩ་གདར་ཆོད་པར་བྱེད་དགོས་པ་ཡིན་ནོ། །བདུན་པ་ཡེ་ནས་སོགས༴ ཡེ་གདོད་མ་ནས་ཐ་མལ་གྱི་རིག་པ་འདི་ཉིད་སྤྲོས་མཐའ་དང་བྲལ་བའི་ཚུལ་བསྟན་པ་ལ། དེ་ལ་ལྟ་བ་དང་སྒོམ་པ་དང་སྤྱོད་པའི་ཐ་སྙད་ཀྱི་རི་མོ་མ་དོད་པ་དང་། རིག་པའི་གདངས་འགགས་མེད་དུ་ཇི་ལྟར་ཤར་ཡང་དེ་དང་དེར་འཛིན་གྱི་གཞི་རྩ་མེད་པར་འཁྲུལ་སྣང་རང་སངས་སུ་གྲོལ་ནས་བཟང་རྟོག་ཏུ་ཤར་ཡང་རང་ཤར་རང་གྲོལ། ངན་རྟོག་ཏུ་ཤར་ཡང་མཐའ་གྲོལ་ཀློང་ཡངས། རང་སར་གནས་ཀྱང་ལུང་མ་བསྟན་རང་དེངས། ཡོད་མེད་གང་གི་ཕྱོགས་སུ་མ་ལྷུང་ཞིང་། ཤར་གྲོལ་ཐ་དད་དུ་དབྱེ་བའི་མཁན་པོ་མེད་ལ། མ་བཅོས་ཐ་མལ་གྱི་ཤེས་པ་རིག་སྟོང་བརྗོད་དུ་མེད་པའི་རང་ཚུགས་འདི་ཉིད་མ་ཤོར་བར་བྱས་ན་འདི་ལས་ལྷག་པའི་ལྟ་བ་དང་སྒོམ་པ་གཞན་གང་ཡང་མི་དགོས་ཞེས་གདམས་པ་ཡིན་ནོ། །གསུམ་པ་ལ་གཉིས་ལས། དང་པོ་གཞན་ནས་ཐེ་ཚོམ་གཅོད་མི་དགོས་པ་ནི། མཁས་བཙུན་སོགས༴ དེའང་འཆད་རྩོད་རྩོམ་གསུམ་དང་ལྡན་པའི་མཁས་པ་དང་། འདུལ་འཛིན་དམ་པ་རྣམས་ཀྱི་མཆོག་ཏུ་གྱུར་པའི་བཙུན་པ་བརྒྱ་ཕྲག་དང་། མཁྱེན་བརྩེ་ནུས་གསུམ་དང་ལྡན་པའི་གྲུབ་ཐོབ་སྟོང་དང་། རྒྱ་ཆོས་བོད་དུ་བསྒྱུར་བའི་ལོ་ཙཱ་བ་རྣམས་དང་། རིག་པའི་གནས་ལྔ་ལ་མཁས་པའི་པཎྜི་ཏ་ཁྲི་ཕྲག་སོགས་ཀྱིས་གསུངས་པའི་བཀའ་དང་བསྟན་བཅོས་རྒྱུད་ལུང་མན་ངག་འབུམ་ཕྲག་སོགས་ཀྱི་སྙིང་པོ་བཅུད་དུ་དྲིལ་བའི་མན་ངག་ནི་འདི་ཡིན་ཏེ། གཞན་བསྟན་བཅོས་བྱེ་བ་ས་ཡ་དང་མཇལ་ཡང་། ཐེ་ཚོམ་དང་ཡིན་མིན་གྱི་སྒྲོ་འདོགས་གཅོད་མི་དགོས་པར་ཐག་བཅད་པས་ཐ་ཚིག་གོ །ས་མ་ཡ༔ དྷ་ཐིམ༔ བུ་གཅིག་མཁྱེན་བརྩེའི་འོད་ཟེར་ལ༔ ཤེས་རིག་ཀུན་ཏུ་བཟང་པོ་ཡིས༔ བྱིན་རླབས་དགོངས་བརྒྱུད་ཚུལ་དུ་གནང༔ ཀུན་ལ་མ་སྟོན་སྙིང་གར་སྦོས༔ དེ་སྐད་འོག་མིན་བྲག་ཕུག་ཏུ༔ ཆོ་འཕྲུལ་ཟླ་བའི་ཉེར་དྲུག་གི༔ མུན་མཚམས་མཁའ་འགྲོ་འདུ་བའི་ཚེ༔ རིན་ཆེན་ཤོག་སྐྱའི་ལོགས་སུ་ཕབས༔ སྙན་བརྒྱུད་ཟབ་མོ་ཨ་ཐམ་རྒྱ༔ འདི་ཁོ་ནའོ༔ འདི་ཁོ་ནའོ༔ འདིའི་དོན་འགྲེལ་ཀུན་མཁྱེན་ཞལ་ལུང་ངོ་། ། དམ་པ་གསུམ་གྲངས་གསོག་ཚུལ་བྱང་སེམས་ལམ་གྱི་སྤྱི་བསྡོམས་བླ་མ་དམ་པའི་ཞལ་ལུང་བགྲོད་པ་གཅིག་པུའི་ལམ་ཆེན།དམ་པ་གསུམ་གྲངས་གསོག་ཚུལ་བྱང་སེམས་ལམ་གྱི་སྤྱི་བསྡོམས་བླ་མ་དམ་པའི་ཞལ་ལུང་བགྲོད་པ་གཅིག་པུའི་ལམ་ཆེན་བཞུགས་སོ།། དེ་ཡང་ཀུན་མཁྱེན་ཆེན་པོས། ཁྱད་པར་ཐེག་ཆེན་དགེ་བ་རླབས་པོ་ཆེ། །སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་བསྔོ་བས་ཡོངས་སུ་ཟིན་པ་ནི། །ཐར་ལམ་བགྲོད་པའི་གཅེས་པ་རྣམ་གསུམ་ཡིན། །ཞེས་གསུངས་པ་ལྟར་ཐེག་ཆེན་མདོ་སྔགས་གཉིས་ཀྱི་ལམ་ཉམས་སུ་ལེན་པའི་ཆིངས་ཆེན་པོ་དམ་པ་རྣམ་གསུམ་གྲངས་གསོག་ཚུལ་བླ་མའི་ཞལ་རྒྱུན་ལྟར་འགོད་པ་ལ། དང་པོ་སྦྱོར་བ་སེམས་བསྐྱེད་དམ་པ་ནི། ཐོག་མར་རང་རྒྱུད་ཀྱི་ཀུན་སློང་ལ་ཞིབ་པར་བརྟགས་ནས་མི་དགེ་བ་ཡིན་ན་སྤང་། ལུང་མ་བསྟན་ཡིན་ན་དགེ་བའི་ལམ་དུ་བཅོས། དགེ་བའི་ཀུན་སློང་དད་པ། ངེས་འབྱུང་། སྙིང་རྗེ་གསུམ་གྱིས་ཀུན་ནས་བསླང ས་ཏེ། རང་གི་མདུན་གྱི་ནམ་མཁར་གདན་པད་མ་ཉི་ཟླའི་སྟེང་དུ་ངོ་བོ་རང་གི་དྲིན་ཆེན་རྩ་བའི་བླ་མ་ཡིན་པ་ལ་རྣམ་པ་ཨོ་རྒྱན་ཆེན་པོ་རྒྱན་ཆ་ལུགས་ཇི་ལྟ་བ་བཞིན་གསལ་བཏབ་སྟེ། དེ་ཡང་ཡར་སྐུ་གསུམ་རྩ་གསུམ་མཆོག་གསུམ་སོགས་ནས་ཀ་ཁ་སློབ་པའི་སློབ་དཔོན་ཡན་ཆད། རྡོ་རྗེའི་མཆེད་གྲོགས་རྣམས་དང་བཅས་སྐྱབས་གནས་ཀུན་འདུས་ཀྱི་ངོ་བོར་མོས་པ་བསྐྱེད་ནས་ཡོན་ཏན་དང་བཀའ་དྲིན་དྲན་པའི་དད་འདུན་དྲག་པོས། དགྲ་གཉེན་ངེས་པ་མེད་པའི་བདག་གཞན་མ་རྒན་སེམས་ཅན་ཐམས་ཅད་དུས་འདི་ནས་བཟུང་ཏེ། བྱང་ཆུབ་དུ་མངོན་པར་རྫོགས་པ་སངས་རྒྱས་མ་ཐོབ་ཀྱི་བར་དུ་སྐྱབས་གནས་ཀུན་འདུས་ཨོ་རྒྱན་ཆེན་པོ་ཁྱེད་ལ་སྐྱབས་སུ་འགྲོ། ཁྱེད་ལ་བསྟེན། ཁྱེད་ལས་གཞན་པའི་སྐྱབས་གནས་མེད་དོ་སྙམ་པའི་དམ་བཅའ་བརྟན་པོས་སྙིང་ནས་སྐྱབས་འགྲོ་བྱས། བདག་གཞན་སེམས་ཅན་ཐམས་ཅད་གནས་ཚུལ་ཡེ་ནས་སངས་རྒྱས་ཡིན་མོད་ཀྱང་། མ་རྟོག་འཁྲུལ་བའི་དབང་གིས་གཟུང་འཛིན་འཁོར་བའི་སྣང་ཚུལ་སྡུག་བསྔལ་གྱི་ཡོ་ལང་ལ་བར་མེད་དུ་སྤྱོད་པའི་མ་རྒན་འདི་རྣམས་སྙིང་རེ་རྗེ། ད་ནི་བདག་གིས་རྣམ་གྲོལ་གཏན་གྱི་བདེ་བ་རྫོགས་པའི་སངས་རྒྱས་ཀྱི་གོ་འཕང་ལ་མྱུར་དུ་ཚེ་ལུས་འདི་ལ་འགོད་པར་བྱ། དེའི་ཆེད་དུ་ལམ་ཟབ་མོ་ཉམས་སུ་བླང་བར་བྱའོ་སྙམ་དུ་དམ་བཅས་ནས་སྙིང་ཁུང་རུས་པའི་གཏིང་ནས་སེམས་བསྐྱེད་གནད་དུ་ཐེབས་པར་བྱ། དེ་ནས་དངོས་གཞི་དམིགས་མེད་དམ་པ་ནི། ཨོ་རྒྱན་ཆེན་པོ་ལ་ཡིད་ཁྱེད་ཤེས་ཀྱི་དད་འདུན་བསྐྱེད་ནས་གསོལ་འདེབས་སྙིང་ནས་ཡང་ཡང་བྱ། དེ་ཡང་ལམ་གྱི་ཡོན་ཏན་རང་རྒྱུད་ལ་ཆེ་སྐྱེས་ཆུང་སྐྱེས་ནི་རང་གི་དད་པ་ཁོ་ན་ལ་རག་ལས་པ་ཡིན། དད་པ་ནི་སྐྱབས་ཡུལ་གྱི་ཡོན་ཏན་ཐུན་མོང་དང་ཐུན་མིན་ཤེས་པ་དང་གཅིག །རང་ལ་བཀའ་དྲིན་ཆེ་བ་དྲན་པ་དང་གཉིས། རང་འཁོར་བའི་སྡུག་བསྔལ་ལས་ཐར་བར་འདོད་པ་དང་གསུམ། ཐར་བའི་ཐབས་ནི། བླ་མའི་ཐུགས་རྗེ་དང་ཕྲིན་ལས་ཁོ་ན་ལས་གཞན་མེད་པར་ཤེས་པ་དང་བཞི་སྟེ། དེ་ལྟ་བུའི་ཤེས་ཐོབ་ཀྱི་དད་པ་དྲག་པོས་གསོལ་བ་བཏབ་པས་ཨོ་རྒྱན་ཆེན་པོ་ཐུགས་དགྱེས་བཞིན་འོད་དུ་ཞུ་ནས་རང་ལ་ཐིམ་པས་ཐུགས་ཡིད་དབྱེར་མེད་དུ་གྱུར་བར་བསམ་ནས་མཉམ་པར་འཇོག་དགོས། རང་གར་གསོལ་འདེབས་དང་ཐུགས་ཡིད་མ་བསྲེ་བར་ལས་དང་པོ་བས་ས་འཇོག་རྡོ་འཇོག་བྱས་པས་ཅི་ཡང་མི་ཕན། རང་གིས་མོས་གུས་ཀྱིས་གསོལ་བ་ཐེབས་ན། བླ་མའི་བྱིན་རླབས་ཞུགས་རྟགས་ནི། མཉམ་བཞག་གི་དུས་དེར་བྱིང་རྨུག་འཐིབ་གསུམ། འཕྲོ་རྒོད་འཐོར་གསུམ་པོ། དཔེར་ན་རི་ཆེན་མགོའི་སྨུག་པ་དྭངས་བ་བཞིན། ད་ལྟ་ནས་དྭངས་ཏེ་འཁྲུལ་རྟོག་གི་རྙོག་མ་ཡེ་མི་འོང་བ་ཞིག་འོང་རྒྱུ་ཡོད་དགོས། དེ་འདྲ་མིན་པར་རི་ཆེན་སྨུག་པས་དབ་བེ་དུབ་བེ། འཁྲལ་ལི་འཁྲུལ་ལེ་ཞིག་ཡིན་དུས་ནི་དད་པ་ཡག་པོ་ཞིག་མ་ཞོག་པའི་མངོན་རྟགས་གསལ་བ་ཡིན་ཏེ། དད་པས་ནི་སེམས་མ་དག་པའམ་མ་དད་པའི་འཁྲུལ་རྟོག་ཐམས་ཅད་དྭངས་འགྲོ་བ་ཡིན་པར་མདོ་རྒྱུད་ཐམས་ཅད་ནས་གསུངས་པས་མོས་གུས་འདི་ལ་ཅི་ནས་གཟབ་དགོས་ཏེ། དཔལ་སྤྲུལ་གྱི་ཞལ་ནས། བླ་མ་བསྟེན་ཐབས་མོས་གུས་ཡིན་ཏེ་ཞེ་ས་མིན། །བླ་མ་སྒྲུབ་ཐབས་མོས་གུས་ཡིན་ཏེ་གསོལ་འདེབས་མིན། །ཞེས་གསུངས་པ་ལྟར་རོ། །མཉམ་པར་ཇི་ལྟར་འཇོག་ན་ཕྱག་རྫོགས་ཀྱི་གདམས་ངག་ལ་གོ་མྱོང་ཅན་ཡིན་ན་ནི། གནས་ན་དྭངས་ཆ་ཡོད་པ། གསལ་ན་ལྷོད་ཆ་ཡོད་པ། འགྱུ་ན་གྲོལ་ཆ་ཡོད་པ། རིག་ན་གཏད་སོ་མེད་པ། འགྱུ་བ་རང་དག་གི་མགོ་རྩོམ་ནི་ཞིག་བྱེད་ནས་མཉམ་པར་འཇོག་དགོས། དེ་འདྲ་མིན་པར་དཔལ་སྤྲུལ་གྱིས། མཐོ་ན་གསལ་གསལ་འདྲ་ཡང་དྭངས་ཆ་མ་ཐོན། །ཕུར་ཚུགས་རིག་ཆ་འདྲ་ཡང་གཏད་སོ་མདུང་ཚུགས། །སེམས་འཛིན་ལྟ་བའི་འཛིན་སྟངས་རྟོད་ཕུར་སྐྱུར་ཐོངས། །ཞེས་གསུངས་པ་ལྟ་བུ་ཞིག་ཡིན་ན་ནི་སེམས་འཛིན་ཡིད་དཔྱོད་ཀྱི་སྒོམ་སྟེ་སྒྲུབ་རྒྱུད་དམ་པའི་ལམ་མ་ཡིན་ནོ། །མན་ངག་མེད་པ་ཞིག་ཡིན་ན་ཡང་། བླ་མའི་ཐུགས་དང་རང་སེམས་དབྱེར་མེད་དུ་བསྲེ་བའི་མོས་པས། རྣམ་རྟོག་གང་ཤར་ཐམས་ཅད་ཆེད་དུ་མི་བཀག །རྗེས་སུ་མི་འབྲང་བར་རང་བབས་སུ་ལྷོད་དེ་མཉམ་པར་བཞག་པ་དེ་གོམས་ན་ཞི་ལྷག་ཡང་དག་རྒྱུད་ལ་སྐྱེ་བའི་གཞི་མན་ངག་ཡང་དག་པའོ། །དེ་ལ་མན་ངག་ཡོད་མེད་ཇི་ལྟར་ཡང་ཐུགས་ཡིད་བསྲེས་ནས་མཉམ་པར་བཞག་དུས་དྲན་ཤེས་ལུང་མ་བསྟན་ཏུ་མ་ཤོར་བ་གལ་ཆེ། གལ་ཏེ་འཁྲུལ་འབྱམས་སུ་ཤོར་ཆུས་བྱེད་ན་ནི་མཉམ་བཞག་དེ་ལས་ལང་སྟེ། དགེ་སྡིག་གཏོང་ལེན་བྱེད་པ་སོགས་ལ་ཁ་སྤོ་དགོས། ལུང་མ་བསྟན་ལ་འབྱམས་ཡོད་བཞིན་སྒོམ་གི་༼གྱི་༽ གོ་བཅད་ལོབ་སློབ་མི་ཉན། ཡུན་ཐུང་གྲངས་མང་བྱས་ནས་སྒོམ་རྒྱུ་འདི་ལ་གནད་ཆེན་པོ་རིམ་བཞིན་གོ་རྒྱུ་ཡོད། ཡུན་རིང་པོར་མཉམ་བཞག་ལ་འདུག་ཐུབ་པ་ལོས་བཟང་དེ་ཡུན་རིང་སྤྱད་ཀྱི་བརྟན་ཆ་ཡོད་ནི་མ་རེད། བརྗེད་ངས་དང་བྱིང་རྒོད་ཀྱིས་བཅད་འགྲོ་ནི་རེད། དེ་འདྲའི་ལུང་མ་བསྟན་ལ་ཤོར་གྲབ་བྱེད་དུས་མཉམ་བཞག་དེ་ལས་ལྡང་ནས་རྗེས་ཐོབ་དུ། རང་གི་དབུགས་ཕར་འགྲོ་བ་དང་མཉམ་དུ་བདག་གིས་དུས་གསུམ་དུ་བསགས་པའི་དགེ་རྩ་ཐམས་ཅད། དེའི་འབྲས་བུ་དད་པ་སྙིང་རྗེ་ངེས་འབྱུང་ཐོས་བསམ་སྒོམ་གསུམ་བསླབ་པ་གསུམ་སོགས་ཡོན་ཏན། འཇིག་རྟེན་ཕྱོགས་ཀྱི་ཚེ་རིང་བ། གཟུགས་མཛེས་པ་ལོངས་སྤྱོད་སྙན་གྲགས་སོགས་ཡིད་དུ་འོང་བའི་བདེ་དགེ་ཅི་ཡོད་ཐམས་ཅད། རླུང་དཀར་པོའི་རྣམ་པར་སོང་སྟེ། རང་གི་ཚེ་རབས་ཐོག་མེད་ཀྱི་དགྲ་བགེགས་གཉིས་ཀྱི་གཙོ་བོ་བྱས་པའི་སེམས་ཅན་ཐམས་ཅད་ལ་བྱིན་པས། དེ་ཡང་གཅིག་ཁོ་ན་ཐམས་ཅད་ལ་བགོ་བཤའ་བྱེད་པ་ལྟ་བུ་མིན་པར། བདེ་དགེ་ཅི་ཡོད་དེ་སེམས་ཅན་གྱི་གྲངས་བཞིན་ཆ་ཚང་རེ་ཐོབ་ནས་མ་སེམས་ཅན་ཐམས་ཅད་་བདེ་བ་རྒྱུ་འབྲས་གཉིས་དང་ལྡན་པར་བསམ། དབུགས་ཚུར་སྡུད་དུས་སེམས་ཅན་ཐམས་ཅད་ཀྱི་རྒྱུད་ཀྱི་སྡིག་པ་མི་དགེ་བ་བཅུ་མཚམས་མེད་པ་ལྔ་སོགས་དང་སོ་བྱང་སྔགས་གསུམ་གྱི་དམ་ཚིག་འདས་ཉམས་རལ་བ། ཆོས་སྤངས་མནའ་ཟོས་སོགས་དང་། འབྲས་བུ་ངན་སོང་གསུམ་གྱི་སྡུག་བསྔལ་ཐམས་ཅད་འོད་ནག་པོའི་རྣམ་པར་བྱུང་ནས་རང་གི་སྣ་བུག་གཉིས་ནས་ཞུགས་ཏེ། སྙིང་ནང་ན་ཐོག་མེད་ནས་ད་བར་དུ་བདག་མེད་ལ་བདག་ཏུ་བཟུང་། ང་མེད་ང་རུ་འཛིན་མཁན་གྱི་ངོ་བོ་ཐིག་ལེ་ཁམ་ནག་གི་ངོ་བོར་ཡོད་པ་ལ་ཐིམ་པས། དེ་མ་ལྕོག་པའི་རྣམ་པས་ཐིག་ལེ་དེ་ཉིད་ཞིག་སྟེ་དམིགས་མེད་ཀ་དག་གི་དབྱིངས་སུ་གཏོར་ནས་གཞི་མེད་རྩ་བྲལ་དུ་གྱུར་པར་བསམས་ནས་ཡང་མཉམ་པར་འཇོག ། སླར་ཡང་སྔར་བཞིན་འཁྲུལ་འགོ་རྩོམ་དུས་རྗེས་ཐོབ་ལ་ལྡང་ནས། ཨོ་རྒྱན་ཆེན་པོ་སླར་ཡང་སྔར་བཞིན་མདུན་གྱི་ནམ་མཁར་དམིགས་ནས་བསྔོ་བའི་དཔང་པོ་མཛད་པའི་དགོངས་གསོལ་ཞུས། ད་ཅི་བསྔོ་ན་བདག་གི་སྔར་བསགས་ཚད་ཀྱི་དགེ་བ་ཐུན་ཤར་འདིའི་མཚོན་ཏེ་ད་ལྟ་བསགས་ཡོད་ཀྱི་དགེ་བ་མ་འོངས་པ་ན་བསགས་འགྱུར་གྱི་དགེ་བ་སངས་རྒྱས་དང་བྱང་ཆུབ་སེམས་དཔའ་ཉན་རང་དང་བཅས་པ་རྣམས་ཀྱི་ཟག་མེད་ཀྱི་དགེ་བ་སེམས་ཅན་ཐམས་ཅད་ཀྱི་ཟག་བཅས་ཀྱི་དགེ་བ་ཐམས་ཅད་གཅིག་ཏུ་བསྡུས་བློ་ཡིས་བླངས་ནས་དགེ་བའི་ཕུད་དེ་ཨོ་རྒྱན་ཆེན་པོ་སྐྱབས་གནས་ཀུན་འདུས་ལ་རབ་སྒྲུབ་པའི་མཆོད་པ་ཕུལ། དེ་ལྟར་མཆོད་པའི་དགེ་རྩ་དང་བཅས་པ་ཕ་མ་གཉིས་དང་དགྲ་བགེགས་གཉིས་ཀྱི་གཙོས་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པར་གྱུར་ཅིག །དེ་ལྟར་བསྔོ་བ་དང་སྨོན་ལམ་བཏབ་པ་དེ་མྱུར་དུ་འགྲུབ་པར་ཨོ་རྒྱན་ཆེན་པོ་ཁྱེད་ཀྱིས་ཐུགས་རྗེས་བྱིན་གྱིས་བརླབ་ཏུ་གསོལ། ཞེས་བསྔོ་སྨོན་བྱས་ནས་རྗེས་ཐོབ་དུ། བག་ཡང་ཅུང་ཟད་བྱས། དེ་ནས་སླར་ཡང་སྔར་ལྟར་དམ་པ་གསུམ་གྲངས་གསོག །ཁ་གྲངས་ཡང་ཏིག་ནག་པོ་གསེར་གྱི་འབྲུ་གཅིག་ན་བརྒྱ་དང་བརྒྱད་བཅུའམ་བརྒྱ་དང་ལྔ་བཅུ་ཙམ་རེ་འགྲོ་དགོས་པར་གསུངས་ཀྱང་སྤྱིར་དེ་ལྟར་ལས་བྱེ་བྲག་གང་ཟག་གི་ཁྱད་པར་དང་གོམས་པ་ཆེ་ཆུང་གཉིས་མཐའ་གཅིག་ཏུ་ངེས་དཀའ་ཡང་། ལས་དང་པོ་བ་ནི་གོམ་རིམ་བཞིན་དང་པོ་ཇེ་མང་ལ་འགྲོ་བ་ཞིག་ངེས་པར་དགོས་གསུངས་སོ། །ཞེས་སྐྱབས་རྗེ་བྱ་བྲལ་ཆོས་དབྱིངས་རང་གྲོལ་གྱི་ཞལ་རྒྱུན་དང་བླ་མ་དམ་པ་མཁན་དྲི་མེད་འོད་ཟེར་གྱི་གསུང་རྒྱུན་ཡིད་ལ་གང་ཟིན་འགའ་ཞིག་ད་ཕན་ཅི་ནས་ཉམས་ལེན་ལ་བརྩོན་པར་བཞེད་པའི་ཆོས་གྲོགས་དམ་པའི་ཐུགས་ཀྱི་བསྙེལ་གསོར་དམིགས་ཏེ། ཅི་དྲན་དེར་བཅོས་བསྒྱུར་ཡག་བདམ་ཅི་ཡང་མ་བྱས་པར་ཐུབ་བསྟན་ནོར་བུ་ནས་བྲིས་པ་ཡི་གེ་བས་སྒྲུབ་པ་དོན་ལྡན་གྱི་ཆ་རྐྱེན་དུ་གྱུར་ཅིག ། དམ་པ་གསུམ་གྲངས་བསགས་ལུགས་ནི། སྦྱོར་བ་སེམས་བསྐྱེད་དམ་པ་ནི། རང་གི་སྤྱི་བོར་པད་མ་ཉི་ཟླའི་གདན་ལ་བཀའ་དྲིན་གསུམ་ལྡན་གྱི་བླ་མ་མན་ཆོད་ནས་ཀ་ཁ་སློབ་པའི་སློབ་དཔོན་ཡན་ཆད་རྡོ་རྗེའི་མཆེད་གྲོགས་རྣམས་དང་བཅས་སྐྱབས་གནས་ཐམས་ཅད་འདུས་པའི་ངོ་བོ་ཨོ་རྒྱན་རིན་པོ་ཆེ་དངོས་སུ་བཞུགས་ཡོད་པ་གསལ་དུས་འདི་ནས་བྱང་ཆུབ་མ་ཐོབ་ཀྱི་བར་དུ་བདག་གཞན་མ་རྒན་སེམས་ཅན་ཐམས་ཅད། སྐྱབས་གནས་ཀུན་འདུས་ཨོ་རྒྱན་རིན་པོ་ཆེ་ཁྱེད་ལ་བློ་གཏད་གཅིག་ཆོག་གི་དད་གུས་ཀྱིས། སྐྱབས་སུ་མཆི་ཞིང་སྐྱབས་གནས་མཐར་ཐུག་གི་ངོ་བོར་དམ་བཅའ་བྱེད་པ་ཡིན་པས། འཁོར་བ་དང་ངན་སོང་གི་སྡུག་བསྔལ་དང་སྲིད་ཞིའི་མཐའ་གཉིས་ཀྱི་འཇིགས་པ་ལས་བསྐྱབས་ཏུ་གསོལ་སྙམ་དུ་སྐྱབས་སུ་འགྲོ་བར་བྱ། དེ་ནས་འཁོར་བ་ན་གནས་པའི་སེམས་ཅན་ཐམས་ཅད་བདག་གི་ཕ་མ་ཤ་སྟག་ཡིན་ཀྱང་ད་སྔོན་མ་ཤེས་པས་དགྲ་གཉེན་རིས་ཆད་དུ་བཟུང་སྟེ་རང་གིས་ངོ་མ་ཤེས་པས་མ་རྒན་སེམས་ཅན་ཐམས་ཅད་སྙིང་རེ་རྗེ། བདག་གིས་སེམས་ཅན་གཅིག་ཀྱང་མ་ལུས་པར་འཁོར་བ་ལས་བསྒྲལ་ནས་སངས་རྒྱས་ཀྱི་ས་ལ་བཀོད་པར་བྱ། དེའི་ཆེད་དུ་བླ་མའི་གདམས་ངག་གི་ཁྲིད་དོན་ཉམས་སུ་བླང་བར་བྱའོ་ཞེས་ངེས་འབྱུང་གི་བློས་ཟིན་པའི་སྨོན་འཇུག་གི་སེམས་གཉིས་བསྐྱེད་པར་བྱ། དེ་ནས་དངོས་གཞི་དམིགས་མེད་དམ་པ་ནི། ཀུན་འདུས་རྩ་བའི་བླ་མ་དང་དབྱེར་མེད་པའི་གུ་རུ་ཡིད་བཞིན་ནོར་བུ་ལ་ཡིད་ཁྱེད་ཤེས་བློ་གཏད་ལིང་བསྐྱུར་གྱི་དད་པས་གསོལ་བ་སྙིང་ནས་བཏབ་པས། ཨོ་རྒྱན་ཆེན་པོའི་ཐུགས་རྒྱུད་བསྐུལ་ཏེ་འོད་དུ་ཞུ་བ་ཐིག་ལེ་དཀར་ལ་དམར་མདངས་ཆགས་པ་ཡི་གེ་ཧཱུྃ་གི་རྣམ་པ་ཅན་དུ་གྱུར་བ་རང་གི་སྙིང་གར་ཐིམ་པས་བླ་མའི་སྐུ་གསུང་ཐུགས་དང་རང་གི་སྒོ་གསུམ་དབྱེར་མེད་དུ་གྱུར་བར་བསམ་ནས་སེམས་རང་བབས་སུ་ལྷོད་དེ་རྣམ་རྟོག་ལ་བཀག་འབྲང་དང་ངོ་ལྟ་མེད་པར་ཅི་གནས་སུ་འཇོག །དེ་ནས་ཁྲིད་སྐབས་ཡིན་ན་འཁྲུལ་བ་ལུང་མ་བསྟན་ལ་ཤོར་གྲབ་བྱེད་དུས། སླར་ཡང་རང་གི་དུས་གསུམ་གྱི་དགེ་རྩ་དང་། ལུས་ལོངས་སྤྱོད་ཚེ་བསོད་ཁ་རྗེ་དབང་ཐང་ངག་ནུས་བྱིན་རླབས་སོགས་ལུགས་གཉིས་ཀྱི་དཔལ་ཡོན་ཅི་ཡོད། མཆོག་གསུམ་རྩ་གསུམ་ཆོས་སྐྱོང་གི་ཐུགས་རྗེ་ཕྲིན་ལས་ཐམས་ཅད་རང་གི་ཁ་སྣ་ནས་རླུང་དཀར་པོའི་རྣམ་པར་ཕྱིར་སོང་ནས། དགྲ་བགེགས་སོགས་མི་འདོད་པ་གཙོ་བོར་བྱས་པའི་མ་རྒན་སེམས་ཅན་ཐམས་ཅད་ལ་བྱིན་པས་བགོ་བཤའ་བྱས་པ་ལྟ་བུ་མ་ཡིན་པར་སེམས་ཅན་རེ་རེ་ལ་བདེ་བ་རྒྱུ་དང་འབྲས་བུ་རེ་རེ་ཐོབ་པར་བསམ་ནས་རླུང་ཕྱིར་བསལ། དེ་ནས་སེམས་ཅན་ཐམས་ཅད་ཀྱི་རྒྱུད་ན་ཡོད་པའི་སྡུག་བསྔལ་གྱི་རྒྱུ་ཉོན་མོངས་དུག་ལྔ། ལས་མི་དགེ་བ་བཅུ། མཚམས་མེད་པ་ལྔ། ཉེ་བ་ལྔ། ལྕི་བཞི་ལོག་བརྒྱད་སྡོམ་པ་གསུམ་དང་འགལ་བ། མཚམས་དང་འགལ་བ། དམ་ཚིག་ཉམ་ཆགས་ཆོས་སྤངས། དམ་སེལ་སོགས་འབྲས་བུ་ངན་སོང་གསུམ་རིགས་དྲུག་རྒྱུད་ལྔ། སྡུག་བསྔལ་གསུམ། ན་ཚ་རྐྱེན་བགེགས་དབུལ་ཕོང་བཀྲེས་སྐོམ། ནད་དང་དགྲ་སོགས་མི་འདོད་པ་ཐམས་ཅད་རླུང་ནང་དུ་འོང་བ་དང་མཉམ་དུ་འོད་ནག་པོའི་རྣམ་པར་བྱུང་ནས། ཁ་སྣའི་ལམ་རྒྱུད་དེ་རང་གི་སྙིང་ནང་ན་ཐོག་མེད་ནས་ང་མེད་ལ་ངར་འཛིན་པའི་གཅེས་འཛིན་གྱི་ངོ་བོ་ཐིག་ལེ་ཁམ་ནག་གི་རྣམ་པར་ཡོད་པ་ལ་ཐིམ་པས་ཐིག་ལེ་དེ་ཉིད་དམིགས་མེད་ཀྱི་དབྱིངས་སུ་གཏོར་བར་བསམ་ནས་རླུང་ནང་དུ་རྔུབ་སེམས་ཅན་རྣམས་སྡུག་བསྔལ་རྒྱུ་འབྲས་གཉིས་དང་བྲལ་ནས་ཐམས་ཅད་སངས་རྒྱས་པར་བསམ་ལ། ཐུགས་ཡིད་བསྲེས་དེ་མཉམ་པར་འཇོག་པ་སོགས་བྱེད་པ་གོང་ལྟར་བྱས། ཡང་འཁྲུལ་དབང་ལ་འཆོར་གྲབ་བྱེད་འོང་དུས། རྗེས་བསྔོ་བ་དམ་པ་ནི། བླ་མ་ཨོ་རྒྱན་ཆེན་པོ་སྔར་ལྟར་མདུན་མཁར་གསལ་བ་བསྔོ་བའི་དཔ ང་པོ་བྱེད་པར་ཞུ། ཇི་ལྟར་བསྔོ་ན། བདག་གིས་ད་རེས་ཐུན་འདིའི་དགེ་རྩས་མཚོན། བདག་གིས་སྔར་བསགས་ཀྱི་དགེ་བ། མ་འོངས་པར་བསགས་འགྱུར་གྱི་དགེ་བ། ད་ལྟའི་བསགས་ཡོད་ཀྱི་དགེ་བ། སངས་རྒྱས་བྱང་སེམས་ཉན་རང་སོགས་ཀྱི་ཟག་མེད་ཀྱི་དགེ་བ། སེམས་ཅན་ཐམས་ཅད་ཀྱིས་བསགས་པའི་ཟག་བཅས་ཀྱི་དགེ་བ་ཐམས་ཅད་བསྲེས་ཏེ་བསྡོམས་ནས། རྗེས་སུ་ཡི་རང་དང་བཅས་དགེ་རྩའི་ཕུད་ཨོ་རྒྱན་ཆེན་པོ་ལ་མཆོད་པར་ཕུལ། དེའི་དགེ་རྩ་དང་བཅས་མ་རྒན་སེམས་ཅན་ཐམས་ཅད་ལ་བསྔོས་ཏེ་བྱིན་པས་རྫོགས་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པར་ཤོག་ཅིག་སྙམ་དུ་བསྔོ་བ་དང་སྨོན་ལམ་སྙིང་ནས་འདེབས། སྨོན་ལམ་དེ་ཉིད་འགྲུབ་པར་ཨོ་རྒྱན་ཆེན་པོས་བྱིན་གྱིས་བརླབ་ཏུ་གསོལ་སྙམ་དུ་ཡང་ཡང་བསམ། དེ་ནས་རྗེས་ཐོབ་དུ་ཅུང་ཟད་གུ་ཡངས་བ་བྱ། འཁྲུལ་དབང་ལ་ཤོར་ཆུས་བྱེད་དུས་ཡང་དམ་པ་གསུམ་པོ་ཡང་བསྐྱར་བྱས། དེ་ལྟར་ཐུན་རེ་ལ་བྱེད་སྲོལ་ཁམས་དང་བསྟུན་དགོས་སོ། །དེ་ལ་མདོ་སྔགས་ཀྱི་ལམ་གནད་ཐམས་ཅད་འདུས་པར་གསུངས། ༈ དང་པོ་མདུན་གྱི་ནམ་མཁར་ཨོ་རྒྱན་ཆེན་པོ་བཞུགས་ཡོད་བསམ། དེ་ནས་བདག་གཞན་སེམས་ཅན་ཐམས་ཅད་དུས་འདི་ནས་བཟུང་སྟེ་སངས་རྒྱས་མ་ཐོབ་ཀྱི་བར་དུ་ཨོ་རྒྱན་རིན་པོ་ཆེ་ཁྱེད་ལ་སྐྱབས་སུ་མཆི་འོ་བསམ། དེ་ནས་སེམས་ཅན་ཐམས་ཅད་སངས་རྒྱས་ས་ལ་འགོད་པར་བྱ་དེའི་ཆེད་དུ་བདག་གིས་ཐུན་འདི་གཅད་པ་ཡིན་བསམ། དེ་ནས་བདག་ལ་སྐྱིད་སྡུག་ལེགས་ཉེས་བཟང་ངན་ཅི་བྱུང་ཡང་ཨོ་རྒྱན་ཆེན་པོ་ཁྱེད་མཁྱེན། ཁྱེད་ལས་གཞན་པའི་སྐྱབས་གཞན་མེད་བསམ། ཨོ་རྒྱན་ཆེན་པོ་འོད་དུ་ཞུ་ནས་ཐིག་ལེ་དཀར་དམར་གྱི་རྣམ་པས་བདག་གི་སྙིང་ཁར་ཐིམ་པས་གུ་རུའི་ཐུགས་དང་བདག་གི་སེམས་དབྱེར་མེད་འདྲེས་པར་བསམ། དེ་ནས་ཐུགས་ཡིད་དབྱེར་མེད་ཀྱི་ངང་ནས་རང་སེམས་མ་བཅོས་པར་མཉམ་པར་བཞག ། རྣམ་རྟོག་བཀག་མི་ཉན། རྣམ་རྟོག་གི་རྗེས་སུ་འབྲང་མི་ཉན། ཡང་འཁྲུལ་ཆུས་བྱེད་དུས་ཁ་གདངས་ནས་སྒོམ་མདོག་བྱེད་མི་ཉན། རྗེས་ཐོབ་ལ་ལྡང་ནས་དགེ་སྡིག་གཏོང་ལེན་བྱེད་དགོས། རང་གི་ཚེ་རབས་སྔ་མ་དང་། ད་ལྟ་དང་རྗེས་མར་བསགས་པའི་དགེ་བ་དང་། འབྲས་བུ་བདེ་བ་ཐམས་ཅད་དབུགས་ཕར་འགྲོ་བ་དང་མཉམ་དུ་རླུང་དཀར་པོའི་རྣམ་པར་ཕར་སོང་བས་སེམས་ཅན་ཐམས་ཅད་ལ་དགེ་རྩ་བདེ་འབྲས་ཆ་ཚང་རེ་ཐོབ་ནས་བདེ་བ་རྒྱུ་འབྲས་གཉིས་དང་ལྡན་པར་བསམ། དབུགས་ཚུར་རྔུབ་དུས་སེམས་ཅན་ཐམས་ཅད་ཀྱི་རྒྱུད་ཀྱི་སྡུག་བསྔལ་རྒྱུ་འབྲས་ཐམས་ཅད་རླུང་ནག་པོའི་རྣམ་པར་ཚུར་བྱུང་ནས་རང་གི་སྣ་བུག་ནས་ཞུགས་ཏེ་སྙིང་ནང་ན་བདག་གཅེས་འཛིན་གྱི་ངོ་བོ་ཐིག་ལེ་ཁམ་ནག་ལ་ཐིམ་པས་དམིགས་མེད་ཀ་དག་གི་དབྱིངས་སུ་གཏོར་བར་བསམ་ལ་ཡང་མཉམ་པར་བཞག ། དེ་ནས་མདུན་དུ་ཨོ་རྒྱན་ཆེན་པོ་སྔར་བཞིན་གསལ་ནས་བསྔོ་སྨོན་བྱའོ། །མཇུག་མ་ཚང་ལགས། རྫོགས་ཆེན་གྱི་ལམ་ཉམས་སུ་ལེན་པའི་མན་ངགལམ་ཟབ་མོ་འདི་ཉིད་ཉམས་སུ་ལེན་པ་ལ། སྔོན་འགྲོ་དང་དངོས་གཞི་རྗེས་ཐོབ་གསུམ་དུ་ཡོད་པ་ལས། དང་པོ་སྔོན་འགྲོ་ལ་ཡང་སྒོ་གསུམ་སྦྱངས་པའི་རིམ་པ་ལས། དང་པོ་ལུས་ཀྱི་མངོན་ཞེན་བཟློག་ཅིང་བར་ཆད་ཀྱི་གེགས་བསལ་བའི་ཕྱིར་གནས་དབེན་པ་མི་མེད་ལུང་སྟོང་དུ་འགྲོ་སྟེ། ཡེ་ཤེས་དང་འཇིག་རྟེན་གྱི་སྲུང་མ་གསོལ་ཞིང་ས་ལམ་གྱི་བར་ཆད་བཟློག་པའི་ཕྲིན་ལས་བཅོལ། དེ་ནས་ཁམས་གསུམ་གྱི་སེམས་ཅན་ཐམས་ཅད་སྲིད་པ་སྡུག་བསྔལ་གྱི་ཁྲི་མུན་ལས་འདོན་པའི་ཕྱིར། ངས་འཁོར་འདས་རུ་ཤན་འབྱེད་ཅིང་ཚེ་གཅིག་ལུས་གཅིག་ཏུ་རྒྱལ་བ་ཀུན་ཏུ་བཟང་པོའི་གོ་འཕང་ལ་བགྲོད་པར་བྱའོ་ཞེས་སེམས་བསྐྱེད། དེ་ནས་བླ་མ་སྤྱི་བོར་བསྒོམ་པའི་སྐུ་ལས་འོད་ཟེར་དཔག་ཏུ་མེད་པ་འཕྲོས་པས། རང་གི་སྤྱི་བོ་ནས་ལུས་ལ་ཞུགས་པས་ནད་གདོན་སྡིག་སྒྲིབ་བག་ཆགས་གདོས་བཅས་ཤ་ཁྲག་གི་ཕུང་པོ་དང་བཅས་པ་དངོས་མེད་དུ་གཞིག་པར་བསམ། དེ་ནས་ཡེ་ཤེས་ལྔ་ལྡན་གྱི་ཐིག་ལེ་ཆེན་པོའི་ནང་ཁོ ངས་སུ་རང་ལུས་རྡོ་རྗེ་སྔོན་པོ་རྭ་གདེང་བ་ཞིག་ཏུ་བསྒོས་ཏེ་ལག་གཉིས་སྤྱི་བོར་ཐལ་མོ་སྦྱར་ཞིང་གྲུ་མོ་ཕྱིར་བསྒྲད་རྐང་པའི་མཐིལ་སྤྲད་དེ་པུས་མོ་ཡང་བསྒྲད། ཐིག་ལེའི་ཕྱི་རིམ་དུ་མེ་དཔུང་འབར་ཞིང་ཚ་ཚ་འཕྲོ་བར་བསྒོམ། དེ་ལ་དག་པ་དྲན་པ་ནི། ཡར་རྩེ་གསུམ་དུ་ངོ་བོ་རང་བཞིན་ཐུགས་རྗེ་གསུམ་དང་། མར་རྩེ་གསུམ་ཆོས་སྐུ་ལོངས་སྐུ་སྤྲུལ་སྐུ་གསུམ་དང་། རྐེད་པ་གཅིག་ཏུ་དྲིལ་བ་ནི་ཐབས་ཤེས་གཉིས་སུ་མེད་པའི་མཚོན་བྱེད་དུ་ཤེས་པར་བྱའོ། །དེ་ནི་སྔ་མ་དང་ཕྱི་མ་ནི་ལུས་ཀན་རྐྱལ་དུ་ལོག་ནས་སྔ་མ་ལྟར་ལུས་ཀྱིས་བྱ་བ་དང་དག་པ་དྲན་པར་བྱའོ། །དེ་ལྟར་ཞག་བཞི་བཅུར་གནད་དུ་བསྣུན་པས་སྐབས་སུ་ལུས་རྡོ་རྗེ་མེ་འབར་བ་མཐོང་ནས་བགེགས་དང་བར་ཆད་ཞི། མཐར་ཐུག་ལུས་སྒྲིབ་དག་ཅིང་ལུས་རྡོ་རྗེ་སྐུ་ཡི་རོལ་བར་སངས་རྒྱས་པར་འགྱུར་རོ། །གཉིས་པ་ངག་གི་ཞེན་པ་བཟློག་པའི་ཕྱིར་ངག་སྦྱང་བ་ལ། སྤྱི་བོར་བླ་མ་བསྒོམ་པའི་གསུང་གི་གསང་བ་ཆེན་པོ་འོད་ཟེར་ཁ་དོག་ལྔ་ལྡན་གྱི་རྣམ་པར་རང་གི་མགྲིན་པར་ཐིམ་སྟེ་མ་དག་པའི་རྩ་དང་རླུང་ཁམས་ནད་གདོན་སྒྲིབ་པའི་བག་ཆགས་དང་བཅས་པ་ཐམས་ཅད་སངས་ཀྱིས་དག་པར་བྱས་ཏེ། རང་ལུས་གསང་བདག་ཕྱག་ན་རྡོ་རྗེ་སྐུ་ཆེ་ལ་ཡན་ལག་རགས་པ་ནམ་མཁའི་མཐའ་དང་མཉམ་པར་སྣང་ལ་རང་བཞིན་མེད་པ་ནམ་མཁའི་འཇའ་ཚོན་ལྟ་བུ་ཞིག་ཏུ་བསྒོམ་སྟེ། ཧཱུྃ་གི་སྒྲ་བསྒྲགས་པས་ཧཱུྃ་ཡིག་ཁ་དོག་མཐིང་ག་ནས་རིམ་པ་བཞིན་ཏུ་དཀར་སེར་དམར་ལྗང་འཕྲོས་པས་སྲིད་ཁམས་ཀྱི་བརྟན་གཡོ་ཐམས་ཅད་ཧཱུྃ་གི་རོལ་པར་གྱུར་ནས་སྣང་ལ་རང་བཞིན་མེད་པ་འཇའ་ཚོན་ལྟ་བུའི་སྟོང་ཁམས་ཐམས་ཅད་ཧཱུྃ་གིས་ཁེངས་པར་བསམ་ཞིང་། ངག་ཏུ་ཡང་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཞེས་ཧཱུྃ་གླུ་དལ་བུར་བརྗོད་ཅིང་ཧཱུྃ་ཐམས་ཅད་རང་གི་ཞལ་ཏུ་ཞུགས་ཏེ་ལུས་ཀྱི་རྩ་དང་རླུང་ཁམས་ཐམས་ཅད་ཧཱུྃཿགི་རང་བཞིན་དུ་གྱུར་ཏེ་རང་ལུས་ཧཱུྃཿགི་ཡི་གེ་རྡུལ་ཕྲན་གྱི་ཆ་ཙམ་ཚོགས་པའི་ཕུང་པོར་བསྒོམ་སྟེ། ཧཱུྃཿགི་དལ་བུས་སྙན་པའི་གླུ་ལེན། འདི་ཡི་དུས་དམིགས་པ་གཞན་དུ་མི་ཡེངས་པ་གནད་དམ་པའོ། དེ་ཡང་ཞག་བཅུར་གནས་དེ་ནས་ཉམས་སུ་བླངས་ནས་གནས་སྐབས་རྩ་རླུང་ལས་སུ་མི་རུང་བའི་གེགས་སེལ། མཐར་ཐུག་ངག་གི་སྒྲིབ་པ་དག་ཅིང་དབྱངས་སྙན་པ་དང་རྡོ་རྗེ་གསུང་གི་རོལ་པར་སངས་རྒྱས་པར་འགྱུར་རོ། །གསུམ་པ་ཡིད་སྦྱང་བ་ནི། ལུས་དུར་ཁྲོད་ཀྱི་མི་རོ་ལྟར་གཡོ་འགུལ་དང་བྲལ་བར་བཞག ངག་སྨྲ་བརྗོད་དང་བྲལ་བ་ལྐུགས་པ་ལྟ་བུར་བཞག སེམས་ནི་སྤྲིན་དངས་བའི་ནམ་མཁའ་ལྟ་བུར་བཟོ་མི་འཆོས་པར་བཞག །རེས་འགའ་ཁྲོ་བོའི་ལྟ་སྟངས་བྱས་ནས་ཧཱུྃཿཧཱུྃཿཞེས་དྲག་ཏུ་བརྗོད་ཅིང་སྣང་བ་གཏད་མེད་དུ་བཏང་། རེས་འགའ་རྣམ་སྣང་ཆོས་བདུན་དང་ལྡན་པའི་ངང་ནས་སེམས་མ་བཅོས་པར་ལྷོད་དེ་ཤིག་གེར་བཞག དེ་ལྟར་གཞིག་ལ་ཉམས་སུ་བླངས་བས་ཡིད་སྒྲིབ་དག་ཅིང་། རིག་པ་རང་བྱུང་གི་ངང་མཐོང་སྟེ་ཆོས་ཡང་དག་པའི་དགོས་པ་ཡོད། ཀྱཻ་རིག་པའི་རྡོ་རྗེ་ཁྱེད་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་དངོས་གཞི་ཉམས་སུ་ལེན་པའི་རིམ་པ་ངའི་སྤྱན་དང་མངོན་ཤེས་རྫུ་འཕྲུལ་རླབས་པོ་ཆེའི་བདག་ཉིད་འཕོ་བ་ཆེན་པོའི་གདམས་པ་ཉམས་སུ་ལེན་པ་ནི། ལུས་གནད་སེང་གེས་འབྲུག་ལ་རྔམས་པ་ལྟ་བུ་དང་། གླང་ཆེན་བདེ་ལུགས་སུ་ཉལ་བ་ལྟ་བུ་དང་། དྲང་སྲོང་གིས་ཡུལ་དཔྱོད་བྱེད་པའི་འདུག་སྟངས་ལྟ་བུའི་བཞུགས་སྟངས་ལ་བརྟེན་ནས་གཟིགས་སྟངས་ཡང་དང་པོ་གྱེན། གཉིས་པ་ཐད། གསུམ་པ་ཐུར་བལྟ་བ་ཡིན་པར་ཤེས་པར་གྱིས། ངག་གི་གནད་ནི་མཆུ་སོ་མ་རེག་པའི་བར་ནས་རླུང་གི་འགྲོ་འོང་དལ་བ་བསླབ། སྨྲ་བརྗོད་བཟླས་པ་ཐམས་ཅད་ཅོག་གེར་བཞག་ནས་བདེ་ལུགས་སུ་རང་བབས་སུ་གནས་པ་དང་། སེམས་ཀྱི་གནད་ལྷོད་དེ་ཤིག་གེར་བཞག་པ་དང་གསུམ་ནི་སྐུ་གསུམ་གྱི་རྣལ་དུ་ད བབ་པ་ཡིན། ལུས་དུར་ཁྲོད་ཀྱི་མི་རོ་ལྟ་བུར་བསྒུལ་བསྐྱོད་དང་བྲལ་བར་སྡོད་པ་དང་། ངག་ལྐུགས་པ་ལྟ་བུ་སྨྲ་བཅད་དུ་སྡོད་པ་དང་། སེམས་དབྱིངས་རིག་མི་འགྱུར་བའི་ངང་དུ་སྡོད་པ་དག་ནི་སྡོད་པ་གསུམ་གྱི་ས་དབབ་པ་ཡིན་ནོ། །ལུས་ལ་ལྷོད་ཆགས་པ་མི་བསྒྲིམ་ཞིང་ཆུན་མི་བཙལ་བར་བབ་ཀྱིས་བཞག །ངག་ལ་ལྷོད་ཆགས་པ་དབུགས་ཀྱི་འགྲོ་འོང་དགག་སྒྲུབ་མེད་པར་བཞག་པ་དང་། སེམས་ལ་ལྷོད་ཆགས་པ་ཡིད་དཔྱོད་བྱེད་དང་དགག་སྒྲུབ་མེད་པར་བཞག་པ་ནི་སྡོད་པ་གསུམ་གྱིས་ངང་ཆགས་པ་ཞེས་བྱའོ། །ཡང་ལུས་དང་ངག་མི་འགུལ་བས་རྩ་དང་རླུང་མི་འགུལ་དེ་མ་འགུལ་བས་སྒོ་དང་སྣང་སེམས་མི་འགུལ་བ་སྟེ། མི་འགུལ་བ་གསུམ་གྱིས་གནད་བསྣུ ན་པས་ལུས་པོའི་རྩ་དྲང་། རྩ་དྲང་བས་རླུང་བདེ་ལུགས་སུ་རྒྱུ་ཞིང་དྲང་བ་ཡིན་ཏེ་དྲང་པ་གསུམ་གྱི་གཟེར་གདབ་པ་ཞེས་བྱའོ། །དང་པོ་ལུས་ཀྱི་གསང་ལམ་སྒྲོན་མ་དྲུག་དུ་ཡོད་པ་ལས། དྲུག་ནི་འདི་ལྟ་སྟེ། རང་གི་སྙིང་ཙིཏྟ་ཤ་ཡི་སྒྲོན་མའི་དབུས་སུ་དྭངས་མ་རྩ་ཡི་སྒྲོན་མ་ཞེས་བྱ་བ་རྟ་རྔ་བརྒྱད་གཤགས་ཀྱི་ཆ་གཅིག་ཙམ་ལ། དྭངས་གསལ་ཤེལ་གྱི་སྦུ་གུ་ལྟ་བུའི་ཡར་རྩེ་རྒྱང་ཞག་ཆུ་ཡི་སྒྲོན་མའི་ཨ་འབྲས་སུ་ཁ་ཕྱེ་བའི་ནང་ཁོངས་སུ་དབྱིངས་རྣམ་པར་དག་པའི་སྒྲོན་མ་འཇའ་རིས་ཀྱིས་གང་བ་ཟ་འོག་ཁ་ཕྱེ་བ་ལྟ་བུའི་ཀློང་དུ་ཐིག་ལེ་སྟོང་པའི་སྒྲོན་མ་ཀོ་མོའི་ཆུ་ལ་རྡོ་བསྐྱུར་བ་ལྟ་བུ་དང་། ཤེས་རབ་རང་བྱུང་གི་སྒྲོན་མ་རིག་པ་བདེར་གཤེགས་སྙིང་པོ་སྒྲོན་མ་ལྔ་ཡི་འཆར་གཞི་གནས་པ་ནི་ལམ་རང་བྱུང་བའོ། །གསང་བ་ཆེན་པོ་རང་བྱུང་བའི་ལམ་དེ་ལ་བརྟེན་ནས་འབྲས་བུ་བླ་ན་མེད་པའི་ས་ལ་བརྡལ་བ་ནི་ལམ་མྱུར་ཞིང་ཆོད་ཆེ་བ་བླ་ན་མེད་པའོ། །དེ་ལ་ལས་དང་པོ་པས་སུཪྱཱ་དང་ཙནྡྲ་ལ་གྲུ་གང་མ་རེག་པའི་སར་བལྟ་བ་དང་། མན་ཤེལ་ཨ་ལོ་ཀེ་ལ་ཙཀྵུ་ཕྱེད་བཙུམ་གྱིས་བལྟས་ན་རིག་པ་མདུང་ཚུགས་སུ་མིག་ལ་གཏད་ཅིང་སྡོད་པའི་སྣང་བ་ནི། འོད་གསལ་དབྱིངས་རྣམ་པར་དག་པའི་སྒྲོན་མ་ཟ་འོག་ཁ་ཕྱེ་བ་ལྟ་བུའི་ཀློང་དུ་ཐིག་ལེ་སྟོང་པའི་སྒྲོན་མ་འོད་ལྔའི་མུ་ཁྱུད་ཅན་ཀྱི་རྣམ་པར་འཆར་ཏེ། དེ་དག་གི་གོ་མཚམས་སུ་རིག་པའི་གདངས་རྡོ་རྗེ་ལུ་གུ་རྒྱུད་ཅེས་བྱ་བ། གསེར་གྱི་སྐུད་པ་ལྡིང་བ་ལྟ་བུར་གསལ་ལ་འཚེར་བ་ཕྲ་ལ་འཁྱོགས་པར་འཆར་རོ། །སྒོ་ཡི་གནད་ལ་བརྟེན་པའི་ཕྱིར་དང་སོ་སོའི་གནས་སྐབས་སུ་འདར་འཕྲིག་དང་འགྲོ་འོང་ཅན་གྱི་རྣམ་པར་འཆར་རོ། །དེ་ནས་ཅུང་ཟད་གོམས་པའི་སྟོབས་ཀྱིས་སྒྲོན་མའི་སྣང་བ་ཐམས་ཅད་བརྟན་ཅིང་གནས་པར་འགྱུར་རོ། །དེ་ཡི་ཚེ་སྔ་དྲོ་ནུབ་ཕྱོགས་དང་ཕྱི་དྲོ་ཤར་ཕྱོགས་སུ་ཁ་བལྟས་ཏེ་སྡོད་པ་དང་། དཀར་ཁུང་གསལ་ལམ་ལ་བལྟས་པས་ཆོག་པ་ཡིན་ནོ། །དེ་ལྟར་ཉམས་སུ་ལེན་པའི་སྐྱེས་བུ་དེ་ལམ་མ་ནོར་བ་དད་པ་བརྟན་པ་དམ་ཚིག་ཐུབ་པར་ངོ་ལྐོག་དང་གཡོ་རྒྱུ་མེད་པ་དག་ལ་བརྒྱུད་རིམ་གཉིས་ཚུན་ཆད་དུ་ངའི་དགོངས་རྒྱུད་འཕོས་ཏེ་ཉམས་རྟོགས་ཁྱད་པར་ཅན་རྒྱུད་ལ་སྐྱེ་ཞིང་། གོལ་ཤོལ་གེགས་དང་འཕྲང་ལས་གྲོལ་ཏེ་ཚེ་གཅིག་ལུས་གཅིག་གིས་འཇའ་ལུས་འོད་སྐུར་གྲོལ་བའི་གཏན་ཚིག་གོ ། ཐོད་རྒལ་ཉམས་ལེན་བྱེད་ཚུལ།རང་བྱུང་རྡོ་རྗེའི་ཞབས་ལ་ཕྱག་འཚལ་ལོ། དེ་ཡང་ཟབ་པ་ཐོད་རྒལ་གྱི་ཉམས་ལེན་བྱ་ཚུལ་མདོར་བསྡུས་ནི། དང་པོ་ཀ་དག་ཁྲེགས་ཆོད་ཀྱི་ལྟ་བ་སྐྱོན་མེད་དུ་ཐག་བཅད་པའི་སྟེང་དུ་སྒོ་ཡུལ་སོགས་ཀྱི་གནད་ལ། དང་པོ་སྒྲོན་མ་དྲུག་ནི། དང་པོ་ཤ་ཡི་སྒྲོན་མ་ནི་རང་གི་སྙིང་ནང་དུ་རྟེན་དྭངས་མ་ལྔ་ཡེ་ཤེས་ལྔ་དང་། སྙིགས་མ་ལྔ་འབྱུང་ལྔ་ཡེ་ཤེས་རིགས་ལྔར་ལྷུན་གྲུབ་དུ་ཤར་བ་དེའོ། །གཉིས་པ་དཀར་འཇམ་རྩའི་སྒྲོན་མ་ནི། ཀ་ཏི་ཤེལ་སྦུག་ཅན་སྙིང་ནས་མིག་ཏུ་བརྒྱུད་པ་དེའོ། །གསུམ་པ་རྒྱང་ཞགས་ཆུའི་སྒྲོན་མ་ནི་མིག་གི་དབང་རྟེན་གྱི་གོ་སར་འོད་རྩ་དྭངས་པ་འཁྲུལ་བ་མི་འཛིན་ཅིང་ཡེ་ཤེས་ཀྱི་སྣང་བ་འཛིན་པ་དེའོ། །བཞི་པ་ཐིག་ལེ་སྟོང་པའི་སྒྲོན་མ་ནི། རྒྱང་ཞགས་ཀྱི་འོད་རྩས་མཐོང་བའི་ཐིག་ལེ་སྟོང་པའི་སྒྲོན་མ་ལམ་དུ་བྱེད་དགོས་པ་དེའོ། །ལྔ་པ་དབྱིངས་རྣམ་དག་གི་སྒྲོན་མ་ནི། དབྱིངས་ནམ་མཁའ་ནམ་མཁའི་སྟོང་པ་དང་། ནང་གི་གསང་ལམ་དང་གདངས་སྔོན་པོ་ཕྱིར་ཤར་བ་དང་། གསང་བའི་དབྱིངས་མིག་གི་འོད་རྩའི་སྣང་བ་ལ་སྣང་རྒྱུའི་དབྱིངས་གདངས་ལྔ་ལྡན་ཐིག་ལེ་སྟོང་པའོ། །དྲུག་པ་ཤེས་རབ་རང་བྱུང་གི་སྒྲོན་མ་ནི། འཁོར་གསུམ་རྣལ་འབྱོར་དག་པ་ཤེས་པའི་ཤེས་རབ་རིག་པ་རང་གསལ་དེ་ཀའོ། །དེ་ལྟར་སྒྲོན་མ་དྲུག་གི་བལྟ་བྱ་གནས་དུས་སྒོ་ཡུལ་གནད་དང་ལྔ་སྟེ། དང་པོ་ནི་རྣམ་གཡེང་དང་འདུ་འཛི་མེད་པའི་གནས་སུ་བསྒོམ། གཉིས་པ་ནི་ནམ་མཁའ་དྭངས་པའི་དུས་སུ་བསྒོམ། གསུམ་པ་ནི་ཆོས་སྐུའི་གཟིགས་སྟངས་ཀྱིས་གཙུག་ཏོར་གྱི་ཐད་ཀར་བལྟ། ལོངས་སྐུའི་པདྨའི་སྤྱན་གྱིས་ཟུར་གཡས་གཡོན་དུ་བལྟ། སྤྲུལ་སྐུའི་ཆོས་ཀྱི་མིག་གིས་སྣ་རྩེའི་ནམ་མཁར་བལྟའོ། །བཞི་པ་ནི་ཆོས་སྐུ་ཉི་མ། ལོངས་སྐུ་ཟླ་བ། སྤྲུལ་སྐུ་སྣང་གསལ་རྣམས་ལ་བྱེད། ལྔ་པ་ལུས་ངག་ཡིད་གསུམ་གནད་དུ་བཅུན་ཏེ་བསྒོམ་པ་གལ་ཆེ། དེ་ཡང་སྐུ་གསུམ་གྱི་བཞུགས་སྟངས་བྱའོ།། དེ་ལ་སྣང་བའི་འཆར་ཚུལ་ནི་བཞི་ལས། དང་པོ་ཆོས་ཉིད་མངོན་སུམ་ནི་དབྱིངས་ངོགས་སུ་ཐིག་ལེ་རྣམས་ཁ་དོག་རྫོགས་པ་ནས་བཟུང་ཐིག་ལེ་སུམ་འབྲེལ་ཚུན་ཆད་པ་དང་། ལུ་གུ་རྒྱུད་གསེར་སྐུད་ལྟར་འགུལ་འཕྲིག་གི་རྣམ་པ་ཅན་སྐབས་འགར་མངོན་སྐབས་འགར་འཆད་པ་དེ་ཉིད་རིག་པ་ཡེ་ཤེས་ཀྱི་གདངས་དངོས་ཡིན་པས་ཐིག་ལེའི་ར་བར་ཚུད་དགོས་གསུངས ། གཉིས་པ་གོང་འཕེལ་གྱི་དུས་སྣང་ཉམས་ལ་དབྱིངས་དང་ཐིག་ལེའི་ཁ་དོག་སྔར་བས་ཇེ་གསལ་ལ་སོང་ཞིང་། འོད་སྣང་གྱེན་འགྲེང་དང་རྩིབས་ཤར་ལ་སོགས་པ་སྣ་ཚོགས་འཆར་བ་དང་། ཤེས་ཉམས་ཡང་བདེ་གསལ་མི་རྟོག་པའི་ཏིང་ངེ་འཛིན་ལ་བརྟན་པ་ཐོབ་པ་སོགས་འབྱུང་བ་ཡིན་ནོ། །གང་འཕེལ་ན་འོད་སྣང་དང་ཏིང་འཛིན་གོང་དུ་འཕེལ་དགོས་པ་ཡིན་ནོ། །གསུམ་པ་ཚད་ཕེབས་ཀྱི་དུས་རིམ་གྱིས་བསྒོམས་མཐར། སྣང་ཉམས་ལ་ཐིག་ལེའི་ཀློང་དུ་ཡི་གེ་དང་ཕྱག་མཚན་ལྷ་སྐུ་སོགས་འཆར་ཞིང་ཤེས་ཉམས་གཞིར་གནས་ཀྱི་རིག་པ་རང་ཐོག་ཏུ་ཕེབས་པས་བརྩོན་འགྲུས་བྱ་མི་དགོས་པར། ཐོད་རྒལ་གྱི་རིག་པ་ཉམས་སུ་ལེན་པ་ཚད་དུ་ཕྱིན་ནས་གོང་འཕེལ་ཚད་ལ་ཕེབས་པའོ། །བཞི་པ་ཆོས་ཉིད་ཟད་པའི་སྐབས་སུ་ཕྱིའི་ཉམས་སྣང་གི་འཕེལ་ཁ་ཟད། ནང་ཚོགས་དྲུག་གི་ཉེར་ལེན་ལྡོག་པ་སྒྱུ་ལུས་ཀྱི་ཆོས་ཟད། གསང་བ་རྟོག་ཚོགས་འཕྲོ་འདུའི་སེམས་ཟད་ནས་སྣང་དང་མི་སྣང་གི་འཛིན་པའི་བློ་ཟད་དེ། འོད་ཀྱི་སྣང་བ་ལས་འཁོར་འདས་ཀྱི་འདུ་ཤེས་བྲལ་ནས་འབྱུང་བ་ལ་སོགས་དགྲས་མི་ཚུགས་པ་འབྱུང་ཞིང་། ཐིག་ལེས་ཡེ་ཤེས་མཛད་པ་རྒྱུན་མི་འཆད་པར་སྣང་ངོ་། །དེ་ལ་མི་འགུལ་གསུམ་གྱི་གནད་ནི་ལུས་ངག་ཡིད་གསུམ་གྱི་གནད་བརྟན་པ། གདོད་མ་གཞིའི་དབྱིངས་སུ་གནས་པའི་དགོས་པ་ཡིན་ནོ། །སྡོད་པ་གསུམ་གྱི་ཚད་ནི། ཕྱིའི་སྣང་བ་སྡོད་པས་རྐྱེན་ངན་གྲོགས་སུ་འཆར་བ་དང་། ནང་སྒྱུ་ལུས་སྡོད་པས་འཁྲུལ་བའི་བྱ་བ་དང་བྲལ། བར་རླུང་སེམས་སྡོད་པས་རྣམ་རྟོག་འདུ་རྒྱུན་ཆད་པ་ཡིན་ནོ། ༈ །ཐོབ་པ་གསུམ་ནི། ཕྱི་སྣང་བ་ལ་དབང་ཐོབ་པས་སྣང་ཡུལ་ཞིང་ཁམས་སུ་གྲོལ། ནང་སྒྱུ་ལུས་ལ་དབང་ཐོབ་པས་སྒྱུ་ལུས་འོད་གསལ་དུ་འགྲོ། གསང་བ་རླུང་སེམས་ལ་དབང་ཐོབ་པས་འཁྲུལ་པའི་སྣང་ཆ་རང་འགགས་སུ་སོང་བས་གང་སྣང་ཐམས་ཅད་ཆོས་ཉིད་མཉམ་པ་ཉིད་དུ་གྲོལ་བའོ། །གདེངས་བཞི་ནི། རང་རིག་ལས་སངས་རྒྱས་ལོགས་ན་མེད་པར་ཐག་ཆོད་པས་སངས་རྒྱས་གཞན་ནས་མི་འཚོལ་བའི་རེ་དོགས་བྲལ་བ་ནི་ཡར་གྱི་གདེངས་གཉིས། རྣམ་པར་རྟོག་པ་ཆོས་ཉིད་དུ་གྲོལ་ནས་འཁོར་བར་འཆིང་བྱེད་ཀྱི་རྒྱུ་མེད་པས་འཁོར་བར་ལྟུང་བ་དང་མ་ལྟུང་པའི་རེ་དོགས་བྲལ་བའི་གདེངས་རྙེད་པ་ནི་མར་གྱི་གདེངས་གཉིས་སྟེ་གདེངས་བཞིའོ། །སྣང་བཞིའི་འཕེལ་ཚད་རྫོགས་པའི་རྟགས་སྒོ་གསུམ་ལ་འཆར་ལ། དང་པོ་ཆོས་ཉིད་མངོན་སུམ་གྱི་སྐབས་ལུས་རུས་སྦལ་མཁར་གཞོང་དུ་གནས་པ་ལྟ་བུ་དང་། ངག་བརྗོད་བྲལ་ལྐུགས་པ་དང་། སེམས་མཁའ་འགྲོ་སྙི་ལ་ཟིན་པ་ལྟར་རྟོག་མེད་དུ་གནས་པའོ། །གཉིས་པ་གོང་འཕེལ་དུས་ལུས་སྐྱེས་བུ་ནད་ཀྱིས་གདུང་བ་ལྟར་སྤྲོས་མེད་དང་། ངག་སྨྱོན་པ་འུར་ལང་ལྟར་གང་ཤར་ཟང་ཐལ་རྗེས་མེད་དང་། སེམས་དུག་ནད་ཀྱི་ཐེབས་པ་བཞིན་རྟོག་པའི་འཕྲོ་འདུ་ཆད་པ་ཡིན་ནོ། །གསུམ་པ་ཚད་ཕེབས་དུས་གླང་ཆེན་འདམ་དུ་མི་བྱིང་པ་ལྟར་རི་བྲག་ལ་ཐོགས་མེད་དུ་འགྲོ་བ་དང་། ངག་གྲུལ་བུམ་གྱི་ཕྲུ་གུ་ལྟར་སྙན་ཅིང་ཅི་སྨྲས་གཞན་ལ་ཕན་པ་དང་། སེམས་སྙིང་ལ་མདའ་ཕོག་པ་ལྟར་དྲན་བསམ་འཕྲོ་འདུའི་རྟོག་པའི་རྒྱུན་ཆད་པའོ། །བཞི་པ་ཆོས་ཉིད་ཟད་པའི་དུས། ལུས་དུར་ཁྲོད་ཀྱི་མི་རོ་ལྟར་སོར་བཞག་དགག་སྒྲུབ་ཀྱི་འཁྲུལ་པའི་ཡུལ་མེད། ངག་བྲག་ཆ་ལྟར་གཞན་གྱི་ཅི་སྨྲས་རྗེས་སུ་ཟློས། སེམས་རིམས་ནད་བྱང་བའི་སྐྱེས་བུ་ལྟར་རྟོག་ཚོགས་དབྱིངས་སུ་དག་ནས་རིག་པ་རང་གསལ་ཆེན་པོར་གནས་པ་ཡིན་ནོ། ༈ །དེ་ལྟར་སྣང་བ་བཞིའི་འཆར་ཚུལ་སྔ་མ་རྣམས་ནི་སྣང་ཉམས་དང་ཤེས་ཉམས་ཀྱི་ཤར་ཚུལ་མདོར་བསྡུས་དང་། ཕྱི་མ་ནི་བུམ་གསང་ཤེར་དབང་གི་ནུས་པ་ཐེབས་པས་སྒོ་གསུམ་གྱི་རྟགས་ཚད་རྫོགས་ཚུལ་ཡིན་ནོ། ༈ །མདོར་ན་ཁྲེགས་ཆོད་ཀྱི་ལྟ་བས་ཐག་བཅད། སྒོམ་པས་ངང་བསྐྱངས། སྤྱོད་པས་ལ་དོར། རིག་པ་ཁྱབ་བརྡལ་དུ་འཇོག །ཤེས་པ་བཟོ་མེད་དུ་སྐྱོང་། དྲན་རྟོག་མཁའ་ལ་སྦྲུལ་མདུད་བོར་བ་ལྟར་རང་གྲོལ་དུ་བཞག་པས་སྐྱེ་མེད་ཀྱི་དོན་རྟོགས་པར་འགྱུར་རོ། །ཞེས་བླ་མའི་གསུང་གི་ཟིན་བྲིས་བྱས་པ་ལ་འཁྲུལ་པ་ཅི་མཆིས་པ་ཐམས་ཅད་དཔལ་ལྡན་བླ་མར་བཤགས། དགེ་བས་འགྲོ་ཀུན་སངས་རྒྱས་ཐོབ་པར་ཤོག་ཅིག ། ༈ ལྟ་བ་དཔའ་དགོས། སྤྱོད་པ་སྡར་དགོས། ལྟ་བ་ཡེ་འབབས། སྤྱོད་པ་མས་འཛེགས། སྣང་བ་འོད་ཀྱི་ཁྱད་པར། ཉམས་ལེན་ལག་ལེན་དང་འབྲེལ་བའི་ཁྱད་པར། རང་སྣང་མངོན་སུམ་གཟིགས་པའི་ཁྱད་པར། ལུས་གནད་རྩའི་ཁྱད་པར། སྣང་བྱེད་སྒོའི་ཁྱད་པར། མཐོང་བ་དབང་པོའི་ཁྱད་པར། ཉམས་མྱོང་འཕེལ་སྣང་གི་ཁྱད་པར་དང་བདུན་ནོ། ༈ །སྟོང་གསལ་ཕྱིའི་ནམ་མཁའ་གཡའ་དག །རྟོག་མེད་ནང་གི་ནམ་མཁའ་ཀུན་རྟོག་དག་པ། ཟང་ཐལ་གསང་བའི་ནམ་མཁའ་རིག་པ་རྗེན་ལ་བུད་པ། ཐོད་རྒལ་སྐབས་དབྱིངས་ཐིག་རིག་གསུམ་སྙིང་དབུས་ན་གནས་པ་ནང་རྩ་ནས་ཕར་ཕྱིར་འཆར་བ་ཕྱི། དེའི་སྔ་ཕྱིའི་ནམ་མཁའ་སུམ་སྤྲུག་ཤེས་པར་བྱ་གསུངས། ༈ །སྒྲོན་མ་དྲུག་ནི། གནས་ལུགས་རང་བྱུང་གི་སྒྲོན་མ། ཙིཏྟ་ཤ་ཡི་སྒྲོན་མ། རྒྱང་ཞགས་ཆུ་ཡི་སྒྲོན་མ། ཐིག་ལེ་སྟོང་པའི་སྒྲོན་མ། བར་དོ་དུས་ཀྱི་སྒྲོན་མ། མཐར་ཐུག་འབྲས་བུའི་སྒྲོན་མ་དང་དྲུག་གོ། ༈ །ཆོས་སྐུའི་བཞུགས་སྟངས་སེང་གེ་ལྟ་བུ། ལོངས་སྐུའི་བཞུགས་སྟངས་གླང་ཆེན་ཉལ་བ་ལྟ་བུ། སྤྲུལ་སྐུའི་བཞུགས་སྟངས་དྲང་སྲོང་ལྟ་བུ། མངོན་པར་བྱང་ཆུབ་བྱ་རྒོད་ལྟ་བུ། མི་འགྱུར་རྡོ་རྗེ་རྡོ་རྗེ་ལྟ་བུ། སངས་རྒྱས་འགྲོ་བ་རྣམ་སྣང་གི་ཆོས་བདུན། འོད་གསལ་རྣམ་སྦྱོང་རྒྱལ་བའི་གཟིམ་ལུགས། མཁའ་མཉམ་དག་པ་སྐྱེས་བུའི་འགྱིང་སྟབས། གནམ་གཟེར་དག་པ་ལྕགས་སྡོང་གི་འགྲིལ་ལུགས། དྲག་ཤུལ་ཆེན་པོ་གྱད་ཀྱི་དོར་སྟབས། དཔའ་བོའི་འདུག་སྟངས། ༈ བླ་མའི་མན་ངག་གིས་རིག་པ་ངོ་སྤྲད་ཚེ། སྒོ་ལྔ་ཆ་མཉམ་པ། དཔེར་ན་རྒྱ་མཚོ་ལྷམ་མེ་ལྟ་བུ་རྒྱ་མཚོ་ཅོག་བཞག་ཡིན། རིག་པ་རྗེན་ཅེར་རིག་པ་ཅོག་བཞག་ཡིན། ཤར་བ་ལྟར་སྣང་བ་ཅོག་བཞག་ཡིན། མི་གཡོ་བ་རི་བོ་ཅོག་བཞག་ཡིན། ༄༅། །ཉག་བླའི་ཞལ་རྒྱུན། བླ་མ་ལ་ཕྱག་འཚལ་ལོ། །ཉག་གཏེར་རིན་པོ་ཆེས། སངས་རྒྱས་མངོན་སུམ་དུ་རྙེད་ཡོད་པའི་དུས་འདིར། རི་ཁྲོད་དབེན་པ་ཞིག་ལ། རང་ཉིད་གཅིག་པུར་གྲོགས་མེད་པར་བསྡད་ནས་གཡས་སུ་དབྱུག་ཐོ། གཡོན་དུ་ཁུག་ལུ། སྔུན་དུ་རྫ་ཟངས། རྒྱབ་རི་བྲག་ཕུག་ཞིག་ལ་གཏད་ནས། འདི་ནས་བྱང་ཆུབ་ཀྱི་བར་དུ་ཡར་གཏད་དེ་བླ་མ་དཀོན་མཆོག་རིན་པོ་ཆེ་རྣམ་པ་གསུམ་ལ་གཏད། མར་གཏད་དེ་རིག་སྟོང་ཟུང་འཇུག་རྗེན་པ་དེ་ལ་གཏད་ནས། དུས་དང་གནས་སྐབས་ཐམས་ཅད་དུ་ལྟ་བའི་རྫོང་དེ་རྡོ་རྗེ་ཕ་ལམ་གྱི་རྫོང་ལྟ་བུ་ཞིག་བཟུང་ནས་མིག་སྔོ་ཅེ་རེ་དབུགས་ཆད་མ་སོང་བར་བསྒོམ་དགོས་གསུངས། ཞལ་རྒྱུན་གནད་བསྡུས།༈ ཡང་སྐྱབས་རྗེ་བླ་མ་རིན་པོ་ཆེའི་ཞལ་ནས། ཕྱོགས་བཅུའི་སངས་རྒྱས་བྱང་སེམས་མན་ཆད། ཀ་ཁ་སུམ་ཅུ་སློབ་པའི་སློབ་དཔོན་ཡན་ཆད་སྐྱབས་གནས་ཀུན་འདུས་ཀྱི་ངོ་བོ་རིག་སྟོང་ཟུང་འཇུག་འདི་ཁོ་ན་ཡིན་པར་ཤེས་པའི་བློ་ཐག་བཅད་ནས། མཐོ་ལ་ཁ་རུ་སོང་རུང་། དམའ་ལུང་ཁུང་དུ་སོང་རུང་། ཉི་མ་ཉིན་ཕྱེད། ཟླ་བ་མཚན་ཕྱེད། འདི་ཕྱི་བར་དོ་གསུམ་དུས་དང་གནས་སྐབས་ཐམས་ཅད་དུ་སྐྱབས་གནས་ཀུན་འདུས་ཀྱི་ངོ་བོ་ཡིན་པར་བློ་ཐག་རྦད་ཀྱིས་བཅད་ནས་རིག་སྟོང་ཟུང་འཇུག་དེ་ཉམས་སུ་བླང་། ཕྱི་ནང་སྣོད་བཅུད་ཀྱི་སྣང་བའི་ཆོས་ཐམས་ཅད་རང་སྣང་རང་བཞིན་མེད་པར་བདེན་མེད་སྒྱུ་མའི་རྣམ་རོལ་རྨི་ལམ་གྱི་འཁྲུལ་སྣང་ཙམ་ལས་བདེན་གྲུབ་མེད་པར་བློ་ཐག་རྦད་ཀྱིས་བཅད་ནས། ལྟ་བའི་རྫོང་བཟུང་དགོས། རིག་པ་རྐྱང་རྐྱང་དེ་རྗེན་དེད་མ་བྱས་ན། སྒོམ་པའི་འཕྲང་བགྲོད་དཀའ་མོ་ཡིན། ཞི་གནས་སྟེང་ན་གོལ་ས་གསུམ་དང་། ལྷག་མཐོང་སྟེང་ན་ཤོར་ས་བཞི་དང་། ནོར་ས་བརྒྱད་སོགས་ཀྱི་འཕྲང་གི་ར་བས་བསྐོར་ཡོད་ནི་རེད། ཤིན་ཏུ་གཟབ་སྟེ་དུས་གསུམ་གྱི་འཁྲུལ་པ་ལ་མི་སྐུར། ཉམས་བདེ་གསལ་མི་རྟོག་གསུམ་གྱི་ཤུན་པ་བསྐོན་མི་བཅུག །བྱིང་རྨུགས་ཀྱི་སྐྱོན་གྱིས་མ་གོས་པའི་རིག་པ་གཤིས་ཐོག་ཏུ་ཕེབས་ནས་ལྟ་བའི་རྫོང་ཟིན་ན་སྤྱོད་པས་སྲོག་འཕྲོག སྒོམ་པས་ལ་དོར་བ་ཡིན་པས་ཉོན་མོངས་པས་རང་རྐྱ་མི་ཐུབ་པར་གྲོལ་བ་ནི། མེ་ཚན་ནང་དུ་སྤུ་ཉག་ལྷུང་བ་ལྟར་རྗེས་མེད་དུ་འགྲོ་བ་ཡིན། རིག་པ་གསལ་ངར་དང་ལྡན་པའི་ལྟ་བའི་རྫོང་གཏན་ནས་ཤོར་མི་ཉན། དཔེར་ན་མི་དཔའ་བོ་གཡུལ་དུ་ཞུགས་དུས་རལ་གྲི་ལག་གིས་བཟུང་ནས་ཞུགས། རལ་གྲི་ས་ལ་ལྷུང་ན་དེ་མ་ཐག་ཏུ་ཡར་ལ་བླང་བ་ལྟར། རྗེས་ཐོབ་སྤྱོད་ལམ་གྱི་སྐབས་སུ་ལྟ་བའི་གདེངས་མ་ཤོར། བསྒོམ་པའི་ངང་མ་ཤོར་བའི་ངང་ནས་ཞུགས་དགོས། གལ་ཏེ་ལྟ་བའི་རྫོང་ཤོར་ན་དེ་མ་ཐག་ཡང་དག་གཉུག་མའི་དྲན་པས་ཟིན་དགོས། དྲན་པས་ཟིན་ཀྱང་ལྟ་བའི་རྫོང་མ་ཟིན་ན། ཆབ་རོམ་སྟེང་དུ་འགྱེལ་མ་ལིང་ལྟ་བུས་ཅང་མི་འོང་། ཡང་དག་གཉུག་མའི་དྲན་པས་ཟིན་ཙམ་ནས་དྲན་མཁན་ཡེ་ཤེས་ཀྱི་རྣམ་ལྡན་དུ་འཆར་བའི་རིག་པ་གཤིས་ཐོག་ཏུ་སླེབས་ན། ཉི་མ་རེ་ལ་དྲན་པ་ལྔ་བརྒྱ་ཙམ་རེ་བསྟེན་ན་བཟང་། ཆོས་ཆེན་པོ་ཕན་ཡོན་ལོས་ཡོད་མ་གཏོགས་བཀའ་བརྒྱད་ཁྲམ་ཤིང་ཞིག་འདོན་ནི་བས་ཉམས་ལེན་པ་ཞིག་གིས་དྲན་པ་གཅིག་བསྟེན་ནས་རིག་པའི་རང་ས་ཟིན་ན་དེས་དགའ་གསུངས། རིག་ངོ་འཕྲོད་ཕན་ཆོད་དྲན་པས་མི་འཆིང་། རིག་ངོ་འཕྲོད་ནས་བཟུང་སྟེ་ཡེང་བ་མེད་པར་བསྒོམ་དགོས། མིན་དུས་ཞིག་ལ་བསྒོམ་རྩིས་བྱེད་ནི་བས་ནི། རིག་ངོ་འཕྲོད་དུས་བསོད་ནམས་ཟད་སོང་ན་མ་གཏོགས་བསྒོམ་དགོས་ནི་རེད། སངས་རྒྱས་ཐམས་ཅད་ཀྱི་དགོངས་པ། ཆོས་ཐམས་ཅད་ཀྱི་གནས་ལུགས་མངོན་སུམ་འདི་ནི། ཞིང་ལས་སོ་ནམ། ཕྱུགས་ཀྱི་འཚོ་སྐྱོང་། དཀོར་ཁ་གྲོང་ཆོག གོར་ལི་ཤ་སྐལ། ཇ་ཐོ་ནས་སྤར། འཁོར་བའི་བྱ་བཞག་སོགས་ཀྱི་བྱ་བ་གང་ལའང་བརྗེ་མི་བྲ་ངེས་པ་རེད། རིག་ཆ་རྗེན་པ་དེའི་ས་ཤོར་དུས་ནི། ཁོ་བྱ་བྲལ་བ་ཡིན་ཟེར་ནས་ས་ཐག་རིང་མོ་ཞིག་ལ་སོང་ནིས་ཚ་མ་མེད། རྒྱུ་ཟས་མེད་ནིས་ཚ་མ་མེད། ས་མཐོ་ས་ཞིག་ལ་བསྡད་ནིས་ཚ་མ་མེད། གཉེན་གྲོགས་མེད་ནིས་ཚ་མ་མེད། ཐོབ་མཐོ་ནིས་ཚ་མ་མེད། གདུགས་དཀར་པོ་བཅུ་གསུམ་གྱི་ཞབས་ན་ཡོད་ནིས་ཚ་མ་མེད། གསེར་ཁྲི་སེར་པོ་ཞིག་གི་སྟེང་ན་ཡོད་ནིས་ཚ་མ་མེད། མདོར་ན་ཀུན་གཞི་སེམས་གསུམ་དང་མ་བྲལ་ན། ལུས་ཅན་སེམས་ཀྱི་དྲི་མ་ཚུ་རོལ་འཁོར་བའི་ས་ཡིན་པས་ཅིས་ཀྱང་ཤེས་དགོས་སོ། །བྱ་བ་གང་བྲལ་དགོས་ན་ནང་ཉོན་མོངས་པའི་གཡུལ་ཆེན་པོ་ཀུན་གཞི་སེམས་གསུམ་དང་བྲལ་དགོས་ནི་རེད། མ་རིག་བདེན་འཛིན་གྱིས་དྲང་བའི་དུས་གསུམ་ཡིད་ཀྱི་འཁྲུལ་བ་ལས་འཁོར་བ་ལོག་ན་མེད། འཁྲུལ་སྣང་དབྱིངས་སུ་ཞི་བ་ལས་མྱང་འདས་ལོག་ན་མེད། རིག་པ་ལམ་བྱེད་ནི་ཕ་རོལ་མྱང་འདས་འབྲས་བུ་ལམ་བྱེད་དམ་ལམ་རྒྱུད་ལྡན་གྱི་གང་ཟག་ཡིན་པའོ། །ཁྲེགས་ཆོད་ཀྱི་ལམ་ཤར་གྲོལ་དང་། ཐོད་རྒལ་གྱི་ལམ་འོད་སྣང་སྟེ་ལམ་བདེན་དངོས་ཡིན། དད་པ་དག་སྣང་བྱམས་སྙིང་རྗེ་སོགས་ཀྱང་དེའི་ཕྱོགས་སུ་བསྡུ་དགོས། དེས་སེམས་རིག་གི་ལ་ཤན་ཟེར་བ་རིག་དང་མ་རིག་ལག་པའི་མདུན་རྒྱབ་ལྟ་བུ་ཡིན་པར་ཤེས་ནས། འཁོར་འདས་གཉིས་ཀའི་ཡར་མར་གྱི་ས་མཚམས། དཔེ་རལ་གྲི་སོ་རྡེབ་ལྟ་བུར་བྱེད་ནས་ཉམས་ལེན་ད་ལྟ་ད་ལྟ་བྱེད་པ་གལ་ཆེ། སང་བྱ་གནང་བྱ་ཞིག་ཏུ་ངས་རི་ཁྲོད་ཞིག་བསྟེན་ནས་སྒོམ་བསྒྲུབ་དགེ་སྦྱོར་ཞིག་བྱེད་བསམ་པའི་འདུ་ཤེས་རིང་མོ་དེ་ནི་ཕུང་འདྲེ་ལྟས་ངན་རྟག་འཛིན་བདུད་ཀྱིས་བསླུས་པ་ཡིན། དེ་བས་རི་ཁྲོད་ཞིག་འཛིན་དགོས་བསམ་ན་ནི། གྲོགས་འཆི་བ་མི་རྟག་པ་དང་སྦྱ ར་ནས་ད་ལྟ་ད་ལྟ་ནས་རིག་པའི་རང་ས་ཟིན་ན་སྒོ་གསུམ་དབེན་ཁྲོད་གསང་གསུམ་དང་ལྡན་པ་ཡིན། ལྷ་ཆོས་ལུས་དང་ཡན་ལག་འདྲ། །ནམ་དགོས་རང་གི་དྲུང་ན་ཡོད། །གསུངས་པ་དེ་ནི་རང་གི་ཤེས་རྒྱུད་སྟེང་ན་ཡོད་ནི་རེད། མཉམ་བཞག་ཏུ་རིག་པ་སྐུ་གསུམ་གྱི་བདག་ཉིད་གཤིས་ཀྱི་བཞུགས་ཚུལ་གཞི་ལས་མ་གཡོས་པར་བཞུགས་པ་དང་། རྗེས་ཐོབ་ཏུ་བཞེངས་པའི་ཚེ་ན་རིན་ཆེན་གསེར་གླིང་དུ་ཕྱིན་པ་ལྟ་བུ། རྣམ་ཤེས་ཚོགས་བརྒྱད་ཡང་རིག་པའི་རྣམ་ལྡན་དུ་གྱུར་ནས་སྣང་སྲིད་དག་པ་རབ་འབྱམས་སུ་ཤར་བའི་དུར་ཁྲོད་ཀྱི་འདྲེ་ལ་སོགས་པ་སེམས་ཅན་ཐམས་ཅད་ཀྱི་རྒྱུད་ན་དེ་འདྲའི་རིག་པ་སྐུ་གསུམ་གྱི་བདག་ཉིད་དེ་མངོན་སུམ་དུ་བཞུགས་ཡོད་པར་གཟིགས་ནས་སྣང་སྲིད་བླ་མར་འཆར་བའི་དག་སྣང་མ་བྲལ་བར་དེ་ལྟར་རྒྱུད་ན་ཡོད་པར་མ་རྟོགས་པའི་སེམས་ཅན་ཐམས་ཅད་ལ་དམིགས་པ་མེད་པའི་བརྩེ་བའི་སྙིང་རྗེ་ཆེན་པོ་ཕྱོགས་རིས་མེད་པར་ཉི་མའི་ཟེར་ལྟར་འཆར་དགོས། དེ་ལྟར་དམིགས་མེད་ཀྱི་དག་སྣང་དང་སྙིང་རྗེ་སོགས་ཡོན་ཏན་གྱི་ཆ་རྣམས་ཡང་དག་པའི་ལམ་དུ་འགྲོ་དང་མི་འགྲོའི་འབྲས་རྟགས་ཡིན་པས་ཡོད་དགོས། སྦལ་བ་ཆུང་ཡང་རྐང་ལག་བཞི་པོ་ཡོད་པ་ལྟར་ཛ་ཛུག་ཞིག་ཡོད་དགོས་ནི་རེད། ཉི་མ་ཤར་ཡང་དྲོད་སང་ཉིན་བས་མེད་ཟེར་བ་ནི་མི་སྲིད། མཉམ་བཞག་ཏུ་ཉམས་ལེན་ཨ་མས་བུ་ཆུང་སྐྱོར་སྐྱོར་བྱས་ཀྱང་། རིག་པ་གསལ་ངར་དང་མི་ལྡན་ན། རྣམ་རྟོག་གཅིག་གྲོལ་མི་ཐུབ། གང་གྲོལ་ན་བཟང་རྐྱེན་དང་ངན་རྐྱེན་གཉིས་གྲོལ་དགོས་ནི་རེད། བཟང་རྐྱེན་ནི་ལུས་སེམས་གཉིས་ཀ་དགའ་ཡ་ལེ་འགྲོ་བའི་ཟག་བཅས་ཀྱི་རྐྱེན་གཟུགས་སྒྲ་དྲི་རོ་རེག་བྱ་སོགས་དང་རྙེད་བཀུར་སྙན་གྲགས་བསྟོད་བཀུར་བྱེད་པ་དེ་རྣམས་ཀྱིས་བསླངས་ནས་ལུས་སེམས་བདེ་བས་ཁྱབ་པ་དེ་ནི་མི་མངོན་པར་ལྐོག་ཏུ་འཇབ་སྟེ་འོང་བ་དང་འདྲ་སྟེ། དེ་གྲོལ་མ་ཐུབ་ན་ལྷ་ཡི་བུ་ཡི་བདུད་ཡིན། ངན་རྐྱེན་ནི། དངོས་སུ་དཔུང་ཤེད་ཀྱི་སྒོ་ནས་བཅོམ་པར་བྱེད་པ་ཡུལ་བུད་མེད་སོགས་ལ་འདོད་ཆགས་སྐྱེ་བ་དང་། དགྲ་ལྟ་བུའི་ཕྱོགས་ལ་ཞེ་སྡང་སྐྱེ་བ་སོགས་ཡིན་པས། དེའི་སྣ་མི་བརྟེན་ཏེ། ཐག་ཚད་ཞིག་ལ་འཕེན་ནས་རྟ་བརྒྱུག་ཚར། རྡུལ་དྭངས་ཚར་རྗེས་ཞིག་ལ་ཕྱི་ལྟས་ཞིག་བྱས་རུང་ཚར་སོང་ནི་རེད། གྲོལ་བའི་མིང་མི་ཐོག དབ་བུ་དུབ་བེ་དང་། འཁྲལ་ལུ འཁྲུལ་ལིས་ངང་ནས་རྣམ་རྟོག་མེད་སོང་ནི་འདྲ་འདྲ་དེ་རྒན་རྒོན་ཚོས་དེ་འདྲའི་རྣམ་རྟོག་ཐམས་ཅད་ཅང་ལག་ལེན་དུ་ཐེབ་ནི་མ་རེད། བཏབ་ཚོད་ཀྱང་ཅི་ཡོད། དེ་ལྟ་བུའི་གང་ཟག་དེས་ནི་སྤྱོད་ལམ་སྐབས་སུ་འཕོང་མགོ་གྲོག་ཚང་ནང་དུ་བཞག་ནི་འདྲ་འདྲ་མ་གཏོགས་ཉམས་ལེན་སྟྭ་རེ་གཡུག་གི་སོ་གདན་ནི་ག་ལ་ཡོད། ལས་རྒྱུ་འབྲས་འཆོལ་ཉོག་ཏུ་སྤྱོད་པ་དག་གིས་རང་རྐུབ་རང་གིས་ཕུད་ནས་འདི་ལྟར་ཟེར། ལས་རྒྱུ་འབྲས་ཀྱིས་ཁོ་བོ་ལ་མི་གནོད་པས་ཁྱེད་ཅག་ལ་དེས་ཅི་གནོད་ཟེར་བ་དེ་ནི། ལྟོ་ལེ་འཆི་ཁ་མ་ཚོས་འཆི་མི་ཐུབ་ནས་འཆི་འཕགས་བྱེད་པ་ལྟར་ངོ་ཚ་རྒྱུ་མེད་པའི་སྐད་ཆ་རེད། ༀ་མ་ཎི་པདྨེ་ཧཱུྃཿ སློབ་དཔོན་པདྨས། དགེ་སྟོང་སྡིག་སྟོང་ནག་པོ་ཁ་འབྱམས་བདུད་ཀྱི་ལྟ་བ་ཞིག་དར་གསུངས། ལུང་བསྟན་ཐོག་ཏུ་བབ་པ་རེད། དེ་འདྲ་མིན་པའི་བུ་སྙིང་ཡོད་ཡར་འགྲོ་ཞིག་ཡིན་ན། མཉམ་བཞག་ཏུ་རིག་པ་སྐུ་གསུམ་གྱི་བཞུགས་ཚུལ་ནི་ཁྱད་ཆོས་གསུམ་དང་ལྡན་པའི་བདག་ཉིད་ཅན་དེ་ངོ་བོ་སྟོང་ཉམས་ངར་ཆ་དང་ལྡན་པ། རང་བཞིན་གསལ་ཉམས་སངས་ཆ་དང་ལྡན་པ། ཐུགས་རྗེ་རིག་ཉམས་གྲོལ་ཆ་དང་ལྡན་པས་རྟོག་པ་གང་ཤར་ཀྱང་བག་ཆགས་བསགས་ལོང་མི་འདུག །རྗེས་ཐོབ་སྐབས་སུ་ལས་རྒྱུ་འབྲས་དེ་ལ་དེ་བས་ནི་ཞིབ་ཆ་ཆེ་ནི་རེད། སྟོང་ཉིད་རྒྱུ་འབྲས་སུ་ཤར་ནིས་ཉམས་ལེན་པ་ཞིག་ཡིན་ནས་བཟུང་ལས་རྒྱུ་འབྲས་ཀྱི་གནས་ལ་མི་ཞིབ་ཐབས་གཏན་ནས་མེད། སློབ་དཔོན་པདྨས། ང་ལྟ་བ་ནམ་མཁའ་བས་ཀྱང་མཐོ།། ལས་རྒྱུ་འབྲས་བག་ཕྱེ་བས་ཀྱང་ཞིབ། །གསུངས་པ་དེ་ལྟ་བུ་ཞིག་ལ་ཟེར་བ་ཡིན། རྟོག་པ་རང་སར་གྲོལ་དང་མི་གྲོལ་ནི་རྐྱེན་ངན་པ་དང་འཕྲད་ནས་རྣམ་རྟོག་མེ་འབར་འབར་ཆུ་ཁོལ་ཁོལ་ཡོང་དུས་སུ་གྲོལ་ཐུབ་ན་གྲུབ་རྟགས་ཞིག་དང་ཁྱད་མེད། ཆགས་སྡང་ངན་པ་གཅིག་གྲོལ་ཐུབ་ན་བསྐལ་པ་མང་པོའི་སྡིག་སྒྲིབ་འདག་ནི་རེད། གྲུབ་རྟགས་ནི་དེ་ཡིན། མངོན་ཤེས་ནི་དེ་ཡིན། ཁོང་ལ་བླ་མ་ཉག་བླས་ཕ་བསད་ལག་དམར་ལྟ་བུ་དང་འཕྲད་དུས། ལུས་ངག་ཡིད་གསུམ་ལྷོད་ཤིགས་སེ། ངོ་གདོང་ཁོང་ནས་འཛུམ་མོལ་ལེ་ཡོད་དགོས་ནི་རེད་གསུངས། དེ་ལྟ་བུའི་རྐྱེན་ངན་དང་འཕྲད་དུས་དྲན་པས་གཅིག་ཟིན་ན་ཕན་ཡོན་དཔག་ཏུ་མེད་པ་ཡོད་ངེས་ཡིན་གསུངས། རིག་པ་དངོས་གཤིས་ཐོག་ཏུ་ཕེབ་དུས་ནི། དཔྱོད་བྱེད་ཀྱི་མཁན་པོ་འགྱེལ། རླུང་སེམས་དབྱིངས་སུ་དེངས། ཉམས་ཞེན་གྱི་ཤུན་པ་འཐོར། ཡིན་མིན་གྱི་རྩིས་གདབ་ཐམས་ཅད་སེ་ལུང་ལྕགས་ཀྱི་རྒྱ་མདུད་འཐོར་བ་བཞིན་དུ་གྲོལ་བ་ནི། སྣང་བའི་མདུན་ན་མུན་པ་འདུག་ལོང་མེད་པ་བཞིན་ནོ་ཞེས་གསུངས་པ་དེ། བླ་མ་རིན་པོ་ཆེའི་ཞལ་རྒྱུན་ནོར་བ་མེད་པ་དགེ་ལེགས་འཕེལ། ༈ ཉིད་ཀྱིས་འོད་གསལ་རྫོགས་པ་ཆེན་པོ་ཉམས་སུ་ལེན་པར་འདོད་ན་གླེན་སྒོམ་ཨུ་ཚུགས་བྱས་པ་ལ་སྙིང་པོ་མེད་པ་མ་ཟད་སྲོག་རྩར་ལས་རླུང་འཇུག་པའི་གེགས་སུ་འགྲོ་བ་ལས་ལོ་བརྒྱར་བསྒོམས་ཀྱང་གྲོལ་བ་མེད་ལགས། དེ་ཕྱིར་གསང་སྔགས་རྡོ་རྗེ་ཐེག་པའི་ཉེ་ལམ་ཟབ་མོ་ལ་བརྟེན་ནས་འཁོར་འདས་གཉིས་ཀྱི་སྤྱི་གཞི་གཏན་ལ་དབབ་ནས་འཁོར་འདས་དག་མཉམ་གྱི་ལྟ་བ་རྟོགས་དགོས་པ་ཡིན། དེ་ཡང་འདི་ཉིད་རྟོགས་ན་གདོད་མའི་གྲོལ་གཞི་བྱེད་པ་དང་། མ་རྟོགས་ན་སེམས་ཅན་གྱི་འཁྲུལ་གཞི་བྱེད་པས་སྤྱི་གཞི་ཟེར་བ་ཡིན། མདོར་ན་མ་རིག་བདེན་འཛིན་གྱིས་དྲངས་པའི་དུས་ག སུམ་ཡིད་ཀྱི་འཁྲུལ་པ་ལས་གཞན་པའི་འཁོར་བ་མེད་པ་དང་། འཁྲུལ་པའི་རྟོག་ཚོགས་ཞི་བ་ལས་གཞན་པའི་ཞི་བ་མྱང་འདས་མེད་པ་ཤེས་པར་གྱིས་ལ་ཞིབ་དུ་གཏན་ལ་དབབ་དགོས་ཞེས། བླ་མ་རིན་པོ་ཆེ་ནས་སོ། ། ༈ ཉམས་ལེན་གྱི་སྙིང་པོ་ནི། མཉམ་བཞག་གི་སྐབས་སུ་ཉམས་ཞེན་གྱི་ཤུན་པ་དང་བྲལ་བའི་རིག་སྟོང་ཟང་ཐལ་གྱི་ངང་ནས་དུས་གསུམ་གྱི་རྟོག་ཚོགས་གང་ཤར་ཐམས་ཅད་བག་ཆགས་གསོག་ལོང་མེད་པར་རང་ཤར་དང་རང་གྲོལ་དུ་འགྲོ་དགོས་པས་ལྟ་བའི་གདེངས་དང་ལྡན་པ་གལ་ཆེ། རྗེས་ཐོབ་ཀྱི་དུས་སུ་དྲན་པས་ཟིན་པ་ཙམ་ནས་དྲན་མཁན་ཆོས་ཉིད་ཀྱི་དབྱིངས་སུ་གྲོལ་ནས་ཆོས་ཉིད་ཀྱི་ངང་དུ་རྒྱ་འབྱམས་དགོས་པས་ཡེངས་པའི་ཚེ་དྲན་པས་ཟིན་པ་གལ་ཆེ་ཞེས་མདོ་པ་གདམས་ངག་རྒྱ་མཚོ་རང་ཡུལ་དུ་ཕེབ་དུས་ཆོས་དབྱིངས་རང་གྲོལ་ནས་གཅེས་ནོར་དུ་གདམས་པ་ཡིན་ནོ། ༈ །བློས་ཕར་མ་བསྒོམས་པས་ཅོག༵་བཞག༵ རིག་པས་ཚུར་མ་བཅིངས་པས་རྒྱ་༵ ཡན༵། བཅིངས་གྲོལ་གཉིས་ཀ་ལས་འདས་པས་མཐའ༵་གྲོལ༵། སྒོམ་འཛིན་གྱི་བློ་དང་བྲལ་བས་བློ༵་བྲལ༵། རང་བཞིན་གདོད་ནས་དག་པས་ཡེ༵་དག༵ །ཉམས་ཞེན་གྱི་ཤུན་པ་འཐོར་བས་རྗེན༵་པ༵། གཟུང་འཛིན་རང་གྲོལ་དུ་སོང་བས་རིག༵་སྟོང༵་། རྣམ་རྟོག་གི་གོས་དང་བྲལ་བས་གཅེར༵་བུ༵། གདོད་མ་ནས་གནས་པས་གཉུག༵་མ༵། བློ་གཉིས་འཛིན་གྱི་དྲི་མས་མ་གོས་པས་སོ༵་མ༵། རྒྱུ་རྐྱེན་དང་བྲལ་བས་རང་༵ བྱུང༵་། འཁྲུལ་གྲོལ་དང་བྲལ་བས་ཀ༵་དག༵ །སྤང་བླང་དང་བྲལ་བས་བློ༵་འདས༵་སོ། ༈ །བྱང་ཆུབ་ཀྱི་སེམས་དེ་ལ། ངོ་བོ་དང་། རྩལ་དང་། རོལ་པ་གསུམ་ཡིན་ལ། དེ་ཡང་ཀུན་གཞི་ལུང་མ་བསྟན་གྱི་ངོ་བོ་ལས་ཁྱད་དུ་འཕགས་པའི་ཆོས་༵སྐུ་གཞིར་གནས་ཀྱི་རིག་པ་སྤྲོས་པའི་མཐའ་དང་བྲལ་བ་༼དཔེ་ནམ་མཁའ་ལྟ་བུ་༽དེ་ལ་ངོ་བོ། འཁོར་འདས་ཀྱི་འཆར་གཞི་མ་འགགས་ཀྱང་ཀུན་གཞིའི་རྣམ་ཤེས་དང་བྲལ་བའི་ཚོགས་དྲུག་དུས་མཉམ་དུ་འཆར་བའི་ལོངས་སྐུའི༵་ཡེ་ཤེས་༼ དཔེ་མེ་ལོང་ལ་གཟུགས་བརྙན་འཆར་བ་ལྟ་བུ་༽དེ་ལ་རྩལ། ཀུན་ཉོན་འཁྲུལ་བའི་རྟོག་ཚོགས་མ་སྤངས་རང་གྲོལ་དུ་སོང་བའི་ཐུགས་རྗེ་རིག་གདངས་སྣ་ཚོགས་སུ་འཕྲོ་བ་༼ དཔེ་ཆུ་ལ་རི་མོ་བྲིས་པ་ལྟ་བུ་༽དེ་ལ་རོལ་བའོ། ༈ །གཞིར་གནས་ཀྱི་ཡེ་ཤེས་གསུམ་༼ངོ་བོ་སྟོང་པའི་ཡེ་ཤེས་རང་བཞིན་གསལ་བའི་ཡེ་ཤེས་ཐུགས་རྗེ་ཀུན་ཁྱབ་ཀྱི་ཡེ་ཤེས། ༽མཚན་ཉིད་མེད་པའི་ཡེ་ཤེས་ལྔ། ཡུལ་ལ་འཇུག་པའི་ཡེ་ཤེས་གཉིས་༼ཇི་ལྟ་ཇི་སྙེད་ཡེ་ཤེས། ༽༈ ཤེས་རིག་རང་ཚིག་༼རིག་པ་སྐུ་གསུམ་དེ་ངོ་རང་ཐོག་ཏུ་སྤྲད་པ། ཐག་གཅིག་ཐོག་ཏུ་བཅད་པ། གདེངས་གྲོལ་ཐོག་ཏུ་བཅའ་བའོ་༽ཞེས། དོན་བཟང་རྟོག་ཏུ་ཤར་ཡང་རང་ཤར་རང་གྲོལ། ངན་རྟོག་ཏུ་ཤར་ཡང་མཐའ་གྲོལ་ཀློང་ཡངས ། ལུང་མ་བསྟན་གྱི་ཆ་རང་དྭངས། ༈ དུས་རྒྱ་ཆེ་བ་ནམ་མཁའ་ཇི་སྲིད། དམིགས་པ་རྒྱ་ཆེ་བ་སེམས་ཅན་ཐམས་ཅད་ཀྱི་དོན། དོན་རྒྱ་ཆེ་བ་སངས་རྒྱས་ཀྱི་གོ་འཕང་། བློ་སྟོབས་རྒྱ་ཆེ་བ་སེམས་ཅན་རེ་རེའི་ཕྱིར་དུ་མནར་མེད་དུ་འཇུག་ཀྱང་པདྨའི་མཚོ་རུ་ངང་པ་ཞུགས་པ་བཞིན། ཞེས་སོ། ། གཞིའི་འོད་གསལ་ལས་གྲོལ་འཁྲུལ་འབྱུང་ཚུལ་སོགས་མདོར་བསྡུས།འདིར་འོད་གསལ་རྫོགས་པ་ཆེན་པོའི་ལུགས་ལ། གཞོན་ནུ་བུམ་པའི་སྐུ་ཞེས་ནང་གསལ་ཐིམ་ལ་མ་རྨུགས་པ་ཕྲ་བའི་ཡེ་ཤེས་དེ་ཉིད། དུར་ཁྲོད་ཀྱི་འདྲེ་མོ་ཡན་ཆད་ཀྱི་རྒྱུད་ལ་ཡོད་གསུངས། གཞོན་ནུ་བུམ་སྐུ་ཞེས་པ་ནི། འོད་གསལ་འདུས་མ་བྱས་པའི་ཡེ་ཤེས་ལ་སྐྱེ་འཆི་དང་བགྲེས་རྒུད་མེད་པས་ན་གཞོན་ནུ། ལྷུན་གྲུབ་ཀྱི་རྒྱ་མ་རལ་བས་ན་བུམ་སྐུ། སྐུ་དང་ཡེ་ཤེས་མ་འགགས་པས་ནང་གསལ། ཀུན་གྱིས་རྟོགས་དཀའ་བས་ཕྲ་བའི་ཡེ་ཤེས། དཔེར་ན་བག་ཆགས་གསུམ་གྱིས་བསྒྲིབ་པ་ནི་བུམ་པ་ལྟ་བུའོ། །ཕྲ་བའི་ཡེ་ཤེས་དེ་ཉིད་སྐུ་གསུམ་གྱི་བདག་ཉིད་བུམ་ནང་གི་མར་མེ་ལྟ་བུའོ། །ཐིམ་རིམ་ཐམས་ཅད་རྫོགས་ནས་འཆི་སྲིད་ཆོས་སྐུའི་བར་དོའི་སྐབས་གཞིའི་འོད་གསལ་ལ་བསམ་གཏན་གྱི་ཞག་ལྔ་ལ་གནས། དེ་ལས་ལྡང་ཚེ་གཞིའི་འོད་གསལ་རང་སྣང་ཡིན་པར་སྐ༵ད་ཅིག༵་དང༵་པོའི༵་དུས་ཀ་དག་གདོད་མའི་ཡེ་གཞིའི་གནས་ལུགས་ངོ་ཤེས་ན་སྐ༵ད་ཅིག༵་གཉིས༵་པའི་༵ དུས་ངོ་ཤེས་མཁན་དབྱིངས་སུ་དྭངས། སྐད༵་ཅིག༵་གསུམ༵་པའི༵་དུས་གདོད་མའི་དབྱིངས་སུ་བཙན་ས་ཟིན་ནས་འཆི་སྲིད་ཆོས་སྐུའི་ཞིང་དུ་གྲོལ། བར་དོ་དེར་མ་གྲོལ་ན། ཆོས་ཉིད་བར་དོའི་སྐབས་སུ་གཞོན་ནུ་བུམ་སྐུའི་རྒྱ་རལ་ནས་ལྷུན་གྲུབ་ཀྱི་གསང་བའི་སྒོ་ཕྱེས་ནས་འོད་ལྔ་ཤར་བ། དག་པ་ལྟར་ན། སྐད༵་ཅིག༵་དང༵་པོ་ལ་རང་སྣང་ཡིན་པ་ངོ་ཤེས། སྐད༵་ཅིག༵་གཉིས༵་པའི༵་དུས་རང་སྣང་རང་བཞིན་མེད་པར་ངོ་ཤེས། སྐད་ཅིག་གསུམ་པའི་དུས་ངོ་ཤེས་པའམ་དཔྱོད་མཁན་ཆོས་སྐུའི་ཀློང་དུ་གྲོལ། དེ་ཚེ་ཕྱི་གསལ་གྱི་ཤེས་པ་ནང་དུ་ལྡོག །ནང་གསལ་དཔྱོད་བྱེད་ཀྱི་ཤེས་པ་གདོད་མའི་དབྱིངས་སུ་གྲོལ། གདོད་མའི་གཞི་ལ་གཡོ་བ་མེད་པར་དར་ཅིག་གནས། དེ་ནས་སྐུ་གསུམ་གྱི་སྟོན་པའི་སྐུར་བཞེངས་པ་ནི། ངོ་བོ་སྟོང་པ་ལ་ཡེ་ཤེས་ཀྱི་སྙིང་པོ་ཅན་གྱི་ཆོས་ཀྱི་སྐུར་བཞེངས། རང་བཞིན་གསལ་བ་འོད་ཀྱི་སྙིང་པོ་ཅན་གྱི་ལོངས་སྐུའི་སྐུར་བཞེངས། ཐུགས་རྗེ་ཀུན་ཁྱབ་ལ་རིག་པའི་སྙིང་པོ་ཅན་གྱི་སྤྲུལ་བའི་སྐུར་བཞེངས། དབྱིངས་རྣམ་དག་གི་སྒྲོན་མ་ལས་ཞིང་ཁམས་ཀྱི་ཆ་འཛིན། ཐིག་ལེ་སྟོང་སྒྲོན་ལས་ཞི་དྲག་གཉིས་ཀྱི་གཞལ་ཡས་ཁང་གི་ཆ་འཛིན། རྡོ་རྗེ་ལུ་གུ་རྒྱུད་ཀྱིས་ཞི་དྲག་གཉིས་ཀྱི་སྐུའི་ཆ་འཛིན། ཆོས་ཉིད་རང་སྒྲ་ལས་གསུང་གི་ཆ་འཛིན། ཐུགས་རྗེའི་རིག་གདངས་ལས་ཐུགས་རྣམ་མཁྱེན་ཡེ་ཤེས་ཀྱི་ཆ་འཛིན། རང་སྣང་ལོངས་སྤྱོད་རྫོགས་སྐུར་གྲོལ། མ་དག་པ་ལྟར། ཆོས་ཉིད་ཡུལ་གྱི་འཁྲུལ་གཞི། འོད་ལྔ་སྣོད་བཅུད་ཀྱི་འཁྲུལ་གཞི། རིག་པ་སེམས་ཀྱི་འཁྲུལ་གཞི་བྱས་ནས་འོད་ལྔ་ལས་འབྱུང་བ་ལྔ་རུ་སྣང་། ཐིག་ལེ་ལས་ཁང་ཁྱིམ་དུ་སྣང་། རྡོ་རྗེ་ལུ་གུ་རྒྱུད་ལས་རང་གི་ལུས་སུ་སྣང་། ཐུགས་རྗེ་རྣམ་མཁྱེན་ལས་རྣམ་ཤེས་ཚོགས་བརྒྱད་རྒྱུ་གསུམ་རྐྱེན་བཞིས་འཁྲུལ་གཞི་སེམས་སུ་སྣང་། ཆོས་ཉིད་རང་སྒྲ་ལས་རིགས་དྲུག་སོ་སོའི་སྐད་དུ་སྣང་། དེ་ནས་འཁོར་བ་ལུ་གུ་རྒྱུད་དུ་འཁྲུལ་བ་ཡིན་ནོ།། རྫོགས་ཆེན་ལུགས་ཀྱི་འཆི་སྲིད་ཆོས་སྐུའི་བར་དོ་ད་ལྟ་ནས་སྦྱོང་ཚུལ་སོགས་ཀྱི་སྐོར།འོད་གསལ་རྫོགས་པ་ཆེན་པོའི་ལུགས་ལ་འཆི་སྲིད་ཆོས་སྐུའི་བར་དོ་ད་ལྟ་སྦྱངས་ན་འདིར་གསང་སྔགས་རྙིང་མའི་ལུགས་ལ་རྒྱུད་ལུང་མན་ངག་གསུམ་སྟེ་རྒྱུད༵་བསྐྱེད་པ་མ་ཧཱ་ཡོ་གའི་དགོངས་པ་ནི་སྣོད་བཅུད་སྣང་གྲགས་རིག་གསུམ་ལྷ་སྔགས་ཆོས་སྐུར་འདོད། ཞེ་སྡང་འདུལ་བའི་གཉེན་པོའོ། །ལུང༵་ཨ་ནུ་ཡོ་གའི་དགོངས་པ་ནི་སྣོད་བཅུད་སྣང་སྟོང་ངམ་བདེ་སྟོང་ཟུང་འཇུག་ཏུ་འདོད། འདོད་ཆགས་འདུལ་བའི་གཉེན་པོའོ། །མ༵ན་ངག༵་རྫོགས་པ་ཆེན་པོའི་དགོངས་པ་ནི། སྣོད་བཅུད་དབྱིངས་དང་ཐིག་ལེ་སྐུ་དང་ཡེ་ཤེས་སུ་འདོད། གཏི་མུག་འདུལ་བའི་གཉེན་པོའོ། །འཆི་སྲིད་ཆོས་སྐུའི་བར་དོ་ད་ལྟ་སྦྱང་སྐབས། གཞིའི་གནས་ལུགས་དེ་གྲོལ་བ་བཞིའི་བདག་ཉིད་ཅན་དུ་གྲོལ་བ་ཡིན་ལ། སྐད༵་ཅིག༵་དང༵་པོ༵་ལ། ཀ་དག་གདོད་མའི་ཡེ་གཞིའི་གནས་ལུགས་རང་ངོ་ཤེས་པ། སྔར་འདྲིས་ཀྱི་མི་དང་འཕྲད་པ་ལྟ་བུའོ། །སྐད༵་ཅིག༵་གཉིས༵་པ༵་ལ་ངོ་ཤེས་མཁན་དབྱིངས་སུ་དྭངས། མི་གསལ་བ་གསལ་བ་སྒེག་མོ་མེ་ལོང་ལ་བལྟས་པ་ལྟ་བུའོ། །སྐད༵་ཅིག༵་གསུམ༵་པ༵་ལ་གདོད་མའི་དབྱིངས་སུ་བཙན་ས་ཟིན་པ་ལ་གདེངས་བྱ། མི་འགྱུར་བ་གསེར་གྱི་ཐུར་མ་ལྟ་བུའོ། །ཆོས་ཉིད་བར་དོ་ད་ལྟ་ནས་སྦྱངས་ཚེ་ཐོད་རྒལ་ལ་བརྟེན་ནས་སྟག་སེང་ཁུག་མཆོང་གི་ལམ་ཡིན་པས། སྐད༵་ཅིག༵་དང༵་པོར༵་འོད་ལྔ་ཤར་བ་ཡེ་ཤེས་ཀྱི་རང་གདངས་ཡིན་པར་ངོ་ཤེས། སྐད༵་ཅིག༵་གཉིས༵་པར༵་རང་སྣང་ལ་རང་བཞིན་མེད་པར་བདེན་མེད་ངོ་ཤེས། སྐད༵་ཅིག༵་གསུམ༵་པར༵་རང་བཞིན་མེད་པར་ཤེས་མཁན་དབྱིངས་སུ་དྭངས། ཡེ་ཤེས་ཀྱི་རླུང་རྒྱུ་དུས་དུས་གསུམ་གྱི་འཁྲུལ་བ་བྲལ་བའམ་རྟོག་ཚོགས་ཐམས་ཅད་མ་སྤངས་རང་ཤར་རང་གྲོལ་དུ་འགྲོ། ལས་རླུང་རྒྱུ་དུས་ཉམས་བདེ་གསལ་མི་རྟོག་གི་ཉམས་ལ་ཆགས་ནས་དུས་གསུམ་འཁྲུལ་བའི་མགོ་བརྩམ། ཉོན་རླུང་རྒྱུ་དུས་ཆགས་སྡང་བསྐྱེད་ནས་དུས་གསུམ་འཁྲུལ་བ་ལ་འབྱམས། ངོ་བོ་བརྗོད་དུ་མེད་པ་ལ་ཀ་དག་ཏུ་མ་ཤེས་པས་རྒྱུ་བདག་ཉིད་གཅིག་པུའི་མ་རིག་ཡེ་ལྡན་པའོ། །རང་བཞིན་གསལ་བ་རང་སྣང་འོད་གསལ་དུ་མ་ཤེས་པས་ལྷན་ཅིག་སྐྱེས་པའི་མ་རིག་དུས་མཉམ་པའོ། །ཐུགས་རྗེ་ཀུན་ཁྱབ་ལ་རང་རིག་ཏུ་མ་ཤེས་པས་ཀུན་ཏུ་བརྟགས་པའི་མ་རིག་སོགས་ཕྱི་འབྱུང་གི་ཚུལ་དུ་ཡོད་པའོ། །གཞི་ཀ་དག་ཁྲེགས་ཆོད་ཀྱི་ལྟ་བ་ངོ་འཕྲོད་པས་རྒྱུ་བདག་ཉིད་གཅིག་པུའི་མ་རིག་པ་རང་སར་དྭངས། ལམ་ཐོད་རྒལ་སྣང་བཞི་ལ་བརྟེན་ནས་ལྷན་ཅིག་སྐྱེས་པའི་མ་རིག་པ་རང་སར་དྭངས། ཐུགས་རྗེས་རིག་གདངས་ཤར་གྲོལ་དུ་སོང་བས་ཀུན་ཏུ་བཏགས་པའི་མ་རིག་པ་རང་སར་དྭངས། གཞིའི་འོད་གསལ་ངོ་མ་ཤེས་ན་ཀུན་གཞི་རྟོག་མེད་དུ་ཤར་བ་ལས་གཟུགས་མེད་སྐྱེ་མཆེད་མུ་བཞིར་གོལ། དེ་ནས་ཀུན་གཞིའི་རྣམ་ཤེས་ལ་ངར་འཛིན་གྱིས་གསོས་བཏབ་པའི་འོད་སྣང་ལས་གཟུགས་ཁམས་སུ་གོལ། ཉོན་ཡིད་དང་ཡིད་ཀྱི་རྣམ་ཤེས་ཤར་བ་ལས་འདོད་ཁམས་སུ་གོལ། དེ་གསུམ་དག་པས་སྲིད་གསུམ་ཀ་དག་གི་ལྟ་བའམ་སྲིད་པ་དྲུང་འབྱིན་གྱི་ལྟ་བ། ཁམས་གསུམ་ཡོངས་གྲོལ་གྱི་སྒོམ་པ། ཕྱོགས་ལས་རྣམ་རྒྱལ་གྱི་སྤྱོད་པ། སྐུ་གསུམ་ལྷུན་གྲུབ་ཀྱི་འབྲས་བུའོ། །ཡེ་ཤེས་ནི་ངོ་བོ་སྟོང་པའི་ཡེ་ཤེས། རང་བཞིན་གསལ་བའི་ཡེ་ཤེས། ཐུགས་རྗེ་ཀུན་ཁྱབ་ཀྱི་ཡེ་ཤེས་དེ་གསུམ་ཆོས་སྐུའི་ཡེ་ཤེས་སོ། །ཡེ་ཤེས་ལྔ་ནི་ལོངས་སྐུའི་ཡེ་ཤེས་སོ། །ལམ་གྱི་དུས་སུ་མཁྱེན་པའི་ཡེ་ཤེས་ནི་སྤྲུལ་སྐུའི་ཡེ་ཤེས། སངས་རྒྱས་པའི་དུས་སུ་མཁྱེན་གཟིགས་གཉིས་སོ། །ཁམས་གསུམ་ཡོངས་གྲོལ་གྱི་སྒོམ་པ་ནི་ངོ་བོ་མི་རྟོག་ཀྱང་ཡེ་ཤེས་ཀྱི་རང་གདངས་མི་འགག་པའི་ཆ་ནས་གཟུགས་མེད་སྐྱེ་མཆེད་མུ་བཞི་ལས་གྲོལ། ཡེ་ཤེས་གསལ་ཡང་མི་འཛིན་པའི་ཆ་ནས་གཟུགས་ཁམས་ལས་གྲོལ། ཐུགས་རྗེའི་ཆ་ནས་རིག་ཀྱང་མི་འཕྲོ་བས་འདོད་ཁམས་ལས་གྲོལ། གྲོལ་བ་བཞིའི་བདག་ཉིད་ཅན་བག་ཆགས་གསོག་ལོང་མེད་པར་ཆོས་ཉིད་ངང་དུ་རྒྱ་འབྱམས། ཡེ་ཤེས་ལྔ་ནི། ཆོས་ཐམས་ཅད་རང་བཞིན་དབྱིངས་སྤྲོས་པ་དང་བྲལ་བའི་ངོ་བོ་བརྗོད་དུ་མེད་པ་དེ་ཉིད་ཆོས་སྐུའི་ཐུགས་ཆོས་དབྱིངས་ཡེ་ཤེས། ཆོས་ཐམས་ཅད་ཀྱི་སྣང་ཚུལ་མ་འདྲེས་པར་གསལ་ཡང་གཉིས་འཛིན་གྱི་རྟོག་པ་དང་བྲལ་བའི་ལོངས་སྐུའི་ཐུགས་མེ་ལོང་ཡེ་ཤེས་སོ། །འཁོར་བའི་ཆོས་མ་སྤངས། འདས་པའི་ཆོས་མ་བླངས་པའི་སྤང་བླང་མེད་པར་མི་འགྱུར་རྡོ་རྗེའི་ཐུགས་མཉམ་ཉིད་ཡེ་ཤེས། ཤེས་བྱ་ཐམས་ཅད་མ་འདྲེས་པར་ཅིག་ཆར་མཁྱེན་པའི་ངོ་བོ་ཉིད་སྐུའི་ཐུགས་སོར་རྟོག་ཡེ་ཤེས། དམིགས་མེད་སྙིང་རྗེ་ཆེན་པོས་འགྲོ་དོན་ཐོགས་པ་མེད་པར་མཁྱེན་པའི་སྤྲུལ་སྐུའི་ཐུགས་བྱ་གྲུབ་ཡེ་ཤེས་སོ། །ཡང་ཁམས་གསུམ་ཡོངས་གྲོལ་གྱི་སྒོམ་པ་ནི། ཀུན་གཞི་དང་ཆོས་སྐུ་གཉིས་རྟོག་མེད་ངོས་ནས་འདྲ་ཡང་། ཀུན་གཞི་ནི་ལུང་མ་བསྟན་འདུས་བྱས་དག་བྱ། ཆོས་སྐུ་ནི་ཟང་ཐལ་འདུས་མ་བྱས་ཤིང་ངོ་བོ་མི་རྟོག་ཀྱང་ཡེ་ཤེས་ཀྱི་རང་གདངས་མི་འགག་པའི་ཆ་ནས་གཟུགས་མེད་སྐྱེ་མཆེད་མུ་བཞི་ལས་གྲོལ། དངོས་པོ་དང་མཚན་མར་འཛིན་པའི་རྟོག་པས་ཟིལ་གྱིས་མི་ནོན་པ་སེང་གེ་དར་མ་ལྟ་བུའི་རིག་པ། ཀ་དག་ཡེ་གྲོལ་གྱི་ཀློང་དུ་རང་གདངས་འགག་མེད་དུ་ཇི་ལྟར་ཤར་ཡང་ཆགས་ཐོགས་མེད་པར་གྲོལ་བས་གེག་དང་གོལ་ས་མེད་པ་ནི་དཔེར་ན་ནམ་མཁའི་དབྱིངས་སུ་མཁའ་ལྡིང་རྒྱལ་པོ་ལྡིང་བ་ལྟ་བུའི་རིག་པ། ཕྱི་ནང་སྣོད་བཅུད་ཀྱི་ཆོས་ཇི་ལྟར་སྣང་ཡང་ཆགས་ཞེན་གྱི་གེག་དང་གོལ་ས་མེད་པ་པདྨ་ལྟ་བུའི་རིག་པ། དེ་ལྟ་བུའི་རིག་པ་གསུམ་གྱི་གནད་དང་ལྡན་ན། དབྱིངས་རིག་ཟུང་འཇུག་གི་ངང་དུ་ཉིན་མཚན་འཁོར་ཡུག་ཏུ་གནས་ཀྱང་སེམས་འཛིན་རྩེ་གཅིག་གི་རྟོད་ཕུར་མེད་པ་དང་གཅིག ། ཚོགས་བརྒྱད་ལས་འདས་ཀྱང་རང་རིག་འོད་གསལ་གྱི་རང་གདངས་མི་འགག་པ་དང་གཉིས། ཟང་ཐལ་རྒྱ་ཡན་དུ་འདུག་ཀྱང་བསལ་བཞག་སྤྲོ་བསྡུ་མི་དགོས་པ་དང་གསུམ་ཡིན་ནོ། །ཕར་ལ་བློ་ཡིས་མ་བཅོས། ཚུར་ལ་དྲན་པས་མ་བཅིངས ། གཉིས་ཀའི་དབུས་ལ་མི་གནས་ཟང་ཐལ། ཐིབས་ཀྱིས་འགོག་པ་འདུ་བྱེད་ཀྱི་རྟོག་པ། དལ་གྱིས་ཤར་བ་འོད་གསལ་གྱི་དཀྱིལ་འཁོར། ཧྲིག་གེ་རིག་པ་རང་བྱུང་གི་ཡེ་ཤེས། ཕྱམ་གྱིས་བརྡལ་བ་གདོད་མ་ཡི་གཞི་དབྱིངས། གཉུག་མ་ལྷན་སྐྱེས་ཀྱི་ཡེ་ཤེས་འདི་ཉེ་ཆེ་བས་ངོ་མ་ཤེས། སླ་ཆེ་བས་ཡིད་མ་ཚིམ། ཟབ་དྲགས་པས་བློ་རུ་མ་ཤོང་། རྫོགས་པ་ཆེན་པོའི་ལྟ་སྒོམ་སྤྱོད་གསུམ་གྱི་རྣམ་གྲངས་བཤད་པ།བླ་མ་ལ་ཕྱག་འཚལ་ལོ། །འདིར་འོད་གསལ་རྫོགས་པ་ཆེན་པོའི་ལྟ་སྒོམ་སྤྱོད་གསུམ་གྱི་རྣམ་གྲངས་ཅུང་ཟད་བཤད་པ་ལ། དང་པོ་ལ་ལྟ་བ་ངོ་སྤྲོད་ལ་ནི་ལུས་གནད་རྣམ་སྣང་ཆོས་བདུན་བྱས། ཁའི་རླུང་དལ་གྱིས་རྒྱུ་བར་བྱེད་པ་དང་། སེམས་འདས་པའི་རྣམ་རྟོག་གི་རྗེས་མི་དཔྱོད། མ་འོངས་པའི་མདུན་མི་བསུ། ད་ལྟའི་རྟོག་པ་བཟོ་མི་འཆོས་པར་རང་བབས་སུ་ལྷོད་ཀྱིས་ཞོག་དང་། དེའི་དུས་སུ་སེམས་རང་བབས་སུ་བཞག་པའི་གནད་ཀྱིས་དུས་གསུམ་གྱི་རྟོག་པ་རགས་པ་ཙམ་ཞིག་བྲལ་བར་འགྱུར་རོ། །དེ་མ་ཐག་དེའི་ཤུལ་ན་ཡོད་པའི་ཤེས་རིག་སོ་མ་ཕྱི་ཚོགས་དྲུག་གི་ཡུལ་ལ་ཞེན་པ་མེད་ཅིང་ནང་དྲན་འཛིན་གཉེན་པོས་མ་བསླད་པ་རང་བབས་ཤུགས་འབྱུང་མངོན་གྱུར་དུ་ཡོད་པ་འདི་མངོན་སུམ་དུ་ངོ་འཕྲོད་ན་རྫོགས་ཆེན་གྱི་ལྟ་བའམ་རིག་པ་ཙམ་ངོ་འཕྲོད་པ་ཡིན། ཡང་ན་སྣང་སྲིད་འཁོར་འདས་གཉིས་བསྡུས་ཀྱི་ཆོས་ཐམས་ཅད་ཐ་སྙད་ཀུན་རྫོབ་སྣང་ཚུལ་ཙམ་དུ་ནང་རྟོག་པས་ཕར་བཟོས་པ་ཙམ་མམ་སེམས་ཀྱི་ཆོས་ཆོ་འཕྲུལ་རྨི་ལམ་གྱི་སྣང་བ་ལྟ་བུའི་བདེན་མེད་དང་། དོན་དམ་གནས་ཚུལ་ལ་སྣང་སྲིད་དེ་ཐམས་ཅད་བརྟགས་ན་རང་ངོ་ནས་མེད་པར་མ་ཟད་བློས་ཕར་བཏགས་ཙམ་ཡང་ཤུལ་ན་ལྷག་རྒྱུ་མེད་པས་ཅིར་ཡང་མ་གྲུབ་པ་སྟེ་སྤྲོས་བྲལ་སྟོང་ཉིད་དུ་ཐག་བཅད། དེ་ནས་འཁོར་འདས་ཀྱི་བྱེད་པ་པོ་སེམས་ཁོ་ན་ཡིན་པར་ཤེས་ནས་སེམས་ཁོ་རང་གི་ཐོག་ནས་ཡིན་ལུགས་ཅི་འདྲ་རེད་རང་ངོ་ནས་གྲུབ་བམ་མ་གྲུབ་སོགས་བྱུང་གནས་འགྲོ་གསུམ་གྱི་སྒོ་ནས་བརྟགས་པས་གཟུགས་དབྱིབས་ཁ་དོག་མཚན་མ་སོགས་བློས་ཕར་བཏགས་ཙམ་ཡང་མེད་པའི་སྟོང་པ་རུ་ཐག་ཆོད་པ་ན། དེ་མ་ཐག་སྟོང་ངོ་སྙམ་པའི་ཞེན་འཛིན་ཕྲ་མོ་ཞིག་ཡོད་དོ། །སྟོང་འཛིན་དེའི་རང་ངོར་བལྟས་པས་སྟོང་འཛིན་དེ་རང་སར་བཞག་པས་ཆུ་རླབས་ཆུར་ཞིག་པ་བཞིན་རིག་པའི་དབྱིངས་སུ་རང་ཞིག་གོ །དེ་མ་ཐག་སྟོང་རྐྱང་ཁོ་ན་མ་ཡིན་པར་སྟོང་པའི་ངང་ནས་ཤར་འོང་བ་ལྟ་བུའི་སྟོང་པ་རིག་པའི་སྙིང་པོ་ཅན་ནམ་སྟོང་གསལ་དབྱེར་མེད་ཀྱི་ཤེས་པ་རང་བབས་སུ་ཤུགས་འབྱུང་བཟོ་བཅོས་དང་བྲལ་བ་ཞིག་ཡོད་པ་དེ་ངོ་འཕྲོད་ན་ལྟ་བ་ཙམ་ཡིན། ཡང་ན་ལུས་གནད་བསྲངས། མིག་བར་སྣང་ལ་ཧ་རེ་གཏད་དེ་སེམས་ཡང་ཕར་ནམ་མཁའ་སྟོང་པའི་དབྱིངས་སུ་གཏོད་ལ་འཛིན་མེད་དུ་ཞོག་དང་། དེའི་སྟོབས་ཀྱིས་རྣམ་རྟོག་གི་འཕྲོ་འདུ་ཆད་ནས་ཕྱི་ནམ་མཁའ་དང་། ནང་སེམས་ཉིད་སྟོང་པ་གཉིས་དབྱེར་མེད་ལྟ་བུའི་རྒྱ་ཆེ་བ་ཡངས་ཁྲོལ་ལེའི་ཤེས་པ་གསལ་སྟོང་འཛིན་མེད་ཞིག་མངོན་དུ་འགྱུར་རོ། །དེ་ཡང་རིག་པ་ཡིན། མདོར་ན་རྣམ་རྟོག་གང་ཤར་གྱི་སྔོན་བསུ། རྗེས་སྙེག་མི་བྱེད་པར་ཤར་མཁན་ཁོ་རང་གི་ངོ་བོར་ལྟོས་དང་། བལྟས་པ་ཙམ་ནས་རྣམ་རྟོག་གི་ཚོགས་རང་འགགས་སུ་འགྲོ་བ་ཆོས་ཉིད་ཡིན། དེ་དུས་ཁོ་ནར་ཡོད་པའི་ཤེས་རིག་དྭངས་གསལ་ངོ་བོ་ངོས་བཟུང་དང་བྲལ་བའི་སྟོང་སངས་འཛིན་མེད་ཞིག་མངོན་དུ་འགྱུར་རོ། །དེ་ཡང་རིག་པ་ཡིན་ནོ། །རྣམ་རྟོག་རང་ངོར་ལྟ་བ་ཙམ་དང་བལྟས་པས་སྟོང་པ་ཁོ་ན་བསྒོམ་པ་ལྟ་བུའི་རིག་པ་ཡིན་ནོ། །དེའི་ཚུལ་ཞིབ་ཏུ་བཤད་ན། སེམས་ལྷོད་དེ་བཞག་པས་སེམས་ཀྱི་འཕྲོ་འདུ་ཆད་ནས་ཡུལ་མི་རྟོག་ཙམ་དང་། གསལ་ས་ལེར་ཡོད་པ་ཙམ་དང་ངེས་མཁན་དང་སྟོང་སང་ངེར་ཡོད་པ་ལྟ་བུ་གང་ཡང་རིག་པ་མིན། དེའི་དུས་སུ་དེ་དག་དང་མ་འདྲེས་པའི་གསལ་དག་ཟང་མ་ཐལ་གྱི་ཤེས་པ་རྗེན་ནེ་བའམ་མི་རྟོག་པའི་ཆ་ངེས་མཁན་ནམ་མཐོང་མཁན་ཞིག་རང་ཤུགས་ཀྱིས་ཡོད་པ་དེ་རིག་པ་ཡིན། གང་བཤད་དེ་དག་གི་མདོ་འགག་ངོ་འཕྲོད་ཐབས་མཐར་ཐུག་ནི་འདི་ཡིན་ཏེ་རྣམ་རྟོག་རང་ངོར་བལྟས་ཏེ་རང་སར་བཞག་པའི་སྟབས་ཀྱིས་ཕྱི་ཚོགས་དྲུག་གི་ཡུལ་ལ་མ་ཞེན། ནང་དྲན་འཛིན་གཉེན་པོས་མ་བཅིངས་བར་བཏང་སྙོམས་ལུང་མ་བསྟན་དུའང་མ་གོལ་བའི་སྟོང་གསལ་འཛིན་མེད་ཀྱི་ཤེས་པ་དེ་རིག་པ་ཡིན། དེའི་དོན་ནི་ཕྱི་ཚོགས་དྲུག་གི་ཡུལ་གཟུགས་སྒྲ་སོགས་ལ་མི་ཞེན་པར་ཞེན་མཁན་ཁོ་རང་རང་བབས་སུ་བཞག་སྟེ་བསྐྱང་བ་ན་ཕྱི་གཟུགས་སྒྲ་སོགས་ལ་མི་ཞེན་ཀྱང་ནང་བདེ་གསལ་མི་རྟོག་གསུམ་གྱི་རོ་ལ་ཞེན་པའང་ནང་སྣང་སྟོང་གི་ཆོས་ལ་ཞེན་པའི་བློའམ་རྟོག་པ་ཕྲ་མོ་ཞིག་ཡིན། དེའི་ཚེ་རོ་མྱོང་མཁན་དེ་ཁོ་རང་རང་བབས་སུ་མ་བོར་ཙམ་དུ་བསྐྱང་བའི་ཚེ་ཉམས་ཀྱི་རོ་མྱོང་མེད་ཀྱང་བསྐྱང་བྱ་སྐྱོང་བྱེད་ཀྱི་ཚུལ་དུ་སྐྱོང་དགོས་པ་ནི། ནང་དྲན་འཛིན་གཉེན་པོས་བཅིངས་པའི་བློ་སྟེ། གོ་མྱོང་རྟོགས་གསུམ་ལས་མྱོང་བ་ཙམ་ལས་རྟོགས་པ་དངོས་མིན་པ། དེ་ཉིད་གཉེན་པོ་ལ་ཞེན་པའི་བློ་ཡང་ཡིན། དེའི་གཉེན་པོ་མཆོག་འཛིན་དང་ངེས་ཤེས་ཀྱི་འཛིན་པ་སོགས་དྲང་ངོ་། །དེ་དག་གི་སྐབས་སུ་རྩོལ་བཅས་ཀྱི་དྲན་པའམ། འཇུར་བུའི་དྲན་པ། འདུ་བྱེད་དྲན་པ། འདུ་ཤེས་ཀྱི་དམིགས་པ། མིང་བཅས་ཀྱི་དྲན་པ་སོགས་བརྗོད་དོ། །དེ་ལྟར་འཇུར་དྲན་ལ་གོམ་འདྲིས་སུ་སོང་བ་ན། བསྐྱང་བྱ་སྐྱོང་བྱེད་ཀྱི་འགྱུ་དྲན་དེ་རང་སར་བཞག་པས་ཅི་ཡང་མི་བསྒོམ་པར་ཡང་ཡང་ལྷོད་ཀྱིས་བཞག་ན། ནམ་ཞིག་བསྐྱང་བྱ་སྐྱོང་བྱེད་ཀྱི་དྲན་འཛིན་རང་ཞིག་དུ་སོང་ནས་བསྒོམ་བྱ་སྒོམ་བྱེད་ཀྱི་གཏད་སོ་འཛིན་པ་ངེས་ཤེས་ཐམས་ཅད་ཀྱི་ཤུབས་ནས་འཐོན་ཏེ་ཉི་མ་སྤྲིན་ལས་གྲོལ་བ་བཞིན་བསྒོམ་ཀྱང་སྐྱོང་རྒྱུ་མེད་ལ་མ་བསྒོམས་ཀྱང་འཁྲུལ་དུ་མེད་པ་ཞིག་འོང་སྟེ་རྟོགས་པ་ལྷད་མེད་ཡིན། དེའི་ཚེ་རང་ངོ་མ་མཐོང་བའི་མ་རིག་པ་དང་མཚུངས་ལྡན་གྱི་རྟོག་མེད་ཧད་པོ་ཀུན་གཞི་ལྟ་བུ་ཡང་མིན་པས་བཏང་སྙོམས་ལུང་མ་བསྟན་དང་བྲལ་ལོ། །དེ་དུས་གཉུག་མའི་དྲན་པའམ་ཆོས་ཉིད་ཀྱི་དྲན་པ་དང་། ལྷུན་གྲུབ་ཀྱི་དྲན་པའམ་རྩོལ་མེད་ཀྱི་དྲན་པ་ཡང་ཟེར་རོ། །དེ་སླར་ཡང་རྩེ་གཅིག་ཏུ་གོམས་ནུས་ན་དབྱིངས་རིག་དབྱེར་མེད་དུ་འདྲེས་ཏེ་འཕགས་ལམ་ཐོབ་པར་འགྱུར་རོ། །གོ་ཐོབ་བཤད་ན་ད་ལྟའི་ཤེས་པ་མ་བཅོས་རང་བབས་སུ་བཞག་པ་འདི་ཉིད་རིག་པ་ཡིན། དེ་ངོ་མ་འཕྲོད་ན་རྣམ་རྟོག་ཕཊ་ཀྱིས་གཏོར་ན་རིག་ཆ་མངོན། དེའང་གང་ཤར་རེ་དོགས་མི་བྱེད་པར་ཐོལ་བྱུང་ཕཊ་སྒྲ་དྲག་པོ་ངར་ཐུང་ཞིག་བརྗོད་པ་དང་དེ་མ་ཐག་ཏུ་རྣམ་རྟོག་དང་བྲལ་བའི་ཤེས་པ་སྟོང་གསལ་འཛིན་མེད་ཅིག་ཤར་བ་དེ་རིག་པ་རེད། བྱིང་རྨུགས་འཐིབ་གསུམ་དུ་མི་གཏོང་བར་དེའི་རྒྱུན་བསྐྱང་བ་སྒོམ་པ་རེད། དེ་ཉིད་རྐྱེན་དང་བསྲེ་བ་སྤྱོད་པ་རེད། རྐྱེན་དང་བསྲེ་ཚུལ་ལ་ནི་རྣམ་རྟོག་བཟང་ངན་གང་ཤར་ཡང་སྤང་བླང་རེ་དོགས་མི་བྱེད་པར་རིག་ཐོག་ཏུ་བཞག་པས་ཆུ་ལ་རི་མོ་བྲིས་པ་ལྟར་རྣམ་རྟོག་རྣམས་གཉེན་པོ་གཞན་ལ་མ་ལྟོས་པར་རང་ཡལ་དུ་འགྲོ་བར་བྱེད་པའམ། རྗེས་ཐོབ་ཀྱི་སྐབས་མ་གཏོགས་རིག་པ་རྒྱ་བསྐྱེད་དཔང་བསྟོད་སོགས་ཅི་ཡང་མི་བྱ་བར་དང་པོ་དེ་འདྲའམ་རིག་པ་ཙམ་སྟེ་ངོ་འཕྲོད་ན་རྒྱུན་དུ་བསྒོམས་ན་རིག་པ་ཇེ་གསལ་ཇེ་འཐུག་ཏུ་འགྲོའོ། །འདི་ནི་ངོ་བོ་ལམ་བྱེད་ཡིན། རྣམ་པ་ལམ་བྱེད་ཅེས་དྲུག་སྟོང་བཞིའི་དྲངས་པའི་འཆི་སྲིད་ཆོས་སྐུའི་འོད་གསལ་གྱི་རྣམ་པའམ་དོན་སྤྱི་བསྒོམ་པའི་ཚུལ་དེ་ནི་རིག་པ་དངོས་སྒོམ་ཚུལ་དཀྱུས་མའི་རྣལ་མ་ཡིན་པར་གསུངས་པས་བཞག་གོ །ཞེས་བྱ་བྲལ་ཆོས་དབྱིངས་རང་གྲོལ་པས་སོ། ། བླ་མ་རིན་པོ་ཆེའི་ཞལ་རྒྱུན།བླ་མ་རིན་པོ་ཆེའི་ཞལ་རྒྱུན་ནི། རང་གི་སྤྱི་བོར་གདན་པདྨ་ཉི་ཟླའི་སྟེང་དུ་བླ་མ་གུ་རུ་རིན་པོ་ཆེ་མཆོག་གསུམ་ཀུན་འདུས། རྩ་གསུམ་ཀུན་འདུས། སྐུ་གསུམ་ཀུན་འདུས་ཀྱི་བདག་ཉིད། མདོར་ན་ཕྱོགས་བཅུའི་རྒྱལ་བ་སྲས་བཅས་ནས་བཟུང་སྟེ། ཉེ་བའི་མཆེད། རིང་བའི་མཆེད། འདྲེས་པའི་མཆེད། རྡོ་རྗེའི་མཆེད་པོ་ཡན་ཆད་ཀྱི་སྐྱབས་གནས་ཀུན་འདུས་པའི་ངོ་བོར་གསལ་བཏབ་ལ། འདི་ནི་ཀུན་འདུས་ནོར་བུའི་ལུགས་སུ་བསྒོམ་ནི་རེད། སྐྱབས་སུ་སོང་། སེམས་བསྐྱེད། གདུང་ཤུགས་དྲག་པོས་གསོལ་བ་བཏབ་སྟེ། དད་པ་མེད་ན་ཅི་རེད་ནི་མ་རེད། དོན་དམ་པ་ནི་དད་པ་ཁོ་ནས་རྟོགས་པར་བྱ་བའོ། །དད་པ་མེད་ན་མདོ་ནས་སྔགས་ཀྱི་བར་གྱི་གནད་རྟོགས་ནི་མ་རེད། དད་པ་བཞག །དབང་བཞི་བླངས། འོད་ཞུ་བྱས་ནས་ཐུགས་ཡིད་དབྱེར་མེད་དུ་བསྲེས་ན་དད་པ་དེ་ཉིད་ཀྱི་སྟོབས་ཀྱིས་འོང་སྟེ། འཁྲུལ་བའི་རྟོགས་ཚོགས་ཐམས་ཅད་སེ་ལུང་ལྕགས་ཀྱི་རྒྱ་མདུད་འཐོར་བ་ལྟར། བྱིང་རྨུགས་འཐིབ་གསུམ་པོ་རི་ཆེན་སྨུག་པ་དྭངས་ནི་འདྲ་འདྲ། ཐམས་ཅད་དབྱིངས་སུ་དེངས་ཨུ་མི་འགྲོ། དེའི་མ་ཆོག་རྒྱུ་ཅི་ཡོད། ཕྱོགས་བཅུའི་རྒྱལ་བ་སྲས་དང་བཅས་པའི་ཐུགས་དང་དབྱེར་མེད་བསྲེ་རྒྱུ་རེད། སྐལ་བ་ཅན་རེད། ཟབ་གནད་ཅིག་རེད། དེའི་བཟང་ཅི་དགོས། ཐོག་མར་ཀུན་སློང་བཅོས། སྦྱོར་བ་སྐྱབས་འགྲོ་དང་སེམས་བསྐྱེད། དངོས་གཞི་གསོལ་འདེབས་དང་ཐུགས་ཡིད་བསྲེ་བ། རྗེས་ལ་བསྔོ་བ་དང་སྨོན་ལམ། ངལ་བསོ། དེ་ལྟར་ཉིན་རེ་ཐུན་བརྒྱ་དང་དྲུག་ཅུ་རེ་ལྔ་རེ་བཅད་དགོས་པ་ཡང་ཏིག་ནག་པོ་གསེར་གྱི་འབྲུ་གཅིག་གི་དགོངས་པ་རེད། ཐུན་བརྒྱ་རེའམ། བརྒྱད་ཅུ་རེ་ཙམ་བཅད། ཡུན་ཐུང་གྲངས་མང་བྱས་ན་དགའ། དེ་མིན་ཡུན་ཐུང་རྒྱུ་ལ་ཅི་དགའ་ད། ཡུན་རིང་པོར་མཉམ་བཞག་གིས་ཉིན་མཚན་འདའ་ནུས་པ་ཡོད་ན་ལོས་དགའ་ད། རིང་སྐྱད་ཡོད་ནི་མ་རེད། ཕ་བོ་ཡུན་རིང་ན་བྱིང་རྨུགས་འཐིབ་གསུམ་གྱིས་རི་ཆེན་སྨུག་པས་གཡོག་ནི་འདྲ་འདྲ་མགོ་རེ་སྒྱེས་བཏུམ་ནི་འདྲ་འདྲ་ཞིག་གི་ངང་ནས་ཐུགས་ཡིད་དབྱེར་མེད་ཀྱི་ས་ནམ་ཤོར་མ་གོ་དུས་ཚར་ནི་རེད། དེ་དུས་བསྔོ་བ་བྱེད་ཡེ་ཅི་ཡོད་མི་བྱེད་ཡེ་ཅི་ཡོད་ཨོ་ཕ་བོ། ཁོ་བོ་དེ་ལྟར་མ་ཡིན་པར་ཡུན་རིང་པོར་མཉམ་བཞག་གི་ས་ཟིན་གི་ཟེར་བ་ནི་གཅིག་ལྷ་མི་དགའ་ན་ཤོག་དང་མཉམ་དུ་བགྲོ་གླེང་བྱེད་ཡ། དེ་མིན་ཡུན་ཐུང་ཐུང་མི་འདུག་ཐུབ་ནི་མ་རེད། བཅད་འགྲོ་ནི་རེད་རྣམ་རྟོག་ཤར་དགོས་ནི་རེད། དཔེར་ན་རྒད་པོ་ཞིག་གིས་བོའུ་ལོ་ཁུར་ནས་འཕྱི་བདའ་ལ་སོང་ན་འཕྱི་བ་ཁུང་སྒོར་འབུད་མ་བཅུག་ན་ཅི་ཞིག་སོད། མ་སོད་ན་ཅི་ཞིག་ཟ། དེ་བཞིན་དུ་རྣམ་རྟོག་ཤར་དགོས་ནི་རེད། རྣམ་རྟོག་འཆར་མ་བཅུག་ན་ཅི་ཞིག་གྲོལ། མ་གྲོལ་ན་ཅི་ཞིག་བསྒོམ། མ་གྲོལ་ན་སངས་རྒྱས་ནི་མ་རེད། ཁྲེགས་ཆོད་ལམ་ཤར་གྲོལ་ཐོད་རྒལ་ལམ་འོད་སྣང་རེད། སྡེ་གཞན་ ཞིག་ཡིན་ན་འདོད་ཆགས་སོགས་དུག་གསུམ་གྱི་རྟོག་པ་ཆེར་ཤར་འཇུག །དབུལ་བོའི་ལག་མཐིལ་དུ་ནོར་བུ་རྙེད་པ་ལྟར་རྒྱབ་རི་བྲག་རི་འདྲ་བ་བླ་མ་དཀོན་མཆོག་གསུམ་ཡོད་ནི་རེད། དེ་ཚེ་བླ་མ་ལ་གསོལ་བ་བཏབ་ནས་མཉམ་པར་བཞག་ན་འདོད་ཆགས་བདེ་སྟོང་དུ་གྲོལ་འགྲོ་ནི་རེད། དེ་ལ་སོགས་རྣམ་རྟོག་ཤར་ཚད་ཐམས་ཅད་ཤར་གྲོལ་དུ་སོང་ན་རྫོགས་ཆེན་ལམ་སྣེ་ཟིན་ཡོང་ནི་རེད་ཨེ་གོ། ཨེ་སྒྲུབ་ཁྱེད་ཚོས་ཤེས། དེང་སང་ལ་ལས་ཉམས་ལེན་བྱེད་མདོག་བྱེད། བཤད་བཅུག་ན་མགོ་ན་སྐྱབས་སེམས་མེད་མཇུག་ན་བསྔོ་བ་མེད་ཐུགས་ཡིད་བསྲེ་མི་དགོས་རྒྱ་རྒན་ཚོང་བ་ཧ་རྡིབ་ནི་འདྲ་འདྲ། སྤྲང་པོ་ཚོས་ངལ་གསོ་ནི་འདྲ་འདྲ་ཧད་དེ་བལྟས་བསྡད་ནི་གི་ཉེ་ལམ་རྫོགས་པ་ཆེན་པོ་ཕར་ཞོག་སངས་རྒྱས་པའི་རྒྱུ་ཙམ་ཡང་ཨེ་ཡིན་མི་གོ། དེ་ལས་ཆོས་ཕུང་བརྒྱད་ཁྲི་བཞི་སྟོང་གི་ཡང་སྙིང་ཆོས་ཀྱི་རྒྱལ་པོ་ཡི་གེ་དྲུག་མ་བཟླས་བརྗོད་ཡག་པོ་རེ་བྱས་ན་དེའི་དུམ་པ་མི་དགའ་ན། ཨོ་ཕ་བོ་ལ་ལས་རྣམ་རྟོག་འཕྲོ་མི་འཇུག་པར་མིག་རྩ་ཚོ་དམར་ལོང་ལོང་མ་སོང་བར་བཀག །རྣམ་རྟོག་གཅིག་ཤར་ན་བློ་མ་བདེ་ཟིང་ཟིང་སོང་། ཐུན་གྲོལ་ཚེ་རྒྱུད་ཚོ་རྩུབ་ཧྲག་གེ། ཤེས་པ་ཚོ་ཁྲོ་ལང་ངེ་ཡོད་རྒྱུ་དེས་ཅི་ལོ་ནི་མ་རེད། ངའི་ཁ་ལ་ཉན་ན་སྦྱོར་དངོས་རྗེས་གསུམ་ཚང་བའི་ཐུན་གྲངས་མང་རེ་ཆོད་དང་དེ་ཅིག་ཡག་ནི་རེད། མ་ཉན་ན་ས་ཐག་རིང་ཐུང་ཀུན་ནས་འདིར་ང་ལ་ནོག་བཙོ་ནི་ལ་འོང་ནི་ཨི་ཡིན། འདུག་བཅུག །ཁ་དྲོ། བླ་མ་བསྟེན་ནས་བཟུང་སྟེ་ཅི་གསུང་གི་བཀའ་ཅི་བཞིན་དུ་མ་བསྒྲུབ་པས་བཀའ་བཅག་ན་དམྱལ་བ་ལ་འགྲོ་བའི་རྒྱུའི་གཙོ་བོ་ཡིན་པས་སྡིག་པའི་སྟེང་དུ་སྡིག་པ་ཁུར་ནི་ལ་འདིར་ཅི་ལ་འོང་ནི་ཡིན། བེད་ཅང་ཡོད་ནི་མ་རེད། དེ་ལས་རང་ཁྱིམ་གི་བུད་ནས་བཟུང་ཅི་གསུང་གི་བཀའ་ཅི་བཞིན་དུ་སྡོད། སྨྱུང་གནས་རྡོག་རེ་བསྲུང་ཐུབ་ན་རབ། མིན་ཀྱང་མ་ཎི་ཐོན། སྡིག་པ་ལ་འགྱོད་བཤགས་བྱས་ཏེ་སྡོད། ཁ་དྲོ་སྐུ་ཚེ་རིང་། ༀ་བཛྲ་ས་ཏྭ་ཧཱུྃ། བན་རྒན་ཆ་ག་ཁྱེད་རྣམས་ལ་ཁྱད་གསོད་ལྷ་ཡིན་ན། གོ་ན་དྲང་གཏམ་ཡིན། ཤི་ཟས་ཟ་བ་འདི་ནི་བར་དོའི་ཡིད་ལུས་ལ་མངོན་ཤེས་ཕྲན་བུ་ཡོད་པས་ཅི་བསམ་གོ། བསམ་ཉེས་རེ་བྱས་ན་རང་གཞན་གཉིས་ལ་གནོད་འགྲོ་ནི་རེད། དེ་བས་བདེ་སྡུག་གཏོང་ལེན་རེ་བྱས་ན་བཟང་། རང་གི་སྤྱི་བོར་བླ་མ་བསྒོམ་བཞིན་པའི་ངང་ནས་རང་གི་དུས་གསུམ་དུ་བསགས་པའི་དགེ་བ་འོད་དཀར་པོའི་རྣམ་པར་ཐོན། དེ་ཚེ་འདས་སོགས་སེམས་ཅན་ཐམས་ཅད་ཀྱི་སྙིང་གར་ཐིམ། དེ་རྣམས་བདེ་བ་དང་ལྡན་པར་བསམ། ཚེ་འདས་སོགས་དེ་རྣམས་ཀྱི་རྒྱུད་ལ་ཡོད་པའི་སྡིག་སྒྲིབ་ཐམས་ཅད་འོད་ནག་པོའི་རྣམ་པར་བྱུང་ནས། རང་གི་ཐོག་མེད་ནས་ད་བར་ང་མེད་ངར་བཟུང་བ་བདག་མེད་ལ་བདག་ཏུ་འཛིན་པའི་ངར་འཛིན་ཐིག་ལེ་ནག་པོའི་རྣམ་པར་སྙིང་དཀྱིལ་ན་གནས་པ་དེ་ལ་ཕོག་མ་ཐག་ཏུ་གཏོར་ནས་གར་ཡལ་ཆ་མེད་དུ་གྱུར་ཏེ་བླ་མས་གསུངས་པའི་ཉམས་ལེན་གྱི་ངང་དུ་བཞག་ན་མིའི་གདན་ཐོག་ནས་རང་གི་སྒྲིབ་པ་སྦྱོང་ཟེར་བ་དེ་རེད། དེ་ཅིག་ཡག་ནི་རེད། ཅེས་གསུངས་སོ། །དགེའོ། །བཀྲ་ཤིས་པར་གྱུར་ཅིག ། བསྒྲུབ་བྱ་མཐར་ཐུགབསྒྲུབ་བྱ་མཐར་ཐུག་ནི། རང་བྱུང་གདོད་མའི་ཡེ་གཞི་འོད་གསལ་འདུས་མ་བྱས་སྐྱེ་རྒ་གནས་འཇིག་དང་བྲལ་བའི་བདག་ཉིད། རྒྱུ་ལས་མ་བྱུང་བའི་འབྲས་བུ། སེམས་ལས་མ་བྱུང་བའི་སངས་རྒྱས། ལུང་ལས་མ་བྱུང་བའི་མན་ངག རང་བྱུང་གི་ཆོས་གསུམ་དང་ལྡན་པ། རྒྱུ་རྐྱེན་ལས་འདས་པ། སྐུ་གསུམ་འདུ་འབྲལ་མེད་པའི་རིག་པ་དེ་ཉིད་ཀྱི་ཐུགས་གྲུབ། རྩ་དབུ་མ་དེ་ལ་ཕྲ་རགས་གཉིས་ཕྱེ་ནས་ཕྲ་བ་དེ་ཉིད་འོད་ཀྱི་རང་བཞིན་འདུས་མ་བྱས་པ་ལུས་གནས་རང་བྱུང་ལུས་ལས་མ་སྐྱེས་པ་ཡིན་པས་བ་སྤུའི་ཆ་ཐམས་ཅད་འོད་རྩ་དེ་ཡིས་ཁྱབ་ཡོད། དྭངས་མའི་དེ་ཉིད་རྟོགས་ཚེ་སྐུ་གྲུབ། འབད་རྩོལ་ལས་འདས་པ་ཡེ་ཤེས་ཀྱི་རླུང་དེ་ཉིད་འདུས་མ་བྱས་པ་རྒྱུ་རྐྱེན་གྱིས་མ་བསྐྱེད་པ་བརྗོད་མེད་བརྗོད་པ་ཆེན་པོ་དེ་ཉིད་ཀྱི་གསུང་གྲུབ་པ་ཡིན་གསུངས། དེ་གསུམ་ནི་དབྱེར་མི་ཕྱེད་པའི་བདག་ཉིད་ཅན་ནོ། །དེ་དག་སྒྲིབ་བྱེད་ནི་གཟུང་འཛིན་གྱི་རྟོག་པས་རིག་སྟོང་གི་ཆ་བསྒྲིབ། སྙིགས་མའི་ཤ་ཁྲག་གིས་འོད་ལུས་བསྒྲིབ། ལས་རླུང་དང་ཉོན་རླུང་གིས་ཡེ་ཤེས་ཀྱི་རླུང་བསྒྲིབ་པ་ཡིན། སྒྲིབ་བྱེད་ཀྱི་ཆ་དེ་གསུམ་དག་པ་ན་གཟེར་བུ་རྣམས་ཐེབས་པ་ཡིན་གསུངས་སོ། །སྒྲིབ་པ་ནི་གློ་བུར་བ་འདུས་བྱས་མི་རྟག་པ་མི་བརྟན་པའོ། ། ༈ ཡུལ་གསུམ་གྱད་དུ་གྱུར་བ་ནི། ཡིད་ཀྱི་ཡུལ་དུ་གྱུར་པ། དབང་པོའི་ཡུལ་དུ་གྱུར་པ། ཡུལ་གྱི་ཡུལ་དུ་གྱུར་པ་སྟེ། དང་པོ་ཡིད་ཀྱི་ཡུལ་དུ་གྱད་དུ་གྱུར་པ་ནི། རྒྱལ་བའི་བཀའ་ཚད་མ། བླ་མའི་མན་ངག་ཚད་མ། རང་གི་རིག་པ་ཚད་མ་གསུམ་གྱི་སྒོ་ནས་ཕྱི་སྣོད་གཞལ་ཡས་ཁང་དང་ནང་བཅུད་སེམས་ཅན་རྣམས་སྣང་གྲགས་རིག་གསུམ་ལྷ་སྔགས་ཆོས་ཉིད་ཀྱི་རང་བཞིན་ཡིན་པ་དང་པོ་ངེས་ཤེས་སྐྱེས། བར་དུ་ངེས་ཤེས་བརྟན། ཐ་མར་འཁྲུལ་འཛིན་ལས་ལོག །དེ་ལྟར་ཐག་ཆོད་པ་ཡིད་ཀྱི་ཡུལ་དུ་གྱུར་པ་ཡིན། གཉིས་པ་དབང་པོའི་ཡུལ་དུ་གྱད་དུ་གྱུར་པ་ནི་འདི་ནི་ལྷའོ་སྔགས་སོ་ཆོས་ཉིད་དོ་བསམ་པའི་གཟུང་བའི་ཡུལ་དང་དེ་ལྟར་དུ་ཐག་བཅད་པ་འཛིན་པ་སེམས་དང་། ཡུལ་ཡུལ་ཅན་དུ་འཛིན་པའི་ཤེས་པ་གཞི་དབྱིངས་སུ་དྭངས་ཚེ། ཐ་མ་ངེས་ཤེས་དག་པ་ཡིན་པས་དེ་དུས་ལྷ་གསལ་ཞེ་ན་ཡུལ་ཡུལ་ཅན་དུ་འཛིན་པའི་ཤེས་པ་རང་དྭངས་ལ་སོང་། མ་གསལ་ཞེ་ན་སྒོ་ལྔའི་གདངས་མ་འགགས་པ་རང་ཡན་ཚོགས་དྲུག་དུས་གཅིག་ལ་སོ་སོར་བཀྲ་ལམ་མེར་སྣང་བ་དབང་པོའི་ཡུལ་དུ་གྱུར་པ་ཡིན། དེ་ཉིད་ལ་གདངས་ཐོབ་དགོས་སོ། །གསུམ་པ་ཡུལ་གྱི་ཡུལ་དུ་གྱད་དུ་གྱུར་པ་ནི། དེ་ལྟར་དུ་གོམས་པའི་ཚེ་མཐར་དཔེར་ན་ཚངས་པ་རལ་པ་ཅན་གྱི་གཟིགས་ངོར་ལྟ་བུ་མངོན་སུམ་དུ་སྣོད་བཅུད་ཞིང་དང་གཞལ་ཡས་ཁང་སྐུ་དང་ཡེ་ཤེས་ཀྱི་རང་བཞིན་དུ་སྣང་བ་ནི་ཡུལ་གྱི་ཡུལ་དུ་གྱུར་བའོ། །རྣམ་པར་སྨིན་པའི་རིག་འཛིན་གྱི་སྐབས་སུ། ས་ཆུ་སྤྱན་དང་མ་མཱ་ཀི། །མེ་རླུང་གོས་དཀར་དམ་ཚིག་སྒྲོལ། །ནམ་མཁའ་དབྱིངས་ཀྱི་དབང་ཕྱུག་མར། །ཞེས་པ་ལྟ་བུའོ། །འཕགས་པ་ཀླུ་སྒྲུབ་ཀྱིས། ཤེས་པ་གསུམ་པོ་གཅིག་ཉིད་དུ། །འདྲེས་པར་གྱུར་པ་བདག་སྨྲའོ། །ཞེས་རང་སྣང་དབྱིངས་སུ་དག་པ། དབྱིངས་སྣང་ཆོས་ཉིད་དུ་དག་པ། དབྱིངས་དང་ཡེ་ཤེས་གཉིས་མེད་འདྲེས་པ། འོག་མིན་རང་སྣང་དུ་གྲུབ་པའོ། ༈ །མཐར་ཐུག་གི་ཆོས་ཉིད་བར་དོའི་སྐབས་སུ་ཕྱི་གསལ་གྱི་ཤེས་པ་ནང་དུ་ལྡོག །ནང་གསལ་དཔྱོད་བྱེད་ཀྱི་ཤེས་པ་གཞི་ཐོག་ཏུ་དྭངས་པའམ་ཐིམ་པ་ཞེས་པའོ། །མ་རྨུགས་པ་ཞེས་པ་ནི་ཕྲ་བའི་ཡེ་ཤེས་དེ་ཉིད་རྟོག་མེད་ཀྱི་ཚུལ་དུ་མ་འགགས་པར་ཕྱམ་བརྡལ་དུ་སྣང་བ་ཡིན་གསུངས། གཞི་དེ་ལས་ལྡང་བའི་ཚེ་སྐུ་གསུམ་གྱི་སྟོན་པའི་སྐུར་བཞེངས་པ་ཡིན་གསུངས་སོ། ༈ །དཔེར་ན་རྒྱ་མཚོ་རླབས་དང་བྲལ་བའི་ཆ་རིག་པ་ལྟ་བུ། རླབས་དེ་ཉིད་རླུང་གིས་བསྐྱོད་ནས་བྲལ་བའི་ཆོས་ཅན་དུས་གསུམ་གྱི་རྟོག་པ་ལྟ་བུ་ཡིན། གནད་རྟོགས་པའི་ཚེ་རླབས་ཉིད་རྒྱ་མཚོ་ལས་བྱུང་སླར་ཆུ་ལ་ཐིམ་པས་སྤང་བླང་མེད་པ་ཡིན་ནོ། ༈ །ཡང་དཔེར་ན་རྒྱ་མཚོ་དྭངས་པ་ཁ་གཏིང་མེད་པ་ལྟ་བུ་རིག་པའི་ཆའོ། །དྭངས་བའི་དཀྱིལ་དུ་རྡོ་འཕང་པའི་ཚེ་རིམ་བཞིན་དུ་རི་མོ་རྣམས་སྐད་ཅིག་ཀྱང་ཚུགས་མི་ཐུབ་པར་རང་གྲོལ་དུ་སོང་བ་ལྟ་བུ་དེ་བཞིན་དུ་ཤར་ཆ་རྣམས་རང་གྲོལ་ཡིན་གསུངས་སོ། ༈ །མདོ་པདྨ་དཀར་པོ་ལས། བྱིས་པའི་རྩེད་མོར་དེ་དང་དེ་དག་ཏུ། །གང་གིས་རྒྱལ་བ་དེའི་ཕྱིར་མཆོད་རྟེན་དག །བྱེ་མ་ལས་ནི་ཕུང་པོ་བྱས་པ་ཡང་། །དེ་རྣམས་ཀྱིས་ཀྱང་བྱང་ཆུབ་ཐོབ་པར་འགྱུར། །གང་གིས་རྩིག་ངོས་གཟུགས་ཀྱི་རི་མོ་དག །བསོད་ནམས་རྒྱལ་མཚན་ཡོངས་སུ་རྫོགས་པའི་སྐུ། །བདག་གིས་བྲིས་སམ་འབྲི་རུ་བཅུག་ཀྱང་རུང་། །དེ་དག་ཐམས་ཅད་བྱང་ཆུབ་འཐོབ་པར་འགྱུར། །སྐྱེས་བུ་དག་གམ་འོན་ཏེ་གཞོན་ནུའང་རུང་། །གང་དག་ལ་ལ་དེ་ནི་སློབ་པའི་ཚེ། །རྩེད་མོ་དགའ་དང་བསད་པར་བྱེད་པ་ནི། །རྩིག་ངོས་སེན་མོ་ཤིང་བུས་གཟུགས་བྲིས་པ། །དེ་དག་ཐམས་ཅད་བྱང་ཆུབ་ཐོབ་འགྱུར་ཏེ། །དེ་དག་ཐམས་ཅད་སྙིང་རྗེ་ཅན་དུ་འགྱུར། ༈ །དཀོན་མཆོག་གི་ཟ་མ་ཏོག་ལས། ཇི་ལྟར་དུ་ངར་འཛིན་པ་དང་། ང་ཡིར་འཛིན་པ་ལ་མངོན་པར་བརྩོན་པ་དེ་སྲིད་དུ་མངོན་པའི་ང་རྒྱལ་ལོ་གསུངས། ༈ །ཡེ་གྲོལ་ནི། རིག་སྟོང་ཟུང་འཇུག་སྐུ་གསུམ་འདུ་འབྲལ་མེད་པའི་རིག་པ་དེ་ཉིད་བྱ་བས་མ་བྱས་རྩོལ་བས་མ་བསྒྲུབས་པར་རང་བྱུང་གི་ཆོས་གསུམ་དང་ལྡན་པ། རང་བྱུང་གདོད་མའི་ཡེ་གཞི་དེ་ཉིད་ཡེ་གདོད་མ་ནས་གྲོལ་གཞི་རྡུལ་ཙམ་མེད་པ་ཡིན། ཡེ་གྲོལ་ཞེས་པའི་དོན་ཉིད། གང་ཟག་རྣམས་ད་གཟོད་འབད་པས་གྲོལ་བ་མིན་པའི་དོན་ནོ། །ཡེ་ཤེས་ཀྱི་རང་གདངས་ཀྱི་ཕྱིའི་སྣང་ཆ་འགགས་ཀྱང་གསལ་ཆ་མི་འགག་པས་ཡེ་གྲོལ། ཐུགས་རྗེའི་རིག་གདངས་ལས་ཇི་ལྟར་ཤར་ཡང་ཡེ་ཤར་ཡེ་གནས་ཡིན་པས་གནས་བྱ་གནས་བྱེད་བྲལ་བའི་ཡེ་གྲོལ་གྱི་རང་བཞིན་ཡིན། ཉོན་མོངས་པ་བརྒྱད་ཁྲི་བཞི་སྟོང་ཡང་། དཔེར་ན་བྱ་བརྒྱད་ཁྲི་བཞི་སྟོང་གི་རྐང་པ་ལ་ཚོན་སྣ་མང་པོ་བསྐུས་ནས་བྱ་དེ་དག་རྣམས་བར་སྣང་ལ་འཕུར་ཚེ་ཚོན་རྗེས་མི་དོད་པ་ལྟ་བུ། དེ་བཞིན་དུ་ཡེ་ནས་ཤར་ཆ་རྣམས་ཡེ་གྲོལ་གྱི་རང་བཞིན་ཡིན་པར་ཐག་བཅད་པའོ། ༈ །རང་གྲོལ་ནི། རིག་སྟོང་ཟུང་འཇུག་གི་ཀློང་དེ་ན་སྣང་གྲགས་རིག་གསུམ་ལྷ་སྔགས་ཆོས་ཉིད་ལས་མ་འདས་པ་ཡིན་པས་ཕྱི་ནང་སྣོད་བཅུད་དང་། དུས་དང་གསང་བ་ཉོན་མོངས་པའི་རྟོག་ཚོགས་ཤར་བ་ཐམས་ཅད་རང་གྲོལ་བའི་ཆོས་ཅན་གཉེན་པོ་བསྟེན་ལོང་མེད་པར་རང་ཚུགས་མི་ཐུབ་པར་རང་གྲོལ་ཡིན་ཏེ། ཀློང་ཆེན་པས། ཤར་བའི་ཚེ་ན་མཉམ་ཤར་རང་ས་ཟིན། །གནས་པའི་ཚེ་ན་མཉམ་གནས་རང་ས་ཟིན། །གྲོལ་བའི་ཚེ་ན་མཉམ་གྲོལ་རང་ས་ཟིན། །ཞེས་གསུངས་སོ། ༈ །རྒྱ་གྲོལ་ནི། རིག་སྟོང་ཟུང་འཇུག་གི་ཀློང་ན་འཁོར་འདས་ཀྱི་ཆོས་རྣམས་སྤང་བླང་མེད་པར་ཐམས་ཅད་མཉམ་ཉིད་ཁྱབ་བརྡལ་དུ་རྟོགས་པ་ལ་རྫོགས་པ་ཆེན་པོར་མ་གྲོལ་བ་མེད་པས་ནས་རྒྱ་གྲོལ་ཞེས་སོ། །དྷ་ཀི་བཛྲ་གྱིས། རྒྱ་གྲོལ་རྣལ་འབྱོར་ནམ་ལངས་ཉི་ཤར་འདྲ། །ཆོས་སྐུའི་སྣང་བ་ཡིན་ནོ་ཨེ་མ་ཧོ། །ཞེས་གསུངས་སོ། ༈ །ཅེར་གྲོལ་ནི། རིག་སྟོང་གི་ལྟ་བའི་ངང་དེར་ཆོས་ཅན་གྱི་སྣང་བ་ཐམས་ཅད་ཆོས་ཉིད་ཀྱི་ཀློང་དུ་ཕྱམ་བརྡལ་དུ་རྟོགས་ཀྱང་། རྗེས་ཐོབ་ཀྱི་སྐབས་སུ་ཡུལ་རྐྱེན་དང་འཕྲད་པའི་དུས་སུ་ཡུལ་སྐད་ཅིག་ལ་ཁོལ་བུར་བཟུང་ཡང་། བླ་མ་དྲན་པ་དང་མིག་གིས་བལྟ་སྟངས་དང་། ལུས་གནད་བསྲིང་བ་ཙམ་ཉིད་ནས་ལྟ་ཐོག་ཏུ་ཕྱིན་པས་ན་ཅེར་གྲོལ་ཡིན་ཏེ། ཐོག་བབས་ཆེན་པོའི་ལྟ་སྟངས་ཀྱིས། །ཅེར་གྱིས་བལྟས་པས་མཐོང་སར་ཡལ། །ཅེས་སོ། ༈ །མཐའ་གྲོལ་ནི། ངོ་བོ་བརྗོད་དུ་མེད་པ་ཀ་དག་ཡེ་སྟོང་སྤྲོས་པ་དང་བྲལ་བས་རྟག་པའི་མཐའ་ལས་གྲོལ། ཡེ་ཤེས་ཀྱི་གདངས་འགགས་པ་མེད་པས་ཆད་པའི་མཐའ་ལས་གྲོལ། ཐུགས་རྗེ་ཟུང་དུ་འཇུག་པས་གཉིས་ཀྱི་མཐའ་ལས་གྲོལ། གཅིག་དང་དུ་མའི་མཐའ་ལས་གྲོལ་བས་ན་མཐའ་གྲོལ་ཡིན་ནོ། ༈ །ཡོངས་གྲོལ་ནི། ལྷག་ལུས་མེད་པར་གྲོལ་བས་ཡོངས་གྲོལ་ཡིན་གསུངས་སོ། ། ཕྱག་ཆེན་སྙིང་པོའི་ལུགས་སུ་ཁྲིད་ཚུལ།ཕྱག་ཆེན་དེ་ལ་མདོ་ལུགས་སུ་ཁྲིད་པ། སྔགས་ལུགས་སུ་ཁྲིད་པ། སྙིང་པོའི་ལུགས་སུ་ཁྲིད་པ། ཟུང་འཇུག་དུ་ཁྲིད་ཚུལ་འདི་བརྩིས་ན་བཞི་ཡོད་དོ། །དེ་དག་ལས་མདོ་ལུགས་སུ་ཁྲིད་པ་ནི་ས་བཅུ་ལམ་ལྔ་དང་སྦྱར་ནས་རྣལ་འབྱོར་བཞིའི་ཚུལ་གྱིས་འཇུག་པ་ཡིན། སྔགས་ལུགས་སུ་ཁྲིད་པ་ནི་སྔགས་བླ་མེད་སྤྱིའི་ཚུལ་དང་མཐུན་པར་བསྐྱེད་རྫོགས་ཀྱི་ལམ་ནས་སྟོང་བཞིས་དྲངས་བའི་འོད་གསལ་དང་། དགའ་བཞིས་དྲངས་བའི་ཡེ་ཤེས་ལ་བསླབ་པ་ཡིན། སྙིང་པོའི་ལུགས་སུ་ཁྲིད་པ་ནི་ཁྲེགས་ཆོད་དང་ཕྱོགས་མཐུན་པར་བསླབས་པ། འདིར་ནི་སྙིང་པོའི་ལུགས་སུ་ཁྲིད་པ་ཡིན་ཏེ། གནས་འགྱུ་རིག་གསུམ་ཙམ་ལ་ཉམས་ལེན་བྱེད་ཐུབ་མཐར་ཆོས་ཉིད་ཀྱི་བདེན་པ་མཐོང་བ་ཡིན་ཀྱང་། དེའི་ཚུལ་མི་ཤེས་པའི་གང་ཟག་གིས་ཁོ་བོས་གནས་འགྱུ་རིག་གསུམ་ཙམ་ལས་ཅང་མི་ཤེས་ཟེར་ནས་རྩིས་མེད་བྱེད་ཀྱང་། གནས་འགྱུ་རིག་གསུམ་གྱི་ལམ་གནད་ཡང་དག་པར་ཟིན་ན་ཕ་རོལ་འཕགས་པའི་ལམ་ལ་སྦྱོར་བར་བྱེད་ནི་རེད། དེ་ལས་ལྷག་པའི་ལམ་ཡང་དག་ཅི་དགོས། མཐོང་ལམ་ཆོས་ཉིད་ཀྱི་བདེན་པ་མཐོང་བའི་གནད་ནི། སྒོམ་པ་པོ་གང་ཟག་གི་རྒྱུད་ན་སེམས་ཀྱི་ཆོས་ཉིད་བདེ་གཤེགས་སྙིང་པོ་ཡོད་པའི་གནད་ཀྱིས་ཡིན། འདི་ལ་མིང་གི་རྣམ་གྲངས་མདོ་ན་ཁམས་བདེ་བར་གཤེགས་པའི་སྙིང་པོ། སྔགས་ལྟར་བླ་མེད་སྤྱི་ན་གཉུག་མའི་སེམས་དང་། སྟོང་བཞིས་དྲངས་པའི་འོད་གསལ་སོགས་དང་། ཕྱག་ཆེན་ན་གཉུག་མ་ལྷན་ཅིག་སྐྱེས་པའི་ཡེ་ཤེས། རྫོགས་ཆེན་ན་རང་བྱུང་གི་ཡེ་ཤེས་ཞེས་བསྟན་པའི་དོན་དེ་ཉིད་མན་ངག་ཁྱད་པར་ཅན་གྱི་སྒོ་ནས་སད་པར་བྱེད་པ་ཡིན་ཏེ། འདི་ལྟར་ཆོས་ཐམས་ཅད་ཀྱི་རྩ་བ་སེམས་ལ་ཐུག་པ་ནི། ཁམས་གསུམ་གྱི་བྱེད་པ་པོ་སེམས་ཡིན་པས། དེ་ཡིན་ཚུལ་ནི། མ་རིག་བདེན་འཛིན་དེས་མ་དྲངས་བའི་ཉོན་མོངས་པ་ཞིག་ཤེས་བྱ་ལ་མི་སྲིད། ཉོན་མོངས་པ་མེད་ན་ལས་བསགས་པ་ཡང་ཤེས་བྱ་ལ་མི་སྲིད། ལས་མ་བསགས་ན་འགྲོ་དྲུག་གི་འཁྲུལ་བའི་སྣང་བ་ཤེས་བྱ་ལ་མི་སྲིད་ནི་རེད། དེས་ན་མ་རིག་བདེན་འཛིན་གྱིས་དྲངས་པའི་དུས་གསུམ་ཡིད་ཀྱི་འཁྲུལ་བ་འདི་ལས་འཁོར་བ་ལོགས་ན་མེད། མ་རིག་བདེན་འཛིན་གྱིས་དྲངས་པའི་དུས་གསུམ་ཡིད་ཀྱི་འཁྲུལ་བ་ཞི་བ་ལས་མྱང་འདས་ལོགས་ན་མེད་ཚུལ་ཤེས་དགོས་གསུངས། མདོར་ན་མ་རིག་བདེན་འཛིན་འདི་སྒྱུ་མ་མཁན་ལྟ་བུ། འཁྲུལ་སྣང་འདི་དག་སྒྱུ་མ་མཁན་གྱིས་སྤྲུལ་པའི་གྲོང་ཁྱེར་ལྟ་བུ་ཡིན་ཚུལ་གསུངས་པའི་དོན། མི་ཕམ་རིན་པོ་ཆེའི་བསྟན་བཅོས་ཁྱི་རྒན་གསེར་སྐྱུགས་དུ་ལུང་དང་རིགས་པ་དུ་མའི་སྒོ་ནས་ཚུལ་དེ་དང་མཐུན་པར་གསུངས། སྒྱུ་མ་མཁན་སོད་ན་སྒྱུ་མའི་གྲོང་ཁྱེར་ལྡོག་པ་བཞིན་དུ། སེམས་ཀྱི་ཆོས་ཉིད་འོད་གསལ་སྟོང་པ་ཆེན་པོའི་དོན་རྟོགས་ནས། མ་རིག་བདེན་འཛིན་འདི་སོད་ན་འཁྲུལ་བའི་སྣང་ཆ་ལྡོག་པ་ཡིན། འཁྲུལ་སྣང་འདི་དག་ཡོད་རིང་ལ་རྒྱུས་འབྲས་བུ་ལ་བྱ་བ་བྱེད་པ་དང་། འབྲས་བུ་རྒྱུ་ལ་ལྟོས་དགོས་པས་ལས་འབྲས་བསླུ་མེད་འདི་འཁྲུལ་སྣང་དབྱིངས་སུ་མ་ལྡོག་བར་དུ་ཡོད་པས། འགྲོ་བ་རིགས་དྲུག་གི་ཆུ་གཅིག་ལ་ལས་སྣང་གིས་མཐོང་ཚུལ་མི་འདྲ་བ་དྲུག་ཏུ་སྣང་བ་འདི་རྒྱུ་མེད་རྐྱེན་མེད་དུ་སྣང་བ་མ་ཡིན་པས། ལས་སྣང་མ་ཟད་བར་དུ་གནས་ཚུལ་ཇི་བཞིན་མི་མཐོང་། ཕྱིན་ཅི་ལོག་གི་ལས་སྣང་འདི་དག་ཐོག་མའི་གཞི་དང་མཐར་ཕྱིན་འབྲས་བུའི་དུས་ན་མེད་པའི་འཁྲུལ་སྣང་འདི་དག་མེད་སྣང་སྟོང་པའི་རང་གཟུགས་སྟོང་གཟུགས་ཉག་གཅིག་ཡིན་པར་ཤེས་དགོས། འབྲས་བུའི་དུས་ན་འཁྲུལ་སྣང་འདི་དག་མེད་ཚུལ་མདོ་སྔགས་གང་ཡིན་ཀྱང་མཐུན་ནོ། །ཐོག་མའི་གཞི་ཞེས་པ་ནི་ལུས་ཅན་རྣམས་འཆི་བའི་ཚེ་སྔ་མའི་རླུང་སེམས་བསྡུས་ཟིན། ཕྱི་མའི་རླུང་སེམས་མ་མཆེད་པའི་འོད་གསལ་ལ་ཟེར། སེམས་ཀྱི་གནད་གསང་ཆོས་ཉིད་འོད་གསལ་བའི་རིག་པ་འདི་རྟོགས་ན་ཆོས་ཐམས་ཅད་ལ་མཁས་ཤིང་བདག་མེད་གཉིས་རྟོགས་ཀྱི་དོན་ཚང་བ་རང་ལུགས་སུ་བཞེད་པའོ།། འདིར་རིགས་དཔྱད་མང་པོ་དོར་ཏེ་ཞེས་ཁ་མཚམས་བཅད་པ་ནི་མན་ངག་སྒོམ་པའི་ལུགས་འདིའི་སེམས་ཀྱི་གནད་གསང་རྟོགས་ཚུལ་བསྟན། སྤྱིར་ཐོས་བསམ་ལྟ་བའི་ལུགས་ཀྱི་ལྟ་བ་གཏན་ལ་འབེབས་ཚུལ་ནི་རིགས་དཔྱད་མང་པོའི་སྒོ་ནས་ཐུན་མོང་ཕྱི་ནང་གི་སྔོན་འགྲོ་ནས་བཟུང་དངོས་གཞིའི་བར་དང་། དངོས་གཞི་ངོ་སྤྲད་ནས་མཉམ་བཞག་དུ་འཇོག་སྒོམ། རྗེས་ཐོབ་ཏུ་དཔྱད་སྒོམ་བྱས་ནས་ཆོས་དང་ཆོས་མིན་གྱི་རྣམ་དབྱེ་འབྱེད་པའི་ཤེས་རབ་ལྷག་མཐོང་དྲངས་པ་ཡིན་པས། འཇོག་སྒོམ་དཔྱད་སྒོམ་གཉིས་བྱ་ཕོ་མོའི་གསོ་རེས་ལྟ་བུ་ཡིན་ཚུལ་གསུངས། གོམས་པ་ཀློང་དུ་གྱུར་དུས་འཇོག་སྒོམ་ཁོ་ནས་ཆོག །བློ་རྩིང་ནས་ཁ་ཕྱིར་མི་བསྐོར་བར་ཁ་ནང་དུ་ཕྱོགས་ནས་སེམས་ཀྱི་གནད་གསང་ལ་བལྟས་པའི་ཚེ་གནས་པའི་ཐབས་ལ་སྤྱིར་དམིགས་པ་རྟེན་བཅས་དང་རྟེན་མེད་གཉིས། མཚན་བཅས་དང་མཚན་མེད་གཉིས་ཡོད་པས་ཞི་གནས་རབ་ཏུ་ལྡན་པའི་ལྷག་མཐོང་གིས། །ཞེས་གསུངས་པས་ན། ཞི་གནས་སྔོན་དུ་འགྲོ་བའི་ཁྲིད་ཚུལ་ཡོད་པར་གསུངས་ཀྱང་། འདིར་ཐོག་མ་ནས་ཞི་ལྷག་ཟུང་འབྲེལ་ཡིན། མདོ་སྔགས་གང་གི་ལུགས་ལའང་ཞི་ལྷག་ཟུང་དུ་མ་འབྲེལ་བའི་ལྟ་བ་རྣམ་དག་ཞིག་མེད། གནས་པའི་ཐབས་གདམས་ངག་ཐམས་ཅད་ཀྱི་རྒྱལ་པོ་ནི་དད་པ་ཁོ་ན་ཡིན། གང་ཟག་ཐུན་མོང་ཡིན་པའི་དད་པ་ཅན་དེས་ནི་བླ་མ་དཀོན་མཆོག་གསུམ་གྱི་ཡོན་ཏན་དང་བཀའ་དྲིན་དྲན་པ་དང་། ཡང་གསང་བླ་མེད་ཀྱི་ཟབ་གནད་ཤེས་པའི་དད་པ་དེའི་སྟོབས་ལས། མ་རིག་བདེན་འཛིན་གྱིས་དྲངས་པའི་དུས་གསུམ་ཡིད་ཀྱི་འཁྲུལ་བ་དང་། ཉམས་ཞེན་གྱི་ཤུན་པ་ཐམས་ཅད་སྤྲིན་ཆེན་ནམ་མཁར་དེངས་པ་ལྟར་དབྱིངས་སུ་དེངས་ནས། རྐྱེན་དབང་དུ་མི་འགྲོ་བར་རྩེ་གཅིག་ཏུ་དགའ་སྤྲོ་དང་བཅས་པས་འཇུག་པ་ནི། དཔེར་ན་པདྨ་ཅན་གྱི་མཚོ་རུ་ངང་པ་ཞུགས་པ་དང་། དྲི་ཞིམ་པདྨོའི་ཚལ་དུ་བུང་བ་རྒྱུ་བ་ལྟར་རོ། །དེ་ལྟར་མིན་པའི་གང་ཟག་གཞན་མ་རྣམས་ཁམས་དང་མཐུན་པར་ཁྲིད་ཚུལ་ཉི་ཤུ་རྩ་གཅིག་བདུན་ལྔ་གསུམ་སོགས་བསྟན། དམིགས་པའི་རྟེན་ལ་རྣམ་རྟོག་འདོན་བྱེད་ཧཱུྃ། གཅོད་བྱེད་ཕཊ༔ བག་ཆགས་བསྲེག་བྱེད་རཾ༔ སོགས་ལ་བསླབ་ཚུལ་བསྟན། གནས་པའི་གོ་སྐབས་གཏན་ནས་མི་རྙེད་པའི་གང་ཟག་རྣམས་ལ། ལྷ་མིན་གཡུལ་འགྱེད་ཀྱི་ཁྲིད་འཇོག་ཚུལ་གསུངས། སློབ་མ་གཡོ་མེད་དྲང་པོ་རྫུན་མི་བཤད་པ་ཞིག་ཡིན་ན། བླ་མ་དེས་ཁམས་ཀྱི་རྣམ་དབྱེ་འབྱེད་ཤེས་ན། ས་ཁམས་པ་དུབ་ཆ་ཆེ་བས་དྭངས་ཆ་འདོན་དགོས། རླུང་ཁམས་པ་འཚུབས་ཆ་དང་འཕྲོ་འཐོར་ཆེ་བས་ལྷོད་ཐབས་བསྟན་དགོས། མེ༵་ཁམས་པ་དེ་རིང་གོ་ན་སང་ཉིན་གླིང་ན་མེད་པས་དེ་ལ་གང་ཡང་ཡིན་མདོག་དང་བརྟན་པའི་ཐབས་དགོས། ཆུ༵་ཁམས་པ་གཏན་ཞེན་ཆེ་བས་ཉམས་སྣང་སྣ་ཚོགས་འཆར་ནའང་། དེ་ལ་ནམ་མཁའ་ལྷས་གང་། བར་སྣང་བདུད་སྲིན་གྱིས་གང་། ས་གཞི་འདྲེས་གང་བའི་ཉམས་སྣང་ཤར་ན་ཡང་སྤང་བླང་མེད་པར་རང་སྣང་ཡིན་ཚུལ་བསྟན་ནས་རིག་ཐོག་ཏུ་སྐོར་དགོས། ནམ༵་མཁའི་ཁམས་ནི་འབད་རྩོལ་དྲག་པོ་བྱས་ཀྱང་འཆིང་ཞེན་མེད་པར་དབྱིངས་སུ་ཞིག་པར་འགྱུར་བས་རང་ལམ་ལ་བཞག་ཆོག །དེས་ན་གནས་པའི་ཚེ་དྭངས་སྙིགས་གཉིས་ཕྱེ་ནས་དྭངས་ཆ་ཐོན་དགོས། དྭངས་ཆ་ལ་གསལ་ཆ་ཐོན་དགོས། མེད་ན་བྱིང་བས་དྭངས་ཆ་སྒྲིབ། རྨུགས་པས་གསལ་ཆ་སྒྲིབ་ནི་རེད། གསལ་ཆ་ལ་ལྷོད་ཆ་ཡོད་དགོས། དྭངས་གསལ་གྱི་དབྱིངས་ལ་ཤར་ཆ་འགག་མེད་ཅིག་ཡོད་དགོས། མེད་ན་གནས་ཆ་ཡོད་ཀྱང་གྲོལ་ཆ་མེད་པའི་བསམ་གཏན་གྱི་ལྷ་དང་འདྲ་བར་གསུངས། དེས་ན་དྭངས་གསལ་གྱི་དབྱིངས་ལ་ཤར་ཆ་འགག་མེད་ཅིག་ཡོད་པ་ནི་ཕྱི་ནང་གང་དུའང་གཏན་ཞེན་གྱི་འཛིན་སྟངས་མེད་པའི་ལམ་རྟགས་ཡང་དག་ཡིན། ལས་དང་པོ་པའི་ཕན་གནོད་མེད་པའི་རྟོག་པ་རྣམས་རྗེས་མཐུད་མེད་པར་གྲོལ་ན་ལྷག་མཐོང་ཙམ་པོ་ཞིག་ཡིན། ལྷག་མཐོང་ཐམས་ཅད་ཀྱི་རྒྱལ་པོ་ནི་འོད་གསལ་བའི་རིག་པ་ལ་ཟེར། དྲན་ཤེས་ཀྱིས་རྩིས་ཟིན་པའི་ཤར་ཆ་རྣམས་རྗེས་མཐུད་མེད་པར་གྲོལ་བ་འདི་ལ་འཁྲུལ་པ་གཏན་ནས་མི་ཟེར། འཁྲུལ་བ་ཞེས་པ་ནི་ཉམས་ལེན་བརྗེད་རྗེས་འབྱམས་སུ་ཤོར་བས་ཉོན་མོངས་རང་རྒྱུད་པ་དེ་ལ་འཁྲུལ་པ་ཟེར་བ་ཡིན། དེས་ན་འགྱུ་ཆ་ལ་གྲོལ་ཆ་ཡོད་དགོས། དེ་ལྟར་གནས་འགྱུ་གཉིས་རེས་མོས་ཚུལ་དུ་ཤེས་པ་དེ་ལ་ཕྱག་ཆེན་པས་རིག་པར་བཏགས་ཀྱང་། སེམས་རིག་ལ་ཤན་འབྱེད་པའི་གཞིའི་རིག་པ་དངོས་མིན། བློ་རིག་ཤེས་གསུམ་དོན་གཅིག་མིང་གི་རྣམ་གྲངས་ཡིན་པས་རྫོགས་ཆེན་པས་འདི་ལ་དྲན་ཤེས་ཟེར། སྤྱིར་ཀུན་རྟོག་ཐམས་ཅད་ལ་གཞིའི་དབྱིངས་དང་རིག་པའི་ཁྱབ་ཆ་ཡོད་པས་རྩལ་གྱི་རིག་པ་དངོས་ཡིན། དེ་ལྟར་སྣོད་བཅུད་འདི་དག་དབྱིངས་དང་རིག་པས་ཁྱབ་ཚུལ་ཤེས་ནས་རྦ་རླབས་རྒྱ་མཚོར་བསྐོར་བའི་མན་ངག་ཐུགས་རྗེ་ཀུན་ཁྱབ་ཀྱི་རིག་པའི་དོན་ཕྱོགས་ཙམ་ཤེས་པ་ཡིན། དེ་ཡང་བྱིང་རྨུགས་སེལ་ཐབས། རྒོད་ན་ལྷོད་ཐབས། ཁམས་གསུམ་དང་སྐུ་གསུམ་གྱི་རྣམ་དབྱེ་སོགས་ཡིན་མིན་གྱི་སྟངས་ལེགས་པར་ཕྱེ་ནས་རྒྱུན་ཏུ་བསྐྱངས་ན་དགའ་སྡུག་གི་སྣང་བ་སྣ་ཚོགས་སུ་ཤར་བ་དེ་ཉིད་རང་སེམས་ལས་ཤར་ཞིང་དེ་ཉིད་དུ་ཐིམ་པའི་གནད་ཤེས། དགའ་སྡུག་གི་སྣང་བ་ནི་ཕྱི་ནང་གང་དུའང་རང་མཚན་དུ་གྲུབ་པ་རྡུལ་ཙམ་མེད་ཀྱང་། ཡུལ་རྐྱེན་གྱིས་བསླངས་བའི་སེམས་ཀྱི་ཉེར་ལེན་ལས་སྐྱེ་བ་ཡིན་ཏེ། སངས་རྒྱས་ཀྱིས་འདུལ་བ་ལུང་ལས། སྐྱེ་བོ་མཛའ་བོ་མཐོང་ན༴ སོགས་གསུངས་སོ། །དེས་ན་དགའ་སྡུག་གི་སྣང་བ་འདི་དག་ཐམས་ཅད་འོད་གསལ་གྱི་དབྱིངས་ལས་ཤར་བའི་སྟོང་གཟུགས་ཉག་གཅིག་ཡིན་པར་ཤེས་དགོས། དེ་ཉིད་དུ་ཐིམ་ཚུལ་དུས་འཁོར་ལུང་དྲངས། ཐིམ་ཞེས་པ་ནི་ས་རྡོ་སོགས་བེམ་པོ་འདི་དག་སེམས་ལ་ཐིམ་པ་ལྟ་བུ་མིན་ཏེ། བཟང་ངན་བར་མའི་རྟོག་པ་རྣམས་དབྱིངས་ལས་ཤར་ཞིང་དབྱིངས་སུ་རང་དེངས་ལ་འགྲོ་བའམ་གྲོལ་བའི་ཚུལ་ཡིན། སྣང་བ་ཐམས་ཅད་སེམས་ཀྱི་རང་སྣང་དུ་ངོ་འཕྲོད་ཅེས་པ་ནི་ཕར་ཕྱིན་ཐེག་པ་དང་། སྔགས་བླ་མེད་གཉིས་ཀའི་སྣང་སེམས་གཉིས་གཅིག་ཡིན་པར་འདོད། ཡུལ་སྣང་བ་ལ་དབྱིབས་དང་ཁ་དོག་ཡོད་པའི་ཕྱིར་དང་ཡུལ་ཅན་སེམས་ལ་མེད་པའི་ཕྱིར་དེ་གཉིས་ཚུལ་མི་མཚུངས་སོ། །གནས་སམ་འགྱུ་བའི་ཚེ་ཞེས་པ་ནི་གནས་པའི་སྟེང་དུ་ཡུལ་ཅན་ཡིད་ཤེས་ཀྱི་ངོར་ཡུལ་སྟོང་པ། བདེ་བ་གསལ་བ། དྭངས་དུབ་མ་ཕྱེ་བའི་ཧང་ཧང་བ་དང་བཞི་ཡོད། འགྱུ་བ་ལ་མང་དུ་ཡོད་ཀྱང་། བཟང་ངན་བར་མའི་རྟོག་པ་གསུམ་ལ་འདུ་བས། གོང་དུ་སྐྱོན་ཡོན་བཤད་པ་ལྟར་ཡིན་མིན་གྱི་སྟངས་ལེགས་པར་ཕྱེ་ནས་འཆར་གཞི་འོད་གསལ་བའི་རིག་པའི་རྒྱུན་ཡང་ནས་ཡང་དུ་བསྐྱང་བའི་ཚེ། ཆོས་ཐམས་ཅད་འོད་གསལ་སྟོང་པའི་རང་བཞིན་དུ་རྟོགས། སྟོང་པ་དེ་ཡང་ནམ་མཁའ་ལྟ་བུའི་ཆད་སྟོང་ཞིག་མིན། ནམ་མཁའ་ཞེས་པ་ནི་སྟེང་གི་རྒྱན་དེ་ལ་མི་ཟེར་ཏེ། བར་སྣང་སྟོང་པ་བེམ་ཤེས་གཉིས་ཀྱི་ཆས་སྟོང་པ་དེ་ལ་ཟེར། འོད་གསལ་སྟོང་པ་ཆེན་པོ་འདི་ནི་ཀུན་ཤེས་ཀུན་རིག་གི་བདག་ཉིད་ཅན། ཀུན་ཤེས་ཀུན་རིག་དམ་པ་པོ། །ཞེས་པ་ལྟར་དང་། དུས་འཁོར་ན་སྟོང་ཉིད་བླུན་པ་མིན་པ་གསུངས་པ་ལྟར། རྣམ་ཀུན་མཆོག་ལྡན་གྱི་སྟོང་ཉིད་སྐུ་དང་ཡེ་ཤེས་ཀྱིས་བརྒྱན་པའི་བདག་ཉིད། ཕྱག་ཆེན་ན་གཉུག་མ་ལྷན་ཅིག་སྐྱེས་པའི་ཡེ་ཤེས། རྫོགས་ཆེན་ན། གདོད་མའི་སྟོང་ཆེན་གྱི་དབྱིངས་སྐུ་དང་ཡེ་ཤེས་ཀྱི་འཆར་གཞི་ཟེར་བ་ཡིན། རྫོགས་ཆེན་གྱི་གཞི་བཤད་པའི་སྐབས་སུ། གཞི་བདུན་སྐྱོན་ཅན་བཤད་པ་ནི། ལོང་བ་བདུན་གྱིས་གླང་པོའི་སྐྱེ་མཆེད་བཤད་པ་ལྟར། འོད་གསལ་གྱི་གཞིའི་ཕྱོགས་རེར་བཟུང་བའི་ཆ་ནས་བཤད་པ་ཡིན། སྐྱོན་མེད་རང་གཞུང་གི་གཞི་སྐུ་གསུམ་འདུ་འབྲལ་མེད་པའི་རིག་པ་འདི་ནི། ངོ་བོ་སྟོང་པ་ལ་ཡེ་ཤེས་ཀྱི་སྙིང་པོ་ཅན། རང་བཞིན་གསལ་བ་ལ་འོད་ཀྱི་སྙིང་པོ་ཅན། ཐུགས་རྗེ་ཀུན་ཁྱབ་ལ་རིག་པའི་སྙིང་པོ་ཅན་དེ་ཉིད་འཁོར་འདས་ལམ་གསུམ་གྱི་ཆོས་ཐམས་ཅད་ལ་དབྱིངས་རིག་འདུ་འབྲལ་མེད་པར་ཁྱབ་པ་ཡིན་ཀྱང་། རྣམ་ཤེས་ཚོགས་བརྒྱད་སེམས་བྱུང་དང་བཅས་པ་རྣམ་ཤེས་སེམས་ཀྱི་རྒྱས་གཅིག་སྒྲིབ། ཉམས་བདེ་གསལ་མི་རྟོག་གསུམ་གྱི་ཞེན་པས་གཅིག་སྒྲིབ། ཀུན་གཞི་མ་རིག་ལུང་མ་བསྟན་གྱི་ཆས་གཅིག་སྒྲིབ། དེ་གསུམ་གྱིས་སྒྲིབ་ཚུལ་ནི། རལ་གྲི་ཤུབས་དང་། ནོར་བུ་འདམ་དང་། མེ་ལོང་སྒྲོམ་ལྟར་སྒྲིབ་པས་བསྒྲིབས་ཀྱང་རང་བཞིན་རྣམ་དག་གི་ཚུལ་དུ་གནས་སྐབས་ཀུན་ཏུ་འཕོ་འགྱུར་མེད་པ་ཡིན། རྒྱུད་ལུང་མན་ངག་གསུམ་གྱིས་སྣོད་བཅུད་ཡེ་ནས་སངས་རྒྱས་པའི་རང་བཞིན་དུ་འདོད་ཚུལ་འདྲ་ཡང་། མ་ཧཱས་སྣོད་བཅུད་རྣམས་སྒྱུ་དང་འཕྲུལ་གྱི་ཚུལ་དུ་འདོད། ཨ་ནུས་རྩལ། ཨ་ཏིས་རིག་པ་ཉིད་རང་སྣང་བར་འདོད། དང་པོ་འཆར་གཞི་སྐུ་གསུམ་འདུ་འབྲལ་མེད་པའི་རིག་པའི་སྟེང་དུ་སེམས་རིག་ལ་ཤན་ལེགས་པར་ཕྱེས་ནས་ཡང་ནས་ཡང་དུ་གོམས་ཤིང་འདྲིས་པར་བྱས་པའི་སྙིང་དབུས་སུ་འོད་གསལ་གྱི་རིག་པ་སད་པའི་སྟོབས་ཀྱིས་རྣམ་ཤེས་ཚོགས་བརྒྱད་སེམས་བྱུང་དང་བཅས་པ་འོད་གསལ་ཉག་གཅིག་གི་རྣམ་ལྡན་དུ་འཆར་བ་ནི། དཔེར་ན་ཉི་མའི་དཀྱིལ་འཁོར་ཤར་བའི་ཚེ་ཟེར་ཐམས་ཅད་དྲོད་ཀྱིས་ཁྱབ་པ་ལྟར། དྲོད་དང་ཟེར་རྣམས་ཉི་མའི་སྙིང་པོ་འོད་གསལ་བ་ལ་ལྟོས་ཀྱང་། ཉི་མའི་སྙིང་པོ་འོད་གསལ་བ་ནི་དྲོད་དང་ཟེར་ལ་ལྟོས་མི་དགོས་པ་ལྟར། འཆར་ཆོས་ཐམས་ཅད་འཆར་གཞི་འོད་གསལ་དབྱིངས་རིག་ལ་ལྟོས་ཀྱང་། འཆར་གཞི་དབྱིངས་རིག་དེ་ཉིད་འཆར་ཆོས་ལ་ལྟོས་མི་དགོས་པར་གནས་སྐབས་ཀུན་ཏུ་འཕོ་འགྱུར་མེད་ཚུལ་ཤེས་དགོས། ངོ་བོ་སྟོང་པ་ལ་ཡེ་ཤེས་ཀྱི་སྙིང་པོ་ཅན་གྱི་སྟེང་ནས་ཆོས་སྐུ་ལམ་བྱེད། རང་བཞིན་གསལ་བ་ལ་འོད་ཀྱི་སྙིང་པོ་ཅན་གཟུགས་སྐུ་ལམ་བྱེད། རང་གདངས་འོད་གསལ་ནི་དུས་འཁོར་གྱི་ལུགས་ལ་སྟོང་གཟུགས་དང་། རྫོགས་ཆེན་གྱི་ལུགས་ལ་ཐོད་རྒལ་གཉིས་གང་ལས་འཆར་ན། ཤ་ལས་འཆར་བ་མིན། ཁྲག་ལས་འཆར་བ་མིན། རུས་པ་ལས་འཆར་བ་མིན་ཏེ། འོད་ཀྱི་སྙིང་པོ་དེ་ལས་འཆར་བ་ཡིན། དེའི་ཚེ་ན་མ་དག་པའི་ཆོས་ཞིག་གཏན་ནས་ཕྱེ་རྒྱུ་མེད། དོན་ལ་དག་པ་ཡིན་པ་དང་། བསྒོམས་སྟོབས་ཀྱིས་རང་སྣང་ཡེ་ཤེས་ཀྱི་དཀྱིལ་འཁོར་ཉག་གཅིག་ཏུ་སད་པ་ན། སེམས་རྟོག་སྐྱོན་གྱི་ཆ་རྣམས་བསལ་རྒྱུ་དང་། རིག་པ་ཡེ་ཤེས་ཀྱི་ཆ་ཡོན་ཏན་གྱི་ཕྱོགས་བཞག་རྒྱུ་མེད་པར་རྟོགས་པ་ནི་གནད་དམ་པ་ཡིན་ནོ། །དེ་ལྟར་རིག་པ་ཚད་ཕེབས་ཀྱི་སྐབས་འོད་གསལ་འབའ་ཞིག་ཏུ་རྟོགས་པ་ནི། ཤ་ཁམས་དང་ས་ཁམས་འོད་སེར་པོའི་རྣམ་པར་སྣང་འོད་གསལ་གྱི་རང་བཞིན་དུ་སྣང་བའི་མཐར། རིན་ཆེན་འབྱུང་ལྡན་སྟོན་འཁོར་དང་བཅས་པའི་སྐུར་བཞེངས། དེ་བཞིན་དུ་འབྱུང་ཆེན་ལྔ་དང་ཕུང་ཁམས་སྐྱེ་མཆེད་ཐམས་ཅད་འོད་གསལ་གྱི་རང་བཞིན་དུ་སྣང་བའི་མཐར་རྒྱལ་བ་རིགས་ལྔ་ཞིང་སྐུ་ཕོ་བྲང་གི་རྣམ་པར་ཤར་བ་ཡིན་ནོ། །ཆོས་སྐུའི་སྟེང་ན་ཡེ་ཤེས་གསུམ། ལོངས་སྐུའི་སྟེང་ན་ཡེ་ཤེས་ལྔ། སྤྲུལ་སྐུའི་སྟེང་ན་ཡེ་ཤེས་གཉིས། དེ་ལས་ལྡོག་ཆས་ད བྱེ་ན་ཡེ་ཤེས་ཉེར་ལྔ་དང་། དྲུག་ཅུ་རེ་ལྔ་རེ་དབྱེ་ཚུལ་ཡོད། སྐུ་གསུམ་དབྱེར་མེད་ལ་ལྡོག་ཆས་དབྱེ་བ་ནི་རལ་གྲི་རྣོ་ངར་མཉེན་གསུམ་ལྟར་རོ། །སྒོམ་བྱེད་ཡུལ་ཅན་ཡིད་ཀྱི་ཤེས་པ་ཡིན་ཡང་། སྡུག་མི་དགོས་ཏེ་ཡུལ་ཡུལ་ཅན་གཉིས་༼ ཀྱི་རྣམ་པ་༽སུ་མེད་ཚུལ་ནི། དཔེར་ན་མདོ་ཡི་ཆོས་ཐམས་ཅད་སྟོང་ཉིད་གཅིག་གི་རང་བཞིན་ཏུ་གཏན་ལ་ཕབ་ནས་ཡུལ་ཅན་ཡིད་ཀྱི་ཤེས་པས་ཡུལ་སྟོང་ཉིད་དོན་སྤྱིའི་ཚུལ་ལ་མཉམ་པར་བཞག་པའི་ཚེ། ཡིད་ཤེས་དེ་སྟོང་ཉིད་གཅིག་གི་རྣམ་ལྡན་དུ་འཆར་བ་དང་། ཡུལ་ཅན་ཡིད་ཀྱི་ཤེས་པའི་ཡུལ་འོད་གསལ་གྱི་རིག་པ་ལ་མཉམ་པར་བཞག་པའི་ཚེ། འོད་གསལ་གྱི་རིག་པ་ཤར་བའི་སྟོབས་ཤུགས་ཀྱིས་ཡུལ་ཅན་ཡིད་ཀྱི་ཤེས་པའང་འོད་གསལ་གྱི་རྣམ་ལྡན་དུ་འཆར་བས་ཡུལ་ཡུལ་ཅན་ཐ་དད་པའི་ཚུལ་དུ་ཡོད་པ་མ་ཡིན་པའི་ཚུལ་ཤེས་དགོས་སོ། །དེ་ལྟར་ཡང་ནས་ཡང་དུ་གོམས་ཤིང་འདྲིས་པར་བྱས་ནས་བརྟན་པ་ཐོབ་རིམ་གྱིས་འཁྲུལ་བའི་སྣང་བ་ཇེ་དག་དང་། དག་པའི་སྣང་བ་ཇེ་ཆེར་འགྲོ་བ་ནི་ལམ་རྟགས་ཡིན་པར་གསུངས་སོ། ༈ །ཤེས་བྱ་ཡུལ་དང་ཤེས་བྱེད་བློ། །གཉིས་སུ་མེད་པའི་ཡེ་ཤེས་ནི། །མཉམ་པ་ཉིད་དུ་ཤར་བའི་ཚེ། །ཡེང་ཡུལ་ཆོས་ཉིད་སངས་པ་ཞེས། དཔལ་མགོན་བླ་མའི་ཞལ་རྒྱུན་ཡིན། ། བྱིང་རྒོད་རྨུགས་གསུམ་སོགས་བཤད་པའི་སྐོར།བྱིང་ནི་རིག་པའི་གསལ་ངར་གྱི་ཆ་ལྷོད་པ་དང་། རྒོད་པ་ནི་འདོད་པའི་ཕྱོགས་སུ་གཏོགས་པའི་འཕྲོ་བའི་ཆའོ། །རྨུགས་པ་ནི་སེམས་ལ་མུན་པ་བབས་པའི་རྣམ་པ་ཅན་ནོ། ༈ །འོད་གསལ་ཞེས་པ་ནི། མེད་དགག་སྟོང་རྐྱང་མིན་ཏེ། དབྱིངས་སྤྲོས་བྲལ་ལ་རིག་གདངས་ཀྱི་ཆ་ཡོད་པའོ། །གཞི་ལས་གཞི་སྣང་འཆར་ཚུལ་དང་། དེ་ལས་འཁྲུལ་གྲོལ་འབྱུང་ཚུལ་འཁྲུལ་བ་གཞི་ལ་ལྡོག་ནས་སླར་འཁྲུལ་མི་སྲིད་པའི་ཚུལ་ཤེས་པར་བྱའོ། ༈ །འཁོར་ལོ་བར་བའི་བསྟན་དོན་ཆོས་ཐམས་ཅད་དབྱིངས་སྤྲོས་པ་དང་བྲལ་བའི་སྟོང་པ་ཆེན་པོ་དང་། འཁོར་ལོ་ཐ་མའི་བསྟན་དོན་སྐུ་དང་ཡེ་ཤེས་བསྟན་པ་དེ་གཉིས། དབྱེར་མེད་ཟུང་འཇུག་ཆེན་པོར་ཀུན་མཁྱེན་ཀློང་ཆེན་དང་། འཇམ་མགོན་མི་ཕམ་རྣམ་རྒྱལ་སོགས་ཀྱིས་བཞེད་པ་ཡིན་ལ་གསང་སྔགས་ཐུན་མོང་མ་ཡིན་པའི་རྒྱུད་སྡེ་རྣམས་སུ། གདོད་མའི་ཡེ་གཞི་འམ་ཆོས་སྐུ་གཞི་གནས་ཀྱི་རིག་པ་ཞེས་གསུངས། འོད་གསལ་རྫོགས་པ་ཆེན་པོའི་སྐབས་སུ་གཞི་བཅིང་གྲོལ་མེད། གནས་ལུགས་ཆོས་ཟད་ཀ་དག་གི་དགོངས་པ་ངོ་འཕྲོད། ལྷུན་གྲུབ་རང་གདངས་འགག་པ་མེད་པས་འཁོར་འདས་ཀྱི་འཆར་གཞི་མ་འགགས་པར་ངོ་ཤེས། ཐུགས་རྗེའི་རོལ་པ་ཡུལ་ཐོག་ཏུ་ཤར་ནས་བག་ཆགས་གསོག་ལོང་མེད་པར་དྲན་རྟོག་རྗེས་མེད་དུ་གྲོལ་བས་ཡིད་ཆེས། དེ་གསུམ་གདོད་ནས་དབྱེར་མེད་དུ་བཞུགས་པ་ལ་སྐུ་གསུམ་དབྱེར་མེད་ཀྱི་རིག་པའམ་རིག་སྟོང་ཟུང་འཇུག་ཅེས་སྔ་འགྱུར་རིག་འཛིན་བརྒྱུད་པ་རྣམས་ཀྱིས་བཞེད་པ་ཡིན་ནོ། །དེ་རྣམས་གཡུ་ཁོག་བྱ་བྲལ་གསུང་ཡིན། ། སེམས་རིག་ལ་ཤན་ཕྱེས་ཏེ་ཉམས་སུ་ལེན་ཚུལ་སོགས་ཀྱི་སྐོར།དང་པོ་སེམས་རིག་གི་ལ་ཤན་ཕྱེས་ནས་རིག་ཐོག་ཏུ་མཉམ་པར་བཞག །བར་དུ་རྩལ་སྦྱོང་སོགས་ཀྱིས་སེམས་རྟོག་གང་ཤར་རིག་པའི་ཀློང་དུ་གྲོལ་བ་ལ་བསླབ། མཐར་སེམས་སེམས་བྱུང་མཐའ་དག་རིག་པའི་རྣམ་ལྡན་དུ་འཆར་གསུངས། ༈ གང་ཟག་ལས་དང་པོ་པའི་དུས་སུ་རྣམ་པར་ཤེས་པའི་ཚོགས་བརྒྱད་པོའི་གསེབ་ནས་འོད་གསལ་གྱི་རིག་པ་དེ་ཤ་ནང་གི་རྨེན་བསལ་བསལ། ས་ནང་ནས་གསེར་བཙག་བཙག་བྱས་ཏེ་ངོས་ཟིན་དགོས། དེ་དགོས་པའི་རྒྱུ་མཚན་གང་ཞེ་ན། གང་ཟག་གཅིག་གི་རྒྱུད་ལ་དུས་མཉམ་དུ་རྣམ་ཤེས་ཚོགས་བརྒྱད་འོད་གསལ་དང་དགུ་པོ་ཤར་ཡོད་དེ། འོད་གསལ་ནི་སེམས་ཅན་ཐམས་ཅད་ཀྱི་ཤེས་རྒྱུད་ལ་རྗེན་པར་ཤར་ཡོད་ཀྱང་ངོས་མི་ཟིན་པ་རེད། སེམས་ཀྱི་ཆ་རྣམས་འགག་པའི་སྐབས་རེ་ཡོད་ཀྱང་། དེ་ནི་འདི་ལྟར་གཉིད་དང་བརྒྱལ་བ་ལ་སོགས་པས་མི་ཟིན། མདོ་རང་ལམ་གྱི་བྱང་ཆུབ་སེམས་དཔའ་དབང་པོ་རབ་འབྲིང་ཐ་གསུམ་ལས། བྱང་སེམས་དབང་རབ་ཀྱིས་ཀྱང་བསྐལ་ཆེན་གྲངས་མེད་གཅིག་གི་ཚོགས་བསགས་དང་འབྲེལ་བར་ཡུལ་ཅན་རྣམ་ཤེས་ཀྱི་ཡུལ་སྟོང་ཉིད་དོན་སྤྱི་ཙམ་སྒོམ་པའི་མཐར། ས་དང་པོ་འཕགས་ལམ་ཆོས་ཉིད་ཀྱི་བདེན་པ་མཐོང་དུས་སུ་ཡུལ་ཅན་དང་ཡུལ་ཐ་དད་མེད་པའི་ཚུལ་དུ་སྟོང་ཉིད་མངོན་སུམ་དུ་རྟོགས་པ་ཡིན་ཏེ། ཇི་སྐད་དུ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །ཅེས་པས་ཡུལ་སྟོང་ཉིད་བསྟན། སོ་སོ་རང་རིག་ཡེ་ཤེས་སྤྱོད་ཡུལ་བ། །ཞེས་པས་ཡུལ་ཅན་ཡེ་ཤེས་བསྟན་ཏེ། དེ་ལྟར་འཕགས་པའི་མཉམ་བཞག་གི་རང་དུས་དེར་ཚོགས་བརྒྱད་འགགས་ནས་ཡེ་ཤེས་རྗེན་པར་འཆར། དེ་དུས་ཀྱང་རྗེས་ཐོབ་དུ་ནི་དག་པ་ས་གསུམ་ལ་མ་སླེབས་བར་ཏུ་ཀུན་གཞི་དང་སྒོ་ལྔའི་ཤེས་པ་སོགས་མི་འགག །སྔགས་བླ་མེད་ཀྱིས་མཚན་བཅས་རྫོགས་རིམ་བསྒོམ་ཚེ་རྩ་ཐིག་རླུང་གསུམ་ལ་གནད་དུ་བསྣུན་པས་ཡིད་ཤེས་ཀྱི་ངོར་དཔེའི་ཡེ་ཤེས་ཤར་ཚེ་ཤེས་པ་གཞན་འགགས་ཀྱང་ཡིད་ཤེས་ཙམ་མམ་ཀུན་གཞིའི་རྣམ་ཤེས་ཀྱང་མི་འགག་པའི་སྐབས་ཡོད། ཕྱག་ཆེན་མདོ་ལུགས་ཀྱི་སྐབས་ས་བཅུ་སོགས་ཀྱི་རིམ་པས་སྤང་བྱ་སེམས་ཀྱི་དྲི་མ་ཅི་རིགས་དག་རིམ་གྱིས་ཡེ་ཤེས་མཐོང་ཚུལ་གསུངས། ཕྱག༵་ཆེ༵ན་སྔ༵གས་ལུ༵གས་གོང་གི་སྔགས་ལམ་ལྟར། ཕྱག་ཆེན་སྙིང་པོའི་ལུགས་དང་རྫོགས་ཆེན་གྱི་སྐབས་སུ་སེམས་རྣམ་པར་ཤེས་པའི་ཚོགས་བརྒྱད་པོ་དེ་དང་མ་ནོར་བར་འཆར་གཞི་འོད་གསལ་གྱི་རིག་པ་རྗེན་པ་དེ་ངོ་ཤེས་དགོས། དེ་ལྟར་ངོ་ཤེས་པ་ལ་ཕྱག་ཆེན་པས་གཉུག་མ་ལྷན་ཅིག་སྐྱེས་པའི་ཡེ་ཤེས་ཟེར། རྫོགས་ཆེན་པས་འོད་གསལ་གྱི་རིག་པ་ཟེར་ཏེ་དོན་གཅིག་མིང་གི་རྣམ་གྲངས་སོ། ༈ །མདོར་ན་རང་གི་ཤེས་རྒྱུད་འདིའི་སྟེང་ནས་འཁོར་འདས་གཉིས་ཀའི་གཞི་འཇོག་སྟེ། བདེ་ཉམས་ཀྱིས་འདོད་ལྷ་རིགས་དྲུག་གི་ཐོག་མ། གསལ་ཉམས་ཀྱིས་གཟུགས་ཁམས། སྟོང་ཉམས་དང་མི་རྟོག་པའི་ཉམས་ཀྱིས་གཟུགས་མེད་སྐྱེ་མཆེད་མུ་བཞིར་འཕེན། བྱིང་རྨུགས་བསགས་པས་རི་བོང་དང་འཕྱི་བ་སོགས་སུ་སྐྱེ། ཆགས་སྡང་རྨོངས་གསུམ་གྱིས་ངན་སོང་གསུམ། དགེ་བ་ཡང་བྱང་ཆུབ་སེམས་ཀྱིས་མ་ཟིན། དངོས་གཞི་ལྟ་བས་མ་ཟིན། རྗེས་བསྔོ་བས་མ་ཟིན་པའི་སྦྱིན་སོགས་ཀྱི་དགེ་རྩ་དེ་ལོག་ལྟས་མ་བཅོམ། ཁོང་ཁྲོས་མ་བསྲེག །མ་བསྔོས་པ་དང་ལོག་པར་བསྔོས་པ་སོགས་དགེ་རྩ་འཛད་པའི་རྒྱུ་བཞིས་མ་བཤིག་པར་ཡོད་ན་དེ་དག་གི་འབྲས་བུ་སྦྱིན་པས་ལོངས་སྤྱོད་དང་། ཁྲིམས་གྱིས་བདེ་འགྲོ། བཟོད་པས་གཟུགས་བཟང་བ་སོགས་འབྱུང་བ་སྟེ། དེ་དག་ནི་ཀུན་ཉོན་འཁོར་ཕྱོགས་ཀྱི་རྒྱུ་ཡིན་ལ། རིག་ངོ་སད་དེ་གཟུགས་ཁམས་དང་གཟུགས་མེད་དུ་སྐྱེ་བའི་རྒྱུ་ཉམས་ཞེན་གྱི་ཤུན་པ་འཐོར། འདོད་ཁམས་སུ་སྐྱེ་བའི་རྒྱུ་དུས་གསུམ་གྱི་འཁྲུལ་རྟོག་དག་ནས་རིག་པ་རྐྱང་འདེད་དང་། ཡེ་ཤེས་རྗེན་འདེད་བྱས། དེ་ལྟར་མ་རྟོགས་པའི་སེམས་ཅན་ལ་སྙིང་རྗེ། འཁོར་བར་ཞེན་ལོག་གི་ངེས་འབྱུང་། གཞན་ཕན་དོན་གཉེར་གྱི་བྱང་སེམས། སྣང་སྲིད་རྣམ་དག་གི་དག་སྣང་སོགས་རང་ཤུགས་ཀྱིས་འཆར་ནས་རྣམ་བྱང་མྱང་འདས་ཀྱི་རྒྱུ་འཇོག་པར་མཁས་པའི་བསྟན་བཅོས་དང་། རྟོགས་ལྡན་གྱི་མྱོང་ཁྲིད་ཐམས་ཅད་མཐུན་ནོ། ༈ །རིག་པ་ནི་ཡུལ་ལ་གཏད་པ་མེད་པས། འཆར་གཞི་འོད་གསལ་ཤར་བ་དེས་ཤར་ཆོས་རྟོག་པ་གཞན་འཆར་བའི་གོ་མི་བཀག་པ་ནི། ཉི་མ་ཤར་བས་འོད་མི་འགག་པ་བཞིན། རྣམ་ཤེས་ཚོགས་བརྒྱད་ལ་ཡུལ་ཡུལ་ཅན་གཉིས་རེ་ཡོད་པས་ཡུལ་ཅན་ཡིད་ཤེས་ལྟ་བུས་ཡུལ་བཟང་ངན་བར་མ་གང་རུང་ཞིག་བཟུང་བ་ན་རྟོག་པ་གཞན་འཆར་བའི་གོ་སྐབས་འཕྲོག་པ་སྟེ། དེས་ན་རིག་པ་སེམས་ཀྱི་ངང་ལས་མི་འཆར་ལ། སེམས་རིག་པའི་ངང་ནས་འཆར་བའི་ཚུལ་ཤེས་ན་ནོར་མི་དགོས་སོ། །དེ་ལྟ་བུའི་གདོད་མའི་གཤིས་ཀྱི་བཞུགས་ཚུལ་དེ་གོ་བས་མི་ཆོག་མྱོང་བ་ཐོན་དགོས་པས། རིག་པ་ཟང་ཐལ་གྱི་ངོ་བོའི་སྟེང་དུ་རང་ས་བཟུང་། རྗེན་ལ་བཏོན། ཧུར་བྱུང་ནས་ལྟ་ཐོག་ཏུ་མྱོང་བས་སླེབས་དགོས་སོ། ༈ །ཡང་མཉམ་བཞག་གིས་རང་ས་ཟིན་ཀྱང་དེ་ཉིད་རྐྱེན་དང་བསྲེས་ནས་རྟོགས་པའི་རྩལ་སྦྱང་མ་བྱས་ན་གཉེན་པོས་རྐྱེན་མི་ཐུབ་པས། མཉམ་བཞག་ལེགས་པོ་དེའི་ཀློང་ན་རྟོག་ངན་གྱི་དུག་སྦྲུལ་འཇིགས་སུ་རུང་བ་མང་པོ་གནས་གཅིག་དུ་ཚོགས་ནས་སྡོད་པ་ལྟ་བུ་ཡིན་པས། མཛེས་མའི་གཟུགས་སོགས་ཆགས་ཡུལ་ཡིད་དུ་འོང་བ་དང་། གཞན་གྱིས་བརྙས་སྨོད་སོགས་སྡང་བའི་ཡུལ་རྐྱེན་གང་རུང་རེའི་དབང་གིས་ཁོང་ཁྲོ་དང་འདོད་ཆགས་སོགས་མངོན་དུ་གྱུར་འོང་བ་དེ། རང་རྒྱུད་ཀྱི་སྒོམ་དེའི་ཀློང་ནས་བྱུང་བ་མིན་ན་ཤ་ལས་མི་འབྱུང་། ཁྲག་དང་པགས་པ་དང་རུས་དང་རྐང་སོགས་གང་ལས་བྱུང་སོམས་ཤིག །དེས་ན་དེ་དག་སྦྱོང་མ་ཐུབ་ན་ཞེ་སྡང་གི་དབང་གིས་དམྱལ་བ། འདོད་ཆགས་ཀྱི་དབང་གིས་ཡི་དྭགས། གཏི་མུག་གིས་དུད་འགྲོ། ཕྲག་དོག་གིས་ལྷ་མིན། ང་རྒྱལ་གྱིས་ལྷ་སོགས་སུ་སྐྱེ་བ་ཐོས་གྲོལ་གྱི་གཞུང་ན་གསལ་བ་ལྟར་ཡིན་པས་དེ་དག་སྦྱང་དགོས། དེ་ཡང་ཇི་ལྟར་སྦྱོང་བའི་ཚུལ་ནི། རྒྱ་གར་གྲུབ་ཆེན་ཚོས། དང་པོ་དབེན་པའི་གནས་སུ་མཉམ་བཞ ག་ལ་བརྟན་པ་ཐོབ་པའི་རྗེས་སུ་ཚོང་འདུས་སོཊ་སུ་སོང་ནས་མི་མང་གི་རྒྱུ་འགྲུལ་དང་བདེ་སྡུག་སོགས་ལ་བལྟས་ནས་རྩལ་སྦྱང་། དེ་ནས་གྲོང་དགུའི་མི་གཙང་བ་སློག་སྟེ་གཙང་སྨེའི་གཉིས་རྟོག་ལ་རྩལ་སྦྱང་པ་དང་། དེ་ནས་རྒྱལ་པོས་ཆད་པ་གཅོད་པའི་སར་ཕྱིན་ཏེ་མིག་འབྱིན་པ་དང་རྐང་ལག་གཅོད་པ་གསོད་པ་སོགས་ལ་བལྟས་ཏེ་སེམས་ཅན་རང་རྒྱུད་པ་དང་སྙིང་རྗེ་རང་རྒྱུད་པ་ལ་རྩལ་སྦྱང་། དེ་ནས་དུར་ཁྲོད་དུ་ཕྱིན་ཏེ་གཅན་གཟན་གཏུམ་པོ་དང་མི་མ་ཡིན་གདུག་པ་ཅན་སོགས་མཐོང་བ་ན་འཇིགས་སྐྲག་ལ་སྦྱངས་པ་སོགས་མཛད་པ་ལྟར། གནས་རི་རྩེའམ། མཚོ་གླིང་། སྐྱེད་མོས་ཚལ་སོགས་སུ་ཕྱིན་ནས། མིག་གིས་གཟུགས་མཐོང་ན་དེ་ལ་ཡང་ཡང་བལྟ། རྣ་བས་སྒྲ་ཐོས་ན་ཡང་ཡང་ཉན་པ་སོགས་དང་། ཡིད་ལ་ཅི་ཤར་ཡང་འཆར་དུ་བཅུག་སྟེ་ངག་ནས་མིང་བརྗོད། སེམས་རྟོག་མེད་ཀྱང་ཡུལ་ལ་འཕྲོར་བཅུག་སྟེ། ཡུལ་ཀ་བ་ལྟ་བུ་གཅིག་གི་སྟེང་དུ་འབྱམས་པ་གཅོད་པའི་ཕྱིར་དུ་ཀ་བའོ་སྙམ་པའི་དེ་མ་ཐག་བུམ་པའོ། རྡོ་རྗེའོ། ཤིང་ངོ་ཞེས་པ་ལྟ་བུར་ཁ་སྤོ་ཞིང་རྩ་བ་རིག་པའི་རང་ས་མ་ཤོར་བཞིན་ཤེས་པ་ཡུལ་ལ་འཕྲོར་གཞུག་སྟེ་རིག་ཐོག་ཏུ་གྲོལ་བ་ལ་བསླབས་པས་རྐྱེན་ངན་དང་རྣམ་རྟོག་གང་ཤར་རིག་པའི་རྩལ་སྦྱོང་དུ་འཆར་ནུས་པ་ནི་བླ་མ་ཞང་རིན་པོ་ཆེས་དབུ་བྲག་ཕུག་ལ་བརྡབ་པ་དང་། ཞབས་རྐང་ལ་ཚེར་མ་ཟུག་པ་ཡང་བདེ་སྟོང་འཆར་ནུས་པ་བཞིན་ནོ། །དེ་ལྟར་རྩལ་སྦྱང་བྱ་བ་འདི། ལས་དང་པོ་པ་ལ་རིག་པ་ངོ་སྤྲད་པའི་དུས་སུ་ཤུན་པ་གཏོར་བའི་ཐབས་དང་། ཉམས་ལེན་ལ་བརྟན་ཆ་ཐོབ་པའི་གང་ཟག་གིས་རྐྱེན་ཐུབ་ཀྱི་རྟོགས་པ་འཕེལ་བའི་ཆེད་དུ་བྱ་བ་སྟེ། མ་མཐའ་འང་ཞག་པོ་བརྒྱ་རེ་ཙམ་ལ་ངེས་པར་སློབ་དགོས་སོ། ༈ །དུས་དང་རྣམ་པ་ཀུན་ཏུ་དམ་ཚིག་ལ་སེལ་མ་ཞུགས་ཤིང་། དད་པ་དང་ལྡན་པའི་གང་ཟག་གིས་དཀོན་མཆོག་གསུམ་གྱི་སྣང་བ་དང་མ་བྲལ་བར་རེས་འགའ་བླ་མ་སྤྱི་བོར་བསྒོམ་གསོལ་བ་བཏབ་དབང་བཞི་བླངས། རེས་འགའ་སྙིང་དབུས་སུ་བསྒོམ་ཐུགས་ཡིད་དབྱེར་མེད་དུ་བསྲེ་བ་སོགས་བྱེད་པ་ནི་གནད་གལ་བོ་ཆེ་སྟེ། ཐུགས་ཡིད་བསྲེ་བའི་གནད་འདི་ཁོ་ནས་རང་གི་བསྒོམ་རྒྱུ་དེ་ལམ་རྣམ་དག་ཞིག་མིན་རུང་འཆི་ཁ་ཚུན་ལ་མི་གྲོལ་མི་སྲིད་པ་ཞབས་དྲུང་རིན་པོ་ཆེའི་ཞལ་རྒྱུན་ཡིན་ནོ། ༈ །སྒོ་ལྔའི་རྣམ་ཤེས་གསལ་བ་ལ། །ཡིད་ཀྱི་ཞེན་རྟོག་མ་ཞུགས་པ། །རྒྱལ་བའི་དགོངས་པ་དེ་ཀ་ཡིན། ། རྩ་རྒྱུད་ཀྱིི་བླ་མ་རང་དང་དབྱེར་མེད་པ།རྩ་རྒྱུད་ཀྱིི་བླ་མ་རང་དང་དབྱེར་མེད་པ་ནི། རིག་སྟོང་ཟུང་འཇུག་གི་ཀློང་ཆེན་པོ་ནས་འཁོར་འདས་ཀྱི་སྣང་ཆ་རབ་འབྱམས་ཇི་སྙེད་པ་དང་པོ་ཤར། བར་དུ་གནས། མཐར་གྲོལ་བར་འགྱུར་ན་ལྟ་བ་ཀློང་ཆེན་རབ་འབྱམས་ནི་མཚོན་བྱ་དོན་གྱི་བླ་མ་ཡིན། སྔར་ཞལ་ཕྱག་སྐུ་གཟུགས་ཀྱི་རྣམ་པར་བྱོན་པ་ནི་མཚོན་བྱེད་དཔེའི་བླ་མའོ། །དེ་བཞིན་དུ་རིག་པའི་ཡེ་ཤེས་ལ་མཁྱེན་པའི་ཡེ་ཤེས། བརྩེ་བའི་སྙིང་རྗེ་ཟུང་འཇུག་ཏུ་ཡོད་པ་ནི། འཇིགས་གླིང་། མྱུ་གུ་ནས་འབྲས་སོགས་བསྐྱེད་པ་བཞིན་གང་ཤར་གྱི་རྟོག་པ་གྲོལ་ཚུལ་གྱི་རྣམ་པ་གང་རུང་དུ་གྲོལ་ནས་རྒྱལ་བའི་འབྲས་ཆོས་མ་ལུས་པར་བསྐྱེད་པར་འགྱུར་བས་དེ་སྐད་དུ་སྨྲའོ། ༈ །མཉམ་བཞག་ཏུ་ཚོགས་ཆེན་ཡེ་རྫོགས་ཀྱི་ཕར་ཕྱིན་དྲུག་ནི། ཆགས་པ་མེད་པའམ་འཛིན་པ་མེད་པ་ནི་སྦྱིན་པའི་མཆོག་སྦྱིན་པའི་ཕར་ཕྱིན། ལས་དང་བག་ཆགས་དུས་གསུམ་གྱི་འཁྲུལ་རྟོག་གིས་མ་གོས་པ་ཚུལ་ཁྲིམས། སྔགས་ཀྱི་དབང་རྣོན་གྱིས་ཡེ་ཤེས་རྟོགས་བཞིན་སྟོང་ཉིད་ལ་མི་སྐྲག་པར་མ་ཟད་སྟོང་ཉིད་ལ་ཇེ་དགའ་ཇེ་དགའ་ཉིད་དུ་འགྱུར་ན་ནི། དོན་ལ་མི་སྐྲག་པའི་བཟོད་པའམ། མི་འཁྲུགས་པའི་བཟོད་པའོ། །འདུ་བྱེད་རྩོལ་བའི་བརྩོན་འགྲུས་མ་ཡིན་པར། མི་བརྩོན་པའི་བརྩོན་པ་ཆེན་པོ་བརྩོན་པ་མཐར་ཐུག་པའོ། །བསམ་བྱ་བསམ་བྱེད་དང་བྲལ་བའི་གདོད་མ་གཞིའི་བཞུགས་ཚུལ་ལ་མཉམ་པར་འཇོག་པ་བསམ་གཏན་ནམ། ཡང་ན་ཡེང་འཁྲུལ་དང་བྲལ་བའི་ཕྱིར་ན་དེ་སྐད་དུ་སྨྲའོ།། རིག་པའི་ཡེ་ཤེས་ཐིག་ལེ་ཉག་གཅིག་སྤྲོས་པ་དང་བྲལ་བ་ནི། གཞི་གནས་རང་བྱུང་གི་ཤེས་རབ་མཉམ་བཞག་ཏུ་མཁྱེན་ཆ་འགག་མེད་ཀྱི་ཚུལ་དུ་ཡོད་ལ་རྗེས་ཐོབ་དུ་རྩལ་སྒོམ་བྱུང་གི་ཤེས་རབ་སོགས་སུ་འབར་བ་ཡིན་གསུངས་སོ། །རྗེས་ཐོབ་ཏུ་སྔ་མའི་ཤུགས་ཀྱིས་ཕྱིན་དྲུག་ལ་སློབ་པར་འགྱུར་བ་ནི་སྤྱོད་པ་རྒྱལ་བའི་མྱུ་གུ་ཡིན་ཞེས་སོ། ། གཞི་ལས་གཞི་སྣང་འཆར་ཚུལ་གྱི་སྐོར།གཞི་ལྷུན་གྲུབ་རིན་པོ་ཆེའི་སྦུབས་ན་འཁོར་འདས་གཉིས་ཀྱི་སྣང་བ་འཆར་རུང་གི་གདངས་མ་འགགས་པར་ཡོད། གཞི་སྣང་ལམ་ལྷུན་གྲུབ་རིན་པོ་ཆེའི་སྦུབས་ནི་འཁོར་འདས་སུ་སྣང་བའི་འཁྲུལ་གཞི་དང་གྲོལ་གཞི་གཉིས་ཀ་ཡིན། འབྲས་བུ་ལྷུན་གྲུབ་རིན་པོ་ཆེའི་སྦུབས་ལ་སྐུ་དང་ཞིང་ཁམས་སོགས་འཆར་རུང་དུ་ཡོད། གཞི་ལ་དག་མ་དག་གཉིས་ཀ་མི་སྲིད་ཀྱང་གཞི་སྣང་ལྷུན་གྲུབ་ལ་འཁོར་འདས་གཉིས་སུ་འཆར་བའི་སྒོ་ཡོད་པ་ལ་ལྷུན་གྲུབ་སྒོ་བརྒྱད་ཀྱི་སྣང་བ་ཞེས་བྱ་སྟེ། ཐུགས་རྗེ་ལྟར་ཤར་བ་མེད་ན་གདུལ་བྱ་འདུལ་བྱེད་དུ་མི་འབྲེལ། འོད་ལྟར་ཤར་བ་མེད་ན་རིག་པ་ནང་དུ་ཆད། འབྱུང་བ་ཕྱིར་རྒྱ་ཆད་པས་སྣོད་བཅུད་ཀྱི་སྣང་བའང་མི་འབྱུང་ལ། གཉིས་མེད་ལྟར་ཤར་བ་མེད་ན་སེམས་ཅན་གྱི་སྒོ་གསུམ་དང་སངས་རྒྱས་ཀྱི་སྐུ་གསུང་ཐུགས་སུ་འབྲེལ་མི་ཤེས་པས་སེམས་ཅན་སངས་རྒྱས་སུ་མི་འགྱུར། སྐུ་ལྟར་ཤར་བ་མེད་ན་འགྲོ་བའི་ལུས་དང་རྒྱལ་བའི་སྐུར་སྣང་བའང་མི་རིགས། ཡེ་ཤེས་ལྟར་ཤར་བ་མེད་ན་ཤེས་བྱ་རང་མཚན་པར་གྱུར་བས་གཞི་ལམ་འབྲེལ་མཚམས་མི་སྦྱོར། མཐའ་གྲོལ་ལྟར་ཤར་བ་མེད་ན་འབྲས་བུ་རྒྱུར་ལྡོག་པས་ངེས་པའི་ས་ཟིན་མི་ཐོབ། མ་དག་འཁོར་བའི་སྒོ་མེད་ན་སེམས་ཅན་དུ་འཁྲུལ་མི་ཤེས་པས་འཁོར་འདས་ཀྱི་བསྟི་གནས་སུ་མི་རུང་། དག་པ་ཡེ་ཤེས་ཀྱི་སྒོ་མེད་ན་རིག་ངོ་ལ་སངས་རྒྱས་ཀྱི་ཡོན་ཏན་མི་འབྱུང་ངོ་། །དེ་བས་ན་དེ་རྣམས་ལྷུན་གྲུབ་ཏུ་ཡོད་པ་ནི་ལྷུན་གྲུབ་སྒོ་བརྒྱད་ཀྱི་ཡོན་ཏན་ནོ། །སྒོ་བརྒྱད་པོ་དུས་ཅིག་ཆར་ལ་འཆར། ཅིག་ཆར་ལ་ནུབ་པར་གསུངས། ༈ ཐེག་མཆོག་མཛོད་ལྟར་ན། ཐུགས་རྗེ་ལྟར་འཆར་བའི་གོ་མ་འགགས་པས་སེམས་ཅན་ལ་སྙིང་རྗེ་འབྱུང་། འོད་ལྟར་ཤར་བའི་གོ་མ་འགགས་པས་ཡེ་ཤེས་ལྔའི་རང་འོད་འཇའ་ཚོན་ལྟ་བུས་ཁེངས། ཡེ་ཤེས་ལྟར་འཆར་བའི་གོ་མ་འགགས་པས་མི་རྟོག་པར་ནང་ན་གནས། སྐུ་ལྟར་འཆར་བའི་གོ་མ་འགགས་པས་ཞི་ཁྲོ་འོད་གསལ་གྱི་སྐུ་ནམ་མཁའ་ཁེངས ། གཉིས་མེད་ལྟར་འཆར་བའི་གོ་མ་འགགས་པས་གཅིག་དང་དུ་མ་མི་དཔྱོད་པ། མཐའ་གྲོལ་ལྟར་འཆར་བའི་གོ་མ་འགགས་པས་ལྷུན་གྲུབ་རང་ངོ་ན་གསལ་བའོ། །ཞེས་གསུངས། ༈ འོད་ལྟར་ཤར་བ་དང་སྐུ་ལྟར་ཤར་བ་གཉིས་ཡུལ་ལྟར་ཤར། ཐུགས་རྗེ་དང་ཡེ་ཤེས་གཉིས་ཡུལ་ཅན་ལྟར་ཤར། གཉིས་མེད་དང་མཐའ་གྲོལ་ལྟར་ཤར་བ་གཉིས་ཡུལ་ཅན་དེས་ཡུལ་ལ་བྱ་བ་བྱེད་ཚུལ་ལྟར་ཤར་བས། སྣང་བ་ལ་ཡོད་ཅེས་སྒྲོ་འདོགས་པའི་བློ་མེད་པས་ཡོད་འཛིན་འཁོར་བའི་མཐའ་སེལ། རིག་པ་ལ་མེད་ཅེས་སྐུར་བ་འདེབས་པའི་བློ་མེད་པས་སྟོང་འཛིན་མྱ་ངན་ལས་འདས་པའི་མཐའ་སེལ། འདི་ལྟར་སྣང་དུས་ཀྱི་འོད་སྣང་སྟོང་གཟུགས་ཐམས་ཅད་རིག་པའི་རང་གདངས་ཡེ་ཤེས་ཀྱི་སྣང་བ་ཡིན་ནོ། །གདངས་ཕྱིར་ཤར་བ་རྐྱེན་བཞིས་ཡར་གྲོལ་ཏེ། རྒྱུའི་རྐྱེན་དངོས་པོའི་གནས་ལུགས། བདག་པོའི་རྐྱེན་རང་རིག་པའི་ཡེ་ཤེས། དམིགས་པའི་རྐྱེན་རང་སྣང་དུ་ཤེས་པ། མཚུངས་པ་དེ་མ་ཐག་པའི་རྐྱེན་དེ་རྣམས་དུས་མཚུངས་སུ་འབྱུང་བའི་སྐད་ཅིག་ལ་སངས་རྒྱས་པའོ། །དེའི་ཚེ་ཀ་དག་གི་རིག་པས་ཚུར་རང་ངོ་ཤེས་པས་ཡེ་ཤེས་ཀྱི་ཚོགས་རྫོགས། ལྷུན་གྲུབ་ཀྱི་སྣང་བ་དེ་རང་སྣང་ཡིན་པ་དང་། དེ་རང་བཞིན་མེད་པར་ཤེས་པས་བསོད་ནམས་ཀྱི་ཚོགས་རྫོགས་པ་ཡིན་ཏེ། ཟག་མེད་རང་ངོ་ཤེས་པའི་དགེ་ཚོགས་ཀྱིས་ཞེས་གསུངས། དེ་ཡང་ཀུན་ཏུ་བཟང་པོས་དགེ་བ་སྤུ་ཙམ་མ་བྱས་པར་སངས་རྒྱས་ཞེས་བརྗོད་ཀྱང་ལེགས་པར་བརྟགས་ན་ཟག་མེད་རང་ངོ་ཤེས་པ་དེ་འདུས་བྱས་ཀྱི་དགེ་རྩ་གང་གིས་ཀྱང་མི་མཚོན་ཞིང་ཐམས་ཅད་ཀྱང་དེ་རྟོགས་པའི་ཐབས་འབའ་ཞིག་ཏུ་ཟད་པས་དོན་ལ་སྒྲིབ་གཉིས་མ་སྤངས་ཡེ་སངས། ཚོགས་གཉིས་མ་བསགས་ཡེ་རྫོགས་སུ་གྱུར་བའོ། །གློག་སྒྲོན་ལས། རྒྱུའི་རྐྱེན་རིག་པ་རང་བྱུང་གི་ཡེ་ཤེས་རང་ལ་གསལ་བ། དམིགས་རྐྱེན་འོད་སྣང་སྣ་ཚོགས་སུ་ཤར་བ། བདག་པོའི་རྐྱེན་དེ་ཉིད་རང་སྣང་དུ་ངོ་ཤེས་པ། དེ་མ་ཐག་རྐྱེན་རང་བྱུང་ཡེ་ཤེས་ཆེན་པོ་དེས་མ་དག་འཁྲུལ་བའི་ས་བོན་གཏན་བཅོམ་དུ་སོང་ནས་གདོད་མའི་གཞི་དབྱིངས་ཀ་དག་གི་ཀློང་དུ་གྲོལ་བ་ལ་གྲོལ་བ་སྔ་ཕྱིར་གྲོལ་བ་དང་ད་ལྟ་དང་བར་དོ་སོགས་སུ་གྲོལ་བ་ལ་ཁྱད་མེད་པར། གཞི་སྣང་ཤར་བ་ངོ་ཤེས་པའི་སྐད་ཅིག་ལ་གདོད་མར་གྲོལ་ཏེ་དབྱིངས་དང་ཡེ་ཤེས་འདུ་འབྲལ་མེད་པ་ནང་གསལ་ཆོས་ཉིད་ཀྱི་དགོངས་པར་བཞུགས།། ཅོག་བཞག་བཞིའི་རྣམ་བཞགཅོག་བཞག་བཞི་ནི་ཁྲེགས་ཆོད་ཐོད་རྒལ་གཉིས་ཀའི་བཞག་ཐབས་སུ་ཆོས་དབྱིངས་མཛོད་འགྲེལ་དུ་གསུངས། འདི་ལ་འཆད་ཚུལ་མི་འདྲ་བ་དུ་མ་ཡོད་ཀྱང་། ལུགས་གཅིག་ལ། ལྟ་བ་རི་བོ་ཅོག་བཞག་ཅེས་པ་ལ། གཞིའི་བཞུགས་ཚུལ་དང་། ངོ་སྤྲོད་ཀྱི་མན་ངག་དང་། ངོ་འཕྲོད་པའི་ཆ་ནས་བཞག་པ་གསུམ་ལས། དང་པོ་ནི། རིག་སྟོང་ཆོས་སྐུ་ཐིག་ལེ་ཉག་གཅིག་དེ་སེམས་ཅན་ཐམས་ཅད་ཀྱི་རྒྱུད་ལ་བཞུགས་པ་རྣམ་པ་ཐམས་ཅད་དུ་འཕོ་འགྱུར་མེད་པར་རི་རྒྱལ་ལྟར་བརྟན་པའི་ཆ་ནས་འཇོག །གཉིས་པ་ནི་རིག་འཛིན་རྩལ་འཆང་གི་བརྒྱུད་པའི་མན་ངག་རྣམས་ཚིག་ལ་ལྷག་ཆད་དང་དོན་ལ་ནོར་འཁྲུལ་མེད་པའི་ཆ་ནས་འཇོག །གསུམ་པ་ནི། ངོ་འཕྲོད་པའི་གང་ཟག་དེས་རང་རྒྱུད་ཀྱི་ཡེ་ཤེས་སད་སྟོབས་ཀྱིས་གཞན་གྱི་རྒོལ་བ་དང་ཕྱིན་ཅི་ལོག་གི་བློ་ངན་སོགས་ཀྱིས་བསྐྱོད་དུ་མེད་པར་ཡིད་གཏིང་ནས་ཆེས་པ་ལ་བྱའོ། །སྒོམ་པ་རྒྱ་མཚོ་ཅོག་བཞག་ནི། ཚོགས་དྲུག་ལྷུག་པར་བཞག་ན་ཡུལ་ལྔ་འགག་མེད་དུ་འཆར་ཚུལ་རྒྱ་མཚོར་གཟའ་སྐར་བཀྲ་བ་བཞིན་ཤར་ཡང་སྣང་བའི་ཡུལ་གྱིས་མ་གོས། འཛིན་པའི་སེམས་ཀྱིས་མ་བཅིངས་པའོ། །སྤྱོད་པ་མན་ངག་ཅོག་བཞག་ནི། ཡུལ་དྲུག་ལ་ཡུལ་ཅན་གྱི་ཤེས་པས་རོལ་བའི་ཚེ། དང་པོར་རྩལ་སྦྱང་བ། བར་དུ་ཤར་གྲོལ་དུ་སོང་། ཐ་མར་རིན་པོ་ཆེའི་གསེར་གླིང་ལྟར་གང་སྣང་ཡེ་ཤེས་ཀྱི་རྣམ་རོལ་དུ་འཆར་བའི་བར་དུ་བསླབ་པའོ། །འབྲས་བུ་རིག་པ་ཅོག་བཞག་ནི། ལམ་གྱུར་གྱི་འབྲས་བུ་སྟེ་གོང་གི་ལྟ་སྒོམ་སྤྱོད་གསུམ་ལ་གོམས་འདྲིས་བྱས་པས་གཞིའི་ཡོན་ཏན་ཇེ་མངོན་དུ་གྱུར་པའོ། །ཞེས་གསུངས། ། ཐོད་རྒལ་གྱི་སྐབས་སུ་ཁྲེགས་ཆོད་ལས་འཕགས་པའི་ཁྱད་ཆོས་བདུན།ཐོད་རྒལ་གྱི་སྐབས་སུ་ཁྲེགས་ཆོད་ལས་འཕགས་པའི་ཁྱད་ཆོས་བདུན་ནི། །ཉམས་ལེན་ལག་ལེན་དང་འབྲེལ་བའི་ཁྱད་པར། ལུས་གནད་རྩ་ཡི་ཁྱད་པར། སྣང་བྱེད་སྒོ་ཡི་ཁྱད་པར། མཐོང་བ་དབང་པོའི་ཁྱད་པར། རང་གནད་མངོན་སུམ་གྱི་ཁྱད་པར། སྣང་བ་འོད་ཀྱི་ཁྱད་པར། ཉམས་སྣང་གོང་འཕེལ་གྱི་ཁྱད་པར་དང་བདུན་ནོ། །དང་པོ་ནི། ཕྱིའི་དབྱིངས་ནམ་མཁའ་སྟོང་པ་ལ་དབྱིངས་རིག་པ་ལུ་གུ་རྒྱུད་དངོས་སུ་ཅེར་མཐོང་དུ་སྟོན་པའི་ལག་ཁྲིད་ཟམ་མ་ཆད་པས་ཡིད་དཔྱོད་རྟོག་པའི་ཤེས་རབ་ལ་རག་མ་ལས་ཏེ། གདམས་པའི་ངོ་བོ་ལ་བར་དུ་བསྲེ་བསླད་དང་རྟོག་བཟོས་ཟབ་མི་ཟབ་བྱར་མེད་པས་ཆེས་འཕགས་སོ། །གཉིས་པ་ནི། ཁྲེགས་ཆོད་དུ་རགས་པའི་རྩ་རླུང་ལ་བརྟེན་པ་ལས། ཐོད་རྒལ་དུ་འོད་རྩ་དྭངས་པ་ངོས་བཟུང་ནས་སྒྲོན་མ་དངོས་ལམ་དུ་བྱེད་པས་འཕགས་སོ། །གསུམ་པ་ནི། རིག་པ་མི་རྟོག་པར་གནས་པ་ལ་ཁྲེགས་ཆོད་དུ་ཡིད་སྒོ་རྟོག་བཅས་ཀྱི་གདེངས་ལས་ཡེ་ཤེས་འཚོལ་བ་ལ། འདིར་རིག་པ་རྟོག་མེད་འོད་གསལ་གྱི་གདངས་མིག་ནས་འཆར་བ་ངོས་འཛིན་པས་འཕགས་སོ། །བཞི་པ་ནི། ཁྲེགས་ཆོད་དུ་ཡུལ་སྣང་ཚོགས་དྲུག་གི་སྣང་བ་འཛིན་པའི་དབང་པོས་མཐོང་བས་རྟོག་པ་སྣ་ཚོགས་སུ་འཆར་བ་རྒྱུན་མི་འཆད་པ་ལས། འདིར་འོད་རྩ་དྭངས་བའི་དབང་པོས་ལུ་གུ་རྒྱུད་ཅེར་མཐོང་དུ་མཐོང་དུས། རྟོག་པ་དུས་གཅིག་ལ་འགག་ཅིང་ཡེ་ཤེས་ཀྱི་སྣང་ཆ་དཔག་ཏུ་མེད་པ་འཆར་བས་འཕགས་སོ། །ལྔ་པ་ནི། ཁྲེགས་ཆོད་དུ་ཡེ་ཤེས་དངོས་སུ་བལྟར་མེད་ལ་འདིར་དངོས་སུ་མཐོང་བས་ཕྱིས་མངལ་གྱི་གྲོང་ཁྱེར་རྒྱུན་གཅོད་པར་བྱེད་པས་འཕགས་སོ། །དྲུག་པ་ནི། ཁྲེགས་ཆོད་དུ་འཁྲུལ་སྣང་ལས་མི་སྣང་ལ། འཁྲུལ་སྣང་འཛིན་པའི་ཤེས་པ་ནི་འཁྲུལ་ཤེས་སུ་འགྱུར་བས་དོན་ལ་གཟུང་འཛིན་ལས་མི་འདའ་ལ། འདིར་ནི་རིག་པའི་ཡེ་ཤེས་ལ་འབྱུང་བ་དག་པས་འཁྲུལ་སྣང་མི་སྣང་བར་རང་འོད་སྣང་བས་ཁྱད་པར་དུ་འཕགས་སོ། །བདུན་པ་ནི། ཁྲེགས་ཆོད་དུ་ཤེས་པ་གཅོད་ཁམས་ཇེ་བརྟན་དུ་འགྲོ་བ་ཙམ་ལས་ནང་ཤེས་པའི་ཉམས་ཏིང་ངེ་འཛིན་དུ་མ་དྭངས། སྤྱན་དང་མངོན་ཤེས་དང་། ཕྱི་སྣང་བའི་ཉམས་འོད་དང་སྐུ་ལ་སོགས་པ་མེད་ལ་འདིར་ཉམས་སྣང་ཁྱད་པར་ཅན་གོང་ནས་གོང་དུ་འཆར་ཏེ་སྣང་བ་བཞི་ཚད་དུ་ཕྱིན་ནས་མྱུར་དུ་གྲོལ་བས་ཁྱད་པར་འཕགས་སོ། །འདི་དག་གི་ཁྱད་པར་ཞིབ་མོར་ཕྱེ་ན་བསམ་གྱིས་མི་ཁྱབ་ཀྱང་། ཆེ་ལོང་ཙམ་བརྗོད་པ་སྟེ། མདོར་ན་རིག་པའི་དོན་དངོས་སུ་མཐོང་ཞིང་བལྟར་ཡོད་པས་འཁྲུལ་བ་སྐད་ཅིག་ལ་དག་པ་དང་། ཡིད་དཔྱོད་ལ་ལུས་པས་འཁྲུལ་སྣང་ལ་ལམ་བྱས་ནས། མ་འཁྲུལ་བའི་འབྲས་བུས་འཚོལ་བའི་ཁྱད་པར་གྱིས་ཆེ་བར་ཤེས་རབ་ཀྱི་མིག་དང་ལྡན་པ་རྣམས་ཀྱིས་རྟོགས་པར་བྱའོ།། སེམས་དང་ཡེ་ཤེས་ཀྱི་དབྱེ་བ།སེམས་དང་ཡེ་ཤེས་ཀྱི་དབྱེ་བ་ལ་གཉིས། དང་པོ་སེམས་ཀྱི་དབྱེ་བ་བརྒྱད་དེ། གནས། ངོ་བོ། ལམ། སྒོ། ཡུལ། རྩལ། བྱེད་ལས། འབྲས་བུའོ། །གན༵ས་ནི། གློ་བ་ན་རྩ་གྲོ་སོག་གི་སྦུ་གུ་ཙམ་རླུ ང་གིས་གང་བ་ལས་དབུགས་ཐམས་ཅད་མཆེད་པའི་རྟེན་བྱེད་པ་སྙིང་ག་དང་འབྲེལ་བ་ན་གནས་སོ། །ངོ༵་བོ༵་ནི་སྙིང་གི་རིག་གདངས་རླུང་དང་འདྲེས་པས་རྣམ་པར་རྟོག་པའོ། །ལམ༵་ནི། གློ་བ་ནས་རྩ་འདབ་སོ་སོ་ལ་སོང་བའི་རླུང་གིས་སྒོ་ལྔའི་ཡུལ་རྟོགས་པའི་ཕྱིར་ཁ་སྣ་སོགས་དབང་པོ་སོ་སོའི་རླུང་རྒྱུ་བའི་རྩ་རྣམས་ཡིན་ནོ། །སྒོ༵་ནི། དབང་པོ་སོ་སོ་དང་ཁ་སྣའོ། །ཡུལ༵་ནི། གཟུགས་ལ་སོགས་པ་ཚོགས་དྲུག་གི་ཡུལ་དྲུག་གོ །རྩལ༵་ནི། གཟུང་འཛིན་དགག་སྒྲུབ་ལ་སོགས་པའི་རྣམ་རྟོག་རྣམས་སོ། །བྱེ༵ད་ལས༵་ནི། ཉོན་མོངས་དང་བག་ཆགས་དུ་མ་གསོག་པར་བྱེད་དོ། །འབྲས༵་བུ་༵ནི་འཁོར་བའི་སྡུག་བསྔལ་ཐམས་ཅད་བསྐྱེད་པར་བྱེད་དོ། ། ༈ གཉིས་པ་ཡེ་ཤེས་ཀྱི་དབྱེ་བ་བརྒྱད་ལས། གནས༵་ནི། ཙིཏྟ་རིན་པོ་ཆེ་མཆོང་གུར་ཕུབ་པ་འདྲ་བའི་དབུས། འོད་གསལ་གྱི་རྩ་འདབ་བཞིའི་ལྟེ་བ་ལ་དྭངས་མ་ཉུང་འབྲུ་ཙམ་ལ་བརྟེན་པའོ། །ངོ༵་བོ༵་ནི། རིག་པའི་ཡེ་ཤེས་ཏེ། ངོ་བོ་སྟོང་པ། རང་བཞིན་གསལ་བ། ཐུགས་རྗེ་འགག་པ་མེད་པར་མར་མེའི་སྙིང་པོ་ལྟ་བུ་འོད་དང་སྐུར་འབར་བ་དང་དེའི་རྩལ་དུང་ཁང་ན་ཁྲོ་བོའི་དཀྱིལ་འཁོར་དུ་གནས་པའོ། །ལམ༵་ནི། སྙིང་ནས་མིག་ཏུ་འབྲེལ་བའི་རྩ་ཀ་ཏི་ཤེལ་གྱི་སྦུ་གུ་ཅན་དེ། འབྲེལ་ལུགས་ནི་སྙིང་གི་རྩེ་ནས་སྒལ་ཚིགས་འདབས་ལ་འཁྲིལ་ཏེ། མགྲིན་པའི་རྩེའུ་ཆུང་གཡས་གཡོན་གྱི་འདབ་ནས་རྣ་བ་གཉིས་ལ་འཁྲིལ་ཏེ། ཀླད་པ་ནས་མིག་གི་ཨ་འབྲས་ཆུའི་སྒྲོན་མ་གཉིས་ལ་ཟུག་ནས་གནས་སོ། །སྒོ༵་གང་ནས་འཆར་བ་ནི། མིག་གཉིས་ནས་འཆར་རོ། །མིག་གི་རྩའི་རྩ་བ་ནི་ལྟེ་བ་དང་སྙིང་གར་འབྲེལ་ལོ། །སྙིང་ག་ནས་མགྲིན་པ་འབྲེལ་ལོ། །མགྲིན་པ་ནས་དུང་ཁང་དུ་གཡས་འཁྱིལ་བ་རྩ་འདབ་བཞིར་གྱེས་པའི་དབང་པོ་ཡུལ་ལ་འཆར་བར་བྱེད་པའི་རྩ་འདབ་གཅིག་ལས་རྩེ་མོ་ལྔར་གྱེས་ཏེ། སྒོ་ལྔ་སོ་སོའི་རྟེན་བྱེད་པའི་ལས་སྐྱོན་ཡོན་དབང་པོ་དྭངས་བྱེད་ཀྱི་རྩ་ཞེས་བྱ་བ་ཁ་ཆེ་ལ་རྩ་བ་ཕྲབ་བ་མེན་གྱི་རྭ་ལྟ་བུའི་ཡལ་ག་གཉིས་མིག་གི་ཨ་འབྲས་ཀྱི་དྭངས་མ་གཉིས་ལ་ཟུག་ནས་དཀར་ནག་ཕྱེད་མ་ཆུའི་རང་བཞིན་དྭངས་ལ་གསལ་བ་བྱུང་བས་རྒྱང་ཞགས་ཆུའི་སྒྲོན་མ་ཞེས་བྱའོ། །དེ་ལ་བརྟེན་ནས་ཐིག་ལེ་སྟོང་བའི་སྒྲོན་མ་རྨ་བྱའི་མདོངས་ལྟ་བུར་འཆར་རོ། །དེའི་གདངས་དབྱིངས་རྣམ་པར་དག་པའི་སྒྲོན་མ་ཡི་གེ་ན་རོ་ལྟ་བུར་འཆར་རོ། །དེའི་རྩལ་ཤེས་རབ་རང་བྱུང་གི་སྒྲོན་མ་ཤེས་པའི་རྩལ་དུ་མར་འཆར་རོ། །དེ་ཡང་ཤེལ་སྦུག་ཅན་ནི་འོད་རྩ་ཡིན་ལ། དབང་པོ་དྭངས་བྱེད་ནི་མིག་གི་དབང་རྟེན་ཟར་མའི་མེ་ཏོག་ལྟ་བུའི་རྩ་ཡིན་ནོ། །མིག་གི་ནང་རིག་པ་དངོས་ཕྱིར་ལྟ་བ་དང་། ཕྱི་ནང་སྣང་བ་གཟུགས་ཁམས་ཀྱི་སྣང་བ་ནང་དུ་ལྟ་བའི་བར་གྱི་སྒོ་མེ་ཤེལ་དྲི་མ་མེད་པས་ཆོད་པ་ལྟ་བུ་སྟེ། ནང་གི་འོད་མདངས་ཕྱིར་གསལ་དང་། ཕྱིའི་གཟུགས་བརྙན་ནང་དུ་ཤར་བ་གཉིས་མི་བསྒྲིབ་པར་གསལ་བར་མཐོང་བའི་ཕྱིར་རོ། །རིག་པ་དངོས་ཀྱི་གདངས་འཆར་བའི་རྩ་སྒོ་བཞི་སྟེ། མིག་གཉིས་ནས་འོད་སྣང་དངོས་སུ་ཕྱིར་འཆར་བ་དང་། སྙིང་ནས་དབུ་མའི་དབུས་སུ་སྙིང་པོ་འོད་གསལ་གྱི་རྩ་ལས་དུང་ཁང་གི་ཁྲོ་བོ་དང་། དེའི་གདངས་རྩ་རྣམས་ཀྱི་ཐིག་ལེ་དང་། དབུ་མའི་འོད་རྩ་ལས་འཁོར་ལོ་བཞིའི་དབུས་ཀྱི་འོད་གསལ་ཐིག་ལེ་ཆེན་པོ་དང་། སྤྱི་བོ་ནས་རྟོག་པ་མེད་པའི་སྐུ་ཚངས་བུག་ལ་འཆར་རོ། །ཚད་ཕེབས་ཀྱི་ཐིག་ལེ་ལྔ་བརྩེགས་སམ་དགུ་བརྩེགས་སུ་འཆར་བའི་རྟེན་ཅན་འཕོ་བའི་རྩ་སྒོ་དམ་པ་དེ་དང་། སྙིང་ནས་གློ་བར་རིག་གདངས་སེམས་སུ་འཆར་བ་སྟེ། དེ་ལྟར་མིག་གཉིས་དབུ་མའི་འོད་རྩ་གློ་བའི་གདངས་རྩ་དང་བཅས་པ་རྣམས་སོ། །ཕལ་གྱིས་མིག་རྩ་གཉིས་ལམ་དུ་ངོས་བཟུང་བ་ནི། རྒྱ་ཆུང་བས་མ་གོ་བར་ཟད་དོ། །གདངས་བཞི་འཆར་བའི་རྩ་བཞི་ངོས་བཟུང་ལ། ཉམས་ལེན་གྱི་ཚེ་མིག་ནས་རིག་པ་ཐོན་ཅིང་། དེའང་མིག་གཉིས་ནས་རིག་པའི་རང་བཞིན་འོད་མདངས་འཆར་ལ། དབུ་མའི་འོད་རྩ་ལས་ངོ་བོ་སྟོང་གདངས་འཆར་ཞིང་གློ་བའི་རྩ་ནས་ཐུགས་རྗེ་རིག་གདངས་འཆར་བ་ཡིན་ནོ། །ཡུལ༵་གང་ལ་འཆར་ན་ཕྱིའི་དབྱིངས་ནམ་མཁའ་ལ། ནང་གི་དབྱིངས་རྣམ་པར་དག་པའི་སྒྲོན་མ་འོད་ལྔར་སྣང་བའི་ནང་དུ་འཆར་རོ། །རིག་པའི་རྩ༵ལ་ནི། ནང་གསལ་ཐམས་ཅད་མཁྱེན་པའི་ཡེ་ཤེས་ལྔ་དང་། ཕྱི་གསལ་ཇི་ལྟ་དང་ཇི་སྙེད་པ་མཁྱེན་པའི་རྣམ་པར་ཤར་རོ། །བྱེད༵་ལས༵་ནི། འཁོར་བའི་འཁྲུལ་སྣང་འཁྲུལ་འཛིན་ཐམས་ཅད་དང་བྲལ་བར་བྱས་ཏེ་དབྱིངས་གདོད་མའི་ངང་ལ་སྦྱོར་བའོ། །འབྲས༵་བུ༵་ནི། ཁམས་ལ་སྒྲིབ་པའི་དྲི་མ་བག་ཆགས་སྣ་ཚོགས་པའི་ཀུན་གཞི་ལ་བརྟེན་པའི་ཆ་དང་བཅས་པ་དག་ནས་ཉི་མ་སྤྲིན་དང་བྲལ་བ་ལྟར། ཤེས་རབ་རིག་པའི་ཡེ་ཤེས་དྲི་མ་མེད་པས་རང་རིག་བྱང་ཆུབ་ཏུ་མཐར་ཕྱིན་པར་བྱས་ནས་སྐུ་དང་ཡེ་ཤེས་ཀྱི་དགོངས་པ་ལ་རྟག་ཏུ་བཞུགས་པའོ། །སེམས་དང་ཡེ་ཤེས་འཕྲད་པའི་དུས་ནི་གཉིས་ཏེ་ཕྱི་འཕྲད་དང་། ནང་འཕྲད་དོ། །ཕྱི་འཕྲད་ནི། བློ་སྤྲོས་པ་དང་བྲལ་བའི་ཚེ་སེམས་ཀྱི་ཆའི་རིག་གདངས་སྙིང་གར་ཐིམ་ནས། ནང་རིག་ཐོག་ཏུ་སེམས་འཕྲད་པ་ཞེས་བྱའོ།། བཞུགས་སྟངས་སོགས་ཀྱི་སྐོར།བཞུགས་སྟངས་ཀྱི་སྐབས་སུ། ཐེག་མཆོག་མཛོད་དུ། བཅའ་བ་རྒྱུན་གྱི་ཞེས་རྩ་བའི་སྐུ་གསུམ་གྱི་བཞུགས་སྟངས་གསུམ་དང་། ངལ་གསོ་ཡེ་ཤེས་ཀྱི་གནད་ཅེས་སྤྲུལ་སྐུའི་སྐབས་སུ་ལག་སོར་བསྣོལ་ཏེ་པུས་རྒྱབ་ནས་འཁྱུད་པ་དང་། ལོངས་སྐུའི་སྐབས་ལག་མཐིལ་མདུན་གྱི་ས་ལ་ཕབ་པ་དང་། ཆོས་སྐུའི་སྐབས་ལག་མཐིལ་སར་ཕབ་པ་ཙམ་གྱི་ཁྱད་པར་རྣམས་གསུངས་ལ། གཞན་ཡང་ཡན་ལག་གི་འདུག་སྟངས་མང་པོ་ཡ་བཞི་སོགས་སུ་གསུངས་པ་ཡོད་ཀྱང་སྐུ་གསུམ་གྱི་བཞུགས་སྟངས་དེ་ཁོ་ནས་མི་ཆོག་པ་མེད་ཅིང་། དེའི་ནང་ནས་ཆོས་ཉིད་མངོན་སུམ་མན་ཆད་དུ་སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ཉིད་གཙོ་བོར་བྱ་དགོས་གསུངས། ༈ ངག་གི་གནད་ལ། བསླབ་པ་དང་། གནས་པ། ལ་བཟླ་བ་རྣམས་བསྟེན་པར་བྱ་ཞེས་གནད་གསུམ་དུ་འབྲེལ་བའི་ལུགས་ཡོད་ཀྱང་། ཐེག་མཆོག་མཛོད་དུ། བསླབ་པ་ནི་སྨྲ་བ་ཇེ་ཉུང་ཐ་མལ་གྱི་སྨྲ་བ་བཅད་པ་ལ་ཐུན་ཐུང་ངུ་བསླབ། དེ་ནས་རིང་དུ་བསླབ། སྐབས་སུ་སྨྲ་རྒྱུ་མེད་ཀྱང་གཅིག་པུ་སྨྲའོ། །གནས་པ་ནི་སྔགས་དང་བརྗོད་པ་ལ་སོགས་དགེ་བའི་བརྗོད་པ་མི་དགག །གཞན་དང་ཚིག་འབྲུ་གཅིག་ཀྱང་མི་འདྲེའོ། །འདིའི་དུས་ན་ལུས་ཀྱི་བརྡས་དོན་གོ་བར་བྱེད་པའོ། །ལ་བཟླ་བ་ནི་སྔགས་ལ་སོགས་པ་བརྗོད་པ་ཐམས་ཅད་མི་བྱའོ། །བརྟན་པ་ནི། ཅི་ཡང་མི་བརྗོད་པའི་ངང་ལས་མི་འདའ་བར་བྱེད་པ་སྟེ། ལུས་ཀྱི་བརྡ་ཙམ་ཡང་མི་བྱ་བ་ཡིན་ནོ། །ཞེས་གསུངས་པ་ལྟར་རོ། ༈ །སྤྱིར་འོད་སྣང་སྤུ་ཉག་ཙམ་དང་ཐིག་ལེ་ཉུང་འབྲུ་ཙམ་ཚུན་ཆད་ཐིག་ལེའི་ཕྱོགས་སུ་བསྡུ་དགོས་ལ། ཐིག་ལེ་སྟོང་སྒྲོན་དངོས་ནི། ནར་མོ་ཕྱི་འོད་ལྔའི་མུ་ཁྱུད་ཅན་པད་འདབ་ཀྱིས་བསྐོར་བ་རང་གི་ཚོན་གང་གི་ཚད་ཙམ་འཆར་བ་སོགས་དབྱིངས་ཐིག་རིག་གསུམ་སྣང་བ་དངོས་མཐོང་ཚུལ་གྱི་ཁྱད་པར་མང་དུ་ཡོད་གསུངས། ༈ ཕྱིའི་འོད་སྣང་ལ་རྟོག་དཔྱོད་ཞུགས་པ་སོགས་ཀྱིས་ལུག་རྒྱུད་དངོས་པོར་གོལ་བའི་སྐྱོན་དང་། ཁྱད་པར་རླུང་སེམས་ཀྱི་སྦུར་བའི་སྟོང་གཟུགས་ལ་མཆོག་འཛིན་བྱས་པས། གཟུང་འཛིན་གྱི་དབང་གིས་སྟོང་གཟུགས་བདུད་ཀྱི་རྣམ་པར་ཤར་བ་སོགས་འབྱུང་བ་ནི་ལམ་གྱི་གནད་ལེགས་པར་མ་ཟིན་པས་ཡིན་ལ། སྔོན་འགྲོའི་ཕྱིའི་རུ་ཤན་གྱི་སྐབས་སུ་གཟུང་འཛིན་གྱི་འཆིང་ཞེན་ལེགས་པར་བཤིག་ཐུབ་ཡོད་ན་འདིར་དངོས་གཞིའི་སྐབས་སུ་རྩོལ་བས་ཅི་ཙམ་དུ་གཏད་ཀྱང་མི་འཆིང་བ་འོང་བས་དེ་འདྲ་ལ་སྔོན་འགྲོས་དངོས་གཞི་དྲངས་པ་ཞེས་ཟེར་ཏེ། འདི་ལ་ནི་ལུག་རྒྱུད་དངོས་པོར་གོལ་བ་སོགས་ཀྱི་གོལ་ས་གཏན་མི་འབྱུང་། ཞེས་གསུངས། ༈ ཤེས་ཉམས་དང་སྣང་ཉམས་མཐར་འགྱུར་གྱི་ཉམས་གསུམ་གྱི་ཁྱད་པར་ནི་ཤེས་ཉམས་ཞེས་པ་བདེ་གསལ་མི་རྟོག་སོགས་དང་། སྣང་ཉམས་ནི་དབྱིངས་རྣམ་དག་དང་ཐིག་ལེ་སྟོང་སྒྲོན་ལ་སོགས་པའོ། །མཐར་འགྱུར་གྱི་ཉམས་ནི་རིག་གདངས་ལས་གཞན་པའི་ཉི་ཟླ་འཇའ་ཚོན་འདྲ་བ་ལ་སོགས་པ་རླུང་རྟགས་ཀྱི་སྣང་བ་རྣམས་སོ། ༈ །སྐྱེ་འཇུག་ལ་དབང་ཐོབ་པའི་སྐབས་སེམས་ཅན་སྟོང་གྲོལ་བར་མཛད་པ་ནི་རྒྱ་གར་གྲུབ་ཆེན་རྣམས་ཚོགས་སྒྲུབ་མཛད་པའི་དུས་སུའང་ནམ་ཚོད་འཛིན་པའི་བྱ་དང་མཛོ་མོ་ལ་སོགས་པ་མཁའ་སྤྱོད་དུ་གཤེགས་པ་དང་དངོས་གྲུབ་ཐོབ་པའི་ལོ་རྒྱུས་བཞིན་ནོ། ༈ །རྗེས་དྲན་གྱི་སྐབས་སུ་བླ་མ་མཆོག་ལ་གདུང་བ་དང་ལྡན་པ་ཞེས་བླ་སློབ་ཀྱི་འབྲེལ་བ་མ་བཅད་པའི་གང་ཟག་དེས་མོས་གུས་དྲན་པའི་མོད་ལ་བླ་མ་མངོན་སུམ་དུ་བྱོན་ནས་དབང་བསྐུར་གདམས་ངག་བཏབ་པས་མི་ཐེབས་མི་སྲིད། ཐོབ་ནས་མི་གྲོལ་མི་སྲིད་པའི་གནད་ཁྱད་པར་ཅན་ཡོད་པ་ཡིན་ནོ། །ཞེས་གསུངས། ༈ བྱུང་གནས་འགྲོ་གསུམ་གྱི་ལྟ་བ་སྣང་སྟོང་ཟུང་འཇུག་ངེས་པའི་ངེས་ཤེས་ཀྱི་ངོ་ན་དགག་རྟོག་ཡོད་འཛིན་མེད་འཛིན་ཆོས་ཀྱི་བདག་འཛིན་དང་གང་ཟག་གི་བདག་འཛིན་རྣམས་ཀྱང་གྲོལ། ཡུལ་ཡོད་མེད། བདག་གཉིས་སོགས་ཀྱང་འགགས། སྣང་ཆ་སྤངས་བའི་སྟོང་རྐྱང་ཆད་པའམ། སྟོང་ཆ་སྤངས་བའི་སྣང་རྐྱང་རྟག་པ་ཞིག་ག་ལ་ཡིན་ཏེ་མིན་ནོ། །གནས་ལུགས་ལ་ཤིན་ཏུ་ཉེ་བའི་དཔེ་ཡི་འོད་གསལ་ཟེར་ཆོག་རྒྱུ་རེད། ཅེས་གསུངས། ༈ ལ་ལས་བཅོས་མི་ཉན་ཟེར་ཡང་བྱིང་རྨུགས་གཉིད་གསུམ་ཆགས་སྡང་རྨོངས་གསུམ་དུས་གསུམ་གྱི་འཁྲུལ་བའི་དབང་དུ་སོང་ཡང་བཅོས་མི་ཉན་ནི་ཨེ་རེད་གསུངས། ནམ་མཁའ་གསུམ་སྤྲུགས་ཀྱི་གདམས་པ་ནི་བལ་བོ་ཀ་མ་ཤི་ལ། ཤྲཱི་སེང་། ལྕགས་སྐོང་། ཀུན་མཁྱེན། ཞབས་དྲུང་། དགོངས་པ་ཟང་ཐལ་སོགས་ན་ཡོད་གསུངས། ༈ འཆི་ཁ་དུར་ཁྲོད་ཁ་ཚུན་ཆད་ལ་བརྗེད་མི་ཉན་རྒྱུ་བོ་ཉམས་ལེན་རེད་ནི་མ་ནོར་བ་ཞིག་ཨེ་ཤེས་བལྟ་དགོས་ནི་རེད། རྐང་པའི་རྟེན་ས། ལག་པའི་འཇུ་ས་ཞིག་མེད་ན་ཨོ་ཧ་བོ། ཁྱེད་རྣམས་ཤ་ཨེ་ཚ་གོ། སྙིང་ཨེ་རྗེ་འི། ཡི་ཨེ་མུག་གི།། འོད་གསལ་རྫོགས་ཆེན་ཁྲེགས་ཐོད་མན་ངག་ཟབ་མོ་ཆ་ཚང་བར་བཤད་པ།ཁྲེགས་ཐོད་ཀྱི་མན་ངག་ཟབ་མོ། སྤྱིར་འོད་གསལ་རྫོགས་པ་ཆེན་པོ་འདིར། དང་པོ་བརྒྱུད་པའི་ལོ་རྒྱུས་དང་། དེ་ལས་བྱུང་བའི་མན་ངག་གཉིས་ལས། དང་པོ་བརྒྱུད་པའི་ལོ་རྒྱུས་གཞན་ལས་ཤེས། གཉིས་པ་གདམས་ངག་ལ་སྨིན་བྱེད་ཀྱི་དབང་དང་གྲོལ་བྱེད་ཀྱི་གདམས་པ་གཉིས་ལས། དང་པོ་ལ་གཞིའི་དབང་། ལམ་དབང་། འབྲས་བུའི་དབང་དང་གསུམ། དང་པོ་གཞི་དབང་ལ་ནི། བུམ་དབང་། གསང་དབང་ཤེར་དབང་། ཚིག་དབང་དང་བཞི། གཉིས་པ་ལམ་དབང་ནི། ལམ་ཟབ་བླ་མའི་རྣལ་འབྱོར་ལ་བརྟེན་ནས་དབང་བཞི་བླང་བའོ། །གསུམ་པ་འབྲས་བུའི་དབང་ནི། རིག་པ་ཚད་ཕེབས་ཀྱི་སྐབས་སུ་བསྟན་པ་ཡིན་ནོ། །གཉིས་པ་གྲོལ་བྱེད་ཀྱི་གདམས་ངག་ལ་ཁྲེགས་ཆོད་ཐོད་རྒལ་གཉིས། དང་པོ་ཁྲེགས་ཆོད་ལ། སྔོན་འགྲོ་དངོས་གཞི་རྗེས་དང་གསུམ། དང་པོ་སྔོན་འགྲོ་སེམས་ཀྱི་ཁང་བུ་བཤིག་པ་ལ་གསུམ། དང་པོ་རྟོག་པ་རྩད་བཅད་པ། མཚང་བཙལ་བ། བྱུང་གནས་འགྲོ་གསུམ་ལ་བརྟག་པ་གསུམ། དང་པོ་རྟོག་པ་རྩད་བཅད་པ་ནི། འཁོར་བའི་ཡ་མཐའ་ཐོག་མེད་ནས་ད་ལྟའི་བར་དུ། ཁམས་གསུམ་འཁོར་བའི་གནས་སུ་ཟོ་ཆུན་གྱི་ཁྱུད་མོ། རྫ་མཁན་གྱི་འཕང་ལོ་བཞིན་དུ། ལུས་ངག་ཡིད་གསུམ་དབང་མེད་དུ་འཁྲིད་མཁན་དང་འདེད་མཁན་མེད་པར་འཁྱམས་པ་ལ། ལུས་ངག་ཡིད་གསུམ་གཙོ་གང་ཆེ་བརྟགས་པས། ལུས་ངག་མེད་པའི་སེམས་རང་རྐྱ་ཐུབ་པ་ཞིག་ཡོད་ཀྱང་དེས་ཐོག་མར་དགེ་སྡིག་ངོ་མི་ཤེས། བར་དུ་བསྒྲུབ་མི་ཤེས། ཐ་མ་གྲུབ་འབྲས་སྨིན་ཡུལ་མེད་པ་དང་། ཡར་རྒྱལ་བའི་སྐུ་གསུང་ཐུགས་དང་། མར་སེམས་ཅན་གྱི་ལུས་ངག་ཡིད་གསུམ། རྨི་ལམ་ཡུལ་གྱི་ལུས་ངག་ཡིད་གསུམ་སོགས་ལ་བརྟགས་པས་གཙོ་གང་ཆེ་མི་རྟོགས་པའོ། །དེ་ལས་རིག་པ་ཁ་སྤོ་ནས། འཁོར་བ་ཐོག་མེད་ནས་ད་ལྟའི་བར་སྐྱེ་ཤིའི་ཁ་བརྒྱུད་ནས། ལུས་ངག་གཉིས་གྲངས་མེད་འདོར་ལེན་བྱས་ཀྱང་དེ་ལ་རྒྱུན་མ་ཆད་པ་ཙམ་ལ་བརྟགས་ན་ཅུང་ཟད་རྟོགས་པ་ཡིན་ནོ། །དེ་ལས་རིག་པ་ཁ་སྤོ་སྟེ། འཆི་བའི་དུས་སྔ་མའི་རླུང་སེམས་བསྡུས་ནས། འཆི་སྲིད་ཆོས་སྐུའི་འོད་གསལ་ལས། རླུང་སེམས་ཐོག་མར་མཆེད་པའི་དུས་སུ་ལུས་ངག་མ་གྲུབ་ཀྱང་། སླར་འཁྲུལ་བའི་དབང་གིས། ལུས་ངག་གློ་བུར་དུ་གྲུབ་ནས་གསུམ་ཀ་ཚོགས་ཏེ་ལས་དཀར་ནག་དང་མི་གཡོ་བའི་ལས་གསུམ་གྱི་ཁམས་གསུམ་གྱི་གནས་རིས་གྲུབ་པས་འཁོར་བའི་བྱེད་པོ་སེམས་ཡིན་པར་རྟོགས་ནས། ཀུན་ཉོན་འཁོར་བའི་ཕྱོགས་སུ་སེམས་དང་། རྣམ་བྱང་མྱང་འདས་ཀྱི་ཕྱོགས་སུ་སེམས་ཉིད་གཙོ་ཆེ་བར་རྟོགས་པ་ནི་རྐུན་མ་ངོས་འཛིན་ལྟ་བུའི་གདམས་ངག་ཡིན་ནོ། །གཉིས་པ་མཚང་བཙལ་བ་ནི། རི་མོ་མཁན་ལྟ་བུའི་སེམས་དེས་གཅིག་དང་ཐ་དད་ཀྱི་ཚུལ་དུ་འཛིན་པ་ཡིན་ཏེ། རེས་ཆུ་དང་འོ་མ་འདྲེས་པ་ལྟར་ལུས་ངག་ལ་ང་ཞེས་གང་ཟག་གི་བདག་ཏུ་འཛིན། རེས་ཕྱུགས་དང་ཕྱུགས་རྫི་ལྟ་བུ་ངའི་ལུས་ངག་ཅེས་ཆོས་ཀྱི་བདག་དུ་འཛིན་པ་སྟེ། གཅིག་དང་ཐ་དད་ཀྱི་ཚུལ་དུ་འཛིན་པ་ཡིན། དེ་ལྟར་ན་ལུས་ངག་བེམ་པོ་དང་། དབྱིབས་ཁ་དོག་ཡོད་པ་བཞིན་དུ། སེམས་ལ་ཡོད་དགོས་པ་དང་། ཡང་ན་སེམས་ཤེས་པ་ཡིན་པ་དང་། མཐོང་ཐོས་ཀྱི་ཡུལ་དུ་མ་གྱུར་བ་བཞིན་དུ། ལུས་ངག་ཀྱང་ཤེས་པར་འགྱུར་བ་དང་། མཐོང་ཐོས་མི་རུང་བར་འགྱུར་དགོས་ཀྱང་དེ་ལྟར་མ་གྲུབ། དེ་བཞིན་གཞན་ཁྲོ་ཆགས་ཀྱི་སེམས་དང་། དགྲ་གཉེན་གྱི་རྟོག་པ་སོགས་གཅིག་ཐ་དད་དུ་བརྟགས་པས། གཅིག་ཐ་དད་གང་ཡང་མ་གྲུབ་པའོ། །གསུམ་པ་བྱུང་གནས་འགྲོ་གསུམ་ལ་བརྟགས་པ་ནི། དང་པོ་བྱུང་ས་དང་བྱུང་མཁན་ལ་བརྟགས་པ་ནི། རྫ་མའོ་སྙམ་པ་ལྟ་བུའི་སེམས་བྱུང་བ་ན་ཡུལ་རྫ་མ། ལུས་ཤ་ཁྲག་སོགས་སྣང་བའི་ཡུལ་གང་ལས་བྱུང་སྙམ་ན། དེ་ཉིད་རྡུལ་ཕྲན་བསྲེགས་གཏོར་དུ་བྱས་ནས་ཡུལ་གཞི་མེད་རྩ་བྲལ་དུ་གཏན་ལ་ཕབ། བྱུང་མཁན་རང་གི་ངོ་བོར་བརྟགས་ཤིང་དཔྱད་ནས་ཤེས་པ་ཡུལ་མེད་ཟང་ཐལ་དུ་གཏན་ལ་ཕབ། བར་དུ་གནས་ས་གནས་མཁན་མེད་པར་ཡུལ་དང་ཡུལ་ཅན་གང་ཟག་གཏན་ལ་ཕབ། ཐ་མ་འགྲོ་སའི་ཡུལ་སྟེང་འོག་ཕྱོགས་བཞི་སོགས་དང་། ཡུལ་ཅན་རང་གི་ངོ་བོ་གཏན་ལ་དབབ་པས། ཡུལ་ཤེས་གཉིས་ཀ་མ་གྲུབ་པར་རྟོགས། དེ་ལྟར་བྱུང་གནས་འགྲོ་གསུམ་གཏན་ལ་དབབ་པས་རྟོག་པ་དང་པོ་སྐྱེ་བ་མེད་པའི་ཆོས་སྐུ། གཉིས་པ་འགགས་པ་མེད་པས་ལོངས་སྐུ། གསུམ་པ་ཤར་གྲོལ་འགགས་མེད་ཀྱི་སྤྲུལ་སྐུར་གཏན་ལ་ཕབ་པའོ། །དེ་ལྟར་གཏན་ལ་ཕབ་པས། སྣོད་བཅུད་འཁྲུལ་སྣང་དང་བཅས་པ་མེད་པ་གསལ་སྣང་། སྐྲ་ཤད་དང་རྨི་ལམ་སྒྱུ་མ་ལྟ་བུ། མེད་སྣང་ཉག་གཅིག གཞི་མེད་རྩ་བྲལ། ཤེས་པ་ཡུལ་མེད། ཟང་ཐལ་བྱར་མེད་ཀྱི་ངང་དུ། ངེས་ཤེས་མར་མེ་ལྟ་བུའི་ངང་དུ་མཉམ་པར་འཇོག་པ་ནི་དབུ་མའི་ལྟ་བ་ལས་ཁྱད་དུ་འཕགས་པ། ཁྱད་གཞིའི་སྟེང་ནས་ཁྱད་ཆོས་ནི། གནས་ཆ་ལ་དྭངས་ཆ་ཡོད་པ། དྭངས་ཆ་ལ་ཤར་ཆ་ཡོད་པ། ཤར་ཆ་ལ་གྲོལ་ཆ་ཡོད་པ་སྟེ། མཐའ་བཞིའི་སྤྲོས་པ་ཐམས་ཅད་དང་བྲལ་བའི་ངང་དུ་འཇོག་པ་ནི། བྱུང་གནས་འགྲོ་གསུམ་གྱི་ལྟ་བ་ཡང་དག་པའོ། །དབུ་མ་ནི་སྟོང་འཛིན་གྱི་འདུ་ཤེས་སམ། འཛིན་སྟངས་མ་ཉམས་པ་ལྕགས་སྐུད་བསྒྲིམ་པ་ལྟ་བུ་དགོས་ཞེས་པ་དང་ཁྱད་པར་ཡོད། གཉིས་པ་དངོས་གཞི་རིག་པའི་རང་ངོ་སྤྲད་པ་ལ། སྣང་བ་ཡུལ་གྱི་བློ་ཅན་དང་། རིག་པ་རང་སྣང་གི་བློ་ཅན་གཉིས་ལས། དང་པོ་སྣང་བ་ཡུལ་གྱི་བློ་ཅན་ནི། རིག་པ་ཐད་ཀར་ལམ་དུ་ཁྱེར་མི་ནུས་པས། རྟོག་པ་གང་སྐྱེས་ཐམས་ཅད་དྲན་པས་བཟུང་ནས། མ་བཅོས་པར་བཞག་པ་ལ་འགྱུ་བ་གནས་དག་གི་དགོངས་པ་བསྐྱངས་པ་ཡིན། དེ་ལ་མཚན་བཅས་དང་། མཚན་མེད་ཀྱི་ཞི་གནས་གཉིས། དང་པོ་མཚན་བཅས་ཀྱིས་མཚན་མ་ཨཱཿདཀར་ལ་སེམས་བཟུང་བ། རྣམ་རྟོག་གཏོར་བ་ཡི་གེ་ཕཊ་ལ་སེམས་བཟུང་བ། ཁྲོ་བོ་དགྱེས་པའི་གད་མོ་ཡི་གེ་ཧ་ལ་སེམས་བཟུང་བ་དང་། འདེད་པ་ཧཱུྃ་ལ་སེམས་བཟུང་བ་སོགས་ལ་བསླབ། མཚན་མེད་ཀྱི་རྫོགས་རིམ་ནི། སྣང་སྲིད་བླ་མར་འཆར་བའི་བསྐྱེད་རིམ་དང་། ཐུགས་ཡིད་དབྱེར་མེད་འདྲེས་པའི་རྫོགས་རིམ་གཉིས་ལ་བསླབས་ནས། ངོ་སྤྲོད་པ་སོགས་ཡིན་པའོ། །གཉིས་པ་རིག་པ་རང་སྣང་གི་བློ་ཅན་ནི། བྱུང་གནས་འགྲོ་གསུམ་གྱི་ལྟ་བའི་སྟེང་ནས་ངོ་སྤྲད་པས། རིག་པ་རྐྱང་འདེད། ཡེ་ཤེས་ལམ་བྱེད། ཡེ་ཤེས་རྗེན་འདེད་བྱས་ནས་རིག་ངོ་སྐྱོང་ནུས་པ་ཡིན་ནོ། །རིག་པ་ངོ་སྤྲད་པ་ལ། རིག་པ་ངོས་འཛིན་ཚུལ་དང་། དེ་ཉིད་སྐུ་གསུམ་དུ་ངོ་སྤྲད་པ་གཉིས་ལས། དང་པོ་ངོས་འཛིན་ཚུལ་ནི། བྱིན་རླབས་འཕོ་བའི་སྟོབས་ཀྱིས་ངོ་སྤྲད་པ། གནས་ལུགས་ལྟ་བའི་སྟེང་དུ་ངོ་སྤྲད་པ། ཉམས་མྱོང་སྒོམ་པའི་སྟེང་དུ་ངོ་སྤྲད་པ་རྣམས་ནི་ཆོས་དབྱིངས་མཛོད་ལེའུ་དགུ་པར་གནད་ལ་མ་བརྟེན་པར་ངོ་སྤྲད་ཚུལ་དང་། གནད་ལ་བརྟེན་ཏེ་ངོ་སྤྲད་ཚུལ་དྲུག་ལས་ཤེས་པར་བྱའོ། །གཉིས་པ་དེ་ཉིད་སྐུ་གསུམ་དུ་ངོ་སྤྲད་པ་ལ་གཞི་བཤད་པ། གཞི་སྣང་བཤད་པ། ཀུན་ཏུ་བཟང་པོའི་གྲོལ་ཚུལ་བཤད་པ། མ་དག་སེམས་ཅན་གྱི་འཁྲུལ་ཚུལ་བཤད་པའོ། །དང་པོ་ལ་གཞི་བདུན་སྐྱོན་ཅན་དུ་བསྟན་པ་དང་། བྱེ་བྲག་བླ་མེད་རང་གཞུང་གི་གཞི་བཤད་པ་དང་གཉིས། དང་པོ་གཞི་བདུན་སྐྱོན་ཅན་དུ་བཤད་པ་ནི། དང་པོ་གཞི་ཀ་དག་ཏུ་འདོད་པ་ཅན་ནི། གཞི་ནི་རང་བཞིན་གདོད་ནས་སྤྲོས་པ་ཐམས་ཅད་བྲལ་བའི་བདག་ཉིད་ཅན་དུ་སྨྲ་བ་ལས། ཡེ་གདངས་འགག་པ་མེད་པའི་ལྷུན་གྲུབ་ཀྱི་སྣང་ཆ་མ་བཟུང་བའོ། །ངོ་བོ་སྟོང་པའི་ཆ་ནས་འཐད་ཀྱང་། ཀ་དག་སྟོང་རྐྱང་དེ་ལ་མ་རིག་པ་མི་ལྡན་པས་འཁོར་བ་མ་གྲུབ། ཡེ་ཤེས་མེད་པས་མྱང་འདས་མི་སྲིད་དེ་ཆད་པར་འགྱུར་རོ། །རྣམ་རྟོག་མེད་ཤུལ་གྱི་སྟོང་པ་ཞིག་ལ་དམིགས་ནས་བསྒོམ་པ་ནི་རྫོགས་ཆེན་གྱི་སྤྱི་འབྱམས་གཤིས་ཤོར་གྱི་གོལ་སར་བསྟན་པའོ། །གཉིས་པ་གཞི་ལྷུན་གྲུབ་ཏུ་འདོད་པ་ནི། འཁོར་འདས་གཉིས་ཀ་གཞི་ལ་ལྷུན་གྲུབ་པར་འདོད་པའོ། །དེ་ཡང་གདངས་འགགས་མེད་ཀྱི་རྩལ་སྣང་སྣ་ཚོགས་སུ་འཆར་བའི་ཆ་ནས་འཐད་ཀྱང་། མཐའ་གཅིག་ཏུ་དེ་ལྟར་འདོད་ན། ཡོད་པ་རྟག་པའི་དངོས་པོ་སོ་སོར་འགྱུར་བས། གཞི་མ་སྤངས་བར་འཁོར་བ་སྤང་མི་ནུས། ཚོགས་རྫོགས་པ་སོགས་ཀྱིས་མྱང་འདས་རྟོགས་མི་སྲིད། སེམས་རྒྱུད་གཅིག་ལ་འཁོར་འདས་གཞི་མཐུན་དུ་མི་སྲིད་དོ། །གསུམ་པ་གཞི་མ་ངེས་པར་འདོད་པ་ནི། གཞི་སེམས་ཀྱི་རང་བཞིན་ནི་འཁོར་འདས་གང་དུའང་འགྱུར་རུང་བས་མཐའ་གཅིག་ཏུ་མ་ངེས་པར་འདོད་པའོ། །དེ་ཡང་གཞི་སྤྲོས་བྲལ་ལ་འཁོར་འདས་མ་གྲུབ་པའི་ཆ་ནས་མ་ངེས་པ་འཐད་ཀྱང་། རྣམ་པ་ཀུན་ཏུ་དོན་ལ་མ་ངེས་ན། དྲི་མ་དག་ཀྱང་མ་དག་པར་ལྡོག་པའམ་མ་དག་ཀྱང་དག་པའི་རང་བཞིན་དུ་འཐད་པར་འགྱུར་ཏེ་ས་ཟིན་མེད་པས་འཁོར་འདས་འཆོལ་བར་འགྱུར་རོ། །བཞི་པ་གཞི་ངེས་པ་དོན་གྱི་དངོས་གཞི་འདོད་པ་ནི། གཞི་རང་བཞིན་འདུས་མ་བྱས་འཕོ་འགྱུར་མེད་པ་ཞིག་ཏུ་འདོད་པའོ། །དེ་ཡང་གློ་བུར་གྱི་དྲི་མ་མེད་སྣང་ཡིན་པའི་ཆ་ནས་གཞི་ངེས་མེད་ཡིན་པར་འཐད་ཀྱང་། རྣམ་པ་ཀུན་ཏུ་དེ་ལྟར་འདོད་ན། འཁོར་བ་སྣང་མི་སྲིད་ལ། མྱང་འདས་གཞི་ལ་ངེས་པར་ཡོད་ན་ལམ་ལ་མི་ལྟོས་པར་འགྱུར་རོ། །ལྔ་བ་གཞི་ཅིར་ཡང་བསྒྱུར་དུ་བཏུབ་པར་འདོད་པ་ནི། གཞིའི་རང་བཞིན་ལ་རྐྱེན་འཇུག་པས་དེ་འཁོར་འདས་གང་དུའང་བསྒྱུར་རུང་བར་འདོད་པའོ། །དེ་ཡང་གཞི་ལས་གཞི་སྣང་འཆར་བ་ན། ངོ་ཤེས་མ་ཤེས་ལས་གྲོལ་འཁྲུལ་དུ་འགྱུར་བ་ལ་བསྒྱུར་བའི་ཐ་སྙད་ཙམ་འཐད་ཀྱི། གཞིའི་ངོ་བོ་བསྒྱུར་དུ་ཡོད་པར་འདོད་ན། བསྒྱུར་རྒྱུའི་དངོས་པོ་ཞིག་འདོད་དགོས། དེ་ལྟར་ན་རྟག་པ་ཡིན་ན་བསྒྱུར་དུ་མི་རུང་། མི་རྟག་པ་བསྒྱུར་མི་དགོས་པའི་ཕྱིར་རོ། །དྲུག་པ་གཞི་ཅིར་ཡང་ཁས་བླང་དུ་བཏུབ་པ་ནི། གཞི་སེམས་ཀྱི་རང་བཞིན་འདི། འཁོར་འདས་དང་ཡོད་མེད་སོགས་གང་ཡང་རྣམ་པ་ཀུན་ཏུ་གང་རུང་རུང་ཁས་བླང་དུ་བཏུབ་ན། གྲོལ་གཞི་ཡང་འཁྲུལ་གཞི་དང་། འཁྲུལ་གཞི་གྲོལ་གཞིར་ཁས་བླང་དགོས་ཤིང་། རི་རྭ་དང་མོ་གཤམ་གྱི་བུས་ཀྱང་འཁོར་འདས་བྱེད་པར་ཁས་བླང་དགོས་སོ། །བདུན་པ་གཞི་སྣ་ཚོགས་སུ་འདོད་པ་ནི། གཞི་ལས་འཁོར་འདས་ཀྱི་ཆོས་སྣ་ཚོགས་པ་འཆར་བས་ཆོས་དེ་རྣམས་གཞིའི་ཆོས་ཉིད་དོ་ཞེས་འདོད་པའོ། །ལྷུན་གྲུབ་དང་འདི་གཉིས་ཀྱིས་ཁྱད་པར་ནི། གཞི་ལ་འཁོར་འདས་གྲུབ་ཅེས་པ་དང་གཞི་ཉིད་འཁོར་འདས་གཉིས་ཀ་ཡིན་ཞེས་པའི་ཁྱད་པར་རོ། །དེ་ཡང་ཐུགས་རྗེ་འགག་མེད་ལས་རོལ་པ་སྣ་ཚོགས་སུ་ཤར་བ་སེམས་ཉིད་ཀྱི་ཆ་ལས་གཞན་མ་ཡིན་པའི་ཆ་ནས་འཐད་ཀྱང་། རྣམ་པ་ཀུན་ཏུ་དེ་ལྟར་འདོད་ན་སེམས་ཉིད་གཅིག་པུ་འདི་དག་མ་དག་གཉིས་ཀ་ཡིན་པ་དང་། སྣང་བ་ལ་འདོད་ན་གཞི་བེམ་པོ་ཡིན་པ་དང་། ཤེས་པ་ལ་འདོད་ན་གཞི་རྣམ་ཤེས་སུ་ཐལ་བ་དང་། དེ་གཉིས་ཚོགས་པ་ལ་འདོད་ན། གཞི་གཟུང་འཛིན་ཅན་དུ་ཐལ་བ་དང་། དབྱིངས་གཅིག་གི་རང་བཞིན་ཡིན་པར་མི་རུང་བས་མི་འཐད་དོ། །དེ་ལྟར་བདུན་ནི། དཔེ་དམུས་ལོང་གིས་གླང་པོ་ཆེའི་སྐྱེ་མཆེད་ལ་གཞལ་བ་ལྟ་བུའོ། །གཉིས་པ་སྐྱོན་མེད་བླ་མེད་ཀྱི་གཞི་རང་གཞུང་དུ་བཤད་པ། དེ་ཡང་རིག་སྟོང་ཟུང་དུ་འཇུག་པའི་ཡེ་ཤེས་སྐུ་གསུམ་འདུ་འབྲལ་མེད་པའི་རིག་པ། ངོ་བོ་སྟོང་པ་ལ་ཡེ་ཤེས་ཀྱི་སྙིང་པོ་ཅན་ཆོས་སྐུ། རང་བཞིན་གསལ་བ་འོད་ཀྱི་སྙིང་པོ་ཅན་ལོངས་སྐུ། ཐུགས་རྗེ་ཀུན་ཁྱབ་ལ་རིག་པའི་སྙིང་པོ་ཅན་སྤྲུལ་སྐུ་སྟེ། ངོ་བོ་མི་རྟོག་ཀྱང་གདངས་མ་འགག་པས་གཟུགས་མེད་ཀྱི་སེམས་ལས་གྲོལ། གསལ་ལ་མི་འཛིན་པས་གཟུགས་ཁམས་ཀྱི་སེམས་ལས་གྲོལ། རིག་ཀྱང་མི་འཕྲོ་བས་འདོད་ཁམས་ཀྱི་སེམས་ལས་གྲོལ་བས། སྲིད་གསུམ་ཀ་དག་གི་ལྟ་བ། ཁམས་གསུམ་ཡོངས་གྲོལ་གྱི་སྒོམ་པ། ཕྱོགས་ལས་རྣམ་རྒྱལ་གྱི་སྤྱོད་པ། རང་ངོ་འཕྲོད་པ་ལྟ་བ། ངང་ལ་གནས་པ་སྒོམ་པ། གང་ཤར་རང་གྲོལ་སྤྱོད་པ། སྐུ་གསུམ་ལྷུན་གྲུབ་འབྲས་བུ། དེ་ལས་མི་འདའ་བ་དམ་ཚིག་སྟེ། དེ་ལྟར་གཞི་རིག་སྟོང་ཟུང་འཇུག་གི་ལྟ་བ་དེ་ལ། ཕུ་ཐག་ནང་ནས་ཆོད། ངེས་ཤེས་གཏིང་ནས་སྐྱེས། གོ་ཡུལ་ཙམ་དུ་མ་སོང་བར། ཁྲེགས་ཆོད་ཆོས་སྐུའི་དཀྱིལ་འཁོར་མངོན་སུམ་དུ་བསྟན་པ་ཡིན་པས་གཞི་ལམ་དུ་བྱེད་པ། ད་ལྟའི་ཐད་ཀའི་ཤེས་པ་ཤར་ཡོད་པ་དེ་ཉིད་རིག་པ་ཆོས་སྐུ་ཆེན་པོར་ངོ་སྤྲད་པ་ཡིན་ནོ། །མཉམ་བཞག་ལྟ་བུ་ལ་མཚོན་ན། ཕྱི་སྒོ་ལྔའི་ཤེས་པ། ནང་དུས་གསུམ་ཡིད་ཀྱི་འཁྲུལ་རྟོག །ཉམས་བདེ་གསལ་མི་རྟོག་པའི་ཤུན་པ་དང་བྲལ་ནས་གདོད་མའི་གཤིས་ཐོག་ཏུ་ཕེབས་པས། ཤེས་རིག་གོ་མ་འགགས་པ་ཀུན་ཤེས་ཀུན་རིག་གི་བདག་ཉིད་ཅན་དེ་ལ་བཟོ་བཅོས་མེད་པ་ལ་ད་ལྟའི་ཐ་མལ་གྱི་ཤེས་པའམ། རིག་སྟོང་ཐ་མལ་གྱི་ཤེས་པ་ཟེར་བ་ཡིན། འཁྲུལ་རྟོག་ཐ་མལ་གྱི་ཤེས་པ། ཉམས་ཞེན་ཐ་མལ་གྱི་ཤེས་པ་དང་མི་འདྲའོ། །གཉིས་པ་གཞི་སྣང་བཤད་པ་ལ། ལྷུན་གྲུབ་ཀྱི་སྣང་བ་དང་། གཞི་སྣང་ཆེན་མོ་ལོངས་སྐུ་དང་། སྤྲུལ་སྐུ་འཆར་ཚུལ་སོགས་བར་དོ་བཤད་པའི་སྐབས་ལས་ཤེས་སོ། །གསུམ་པ་ཀུན་ཏུ་བཟང་པོའི་གྲོལ་ཚུལ་ནི། སེམས་ཅན་ཐམས་ཅད་འཆི་བའི་ཚེ། སྔ་མའི་ལུས་སེམས་ཐམས་ཅད་སྡུད་ཅིང་ཁམས་དཀར་དམར་ནག་གསུམ་གྱི་སྣང་བ་དང་བཅས། བདེ་གསལ་མི་རྟོག་གི་ཉམས་དང་ཀུན་རྟོག་བརྒྱད་ཅུ་སོགས་འཁྲུལ་རྟོག་ཐམས་ཅད་འགགས་ནས། འཆི་སྲིད་ཆོས་སྐུའི་འོད་གསལ། འཁོར་འདས་གཉིས་ཀྱི་སྤྱི་གཞི་རྟོགས་ཏེ་སངས་རྒྱས་མ་བྱུང་། སྐུ་གསུམ་སྟོན་པའི་སྐུར་མ་བཞེངས། མ་རྟོགས་ཏེ་སེམས་ཅན་མ་བྱུང་། འཁྲུལ་བའི་རླུང་སེམས་མ་མཆེད། ངོ་བོ་སྟོང་ཀྱང་གདངས་མ་འགགས། འཁོར་འདས་གཉིས་ཀ་འཆར་བའི་གཞིར་གནས་པ་ནི། གཞི་ལྷུན་གྲུབ་རིན་པོ་ཆེའི་སྦུབས་ཡིན་ནོ། །ནང་གསལ་གཞོན་ནུ་བུམ་པའི་སྐུའི་ཚུལ་ཏེ། གདངས་ཕྱིར་མ་ཤར་བས་བུམ་པ། གཏིང་གསལ་ཕྲ་བའི་ཡེ་ཤེས་མ་འགགས་པས་སྐུ་ཞེས་བརྗོད་པ་ཡིན། ཐུགས་རྗེའི་རིག་པ་ནང་དུ་གཡོས་པ་ལས། གཞོན་ནུ་བུམ་སྐུའི་རྒྱ་རལ་ཏེ་ཐོག་མའི་གཞི་ལས་གཞི་སྣང་ཤར་བ་ནི། ངོ་བོའི་སྟོང་གདངས་ནམ་མཁའ་ལྟ་བུ། སྟེང་དང་འོག་མེད་པ། མཐའ་དང་དབུས་མེད་པ། རང་བཞིན་འོད་གདངས་སྒྲ་འོད་ཟེར་གསུམ་གྱི་རྣམ་པ། ཐུགས་རྗེའི་རིག་གདངས་དཔྱོད་བྱེད་ཤེས་རབ་ཀྱི་རང་བཞིན་དུ་ཤར་བ་ལས། འཁྲུལ་གྲོལ་གཉིས་ཀ་འབྱུང་རུང་བས་ལམ་ལྷུན་གྲུབ་རིན་པོ་ཆེའི་སྦུབས་ཞེས་བརྗོད་པ་ཡིན། གཞི་སྣང་ཤར་བ་ལ་རང་སྣང་དུ་ཤེས། རང་སྣང་རང་བཞིན་མེད་པར་ཤེས་པ་རང་ངོར་སྣང་བ། གཞི་འཁྲུལ་གྲོལ་གང་ཡང་ལུང་དུ་མ་བསྟན་པའི་ཆ་ནས་གྲོལ་བའི་གཞི་ལས་འཕགས་པ། མ་རིག་པའི་བག་ཆགས་དག་རིག་པའི་རང་ངོ་མཐོང་བས་འཁོར་འདས་ཀྱི་བྱེ་བྲག་ཕྱེད་པ་དང་། དཔྱོད་བྱེད་ཀྱི་ཤེས་རབ་ཉིད་ཀྱང་ཆོས་ཀྱི་སྐུར་སྨིན་པས་སྣང་གསུམ་འཕོ་བའི་བག་ཆགས་རང་ཟད་རང་དག །ཤེས་སྒྲིབ་ཕྲ་བའི་བག་ཆགས་གཏན་དག་ཕྱེད་ཐོག་ཏུ་གྲོལ་བ། དེ་ལྟར་རྟོགས་པ་གཞན་རྐྱེན་ལ་མ་ལྟོས་པས་རང་སྟོབས་ཀྱི་རྟོགས་པས་ལུང་ལས་མ་བྱུང་བའི་མན་ངག ། སེམས་རྣམ་ཤེས་ཚོགས་བརྒྱད་ལས་མ་བྱུང་བའི་སངས་རྒྱས། རྒྱུ་དགེ་སྡིག་ལས་མ་བྱུང་བའི་འབྲས་བུ་སྟེ། ཁྱད་ཆོས་དྲུག་གི་བྱེ་བྲག་ཕྱེས་ནས། གཞི་སྣང་ཐམས་ཅད་ཤེལ་འོད་ནང་དུ་ཐིམ་པ་ལྟར། ཐོག་མའི་གྲོལ་སའི་གཞི་དབྱིངས་སུ་དལ་གཅིག་གནས་པ་ནི། འབྲས་བུ་ལྷུན་གྲུབ་རིན་པོ་ཆེའི་སྦུབས་ཏེ་གྲོལ་ཚུལ་ལོ། །ཁྱད་ཆོས་དྲུག་གི་བརྗོད་ཚུལ་གཞན་དུ། གཞི་སྣང་དངོས་ཤར་དུས། སྣང་བ་ལྷུན་གྲུབ། ལྷུན་གྲུབ་རང་སྣང་། རང་སྣང་ཡེ་ཤེས། ཡེ་ཤེས་ཡེ་གྲོལ། ཡེ་གྲོལ་རང་རིག །རང་རིག་ཆོས་སྐུ་ཡིན་པས་ཐུགས་རྗེའི་རིག་པ་ཕྱིར་སྐད་ཅིག་མ་ཉུག་ཙམ་ཤར་བས་ཆོས་དྲུག་པོ་དེ་རྟོགས་ནས་སངས་རྒྱས་པར་གསུངས་པ་དང་། ཡང་ལུང་ལས་མ་བྱུང་བའི་མན་ངག །སེམས་ལས་མ་བྱུང་བའི་སངས་རྒྱས། རྒྱུ་ལས་མ་བྱུང་བའི་འབྲས་བུ། རང་སྣང་རང་ཤར། རང་གྲོལ་དུ་སངས་རྒྱས་སོ་ཞེས་བརྗོད་ཚུལ་ཐ་དད་པ་རྣམས་ཀྱང་དོན་ལ་གཅིག་གོ །བཞི་པ་མ་དག་སེམས་ཅན་གྱི་འཁྲུལ་ཚུལ་བཤད་པ་ལ་གསུམ། འཁྲུལ་བའི་རྒྱུ་རྐྱེན་བཤད་པ། འཁྲུལ་བའི་སྣང་ལུགས་བཤད་པ། སྣང་སེམས་ཀྱི་དབྱེ་བ་བཤད་པའོ། །དང་པོ་འཁྲུལ་བའི་རྒྱུ་རྐྱེན་བཤད་པ་ནི། གཞི་ལས་གཞི་སྣང་ཤར་བའི་ཚེ། རིག་པ་རང་གི་རྩལ་རང་ལ་སྒྲིབ་བྱེད་དུ་སོང་བ། རླུང་སེམས་ཤིན་ཏུ་ཕྲ་བ། རིག་པ་ལས་ལྡོག་ཙམ་མ་རིག་པ་རྨོངས་ཆ་ཅན། ཀུན་གཞིའི་རྣམ་ཤེས་དང་མཚུངས་ལྡན་གྱི་ཤེས་པ་ལུང་མ་བསྟན་དེ་རྒྱུ་བདག་ཉིད་གཅིག་པུའི་མ་རིག་པ་སྟེ་འཁོར་བའི་རྩ་བ་ཤེས་སྒྲིབ་ཕྲ་བའམ་ཤེས་སྒྲིབ་ཀྱི་ལྷག་རོ་ལ། ཡེ་ཤེས་རང་འགྲིབ། ལས་རླུང་སྦུན་པོ་སྟེ། འཁོར་བའི་རྒྱུ་མ་ནོར་བར་སོང་བ་ཡིན། དེ་ཉིད་ནུས་སྟོབས་ཆེར་སོང་བས་དཔྱོད་བྱེད་ཀྱིས་ཤེས་པ་ཕྲ་མོ་སྒོ་ལྔའི་ཤེས་པ་དང་མཚུངས་ལྡན། ཡུལ་སྣང་ཡང་འཛིན་མི་ནུས་པ་ནི་ལྷན་ཅིག་སྐྱེས་པའི་མ་རིག་པ། དེ་ལས་ནུས་པ་ཆེར་འཕེལ་ནས་དམིགས་དོན་བདག་རྟོག་གི་མགོ་བརྩམ་ས་ཏེ་མ་རིག་པ་ཡིད་ཤེས་དང་མཚུངས་ལྡན་དེ་ཀུན་ཏུ་བརྟགས་པའི་མ་རིག་པ་སྟེ། དེ་གསུམ་ཚོགས་ཤིང་འདུས་པ་ལས་རྐྱེན་བཞི་ཇི་ལྟར་མཆེད་ཚུལ་ནི། ཆོས་ཉིད་ཡུལ་གྱི་འཁྲུལ་གཞི། འོད་ལྔ་སྣོད་བཅུད་ཀྱི་འཁྲུལ་གཞི། རིག་པ་སེམས་ཀྱི་འཁྲུལ་གཞི། ངོ་བོའི་སྟོང་གདངས་རང་བཞིན་འོད་གདངས་གཉིས་ཡུལ་རྒྱུའི་རྐྱེན། ཐུགས་རྗེའི་རིག་གདངས་དཔྱོད་བྱེད་ཀྱི་རྣམ་པར་ཤར་བ་ཡུལ་ཅན་བདག་པོའི་རྐྱེན། ཡུལ་ཅན་རིག་གདངས་ཀྱིས་ཡུལ་འོད་གདངས་ལ་དམིགས་པ་འཛིན་པའི་རྐྱེན། རྐྱེན་གསུམ་པོ་དུས་གཅིག་ཏུ་མཚུངས་པར་ལྡན་པ་ལས་འཁྲུལ་བ་རྒྱུན་མ་ཆད་པར་འབྱུང་བའི་རྐྱེན་བྱེད་པས་དེ་མ་ཐག་པའི་རྐྱེན་ཏེ། རྒྱུ་གསུམ་རྐྱེན་བཞིའི་དབང་གིས་ལས་དགེ་བའི་འབྲས་བུ་མཐོ་རིས། མི་དགེ་བའི་ལས་ཀྱིས་ངན་སོང་། མི་གཡོ་བའི་ལས་ཀྱིས་ཁམས་གོང་མ་གཉིས་ཏེ་འཁོར་བ་ལ་རྒྱུ་དེ་གསུམ་ལས་ཡོད་པར་མདོ་སྔགས་ཀྱི་སྟོན་པས་མ་གསུངས་སོ། ། ༈ གཉིས་པ་འཁྲུལ་བའི་སྣང་ལུགས་ནི། དེ་ལྟར་འགྲོ་བ་རིགས་དྲུག་གི་གནས་སྣོད་ཀྱི་འཇིག་རྟེན། བཅུད་ཀྱི་སེམས་ཅན། གནས་ལུས་ལོངས་སྤྱོད་དང་། འཁྲུལ་བ་འཁྲུལ་སྣང་དང་བཅས་པ་འདི་ཐོག་མའི་གཞི་ལ་མ་གྲུབ། མཐར་ཐུག་འབྲས་བུར་མ་གྲུབ། ད་ལྟ་ལམ་གྱི་གནས་ཚུལ་ལ་མ་གྲུབ། འཁྲུལ་གཞི་མ་རིག་པ་ཙམ་ཡང་མ་གྲུབ་པས་ནམ་མཁའི་སྐྲ་ཤད་ཙམ་ལས་ངོ་བོ་རྡུལ་ཕྲན་ཙམ་དུ་གྲུབ་མ་མྱོང་། སྟོང་གཟུགས་ཉག་གཅིག་གི་སྣང་བ་ཡིན་པས་ཕྱི་རོལ་དོན་དུ་གྲུབ་པ་མེད་དོ། ། ༈ གསུམ་པ་སྣང་སེམས་ཀྱི་དབྱེ་བ་བཤད་པ་ནི། འོ་ན་སྣོད་བཅུད་ཡོད་ཡོད་གྲུབ་གྲུབ་ཏུ་སྣང་བ་འདི། སེམས་ཡིན་ནམ་ཟེར་ན། སེམས་མ་ཡིན་ཏེ་སེམས་ཀྱི་འཁྲུལ་སྣང་གི་བག་ཆགས་ཡིན་པས། སེམས་དང་སེམས་ལས་གཞན་དུ་གྲུབ་པ་རྡུལ་ཙམ་ཡང་མེད། དཔེ་རྨི་ལམ་གྱི་སྣང་བ་གཉིད་ཀྱི་ངང་ལས་མ་འདས་པ་ལྟ་བུའོ། །རྨི་ལམ་གྱི་སྐབས་སུ་ནོར་བུ་རྙེད་ནས་ལོངས་སྤྱད་དེ་སད་པའི་ཚེ་ཐོག་མར་ནོར་བུ་རྙེད་མ་མྱོང་། བར་དུ་ལོངས་སྤྱོད་པའི་གཞིར་མ་གྲུབ། ཐ་མ་འགག་པའམ་སྟོར་བ་མེད་པ་ལྟར་སྣང་ཤེས་གཉིས་ཀ་གཞིར་མ་གྲུབ་པའོ།། ༈ རྗེས་ཉམས་ལེན་གྱི་སྐྱོང་ཚུལ་ནི། ལམ་གྱི་ཁྱད་པར་བཤད་པ་དང་། ལམ་དངོས་བཤད་གཉིས་ལས། དང་པོ་ནི་སེམས་ཀློང་མན་ངག་གི་སྡེ་གསུམ་གྱི་ཁྱད་པར་ནི། དང་པོ་སེམས་སྡེ་བས། བྱང་ཆུབ་སེམས་ཀྱི་ངོ་བོ་ནི་གང་དུའང་མ་གྲུབ་ལ། གང་གི་ཡང་གཞིར་གྱུར་པ། འོད་གསལ་བའི་ཡེ་ཤེས་ནམ་མཁའ་ལྟ་བུའོ། །དེའི་རྩལ་གདངས་མ་འགགས་པ་ཚོགས་དྲུག་གི་ཡུལ་ལ་ཆ་མཉམ་པ་བཀྲ་ལམ་མེར་གསལ་བ། མེ་ལོང་ལ་གཟུགས་བརྙན་ལྟ་བུ། བྱིང་རྨུགས་ཀྱི་སྐྱོན་ཐམས་ཅད་དང་བྲལ་བ་དེ་ཡིན། རོལ་བ་ཡུལ་སྣང་གང་ཡིན་ཡང་སྒྱུ་མའི་རྣམ་རོལ་དུ་རྟོགས་པའོ། །གཉིས་པ་ཀློང་སྡེ་བས། ཆོས་ཅན་ཕྱི་ནང་གི་སྣང་བ་ཇི་སྙེད་པ་ཐམས་ཅད་ཆོས་ཉིད་སྐྱེ་བ་མེད་པ་ཀུན་ཏུ་བཟང་མོའི་ཀློང་ལས་གྲོལ་ས་གཞན་མེད་པས་གཉེན་པོ་མཐའ་ལས་གྲོལ་བ་བྱ་བྲལ་ཀློང་གི་སྡེ་བའོ། །གསུམ་པ་མན་ངག་གི་སྡེ་ནི། དེ་གཉིས་རིག་སྟོང་ཟུང་འཇུག་ཏུ་རྟོགས་ཤིང་། ཡིན་ལུགས་གཤིས་ཐོག་ཏུ་ཕེབས་པ། སྤང་གཉེན་གཉིས་ཀྱི་མཐའ་ལས་གྲོལ་བ་ཟབ་པ་མན་ངག་གི་སྡེ་བའོ། །ཡེ་ཤེས་གཙོ་བོར་བྱེད་པ་སེམས་སྡེ། དབྱིངས་གཙོ་བོར་བྱེད་པ་ཀློང་སྡེ། ཟུང་འཇུག་གཙོ་བོར་བྱེད་པ་མན་ངག་སྡེ་བ་ཡིན་ནོ། ། ༈ གཉིས་པ་ལམ་དངོས་བཤད་པ་ལ་གསུམ་སྟེ། གྲོལ་ལུགས་ཀྱི་གདངས་༼གནད་༽བཤད་པ། ཤན་འབྱེད་ཀྱི་འཕྱོང་བཤད་པ། བཞག་ཐབས་ཀྱི་གནད་བཤད་པའོ། །དང་པོ་ལ་ལྔ་ལས། དང་པོ་ཡེ་གྲོལ་ནི། འཆར་གཞི་རིག་སྟོང་ཟུང་འཇུག་དེ་ཉིད། ཕུང་ལྔ་དང་རྣམ་ཤེས་ཚོགས་བརྒྱད་ཀྱི་ཉེར་ལེན་དགེ་སྡིག་སོགས་གང་གིས་མ་གོས་པས། འཆིང་གྲོལ་ལས་འདས་པས། གཟོད་འབད་དེ་བསྐྱར་ནས་གྲོལ་མིི་དགོས་པ་དང་། འཆར་ཆོས་སྣང་ཤེས་གཉིས་ཀ་གཞིའི་ཐོག་མཐའ་བར་གསུམ་ན་གྲུབ་མ་མྱོང་བས། ཡུལ་ཡུལ་ཅན་གཉིས་ཀ་ཡེ་ནས་གྲོལ་བ། ཡང་གྲོལ་མི་དགོས་པ། སྔར་ནས་གྲོལ་ཚར་བ་ལྟ་བུ་ཡིན། དང་པོ་སྐྱེ་རྒྱུའི་སྟེང་ཤར་གནས་གྲོལ་གསུམ། བར་དུ་གནས་ས་གནས་པ་ངོ་བོས་སྟོང་། ཐ་མ་འགགས་པ་རང་གི་མཚན་ཉིད་ཀྱིས་སྟོང་པའོ། །གཉིས་པ་རང་གྲོལ་ནི། གཉེན་པོ་ལ་ལྟོས་པ་མེད་པས་རྐྱེན་གཞན་གྱིས་གྲོལ་བའང་མིན། རང་གིས་རང་ལ་གྲོལ་བའི་བྱ་བ་བྱེད་པའང་མ་ཡིན་ཏེ། རིག་པ་རྐྱེན་ཐུབ་དུས་རྟོག་པས་ཚུགས་མི་ཐུབ་པར་སྦྲུལ་མདུད་བཞིན་རང་ཡལ་རྗེས་མེད་དུ་དག་པ་ཡིན། གསུམ་པ་ཅེར་གྲོལ་ནི། སྣང་ཤེས་ཀྱི་རྟོག་པ་མཐོང་ཐོས་ཆོས་སྤྱི་ལ་བསླབ། ཆོས་ཅན་དུམ་བུ་ལ་བསླབ་པ། ཀ་བ་སོགས་ཐམས་ཅད་མགོ་འབུར་ཙམ་ནས་མིག་གི་ལྟ་སྟངས་ཐོག་བབ་ཆེན་པོའི་གནད་ཀྱིས་གཟིར་ཏེ་ཅེར་གྱིས་གྲོལ་བ་ནི་ཤེས་པ་ཡུལ་ལ་མ་ཞེན། སྣང་བས་ཤེས་པ་ལ་མ་གོས། སྣང་ཤེས་ཀྱི་འབྲེལ་ཐག་ཆད། གནས་འགྱུའི་བར་ལག་འགྱེལ། སྣང་བ་བདེན་མེད་ལ་རིག་པ་རྟེན་མེད་དུ་ཤར། འགག་མེད་དུ་ཤར། ཞེན་མེད་དུ་རོལ། རྟེན་མེད་དུ་གྲོལ་ནས། སྣང་ཤེས་གཉིས་པོ་མཐོང་སར་ཡལ་བའོ། །བཞི་པ་མཐའ་གྲོལ་ནི། རིག་པའི་ངོ་བོ་སྐྱེ་མེད་ཀྱི་ཆ་ནས་ཡོད་མཐའ་ལས་གྲོལ་ཡང་། འགག་མེད་ཀྱི་ཆ་ནས་མེད་མཐའ་ལ་མི་གནས། རྒྱུན་མི་ཆད་པས་མེད་མཐའ་ལས་གྲོལ་ཡང་རྟག་དངོས་མ་ཡིན་པས་ཡོད་མཐའ་ལ་མི་གནས། རྩལ་སྣང་སྣ་ཚོགས་སུ་འཆར་བས་གཅིག་པུར་མ་གྲུབ་པ་དང་། ངོ་བོ་སྤྲོས་པ་དང་བྲལ་བས་དུ་མར་གདགས་པའི་མཐའ་ལས་གྲོལ་བའི་རང་བཞིན་ནི་ཀུན་ཏུ་བཟང་པོ་སྟེ། ཕྱི་ཡུལ་ལ་ཕར་མི་བསམ། ནང་སེམས་ལ་ཚུར་མི་རྟོག །བར་སྐྱེ་མེད་ལ་རང་སར་མི་འཇོག་པར་རིག་པ་རྗེན་ལ་ཕུད་ནས་འཇོག་པའོ། །ལྔ་པ་གཅིག་གྲོལ་ནི། བདེན་གཉིས་དབྱེར་མེད་རིག་པ་སྤྲོས་བྲལ། ཆོས་སྐུ་ཐིག་ལེ་ཉག་གཅིག །ཡེ་ཤེས་ཟང་ཐལ་གཅིག་པུའི་ངང་མ་ཤོར་ན་ལུས་ཀྱི་འགྲོ་འདུག ངག་གི་སྨྲ་བརྗོད། ཡིད་ཀྱི་བསམ་རྟོག་ཐམས་ཅད་མེད་པ་གསལ་སྣང་ཙམ་ལས་རིག་པའི་ངོ་བོར་མ་གྲུབ་པས། རྒྱལ་བའི་སྐུ་གསུང་ཐུགས་སུ་རང་ཤར་བའོ། ༈ །གཉིས་པ་ཤན་འབྱེད་ཀྱི་འཕྱོང་བཤད་པ་ལ་བཅུ་སྟེ། སེམས་རིག་དོན་གྱི་ཤན་འབྱེད། གནས་པ་ངོ་བོའི། འཕྲོ་བ་རྩལ་གྱི། གྲོལ་ཚུལ་གནད་ཀྱི། ཀུན་གཞི་ཆོས་སྐུའི། འཁྲུལ་གྲོལ་སྐབས་ཀྱི། གཞི་འབྲས་ལྷུན་གྲུབ་ཀྱི། ལམ་འབྲས་ཀ་དག་གི བར་དོ་ལྷ་ཡི། དབུགས་འབྱིན་ཞིང་གི་ཤན་འབྱེད་བཤད་པའོ། ། དང་པོ་སེམས་རིག་དོན་གྱི་ཤན་འབྱེད་ནི། སེམས་གནས་པ་དང་འཕྲོ་བ་ལྟ་བུ་ལ་དབྱེ་བ་མ་ཡིན་ཏེ། ད་ལྟའི་ཐད་ཀའི་ཤེས་པ་གསལ་རིག་གི་ཆ་གཉིས་ལ་ཤན་འབྱེད་པ་སྟེ། སེམས་ནི་རྣམ་ཤེས་ཚོགས་བརྒྱད། སེམས་བྱུང་ལྔ་བཅུ་རྩ་གཅིག །ཀུན་རྟོག་བརྒྱད་བཅུ་དང་བཅས་པ་ནི། འདུས་བྱས་སྐད་ཅིག་མ། མ་རིག་པ། སྐྱེ་འགག་ཅན། རྐྱེན་ཁ་ལ་ལྟོས་པ། གྲོལ་འཁྲུལ་ཅན། དུས་གསུམ་ལ་ལྟོས་པ་སོགས་ཡིན་ལ། རིག་པ་ནི་དེ་དག་ལས་འདས་པ། འདུས་མ་བྱས། ཟང་ཐལ་རྗེན་པའི་ཡེ་ཤེས་ཡིན་ཏེ། ནོར་ས་དང་འཛོལ་ས་མེད་དོ། །དེ་རྣམས་ཞག་བདུན་རེ་བསྒོམ་པ་བླ་མ་རྣམས་ཀྱི་ཕྱག་བཞེས་ཡིན་ནོ། །སེམས་རིག་གཉིས་ཤེས་པ་གཉིས་ཕྱེ་བ་ཡིན། སེམས་དང་ཡེ་ཤེས་རླུང་དང་སྦྱར་བ་ཡིན་ནོ། ། ༈ གཉིས་པ་གནས་པ་ངོ་བོའི་ཤན་འབྱེད་ནི། སེམས་རྟོག་མེད་རྩེ་གཅིག་ཏུ་གནས་པ་དང་། རིག་པ་རྟོག་མེད་རྩེ་གཅིག་དུ་གནས་པ་གཉིས་གནས་པ་ཙམ་དུ་འདྲ་ཡང་སེམས་བདེ་གསལ་མི་རྟོག་པའི་ཉམས་ཞེན་དང་མི་འབྲལ། རིག་པ་ཡུལ་མེད་ཟང་ཐལ་དུ་གནས་པ་ཡིན། སེམས་ནི་ལྟེང་ཀའམ་རྫིང་བུ་ལྟ་བུར་ལྟེམ་མེ་གནས་པ་ཡིན། རིག་པ་ནི་ལྷག་མཐོང་གསལ་བའི་ཡེ་ཤེས་ཡུལ་ལ་མ་ཤར་བའོ། །འདྲ་གཞི་བཅུ་དྲུག་ལས་དང་པོ་གསུམ་འདིར་སྦྱར་རོ། ༈ །གསུམ་པ་འཕྲོ་བ་རྩལ་གྱི་ཤན་འབྱེད་ནི། རིག་པ་དང་མ་རིག་པ་གཉིས་ཀྱི་རྩལ་ཡུལ་ལ་འཆར་ཚུལ་ཙམ་དུ་འདྲ་ཡང་། གྲོལ་ཚུལ་མི་འདྲ་སྟེ། རིག་པའི་དཔེ་དངུལ་ཆུ་ས་ལ་ལྷུང་བ་ལྟར་ཡུལ་མི་འཛིན། སེམས་ཀྱི་དཔེ་བཅོ་ལྔའི་ཟླ་འོད་སེམས་དང་འདྲེས་པའམ། ས་སྐམ་དང་ཆུ་ཐིགས་འཕྲད་པ་ལྟར་ཡུལ་འཛིན་པའོ། །འདྲ་གཞི་ནས་བཞི་པ་དང་བཅུ་གསུམ་བཅུ་བཞི་འདིར་བྱའོ། ༈ །བཞི་པ་གྲོལ་ཚུལ་གནད་ཀྱི་ཤན་འབྱེད་ནི། དེ་ལྟར་སེམས་དང་རིག་པ་གཉིས་པོའི་ཁྱད་པར་ཤེས་ནས་འཁོར་བའི་རང་བཞིན་སེམས་ཀྱི་ཆ་རང་གྲོལ་དུ་དག་ནས། རིག་པའི་ངོ་བོ་མངོན་དུ་འགྱུར་བའི་ཚུལ་ནི། ཐེག་བརྒྱད་ཀྱིས་ཤར་ཆོས་ཉམས་སུ་བླངས་ཏེ་ལམ་དུ་བྱེད། རྫོགས་ཆེན་པས་འཆར་གཞི་ཉམས་སུ་བླངས་ཏེ་ལམ་དུ་བྱེད་པ་ཡིན། དེ་ཡང་ཉན་ཐོས་པས་སྤང་། བྱང་ཆུབ་སེམས་དཔས་སྦྱང་། སྔགས་ཕྱི་པས་བསྒྱུར། ནང་པ་མ་ཧཱ་དང་ཨ་ནུས་དང་དུ་བླངས་ནས་ཐབས་ཀྱིས་ལམ་དུ་བྱེད། སེམས་སྡེ་བས་རྩལ་དང་དེ་ལས་ཤར་བ་ངོ་ཤེས་ནས་གྲོལ་བར་བྱེད། ཀློང་སྡེ་བས་སྟོང་ཆེན་དབྱིངས་ཀྱི་རྒྱན་དུ་རྟོགས་ནས་རང་སར་བཞག་ནས་གྲོལ་བར་འདོད། མན་ངག་སྡེ་བས་རིག་སྟོང་ཟུང་འཇུག་གི་ངང་དུ་སྤང་གཉེན་མེད་པར་གྲོལ་བ་ཡིན། སེམས་སྡེ་བས་སེམས་ཀྱིས་སེམས་མི་མཐོང་བས་སེམས་ཀྱིས་སེམས་མི་གྲོལ། ཀློང་སྡེ་བ་ལྟར་ན། སྣང་བའི་མདུན་ན་མུན་པ་མི་གནས་པ་ལྟར། དབྱིངས་དང་རིག་པའི་ངོ་བོ་ལ་མ་རིག་པའི་སེམས་མེད་པའི་ཕྱིར་ཡེ་ཤེས་ཀྱིས་སེམས་མི་མཐོང་བས་དབྱིངས་ཀྱི་ངང་དུ་གྲོལ་བའང་མི་འདོད། མན་ངག་སྡེ་བས་རིག་པའི་ཆོས་ཉིད་དེ་བཞིན་ཉིད་ཀྱི་ཀློང་ན་ཆོས་ཅན་རང་ངོ་ནས་སྟོང་པ་དང་། ཆོས་ཉིད་གཞན་ངོས་ནས་སྟོང་པའི་གྲུབ་མཐའ་དང་འདོད་ཞེན་ཐམས་ཅད་ཚུགས་མི་ཐུབ་པར་སྤང་གཉེན་ཀུན་རང་གྲོལ་རྗེས་མེད་དུ་ཞིག་པ་ནི་ཤིན་ཏུ་ངོ་མཚར་བས་ན་ལམ་གཞན་ལས་ཁྱད་པར་དུ་འཕགས་པ་ཡིན་ནོ། ། ༈ ལྔ་པ་ཀུན་གཞི་ཆོས་སྐུའི་ཤན་འབྱེད་ནི། ཀུན་གཞི་དང་ཆོས་སྐུ་གཉིས་ངོ་བོ་རྟོག་མེད་ཙམ་དུ་འདྲ་ཡང་། ཀུན་གཞི་ནི་མ་རིག་པ་དངོས་ཡིན། སེམས་དང་སེམས་བྱུང་ཐམས་ཅད་འབྱུང་བའི་གཞི། ཁམས་གསུམ་གྱི་བག་ཆགས་ཐམས་ཅད་ཐོག་མར་འཇོག་པའི་རྟེན། བར་དུ་འཛིན་པའི་ལམ། ཐ་མ་སྨིན་པའི་སྣོད་དུ་གྱུར་བ་ཀུན་གཞི་རྟོག་མེད། ངོ་བོ་ལུང་མ་བསྟན། རྣམ་པ་ཤེས་པ་རྨུན་པོ། བདེ་གསལ་མི་རྟོག་པའི་ཉམས་གང་རུང་ལས་མ་འདས་པའོ། །དཔེ་མ་རིག་པ་གྲུ་ལྟ་བུ། རྣམ་ཤེས་ཚོགས་བརྒྱད་མི་ལྟ་བུ། གནས་དོན་ལུས་གསུམ་ཡོ་བྱད་ལྟ་བུ། ངོ་བོའི་དབྱིངས་ལ་རྨོངས་པའི་མ་རིག་པ་ཡེ་དོན་གྱི་ཀུན་གཞི། རང་ངོ་རིག་ན་གྲོལ་བར་སྦྱོར་ཞིང་། མ་རིག་ན་འཁོར་བར་སྦྱོར་བས་སྦྱོར་བ་དོན་གྱི་ཀུན་གཞི། གདོས་བཅས་ཤ་ཁྲག་གི་ལུས་འདོད་ཁམས། གཟུགས་ཁམས་འོད་ཀྱི་ལུས། གཟུགས་མེད་ཡིད་རིག་གི་ལུས་གསུམ་གྱི་བག་ཆགས་ཡོད་པའི་ཆ་ནས་བག་ཆགས་ལུས་ཀྱི་ཀུན་གཞི། ལས་དགེ་སྡིག་དང་མི་གཡོ་བའི་ལས་ཏེ་ཁམས་གསུམ་གྱི་བག་ཆགས་དང་མཚུངས་པར་ལྡན་པའི་བག་ཆགས་སྣ་ཚོགས་པའི་ཀུན་གཞིའོ། །ཆོས་སྐུ་ནི་མ་རིག་པའི་གཞན་དབང་དུ་མ་གྱུར་པའི་ཡེ་ཤེས་ཀྱི་རྟེན་ཆོས་ཀྱི་དབྱིངས་ཀྱི་ངོ་བོ་གཟུང་འཛིན་དང་ལྷན་ཅིག་མི་གནས་པ། ལས་དང་བག་ཆགས་ཀྱིས་མ་སྦགས་པའི་ཆ་ནི་ཆོས་སྐུ་ཡིན་ཏེ། དེ་རྒྱ་མཚོ་གཏིང་གསལ་ལྟ་བུའོ། ། ༈ དྲུག་པ་འཁྲུལ་གྲོལ་སྐབས་ཀྱི་ཤན་འབྱེད་ནི། ད་ལྟའི་རིག་པ་རྗེན་པ་ལ་འཁྲུལ་གྲོལ་གཉིས་ཀ་མི་སྲིད་ཀྱང་། གཞི་སྣང་ཤར་བའི་སྐབས་སུ་ངོ་ཤེས་ན་གྲོལ་བ། མ་ཤེས་ན་འཁྲུལ་བར་འགྱུར་བས། འཁྲུལ་གྲོལ་གྱི་ཤན་དབྱེ་བའོ། །ད་ལྟའི་རིག་པ་རྗེན་པ་ལ་མཉམ་པར་བཞག་པ་དེས། མཉམ་བཞག་ལ་བརྟན་པ་ཐོབ་ཅིང་། གཉིད་འཐུག་གི་བག་ཆགས་སྦྱངས་ནས་འཐུག་པོའི་འོད་གསལ་ཟིན། འཆི་སྲིད་ཆོས་སྐུའི་འོད་གསལ་སྦྱང་ཞིང་ཆོས་སྐུར་གྲོལ་བར་བྱེད། རྗེས་ཐོབ་རྟོག་པ་རྩལ་སྦྱང་གིས་མཉམ་བཞག་གི་བསྒོམ་པ་རྗེས་ཐོབ་དང་བསྲེ། རྨི་ལམ་གྱི་བག་ཆགས་སྦྱང་ཞིང་། ཆོས་ཉིད་བར་དོར་གཞི་སྣང་གི་སྣང་བ་རང་སྣང་དུ་རྟོགས་ཤིང་ལོངས་སྐུར་གྲོལ་བ་དང་། སྲིད་པ་བར་དོར་རང་བཞིན་སྤྲུལ་སྐུའི་ཞིང་དུ་དབུགས་དབྱུང་བ་སོགས་ཉམས་ལེན་ཐམས་ཅད་ལ་མདའ་སྔོན་དུ་འབེན་བཞག་པ་ལྟ་བུ འམ་ངེས་པ་རྙེད་དགོས་སོ། ། ༈ བདུན་པ་གཞི་འབྲས་ལྷུན་གྲུབ་ཀྱི་ཤན་འབྱེད་ནི། འཁོར་འདས་མ་བྱུང་བའི་ཐོག་མའི་སྤྱི་གཞི་དང་། མཐར་ཐུག་གྲོལ་སའི་ཐོག་མའི་གཞི་གཉིས་གཞི་ཡིན་པ་ཙམ་དུ་འདྲ་ཡང་། འཁྲུལ་གཞི་བྱེད་མི་བྱེད་ཀྱི་ཁྱད་པར་ཡོད་པའོ། ། ༈ བརྒྱད་པ་ལམ་འབྲས་ཀ་དག་གི་ཤན་འབྱེད་ནི། རིག་པ་གནས་ཚུལ་གྱི་དབང་དུ་བྱས་ན། དུས་གསུམ་འཕོ་འགྱུར་མེད་པར་བཞུགས་ཀྱང་། གང་ཟག་གིས་མཐོང་བའི་དབང་དུ་བྱས་ན་ད་ལྟ་རིག་པ་སྐད་ཅིག་ཙམ་ལས་མི་མཐོང་བའི་ད་ལྟའི་ལམ་གྱི་རིག་པ་དང་། མཐར་ཐུག་གི་འབྲས་བུའི་རིག་པ་གཉིས་དབྱིངས་རིག་ཟུང་འཇུག་ཙམ་དུ་འདྲ་ཡང་ལས་རླུང་གིས་ཤན་ཞུགས་མ་ཞུགས་ཀྱི་ཁྱད་པར་ཡོད་དོ། ། ༈ དགུ་པ་བར་དོ་ལྷ་ཡི་ཤན་འབྱེད་ནི། ཆོས་ཉིད་བར་དོར་རིག་གདངས་ལྷུན་གྱིས་གྲུབ་པའི་ལྷ་སྐུ་དང་། སྲིད་པ་བར་དོར་རླུང་སེམས་ཙམ་གྱི་སྒྱུ་ལུས་ཀྱི་ལྷ་སྐུ་གཉིས། ལྷ་སྐུ་སྣང་བ་ཙམ་དུ་མཚུངས་ཀྱང་། རྒྱ་ཆེ་ཆུང་དང་། གྲོལ་མི་གྲོལ་གྱི་ཁྱད་ཆེའོ། ། ༈ བཅུ་པ་དབུགས་འབྱིན་ཞིང་གི་ཤན་འབྱེད་ནི། ཐེག་པ་འོག་མས་གྲངས་མེད་གཅིག་ལ་སོགས་པའི་ཡུན་རིང་པོའི་མཐར་ས་དང་པོ་ཐོབ་ནས་ས་བཅུ་པའི་བར་སངས་རྒྱས་ལོངས་སྤྱོད་རྫོགས་པའི་སྐུ་མཐོང་བ་དང་། རྫོགས་ཆེན་གྱི་ལམ་ལ་ཞུགས་པའི་གང་ཟག་སྐལ་བ་དང་ལྡན་པས་ཚེ་འདི་བརྗེས་མ་ཐག་རང་བཞིན་སྤྲུལ་སྐུའི་ཞིང་དུ་རྨི་ལམ་སད་པའི་ཚུལ་དུ་དབུགས་དབྱུང་བ་གཉིས་ཞིང་སྣང་ཙམ་དུ་འདྲ་ཡང་། ལམ་སྣང་གི་རྩལ་རྫོགས་ནུས་མི་ནུས་ཤེས་ཉམས་ཀྱི་ཁྱད་པར་ཡོད་དོ། ། ༈ གསུམ་པ་བཞག་ཐབས་ཀྱི་གནད་བཤད་པ་ནི། ལ་བཟླ་གསུམ། བཞག་ཐབས་བཞི། གཟེར་བུ་བདུན་གྱི་འདས་རྗེས་དང་སྦྱར་ནས་གསུངས་པ་ནི། ངོ་རང་ཐོག་ཏུ་སྤྲད་པ་ལྟ་བ། ཐག་གཅིག་ཐོག་ཏུ་བཅད་པ་སྒོམ་པ། གདེངས་གྲོལ་ཐོག་ཏུ་བཅའ་བ་སྤྱོད་པ་དང་གསུམ་དུ་གསུངས། འོག་མའི་ལྟ་བ་ཐམས་ཅད་ལས་གྲོལ་བར་འདོད་ན་ལྟ་བ་རི་བོ་ཅོག་བཞག བསྒོམ་པའི་ནུས་པ་སྟོབས་དང་ལྡན་པའམ་འབྲས་བུ་སྐུ་གསུམ་མངོན་དུ་འགྱུར་བར་འདོད་ན་སྒོམ་པ་རྒྱ་མཚོ་ཅོག་བཞག །སྤྱོད་པའི་རྩལ་སྦྱང་བར་འདོད་ན་སྤྱོད་པ་སྣང་བ་ཅོག་བཞག །འབྲས་བུ་སྐུ་གསུམ་མངོན་ཏུ་གྱུར་བར་འདོད་ན་འབྲས་བུ་རིག་པ་ཅོག་བཞག་བྱའོ། །ལྟ་བ་རི་བོ་ཅོག་བཞག་ནི། འཆར་གཞིའི་རིག་པ་ཟང་ཐལ་རྗེན་པ་ཉིད་ཕུང་པོ་ལྔ་དང་། རྣམ་ཤེས་ཚོགས་བརྒྱད་ཀྱི་རྟོག་པ་སོགས་ཀྱིས་གཡོ་མི་ནུས་པར། རི་རྒྱལ་ལྟར་སྡོད་ཚུགས་པ་དང་། ངོ་སྤྲོད་ཀྱི་མན་ངག་ཀྱང་། ཚིག་ལ་ལྷག་ཆད་དང་། དོན་ལ་ནོར་འཁྲུལ་གྱི་གཡོ་བ་མེད་པ། བརྒྱུད་པའི་ཕྱག་བཞེས་དང་ལྡན་པ། སློབ་མས་ཀྱང་ཡིན་མིན་གྱི་ཐེ་ཚོམ་གཞན་གྱི་གོལ་བ་དང་། འཁྲུལ་རྟོག་ཉམས་ཞེན་གྱི་གཡོ་བ་མེད་པར་ད་ལྟའི་རིག་པ་ཐད་ཀར་ངོ་འཕྲོད་ན་རབ། མིན་ཀྱང་རྗེས་དཔག་གི་ངེས་ཤེས་ཁྱད་པར་ཅན་གྱིས་དྲངས་པ་ཞིག་དགོས་ངེས། སྒོམ་པ་རྒྱ་མཚོ་ཅོག་བཞག་ནི། རིག་སྟོང་ཟུང་འཇུག་གི་ལྟ་བ་རང་གསལ་སྒྲིབ་གཡོགས་དང་བྲལ་བའི་ངང་དུ་མཉམ་པར་བཞག་པའི་ཚེ། སྒོ་ལྔ་ཧར་སང་རྒྱ་ཡན་ལ། ཚོགས་དྲུག་གི་སྣང་བ་མ་འགགས་པ་ལྷུག་པར་ཆ་མཉམ་པར་གནས་པ་ནི། དཔེ་རྒྱ་མཚོ་ལ་རྐྱེན་སོགས་ཀྱིས་མ་དཀྲུགས་པར་གཟའ་སྐར་སོགས་སྣང་ཡུལ་བཀྲ་ལམ་མེར་གསལ་བ་བཞིན་འཇོག་པ་ཡིན། སྤྱོད་པ་སྣང་བ་ཅོག་བཞག་ནི། བློ་གཟུ་བོར་གནས་པའི་གང་ཟག་གིས་ལྷ་ཁང་མཇལ་བ་ལྟར་སྣང་ཤེས་ཐམས་ཅད་མཉམ་པར་རང་གྲོལ་དུ་སོང་བ་སྟེ་གྲོལ་ཚུལ་ལྔ་དང་འདྲའོ། །འབྲས་བུ་རིག་པ་ཅོག་བཞག་ནི། མཐར་ཐུག་སྒྲིབ་གཉིས་ཡོངས་སུ་དག་ནས་འབྲས་བུ་སྐུ་གསུམ་མངོན་ཏུ་གྱུར་པ་དང་། གནས་སྐབས་རིག་པའི་རང་ཚུགས་ཟིན་ན་སླར་ཤར་གྲོལ་དུ་སོང་བ་འབྲུམ་ནད་བྱང་བའི་སྐྱེས་བུའམ། བསེ་ཤིང་གི་འབྲས་བུ་སླར་རྒྱུར་མི་ལྡོག་པ་ལྟ་བུའོ། ༈ །ཡེ་ཤེས་ཟང་ཐལ་གྱི་གཟེར་དང་། ལྟ་བ་གྲོལ་ཡན་གྱི་གཟེར་གཉིས་ལྟ་བ། སྒྲོན་མ་རང་དག་གི་གཟེར་དང་། སྒོ་ལྔ་རང་ཡན་གྱི་གཟེར་གཉིས་སྒོམ་པ། ངོ་བོ་རང་དག་གི་གཟེར་དང་། རིག་པ་ཆོས་མིན་གྱི་གཟེར་གཉིས་སྤྱོད་པ། ཆོས་སྐུ་རང་རྫོགས་ཀྱི་གཟེར་འབྲས་བུ་སྟེ་ཅོག་བཞག་བཞི་ལ་སྦྱར་རོ། ། ༼༈ གཉིས་པ་ཐོད་རྒལ་ལ། སྔོན་འགྲོ་དངོས་གཞི་རྗེས་དང་གསུམ་གྱི་དང་པོ་ནི། ལུས་ངག་ཡིད་གསུམ་གྱི་རུ་ཤན་སྔོན་འགྲོ་སོགས་གཞན་ལས་ཤེས། གཉིས་པ་དངོས་གཞི་རང་སྣང་ཡེ་ཤེས་ཀྱི་དཀྱིལ་འཁོར་དུ་ངོ་སྤྲད་པ་ནི། ལུས་གནད་བཞུགས་སྟངས་གསུམ་དང་། ངག་གནད་བསླབ་གནས་ལ་བཟླ་བརྟན་པ་བཞི། སེམས་གནད་རླུང་སེམས་ཀྱི་ཤན་མ་ཞུགས་པ་ནམ་མཁར་གཏད་པ་སྟེ། སྒོ་གསུམ་གྱི་གནད་ལ་གཟིར་ནས། སྒོ་གནད་རྒྱང་ཞགས་མི་འགུལ་བ་དང་། ཡུལ་གནད་སྨིན་མཚམས་དང་ནམ་མཁའ་ལ་གཏད་པ། རླུང་རིག་གི་གནད་ཤིན་ཏུ་དལ་བ། དབྱེ་ན། འགྲོ་འོང་ལས་ཀྱི་རླུང་། རྟོག་ཚོགས་ཉོན་མོངས་པའི་རླུང་། རིག་པ་ཡེ་ཤེས་ཀྱི་རླུང་སྟེ། རླུང་ཕར་གློ་བར་དེངས། རིག་པ་ཚུར་སྙིང་ཁར་ཐིམ་པས། སེམས་དང་ཡེ་ཤེས་རྒྱབ་གྱེས། ཕྱི་དབྱིངས་ཀྱི་ར་བར་ཐིག་ལེ་དང་རིག་གདངས་འགུལ་འཕྲིག་མེད་པར་སྡོད་པའི་སྐབས། རང་སྣང་ཡེ་ཤེས་ཀྱི་དཀྱིལ་འཁོར་མངོན་སུམ་དུ་མཐོང་བ་ནི། ལྔ་ཚན་ལ་སོགས་པའི་སྒོ་ནས་ངོ་སྤྲད་པ་ཡིན་ནོ། །གསུམ་པ་ལ། སྒྲོན་མ་བཞི། སྣང་བ་བཞི། མཐའ་རྟེན་གྱི་མན་ངག བར་དོའི་གདམས་པ་དང་བཞི་ལས། དང་པོ་ལ་བཞི་ལས། རྒྱང་ཞགས་ཆུ་ཡི་སྒྲོན་མ་ནི། སྙིང་ནས་མིག་ཏུ་འབྲེལ་བའི་རྩ་བ་མེན་གྱི་རྭ་འདྲ་བ་སྒོ་རྒྱང་ཞགས་ཆུའི་སྒྲོན་མ་སྟེ། རྟེན་མ་དག་པའི་རྒྱང་ཞག་གི་འཁྲུལ་སྣང་དང་བརྟེན་པ་ཡེ་ཤེས་ཀྱི་རྒྱངས་ཞག་སམ་དག་པའི་རྒྱང་ཞགས་གི་འོད་གསལ་གྱི་སྣང་བ་འཛིན་པའོ། །གཉིས་པ་ཐིག་ལེ་སྟོང་པའི་སྒྲོན་མ་ནི། འོད་ལྔའི་ཟླུམ་བསྐོར་དབུས་དམར་སེར་གྱི་རང་བཞིན་ཅན་དང་ཐིག་ཕྲན་ཡུང་འབྲུ་ཙམ་པ་སོགས་ཡིན་ནོ། །གསུམ་པ། དབྱིངས་རྣམ་དག་གི་སྒྲོན་མ་ནི། སྒྲོན་མའི་ཡུལ་ནམ་མཁའ་དང་། སྨིན་མཚམས་སུ་རིག་པ་གཏད་པས། ཕྱི་དབྱིངས་སྔོ་རི་བ་ཐོག་མར་ཤར་ནས། དེ་ལས་མཆེད་པའི་ནང་དབྱིངས་ཟ་འོག་གི་བེར་ཁྱིམ་ལྟ་བུ། རིག་ག དངས་ཀྱི་ར་བར་བྱུང་བའོ། །བཞི་པ་ཤེས་རབ་རང་བྱུང་གི་སྒྲོན་མ་ནི། ནང་གི་རིག་པ་ཤིན་ཏུ་དྭངས་ལ། ཡུལ་མེད་པ་ཞིག་ཉམས་སུ་མྱོང་བ་ངོ་བོ་དང་། ཆོས་ཀྱི་ཚིག་དོན་ཀློང་རྡོལ་བ་རྩལ་དང་། གསེར་གྱི་སྐུད་པ་དང་། མེ་ཏོག་གི་དྲྭ་བ། རྟ་རྔ་ལ་མདུད་པ་བོར་བ། མུ་ཏིག་བསྟར་ལ་བརྒྱུས་པ་ལྟ་བུ་རྣམས་ནི་རིག་གདངས་ལུ་གུ་རྒྱུད་དོ། །གཞན་ཡང་ཙིཏྟ་ཤ་ཡི་སྒྲོན་མ་རིག་པ་བཞུགས་པའི་གནས་དང་། གནས་ལུགས་གཞིའི་སྒྲོན་མ་རིག་པ་རང་གི་ངོ་བོ། དཀར་འཇམ་རྩ་ཡི་སྒྲོན་མ་ལམ། འོད་གསལ་ཡེ་ཤེས་ཀྱི་སྒྲོན་མ་དབྱིངས་རིག་འདྲེས་པའི་དུས། བར་དོ་དུས་ཀྱི་སྒྲོན་མ་རང་སྣང་ཆོས་ཉིད་བར་དོ་ཤར་བའི་དུས་སུ་བརྗོད་པའོ། ། གཉིས་པ་ལ་བཞི་ལས། དང་པོ་ཆོས་ཉིད་མངོན་སུམ་ནི། ཡིད་དཔྱོད་ཀྱི་ཚིག་ལས་འདས་པས་རྗེས་དཔག་དང་དོན་སྤྱི་མ་ཡིན་པས་ཕྱི་ཡི་འོད་གསལ་ལ་བལྟས་པས་ནང་རྣམ་རྟོག་བྲལ་ཏེ། རིས་མེད་མཉམ་པར་གྲོལ་བའི་ཀ་དག་གི་གདངས་དང་། ལྷུན་གྲུབ་ཀྱི་འོད་གདངས་གཉིས་ཕྱི་ནང་ཟུང་དུ་འབྲེལ་བས་དབྱིངས་འདུ་འབྲལ་མེད་པའི་དགོངས་པ་ཞེས་བྱའོ། །གཉིས་པ་ཉམས་གོང་འཕེལ་ནི། འཁྲུལ་བའི་སྣང་བ་ནུབ་ནས། ཉམས་སྣ་ཚོགས་སྐྱེ་བར་བྱེད་པ་སྟེ། ཤེས་ཉམས་དང་། སྣང་ཉམས། ཤེས་ཉམས་ལ་དགའ་བདེའི་ཉམས་དང་ཤེས་པ་མཐར་འགྱུར་གྱི་ཉམས་གཉིས་ཡོད་ཀྱང་། འདིར་སྣང་ཉམས་འོད་གསལ་གྱི་རང་གདངས་གོང་ནས་གོང་དུ་འཕེལ་བར་བྱེད་པའོ། །གསུམ་པ་རིག་པ་ཚད་ཕེབས་ནི། སྣང་བ་སྐུ་གསུམ་དུ་རྟོགས་པའི་དུས་ཡིན་ཏེ། ཕྱིའི་སྣང་བ་འོད་དུ་གྲོལ། ནང་ཕུང་པོ་གདོས་བཅས་ལས་གྲོལ། གསང་བ་སེམས་ཀྱི་འཁྲུལ་རྟོག་གཟུང་འཛིན་ལས་གྲོལ་བས་གཞིར་གནས་རིག་པའི་ཡོན་ཏན་ཐམས་ཅད་མངོན་ཏུ་གྱུར་ནས་ཟླ་བ་ཉ་གང་བ་དང་འདྲའོ། །བཞི་པ་ཆོས་ཉིད་ཟད་པ་ནི། ཁམས་གསུམ་འཁོར་བའི་སྐྱེ་རྒྱུན་ཆད་པ་སྟེ། གོང་གི་ཚད་ཕེབས་ཀྱི་སྐབས་ཀྱི་རང་གདངས་ལྷུན་གྲུབ་འཆར་སྒོ་ཐམས་ཅད་དབྱིངས་སུ་ཐིམ་པའི་འཇུག་པ་ལ་དབང་ཐོབ་པ་དང་། རང་གི་ལག་སོར་ལ་རིག་པ་གཏད་པས་སྐྱེ་བ་ལ་དབང་ཐོབ་པས་བསྐལ་པར་སེམས་ཅན་གྱི་དོན་དུ་བཞུགས་པ་ཡིན་ནོ། ། གསུམ་པ་ལ་བཞི་ལས། དང་པོ་མི་འགུལ་བ་གསུམ་ནི། ལུས་མི་འགུལ་བ་བཞུགས་སྟངས་གསུམ་དང་གཟིགས་སྟངས་གསུམ། ངག་མི་འགུལ་བ་ནི། ངག་ནི་བསླབ་དང་གནས་པ་དང་། །ལ་བཟླ་བརྟན་པར་བྱ་བའོ། །ཞེས་དང་། སེམས་མི་འགུལ་བ་ནི། སེམས་བཟོ་མེད་ལས་མི་འགུལ་བས་དབྱིངས་རིག་ཟུང་དུ་ཆུད་པའི་གནད་དོ། །དེ་ཡང་མི་འགུལ་བས་འགྱུ་ལ་འགྱུ་བས་རྟོག་པ་འཆར་བས། རྟོག་པས་འཁོར་བའི་ལས་བསོགས་པས་འགྱུ་བའི་རྟེན་རྩ་རླུང་གནད་དུ་གཅུན་པས། རྟོག་པ་རྒྱུན་འཆད་པའི་རང་གནད་གལ་པོ་ཆེའོ། །གཉིས་པ་སྡོད་པ་གསུམ་ནི། ལུས་སྡོད་པ་ལུས་ཀྱི་བྱ་བ་ལ་མི་གནས་པ། ངག་སྡོད་པ་རླུང་གི་འགྲོ་འོང་སྡོད་པ། སྣང་བའི་སྡོད་པ་དབྱིངས་རིག་འགུལ་འཕྲིག་མེད་པའོ། །འདིའི་དུས་སུ་རྟགས་ལུས་ངག་ལ་འཆར་བ། ཚད་རྨི་ལམ་གྱིས་བཟུང་བ་གཉིས་བྱུང་ངོ། །གསུམ་པ་ནི་སྐྱེ་བ་ལ་དབང་ཐོབ་པས་གཞན་དོན་དངོས་སུ་བྱེད། འཇུག་པ་ལ་དབང་ཐོབ་པས་ཟག་བཅས་མི་སྣང་བར་འཚང་རྒྱ། རླུང་སེམས་ལ་དབང་ཐོབ་པས་ཁམས་གསུམ་དུ་ལྡོག་མི་སྲིད་པའོ། །བཞི་པ་ནི། ཡར་འབྲས་བུ་སྐྱབས་གསུམ་རང་སྣང་དུ་བྱོན་པ་མཐོང་བས་སངས་རྒྱས་པ་ལ་རེ་བ་དང་། མི་རྒྱས་པ་ལ་དོགས་པ་མེད། མར་ལས་ཉོན་ཡེ་ཤེས་སུ་དག་པས། འཁོར་བ་མྱང་འདས་སུ་རྟོགས་པས་འཁོར་བ་ལས་ཐར་གྱི་རེ་བ་དང་། ལྷུང་གི་དོགས་པ་མེད་པའོ། ། བཞི་པ་ལ་བཞི་ལས། དང་པོ་རང་བཞིན་བར་དོ་ལ་ཤེས་བྱའི་གྲོས་ཐག་བཅད་པ་ཐི་བྱ་ཚང་ལ་འཇུག་པ་ལྟ་བུའི་མན་ངག་ནི་ཐེ་ཚོམ་ཅན་གྱི་གང་ཟག་གིས་དང་པོ་ཐོས་པས་བློ་སྦྱོང་། བར་དུ་བསམ་པས་ཐག་བཅད། ཐ་མར་བསྒོམ་པས་ལ་བཟླ་བ་གསུམ་གྱི་སྒོ་ནས་རྫོགས་ཆེན་ལ་འཇུག །གང་ཟག་ཐེ་ཚོམ་མེད་པའི་བརྩོན་འགྲུས་དང་ཤེས་རབ་ལྡན་པས། བླ་མའི་མན་ངག་ལ་ཡིད་ཆེས་ནས་ངེས་ཤེས་ཁྱད་པར་ཅན་གྱིས་རྫོགས་ཆེན་ལ་འཇུག་པ་གཉིས་ཡོད། གང་ལྟར་ཡང་གཞི་ཁྲེགས་ཆོད་ཀྱི་ལྟ་བ་ངོ་འཕྲོད་ནས། ལྟ་བ་ལ་མཉམ་པར་བཞག་པས་ཐོག་མར་འདིར་སྣང་གི་སྣང་བ་བཀག་ནས། རྨི་ལམ་མམ་ཆོས་ཉིད་བར་དོ་དངོས་ཡིན་སྙམ་པ་འདུན་པས་ཡང་ཡང་སྦྱངས་པས། འཐུག་པོའི་འོད་གསལ་ལམ་འཆི་སྲིད་ཆོས་སྐུའི་འོད་གསལ་དངོས་ཤར་ནས་ཡོང་སྙམ་པའི་སྐྱབས་སེམས་བསྔོ་བ་དང་བཅས་ཡང་ཡང་སྦྱང་། ཐོད་རྒལ་གྱི་དབྱིངས་རིག་ཤར་བའི་སྐབས་སུ་རྨི་ལམ་གྱི་གྲོང་ཁྱེར་རམ། ཆོས་ཉིད་བར་དོ་དངོས་ཤར་བའི་འདུན་པའི་ངང་སྦྱང་བ་དང་། དེ་བཞིན་དུ་རང་བཞིན་སྤྲུལ་སྐུའི་ལམ་ཁྱེར་ཉིན་དུས་རང་སྣང་མངོན་སུམ་ལ་གོམས་པ་དང་། མཚན་མོ་འོད་ལྔ་སྙིང་ནང་དུ་གོམས་པས་སྤྲུལ་སྐུའི་ཞིང་དུ་བལྟ་བ། ཐུན་བར་འཕོ་ལུགས་གཉིས་ཀྱི་རྩལ་སྦྱང་ཡང་ཡང་བྱེད་ཅིང་སྣང་བ་དཔལ་རིའི་ཕོ་བྲང་ན་བླ་མ་པད་འབྱུང་དབྱེར་མེད་ཀྱི་སྣང་བ་དང་མི་འབྲལ་བར་བྱས་ནས་བར་དོ་ཉམས་འོག་ཏུ་ཚུད་པ་ཞིག་ཅི་ནས་ཀྱང་བྱ་དགོས་སོ། །གཉིས་པ་འཆི་ཁ་བར་དོ་ལ་མི་གསལ་བ་གསལ་བར་བྱེད་པ་སྒེག་མོ་ལ་མེ་ལོང་བསྟན་པ་ལྟ་བུའི་མན་ངག་ནི། རབ་དབྱིངས་རིག་སོར་བཞག་འོད་གསལ་སྦུབས་འཇུག་གི་གདམས་པ་དབྱིངས་རིག་ལ་གཏད་པས་འཆི་བ་དང་། འབྲིང་འཕོ་བའི་གནད་རྣམ་ཤེས་རླུང་ཞོན་གྱི་གདམས་པས་ཆོས་ཀྱི་དབྱིངས་སུ་འཕོ་བ་དང་། ཐ་མས་གཞན་རྐྱེན་ལ་ལྟོས་པས་གྲོགས་སམ་བླ་མས་བར་དོའི་འཆར་ཚུལ་རྣམས་ངོ་སྤྲད་པ་དང་། ཐ་མལ་བ་འཆི་ཁར་ཡི་གེ་ཨཱཿཡི་སྦྱོར་བས་གནས་གོང་ནས་གོང་དུ་སྤར་བ་དང་། རོ་ལ་སྦྱང་བ་དང་། རྗེས་ལ་སྦྱང་བ་སོགས་བྱའོ། །གསུམ་པ་ཆོས་ཉིད་བར་དོ་རུ་རང་སྣང་ལ་ཡིད་ཆེས་པ་སྔར་འདྲིས་ཀྱི་མི་དང་འཕྲད་པ་ལྟ་བུའམ། མ་པང་དུ་བུ་འཇུག་པ་ལྟ་བུའི་གདམས་ངག་ལ། རྣམ་ཤེས་ནམ་མཁར་ཐིམ་པའི་ཚེ། བརྒྱལ་བ་དང་། འཆི་སྲིད་ཆོས་སྐུའི་འོད་གསལ་གཉིས་ཡོད། ནམ་མཁའ་འོད་གསལ་ལ་ཐིམ་པའི་ཚེ། རྡོ་རྗེ་སེམས་དཔའི་སྣ་ཐག་དང་། འོད་ལྔའི་སྣང་བ་ཤར་བ་གཉིས་དང་། འོད་གསལ་ཟུང་འཇུག་ལ་ཐིམ་པའི་ཚེ། ཟུང་འཇུག་ཆུང་ངུ་སྒྲ་འོད་ཟེར་གསུམ་ཁྲོ་བོའི་དཀྱིལ་འཁོར་དང་། ཟུང་འཇུག་ཆེན་པོ་རིགས་ལྔའི་ཚོམ་བུ་རིམ་གྱིས་ཤར་བ། འཇུག་པ་ཤེས་པའི་གནད། གྲོལ་བ་ལུས་ཀྱི་གནད། མཐར་ཕྱིན་ངོ་ཤེས་པའི་གནད། ཟུང་འཇུག་ཡེ་ཤེས་ལ་ཐིམ་ཚེ་ཡེ་ཤེས་བཞི་སྦྱོར་གྱི་སྣང་བ་འོད་སྣམ་བུ་བརྐྱང་བ་ལྟ་བུ། དཀར་སེར་དམར་མཐིང་བཞིའི་སྟེང་དུ་རང་རང་གི་ཁ་དོག་དང་མཐུན་པའི་ཐིག་ལེ་ཆེ་བ་གཅིག་ལ་ཐིག་ཕྲན་བཞི་བཞིས་བརྒྱན་པ་སྣང་། དེ་དུས་ལུས་གདོས་བཅས་ལས་གྲོལ། རིག་པ་ཉོན་མོངས་པ་ལས་གྲོལ། འོད་གསལ་གཟུང་འཛིན་ལས་གྲོལ་བ་ངོ་ཤེས་པར་བྱའོ། །ཡེ་ཤེས་ལྷུན་གྲུབ་ལ་ཐིམ་པའི་སྐབས། སྟེང་དུ་ཀ་དག་གི་སྣང་བ། བར་དུ་ལོངས་སྐུའི་ཞིང་ཁམས། ཕྱོགས་མཚམས་སུ་སྤྲུལ་སྐུ། འོག་ཏུ་རིགས་དྲུག །དེ་འདུལ་བྱེད་ཐུབ་པ་དྲུག་དང་བཅས་པ་འཆར་བ་ངོ་ཤེས་ན། འཆར་ལུགས་བརྒྱད་དང་། མངོན་ཤེས་དྲུག་དང་། རྗེས་དྲན་དྲུག་དང་། ཤེས་རབ་དང་། ཏིང་ངེ་འཛིན་དང་། ཐིམ་ལུགས་བརྒྱད་ཀྱི་སྣང་བ་སོགས་འཆར་རོ། །ལྷུན་གྲུབ་སྒོ་བརྒྱད་ལམ་སྣང་དང་སྦྱར་ན། མ་དག་འཁོར་བའི་སྒོ་ལྟར་ཤར་བ་ཆོས་ཉིད་མངོན་སུམ། འོད་ལྟར་ཤར་བ་ཉམས་གོང་འཕེལ། སྐུ་ལྟར་ཤར་བ་རིག་པ་ཚད་ཕེབས། གཉིས་མེད་དང་མཐའ་གྲོལ་ཆོས་ཉིད་ཟད་པ། ཡེ་ཤེས་ལྟར་ཤར་བ་ཉམས་ལེན་གྱི་དུས་ཤེས་ཉམས་དང་སྣང་ཉམས། ཐུགས་རྗེ་ལྟར་ཤར་བ་དེ་དག་གི་དུས་ན་ཤེས་རབ་དང་སྙིང་རྗེ་ཤར་བ་རྣམས་སོ། །བར་དོ་དང་སྦྱར་ན། སྐུ་ལྟར་ཤར་བ་ཚོམ་བུ། ཡེ་ཤེས་དང་འོད་ལྟར་ཤར་བ་བཞི་སྦྱོར་དག་པ་ཡེ་ཤེས་དང་མ་དག་པ་འཁོར་བའི་སྒོ་གཉིས་ལྷུན་གྲུབ་རང་ངོ་ཤེས་ན་ཐུགས་རྗེ་དང་གཉིས་མེད་དང་མཐའ་གྲོལ་ལྟར་ཤར་ནས། རྩལ་གཞི་ལ་ཐིམ་ནས་གྲོལ་བའོ། །བཞི་པ་སྲིད་པ་བར་དོ་ལ། ལས་ཀྱི་འཕྲོ་མཐུད་པ་ཡུར་བ་རྐང་ཆད་ལ་ཝ་འཛུགས་པ་ལྟ་བུའི་གདམས་ངག་ནི། ཆོས་འདིའི་སྒོ་མཐོང་བ་རྣམས་ཀྱིས་བར་དོའི་རང་སྣང་ངོས་ཟིན་ནས་ཕྱོགས་བཅུར་སྤྲུལ་བའི་ཞིང་ཡིད་ལ་བྱས་པ་ཙམ་གྱིས་ཆོས་ཉིད་བདེན་པའི་བྱིན་རླབས་དང་སྔར་བྱང་ཆུབ་སེམས་དཔའི་འཕོ་ལུགས་གཉིས་ལ་སྦྱངས་སྟོབས་ཀྱིས་རང་སྣང་སྤྲུལ་པའི་ཞིང་དང་དཔལ་རི་སོགས་སུ་སྐྱེ་བ་ཡིན། ཆོས་འདིའི་སྒོ་མ་མཐོང་བ་རྣམས་ཀྱིས་ཞིང་དག་པར་སྨོན་ལམ་འདེབས་པ། སྐྱབས་འགྲོ་བྱེད་པས་མངལ་སྒོ་ངན་པ་དགག བཟང་པོ་འདེམས་པ་སོགས་བྱ་བ་ཡིན་ནོ། ༈ །ལུས་ཀྱི་གནད་གཟེར་ནི་རིག་པའི་ཡུལ་བཙལ་བ། འགྲོ་འོང་གི་ལམ་བཅད་པ། གཏད་སའི་འབེ ན་ལ་གཟུད་པ། མི་འགུལ་བ་ལ་གཞི་བཅའ་བ། རྒྱ་ཆེ་བ་ནམ་མཁའ་སྤར་གྱིས་བཟུང་བ་དྲུག་གོ །དེ་ཡན་གཅིག་གི་ཚིག་ཟིན་མ་རྙེད། མངྒ་ལམ། དགེའོ། །དགེའོ། །དགེའོ། བཀྲ་ཤིས་པར་གྱུར་ཅིག། ༈ འཁྱིལ་བ་བཤིག་སོགས་ཟིན་བྲིས་འགའ། འཁྱིལ་བ་བཤིག་དགོས། འབྱམས་པ་གཅོད་དགོས་གསུངས། ༈ བསྒོམ་མ་མྱོང་དང་ཞེས་པ་ནི་གང་ཤར་ཚད་སྒོམ་དུ་ཤར་ནས་སྒོམ་མཁན་གྱི་བློ་ཡང་ཤར་གྲོལ་དུ་སོང་བས་ནའོ། །འབྲལ་མ་མྱོང་ཞེས་པ་ནི་དོན་མེད་དུ་ཕྱལ་བ་སྟོང་ཉིད་གཤིས་ཤོར་དང་རྒྱས་འདེབས་མ་ཡིན་པར་ཤེས་རིག་རང་ཚུགས་མ་ཤོར་བ་ལ་གོ་དགོས། དེ་ལྟ་བུའི་མི་བསྒོམ་དོན་དང་མི་འབྲལ་བ་གཉིས་ཀྱིས་བདེ་སྡུག་གི་སྣང་བ་དང་སེམས་སེམས་བྱུང་གི་རྟོགས་པ་ཐམས་ཅད་སྒོམ་དུ་ཤར་ནས་གྲོལ་བའོ། །དེ་ཡང་གོལ་ས་གསུམ་པོ་འདི་ཞི་གནས་ཀྱི་སྟེང་ནས་བཞག་ནི་རེད། ཤོར་བ་བཞི་པོ་འདི་ལྷག་མཐོང་གི་སྟེང་ནས་འཇོག་པ་ཡིན་གསུངས། ཤེས་བྱའི་གཤིས་ལ་ཤོར་བ། སྟོང་ཉིད་གཤིས་སུ་ཤོར་བ། སྟོང་ཉིད་རྒྱས་འདེབས་སུ་ཤོར་བ། ཚོགས་དྲུག་ལམ་འཁྱེར། དུག་ལྔ་ལམ་འཁྱེར། སྒོ་ལྔ་ལམ་འཁྱེར། སྔོན་འགྲོ་སེམས་ཀྱི་ཁང་བུ་བཤིག་པས་གཏན་ལ་ཕབ་བྱ་ཤེས་རབ་ལྷག་མཐོང་། རང་སའི་རྣམ་རྟོག་ཞི་བ་ཞི་གནས། གནས་ཆ་དྭངས་མ་ཞི་གནས། འཕྲོ་ཆ་བར་མའི་རྟོག་པ་ཤར་གྲོལ་དུ་འགྲོ་བ་ལྷག་མཐོང་། ཤར་གྲོལ་ཞེས་པ་གཟུང་རྟོག་དེ་ཉིད་འཛིན་རྟོག་ལ་མ་འཕོས་པར་ཡལ་བ་ལ་གོ་གསུངས། སྣང་བ་ཡུལ་གྱི་བློ་ཅན་ནི་མཉམ་བཞག་ནས་འཁྲུལ་འགྲོ་ཚེ་འཁྲུལ་བ་དེ་ཤེས་ནས་འཆར་གཞི་ངོས་བཟུང་ནས་འགྱུ་བ་གནས་དག་གི་དགོངས་པ་བསྐྱང་བ་ལ་ཟེར། རིག་པ་རང་སྣང་གི་བློ་ཅན་འཁྲུལ་ཚེ་སྔོན་ལ་འཁྲུལ་བ་མི་དྲན་རིག་པ་དེ་དྲན་པ་ཙམ་གྱིས་གྲོལ་བ་ལ་ཟེར། དཔེར་ན་ཁྱི་དང་སེང་གེ་ལྟ་བུའོ། ༈ །རྐྱེན་ནི་ཕྱི་ལྷོང་ལྷ་འདྲེའི་ཆོ་འཕྲུལ། ནང་ལྷོང་ལུས་ཀྱི་ན་ཚ། གསང་ལྷོང་ཆགས་སྡང་རྨོངས་གསུམ་སོགས་རྐྱེན་ཆེན་པོ་གྲོལ་ཐུབ་དཀའ་གསུངས། དཔེར་ན་སྒོམ་རྐུབ་གཡེང་བས་ཕུད། ལྟ་རྐུབ་སྤྱོད་པས་ཕུད་གསུངས་སོ། ༈ །རང་ལྟ་མཆོག་འཛིན་བདུད་ཀྱིས་བསླུས་པ་ཡིན། །ཞི་གནས་ཧད་པོ་ལོ་བརྒྱར་བསྒོམ་པ་ལས། །ཞི་ལྷག་ཟུང་འཇུག་སྐད་ཅིག་བསྒོམ་པ་མཆོག ། སེམས་གནས་ཙམ་ནི་བསམ་གཏན་ལྷ་དང་འདྲ། །ཞེས་སོ། ༈ །དང་པོ་ཀུན་གཞི་ལས་ཀུན་གཞིའི་རྣམ་ཤེས། དེ་ལས་སྒོ་ལྔའི་ཤེས་པ། དེ་ལས་ཉོན་ཡིད་སྔ་མ་སྔ་མ་འགགས་ནས་ཕྱི་མ་ཕྱི་མ་ཤར་བའོ། ༈ །འདོད་ཆགས་ཞེས་པ་བུད་མེད་ཁོ་ནས་མི་ཚད་དེ། ཕྱི་སྣོད་ཀྱི་འཇིག་རྟེན་ལ་ཆགས་པ། ནང་བཅུད་ཀྱི་སེམས་ཅན་ལ་ཆགས་པ། བར་འདོད་ཡོན་ལྔ་ལ་ཆགས་པ། ཞེ་སྡང་སྐྱེ་ཡུལ་ཡང་དགྲ་གཅིག་པུས་མི་ཚད་དེ། ཡིད་དུ་མི་འོང་བའི་ཆ་ཐམས་ཅད་དོ། །རྩལ་ལྷོང་བ་ཞེས་པ་ཤར་བའམ་འཆར་བ་ལའོ། ༈ །སྒྲོ་སྐུར་ཞེས་པ་ནི། བདག་ཉིད་ཀྱིས་གནས་ལུགས་ཇི་ལྟ་བར་མ་རྟོགས་བཞིན་ཏུ་ང་རང་རྟོགས་སོ་ཞེས་སྒྲོ་འདོགས་པའོ། །སེམས་ཅན་ཁྱི་ལྟ་བུའི་ཐ་ཆད་པ་དེའི་རྒྱུད་ལ་སངས་རྒྱས་ཀྱི་དགོངས་པ་མི་བཞུགས་ཞེས་པ་ནི་སྐུར་བ་འདེབས་པ་ཡིན་གསུངས་སོ། ༈ །དང་པོ་སྔར་འདྲིས་ཀྱི་མི་དང་འཕྲད་པ་ལྟ་བུའི་གྲོལ་ཚུལ་འདིས་རྗེས་ཐོབ་འཁྲུལ་བའི་རྗེས་སུ་ཡེངས་སོང་བ་གོ་དགོས། དེ་ཚེ་སྐད་ཅིག་དང་པོ་འཁྲུལ་བ་ངོས་ཟིན། གཉིས་པ་འཆར་བ་ངོས་ཟིན། གསུམ་པའི་ཚེ་འཁྲུལ་བ་དེངས་ནས་སྐྱོང་བ་དེ་ལ། ལས་དང་པོའི་སྐྱོང་ཚུལ་ཙམ་ཉན་གི་གསུངས། གཉིས༵་པ༵་སྦྲུལ་མདུད་ལྟ་བུའི་གྲོལ་ཚུལ་ནི་མཉམ་བཞག་སྐབས་རྣམ་རྟོག་ཤར་ཡང་མགོ་འབུར་ཙམ་གྱིས་རང་ཚུགས་མི་ཐུབ་པར་གྲོལ་བ། སྦྲུལ་གྱི་ཁུག་འགོ་ལྟ་བུའི་རྣམ་རྟོག་ཤར། ཡང་མི་རྩལ་ཆེན་ཞིག་འགྱེལ་ཚད་ཞིག་བྱས་ཀྱང་འགྱེལ་མི་ཐུབ་པ་ལྟ་བུ་ཡིན་གསུངས། གསུམ་པ་ཁང་སྟོང་རྐུན་མའི་དཔེ་ནི་མཉམ་བཞག་རང་ས་ཟིན་ཚེ་རིག་པ་རྗེན་ལ་བུད་ནས་གང་ཤར་ཚད་རིག་པའི་རྣམ་ལྡན་དུ་ཤར་ནས་རིག་པ་ཤོར་རྒྱུ་དང་རྣམ་རྟོག་ཐོབ་རྒྱུ་མེད་རིན་པོ་ཆེ་གསེར་གླིང་དུ་ཕྱིན་པ་ལྟ་བུའི་འཁྲུལ་པ་རང་མཚན་པ་མེད་གང་ཤར་དག་པ་རབ་འབྱམས་ཡིན་གསུངས། གྲོལ་ཚུལ་གསུམ་པོ་དེ་གང་ཟག་རབ་འབྲིང་ཐ་གསུམ་གྱི་སྟེང་ནས་བཞག་ལུགས་ཡོད། ཡང་ན་གང་ཟག་གཅིག་གི་སྟེང་ནས་བཞག་ན་ཆོག་གསུངས། ༈ ཆོས་སྐུར་ལྷོང་རྣམ་རྟོག་གནས་གྱུར་ནས་འཁྲུལ་རྟོག་ཡེ་ཤེས་སུ་ཤར། ༈ གཞི་ཀ་དག་ཁྲེགས་ཆོད་ཀྱི་རིག་པ་རང་བྱུང་གི་སྒྲོན་མ་གཞི་ལ་བཞུགས་པ་དང་། ལམ་ཉམས་སུ་མྱོང་བའི་ཆ་ནས་ཤེས་རབ་རང་བྱུང་གི་སྒྲོན་མའི་རང་ཞལ། ༈ སྟོང་ཉིད་སྙིང་རྗེ་ཟུང་འཇུག་གི་ལམ་གནད་མངོན་ཏུ་གྱུར་པ་ཉི་མའི་གཟུགས་སུ་བཀོད་པ་དང་། ལམ་ཕར་ཕྱིན་དྲུག་གི་བསྡུས་པའི་སྤྱོད་པ་རྒྱ་མཚོ་ལྟ་བུ་འོད་ཟེར་གྱི་གཟུགས་སུ་བཀོད་པ་ཡིན་ནོ། ༈ །བསྡུས་དོན་ནི། རང་ངོ་འཕྲོད་པ་ལྟ་བ་རིག་པ་རྗེན་ལ་ཕུད་པ། སྒོམ་པས་ཉམས་སུ་ལེན་ཚེ་ཉམས་ཞེན་གྱི་ཤུན་པ་དང་བྲལ་རྗེན་ལ་ཕུད་པའོ། །གང་ཤར་རང་གྲོལ་སྤྱོད་པ་ནི་ཐམས་ཅད་ཆོས་སྐུར་གྲོལ་བའོ། །རིག་སྟོང་ཟང་ཐལ་རྗེན་པ་དེ་ཉིད་བླ་མ་དང་དབྱེར་མེད་པ་སྐྱབས་འགྲོ་དགུའི་བདག་ཉིད་དུ་ཤེས་ན་གེགས་དང་གོལ་ས་མེད་ཅིང་། ལྟ་བའི་བོགས་ཐོན་པ་བླ་མའི་མན་ངག་ཞལ་ཤེས་ཡིན་ནོ། །གྲོལ་ས་དབྱིངས་དང་གྲོལ་གཞི་ལྷུན་གྲུབ། ༈ གཟུང་འཛིན་བྱུང་ན་ཕཊཿཀྱིས་གཏོར། །ཐུག་འཕྲད་ཤེས་པ་དེ་རུ་འཆར། །ཞེས་སོ། །སྐད་ཅིག་དང་པོར་སྣང་གྲགས་རྟོག་གསུམ་ཐ་མལ་མ་དག་པ་རང་མཚན་པ་ཤར། སྐད་ཅིག་གཉིས་པར་ཐ་མལ་མ་དག་པའི་སྣང་གྲགས་རྟོག་གསུམ་དག་ནས་དག་པ་བླ་མའི་སྐུ་གསུང་ཐུགས་སུ་ཤར། སྐད་ཅིག་གསུམ་པར་དག་པ་བླ་མའི་སྐུ་གསུང་ཐུགས་སུ་འཛིན་པའི་མཚན་འཛིན་གྱི་རྟོག་པ་དབྱིངས་སུ་ཡལ་ནས་རིག་སྟོང་ཟུང་འཇུག་གི་བླ་མའི་རང་ཞལ་ལ་བལྟའོ། །དོན་དུ་མཚོན་བྱེད་དཔེའི་བླ་མའི་སྐུ་གསུང་ཐུགས་སུ་ཤར་བ་དེའི་སྟོབས་ཀྱིས། མཚོན་བྱ་དོན་གྱི་བླ་མ་རིག་སྟོང་ཟུང་འཇུག་སྐུ་གསུམ་འདུ་འབྲལ་མེད་པའི་བདག་ཉིད་འདི་ཡིན་པ་ལ་ངེས་ཤེས་རྙེད་དགོས། ལྟ་བ་ཡན་ཐུབ་པ་ནི། རིག་སྟོང་ཆོས་སྐུ་ཐིག་ལེ་ཉག་གཅིག་དེ་ཉིད་རྒྱ་ཆད་ཕྱོགས་ལྷུང་དང་བྲལ་བར་བཞུགས་པ་དེའི་ཀློང་དུ་ཕྱིའི་ཡུལ་ནང་གི་རྣམ་རྟོག་བཟང་ངན་ཅི་ཤར་ཡང་མི་གནོད་པར་ལྟ་བ་ཚུར་མངོན་འོང་། བསྒོམ་པ་ཡེང་ཐུབ་པ་ནི་གང་ཤར་གང་སྣང་ཐམས་ཅད་རིག་པའི་ཀློང་དེ་ལས་ཤར། དེ་ལ་གནས། མཐར་དེ་ལ་ཐིམ་པའོ། །སྤྱོད་པའི་རྐྱེན་ཐུབ་པ་ནི་ཡུལ་རྐྱེན་གྱིས་རིག་པའི་མལ་ས་མི་འཕྲོག་པར་རྐྱེན་གང་གི་ཚེ་ན་རིག་པ་དྲན་ཙམ་གྱིས་གྲོལ་བའོ། ༈ །ཤེས་རབ་རང་བྱུང་གི་སྒྲོན་མ་ལ་དབྱེ་ན་གཞི་གནས་རང་བྱུང་གི་ཤེས་རབ་ནི་ངོ་བོ་རང་བཞིན་ཐུགས་རྗེ་གསུམ་གྱི་བདག་ཉིད་ཡིན། སྣང་བ་ཅེར་འཛིན་གྱི་ཤེས་རབ་ནི། ཐོད་རྒལ་ཡིན་ཏེ། ནང་གདངས་ཕྱིར་ཤར་བ་རིག་གདངས་རྡོ་རྗེ་ལུ་གུ་རྒྱུད་ལ་སོགས་པ་རྣམས་ནང་གི་རིག་སྟོང་ཟུང་འཇུག་གི་ཡུལ་ཡུལ་ཅན་གཉིས་སུ་མེད་པས་འོད་སྣང་མངོན་དུ་སྣང་བ་ཡིན། དྲན་པ་འགགས་མེད་ཀྱི་ཤེས་རབ་ནི། གང་སྣང་གང་ཤར་གྱི་ཆོས་ཐམས་ཅད་རིག་པ་རྗེན་པར་ཤར་བའི་ཚེ་རིག་སྟོང་ཟུང་འཇུག་གི་ཀློང་དུ་གྲོལ་བའམ། སྣོད་བཅུད་དུ་གྲུབ་པའི་སྣང་བ་ཐམས་ཅད་རིག་པ་ཉག་གཅིག་གི་ཀློང་དུ་སྡུད་པའི་ཆ་ལ་ཟེར། སོ་སོར་རྟོག་པའི་ཤེས་རབ་ནི། ཆོས་དང་ཆོས་ཉིད་རང་དང་སྤྱིའི་མཚན་ཉིད་འབྱེད་པར་བྱེད་པ། རྗེས་ཐོབ་སྐབས་སུ་ཡང་གནས་དོན་ལུས་གསུམ་གྱི་སྣང་བ་འདི་ཐམས་ཅད་བདེན་མེད་དུ་ཤེས་པར་བྱེད་པའོ། །འཇུག་བྱེད་རྣམ་གསུམ་གྱི་ཤེས་རབ་ནི། རང་བཞིན་བར་དོར་སྐྱེས་ནས་འཆི་ནད་ཀྱིས་མ་ཐེབས་བར་གྱི་ཐོས་པས་གཏན་ལ་དབབ། བསམ་པས་ངེས་པར་བྱེད། སྒོམ་པས་རོ་མྱོང་བར་བྱེད་པ་འདི་ཀའོ། །ཤེས་རབ་སྔ་མ་བཞི་རིག་ཆ་དང་ཕྱི་མ་སེམས་ཀྱི་ཆའོ། ༈ །སྤྱིར་ཐོད་རྒལ་ཉམས་སུ་ལེན་པའི་སྐབས་སུ་དབྱིངས་ཐིག་སོགས་རང་སྣང་ཡིན་པར་ཤེས་པས་གཞན་དུ་འཛིན་པ་ལྡོག །རང་བཞིན་མེད་པར་ཤེས་པས་དངོས་པོའི་བློ་ལྡོག །རང་བཞིན་མེད་སྙམ་པ་ཡང་འོད་གསལ་གྱི་ཀློང་དུ་གྲོལ་སོང་བ་ནི་ཁྱད་ཆོས་དྲུག་གི་གནད་བསྡུས་པའོ། ༈ །འོད་གསལ་སྦུབས་འཇུག་སྐབས་གཞི་སྣང་གི་སྣང་ཆ་འདི་རྣམས་ཞིང་ཁམས་དང་གཞལ་ཡས་ཁང་སྟོན་པ་རང་གི་རྩ་བའི་བླ་མ་ཉིད་གཞོན་ནུ་དཔའ་བོ་སྟོབས་ལྡན་གྱི་རྣམ་པར་བཞེངས་པ་ཡིན་སྙམ་པའི་མོས་གུས་དང་བཅས་ཕྱི་ནང་གི་དབྱིངས་རིག་བསྲེས་ཏེ་ཀ་དག་གི་ངང་ལ་སྤྲོ་བསྡུ་མེད་པར་བཙན་ས་འཛིན་པ་ཡིན། ༈ གྲོང་འཕོ་གྲོང་འཇུག་ནི་གྲོང་འདི་ནས་འཕོ་སྟེ་ཆོས་སྐུའི་གྲོང་དུ་འཇུག་པ་ལ་ཟེར། དེ་ཡང་བདག་ནི་ངེས་པར་འཆི་བ་ཡིན་སྙམ་སྟེ་ཆགས་ཞེན་སྐྱེ་བའི་དངོས་པོ་རྣམས་ཡར་མཆོད་མར་སྦྱིན་ཐུབ་ན་རབ་ཡིན་ཀྱང་ཡིད་ཀྱིས་བླ་མ་དཀོན་མཆོག་ལ་འབུལ་ཏེ་ཆགས་ཞེན་བཅད། དེ་ནས་སྤྱི་བོར་དཔའ་བོ་སྟོབས་ལྡན་གྱི་རྣམ་པར་བླ་མ་བཞུགས་ཡོད་པར་མོས་ལ་རང་གི་སྙིང་དབུས་སུ་རིག་པ་ཨ་དཀར་པོ འམ་བླ་མའི་སྐུ་ཚོན་གང་བ་ཞིག་ཏུ་དམིགས་ལ་སྐར་མདའ་བཞིན་དུ་སོང་སྟེ་བླ་མའི་ཐུགས་ཀར་བསྟིམས་ཏེ་ཐུགས་ཡིད་དབྱེར་མེད་དུ་བསྲེ་བ་གནད་ཡིན། དེ་གཉིས་གནད་ཆེ་བས་ད་ལྟ་ནས་རྩལ་འབྱོངས་བ་ཤིན་ཏུ་གལ་ཆེ། ནུབ་མོ་ཉལ་ཁར་གཉིད་རན་དུས་སྙིང་དབུས་སུ་རྩ་བའི་བླ་མ་ཉིད་གཞོན་ནུ་དཔའ་བོ་སྟོབས་ལྡན་གྱི་སྐུར་བཞེངས་ཏེ་སྟོན་འཁོར་གཞལ་ཡས་ཁང་ཞིང་གསུམ་གྱི་བཀོད་པ་དང་བཅས་གསལ་ཏེ་རང་བཞིན་སྤྲུལ་སྐུའི་ཞིང་དུ་འགྲོ་བའི་དམིགས་འདུན་དྲག་པོ་བྱ་སྟེ་སྦྱངས་དགོས། དུས་ནམ་ཡང་ཉིན་རེ་ལ་ཐུགས་ཡིད་བསྲེ་བ་བརྒྱ་རེ་ཙམ་སེམས་བསྐྱེད་སོགས་བསྔོ་སྨོན་བཅས་བྱ་དགོས་གསུངས་། སྔ་དྲོའི་དུས་ཨོ་རྒྱན་རིན་པོ་ཆེ་ལ་གསོལ་བ་འདེབས་པ་དང་། ཕྱི་དྲོ་རྗེ་བཙུན་སྒྲོལ་མ་ལ་གསོལ་བ་འདེབས་དགོས་གསུངས། དེ་བཞིན་ཉིན་རེ་བཞིན་ཕྱིའི་རུ་ཤན་དང་རིགས་དྲུག་བསྲེགས་སྦྱངས་བྱེད་པ་འདི་ཤིན་ཏུ་གལ་ཆེ་བས་ཆག་མི་ཉན་གསུངས།། དགེའོ། །བཀྲ་ཤིས་པར་གྱུར་ཅིག། །། དབང་དོན་སོགས་ཀྱི་ཞལ་རྒྱུན།ལར་དབང་ཞེས་པ་ནི་སྐུ་གསུམ་འདུ་འབྲལ་མེད་པའི་རིག་པ་ལ་དབང་ཐོབ་དགོས་ཀྱང་། ཡེ་ཐོག་མ་མེད་པ་ནས་མ་རིག་བདེན་འཛིན་གྱིས་དྲངས་པའི་དུས་གསུམ་ཡིད་ཀྱི་འཁྲུལ་བའི་གཞན་དབང་དུ་གྱུར་པ་ཡིན་ཏེ། སྔར་དབང་མ་ཐོབ་པ་དེ་ཤན་འབྱེད་ཀྱིས་ཤན་ཕྱེ། ལ་བཟླས། ལ་བཟླ་བས་རིག་པ་ངོ་སྤྲད་ནས། དཔེར་ན་རྒྱལ་བུ་རྒྱལ་ས་ལ་བཀོད་པ་ལྟ་བུ་སྔ ར་མ་དབང་བ་དེ་ད་དབང་བར་བྱས་པ་ཡིན་གསུངས། སྐུ་གསུམ་འདུ་འབྲལ་མེད་པའི་རིག་པ་ལ་དབང་དང་མི་དབང་མེད་ཀྱང་ཐུགས་རྗེའི་རིག་རྩལ་གྱི་ཆ་ལས་འཁྲུལ་བའི་གཞན་དབང་དུ་བསྐྱོད་པ་ཡིན་ནོ། །དཔེར་ན་ཆུ་རླབས་ཀྱིས་ཤིང་བསྐྱོད་པ་ལྟ་བུ་ཡིན་གསུངས། གསང་སྔགས་རྡོ་རྗེ་ཐེག་པའི་ལུགས་ལ་སྨིན་བྱེད་ཀྱི་དབང་དང་གྲོལ་བྱེད་ཀྱི་གདམས་པ་གཉིས་ཡོད་དེ། ཇི་ལྟར་སྨིན་ཞེ་ན། དབང་བསྐུར་བའི་ཚེ་ལུས་ལྷ་རུ་སྨིན། ངག་སྔགས་སུ་སྨིན། སེམས་དྲན་རྟོག་ཡེ་ཤེས་སུ་སྨིན་པ་ཡིན། སྣོད་ཞིང་དང་གཞལ་ཡས་ཁང་གི་རང་བཞིན། བཅུད་ལྷ་དང་དཀྱིལ་འཁོར་གྱི་རང་བཞིན་དུ་ཤེས་པ་ཡིན་གསུངས། དཀྱིལ་འཁོར་ཞེས་གཙོ་དང་འཁོར་དུ་འཇུག་གོ །དབང་དོན་སོགས་དབང་དོན་གྱི་ཡེ་ཤེས་རང་བྱུང་གདོད་མའི་ཡེ་གཞི་སྐུ་གསུམ་འདུ་འབྲལ་མེད་པའི་རིག་པ་ངོ་འཕྲོད། རང་ལུས་གདན་ཚང་གི་དཀྱིལ་འཁོར་དུ་ངོ་འཕྲོད། སྣོད་བཅུད་འདི་ཞིང་དང་གཞལ་ཡས་ཁང་སྐུ་དང་ཡེ་ཤེས་སམ་ལྷ་དང་དཀྱིལ་འཁོར་གྱི་རང་བཞིན་དུ་ངོ་འཕྲོད་པའི་ཚེ་དབང་ཐོབ་པ་ཡིན་གསུངས། དེ་ཚེ་ཆོས་ཉིད་ལ་ཆོས་ཉིད་རོལ། ཡེ་ཤེས་ལ་ཡེ་ཤེས་རོལ་བ་ཡིན་ནོ། །དབང་པོ་སྒོ་ལྔའི་ཡུལ་དུ་གཟུགས་སྒྲ་སོགས་འགག་མེད་དུ་ཤར། སྣང་བ་ཞེན་མེད་དུ་རོལ་ཐུབ་ནས་རྟེན་མེད་དུ་གྲོལ་འགྲོ་གསུངས། དེ་ལྟར་དབང་པོ་སྒོ་ལྔའི་ཡུལ་དུ་གྱུར་པ་གཟུགས་སྒྲ་སོགས་ངོ་ཤེས་རྩལ་རྫོགས་བརྟན་པ་ཐོབ་པ་གསུམ་གྱིས་དང་པོ་རང་སྣང་དུ་ངོ་ཤེས་དགོས། ངོ་ཤེས་དུས་གཞན་དུ་འཛིན་པའི་ཡུལ་ཡུལ་ཅན་དག་པ་ཡིན། གཉིས་པའི་དུས་རང་སྣང་རང་བཞིན་མེད་པར་ཤེས་ནས་ཐག་ཆོད་པ་ཡིན། བདེན་གྲུབ་ཏུ་འཛིན་པའི་ཆ་རང་བཞིན་མེད་པར་དག་པའོ། །གསུམ་པའི་དུས་མེད་པའོ་སྙམ་དུ་འཛིན་མཁན་གྱི་རྟོག་པ་དང་། ཡུལ་མེད་པ་རླུང་སེམས་དང་བཅས་པའི་རྩལ་རིག་སྟོང་ཆོས་ཉིད་ཀྱི་དབྱིངས་སུ་རྫོགས་པའི་ཚེ་དེ་ལ་བརྟན་པ་ཐོབ་དགོས་པ་ཡིན་གསུངས། དང་པོ་ངོ་ཤེས། བར་དུ་ངེས་ཤེས་བརྟན། ཐ་མ་ངེས་ཤེས་དག་དགོས་པ་ཡིན་པས་ངེས་པ་རྙེད་ཀྱང་ངེས་ཤེས་སྒྲོག་གིས་བཅིངས་ཟེར་བ་ཡིན་པས་དག་དགོས་གསུངས། རླུང་སེམས་ཀྱི་རྒྱུ་བ་ཆ་དང་བཅས་པ་གདོད་མའི་གཤིས་ཐོག་ཏུ་དྭངས་པའི་ཚེ་རིག་སྟོང་ཟུང་འཇུག་གི་ལྟ་བ་དེ་ཉིད་དབང་བཞི་པའི་མཉམ་བཞག་གི་ལྟ་བ་ཡིན་གསུངས། དབང་སྲོག་དམ་ཚིག་གིས་འཛིན་ཟེར་བའང་ལྟ་བའི་ངང་དེ་ལས་མི་གཡེང་བ་དམ་ཚིག་གི་སྲོག་ཡིན། དེ་ལས་འདའ་དུས་སྲོག་ཆད་ལྟ་བུ་དམ་ཚིག་འགལ་ཉམས་འདས་རལ་དུ་སོང་བ་ཡིན། དེ་མིན་པའི་དམ་ཚིག་གཞན་དུ་བསྲུང་འདོད་པ་གནད་མ་གོ་བ་ཡིན། ལྟ་བའི་གདེངས། སྒོམ་པའི་ངང་མ་ཤོར་བའི་དྲན་ཤེས་བཞིན་བག་ཡོད་དགོས་གསུངས། མཁའ་འགྲོ་སྡོམ་པའི་རྒྱུད་ལས། མི་ཤེས་པ་དང་བག་མེད་དང་། །ཉོན་མོངས་མང་དང་མ་གུས་པ། །བརྗེད་ངས་དྲན་པ་མི་གསལ་དྲུག །འདི་དྲུག་དམ་ཚིག་ཉམས་པའི་རྒྱུ། །ཞེས་གསུངས། རྗེས་ཐོབ་དུ་དབང་བཞི་གང་རུང་གི་བུམ་དབང་ལྟ་བུས་རྗེས་ཐོབ་སྣང་གྲགས་རིག་གསུམ་ལྷ་སྔགས་ཆོས་ཉིད་དུ་ལྟ་བ་དང་། གསང༵་ཤེ༵ར་གཉིས་ལྟ་བུས་རྗེས་ཐོབ་ཚོར་བ་བདེ་སྡུག་བར་མ་གསུམ་པོ་བདེ་བ་ཆེན་པོའི་ཡེ་ཤེས་ཀྱི་རང་བཞིན་དུ་ལྟ་བ་དང་། འདོད་ཡོན་ལྔ་འགག་མེད་དུ་སྣང་། ཞེན་མེད་དུ་རོལ་ནས་རྟེན་མེད་དུ་གྲོལ་དགོས་པ་ཡིན། མི༵་དམིགས་བསྒོམ་པ་སོགས་ཡིན། ཚིག་དབང་གིས་རྗེས་ཐོབ་ཀྱི་ལམ་ཁྱེར་སྒོ་ཡུལ་རླུང་རིག་གི་གནད་ལ་བརྟེན་ནས་ཐོད་རྒལ་བསྒོམ་པ་དང་། རང་སྣང་ཡེ་ཤེས་ཀྱི་དཀྱིལ་འཁོར་ཞིང་དང་གཞལ་ཡས་ཁང་སྐུ་དང་ཡེ་ཤེས་ཀྱི་རང་བཞིན་དུ་ལྟ་བ་ཡིན་གསུངས ། དེ་དག་ལའང་དམ་ཚིག་ལྔ་ལྔར་དབྱེ་ན་ཉི་ཤུ་ཐམ་པ་ཡོད། ༈ གསང་བ་སེམས་ཉིད་རང་བྱུང་གི་དཀྱིལ་འཁོར་ནི་རིག་སྟོང་འདུས་མ་བྱས་པའི་ཡེ་ཤེས་འདི་ཡིན། ༈ རིག་སྟོང་ཟུང་འཇུག་གི་ཆ་གཙོ་བོའི་ཚུལ་དང་ཐུགས་རྗེའི་རིག་རྩལ་ལས་ཤར་བའི་རྟོག་ཚོགས་འཁོར་གྱི་ཚུལ་དུ་ཡོད་པ་ཡིན། ཡེ་ཤེས་ཀྱི་རང་མདངས་མ་འགགས་པ་གཙོ་བོ་དང་། དེ་ལས་ཤར་བའི་འོད་ལྔ་དབྱིངས་དང་ཐིག་ལེ་ནི་འཁོར་གྱི་ཚུལ་དུ་གནས་པ་ཡིན་གསུངས། ༈ སྔོན་སྣང་བ་དང་མུན་པའི་ཆ་འདི་ཡང་མེད་པ་ཡིན་གྱི། མི་རྣམས་ཀྱི་ཁམས་རགས་པའི་ཟས་ཟོས་ཚེ་དུབ་ནས་གཏི་མུག་གི་དབང་དུ་སོང་ཚེ་རྟེན་ཅིང་འབྲེལ་བར་འབྱུང་བ་ཡིན་པས་ཕྱི་རྟགས་ལ་མུན་པ་འཐིབས། དེ་ངོ་ཤེས་ན་ཆོས་དབྱིངས་ཡེ་ཤེས་ཀྱི་རང་མདངས་ཡིན། འདོད་ཆགས་ཀྱི་ཆ་ནས་རྟེན་ཅིང་འབྲེལ་འབྱུང་དུ་ཁམས་དམར་རཀྟས་བསྐྱེད་པའི་ཕྱི་རྟགས་ལ་ཉི་མ་ཤར་བ་དང་། ཞེ་སྡང་དང་ཁམས་དཀར་པོས་བསྐྱེད་པའི་རྟགས་ལ་ཟླ་བ་ཤར་བ་ཡིན་གསུངས། ༈ སེམས་གང་ཡིན་བརྗོད་དུ་མེད་པའི་རིག་པ་སྟོང་པའི་ཡེ་ཤེས་དེ་བྱིན་ཡེ་ཤེས་དབབ་པ་ཡིན་གསུངས། ༈ རུ་ཤན་ཞེས། རུ་ནི་གཉིས་ལ་འཇུག །འཁོར་འདས་ཤན་ཕྱེ་བ་ཡིན། མ་དག་རྒྱུད་ལྔའི་ས་བོན་རྡོ་རྗེ་གསུམ་གྱི་ཡེ་ཤེས་ཀྱི་མེས་བསྲེག་ནས་ལུས་དང་སྣོད་སྤྲུལ་སྐུར་དག ། ངག་ཧཱུྃ་སྦྱང་དང་འཕྲོ་འདུ་རྣམ་པ་བཞི་ལ་བརྟེན་ནས་གསུང་ལོངས་སྤྱོད་རྫོགས་སྐུར་ཐོབ། ཡིད་གྲོལ་བ་བཞིའི་རང་བཞིན་དུ་རྟོགས་ནས་ཐུགས་ཆོས་སྐུ་ཐོབ་པ་ཡིན་གསུངས། ལམ་དུས་སུ་འཁྲུལ་བ་བཤིག་ཟིན་ཀྱང་སྟོང་པ་ཅང་མེད་མ་ཡིན་པར་འཁྲུལ་སྣང་ཡེ་ཤེས་སུ་འཆར་དགོས། གང་ལྟར་ཡིན་ན། ཁྲེགས་ཆོད་ཀྱིས་སྣོད་བཅུད་འདི་དག་རང་སྣང་ཡེ་ཤེས་ཀྱི་དཀྱིལ་འཁོར་དུ་གཟིགས། ཐོད་རྒལ་བས་སྣོད་བཅུད་འདི་སྐུ་དང་ཞིང་ཁམས་ཡེ་ཤེས་ཀྱི་རང་བཞིན་དུ་གཟིགས་པ་ཡིན་གསུངས། ༈ རྩད་བཅད་པ། ཁམས་གསུམ་འཁོར་བར་འཁྱམས་མཁན་ལུས་ངག་ཡིད་གསུམ་ལ་རག་ལས་ཀྱང་། དེ་གསུམ་གཙོ་གང་ཆེ། སངས་རྒྱས་མཁན། འཁོར་བར་འཁྱམས་མཁན། བདེ་སྡུག དྲོ་གྲང་། བརྒྱག་ལྟོག ན་ཚ། སྐྱེ་འཆི་སོགས་ཐམས་ཅད་ཀྱི་རྩ་བ་སེམས་ཡིན་པར་ཐག་ཆོད་པ་རྐུན་པོ་ངོས་ཟིན་པ་ལྟ་བུ་དགག་བྱའི་སྣང་ཚུལ་ངེས་པ་ཡིན་གསུངས། ༈ མཚང་བཙལ་བ་ནི་དབྱིབས་དང་། ཁ་དོག་ཡོད་མེད། སྣང་སྟོང་། རྟག་ཆད། གཅིག་ཐ་དད་གང་ཡང་མ་ཡིན་པར་ཐག་ཆོད་ནས་ལུས་སྣང་སྟོང་མེ་ལོང་གི་གཟུགས་བརྙན་དང་ཆུ་ཟླ་ལྟ་བུ། ངག་གྲགས་སྟོང་བྲག་ཆ་ལྟ་བུ། ཡིད་དྲན་སྟོང་ནམ་མཁའི་བྱ་རྗེས་དང་ཆུ་ཡི་རི་མོ་ལྟ་བུ་ཡིན་པར་ཤེས་ནས་ཀུན་རྫོབ་ཀྱི་ཆོས་ཐམས་ཅད་སྟོང་ཉིད་དུ་ཤེས། སྟོང་པ་ཉིད་ཕྱང་ཆད་དུ་མ་སོང་བར་རྒྱུ་འབྲས་སུ་ཤར་བའོ། ༈ །འཁོར་ལོ་བར་བའི་བསྟན་དོན་དབྱིངས་སྤྲོས་པ་དང་བྲལ་བ་དེ་ཡིན། འཁོར་ལོ་ཐ་མའི་བསྟན་དོན་ནི་སྐུ་དང་ཡེ་ཤེས་ཀྱི་རང་བཞིན་དབྱིངས་རིག་ཟུང་འཇུག་ཡིན་གསུངས། ༈ ལམ་ལྔ་དང་འབྲེལ་ན། ཉམས་ལེན་བྱེད་པའི་ཚེ། ལུས་ངག་ཡིད་གསུམ་གྱི་ཚོགས་པ་ཚང་དགོས་པས་ཚོགས་ལམ། མ་རིག་པའི་དབང་དུ་སོང་ཚེ་དྲན་པ་དེ་ཡིས་རིག་སྟོང་ཟུང་འཇུག་གི་ལྟ་བ་དེ་ཉིད་ལ་སྦྱོར་བས་ན་སྦྱོར་ལམ། རིག་སྟོང་ཡེ་ཤེས་དེ་ཉིད་མངོན་སུམ་མཐོང་བས་མཐོང་ལམ་ཡིན་ནོ། །དེ་ཉིད་ཡང་ཡང་གོམས་པར་བྱེད་པས་སྒོམ་ལམ། མི་སློབ་པ་སངས་རྒྱས་ཡིན་གསུངས། ༈ སྔགས་བླ་མེད་ཀྱི་ལུགས་ལ། སྣོད་བཅུད་འདུས་མ་བྱས་ཤིང་ལྷུན་གྱིས་གྲུབ་པའི་བདག་ཉིད་ཕྲིན་ལས་རྣམ་པ་བཞིའི་རང་བཞིན་ཡིན་ཏེ། ཁ་དོག་དཀར་པོ་ཐམས་ཅད་ཞི་བའི་ལས་དང་མེ་ལོང་ལྟ་བུའི་ཡེ་ཤེས་ཀྱི་རང་མདངས། ཁ་དོག་སེར་པོ་ཐམས་ཅད་རྒྱས་པའི་ལས་དང་མཉམ་ཉིད་ཡེ་ཤེས་ཀྱི་རང་མདངས། དམར་པོ་ཐམས་ཅད་དབང་གི་ལས་དངསོར་རྟོག་ཡེ་ཤེས་ཀྱི་རང་མདངས། ནག་པོ་ཐམས་ཅད་དྲག་པོའི་ལས་དང་ཆོས་དབྱིངས་ཡེ་ཤེས་ཀྱི་རང་མདངས་ཡིན་གསུངས། མིག་གི་ཡུལ་དུ་གཟུགས་བཟང་ངན་བར་མ་གསུམ་ཡོད། གཟུགས་བཟང་པོ་དེ་ལ་ཆགས་པའི་ཚེ་རང་སྣང་དུ་ངོ་ཤེས་ནས་སྣང་ཆ་ནས་སྤྲོས་མཐའ་དང་བྲལ། སྟོང་ཆ་ནས་རང་བཞིན་མ་གྲུབ་པ་ཡིན་པས་དེ་གཉིས་ཟུང་འཇུག་གི་ཆ་ནས་གཟུགས་སྣང་སྟོང་རྒྱལ་བའི་སྐུ་ཡིན། འདོད་ཆགས་ཀྱི་རྟོག་པ་དེ་སོར་རྟོག་ཡེ་ཤེས་ཡིན། ཡུལ་དེ་ཡང་གསུང་པདྨའི་རིགས་ཡིན། ཞེ་སྡང་ལྟ་བུ་ལའང་ཞེ་སྡང་གི་རྟོག་པ་དེ་མེ་ལོང་ཡེ་ཤེས་ཡིན། ཡུལ་དེ་ཡང་ཐུགས་རྡོ་རྗེའི་རིགས་ཡིན་གསུངས། གཏི་མུག་གི་ཆ་དེ་ཆོས་དབྱིངས་ཡེ་ཤེས་དང་ཡུལ་དེའང་བུདྡྷའི་རིགས་ཡིན་གསུངས། རྒྱུད་སྡེ་རྒྱ་མཚོའི་དེ་ཉིད་བཅུ་ནི། དེ་ཁོ་ན་ཉིད་ལྟ་བམི་གཡོ་བ་ཏིང་ངེ་འཛིན། ལ་དོར་བ་སྤྱོད་པ་དང་གསུམ། བཀོད་པ་དཀྱིལ་འཁོར། རིམ་པ་བགྲོད་པ་དབང་། མི་འདའ་བ་དམ་ཚིག་དང་གསུམ། དོན་དུ་གཉེར་བ་བསྒྲུབ་པ། གནས་སུ་སྟོབས་པ་མཆོད་པ། རོལ་པ་ཕྲིན་ལས་ཏེ་གསུམ། འཆིང་བ་ཕྱག་རྒྱ། ཟློས་པ་སྔགས་སྟེ་བཅུ་གཅིག་གི་གྲངས་དང་། ཀུན་མཁྱེན་ཆེན་པོས་ངེས་འབྱེད་ཚད་མ་ནི། ཆོས་དབྱིངས་དོན་དམ་སྤྲོས་པ་ལས་གྲོལ་བར་ཐལ་དམིགས་བཅས་བློ་ཡི་སྤྱོད་ཡུལ་མ་ཡིན་པའི་ཕྱིར། དེའང་ཡེ་ཤེས་ཀྱིས་དམིགས་པ་མེད་པའི་ཚུལ་གྱིས་རྟོགས་སོ། །ཆོས་ཅན་ཀུན་རྫོབ་རྣམས་ཆོས་ཅན་སྤྲོས་པ་དང་བཅས་པར་ཐལ། དམིགས་བཅས་བློ་ཡི་སྤྱོད་ཡུལ་ཡིན་པའི་ཕྱིར། ཁྱབ་པ་ཡོད་དེ། དམིགས་བཅས་ཀྱི་བློ་དང་དེའི་ཡུལ་རྣམས་ནི་ཀུན་རྫོབ་ཡིན་པའི་ཕྱིར་རོ། །ཞེས་སོ། །མདོ་ལྟར་ན་ཡུལ་དྲུག་དབང་པོ་དྲུག་ཤེས་པ་དྲུག་དེ་ཁྱོན་བསྡོམ་པས་བཅོ་བརྒྱད་ཡོད་དེ་ལ་ཁམས་ཆེན་བཅོ་བརྒྱད་ཟེར། ཁམས་ནི་གདུག་པ་ཅན་སྦྲུལ་ལྟ་བུ་དང་། སྟག་གི་ཁ། འབྲོང་གི་རྭ། སེངྒེའི་སྦར་མོ་ལྟ་བུའི་གཡང་ས་ཡིན་གསུངས། དེའང་ཡང་ན་ཐ་མལ་པ་ལྟར་རང་ཁར་སྤྱོད་པ་དང་། ཡང་ན་ཉན་རང་ལྟར་སྤང་བ་དང་། ཡང་ན་བྱང་སེམས་ལྟར་སྦྱང་བ་དང་། ཡང་ན་ལམ་དུ་ཁྱེར་དགོས་པ་ཡིན། དེ་གང་རུང་ཞིག་མིན་པའི་འགྲོ་ས་མེད་གསུངས། ཉན་རང་ལྟར་སྤང་ན་ཡུལ་དེ་སྤང་ནི་རེད་དམ། དབང་པོ་དེ་སྤང་ནི་རེད། ཤེས་པ་སྤང་ནི་རེད་ད། དེ་གསུམ་ཀ་སྤང་བ་རེད། ཞིབ་དུ་རྟོགས་ན་དེ་སྤང་ན་སྤང་འབྲས་དེ་ཅི་ཡོད་རྟོགས། ལས་དང་པོ་བས་སེམས་གླང་ཆེན་སྨྱོན་པ་དེ་དྲན་ཤེས་ཀྱི་ལྕགས་ཀྱུས་ཆོས་ཀྱི་ཀ་ཆེན་ལ་བཏགས་པ་ཡིན་གསུངས། ༈ སྔགས་ལྟར་ན་ཚོགས་དྲུག་ལམ་དུ་འཁྱེར་བ་ཡིན་ཏེ། ལྟ་བའི་གདེངས་སྒོམ་པའི་ངང་ལས་མི་འདའ་བཞིན་ཏུ་སྲེད་ལེན་བྲལ་བའི་ཡུལ་དྲུག་འགག་མེད་དུ་སྣང་ནས་ཞེན་མེད་དུ་རོལ་བས་རྟེན་མེད་དུ་གྲོལ་ཚེ་རིག་པས་རྐྱེན་ཐུབ། ཤར་ཆ་རྣམས་གདོང་བཟློག་མི་བྱ་བར་ཤར་དུ་བཅུག་ནས་ཡུལ་རྐྱེན་གྲོགས་སུ་ཤར། ཡེ་ཤེས་ཆེས་ཆེར་རྒྱས། སྒྲིབ་པའི་དངོས་གཉེན་དུ་གྱུར་བ་ཡིན་པས། དཔེར་ན་ཉི་མ་ཤར་བ་དང་མུན་པ་སངས་བ་ལྟར་ཐུག་འཕྲད་རང་གྲོལ་དུ་སོང་བ་ཡིན། དེ་ལྟར་མིན་པར་ཡེ་ཤེས་དེ་ཉིད་རྟོགས་ནས་གཟོད་སྒྲིབ་པ་དག་པ་ཡིན་བསམ་ན། སྒྲིབ་པ་སྤང་བ་དགོས་མེད་དུ་གྱུར་བ་དང་། སྒྲིབ་པ་སྔོན་དུ་དག་ནས་ཡེ་ཤེས་རྗེས་སུ་རྟོགས་ན་སྒྲིབ་པའི་དངོས་གཉེན་དུ་མ་སོང་བར་ཡིན་པར་གསུངས་སོ། ༈ །སྔགས་ལྟར་ཚོགས་དྲུག་ལམ་དུ་ཁྱེར་ཚེ་དཔེར་ན་དངུལ་ཆུའི་ཐིག་པ་རྡུལ་རྫས་ཕལ་བའི་ཁྲོད་དུ་ལྷུང་ཀྱང་རྡུལ་དང་མ་འདྲེས་པ་ལྟ་བུ་དང་། མེ་ཏོག་པདྨ་འདམ་དང་ཆུ་ལས་སྐྱེ་ཡང་ཆུ་དང་འདམ་གྱིས་གོས་པ་མེད་པ་ལྟ་བུ་དང་། བྱ་ནམ་མཁར་འཕུར་ཚེ་ཆགས་ཐོགས་དང་ལྷུང་དོགས་མེད་པ་ལྟ་བུ་དང་། ཉ་ཆུ་ལ་གནས་ཀྱང་འཚུབ་པ་མེད་པར་ཁ་གཏིང་དུ་ཆགས་ཐོགས་མེད་པར་འགྲོ་བ་ལྟ་བུ། དེ་བཞིན་དུ་ཚོགས་དྲུག་གིས་བསྡུས་པའི་ཡུལ་དང་ཡུལ་ཅན་ཐམས་ཅད་ཡུལ་ཡོངས་སུ་དག་པ་ཆོས་ཀྱི་དབྱིངས་དང་། ཡུལ་ཅན་ཐམས་ཅད་ཡོངས་སུ་དག་པ་རིག་པའི་ཡེ་ཤེས་ཡིན་པས། འགག་མེད་དུ་སྣང་། ཞེན་མེད་དུ་རོལ་ན་རྟེན་མེད་དུ་གྲོལ་བ་ཡིན། འོན་ཀྱང་ཡེ་ཤེས་དང་ལྡན་པའི་སྤྱོད་ཡུལ་ཡིན་གསུངས། ༈ཐབས༵་རྫས་དང་ཤེས༵་རྫས་གཉིས་བཟའ་རིགས་ཐམས་ཅད་ཐབས་རྫས་དང་། བཏུང་བའི་རིགས་ཤེས་རབ་ཀྱི་རྫས་ཡིན་ནོ། །ཆང་ལྟ་བུ་ལ་མཚོན་ན། ཡུལ་ཆང་དེ་སྔགས་དང་ཏིང་ངེ་འཛིན་གྱིས་བྱིན་གྱིས་བརླབས་ནས་བདུད་རྩི་རུ་བསྒྱུར་ནས་ལྟ་བའི་ངང་ནས་རོལ་ཚེ་སྲེད་ལེན་མེད་པས། གཞི་བསམ་སྦྱོར་བ་མཐར་ཐུག་རྣམས་མི་ཚང་བ་ཡིན་པས་སྔགས་ལམ་དུ་ཐབས་ཤེས་ཀྱི་རྫས་མེད་དུ་མི་རུང་ལ་ལོག་ལྟ འང་མི་བྱེད་གསུངས། ༈ དེ་ལྟ་བུའི་མཉམ་བཞག་ལྟ་བའི་ངང་དེར་མདོ་ཧྲིལ་གྱིས་དྲིལ་ན། ངོ་བོས་ཤར་ཆའི་གོ་མི་བཀག་པ་དང་གཅིག །ཤར་ཆ་འཆར་ཡང་ངོ་བོ་ལ་ཕན་གནོད་དང་བྲལ་བ་གཉིས། དབྱིངས་ཀྱིས་ཤར་ཆ་མ་སྤངས་པ་དང་། ཤར་ཆས་དབྱིངས་མ་སྤངས་བ་ནི་གནད་དམ་པ་ཡིན་ནོ། ༈ །རིག་སྟོང་གི་ལྟ་བ་ངོ་འཕྲོད་པའི་གང་ཟག་ཞིག་ཡིན་ན། མཉམ་པར་བཞག་པའི་གནས་སྐབས་སྔོན་འགྲོའི་ཆོས་རྣམས་ལྟ་བའི་ཀློང་དུ་རྫོགས་པ་ཡིན་ཏེ། ཇི་ལྟར་ཞེ་ན། ཀུན་སློང་ལའང་སྔགས་ལྟར་ན་གནས་ཚུལ་སྣོད་བཅུད་འདི་ཞིང་དང་གཞལ་ཡས་ཁང་སྐུ་དང་ཡེ་ཤེས་ཀྱི་རང་བཞིན་དུ་གནས་པ་ཡིན་པས། དེ་ལྟར་མ་རྟོགས་པའི་མཁའ་ཁྱབ་ཀྱི་སེམས་ཅན་རྣམས་ཀྱི་རྒྱུ་སྒྲིབ་གཉིས་བག་ཆགས་དང་བཅས་པ་དག་ནས། རང་སྣང་ཡེ་ཤེས་ཀྱི་དཀྱིལ་འཁོར་མངོན་དུ་གྱུར་ནས་ཚེ་ལུས་གཅིག་གིས་རྒྱལ་བ་རྡོ་རྗེ་འཆང་གི་གོ་འཕང་ཐོབ་པའི་ཆེད་དུ་སྟོང་ཉིད་ཟབ་མོ་མངོན་དུ་གྱུར་ནས་ཚེ་ལུས་གཅིག་གིས་བསྒོམ་པར་བྱའོ་སྙམ་དུ་སེམས་བསྐྱེད། ཆོས་དང་མཐུན་པའི་ལས་བྱེད་པ་ལ་ཀུན་སྤྱོད་ཟེར། ༈ བློ་ལྡོག་རྣམ་བཞིས་དལ་བའི་ལུས་རྟེན་ལ་སྙིང་པོ་ལེན་ཚུལ་ནི། ལུས་སྣང་སྟོང་རྒྱལ་བའི་སྐུ། ངག་གྲགས་སྟོང་རྒྱལ་བའི་གསུང་། ཡིད་དྲན་སྟོང་རྒྱལ་བའི་ཐུགས་ཀྱི་རང་བཞིན་སྒོ་གསུམ་དཀྱིལ་འཁོར་གསུམ་གྱི་བདག་ཉིད་ཅན་དེས་སྙིང་པོ་དེ་ལྟར་དུ་ལེན་པ་ཡིན་པས་དེ་ལས་ལྷག་པའི་སྙིང་པོ་ལེན་ཚུལ་ནི་རྒྱལ་བ་རྡོ་རྗེ་འཆང་གིས་མདོ་རྒྱུད་བསྟན་བཅོས་གང་ནས་མ་གསུངས་སོ། །རིག་སྟོང་གི་ལྟ་བ་ལ་ནོར་འཁྲུལ་མེད་པ་ཞིག་ངོ་འཕྲོད་ནས། དེ་ཡི་ངང་ལ་མཉམ་པར་བཞག་པའི་ཚེ། འཇིག་རྟེན་ཚེ་འདིའི་བྱ་བ་སྒྲུབ་པ་རྣམས་ཆམས་སེ་བཞག་ནས་སྟོང་ཉིད་ཀྱི་དོན་སྒོམ་པ་ཡིན་པས་ཚེ་འདིར་སྣང་གི་བྱ་བ་བསྒྲུབ་པ་ལས་བློ་ལྡོག་ཡོད། དལ་འབྱོར་ཆུད་ཟོས་སུ་མ་སོང་བས་དལ་འབྱོར་གྱི་སྙིང་པོ་ལོན་པ་ཡིན་པས་རྙེད་པར་དཀའ་བའི་ཁྲིད་བསྒོམ་ཡོད། དེ་ལྟ་བུ་རིག་སྟོང་ཆོས་ཉིད་ཀྱི་ཀློང་ན་ཆོས་ཅན་གྱི་སྣང་ཆ་ཐམས་ཅད་རྩལ་གདངས་མ་འགགས་པར་བདེན་མེད་དུ་ཡངས་ཁྲོལ་ལེ་གཟིགས་པས་རྟག་འཛིན་ལས་བློ་ལྡོག་ཡོད། འཆི་བ་མི་རྟག་པའི་སྒོམ་ཁྲིད་ཀྱང་ཡིན་པས་འཆི་མེད་གཉུག་མའི་བཙན་ས་ཡིན། བྱང་ཆུབ་སེམས་ལ་སྐྱེ་འཆི་ཡེ་ནས་མེད་གསུངས། རང་བྱུང་ཡེ་ཤེས་ཀྱི་རྩལ་ལས་དམིགས་མེད་ལྟ་བའི་ཀློང་དུ་བཟང་ངན་གྱི་རྟོག་ཚོགས་ཐམས་ཅད་ཇི་ལྟར་ཤར་ཡང་བག་ཆགས་གསོག་ལོང་མེད་པར་ཤར་གྲོལ་དུ་འགྲོ་བས་སྡིག་པ་མི་དགེ་བའི་ཆ་ལས་བློ་ལྡོག་ཡོད། ལས་རྒྱུ་འབྲས་ཀྱི་ཚོགས་པ་མི་ཚང་བས་ལས་རྒྱུ་འབྲས་མིག་བཞིན་ཏུ་བསྲུང་བ་དེ་ལ་ཟེར་རོ། །ཕྱི་ནང་སྣོད་བཅུད་ཀྱི་གནས་ཚུལ་སྐུ་དང་ཞིང་ཁམས་ཀྱི་རང་བཞིན་དུ་ཤེས་པས་མཐོ་རིས་ཐོབ་འདོད་ལས་བློ་ལྡོག་པ་ཡིན་གསུངས། འཁོར་བའི་ཉེས་དམིགས་ནི་སྣང་སྲིད་འཁོར་འདས་ཀྱིས་བསྡུས་པའི་ཆོས་འདི་དག་རྣམས། སྣོད་དག་པ་རྒྱལ་བའི་དཀྱིལ་འཁོར། བཅུད་དག་པ་རིག་འཛིན་གྱི་ལྷ་ཚོགས། རྒྱུད་དག་པ་ཡེ་ཤེས་ཀྱི་རོལ་བ། སྒྲ་དག་པ་ཆོས་ཉིད་ཀྱི་རང་སྒྲ། དེ་ལྟར་ཡིན་པས་སྤང་བླང་མེད་པར་འཁོར་འདས་དག་མཉམ་གྱི་ལྟ་བ་ཞེས་ཟེར་བ་ཡིན་ནོ། ༈ །ཆོས་ཉིད་བར་དོའི་སྣང་བ་ཤར་དུས་རྨི་ལམ་གྱི་སྣང་བ་དང་འདྲ། དེ་དུས་ཕན་བཏགས་པ་དང་འདྲེན་སྟོན་བྱེད་པ་ལྟ་བུར་སྣང་ཡང་རྨི་ལམ་གྱི་སྣང་ཆ་ལྟ་བུའོ། །དེ་ཚེ་རང་སྣང་དུ་ཤེས། རང་སྣང་རང་བཞིན་མེད་པར་ཐག་ཆོད། ཤེས་མཁན་གདོད་མའི་དབྱིངས་སུ་དེངས་བའི་ཚེ། ཕྱིའི་སྣང་ཆ་ཤར་བ་ཐམས་ཅད་ཤེལ་འོད་ནང་དུ་ལྡོག་པ་བཞིན་དུ་གཞི་ཐོག་ཏུ་དྭངས་བའོ། ༈ །ཁམས་བདེ་གཤེགས་སྙིང་པོ་མངོན་དུ་གྱུར་དུས་ཐར་པའི་ལམ་སྣ་ཟིན་པ་ཡིན། ༈ སྔགས་ཐུན་མོང་པས་རང་བཞིན་གཞིའི་རྒྱུད་ཟེར། ཐུན་མོང་མ་ཡིན་པའི་རྒྱུད་སྡེ་རྣམས་སུ་རང་བྱུང་ཡེ་ཤེས་ཟེར། རང་བྱུང་གདོད་མའི་ཡེ་གཞི་ལ་དབང་འབྱོར་བ་ནི་ཐར་བ་ཐོབ་པ་ཡིན་གསུངས། ༈ དགེ་བའི་བཤེས་གཉེན་ཡང་སྔར་གྱི་དགེ་འབྲས་ཞིག་གིས་ད་ལྟའི་རྩ་བའི་བླ་མ་འདི་སྣང་བ་ཡིན། རྨི་ལམ་དུ་བླ་མ་སྣང་བ་ལྟ་བུ་རང་སྣང་ཡིན་གསུངས། བླ་མ་དགེ་བའི་བཤེས་གཉེན་དེ་ཡང་བསམ་པའི་སྒོ་ནས་ཅི་མཛད་ཆོས་སུ་མཐོང་། སྦྱོར་བའི་སྒོ་ནས་ཅི་གསུང་གི་བཀའ་བསྒྲུབ་དགོས་པ་ཡིན། རབ་སྒྲུབ་པའི་མཆོད་པ། འབྲིང་ལུས་ངག་བྲན་དུ་བཀོལ་བ། ཐ་མ་འཁོར་གསུམ་ཡང་དག་གི་མཆོད་པ། རང་གི་ཡོ་བྱད་ལྷག་ལུས་མེད་པར་འབུལ་དགོས་གསུངས། བླ་མ་ཡང་རང་བྱུང་གི་ཡེ་ཤེས་ཀྱི་རྩལ་ལས་ཤར་བ་ཡིན་པས་རིག་སྟོང་གི་ལྟ་བ་རྟོགས་དུས་དགེ་བའི་བཤེས་གཉེན་ཆེན་པོ་ཡིན་གསུངས་སོ། ༈ །མཉམ་བཞག་གི་སྐབས་སུ་དཔེར་ན་མཐའི་རྒྱ་མཚོའི་ཀློང་དེར་ཆུ་ཕྲན་ཐམས་ཅད་ཐིམ་པ་བཞིན་ཏུ། རིག་སྟོང་གི་ཀློང་དུ་ཆོས་ཅན་གྱི་སྣང་བ་ཐམས་ཅད་མ་སྤང་ཡེ་གྲོལ་དུ་གཟིགས་པ་ཡིན། གནད་དེ་ལྟར་རྟོགས་ན་ཆུ་བརྒྱ་ཟམ་འོག་ཏུ་འདུས་པ་ལྟ་བུ་ཡིན། མཉམ་བཞག་ལས་ལྡང་བའི་ཚེ། དཔེར་ན་མཐའ་ཡས་རྒྱ་མཚོའི་ངང་ནས་ཆུ་ཕྲན་ཐམས་ཅད་མཆེད་པ་བཞིན་དུ། རིག་སྟོང་ཟུང་འཇུག་གི་ངང་ནས་རིག་རྩལ་ལམ་བདག་མེད་རྟོགས་པའི་ཤེས་རབ་ཀྱིས་ཆོས་ཅན་དངོས་པོར་སྣང་བ་ཐམས་ཅད་ཀྱི་མཚང་མཚན་ཉིད་ཤེས་ནས་གནས་ལུགས་རྟོགས་པ་ཡིན། དཔེར་ན་རང་བྱུང་གི་ཡེ་ཤེས་དེ་ཉིད་ནམ་མཁའ་ལྟ་བུ་དང་། ཀུན་འབྱུང་ལས་ཉོན་གྱི་རྟོག་ཚོགས་ཐམས་ཅད་སྤྲིན་ལྟ་བུ། རང་བྱུང་གི་ཡེ་ཤེས་དེ་ཉིད་ཉི་མ་ལྟ་བུ་དང་། ཀུན་འབྱུང་ལས་ཉོན་རྟོག་ཚོགས་རྣམས་ཉི་མའི་ཟེར་ལྟ་བུ། རང་བྱུང་ཡེ་ཤེས་དེ་ཉིད་རི་བོ་ལྟ་བུ་དང་། ཀུན་འབྱུང་གི་རྟོག་ཚོགས་རྣམས་རྩི་ཤིང་ལྟ་བུ། རང་བྱུང་གི་ཡེ་ཤེས་རྒྱ་མཚོ་ཁ་གཏིང་དང་བྲལ་བ་ལྟ་བུ། ཀུན་འབྱུང་ལས་ཉོན་རྣམས་ཆུ་རླབས་ལྟ་བུ། རང་བྱུང་གི་ཡེ་ཤེས་དེ་ཉིད་མེ་ལོང་ལྟ་བུ་དང་། ཀུན་འབྱུང་ལས་ཉོན་ཐམས་ཅད་གཟུགས་བརྙན་ལྟ་བུའོ། ༈ །མཎྜལ་ནི། གཞི་ཀ་དག་སྤྲོས་བྲལ་ཆོས་སྐུའི་མཎྜལ། རང་གདངས་འགག་པ་མེད་པ་ལོངས་སྐུའི་མཎྜལ། ཐུགས་རྗེ་རིག་གདངས་ཀྱི་ཤར་ཆ་རྣམས་གྲོལ་བའི་རང་བཞིན་ཡིན་པ་སྤྲུལ་སྐུའི་མཎྜལ་ཡིན་གསུངས། དེ་མིན་ཡང་ན་སྟོང་གསུམ་རི་རབ་གླིང་བཞི་ལྷ་གནས་དང་བཅས་པ་རྣམས་བློས་བླངས་ནས། རང་གིས་འབུལ་ནུས་ན། བླ་མ་དཀོན་མཆོག་ལ་བཞེས་པའི་ནུས་པ་ཡོད་པས་དེ་ལྟར་དུ་འབུལ་དགོས་གསུངས། ༈ གཅོད་ནི་མདོར་ན་མ་རིག་བདེན་འཛིན་གྱིས་དྲངས་པའི་དུས་གསུམ་ཡིད་ཀྱི་འཁྲུལ་རྟོག་དབྱིངས་སུ་དྭངས་བའི་ཚེ་གཅོད་ཟེར་བ་ཡིན་གསུངས་སོ། །རྗེ་མི་ལས། ཡ་གི་དགའ་ལྡན་ལྷ་ཡུལ་ན། །འབྲས་ད་ལྟ་བཏབ་པ་ད་ལྟ་སྨིན། །ཁོང་སོ་ནམ་མཁས་པས་མ་ཡིན་ཏེ། །སྔོན་བསོད་ནམས་བསགས་པའི་འབྲས་བུ་ཡིན། །ཞེས་དང་། མ་གི་ངན་སོང་གནས་ཉིད་ན། །མཚོན་ད་ལྟ་བཏབ་པ་ད་ལྟ་སོས། །ཁོང་རྨ་ལས་མཁས་པས་མ་ཡིན་ཏེ། སྔོན་ལས་ངན་བསགས་པའི་འབྲས་བུ་ཡིན། །ཞེས་གསུངས་སོ། ༈ །འདོད་པ་མེད་ན་འཕགས་པ་དངོས། །འདོད་པ་ཆུང་ན་འཕགས་པའི་རིགས། །ཞེས་སོ། ༈ ས་པཎ་གྱིས། རྟོག་པ་མེད་པའི་གྲུབ་ཐོབ་ཀྱིས། །རྡོ་ལ་ཞབས་རྗེས་བཞག་ཀྱང་ངན་སོང་རྒྱུ། ༈ །སྙན་གྱི་གོང་རྒྱན་ལས། ལྔ་བརྒྱའི་ཐ་མར་གྱུར་པ་ན། །ང་ཉིད་ཡི་གེའི་གཟུགས་སུ་སྤྲུལ། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་གྱིས། །ཞེས་དང་། དེ་སྐད་དུ། མ་འོངས་ཐུབ་པའི་བསྟན་པ་ནུབ་པའི་ཚེ། །དམར་དང་སེར་པོའི་གོས་ཀྱི་རས་མ་ཀུན། །ལྷ་རྣམས་ཀྱིས་བསྡུས་དད་པའི་རྟེན་དུ་ཁྱེར། །རི་རབ་རྩེ་རུ་མཆོད་རྟེན་བྱེད་པར་གསུངས།། ༈ དཔལ་སྤྲུལ་པས། སངས་རྒྱས་བསྟན་པའི་རྒྱལ་མཚན་རིན་པོ་ཆེ། །དམར་སེར་ངུར་སྨྲིག་ཆོས་གོས་རྣམ་པ་གསུམ། །མཐོང་ན་དད་ལྡན་དངས་བ་འདྲེན་པའི་ཞིང་། །ཚུལ་ལྡན་ན་བཟས་ཉིན་གཅིག་དཀོར་སྒྲིབ་དག །ཚུལ་ལྡན་ང་རྒྱལ་ཆེ་བ་ལས། །ཚུལ་འཆལ་འགྱོད་པ་ཆེ་ན་དགའ། ༈ །ཆོས་ནི་སྐྱེས་བུའི་སྙིང་ལ་མདའ་ཕོག་པ་བཞིན། ཉོན་མོངས་པའི་གཉེན་པོར་འགྲོ་ན་ཆོས་ཡིན་གསུངས། ཕྱི་རོལ་དཔེ་ཡི་བླ་མ་ནི་སྔོན་དཀར་པོ་དགེ་བ་བསྒྲུབས་པ་ལས་བྱུང་བའི་བླ་མ་འདི་རྣམས་ཡིན་གསུངས། དེ་ཡང་ལས་ལས་བྱུང་བ་ཡིན་པས་རང་སྣང་ཡིན་གསུངས། དེ་ཡང་བདེན་མེད་རྨི་ལམ་ལྟ་བུའི་རང་བཞིན་ཡིན་ཚུལ་ལ་བློ་སྦྱང་དགོས། དེ་མིན་འཛིན་སྟངས་དམ་ཧྲང་ངེ་བར་བཟུང་ན་ཤེས་སྒྲིབ་ཡིན་གསུང་། གནས་ལུགས་གཞི་ཡི་བླ་མ་ནི་གནས་ལུགས་རང་ཞལ་མཐོང་བ་འདི་ཉིད་ཡིན་པས་དཔེ་ཡི་བླ་མ་དང་མི་འདྲ་གསུངས། བླ་མ་འོད་ཞུ་བྱས་ནས་ཐུགས་ཡིད་དབྱེར་མེད་བསྲེས་སྐབས་སྣང་བ་སྐུ་ཡི་བླ་མ། སྒྲ་གྲགས་གསུང་གི་བླ་མ། དྲན་རྟོག་ཐུགས་ཀྱི་བླ་མ་ཡིན་པས་དག་མ་དག་གཉིས་ཀྱི་ཟླས་ཕྱེ་བའི་དག་སྣང་ལྟ་བུ་མ་ཡིན་པས། དྲན་སྣང་བླ་མའི་གསང་གསུམ་དང་མ་བྲལ་བ་གལ་ཆེ་གསུངས་སོ། །མདོ་ལྟར་ན་ལྡན༵་གྲོ༷ལ་ཚུལ་ཁྲིམས་དང་ལྡན་པ། ཤེས་པས་རྒྱུད་གྲོལ་བ་སོགས། སྔགས་ལྟར་ན་བསྐྱེད་རྫོགས་སོགས༴ ༈ དབྱིག་གཉེན་གྱིས། ལྡན་དང་གྲོལ་ལ༴ མེད༴ རྟ་དང་བ་གླང་བོང་བུ་དག་ཏུ་སྐྱེ། །རྡོོ་དང་དབྱུག་པ་དག་གིས་བརྡེག་པར་འགྱུར། ༈ །མི་སློབ་པས་ནི་བདག་པོར་སྤྱོད། །སློབ་པས་སྦྱིན་པ་སྤྱོད་པ་སྟེ། །བསམ་གཏན་ཀློག་དང་ལྡན་པ་ལ། །རྗེས་གནང་སྤྱོད་པས་ཉེས་པ་མེད། །ཅེས་སོ། །ས་པཎ་གྱིས། བླུན་པོས་ཕྱག་རྒྱ་ཆེར་སོགས། ༈ འཇིགས་གླིང་གིས། སྐབས་ཤིག་བསྒོམ་རྒས་གཉིད་དུ་སོང་བའི་ཚེ། །འཆི་དུས་དུད་འགྲོར་སྐྱེ་བ་མཁྱེན་པར་མཛོད། །ཅེས་སོ། །བླུན་པོ་ཆུ་ཡི་རི་མོ་བཞིན། །གང་བྱས་དེ་ཉིད་མྱུར་དུ་འཇིག །མཁས་པ་རྡོ་ལ་རི་མོ་བཞིན། །ཤིན་ཏུ་ཕྲ་ཡང་བརྟན་པར་གནས། ༈ །བྱིང་བས་དྭངས་ཆ་སྒྲིབ། རྨུགས་པས་གསལ་ཆ་སྒྲིབ། གཉིད་ཀྱིས་ལུས་ངག་ཡིད་གསུམ་སྐྱོན་ཅན་བྱེད། ༈ འབྲུག་པ་ཀུན་ལེགས་ཀྱིས། བླ་མས་དབང་བསྐུར་ཆོས་བཤད་བྱེད། །ཐུགས་ལ་མེད་དོ་ས་མ་ཡ། །ཅི་གསུང་ཚད་མར་མ་བཟུང་ན། །ལེགས་སོ་མང་པོས་ཅི་ལ་ཕན། །སློབ་མས་མིག་བཙུམ་ཐལ་མོ་སྦྱར། །ཡིད་ལ་མེད་དོ་ས་མ་ཡ། །མཉམ་བཞག་ནམ་མཁའ་ལྟ་བུ་ནི། །དྲན་རིག་སོ་མའི་ངང་ན་ཡོད། ༈ །མི་ཞིག་ལ་ཁང་པ་བཟང་པོ་ཡོད་ན་ང་ཡི་ཁང་པ་བཟང་སྙམ་པའི་ཞེན་ཆགས་ཡོད་ལ། རེ་ཞིག་ཁང་པ་དེ་མེ་ཡིས་ཚིག་པར་གྱུར་ན་དེའི་ཚེ་ཁང་པ་བཟང་སྙམ་པའི་ཞེན་ཆགས་ག་ལ་ཡོད་དེ་མེད། དེ་བཞིན་དུ་སེམས་སེམས་བྱུང་ཐམས་ཅད་ཀྱི་རྩ་བ་བདག་འཛིན་ཁང་པ་རྣམ་དཔྱོད་ཤེས་རབ་ཀྱིས་ཐལ་གྱིས་བཏང་བའི་ཚེ། ངར་འཛིན་རྣམ་པར་རྟོག་པའི་འཕྲེང་བ་བདེ་སྡུག་རེ་དོགས་ཐམས་ཅད་རང་ཞིག་ལ་མི་འགྲོ་བའི་ཐབས་མེད་གསུངས། ༈ ཧཱུྃ་མཚན་ཉིད་བཞི་ལྡན་ནི། རེག་བྱ་ཚ་བ་མེ་ལྟ་བུ། རྣོ་བ་སྤུ་གྲི་ལྟ་བུ། མྱུར་བ་གློག་ལྟ་བུ། ཤུགས་དང་ལྡན་པ་གནམ་ལྕགས་ཀྱི་ཐོག་ལྟ་བུ་སྟེ་བཞིའོ། །རླུང་དམིགས་སེམས་གསུམ་པོ་གཅིག་དུ་དྲིལ་པ་ལ། སེམས་རྩེ་གཅིག་ཏུ་གཏད་པ་གལ་ཆེ་བ་ཞིག་དགོས་གསུངས། ༈ ཕྱོགས་རིས་མེད་པའི་དད་པ། ཉེ་རིང་མེད་པའི་སྙིང་རྗེ་ཞིག་ཤུགས་འབྱུང་ལ་འཆར་ན། ལྟ་བ་ངོ་འཕྲོད་པའི་རྟགས་ཡིན་གསུངས། ལམ་ཞུགས་ཀྱི་སྐབས་སུ་རྣམ་རྟོག་འགག་སྟོབས་གཞན་ལས་ཆེ་བར་གསུངས་པས་སྐབས་སུ་དམིགས་ཡུལ་ལ་གཏད་ཚེ། དེ་ལས་གཞན་པའི་རྣམ་རྟོག་གི་བར་གཅོད་མི་འབྱུང་བས་ཞི་ལྷག་ཟུང་འབྲེལ་ལ་དབང་འབྱོར་བའི་ཡོན་ཏན་ཐོབ་པ་ལས། རྣམ་རྟོག་གཏན་འགགས་སུ་གྱུར་པ་ལ་གོ་མི་ཉན་གསུངས། ༈ རྣལ་དབབ་ནི། སྐྱིད་པོ་བྱས་པ་ལྟ་བུ་སེམས་བག་ཕེབ་པར་བཞག་པའོ་གསུངས། རུ་ཤན་གྱི་སྐབས་འགྲོ་བ་དྲུག་གི་བསམ་སྤྱོད་སོགས་ལ་བསླབས་པ་འདི། མཚན་མ་གཞིག་པའི་དོན་དུ་སྒོམ་ཚུལ་ཡིན་པ་གཞིར་བཞག་ཏུ་གོ་དགོས་གསུངས། རིག་པ་ཀ་དག་གི་རང་བཞིན་ཅན་གྱི་ལྟ་བ་ངོ་ལེགས་པར་འཕྲོད་པའི་གང་ཟག་གིས་ཡུན་ཅི་རིང་བར་བསྒོམས་ཀྱང་གེགས་གོལ་ས་ལ་མི་འགྲོ་གསུངས། ༈ ངོ་མ་འཕྲོད་པའི་གང་ཟག་གིས་ཡུན་ཐུང་གྲང་མང་ཁང་རྒན་ཐིགས་པ་ལྟར་མ་བསྒོམས་མི་འོང་གསུངས། ༈ བཟླས་པས་རླུང་འཕེལ། རིག་སྟོང་གི་ལྟ་བའི་ཐོག་ཏུ་མི་ཁེལ། རིག་གདེངས་སེམས་ཀྱི་རྣམ་རྟོག་ཁ་འབྱམས་སུ་འགྲོ་ཉེན་ཆེ་བས། དེ་བས་གལ་ཁེ་ཆེ་བ་མཉམ་བཞག་ལ་བརྩོན། ཁེ་ཆུང་བ་མཚན་མའི་བསམ་སྤྱོད་རྣམས་སྤོངས་གསུངས། གཞི་ཡི་བཞུགས་ཚུལ་ལ་ཕྱོགས་ཙམ་ལས་མངོན་སུམ་མ་མཐོང་བ་ལ་གཞི་ཡིན་དངོས་མ་ཡིན་གསུངས། ༈ རིག་པ་དབྱིངས་ཀྱི་ར་བར་བཙུད་ཟེར་ཡང་དོན་ལ་ཐིག་ལེའི་དབུས་སུ་གཏད་དགོས་གསུངས། ལམ་ཞུགས་ཀྱི་སྐབས་སུ་བླ་མ་འོད་ཞུ་བྱས་ནས་ལུས་ལ་ཐིམ་པས་ལུས་ཧཱུྃ་དུ་གྱུར་བར་གསུངས། ༈ རྫོགས་ཆེན་སྐབས་སྐུ་གསུམ་དབྱེ་ཚུལ། དཔེ་ནི། བུམ་པའི་ངོ་བོ་སྟོང་ཆ་ཆོས་སྐུ། མ་འགགས་པ་ལོངས་སྐུ། སྣང་ཆ་སྤྲུལ་སྐུ། དབྱེར་མེད་ངོ་བོ་ཉིད་སྐུའོ་ཞེས་ལྡོག་ཆས་ཕྱེ་གསུངས། ༈ ཆོས་ཟད་དུས་མི་སྡིག་ཅན་ལ་ཆོས་བསྟན་ཡང་དེ་ལྟར་མི་བསྒྲུབ་པར་ཐབས་མེད་གསུངས། ༈ རིག་པའི་ངར་མ་ཤོར་བའི་ངང་ནས་ཨ་ཡིག་ལ་གཏད་ནས་གཉིད་འོད་གསལ་དུ་སྦ་སོགས་བྱ་དགོས་གསུངས། ཉིན་མོ་མ་གོམས་པར་ནུབ་མོ་ཇི་ལྟར་དམིགས་པ་བཟུང་ཡང་གཉིད་འོད་གསལ་དུ་མི་འཆར་གསུངས། ༈ རྫོགས་ཆེན་ཤིན་ཏུ་ཟབ་ཀྱང་། གང་ཟག་རྫོགས་ཆེན་དུ་མ་སོང་ན་མི་ཕན་གསུངས། ༈ དབུ་མའི་ཡིད་དཔྱོད་ཀྱི་གོ་བ་རྗེས་དཔག་ལ་བརྟེན་ནས་གཞིའི་གནས་ཚུལ་གཏན་ལ་འབེབ་པ་ཙམ་ཡང་མེད་པར་ཐམས་ཅད་སྟོང་པའོ་སྙམ་པའི་དེང་སང་གི་སྒོམ་ཆེན་ཕལ་ཆེར་ལྟ་བུའོ། །གསུངས། ༈ འཁོར་འདས་དག་མཉམ་ལྟ་བའི་གོ་བ་ཙམ་ཐོན་ཀྱང་། །གོམས་པའི་མྱོང་ཐོག་མ་སླེབས་གོ་ཡུལ་ལ་ལྟོས་དང་། སྟོང་ལྟའི་འུར་སྒྲ་ལྡིར་ཡང་ཤེས་རྒྱུད་ནི་སྔར་བཞིན། །སྒོ་གསུམ་ཐ་མལ་ངང་དུ་ཉིན་མཚན་ཀུན་འདའ་འདུག །གསུངས། ༈ སྣང་བ་སེམས་སུ་ངོ་སྤྲོད་པ་ན་སྣང་བ་སྣང་ཡུལ་མ་ཕྱེད་པར་སེམས་སུ་འདོད་ན། དཔེར་ན་བུམ་པ་སེམས་ཡིན་ན་བུམ་པའི་ཡུལ་སེམས་པར་ཐལ་བ་སོགས་སྐྱོན་ཡོད་པས། དེ་ལྟར་མིན་པར་ཀུན་མཁྱེན་གྱིས་བཞེད་པའི་གནས་དོན་ལུས་ཀྱི་བག་ཆགས་དེའི་དབང་གིས་གྲུབ་པའི་སྣང་བ་འདི་གྲུབ་པས། དེ་ནི་བག་ཆགས་དེའི་དབང་གིས་གྲུབ་པའི་ལུས་ཡིན་སེམས་མིན། གནས་ཀྱི་བག་ཆགས་གི་དབང་གིས་གྲུབ་པ་གནས་ཡིན་སེམས་མིན་ཀྱང་། བག་ཆགས་གསོག་མཁན་དེ་སེམས་ཡིན་པས་སེམས་གཙོ་ཆེར་གྱུར་བས། མདོ་སྡེ་ལང་ཀར་གཤེགས་པ་ལས་ཁམས་གསུམ་པོ་འདི་ནི་སེམས་ཙམ་མོ་གསུངས། ༈ ད་ནི་བདག་འཆི་བའི་དུས་ལ་བབ་པ་ཡིན་པས། ཆོས་ཀྱི་དབྱིངས་སྤྲོས་པ་མེད་པའི་ཀློང་དུ་མྱ་ངན་ལས་འདའ་བར་བྱའོ། །ཞེས་དང་། ངག་གིས་ན་ཞེས་བརྗོད་ལ་སེམས་ཉིད་རང་གི་རིག་པ་རླུང་དང་འགྲོགས་ནས་ཕྱིའི་དབྱིངས་ལ་ཐིམ་པ་དར་ཅིག་བསྒོམ་པའི་རྗེས་ལ་རིག་ཐོག་ཏུ་འཇོག་ཅེས་དཔལ་སྤྲུལ་ལྟ་བུའོ། ༈ །ཐུག་ཕྲད་ཅེས་པ་རྡོ་ཚན་ལ་ཁ་བ་འཕྲད་པ་བཞིན་ཕྲད་པའི་རིག་པ་ཙམ་གྱིས་གྲོལ་བ་ལ་གོ་དགོས་གསུངས། ཅེར་གྲོལ་ཞེས་པ་ནི་ཚོགས་དྲུག་གི་ཡུལ་གང་བློ་ལ་ཤར་ན་དེ་ཐོག་ཏུ་ལྟ་སྟངས་བྱས་པ་ཙམ་གྱིས་རང་ཡལ་ལ་འགྲོ་བ་དང་། རིག་པའི་ཀློང་ནས་རྣམ་རྟོག་གི་མགོ་འབུར་བའམ་ཅེར་བ་ཙམ་གྱིས་སླར་རིག་ཐོག་ཏུ་གྲོལ་བ། དཔེར་ན་ཆུ་ལས་ཉའི་མགོ་འབུར་བའམ་ཅེར་བ་ལྟ་བུ་ཡིན་ཞེས། བླ་མ་འབྲུག་པས་བཞེད་གསུངས། ལས་དང་པོ་པ་ལ་རྩལ་མེད་ཐབས་ཆག་ཡིན་པས་གོམས་དགོས་གསུངས། ༈ ཐོག་མའི་གཞི་སྐོར་ལ་འཁོར་འདས་གཉིས་ཀ་མ་གྲུབ་པས་གཞི་གཉིས་ཀ་འཆར་རུང་གི་གདངས་ཙམ་ཡོད་པ་ལ་གོ་དགོས་གསུངས། ༈ རིག་པའི་ཡེ་ཤེས་འདྲེན་པ་ལ་འགྲོ་འོང་ལས་ཀྱི་རླུང་རང་སར་བཞག་དགོས་གསུངས། རྟོག་ཚོགས་ཉོན་མོངས་པའི་རླུང་དྭངས་དགོས་གསུངས། ཡིད་ཀྱི་ཤེས་པ་ནི། ཡུལ་དང་པོ་སྤྱི་འཛིན་པས་གཟུང་བ་དང་། ཉོན་ཡིད་ནི། རྗེས་ལ་བྱེ་བྲག་འཛིན་པས་འཛིན་པའོ། །གསུངས། དེ་གཉིས་ལ་རྟོག་བཅས་རྟོག་མེད་ཅི་རིགས་དང་དགེ་མི་དགེ་ལུང་མ་བསྟན་རྣམས་ཡོད། སྒོ་ལྔ་དང་ཀུན་གཞིའི་རྣམ་ཤེས་ནི་རྟོག་མེད་ཁོ་ན་ཡིན་གསུངས། རྣམ་རྟོག་མི་བཀྲ་དགུ་བཀྲ་འདིས་འགྱུ་ཆ་རླུང་ཡིན་ལ། རིག་ཆ་རིག་གདངས་ཡིན་གསུངས། རིག་གདངས་རླུང་གིས་བསྐྱོད་རང་ངོ་མ་མཐོང་བའི་ཆ་རིག་པ་ལ་ལྟོས་ནས་མ་རིག་པའི་ཆ་ཙམ་ཞིག་ལ་རྒྱུ་བདག་ཉིད་གཅིག་པའོ་སོགས༴ ༈ གཞི་ལས་གཞི་སྣང་གཡོས་ཚེ་རང་སྣང་རང་ངོ་ཤེས་ཏེ་གྲོལ་བ་དེ་ལ་ཐོག་མའི་མགོན་པོ་ཀུན་ཏུ་བཟང་པོ་ཟེར་ལ། དེ་ལས་སྔོན་ཞིག་ལ་སེམས་ཅན་མ་བྱུང་བའི་ཐོག་མ། སངས་རྒྱས་མ་བྱུང་བའི་ཐོག་མ་ཞིག་ལ་ཀུན་ཏུ་བཟང་པོ་ཟེར་བ་ཞིག་ཡོད་པ་ལ་གོ་མི་ཉན། དེ་ལ་ད་ཅང་མི་གོ་རྒྱུ་མེད་ཁི་ཨ། འདི་ཡིན་ན་མྱོང་ཐོག་གིས་བསླབས་ན་མི་གོ་རྒྱུ་མེད་པས། འདི་ལྟར་དག་མ་དག་གི་སྣང་བ་སྣ་ཚོགས་པ་འདི་དག་ཐམས་ཅད་གཞི་སྣང་ལས་ཤར་བ་རེད་ཏ། ཡིན་དགོས་ནི་རེད་ཨ། དེ་ཡིན་ན་གཞི་སྣང་རང་སྣང་ཡིན་པས་རང་སྣང་ཉག་གཅིག་ལས་མེད་པ་དེ་རང་ངོ་ཤེས་པས་ཤེས་མཁན་གཞི་ཐོག་ཏུ་གྲོལ་ནས་འགྲོ་བ་འདི་ལ། མ་དག་འཁོར་བའི་འཁྲུལ་ཚུལ་གྱི་རྒྱུ་གསུམ་རྐྱེན་བཞི་འབྱུང་ལུགས་མེད་པས་རང་ལོག་ལ་འགྲོ་ལུགས་ཤེས་དགོས་ཨ། ད་མདོར་བསྡུ་ན་རང་སྣང་རང་ངོ་ཤེས་པས་དེ་ཡང་ཤར་གཞི་ཤར་ཆོས་གཉིས་ཀ་རང་སྣང་དུ་ངོ་ཤེས་པས་འཁྲུལ་བའི་རྒྱུ་གསུམ་རྒྱུའི་རྐྱེན་དང་བཅས་པ་རང་ལོག་ཏུ་འགྲོ་ནི་རེད། ངོ་ཤེས་མཁན་གྱི་ཤེས་རབ་དེ་གཞི་ཐོག་ཏུ་རྩལ་རྫོགས་པས་བདག་པོའི་རྐྱེན་རང་ལོག་ཏུ་འགྲོ་ནི་རེད། དེ་ལྟར་གཞན་ལ་མ་ལྟོས་པར་རང་ངོ་རང་གིས་རིག་པས་རིག་པ་རང་གྲོལ་གྱི་ཆ་ལ་སྟོན་བྱེད་ཀྱི་སློབ་དཔོན་མེད་པར་རང་བྱུང་གི་སངས་རྒྱས་རང་སར་གནས་པས་བརྟན་པ་ཐོབ་པ་ལ་འཁྲུལ་བའི་དམིགས་རྐྱེན་དང་དེ་མ་ཐག་རྐྱེན་རང་ལོག་ཡིན་པས། འདི་ཡིན་ན་མཉམ་བཞག་ལ་འདུག་ནས་བལྟས་ན་ལེགས་པ་ཞིག་ཡིན་ནི་རེད་གསུངས། ༈ གཞི་སྣང་ངོ་ཤེས་ན་གྲོལ་བྱེད། ངོ་མ་ཤེས་ན་འཁྲུལ་བྱེད་ཅེས་ཟེར་ཡང་། མ་རྟོགས་ན་ཡིད་དཔྱོད་ལྡང་བས་ལོག་པར་འཁྲུལ་བའི་གཞིར་སོང་ན་འཁྲུལ་གཞིར་ཏེ་ལམ་གོམས་པ་ལ་ཆ་དེ་ལྟར་སྦྱར་རྒྱུ་ཡོད་ནི་རེད། འབྲས་བུ་དང་ཆ་འདྲ་བ་ཡིན་ནི་རེད། ཐུགས་རྗེའི་རིག་པ་ནི་རང་གི་རིག་པ་ལ་གོ་དགོས་ཏེ་ཐུགས་རྗེའི་རིག་པ་གསུངས་ཡོད་པས། དེ་གཞི་སྣང་ཤར་བ་ངོ་མ་ཤེས་ན་འཁྲུལ་པའི་ཡིད་དཔྱོད་ཀྱི་མགོ་འཛིན་པས། དེ་ཡང་མ་རིག་པ་དངོས་ཅི་ཡིན་ཏ། མ་རིག་པའི་རྒྱུར་གྲུབ་པའི་དཔེ་མ་རིག་པའི་ཆར་གྱུར་པའི་མགོ་ཡིན་ཏེ། རང་སྣང་ཡིན་པར་མ་ཤེས་སོ། །དེའི་མ་རིག་འཁྲུལ་བའི་གཞི་འཛིན་ལ། རང་སྣང་ཡིན་པར་ཤེས་ན་གྲོལ་གཞི་རུ་གྱུར་བས་ཆོས་སྐུ་དབྱེར་མེད་དུ་བཞུགས་པ་ཡིན་ནི་རེད། དེ་ལྟར་གཞི་ལྷུན་གྲུབ་དང་དེའི་གདངས་ཤེས་པར་ཤར་ཚུལ་འདི་ལ་གཞི་སྣང་ལྷུན་གྲུབ་ཀྱི་སྣང་བ་ལྷུན་གྲུབ་ཟེར་བ་རེད། དེའི་འཆར་གཞི་ལ་གཞི་ཟེར་བ་རེད། སྣང་བ་ཐམས་ཅད་རང་སྣང་ཡིན་ཏེ། གཞི་ལས་ཤར་བའི་གཞི་སྣང་རེད། དེ་ཤེས་མཁན་གཞི་ཐོག་ཏུ་གྲོལ་ནི་རེད། དེ་ལྟར་རང་གྲོལ་དུ་གྱུར་པ་དེ་ཡེ་ཤེས་ཡིན་ནི་རེད། རང་སྣང་ཡེ་ཤེས་སུ་ཤར་བ་ལ་གནད་འདི་གོ་དགོས། འདི་གོ་ན་རྩལ་ལས་ཤར་བའི་རོལ་བ་ཡེ་ཤེས་སམ་རིག་པ་རུ་ཤར་བ་ཡིན་ཞེས་ཡང་ཡང་གསུངས། ༈ འཁྲུལ་སྣང་ཡེ་ཤེས་སུ་འཆར་བའི་མན་ངག་ནི། ཀ་དག་ཁྲེགས་ཆོད་ཀྱི་ལྟ་བ་དབྱིངས་ཡེ་ཟུང་འཇུག་རྟོགས་པ་དང་། ལྷུན་གྲུབ་ཐོད་རྒལ་གྱིས་འཁྲུལ་ཡུལ་འཁྲུལ་མཁན་ཐམས་ཅད་རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོར་ངོ་སྤྲད་ནས། སྣང་བཞི་སྒྲོན་དྲུག་གི་ལམ་མཆོག་ལ་བརྟེན་ནས་ཚེ་ལུས་གཅིག་གིས་རྒྱལ་བ་རྡོ་རྗེ་འཆང་གི་གོ་འཕང་ཐོབ་པ་ཡིན་གསུངས། ༈ བསྐྱེད་པ་མ་ཧཱ་ཡོ་ག་ལྟར་ན། སྣང་ཕྱོགས་ནས་ཆོས་ཐམས་ཅད་དག་པ་སྐུ་དང་ཡེ་ཤེས་ཀྱི་དཀྱིལ་འཁོར། སྟོང་ཕྱོགས་ནས་དོན་དམ་དཀོར་བདུན་ལྷག་པའི་བདེན་གཉིས་དབྱེར་མེད་དུ་རྟོགས་དགོས་པ་ཡིན་གསུངས། ༈ ལུང་ཨ་ནུ་ཡོ་ག་ལྟར་ན། ཀུན་རྫོབ་ཀྱི་སྣང་བའི་ཆོས་ཐམས་ཅད་ཡབ་ཀུན་ཏུ་བཟང་པོའི་དཀྱིལ་འཁོར། སྟོང་པ་ཡུམ་ཀུན་ཏུ་བཟང་མོའི་དཀྱིལ་འཁོར། དེ་གཉིས་ཟུང་དུ་འཇུག་པ་སྲས་བདེ་བ་ཆེན་པོའི་དཀྱིལ་འཁོར་དུ་རྟོགས་དགོས་གསུངས། ༈ འོད་གསལ་རྫོགས་པ་ཆེན་པོ་ལྟར་ན། རང་སྣང་ཡེ་ཤེས་ཀྱི་དཀྱིལ་འཁོར་ཆོས་སྐུ་ཐིག་ལེ་ཉག་གཅིག་ངོ་སྤྲོད་པ་ཡིན་གསུངས། ༈ གཞི་ལ་མང་ཡང་མི་ཞིག་ཤི་ཚེ་གཞི་ཐོག་ཏུ་དར་གཅིག་གནས་པ་ཐོག་མའི་གཞི་ཟེར་གསུངས། ཅི་ཞིག་གི་ཐོག་མ་ཡིན་སྙམ་ན་སངས་རྒྱས་སེམས་ཅན་གཉིས་ཀ་མ་བྱུང་བའི་སྔ་རོལ་ཡིན་པས་ཐོག་མ་ཟེར་གསུངས། ༈ སྣང་བ་འགགས་ཀྱང་སྣང་ཡུལ་མ་འགགས་པ་ཟེར་བ་ཡིད་ཤེས་ཀྱི་ངོར་དཔེའི་འོད་གསལ་དོན་སྤྱིའི་ཚུལ་དུ་འཆར་ནི་རེད། དེ་ལ་སྣང་བ་ཟེར་ནི་རེད། ཚོགས་སྦྱོར་སྐབས་ན་དེ་ལྟར་ཡིན་ནི་རེད། མཐོང་ལམ་སྐབས་དོན་གྱི་འོད་གསལ་དངོས་ཡིན་པས་དེ་ཤར་ཚེ། སྣང་བ་ཡིད་ཤེས་ཀྱི་ངོར་ཤར་བའི་དོན་སྤྱི་དག་ནས་སྣང་ཡུལ་མངོན་སུམ་དུ་མྱོང་བ་ཡིན་ནི་རེད། དཔེར་ན་ནམ་མཁའི་ཟླ་བ་སྣང་ཡུལ། གཟུགས་བརྙན་རྫིང་བུར་ཤར་བ་སྣང་བ། གཟུགས་བརྙན་སྣང་བ་དེ་འགགས་ཀྱང་ནམ་མཁའི་ཟླ་བ་སྣང་ཡུལ་འགགས་མི་དགོས་གསུངས། རྫོགས་ཆེན་སྐབས་འདིར་སྣང་བ་སྣང་ཡུལ་དེ་ལྟར་ཤེས་དགོས། དེ་ལས་ཕྱི་ནང་གཉིས་སུ་བཞག་རྒྱུ་ཨི་རྙེད་མ་ལྟ་གསུངས། ཕྱི་ནང་ལྟར་བཞག་ན་ཁྱོད་ཀྱིས་གྲོགས་ཀྱི་དོན་སྤྱི་བློ་ཡུལ་ལ་ཤར་བ་སྣང་བ། གྲོགས་དངོས་སྣང་ཡུལ། དེ་བཞིན་ཏུ་ཀ་བ་སྣང་ཡུལ། དེའི་རྣམ་པ་ཡིད་ངོར་ཤར་བ་ལ་སྣང་བ་ཟེར་ཡང་དེ་ཡིས་དགོས་རྒྱུ་སྐབས་འདིར་མེད་ཁི་ཨ། ༈ ཐོག་མའི་གཞི་ཟེར་བ་དེ་འཁོར་འདས་གཉིས་ཀ་མ་གྲུབ་པའི་གཞི་དབྱིངས་ལོ་ལོ་བོའི་ཀློང་ན་ཡོད། འཆི་སྲིད་སོགས་མཚན་གཞིར་འཇོག་གསུངས། འཁོར་འདས་གཉིས་ཀ་འཆར་རུང་གི་གདངས་ཙམ་ཡོད་པ་ལ་གོ་དགོས་གསུངས། ཐོག་མའི་གཞི་ཀ་དག་གི་ངོ་ན་འཁོར་འདས་གང་ཡང་མ་གྲུབ་པའི་གཞི་ལོ་ལོ་བོ་དེ་ལ་གཞི་གཅིག་ཟེར། གཞི་ལས་གཞི་སྣང་མཆེད་དུས་རང་སྣང་ངོ་ཤེས་ན་སངས་རྒྱས་ཀྱི་ལམ། མ་རྟོགས་ན་འཁོར་བར་འཁྱམས་པའི་ལམ་གཉིས་བྱུང་བ་འདི་གཞི་སྣང་གི་སྟེང་ནས་ངོས་འཛིན་དགོས་གསུངས། ཕྱོགས་བཅུའི་སངས་རྒྱས་ཐམས་ཅད་ཡིད་ལ་ལན་གཅིག་དྲན་ན་སངས་རྒྱས་རྣམས་ནི་ས་ཆེན་པོའི་རྡུལ་གྱི་གྲངས་དང་མཉམ་པ་ཡོད་པས་སངས་རྒྱས་དེའི་གྲངས་དང་མཉམ་པ་ལ་ཚོགས་བསགས་པའི་འབྲས་བུ་ཐོབ་པ་ཡིན་ལ། སེམས་ཅན་གྱི་ཁམས་ལ་ཡང་སྙིང་རྗེ་ལན་གཅིག་སྐྱེས་པས་ནམ་མཁའི་མཐའ་དང་མཉམ་པའི་སེམས་ཅན་གྱི་གྲངས་དང་མཉམ་པའི་བསོད་ནམས་ཐོབ་གསུངས། ཕྱོགས་བཅུ་དུས་བཞི་ཐམས་ཅད་དུ་སངས་རྒྱས་རྣམས་མི་བཞུགས་པའི་ཡུལ་དུས་སྐྲ་ཡི་རྩེ་མོ་ལན་བརྒྱར་བགོས་པའི་ཆ་ཙམ་ཡོད་པ་མ་ཡིན་ཀྱང་། སེམས་ཅན་གྱིས་རང་རང་གི་ལས་ངན་གྱིས་བསྒྲིབས་ཡོད་པས་མཐོང་བར་མི་ནུས་ཏེ། སྒྱུ་འཕྲུལ་ལས། ཡང་དག་ཤེས་པའི་རང་རིག་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཞེས་གསུངས། སྔོན་ཚངས་པ་རལ་པ་ཅན་ཞེས་བྱ་བ་སངས་རྒྱས་ཀྱི་མདུན་དུ་བྱོན་ཚེ་ཤ་རིའི་བུ་དང་མོའུ་འགལ་བུ་སོགས་རྩོད་པ་བྱས་པས་ཚངས་པ་རལ་པ་ཅན་གྱིས་ཞིང་འདི་ཤར་ཕྱོགས་མངོན་པར་དགའ་བའི་ཞིང་ངེས་པར་མཐོང་བ་སོགས་རྒྱུ་མཚན་བཤད་པས་མོའུ་འགལ་བུ་དང་ཤ་རིའི་བུ་སོགས་ཀྱིས་ཡིན་དོན་མེད། ཁྱིམ་བདག་དཔལ་སྐྱེས་ལྟ་བུ་ལོ་བརྒྱ་བ་དང་། སོར་ཕྲེང་ཅན་སོགས་སྡིག་ཅན་ཞིག་དང་། དགེ་སློང་མ་ཨུད་པ་ལ་ལྟ་བུ་སོགས་ཞིང་ཁམས་ན་ཡོད་དོན་མེད་ཟེར་ནས། མཐར་སྟོན་པ་ལ་ཞུས་ཚེ་ཚངས་པ་རལ་པ་ཅན་གྱིས་མཐོང་བ་ནི་ལེགས་སོ་གསུངས་ནས་སངས་རྒྱས་ཀྱིས་བྱིན་རླབས་ཀྱི་མཐུ་ལས་འཁོར་ཐམས་ཅད་རེ་ཞིག་ཙམ་ལ་ཤར་ཕྱོགས་མངོན་པར་དགའ་བའི་ཞིང་ཁམས་མངོན་སུམ་མཐོང་བ་ལྟ་བུའོ། །དངུལ་ཆུའི་ཐིག་པ་ས་ལ་ལྷུང་དུས་རྡུལ་དང་མ་འདྲེས་པ་བཞིན་ཤར་གཞི་ཤར་ཆོས་གཉིས་འབྱེད་དགོས། དེ་བྱེད་ན་ཤར་གཞི་ཤར་ཆོས་གཉིས་གཅིག་ཏུ་མི་འདོད་པའི་ལྡོག་ཆ་འདི་ཤེས་དགོས། ཆོས་ཐམས་ཅད་རིག་པ་རྗེན་པར་རྟོགས་དགོས་གསུངས། དེ་ལ་སེམས་དང་རིག་པ་གཅིག་ཏུ་མ་གསུངས། དེ་གསུངས་ན་སེམས་ལ་སྐྱེ་འགག་ཡོད་པ་བཞིན་རིག་པ་སྐྱེ་འགག་ཅན་དུ་ཐལ། ཡང་ན་ཡུལ་རིག་པ་གཉིས་གཅིག་དུ་བསམ་ན། ཕྱི་རོལ་དངོས་པོར་གྲུབ་པ་བཞིན་རིག་པ་དངོས་པོ་ཅན་དུ་ཐལ། ཡང་ན་རིག་པ་འདུས་མ་བྱས་པ་བཞིན། ཕྱི་རོལ་ཚོགས་དྲུག་གི་ཡུལ་འདི་འདུས་མ་བྱས་ཡིན་པར་ཐལ། རིག་པ་འདུས་མ་བྱས་དང་རྫས་གཅིག་ཏུ་འདོད་པའི་ཕྱིར་སོགས་སྐྱོན་དུ་མ་ཡོད་པས་ལྡོག་ཆས་ཕྱེ་མ་ཤེས་ན་ཆ་ག་རོ་ལོག་རྒྱབ་འགལ་ལ་འགྲོ་ནི་རེད། དེ་བས་ལྡོག་ཆས་ཕྱེ་ཤེས་དགོས། རིག་པ་རྗེན་པར་གསུངས་པ་དེ་ཡང་གོ་རྒྱུ་ཆེན་པོ་ཡོད་ལ། འཆར་གཞིའི་རིག་པ་རྗེན་ལ་ཕུད་ནས་བསྐྱངས་ན། དེ་ལ་ཡུལ་གྱི་སྣང་ཆ་མ་འགགས་ཀྱང་ཡུལ་ལ་རིག་པ་གཡོ་བ་མེད། ཡུལ་གྱིས་རིག་པ་ལ་གོས་པ་མེད། དེ་མེད་དངུལ་ཆུའི་ཐིག་པ་རྡུལ་དང་མི་འདྲེས་པ་བཞིན། ཡུལ་ལ་འདྲེས་པ་མེད་པས་རིག་པ་རྗེན་པ་ལ། གནམ་སྟོང་གི་ཟླ་བ་དང་དངུ ལ་ཆུའི་ཐིག་པའི་དཔེ་སོགས་ཀྱི་མཚོན་པ་ཡིན་ནི་རེད། དེ་འདྲའི་རིག་པ་ལེགས་པར་སྐྱོང་ཤེས་ན། འཛིན་པ་ཐམས་ཅད་རང་གྲོལ་ལ་འགྲོ་བའི་རང་གཤིས་ཀྱི་བབ་ལ་གནས་ནི་རེད། དེ་ལ་རིག་པ་རང་བབ་ཀྱི་བསམ་གཏན་ཟེར་ནི་རེད། སེམས་འཛིན་བསམ་གཏན་ཐབས་བཅས་རེད། ༈ སྤྱིར་རིག་པའི་ཡེ་ཤེས་ཀྱི་ལྡོག་ཆ་ཙམ་ལ་ལྟ་སྒོམ་སྤྱོད་གསུམ་མིང་དུ་བཏགས་པ་ལས་ལྟ་སྒོམ་སྤྱོད་གསུམ་ཐ་དད་དུ་མེད་པས། རང་ངོ་འཕྲོད་པའི་ཆ་ནས་ལྟ་བ། ངང་ལ་གནས་པའི་ཆ་ནས་སྒོམ་པ། གང་ཤར་རང་གྲོལ་དུ་གྱུར་པའི་ཆ་ནས་སྤྱོད་པ། སྐུ་གསུམ་ལྷུན་གྲུབ་འབྲས་བུ། དེ་ལས་མི་འདའ་བ་དམ་ཚིག་ཡིན་པས། རིག་སྟོང་ཆོས་སྐུའི་འོད་གསལ་གྱི་རང་ས་མ་ཤོར་ན་གང་ཤར་བག་ཆགས་གསོག་ལོང་མེད་པར་གྲོལ་བ་ལས་མི་གྲོལ་བ་ཤེས་བྱ་ལ་མི་སྲིད་པ་ཡིན་ཏེ། གྲོལ་བ་རང་གིས་རང་གྲོལ་ལ་གཞན་རྐྱེན་མེད་པར་བཟང་ངན་བར་མའི་རྟོག་ཚོགས་ཐམས་ཅད་སྦྲུལ་གྱི་མདུད་པ་བཞིན་དུ་གྲོལ་བས་སྐད་ཅིག་དེ་ཉིད་ལ་གང་ཟག་དེའི་ཤེས་རྒྱུད་དག་པ་ཡེ་ཤེས་ཀྱི་རང་བཞིན་དུ་སད་པ་ཡིན་པས། དེ་ལྟར་རིག་པའི་ཡེ་ཤེས་སྙིང་དབུས་སུ་སད་ན། དད་པ། སྙིང་རྗེ། ཤེས་རབ་གསུམ་བཅོས་མེད་དུ་འཆར་བ་ཆོས་ཉིད་ཡིན་པས། གོ་རྒྱུ་མྱོང་རྒྱུ་མེད་པ་ཞིག་ཨི་ཡོད་ཧ་བོ། ཇི་ལྟར་བསྒོམས་ཀྱང་ན་ནིང་གི་བེའུ་ལི། ད་ལོ་ཡང་བེའུ་ལི་འདྲ་འདྲ། ཡར་སྐྱེད་མེད་པ་འདི་མཉམ་བཞག་རྗེས་ཐོབ་ལ་བསྲེས་ནས་སྤྱོད་པ་ཤར་གྲོལ་གྱིས་རྩལ་སྦྱང་མ་ཤེས་པས་ཡིན་ནམ་གནད་ཀྱི་རིག་ངོ་མ་ཤེས་པས་ལན་པ་ཡིན་ནོ། །དེས་ན་རིག་སྟོང་ཆོས་སྐུའི་འོད་གསལ་གྱི་ལྟ་བའམ། ལྷག་མཐོང་གི་རྩལ་རྫོགས་ནས་བཟང་རྟོག་ངན་རྟོག་ལུང་མ་བསྟན་གསུམ་རིག་སྟོང་གི་ཀློང་དུ་རང་གྲོལ་དུ་འགྲོ་བ། དཔེར་ན་ཁྱུང་གི་ཕྲུ་གུ་གཤོག་རྩལ་རྫོགས་པ་ལྟ་བུ་དགོས་གསུངས། ཤེད་མེད་ཅིག་ཁུར་རྒྱས་ནོན་པ་ལྟ་བུའི་བསྒོམ་གོ་ཅི་ཡང་མ་ཆོད་པ་ཡིན་ཏེ། རྒྱུ་མཚན་དེའི་ཕྱིར་ན་ལྟ་སྒོམ་སྤྱོད་གསུམ་ཐ་དད་དུ་མི་འཛིན་ལ་རིག་སྟོང་གཉུག་མའི་རང་བབ་རང་གྲོལ་དུ་སྐྱོང་བ་ལས་གཞན་མེད་དེ། མི་ཕམ་པས། རྟེན་འབྱུང་སྣ་ཚོགས་བྱེད་པོ་སེམས་ཉིད་ཡིན། །སེམས་ཀྱི་རྒྱལ་པོ་རང་སར་རང་གྲོལ་ན། །བྱ་སྤྱོད་གཞན་ལ་རེ་ལྟོས་ཅི་ཞིག་དགོས། །གསུངས། ༈ རིག་སྟོང་ཟུང་འཇུག་འོད་གསལ་གྱི་ལྟ་བ་དེ་ངོས་བཟུང་བ། དེའི་ངང་གཏད་མེད་ཟང་ཐལ་དུ་སྐྱོང་བ། དེ་གཉིས་ཀྱི་གྲོགས་སྤྱོད་པ་རང་གྲོལ་གྱི་རྩལ་སྦྱང་བ་གསུམ་ཡེ་གདོད་མ་ནས་རྒྱུ་རྐྱེན་གྱིས་མ་བསྐྱེད་པའི་རང་བྱུང་ལྷུན་གྲུབ་ཀྱི་རིག་པ་འོད་གསལ་བའི་ཡེ་ཤེས་འདིའི་སྟེང་ན། སྤང་བླང་གིས་བཅོས་བསྒྱུར་སྐྱོན་ཕར་བསལ་རྒྱུ། ཡོན་ཏན་ཚུར་བསྒྲུབ་རྒྱུ་མེད་ལ། མེད་དགག་དང་མ་ཡིན་དགག་ལ་སོགས་བློས་བྱས་ཀྱི་ལྟ་བ་ལས་འདས་པའི་ཆོས་སྐུ་ཐིག་ལེ་ཉག་གཅིག་གི་ལྟ་བ་ངོ་འཕྲོད་དགོས་གསུངས། ༈ དེ་ལྟ་བུའི་ལྟ་བ་དེའི་རྩལ་མ་རྫོགས་ན་རིག་ངོ་ཡི་དྭགས་གི་སེན་ཁ་ལྟ་བུའི་ངོ་སྤྲོད་ཞིག་ལ། གནས་ཆ་སྤྲིན་བར་གྱི་ཉི་འོད་ལྟ་བུའམ་རླུང་གསེབ་ཀྱི་མར་མེ་ལྟ་བུས་རྐྱེན་མི་ཐེག་སྟེ། ཀུན་མཁྱེན་ཆེན་པོས། རང་ངོ་འཕྲོད་ཀྱང་གོམས་འདྲིས་མ་བྱས་ན། །རྣམ་རྟོག་དགྲས་ཁྱེར་གཡུལ་ངོའི་བུ་ཆུང་འདྲ། །ཞེས་སོ། །བཟང་རྟོག་དང་དགའ་བྲོད་ལྷ་བུའི་བདུད་གང་ཤར་ཐམས་ཅད་ཞེན་མེད་དུ་ངོས་ཟིན་དགོས་གསུངས། བླ་མ་དང་མཆེད་གྲོགས་སོགས་ལ་ལོག་ལྟ་སྐྱེས་ན་ཨ་ཁ་ཁ་སྙམ་པས་སྐྱོན་ཅན་དུ་དམ་བྲེང་ངེ་བཟུང་ནས་གཉེན་པོ་གཞན་ཞིག་བསྟེན་ནས་ཕར་སྤང་རྒྱུ་ཨི་རྙེད་ལྟ་བ་སོགས་ཆགས་སྡང་རྨོངས་གསུམ་གྱི་དབང་གིས་རྟོག་པ་གང་ཤར་ཡང་དེ་ལ་སྐྱོན་དུ་བཟུང་ནས་གཉེན་པོ་གཞན་རྐྱེན་ལ་བརྟེན་ནས་སྤང་རྒྱུ་ཨི་རྙེད་རེ་བ་གཉེན་པོར་ཤོར་བའོ། །གདོད་མའི་སྟོང་ཆེན་གྱི་དབྱིངས་རྣམ་ཀུན་མཆོག་ལྡན་གྱི་སྟོང་པ་ཉིད་མ་ཤེས་པར་ཕུང་སོགས་ཀྱི་སྟོང་ཉིད་ལ་འཇོག་པ་སྟོང་ཉིད་བློས་བྱས་སུ་རེ་བས་གཤིས་ཤོར་དུ་ཞབས་དྲུང་རིན་པོ་ཆེའི་བཞེད་པར་འབྲུག་པའི་ཞལ་རྒྱུན་ཡིན་གསུངས། མདོར་ན་མཉམ་བཞག་རྗེས་སྤྱོད་ལ་བསྲེས། རྗེས་སྤྱོད་རྨི་ལམ་ལ་བསྲེས། རྨི་ལམ་འོད་གསལ་དུ་སྦྱངས་པ་འདི་ཕྱག་རྫོགས་གཉིས་ཀས་ཐུན་མོང་དུ་བཞེད་པ་ཡིན་གསུངས། སྤྱོད་པ་རང་གྲོལ་གྱི་གནད་མེད་ན་ཆགས་སྡང་སོགས་ཀྱིས་ལྟ་རྐུབ་སྤྱོད་པས་ཕུད། སྒོམ་རྐུབ་གཡེང་བས་ཕུད་ནས། ཨ་ཁུས་རྟོགས་ཁུལ་བཟུང་ཡང་། ཉི་མ་རེ་ལ་རང་མཚང་སྦ་གསང་མེད་པར་མང་པོ་སྟོན་འོང་བ་རེད། དེས་ན་སྤྱོད་པ་རང་གྲོལ་གྱི་གནད་ཡོད་ན་ཡུལ་ཡུལ་ཅན་གཉིས་ཀ་རིག་པའི་ཡེ་ཤེས་སུ་འཆར། གལ་ཏེ་ཡུལ་རང་གྲོལ་ཡེ་ཤེས་སུ་འཆར་མ་ནུས་ཀྱང་། ཡུལ་ཅན་རྣམ་རྟོག་བཟང་ངན་བར་མ་གསུམ་པོ་ཡང་སྐྱེ་གྲོལ་དུས་མཉམ་དུ་འགྲོ་བ་ཞིག་ནི་ཅི་ནས་འོང་དགོས་ཏེ། དེ་མ་འོངས་ན་གཞན་ཞིག་ལ་ཁོ་བོ་ཇི་ལྟར་རེད་འདུག་ཟེར་བ་ནི་ཡི་མུག་བྱེད་དུ་འདུག་པས། དེས་ན་རང་རིག་ཟང་ཐལ་རྗེན་པར་ཤར་བའི་ཀློང་དུ་རང་སར་སྣང་བ་དག་པ་རབ་འབྱམས་སུ་རང་གྲོལ་གཉུག་མའི་རྩལ་འབྱོངས་བ་ཞིག་དགོས་པར་འདུག་གསུངས། མདོར་ན་རྩིས་ཟིན་གྱི་རྣམ་རྟོག་ཆུ་ལ་རི་མོ་འདྲ་ཚུལ་དང་། འོག་འགྱུའི་རྣམ་རྟོག་རྡོ་ལ་རི་མོ་འདྲ་ཚུལ་མང་པོ་གསུངས་འདུག །ཚེ་མཇུག་ལུག་གི་རྔ་མ་ལྟ་བུ་ཐུང་ཧད་དེ་བ་འདི་ལ་དཀོར་ལ་མི་འབྱམས་པར་བརྩོན་འགྲུས་གཞུ་འགེངས་བ་ལྟ་བུ་ཞིག་དགོས་གསུངས། མཉམ་བཞག་ལས་ཡེང་འཁྲུལ་ནམ་བྱུང་ན་དེ་ཚེ་དང་པོ་ཀུན་གཞིའི་ངང་ལ་མི་ལྷུང་བའི་ཐབས་མེད། ཐུན་གཅིག་བསྡད་ན་སྐད་ཅིག་གིས་འཁྲུལ་འགྲོ་རྒྱུ་འདི་ཀུན་གཞིའི་ཁམས་ལ་འདུག་པའི་སྐྱོན་རེད། ཅུང་ཟད་ཡུན་རིང་ན་ཀུན་གཞི་རུ་འདུག་ནི་རེད། དེ་ལྟར་མ་བྱེད་མ་གཏོགས་ཇེ་འཐིབ་འཐིབ་ཡིན་ནི་རེད། རང་རིག་གསེར་ཞུན་མ་ལྟ་བུ་དེ་ལེགས་པར་སྐྱོང་དགོས་ནི་རེད། དེ་ཡང་ཨི་ཙི་མ་ཞིག་གི་ཁ་ལ་བལྟ་མ་འདུག་ལ། དཔེ་ཆ་ལེགས་པར་བསླབས་ནས་ཐང་ཡངས་པོར་རྟ་བཟང་གི་སྒྲོག་གཏོར་ནི་འདྲ་འདྲ་ཞིག་དགོས་གསུངས། ༈ མཉམ་བཞག་ལ་སྐྱོང་སྒོམ་མེད་ཀྱང་རྗེས་ཐོབ་ལ་རིག་ཆ་ཡོད་པས་རི་སུལ་དུ་མི་ཚེ་བསྐྱལ་བ་ཡིན་ཞེས་སོ། །འཁྲུལ་རྟོག་ཐ་མལ་གྱི་ཤེས་པ་རྣམ་ཤེས་ཚོགས་བརྒྱད། ཉམས་ཞེན་ཐ་མལ་གྱི་ཤེས་པ་བདེ་གསལ་མི་རྟོག་གསུམ། གཞི་གནས་ཐ་མལ་གྱི་ཤེས་པ་ཤེས་རིག་གོ་མ་འགགས་པ་ཡིན་གསུངས། ༈ ཐོག་མར་ཀུན་སློང་བཅོས། སྐྱབས་སེམས་བཞག །དངོས་གཞི་ཐུགས་ཡིད་དབྱེར་མེད་ཀྱི་ངང་ལ་མཉམ་པར་བཞག་པའི་དུས་སུ་རྟོག་པ་གང་ཤར་ཐམས་ཅད་གྲོལ་ཁ་ཞོག་དང་ཁྲེགས་ཆོད་ལམ་ཤར་གྲོལ་ཡིན་གསུངས། རྣམ་རྟོག་མ་ཤར་ན་ཅང་གྲོལ་གྱི་ཡོད་ནི་མ་རེད་གསུངས། དཔེར་ན་རྒད་པོ་ཞིག་གིས་ཕྱི་བ་བསད་དགོས་ན་ཕྱི་བ་ཁོང་སྒོ་ལ་མ་བུད་ན་གསད་རྒྱུ་མེད། ཕྱིར་བུད་ཀ་བཞག་ནས་གཟོད་གསད་ནི་རེད། འཁྲུལ་བ་བཤིག་ལུགས་ལ་དད་པའི་སྒོ་ནས་ཐུགས་ཡིད་དབྱེར་མེད་དུ་བཞག་ན་འཁྲུལ་བ་དྭངས་འགྲོ་ནི་རེད། རྣམ་རྟོག་ཤར་ཀ་བཞག་ནས་འཁོར་བ་ཞེན་ལོག་གི་སྒོ་ནས་འཁྲུལ་བ་བཤིག་ན་ཆོག་གསུངས། གཉེན་པོ་བསྟེན་མ་དགོས་པར་འཁྲུལ་བ་རང་དྭངས་ལ་སོང་ན་འདྲ་འདྲ་ཡིན་གསུངས། ཉམས་ལེན་གྱི་དུས་ཐུགས་ཡིད་དབྱེར་མེད་བསྲེ་བའི་སྐབས་སུ་རྣམ་རྟོག་ཤར་ནི་དེ་ལ་འཁྲུལ་བ་ཟེར་ནི་མ་རེད། ཤར་གྲོལ་ཟེར་ནི་རེད་གསུངས། རྣམ་རྟོག་ཤར་ཀ་བཞག་ནས་གྲོལ་ཀ་འཇོག་ནི་རེད་གསུངས། དཔེར་ན་དབུལ་བོ་ཞིག་གི་ལག་ནས་གཏེར་རྡོལ་བ་བཞིན་རྣམ་རྟོག་སྤང་བླང་གཉིས་ཀ་མ་རེད་གྲོལ་ཀ་ཞོག་གསུངས། སྡེ་ཟིག་ཡིན་ན་ཉམས་ལེན་གྱི་དུས་སུ་ཆགས་སྡང་རྨོངས་གསུམ་འཆར་ག་བཞག་ནས་ཉམས་ལེན་གྱི་རང་ཚུགས་མ་ཤོར་བའི་ངང་ནས་ཤར་ཚད་ཐམས་ཅད་དཔེར་ན་སྤྲིན་ཆེན་ནམ་མཁའ་ལ་དྭངས་བ་བཞིན་ཏུ་གྲོལ་འགྲོ་ནི་རེད་གསུངས། རྣམ་རྟོག་ཤར་གྱི་མེད་ནས་སྲ་མོ་རྡོ་འདྲ་འདྲ་དེ་ནི་གོལ་ས་ངན་པ་རེད་གསུངས། རྣམ་རྟོག་ཤར་བཞིན་གྲོལ་ན་ཡག་ནི་རེད་གསུངས། བསྔོ་བ་ནི་འཁོར་གསུམ་དམིགས་མེད་ཀྱི་བསྔོ་བ༴ རྗེས་མཐུན་པ༴ གང་ཤེས༴ སོགས༴ བསྔོ་ཚུལ་གསུངས། ཡང་ན་དགེ་སྡིག་གཏོང་ལེན་གྱི་དམིགས་པ་བྱས་ན་ཆོག་གི་གསུངས།། །། མ་ཎི་འདོན་ལུགས་སོགས་ཚིག་ཟིན་འགའ།རང་གི་མདུན་གྱི་ནམ་མཁར་སྐྱབས་གནས་ཀུན་འདུས་ཀྱི་ངོ་བོ་སྤྱན་རས་གཟིགས་གསལ་བཏབ་ལ། མོས་པ་ཙམ་གྱིས་ཆོག་གསུངས། སྤྱན་རས་གཟིགས་ཀྱི་སྐུ་ལས་འོད་ཟེར་དཔག་ཏུ་མེད་པ་འཕྲོས་རང་གཞན་སེམས་ཅན་ཐམས་ཅད་ལ་ཕོག་པས་རྒྱུ་མི་དགེ་བ་དང་འབྲས་བུ་སྡུག་བསྔལ་ཐམས་ཅད་དག་ནས་སངས་རྒྱས་པར་བསམ། དེའི་ངང་ནས་མ་ཎི་བཟླས་ན་སྐྱབས་འགྲོ་སེམས་བསྐྱེད་བསྔོ་བ་སྨོན་ལམ་རྣམས་ཚང་གསུངས། དུས་རྟག་ཏུ་དགེ་བ་གང་ཡིན་ཀྱང་ཐ་ན་དགེ་སེམས་སྐད་ཅིག་མ་གཅིག་ཡན་ཆད་ཐལ་མོ་ཡ་གཅིག་སྦྱར་བ་ཐམས་ཅད་གང་ཡིན་ཡང་སྦྱོར་དངོས་རྗེས་གསུམ་གལ་ཆེ་གསུངས། སྦྱོར་དངོས་རྗེས་གསུམ་གྱིས་ཟིན་པའི་དགེ་རྩ་ཁོང་ཁྲོས་མི་འཇོམས། ལོག་ལྟས་མི་གཅོད་གསུངས། ༈ ༀ་མ་ཎི་པདྨེ་ཧཱུྃ། ༀ་ཡིག་རྡོ་རྗེ་གསུམ་ཕྱེ་འདུས་པའི་དངོས། །སངས་རྒྱས་བསྐུལ་བའི་སྔགས་རྣམས་དེ་ཡིས་འདྲེན། མ་ཎི་རྣམ་པར་མི་རྟོག་འཇིག་རྟེན་དུ། །བསམ་ཡས་ཆོས་ཀྱི་ཆར་འབེབས་ཤེས་རབ་སྟེ། །པདྨེ་དམིགས་པའི་རྡུལ་བྲལ་སྙིང་རྗེ་ཆེ། །སྲིད་གསུམ་ཆུ་ཡི་རྒྱན་བྱེད་འབོད་པའི་བརྡ། །ཧཱུྃ་ཞེས་འཁོར་བའི་སྡུག་བསྔལ་འཇོམས་པའི་མཆོག ། རྩེ་གཅིག་ཡིད་ཀྱིས་རིགས་སྔགས་ལེགས་བཟླས་པས། །ཐུགས་དམ་རྒྱུད་བསྐུལ་སྐུ་ཡི་གནས་རྣམས་ལས། །འོད་འཕྲོས་རྒྱལ་བ་རྣམས་ཀྱི་ཐུགས་རྗེ་གཡོས། །འགྲོ་ཀུན་སྒྲིབ་སྦྱངས་བདག་རྒྱུད་བྱིན་རླབས་སོ། །དོན་གཉིས་ཕུན་ཚོགས་དངོས་གྲུབ་ཐོབ་པར་འགྱུར། །ཞེས་བརྗོད་ལ་བཟླས། ༈ འཁོར་ལོ་བསྐོར་བའི་དུས་སུ་དམིགས་པ་ནི། འཁོར་ལོའི་ཡིག་འབྲུ་ལས་ཡེ་ཤེས་ཀྱི་འོད་ཟེར་འཕྲོས་པས་རྒྱལ་བ་སྲས་བཅས་ལ་མཆོད་པར་བསམ། ཚུར་འདུས་པས་རྒྱལ་བ་སྲས་བཅས་ཀྱི་བྱིན་རླབས་དང་མཆོག་ཐུན་མོང་གཉིས་ཀྱི་དངོས་གྲུབ་འཁོར་ལོར་ཐིམ་པར་བསམ། ཕར་འཕྲོས་པས་རིགས་དྲུག་གི་སེམས་ཅན་ཐམས་ཅད་ལ་ཕོག་པས་རྒྱུ་མི་དགེ་བ་དང་འབྲས་བུ་སྡུག་བསྔལ་ཐམས་ཅད་སངས་སངས་དག་ནས་སངས་རྒྱས་པར་བསམ། དེའི་ངང་ནས་འཁོར་ལོ་བསྐོར་ན་ཕན་ཡོན་དཔག་ཏུ་མེད་པ་ཡོད་གསུངས། དེ་ལྟ་བུའི་དམིགས་རྣམ་གྱིས་ཟིན་དགོས་གསུངས། ༈ ཤི་གསོན་གང་ཡིན་ཀྱང་འདྲ། གསོན་པོའམ་ནད་པའི་རིམ་གྲོ་ཡིན་ན་ནད་བདག་གི་གཙོར་བྱས་སེམས་བསྐྱེད་དགོས། ཁྱད་པར་ཚེ་འདས་ཀྱི་སྔས་མགོར་འགྲོ་བའི་གནས་སྐབས་ཆགས་སྡང་རྨོངས་གསུམ་བསམ་ན། དེས་ཡར་འཕེན་ནི་མ་རེད་མར་འཕེན་ནི་རེད། དེས་ན་ཚེ་འདས་ཀྱི་མངོན་ཤེས་ཀྱིས་གོ་ནས་ལོག་ལྟ་སྐྱེས་ནས་མར་ངན་སོང་དུ་འགྲོ་ནི་རེད། ཉམས་ལེན་པ་ཞིག་ཡིན་ན་ཉམས་ལེན་གྱི་ངང་ནས་སངས་རྒྱས་ཀྱི་མཚན་དང་གཟུངས་སྔགས་ཁྱད་པར་བ་བརྗོད་ནས་མི་འཁྲུལ་བར་འཕོ་བ་བཏབ་ན་ཕན་ཐོག་གསུངས། ༈ རང་མན་ན་ཡོད་པ་གང་ཡིན་ན་རང་གི་ལུས་ནས་སྐྱེས་པའི་བུ་ཕྲུག་ལྟ་བུ་གང་ཡིན་ན་ཤིག་ཡིན། ཤིག་གཅིག་གི་སྲོག་བཅད་ན་སོ་བྱང་སྔགས་གསུམ་ལ་འགལ་ཚུལ་དང་ཤ་ཉེ་ཕ་མ་སོགས་ཆགས་ཞེན་གྱིས་དབང་གིས་སྐྱེས་པ་ཡིན་གསུངས། ཤིག་གཅིག་གྲང་འཁྱག་ལ་གསོད་ན་གྲང་དམྱལ་བརྒྱད་ཀྱི་རྒྱུ་མ་ནོར་བ་ཡིན་གསུངས། སེན་མོའི་སྟེང་ནས་བཅུར་ན་དམྱལ་བ་བསྡུས་འཇོམས་ཀྱི་རྒྱུ་མ་ནོར་བ་ཡིན་གསུངས། ཁྱད་པར་དུ་བན་སེར་མོ་བ་རྣམས་ཀྱིས་འདི་ལ་འཛེམ་བག་བྱེད་པ་གལ་ཆེ་གསུངས། ༈ རིག་པ་ཡིན་པའི་རྟགས་སུ་རྟོག་པ་རང་རྒྱུད་པ་གཅིག་འཆར་ནི་མ་རེད་གསུངས། གོལ་ས་ཐམས་ཅད་དང་སེམས་ཀྱི་དྲི་མ་ཙམ་ཡོད་རུང་ནི་མ་རེད་གསུངས། རྣམ་རྟོག་ཐམས་ཅད་རིག་པའི་རྣམ་ལྡན་དུ་འཆར་དགོས་གསུངས། དཔེར་ན་ཉི་མ་ཤར་ན་མུན་པ་འདུག་ལོང་མེད་པ་བཞིན་ཏུ་རིག་པ་ཁོ་རང་ཤར་དུས་རྣམ་རྟོག་ཐམས་ཅད་རིག་པའི་རྣམ་ལྡན་དུ་ཤར་འགྲོ་ནི་རེད་གསུངས། ༈ དྲན་ཤེས་བསྟེན་ཚུལ་ནི། དྲན་པ་རྙེད་ན་སྒོམ་རྙེད། དྲན་པ་སྟོར་ན་སྒོམ་སྟོར། དྲན་ཤེས་ཞེས་པ་ཤེས་བཞིན་གོ་བཞིན་པ་དེའི་ངང་དུ་དྲན་པ་བསྟེན་གྱི་རེད་གསུངས། མཉམ་བཞག་ལ་ལྷོད་ཡོད་དགོས། དེའི་ངང་ནས་རྩལ་གང་ཤར་ཐམས་ཅད་བག་ཆགས་གསོག་ལོང་མེད་པར་གྲོལ་བས་རྗེས་ཐོབ་ཟེར། སྤྱོད་ལམ་གྱི་སྐབས་རིག་པ་བསྒྲིམ་དགོས་གསུངས། མི་ཕམ་པས། མན་ངག་བྱིས་པའི་རྩེད་མོ་འདྲ། །དགོས་པ་རི་རབ་རྒྱ་མཚོ་འདྲ། །གསུངས། ༈ མཉམ་བཞག་མཚན་ཉིད་པའི་སྐབས་སུ་ཡུལ་ཅན་རླུང་སེམས་དག་སྟོབས་ཀྱིས་དེས་བསྐྱེད་འཁྲུལ་བའི་ཆ་འདི་དག་ཀྱང་དག་འགྲོ་ནི་རེད་གསུངས། དེ་འདྲའི་འཁྲུལ་བའི་ཆ་འདི་དག་གསར་བྱུང་གློ་བུར་བ་ཡིན་ཏེ། འདི་ཐོག་མའི་གཞི་དུས་ན་མེད། མཐར་ཐུག་འབྲས་དུས་ན་མེད། རྣལ་འབྱོར་ལམ་དུས་ན་མེད། རིག་པ་གཤིས་སུ་ཕེབས་སྐབས་འཁྲུལ་སྣང་འདི་དག་ཁྲལ་མ་ཁྲོལ། ཡ་མ་ཡེངས། བན་མ་བུན། མེད་སྣང་གློ་བུར་ཙམ་མ་གཏོགས་མེད་པར་ཤེས་ནས། འཁྲུལ་སྣང་གློ་བུར་བ་འདི་དག་མེད་གསུངས། དཔེར་ན་མཁྲིས་ནད་ཅན་གྱིས་དུང་སེར་པོར་སྣང་བ་དང། མིག་ལ་རབ་རིབ་ནད་ཅན་གྱིས་མིག་ལམ་དུ་སྐྲ་ཤད་སྣང་བ་ལྟར་དང་། ཡི་དྭགས་ཀྱིས་ཆུ་ལ་རྣག་ཁྲག་ཏུ་མཐོང་བ་བཞིན། དེ་ཡང་འཁྲུལ་སྣང་བག་ཆགས་དག་སྐབས་གནས་ཚུལ་ཆུ་གཙང་མ་མཐོང་བ་བཞིན། གནས་ཚུལ་གཟིགས་སྐབས་འཁྲུལ་སྣང་རང་ལོག་ཏུ་དག་འགྲོ་ནི་རེད་གསུངས། མི་དཔའ་བོ་གཡུལ་དུ་ཞུགས་ནས་ཞེ་སྡང་གིས་རལ་གྲི་ཕྱར་ནས་གཡུག་བཞིན་པའི་གནས་སྐབས་ནའང་གནས་ཚུལ་རིག་སྟོང་ཆོས་སྐུའི་བཞུགས་ཚུལ་མངོན་དུ་གྱུར་ནས་ཤར་ཡོད་གསུངས། ལམ་དུས་སྐད་ཅིག་ཙམ་ཡང་འབྲལ་བ་མེད་གསུངས། རིག་སྟོང་ཆོས་སྐུའི་ཡེ་ཤེས་ཀྱི་ཉི་མ་ནམ་ཤར་ཀྱང་མ་རིག་གཟུང་འཛིན་གྱིས་བསྐྱེད་པའི་སེམས་སེམས་བྱུང་དང་བཅས་པ་རིག་པ་ཡེ་ཤེས་ཀྱི་རྣམ་ལྡན་དུ་སད་འགྲོ་བ་ཡིན་པས་དེ་གོ་དགོས་གསུངས། དེ་མིན་སེམས་དང་རིག་པ་གཉིས་གནས་སྐབས་མ་གཏོགས་མཐར་ཐུག་ཐ་དད་དུ་གོ་མི་ཉན་གསུངས། དཔེར་ན་ཉི་མ་ཤར་ཚེ་མུན་པ་རང་ཡལ་དུ་འགྲོ་བ་བཞིན་རྣམ་རྟོག་གང་ཤར་ཀྱང་རིག་སྟོང་ཆོས་སྐུའི་རྒྱལ་ཁབ་ཏུ་གྲོལ་དགོས་གསུངས། རྣམ་རྟོག་གི་རྗེས་དེད་ནས་གྲོལ་བར་འདོད་པ་ནི་ཁྱི་ལ་རྡོ་འཕེན་སྐབས་མི་ལ་མི་འཇུ་བར་རྡོ་རྗེས་དེད་པ་བཞིན་ནོ། །རྣམ་རྟོག་ཤར་ཀྱང་དྲན་པས་ཟིན་ཙམ་གྱིས་རིག་པའི་རྣམ་ལྡན་དུ་གྲོལ་བ་ནི་གཅན་གཟན་གྱི་རྒྱལ་པོ་སེང་གེ་ལ་རྡོ་འཕངས་ན་རྡོ་ལ་མི་འཇུ་བར་འཕེན་མི་ལ་འཇུ་བ་བཞིན་ནོ། ༈ །ཡང་རིག་པའི་སྣང་ཆ་ནི་ཡབ་ཚེ་ད པག་མེད། ཡེ་སྟོང་གི་ཆ་ནི་ཡུམ་ཆོས་ཉིད་དོན་གྱི་གཟུང་མ། ཟུང་འཇུག་གི་ཆ་ཡབ་ཡུམ་འཁྲིལ་སྦྱོར་དུ་གོ་དགོས་གསུངས། དེ་སྐབས་གཟུགས་སྣང་སྐུ། སྒྲ་གྲགས་གསུང་། དྲན་རྟོག་ཐུགས་ཀྱི་འཁྱེར་སོ་གསུམ་དང་མ་བྲལ་བ་དགོས་གསུངས། དེ་ཡང་མཐར་ཐུག་དབྱིངས་ཡེ་ཟུང་འཇུག་དེ་ཉིད་ལྷ་ཡབ་ཡུམ་གང་ཡིན་ཀྱང་དེའི་སྐུར་བཞེངས་པ་གོ་དགོས་གསུངས། ༈ མན་ངག་ཟབ་མོ་ལ་བརྟེན་ནས་ཟང་ཐལ་གྱི་རིག་པ་མངོན་སུམ་རྟོགས་ཤིང་ཚད་དུ་ཕྱིན་པས་སྔོན་གྱི་བླ་མ་དམ་པ་འོད་གསལ་སྙིང་པོའི་བརྒྱུད་པ་འཛིན་པ་རྣམས་ནི་འདི་ལྟར་ཡིན་པར་གསུངས་ཏེ། ཡུལ་སྣང་རིག་ངོ་ལ་མི་འགག་ཀྱང་རིག་པ་ཡུལ་ཐོག་ཏུ་མ་འདྲེས་པ་གཟུང་འཛིན་འཁོར་བའི་ཆོས་ཐམས་ཅད་ཆུ་ལ་རི་མོ་བྲིས་པ་བཞིན་རང་གྲོལ་དུ་སོང་བས་སྤང་བྱའི་མཐའ་ཟད། ཡུལ་ཐོག་ཏུ་མ་ཤོར་བའི་རིག་ངོ་ལ་ཆགས་ཞེན་དང་དགག་སྒྲུབ་མི་མངོན་པས་གཉེན་པོའི་འཛིན་པ་ལས་གྲོལ། རིག་པ་ཆོས་སྐུར་གྲུབ་པ་ལ་ཆོས་ཅན་གྱིས་གཏན་ཚིགས་མེད་པས་མཐའ་བྲལ་ཆེན་པོའི་ཡེ་ཤེས་སུ་ཟང་ཐལ། རྣམ་རྟོག་རིག་པར་གྲོལ་བས་ལྟ་སྒོམ་སྤྱོད་འབྲས་ཀྱི་རྫུན་ཕུག་རྡིབ་ནས་ཆོ་ག་དང་ཆོས་སྤྱོད་ཀྱིས་མི་གདུང་ཡང་སྤྲོས་པ་མེད་པའི་ཆོས་ཉིད་བྱང་ཆུབ་ཀྱི་སེམས་དང་མི་འབྲལ། ཆོས་བརྒྱད་ཀྱི་རྟོག་པ་མེད་ཀྱང་དཀོན་མཆོག་དང་ལས་འབྲས་ལ་གུས་པ་མི་ལྷོད་པས་བྱ་བྱེད་ཐམས་ཅད་སེམས་ཅན་གྱི་དོན་དུ་སོང་། རེ་དོགས་ཡུལ་མེད་དུ་སངས། ཁྲེལ་ཡོད་དང་ངོ་ཚ་ཤེས་པས་ཆགས་སྡང་དང་ཐོ་ཅོའི་སྤྱོད་པས་གཞན་སུན་མི་འབྱིན། ཐ་སྙད་དང་གྲུབ་མཐའ་ལ་མ་སྦྱངས་ཀྱང་རང་བཞིན་རིག་པའི་རྩལ་ཡེ་ཤེས་སུ་རྒྱས་པས་ཐ་སྙད་ཀྱི་རྣམ་བཞག་ཀུན་ལ་མ་རྨོངས་ཀྱང་། ང་རྒྱལ་དང་འགྲན་སེམས་མེད། མཉམ་བཞག་ལ་སྐྱོང་སྒོམ་མེད་ཀྱང་རྗེས་ཐོབ་རིག་ཆ་ཡོད་པས་མི་ཚེ་རི་ལ་སྐྱེལ་བ་ཡིན་གསུངས། ད་ལྟ་རང་རེའི་བླ་མ་རྣམས་ཀྱང་དེ་འདྲ་བ་ཤ་སྟག་ཏུ་བཞུགས་པ་མངོན་སུམ་ཡིན་ན་རང་ཅག་རྣམས་ཆོས་རྒྱུད་འདི་ལྟ་བུ་ལ་འཇུག་ཏུ་ཡོད་པ་སྐལ་བ་རེ་བཟང་། ཕ་རྗེས་བུ་ཡིས་ཟིན་པ་ཞིག་ངེས་པར་དགོས་གསུངས། དབྱིངས་སྤྲོས་པ་དང་བྲལ་བ་ལ་མཉམ་པར་བཞག་ན་ལར་ཡིན་ཀྱང་ལུང་མ་བསྟན་ཀུན་གཞི་རུ་འཆོར་ཉེ་བས་རིག་པ་གསལ་ངར་དང་ལྡན་པ་ངོས་འཛིན་དགོས་གསུངས། འདི་འབྲུག་པའི་ཞལ་རྒྱུན་ཡིན་གསུངས། མི་ཕམ་རིན་པོ་ཆེས་རྟོགས་ལྡན་ལ་དབྱིངས་སྨྲས་ཀྱང་རིག་པ། རིག་པ་བརྗོད་ཀྱང་དབྱིངས་སུ་གོ་བས་རྟོགས་ན་དོན་གཅིག་མིང་གི་བྱེ་བྲག་ལས་ཁྱད་པར་མེད་ཅེས་གསུངས། ཡང་མཉམ་བཞག་ལེགས་པར་བྱས་ནས་རང་རེ་ནང་ནས་ཡེ་ཤེས་སད་ནས་སྣང་ཡུལ་ཡེ་ཤེས་སུ་མ་ཤར་ན། རང་ང་ཐམས་ཅད་ཡེ་ཤེས་སོ་སྙམ་ན་རྒྱས་འདེབས་སུ་ཤོར་འགྲོ་ནི་རེད། དེ་ལྟར་མ་བྱེད་ཞིབ་ཆ་གྱིས་གསུངས། ཡང་ཐོག་མའི་གཞི་ཤེས་དགོས། གཞི་དེ་ལ་འཁོར་འདས་འབྱུང་རུང་གི་གདངས་ཙམ་ཡོད་པ་ཤེས་དགོས། དེ་འདྲའི་གཞི་སྣང་ཡེ་ནས་ལྷུན་གྲུབ་ཤེས་དགོས། དེ་ལ་གྲོལ་འཁྲུལ་འབྱུང་བའི་རྒྱུ་རྐྱེན་ཚང་བ་ཤེས་དགོས། དེ་འདྲའི་ལྷུན་གྲུབ་ཀྱི་སྦུབས་གསུམ་འདི་གཅིག་མ་ཤེས་ན་རྫོགས་ཆེན་གྱི་དགོངས་པ་ལེགས་པར་ཤེས་རྒྱུ་མ་རེད་གསུངས། སེམས་ཅན་ཕལ་བ་རྣམས་ནི་ང་དང་ང་ཡིར་འཛིན་པས། ཡོད་མ་མྱོང་བས་འཁྲུལ་སྣང་གློ་བུར་བ་ལ་ཞེན་ནས་བསླུས་པ་ཡིན་པས། རྣལ་འབྱོར་བ་རྣམས་ཀྱིས་ངོ་བོ་ཡེ་སྟོང་རྩ་བྲལ། ལྟོས་གཞི་ལས་འདས་པ། སྒྱུ་ལུས་རྗེས་མེད་ནམ་མཁའ་ལྟ་བུ་དེའི་ངང་ལས་རྩལ་སྣང་ཇི་ལྟར་མཆེད་ཀྱང་། མེད་སྣང་སྟོང་པའི་རང་གཟུགས་ཤར་གྲོལ་རིས་མེད་དུ་དྭངས་སུ་བཅུག་པ་ཙམ་ལས་རྣམ་འགྱུར་གཞན་དུ་སོང་མ་མྱོང་བར་ཐག་ཆོད་པར་བྱའོ། །དེ་ཡང་དཔེར་ན་སྨིག་རྒྱུ་ཆུ་ཉིད་དུ་སྣང་བའི་དུས་ཆུར་ཡེ་ནས་མེད་པས་ཆུ་མ་ཡིན་པར་གྲོལ་ཟིན་པ་ལ་དེ་ལྟར་ཤེས་ནས་ཐག་ཆོད་པ་ཙམ་ལས་གཟོད་གྲོལ་མི་དགོས་པ་བཞིན་ནོ། །ཆོས་དབྱིངས་མཛོད་ལས། མི་འགྱུར་སྤྲོས་དང་བྲལ་བའི་རིག་པ་ལ། །ཤར་བ་ཡེ་ཤར་གནས་པ་ཡེ་གནས་ལ། །གྲོལ་བ་ཡེ་གྲོལ་ནམ་མཁའི་རང་བཞིན་ནོ། །ཞེས་སོ། །རང་གྲོལ་ནི། སྣང་གྲགས་ཀྱི་ཆོས་ཐམས་ཅད་རང་ཤར་རང་གྲོལ་རང་ཡལ་ལམ་རིག་པ་ཟང་ཀ་ཆོས་སྐུའི་ནང་དབྱིངས་སུ་ཀ་དག་རྗེན་པར་གནས་པ་དེར་ངོ་ཤེས་ནས་རང་ས་ཟིན་ན་རྩལ་ལས་ཤར་བའི་རྣམ་རྟོག་ཐམས་ཅད་སྦྲུལ་གྱི་མདུད་པ་བཞིན་རང་ཡལ་རྗེས་མེད་དུ་དག་པ་སྟེ། སྔ་མ་ལས། ཤར་བའི་དུས་ན་རང་ཤར་རང་ས་ཟིན། །གནས་པའི་དུས་ན་རང་གནས་རང་ས་ཟིན། །གྲོལ་བའི་དུས་ན་རང་གྲོལ་རང་ས་ཟིན། །ཞེས་སོ། །ཅེར་གྲོལ་ནི། རྟག་ཏུ་རིག་པ་རྒྱུན་ཆད་མེད་པ་ཆུ་བོའི་རྒྱུན་བཞིན་ཡོད་པ་དེའི་རྩལ་མ་འགགས་པ་ལས་ཆགས་ཡུལ་ལམ་སྡང་ཡུལ་སོགས་གང་ཡང་རུང་བ་ཞིག་མིག་ལམ་དུ་མཐོང་བའི་ཚེ་ཆགས་སྡང་གི་རྣམ་རྟོག་འཕྲོ་བར་རྩོམ་པ་ན། དེ་ལ་མ་ཞེན་པར་ཅེར་གྱིས་རིག་ཐོག་ཏུ་རྗེན་པར་བཞག་པས་གཟུང་འཛིན་དུ་འབྲེལ་ནས་འཁོར་བའི་བག་ཆགས་སོགས་པའི་སྒྱུ་ལུས་ཀྱི་གཞི་ཀུན་དང་བྲལ་ཏེ་ཤར་གྲོལ་རྒྱུན་ཆད་མེད་པར་ཤུགས་ཀྱིས་འབྱུང་སྟེ། ཀློང་དྲུག་པ་ལས། ཐོག་བབ་ཆེན་པོའི་སེམས་ཉིད་ལ། །སྣང་བ་ཐད་ཀར་རང་སར་དག །ཅེས་དང་། སྔ་མ་ལས། ཤར་གནས་གྲོལ་གསུམ་ཤར་གྲོལ་རྒྱུན་ཆད་མེད། །རྒྱུན་ཆད་མེད་པས་སྒྱུ་ལུས་བར་མ་ཆོད། །སོགས་སོ། །ཆོས་སྐུ་ཐིག་ལེ་ཉག་གཅིག་ཡེ་ཤེས་ཟང་ཐལ་གཅིག་པོ་འོག་མའི་ལམ་གྱི་ཐབས་ཤེས་རབ་ལྟ་བུའི་རྐྱེན་ལ་མ་ལྟོས་པར་རྗེན་པར་རིག་པའི་ངང་དེར་མ་གྲོལ་བའི་རྟོག་པ་གང་ཡང་མེད་པས་དེའི་ངང་མ་ཤོར་ན་ལུས་ཀྱི་འགྲོ་འདུག་དང་། ངག་གི་སྨྲ་བརྗོད་ཡིད་ཀྱི་བསམ་རྟོག་ཐམས་ཅད་མེད་པ་གསལ་སྣང་ཙམ་ལས་རིག་པའི་ངོ་བོར་མ་གྲུབ་པས་མཚན་ཉིད་མེད་པ་ནི། རྒྱལ་བའི་སྐུ་གསུང་ཐུགས་སུ་རང་ཤར་བ་སྟེ། སྔ་མ་ལས། ཇི་ལྟར་འདུག་ཀྱང་རང་གི་ངང་ལ་འདུག །ཇི་ལྟར་གནས་ཀྱང་རང་གི་ངང་ལ་གནས། །ཇི་ལྟར་འགྲོ་ཡང་སོགས༴ བསམ་རྟོག་བྲལ་བ་དུས་གསུམ་རྒྱལ་བའི་ཐུགས། །ཞེས་གསུངས། དོན་ལ་རིག་པའི་ངང་ལས་མ་གཡོས་པས་རིག་པ་འགྲོ་འོང་སྨྲ་བརྗོད་དྲན་རྟོག་ཐམས་ཅད་ཀྱི་ཡུལ་ལས་འདས་པར་བཞུགས་པའོ། །དེ་ལྟར་རིག་པ་གཅིག་པུའི་ངང་ལས་མ་གཡོས་ན་སྐུ་གསུམ་གྱི་དགོངས་པ་ཡང་དེ་ལས་གཞན་ན་མེད་དེ། དེ་ཉིད་ལས། མེད་ལ་ཅིར་ཡང་འབྱུང་བ་སྤྲུལ་བའི་སྐུ། །སོགས་ནས་འབྲས་བུའི་སྐུ་གསུམ་ལྷུན་གྱིས་གྲུབ་པའི་ཀློང་། །ཞེས་སོ། །ལ་བཟླ་ཞེས་པ་ནི། ཤེས་ཤིང་ཐག་ཆོད་པའི་དོན་ཏེ་འདི་ལྟར་མེ་གཅིག་གི་མཚན་ཉིད་ཤེས་པ་དང་བུ་རམ་གཅིག་གི་རོ་ཤེས་པས་བུ་རམ་ཐམས་ཅད་མངར་བ་དང་མེ་ཐམས་ཅད་ཚ་བ་སྟེ། བྱང་ཆུབ་སེམས་འགྲེལ་ལས། །མེ་ཡི་རང་བཞིན་ཚ་བ་དང་། །བུ་རམ་རང་བཞིན་མངར་བ་ལྟར། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་གཅིག །ཅེས་སོ། །གནས་ལུགས་རང་ངོ་ཤེས་པ་ཙམ་ཉིད་ལ། །སངས་རྒྱས་ཞེས་སུ་མིང་དུ་བཏགས་པར་ཟད། །ཅེས་སོ། ༈ །དང་པོ་འཆར་གཞི་ཁྲེགས་ཆོད་ཀྱི་གླེང་གཞི་ནི། སྙིང་ཙིཏྟ་རིན་པོ་ཆེ་མཆོང་གུར་ཕུབ་པ་ལྟ་བུ་གནས་ཕུན་སུམ་ཚོགས་པ། རིག་སྟོང་ཆོས་སྐུ་ཐིག་ལེ་ཉག་གཅིག་སྟོན་པ་ཕུན་སུམ་ཚོགས་པ། རང་སྣང་ཡེ་ཤེས་ཀྱི་ཚོམ་བུ་འཁོར་ཕུན་སུམ་ཚོགས་པ། རིག་སྟོང་ཆོས་སྐུ་ཐིག་ལེ་ཉག་གཅིག་མངོན་སུམ་རྟོགས་ནས་ཉམས་སུ་མྱོང་བའི་ཆ་ནས་ཆོས་ཕུན་སུམ་ཚོགས་པ། ལུས་ཀྱི་རྟེན་འབྲེལ་ཚང་བའི་ཆ་དུས་ཕུན་སུམ་ཚོགས་པའོ། །གཉིས་པ་འཆར་བ་ཡུལ་གྱི་གླེང་གཞི་ནི། ཕྱི་འདུས་བྱས་རྡུལ་བྲལ་ནམ་མཁའི་དབྱིངས་སུ་དབྱིངས་རྣམ་དག་གི་སྒྲོན་མ་གནས་ཕུན་སུམ་ཚོགས་པ། རིག་གདངས་རྡོ་རྗེ་ལུ་གུ་རྒྱུད་སྟོན་པ་ཕུན་སུམ་ཚོགས་པ། སྐུ་དང་ཡེ་ཤེས་འཁོར༴ རང་སྣང་ཡེ་ཤེས་ཀྱི་དཀྱིལ་འཁོར་མངོན་སུམ་དུ་རྟོགས་ནས་ཉམས་སུ་མྱོང་བའི་ཆ་ནས་ཆོས༴ བཞུགས་སྟངས་དང་གཟིགས་སྟངས་འཛོམས་པ་དུས་ཕུན་ཚོགས་པའོ།། གོལ་ས་གསུམ་སོགས་བཤད་པ།གོལ་ས་གསུམ་ནི་ཀུན་གཞི་ནི་ཤེས་པ་ལུང་མ་བསྟན་ཁ་ཕྱི་བལྟས་ཀྱི་ཤེས་པ་ངོ་བོ་རྟོག་མེད། རྣམ་པ་དྭངས་གསལ། སྣོད་བཅུད་ཆེན་པོ་ལ་དམིགས་པ། ཨི་སྣང་ན་སྣང་། ཨི་འཛིན་ན་མི་འཛིན། ཕྱིའི་ཡུལ་ལ་གཏད། ནང་དུ་མ་བསྒོམ་བར་མ་བཞག །འཁྲུལ་ནི་མ་ཡིན་དུབ་ཆ་དང་འཐིབ་ཆ་སོགས་གང་ཡང་མེད་པ་ངོ་བོ་ཀུན་གཞི་ཤིན་ཏུ་རྟོག་མེད། རྣམ་པ་ཀུན་གཞིའི་རྣམ་ཤེས་གསལ་རིག་རིག་པ་དཔེར་ན་བཙས་མ་ཐག་པའི་བྱིས་པའི་སྣང་བ་བཞིན་ཏུ་ཡུལ་སྣང་སྒོ་ལྔའི་རྣམ་ཤེས་ཡུལ་ལ་མ་མཆེད་པས་བུམ་སོགས་ཡུལ་ལ་འཛིན་པའི་སྤུ་རིས་ཀྱི་བྱེ་བྲག་མི་ཕྱེད་པས་འདི་ཡིན་འདི་མིན་གྱི་སྟངས་མ་ཕྱེད་པ་ཡིན། ཀློང་ཆེན་པས། མི་ཞིག་དཀའ་བའི་ཤུགས་ཀྱིས་རྟོག་པ་རྒྱུན་འགགས་པ་ཀུན་གཞི་ཡིན་གསུངས། ཐ་མལ་བ་རྣམས་དཀའ་བའི་ཤུགས་དང་། འཇིགས་སྣང་དང་། དྲན་བརྗོད་ཀྱི་དུས་སུ་ཀུན་གཞི་དེ་ཉིད་རྐྱེན་གྱིས་བསྐྱེད་ནི་རེད། རྣལ་འབྱོར་པས་སྒོམ་སྟོབས་ཀྱིས་བསྐྱེད་ནི་རེད། ལྷག་མཐོང་དང་འོད་གསལ་རིག་པའི་རྒྱལ་པོ་སྙིང་དབུས་སུ་སད་པའི་ཚེ་དེ་མིན། གཞན་དུ་ཆོས་ཐམས་ཅད་བདེན་སྟོང་གི་ཤེས་རབ་དང་འགྱུ་ཆ་ལ་གྲོལ་ཆ་ཡོད་པ་སོགས་ལྷག་མཐོང་ལ་རྣམ་གྲངས་མང་གསུངས། ཅི་ལ་གནས་དང་ཏིང་ངེ་འཛིན་སྐྱོན་མེད་པ་བདག་མེད་གཉིས་རྟོགས་ཀྱི་སྟོང་ཉིད་དང་། རྫོགས་ཆེན་པས། འོད་གསལ་གྱི་ངང་ལ་གནས་པ་སོགས་ཅི་ཡང་མེད་པས་སོ།། དབང་ཤེས་ནང་ནས་མིག་ཤེས་ལ་ཡིད་ཤེས་ཀྱི་གྲོགས་བྱས་ནས་ནམ་མཁའ་ལ་གཏད་པས་ཕྱིའི་ནམ་མཁའ་དང་འདྲེས་པའི་ཉམས་འཆར་གསུངས། དེ་ཡང་རིག་པའི་ངང་བསྐྱངས་ཀྱང་སྒོམ་ཐུན་རིང་ན་རིག་པའི་ས་ཕུད་ནས་མིག་ཤེས་ལ་ཞེན་ཏེ་ནམ་མཁའ་དང་འདྲེས་པའི་ཉམས་འཆར་རྟགས་ནི། རི་མཐོན་པོའི་རྩེ་དང་ནམ་མཁའ་དྭངས་པ་དང་ཁང་པའི་སྒོ་དང་སྐར་ཁུང་ཕྱེ་བའི་དུས་སུ་སྔར་བས་ཀྱང་དྭངས་གསལ་གྱི་རྣམ་པ་འཆར་ནི་རེད་གསུངས། མིག་བཙུམ་པ་དང་། གནམ་ངོ་འཁྲུགས་པ་དང་། མུན་རུབ་ཀྱི་དུས་དང་། སྒོ་དང་སྐར་ཁུང་བཅད་དུས་འཐིབ་ཆ་བྱུང་བ་ནི་མིག་ཤེས་ལ་གོལ་བའི་འབྲས་རྟགས་ཡིན། སྟོང་གསུམ་མུན་པར་འཁྲུགས་ཀྱང་ང་མི་འཐིབ། །སྟོང་གསུམ་མེ་ལྟར་འབར་ཀྱང་ང་མི་འཚིག །ཅེས་གསུངས་པའི་དོན་ནི། རྨི་ལམ་དང་བར་དོའི་འོད་གསལ་སོགས་གང་དུ་ཟང་ཐལ་དུ་ཤར་བ་ཡིན་ཏེ། དེ་འདྲའི་ཡུལ་རྐྱེན་འཇིགས་སྐྲག་སོགས་ཀྱིས་གོས་པའི་གཡོ་བ་མེད་གསུངས། གེགས་སེལ་ནི། རི་མཐོན་པོའི་རྩེ་དང་། མིག་བཙུམ་པ་དང་། སྔོན་དུ་གྱང་ལོག་གིས་བཅད་ནས་བསྒོམ་དགོས་གསུངས། །ཡིད་ཤེས་ནི། དབང་ཤེས་མངོན་སུམ་ལ་མ་བརྟེན་པར། །ཡིད་ཤེས་རྗེས་དཔག་འབྱུང་བ་མི་སྲིད་དོ། །ཞེས་གསུངས། དབང་ཡུལ་ཤེས་གསུམ་འཕྲད་དུས་དབང་ཤེས་ཀྱིས་མངོན་སུམ་རེད། ཡིད་ཤེས་ཀྱི་ཡུལ་རྗེས་དཔག་ཡིན་པས་ཡིད་ཤེས་ཀྱི་ཡུལ་རྣམས་རང་གི་མངོན་སུམ་ཡིན་སྣང་ཤར་ཀྱང་མངོན་སུམ་མ་རེད། རྗེས་དཔག་རེད། རྗེས་དཔག་གི་ཡུལ་ཤེས་ནི་དེ་ཤེས་རྒྱུད་གཅིག་ཡིན་ནི་གི་ཡིན་གསུངས། ཡིད་ཤེས་ཀྱི་ཉམས་བདེ་གསལ་མི་རྟོག་གསུམ་དང་། དེ་གསུམ་གང་ཡང་ཤན་མ་ཕྱེད་པས་སྟོང་ཧད་ཧད་པོ་དང་བཞི་པོ་འདི་ཡིད་ཀྱི་ཡུལ་དུ་མྱོང་བྱ་ཡིན། མྱོང་བྱེད་དེ་རྣམས་འཛིན་མཁན་གྱི་ཡུལ་ཅན་ཡིད་ཤེས་ཡིན་གསུངས། ཉོན་ཡིད་ནི། ཉམས་རྣམས་གང་རུང་ལ་ཆགས་ཤིང་ཞེན་པས་འབྲལ་མི་ཕོད་པ་ལྟ་བུ་འདོད་ཆགས། རྩུབ་ཉམས་དང་ཡིད་མི་བདེ་བ་སོགས་བྱུང་ན་དེ་འདོར་བའི་རྣམ་པས་མནར་སེམས་ཅན་ཞེ་སྡང་། འདོར་ལེན་གྱི་རྣམ་པ་མིན་པའི་བར་མའི་རྣམ་པར་རྟོག་པ་གཏི་མུག །དེ་ལྟ་བུའི་ཀུན་གཞི་ལུང་མ་བསྟན་དང་། སྒོ་ལྔའི་རྣམ་ཤེས། མིག་ཤེས་ཤས་ཆེ་བའི་མིག་ཤེས་དང་། ཡིད་བདེ་གསལ་མི་རྟོག་གསུམ་དང་། དེ་གསུམ་ཤན་མ་ཕྱེད་པས་སྟོང་ཧད་ཧད་པོ་དང་བཞི་པོ་འདི་གོལ་ས་ཆེན་པོ་གསུམ་ཡིན་ཏེ། རང་གི་ཉམས་ལེན་དང་གོལ་ས་དེ་རྣམས་ནོར་མི་ནོར་བརྟགས་དཔྱད་ལེགས་པར་ཤིན་ཏུ་བྱེད་པ་གལ་ཆེ། རེས་འོད་གསལ་ལ་མཉམ་པར་བཞག་རེས་གོང་གི་གསུམ་པོ་སེམས་ཐོག་ཏུ་བླངས་ཏེ་བསྒོམས་ནས་རེས་མོས་བྱས་ཏེ་བསྒོམས་པས་གོང་གི་གོལ་ས་དེ་རྣམས་དང་འདྲེས་མ་འདྲེས་ཤན་ལེགས་པར་འབྱེད་པ་ཡིན་ནོ་གསུངས། ༈ སེམས་ཅན་གསར་སྐྱེ་ཡོད་མེད་ཅེས། ཐེག་པ་འོག་མ་སྤྱིའི་ཆོས་སྐད་དང་། སྔ་རབས་ཀྱི་བླ་མ་འགའ་ཞིག་རྣམས་ཀྱིས་གསར་སྐྱེས་མེད་པར་བཞེད། རང་ལུགས་ལ་ཡོད་དེ་སྤྱི་གཞི་ཐོག་མའི་ཀློང་དང་འཆར་ལུགས་དྲུག་ཡན་ཆོད་ལ་སེམས་ཀྱི་མིང་མ་གྲུབ་པས་སོ། །རང་ངོ་ལ་རིག་མ་རིག་གི་ཐ་སྙད་ལས་འདས་པའི་ཕྱིར་རོ། །འཛིན་ལུགས་ལ་རིག་གདངས་ཤར་བ་དེ་ཉིད་ངོ་མ་ཤེས་པས་རྒྱུ་བདག་ཉིད་གཅིག་པའི་མ་རིག་པ་སོགས་སེམས་ལ་གཉིས་འཛིན་སྐྱེས་པས་སེམས་ཅན་རེད། ཡུལ་ཡུལ་ཅན་གཉིས་པོ་གློ་བུར་བྱུང་། གོང་གི་འཆར་གཞི་ལས་མ་བྱུང་། ཕྱིས་འཛིན་པ་ལས་བྱུང་བས་གསར་སྐྱེས་སོ། །དགེའོ།། བཀྲ་ཤིས།། །། རྫོགས་ཆེན་ཉམས་སུ་ལེན་ཚུལ་གནད་བསྡུས།རྫོགས་པ་ཆེན་པོའི་ལམ་ཉམས་སུ་ལེན་ཚུལ། སྤྱིར་འོད་གསལ་རྫོགས་པ་ཆེན་པོའི་ལམ་ཉམས་སུ་ལེན་པ་ལ། སྔོན་འགྲོ་དངོས་གཞི་རྗེས་གསུམ་ཡོད་པ་ལས། དང་པོ་སྔོན་འགྲོ་སེམས་ཀྱི་ཁང་བུ་བཤིག་པའི་མན་ངག །དེ་ལ་རྩད་བཅད་པ། མཚང་བཙལ་བ། བྱུང་གནས་འགྲོ་གསུམ་ལ་བརྟག་པ་དང་གསུམ་ཡོད་པ་ལས། དང་པོ་རྩད་བཅད་པ་ནི། རྐུན་པོ་ངོས་འཛིན་ལྟ་བུའི་མན་ངག་ཁམས་གསུམ་འཁོར་བའི་འཁོར་རྩ་ངོས་ཟིན་དགོས་པ་ཡིན། འདིའི་སྐབས་སུ་དེང་སང་གི་ཁྲིད་མཁན་ཕལ་ཆེར་གྱིས་སློབ་བུ་རྣམས་ལ་ཁྱོད་ཀྱི་ལུས་ངག་ཡིད་གསུམ་གཙོ་གང་ཆེ་དཔྱོད་ཀྱིས་ཟེར། དེས་ཀྱང་ཁ་ཁ་རྒྱུག་མཆུ་མཆུ་རྒྱུག་ཙམ་གྱིས་ཁོས་ཅིག་བསམ་འདུག་གི ཐོག་མར་འཁྲུལ་མཁན་སོགས་སེམས་ཡིན་པས་སེམས་གཙོ་ཆེ་ཟེར། ཡང་དེ་ལ་ཁྱོད་ཀྱི་སེམས་ལ་ཁ་དོག་དང་དབྱིབས་གཟུགས་སོགས་ཡོད་མེད་དང་བྱུང་གནས་འགྲོ་གསུམ་ལ་རྟོག་དཔྱོད་གྱིས་དང་ཟེར། དེས་ཀྱང་ཅི་ཡང་མེད་གི་ཟེར་བ་ཙམ་ན་ཁྱོད་ཤེས་ཡོད་གི་ད་མ་བཅོས་པར་ཞོག་ལ་ཨ་གཏད་སོགས་སུ་ལྟོས་ནས་བསྒོམ་ཟེར་ན འང་། དེ་འདྲ་འཆད་པ་ལ་ཕྱི་སྒོ་ཕྱི་ནས་བསྡམ། ནང་སྒོ་ནང་ནས་བསྡམས་ཏེ་གསང་རྒྱ་དམ་པོར་བྱེད་མི་དགོས། དེ་ཕྱག་རྫོགས་དབུ་གསུམ་གང་གི་ཡང་ལུགས་མ་རེད། དེ་ལྟ་བུ་ཞིག་ཇོ་རྒན་མ་ཞིག་གིས་ཀྱང་ཤེས་ནུས་པས་དེ་ཙམ་སྟོན་པའི་ཆེད་རྡོ་རྗེ་འཆང་བྱོན་ཡང་མི་དགོས་པས་སྲོལ་ངན་དེ་ཕྱིན་ཆད་སྣུབ་ཐུབ་དགོས་གསུངས། རང་ལུགས་ལ་གང་ཟག་གི་བདག་འཛིན་འཁོར་རྩར་བཞེད་པས་བློ་ཕྱིན་ཅི་ལོག་གི་ངོར་ཕུང་པོ་ལྔའམ་ལུས་ངག་ཡིད་གསུམ་ལ་བདག་གམ་ངར་སྣང་ངོ་། །དེ་ལ་བདག་ཏུ་འཛིན་པའམ་ངར་འཛིན་པར་བྱེད་པས་དེ་ཉིད་དགག་བྱའི་སྣང་ཚུལ་ངེས་པ་ཟེར་བ་ཡིན་པས་གང་ཟག་གི་བདག་འཛིན་འཁོར་རྩར་བཞེད་པ་ཡིན། ཆོས་ཀྱི་བདག་འཛིན་ཤེས་སྒྲིབ་ཡིན་པར་འདོད་དོ། །རྒྱལ་ཚབ་བྱམས་པས། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་གསུངས་པ་དེ་མདོ་ནས་སྔགས་ཀྱི་བར་དུ་དེ་ལྟར་ཁས་ལེན་པ་ལས། གཞན་དུ་སྒྱུར་མི་དགོས། གཞན་གྱི་ལྷན་པོ་རྒྱབ་མི་དགོས་གཞན་དང་བསྲེ་མི་དགོས་བསྲེ་ན་མི་འགྲིགས། ཇི་ལྟར་མི་འགྲིགས་ན། ཕྱི་རབས་པ་དག་གིས་དགག་བྱ་ལ་བདེན་གྲུབ་སྦྱར་ནས་དེ་ཉིད་དགག་བྱ་ངེས་པར་བཞེད་ནས་བདེན་འཛིན་ཉོན་སྒྲིབ་ཏུ་འདོད་པས་ཆོས་ཀྱི་བདག་འཛིན་ཡང་འཁོར་རྩར་བཞེད་པས་གང་ཟག་གཅིག་གིས་བློ་ངོར་འཁོར་རྩར་འདོད་ཚུལ་མི་འདྲ་བ་གཉིས་བཟུང་མི་བདེ་བས་མི་འགྲིགས། གཞན་ཡང་རང་ལུགས་ལ་ཉན་རང་གིས་ཆོས་ཀྱི་བདག་མེད་ཡོངས་སུ་རྫོགས་པར་མ་རྟོགས་པར་འདོད་པ་དང་། གཞན་གྱིས་ཉན་རང་གིས་ཆོས་ཀྱི་བདག་མེད་རྫོགས་པར་རྟོགས་པར་འདོད་པ་སོགས་ཡིན་པས་དེ་གཉིས་བསྲེ་ན་མི་འགྲིགས་པས། དཔེར་ན་གྲོ་མ་དང་མར་ཁུ་བསྲེས་པ་ལྟ་བུའི་གཅིག་ལ་གཅིག་གིས་ཕན་ཐོག་པ་གཅིག་གྲོགས་གཅིག་གིས་བྱེད་པ་ཞིག་ཡིན་ན་བསྲེ་ཆོག་པ་ལ་དེ་མིན་པས་བསྲེ་མི་དགོས། དཔེར་ན་རང་ལུགས་ལ་ངེས་ཤེས་གཏིང་ནས་སྐྱེ། ཕུ་ཐག་ནང་ནས་ཆོད་པར་བྱེད་པ་གལ་ཆེ། གཞན་ལུགས་ལ་ཡང་དེང་ནས་བྱང་ཆུབ་སྙིང་པོའི་བར་དུ་དད་པ་དག་སྣང་བྱེད་པ་གལ་ཆེ་བས་དེ་ནི་སྐྱེ་བོ་ཡ་རབས་ཀྱི་ལུགས་ཡིན་གསུངས། སྤྱིར་བོད་འདིར་གྲུབ་མཐའ་ཉི་ཚེ་ཞིག་དང་བདུན་ཡོད་པས་དེ་དག་ཐམས་ཅད་ལ་རང་རང་གི་ལམ་ནས་རྣམ་གྲོལ་བྱང་ཆུབ་སྒྲུབ་པའི་ལམ་ཚང་ལ་མ་ནོར་བ་རེ་ཡོད་པ་ཡིན་པས་དེ་རྣམས་ཕན་ཚུན་བསྲེ་མི་དགོས་གསུངས། ༈ གཉིས་པ་མཚང་བཙལ་བ་ནི། བདག་འཛིན་དེས་ཇི་ལྟར་འཛིན་ན་རིལ་པོ་གཅིག་བདེན་དུ་འཛིན། དེ་ཉིད་ལྡོག་བྱེད་ག ཅིག་གི་གཉེན་པོ་དུ་མ་ཡིན་པས་ཕུང་པོ་ལྔ་དང་། དེ་ཡང་གཟུགས་ཀྱི་ཕུང་པོ་ལྟ་བུ་ལ་མཚོན་ན་རྡུལ་ཕྲན་ཆ་མེད་དུ་བཤིག་ན་གཅིག་ཡིན་པ་དང་འགལ་ལ། བདེན་པའི་གཉེན་པོ་རྫུན་པ་དང་མི་རྟག་པ་ཡིན་པས་སྐད་ཅིག་སྐད་ཅིག་གིས་འགྱུར་བའི་བདག་ཉིད་ཅན་དེ་ཕྲ་བ་ཆོས་ཉིད་ཀྱི་མི་རྟག་པ་དང་། རགས་པ་རྒྱུན་གྱི་མི་རྟག་པ་ཡིན་པས་རྒྱུ་རྐྱེན་རྟེན་འབྲེལ་ཙམ་ལས་བདེན་པར་གྲུབ་པ་མེད་པའི་ཕྱིར་ན་དེ་ལྟར་རྟོགས་ཚེ་བདག་འཛིན་རང་ལོག་ཏུ་འགྲོ་བས་གང་ཟག་གི་བདག་མེད་རྟོགས་པ་རེད། ལུས་ངག་ཡིད་གསུམ་གཙོ་གང་ཆེ་བརྟགས་པའི་སྐབས་འདིར་སེམས་གཙོ་ཆེ་བར་འདོད་ཀྱང་། ཞིབ་པར་བརྟགས་ན་ལུས་ཀྱང་གཙོ་ཆེ་སྟེ། སངས་རྒྱས་ཀྱི་བསྟན་པའི་སྒོར་འཇུག་པ་ལ་སོར་བྱང་སྔགས་གསུམ་མིན་པའི་སྒོར་འཇུག་ཚུལ་མེད་པས་དེས་ན་དང་པོར་སོ་སོར་ཐར་པའི་སྡོམ་པ་རྒྱུད་ལ་སྐྱེ་བ་ལ་གླིང་གསུམ་གྱི་སྐྱེས་པ་བུད་མེད་དང་། དེའི་ནང་ནས་ཀྱང་འཛམ་བུའི་གླིང་གི་ལུས་རྟེན་ཁྱད་པར་ཅན་དགོས་ཏེ། གཞན་ལྷ་དང་། ཀླུ་དང་། ནམ་མཁའ་ལྡིང་སོགས་ལ་མི་སྐྱེ། སངས་རྒྱས་དངོས་སུ་བྱོན་ཀྱང་ཕན་པའི་ཐབས་མེད། ལྷ་དང་ཀླུ་ལ་སོགས་པ་ལ་བྱང་སེམས་ཀྱི་སྡོམ་པ་ཙམ་སྐྱེ་བ་ཡོད་ཀྱང་སེམས་ཁོ་ནས་མི་ཡོང་། ལུས་ངག་ཡིད་གསུམ་ཚོགས་དགོས། སྔགས་བླ་མེད་ཀྱི་སྒོར་འཇུག་པ་ལ་ཁམས་དྲུག་ལྡན་གྱི་མིའི་ལུས་རྟེན་ཞིག་མིན་ན་དབང་བཞིའི་སྣོད་དུ་མི་རུང་སྟེ་མཚུངས་ལྡན་གྱི་རྒྱུ་མེད་པའི་ཕྱིར། དེ་བཞིན་ཏུ་དལ་འབྱོར་བཅོ་བརྒྱད་ཚང་བ་ལ་ཡང་ལུས་གཙོ་ཆེ་སྟེ་དཔེར་ན་བྱིས་པ་བཙས་མ་ཐག་པ་ཞིག་ལ་མིག་དང་རྣ་བ་གཉིས་ཀ་མེད་ན་མཐོང་ཐོས་གང་ཡང་མེད་པས་ཆོས་དང་འཇིག་རྟེན་གཉིས་ཀྱི་བྱ་བ་ཅུང་ཟད་ཙམ་ཡང་བསྒྲུབ་མི་ཤེས་པས་ལུས་ཀྱང་གཙོ་ཆེ་སྟེ། དེ་བཞིན་དུ་ངག་ཀྱང་གཙོ་ཆེ་བར་གསུངས་ཏེ་སྤང་བླང་གི་གནས་སྟོན་པ་ལ་ངག་མཚན་ཉིད་ཚང་བ་སྨྲ་ཤེས་ཤིང་བརྡ་འཕྲོད་པ་ཞིག་ངེས་པར་དགོས་ཏེ། དེ་མེད་ན་དུད་འགྲོའི་སྒྲ་སྐད་ཙམ་གྱིས་མི་ཕན། ལུས་ངག་ཡིད་གསུམ་ལ་བརྟེན་ནས་འབྱུང་སྟེ། ལུས་ཀྱི་བྲང་དང་མིད་པ་ལྕེ་དང་སོ་རྐན་སོགས་ལ་བརྟེན་ཏེ་སེམས་ཀྱིས་ཀུན་ནས་བསླང་ཏེ་རླུང་གི་རྟ་ལ་ངག་ཡི་གེའི་ཕྲེང་བ་ལ་བརྟེན་པ་ཚིག་དོན་ཐམས་ཅད་འབྱུང་བས་ངག་གཙོ་ཆེ། སེམས་རྣམ་ཤེས་ཚོགས་བརྒྱད་དང་འཁོར་སེམས་བྱུང་ལྔ་བཅུ་དང་བཅས་པ་དེ་མེད་ན་རོ་རེད། ཐོག་མར་འཁོར་བར་སྐྱེ་བ་པོ་སེམས་རེད། ལུས་ངག་གཉིས་འདོར་ལེན་བྱེད་འགྲོ་ནི་རེད། བདག་འཛིན་མ་རིག་འཁྲུལ་བའི་དབང་གིས་སྣང་། སྣང་བ་ལྟར་དུ་ཞེན། ཞེན་པ་ལྟར་དུ་ཨ་འཐས་བདེན་འཛིན་གྱིས་བདག་དང་བདག་གིར་འཛིན་པའམ་ང་དང་ང་ཡི་བར་འཛིན་པ་སོགས་འབྱུང་བ་ཡིན་པས་ཕྱུགས་དང་ཕྱུགས་རྫི་ལྟ་བུའི་ཚུལ་གྱིས་བདག་གིར་འཛིན་པའམ་ང་ཡི་བར་འཛིན་ནི་རེད། སྤྱིར་འཁོར་བ་ཡ་མཐའ་ཐུག་མེད། སྐྱེ་བ་ཡ་མཐའ་ཐུག་མེད། འཁྲུལ་བ་ཡ་མཐའ་ཐུག་མེད་ནས་ཐ་མ་དེ་རིང་ད་ལྟ་ལ་མ་ཐུག་གི་བར་དུ་སྲིད་པ་འཁོར་བ་འདིར་འཁྱམ་ནི་རེད། དེའི་གནས་སྐབས་ནའང་འཁྱམས་པ་པོའི་གང་ཟག་དེ་ལ་མ་དག་འཁོར་བའི་གནས་ན་ལུས་ངག་ཡིད་གསུམ་མི་ཚང་བའི་སེམས་ཞིག་མེད། གང་དུ་འཁྱམས་པའི་གནས་དེ་ལ་རིགས་དྲུག་འཁོར་བའི་གནས་རིས་དྲུག་ཡོད་པས་ལུས་ཀྱང་ཐ་དད་དོ། །འདོད་ཁམས་ཀྱི་ལུས་ནི་གདོས་བཅས་ཤ་ཁྲག་གི་ལུས། གཟུགས་ཁམས་རྣམས་སུ་དྭངས་མ་འོད་ཀྱི་ལུས། གཟུགས་མེད་ན་ཏིང་ངེ་འཛིན་ཡིད་རིག་གི་ལུས་ཡོད་པར་ཐེག་ཆེན་པའི་བཞེད་པ་ལྟར་ལུས་ངག་ཡིད་གསུམ་ཚོགས་པ་ལ་བརྟེན་ནས་ལས་བསགས། ལས་ཀྱི་དབང་གིས་ཁམས་གསུམ་འཁོར་བར་སྐྱེ་ནི་རེད་མ་གཏོགས་ལས་མ་བསགས་པར་སེམས་རྐྱང་བ་འཁོར་བར་སྐྱེ་བ་མི་སྲིད་དོ། །དཔེར་ན་ལས་མ་བསགས་པར་སེམས་ཁོ་ན་སྔུན་ནས་ཉ་ལྕགས་ཀྱུས་འདྲེན་པ་ལྟ་བུ་ཁྲིད་འོང་མཁན་ཞིག་དང་། རྗེས་ནས་ཤ་བ་ཁྱིས་དེད་པ་ལྟ་བུའི་འདེད་འོང་མཁན་གཏན་ནས་ཡོད་པ་མིན། ལས་འབའ་ཞིག་གིས་བྱེད་པ་ཡིན་ཏེ། འཇིག་རྟེན་ལས་ཀྱིས་བྱས་ཤིང་ལས་ཀྱིས་སྤྲུལ། །ལས་ནི་ཀུན་བྱེད་རི་མོ་མཁན་དང་མཚུངས། །ཞེས་ཟག་བཅས་ཀྱི་ལས་དེ་ལ་དགེ་མི་དགེ་མི་གཡོ་བའི་ལས་དང་གསུམ་ཡོད། དེ་གང་བསྒྲུབ་ཀྱང་ལུས་ངག་ཡིད་གསུམ་ཚོགས་པ་ལ་བརྟེན་དགོས། སེམས་རྐྱང་བས་མི་འགྲུབ། དག་པ་སངས་རྒྱས་ཀྱི་ཞིང་ན་སྐུ་གསུང་ཐུགས་གསུམ་མི་ཚང་བའི་ཐུགས་རྐྱང་བ་ཞིག་མི་སྲིད་པས་དེ་ལྟར་ལུས་ངག་ཡིད་གསུམ་སྒྱེད་པུ་སུམ་ཚུགས་ལྟ་བུ་ཡིན་པས་གཙོ་གང་ཆེ་ངོས་ཟིན་དཀའ་ནའང་མདོ་ནས་སྔགས་ཀྱི་བར་དུ་སེམས་འདི་གཙོ་ཆེ་བར་གསུངས་ཡོད་པས་དཔྱད་སྒོ་ཙམ་ཞིག་བཏོད་ནས་ད་རང་རང་གིས་བརྟགས་ཤིང་དཔྱད་ནས་ལུང་རིགས་མན་ངག་རྣམས་དང་མི་འགལ་བ་ཞིག་ངེས་ཤེས་གཏིང་ནས་འདྲོང་བ་ཞིག་མ་སྐྱེས་ན་རྣམ་པ་མི་དག་ནི་རེད་གསུངས། ༈ གསུམ་པ་བྱུང་གནས་འགྲོ་གསུམ་ལ་བརྟགས་པ་ནི། ཁྲེགས་ཆོད་ཡེ་བབ་སོར་བཞག་དང་དེའི་ཡང་ཡིག་སོགས་སྔོན་བྱོན་གྱི་རིག་འཛིན་བརྒྱུད་པའི་གསུང་སྲོལ་མང་པོ་ཡོད་ཀྱང་། སྐབས་འདིར་རྡོ་གྲུབ་རིན་པོ་ཆེའི་ཞལ་ནས་ཉག་བླ་རིན་པོ་ཆེ་ལ་གསུངས་པ་ལྟར་འཆད་པ་ལ། ཆོས་ཐམས་ཅད་ཡུལ་དང་ཡུལ་ཅན་གཉིས་སུ་བསྡུ་ནི་རེད། དཔེར་ན་ཤེས་བྱའི་ཆོས་ཐམས་ཅད་བདེན་པ་གཉིས་སུ་བསྡུས་ནས་བསྟན་པ་ལྟར་ཡུལ་ཐམས་ཅད་བྱུང་ས་གནས་ས་འགྲོ་ས་གསུམ་དུ་བསྡུས། ཡུམ་ཅན་ཐམས་ཅད་བྱུང་མཁན་གནས་མཁན་འགྲོ་མཁན་གསུམ་དུ་བསྡུས་པ་ཡིན་ལ། དང་པོ་བྱུང་ས་བརྟགས་པའི་ཚེ་གཞི་ཞིག་ལ་སྦྱར་དགོས་པས། དཔེར་ན་མདུན་གྱི་ཀ་བ་ལྟ་བུ་ད མིགས་ཚེ། ཀ་འཛིན་མིག་ཤེས་ཀྱིས་སྐད་ཅིག་དང་པོ་ཀ་བའོ་སྙམ་པའི་ཚེ་ངའི་ཤེས་པ་འདི་ཀ་བ་ལས་བྱུང་བ་ཡིན་ནམ་མིན་སྙམ་ནས། དེའི་ཚེ་ཡུལ་ཅན་ལ་མི་དཔྱོད་པར་ཡུལ་ལ་དཔྱད་ནས་ཀ་བ་རང་གི་ངོ་བོ་ཡེ་ནས་སྟོང་བཞིན་དུ་སྣང་ཆ་མ་འགགས་པར་སྣང་བ་དང་། སྣང་བཞིན་དུ་ངོ་བོ་ཡེ་སྟོང་སྤྲོས་པ་དང་བྲལ་བའི་བདག་ཉིད་དུ་གནས་པ་ཡིན་ཏེ། སྣང་བའི་སྣང་ཚུགས་མ་ཤོར་བཞིན་དུ་སྟོང་། སྟོང་པའི་སྟོང་ཚུགས་མ་ཤོར་བཞིན་སྣང་བའི་སྣང་སྟོང་ཟུང་འཇུག་གི་བདག་ཉིད་དུ་ངེས་དགོས། གཞན་གྱིས་ཀ་བ་རང་གི་ངོ་བོས་མི་སྟོང་ཀ་བ་བདེན་གྲུབ་ཀྱིས་སྟོང་པར་འདོད། དེས་ན་བདེན་གྲུབ་ཤེས་བྱ་ལ་མི་སྲིད་པ་དང་། དོན་དམ་དཔྱོད་པའི་ངོར་མི་སྟོང་བ་གཉིས་སྣང་སྟོང་ཟུང་འཇུག་དང་། ཐབས་ཐབས་བྱུང་དང་། ཆོས་ཉིད་ཆོས་ཅན་དུ་འབྲེལ་བ་མེད་དོ། །བདེན་གྲུབ་ཤེས་བྱ་ལ་མི་སྲིད་པས། དེས་སྟོང་པའི་སྟོང་ཉིད་ཀྱང་མི་སྲིད་དེ། རྟ་བ་ལང་གིས་སྟོང་ཟེར་བ་ལྟ་བུ་ཡིན། གལ་ཏེ་སྲིད་ན་ཡང་སྣང་སྟོང་ཟུང་འཇུག་མི་རུང་སྟེ། ངོ་བོ་ཐ་དད་འདོད་པའི་སྣང་སྟོང་ཟུང་འཇུག་སྐུད་པ་དཀར་ནག་སྦྲེལ་བ་བཞིན་དུ་མི་སྲིད་པའི་ཕྱིར་རོ། །སྤྱིར་མདོ་ལངྐར་གཤེགས་པ་ན། སྟོང་ཉིད་ཐ་ཤལ་བ་ཞིག་དང་བདུན་གསུངས་ཡོད་པས་གཅིག་གཅིག་གིས་སྟོང་པ་དང་། མོ་གཤམ་བུས་སྟོང་པ་དང་། རི་བོང་རྭས་སྟོང་། དབུལ་བོ་ནོར་གྱིས་སྟོང་བ་སོགས་སྟོང་ཉིད་ཐ་ཤལ་བ་ཡིན་པས། འདི་ལྟ་བུ་ནི་ཐར་འདོད་ཀྱི་སྐྱེས་བུས་ཉམས་སུ་ལེན་བྱའམ་བསྒོམ་བྱ་མིན་ནོ། །ཀ་བ་དོན་དཔྱོད་ཀྱི་ངོར་མི་སྟོང་པར་བདེན་གྲུབ་ཀྱིས་སྟོང་པར་འདོད་པས་ནི། བདེན་གྲུབ་སོགས་ཞིག་སྣང་སྐྱེ་ཡོད་ཀྱང་མ་སྟོང་བར་ཀ་བ་བདེན་གྲུབ་རྟག་བརྟན་ཐེར་ཟུག་གི་རྣམ་པར་ཡོད་གི་གསུངས་སོ། །བླ་མ་རྒྱ་སྡེ་བས། ཀ་བ་རང་གི་ངོ་བོས་སྟོང་པར་བཞེད་ཀྱང་སྟོང་ཉིད་སྤྲོས་བྲལ་ཡིན་པར་བཞེད་པས་སྣང་ཆ་སྤངས་པའི་སྟོང་ཆ་དེ་སྤྲོས་བྲལ་ཡིན་པར་གོ་རྒྱུ་མེད། དེས་རྗེས་འབྲང་རྣམས་ཀྱིས་མི་ཕམ་ལ་སྣང་སྟོང་ཟུང་འཇུག་ནམ་དུ་ཡང་ཡོད་དགོས་ན་འཕགས་པའི་མཉམ་བཞག་ཡེ་ཤེས་ཀྱི་ངོར་ཀ་བ་སྐྱ་ཤིང་གི་རྣམ་པར་ཡོད་དགོས་སོ་ཟེར་ན་ཡང་། དངོས་སུ་དེ་ལ་ལན་གསུངས་མེད་ཀྱང་རང་ལུགས་འདོད་ཚུལ་གྱིས་ཁེགས་པ་ཡིན་གསུངས། ཡུལ་ཅན་ལ་དཔྱད་ཚེ་མིག་ཤེས་ལྟ་བུ་ལ་མཚོན་ན་ཡུལ་གསལ་ཞིང་རིག་པའི་ཆ་དེ་འོད་གསལ་གཉུག་མའི་ཡེ་ཤེས་ཀྱི་འབྲས་རྟགས་ཕྱི་ལ་ཤར་བ་ཡིན་པས། གསལ་ཞིང་རིག་པ་ཤེས་པའི་མཚན་ཉིད་གསུངས་པ་ཡིན་ཏེ། མ་གོ་བ་གོ། མ་ཤེས་པ་ཤེས། མ་རྟོགས་པ་རྟོགས་པར་བྱེད་པ་ཟེར་ནི་རེད་མ་གཏོགས་༼མར་མེ་ལྟ་བུ་༽གསལ་དཀར་བཞག་ནི་འདྲ་འདྲ་ཞིག་ཡོད་ནི་མ་རེད། དབྱིངས་སྤྲོས་བྲལ་སྟོང་ཆེན་གྱི་འབྲས་རྟགས་ཕྱི་ལ་ཤར་བས་ངོ་བོ་ཡེ་སྟོང་སྤྲོས་པ་དང་བྲལ་བ། དབྱིངས་ཡེ་ཟུང་འཇུག་གི་ཆ་ནས་ཤར་བའི་འབྲས་རྟགས་སུ་དེ་གཉིས་ཟུང་འཇུག་དབྱེར་མེད་ཀྱི་བདག་ཉིད་ཅན་ཡིན་པས་འདི་ནི་སེང་གེ་དཀར་མོའི་བུ་རྒྱུད་ལྟ་བུ་ཡིན་གསུངས། དེས་ན་རྡོ་གྲུབ་རིན་པོ་ཆེས་དབྱིངས་ཡེ་ཟུང་འཇུག་འདི་ཆོས་ཐམས་ཅད་ཀྱི་དབུས་ན་གནས་ཡོད། སྲོག་ཏུ་ཞུགས་ཡོད། ཕྱག་རྒྱས་བཏབ་ཡོད་གསུངས་པས་ན་ད་ལྟའི་སྣང་བ་འདི་དག་ཐམས་ཅད་བདེ་གཤེགས་སྙིང་པོའམ་གཉུག་མའི་འོད་གསལ་གྱི་བར་ན་གཅིག་གིས་ཀྱང་ཆོད་ཡོད་ནི་མ་རེད་༼ཕྱག་གི་མཛུབ་མོ་བསྒྲེངས་ཏེ་༽འདིའི་འབའ་རི་འབུ་ར་ཀ་སི་ཀོ་སེ་འདི་ཅིག་ཡིན་ནི་རེད་གསུངས་ཏེ་བཞད་སོང་གསུངས་སོ། །རྡོ་གྲུབ་རིན་པོ་ཆེས་སྦྱོར་དངོས་རྗེས་གསུམ་ཞིག་ཚང་དགོས། དེ་ཚང་ནས་ལོ་གསུམ་བར་ཏུ་བྱུང་གནས་འགྲོ་གསུམ་གྱི་ལྟ་བ་འདི་བསྒོམ་ནུས་ན་དངོས་གཞི་ཁྲེགས་ཆོད་སོགས་བསྒོམ་རྒྱུ་མ་བྱུང་བར་ཤི་སོང་ན་བར་དོར་གྲོལ་ཐུབ་གསུངས་ནི་རེད། འདི་ནི་ཤིན་ཏུ་ཡག་སྟེ། འདི་འདྲ་གོ་རྒྱུ་ཞིག་ཡོད་ནི་མ་རེད། གང་ཟག་དེས་བར་དོའི་སྣང་ཆ་ཐམས་ཅད་སྣང་སྟོང་ཟུང་འཇུག་ལ་སོགས་པར་ངེས་པས་མཉམ་བཞག་གི་རང་དུས་དེར་མཐའ་བཞིའི་འཛིན་པ་དང་། རྟག་ཆད་དུ་འཛིན་པ་དང་། ཆོས་དང་བདག་འཛིན་སོགས་གང་ཡང་མི་འཛིན། འདི་ནི་ལམ་ཞུགས་ཀྱང་ཡིན། རྫོགས་པ་ཆེན་པོ་ཡང་ཡིན། མདོར་ན་འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་དབྱིངས་ཡེ་ཟུང་འཇུག་གམ་སྣང་སྟོང་ཟུང་འཇུག་མིན་པ་གཅིག་ཀྱང་མེད། མ་དག་འཁོར་བའི་གནས་ན་གང་སྣང་གི་ཆོས་ཐམས་ཅད་སྣང་སྟོང་ཟུང་འཇུག་མིན་པ་གཅིག་ཀྱང་མེད། མཐར་ཐུག་འབྲས་བུའི་དུས་ན་གདོད་མའི་སྟོང་ཆེན་གྱི་དབྱིངས་ལས་ཤར་བའི་སྣང་ཆ་ཞིང་སྐུ་སོགས་ཡེ་ཤེས་རང་སྣང་གི་བཀོད་པ་མཐའ་ཡས་པར་སྣང་བ་ཡིན་གསུངས། རྣལ་འབྱོར་ལམ་པའི་གནས་སྐབས་ན་ཆོས་ཐམས་ཅད་ཀྱི་གནས་ལུགས་དབྱིངས་ཡེ་ཟུང་འཇུག་མངོན་སུམ་དུ་རྟོགས་ནས་རྗེས་ཐོབ་དུ་གང་སྣང་སྣང་སྟོང་ཟུང་འཇུག་དུ་བུན་བུན་ཤིག་ཤིག་ཏུ་ཤར་ཐུབ་པ་ཡིན་གསུངས། བླ་མ་ཉག་བླས་རྡོ་གྲུབ་རིན་པོ་ཆེ་ལ་སྐབས་འདིའི་བྱུང་གནས་འགྲོ་གསུམ་གྱི་ལྟ་བ་དང་། དབུ་མའི་ལྟ་བ་གཉིས་ལ་མཐོ་དམན་ཡོད་དམ་མེད་ཞུས་ཚེ། མཐོ་དམན་ལོས་ཡོད། དབུ་མ་མདོ་རེད། དེ་ཡན་ཆད་ན་སྔགས་ཀྱི་རྒྱུད་སྡེ་གསུམ་ཡོད། དེ་ཡན་ན་ཡང་སྔགས་ནང་རྒྱུད་སྡེ་གསུམ་དེའི་ནང་ནས་ཀྱང་ཐེག་དགུའི་ཡང་རྩེ་རྫོགས་པ་ཆེན་པོ་ཨ་ཏི་ཡོ་ག་ཡིན་པས་ཁྱད་ལོས་ཡོད། གཏེར་སྟོན་ཚང་ཁྱད་གཞིའི་སྟེང་ནས་ཁྱད་ཆོས་ཆེན་པོ་ཞིག་འཇོག་རྒྱུ་ཡོད་ནི་རེད་གསུངས། འོ་ན་འཛིན་སྟངས་ཡོད་དགོས་སམ་མི་དགོས་ཞུས་ཚེ་དེ་དགོས་ན་སྔོན་འགྲོ་སེམས་ཀྱི་ཁང་བུ་བཤིག་པ་མ་རེད་བརྩིགས་པ་རེད་གསུངས། བླ༷་མ༷་ལུང་རྟོག༷ས་ཚང་གིས་ནི་འཛིན་སྟངས་ཡོད་དགོས་གསུངས་ནི་ཡིན་ཞུས་ཚེ། འོ་གསུངས་པ་ཡིན་གསུངས། བླ་མ་ཉག་བླས་རིན་པོ་ཆེས་འཛིན་སྟངས་མེད་གསུངས་པ་ཡིན། བླ་མ་ལུང་རྟོགས་ཚང་གིས་ཡོད་དགོས་གསུངས་ནི་ཡིན། བླ་མ་ཚང་ཁྱེད་ཀྱིས་གང་ལྟར་བཞེད་པ་ཡིན་གསུངས་པས། ཁོང་གི་འཛིན་སྟངས་འཇོག་ནི་མིན་ཞུས། དེ་ན་ཁྱད་གཞིའི་སྟེང་གི་ཁྱད་ཆོས་ཇི་ལྟར་ཡོད་ལགས་ཞུས་ཚེ། སྣང་སྟོང་ཟུང་འཇུག་ངེས་པའི་ངེས་ཤེས་མར་མེ་ལྟ་བུའི་སྟེང་ནས་མཉམ་བཞག་ལ་ལྷོད་སེ་བཞག་པའི་དུས་དེར་མཐའ་བཞིའི་འཛིན་སྟངས་གང་ཡང་མེད་པས་དེའི་འབྲས་རྟགས་ལ་ངོ་བོའི་དབྱིངས་ལ་ཤར་ཆ་འགགས་མེད་དུ་འཆར་ཐུབ་པ་འདི་དབུ་མ་ལ་མེད་པའི་ཁྱད་ཆོས་ཡིན། སྤྱིར་ཁྲེགས་ཆོད་ཀྱི་ལམ་ཤར་གྲོལ་དུས་མཉམ་ཡིན་པས། དེ་དུས་ཤེས་རྒྱུད་ལ་བྱུང་གནས་འགྲོ་གསུམ་གྱི་ལྟ་བས་ཁྱབ་ཡོད་པའི་འབྲས་རྟགས་སུ་གཉེན་པོ་གཞན་བསྟེན་མི་དགོས་པར་རང་གྲོལ་དུ་འགྲོ་བ་འདི་དབུ་མ་ལ་མེད་པའི་ཁྱད་ཆོས་ཡིན། སྤྱིར་ཁྲེགས་ཆོད་ཀྱི་ལམ་ཤར་གྲོལ་དུས་མཉམ་ཡིན་པས་འདི་དངོས་གཞིའི་ཤར་གྲོལ་མཚན་ཉིད་པ་མིན་ཡང་ཤར་གྲོལ་གྱི་མགོ་འདི་ནས་རྩོམ་པ་ཡིན་པའི་གནད་ཀྱིས་འདི་ཁྲེགས་ཆོད་ཀྱི་སྔོན་འགྲོར་འགྲོ་བའི་རྒྱུ་མཚན་དེ་ལྟར་ཡིན་གསུངས། གཞན་ཡང་བྱུང་གནས་འགྲོ་གསུམ་བརྟགས་ཚུལ་ནི། གློ་བུར་འཁྲུལ་བའི་སྣང་བ་འདི་ཐོག་མའི་གཞི་དུས་ན་མེད་པས་བྱུང་སའི་གནས་ཀྱིས་སྟོང་། བར་དུ་གནས་ས་ཡང་མེད་དེ་གློ་བུར་གྱི་མགྲོན་པོ་ལྟ་བུ་ཉག་གཅིག་ཡིན་ཏེ། དཔེར་ན་མིག་ནད་ཅན་གྱིས་ནམ་མཁར་སྐྲ་ཤད་མཐོང་བ་དང་། མཁྲིས་ནད་ཅན་གྱིས་དུང་སེར་པོར་སྣང་བ་དང་། ཆུ་ཆབ་རོམ་གྱིས་བསྡམས་པ་བཞིན་དུ་གློ་བུར་གསར་བྱུང་གི་བདག་ཉིད་ཡིན་པས་གནས་པའི་ངོ་བོ་སྟོང་། མཐར་ཕྱིན་འབྲས་དུས་ན་མེད་པས་འགྲོ་སའི་ཡུལ་གྱིས་སྟོང་བ་ཡིན་ནོ། །རོང་ཀློང་མི་ཕམ་སོགས་ཀྱིས་བཞེད་པ་ལྟར། སྣང་བ་ལྷར་བསྒྲུབ་པ་དང་། ཡུལ་ཅན་ཡེ་ཤེས་སུ་བསྒྲུབ་པའི་སྐབས། ཐ་སྙད་ཚད་མ་དེ་ལ་ཚུ་རོལ་མཐོང་བ་ལ་བརྟེན་པའི་ཀུན་ཏུ་ཐ་སྙད་པའི་ཚད་མ་དང་། དག་པའི་གཟིགས་པ་ལ་བརྟེན་པ་ཀུན་ཏུ་ཐ་སྙད་པའི་ཚད་མ་གཉིས་ལས། དང་པོ་དེ་ལ་མངོན་སུམ་ཚད་མ་དང་རྗེས་དཔག་ཚད་མ་སོགས་ཀྱི་ངོར་མ་དག་པའི་སྣང་བ་ལས་དག་པར་སྣང་མི་ནུས་ལ། གཉིས་པ་ནི། འཕགས་པའི་མཉམ་བཞག་ཡེ་ཤེས་ངོར་གཉིས་སྣང་མཐའ་དག་ནུབ་པའི་ཚུལ་གྱིས་ཡུལ་ཡུལ་ཅན་དུ་འཛིན་པའི་གཟུང་འཛིན་སོགས་གཏན་ལོག་ཏུ་སོང་བ་དང་། རྗེས་ཐོབ་ཀྱི་སྐབས་ནའང་སྣང་བ་བདེན་མེད་དུ་འཆར་བ་དང་། ས་བརྒྱད་པའི་གནས་སྐབས་ན་རྗེས་ཐོབ་ཏུ་སྣང་སྲིད་དག་པ་རབ་འབྱམས་ཤར་ཐུབ་པའང་ཡོད། ཁྱད་པར་སངས་རྒྱས་ཀྱིས་དག་པའི་གཟིགས་ངོར་ཆུའི་རྡུལ་ཕྲ་རབ་གཅིག་གི་སྟེང་ན་རྡུལ་སྙེད་ཀྱི་ཞིང་ཁམས་སྟོན་འཁོར་དང་བཅས་པ་བསམ་གྱིས་མི་ཁྱབ་པར་གཟིགས་པ་ནི་གནས་ལུགས་མཐར་ཐུག་གི་གཟིགས་པ་ཚད་མ་ཡིན་པས་ན་ད་ལྟའི་སོ་སྐྱེས་འཁྲུལ་བའི་སྣང་བ་འདི་དག་ཐམས་ཅད་ཚད་མ་ཡང་དག་མིན་པར་རྫུན་པ་བསླུ་བའི་ཆོས་ཅན་ཡིན་པར་མཐར་ཐུག་གི་ཚད་མ་དེ་དག་གིས་རྟོགས་ཐུབ་པར་གསུངས་པའོ། ༈ །རིག་པ་ཡིན་པའི་རྟགས་སུ་རྟོག་པ་རང་རྒྱུད་པ་གཅིག་འཆར་ནི་མ་རེད་གསུངས། ༈ གོལ་ས་ཐམས་ཅད་དང་སེམས་ཀྱི་དྲི་མ་ཙམ་ཡོད་རུང་ནི་མ་རེད་གསུངས། རྣམ་རྟོག་ཐམས་ཅད་རིག་པའི་རྣམ་ལྡན་དུ་འཆར་དགོས་གསུངས། དཔེར་ན་ཉི་མ་ཤར་ན་མུན་པ་འཐིབ་ལོང་མེད་པ་བཞིན་དུ་རིག་པ་ཁོ་རང་ཤར་དུས་རྣམ་རྟོག་ཐམས་ཅད་རིག་པའི་རྣམ་ལྡན་དུ་ཤར་འགྲོ་ནི་རེད་གསུངས། ༈ དྲན་ཤེས་བསྟེན་ཚུལ་ནི། དྲན་པ་རྙེད་ན་སྒོམ་རྙེད། དྲན་པ་སྟོར་ན་བསྒོམ་སྟོར། དྲན་ཤེས་ཞེས་པ་ནི་གོ་བཞིན་ཤེས་བཞིན་པ་དེའི་ངང་ནས་དྲན་ཤེས་བསྟེན་གྱི་རེད་གསུངས། ༈ མཉམ་བཞག་ལ་ལྷོད་ཡོད་དགོས། དེའི་ངང་ནས་རྩལ་གང་ཤར་བག་ཆགས་གསོག་ལོང་མེད་པར་གྲོལ་བས་རྗེས་ཐོབ་ཟེར། སྤྱོད་ལམ་གྱི་སྐབས་རིག་པ་བསྒྲིམ་དགོས་གསུངས་པས་སོ། །མི་ཕམ་པས། མན་ངག་བྱིས་པའི་རྩེད་མོ་འདྲ། །སྒོམ་པ་རི་རྒྱལ་རྒྱ་མཚོ་བཞིན། །ཞེས་གསུངས ། ༈ ཡེ་གཞི་འཕོ་འགྱུར་མེད་པ་གདོད་མའི་ངང༔ བློ་འདས་སྤྲོས་བྲལ་ཀ་དག་བླ་མ་ལ༔ འཁྲུལ་མེད་རང་རིག་ངང་ནས་གསོལ་བ་འདེབས༔ ཚེ་འདིར་སངས་རྒྱས་འགྲུབ་པར་བྱིན་གྱིས་རློབས༔ ཞེས་སོཿ ཡེ་ནས་འཁྲུལ་མེད་རིག་པ་སྟོན་མཛད་པའི༔ གདོད་མའི་མགོན་པོ་ཡེ་སངས་རྒྱས་དེ་ལ༔ བཀའ་དྲིན་དྲན་པའི་ངང་ནས་གསོལ་བ་འདེབས༔ སྣོད་བཅུད་ཆོས་སྐུར་གྲོལ་བར་བྱིན་གྱིས་རློབས༔ རིག་སྟོང་ཆོས་སྐུའི་བླ་མ་ཡིས༔ རིག་པའི་བུ་ཡི་བཞེད་ངོར་བྲིས༔ སྔགས་ཀྱི་སྲུང་མས་བྱ་ར་གྱིས༔ དམ་ཉམས་ལག་ཏུ་མ་ཤོར་བྱོས༔ ས་མ་ཡཱཿ རྒྱ་རྒྱ་རྒྱཿ བསྒོམ་མ་མྱོང་དང་ཞེས་སོགས་ཤོ་ལོ་ཀ་གཉིས་ཀྱི་ཁུངས་དང་དོན་འགྲེལ།གཏེར་བརྒྱུད་རྣམ་ཐར་ལས། སྤ་གྲོ་གནམ་ཐང་དཀར་པོ་སོག་དམག་འཇོམས༔ ལས་སུ་དམག་འཁྲུག་བྱེད་ཅིང་ལྕགས་ཆ་གྱོན༔ བུམ་ཐང་རྩིས་ལུང་སྦས་པའི་གཏེར་ཁ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང༔ གཏེར་སྟོན་བོན་པོ་བྲག་ཚལ་ཞེས་བྱ་འབྱུངཿ ཞེས་གཏེར་སྟོན་འདི་གཙང་རོང་ཟར་གྱི་ཕྱོགས་སུ་འཁྲུངས། རུས་བོན་པོ་ཡིན་པས་དེར་གྲགས། བཻ་རོ་དཔལ་སེང་ཟུང་དུ་འཇུག་པའི་རྣམ་འཕྲུལ། རྟེན་སྔགས་འཆང་། སྐུ་གཟུགས་ཆེ་སྟོབས་ལྡན་པ་ལ་བླ་དྭགས་མཚན་བྲག་ཚལ་དང་། གསང་མཚན་རྡོ་རྗེ་འབར་དུ་གྲགས། བུམ་ཐང་རྩིས་ལུང་ནི། དུས་གསུམ་སངས་རྒྱས་ཀྱི་སྐུ་ལི་མ་བཞུགས་པའི་ལྷ་ཁང་ལ། མོན་པ་རྣམས་ཀྱིས་དཀོན་མཆོག་གསུམ་གྱི་ལྷ་ཁང་ཟེར། གཏེར་གནས་དེ་ནས་རྫོགས་ཆེན་གུ་རུ་ཞི་བ། གུ་རུ་ཞི་བའི་ལོ་རྒྱུས་ཀྱིས་མཚོན་ཤྲཱི་སེང་ཧའི་རྫོགས་རིམ་བླ་མ་དམར་ཁྲིད་ཟེར་བའི་པུསྟི་གདན་དྲངས། འདི་ཡི་ནང་ན། སྒོམ་མ་མྱོང་དང་བྲལ་མ་མྱོང་༔ མི་སྒོམ་དོན་དང་མི་འབྲལ་བ༔ ཟེར་བའི་མན་ངག་དེ་ཡོད་གསུངས། འདི་བྱང་གཏེར་ཀ་དག་གི་སྐབས་སུ་ཡང་སློབ་དཔོན་ཆེན་པོ་པདྨ་འབྱུང་གནས་མཆིམས་ཕུའི་ཡང་དབེན་ན་བཞུགས་དུས་སུ། མཁར་ཆེན་བཟའ་མཚོ་རྒྱལ་གྱིས་ཞུས་པའི་ཟབ་མོ་གནད་ཀྱི་ཐེམ་བཅུ་ལས། ཨོ་རྒྱན་ཆེན་པོས་སྔོན་རིག་འཛིན་ཤྲཱི་སེང་ཧའི་སྤྱན་སྔར་གདམས་ངག་ཟབ་མོ་འདི་ཞུས་པའི་དུས་སུ་སྒོམ་མ་མྱོང་དང་བྲལ་མ་མྱོང་། །མི་སྒོམ་དོན་དང་མི་འབྲལ་བ། །དེ་ཉིད་རང་ངོ་སྐྱོང་བས་མཆོག་ཐུན་མོང་གི་དངོས་གྲུབ་ཐོབ་ཟིན་གྱི་ཞེས་གསུངས། དཔལ་སྤྲུལ་རིན་པོ་ཆེས་གསུངས་པའི་ཐེག་མཆོག་ཨ་ཏིའི་མན་ངག་གནས་ལུགས་གསལ་སྟོན་དུ་ལུང་དྲངས་པ། རྫོགས་ཆེན་གུ་རུ་ཞི་བ་ལས། སྒོམ་མ་མྱོང་དང་བྲལ་མ་མྱོང་། །མི་སྒོམ་དོན་དང་མི་འབྲལ་བ། །ཞེས་གསུངས་པ་ལ་གང་ཤར་སྒོམ་ཡིན་པས་ན་བློས་བཅོས་པའི་སྒོམ་ཏུ་མེད་པས་སྒོམ་མ་མྱོང་། ཡེ་ནས་དོན་མེད་འཆལ་བ་མིན་པས་རང་ཐོག་ཏུ་འཇོག་པ་དེ་ད ང་འབྲལ་མ་མྱོང་། མི་སྒོམ་དོན་དེ་ལྟ་བུ་དང་རྒྱུན་དུ་མི་འབྲལ་བར་གྱིས་ཞེས་པའི་དོན་ནོ། །ཞེས་གསུངས་སོ།། རིགས་དྲུག་བསྲེག་སྦྱོང་གནད་བསྡུས།སྐལ་ལྡན་འཇུག་ངོགས་ལས། ལྷའི་ས་བོན་ང་རྒྱལ་ཏེ། དེ་ལ་དབྱེ་ན་བདུན། ལྷ་མིན་གྱི་ས་བོན་ལྟ་བ་སྟེ་དེ་ལ་དབྱེ་ན་ལྔ། མིའི་ས་བོན་ཐེ་ཚོམ། དུད་འགྲོའི་ས་བོན་གཏི་མུག་གམ་མ་རིག་པ་སྟེ་འདི་གཉིས་དོན་གཅིག་པར་མདོ་ལས་བཤད་དོ། །ཡི་དྭགས་ཀྱི་ས་བོན་འདོད་ཆགས། དམྱལ་བའི་ས་བོན་ཁོང་ཁྲོའམ་ཞེ་སྡང་སྟེ། དེ་དག་གི་འཁོར་ནི་ཁྲོ་བ་ལ་སོགས་པ་ཉེ་ཉོན་རྣམས་ལས་ཅི་རིགས་པར་སྦྱང་བ་རྣམས་སོ། །ཞེས་གསུངས། ང་རྒྱལ་བདུན་ནི། རང་ལས་ཡོན་ཏན་ཆུང་བ་ལ་དམིགས་ནས་འདི་ལས་བདག་ཆེ་ལ་མཚུངས་པ་དང་མཉམ་མོ་སྙམ་པ་ང་རྒྱལ་ཙམ་མམ་ཆུང་བའི་ང་རྒྱལ། མཚུངས་པ་བས་ཀྱང་བདག་ཆེའམ་འཕགས་ལ་ཆེ་བ་དང་མཉམ་པར་འཛིན་པ་ཆེ་བའི་ང་རྒྱལ། ཆེ་བ་ལས་ཀྱང་བདག་འཕགས་སྙམ་པ་ང་རྒྱལ་ལས་ཀྱང་ང་རྒྱལ། ང་འོ་སྙམ་དུ་ཉེར་ལེན་གྱི་ཕུང་པོ་ལྔ་ལ་བདག་དང་བདག་གིར་ལྟ་བ་ང་འོ་སྙམ་པའི་ང་རྒྱལ། གོང་མའི་ཡོན་ཏན་མ་ཐོབ་པ་ལ་ཐོབ་བོ་སྙམ་པ་མངོན་པའི་ང་རྒྱལ། ཆེས་འཕགས་པ་བས་བདག་ཅུང་དམན་མོད་ཀྱི་འོན་ཀྱང་བཟང་ངོ་སྙམ་པ་ཅུང་ཟད་སྙམ་པའི་ང་རྒྱལ། ཡོན་ཏན་མིན་པའི་སྐྱོན་ཉིད་ཡོན་ཏན་དུ་རློམ་ནས་ང་རྒྱལ་བ་ལོག་པའི་ང་རྒྱལ་བའོ། ། ལྟ་བ་ལྔ་ནི། མཁས་འཇུག་རྩ་བ་ལས། འཇིག་ཚོགས་ལ་ལྟ་བ་ནི། ཉེ་བར་ལེན་པའི་ཕུང་པོ་ལྔ་ལ་བདག་དང་བདག་གི་བར་ལྟ་བ་སྟེ། ལྟ་བ་གཞན་གྱི་རྟེན་བྱེད་པའོ། །མཐར་འཛིན་པའི་ལྟ་བ་ནི་བདག་གམ་ཕུང་པོ་ལྔ་ལ་རྟག་པ་དང་ཆད་པར་འཛིན་པ་སྟེ། དབུ་མའི་ལམ་གྱིས་ངེས་པར་འབྱུང་བ་ལ་བར་དུ་གཅོད་པའི་ལས་ཅན་ནོ། །ལོག་པར་ལྟ་བ་ནི། ལས་རྒྱུ་འབྲས་སོགས་ཡོད་པའི་དོན་ལ་མེད་པར་ལྟ་བ་སྟེ། དགེ་རྩ་གཅོད་པར་བྱེད་པའི་ལས་ཅན་ནོ། །ལྟ་བ་མཆོག་འཛིན་ནི། གོང་གི་ལྟ་བ་ངན་པ་གསུམ་དང་ལྟ་བའི་གནས་ཉེར་ལེན་གྱི་ཕུང་པོ་ལྔ་ལ་མཆོག་དང་དམ་པར་ལྟ་བ་སྟེ་ལྟ་ངན་ལ་མངོན་པར་ཞེན་པར་བྱེད་པའོ། །ཚུལ་ཁྲིམས་དང་བརྟུལ་ཞུགས་མཆོག་འཛིན་ནི། །འདག་གྲོལ་མ་ཡིན་པའི་ཚུལ་ཁྲིམས་དང་བརྟུལ་ཞུགས་དང་དེའི་གནས་ཕུང་ལྔ་ལ་འདག་གྲོལ་ངེས་འབྱིན་དུ་ལྟ་བ་སྟེ། ངལ་བ་འབྲས་བུ་མེད་པར་བྱེད་པའི་ལས་ཅན་ནོ། །ཞེས་དང་། ཐེ་ཚོམ་ནི། བདེན་པའི་དོན་ལ་ཡིད་གཉིས་ཟ་བ་སྟེ། དགེ་བའི་ཕྱོགས་ལ་མི་འཇུག་པའི་ལས་ཅན་ནོ། །ཞེས་གསུངས། སྐལ་ལྡན་འཇུག་ངོགས་ལས། འདིར་སྦྱོང་བྱེད་ཀྱི་གཉེན་པོ་སྒོམ་པ་ནའང་། བརྟེན་པའི་ས་བོན་དྲུག་པོ་དེ་བདག་མེད་རྟོགས་པའི་ཤེས་རབ་ཀྱི་མེས་བསྲེག་པ་དང་། རྟེན་གྱི་ས་བོན་དྲུག་པོ་དེ་ཡི་གེ་གསུམ་ལས་འཕྲོས་པའི་འོད་ཟེར་གྱི་མེས་བསྲེག་པ་སྟེ། དེ་ལྟ་བུའི་རིགས་དྲུག་སྲེག་སྦྱོང་བྱས་ན་དོན་ལ་གནས་པ་ཡིན་ནོ། །ཞེས་གསུངས་སོ།། རྨི་ལམ་འཛིན་ཚུལ་གྱི་ཞལ་གདམས་ཉུང་བསྡུས།སྤྱིར་རྨི་ལམ་སོགས་དང་པོ་ཟིན་པ་ལ་ཕྱིས་ནི་མི་ཟིན་པར་འགྱུར་བའི་རིགས་ནི་ཁྲིད་གཞུང་རྣམས་ལས་ནི་དགེ་སྦྱོར་གྱི་འདུན་པ་ཞན་དུ་ཐལ་བ་དང་། དཀོར་ཟས་ཀྱི་རིགས་དང་ཁྱད་པར་དཀོན་མཆོག་གི་སྐུ་གསུང་ཐུགས་རྟེན་བཙོང་བའི་སྐུ་གླུད་ཟ་བའི་རིགས་དང་། དམ་ཚིག་ཉམས་ཆགས་ཀྱི་རིགས་རང་གིས་མ་ཚོར་བར་ཡོད་པའི་རིགས་སོགས་ལས་རྨི་ལམ་དུ་དགེ་སྦྱོར་འགྲིབ་འགྲོ་བར་བཤད་ཀྱང་། ཁྱེད་ལ་དེ་འདྲའི་རིགས་འཕྲལ་དུ་འོང་དོན་མེད་ཚེ་རང་བཞིན་གྱིས་ན་སོ་རྒན་དུ་སོང་བས་འབྱུང་བའི་ཆ་ཐམས་ཅད་རིམ་གྱིས་རྒུད་དུ་སོང་བའི་སྟབས་ཀྱིས་དགེ་སྦྱོར་རྩལ་ཡང་ཆུང་ངུར་འགྲོ་བར་སྣང་བས་དེ་འདྲ་ཞིག་ཡིན་ཤས་ཆེ་ཡང་། འོད་གསལ་གྱི་གོང་ལྟར་ཉིན་སྣང་གི་དགེ་སྦྱོར་དྲན་རིག་རྗེན་པ་སྐྱོང་བའི་རྩོལ་བ་ཞན་དུ་མ་སོང་ན་རྨི་ལམ་ཙམ་མ་ཟིན་ཀྱང་སྐྱོན་ཆུང་ལ། ཉིན་སྣང་གི་ཐུགས་དམ་དངོས་འདི་ཞན་དུ་འགྲོ་ན་ནི་རྨི་ལམ་ཟིན་ཐབས་ཀྱང་མེད་ལ་སྐབས་རེ་ཙམ་ཟིན་པས་ཕན་པ་མེད་པས། གཙོ་བོ་དྲན་རིག་ཡེངས་མེད་ཁོ་རང་ལ་དམར་འཇུས་བྱེད་པ་གལ་ཆེ་ཞིང་། དེའི་ངང་ལ་ཉིན་པར་གྱི་བྱ་བྱེད་སྨྲ་བརྗོད་ཟ་འཐུང་འགྲོ་འདུག་སོགས་སྣང་བ་ཅི་ཤར་ཐམས་ཅད་རྨི་ལམ་གྱི་རང་བཞིན་ཡིན་ནོ་སྙམ་པ་དང་། རྨི་ལམ་གྱི་སྣང་བ་འདི་འཁྲུལ་བ་རང་ཤར་བཏང་ན་མི་རུང་བས་ཐུགས་དམ་ཟིན་པར་བྱའོ་སྙམ་པའི་དྲན་འདུན་མ་ཆད་པར་བྱས་ན་རྨི་ལམ་ཡང་ཟིན་པར་འགྱུར་ལ། དེ་ལ་དགེ་སྦྱོར་གྱིས་ཀྱང་སླེབ་པར་འགྱུར་ཞིང་། རྨི་ལམ་ཟིན་ཡང་ཐུགས་དམ་གྱི་ངོ་བོ་མ་སླེབ་ན་དགོས་ཆེད་མེད་པས། ཐུགས་དམ་ཉིད་ལ་གཙོ་བོར་སྟོན་པ་དང་། གཉིད་དུ་འགྲོ་ཁར་རང་ཉིད་ཀྱི་སྙིང་ཁར་འཇའ་འོད་ལྔ་ལྡན་གྱི་ཐིག་ལེ་རྨ་བྱའི་མདོངས་ཙམ་གཅིག་གི་ནང་དུ། རྩ་བའི་བླ་མ་འཇའ་འོད་ཀྱི་སྐུ་ལྟ་བུ་མཉམ་བཞག་གི་ཕྱག་རྒྱ་མཛད་ནས་བཞུགས་པ་གཅིག་བསྒོམས་ལ། དད་མོས་གདུང་ཤུགས་ཆེན་པོས་ཡིད་ཀྱིས་གསོལ་བ་བཏབ་སྟེ། རྨི་ལམ་འཁྲུལ་བ་ཞི་ནས་རང་རིག་འོད་གསལ་མངོན་དུ་འགྱུར་བར་བྱིན་གྱིས་རློབས་ཤིག་སྙམ་པའི་ངང་ནས་གཉིད་དུ་འགྲོ་བར་བྱ། ཡང་གཉིད་ནམ་སད་དུ་དམིགས་པ་དང་མོས་གུས་དེ་ཀ་འཕྲོ་མཐུད་ཅིང་གཉིད་དུ་ནམ་ལོག་ཀྱང་འདི་མ་བརྗེད་པར་རྒྱུན་ལྡན་དུ་བྱས་ན་བྱིན་རླབས་ཆེ་བ་ཡིན། དེ་ལྟར་རྒྱུན་ལྡན་དུ་བྱས་པས་རེ་འགའ་རྨི་ལམ་ཟིན་པ་བྱུང་ཡང་དགའ་བྲོད་དང་ཞེན་པ་མི་བྱ། གཏན་ནས་མ་ཟིན་ཀྱང་སྡུག་བསྔལ་དང་སྒྱིད་ལུགས་པ་སོགས་མི་བྱ་བར། ཉིན་པར་གྱི་སྣང་བ་ཐམས་ཅད་རྨི་ལམ་ཡིན་པར་ཤེས་པ་དང་སྐུ་ཐུགས་རྟེན་གཉིས་དབྱེར་མེད་དུ་འབུང་། གཉིད་དུ་ལོག་ཁར་དམིགས་པ་འདི་དུས་རྟག་ཏུ་རྒྱུན་མཐུད་ན་འཕྲལ་མར་ཟིན་ཐུབ་པ་མ་བྱུང་ཡང་གཏི་མུག་གི་སྒྲིབ་པ་སེལ་བའི་དགོས་ཆེད་ཡོད་པ་དང་། ཕན་ཡོན་དཔག་ཏུ་མེད་པས་དེ་ལྟར་རྒྱུན་བརྩོན་གནང་བར་ཞུ།། ཕྱག་རྫོགས་ལུགས་ཀྱི་ཉོན་མོངས་ལམ་དུ་འཁྱེར་ཚུལ།སློབ་དཔོན་གང་དྲུང་གིས་ཁར་སེང་ཨ་བོ་ལ་གཟེར་གདམས་བརྗོད་པའི་ཐུགས་དམ་གྱི་སྐོར་ལ་འཕྲལ་རྐྱེན་ཞེ་སྡང་དྲག་པོ་ལྟ་བུ་ངོ་ཐོག་ཏུ་བཞག་ཀྱང་མྱུར་དུ་རང་ཞི་ཐུབ་པ་དཀའ་བ་ཞིག་འདུག་གསུངས་པ་དེ་ཤིན་ཏུ་ཐུགས་བདེན་ཏེ། དེ་ལྟར་འཕྲལ་མར་ཞི་ཐུབ་པ་རང་གི་ཐུགས་དམ་གྱི་རྩལ་དགའ་རབ་ཡོད་པ་མ་གཏོགས་གང་ཟག་ལས་དང་པོ་བས་དེ་ལྟར་མི་ཐུབ་ཅིང་། སྤྱིར་ན་རྣམ་རྟོག་འགྱུ་བ་ཕྲ་མོའི་རིགས་རྣམས་ལ་ངོས་ཟིན་པ་ཙམ་གྱིས་རང་ཞིར་འགྲོ་བ་མ་གཏོགས་དེ་ལས་ཐབས་གཞན་མི་དགོས་པས་ངོས་ཟིན་ཐོག་ཏུ་བསྐྱར་བ་ཁོ་ནས་ཆོག །ཞེ་སྡང་དྲག་པོའི་སྡུག་བསྔལ་ན་ཚ་ཟུག་གཟེར་སོགས་ལས་ནི། དེ་ལྟ་བུའི་ཚོར་བ་དྲག་པོ་ལྷང་ལྷང་བ་དེ་ཀ་ལ་རང་སེམས་ཁོ་རང་གིས་རྩེ་གཅིག་གིས་ཕུར་ཚུགས་སུ་ཧྲིག་གེར་གཏད་ནས་རྒྱུན་བསྲིངས་བས་དེ་ལྷང་ལྷང་བར་ཚོར་བ་དང་ཚོར་མཁན་ནམ་ངོས་འཛིན་མཁན་གྱི་སེམས་དེ་གཉིས་སོ་སོ་མ་ཡིན་པའི་ཞེ་སྡང་ལྷང་ལྷང་བ་དེ་ཐུགས་དམ་ཧྲིག་གེ་བ་དེ་དང་དབྱེར་མེད་པའི་ཐོག་ཏུ་བཞག་པ་ལ་ནན་ཏན་དུ་ཡུན་བསྲིང་བ་གནད་དུ་ཟབ་པ་ལགས། ལར་ཉོན་མོངས་ཁ་ཡན་དུ་མ་ཤོར་བར་བྱེད་པ་འདི་ཆོས་ཐམས་ཅད་ཀྱི་རྩ་བ་ཡིན་ན་ཡང་། དེ་ལ་གདམས་ངག་ལམ་དུ་ཁྱེར་ཚུལ་མི་འདྲ་བ་ཞིག་ཐེག་པའི་རིམ་པའམ། གང་ཟག་དབང་པོའི་རིམ་པའི་ཁྱད་པར་ཡིན་ཕྱིར་ཐེག་པ་འོག་མ་ཀུན་ལ་ནི་ཉོན་མོངས་གཉེན་པོ་བསྟེན་ནས་སྤང་པའི་ཐབས་ཁོ་ནར་གསུངས། ཐེག་པ་བར་མའི་སྐབས་སུ་ནི་དེ་དག་ལ་ལྷ་དང་སྔགས་དང་དམིགས་པའི་གནད་ཀྱིས་ཉོན་མོངས་ཡེ་ཤེས་སུ་བསྒྱུར་བའི་ཐབས་མང་དུ་གསུངས་མོད་ཀྱང་། ཐེག་པ་གོང་མའི་ཡང་རྩེ་ཕྱག་རྫོགས་ཀྱི་ཉམས་ལེན་སྐབས་སུ་ནི་གང་ཤར་ཅི་སྣང་ཐམས་ཅད་རང་སེམས་ཀྱི་འཆར་ཚུལ་ཙམ་ལས་ནི་མ་འདས། དེ་དག་ལ་ཨ་འཐས་དང་བདེན་འཛིན་གྱི་རྗེས་འབྲང་བྱས་ན། ཆོས་ཉིད་རྣམ་རྟོག་གི་དབང་དུ་སོང་བ་ཡིན་པས་ཆོས་ཀྱིས་དགོས་པ་མི་འབྱུང་བས་ན། རྣམ་རྟོག་གམ་ཞེ་སྡང་ལྟ་བུ་དེ་ཞི་ན་ཞི་ལ། མ་ཞི་ན་མ་ཞི། དེ་གཉིས་ལ་དགའ་མི་དགའ་སོགས་དགག་སྒྲུབ་གང་ཡང་མི་བྱ་བར། དེ་ཀའི་རང་ངོ་ལ་ཅེར་རེ་ཧྲིག་གེ་གསལ་བར་བསྐྱང་བ་ཉིད་ལ་གཅིག་དྲིལ་དུ་བྱེད་པ་འདི་ནི། ཉོན་མོངས་ན་ཚ་སྡུག་བསྔལ་འཇིགས་སྐྲག་སོགས་རྣམ་རྟོག་ཐམས་ཅད་ཀྱི་ལམ་ཁྱེར་ལགས།། རྫོགས་པ་ཆེན་པོའི་ཉམས་ལེན་གནད་བསྡུས་ཉག་བླ་བསོད་རྒྱལ་གྱི་ཞལ་རྒྱུན།རྫོགས་པ་ཆེན་པོའི་ཉམས་ལེན་གནད་བསྡུས་ཉག་བླ་བསོད་རྒྱལ་གྱིས་གསུངས་པ། སྔོན་འགྲོ་སེམས་ཀྱི་ཁང་བུ་བཤིག་པ། དངོས་གཞི་རིག་པ་ངོ་སྤྲད་པ། རྗེས་ཉམས་ལེན་བཤད་པ་དང་གསུམ། སྔོན་འགྲོ་ལ་ཡང་སེམས་ཀྱི་རྩད་བཅད་པ། བྱུང་གནས་འགྲོ་གསུམ་བརྟག་པ། རིག་པ་ངོས་བཟུང་ཐབས་དང་གསུམ་ལས། རྩད་བཅད་ལུགས་ནི། རྒྱུ་དགེ་སྡིག་བྱེད་མཁན་འབྲས་བུ་བདེ་སྡུག་མྱོང་མཁན་གྱི་གཙོ་བོ་སེམས་དང་ལུས་ངག་གཉིས་དེ་ཡི་འཁོར་ཡིན་མོད། ལུས་ངག་ནི་སེམས་ཀྱི་ཆོ་འཕྲུལ་ཆུ་དང་ཆུ་བུར་ལྟ་བུ་ཡིན་པས་སེམས་གཙོ་ཆེའོ། ༈ བྱུང་གནས་འགྲོ་གསུམ་བརྟག་ལུགས་ནི། འདི་ལྟར་ཕྱི་སྣོད་འབྱུང་ལྔ་དང་ནང་བཅུད་སྐྱེ་འགྲོའི་སྒོ་གསུམ་གྱི་རྣམ་པ་བཟང་ངན་སྣ་ཚོགས་བདེན་བདེན་ལྟར་ཡོད་པ་འདི་ཐམས་ཅད་རང་སེམས་ཀྱི་ཆོ་འཕྲུལ་རྨི་ལམ་ལྟར་ཡིན་ལ། རང་སེམས་དུས་གསུམ་གྱི་རྣམ་རྟོག་ཐམས་ཅད་ཀྱང་། ད་ལྟའི་རྣམ་རྟོག་སྐད་ཅིག་མ་ཞིག་དང་། བདེན་གྲུབ་ཡོད་མེད་ཚུལ་མཚུངས་པས་རྣམ་རྟོག་གཅིག་སྐྱེ་འགག་གནས་གསུམ་དང་བྲལ་བར་ཤེས་ན། ཆོས་ཐམས་ཅད་བདེན་མེད་ཀྱི་དོན་ཁོང་དུ་ཆུད་པ་སྟེ་དཔེར་ན་སྡོང་པོའི་རྩ་བ་བཅད་པ་དང་འདྲའོ། །དེས་ན་ད་ལྟ་རྣམ་རྟོག་གཅིག་ཤར་དུས། དེ་སྐྱེ་བའི་ཡུལ་དེ་བརྟག་ཅིང་དཔྱད་ནས་བདེན་མེད་ཀྱི་རང་བཞིན་དུ་ཤེས་ན། བྱུང་ས། གནས་ས། འགྲོ་ས་མེད་པ། གཟུང་བའི་ཡུལ་སྟོང་པ་ཉིད་ཀྱི་དོན་མཐོང་བ་ཡིན། གང་ཤར་བའི་རྣམ་རྟོག་ཁོ་རང་ལེགས་པར་བརྟག་ནས་དེ་ཡང་རང་བཞིན་མེད་པའི་དོན་རྟོགས་ཚེ། བྱུང་མཁན། གནས་མཁན། འགྲོ་མཁན་གང་ཡང་མ་གྲུབ་པར་འཛིན་པའི་སེམས་སྟོང་པ་ཉིད་ཀྱི་དོན་རྟོགས་པ་ཡིན། དེ་ལྟར་གཟུང་འཛིན་གཉིས་བསྡུས་ཀྱི་ཆོས་ཐམས་ཅད། སྐྱེ་འགག་གནས་གསུམ་ཡོད་ཡོད་ལྟར་འཁྲུལ་ངོར་སྣང་ཡང་། བརྟག་ཅིང་དཔྱད་ན་གང་ཡང་མ་གྲུབ་པར། བདེན་མེད་སྒྱུ་མ་དང་རྨི་ལམ་ལྟ་བུའི་ཚུལ་ཁོང་དུ་ཆུད་དགོས་སོ། ༈ །རིག་པ་ངོས་བཟུང་ཐབས་ནི། སེམས་རྣམ་རྟོག་གློ་བུར་བ་འདི་རྣམས་ནི་ཡུལ་དང་ཡུལ་ཅན་ཏེ། གཟུང་འཛིན་གཉིས་རེ་ཡོད་པ། རྒྱ་ཆུང་བ། འཛིན་ཞེན་དང་བཅས་པ། འགྱུར་ལྡོག་ཆེ་བ་ཡིན། སེམས་ཉིད་རིག་པའི་ཡེ་ཤེས་ནི། ཡུལ་མེད་རང་གསལ་བ་མ་གཏོགས་གཟུང་འཛིན་ཐ་དད་མེད་པ། གུ་ཡངས་ཤིང་རྒྱ་ཆེ་བ། འཛིན་ཞེན་དང་གཏད་སོ་མེད་པ། ནམ་ཡང་མི་འགྱུར་བའི་རང་བཞིན་ཡིན་པས་ནོར་མི་དགོས་སོ། །ཀུན་གཞི་སོགས་རྟོག་མེད་ཀྱི་སེམས་དང་རིག་པ་ནོར་མི་དགོས་ཏེ། རིག་པའི་རང་བཞིན་ནི། མཁྱེན་ཆ་ལྷུན་གྲུབ་དུ་ཡོད་པས་རྣམ་པར་མི་རྟོག་བཞིན་དུ་ཀུན་ཤེས་ཀུན་རིག་རྨོངས་པའི་དྲི་མ་མེད་པའོ། ། ༈ དངོས་གཞི་ལ། རིག་པའི་ངོ་བོ་མ་བཅོས་རང་ཐོག་ཏུ་ངོ་སྤྲོད་པ། གཟུང་འཛིན་གཉིས་བསྡུས་ཀྱི་ཆོས་ཐམས་ཅད་རིག་རྩལ་རོ་གཅིག་ཏུ་ངོ་སྤྲད་ནས་ཐག་གཅིག་ཐོག་ཏུ་བཅད་པ། རྣམ་རྟོག་གང་ཤར་ཐམས་ཅད་རིག་ཐོག་ཏུ་གྲོལ་ལུགས་བཤད་པའོ། ༈ ངོ་སྤྲོད་ནི། རྣམ་རྟོག་དང་མ་ནོར་བའི་ཤེས་རིག་རང་བབ་རང་གསལ་དྭངས་སང་ངེ་བ། ཡངས་ཧ་རེ་བ། བཟོ་བཅོས་གང་ཡང་མི་དགོས་པ། བཤིག་རྒྱུ་མེད་པ། ཅི་ཙམ་བཤིག་ཀྱང་ཇེ་གསལ་ཇེ་དྭངས་འོང་བ། ངོ་བོ་འཕོ་འགྱུར་མི་འགྲོ་བ་འདི་ནི་རིག་པ་ཆོས་སྐུ་མ་ནོར་བ་ཡིན་པས་འདི་ལས་ལྷག་པའི་སེམས་ངོ་ཞིག་སྟོན་རྒྱུ་མེད་དོ། ༈ །ཐག་བཅད་ལུགས་ནི་ཡུལ་སྣ་ཚོགས་དང་། རྣམ་རྟོག་བཟང་ངན་ཐམས་ཅད་རིག་པ་ཡེ་ཤེས་ཀྱི་རང་རྩལ་ཆུ་དང་རླབས་ལྟ་བུ་ཐ་དད་གཉིས་སུ་སྣང་ཡང་། དོན་ལ་གཉིས་སུ་མེད་པ་ཡིན་པས་སྤང་བླང་གང་ཡང་མི་དགོས་པར་རིག་པ་ཡེ་ཤེས་ཆེན་པོའི་རང་བཞིན་རོ་གཅིག་ཏུ་ཐག་ཆོད་པ་ཞིག་ནི་ཤིན་ཏུ་གལ་ཆེའོ། ༈ །གྲོལ་ལུགས་ནི། རིག་པ་བོར་ཤོར་ནས་རྣམ་རྟོག་ཁོ་ནའི་དབང་དུ་ཤོར་དུས་འཁྲུལ་བ་ཡིན། རིག་པ་མ་ཡེངས་པའི་ངང་ནས་རྣམ་རྟོག་ཐམས་ཅད་རིག་པ་ཉིད་ལས་ཤར། རིག་པའི་ངང་དུ་གནས། རིག་པ་ལ་ཐིམ་ན་གྲོལ་བ་ཡིན། དེ་ཡང་རྣམ་རྟོག་གིས་རིག་པ་ལ་ཕན་གནོད་མེད་པར་གྲོལ་ན་རབ་ཡིན། རྣམ་རྟོག་ལ་ངོས་བཟུང་བཟོ་བཅོས་མི་དགོས་པར་རང་སར་གྲོལ་བ་འབྲིང་ཡིན། རྣམ་རྟོག་གིས་རིག་པ་ལ་གནོད་པ་བྱུང་ན་ཡང་འདི་ནི་རིག་པའི་རང་རྩལ་ཡིན་ནོ་སྙམ་དུ་ངོ་ཤེས་ཤིང་རིག་ཐོག་ཏུ་བཞག་པས་གྲོལ་ན་ནི་གྲོལ་ལུགས་ཐ་མ་ཡིན་ནོ། །གང་ལྟར་ཡང་། གྲོལ་བ་རིག་པའི་ཡེ་ཤེས། གྲོལ་རྒྱུ་རྣམ་རྟོག་བཟང་ངན་ཐམས་ཅད། གྲོལ་ལུགས་རིག་པའི་ངང་དུ་རྣམ་རྟོག་རང་སར་དག་པ་ཆུ་ལ་རླབས་ཐིམ་པ་ལྟར་གྲོལ་དགོས་སོ། ༈ །རྗེས་ཉམས་ལེན་སྐྱོང་ཚུལ་ལ་ཡང་། སྒོམ་པ། སྤྱོད་པ། འབྲས་བུའོ། ། ༈ སྒོམ་པ་ལ་མཉམ་རྗེས་གཉིས་ལས། མཉམ་བཞག་ནི། གནས་དབེན་པར། མཚམས་ལེགས་པར་བཅད། སྒོ་གསུམ་གྱི་བྱ་བ་གཞན་ཐམས་ཅད་བཏང་ནས་སྟན་བདེ་བ་ལ་ལུས་དྲང་པོ་བདེ་ལུགས་སུ་གཡོ་འགུལ་མེད་པར་འདུག །མིག་མི་འགུལ་བར་ཐད་ཀར་ཧ་རེ་བལྟ། རླུང་རོ་ལེགས་པར་བསལ་ཞིང་རླུང་ཁ་ནང་ནས་ཕྱིར་དལ་བུས་ཕར་བཏང་། ཀུན་སློང་ལེགས་པར་བཅོས། བླ་མ་ལ་གསོལ་བ་རྩེ་གཅིག་ཏུ་བཏབ་ནས་ཐུགས་ཡིད་བསྲེ། དེ་ནས་རིག་པ་བཟོ་བཅོས་མེད་པར་གསལ་ཡེ་རེ་རང་བབས་སུ་བཞག ། དེའི་ངང་དུ་ཡུལ་སྣང་བཟང་ངན་གང་ཤར་སྤང་བླང་མེད་པར་རྒྱ་མཚོ་ལ་གཟའ་སྐར་ཤར་བ་ལྟར་འཛིན་མེད་དུ་བཞག རྣམ་རྟོག་བཟང་ངན་གང་ཤར་ཡང་རིག་རྩལ་ཆུ་དང་རླབས་ལྟ་བུ་ཡིན་པས་མི་སྤང་། རྣམ་རྟོག་གི་རྗེས་སུ་མི་འབྲང་། རྣམ་རྟོག་ལ་ལྟ་རྟོག་ངོས་ལེན་གང་ཡང་མེད་པར་རིག་པ་མ་བཅོས་པའི་ངང་དུ་མ་ཡེངས་འཛིན་པ་མེད་པར་བཞག་གོ །རྨུགས་འཐིབ་བྱུང་ན་བཤིག་ནས་རིག་པ་གསལ་ཞིང་དྭངས་ཆ་ཐོན་པ་ཞིག་གནད་ཆེ། གོམས་འདྲིས་ཐུབ་ན་ཉམས་སྐྱེ་ཡང་། ཉམས་བཟང་ངན་ཐམས་ཅད་རེ་དོགས་སྤང་བླང་མེད་པར་རིག་པའི་ངོ་བོ་ཁོ་ན་སྐྱོང་བ་གནད་ཡིན། མཐར་བསྔོ་སྨོན་ཚད་ལྡན་རེ་བྱས་ཏེ་ཐུན་གྲོལ་བར་བྱའོ། །མཉམ་བཞག་ལ་ནན་ཏན་ཡུན་བསྲིངས་ཏེ་སྙིང་རུས་མ་ཐུབ་ན། ཁ་ལྟ་སྟོང་སྐད་ཀྱི་ལྟ་སྒོག་དང་། འགྲོ་འདུག་ལམ་ཁྱེར་གྱི་བསྒོམ་སྣང་ཙམ་གྱིས་སེམས་རྒྱུད་གྲོལ་ཤིན་ཏུ་དཀའོ། །རྗེས་ཐོབ་ལ། རིག་པ་ཅུང་ཟད་བསྒྲིམས་ནས་མ་ཡེངས་པའི་ངང་དུ། འགྲོ་འདུག་ཟ་ཉལ། གཏམ་སྨྲ་བ། ལས་བྱེད་པ། དེ་ཐམས་ཅད་ཀྱང་རིག་པའི་རང་རྩལ་འཛིན་མེད་རང་གྲོལ་གྱི་ཚུལ་དུ་རེ་དོགས་དང་བྲལ་བ། སྤང་བླང་མེད་པར་ལམ་དུ་ཁྱེར་དགོས་སོ། །སྤྱོད་པ་ལ། ཆོས་བརྒྱད་རོ་སྙོམས་ཀྱི་གསང་སྤྱོད་དང་། དགེ་སྡིག་བླང་དོར་གཞུང་བཞིན་དུ་སྤྱོད་པའོ། །གསང་སྤྱོད་ནི། རྙེད་པ། བསྟོད་པ། སྙན་གྲགས། བདེ་བ་སྟེ། འཇིག་རྟེན་མཐུན་ཕྱོགས་ཀྱི་ཆོས་བཞི་ཅི་ཙམ་བྱུང་ན་ཡང་། དེས་རིག་པའིི་ངོ་བོ་ལ་ཕན་པ་རྡུལ་ཙམ་མེད་པས། དེ་དག་ལ་རེ་བ། འབད་རྩོལ་ཆགས་ཞེན་དོན་གཉེར་གང་ཡང་མི་བྱེད་པར་རིག་ཐོག་ཏུ་རོ་སྙོམས་བྱ། མ་རྙེད་པ། སྨོད་པ། མི་སྙན་པར་གྲགས་པ། སྡུག་བསྔལ་ཏེ། འཇིག་རྟེན་མི་མཐུན་པའི་ཕྱོགས་ཀྱི་ཆོས་བཞི་པོ་ཤུགས་དྲག་ལ་ཡུན་རིང་བ་ཅི་ཙམ་ཞིག་རང་ཐོག་ཏུ་བྱུང་ཡང་། དེས་རིག་པའི་ངོ་བོ་ལ་ཅུང་ཟད་ཀྱང་མི་གནོད་པས། དེ་དག་ལས་དགོས་པ་བཟློག་ཐབས། སེམས་ནད་གནོད་ལན་སོགས་རྩོལ་སྒྲུབ་གང་ཡང་མི་བྱེད་པར་རིག་ཐོག་ཏུ་རོ་སྙོམས་ཐུབ་ན་གསང་སྤྱོད་དེ་ལྷག་མི་དགོས་སོ། །དེ་མ་ཐུབ་ན་ལྟ་མཚང་སྤྱོད་པས་ཕུད་ཟེར་བ་དེ་དང་། ལྟོ་འགྲང་ཉི་མས་དྲོ་དུས་ཆོས་པའི་གཟུགས། །རྐྱེེན་ངན་ཐོག་ཏུ་བབ་དུས་ཐ་མལ་བ། །ཟེར་བ་དེ་ཡིན་ནོ། །དགེ་སྡིག་བླང་དོར་གྱི་སྤྱོད་པ་ནི། བདེ་སྡུག་གི་རྒྱུ་དགེ་སྡིག་གཉིས་ཀ་རིག་རྩལ་ཡིན་མོད། སྙིང་རྗེ་དང་སྒོམ་བྱུང་གི་ཤེས་རབ་སོགས་དགེ་ཚོགས་ཐམས་ཅད་གཞན་ལས་ཁྱད་དུ་འཕགས་པ་རྩོལ་མེད་དུ་འཕེལ་བ་དང་། གཏི་མུག་དང་བདག་འཛིན་ལོག་ལྟ་སོགས་སྤང་བྱ་ཐམས་ཅད་གཉེན་པོ་གཞན་མི་དགོས་པ་རྩད་ནས་དག་འགྲོ་བ་ཞིག་དགོས་ཀྱི། དགེ་བ་སྤང་སྡིག་པ་བླང་ཡང་སྐྱོན་མེད་ཟེར་ན། དེ་ནི་ནག་པོ་ཁ་འབྱམས་བདུད་ཀྱི་ལས་བཅོས་དཀའ་བ་ཡིན་ཏེ། རྒྱུ་དགེ་བ་སྤངས་ན་དེའི་རང་འབྲས་མཐོ་རིས་ཐར་བའི་གེགས་བྱེད། རྒྱུ་མི་དགེ་བ་བསྒྲུབས་ན་དེའི་རང་འབྲས་ངན་སོང་འཁོར་བའི་སྡུག་བསྔལ་གྱི་གཞི་ཚུགས་པ་ཐེ་ཚོམ་མེད་དེས་ལས་འབྲས་བསླུ་མེད་ཀྱི་དྲང་ལམ་འདི་ནི། རྒྱལ་བའི་ཕྱག་གིས་ཀྱང་བསྒྱུར་དུ་མེད་པས་སོ། །དེས་ན་བླ་མ་དཀོན་མཆོག་གསུམ་པོར་བློ་ཕུག་གཏད། རྒྱུ་འབྲས་ཡིད་ཆེས་ཀྱི་དད་པ་སྙིང་ལ་འཆང་། ལྟོ་གོས་གཏམ་གསུམ་སོགས་ཚེ་འདིའི་བདེ་སྐྱིད་ལ་གྱོང་བསྐུར། གནས་དབེན་པར་བརྟེན། གྲོགས་ཆོས་མཐུན་དང་འགྲོགས། དམ་པ་གོང་མ་རྣམས་ཀྱི་རྗེས་སུ་བསླབས་ཏེ། གཏོང་ཕོད་སྙིང་རུས་བརྩོན་འགྲུས་ཐམས་ཅད་དམ་པའི་ཆོས་ཁོ་ན་ལ་བྱེད། དུས་དང་རྣམ་པ་ཐམས་ཅད་དུ་སྒོ་གསུམ་གྱི་དགེ་རྩ་ཕྲ་མོ་ཙམ་ཡང་ཁྱད་དུ་མི་བསད་པར་རིག་པའི་ངང་ནས་དམ་པ་གསུམ་ལྡན་རྣམ་པར་དག་པ་ཁ་ཞེ་མཚུངས་པ་རེ་བྱས། དེ་ལ་བརྟེན་ནས་རང་རྒྱུད་ལ་ཡོན་ཏན་བཟང་པོ་ཅི་ཙམ་སྐྱེས་ཀྱང་དགེ་བ་དང་ཡོན་ཏན་ཚད་བཟུང་དང་ཆོག་ཤེས་མི་བྱ། རང་རྩིས་དང་མངོན་ཞེན། རློམ་སེམས་དང་ང་རྒྱལ་ངོམ་ཆོས་མི་བྱ་བར། རང་སྐྱོན་ལ་བསམ་ནས་དམན་ས་བཟུང་ཞིང་། མི་ཚེ་ལྷག་མ་འདི་དམ་པའི་ཆོས་ཀྱིས་འདའ་བ་ཞིག་ལ་སྙིང་ནས་འབད་དགོས་ལགས། སྒོ་གསུམ་གྱི་མི་དགེ་སྡིག་ལྟུང་ཕྲ་རགས་ཐམས་ཅད་ལ་དུག་བཞིན་འཛེམ་ནས་སྡིག་སེམས་དང་པོ་སྐྱེ་བའི་དུས་སུ་ཤར་གྲོལ་དུས་མཉམ་དུ་བཏང་། དེ་ཙམ་མ་བྱུང་ཡང་ཆོས་ཞུས་པའི་དོན་སྒོ་སྡིག་སེམས་ཁ་ཡན་དུ་མི་གཏོང་བ་ཞིག་དགོས་པས་གཉེན་པོས་འཕྲལ་དུ་སྤང་། གལ་ཏེ་སྡིག་པ་དབང་མེད་དུ་ཤོར་བའམ་ཚེ་རབས་སྔོན་གྱི་སྡིག་སྒྲིབ་ཀྱི་གཉེན་པོ་སྟོབས་བཞི་ཚང་བའི་བཤགས་ཐབས་ལ་འབད། ཚེ་འདིའི་སྣང་བ་སྐད་ཅིག་ཙམ་རྨི་ལམ་ལྟར་ཡིད་རྟོན་མི་རུང་ཞིང་སྙིང་པོ་གང་ཡང་མེད་པ་འདི་ཡི་དོན་དུ། ཚེ་ཕྱི་མར་སྡིག་པ་ངན་པ་ཞིག་རང་ཐོག་ཏུ་ཁུར་མི་དགོས་པ་རེ་བྱེད་དགོས་ལགས། དེ་ལྟར་དགེ་སྡིག་བླང་དོར་གྱི་གནས་མི་བརྗེད་པ་དྲན་པ། རང་གི་སྒོ་གསུམ་གྱི་བྱ་བ་ལ་བརྟག་པ་ཤེས་བཞིན། འཇུག་ལྡོག་གི་གནས་ལ་གཟོབ་པ་ལྷུར་ལེན་པ་བག་ཡོད་རྣམས་དང་ལྡན་པས་དུས་རྟག་ཏུ་རང་གིས་དགེ་བ་སྒྲུབ། གཞན་ལ་བསྐུལ། བྱས་པ་ལ་ཡི་རང་ཡང་བྱ། རང་གི་སྡིག་པ་སྤང་། གཞན་ལ་སྡིག་སྤང་བསྐུལ། བྱས་པ་ལ་འགྱོད་བཤགས་དང་སྡོམ་སེམས་བྱ། མདོར་ན་གཡོ་སྒྱུ་མེད་པར་རྒྱུད་དྲང་པོས་མི་ཚེ་ནམ་གནས་ཀྱི་བར་དུ་དགེ་སྒྲུབ་སྡིག་སྤང་སྣ་རེ་ཡན་ཆོད་ལ་ཅི་ནུས་སུ་འབད་པར་བྱས་ན། རང་གཞན་ཀུན་ལ་ཕན་ཞིང་གཏན་བདེའི་གཞི་ཚུགས་པའི་སྤྱོད་པ་ཡང་དག་མ་ནོར་བ་ཡིན་ནོ། ༈ །འབྲས་བུ་ནི། སྤང་རྟོགས་ཀྱི་ཡོན་ཏན་ཏེ། དེ་ཡང་ད་ལྟ་ནས་རང་རྒྱུད་ཀྱི་སྤང་བྱ་ཉོན་མོངས་ཅུང་ཟད་ཇེ་ཆུང་ལ་འགྲོ་བ་དང་། དད་པ་ངེས་འབྱུང་། བྱམས་སྙིང་རྗེ་སོགས་དགེ་སེམས་གོང་འཕེལ་དུ་འོང་བ་ཞིག་ཡོད་དགོས། དེ་མ་བྱུང་ན་ལྟ་སྒོམ་བཟང་པོར་རློམས་ན་ཡང་རང་རྒྱུད་ལ་མ་ཕན་ན་དགོས་པ་གང་ཡང་མེད་དེ། དེ་ཡང་མངོན་ཤེས་རྫུ་འཕྲུལ་སོགས་རྟགས་སྣ་ཚོགས་བྱུང་ན་ཡང་། དེ་ལ་བརྟེན་ནས། རྣམ་གཡེང་སོགས་སྡིག་པ་ཇེ་འཕེལ་ཆོས་དང་ཇེ་འགལ། ཉམས་རྟོགས་ཇེ་དམན། རང་གཤིས་ཇེ་ངན་བྱུང་ན་བར་ཆད་བདུད་ཀྱི་རྟགས་ཡིན་པས་སྤང་དགོས། བཟང་ངན་མ་ངེས་སྣ་ཚོགས་བྱུང་ཞིང་དེ་དག་ལ་རེ་དོགས་དང་ཞེན་པ་ཇེ་ཆེ་བྱུང་ན་འཕེལ་འགྲིབ་ཉམས་ཀྱི་རྟགས་ཡིན་པས་གང་ལའང་རེ་དོགས་མེད་པ་ཞིག་གལ་ཆེ། རང་འདོད་ཆུང་ཞིང་སྙིང་རྗེ་བཅོས་མིན་དང་། བསྒོམས་བྱུང་རིག་རྩལ་གྱི་ཤེས་རབ་སོགས་ཡོན་ཏན་གོང་འཕེལ་ཇི་ཙམ་བྱུང་ཡང་། དེ་དག་ལ་ང་རྒྱལ་དང་ཞེན་པ། འཛིན་ཆགས་མེད་ཅིང་རྟོགས་པ་ཇེ་བཟང་ཇེ་བརྟན། རང་གཤིས་ཇེ་བཟང་། འཁོར་བ་ལ་བློ་ཇེ་ཐོང་། ཆོས་དང་བླ་མ་ལ་ཡིད་ཇེ་ཆེས། རང་རྒྱུད་དམ་པའི་ཆོས་དང་ཇེ་མཐུན་བྱུང་ན་ཡང་དག་པའི་རྟགས་ཡིན་ནོ། །ཉིན་གྱི་ཉམས་ལེན་མཉམ་རྗེས་གཉིས་ཁྱད་མེད་ལྟ་བུ་བརྟན་པ་ཐོབ་ཚེ། མཚན་མོར་གཉིད་སྲབ་འཐུག་གི་འོད་གསལ་ཅི་རིགས་ཀྱང་ཤུགས་ཀྱིས་ཟིན་པའོ། །དེ་ལས་ཀྱང་ཉམས་ལེན་གཟབ་ན་ཉིན་མཚན་འོད་གསལ་འཁོར་ཡུག་ཏུ་འགྲོ་བ་ཡང་ཡོད་པ་འདྲ། གལ་ཏེ་མཚན་མོའི་རྣལ་འབྱོར་གྱི་མན་ངག་གིས་རྨི་ལམ་ཟིན་པའམ། ནུབ་རེ་རེ་ཙམ་ལ་འོད་གསལ་ཟིན་པ་རེ་བྱུང་ན་ཡང་མཉམ་བཞག་ལ་བརྟན་པ་མ་ཐོབ་ན། རྟག་མི་ཐུབ་པར་འཇའ་ཡལ་བ་ལྟར་ཡལ་འགྲོ་བ་མང་པོ་ཡོད་པ་འདྲ། འབྲས་བུ་ཡོན་ཏན་ལ་རེ་བ་ཆེ་བས་གང་ཡང་མི་ཕན། ཡོན་ཏན་འབྱུང་བའི་རྒྱུ་དགེ་སྒྲུབ་སྡིག་སྤང་རེ་གཟབ་པ་དང་། ཉམས་ལེན་ལ་སྙིང་རུས་ཁ་ཙམ་མིན་པ་རེ་བྱ་བ་ནི་གནད་མ་ནོར་བ་ཡིན་ནོ། །མཐར་ཐུག་གི་འབྲས་བུ་ནི། སྤང་རྟོགས་མཐར་ཕྱིན་རྫོགས་པའི་སངས་རྒྱས་ཀྱི་གོ་འཕང་ཉིད་ཡིན་ལ། དེ་ཡང་སྤང་བྱ་སྒྲིབ་གཉིས་བག་ཆགས་དང་བཅས་པ་ལྷག་མེད་ཡོངས་སུ་དག་ཅིང་། རྟོགས་བྱ་ཡེ་ཤེས་ཡོན་ཏན་མ་ལུས་པ་ཐམས་ཅད་ཡོངས་སུ་རྫོགས་ནས། རང་དོན་ཆོས་སྐུ་མངོན་དུ་གྱུར། གཞན་དོན་གཟུགས་སྐུ་རྣམ་པ་གཉིས་ཀྱིས་གདུལ་བྱ་གང་ལ་གང་འདུལ་གྱི་ཕྲིན་ལས་ཚད་མེད་པ་རྟག་ཁྱབ་ལྷུན་གྱིས་གྲུབ་པའི་རང་བཞིན། རྒྱ་ཆེ་བ་ནམ་མཁའི་མཐའ་དང་མཉམ་པ། རྒྱུན་རིང་བ་འཁོར་བ་མ་སྟོང་གི་བར་དུ་འབད་རྩོལ་མེད་པར་འབྱུང་བ་ཡིན་ནོ། །འདི་རྣམས་གནད་ཟབ་ཉུང་བསྡུས་གོ་བདེར་བྲིས་པ་ཡིན་པས་རང་གིས་གཟིགས་རྟོགས་མཛོད། དཔེ་ཆའི་ནང་ཡོད་སྙམ་ནས་བསྐྱུར་མ་བཞག །གཞན་དག་སུ་ལའང་མ་སྟོན། དམ་ཚིག་གི་རྒྱ་ཡིན་ནོ། །ཉག་བླ་བསོད་རྒྱལ་གྱི་ཞལ་རྒྱུན་ནོ། །དགེའོ།། ༈ ཐོད་རྒལ་ཐད། གཏེར་ཆེན་རིན་པོ་ཆེའི་ཞལ་ནས། དབྱིངས་ཐིག་རིག་གསུམ་གྱི་སྣང་བ་མཐོང་ཚེ་དེ་ལ་བདག་གཉེར་གང་ཡང་མེད་པར་རིག་པ་ཀློད་དེ་འཇོག་པ་དེ་ཐོད་རྒལ་བསྒོམ་ལུགས་ལེགས་ཤོས་མིན་པར་གོ །ལུ་གུ་རྒྱུད་དབྱིངས་ཐིག་གི་ར་བར་གཟེར་བཏབ་པ་ལྟར་ཨར་ལ་གཏད་ནས། དེ་འདྲའི་ལུག་རྒྱུད་དེ་ལ་ནང་གི་རིག་པ་ཙིར་བཟུང་ལྟ་བུར་མདུང་ཚུགས་སུ་གཏད་པའམ། རིག་པ་ཁ་ཡན་དུ་མི་གཏོང་བར་ལུ་གུ་རྒྱུད་དེ་དང་བསྲེས་ནས་ཕུར་ཚུགས་སུ་ཧུར་ཐག་བྱས་ཏེ་བསྒོམ་པ་འདི་ལེགས་ཤོས་ཡིན་ནོ། ། ཤན་འབྱེད་དང་ལ་བཟླའི་དོན་མདོ་ཙམ་བཤད་པ་ཉག་བླའི་ཞལ་རྒྱུན།རྫོགས་ཆེན་གྱི་སྐབས་སུ་འདིར་སྒྲིབ་གཞིའི་གནས་ལུགས་ལ་རིག་པ་ཞེས་བྱ་བ། སྒྲིབ་བྱེད་ཀྱི་དྲི་མ་ལ་སེམས་ཞེས་བྱ། སྣང་ཚུལ་ཙམ་ལ་སེམས་འཁྲུལ་ཞིང་རིག་པ་མ་འཁྲུལ་བའི་ཁྱད་པར་ཤིན་ཏུ་ཆེ་བས་སེམས་རིག་སོ་སོར་ཤན་ཕྱེ་ནས། རིག་པ་རང་ཐོག་ཏུ་ངོ་སྤྲོད་པ་ལ་ཤན་འབྱེད་ཅེས་བྱ། གནས་ཚུལ་ལ་ནི་འཁྲུལ་བའི་སེམས་ཀྱང་འཁྲུལ་མེད་ཀྱི་རིག་པ་ཉིད་ལས་རྡུལ་ཙམ་མེད་པས་འཁོར་འདས་གཉིས་བསྡུས་ཀྱི་སྣང་སེམས་གང་ལ་ཡང་སྤང་བླང་དབྱེ་བསལ་གང་ཡང་མི་དགོས་པ་རིག་སྟོང་ཐིག་ལེ་ཉག་གཅིག་ཏུ་ཁོ་ཐག་ཆོད་པ་ལ་ལ་བཟླ་ཞེས་བྱའོ། །ཤན་འབྱེད་ལ་བརྟེན་ནས་གྲོལ་གཞི་མ་བཅོས་པའི་རིག་པ་སོ་མ་ངོ་ཤེས། ལ་བཟླ་ལ་བརྟེན་ནས་གྲོལ་རྒྱུ་རྣམ་རྟོག་བཟང་ངན་གང་ཤར་ཐམས་ཅད་གྲོལ་གཞིའི་རིག་པ་ཉིད་ལས་ནམ་ཡང་འདའ་མ་མྱོང་བའི་རང་ཤར་རང་གྲོལ་ཆུ་དང་རླབས་བཞིན་དུ་ངོ་ཤེས་པ་ལ་རང་གྲོལ་མངོན་སུམ་དུ་སྟོན་པ་ཞེས་བྱ། གནས་ཚུལ་ལ་རྣམ་རྟོག་ཐམས་ཅད་རིག་པ་ཉག་གཅིག་ལས་མི་འདའ་ཞིང་རིག་པ་དེ་ནམ་ཡང་འཁྲུལ་མ་མྱོང་བའི་ཡེ་གྲོལ་ཆེན་པོ་ཡིན་པས་ན། གྲོལ་བ་རིག་པ་དང་ཆོས་ཅན་ཐ་མི་དད་པས་མི་གྲོལ་རྒྱུ་ཞིག་མི་སྲིད་པས་གྲོལ་ཚུལ་དང་གྲོལ་བ་ཞེས་ཀྱང་མེད་དོ། །སྣང་ཚུལ་ལ་གྲོལ་བ་ནི་རིག་པ་ཉིད་དུ་ངོ་མ་ཤེས་པའི་དབང་གིས་ཤར་བའི་འཁྲུལ་སེམས་ཡུལ་དང་བཅས་པའི་རྣམ་རྟོག་གློ་བུར་དུ་བྱུང་བ་འདི་རྣམས་གྲོལ་རྒྱུ་ཡིན་ཞིང་། དེའང་དང་པོར་རྣམ་རྟོག་གང་ཤར་ཐམས་ཅད་རིག་པ་ལས་གཞན་ཞིག་ཡིན་ཡིན་ལྟར་ཤར་བས་ང་འཁྲུལ་སོང་སྙམ་དུ་དོགས་པ་ཤར་ན་ཡང་གཉུག་མའི་དྲན་པས་ངོས་ཟིན་མ་ཐག་ཏུ་དཔེར་ན་སྔར་འདྲིས་ཀྱི་མི་དང་འཕྲད་པ་ལྟར་རིག་པ་ཉིད་ཀྱི་འཆར་ཚུལ་ཡིན་པ་ངོ་ཤེས་ནས་གྲོལ་བ་དང་གཅིག བར་དུ་རྣམ་རྟོག་གང་ཤར་ཐམས་ཅད་རིག་པ་ལས་གཞན་དུ་འཛིན་པ་ཇེ་ཆུང་དུ་སོང་ནས་དྲན་པས་ངོས་བཟུང་ལ་ཆེར་མི་ལྟོས། དཔེར་ན་སྦྲུལ་གྱི་མདུད་པ་གྲོལ་བ་བཞིན་དུ་རྣམ་རྟོག་ཁོ་རང་གཉུག་མའི་ངོ་བོར་རང་ཤར་རང་གྲོལ་དུ་དག་པ་དང་གཉིས། མཐར་རིག་པ་དང་རྣམ་རྟོག་གཉིས་ཐ་མི་དད་པར་གང་ཤར་ཚད་གཉུག་མའི་ངོ་བོར་ལམ་གྱིས་སྟོང་ནས། སྣང་བ་ཕར་མ་ཆད། རིག་པ་ཚུར་མ་ཆད་པའི་གནད་ཀྱིས་ཡུལ་བཟང་ངན་སྣ་ཚོགས་སྣང་ཞིང་རྟོག་པ་བཟང་ངན་སྣ་ཚོགས་ཤར་ན་ཡང་རིག་པ་ལ་གང་ཡང་མི་གནོད་ཅིང་། དེ་ག་མ་སྣང་མ་ཤར་ཡང་རིག་པ་ལ་གང་ཡང་མི་ཕན་པ། དཔེར་ན་ཁང་སྟོང་དུ་རྐུན་མ་ཞུགས་ཀྱང་ཐོབ་ཤོར་གྱི་ཕན་གནོད་མི་སྲིད་པ་བཞིན་དུ་མ་ཤར་བའི་ཚེ་རིག་པ་གྲོལ་ཆེ་རྒྱུའི་ཕན་པ་དང་། ཤར་བའི་ཚེ་འཁྲུལ་སོང་བའི་ཤོར་རྒྱུའི་གནོད་པ་གང་ཡང་མེད་པར་གྲོལ་བ་དང་གྲོལ་རྒྱུ་གཉིས་སུ་མེད་པའི་ཚུལ་དུ་གྲོལ་བ་དང་གསུམ་པོ་འདི་གྲོལ་ཚུལ་ཡིན་ནོ། །དེ་ལྟར་རིག་པ་རང་གྲོལ་གྱི་ཉམས་ལེན་ལ་ཡང་ཡང་གོམས་པས་ཚོགས་ལམ་ནས་རྒྱུན་མཐའི་བར་དུ་སྒྲིབ་པ་གཉིས་ཀ་རིམ་གྱིས་གྲོལ་བ་ཇེ་ཆེར་སོང་ནས་མཐར་རྡོ་རྗེ་ལྟ་བུའི་ཡེ་ཤེས་ཀྱིས་སྣང་གསུམ་འཕོ་བའི་སྒྲིབ་པ་ལྷག་མེད་ཡོངས་སུ་གྲོལ་བའི་ཚེ་རྣམ་པར་གྲོལ་བ་མཐར་ཐུག་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་མངོན་དུ་འགྱུར་བ་ལགས་སོ། །འདིའང་རྫོགས་པ་ཆེན་པོའི་གསང་ལམ་ཉམས་སུ་བླངས་བས་རྟོགས་པ་བཟང་པོ་ཞིག་བྱུང་བ་དེའི་ངོར་རྒྱལ་དབང་པདྨའི་རིག་སྔགས་ཀྱི་རིགས་ཀྱི་རྟགས་ཙམ་འཆང་བ་ལས་རབ་གླིང་པས་སོ།། སེམས་རིག་ཤན་འབྱེད།འོད་གསལ་གྱི་རིག་པ་དེ་ཤ་ནང་གི་རྨེན་བསའ་བསའ། ས་ནང་གི་གསེར་བཙག་ནི་འདྲ་འདྲ། སེམས་རྣམ་ཤེས་ཚོགས་བརྒྱད་དང་སེམས་བྱུང་ལྔ་བཅུ་རྩ་གཅིག་གི་ནང་ནས་ངོས་ཟིན་དགོས་ནི་རེད། འོ་ད་དབང་པོ་དང་ཤེས་པ་གཞི་མཐུན་ཞིག་སྲིད་ནི་མ་རེད། བེམ་པོ་ཡང་ཡིན་པ་ཤེས་པ་ཡང་ཡིན་པ་ཞིག་ག་ལ་སྲིད། རྡུལ་དྭངས་བ་དཔེར་ན་མར་མེ་དང་ཤེལ་སྦུག་ལྟ་བུ་ཞིག་གི་སྒོ་ནས་ཡུལ་མཐོང་ནི་མ་རེད། མིག་བཙུམ་ན་ཤེས་པ་འགགས་ནི་མ་རེད་དབང་པོའི་སྒོ་བཀག་ནི་རེད། ཤེས་པ་ཡང་དབང་པོ་བཀག་ན་མེད་ན་མི་འབྱུང་བའི་གཏན་ཚིགས་རེད། ཡིད་ཤེས་རྟོག་མེད་ཀྱང་སྐྱེ་འགག་བྱེད་ཀྱི་ཡོད་ནི་མ་རེད། གཙོ་སེམས་ཡིད་ཀྱི་ཤེས་པ་དེ་མཆེད་པའི་ཚེ་ན་བདེ་གསལ་མི་རྟོག་གསུམ་ཡང་འཁོར་བ་ཁམས་གསུམ་དུ་སྐྱེ་བའི་རྒྱུ་རེད། ཡིད་ཤེས་དཔེར་ན་ཕར་ཡུལ་ལ་གསལ་བ་ཡིན་ན་གསལ་བ་རེད་ཅེས་ཟེར་བ་ལྟ་བུ་མིན་པ་གསལ་བས་རང་ངོ་མི་ཤེས། སེམས་སེམས་བྱུང་དང་བཅས་པ་རྐྱེན་བཞི་ལ་བརྟེན་ནས་སྐྱེ་དགོས་ནི་རེད། རྒྱུ་སྔ་མ་ཤེས་པ་དེ་དང་འདྲ་བ་སོགས་སྔོན་སོང་ཞིག་མེད་ན་སྐྱེ་ཁ་ཉན་ནི་མ་རེད། དཔེར་ན་རྒྱུའི་རྐྱེན་དང་། ཤེས་པ་སྔ་མ་འགགས་ནས་ཕྱི་མ་སྐྱེ་བའི་གོ་མ་ཕྱེ་ན་མི་སྐྱེ་བས་ན། དེ་མ་ཐག་ཏུ་སྐྱེ་བ་ནི་དེ་མ་ཐག་རྐྱེན་ནམ། བདག་རྐྱེན་དབང་པོ་དེ་མེད་ན་མི་འབྱུང་བའི་གཏན་ཚིགས་ཡིན་པས་ན་བདག་རྐྱེན་ནམ། ཡུལ་ཨུཏྤལ་སྔོན་པོ་ལྟ་བུ་དེ་མིན་ན་སྔོ་འཛིན་མིག་ཤེས་སྐྱེ་བའི་ཡུལ་མེད་པས་ན་དམིགས་རྐྱེན་ནམ། དེས་ཀྱང་ཁྱོད་ཀུན་གཞི་དང་ཀུན་གཞིའི་རྣམ་ཤེས་གཉིས་ཀྱང་གསལ་ཞིང་རིག་པ་ཤེས་པའི་མཚན་ཉིད་ཅན་ཞིག་ཡིན་ཡང་བྱེ་བྲག་མི་ཤེས་ཤིང་། སྤྱི་ཙམ་འཛིན་པ་སྣ་ཚོགས་སྣང་བའི་ཡུལ་ལ་ཁ་ཕྱིར་བལྟས་ཀྱི་ཚུལ་དུ་ཡོད་པ་བླུན་ཞིང་རྨོངས་པ་ཞིག་ཡིན་ནི་རེད། ཡིད་ཤེས་དེས་ཡུལ་གཟུགས་ཀ་བ་ལྟ་བུ་ཞིག་བཟུང་ཡོད་དུས་གཞན་གཅིག་སྐྱེ་ཁ་ཉན་ནི་མ་རེད། གཙོ་སེམས་མིག་གི་ཤེས་པ་དང་ཡིད་ཤེས་གཟུགས་ལ་གཏད་ཡོད་དུས་གཞན་རྣམས་སྣང་ལ་མ་ངེས་པ་ཟེར་རྒྱུ་དེ་རེད། ཡིད་ཤེས་ནི་སྐྱེ་ཡང་མེད་མ་སོང་གི་བར་དུ་གཞན་གཅིག་སྐྱེ་ཁ་མི་ཉན་པར་སྐྱེ་བའི་གོ་བཀག་ནི་རེད། རྣམ་རྟོག་སྐྱེ་ཚད་ཐམས་ཅད་ཡིད་ཤེས་གཅིག་པུ་རེ་སྐྱེ་དུས་ནི་བཀག་ནི་རེད། མ་སྐྱེས་དུས་ནི་མེད་ནི་རེད། སྐྱེ་ན་ཤེས་པ་རང་སྐྱེས་ནི་རེད། མེད་ན་རང་ཉིད་མེད་འགྲོ་ནི་རེད། དེ་མིན་གཞན་ཞིག་ཡོད་ནི་མ་རེད། འོ་ད་སྟོང་སང་ངེ་ཡོད་རྒྱུ་དེའི་ངང་ན་ཤེས་པ་འཁྲུལ་མི་ཤེས་ནི་ཞིག་ཡོད་ནི་གོ་དགོས་ནི་རེད། དེ་ཉིད་རྐྱེན་བཞི་ལས་སྐྱེ་དགོས་ནི་མ་རེད། འདུས་བྱས་ཡིན་ནི་མ་རེད། འདུས་བྱས་ནི་རྐྱེན་བཞི་ལས་བྱུང་ནི་རེད། རྟེན་ཅིང་འབྲེལ་འབྱུང་ཡིན་ནི་རེད། རིག་པ་ཡང་རྟེན་ཅིང་འབྲེལ་འབྱུང་མིན་ཟེར་ཉན་ནི་མ་རེད། ཤར་ཆ་འགག་མེད་རྟེན་འབྲེལ་གྱི་ཚུལ་དུ་འཆར་ནི་རེད། འོད་གསལ་རིག་པའི་དབྱིངས་ནས་ཤར་ཆ་ཤར་ཡང་ཁུར་རྩལ་ལས་འཆར་ནི་རེད། རང་ཉིད་ཡིན་ནི་མ་རེད། དཔེར་ན་མར་མེའི་འོད་ཟེར་ཡང་། འོད་ཀྱིས་མར་མེར་མི་གནོད། མར་མེས་འོད་ལ་མི་གནོད་པར་འདུག་ནི་རེད། དེ་བཞིན་ཏུ་འོད་གས ལ་རིག་པའི་དབྱིངས་སུ་ཅི་ཙམ་ཤར་ཡང་། འཆར་གཞི་ལ་མི་གནོད། གནོད་ནི་མི་དགོས་ལྷ་མཛེས་པས་རྒྱན་བཏགས་ནི་འདྲ་འདྲ་རྩལ་ལས་ཤར་བ་ཡིན་པས་རྩལ་ཇེ་འབར། ངར་ཆ་ཇེ་བཟང་དུ་སོང་ནི་རེད། ཁྱེད་ཀྱི་སྔོན་ལ་མི་ཞིག་སོང་ཡང་ཁྱོད་མེད་འགྲོ་ཁ་ཉན་ནི་མ་རེད། དེ་བཞིན་དུ་ཅི་ཙམ་ཤར་ཡང་ཟུར་དུ་འཆར་གྱི་ཡོད་ནི་འདྲ་འདྲ་ཞིག་ཡིན་ནི་རེད། ཡིད་ཤེས་དེ་དཔེར་ན་མི་རང་ཉིད་འགྲོ་གི་ཡོད་ནི་འདྲ་འདྲ་ཞིག་ཡིན་ནི་རེད། འདུག་ན་རང་འགྲོ་ན་རང་གཅིག་པུ་ལྟ་བུ། ཤེས་རིག་རང་ཚུགས་མ་ཤོར་བའི་དུས་ན་བདེ་གསལ་མི་རྟོག་གསུམ་ཡང་སྐུ་གསུམ་གྱི་ཉམས་ཞེས་ཟེར་ནི་རེད། སྐུ་གསུམ་ཉམས་ནི་ནམ་མཁའི་མཐའ་དང་མཉམ། །ཞེས་པའི་དོན་ནོ། །དེ་ཡི་དུས་ན་ཡུལ་དང་ཡུལ་ཅན་སེམས་སེམས་བྱུང་དང་བཅས་པ། ཡེ་ཤེས་ཀྱི་རོལ་པ་ཡིན་ནི་རེད། རྩལ་ལས་རོལ་པ་ཟེར་རྒྱུ་དེ། དཔེར་ན་མིག་ཤེས་དེས་གཟུགས་དེ་རོལ་ནི་རེད། ལྷ་ཡབ་ཡུམ་བཞག་ན་མིག་ཤེས་ཡབ་དེས་གཟུགས་ཡུམ་དེ་ཚུར་རོལ་ནི་རེད། དཔེར་ན་མར་མེ་ལྟ་བུ་ཞིག་ཡིན་ན། ནང་དུ་སྡོང་ཤིང་དང་ཕྱི་རུ་སྤུ་ཉག་ཁྲི་ཕྲག་ཞིག་ཡོད་ཀྱང་། མེ་གཅིག་གི་རྣམ་ལྡན་དུ་འབར་གི་ཡོད་ནི་ལྟ་བུ་སེམས་དང་རིག་པ་གཉིས་སྣང་བ་དང་མུན་པའི་ཁྱད་པར་ཙམ་ཞིག་ཡོད་ནི་རེད། རིག་པ་ནི་ཁྱིམ་ནང་མར་མེ་བཞག་པ་ལྟ་བུ་གསལ་ཁྱེར་འཁྱིལ་ལེ་ཡོང་ནི་རེད། རྩལ་ལས་ཤེས་རབ་སྙིང་རྗེ་དད་པ་སོགས་རྩོལ་མེད་དུ་རྒྱས་ཡོང་ནི་རེད། སེམས་ནི་མ་རིག་པ་གློ་བུར་དྲི་མ་འཛིན་ཞེན་ཅན་ཡང་གཅིག་གི་རྒྱབ་ན་གཅིག་ཡོད་ནི་རེད། གཅིག་པུ་ནི་སྤུས་གཙང་བ་དེ་ལྟ་བུ་ཞིག་གཏན་ནས་ཡིན་ནི་མ་རེད། རིག་ཐོག་ཏུ་ཡོད་དུས་སེམས་སེམས་བྱུང་དང་བཅས་པ་ཡེ་ཤེས་ཀྱི་རྣམ་ལྡན་དུ་ཤར་དགོས་སྤྱད་དེ། དཔེར་ན་རྩྭ་ཕུང་ཞིག་མེ་ལ་བསྲེག་དགོས་ན། རྩྭ་དེ་ལ་མེ་ལེན་པའི་ནུས་པ་ཞིག་ཡོད་ནི་རེད། དེ་བཞིན་དུ་སེམས་སེམས་བྱུང་དང་བཅས་པ་དེ་གསལ་ཞིང་རིག་པ་ཞིག་ཡིན་རྒྱུ་དེ་གང་གི་ཆ་ནས་འཇོག་དགོས་ན། འོད་གསལ་རིག་པའི་ཆ་ནས་འཇོག་དགོས་ནི་རེད། མེ་དང་ཚ་བ་ཆུ་དང་རླན་བཞིན་དུ་ཁྱབ་བྱ་ཁྱབ་བྱེད་ཀྱི་ཚུལ་དུ་ཁྱབ་ཡོད་ནིས་གནད་ཀྱིས་སྒོམ་པའི་ཚེ་ན་ཡེ་ཤེས་ཀྱི་རྣམ་ལྡན་དུ་འཆར་ནི་རེད། གནས་ཚུལ་དེའི་དབང་གིས་གཙོ་ཆེ་འགྲོ་སྟེ། མ་རིག་ཞེན་འཛིན་སོགས་གློ་བུར་གྱི་དྲི་མ་ཡིན་པས་གཙོ་ཆེ་བར་མི་འགྲོ། བཞུགས་ཚུལ་ལ་ཡེ་ནས་བཞུགས་ཀྱང་མཐོང་ཚུལ་ལ་སྐད་ཅིག་མར་མཐོང་ནི་རེད། དེའི་ངོ་དེ་ན་ཡུལ་དང་ཡུལ་ཅན་གཟུང་འཛིན་ནམ་རང་རྒྱུད་ཅན་གཅིག་སྐྱེ་ནུས་ནི་མ་རེད། སྒོ་ལྔའི་ཤེས་པའི་སྟེང་ནས་སེམས་དཔའ་བརྒྱད་བཞག་ན་དེ་ལྟར་ཤེས་དགོས་ནི་རེད། རིག་པ་སྐུ་གསུམ་སྟོན་པའི་སྐུ། འཁོར་སེམས་བྱུང་དང་བཅས་པ་འཁོར་གྱི་ཚུལ་དུ་བཞུགས་ནི་རེད། དཀྱིལ་འཁོར་གསུམ་ལྡན་དགུ་ལྡན་སོགས་ཀྱང་དེ་ལྟར་རོ། །དཔེར་ན་ལྕེ་ཐོག་བུ་རམ་ཞིག་བཞག་ན་སེམས་སེམས་བྱུང་དང་བཅས་པ་མངར་བའི་རྣམ་ལྡན་དུ་འགྱུར་ནི་རེད། རྟོགས་ལྡན་ཞིག་ཡིན་ན་ཡུལ་དང་ཡུལ་ཅན་ཡེ་ཤེས་འབའ་ཞིག་ཏུ་ཤར་ནི་རེད། རིན་ཆེན་གསེར་གླིང་སོགས་མཐུན་དཔེ་བཞག་ཡོད་ནི་རེད། ཆབ་རོམ་ལ་ཆུའི་རྒྱས་ཐེབས་ཡོད་ནི་འུ་ནམ་ཞིག་ཆུ་རུ་འགྱུར་བ་བཞིན་དུ་ཆོས་རྣམས་ཆོས་ཀྱི་དབྱིངས་ཀྱིས་རྒྱས་མ་ཐེབས་པ་ཞིག་མེད་ནི་རེད། ཆུ་གཅིག་ལ་ཡང་ས་རྡུལ་མེ་རྡུལ་སོགས་རྡུལ་རྫས་བརྒྱད་འདུས་དྲུག་འདུས་སོགས་ཡིན་ཀྱང་ཆུའི་ཤུགས་ཆེ་བ་བཞིན་དུ་ཁྱབ་བྱའི་ཤུགས་མི་ཆེའོ། །ཤར་བས་གཞི་ལ་མི་གནོད་པ་མེ་ལས་དུ་བ་མཆེད་པ་ལྟ་བུ་དུ་བས་མེ་ལ་མི་གནོད་མེས་དུ་བར་མི་གནོད་དོ། །རང་སྣང་ཡེ་ཤེས་ཀྱི་དཀྱིལ་འཁོར་ཟེར་རྒྱུ་དེ་རེད། རང་རིག་རང་ཤེས་འཁྲུལ་བ་བྲལ། །ཞེས་པའི་དོན་ཡིན་ནོ། །སྣང་སྲིད་དག་པ་རབ་འབྱམས་ཟེར་རྒྱུ་དེ་རེད། དེ་མིན་བླ་མ་ཕལ་ཆེར་ལ་དད་པ་རེས་འགའ་བ་ཞིག་ཡོད་རྒྱུ་དེ་རྒད་པོ་རྒན་མོ་རྣམས་ལའང་ཡོད་ནི་རེད། སྣང་སྲིད་རྣམ་དག་གི་དག་སྣང་ཟེར་རྒྱུ་དེ་ཐོག་ཡོག་བརྗེ་འཇོག་ནི་རེད། དང་པོ་ངེས་པ་འདྲོང་དགོས་ནི་རེད། ངེས་པ་རྙེད་ནས་མྱོང་བ་ཐོན་དགོས་ནི་རེད། དཔལ་སྤྲུལ་གྱིས། རྟོགས་ལྡན་ཞིག་ཡིན་ན་ལུས་མ་སྤངས་ཉིད་དུ་དག་པ་མཁའ་སྤྱོད་ན་བཞུགས་ཡོད་ནི་རེད། མ་དག་མི་དགེའི་ལས་བྱེད་ནི་ཞིག་ཡིན་ན་ལུས་མ་སྤངས་ཉིད་དུ་སྲིན་པོའི་ཁྲོད་གསུངས་པ་ལྟར་རོ། །སྔོན་རྒྱལ་བ་གོང་མ་ཞིག་ཡིན་ན་དམ་ཚིག་སྙིང་ལྟར་བསྲུང་། དབྱར་དགུན་སྟོན་དཔྱིད་དུས་བཞིར་གནས་བཞི་རེ་བསྟེན་པ་དང་། ལྟོ་ཡང་འགྲང་ཆེས་ན་དུབ་ཡོང་ནི་རེད། ལྟོ་ཚད་ལ་ཕབ། རྗེ་བཙུན་མི་ལས། དབྱར་དྲོ་བའི་དུས་སུ་གངས་རྩར་བྱོན། དགུན་གྲང་བའི་དུས་སུ་དམའ་མོའི་ལུང་གཞུང་དུ་བཞུགས་ནི་རེད། ལུས་ཀྱི་ལས་གསུམ་བླ་མའི་སྐུའི་དམ་ཚིག །ངག་གི་བཞི་གསུང་གི༴ ཡིད་ཀྱི་གསུམ་ཐུགས་ཀྱི༴ ཤིག་གཅིག་བསད་ན་སྐུའི་དམ་ཚིག་ཉམས་ནི་རེད། ལྟ་བ་ཡིད་ལ་མ་བྱས་ན། ཉིན་ཞག་གཅིག་སོང་ན་རན་ནི་རེད། སྔགས་ལ་ཞུགས་པའི་སྐྱེས་བུ་ངན་སོང་དང་། །སངས་རྒྱས་གཉིས་ལས་འགྲོ་ས་གསུམ་པ་མེད། །ཅེས་གསུངས་ནི་རེད། ཡང་ན་ཡར་ཡང་ན་མར་དེ་མིན་བར་དེ་ནི་འདུག་ནི་ལྷ་རེད་ན། སྔགས་ན་གཟུགས་སྒྲ་དྲི་རོ་རེག་བྱ་རྣམས་ཞེན་མེད་དུ་རོལ། འགག་མེད་དུ་མྱོང་། རྟོག་མེད་དུ་གྲོལ། ཡང་མིག་ཤེས་ལྷོད་སེ་བཞག་ཏེ་ནམ་མཁའ་ལ་གཏད་ན་ནམ་མཁའ་དང་འདྲེས་པ་ལྟ་བུའི་ཉམས་ཤར་ན་ནོར་ས་གཅིག །ཡིད་ཤེས་ཀྱིས་སྟོང་པའོ་སྙམ་པ་དང་། གསལ་བ་དང་། བདེ་བ་དང་། མི་རྟོག་པའོ་སྙམ་པས་ནོར་ས་གཅིག །དེ་མིན་ནོར་ས་མེད་པ་དང་འདྲ། དགེའོ། །བཀྲ་ཤིས། ། ཀུན་ཏུ་འགྲོ་བའི་ལམ་ལྔ་སོགས་བཤད་པའི་སྐོར།ལམ་ལྔ་ནི། དམྱལ་བ་གདུང་བའི་ལམ། ཡི་དྭགས་འགོག་པའི་ལམ། བྱོལ་སོང་མུན་པའི་ལམ། མི་འདམ་པའི་ལམ། ལྷ་གཡེང་བའི་ལམ་མོ། །ད་ལྟ་དང་ཕྱིས་ཀྱི་བདེ་སྡུག་ཏུ་བགྲོད་ཅིང་ཕྱིན་པར་བྱེད་པས་ལམ། རིགས་མི་འདྲ་བ་ལྔ་ཡོད་པས་ན་ལྔའོ། །མི་མིན་ནི་འདོད་ལྷར་བསྡུས་པའོ། །སྙན་བརྒྱུད་རྒྱབ་ཆོས་ལས་སོ། ། སྟོན་པ་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་ནི་སྡེ་སྣོད་གསུམ་དང་ཕྱི་རྒྱུད་གསུམ།སྟོན་པ་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་ནི་སྡེ་སྣོད་གསུམ་དང་ཕྱི་རྒྱུད་གསུམ། དེ་ཉིད་ལོངས་སྐུ་རྡོ་རྗེ་འཆང་གི་སྐུར་བཞེངས་ནས་སོགས། དེ་ནས་དགའ་རབ་རྡོ་རྗེས་སྤྱིར་རྒྱུད་གསུམ་འབུམ་ཕྲག་དྲུག་ཅུ་རྩ་བཞིའི་དབང་དང་གདམས་པ་གསན། བྱེ་བྲག་ཡང་གསང་བླ་ན་མེད་པའི་གདམས་པ་སོགས། དེ་ནས་འཇམ་དཔལ་བཤེས་གཉེན་གྱིས་རང་བཞིན་རྫོགས་པ་སོགས། སྙན་རྒྱུད་ལ་གཉིས་ཡོད་ནི་རེད། གསུམ་ཡོད་པར་གསུངས་ཀྱང་མ་མཐོང་གསུངས། ༈ སེམས་ཀློང་མན་ངག་གི་དགོངས་པའི་ཁྱད་པར་ལ། སེམས་སྡེ་ནི། ཕྱི་ནང་སྣོད་བཅུད་ཐམས་ཅད་བྱང་ཆུབ་སེམས་ཀྱི་ངོ་བོ་དང་། རྩལ་དང་། རོལ་བའི་འཆར་ཚུལ་ཡིན་པས། དེ་ལས་གཞན་གྱུར་གཅོད་པ་ལ་དགོངས་པའོ། །གང་ཤར་ཐམས་ཅད་མ་བཅོས་པར་ཤེས་མཁན། གོ་མཁན། རིག་མཁན་ཁོ་རང་གི་ཐོག་ཏུ་བཞག་དགོས་གསུངས་ནས་འགྱུ་བ་གནས་དག་གི་དགོངས་པ་སྐྱོང་བ་སེམས་སྡེ་བའི་ལུགས་ཡིན། སྣང་ཕྱོགས་སོ། ཀློང་སྡེ་ནི། ཆོས་ཅན་གྱི་སྣང་བ་ཐམས་ཅད་ཆོས་ཉིད་ཀུན་ཏུ་བཟང་མོའི་ཀློང་ལས་གཞན་བྱུང་འགོག་པའམ་གཅོད་པ་ལ་དགོངས་པའོ། །ཀློང་ཆེན་པོ་ནི། རྣམ་རྟོག་འགགས་པ་ཙམ་དང་རང་བཞིན་གྱི་རྐྱེན་འགའ་རེས་སྟོང་པའི་ཉམས་རེ་འཆར་བ་ཙམ་མ་ཡིན་བསམ་བརྗོད་དང་བྲལ་བ་གདོད་མའི་སྟོང་ཆེན་གྱི་དབྱིངས་ཡིན། དེ་ནི་བལྟ་རྒྱུ་མེད། བསྒོམ་རྒྱུ་མེད། བསྐྱང་རྒྱུ་ཅི་ཡང་མེད་ཅེས་གསུངས་པ་ནི་ཀློང་སྡེ་པའོ། །སྟོང་ཕྱོགས་སོ། ཟུང་འཇུག་རྩལ་དུ་བཏོན་པ་མན་ངག་གི་སྡེ་ནི། སྔོན་འགྲོ་སེམས་ཀྱི་ཁང་བུ་བཤིག་ནས། རིག་སྟོང་ཟུང་འཇུག་ངོ་སྤྲོད་དེ་མཉམ་པར་བཞག་པའི་དུས་ན་དྭངས་སང་ངེ་བའི་ཆ་སོགས་ཕར་བཞག་ལ། ཚུར་རིག་སྟོང་ཟུང་འཇུག་གི་རང་ས་བཟུང་བ་ཡིན་གསུངས། ༈ ཕྱག་མཆན་ནི་སྨྱོ་ཤུལ་བླ་མ་ལུང་རྟོགས་ལ་གནང་ནི་རེད། དེས་སུ་ལའང་མ་བསྟན་ནི་རེད། དེང་སང་ཨ་བསེས་ཀླུ་མོ་དགོན་ན་མཁན་སྤྲུལ་ཕྱག་ནས་བླངས་པ་ཡིན། ཞལ་རྒྱུན་ནི་ཨ་འཛོམ་འབྲུག་པ་ཚང་ལ་འཕོ་རྟ་ཕུལ་བ་དེ་ཡིན། གསུམ་པ་གསང་བ་མན་ངག་གི་སྡེ་ལ་སྐོར་བཞི་ལས། ཞལ་རྒྱུན་ལས། དེ་ཡང་ཕྱི་སྐོར་དུ་སོགས༴ ༈ དངོས་གཞི་འདི་དག་དེང་སང་མཁས་པ་སུས་ཀྱང་ཐེག་པ་འོག་མ་དང་སྦྱར་ནས་བཤད་ནི་རེད། དེ་ལྟར་མི་ཉན་ནི་རེད། གཞི་ཡིན་ལ་དངོས་མ་ཡིན་པ་ནི། རྫོགས་པ་ཆེན་པོ་ཁ་ཅིག་ཞེས་གསུངས་པ་དང་། མན་ངག་གི་སྡེའི་ནང་གསེས་ཕྱི་སྐོར་ལ་སྦྱར་དགོས། དེ་ཡང་གཞི་ཞེས་པ་གང་ཡིན་ན་ཀ་དག་ཁྲེགས་ཆོད་ཀྱི་ལྟ་བ་རེད། དེ་གཏན་ལ་དབབ་པ་ལ་སྔོན་འགྲོ་སེམས་ཀྱི་ཁང་བུ་བཤིག་པ་ལ། རྩད་བཅད་པ། མཚང་བཙལ་བ། བྱུང་གནས་འགྲོ་གསུམ་ལ་བརྟགས་པ་གསུམ། ལྟ་བ་དབུ་མ་ཐལ་འགྱུར་ལས་ཁྱད་པར་འཕགས་ཚུལ་རིན་པོ་ཆེའི་གསུངས་ལྟར་ཁྱད་གཞི་ཁྱད་ཆོས་བཞག་ཏེ་དངོས་གཞི་ནི། གཞི་དྲུག་སྐྱོན་ཅན་དུ་ཕྱེ་ནས། བདུན་པ་སྐྱོན་མེད་རང་གཞུང་གི་གཞི་སྐུ་གསུམ་འདུ་འབྲལ་མེད་པ་རིག་སྟོང་ཟུང་འཇུག་ཏུ་ངོ་འཕྲོད་པ་དེ་ཡིན། དངོས་ནི་གང་ཞེ་ན་ལྷུན་གྲུབ་ཐོད་རྒལ་རེད། དེ་ཡང་ཐོད་རྒལ་གྱི་སྔོན་འགྲོ་ཕྱི་ནང་གསང་གསུམ་གྱིས་འཁོར་འདས་རུ་ཤན་ཕྱེ་ནས། མ་དག་འཁོར་བའི་རྒྱུ་ཀུན་གཞི་སེམས་གསུམ། དག་པ་མྱང་འདས་ཀྱི་རྒྱུ་དབྱིངས་ཡེ་ཟུང་འཇུག་གི་ཀློང་དུ་གཏན་ལོག་གམ་གཏན་གྲོགས་བྱས་ནས། དངོས་གཞི་ཡེ་ཤེས་རང་སྣང་གི་དཀྱིལ་འཁོར་ཆེན་པོར་ངོ་འཕྲོད་པ་ཡིན། དེ་དག་ཞིང་སྐུ་ཕོ་བྲང་གསུམ་གྱི་རང་བཞིན་འདུ་བས་ན། ངོ་བོ་སྟོང་གདངས་དབྱིངས་རྣམ་དག་གི་སྒྲོན་མ་ཞིང་ཁམས། རང་བཞིན་གསལ་གདངས་ཐིག་ལེ་སྟོང་བའི་སྒྲོན་མ་གཞལ་ཡས་ཁང། ཐུགས་རྗེའི་རིག་གདངས་རྡོ་རྗེ་ལུ་གུ་རྒྱུད་ཀྱི་སྒྲོན་མ་སྐུ་རེད། དེས་ན་ལྷག་མཐོང་ཐམས་ཅད་ཀྱི་རྒྱལ་པོ་འོད་གསལ་རིག་གདངས་རྟོག་མེད་རྡོ་རྗེ་ལུ་གུ་རྒྱུད་ཡིན་ཚུལ་མི་ཕམ་རིན་པོ་ཆེས་གསུངས། ལྔ་ཚན་ལྔའི་ངོ་སྤྲོད་འདི་གཉིས་ཁྱད་པར་སྤུ་ཙམ་ཡང་མེད་པས་ན། ཁ་མི་མང་བར་རང་གི་སྙིང་གི་དཀྱིལ་དུ་ཚ་ར་གྱིས་ལ་ཉམས་སུ་ལོངས་ཞེས་གདམས་པའོ། །དངོས་ཡིན་ལ་གཞི་མ་ཡིན་ཞེས་པ་ནི། མན་ངག་རྫོགས་པ་ཆེན་པོ་ཞེས་འབུར་དོད་དུ་ཡོད་པ་འདི་ནི་གསང་སྐོར་དང་སྦྱར་དགོས་འོག་མ་དང་སྦྱར་མི་ཉན་ནོ། །པྲ་ཡས་པ་ཞེས་པྲའི་ལྷ་མོ་གཤེགས་པ་ལྟ་བུ་ཞེས་གསུངས་པས་སྙིང་པོ་མེད་པའོ། །དངོས་གཞི་གཉིས་ཀ་མིན་པ་ནི། ཐེག་པ་ཐུན་མོང་ཞེས་པ་ཉན་རང་ན་ལྟ་སྒོམ་རེ་ཡོད་པས་དེ་དང་མདོ་ཕར་ཕྱིན་ཐེག་པ་ནས་ཕྱི་རྒྱུད་དང་ཨ་ནུ་མན་ཆད་ལ་གོ་དགོས། མདོར་ན་གཞི་ཁྲེགས་ཆོད་ཀྱི་སྔོན་སེམས་ཀྱི་ཁང་བུ་བཤིག་པ་སྔོན་དུ་མ་སོང་། དངོས་གཞི་སྐུ་གསུམ་འདུ་འབྲལ་མེད་པ་རིག་སྟོང་ཟུང་འཇུག་ངོ་མ་འཕྲོད། ལམ་ཐོད་རྒལ་གྱི་སྔོན་འགྲོ་འཁོར་འདས་རུ་ཤན་མ་ཕྱེད། དངོས་གཞི་རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོ་ངོ་མ་འཕྲོད་པ་དེ་ཉིད་ཡིན་ནོ། །དངོས་དང་གཞི་གཉིས་ཀ་ཡིན་པ་ནི། ཀ་དག་ཁྲེགས་ཆོད་ཀྱི་ལྟ་བ་སྐུ་གསུམ་འདུ་འབྲལ་མེད་པ་རིག་སྟོང་ཟུང་འཇུག་དང་དེའི་རང་གདངས་འགག་པ་མེད་པ་ལྷུན་གྲུབ་ཐོད་རྒལ། རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོ་ངོ་འཕྲོད་པ་དེ་ཉིད་ཡིན་ནོ། །ཐེག་པ་རིམ་དགུའི་ལྟ་སྒོམ་ནི་གསང་སྐོར་མན་ཆོད་བཞག ༈ །རྡོ་གྲུབ་རིན་པོ་ཆེས། གསང་སྙིང་གི་ཕུག་འདི་རྫོགས་ཆེན་ལ་མ་གཏུག་གི་བར་དུ་དག་མཉམ་མཚན་ཉིད་པ་མི་ཤེས་ཏེ། ཕུང་ལྔ་དང་འབྱུང་ལྔའི་སྟེང་དུ་གནས་སྣང་རེ་ལུང་རིགས་ཀྱི་དཔྱད་པས་བཞག་རུང་གོ་བའི་ངེས་ཤེས་ཙམ་ལས་མི་འཆར་དེས་ན་འདི་ལྟར་བཞག་དགོས་ཏེ། སྙིང་ཁ་ཆོས་ཀྱི་ཕོ་བྲང་ནས་འཆར་གཞི་འོད་གསལ་སད་དེ་ཐོག་མར་སེམས་སེམས་བྱུང་མཐའ་དག་འོད་གསལ་གྱི་རྣམ་ལྡན་དུ་ཤར་དུས་སྣང་སྲིད་དག་པ་རབ་འབྱམས་སྙིང་དབུས་ན་དག་མཉམ་དུ་སད་ཡོད་པས། གནས་སྣང་མཐུན་པའི་མགོ་དེ་ནས་རྩོམ་པ་ཡིན། དེ་ལྟར་མཐོང་དུས་ཉི་མ་སྤྲིན་སྦུབས་ལས་གྲོལ་དུས་འོད་ཟེར་ཐམས་ཅད་དྲོད་ལྡན་དུ་ཡོད་པ་དང་། རིན་པོ་ཆེ་གསེར་གླིང་དུ་ཐོན་པ་ལྟ་བུ་ཡིན་ནོ། །འཆར་གཞི་འོད་གསལ་དོན་དམ་དཀོར་བདུན་དང་། འཆར་ཆོས་སེམས་སེམས་བྱུང་ཐམས་ཅད་འོད་གསལ་གྱི་རྣམ་ལྡན་དུ་ཤར་བ་ལྷག་པའི་ཀུན་རྫོབ་བདེན་པ་དང་། དེ་གཉིས་དབྱེར་མེད་པ་ལྷག་པའི་བདེན་གཉིས་དབྱེར་མེད་དམ་ཟུང་འཇུག་རེད། ཡུལ་ཐོག་ན་གཉེན་པོས་སྦྱང་བསྒྱུར་མི་དགོས་ཏེ། དུང་སེར་པོར་མཐོང་དུས་མཁྲིས་ནད་དག་དུས་དུང་གི་སེར་སྣང་དག་པ་དང་། མིག་སྐྱོན་རབ་རིབ་དག་དུས་སྐྲ་ཤད་དག་པ་ལྟར། མ་རིག་པ་དག་པས་དེས་བསྐྱེད་པའི་མ་དག་པའི་ཡུལ་སྣང་ཐམས་ཅད་གཉེན་པོ་གཞན་བསྟེན་མི་དགོས་པར་དག་པར་འགྱུར་རོ་ཞེས་གདམས་སོ། །དེས་ན་མ་དག་པའི་སྣང་བ་འདི་ཐོག་མའི་གཞི་དུས་ན་མེད། མཐར་ཕྱིན་འབྲས་བུའི་དུས་ན་མེད་པས་ན། རྣལ་འབྱོར་བའི་རིག་པ་གཤིས་ཐོག་ཏུ་ཕེབས་པ་དེའི་ཚེ་སྣང་བ་ཐམས་ཅད་ཧྲལ་ཧྲོལ་ཁྲལ་ཁྲོལ་ཙམ་ལས་མེད་པར་འགྱུར་བ་འདི་ཉིད་འཁྲུལ་སྣང་འདི་དག་ཐོག་མཐའ་ན་མེད་པའི་རྟགས་ཡིན་ཞེས་རིན་པོ་ཆེས་གསུངས། དོན་དཔྱོད་སྔོན་དུ་སོང་བའི་ལག་རྗེས་ལས་ཀུན་རྫོབ་ཀྱི་སྣང་བ་འདི་དག་སྣང་ཙམ་བཏགས་ཙམ་ཞིག་ལས་མེད་པར་རྟོགས་པའི་གང་ཟག་ལ། འཁྲུལ་སྣང་ཀ་ནས་དག་པའི་ཡེ་ཤེས་ངོ་འཕྲོད་སླ་བ་ཡིན་གསུངས་སོ། ༈ །གཙོ་སེམས་མིག་ཤེས་དང་འཁོར་ཀུན་འགྲོ་ལྔས་ཡུལ་སྔོན་པོ་མཐོང་དུས། དང་པོ་མིག་ཤེས་ཡུལ་ལ་གཡོ་བའི་ཆ་དེ་སེམས་པ། ཡུལ་ལ་གཏོད་པའི་ཆ་དེ་ཡིད་བྱེད། ཡུལ་དང་དབང་པོ་ཤེས་པ་གསུམ་འཕྲད་པའི་ཆ་དེ་རེག་པ། གཟུགས་ཡིད་འོང་མི་འོང་བར་མ་གསུམ་གང་རུང་ཉམས་སུ་མྱོང་བའི་ཆ་དེ་ཚོར་བ། སྔོ་སེར་སོགས་སོ་སོར་མ་འདྲེས་པར་ཤེས་པ་འདུ་ཤེས་དང་ལྔ་ནི་ཀུན་འགྲོ་ལྔ་ཡིན། ༈ ཤེས་རབ་རྣོ་བ་སྤུ་གྲི་ལྟ་བུ་མྱུར་བ་གློག་ཞགས་ལྟ་བུ་ཡོད་ན། སྔགས་རྫོགས་ཀྱི་དགོངས་པ་རྒྱ་ཆེ་བ་ནམ་མཁའི་ཕ་མཐའ་ལས་ཀྱང་རིང་བ། གཏིང་ཟབ་པ་རྒྱ་མཚོའི་གཏིང་མཐའ་བས་ཀྱང་ཟབ་པ། དེ་ཉིད་ཀྱི་གནད་དོན་རྟོགས་ནུས་ནི་རེད་མ་གཏོགས་དེ་མིན་དཀའ་ནི་རེད། བྱ་བའི་ཡུལ་ལ་ཡོད་པ་ཕྲིན་ལས་དང་། བྱེད་པ་པོ་ལ་ཡོད་པ་ཐུགས་རྗེ་གཉིས་ལྡན་དགོས་ནི་རེད་གསུངས། ༈ འདུན་པས་འགྲོ་བ་ནི་མཐོ་རིས་ཀྱི་བདེ་བ་ལ་དོན་དུ་གཉེར་བ་དང་། ཞེ་སྡང་གིས་ནི་གཞན་འབྱོར་ལ་སྡང་བ་དང་། གཏི་མུག་གིས་ལས་འབྲས་ལ་རྨོངས་པས་སྐྱབས་སུ་འགྲོ་བའོ། ༈ །ཉག་གཏེར་རིན་པོ་ཆེས་མཉམ་བཞག་གཅིག་གི་སྟེང་དུ་ལྟ་བའི་གནས་ལ་སྒྲོ་འདོགས་ཆོད་པ་ཐི་བྱས་ཚང་བཙལ་བ་ལྟ་བུའི་སྤྱོད་པ་དང་། བླ་མའི་གདམས་ངག་རྣམས་དྲན་པ་ནི་བུང་བ་ལྟ་བུའི་སྤྱོད་པ་དང་། འཁྲུལ་རྟོག་ལས་དབེན་པ་རི་དྭགས་ལྟ་བུ། སྨྲ་བརྗོད་ཀྱི་རྟོག་པའི་སྤྲོས་པ་བསྐྱུང་བ་ལྐུག་པ་ལྟ་བུ་ངག་གི་སྐྱོད་བྱེད་ཀྱི་རྩ་བ་ལས་རླུང་ཡིན་པས་རླུང་དེངས་སུ་བཅུག་སྟེ་གང་ཤར་རྟོགས་པའི་སྣ་མི་བསྐྱིལ་བར་ཤར་གྲོལ་དུ་གཏོང་བ་སྨྱོན་པ་ལྟ་བུ། མཉམ་བཞག་གི་ཡེ་ཤེས་དེ་མི་འཇིགས་པའི་གདེངས་དང་ལྡན་པ་སེང་གེ་ལྟ་བུ། གཙང་སྨེ་གཉིས་འཛིན་གྱི་རྟོག་པ་དང་བྲལ་བ་ཁྱི་ཕག་ལྟ་བུའི་སྤྱོད་པ་བདུན་ནོ། ༈ །དབྱིངས་ཀྱི་ནང་དུ་ཐིག་ལེ། ཐིག་ལེའི་ནང་དུ་ལུག་རྒྱུད་གཡོ་འགུལ་ཅན་ཡིན་ཀྱང་མི་འབྲལ་བ་ཆོས་ཉིད་མངོན་སུམ། དེ་ལས་གོང་འཕེལ་དུ་སོང་ནས་ཅུང་ཟད་འགུལ་འཕྲིག་གི་རྣམ་པ་ཅན་ཉམས་གོང་འཕེལ། དབྱིངས་ཐིག་སོགས་ལྷུན་གྲུབ་ཀྱི་སྣང་ཆ་གཡོ་འགུལ་མེད་པ་རིག་པ་ཚད་ཕེབས་ཡིན། སྤྱིར་སྣང་བ་འདི་དག་འོད་ལྔའི་རང་བཞིན་ཡིན་ཡང་སོ་སྐྱེས་ལ་མ་དག་པ་ལྟར་སྣང་། སྣང་བ་ལྟར་དུ་ཞེན། ཞེན་པ་ལྟར་ཨ་འཐས། རིག་པ་ཚད་ཕེབས་དུས་གནས་ཚུལ་ཇི་བཞིན་སྣང་བ་ཡིན་ལ། ནང་དུ་རིག་སྟོང་ཟུང་འཇུག་དུ་འབྲེལ་བའི་རྟགས་ཕྱི་རུ་ཐིག་ལེ་ཟུང་འབྲེལ། ཡེ་ཤེས་ལྔ་ཕྱོགས་ཙམ་རྟོགས་པའི་རྟགས་ཐིག་ལེ་ལྔ་འབྲེལ། འདིར་མ་དག་ས་བདུན་གྱི་སྤང་བྱ་སྤངས་ནས་དག་པ་ས་གསུམ་དང་སྐལ་བ་མཉམ་ནའང་དོན་ལ་ས་དང་པོ་ཡིན་པ་གོ་དགོས། དེ་དག་གི་འཕེལ་བ་ཟད་ནས་སྐྱེ་འཇུག་གཉིས་ལ་དབང་ཐོབ། ནང་དབྱིངས་སུ་ཐིམ་པ་ནི་ཆོས་ཉིད་ཟད་པའོ། ༈ །ཐོག་མར་དགེ་བ་སྐྱབས་འགྲོ་སེམས་བསྐྱེད། བར་དུ་དགེ་བ་ཐུགས་ཡིད་དབྱེར་མེད། ཐ་མ་དགེ་བ་བསྔོ་བ་སྨོན་ལམ་གསུམ་ཚང་དགོས། ༈ རྫོགས་ཆེན་སེམས་ཀློང་མན་ངག་གི་སྡེ་གསུམ་ལས། སེམས་སྡེའི་བྱང་ཆུབ་སེམས་ཀྱི་ངོ་བོ་དང་། རྩལ་དང་། རོལ་པ་གསུམ་པོ་གཞུང་དོན་ཡིན་གསུངས། རྩལ་ལས་རོལ་པ་གང་ཤར་ཐམས་ཅད་ཀྱི་ངོ་ལ་བལྟ། ངང་ལ་བཞག །མ་བཅོས་པར་བཞག་པས་རྟོག་ཚོགས་དྭངས་སོང་བའི་ཆ་བསྒོམས་པས་སྟོང་ཉིད་རྒྱས་འདེབས་སུ་ཤོར་བའམ་སྟོང་ཉིད་གཉེན་པོར་ཤོར་བ་ཡིན་གསུངས། ༈ སྒོ་ལྔའི་རྣམ་ཤེས་གསལ་བ་ལ། །ཡིད་ཀྱིས་རྟོག་དཔྱོད་མ་ཞུགས་པ། །རྒྱལ་བའི་དགོངས་པ་དེ་ཀ་རང་། །ཞེས་སོ། ༈ །གཞི་ཁྲེགས་ཆོད་ཀྱི་ངོ་སྤྲད་བྱ་རིག་སྟོང་ཟུང་འཇུག་སྐུ་གསུམ་འདུ་འབྲལ་མེད་ཚུལ་ལོ། །ཐོད་རྒལ་གྱི་ངོ་སྤྲད་བྱ་ཞིང་སྐུ་ཕོ་བྲང་གསུམ་པོ་ངོ་སྤྲོད་པ་ཡིན་གསུངས། ༈ སྣང་ཆ་གང་ཤར་མི་འགག་པར་སྤྱོད་པས་ན་སྤྱོད་པའོ།། ཉམས་ལེན་སྲང་ལ་འཇུག་ཚུལ།ཞར་ལ་ཉམས་ལེན་སྲང་དུ་འཇུག་པའི་ཚུལ་གཉིས་ལས། སྤྲོས་བཅས་སོགས། སྤྲོས་མེད་ནི། ཉིན་མོ་བྱ་བ་དགུ་ཕྲུགས་སུ་བཏང་ནས་བཞུགས་སྟངས་དང་མི་འབྲལ་བས་སྐུ་དང་ཐིག་ལེའི་ཀློང་དུ་རིག་པ་བརྗོད་མེད་དུ་བཞག །མཚན་མོ་ཆ་གསུམ་དུ་བྱས་པས། སྲོད་ལ་དྲང་སྲོང་གི་འདུག་སྟངས་དང་བཅས་པས། དབང་པོ་གནད་དུ་བསྡུ་བ་ནི། ལྟེ་བར་པདྨ་དམར་པོ་འདབ་བཞིའི་སྟེང་དུ་སྦྱང་བྱ་མེའི་དཀྱིལ་འཁོར་དབྱིབས་གྲུ་གསུམ་གྱི་རྣམ་པ་དེའི་དཀྱིལ་ན་ཡི་གེ་ཨ་ཐུང་དམར་པོ་ཨ་ཆེན་ལྟ་བུས་ཀྱང་ཆོག །མིན་ཀྱང་ལུགས་མང་ནི་རེད། དེའི་འོག་ཏུ་སྦྱོང་བྱེད་རླུང་གི་འཁོར་ལོ་གཞུའི་དབྱིབས་ཅན་གཞུའི་མཆོག་གཉིས་སྣ་བུག་གཉིས་ལ་ཟུག་པ་འཆང་བཟུང་ལ་ཡི་གེ་ཡཾ་གྱིས་མཚན་པ་ཞིག་བསྒོམ་ཏེ། སྤྱི་བོའི་ཚོགས་ཞིང་འོད་དུ་ཞུ་ནས་ཕྱིའི་རླུང་སེམས་ལ་ཐིམ། ཕྱིའི་རླུང་སྣ་བུག་གཉིས་ནས་རོ་རྐྱང་གཉིས་བརྒྱུད་ནས་ལྟེ་འོག་གི་ཡཾ་ལ་ཕོག་པས་ལས་རླུང་གཡོས། རླུང་ཨ་ཐུང་ལ་ཕོག་པས་ཨ་ཐུང་ལས་ཡེ་ཤེས་ཀྱི་མེ་འབར་བ་དབུ་མ་ནས་ཡར་སོང་ནས་སྤྱི་བོའི་ཧཾ་ཡིག་མགོ་ཐུར་བསྟན་ལ་ཕོག་པས་དེ་ལས་ཐིག་ལེའི་ཐིགས་པས་མེའི་གསོས་བྱས་ཤིན་ཏུ་འབར་བར་བསམ། དེས་ལས་དང་བག་ཆགས་བསྲེགས། བདེ་སྟོང་གི་ངང་ལ་བཞག་སྟེ་སྟེང་རླུང་ཅུང་ཟད་མནན། འོག་རླུང་ཅུང་ཟད་བསྡམ། བར་རླུང་ཅུང་ཟད་འཛིན། རྗེས་ཐོབ་དུས་བཟའ་བཏུང་སོགས་སྤྱོད་ལམ་ཐམས་ཅད་བདེ་སྟོང་དུ་ཤར། གང་སྣང་ཐམས་ཅད་བདེ་སྟོང་དུ་ཤར། སོར་མོའི་རྩེ་ཚུན་ཆད་བདེ་དྲོད་ཀྱིས་ལུས་ལ་སྐྲ་སེན་མིན་ཚད་ཁྱབ། ལོ་གཅིག་ཙམ་ལ་དེ་ལྟར་བྱས་པས་ཁམས་གསོ་བའམ་རྒྱས་ནུས་ཀྱང་བསྡམ་མ་དོ་ནས་ཁམས་འདི་ཉམས་ཀྱི་བསྡད་ན་གང་ཟག་དེའི་རྒྱུད་དེར་ཆང་འགག་གི་སྦང་མ་ལྟ་བུ་ཞིག་མ་གཏོགས་ཡོད་ནི་མ་རེད། དཔེར་ན་རྒུན་དུས་གསེར་གྱི་རྒོད་རྒན་ཐང་ལ་སོང་ནི་འདྲ་འདྲ་ཞིག་ཡིན་ནི་རེད། རྩ་ལྟུང་བཅུ་གཉིས་པ་འབྱུང་། རྟོགས་པ་རྒྱུད་ལ་མི་སྐྱེ། ཤེས་རབ་ཞན་པ་སོགས་སོ། །འདི་མི་ཉམས་ཆེད་དུ་འདོད་ཆགས་ཀྱིས་དབང་གིས་ཡིན་ན་མི་སྡུག་པ་སྒོམ། གདོན་དབང་ལ་བསྲུང་བ་སོགས། ནད་ལ་སྨན། རྩ་རླུང་དང་འཁྲུལ་འཁོར་སོགས་ཀྱིས་བཅོས། འདི་ལྟར་དམིགས་པ་བྱས་ན་འབེབས་པ་སླ་ཡང་ཕྱིས་སུ་བསྲུང་མ་ནུས་ན་ཅང་ཕན་ཐོག་ཡོད་ནི་མ་རེད། བསྲུང་ནུས་ན་ལུས་ཀྱི་དྭངས་མ་གསོ་ནུས་ཏེ། སྙིང་གར་ཁམས་དཀར་དམར་གཉིས་ཁ་བསྡེབས་ཏེ་གཞིའི་ངང་ན་གནས། བན་ཆུང་ཁམས་མ་ཉམས་བདག་འདྲ་ཡིན་ན་དེ་ལྟར་ཅུང་ཟད་རེ་བཟུང་བས་ཀྱང་རྟགས་ལེགས་པར་འཆར་བ་སོགས་སོ། །དགུང་ལ་སེང་གེའི་འདུག་སྟངས་དང་བཅས་ཤེས་བྱ་བུམ་པར་བསྡུ་བ་སོགས་སོ། ༈ །ཨ་གཏུམ་ཨ་ཐུང་ཨ་ཤད་གསུམ་གྱི་ཁྱད་པར། ཨ་གཏུམ་ཨ་ཐུང་ཨ་ཤད་ཅེས་གསུམ་དུ་འབྱུང་ལ། དེའི་དང་པོ་ནི་ཉོན་མོངས་འཇོམས་པ་སྟེ་བྱེད་ལས་དང་། གཉིས་པ་སྐྱེ་བ་མེད་པ་སྟེ་རང་བཞིན་དང་། གསུམ་པ་ཨ་ཕྱིས་ཤུལ་གྱི་ཨ་ཤད་དབྱིབས་གསུམ་ལས་བཏགས་པ་ཡིན་ནོ། ། དྭངས་མ་ལྔ་སོགས་བཤད་པའི་སྐོར།དྭངས་མ་ལྔ་ནི་ཤའི་དྭངས་མ་དབུ་མའི་རྩ། ཁྲག་གི་དྭངས་མ་ཨ་ཐུང་མེ། རུས་པའི་དྭངས་མ་ཐིག་ལེ་ཧཾ།། དབུགས་ཀྱི་དྭངས་མ་སྲོག་གི་རླུང་། ཡིད་ཀྱི་དྭངས་མ་ཀུན་གཞིའི་སེམས་ཞེས་སོ། ༈ ཚེ་ལ་རྣམ་པ་གསུམ་ཡོད་དེ། འཕོ་ཞིང་གཡོ་བ་ཐིག་ལེའི་ཚེ། འགྲོ་དང་འོང་བ་རླུང་གི་ཚེ། འོད་གསལ་འགྱུར་མེད་གཉུག་མའི་ཚེ་ཞེས་སོ། ༈ །མངོན་བརྗོད་ལས། སྲུང་བར་བྱེད་པ་བསྙུང་གནས་ནི། །ཁ་ཟས་ཉུང་ངུར་ཟ་བའི་མིང་།། བསྙུང་བ་ཉུང་ངུ་མེད་པའི་མིང་། ཞེས་སོ། ༈ །ཁམས་དྲུག་ལྡན་ནི། པགས་པ། ཤ། ཁྲག །རུས་པ། རྐང་། ཁམས་དཀར་དམར་དང་དྲུག་གོ། ༈ །ཉོན་སྒྲིབ་ནི་ཆགས་སྡང་སོགས། ཤེས་སྒྲིབ་ནི་བདེན་འཛིན། ཤེས་སྒྲིབ་ཕྲ་བ་བག་ཆགས་ཏེ། སྣང་སེམས་བག་ཆགས་ས་བཅུའི་རྒྱུན་མཐའ་ན་སྐར་མདའ་རྒྱུག་པའི་ཆ་ཙམ་དེས་རིག་ངོ་ལ་སྒྲིབ་པས་ན་སྒྲིབ་པའོ། །ལས་སྒྲིབ་ནི་རང་བཞིན་གྱི་སྡིག་པ་དང་བཅས་པའི་སྡིག་པའོ། ༈ །ཕྲིན་བཅོལ་གྱི་སྐབས། རྒྱལ་པོ་ལྟར་སྤྱི་ལ་ཁྱབ་པ་དང་༡། བློན་པོ་ལྟར་ཕྱོགས་ལ་ཁྱབ་པ་དང་༢། ཕོ་ཉ་བ་ལྟར་གནད་ཐོག་ཏུ་འབེབས་པ་དང་གསུམ་མོ༣། ༈ །དྲོད་རླུང་གཉིས་ལ་སྲོག་ཅེས་བཤད་དོ། ༈ །སྤྱིར་འོད་གསལ་རྫོགས་པ་ཆེན་པོ་ལ་བརྒྱུད་པའི་ལོ་རྒྱུས་ཞིག་དང་། དེ་ལས་བརྒྱུད་པའི་མན་ངག་ཅིག་ཡོད་ནི་རེད། དེ་ཡང་ཆོས་སྐུ་རྡོ་རྗེ་འཆང་ནས་ད་ལྟའི་རྩ་བའི་བླ་མའི་བར་དུ་བརྒྱུད་པ་གསེར་གྱི་ཉག་ཐག་ལྟ་བུ་ལ་དམ་སེལ་གྱི་གཡའ་ཡིས་མ་གོས་པ་ཞིག་ཡིན་དགོས་ནི་རེད། བརྒྱུད་པ་བྱིན་རླབས་ཀྱི་ཚན་ཁ་མ་ཉམས་པ་ཞིག་དང་། དེ་ལས་བརྒྱུད་པའི་ཕྱག་བཞེས་ཀྱི་གནད་མ་འཆུག་པ་ཞིག་དགོས་ནི་རེད། བརྒྱུད་པའི་མན་ངག་ནི་སྨིན་བྱེད་དབང་བཞི་དང་གྲོལ་བྱེད་ཁྲེགས་ཐོད་དོ། །ཁྲེགས་ཆོད་ལ་ཡང་། སྔོན་འགྲོ་སེམས་ཀྱི་ཁང་བུ་བཤིག་པ། དངོས་གཞི་རིག་པའི་ངོ་སྤྲད་པ་དང་། རྗེས་ཉམས་ལེན་གྱི་སྐྱོང་ཚུལ་དང་གསུམ་མོ། །སྔོན་འགྲོ་ལ་རྟོག་པ་རྩད་བཅད་པ། མཚང་བཙལ་བ། བྱུང་གནས་འགྲོ་གསུམ་བརྟག་པའོ། །དངོས་གཞི་དེ་ལ་དད་པ་ཅན་ལ་བྱིན་རླབས་འཕོ་བའི་སྟོབས་ཀྱི་ངོ་སྤྲོད་པ་ནི། གང་ཟག་དད་པ་ཅན་ལའོ། །ཤེས་རབ་ཅན་ལ་གནས་ལུགས་ལྟ་བའི་སྟེང་ནས་ངོ་སྤྲོད་པ་ནི། ཁང་བུ་བཤིག་པ་སྔོན་དུ་སོང་ནས་དངོས་གཞི་ངོ་སྤྲོད་པའོ། །རིག་པ་རང་སྣང་གི་བློ་ཅན་ལྟ་ཐོག་ནས་སྒོམ་པ་བཙལ་བ་ཡིན་ནོ། །བརྩོན་འགྲུས་ཅན་ལ་ཉམས་མྱོང་སྒོམ་པའི་སྟེང་ནས་ངོ་སྤྲོད་པ་ནི། སྣང་བ་ཡུལ་གྱི་བློ་ཅན་ཡིན་པས་སྒོམ་ཐོག་ནས་ལྟ་བ་བཙལ་བའོ། །རྗེས་ཉམས་ལེན་ནི། རྨི་ལམ་དང་བར་དོ་ལམ་འཁྱེར་རོ། ༈ །ཐོད་རྒལ་ལ། སྔོན་འགྲོ་ཕྱི་ནང་གསང་གསུམ་གྱི་རུ་ཤན་ལེགས་པར་ཕྱེ་བ་དང་། དངོས་གཞི་རང་སྣང་ཡེ་ཤེས་ཀྱི་དཀྱིལ་འཁོར་དུ་ངོ་སྤྲོད་པ་དང་། ཅོག་བཞག་བཞི་དང་། ལམ་སྣང་བཞི་མཐར་ཕྱིན་པར་བྱེད་པའོ། ༈ །སྐབས་དང་པོ་རིག་པ་རྗེན་ལ་ཕུད་ནས་ངོ་སྤྲད། སྐབས་གཉིས་པ་གནས་འཕྲོ་གཉིས་པོ་ལ་གནས་ཆ་དྭངས་ཆ་ཐོན་པ་ཉམས་ཞེན་དང་བྲལ་བ། འཕྲོ་ཆ་གྲོལ་ཆ་ཐོན་ནས་འཁྲུལ་ཆ་བྲལ་བའོ། །དེ་ལའང་འཕྲོ་གནས་ཡང་ཟེར་རིག་པ་བཞེངས་བཞུགས་ཡང་ཟེར་རོ། །ཞེས་སོ། ༈ །འཁོར་འདས་རང་གྲོལ་ལས། ངོ་བོ་གདོད་ནས་དག་པ་ཡི། །ཀ་དག་ཕྱོགས་ཡན་མ་རྟོགས་བཞིན། །སྟོང་པ་ལོགས་ནས་བསྒྲུབ་པ་ནི། །གཤིས་ལ་ཤོར་བ་ཞེས་སུ་བཤད། །རང་རིག་ཟང་ཐལ་ཆེན་པོ་ལ། །རྒྱུ་འབྲས་ལྷུན་གྲུབ་མ་ཤེས་པ། །སྟོང་ཉིད་ལམ་ནས་འབྲས་བུ་གཞན། །བཙལ་བ་ལམ་དུ་ཤོར་བའོ། །སྤང་གཉེན་གཉིས་ལས་རབ་འདས་པའི། །སྦྲུལ་མདུད་ཞིག་ལྟར་ངང་གནས་ལས། །ཉམས་མྱོང་སྟེང་དུ་གཉེན་པོ་གཞན། །བསྒོམ་པ་གཉེན་པོར་ཤོར་བའོ། །གསལ་སྟོང་ལྷུན་གྲུབ་མ་རྟོགས་བཞིན། །བློ་དང་རྣམ་རྟོག་རྗེས་འབྲངས་ནས། །རྒྱུ་འབྲས་མེད་པའི་སྐུར་འདེབས་པ། །འདི་ནི་རྒྱས་འདེབས་སྟོང་པའོ། །རུ་ཤན་སྐབས། ༈ མདོ་ལས། མི་འཛིན་པ་རིག་པའི་ངོ་བོ་འཛིན་པ་ཐམས་ཅད་བྲལ་བ་སྦྱིན་པ། མཐའ་བཞི་བརྒྱད་གང་དུའང་མི་གནས་པ་ཚུལ་ཁྲིམས། ཁྲོ་སེམས་སོགས་བྲལ་ནས་ཡུལ་གང་ལའང་མི་སྐྲག་པ་བཟོད་པ། མཐར་ཐུག་པའི་ལུས་ངག་ཡིད་གསུམ་དགེ་སྦྱོར་སོགས་གང་ལའང་མི་བརྩོན་པ་བརྩོན་འགྲུས། ཡུལ་དང་ཡུལ་ཅན་དུ་འཛིན་པའི་སེམས་མེད་པའི་མི་སེམས་པ་བསམ་གཏན། ཆོས་དང་ཆོས་ཅན་ལའང་དམིགས་བྱེད་བྲལ་བའི་ཅི་ཡང་མི་དམིགས་པ་ཤེས་རབ་ཡིན་ཞེས་སོ། ༈ །མི་མཐུན་ཕྱོགས་བྱུང་ན། སྤོང་བའི་གཉེན་པོ་འདུ་བྱེད་པ་སེམས་པ་དང་། སེམས་ཙམ་པས། སེམས་པ་རྐྱང་བ་ལ་བྱས་ན་རྒྱུན་མེད་ཅིང་བག་ཆགས་ཙམ་ལ་བྱས་ན་གཏོང་རྒྱུ་བྱུང་བའི་གནས་སྐབས་སུའང་རྗེས་སུ་འབྲང་བའི་ཕྱིར་རོ། །སེམས་གཡེང་བ་ལ་སོགས་པའི་སྐབས་སུ་སེམས་པ་དེ་མེད་ན་སྡོམ་དང་སྡོམ་པ་མིན་པ་གཉིས་ཇི་ལྟར་ཡོད་ཅེ་ན། སྡོམ་པའི་ཁྱད་པར་གྱིས་བག་ཆགས་མ་བཅོམ་པའི་ཕྱིར་སྡོམ་དང་སྡོམ་པ་མ་ཡིན་པ་གཉིས་ཀ་ཡོད་དོ། །དབུ་མ་པ་ནི་སྤྱོད་འཇུག་ལས། སྤོང་བའི་སེམས་ནི་ཐོབ་པ་ལ། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་སོ། །ཉོན་མོངས་པ་ཐམས་ཅད་ཆོས་ཉིད་དུ་སྦྱང་ནུས་པས་མི་གནོད་པ་དང་། སྙིང་རྗེ་ཆེན་པོའི་ཐབས་མཁས་ཀྱིས་ལམ་གྲོགས་སུ་བསྒྱུར་ནུས་པ་དང་། གསང་སྔགས་ཀྱིས་བསྐྱེད་རྫོགས་ཟབ་མོའི་དོན་དུ་རྣལ་འབྱོར་བས་ཉོན་མོངས་པ་ལམ་དུ་ཁྱེར་བའོ། ༈ །འཇིགས་མེད་གླིང་བས། མཉམ་བཞག་ནམ་མཁའ་ལྟ་བུ་ལ། །དྲན་རིག་སོ་མའི་དབྱིངས་ན་ཡོད། །ཅེས་སོ། ༈ །དྲན་པ་གསུམ་ནི་རང་གསལ་འགག་མེད་ཀྱི་དྲན་པ་ཁྲེགས་ཐོད་གཉིས་ལ་དགོས། གཞི་གནས་རང་བྱུང་ཁྲེགས་ཆོད་ཀྱི་དྲན་པ། སྣང་བ་ཅེར་འཛིན་ཐོད་རྒལ་གྱི་དྲན་པ། མན་ངག་མཛོད་ན་དྲན་པ་དྲུག་གསུངས་ཀྱང་དྲན་པ་གསུམ་ལ་འདུས། ༈ ཐེག་མཆོག་མཛོད་ལས། དེ་ཡང་རྣམ་ཤེས་ཚོགས་བརྒྱད་ནི། ཀུན་གཞིའི་རྣམ་པར་ཤེས་པ་ཡུལ་དུ་མི་རྟོག་རྣམ་པ་འཆར་བའི་རྒྱུར་གྱུར་བའི་རྣམ་ཤེས་རྟོག་མེད་དྭངས་པ་དང་། དེ་ལས་མཆེད་པའི་སྒོ་ལྔའི་ཤེས་པ་ལས། མིག་གི་རྣམ་ཤེས་གཟུགས་འཛིན་རྟོག་མེད། རྣ་བའི་རྣམ་ཤེས་སྒྲ་འཛིན་རྟོག་མེད། སྣའི་རྣམ་ཤེས་དྲི་འཛིན་རྟོག་མེད། ལྕེའི་རྣམ་ཤེས་རོ་འཛིན་རྟོག་མེད། ལུས་ཀྱི་རྣམ་ཤེས་རེག་འཛིན་རྟོག་མེད་དོ། །དེ་ལས་གཟུང་འཛིན་གྱི་ཡིད་ཤེས་གཉིས་ཏེ། ཡུལ་དང་པོར་སྤྱི་འཛིན་པ་ཡིད་ཤེས་དང་། རྗེས་ལ་བྱེ་བྲག་འཛིན་པ་ཉོན་ཡིད་དེ། གཟུང་བ་དང་འཛིན་པའོ། །ཡིད་ཤེས་འདི་གཉིས་ལ་དགེ་མི་དགེ་ལུང་མ་བསྟན་གསུམ་ཡོད་ལ། རྟོག་བཅས་རྟོག་མེད་ཅི་རིགས་སུ་ཡོད་དོ། །སྒོ་ལྔ་དང་ཀུན་གཞིའི་རྣམ་ཤེས་རྟོག་མེད་ཡིན་ནོ། །ཞེས་སོ། ༈ །མངོན་སུམ་རྟགས་ལ་མ་བརྟེན་པར། །རྗེས་དཔག་འབྱུང་བ་མི་སྲིད་དོ། །ཞེས་སོ། །མོས་གུས་དང་ཡེངས་མེད་ལུས་པོ་དང་། ཞེན་ལོག་སྒོམ་གྱི་རྐང་བ་ཚང་བ་ན། སྒོམ་གྱི་མགོ་རྐང་ཚང་བས་འདོད་དོན་འགྲུབ་ཅེས་སོ། །ཐམས་ཅད་བཙས་མ་ཐག་པ་བཞིན་ཞེས་སྒྲ་དོན་འདྲེས་འཛིན་གྱི་རྟོག་པ་མི་མཆེད་པའོ། ༈ །ཁམས་གསུམ་དུ་སྐྱེ་བའི་གོལ་ས་དེ་དག་སྐུ་གསུམ་གྱི་ཀློང་དུ་གྲོལ་དགོས་གསུངས་སོ། །ཞབས་དྲུང་པས། ཐ་མལ་པ་ཤེས་པ་རང་འགགས་སུ་འགྲོ་བ་ཞིག་དགོས་གསུངས། ༈ །ཕྱག་ཆེན་པས། གནས་འགྱུ་གཉིས་པོ་རིག་པའི་རྒྱུན་སྐྱོང་ནི་རེད། རྫོགས་ཆེན་པས། འཕྲོ་གནས་གཉིས་པོ་དྲན་པའི་རྒྱུན་སྐྱོང་ནི་རེད། འཕྲོ་བ་དེ་ལ་འཁྲུལ་གྲོལ་གཉིས་དང་། གནས་པ་དེ་ལ་དྭངས་སྙིགས་གཉིས་སོ། །ཁྲེགས་ཆོད་ཀྱི་རིག་གདངས་ཟེར་བ་དེ་ཤེས་པ་ལ་ཟེར། ཐོད་རྒལ་རིག་གདངས་དེ་ལུ་གུ་རྒྱུད་ལ་ཟེར་གསུངས་སོ། ༈ །གཏེར་སྟོན་བོན་པོ་དྲག་རྩལ་གྱིས་གསུངས་པའི་རྫོགས་ཆེན་གུ་རུ་བཞི་ཞེས། དགའ་རབ་རྡོ་རྗེ། ཤྲི་སེང་ཧ། ཛྙ་ན་སུ་ཏྲ། འཇམ་དཔལ་བཤེས་གཉེན་བཞིའི་ལོ་རྒྱུས་ཡོད་ནི་གི་བཞི་པ་ཟེར་གསུངས་སོ། ༈ །རུ་ཤན་སྐབས། རེ་འགའ་རང་གིས་ཞེ་སྡང་གི་སྒོ་ནས་བསགས་པའི་ལས་དང་སེམས་ཅན་ཐམས་ཅད་ཀྱིས་ཞེ་སྡང་གི་སྒོ་ནས་བསགས་པའི་ལས་ཀྱི་རྣམ་སྨིན་རང་ལ་སྨིན། དམྱལ་བའི་སྡུག་བསྔལ་རང་ཐོག་ཏུ་བླངས་ནས། སྒྲ་སྐད་ཐམས་ཅད་ངུ་འབོད། ཚོར་བ་ཐམས་ཅད་སྡུག་བསྔལ། མཐར་རིག་སྟོང་ཆོས་སྐུའི་ངང་ལ་བཞག་པས་འཁྲུལ་ས་འཁྲུལ་སྣང་དང་བཅས་པ་རང་སར་དག །ཡི་དྭགས་སོགས་ཀུན་ལ་རིགས་འགྲེས། རེས་འགའ་སེམས་ཅན་ཐམས་ཅད་ཕ་མར་ཤེས་ནས་སྙིང་རྗེ་རང་རྒྱུད་པ་སྐྱེ་བཅུག་མཐར་རིག་སྟོང་གི་ངང་ལ་བཞག །དགྲ་གཉེན་བར་མ་གསུམ་ལ་དེ་ལྟར་བྱའོ། །རེས་འགའ་སྣོད་བཅུད་སྐུ་དང་ཡེ་ཤེས་སུ་ཐག་བཅད། ཐ་མལ་ལྟར་འཛིན་པའི་རྟོག་པ་དབྱིངས་སུ་ལྷོད། རེས་འགའ་གང་ཟག་གི་བདག་དང་བདག་འཛིན་སྦྱང་། རེས་འགའ་ཆོས་ཀྱི་བདག་དང་བདག་འཛིན་སྦྱང་། ནམ་ཡིན་ཡང་རིག་ཐོག་ཏུ་ས་མ་ཟིན་ན་རྒྱུག་མཆོང་འུར་དིར་བྱས་པས་དོན་མེད་ཡིན་གསུངས། ། གསུང་རྒྱུན་ཟིན་བྲིས།ཀུན་གཞི་ཞེས་པ་དེ་ལ་གཉིས་ལས། དང་པོ་ཡེ་དོན་གྱི་ཀུན་གཞི་ནི་བདེ་གཤེགས་སྙིང་པོ་དེ་ལ་ཟེར་ནི་རེད། དེ་ནི་ཟག་མེད་ཀྱི་ཆོས་ཁམས་རྒྱ་མཚོའི་རྒྱུ་སྐུ་དང་ཡེ་ཤེས་ཀྱི་འཆར་གཞི་ཡིན་ནི་རེད། གཉིས་པ་མ་དག་འཁོར་བའི་ཀུན་གཞི་ནི་ཟག་བཅས་ཀྱི་ཆོས་གཙོ་སེམས་རྣམ་ཤེས་ཚོགས་བརྒྱད་དང་འཁོར་སེམས་བྱུང་ལྔ་བཅུ་དང་། ཕྲ་བ་ཀུན་རྟོག་བརྒྱད་ཅུ་དང་བཅས་པའི་འཆར་གཞི་ཡིན་ནི་རེད། ཀུན་གཞི་དེ་ནི་རྟོག་པ་སྔ་མའི་བག་ཆགས་བསོགས་པའི་སྣོད་ལྟ་བུ་དང་། རྟོག་པ་ཕྱི་མ་རྣམས་མཆེད་པའི་རྟེན་བྱེད་ནི་རེད། ཀུན་ག ཞིའི་རྣམ་ཤེས་དེ་ནི་སྒོ་ལྔའི་རྣམ་ཤེས་དང་། ཡིད་ཤེས་དང་། ཉོན་ཡིད་རྣམས་འཕྲོ་བའི་གཞིར་གྱུར་བ་ཡིན། ཀུན་གཞིའི་རྣམ་ཤེས་དེ་ནི་ཡོད་མེད་སོགས་གང་གི་ཕྱོགས་སུ་མ་ལྷུང་བའི་སྣོད་བཅུད་རྒྱ་ཆེན་པོ་ལ་དམིགས་པ། ཡུལ་གྱི་རྣམ་པ་དཀར་སྔོ་སོ་སོར་སྤུ་རིས་མི་འབྱེད་པ། ཀུན་གཞི་རང་གི་ངོ་བོ་ལ་རྣམ་རྟོག་རགས་པའི་རླབས་ཞི་བས་ན། དེ་རླབས་དང་བྲལ་བའི་རྒྱ་མཚོ་ལྟ་བུ། དེ་ལ་རྩེ་གཅིག་ཏུ་གནས་ཤིང་གོམས་ན་གཟུགས་མེད་དུ་སྐྱེ་འགྲོ། ཤེས་པ་རང་གི་ངོ་བོ་རང་བློ་རང་ལ་ལྐོག་ཏུ་མ་གྱུར་པའི་གསལ་ཆ་ལ་ཡང་གོམས་ཤུགས་ཆེ་ན་གཟུགས་ཁམས་གནས་རིས་བཅུ་བདུན་གྱི་ནང་ཚན་འཕགས་པའི་ས་ལྔ་ལ་མི་སྐྱེ། དེ་མན་གྱི་སོ་སྐྱེའི་ས་བཅུ་གཉིས་ཡོད་པའི་ཁམས་གོང་མ་དང་། དེ་བས་གོམས་ཤུགས་ཇེ་ཆུང་ཇེ་ཆུང་གི་དབང་གིས་གཟུགས་ཁམས་འོག་མ་རྣམས་ལ་འཕེན་ནི་རེད། ཀུན་གཞི་དེ་ནི་རྟོག་པ་མེད་པས་ན་དཔེར་ན་ནམ་མཁའ་སྤྲིན་བྲལ་ལྟ་བུ་དེ་ཉིད་ཤེས་པ་སྔ་མའི་བག་ཆགས་འཛིན་ཞིང་ཕྱི་མའི་རྟེན་ཏུ་གྱུར་བའི་ཞི་བ་ཟབ་པ་ཤིན་ཏུ་ཕྲ་བའི་རང་བཞིན་ཅན་ཡིན་པས་ན་ཤིན་ཏུ་རྟོག་དཀའ་ཚུལ་བླ་མ་ཨ་འཛོམ་དང་། ཉག་བླ་དང་། ལྕགས་སྐོང་རྣམས་ཀྱི་གསུང་རྒྱུན་ལྟ་བུ་རེད། ཀུན་མཁྱེན་ཆེན་པོས། སྐྱེས་བུ་གཅིག་ལ་བོས་པ་ལྟ་བུའི་ཚེ་ཤེས་པ་དར་ག ཅིག་གང་དུ་ཡང་མི་རྟོག་པར་ལུང་མ་བསྟན་དུ་གནས་པ་ཀུན་གཞི་དང་། དེ་ལས་དར་གཅིག་སྣང་ཡུལ་མ་འགགས་པར་ལམ་མེ་གསལ་ཡང་དེར་འཛིན་མ་ཞུགས་པས་གསལ་ལ་རྟོག་མེད་ཀྱི་རྣམ་པ་དེ་ཀུན་གཞིའི་རྣམ་ཤེས་ཡིན་གསུངས། བླ་མ་ཉག་བླས་མི་ཞིག་གིས་ཁུར་བོ་ཆེན་པོ་ཞིག་ཁུར་ནས་བརྒྱུགས་བརྒྱུགས་ནས་ཐང་ཆེན་པོ་ཞིག་གི་དཀྱིལ་ན་ངལ་གསོ་བའི་ཚེ་དཀའ་བའི་ཤུགས་ཀྱིས་རྟོག་པའི་རྒྱུན་འགགས་ཏེ་རྟོག་མེད་དུ་ཡོད་པ་དེ་ཀུན་གཞི་ཡིན་གསུངས། ཀུན་གཞིའི་རྣམ་ཤེས་དེ་ལས་སྒོ་ལྔའི་རྣམ་ཤེས་འཆར། དེ་ལས་ཡིད་ཤེས་རྟོག་བཅས་མཆེད། དེ་ལས་ཉོན་ཡིད་མཆེད་ནི་རེད། ཡིད་རྟོག་དང་ཉོན་ཡིད་རྣམས་མ་འགགས་བར་དུ་སྒོ་ལྔ་ཆ་མཉམ་ཡོད་ནི་མངོན་ནི་མ་རེད། ཡིད་རྟོག་དང་ཉོན་ཡིད་གཉིས་རགས་པ། སྒོ་ལྔའི་རྣམ་ཤེས་ཕྲ་བ། ཀུན་གཞིའི་རྣམ་ཤེས་ཤིན་ཏུ་ཕྲ་བ་ཡིན་གསུངས། ཀུན་གཞིའི་རྣམ་ཤེས་མཆེད་འགག་གི་རྣམ་པ་ཅན་དང་། སྒོ་ལྔའི་རྣམ་ཤེས་སྐྱེ་འགག་གི་རྣམ་པ་ཅན་དང་། ཡིད་ཤེས་དང་ཉོན་ཡིད་གཉིས་གཟུང་འཛིན་གྱི་རྣམ་པ་ཅན་ཡིན། དེ་ཡང་ཤེས་པ་རྣམས་མིག་གི་ཤེས་པ་གཟུགས་འགག་མེད་དུ་གསལ་བ་ཞེས་གསུངས་པ་ལྟ་བུའི་རྣམ་པ་ཅན་སྒོ་ལྔའི་ཤེས་པ་ཡིན། ཤེས་པ་དེ་རྣམས་དུས་ནམ་འགགས་ན་ཐ་མལ་བ་ལ་གཉིད་དུས་དང་། དབང་པོ་འཆོར་དུས་དང་། འཆི་བའི་དུས་གསུམ་པོ་དེ་ལ་འགགས་ནི་རེད། དེ་མིན་གཅིག་འགག་ནི་མ་རེད། དེ་རྣམས་འགག་དུས་དང་པོ་ཉོན་ཡིད་འགག དེ་ནས་ཡིད་རྟོག །དེ་ནས་སྒོ་ལྔ། དེ་ནས་ཀུན་གཞིའི་རྣམ་ཤེས་འགག་དགོས་ནི་རེད། དེའི་ནང་ནས་ཀུན་གཞིའི་རྣམ་ཤེས་ཙམ་མ་འགགས་ན་གཉིད་པ་དང་། དབང་པོ་འཆོར་བ་དང་། ཤི་ཁ་ཉན་ནི་མ་རེད། དེ་རྣམས་འགགས་དུས་སྔགས་ཕྱག་རྫོགས་གང་གི་ལུགས་ཡིན་ན་གཞིའི་འོད་གསལ་དངོས་ཤར་ནི་ཡིན་གསུངས། དེ་དུས་རང་ངོ་ཤེས་ན་འོད་གསལ་ངོས་ཟིན་ཟེར་ནི་རེད། ངོ་མ་ཤེས་ན་མ་རིག་པ་རྨོངས་པ་གཏི་མུག་གམ་ལུང་མ་བསྟན་ཡིན། རྣལ་འབྱོར་པས་མཉམ་བཞག་དུས་འོད་གསལ་ཤར་ན། རྨི་ལམ་དུ་ངོས་ཟིན། དེ་ལ་ཟིན་ན་འཆི་ཁའི་འོད་གསལ་ངོ་ཤེས་ནས་གྲོལ་འགྲོ་བ་ཡིན་གསུངས། གཞན་ཡང་ཉན་ཐོས་འགོག་པའི་སྙོམས་འཇུག་གི་དུས་དང་། བྱང་སེམས་འཕགས་པའི་མཉམ་བཞག་གི་དུས་དང་། སྔགས་ལམ་པས་གཉིས་སྣང་ནུབ་པའི་དུས་དང་དུས་གསུམ་པོ་ལ་ཚོགས་བརྒྱད་འགགས་ནི་རེད། དེ་མིན་སྒོ་ལྔའི་ཤེས་པ་དང་ཡིད་རྟོག་ཉོན་ཡིད་རྣམས་འགགས་སོང་ན་དགེ་སྡིག་གང་རུང་གི་བྱ་བ་བྱེད་ཀྱི་ཡོད་ནི་མ་རེད་གསུངས། སྒྲ་ཐལ་འགྱུར་རྩ་བའི་རྒྱུད་ལས། མ་གོལ་བ་ཡི་སྒོམ་པ་ནི། །དབང་པོའི་སྒོ་རྣམས་གསལ་བའོ། །ཞེས་སྒོ་ལྔ་ཆ་མཉམ་དུ་ཡོད་དུས། གནས་ཆ་ཡོད་ནི་རེད། གནས་ཆ་དེ་ལ་དྭངས་ཆ་མ་ཐོན་ན་དུད་འགྲོར་སྐྱེ་འགྲོ་ནི་རེད། གསལ་ཆ་ཐོན་ནས་ལྷོད་ཆ་མ་ཐོན་ན་རང་རྒྱུད་ལ་ཞེན་འཛིན་གྱི་འཆིང་བས་བཅིངས་ཡོད་ནི་རེད། དེ་ལྷོད་ཐབས་ནི། རེས་ལྷོད། རེས་གྲིམ། དེ་ཡང་ཡང་སྤེལ་མ་བྱེད་བཅུག་ན་ཉི་མ་བདུན་བརྒྱད་ཙམ་རེ་གི་ལྷོད་ཤེས་འོང་ནི་རེད་གསུངས། ལྷོད་ཆ་ཐོན་ན་ཤར་ཆ་ཡོད་ནི་རེད། ཤར་ཆ་ལ་རྟོག་པ་རྗེས་མཐུད་མེད་པར་གྲོལ་འགྲོ་དགོས། མ་གྲོལ་ན་འདོད་ཁམས་ལ་གོལ་བས་དེ་རྣམས་དང་མ་ལྡན་ན་གོལ་ས་གསུམ་ཡོད་ནི་རེད། ཡིད་ཤེས་ཀྱི་སྟེང་ན་ཉམས་བདེ་གསལ་མི་རྟོག་གསུམ་པོ་ལ་འཛིན་ཞེན་ཡོད་ན་ཁམས་གསུམ་དུ་གོལ་ནི་རེད། སྒོ་ལྔ་ལས་མིག་ཤེས་སྟེང་ནས་གོལ་ན་གཟུགས་ཁམས་སུ་སྐྱེ་འགྲོ། དེ་ལྟར་གོལ་ས་བདུན་པོ་དེ་དག་སྒོ་ལྔ་ཆ་མཉམ་དུ་ལེགས་པར་བཞག་ཤེས་ན་གོལ་ས་ཆོད་འགྲོ་གསུངས། ཡང་རྟོག་བཅས་ཡིད་ཀྱི་ཤེས་པ་དེའི་ཡུལ་ཕྱི་འཛིན་དང་ནང་འཛིན་གཉིས་བྱེད་ནི་རེད། ཕྱི་འཛིན་ནི་འདས་པའི་རྗེས་གཅོད། མ་འོངས་པའི་མདུན་བསུ། ད་ལྟའི་ཕྱི་ནང་གི་མཚན་འཛིན་བྱེད། ཡུལ་གཟུགས་སྒྲ་ལ་སོགས་པ་ལ་མཚན་མར་འཛིན་ནི་རེད། ནང་འཛིན་ནི་མཉམ་བཞག་གི་དུས་ན་ཡུལ་བདེ་བ་ལ་ཡུལ་ཅན་ཡིད་ཤེས་དེས་ཡུལ་བདེ་བར་འཛིན། གསལ་བ་གསལ་བར་འཛིན། མི་རྟོག་པ་ལ་སྟོང་པར་འཛིན། ཉོན་ཡིད་ཀྱིས་ཐུན་བཅད་དུས་མཉམ་བཞག་ལེགས་པར་ཡོང་ན་དགའ་བའི་འདོད་ཆགས། བྱིང་རྒོད་སོགས་སྐྱེ་དུས་དེ་ལ་མི་དགའ་བའི་རྣམ་པ་ཞེ་སྡང་སོགས་སྐྱེ་བ་ཡིན། ཉམས་བདེ་གསལ་མི་རྟོག་གསུམ་གང་སྐྱེས་ཚེ། ཡུལ་དེ་ལ་ཡུལ་ཅན་ཡིད་ཀྱི་ཤེས་པས་ཡུལ་དེ་ལ་དེར་འཛིན་ཅིང་ཞེན་ནས་ཡང་ཡང་གོམས་པའི་སྟོབས་ཀྱིས་ཡུལ་དང་ཡུལ་ཅན་གཉིས་མེད་དུ་འདྲེས་ཏེ་རྟོག་མེད་ཚུལ་དུ་གནས་ནི་རེད་གསུངས། ད་ནི་འགོ་ན་སྐྱབས་འགྲོ་སེམས་བསྐྱེད་ཀྱིས་ཟིན། བར་དུ་སྒོ་ལྔ་ཕྱམ་བརྡལ་དུ་ཡོད་དུས་གནས་ཆ་ཡོད་ན་དྭངས་ཆ་ཐོན། གསལ་ཆ་ཡོད་ན་ལྷོད་ཆ་ཐོན། ཤར་ཆ་ཡོད་ན་གྲོལ་ཆ་དང་ལྡན་ན་མཉམ་བཞག་གི་རྒྱ་མ་རལ་གོང་དུ། རྗེས་བསྔོ་བ་བྱས་ན་གེགས་དང་གོལ་ས་གང་ཡང་ཡོད་ནི་མ་རེད་གསུངས་སོ། །དེ་མིན་ན་ཆ་མཉམ་ལེགས་པར་ངོས་མ་ཟིན་ན་འགོ་ན་སྐྱབས་སེམས། བར་དུ་རྟོག་ཚོགས་དག་ནས་གནས་ཆ་ཡོད་ན་དྭངས་ཆ། གསལ་ཆ་ཡོད་ན་ལྷོད་ཆ། ཤར་ཆ་ཡོད་ན་གྲོལ་ཆ་ཐོན། རྗེས་བསྔོ་བ་བྱས་ན་ཡག་ནི་རེད། སྒོམ་ཆོག་ནི་རེད་གསུངས། བཀྲ་ཤིས་ཤོག། ཞལ་རྒྱུན་ཐོར་བུ་འགའ།དམ་པའི་ཆོས་འདི་མི་སྒྲུབ་ནི་རེད་མ་གཏོགས། ཆོས་འདི་བུན་བུན་ཤིག་ཤིག་ཏུ་འཆར་གི་ཡོད་ནི་རེད། དཔེར་ན་ཀ་བུམ་ལ་སོགས་པས་ང་སྣང་སྟོང་ཟུང་འཇུག་ཡིན། འདི་ན་ཡོད་ཅེས་ཟེར་བ་ལྟ་བུ་ཞིག་དང་། སྒྲས་ཀྱང་ང་གྲགས་སྟོང་བྲག་ཆ་ལྟ་བུ་ཡིན་ཞེས་ཟེར་བ་ལྟ་བུ་ཡིན་ནི་རེད། སྦྱིན་པས་ལོངས་སྤྱོད་ཞེས་ཟེར་ནི་རེད་ནི་དམན་པའི་སེམས་ཅན་དབུལ་བོ་མཐོང་ན་ངས་འདི་ནས་བྱང་ཆུབ་ཀྱི་བར་དུ་ཁྱོད་ལ་ལོངས་སྤྱོད་འཛད་མེད་དུ་སྟེར་ཟེར་བ་ལྟ་བུ་ཞིག་དང་། དགྲས་འདི་ནས་བྱང་ཆུབ་ཀྱི་བར་དུ་ཁྱོད་ལ་གཟུགས་ལེགས་པ་སྟེར་ཟེར་བ་ལྟར་རོ། །ཐུགས་ཡིད་དབྱེར་མེད་བསྲེས་ནས་མཉམ་པར་བཞག་པ་དོན་དམ་བྱང་ཆུབ་ཀྱི་སེམས་དང་། དེ་ལས་སེམས་ཅན་གྱི་ཁམས་ལ་བརྩེ་བའི་སྙིང་རྗེ་ཆེན་པོ་ཤར་བ་ཀུན་རྫོབ་བྱང་ཆུབ་ཀྱི་སེམས། ཀུན་རྫོབ་བྱང་ཆུབ་སེམས་ལ་སྨོན་འཇུག་གཉིས་སོ། ༈ །བྱུང་གནས་འགྲོ་གསུམ་གྱིས་ལྟ་བ་སྣང་སྟོང་ཟུང་འཇུག་ངེས་པའི་ངེས་ཤེས་ཀྱི་ངོར་ན། དགག་རྟོག་སྒྲུབ་རྟོག་ཡོད་འཛིན་མེད་འཛིན་བདག་འཛིན་ཆོས་ཀྱི་བདག་འཛིན་དང་གང་ཟག་གི་བདག་འཛིན་རྣམས་ཀྱང་གྲོལ། ཡུལ་ཡོད་མེད་བདག་གཉིས་སོགས་ཀྱང་འགག །སྣང་ཆ་སྤངས་བའི་སྟོང་རྐྱང་ཆད་པ། སྟོང་ཆ་སྤངས་བའི་རྟག་པ་ཞིག་ག་ལ་ཡིན་ཏེ་མིན་ནོ། །གནས་ལུགས་ལ་ཤིན་ཏུ་ཉེ་བས་དེ་ལ་འོད་གསལ་ཟེར་ཆོག་གི་རེད་གསུངས་སོ། ༈ །ཀུན་སློང་མེད་ན་བཤད་པའི་ཚིག་ལ་མཁས་ཀྱང་མི་ཕན། སྙིང་རུས་ཞེ་བཅད་བྱས་ཀྱང་མི་ཕན། སྙིང་རྗེ་མེད་ན་དགེ་བས་གཤིན་རྗེའི་འཇིག་རྟེན་ཏུ་སྐྱེ་བའི་རྒྱུ་མཚན་མི་ཕམ་རིན་པོ་ཆེས་མཁན་ཚུལ་དགའ་ལ་གསུངས་ཚུལ་རྡོ་གྲུབ་རིན་པོ་ཆེས་གསུངས། དཔལ་སྤྲུལ་གྱི་བསྐྱེད་རིམ་ལྷའི་དཀའ་གནད་ནང་ན། སྟོང་ཉིད་ལ་གོ་བ་ཡོད་པ། བསྐྱེད་རིམ་གསལ་སྣང་ཐོན་པ། བཟླས་པའི་གྲངས་འཁྱོལ་བ། སྙིང་རྗེ་མེད་པ་རྣམས་གཤིན་རྗེའི་འཇིག་རྟེན་ཏུ་སྐྱེ་ཚུལ་བླ་མ་དེ་དག་གི་ཐུགས་དགོངས་གཅིག་རེད། བཤད་བཤད་ཀྱིས་ཐོས་པ་བལྟས། འདུག་འདུག་གིས་འབོལ་གདན་ཐེད། བཏོན་བཏོན་གྱིས་ཕྲེང་བ་ཟད་པ་ཅི་ཙམ་བྱས་ཀྱང་རང་རྒྱུད་ཉོན་མོངས་དང་མ་བྲལ་ན་དཀའ་ནི་རེད། བཀའ་གདམས་པ་རྣམས་ཀྱིས་རྡེའུ་དཀར་ནག་གིས་བསམ་པ་བརྟག་ཚུལ་ད་དུང་ཡང་ཆེན་པོ་གསུམ་གྱི་གྲུབ་མཐའ་ལ་ཤེས་སྙམ་གྱི་རློམ་སེམས་བྱས་ཀྱང་ཤིན་ཏུ་དཀའ་ནི་རེད། རང་སྐྱོན་རི་བོ་ཙམ་ཡང་མི་མཐོང་། གཞན་སྐྱོན་ཤིག་ཙམ་ཡོད་ཀྱང་མཐོང་། ཚུལ་འཆལ་རི་ན་གནས་ཀྱང་འཆལ། ཁྲིམས་ལྡན་གྲོང་ན་གནས་ཀྱང་བཙུན། ༈ ལུས་ལྷ་མིའི་ཚོགས་གྲལ་ན་བཞུགས་ཀྱང་སེམས་སངས་རྒྱས་ཀྱི་ས་ན་བཞུགས་པའི་གང་ཟག་ཡོད་གསུངས། ༈ དེ་ལྟར་དགག་བྱའི་སྣང་ཚུལ་དེ་ངེས་དགོས། དགག་བྱ་གང་ཡིན་ན་བདག་འཛིན། བདག་འཛིན་འདི་གཏན་ལ་མ་དབབ་ན་ཕྱག་རྫོགས་ཀྱི་ལྟ་བ་མ་ཚད་ཞི་གནས་ཙམ་ལ་ཡང་གེགས་བྱེད་ནི་རེད། གཡེང་བ་རྣམ་པ་དྲུག་དང་བྲལ་བའི་ཏིང་ངེ་འཛིན་དེ་ཞི་གནས་གྱི་མཚན་ཉིད་རེད། ངོ་བོ་ཉིད་ཀྱིས་གཡེང་བ་ནི་སྒོ་ལྔའི་ཤེས་པ་ཁ་ཕྱིར་བལྟས་ཏེ་གཟུགས་སྒྲ་སོགས་ཡུལ་ལ་གཡོས་ན་ཏིང་ངེ་འཛིན་ལས་ལྡང་བར་བྱེད་པས་ངོ་བོ་ཉིད་ཀྱི་གཡེང་བ། དེའི་སྟེང་དུ་ཡིད་ཤེས་མཆེད་ནས་འདས་པ་ལ་རྗེས་གཅོད། མ་འོངས་པ་ལ་སྔོན་བསུ། ད་ལྟའི་ཕྱི་ནང་གི་ཡུལ་མཚན་འཛིན་གྱི་རྟོག་པ་སྐྱེ་ན་ཕྱི༵་རོལ༵་དུ༵་གཡེང་བ། ནང་ཏིང་ངེ་འཛིན་གྱི་རོ་མྱང་ནས་བདེ་གསལ་སོགས་ལ་ཞེན་ནས་ངང་དེ་ལས་འབྲལ་མི་ཕོད་པ་ནང༵་གི༵་གཡེང་བ། ངས་རྟོགས་ཡོད་པ་འདི་གཞན་ལས་འཕགས་སོ་བསམ་ནས་ང་རྒྱལ་དང་བཅས་ཏེ་མཆོག་གོ །མཚར་རོ་བསམ་ནས་མཚན་༵མར༵་འཛིན༵་པའི༵་གཡེང་བ། དེ་ཡོད་ཉན་ནི་མ་རེད། དགེ་བར་བརྩོན་ཡང་མཆོག་འཛིན་རློམ་སེམས་མེད་ཅེས་གསུངས་ནི་རེད་ནི་དགེ་སེམས་འདི་ནས་བྱང་ཆུབ་ཀྱི་བར་དུ་འབྲལ་མེད་གོང་འཕེལ་དུ་འགྲོ་དགོས་ནི་རེད། ངར་འཛིན་དང་བཅས་པས་ང་འཁྲུལ་ང་གྲོལ་བསམ་ནས་འཛིན་པ་ནི་གནས་༵ངན༵་ལེན༵་བྱེད༵་ཀྱི་གཡེང་བ། རང་འདོད་ཡིད་བྱེད་ཀྱི་བློ་ཡོད་ན་ཡིད་ལ་བྱེད་པའི་གཡེང་བ་དང་དྲུག་པོ་བྲལ་དགོས། རང་དོན་གཞན་དོན་སོགས་ཅི་བྱས་ཀྱང་བདག་འཛིན་འདི་འདུལ་དགོས། བོད་སྔ་རབས་པས་འཁོར་རྩ་འཁོར་ལོའི་སྲོག་ཤིང་ལྟ་བུ་དེ་བདག་འཛིན་ལ་ངོས་འཛིན་ནི་རེད། བོད་ཕྱི་རབས་པས་ཆོས་བདག་དང་གཉིས་ཀ་འཁོར་རྩར་བཞག་པའི་རྒྱུ་མཚན་ཉོན་སྒྲིབ་འཁོར་བའི་རྩ་བ་འཇོག་ནི་གི་རེད་གསུངས། ༈ ཐིག་ལེ་སྟོང་སྒྲོན་ཀོ་མོའི་ཆུ་ལ་རྡོ་བོར་བའི་རྣམ་པ་ཐིག་ཟླུམ་ཁ་དོག་དམར་སེར་ཆེ་ཆུང་ཚོན་གང་བ་འོད་ལྔའི་མུ་ཁྱུད་ཅན་ཕལ་ཆེར་རྩ་དག་པ་རྣམས་ལ་པད་འདབ་ཀྱིས་བསྐོར་བ་ཞིག་སྣང་ནི་རེད། དེ་ཡང་ལོ་གཅིག་གཉིས་རེ་མ་བསྒོམས་ན་དེ་ལྟར་སྣང་ནི་མ་རེད་གསུངས། ༈ ཀུན་མཁྱེན་གྱིས་ཆོས་ཉིད་མངོན་སུམ་སྐབས་སུ་སྟོང་སྒྲོན་རེས་སྣང་རེས་མི་སྣང་བའི་ཚུལ་དང་། གོང་འཕེལ་སྐབས་སུ་སྟོང་སྒྲོན་རྒྱུན་དུ་སྣང་བར་གསུངས་སོ། ༈ །ཕྱིའི་འོད་སྣང་ལ་རྟོག་དཔྱོད་ཞུགས་པ་སོགས་ཀྱིས་ལུག་རྒྱུད་དངོས་པོར་གོལ་བའི་སྐྱོན་དང་། ཁྱད་པར་རླུང་སེམས་ཀྱིས་སྤུར་བའི་སྟོང་གཟུགས་ལ་མཆོག་འཛིན་བྱས་པས། གཟུང་འཛིན་གྱི་དབང་གིས་སྟོང་གཟུགས་བདུད་ཀྱི་རྣམ་པར་ཤར་བ་སོགས་འབྱུང་བ་ནི་ལམ་གྱི་གནད་ལེགས་པར་མ་ཟིན་པ་ཡིན་ལ། སྔོན་འགྲོའི་ཕྱིའི་རུ་ཤན་གྱི་སྐབས་སུ་གཟུང་འཛིན་གྱི་འཆིང་ཞེན་ལེགས་པར་བཤིག་ཐུབ་ཡོད་ན། འདིར་དངོས་གཞིའི་སྐབས་སུ་རྩོལ་བས་ཅི་ཙམ་དུ་གཏད་ཀྱང་མི་འཆིང་བ་འོང་བས་དེ་འདྲ་ལ་སྔོན་འགྲོས་དངོས་གཞི་དྲངས་པ་ཞེས་ཟེར་ཏེ། འདི་ལ་ལུག་རྒྱུད་དངོས་པོར་གོལ་བ་སོགས་ཀྱི་གོལ་ས་གཏན་ནས་མི་འབྱུང་ཞེས་གསུངས་སོ། ༈ །ཚོགས་སྦྱོར་ནང་དཔེ་ཡི་ཡེ་ཤེས་ནི་མངོན་སུམ་ཟེར་ཀྱང་རིག་པ་མངོན་སུམ་མ་ཡིན་ཏེ། རིག་པའི་དོན་སྤྱི་མངོན་སུམ་ལ་གོ་དགོས། ཚོགས་སྦྱོར་གྱི་སྐབས་ཆོས་ཉིད་མངོན་སུམ་ཡང་རྟགས་སྤྱོད་པས་སྟོན། ཚོགས་སྦྱོར་གྱི་སྐབས་སུ་ཚད་རྨི་ལམ་ནི། ཚོགས་ལམ་ཆོས་ཉིད་མངོན་སུམ་སྐབས་སུ་གཉིད་ཀྱི་དུས་སུ་འོད་གསལ་དུམ་རེ་ཙམ་ཟིན་པ་དང་སྐྱོན་འབྲིང་མན་ཆད་གྲོལ་ནུས། སྦྱོར་ལམ་ཉམས་གོང་འཕེལ་གྱི་སྐབས་སུ་གཉིད་ཀྱི་སུམ་ཆ་གཉིས་ཙམ་འོད་གསལ་དུ་གྲོལ་བ་དང་ཟིན། དེ་ཡང་གྲིབ་སོགས་ཀྱི་མི་ཟིན་པ་ཡང་རེ་འགའ་ཙམ་ཡོད། རྐྱེན་ངན་ཅི་ལྟ་བུ་ཡང་། རང་གྲོལ་དུ་ཤིགས་སེ་ལྷོད་དེ་གྲོལ་ནས་འོད་གསལ་ཇེ་གསལ་དུ་འགྲོ་བས་ན་རྐྱེན་ངན་གྲོགས་སུ་འཆར་བ་འོད་གསལ་གྱི་རང་བཞིན་གསུངས་པ་ལྟར་རོ། །མཐོང་ལམ་རིག་པ་ཚད་ཕེབས་ཀྱི་སྐབས་སུ་དོན་གྱི་འོད་གསལ་ཐོབ་ཚེ་ཡིད་ཤེས་ནུབ་ཏེ། ཡུལ་ཡུལ་ཅན་མེད་པར་ཡུལ་ཆོས་ཀྱི་དབྱིངས་དེ་ཡུལ་ཅན་ཡེ་ཤེས་ཀྱིས་དངོས་སུ་མཐོང་ཞིང་ཡོན་ཏན་བརྒྱ་ཕྲག་བཅུ་གཉིས་ཐོབ་པ་ཡིན། དབང་ཤེས་ཉེར་ལྔ་སོགས་མཁྱེན་པའི་ཡོན་ཏན་ཐོབ། སྒོམ་ལམ་ས་དགུ་ནི་ཆོས་ཉིད་ཟད་སའོ། །ས་བཅུའི་རྒྱུན་མཐའ་ན་འོད་གསལ་མཚན་མོའི་ཟླ་བ་ལྟ་བུའོ། །སངས་རྒྱས་ཀྱི་ས་ན་ཁམས་བདེ་བར་གཤེགས་པའི་ཡོན་ཏན་མཐའ་དག་ཐོབ་པའི་དཔེ་ཉི་མའི་དཀྱིལ་འཁོར་ལྟ་བུའོ། ༈ །འཕགས་པ་ལེགས་ཉེས་ཀྱི་རྒྱུ་དང་འབྲས་བུ་བསྟན་པའི་མདོ་ལས། མིར་གྱུར་ཀྱང་མདོག་གནག་པ་གང་ཡིན་པ་དེ་ནི་དེ་བཞིན་གཤེགས་པའི་སྐུ་གཟུགས་ཁྱམས་དག་གི་འོག་ཏུ་བཞག་ནས་དུད་པས་བདུགས་པ་ལས་གྱུར་པ་ཡིན་ནོ། །བུ་དང་བུ་མོ་མེད་པ་ནི་སྔོན་བྱ་མང་པོའི་ཕྲུ་གུ་བསད་པ་ལས་གྱུར། མིར་གྱུར་ཀྱང་དབང་པོ་མི་གསལ་བ་དེ་ནི་སྔོན་དུད་འགྲོའི་གནས་ནས་འོང་བ་ཡིན་ནོ། །མདོ་སྡེ་སོགས་ཤེས་ཀྱང་གཞན་ལ་མི་སྟོན་པར་སེར་སྣ་བྱེད་པ་དེ་ནི་ཤི་འཕོས་ནས་ཤིང་སྲིན་དག་ཏུ་སྐྱེ་བར་འགྱུར་རོ། །ཀུ་རེ་ལ་དགའ་ཞིང་གཞན་གྱི་ཚིག་ཟློས་ནི་ནེ་ཙོར་སྐྱེ་བར་འགྱུར་རོ། །ཉལ་བ་དང་ཟ་བ་ཁོ་ན་དགའ་བ་དེ་ནི་ཕག་ལ་སྐྱེ་བར་འགྱུར་བ་སོགས་མང་ངོ་། ༈ །ཀློང་ཆེན་གྱིས་ཐིག་ལེ་སྟོང་སྒྲོན་ཁ་དོག་ལྔ་ལྡན་གྱི་མུ་ཁྱུད་རབ་ཏུ་མང་པོས་བསྐོར་བའི་དབུས་སུ་པདྨ་འདབ་བཞི་ཡོད་པ་གཅིག་འཆར་རོ། །གསུངས། ། ༈ རྣམ་ཤེས་དང་ཡེ་ཤེས་གཉིས་ཀ་གསལ་ཞིང་རིག་པ་ཙམ་དུ་མཚུངས་ཀྱང་། ཡུལ་ཇི་བཞིན་མི་རིག་པར་ཕྱིན་ལོག་ཏུ་འཛིན་པ་དང་། ཇི་བཞིན་རིག་པ་གཉིས་ཀྱི་ཁྱད་ཡོད་ལ། གཟུང་འཛིན་ཅན་གྱི་རྣམ་ཤེས་ལྡོག་ཀྱང་ཡེ་ཤེས་མི་ལྡོག་པར་ཤེས་པར་བྱའོ། །མདོར་ན་རྣམ་ཤེས་ཚོགས་བརྒྱད་ལས་འདས་པའི་རིག་སྟོང་གཉུག་མ་སྤྲོས་བྲལ་རང་བྱུང་གི་ཡེ་ཤེས་སུ་ཐད་ཀར་རྗེན་པར་ཤར་བ་ངོ་སྤྲད་པར་བྱའོ། ༈ །འགྱུ་བའི་ཆ་ནི་སེམས་ཡིན་ལ། །རིག་པའི་ཆ་ལ་ཡེ་ཤེས་ཟེར། །ཆོས་ཀུན་གདོད་ནས་མ་གྲུབ་ཅེས། །འཛིན་པ་མེད་ཅིང་རྟོག་པ་མེད། །དྭངས་ལ་འགགས་པ་མེད་པ་ཡི། །ལྟ་བའི་ཉམས་ལེན་བོན་ལའང་ཡོད། །ཤེས་བྱ་སྒྱུ་མ་ལྟ་བུ་རུ། །འདོད་པ་མུ་སྟེགས་བྱེད་ལ་ཡོད། ༈ །མ་ཡེངས་ཙམ་དུ་བསྒོམ་པའི་ཚེ། །དྲན་པའི་རྫི་བོ་མ་བོར་ན། །བསྒོམ་མེད་རྟོགས་ཞེས་ཐོས་གསུངས་ཀྱང་། མ་ཡེངས་ཙམ་དུ་བསྒོམ་པ་ནི། །ཤེས་བྱའི་སྒྲིབ་པ་ཡིན་པར་བཤད། །དེ་ཉིད་སྤང་བར་མ་ནུས་ན། །བློ་ལས་འདས་པའི་ཆོས་ཉིད་མིན། །ཅི་ཕྱིར་མ་ཡེངས་ཙམ་བསྒོམ་པའི། །བློ་དེ་མཐའ་ལས་མ་འདས་ཕྱིར། །སེམས་ཀྱི་དྲན་འཛིན་ཕྲ་མོ་ལ། །དམིགས་པའི་ཏིང་འཛིན་ཡོད་ཅེས་སྨྲ། །དྲན་བྱ་བྲལ་བའི་ཆོས་ཉིད་ལ། །བསྒོམ་མེད་ཅེས་སུ་གྲགས་ན་ཡང་། །དྲན་པའི་རྫི་བོ་མ་བོར་ན། །དེ་ལ་བསྒོམ་མེད་ཇི་ལྟར་རུང་། །བསྒོམ་མེད་ཅེས་པའང་ཐ་སྙད་ཙམ། །དོན་ལ་མེད་པ་ཉིད་འདོད་ན། །མེད་པའི་མཐའ་ལ་གནས་པའི་ཕྱིར། །ལྟ་དེ་ཡང་དག་མ་ཡིན་ཏེ། །སྤྲོས་བྲལ་ཉིད་དུ་བཟུང་བ་མིན། །གལ་ཏེ་ཆད་པར་ལྟ་བ་དེ། །ཡང་དག་ལྟ་བ་ཉིད་ཡིན་ན། །མུ་སྟེགས་ཆད་ལྟའང་གྲོལ་བར་འགྱུར། །དེ་རྣམས་གཡུ་ཁོག་བྱ་བྲལ་གསུང་ཡིན། ༄༅། །རྣམ་རྟོག་སྔ་ཕྱི་འགགས་པའི་བར། །སྟོང་པའི་གནས་ཆ་ངོ་འཕྲོད་ན། །མཉམ་ཉིད་ལྟ་བར་འདོད་གསུངས་ཀྱང་། །ཆེད་འཛིན་བྱས་པའི་སྟོང་ཉམས་ཏེ། །མཉམ་པ་ཉིད་ཀྱི་ཡེ་ཤེས་མིན། ༈ །སྲིད་མཐའ་འགོག་པའི་ལྷག་མཐོང་དང་། །ཞི་མཐའ་འགོག་པའི་སྙིང་རྗེ་གཉིས། །ཟུང་འཇུག་འོད་གསལ་འདུས་མ་བྱས། །ཚུལ་འདི་ཐེག་པ་མཆོག་གི་ལམ། །ཆོས་རྣམས་རང་བཞིན་སྟོང་པ་ཉིད། །སྐྱེ་འགག་གནས་གསུམ་དང་བྲལ་བའི། །རྐྱེན་གྱིས་མ་བསྐྱེད་འདུས་མ་བྱས། །སྟོན་པ་བདེ་བར་གཤེགས་པའི་གསུང་། །སྙིང་པོ་བསྟན་པའི་མདོ་སོགས་ནས། །བདེ་གཤེགས་སྙིང་པོ་རྒྱ་ཆེར་བཤད། །འཁོར་ལོ་བར་མའི་མདོ་རྣམས་སུ། །རྣམ་པར་ཐར་པའི་སྒོ་གསུམ་བསྟན། །དེ་ཉིད་གསང་སྔགས་ཐུན་མོང་ལས། །རང་བཞིན་གཞི་ཡི་རྒྱུད་ཅེས་བྱ། །ཐུན་མིན་སྔགས་ཀྱི་རྒྱུད་སྡེ་ལས། །རང་བྱུང་གདོད་མའི་ཡེ་གཞི་ཞེས། ༈ །ཁྲེགས་ཆོད་སྟོང་པའི་ཡེ་ཤེས་དང་། །ཐོད་རྒལ་སྣང་བའི་འོད་གསལ་གཉིས། །ཟུང་འཇུག་ཆེན་པོར་བཞུགས་པ་ལ། །འཕགས་ལམ་རྫོགས་པ་ཆེན་པོར་གྲགས། ༈ །སྔ་མའི་རྟོག་པ་དེ་འགགས་ནས། །ཕྱི་མའི་རྟོག་པ་ཡང་མ་སྐྱེས། །བར་གྱི་སྟོང་ཉམས་ལ་ཞེན་ནས། །མི་ཚེ་སྟོང་ཟད་དུ་མ་གཏོང་།།དགེའོ།། ། |