 གཡུ་ཁོག་བྱ་བྲལ་བ་ཆོས་དབྱིངས་རང་གྲོལ་གྱི་གསུང་འབུམ།པོད། ཧཱུྃ༽གཡུ་ཁོག་བྱ་བྲལ་བ་ཆོས་དབྱིངས་རང་གྲོལ།སི་ཁྲོན་མི་རིགས་དཔེ་སྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། སྟོན་པ་འཚང་རྒྱ་ཚུལ་གྱི་རྣམ་བཞག་མདོ་དང་སྔགས་ཀྱི་བཞེད་པ་མི་འདྲ་བའི་སྐོར།ཆོས་འབྱུང་རིན་པོ་ཆེའི་གཏེར་མཛོད་ཉི་འོད་ལས། དེ་ཡང་བསྟན་པའི་བདག་པོ་ཐུབ་པའི་དབང་པོ་འདིས། དང་པོར་ཐུགས་བསྐྱེད་ཅིང་ཚོགས་བསགས། ལམ་ལེགས་པར་མཐར་ཕྱིན་ནས། འབྲས་བུ་མངོན་པར་རྫོགས་པར་སངས་རྒྱས་པ་ནི་སྐུ་གསུམ་གྱི་ཚུལ་ཏེ། དེ་ཡང་ཆོས་སྐུ་དང་ལོངས་སྐུ་སངས་རྒྱས་པའི་གནས་ནི་འོག་མིན་ཡིན་ལ། འཛམ་བུའི་གླིང་ནི་སྤྲུལ་པའི་སྐུ་སངས་རྒྱས་པའི་ཚུལ་སྟོན་པའོ། །དེ་ལ་ཡང་རྒྱུ་མཚན་ཉིད་ཀྱི་ཐེག་པ་དང་། འབྲས་བུ་སྔགས་ཀྱི་ཐེག་པ་གཉིས་སོ། །མཚན་ཉིད་ཀྱི་ཐེག་པ་ལ་ཡང་། ཉན་རང་ཐེག་ཆུང་དང་། མཚན་ཉིད་ཐེག་པ་ཆེན་པོའོ། །དེ་ལ་ཐེག་ཆུང་བ་ནི། རྒྱལ་བུ་དོན་ཐམས་ཅད་གྲུབ་པ་སྟེ། ས་བཅུ་རང་རྒྱུད་པ་གཅིག །འོག་མིན་ནམ་རྡོ་རྗེ་གདན་དུ་སངས་རྒྱས་པར་འདོད་དོ། །ཐེག་པ་ཆེན་པོ་ནི། རྒྱལ་བ་འདི་བསྐལ་པ་གྲངས་མེད་པའི་སྔོན་རོལ་དུ་སངས་རྒྱས་ཟིན་པར་འདོད་དེ། མདོ་སྡེ་པདྨ་དཀར་པོ་ལས། རིགས་ཀྱི་བུ་ང་ནི་བསྐལ་པ་བྱེ་བ་ཁྲག་ཁྲིག་མང་པོ་འདས་པའི་སྔོན་རོལ་དུ་སངས་རྒྱས་སོ། །ཞེས་པ་དང་། མདོ་ཡབ་སྲས་མཇལ་བ་ལས། ཤཱཀ་ཐུབ་འདི་སྔོན་བསྐལ་པ་དཔག་ཏུ་མེད་པའི་སྔོན་རོལ་དུ་དེ་བཞིན་གཤེགས་པ་དབང་པོའི་ཏོག་ཅེས་བྱ་བར་སངས་རྒྱས་ཟིན་ནས། ཕྱིས་ཀྱང་སངས་རྒྱས་ཀྱི་ཕྲིན་ལས་མཛད་པའི་ཕྱིར་སངས་རྒྱས་ཚུལ་བསྟན་ཏེ། དེ་སྐད་དུ། བྱེ་བ་བརྒྱ་རུ་རྒྱལ་བ་འདིས། །སངས་རྒྱས་ཉིད་དུ་བསྟན་གྱུར་ཀྱང་། །ད་རུང་ཆོག་པའི་འདུ་ཤེས་མེད། །སླར་ཡང་བྱང་ཆུབ་ཐུགས་ཀྱང་འཇུག །ཅེས་སོ། །འབྲས་བུ་སྔགས་ཀྱི་ཐེག་པ་ལ་ཡང་གཉིས་ཏེ། སྔགས་ཕྱི་རྒྱུད་དང་། ནང་རྒྱུད་དོ། །ཕྱི་པ་རྣལ་འབྱོར་རྒྱུད་ཀྱི་ལུགས་ཀྱི་ཆོས་སྐུ་དང་ལོངས་སྐུ་ནི་སངས་རྒྱས་ཡིན་ལ། སྤྲུལ་སྐུ་ནི་སངས་རྒྱས་སུ་མི་བཞེད་དེ། དེ་བས་ན་ལོངས་སྐུ་ནི་འདོད་པའི་ཁམས་སུ་ཡང་སངས་མ་རྒྱས་ཤིང་། སྐྱེ་བའི་སྲིད་པ་ཡང་མི་བཞེད་དེ། གཟུགས་ཁམས་ཀྱི་འོག་མིན་སྡུག་པོ་བཀོད་པ་དེ་ཉིད་དུ་སངས་རྒྱས་ཤིང་། སྐྱེ་བའི་སྲིད་པ་ཡང་དེ་ཉིད་དུ་བཞེས་པར་བཞེད་དོ། །དེ་ཁོ་ན་ཉིད་རྣལ་འབྱོར་གྱི་རྒྱུད་ལས། འདོད་པའི་ཁམས་དང་གཟུགས་མེད་དུ། །སངས་རྒྱས་རྣམ་པར་འཚང་མི་རྒྱ། །གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་འཚང་རྒྱའོ། །ཞེས་སོ། །འོ་ན་འཛམ་བུའི་གླིང་དུ། ཆུ་བོ་ནཻ་རཉྫ་ནའི་དྲུང་དུ་དཀའ་ཐུབ་སྤྱད་ནས། མཐར་བྱང་ཆུབ་ཀྱི་ཤིང་དྲུང་དུ་སྲོད་ལ་བདུད་བཏུལ་ནས། ཐོ་རངས་མངོན་པར་རྫོགས་པར་སངས་རྒྱས་པ་དང་འགལ་ལོ་སྙམ་ན། མི་འགལ་ཏེ་དཀའ་ཐུབ་ཀྱི་ངང་དེ་ཉིད་ནས་འོག་མིན་དུ་བྱོན་ནས། དེ་ན་དེ་བཞིན་གཤེགས་པ་ཏིལ་གྱི་གོང་བུ་བཞིན་དུ་བཞུགས་པ་ལ་ཕྱག་བྱས་ནས། སེང་གེའི་ཁྲི་ལ་འདུག་སྟེ། སྟོང་པའི་ངང་ལ་ཡུན་རིང་པོར་མཉམ་པར་བཞག་ཀྱང་གསང་སྔགས་ཀྱི་གདམས་ངག་མེད་པས། མངོན་པར་རྫོགས་པར་སངས་རྒྱས་པར་མ་ནུས་ནས། ཕྱོགས་བཅུ་ན་བཞུགས་པའི་དེ་བཞིན་གཤེགས་པ་ཐམས་ཅད། བྱང་ཆུབ་སེམས་དཔའི་མདུན་དུ་བྱོན་ནས་ཏིང་ངེ་འཛིན་ལས་བསླངས་ནས་འདི་སྐད་དུ་རིགས་ཀྱི་བུ་ཁྱོད་ཀྱིས་གསང་སྔགས་ཀྱི་དོན་མི་ཤེས་པར་ཇི་ལྟར་འཚང་རྒྱ་བར་བྱ་སྙམ་ཞེས་གསུངས་པ་དང་། བྱང་ཆུབ་སེམས་དཔའ་དེ་ཏིང་ངེ་འཛིན་ལས་ལངས་ནས་དེ་བཞིན་གཤེགས་པ་དེ་དག་ལ་ཕྱག་བྱས་ཏེ། ཐལ་མོ་སྦྱར་ནས་གསང་སྔགས་དོན་ཇི་ལྟར་ལགས་ཞུས་པ་དང་། མངོན་པར་བྱང་ཆུབ་པ་ལྔའི་གདམས་ངག་གསུངས་ནས། དེ་མ་ཐག་ཏུ་དེ་བསྒོམས་པ་དང་སངས་རྒྱས་སོ་སྐད། དེ་ལྟར་སངས་རྒྱས་ནས་དཀའ་ཐུབ་ཀྱི་ཁོག་པ་ལས་བཞེངས་ནས། བདུད་བཏུལ་བ་དང་ཆོས་ཀྱི་འཁོར་ལོ་བསྐོར་བ་ལ་སོགས་པ་འཛམ་བུའི་གླིང་འདིར་མཛད་པ་ཡིན་ཏེ། སྟུག་པོ་བཀོད་པའི་མདོ་ལས། །སངས་རྒྱས་ཐམས་ཅད་འོག་མིན་དུ། །སངས་རྒྱས་མ་གྱུར་འདོད་ཁམས་སུ། །སངས་རྒྱས་མཛད་པ་མི་མཛད་དོ། །ཞེས་པས་མངོན་ནོ། །གསང་སྔགས་ནང་པ་རྣལ་འབྱོར་བླ་མེད་ཕ་རྒྱུད་པ་ནི། འོག་མིན་དུ་རྣམ་པར་སྣང་མཛད་ཆེན་པོ་ལ་དབང་ཞུས་ནས་དེར་སངས་རྒྱས་ལ། དེའི་སྤྲུལ་པ་པོ་འདིར་སངས་རྒྱས་པར་འདོད་དེ། ཟླ་གསང་ཐིག་ལེ་ལས། གཙང་མའི་རིས་དག་སྤངས་ནས་ནི། །འོག་མིན་སྟུག་པོ་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་ནི་འདིར་འཚང་རྒྱ། །ཞེས་སོ། །ཡང་ན་ས་བཅུ་པའི་བྱང་ཆུབ་སེམས་དཔའ་དེ་འོག་མིན་མཆོག་གི་གནས་སུ་རྡོ་རྗེ་འཆང་ལ་དབང་ཞུས་ནས་དེ་ཉིད་ཀྱིས་དབང་བསྐུར་བས་སངས་རྒྱས་པར་འདོད་དོ། །འདུལ་བ་དོན་ཡོད་པའི་རྒྱུད་ལས། གསང་བའི་གནས་མཆོག་འོག་མིན་ཉམས་དགར་ནི། །བྱང་ཆུབ་སེམས་དཔའ་གཙོ་ཆེན་དབང་ཕྱུག་དེས། །ཆོས་ཀྱི་ཕོ་བྲང་དེར་ནི་དབང་བསྐུར་བ། །ཀུན་ཏུ་བཟང་པོ་རྡོ་རྗེ་དབྱིངས་ཀྱི་སྐུར། །བྱང་ཆུབ་སེམས་དཔའ་རྡོ་རྗེས་བྱིན་བརླབས་ནས། །དེ་ཉིད་དུ་ནི་མངོན་པར་བྱང་ཆུབ་པས། །བླ་མེད་སྙིང་པོ་རྡོ་རྗེ་འཆང་དུ་གྱུར། །རང་བྱུང་བདེ་བ་ཆེན་པོར་མངོན་སངས་རྒྱས། །ཞེས་སོ། །མ་རྒྱུད་པ་ནི་གྲགས་ཆེན་གྱི་སངས་རྒྱས་ས་བཅུ་གཅིག་པ་དེ་ཉིད་འོག་མིན་བཙུན་མོའི་གཞལ་ཡས་སུ་དབང་བཞི་ཡོངས་རྫོགས་ཞུས་ནས། བུད་མེད་མཆོག་ལ་བརྟེན་ནས་བཅུ་གསུམ་རྡོ་རྗེ་འཛིན་པའི་ས་ཐོབ་སྟེ། རབ་ཏུ་མི་གནས་པའི་རྒྱུད་ལས། བཅུ་གཅིག་སངས་རྒྱས་རྣམས་ཀྱིས་ཀྱང་། །བུད་མེད་ཕྱག་རྒྱར་བརྟེན་བྱས་ནས། །རྡོ་རྗེ་འཛིན་པའི་ས་ཐོབ་འགྱུར། ཡང་ན་ས་བཅུ་པའི་བྱང་ཆུབ་སེམས་དཔའ་དེས། འོག་མིན་དུ་ལོངས་སྐུ་བདེ་བ་ཆེན་པོའི་སྐུ་དྲུག་པ་རྡོ་རྗེ་འཆང་ལ་དབང་བཞི་རྫོགས་པར་ཞུས་པས་ས་བཞི་བགྲོད་དོ། །རྡོ་རྗེ་བདེ་བ་ཆེན་པོའི་རྒྱུད་དང་། ཡེ་ཤེས་ཐིག་ལེའི་རྒྱུད་ལས། བུམ་པའི་དབང་ནི་བཅུ་གཅིག་སྟེ། གསང་བའི་དབང་ནི་བཅུ་གཉིས་མཆོག །ཤེས་རབ་ཡེ་ཤེས་བཅུ་གསུམ་པ། །དེ་ལྟར་དེ་བཞིན་བཅུ་བཞི་པ། །དབང་རེ་ལ་ནི་ས་རེ་སྟེ། །འདི་རྣམས་ས་ཡི་དབང་ཕྱུག་བདག །ཅེས་སོ། །གཞན་ཡང་དེ་བཞིན་གཤེགས་པ་སངས་རྒྱས་ཚུལ་ལ། ཐེག་དམན་ཉན་ཐོས་རྣམས་ཀྱིས་གྲངས་མེད་གསུམ་དུ་ཚོགས་བསགས་པའི་མཐར་སངས་རྒྱས་སྐར་རྒྱལ་ལ་བསྟོད་པས་བསྐལ་པ་དགུའི་ཚོགས་འདུམ། དེ་ནས་བསྐལ་པ་འདིའི་སངས་རྒྱས་འོད་སྲུང་བསྙེན་བཀུར་བ་ཡན་ཆད་ལ་བསྐལ་པ་དགུ་བཅུ་གོ་གཅིག་སྟེ་བསྐལ་ཆེན་བརྒྱར་མཚན་དཔེའི་རྒྱུ་བསྒྲུབ་ནས་དགའ་ལྡན་གྱི་གནས་སུ་ལྷའི་བུ་དམ་པ་ཏོག་དཀར་པོར་སྐུ་འཁྲུངས་ཤིང་། དེ་ནས་དགའ་ལྡན་གྱི་གནས་ནས་འཕོ་བ་སོགས་མཛད་པ་བཅུ་གཉིས་བསྟན་པ་སྟེ། དེའང་སྲིད་པ་ཐ་མ་པ་རྒྱལ་བུ་དོན་གྲུབ་ཀྱི་དུས་སུ་གྲངས་མེད་གསུམ་གྱི་ཚོགས་རྫོགས་ཀྱང་ཚོགས་ལམ་ཆེན་པོའི་རྟེན་ཙམ་ཡིན་ཞིང་། དེ་ནས་རྡོ་རྗེའི་གདན་ལ་བཞུགས་པ་ཚུན་ཆད་སོ་སོའི་སྐྱེ་བོ་འཆིང་བ་ཀུན་ལྡན་ཡིན་ལ། བྱང་ཆུབ་ཀྱི་ཤིང་དྲུང་དུ་སྲོད་ལ་བདུད་དཔུང་བྱེ་བ་ཕྲག་སོ་བདུན་བཏུལ། སྟན་ཐོག་གཅིག་དེ་ཁོ་ནར་བདེན་བཞི་མི་རྟག་སོགས་བཅུ་དྲུག་རྟོགས་པའི་ལམ་གྱིས་སྦྱོར་མཐོང་སྒོམ་པ་མི་སློབ་པའི་བར་ལམ་བཞི་མཐར་ཕྱིན་པར་མཛད་ཅིང་སངས་རྒྱས་པར་འདོད་དོ། །ཐེག་ཆེན་ངེས་པའི་དོན་ཁོ་ནའི་དབང་དུ་བྱས་ན། བསྐལ་པ་དཔག་ཏུ་མེད་པའི་གོང་དུ་མངོན་པར་རྫོགས་པར་སངས་རྒྱས་ཟིན་པ་ཡིན་ཏེ། ཡབ་སྲས་མཇལ་བའི་མདོར། སྔོན་འདས་པའི་དུས་བསྐལ་པ་དཔག་ཏུ་མེད་པའི་གོང་རོལ་དུ་འཇིག་རྟེན་ཁམས་གངྒཱ་ཀླུང་གི་བྱེ་མ་སྙེད་ཀྱི་ཞིང་གཅིག་ཏུ་གྱུར་པ་དེར། དེ་བཞིན་གཤེགས་པ་དབང་པོའི་ཏོག་ཅེས་བྱ་བར་སངས་རྒྱས་ནས་སེམས་ཅན་གྱི་དོན་མཛད་དེ་མྱ་ངན་ལས་འདས་ནས། སླར་ཡང་དེ་འོག་ཏུ་སངས་རྒྱས་པའི་ཚུལ་བསམ་གྱིས་མི་ཁྱབ་པ་བསྐལ་པ་འདིའི་བར་དུ་བསྟན་ཅིང་། ད་དུང་ཡང་སོ་སོ་སྐྱེ་བོ་སེམས་དང་པོ་བསྐྱེད་ནས་བཟུང་སྟེ་སངས་རྒྱས་པའི་ཚུལ་འཁོར་བ་མ་སྟོང་བར་དུ་མཛད་དོ། །ཞེས་པ་ནས། དཔའ་བོ་ཆེན་པོ་ཐབས་མཁས་ཏེ། །སེམས་ཅན་ཡོངས་སུ་སྨིན་མཛད་ཕྱིར། །བྱེ་བ་ཕྲག་བརྒྱར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་ཡང་ནི་འདྲེན་པ་ཁྱོད། །སངས་རྒྱས་མང་པོ་སྟོན་པར་མཛད། །ཅེས་སོ། །དེ་ལ་ཐེག་ཆེན་པ་རྣམས་ཀྱི་ལུགས་སུ་གྲངས་མེད་དང་པོར་ཚོགས་སྦྱོར། གཉིས་པར་མ་དག་ས་བདུན། གསུམ་པར་དག་པ་ས་གསུམ་བགྲོད་ནས་སྲིད་པ་ཐ་མ་པའི་སྐབས་སུ་འོག་མིན་དུ་ཕྱོགས་བཅུའི་རྒྱལ་བ་རྣམས་ལས་འོད་ཟེར་ཆེན་པོའི་དབང་བསྐུར་ནོད་ཅིང་རྡོ་རྗེ་ལྟ་བུའི་ཏིང་ངེ་འཛིན་སྐྱེས་ཏེ་ལོངས་སྤྱོད་རྫོགས་པའི་སྐུར་སངས་རྒྱས་ནས་རིང་པོར་མ་ལོན་པར་སྤྲུལ་པའི་གཟུགས་ཀྱིས་རྡོ་རྗེའི་གདན་དུ་འཚང་རྒྱ་བའི་ཚུལ་བསྟན་ཏེ་འགྲོ་བའི་དོན་མཛད་པར་བཞེད་དོ། །འོག་མིན་དུ་འཚང་རྒྱ་བའི་ཚུལ་ཡང་། ཁ་ཅིག་ཏུ་འོག་མིན་དུ་སྟུག་པོ་བཀོད་པའི་ཞིང་དུ་སངས་རྒྱས་པའི་རྗེས་ལ་གཙང་གནས་ཀྱི་འོག་མིན་དུ་འཚང་རྒྱ་བའི་ཚུལ་བསྟན་པར་བཞེད་དེ། །ལང་ཀར་གཤེགས་པ་ལས། གཙང་མའི་རིས་དག་སྤངས་པ་ཡི། །འོག་མིན་གནས་མཆོག་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་གཅིག་འདིར་སངས་རྒྱས། །ཞེས་དང་། འདོད་པའི་ཁམས་དང་གཟུགས་མེད་དུ། །སངས་རྒྱས་མངོན་པར་འཚང་མི་རྒྱ། །གཟུགས་ཀྱི་ཁམས་ཀྱི་འོག་མིན་ཏུ། །འདོད་ཆགས་བྲལ་ཁྱོད་དེར་སངས་རྒྱ། །ཞེས་སོ། །བྱ་བའི་རྒྱུད་ལས། དང་པོར་ཐུགས་བསྐྱེད་ནས་དེ་བཞིན་གཤེགས་པ་མེ་ཏོག་ཀུན་ཏུ་སྟོན་པའི་སྤྱན་སྔར་སྔགས་ཐོས་ཏེ་སྔགས་ཀྱི་སྤྱོད་པ་སྤྱད་པའི་སྒོ་ནས་གྲངས་མེད་གསུམ་དུ་ཚོགས་བསགས་ཤིང་། དམ་པ་ཏོག་དཀར་པོ་ནས་འཕོས་པ་ཟས་གཙང་གི་སྲས་སུ་གྱུར་ནས་སངས་རྒྱས་པར་བཤད་པའོ། །སྤྱོད་རྒྱུད་ལས། སེམས་བསྐྱེད་དེ་སྔགས་ཀྱི་སྤྱོད་པ་སྤྱད་ནས་ས་བཅུ་མངོན་དུ་བྱས་ཤིང་འོག་མིན་དུ་ལོངས་སྐུར་སངས་རྒྱས་པའི་ཚུལ་བསྟན་པར་བཤད་དོ། །རྣལ་འབྱོར་རྒྱུད་ལ་བཞེད་ཚུལ་གསུམ་གྱི། དང་པོ་རྣལ་འབྱོར་རྒྱུད་དེ་ཉིད་བསྡུས་པ་ནས། བྱང་ཆུབ་སེམས་དཔའ་དོན་གྲུབ་བྱང་ཆུབ་ཀྱི་སྙིང་པོར་བཞུགས་པ་ལ་སངས་རྒྱས་རྣམས་ཀྱིས་བསྐུལ་ནས། མི་གཡོ་བའི་ཏིང་ངེ་འཛིན་ལས་བཞེངས་ཏེ་སེམས་བསྐྱེད་ཅིང་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་ནས་མངོན་པར་རྫོགས་པར་སངས་རྒྱས་པར་བཤད་དོ། གཉིས་པ། སློབ་དཔོན་ཤཱཀྱ་བཤེས་གཉེན་སོགས་ཀྱིས་ཟས་གཙང་གི་སྲས་ཆུ་བོ་ནཻ་རཉྫ་ནའི་འགྲམ་དུ་དཀའ་ཐུབ་མཛད་པའི་ཚེ་སངས་རྒྱས་རྣམས་ཀྱིས་བསྐུལ་བས། ཡེ་ཤེས་ཀྱི་ལུས་འོག་མིན་དུ་བྱོན་པ་ལ་སངས་རྒྱས་རྣམས་ཀྱིས་དབང་བསྐུར་ནས་སངས་རྒྱས་ཏེ། སླར་རྣམ་སྨིན་གྱི་ལུས་ལ་ཞུགས་ནས་སྤྲུལ་སྐུར་འཚང་རྒྱ་ཚུལ་བསྟན་པར་བཞེད་ལ། དེ་ལྟར་ཡང་སངས་རྒྱས་ཡེ་ཤེས་ཞབས་ཀྱི་གྲོལ་བའི་ཐིག་ལེ་ལས། ཅི་ཕྱིར་ཤཱཀྱ་ཐུབ་པ་ཡིས། །གྲངས་མེད་གསུམ་དུ་ཚོགས་བསགས་ཀྱང་། །འདི་དོན་མ་རྟོགས་ནེ་རཉྫར། །ཅི་ཡང་མ་ཡིན་ཏིང་འཛིན་གནས། །དེ་ཚེ་ཕྱོགས་བཅུའི་བདེ་གཤེགས་ཀྱིས། །ཐལ་བྱུང་བློ་ཅན་དེ་བཟློག་སྟེ། །ནམ་མཁའི་དབྱིངས་ལྟར་རྣམ་དག་པའི། །ཟབ་གསལ་གཉིས་མེད་རབ་བསྟན་པས། །ནམ་ཕྱེད་དུས་ན་རྒྱལ་བ་ལྟར། །དེ་ཉིད་གོམས་པས་ཐོ་རངས་དུས། །སྐད་ཅིག་གིས་ནི་ཡང་དག་རྟོགས། །འགྲོ་བ་འདུལ་བར་བྱ་བའི་ཕྱིར། །བྱང་ཆུབ་སྙིང་པོར་བཞུགས་ནས་ཀྱང་། །དཔུང་ཆེན་བདུད་རྣམས་རབ་བཅོམ་སྟེ། སེམས་ཅན་གཟུང་བར་བྱ་དོན་དུ། །ཆོས་ཀྱི་འཁོར་ལོ་བསྐོར་བའོ། །ཞེས་གསུངས། གསུམ་པ། ཡོ་གའི་ཤིང་རྟ་ཆེན་པོ་སློབ་དཔོན་ཀུན་དགའ་སྙིང་པོས། རྒྱལ་བས་སེམས་བསྐྱེད་ནས་གྲངས་མེད་གསུམ་དུ་ཚོགས་བསགས་ཏེ་བསམ་གཏན་དང་གཟུགས་མེད་ཀྱི་ཏིང་ངེ་འཛིན་ཐམས་ཅད་བསྐྱེད་ཅིང་སྲིད་པ་ཐ་མ་པར་མཛད། སངས་རྒྱས་རྣམས་ལས་དབང་བསྐུར་བ་ཐོབ་ཅིང་བསྐལ་པ་མང་པོའི་སྔོན་རོལ་ཏུ་སངས་རྒྱས་ནས་སླར་ཤཱཀྱའི་རིགས་སུ་སྐྱེ་བ་བསྟན་པར་བཤད་དོ། །རྣལ་འབྱོར་བླ་མེད་ཆེན་པོའི་ལུགས་ལྟར་ན་ངེས་དོན་དུ་སྲིད་པ་ཐ་མའི་བྱང་སེམས་སུ་གྱུར་པ་ཞིག་གནས་འོག་མིན་ཆེན་པོར་ལམ་ཐུན་མོང་མ་ཡིན་པའི་ཟབ་ལམ་གྱི་ཉེ་རྒྱུ་ལ་བརྟེན་ནས་མངོན་པར་བྱང་ཆུབ་པ་ལྔ་ལ་སོགས་པས་རྡོ་རྗེ་འཆང་ཉིད་དུ་སངས་རྒྱས་པར་གྱུར་ཅིང་། སླར་སྤྲུལ་པའི་སྐུ་འཛམ་གླིང་མ་གྷ་དྷཱར་སངས་རྒྱས་པའི་ཚུལ་བསྟན་པར་བཞེད་དོ། ། ༈ མངོན་བྱང་ལྔ་ལ་གཞི་ཡི་མངོན་བྱང་དང་། ལམ་གྱི་མངོན་བྱང་། འབྲས་བུའི་མངོན་བྱང་དང་གསུམ་ལས། དང་པོ་གཞིའི་མངོན་བྱང་ལྔ་ནི། སེམས་ཅན་རྣམས་ཤི་བའི་དུས་སུ་ཤར་བའི་དྲི་བཅས་ཀྱི་ཡེ་ཤེས་དེ་དང་། རྟེན་རླུང་རགས་པ་དང་། སྣང་བ་གསུམ་སྟེ་ལྔ་ནི་གཞིའི་མངོན་བྱང་། གཉིས་པ་ལམ་གྱི་མངོན་བྱང་ལྔ་ནི། སྟོང་པ། སྟོང་པ་ཆེན་པོ། ཤིན་ཏུ་སྟོང་པ། ཐམས་ཅད་སྟོང་པ། དོན་གྱི་འོད་གསལ་སྟེ་ལྔ་ནི་ལམ་གྱི་མངོན་བྱང་ལྔ། གསུམ་པ་འབྲས་བུའི་མངོན་བྱང་ལྔ་ནི། རྣལ་འབྱོར་རང་གི་ཡིད་ངོར་དཀར་ཆ་ཐུར་དུ་དག་པ་ཟླ་བའི་དཀྱིལ་འཁོར་སྐུ་རྡོ་རྗེ། དམར་ཆ་གྱེན་དུ་དག་པ་ཉི་གདན་གསུང་རྡོ་རྗེ། རླུང་སེམས་ཐད་དུ་དག་པ་ཕྱག་མཚན་རྡོ་རྗེ་སོགས་ཐུགས་རྡོ་རྗེ། དེ་དག་འོད་དུ་ཞུ་བ་འོད་གོང་དུ་གྱུར་པ་འོད་ཀྱི་གོང་བུ་སོགས་ལ་མངོན་པར་བྱང་ཆུབ་པ་སྟེ། དེ་དག་རྣལ་འབྱོར་རང་གི་སྟོང་བཞིའི་ཡེ་ཤེས་ཤར་བའི་སྣང་ངོར་རིམ་བཞིན་སྣང་བ་ཡིན་ཅིང་དེ་ཉིད་སྐུ་ཡོངས་རྫོགས་སུ་བྱང་ཆུབ་སྟེ་འབྲས་བུའི་མངོན་བྱང་ལྔའོ། །མ་རྒྱུད་ལ་མཁས་པའི་གྲུབ་ཆེན་རྣམས་ཀྱིས་བཤད་པ་ལྟར་ན། དབང་བསྐུར་བ་དེའི་ཚེ་ཤེས་རབ་མ་དང་སྦྱར་བས། དཀར་ཆ་ཞུ་བའི་བདེ་ཆེན་གྱིས་སྟོང་ཉིད་གཟིགས་པ་མཐར་ཐུག་པ་ཟླ་བ་ལ་བྱང་ཆུབ། ཤེས་རབ་མའི་དམར་ཆ་དང་ལྷན་ཅིག་དྲངས་པས་རྟེན་ཐིག་ལེ་ལྷག་པའི་ཁྱད་པར་གྱིས་བདེ་སྟོང་དབྱེར་མེད་མཐར་ཐུག་པ་ཉི་མ་ལ་བྱང་ཆུབ་པ། དེ་ཡི་སྤྱི་བོ་ནས་ཐིམ་སྐུ་ཐམས་ཅད་གང་བའི་བདེ་སྟོང་གིས་དྲི་མ་གདོད་ནས་སྟོང་པར་མཁྱེན་པར་མཐར་ཐུག་པ་ཕྱག་མཚན་ལ་བྱང་ཆུབ་པ། དེ་ལས་ཆོས་ཐམས་ཅད་ཡུལ་ཡུལ་ཅན་དབྱེར་མེད་གཟིགས་པ་མཐར་ཐུག་པ་གཅིག་ཏུ་གྱུར་པ་སྟོང་པ་ཉིད་ལ་བྱང་ཆུབ་པ། དེ་ཉིད་ལས་ཐུགས་ཆོས་སྐུ་དང་ལོངས་སྐུ་སོགས་སུ་གྱུར་པ་སྐུ་ཡོངས་རྫོགས་ལ་བྱང་ཆུབ་པའོ། ༈ །མཛོད་སྡེ་ལས་ཀུན་མཁྱེན་ཆོས་ཀྱི་རྒྱལ་པོས་གྲོལ་བའི་ཐིག་ལེ་དྲངས་ནས་བཤད་པ་གསུང་སྐབས། ངལ་གསོ་སྐོར་གསུམ་གྱི་སྤྱི་དོན་ལེགས་བཤད་རྒྱ་མཚོ་ལས། སྔགས་བླ་མེད་ལ་གསར་རྙིང་གཉིས་སུ་ཕྱེས་ཏེ་གསར་མའི་སྐབས་སུ་གྲོལ་ཐིག་གི་ལུང་དྲངས་པ་དང་། རྙིང་མའི་ལུགས་ལ་སྒྱུ་འཕྲུལ་བླ་མའི་ལུང་དྲངས་ཏེ་སོ་སོའི་ལུགས་ཀྱི་མངོན་པར་བྱང་ཆུབ་ཚུལ་གསལ་བོར་གསུང་ཡོད་པས་ཤེས་པར་བྱ། ༈ མི་ཕམ་རིན་པོ་ཆེས་ཀྱང་སྒྱུ་འཕྲུལ་གྱི་སྐབས་འདིར་མངོན་བྱང་ལྔ་ནི་སྒྱུ་འཕྲུལ་ལམ་རིམ་སོགས་ལས་གསུངས་པ་ལྟར་ཤེས་དགོས་གསུངས། སྒྱུ་འཕྲུལ་བླ་མ་ལས། དོན་གྲུབ་དཀའ་ཐུབ་ལུས་ཅན་ལ། །ཕྱོགས་བཅུའི་རྒྱལ་བ་སྤྲིན་བཞིན་དུ། །འདུས་པས་ལོངས་སྤྱོད་དོན་གྱི་ཕྱིར། །སྲོད་དང་ཐོ་རངས་དུས་ཉིད་དུ། །ཉི་ཟླ་ཟ་བའི་དབང་བྱིན་ནས། །རོལ་པའི་ཀ་ར་བསྟན་པ་ཡིས། དེ་བཞིན་དེ་བཞིན་གཤེགས་པའོ། །ཞེས་དང་། ལམ་རིམ་ལས། དོན་གྲུབ་དཀའ་ཐུབ་ལུས་ཅན་ལ། །ཕྱོགས་བཅུའི་རྒྱལ་བ་སྤྲིན་བཞིན་དུ། འདུས་པ་གསང་བའི་ལོངས་སྤྱོད་ཀྱིས། །སྲོད་དང་ཐོ་རངས་དུས་ཉིད་དུ། ཉི་ཟླ་ཟ་བའི་དབང་བྱིན་ཅིང་། །རོལ་པའི་ཀ་ར་བསྟན་པ་ཡིས། །ཡེ་ཤེས་བརྟན་རྫོགས་དབང་ཐོབ་པས། །དེ་བཞིན་དེ་བཞིན་གཤེགས་པའོ། །ཞེས་གསུངས། ཀོང་སྤྲུལ་རིན་པོ་ཆེས། ཕྱིའི་མངོན་བྱང་། ནང་གི་མངོན་བྱང་གཉིས་ལས། དང་པོ་ནི། མངོན་བྱང་གི་རིམ་པ་ལ་འཇུག་པའི་ཚུལ་ཡང་། ནུབ་སྔ་མ་ཟླ་འོད་སྣང་བའི་ཚེ་སྣང་བའི་ཡེ་ཤེས་ཉིད་གཙོ་བོར་བསྒོམ། དེ་ནས་ཉིན་མོར་བབས་པ་ན་མཆེད་པ་ཉིན་མོ་བསྒོམ། ཉི་མ་ནུབ་པ་ན་ཐོབ་པ་བསྒོམ་པས་སྐྱ་རེངས་འཆར་བའི་དུས་སུ་དོན་གྱི་འོད་གསལ་མངོན་པར་བྱང་ཆུབ་པ་མངོན་དུ་བྱེད་དོ། །ནང་གི་ཏིང་ངེ་འཛིན་དང་རྣམ་པ་འདྲ་བའི་ཕྱིའི་དུས་ཀྱི་ཁྱད་པར་ཡིན་ཏེ། དེས་ན་ཕྱིའི་མངོན་བྱང་ཞེས་བྱའོ། །གཉིས་པ་ནི། དུས་ཀྱི་ཁྱད་པར་སྔ་མ་དེ་ཉིད་ཀྱི་ཉི་མ་དམར་ཐག་ཆད་པ་ན་ཚོགས་ཀྱི་མཆོད་པ་སོགས་སྔོན་དུ་འགྲོ་བས་རིག་མ་དང་ལྷན་ཅིག་སློབ་དཔོན་ལ་གསོལ་བ་འདེབས་པས་གནས་པ་ལ། སློབ་དཔོན་གྱིས་ཤེས་རབ་ཡེ་ཤེས་ཀྱི་དབང་བསྐུར་བ་སྦྱིན་ཏེ། དཔེའི་ཡེ་ཤེས་ལ་མངོན་པར་བྱང་ཆུབ་པའི་རིམ་པར་ངོ་སྤྲོད་པའི་གདམས་ངག་སྟོན་པ་ནི་དབང་བཞི་པ་སྟེ། དེ་ཉིད་ཀྱི་རྒྱུན་གོམས་པས་ཐོ་རངས་ཀྱི་དུས་སུ་མངོན་པར་བྱང་ཆུབ་པ་མཐོང་ལམ་མངོན་དུ་བྱེད་དེ། འདི་ནི་རྣལ་འབྱོར་ཕ་མའི་རྒྱུད་གཉིས་ཆར་ལས་བཤད། ཅེས་དང་། འདིར་རྒྱུའི་མངོན་བྱང་མཐོང་ལམ་ཐོབ་པའི་སྐབས་དང་སྦྱར་ན་གཟིགས་པ་རྣམ་དག་མཐར་ཐུག་མ་ཡིན་པའི་སྐབས་དང་། སྐུ་གཉིས་ཐོབ་པའི་དོད་དུ་སློབ་པའི་ཟུང་འཇུག་འགྲུབ་པ་སྟེ། ཕྱི་མ་འདི་ལ་ནང་གི་མངོན་བྱང་ཞེས་བྱ་བ་ནི་ཕྱི་རོལ་དུས་ཀྱི་ཁྱད་པར་ལ་མི་སྦྱོར་བར་ནང་བདེ་སྟོང་གི་རིམ་པ་ལ་སྦྱོར་བས་སོ། །བྱང་སེམས་དཀར་དམར་གྱི་ཐིག་ལེའང་མཐོང་ལམ་པའི་སྐབས་དེར་ཕལ་ཆེར་འབྱུང་བའི་ཁམས་ཡིན་ལ་འཚང་རྒྱ་བའི་དུས་སུ་ཡེ་ཤེས་ཀྱི་རང་འོད་ཡིན་པའི་ཁྱད་པར་ཡོད་པ་དང་། དེའང་སྔར་གྱི་རྒྱུན་གནས་འགྱུར་བ་ཡིན་ཅིང་། ཕྱི་མ་འདི་འདུས་པ་ལས་མི་གསལ་ཡང་མ་རྒྱུད་ཀྱི་ལུགས་ཏེ། འཚང་རྒྱ་ཁའི་སྐབས་ཀྱི་ཉེ་རྒྱུའི་སྤྱོད་པ་ལ་གནས་པའི་ཐ་མར་ཡང་འདི་ལྟ་བུ་ལ་བརྟེན་ནས་འཚང་རྒྱ་བ་ཡིན་ནོ། །ཞེས་གསུངས།། །། སྒྱུ་འཕྲུལ་བླ་མ་བརྒྱུད་པའི་ལོ་རྒྱུས་ཚན་པ་གཉིས།དེ་ཡང་སྔོན་འོག་མིན་གྱི་གནས་སུ་གསུངས་པ་སླར་ཡང་ཟློས་ཀྱི་ཚུལ་དུ་ཕྱག་ན་རྡོ་རྗེས་དྲྭ་མ་ལྔ་ལ་གསུངས། དེ་རྣམས་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻཌཱུཪྱའི་ཞུན་མས་བྲིས་ཏེ། ཇི་སྐད་དུ། གཞི་རྒྱུ་དགོངས་སྣོད་གནས་སྲུང་བདག་བརྒྱུད་འཛིན། །ཞེས་པས། གསེར་གྱི་བྱང་བུ་ལ་བྲི་གཞི་ཕུན་སུམ་ཚོགས་པར་དགོངས་པ། བཻཌཱུཪྱའི་ཞུན་མས་བྲིས་པ་རྒྱུ་ཕུན་སུམ་ཚོགས་པར་དགོངས་པ། རིན་པོ་ཆེ་སྣ་ཚོགས་པའི་སྒྲོམ་བུ་སྣོད་ངོ་མཚར་བར་དགོངས་པ། ནམ་མཁའ་འབྱུང་བཞིས་མི་འཇིག་པས་གཏེར་གནས་དམ་པར་དགོངས་པ། མ་དང་མཁའ་འགྲོ་རྣམས་ཡེ་ཤེས་ཀྱི་སྤྱན་དང་ལྡན་པས་གཏེར་སྲུང་ཁྱད་པར་ཅན་དུ་དགོངས་པ། ཆོས་བདག་རྒྱལ་པོ་ཛཿལས་ཅན་དབང་པོ་ཡང་རབ་རྟོགས་གྲོལ་དུས་མཉམ་དུ་དགོངས་པ། སྐྱེ་འཕགས་བྱང་སེམས་ས་ལ་གནས་པ་སོགས་གྲུབ་བརྙེས་བརྒྱུད་འཛིན་དར་རྒྱས་སུ་འབྱུང་བ་ལ་དགོངས་པ་སྟེ། དགོངས་པའི་རྩལ་བདུན་གྱིས་ནམ་མཁའ་ལ་སྦས་སོ། །དེ་ལྟར་གསང་བདག་གིས་བཀའ་བསྡུ་མཛད་པའི་ཚེ་དེའི་བྱིན་རླབས་ཀྱིས་ས་ཧོ་རའི་རྒྱལ་པོ་ཛཿསྟེ་ཨིནྟྲ་བྷུ་ཏི་ལ། རྨི་ལྟས་ངོ་མཚར་བ་བདུན་བྱུང་བ་དང་མཐུན་པར་རྒྱལ་པོའི་ཁང་སྟེང་དུ་བཛྲ་པ་ཎིའི་སྐུ་ཁྲུ་གང་བ་ཞིག་དང་། ཏནྟྲ་ཆེན་པོ་སྡེ་བཅོ་བརྒྱད་ཀྱི་གླེགས་བམ་དང་བཅས་བབས། ས་ཧོ་ར་ཞེས་པ་ནི། ཐོན་མིས་རྒྱ་གར་ལ་མེད་ཀྱང་བོད་ལ་ཞ་དང་ཟ་དང་འ་རྣམས་དགོས་པར་དགོངས་ཏེ་བཞག་ལ། དེ་ཡང་ཞ་ནི་ཤ་དང་མཐུན། འ་ནི་ཨ་དང་མཐུན། ཟ་ནི་ས་དང་མཐུན་པས་རྒྱ་གར་བ་རྣམས་ས་ཧོ་ར་ཟེར་བ་ལ། བོད་ཀྱིས་ཟ་ཧོར་དུ་འབོད་དོ། །རྒྱལ་པོ་ཛཿལ་ཨིནྟྲ་བྷུ་ཏི་གསུངས་པ་ནི། རྒྱལ་པོ་ཉིད་ཀྱིས་མཛད་པའི་ལམ་རྣམ་བཀོད་དུ། ཤར་ཕྱོགས་ཨིནྟྲའི་ལུང་པ་ནས། །རྒྱ་ལུང་རྡོ་རྗེ་བརྩེགས་པ་རུ། །རིགས་ཅན་ཨིནྟྲ་བྷུ་ཏི་ངས། །གསང་བའི་བདག་པོས་མངོན་བསྟན་པས། །སྒྱུ་འཕྲུལ་དྲྭ་བའི་སྒྲུབ་པ་ཡང་། །ཚོམ་བུ་ལྔ་བཅུ་སྟོང་དང་བཅས། །ཕྱག་ན་རྡོ་རྗེ་མངོན་གྲུབ་སྟེ། །སྤང་ལེན་བརྟུལ་ཞུགས་སྤྱོད་པའི་དབང་། །དགེ་བར་བསྐུར་ནས་སྡིག་པ་མེད། །དེ་ནས་ས་ལ་རེག་པར་བྱས། །ཞེས་གསུངས་པ་ལྟར་རོ། །འདིས་རྒྱལ་པོས་གླེགས་བམ་ཀྱི་བརྡ་དོན་མ་ལུས་པ་མཁྱེན་ཚུལ་ཡང་ཤེས་ནུས་སོ། །དེ་ཡང་ཏནྟྲ་ཆེན་པོ་སྡེ་བཅོ་བརྒྱད་པོ་ལ་བཞེད་ཚུལ་མི་མཐུན་པ་མང་ཡང་། འདིར་གཏེར་ཆེན་བླ་མའི་དགོངས་པ་ལྟར་འཛིན་དགོས་གསུངས། དེ་ཐམས་ཅད་ཀྱི་བསྡུས་དོན་ལྟ་བུའི་རྒྱུད་སྡེ་ཆེན་པོ་གཅིག་ནི་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་དཔལ་གསང་བ་སྙིང་པོའོ། །རྒྱལ་པོས་ཀུ་ཀུ་རཱ་ཛ་ལ་བཤད་དེ། འདི་ནི་ལོ་རྒྱུས་ལ་ལར་ཀུ་ཏ་རཱ་ཛ་ཞེས་ཀྱང་འབྱུང་སྟེ་ཉིན་མོ་ཁྱིའི་རྣམ་པ་ཅན་གྱི་དཔའ་བོ་དང་རྣལ་འབྱོར་མ་སྟོང་ཕྲག་རེ་ལ་ཆོས་སྟོན་ཅིང་མཚན་མོ་དེ་དག་དང་ལྷན་ཅིག་ཏུ་དུར་ཁྲོད་ཀྱི་གནས་སུ་གཤེགས་ནས་ཚོགས་ཀྱི་འཁོར་ལོ་ལ་སོགས་པ་དམ་ཚིག་གི་ཀུན་ཏུ་སྤྱོད་པ་ལ་གནས་ཤིང་། དེ་ལྟར་ལོ་བཅུ་གཉིས་སྤྱད་ནས་མཐར་ཚོམ་བུ་འབུམ་དང་བཅས་ཏེ་ཕྱག་རྒྱ་ཆེན་པོའི་དངོས་གྲུབ་བརྙེས་པར་ཡང་བཤད་དོ། །དེས་ཨིནྟྲ་བྷུ་ཏི་སྟེ་འབྱོར་བའི་དབང་པོ་བར་པ་ལ་བཤད་དེ་འཁོར་ཚོམ་བུ་ཁྲི་དང་བཅས། དེས་སེང་ཧ་རཱ་ཛ་སྟེ་སེང་གེའི་རྒྱལ་པོ་ལ་བཤད་དེ་འཁོར་ཚོམ་བུ་སྟོང་དང་བཅས། དེས་ཨུ་པ་རཱ་ཛ་སྟེ་ཉེ་བའི་རྒྱལ་པོ་ལ་བཤད་དེ་ཚོམ་བུ་བརྒྱ་དང་བཅས། དེས་སྲས་མོ་གོ་མ་དེ་ཝི་སྟེ་ལྷའི་བཙུན་པ་ལ་བཤད་དེ་འཁོར་ཚོམ་བུ་ལྔ་བཅུ་དང་བཅས་ཏེ་ཀུན་ཀྱང་ཚོགས་སྒྲུབ་ཀྱི་ལམ་གྱིས་རྡོ་རྗེ་འཆང་གི་སར་གཤེགས་སོ། །ཚོམ་བུ་ཕྱི་མ་གཉིས་ཀྱི་གྲངས་གཞན་དང་མི་འདྲ་བར་སྣང་ངོ་། །གོ་མས་སྒེག་རྡོར་ལ་བཤད། སློབ་དཔོན་སྒེག་པའི་རྡོ་རྗེ་ནི། ཡུལ་ཥ་མ་ཥ་རར་འཁྲུངས། ཨོ་རྒྱན་དུ་རབ་ཏུ་བྱུང་ཞིང་སྡེ་སྣོད་སྤྱི་དང་ཁྱད་པར་ཐོགས་མེད་ཀྱི་ལུགས་ལ་མཁས། ཨོ་རྒྱན་གྱི་གླིང་ཕྲན་མ་དྷི་མ་ཞེས་བྱ་བར་འཕགས་པ་འཇམ་དཔལ་གྱི་སྒྲུབ་པ་མཛད་པས་བྲིས་སྐུའི་ཞལ་ལས་འོད་འཕྲོས་གླིང་དེ་ཡུན་རིང་གསལ་བར་མཛད་པས་ཉི་མ་དང་འདྲ་བར་མཚན་གསོལ། རྒྱུད་སྡེ་སྤྱི་དང་བྱེ་བྲག་སྒྱུ་འཕྲུལ་དྲྭ་བ་ལ་མཁས་ཤིང་གྲུབ་པ་བརྙེས། སྐུ་ཚེ་སྨད་ལ་ཨོ་རྒྱན་དུ་འགྲོ་དོན་ཆེར་མཛད། ན་ལེནྟྲར་ལོ་བཅུ་བཞུགས་ཤིང་སྔགས་ཀྱི་བསྟན་པ་སྤེལ། སྙིང་འགྲེལ་རིན་ཆེན་སྤར་ཁབ་དང་དམ་ཚིག་གསལ་བཀྲ་སོགས་སྒྱུ་འཕྲུལ་སྐོར་གྱི་བསྟན་བཅོས་ཀྱང་མང་དུ་མཛད་ནས་མཐར་རྡོ་རྗེའི་སྐུ་བརྙེས་སོ། །དེས་སངས་རྒྱས་གསང་བ་ལ་བཤད་དེ། འདི་ནི་ཡུལ་དབུས་སུ་འཁྲུངས། ན་ལེནྟྲར་རབ་ཏུ་བྱུང་། སངས་རྒྱས་ཡེ་ཤེས་བླ་མར་བརྟེན། ཝཱ་ར་ཎ་སིར་འཇམ་དཔལ་བསྒྲུབས་པས་གྲུབ་པའི་མཚན་མ་མངོན་དུ་མཐོང་། ཨོ་རྒྱན་དུ་བྱོན་ནས་སྒེག་པའི་རྡོ་རྗེ་དང་མཇལ། རྣལ་འབྱོར་རྒྱུད་དང་བླ་མེད་རྒྱུད་སྡེ་ལྔ་གསན་ཅིང་ལྷག་པར་སྒྱུ་འཕྲུལ་ལ་མཁས། སངས་རྒྱས་ཞི་བ་དང་ལྷན་དུ་རི་བོ་ཏ་ལར་འཕགས་པ་སྤྱན་རས་གཟིགས་མཇལ་བར་བྱོན་པས་ཞབས་ས་ལ་མི་རེག་པའི་དངོས་གྲུབ་བརྙེས། རྗེ་བཙུན་སྒྲོལ་མ་དང་འཇམ་དཔལ་གྱིས་བསྐུལ་ནས་གངས་ཏི་སེར་ཕེབས་ཏེ་སྒྲུབ་པ་མཛད་ནས་བཞུགས་དུས་སློབ་དཔོན་ཆེན་པོ་པདྨ་དང་བི་མ་མི་ཏྲ་ལ་གདམས་ཏེ་འཕགས་ཡུལ་དུ་བྱུང་བའི་ཚུལ་ལོ། །རྒྱལ་དབང་ལྔ་པའི་དེབ་ཐེར་ལས། གྲོང་ཁྱེར་ཤིང་ཐབས་ཅན་ན་རྒྱལ་པོ་ཤིང་རྟ་བཅུ་པ་ཞེས་བྱ་བ་བྱུང་བའི་སྲས་ཆོས་རྒྱལ་མྱ་ངན་མེད་ཅེས་བྱ་བ་བདེན་ཚིག་གི་མཐུས་མཆོད་རྟེན་བྱེ་བ་བཞེངས་པ། དེའི་སྲས་རྒྱལ་པོ་ཛ་ཞེས་པ་སྨོན་ལམ་གྱི་མཐུས་རྡོ་རྗེ་སེམས་དཔའི་གླེགས་བམ་གྱི་ཆར་ཕོ་བྲང་གི་སྟེང་དུ་བབ་པས་མདོ་སྡེ་ཟ་མ་ཏོག་རླུང་གིས་ཁྱེར་ཏེ་ཕོ་བྲང་ཡུམ་བུ་བླ་སྒང་གི་སྟེང་དུ་བབས་པ་ལྷ་ཐོ་ཐོ་རི་སྙན་ཤལ་གྱིས་གཉན་པོ་གསང་བ་བཏགས་ལ། དེའི་སྲས་ཟ་ཧོར་རྒྱལ་པོ་ཨིནྟྲ་བྷུ་ཏི། དེ་ལ་སྲས་མོ་གོ་མ་དེ་ཝ་དང་། སྲས་ཤ་བཀྲ་གཉིས། དེའི་སྲས་རྒྱལ་པོ་གཙུག་ལག་འཛིན། དེ་ལ་སྲས་དྷརྨ་རཱ་ཛ། མཁན་ཆེན་ཞི་བ་འཚོ། ལྷ་ལྕམ་མནྡྷ་ར་བ་དང་གསུམ། སྔ་མའི་སྲས་དྷརྨ་པ་ལ། ཤཱཀྱ་དེ་ཝ། མ་ཧཱ་དེ་ཝ་གསུམ་བྱུང་ངོ་། །ཞེས་གསུངས། བོད་དུ་ནི། གངས་རིའི་ཁྲོད་འདིར་སྔ་འགྱུར་རྡོ་རྗེ་ཐེག་པའི་མདོ་སྒྱུ་སེམས་གསུམ་གྱི་བསྟན་པ་ནི། དང་པོ་གཉགས་ལ་བབས་ཏེ། གཉགས་ཛྙཱ་ན་ཀུ་མཱ་ར་ནི། ཡུལ་ཡར་ཀླུང་འཕྱོས་སུ། ཡབ་གཉགས་སྟག་སྒྲ་ལྷ་སྣང་དང་། ཡུམ་སྲུ་བཟའ་སྒྲོན་སྐྱིད་གཉིས་ཀྱི་སྲས་སུ་འཁྲུངས། མགྲིན་པར་སྨེ་བ་རྡོ་རྗེ་རྒྱ་གྲམ་ཡོད། མཚན་རྒྱལ་བའི་བློ་གྲོས་སུ་བཏགས། མཁན་པོ་བོ་དྷི་ས་ཏྭ་ལས་རབ་ཏུ་བྱུང་ཞིང་མདོ་སྔགས་ཀྱི་ཆོས་མང་དུ་བསྒྱུར། སློབ་དཔོན་པདྨ་འབྱུང་གནས། བི་མ་ལ། བཻ་རོ། གཡུ་སྒྲ་སྙིང་པོ་ཀུན་ལ་བརྟེན་པས། དཀྱུས་བཤད་གཞུང་གི་ཆུ་བོ་འགྲེལ་ཊིཀ་སྟོང་ཐུན་དང་བཅས་པ། སྙན་བརྒྱུད་གདམས་ངག་གི་ཆུ་བོ་གནད་ཡིག་དམར་ཁྲིད་དང་བཅས་པ། བྱིན་རླབས་དབང་གི་ཆུ་བོ་བསྐུར་ཐབས་ངོ་སྤྲོད་དང་བཅས་པ། ཕྱག་བཞེས་ཕྲིན་སྒྲུབ་ཀྱི་ཆུ་བོ་བསྟན་སྲུང་དྲག་སྔགས་དང་བཅས་པ་སྟེ་བཀའི་ཆུ་བོ་ཆེན་པོ་བཞི་འདུས། མདོ་སྒྱུ་སེམས་གསུམ་ཀའི་བསྟན་པའི་བདག་པོར་གྱུར་ཅིང་ཉན་བཤད་ཀྱི་སྒོ་ནས་སློབ་མ་ཁྱད་པར་ཅན་མང་དུ་བསྐྲུན་པས་བཀན་དྲིན་བསམ་གྱིས་མི་ཁྱབ། མཐར་སྙན་བརྒྱུད་རྡོ་རྗེ་ཟམ་པ་དང་། མན་ངག་སྡེ་ལས་དངོས་གྲུབ་ཆེན་པོ་བརྙེས་ཏེ་སྟོང་གསལ་འོད་ཀྱི་ཕུང་པོར་གཤེགས་སོ། །དེ་ལ་སློབ་མའི་གཙོ་བོ་ནི། ཕུར་པ་མཁན་པོ་རྣམས་དཔལ་བརྒྱད་དུ་འདྲེན་པ་ཡོད་དེ། འདིར་སོག་པོ་དཔལ་གྱི་ཡེ་ཤེས། གྲ་དཔལ་གྱི་སྙིང་པོ། དར་རྗེ་དཔལ་གྱི་གྲགས་པ། ལྷ་ལུང་དཔལ་གྱི་རྡོ་རྗེ། འོ་བྲན་དཔལ་གྱི་གཞོན་ནུ། སྙན་དཔལ་དབྱངས། འཚུར་ནག་ཡེ་ཤེས་དཔལ། ཐག་བཟང་དཔལ་གྱི་རྡོ་རྗེའོ། །ཨུ་པ་དོ་དང་གསལ་དབོན་རྒྱུད་ལས་ཀྱང་ཕྲིན་ལས་རྒྱ་ཆེར་བྱུང་ངོ་། ། གཉིས་པ་སྔ་འགྱུར་གྱི་བསྟན་པ་བར་དུ་གནུབས་ལ་བབས་ཏེ། དེ་ཡང་རྨ་གཉགས་གཉིས་ནས་བརྒྱུད་པའི་ཆུ་བོ་གསུམ་དུ་གྱེས་པ་འདུས་ཚུལ་ནི། སངས་རྒྱས་གསང་བས་སློབ་དཔོན་ཆེན་པོ་པདྨ་དང་བི་མ་མི་ཏྲ་ལ་གདམས་ཏེ། བི་མ་ལས་རྨ་གཉགས་གཉིས་ལ་གདམས། རྨས་གཙུག་རུ་རིན་ཆེན་གཞོན་ནུ་དང་། གྱེ་རེ་མཆོག་སྐྱོང་གཉིས་ལ་བཤད། དེ་གཉིས་ཀས་དར་རྗེ་དཔལ་གྱི་གྲགས་པ་དང་། ཞང་རྒྱལ་བའི་ཡོན་ཏན་གཉིས་ལ་བཤད། ཞང་གིས་གནུབས་སངས་རྒྱས་ཡེ་ཤེས་ལ་བཤད་པ་སྟེ་བཀའ་སྲོལ་གཅིག་གོ །ཡང་སློབ་དཔོན་པདྨ་དང་བི་མ་ལ་གཉིས་ཀས་གཉགས་ཛྙཱ་ན་ཀུ་མཱ་ར་ལ། དེས་སོག་པོ་དཔལ་གྱི་ཡེ་ཤེས་ལ། དེས་གནུབས་ཆེན་ལ་བཤད་པ་སྟེ་བཀའ་སྲོལ་གཅིག་གོ །ཡང་རྨ་གཉགས་ཐུན་མོང་གི་སློབ་མ་ཁུ་བྱང་ཆུབ་འོད་དང་། ཁྱུང་པོ་དབྱིག་འོད་གཉིས་ལས། ཁུས་ཞང་དང་། ཁྱུང་པོས་དར་རྗེ་ལ་བཤད། ཞང་གིས་མཁས་པ་གཙུག་གྱེར་རྣམ་གཉིས་དང་། ཁུས་བཤད་བཀའ་གཙོ་བོར་བཟུང་བས་བཀའ་ཕྱོགས་སྐྱོང་མ་དང་། གནས་ལས་བཏགས་པ་བཀའ་མཆིམས་ཕུ་མར་ཡང་གྲགས་ཏེ། གནུབས་ལ་བཤད་པ་ནི་བཀའ་སྲོལ་གཅིག་གོ །དེ་ལྟར་བརྒྱུད་པའི་ཆུ་བོ་གསུམ་དུ་གྱེས་པ་གནུབས་སངས་རྒྱས་ཡེ་ཤེས་ལ་གཅིག་ཏུ་འདྲེས་སོ། ། གནུབས་ཆེན་སངས་རྒྱས་ཡེ་ཤེས་ནི། ཡབ་གནུབས་རིགས་གསལ་བའི་དབང་ཕྱུག་དང་། ཡུམ་མཆིམས་མོ་བཀྲ་ཤིས་འཚོ་ཞེས་བྱ་བའི་སྲས་སུ་འཁྲུངས། མཚན་རྡོ་རྗེ་ཁྲི་གཙུག་ཏུ་གྲགས། མཁན་པོ་བྷོ་དྷི་ས་ཏྭ་ལས་རབ་ཏུ་བྱུང་། རྒྱ་གར་ལ་ལན་བདུན་དུ་བྱོན་ཏེ། རྒྱ་བལ་གྱི་ཡུལ་ནས་གཤེད་སྐོར་རྒྱ་མཚོའི་དྲག་སྔགས་རྣམས་སྤྱན་དྲངས་པ་ཡིན་ཏེ། ཇི་སྐད་དུ། བདག་འདྲ་གནུབས་ཀྱི་བན་ཆུང་ཡང་། །སྙིང་ནས་ཆོས་བཞིན་བྱ་སེམས་སྐྱེས། །ཞེ་སྡང་དགྲ་བོས་བྱེད་མ་སྟེར། །སངས་རྒྱས་བསྟན་པ་སྲུང་བའི་ཕྱིར། །ཞེ་སྡང་དེ་མ་ཐག་ཏུ་བསྐྱེད། །དཀར་པོའི་ཆེ་བ་འདོན་བསམས་ནས། །ངན་སྔགས་ཡིག་སྣ་སྣ་ཚོགས་བསླབས། །ཞེས་དང་། བླ་མ་བཅུ་གཅིག་ཞབས་ནས་བཏེགས། །འོན་ཀྱང་མཁས་པ་བཞི་ལ་གཏུགས། །སློབ་དཔོན་དཔལ་གྱི་སེང་གེ་དང་། །རྒྱ་གར་ཁྲག་འཐུང་ནག་པོ་དང་། །ཕུང་བྱེད་ཤིནྟཾ་གརྦྷ་དང་། །བལ་པོ་བ་སུ་དྷ་ར་བཞི། །མཁས་པ་བཞི་ཡི་ཐུགས་བརྡོལ་ནས། །ཟབ་པའི་མན་ངག་ཐུགས་ལ་བཏགས། །ཞེས་སོགས་གསུངས་པ་བཞིན་ནོ། །སྐབས་ཤིག་རྡོ་རྗེ་གདན་ལ་ཚོགས་གསོག་མཛད་པས། ནམ་མཁའི་ཀློང་ནས་གསེར་གྱི་རྡོ་རྗེ་རྩེ་དགུ་པ་ཞིག་རང་གི་ཐད་གྲུ་གང་གི་སར་བྱུང་སྟེ་ལན་གཉིས་སུ་མ་ཟིན། ལན་གསུམ་པའི་ཚེ་ཕྱག་གཡས་པའི་མཐེབ་སྲིན་གྱི་བར་དུ་ཆགས་པའི་མོད་ལ་དེ་ཕྱག་ན་རྡོ་རྗེ་དངོས་ཀྱི་སྐུར་གྱུར། དབང་བསྐུར། བྱིན་གྱིས་བརླབས། སངས་རྒྱས་ཡེ་ཤེས་སུ་མཚན་གྱི་ཅོད་པཎ་བཏགས། དབང་རྟགས་སུ་རྡོ་རྗེ་རྩེ་དགུ་འབྲལ་མེད་དུ་འཆང་བ་ད་ལྟ་རོང་བྱམས་ཆེན་གྱི་ཐུགས་ཀ་ན་ཡོད་པར་གྲགས། སྐུ་ཚེའི་ཚད་ནི། བཀའ་ཤོག་རྒྱ་བོ་ཆེར། རྒྱ་གར་མཁས་པ་བི་མ་མི་དྲ་དང་། །ཨོ་རྒྱན་མཁན་པོ་པདྨ་འབྱུང་གནས་དང་། །བལ་པོའི་མཁས་པ་བ་སུ་དྷཱ་ར་དང་། །བོད་ཀྱི་མཁས་པ་ཛྙཱ་ན་ཀུ་མ་རས། །བདག་ལ་གནང་བའི་མན་ངག་འདི་རྣམས་ཡིན། །ཞེས་པས་ཆོས་རྒྱལ་ཁྲི་སྲོང་གི་དུས་ན་བྱུང་བར་རྩོད་པ་མེད་དེ། གནུབས་ཀྱི་བན་ཆུང་སངས་རྒྱས་ངས། །ལོ་ནི་བརྒྱ་དང་སུམ་ཅུར་ལོན། །ཞེས་ཚེའི་རིག་པ་འཛིན་པ་བརྙེས་ནས་མངའ་བདག་དཔལ་འཁོར་བཙན་གྱི་བར་དུ་བཞུགས་པར་སྣང་ངོ་། །འདི་ལ་བརྒྱུད་འཛིན་གྱི་སློབ་བུ་སྲས་ཀྱི་དམ་པ་གཅིགཐུགས་ཟིན་གྱི་སྲས་བཞི་དང་ལྔར་བྱུང་བ་ལས། སྲས་ཀྱི་དམ་པ་ནི། གནུབས་ཆེན་དང་གདུང་གཅིག་པའི་ཁུ་ལུང་པ་ཡོན་ཏན་རྒྱ་མཚོ་ནི། གནུབས་ཁུ་ལུང་དུ་འཁྲུངས། རུས་གཅིག་པ་དང་སྐལ་ལྡན་དུ་མཁྱེན་ནས་རྗེས་སུ་བཟུང་། ལྟ་བ་སྒང་དྲིལ། གབ་པ་མངོན་ཕྱུང་། གསང་བ་ཁོང་ལྷོད་ལྟར་ཕྱུང་། སྟར་ག་གེགས་སེལ་གྱི་ཚུལ་ཏེ་བཞི་ཀ་ཐོབ་པས་གདམས་ངག་མཐའ་དག་རྫོགས་པ་ཡོན་ཏན་རྒྱ་མཚོའོ། །ཁོང་གིས་རྐང་མགྱོགས་བསྒྲུབས། ཡི་དམ་མང་པོའི་ཞལ་གཟིགས། དམ་ཅན་བྲན་དུ་འཁོལ། ཆོས་ཉིད་ཀྱི་བདེན་པ་མངོན་དུ་གྱུར་པའོ། །འདི་ལ་སྲས་ཡེ་ཤེས་རྒྱ་མཚོ་དང་། པདྨ་དབང་རྒྱལ་གཉིས་འཁྲུངས། ཡེ་ཤེས་རྒྱ་མཚོའི་སྲས་ལྷ་རྗེ་གནུབས་ཆུང་ངམ་ཧཱུྃ་ཆུང་སྟེ། འདིས་མི་ལ་ལ་དྲག་སྔགས་བསྟན། ཐུགས་ཟིན་གྱི་སྲས་བཞི་ལས། སོ་ཡེ་ཤེས་དབང་ཕྱུག་ལ་ལྟ་བ་བཅུད་དྲིལ་ཏེ་བཤད། བ་གོར་བློན་ཆེན་འཕགས་ལ་གཞུང་འགྲེལ་ཊཱི་ཀ་དང་སྦྱར་ནས་བཤད། དན་ཡོན་ཏན་མཆོག་ལ་སྟར་ག་གེགས་སེལ་གྱི་ཚུལ་དུ་བཤད། སྲུ་ལེགས་པའི་སྒྲོན་མ་ལ་ཚིག་སྡེབས་སྦྱོར་ལེགས་པར་བཤད་པ་སྟེ། གནུབས་ཆེན་གྱི་མགུར་ལས། ཤེས་རབ་ཀྱི་ནགས་ཚལ་ན། །ཡོན་ཏན་གྱི་ལྗོན་ཤིང་འཁྲུངས། །སྣོད་མཆོག་ནི་ལྔ་རུ་བླུག །གཅིག་གིས་ནི་རྩ་བ་ཁྱེར། །བློན་ཆེན་འཕགས་པ་ཡིན། །གཅིག་གིས་ནི་ལོ་མ་ཁྱེར། །ལེགས་པའི་སྒྲོན་མ་ཡིན། གཅིག་གིས་ནི་མེ་ཏོག་ཁྱེར། དན་ཡོན་ཏན་མཆོག །གཅིག་གིས་ནི་འབྲས་བུ་ཁྱེར། །ཡེ་ཤེས་དབང་ཕྱུག་ཡིན། །གཅིག་གིས་ནི་ཐམས་ཅད་ཁྱེར། །ཡོན་ཏན་རྒྱ་མཚོ་ཡིན། །ཞེས་གསུངས། གནུབས་ཆེན་གྱིས། གནུབས་ཡོན་ཏན་རྒྱ་མཚོ་དང་། སོ་ཡེ་ཤེས་དབང་ཕྱུག་ལ་བཤད། དེ་གཉིས་ཀྱི་སློབ་མ་ཉང་ཤེས་རབ་མཆོགའདི་བསྐྱེད་རྫོགས་ལ་མཁས་པར་གྲགས་ཤིང་རྡོ་རྗེ་ཕུར་པ་ཡི་དཀྱིལ་འཁོར་གྱི་ཞལ་གཟིགས། བྲག་ལ་རྡོ་རྗེ་བརྒྱབ་པས་འཇིམ་པ་ལ་བྱས་པ་བཞིན་སོགས་གྲུབ་པ་བརྙེས་པའོ། །དེའི་སློབ་མ་ཆོས་ལུང་གི་ཉང་ཤེས་རབ་འབྱུང་གནས་བླ་མའི་ཐུགས་ཟིན་ཅིང་བསྐྱེད་རྫོགས་རྫོགས་ཆེན་གསུམ་ལ་མཁས་ཤིང་ཡོན་ཏན་བསམ་གྱིས་མི་ཁྱབ་པ་དང་ལྡན་པའོ། །དེའི་སློབ་མ་ལྷ་རྗེ་ཟུར་པོ་ཆེའོ། །ཟུར་པོ་ཆེ་འདི་སྟོང་ཚབ་འཕགས་པ་རིན་པོ་ཆེའི་ཡང་སློབ་མ་ཡིན་པས། དེའི་དབང་དུ་བྱས་ན་གནུབས་ཆེན་པོ་དང་ཟུར་པོ་ཆེའི་བར་ན་བླ་མ་གཅིག་ལས་མེད་པ་ཡིན་ནོ། ། གསུམ་པ་ཐ་མ་ཟུར་ལ་བབས་ཚུལ་ནི། ལྷ་རྗེ་ཟུར་པོ་ཆེ་ཤཱཀྱ་འབྱུང་གནས་ནི་དཔལ་ཆེན་པོ་འཇིག་རྟེན་ཏུ་མངོན་སུམ་བྱོན་པ་ཡིན་ཏེ། བསྟན་པ་ཕྱི་དར་ལ་སྔ་འགྱུར་གྱི་བསྟན་པའི་རྩ་བ་བཙུགས། ཟུར་ཆུང་བ་ཤེས་རབ་གྲགས་ཀྱིས་ཡལ་ག་བརྐྱངས། ཟུར་ཤཱཀྱ་སེང་གེས་ལོ་འབྲས་རྒྱས་པར་བྱས་པས། ཟུར་མེས་དབོན་རྣམ་གསུམ་ཞེས་གྲགས་ལ། སྤྱིར་ཟུར་ཞེས་པའི་གདུང་འདི་དང་པོར་རྒྱ་གར་ནས་ལྷག་པ་ཞིག་སྟེ། འཕགས་པའི་ཡུལ་དུ་འོད་གསལ་ལྷ་དབང་གཞོན་ནུ་གཙུག་ཏོར་ཅན། དེའི་སྲས་མནྟྲ་ཟངས་ཞུ་ཅན། དེའི་སྲས་མདོ་ཁམས་སུ་བྱུང་བ་ཟུར་རྒྱལ་བ་གསུམ་དུ་གྲགས། དེའི་སྲས་ཟུར་བཤེས་གཉེན་སྟག་སྒྲ་ཅན། དེའི་སྲས་ཟུར་རིན་ཆེན་རྒྱ་མཚོ། དེའི་སྲས་མཚོ་མིག་པོ་ཆེ། སྔོན་ལྷ་རྗེ་ཟུར་པོ་ཆེ་དེའི་སྲས་སུ་བཤད་པ་དང་། གཞན་དུ་ཨ་ཙ་རའི་སྲས་སུ་འདོད་ཀྱང་། འདིར་ཀུན་མཁྱེན་འཇིགས་མེད་གླིང་པས་ཟུར་བའི་རབས་ཉི་ཤུ་རྩ་བདུན་གྱི་ཡི་གེ་ཞིག་གཟིགས་པ་དེ་ཉིད་བཙན་པར་བགྱིས་ཏེ་མིག་པོ་ཆེ་ལ་ཟུར་ཨ་ཙ་ར། ཟུར་ཁ་ཅན་ལག་ཅན། ཟུར་བཟང་ཤེས་རབ་འབྱུང་གནས་ཏེ་སྲས་གསུམ་བྱུང་བས། ཐ་ཆུང་ཤེས་རབ་འབྱུང་གནས་ཀྱི་སྲས་ལྷ་རྗེ་ཟུར་པོ་ཆེ། ཟུར་སྟོན་བླ་མ། ཟུར་སྒོམ་རྡོ་རྗེ་འབྱུང་གནས། ཟུར་སྒོམ་ཆུང་དང་བཞི་བྱུང་ལ། ཆེ་བ་ཨ་ཙ་རས་རྒྱ་གར་ལ་བྱོན་པའི་སྲས་ཉི་མའི་སྙིང་པོ། སླར་བོད་དུ་བྱོན་ནས་ཐག་ལུང་པར་བཞུགས་སའི་སྲས་ཟུར་ཐག་སྒོམ་ཆེན། དེའི་སྲས་ཟུར་ཆུང་ཤེས་རབ་གྲགས་པ་ཡིན་ཞེས་པ་ཡིན་ནོ། ། ལྷ་རྗེ་ཟུར་པོ་ཆེ་ནི། ཡུལ་མདོ་ཁམས་ཀྱི་སའི་ཆ་ཡར་རྫོང་ངམ་ཞེས་བྱ་བར་ཡབ་ཟུར་བཟང་ཤེས་རབ་འབྱུང་གནས་དང་། ཡུམ་ཡོན་བདག་མོ་བདེ་བ་ལྕམ་ཞེས་བྱ་བའི་སྲས་སུ་འཁྲུངས། མཚན་ཤཱཀྱ་འབྱུང་གནས་སུ་བཏགས། བླ་ཆེན་དགོངས་པ་རབ་གསལ་བསྙེན་པར་རྫོགས། སྤྱིར་ཟུར་ཆེན་ལ་བླ་མ་མང་དུ་བཞུགས་ཏེ། ཁྱད་པར་དུ་ཆོས་ལུང་གི་ཉང་ཡེ་ཤེས་འབྱུང་གནས་ལས་ཟུར་བའི་མེ་ཏོག་ཕོག་པའི་ཆོས་སྒྱུ་འཕྲུལ་དང་སེམས་ཕྱོགས་ཞུས། གཞན་ཡང་། ལྕེ་ཤཱཀ་མཆོགཐོ་གར་ནམ་མཁའ་ལྡེ། ཉང་སྟོད་ཀྱི་འབྲེ་ཁྲོ་ཆུ། ཞུ་སྟོན་བསོད་ནམས་ཤཱཀྱ། སྟོང་ཚབ་འཕགས་པ་བྱང་ཆུབ། རྒྱ་སྟོན་བློ་གྲོས་བཀའ་སྡོད། ཡེ་ཤེས་སྙིང་པོ། གཉན་ནག་དབང་གྲགས། ལྕེ་ཤཱཀྱ་རྒྱལ་སོགས་མཁས་གྲུབ་ཀྱི་བླ་མ་དུ་མ་འཁོར་གསུམ་ཡང་དག་གི་མཆོད་པས་མཉེས་པར་བྱས་ནས་རྒྱུད་ལུང་མན་ངག་མཐའ་དག་གསན། དགོངས་པ་ཉམས་འོག་ཏུ་ཆུད། སྡེ་སྣོད་དང་རྒྱུད་སྡེའི་གྲུབ་མཐའ་ཀུན་ལ་མཁས་པར་བྱས་ནས། རྩ་རྒྱུད་དང་བཤད་རྒྱུད་བསྡེབས། རྩ་བ་དང་འགྲེལ་བ་བསྡེབས། རྒྱུད་དང་སྒྲུབ་ཐབས་སུ་བསྡེབས། སྒྲུབ་ཐབས་ཆོག་ཡིག་ལ་སོགས་པར་བསྡེབས་ནས་ལག་ལེན་དུ་ཐེབས་པར་བྱས། མཁའ་འགྲོའི་ལུང་གིས་བསྐུལ་ནས་རྟ་ནག་གི་ལུང་པར་བྱོན། འུག་པའི་ཚང་ཡོད་པའི་བྲག་ཕུག་ཁ་ཤར་བསྟན་ཞིག་ཏུ་ཡང་དག་ལྷ་དགུའི་སྒྲུབ་པ་མཛད་པས། དཔལ་ཆེན་པོ་ཡང་དག་ལྷ་དགུའི་ཞལ་མངོན་སུམ་དུ་མཐོང་། དེ་ལྟར་བཞུགས་གནས་ཀྱི་མིང་ལས་བླ་མ་འུག་པ་ལུང་པ་ཞེས་སུ་གྲགས་སོ། །ལྷ་རྗེ་ཟུར་པོ་ཆེ་ལ་སློབ་མ་རྩེ་མོ་བཞི། རྩེ་ལྐོག་དང་ལྔ། སྒོམ་ཆེན་བརྒྱ་རྩ་བརྒྱད་ཡོད་པ་ལས། རྩེ་མོ་བཞི་ནི། ལྟ་དགོངས་ཀྱི་རྩེ་མོར་གྱུར་པ་ཟུར་ཆུང་ཤེས་རབ་གྲགས་པ། སྒྱུ་འཕྲུལ་གྱི་བཤད་པའི་རྩེ་མོར་གྱུར་པ་མེ་ཉག་ཁྱུང་གྲགས། མཁྱེན་བརྒྱའི་རྩེ་མོར་གྱུར་པ་ཞང་དགོས་ཆུང་། སྒོམ་སྒྲུབ་ཀྱི་རྩེ་མོར་གྱུར་པ་བཟང་སྒོམ་ཤེས་རབ་རྒྱལ་པོའོ། །རྩེ་ལྐོག་ནི་ཆོས་ཀྱི་སྟེང་དུ་ཕོ་ཟོའི་རྩེ་མོར་གྱུར་པ་རྩགས་བླ་མའོ། །དེ་བཞིན་དུ་སྒྲུབ་སྒོམ་ཁོ་འགྱིང་། ཡུལ་སྒོམ་ནག་མོ། ལྕེ་སྒོམ་ཤཱཀ་རྒྱལ། ཟུར་སྒོམ་རྡོར་འབྱུང་། གཡུ་སྒོམ་ཇོ་འབར། སྦ་སྒོམ་བསོད་ནམས་སྙིང་པོ་ལ་སོགས་ཏེ་སྒོམ་ཆེན་བརྒྱ་བརྩ་བརྒྱད་དོ། །དེ་ཐམས་ཅད་ཀྱང་ནམ་མཁའ་ལ་འགྲོ་བ་སོགས་རྫུ་འཕྲུལ་ཐོབ་པ་འབའ་ཞིག་ཏུ་གྲགས། རྩེ་མོ་བཞིའི་ནང་ནས་ཀྱང་གླང་པོའི་ནང་ནས་ཁྱུ་མཆོག་ལྟ་བུ་དེ་ཉིད་བྲག་རྒྱ་བོ་ལ་ལོ་ཉི་ཤུ་རྩ་བཞིར་བསྒྲུབ་གནས་བྱས་པ་བདེ་གཤེགས་རྒྱ་བོ་བ་ཞེས་ཟུར་ཆུང་ཤེས་རབ་གྲགས་པ་ནི། ཡབ་ཟུར་ཐག་པ་སྒོམ་ཆེན་དང་། ཡུམ་ཤེས་རབ་སྐྱིད་ཀྱི་སྲས་སུ་གཡས་རུ་གཙང་གི་ཆར་ངོ་མཚར་བའི་ལྟས་དང་བཅས་འཁྲུངས། ལོ་བཅུ་གསུམ་ལོན་པའི་ཚེ་ཟུར་ཆེན་ལ་གཏད་དེ་བྱོན། ལམ་དུ་རྟ་ནག་འབྲོག་པ་གཡུ་དང་ཟངས་ཁྱེར་བ་གཉིས་དང་། ཤངས་པ་ཁྲབ་ཁྱེར་བ་རྣམས་ལྷན་དུ་བྱོན། ཟུར་ཆུང་ལ་སྤྱང་སློག་ལས་འབུལ་རྒྱུ་མེད་པས་སྤྱང་སློག་ཡོད་པ་ཕྱག་རྟེན་དུ་ཕུལ་བས། བླ་མའི་ཞལ་ནས། ཁོང་རྣམས་འཁོར་བ་ལ་བློ་ལྡོག་མ་ལྡོག །ལྟ་བས་བག་ཟན་དང་། ལོ་མ་ཐུག་རེ་དྲོངས་གསུངས་པ་ལས། འབྲོག་པ་གཉིས་པོས་ཟར་མ་འདོད། ཤངས་པས་ཅུང་ཟད་ཟོས། ཟུར་ཆུང་བས་ལྷག་མེད་དུ་ཟོས། བླ་མས་སྤྱང་སློག་དང་ཁྲབ་གཉིས་ཞོག །གཡུ་དང་ཟངས་གཉིས་བདག་པོ་ལ་གཏོད་གསུངས། དེར་ཟུར་ཆུང་བ་ལ་ཁྱོད་ཀྱི་རུས་པ་ཅི་ཡིན། བླ་མ་དང་རུས་གཅིག་པར་བརྗོད་ན་འགྲན་པར་སོང་དྭོགས་ནས། ཟུར་ཆུང་ཆུང་ཞིག་ལགས་བྱས་པས་དེ་ལྟར་ཐོགས། དེ་ལས་ཅན་དུ་མཁྱེན་ནས་སློབ་གཉེར་བྱེད་དུ་བཅུག་པས་བློ་གྲོས་ཀྱི་སྤོབས་པ་མཆོག་ཏུ་གྱུར་པ་ཞིག་བྱུང་། དང་པོར་ཤིན་ཏུ་དབུལ་ནས་བླ་མས་གཏོར་མ་བཏང་བ་དག་བླངས་ནས་ཟན་ཆུང་བྱ་བཞིན་གསོལ་བ་དང་། དཔེ་ཆ་ཙམ་འབྲི་བའི་ཡོ་བྱད་མེད་ཙ་ན། ལྷ་རྗེ་ཟུར་པོ་ཆེ་ལ་པན་གྱི་ཁང་སྔོན་བྱ་བ་ན་ཇོ་མོ་གཡུ་མོ་བྱ་བའི་སྒོམ་མ་ཕྱུག་མོ་མ་སྨད་གཉིས་ཡོད་པས། ཁྱོད་རང་འདིའི་སྟེང་དུ་སྡོད་གསུངས། ང་ཁྱིམ་ཐབ་མི་བྱེད་ཞུས་པས། འདུ་ཤེས་མ་ཆུང་། སྟོན་པས་གནང་བ་དང་བཀག་པའི་མཚམས་ངས་ཤེས། ཁོང་གཉིས་ཀྱི་ཡོ་བྱད་ལ་སྤྱོད་ནས་དབང་ཞུས། དཔེ་བྲིས། ཆོས་ཐམས་ཅད་ལྷག་མ་མ་ལུས་པར་ཉན་པས་ཆོག་པ་ཡིན། དེས་ཁོང་གཉིས་ཀྱང་ཚོགས་རྫོགས། ཁྱོད་རང་གི་དོན་ཡང་འགྲུབ་གསུངས། དེར་གསུངས་བཞིན་ཉན་པས་འདོད་པ་ཐམས་ཅད་རྫོགས་པ་དང་། ཡང་གསུངས་པས། ད་ཁྱོད་དེར་མ་སྡོད་འདི་ལ་གབ་པས་རང་དོན་གཞན་དོན་གང་ཡང་མི་འགྲུབ་པས་འདིར་ཤོག་གསུངས། དེར་ཇི་སྐད་གསུངས་པ་བཞིན་བྱས་པས་མཁས་ཤིང་གྲུབ་པ་བརྙེས་པའོ། །དེ་ལ་སློབ་མ་ཀ་བ་བཞི། གདུང་མ་བརྒྱད། ཕྱམ་བཅུ་དྲུགདྲལ་མ་སུམ་ཅུ་རྩ་གཉིས། སྒོམ་ཆེན་མི་གཉིས། ཡུས་པོ་ཆེ་མི་གཅིག །དཀྱུས་མ་གཉིས། སྟ་གུ་ར་མི་གཉིས། གོ་མ་ཆོད་པ་གསུམ་ལ་སོགས་པ་མང་དུ་བྱོན་ཏེ། ཀ་བ་བཞི་ནི། དེ་ཡང་དགེ་བཤེས་ཁྱུང་པོ་གྲགས་སེས། གྲྭ་པ་མཚན་ཉིད་པ་ཆེན་པོ་བཞི་བཏང་ནས། ཟུར་ཆུང་བ་བྱ་བའི་ཆོས་ལོག་མཁན་བ་གླང་འདི་སུན་ཕྱུངས་ལ་ཤོགཅེས་བསྒོས་པས་བཞི་པོ་ལྷ་རྗེའི་སྤྱན་སྔར་ཕྱིན་ཙ་ན། ཟུར་ཆུང་བ་ཐུལ་པ་ཕྱི་ནང་ལྡོག་ནས་བཞེས་ཏེ་འདུག །དེར་གཅིག་གིས་པགས་པ་ཕྱི་ནང་སློག་པའི་གོས་འདི་གང་གི་ཆོས་ལུགས་ཡིན་ཟེར། པགས་པ་དང་པོ་ནས་འདི་ལྟར་ཡོད་པས་ཕྱི་ནང་མ་ལྡོག །ཕྱི་ནང་འཛོལ་བ་ཁྱེད་རང་གི་ཆོས་ཡིན་མོད་གསུངས། གཅིག་གིས་འོ་ན་ཆོས་གཏམ་བྱའོ་སྨྲས་པས། ཆོས་ཀྱི་ངོ་བོ་བརྗོད་མེད་མཐའ་བྲལ་ལ་ཆོས་གཏམ་ག་ན་ཡོད་གསུངས། དེར་སྐྱོ་སྟོན་གྱིས་དྲིས་པ། འོ་ན་ཁྱེད་རྫོགས་པ་ཆེན་པོའི་ལུགས་ཀྱི་སྒོམ་གཙོ་བོར་བྱེད་པ་ལགས་སམ་བྱས་པས། ང་དམིགས་པ་གང་ལ་གཏད་འདུག་གསུངས། འོ་ན་མི་སྒོམ་པ་ལགས་སམ་བྱས་པས། ང་གང་ལ་ཡེངས་འདུག་གསུངས་པས་སྤོབས་པ་ལན་མེད་དུ་སོང་། ཡང་གླན་སྟོན་ཤཱཀ་བཟང་གིས་དྲིས་པས། ཁྱེད་གསང་བ་སྒྱུ་འཕྲུལ་བའི་ལུགས་ཀྱིས་སྣང་བ་ཐམས་ཅད་ལྷ་དང་ལྷ་མོར་འདོད་པ་ལགས་སམ་བྱས་པས། ཡུལ་བེམ་པོ་རང་རྒྱུད་དུ་སྣང་བའི་མངོན་སུམ་གྱི་ཚད་མ་སུས་འགོག་གསུངས། འོ་ན་མི་འདོད་པ་ཨེ་ཡིན་བྱས་པས། སེམས་ཅན་གྱི་མ་དག་པའི་འཁྲུལ་སྣང་རང་རྒྱུད་པ་སྦྱོང་ཕྱིར་མདོ་རྒྱུད་ཀྱི་དགོངས་པ་དང་འགལ་བར་སུས་ནུས་གསུངས་པས་ཁོང་བཞི་ཕམ་པར་མཛད། ཁོང་རྣམས་ཤིན་ཏུ་དད་དེ། ད་ལྟ་འདིར་བསྡད་ན་སློབ་དཔོན་མི་དགྱེས་པས། སང་ཕོད་ཐབས་བྱས་ནས་འོང་བར་དམ་བཅས། རྗེས་སུ་སློབ་མར་གྱུར་ཏེ་རྫོགས་ཆེན་གྱི་ཀ་བ་གུང་བུའི་སྐྱོ་སྟོན་ཤཱཀ་ཡེ། མདོའི་ཀ་བ་སྐྱོ་སྐྱེད་ལུང་གི་ཡང་ཁྱེད་བླ་མ། སྒྱུ་འཕྲུལ་གྱི་ཀ་བ་ཆུ་བར་གྱི་གླན་ཤཱཀྱ་བཟང་པོ། ཕྲིན་སྒྲུབ་ཀྱི་ཀ་བ་ནག་མོ་རིའི་མདའ་ཏིག་ཆོས་ཤཱཀ་གོ །ཡང་མ་ཐོག་བྱང་འབར་དང་བརྒྱུད་པ་ལྔ་ཞེས་ཀྱང་གྲགས། རྦ་དགེ་མཐོང་གིས་སློབ་མ་བློ་རྣོ་བ་ཞིག་རྩོད་དུ་བཏང་བ་དེས། ཀ་བ་ཆོས་ཅན་ཟེར་བ་དང་། ཁྱོད་འཇིག་རྟེན་རང་རྒྱུད་པའི་འཁྲུལ་ངོར་ཀ་བ་རང་རྒྱུད་དུ་སྣང་ཡང་། ང་རྫོགས་པ་ཆེན་པོ་རང་སྣང་རིས་མེད་ཀྱི་དོན་ལ་ཀ་བ་གྲུབ་པ་མི་གདའ་གསུངས་ནས་ཕྱག་ཡུག་ཡུག་མཛད་པས་ཀ་བ་ལ་ཆགས་ཐོགས་མེད་པར་སོང་བས་ཁོ་དད་ནས་སློབ་མར་བྱས་པ་མ་ཐོག་བྱང་འབར་རོ། །གདུང་མ་བརྒྱད་ནི། མ་ཐོག་པ། སྐྱོ་སྟོན་ཆོས་སེང་། གླན་ཤཱཀྱ་བྱང་ཆུབ། རྩག་ཤཱཀ་རངས། གནུབས་སྟོན་བག་མ། དབུས་པ་ས་འཐོར། ཤུ་སྟོན་ཟླ་གྲགས། རྩེ་སྟོན་བྱང་དཔལ་དང་བརྒྱད་དོ། །སྒོམ་ཆེན་མི་གཉིས་ནི། འབའ་སྒོམ་དིག་མ་དང་། བོན་སྒོམ་དོ་པའོ། །ཡུས་པོ་ཆེ་ནི། ལ་སྟོད་ཀྱི་ཟི་སྟོན་བསོ་རྒྱལ་ལོ། སྟ་གུ་ར་མི་གཉིས་ནི། ཞང་སྟོན་གྲགས་སེ་དང་། ཁྱུང་པོ་གྲགས་སེའོ། །ཕྱམ་དྲལ་ལ་སོགས་ཏེ་དཀྱུས་མའི་མིང་སྨོས་མ་འཚལ་ལོ། །གོ་མ་ཆོད་པ་མི་གསུམ་ནི། མགོ་ཕྱ་ཚ། མིག་ཆུང་དབང་སེང་། འགོས་ཆུང་དབང་ངེ་གསུམ་མོ། །མགོ་ཕྱ་ཚས་ཐབས་ལམ་གྱི་སྐབས་སུ་རྒྱབ་རྟེན་ཏུ་མ་རྒྱུད་དགོས་ཟེར་འགོས་ཁུག་པ་ལྷས་བཙས་ཀྱི་རྩར་དགྱེས་རྡོར་ཉན་དུ་སོང་བའི་ཚེ། ལམ་དུ་བཙུན་པ་གཉིས་དང་ཕྲད་ནས་ཇོ་བོ་བན་དེ་ལམ་ན་དགྲ་འདུག་གོ་ཟེར་བ་ལ། ལན་དུ། གཟུང་འཛིན་གྱི་འཕྲང་ལ་ཉོན་མོངས་ཀྱི་ཇག་པ་བཀྱེ་ནས། ཉན་ཐོས་ཀྱི་བྱིས་པ་བཙོན་དུ་བཟུང་བར་མཆིའོ། །བཙུན་པ་གཉིས་ན་རེ། བན་དེ་ཀུ་༼རང་༽མཐོང་ཅན་སྦོས་སུ་རེ་བ་ཅིག་འདུག་གོ་ཟེར་བས། ཡང་ལན་དུ། ཐེག་རྒྱལ་གྱི་ཁ་ནས་ལྟ་རྒྱལ་གྱི་རྦབ་འདྲིལ་ནས། ཉན་ཐོས་ཀྱི་གྲོང་ཁྱེར་བཅོམ་པར་མཆིའོ། །གསུངས། མིག་ཆུང་དབང་སེང་ན་རེ། སྒྱུ་འཕྲུལ་འདི་ལ་དཀྱིལ་འཁོར་ཕྱིར་འདོན་པའི་དུས་སུ་རྒྱབ་རྟེན་དུ་ཡོ་ག་དགོས་ཟེར་ནས་སུམ་པ་ཡེ་འབར་གྱི་རྩར་སོང་། འགོས་ཆུང་དབང་ངེས་སྒྱུ་འཕྲུལ་འདི་ལ་གཞི་ལམ་གྱི་གྲུབ་མཐའི་སྐབས་སུ་རྒྱབ་རྟེན་དུ་ཚད་མ་དགོས་ཟེར་སྤང་ཀ་དར་ཆུང་བའི་རྩར་ཚད་མ་ཉན་དུ་སོང་ངོ་། །དེ་དག་ནི་གསང་བ་སྙིང་པོ་ལ་ལམ་ཐབས་གྲོལ་གཉིས་ཀ་ཡོད་དེ་མ་རྒྱུད་ཀྱི་མཚན་ཉིད་མ་བྱེད། དཀྱིལ་འཁོར་རང་ས་ནས་ཐོན་པ་ལ་མིག་ལྟས་ཁུང་ནས་འཆུས། ཚད་མ་ཚིག་གི་གྲུབ་མཐའ་ཡིན་ཏེ་གཞི་ལམ་ཐོག་ཏུ་མི་ཕེབས་པ་མ་གོ །རྒྱུ་དེས་གོ་མ་ཆོད་མི་གསུམ་གྱིས་བཤད་གྲྭ་མ་འཁྱོངས་བས་སྐུ་མཚམས་ལས་ཐོན་དགོས་པ་བྱུང་། ལྷ་རྗེ་ཟུར་ཆུང་ནི། རྫུ་འཕྲུལ་ཤིན་ཏུ་ཆེ་བས་ཉི་ཟེར་ལ་བྱོན་བཞུད་མཛད་དེ། འུག་པ་ལུང་དུ་སྔ་ཆོས། སྒྲོ་ཕུག་ཏུ་གུང་ཆོས། བྲག་རྒྱ་བོར་དགོང་ཆོས་ཏེ་ཉི་མ་རེ་ལ་ཆོས་ཐུན་གསུམ་རེ་འཆད་པར་མཛད་པའོ། །འདི་ལ་ཇོ་མོ་སྔ་མ་བཙད་མོ་དར་མ་བོ་དྷི་ཁབ་ཏུ་བཞེས་པའི་སྲས་བཙད་ཚ་ལྕམ་དྲལ་གཉིས་འཁྲུངས་ཏེ། རྗེ་བཙུན་རྡོ་རྗེ་འབར་དང་། རྗེ་སྲས་མོ་ཤཱཀྱ་ལྕམ་སྟེ། རྡོ་རྗེ་འབར་གྱི་སྲས་བཙད་ཚ་ཤཱཀ་རྡོར། དེ་ལས་བརྒྱུད་པའི་སྲས་བརྒྱུད་ཀྱང་ཡོད་དོ། །དེ་ལ་བོད་འདིར་དཔལ་གསང་བའི་སྙིང་པོའི་བཤད་པའི་ཆུ་མགོ་ལྟ་བུར་གྱུར་པ་གསང་བདག་སྒྲོ་ཕུག་པ་ཆེན་པོའམ། ཟུར་ཤཱཀྱ་སེང་གེ་ནི། ལྷ་རྗེ་ཟུར་ཆུང་བ་དེ་སྐུ་མྱ་ངན་ལས་འདའ་བར་ཉེ་བའི་ཚེ་བུ་སློབ་རྣམས་ཀྱིས་རིགས་སྲས་བསྐྲུན་པར་གསོལ་བ་བཏབ་པས་གསང་བདག་ལག་ན་རྡོ་རྗེ་དེ་ཉིད་ཀ་བ་བཞིའི་གྲས་མདའ་ཏིག་ཆོས་ཤཱཀ་ཀྱི་སྲིང་མོ་མདའ་མོ་གཙུག་ཏོར་ལྕམ་ཞེས་བྱ་བ་སློབ་མར་གྱུར་པ་ཞིག་ཡོད་པ་དེས་མངལ་དུ་སྤྱན་དྲངས་པས་ཤིང་ཕོ་སྟག་གི་ལོར་སྐུ་བལྟམས། མཚན་ཤཱཀྱ་སེང་གེར་བཏགས། ཟླ་བ་བརྒྱད་ན་ཡབ་གཤེགས། ཡུམ་དང་ཞང་པོས་བསྐྱངས། ལོ་བཅོ་ལྔ་ནས་རིམ་བཞིན་བླ་མ་མང་པོ་དང་ཁྱད་པར་ཀ་བ་བཞི་སོགས་དང་། གཞན་ཡང་དམ་པ་སངས་རྒྱས་དིང་རི་ན་བཞུགས་པའི་དྲུང་དུ་ཕེབས། ཆོས་ཀྱི་བདུད་རྩིའང་ནོད། དམ་པའི་ཞལ་ནས་སྒྲོ་ཕུག་པ་ལ་འདི་བསྟན་པའི་སྤྱི་དཔལ་ཆེན་པོར་འགྱུར་ཞེས་དབུགས་འབྱིན་མཛད། སྒྲོ་ཕུག་པའི་སྲས་ཇོ་བཙུན་རྡོ་རྗེ་གྲགས། སྲས་མོ་རྡོ་རྗེ་ལྕམ་མོ། །རྡོ་རྗེ་གྲགས་པ་ལ་སྲས་ལྔ། རྣལ་འབྱོར། རྒྱལ་ཚབ། ཅུང་ངེ་སོགས་སོ། །ལྷ་རྗེ་རྣལ་འབྱོར་ལ་སྲས་གཉིས། རྒྱལ་ཚབ་ཀྱི་སྲས་ཇོ་བཙུན་ཀུན་དགའ་སྙིང་པོའོ། །ཞེས་དེབ་ཐེར་སྔོན་པོ་ལས་གསུངས། དེ་ལ་གདུགས་ཐོགས་ཀྱི་སློབ་མ་གྲྭ་ས་འཛིན་པ་སྟོང་དང་། དེའི་ནང་ནས་ཀྱང་ཐུགས་ཟིན་གྱི་སློབ་མ་བཅུ་གཉིས་བྱུང་སྟེ། ནག་པོ་བཞི། སྟོན་པ་བཞི། མེས་པོ་བཞི་ལས། ནག་པོ་བཞི་ནི། ལྕེ་སྟོན་རྒྱ་ནགཟུར་ནག་འཁོར་ལོ། ཉང་ནག་མདོ་བོ། མདའ་ནག་གཙུག་ཏོར་དབང་ཕྱུག་གོ །སྟོན་པ་བཞི་ནི། ཉེ་སྟོན་ཆོས་སེང་། གྱབས་སྟོན་རྡོ་རྗེ་མགོན་ཐ། ཞང་སྟོན། རྒྱ་སྟོན་དང་བཞིའོ། །མེས་པོ་བཞི་ནི། རྩངས་པ་བྱི་སྟོན། གཡུང་སྟོན་ཧོར་ནི། སྤང་སྟོན་ལྕགས་ཀྱུ། དབུས་པ་ཆོས་སེང་ངོ་། །འདྲེན་ཚུལ་འདི་ཟུར་སྟོད་ལུགས་སུ་གྲགས་ལ། སྨད་ལུགས་སུ་དེ་ལས་ཐ་དད་པའང་ཡོད། འགོས་ལོ་གཞོན་ནུ་དཔལ་གྱི་དེབ་ཐེར་སྔོན་པོ་ལས། སྒྲོ་ཕུག་པའི་སློབ་མ་གཙང་པ་བྱི་སྟོན་དང་། སྒང་དྲི་རས་པ་ཉེ་སྟོན་ཆོས་ཀྱི་སེང་གེ་གཉིས་ཀྱིས་གཙང་ནག་འོད་འབར་ལ་གསུངས། དེས་མེས་སྟོན་མགོན་པོ། དེས་སྲོ་ཤེས་རབ་ཚུལ་ཁྲིམས། དེ་ལ་པཀྴི་ཤཱཀ་འོད་དང་། རྟ་ནག་བདུད་འདུལ་གྱིས་གསན། པཀྴི་ཤཱཀ་འོད་འདི་ཟུར་བའི་གདུང་རྒྱུད་ཡིན་ཏེ། ཟུར་དབང་ཆེན་འོད་པོ་ལ་སྲས་གཉིས་འཁྲུངས་པའི་ཆུང་བ་ལ་ཤཱཀྱ་འོད་དུ་མཚན་གསོལ། གྲུབ་པའི་ས་མཐོར་གཤེགས་ནས་ཧོར་སེ་ཆེན་རྒྱལ་པོ་ལ་ཚེ་ཆུ་ཕུལ་ནས་དགུང་ལོ་བརྒྱ་ཐུབ་པ་བྱུང་བ་སོགས་སོ། །རྟ་ནག་ནས་མདའ་ཤཱཀྱ་འཕེལ། དེའི་སློབ་མ་ཟུར་བྱམས་པ་སེང་གེ། དེ་ལ་གཡུང་སྟོན་རྡོ་རྗེ་དཔལ་དང་། རྟ་ནག་བསམ་འགྲུབ་རྡོ་རྗེ་གཉིས་ཀྱིས་གསན། ཟུར་བྱམས་པ་སེང་གེ་ནི། ཡབ་ཟུར་ཉི་མ་སེང་གེ་ཞེས་བྱ་སྟེ་མེས་པོ་པཀྴིའི་སྲས་ཡིན། ཁྲོ་ཕུ་ལས་རབ་ཏུ་བྱུང་། མཚན་ཡང་དེ་ལྟར་ཐོགས། དགུང་ལོ་བཅོ་ལྔ་ལ་འུག་བྱ་ལུང་དུ་མདའ་ཤཱཀྱ་འཕེལ་ལས་གསང་སྙིང་གསན་སྦྱང་མཛད་པས་མཁས་པའི་དབང་པོར་གྱུར། དེ་ལ་སློབ་མའི་ཚོགས་བསམ་གྱིས་མི་ཁྱབ་ཅིང་། གཞན་དོན་རྒྱ་ཆེར་སྤྱོད་པ་བཅུ་དྲུག་ཙམ་ཡོད་པ་ལས། གཙོ་བོར་གྱུར་པའི་སྲས་ཀྱི་ཐུ་བོ་གཡུང་སྟོན་རྡོ་རྗེ་དཔལ་དང་། རྟ་ནག་སྒྲོལ་མ་བ་བསམ་འགྲུབ་རྡོ་རྗེའོ། །དེ་ལ་གཡུང་སྟོན་རྡོ་རྗེ་དཔལ་ནི་གདུང་རུས་གླན། འཁྲུངས་ས་ནི་ཚོང་འདུས་པ་ཡིན། དེའི་སློབ་དཔོན་ནི་ཀརྨ་པ་རང་བྱུང་རྡོ་རྗེ། ཟུར་བྱམས་པ་སེང་གེའོ། །རྟ་ནག་སྒྲོལ་མ་བ་བསམ་འགྲུབ་རྡོ་རྗེ་ནི། ཤིང་མོ་ལུག་གི་ལོ་ལ་རྟ་ནག་གནས་གསར་དུ་ལང་གྲོ་དཀོན་མཆོག་འབྱུང་གནས་ཀྱི་གདུང་བརྒྱུད་ལ་འཁྲུངས། སློབ་དཔོན་ནི་ཟུར་བྱམས་པ་སེང་གེ་དང་། གླན་ཉ་ཚལ་པ་བསོད་ནམས་མགོན་པོའོ། །ཁོང་གཤེགས་ཁར་རང་གི་སྲས་ལ། ང་ནི་བདེ་བ་ཅན་དུ་འགྲོ། ཉིད་ཀྱིས་ཀྱང་བརྒྱད་ཅུ་རྩ་གཉིས་ཐུབ་པར་འདུག་སྟེ། དེ་ནས་བདེ་བ་ཅན་དུ་ཤོག་གསུངས། དེ་ལ་ཟུར་བརྒྱུད་དང་སྲས་བརྒྱུད་གཉིས་ལས། ཟུར་བརྒྱུད་ནི། ཟུར་བཟང་པོ་དཔལ་གྱི་སྲས་ཟུར་ཧམ་ཤཱཀྱ་འབྱུང་གནས་སོགས་སོ། །ཕྱིས་ཀྱི་ཟུར་བའི་བརྒྱུད་པ་ལ་ཤིན་ཏུ་བཀའ་དྲིན་ཆེ། སྲས་བརྒྱུད་ནི་སྲས་སྒྲོལ་ཆེན་སངས་རྒྱས་རིན་ཆེན་དཔལ་བཟང་པོ་ནི། ལྕགས་ཕོ་སྟག་ལ་རྟ་ནག་གནས་གསར་དུ་འཁྲུངས། ཟུར་ཤཱཀྱ་འབྱུང་གནས་ཀྱི་སྤྱན་སྔར་བྱོན། ངའི་བླ་མའི་སྲས་ཞེས་གཅེས་པར་བསྐྱངས། ཡབ་ལས་སྒྱུ་འཕྲུལ་གྱི་ཆོས་སྐོར་རྣམས་ཐུགས་སུ་ཆུད་པར་མཛད། དགུང་ལོ་བདུན་ཅུ་པ་ལ་འགོས་ལོ་ཡེ་བཟང་བརྩེ་བས་རྗེས་སུ་བཟུང་ནས་དབང་ཁྲིད་མང་དུ་མཛད་པའོ། །བརྒྱད་ཅུ་རྩ་གཉིས་པ་ལྕགས་མོ་ཕག་གི་ལོ་ལ་གཙང་དུ་སྐུ་གཤེགས། ཟུར་ཆུང་བ་འཁྲུངས་ནས་དུས་འདི་ཡན་ཆད་ལ་ལོ་བཞི་བརྒྱ་དང་བཅུ་བདུན་ནོ། ། དེའི་སློབ་མ་འགོས་ལོ་ཙཱ་བ་གཞོན་ནུ་དཔལ་ནི་ཡབ་འགོས་སྟོན་འབྱུང་གནས་རྡོ་རྗེ་དང་། ཡུམ་སྲིད་ཐར་སྐྱིད་གཉིས་ཀྱི་སྲས་སུ་ཆུ་སྤྲེལ་ལ་འཁྲུངས། དེ་ནས་རབ་ཏུ་བྱུང་། སྒྲོལ་ཆེན་སངས་རྒྱས་རིན་ཆེན་ལས་སྒྱུ་འཕྲུལ་ཞི་ཁྲོའི་དབང་སོགས་སྔ་འགྱུར་རྒྱུད་སྡེའི་དབང་བཀའ་ཐམས་ཅད་གསན། གསང་བ་སྙིང་པོའི་རྒྱུད་སོགས་ལུང་དང་མན་ངག་བསམ་གྱིས་མི་ཁྱབ་པ་གསན་ཅིང་སྔ་འགྱུར་གྱི་བསྟན་པའི་བདག་པོར་གྱུར་པའོ། ། ཞྭ་དམར་བཞི་པ་སྤྱན་སྔ་ཆོས་ཀྱི་གྲགས་པ་ཡེ་ཤེས་དཔལ་བཟང་པོ་ནི། ཏྲེ་ཤོད་ཁང་དམར་དུ་ཡབ་ལྡོང་དགོན་པ་སྐྱབས་དང་། ཡུམ་བྲ་བཟའ་བསོད་ནམས་སྒྲོལ་མའི་སྲས་སུ་འཁྲུངས། བདུན་པ་ཆོས་གྲགས་རྒྱ་མཚོ་ལས་རབ་ཏུ་བྱུང་། མཚན་ཆོས་ཀྱི་གྲགས་པ་གསོལ། དགུང་ལོ་ཉེར་བཞི་པ་ལ་འགོས་ལོ་ཆེན་པོ་ལས་བསྙེན་པར་རྫོགས། སྒྱུ་འཕྲུལ་གསང་བ་སྙིང་པོ་སོགས་གསན་པ་མཐའ་ཡས་པ་མཛད། སློབ་དཔོན་པདྨས་ཞལ་གཟིགས་ཤིང་གདམས་པའང་བསྩལ། འབྲི་གུང་རིན་ཆེན་ཕུན་ཚོགས་ནི། དགུང་ལོ་བརྒྱད་ཀྱི་སྟེང་དུ་ཞྭ་དམར་བཞི་པ་སྤྱན་སྔ་རིན་པོ་ཆེའམ་ཆོས་ཀྱི་གྲགས་པ་ལས་རབ་ཏུ་བྱུང་། མཚན་རིན་ཆེན་ཕུན་ཚོགས་ཆོས་ཀྱི་རྒྱལ་པོར་གསོལ། མདོ་སྔགས་ལ་གསན་པ་ཕུལ་དུ་ཕྱིན། ནུབ་གཅིག་མནལ་ལམ་ན་རྫིང་བུ་མེ་ཏོག་གིས་བཀྲ་བར། སྔགས་པ་སྐྲའི་རྩེ་མོ་ལ་སྤྱན་རས་གཟིགས། རྐེད་པ་ཐམས་ཅད་རྟ་མགྲིན། རྩ་བ་རྡོ་རྗེ་ཕག་མོའི་རྣམ་པར་འདུག་པ་ཞིག་ཁྲུས་བྱེད་པར་གཟིགས་ནས་དེ་ལ་ངོ་མཚར་སྐྱེས་ཙ་ན། མཁའ་འགྲོ་མཛེས་མ་ཞིག་གིས་འདིའི་སྐྲ་དང་ཁྱོད་ཀྱི་སྐྲ་མཚུངས་པ་ཡིན། ཁྱོད་ཀྱི་སྐྲ་བྲེག་པས་ལྷ་ཚོགས་འདི་རྣམས་སྤངས་པའི་ཉེས་པ་བྱུང་ཞིང་འབྱུང་འཁྲུགས་ཀྱི་ནད་བྱུང་། མིང་དང་ལུས་ཀྱང་དཀར་ཆོས་སུ་བསྒྱུར་ན་རྟེན་འབྲེལ་ཐམས་ཅད་ང་རང་གིས་ཤེས་གསུངས། དེ་བཞིན་དུ་མཛད་པས་སྐུ་ཚེ་ཡུན་རིང་དུ་བཞུགས་པའི་རྟེན་འབྲེལ་བྱུང་། ཏི་སྒྲོའི་ཚོགས་ཁང་ཆེན་མོ་ནས་དུང་ཤོག་དཀར་པོ་དང་། གསེར་ཤོག་སེར་པོ། མཆོང་ཤོག་སྨུག་པོ། གཡུ་ཤོག་ལྗང་སྐྱ། ལྕགས་ཤོག་ནག་པོ་རྣམས་སྤྱན་དྲངས། ཚེས་བཅུ་ལ་ཟངས་མདོག་དཔལ་རིར་ཕེབ། སློབ་དཔོན་རིན་པོ་ཆེ་དང་ཁྲི་སྲོང་ལྡེའུ་བཙན་སོགས་མཇལ། སྤྱིར་གསར་རྙིང་བཀའ་གཏེར་གྱི་བདག་པོར་གྱུར། ཁྱད་པར་མདོ་སྒྱུ་སེམས་གསུམ་གྱི་བཤད་སྲོལ་ཐུན་མོང་མ་ཡིན་པ་བཙུགས། མཁའ་འགྲོ་སྙིང་ཏིག་ལ་ཁྲིད་ཡིག་ཀྱང་མཛད་པ་སོགས་བསམ་གྱིས་མི་ཁྱབ་པའོ། །དེས་རང་གྲོལ་ཉི་ཟླ་སངས་རྒྱས་ལ་སྒྱུ་འཕྲུལ་སྐོར་རྣམས་གསུངས། དེས་འཁོན་རིགས་ཚེ་དབང་ནོར་རྒྱས་ལ་བཤད། འཁོན་སྟོན་དཔལ་འབྱོར་ལྷུན་གྲུབ་ནི། ཡབ་འཁོན་རིགས་ཚེ་དབང་ནོར་རྒྱས་དང་། ཡུམ་རྒྱལ་མོ་འཛོམ་གྱི་སྲས་སུ་ལྕགས་བྱ་ལོར་འཁྲུངས། དགུང་ལོ་བཅུ་ལ་རབ་ཏུ་བྱུང་། ཡབ་ལས་གཡུང་འགྲེལ་དང་ཕྱོགས་བཅུའི་མུན་སེལ་སོགས་གསན་སྦྱངས་མཛད། དགུང་ལོ་བཅོ་བརྒྱད་པར་ཉི་ཟླ་སངས་རྒྱས་ལས་རྫོགས་ཆེན་དང་གཞན་ཡང་བཀའ་གཏེར་མང་པོ་དང་། ཁྱད་པར་ཐེག་མཆོག་རིན་པོ་ཆེའི་མཛོད་ལ་བཤད་ལུང་སོགས་གསན་སྦྱངས་མཐར་ཕྱིན་མཛད་པ་དང་། དགུང་ལོ་སོ་བཞི་པར་བསྙེན་པར་རྫོགས། མཚན་དཔལ་འབྱོར་ལྷུན་གྲུབ་ཏུ་གསོལ། རྒྱལ་དབང་ལྔ་པ་ཆེན་པོས་ཀྱང་གསར་རྙིང་གི་དབང་ལུང་ཁྲིད་མན་ངག་གི་སྐོར་མཐའ་ཡས་པ་གསན་པའོ། །ཕྱིས་འདུ་འཛི་སྤངས་ནས་ཕ་ཝང་ཁའི་ནགས་ཁྲོད་དུ་སྒྲུབ་པ་ཁོ་ནར་མཛད་དོ། །ཟུར་ཆེན་བཀྲ་ཤིས་ཀུན་དགའ་འམ་ཆོས་དབྱིངས་རང་གྲོལ་ནི། ཟུར་གྱི་བརྒྱུད་པའི་གདུང་རབས་མ་ཆད་པ་ལས། ཡབ་ཟུར་ཆེན་པོ་གཞོན་ནུ་དོན་འགྲུབ་དང་། ཡུམ་མཁའ་འགྲོའི་རིགས་ལས་མཚན་ཉིད་ཡིད་འཛིན་གཉིས་ཀྱི་སྲས་སུ་ཤིང་འབྲུག་གི་ལོར་འཁྲུངས། དགུང་ལོ་བཅུ་གཉིས་པར་སྣང་གསལ་རིན་པོ་ཆེ་ངག་དབང་ཡེ་ཤེས་གྲུབ་པ་ལས། ཀར་གླིང་ཞི་ཁྲོ་དགོངས་པ་རང་གྲོལ་སོགས་ཀྱི་དབང་ལུང་མང་པོ་དང་ཉམས་ཁྲིད་གནང་། མཚན་ཆོས་དབྱིངས་རང་གྲོལ་དུ་གསོལ། དགུང་ལོ་བཅུ་བདུན་པ་ལ་རྡོ་རྗེ་འཆང་འཁོན་སྟོན་ཕ་ཝང་ཁ་དཔལ་འབྱོར་ལྷུན་གྲུབ་ལས། དཔལ་གསང་བ་སྙིང་པོའི་རྒྱུད་དང་། འགྲེལ་བ་སྤར་ཁབ། བོད་འགྲེལ་གཡུང་ཊཱིཀ་རྣམས་སྦྱར་བའི་གསུང་བཤད་མཛད་པ་སོགས་བཀའ་གཏེར་གྱི་ཆོས་ཚུལ་རྒྱ་མཚོ་ལྟ་བུ་བུམ་པ་གང་བྱོའི་ཚུལ་གྱིས་གནང་། སྐུ་ཚེའི་མཐར་གུང་ཐང་དུ་བཞུགས། དར་ལྡིང་རིག་འཛིན་ཆེན་པོ་ཕྲིན་ལས་ལྷུན་གྲུབ་ལ་སྙིང་པོའི་རྒྱུད་ཀྱི་བཤད་པ་སོགས་གནང་། ཐུགས་སྲས་རྒྱལ་མཆོག་ལྔ་པ་ཆེན་པོ་ལ་ཞི་རྒྱས་དབང་དྲག་གི་ཕྲིན་ལས་རབ་འབྱམས་ཀྱི་ལུང་དང་མན་ངག་གནང་། ཟུར་ཆེན་ཆོས་དབྱིངས་རང་གྲོལ་ཞིང་ཁམས་གཞན་དུ་གཤེགས་པའི་ཚེ་ཡང་རྒྱལ་མཆོག་ལ་ཡེ་ཤེས་ཀྱི་སྐུས་རྗེས་སུ་བཟུང་ཚུལ་རྒྱལ་དབང་ལྔ་པའི་རྣམ་ཐར་ལས། ལེགས་བྱས་འདིའི་མཐུས་སོགས་གསུངས་པ་བཞིན་ནོ། །སྨིན་གླིང་ཡབ་སྲས་ཀྱི་རིགས་ནི་འོད་གསལ་ལྷ་ལས་ཆད་པ་ཞིག་ཡིན་ཏེ། བོད་ཡུལ་གྱི་ས་ཆ་ཁ་རག་ཏུ་སྔོན་ཆད་མཐོང་མ་མྱོང་བའི་སྐྱེས་བུ་གཟུགས་བཟང་ཞིང་མཛེས་པ་ཞིག་སྣང་བས་དེར་མི་རྣམས་ཡ་མཚན་དུ་གྱུར། དེའི་ཚེ་མིའི་གྲིབ་ཀྱིས་ལྷའི་བུ་མྱོས་པར་གྱུར་པས་ན། མྱོས་ཞེས་པའི་རིགས་རྒྱུད་དུ་གྲགས་པ་ལས་རིམ་པར་བྱོན་པའི། གནུབས་ཆེན་སངས་རྒྱས་ཡེ་ཤེས་ཀྱི་སྤྲུལ་པ་རིག་འཛིན་ཕྲིན་ལས་ལྷུན་གྲུབ་ནི། ཡབ་མྱོས་སྟོན་མཁས་གྲུབ་མདོ་སྔགས་བསྟན་འཛིན་དང་། ཡུམ་རྒྱལ་རིགས་དགོས་འཛོམ་མའི་སྲས་སུ་ལྕགས་མོ་ཕག་གི་ལོ་ལ་འཁྲུངས། ལྕགས་སྦྲུལ་ཧོར་ཟླ་ལྔ་པའི་ཉེར་ལྔའི་སྲོད་ལ་མཁའ་འགྲོ་བདེ་ཆེན་རྒྱལ་མོ། ཤིང་ཕོ་སྤྲེལ་ལོ་སྤྲེལ་ཟླའི་སྲོད་ལ་སློབ་དཔོན་པདྨ་འབྱུང་གནས་མཇལ་བ་དང་། ཡབ་རྗེ་ཉིད་ལས་བཀའ་གཏེར་དུ་མའི་དབང་ཁྲིད་སོགས་གསན། ཟུར་ཆེན་ཆོས་དབྱིངས་རང་གྲོལ་ལ་གསང་བ་སྙིང་པོའི་བཤད་རྒྱུད་སྤར་ཁབ་དང་གཡུང་ཊཱིཀ་གཉིས་ཀྱི་སྟེང་ནས་གསན་པ་ལ་སོགས་པའོ། །དེ་ནས་མི་རིང་བར་ཡབ་རྗེ་ཉིད་དར་རྒྱས་ཆོས་སྡིངས་སུ་ཞི་བར་གཤེགས། ཡབ་རྗེ་གཙོ་བོར་གྱུར་པའི་བཤེས་གཉེན་དམ་པ་བཅུ་ཕྲག་གསུམ་ལྷག་ལ་མདོ་སྔགས་ཀྱི་ཆོས་ཚུལ་བསམ་གྱིས་མི་ཁྱབ་པ་གསན། རང་གི་སྲས་གཏེར་ཆེན་ལ་ཟབ་རྒྱས་ཀྱི་ཆོས་ཐམས་ཅད་ཚང་སྤྲུགས་སུ་བསྩལ་ཏེ་རྒྱལ་ཚབ་ཏུ་མངའ་དབང་བསྐུར། དབུས་གཙང་ལྷོ་མོན་སོགས་གདུལ་བྱའི་ཞིང་རྣམས་སུ་གཞན་ཕན་གྱི་ཕྲིན་ལས་གཡེལ་བ་མི་མངའ་བའི་ངང་དགུང་ལོ་ལྔ་བཅུ་རྩ་གཉིས་པར་ཆུ་སྟག་ལ་ངོ་མཚར་བའི་ལྟས་དང་བཅས་སྐུ་གཤེགས། གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པ་ནི། ཡབ་མྱོས་སྟོན་གསང་བདག་ཆེན་པོ་རིག་འཛིན་ཕྲིན་ལས་ལྷུན་གྲུབ་དང་། ཡུམ་ནི་བོད་ཆོས་རྒྱལ་གྱི་གདུང་རྒྱུད་ལས་བྱོན་པའི་དོན་འགྲུབ་དབང་རྒྱལ་གྱི་སྲས་མོ་ལྷ་འཛིན་དབྱངས་ཅན་སྒྲོལ་མ་སྟེ། ཡབ་ཡུམ་དེ་གཉིས་ཀྱི་སྲས་སུ་མེ་ཁྱི་ཧོར་ཟླ་གཉིས་པའི་ཡར་ངོའི་ཚེས་བཅུར་ངོ་མཚར་གྱི་ལྟས་ཆེན་པོ་དང་བཅས་ཏེ་འཁྲུངས། དགུང་ལོ་བཅུ་གཅིག་པར་ཀུན་མཁྱེན་རྒྱལ་བ་ལྔ་བའི་དྲུང་དུ་གཙུག་ཕུད་ཕུལ། མཚན་ངག་དབང་པདྨ་བསྟན་འཛིན་དུ་བསྩལ། དེ་ནས་རིམ་བཞིན་སྨིན་གྲོལ་ལམ་བཟང་སྟོན་པའི་བསྟན་འཛིན་ཆེན་པོ་བཅུ་དྲུག་དང་། ཟབ་ཆོས་སྣ་ཚོགས་གསན་པའི་ཡོངས་འཛིན་སོ་ལྔ་རྣམས་གུས་པས་བསྟེན། དགུང་ལོ་བཅུ་དྲུག་ནས་དྲུག་ཅུ་རེ་དགུའི་བར་ཆོས་ཀྱི་ཕྲིན་ལས་བསྐྱངས། མཐར་ཤིང་རྟ་ཧོར་ཟླ་དང་པོ་ནས་བསྙུན་ཚུལ་བསྟན་ཏེ། ཤར་ཕྱོགས་སུ་གོམས་པ་བདུན་འགྲོ་དགོས་ཡོད་གསུངས་ཏེ་ཞབས་གོམས་པ་བདུན་སྤོས་ནས་སྐྱིལ་ཀྲུང་གིས་བཞུགས་ཏེ། སྣང་གྲགས་རིག་གསུམ་ལྷ་སྔགས་ཆོས་སྐུའི་ངང་། །སྐུ་དང་ཡེ་ཤེས་རོལ་པར་འབྱམས་ཀླས་པའི། །ཟབ་གསང་རྣལ་འབྱོར་ཆེན་པོའི་ཉམས་ལེན་ལ། །དབྱེར་མེད་ཐུགས་ཀྱི་ཐིག་ལེར་རོ་གཅིག་ཤོག །ཅེས་འདའ་ཁ་ཞལ་ཆེམས་ཀྱི་ཚུལ་དུ་གསུངས་ཏེ། ཧོར་ཟླ་གཉིས་པའི་ཚེས་གཉིས་ཀྱི་ཉི་དྲོས་ལ་མཁའ་འགྲོའི་བསུ་བ་བྱུང་ངོ་གསུངས་ཏེ། ཕྱག་གཉིས་ཌ་དྲིལ་འཁྲོལ་བའི་ཚུལ་དང་སྤྱན་ལྟ་སྟངས་དང་བཅས་སྐད་ཅིག་ལ་མཁའ་སྤྱོད་དུ་གཤེགས་སོ། །བུ་སློབ་ནི་གཏེར་ལུང་ལས། དམ་ལྡན་ཆོས་བདག་སློབ་བུ་ནི༔ད་ལྟའི་མངའ་བདག་ཡབ་སྲས་སོགས༔ས་ཐོབ་རྗེ་འབངས་སྐྱེ་བའི་མཐའ༔འགྲོ་དོན་ནུས་པ་སུམ་ཅུ་ལྔ༔རང་དོན་ཐུབ་པ་བརྒྱད་ཅུ་བརྒྱད༔ཆོས་ཀྱིས་འབྲེལ་བ་སྟོང་ཚོ་གཉིས༔སྨོན་ལམ་འབྲེལ་བ་ཁྲི་ཕྲག་ལྔ༔ལས་ཀྱིས་འབྲེལ་བ་དྲུག་ཅུ་བདུན༔གདུགས་ཐོགས་བདུན་གྱིས་ཞབས་ནས་འདེགས༔མི་ཆེན་གསུམ་གྱིས་མངའ་ཐང་སྤེལ༔ཞེས་གསུངས་པ་ལྟར། རྒྱལ་བ་ལྔ་པ་ཆེན་པོ་དང་། མི་དབང་སངས་རྒྱས་རྒྱ་མཚོ་སོགས་སྡེ་སྲིད་སྔ་ཕྱི་དང་མཆོད་ཡོན་ཉི་ཟླ་ཟུང་དུ་འབྲེལ། ས་སྐྱ་བ་བདག་ཆེན་ཀུན་དགའ་བཀྲ་ཤིས། ཆབ་མདོ་རྒྱལ་བ་འཕགས་པ་ལྷ་སོགས་དང་། འདུལ་མངོན་ཕར་ཚད་དབུ་མ་སྡོམ་གསུམ་གསང་བདག་དགོངས་རྒྱན་སྟེ། གཞུང་ཚོགས་དེ་རྣམས་རིགས་ལམ་ནས་དྲངས་པའི་བཤད་སྦྱང་མཛད་པའི་རབ་འབྱམས་པ་ཨོ་རྒྱན་ཆོས་གྲགས་སོགས་བདུན་དང་། ཁྱད་པར་རྒྱུད་ལུང་མན་ངག་རིག་གནས་དང་བཅས་པ་བུམ་པ་གང་བྱོའི་ཚུལ་དུ་རྫོགས་པར་གནང་ནས་རྒྱལ་ཚབ་ཏུ་མངའ་གསོལ་བ་ནི། རྒྱལ་སྲས་བསྟན་པའི་ཉི་མ། ལོ་ཆེན་ཆོས་དཔལ་རྒྱ་མཚོ་སྐུ་མཆེད་གཉིས་དང་། སྐུ་སྲས་པདྨ་འགྱུར་མེད་རྒྱ་མཚོ། ཡིད་བཞིན་ལེགས་གྲུབ། རིན་ཆེན་རྣམ་རྒྱལ་རྣམས་སོ། ། རྒྱལ་སྲས་བསྟན་པའི་ཉི་མ་ནི། ས་བྱི་ལོར་འཁྲུངས། དགུང་ལོ་ཉེར་བདུན་ཐོག་གཤེགས། དེའི་གཅུང་ལོ་ཆེན་ཆོས་དཔལ་རྒྱ་མཚོ་ནི། མྱོས་སྟོན་ཆེན་པོ་ཕྲིན་ལས་ལྷུན་གྲུབ་ཀྱི་སྲས་སུ་མེ་ཕོ་རྟའི་ལོ་ལ་འཁྲུངས། བཅུ་གསུམ་པར་གཏེར་ཆེན་ཆོས་ཀྱི་རྒྱལ་པོའི་དྲུང་དུ་གཙུག་ཕུད་ཕུལ་བས་མཚན་བསྟན་འཛིན་འཇམ་དབྱངས་དབང་པོར་གསོལ། བཅོ་ལྔ་པར་རྒྱལ་དབང་ལྔ་པ་རིན་པོ་ཆེ་ལས་རབ་ཏུ་བྱུང་ཞིང་ཉི་ཤུ་པར་བསྙེན་པར་རྫོགས། གཞན་ཡང་གཅེན་རྒྱལ་སྲས་བསྟན་པའི་ཉི་མ་སོགས་ཡོངས་འཛིན་དམ་པ་བཅུ་ཕྲག་གཉིས་ལྷག་བསྟེན་ནས། བསྟན་བཅོས་མང་དུ་མཛད། གཏེར་ཆེན་བླ་མའི་ཕྲིན་ལས་ཀྱི་རྒྱུན་བསྐྱངས་བས་བཤད་སྒྲུབ་བསྟན་པའི་གསལ་བྱེད་གཅིག་པུར་གྱུར་ནས་མཐར་དགུང་ལོ་རེ་ལྔ་པ་ས་ཁྱི་ཧོར་ཟླ་བཅུ་གཉིས་པའི་ཉེར་བཞི་ལ་གཤེགས། པདྨ་འགྱུར་མེད་རྒྱ་མཚོ་ནི། ཡབ་གཏེར་ཆེན་ཉིད་དང་ཡུམ་རྗེ་རིགས་མཁའ་འགྲོའི་རྟགས་ཀྱིས་སྤྲས་པའི་ཡོན་ཏན་སྒྲོལ་མ་ཞེས་པའི་སྲས་སུ་མེ་སྟག་ལོར་འཁྲུངས། ཡབ་ཀྱི་ཞལ་ཆེམས་སུ། ཆོས་ཆར་ཕ་ལས་བུ་ལྷག་ཅེས་གསུངས་པ་ལྟར་ཆོས་ཀྱི་ཕྲིན་ལས་བསྐྱངས་པའི་མཐར་དགུང་ལོ་སོ་གསུམ་པ་ས་ཁྱིའི་ལོར་ལོག་སྨོན་ཅན་རྣམས་ཀྱི་དབང་དུ་སོང་ནས་ཧོར་ཟླ་དང་པོའི་ཉེར་དྲུག་ལ་གཤེགས། ཡིད་བཞིན་ལེགས་གྲུབ་ནི། ཡབ་གཏེར་ཆེན་བླ་མ་དང་། ཡུམ་ས་ཧོ་རའི་རྒྱལ་པོ་གཙུག་ལག་འཛིན་གྱི་དབོན་རྒྱུད་ལས་བྱུང་བའི་སྲས་མོ་ཕུན་ཚོགས་དཔལ་འཛོམ་ལས་ས་མོ་ལུག་ལོ་འཁྲུངས། མཁས་བཙུན་བཟང་པོའི་ཡོན་ཏན་དང་ལྡན་ཀྱང་ལོག་སྨོན་ཅན་དེ་རྣམས་ཀྱི་དབང་དུ་སོང་། རིན་ཆེན་རྣམ་རྒྱལ་ནི་ཤིང་ཁྱིར་སྐུ་བལྟམས། སྡིག་ཅན་གྱིས་བརྫི་བར་མ་ནུས་ཏེ་ཁམས་ཕྱོགས་སུ་བྱོན། ཕྱིས་གདན་སར་ཕེབས་ཏེ། རྒྱལ་མཆོག་སྐལ་བཟང་རྒྱ་མཚོས་རྗེ་གཏེར་ཆེན་བླ་མའི་ཆོས་ཁྲིར་མངའ་གསོལ། ཆོས་ཀྱི་ཕྲིན་ལས་རྒྱ་ཆེར་བསྐྱངས་ནས་མཐར་དགུང་ལོ་དྲུག་ཅུ་རྩ་ལྔ་པ་ས་ཕོ་སྟག་གི་ལོར་གཤེགས། མི་འགྱུར་དཔལ་གྱི་སྒྲོལ་མ་ནི། ཡབ་གཏེར་ཆེན་བླ་མ་དང་། ཡུམ་ཕུན་ཚོགས་དཔལ་འཛོམ་གཉིས་ཀྱི་སྲས་མོར་མྱོས་ལྡན་ས་ཡོས་ལོར་འཁྲུངས། ལོག་སྨོན་རྣམས་ཀྱིས་བརྫི་བར་མ་ནུས་པར་སྦས་ཡུལ་འབྲས་མོ་ལྗོངས་སུ་ཕེབས། ཉམས་རྟོགས་ཕུལ་དུ་ཕྱིན་པའི་ཞལ་སློབ་མང་པོ་བྱུང་། མཐར་དགུང་ལོ་བདུན་ཅུ་རྩ་གཅིག་པ་ས་གླང་ལོ་གྲོ་བཞིན་ཟླ་བའི་ཡར་ངོའི་ཚེས་བཅུར་ངོ་མཚར་བའི་ལྟས་དང་བཅས་པར་གཤེགས། འགྱུར་མེད་པདྨ་བསྟན་འཛིན་ནི། ཡབ་རིན་ཆེན་རྣམ་རྒྱལ་དང་། ཡུམ་ཚེ་དབང་དཔལ་འཛོམ་གཉིས་ཀྱི་སྲས་སུ་དམར་སེར་ཅན་ཞེས་པ་མེ་མོ་སྦྲུལ་གྱི་ལོར་འཁྲུངས། གཏེར་ཆེན་བླ་མའི་གསེར་ཁྲིར་ཞབས་ཟུང་བཀོད་ནས། འཆད་རྩོད་རྩོམ་གསུམ་གྱིས་བསྟན་པ་རིན་པོ་ཆེ་འདི་ཉིད་འཛིན་སྐྱོང་སྤེལ་གསུམ་གྱི་ཕྲིན་ལས་རྒྱ་ཆེར་བསྐྱངས་བར་མཛད་ནས་སྐུ་གཤེགས་སོ། ། རྗེ་འདི་ཉིད་ཀྱི་རིགས་ཀྱི་གཅུང་། རིན་ཆེན་རྣམ་རྒྱལ་གྱི་སྲས་མཁན་ཆེན་ཨོ་རྒྱན་བསྟན་འཛིན་རྡོ་རྗེ་ནི། ཆུ་ཁྱི་ལོར་འཁྲུངས། དགུང་ལོ་ཉི་ཤུར་ཕེབས་པ་ན་བསྙེན་པར་རྫོགས་ནས་ཆོས་ཀྱི་ཁྲི་ལ་ཞབས་པད་བཀོད་དེ་མཁན་པོ་མཛད། འདུལ་བ་སོགས་མཛད་པ་མཐར་རྒྱས་སུ་གནང་ནས་ཞི་བར་གཤེགས། དེའི་སློབ་མ་ཆོས་ཀྱི་གྲགས་པ་ཞེས་པ་ནི་ཀུན་མཁྱེན་ཕྱི་མའི་དངོས་སློབ་སྒོམ་ཆེན་ངག་དབང་ཆོས་གྲགས་ཡིན་གསུངས། དེས་ཀུ་ལུང་བླ་མ་འཇིགས་མེད་ངོ་མཚར་ལའོ། །གནུབས་ཆེན་ནས་རིམ་པར་བརྒྱུད་དེ་ཟུར་པ་མེས་དབོན་གསུམ་ལ་བཀའ་བབས་ཏེ་ཟུར་ལུགས་སུ་གྲགས་པ་དང་། རོང་ཟོམ་ཆོས་བཟང་ལ་པདྨ་བཻ་རོ་སོགས་ཀྱི་བརྒྱུད་པའི་བཀའ་བབས་པས། སྙིང་འགྲེལ་དཀོན་མཆོག་འགྲེལ་དུ་གྲགས་པར་མཛད་པ་རོང་ལུགས་སོ། །རོག་ཤེས་རབ་འོད་ལ་སོ་ཟུར་སྐྱོར་ལུགས་སོགས་མང་དུ་འདུས་ཤིང་དེ་ལས་རོག་ལུགས་སུ་གྲགས་པ་བྱུང་། སྒྲོ་ཕུག་པའི་སློབ་མ་འཛམ་སྟོན་འགྲོ་བའི་མགོན་པོ་ལས་ཀཿདམ་པ་བདེ་གཤེགས་ཀྱིས་གསན་པའི་རྒྱུན་ཕྱིས་ནས་དབུས་སུ་ཡར་འཕེལ་བ་ལ་སྒྱུ་འཕྲུལ་ཁམས་ལུགས་སུ་གྲགས་སོ། ། དེ་ཡང་གནས་བརྟན་ཆེན་པོ་བྷ་ར་དྷྭ་ཛའི་རྣམ་འཕྲུལ་ཀཿདམ་པ་བདེ་གཤེགས་སམ་བླ་མ་ཤར་བ་སྤོབས་པ་མཐའ་ཡས་ནི། ཡབ་གཙང་པ་དཔལ་སྒྲུབ་དང་། ཡུམ་གཙང་མོ་རིན་ཆེན་རྒྱན་གཉིས་ཀྱི་སྲས་སུ་ཆུ་ཕོ་སྟག་གི་ལོ་ལ་མདོ་ཁམས་སུ་སྤོ་འབོར་སྒང་དུ་འཁྲུངས། གདུང་རུས་སྒ་ཡིན། དགུང་གྲངས་བཅུ་བདུན་པར་དབུས་སུ་བྱོན། འཕན་ཡུལ་དུ་བླ་མ་བྱང་ཆུབ་སེང་གེ་ལས་རབ་ཏུ་བྱུང་། མཚན་ཤེས་རབ་སེང་གེར་གསོལ། སྒྲོ་ཕུག་པའི་ཐུགས་སྲས་འཛམ་སྟོན་འགྲོ་བའི་མགོན་པོ་ནི། ཀམ་པོའི་གནས་དང་ཉེ་བ་ཞིག་ཡིན་ཏེ། མཁས་གྲུབ་ཆེན་པོ་དེ་ལ་སྒྱུ་འཕྲུལ་གསང་སྙིང་གི་སྐོར་དང་སེམས་ཕྱོགས་སོགས་གསན། དེ་དང་དེ་ལ་མཁས་པའི་ཕ་རོལ་དུ་ཕྱིན། ཀཿདམ་པ་བདེ་གཤེགས་ཀྱི་རིང་ལ་བསྟན་པའི་ཆུ་མགོ་བརྙེས་པ་ཡིན། ཀཿདམ་པ་ལ་འཛམ་སྟོན་རིན་པོ་ཆེས་ཀམ་པོ་གནས་ནང་དུ་བསྒོམས་ན་ཕུང་པོ་འོད་སྐུར་གྲོལ་བ་དང་། ཀཿཐོག་ཏུ་བྱོན་ན་བསྟན་པ་མཐར་རྒྱས་གཅིག་འབྱུང་བར་ལུང་བསྟན་པས། བསྟན་པ་ཁོ་ན་ཐུགས་ལ་བཅངས་ནས་ཀཿཐོག་ཏུ་ཕེབས་པས་རྟེན་འབྲེལ་ཁྱད་པར་ཅན་འགྲིགས། དེ་ནས་ས་ཡུལ་གྱི་ཡི་གེ་ཀཿའདྲ་བའི་ཐོག་ས་མོ་ཡོས་ཀྱི་ལོར་དགོན་པ་འདེབས་པའི་གཙུག་ལག་ཁང་བཞེངས། མདོ་ཁམས་ཀྱི་ལྗོངས་སུ་གསང་སྔགས་ཀྱི་བསྟན་པ་གཞིར་བཞེངས་སུ་བཏིང་ནས་དགུང་གྲངས་དོན་གཅིག་པ་ཆུ་བྱི་ཐ་སྐར་ཅན་གྱི་ཟླ་བར་གཟུགས་སྐུ་བསྡུས་སོ། ། དེའི་སློབ་མ་རྡོ་རྗེ་མི་བསྐྱོད་པའི་རྣམ་འཕྲུལ་ཆོས་རྗེ་གཙང་སྟོན་པ་རྡོ་རྗེ་རྒྱལ་མཚན་ནི། མེ་མོ་ལུག་གི་ལོ་ལ་འཁྲུངས། བཅུ་བདུན་པར་ཀཿདམ་པ་རིན་པོ་ཆེ་དང་མཇལ་ནས་ཆོས་གསན། མདོ་སྒྱུ་སེམས་གསུམ་གྱི་བསྟན་པ་བླ་མའི་བཀའ་སྲོལ་བཞིན་བསྐྱངས་བའོ། །དེ་ནས་རིམ་བཞིན་མཁས་གྲུབ་ཡེ་ཤེས་རྒྱལ་མཚན་བར་གྱིས་བསྟན་པ་བསྐྱངས་པས་ཀཿཐོག་བླ་རབས་བཅུ་གསུམ་ཞེས་རིགས་གསུམ་མགོན་པོའི་རྣམ་འཕྲུལ་ཟམ་མ་ཆད་པར་བྱོན་པ་ཡིན། ཁྱད་པར་དུ་མཁས་གྲུབ་ཡེ་ཤེས་རྒྱལ་མཚན་གྱིས། མདོ་དང་སྒྱུ་འཕྲུལ་རྫོགས་པ་ཆེན་པོ་སྡེ་གསུམ་སོ་སོའི་བཀའ་སྲོལ་གྱི་རྩ་བ་རྣམས་སླར་ཡང་ཉི་མ་ལྟར་གསལ་བར་མཛད་ཅིང་བཤད་སྒྲུབ་ཀྱིས་ཁྱབ་བདལ་དུ་སྤེལ་བ་ཡིན་ནོ། ༈ །རིང་བརྒྱུད་སྐབས། སྤྱི་དོན་ཡིད་ཀྱི་མུན་སེལ་ལས། རིག་འཛིན་གྱི་རྒྱལ་པོ་ཛས། ཨོ་རྒྱན་གྱི་རྒྱལ་པོ་ཨིནྟྲ་བྷུ་དྷི། ཟ་ཧོར་གྱི་རྒྱལ་པོ་ཨུ་པ་རཱ་ཛ། ཡུལ་དབུས་ཀྱི་དགེ་སློང་ཀུ་ཀུ་རཱ་ཛ་གསུམ་ལ་བཤད་དེ། དེ་ཐམས་ཅད་ཀྱང་སྐུ་ཚེ་དེ་ཉིད་ལ་ལྷུན་གྱིས་གྲུབ་པའི་རིག་འཛིན་གྱི་ས་ལ་གཤེགས་སོ། །ཨིནྟྲ་བྷུ་ཏིས་སྲས་ཤཱཀྱ་བྷུ་ཏི་དང་། སྲས་མོ་གོ་མ་དཱེ་བི་ལ་བཤད་དེ་དེ་གཉིས་ཀྱང་རྣམ་པར་སྨིན་པའི་རིག་འཛིན་གྱི་གྲྭལ་ལ་འཁོད་དོ། །ཀུ་ཀུ་རཱ་ཛས་རྒྱུད་བཅོ་བརྒྱད་དུ་ཕྱེས་ནས། ནཱ་གརྫུ་ན་དང་། དྲང་སྲོང་བྷ་ཤཱི་ཏ་ལ་བཤད་དེ། ཕྱག་རྒྱ་ཆེན་པོའི་རིག་འཛིན་ཐོབ་བོ། རྒྱུད་སྡེ་བཅོ་བརྒྱད་ནི། རྩ་བའི་རྒྱུད་སྡེ་དྲུགཕྱི་མ་དྲུགཕྱི་མའི་ཕྱི་མ་དྲུག་གོ །ནཱ་གརྫུ་ནས། པདྨ་སཾ་བྷ་ཝ། དེས་བི་མ་མི་དྲ་ལ་བཤད་དེ། འདི་གཉིས་གདུལ་བྱའི་དོན་དུ་པཎྚི་ཏར་སྣང་ཡང་། ངོ་བོ་ལྷུན་གྱིས་གྲུབ་པའི་རིག་འཛིན་དངོས་ཡིན་ནོ། །ཡང་སྲས་མོ་གོ་མས་སི་ཏཱི་ཀ་མ་ལ། དེས་སངས་རྒྱས་གསང་བ་ལ་གསུངས་ཏེ། འདི་གཉིས་ནི་ཚེ་ལ་དབང་བའི་རིག་འཛིན་ལ་གནས་སོ། །ཡང་དྲང་སྲོང་བྷ་ཤཱི་ཏས་པྲ་བྷ་ཧསྟི་ལ་བཤད། འདིས་ཀྱང་ཕྱག་རྒྱ་ཆེན་པོའི་རིག་འཛིན་བརྙེས་སོ། །དེས་ཀྱང་སློབ་དཔོན་ཆེན་པོ་པདྨ་ལ་གསུངས་སོ། །འདི་དག་ལ་ཁ་ཅིག་གང་ཟག་སྙན་བརྒྱུད་དུ་འདོད་པ་མི་འཐད་དེ། ལ་ལ་ནི་རྒྱུའི་རིག་འཛིན་ཡིན་ལ། ཕལ་ཆེར་ཕྱག་རྒྱའི་རིག་འཛིན་མང་ཞིང་པདྨ་དང་བི་མ་ལ་ནི་ལྷུན་གྲུབ་ཀྱི་ས་ལ་བཞུགས་ནས། སེམས་ཅན་གྱི་དོན་དུ་པཎྚི་ཏར་སྣང་བ་སྟེ། འཕོ་བ་ཆེན་པོའི་སྐུར་བཞེངས་པ་ཡིན་ནོ། །སྙན་བརྒྱུད་ནི། བོད་དུ་རིམ་པས་བརྒྱུད་པ་རྣམས་ཏེ། སྔ་འགྱུར། བར་འགྱུར། ཕྱི་འགྱུར་གསུམ་དུ་གྲགས་སོ། །དེ་ཡང་སངས་རྒྱས་གསང་བ་གངས་ཏི་སེར་བཞུགས་དུས། བྲན་ཀ་མུར་ཏི། སྦ་མཉྫུ་ཤྲཱི། བཻ་རོ་ཙ་ན་གསུམ་ལ་བཤད་དེ། དེ་ལས་བརྒྱུད་པ་ནི་སྔ་འགྱུར་རོ། །པདྨས་གཉགས་ཛྙཱ་ན་ཀུ་མ་ར་དང་། ངན་ལམ་རྒྱལ་བ་མཆོག་དབྱངས་ལ་མཆིམས་ཕུར་དབང་བསྐུར་ཏེ་སྒྲ་བསྒྱུར་རྒྱ་གར་གྱི་གླིང་དུ་བསྒྱུར་ནས་བཤད་པ་ལ་བར་འགྱུར་ཞེས་གྲགས་སོ། །བི་མ་ལས་གཉགས་ཛྙཱ་ན་ཀུ་མ་ར་དང་། རྨ་རིན་ཆེན་མཆོག་ལ་བསམ་ཡས་ལྷུན་གྱིས་གྲུབ་པའི་བར་ཁང་དུ་གསུངས་པ་ནི་ཕྱི་འགྱུར་རོ། །བཀའ་བརྒྱུད་འདིའི་རིམ་པ་ནི། དེ་གསུམ་ག་ལ་བརྒྱུད་དེ། བཻ་རོ་ཙ་ན་དང་། གཉགས་ཛྙཱ་ན་ཀུ་མ་ར་གཉིས་ཀའི་སློབ་མ་རྨ་རིན་ཆེན་མཆོག་གོ །དེས་གྱེ་རེ་མཆོག་སྐྱོང་ནས་རིམ་པ་བཞིན། དར་རྗེ་དཔལ་གྱི་གྲགས་པ། གནུབ་སངས་རྒྱས་ཡེ་ཤེས། བ་གོར་བློན་ཆེན་འཕགས་པ། དོན་ཡོན་ཏན་མཆོགདགེ་གསལ་བའི་བྱང་ཆུབ། རྒྱ་སློབ་དཔོན་གཞོན་ནུ། འགར་ཚུལ་ཁྲིམས་བཟང་པོ། རོང་པ་ཆོས་ཀྱི་བཟང་པོ། མཚུར་ཡེ་ཤེས་དབང་པོ། དན་ཆོས་ཀྱི་དབང་ཕྱུགཞང་མཆོག་གི་བླ་མ། ཀྱི་ཡོན་ཏན་འབྱུང་གནས། སློབ་དཔོན་གཞོན་ནུ་དོན་གྲུབ། དེས་གུ་རུ་དྲི་མེད་འོད་ཟེར་ལ་གསུངས་སོ། །ཞེས་གསུངས། ༈ ས་ཧོ་རའི་རྒྱལ་པོ་ཛཿལ་རྨིས་ལྟས་ངོ་མཚར་བ་བདུན་བྱུང་བ་དང་མཐུན་པར་རྒྱལ་པོའི་ཁང་སྟེང་དུ་བཛྲ་པ་ཎིའི་སྐུ་ཁྲུ་གང་བ་ཞིག་དང་། ཏནྟྲ་ཆེན་པོ་སྡེ་བཅོ་བརྒྱད་ཀྱི་གླེག་བམ་དང་བཅས་པ་བབས། དེའི་ཚེ་རྒྱལ་པོས་གསོལ་བ་བཏབ་པས་རྡོ་རྗེ་སེམས་དཔའ་ཞལ་མཐོང་གི་ལེའུ་རྟོགས་ནས་དེ་དང་ཕྱག་རྡོར་གྱི་སྐུ་ལ་བརྟེན་ནས་ཟླ་བ་བདུན་བསྒྲུབས་པས་རྡོ་རྗེ་སེམས་དཔའི་ཞལ་མཐོང་ཞིང་ཡེ་ཤེས་ཀྱི་དབང་བསྐུར་བ་ཐོབ་པས་གླེག་བམ་གྱི་བརྡ་དོན་མ་ལུས་པ་མཁྱེན་པར་གྱུར་ཏེ། ཉིད་ཀྱིས་མཛད་པའི་ལམ་རྣམ་བཀོད་དུ། ཤར་ཕྱོགས་ཨིནྟྲའི་ལུང་པ་ནས། །རྒྱ་ལུང་རྡོ་རྗེ་བརྩེགས་པ་རུ། །རིགས་ཅན་ཨིནྟྲ་བྷུ་ཏི་ངས། །གསང་བའི་བདག་པོས་མངོན་བསྟན་པས། །སྒྱུ་འཕྲུལ་དྲྭ་བའི་སྒྲུབ་པ་ཡང་། །ཚོམ་བུ་ལྔ་བཅུ་སྟོང་དང་བཅས། །ཕྱག་ན་རྡོ་རྗེ་མངོན་གྲུབ་སྟེ། །སྤང་ལེན་བརྟུལ་ཞུགས་སྤྱོད་པའི་དབང་། །དགེ་བར་བསྐུར་ནས་སྡིག་པ་མེད། །ཅེས་གསུངས། ལོ་རྒྱུས་ལ་ལར་རྒྱལ་པོ་ཛཿས་གླེགས་བམ་གྱི་བརྡ་མ་ཁྲོལ་བར་སློབ་དཔོན་ཀུ་ཀུ་རཱ་ཛ་འདི་ཉིད་ཀྱིས་རྟོགས་ནས་རྒྱུད་སྡེ་བཅོ་བརྒྱད་དུ་ཕྱེས་ཏེ་སླར་རྒྱལ་པོ་ལ་བཤད་པར་གསུངས་པ་ཡོད་པ་གང་ལྟར་མི་འགལ་ཡང་། གཙོ་བོར་ལམ་རྣམ་བཀོད་དང་ལམ་རིམ་ཆེན་མོ་རྣམས་ནས་བཤད་པ་ལྟར་རོ། །དེས་ཨིནྟྲ་བྷུ་ཏི་བར་པ་ལ་བཤད་དེ་འཁོར་ཚོམ་བུ་ཁྲི་དང་བཅས། དེས་སེང་ཧ་རཱ་ཛ་ལ་བཤད་དེ་ཚོམ་བུ་སྟོང་དང་བཅས། དེས་ཨུ་པ་རཱ་ཛ་ལ་བཤད་དེ་ཚོམ་བུ་བརྒྱ་དང་བཅས། དེས་སྲས་མོ་གོ་མ་དེ་ཝཱི་ལ་བཤད་དེ་འཁོར་ཚོམ་བུ་ལྔ་བཅུ་དང་བཅས་ཏེ་ཀུན་ཀྱང་ཚོགས་སྒྲུབ་ཀྱི་ལམ་གྱིས་རྡོ་རྗེ་འཆང་གི་སར་གཤེགས་སོ། ། རྫོགས་པ་ཨ་ནུ་ཡོ་གའི་སྐོར་རྣམས་མི་ཡུལ་དུ་ཡོངས་སུ་གྲགས་པ་ཇི་ལྟར་བྱུང་བའི་ཚུལ་ནི། མདོ་དགོངས་པ་ལུང་སྟོན་སོགས་ལས་ཇི་ལྟར་ལུང་བསྟན་པ་དང་མཐུན་པར། སྟོན་པ་མཆོག་གི་སྤྲུལ་སྐུ་མྱ་ངན་ལས་འདས་ནས་ལོ་ཉེར་བརྒྱད་ན། དམ་པའི་རིགས་ཅན་དྲ་མ་ལྔས་འཇིག་རྟེན་མུན་པ་ལྟ་བུར་གྱུར་པ་མཐོང་ནས་སྟོན་པ་མྱ་ངན་ལས་འདས་པར་ཤེས་ཏེ། གང་དུ་འདུ་བའི་གནས་ནི། ཇི་སྐད་དུ། རྩེ་ན་རྩལ་གྱི་རྒྱལ་པོ་གནས། །ངོས་ལ་བྲག་དཀར་ཁྱི་ཚུགས་པ། །སེང་གེ་གནམ་དུ་འཕྱོང་འདྲས་བརྒྱན། །རྩི་སྨན་རྩ་བརྒྱད་རྩ་བར་འཁྲུངས། །འདུ་བའི་ནད་ཀྱིས་ཡོངས་མི་ཚུགས། །སྤྱི་བོར་ཀ་ལནྟ་ཀ་ནི། །མི་གཉིས་གཅིག་པུར་གནས་པ་ཡི། །མཛོད་ལྡན་དེ་ཡི་ཚང་བཅས་པ། །སྐལ་ལྡན་རྣམས་ནི་བགྲོད་པར་སླ། །སྐལ་མེད་རྣམས་ཀྱིས་ཡོངས་མི་ཐར། །ཞེས་པའི་མཚན་ཉིད་དང་ལྡན་པའི་ལངྒའི་ཡུལ་གྱི་རི་བོ་དྲག་ཤུལ་ཅན་ནམ་གནམ་ལྕགས་ཡོད་པའི་རྩེ་མོར་རང་རང་གི་རྫུ་འཕྲུལ་གྱི་བྱ་བས་གཤེགས་ཏེ། ཕྱོགས་བཅུའི་སངས་རྒྱས་ཡིད་ལ་བྱས་ནས་གདུང་ཚིག་ཉེར་གསུམ་བཏོན་པས། སྟོན་པ་རིགས་དྲུག་པ་ཀུན་ཏུ་བཟང་པོ་ཉིད་གསང་བའི་བདག་པོ་ཕྱག་ན་རྡོ་རྗེའི་རྣམ་པར་བསྟན་ཏེ། དམ་པའི་རིགས་ཅན་དྲྭ་མ་ལྔ་སོགས་རིག་འཛིན་འདུས་པ་ཕལ་མོ་ཆེ་ལ། སྔར་འོག་མིན་དང་། དགའ་ལྡན་དང་། སུམ་ཅུ་རྩ་གསུམ་སྟེ་ལྷ་གནས་གསུམ་དུ་བསྟན་ཅིང་གྲགས་པའི་གསང་བའི་རྒྱུད་ཐམས་ཅད་སླར་ཡང་བཟླས་ཏེ་གསུངས་སོ། །དེ་རྣམས་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻཌཱུཪྱའི་ཞུན་མས་བྲིས་ཏེ། ཇི་སྐད་དུ། གཞི་རྒྱུ་དགོངས་སྣོད་གནས་སྲུང་བདག་བརྒྱུད་འཛིན། །ཞེས་པས་གསེར་གྱི་བྱང་བུ་ལ་བྲི་གཞི་ཕུན་སུམ་ཚོགས་པར་དགོངས་པ། བཻཌཱུཪྱའི་ཞུན་མས་བྲིས་པ་རྒྱུ་ཕུན་སུམ་ཚོགས་པར་དགོངས་པ། རིན་པོ་ཆེ་སྣ་ཚོགས་པའི་སྒྲོམ་བུ་སྣོད་ངོ་མཚར་བར་དགོངས་པ། ནམ་མཁའ་འབྱུང་བཞིས་མི་འཇིག་པས་གཏེར་གནས་དམ་པར་དགོངས་པ། མ་དང་མཁའ་འགྲོ་རྣམས་ཡེ་ཤེས་ཀྱི་སྤྱན་དང་ལྡན་པས་གཏེར་སྲུང་ཁྱད་པར་ཅན་དུ་དགོངས་པ། ཆོས་བདག་རྒྱལ་པོ་ཛཿལས་ཅན་དབང་པོ་ཡང་རབ་རྟོགས་གྲོལ་དུས་མཉམ་དུ་དགོངས་པ། སྐྱེ་འཕགས་བྱང་སེམས་ས་ལ་གནས་པ་སོགས་གྲུབ་བརྙེས་བརྒྱུད་འཛིན་དར་རྒྱས་སུ་འབྱུང་བ་ལ་དགོངས་པ་སྟེ། དགོངས་པའི་རྩལ་བདུན་གྱིས་ནམ་མཁའ་ལ་སྦས་སོ། །དེ་ཡང་གསང་བའི་བདག་པོས་དབང་བསྐུར་ཞིང་བསྟན་པའི་དོན་ཐམས་ཅད་རྒྱལ་པོས་ཐུགས་སུ་ཆུད་ཅིང་ཚིག་གི་བརྒྱུད་པ་རྣམས་རིག་འཛིན་གྱི་དགེ་བསྙེན་ཆེན་པོ་ལི་ཙ་བཱི་དྲི་མེད་གྲགས་པ་ལས་ཞུས། སྤྱི་མདོའི་འགྲེལ་བ་སོགས་བསྟན་བཅོས་ཀྱང་མཛད། དེས་སློབ་དཔོན་ཨུ་པ་རཱ་ཛ་དང་། རང་གི་སྲས་ཤཱཀྱ་པུ་ཏྲི། ན་ག་པུ་ཏྲི། གུ་ཧྱ་པུ་ཏྲི་གསུམ་ལ་སྤྲུལ་པའི་དཀྱིལ་འཁོར་དུ་དབང་བསྐུར་ཞིང་གདམས་ངག་རྣམས་བསྟན། དེ་ཡང་ཤཱཀྱ་པུ་ཏྲི་ནི་ཨིནྟྲ་བྷུ་ཏི་ཆུང་བའམ་སློབ་དཔོན་ལྭ་བ་པ་ཡིན་ནོ། །དེས་སེངྷ་པུ་ཏྲི་དང་། ཀུ་ཀུ་རཱ་ཛ་ཕྱི་མ་གཉིས་ལ་བཤད། ཕྱི་མས་སློབ་དཔོན་ཆེན་པོ་རོ་ལངས་བདེ་བ་ལ་དབང་བསྐུར་ཞིང་བཤད་པའོ། ། སྤྱི་དོན་མཛོད་ཀྱི་ལྡེ་མིག་སྐབས་ཀྱི་ཟིན་བྲིས་བཞུགས།བླ་མ་རིན་པོ་ཆེ་མཁྱེན་ནོ། །བདག་གི་རྒྱུད་སྨིན་ཅིང་གྲོལ་བར་མཛད་དུ་གསོལ། གསང་སྙིང་སྤྱི་དོན་རིན་ཆེན་མཛོད་ལྡེ་གསུངས་སྐབས་སུ་ཞལ་རྒྱུན་འགའ་ཞིག་བརྗེད་བྱང་ཕྱོགས་བསྒྲིགས་སུ་འབྲི་བ་ལ། དང་པོ་མཆོད་བརྗོད་དུས། དཔལ་ལྡན་བླ་མ་སོགས་ཀྱི་ཐད་གཏེར་ཆེན་ཉག་བླའི་གསུངས་རྒྱུན་ལས། དོན་གཉིས་ཕུན་སུམ་ཚོགས་པའི་དཔལ་དང་ལྡན་པའི་བླ་མ་དཀྱིལ་འཁོར་གྱི་ལྷ་ཚོགས་ཐམས་ཅད་སྤྲོས་པའི་གཞིར་གྱུར་པའི་བདག་ཉིད་རྡོ་རྗེ་སེམས་དཔའ་ལ་སྒོ་གསུམ་གུས་པ་ཆེན་པོས་བཏུད་དེ་ཕྱག་འཚལ་ལོ། །དོན་དམ་གདོད་མའི་སྟོང་ཆེན་གྱི་དབྱིངས་དང་། གློ་བུར་སྒྲིབ་གཉིས་ཀྱི་དྲི་མ་ཐམས་ཅད་དང་བྲལ་བའི་རིག་པའི་རང་མདངས་ཀྱི་ཁམས་སྐུ་དང་ཡེ་ཤེས་ཀྱི་དཀྱིལ་འཁོར་དུ་སྣང་བ་དེ་དང་དབྱེར་མི་ཕྱེད་པའི་རྡོ་རྗེ་གྲུབ་པའི་གཟི་བརྗིད་དཔེར་ན་ནམ་མཁའི་སྤྲིན་ལས་ཆར་བྱུང་བ་བཞིན་དུ་དབྱིངས་ཡེ་ཟུང་འཇུག་གི་སྤྲིན་ལས་སྒྱུ་འཕྲུལ་དྲྭ་བའི་ཚུལ་དུ་ཡེ་ཤེས་སྒྱུ་མའི་སྐུར་བཞེངས་པར་མཛད་ནས། དབྱར་གྱི་རྔ་གསང་སྒྲོགས་པ་བཞིན་དུ་གསང་བ་རྒྱུད་སྡེའི་དབྱངས་ཀྱིས་གདུལ་བྱའི་ཤེས་རྒྱུད་ཀུན་ལ་ཁྱབ་པར་མཛད་པའི་དཀྱིལ་འཁོར་གྱི་འཁོར་ལོའི་དབང་ཕྱུག་བླ་མ་དེ་ལ་གུས་པས་འདུད་དོ། །ཞེས་གསུངས། ཁོ་བོའི་བླ་མའི་ཞལ་རྒྱུན་ལྟར། དོན་དམ་དབྱིངས་ཞེས་པས་རང་བཞིན་རྣམ་དག །སྒྲིབ་བྲལ་རིག་པའི་སྐུ་ཞེས་པས་གློ་བུར་བྲལ་དག་གི་ཡེ་ཤེས་ཆ་ཤས་དུ་མ་ལྡན་པའི་སྐུ་སྟེ། དབྱིངས་རིག་དབྱེར་མི་ཕྱེད་པའི་བདག་ཉིད་རྡོ་རྗེ་སྙིང་པོའི་ལམ་གྱིས་རྒྱུད་ལ་མངོན་གསལ་དུ་གྲུབ་པའི་གཟི་བརྗིད་ཅེས་པ་ཞབས་དྲུང་དང་ཀུན་མཁྱེན་ཆེན་པོའི་མཚན་ཡང་ཡིན་གསུངས། གསང་མཆོག་རྒྱུད་སྡེའི་ཐད་གཏེར་ཆེན་བླ་མའི་གསུང་རྒྱུན་ལས་གསང་བ་མཆོག་གི་རྒྱུད་སྡེའི་སྣང་བ་ཉི་མའི་འོད་ཟེར་གྱི་གཟུགས་སུ་བཀོད་པ་དང་། གདུལ་བྱ་རྣམས་གླིང་བཞིའི་གཟུགས་སུ་བཀོད་ནས། གྲུབ་གཉིས་ལང་ཚོ་རྒྱས་པའི་པདྨའི་ཚལ་དུ་སྒྲུབ་པར་མཛད་པའི་བརྒྱུད་གསུམ་བླ་མ་རྟ་བདུན་དབང་པོའི་གཟུགས་སུ་བཀོད་པ་དང་། གསང་ཆེན་གསུང་གི་སྒྲ་དབྱངས་འོད་སྟོང་འཕྲོ་བའི་གཟུགས་སུ་བཀོད་དེ། བསྟན་བཅོས་རྩོམ་པ་པོའི་ཡིད་ནམ་མཁའི་གཟུགས་སུ་བཀོད་ནས་དེ་ཡི་ངོས་ལ་བརྟན་པར་བཞུགས་གྱུར་ཅིག །ཅེས་པའི་དོན་ནོ། །རྒྱུད་དོན་ཟབ་མོ་བདག་འདྲས་གཏིང་དཔག་པར་དཀའ་ན་ཡང་། སྐྱེས་བུའི་བརྗོད་པའི་རྗེས་འབྲང་བྲག་ཆ་ལྟར་དུ་བརྒྱུད་ལྡན་བླ་མས་ལེགས་པར་བཤད་པའི་མན་ངག་ལ་བརྟེན་ནས། རྒྱུད་ཀྱི་རྒྱལ་པོ་འདི་ཡི་ཆ་ཤས་ཙམ་གླེང་ཞེས་བརྩམ་པར་དམ་བཅའ་བ་དང་། འདིར་གཟུ་བོའི་བློ་ཡིས་ཉོན་ཅིག་ཅེས་རང་ཕྱོགས་ཀྱི་གྲུབ་མཐའི་གསུང་རྒྱུན་ལ་ཆགས་པ་དང་། གཞན་ཕྱོགས་ཀྱི་གྲུབ་མཐའ་ལ་སྡང་བ་ལྟ་བུ་མ་ཡིན་པར་དྲང་པོའི་ངང་ཚུལ་ཅན་གྱི་བློ་ཡིས་ཉོན་ཅེས་ཉན་པར་བསྐུལ་བའོ། ། མངོན་བྱང་ལྔའི་བྱང་ཆུབ་བརྙེས། །ཞེས་པའི་ཐད། རིན་པོ་ཆེས་གཏེར་སྟོན་ལ། མངོན་བྱང་ལྔ་རྙིང་ལུགས་ཀྱི་བླ་མེད་ལྟར་བྱ་དགོས། ད་ལྟའི་མངོན་བྱང་ལྔ་འདི་རྣལ་འབྱོར་ཡོ་གའི་རྒྱུད་ཀྱི་ལུགས་རེད་༼སྔགས་རེ་དང་དོན་སྦྱར་ནས་བཤད་རྒྱུ་དེ་རང་ལུགས་མིན། ༽དེ་དང་མི་འདྲ་གསུངས། རྒྱུད་ཐམས་ཅད་ཀྱི་སྙིང་པོའི་ཐད་གསུང་རྒྱུན་ལས། སྤྱིར་ཟབ་པ་གདོད་མའི་སྟོང་ཆེན་གྱི་དབྱིངས་དང་། གསལ་བ་ཡེ་ཤེས་ཀྱི་འཁོར་ལོ་ཞེས་གསུངས་པ་ལྟར། ཟབ་པ་ཆོས་སྐུ་དངོས་ལམ་བྱེད་དང་། གསལ་བ་གཟུགས་སྐུ་དངོས་ལམ་དུ་བྱེད་པ་སྟེ། གཞུང་འདི་ལ་སྦྱར་ན་ལྷག་པའི་བདེན་གཉིས་ལམ་བྱེད་ལ་གསུངས་སོ། ། སྒོ་མི་འདྲ་བ་གསུམ་ཞེས་པའི་ཐད། བསྐྱེད་ཆོག་རྒྱས་པ་བསྐྱེད་རིམ་སྒོམ་པ་ལའང་སྐྱེ་གནས་བཞིའི་བག་ཆགས་སྦྱོང་བྱེད་བདག་སྲས་གཞན་སྲས། མངོན་བྱང་ལྔ་བསྐྱེད། རྡོ་རྗེའི་ཆོ་ག་བཞི་བསྐྱེད་སོགས་རྒྱས་པ་དང་། འབྲིང་པོ་ཆོ་ག་གསུམ་བསྐྱེད་དང་། བསྡུས་པ་ཨ་ནུ་ལྟར་སྔགས་ཙམ་བརྗོད་པ་ལྷ་ཡི་འཁོར་ལོ་རྫོགས་པའི་བསྐྱེད་རིམ་དང་། ཤིན་ཏུ་བསྡུས་པ་ཨ་ཏི་ལྟར་རིག་པ་ཡེ་ཤེས་ཀྱི་རྩལ་སྣང་ལྷའི་འཁོར་ལོ་ཡེ་ནས་ཡིན་པ་ཉིད་ལ་རྣམ་པ་མ་བསྒྱུར་ཀྱང་ཆོག་སྟེ། གལ་ཏེ་ལྷའི་རྣམ་པར་བསྒྱུར་བར་འདོད་ན་ཡང་སྐད་ཅིག་དྲན་རྫོགས་ཀྱི་ཚུལ་དུ་ཆུ་ལས་ཉ་ལྡང་བ་ལྟར་རིག་པའི་རྩལ་དེ་ཉིད་དུ་སྣང་བ་ནི་ཡེ་ནས་དམ་ཡེ་དབྱེར་མེད་ལྷུན་གྱིས་གྲུབ་པའི་ལྷ་ཉིད་དུ་གྱུར་པ་ཡིན་ནོ། །ཞེས་གསུངས། ཞལ་རྒྱུན་ལས། དེ་ཡང་བསྡུས་པ་ཡིད་བཞིན་མཛོད་དང་། སེམས་ཉིད་ངལ་གསོ་སོགས་ལས་གསུངས་པ་ལྟར། ཀུན་མཁྱེན་ཕྱི་མས། མ་བཅོས་རིག་པ་སྟོང་གསལ་ངང་། །ཞེས་དབྱིངས་ལམ་བྱེད་དང་། །ལྷུན་གྲུབ་སྣང་ཆའི་རྟེན་འབྲེལ་ཀུན། །ཞེས་ཡེ་ཤེས་ལམ་བྱེད་ལ་སློབ་པ་ལྟ་བུ་དང་། བཅོས་མའི་བསྐྱེད་ཆོག་ལ་མི་ལྟོས་པར་ཀ་དག་དང་ལྷུན་གྲུབ་ལམ་བྱེད་ཁྲེགས་ཆོད་དང་ཐོད་རྒལ་གཉིས་ལ་བརྟེན་པའོ། །ཟིན་བྲིས་གཞན་ལས། དཀྱིལ་འཁོར་རྒྱས་བསྡུས་ཞི་བ་ལྟ་བུ་ལ་མཚོན་ན་རྒྱས་འབྲིང་བསྡུས་གསུམ་ལས་རྒྱས་པ་གཙོ་འཁོར་ཐམས་ཅད་ཞལ་གསུམ་ཕྱག་དྲུག་དང་། འབྲིང་པོ་རིགས་ལྔ་ཞལ་གསུམ་ཕྱག་དྲུག་གཞན་ཐམས་ཅད་ཞལ་གཅིག་ཕྱག་གཉིས་དང་། བསྡུས་པ་གཙོ་བོ་ཞལ་གསུམ་ཕྱག་དྲུག་འཁོར་ཐམས་ཅད་ཞལ་གཅིག་ཕྱག་གཉིས་སོ། །ཞེས་གསུངས། གཏེར་ཆེན་བླ་མའི་གསུང་རྒྱུན་ལས། ལྷ་གྲངས་མང་ཉུང་ལ་སྦྱར་ཏེ་གསུངས་ལ། དེ་ཡང་རིགས་ཆུང་དང་བཅས་ཏེ་ཡོངས་རྫོགས་ནི་དཀྱིལ་འཁོར་རྒྱས་པ། རིག་ལྔ་དང་སྒོ་བ་ཡབ་ཡུམ་ཙམ་ནི་བསྡུས་པར་གསུངས། ཡོ་ག་གསུམ་ཐད། ཆོས་རྗེ་མི་ཕམ་རིན་པོ་ཆེས། འབྲས་བུའི་ཐེག་པ་ལ། ལྷ་སྔགས་སོགས་ཀྱི་ཐབས་མཁས་བསྟེན་པས་མི་ཚེ་འགའ་ཡིས་འགྲུབ་པ་ཕྱི་རྒྱུད། རང་གནས་ཡེ་ཤེས་འཆར་བའི་ཐབས་ལ་བརྟེན་པ་རྣལ་འབྱོར་བླ་མེད་གཉིས། དེའི་ཕྱི་མ་ལའང་དམིགས་བཅས་བསྐྱེད་རིམ་གཙོ་ཆེ་བ་ཕ་རྒྱུད། རྡོ་རྗེའི་ལུས་ལ་གནད་དུ་བསྣུན་པས་འཆར་བ་མ་རྒྱུད། གཉིས་མེད་ཡེ་ཤེས་ལམ་བྱེད་ཟུང་འཇུག་རྒྱུད་གསུམ། ཕྱི་མ་ལའང་ལས་རླུང་དང་བཅས་པའི་རྣམ་ཤེས་དང་ཡེ་ཤེས་ཀྱི་རླུང་བྱེད་པ་འདྲེན་པའི་སྒོ་ནས་ཡེ་ཤེས་འཚོལ་བྱེད་དུས་འཁོར། ཡེ་རླུང་འོད་གསལ་བའི་སེམས་འབའ་ཞིག་ལམ་བྱེད་རྫོགས་པ་ཆེན་པོའི་མཐར་ཕྱིན་པ་ཡིན་ནོ། །ཞེས་གསུངས། མ་ཧཱ་ལ་ཡང་གསུམ་དུ་ཕྱེ་བའི་སྐབས་སུ། གསུང་རྒྱུན་ལས། ཕ་རྒྱུད་ལ་གསུམ་དུ་ཕྱེ་བའི་མཚན་གཞིར་རྒྱུད་དཔལ་གསང་བ་འདུས་པ་དང་། འཁོར་ལོ་སྡོམ་པ་དང་། སྒྱུ་འཕྲུལ་འདི་བཞག་དགོས་པར་གསུངས་ལ། ཞལ་རྒྱུན་ལས། འདི་གསུམ་ཀའི་སྐབས་སུ་རིག་པ་འོད་གསལ་བྱང་ཆུབ་སེམས་ཉིད་ལྷ་སྐུར་འཆར་བ་ལ་སློབ་པར་ཁྱད་མེད་ཀྱང་། གཙོ་བོར་རྡུལ་ཚོན་རས་བྲིས་སོགས་ཕྱི་དཀྱིལ་ལ་བརྟེན་ནས་བདག་སྲས་གཞན་སྲས་སོགས་བསྐྱེད་ཆོག་རྒྱས་པའི་རྣམ་བཞག་སྟོན་པ་མ་ཧཱའི་མ་ཧཱ་དང་། ཕྱི་དཀྱིལ་ལ་བརྟེན་ནས་ལྷའི་རྣལ་འབྱོར་སྒོམ་པ་གཙོ་བོར་མི་བྱེད་པར་རྡོ་རྗེ་ལུས་ཀྱི་གྲོང་ཁྱེར་གདོད་ནས་རྒྱལ་བའི་དཀྱིལ་འཁོར་ཆེན་པོར་གནས་པ་ཉིད་ཤེས་པར་བྱས་ནས་སྐད་ཅིག་དྲན་རྫོགས་སུ་ལྷར་གསལ་བ་མ་ཧཱའི་ཨ་ནུའམ་ཕ་རྒྱུད་ཀྱི་མ་རྒྱུད་ཅེས་བྱའོ། །ཕྱི་དཀྱིལ་སོགས་ཡོད་མོད། གཙོ་བོར་རང་རིག་པའི་ཡེ་ཤེས་སྐྱེ་བ་མེད་པ་བདེན་པ་དབྱེར་མེད་ཀྱི་རང་བཞིན་ཉིད་ལྷའི་འཁོར་ལོར་བསྒོམ་པའི་ཚུལ་རྩལ་དུ་འདོན་པ་མ་ཧཱའི་ཨ་ཏི་སྟེ་ཕ་རྒྱུད་ཀྱི་གཉིས་མེད་རྒྱུད་ཅེས་བྱའོ། །འདི་མ་ཧཱ་ལ་སྐོར་གསུམ་དུ་ཕྱེ་བའི་ཨ་ཏི་ཡིན་གསུངས། འདིར་ཕ་རྒྱུད་ཅེས་པའི་ཕའམ་ཐབས་ཀྱི་ལྡོག་པ་ནི། སྣང་ཆ་ལྷའི་འཁོར་ལོ་སྤྲོས་པའི་རྣམ་གྲངས་ཤིན་ཏུ་རྒྱས་པ་དང་། ཤེས་རབ་མའི་རྒྱུད་ཀྱི་ཁྱད་པར་གཙོ་བོ་དབྱིངས་སམ་ཤེས་རབ་ཀྱི་ཆ་གཏན་ལ་རྒྱས་པར་འབེབ་པ་སྟེ། འདིར་གཉིས་ཀ་ཆ་མཉམ་པར་སྟོན་པས་གཉིས་མེད་ཅེས་སོ། །འོ་ན་འདུས་པ་དང་འཁོར་ལོ་སྡོམ་པ་ནས་སྣང་སྲིད་དག་མཉམ་ཡིན་པར་བསྟན་པ་མཁས་པ་ཆེན་པོ་རྗེ་སོགས་ཀྱིས་མ་གསུངས་པས་མི་འཐད་སྙམ་ན། དེ་ཙམ་གྱིས་འགལ་མི་དགོས་ཏེ། ཕྱག་ན་རྡོ་རྗེས་བདེ་མཆོག་སྟོད་འགྲེལ་དུས་འཁོར་ལྟར་བཤད་པ་དང་། ལྭ་བ་པས་སྦས་རྒྱུད་ལྟར་བཤད་པ་གཉིས་འགལ་བར་མི་འདོད་པ་ལྟར། འདིར་ཡང་སྔགས་ཀྱི་འཕགས་ལམ་གྲུབ་པའི་སྐྱེས་བུ་ཆེན་པོ་བི་མ་མི་དྲ་སོགས་ཀྱི་དགོངས་པ་ཡིན་པས། གཉིས་ཀ་རྒྱུད་དེའི་དགོངས་པར་གནས་སོ། །ཞེས་གསུངས། ཞལ་རྒྱུན་དུ། རྒྱལ་བའི་གཟུགས་སྐུ་སྒྲུབ་བྱེད་དང་། ཡེ་ཤེས་ཆོས་སྐུ་སྒྲུབ་བྱེད་གཙོར་སྟོན་པའི་སྟེང་ནས་ཁྱད་པར་ཡོད་པས། བསྐྱེད་རིམ་དང་སྒྱུ་ལུས་བདེ་ཆེན་གཙོར་སྟོན་གྱི་ཁྱད་འོང་བ་ཡིན་པར་གསུངས། དེའི་རིགས་པས་རྫོགས་ཆེན་དང་གཞུང་འདི་གཉིས་ཀའི་རྒྱུད་དུ་གྲུབ་ཅེས་གསུངས། གསུང་རྒྱུན་ལས། རིན་པོ་ཆེས། རྒྱུད་འདིའི་ལམ་ལ་ཐབས་གྲོལ་གཉིས་ཡོད་ཀྱང་། གཙོ་བོར་གྲོལ་ལམ་རང་ཡིན་ཏེ། གཡོ་བ་རླུང་དང་། བདེ་བ་ཐིག་ལེའི་རྫོགས་རིམ་གཙོ་བོར་མི་བྱེད་པར་འོད་གསལ་ཡེ་ཤེས་ཀྱི་རྫོགས་རིམ་གཙོ་བོར་བྱེད་པས་མ་ཧཱའི་ཨ་ཏིར་བཞག་པའི་ཕྱིར། ཞེས་དང་། ཞབས་དྲུང་དྲིས་ལན་ལས། རྒྱུད་འགྲེལ་ཕྱོགས་བཅུའི་མུན་སེལ་ལས་གསུངས་པའི་བབ་ལ་བརྟགས་ན། སྒྱུ་འཕྲུལ་གསང་སྙིང་གི་ལམ་རིམ་དང་རྫོགས་ཆེན་ཁྲེགས་ཆོད་དང་ཐོད་རྒལ་གསུམ་པོ་ཨ་ཏིའི་མ་ཧཱ་སོགས་གསུམ་དུ་མཛད་པ་འདྲ་བ་ཞིག་སྣང་། ཞེས་གསུངས། ཟིན་བྲིས་ལས། མ་ཧཱའི་མ་ཧཱའི་སྐབས་སྣོད་བཅུད་ཐམས་ཅད་ཤུ་ནྱ་ཏ་སོགས་ཀྱིས་སྦྱངས་ཏེ་དེའི་ངང་ལས་རང་ཉིད་རྒྱུའི་ཧེ་རུ་ཀར་གསལ་བའི་ཐུགས་ཀ་ནས་འབྱུང་རིམ་སོགས་ནས་རིམ་པས་བསྐྱེད་པ་དང་། བསྐྱེད་གཞི་རང་ལུས་ཡེ་ནས་རྣམ་པར་དག་པའི་བདག་ཉིད་ཡིན་པས་སྣང་ཚུལ་གྱི་ལུས་ཀྱི་ཆ་ཤས་དག་ཡོངས་སུ་གྱུར་པ་ལས་ལྷར་བསྐྱེད་པ་ནི་ཡོངས་གྲུབ་ཀྱི་དཀྱིལ་འཁོར་བསྒོམ་པ་དང་། ཨ་ཏིའི་སྐབས་ཡུམ་ཀའི་སྒྲུབ་གཞུང་གི་ཟིན་བྲིས་ན། རིག་པའི་རང་ངོ་ཐུགས་རྗེ་དང་སྦྱར་བའི་སྐྱེ་འཆི་སྦྱང་ཚུལ་དང་སྐུ་གསུམ་མངོན་དུ་གྱུར་ཚུལ་གསུངས། རྒྱུད་༵ཐམས་༵ཅད་༵ཀྱི༵་རྒྱལ་༵པོ༵་ཡིན༵་པས༵་ཆེ༵་བ༵། ལམ་བགྲོད་པའི་མྱུར་ཁྱད་གཞན་ལས་ཆེ་བས་ཐེག་པ་ཐམས་ཅད་ཀྱི་ཡང་རྩེ། རྒྱལ་བས་འོད་གསལ་གཉུག་མའི་དེ་ཁོ་ན་ཉིད་གདུལ་བྱ་ལ་སྟོན་པར་བཞེད་ན་རེ་ཞིག་སྣོད་དུ་མ་གྱུར་པ་རྣམས་ལ་ལྷ་མིའི་ཐེག་པ་སོགས་ཆོས་ཕུང་མཐའ་ཡས་པ་གསུངས་པས་བསྟན༵་པ༵་ཐམས༵་ཅད་ཀྱི༵་འབྱུངས༵་ཁུངས༵། ལོ་ཆེན་རིན་པོ་ཆེས་མདོ་རྒྱུད་མང་པོ་མི་ཤེས་ཀྱང་གསང་སྙིང་ལ་སྦྱང་པ་ཆེ་བས་མདོ་རྒྱུད་གཞན་སླ་མོ་བྱུང་གསུངས་པ་ལྟར། མདོ་རྒྱུད་ཐམས་ཅད་ལ་ཁྱབ་བྱེད་ལྟ་བུར་ཡོད་པས་ལུང་ཐམས་ཅད་ཀྱི་སྤྱི་འགྲེལ། རྒྱལ་བའི་ཞེ་ཕུག་སྟེ་བརྣག་ཆོས་སམ་གཅེས་ནོར་རོ། །མི་ཕམ་རིན་པོ་ཆེས་རྒྱུད་འདིར་སྣང་སྲིད་དག་མཉམ་དང་། དབང་བཞི་པའི་དོན་གྱི་ཡེ་ཤེས་བསྟན་པས་རྒྱུད་ཐམས་ཅད་ཀྱི་རྒྱལ་པོར་གསུངས། ཞལ་རྒྱུན་ལ། འདི་གྲུབ་མཐའ་འདི་མན་གྱི་ཡང་རྩེ་ཡིན་པའམ། ཡང་ན་འདིར་ལྷག་པའི་བདེན་པ་དབྱེར་མེད་ཉིད་རྒྱས་པར་བསྟན་པས་བརྗོད་བྱའི་དོན་གྱི་ངོས་ནས་ཐེག་རྩེ་ལའང་དེ་ལས་གཞན་སྟོན་ཏུ་མེད་པའི་ལྡོག་པ་ནས་སོ། །ཞེས་གསུངས། བསྡུས་དོན་ལྟ་བུའི་རྒྱུད་དང་། ཕྱིའི་ཐུགས་རྒྱུད་ཞེས་པའི་ཐད། རིན་པོ་ཆེའི་གསུང་ལས། ཕ་རྒྱུད་མ་ཧཱ་ཡོ་གར་སྣང་ཕྱོགས་ཀྱི་ལྷ་དང་། མ་རྒྱུད་ཨ་ནུ་ཡོ་གར་སྟོང་ཕྱོགས་ཀྱི་ཡེ་ཤེས་གཙོ་བོར་བྱེད་པར་བཤད་པ་དང་སྦྱར་ན་རྒྱུད་འདི་མ་ཧཱའི་ཕྱི་རྒྱུད་དུ་དང་། བསྡུས་དོན་དང་། རྩ་བའི་རྒྱུད་དུ་བཤད་པ་ལ་ངེས་པ་ཆེན་པོ་སྟེར། འདི་ལས་དཔག་ན་འདི་པའི་སྟོང་གཟུགས་ཀྱི་སྐུ་ཡང་ཡེ་ཤེས་རང་སྣང་གི་དཀྱིལ་འཁོར་དང་སྒྱུ་འཕྲུལ་དྲྭ་བའི་གཙོ་ཤོས་སུ་བཤད་དགོས་པས་རྒྱུ་ལུས་སྒྲུབ་ལུགས་དང་མ་འདྲ་རུང་། སྒྱུ་འཕྲུལ་དྲྭ་བའི་སྐུ་ནི་སྒྲུབ་པར་ངེས་པར་འདོད་པར་བྱའོ། །ཞེས་གསུངས་སོ། །ཟིན་བྲིས་ལས། རྩ་བཤད་གཉིས་མི་འགལ་ཏེ། རྒྱུད་ཕྱི་མ་དེ་ཉིད་རྩ་རྒྱུད་ལ་ལྟོས་པས་བཤད་རྒྱུད་དང་། བཤད་རྒྱུད་སྡེ་བཞི་ལ་ལྟོས་པས་རྩ་རྒྱུད་ཡིན་ནོ། །སྤྱིར་མ་ཧཱ་ཡོ་གའི་རྒྱུད་རྣམས་རྒྱན་བདུན་གྱིས་འཆད་པ་ཡིན་ནོ། ། སྔ་རབས་པ་རྣམས་ཀྱིས་འཆད་ཚུལ་ནི། མཚོན་དཔེ་དང་སྦྱར་ཏེ་བཤད་ལུགས་གསུམ་ལས། མདའ་ལྟར་རྩེ་མོ་ནས་བཟུང་སྟེ་འཆད་པ་ཞེས་བྱ་བ་ནི་གསང་བ་ཆེན་པོ་གཞི། སྙིང་པོ་མ་ནོར་བ་ལམ། དེ་ཁོ་ན་ཉིད་ངེས་པ་འབྲས་བུ་སྟེ་མཚན་གྱི་ནང་དུ་ཆོས་ཐམས་ཅད་གཞི་ལམ་འབྲས་གསུམ་དུ་བསྡུས་ནས་འཆད་པ་མདའ་ལྟར་རྩེ་མོ་ནས་བཟུང་སྟེ་བཤད་པའོ། །མདུང་ལྟར་རྐེད་པ་ནས་བཟུང་སྟེ་འཆད་པ་ཞེས་བྱ་བ་ནི་རྩ་རྒྱུད་ལེའུ་ལྔ་པར་རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། མངོན་དུ་གྱུར་པ་འབྲས་བུའི་མཚན་ཉིད་གསུམ་དངོས་དང་ཞར་བྱུང་ཅི་རིགས་པར་བསྡུས་ནས་བཤད་དོ། །རྩ་རྒྱུད་ལེའུ་ཉེར་གཉིས་པར་གཞི་རང་བཞིན་གྱི་སྣང་བ་རྟོགས་བྱར་གདམས་པ། ལོག་རྟོག་འཁྲུལ་བའི་སྣང་བ་དག་བྱར་གདམས་པ། གདུལ་བྱ་ལམ་གྱི་སྣང་བ་བསྒྲོད་བྱར་གདམས་པ། འབྲས་བུ་བདེ་གཤེགས་ཀྱི་སྣང་བ་ཐོབ་བྱར་གདམས་པ་སྟེ། ཆོས་ཐམས་ཅད་སྣང་བ་བཞིར་བསྡུས་ནས་འཆད་པ་ཡིན་གསུངས་པ་རལ་གྲི་ལྟར་ཡུ་བ་ནས་བཟུང་སྟེ་འཆད་པའོ། །གསུང་རྒྱུན་ལས། རྒྱུད་རྒྱུད་ཀྱིས་བཤད་ཅེས་པ་རྒྱས་པ་སོགས་བཤད་རྒྱུད་རྣམས་དང་སྦྱར་ཏེ་འཆད། རྒྱུད་འགྲེལ་བས་བཤད་པ་ནི། རང་རང་གི་འདོད་གཞུང་སོ་སོས་བཤད་པ་སྤར་ཁབ་སོགས་སོ། །རྒྱུད་སྒྲུབ་ཐབས་ཀྱིས་བཤད་པ་ནི། མན་ངག་གི་གཞུང་ཕྲ་མོ་རྣམས་ཀྱིས་རྒྱུད་དོན་དམིགས་ཕྱེ་སྟེ་འཆད་པ་དང་། མན་ངག་གིས་བཤད་པ་ནི། དེ་དག་དང་ཁྱད་པར་ཟབ་ལམ་སྦས་བཤད་རྣམས་སྙན་བརྒྱུད་དང་ལྡན་པའི་བླ་མ་དམ་པའི་གསུང་སྒྲོས་ཀྱིས་བརྒྱན་ཏེ་འཆད་དོ། །ཞེས་གསུངས། ཞལ་རྒྱུན་དུ། རྒྱུད་མན་ངག་གིས་བཤད་པའི་ཐད། བི་མའི་དྲྭ་ཆེན་སོགས་ཀྱི་སྒོ་ནས་རྒྱུད་ཀྱི་སྐབས་དང་སྦྱར་ན་འདི་དང་འདི་སྟོན་གསུངས་པ་ལྟ་བུའོ། །མ་ཧཱ་ཡོ་གའི་རྒྱན་བདུན་སོགས། འདི་སྦས་རྒྱུད་མིན་པར་རིན་ཆེན་ཟ་མ་ཏོག་ཁ་ཕྱེ་བ་ལྟ་བུ་ཡིན་པས་འཆད་ཚུལ་དེ་མི་དགོས་ཞེས་གསུངས། བརྗོད་བྱའི་དོན་བརྟན་བསྡུས་རྟོགས་གསུམ་གྱི་རྡོ་རྗེ་སེམས་དཔའ་དང་སྒྱུ་འཕྲུལ་དྲྭ་བ་རྣམས་སྟོན་པའི་གཞུང་ལའང་བརྗོད་བྱའི་མིང་རྗོད་བྱེད་ལ་བཏགས་ནས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་དང་། དཀྱིལ་འཁོར་གཙོ་བོ་ལ་རྡོ་རྗེ་སེམས་དཔའ་ཞེས་བཏགས་དོན་ནི། སེམས་ཉིད་རང་བྱུང་གི་ཡེ་ཤེས་དེ་ཉིད་ཀྱི་ངོ་བོ་མཚན་མེད་སྟོང་པ་ཉིད་ཡིན་ཀྱང་། སེམས་ཅན་གྱི་བློ་ལ་ལྟོས་ནས་རིག་པ་ཉིད་ཡེ་ཤེས་ཀྱི་འཁོར་ལོའི་ཚུལ་དུ་མཚན་མའི་ཕྱག་རྒྱར་མངོན་པར་སྣང་བའོ། །འཆད་པའི་སྐྱེས་བུ་རིགས་ལྔ་ལས། འདིར་སྟོན་པ་ཀུན་ཏུ་བཟང་པོའི་མདུན་ན་བཞུགས་པའི་ཐུགས་ཀྱི་སྒྱུ་འཕྲུལ་འཆད་པའི་སྐྱེས་བུ་རྡོ་རྗེ་མི་བསྐྱོད་པ་ལ་ཡང་དེ་ལྟར་གྲགས་སོ། ། བཤད་རྒྱུད་མེ་ལོང་གི་ལུང་དོན་ནི། འཁོར་འདས་ཀྱི་ཆོས༵་རྣམས༵་མ༵་ལུས༵་པ་འོད་གསལ་རིག་པའི་ཆོ་འཕྲུལ་ཙམ་དུ་ཟད་པས། རྟོགས་མ་རྟོགས་ཀྱི་བྱེ་བྲག་ལས་འཁོར་འདས་སུ་བཞག་གི། རང་གི་ངོ་བོའི་བཟང་ངན་གཉིས་སུ་གྲུབ་པ་མེད༵་པའི༵་ཕྱིར་ཐམས་ཅད་ཀྱི་རྩ་བ་ནི་རང༵་རིག༵་པ་བྱང༵་ཆུབ༵་ཀྱི་སེམས༵་ཉིད༵་དོ༵། །དེས་ན་འཁོར་འདས་ཐ༵་དད་དུ་༵གྲུབ་པ་མེད༵་པའི༵་རང༵་བཞིན༵་འོད་གསལ་དེ་ཉིད༵་ཀྱིས་ཆོས་ཐམས་ཅད་བསྡུ་བའི་ཕྱིར། རྡོ་རྗེའི་རྡུལ་རྫས་ལྟར་འཁོར་འདས་བཟང་ངན་རིས་ཆད་ཅན་དུ་སོ་སོར་མི་ཕྱེད་ཅིང་མི་ཤིགས་པའི་ཕྱིར༵་རྡོ༵་རྗེ་ཞེས༵་ནི༵་བཤད༵་པ༵་ཡིན༵་ནོ། ། རྡོ་རྗེ་ཞེས་པའི་ཐད། མཚོན་བྱེད་ཀྱི་རྡོ་རྗེ་ཆོས་བདུན་ལྡན་ནི། ས་ཆུ་མེ་རླུང་གི་གནོད་པས་མི་ཚུགས་པས་རིམ་པར་མི་ཆོད་པ་དང་། མི་ཤིགས་པ་དང་། བདེན་པ་དང་། སྲ་བའི་ཁྱད་པར་བཞི་དང་། རྣམ་པ་གཞན་དུ་མི་འགྱུར་བ་དང་། གཟུགས་ཅན་གཞན་ཐོགས་མེད་དུ་ཕུག་པར་ནུས་པ་དང་ཚུར་གང་གིས་ཀྱང་མི་ཚུགས་པས་ན་བརྟན་པ་དང་། ཐམས་ཅད་ལ་ཐོགས་པ་མེད་པ། ཐམས་ཅད་དུ་མ་ཕམ་པ་ཞེས་ཁྱད་ཆོས་བདུན་དང་ལྡན་པ་བཞིན། མཚོན་བྱ་དོན་གྱི་ཡེ་ཤེས་རྟོག་གེའི་བློས་མི་ཆོད་པ་དང་། ཐ་སྙད་ཀྱི་རིགས་པས་ཇི་བཞིན་ཡུལ་མིན་པས་མི་ཤིགས་པ། གནས་ལུགས་ཇི་ལྟ་བ་བཞིན་དུ་བདེན་པ། སྐལ་པ་དམན་པ་རྣམས་ཀྱིས་རྟོགས་པར་དཀའ་བས་སྲ་བ། ངོ་བོ་ལ་འཕོ་འགྱུར་མེད་པས་བརྟན་པ། འཁོར་འདས་ཐམས་ཅད་ལ་ཁྱབ་ཅིང་འཇུག་པའི་ཐོགས་པ་མེད་པས། གང་གིས་ཀྱང་བརྫི་བར་མ་ནུས་པས་མ་ཕམ་པ་སྟེ། རྡོ་རྗེ་ཆོས་བདུན་དང་ལྡན་པ་དེའི་ཡོན་ཏན་འཕགས་ཆེན་རྣམས་ཀྱིས་ཀྱང་བརྗོད་ཀྱིས་མི་ལང་ན་སོ་སོའི་སྐྱེ་བོས་ལྟ་ག་ལ་ཞིག་མཐོང་བར་འགྱུར་རོ། །ཡང་ཟིན་བྲིས་ལས། འཁོར་འདས་ཀྱི་ཆོས་རྣམས་མ་ལུས་པ་སེམས་རང་སྣང་གི་དབང་དུ་བཏང་ན་སྣང་བ་སྣང་ཡུལ། དག་མ་དག་སོགས་གཉིས་ཆོས་ཀྱི་རྣམ་པར་ཡོད་ཀྱང་། ཡེ་ཤེས་རང་སྣང་གི་དབང་དུ་བཏང་ན། དེ་ལྟར་གཉིས་སུ་མེད་པའི་བྱང་ཆུབ་ཀྱི་སེམས་འདི་ཁོ་ན་ཉིད་དོ། །རིག་པ་ནང་གསལ་ལྟར་ན་ཡེ་ཤེས་རང་གི་དབྱིངས་ཁོ་ན་ལས་གཞན་མི་སྣང་བ་དང་། ཕྱི་གསལ་ལྟར་ན་ཡེ་ཤེས་རང་སྣང་གི་ཆོས་ཐམས་ཅད་རང་སྣང་དུ་མཐོང་བ་ལས། གཞན་དུ་མི་སྣང་བས་ན་རང༵་རིག༵་ཅེས་བྱ། དེ་ལྟ་བུའི་དབྱིངས་རིག་ཐ་དད་མེད་པ་སྟེ་དབྱེར་མི་ཕྱེད་པའི་རང་བཞིན་དེ་ཁོ་ན་ཉིད་ལ་རྡོ་རྗེ་ཞེས༵་ནི༵་བཤད༵་པ༵་ཡིན༵་ཏེ། བརྒྱ་བྱིན་གྱི་རྡོ་རྗེ་ནི་ཚུར་གནོད་པ་གང་གིས་ཀྱང་མི་ཚུགས་ཤིང་། ཕར་ལྷ་མིན་གྱི་གྲོང་ཁྱེར་སུམ་བརྩེགས་ཀྱང་འཇོམས་པ་ལྟར་ཚུར་སྤྲོས་པས་བརྫི་མི་ནུས་ཤིང་། དབྱིངས་དེ་མངོན་དུ་གྱུར་ན་ཕར་སྤྲོས་པའི་ཀུན་རྟོག་མཐའ་དག་ཐལ་མར་རམ་ཟང་ཐལ་དུ་འབིགས་པར་བྱེད་པས་ན་རྡོ་རྗེ་དང་མཚུངས་པའོ། །འདིའི་རྐང་པ་དང་པོ་གཉིས་ཀྱིས་སེམས་དཔའི་དོན་དང་ཕྱི་མ་གཉིས་ཀྱིས་རྡོ་རྗེའི་དོན་བཤད་དོ། །དཔེར་ན་བྱས་མི་རྟག་གཉིས་ཕན་ཚུན་ཡིན་ཁྱབ་མཉམ་གྱི་ངོ་བོ་གཅིག་ཡིན་ཀྱང་། བྱས་པ་སྒྲུབ་ཕྱོགས་དང་། མི་རྟག་པ་དགག་ཕྱོགས་ནས་བཞག་པའི་ལྡོག་ཆ་སོ་སོར་ཡོད་པ་བཞིན་དུ་རིག་པ་སྒྲུབ་ཕྱོགས་དང་། དབྱིངས་དགག་ཕྱོགས་ནས་བཤད་པ་ཡིན་གསུངས། གསར་རྙིང་ཐུན་མོང་གི་རྒྱུད་མཉམ་སྦྱོར་ལས། རྡོ་རྗེ་སྟོང་པ་ཉིད་དུ་བཤད། །སེམས་དཔའ་ཡེ་ཤེས་ཆེན་པོ་སྟེ། །དེ་དག་བདག་ཉིད་གྲུབ་པ་ནི། །རྡོ་རྗེ་སེམས་དཔའ་ཞེས་བརྗོད་དོ། །གསུང་རྒྱུན་ལས་སོ། །བཤད་རྒྱུད་མེ་ལོང་ལས། ཆོས་རྣམས་སོགས་ཐད། གསུང་རྒྱུན་ལས། རྡོ་རྗེ་ནི་རང་བཞིན་དབྱེར་མི་ཕྱེད་པའི་ཤེས་རབ་སྟོང་པ་ཉིད་ཡིན་ལ། དེ་ཡང་རྡོ་རྗེ་དེ་རང་བཞིན་གང་དང་དབྱེར་མིི་ཕྱེད་ཅེ་ན། ཆོས་ཐམས་ཅད་ཀྱི་རང་བཞིན་སྟོང་པ་ཉིད་དང་དབྱེར་མི་ཕྱེད་པ་ཡིན་ལ། སྟོང་པ་ཉིད་ལ་རྡོ་རྗེ་ཞེས་བྱ་སྟེ། མཉམ་སྦྱོར་ལས། རྡོ་རྗེ་སྟོང་པ་ཉིད་དུ་བཤད། །ཅེས་སོ། །སེམས་དཔའ་ཞེས་པ་ནི། ཆོས་རྣམས་མ་ལུས་སོགས་རྐང་པ་གཉིས་ཀྱི་བསྟན་ཏོ། །རྡོ་རྗེ་ཆོས་བདུན་མཚོན་བྱ་དོན་ལ་སྦྱར་ན། རིག་པ་གཏིང་གསལ་ཆེན་པོ་ལ་ཆགས་སོགས་ཉོན་མོངས་པའི་རྟོག་པས་མི༵་ཆོད༵་པ། བདེན་འཛིན་སོགས་ཤེས་སྒྲིབ་ཀྱི་རྟོག་པས་མི༵་ཤིགས༵་པ། ཕྱིན་ཅི་མ་ལོག་པར་ཡང་དག་པར་བདེན་པས་བདེན༵་པ༵། སྐྱེ་འཆི་བགྲེས་རྒུད་དང་བྲལ་བས་སྲ༵་བ༵། རིག་སྟོང་ཟུང་འཇུག་ཆོས་སྐུ་ཐིག་ལེ་ཉག་གཅིག་དུས་གསུམ་འཕོ་འགྱུར་དང་བྲལ་བས་བརྟན༵་པའོ༵། །སྲིད་ཞི་དབྱེར་མེད་དུ་ཁྱབ་པས་ཐམས་ཅད་དུ་ཐོགས༵་པ་མེད༵་པ། རང་ངོ་ཡེ་ནས་སྐྱོན་བྲལ་ཡོན་ཏན་ཀུན་ལྡན་དུ་གནས་པས་ཐམས་ཅད་དུ་མ༵་ཕམ་༵པའོ། ། ཀུན་རྟོག་དང་བདེན་དངོས་གཉིས་ཆར་གྱིས་སྟོང་ཞེས་པའི་ཐད། གྲུབ་དབང་རིན་པོ་ཆེས་མཁན་པོ་འཇིགས་འོད་ལ། ཚིག་འདི་རྣམས་བཅོས་དགོས་པས་ད་ཕན་ཆོད་དཔེ་བཅོས་མ་གྲུབ་བར་དུ་སྣང་སེམས་གཉིས་ཀྱིས་སྟོང་པ་ཞེས་སྦྱོར་ལ་ཤོད། ཕྱིས་སུ་འདི་གཉིས་ཀྱང་སྦྱར་རྒྱུ་མིན། འདིར་མ་ཡིན་དགག་བཤད་པའང་བཏགས་པ་ཙམ་ལས་དངོས་མིན་གསུངས། འདི་རྣམས་མཁན་པོ་འཇིགས་འོད་ནས་ཁྲ་བླ་མ་སྦྱིན་པ་ལ་གསུངས། མན་ངག་དང་ལྡན་པས་དེ་ལ་མཉམ་པར་བཞག་པ། ཞེས་པའི་སྐབས། རིན་པོ་ཆེས་བླ་མ་གཏེར་སྟོན་ལ། འོད་གསལ་རིག་པ་ངོ་ལེགས་པར་འཕྲོད་རྗེས་དེ་ལ་མཉམ་པར་བཞག་ན་དབྱིངས་ལའང་མཉམ་པར་བཞག་པ་ཡིན། དབྱིངས་ལ་མཉམ་པར་བཞག་ན་ཡང་འོད་གསལ་ལ་མཉམ་པར་བཞག་པ་ཡིན། དེ་གཉིས་མེ་དང་ཚ་བ་ལྟ་བུ་གདོད་ནས་དབྱེར་མེད་ཟུང་འཇུག་ཆེན་པོར་བཞུགས་པ་ཡིན་གསུངས། གཏེར་སྟོན་ཉིད་ཀྱིས་གསང་སྙིང་འཆད་སྐབས་སུ། །དེ་ལ་ཞེས་པའི་འབྲུ་འགྲེལ་ཚུལ་ཡང་འོད་གསལ་དེ་ལ་ཞེས་པར་སྦྱར་ནས་གསུངས། དེའི་རྒྱུ་མཚན་དབྱིངས་ཡེ་མེ་དང་ཚ་བ་བཞིན་ནམ་ཡང་འདུ་འབྲལ་མེད་པའོ། །ཞེས་གསུངས། དེ་བཞིན་ཏུ་མི་ཕམ་རིན་པོ་ཆེས། གཟུང་འཛིན་གཉིས་སུ་མེད་པ་ཡི། །ཆོས་ཉིད་མཐོང་བ་གང་ཡིན་པ། །རང་སེམས་འདི་ཡི་སྟེང་ལས་ནི། །གཞན་དུ་མྱོང་བ་ཇི་ལྟར་སྲིད། །སྟོང་དང་དབྱེར་མེད་མ་མྱོང་བའི། །ཤེས་པ་རང་བྱུང་ཡེ་ཤེས་མིན། །གང་དུ་དབྱེར་མེད་མྱོང་བའི་ཚེ། །སྟོང་ཕྱིར་མི་སྐྱེ་མི་འགག་ལ། །གནས་མེད་གཟུང་དུ་མེད་པ་ཡི། །རང་བཞིན་འོད་གསལ་གཉུག་མའི་དོན། །རང་བྱུང་ཡེ་ཤེས་གང་ཡིན་པ། །བདེན་གཉིས་དབྱེར་མེད་ཆོས་ཉིད་དོ། །དབུ་མ་ཆེན་པོའི་རང་བཞིན་ཡིན། །ཆོས་དབྱིངས་ཞེས་པ་ཡུལ་དང་ནི། །ཡེ་ཤེས་ཞེས་པ་ཡུལ་ཅན་དང་། །ཡུལ་ཅན་མི་རྟག་ཡུལ་རྟག་པར། །ཇི་སྲིད་སོ་སོར་སྣང་དེའི་རིང་། །དབྱིངས་རིག་དབྱེར་མེད་རང་བྱུང་གི། །ཡེ་ཤེས་རྗེན་པར་མྱོང་བ་མིན། །ཡེ་ཤེས་རྗེན་པར་ངོས་ཟིན་ཚེ། །ཆོས་དབྱིངས་བྱས་ཀྱང་དེ་ག་རང་། །ཡེ་ཤེས་བྱས་ཀྱང་དེ་ག་རང་། །དབྱེར་མེད་བྱས་ཀྱང་དེ་ག་རང་། །དེ་ཉིད་དོན་དམ་གཉུག་མ་དང་། །ལྷན་སྐྱེས་བདེ་ཆེན་ཆོས་ཀུན་གྱི། །ཆོས་ཉིད་ནམ་ཡང་འགྱུར་བ་མེད། །དོན་ལ་སྐྱེ་དང་སྐྱེ་མེད་གཉིས། །སོ་སོར་དབྱེ་བ་ཡོད་ན་འདི། །དབྱིངས་རིག་དབྱེར་མེད་ཆོས་ཉིད་ནི། །ནམ་ཡང་སྲིད་པ་མ་ཡིན་ཏེ། །དེ་ཕྱིར་ལྡོག་པས་ཕྱེ་ན་ཡང་། །དོན་ལ་དབྱེར་མེད་ངོ་བོ་དེ། །གཉིས་སྣང་ཅན་གྱི་བློའི་སྤྱོད་ཡུལ། །ཀུན་ལས་རབ་ཏུ་འདས་ནས་སུ། །སོ་སོ་རང་རིག་གིས་མྱོང་ན། །བརྗོད་མེད་མཉམ་པའི་དོན་ལ་རེག །དེ་ལ་སྣང་སྟོང་གཉིས་སུ་མེད། །ཆོས་དང་ཆོས་ཉིད་དབྱེར་མེད་ལ། །ཡུལ་དང་ཡུལ་ཅན་འབྱེད་དུ་མེད། །ཐིག་ལེ་ཉག་གཅིག་ཆོས་ཀྱི་དབྱིངས། །ཐ་སྙད་ཚིག་གིས་མི་མཚོན་ཀྱང་། །སོ་སོ་རང་རིག་འོད་གསལ་བ། །ཡེ་ནས་བབ་ཀྱིས་གནས་པ་ཡི། །གནས་ལུགས་དོན་ལ་སོམ་ཉི་བྲལ། །ཞེས་གསུངས། ཞལ་རྒྱུན་ལས། རྒྱུད་འདི་ལྟར་ན། དབྱིངས་ཡེ་འདུ་འབྲལ་མེད་པའི་ཡེ་ཤེས་ཉིད་སྐུ་གསུམ་གྱི་ཡོན་ཏན་ཐམས་ཅད་ཀྱི་བདག་ཉིད་ཡིན་པར་ངོ་ལེགས་པར་འཕྲོད་རྗེས་རིག་པ་ཆོས་ཉིད་བཅོས་མེད་དུ་བསྐྱང་བའི་མན་ངག་དང་ལྡན་པས་རིག་ཆ་དེ་ལ་མཉམ་པར་བཞག་མཐུས་ཆོས་ཀྱི་དབྱིངས་སམ་སྟོང་ཉིད་ལ་མཉམ་པར་བཞག་པ་ཡིན་པས་སྟོང་ཉིད་ལ་མཉམ་པར་བཞག་པར་འགྲོ། ཞེས་དང་། རིན་པོ་ཆེས། ཀུན་མཁྱེན་སྔ་ཕྱིས་ལམ་དུས་ཀྱི་འོད་གསལ་འཆར་དུས་རིག་ཆ་སད་དགོས། དབུ་མའི་ལྟ་བ་ཟུར་ནས་མི་དགོས་གསུངས། ཞེས་དང་། ཡེ་ཤེས་རང་ངོ་ལ་ཀུན་གཞིའི་བསླད་ཆ་མ་ཞུགས་པས་སྣང་ཆ་གང་ཡང་ཡེ་ཤེས་སམ་རིག་ངོར་སོང་བ་རིག་པ་ཉིད་སྣང་ཆ་དེ་དང་དེ་ཤར་བར་འཆར་གྱི་ཐ་དད་དུ་མི་འཆར་རོ། །དེའི་སྣང་ཆ་ཐམས་ཅད་རིག་པ་ཉིད་ཀྱིས་བསྡུས་པ་ཡང་ཡིན་ཏེ། གཞི་སྣང་དང་པོ་བཞིན་ནོ། །ཞེས་དང་། དེ་ལྟར་སྣང་བ་གང་དང་གང་རིག་ཐོག་ཏུ་སོང་ཡང་སྣང་བ་དེས་རིག་པ་བཏུམ་རྒྱུའམ་གཡོགས་རྒྱུ་འགེབ་རྒྱུ་མེད་པར་སྣང་བ་དེ་ཉིད་རིག་པ་རང་དུ་ཧྲིལ་གྱིས་འགྲོ་བ་ནི་རིག་པ་ཡུལ་ལ་མི་ཐོགས་པའི་དོན་ཏེ། རིག་པ་ཟང་ཐལ་ཟེར་དོན་དེ་རེད། ཅེས་དང་། དེ་དག་ཀྱང་གཞི་སྣང་གི་རིག་པའི་རང་གཤིས་ལ་ཆོས་ཀུན་མེད་སྣང་སྟོང་གཟུགས་སུ་མཐོང་བའི་རྩལ་རང་ཆས་སུ་ཡོད་པས་ཡིན་གྱི། སྟོང་ཉིད་དེ་ལ་ཐོས་བསམ་སྔོན་སོང་སོགས་ཀྱི་མཐུས་མིན་པས། ཆོས་སྐུ་ཀུན་ཏུ་བཟང་པོ་ལ། །བླ་མ་བྱ་བ་ཡོད་མིན་ཏེ། །རང་སེམས་སངས་རྒྱས་རྟོགས་ཙ་ན། །དུས་གསུམ་སངས་རྒྱས་དགོངས་པ་ཡིན། །ཞེས་གསུངས་སོ། །བླ་མ་འཇིགས་འོད་གསུང་རྒྱུན། མན་ངག་དང་ལྡན་པ་ཞེས་པ་དབྱིངས་ཀྱི་ཚུལ་ལེགས་པར་ངོ་འཕྲོད་པའི་རྣལ་འབྱོར་བས་རིག་པ་བཅོས་མེད་དུ་མཉམ་པར་བཞག་པས། སྟོང་ཉིད་རྟོགས་པ་རང་སྟོབས་ཀྱིས་འོང་བས་ན། ཞེས་དང་། ཟིན་བྲིས་ལས། དབྱིངས་ལ་སྣང་བ་གང་ཡང་མ་གྲུབ་པས་ཞེས་པ། དབྱིངས་དེ་ལ་མཉམ་པར་བཞག་སྟེ་ནམ་མངོན་ཏུ་གྱུར་པ་ན་ཡང་རྗེས་ཐོབ་ཏུ་གང་སྣང་ཐམས་ཅད་ཡེ་ཤེས་ཀྱི་འཁོར་ལོ་ཉག་གཅིག་ཏུ་འཆར་བ་ལས་རང་དབང་བར་གཏན་མི་འཆར་ཏེ། ཡུལ་སྣང་ཐམས་ཅད་ཡེ་ཤེས་ཀྱི་རྣམ་རོལ་ཁོ་ནར་འཆར་བར་འགྱུར་རོ། །ཞེས་དང་། ཞལ་རྒྱུན་ཏུ། རྗེ་བླ་མས་གསང་བ་འདུས་པ་སོགས་ཀྱི་ཟབ་མོའི་ལམ་གྱི་འོད་གསལ་མངོན་ཏུ་གྱུར་དུས་ཟུར་ནས་སྟོང་ཉིད་དྲན་དགོས་ཞེས་གསུངས་པ་དེ། ཐེག་རྩེའི་ལུགས་ཀྱིས་མར་གཞལ་ན། གཞི་རྒྱུད་དེ་ལ། གཞི་གཞི་སྣང་གཉིས་ལས། སྔ་མ་འཆི་འོད་སྟོང་སང་གི་རྣམ་ཅན་གྱི་དང་། གཉིས་པ་ནམ་མཁའ་འོད་གསལ་ནས་ལྷུན་གྲུབ་ལ་ཐིམ་པའི་བར་ལ་གཞི་སྣང་གི་ཡེ་ཤེས་ཏེ། དེ་གཉིས་ལས། སྔ་མ་ནི་ཡེ་ཤེས་རླུང་གིས་མ་བསྐྱོད་པའི་སྐབས་ཀྱི་འོད་གསལ་ཡོན་ཏན་ཕྱིར་མ་མཆེད་པའི་སྐབས་ཡིན་ལ། དེས་ན་ཟབ་རྒྱས་གཉིས་ཐད་ནས་སྟོང་ཉིད་དང་སྦྱར་བ་དང་། རྒྱུ་ལས་སྒྲུབ་ཚུལ་ཡོད་ལ། དེའི་རྒྱུ་མཚན་འདི་དུས་གཞི་སྣང་གི་ཡོན་ཏན་ཕྱི་གསལ་དུ་མཆེད་པའི་སྐབས་ལ་ལྟོས་ན་ཐུམ་ཞད་ཅན་འདྲ་བ་ཡིན་པས་སྟོང་ཉིད་དྲན་དགོས་གསུངས། ཕྱི་མའི་ཕྱོགས་གཙོ་བོར་སྟོན་པས་སེམས་ལས་འདས་པའི་རང་གནས་ཀྱི་ཤེས་རབ་ཀྱི་གནས་ལུགས་སྟོང་པ་ཉིད་རྟོགས་འོང་བའི་ཁྱད་པར་ཡོད་ཏེ། དེའི་རྒྱུ་མཚན་ནི་དང་པོ་གཞུང་འདི་དང་ཐེག་རྩེ་ལྟར་ན་སྤྱིར་སྣང་སྲིད་དག་མཉམ་དུ་བསྟན་པ། དེའི་གནད་མཐར་ཐུག་རིག་པ་སྐུ་གསུམ་གྱི་བདག་ཉིད་དུ་ངོ་སྤྲོད་པའི་ཁྱད་པར་དང་། མངོན་ཏུ་བྱེད་རྒྱུའི་འོད་གསལ་ཡང་ཡེ་ཤེས་རླུང་གིས་བསྐྱོད་པའི་སྐབས་ཀྱི་འོད་གསལ་ཉིད་ལམ་དུ་བྱེད་པའི་ཁྱད་པར། རྫོགས་རིམ་དུས་སུའང་ཕྲ་ཐིག་ལ་སེམས་ཐིམ་པའི་དམིགས་པ་མི་བྱེད་པའི་ཁྱད་པར་གྱིས། གཞི་གཞི་སྣང་གཉིས་ཀྱིས་ཟླས་དྲང་བའི་གཞི་དང་འདྲ་བའི་ལམ་གྱི་འོད་གསལ་ལ་རྩལ་དག་སྡུད་གང་ཐུབ་བྱེད་པ་མ་ཡིན་པས་ཁྱད་པར་གྱི་སེམས་ཀུན་ཡེ་ཤེས། རླུང་ཀུན་ཡེ་རླུང་དུ་གསལ་བར་སད་ནས་རགས་ལུས་ཉིད་ཀྱང་འོད་སྐུར་དེངས་པའི་ཁྱད་པར་ཡོད་པ་ནི། ལམ་སྒྲུབ་ཚུལ་གྱི་ཁྱད་པར་ངོ་སྤྲོད་ཡོད་མེད་ཀྱིས་རེད་གསུངས། ད་ལྟའི་སྐབས་འདིར་ཡང་། དག་པའི་སྣང་བ་ཁོ་ན་ཅན་གྱི་གཞི་དང་སྣང་ཆ་དེ་རགས་པར་མཆེད་པ་ཙམ་ལས་རྩལ་མཆེད་ཅིང་རྒྱས་པའི་སྐབས་ཀྱི་ཡེ་ཤེས་ཡིན་པས་འདི་ངོ་འཕྲོད་ཅིང་སྒོམ་པ་ན་ལམ་ཤིན་ཏུ་མྱུར་བས་ཁྱད་པར་ཆེ་ཞེས་གསུངས། ༈ ཀུན་མཁྱེན་ཆེན་པོས་མ་ཡིན་དགག་ཏུ་གསུངས་པ་ནི། སྤྱིར་དགག་བྱ་བཀག་ཤུལ་དུ་ཆོས་གཞན་འཕང་བ་མ་ཡིན་དགག་ཡིན་ཀྱང་། འདིར་དགག་གཞི་ཆོས་ཉིད་སྤྲོས་བྲལ་ཡིན་པས། དེ་མེད་པ་མ་ཡིན་པ་ཙམ་ལ་དགོངས། སྣང་ཚུལ་ལ་དཔྱོད་པ་ཀུན་ཏུ་ཐ་སྙད་པའི་ཚད་མའི་བདེན་གཉིས་སྐབས་སུ་དོན་དམ་པར་ཟབ་ཞི་སྤྲོས་བྲལ་སོགས་གསུངས་པས་མ་ཡིན་དགག་གསུངས་པ་དེ་ཡང་རྒྱུ་མཚན་དེས་ན་བཏགས་པ་ཙམ་དུ་ཡིན་གྱི་དངོས་མིན་ཏེ། མི་ཕམ་རིན་པོ་ཆེས་གནས་ལུགས་དོན་དམ་དཔྱོད་པའི་དབང་དུ་བཏང་བའི་བདེན་གཉིས་དང་། སྣང་ཚུལ་དཔྱད་པ་ཀུན་ཏུ་ཐ་སྙད་པའི་ཚད་མའི་དབང་དུ་བཏང་བའི་བདེན་གཉིས་ལས་ཀུན་མཁྱེན་ཆེན་པོས་ཟབ་ཞི་སྤྲོས་བྲལ་སོགས་དོན་དམ་དུ་བཞེད་པ་ཕྱི་མའི་སྐབས་ཡིན་ནོ། །ཞེས་གསུངས། ༈ བརྟན་བསྡུས་རྟོགས་གསུམ་སྐབས། ཟིན་བྲིས་ལས། བརྟན་པ་ནི། གྲུབ་ཆེན་སྐྱེ་ཕྲེང་གསོལ་འདེབས་ལས། གདོད་ནས་རྣམ་དག་བྱང་ཆུབ་སེམས་ཉིད་དེ། །དམྱལ་མེས་མ་ཚིག་སོགས་ལྟར། མར་ངན་སོང་གི་སྡུག་བསྔལ་གྱིས་མནར་བ་ན་ཡང་ངོ་བོ་གཞན་དུ་མ་གྱུར་བས། བརྟན་པའི་རྡོ་རྗེ། བསྡུས་པ་ནི། རྫས་མང་པོ་ཕྱོགས་གཅིག་ཏུ་བསྡུས་པ་ལྟ་བུ་མིན་གྱི། རྒྱལ་པོའི་བཀའ་རྟགས་ཀྱིས་འབངས་དབང་དུ་བསྡུས་པ་ལྟ་བུ་སྟེ་ལམ་དུས་སུ་བདེ་བ་ཆེན་པོའི་ཡེ་ཤེས་རྣམས་མངོན་དུ་གྱུར་པ་ན། དེའི་རྗེས་ཐོག་ཏུ་གང་སྣང་དེའི་ཚོས་མདོག་བསྒྱུར་བ་ལྟ་བུ་སྟེ་ཕྱག་རྒྱས་བཏབ་པའོ། །ཞེས་གསུངས། གཞི་ལམ་གང་གི་སྐབས་སུ་ཡང་ཡེ་ཤེས་ཀྱི་ཚུལ་ལས་མ་འདས་པས་ན་བསྡུས་པའོ། །གཉུག་མའི་ཡེ་ཤེས་དེ་ཉིད་སྒྲིབ་བྲལ་དུ་བྱས་པ་ནི་རྟོགས་པ་སྟེ། སྔ་མ་བརྟན་བསྡུས་གཉིས་གནས་ཚུལ་ལ་ཡེ་ནས་དག་པའི་ཆ་ནས་དང་། ཕྱི་མ་རྟོགས་པའི་རྡོ་རྗེ་ཉིད་གློ་བུར་གྱི་སྒྲིབ་པ་བྲལ་བའི་ཆ་ནས་སོ། །ཞེས་གསུངས། གསུང་རྒྱུན་ལས། བརྟན་པ་ནི། གོང་གི་ཤེས་རབ་སྟོང་པ་ཉིད་དེའི་སྣང་ཆ་ཐབས་རིག་པ་རང་བྱུང་གི་ཡེ་ཤེས་ཡིན་ལ། དེ་ལྟར་དབྱིངས་དང་ཡེ་ཤེས་དེ་གཉིས་མེ་དང་ཚ་བ་བཞིན་ཏུ་གདོད་ནས་ཟུང་འཇུག་ཆེན་པོར་བཞུགས་ཤིང་སེམས་ཅན་ནས་སངས་རྒྱས་ཀྱི་བར་དུ་རང་བཞིན་ལ་བཟང་ངན་མེད་ཅིང་། དུས་ཐམས་ཅད་དང་ངོ་བོ་གཞན་དུ་མི་འགྱུར་བར་གནས་པས་ན་བརྟན་པའི་རྡོ་རྗེ་སེམས་དཔའ་ཞེས་བཤད་པའོ། །གཉིས་པ་བསྡུས་པ་ནི། དེ་ཉིད་ཀྱི་ཕྱག་རྒྱས་འཁོར་འདས་ཀྱི་ཆོས་ཐམས་ཅད་ལ་བཏབ་པས་མཉམ་པ་ཉིད་དུ་བསྡུས་ཞེས་པ་ནི། དེ་ཉིད་ཆོས་ཐམས་ཅད་ཀྱི་སྲོག་ཏུ་སོང་བས་དབུས་ན་གནས་ཤིང་སེམས་ཉིད་ཀྱི་ཀློང་དུ་བརྟན་གཡོའི་ཆོས་ཀུན་མཉམ་པ་ཉིད་དུ་བསྡུས་པས་ན་བསྡུས་པའི་རྡོ་རྗེ་སེམས་དཔའ་ཡིན། རིན་པོ་ཆེའི་ཞལ་རྒྱུན་ཏུ། དབྱིངས་ཡེ་ཟུང་འཇུག་གི་བདག་ཉིད་དུ་གནས་པའི་རྟགས་སུ་ཆོས་ཀུན་སྣང་སྟོང་ཟུང་འཇུག་ཡིན་ཞེས་གསུངས། རྟོགས་པའི་སྐབས། གསུང་རྒྱུན་ལས། ཚོགས་ཆེན་གཉིས་རྫོགས་ཞེས་པ་གསུངས། རྣམ་པ་ལས་སྣང་ཆ་སྐུ་དང་ཡེ་ཤེས་ཀྱི་དཀྱིལ་འཁོར་དུ་གོམས་པས་བསོད་ནམས་ཀྱི་ཚོགས་དང་། དོན་དམ་དཀོར་བདུན་ལ་གོམས་པར་བྱས་པས་ཡེ་ཤེས་ཀྱི་ཚོགས་སོ། །སྤྱིར་ཚོགས་གཉིས་ནི་ཡེ་ནས་སྣང་བ་དང་སྟོང་པའི་ཡོན་ཏན་དུ་རྫོགས་ཟིན་པ་ལ་ལྷུན་གྲུབ་ཅེས་བརྗོད་དོ། །གློ་བུར་དུ་བསགས་པ་དེ་ནི་དྲི་མ་སེལ་བྱེད་ཀྱི་རྐྱེན་ཀྱི་ཆ་ཙམ་ལ་རྒྱུ་ཚོགས་གཉིས་ཞེས་བཏགས་པ་ཙམ་ཡིན་ནོ། །གནས་ཚུལ་ལ་གཞི་འབྲས་གཉིས་སུ་མེད་པར་རྟོགས་ནས་དེ་ཉིད་ལམ་དུ་བྱེད་པས་ན་འབྲས་བུ་ལམ་བྱེད་དོ། །ལམ་ལ་བརྟེན་ནས་གནས་ཚུལ་ཇི་ལྟ་བ་བཞིན་མངོན་སུམ་དུ་སྣང་བ་ལ་སྣང་ལུགས་དྲི་བྲལ་གྱི་ཆ་ནས་འབྲས་བུའི་རྡོ་རྗེའོ། ། སྒྱུ་འཕྲུལ་དྲྭ་བ་ནི་ཞེས་པ་ཐབས་སྣང་བའི་ཆ་དང་། ཤེས་རབ་སྟོང་པའི་ཆ་གཉིས་འབྲེལ་བའི་དོན་དེ་ལ་སྒྱུ་འཕྲུལ་དྲྭ་བ་ཞེས་བཤད། ཅེས་གསུངས། ཟིན་བྲིས་ལས་འབྱུང་བ་ལྔའི་བཅུད་འདུས་པའི་ཐིག་ལེའི་ཆ་ཕྲ་བ་ཞེས་པ་ཕ་མའི་ཁུ་ཁྲག་གི་ཐིག་ལེ་སྟེ། དེ་སྦྱོང་བྱེད་བསྐྱེད་རིམ་སྐབས། འབྱུང་བ་རིམ་བརྩེགས་སོགས་ཡིན་ལ། རིས་སུ་མ་ཆད་ཅེས་པ་ཡང་། ཕུང་ཁམས་རགས་པའི་སྣང་བ་སྣ་ཚོགས་པ་སོ་སོར་འཆར་བའི་གཞིར་གྱུར་པའི་ཆ་ནས་བཤད་ཀྱི་འབྲས་དུས་ཀྱི་རིས་མེད་ལྟ་བུ་ལ་གོ་རྒྱུ་མིན། ཞེས་གསུངས། རགས་པ་ཁམས་དྲུག་ལྡན་དུ་ཤར་བ་འཕྲུལ་བ་སྟེ། པགས་པ། ཤ། ཁྲག་རུས་པ། རྐང་། ཁམས་དཀར་དམར་དང་དྲུག་གོ །ཞེས་གསུངས། ཞལ་རྒྱུན་ལས། ཁམས་དྲུག་ལྡན་གྱི་གདུལ་བྱ་ངོས་བཟུང་ཆེད་དོ། །ཞེས་དང་། སྒྱུ་འཕྲུལ་དྲྭ་བ་ཞེས་པ་འདི། རགས་ཕྲ་རྟོགས་དཀའ་སླ་སོགས་ཀྱི་སྒོ་ནས་སྦྱར་དགོས་གསུངས། གསུང་རྒྱུན་ལས། དེ༵་ལྟར༵་སྣང༵་བ༵་སྒྱུ༵་མ༵་ལྟར༵༴ཞེས་པ་ནི། མ་དག་འཁོར་བའི་ཆོས་ཕུང་པོ་ཁམས་དང་སྐྱེ་མཆེད། དག་པ་སྐུ་དང་ཡེ་ཤེས་ཀྱི་སྣང་བ་ཐམས་ཅད་སྒྱུ་མ་ལྟར་རིས་མེད་དུ་འཆར་བའི་གནད་ནི་གདོད་མའི་སྟོང་ཆེན་གྱི་དབྱིངས་ཡིན་ནོ། །ཞེས་གསུངས། ཞལ་རྒྱུན་དུ། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཡིན། །ཞེས་པ་ལྟར་དབྱིངས་ངོར་གང་ཡང་མ་གྲུབ་པས་གང་གི་ཕྱོགས་སུ་མ་ལྷུང་བས་ན་ཅིར་ཡང་འཆར་ཞེས་གསུངས། གསུང་རྒྱུན་ལས། དྲང་དོན་སྒྱུ་འཕྲུལ་དྲྭ་བ་ནི། ངེས་དོན་སྒྱུ་འཕྲུལ་དྲྭ་བ་དེ་ཉིད་རྟོགས་པའི་ཐབས་སུ་འགྱུར་བ་སྟེ། དེའི་མཚོན་བྱེད་ལྷ་ཡབ་ཡུམ་ཟུང་དུ་འཇུག་པ་སྟེ། སྟོང་པ་ཉིད་མཚོན་བྱེད་ལྷ་ཡུམ། རིག་པའི་ཡེ་ཤེས་མཚོན་བྱེད་ལྷ་ཡབ། ཟུང་འཇུག་མཚོན་བྱེད་ལྷ་ཡབ་ཡུམ་འཁྲིལ་སྦྱོར་དུ་བཞུགས་པས་ན། ལྷ་ཡུམ་རྣམས་ནི་སྒྱུ་མ་དང་། ཡབ་རྣམས་ནི་འཕྲུལ་བ་དང་། ཡབ་ཡུམ་ཁ་སྦྱོར་བདེ་བའི་སྐུར་བཞུགས་པ་དྲྭ་བའི་དོན་ཏོ། །དེ་ཡང་གང་དྲང་ན་གང་ཟག་མཚན་མའི་བློ་ཅན་དེ་དྲང་། གང་དུ་དྲང་ན་ངེས་དོན་སྒྱུ་འཕྲུལ་དྲྭ་བ་དེ་ལ་དྲང་། ཚུལ་ཇི་ལྟ་བུའི་སྒོ་ནས་དྲང་ན་ལྷ་ཡབ་ཡུམ་ཐབས་ཤེས་ཕན་ཚུན་འཁྲིལ་སྦྱོར་གྱི་ཕྱག་རྒྱའི་བརྡ་དང་རྟགས་ལ་བརྟེན་ནས་དྲང་པ་ཡིན་ནོ། །བཞི་པ་ལྷ་རྟོག་དབྱེར་མེད་ཀྱི་སྒྱུ་འཕྲུལ་དྲྭ་བ་ནི། རྟོག་ཚོགས་ཀྱི་རང་བཞིན་ལྷར་འཕྲུལ་བ་དང་། ལྷའི་ངོ་བོ་རྟོག་ཚོགས་སུ་སྣང་ཡང་རང་བཞིན་ལྷ་ཡིན་པ་ལས་མ་གཡོས་པའི་ཕྱིར་ན་ལྷ་རྟོག་དབྱེར་མེད་ཅེས་བཤད་དོ། །རྟོག་ཚོགས་ཞེས་པ། འཁོར་བའི་ཆོས་ཕུང་ཁམས་སྐྱེ་མཆེད་ཡུལ་ཡུལ་ཅན་དང་བཅས་པ་ལ་སྒྱུ་མ་དང་། དེ་ཉིད་ལྷར་ཤར་བ་ནི་འཕྲུལ་བའོ། །སྒྱུ་འཕྲུལ་སྔ་མ་གཉིས་ཞེས་པ། རྟོག་ཚོགས་དང་ངེས་དོན་ནོ། །ཙམ་ཞེས་པ་གནས་སྣང་མི་མཐུན་པའོ། ། འདིར་སྟོན་ཞེས་པ་ནི། སྟོན་པས་གདུལ་བྱ་སོ་སོའི་བློ་དང་འཚམས་པར་བསྟན་པའི་ཆོས་ནི་རྒྱ་མཚོའི་རྒྱུད་དེ། དོན་ཟབ་ཅིང་གཏིང་དཔག་དཀའ་བ་རྒྱ་མཚོ་ལྟ་བུ། ཚིག་རྒྱ་ཆེ་ཞིང་མཐའ་ཡས་པ་དེ་ཐམས་ཅད་ཀྱི་བརྗོད་བྱ་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཀྱི་ནང་དུ་རྫོགས་པར་སྟོན་པས་ན། འདིར་སྟོན་ཞེས་བཤད་དོ། །འདིས་སྟོན་ཞེས་པ་ནི། བསྟན་པ་དང་ཐེག་པ་ཐམས་ཅད་ཀྱི་དོན་མ་ལུས་པ་རྒྱུད་ཀྱི་རྒྱལ་པོ་ཆེན་པོ་འདི་ཉིད་ལས་འཕྲོས་ཏེ་སྟོན་པས་ན་འདིས་སྟོན་ཞེས་བཤད་དོ། །འདི་ཕྱིར་སྟོན་ཞེས་པ་ནི། ཐེག་པའི་སྒོ་གང་ནས་ཞུགས་ཀྱང་མཐར་ཐུག་ཐེག་པ་འདི་ལས་མི་འདའ་བས་ཐེག་པ་གཞན་ཐམས་ཅད་འདི་ཉིད་ཀྱི་ལམ་སྟེགས་ཀྱི་ཚུལ་དུ་གསུངས་པ་ཡིན་པས། ལུང་གི་སྤྱི་ཞེས་བཤད་པ་ཡིན་ཏེ། སྒྱུ་འཕྲུལ་རྡོ་རྗེ་ལས། དྲི་མ་མེད་པའི་ལུང་ཉིད་དེ། །ལས་དང་ཡེ་ཤེས་ཕྱི་ཉིད་ཀྱི། །རྫོགས་པའི་རྫོགས་ཕྱིར་ལུང་ཉིད་དོ། །ཞེས་གསུངས་པ་ལྟར་རྒྱ་མ་ལས་ཀྱི་ལུང་མཚན་ཉིད་སྡེ་གསུམ། ཡེ་ཤེས་ལྷའི་ལུང་ཕྱི་རྒྱུད་སྡེ་གསུམ། བྱ་བྲལ་རྫོགས་པའི་ལུང་ནང་རྒྱུད་སྡེ་གསུམ། དེ་དག་གི་ལུང་གི་སྤྱིར་གྱུར་པས་ན་ལུང་གི་སྤྱི་ཞེས་བཤད་པ་ཡིན་ནོ། །ཞེས་གསུངས། ཞལ་རྒྱུན་ལས། གསང་སྔགས་ཕྱི་པའི་མཚན་བཅས་མཚན་མེད་ཅེས་པ། མཚན་བཅས་ནི་ལྷའི་རྣལ་འབྱོར་སྒོམ་པ་དང་། མཚན་མེད་ནི་སྟོང་ཉིད་སྒོམ་པ་སྟེ་དེ་གཉིས་ལ་གོམ་པས་ཡར་འབྲས་བུ་སྐུ་གསུམ་དང་མཐུན་པའི་ལམ་བསྒོམ་ཚུལ་ཡོད་ཀྱང་མར་སྐྱེ་འཆི་བར་དོ་གསུམ་དང་མཐུན་པའི་ལམ་སྒོམ་ཚུལ་མེད་པ་ཡིན་ནོ། །ཞེས་གསུངས། ཞལ་རྒྱུན་དུ། ངེས་པའི་དོན་རྣམས་བསྟན་པར་བཤད་དོ། །ཞེས་པ་རྣམས་ཀྱི་དོན་ནི། རྒྱུད་ཀྱི་བརྗོད་བྱའི་གཙོ་བོ་གཉུག་མའི་སེམས་ཀྱི་རྡོ་རྗེ་དེ་ཉིད་སེམས་ཅན་རྣམས་ལ་སྐད་ཅིག་ཀྱང་མ་བྲལ་བར་རང་ཆས་སུ་གནས་ཀྱང་ཤིན་ཏུ་ཕྲ་ཞིང་ཟབ་པའི་བདག་ཉིད་དུ་གྱུར་པས་རང་བཞིན་གྱིས་གསང་ཞིང་ཕལ་གྱི་སྤྱོད་ཡུལ་དུ་མ་གྱུར་བས་ན་གསང་བའི་རང་བཞིན་བསྟན་ལ། སྙིང་པོའི་སྐད་དོད་གསུམ་པོ་གང་གི་སྒོ་ནས་བཤད་ཀྱང་མདོ་རྒྱུད་ཀྱི་ལམ་གཞན་ལས་ཁྱད་པར་དུ་འཕགས་པའི་ཁྱད་ཆོས་བརྗོད་པས་སྙིང་པོའི་སྒྲས་ནི་རྒྱུད་དོན་གྱི་ཆེ་བ་བསྟན། གཉུག་མའི་འོད་གསལ་གྱི་ཡོན་ཏན་མཐའ་དག་མངོན་དུ་གྱུར་པ་ནི་འབྲས་བུ་མཐར་ཐུག་སྟེ་རྒྱུད་འདིའི་བརྗོད་བྱ་མཐར་ཐུག་ཀྱང་དེ་ལས་གཞན་མ་ཡིན་པས། དེ་ཁོ་ན་ཉིད་དེས་རྒྱུད་དོན་གྱི་མཚན་ཉིད་ངོས་བཟུང་བ་དང་། དེ་ལྟ་བུའི་རྒྱུད་དོན་གདུལ་བྱ་ཁ་དྲང་བ་ཙམ་གྱི་ཆེད་དུ་བསྟན་པ་ཙམ་མིན་པར་ཐུབ་པའི་དགོངས་པའི་ཞེ་ཕུག་ཡིན་པར་ངེས་པས་ངེས་དོན་ཡིན་པར་བསྟན་ནོ། །མདོར་བསྡུས་པས་ནི་སངས་རྒྱས་ཉིད། ཅེས་སོགས་སྒྲས། བསྐལ་པ་བྱེ་བ་གྲངས་མེད་པས། ཇི་སྲིད་སངས་རྒྱས་གང་ཐོབ་པ། །གང་གིས་དམ་པའི་བདེ་བས་ཁྱོད། །སྐྱེ་བ་འདིར་ནི་ཐོབ་པར་འགྱུར། །ཞེས་ལམ་གཞན་གྱི་བསྐལ་པ་གྲངས་མེད་མང་པོས་འཐོབ་དགོས་པའི་སངས་རྒྱས་དེ་ཉིད། སྔགས་བླ་མེད་ཀྱི་ལམ་གྱིས་ཚེ་གཅིག་ལ་འགྲུབ་པ་མྱུར་ལམ་ཁྱད་པར་ཅན་ནི་ལྷན་སྐྱེས་ཀྱི་བདེ་བ་ཉིད་བསྒོམས་པས་འགྲུབ་པར་གསུངས་པ་ཡིན་ནོ། །རྒྱུའི་དེ་ཁོ་ན་ཉིད་ཅེས་པ། ཀུན་རྟོག་གིས་སངས་རྒྱས་ཀྱི་ཡེ་ཤེས་ཀྱི་རྒྱུ་མི་བྱེད་པ་འདི་ཉིད་རྒྱུ་ཡིན་ངེས་ཡིན་པས་སོ། །འབྲས་རྒྱུད་ཉིད་འབྲས་བུ་ཡིན་ངེས་ཡིན་པས་ན་འབྲས་བུའི་དེ་ཁོ་ན་ཉིད་ཅེས་པའོ། །ཞེས་གསུངས། ཟིན་བྲིས་ལས། མཚན་གྲོལ་ལམ་ལྟར་བཤད་ན་རྒྱུད་ལུང་མན་ངག་དང་མཐུན་པར་བཤད་ལ། ནང་གསང་ཐབས་ལམ་ལྟར་བཤད་པ་སྟེང་སྒོ་འཇུ་འདུལ་དང་། འོག་སྒོ་ཁམས་གསུམ་རོལ་བ་དང་སྦྱར་ནས་བཤད་པ་ཡིན། ཡང་འཁོར་ལོ་བཞི་དང་སྦྱར་ནས་མཚན་འཆད་ཚེ། ལྟེ་བ་ན་རྩ་འདབ་དྲུག་ཅུ་རེ་བཞིའི་དབུས་ན། དབྱིངས༵་ཕྱུག༵་ལྔའི་ཐིག་ལེའམ་ཁམས་དམར་པོའི་རང་བཞིན་ཅན་གྱི་ཐིག༵་ལེ༵་ནི་རྟོགས་དཀའ་བས་གསང༵་བ༵་དང༵་། ཡེ་ཤེས་སྙིང་པོའམ་སྲོག་མི་ཤིགས་པའི་ཐིག་ལེ་ན་སོགས། མཁའ་འགྲོ་མ་རྔམས་མའི་ཐིག་ལེ༴ཀུན་ཏུ་བཟང་པོའི་ཐིག་ལེ་ནི་བདེ་ཆེན་ཡེ་ཤེས་བསྐྱེད་པར་ངེས་པས་ངེས༵་པ༵་ཞེས་བཤད་དོ། །ཞེས་གསུངས། གསུང་རྒྱུན་ལས། ལྟེ་བ། སྙིང་ཁ། མགྲིན་པ། སྤྱི་བོ་རྣམས་ལ་རྩ་འདབ་རིམ་པར་དྲུག་ཅུ་རྩ་བཞི་དང་། བརྒྱད་དང་། བཅུ་དྲུག་དང་། སོ་གཉིས་དག་གི་དབུས་ན་རིམ་པར་དབྱིངས་ཕྱུག་ལྔའི་ཐིག་ལེ་ཨའི་རྣམ་ཅན་དང་། སྙིང་གར་དྭངས་མ་ལྔའི་དབུས་ན་ཡེ་ཤེས་སྙིང་པོའི་ཐིག་ལེ་དང་། མགྲིན་པར་མཁའ་འགྲོ་མ་རྔམས་མའི་ཐིག་ལེ་ཨཾ་ཡིག་གི་རྣམ་པ་ཅན། སྤྱི་བོར་དཀར་ཆ་ཧཾ་གི་རྣམ་ཅན་ཏུ་གསུངས། ཞལ་རྒྱུན་ལྟར་ན། སྤྱི་བོ་དང་མགྲིན་སྙིང་ལྟེ་བ་བཞི་པོ་ལ། དང་པོ་ལ་གནད་དུ་བསྣུན་པས་བདེ་ཆེན་སྐྱེ་བས་རྐྱེན་དང་མཐར་བདེ་ཆེན་ཡེ་ཤེས་ཀྱི་སྐུ་ཐོབ་བྱེད་ཡིན་པས་བདེ་ཆེན་འཁོར་ལོ་དང་། གཞི་དུས་ཟས་ལ་ལོངས་སྤྱོད་པས་དང་དེ་ལ་གནད་དུ་བསྣུན་པས་ལོངས་སྐུ་ཐོབ་པས་དང་། སྙིང་ཁའི་འཁོར་ལོ་ལ་གནད་དུ་བསྣུན་པས་ཆོས་སྐུ་ཐོབ་པ་དང་། དེ་བཞིན་ལྟེ་བ་དང་སྤྲུལ་པའི་སྐུ་འཐོབ་བྱེད་དུ་འགྱུར་བས་སྤྲུལ་པའི་འཁོར་ལོ་ཞེས། འདི་དག་གི་སྐབས་སུ་འཁོར་ལོ་ནི་གཅོད་བྱེད་རྩིབས་དང་ལྡན་པ་ཡིན་པ་ལྟར། འདི་དག་ལ་གནད་དུ་བསྣུན་ན་རྟོག་སྒྲིབ་གཅོད་པས་སོ། །ཞེས་གསུངས། ཟིན་བྲིས་ལས། སྟེང་སྒོ་དང་སྦྱར་ནས་བཤད་ཀྱང་རུང་མོད། འདིར་འོག་སྒོ་དང་སྦྱར་ནས་བཤད་ན། རྩ་གནས་ཀྱི་ཐིག་ལེ་སོགས་ལུས་ཀྱིས་ཁྱབ་ཚད་རྩས་ཁྱབ། རྩས་ཁྱབ་ཚད་ཐིག་ལེས་ཁྱབ། ཐིག་ལེས་ཁྱབ་ཚད་བདེ་བའི་ཡེ་ཤེས་ཀྱི་རོས་ཁྱབ། རྣལ་འབྱོར་བས་ཐིག་ལེ་དབབ་ལྡོག་བྱས་ནས་ལྷན་སྐྱེས་བདེ་ཆེན་ཡེ་ཤེས་མངོན་ཏུ་མྱོང་། ཞེས་སོ། ། གླེང་གཞིའི་ཐད། གསུང་རྒྱུན་ལས། ཕུན་སུམ་ཚོགས་པ་ལྔ་པོ་དེ་རྒྱུད་འབྱུང་བའི་རྒྱུ་ཡང་ཡིན། རྒྱུད་གླེང་བའི་གཞི་ཡང་ཡིན་པས་ན་གླེང་གཞི་ཞེས་བཤད་པ་ཡིན་གསུངས། གླེང་གཞིའི་སྐད་དོད་ད་ན་ཞེས་པ་སྦྱིན་པ་ལ་འཇུག་སྟེ། དེ་ཡང་གང་སྦྱིན་ན་ཡིད་ཆེས་ཀྱི་ངེས་པ་སྦྱིན། གང་ལ་སྦྱིན་ན་བཀའ་ཡིན་མིན་དུ་རྟོག་པའི་ཐེ་ཚོམ་ཅན་དེ་ལ་སྦྱིན། ཚུལ་ཇི་ལྟ་བུའི་སྒོ་ནས་སྦྱིན་ན་ཕུན་སུམ་ཚོགས་པ་ལྔའི་ལོ་རྒྱུས་བརྗོད་པའི་སྒོ་ནས་སྦྱིན་པའོ། ། གནས་སྙིང་ག་ཆོས་ཀྱི་འཁོར་ལོའི་རྩ་བཞི་ནི། ཟིན་བྲིས་ལས། མདུན་ཆོས་ཉིད་ཀྱི་རྩ་གསུམ་དཀར་པོ་དབྱིབས་ཟླུམ་པོ་ཝཾ༵། གཡས་ཡེ་ཤེས་ཀྱི་རྩ་གཅིག་འོད་སེར་པོ་དབྱིབས་གྲུ་བཞི་མ༵། གཡོན་ཡོན་ཏན་གྱི་རྩ་གཅིག་འོད་དམར་པོ་དབྱིབས་ཟླ་གམ་ཡ༵། རྒྱབ་རང་རྒྱུད་ཀྱི་རྩ་གསུམ་འོད་དམར་ནག་གྲུ་གསུམ་ཨེས༵་མཚན་པ། དྭངས་མ་ལྔའི་ཐིག་ལེ་ནི། སའི་དྭངས་མ་རྩ་དར་དཀར་གྱི་སྐུད་པ་ལྟ་བུ་རྟ་རྔ་བཅུ་གཤགས་ཙམ། དེའི་དབུས་ན་ཆུའི་དྭངས་མ་རྒྱ་མཚལ་ཅོག་ལའི་ཁུ་བ་ལྟ་བུ། དེའི་དབུས་ན་མེའི་དྭངས་མ་མེ་ལོང་ཉི་མ་ལ་བཞག་པའི་ངད་པ་ཙམ། དེའི་དབུས་ན་རླུང་གི་དྭངས་མ་གསེར་ས་འོག་ན་ཡོད་པའི་རླངས་པ་ནམ་མཁའ་ལ་རྒྱུ་བ་ཙམ། དེའི་དབུས་ན་ནམ་མཁའི་དྭངས་མ་སང་སང་པོའམ་གོ་འབྱེད་པའི་རྣམ་པར་གནས་པ། དེ་ལྟ་བུའི་དྭངས་མ་ལྔ་འདུས་ཀྱི་དབུས་ན་ཡེ་ཤེས་སྙིང་པོའི་ཐིག་ལེ་སྟོང་གསལ་འགགས་མེད་ཡི་གེ་ཝཾ་དབྱིབས་ཀྱི་རྣམ་པར་གནས་པ་དེ་ནི་སྟོན་པ་ཕུན་སུམ་ཚོགས་པ་སྟེེ། དེ་ཉིད་མར་མེ་གསལ་བྱེད་གཞན་ལ་ལྟོས་མི་དགོས་པ་བཞིན་རང་གིས་རང་ལ་བདེ་བ་གསལ་བར་སྟོན་པས་ན་སྟོན་པའོ། ། འཁོར་༵རྩ༵་འདབ༵་ལ༵་རྒྱུ༵། ཞེས་པའི་ཐད། ཆོས་ཉིད་ཀྱི་རྩ་ལ་ཀུན་གཞིའི་རྣམ་ཤེས་དང་། ཡེ་ཤེས་ཀྱི་རྩ་ལ་ཡིད་ཀྱི་རྣམ་ཤེས། ཡོན་ཏན་གྱི་རྩ་ལ་ཉོན་ཡིད། རང་རྒྱུད་ཀྱི་རྩ་ལ་སྒོ་ལྔའི་རྣམ་ཤེས་གནས་སོ། །པདྨ་ལས་བཞིའི་དབྱིབས་ཅན་ནི། གནས་ཡིན་ཏེ་ཁྱམས་གྲུ་བཞི། སྒོ་གྲུ་གསུམ། དབང་ཕྱུག་གི་སྣ་རྩེ་ཟླུམ་པོ། སྐྱེ་གནས་ཟླ་གམ་ནོར༵་བུའི༵་དབུས༵་ན༵་རྩ་ས་ཡ་ཕྲག་གསུམ་གྱི་བཅུད་འདུས་པ་ཀུན་རྫོབ་ཀྱི་ཐིག་ལེ་ཝཾ་གྱིས་མཚན་པར་བཞུགས་པ་སྟོན་པ། མ་དཱ་སྡོམ་བྱེད་དང་མ་ནུ་ཡིད་ལ་འཇུག་པས་བྱེད་པ་སྡོམ་པའི་ཡིད། འདི་དོན་རྩ་རླུང་གི་བྱེད་པ་སྡོམ་པའོ། །རླུང་རྔུབ་པ་དང་། སྡོམ་པ་སོགས་བྱེད་པའོ། །རྩ་ཁ་ཁ་མུ་ཁ་དང་རྡོ་རྗེ་ནོར་བུའི་རྩ་གཉིས་དཀྱིལ་ཀྲུང་དུ་བསྣོལ་ནས་བྱང་སེམས་དཀར་དམར་ཕན་ཚུན་ཞལ་མཇལ་ནས་འདུ་ཤེས་གསུམ་ལྡན་གྱིས་མཚན་རྟོག་སྡོམ་པར་བྱེད་པའི་གསང་བའི་རྣམ་ཤེས་ཀྱི་རེག་བདེ་ཉམས་སུ་མྱོང་བའི་ཆ་ནས་འཁོར་དང་ཐབས་ལམ་གྱི་སེམས་ལྔ་ཞེས་པ། རྩ་ཁམས་ནས་ཁམས་དང་པོ་གཡོ་བ་གཡོ་ལྡང་། རྩ་ལམ་ནས་འཇུག་པ་འཇུག་པ། རྩ་གནས་དང་པོ་རྣམས་ནས་ཁམས་དང་ལྷན་ཅིག་ཏུ་བདེ་བ་སྔ་མ་འཇིག་ཅིང་ཕྱི་མ་འབྱུང་བ་འཇིག་འཇུག །བདེ་བ་སྔ་མ་ལས་ཕྱི་མ་ལྷག་པས་ཕྱི་མ་ལ་སྨོན་པ་སྨོན་པ། དབུ་མའི་མར་སྣེ་ནས་ཁམས་དཀར་དམར་ཞལ་མཇལ་ཞིང་ལྷན་སྐྱེས་ཀྱི་བདེ་བ་ཆེན་པོ་སྐྱེས་པ་ན་འདོད་དོན་མཐར་ཕྱིན་བྱང་ཆུབ་ཀྱི་སེམས་ཞེས་བྱའོ། །མངོན་བྱང་ལྔའི་སྐབས། དཀར་ཆ་དག་པ་སྐུ། དམར་ཆ་དག་པ་གསུང་། དྲན་རིག་དག་པ་ཐུགས། རྩ་ཁམས་དག་པ་ཡོན་ཏན། རླུང་ཁམས་དག་པ་ཕྲིན་ལས། ཞེས་དང་། ཡང་ལས་རླུང་དག་པ་ཡོན་ཏན་རྡོ་རྗེ། ཆ་མཉམ་དག་པ་ཕྲིན་ལས་གཉིས་ལ་སྦྱོར། ཡང་སྐུ་རྡོ་རྗེ་རྣམ་སྣང་། གསུང་སྣང་མཐའ། ཐུགས་མི་བསྐྱོད་པ། ཡོན་ཏན་རིན་འབྱུང་། ཕྲིན་ལས་དོན་གྲུབ་བོ། །ཁམས་དཀར་པོ་མས་ནས་དང་། དམར་པོ་སྤྱི་གཙུག་ནས་བརྩེགས་པའམ་དག་པ་ལས་ཡས་བབ་དང་མས་བརྟན་གྱི་བདེ་བ་མཐར་ཕྱིན་ནས་མངོན་པར་བྱང་ཆུབ་པར་འགྱུར་རོ། །གསུང་རྒྱུན་ལ། དཀར་ཆ་ཐུར་དུ་འགྲོ་བ་གྱེན་དུ་སོང་སྟེ་དཀར་ཆ་ཆུའི་རང་བཞིན་སྤྱི་བོར་དག་པས་སྐུ་རྡོ་རྗེ་ཐོབ། དམར་ཆ་མེའི་རང་བཞིན་གྱེན་དུ་འགྲོ་བ་ཐུར་དུ་སོང་ནས་རྡོ་རྗེ་ནོར་བུའི་རྩེར་འགགས་པས་དམར་ཆ་དག་པས་གསུང་རྡོ་རྗེ་ཐོབ། དཀར་དམར་བར་གྱི་འབྲེལ་བྱེད་པའི་རླུང་དག་པས་ཐུགས་རྡོ་རྗེ་ཐོབ། དེ་གསུམ་འགྱུར་བ་མྱོང་བའི་ཤེས་རིག་དག་པས་ཡེ་ཤེས་རྡོ་རྗེ་ཐོབ་སྟེ་སྐུ་བཞིི་ཡེ་ཤེས་ལྔའི་ངོ་བོར་སངས་རྒྱས་པས་ན། སྟོན་འཁོར་དགོངས་པ་དབྱེར་མེད་དུ་གྱུར་པ་ནི་ཐུན་མོང་མ་ཡིན་པའི་གླེང་བསླང་ངོ་གསུངས། འོག་མིན་ཐད་དོན་གྱིི་དང་། རིག་པའི། གསང་བའི། འཇིག་རྟེན་གནས་ཀྱི། དབང་ཕྱུག་ཆེན་པོའི་འོག་མིན་དང་ལྔ་ལས། དང་པོ་ནི། གསུང་རྒྱུན་ལས། ཆོས་ཀྱི་དབྱིངས་ལ་གྲགས་ཏེ། དེ་ཉིད་སངས་རྒྱས་ཐམས་ཅད་ཀྱི་རྟེན་གནས་སོ། །རྣམ་རྟོག་དང་མཚན་མ་གང་གི་འོག་ཏུ་མ་གྱུར་བའོ། །གཉིས་པ་ཆོས་དབྱིངས་དེ་རྟོགས་པའི་རང་རིག་པའི་ཡེ་ཤེས་ལ་བྱ་སྟེ་གཉིས་འཛིན་གྱི་འོག་ཏུ་མ་གྱུར་པས་སོ། །གཞན་ཏུ་ན་ལོངས་སྐུའི་ཞིང་དང་ཆ་མཐུན་པར་ལྷག་པའི་ཏིང་ངེ་འཛིན་གྱི་དཀྱིལ་འཁོར་བསྒོམ་པ་ལའང་དེ་ལྟར་གྲགས་པའི་ཕྱིར་རོ། །གསུམ་པ་ནི། ཡུམ་གྱི་མཁའ་ལ་གྲགས་ཏེ། སྟོན་པ་གསང་བའི་སྐུའི་བཞུགས་གནས་ཡིན་ཅིང་། མཚན་མའི་རྟོག་པ་རང་རྒྱུད་པའི་འོག་ཏུ་མ་གྱུར་བས་སོ། །བཞི་པ་ནི་གཟུགས་ཁམས་གནས་རིས་བཅུ་བདུན་གྱི་ཡ་མཐའ་གཙང་མ་རིས་ཀྱི་ལྷ་ལྔའི་དང་པོ་སྟེ། གཟུགས་ཅན་གྱི་གནས་གཞན་གྱི་འོག་ཏུ་མ་གྱུར་བས་སོ་གསུངས། ལྔ་པ་དབང་ཕྱུག་ཆེན་པོའི་འོག་མིན་ནི། སྐབས་འདིར་བསྟན་གྱི་གཞུང་ལོངས་སྐུའི་གནས་སུ་གྱུར་པ་འོག་མིན་ཆེན་པོའོ། །དེ་ཡང་སངས་རྒྱས་ཀྱི་ཞིང་ནི་རང་ཉིད་གང་ན་གནས་པའི་རང་སྣང་ཡིན་པས་མ་དག་པའི་ཞིང་སྤངས་པའི་ཕ་རོལ་ན་དག་པའི་ཞིང་གཞན་བློས་བཙལ་དུ་མེད་དེ། །རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། །སོགས་ལྟར་རོ། །ཞེས་གསུངས། ཡང་ཟིན་བྲིས་ལས། དྲི་མ་མཐའ་དག་དང་བྲལ་བས་ཆོས་དབྱིངས་མཐར་ཐུག་དོན༵་གྱི༵་འོག་མིན། དེ་ཡུལ་ཅན་བདེ་བའི་ཡེ་ཤེས་རིག༵་པའ་ི༵འོག་མིན། རྡོ་རྗེ་བཙུན་མོའི་པདྨ་གསང༵་བའི༵་འོག་མིན། གནས་གཙང་གི་འོག་མིན་འཇིག་རྟེན་འོག་མིན། སྟུག་པོ་བཀོད་པ་དབང་ཕྱུག་ཆེན་པོའི་འོག་མིན། རྣམ་པར་དག་པའི་ཞིང་ཁམས་སོགས་ལྟར་རོ། །འགྲེལ་ཆུང་ལས། གཞན་ཡང་གཞི་དང་རྒྱུ་དང་སོགས། གསང་བདག་ཞལ་ལུང་སོགས་ན་གསལ་བར་བཞུགས་པས་མ་བྲིས། ཡེ་ཤེས་ཀྱི་དེ་ཉིད་ལ་རང་བཞིན་ཞེས་པ་རང་སྣང་གི་དཀྱིལ་འཁོར་དེ་ཉིད་ཡེ་ཤེས་ཉག་གཅིག་ལས་གྲུབ་པའི་ཆ་ནས་རང་བཞིན་ཞེས་མདོར་ན་ཡེ་ཤེས་ཀྱི་རང་བཞིན་ལས་གྲུབ་པས་ན་རང་བཞིན་ནོ། །གཟུགས་ཀྱི་རྣམ་པ་ཞེས་པ། དབྱིབས་དང་ཁ་དོག་སོགས་ཀྱི་རྣམ་པ་ལ་ངོ་བོ་ཞེས་བཏགས་པ་དང་། རང་བཞིན་ཆོས་སྐུའི་ཕྱོགས་ནས་ཞེས་པ། གོང་བསྟན་གྱི་རང་བཞིན་དང་གཅིག་ཡིན། གཟུགས་ཀྱི་རྣམ་པ་ལ་བཏགས་པ་དང་ངོ་བོ་གཟུགས་སྐུའི་ཕྱོགས་ནས་བསྟན་པ་གཉིས་གཅིག་ཡིན་ནོ། ། སྟོན་པའི་རང་བཞིན་སྐབས། ཆོས་ཉིད་དེ་བཞིན་ཉིད་ཀྱི་དོན་སྒྲིབ་བྱེད་ཀྱི་ཞེན་པ་དང་བྲལ་བས་ནར་སོན་ཞིང་དེའི་ངོ་བོ་མངོན་དུ་གྱུར་བས་ན་དེ༵་བཞིན༵་ཉིད༵་དུ༵་སོགས། དེའི་དབང་གིས་རང་བྱུང་ཡེ་ཤེས་ལ་སྤང་བྱ་མ་གྲུབ་པས་ན་མི་འགྱུར། མི་བསླུ་བས་ན་ཡང་དག་པ་དང་། ཆོས་ཉིད་དེ་ཡི་ཀློང་ན་འབྲས་བུ་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྫོགས་པར་རང་སྣང་བས་ནང་ཡོ༵ན་ཏན་༵མ༵་བཙལ༵་ལྷུན༵་གྱི༵༴སོགས། གཟུང༵་དུ༵་མེད༵་པས༵་སྒྲིབ་བྲལ་གྱི་ཡེ་ཤེས་མཐའ་དབུས་མེད་པར་བརྡལ་བས་ན། མཐའ༵་དབུས༵༴སོགས། སྤངས༵་རྟོགས༵་སོགས། སྒྲིབ་པའི་ཆ་ཤས་ཕྲ་མོ་ཙམ་ཡང་མི་གནས་པ་དང་། ཤེས་རབ་ཁྱད་པར་ཅན་དང་དམིགས་མེད་སྙིང་རྗེའི་སྟོབས་ཀྱིས་སྲིད་ཞི་སོགས། ཡང༵་ན༵་སོགས། ནས་མཚན་མའི་ཡུལ་ཅན་གང་གིས་མཚོན་དུ་མེད་པ། རྣམ་རྟོག་གིས་ཇི་བཞིན་མཚོན་དུ་མེད་པའི་འབྲས་བུ་ལ་མངའ་མཛད་པས་བདུད་བཞི་བཅོམ་པ་དང་ཆེ་བའི་ཡོན་ཏན་ཐམས་ཅད་ལ་མངའ་མཛད་ཀྱང་རང་གི་ངོ་བོ་ཚིག་གིས་ཇི་བཞིན་བསྟན༵་དུ༵་མེད༵་པའི༵༴མཉམ་པ་ཉིད་མངོན་དུ་མཛད་ཅེས་པ། འཁོར་འདས་མཉམ་པ་ཉིད་ཀྱི་དོན་མངོན་དུ་མཛད་པས་ཆོས་ཐམས་ཅད་ལ་སྤྱད་བྱ་སྤྱོད་བྱེད་དུ་འཛིན་པའི་ཞེན་པ་དང་བྲལ་བའི་སྒོ་ནས་ལོངས་སྤྱོད་པས་ན་སྤྲོས་པ་ཐམས་ཅད་དང་བྲལ་བའི་རང༵་བཞིན༵་ཞེས༵་ཀྱང༵་བྱའོ། །ཞེས་གསུངས། ཞལ་རྒྱུན་དུ། མཉམ་པ་ཉིད་ལྷག་པའི་བདེན་དབྱེར་མེད་དུ་ཆོས་ཐམས་ཅད་དུས་གསུམ་དུ་མཉམ་པའི་ཚུལ་མངོན་དུ་སོགས་སྦྱར། ཕྱོགས༵་བཅུའི༵་དུས༵་བཞིའི༵༴སོགས་ཕྱོགས་དུས་ཀྱི་བསྡུས་པའི་དེ་བཞིན་གཤེགས་པ་ཐམས་ཅད་ཀྱི་ཆེ་བའི་ཡོན་ཏན་གྱི་རྟེན་བྱེད་པའི་ཆ་ནས་སྐུ་ལྔ་དང་། ཆོས་བརྡ་སྤྲོད་པའི་ཆ་ནས་གསུང་ལྔ། མི་གཡོ་བའི་ངོས་ནས་ཐུགས་ལྔ། དགོས་འདོད་འབྱུང་བའི་ངོས་ནས་ཡོན་ཏན་ལྔ། གཞན་དོན་མཛད་པའི་ཕྲིན་ལས་ལྔ་སྟེ། འབྲས་ཆོས་ཉེར་ལྔར་སྣང་བས་གཅིག་གི་རང་བཞིན་དང་བྲལ། འབྲས་ཆོས་ཉེར་ལྔ་པོ་དེ་རང་བྱུང་གི་ཡེ་ཤེས་སུ་འདུས་ཤིང་རིགས་ལྔ་ཡང་རིགས་དྲུག་པར་འདུས་པས་ན་དེ་བཞིན་གཤེགས་པ་ཐམས་ཅད་ཀྱི་བདག་ཉིད་གཅིག་དང་དུ་མ་དང་བྲལ་བའི་རང་བཞིན་གཉིས་སུ་མེད་པའི་བདག་ཉིད་ཆེན་པོ་དུས་གསུམ་འདུ་འབྲལ་མེད་པའི་རང་བཞིན་ནོ། །ཞལ་རྒྱུན་ལྟར་ན། ཕྱོགས་དུས་ཀྱི་རྒྱལ་བ་ཐམས་ཅད་རིགས་ལྔར་འདུ་ཞིང་དེ་དག་ཁྱབ་བདག་རིགས་དྲུག་པ་ལ་འདུ་བས་ཕྱོགས་དུས་རྒྱལ་བ་ཐམས་ཅད་ཀྱི་བདག་ཉིད་ཡིན་པས་གཅིག་དང་། དེ་ཐམས་ཅད་རིགས་དྲུག་པ་གཅིག་ཡིན་པས་དུ་མ་དང་བྲལ་བ་སྟེ། ལྷག་བདེན་སྤྱི་ཡི་སྟེང་ནས་གོ་དགོས་གསུངས། ཟིན་བྲིས་ལས། ལོངས་སྐུ་གཅིག་གི་ཞིང་ཁམས་བཤད་པ་དང་གཏན་ལ་ཕབ་པས་ལོངས་སྐུ་ཐམས་ཅད་ཀྱི་ཞིང་ཁམས་བཤད་པ་དང་གཏན་ལ་ཕབ་པར་འགྱུར་ཡང་ཐམས་ཅད་ཆུ་དང་འོ་མ་འདྲེས་པ་ལྟར་མིན་པས་གཅིག་དང་བྲལ། སངས་རྒྱས་གཅིག་གི་ཕྲིན་ལས་དང་སངས་རྒྱས་ཐམས་ཅད་ཀྱི་ཕྲིན་ལས་མི་འདྲ་བ་མེད་པ་སོགས་ཀྱིས་དུ༵་མ༵་དང༵་བྲལ༵་བའི༵་རང༵་བཞིན༵། ཞེས་སོ། །ཞལ་རྒྱུན་ཏུ། རྟག༵་ཁྱབ༵་ཏུ༵་བཞུགས༵་པ༵༴ལྷག་བདེན་དེ་གཉིས་ལ་རྟག་ཏུ་མཉམ་པར་བཞག་པས་གཉིས༵་སུ༵་མེད༵་པའི༵་སོགས༴གསུངས་སོ། །ཟིན་བྲིས་ལས། མདུན༵་དང༵་རྒྱབ༵་སོགས༴བདེ་གཤེགས་རང་སྣང་ལ་སྐུ་མདུན་དང་རྒྱབ་མ་གྲུབ་ཅིང་གདུལ་བྱའི་སྣང་བ་ལ་རིས་མེད་པར་ཞལ་ཐ་ལེར་གཟིགས་པ་ནི་རྣམ་མཁྱེན་གྱི་ཡེ་ཤེས་ཀྱིས་ཆོས་ཀུན་གཟིགས་པའི་རྟགས་སོ། ། ལོངས༵་སྐུའི༵་བདག༵་ཉིད༵༴ཐུན་མོང་མཚན་དཔེ་ཕྱག་ཞབས་འཁོར་ལོས་མཚན་སོགས་སོ་གཉིས། ཐུབ་པའི་སེན་མོ་ཟངས་མདོག་དང་སོགས་དཔེ་བྱད་བརྒྱད་བཅུ་མངའ་བའོ། །གཉིས་པ་ཁྱད་པར་གྱི་མཚན་དཔེ་ལའང་ཕྱི་ནང་གསང་གསུམ་ལས། དང་པོ་ཕྱིའི་མཚན་དཔེ་ནི། སྟོན་པའི་ཐུགས་མེ་ལོང་སོར་རྟོག་བྱ་གྲུབ་མཉམ་ཉིད་ཡེ་ཤེས་བཞི་པོ་རེ་རེའང་བཞི་བཞིར་ཕྱེ་བའི་ཡེ་ཤེས་བཅུ་དྲུག་གི་རྩལ་སེམས་དཔའ་བཅུ་དྲུག །དེའི་ཡུལ་ཆོས་དབྱིངས་བཅུ་དྲུག་ལས་སེམས་མ་བཅུ་དྲུག་སྟེ་མཚན་སོ་གཉིས་དང་། སེམས་དཔའ་བཅུ་དྲུག་པོར་ཡེ་ཤེས་ལྔའི་རྟགས་རིགས་ལྔས་དབུར་བརྒྱན་པའི་ལྷ་བརྒྱད་ཅུ་ནི་དཔེ་བྱད་བརྒྱད་ཅུའོ། །གཉིས་པ་ནང་གི་མཚན་དཔེ་ནི། སྤྱི་བོའི་རྩ་འདབ་མཚན་༣༢། མགྲིན་པའི་༡༦། སྙིང་ཁའི་༤། ལྟེ་བའི་དྲུག་ཅུ་རྩ་བཞིའི་སྟོང་པའི་རྩ་བཞི་ཕྲི་ལྷག་༦༠། དེ་དག་བསྡོམ་པས་དཔེ་བྱད་དོ། །གསུམ་པ་ནི། རྟེན་ཉི་ཟླ་གཉིས་ཀྱིས་དབྱེ་བས་དགའ་བ་མཚན་༣༢དང་། ཟླ་བ་མས་བརྟན་གྱི་དགའ་བ་བཅུ་དྲུག་ལ་ཡེ་ཤེས་ལྔ་ལྔའི་རོས་ཁྱབ་པ་ནི་དཔེ་བྱད་ཡིན་ནོ། །སྙིང༵་རྗེ༵་ཆེན༵་པོ༵་དང༵་། མི༵་དམིགས༵་པའི༵་ཤེས༵་རབ༵་ལ༴ཐུན་མོང་དང་ཐུན་མོང་མིན་པའི་དམིགས་མེད་སྙིང་རྗེ་དང་ཤེས་རབ་བོ། བཞུགས་ཚུལ་དག་ཞལ་ལུང་དུ་གསལ་བས་དེར་བལྟའོ། ། རྡོ་རྗེ་འཁོར་ལོ་རིན་ཆེན་གཡས། །དྲིལ་བུ་པདྨ་རལ་གྲི་གཡོན། །ཞེས་པ། ཡེ་ཤེས་ལྔ་དབྱེར་མེད་པ་དང་། །ཆོས་ཀྱི་འཁོར་ལོ་རྒྱུན་མི་འཆད་པ་དང་། འགྲོ་བའི་རེ་འདོད་སྐོང་བ་དང་། ཆོས་ཉིད་དེ་བཞིན་ཉིད་ལ་རྟག་ཏུ་མཉམ་པར་བཞག་པ་དང་། འཁོར་བའི་སྐྱོན་གྱིས་མ་གོས་པ་དང་། མི་མཐུན་འཇོམས་པའི་ནུས་པ་མཐར་ཐུག་པ་རྣམས་རིམ་བཞིན་མཚོན། ཞེས་དང་། རྣམ་ཐར་གསུམ་མཐར་ཐུག་པ་བརྙེས་པའི་རིག་པ་ཉིད་སྐུ་གསུང་ཐུགས་ཀྱི་རྣམ་པར་ཤར་བའི་བརྡར་དཀར་དམར་མཐིང་བའི་ཞལ་གསུམ་ནི། སྐུ་བསམ་གྱིས་མི་ཁྱབ་པ་དང་ལྡན་པའམ་ཉེས་སྐྱོན་གྱིས་མ་གོས་པའི་བརྡར་ཞལ་གཡས་དཀར། གསུང་བསམ་གྱིས་མི་ཁྱབ་པ་དང་ལྡན་པའམ་གདུལ་བྱ་ལ་རྗེས་སུ་ཆགས་པའི་བརྡར་གཡོན་དམར། ཐུགས་བསམ་གྱིས་མི་ཁྱབ་པ་དང་ལྡན་པའམ་དེ་བཞིན་ཉིད་དབྱིངས་ལས་སླར་མི་ལྡང་བའི་ཚུལ་དུ་མཉམ་པར་བཞག་པ་ལ་འགྱུར་བ་མེད་པའི་བརྡར་དབུས་མཐིང་བའོ། །ཞེས་སོ། །ཞལ་རྒྱུན་དུ་རྣམ་ཐར་སྒོ་གསུམ་ལ་སྦྱར་བ་དེ་ཡང་རྣམ་འཇོག་ཙམ་ལས་གཡས་ཞལ་གྱིས་སྟོང་པ་ཉིད་ཁོ་ན་ལས་གཞན་གཉིས་མི་མཚོན་ཞེས་པའི་དོན་མིན་གསུངས། ༈ དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ། ཞེས་པའི་ཐད། གསུང་རྒྱུན་ལས། ཀུན་མཁྱེན་ཆེན་པོས་དབུས་སུ་རིགས་བདག་མཚོན་བྱེད་གདན་འཁོར་ལོ་སེང་གེ་བྱུང་བའི་ཕྱིར་དང་། ཡུམ་ནམ་མཁའི་དབྱིངས་ཕྱུག་མ་བྱུང་བའི་ཕྱིར་དང་། ཞི་བའི་མདངས་འཕྲོག་པའི་ཁྲོ་བོའི་སྐབས་སུ་གཙོ་བོ་བུངྷ་ཧེ་རུ་ཀ་བྱུང་བའི་ཕྱིར་དང་། དཀྱིལ་འཁོར་འདི་ཡང་ཡེ་ཤེས་རང་སྣང་བ་གཞི་ལ་གཙོ་འཁོར་མ་འཁྲུགས་པར་འཆད་ཅིང་སྣང་བའི་སྐབས་ཡིན་པའི་ཕྱིར། འདིར་དཀྱིལ་འཁོར་ཀུན་གྱི་གཙོ་བོ་རྣམ་སྣང་དུ་འཇོག་རིགས་ཏེ། ཐུན་མོང་མ་ཡིན་པའི་རྒྱུད་ཀྱི་སྡེ་ཚན་གཅིག་པ་འཇམ་དཔལ་སྒྱུ་འཕྲུལ་དྲྭ་བའི་འགྲེལ་པ་པདྨ་དཀར་པོ་ལས། མེ་ལོང་ལྟ་བུའི་ཡེ་ཤེས་ཀྱི་བདག་ཉིད་རྣམ་པར་སྣང་མཛད་མཐིང་ག་དང་། ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་མི་བསྐྱོད་པ་དཀར་པོ་དང་། ཞེས་སོ། །གཞན་ཡང་རྣམ་སྣང་གཙོ་བོ་ཡིན་པ་ནི་དེ་བཞིན་གཤེགས་པའི་ཐུགས་ཀྱི་རིགས་ཡིན་པ་དང་ཐུན་མོང་མིན་པའི་རྒྱུད་ཀྱི་དགོངས་པར་གནས་སོ། །གཞན་ལས་རྣམ་སྣང་གཟུགས་ཏེ་སྐུའི་རིགས་དང་མི་བསྐྱོད་པ་ཐུགས་སུ་བཤད་པ་ནི། ཐུན་མོང་པའི་རྒྱུད་ཀྱི་དགོངས་པ་སྟེ། རིགས་ལྔ་སྤྱི་ཙམ་སྐུའི་དཀྱིལ་འཁོར་ལ་སོགས་པ་རྩ་བའི་དཀྱིལ་འཁོར་ལས་གཞན་དུ་འཕྲོས་པའི་དབང་དུ་བྱས་པའོ། །ཞེས་དང་། ཟུར་བས་ནི། དཀྱིལ་འཁོར་གྱི་གཙོ་བོ་རྡོ་རྗེ་མི་བསྐྱོད་པར་འདོད་དེ། གླང་ཆེན་རབ་འབོག་གི་རྒྱུད་ལས། དོན་དམ་པར་སེམས་ཅན་གྱི་རྣམ་པར་ཤེས་པ་གནས་སུ་དག་པ་དེ་བཞིན་གཤེགས་པའི་ཐུགས་ཀྱི་བདག་ཉིད་ཅེས་པ་བཅོམ་ལྡན་འདས་རྡོ་རྗེ་མི་བསྐྱོད་པ་ཞེས་དང་། ཉི་འོད་སེང་གེས། ཀུན་གཞི་མི་བསྐྱོད་པ་ལ་རྣམ་པར་ཤེས་པའི་རྒྱལ་པོ་ཞེས་གནས་སྐབས་འདིར་བྱའོ། །ཞེས་དང་། རྡོ་རྗེ་ལས་རིམ་ལས། རྣམ་ཤེས་ནམ་མཁའི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པ། །མི་བསྐྱོད་ཡབ་ཡུམ་རང་བཞིན་ལས། ཞེས་གསུངས་པ་ལྟར་མི་བསྐྱོད་པར་བཞེད། དོགས་སྤོང་ལ་ཡུམ་དབྱིངས་ཕྱུག་མ་ནི། རྣམ་ཤེས་ཡུལ་ནམ་མཁའི་ཁམས་དང་སྦྱོར་བ་དང་། གདན་གྱི་འཁོར་ལོ་ནི། རིགས་བདག་མཚོན་བྱེད་ཀྱི་མཚན་མ་མ་ཡིན་གྱི། རིགས་ལྔ་ཡེ་ཤེས་ལྔའི་ཕྱག་རྒྱ་སྟེ། འགྲེལ་ཆུང་ལས། གཞི་ཡང་ཚད་མེད་འཁོར་ལོ་སྟེ། །ཡེ་ཤེས་ལྔ་ཡི་རང་བཞིན་ཡིན། །ཞེས་སོ། །སེང་ཁྲི་ཡང་ཐུགས་གཙོ་བོར་སྟོན་པའི་ཕྱིར་རྡོ་རྗེའི་རིགས་དང་སྦྱར་བ་ཙམ་དུ་ཟད་དོ། །ཡེ་ཤེས་ནི་རྒྱ་ཆེར་འགྲེལ་ལས། ཞེ་སྡང་རྣམ་པར་དག་པའི་རང་བཞིན་རྣམ་པར་ཤེས་པའི་ཕུང་པོ་ཡོངས་སུ་དག་པ་ཐུགས་རྡོ་རྗེ་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་མི་བསྐྱོད་པའི་དཀྱིལ་འཁོར་ཞེས་སོ། །ཁྲོ་བོའི་སྐབས་སུའང་། བྷུདྡྷ་ཧེ་རུ་ཀ་གཙོ་བོ་མ་གྲུབ་སྟེ། པཎ་གྲུབ་ཀྱི་མན་ངག་རྣམས་སུ་རྒྱུད་འཁྲུགས་པ་བསྡེབས་ནས་གཙོ་བོ་བཛྲ་ཧེ་རུ་ཀར་བཞེད་པའི་ཕྱིར་རོ། །ཞེས་དང་། མི་བསྐྱོད་རྒྱལ་པོ་མདུན་ན་གནས། །ཞེས་པ། རིགས་དྲུག་པའི་མདུན་དཀྱིལ་འཁོར་གྱི་དབུས་ཀྱི་ལྟེ་བའི་སྟེང་དུ་གནས་སོ། །གཞན་རིགས་བཞི་རྣམས་ནི་ཕྱོགས་བཞི་ན་གནས་སོ། །ཞེས་སོ། ། དད་པས་ཉན་པའི་ལྷ་ཆེན་རྣམས། །ཞེས་པའི་ཐད། ཞལ་རྒྱུན་ལ། རྒྱུད་ཉན་པས་དད་པའི་འཁོར་ལྷ་ཆེན་རྣམས་སངས་རྒྱས་ཀྱི་སྤྲུལ་པ་དང་སྔགས་ཀྱི་ལམ་གྱིས་སྟོན་པ་དངོས་སུ་མཐོང་ནུས་པའི་འཁོར་དང་གཉིས་ཏེ། དཔེར་ན་ཕར་ཐེག་ཏུ་ལོངས་སྐུའི་འཁོར་ལ་སངས་རྒྱས་ཀྱི་མཐུས་ཉན་རང་ཡང་ཡོད་ཆོག་པར་གསུངས་པ་ལྟར་རམ། ཡང་ན་རང་སྣང་གཞན་སྣང་གི་འཁོར་གཉིས་ཡོད་པ་བཞིན་ནོ། །ཞེས་གསུངས། ཟིན་བྲིས་ལས། དྲང་སྲོང་ཁྲོས་པ་ལོཀྟྲི་པཱ་ལ་ལྟ་བུ། མི་ཐུང་བྱིས་པ་གསང་འཛིན་ལག་ན་རྡོ་རྗེ་ལྟ་བུ། དཔལ་ཆེན་རྔམ་བརྗིད་ཆེ་མཆོག་ཧེ་རུ་ཀ་ལྟ་བུའོ། །གནས་ཚོད་ལ། སངས་རྒྱས་སྤྲུལ་པ་ཡིན་པར་བཤད་ཀྱང་། ཞེས་པ་ནི། རུ་ཏྲ་རང་སྣང་གི་འཁོར་ཡིན་པའི་སྒྲུབ་བྱེད། དཔེར་ན་འོག་མིན་གྱི་རྟེན་བརྟེན་པ་རང་སྣང་འབའ་ཞིག་ཡིན་པ་བཞིན་དུ་དུར་ཁྲོད་མེ་རི་འབར་བའི་རྟེན་བརྟེན་པ་ཡང་དེ་བཞིན་དང་། རྡོ་རྗེའི་ལུས་ལ་ཞི་ཁྲོའི་དཀྱིལ་འཁོར་བསྒོམ་པ་ཡོད་པའི་ཕྱིར་རོ། མདོར་ན་ལམ་འབྲས་གཉིས་ཀའི་སྐབས་ན་དེ་ལྟར་ཡོད་ཅིང་ལམ་འབྲས་གཉིས་མཚུངས་དགོས་པའི་ཕྱིར། སྣང་ཚོད་ལྟར་བཤད་ན་མདོ་དགོངས་འདུས་དང་བཀའ་ཐང་གཉིས་རྒྱས་བསྡུས་ཙམ་མ་གཏོགས་ཤིན་ཏུ་མཐུན་ཞེས་གསུངས། འདོད༵་གཟུགས༵་གནས་ལྔ་མ་གཏོགས། འདོད་ཁམས་པས་གཟུགས་ཁམས་པ་དབང་དུ་བསྡུ་ན་མི་འཐད་པས་འདི་རྒྱུད་རྣམ་དག་མིན་ཟེར་བ་ཡོད་ཀྱང་སྐྱོན་མེད་དེ། སྤྱིར་དེ་ལྟར་ཡིན་ཀྱང་། དམིགས་བསལ་རིག་སྔགས་ཀྱི་མཐུ་བསམ་གྱིས་མི་ཁྱབ་པའི་ཕྱིར་མི་འགལ་ཏེ། དཔེར་ན་དམག་གི་རྒྱལ་པོ་རིག་སྔགས་ཀྱིས་དབང་དུ་བསྡུས་པ་མི་འགལ་བ་བཞིན། ཞེས་དང་། དབང་ཕྱུག་ཉེར་བརྒྱད་གདུལ་བྱ་འདུལ་བྱེད་གཉིས་ཀར༵་གཏོགས༵་ཚུལ། གཞི་སྣང་བར་དོའི་སྐབས་སུ་སྣང་བའི་དབང་མོ་དང་། འབྲས་དུས་སུ་དཀྱིལ་འཁོར་གྱི་ཁྱམས་ན་གནས་པའི་དབང་མོ་དང་། དྲེགས་པ་ཅན་གྱི་ཆུང་མ་དུར་ཁྲོད་ན་གནས་པའི་དབང་མོ་དང་གསུམ་ལས་བར་བ་འདུལ་བྱེད་ཐ་མ་གདུལ་བྱ་ཡིན་ཞེས་དང་། ཐུབ་པ་དྲུག་ཏུ་བཞག་གོ་ཞེས་པའི་ཐད་རིན་པོ་ཆེས། དུད་འགྲོ་འདུལ་བྱེད་དུ་སྤྲུལ་པའི་སྐུ་ལ་ཀླུའི་རྒྱལ་པོ་དང་། རི་དྭགས་དབང་པོ་སོགས་དུད་འགྲོའི་རྣམ་པ་ཅན་དང་། ཡིད་བཞིན་ནོར་བུ་འདོད་པ་སྦྱིན་ཤིང་བེམ་པོའི་རྣམ་ཅན་དང་། མཆོག་སྤྲུལ་མཚན་དཔེས་སྤྲས་པའི་རྣམ་ཅན་སོགས་མང་དུ་ཡོད་ཀྱང་། དཀྱིལ་འཁོར་ལ་འགོད་དུས་དེ་ཐམས་ཅད་དུད་འགྲོ་འདུལ་བྱེད་ཀྱི་སྤྲུལ་སྐུར་རིགས་བསྡུས་ནས་ལྷ་གཅིག་འགོད། དེའང་བཤད་མ་ཐག་པ་དེ་ཐམས་ཅད་ཀྱི་ནང་ནས་སྐུའི་རྣམ་པའི་ཆ་ནས་མཆོག་ཏུ་གྱུར་པ་ནི་མཆོག་སྤྲུལ་རྣམ་ཅན་རང་ཡིན་པས་དེའི་རྣམ་པར་འགོད་པ་ཡིན། དེ་འདྲའི་སངས་རྒྱས་ཀྱི་སྤྲུལ་བ་དེ་དུད་འགྲོ་འདུལ་བྱེད་ཀྱི་ཐུབ་པ་ཡིན་ཡང་། དུད་འགྲོའི་རྟེན་ཅན་གཏན་ནས་མིན་ནོ། །དེའི་སྐུའི་རྣམ་པའི་ཆེས་མཆོག་ཏུ་གྱུར་ཚུལ་ནི། དག་པའི་རྣམ་ཅན་ཡིན་ཕྱིར་རོ། །ཞེས་གསུང་རྒྱུན་ལས་སོ། ། གཤིན་རྗེའི་རྒྱལ་པོ་ཞེས་པ་ལ། ལས་དབང་གིས་སྐྱེ་བ་དང་། སངས་རྒྱས་ཀྱི་སྤྲུལ་པ་གཉིས་ལས་སྐབས་འདིར་ཕྱི་མའོ། །སྤྲུལ་སྐུའི་འཁོར་རྣམ་བཞི་དགེ་བསྙེན་ཕ་མ། དགེ་སློང་ཕ་མའོ། ། གདམས་ངག་རྗེས་བསྟན་ཞེས་པ། མན་ངག་ཁྱད་པར་ཅན་གསར་དུ་སྟོན་པ་ནི་གདམས་ངག་དང་། གདམས་ངག་ཐོབ་ཟིན་པ་ལ་ཡང་ཡང་ངེས་པར་བྱ་བའི་ཕྱིར་དེའི་དོན་ཞིབ་པར་སླར་ཡང་རྗེས་སུ་འདོམ་པ་ནི་རྗེས་བསྟན་ནོ། །རྫོགས་སྨིན་སྦྱང་གསུམ་ནི་སྨོན་ལམ་ཡོངས་སུ་རྫོགས། གདུལ་བྱ་ཡོངས་སུ་སྨིན། ཞིང་ཁམས་སྦྱང་བའོ། །སྒྲོན་མ་བཀོད་པའི་དུས། ཆོས་འཁོར་བསྐོར་བའི་དུས་སོ། །སྣང་གསུམ་གྱི་བག་ཆགས་སམ་འཕོ་བའི་བག་ཆགས། རླུང་སེམས་དང་ཁམས་ཕྲ་བ་ཡུལ་ལ་འཕོ་བའོ། །སྣང་གསུམ་གྱི་བག་ཆགས་ཞེས་པ་ནི། ཁམས་དཀར་དམར་ནག་གསུམ་གྱི་སྣང་བ་སྟེ། སྣང་མཆེད་ཐོབ་གསུམ་ལ་བྱའོ། །ཞེས་གསུངས་སོ། ། ཞལ་རྒྱུན་དུ། ཕྲ་མོའི་བདུད་བཅོམ་པ་ནི། མ་རིག་བག་ཆགས་དང་། ཟག་པ་མེད་པའི་ལས། ཡིད་ཀྱི་རང་བཞིན་གྱི་ལུས། བསམ་མི་ཁྱབ་པའི་འཆི་འཕོ་བ་བཞི། ཉོན་བདུད་དང་། ལྷ་བདུད་དང་། ཕུང་བདུད། འཆི་བདུད་ཕྲ་མོ་ཞེས་གསུངས། ལོ་ཆེན་གྱིས་བདེར་འདུས་བསྙེན་ཡིག་ཏུ། ཕུང་ལྔ་ལྷར་དག་པས་ཕུང་བདུད་བཅོམ། རང་རིག་པའི་རྩལ་གྱིས་ཉོན་མོངས་པ་ཡེ་ཤེས་ལྔར་དག་པས་ཉོན་མོངས་པའི་བདུད་བཅོམ། དེ་ལ་འདོད་ལྷའི་བར་ཆད་ཀྱིས་མི་ཚུགས་ཤིང་སེམས་ཉིད་སྐྱེ་ཤི་ལས་གྲོལ་བ་ལྷའི་བུའི་བདུད་དང་འཆི་བདག་གི་བདུད་བཅོམ། ཞེས་གསུངས། འདི་གཉིས་ཞར་བྱུང་གི་གླེང་གཞིར་འགྱུར་ཞེས་པ་ལ། ཟིན་བྲིས་ལས། གོང་དུ་བཤད་མ་ཐག་པའི་ཁྲོ་སྤྲུལ་གཉིས་ཀྱི་གླེང་གཞི་དངོས་སུ་མ་བསྟན་ཀྱང་ཤུགས་བསྟན་དུ་བཞེད་པ་ལ་དགོངས་སོ། །གླེང་གཞི་ཉེར་ལེན་གྱི་རྒྱུ་དང་། གླེང་བསླང་ལྷན་ཅིག་བྱེད་རྐྱེན་ལྟ་བུའོ། །ཞེས་དང་། ཉི་ཟླ་བྱང་ཆུབ་ཀྱི་སེམས་ཞེས་པ། ངོ་བོ་ཡེ་ཤེས། རྣམ་པ་བདུད་རྩིའོ། །སེམས་ཡེ་ཤེས་སུ་བསྐྱེད་པ་ཞེས་པ། མ་དག་པའི་སེམས་དག་པ་ཡེ་ཤེས་སུ་བསྐྱེད་པའོ། །ཞེས་གསུངས། འདིར་སྟོན་པ་ཀུན་ཏུ་བཟང་པོ་སོགས་ཐད། གསུང་རྒྱུན་ལས། འོག་མིན་གྱི་རྟེན་ཅན་དབང་གསུམ་པ་བསྐུར་ཡུལ་དེ་ལ་ཁམས་དཀར་དམར་ཡོད་པ་མི་འཐད་དེ། །དེར་མ་ཟད་འདོད་པའི་ལྷ་ལ་ཡང་རླུང་འཕོ་བ་ཙམ་ལས་ཁམས་མེད་པར་གསུངས་པའི་ཕྱིར་ཞེ་ན་དོགས་སྤོང་ཁུ་རྡུལ་རླུང་གསུམ་སོགས་ཀྱིས་བསྟན་ཏོ། །ལོ་ཆེན་རིན་པོ་ཆེའི་བཞེད་པས་སོགས་དེའི་ཕྱོགས་ནས། འདིར་ཞལ་རྒྱུན་དུ། འདི་རྒྱུད་སྨིན་ནས་དབང་གི་བག་ཆགས་ཙམ་གྱིས་ཁམས་དྲུག་ལྡན་གྱི་ལུས་ལྟར་བྱ་བ་བྱེད་པར་གསུངས། ཀུན་མཁྱེན་ཆོས་ཀྱི་རྒྱལ་པོས་གྲོལ་བའི་ཐིག་ལེ་ཞེས་པའི་ཐད་བླ་མའི་གསུང་ལྷན་ཐབས་ལས། ཕར་ཕྱིན་ཐེག་པའི་ལམ་པ་རྣམས་ཀྱིས་ཀྱང་མཐར་སྔགས་བླ་མེད་ལམ་ལ་མ་བརྟེན་པར་འཚང་རྒྱ་མི་ནུས་པའི་རྒྱུ་མཚན་ནི། ལས་མཐའ་རྣམ་འབྱེད་ལས། བསྐལ་པ་མཐའ་ཡས་རྣམས་སུ་ཡང་། །མགོ་དང་རིན་ཆེན་སོགས་སྦྱིན་པས། །སྣང་བ་རྣམ་གསུམ་མ་དག་ཕྱིར། །བྱང་ཆུབ་དམ་པ་ཐོབ་མི་འགྱུར། །མཐའ་ཡས་བསྐལ་པ་རྣམས་སུ་ཡང་། །དེ་བཞིན་ཚུལ་ཁྲིམས་བཟོད་སོགས་ཀྱིས། །སྣང་བ་རྣམ་གསུམ་མ་དག་ཕྱིར། །བྱང་ཆུབ་དམ་པ་ཐོབ་མི་འགྱུར། །མཐའ་ཡས་བསྐལ་པ་རྣམས་སུ་ཡང་། །སྔགས་ཀྱི་སྐུ་ཡི་ཏིང་འཛིན་གྱིས། །སྣང་བ་གསུམ་པོ་མ་དག་ཕྱིར། །བྱང་ཆུབ་དམ་པ་ཐོབ་མི་འགྱུར། །སྣང་བ་གསུམ་པོ་དག་པ་ན། །ཐམས་ཅད་མཁྱེན་པ་ཐེ་ཚོམ་མེད། །ཅེས་གསུངས་པའི་ཚིགས་བཅད་དང་པོ་གཉིས་ཀྱིས་ཕར་ཕྱིན་གྱི་ཐེག་པ་དང་། དེ་ནས་ཚིགས་བཅད་གཅིག་གིས་བསྐྱེད་རིམ་ཙམ་དང་རྒྱུད་སྡེ་འོག་མ་གསུམ་གྱིས་སྣང་བ་གསུམ་དག་པར་བྱེད་མི་ནུས་པས་བླ་མེད་བྱང་ཆུབ་མི་འཐོབ་པར་གསུངས་པའི་དགོངས་པ་ནི་སྣང་བ་གསུམ་གྱི་སྐབས་སུ་གཉིས་སྣང་གི་འཁྲུལ་བ་ཡོད་ལ། དེ་གཉིས་སྣང་འཁྲུལ་བའི་བག་ཆགས་མ་ལུས་པ་མ་དག་བར་དུ་གཏན་ནས་ལྡོག་པ་མེད། དེས་ན་དེ་གཏན་ལྡོག་པའི་ཚུལ་གྱིས་སྦྱོང་བ་ལ་ལྷན་སྐྱེས་ཀྱི་བདེ་བས་དེ་ཁོ་ན་ཉིད་ཀྱི་དོན་རྟོགས་ནས་སྒོམ་པ་དགོས་ཤིང་། དེ་ཡང་བླ་མེད་ཀྱི་ཐེག་པ་ལས་གཞན་ན་མེད་པའི་དོན་ནོ། །གྲོལ་བའི་ཐིག་ལེ་ལས་ཀྱང་། ཅི་ཕྱིར་ཤཱཀྱ་ཐུབ་པ་ཡིས། །གྲངས་མེད་གསུམ་དུ་ཚོགས་བསགས་ཀྱང་། །འདི་དོན་མ་རྟོགས་ནེ་རཉྫར། །ཅི་ཡང་མ་ཡིན་ཏིང་འཛིན་གནས། །དེ་ཚེ་བདེ་གཤེགས་ཀུན་གྱིས་ཀྱང་། །ཐལ་བྱུང་བློ་ཅན་དེ་བཟློག་སྟེ། །ནམ་མཁའི་དཀྱིལ་ལྟར་རྣམ་དག་པའི། །ཟབ་གསལ་གཉིས་མེད་རབ་བསྟན་ཏོ། །ནམ་ཕྱེད་དུས་ན་བརྒྱལ་བ་ལྟར། །དེ་ཉིད་བསྒོམས་པས་ཐོ་རངས་དུས། །སྐད་ཅིག་གིས་ནི་ཡང་དག་རྟོགས། །ཞེས་སོགས་གསུངས་སོ། །བདག་ཅག་གི་སྟོན་པས་དཀའ་སྤྱད་ཀྱི་མཛད་པ་ལ་གནས་པའི་ཚེ་ན་ནམ་མཁའ་གང་བའི་བདེ་བར་གཤེགས་པ་རྣམས་ཀྱིས་ཅི་ཡང་མ་ཡིན་པའི་ཏིང་ངེ་འཛིན་འདི་ལྟ་བུའི་བླ་མེད་མི་འགྲུབ་པོ། །ཞེས་ཐལ་བྱུང་གི་བློ་ཅན་དེ་བཟློག་པར་གསུངས་པ་ནི། རྟོགས་བྱ་ཆོས་དང་གང་ཟག་གི་བདག་མེད་ཕྲ་མོ་ཆོས་ཐམས་ཅད་ཀྱི་གནས་ལུགས་མཐར་ཐུག་པ་ཡིན་ཀྱང་། རྟོགས་བྱེད་ཡུལ་ཅན་གྱི་བློ་དག་བྱ་གློ་བུར་བའི་སེམས་ཡིན་པས་འདི་ཉིད་ཀྱི་སྟེང་ན་སྟོང་ཉིད་མངོན་སུམ་དུ་རྟོགས་པ་ཅི་ཙམ་གོམ་པར་བྱས་ཀྱང་སྣང་གསུམ་དྲི་མ་ཕྲ་མོ་སྦྱང་མི་ནུས་པའི་ཕྱིར་དང་། དག་བྱ་གློ་བུར་བའི་ལུས་སེམས་ཤིན་ཏུ་དག་པའི་རྒྱལ་བའི་ཆོས་གཟུགས་ཀྱི་སྐུའི་དངོས་ཀྱི་ཉེ་རྒྱུ་བྱེད་མི་ནུས་པའི་ཕྱིར་ན་ཅི་ཡང་མ་ཡིན་པ་དང་ཐལ་བྱུང་གི་བློ་ཞེས་དམན་པའི་སྒྲས་དེ་ཙམ་གྱིས་ཆོག་འཛིན་བཟློག་པར་གསུངས་པ་ཡིན་ལ། བླ་མེད་ཀྱི་ལམ་གང་ནས་ཞུགས་པ་ནི། ནམ་མཁའི་དཀྱིལ་ལྟར་རྣམ་དག་པའི། །ཟབ་གསལ་གཉིས་མེད་དེ་བསྟན་ཏོ། །ཞེས་ནམ་མཁའི་དཀྱིལ་ལྟར་སྤྲོས་པ་མཐའ་དག་དང་བྲལ་བའི་ཆོས་དབྱིངས་མངོན་སུམ་དུ་རྟོགས་པའི་ཡེ་ཤེས་གང་ཞིག །སྣང་བ་གསུམ་གྱིས་བསྡུས་པའི་གཉིས་སྣང་ཕྲ་མོའི་དྲི་མས་དག་པ་ཟབ་པ་རིམ་པ་བཞི་པའི་དོན་གྱི་འོད་གསལ་དང་དེ་བཞོན་པའི་རླུང་གིས་བསྒྲུབས་པའི་ཟབ་དང་རྒྱ་ཆེ་བ་གཉིས་མེད་ཟུང་འཇུག་གི་གདམས་པ་བསྟན་པར་གསུངས་པ་ཡིན་ནོ། །དཔྱོད། ནམ་ཕྱེད་དུས་ན་བརྒྱལ་བ་ལྟར། །དེ་ཉིད་བསྒོམས་པས་ཐོ་རངས་དུས། །སྐད་ཅིག་གིས་ནི་ཡང་དག་རྟོགས། །ཞེས་གསུངས་པ་ནི། དེ་ལྟ་བུའི་གདམས་པའི་དོན་བསྒོམས་པས་བརྒྱལ་བའི་ཚེ་ཀུན་རྟོག་རགས་པ་དང་བྲལ་བ་ལྟར། ཀུན་རྟོག་གི་སྤྲོས་པ་མཐའ་དག་དང་བྲལ་བའི་དོན་གྱི་འོད་གསལ་མངོན་སུམ་དུ་བྱས་པ་དེས་ཆོས་ཐམས་ཅད་དེ་ཁོ་ན་ཉིད་མངོན་སུམ་དུ་རྟོགས་ཤིང་བསྒོམས་པར་བྱས་པའི་མཐུས། ལམ་གཞན་གྱིས་སྦྱང་བར་མི་ནུས་པའི་སྣང་གསུམ་གྱི་དྲི་མ་ཕྲ་མོ་ཤེས་སྒྲིབ་ཀྱིས་བསྡུས་པ་དེ་ཉིད་ལྷག་མ་མེད་པར་སྦྱངས་ཏེ་ཐོ་རངས་ཀྱི་དུས་ན་འོད་གསལ་དེའི་བཞོན་པའི་རླུང་གིས་མི་སློབ་ཟུང་འཇུག་གི་སྐུ་གྲུབ་ནས་སངས་རྒྱས་པར་བསྟན་ཏོ། །མན་ངག་སྙེ་མར། མཆོག་ཏུ་མཐར་ཐུག་ས་ལ་གནས་ཀྱང་ངེས་པར་ཐབས་འདི་ལ་ལྟོས་སོ་ཞེས་བརྗོད་པར་བྱ་སྟེ། དཔེར་ན་ནམ་མཁར་བཞུགས་པའི་སངས་རྒྱས་རྣམས་ཀྱིས་གནང་བའི་ཤེས་རབ་ཀྱི་དབང་ལས་ཤཱཀྱའི་མགོན་པོ་བྱང་ཆུབ་ཀྱི་ཤིང་དྲུང་དུ་བཞུགས་པ་ལ་བྱང་ཆུབ་ཐོབ་པའི་ཆེད་དུ་མཚན་ཕྱེད་ན་སྟོང་པ་བཞི་དང་། ཇི་ལྟར་ཡང་བཅོམ་ལྡན་འདས་འདི་ཁོ་ནས་རྡོ་རྗེ་སྙིང་པོ་ལ་ཐིག་ལེ་མཆོག་མ་ལས་དབང་བསྐུར་བ་བྱིན་པ་བཞིན་ནོ། །ཞེས་པ་དང་མཐུན་པར་དོན་གྱི་འོད་གསལ་དང་ཟུང་འཇུག་གི་རིམ་པ་གྲུབ་དགོས་པས་དེ་གཉིས་དབང་གསུམ་པ་དང་བཞི་པའི་ལམ་ཡིན་པས། དབང་གསུམ་པ་ཤེར་དབང་དང་བཞི་པ་ཚིག་དབང་བསྐུར་དགོས་གསུངས་པ་ལྟ་རིགས་པས་གྲུབ་བོ། མ་དག་སྒྱུ་ལུས་མན་ཆད་ཀྱི་ལམ་རྣམས་བསྒོམ་མི་དགོས་ཏེ་ས་བཅུ་པའི་སྲིད་པ་ཐ་མ་དེས་བསྐལ་ཆེན་གྲངས་མེད་གསུམ་དུ་བསོད་ནམས་ཀྱི་ཚོགས་བསགས་པ་དེས་སྒྱུ་ལུས་མན་ཆད་ཀྱི་དོད་ཐུབ་པའི་ཕྱིར་ན་རྒྱལ་སྲས་མཐར་ལམ་པ་དེས་བུམ་དབང་ཉིད་ཀྱི་ལམ་བསྐྱེད་རིམ་དང་། གསང་དབང་གི་ལམ་དབེན་གསུམ་སྒྱུ་ལུས་དང་བཅས་པ་ནས་འཇུག་མི་དགོས་པས། བུམ་དབང་དང་གསང་དབང་ཡང་དེ་ལ་བསྐུར་མི་དགོས་པར་གྲུབ་པོ། །རྒྱུ་མཚན་དེའི་ཕྱིར། ཀུན་མཁྱེན་ཆེན་པོས། ངལ་གསོའི་སྤྱི་དོན་ལེགས་བཤད་རྒྱ་མཚོར། བདག་ཅག་གི་སྟོན་པ་འཚང་རྒྱ་ཚུལ་སྟོན་པའི་སྐབས་སུ་གྲོལ་བའི་ཐིག་ལེའི་ལུང་དེ་ཉིད་དྲངས་ནས་བཤད་པ་ལྟར་བྱས་ཚེ་བྱང་སེམས་མཐར་ལམ་པ་དེ་བླ་མེད་དུ་འཇུག་ཚེ་དབང་གསུམ་པ་ནས་འཇུག་པས་ཆོག་དགོས་པར་མངོན་ཡང་བཀའ་སྡེ་ཟུར་བའི་བཤད་སྲོལ་འཛིན་པ་རྣམས་ཀྱིས་གསང་དབང་ནས་འཇུག་དགོས་པར་གསུངས་པ་གཉིས་མི་མཐུན་པར་སྣང་བ་འདི་ཅི་ཞེ་ན། གྲོལ་བའི་ཐིག་ལེ་ལ་སོགས་པ་༼འདི་གསར་ཕྱོགས་དང་མཐུན་པར་བཤད་པ་ཡིན་མཆན་༽གཞུང་ཆེན་པོ་གཞན་གྱི་གསང་དབང་གི་ལམ་དབེན་གསུམ་སྒྱུ་ལུས་དང་བཅས་པ་ཡིན་པས་གོང་བཤད་ལྟར་རྒྱལ་སྲས་མཐར་ལམ་པ་དེ་མི་སློབ་ལམ་དུ་འཇུག་པ་ལ་དབང་གསུམ་པའི་ལམ་རིམ་པ་བཞིན་དོན་གྱི་འོད་གསལ་ལ་འཇུག་པས་དབང་གཉིས་པ་ནས་འཇུག་མི་དགོས་པར་བཞེད་ལ། རྒྱུད་འདིའི་བཤད་སྲོལ་གྱི་དབང་དུ་བྱས་ཚེ་གསང་དབང་གི་ལམ་རྡོ་རྗེའི་ལུས་ཀྱི་རྩ་ཐིག་རླུང་གསུམ་གནད་དུ་བསྣུན་པའི་རང་ལུས་ཐབས་ལྡན་གྱི་ལམ་རྣམས་ཡིན་པས། མཐར་ལམ་པ་དེས་ཀྱང་རྡོ་རྗེའི་ལུས་ཀྱི་རྩ་ཐིག་རླུང་གསུམ་ལ་དམིགས་པས་གནད་དུ་བསྣུན་དགོས་པས། གསང་དབང་དགོས་པར་བཞེད་ཀྱང་། རྫོགས་རིམ་གྱི་ལམ་ལ་འཇུག་མཚམས་ལ་མི་འདྲ་བ་ཆེན་པོ་མིན་ནོ། །ཞེས་འགལ་མེད་དུ་འཆད་པའོ། །ཡང་ན་སྟོན་པ་ཡབ་ཡུམ་སྙོམ་པར་ཞུགས་ནས་ཁམས་དཀར་དམར་གྱི་རྫས་གནང་སྟེ་ཆེད་དུ་བརྗོད་པའི་འབྲས་དབང་དང་གསང་དབང་ཆོས་མཐུན་པས་གསང་དབང་གི་ཐ་སྙད་དུ་མཛད་པ་མ་གཏོགས་གསང་དབང་དངོས་མ་ཡིན་ནོ། །ཞེས་པའི་ལན་སྔ་མ་དང་འདི་གཉིས་གང་བདེར་དཔྱད་དགོས་གསུངས། མཐར་ལམ་པ་ཞེས་པའང་། ལོ་ཆེན་གྱིས་ས་བཅུའི་ཁྱད་པར་ལམ་ལ་གནས་པ་ལ་བཤད། ཁྱད་པར་ལམ་ཐམས་ཅད་ནི། ས་བཅུའི་ཡེ་ཤེས་མཉམ་བཞག་ཐུན་གཅིག་སྐྱེས་ཕན་ཆོད་དོ། །ཞེས་གསུངས། དབང་ཕྱི་མ་གཉིས་ལ་ཡང་དོགས་པ་གཅད་རྒྱུ་ཡོད་པ་དེས་ཤེས་སོ། །ཞེས་གསུངས་པ་ནི། མཁས་གྲུབ་ཆེན་པོ་གཞན་གྱིས་བཞེད་པའི་དབང་གསུམ་པ་ནི། ཕྱག་རྒྱ་མཚན་ཉིད་དང་ལྡན་པ་ལ་སྙོམ་པར་ཞུགས་པ་ལས་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་ཡས་བབས་དང་མས་བརྟན་གྱི་དགའ་བཞི་སྟོང་ཉིད་དང་སྦྱར་བའི་བདེ་སྟོང་དབྱེར་མེད་ཀྱི་ཡེ་ཤེས་དེ་ཉིད་དབང་གསུམ་པ་དང་། དེའི་དུས་སུ་རང་དང་རིག་མ་གཉིས་ཀྱི་ལུས་འདོད་ལྷ་ཡབ་ཡུམ་ཀྱི་སྐུར་གསལ་བ་དང་སེམས་བདེ་སྟོང་དབྱེར་མེད་དུ་སོང་བ་གཉིས་དུས་གཅིག་ཏུ་ཚོགས་པ་དེ་དཔེར་བྱས་ཏེ། ཐུགས་བདེ་ཆེན་དེས་སྟོང་ཉིད་མངོན་སུམ་དུ་རྟོགས་པ་སྐུ་དག་པ་སྒྱུ་མའི་སྐུ་མཚན་དཔེ་བཞིན་ལག་གི་རྣམ་ཅན་དུ་དངོས་གནས་ལ་གྲུབ་པ་གཉིས་དུས་གཅིག་ཏུ་ཚོགས་ཤིང་དབྱེར་མེད་དུ་སོང་བའི་སློབ་པ་དང་མི་སློབ་པའི་ཟུང་འཇུག་གི་སྐུ་ཐུགས་ཟུང་འཇུག་དེ་ཉིད་ཚིག་གི་སྒོ་ནས་ངོ་སྤྲད་པ་དེ་ཉིད་བཞི་པ་ཚིག་དབང་དུ་ངོས་འཛིན་པར་མཛད་ལ། རྒྱུད་འདིའི་བཀའ་སྲོལ་འཛིན་པ་རྣམས་ཀྱིས་དབང་གི་དུས་སུ་སློབ་བུ་རིག་མ་དང་མཉམ་པར་སྦྱར་བ་ལས་ཐིག་ལེ་ཡས་བབས་ཀྱི་དགའ་བ་བཅུ་དྲུག་དབང་གསུམ་པ་དང་། མས་བརྟན་གྱི་དགའ་བ་བཅུ་དྲུག་དབང་བཞི་པ་དབྱེར་མེད་བདེ་བ་ཆེན་པོའི་དབང་ཞེས་དབང་གསུམ་པ་དང་བཞི་པ་ངོས་འཛིན་ལུགས་མི་འདྲ་བའང་དེ་གཉིས་ཀྱི་ལམ་ངོས་འཛིན་ལུགས་མི་འདྲ་བས་ཡིན་པའི་ཕྱིར་ཏེ། ཆེན་པོ་རྣམས་ཀྱིས་བཞེད་པ་ལ་དབང་གསུམ་པའི་ལམ་ནི་རིམ་པ་བཞི་པའི་དོན་གྱི་འོད་གསལ་དང་། དབང་བཞི་པའི་ལམ་ཟུང་འཇུག་གི་ལམ་ཡིན་པར་བཞེད་པ་དང་། རྒྱུད་འདིའི་བཀའ་སྲོལ་འཛིན་པ་རྣམས་ཀྱིས་དབང་གསུམ་པའི་ལམ་གཞན་ལུས་ཐབས་ལྡན་གྱི་ལམ་དང་། དབང་བཞི་པའི་ལམ་འོད་གསལ་རྣམ་པར་མི་རྟོག་པའི་ཡེ་ཤེས་སྔགས་བླ་མེད་ཀྱི་འཕགས་ལམ་དེ་ཡིན་པར་བཞེད་པ་ལ་ཤིན་ཏུ་མཐུན་པས་དོན་གྱི་གནད་ལ་འགལ་བ་ཆེར་མེད་དོ། །འཆད་གང་བདེར་དཔྱད་གསུངས་པ་ལས། རང་རང་གི་བཞེད་གཞུང་རྣམས་དང་ཤིན་ཏུ་མཐུན་པས་དབང་གཉིས་ལམ་འཇོག་ལུགས་མི་འདྲ་བས་ཡིན་ནོ། །ཞེས་པ་འདི་འཐད་པ་ཡིན་སྙམ། ཞེས་གསུངས། ༈ ཟིན་བྲིས་ལས། སློབ་དཔོན་སངས་རྒྱས་ཡེ་ཤེས་ཞི་བའི་ཞབས་ལ། སློབ་དཔོན་འཇམ་དཔལ་བཤེས་གཉེན་གྱིས་གསུངས་པའི་དཔལ་གསང་བ་འདུས་པའི་གདམས་པ་འཇམ་དཔལ་ཞལ་ལུང་། དེའི་འགྲེལ་བ་སློབ་དཔོན་ཡེ་ཤེས་ཞབས་ཀྱིས་མཛད་པའི་བསྐྱེད་རིམ་སྟོན་པ་སྒྲུབ་ཐབས་ཀུན་བཟང་། རྫོགས་རིམ་སྟོན་པ་གྲོལ་བའི་ཐིག་ལེ་སྟེ་ཡེ་ཤེས་ཞབས་ལུགས་གསུངས། ཀླུ་སྒྲུབ་ཀྱིས་གསང་འདུས་རྩ་རྒྱུད་ཀྱི་འགྲེལ་བ་མདོ་བྱས་དང་མདོ་བསྲེས་གཉིས་ཏེ། སྔ་མ་རྩ་རྒྱུད་ཀྱི་ཚིག་རེ་རེ་ནས་སྦྱར་བ་མེད། ཕྱི་མ་ལ་ཡོད་དེའི་རྫོགས་རིམ་སྟོན་པ་ལ་དཔལ་རིམ་པ་ལྔ་པ་སྟེ། འདི་ལ་གསང་འདུས་འཕགས་ལུགས་གསུངས། གསུང་རྒྱུན་ལས། དབང་གི་ལམ་འཇོག་ཚུལ་མི་འདྲ་བས་ཞེས་པ་གསུང་རྒྱུན་ལས། གསར་རྙིང་གཉིས་ཀས་བུམ་དབང་ཚོགས་ལམ་དུ་འཇོག་ཚུལ་འདྲ་ཡང་། གསར་ཕྱོགས་ནས་གསང་དབང་སྦྱོར་ལམ། ཤེར་དབང་མཐོང་ལམ། ཚིག་དབང་སྒོམ་ལམ་དུ་འཇོག །འདིར་ནི་གསང་ཤེར་གཉིས་ཀ་སྦྱོར་ལམ་ནས་རྒྱུན་མཐའི་བར་དུ་འཇོག་པའོ། །དབང་ཕྱི་མ་གཉིས་ལ་དོགས་གཅོད་ཅེས་པ་གྲོལ་ཐིག་ལྟར། དབང་ཕྱི་མ་གཉིས་མཐོང་ལམ་ཕན་ཆོད་ནས་འཇོག་པ་ཁམས་ལུགས་ཡིན་ནོ། །སྦྱོར་ལམ་ནས་འཇོག་པ་ཟུར་ལུགས་སོ། ཞེས་གསུངས། ཞལ་རྒྱུན་ལ། བདག་བྱིན་རླབས་ཀྱི་ལམ་རྩ་ཐིག་རླུང་ལ་གནད་དུ་བསྣུན་པའི་ལམ་གསང་དབང་གི་ལམ་དང་། གཞན་ལུས་ལ་བརྟེན་ནས་ཡས་བབས་ཀྱི་ལམ་དང་། མས་བརྟན་དབྱེར་མེད་བདེ་བ་ཆེན་པོའི་དབང་གི་ལམ་དུ་བཞག་པས། གསང་དབང་གི་ལམ་འདི་ལྟར་ན་ཁྱབ་ཆེ་བས་ཁྱད་པར་ཡོད་ཅེས་གསུངས། ༈ ཀུན་མཁྱེན་འཇིགས་མེད་གླིང་པའི་ཡོན་ཏན་མཛོད་ཀྱི་རང་འགྲེལ་ལས། ས་བཅུའི་མཐར་སྔགས་ལ་འཇུག་པར་གསུངས་པའི་དོན། དྲན་པ་ཉེ་བར་བཞག་པ་བཞི། ཡང་དག་སྤོང་བ་བཞི་དང་བརྒྱད། རྫུ་འཕྲུལ་རྐང་པ་དང་པོ་གསུམ་དང་བཅུ་གཅིག་གི་བར་ལ་གདུལ་བྱ་དྲང་བའི་ཕྱིར་རབ་ཏུ་དགའ་བ་ལ་སོགས་པའི་ས་བཅུ་གཅིག་ཏུ་བཏགས་པ་ཡིན་པས། སྔགས་ཀྱི་ཐེག་པ་ལ་རྫུ་འཕྲུལ་རྐང་པ་བཞི་པ་ནས་འཇུག་པར། མཚན་བརྗོད་ཀྱི་ལུང་གིས་བསྒྲུབས་ཏེ་གསུངས། དེ་བཞིན་ཏུ་མཁན་པོ་ཡོན་ཏན་རྒྱ་མཚོའི་ཡོན་མཛོད་འགྲེལ་བ་ལས་ལུང་རིགས་དུ་མའི་སྒོ་ནས་བསྒྲུབས་ཡོད་ལ། ཁྱད་པར་སྤྱོད་བསྡུས་ཀྱི་འགྲེལ་བ་དང་། རྣམ་སྣང་མངོན་བྱང་སོགས་ལ་བརྟེན་ནས་བསྒྲུབས་པས་དང་པོ་ནི། གང་ཚེ་ཐ་མའི་དྲོད་གྱུར་ནས། །བཟོད་པ་ཆོས་མཆོག་བར་དུ་ནི། །རབ་འབྲིང་སྦྱོར་བ་བཅུ་གཉིས་ཏེ། །རབ་ཏུ་དགའ་བ་བཅུ་གསུམ་པའོ། །ཞེས་སོགས་དང་། རིགས་པ་ཡང་སོ་སྐྱེས་འཆིང་བ་ཀུན་ལྡན་གྱི་རྒྱུད་ལ་སྔགས་ལམ་སྐྱེ་ན། འཕགས་པ་ས་ཐོབ་པའི་རྒྱུད་ལ་མི་སྐྱེ་ཞེས་བཤད་ན་ཧ་ཅང་ཐལ་བ་དང་། དེར་མ་ཟད་ཕྱི་འགྱུར་ཆོས་སྐད་ནང་མཐུན་པར་སྨྲ་བ་དག་ཀྱང་སོ་སྐྱེའི་རྣལ་འབྱོར་དང་། འཕགས་ས་མཐོན་པོའི་རྣལ་འབྱོར་སྟོབས་ནུས་ཆེ་ཆུང་གི་ཁྱད་པར་གནམ་ས་ལྟ་བུར་ཁྱད་ཞུགས་པ་ལ་དོད་ཐུབ་བྱེད་པ་ཧ་ཅང་ཐལ་ཞེས་ནང་ཕན་ཚུན་དགག་པ་སོགས་རྣམ་གྲངས་མང་པོའི་སྒོ་ནས་བཀག་སྟེ་འཕགས་ལམ་ནས་སྔགས་ཀྱི་ཡེ་ཤེས་ཉིད་མངོན་དུ་གྱུར་བར་གསུངས་སོ། །ཀུན་མཁྱེན་ཆོས་ཀྱི་རྒྱལ་པོ་ཡང་། ཐུན་མོང་གི་འདོད་པའི་སངས་རྒྱས་ཚུལ་ལ་སྦྱར་ཏེ། ཅིའི་ཕྱིར་ཤཱཀྱ་ཐུབ་པ་ཡིས། །གྲངས་མེད་གསུམ་དུ་ཚོགས་བསགས་ཀྱང་། །སོགས་དྲངས། ཐུན་མིན་ཐེག་ཆེན་མདོ་ལྟར་ན། ཡབ་སྲས་མཇལ་བའི་མདོ་ལས། དཔའ་བོ་ཆེན་པོ་ཐབས་མཁས་དེ། །བྱེ་བ་ཕྲག་བརྒྱར་རྒྱལ་བ་ཉིད། །སོགས་ཀྱི་སྒོ་ནས་གྲངས་མེད་མང་པོའི་གོང་ནས་སངས་རྒྱས་པར་གསུངས་པ་དང་། མི་ཕམ་ཆོས་རྗེས་ཡང་འཕགས་ལམ་ནས་སྔགས་ཀྱི་ཡེ་ཤེས་ཉིད་བརྙེས་པར་གསུངས་པ་སོགས་བསྒྲིགས་ནས། ཐུན་མོང་དང་ཐུན་མིན་གྱི་ཁྱད་པར་རང་ལུགས་འཛིན་པའི་སྐྱེས་བུ་དམ་པ་གཟུར་གནས་རྣམས་ཀྱིས་དཔྱད་པར་ཞུའོ། ། ཨེ༵་མ༵་ཧོ༵་ཡེ༵་ནས༵་གསང༵་བའི༵་ཆོས༵། །སོགས༴ཞེས་པའི་དོན་ནི། མ་རྟོགས་པའི་འགྲོ་བ་ལ་སྐྱོ་བའི་ཚུལ་གྱིས་ཨེ༵་མ༵་ཧོ༵་ཞེས་རང་བཞིན་གཉིས་སུ་མེད་པའི་ཆོས་ཉིད་ལ་འབྲས་བུ་ཆེ་བའི་ཡོན་ཏན་ཐམས་ཅད་ལྷུན་གྱིས་གྲུབ་ཀྱང་། དེའི་དོན་ལ་ཐོག་མ་ཉིད་ནས་མ་རྟོགས་པས་ཡེ༵་ནས༵་གསང༵་བའི༵་ཆོས༵་སོ། །དེ་ཉིད་སྣ༵་ཚོགས༵་སུ་སྣང༵་བའི་ཆོས་ཐམས་ཅད་ཀྱང་འབྲས་བུ་མི་ཟད་པ་རྒྱན་གྱི་འཁོར་ལོའི་གནས་ལ༵་ཕྱིན་ཅི་ལོག་གི་ཤེས་པས་བསླད་ནས་རང་གི་རང་བཞིན་མ་རྟོགས་པ་ནི་རང༵་བཞིན༵་གྱིས་གསང༵་བའོ། །གནས་ལུགས་དེ་ཡང་ཡུལ་སེམས་དང་རྒྱུ་འབྲས་ལ་སོགས་པ་གཉིས་ཆོས་ཐམས་ཅད་ལས་ངོ༵་བོ༵་ཉིད༵་ཀྱིས༵་གྲོལ་ཏེ་ཡུལ་དུ་བྱར་མེད་ཀྱང་མ་རྟོགས་པས་དེ་ལྟར་བལྟ་བ་ནི་རབ༵་ཏུ༵་གསང༵་བའོ། །དེ་ཡང་སེམས་ཉིད་ལས་གཞན༵་ཞིག་གུད་དུ༵་ཡོད་པ་མིན༵་ཀྱང་སྒྲིབ་གཉིས་བག་ཆགས་དང་བཅས་པས་བསྒྲིབས་ཏེ༵་རང་ལ་གནས་པ་གཞན་ལས་འཚོལ་བ་ནི་ཤིན༵་ཏུ༵་གསང༵་བ་སྟེ། དེ་ལྟར་གསང་བ་བཞིས་ཆོད་ནས་མ་རྟོགས་པའི་གདུལ་བྱ་རྣམས་རྗེས་སུ་བཟུང་བར་རིགས་ཞེས་ཞུས་པའོ། །ཞེས་གསུངས། ཡང་ཟིན་བྲིས་ལས། གཉུག་མའི་སྟེང་ན་འབྲས་ཆོས་ཐམས་ཅད་ཡེ་རྫོགས་སུ་གནས་པ་ངོ་མ་ཤེས་པ་ཡེ༵་གསང༵་། སྣ་ཚོགས་སུ་སྣང་བའི་ཆོས་ཀུན་ཡེ་ཤེས་རང་སྣང་ལས་མི་གཞན་ཀྱང་གློ་བུར་འཁྲུལ་རྟོག་གི་དབང་གིས་དེ་འདྲའི་རང་བཞིན་མ་ཤེས་པ་རང་༵བཞིན༵་གསང༵་བ༵། སྣང་བ་དེ་ཐམས་ཅད་གཉིས་ཆོས་མཐའ་དག་དང་བྲལ་ཡང་དེ་ལྟར་མ་རྟོགས་པ་རབ༵་གསང༵་། ཆོས་རྣམས་སེམས་ཉིད་ལས་གཞན་དུ་མེད་ཀྱང་འཁྲུལ་བའི་དབང་གིས་གཞན་དུ་འཚོལ་བ་ཤིན༵་ཏུ༵་གསང་༵བའོ༵། །སྨིན་མ་གཡོ་བ་སོགས་ཀྱིས་སྤྱན་འགྱུར་བ། ཕྱག་རྐྱོང་བ། སྐུའི་གཟེངས་བསྟོད་པ། འོད་ཟེར་སྤྲོ་བ་རྣམས་སོ། །ཟིན་བྲིས་ལས། གང་ལ་གནད་དུ་བསྣུན་པའི་ཡེ་ཤེས་ཡུལ་དང་བཅས་པ་ཡེ་ནས་རྣམ་པར་དག་པའམ་སངས་རྒྱས་པའི་ཚུལ་དང་། གང་གིས་གནད་དུ་བསྣུན་པའི་ཐབས་ལམ་རིམ་གཉིས་ཀྱི་རྣལ་འབྱོར་དང་། ཇི་ལྟར་གནད་དུ་བསྣུན་པའི་ཚུལ་ལྟ་བུའི་དེའི༵་ཁྱད༵་ཆོས༵་ལེགས༵་པར༵་ཤེས༵་ན༵་སོགས་ལ་སྦྱར། ཞེས་གསུངས། འཆིང་གྲོལ་མེད་པའི་གནས་ལུགས་སོགས་ཐད། ཞལ་རྒྱུན་དུ། སེམས་ཁོ་ན་གཙོ་བོ་ཡིན་པར་ལན་ཅིག་སོགས་སྐབས། ཐེག་ཆེན་མདོ་ལས། སེམས་འདུལ་བ་ནི་བདེ་བ་འདྲེན། །སེམས་འདུལ་བ་ནི་ལེགས་པ་སྟེ། །བདག་ཉིད་བདག་གི་མགོན་ཡིན་གྱི། །གཞན་ལྟ་སུ་ཞིག་མགོན་ཏུ་གྱུར། །ཞེས་དང་། སེམས་དགེ་མི་དགེའི་དབང་གིས་ནི། །སེམས་དམྱལ་མཐོ་རིས་འཇིག་རྟེན་ན། །མཚོན་དང་རིན་ཆེན་ཤིང་བཞིན་ནོ། །ཞེས་དང་། འཇུག་པ་ལས་ཀྱང་། སེམས་སྤང་ནས་ནི་ལས་ཀྱང་ཡོད་མ་ཡིན། །ཞེས་དང་། ཡིད་བཞིན་མཛོད་ལས། སེམས་ཀྱིས་འདུ་བྱེད་སེམས་ཀྱིས་ལས་ཀུན་བྱེད། །སེམས་ལ་སྣང་ཞིང་སེམས་ཀྱིས་བཏགས་པས་ན། །འཁྲུལ་བའི་སེམས་གདུལ་སླད་དུ་འབད་པར་མཛོད། །ཅེས་གསུངས་པ་ལྟར། རྩ་བ་སེམས་ལ་ཐུག་པའི་སྒོ་ནས་ལས་བསགས། དེས་གནས་རིས་ཐ་དད་པའི་འཁོར་བ་དག་སྣང་བ་དང་། དད་པ་སོགས་ཡིད་དགེ་བའི་དབང་གིས་རྣམ་བྱང་ཕྱོགས་ཡང་འབྱུང་བ་ཡིན་པས་ཐམས་ཅད་ལས་སེམས་གཙོ་བོ་ཡིན་པར་གསུངས། ཕྲ་བའི་སེམས་ཞེས་པ་ཚོགས་བརྒྱད་ལས་འདས་པས་སོ། །སེམས་ཀྱི་རྡོ་རྗེ་ཞེས་པ། མཚོན་བྱ་དོན་གྱི་ཆོས་བདུན་དང་ལྡན་པ་ཉིད་སེམས་ཅན་གྱི་རྒྱུད་ལ་འདུ་འབྲལ་མེད་པར་བཞུགས་པ་ཉིད་ཡིན་ལ། དེ་ལྟར་རྟག་ཏུ་བཞུགས་པ་ཡང་རང་འཇོམས་བྱེད་ཀྱི་གཉེན་པོ་མེད་པས་ཡིན་ནོ། །ཞེས་དང་། འོད་གསལ་ཞེས་པ། ཕར་ཐེག་ཏུ་སྟོང་པ་ཉིད་ལ་བདག་འཛིན་གྱིས་དམིགས་ཚུལ་དག་པས་བདག་འཛིན་དང་དེའི་རྩ་བ་ཅན་གྱི་ཉོན་མོངས་དག་པས་ན་འོད་གསལ་ཞེས་ཟེར། འདིར་གཉུག་མའི་ཡེ་ཤེས་ཉིད་ཆགས་སྡང་རྨོངས་སོགས་སྒྲིབ་པའི་ངོ་བོར་གཏན་ནས་སྐྱེ་མི་སྲིད་པས་སངས་རྒྱས་ནས་སེམས་ཅན་བར་སྐད་ཅིག་ཙམ་ཡང་བཟང་ངན་མེད་པས་ན་འོད་གསལ་ཞེས་བཏགས་པ་དང་། རང་བཞིན་ལྷན་སྐྱེས་ཞེས་པའང་། ལམ་སྒོམ་སྟོབས་ལྟ་བུའི་བདེ་ཆེན་གྱི་ངོ་བོར་སྐྱེས་པ་ལྟ་བུ་མིན་པར་གདོད་ནས་ངོ་བོ་བདེ་བ་ཆེན་པོའི་བདག་ཉིད་དུ་ལྷན་ཅིག་སྐྱེས་པས་ལྷན་སྐྱེས་དང་། སེམས་ཐམས་ཅད་ཀྱི་འཆར་གཞི་སེམས་དང་ལྷན་གཅིག་ཏུ་བཞུགས་ཀྱང་རང་ཉིད་སེམས་ལས་མ་སྐྱེས་པའི་ལྷན་སྐྱེས་ལ་སོགས་པའི༴ཞེས་པའི་སྐབས། གཉུག་མའི་ཡེ་ཤེས་དང་། ཡེ་གྲོལ་རིག་པ་སོགས་མཚན་མང་དུ་ཡོད་ལ། དང་པོའི་དོན་རྐྱེན་གྱིས་བཅོས་བསྒྱུར་བྱས་པ་མིན་པར་ཡིན་ལུགས་ལ་གཉུག་མ་ཟེར་བ་དང་ཆོས་ཐམས་ཅད་རང་སྣང་དུ་རིག་པས་ན་རིག་པ་དང་སྤང་བྱས་གཏན་མ་བཅིངས་བས་ཡེ་གྲོལ་སོགས་སུ་བཏགས་པར་གསུངས། བཅིངས་གྲོལ་མེད་པའི༴ཞེས་པ། སེམས་རགས་པ་རྣམས་ལས་ཉོན་སྡུག་བསྔལ་གྱི་ངོ་བོར་སྐྱེ་བཞིན་པའི་སྐབས་ནའང་འོད་གསལ་བའི་ཡེ་ཤེས་ཀྱི་ངོ་བོ་ལ་ཅུང་ཟད་མ་སྦག་མ་བསླད་པར་བཞུགས་པས་ན་གང་གིས་མ་བཅིངས་བས་ན་ད་གྲོལ་ཡང་མི་དགོས་པས་བཅིངས་གྲོལ་མེད་པ་སྟེ། བྱམས་པ་མགོན་པོས། འདི་ལ་བསལ་བྱ་ཅི་ཡང་མེད། །བཞག་པར་བྱ་བའང་ཅུང་ཟད་མེད། །ཅེས་པ་ལྟར་རོ། །ཡེ་ཤེས་རང་གི་གནས་ལུགས་སྟོང་པ་ཉིད། ཅེས་པའི་ཐད། ཞལ་རྒྱུན་དུ། རིག་པ་ཉིད་མངོན་དུ་གྱུར་ན་ཆོས་ཀྱི་དབྱིངས་རང་སྟོབས་ཀྱིས་མཐོང་བྱ་མཐོང་བྱེད་ཀྱི་སྤྲོས་པ་མེད་པར་མངོན་སུམ་གཟིགས་པས་ན་རང་རིག་པ་ཞེས་བརྗོད་དོ། ། བྱང་ཆུབ་སེམས་ཞེས་པའི་ཐད། རྒྱུད་འདི་ནས་བསྟན་པའི་ཡེ་ཤེས་དེ་སྒྲིབ་པའི་དྲི་མས་གཏན་མ་གོས་པ་དང་། གསལ་བ་སྐུ་དང་ཡེ་ཤེས་ཀྱི་བདག་ཉིད་དུ་བཞུགས་པས་བྱང་ཆུབ་དང་། ངོ་བོ་ཡེ་ཤེས་ཡིན་པས་སེམས་ཞེས་བརྗོད་ལ། ཀུན་རྫོབ་བྱང་སེམས་ཉིད། བྱང་ཆུབ་མིན་ཞིང་བྱང་ཆུབ་འདོད་པ་ཙམ་ཡིན་པར་གསུངས་སོ། ། བདེན་པ་གཉིས་ལ་སྤྱིར་འཇོག་ཚུལ་མང་ཡང་། ཞེས་པ། བྱེ་མདོ་དང་དབུ་སེམས་ཕྱི་རྒྱུད་རྣམས་སོ། །བདེ་གཤེགས་ཟུར་ཆུང་བས། ཆོས་རྣམས་སོགས་ཐད། ཆོ་འཕྲུལ་ཆུ་ཆབ་རོམ་ལྟ་བུ་ལ་གོ་དགོས། གནས་ཚུལ་ཡེ་ཤེས་ཡིན་ཡང་སྣང་ཚུལ་ཕྱིན་ཅི་ལོག་ཏུ་སོང་བ་ཆབ་རོམ་ཆུ་མིན་ཡང་གཤིས་ཆུ་ཡིན་པ་བཞིན་ནོ་གསུངས། འདིར་བསྟན་གཉུག་སེམས་དོན་གཅིག་པས་དགོངས་གཞིར་མ་ཟད་བརྗོད་བྱ་ཡང་འདི་ཁོ་ན་ཡིན་ཞེས་བཞེད་ལ། ཞེས་པ་ནི། ཡིད་བཞིན་མཛོད་འགྲེལ་པདྨ་དཀར་པོའི་རིམ་ཁང་བཅོ་བརྒྱད་པར། དོན་འདི་མདོ་སྡེའི་ཡང་བཀའ་ཐ་མ་དོན་དམ་རྣམ་པར་ངེས་པའི་ཆོས་ཀྱི་རྣམ་གྲངས་སུ་གཙོ་བོར་གསུངས་པ་ལ། རྒྱུད་ཀྱི་དངོས་གཞི་ཡིན་པས། འདིར་དེའི་རང་བཞིན་རྟོགས་པར་བྱེད་པ་ནི་རྒྱུད་བླ་མའི་མྱ་ངན་འདས་པ་དང་། སྒྱུ་འཕྲུལ་ཆེན་པོ་ལ་སོགས་པའི་གནས་ཇི་ལྟ་བ་བཞིན་བཤད་པ་ལས། གཉུག་མའི་འོད་གསལ་དེ་ཉིད་སེམས་ཅན་གྱི་རྒྱུད་ལ་རང་ཆས་སུ་ཡོད་པའི་ངེས་དོན། རྒྱུད་བླ་མ་དང་ཆོས་དབྱིངས་བསྟོད་པ་བཞིན་ཏུ་བཤད་པ་ནི། ས་འོག་གཏེར་དང་བུམ་ནང་མར་མེ་དང་། །པད་ནང་སྐུ་འདྲར་མཁས་པས་ཤེས་པར་བྱ། །ཞེས་གསུངས་པ་དྲངས་པ་དང་། གང་འདིར་སྟོན་པས་ཆོས་ཀྱི་མཛོད་གསུངས་པ། །ཀུན་གྱི་སྙིང་པོ་འོད་གསལ་རྩེ་མོའི་ལམ། །ལྷུན་གྲུབ་གཞི་ཡི་གནས་ལུགས་ཡིན་ཞེས་བྱ། །སངས་རྒྱས་ཀྱི་བཀའ་ཐ་མ་དང་མན་ངག་ཏུ་ལྷུན་གྲུབ་གཞི་ཡི་གནས་ལུགས་འདི་མཆོག་ཏུ་བསྔགས་པས་ཤེས་པར་བྱའོ། །ཞེས་སོགས་ཐེག་མཆོག་རིན་པོ་ཆེའི་མཛོད། གྲུབ་མཐའ་མཛོད་དང་། ངེས་དོན་ཤིང་རྟ་ཆེན་མོ་སོགས་ནས་ཚུལ་དེ་དང་མཐུན་པར་གསུངས་སོ། ༈ །སྔགས་ཀྱི་ཁྱད་ཆོས་ཡིན་ཞེས་བཞེད་དོ། །ཞེས་པའི་དོན་ནི། ཟུར་འདེབས་ལས། ནང་རང་རིག་འགྱུར་མེད་ལ་དེ་བཞིན་ཉིད་དུ་བྱས་པ་ནི་སྙིང་པོའི་མདོ་དང་། རྒྱུད་བླ་མ་སོགས་དེ་དག་གི་དགོངས་འགྲེལ་རྣམས་དང་མཐུན་ཡང་། འདིར་རང་རིག་དེ་བདེ་བ་ཆེན་པོའི་རང་བཞིན་དུ་བྱས་པ་ནི། བླ་མེད་རྒྱུད་ཀྱི་ཁྱད་ཆོས་ཡིན་ནོ་སྙམ་དུ་སེམས་ཏེ། དུས་འཁོར་ལས། སྲིད་གསུམ་ཕྲ་རགས་གཟུགས་མིན་འདིར་ནི་རྣམ་པར་ཤེས་པའོ་དེ་བཞིན་རྣམ་པར་ཤེས་པ་ཉིད་མེད་དེ། །སངས་རྒྱས་ཤེས་རབ་གང་དུའང་གནས་པ་མ་ཡིན་ཞེས་པའི་ཚིག་ནི་སངས་རྒྱས་པ་རྣམས་སྟོན་པར་འགྱུར། །གང་གིས་འགྱུར་མེད་དང་བྲལ་མི་རྣམས་ཀྱིས་ནི་སྟོང་པ་ཉིད་དེ་བཟུང་ནས་སྟོང་པར་བལྟ་བྱེད་པ། །དེ་ནས་གཙོ་བོ་གང་གི་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། །ཞེས་ཟུར་འདེབས་ལས་སོ། །མི་ཕམ་རིན་པོ་ཆེས་རྒྱུད་བླ་མའི་དོགས་བཤད། སྤྲིན་དང་རྨི་ལམ་བཞིན་ཆོས་ཐམས་ཅད་སྟོང་པར་གསུངས་ནས། དེའི་རྗེས་སུ་སེམས་ཅན་ཐམས་ཅད་ཀྱི་སེམས་ཀྱི་ཆོས་ཉིད་ཀྱི་དབྱིངས་དེ་བདེ་གཤེགས་སྙིང་པོ་ཡོན་ཏན་ཡེ་ལྡན་གྱི་ཁམས་སུ་གསུངས་པའི་དགོས་པ་ཅི་ཞེས་དྲིས་པ་ལ། སེམས་ཞུམ་པ་སོགས་ཉེས་པ་ལྔ་སྤང་པའི་དོན་དུ་གསུངས། དེ་ལྟར་གསུངས་པ་དེ་འདྲའི་ཁམས་ཡོན་ཏན་མེད་ཀྱང་ཡོད་པའི་རྒྱུས་ཚིག་དྲང་དོན་ནམ། ངེས་དོན་གང་ཡིན་ན། དྲང་དོན་ཡིན་ན་རྒྱུད་བླ་མའི་རང་ཚིག་དང་དངོས་སུ་འགལ། ངེས་དོན་ཡིན་ཏེ་བྱང་ཆུབ་ཏུ་སེམས་བསྐྱེད་ནས་ཕྱིར་མི་ལྡོག་པ་འཇིག་མེད་རྟག་པའི་ལམ་ཐེག་ཆེན་རྟོགས་རིགས་ཐུན་མིན་ཡིན་ནོ། །དེ་ཡིན་པར་ཡང་། ཡང་དག་མཐའ་ནི་འདུས་བྱས་ཀྱི་སོགས་ཀྱིས་བཤད་དོ། །ལས་ཉོན་རྣམ་སྨིན་གྱིས་བསྡུས་པའི་འཁོར་བའི་ཆོས་རྣམས་དབྱིངས་ལ་ཡེ་ནས་མི་ལྡན་དེ་རང་བཞིན་རྣམ་དག་ཡིན་པས་འབྲལ་རུང་དང་། ཟག་མེད་མི་གནས་པའི་མྱང་འདས་ཀྱི་ཡོན་ཏན་ཐམས་ཅད་མཁའ་གོ་འབྱེད་དང་། ཉི་མ་ལ་འོད་བཞིན་འབྲལ་མི་རུང་བར་རང་གི་ཆོས་ཉིད་ལ་ལྡན་ཏེ། གཤེགས་སྙིང་ནི་སྟོང་རྐྱང་ཙམ་མིན་ཏེ། སྟོང་ཉིད་འོད་གསལ་ཡིན། དེ་ཆོས་ཐམས་ཅད་ཀྱི་ཡེ་ཐོག་གཞི་ཡི་གནས་ལུགས་ཡིན། ཟུང་འཇུག་བདེན་པ་དབྱེར་མེད་ཀྱི་གནས་ལུགས་རྣམ་ཀུན་མཆོག་ལྡན་གྱི་སྟོང་ཉིད་ཡིན་ལ། དེ་ངོ་བོ་ཉིད་ཀྱིས་སྲིད་ཞིར་མི་གནས་པ་དང་། སངས་རྒྱས་ཀྱི་ཡོན་ཏན་ལྷུན་གྲུབ་ཡོད་པ། དེ་རྟོགས་པས་ཐེག་ཆེན་ལམ་གྱི་ཡོན་ཏན་ཐམས་ཅད་འབྱུང་བ་ཡིན་ནོ། །ལས་ཉོན་རྣམ་སྨིན་གྱི་ཕྲ་བ་གང་ཟད་ཕན་ཆད་སྤང་བྱ་གཏན་མེད་པ་ནི། མ་རིག་བག་ཆགས་ཀྱི་ས་སོགས་བཞི་ཡིན། དེ་སྤང་བ་ནི་སངས་རྒྱས་ཁོ་ནའི་ས་ཡིན་ལ། དེ་བཞི་སྤངས་ན་མཐར་ཐུག་གི་ཡོན་ཏན་སྟོབས་སོགས་སངས་རྒྱས་ཀྱི་ཆོས་རྒྱ་མཚོ་མངོན་དུ་འགྱུར་བ་ནི་དབྱིངས་ཀྱི་ཡོན་ཏན་ཉིད་མངོན་ཏུ་གྱུར་བ་ཡིན་པས། འདི་སངས་རྒྱས་ཀྱི་རིགས་ཁོ་ན་ཡིན་གྱི་ཉན་རང་སོགས་ཀྱི་མ་ཡིན་ཏེ། སངས་རྒྱས་པའི་ཡོན་ཏན་དང་དབྱེར་མེད་པའི་ཕྱིར་རོ། །འོ་ན་ཁྱི་ཕག་སོགས་སེམས་ཅན་རྣམས་ཀྱི་སེམས་ཀྱི་རྒྱུད་ལ་སྟོབས་བཅུའི་ཡེ་ཤེས་ཡོད་དམ་ཟེར་ན། སྟོབས་བཅུའི་ཡེ་ཤེས་ཀྱི་ཡོན་ཏན་དེའི་རྒྱུད་ཀྱི་གཤེགས་སྙིང་ལ་ཡེ་ནས་ཡོད་དོ། །ཁོ་རང་གི་ཆོས་ཉིད་ཀྱི་ཡོན་ཏན་ཡིན་པས་ཁམས་ཡོད་ན་ཡོན་ཏན་ཡོད་མོད་ཀྱི་མངོན་ཏུ་མི་འགྱུར་ཏེ། རལ་གྲི་ལ་གཅོད་པའི་བྱ་བ་ཡོད་ཀྱང་། ཤུབས་སུ་ཆུད་པ་ལ་གཅོད་པའི་བྱ་བ་མངོན་གྱུར་དུ་མེད་པ་དང་། མེ་ལོང་ལ་གཟུགས་བརྙན་འཆར་རུང་གི་ཡོན་ཏན་ཡོད་ཀྱང་སྒྲོམ་དུ་བཅུག་པ་ལ་མངོན་གྱུར་དུ་མི་འཆར་བ་དང་འདྲ་སྟེ་རང་རྒྱུད་ལྡན་གྱི་གང་ཟག་དེའི་རྒྱུད་ལ་ཡོད་པའི་སྒྲིབ་པས་ཁམས་ཀྱི་ཡོན་ཏན་མངོན་དུ་མི་སྣང་སྟེ། དེར་མ་ཟད་དེའི་རང་སེམས་ཀྱི་ཆོས་ཉིད་རྣམ་ཀུན་མཆོག་ལྡན་གྱི་སྟོང་ཉིད་ཡོད་ཀྱང་མངོན་དུ་མ་གྱུར་ན་ཡོན་ཏན་ཅི་ལ་མངོན། དེའི་ཕྱིར་མངོན་གྱུར་དུ་མེད་པ་འདི་ལ་བསམས་ནས། སྟོབས་བཅུ་སྐྱེ་རུང་གི་རྒྱུ་ཙམ་ཡོད་ཀྱི་དངོས་སུ་མེད་ཟེར་བ་ཡོད་པའང་དཔྱད་ཚུལ་དེའི་དབང་དུ་དེ་ལྟར་རུང་མོད། སྐྱེ་རུང་གི་རྒྱུ་དེ་འདུས་བྱས་སེམས་ཀྱི་ཆ་ཡིན་ན་སེམས་ཡིན་ཚད་སྟོབས་བཅུ་བསྐྱེད་རུང་དུ་སྒྲུབ་དཀའ་ལ། སྒྲིབ་གཉིས་བག་ཆགས་བཅས་སྦྱངས་སྟོབས་ཀྱིས་སེམས་ཉིད་རང་གི་བྱེད་པ་ཡིན་ན། འདི་འདུས་མ་བྱས་ཀྱི་དབྱིངས་ཀྱི་ཡོན་ཏན་ཡིན་པས། སྨིན་པའི་རྒྱུ་རུ་མི་རུང་ངོ་། །འདི་ལྟ་བུའི་ཁམས་དེ་སེམས་ཀྱི་རང་བཞིན་འོད་གསལ་གཉུག་སེམས་གསུངས་པ་དེ་ཡིན། དེ་ནམ་ཡང་རྒྱུན་ཆད་པ་མེད་ལ་ངོ་བོ་སྟོང་པས་དམིགས་མཚན་གང་ཡང་མེད་ཀྱང་། སྟོང་རྐྱང་མིན་ཏེ་མཚན་མ་མེད་པའི་རང་འོད་གསལ་བ་ཡིན་ནོ། །སྒྲིབ་པ་མ་ཟད་པའི་སེམས་རྒྱུད་ཀྱི་གཤེགས་སྙིང་ལ་སྟོབས་བཅུའི་ཡེ་ཤེས་མངོན་གྱུར་དུ་མེད་པ་ནི་བདག་ཅག་ཀྱང་འདོད་མོད། བླ་མེད་ཆོས་ཀྱི་ཡོན་ཏན་དབྱིངས་དེ་ལ་མེད་པ་མིན་ཀྱང་། མངོན་དུ་མི་འགྱུར་བའི་སྒྲིབ་པ་ཡོད་པའི་ཕྱིར་རོ། །ཁམས་རང་གི་ངོ་བོ་སངས་རྒྱས་ཀྱི་ཡོན་ཏན་ཡེ་ལྡན་མིན་ན། དེ་འདྲའི་ཁམས་དེ་ཡོད་ཀྱང་སངས་རྒྱས་ཀྱི་རིགས་སུ་མི་འགྲུབ་སྟེ། སྟོང་རྐྱང་བཞིན་ནོ། །དེས་ན་ཆོས་དབྱིངས་འོད་གསལ་ལམ། རང་བྱུང་ཡེ་ཤེས་སམ། གཉུག་སེམས་འོད་གསལ་ལམ། བདེ་གཤེགས་སྙིང་པོ་ཞེས་པ་རྣམས་དོན་གཅིག་སྟེ། འདི་སངས་རྒྱས་ཀྱི་རིགས་ཡིན་ཏེ། སྒྲིབ་བཅས་ཀྱི་རྒྱུད་ལ་ཡོད་ཚེ་སངས་རྒྱས་རུང་གི་རིགས་དང་སངས་རྒྱས་ཚེ་མངོན་གྱུར་ཡིན། སངས་རྒྱ་རུང་ཡིན་ཀྱང་འདུས་མ་བྱས་པའི་ཆོས་ཉིད་ལ་སྔ་ཕྱིའི་ཁྱད་པར་གནས་ཚུལ་ལ་མེད་དེ་ངོ་བོ་འགྱུར་མེད་ཡིན་པས་སོ། །སྣང་ཚུལ་ལ་གནས་གྱུར་བའི་ཐ་སྙད་བརྗོད་རུང་ངོ་། །དེ་འདྲའི་སངས་རྒྱས་ཀྱི་རིགས་ཡོད་པར་བསྟན་པས་ཉེས་པ་ལྔ་སྤང་ནས་བླ་མེད་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ཉེས་པ་ལྔ་པོ་གཤེགས་སྙིང་སེམས་ཅན་ཐམས་ཅད་ལ་ཡོད་པར་མ་ཐོས་པ་ལས་འབྱུང་། མཐར་ཐུག་ཐེག་གཅིག་འགྲུབ་པའི་གནད་འདི་ཡིན་ལ། རྡོ་རྗེ་ཐེག་པར་སེམས་ཉིད་ཡེ་སངས་རྒྱས་པའི་གནད་ཀྱང་འདི་ཡིན་ནོ། །ཞེས་གསུངས། སྤྲིན་དང་རྨི་ལམ་སྒྱུ་བཞིན་དེ་དང་དེ། །ཤེས་བྱ་ཐམས་ཅད་རྣམ་ཀུན་སྟོང་ངོ་ཞེས། །གསུངས་ནས་ཡང་འདིར་རྒྱལ་རྣམས་སེམས་ཅན་ལ། །སངས་རྒྱས་སྙིང་པོ་ཡོད་ཅེས་ཅི་སྟེ་གསུངས། །སེམས་ཞུམ་སེམས་ཅན་དམན་ལ་བརྙས་པ་དང་། །ཡང་དག་མིན་འཛིན་ཡང་དག་ཆོས་ལ་སྐུར། །བདག་ཅག་ལྷག་པའི་སྐྱོན་ལྔ་གང་དག་ལ། །ཡོད་པ་དེ་དག་དེ་སྤང་དོན་དུ་གསུངས། །ཞེས་པའི་དོན་ཡང་། རྗེ་མི་ཕམ་པའི་ཕྱག་མཆན་ལས། མི་བརྟན་ཞིང་རང་བཞིན་མེད་པ་སྤྲིན༵་དང༵་། ཉམས་སུ་མྱོང་ཡང་རང་བཞིན་མེད་པ་རྨི༵་ལམ༵་དང་། རྣམ་པར་སྣང་ཡང་རང་བཞིན་མེད་པ་སྒྱུ༵་མའི་གཟུགས་བརྙན་བཞིན༵་བཀའ་བར་བ་ཡུམ་རྒྱས་འབྲིང་སོགས་དང༵་དེ༵ར་ཤེས༵་བྱ༵་ཐམས༵་ཅད༵་ནི་རྣམ༵་ཀུན༵་ཏུ༵་སྟོང༵་པའོ༵་ཞེས༵་གསུང༵ས་ནས༵་ཡང༵་འཁོར་ལོ་ཐ་མ་འདིར༵་རྒྱལ༵་བ་རྣམས༵་སེམས༵་ཅན༵་གྱི་རྒྱུད་ལ༵་སངས༵་རྒྱས༵་ཀྱི་སྙིང༵་པོ༵་གདོད་ནས་ལྷུན་གྲུབ་ཏུ་ཡོད༵་ཅེས༵་ཅི༵་སྟེ༵་གསུངས༵་ཏེ་ཡོད་མེད་མི་འགལ་ལམ། ཞེས་དང་། ཡང་ཁམས་དེ་འཕགས་པ་མཆོག་གིས་ཀྱང་རྟོགས་པར་དཀའ་ན་བྱིས་པ་རྣམས་ལ་དེ་བསྟན་པ་ལ་དགོས་པ་ཅི་ཡོད་ཅེ་ན། དེ་ཡི་ལན་ཉིད་བསྟན་པའོ། །དེ་གཉིས་མི་འགལ་ཏེ། སྔར་གཟུགས་ནས་རྣམ་མཁྱེན་བར་གྱི་ཆོས་རྣམས་ལ་བདེན་པ་མེད་པར་གསུངས་པ་དབྱིངས་ངོ་བོ་སྟོང་པའི་ཆ་ནས་བསྟན་པ་ཡིན་ལ་འདིར་བདེ་གཤེགས་སྙིང་པོ་ཡོད་པར་གསུངས་པ་ཡང་ངོ་བོ་བདེན་པར་ཡོད་ཅེས་གསུངས་པ་མ་ཡིན་ཏེ། རིག་པ་ཡེ་ཤེས་རང་བཞིན་གསལ་བའི་ཆ་ནས་བསྟན་པས་དེ་གཉིས་མི་འགལ་བར་མ་ཟད་གཅིག་གྲོགས་སུ་གཅིག་འཆར་བས་ཟུང་དུ་འཇུག་པ་དང་། དགོས་པ་ཁྱད་པར་ཅན་ལྔའི་ཆེད་དུ་ཡོད་པར་བསྟན་པ་དང་། ལྔ་གང་ཞེ་ན། རང་ལ་སེམས་བསྐྱེད་སྐྱེ་བའི་གེགས་དོན་དམ་པའི་དབྱིངས་རང་ལ་ཡོད་པར་མ་ཤེས་ནས་བྱང་ཆུབ་བསྒྲུབ་པར་མི་ནུས་སྙམ་དུ་སེམས༵་ཞུམ༵་པ་དང་། ལམ་ལ་མི་སྤྲོ་བའི་ཉེས་པ་དང་། གཞན་རྗེས་སུ་འཛིན་པའི་གེགས་གཞན་རྒྱུད་ལ་གཤེགས་སྙིང་ཡོད་པར་མ་ཤེས་ནས་སེམས༵་ཅན༵་འདི་དག་དམན་ནོ་སྙམ་དུ་དམན༵་ལ༵་བརྙས༵་པ༵་མི་གུས་པའི་ཉེས་པ་དང༵་། །ཡང་དག་པའི་གནས་ལུགས་རྟོགས་པའི་ཤེས་རབ་ཀྱི་གེགས་རང་གཞན་ཀུན་ལ་གཤེགས་སྙིང་ཡོད་པར་མ་ཤེས་ནས་བཅོས་མ་གློ་བུར་གྱི་དྲི་མ་དབྱིངས་ལ་གདོད་ནས་མེད་པ་ལ་ཡོད་པར་སྒྲོ་བཏགས་ཏེ་ཡང༵་དག༵་མིན༵་པར་འཛིན༵་པའི་ཉེས་པ་དང་དབྱིངས་དང་དབྱེར་མེད་པའི་ཡོན་ཏན་རྣམས་ཡོད་པ་ལ་མེད་པར་སྙམ་ཏེ་ཡང༵་དག༵་ཆོས༵་ལ༵་སྐུར༵་པ་འདེབས་པའི་ཉེས་པ་དང་། བདག་གཞན་མཉམ་པ་ཉིད་དུ་རྟོགས་པའི་གེགས་བདག་གཞན་རང་བཞིན་ཆོས་དབྱིངས་མཉམ་པར་མ་ཤེས་པས་བདག༵་ལ༵་ཆགས༵་པ་ལྷག༵་པར་འཕེལ་བའི༵་ཉེས་པ་སྟེ་སྐྱོན༵་ནམ་ཉེས་པ་ལྔ༵་གང་ཟག་གང༵་དག༵་ལ་ཡོད༵་པ༵་དེ༵་དག༵་དེ༵་སྤང༵་དོན༵་དུ༵་གསུང༵ས་པ་ཡིན་ནོ། །ཞེས་གསུངས། རིན་པོ་ཆེས་གཏེར་ཆེན་བླ་མ་ལ་གསུངས་པ་ནི། སེམས་ཞུམ་སོགས་དོན། བདག་ཀྱང་བདེ་གཤེགས་སྙིང་པོ་རང་བཞིན་འོད་གསལ་གྱི་སེམས་དང་ལྡན་པས་དྲི་མ་གློ་བུར་པ་སྦྱོང་བའི་ཐབས་ལ་བསླབས་ན་བླ་མེད་བྱང་ཆུབ་གདོན་མི་ཟ་བར་འཐོབ་ནུས་སོ་སྙམ་ནས་ཞུམ་པ་སྤོང་པ་དང་༡། རྒྱུད་ཉེས་བྱས་ཆེན་པོས་ཟིལ་ཀྱིས་མནན་ཅིང་ཉོན་མོངས་འཆོལ་ཉོག་ཏུ་སྤྱོད་པའི་སེམས་ཅན་རྣམས་ཀྱང་གདོད་ནས་རྣམ་དག་འོད་གསལ་གྱི་སྙིང་པོ་ཅན་དུ་གནས་པས་ངེས་པར་སངས་རྒྱས་པར་འགྱུར་རོ་སྙམ་ནས་སེམས་ཅན་དམན་པ་ལ་བརྙས་པ་སྤོང་བ་དང་༢། འབྲལ་རུང་གློ་བུར་བའི་སེམས་ལ་མཐར་ཐུག་སངས་རྒྱས་ཀྱི་སའི་བར་དུ་འགྲོ་བའི་ཤེས་རྒྱུད་གཉུག་མར་ཞེན་པའི་སྒྲོ་འདོགས་སྤོང་བ་དང་༣། སངས་རྒྱས་ཀྱི་ཆོས་གང་གའི་བྱེ་མ་སྙེད་ཀྱི་གཞིར་གྱུར་ཅིང་མོས་པ་ལན་རེ་སྐྱེས་པས་ཀྱང་ཕྱིར་མི་ལྡོག་པའི་ས་བོན་ཁྱད་པར་ཅན་འཇོག་པའི་སེམས་ཀྱི་གནད་གསང་མཐར་ཐུག་གཞན་ཡོད་པ་ལ། ད་ལྟ་རང་ཅག་ལ་མངོན་དུ་གྱུར་པའི་སེམས་ཀྱི་ཕ་རོལ་ན་དེ་འདྲ་གང་ཡང་མེད་དོ་ཞེས་སྐུར་བ་འདེབས་པ་སྤོང་བ་དང་༤། བདག་གཞན་སྣོད་བཅུད་བདེ་སྡུག་སོགས་གློ་བུར་གྱི་འཁྲུལ་སྣང་ཅི་ཙམ་ཤར་ཡང་སེམས་ཀྱི་གཉུག་མའི་གཤིས་ལ་མཉམ་པ་ཉིད་དུ་ཤེས་ནས་བདག་ལ་ལྷག་པར་ཆགས་པའི་སྐྱོན་བསལ་ཏེ་ཞེན་མེད་ཀྱི་གནད་དང་ལྡན་པའི་དགོས་པ་དང་༥། ཞེས་པ་འཕྲལ་གཏམ་ཙམ་མོ། །འཕགས་པ་ཐོགས་མེད་ཀྱི་རྒྱུད་བླ་མའི་འགྲེལ་བར། སྤྲིན་མཐོང་མཁའ་ལ་ཉི་བཞིན་ཁྱོད་འདིར་སོགས་དྲངས་ནས། ཉན་རང་གིས་ཀྱང་བདེ་གཤེགས་སྙིང་པོ་ཕྱོགས་གཅིག་མཐོང་བར་བཤད་པ། ཁྱོད་ལྟར་ན། ཉན་རང་རྣམས་ཀྱང་ལྷན་སྐྱེས་ཀྱི་ཡེ་ཤེས་རྟོགས་པའི་གསང་སྔགས་པར་ཁས་ལེན་དགོས་སོ་ཞེ་ན། ཉན་རང་གིས་སེམས་ཀྱི་གནས་ལུགས་སྟོང་པ་ཉིད་དུ་གཟིགས་ཤིང་། སེམས་ཀྱི་ནང་ན་གཤེགས་སྙིང་ཡང་ཡོད་པས་དེ་ཙམ་ལ་བཤད་རུང་སྟེ། ཆོས་ཐམས་ཅད་ཀྱི་གནས་ལུགས་མངོན་སུམ་དུ་མཐོང་ན་ཆོས་ཐམས་ཅད་མངོན་སུམ་དུ་མཐོང་མི་དགོས། ད་དུང་ཡིད་བཞིན་མཛོད་འགྲེལ་དང་ཤིང་རྟ་ཆེན་པོ་ལས་གཡའ་ཆོད། བླ་མ་རིན་པོ་ཆེའི་གསུང་ཟུར་འདེབས་ལས། སྤྲིན་དང་རྨི་ལམ་སོགས༴ཟུར་འདེབས་ལས། འཁོར་ལོ་བར་བར་ཉོན་མོངས་སྤྲིན་དང་། ཟག་བཅས་ཀྱི་ལས་རྨི་ལམ་གྱི་ལོངས་སྤྱོད་དང་། ཉེར་ལེན་གྱི་ཕུང་པོ་སྒྱུ་མ་དང་སྤྲུལ་པ་ལྟར་རང་བཞིན་གྱིས་གྲུབ་པ་རྡུལ་ཙམ་ཡང་མ་གྲུབ་པས་རྫུན་པའི་སྣང་བ་ཙམ་དུ་གསུངས་ནས། ཡང་འཁོར་ལོ་ཐ་མ་འདིར་སེམས་ཅན་གྱི་རྒྱུད་འདིར་སངས་རྒྱས་ཀྱི་སྙིང་པོ་འདི་ལྟ་བུ་ཡོད་པར་གསུངས་པ་མི་འགལ་ལམ་ཞེ་ན། ཞེས་དྲིས་པའི་ལན་དུ་སེམས་ཞུམ་སོགས་དོན་བདེ་བར་གཤེགས་པའི་སྙིང་པོ་སེམས་ཅན་ཐམས་ཅད་ལ་རང་ཆས་སུ་ཡོད་པ་འདི་མ་མཐོང་བར་བདག་ནི་ཡོན་ཏན་དང་བྲལ་ཞིང་ཉེས་སྐྱོན་ཀྱི་ཕུང་པོ་ཆེན་པོ་ཡིན་པས་བདག་ལྟ་བུས་བྱང་ཆུབ་ག་ལ་འགྲུབ་སྙམ་ནས་སེམས་ཞུམ་པ་དང་། བདག་ཉིད་ལ་བྱང་ཆུབ་ཀྱི་སེམས་སྐྱེས་ཀྱང་བྱང་སེམས་མ་སྐྱེས་པའི་སེམས་ཅན་གཞན་ལས་དམན་པའི་འདུ་ཤེས་ཀྱིས་ཁྱད་དུ་གསོད་པ་དང་། བདག་གཞན་གྱི་རྒྱུད་འདི་མཐའ་གཅིག་ཏུ་ཉེས་སྐྱོན་ཅན་དུ་བདེན་པར་སྒྲོ་འདོགས་པ་དང་། ཡང་དག་པའི་ཆོས་སངས་རྒྱས་ཀྱི་སྐུ་དང་ཡེ་ཤེས་མཐའ་དག་གི་སེམས་ཅན་གྱི་རྒྱུད་འདི་སྟོང་པར་བཟུང་ནས་སྐུར་བ་འདེབས་པ་དང་། བདག་ལ་ཆགས་པའི་དབང་གིས་བདག་ནི་གཞན་ལས་ལྷག་གོ་ཞེས་ང་རྒྱལ་སྐྱེས་པའི་ཉེས་པ་ལྔ་སྤང་བའི་རྣམ་གཅོད་ཀྱི་དགོས་པའི་ཆེད་དུ། འགྲོ་བ་མཐའ་དག་གི་རྒྱུད་ན་གཉུག་མའི་འོད་གསལ་སངས་རྒྱས་ཀྱི་ཡོན་ཏན་རྒྱ་མཚོའི་གཏེར་མཛོད་ལྟ་བུ་དེ་ཡོད་པར་སྟོན་པའི་མན་ངག་གི་མཆོག་དེ་བསྟན་པས། སྤྲོ་དང་སྟོན་པ་བཞིན་གུས་དང་། །ཤེས་རབ་ཡེ་ཤེས་བྱམས་ཆེན་སྐྱེས། །ཞེས་གསུངས་པ་ལྟར། བདག་ཉིད་ཀྱང་བརྩོན་པའི་སྟོབས་བསྐྱེད་ན་ངེས་པར་འཚང་རྒྱའོ་སྙམ་དུ་དགའ་ཞིང་སྤྲོ་བ་དང་། །སེམས་ཅན་གཞན་མཐའ་དག་ཀྱང་གཤིས་སངས་རྒྱས་ཀྱི་བདག་ཉིད་ཡིན་ནོ་སྙམ་དུ་སྟོན་པ་བཞིན་དུ་གུས་པ་དང་། མ་དག་འཁོར་བའི་ཕུང་ཁམས་འདི་དག་ཐམས་ཅད་ཀྱང་དག་བྱ་གློ་བུར་བ་འབྲལ་རུང་ཁོ་ནའི་བདག་ཉིད་དུ་ཤེས་པའི་ཤེས་རབ་དང་། རང་བཞིན་རྣམ་དག་གི་དབྱིངས་འོད་གསལ་བས་སེམས་ཅན་ཐམས་ཅད་ལ་ཁྱད་མེད་དུ་ཁྱབ་པར་ངེས་པའི་ཡེ་ཤེས་དང་། བདག་གཞན་ཐམས་ཅད་ཡེ་ནས་སངས་རྒྱས་པའི་བདག་ཉིད་དུ་མཉམ་པར་ཤེས་པའི་བྱམས་པ་ཆེན་པོ་སྐྱེ་བ་དེ་ཡོངས་གཅོད་ཀྱི་དགོས་པ་ལྔ་དང་ལྡན་པར་བསྟན་ནོ། །རྒྱུད་བླ་མའི་འགྲེལ་བར་ཡང་བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་སྐྱེ་བའམ་ན་བའམ་འཆི་འཕོ་བ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་འདུས་བྱས་ཀྱི་མཚན་ཉིད་ཀྱི་ཡུལ་ལས་འདས་པའོ། །རྟག་པ། བརྟན་པ། ཞི་བ། གཡུང་དྲུང་ཞེས་གསུངས་པ་སོགས་གཤེགས་སྙིང་རྟག་བརྟན་དུ་ལུང་དང་འགྲེལ་ཚིག་དུ་མར་བསྟན་ཀྱང་། དེའི་དོན་ཤིང་རྟ་ཆེན་པོར་ནི། དྲི་མ་མེད་པས་གཙང་བ། འཕོ་འགྱུར་མེད་པས་བདག་དམ་པ། དུས་ཐམས་ཅད་དུ་གནས་པས་རྟག་པ། སྡུག་བསྔལ་ཐམས་ཅད་པའི་འཁོར་བར་ལྟུང་ཡང་སྡུག་བསྔལ་གྱི་ཟིལ་གྱིས་མི་གནོན་པའི་ཕྱིར་བདེ་བའི་ཕ་རོལ་ཏུ་ཕྱིན་པ་སྟེ། ཞེས་གསུངས་པ་ལྟར། རང་གི་ངོ་བོ་དྲི་མས་མ་བསླད་ཅིང་ཡོན་ཏན་ཡེ་རྫོགས་སུ་ཡོད་པས་ཡེ་ཤེས་དེ་ཉིད་བཟང་ངན་སྣ་ཚོགས་སུ་འགྱུར་བ་མེད་པས་བརྟན་པ། དུས་ནམ་ཡང་རྒྱུན་ཆད་པ་མེད་པས་རྟག་པ། དྲི་མས་མ་བསླད་པས་ཞི་བ། སྐྱེ་འཆི་བགྲེས་རྒུད་དང་བྲལ་བའི་གཡུང་དྲུང་གི་བདག་ཉིད་ཡིན་པར་དགོངས་པ་ཡིན་ནོ། ༈ །དེ་བས་ཀྱང་ཆེས་བཤད་དཀའ་བ་འགའ་ཞིག །ཞེས་པའི་ཐད། རྒྱུད་བླ་མའི་འགྲེལ་པར། འཇིག་རྟེན་ལས་འདས་པའི་ཆོས་ཀྱི་སྐུའི་རང་བཞིན་ཡོངས་སུ་དག་པ་ལྟ་བའི་གནད་ཡིན་པ་ནི་འདིར་གང་གིས་ས་བཅུ་ལ་གནས་པའི་བྱང་ཆུབ་སེམས་དཔའ་དེ་བཞིན་གཤེགས་པའི་སྙིང་པོ་ཅུང་ཟད་མཐོང་ངོ་ཞེས་གསུངས་པས། ཡང་དག་པ་ནི་ཇི་ལྟ་བ་བཞིན་གྱི་ཡེ་ཤེས་ཀྱིས་མཐོང་བར་འདོད་དོ། །དེ་སྐད་དུ། སྤྲིན་མཐོང་མཁའ་ལ་ཉི་བཞིན་འདིར་ཁྱོད་ཕྱོགས་གཅིག་བློ་གྲོས་ཅན། །བློ་མིག་དག་པའི་འཕགས་རྣམས་ཀྱིས་ཀྱང་ཐམས་ཅད་མཐོང་མ་ལགས། །བཅོམ་ལྡན་འདས་ཁྱོད་ཆོས་སྐུ་གང་དག་བློ་གྲོས་མཐའ་ཡས་པ། །ཤེས་བྱ་མཐའ་མེད་མཁའ་དབྱིངས་ཁྱབ་པ་དེ་དག་གིས་ཀུན་མཐོང་། །ཞེས་པའི་ཐད་དུ། ཤིང་རྟ་ཆེན་པོ་ལས། གནས་ལུགས་མ་མཐོང་བའི་སྐྱེ་བོ་དགེ་བའི་བཤེས་གཉེན་གྱིས་ཟིན་པ་རྣམས་དང་། ཉན་ཐོས་དང་། རང་སངས་རྒྱས་ཐེག་པ་ཆེན་པོ་མོས་པ་དང་། ས་ལ་མ་ཞུགས་པའི་སེམས་དཔའ་རྣམས་ཀྱིས་མོས་པས་དོན་སྤྱིའི་ཚུལ་དུ་རྟོགས་པ་དང་། སེམས་དཔའ་ས་བཅུ་ལ་གནས་པས་ཕྱོགས་གཅིག་ཙམ་རྟོགས་ལ། ཇི་ལྟ་བ་བཞིན་ཏུ་ནི་སངས་རྒྱས་ཉིད་ལས་གཞན་གྱིས་མི་མཐོང་སྟེ། ཞེས་གསུངས། ༈ ཡང་ཟིན་བྲིས་ལས། སྤྲིན་དང་རྨི་ལམ༴སོགས་ནས། གསུངས་ཞེས་ཤེར་ཕྱིན་གྱི་མདོ་སྟོང་ཕྲག་བརྒྱ་བ་ལ་སོགས་པ་དེ་དང་དེར་ཤེས་བྱ་ཐམས་ཅད་སྤྲིན་དང་རྨི་ལམ་སྒྱུ་མ་བཞིན་དུ་རྣམ་པ་ཐམས་ཅད་དུ་རང་བཞིན་གྱིས་གྲུབ་པའི་སྟོང་པ་ཞེས་གློ་བུར་ལྟར་གསུངས་ནས། ཡང་དེ་བཞིན་གཤེགས་པའི་སྙིང་པོའི་མདོ་ལ་སོགས་པ་འདིར་རྒྱལ་བ་རྣམས་སེམས་ཅན་ཐམས་ཅད་ལ་སེམས་ཀྱི་རང་བཞིན་ནམ་གཉུག་མར་གྱུར་བའི་སངས་རྒྱས་ཀྱི་སྙིང་པོ་ཡོད་ཅེས་ཅི་སྟེ་གསུངས་ཏེ། གསུངས་མི་རིགས་པར་ཐལ། གློ་བུར་བ་ཡིན་པ་དང་རང་བཞིན་ནམ་གཉུག་མ་ཡིན་པ་གཉིས་འགལ་བའི་ཕྱིར། ཞེས་པའི་རྩོད་པ་དང་། སེམས་ཅན་ཐམས་ཅད་ལ་དེ་འདྲའི་བདེ་གཤེགས་སྙིང་པོ་ཡོད་ཅེས་ཅི་སྟེ་གསུངས་ཏེ། དགོས་པ་མེད་པར་ཐལ། བྱིས་པ་རྣམས་ལ་བསྟན་ཀྱང་རྟོགས་མི་ནུས་པའི་ཕྱིར་ཏེ། དཀོན་མཆོག་གསུམ་པོ་འདི་ཡི་རིགས། །ཐམས་ཅད་གཟིགས་པ་རྣམས་ཀྱི་ཡུལ། །དེ་ལ་རྣམ་བཞི་གོ་རིམ་བཞིན། རྒྱུ་བཞི་ཡིས་ནི་བསམ་མི་ཁྱབ། །ཅེས་པ་ལྟར་བསམ་གྱིས་མི་ཁྱབ་པར་གསུངས་པའི་ཕྱིར། ཞེས་དེ་ལྟར་བསྟན་པ་ལ་དགོས་པ་མེད་པར་རྩོད་པའི་ལན་དུ། སེམས་ཞུམ་སེམས་ཅན་དམན་ལ་སོགས་གསུངས། ཞེས་གསར་དུ་བྱང་ཆུབ་མཆོག་ཏུ་སེམས་བསྐྱེད་པའི་གེགས་བདག་ལ་སངས་རྒྱས་ཀྱི་རིགས་སམ་ས་བོན་མེད་པས་བླ་མེད་བྱང་ཆུབ་འཐོབ་མི་ནུས་སྙམ་དུ་སེམས་ཞུམ་པ་དང་༡། བྱང་སེམས་ཀྱི་སྤྱོད་པ་སྒྲུབ་པའི་གེགས་སེམས་བསྐྱེད་པ་ཁ་ཅིག་བདག་གིས་བྱང་ཆུབ་འཐོབ་ནུས་ལ་སེམས་ཅན་གཞན་གྱིས་མི་ནུས་སྙམ་པའི་སེམས་ཅན་དམན་པ་ལ་བརྙས་པ་དང་༢། གནས་ལུགས་སམ་གཉུག་མའི་ཡེ་ཤེས་ཀྱི་དོན་རྟོགས་པའི་གེགས་གཉུག་མའམ་ཡང་དག་མིན་པའི་གློ་བུར་བ་ལ་ཡང་དག་པར་འཛིན་པའི་སྒྲོ་འདོགས་དང་༣། ཡང་དག་པའི་ཆོས་གཉུག་སེམས་རང་བཞིན་གྱིས་རྣམ་པར་དག་པ་མེད་དོ་ཞེས་སྐུར་བ་འདེབས་སླད་དང་༤། སེམས་བསྐྱེད་སྐྱེ་བའི་རྒྱུ་བདག་གཞན་བརྗེ་བའི་སྙིང་རྗེ་ཆེན་པོའི་གེགས་རང་གཅེས་འཛིན་དབང་གིས་བདག་ལ་ཆགས་པ་ལྷག་པར་ཡོད་པའི་སྐྱོན་ལྔ་པོ་དེ་དག་སྤངས་ནས་གསར་དུ་སེམས་བསྐྱེད་པ་སོགས་ཀྱི་ཡོན་ཏན་དེ་དག་བསྐྱེད་པའི་དོན་དུ་སངས་རྒྱས་སུ་འགྱུར་རུང་གི་གཤེགས་སྙིང་སེམས་ཅན་ཐམས་ཅད་ལ་ཡོད་པར་གསུངས་སོ། །མདོ་ཕྱི་མར་བསྟན་པའི་གཉུག་སེམས་ཡུལ་ཡུལ་ཅན་གྱི་སྤྲོས་པ་དང་བྲལ་བ་དེ་ཉིད། མདོ་སྔ་མར་བསྟན་པའི་སྤྲོས་པ་དང་བྲལ་བའི་དབྱིངས་ཡིན་པས་ན་སྔ་ཕྱི་མི་འགལ་བར་ཤེས་པར་བྱོས་ཤིག་ཅེས་པ་སྟེ། མདོ་ཕྱི་མར་བསྟན་པའི་རང་བཞིན་ནམ་གཉུག་མ་ནི་གཉུག་སེམས་ཀྱི་དབྱིངས་མཐར་ཐུག་དང་། མདོ་སྔ་མར་བསྟན་པའི་གློ་བུར་བ་ནི་ཀུན་ཉོན་གསུམ་གྱིས་མཚོན་པའི་ཀུན་རྟོག་ཡུལ་དང་བཅས་པ་ཡིན་པས་མི་འགལ་བར་གསུངས་ཏེ། ཡང་དག་མཐའ་ནི་འདུས་བྱས་ཀྱིས་སྟོང་སོགས་གསུངས་སོ། །གསུང་རྒྱུན་ལས། གཤེགས་སྙིང་ལ་རྟག་པའི་ཆོས་ཉིད་ཅེས་པ། གསར་ཕྱོགས་ནས། རྟག་བརྟན་ཐེར་ཟུག་གི་རྣམ་པ་མ་ཡིན་པར་རྒྱུན་གྱི་རྟག་པ་ལ་གོ་དགོས། ཕར་ཐེག་ནས་སེམས་རགས་པའི་སྟེང་ནས་སྟོང་ཉིད་སྒོམ་པས་ངོ་བོ་ཉིད་སྐུའི་ཉེར་ལེན་གྱི་རྒྱུ་དང་། སེམས་རགས་པའི་སྟེང་ནས་ཚོགས་བསགས་པས་གཟུགས་སྐུའི་ཉེར་ལེན་གྱི་རྒྱུར་འདོད་པའོ། །དེ་བས་ཆེས་བཤད་དཀའ་བ་ཞེས་པ། གསར་ཕྱོགས་ཀྱིས་གཤེགས་སྙིང་སྟོང་ཉིད་ལ་བཞེད་པས་དེ་ནི་ཉན་རང་ལའང་རྟོགས་པ་ཡོད། དེ་ལྟ་ན་ཉན་ཐོས་ཀྱི་སྟོང་ཉིད་བསྟན་པའི་སྡེ་སྣོད་རྣམས་གཤེགས་སྙིང་སྟོན་པའི་སྡེ་སྣོད་ཡིན་པར་ཐལ་ཞེ་ན། ཉན་རང་གིས་རྟོགས་པའི་སྟོང་ཉིད་ནི་སྐར་མའི་འོད་ལྟ་བུ་དང་། སངས་རྒྱས་ཀྱིས་ཉི་མའི་དཀྱིལ་འཁོར་ལྟ་བུར་མཐོང་བ་དེ་གཉིས་མི་འདྲའོ། །ཞེས་སོ། །མི་ཕམ་ཆོས་རྗེའི་བཞེད་པ་ལྟར་ན། བྱང་སེམས་ཀྱི་གཤེགས་སྙིང་ཚེས་གཅིག་གི་ཟླ་བ་ཆ་ཤས་མཐོང་བ་ལྟ་བུ་དང་། སངས་རྒྱས་ཀྱིས་ཡོངས་རྫོགས་མཐོང་བའི་ཁྱད་པར་གསུངས་པ་འོག་ནས་བཤད་པར་འགྱུར་རོ། །ཞེས་གསུངས། ཟིན་བྲིས་ལས། རྣམ་པ་གཅིག་ཏུ་ན་ཞེས་པ་ནས། ཞིབ་ཏུ་དཔྱད་པར་བྱའོ་ཞེས་པའི་བར་རིན་པོ་ཆེ་ཉིད་ཀྱི་དགོངས་པ་རེད་གསུངས། ༈ ད་ལྟར་གསོན་ལུས་ལ་གནས་དུས་ཀྱང་ཞེས་པའི་ཐད། ཞལ་རྒྱུན་དུ། ཚིག་དོན་མཛོད་སོགས་ལས་བཤད་པ་ལྟར་གྱི་སེམས་ཀྱི་གནས་ངོ་བོ་རོ་རྐྱང་བཞོན་པ་ལས་རླུང་དང་འགྲོགས་པའི་སེམས་རྣམས། རིག་གདངས་མི་འཕྱེ་བོ། ལས་རླུང་རྟ་ལོང་བ་ཞོན་ནས་ཡུལ་བགྲོད་པའི་དཔེས་མཚོན་པའི་དོན་རིག་གདངས་ཉིད་ལས་གཞན་མིན་ལ། གལ་ཏེ་རིག་གདངས་དང་མ་འགྲོགས་ན་ཡུལ་ཤེས་པའི་བྱ་བ་སོགས་གང་ཡང་མི་བྱེད་པར་གསུངས་སོ། ། ཟིན་བྲིས་ལས། ཆོས་ཐམས་ཅད་རྟོག་པའི་ཆོ་འཕྲུལ། རྟོག་པ་ཐམས་ཅད་འོད་གསལ་གྱི་ཆོ་འཕྲུལ། ད་ལྟ་ནས་རྣམ་རྟོག་ཐམས་ཅད་ཀྱི་སྲོག་ན་འོད་གསལ་ཉིད་བཞུགས་པ་དེ་ཉིད་བླ་མའི་མན་ངག་གིས་ངོ་སྤྲད་དེ་ལམ་དུ་བྱེད་པ་རྒྱུད་འདིའི་ཁྱད་ཆོས། ད་ལྟའི་རྟོག་པ་ཐམས་ཅད་ཀྱི་སྲོག་ན་འོད་གསལ་ཡོད་ན། འོད་གསལ་རྣམ་རྟོག་གཉིས་སྐུད་པ་དཀར་ནག་བསྒྲིམ་པ་ལྟར་ཡོད་དགོས་པས་ཤེས་རྒྱུད་གཉིས་སུ་ཐལ་ལོ་ཞེ་ན། དཔེར་ན་ཆུ་གྲང་བས་གཅུར་དེ་ཆབ་རོམ་དུ་སོང་བའི་སྲ་འཐས་ཏེ་ཆུ་མིན་ཀྱང་དེའི་གཤིས་ཆུ་ཡིན་པས་ནམ་ཞིག་ཞུ་བ་ན་ཆུའི་ངོ་བོར་ཞུ་འགྲོ་བ་བཞིན་དུ། འཁྲུལ་བའི་ཡོ་ལང་སྣ་ཚོགས་ཀྱི་གཙོ་བོ་ཀུན་རྟོག་རགས་པ་སྣ་ཚོགས་པ་མཆེད་པ་འདི་དག་གི་སྲོག་གམ་གཤིས་ན་འོད་གསལ་ཡོད་པས་དེ་བླ་མའི་མན་ངག་གིས་ངོ་སྤྲད་དེ་མངོན་དུ་གྱུར་ཚེ་ཀུན་རྟོག་ཐམས་ཅད་འོད་གསལ་གྱི་ཀློང་དུ་ཐིམ་འགྲོ་བས་འོད་གསལ་དང་རྣམ་རྟོག་གཉིས་གཅིག་མངོན་ཏུ་གྱུར་བ་ན་ཅིག་ཤོས་བག་ལ་ཞ་འགྲོ་བ་སྲང་མདའི་མཐོ་དམན་ལྟ་བུ་ཡིན་གསུངས། ༈ དྷུ་ཏིའི་རྩ་འཁོར་སོགས་ཐད། རྫོགས་རིམ་དུས་དྷུ་ཏིའི་ནང་ཁོ་ནར་འཆར་བ་ཡིན་ཡང་ཐེག་རྩེ་སོགས་ཀྱི་ལུགས་ལྟར་ན། ཡེ་ཤེས་དང་དྭངས་མའི་རླུང་རིག་གི་ཆ་རེ་ཡོད་པ་རྣམས་རྗེན་ལ་བཏོན་ནས་མཉམ་པར་བཞག་མཐུས་དྷུ་ཏི་ཁོ་ན་མིན་པར་ལུས་ཐམས་ཅད་ལ་ཁྱབ་པའི་ཚུལ་དུ་འཆར་བའི་ཁྱད་པར་གྱིས་རྩོད་ལྡན་དུ་ཆོས་ཀྱི་རྒྱལ་པོའི་མཐུས་བདེ་སྐྱིད་ཁོལ་བུ་དང་ཁ་སྦྱོར་ཡན་ལག་བདུན་ལྡན་གྱི་ཕུན་ཚོགས་ལྟར་རྒྱ་ཆེ་ལ་མཐའ་བརྟན་པའི་ཁྱད་པར་ལྟ་བུ་ཡོད་ཅེས་རིན་པོ་ཆེ་ནས་གསུངས། ཞལ་རྒྱུན་དུ། དུས་འཁོར་ལྟར་ན་སྟོང་སང་ཙམ་མིན་པར་སྟོང་གཟུགས་སྣང་བ་དང་བཅས་པ་འཆར་བ་དང་། དེ་བཞིན་དུ་འདིར་ཡང་སྟོང་གཟུགས་དང་ཟབ་པའི་ཕྱོགས་གྱི་ཁྱད་པར་དང་། འཆར་བའི་གནས་ཀྱང་རགས་པའི་རྩས་གར་ཁྱབ་ཡེ་ཤེས་ཀྱི་རྩས་ཁྱབ་པ་དང་། རླུང་རགས་པའི་ཆ་རྣམས་ཡེ་རླུང་དུ་ཤར་ནས་འོད་གསལ་མུ་མཐའ་མེད་པར་འཆར་བའི་ཁྱད་པར་ཆེའོ་གསུངས། ༈ རྣམ་བྱང་ཕྱོགས་ཀྱི་གཞི་བྱེད་ལུགས་གཞན་ཡང་ཡོད་ཅེས་པ་གསར་ཕྱོགས་ལྟར་ན་བླ་མེད་ལུགས་ལ། མཉམ་གཞག་ཏུ་འོད་གསལ་དེའི་བདེན་སྟོང་སྒོམ་པ་དང་། རྗེས་ཐོབ་ཏུ་དག་མ་དག་གི་སྒྱུ་ལུས་སྒོམ་པ་སྟེ་ཆོས་གཟུགས་གཉིས་ཀྱི་བསྒྲུབ་གཞིའོ། །ཞེས་གསུངས་རྒྱུན་དང་། ཕྱི་མའི་གནས་ལུགས་སོགས། གསུང་རྒྱུན་ལས། གོང་དུ་བཤད་པའི་ཡེ་ཤེས་རང་སྣང་གཉིས་བསྟན་པའི་ཕྱི་མའོ། །ཕྱི་མའི་གནས་ལུས་སོགས་སེམས་དང་ཡེ་ཤེས་གང་ཡང་མིན་པས་རང་སྣང་དངོས་མ་ཡིན་ཡང་། སྣང་སྲིད་དག་མཉམ་དུ་བསྟན་པ་རྣམས་ཀྱི་དགོངས་དོན་གཏན་ལ་དབབ་པའི་ཕྱིར་ཐམས་ཅད་རང་སྣང་གི་ཕྱོགས་སུ་བསྡུས་ནས་བསྟན་པའོ། ༈ །འདས་པ་སྣང་ཡང་འཁོར་བར་ཞེན་པ་ཞེས་པའི་སྐབས། དེས་ཐག་ཁྲ་སྦྲུལ་སྣང་བཞིན་ཏུ་འདས་པ་སྣང་ཡང་ཕྱིན་ཅི་ལོག་ཏུ་ཞེན་པ་སྟེ། ཐག་ཁྲའི་སྤུ་ཉག་རེ་རེ་དང་ཚོགས་པ་གང་ཡང་སྦྲུལ་དུ་མ་སོང་བཞིན་དབང་ཤེས་འཁྲུལ་བ་ལ་སྦྲུལ་སྣང་བཞིན། ཡེ་ཤེས་དང་དེའི་སྣང་ཆ་ལ་ཡུལ་དང་ཡུལ་ཅན་རང་རྒྱུད་པར་སྣང་ནས་ཕྱིན་ཅི་ལོག་ཏུ་ཞེན་པ་ནི་སྦྱང་བྱའི་གཙོ་བོ། ཞེས་དང་། དེ་ལ་ལྷན་སྐྱེས་ཀུན་བཏགས་གཉིས་སྐབས། ཕར་ཐེག་ལྟར་གྲུབ་མཐའི་ཀུན་བཏགས་མ་ཡིན་པ་དང་ཡིན་པའི་ཁྱད་པར་ལྟ་བུ་ལ་གོ་རྒྱུ་མིན་པར། འོད་གསལ་བའི་ངོ་བོའི་དབྱིངས་ལ་རྨོངས་ཙམ་གྱི་མ་རྟོགས་པའི་མ་རིག་པ་དང་། སྣང་སེམས་རང་ངོས་གྲུབ་པར་ཞེན་པའི་ལོག་རྟོག་གཉིས་ལས་གཙོ་བོ་ཕྱི་མའོ། །ཞེས་གསུངས། ཞལ་རྒྱུན་ལས། གཉུག་མའི་ཡེ་ཤེས་ལས་མེད། འདི་ལ་ཇི་ལྟ་བ་དང་ཇི་སྙེད་མཁྱེན་པའི་ཡེ་ཤེས་གཉིས་ཡོད། འདིས་ཡུལ་གཟིགས་ཚུལ་མཐར་ཐུག་པ་ནི་སངས་རྒྱས་ཀྱི་ཡེ་ཤེས་དང་འདྲའོ། །ཞེས་གསུངས། འདི་ཉིད་ཀྱི་དཔེར་འོས་པ་འཕགས་པའི་མཉམ་བཞག་ཉིད་ཡིན་པར་དུས་འཁོར་གྱི་སྤྱི་དོན་མཁས་གྲུབ་ནོར་བཟང་རྒྱ་མཚོས་མཛད་པ་ཡོད་ཅེས་གསུངས། གསུང་རྒྱུན་ལས། སྐྱེད་བྱེད་ཐོས་བསམ་སྒོམ་གསུམ་གྱི་ཤེས་རབ་རྣམ་པ་གསུམ་གྱིས་ཐུན་མོང་དང་མཆོག་གི་སེམས་ལྔ་སྔོན་སྐྱེས་སམ་ད་ལྟ་སྐྱེས་པའོ། །འདིར་སེམས་ལྔ་དག་གི་ཁྱད་པར་ཞལ་ལུང་སོགས་ན་གསལ་ལོ། ༈ །ཚོགས་སྤྱོད་བཞིན་ནོ། །ཞེས་པ་ནི། འོག་སྒོ་གཙོ་བོར་སྟོན་པའོ། །སྤྱིར་ཐབས་གྲོལ་ལམ་གྱི་ཁྱབ་ཆེ་ཆུང་ནི། གྲོལ་ལམ་ཀྱི་སྐབས་སུ་ལམ་གྱི་ཁོག་ཤིང་མཚན་ཉིད་གསུམ་གཙོ་བོར་བསྟན་པ་དང་། ཐབས་ལམ་གྱི་སྐབས་སུ་རང་གི་དགོས་ཆོས་རྩ་ཐིག་རླུང་གསུམ་གནད་དུ་བསྣུན་པ་ཙམ་ལས་མ་བསྟན་པས་གྲོལ་ལམ་ཁྱབ་ཆེ་བའོ། །ཞེས་གསུངས། ༈ གྲོལ་ལམ་ནི་རིན་པོ་ཀཽསྟུ་བྷ་སོགས་ཐད་ཟིན་བྲིས་ལས། གྲོལ་ལམ་ཁེ་ཉེན་ཆུང་ལ། ཐབས་ལམ་ནི་ཁེ་ཉེན་ཤིན་ཏུ་ཆེ་སྟེ། དཔེར་ན་གསེར་འགྱུར་གྱི་རྩིས་སྟབས་ལེགས་ན་སྲང་གང་གིས་ལྕགས་སྲང་སྟོང་ཡུད་ཙམ་གྱི་གསེར་དུ་བསྒྱུར་ཡང་ཉེས་ན་ལྕགས་དེ་ཙམ་ཐལ་བར་བསྒྱུར་བ་ལྟར་ཡིན་གསུངས། མི་ཕམ་རིན་པོ་ཆེས་ཐབས་གྲོལ་གྱི་ལམ་དེ་གཉིས་ཀྱང་ཐབས་ཤེས་ཀྱི་བྱེད་པ་ཙམ་གཙོ་ཆེ་ཆུང་གི་སྒོ་ནས་བཞག་གི་ཅིག་ཤོས་ལ་ཅིག་ཤོས་མེད་པ་མ་ཡིན་ལ། གནས་ལུགས་ཀྱི་དོན་མཐོང་བ་ལ་དོན་གཅིག་པར་ཤེས་པར་བྱའོ། །ཞེས་དང་། ཐབས་ལམ་རིམ་གྱིས་པ་སྟེང་སྒོ་དང་ཅིག་ཆར་བ་འོག་སྒོའི་མན་ངག་ལ་བརྟེན་ནས་གསུངས་སོ། ། ༈ ཟིན་བྲིས་ལས། རྒྱུད་འདིའི་ཆེད་དུ་བྱ་བའི་གདུལ་བྱ་དཔེ་ཐུན་མོང་གི་ལམ་གྱིས་རྒྱུད་སྦྱང་བ་སྔོན་དུ་བཏང་ནས། སྨིན་བྱེད་ཀྱི་དབང་ཞུས། དབང་སྲོག་དམ་ཚིག་གིས་བཟུང་སྟེ་ལམ་རིམ་གཉིས་ལ་བསླབ། དེ་ལ་སྔོན་དུ་ལྟ་བ་གཏན་ལ་ཕབ་དགོས། དེའང་རྒྱུ་ཤེས་པའི་མཚན་ཉིད་ལྟ་བ་ཙམ་ཁོ་ན་མིན་པར་གང་ལ་གནད་དུ་བསྣུན་པའི་ཡུལ་གྱི་རྩ་རླུང་ཐིག་ལེའི་རྣམ་བཞག་དེ་ལ་ཇི་ལྟར་གནད་དུ་བསྣུན་ཚུལ། དེ་ལྟར་གནད་དུ་བསྣུན་པའི་འབྲས་བུ་དང་བཅས་པ་ལ་ཐོས་བསམ་གྱིས་སྒྲོ་འདོགས་ཆོད་པར་བྱས། དེ་ནས་རིམ་གཉིས་ཀྱི་རྣལ་འབྱོར་ལ་དངོས་སུ་སློབ་པ་ནི་རྐྱེན་འཇུག་པའི་མཚན་ཉིད་ཏིང་ངེ་འཛིན་ཏེ། བསྐྱེད་རིམ་སྔོན་དུ་བཏང་བའི་རྫོགས་རིམ་ལ་ཐབས་གྲོལ་གཉིས་ལས། རྩ་ཐིག་རླུང་གསུམ་ལ་གནད་དུ་བསྣུན་པ་མེད་པར་བཞག་སྟོབས་ཁོ་ནས་རང་གནས་ཀྱི་ཡེ་ཤེས་མངོན་དུ་བྱས། དེའི་སྟོབས་ཀྱིས་ཡེ་ཤེས་ཀྱི་སྣང་ཆ་གཉུག་མའི་རླུང་གིས་བསྐུལ་ཏེ་གཞི་སྣང་སྟོང་གཟུགས་ཀྱི་སྣང་བ་སྣ་ཚོགས་སུ་ཤར་ཏེ་ལམ་དུ་བྱེད་པ་གྲོལ་ལམ་དེ་ནི་རྟོགས་དཀའ་བ་དང་ལམ་བུལ་བ་ཡིན། རྟོགས་སླ་བ་དང་ལམ་མྱུར་བ་ནི་ཐབས་ལམ་སྟེ། དེ་ལ་རང་ལུས་ཐབས་ལྡན་དང་། གཞན་ལུས་ཐབས་ལྡན་གཉིས་ཀྱི་དང་པོ་ནི། སྙིང་ཁའི་མི་ཤིགས་པ་སད་པ་ལམ་གྱི་གནད་ཡིན་པས། དེ་གཏུམ་མོའི་མེ་སྦར་ཏེ་སད་དགོས། དེའི་ཚུལ་ནི་རང་ཉིད་གསང་ཆེན་རིགས་གཅིག་རྡོ་རྗེ་འཆང་ངམ་ཀུན་ཏུ་བཟང་པོ་ལྟ་བུར་བྱས་ཏེ། ལུས་གནད་རྣམ་སྣང་ཆོས་བདུན་བཅས། སྤྱི་མགྲིན་སྙིང་ཁ་ལྟེ་བ་བཞི་དང་། ལྟེ་འོག་སོར་བཞིའི་ཐད་དུ་གཏུམ་མོ་ལ་ཨ་ཤད་ཀྱི་གནས་དང་། དེའི་འོག་ཏུ་སྦྱོར་བྱེད་རླུང་གི་དཀྱིལ་འཁོར་ཏེ། ལུས་ཀྱི་རྩ་འཁོར་དྲུག་གསལ་བཏབ་སྟེ། སྟེང་རླུང་མནན་འོག་རླུང་དྲག་ཏུ་འཐེན་ཏེ་རླུང་གཉིས་ཁ་སྦྱོར་ནས་བཟུང་། ལྟེ་བའི་ཨ་ཐུང་ཞེས་པ་ངོ་བོ་ཁྲག་གི་དྭངས་མ་བདེ་བའི་རང་བཞིན་ཅན། རྣམ་པ་ཚེར་མ་རྣོ་ས་ནས་བཅད་པའི་བཅད་ཁ་གྱེན་བསྟན་ལྟ་བུ། རེག་བྱ་ཚ་བ་ཞིག་གསལ་ཏེ། དེ་ལ་རིག་པ་གཏད་དེ་བཟུང་ནས་རོ་རྐྱང་དུ་རྒྱུ་བའི་རླུང་སེམས་ཐམས་ཅད་དབུ་མར་འདྲོང་བའི་རྐྱེན་གྱིས་ཨ་ཐུང་ལྷག་པར་འབར་ཏེ་སྤྱི་བོའི་ཧཾ་ཡིག་བསྐུལ་བས་བྱང་སེམས་ཀྱི་ངོ་བོར་ཞུ་བ་རིམ་བཞིན་རྩ་གནས་རྣམས་སུ་ཡས་བབ་དང་མས་བརྟན་གྱི་དགའ་བ་རྒྱས་ཏེ་མར་མེ་གསོས་ན་རང་འོད་མཆེད་ནས་འོང་བ་ལྟར་སྙིང་གའི་མི་ཤིགས་པ་སོགས་དྭངས་མ་སྟོབས་སུ་གྱུར། དྭངས་མ་དེ་དག་གི་ལྷན་ཅིག་བྱེད་རྐྱེན་གྱིས་ཡེ་ཤེས་ཀྱི་གདངས་བསྐུལ་ཏེ་སྟོང་གཟུགས་ཀྱི་སྣང་བ་སྣ་ཚོགས་ཤར་བ་ལ་གཞི་སྣང་ཟེར། དེ་ལ་སྐུ་མཐོང་ཐོབ་གཉིས་ཡོད། སྙིང་རྗེ་སྒྱུ་མ་མན་ཆད་ལ་ལྷ་སྐུ་ཡིད་ངོར་ཤར་བ་ཡིན་པས་སྐུ་མཐོང་བ་དང་། ཕྱག་རྒྱ་གཅིག་པ་མན་ཆད་ལ། དབུ་མའི་ནང་དུ་སྒོམ་སྟོབས་ཀྱི་མིག་དབང་གསར་དུ་གྲུབ་དེས་དངོས་སུ་མཐོང་བས་ལྷ་སྐུ་ཐོབ་པ་ཟེར། དེ་འདྲའི་གཞི་སྣང་དེ་ཉིད་སློབ་ལམ་རྣམས་སུ་རིམ་གྱིས་ལམ་དུ་བྱས་ཏེ་སྣང་བ་དེ་རྒྱ་ཇེ་ཆེ་ཇེ་བཟང་ཇེ་དག་ཇེ་བརྟན་དུ་སོང་སྟེ་སློབ་པ་མཐའི་འོད་གསལ་གྱི་ཚེ། སྣང་བ་ཐམས་ཅད་གཉུག་མའི་དབྱིངས་སུ་ཐིམ་པའམ་ཟད་དེ་དབྱིངས་དེའི་ངང་དུ་སོང་ཚེ་རྒྱུན་མཐའི་བར་ཆད་མེད་ལམ་ཡིན། སྐབས་དེར་སྣང་བ་ཟད་པ་བཞིན་དུ་རང་ལུས་འོད་དུ་དྭངས་བའམ་ཟད་དེ་སྐད་ཅིག་གཉིས་པ་ནས་ལོངས་སྤྱོད་རྫོགས་པའི་སྐུ་ཁ་སྦྱོར་ཡན་ལག་བདུན་ལྡན་དུ་བཞེངས་ཚེ་རྒྱུན་མཐའི་རྣམ་གྲོལ་ལམ་ཞེས་ནམ་མཁའ་མ་ཞིག་བར་དུ་ཆོས་ཀྱི་དབྱིངས་ལས་མ་གཡོས་བཞིན་དུ་སྤྲུལ་སྐུ་ཕྲིན་ལས་དང་བཅས་པ་འཇིག་རྟེན་གྱི་ཁམས་རབ་འབྱམས་སུ་སྤྲོ་བ་ནི་མངོན་དུ་གྱུར་པ་འབྲས་བུ་མཐར་ཐུག་གི་དུས་ཡིན་ནོ། །མིག་དབང་ལ་བསྟན་དུ་ཡོད་པས་ལུས༵་སྣང༵་བ༵་འདོད༵་ཁམས༵། དབང་པོ་གཟུགས་ཅན་ལ་བསྟན་དུ་ཡོད་ཅིང་མིག་དབང་ལ་བསྟན་དུ་མེད་པས་ངག༵་ཕྱེད༵་སྣང༵་། དབང་པོ་གཟུགས་ཅན་ལ་སྤྱིར་བསྟན་དུ་མེད་པས་ཡི༵ད་མི༵་སྣང༵་སོགས་གསུང་རྒྱུན་ལས། ཡུལ་དབང་ཤེས་གསུམ་སྐབས་ཡུལ་རགས་པ་དང་། དབང་པོ་དེ་ལས་ཕྲ་བ། རྣམ་ཤེས་དེ་ལས་ཀྱང་ཕྲ་བས་ན། དེ་དག་ལ་ཁམས་གསུམ་ཞེས་བརྗོད་དོ། །འདོད་གཟུགས་གཟུགས་མེད་རྣམས་སྔ་མ་ལ་ལྟོས་ཕྱི་མ་དག་ཕྲ་བའི་ཁྱད་པར་དང་མཚུངས་པས་ན་དེ་དག་གི་ཐ་སྙད་སྦྱོར། ཞེས་གསུངས། ༈ འཁོར་ལོ་གསུམ་གཉིས་སོགས་ཐད། ཟིན་བྲིས་ལས། སྤྱི་བོའི་ཐིག་ལེ་ཧཾ་ཡིག་གིས་མཚན་པ་ཉིད་དབབ་ལྡོག་བྱེད་པ་བདེ་བ་ཆེན་པོའི་ཡེ་ཤེས་ཀྱི་རྟེན་བྱེད་པས་དེའི་གནས་སྤྱི་བོའི་རྩ་འཁོར་༣༢་ལ་བདེ་༵ཆེན༵་གྱི༵་འཁོར་ལོ། མགྲིན་པའི་ཐིག་ལེ་བཟའ་བཏུང་ལོངས་སྤྱོད་ན་རོ་དྲུག་མྱོང་བའི་རྟེན་བྱེད་པས་དེའི་གནས་མགྲིན་པའི་རྩ་འཁོར་༡༦ལ་ལོངས༵་སྤྱོད༵་ཀྱི༵་འཁོར༵་ལོ༵། སྙིང་གའི་མི་ཤིགས་པའི་ཐིག་ལེ་ནི་དེ་ལ་གནད་དུ་བསྣུན་ནས་སད་ན་རྣམ་བྱང་གི་ཡོན་ཏན་གྱི་ཆོས་མཐའ་དག་གི་རྟེན་བྱེད་པས་དེའི་གནས་རྩ་འཁོར་༨ལ་ཆོས༵་ཀྱི༵་འཁོར༵་ལོ༵་དང་། དང་པོ། མངལ་དུ་ཆགས་པ་ན་ལྟེ་བའི་ཐིག་ལེ་ཆགས་ཏེ། དེ་ལས་ཕུང་ཁམས་རགས་པ་འཕྲུལ་བ་སྟེ་མཆེད་པས་ན་དེའི་རྩ་འཁོར་༦༤ལ་སྤྲུལ༵་བའི༵་འཁོར་༵ལོ་སྟེ་ཞེས་སྦྱར། ཞེས་གསུངས། ༈ ཟུར་འདེབས་ལས། ས༵་བོན་དྲུག་པོ་རྩ་འདབས་ཀྱི་སྐབས་སམ་མཐའ་ན་གན༵ས་སོ། །དེ་ཡང་སྙིང་ཁོང་སྟོང་གི་དབུས་ན་རྩའི་དྭངས་མ་རྩ་འདབ་རྒྱུས་པ་བལྡད་པ་འདྲ་བ་བརྒྱད་ཡོད་པ་རྩ་བཞིར་འདུས་ཏེ། མདུན་གྱི་གསུམ་ཆོས་ཉིད་ཀྱི་རྩ་སྟེ་སྐྱེ་བ་མེད་པ་རང་སྣང་བའི་ལས་བྱེད་པ། གཡས་ཀྱི་གཅིག་ཡེ་ཤེས་ཀྱི་རྩ་སྟེ་ཡེ་ཤེས་འཆར་བའི་ལས་བྱེད་དོ། །གཡོན་གྱི་གཅིག་ཡོན་ཏན་གྱི་རྩ་སྟེ་མངོན་ཤེས་དང་འབྲས་བུའི་ཆོས་རྣམས་སྣང་བའི་ལས་བྱེད་པ། རྒྱབ་ཀྱི་གསུམ་རང་རྒྱུད་ཀྱི་རྩ་སྟེ་ཤེས་པ་རྣམས་རྨོང་ཞིང་འཇོམས་པའི་ལས་བྱེད་དོ། །རྩ་དེ་དག་གི་སྦུབས་ན་འོད་བཞི་དང་དེའི་ཁྲོད་ན་སྦྱང་བྱ་དང་སྦྱོང་བྱེད་ཀྱི་ས་བོན་རྣམ་ཤེས་དང་བཅས་པ་རྣམས་གནས་ཏེ། ཆོས་ཉིད་ཀྱི་རྩ་ལ་འོད་ཟླུམ་པོ་དཀར་པོ་སྦྱང་བྱ་སུ་དང་ཏྲི། སྦྱོང་བྱེད་ༀ། ཀུན་གཞིའི་རྣམ་ཤེས་སོ། །ཡེ་ཤེས་ཀྱི་རྩ་ལ་འོད་གྲུ་བཞི་སེར་པོ། སྦྱང་བྱ་ཨ་དང་ནྲི། སྦྱོང་བྱེད་ཧཱུྃ། ཡིད་ཀྱི་རྣམ་ཤེས། ཡོན་ཏན་རྩ་ལ་འོད་ཟླ་གམ་དམར་པོ། སྦྱང་བྱ་པྲེ་དང་དུ། སྦྱོང་བྱེད་ཨཱཿཉོན་མོངས་ཅན་གྱི་ཡིད། རང་རྒྱུད་ཀྱི་རྩ་ལ་འོད་གྲུ་གསུམ་དམར་ནག་ལ་སྒོ་ལྔའི་རྣམ་པར་ཤེས་པ་ཉིད་དང་བཅས་པ་གནས་སོ། །འདིར་ཆོས་ཉིད་དང་ཡེ་ཤེས་རྩའི་འོད་དཀར་པོ་དང་སེར་པོར་གནས་པ་དཔེ་ཆུང་རང་གནས་ཀྱི་ལུགས་ཏེ། བི་མ་མི་དྲའི་གསང་ཐིག་ལས་ནི། ཆོས་ཉིད་སེར་པོ་དང་། ཡེ་ཤེས་མཐིང་གར་བཤད་དོ། །དེ་ལྟར་སྙིང་གའི་དཀྱིལ་འཁོར་རྩ་ཆེན་བཞི་དང་ལྡན་པ་དེའི་ནང་ན་དྭངས་མ་ལྔའི་དཀྱིལ་འཁོར་རང་བཞིན་གྱིས་གནས་པའི་དབུས་སུ་ཡེ་ཤེས་སྙིང་པོའི་ཐིག་ལེ་སྟོང་གསལ་འགག་མེད་བདེ་བ་ཆེན་པོའི་ངོ་བོར་བཞུགས་ཏེ། ཉི་ཟླ་ཁ་སྦྱོར་གྱི་རྒྱུད་ལས། ཙིཏྟ་རིན་ཆེན་གཞལ་ཡས་ན། །ཞི་བའི་དཀྱིལ་འཁོར་བཞི་བཅུ་གཉིས། །སྐུ་ནི་སྣང་ལ་རང་བཞིན་མེད། །ཆ་ཕྲ་འོད་གསལ་སྙིང་པོར་བཞུགས། །ཞེས་དང་། བརྟགས་གཉིས་ལས། ལུས་ལ་ཡེ་ཤེས་ཆེན་པོར་གནས། །རྟོག་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པ་པོ། །ལུས་གནས་ལུས་ལས་མ་སྐྱེས་པའོ། །ཞེས་དང་། རིམ་ལྔ་ལས། རྟག་ཏུ་སྙིང་ལ་གནས་པ་ནི། །ཐིག་ལེ་གཅིག་ལ་འགྱུར་བ་མེད། །དེ་སྒོམ་བྱེད་པའི་སྐྱེ་བོ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་སོ། །དེ་ལ་དྭངས་མ་ལྔ་ནི་གོང་དུ་བཤད་པ་ལྟར་རོ། །ལྔ་པོའང་ཡུམ་ལྔ་ཡེ་ཤེས་ལྔ་སྐུ་ལྔར་གནས་ཏེ། རྩའི་དྭངས་མ་ནི་འབྱུང་བ་ས་སྟེ། ཡུམ་སྤྱན་མ། མེ་ལོང་ལྟ་བུའི་ཡེ་ཤེས། མངོན་བྱང་གི་སྐུའོ། །ཁྲག་གི་དྭངས་མ་ཆུ་སྟེ་མ་མ་ཀཱི། མཉམ་ཉིད་ལོངས་སྐུའོ། མེའི་དྭངས་མ་ནི་གོས་དཀར། སོར་རྟོགས་རྡོ་རྗེའི་སྐུའོ། །རླུང་གི་དྭངས་མ་ནི་སྒྲོལ་མ། བྱ་གྲུབ་སྤྲུལ་སྐུའོ། །ནམ་མཁའི་དྭངས་མ་ནི་དབྱིངས་ཕྱུག་མ། སྟོང་པ་ཉིད་ཆོས་ཀྱི་སྐུའོ། །ཡེ་ཤེས་སྙིང་པོའི་ཐིག་ལེ་ནི། རིག་པའི་དྭངས་མ་སེམས་ཉིད་འོད་གསལ་བ་སྟེ། ཡུམ་ལྔ་འདུས་པ་བྱ་བ་མོ་དང་། ཡེ་ཤེས་ལྔ་འདུས་པ་རང་བྱུང་གི་ཡེ་ཤེས་དང་། སྐུ་ལྔ་འདུས་པ་བདེ་ཆེན་གྱི་སྐུར་དོན་གྱིས་འགྱུར་ཞིང་། དེར་མ་ཟད་དྭངས་མ་དྲུག་པོའང་གཉིས་གཉིས་རོ་གཅིག་ཏུ་འཇུག་པས་ཕྲ་བའི་སྒོ་གསུམ་མམ། རྡོ་རྗེ་མི་ཤིགས་པ་གསུམ་དུ་འགྱུར་ཏེ། ས་ཆུ་གཉིས་སྐུ་རྡོ་རྗེ། མེ་རླུང་གཉིས་གསུང་རྡོ་རྗེ། མཁའ་སེམས་གཉིས་ཐུགས་རྡོ་རྗེ་སྟེ། དཔེ་ཆུང་རང་གནས་ལས། མི་ཤིགས་ཡེ་ཤེས་ཐིག་ལེ་ནི་སོགས་ལྟར་རོ། །ཞེས་གསུངས། ཞལ་རྒྱུན་ལ། རྡོ་རྗེ་མེ་ལོང་གི་ལུང་དོན། ལུས་ཅན་སེམས་ཅན་ཀུན་གྱི་སྙིང་ལ་གནས་པའི་ཡེ་ཤེས་རྒྱུ་རྐྱེན་ལས་འདས་རང་བྱུང་ཡེ་ཤེས་ཟག་མེད་ཀྱི་གཟུགས་ཀྱི་སྐད་དོད། རཱུ་པ་རང་བཞིན་ལ་གོ་བའི་དབང་དུ་བྱས་པའོ། །རང༵་བཞིན་རླུང་ཁམས་སེམས་མི་ཤིགས་པ་དང་དབྱེར་མེད་དུ་བཞུགས་པའི་བདེ་ཆེན་ནམ་མཁའ་ལྟ་བུ་སྲིད་ཞིར་མི་གནས་ཆོས་སྐུའི་རང་བཞིན་ཅན་ནོ། །ཞེས་དང་། དཔེ་ཆུང་རང་གནས་ལུང་དོན། གཅིག་དང་དུ་མའི་སྤྲོས་པ་ཐམས་ཅད་ལས་འདས་པ། སྣ་ཚོགས་སུ་སྣང་ཡང་ངོ་བོ་སྒྲ་རྟོག་གིས་ཇི་བཞིན་མཚོན་དུ་མེད་པའོ། ། སྐུ་སྒྲུབ་བྱེད་ཀྱི་ལས་ༀ་གྱི་སྟེང་དུ་གསོག་པ་དང་། ཞེས་པའི་སྐབས། ཉེ་དྭངས་འདི་དག་ལ་རགས་པ་ཕ་མའི་ཁུ་ཁྲག་གི་ཆ་དང་ལས་རླུང་དང་། དེར་བརྟེན་བག་ཆགས་ཀྱིས་བགོ་གཞི་ཀུན་གཞི་དང་ཡེ་ཤེས་ཀྱི་བདག་ཉིད་ཀྱི་རླུང་ཁམས་སེམས་བཅས་དང་གཉིས་འདོད་དགོས་པ་འདྲ་སྟེ། ཀུན་རྟོག་གིས་ལྷ་བསྒོམ་པ་སོགས་ཀྱིས་བག་ཆགས་འཛིན་པའི་ཕྱིར་དང་། ཡེ་ཤེས་ཀྱི་ཆའི་སྟོང་གཟུགས་སྣང་བའི་ནུས་པ་འཛིན་པ་སོགས་ཡོད་པའི་ཕྱིར་རོ། །ཞེས་གསུངས་སོ། ༈ །བརྡ་བཞི་དང་ཕྱག་རྒྱ་བཞིའི་ཐད། གསུང་རྒྱུན་ལས། བརྡ་བཞི་ནི། ས་མ་ཡ་སྟྭཾ་ནམ་དུས་ལ་བབ་ཅེས་ཡུམ་གྱིས་བསྐུལ། ས་མ་ཡ་ཧོཿདུས་ཡིན་ནོ་ཞེས་ལན་བྱིན། སླར་ར་ག་ཡ་ཧོཿབདག་ཆགས་སོ་ཞེས་བསྐུལ། རཱ་ག་ཡཱ་མའི་ཆགས་པར་བགྱིའོ། །ཞེས་ལན་བྱིན་ནོ། །དེ་ལྟར་བརྡ་དང་བརྡ་ལན་མ་ཤེས་ན་མཁའ་འགྲོའི་གནས་སུ་སོང་ན། རྡོ་རྗེ་མཁའ་འགྲོ་མ་རྣམས་ཀྱིས་བསྒྲལ་ནས་ཚོགས་འཁོར་བྱེད་པར་གསུངས། ཕྱག༵་རྒྱ༵་བཞིས༵་སྙོམ༵་པར༵་ཞུགས་པ་ནི། ཛ་ཞེས་པས་ལུས་ཀྱི་ཆ་རྣམས་རེག །ཧཱུྃ་ཞེས་པས་ལག་པ་དང་བརླ་འཁྱུད། བམ་ཞེས་པས་མཁའ་གསང་དམ་དུ་སྤྲད། ཧོ་ཞེས་ཡབ་ཀྱིས་གསོར་ཡུམ་གྱིས་བསྐྱོད་པ་ལ་སོགས་པའོ། །གཞན་ཡང་ཕྱག་རྒྱ་མཚན་ཉིད་དང་ལྡན་པ་དགུག་པ། ཡབ་ཡུམ་མཉམ་པར་སྦྱོར་བ་འཆིང་བ། ཡན་ལག་ཕན་ཚུན་སྡོམ་པ་བསྡམ་པ། ཡབ་ཡུམ་བདེ་ནས་ཚིམ་པ་མྱོས་པ་སྟེ་རགས་པའི་ཕྱག་རྒྱ་བཞིའོ། །དམར་ཆ་གྱེན་དུ་དྲངས་བ་དགུག་པ། རླུང་གི་བྱེད་བཅིང་གི་སྟོབས་ཀྱིས་གཅུན་པ་འཆིང་བ། ཐིག་ལེ་ཕྱིར་མི་ལྡོག་པ་བསྡམ་པ། ཡབ་ཡུམ་ཀྱི་གསང་བའི་རྣམ་ཤེས་བདེ་བས་ཚིམ་པ་མྱོས་པ་སྟེ་ཕྲ་བའི་ཕྱག་རྒྱ་བཞིའོ། །ལྷན་སྐྱེས་གཉིས་འབྲེལ་བ་ཞེས་པ། རྟེན་གྱི་སྒོ་ནས་ཡབ་ཡུམ་ཀྱི་ལྷན་སྐྱེས་གཉིས། བརྟེན་པའི་སྒོ་ནས་ཡས་བབ་དང་མས་བརྟན་གྱི་ལྷན་སྐྱེས་གཉིས་སོ། ། འཇོག་ཚུལ་ཁྱད་པར་ཅན་གཞན་གསུངས་སོ། །ཞེས་པའི་ཐད་དུ་ཞལ་ལུང་དུ། ལམ་རིམ་ལས། འདི་ཡང་ལམ་སྒྲུབ་སྦྱོར་བ་ཡི། །ཞེས་པས། ལམ་གྱི་དུས་ཀྱི་དང་། སྒྲུབ་པའི་དུས་ཀྱི་དང་། སྦྱོར་བའི་དུས་ཀྱི་བསྙེན་སྒྲུབ་ཡན་ལག་བཞིའོ། །དང་པོ་ནི། ལྟ་བ་རྟོགས་ནས་སྟོང་ཆེན་དང་ཀུན་ཏིང་ལ་གནས་པ་ནི་བསྙེན་པ། ཕྱག་རྒྱ་གཅིག་སྤྲོ་ནི་ཉེ་བསྙེན། ཡོ་བྱད་ལྔའི་ཚོགས་སྒྲུབ་པ་ནི་སྒྲུབ་པ། དེ་འབྲས་ཟག་མེད་ཀྱི་རིག་འཛིན་ཐོབ་མ་རག་པ་ནི་སྒྲུབ་ཆེན་ཏེ། ལམ་རིམ་ལས། བྱང་ཆུབ་སེམས་རྟོགས་འགྲུབ་པ་ནི། །བསྙེན་པའི་དམ་པ་ཡིན་པའི་ཕྱིར། །སེམས་ཆོས་སྙིང་རྗེ་མན་ཆད་དོ། །ཕྱག་རྒྱ་གསལ་བ་ཉེ་བསྙེན་པ། །དེ་ཕྱིར་གཅིག་དང་སྤྲོས་པའོ། །སྒྲུབ་པ་ཉིད་ནི་བར་ཆད་མེད། །དུས་ཀྱི་ཚོགས་མཐའ་སྒྲུབ་ཆེན་ནོ། །ཞེས་སོ། །གཉིས་པ་ནི། ཟླ་བ་གཅིག་ལ་སྒྲུབ་པ་རྫོགས་པ་མ་ཡིན་པས་ཟླ་བ་དྲུག་ལ་སོགས་པ་ཅི་ཙམ་བྱེད་པ་ལ་ཆ་བརྩི་བ་ཡིན་མོད་ཀྱི། འོན་ཀྱང་འདིར་ཟླ་བ་གཅིག་ལྟ་བུ་ལ་དཔེར་བྱས་ཏེ་བརྩི་ན། དེ་ལས། ཟླ་ཕྱེད་ཕྱེད་ཞལ་ཉེ་བསྙེན་པ། །ལྷ་གསལ་འཕྲོ་འདུས་སྣང་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུ་བསྣོལ་མས་བསྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བཟླས་ཀྱང་སྒྲུབ་ཆེན་པོ། །ཞེས་པས་ཆ་རྐྱེན་རྣམས་ཚོགས་ནས་སྒྲུབ་པ་ལ་འཇུག་མ་ཐག་པ་ནི་བསྙེན་པ། ཞུགས་ནས་ཟླ་བ་ཕྱེད་ཡན་ཆད་ནི་ཉེ་བསྙེན། ཐ་མའི་ཞག་གཅིག་མ་གཏོགས་པའི་ཕྱེད་མན་ཆད་ནི་སྒྲུབ་པ། ནུབ་ཐ་མ་ལ་དངོས་གྲུབ་ལེན་པ་ནི་སྒྲུབ་པ་ཆེན་པོ་སྟེ། སྒྲུབ་བྱང་ལས། རིམ་པ་ཤོམ་དང་འབྲེལ་བའི་ཕྱིར། །བསྙེན་པ་ཞེས་སུ་བརྗོད་པ་ཡིན། །གསང་སྒོར་ཞུགས་ནས་བྱིན་ལྡན་པ། །ཉེ་བའི་བསྙེན་པ་ཞེས་སུ་བརྗོད། །གང་ཡང་བར་ཆད་མི་གཡེལ་བར། །དམ་པའི་གཞུང་གཉིས་འཛིན་པ་ན། །སྒྲུབ་པ་ཞེས་སུ་བརྗོད་པ་ཡིན། །རྣལ་འབྱོར་སྲོད་ཀྱི་རྩལ་འཆང་བ། །སྒྲུབ་པ་ཆེན་པོ་དེ་བརྗོད་དོ། །ཞེས་སོ། །གསུམ་པ་ནི། ཡུམ་བཙལ་ཏེ་ཆས་སུ་ཞུགས་པ་ནི་བསྙེན་པ། དེ་བྱིན་གྱིས་བརླབས་པ་ཉེ་བསྙེན། རོལ་ནས་དབབ་བཟུང་གི་དགོངས་པ་ནི་སྒྲུབ་པ། ཉི་ཟླ་རྡོ་རྗེའི་ལྕེས་ལེན་ཏེ་ལྡོག་བཀྲམ་གྱི་དགོངས་པ་ནི་སྒྲུབ་ཆེན་ཏེ་ལག་ལེན་སྦྱོར་མཆོད་བཞིན་ནོ། །དེའང་ལམ་རིམ་ལས། གསུམ་པ་མཆོད་པའི་སྐབས་བཞིན་ཤེས། །ཞེས་སོ། །སྤངས་ནས་རྡོ་རྗེ་དབྱིངས་ཕྱུག་རྩ་སོགས་ཐད། གསུང་རྒྱུན་ལས། སྤང་ཞེས་པ་མཚན་འཛིན་གྱི་རྟོག་པ་སྤང་བ་དང་། ཡང་ན་དགུག་པ་དང་བསྡམས་པ་མི་ཤེས་པ་སྤང་བའོ། །རྡོ་རྗེ་ཞེས་པ་སྐྱིལ་ཀྲུང་སྟེ་དེ་ལ་གསུམ། ལུས་རྡོ་རྗེ་སྐྱིལ་ཀྲུང་གིས་ཡབ་ཡུམ་མཉམ་པར་སྦྱོར་བའོ། །རྩ་རྡོ་རྗེ་སྐྱིལ་ཀྲུང་ནི། ཡུམ་གྱི་དབུ་མའི་མར་སྣ་ཡབ་ཀྱི་དབུ་མར་དྲངས་ཏེ་སད་པར་བྱས་པའོ། །རླུང་རྡོ་རྗེ་སྐྱིལ་ཀྲུང་ནི། ཡུམ་གྱི་དབུ་མའི་རླུང་ཡབ་ཀྱི་དབུ་མར་དྲངས་བ་དང་། ཁམས་རྡོ་རྗེ་སྐྱིལ་ཀྲུང་ནི། ཐིག་ལེ་དཀར་དམར་འདྲེས་པའོ། །རིན་པོ་ཆེས། ཐལ་རྒྱུད་ལས། སྤངས་ནས་རྡོ་རྗེ་དབྱིངས་ཕྱུག་བཅས། །དགུག་དང་བསྡམ་པ་མ་ཤེས་ན། །ཞེས་ཐབས་ལམ་འོག་སྒོའི་སྐབས་རྩ་འཆིང་བ་གལ་ཆེ་གསུངས་པ་འདི་འབོར་མི་ཉན། ཞེས་གསུངས་སོ། ༈ །འདི་ལ་དང་འདིས་རྟོག་པ་ཞེས་པ་ནི། རྣམ་རྟོག་འདིའི་ཡུལ་དུ་གྱུར་པའམ་རྟོག་པ་དེས་གཞལ་བའི་ཕུང་པོ་ཁམས་དང་སྐྱེ་མཆེད་ལ་འདི་ལ་དང་། རྣམ་རྟོག་འདིས་རྟོག་པར་བྱེད་པས་ན་འདིས་རྟོག་པ་ཞེས་སོ། །སྔ་མ་ཡུལ་ལ་ཡུལ་ཅན་གྱི་མིང་གིས་བཏགས་པའོ། །རྟོགས་པ་ཤིན་ཏུ་མྱུར་བ་ནི་རྣམ་བྱང་གི་དབང་པོ་ལྔའམ་ནང་ནས་གཙོ་བོར་ཤེས་རབ་ཀྱི་འཇུག་པ་ཆེས་མྱུར་བའི་རྒྱུ་མཚན་གྱིས་མཚན་ཉིད་གསུམ་གྱི་བར་གཞན་གྱིས་མ་ཆོད་པར་ཡུན་ཤིན་ཏུ་ཐུང་བ་ལ་རྟོགས་གོམ་མཐར་ཕྱིན་པར་བྱེད་པ་ལ་ཅིག༵་ཆར༵་བ༵་ཞེས༵་བརྗོད༵་པ་ཡིན་གྱི་དེའི་རྒྱུད་ཀྱི་མཚན་ཉིད་གསུམ་གྱི་སྔ་ཕྱིའི་རིམ་པ་མེད་པ་མིན་ཏེ། འགལ་མེའི་འཁོར་ལོ་བཞིན་ནོ། །སྦྱང་རྣོ་རང་རྣོ་སོགས་ཞལ་ལུང་ན་གསལ་བས་མ་བྲིས། གཏན་ཚིགས་ཀྱི་སྣ་རྩེ་ཙམ་ཞེས་པ་རྟགས་སྒྲུབ་སོགས་རྒྱས་པར་བཀོད་པ་ལ་མི་ལྟོས་པར་སྦྱོར་བ་གཅིག་བཀོད་པ་ཙམ་གྱིས་མངོན་སུམ་དུ་རྟོགས་པ་ལ་གོ་དགོས་གསུངས། འདིར་ཐུན་མིན་གྱི་ཀུན་རྫོབ་སེམས་བསྐྱེད་ཀྱང་ལྟ་བའི་ཕྱོགས་ནས་འཇོག་ཞེས་པའི་ཐད། ཟིན་བྲིས་ལས། སྔར་གཞི་རྒྱུད་སྐབས་ལུགས་འདིར་སེམས༵་དག༵་གི་གནད༵་གསང༵་རྡོ་༵རྗེའི་ཡེ༵་ཤེས་འདི་༵ཁོ༵་ན༵་བྱང་༵ཆུབ་༵ཆེན་པོའི་ཡེ་ཤེ༵ས་ཀྱི༵་སྙིང༵་པོར་བཞེད༵་ནས༵་བྱང་ཆུབ༵་སེམས༵་ཞེས༵་བྱ༵་གསུངས་པ་དེའོ། །སྙིང་པོ་ཞེས་པ་དེ་དངོས་ལ་བྱེད་ཀྱི་ས་བོན་ལྟ་བུ་ལ་གོ་རྒྱུ་མིན་གསུངས། ཡང་ཞལ་རྒྱུན་དུ། ཆོས་ཐམས་ཅད་ཡེ་ནས་སངས་རྒྱས་པར་རྟོགས་པའི་རང་ལུགས་ཐུན་མིན་གྱི་སེམས་བསྐྱེད་དང་མཉམ་བཞག་ཡེ་ཤེས་འོད་གསལ་བ་ཉིད་བརྩེ་བའི་སྙིང་རྗེའི་བདག་ཉིད་དུ་བཞུགས་པས། རྗེས་ཐོབ་ཏུ་རྐྱེན་ཕྲ་མོས་བསྐུལ་བའི་སྒོ་ནས་འགྲོ་ཀུན་གནས་ལུགས་ཇི་ལྟ་བཞིན་མངོན་དུ་གྱུར་པའི་སངས་རྒྱས་ཀྱི་ས་ལ་འགོད་པར་འདོད་པའི་སྒོ་ནས་འཁྲུལ་རྟོག་གློ་བུར་བ་བསལ་ནས་བདག་གིས་སེམས་ཅན་ཆེད་དུ་སངས་རྒྱས་བསྒྲུབ་པར་བྱའོ་སྙམ་པ་རང་ཤུགས་ལ་འོང་བ་ནི་ཐུན་མོང་སེམས་བསྐྱེད་ཀྱང་ཚང་བར་གསུངས་སོ། །གསུང་རྒྱུན་ལས། འདིར་ཐུན་མིན་གྱི་ཀུན་རྫོབ་སེམས་བསྐྱེད་ཅེས་པ། སྣང་ཆ་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྟོགས་པའོ། །ཞེས་གསུངས། མ་དག་པའི་ཞེན་སྣང་གཏན་ལ་ཕབ་པས་ཆོས་ཉིད་གཏན་ལ་ཕེབས་པར་འགྱུར་བའི་སྐབས། སྒྱུ་འཕྲུལ་འདིའི་སྐབས་ཀྱི་སྣང་ཞེན་གཅོད་ལུགས་ནི། རིན་པོ་ཆེས་གཏེར་ཆེན་ལ་གསུངས་པ། དཔེ་ཉི་མ་སྤྲིན་གྱིས་བསྒྲིབ་པའི་སྐབས་འོད་དྲོད་དང་ལྡན་པ་ཡིན་ཀྱང་། སྒྲིབ་བྱེད་སྤྲིན་གྱི་དབང་གིས་འོད་ཟེར་དྲོད་ལྡན་དུ་མི་འཆར་བ་ཡིན་ལ། སྤྲིན་དང་བྲལ་ཚེ་འོད་ཟེར་མཐའ་དག་དྲོད་དང་ལྡན་པར་དངོས་སུ་འཆར་ལ། དེ་ཡང་སྔར་དྲོད་མེད་གསར་དུ་དྲོད་དང་ལྡན་པར་སོང་བ་མིན་པར་ཐ་སྙད་ཀྱི་ཡིན་ཚུལ་གསལ་བ་ཡིན་ལ། དེ་བཞིན་དུ་འཆར་གཞིའི་འོད་གསལ་བའི་རིག་པ་ཉིད་ཚོགས་བརྒྱད་གློ་བུར་བའི་སྤྲིན་གྱིས་སྒྲིབ་ཚེ། སེམས་ཀུན་གྱི་གཤིས་ཡེ་ཤེས་ཡིན་པར་མི་སྣང་བར་མ་དག་རང་རྒྱུད་པར་སྣང་ཞིང་ཞེན་ལ། བླ་མའི་མན་ངག་ལ་བརྟེན་ནས་སྙིང་དབུས་ཀྱི་འོད་གསལ་སད་ནས་མངོན་དུ་གྱུར་ཚེ། དེའི་ངོར་སེམས་ཐམས་ཅད་འོད་གསལ་འབའ་ཞིག་ཏུ་འཆར་བ་ནི། དཔེ་གསེར་གླིང་དུ་ཕྱིན་པ་ལྟ་བུ་ཡིན་ལ། འདི་དུས་ཡུལ་ཅན་ཐམས་ཅད་ཡེ་ཤེས་འབའ་ཞིག་ཏུ་ཤར་བ་ནི། སྔར་ཡེ་ཤེས་མིན་པ་གསར་དུ་ཡེ་ཤེས་སུ་སོང་བ་མིན་པར་གནས་ལུགས་ཇི་བཞིན་པ་ཉིད་མངོན་དུ་གྱུར་བ་ཡིན་ནོ། །རིག་པ་སད་སྟོབས་ཀྱིས་ཡུལ་ཅན་ཐམས་ཅད་ཡེ་ཤེས་སུ་ཤར། ཡུལ་ཡང་ཡེ་ཤེས་ཀྱི་ངོར་སྣང་བས་ཡུལ་གྱི་སྟེང་ན་མ་དག་པ་བསལ་རྒྱུ་མེད་པར་ཐམས་ཅད་དག་པ་འབའ་ཞིག་ལས་མེད་པ་མྱོང་བས་གྲུབ་པ་ཡིན་ནོ། །ཞེན་སྣང་ནི་རྗེས་ཐོབ་རྒྱ་ཡན་པའི་ངོར་སྣང་སེམས་རང་རྒྱུད་པ་འཁྲུལ་རྟོག་ཏུ་སྣང་བ་འདི་ཙམ་ལས་གཞན་མེད་པས། ངོ་ཤེས་མ་ཤེས་ཙམ་མམ། རིག་པ་སད་མ་སད་ཙམ་མམ། ཞེས་གསུངས། མི་ཕམ་རིན་པོ་ཆེས། རྣམ་ཤེས་ཚོགས་བརྒྱད་ཆོས་ཅན་དང་། དེའི་རང་བཞིན་ཆོས་ཉིད་ཀྱི་ཡེ་ཤེས་གཉིས་ནི། གཅིག་ཐ་དད་གང་དུ་དང་ཁས་བླང་བྱ་མིན་པར། དགོངས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་པའི་མཚན་ཉིད་དེ། །གཅིག་དང་ཐ་དད་དུ་ཡང་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་གསུངས་པའི་ལུང་བཞིན་ཀློང་ཆེན་རབ་འབྱམས་ཀྱིས་གསུངས་ལ། དེའི་ཕྱིར་དེ་གཉིས་ཐ་སྙད་དུ་གཅིག་མ་ཡིན་ཏེ། སེམས་རྟོགས་པ་ཙམ་གྱིས་སེམས་ཀྱི་ཆོས་ཉིད་ཡེ་ཤེས་མི་རྟོགས་པ་དང་། ཆོས་ཅན་དང་ཆོས་ཉིད་ཡིན་པ་སོགས་ཀྱི་ཕྱིར་རོ། །དོན་དམ་པར་ཐ་དད་མིན་ཏེ། སེམས་ཀྱི་རང་བཞིན་ཡེ་ཤེས་ཡིན་པས། ཡེ་ཤེས་རྟོགས་དུས་སེམས་ཀྱང་དེ་ལས་ཐ་དད་དུ་མ་དམིགས་པའི་ཕྱིར་དང་། ཡེ་ཤེས་རྟོགས་ཚེ་སེམས་རང་གྲོལ་དུ་འཆར་བ་སོགས་ཀྱི་ཕྱིར་ནའོ། །ཞེས་སོ། །འདི་ཐད། བླ་མ་འཇིགས་འོད་ཉིད་ཀྱི་ཞལ་རྒྱུན་ལ་གསུང་སྒྲོས་ཐུན་མིན་ལྟར་ན། ཡེ་ཤེས་རང་དབང་གི་སྣང་བ་ཆོས་ཅན། དག་པའི་དཀྱིལ་འཁོར་གཅིག་ཏུ་གནས་པ་ཡིན་ཏེ། དེའི་སྣང་ཆ་ལ་མ་དག་པའི་སྣང་བ་མ་དམིགས་པའི་ཕྱིར་ཞེས་དང་། དཔལ་སྤྲུལ་གསུང་རྒྱུན་ལ། སྣང་བ་འདི་ཆོས་ཅན། ལྷ་ཡིན་ཏེ། ཡེ་ཤེས་རང་སྣང་ཡིན་པའི་ཕྱིར། འདི་སྐབས་ཀྱི་ལྷ་ཀ་དག་ལྷུན་གྲུབ་ཟུང་འཇུག་གི་ཡེ་ཤེས་ཉིད་ཡིན་ལ། ལྷ་དེ་ཉིད་ཚོགས་བརྒྱད་ཀྱི་རྣམ་པར་བཞེངས་པའི་ཡེ་ཤེས་རང་སྣང་གི་ཆ་ཡིན་པའི་ཕྱིར་ཞེས་པར་གོ་དགོས་ཞེས་དང་། རྫོགས་ཆེན་ལུགས་ལ་སྣང་བ་ཐམས་ཅད་ཀྱི་ཆོས་ཉིད་རིག་སྟོང་འདུས་མ་བྱས་པ་དེ་འབྲས་བུ་ཡོངས་དག་ལྷའི་ངོ་བོར་དང་པོ་ངོ་ཤེས། བར་དུ་ཡང་ཡང་བསྐྱངས་བས་རྩལ་རྫོགས་པའི་ཐབས་ལ་སློབ་ཅིང་། མཐར་བརྟན་པ་ཐོབ་ཚེ་སྒོམ་སྟོབས་ཀྱིས་སྣང་བ་ལྷར་གྲུབ་པའམ་ཤར་བ་ཡིན་ནོ། །བཤད་པ་མང་པོས་སྣང་བ་ལྷར་མི་འགྲུབ་ཀྱི། དང་པོ་སེམས་དང་རིག་པ་གཉིས་སུ་ཕྱེ་ནས་རིག་པ་རྐྱང་དེད་དུ་བསྐྱང་བ་ནི་སྣང་བ་ལྷར་སྒྲུབ་པའི་སྒོ་ཡིན། བར་དུ་སྣང་ལུགས་འཁྲུལ་བ་ཅུང་ཟད་ལོག་ནས་སེམས་རིག་གཉིས་མེད་ཆུ་དང་རླབས་ལྟར་མཐོང་ནས་སེམས་རིག་གཉིས་འཛིན་གྱི་སྒྲོགས་ལྷོད་པས་རྩལ་གྱི་འཆར་སྒོ་ལ་དགག་སྒྲུབ་མི་དགོས་པར་གུ་ཡངས་ལ་བློ་བདེ་བའི་དབྱིངས་ཀྱི་ནམ་མཁའ་ལ་རིག་པའི་མཁའ་ལྡིང་གཡོ་བ་ན་སྣང་བ་ལྷར་འགྲུབ་པའི་མགོ་རྩོམ་པ་ཡང་ཡིན། མཐར་བརྟན་པ་ཐོབ་པ་མཐར་ཐུག་པ་ན་གསེར་གླིང་དུ་ས་རྡོ་ཕལ་བ་བཙལ་ཀྱང་མི་རྙེད་པ་སེམས་རིག་དང་ཆུ་རླབས་ལྟར་རྟོགས་པར་མ་ཟད། སྣང་སེམས་ཀྱང་དེ་ལྟར་རྟོགས་པ་དང་གནས་ལུགས་དང་སྣང་ལུགས་མ་བུ་འཕྲོད་དེ་སྣང་ལུགས་ཀྱི་འཁྲུལ་ཆ་དབྱིངས་སུ་ཟད་པ་ན་སློབ་ལམ་གྱི་སྣང་བ་ལྷར་སྒྲུབ་མཐར་ཐུག་ཡིན་ཞིང་། མཐར་རིག་པ་དབྱིངས་སུ་འཁྱིལ། རིག་གདངས་སྐུ་དང་ཞིང་ཁམས་སུ་སྨིན། རིག་རྩལ་རྣམ་པ་ཐམས་ཅད་མཁྱེན་པའི་ཡེ་ཤེས་སུ་གྲོལ་བ་ན་སྣང་བ་ལྷར་གྲུབ་པ་བླ་ན་མེད་པའོ། །ཞེས་གསུངས་སོ། །ཟིན་བྲིས་ལས། ཐག་ཁྲ་སྦྲུལ་དུ་སྣང་བ་ཆོས་ཅན། ཇི་ལྟར་སྣང་བ་ལྟར་གྱི་སྦྲུལ་གྱིས་གདོད་ནས་སྟོང་སྟེ། ཁྱོད་ཡུལ་མི་གསལ་བ་སོགས་ཀྱི་རྐྱེན་ལས་སྣང་གཞི་ཐག་པ་ལ་སྦྲུལ་དུ་བཟུང་བའི་སྣང་བ་ཙམ་ཡིན་པའི་ཕྱིར། །དོན་ནི་ལོག་རྟོག་འཁྲུལ་བའི་དམིགས་ཡུལ་དུ་གྱུར་བའི་མ་དག་པའི་ཕུང་ཁམས་སྐྱེ་མཆེད་ཆོས་ཅན། ཇི་ལྟར་སྣང་བ་ལྟར་གྲུབ་པས་གདོད་ནས་སམ་ཡེ་ནས་སྟོང་སྟེ། ཁྱོད་གཉུག་མའི་ཡེ་ཤེས་ཀྱི་སྣང་བ་ལས་ཕྱིར་གོལ་ཏེ་མ་རིག་པ་མཆེད་ཕྱིན་ཆད་ཀྱི་སྣང་བ་ཡིན་པའི་ཕྱིར། ཞེས་ཞལ་རྒྱུན་ཡིན། ཞེས་སོ། ། སྟོན་པ་ཆོས་ལོངས་རྡོ་རྗེ་མངོན་བྱང་གི་སྐུ་བཞི་དང་། འཁོར་ཡེ་ཤེས་རྒྱ་མཚོ་སོགས་བཞི་པོ་རྣམས་ནི་ལྡོག་ཆས་ཕྱེ་ལ། སྐུ་དེ་དག་རང་རང་གི་དགོངས་པ་ལ་མཉམ་པར་བཞག་པའི་སྟོབས་ཀྱིས། འཁོར་རྣམས་ཀྱི་སྐུ་དེ་དང་ཆ་འདྲ་བའི་རྟོགས་པ་ཁྱད་པར་ཅན་ཐོབ་པས། རང་རང་གི་དགོངས་པ་ལ་མཉམ་པར་བཞག་པ་ལ་གསུང་གིས་བརྡ་སྤྲད་པའི་ཐ་སྙད་སྦྱར་བ་ཡིན་ནོ། །ཆོས་སྐུའི་ཆོས་ཐམས་ཅད་སྐྱེ་བ་མེད་པ་ལ་མཉམ་པར་བཞག་པས་འཁོར་གྱིས་ཀྱང་དེ་དང་ཆ་འདྲ་རྟོགས་པ་དང་། ལོངས་སྐུས་སྐུ་གསུམ་ངོ་བོ་དབྱེར་མེད་ཀྱི་དོན་ལ་མཉམ་པར་བཞག་པས་མེ་ལོང་ལ་པྲ་ཕབ་པ་ལྟར་ལོངས་སྐུ་མཐོང་བ་ཙམ་གྱིས་རང་རྒྱུད་ཀྱི་སྒྲིབ་པ་ཕྲ་མོ་ངོས་ཟིན་པ་དང་། རྡོ་རྗེའི་སྐུས་སྐུ་གསུམ་ངོ་བོ་དབྱེར་མེད་པ་ལ་མཉམ་པར་བཞག་པས་འཁོར་རྣམས་ལྷག་པའི་བདེན་པ་དབྱེར་མེད་ཀྱི་དོན་དང་། མངོན་བྱང་གི་སྐུ་ལྔ་ཡེ་ཤེས་ལྔའི་ལྡོག་ཆ་ཐ་དད་པ་ལ་དགོངས་པ་གཏད་པས་འཁོར་རྣམས་སྤྲོས་པ་མཐའ་དག་གི་སྦུབས་ལས་གྲོལ་བའི་འོད་གསལ་མངོན་སུམ་རྟོགས་གསུངས། ལོངས་སྐུས་སྨིན་པ་ཞེས་པ་གསུང་རྒྱུན་ལས། རྒྱུན་མཐའ་བ་དེས་ལོངས་སྐུ་མཐོང་བ་ཙམ་གྱིས་རང་རྒྱུད་ཀྱི་དྲི་མ་ངོས་ཟིན་ནོ། །སྤྲུལ་སྐུས་མོས་པ་ཞེས་པ་མོས་སྤྱོད་པ་རྣམས་ལའོ། །ཞེས་དང་། སྐུ་གསུམ་དབྱེར་མེད་ཀྱི་ཆ་ནས་དང་སྐུ་གསུམ་གྱི་ལྡོག་ཆ་མ་འདྲེས་པའི་ཆ་ནས་རྡོ་རྗེ་དང་མངོན་བྱང་གི་སྐུའོ། །ཞེས་གསུངས། ཟིན་བྲིས་ལས། བླ་མ་ཐམས་ཅད་མཁྱེན་པ་དཔལ་སྤྲུལ་ནས། སྤྱིར་དབང་རྣོན་ནི་རྟགས་སམ་གཏན་ཚིགས་ཙམ་ལ་བརྟེན་པའི་ཤེས་རབ་ཀྱིས་གྲོལ་བ་དང་། འདིར་དངོས་ལྔ་སོགས་ཀྱི་ཡེ་ཤེས་མཚོན་ནས་རྟོགས་པས་གྲོལ་ཚུལ་གཉིས་དབྱིབས་མཚུངས་དུ་ཡོད་པས་དངོས༵་ལྔ༵་སོགས་གཏན༵་ཚིགས༵་མཚན༵་ཉིད༵་པ༵་དང༵་འདྲ༵་བ༵་ལས༵་བཏགས༵་ཏེ། ཞེས་སོ། ། བཞེད་པ་གཉིས་པོ་གང་ལའང་འཐད་མི་འཐད་ཀྱི་ཆ་གཉིས་ཞེས་པ། གསུང་རྒྱུན་ལས། ཞེན་སྣང་མེད་ཅེས་པ་མི་འཐད་དེ། ཤེས་སྒྲིབ་ཕྲ་མོ་ཡོད་པའི་ཕྱིར། གཏན་ཚིགས་མིན་ཞེས་པ་འཐད་ལྡན་ནོ། །ཞེན་སྣང་གཅད་རྒྱུ་ཡོད་ཅེས་པ་འཐད། གཏན་ཚིགས་དངོས་ཡིན་གསུངས་པ་མི་འཐད། དེ་གཏན་ཚིགས་བཏགས་པ་བ་ཡིན་ནོ། །ཞེས་དང་། སྐྱེ་མེད་མཚོན་པ་ཞེས་པ། ནམ་མཁའ་མཐོང་བ་ཙམ་གྱིས་ཆོས་རྣམས་སྐྱེ་མེད་དུ་རྟོགས་པ་དང་། མེ་ལོང་གི་གཟུགས་བརྙན་གྱི་དྲི་མ་མཐོང་བ་ཙམ་གྱིས་རང་རྒྱུད་ཀྱི་དྲི་མ་ངོས་ཟིན་པ་དང་། ཉི་མའི་སྙིང་པོ་མཐོང་བ་ཙམ་གྱི་གསལ་བའི་ཡེ་ཤེས་མངོན་སུམ་རྟོགས་པ་དང་། བྲག་ཆ་ཐོས་པ་ཙམ་གྱི་གྲགས་སྟོང་དབྱེར་མེད་ཀྱི་དོན་རྟོགས་པ་དང་། སངས་རྒྱས་ཀྱི་ཚངས་དབྱངས་གཅིག་ཐོས་པའི་ཚེ་ན་རང་གི་མོས་པ་ཤེས་ནུས་པ་བཞིན་དངོས་པོ་གཅིག་ཉིད་མཐོང་བའི་ཚེ་ན། དགོངས་དོན་སྣ་ཚོགས་ཤེས་ནུས་སོ། །ཞེས་གསུངས། ལྡེམ་དགོངས་བརྡའི་ཚིག་སོགས་ཐད། ཞལ་རྒྱུན་དུ། ཁམས་གསུམ་གྱི་སྲོག་གཅད་པར་བྱའོ། །ཞེས་པའི་ནང་དུ་རླུང་སེམས་དབུ་མར་བསྡུ་བ་ལ་གོ་བ་དང་ཆོས་ཐམས་ཅད་བྲག་ཆ་ལྟ་བུའོ། །ཉིན་པར་གྱི་སྣང་བ་ཉི་མ་ལས་གཞན་དུ་མ་གྱུར་བའོ། །ཞེས་པ་དག་ལོངས་སྐུ་དང་དབྱེར་མེད་དང་། མངོན་བྱང་གི་གསུང་གི་མཚན་གཞིར་བཞག་གསུངས། ཚིག་དོན་མཐུན་པའི་གཏན་ཚིགས་ཀྱི་སྐབས་སུ་སྒྲ་མི་འགལ་ཞེས་པའི་དོན་ནི། ཅི་ཡང་མིན་པ་དང་། ཡིན་པ་གཉིས་ཚིག་འགལ་བ་ལྟར་མ་ཡིན་པ་གོ་བ་ལས། གཞན་ཚིག་དོན་མི་མཐུན་པ་ནི། རྟགས་དང་བསྒྲུབ་བྱའི་ཆོས་འགལ་བ་ལ་གོ་ན་འགལ་རྟགས་མཚན་ཉིད་པར་འགྱུར་བས། ཚིག་དོན་མི་མཐུན་པའི་གཏན་ཚིགས་ཡང་དག་གཞག་ཏུ་མེད་པའོ། །ཞེས་གསུངས། གཏན་ཚིགས་ཐད། མི་ཕམ་རིན་པོ་ཆེས་མཛད་པའི་མན་ངག་ལྟ་ཕྲེང་གི་མཆན་འགྲེལ་ནོར་བུའི་བང་མཛོད་ལས། རྒྱུ་གཅིག་པར་རྟོགས་པ་དང་། ཡིག་འབྲུའི་ཚུལ་གྱིས་རྟོགས་པ་དང་། བྱིན་གྱིས་རླབས་ཀྱི་རྟོགས་པ་དང་། མངོན་སུམ་པར་རྟོགས་པའོ། །དེ་ཡང་རྟོགས་པ་བཞི་འདི་ལ་རིམ་ཅིག་ཆར་གཉིས་ཀྱི་བཤད་པ་འབྱུང་ཡང་འདིར་རྫོགས་པ་ཆེན་པོ་རང་བྱུང་གི་ཡེ་ཤེས་ཐིག་ལེ་ཉག་གཅིག་ཏུ་གཏན་ལ་ཕེབས་པས་ཅིག་ཆར་བ་ལྟར་དུ་བཤད་དོ། །དེ་ལ་རྒྱུ་སྟེ་རང་བཞིན་ནམ་གཞི་གཅིག་པར་རྟོགས་པ་ནི་ཆོས་ཐམས་ཅད་དོན་དམ་པར་མ་སྐྱེས་པས་ཞེས་མ་སྐྱེས་པའི་རང་བཞིན་དུ་སོ་སོ་མ་ཡིན་པ་དང་། ཀུན་རྫོབ་ཏུ་སྣང་བ་བདེན་སྟོང་སྒྱུ་མའི་མཚན་ཉིད་དུ་སོ་སོ་མ་ཡིན་པ་ནི་ཐེག་པ་ཆེན་པོ་ཐུན་མོང་དུ་གྲགས་པ་དང་། མ་སྐྱེས་པ་ཉིད་མ་སྐྱེས་བཞིན་དུ་ཆུ་ཟླ་ལྟར་སྒྱུ་མ་དག་སྣ་ཚོགས་སུ་སྣང་ཞིང་རང་རང་གི་བྱ་བ་བྱེད་ནུས་པ་དང་། སྒྱུ་མ་ལྟར་སྣང་བ་ཉིད་སྣང་བཞིན་དུའང་ངོ་བོ་མེད་དེ་མ་སྐྱེས་པས་ན་ཀུན་རྫོབ་དང་དོན་དམ་པར་དབྱེར་མེད་པས་ཟུང་འཇུག་རང་བྱུང་གི་ཡེ་ཤེས་རྒྱུ་གཅིག་པར་རྟོགས་པ་ནི་ལུང་ཟབ་མོ་ལས་དྲང་བའི་ཐུན་མོང་མ་ཡིན་པའོ། །མདོར་ན་རང་བྱུང་ཡེ་ཤེས་བྱང་ཆུབ་སེམས་ཀྱི་ངོ་བོ་ནི་སྣང་སྟོང་དབྱེར་མི་ཕྱེད་པའི་རང་བཞིན་ཡིན་ལ། འཁོར་འདས་ཐམས་ཅད་དེའི་ཚུལ་གཅིག་ལས་མི་འདའ་བ་ནི་རྒྱུ་གཅིག་པའོ། །ཡིག་འབྲུའི་ཚུལ་གྱིས་རྟོགས་པ་ནི་དེ་ལྟ་བུའི་སྣང་སྟོང་དབྱེར་མེད་ཀྱི་རང་བཞིན་དེ་ཉིད་ཀྱང་གདོད་མ་ནས་སྐུ་གསུང་ཐུགས་འབྲས་བུའི་ཆོས་སུ་སངས་རྒྱས་པར་བསྟན་པ་སྟེ། དེ་ལ་ཆོས་ཐམས་ཅད་མ་སྐྱེས་པ་ནི་ཨ་ཡིས་མཚོན་ཏེ་གསུང་གི་རང་བཞིན། མ་སྐྱེས་པ་ཉིད་སྒྱུ་མར་སྣང་ཞིང་བྱ་བ་བྱེད་ནུས་པ་ནི་ཨོ་ཡིས་མཚོན་ཏེ་སྐུའི་རང་བཞིན། དེ་ལྟར་རྟོགས་པའི་རིག་པ་སྒྱུ་མའི་ཡེ་ཤེས་མཐའ་དབུས་མེད་པ་ནི་ༀ་གྱིས་མཚོན་ཏེ་ཐུགས་ཀྱི་རང་བཞིན་དུ་རྟོགས་པའོ། །དེ་ཡང་གདོད་ནས་སྣང་སྟོང་ཟུང་འཇུག་གི་ཡེ་ཤེས་དེ་ལ་བསལ་བཞག་གི་བྲི་གང་ནམ་ཡང་མེད་ཅིང་། དེ་ཉིད་རང་བཞིན་རྣམ་པར་དག་པས་འཁོར་བ་ཡེ་སངས་ཆེན་པོ་ཡིན་ལ། དེ་ཉིད་ཀྱི་རོལ་བ་ནི་གདོད་ནས་དཀྱིལ་འཁོར་གསུམ་དུ་གནས་པ་ཡིན་པར་ནི་ཡིག་འབྲུའི་ཚུལ་གྱིས་རྟོགས་པའོ། །བྱིན་གྱིས་རླབས་ཀྱིས་རྟོགས་པ་ནི། རྟོགས་པ་རྣམ་པ་གཉིས་པོ་དེའི་མཐུ་དང་བྱིན་རླབས་ཤེས་པ་སྟེ། དཔེར་ན་རས་དཀར་པོ་ལ་དམར་པོར་བྱིན་གྱིས་རློབ་པའི་མཐུ་བཙོད་མ་ཡོད་པ་བཞིན་ཏུ། ཆོས་ཐམས་ཅད་གདོད་མ་ནས་སངས་རྒྱས་པར་བྱིན་གྱིས་རློབས་པའི་མཐུ་ཡང་རྒྱུ་གཅིག་པ་དང་ཡིག་འབྲུའི་ཚུལ་གྱི་མཐུས་བྱིན་གྱིས་བརླབས་པར་ཤེས་ཤིང་རྟོགས་པའོ། །དེ་ལ་ཆོས་ཐམས་ཅད་ཡེ་ནས་སངས་རྒྱས་པ་ཡིན་མོད་ཀྱི་རྟོགས་པ་གཉིས་དང་མི་ལྡན་པ་རྣམས་ལ། དེས་ཕན་འདོགས་པར་མི་འགྱུར་ལ། དེ་གཉིས་དང་ལྡན་ན་ནི་ཕན་ཐོགས་པར་སྣང་བར་འགྱུར་བས། རྟོགས་པ་གཉིས་ཀྱི་མཐུས་ཆོས་ཐམས་ཅད་ཡེ་ནས་སངས་རྒྱས་པར་བྱིན་གྱིས་བརླབས་པ་ལྟར་སྣང་བར་འགྱུར་བས་བྱིན་གྱིས་བརླབས་པར་རྟོགས་པ་ཞེས་བྱའོ། །མངོན་སུམ་པར་རྟོགས་པ་ནི། སྤྱིར་དབང་པོའི་མངོན་སུམ་སོགས་ཡོད་ཀྱང་འདིར་ཤེས་རབ་ཀྱི་དབང་པོའི་མངོན་སུམ་སྟེ། དེ་ཡང་སོ་སོར་རྟོག་པའི་ཤེས་རབ་ཉིད་ལ་གོ་བར་བྱ་སྟེ། ཆོས་ཐམས་ཅད་ཡེ་ནས་སངས་རྒྱས་པར་གནས་པ་དེ་ཡང་ཡིན་ཞེས་པའི་ལུང་དང་བླ་མ་བརྒྱུད་པའི་མན་ངག་དང་འགལ་བའང་མ་ཡིན་པ་སྟེ། དཔེར་ན་བསྲེགས་བཅད་བརྡར་བའི་གསེར་ཡིན་མིན། སྐྱོན་ཡོད་མེད། གསེར་བཟང་ངན་ཤེས་པ་བཞིན་དུ། ལུང་གིས་སྤྱི་ལ་མི་འཁྲུལ། ལུང་ལ་དྲང་ངེས་ལྡེམ་དགོངས་སྣ་ཚོགས་པ་ལ་མན་ངག་གིས་དེའི་སྐྱོན་བསལ་བས་ཡིད་ཆེས་ལུང་དང་མན་ངག་ཡོད་ཀྱང་ཚིག་ཙམ་གྱི་སྒྲ་ཕྱིར་འབྲངས་བས་བློའི་གཏིང་དུ་ཉམས་སུ་མ་ལོན་པ་ཡང་ཡོད་པས། ལུང་དང་མན་ངག་གི་ཚིག་ཙམ་ལ་བརྟེན་པའང་མ་ཡིན་པར་སོ་སོར་རྟོག་པའི་ཤེས་རབ་བམ་རང་གི་རིག་པས་བློའི་གཏིང་དུ་ཡིད་ཆེས་པས་མངོན་སུམ་དུ་རྟོགས་པའོ། །ཞེས་འདིས་ནི་ལུང་གི་དོན་སྤྱི་ཕྱིན་ཅི་མ་ལོག་པ་ཤེས་པར་འགྱུར་ལ། མན་ངག་གིས་ལུང་གི་དགོངས་པ་གཞན་དུ་འདྲེན་པ་གཅོད་ཅིང་། ཤེས་རབ་ཀྱིས་མངོན་སུམ་དུ་རྟོགས་པས་ཐོས་པ་ཙམ་ལ་སོགས་པ་ཉིད་དུ་ཞེན་པ་སེལ་ཞིང་གཅོད་པར་བྱེད་པ་ཡིན་ནོ། །དེ་ལྟར་ལམ་གྱིས་ཡིད་ཆེས་པ་ནི། རྟོགས་པ་རྣམ་བཞིའི་དོན་དེ་ཉིད་ཤེས་ཤིང་རིག་པ་ཉིད་རྣལ་འབྱོར་བའི་ལམ་སྟེ། དེའང་མཚན་ཉིད་ཐེག་པར་རྒྱུ་སྔོན་དུ་བསྒྲུབས་པའི་འབྲས་བུ་སངས་རྒྱས་ཉིད་ཀྱིས་ནམ་ཞིག་ན་འབྱུང་བའི་དུས་ལ་ལྟོས་པ་ལྟ་བུ་མ་ཡིན་གྱི། ད་ལྟ་ཉིད་དུ་ཤེས་རབ་ཀྱི་དབང་པོས་རང་གིས་མངོན་སུམ་དུ་རྟོགས་ཤིང་ཡིད་ཆེས་པའོ། །ཞེས་དང་། རིན་པོ་ཆེས། ཡོངས་སུ་དག་པའི་ལྷ་སྐུ་ཐམས་ཅད་སྐྱེད་པའི་ས་བོན་ནི་གསང་སྔགས་ཀྱི་ཡི་གེ་སྟེ། སངས་རྒྱས་ཐམས་ཅད་མིང་ཙམ་ལ་གནས་པ་ལ་གཏུག་ནས་ལེའུ་བཞི་པར་རྒྱས་བཤད་མཛད། ཕུང་སོགས་ཅིར་སྣང་ཐམས་ཅད་སྐྱེད་པའི་ས་བོན་ནི་ཆོས་ཀྱི་དབྱིངས་སམ་སེམས་ཀྱི་གཉུག་མའི་ཁམས་ཏེ། འདིར་འོད་གསལ་གྱི་བསམ་མི་ཁྱབ་བམ་མི་རྟོགས་པའམ་སྤྲོས་པ་མེད་པའི་བཞུགས་ཚུལ་གྱི་ཆའོ། །དེ་ཉིད་ནི་ཡིད་སྐྱོབ་པའི་མནྡྲ་ཐམས་ཅད་ཀྱི་མཐར་ཐུག་སྟེ། ཕྱག་རྡོར་དབང་བསྐུར་དུ་ཆོས་ཀྱི་དབྱིངས་ལ་ལྷ་སྔགས་ཕྱག་རྒྱ་སོགས་མང་པོར་བརྟགས་ནས་དངོས་གྲུབ་ཀྱི་དོན་བྱེད་པར་གསུངས་པ་ལྟ་བུ། དེ་གློ་བུར་བའི་སྤྲོས་པས་སྟོང་བའམ་དག་པ་ཡིན་ཅིང་། གང་སྣང་ཐམས་ཅད་དེའི་ངང་ལས་མཆེད་པ་ནི་སྣང་བ་ཐམས་ཅད་ཀ་ནས་དག་པའི་མཆེད་བཞིའི་ས་བོན་མཐར་ཐུག་ནས་དག་པ་དང་གདོད་ནས་དག་པའོ། །དེའི་ཕྱིར་དབྱིངས་དེ་ནི་ས་བོན་གྱི་སྔགས་དེ་ལ། དེའི་རྣམ་འགྱུར་རང་སྣང་རིས་མེད་སྔགས་ཀྱིས་མིག་བསྒྱུར་བའི་རང་སྣང་གི་སྒྱུ་མ་ལྟ་བུར་མཆེད་ན་ནི་ལྷའི་སྐུ་སྟེ་ཨོས་མཚོན། དེ་ལྟར་དབྱིངས་དང་དེ་ཉིད་སྣང་བ་སྣ་ཚོགས་སུ་ཤར་བ་ཐམས་ཅད་སྔགས་བླ་མེད་ཀྱི་རང་ལུགས་ཐུན་མོང་མ་ཡིན་པའི་རང་བཞིན་རྣམ་དག་གི་དཀྱིལ་འཁོར་གཅིག་ཏུའམ་རང་བཞིན་རྣམ་དག་གི་སྐུ་གསུང་ངམ་ལྷ་སྔགས་ཀྱི་ཡོ་ལང་ཁོ་ན་གནས་པ་དེ་རྟོགས་བྱེད་ཀྱི་ཐུགས་ནི་འོད་གསལ་རང་གི་མཁྱེན་ཆའམ་རིག༵་པའི༵་ཆ༵་སྟེ། དེས་རྟོགས་ཚུལ་ཡང་དབྱིངས་དང་ཡུལ་སྣང་གཉིས་ཆར་རིག་ཆ་ཉིད་ལས་མི་གཞན་པར་མངོན་དུ་གྱུར་ནས་རྟོགས་བྱ་གཉིས་ཀ་རྟོགས་བྱེད་ཀྱི་ཀློང་དུ་རྫོགས་པ་ཨ་ཨོ་གཉིས་ཆར་ༀ་ལ་རྫོགས་པ་ལྟ་བུའོ། །ༀ་གྱི་དོན་ནི། གཟུང་འཛིན་བྲལ་བའི་སེམས་ལ་ལྟོས། །སྣང་བ་ཐམས་ཅད་རང་སྣང་ཡིན། །ཡེ་ཤེས་རིག༵་པ༵་ངོ་མཚར་ཆེ། །ཞེས་པ་དང་གཅིག་རེད། རྟོགས་དུས་སྣང་རིག་དབྱིངས་གསུམ་ཁྱབ་བརྡལ་དུ་འདྲེས་ནས་མཐའ་དབུས་མེད་པའི་འོད་གསལ་དུ་འགྱུར་བར་མ་ཟད་དབྱིངས་མ་རྟོགས་རང་སྣང་སྣོད་བཅུད་རྒྱུད་གསུམ་རང་རྒྱུད་པར་ཞེན་པའི་དུས་ཉིད་ནས་ཤེས་པས་གར་ཁྱབ་རིག་པའི་བདག་ཉིད་གཅིག་གི་ཚུལ་གྱིས་ཁྱབ་ཅིང་རིག་པ་རང་གི་ངོ་བོ་བཟང་ངན་དུ་མི་འགྱུར་བར་མཐའ་དང་དབུས་མེད་པ་སྟེ་ཟབ་ཅིང་རྒྱ་ཆེ། རྒྱ་ཆད་ཕྱོགས་ལྷུང་མེད་པར་གདལ་བ་སྟེ། སེམས་རང་སྣང་རྣམས་སེམས་རང་སྣང་དང་ཡེ་ཤེས་རང་སྣང་གཉིས་ཀྱི་ཟླས་ཕྱེ་བའི་ཡེ་ཤེས་རང་སྣང་མིན་ཡང་། མཐར་གཏུག་ན་ཡེ་ཤེས་ཀྱི་རང་སྣང་ཡིན་དགོས། རང་སྣང་ཞེས་པའི་སྐོར་ཐམས་ཅད་སྣང་བ་སྣང་ཡུལ་གཉིས་ཀྱི་ཟླས་ཕྱེ་བའི་སྔ་མ་རང་ལ་སྦྱར་ན་འགྲིགས་ཆེ། ཀུན་མཁྱེན་ཆེན་པོས་སྣང་བ་འདི་རྣམས་བག་ཆགས་སྨིན་པའི་སྣང་ཆར་བཤད་པའང་དེ་ལྟར་དགོས། སྣང་ཡུལ་དག་མ་དག་གམ་ཕྱིན་ཅི་ལོག་ཡིན་མིན་སྣང་བ་དག་མིན་གྱིས་ཕྱེ་བ་ཐལ་འགྱུར་བའི་ཡང་ལོག་རྣམ་བཞག་དང་ཀུན་རྫོབ་བདེན་པ་གནས་སྣང་མི་མཐུན་པའི་སྟེང་ནས་བཤད་ལུགས་ལྟ་བུ་སྟེ་ཞར་བྱུང་ངོ་། །རང་སྣང་ཐམས་ཅད་དག་པའི་ལྷའི་རང་བཞིན་ནམ་ངོ་བོ་ཉིད་ཡིན་ལུགས་ནི། དག་པའི་དུས་སུ་རྣམ་སྣང་དུ་འོང་རྒྱུ་དེ་མ་རིག་པའི་བག་ཆགས་ཀྱིས་བསླད་ཚེ་ཐ་མལ་བའི་གཟུགས་ཕུང་དུ་འཆར་བ་སོགས་སོ། །རྫོགས་པ་ཆེན་པོའི་ཚུལ་ལ་རྟོགས་པ་བཞིས་ཡིད་ཆེས་ཚུལ་ཡང་གཙོ་བོར་འདི་དང་རྒྱུ་གཅིག་པ་གཉིས་སུ་སྣང་། རྒྱུ་གཅིག་པར་ཆོས་ཐམས་ཅད་ཅེས་པ་ནི་གོང་དུ་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་ཅེས་པ་དང་གཅིག་རེད། དོན་དམ་འོད་གསལ་གྱི་དབྱིངས་ལ་འཇིག་འདས་ཀྱི་མཚན་མའམ་སྤྲོས་པ་གཉིས་ཆར་མི་དམིགས། ཀུན་རྫོབ་རང་སྣང་གི་ངོར་དེ་གཉིས་སོ་སོའི་བྱ་བ་བྱེད་ནུས་སུ་ཤར་བའི་རྟེན་འབྲེལ་དུ་མཉམ། དེ་གཉིས་དབྱེར་མེད་དུ་མཉམ་པ་རྣམས་རེད་པས་འདིས་མཉམ་པ་དང་། ཡིག་འབྲུའི་དག་པར་རྟོགས་པ་བསྟན་འདྲ། འདིའི་སྟོང་མཉམ་སྣང་མཉམ་གཉིས་ཆར་དབུ་མ་ལྟར་མི་འཇོག་པར་བླ་མེད་ལུགས་ཁོ་ན་ལྟར་འཆད་པ་འདི་གཙང་ཊཱིཀ་ན་གསལ། མཉམ་ལུགས་སྔ་མ་གཉིས་ཐུན་མོང་བ་དང་། ཕྱི་མ་གཅིག་ཐུན་མིན་དུ་རོང་འགྲེལ་གཉིས་ན་སྣང་བ་ནི་སྲིད་ཞི་གཉིས་བདེན་མཉམ་རྫུན་མཉམ་ཙམ་ཐུན་མོང་ཐེག་པར་ཡང་བཞེད་ཀྱང་། དེ་གཉིས་བདེན་པ་གཉིས་ཀར་འོད་གསལ་ལས་ཕྱི་རོལ་དུ་མ་གྱུར་བར་གཅིག་པའམ་དབྱེར་མེད་པས་བཟང་ངན་མེད་པར་མཉམ་པ་འདི་བླ་མེད་ཀྱི་ཐུན་མིན་ཡིན་ཟེར་རམ་སྙམ་སྟེ། ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་པ་ལྟ་བུ་རེད་དམ་བརྟག །དོན་དམ་མ་སྐྱེས་པ་ཨ་དང་། ཀུན་རྫོབ་སྒྱུ་མ་ཨོ་གཉིས་རིག་པ་འོད་གསལ་གཅིག་པུར་རྫོགས་པའི་ༀ་འདི་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོ་ཟེར་རྒྱུ་དེ་ཡིན་པ་འདྲ། བྱིན་གྱིས་བརླབས་པར་རྟོགས་པའི་ཐད་དཔེ་ལ་ལར་ཡེ་ནས་སངས་རྒྱས་པར་བྱིན་གྱིས་བརླབས་པའི་ཞེས་སྣང་ཡང་། ཡེ་ནས་ཞེས་པ་མེད་པའི་དཔེ་དག་པར་སྣང་། དེའང་རྟོགས་པ་སྔ་མ་གཉིས་ཀྱིས་ཕུང་པོར་བྱིན་གྱི་རློབ་ནུས་པ་སྟེ། རྟོགས་པ་དེ་དག་གི་སྟོབས་ཀྱིས་རྟོགས་བྱའི་དོན་དེ་དག་མངོན་དུ་གྱུར་འོང་བའོ། །དེའང་རྟོགས་པ་གཉིས་པོའི་སྟོབས་ཀྱིས་མ་དག་པའི་ལམ་ཐ་མལ་བའི་སྣང་ཞེན་གློ་བུར་བ་གཉིས་ཀ་ནུབ་ནས་གཞི་དུས་སུ་གཟུགས་ཚོར་སོགས་ཐ་མལ་གྱི་སྣང་བར་འོང་རྒྱུ་དེ་རྣམ་སྣང་རིན་འབྱུང་སོགས་ཀྱི་སྣང་ཞེན་དུ་གོ་འཕོ་བ་སྐྱེ་ཤི་བར་དོ་སྐུ་གསུམ་དུ་སྒྱུར་ཞིང་རློབས་པ་ལྟ་བུ། དེའང་རས་དཀར་པོ་ལྟ་བུ་ནི་ཕུང་སོགས་རང་བཞིན་རྣམ་དག །དམར་པོ་ནི་གློ་བུར་རྣམ་དག་གམ་རྟོགས་པ་མངོན་གྱུར། བཙོད་ནི་རྟོགས་པ་གཉིས་རེད། རས་ནག་པོ་སོགས་ལ་ཚོས་ཁ་ཆེན་པོ་གཞན་དུ་སྒྱུར་མི་བཏུབ། དཀར་པོ་ཁོ་ན་གང་འདོད་དུ་བཏུབ། དེ་བཞིན་ཏུ་གང་སྣང་ཐམས་ཅད་རང་སྣང་རིས་མེད་ཡིན་པའི་གནད་ཀྱིས་ཡོངས་སུ་དག་པའི་ལྷར་བསྒྱུར་ནུས་པ་སྣ་ཚོགས་ནོར་བུ་ལྟ་བུ་རེད། དེའང་སྣང་བ་ཡིན་ཚད་མཐར་གཏུག་ན་ཡེ་ཤེས་རང་སྣང་ཁོ་ནར་ངེས་པ་ལ་ཐུག །ལར་སྐྱེ་འཆི་བར་དོའང་ཐབས་མཁས་ཀྱིས་ཟིན་ན་སྐུ་གསུམ་དུ་འོང་ཞེས་པ་ཙམ་གྱིས་འདིའི་ལུགས་ཀྱི་ལྷར་སྒྲུབ་ལ་དྲན་པ་རྙེད་དཀའ། དེའི་ཁ་བསྐོར་ཕྱོགས་བསྒྱུར་ནས་གདོད་ནས་སྐུ་གསུམ་དངོས་སུ་འོང་རྒྱུ་དེ་འཁྲུལ་རྒྱུས་རྙོག་ནས་ཐ་མལ་བའི་སྐྱེ་ཤི་བར་དོར་འཆར་ཞེས་པའི་སྟེང་ནས་འགྲོ་དགོས། འདིར་སྒྱུ་མ་ངལ་གསོའི་ལེའུ་དང་པོར་མ་དག་གཞན་དབང་ནུབ་སྟེ་དག་པའི་གཞན་དབང་འོང་ཚུལ་གསུངས་པའང་དྲན་པར་བྱ། དེ་ལྟ་བུའི་རྟོགས་པ་གསུམ་པོའང་ཐོས་བསམ་རྐྱང་བའི་གོ་ཡུལ་ཙམ་གྱིས་ནི་གོང་དུ་རྫོགས་པ་ཆེན་པོའི་ཚུལ་ལ་རྟོགས་པ་བཞིའི་ལམ་གྱིས་ཡིད་ཆེས་ཞེས་གསུངས་པའི་ཡིད་ཆེས་མཚན་ཉིད་རྫོགས་པར་མི་འགྱུར་གྱི་རྟོགས་པ་དེ་གསུམ་གྱི་དོན་ཐོས་ཤིང་བསམ་ནས་འདི་ཅིག་ཆར་བ་རེད་པས་རྟོགས་པ་མྱུར་བའི་རྒྱུ་མཚན་གྱིས་མེ་དང་སྤྲ་བ་ཕྲད་པ་ལྟར་སྣང་སེམས་རང་རྒྱུད་པར་འཛིན་པའི་སྒྲོ་འདོགས་རང་ཞིག་སྟེ་རིག་པ་ཡུལ་མེད་རང་གསལ་དུ་བུད་པའི་སྟེང་ནས་དག་མཉམ་ཆེན་པོའི་བཞུགས་ཚུལ་ལ་མྱོང་སྟོབས་ཀྱིས་གཏིང་སླེབ་པ་ལས་ཡིད་ཆེས་རྙེད་པ་ཤེས་ནས་དད་པ་ཐོབ་པ་ཞེས་པ་ལྟ་བུར་གྱུར་དུས། ལྟ་བའི་ལག་རྗེས་འཇོག་ཐུབ་པ་རེད་པས་ཤེས་པའི་མཚན་ཉིད་ཀྱི་ལམ་དངོས་ལ་སླེབས་པའོ། །འདི་ནི་མངོན་སུམ་པར་རྟོགས་པ་སྟེ། རྫོགས་པ་ཆེན་པོའི་ཚུལ་ལ་ཡིད་ཆེས་པ་ཞེས་པའི་རྟོགས་པར་འཇོགས་པ་ལ་རྟོགས་པ་སྔ་མ་གསུམ་པོའི་ཁྱད་པར་འདི་ལྟ་བུ་དགོས་ཞེས་བྱེ་བྲག་ཏུ་ཕྱེ་ནས་བསྟན་པའོ། །རོང་ཟོམ་པས་སོ་སོར་རྟོག་པའི་དུས་ཡིན་གྱི་རྣལ་འབྱོར་གྱི་དུས་ན་མིན་གསུངས་པ་དང་། གཡུང་གིས་སྔ་མ་སྔ་མའི་རྒྱུན་གྱིས་ཕྱི་མ་ཕྱི་མ་བསྟན་ཡོད་སྣང་ཤར་བ་དཔྱོད་ཅེས་དང་། ཡང་རྒྱུ་གཅིག་པའི་སྐབས་མ་དག་པ་ན་ཡེ་ཤེས་ཀྱི་བཞུགས་ཚུལ་ལྟར་ན་རི་རྭ་ལྟ་བུ་དང་། དག་པའང་སྣང་ཙམ་ལས་མེད་པ་ཡིན་པས་དབྱིངས་ངོར་གང་ཡང་མ་གྲུབ་པ་ལ་གོ་དགོས། རྒྱུ་གཅིག་གི་གཏན་ཚིགས་ལ་བརྟེན་ནས་རྒྱུད་འདིའི་ཆེད་དུ་བྱ་བའི་གདུལ་བྱའི་དོན་དམ་དཀོར་བདུན་གྱི་བདག་ཉིད་དབྱིངས་མངོན་སུམ་དུ་རྟོགས་ཏེ་གཉིས་ཆོས་སྤྲོས་མཚན་གྱིས་དབེན་པར་རྟོགས་པ་དང་། དེ་ཡང་ཡེ་ཤེས་ཀྱི་རང་བཞིན་དུ་རྟོགས་པ་དང་། མ་དག་པ་ཐམས་ཅད་ལས་འདས་པའི་ཤིན་ཏུ་དག་པའི་བདག་ཉིད་ཅན་དུ་གཟིགས་པས། དབྱིངས་ཡེ་འབྲས་བུ་དོན་དམ་དངོས་སུ་རྟོགས་པ་སྟེ། དེ་ཡང་རྒྱུད་འདིའི་དབང་དུ་བཏང་ནས་ཟབ་མོའི་ལམ་དང་མཐར་ཐུག་ཆོས་སྐུ་ཐམས་ཅད་འདི་ངོ་འཕྲོད་པ་ཁོ་ནས་འོང་གསུངས། ཡིག་འབྲུའི་གཏན་ཚིགས་སྐབས། ངོ་བོ་ཉིད་ཡེ་མེད་ན་ཆོས་ཐམས་ཅད་ཇི་ལྟར་སྣང་ཞེ་ན། མིང་ཙམ་གྱིས་བཞག་པས་ན་ཡི་གེའི་རྣམ་འཕྲུལ་ཙམ་མོ། །ཡི་གེ་དེའང་གནས་སྣང་མི་མཐུན་པའི་འཁྲུལ་བ་ཕྱིན་ཅི་ལོག་གིས་བསླད་ནས་གཏན་མ་ཞུགས་ན་དེས་གང་བཏགས་དང་ཅིར་སྤྲུལ་གྱི་སྣང་བ་ཐམས་ཅད་ཀྱང་སྣང་ཚུལ་ཕྱིན་ཅི་ལོག་ལས་འདས་པའི་ཤིན་ཏུ་རྣམ་དག་གི་སྣང་བ་འབའ་ཞིག་ཏུ་ཟད་པས་སྣང་སྲིད་ཐམས་ཅད་གདོད་མའི་སྡོད་ཚུལ་ལ་གསུངས། གསང་སྔགས་ཀྱི་སྒྱུ་འཕྲུལ་ཁོ་ནར་གནས་ཏེ་གསུང་གསང་སྔགས་ཀྱི་ཡི་གེ་བྱ་བ་ཕྱིན་ལོག་གིས་བསླད་པ་དང་བྲལ་བའི་དག་པའི་ཡི་གེ་དག་པ་རབ་འབྱམས་ཀྱི་རྣམ་འཕྲུལ་དང་བྱེད་ལས་ཅན་དེ་ལ་བྱེད་པས་སོ། །སྣང་ཚུལ་སེམས་རང་སྣང་གི་ཡི་གེ་ལ་འཁྲུལ་བའི་མིང་ཚིག་མཐའ་མེད་སྲིད་ཀྱང་གནས་ཚུལ་ཡེ་ཤེས་རང་སྣང་གི་མིང་ཚིག་ལ་གསང་སྔགས་ཀྱི་ཡི་གེའི་སྤྲིན་མིན་པ་མེད་པའོ། །འདི་ལེའུ་བཞི་པ་དང་། ཡིག་འབྲུའི་གཏན་ཚིགས་སྐབས་མཁོ་མིན་དཔྱོད། ཅེས་རིན་པོ་ཆེས་གསུངས། ཞལ་རྒྱུན་དུ། ཡིག་འབྲུའི་ཚུལ་གྱིས་གཏན་ཚིགས་དེས་རང་སྣང་དག་པའི་དཀྱིལ་འཁོར་མངོན་སུམ་མཐོང་སྟེ། ལམ་གྱི་སྐབས་རྒྱ་ཆེ་བ་སངས་རྒྱས་གཟུགས་སྐུའི་དངོས་རྒྱུ་དང་། འབྲས་བུའི་སྐབས་ཀྱི་གཟུགས་སྐུ་མཐར་ཐུག་པ་ཉིད་འདི་ངོ་འཕྲོད་པ་ལ་ལྟོས། གྲོལ་ལམ་ཅིག་ཆར་བའི་ཐད་ན། སྐུ་གསུང་ཐུགས་སུ་སྣང་བའི་དག་པའི་ཆོས་ཀུན་མ་ལུས་གསུང་ༀ་ཡིག་རོལ་བར་མཚོན་ནས་རྟོགས། འདི་ལ་དཔེར་བརྗོད། སེམས་ཉིད་ཆོས་ཅན། གཤིས་དག་པའི་དཀྱིལ་འཁོར་ཡིན་ཏེ། ༀ་བཞིན་ཞེས་པ་ལྟ་བུའོ། །དེ་ལྟར་ཡི་གེ་ཨ་ཨུ་མ་གསུམ་གྱིས་སྐུ་གསུང་ཐུགས་རྡོ་རྗེ་གསུམ་མཚོན་ལ། དེའང་ཨ་ཡིག་གིས་ནི་དབྱིངས་ཅི་ཡང་མ་ཡིན་པ་མཚོན་ལ། ཀླད་གོར་གྱིས་དབྱིངས་ལ་ཡེ་ཤེས་འབྲལ་མི་སྲིད་ཅེས་པའི་ཡེ་ཤེས་མཚོན་ལ། ཨུ་ཡིག་གིས་ནི་ཡེ་ཤེས་ལ་སྣང་ཆ་ལྷུན་གྲུབ་ཏུ་ཡོད་པ་མཚོན་ནོ། །བྱིན་གྱིས་བརླབས་པའི་གཏན་ཚིག་ཐད། འདིར་བདེན་གཉིས་དབྱེར་མེད་ཀྱི་ཚུལ་མངོན་སུམ་དུ་རྟོགས་པ་ནི། ལམ་དུས་སྐུ་ཐུགས་ཟུང་འབྲེལ་དུ་སློབ་པ་དང་། མཐར་ཐུག་སྐུ་ཐུགས་ཟུང་འཇུག་གི་དངོས་རྒྱུ་འདི་ཡིན་པས་འདི་ལ་སྒྱུ་ལུས་སྒྲུབ་ཚུལ་ལྟ་བུ་མེད་པར་རང་ལུགས་ཀྱི་སྒྱུ་འཕྲུལ་དྲྭ་བའི་སྐུ་འདི་ཉིད་ངོ་འཕྲོད་པ་གལ་ཆེ་གསུངས། ཞལ་རྒྱུན་དུ། བདེན་གཉིས་དབྱེར་མེད་རྟོགས་བྱེད་ཉིད་འོད་གསལ་བའི་ཡེ་ཤེས་བློ་བྲལ་ཉིད་ཡིན་པར་བསྟན་པ་འདི་ལམ་སོ་སོ་རང་རིག་པའི་ཡེ་ཤེས་དང་མཐར་ཐུག་རྒྱལ་བའི་ཐུགས་རྣམ་པར་མི་རྟོག་པའི་ཡེ་ཤེས་ཉིད་བསྟན་པའོ། །ཞེས་གསུངས། འདི་སྐོར་རྒྱས་པ་གཏན་ཚིགས་ཀྱི་འགྲེལ་བ་བཀའ་དྲིན་འཁོར་དུ་མེད་པ་རྗེ་བཙུན་བླ་མ་ཉིད་ཀྱིས་མཛད་པ་ལས་ཤེས་པར་བྱའོ། ། ༈ རིན་པོ་ཆེས། གཡོ༵་མེད༵་ཀྱི༵་དགོངས༵་པ༵་ཤར༵་བ༵་ན༵། དེ་འདྲའི་རྣལ་འབྱོར་བ་དེའི་བློ་ངོར་ཆོས་ཐམས་ཅད་དབྱེར་མེད་དུ་སངས་རྒྱས་པ་དེ་གདོད༵་གཞོན༵་ནུ༵་མའི༵་༴སོགས། དབུ་མའི་སྐབས་སུ་སྟོང་པ་དང་རྟེན་འབྱུང་གཉིས་གཅིག་གྲོགས་སུ་གཅིག་སོང་བ་བཞིན་དུ། འདིར་དབྱིངས་ཅི་ཡང་མ་ཡིན་པའི་གནད་ཀྱིས་ཅིར་ཡང་སྣང་བ་དང་། ཅིར་ཡང་སྣང་བའི་གནད་ཀྱིས་དབྱིངས་ཅི་ཡང་མ་ཡིན་པ་ནི་གནད་ཀྱི་དབྱིངས་སུ་ཅི་ཡང་མ་ཡིན་པ་ནི་ཆེས་ཤིན་ཏུ་འཐད་གསུངས། སྣོད་བཅུད་རྒྱུད་གསུམ་ཞེས་པའི་ཐད། རྒྱུད་རྣམ་ཤེས་ཚོགས་བརྒྱད་ནི། གྲུབ་མཐའ་མཛོད་ལས། དེའང་ཀུན་གཞི་ནི་རྟོག་མེད་དྭངས་མ་ཕྱེད་པ་ལུང་མ་བསྟན་ཡིན་པ། ཀུན་གཞིའི་རྣམ་ཤེས་གསལ་བ་ཙམ་རིས་སུ་མ་ཆད་པར་གནས་པའི་ཆ་ཞེས་དང་། ཡང་རྟོག་པ་དང་དཔྱོད་པ་ཆགས་སྡང་ནི་ཡིད་ཤེས་དང་ཉོན་ཡིད་ཅེས་དང་། དྭངས་མ་ཕྱེད་པའི་རྟོག་མེད་ཀུན་གཞི། ཅུང་ཟད་གསལ་དྭངས་ཙམ་ཀུན་གཞིའི་རྣམ་ཤེས། གཟུགས་སྒྲ་སོགས་ཡུལ་ལྔ་རགས་པ་དང་དབང་ཤེས་སོ་སོ་ལ་སྣང་བ་སྒོ་ལྔའི་རྣམ་ཤེས་སོ། །ཞེས་གསུངས་པ། ངོ་བོ་མི་རྟོག་པའི་ཆ་ནས་ཀུན་གཞི། རིག་ཙམ་གསལ་ཙམ་གྱི་ཆ་ནས་ཀུན་གཞིའི་རྣམ་ཤེས་ཏེ། ཤེས་པ་གཅིག་ལ་ལྡོག་པས་ཕྱེ་བ་ཡིན་པ་འདྲ་ལ། ཡང་གསུང་རྒྱུན་ལ། ཀུན་གཞི་འཐིབ་ཤིང་དྭངས་མ་ཕྱེ་བ། དེ་ལས་ཅུང་དྭངས་བ་སྒོ་ལྔ་མ་མཆེད་པའི་སྐབས་ཀྱི་ཤེས་པ་རྨོངས་པ་ལ་ཀུན་གཞིའི་རྣམ་ཤེས་ཟེར་བ་འདྲ་བ་ཞིག་ཀྱང་ཐོས་པ་འདྲ་ཡང་། སྔ་མ་ཉིད་ལེགས་པ་ཡིན་ནམ་དཔྱད། །འདི་དག་གནས་གྱུར་ཡེ་ཤེས་ལྔར་འགྱུར་ཚུལ་ནི། གྲུབ་མཐའ་མཛོད་ཀྱི་ཐེག་ཆེན་ལམ་གྱི་འབྲས་བུ་རྟེན་སྐུ་བརྟེན་པ་ཡེ་ཤེས་འཆད་སྐབས་ལ། མ་དག་པའི་དུས་ཀྱི་རྣམ་ཤེས་ཚོགས་བརྒྱད་རྟེན་ཀུན་གཞི་དང་བཅས་པ་ལོག་པས་ཡེ་ཤེས་སུ་ཤར་བ་ལ། ཀུན་གཞི་དག་པས་ཆོས་དབྱིངས། ཀུན་གཞིའི་རྣམ་ཤེས་དག་པས་མེ་ལོང་ལྟ་བུའི་ཡེ་ཤེས། ཡིད་དག་པས་མཉམ་པ་ཉིད། ཉོན་ཡིད་དག་པས་སོ་སོར་རྟོག་པ། སྒོ་ལྔའི་རྣམ་ཤེས་དག་ནས་བྱ་བ་གྲུབ་པའི་ཡེ་ཤེས་ཏེ། སྐུ་གསུམ་ལ་འཇུག་པའི་མདོ་ལས། ཀུན་གཞི་དབྱིངས་སུ་ནུབ་པ་ནི་ཆོས་ཀྱི་དབྱིངས་སོ། །ཀུན་གཞིའི་རྣམ་ཤེས་དབྱིངས་སུ་ནུབ་པ་ནི་མེ་ལོང་ལྟ་བུའི་ཡེ་ཤེས་སོ། །ཡིད་ཀྱི་རྣམ་པར་ཤེས་པ་དབྱིངས་སུ་ནུབ་པ་ནི་མཉམ་པ་ཉིད་ཀྱི་ཡེ་ཤེས་སོ། །ཉོན་མོངས་པ་ཅན་གྱི་ཡིད་དབྱིངས་སུ་ནུབ་པ་ནི། སོ་སོར་རྟོག་པའི་ཡེ་ཤེས་སོ། །སྒོ་ལྔའི་རྣམ་པར་ཤེས་པ་དབྱིངས་སུ་ནུབ་པ་ནི་བྱ་བ་གྲུབ་པའི་ཡེ་ཤེས་སོ། །ཞེས་སོ། །འདི་དག་གནས་འགྱུར་ཞེས་པའང་སྣང་ཚུལ་གྱི་མ་དག་པའི་ཆ་ཡེ་ཤེས་སུ་ཤར་བ་ལ་གོ་བ་ལས་ཉོན་མོངས་རང་མཚན་ཡེ་ཤེས་སུ་གནས་འགྱུར་བ་མི་སྲིད་དེ་ཡེ་ཤེས་དང་ཤིན་ཏུ་འགལ་བའི་ཕྱིར་དང་། སྤང་བྱར་བཤད་པའང་སྣང་ཚུལ་ལ་དགོངས་པ་དང་། ཡེ་ཤེས་ལྔ་པོ་ལྷུན་གྲུབ་འདུས་མ་བྱས་པའི་ཁམས་ཀྱི་ཡོན་ཏན་ཡིན་པས་ད་གསར་དུ་སྒྲུབ་དགོས་རྒྱུ་ཞིག་རང་ལུགས་སུ་འདོད་པའི་མཁས་གྲུབ་སུ་ཡང་མེད་པས་ན། ངོ་བོ་གདོད་ནས་ཡེ་ཤེས་སུ་འདོད་པར་བྱའོ། །ཞེས་གསུངས། ཞལ་རྒྱུན་ལ། སེམས་ཉིད་ཆོས་ཅན། གཤིས་དག་པའི་དཀྱིལ་འཁོར་ཡིན་ཏེ། དཔེར་ན་ༀ་བཞིན། ཞེས་པ་ལྟ་བུའི་ཅིག་ཆར་དུ་ལྷག་བདེན་གཉིས་རྟོགས་གསུངས། གསུང་རྒྱུན་ལས། ཡུམ༵་ལྔ༵་དང༵་ཡབ༵་ལྔ༵་ཞེས་པ། འབྱུང་བཞིའི་རེག་བྱ་སྟེ་ཡུལ་ཡིན་པས་ཡུམ་ལ་བཞག་པ་དང་། འབྱུང་གྱུར་གཟུགས་ཀྱི་ཕུང་པོ་ནི་ཡུལ་ཅན་ཡིན་པས་ཡབ་ལ་བཞག་གོ ། གཟུགས༵་ཕུང༵་ཙམ་ཡང་ཚོར་བ་༴སོགས། ཞེས་པ། གཟུགས་ཕུང་གཅིག་གིས་ཀྱང་ཕུང་པོའི་ཕྱི་མ་རྣམས་ཀྱི་དོན་བྱེད་ནུས་པས་ན་རོ་མཉམ་ཞེས་བརྗོད་པ། གཟུང་ཕུང་དེ་ལ་ཚོར་ཕུང་ཞེས་མི་བརྗོད་དེ་ལྡོག་ཆ་ཐ་དད་དུ་འཇོག་དགོས་སོ། ། དཔྱད༵་རྒྱུ༵་ཆེ༵་ཡང༵་ཞེས༵་པ། མདོ་ཕྱོགས་ནས་གཤེགས་སྙིང་བསྟན་པས་འདིར་བསྟན་གྱི་ཡེ་ཤེས་བསྟན་པར་འདོད་དགོས་སོ། །འདོད་ན་ལྷག་པའི་ཀུན་རྫོབ་བདེན་པ་བསྟན་པར་ཡང་འདོད་དགོས། འདོད་ན་ཐུན་མིན་བདེན་གཉིས་འཇོག་པར་དཀའ་ཡང་། སྐྱོན་མེད་པའི་ཚུལ་ནི། རྒྱུད་བླ་མའི་བཤད་བྱ་རྩ་བར་བསྟན་པའི་མདོ་བཞི་ནི། གཤེགས་སྙིང་བསྟན་པའི་མདོ། གཟུངས་ཀྱི་དབང་ཕྱུག་གིས་ཞུས་པའི་མདོ། དཔལ་ཕྲེང་གིས་ཞུས་པའི་མདོ། བྱམས་པ་སེང་གེས་ཞུས་པའི་མདོ་རྣམས་དམིགས་བསལ་དུ་བྱས་ནས། མདོ་ཕྱོགས་སྤྱིར་བཏང་ལ་ལྟོས་ཏེ་ཐུན་མིན་དུ་འཇོག་པ་ལོ་ཆེན་གྱིས་བཞེད་པའོ། ། མཱུ༵ྃ་གྱི༵་དེ༵་ཉིད་ཅེས་པ་ཟིན་བྲིས་ལས། དབྱིངས་བཞིན་ལག་གི་རྣམ་པར་ཤར་བ་ཡུམ་དབྱིངས་ཕྱུག་མ་ཡིན་ལ། དེའི་ས་བོན་མཱུཾ༵་དང་། དེའི་དེ་ཉིད་དབྱིངས་ཡིན་པས་དེར་བསྡུས་པ་ལ་ཆོས་དེ་དག་མཱུ༵ྃ་གྱི་དེ་ཉིད་སོགས་ཞེས་དང་། གྲུབ་མཐའ་ནི། འཇལ་བྱེད་རྟགས་སམ་གཏན་ཚིགས་རྣམས་ལ་བརྟེན་ནས། གཞལ་བྱ་དག་མ་དག་གི་ཚོགས་དོན་དེ་ཉིད་གདོད་ནས་རྣམ་དག་ཏུ་ཤར་བ་ལ་གྲུབ་མཐའ་ཟེར་ཞེས་གསུངས། ལམ་རིམ་ལས། རྒྱ་མཚོ་དྭངས་བའི་སོགས། རླུང་རྐྱེན་གྱིས་བྱུང་པའི་རླབས་སོགས་དང་བྲལ་བའི་རྒྱ༵་མཚོ༵་དྭངས༵་པའི༵་ནང་དུ་གཟའ་སྐར་གྱི་གཟུགས༵་བརྙན༵་ཤར་བ་ལྟར༵་དུ་སྒྲ༵་ལ་བརྟེན་པའི་དོན་སྤྱི་ཡིད༵་ལ༵་བྱེད༵་པའི་རྟོག་པས་ཡུལ་འཇལ་བ་ལྟར་མིན༵་པར༵་གནས་ལུགས་མཚན་ཉིད་པ་དེ་སོ་སོ་རང༵་རིག༵་པའི་མངོན༵་སུམ༵་གྱིས་དམིགས༵་གཏད་ཀྱི་ཡུལ་དང་བྲ༵ལ་བར༵་སེམས་ཉིད་རང༵་གསལ༵་གྱི་ཚུལ་དུ་སྒྲོ་སྐུར་ལུང་མ་བསྟན་གསུམ་མམ། ལྟ་བའི་ཡུལ། བལྟ་བྱེད་ཀྱི་མཁན་པོ། ལྟ་བ་དངོས་གསུམ༵་དང་བྲལ༵་བར་མཐོང་བ་དང་། ཀུན་རྟོག་གི་གྲུབ་མཐའ་གཞན་གྱིས་མི༵་བསྒུལ༵་བའམ༵་དཀྲི་མི་ནུས་པའི་ངེས༵་པ༵་གཏིང་ནས་རྙེད་པའི་ལྟ་བ་ལ་གདེངས༵་སུ༵་བྱས༵་པ༵་སྟེ་གདེངས་བཅས་ཏེ་ཐོས༵་བསམ༵་བརྟན་༵པོ༵་སོགས་སྔོན་དུ་སོང་ནས་སྒོམ་པ་ལ་ལྟ༵་བ་མཐར༵་ཕྱིན༵་པ་ཡིན་ནོ། །ཞེས་སོ། །ཞལ་རྒྱུན་དུ། སྒྲ་ཚིག་ལ་བརྟེན་པ་དང་ཀུན་རྟོག་གི་ཡིད་ལ་བྱེད་ནུས་པ་མིན་པར། རང་རིག་མངོན་སུམ་འདི་དང་འདིའོ་སྙམ་པ་ལྟ་བུའི་དམིགས་བྲལ་བ། རང་གསལ་གསུམ་བྲལ་རྟོགས་བྱ་རྟོགས་བྱེད་རྟོགས་པ་པོས་མི་བསྒུལ་བར་རམ་མ་རྟོགས་ལོག་རྟོག་ཐེ་ཚོམ་གྱིས་མི་བསྒུལ་བར་ཡིད་ཆེས་པས་གདེངས་སུ་གང་བྱས་པ་ཐོས་བསམ་བརྟན་པའི་ལྟ་བ་མཐར་ཕྱིན་པའོ། །ཞེས་གསུངས། ༈ ལྷུན་གྲུབ་ཡེ་ཤེས་སྒྲོན་མ་ཉིད། །རང་བཞིན་གསལ་བ་སྤྱན་གྱི་མཆོག །ཅེས་པའི་ཐད། འཇིགས་འོད་ཞལ་རྒྱུན་ལས། རང་བཞིན་གསལ་བ་སྤྱན་གྱི་མཆོག །ཅེས་པས་གསལ་བའི་རང་བཞིན་འདིར་བསྟན་དབྱིངས་ཡིན་ཞིང་། དབྱིངས་མངོན་སུམ་དུ་གཟིགས་པས་ཤེས་རབ་ཀྱི་སྤྱན་གཞན་ལས་མཆོག་ཅེས་པ་རེད། ཡིད་ལས་འདས་པའི་ཤེས་རབ་ཞེས་པའི་ཡིད་གློ་བུར་བའི་ཤེས་རབ་དང་། དེ་ལས་འདས་པའི་ཤེས་རབ་གཉུག་མའི་ཤེས་རབ་ཡིན་ནོ། །ཞེས་གསུངས། ལམ་གྱི་འོད་གསལ་ཤར་ན་ཆོས་ཉིད་ཀྱི་དབྱིངས་མངོན་སུམ་དུ་མཐོང་བས་མ་ཁྱབ་པས། ཞེས་པའི་ཐད་དུ། ཞལ་རྒྱུན་དུ། འོད་གསལ་ཉིད་མངོན་དུ་གྱུར་ཡང་། དཔེ་སྤྲིན་སྲབ་མོས་བསྒྲིབ་པའི་ཉི་མ་ལྟ་བུ་སྦྱོར་ལམ་གྱི་དུས་དང་། འཕགས་ས་ནས་ཀྱང་ཡོངས་རྫོགས་མཐོང་བ་ནི་སངས་རྒྱས་ཀྱི་ས་ལས་མི་འོང་སྟེ། མདོར་ན་དབྱིངས་ཡེ་གཉིས་ཀའི་ཡིན་ལུགས་ཅི་བཞིན་པ་མངོན་དུ་གྱུར་པ་ནི་སངས་རྒྱས་པའི་ས་ལས་མི་འོང་ཞེས་གསུངས་སོ། །མི་ཕམ་རིན་པོ་ཆེས། དོན་གྱི་ཡེ་ཤེས་ཟླ་བ་ལྟ་བུ་མངོན་དུ་མཐོང་བའི་ཚེ་ན་དོན་གྱི་ཡེ་ཤེས་དངོས་མཐོང་བ་ཡིན་ཡང་། ཚེས་གཅིག་ཟླ་བ་ཟླ་བ་དངོས་ཡིན་ཀྱང་ད་དུང་བཅོ་ལྔའི་བར་རྒྱ་ཆེར་མཐོང་བ་ཡོད་པ་བཞིན། སྒོམ་པའི་ལམ་དུ་དོན་གྱི་ཡེ་ཤེས་མཐོང་བ་ཆེར་འཕེལ་ཏེ། མཐར་ཐུག་བཅོ་ལྔའི་ཟླ་བ་མཐོང་བ་ལྟར་མཐོང་བ་ཡོངས་སུ་རྫོགས་པ་སངས་རྒྱས་ཀྱི་གོ་འཕང་འགྲུབ་པའོ། །ཞེས་གསུངས། རིན་པོ་ཆེས། ཚད་ཕེབས་དུས་ངོ་བོའི་སྟེང་དུ་བཙན་ས་ཟིན་པ་ཡིན་པར་གསུངས། གསང་འདུས་སོགས་ཐད་ཟིན་བྲིས་ལས། སྟོང་གཞིའི་རླུང་སེམས་ལས་དག་མ་དག་གི་སྒྱུ་མའི་སྐུ་སྒྲུབ་ཚུལ་གཙོ་བོར་སྟོན་པའི་རྒྱུད་སྡེ་དངོས་སམ་དེ་དང་བརྗོད་བྱ་ཕྱོགས་མཐུན་གང་རུང་གི་རྒྱུད་དེ་ཕ་རྒྱུད། ཕ་རྒྱུད་རྣལ་འབྱོར་རྒྱུད། ཐབས་ཀྱི་རྒྱུད། མཁའ་འགྲོ་ཕའི་རྒྱུད་རྣམས་དོན་གཅིག་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་དོན་དེ་བདེན་པ་དང་རོ་གཅིག་དུ་གྱུར་བའི་བདེ་བ་ཆེན་པོའི་ཡེ་ཤེས་གཙོ་བོར་སྟོན་ཞིང་སྒྱུ་མའི་སྐུ་སྒྲུབ་ཚུལ་གཙོ་བོར་མི་སྟོན་པའི་རྒྱུད་སྡེ་དངོས་སམ་དེ་དང་བརྗོད་བྱ་ཕྱོགས་མཐུན་གང་རུང་གི་རྒྱུད་དེ་མ་རྒྱུད། མ་རྒྱུད་རྣལ་འབྱོར་གྱི་རྒྱུད། ཤེས་རབ་ཀྱི་རྒྱུད། མཁའ་འགྲོ་མའི་རྒྱུད་རྣམས་དོན་གཅིག །བདེན་སྟོང་གཉིས་མེད་ཀྱི་རྒྱུད་སྡེ་དངོས་སམ་དེ་དང་བརྗོད་བྱ་ཕྱོགས་མཐུན་གང་རུང་གི་རྒྱུད་ཀྱི་རྒྱུད་དེ་གཉིས་མེད་རྒྱུད། དེ་དང་མ་ནིང་གི་རྒྱུད་དོན་གཅིག །སྟོང་པ་སྣང་བ། ཤིན་ཏུ་སྟོང་པ་མཆེད་པ། རབ་ཏུ་སྟོང་པ་ཐོབ་པ། ཐམས་ཅད་སྟོང་པ་འོད་གསལ། ཞེས་སོ། ། ཡང་གསུང་རྒྱུན་ལས། དག༵་རྫོགས༵་སྨིན༵་གསུམ༵་ཞེས་པ། མར་སྐྱེ་འཆི་བར་དོ་གསུམ་ག་དག །ཡར་འབྲས་བུ་སྐུ་གསུམ་རྫོགས་པ་སྟེ། དགག་སྒྲུབ་གཉིས་ཀྱི་སྒོ་ནས་འཇོག་པ་དང་། སྨིན་པ་ནི་བསྐྱེད་རིམ་དེ་ཉིད་རྫོགས་རིམ་སྨིན་བྱེད་ཀྱི་ཡན་ལག་ཏུ་གྱུར་པའོ། །དེ་ཡང་བསྐྱེད་རིམ་གྱི་སྟོང་པ་ཆེན་པོའི་རྣལ་འབྱོར་དང་། སྙིང་རྗེ་སྒྱུ་མ་ནས་བཟུང་སྟེ་སྤྲོས་བཅས་ཀྱི་བར་འབྲས་བུ་ཆོས་གཟུགས་གཉིས་ཀྱི་བརྒྱུད་རྒྱུ་བྱེད་པ་དང་། རྫོགས་རིམ་གྱི་འོད་གསལ་དང་སྟོང་གཟུགས་གཉིས་ཀྱི་འབྲས་བུ་ཆོས་གཟུགས་གཉིས་ཀྱི་དངོས་རྒྱུ་བྱེད་པའོ། ། དངོས༵་སུ༵་སྒྱུར༵་བའི༵་ལམ༵་ཞེས་པ། རྫོགས་རིམ་ཡིན་ལ། རྒྱུན་མཐའི་བར་ཆད་མེད་ལམ་གྱི་རྣམ་གྲོལ་ལམ་ལ་འཕོས་ནས་འབྲས་བུ་ལམ་ལ་ཉིང་མཚམས་སྦྱོར་བའོ། ། རྫོགས༵་པའི༵་བསྐྱེད༵་པ༵་ཞེས་པ། སྟོང་ཆེན་ལ་གོམས་པས་འོད་གསལ་མངོན་ཏུ་གྱུར་ཏེ། རྗེས་སུ་སྙིང་རྗེ་སྒྱུ་མ་སྒོམ་པ་ལྟ་བུ། བསྐྱེད༵་པའི༵་རྫོགས༵་པ༵་ཞེས་པ་བསྐྱེད་རིམ་གྱི་སྙིང་རྗེ་སྒྱུ་མའི་རྣལ་འབྱོར་བསྒོམ་པས། རྫོགས་རིམ་ཀྱི་ཡེ་ཤེས་ལ་གོ་འཕོས་ནས་མ་བཅོས་པའི་སྙིང་རྗེ་སྒྱུ་མར་སོང་བ་ལྟ་བུའོ། །ཞེས་གསུངས། ཟིན་བྲིས་ལས། ལྷ་ཞེ་གཉིས་ཞེས་པ། རིགས་ལྔ་ཡབ་ཡུམ་བཅུ། སེམས་དཔའ་ཡབ་ཡུམ་༡༦། ཀུན་བཟང་ཡབ་ཡུམ་༢། ཐུབ་པ༦། སྒོ་བ་ཡབ་ཡུམ་བརྒྱད་དང་ཞེ་གཉིས་སོ། །ཞེས་གསུངས། ཞལ་རྒྱུན་ལས། སྤྱི་མགྲིན་སྙིང་གར་རྣམ་སྣང་སྤྱན་གཟིགས་མི་བསྐྱོད་རྒྱལ་པོ། དཀར། དམར། མཐིང་། འཁོར་ལོ། པདྨ། རྡོ་རྗེ་འཛིན་པ་ལོངས་སྐུའི་ཆས་ཅན། ཡེ་ཤེས་སེམས་དཔའ་རྒྱན་དང་ཕྱག་མཚན་སྤང་བ་དང་། རྣམ་སྣང་སོགས་རིགས་ཐ་དད་བཞིའི་གཙོ་བོ་རྡོ་རྗེ་མི་བསྐྱོད་པ་གཅིག་ཏུ་གྱུར་པའི་རབ་ཏུ་ཕྱེ་བའི་དཀྱིལ་འཁོར། རང་གི་རིགས་ཆུང་གིས་བསྐོར་བའི་རིགས་ཐ་མི་དད་པའི་གཙོ་བོ་སོ་སོས་བྱེད་པ་ཚོམ་བུར་བཤད་དོ། ། རིགས་ཆུང་གི་སེམས་དཔའ་བཞི་བཅུའི་མཚན་སྡོམ་ནི། དབུས་ཀྱི་རིགས་ཆུང་སེམས་དཔའ་རྡོ་རྗེ་དང་། །དེ་བཞིན་རིན་ཆེན་ཆོས་དང་ལས་བཞིའི་ཡུམ། །རིམ་བཞིན་བརྟན་འབར་སྡུད་བསྐྱོད་བཞི་པོ་སྦྱར། །སེམས་དཔའ་རྒྱལ་པོ་ཆགས་པ་ལེགས་བཞི་ཤར། །ཡུམ་ནི་སྒེག་མོ་བདུག་པ་ལྕགས་ཀྱུ་སྒྲོན། །རིན་ཆེན་ཉི་མ་རྒྱལ་མཚན་བཞད་བཞི་ལྷོ། །ཡུམ་ནི་མ་ལེ་མེ་ཏོག་ཞགས་བདེ་མ། །ཆོས་དང་རྣོན་པོ་འཁོར་ལོ་སྨྲ་བ་ནུབ། །ཡུམ་ནི་གླུ་སྒྲོན་ལྕགས་སྒྲོགས་གསལ་བཀྲ་མ། །ལས་དང་སྲུང་བ་གནོད་སྦྱིན་ཁུ་ཚུར་བྱང་། །གར་བྱུག་དྲིལ་འཁྲོལ་འབེབས་མ་ཡུམ་བཞི་སྟེ། །དང་གཅིག་མ་གཏོགས་ཡབ་ཡུམ་ཐམས་ཅད་ཀྱི། །མཚན་གྱི་ཐོག་མར་རྡོ་རྗེ་རེ་རེ་སྦྱར། །ཞེས་སོ། ། ཁྲོ་བོའི་རིགས་ཆུང་སྡོམ་ནི། །བུདྡྷའི་འཁོར་ནི་བྱམས་པ་ཐུགས་རྗེ་དང་། །ལོ་ཀ་གསུམ་ལ་སྙིང་པོ་བཏགས་པ་དང་། །བཏང་སྙོམ་ཡབ་ཡུམ་པདྨ་ཧེ་རུའི་འཁོར། །རྒྱལ་བར་རོལ་བར་སེམས་ཟད་འབྱུང་བ་བཞིར། །བྱེད་པར་བཏགས་པ་ཡབ་ཡུམ་ཀརྨའི་འཁོར། །སྒྲོལ་བྱེད་མཐར་བྱེད་རོལ་པ་ཉམས་མྱོང་བཞི། །ཡུམ་བཅས་བཛྲ་འཁོར་ནི་རྡོ་རྗེ་དང་། །རིན་ཆེན་པདྨ་ཀརྨ་བཞི་པོ་ལ། །སྙིང་པོ་བཏགས་པ་ཡུམ་བཅས་རཏྣའི་འཁོར། །རྡོ་རྗེ་རོལ་བ་རྡོ་རྗེ་སྲིན་པོ་དང་། །རྡོ་རྗེ་ལྷ་མོ་སྣ་ཚོགས་རྡོ་རྗེ་རྣམས། །ཡུམ་བཅས་རིགས་ལྔའི་རིགས་ཆུང་ཁྲོ་མོའི་འཁོར། །ཞེས་སོ། །སངས་རྒྱས་སྟོང་དང་སོགས་ཀྱི་བཀོད་ལུགས་རྣམས་གསང་བདག་ཞལ་ལུང་ན་གསལ་བས་མ་བྲིས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་དང་བརྒྱད་འཆང་བ། །རྣལ་འབྱོར་མཐར་ལྡན་ཤིན་ཏུ་བསྟེན། །ཞེས་པ། ལྟ་སྒོམ་སྤྱོད་པའི་མཛོད་དང་ལྡན་པ་དང་། །དབང་བཞིའི་ཆུ་བོ་ཡོངས་སུ་རྫོགས་པ་དང་། །བློ་རིམ་དང་འཚམས་པར་སློབ་མ་རྗེས་སུ་འཛིན་པའི་དོན་གཉེར་དང་ལྡན་པ་དང་། རྒྱུད་གསུམ་གྱི་དོན་དང་ལས་བཞིའི་ཕྲིན་ལས་སྒྲུབ་པ་ལ་མཁས་པ་དང་། ལག་ལེན་གྱི་མན་ངག་ཤེས་པ་དང་། ཉམས་མྱོང་གི་དྲོད་དང་ལྡན་པ་སྟེ་བརྒྱད་དོ། །ཞེས་སོ། །ཟིན་བྲིས་ལས། ལྷག་པའི་བདེན་གཉིས་དབྱེར་མེད་རྟོགས་པའི་ལྟ་བ་དང་། སྤྲོས་བཅས་མན་ཆད་མཐར་ཕྱིན་པའི་ཏིང་ངེ་འཛིན་དང་། མཆོག་ཐུན་གྱི་དངོས་གྲུབ་སྒྲུབ་པ་ལས་མི་འདའ་བ་དམ་ཚིག་གི་མཛོད་དེ་དམ་པའི་མཛོད་གསུམ་དང་ལྡན་པ། ཡོངས་སུ་རྫོགས་པ་དབང་གི། བཀའ་རྒྱུད་པ་ལུང་གི། བླ་མ་བརྒྱུད་པ་བྱིན་རླབས་ཀྱི། རང་རིག་པ་ཉམས་ཀྱི་ཆུ་བོ་སྟེ། ཆུ་བོ་བཞི་དང་ལྡན་པའམ། ཡང་ན་བྱིན་རླབས་དབང་གི་ཆུ་བོ་ཞེས་རྩ་ལྟུང་གི་ཉེས་པས་གཏན་ནས་མ་གོས་ཤིང་སྦོམ་ལྟུང་བྱུང་ཡང་ཕྱིར་བཅོས་ཀྱིས་སོར་ཆུད་པ། སྒྲུབ་པའི་ལས་ཀྱི་གཉེར་ཁ་འཛིན་པ་ལ་སྤྲོས་བཅས་མན་ཆད་མཐར་ཕྱིན་པའི་སྟེང་དུ་ཡི་དམ་ལྷས་གནང་བ་ཐོབ་པའམ་དངོས་ཉམས་རྨི་ལམ་དུ་རྟགས་གསར་བ་ཐོན་པ་དང་ལྡན་པ། ཡང་ན་ཕྱིའི་དགྲ་བགེགས་ཀྱི་བར་ཆད་བཟློག་པ། ཉོན་མོངས་ལམ་དུ་སློང་བ། བདེ་སྡུག་རོ་སྙོམ་པ། སྙིང་རྗེ་དང་ཕན་སེམས་ཀྱིས་སློབ་མ་རྗེས་སུ་འཛིན་པའི་གཉེར་ཁ་བཞི་དང་ལྡན་པ། རྒྱུད་དང་ཞེས་པ་ཕྱི་ནང་གི་དེ་ཉིད་བཅུ་ཤེས་པའམ། ཡང་ན་རྒྱུད་སྡེའི་དོན་ལ་མཁས་པ། ཆོ་ག་དང་སྒྲུབ་པའི་ལས༵་ཀྱི་ངོ་བོ་གྲངས་གོ་རིམ་སོགས་ལ་མཁས་དགོས་ཏེ། དཔེར་ན་སོ་ཐར་གྱི་ལས་ཆོག་གོ་རིམས་སོགས་ནོར་ན་ལས་མི་ཆགས་པ་བཞིན་ཏུ་དབང་གི་ངོ་བོ་གྲངས་སོགས་ནོར་ན་དབང་མི་ཐོབ་པས་མན་ངག་ཟབ་མོ་ཉམས་མྱོང་གི་དྲོད་དང་ལྡན་པ་སྟེ་ཁྱད་པར་གྱི་ཆོས་བརྒྱད༵་འཆང༵་བའི་རྣལ་འབྱོར༵་བ་ཟག་བཅས་སྤྲོས་པ་མཐར༵་ཕྱིན་པ་དང་ལྡན༵་པ་བསྟེན༵་པར་བྱ་ཞེས་པའོ། ། སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །ཞེས་སྟོན་པ་རྡོ་རྗེ་སློབ་དཔོན་མཉེས་པ་གསུམ་གྱིས་མཆོད༵་པ་ལ་བརྩོན༵་པ་དང་ཏིང་ངེ་འཛིན་གྱི་རྟོགས༵་པ༵་གསལ༵་བའམ། ཡང་ན་བརྩོན་པས་སྒོ་གསུམ་སྦྱང་བ་སྟོང་ཆེན་སོགས་བཞིའི་ཏིང་འཛིན་གསལ་བ། རྩ་བའི་དམ་ཚིག་ལྔ། ཡན་ལག་གི་དམ་ཚིག་བཅུ་དང་སྡོམ་པ་མ་ཉམས་པ། རྒྱུ་མ་ནོར་བ་རྩ་བའི། བསྐྱེད་པ་རྐྱེན་གྱི། བཟླས་པ་ལས་ཀྱི༵་སྔགས༵་རྣམས༵་དང་། སྐུ་ཕྱག་རྒྱ། གསུང་ཆོས་རྒྱ། བཅའ་བ་ལས་རྒྱ། དམ་ཚིག་ཕྱག་རྒྱ་སྟེ་ཕྱག༵་རྒྱ༵་བཞི་ཤེས་པ་དང་། ཡོ་བྱད་ལྔ་ནི། དམ་ཚིག་ལྟ་བ་ཏིང་འཛིན་དང་། །བྱང་ཆུབ་སེམས་དང་སྙིང་རྗེ་སྟེ། །ལྷག་པའི་ཡོ་བྱད་ལྔ་རྫོགས་བྱ། །ཞེས་ལམ་གྱི་ཡོ་བྱད་ལྔའོ། །ཡང་ན་སྒྲུབ་པ་རྫས་ཀྱི་ཡོ་བྱད། བཟའ་བཅའ་བཏུང་བའི། རྒྱན་དང་བགོ་བའི། གླུ་ཚིག་སྒྲ་ཡི། བྲོ་གར་འདུ་འཕྲོའི། ཨ་ལི་ཀ་ལིའི་ཡོ༵་བྱད༵་དེ་ལྔ་དང་ལྡན་པས་འགྲུབ་པར་འགྱུར་རོ། ། ལས༵་རིམ༵་གྱི༵་ཏིང་༵འཛིན༵་ལྔ༵་པོ། ཡེ་ཤེས་དཀྱིལ་འཁོར་སྤྱན་དྲངས་བ། མཆོད་པ་འབུལ་བ། བཤགས་པ་བྱ་བ། དངོས་གྲུབ་གསོལ་བ། དམ་བཅའ་བ། ཛབ་བཟླ་བ། བདག་དམ་ཚིག་པ། ལྷ་ཡེ་ཤེས་པ་འོད་ཟེར་སྤྲོ་བསྡུ་སྟེ་གསལ་བ་གསུམ། ཕྲ༵་ཡང༵་སོགས༵་ཐད། སྤྱོད་བསྡུས་ལས། གཟུགས་ཕྲ་བ་དང་རགས་པ་དང་། །ཁྱབ་པ་ཡང་དག་ཐོབ་པ་ཉིད། །རབ་ཏུ་གསལ་བ་ཉིད་བསྟན་དང་། དབང་ཕྱུག་ཉིད་དང་འདོད་དགུར་བསྒྱུར། །ཞེས་བརྟེན་པ་ཕྲ་བ་ལྷ་སྤྲོ་བ། རྟེན་གཞལ་ཡས་ཁང་རགས་པ་སྤྲོ་བསྡུ། དྲུག་ཅེས་པ་ཡང་འདུག །རང་ལུས་ཀྱིས་འཇིག་རྟེན་ཁྱབ་པར་སྤྲུལ་ནུས་པ། དེ་ལྟ་བུའི་ཡང་དག་ཐོབ་པ་དཀྱིལ་འཁོར་སྤྲོ་བའི་བདག་པོར་གྱུར་པ། རབ་ཏུ་གསལ་བ། ལྷ་ཆེན་པོ་སོགས་ཟིལ་གྱིས་གནོན་ནུས་པ། བརྟན་པ་ནི་རང་ཉིད་ཇི་ལྟར་འདོད་པའི་དོན་ལ་སྤྱོར་ནུས་པ། དབང་ཕྱུག་ཉིད་གདུལ་བྱ་ཚར་གཅོད་རྗེས་འཛིན་ལ་དབང་བསྒྱུར་ཐོབ་པ། འདོད་དགུར་བསྒྱུར་བ་སྟོབས་སོགས་སངས་རྒྱས་ཀྱི་ཡོན་ཏན་དང་ཆ་འདྲ་ཐོབ་པའོ། །དངོས༵་གྲུབ༵་ཀྱི༵་ཕོ༵་ཉའི༵་དབང་གིས༵་ཞེས་པ་དབང་ཕྱུག་ཉེར་བརྒྱད་དང་ཕུར་སྲུང་བཅུ་གཉིས་རྣམས་སོ། །གཞན་ཡང་ཕྱག་རྒྱའི་ཁྱད་པར་འདོད་ཚུལ་ཡང་ཡོད་དོ། ༈ །ཟིན་བྲིས་ལས། ཕྲ༵་མོའི༵་རྣལ༵་འབྱོར༵་མཐར༵་ཕྱིན༵་པ། མ་དག་པའི་སྣང་ཞེན་གཅོད་བྱེད་དངོས་རྫོགས་རིམ་ཡིན་མོད། དེའི་སྔོན་དུ་དེ་འདྲའི་སྣང་ཞེན་ཡིད་ངོར་གཅོད་དགོས་པས། མ་དག་པར་སྣང་བའི་གཉེན་པོ་ཐ་མལ་གྱི་ཕུང་ཁམས་སྐྱེ་མཆེད་ཐམས་ཅད་ཡེ་ནས་དག་པ་རྒྱལ་བའི་དཀྱིལ་འཁོར་ཉག་གཅིག་ཏུ་བལྟ་བ་སྟེ། རྣམ་པ་གསལ་བ་དང་། མ་དག་པར་ཞེན་པའི་གཉེན་པོར། རྣམ་པ་གསལ་བ་དེའི་སྐབས་སུ་སངས་རྒྱས་སྐུ་གསུམ་གྱི་བདག་ཉིད་དུ་ང་རྒྱལ་བ་རྣམ་དག་དྲན་པ་སྟེ། དེ་ལྟ་བུའི་ཁྱད་པར་གཉིས་ཚང་བའི་བསྐྱེད་རིམ་ཐུན་མཐར་འཁྱོལ་གྱི་བར་དུ་བར་མ་ཆད་པ་ལ་སློབ་དགོས། དེའང་འཛིན་སྟངས་གཞན་གྱིས་བར་བཅད་པ་ཙམ་མིན་གྱི་མ་དག་པའི་སྣང་ཞེན་གྱིས་བར་མ་བཅད་པ་དགོས་ལ། དེ་ལྟར་སློབ་པ་ལ་བཞི་སྟེ། རགས་པའི་དཀྱིལ་འཁོར་ཡུད་ཙམ་ལ་གསལ་མི་ནུས་པ་དེ་སྲིད་དུ་ལས་དང་པོ་བའི་གནས་སྐབས་དང་། དེ་ལྟར་ནུས་པ་ན་ཡེ་ཤེས་ལ་ཅུང་ཟད་དབང་པའི་གནས་སྐབས་དང་། ཡུད་ཙམ་ལ་ཕྲ་བའི་དཀྱིལ་འཁོར་གསལ་ནུས་པ་ཡེ་ཤེས་ལ་ཅུང་ཟད་དབང་བའི་གནས་སྐབས་དང་། བསྐྱེད་རིམ་ལ་མ་ལྟོས་པར་ཏིང་ངེ་འཛིན་ཙམ་ལ་བརྟེན་ནས་གཞན་དོན་རྒྱ་ཆེན་བྱེད་ནུས་པ་ཡེ་ཤེས་ལ་ཡང་དག་པར་དབང་བའི་གནས་སྐབས་དང་བཞིའོ། །དེ་དག་གི་སྐབས་སུ་བྱིང་རྒོད་གཅོད་དགོས་པས་བྱིང་བའི་གཉེན་པོར་ཐུགས་ཀའི་སྔགས་ལས་འོད་ཟེར་སྤྲོ་བསྡུ་དང་དབུགས་འབྱུང་རྔུབ་བགྲང་བ་སོགས་ཀྱིས་སེམས་གཟེངས་བསྟོད་པ་དང་། རྒོད་པའི་གཉེན་པོར་ཕྲ་ཐིག་གི་རྣལ་འབྱོར་ལ་སློབ་པ་སྟེ། དང་པོ་གཉིས་ཀྱི་སྐབས་སུ་དབུ་མའི་ཡར་མར་གྱི་སྣ་རྩེ་གཉིས་པོ་གང་རུང་དུ་ཐིག་ལེ་ཚད་ཡུང་འབྲུ་ཙམ་པ། ཁ་དོག་མཐིང་ག་ངོ་བོ་ལྷ་ཡིན་པའམ་དབྱིབས་ཟླུམ་པོ་སྟེ་ཁྱད་པར་གསུམ་ལྡན་ལ་སེམས་འཛིན་པ་ཐིག་ལེའི་རྣལ་འབྱོར་དང་། ཕྱི་མ་གཉིས་ཀྱི་སྐབས་སུ། རང་ཉིད་གསང་འདུས་མི་བསྐྱོད་རྡོ་རྗེར་གསལ་བའི་ཡུམ་གྱི་མཁར་ཐིག་ལེ་ཕབ་སྟེ། དེའི་ནང་དུ་དཔལ་གསང་བ་འདུས་པ་ལུས་དཀྱིལ་དང་བཅས་པའི་དཀྱིལ་འཁོར་ཡོངས་སུ་རྫོགས་པ་སྤྱན་གྱི་དཀར་ནག་གི་ཆ་ཚུན་ཆད་མ་འདྲེས་པར་གསལ་ནུས་པའི་ཚུལ་དང་། ཐིག་ལེའི་ནང་གི་གསང་འདུས་ཡུམ་མཁར་ཡང་དེ་འདྲ་གསལ་ནུས་པ་ཚ་བོའི་ཚུལ་དང་། དེས་ཀྱང་དེ་ལྟར་ནུས་པ་ཡང་ཚའི་ཚུལ་དུ་གསལ་ནུས་པ་ན་ཕྲ་མོའི་རྣལ་འབྱོར་མཐར་ཕྱིན་པ་ཡིན་པར་གསུངས་སོ། །གོང་གི་རིམ་པ་བཞིའི་གཉིས་པའི་སྐབས་སུ་བསྐྱེད་རིམ་ཐོབ་པ་མ་ཡིན་ཞིང་། གསུམ་པའི་སྐབས་སུ་དེ་ཐོབ་པར་འཇོག་གསུངས། བྱིང་རྒོད་གཅོད་པ་ཡང་ཞི་གནས་ཙམ་འགྲུབ་པའི་ཆེད་དུ་མིན་གྱི་འདིར་བསྟན་གྱི་བསྐྱེད་རིམ་མཐར་ཕྱིན་པ་ན། ཞི་གནས་ཞར་ལ་གྲུབ་ཡོད་པ་ཡིན་གསུངས། སྒྲུབ་ལུགས༵་ཀྱི༵་ཁྱད༵་མི་འདྲ༵་བས༵་འབྱེད༵་དགོས༵་སམ༵། ཞེས་ཐད། ཞལ་རྒྱུན་ལས། དང་པོ་དཔྱོད་པའི་དུས་བདེ་ཆེན་དོན་དུ་གཉེར་ནས་དེ་རྗེས་དངོས་གྲུབ་དོན་ལ་སྦྱིན་སྲེག་སོགས་བརྒྱུད་དགོས། ཕྱི་བས་ནི་དང་པོ་ནས་དངོས་གྲུབ་དོན་དུ་གཉེར་ནས་འོད་ཟེར་དཀར་པོས་དངོས་གྲུབ་ཀྱི་སྣོད་རུང་དུ་བྱ་བ་དང་འོད་ཟེར་དམར་པོའི་སྤྲོ་བསྡུས་དངོས་གྲུབ་སྡུད་པ་སོགས་ཐབས་དུ་མའི་སྒོ་ནས་དངོས་གྲུབ་ཐོབ་ཆེད་དུ་ཚོགས་སྒྲུབ་བྱེད་པའི་དེའི་རྗེས་མཇུག་ཏུ་སྦྱིན་སྲེག་སོགས་ལ་མི་ལྟོས་པར་འདོད་གཟུགས་ཀྱི་རིག་འཛིན་འགྲུབ་ཅེས་གསུངས། འདོད་གཟུགས་ཀྱི་རིག་འཛིན་ནི། འདོད་པ་ལས་འདོད་ཆགས་དང་མ་བྲལ་བའི་ལྷ། ལྷ་དབང་བརྒྱ་བྱིན་གྱི་རྣམ་པའི་རིག་འཛིན་དང་། ཆགས་བྲལ་ཚངས་པའི་ལུས་ལྟ་བུའི་རིག་འཛིན་འགྲུབ་ཅེས་གསུངས། བཞག་ཐབས་གཉིས་ཐད། ཟིན་བྲིས་ལས། ངང་མ་ཤོར་བ་ལ་གོ་དགོས་པས་སྤྱི་བླུགས། གསལ་མི་གསལ་མིན་པས་སོ་མ་ཤོར་བ། ཞེས་དང་། དེ་བྱང་བར་གོམས་པ་ན་ཞེས་པའི་ཐད། སྣང་བ་ཐམས་ཅད་འོད་གསལ་གྱི་རྩལ་འབའ་ཞིག་ཏུ་བལྟ་བ་ལ་བསྲེེ༵་བ་ཟེར། ཞེས་དང་། ཞལ་རྒྱུན་ལ། སྟོང་གཟུགས་རིག་ངོར་སྣང་བའི་གཉིས་འཛིན་བྲལ་བ་ལ་གོ་དགོས་པ་དང་། སྟོང་གཟུགས་ཀྱི་སྣང་བ་དེ་དག་ལ་རང་སྣང་དུ་བལྟ་བའོ། །རང་ལུས་ཀྱི་འདུ་ཤེས་བཞག་ནས་རྩེ་གཅིག་ཏུ་སྟོང་གཟུགས་ཀྱི་སྣང་བ་དག་མ་དག་ལ་མཉམ་དུ་མཉམ་པར་བཞག་པ་ན་སྔར་ལས་ཀྱང་ལྷག་པར་མཆེད་དེ་རྩལ་རྫོགས་པར་འགྱུར་རོ། །ཞེས་གསུངས། ཟིན་བྲིས་ལས། སྣང་བ་ཐམས་ཅད་འོད་གསལ་གྱི་རྩལ་འབའ་ཞིག་ཏུ་གོང་སྨོས་ལྟར་བསྒོམས་པས་སྣང་བ་ཐམས་ཅད་དབྱིངས་མི༵་དམིགས༵་པ་དང་དབྱེར་མི་ཕྱེད་པའི༵་བདེ༵་བའི༵་ཡེ་ཤེས་ཀྱི་ཡོ༵་ལང༵་འབའ༵་ཞིག༵་ཏུ༵་འཆར༵། དེ༵་དག་གསལ་བརྟན་པའི༵་ཁྱད་པར་ཐོབ་པའི་ཚེ༵། ཐུན་མཐར་འཁྱོང་གི་བར་དུ་མི་གཡོ་བར་གནས་ནུས་པའི་སྟོང༵་གཟུགས༵་ལས༵་རུང༵་སོགས། དང་པོ་ནས་སྟོང་གཟུགས་ཀྱི་སྣང་བ་གང་ཤར་ལྷ་སྐུ་ཕྱག་རྒྱ་གཅིག་པར་དངོས་སུ་བསྒྱུར་རོ་སྙམ་པའི་འཕེན་པའི་རྐྱེན༵་ཅུང༵་ཟད༵་སོགས། དེ་བཞིན་དུ་ཉིན་མོའི་ཏིང་འཛིན་གང་ལ་སློབ་པ་དེ་ཉིད་མཚན་མོའི་རྣལ་འབྱོར་དུ་ཁྱེར་ཚུལ་སྐབས་ལ་གཉིས་ཏེ། རླུང་སྟོབས་དང་འདུན་སྟོབས་ཀྱིས་འཁྱེར་བ་གཉིས་ཀྱི་དང་པོ་ནི། རྣལ་འབྱོར་དང་པོའི་སྐབས་སད་དུས་སུ་རླུང་དབུ་མར་ཞུགས་གནས་ཐིམ་གསུམ་བྱས་སྟོབས་ཀྱིས་སྟོང་ཆེན་འོད་གསལ་མངོན་དུ་གྱུར་ནུས་པ་དེས་སྙིང་གའི་རྩ་གསལ་ཏེ། དེ་ལ་སེམས་བཟུང་སྟེ་གཉིད་ལ་ཞུགས་པ་ན། གཉིད་ཀྱི་སྟོང་བཞི་འམ་སྣང་མཆེད་ཐོབ་གསུམ་གྱི་ཡེ་ཤེས་འོད་གསལ་དང་བཅས་པ་ངོས་ཟིན་ནས་བདེ་སྟོང་སྦྱར་ཏེ། ལམ་གྱི་སྟོང་ཆེན་དུ་དངོས་སུ་བསྒྱུར་ནུས་ལ། དེའི་མཇུག་ཏུ་འོད་གསལ་ལས་གཡོ་བའི་མགོ་རྩོམ་པ་དང་། གཡོ་ན་ཡང་ངོས་ཟིན་ནས་འཕེན་པའི་རྐྱེན་ཅུང་ཟད་ཙམ་གྱི་རྐྱེན་ལས་ཉིན་མོའི་སྟོང་གཟུགས་ཀྱི་སྣང་བ་དང་རྨི་ལམ་གཉིས་སྦྲེལ་ཏེ་སྙིང་རྗེ་སྒྱུ་མ་དངོས་གོམས་ནུས་ཤིང་། དེ་ཕྱག་རྒྱ་གཅིག་སྤྲོས་སུ་ཡང་བསྒྱུར་ནུས་ལ། འདིའི་སྟོང་ཆེན་སོགས་བཞི་ནི་དེ་དག་མཚན་ཉིད་པ་ཡིན་ཞིང་། འདི་དུས་ཁ་སྣའི་དབུགས་ཀྱི་རྒྱུ་བ་འགག་པར་གསུངས། གཉིས་པ་ནི། རླུང་སྟོབས་ཀྱིས་གོང་ལྟར་མི་ནུས་པའི་གང་ཟག་གིས་དེ་ལྟར་ནུས་ཆེད་དུ་སློབ་པ་སྟེ། འདིའི་མགྲིན་པའི་རྩ་འཁོར་གསལ་ཏེ། གཉིད་ཀྱི་སྟོང་བཞི་ངོས་ཟིན་པར་བྱའོ་སྙམ་པ་དང་སྟོང་ཆེན་སོགས་ལ་རིམ་བཞིན་འཇུག་པར་བྱའོ་སྙམ་དུ་འདུན་པས་དམིགས་འོག་ཏུ་བཅུག་སྟེ་གཉིད་པ་ན་གཉིད་ཀྱི་སྟོང་བཞི་སོགས་ངོས་ཟིན་མི་ནུས་པས་སྟོང་ཆེན་སོགས་མཚན་ཉིད་པ་མི་འོང་ཡང་དེ་དག་རྗེས་སུ་མཐུན་པ་ལ་གོམས་པ་ན་རིང་པོར་མི་ཐོགས་པར། སྔ་མ་ལྟར་འོང་བ་ཡིན་གསུངས། གྲུབ་དབང་རིན་པོ་ཆེས། དགོངས་རྒྱན་དང་སྡོམ་ཊིཀ་སོགས་མང་པོར་སྟོང་ཆེན་གྱི་སྐབས་སུ། སད་པའི་དུས་ཀྱི་འོད་གསལ་དང་། མཚན་མོ་གཉིད་འཐུག་གི་འོད་གསལ་གཉིས་སྦྲེལ་ཏེ་ཉམས་སུ་ལེན་པར་གསུངས་ཤིང་། སྙིང་རྗེ་སྒྱུ་མའི་ཐད་དུ་སད་རྨི་གཉིས་ཀྱི་སྣང་བ་མཐོང་བར་བཤད་པའང་སྣང་བ་དེ་དག་སྟོང་གཟུགས་སུ་ལམ་ཁྱེར་བྱེད་པའམ། ཐ་མལ་པ་ལ་སྣང་བ་དེ་གཉིས་འཆར་བའི་དོད་དུ་སྟོང་གཟུགས་མཐོང་ཞེས་པར་མངོན་ཡང་། དེས་ནི་རྣལ་འབྱོར་དང་པོ་གཉིས་གཉིད་རྨི་གཉིས་ཀྱི་སྐབས་སུ་སྐྱོང་ཚུལ་བསྟན་ནོ། །རྨི་ལམ་དུ་འོང་རྒྱུ་རྣམས་སྟོང་གཟུགས་ཡེ་ཤེས་ཀྱི་སྣང་བར་འཆར་ཞེས་བསྟན་པ་དང་། དེ་ལྟར་ཤར་བའི་སྟོང་གཟུགས་དེ་རིམ་གྱིས་ཕྱག་རྒྱ་གཅིག་སྤྲོས་སུའང་འཆར་བར་གོང༵་བཞིན༵་བཤད་པས། ཕྱག་རྒྱ་གཅིག་སྤྲོས་རྨི་ལམ་དུ་སྦྱང་ཚུལ་ཐོན་ནོ། །གཞི་ལ་སྲིད་པ་བར་དོ་མ་གྲུབ་གོང་ཆོས་ཉིད་བར་དོའི་སྣང་བ་འཆར་བ་ལྟ་བུའི་རྨི་ལམ་མ་མཐོང་བའི་སྔོན་དུ་ལྷུན་གྲུབ་ཀྱི་གཞི་སྣང་མཐོང་བར་མན་ངག་སྙིང་ཐིག་ཏུ་གསུངས་པ་དང་། འདིའི་སྟེང་སྒོ་རྣལ་འབྱོར་བའི་གཉིད་ཐུག་གི་རྒྱ་སྤྲོས་གཉིས་མཐུན་དགོས་ཏེ། འདིའི་སྟོང་གཟུགས་དང་། ཆོས་ཉིད་བར་དོའི་སྣང་བ་གནད་གཅིག་པར་དགོངས་རྒྱན་དང་ཤིང་རྟ་ཆེན་མོར་བཤད་པས་སོ། །ཞེས་དང་ཡང་ལམ་རིམ་ལུང་སྐབས། གང་དག་དངོས་ཀུན་རང་རིག་ཕྱིར། །འཆི་བ་དོན་དམ་བདེན་པ་སྟེ། །སོགས་ཀྱིས་བསྐྱེད་རིམ་པས་མོས་ངོར་དང་། རྫོགས་རིམ་པས་ཡོངས་སུ་འཆི་བ་ཆོས་སྐུར་སྦྱོང་བྱེད་སྟོང་ཆེན། བར་དོར་ལོངས་སྐུར་སྦྱོང་བྱེད་སྙིང་རྗེ་སྒྱུ་མ་སོགས་སྒོམ་པར་བསྟན་པས། སྟོང་ཆེན་དང་འཆི་བ་བསྲེ་བ་སོགས་ཀྱིས་འཐོབ་བོ། །འོན་ཀྱང་འདིའི་སད་པ་དང་སྐྱེ་བ་སྦྱོང་བྱེད་ནི་རྨི་ལམ་དང་བར་དོ་སྦྱོང་བྱེད་དུའང་མི་འགལ་བས། སྙིང་ཐིག་ཏུ། འཆི་བ་དང་། ཆོས་ཉིད་བར་དོའི་ལམ་ཁྱེར་གཉིས་པོ་ཁོ་ནས་བར་དོ་དང་སྐྱེ་བ་ཀུན་སྦྱོང་བར་བཞེད་པ་དང་མཐུན་ནོ། ། བར༵་ཆད༵་མེད༵་པའི༵་ཏིང༵་འཛིན༵་ཞེས་པ། སྐྱེ་བ་དང་ལམ་གཞན་གྱིས་བར་མ་ཆོད་པའོ། །ཞེས་གསུངས། དེར་ཚོགས་བསྒྲུབ་ཀྱི་དུས་སུ་ལྷ་ཚོམ་བུ་གཅིག་པ་སོགས་ཞེས་པའི་ཐད། གསུམ་པ་སོགས་གང་བསྒོམ་གྱི་ཁྱད་པར་ལས་འབྲས་བུ་དམན་མཆོག་གི་ཁྱད་འཇུག་པར་བཤད་པ་ཞེས་པ་ནི། ཟུར་འདེབས་ལས། ལེའུ་བཅུ་གཅིག་པར་ཚོམ་བུ་གཅིག་པ་དང་། གསུམ་པ་དང་། ལྔ་པ་རྣམས་ལ་བརྟེན་ནས་ཚོགས་སྒྲུབ་བྱས་པས། རིམ་པར་མཐོང་ལམ་ནས་རྒྱ་ཆེན་དང་། ཚེ་དབང་ནས་ལྷུན་གྲུབ་དང་ཚེ་དབང་ནས་རྡོ་རྗེ་འཆང་ལ་སྦྱོར་བར་གསུངས་སོ། ། ལོ༵་ཚོད༵་བསྟུན་༵པར༵་འདོད༵་ཅེས་པ། གསུང་རྒྱུན་ལས། ལྷ་རྗེ་ཁ་རག་པ་སོགས་ཀྱི་བཞེད་པ་ནི། ཟག་བཅས་ཟག་མེད་ཀྱི་ལམ་དགུ་པོ་འདི་དག་ལ་རྒྱུའི་ཐེག་པའི་ས་ལམ་དང་གུང་སྦྱར་ཏེ། དེ་བཞིན་ཉིད་ཀྱི་ཏིང་ངེ་འཛིན་ཚོགས་ལམ་ཆུང་ངུ་དྲན་པ་ཉེར་བཞག་བཞི་དང་། ཀུན་ཏུ་སྣང་བའི་ཏིང་ངེ་འཛིན་ཚོགས་ལམ་འབྲིང་པོ་ཡང་དག་སྤོང་བཞི་དང་། ཕྱག་རྒྱ་གཅིག་པ་ལ་ཚོགས་ལམ་ཆེན་པོ་རྫུ་འཕྲུལ་རྐང་བཞི་དང་སྤྲོས་བཅས་སྦྱོར་ལམ་ཆུང་ངུ་དྲོད་རྩེ་གཉིས་དང་། ཚོགས་སྒྲུབ་སྦྱོར་ལམ་ཆེན་པོའི་བཟོད་པ་ཆོས་མཆོག་གཉིས་དང་། རྣམ་སྨིན་མཐོང་ལམ་དང་པོ། ཚེ་དབང་ས་དང་པོའི་བདེན་པ་མཐོང་བ་དང་། ཕྱག་ཆེན་ས་གཉིས་པ་ནས་དགུ་པའི་བར་དང་། ལྷུན་གྲུབ་རིག་འཛིན་ས་བཅུ་ཆོས་ཀྱི་སྤྲིན་དང་ལོ་ཚད་མཉམ་པ་ཡིན་གསུངས། ས་དང་པོ་མཐོང་བའི་ཚེ་ཉོན་སྒྲིབ་ཀུན་བཏགས་ལྷན་སྐྱེས་གཉིས་ཀྱི་ཁྱད་པར་མ་ཕྱེ་བར་མཐའ་དག་སྤང་བའོ། །ཞེས་གསུངས། རྣམ་སྨིན་རིག་འཛིན་སྐབས། ཟིན་བྲིས་ལས། འདིའི་གདུལ་བྱ་དབང་པོ་རྣོ་རྟུལ་གཉིས་ལས། སོ་སྐྱེའི་སར་ཕྱག་རྒྱ་གཅིག་སྤྲོས་སུ་སྟོང་གཟུགས་གྲུབ་པ་ན། སྔ་མས་སྟོང་གཟུགས་ཕྱག་རྒྱ་ཆེན་མོའི་སྟོབས་ཀྱིས་མི་འགྱུར་བའི་བདེ་བ་ཆེན་པོ་འདྲེན་པའི་ཆེད་དུ་ཚོགས་སྤྱོད་བྱས་ནས་བདེ་ཆེན་ཡེ་ཤེས་དེས་རང་ལུས་བེམ་པོའི་ཆ་སྦྱངས་པའམ་ཟོས་ཏེ་དྭངས་མའི་ལུས་སུ་གྱུར་བ་ན་ཚེ་དབང་རིག་འཛིན་དང་། ཕྱི་མས་དགོས་པ་དེའི་ཆེད་དུ་ཚོགས་སྤྱོད་བྱས་ཀྱང་བདེ་བ་ཆེན་པོ་འདྲེན་མ་ནུས་པའི་དབང་གིས་རང་ལུས་མ་དག་ཀྱང་ཉོན་མོངས་པའི་ཟག་པ་དང་བྲལ་བའི་འཕགས་ལམ་བརྙེས་པས་རྣམ་སྨིན་རིག་འཛིན་ཞེས་བྱ། ༈ ཚེ་དབང་རིག་འཛིན་སྐབས། རིན་པོ་ཆེས། རྟོག་ཚོགས་སྒྱུ་དྲྭར་བཤད་པའི་ཁམས་དྲུག་ལྡན་གྱི་རྡོ་རྗེའི་ལུས་ཀྱི་དྭངས་མ་སྟོབས་སུ་གྱུར་ཅིང་། སྙིགས་མའི་དེ་ལས་གྱུར་པའི་ལུས་ཁམས་སྐྱེ་གནས་ཀྱི་ཟག་པ་ཟད་པའི་དབང་གིས། ཕར་ཕྱིན་དུས་ས་ཐོབ་དུས་ཐམས་ཅད་དུ་མཉམ་བཞག་གི་རྟོགས་པ་དང་མཐུན་པ། ཞེས་པ་ལྟར། འདིར་ཡང་ལས་རླུང་གི་འཁྲུལ་རྒྱུས་དཀྲུག་པའི་སེམས་མི་གསལ་བ་རྣམས་མཉམ་རྗེས་ཀུན་ཏུ་ཤས་ཆེར་དྭངས་ཤིང་། གཟི་བྱིན་ཆོས་ཀྱི་དབྱིངས་ལྟར་ཚད་གཟུང་དང་བྲལ་བའི་འོད་གསལ་སྒྱུ་མ་ལྟ་བུའི་རྣལ་འབྱོར་གྱིས་སྣང་སེམས་ཐམས་ཅད་ནོན་ཅིང་ཁ་དོག་བསྒྱུར་བ་ནི། གསང་འདུས་ལས། སྒྱུ་ལུས་ཐོབ་ནས་ལུས་སེམས་ཕྲ་རགས་ཀྱི་འབྲེལ་རགས་པ་ཆད་ནས་མི་རྒྱུ་བ་དང་དོད་མཚུངས་པའམ། ཡང་ན་ཟུང་འཇུག་ཐོབ་ནས་འབྲེལ་ཕྲ་མོ་ཆད་པའི་དོད་དོ། །འདི་རྒྱ་མཚོ་ལས། འབྱུང་བཞི་དྭངས་མ་ལ་བརྟེན་པས། །རིག་པའི་བདེ་ཆེན་བར་ཆད་མེད། །རྣམ་རྟོག་འགྱུ་བའི་རླུང་དྭངས་བས། །བདེ་ཆེན་ནམ་མཁའི་མཐའ་ལྟར་གནས། །ཞེས་ལེའུ་བཅུ་བཞི་པར་བཤད་པ་དང་ཕྱོགས་འདྲའོ། །འདིར་གཡུང་གི་གསུང་ན། བདེན་པའི་ཕྱོགས་གཅིག་མཐོང་བ་རྣམ་སྨིན། བདེ་ཆེན་དོན་རྫོགས་པར་མཐོང་བ་ཚེ་དབང་། མཐོང་ཟིན་གོམས་བྱེད་ཕྱག་ཆེན་གསུངས་པ་དང་། སྤྱོད་བསྡུས་ལས། སེམས་དབེན་པ་ལ་བདེན་པ་མཐོང་བ་འདི། །ཞེས་དཔེའི་འོད་གསལ་ལ་སྤྲོས་པ་ཕྱོགས་རེ་ཁེགས་པའི་ཆ་ནས་དོན་དམ་འོད་གསལ་ཞེས་བཏགས་པ་ལྟར་བཏགས་འདུག་པའམ་མ་འབོར། ཞེས་གསུངས། ཟིན་བྲིས་ལས། ལམ་རིམ་དུ། རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲིའི་རིག་འཛིན་འགྱུར། །ས་གཉིས་པ་ནས་ལྔ་པའི་བར་ལ་རྡོ་རྗེའི་རིག་འཛིན་ཞེས་བྱ་སྟེ། རང་གི་ངོས་སྐལ་གྱི་སྒྲིབ་པ་འཇོམས་པའི་མཐུ་དང་ལྡན་པའི་རྡོ་རྗེ་དང་མཚུངས། ས་དྲུག་པ་དང་བདུན་པར་ཤེར་ཕྱིན་ལྷག་པར་སྤྱོད་པ་དང་ཐབས་ལ་མཁས་པའི་སྟོབས་ཀྱིས་འཁོར་ལོ་བསྐོར་བ་དང་ཚར་གཅོད་པ་དང་རྗེས་འཛིན་གྱིས་གཞན་དོན་སྒྲུབ་པ་ལ་མཁས་པའི་འཁོར་ལོའི་རིག་འཛིན་དང་། བརྒྱད་པར་རྣམ་པར་མི་རྟོག་པའི་ཡེ་ཤེས་ལ་དབང་བའི་འདོད་པ་ཐམས་ཅད་གྲུབ་པས་རིན་པོ་ཆེ། དགུ་པར་ཡུལ་གང་ལ་ཆགས་པ་མེད་པར་སེམས་ཅན་གྱི་དོན་བྱེད་པར་པདྨའི་རིག་འཛིན་དང་། བཅུ་པར་ཕྲིན་ལས་ཁྱད་པར་ཅན་གྱིས་སེམས་ཅན་གྱི་དོན་དཔག་མེད་མཛད་པས་རལ་གྲིའི་རིག་འཛིན་གསུངས། ཟུར་འདེབས་ལས། ཕུང༵་ཁམས༵་རགས་པ་སྦྱོང་ཚུལ་ལ་དགོངས་སོགས། ཞལ་ལུང་ལས། འདིར་རྒྱལ་བ་གཡུང་ནི། དུས་འཁོར་ལས་མཚན་མ་གསུམ་མཐོང་བར་བཤད་པའི་མཚན་མ་དང་པོ་ལས་རླུང་ཉི་ཁྲི་ཆིག་སྟོང་དྲུག་བརྒྱའི་ཡ་གྱལ་གཅིག་འགག་པ་ནི་མཆོག་ཏུ་མི་འགྱུར་བའི་བདེ་བ་ཐོབ་པ་ཆོས་ཉིད་བདེན་པས་ཆ་ཤས་མཐོང་བ་ཡིན་ལ། མཚན་མ་བར་མ་ནི་ལས་རླུང་གཅིག་འགགས་གཉིས་འགགས་ཀྱིས་སྟོང་བརྒྱད་བརྒྱ་འགགས་པ་ན་གསང་གནས་ཀྱི་རྩ་མདུད་གཅིག་གྲོལ་བ་དང་ཆོས་ཉིད་བདེན་པ་མངོན་དུ་མཐོང་བས་ས་དང་པོ་ནོན་པར་བཤད་པ་ལྟར། འདིར་ཡང་རྣམ་སྨིན་བདེན་པའི་ཆ་ཤས་དང་། །ཚེ་དབང་རིག་འཛིན་མཐོང་བ་ཡིན། །ཞེས་གསུངས་སོ། །ཞལ་རྒྱུན་དུ་སྒྱུ་འཕྲུལ་རྡོ་རྗེའི་ལུང་དོན་ལས། སྔགས་བླ་མེད་ཀྱི་ས་དང་པོ་ནས་བཅུ་པའི་བར་གྱི་ཡོན་ཏན་རྣམས་རྒྱུ་ཅིའི་དབང་གིས་འབྱུང་ཞེ་ན། མ་དག་པའི་རྩ༵་རྣམས༵་འབྲི་བ་སྟེ་འོད་རྩ་དྭངས་པའི་དབང་གིས་ས་ཡི་ཡོན་ཏན་རྣམས་སྐྱེའོ། །དེ་ལྟར་ཡོན་ཏན་སྐྱེ་བ་ནི། རླུང་རགས་པ་ཉི་ཁྲི་ཆིག་སྟོང་དྲུག་བརྒྱ་ལོག་པས་དེ་ཞོན་པའི་རྟོག་པ་རགས་པ་དེའི་གྲངས་ལོག་པ་ཡིན་ལ། དེ་ལྟར་རླུང་སོགས་མ་དག་པའི་སྒྲིབ་པའི་ཆ་རྣམས་ལོག་པས་ནི་མི་འགྱུར་བདེ་ཆེན་གྱི་ཆ་ཉི་ཁྲི་ཆིག་སྟོང་དྲུག་བརྒྱ་སྐྱེ་བ་ལས། དེ་ལྟར་འོང་བར་འདོད་ལ་དེ་ལྟར་ཡིན་པའི་རྒྱུ་མཚན་གྱིས་སྦྱང་གཞི་རླུང་ཁམས་སེམས་རགས་པ་འགྲིབ་པ་དང་། སྦྱོང་བྱེད་བདེ་ཆེན་ཤིན་ཏུ་ཕྲ་བ་འཕེལ་བའི་དབང་གིས་སྲིད་པའི་སྣང་བ་འགྲིབ་ཅིང་འགག །མྱ་ངན་ལས་འདས་པའི་སྣང་བ་འཕེལ་བ་ཡིན་ལ། དེ་ཡང་གང་ལ་བརྟེན་ནས་འབྱུང་ན། ལུས་ཀྱི་རྩ་འཁོར་སྤྱི་མགྲིན་སྙིང་ཁ་གསུམ་ཡོད། ལྟེ་བ་དང་བཞི་འམ་གསང་གནས་ཀྱི་འཁོར་ལོ་དང་ལྔ་སྟེ་དེ་འདྲའི་དབྱེ་བསྡུ་བྱེད་དོན་སྐུ་གསུམ་དང་། སྐུ་བཞི་དང་། སྐུ་གསུང་ཐུགས་ཡོན་ཏན་ཕྲིན་ལས་ལྔ་སོགས་མཚོན་བྱའི་དབང་གིས་སོ། །དེ་འདྲའི་དབུ་རྐྱང་འཁོར་ལོ་དང་བཅས་པ་ལ་མདུད་པ་ཉི་ཤུ་རྩ་གཅིག་ཡོད་པས་མདུད་པ་གཉིས་རེ་གྲོལ་ནས་ས་རེ་ཐོབ་པར་གསུངས་ལ། རྩ་མདུད་གཅིག་མ་རྫོགས་པའི་སྐབས་སུ་ས་བཅུའི་ཐ་མ་སྟེ་སྨད་ཀྱི་ཡེ་ཤེས་ཀྱིས་སྟེང་འདིའི་༼ཡེ་བབ་དང་མས་བབ་གཉིས་ཀྱི་༽ལྷན་སྐྱེས་ཀྱི་ཁམས་དཀར་པོ་སྤྱི་བོར་བརྟན། དམར་ཆ་ནོར་བུའི་རྩེར་བརྟན་པས་སངས་རྒྱས་པར་གྲགས་ཤིང་བཞེད་དོ། །ཞེས་གསུངས། ཟིན་བྲིས་ལས། རིམ་བཞིན་དྭངས་སྙིགས་ཀྱི་རྩ་རླུང་སྐྱེ་འབྲིའམ་འཕེལ་འགྲིབ་ལས་སྲིད་པ་དང་མྱང་འདས་འཕེལ་འགྲིབ་བྱེད། ཡིད་བཞིན་མཛོད་ལས། འཁོར་ལོ་བཞི་ཡི་རླུང་སེམས་ལས་རུང་ཚེ། །ནས་བཞེད་ཅེས་དང་། དེ་དག་སོ་སོའི་ཡོན་ཏན་རླབས་ཆེ་བ། སྟོང་ཕྲག་བཅུ་གཉིས་ལ་སོགས་རྒྱ་ཆེ་སྟེ། རྩ་འདབས་ཕྲ་མོའི་མདུད་པ་རབ་གྲོལ་བས། །འཁོར་བའི་རང་བཞིན་ཉོན་མོངས་རླུང་སེམས་ནུབ། མྱང་འདས་རང་བཞིན་ཡེ་ཤེས་རླུང་སེམས་འཕེལ། །དེ་ལྟར་ས་བཅུའི་བསྒྲོད་པ་དེ་དག་ལས། དབུ་མར་རོ་རྐྱང་མདུད་པ་ཉི་ཤུ་གཅིག །གཉིས་གཉིས་གྲོལ་བ་ས་བཅུ་རེ་རེ་ཐོབ། །ཐ་མས་གཙུག་ཏོར་རྩེ་མོའི་ས་མཆོག་འགྲུབ། །ཅེས་སོ། །རང་འགྲེལ་ལས། ལམ་བཞི་ཡོན་ཏན་རྫོགས་པའི་ཡོན་ཏན་འཆར་ཞིང་དབུ་མ་ལ་རོ་རྐྱང་གཉིས་ཀྱི་མདུད་པ་ཉི་ཤུ་རྩ་གཅིག་ཡོད་པའི་གཉིས་གཉིས་གྲོལ་བ་ན་ས་བཅུ་རེ་རེའི་ཡོན་ཏན་འཆར་ལ། ཐ་མ་གྲོལ་བས་སངས་རྒྱས་ཀྱིས་ས་འགྲུབ་པར་སློབ་དཔོན་བི་མ་ལ་དང་པདྨ་འབྱུང་གནས་ལ་སོགས་པའི་མཁས་གྲུབ་ཆེན་པོ་རྣམས་བཞེད་དོ། །ཞེས་དང་། དེ་ལ་རླུང་སེམས་ལས་སུ་རུང་བ་དང་འབྱོང་པ་གཉིས་ལས། དེར་ཚུད་དུས་ལས་སུ་རུང་བ་ཡིན་ལ། འབྱོང་བ་ནི་དེ་དག་གི་རྩ་ཕྲན་དང་བཅས་པའི་མདུད་པ་གྲོལ་དགོས་སོ། །ཞེས་སོ། ། ས་མཆོག་གྲུབ་ཅེས་པའི་ཐད་ཀྱི་འགྲེལ་བར། རྩ་གསུམ་མདུད་པའི་དང་པོ་གཉིས་གྲོལ་བས་ས་དང་པོ་ཐོབ་པ་ནས་ས་བཅུའི་བར་དང་། ཐ་མ་གྲོལ་ནས་གཙུག་ཏོར་རྩེ་མོའི་ས་མཆོག་རྡོ་རྗེ་འགྲུབ་པོ། །ཞེས་དང་། ཤིང་རྟ་ཆེན་མོར། འཁོར་ལོ་དྲུག་གི་རིམ་པ་དང་སྦྱར་ན་གསང་བ་ཡེ་ཤེས་ཀྱི༴མགྲིན་པ་ལོངས་སྤྱོད་ཀྱི༴དབུ་མ་བདེ་བ་ཆེན་པོ༴གཙུག་ཏོར་ནམ་མཁའ༴སྙིང་ཁ་ཆོས་ཀྱི༴ལྟེ་བ་སྤྲུལ་པའི་འཁོར་ལོ་སྟེ་དྲུག་ཏུ་ཡོད་པ་ལས། སྒྱུ་འཕྲུལ་བ་ལྟར་ན་མ་དག་པའི་རིགས་དྲུག་གི་ས་བོན་དྲུག་སྦྱང་གཞིར་གནས་པ་ལ། སྦྱོང་བྱེད་ཐུབ་པ་དྲུག་དང་ཕ་རོལ་ཕྱིན་པ་དྲུག་གི་རང་བཞིན་གྱིས་སྦྱངས་བས་ཡེ་ཤེས་ལྔ་བསམ་གྱིས་མི་ཁྱབ་པའི་ཡེ་ཤེས་དང་དྲུག་འཐོབ། འཁོར་ལོ་རེ་རེ་དང་དེའི་བར་རེ་སྟེ་བཅུ་གཉིས་སུ་རླུང་དག་པས་ས་བཅུ་གཉིས་རྫོགས་པའི་མཐར་བཅུ་གསུམ་པ་ཡེ་ཤེས་ཆེན་པོའི་ས་རྫོགས་པར་འདོད་ཅིང་སོགས་གསུངས། ལམ་བཞིའི་ཡོན་ཏན་རིམ་བཞིན་འཆར། །ཞེས་པ། ལྟེ་བའི་རྩ་མདུད་གྲོལ་བས་ཚོགས་སྦྱོར་གྱི་ཡོན་ཏན་འཆར། སངས་རྒྱས་སྤྲུལ་སྐུའི་ཞིང་ཁམས་མཐོང་། སྙིང་གའི་རྩ་མདུད་གྲོལ་བས་ལྷག་མཐོང་གི་ཡོན་ཏན་འཆར་ལོངས་སྐུའི་ཞིང་ཁམས་མཐོང་། མགྲིན་པས་ས་གཉིས་པ་ནས་བདུན་པའི་བར་གྱི། སྤྱི་བོས་དག་པ་ས་གསུམ་གྱི། རྩ་མདུད་ཐ་མ་ཉེར་གཅིག་པ་གྲོལ་བས་འབྲས་བུ་མཐར་ཐུག་གི་སྐུ་དང་ཡེ་ཤེས་ཀྱི་སྣང་བ་ཚད་མེད་པར་འཆར། སངས་རྒྱས་ཆོས་སྐུའི་ཞིང་ཁམས་མཐོང་བ་ཡིན། རགས༵་ལུས༵་ཟད༵་ཚུལ་རགས་བཤད་ཞིབ་བཤད་ཀྱི་ཁྱད་པར་མ་གཏོགས་དགོངས་པ་གཅིག་ཅེས་པའི་ཐད། དུས་འཁོར་གྱི་བཞེད་པ་ནི། སྟོང་གཟུགས་ཕྱག་རྒྱ་ཆེན་མོ་ལ་བརྟེན་ནས། རྡོ་རྗེ་ནོར་བུའི་རྩེ་མོའི་ནང་དུ་ཐིག་ལེ་དཀར་པོ་རྡོག་པོ་གཅིག་གནས་གཞན་དང་གཞན་དུ་མི་གཡོ་བར་གནས་པ་ལ་མི་འགྱུར་བའི་བདེ་བའི་སྐད་ཅིག་དང་པོ་སྐྱེ་ཞིང་། ཐིག་ལེ་དེས་ལུས་ཀྱི་བེམ་པོའི་ཆ་ཉི་ཁྲི་ཆིག་སྟོང་དྲུག་བརྒྱའི་ཆ་གཅིག་ཟ་ཞིང་ཟད་པར་བྱེད་ལ། མི་འགྱུར་བའི་བདེ་བའི་སྐད་ཅིག་དེས་ཀྱང་ཞག་གཅིག་ལ་དབུགས་ཉི་ཁྲི་ཆིག་སྟོང་དྲུག་བརྒྱའི་ནང་ནས་གཅིག་བསད་ནས་འགག་པར་བྱེད་དོ། །དེ་ལྟར་ཐིག་ལེ་དཀར་པོ་དེ་ནོར་བུའི་རྩེ་ནས་དབུགས་རེ་རེ་བསད་ནས་འགག་པར་བྱེད་པས་བེམ་པོའི་ཆ་ཉི་ཁྲི་ཆིག་སྟོང་དྲུག་བརྒྱ་དང་། དབུགས་ཀྱི་ཆ་ཉི་ཁྲི་ཆིག་སྟོང་དྲུག་བརྒྱ་རྣམས་རིམ་གྱིས་འགགས་པར་བྱེད་དོ། །དེ་ལྟ་བུའི་མི་འགྱུར་བའི་བདེ་བ་དེ་ཉིད་ཀྱིས་སྟོང་ཉིད་མངོན་སུམ་དུ་རྟོགས་པས་མི་འགྱུར་བའི་བདེ་བའི་སྐད་ཅིག་རེ་རེ་ལའང་སྤང་བྱ་བདེན་འཛིན་བག་ཆགས་དང་བཅས་པའི་དངོས་གཉེན་བར་ཆད་མེད་ལམ་རེ་དང་། རང་གི་ངོས་སྐལ་གྱི་སྤང་བྱ་ལས་གྲོལ་བའི་རྣམ་གྲོལ་ལམ་རེ་རེ་འང་ཡོད་པས་གཉིས་གཉིས་སུ་ཕྱེ་བ་ཡིན་ནོ། །ནོར་བུའི་རྩེ་ནས་གསང་གནས་ཀྱི་བར་ཐིག་ལེའི་ཕྲེང་བ་སུམ་སྟོང་དྲུག་བརྒྱ་བརྩེགས་པ་ལས་རིམ་པར་སྐྱེས་པའི་མི་འགྱུར་བའི་བདེ་བའང་སུམ་སྟོང་དྲུག་བརྒྱ་སྐྱེ་བའི་ཕྱེད་སྔ་མ་ཆིག་སྟོང་བརྒྱད་བརྒྱས་ས་དང་པོ་དང་། ཕྱེད་ཕྱི་མ་ཆིག་སྟོང་བརྒྱད་བརྒྱས་ས་གཉིས་པ་དང་། དེ་བཞིན་དུ་གསང་གནས་ནས་ལྟེ་བའི་བར་ལ་ཐིག་ལེ་སུམ་སྟོང་དྲུག་བརྒྱ་བརྩེགས་པ་ལས་སྐྱེས་པའི་མི་འགྱུར་བདེ་བའི་བདེ་བའང་སུམ་སྟོང་དྲུག་བརྒྱ་སྐྱེས་པའི་ཕྱེད་སྔ་མ་ཆིག་སྟོང་བརྒྱད་བརྒྱས་ས་གསུམ་པ་དང་། ཕྱེད་ཕྱི་མ་ཆིག་སྟོང་བརྒྱད་བརྒྱས་ས་བཞི་པ་དང་། ལྟེ་བ་ནས་སྙིང་ཁའི་བར་སྔར་བཞིན་ཐིག་ལེ་བརྩེགས་པ་ལས་མི་འགྱུར་བ་སྔར་ལྟར་སྐྱེས་པའི་ཆིག་སྟོང་བརྒྱད་བརྒྱ་སྔ་མས་ས་ལྔ་པ་དང་། ཆིག་སྟོང་བརྒྱད་བརྒྱ་ཕྱི་མས་ས་དྲུག་པ་དང་། སྙིང་ག་ནས་མགྲིན་པའི་བར་ལ་སྔར་བཞིན་ཐིག་ལེ་བརྩེགས་པ་ལས་སྐྱེས་པས་མི་འགྱུར་བའི་བདེ་བ་ཆིག་སྟོང་བརྒྱད་བརྒྱ་སྔ་མས་ས་བདུན་པ། ཆིག་སྟོང་བརྒྱད་བརྒྱས་ཕྱི་མས་ས་བརྒྱད་པ་དང་། མགྲིན་པ་ནས་དཔྲལ་བའི་བར་དུ་ཐིག་ལེ་སྔར་ལྟར་བརྩེགས་པ་ལས་སྐྱེས་བའི་མི་འགྱུར་བའི་བདེ་བ་ཆིག་སྟོང་བརྒྱད་བརྒྱ་སྔ་མས་ས་དགུ་པ་ཕྱི་མས་ས་བཅུ་བ། དཔྲལ་བ་ནས་གཙུག་ཏོར་གྱི་བར་ཐིག་ལེ་སྔར་བཞིན་སུམ་སྟོང་དྲུག་བརྒྱ་བརྩེགས་པ་ལས་སྐྱེས་པའི་མི་འགྱུར་བའི་བདེ་བ་སུམ་སྟོང་དྲུག་བརྒྱའི་ཕྱེད་སྔ་མ་ཆིག་སྟོང་བརྒྱད་བརྒྱས་ས་བཅུ་གཅིག་པ་སྟེ་ས་བཅུའི་ཁྱད་པར་ལམ། ཕྱེད་ཕྱི་མ་ཆིག་སྟོང་བརྒྱད་བརྒྱས་ས་བཅུ་གཉིས་པ་སྟེ་ས་བཅུའི་བར་ཆད་མེད་ལམ་དུ་འཇོག་གོ །ཐིག་ལེ་དཀར་པོ་ནོར་བུའི་རྩེ་ནས་གཙུག་ཏོར་བར་ཉི་ཁྲི་ཆིག་སྟོང་དྲུག་བརྒྱ་མི་གཡོ་བར་བརྩེགས་པ་ལྟར། ཐིག་ལེ་དམར་པོ་ཡང་དེ་རྣམས་དང་དུས་མཚུངས་སུ་གཙུག་ཏོར་ནས་ནོར་བུའི་བར་དུ་རིམ་པར་ཉི་ཁྲི་ཆིག་སྟོང་དྲུག་བརྒྱ་གཡོ་མེད་དུ་བརྩེགས་པར་བྱེད་དོ། །ཡིད་བཞིན་མཛོད་འགྲེལ་ལས། གསང་སྔགས་གསར་རྙིང་གུང་མཐུན་པར་བྱུང་སྟེ། འཁོར་ལོ་བཞིའི་རླུང་སེམས་རིམ་པ་བཞིན་ལས་སུ་རུང་བ་ལས། ཚོགས་དང་སྦྱོར་བ་དང་། མཐོང་བ་དང་སྒོམ་པའི་ལམ་བཞི་རྫོགས་པའི་ཡོན་ཏན་འཆར་ཞིང་དབུ་མ་ལ་རོ་རྐྱང་གཉིས་ཀྱི་མདུད་པ་ཉི་ཤུ་རྩ་གཅིག་ཡོད་པའི་གཉིས་གྲོལ་བ་ན། ས་བཅུ་པོ་རེ་རེའི་ཡོན་ཏན་འཆར་ལ། ཐ་མ་གྲོལ་བས་སངས་རྒྱས་ཀྱི་ས་འགྲུབ་པར་སློབ་དཔོན་ཆེན་པོ་བི་མ་མི་དྲ་དང་། པདྨ་འབྱུང་གནས་ལ་སོགས་པའི་མཁས་གྲུབ་རྣམས་བཞེད་དོ་ཞེས་གསུངས་པས། སྒྱུ་འཕྲུལ་རྡོ་རྗེའི་དགོངས་དོན་ཡིད་བཞིན་མཛོད་རྩ་འགྲེལ་ནས་བཤད་པ་དང་། དུས་འཁོར་ནས་བཤད་པ་གཉིས་རགས་བཤད་ཞིབ་བཤད་ཀྱི་ཁྱབ་པར་མ་གཏོགས་དགོངས་པ་གཅིག་པར་གོང་མ་བཞེད་པར་གསུངས་སོ། ། ཀུན་མཁྱེན་ལུགས་ཀྱི་རྣམ་སྨིན་རིག་འཛིན་ཐད། ཞལ་རྒྱུན་དུ། རྫོག༵ས་རིམ༵་གྱི༵་རྟོགས་པ་ཆེར་བྱང་བ་དགོས་ཀྱི་ཞེས་པའི་བྱང་ཚད་ནི། གྲུབ་མཐའི་སྐབས་སུ་བཤད་པ་ལྟར་རྫོགས་རིམ་ལ་བརྟེན་ནས་འོད་གསལ་མངོན་དུ་རྟོགས་ཤིང་འོད་གསལ་དེའི་ཆར་འགྱུར་བའི་ཤེས་རབ་སད་དེ། འོད་གསལ་གྱི་དབྱིངས་སྟོང་པ་ཉིད་དོན་སྤྱིའི་སྒོ་ནས་རྟོགས་པའི་སྦྱོར་ལམ་པ་ཞིག་སྟེ། འདི་རྣམ་སྨིན་རིག་འཛིན་མཚན་ཉིད་པ་དང་མཐོང་ལམ་པ་དང་འཕགས་པ་བཏགས་པ་བར་གསུངས། ཀུན་མཁྱེན་ལུགས་ཀྱི་སྐབས་ཀྱི། རྫོགས༵་རིམ༵་གྱི་ལྷག་མཐོང་རྙེད་པ་ཡན༵་ཆད༵་གཅིག༵། མ་མཐའ་རྫོགས་རིམ་གྱི་སྟོང་ཆེན་ལེགས་པར་རྟོགས་པ་ཡན་ཆད་གཅིག་བཞག་དགོས། དེས་དེ་གསར་དུ་མཐོང་བས་མཐོང་ལམ་གྱི་སྒྲ་སྦྱར་བ་ཡིན་ནོ། །ཞེས་སོ། ། ལུང༵་རིག༵ས་ཀྱི༵་གནོད་བྱེད་ཡོད་ཚུལ་སོགས་མ༵་སྤྲོ༵ས་ལ༵། ཞེས་པ་རྣམས་ནི། གཞན་དག་མི་འགྱུར་བའི་བདེ་བ་ཆིག་སྟོང་བརྒྱད་བརྒྱ་ཚན་དང་པོས་མོས་སྤྱོད་པ་དང་། ཚན་པ་གཉིས་པ་རབ་དགའ་བར་བཞེད་པ་དང་། ལ་ལ་སྔ་མ་དང་འདྲ་ལ་ཆིག་སྟོང་བརྒྱད་བརྒྱའི་ཚན་པ་དང་པོས་སྐད་ཅིག་གི་ཐ་མ་ནས་ས་དང་པོའི་མགོ་འཛིན་པར་བཞེད་དོ། །འདིའི་ལུགས་ཀྱི་ས་བཅུ་གཉིས་ཀྱི་དང་པོ་མོས་སྤྱོད་ཀྱི་སར་ཡོད་པ་མི་འཐད་དོ། །འདིའི་དང་པོའི་བདེ་བའི་སྐད་ཅིག་མ་ཆིག་སྟོང་བརྒྱད་བརྒྱ་ཚན་པ་དང་པོ་མོས་སྤྱོད་གྱིས་ས་ཡིན་ན། འདིའི་ལུགས་ཀྱི་ས་བཅུ་པ་བདེ་བའི་སྐད་ཅིག་མ་ཆིག་སྟོང་བརྒྱད་བརྒྱ་ཚན་པ་བཅུ་ཡོད་པ་དགུ་པ་ལེགས་པའི་བློ་གྲོས་ཡིན་དགོས་ན། ས་བཅུའི་དབང་ཕྱུག་དཔལ་ཕྱག་ན་རྡོ་རྗེ་དེ་ས་དགུ་པར་འགྱུར་ཏེ། འགྲེལ་ཆེན་ལས། ཕྱག་རྡོར་གྱི་ལས་རླུང་ཉི་ཁྲི་ཆིག་སྟོང་དྲུག་བརྒྱ་མ་འགགས་པས་འདིའི་ལུགས་གྱི་ས་བཅུ་གཉིས་མ་ཐོབ་པར་བཤད་པའི་ཕྱིར་དང་། ཉི་མ་དཔལ་གྱི་ཡོན་ཏན་འགེང་བ་ལས། དེ་ལྟར་འཁོར་ལོ་སེར་པོ་ས་གཉིས་འཐོབ་པའི་རིམ་པས་ས་གཉིས་ཀྱི་དབང་ཕྱུག་ཏུ་འགྱུར་རོ། །དེ་ལྟར་ན་གསང་བའི་འཁོར་ལོ་དབུགས་འབྱུང་བ་དང་། འཇུག་པ་བརྒྱ་ཕྲག་དྲུག་ལྷག་པའི་སྟོང་ཕྲག་གསུམ་འགོག་པའི་རབ་ཏུ་དགའ་བ་དང་དྲི་མ་མེད་པ་གཉིས་ཡིན་ནོ། །ལྟེ་བའི་འཁོར་ལོ་དེ་བཞིན་དབུགས་འགག་པས་འོད་བྱེད་པ་དང་འོད་འཕྲོ་བ་གཉིས་ཡིན་ནོ། །དེ་བཞིན་ཁོ་ནར་སྙིང་གའི་ཆུ་སྐྱེས་སུ་ཐུབ་དཀའ་བ་དང་མངོན་དུ་གྱུར་པའི་ས་གཉིས་སོ། །ཞེས་སོགས་གསུངས་པ་དང་འགལ་བའི་ཕྱིར་རོ། །ཡང་མཁས་པའི་གསུང་རབ་རྒྱུད་གསུམ་གསང་བ་རྣམ་འབྱེད་ཀྱི་དགོངས་པ་བཙལ་ན། མི་འགྱུར་བའི་བདེ་བ་ཉི་ཁྲི་ཆིག་སྟོང་དྲུག་བརྒྱ་རྫོགས་ཏེ་སྦྱོར་བ་བཅུ་གཉིས་ཀྱི་རླུང་འགགས་ནས་ཡེ་ཤེས་ཀྱི་སྐུ་འགྲུབ་ལ། དེའི་སྔོན་མི་འགྲུབ་པས། ཡེ་ཤེས་ཀྱི་སྐུ་དེ་ཡང་ཕ་རོལ་ཏུ་ཕྱིན་པའི་དབང་དུ་བྱས་ན་ས་དང་པོའི་ཐོག་མ་ནས་བཞེད་པར་མངོན། གལ་ཏེ་དེ་ལྟར་ཡིན་ན། ས་བཅུའི་དབང་ཕྱུག་ཕྱག་ན་རྡོ་རྗེ་ཡང་ས་དང་པོ་རབ་ཏུ་དགའ་བ་མ་ཐོབ་པར་ཐལ་བས་ཧ་ཅང་ཐལ་བར་འགྱུར་རོ། །ཕྱག་ན་རྡོ་རྗེ་ལས་རླུང་སུམ་སྟོང་དྲུག་བརྒྱ་འཕོ་བའི་དུས་སྦྱོར་གཉིས་མ་འགགས་པར་འགྲེལ་ཆེན་ལས་གསལ་བར་གསུངས་པའི་ཕྱིར་རོ། །འཇིག་རྟེན་ཁམས་ལེའི་མདོར་བསྡུས་གཉིས་པ་ལས། ནགས་ཀྱི་རི་དྭགས་ཀྱི་བདག་པོ་ཞེས་པ་བཞིན་དུ་རོལ་ལྡན་ན་གནས་པ་གནོད་སྦྱིན་ཆེན་པོ་རྣམས་ཀྱི་བདག་པོ་འདམ་ནང་དུ་ནི་རོ་ཞེས་པ་དབུགས་འབྱུང་བ་དང་འཇུག་པ་སུམ་སྟོང་དྲུག་བརྒྱའི་དམན་པའི་ཉི་ཁྲི་ཆིག་སྟོང་དྲུག་བརྒྱ་རྣམས་འགགས་པའོ། །དེ་འདི་ལ་ཡོད་པ་ནི། ཆོས་ཀྱི་སྤྲིན་གྱི་ས་སྟེ་དེ་ལ་གནས་པ་ནི་རོ་ལྡན་ན་གནས་པའོ། །ཞེས་གསུངས་པའོ། ཟུར་ལུགས་སྔ་ཕྱིའི་སྐབས། ཕྱིས་ཀྱི་བཀའ་སྡེ་ཟུར་བའི་ལུགས་ལ་དེ་ལྟར་རྣམ་སྨིན་པ་དེས་ཚེ་འདིར་རྒྱ་ཆེན་གྲུབ་པ་ཞིག་ཡོད་ན་ནི། དེ་འདྲ་དེས་རགས་ལུས་ཀྱི་སྟེང་ནས་རྒྱ་ཆེན་འགྲུབ་པས། འོ་ན་ཁྱོད་ཀྱིས་རྣམ་སྨིན་པ་ཡིན་ན་འཆི་དུས་ཀྱི་ཤིན་ཏུ་ཕྲ་བའི་རླུང་དེ་སྒྱུ་ལུས་སུ་བཞེངས་ཏེ་བར་དོར་རྒྱ་ཆེན་འགྲུབ་དགོས་ཀྱིས་ཁྱབ་པས་སྒྱུ་ལུས་ཀྱི་རྟེན་ལ་རྒྱ་ཆེན་འགྲུབ་པ་ཡིན་པས་རགས༵་ལུས༵་འདི༵་རྒྱ༵་ཆེན༵་དུ༵་འཁྱེར༵་བ༵་མེད༵་པས༵་ལྷག་བཅས་ལྷག་མེད་ཀྱི་རྣམ་བཞག་མཛད་པ་དང་དངོས་སུ་འགལ་ཞིང་ཞེས་སོ། ། དཔལ་སྤྲུལ་རིན་པོ་ཆེས། རྒྱ་མིག་ནི་ཐེལ་ཚེའི་ངོའི་རི་མོ་དང་། རྒྱ་ས་ནིི་ལ་ཆ་སོགས་རྒྱ་འདེབས་ས་དེ་ཡིན་ནོ། །རྒྱ་མིག་རྒྱ་ས་ཇི་བཞིན་དུ། །ཕྱག་རྒྱ་ཐོབ་ལ་མ་རག་པ། །ཞེས་པ་ནི། དཔེར་ན་རྒྱ་མིག་དེ་བསྐོས་ཕོར་རི་མོ་ཇི་ལྟར་ཡོད་པ་དེ་རྒྱ་ས་འཇིམ་པ་ལ་བཏབ་པའི་ཚེ་ལེགས་པར་དོད་ཡོད་ཀྱང་བརྐོས་ཕོར་ནས་མ་བྱུང་བར་དུ་མངོན་དུ་མི་སྣང་བ་ལྟར་སྔགས་བླ་མེད་ཀྱི་སྦྱོར་ལམ་པ་དེ་འཆི་བའི་འོད་གསལ་གྱི་ཚེ་སྔགས་ཀྱི་མཐོང་ལམ་གྲུབ་པ་མཉམ་བཞག་གི་ཚེ་སེམས་དོན་དམ་འོད་གསལ་གྱི་ལྷ་སྐུ་གྲུབ་ཏེ་ཉོན་སྒྲིབ་སྤངས་ནས་ལུས་ཡི་དམ་ལྷའི་ཟུང་འཇུག་གི་སྐུར་མངོན་དུ་གྱུར་མ་རག་ཡོད་ཀྱང་དངོས་སུ་གྲུབ་པ་མེད་ལ། འོད་གསལ་དེ་རྣམ་སྨིན་གྱི་ལུས་ལས་ལྡང་བ་ན་ཟུང་འཇུག་གི་སྐུ་དེ་མངོན་དུ་གྲུབ་པ་ཡིན་ནོ། །ཞེས་སོ། ། འབྲས་རྒྱུད་ཀྱི་བླ་མེད་ཁོ་ན་ལ་གྲགས་པའི་ཁ་སྦྱོར་ཡན་ལག་བདུན་སྐབས། མི་ཕམ་རིན་པོ་ཆེའི་ཤན་འབྱེད་ལས། ངོ་བོ་ཉིད་སྐུ་དེ་ནི་རྣམ་ཀུན་མཆོག་ལྡན་གྱི་སྟོང་ཉིད་དག་པ་གཉིས་ལྡན་པས་དེའི་མཁྱེན་ཆ་ཡེ་ཤེས་ཆོས་སྐུ། གཟུགས་སྐུ་རྣམ་གཉིས་ཉི་མ་དང་འོད་ཟེར་བཞིན་དུ་འདུ་འབྲལ་མེད་པ་ཡིན་པས་གཟུགས་སྐུའི་དབང་དུ་བྱས་ན་ལོངས་སྐུ་ངེས་པ་ལྔ་ལྡན་གྱི་བདག་ཉིད་རྡོ་རྗེ་སེམས་དཔའི་སོགས་ཁ་སྦྱོར་བདུན་གྱི་བདག་ཉིད་ཡོད་པར་ཁས་ལེན་དགོས་ཏེ། ཁ་སྦྱོར་བདུན་ནི། ངག་དབང་གྲགས་པས། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་འཆད་དང་འགོག་པ་མེད། ཅེས་གསུངས། འོག་མིན་དུ་ས་བཅུ་བའི་བྱང་སེམས་ལ་ཆོས་ཀྱི་ལོངས་སྤྱོད་རྫོགས་པར་མཛད་པ་དང་། ཡེ་ཤེས་ཀྱི་རང་བཞིན་ཅན་གྱི་མཚན་དཔེའི་སྐུ་རང་གི་བཙུན་མོ་དང་ཁ་སྦྱོར་དུ་བཞུགས་པ་དང་། ཟག་མེད་ཀྱི་བདེ་བ་ཆེན་པོས་རྒྱུད་ཡོངས་སུ་གང་བ་དང་། རང་བཞིན་གྱི་ངོ་བོ་ཉིད་མེད་པ་དང་། སྙིང་རྗེས་ཡོངས་སུ་གང་བས་སེམས་ཅན་གྱི་དོན་མཛད་པ་དང་། དེའི་མཛད་པ་ནམ་མཁའ་ཇི་སྲིད་དུ་རྒྱུན་མི་འཆད་པ་དང་། འགོག་པ་མེད་པ་མི་གནས་ཀྱི་མྱང་འདས་སོ། །དེ་ལྟར་ཡང་བཙུན་མོའི་བདེ་བ་དང་ལྡན་པ་སོགས་རྒྱུད་རང་མཚན་པའི་ཆགས་སྤྱོད་སྨད་པའི་ཚུལ་ཅན་མ་ཡིན་ཏེ། སྐུ་རྣམ་པ་ཐམས་ཅད་པར་འཆར་བའི་བྱེ་བྲག་འཁོར་འདས་ཀྱི་ཆོས་ཀུན་ལ་བདག་པོ་ཆེན་པོའི་ཚུལ་དུ་མངའ་དབང་བསྒྱུར་བའི་ཟག་མེད་ཀྱི་བདེ་བ་ཆེན་པོ་ལ་མངའ་དབང་འབྱོར་བ་ཡིན་པས། འབྲས་ཆོས་ཉེར་ལྔ་ལྷུན་གྱིས་གྲུབ་པ་ཡིན་ནོ། །སྤྱན་སོགས་སྐྱེ་མཆེད་དྲུག་ལྡན་གྱི་སྐུ་མཚན་དཔེ་བཞིན་ལེགས་ཏུ་སྣང་ཡང་མིག་སོགས་ལ་བདག་གིར་འཛིན་པ་སོགས་ཡོད་མི་དགོས་ལ། ཡུམ་དང་གདན་ཁྲི་གཞལ་ཡས་སོགས་འདོད་ཡོན་གྱི་རྣམ་པ་ཐམས་ཅད་དེ་བཞིན་ཏེ། སྤྲོལ་བྲལ་དོན་གསལ་ཆེན་པོའི་རྒྱུད་ལས། སྐུ་མདོག་ཕྱག་མཚན་གདན་ཁྲི་ལ་སོགས་པ། །སྣང་ཡང་ཡང་དག་དོན་དུ་གྲུབ་པ་མེད། །ཆོས་སྐུའི་ཡོན་ཏན་ཙམ་དུ་སྣང་བ་ཡིན། །རྩལ་མདང་མ་འགགས་ཆ་ཙམ་ཤར་བ་ཡིན། །མཁྱེན་པའི་ཤེས་རབ་ཙམ་ལས་གསལ་བ་ཡིན། །ཞེས་གསུངས། སྐུ་ལ་ཆེ་ཆུང་གི་ཚད་དུ་སྣང་ཡང་གང་ཡང་ཁྱབ་པའི་ཆུ་ཟླ་ལྟ་བུ་ལ་རྡུལ་ཕྲན་གྱི་ཚད་བསགས་པ་མེད་པ་སོགས་ཤེས་པར་བྱའོ། །སངས་རྒྱས་ཀྱི་སྐུ་ལ་རིས་སུ་ཕྱེ་བའི་རྒྱུད་རང་མཚན་མེད་ཀྱང་དག་པའི་གདུལ་བྱར་སྣང་བའི་ལོངས་སྐུ་དེ་ཡང་སངས་རྒྱས་ཡིན་པ་དང་། ཁ་སྦྱོར་བདུན་ལྡན་དུ་ཁས་ལེན་པ་ལ་སྐྱོན་གང་ཡང་མེད་དེ། རྒྱུད་སྡེ་ཆེན་པོ་རྣམས་ཀྱི་དགོངས་པ་རྣམ་དག་ཡིན་ནོ། །དེར་མ་ཟད་སྤྲུལ་པའི་སྐུ་ལའང་། ཀུན་མཁྱེན་ཆེན་པོའི་ཚིག་དོན་མཛོད་དུ། གདུལ་བྱའི་ངོར་སྣང་བའི་སྤྲུལ་བའི་སྐུ་དེ་ཡང་བེམ་སྟོང་གཟུགས་བརྙན་ལྟ་བུ་མ་ཡིན་པར་ཡེ་ཤེས་གཉིས་ཀྱིས་འགྲོ་བའི་དོན་ལྷུན་གྲུབ་ཏུ་མཛད་པ་སྟེ། ཞེས་སོགས་གསུངས་པ་ལྟར་ཡེ་ཤེས་ཡོད་པ་དང་སངས་རྒྱས་ཡིན་པར་ཁས་ལེན་དགོས་ཀྱི་དེ་སངས་རྒྱས་མིན་པ་དང་ཡེ་ཤེས་མེད་པར་ནམ་ཡང་སྐུར་བ་འདེབས་མི་རུང་ངོ་། །མདོར་ན། ཐལ་འགྱུར་ལས། ཐ་དད་རང་བཞིན་འགྱུར་བ་མེད། །དེ་ཕྱིར་སྐུ་ལྔའི་ཡེ་ཤེས་ཏེ། །སྐུ་དང་ཡེ་ཤེས་འདུ་འབྲལ་མེད། །དོན་ལ་དེ་བཞིན་གནས་པའོ། །ཞེས་སོ། ། ཞལ་རྒྱུན་ལ། གསུང་ལྔའི་ནང་ཚན་གནས་ལུགས་ལ་མཉམ་པར་བཞག་པ་ཉིད་གསུང་ལྔའི་ནང་ཚན་གྱི་ཆོས་སྐུའི་གསུང་ཞེས་བཏགས་པའོ། །ཐུགས་ལྔ་རགས་ཕྲའི་སྒོ་ནས་སྐུ་ལྔའི་ཐུགས་སུ་སྦྱོར་ཞེས་གསུངས། ཡེ་ཤེ༵ས་ཀུན༵་མཁྱེན༵་ལྟ༵་བ༵་དགུ༵་ཞེས་པ་རྣམས་ཀྱི་དོན་ནི། ཟུར་འདེབས་ལས། ཆོས་ཉིད་བདེན་པ་དབྱེར་མེད་མཉམ་པ་ཉིད་ཀྱི་ངང་ལ་མི་སྐྲག་པའི་བཟོད་པ་ཐོབ་པ། ཆོས་ཉིད་བདེན་པ་དབྱེར་མེད་ཀྱི་རང་རིག་པའི་མངོན་སུམ་དུ་སྒྲོ་འདོགས་པ་དང་བྲལ་བར་བྱས་ལ་ཡིད་ཆེས་གདེངས་ཤེས་རབ་སྟེ་རྒྱུ་ཤེས་པའི་མཚན་ཉིད་ལྟ་བ། སྣང་བའི་རྣམ་པ་ཀུན་མ་སྤངས་བར་ལྡན་པ་རྣམ་པ་ཀུན་གྱི་མཆོག་ལྡན་གྱི་སྟོང་པ་ཆེན་པོའི་དོན་དེ་མཐོང་ཞིང་གོ་བའི་ངང་ལས་གནས་པ་དེ་སྟོང་པ་ཆེན་པོའི་ལྟ་བ་དང་། ཡུལ་ཡུལ་ཅན་གཉིས་མེད་པ་རང་རིག་པའི་སྙིང་རྗེ་ཆེན་པོའི་ཏིང་ངེ་འཛིན་གྱི། ཡེ་ཤེས་སྒྱུ་མའི་ངོ་བོར་ཤར་བ་ནི་ཀུན་སྣང་གི་ཏིང་ངེ་འཛིན་སྙིང་རྗེ་ཆེན་པོའི་ལྟ་བ་དང་། འབྲས་བུ་ཡི་དམ་ལྷ་གཅིག་སྣང་སྟོང་གཉིས་མེད་དུ་གསལ་བ་ཕྱག་རྒྱ་གཅིག་པའི་ལྟ་བ་དང་། རྟོག་ཚོགས་ཐམས་ཅད་ལྷ་དུ་མའི་དཀྱིལ་འཁོར་དུ་གསལ་བར་རྟོགས་པ་ཕྱག་རྒྱ་སྤྲོས་པའི་ལྟ་བ་དང་། བར་ཆད་མེད་པའི་ལམ་དུ་ཡོ་བྱད་ལྔ་སྣང་ལ་རང་བཞིན་མེད་པར་སྤྱད་པས་བསོད་ནམས་དང་ཡེ་ཤེས་ཀྱི་ཚོགས་ཆེན་གཉིས་རྫོགས་པ་མཐོང་བ་སྦྱོར་ལམ་ཚོགས་སྒྲུབ་པའི་ལྟ་བ་དང་། དོན་ལ་ལུས་སྣང་སེམས་གསུམ་༼ཟད་པ་གསུམ་ཡིན་ནམ་གསུངས་༽མངོན་དུ་བྱས་ཤིང་རྟག་པར་ཚེ་ལ་རང་དབང་བསྒྱུར་བ་མཐོང་ལམ་ཚེ་དབང་གི་ལྟ་བ་དང་། དགོངས་པ་མཉམ་པ་ཉིད་ཀྱི་དོན་ལ་མི་གཡོ་བ་སྒོམ་ལམ་ཕྱག་རྒྱ་ཆེན་པོའི་ལྟ་བ་དང་། དགའ་བ་བཅུ་དྲུག་ཡེ་ཤེས་ལྔ་ཡི་ལམ་དུ་ཀུན་མཁྱེན་པ་ལྷུན་གྲུབ་རིག་འཛིན་གྱི་ལྟ་བ་སྟེ་དགུའོ། ཞེས་སོ། །གསུང་རྒྱུན་ལས། དད་བརྩོན་གྱི་སྤྱོད་པ་བདུན་གྱི་དང་པོ་ནི། མི་ཕམ་རིན་པོ་ཆེའི་བཀའ་བརྒྱད་ཀྱི་རྣམ་བཤད་དངོས་གྲུབ་སྙིང་པོ་ལས། གསང་སྔགས་ཀྱི་བསླབ་པའི་མཐའ་བཅུ་འམ་དྲུག་ཏུ་འདུ་སྟེ། རྒྱུད་ཐོས་པས་གྲོལ། སྒོམ་ཀུན་ནས་སྡུད། མདོ་གཅིག་ཏུ་བསྡུས། མཁས་པའི་ཕུལ་ཏུ་ཕྱིན་པར་བསླབ་པ་བཞིས་སྒྲོ་འདོགས་གཅད་པར་བྱ་སྟེ། ཐོག་མར་རྒྱུད་ལ་མན་ངག་གི་དོན་ཟབ་མོ་མ་ཐོས་ན་བླང་དོར་གྱི་དམིགས་མི་འབྱེད་པས་རྒྱུད་ཐོས་པས་གྲོལ་བ་རྟ་ཕོ་སྒྲོག་བཀྲོལ་བ་ལྟ་བུ་གཞིར་བཞག །དེ་ཡང་ཐོས་པ་ཉུང་ངུས་ཤེས་རབ་རྒྱ་ཆེན་པོ་གྲོལ་བར་མི་ནུས་པས་ཐོས་པའི་སྒོ་མང་དུ་བཙལ་ཏེ། སྒོ་ཀུན་ནས་སྡུད་པ་བུང་བ་ཚང་ཚོལ་བ་ལྟ་བུས་མང་ཏུ་ཐོས་པར་བྱ། མང་དུ་ཐོས་ཀྱང་ལག་ལེན་གནད་དུ་མ་ཁེལ་ན་རང་རྒྱུད་མི་གྲོལ་བས་མཐར་ཐུག་པའི་མན་ངག་གི་གནད་ཟབ་མོ་ཉམས་འོག་ཏུ་ཆུད་པར་བྱས་ནས་མདོ་གཅིག་ཏུ་སྡུད་པ་ཚོང་པ་ཁེ་ཚོལ་བ་ལྟ་བུས་དོན་གནད་ཕོག་པར་བྱ། དེ་ལྟར་བྱས་ནས་ཐོས་པས་རྒྱུད་ཀྱི་དོན་ཤེས། ལུང་གིས་རྒྱུད་དོན་ཉམས་སུ་བླང་། མན་ངག་གིས་ཡིད་ཆེས་ནས་ཐེ་ཚོམ་མེད་པའི་གདེངས་དང་ལྡན་པར་བསླབ་པའི་སྒོ་ནས་མཁས་པའི་ཕུལ་ཏུ་ཕྱིན་པ་རི་མཐོན་པོའི་རྩེར་ཕྱིན་པ་ལྟ་བུ་ཞིག་བྱ་སྟེ། དེ་བཞི་ནི་གསང་སྔགས་ལ་བསླབ་པའི་ཚུལ་ལོ། །དེ་བཞིའི་སྟེང་དུ་བསླབ་བྱའི་ཡུལ་གྱིས་ཆ་ནས་བསླབ་པའི་མཐའ་དྲུག་ཏུ་གསུངས་བ་བསྣན་ནས་བསླབ་པའི་མཐའ་བཅུར་བཞེད་དོ། །དེ་ལ་བསླབ་པའི་མཐའ་དྲུག་གང་ཞེ་ན། རིམ་པ་དབང་གིས་བསྒྲོད། གཞི་དམ་ཚིག་གིས་བཟུང་། ཐག་ལྟ་བས་གཅོད། ཉམས་སུ་ཏིང་ངེ་འཛིན་གྱིས་བླང་། ལ་སྤྱོད་པས་དོར། དོན་མན་ངག་གིས་སྒྲུབ་པ་སྟེ་དྲུག་གོ །དེ་ལ་རིམ་པ་དབང་གིས་བསྒྲོད་པ་ནི། གསང་སྔགས་གྱི་དབང་ཐོབ་པ་དང་གསང་བའི་དབང་ཐོབ་ནས་ཉོན་མོངས་པས་མི་བརྫི་བའི་ལས་ཅན་དུ་གྱུར་པ་རྒྱལ་བུས་རྒྱལ་ས་ཟིན་པ་ལྟ་བུའོ། །གཞི་དམ་ཚིག་གིས་བཟུང་བ་ནི་བླ་མ་མཉེས་པར་བྱས་ལ་ཇི་སྐད་གསུངས་པའི་དམ་ཚིག་ལས་མི་འདའ་བ་ཞིང་ས་གཤིན་པོ་ལྟ་བུ་དངོས་གྲུབ་ཀྱི་ལོ་ཏོག་སྐྱེ་རུང་བའི་ལས་ཅན་ནོ། །ཐག་ལྟ་བས་བཅད་པ་ནི་འཁོར་འདས་ཀྱི་ཆོས་ཐམས་ཅད་རང་གི་སེམས་སུ་འདུ་ལ་སེམས་ཡེ་ནས་སངས་རྒྱས་པ་རང་བྱུང་གི་ཡེ་ཤེས་སུ་རྟོགས་ནས་བྱ་རྩོལ་རེ་དོགས་བྲལ་ཏེ་བག་ཡངས་སུ་རྒྱུ་བ་ཁྱུང་ནམ་མཁའ་ལ་ལྡིང་བ་ལྟ་བུའོ། །ཉམས་སུ་ཏིང་ངེ་འཛིན་གྱིས་བླང་བ་ནི་ཤེས་རབ་ཀྱིས་དམིགས་པའི་དོན་ལ་ཏིང་ངེ་འཛིན་གྱིས་གཡེང་བ་མེད་པར་རྩེ་གཅིག་ཏུ་བྱས་པ་ནོར་བུ་རིན་པོ་ཆེ་ལེན་པ་ལྟ་བུའོ། །ལ་སྤྱོད་པས་དོར་བ་ནི་མཉམ་བཞག་སྐབས་བྱ་བའི་ལས་ཐམས་ཅད་སྤངས་ནས་སྒོམ་པའི་ལས་ལ་འཇུག་པ་དང་། རྗེས་ཐོབ་ཏུ་བླང་དོར་མེད་པ་མཉམ་པ་ཉིད་ཀྱི་ལྟ་བ་ཟབ་མོ་དང་མཐུན་པར་འཇིགས་མེད་ཏུ་རྒྱུ་ཞིང་ཕྲིན་ལས་སྣ་ཚོགས་ལ་ཇི་ལྟར་འདོད་པ་བཞིན་འཇུག་པ་གླང་པོ་ཆེ་ཆུར་འཇུག་པ་ལྟ་བུའོ། །དོན་མན་ངག་གིས་སྒྲུབ་པ་ནི་གང་ཆེད་དུ་བསྒྲུབ་པའི་དོན་ལ་གནད་དུ་འབྱོར་བའི་མན་ངག་གིས་ཐེ་ཚོམ་ཆོད་པས་གདེངས་དང་ལྡན་པར་སྒྲུབ་པ་ཉམས་སུ་བླངས་བས། ཏིང་ངེ་འཛིན་ཐོབ་པའི་དུས་ན་བདུད་བཞི་ཆོམ་ནས་སྐུ་གསུམ་ཐོབ་པ་རིན་པོ་ཆེ་ཉོས་པ་ལྟ་བུའོ། །དེ་ལྟར་མཐའ་དྲུག་ལ་བསླབ་ཅིང་ཤེར་ཏིང་གི་ཡོ་བྱད་གཉིས་ལ་ལོངས་སྤྱོད་པ་ནི་རྣལ་འབྱོར་གྱི་དབང་ཕྱུག་ཆེན་པོའོ། །ཞེས་སོ། ༈ །རིག་འཛིན་བཞིའི་སྤྱོད་པ་གསང་བདག་ཞལ་ལུང་ན་གསལ་ལོ། །འགྲེལ༵་ཆུང༵་ལས་དཀྱིལ་འཁོར་བཅུ་གཉིས་བཤད༵་པ༵། ཞེས་པ་ནི། འགྲེལ་ཆུང་ལས། དཀྱིལ་འཁོར་རྣམ་པ་བཅུ་གཉིས་ཏེ། །དེ་བཞིན་ཉིད་དང་རང་བཞིན་དང་། །ཐུགས་རྗེ་འདུལ་བའི་དཀྱིལ་འཁོར་དང་། །ཏིང་ངེ་འཛིན་དང་གཟུགས་བརྙན་དང་། །ལྷག་པའི་ཏིང་འཛིན་གཟུགས་བརྙན་དང་། །བྱང་ཆུབ་སེམས་དང་ལྷག་བྱང་སེམས། །ཚོགས་དང་ལྷུན་གྲུབ་དཀྱིལ་འཁོར་རོ། །ཞེས་སོ། ། ༈ དོན་དམ་པའི་གཟུགས་བརྙན་སོགས་ནས་རྣམ་པར་ཤར་བའོ། །ཞེས་པ་འདིར་ལྷ་རྗེ་མདའ་ཏིག་དོན་དམ་པའི་གཟུགས་བརྙན་ཀུན་རྫོབ་ལྷའི་དཀྱིལ་འཁོར་དུ་འབྱུང་བ་ལ་བཞེད། ལྷ་རྗེ་གླན་སྟོན་རྣམ་རྟོག་ཕྲ་རགས་ཀྱི་ལྷ་ཡབ་ཡུམ་དུ་མཚོན་པ་དེའོ་གསུངས། ཉང་ཊིཀ་པ་ནི། སྔ་མའི་བཞེད་པ་དེ་གཉིས་ཆར་ཡང་། འོག་མིན་ན་བཞུགས་པ་དང་། འདི་ལྟར་བསྒོམས་པས་གསལ་བ་གཉིས་འདྲ་བའི་ཕྱིར་གཟུགས་བརྙན་ནོ་གསུངས། དེ་གསུམ་ལུང་ནི་མཐུན་པར། རྒྱས་པ་ལས། གཟུགས་བརྙན་དཀྱིལ་འཁོར་ཡང་དག་ནི། །ཆེན་པོ་རིག་པ་ཐབས་སུ་རྟོགས། །སོ་སོའི་མཚན་ཉིད་ཤེས་རབ་རྟོགས། །གཉིས་གཉིས་འབྲེལ་བ་ཐབས་ཆེན་ཡིན། །ཞེས་སོ། ། ཞལ་རྒྱུན་དུ། རྟོག་པ་རྣམས་ལྷའི་དཀྱིལ་འཁོར་དུ་སྒོམ་པ་ལ་སྦྱོར་རོ། ས་བརྟགས། ས་བསླང་སོགས་ཞལ་ལུང་༢༣༩་ན་གསལ་བས་ཤེས་པར་འདོད་ན་དེ་ལས་རྟོགས་པར་བྱའོ། །གྲ༵ལ་ཚུལ༵་གྱི༵་ཕྱག༵་སོགས་ཀྱང་དེར་གསལ་ལོ། ༈ །རྡོ་རྗེ་ཕུར་བའི་ལུགས་དང་། བཀའ་བརྒྱད་བདེར་འདུས་ཀྱི་ལུགས་དང་། སྒྱུ་འཕྲུལ་གྱི་ལུགས་རྣམས་ལས་སྐབས་འདིར་སྒྱུ་འཕྲུལ་གྱི་ལུགས་ཡིན་ལ། བདག་སྲས་གཞན་སྲས༵་ཐམས་ཅད་རྒྱ་མཚོའི་ལུང་དོན། རྒྱུ་དང་རྐྱེན་སོགས་ཀྱིས་གསར་དུ་བསྐྱེད་པ་ལྟ་བུ་མིན་པས་རང༵་བྱུང༵་ཡེ་ཤེས་གཤིས་ཀྱི་བཞུགས་ཚུལ་སངས་རྒྱས་ཀྱི་བདག་ཉིད་ཅན་དེའི་ཡིན་ལུགས་དངོས༵་དང༵་མི་འགལ༵་ཞིང༵་མཐུན་པའི་འབྲས༵་བུ༵་ཉིད༵་ལ༵་ལམ་དུ་ཤེས་ཏེ། དེ་ཡང་ད་ལྟ་ནས་སད་པར་མོས་པས། རྟེན་བརྟེན་པ་མ༵་ལུས༵་པའི་དཀྱིལ་འཁོར་གྱི་ཐིག༵་ལེ༵་སྟེ་གྲ་ཟུར་མེད་བཞིན་དུ་འབྲས་བུའི་སྐབས་ཀྱི་ལྷ་རྣམས་ཐམས་ཅད་བདག༷་གཉུག་མའི་འོད་གསལ་གྱི༵་སྲས་སུ་བསྒོམ༵་པར་བྱའོ། །འདིར་བདག་གཞན་ཞེས་པ། བདག་དྲི་བཅས་ཀྱི་འོད་གསལ་ཉིད་བསྐྱེད་གཞིར་བཟུང་ནས། གཞན་འབྲས་དུས་ཀྱི་ལྷ་ཞེས་གཉིས་ཀྱི་རྣམ་པར་བསྐྱེད་པ་ནི་བདག་གི་སྲས་སུ་གཞན་བྱ་བ་ཞེས་པ་ཡིན་ལ། དེ་ལྟར་བསྒོམ་པའི་དགོས་པ་གཞིའི་ཡོན་ཏན་རྣམ་པར་སད་བྱེད་ཀྱི་ཐབས་འབྲས་བུ་ལམ་བྱེད་ལ་གོམས་པས། ཡོན་ཏན་ཐམས་ཅད་སད་དེ་འབྲས་བུ་མཐར་ཐུག་པ་ཐོབ་པའི་ཕྱིར་ནའོ། །གཉིས་པ། རྣམ་སྨིན་གྱི་ཆ་འཛིན་པ་གང་གིས་རང་སྣང་ཡེ་ཤེས་ཀྱི་ལྷ་གང༵་ལ༵་ཤར་སྒོ་ནས་ལུས་རྟོག་སྦྱང་བར་གསོལ༵་བ་བཏབ༵་པས༵། ལྷ་རྣམས་ཀྱི་ཐུགས༵་རྗེའི༵་བྱིན་རླབས་ཀྱིས་ལུས་རྟོག་སྦྱང་བར་བྱས༵་ནས༵་ཧཱུྃ་ཡིག་ཏུ་བསྒྱུར་བ་ཐུགས་ཀ་ནས་བྱང་སེམས་ཀྱི་ངོ་བོར་འོད་དུ་ཞུ་ནས་དེ་དང་འདྲེས༵་ནས༵་ཡབ་ཡུམ་གཙོ་འཁོར་བདེ་ཆེན་ངང་དུ་འོད་དུ་ཞུ་ནས་ཐམས་ཅད་དབྱེར༵་མེད༵་པ་དེ་དག་གི་སྲས༵་སུ་བདག་ཉིད་གྱུར་༵བ་ལ་དགོངས༷་པ༵་གཅིག་ལ་གནས་པར་བསྒོམ་དགོས་ཞེས་དང་། ཀུན་ཏུ་རྟོག༵་པའི༵་གཤིས་ཡེ༵་ཤེས༵་འོད༵་གསལ་ལས་མཐར་ཐུག་གི་འབྲས་རྒྱུད་འབྱུང་བའམ་མངོན་དུ་གྱུར་དགོས་པ་ལ། དེ་འབྱུང་བ་ལ་ད་ལྟར་ལམ༵་སྒོམ་པ་དང་༵། དེ་ཡང་བདག་སྲས་གཞན་སྲས་གང་ཡིན་ཀྱང་འབྲས༵་བུ༵་ལམ་བྱེད་དུ་སོང་བའི་ཁྱད༵་པར༵་ལས་མྱུར་ལམ་ཟབ་མོའི་བྱིན་རླབས་སམ་དེའི་མཐུས་འབྲས་བུ་ཟུང་འཇུག་གི་གོ་འཕང་དང་དངོས་སུ་འབྲེལ༵་བ་ཡིན་པས༵། དེས་ན་འོད་གསལ་གྱི་བསྐྱེད་གཞིར་བྱས་པ་ལས་བྱུང་བའི་གཞན་ལྷ་ཞེ་གཉིས་ཀྱིས་བདེ༵་བར༵་གཤེགས༵་པའི༵་སྲས༵་ཀྱི་ཚོགས་ཀྱི་ངོ་བོར་བདག་བསྒོམ་པར་བྱའོ། །ཞེས་སོ། །ཡང་ན་རྟོག༵་པ༵་ཀུན་རྟོག་དེའི་གཤིས་ལུགས་གཉུག་མ་ཡེ་༵ཤེས༵་ཡིན་པས་དེ་ཡི་བསྒྲུབ་གཞི་བྱས་ནས་སྔགས་བླ་མེད་ཀྱི་ལམ་ཐམས་ཅད་བྱུང་བས་འོད༵་ལས༵་བྱུང༵་། འབྱུང་ལུགས་ནི་གཞི་ཡེ་ཤེས་ལམ༵་དུས་སྐུ་གསུམ་གྱི་ངོ་བོར་བསྐྱེད་ཅིང་། འབྲས༵་བུ༵་སྐུ་གསུམ་དང་རྣམ་མཐུན་དུ་བསྒོམ་པའི་ཁྱད༵་པར་༵ལས་༵དེས་བྱིན༵་རླབས་ཀྱི་མཐུ་ལས་མཐར་ཐུག་འབྲས༵་བུ༵་དང་ལམ་གཞན་བརྒྱུད་པ་ལ་མི་ལྟོས་པར་དངོས༵་སུ་འབྲེལ༵་བར་བྱེད་པའི༵་གནད་ཀྱིས་བདེ་བར་གཤེགས་པ༵་རྒྱལ་བ་རྣམས་ཀྱི་སྲས་༵སུ་བདག་རྟོག་ཚོགས་རྣམས་བསྒོམ་མོ། །ཞེས་པ་ཞལ་རྒྱུན་ཡིན་ངེས་ཡིན་ནོ། །བཞུགས་༵ཚུལ༵་ལྷ༵་གནས༵་སོགས་ཞལ་ལུང་༢༥༠ན་ཡོད། དྲུག་པ་བྱང་སེམས་ཀྱི་དཀྱིལ་འཁོར་ཐད། རྩ་བའི་རླུང་ལྔ་ནི། སྲོག་འཛིན། གྱེན་རྒྱུ། ཁྱབ་བྱེད། མེ་མཉམ། ཐུར་སེལ་དང་ལྔའོ། །བྱེད་ལས་ཀྱང་རིམ་བཞིན་སྲོག་གནས་པ་དང་། དབུགས་འབྱུང་རྔུབ་དང་། ལུས་གནས་པ་དང་། །དྲོད་འབེབས་དང་། འགྲོ་འདུག་གཤང་གཅི་ཁུ་གསུམ་འབྱིན་སྡོམ་གྱི་བྱ་བ་བྱེད་པ། གལ་ཏེ་ལོག་ན། བརྒྱལ་སྨྱོ་ཤི་བ་སོགས་དང་། སྟོད་ནད་དང་། ཕོ་བའི་ནད་དང་། སྨད་ཀྱི་ནད་རྣམས་བསྐྱེད་ཅིང་། དེ་དག་ལུས་ཀྱི་སྙིང་ག་ལྐོག་མ། ཚིགས་ཐམས་ཅད་དང་། ལྟེ་བ་གསང་གནས་རྣམས་སུ་གནས་སོ། །ཡན་ལག་གི་རླུང་ལྔ་ནི་དབང་པོ་ལ་གནས་ཤིང་བསྐྱེད་པ་སོགས་ཀྱི་བྱ་བ་བྱེད་པ་སྟེ། རྒྱུ་བའི་གནས་ནི་སྤྱན་ཡིན་ཏེ། །རྣམ་པར་རྒྱུ་བ་རྣ་བ་ལ། །ཡང་དག་རྒྱུ་བ་སྣ་དང་ནི། །རབ་ཏུ་རྒྱུ་བ་ལྕེ་ལ་གནས། །ངེས་པར་རྒྱུ་བ་ལུས་ཉིད་དེ། །ཞེས་སོ། ། ཟིན་བྲིས་ལས། རྩ་རླུང་རྟགས་བཅུ་མཁན་ཆེན་ཆོས་ཀྱི་རྒྱལ་པོའི་རི་ཆོས་ལས། ས་ཆུ་མེ་རླུང་བཞི་དབུ་མར་འདུས་པ་ལས་རིམ་པར་དུ་བ་འཚུབ་པ་དང་། ཕྱུར་ཞིང་དུད་གདངས་ཆགས་པ་ལྟ་བུ་དང་། སྨིག་རྒྱུ་ལྟར་ཤིག་ཤིག་པ་དང་། ཆུ་རྒྱུག་ཅིང་ཆར་ཟིམ་འབབ་པ་ལྟ་བུ་དང་། སྲིན་བུ་མེ་ཁྱེར་ལྟར་འོད་ཙག་ཙག་དང་། དམར་ཕྲོམ་ནམ་མཁའ་ལ་སྐྱེ་ཞིང་ཡལ་བ་དང་། འདུ་འཕྲོ་བྱེད་པ་ལྟ་བུ། མར་མེ་འབར་བ་དང་། སྒྲོན་མེའི་ཕྲེང་བ་བསྒྲིགས་པ་ལྟ་བུ་དང་། ནམ་མཁའ་ལ་རླུང་འདུ་བ་ལྟ་བུའོ། །ཉིན་ཞག་གཅིག་ལ་དབུགས་ཉི་ཁྲི་ཆིག་སྟོང་དྲུག་བརྒྱའི་དབང་དུ་བཏང་ན་དེ་འཕོ་བ་བཅུ་དྲུག་ཏུ་བྱས་ན་ཆིག་སྟོང་སུམ་བརྒྱ་ལྔ་བཅུའོ། །འདི་སྐོར་༢༧༢་ཞལ་ལུང་ན་ཡོད་ཅེས་གསུངས། དབང་སྐབས་རིན་པོ་ཆེས། འདིར་སྔགས་སྡོམ་སྐྱེ་དུས་ནི་དམ་ཚིག་བྱིན་པའི་མཇུག་ཏུ་ཡིན་ལ། བྱང་སྡོམ་ནི་ཞལ་ལུང་དུ་སྔོན་རབས་པའི་གསུང་སྒྲོས་དྲངས་བ་ལྟར་ན་དཀྱིལ་ཆོག་གི་སྔ་ལོག་ནས་བྱེད་པ་ལྟ་བུར་སྣང་ལ། ལུས་དབུལ་དགོས་པ་གསུམ་ཕྱིར་བྱེད་པའི་སྐབས་སུ་ཐོབ་རྒྱུར་བྱས་ཀྱང་རུང་སྙམ་སྟེ། དམ་ཚིག་གསུམ་བཀོད་བཞིན་ནོ། །དབང་གི་གྲངས་བཞིར་རྒྱུད་ཕྱི་མ་ལས་ཏེ། དེར་དབང་དང་པོ་ལ་བུམ་དབང་ཞེས་མ་བཤད་ཅིང་། ཉན་དབང་སོགས་ལ་མཐའ་རྟེན་ཆུ་དབང་མི་འདུག་པས་སློབ་དཔོན་གྱི་དབང་ཞེས་བྱ་སྟེ་གཙོ་བོའི་སྒོ་ནས་བཏགས་པའོ། །དབང་དེ་དཀྱིལ་འཁོར་པ་ལས་འཐོབ་པར་བྱ་དགོས་ཏེ། གཞན་དུ་དཀྱིལ་འཁོར་བཞེངས་སྒྲུབ་ཀྱང་དེར་དབང་བསྐུར་བར་འདོད་ནས་མིན་དགོས་ལ། དལ་ཀྱི་ལྷས་དགོངས་གཏད་མཛད་པའི་ཚིག་ཟིན་ཡང་ཆེར་མ་ཐོན་ཡང་། འཇུག་པའི་འོག་དབང་དངོས་གཞི་མཚམས་སྦྱོར་ན་དཀྱིལ་འཁོར་པ་ལ་མཆོད་བསྟོད་བྱས་ནས་བདག་གིས་སློབ་མ་འདི་དག་ལ་དབང་བསྐུར་བྱེད་པ་ལ་བྱིན་གྱིས་རློབས་པའི་གྲོགས་མཛོད། ཅེས་གསོལ་བ་འདེབས་པར་བཤད་པ་དེས་ཐོན་སྙམ་སྟེ། དེ་དགོངས་པ་གཏོད་ཆེད་ཡིན་པས་སོ། ། ཕན་དབང་ལ་བཅུར་ཕྱེ་བའི་རྒྱུ་མཚན་གསལ་བོར་མ་བཤད་ཀྱང་། ལེའུ་བཅུ་པར་རྒྱལ་པོ་སྦྱིན་པའི་ཏིང་ངེ་འཛིན་ཞེས་གསུངས་པ་ལྟར་ཕན་དབང་གིས་ཆོས་ཀྱི་རྒྱལ་པོའི་ཆས་སུ་བཅུག་ནས་རིགས་ལྔའི་རྒྱལ་ཐབས་ལ་དབང་བའི་རྟེན་འབྲེལ་བསྒྲིགས་ནས། ནུས་དབང་དང་ཟབ་དབང་གིས་རིམ་གྱིས་ཆོས་ཀྱི་རྒྱལ་སྲིད་ལ་དབང་བའི་ནུས་པ་དངོས་སུ་བསྐྱེད་པ་ཡིན་ལ། དེའི་ཚེ་རྒྱལ་པོ་རྣམས་ལ་རྒྱལ་པོའི་ཆེ་རྟགས་གཙོ་བོ་དབུ་རྒྱན་ཅོད་པན། རྒོལ་བས་མི་ཚུགས་པའི་གོ་ཆ། བཟའ་བཏུང་སོགས་འདོད་ཡོན། སྲིད་ན་མཐོ་བའི་རྟགས་གདུགས་སོགས་ཡོད་པ་དང་བསྟུན་ནས་བཞག་པ། དུས་འཁོར་དུ་བྱིས་པ་ལྟར་འཇུག་པའི་དབང་བདུན་ཞེས་པ་བཞིན་ནོ་སྙམ་སྟེ་དཔྱད། དབུ་རྒྱན་རིན་པོ་ཆེའི་ཁང་བུ་རིན་ཆེན་རིགས་ཀྱི་ལྷ་གནས་འཐད་པ་ནས། བཟའ་བཏུང་ལུས་བརྟས་བྱེད་ཡིན་པས་སྐུའི་རིགས་རྣམ་སྣང་གི་རབ་གནས་འཐད་པའི་བར་དུ་ཡང་དཔྱོད་ཚུལ་དགོས་འདྲ་ཡང་མི་གསལ་བས་བློ་གཟུ་བོར་འགྲོའམ་སྙམ། ཕན་དབང་དང་ཉན་སྒོམ་གྱི་དབང་རྡོ་རྗེ་སློབ་མའི་དབང་དུ་དོན་གྱིས་འགྲོ་ཡང་ཐ་སྙད་མི་བྱེད། འཆད་ཕྲིན་གྱིས་ངག་གི་ཐིག་ལེ་ལ་རྒྱུད་འཆད་པའི་བྱིན་རླབས་སྐྱེད་ཆེད་འོད་དཔག་མེད་ཀྱི་དབང་བསྐུར་ནས་གནང་བ་སྟོན་པ་དང་། ལས་ཀྱི་ཐིག་ལེ་ལ་བྱིན་གྱིས་བརླབས་ནས་ལས་རབ་འབྱམས་སྒྲུབ་པའི་མཐུ་བསྐྱེད་པའི་སྒོ་ནས་སློབ་དཔོན་དུ་འོས་པའི་གཞི་བསྒྲུབས་ཏེ། གདོད་སློབ་དཔོན་གྱི་དབང་དངོས་སྟེར་བ་ཡིན་པས་དེ་གསུམ་སློབ་དཔོན་དབང་གི་ཕྱོགས་སུ་འགྲོ་བར་བཤད། འདིའི་དབང་བཞི་པའི་ཐལ་རྒྱུད་ཀྱི་ཚིག་ན། བདེ་ཆེན་ལས་བསྒྲུབས་པའི་མཚན་དཔེ་ལ་ངོ་སྤྲད་ཡོད་པས། ཆོས་གཟུགས་ཀྱི་སྐུ་ཟུང་འཇུག་ལ་ངོ་འཕྲོད་རྒྱུ་གལ་ཆེའོ། །ཞེས་གསུངས། འདི་དག་གཞུང་ན་ཡོད་ཀྱང་དེར་མི་གསལ་བ་འདིར་གསལ་བར་བྲིས། ཆས་བཅུ་ཞེས་པ། རྒྱན་ཆས་རྟགས་ལ་བཅུ་ཡིན་ཏེ། །དབུ་རྒྱན་བུམ་པ་སྙིང་པོ་ལྔ། །ཅོད་པན་གོ་ཆ་ཕྲེང་བ་རྒྱན། །ཐོད་ཕྲེང་རྟགས་གསུམ་མེ་དཔུང་ངོ་། ། ནུས་པའི་དབང་ནི་ལྔར་ངེས་ཏེ། །ཉན་སྒོམ་འཆད་ལས་རབ་འབྱམས་དབང་། །སྒྲུབ་པའི་དབང་ལ་བཅོ་ལྔ་སྟེ། །བདུད་རྩི་ལྔ་དང་ཤ་ལྔ་དང་། །རཀྟ་རྒྱལ་མཚན་གདུགས་ཁ་ཊཾ། །ཕུར་པ་རྡོར་དྲིལ་རྔེའུ་ཆུང་། །ཡུངས་དཀར་གཟུངས་མ་ཕྲེང་བ་དང་། །ཚེ་དང་བཟའ་བཏུང་མིང་དབང་ངོ་། །ཟབ་དབང་གསུམ་སྟེ་གསང་བ་དང་། །ཤེས་རབ་ཡེ་ཤེས་བདེ་ཆེན་པོ། །ཞེས་སོ། །བྱིས་པ་ལྟར་འཇུག་པའི་དབང་བདུན་ནི། རྡོ་རྗེ་སྙིང་འགྲེལ་ལས། བྱིས་པ་སྐྱེལ་མ་རྣམས་ཀྱིས་ནི། །ཆུ་ཡིས་འཁྲུད་པའི་དབང་བསྐུར་བྱེད། །དེ་ཡི་གཙུག་ཕུད་རབ་འཇོག་པ། །ཅོད་པན་དུ་ནི་ཡོངས་སུ་བཏགས། །དེ་ཡི་རྣ་བ་འབུག་པ་སོགས། །དར་དཔྱང་དབང་བསྐུར་བྱེད་པར་བཤད། །བྱིས་པ་སྨྲ་དང་དགོད་པ་ནི། །དྲིལ་བུ་རྡོ་རྗེའི་དབང་བསྐུར་རོ། །ལྔ་པ་ལོངས་སྤྱོད་བརྟུལ་ཞུགས་ཡིན། །མིང་ནི་མིང་གིས་དབང་བསྐུར་ཡིན། །ཀློག་པ་ལ་སོགས་རྗེས་གནང་བ། །བུ་དག་གིས་ནི་རབ་ཏུ་སྟེར། །དེ་ལྟར་རྣམ་པ་བདུན་གྱིས་ནི། །དབང་བསྐུར་བདུན་དུ་རབ་ཏུ་གྲགས། །ཞེས་སོ། ། ཞལ་རྒྱུན་ལས། དབང་དུས་སུ་སྐྱེས་པའི་མས་བརྟན་དགའ་བཞི་འདི་དག་གིས་རྒྱུན་གོམས་ན། སློབ་པའི་མི་འགྱུར་བའི་བདེ་ཆེན་དང་སྟོང་གཟུགས་ཀྱི་སྐུ་དང་། མི་སློབ་རིག་འཛིན་གྱིས་སྐུ་ཐུགས་ཟུང་འཇུག་འགྲུབ་པར་ངོ་སྤྲད་དེ། དེའི་རྒྱུ་མཚན་ཡང་ད་ལྟའི་དགའ་བཞི་སྐུ་ཐུགས་ཀྱི་བདག་ཉིད་དུ་གནས་པ་ཡིན་པས། དེ་གོམས་ན་སྐུ་ཐུགས་དངོས་གནས་འགྲུབ་པར་འགྱུར་བས་ན་དེ་ལྟར་ངོ་སྤྲད་པའོ། །ཞེས་གསུངས་སོ། ། འོག་སྒོའི་རྣལ་འབྱོར་སྐབས་རིན་པོ་ཆེས། ཡས་བབ་ཀྱི་དགའ་བ་བཅུ་དྲུག་ཐེག་ཆེན་ཐུན་མོང་བའི་ས་ལམ་དང་། ཕར་ཕྱིན་བཅུར་སྦྱར་ཞིང་། མས་བརྟན་གྱི་བཅུ་དྲུག་གསང་སྔགས་ནང་གི་ས་ལམ་དང་སྦྱར་བ་ནི། རྡོ་རྗེ་ལས་རིམ་ལས། ཕ་རོལ་ཕྱིན་དང་ས་མཚན་ཉིད། །མཚུངས་ཕྱིར་རྫོགས་པར་བཤད་པ་ཡིན། །ཞེས་མཚན་ཉིད་མཚུངས་པའམ་ཆོས་མཚུངས་ཀྱི་སྒོ་ནས་ཡིན་པར་བཤད་དོ། །ཕར་ཐེག་ཏུ་ཐུན་མོང་བའི་ཕར་ཕྱིན་བཅུའི་རྟོགས་པ་གོང་དུ་འཕེལ་བའི་གནས་སྐབས་ལས་ས་བཅུ་སོགས་འཇོག་པ་བཞིན་དུ། འདིར་ས་ལམ་ཐམས་ཅད་བདེ་ཆེན་གྱི་རྟོགས་པ་དེ་ཉིད་གོང་དུ་འཕེལ་བའི་རིམ་པའི་སྟེང་ནས་འཇོག་པར་མཚོན་པ་དང་། དགའ་བ་བཅུ་དྲུག་པོ་བདེ་བའི་གནས་སྐབས་ཀྱི་ཁྱད་པར་ལས་ཕྱེ་བ་བཞིན་དུ། སྔགས་བླ་མེད་ཀྱི་ས་ལམ་རྣམ་ཀྱང་བདེ་བ་ཆེན་པོའི་རྣལ་འབྱོར་ན་འཕར་བའི་གནས་སྐབས་ཀྱིས་ཕྱེ་བ་དང་། ད་ལྟ་བདེ་བ་ན་འཕར་བའི་གནས་སྐབས་ལ་དགའ་བ་བཅུ་དྲུག་ཏུ་ཕྱེ་བ་འདི་ལྟར། མ་འོང་བར་བདེ་ཆེན་འདིའི་རྒྱུན་འཕེལ་བའི་གནས་སྐབས་རྣམས་རབ་དགའ་ལ་སོགས་པའི་ས་བཅུར་འོང་ཞེས་བཤད་ན་མུན་སེལ་གྱི་དབང་བཞི་པའི་ངོ་སྤྲོད་ཐད་དུ་འགྲིགས་མཆན། ཕྱག་རྒྱ་དང་སྙོམ་པར་འཇུག་ཐེངས་གཅིག་གིས་དགའ་བ་བཅུ་དྲུག་པོ་རྫོགས་པར་ནུས་པ་བཞིན་དུ། བདེ་ཆེན་གྱི་ལམ་ལ་བརྟེན་ན་ས་དང་ལམ་ཐམས་ཅད་ཆེས་མྱུར་བ་ཁོ་ནར་རྫོགས་པར་འགྱུར་ཞེས་མཆོག་གི་བདེ་བའི་རྣལ་འབྱོར་སྐད་ཅིག་མ་ཙམ་ཡང་ལམ་བསྒྲོད་པའི་ནུས་པ་ཕུལ་དུ་བྱུང་བར་ཤེས་ཆེད། གཉིས་སྦྱོར་གྱི་བདེ་བ་ཐུན་གཅིག་ལ་ས་བཅུ་ལམ་ལྔ་ཚང་བར་བསྒྲོད་པ་ལྟ་བུར་བསྟན་པ་སྟེ། བདེ་སྟོང་གི་ལམ་གྱི་ཆེ་བ་བསྟན་པའོ། །ཞེས་དང་། མདོར་བསྡུ་ན་དྭངས་སྙིགས་ཀྱི་སྣང་བ་ཐམས་ཅད་མི་ཤིགས་པ་གཅིག་པུའི་རྣམ་འཕྲུལ་ཡིན་ཡང་། ད་ལྟ་སྙིགས་མས་བསྐྱེད་པའི་སེམས་དང་སྣང་ཆའི་སྟེང་ནས་ཐ་མལ་བའི་ཞེན་པ་རྩལ་ཤུགས་མཆེད་དེ་འཁྲུལ་བ་ཡིན་ཞིང་། དེ་སྦྱོང་བ་ལ་དང་པོར་བསྐྱེད་རིམ་གྱིས་སེམས་དེ་ཀའི་སྟེང་ནས་སྣང་ཞེན་དེ་སྡུད་པའི་སྒོ་བཏོད་ནས། སླར་རྫོགས་རིམ་གྱིས་དྭངས་མའི་སེམས་མཐར་ཐུག་པ་གསལ་ཞིང་རྗེན་པར་ཕྱུང་སྟེ། དེའི་རང་སྣང་གི་སྟེང་ནས་དག་པའི་ཏིང་ངེ་འཛིན་སྦྱངས་ཏེ་སྒྱུ་འཕྲུལ་དྲྭ་བའི་རྒྱལ་སྲིད་འཛིན་པ་ཡིན་ནོ། །སེམས་ཅན་གྱི་ཤེས་པའི་ཆ་ཐམས་ཅད་སྙིགས་མའི་སྣང་བས་འཕྲོག་པའི་སྐབས་ནི་མི་སྲིད་དེ། གཉུག་སེམས་སྣང་བ་དེ་དང་མི་འགྲོགས་པས་སོ། །དྭངས་མའི་སྣང་བས་ནི་ཤེས་པའི་ཆ་མ་ལུས་པ་བསྒྱུར་དུ་ཡོད་དེ། སེམས་གཞན་ཐམས་ཅད་དྭངས་མའི་སྣང་བའི་རྣམ་པ་ཅན་གྱི་གཉུགས་སེམས་ཁོ་ན་ལ་བསྡུ་བའི་སྐབས་ཡོད་པའི་ཕྱིར་ཏེ། རང་བྱུང་ཀུན་ངམ་ལྷུན་གྱིས་གྲུབ། ཅེས་སོ། །དེ༵་མ༵་ཐག་རྐྱེན་དཀྱིལ་འཁོར་དུ་འཇུག་པ་ལ་སོགས་འཇུག་ཚུལ་བཅོ་བརྒྱད་བསྡུས་ནས། ཞལ་ལུང་༣༠༤་ན་ཡོད། གསང་དབང་གི་ལམ་པ་དང་བུམ་དབང་གི་ལམ་པ་འགལ་བ་སོགས་མི་བཞེད་དམ་སྙམ་ཞེས་པའི་ཐད། ཞལ་རྒྱུན་དུ། བསྐྱེད་རྫོགས་སྤེལ་མའི་སྐབས་ཀྱི་སྟོང་ཆེན་སོགས་ལ་གསང་དབང་གི་ལམ་དང་། བུམ་དབང་གི་ལམ་གཉིས་ཀ་ཡོད་དོ། །རྫོགས་རིམ་དང་བསྐྱེད་རིམ་གྱིས་བསྡུས་པའི་དེ་གཉིས་རྒྱུད་ལྡན་ཡོད་པའི་ཕྱིར། ཚོགས་སྒྲུབ་དུས་སུ་ཤེས་རབ་མ་ལ་བརྟེན་པའི་ལམ་ཡང་ཡོད་ལ། བསྐྱེད་རིམ་གྱི་ཆ་ཕྲ་མོ་ཡང་ཡོད་པས། བུམ་གསང་ཤེར་གསུམ་གྱི་ལམ་པའི་གཞི་མཐུན་ཡོད་པ་དང་། འཕགས་ལམ་དུ་གསང་ཤེར་དང་དབྱེར་མེད་བདེ་བ་ཆེན་པོའི་དབང་གི་ལམ་པ་ཡང་ཡིན་པའི་གཞི་མཐུན་ཡོད་ལ། བུམ་དབང་གི་ལམ་པ་དང་གཞི་མཐུན་མེད་དོ། །དེ་ཡིན་ན་སོ་སྐྱེས་སའི་ལམ་ཡིན་པའི་ཕྱིར། གསང་ཤེར་དབྱེར་མེད་གསུམ་གྱི་ལམ་པ་གཅིག་ཡོད་དེ། །རིམ་བཞིན་སྟེང་འོག་གི་སྒོའི་ལམ་དང་འཕགས་ལམ་རྣམ་གསུམ་གྱི་ལམ་ཡིན་པའི་ཕྱིར། ཞེས་གསུངས་སོ། ། དམ་ཚིག་ཐད། རིན་པོ་ཆེས། རྩ་བའི་དམ་ཚིག་ལྔས་རྩ་ལྟུང་སྟོན་པ་མིན་ཏེ། རིགས་ལྔའི་དམ་ཚིག་བཞིན་ཡིན་ནོ། །ཡན་ལག་ལ། ནང་དུག་ལྔའི་རྣམ་རྟོག་ཅི་ཤར་ཡང་དེ་ལ་མ་དག་པའི་སྣང་ཞེན་གྱིས་སྤོང་བསྒྱུར་གཞན་མི་བྱེད་པར་ཉོན་མོངས་པ་དེ་རང་བཞིན་གྱིས་དག་པའི་གནས་ལུགས་ཀྱི་རྣམ་འཕྲུལ་ཡིན་པའི་གནད་ཀྱིས་མི་བསྐྱོད་པ་སོགས་རིགས་ལྔའི་ཡེ་ཤེས་ཀྱི་ངོ་བོར་གདོད་ནས་དག་ཚུལ་སྔགས་བླ་མེད་སྤྱིའི་གང་ཤར་བདེ་སྟོང་དུ་ལྟ་ལུགས་བཞིན་དུ་བལྟས་ནས། གང་ཤར་གྱི་ཉོན་མོངས་ཐམས་ཅད་བདེ་ཆེན་ཡེ་ཤེས་འབར་བའི་གྲོགས་ཁོ་ནར་འཁྱེར་བ་དང་། ཕྱིའི་འཇིག་རྟེན་ན་ཤིན་ཏུ་དམེ་༼སྨད་༽བར་གྲགས་པའི་རྫས་ལྔ་ཡང་དག་པའི་རྣལ་འབྱོར་གྱིས་བདུད་རྩིར་བྱས་ནས་བདེ་ཆེན་གྱི་བཅུད་ལེན་དུ་བསྟེན་པ། ལྔ་ཚན་གཉིས་སམ་ཡང་དག་དུག་ལྔ་ནི། ལོག་པའི་དུག་ལྔ་པོ་འཁོར་འདས་སོ་སོར་མི་རྟོག་པའི་གཏི་མུག་སོགས་སུ་བལྟ་ཆེད་བཞག་གམ་དཔྱད། རྒྱུད་འདིར་ཆོས་ཐམས་ཅད་ཡེ་ནས་སངས་རྒྱས་པར་མཐོང་ཞིང་གོམས་པ་རྣལ་འབྱོར་ལམ་གྱི་སྲོག་ཏུ་ཡང་ཡང་རྩལ་བཏོན་གྱིས་སྟོན་ལ། དེའི་ཚེ་ཕྱི་རོལ་གྱི་རྫས་མ་དག་པ་ཕྱི་ས་སོགས་དང་། ནང་རྣམ་རྟོག་མ་དག་པ་དུག་ལྔ་ལྟ་བུའང་དག་པ་རབ་འབྱམས་ཀྱི་རྣལ་འབྱོར་གཅིག་པུའི་གྲོགས་སུ་འཁྱེར་བ་འདི་ཉིད་ཀྱི་སྒོས་ཀྱི་དམ་ཚིག་ཏུ་བསྟན་པས་ཀྱང་ལམ་གྱི་སྲོག་དེ་ཉིད་དང་རྣམ་པ་ཀུན་ཏུ་འབྲལ་མི་རུང་ཞེས་བསྟན་པར་ངེས་པ་རྙེད་དོ་ཞེས་གསུངས། སྤྱིར་དམ་ཚིག་གི་རྣམ་གྲངས་མཐའ་ཡས་ཀྱང་ཞེས་པ་ནི། རྒྱུད་གཞུང་སྤྱིའི་ལུགས་ཀྱི་དམ་ཚིག་སོགས་ཞལ་ལུང་ན་གསལ་ལོ། ༈ །དམ་ཚིག་བཅོ་ལྔ་ལ་དབྱེ་ཚུལ་ཞལ་ལུང་སོགས་ན་གསལ་ལོ། ། རྣལ༵་འབྱོར༵་སྤྱི་ཁྲུས་སོགས་གཞན་ནས་འབྱུང་བ་ལྟར་བྱའོ། །ཞེས་པ་ནི། གླང་ཆེན་རབ་འབོག་གི་རྒྱུད་ལས། རྟོགས་པ་གཅིག་ཁོལ་དུ་ཕྱུང་བ་ཀལྤ་དུམ་བུའམ་རྒྱུད་དྲི་མེད་བཤགས་རྒྱུད་ལས་གསུངས་པ་ལྟར་ཡོ་ག་གསུམ་གྱི་སྒོར་ཞུགས་པའི་རྣལ་འབྱོར་པ་རྣམས་ཀྱིས་ཉམས་ཆགས་དང་རྟོག་སྒྲིབ་ཐམས་ཅད་སྦྱོང་བར་བྱེད་པའི་སྤྱི་ཁྲུས་རྨད་དུ་བྱུང་བ་ན་རག་དོང་སྤྲུགས་ཀྱི་མན་ངག་ལ་བརྟེན་ནས་ཕྱི་ཡོ་བྱད་ཚོགས་ཀྱི་བསྐང་བཤགས། ནང་ཕུང་པོ་རྟེན་གྱི་བསྐང་བཤགས། གསང་བ་བྱང་ཆུབ་སེམས་ཀྱི་བསྐང་བཤགས་ཉ་སྟོང་ཚེས་བརྒྱད་ལ་བྱས་པས་དེ་ཚུན་ཆད་ཀྱི་ཉམས་ཆགས་རྟོག་སྒྲིབ་ཐམས་ཅད་དག་པར་གསུངས་ལ། དེ་ལྟར་མ་ནུས་ནའང་ཞི་ཁྲོའི་ལྷ་ཚོགས་ལ་ཕྱག་འཚལ་ཏེ། མཚན་ནས་བརྗོད་པ་ཡི་དམ་དུ་བགྱིས་པས་ཀྱང་ཉམས་ཆགས་ཐམས་ཅད་དག་པར་གསུངས་ཏེ། གང་ཞིག་སྒྱུ་འཕྲུལ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆགས་ཀུན་ཀྱང་བྱང་འགྱུར་ཏེ། །མཚམས་མེད་ལྔ་ཡི་སྡིག་ཀྱང་འབྱང་། །ན་རག་གནས་ཀྱང་དོང་སྤྲུགས་ཏེ། །རིིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་པའི་ཕྱིར་རོ། །གཞན་ཡང་བཤགས་པའི་རུ་ཆེན་བཞི་སྟེ། ཡང་དག་དོན་གྱི་གཅུག་སྦྱང་ཕྱིར་རྟོགས་པ་ལྟ་བའི་སྒོ་ནས་བཤགས་པའི་གཞུང་ལྟ་བའི་ཀློང་བཤགས། ལྷ་མིའི་གཅུག་སྦྱང་ཕྱིར་སྒོམ་པ་བསྐྱེད་རྫོགས་ཀྱི་སྒོ་ནས་བཤགས་པའི་གཞུང་ཡེ་ཤེས་སྐུ་མཆོག །རྩ་བ་དང་ཡན་ལག་གི་གཅུག་སྦྱང་ཕྱིར་བསྲུང་བྱ་དམ་ཚིག་གི་སྒོ་ནས་བཤགས་པའི་གཞུང་དམ་ཚིག་ཉི་ཤུ་རྩ་བརྒྱད་པ། མ་མོ་དང་མཁའ་འགྲོའི་གཅུག་སྦྱང་ཕྱིར་གདུང་བ་སྨྲེ་སྔགས་ཀྱི་སྒོ་ནས་བཤགས་པའི་གཞུང་ཡེ་ཤེས་མཁའ་འགྲོའི་བཤགས་པ་རྣམས་སོ། །གཞན་ཡང་དུས་འཁོར་དང་སྙིང་པོ་རྒྱན་སོགས་ལས་གསུངས་པ་རྣམས་སྡོམ་ཊིཀ་ལས་གསུངས་པ་ལྟར་རོ། །ཡང་ཕྱི་ཡོ་བྱད་ཚོགས་ཀྱིས་བསྐང་བ། མར་མེ་དང་ཚོགས་གཏོར་སྨན་རཀ་བརྒྱ་རྩ་བརྒྱད་བཅས་གདུང་བའི་སེམས་ཀྱིས་བཤགས་པ་ནང་ཕུང་པོ་རྟེན་གྱི་བསྐང་བ། དཀར་ཆ་སྨན། དམར་ཆ་རཀྟ། རྩ་ཁམས་གཏོར་མ། རླུང་སེམས་ཀྱི་ཆ་མར་མེ། གསང་བ་སེམས་ཀྱི་བསྐང་བ། རང་བྱུང་རིག་པའི་གཤིས་བདེ་ཆེན་སྨན། ངོ་བོ་སྟོང་པ་རཀྟ། ཟུང་དུ་འཇུག་པ་གཏོར་མ། རང་བཞིན་གསལ་བ་སྒྲོན་མ་སོགས་ཀྱི་སྒོ་ནས་ཉ་སྟོང་ཚེས་བརྒྱད་སོགས་ལ་བཤགས། དེ་མ་ནུས་ན་ཕྱག་གི་བཀོལ་བྱང་ཙམ་རྒྱུན་དུ་ཡི་དམ་དུ་བྱའོ། །གནས༵་རྫས༵་ཐབས༵་ཀྱི༵་སོགས་ཞལ་ལུང་ན་གསལ་ལོ། །ཞེས་གསུངས། རིན་པོ་ཆེས། བྲོ་གར་གཉིས་ཀྱི་ཁྱད་པར་ནི། རྐང་པའི་བྲོ་དང་། ལག་པའི་གར་ཞེས་པ་སྟེ། བྲོས་རི་བྲག་དང་ས་འོག་གི་འཁྲུལ་འཁོར་སོགས་ལ་ཐོགས་པ་མེད་པར་འཛུལ༵་ལམ༵། གར་གྱིས་ནམ༵་མཁར༵་འགྲོ༵་བར༵་འགྱུར༵་ཞེས་སྒྱུ་འཕྲུལ་བ་རྣམས་གསུངས་སོ། །བྲོ་ཕྱག་རྒྱར་འཇོག་ནའང་རུང་སྟེ། སྒྱུ་འཕྲུལ་ལས་རྐང་གཉིས་ཆོས་དང་ལས་ཀྱི་སེམས་དཔར་གསུངས་ནས་ཡན་ལག་ཐམས་ཅད་དཀྱིལ་འཁོར་དུ་བྱིན་གྱིས་བརླབས་ནས། ཕྱག་རྒྱ་སྤྲོས་པའི་ལེའུ་ཞེས་གསུངས་པ་སོགས་ཀྱི་རྐང་པ་བརྒུལ་བསྐྱོད་ཕྱག་རྒྱར་བསྟན་ནོ། །ཞེས་དང་། གླུ་བྲོ་དེ་གཉིས་ཀྱི་ཁྱད་པར་ནི། གླུ་ནི་ཡུལ་སྣང་ཐམས་ཅད་བདེ་ཉམས་སུ་མྱོང་བར་བྱེད་པའི་བདེ་བ་དེ་ཡིན། བྲོ་ནི་བདེ་བ་དེ་ཉིད་ཡུལ་གྱི་རྣམ་འགྱུར་སྣ་ཚོགས་སུ་ཤར་བའི་ཆ་སྟེ། འདི་གར་མཁན་དག་དང་རི་མོ་བཟང་ལྟར་སྣང་། །གང་དུ་བདེ་ཆེན་ཞེས་བྱ་གཅིག་པུ་ཉིད། །གཅིག་པུའི་ཉམས་ནི་དུ་མའི་གར་མཛད་དོ། །ཞེས་པར་ཡང་མཐུན། དེའི་ཚེ་བློ་ངོར་སྣང་བ་ཐམས་ཅད་བདེ་བའི་གར་དུ་བྱེད་པས་བྲོས་བརྫི་བྱ་ཟུར་དུ་མི་འཆར་མོད། གནས་ཚོད་ལ་དེ་འདྲའི་རྣལ་འབྱོར་གྱི་བྲོ་འདུལ་བྱེད་དང་། ཡུལ་གྱི་ཕྲ་མེན་མ་གདུལ་རྒྱུ། ཡུལ་གྱི་རྒྱུད་འཕུང་བར་བྱེད་པའི་གདུག་རྩུབ་བྲོའི་དེ་ཉིད་ཀྱིས་བཅོམ་ནས་དངོས་གྲུབ་ཀྱི་གྲོགས་སུ་ཁོལ་བར་བྱེད་པ་འདུལ་ལུགས་སུ་སོང་ཡོད་དོ། །འདི་ནི་རྣལ་འབྱོར་བླ་མེད་པའི་རྫུ་འཕྲུལ་གྱི་རྐང་པའི་རོལ་རྩེད་སྦྱང་ཚུལ་རྨད་དུ་བྱུང་བའོ། །འདི་ཀློང་དུ་གྱུར་པ་ན་ལྷ་དབང་དང་། མིའི་རྒྱལ་སྲིད་ཀྱི་གནས་དང་། མཁའ་སྤྱོད་དང་། ས་འོགབདེ་བ་ཅན་སོགས་གང་དུ་བསྒྲོད་པར་འདོད་ཀྱང་དེ་དང་དེར་དགོངས་པ་གཏད་དེ་བྲོ་གར་བྱས་པས་ཐོགས་མེད་དུ་མནན་འགྲོ་སྟེ། མནན་པ་ས་ནས་ས་མནན་ཞེས་པ་ལྟར་དེར་སླེབ་པའི་དོན་ནོ། །ཞེས་དང་། བདེ་ཆེན་གཅིག་པུ་དེ་ཉིད། ཞི་ཞིང་དྭངས་བ་དང་། དགའ་ཞིང་སྤྲོ་བ་དང་། ཆགས་ཤིང་ཞེན་པ་དང་། ཁྲོ་ཞིང་རྔམ་པ་སྟེ་ལས་ཀྱི་སྟོང་སེམས་ཐ་དད་དུ་ཉམས་བསྒྱུར་བའི་བསམ་པའི་ཁྱད་པར་བཞིན་དུ་བྲོ་གར་གྱི་སྤྱོད་པ་ཡང་རྣམ་པ་གཞན་དང་གཞན་མཛད་དོ། །ཞེས་དང་། བྲོ་འདིས་སྣང་བ་དབང་དུ་བྱེད་པར་མ་ཟད་དབང་དུ་བྱས་པ་དེ་ལས་ནམ་ཡང་མི་ལྡང་བར་ཟིལ་གྱིས་གནོན་ཅིང་རེངས་པར་ཡང་བྱེད་ཅིང་། ཕྱག་རྒྱས་བཏབ་པའི་དོན་དུ་འགྲོ་བ་ཉིད་ཀྱི་ཕྱིར་རོ། །ཞེས་དང་། གླུ་ནི་འགྲོ་བའི་ཡིད་དང་རྗེས་སུ་མཐུན་པའི་དམ་པའི་ཆོས་ཀྱི་དབྱངས་དང་། གར་ནི་གདུལ་བྱ་ངོ་མཚར་བར་བྱེད་པའི་རྫུ་འཕྲུལ་གྱི་སྤྱོད་པ་ཞེས་དང་། གླུ་གར་གྱི་དེ་ཉིད་གཅིག་ཡིན་ཀྱང་རྐང་སྟབས་དང་སྔགས་ཚིག་གི་སྒོ་སོ་སོར་ཤར་ནས་རིམ་བཞིན་སྐུའི་མཛད་པ་དང་གསུང་གི་མཛད་པའི་སྒོས་དངོས་གྲུབ་ཀྱི་རེ་བ་རྫོགས་པར་མཛད་པའོ། །ཞེས་གསུངས། སྒྲུབ་པའི་སྐབས་ཡོན་ཏན་འབྱུང་བའི་དངོས་གྲུབ་དྲུག་ཅེས་པ་རྒྱུད་ལས། བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཞིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བ་འགྲུབ། །ཅེས་པས། ཟས་དུག་ཅན་བསྒྱུར་གཞི་ལ་ཡི་གེ་བཀོད་དེ་འཕྲོ་འདུའི་སྒོ་ནས་དུག་བདུད་རྩིར་བསྒྱུར་བ་དང་། འདོད་བྱ་གཞན་ཡང་ཇི་ལྟར་དམིགས་པ་བཞིན་འགྲུབ་པ་དང་། ནད་ཞི་བ་དང་། ལོངས་སྤྱོད་འབྱུང་བ་དང་། ངན་འགྲོའི་སྒྲིབ་པ་སྦྱོང་བ་དང་། བྱེ་མ་ལས་གསེར་དང་སོལ་བ་ལས་ལྗོན་པ་སོགས་སྣང་བ་མི་མཐུན་པ་གཞན་དུ་འགྱུར་བ་རྣམས་སོ། །འབྱུང་བའི་དངོས་གྲུབ་ལྔ། །ནམ་མཁའ་རྡོ་རྗེ་སྲ་ཞིང་འབྱུང་། །འབར་ནས་མེ་ཡང་འཚིག་པ་དང་། །ཆུ་འགྱུར་འབབ་པའང་དེ་བཞིན་དེ། །འཇིག་རྟེན་ཁམས་ནི་འཐོར་བ་དང་། །ཐམས་ཅད་སྟོང་ཞིང་ལྷུང་བར་འགྱུར། །ནམ་མཁའ་ལ་རྡོ་རྗེའི་སྐས་བསྒོམས་པས་སྲ་བའི་སྐབས་འབྱུང་བ་དང་། དེ་བཞིན་དུ་ལག་མཐིལ་ལ་ཡི་གེ་རཾ་ཡཾ་ཁཾ་བཀོད་པས་ཡེ་ཤེས་ཀྱི་མེ་ཆུ་རླུང་དུ་འགྱུར་ཏེ། ཐ་མལ་གྱི་མེ་ཉིད་ཀྱང་སྲེག་པར་བྱེད་པ་དང་། ཆུའང་དག་པར་བྱེད་པ་དང་། རླུང་ཡང་འཐོར་བར་བྱེད་ལ། ཡི་གེ་ཨེ་བཀོད་དེ་འཕྲོ་འདུས་སྦྱངས་ན་འཇིག་རྟེན་ཁམས་ཀུན་སྟོང་ཞིང་གཞོལ་ཕྱོགས་སུ་ལྟུང་བར་འགྱུར་བ་ཉིད་དོ། ། ཕྲན་ཚེགས་དངོས་གྲུབ་བརྒྱད་ནི། དགུག་དང་གཏང་དང་བཅིང་དང་དགྲོལ། །གསོ་དང་བསད་དང་ཕམ་པ་རྒྱལ། །ཞེས་པས་དགྲ་བགེེགས་འགུགས་པ་དང་། གླིང་ཁམས་གཞན་དུ་གཏང་བ་དང་། རིག་སྔགས་ཀྱིས་བཅིང་བ་དང་། ཀླུ་ཡི་བྱད་དུ་བཅུག་པ་གྲོལ་ཐབས་དང་། ནད་གསོ་བ། ཤི་བ་གསོ་བ། ཚེ་གསོ་བའོ། །བསད་པ་དགྲ་བགེགས་བསད་པ། གཞན་གྱི་གཡུལ་ཕམ་པ། རང་གི་གཡུལ་རྒྱལ་བར་བྱེད་པའོ། ། མཆོད་པའི་སྐབས། རྟ་མགྲིན་གསང་བའི་ཡུམ་བཅས་བསྐྱེད། །ཅེས་པ་ནི། རྒྱ་གྲམ་གྱི་ལྟེ་བར་རྟ་མགྲིན་དམར་པོ་པདྨ་དང་རྡོ་རྗེ་རྒྱ་གྲམ་འཛིན་པ། རྭ་བཞི་ལ་རིམ་པར། ཤར་དུ་མི་ཕམ་དཀར་མོ་གཡས་ལྕགས་ཀྱུ་དང་གཡོན་ཐོད་ཁྲག །ལྷོར་ཁྲོ་གཉེར་མ་སེར་མོ་གཡས་ཞགས་པ་དང་གཡོན་ཐོད་ཁྲགནུབ་ཏུ་རོ་ལང་མ་དམར་མོ་གཡས་ལྕགས་སྒྲོགས་དང་གཡོན་ཐོད་ཁྲགབྱང་རལ་གཅིག་མ་ལྗང་གུ་གཡས་དྲིལ་བུ་དང་གཡོན་ཐོད་ཁྲག་འཛིན་པའོ། ། སྔགས་ཀྱིས་རཀྟའི་རྒྱ་མཚོར་བྱིན་གྱིས་རློབ་པའོ། །ཞེས་པ་ལྟར་མ་བརླབས་ན། ཕྱི་མཆོད་ལ་མཚོན་ན། ཡོན་ཆབ་ལ་དྲི་ཟ་ཉེ་བའི་འཁོར། མེ་ཏོག་ལ་མེ་ཏོག་ཚེ་རྒྱལ། བདུག་སྤོས་ལ་ནག་པོ་དྲི་ལྡན། སྣང་གསལ་ལ་གྲིབ་གནོན་རྐུན་པོ། དྲི་ཆབ་ལ་བདུག་པའི་དྲི་འཕྲོག །ཞལ་ཟས་ལ་ལོག་འདྲེན་གདོང་བརྒྱ་བ་ཞེས་བྱ་བའི་བགེགས་འཇུག་པར་བདེ་གཤེགས་འདུས་པ་ལས་གསུངས་པས་མཚོན་ཏེ་ནང་མཆོད་རྣམས་ལའང་འབག་རྩོག་གི་དྲི་མས་སྦག་པའི་སྐྱོན་གྱིས་རྩ་གསུམ་དང་དམ་ཅན་ལ་སོགས་པ་དབང་དུ་འདུ་བར་མི་ནུས་པའི་སྐྱོན་ཡོད་དོ། ། ཞིང་བཅུ་སོགས་གདུག་པ་རྣམས་བརླག་པའི་ཕྱིར། ཞེས་པའི་ཞིང་བཅུ་ནི། གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུ་བ་དང་། །འདུ་བར་འོང་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣལ་འབྱོར་ཀུན་གྱིས་དང་དུ་བླང་། ཞེས་གསུངས་པ་ལྟར། བསྟན་པའི་གནོད་བྱེད་དཀོན་མཆོག་སྐུ་དགྲ་དང་། བླ་མའི་སྐུ་དགྲ་དང་། དམ་ཚིག་ཉམས་ནས་གསོ་བར་མི་བྱེད་པ་དང་། སྔགས་ཀྱི་ཐེག་པར་ཞུགས་པ་ལས་ལོག་པ་དང་། བླ་མ་དང་མཆེད་ལ་འཁུ་བ་དང་། སྔགས་སྤྱོད་ལ་འདུ་བར་མི་དབང་བཞིན་དུ་རྐུ་ཐབས་སུ་གནས་པ་དང་། སེམས་ཅན་ཡོངས་ལ་གནོད་པར་བྱེད་པ་དང་། དམ་ལྡན་གྱི་དགྲར་གྱུར་བ་དང་། མི་དགེ་བའི་ལས་ཁོ་ནར་འཇུག་པ་དང་། ཡང་ན་རྒྱུད་ལས། སངས་རྒྱས་བསྟན་པ་བཤིག་པ་དང་། །དཀོན་མཆོག་དབུ་འཕང་སྨད་པ་དང་། །དགེ་འདུན་འདུ་བའི་སྒོ་འཕྲོག་དང་། །ཐེག་ཆེན་ཆོས་ལ་སྨོད་པ་དང་། །བླ་མའི་སྐུ་ལ་བསྡོ་བ་དང་། །རྡོ་རྗེའི་ནང་དུ་དབྱེན་བྱེད་པ། །སྒྲུབ་ལ་བར་ཆད་བྱེད་པ་དང་། །གང་ཟག་དམ་ལས་ལོག་པ་དང་། །སྙིང་རྗེ་མེད་པའི་སྲིན་པོ་དང་། །མུ་སྟེགས་ལོག་ལྟར་གཏོང་བ་དང་། །སྒྲུབ་པ་པོ་ལ་དོ་བསྡོ་བ། །འདི་རྣམས་བསྒྲལ་བའི་ཞིང་བཅུ་ཡིན། །ཞེས་གསུངས་སོ། ། ཕྱག་རྒྱའི་སྐབས་དང་། ཐལ་བའི་ལུང་། །རྭ་དང་འདབ་མའི་ཐིག་ལེ་རྣམས། །རང་གནས་ཀྱི་སོགས་ཐད་ཞལ་རྒྱུན་ལས། རྭ་དང་འདབ་མ་ཞེས་པ་ཡུམ་མཁའ་པདྨ། ཡབ་ཀྱི་གསང་བ་རྡོ་རྗེར་བསྒོམ་པ་ལྟར། གཡས་ཐབས་ཀྱི་ཡིག་འབྲུ་བཀོད་པའི་གཞི་ལ་རྭ་དང་། གཡོན་ཤེས་རབ་འབྲུ་ལྔ་བཀོད་པའི་གཞི་ལ་འདབ་མ་ཞེས་བརྗོད་དོ། །བསྣོལ་བ་དང་མ་བསྣོལ་བ་ཟུང་བཅས་ཀྱི་ཕྱག་རྒྱ་བཅིང་བའི་དགོས་པ། བདེ་བ་ཐམས་ཅད་སྤྱིར་བསྡུ་ན་རིགས་འདྲེས་མ་འདྲེས་གཉིས་སུ་འདུ་བས་དེའི་ངོ་བོར་བསྡོམ་པས་རྣལ་འབྱོར་པས་ཕུང་ཁམས་ལྷའམ་བདག་ཉིད་དུ་བརྟན་པར་གནས་པའི་ཆེད་དུའམ་མངོན་དུ་གྱུར་བའི་དོན་དུའོ། །ཞེས་གསུངས། འོན་ཏེ་གྲོལ་ལམ་གྱི་དངོས་གྲུབ་བསྒྲུབ་ཚུལ་ལྟ་བུ་དང་བསྟུན་ན་ཞེས་པའི་ཐད། རིན་པོ་ཆེ་ཉིད་ཀྱི་གསུང་ལས། མན་ངག་འདིའི་ལུགས་ཀྱི་རྫོགས་རིམ་ཐབས་གྲོལ་གཉིས་ཀྱི་ཁྱད་པར། མཚོན་བྱེད་ཀྱི་ཐབས་རྫོགས་རིམ་པའི་ཞུ་བདེ་མྱོང་བ་ཚུན་ཆད་ཐབས་ལམ་དང་། མཚོན་བྱ་དོན་རིག་སྟོང་གདོད་མའི་གནས་ལུགས་དངོས་ལ་རེག་པ་ན་གྲོལ་ལམ་དུ་བཞེད་ཅེས་གསུངས་པས། གཙོ་བོར་མཚོན་བྱ་དོན་གྱི་གནས་ལུགས་རྟོགས་པའི་ལམ་གྱིས་མཐར་རང་གི་ཡིན་ལུགས་དངོས་གསལ་བར་སད་པའམ་མངོན་དུ་གྱུར་བ་མཐར་ཐུག་པ་ན་སངས་རྒྱས་པ་ཞེས་བརྗོད་པ་ཡིན། ཉིང་དགོས་དང་རྒྱུད་ཀྱི་བརྗོད་བྱ་དོན་གྱི་གཙོ་བོ་གཉིས་བདག་གཅིག་འབྲེལ་ཡིན་ཞེས་པ་ངེས་པ་ལྷག་པར་འདྲོང་བ་ཞིག་ཡོད་ཅེས་ཟེར་རམ་དཔྱད། ཆོས་མཆོག་ཞིང་ལ་ངལ་བའི་ས་བོན་འགའ། །བསྐྱེད་ལས་རྒྱུ་མཐུན་སྡོང་པོ་ཆེར་རྒྱས་ཏེ། །ཟབ་ལམ་རོ་བརྒྱའི་འབྲས་སྟེར་ཉན་བཤད་ཀྱི། །ཡལ་འདབ་ཕྱོགས་དུས་ཁྱབ་པར་སྟེར་གྱུར་ཅིག །ཕྱི་སྣོད་གསང་ཆེན་རྒྱུད་སྡེའི་མཛོད་དུ་གྱུར། །ནང་བཅུད་འགྲོ་ཀུན་རིག་འཛིན་ཚོམ་བུར་སད། །བརྟན་གཡོ་མཐའ་དག་སྒྱུ་འཕྲུལ་དྲྭ་བ་ཡི། །དཀྱིལ་འཁོར་འཁོར་ལོ་གཅིག་ཏུ་བྱང་ཆུབ་ཤོག །ཅེས་རྗེ་བཙུན་བླ་མ་དམ་པའི་བཀའ་ཡི་བསྐུལ་བ་ལྡོག་ཏུ་མ་ཕོད་པར། སློབ་མིང་བས་གསུང་སྒྲོས་རྣམས་ཕྱོགས་བསྒྲིགས་འདྲ་བ་ཞིག་བྱས་ཀྱང་རང་ཉིད་ཤེས་རབ་ཆུང་ཞིང་རྒྱུད་ཤིན་ཏུ་རྨོངས་པའི་དབང་གི་བསྒྲིགས་ཚུལ་རྣམས་ལ་ནོངས་པར་གྱུར་བ་ཅི་མཆིས་པ་དང་། ཞལ་རྒྱུན་ཡིན་སྣང་ཤར་ཡང་བརྗེད་ངས་ཆེ་བའི་དབང་གིས་དོན་མིན་དུ་སོང་བ་སོགས་ཉེས་པ་ཐམས་ཅད་བཀའ་དྲིན་མཚུངས་མེད་བླ་མ་དམ་པ་དང་། ཆོས་ཀྱི་སྤྱན་ལྡན་ཐམས་ཅད་ལ་འཇིགས་ཤིང་ཞུམ་པས་བཟོད་པར་གསོལ་བས་མི་སྒྲིབ་པར་མཛད་པ་དང་། དགེ་བའི་ཕྱོགས་ལ་འབད་ཁུལ་བགྱིས་པ་འདིས་ཀྱང་གསང་ཆེན་བསྟན་པའི་རྩ་བ་ཆོས་རྗེ་བླ་མ་དམ་པའི་ཞབས་པད་རབ་ཏུ་བརྟན་ཅིང་འདུས་པའི་ཚོགས་ཀུན་ནས་ཀུན་ཏུ་རྒྱས་ཏེ་གསང་ཆེན་བསྟན་པ་ཕྱོགས་དུས་ཀུན་ཏུ་དར་ཞིང་རྒྱས་ལ་དུས་ནམ་ཡང་མི་ནུབ་པའི་རྒྱུར་འགྱུར་བ་དང་། བདག་ཀྱང་ཚེ་རབས་ཐམས་ཅད་དུ་རྗེ་བཙུན་བླ་མ་དམ་པ་རྣམས་དང་སྐད་ཅིག་ཙམ་ཡང་མི་འབྲལ་ཞིང་དུས་ཀུན་ཏུ་མཉེས་པ་གསུམ་གྱི་སྒོ་ནས་བཀའ་བཞིན་དུ་བགྱིད་ཅིང་གསང་ཆེན་སྔ་འགྱུར་གྱི་བསྟན་པ་ཕྱོགས་དུས་ཐམས་ཅད་དུ་སྤེལ་བའི་སྣང་བྱེད་ཆེན་པོར་གྱུར་ཅིང་འགྲོ་ཀུན་གདོད་མའི་མགོན་པོའི་ས་ལ་དབུགས་དབྱུང་བའི་མཐུན་འགྱུར་དཔལ་ལྡན་བླ་མ་དམ་པ་དང་རྒྱལ་བ་སྲས་བཅས་ཡོངས་ཀྱིས་མཛད་དུ་གསོལ། དེ་བཞིན་དུ་འགྲུབ་པར་གྱུར་ཅིག །དགེའོ། །བཀྲ་ཤིས་སོ། ། ༈ གཞུང་འདིའི་དབུ་ཞབས་ཀྱི་དོན་ནི་དག་མཉམ་བདེན་པ་དབྱེར་མེད་ཡིན་ལ། དེ་ལ་སྦྱང་གཞི་དང་། སྦྱོང་བྱེད་། སྦྱངས་འབྲས་གསུམ་ཡོད་པས། དང་པོ་ནི། ཡུན་རིང་ནས་མ་རིག་འཁྲུལ་བའི་དབང་དུ་སོང་བའི་སོ་སྐྱེས་རང་ག་མའི་གློ་བུར་ཉག་གཅིག་གི་འཁྲུལ་ངོར་ཡེ་ནས་དག་པ་ལ་མ་དག་པར་སྣང་བ་དཔེར་ན་དུང་སེར་སྣང་ལྟ་བུ་དེ་སྦྱང་གཞི། གཉིས་པ། དག་པ་ཡེ་ནས་ཡིན་པ་ལ་ཡིན་པར་ཤེས་པའི་ཐབས་ཟབ་མོ་གཞུང་འདི་ནས་བསྟན་པའི་བསྐྱེད་རྫོགས་ཐབས་གྲོལ་གྱི་ལམ་མམ་རྒྱུད་ཀྱི་དངོས་པོ་བཅུ་སོགས་སྦྱོང་བྱེད། གསུམ་པ། ཡེ་ནས་དག་པ་རབ་འབྱམས་ཡིན་པ་ལ་ཡིན་པར་ཤེས་པ་སྣང་གྲགས་རིག་གསུམ་ལྷ་སྔགས་ཆོས་སྐུའི་ངང་ངམ་དག་མཉམ་བདེན་པ་དབྱེར་མེད་པ་ལས་ནམ་ཡང་མི་འདའ་བའི་གསལ་བརྟན་དག་གསུམ་ཐོབ་པའོ།། །། དཔལ་གསང་བའི་སྙིང་པོའི་ཟིན་བྲིས་གསང་བའི་སྒོ་བརྒྱ་འབྱེད་པའི་ལྡེའུ་མིག །སྔ་འགྱུར་གྱི་ཆེ་བ་དྲུག་ནི། རོང་ཟོམ་པ་ཆོས་ཀྱི་བཟང་པོས། དང་པོ་སྤྱན་འདྲེན་པ་པོ་ཡོན་བདག་གི་ཆེ་བ། སྔ་འགྱུར་བའི་ཡོན་བདག་འཕགས་པ་རིགས་གསུམ་མགོན་པོའི་རྣམ་འཕྲུལ་ཆོས་རྒྱལ་མེས་དབོན་རྣམ་གསུམ་ཡིན་པས་ཕྱི་འགྱུར་གྱི་ཡོན་བདག་དང་མི་འདྲ། གཉིས་པ་གང་དུ་བསྒྱུར་བའི་གནས་ཕྱག་བཞེས་གཙུག་ལག་ཁང་གི་ཆེ་བ། སྔོན་སྤྲུལ་པའི་གཙུག་ལག་ཁང་བསམ་ཡས་སོགས་ཆོས་འཁོར་སྟོད་སྨད་ཡིན་པས་ད་ལྟའི་གྲོང་དགོན་ཕག་ཕུག་དང་མི་འདྲ། གསུམ་པ་སྒྲ་བསྒྱུར་ལོ་ཙཱ་བའི་ཆེ་བ། སྔོན་སྒྲ་བསྒྱུར་བཻ་རོ་ཙཱ་ན་སྐ་ཅོག་ཞང་གསུམ། རྨ་གཉགས། གནུབས་སོགས་སྤྲུལ་པའི་ལོ་ཙཱ་བས་བསྒྱུར་བའི་ཆོས་ཡིན། ད་ལྟ་བརྡ་སྤྲོད་གཞུང་དུམ་རེ་ཤེས་པ་ལ་ལོ་ཙཱར་བཏགས། དབྱར་མང་ཡུལ་དུ་བསྡད། དགུན་བལ་ཡུལ་དུ་ཡུག་རེ་ཕྱིན་ནས་བསྒྱུར་བ་དང་མི་འདྲ། བཞི་པ་པཎྜི་ཏའི་ཆེ་བ། སྔོན་ཞི་བ་འཚོ། སངས་རྒྱས་གསང་བ། པད་འབྱུང་། བི་མ་ལ་སོགས་སངས་རྒྱས་དང་ས་ཆེན་པོ་ལ་བཞུགས་པའི་བྱང་འཕགས་རྣམ་ཀྱིས་སྤྱན་དྲངས་པའི་ཆོས་ཡིན། ད་ལྟ་གསེར་འདོད་དུ་འཁྱམས་པ་རྣམས་དང་མི་འདྲ། ལྔ་པ་ཕྱག་རྟེན་མེ་ཏོག་གི་ཆེ་བ། སྔར་གསེར་ཤ་བའི་རླིད་བུ་དང་བྲེ་ལ་གཞལ་ནས་ཞུས་པའི་ཆོས་ཡིན། ད་ལྟ་མཆན་ནས་གསེར་ཞོ་རེ་གཉིས་བཏོན་ནས་ཞུས་པ་དང་མི་འདྲ། དྲུག་པ་བསྒྱུར་བྱ་ཆོས་ཀྱི་ཆེ་བ། སྔོན་འཕགས་ཡུལ་དུ་སངས་རྒྱས་ཀྱི་བསྟན་པ་གྲ་མ་ཉམས་དུས་བསྒྱུར་བར་མ་ཟད། འཕགས་ཡུལ་ན་མེད་པའི་རྒྱུད་བྱང་ཆུབ་སེམས་དཔའ་དང་གྲུབ་པ་དང་རིག་འཛིན་དང་མཁའ་འགྲོ་མ་རྣམས་ཀྱིས་བཟུང་སྟེ་དག་པའི་ཞིང་ན་བཞུགས་པ་དང་། འཛམ་གླིང་གི་བྱེ་བྲག་ཨོ་རྒྱན་དང་སིང་ག་ལ་ཡི་གླིང་སོགས་ནས་སློབ་དཔོན་པདྨ་དང་བི་མ་ལ་སོགས་གྲུབ་པའི་ཁྱུ་མཆོག་རྣམས་ཀྱིས་རྫུ་འཕྲུལ་གྱི་བཀོད་པས་བླངས་ནས་བསྒྱུར་བ་ཡིན། འགྱུར་ཡང་སྔོན་གྱི་ལོ་ཙཱ་བ་རྣམས་སྤྲུལ་པའི་སྐུ་ཡིན་པས་དོན་ཇི་ལྟ་བ་བཞིན་དུ་གཏན་ལ་འབེབས་པས་གོ་སླ་ཞིང་བྱིངས་འཇལ་བ་ལ་རླབས་ཆེ། ཕྱིས་ཀྱི་ལོ་ཙཱ་བ་རྣམས་ཀྱིས་དོན་བསྒྱུར་མ་ནུས་པར་རྒྱ་དཔེའི་གོ་རིམ་ལྟར་སྒྲ་བསྒྱུར་བྱས་པས་ཚིག་གྲིམ་ལ་གོ་དཀའ། བྱིངས་མཇལ་བ་ལ་རླབས་ཆུང་བས་མི་འདྲ་བ་ཡིན་གསུངས། ༈ ཕ་རྒྱུད་ཀྱི་ཕ་རྒྱུད་སོགས་གསུམ་ཀའི་སྐབས་སུ་རིག་པ་འོད་གསལ་བྱང་ཆུབ་ཀྱི་སེམས་ཉིད་ལྷ་སྐུར་འཆར་བ་ལ་སློབ་པར་ཁྱད་མེད་ཀྱང་། གཙོ་བོར་རྡུལ་ཚོན་དང་རས་བྲིས་སོགས་ཕྱི་དཀྱིལ་ལ་བརྟེན་ནས་བདག་སྲས་དང་གཞན་སྲས་རྡོ་རྗེའི་ཆོ་ག་གསུམ་བསྐྱེད་དང་བཞི་བསྐྱེད་སོགས་བསྐྱེད་ཆོག་ཤིན་ཏུ་རྒྱས་པའི་རྣམ་བཞག་སྟོན་པ་མ་ཧཱའི་མ་ཧཱ་སྟེ་འདུས་པ་ལྟ་བུའོ། །ཕྱི་དཀྱིལ་ལ་བརྟེན་ནས་ལྷའི་རྣལ་འབྱོར་བསྒོམ་པ་ཡོད་ཀྱང་གཙོ་བོར་རང་གི་རྡོ་རྗེ་ལུས་ཀྱི་གྲོང་ཁྱེར་གདོད་ནས་རྒྱལ་བའི་དཀྱིལ་འཁོར་ཆེན་པོར་གནས་པ་ཉིད་ངོ་ཤེས་པའི་སྐད་ཅིག་དྲན་རྫོགས་ལྟ་བུར་ལྷར་གསལ་བ་རྩལ་དུ་བཏོན་པའི་རྒྱུད་དེ་མ་ཧཱའི་ཨ་ནུའམ་ཕ་རྒྱུད་ཀྱི་མ་རྒྱུད་ཅེས་བྱའོ། །འདིའི་མཚན་གཞི་ནི་མཁའ་འགྲོ་བདེ་ཆེན་རྒྱལ་མོ་དང་འཁོར་ལོ་བདེ་མཆོག་ལྟ་བུ་སྟེ། རྗེ་ཡབ་སྲས་ཀྱིས་ཕ་མ་གཉིས་ཀྱི་ཟླས་ཕྱེ་བའི་མ་རྒྱུད་ཀྱི་མཚན་གཞིར་བདེ་མཆོག་ཡིན་ཀྱང་། རང་ལུགས་རིག་འཛིན་གོང་མས་ཕ་རྒྱུད་མ་རྒྱུད་གཉིས་ལས་ཕ་རྒྱུད་ཀྱི་ཕྱོགས་སུ་དྲངས་ནས་ཕ་རྒྱུད་ཀྱི་མ་རྒྱུད་ཅེས་བཞེད་ལ། མ་རྒྱུད་ཀྱི་མཚན་གཞིར་མདོ་ཚོགས་ཆེན་འདུས་པ་ལྟ་བུ་འཇོགཕྱི་དཀྱིལ་སོགས་ཀྱང་ཡོད་མོད། གཙོ་བོར་རང་རིག་པའི་ཡེ་ཤེས་སྐྱེ་བ་མེད་པ་བདེན་པ་དབྱེར་མེད་ཀྱི་རང་བཞིན་ཉིད་ལྷའི་འཁོར་ལོ་སྒོམ་པའི་ཚུལ་རྩལ་དུ་འདོན་པ་མ་ཧཱའི་ཨ་ཏ྄ིི་སྟེ་ཕ་རྒྱུད་ཀྱི་གཉིས་མེད་ཀྱི་རྒྱུད་ཅེས་བྱའོ། །འདི་མ་ཧཱ་སྐོར་གསུམ་དུ་ཕྱེ་བའི་ཨ་ཏི་ཡིན་གྱི། སྤྱིར་མ་ཧཱ་ཨ་ནུ་ཨ་ཏི་ཞེས་པའི་ཨ་ཏི་མ་ཡིན་ཏེ་དེ་ཡིན་ན་བསྐྱེད་རྫོགས་རིམ་འཇུག་གི་སྤྲོས་པ་ལ་མི་ལྟོས་ཀྱང་། འདིར་རིམ་གཉིས་རིམ་ཅན་དུ་འཇུག་པའི་ཕྱོགས་སྟེ། རྒྱུད་གསང་བའི་སྙིང་པོ་ལྟ་བུའོ། །འདི་ཉིད་གཉིས་མེད་ཀྱི་རྒྱུད་དུ་འཇོག་པའི་གཉིས་མེད་ནི། སྐོར་སྔ་མ་གཉིས་ཀྱི་འཇོག་བྱེད་གཉིས་རྩལ་འདོན་དུ་མེད་པ་ལ་གོ་དགོས། ཕ་རྒྱུད་ཀྱི་མ་རྒྱུད་ཅེས་པའི་མའམ་ཤེས་རབ་ཀྱི་ལྡོག་པ་ནི། རང་གི་ཤེས་རབ་ཀྱི་གཤིས་རྒྱལ་བའི་དཀྱིལ་འཁོར་དུ་གཏན་ལ་དབབ་པའི་ཆ་སྟེ། དམིགས་རྣམ་ཐམས་ཅད་བསྡུས་ནས་སྟོང་ཉིད་བསྒོམ་པ་ལ་ཤེས་རབ་ཅེས་ཟེར་བ་ལྟ་བུའོ། །ཕ་རྒྱུད་ཀྱི་ཕ་རྒྱུད་ཅེས་པའི་ཕའམ་ཐབས་ཀྱི་ལྡོག་པ་ནི། སྣང་ཆ་ལྷའི་འཁོར་ལོ་སྤྲོས་པའི་རྣམ་གྲངས་ཤིན་ཏུ་རྒྱས་པ་ལ་བྱ་སྟེ། སྦྱིན་སོགས་རྒྱ་ཆེ་བའི་ཉམས་ལེན་རྣམ་གྲངས་ཤིན་ཏུ་མང་བ་ལ་ཐབས་ཞེས་ཟེར་བ་ལྟ་བུའོ། །མ་ཧཱའི་ཨ་ཏིའི་ཆེད་དུ་བྱ་བའི་གདུལ་བྱ་ནི། མ་ཧཱའི་མ་ཧཱ་སོགས་ཀྱི་གདུལ་བྱ་ལས་ཆེས་དབང་པོ་རྣོ་བས། རིམ་གཉིས་ལ་རིམ་ཅན་དུ་འཇུག་པའི་རྩོལ་བཅས་ཀྱི་ཉམས་ལེན་ཡོད་ཀྱང་། བསྐྱེད་རིམ་སྒོམ་ཚུལ་ཁྱད་པར་ཅན་གྱིས་རྒྱུད་མྱུར་དུ་སྨིན་པ་དང་། རྫོགས་རིམ་ཀྱང་དང་པོར་རྩོལ་བས་བསྒྲུབ་པའི་ཆ་ཡོད་ཀྱང་མཐར་རྩོལ་མེད་ཀྱི་ལམ་སྐྱོང་བ་ཞིག་འབྱུང་ཞིང་། དེའི་ཚུལ་གཙོ་བོར་འཆད་པ་ཡིན་པས། དེས་ན་དང་པོར་རྩོལ་བས་རིམ་ཅན་དུ་འཇུག་ཚུལ་མ་ཧཱ་དང་འདྲ་ཞིང་། མཐར་ལམ་རྩོལ་མེད་ཀྱི་སྐྱོང་ཚུལ་རྫོགས་ཆེན་དང་མཐུན་པས་མ་ཧཱའི་ཨ་ཏི་ཞེས་བཞག་པ་ཡིན་གསུངས། གལ་ཏེ་འདི་སྙམ་དུ། བདེ་མཆོག་མ་ཧཱའི་ཨ་ནུར་འཇོག་པ་མི་འཐད་དེ། རྒྱུད་དེའི་འགྲེལ་བ་དང་མན་ངག་རྣམས་སུ་རྡོ་རྗེའི་ཕུང་པོ་རྒྱལ་བའི་དཀྱིལ་འཁོར་དུ་ལྷུན་གྱིས་གྲུབ་ཚུལ་གཏན་ལ་ཕབ་ནས་དེའི་སྟེང་ནས་ལམ་བསྒྲོད་ཚུལ་སོགས་འཆད་དགོས་པ་ལ། མཁས་པ་རྗེ་ཡབ་སྲས་ཀྱིས་མ་གསུངས་བའི་ཕྱིར་ན། མ་ཁྱབ་སྟེ། ཕྱིས་ཀྱི་མཁས་པ་རྣམས་ཀྱིས་རྒྱུད་དེའི་ཉམས་ལེན་འདུས་པ་དང་མཐུན་པར་རིམ་ཅན་དུ་བགྱིད་ཚུལ་བཤད་ཀྱང་། རིག་འཛིན་གོང་མས་གདོད་ནས་རྒྱལ་བའི་དཀྱིལ་འཁོར་ཆེན་པོར་གནས་པ་ལམ་དུ་འཁྱེར་ཚུལ་རྒྱུད་དེའི་དོན་དུ་ཁས་བླངས་བ་དང་འགལ་མི་དགོས་ཏེ། གཉིས་ཀའང་རྒྱུད་དེའི་དགོངས་པར་གནས་པའི་ཕྱིར་ཏེ་དཔེར་ན་ཕྱག་ན་རྡོ་རྗེས་བདེ་མཆོག་སྟོད་འགྲེལ་དུ་དུས་འཁོར་ལྟར་བཤད་པ་དང་། ལྭ་བ་པས་སྦས་རྒྱུད་ལྟར་བཤད་པ་དང་། ཀྱེ་རྡོར་གྱི་རྒྱུད་རྡོ་རྗེ་སྙིང་པོས་དུས་འཁོར་དུ་བཀྲལ་ཞིང་། གྲུབ་ཆེན་མཚོ་སྐྱེས་ཀྱིས་སྦས་རྒྱུད་དུ་བཀྲལ་བ་དང་། འདུས་པའི་རྒྱུད་ཕྱི་མ་ན་རོ་བས་སྒྲོན་གསལ་ལྟར་བཤད་ཀྱང་། དབང་མདོར་བསྟན་ཐད་དུས་འཁོར་ལྟར་བཤད་པ་དང་། འཇམ་དཔལ་སྒྱུ་དྲྭ་རིགས་ལྡན་པད་དཀར་གྱིས་དུས་འཁོར་དུ་བཀྲལ་ཞིང་། པཎ་ཆེན་དྲི་མེད་བཤེས་གཉེན་གྱིས་རྫོགས་ཆེན་དུ་བཀྲལ་བ་སོགས་རྒྱུད་དེ་དང་དེའི་དགོངས་པ་ཡིན་ཆོག་པ་བཞིན་ཏེ། བི་མ་མི་དྲ་སོགས་ནི་སྔགས་བླ་མེད་ཀྱི་འཕགས་ལམ་གྲུབ་པའི་གང་ཟག་ཡིན་དགོས་ལ། དེ་ལྟ་ན་རྒྱུད་དོན་མངོན་ཤེས་ཀྱིས་འཆད་ནུས་པས་ཁྱབ་པའི་ཕྱིར། ཞེས་གསུངས། ༈ ཆེ་བ་བརྒྱད་ཀྱི་སྐབས། རྒྱུད་འདི་ཐེག་པ་ཐམས་ཅད་ཀྱི་ཡང་རྩེ་ཞེས་གསུངས་པ་དང་། རྫོགས་ཆེན་གྱིས་ཡང་རྩེ་མ་ཡིན་པ་གཉིས་མི་འགལ་ཏེ། རྡོ་རྗེ་འཆང་གིས་གསང་བའི་སྙིང་པོའི་ཆེད་དུ་བྱ་བའི་གདུལ་བྱ་དེ་ལ། རྒྱུད་འདིའི་གོང་མར་གྱུར་པའི་རྒྱུད་ཅིག་མེད་པ་ལྟར་སྟོན་གྱི་འདི་གོང་ན་རྫོགས་ཆེན་གྱི་རྒྱུད་ཡོད་ཅེས་སྟོན་མི་རིགས་པའི་ཕྱིར། དེ་འདྲ་དེ་ལ་དེ་ལྟར་སྟོན་རིགས་པའི་གདུལ་བྱ་མ་ཡིན་པའི་ཕྱིར། དཔེར་ན་ཕར་ཕྱིན་ཐེག་པའི་གདུལ་བྱ་དེ་ལ་ཐེག་པ་ཆེན་པོ་གསང་སྔགས་མ་བསྟན་པ་ལྟ་བུ་སྟེ། དེས་ན་དོན་ལ་རྒྱུད་འདིའི་གོང་མར་གྱུར་པའི་རྒྱུད་ཁྱད་པར་ཅན་ཡོད་པ་དང་། གདུལ་བྱ་དེའི་ངོར་རྒྱུད་འདི་ཐེག་པ་ཐམས་ཅད་ཀྱི་ཡང་རྩེར་སོང་བ་གཉིས་མི་འགལ་ལོ། ༈ །རྩ་བཤད་མི་འགལ་ཏེ། ཞེས་པའི་ཐད། ཐོག་མར་བྱུང་ཞིང་འཆད་བྱར་གྱུར་པ་དང་། རྗེས་ལ་བྱུང་ཞིང་འཆད་བྱེད་དུ་གྱུར་པ་གཉིས་ཀ་ཡིན་པ་ཡོད་པར་ཐལ། རྒྱུད་ཕྱི་མ་དེ་དེ་ཡིན་པའི་ཕྱིར་ན་རྣམ་པ་གཅིག་ཏུ་སྐྱོན་མེད་དེ། རྒྱུད་ཕྱི་མ་དེ་བཤད་རྒྱུད་གཞན་གྱི་ཐོག་མར་བྱུང་ཞིང་འཆད་བྱ་ཡིན་པས་རྩ་རྒྱུད་དུ་གཏོགས་ལ། ལེའུ་ཉེར་གཉིས་པོ་ལ་ལྟོས་ན་རྗེས་ལ་བྱུང་ཞིང་འཆད་བྱེད་ཡིན་པའི་ཕྱིར། དེས་ན་ཐོག་མ་ཁོ་ནར་བྱུང་ཞིང་འཆད་བྱ་ཁོ་ནར་གྱུར་པ་རྩ་རྒྱུད་དང་། རྗེས་ཁོ་ནར་བྱུང་ཞིང་འཆད་བྱེད་ཁོ་ནར་གྱུར་པའི་བཤད་རྒྱུད་གཉིས་འགལ་ལ། ཐོག་མར་བྱུང་ཞིང་རྩ་རྒྱུད་ཙམ་དང་། རྗེས་ལ་བྱུང་ཞིང་འཆད་བྱེད་ཀྱི་རྒྱུད་ཡིན་པ་ཙམ་འགལ་མི་དགོས་ཏེ། དཔེར་ན་རྩ་རྒྱུད་ཉིད་ལས། གྲུབ་པའི་ཞག་དང་ཚེས་གྲངས་ནི། །རྒྱུད་ལས་སྨོས་པ་བཞིན་དུའོ། །ཞེས་པ་ཐོག་མར་བྱུང་ཞིང་འཆད་བྱ་ཡིན་ལ། ཞག་ནི་སུམ་ཅུ་ཕྲག་དྲུག་གམ། །ཞེས་སོགས་རྗེས་ལ་བྱུང་ཞིང་འཆད་བྱེད་ཡིན་མོད་ཀྱང་། གཉིས་ཀ་རྩ་རྒྱུད་ཀྱི་གཞུང་ཡིན་པ་བཞིན་ནོ། །ཞེས་གསུངས། ༈ མ་ཧཱའི་ཨ་ཏི་ལས་ཆོས་ཐམས་ཅད་སངས་རྒྱས་པར་བཤད་པ་ལས་ལྷག་ཅིག་རྫོགས་ཆེན་གྱི་སྐབས་སུའང་ཆེར་མེད་པས་དེའི་ཆ་ནས་དཔྱད་ན་ཐེག་པ་ཐམས་ཅད་ཀྱི་ཡང་རྩེ་དང་ལུང་ཐམས་ཅད་ཀྱི་སྤྱི་འགྲེལ་ཞེས་བརྗོད་ན་ལེགས་ལ། ལྟ་བ་དེ་སྐྱོང་ཚུལ་དང་ལམ་གྱི་ཡན་ལག་མི་འདྲ་བའི་སྒོ་ནས་རྒྱུད་སྡེ་ལ་མཆོག་དམན་སོ་སོའི་གདུལ་བྱའི་ངོར་མཆོག་དམན་འཇོག་ཚུལ་ཡོད་ཀྱང་མི་འགལ་ལོ། །སྤྱིར་གསར་རྙིང་གི་སྔགས་ཀྱི་དགོངས་པ་མ་འདྲེས་པར་སོ་སོར་རང་ཐད་རང་ཐད་ནས་འཆད་ཤེས་པ་ཞིག་དང་། དོན་གྱི་གནད་གཅིག་ཏུ་འབབ་པ་དང་། གནས་སྐབས་སྐྱོང་ཚུལ་སོགས་ཐ་དད་པ་ཞིག་གི་སྒོ་ནས་འཆད་ཤེས་པ་འདི་གལ་ཆེ་གསུངས། ༈ ད་ལྟ་གཤིས་སྤང་རྟོགས་རྫོགས་པའི་སངས་རྒྱས་ཡིན་ཀྱང་། སྒྲིབ་བྱེད་འཁྲུལ་བ་མ་བྲལ་བའི་གནས་སྐབས་སུ་སེམས་ཅན་ཞེས་བྱ་ལ། འོན་ཀྱང་སེམས་ཅན་ཡིན་པའི་གནས་སྐབས་ན་ཡང་གཤིས་སངས་རྒྱས་ཡིན་པ་མི་འགལ་ཏེ། ཆུ་གཅིག་ཉིད་རྙོགས་མའི་ཆུ་ཡིན་པ་དང་གཤིས་དངས་པའི་ཆུ་ཡིན་པ་གཉིས་ཀ་དུས་མཉམ་དུ་ཡོད་པ་མི་འགལ་ལ། དྭངས་པའི་ཆུ་དེ་རྙོགས་པ་མིན་ལ། རྙོགས་པའི་ཆུ་དེ་དྭངས་པ་མིན་པ་བཞིན་ནོ། །གཤིས་སངས་རྒྱས་ཡིན་ཀྱང་འགྲོ་བ་དེ་སངས་རྒྱས་ཡིན་མི་དགོས་ཏེ། རང་བཞིན་རྣམ་དག་གི་མྱང་འདས་རྒྱུད་ལྡན་ཡིན་ཡང་མྱང་འདས་རྒྱུད་ལྡན་ཡིན་མི་དགོས་པ་བཞིན་ནོ། །རང་རྒྱུད་ན་སངས་རྒྱས་ཡོད་ན་ཅིའི་ཕྱིར་རང་ལ་མངོན་དུ་མི་འགྱུར་ཞེ་ན། རང་རྒྱུད་ན་ཡོད་ན་མངོན་དུ་གྱུར་མི་དགོས་ལ། མངོན་གྱུར་དུ་མེད་ན་མེད་མི་དགོས་ཏེ། འཕགས་པའི་མཉམ་བཞག་གི་དུས་ཀྱི་བྱང་ཆུབ་ཀྱི་སེམས་ཡོད་ཚུལ་སོགས་བཞིན་ནོ། །གལ་ཏེ་གཤིས་ལ་རྣམ་མཁྱེན་ཡོད་ན་རྣམ་པ་ཐམས་ཅད་ད་ལྟར་མཁྱེན་དགོས་སོ་ཞེ་ན་ནི། ཆབ་རོམ་གཤིས་མཉེན་ཞིང་གཤེར་བའི་ཆུ་ཡིན་ན་ད་ལྟ་མཉེན་ཞིང་གཤེར་བའི་ཆུ་མངོན་གྱུར་ཡིན་དགོས་ཞེས་སྨྲ་བ་དང་འདྲའོ། །འོ་ན་གཤིས་ལུགས་མ་རྟོགས་པའི་སངས་རྒྱས་ཞིག་ཡོད་པར་ཐལ། ཁྱོད་ཀྱིས་གཤིས་སངས་རྒྱས་ཡིན་རུང་གཤིས་མ་རྟོགས་པའི་ཕྱིར་རོ། །ཞེ་ན། སངས་རྒྱས་ཀྱིས་གཤིས་ལུགས་རྟོགས་ཀྱང་གཤིས་ལུགས་མ་རྟོགས་པ་དེ་སེམས་ཅན་ཡིན་པའི་ཕྱིར། སངས་རྒྱས་དང་སེམས་ཅན་གྱི་གཞི་མཐུན་ཡོད་པར་ཐལ་ལོ་ཞེ་ན། སངས་རྒྱས་ནི་གཤིས་ལུགས་མཐར་ཐུག་གི་སྟེང་ནས་འཇོག་ལ། སེམས་ཅན་ནི་འཁྲུལ་བའི་ཀུན་རྟོག་གི་གཞན་དབང་ཅན་འདི་ལ་འཇོག་པས་སྐྱོན་མེད་དོ། །འོ་ན་སྟོང་ཉིད་ལ་གཉིས་སྣང་ནུབ་པའི་ཡེ་ཤེས་འོད་གསལ་གྱི་གཤིས་ལ་རང་ཆས་སུ་ཡོད་དམ་ཞེ་ན། ཡོད་དེ། གཤིས་སངས་རྒྱས་ཡིན་ན་གཤིས་ལ་རྣམ་མཁྱེན་ཡོད་དགོས། དེ་ལྟ་ན་ཇི་ལྟ་བ་མཁྱེན་པའི་ཆོས་སྐུ་ཡོད་དགོས་པའི་ཕྱིར། དེས་ལམ་ཞུགས་དང་ལམ་མ་ཞུགས་དང་། སྐྱེ་འཕགས་ཀྱི་གཞི་མཐུན་ཁེགས་ཚུལ་སོགས་ཀྱང་དེས་ཤེས་ཐུབ། ད་ལྟར་གདུལ་བྱའི་ངོར་གཟུགས་སྐུ་གཉིས་སྣང་ནས་ཕྲིན་ལས་མཛད་པར་ཐལ། གཤིས་དེ་སངས་རྒྱས་ཡིན་པའི་ཕྱིར་ན། མ་ཁྱབ་སྟེ། འོ་ན་ཁྱོད་རང་ལ་ད་ལྟར་བཞུགས་པའི་སངས་རྒྱས་ཀྱིས་དུས་གསུམ་གྱི་འགྲོ་བའི་དོན་བྱེད་པར་ཐལ། སངས་རྒྱས་ཡིན་པའི་ཕྱིར། ཁྱབ་པ་འགྲིགས། འདོད་ན་མ་འོངས་པའི་གདུལ་བྱ་ལ་ད་ལྟར་ཕྲིན་ལས་འཇུག་པའི་སྐབས་ཡིན་པར་ཐལ། དུས་གསུམ་གྱི་འགྲོ་བའི་དོན་བྱེད་པའི་སངས་རྒྱས་ཡིན་པའི་ཕྱིར། འདོད་མི་ནུས་ཏེ། འཇུག་པའི་ཡུལ་གྱི་གདུལ་བྱ་དེ་ད་ལྟར་མ་སྐྱེས་པའི་ཕྱིར་ཏེ། མ་འོངས་པ་ཡིན་པའི་ཕྱིར། དེས་ན་མ་འོངས་པའི་གདུལ་བྱའི་དོན་དུ་འཇུག་པའི་ཕྲིན་ལས་རྫོགས་པར་ཡོད་ཀྱང་ད་ལྟར་མི་འཇུག་པ་མི་འགལ་བ་བཞིན། གཤིས་ལ་འབྲས་ཆོས་ཀྱི་ཡོན་ཏན་ཐམས་ཅད་ཡོད་ཀྱང་ཕྱི་གསལ་དུ་མེད་པས་ད་ལྟ་ཕྲིན་ལས་མ་མཛད་ཀྱང་སྐྱོན་མེད་དེ། ཕྲིན་ལས་མཛད་པ་ལ་མངོན་དུ་གྱུར་དགོས་པའི་ཕྱིར། འོ་ན་སེམས་ཅན་གྱི་རྒྱུད་ལ་འཁྲུལ་བ་སྐྱེ་མི་རིགས་པར་ཐལ། གཤིས་ལ་གཉེན་པོའི་ཡེ་ཤེས་ཡོངས་སུ་རྫོགས་པར་ཡོད་པའི་ཕྱིར་ན་སྐྱོན་མེད་དེ། གཤིས་སུ་ཡོད་ཀྱང་དེ་ཡོད་པ་ཙམ་གྱིས་དེའི་རྒྱུད་ན་གཉེན་པོར་ཡོད་པར་འཇོག་མི་ནུས་ཏེ། རྙོགས་མའི་ཆུའི་གཤིས་དྭངས་པ་ཡིན་པས་གཤིས་དྭངས་པར་འཇོག་ཐུབ་ཀྱང་ཆུ་དེ་དྭངས་པར་འཇོག་མི་ཐུབ་པ་བཞིན་ནོ། །སངས་རྒྱས་ཀྱིས་མ་དག་འཁོར་བའི་སྐྱེད་གཞི་བྱེད་པར་ཐལ། གཤིས་ཀྱི་སངས་རྒྱས་དེས་མ་དག་པའི་འཁྲུལ་གཞི་བྱེད་པའི་ཕྱིར་ཞེ་ན། གཤིས་དེས་འཁོར་བའི་སྣང་བ་བསྐྱེད་པ་མིན་གྱི་གཤིས་དེ་མ་རྟོགས་པའི་དབང་གིས་འཁྲུལ་སྣང་འབྱུང་བ་ཡིན་པའི་ཕྱིར། ཕར་ཕྱིན་ཐེག་པའི་སྐབས་སུ། བསྐལ་ཆེན་གྲངས་མེད་གསུམ་དུ་ལམ་གོམས་དགོས་ཀྱང་། རྫོགས་ཆེན་སོགས་སུ་དེ་མི་དགོས་པར་ཐུན་མོང་གི་ལམ་ལ་བློ་ལེགས་པར་སྦྱངས་ནས་དེ་ནས་རིག་སྟོང་སྣང་ཆ་དང་བཅས་པའི་ཉམས་ལེན་རྩལ་འདོན་བྱས་པས་ཆོག་པ་སོགས་ཀྱང་གཤིས་ན་ལམ་ཐམས་ཅད་ཡོད་པས་སད་བྱེད་ཀྱི་ཐབས་རེ་ལས་གཞན་མི་དགོས་པའི་རྟགས་ཡིན་གསུངས། འོ་ན་སྟོང་གཟུགས་ཀྱི་སྐུ་དེའང་གཤིས་ཀྱི་རྒྱལ་བའི་སྐུའི་ཡོན་ཏན་སད་པ་ཡིན་དགོས་ལ། དེ་ལྟ་ན་སྐུ་དེས་ཤེས་བྱ་ཐམས་ཅད་མཁྱེན་ནམ་ཞེ་ན། མ་ཡིན་ཏེ་ཤེས་བྱ་ཐམས་ཅད་མངོན་དུ་གྱུར་པར་མཁྱེན་པ་ལ་ཡེ་ཤེས་ཀྱི་ནུས་པ་ཅི་ཡོད་རྫོགས་པར་སད་དགོས་ལ། དེ་འདྲའི་སྐུའི་སྣང་བ་དེ་གཞིའི་ཡོན་ཏན་ཆ་ཤས་ཙམ་སྣང་བ་ཡིན་གྱི་སྐུའི་ཡོན་ཏན་རྫོགས་པར་མ་སད་པའི་ཕྱིར་གཤིས་ཀྱི་ཡོན་ཏན་རྫོགས་པར་སད་པ་དང་དྲི་མ་ལྷག་མེད་དུ་ཟད་པ་དུས་མཉམ་མོ། །རྫོགས་པ་ཆེན་པོའི་སྐབས། གཞིའི་རིག་པ་ཉིད་ཆོས་གཟུགས་ཀྱི་སྐུའི་འཆར་གཞི་ཡིན་པས་གཞི་སྣང་སྐུ་དང་ཞིང་ཁམས་ཀྱི་སྣང་བ་ཤར་བ་ཕྱོགས་སུ་བསྡུ་རུང་ཡང་དེའི་སྐབས་དབྱིངས་ནང་གསལ་གྱི་ཡོན་ཏན་རིག་པ་ཕྱི་གསལ་དུ་མ་རྫོགས་པས། གཞི་སྣང་ལ་གཞན་དུ་བཟུང་ནས་འཁྲུལ་བ་ལུག་རྒྱུད་དུ་མཆེད་པ་ཡིན་ནོ། །དེས་ན་གཤིས་ལ་ཡོན་ཏན་ཐམས་ཅད་རྫོགས་པར་ཡོད་ཀྱང་། དེ་ནང་གསལ་དུ་ཡོད་པ་ཡིན་ནོ། །འདིར་ནང་གསལ་ཞེས་པ་ནི། ཡོན་ཏན་དེ་དག་མངོན་དུ་གྱུར་མ་རག་པ་ལྟ་བུ་ལས་མངོན་དུ་མ་གྱུར་པ་ཞིག་ལ་གོ་དགོས། དེ་ཡང་སངས་རྒྱས་ཡིན་ལ་ཡོན་ཏན་མངོན་དུ་མ་གྱུར་བ་ཞིག་མེད་དེ། སངས་རྒྱས་ཡིན་ན་མངོན་གྱུར་དུ་ཡོད་དགོས་པའི་ཕྱིར། དེས་ན་ཡོན་ཏན་མངོན་གྱུར་དུ་མེད་པའི་སྒོ་ནས་ཀྱང་ད་ལྟ་གང་ཟག་དེ་སངས་རྒྱས་ཡིན་མི་དགོས་པར་འགྲུབ་ལ། གཞན་ཡང་། ཇི་ལྟར་མི་དབུལ་ཁྱིམ་ནང་ས་འོག་ན། །ཞེས་སོགས་གསུངས་པ་ལྟར། དབུལ་བོ་དེ་གཏེར་ཡོད་ལུགས་ཀྱི་ངོས་ནས་ཕྱུག་པོ་ཡིན་ཀྱང་། དེ་ལ་ཕྱུག་པོ་མི་ཟེར་ཏེ་དབུལ་བོ་ཡིན་པའི་ཕྱིར་ཏེ། ཕྱུག་དབུལ་གྱི་གཞི་མཐུན་མེད་པའི་ཕྱིར། ཞེས་གསུངས། ༈ རིག་སྟོང་གི་ལྟ་བ་རྟོགས་པ་ལའང་ཞིབ་ཏུ་ཕྱེ་ན། སྟོང་ཉིད་མ་རྟོགས་ལ་རིག་ཆ་མན་ངག་བཞིན་དུ་ལེགས་པར་ངོ་འཕྲོད་པ་ཞིག་དང་། རིག་སྟོང་དབྱེར་མེད་དུ་ངོ་འཕྲོད་ཀྱང་གཤིས་ཀྱི་འདུག་ཚུལ་གྱི་རིག་པ་རྗེན་པར་མ་ཐོན་པས་སྟོང་ཉིད་མངོན་སུམ་དུ་མ་རྟོགས་པ་ཞིག་དང་། ཀུན་རྟོག་གི་ཤུབ་ནས་ཐོན་ཏེ་སྟོང་ཉིད་མངོན་སུམ་དུ་རྟོགས་པའི་འོད་གསལ་མངོན་དུ་གྱུར་ཀྱང་གཤིས་ཀྱི་བཞུགས་ཚུལ་གྱི་ཡོན་ཏན་གྱི་ཆ་གཞན་མངོན་དུ་མ་སད་པའི་སྐབས་སོགས་དུ་མ་དབྱེར་རུང་ལ། འདིར་ནི་གཙོ་བོར་རིག་སྟོང་གཉིས་མེད་དུ་རྟོགས་པ་འབའ་ཞིག་ཡིན་ནོ། །སྤྱིར་རིག་པ་ནི་ཆུའི་གྲང་བ་ལྟ་བུ་དང་། ཀུན་རྟོག་ཐམས་ཅད་གཤིས་ཀྱི་འདུག་ཚུལ་མ་ཡིན་པས་ཆུའི་ཚ་བ་ལྟ་བུ་ཡིན་ལ། དེ་ཡང་སྔ་མ་ནི་གནས་ཚུལ་མཐར་ཐུག་སྟེ། དེ་ལ་སྒྲིབ་བྱེད་མེད་ན་དག་པ་རབ་འབྱམས་ཀྱི་བརྟན་གཡོའི་བཀོད་པ་འཆར་བ་དང་སྒྲིབ་བྱེད་ཀྱིས་འཆར་དུ་མ་བཏུབ་པ་ཡིན་ལ། སྒྲིབ་བྱེད་འདི་དག་དོན་ལ་ཡོད་པ་ཞིག་སྣང་བ་མ་འཁྲུལ་བས་སྣང་བ་མིན་ཀྱང་། དོན་ལ་མེད་པ་ཞིག་སྣང་བ་འཁྲུལ་སྣང་དུ་གྲུབ་པས་དེ་ལྟ་ན་ཀུན་རྟོག་ཡུལ་བཅས་གཤིས་ལ་མ་གྲུབ་པའི་གློ་བུར་བ་ཡིན་པས་ཐེག་པ་འདིར་མེད་སྣང་འཁྲུལ་བ་ཞེས་བྱའོ། ༈ །ཀུན་རྟོག་དང་བདེན་དངོས་གཉིས་ཆར་གྱིས་སྟོང་པའི་གཤིས་ཀྱི་རྣམ་པའི་བཞུགས་ལུགས་འདུས་པ་སོགས་སུ་མ་བསྟན་པར་ལམ་དེའི་འགྲོས་རང་ལུས་ཐབས་ལྡན་ལ་བརྟེན་ནས་ཡེ་ཤེས་ལམ་དུ་བྱེད་པའི་བསྒྲོད་ཚུལ་ཕྱོགས་གཅིག་ཡིན་པས་དང་པོ་ནས་དེ་འདྲའི་རིག་སྟོང་གི་ལྟ་བ་ངོ་སྤྲད་པ་མ་གསུངས་པ་ཡིན་གྱི། དེ་འདྲའི་ཚུལ་གཅིག་མེད་པར་མི་བཞེད་ལ། འདིར་ནི་དང་པོ་ནས་གཤིས་རིག་སྟོང་གི་ལྟ་བའི་ཡིན་ལུགས་དང་པོ་ནས་ངོ་འཕྲོད་དགོས་ཏེ་རྒྱུད་འདིའི་ལམ་གྱི་གཞུང་ཤིང་ལྟ་བུ་ཡིན་པའི་ཕྱིར། ༈ གཞིའི་འོད་གསལ་ཤར་བའི་སྐབས་ཀྱི་གཞི་སྣང་གི་སྣང་བ་དེ་ཡེ་ཤེས་ཉིད་ཀྱི་རང་སྣང་ཡིན་ཀྱང་བློ་དེའི་ངོར་སྣང་ཚུལ་རང་སྣང་དུ་སྣང་མི་ནུས་པར་ཡུལ་ཡུལ་ཅན་རྒྱང་ཆད་པའི་གཉིས་སྣང་ཅན་དུ་འབྲེལ་ཏེ་རང་སྣང་ལ་གཞན་དུ་བཟུང་ནས་རིམ་གྱིས་ཀུན་རྟོག་འཁྲུལ་བ་མཆེད་དེ་ད་ལྟར་གྱི་མ་དག་པའི་སྣང་བ་འདིར་སྣང་སོང་བ་ཡིན། དེའི་གནད་ཀྱིས་ད་ལྟའི་ཡུལ་སྣང་འདི་དག་གི་སྟེང་ན་ཡང་སྔར་གྱི་ཡེ་ཤེས་རང་སྣང་དུ་གྱུར་པའི་གཞི་སྣང་སད་པའི་སྣང་ཆ་རེ་ཡོད་དགོས་པས། ཡུལ་ཅན་ཀུན་རྟོག་ཐམས་ཅད་ཀྱི་གཤིས་འོད་གསལ་གྱིས་ཁྱབ་པ་བཞིན། ཡུལ་སྣང་འདི་དག་ཐམས་ཅད་ལ་ཡང་ཡེ་ཤེས་ཀྱི་སྣང་ཆ་རེ་ཡོད་དགོས་སོ་བྱས་པ་ལ། འདི་སྙམ་དུ། ད་ལྟ་མ་དག་པའི་སྣང་བ་འདི་ལ་དག་པའི་ཡེ་ཤེས་ཀྱི་སྣང་ཆ་རེ་ཡོད་ན། ད་ལྟ་ནས་རྒྱལ་བའི་དཀྱིལ་འཁོར་ཆེན་པོར་འདོད་དགོས་སོ། །ཞེ་ན། ཡེ་ཤེས་ཀྱི་སྣང་ཆ་ལ་ཆོས་ཉིད་བར་དོའི་སྣང་བ་ལྟ་བུ་དག་པའི་སྣང་བ་ཡིན་ཀྱང་ཀུན་རྟོག་ས་བོན་དང་བཅས་པ་གཏན་མ་སྤངས་པའི་སྐབས་ཀྱི་དེ་དང་། དེ་གཏན་ལོག་ཏུ་སོང་བའི་ཁྱད་པར་དུ་བྱས་པའི་འབྲས་བུའི་དུས་ཀྱི་སྣང་ཆ་གཉིས་སོགས་ཡོད་པས། ཡེ་ཤེས་སྣང་ཆ་གང་ཡིན་འབྲས་དུས་ཀྱི་སྣང་ཆ་ཡིན་མི་དགོས་ཏེ། ཡེ་ཤེས་ཀྱི་སྣང་ཆ་དང་དག་པའི་སྣང་བ་ཙམ་དུ་མཉམ་ཡང་ཁྱད་ཐང་ཆེན་པོ་ཡོད། ༈ ཡུལ་ཅན་འོད་གསལ་ལ་སྒྲིབ་བྱེད་ཀྱི་ཀུན་རྟོག་རིམ་གྱིས་ཟད་པ་དང་གཤིས་ཇེ་མངོན་དུ་སོང་བའི་ཚེ། ཡུལ་སྣང་ཡེ་ཤེས་ཀྱི་སྣང་ཆ་ཡང་མངོན་དུ་གྱུར་པའི་འགལ་རྐྱེན་ཟད་པའི་དབང་གིས་ནུས་པ་བརྟས་ནས་གང་སྣང་དག་པའི་འཁོར་ལོར་འཆར་བ་ཞིག་འབྱུང་ངོ་། །དེས་ན་དེ་ལྟར་ཡུལ་སྣང་ལ་ཡོད་པའི་ཡེ་ཤེས་ཀྱི་སྣང་བ་དེ་གཤིས་ཀྱི་རང་སྣང་ཡིན་པས། ཡུལ་སྣང་སད་པ་ནི་ཡུལ་ཅན་ལ་ལྟོས་པ་ཡིན་ཏེ། ཡུལ་ཅན་མ་དག་པའི་དབང་གིས་ཡུལ་དམན་པ་སྣ་ཚོགས་སུ་སྣང་ལ། ཡུལ་ཅན་རྣམ་པར་དག་པ་མཐར་ཐུག་གི་དབང་གིས་རང་སྣང་ལོངས་སྐུའི་བཀོད་པའི་རོལ་མོ་འབྱུང་བ་ཡིན་ནོ། ༈ །འོ་ན་ཀུན་རྟོག་དང་དེའི་གཤིས་འོད་གསལ་གཉིས་ངོ་བོ་གཅིག་ཡིན་ནམ་ཞེ་ན། འོད་གསལ་གཤིས་ཀྱི་འདུག་ཚུལ་དབང་བཙན་པར་བྱས་ན། ཀུན་རྟོག་རྣམས་མེད་སྣང་འཁྲུལ་བ་ཡིན་པས་ངོ་བོ་འདི་ཡིན་ཞེས་བཞག་ཏུ་མེད་དེ། དུང་གི་དཀར་པོ་དང་སེར་སྣང་གཉིས་ངོ་བོ་གཞན་མ་ཡིན་པས་གཅིག་ཅེས་མིང་འདོགས་ཆོག་པ་ལྟར་ཡིན་ནོ། ༈ །ཐོས་གྲོལ་ནི་རྒྱུད་འདིའི་མན་ངག་ཡིན་ཀྱང་། ཟུར་ལུགས་དང་མི་མཐུན་ཏེ། དེ་ལས་ཆོས་ཉིད་བར་དོའི་སྐབས་ཞི་ཁྲོའི་ལྷ་ཚོགས་པྲ་ཕབ་པ་བཞིན་འཆར་བའི་ངོ་སྤྲོད་རྫོགས་ཆེན་ནས་འབྱུང་བ་བཞིན་ཡོད་དོ། །དེས་ན་ཀུན་མཁྱེན་གྱིས་ཨ་ཏིའི་མ་ཧཱར་བཀྲལ་བ་དང་གུ་རུའི་དགོངས་པ་ཡིན་པས་ཐོས་གྲོལ་ཡང་ཕྱོགས་བཅུ་མུན་སེལ་དགོངས་པའི་བབས་མཐུན། ༈ ཏནྟྲ་ཆེན་པོ་སྡེ་བཅོ་བརྒྱད་ནི། དཔལ་འཕྲེང་དམ་པའི་འགྲེལ་བ་སློབ་དཔོན་ཀུ་ཀུ་ར་ཛས་མཛད་པར། སྐུ་གསུང་ཐུགས་ཡོན་ཏན་ཕྲིན་ལས་ལྔའི་གཞི་དང་དེའི་རྩ་བར་གྱུར་པའི་རྒྱུད་སྡེ་ལྔ། སྒྲུབ་པ་ལག་ལེན་དུ་བསྟན་པ་རོལ་པའི་རྒྱུད་ལྔ། སྤྱོད་པའི་ཡན་ལག་ཏུ་འགྲོ་བའི་རྒྱུད་ལྔ། ཆོ་ག་མ་ཚང་བ་ཁ་སྐོང་བར་བྱེད་པ་རྒྱུད་ཕྱི་མ་ལྟ་བུ་གཉིས། དེ་ཐམས་ཅད་ཀྱི་བསྡུས་དོན་ལྟ་བུའི་རྒྱུད་ཆེན་པོ་གཅིག་དང་བཅོ་བརྒྱད་དོ། །ཞེས་གསུངས། དེ་ལྟར་སྨིན་གླིང་ཡབ་སྲས་ཀྱིས་བཞེད་དེ། །དང་པོ་ལ་སྐུའི་རྒྱུད་སངས་རྒྱས་མཉམ་སྦྱོར། གསུང་གི་རྒྱུད་ཟླ་གསང་ཐིག་ལེ། ཐུགས་ཀྱི་རྒྱུད་གསང་བ་འདུས་པ། ཡོན་ཏན་གྱི་རྒྱུད་དཔལ་མཆོག་དང་པོ། ཕྲིན་ལས་ཀྱི་རྒྱུད་ཀརྨ་མཱ་ལེ་དང་ལྔའོ། །གཉིས་པ་ལ། ཧེ་རུ་ཀ་རོལ་པའི་རྒྱུད། རྟ་མཆོག་རོལ་པའི་རྒྱུད། སྙིང་རྗེ་རོལ་པའི་རྒྱུད། བདུད་རྩི་རོལ་པའི་རྒྱུད། ཕུར་པ་བཅུ་གཉིས་པ་འབྱུང་བའི་རྒྱུད་དང་ལྔའོ། །གསུམ་པ་ལ། རི་བོ་བརྩེགས་པ། ཡེ་ཤེས་རྔམ་གློག །དམ་ཚིག་བཀོད་པ། ཏིང་འཛིན་རྩེ་གཅིགགླང་ཆེན་རབ་འབོག་གི་རྒྱུད་དང་ལྔའོ། །བཞི་པ་ལ། རྣམ་སྣང་སྒྱུ་དྲྭ་དང་། འཕགས་པ་ཐབས་ཀྱི་ཞགས་པ་པདྨོའི་ཕྲེང་བའི་དོན་བསྡུས་དང་གཉིས་སོ། །ལྔ་པ་ནི། སྤྱི་རྒྱུད་སྒྱུ་འཕྲུལ་དྲྭ་བའོ། །སྔགས་ཀྱི་སྤྱི་དོན་ལས། ཏནྡྲ་སྡེ་བཅོ་བརྒྱད་དུ་ཕྱེ་བ་ནི། སྐུའི་རྒྱུད་གསུམ། གསུང་གི་རྒྱུད་གསུམ། ཐུགས་ཀྱི་རྒྱུད་གསུམ། ཡོན་ཏན་གྱི་རྒྱུད་གསུམ། ཕྲིན་ལས་ཀྱི་རྒྱུད་གསུམ། སྤྱི་རྒྱུད་གསུམ་སྟེ་བཅོ་བརྒྱད་དོ། །དེ་ལ་སྐུའི་སྐུ་རྒྱུད་གླང་པོ་རབ་འབོག །སྐུའི་གསུང་རྒྱུད་གླང་པོ་ཆུར་འཇུག །སྐུའི་ཐུགས་རྒྱུད་སངས་རྒྱས་མཉམ་སྦྱོར། གསུང་གི་སྐུ་རྒྱུད་རི་བོ་བརྩེགས་པ། གསུང་གི་གསུང་རྒྱུད་པདྨ་དབང་ཆེན། གསུང་གི་ཐུགས་རྒྱུད་ཟླ་གསང་ཐིག་ལེ། ཐུགས་ཀྱི་སྐུ་རྒྱུད་རྩེ་མོ་འདུས་པ། ཐུགས་ཀྱི་གསུང་རྒྱུད་གཅིག་ལས་འཕྲོས་པ། ཐུགས་ཀྱི་ཐུགས་རྒྱུད་གསང་བ་འདུས་པ། ཡོན་ཏན་གྱི་སྐུ་རྒྱུད་སྒྲོན་མེ་འབར་བ། ཡོན་ཏན་གྱི་གསུང་རྒྱུད་བདུད་རྩི་ས་མ་ཡ་འབུམ་སྡེ། ཡོན་ཏན་གྱི་ཐུགས་རྒྱུད་དཔལ་མཆོག་དང་པོ། ཕྲིན་ལས་ཀྱི་སྐུ་རྒྱུད་དཔལ་ཕྲེང་དཀར་མོ། ཕྲིན་ལས་གྱི་གསུང་རྒྱུད་མ་མོ་རྒྱུད་ལུང་། ཕྲིན་ལས་ཀྱི་ཐུགས་རྒྱུད་ཏ་མ་ལ་འབུམ་སྡེ། སྤྱིའི་སྐུ་རྒྱུད་ཐབས་ཞགས། སྤྱིའི་གསུང་རྒྱུད་ས་མ་ཡ་བཀོད་པ། སྤྱིའི་ཐུགས་རྒྱུད་གསང་བ་སྒྱུ་འཕྲུལ་ལོ། །ཞེས་གསུངས། ༈ གསང་འགྲེལ་ཕྱོགས་བཅུའི་མུན་སེལ་ལས། སྒྱུ་འཕྲུལ་སྡེ་བཞིར་བཞེད་དེ། འཁོར་འདས་ཀྱི་ཆོས་ཐམས་ཅད་རང་སྣང་དབྱེར་མེད་དུ་སྟོན་པ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་དང་། ལས་ཚོགས་རྒྱས་པར་སྟོན་པ་རྣམ་པར་སྣང་མཛད་སྒྱུ་འཕྲུལ་དྲྭ་བ་དང་། རོལ་པ་མངོན་དུ་སྟོན་པ་ལྷ་མོ་སྒྱུ་འཕྲུལ་དྲྭ་བ་དང་། ཐེག་པ་ཀུན་ལ་ཁྱབ་པར་སྟོན་པ་འཇམ་དཔལ་སྒྱུ་འཕྲུལ་དྲྭ་བའོ། །རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལ་ཡང་བརྒྱད་དེ། སེམས་དང་ཡེ་ཤེས་རང་སྣང་བར་སྟོན་པ་དཔལ་གསང་བའི་སྙིང་པོ་དང་། ཕྲིན་ལས་རྫོགས་པར་སྟོན་པ་བཞི་བཅུ་པ་དང་། དཀྱིལ་འཁོར་རྫོགས་པར་སྟོན་པ་སྒྱུ་འཕྲུལ་བརྒྱད་པ་དང་། དབང་བསྐུར་བ་གསལ་བར་སྟོན་པ་སྒྱུ་འཕྲུལ་བླ་མ་དང་། དམ་ཚིག་མཆོག་ཏུ་སྟོན་པ་སྒྱུ་འཕྲུལ་ལེ་ལག་དང་། ཡོན་ཏན་རྒྱས་པར་སྟོན་པ་སྒྱུ་འཕྲུལ་བརྒྱད་ཅུ་པ་དང་། ལྷའི་སྐུ་མདོག་དང་ཕྱག་མཚན་གསལ་བར་སྟོན་པ་རྡོ་རྗེ་མེ་ལོང་དང་། བསྐྱེད་རིམ་གསལ་བར་སྟོན་པ་རྒྱ་མཚོ་དང་། ཐབས་ལམ་གསལ་བར་སྟོན་པ་ཐལ་བ་དང་སྡེ་བརྒྱད་དོ། །ཞེས་སོ། །ཟུར་ལུགས་པ་ཕལ་ཆེར། སྒྱུ་འཕྲུལ་སྡེ་བརྒྱད་དང་། བཤད་རྒྱུད་སྡེ་བཞིར་དབྱེ་བར་མཛད་དེ། དང་པོ་ནི། འཁོར་འདས་ཀྱི་ཆོས་ཐམས་ཅད་རང་སྣང་དབྱེར་མེད་དུ་སྟོན་པ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ། ལས་ཚོགས་རྒྱས་པར་སྟོན་པ་རྣམ་པར་སྣང་མཛད་སྒྱུ་འཕྲུལ་དྲྭ་བ། སྡེ་སྣོད་ཡོངས་ལ་ཁྱབ་པར་སྟོན་པ་འཇམ་དཔལ་སྒྱུ་འཕྲུལ་དྲྭ་བ། དཀྱིལ་འཁོར་རྒྱས་པར་སྟོན་པ་སྒྱུ་འཕྲུལ་བརྒྱད་པ། ཕྲིན་ལས་རྫོགས་པར་སྟོན་པ་བཞི་བཅུ་པ། དབང་གཙོ་བོར་སྟོན་པ་བླ་མ། ཡོན་ཏན་མཐར་ཕྱིན་པར་སྟོན་པ་བརྒྱད་ཅུ་པ། དམ་ཚིག་མཆོག་ཏུ་སྟོན་པ་ལེ་ལག་དང་བརྒྱད་དོ། །གཉིས་པ་ནི་གྲོལ་ལམ་རིམ་ཅིག་ཆར་དུ་སྟོན་པ་ཡེ་ཤེས་སྙིང་པོ་དང་། རྡོ་རྗེ་མེ་ལོང་དང་། ཐབས་ལམ་རིགས་ཅིག་ཆར་དུ་སྟོན་པ་རྒྱ་མཚོ་དང་ཐལ་རྒྱུད་དོ། ༈ །ཤན་འབྱེད་ལས། གཞན་ཡང་དབུ་མ་དང་མ་འབྲེལ་བའི་རྡོ་རྗེ་ཐེག་པ་རང་ལམ་ཁོ་ན་ཉམས་སུ་བླངས་ཀྱང་ཐར་པ་མི་ཐོབ་ཟེར་བ་ལ་བརྟག་པ། རྡོ་རྗེ་ཐེག་པ་ན་ཐབས་གྲོལ་གྱི་ལམ་གཉིས་ཀ་བཤད་པས། གྲོལ་ལམ་གྱི་བདག་མེད་གཉིས་རྟོགས་དེས་མི་གྲོལ་ན་དབུ་མ་ལའང་མཚུངས་ཏེ། དོན་ལ་ཁྱད་མེད་པའི་ཕྱིར་རོ། །གལ་ཏེ་དེ་དབུ་མའི་ཡིན་ནོ་ཟེར་ན། དབུ་མའི་སྐབས་སུ་གང་ཟག་གི་བདག་མེད་བསྟན་པ་ཉན་ཐོས་ཀྱི་ཡིན་པར་འགྱུར་བས། གང་ཟག་གི་བདག་མེད་མ་རྟོགས་ན་འཁོར་བ་ལས་མི་གྲོལ་བའི་ཕྱིར། ཉན་ཐོས་ཀྱི་གྲུབ་མཐའ་དང་མ་འབྲེལ་ན་དབུ་མ་པའི་ལམ་ལའང་ཐར་བ་མེད་པར་མཚུངས་སོ། །དེས་ན་ཉན་ཐོས་ཀྱི་གྲུབ་མཐའ་སྔོན་སོང་མིན་ན་རྡོ་རྗེའི་ཐེག་པ་ལ་ཐར་ལམ་མེད་སྨྲོས་ཤིགགལ་ཏེ་དབུ་མ་པའི་ལམ་ན་གང་ཟག་གི་བདག་མེད་ཅི་སྨོས། ཆོས་ཀྱི་བདག་མེད་ཀྱང་རྒྱས་པར་བསྟན་པའི་ཕྱིར་ཉན་ཐོས་ཀྱིས་དེར་ལྟོས་མི་དགོས་སྙམ་ན། རྡོ་རྗེ་ཐེག་པ་ནི་བདེ་བ་ཆེན་པོས་ཁྱད་པར་དུ་བྱས་པའི་རྣམ་ཀུན་མཆོག་ལྡན་གྱི་སྟོང་ཉིད་ཁྱད་པར་འཕགས་པ་ཡོད་ན་དབུ་མའི་དེ་ལྟ་ཅི་སྨོས། རྣམ་ཀུན་མཆོག་ལྡན་ཁྱད་པར་བ་ཕུང་པོ་རྣམ་དཔྱད་ཀྱི་སྟོང་ཉིད་ལས་འཕགས་པའི་སྔགས་ཀྱི་ཁྱད་ཆོས་སུ་བཤད་དེ། རིགས་ལྡན་འཇམ་དཔལ་གྲགས་པས་དུས་འཁོར་བསྡུས་རྒྱུད་ལས། སྲིད་གསུམ་ཕྲ་རབ་གཟུགས་མིན་འདིར་ནི་རྣམ་པར་ཤེས་པའོ་དེ་བཞིན་རྣམ་པར་ཤེས་པ་ཉིད་མེད་དེ། །སངས་རྒྱས་ཤེས་རབ་གང་དུའང་གནས་པ་མ་ཡིན་ཞེས་པའི་ཚིག་ནི་སངས་རྒྱས་པ་རྣམས་སྟོན་པར་འགྱུར། །གང་ཞིག་འགྱུར་མེད་དང་བྲལ་མི་རྣམས་ཀྱིས་ནི་སྟོང་པ་ཉིད་དེ་བཟུང་ནས་སྟོང་པར་ལྟ་བྱེད་པ། །དེས་ན་གཙོ་བས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། །ཞེས་དང་། ཕུང་པོ་རྣམ་དཔྱད་སྟོང་པ་ཉིད། །ཆུ་ཤིང་བཞིན་དུ་སྙིང་པོ་མེད། །རྣམ་པ་ཀུན་གྱི་མཆོག་ལྡན་པའི། །སྟོང་ཉིད་དེ་དང་འདྲ་མ་ཡིན། །ཞེས་སོ། །བདེ་བའང་འགྱུར་བདེ་མྱོང་བའི་བདེ་བ་ནི་ལམ་གྱི་རྟེན་ཙམ་ཡིན་གྱི། བདེ་ཆེན་མིན་ཏེ་མི་རྟག་པའི་ཕྱིར་རོ། །ཨིནྡྲ་བྷོ་དྷིས། བདེ་ཆེན་མི་རྟག་མ་ཡིན་ཏེ། །བདེ་བ་ཆེན་པོ་རྟག་ཏུ་རྟག །ཅེས་གསུངས། དེས་ན་ཚོར་བདེ་འགྱུར་བ་ཅན་མིན་ཏེ། ཆོས་ཐམས་ཅད་རང་བཞིན་གྱི་ངོ་བོར་གྱུར་པའི་ཀ་དག་ལྷུན་གྲུབ་དབྱེར་མེད་ཀྱི་རང་བཞིན་ལ། འགྱུར་བའི་ཟུག་རྔུ་ཐམས་ཅད་བྲལ་ཀྱང་རང་གི་ངོ་བོ་འགྱུར་བ་མེད་པའི་ཡེ་ཤེས་འཁོར་བའི་ཟག་བཅས་ཀྱི་བདེ་བ་དང་སྡུག་བསྔལ་ཀུན་གྱིས་མ་གོས་པ་ལ། གང་སྣང་བདེ་བར་འཆར་བ་ལས་ཟུག་རྔུ་སོགས་ཡོང་ཡེ་མེད་པས་བདེ་ཆེན་དང་འདུ་འབྲལ་མེད་པ་ཡིན་ནོ། །ཞེས་སོ། ༈ །ཆེ་བ་བརྒྱད་ནི། ཁོག་གཞུང་གསལ་སྒྲོན་ལས། རང་བཞིན་གསང་བའི་སྙིང་པོ་འདི། །གཞན་ལས་འཕགས་པའི་ཆེ་བ་བརྒྱད། །ཅེས་པ་ལྟར། རྒྱུད་ཐམས་ཅད་གྱི་རྒྱལ་པོ་ཡིན་པས་ངེས་པར་ཆེ་བ་གཟི་ལྡན་གསལ་བའི་ཉི་མ་ལྟ་བུ། ཐེག་པ་ཐམས་ཅད་གྱི་ཡང་རྩེ་ཡིན་པས་ཆེ་བ་དབུས་ཀྱི་རི་བོ་མཆོག་རབ་ལྟ་བུ། བསྟན་པ་ཐམས་ཅད་ཀྱི་འབྱུང་ཁུངས་ཡིན་པས་ཆེ་བ་འབྱུང་བ་ནམ་མཁའ་ལྟ་བུ། ལུང་ཐམས་ཅད་ཀྱི་སྤྱི་འགྲེལ་ཡིན་པས་ཆེ་བ་ནམ་མཁས་སྣང་སྲིད་ཀྱི་གོ་ཕྱེ་བ་ལྟ་བུ། དེ་བཞིན་གཤེགས་པ་ཐམས་ཅད་ཀྱི་དགོངས་པའི་ཞེ་ཕུག་ཡིན་པས་ཆེ་བ་རྒྱལ་པོའི་བཀའ་གསང་ཐོབ་པའི་མི་ལྟ་བུ། འབྲས་བུ་ཐམས་ཅད་ཀྱི་ཐུག་ས་ཡིན་པས་ཆེ་བ་ཡིད་བཞིན་ནོར་བུ་རིན་ཆེན་ལྟ་བུ། དེ་བཞིན་གཤེགས་པ་ཐམས་ཅད་ཀྱི་གཤེགས་ཤུལ་ཡིན་པས་ཆེ་བ་སྟོང་ལམ་གྱི་ཤུལ་ལྟ་བུ། མ་འོངས་པའི་རྣལ་འབྱོར་པ་རྣམས་ཀྱི་ལམ་ཡིན་པས་ཆེ་བ་ཁྲི་ལམ་ལྟ་བུ་སྟེ་བརྒྱད་དོ། །དེ་ལས་དང་པོ་ནི་ཇི་ལྟར་ཉི་མའི་སྣང་བ་ནི་སྣང་བ་ཐམས་ཅད་ཀྱི་རྒྱལ་པོ་ཡིན་པ་བཞིན་དུ་རྒྱུད་འདི་ཉིད་ཀྱང་རྒྱུད་ཐམས་ཅད་ཀྱི་རྒྱལ་པོའོ། །གཉིས་པ་ནི། ཇི་ལྟར་ལྷུན་པོའི་རྩེར་ཕྱིན་ན་རི་ཕྲན་ཐམས་ཅད་མིག་འོག་ཏུ་ཚུད་པ་ལྟར་རྒྱུད་འདིའི་དོན་རྟོགས་ན་ཐེག་པ་ཐམས་ཅད་ཀྱི་དོན་འདིར་འདུས་པའི་ཕྱིར་དེ་ཐམས་ཅད་ཤེས་པར་འགྱུར་རོ། །གསུམ་པ་ནི་ཇི་ལྟར་ནམ་མཁའ་ལས་འབྱུང་བ་བཞི་ཤར་ནས་སྣོད་བཅུད་ཆགས་པ་ལྟར། རྒྱུད་འདིའི་བྱིན་རླབས་ལས་བསྟན་པ་དང་ཐེག་པ་ཐམས་ཅད་འཕྲོས་པ་ཡིན་ནོ། །བཞི་པ་ནི། ཇི་ལྟར་ནམ་མཁས་སྣང་སྲིད་གོ་ཕྱེ་བ་ལྟར། མཚན་ཉིད་དང་རྒྱུད་ཐམས་ཅད་ཀྱི་དོན་དང་འབྲས་བུ་ཐམས་ཅད་འདིར་འདུས་ཤིང་འདིས་སྟོན་པས་ན་ལུང་ཐམས་ཅད་ཀྱི་སྤྱི་འགྲེལ་ཡིན་ནོ། །ལྔ་པ་ནི། ཇི་ལྟར་རྒྱལ་པོའི་བཀའ་གསང་ཐོབ་པའི་མི་ནི་རྒྱལ་པོའི་བློ་གཏད་ས་ཡིན་པས་འབངས་རྣམས་བློན་གཞན་ལ་རག་མི་ལས་པ་བཞིན་དུ། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་གསང་བ་དམ་པའི་མཐར་ཐུག་འདི་ལས་མི་འདའ་བས་འདིའི་དོན་རྟོགས་ན་ཐེག་པ་གཞན་ལ་རག་ལས་མི་དགོས་པའོ། །དྲུག་པ་ནི་ཇི་ལྟར་ཡིད་བཞིན་གྱི་ནོར་བུ་རིན་ཆེན་ནི་འདོད་རྒུ་ཐམས་ཅད་སྟེར་བའི་མཆོག་མཐར་ཐུག་ཏུ་གྲུབ་པ་བཞིན་དུ། བསྟན་པ་དང་ཐེག་པ་ཐམས་ཅད་ཀྱི་མཐར་ཐུག་གི་འབྲས་བུ་ནི་རང་བཞིན་གསང་བའི་སྙིང་པོ་འདི་ཁོ་ནར་ཐུག་པའོ། །བདུན་པ་ནི་ཇི་ལྟར་གང་དུ་འགྲོ་བའི་ལམ་པོ་ཆེར་དེར་སླེབས་པ་ཐམས་ཅད་ཀྱིས་ཕྱིན་པ་ལྟར། སྔར་འདས་པའི་སངས་རྒྱས་ཐམས་ཅད་ལམ་འདི་ལ་བརྟེན་ནས་སངས་རྒྱས་པའོ། །བརྒྱད་པ་ནི། ཇི་ལྟར་གནས་དེར་སླར་འགྲོ་འགྱུར་རྣམས་ཀྱང་ལམ་དེ་ལ་འགྲོ་བ་བཞིན་དུ། མ་འོངས་པ་ན་འཚང་རྒྱ་འགྱུར་རྣམས་ཀྱང་ལམ་འདི་ཁོ་ན་ལ་བརྟེན་ནས་འཚང་རྒྱ་བར་འགྱུར་རོ། །སྤྱིར་མ་ཧཱ་ཡོ་གའི་རྒྱུད་རྣམས་རྒྱན་བདུན་གྱི་སྒོ་ནས་འཆད་པ་ཧེ་རུ་ཀ་གལྤོའི་རྒྱུད་ལས་གསུངས་ཏེ། མ་ཧཱ་ཡོ་གའི་རྒྱན་བདུན་ཡང་། གླེང་སློང་བ་དང་སངས་རྒྱས་ཚུལ། །རྒྱས་བཤད་མཐའ་དང་བཤད་པའི་ཚུལ། །དབྱེ་བའི་རྣམ་པ་གང་ཟག་སྣོད། །བདེན་པའི་དགོངས་པས་ཤེས་པར་བྱ། །ཞེས་སོ། །མ་ཧཱ་ཡོ་གའི་རྒྱུད་ལས་ཀྱང་ཁྱད་པར་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་གསང་བའི་སྙིང་པོ་དེ་ཁོ་ན་ཉིད་ངེས་པ་ཞེས་རྒྱུད་ལུང་མན་ངག་དང་མཐུན་པའི་མཚན་ཙམ་གྱི་ངེས་པ་ལས་ཀྱང་བླ་ན་མེད་པའི་རྒྱུད་དོན་རྣམས་ཀྱི་གསང་བ་རྟོགས་པར་འགྱུར་བ་རྒྱུད་ཐམས་ཅད་ཀྱི་རྒྱལ་པོ་འདི་ཉིད་འགྲེལ་ཚུལ་ལ། མན་ངག་ཨ་ཏི་ཡོ་ག་ལྟར་བཀྲལ་བ་དང་། བསྐྱེད་པ་མ་ཧཱ་ཡོ་ག་ལྟར་བཀྲལ་བའི་བཤད་སྲོལ་གཉིས་སུ་འདུ་བ་ཡིན་ནོ། །དེའང་དང་པོ་ནི། སློབ་དཔོན་ཉི་འོད་སེང་གེ་དང་། ཀུན་མཁྱེན་ཀློང་ཆེན་རབ་འབྱམས་སོགས་ཀྱི་དགོངས་པའོ། །ཕྱི་མ་ནི། སྒེག་པའི་རྡོ་རྗེ། སངས་རྒྱས་གསང་བ་སོགས་དང་། ཟུར་པའི་བཀའ་སྲོལ་འཛིན་པ་ཕལ་ཆེ་བའི་དགོངས་པ་ཡིན་ནོ། །ཇི་ལྟར་འཆད་ན། སྔ་རབས་པ་རྣམས་ཀྱིས་མཚོན་དཔེ་དང་སྦྱར་ཏེ་འཆད་ལུགས་གསུམ་ནི། མདའ་ལྟར་རྩེ་མོ་ནས་བཟུང་སྟེ་འཆད་པ་ཞེས་བྱ་བ། ཆོས་ཐམས་ཅད་ཡེ་ནས་སངས་རྒྱས་པ་གཞི་གསང་བའི་སྙིང་པོ། དེ་ཉིད་བསྐྱེད་རྫོགས་གཉིས་སུ་མེད་པས་ཉམས་སུ་ལེན་པ་ལམ་དེ་ཁོ་ན་ཉིད། དེའི་མཐར་ཐུག་སྐུ་གསུམ་ལྷུན་གྱིས་གྲུབ་པ་འབྲས་བུ་གཞི་ཐོག་ཏུ་ངེས་པ་སྟེ་མཚན་གྱི་ནང་དུ་ཆོས་ཐམས་ཅད་གཞི་ལམ་འབྲས་གསུམ་དུ་བསྡུས་ནས་འཆད་པ་དང་། མདུང་ལྟར་རྐེད་པ་ནས་བཟུངས་སྟེ་འཆད་པ་ཞེས་བྱ་བ་ལ། ལེའུ་ལྔ་པར། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་པས། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་གྱུར་གྱི་འབྲས་བུ་རིག་འཛིན་བཞི་སྟེ་མཚན་ཉིད་གསུམ་དུ་དྲིིལ་ནས་འཆད་པ་དང་། རལ་གྲི་ལྟར་ཡུ་བ་ནས་བཟུང་སྟེ་འཆད་པ་ཞེས་བྱ་བ། རྩ་རྒྱུད་ལེའུ་ཐ་མའི་ཤོ་ལོ་ཀ་གཉིས་ཀྱི་དོན། གཞི་རང་བཞིན་གྱི་སྣང་བ། ལོག་རྟོག་འཁྲུལ་བའི་སྣང་བ། གདུལ་བྱ་ལམ་གྱི་སྣང་བ། འབྲས་བུ་བདེ་གཤེགས་ཀྱི་སྣང་བ་བཞིར་བསྡུས་ནས་འཆད་པ་དང་། བཀའ་སྡེ་ཟུར་པའི་བཤད་སྲོལ་ནི། ཆོས་ལྔའི་སྒོ་ནས་འཆད་དེ། རང་བཞིན་དངོས་པོའི་གནས་ཚུལ། མ་རྟོགས་འཁྲུལ་བའི་སྣང་ཚུལ། ཐམས་ཅད་མཁྱེན་པས་གཟིགས་ཚུལ། བརྩེ་བས་ཐུགས་རྗེ་སྐྱེ་ཚུལ། འགྲོ་དོན་ཇི་ལྟར་མཛད་ཚུལ་དང་ལྔའི་སྒོ་ནས་འཆད་པ་ཡིན་ནོ། །ད་ལྟའི་འཆད་ཚུལ་ནི་བི་མ་ལའི་ཁོག་གཞུང་ལས། རབ་ལ་མཚན་བསྟན་འབྲིང་ལ་ཕྱེ། །ཐ་མ་འབྲུ་གཉེར་བཀྲོལ་བའོ། །ཞེས་གསུངས་ལྟར་རབ་ལ་མཚན་བསྟན་ཞེས་པ་དབང་པོ་ཡང་རབ་ལ་རྒྱུད་ཀྱི་མཚན་བསྟན་ཏེ་བཤད་པ་དང་། འབྲིང་ལ་དབྱེ་ཞེས་པས་དབང་པོ་འབྲིང་རྣམས་ལ་རྒྱུད་ཀྱི་སྤྱི་དོན་རྣམ་པར་དབྱེ་བས་བཤད་པ་དང་། ཐ་མར་འབྲུ་གཉེར་དགྲོལ་བའོ་ཞེས་པས་དབང་པོ་ཐ་མ་རྣམས་ལ་འབྲུ་རེ་རེའི་སྒོ་ནས་བཀྲལ་ཏེ་བཤད་པའོ། །དང་པོ་དབང་པོ་ཡང་རབ་རྣམས་ལ་རྒྱུད་ཀྱི་མཚན་བསྟན་པ་ནི། ཁོག་གཞུང་ལས། རབ་མཚན་ཐ་སྙད་གསུམ་དུ་གྲགས། །སྒྱུ་འཕྲུལ་སྙིང་པོ་ལུང་གི་སྤྱི། །ལག་གི་རྩ་བཞིན་དབུ་ཞབས་རྟོགས། །ཞེས་པས་བསྟན། དེ་ལ། རབ་མཚན་ཐ་སྙད་གསུམ་དུ་གྲགས། །ཞེས་པ་ནི། དབང་པོ་ཡང་རབ་ལ་བསྟན་པའི་མཚན་དེ་ལ་རྣམ་པ་གསུམ་དུ་ཡོད་ཅེས་པའི་དོན་ཡིན། གསུམ་པོ་གང་ཞེ་ན། སྒྱུ་འཕྲུལ་སྙིང་པོ་ལུང་གི་སྤྱི། །ཞེས་པས་བསྟན། སྒྱུ་འཕྲུལ་ཞེས་པས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་པ་རྒྱུད་དང་མཐུན་པའི་མཚན། སྙིང་པོའི་ཞེས་པས་གསང་བ་སྙིང་པོ་དེ་ཁོ་ན་ཉིད་ངེས་པའོ་ཞེས་པ་མན་ངག་དང་མཐུན་པའི་མཚན། ལུང་གི་སྤྱི་ཞེས་པས་མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་ཞེས་པ་ལུང་དང་མཐུན་པའི་མཚན་ནོ། །ལག་གི་རྩ་བཞིན་དབུ་ཞབས་རྟོགས། །ཞེས་པས་དབང་རབ་ཀྱིས་མཚན་ཐ་སྙད་གསུམ་པོ་དེ་ལ་བརྟེན་ནས་རྒྱུད་དོན་རྟོགས་ཚུལ་བསྟན་ཏེ། ལག་གི་རྩ་བཞིན་ཞེས་པས་དཔེ་བསྟན། དབུ་ཞབས་རྟོགས་ཞེས་པས་དཔེ་ཅན་བསྟན་ཏེ། དཔེར་ན་སྨན་པ་མཁས་པས་ནད་པའི་ལག་གི་རྩ་ལ་བརྟེན་ནས་ལུས་མགོ་མཇུག་གི་ནད་ཐམས་ཅད་ངོས་ཟིན་པ་བཞིན་དུ། དབང་རབ་དེས་ཀྱང་རྒྱུད་ལུང་མན་ངག་གི་མཚན་གསུམ་ལ་བརྟེན་ནས་རྒྱུད་དབུ་ཞབས་ཀྱི་དོན་ཐམས་ཅད་བདེ་བླག་ཏུ་རྟོགས་པར་འགྱུར་བས་ན་དབུ་ཞབས་རྟོགས་ཞེས་བཤད་པ་ཡིན་གསུངས། དེ་ལྟར་མཚན་གསུམ་གྱི་དང་པོ་རྒྱུད་དང་དཀྱིལ་འཁོར་གྱི་གཙོ་བོ་དང་འཆད་པའི་སྐྱེས་བུ་གསུམ་གྱི་མཚན་ཐུན་མོང་དུ་བསྟན་པ་ནི་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་སྟེ་ཞེས་པ་ལ་མཚན་གྱི་ཟུར་གཉིས་ཏེ། རྡོ་རྗེ་སེམས་དཔའ་བཤད་པ་དང་། སྒྱུ་འཕྲུལ་དྲྭ་བ་བཤད་པའོ། །དང་པོ་རྡོ་རྗེ་སེམས་དཔའ་ལའང་ཟུར་གཉིས་ཏེ། རྡོ་རྗེ་བཤད་པ་དང། སེམས་དཔའ་བཤད་པ་གཉིས། དང་པོ་རྡོ་རྗེ་ཞེས་པའི་དོན་ནི། བཤད་རྒྱུད་མེ་ལོང་ལས། ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། །ཞེས་པས་བསྟན་པ་ཡིན། རྡོ་རྗེ་ནི་རང་བཞིན་དབྱེར་མི་ཕྱེད་པའི་ཤེས་རབ་སྟོང་པ་ཉིད་ཡིན་ལ། དེ་ཡང་རྡོ་རྗེ་དེ་རང་བཞིན་གང་དང་དབྱེར་མི་ཕྱེད་ཅེ་ན། ཆོས་ཐམས་ཅད་ཀྱི་རང་བཞིན་སྟོང་པ་ཉིད་དང་དབྱེར་མི་ཕྱེད་པ་ཡིན་ལ། སྟོང་པ་ཉིད་ལ་རྡོ་རྗེ་ཞེས་བྱ་སྟེ། མཉམ་སྦྱོར་ལས། རྡོ་རྗེ་སྟོང་པ་ཉིད་དུ་བཤད། །ཅེས་སོ། །མཚན་གྱི་ཟུར་གཉིས་པ་སེམས་དཔའ་ཞེས་པ་ནི། ཆོས་རྣམས་མ་ལུས་གཉིས་མེད་པའི། །རང་རིག་བྱང་ཆུབ་སེམས་ཉིད་དོ། །ཞེས་པས་བསྟན། དེ་ཡང་སེམས་དཔའ་ཞེས་པ་ས་ཏྭའི་སྒྲ་ལས་དོན་དྲུག་ཙམ་ལ་འཇུག་སྟེ། སེམས་ཅན་དང་། དཔའ་བ་དང་། སྙིང་སྟོབས་ཆེ་བ་དང་། བརྟན་པ་དང་། བསྡུས་པ་དང་། རྟོགས་པ་རྣམ་ལ་འཇུག་པ་ལས། འདིར་བརྟན་བསྡུས་རྟོགས་གསུམ་ལ་འཇུག་པའི་སྐབས་ཡིན་ཏེ། དང་པོ་བརྟན་པའི་དོན་ནི། གོང་གི་ཤེས་རབ་སྟོང་པ་ཉིད་དེའི་སྣང་ཆ་ཐབས་རིག་པ་རང་བྱུང་གི་ཡེ་ཤེས་ཡིན་ལ། དེ་ལྟར་དབྱིངས་དང་ཡེ་ཤེས་དེ་གཉིས་མེ་དང་ཚ་བ་བཞིན་དུ་གདོད་ནས་ཟུང་འཇུག་ཆེན་པོར་བཞུགས་ཤིང་སེམས་ཅན་ནས་སངས་རྒྱས་ཀྱི་བར་དུ་རང་བཞིན་ལ་བཟང་ངན་མེད་ཅིང་། དུས་ཐམས་ཅད་དུ་ངོ་བོ་གཞན་དུ་མི་འགྱུར་བར་གནས་པས་ན་བརྟན་པའི་རྡོ་རྗེ་སེམས་དཔའ་ཞེས་བཤད་པའོ། །གཉིས་པ་བསྡུས་པའི་དོན་ནི། དེ་ཉིད་ཀྱི་ཕྱག་རྒྱས་འཁོར་འདས་ཀྱི་ཆོས་ཐམས་ཅད་ལ་བཏབ་པས་མཉམ་པ་ཉིད་དུ་བསྡུས་ཞེས་པ་ནི། དེ་ཉིད་ཆོས་ཐམས་ཅད་ཀྱི་སྲོག་ཏུ་སོང་བས་དབུས་ན་གནས་ཤིང་སེམས་ཉིད་ཀྱི་ཀློང་དུ་བརྟན་གཡོའི་ཆོས་ཀུན་མཉམ་པ་ཉིད་དུ་བསྡུས་པས་ན་བསྡུས་པའི་རྡོ་རྗེ་སེམས་དཔའ་ཡིན་ནོ། །གསུམ་པ་རྟོགས་པའི་དོན་ནི། རྣམ་གྲོལ་དོན་གཉེར་གྱི་གང་ཟག་གིས་ལམ་ཐབས་གྲོལ་གཉིས་ལ་འབད་པས་སེམས་སངས་རྒྱས་སུ་རྟོགས་པ་དེ་ལ་རྟོགས་པའི་རྡོ་རྗེ་སེམས་དཔའ་འམ་འབྲས་བུའི་རྡོ་རྗེ་སེམས་དཔའ་ཞེས་བསྟན་པ་སྟེ། སྔ་མ་གཉིས་གནས་ཚུལ་ལ་ལྟོས་ནས་བཞག་པ་དང་། ཕྱི་མ་ནི་སྣང་ལུགས་དྲི་བྲལ་གྱི་ཆ་ནས་བཞག་པ་ཡིན་ལ། ལམ་དུས་ཀྱི་རིམ་གཉིས་ཀྱི་རྡོར་སེམས་ཡང་འབྲས་བུའི་རྡོར་སེམས་དང་ཆ་འདྲ་ཙམ་དུ་ཤེས་དགོས་གསུངས། དེས་རྒྱུད་ལ་རྡོ་རྗེ་སེམས་དཔའ་ཞེས་བཏགས་པའི་དོན་སོང་། དཀྱིལ་འཁོར་གྱི་གཙོ་བོ་ལ་རྡོ་རྗེ་སེམས་དཔའ་ཞེས་བཏགས་པའི་དོན་ནི། སེམས་ཉིད་རང་བྱུང་གི་ཡེ་ཤེས་དེ་ཉིད་ཀྱི་ངོ་བོ་མཚན་མེད་སྟོང་པ་ཉིད་ཡིན་ཀྱང་། སེམས་ཅན་གྱི་བློ་ལ་ལྟོས་ནས་རིག་པ་ཉིད་ཡེ་ཤེས་ཀྱི་འཁོར་ལོའི་ཚུལ་དུ་མཚན་མའི་ཕྱག་རྒྱར་མངོན་པར་སྣང་བའོ། །འཆད་པའི་སྐྱེས་བུ་ལ་རྡོ་རྗེ་སེམས་དཔའི་མཚན་བཏགས་པ་ནི། སྤྱིར་རྒྱུད་འཆད་པའི་སྐྱེས་བུ་རིགས་ལྔ་སྟེ། འདིར་སྟོན་པ་ཀུན་ཏུ་བཟང་པོའི་མདུན་ན་བཞུགས་པའི་ཐུགས་ཀྱི་སྒྱུ་འཕྲུལ་འཆད་པའི་སྐྱེས་བུ་རྡོ་རྗེ་མི་བསྐྱོད་པ་ལ་ཡང་དེ་ལྟར་དུ་གྲགས་སོ། །ཟུར་གཉིས་པ་སྒྱུ་འཕྲུལ་དྲྭ་བ་ཞེས་པའི་མཚན་ནི། སྒྱུ་འཕྲུལ་རྡོ་རྗེ་ལས། ཐབས་དང་ཤེས་རབ་འབྲེལ་བའི་དོན། །སྒྱུ་འཕྲུལ་ཞེས་ནི་བཞིར་བཤད་དོ། །ཞེས་པས། དེ་ལ་བཞི་ལས། དང་པོ། རྟོག་ཚོགས་སྒྱུ་འཕྲུལ་དྲྭ་བ་ནི། འབྱུང་བ་ལྔ་ལ་སྒྱུ་མ་དང་། ཕུང་པོ་ལྔ་ལ་འཕྲུལ་བ་དང་། དེ་གཉིས་རྟེན་དང་བརྟེན་པར་འབྲེལ་བ་ལ་དྲྭ་བ་ཞེས་བྱའོ། །གཉིས་པ་ངེས་དོན་སྒྱུ་འཕྲུལ་དྲྭ་བ་ནི། ཤེས་རབ་སྟོང་པ་ཉིད་ལ་སྒྱུ་མ་དང་། དེའི་རང་མདངས་མ་འགགས་པའི་ཐབས་རིག་པ་རང་བྱུང་གི་ཡེ་ཤེས་ལ་འཕྲུལ་བ་དང་། དེ་གཉིས་ངོ་བོ་དབྱེར་མེད་དུ་འབྲེལ་བ་ལ་དྲྭ་བ་ཞེས་བྱའོ། །གསུམ་པ་དྲང་དོན་སྒྱུ་འཕྲུལ་དྲྭ་བ་ནི་ངེས་དོན་སྒྱུ་འཕྲུལ་དྲྭ་བ་དེ་ཉིད་རྟོགས་པའི་ཐབས་སུ་གྱུར་པ་སྟེ། དེའི་མཚོན་བྱེད་ལྷ་ཡབ་ཡུམ་ཟུང་དུ་འཇུག་པ་སྟེ། སྟོང་པ་ཉིད་མཚོན་བྱེད་ལྷ་ཡུམ། རིག་པའི་ཡེ་ཤེས་མཚོན་བྱེད་ལྷ་ཡབ། ཟུང་འཇུག་མཚོན་བྱེད་ལྷ་ཡབ་ཡུམ་འཁྲིལ་སྦྱོར་དུ་བཞུགས་པས་ན། ལྷ་ཡུམ་རྣམས་ནི་སྒྱུ་མ་དང་། ཡབ་རྣམས་ནི་འཕྲུལ་པ་དང་། ཡབ་ཡུམ་ཁ་སྦྱོར་བདེ་བའི་སྐུར་བཞུགས་པ་དྲྭ་བའི་དོན་ནོ། །དེ་ཡང་གང་དྲང་ན་གང་ཟག་མཚན་མའི་བློ་ཅན་དེ་དྲང་། གང་དུ་དྲང་ན་ངེས་དོན་སྒྱུ་འཕྲུལ་དྲྭ་བ་དེ་ལ་དྲང་། ཚུལ་ཇི་ལྟ་བུའི་སྒོ་ནས་དྲང་ན་ལྷ་ཡབ་ཡུམ་ཐབས་ཤེས་ཕན་ཚུན་འཁྲིལ་སྦྱོར་གྱི་ཕྱག་རྒྱའི་བརྡ་དང་རྟགས་ལ་བརྟེན་ནས་དྲང་པ་ཡིན་ནོ། །བཞི་པ་ལྷ་རྟོགས་དབྱེར་མེད་ཀྱི་སྒྱུ་འཕྲུལ་དྲྭ་བ་ནི། རྟོག་ཚོགས་ཀྱི་རང་བཞིན་ལྷར་འཕྲུལ་པ་དང་། ལྷའི་ངོ་བོ་རྟོག་ཚོགས་སུ་སྣང་ཡང་རང་བཞིན་ལྷ་ཡིན་པ་ལས་མ་གཡོས་པའི་ཕྱིར་ན་ལྷ་རྟོག་དབྱེར་མེད་ཅེས་བཤད་དེ། སྒྱུ་མ་ནི་རྟོག་ཚོགས། དེ་ཉིད་རང་རིག་རྟོགས་པའི་ཐབས་ཀྱིས་ལྷར་ཤར་བ་ནི་འཕྲུལ་བ། ལྷ་རྟོག་རང་བཞིན་གཉིས་སུ་མེད་པར་འབྲེལ་བ་ནི་དྲྭ་བའོ། །གཉིས་པ་ཆེ་བ་ལ་མཚན་དུ་བཏགས་པ་ལུང་གི་མཚན་ནི། རྡོ་རྗེ་ལས། སོ་སོར་བསྟན་པ་རྒྱ་མཚོའི་རྒྱུད། །འདིར་སྟོན་འདིས་སྟོན་འདི་ཕྱིར་སྟོན། །དོན་ཀུན་འདི་ལ་ཡོངས་རྫོགས་པས། །ལུང་གི་སྤྱི་ཞེས་བཤད་པ་ཡིན། །ཞེས་པས། འདིར་སྟོན་ཞེས་པ་ནི། སྟོན་པས་གདུལ་བྱ་སོ་སོའི་བློ་དང་འཚམ་པར་བསྟན་པའི་ཆོས་ནི་རྒྱ་མཚོའི་རྒྱུད་དེ། དོན་ཟབ་ཅིང་གཏིང་དཔག་དཀའ་བ་རྒྱ་མཚོ་ལྟ་བུ། ཚིག་རྒྱ་ཆེ་ཞིང་མཐའ་ཡས་པ་དེ་ཐམས་ཅད་ཀྱི་བརྗོད་བྱ་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཀྱི་ནང་དུ་རྫོགས་པར་སྟོན་པས་ན། འདིར་སྟོན་ཞེས་བཤད་དོ། །འདིས་སྟོན་ཞེས་པ་ནི། བསྟན་པ་དང་ཐེག་པ་ཐམས་ཅད་ཀྱི་དོན་མ་ལུས་པ་རྒྱུད་ཀྱི་རྒྱལ་པོ་ཆེན་པོ་འདི་ཉིད་ལས་འཕྲོས་ཏེ་སྟོན་པས་ན་འདིས་སྟོན་ཞེས་བཤད་དོ། །འདི་ཕྱིར་སྟོན་ཞེས་པ་ནི། ཐེག་པའི་སྒོ་གང་ནས་ཞུགས་ཀྱང་མཐར་ཐུག་ཐེག་པ་འདི་ལས་མི་འདའ་བས་ཐེག་པ་གཞན་ཐམས་ཅད་འདི་ཉིད་ཀྱི་ལམ་སྟེགས་ཀྱི་ཚུལ་དུ་གསུངས་པ་ཡིན་པས་ལུང་གི་སྤྱི་ཞེས་བཤད་པ་ཡིན་ཏེ། སྒྱུ་འཕྲུལ་རྡོ་རྗེ་ལས། དྲི་མ་མེད་པའི་ལུང་ཉིད་ལས། །ལས་དང་ཡེ་ཤེས་སྤྱི་ཉིད་ཀྱི། །རྫོགས་པའི་རྫོགས་ཕྱིར་ལུང་ཉིད་དོ། །ཞེས་གསུངས་པ་ལྟར་ལས་ཀྱི་ལུང་མཚན་ཉིད་སྡེ་གསུམ། ཡེ་ཤེས་ལྷའི་ལུང་ཕྱི་རྒྱུད་སྡེ་གསུམ། བྱ་བྲལ་རྫོགས་པའི་ལུང་ནང་རྒྱུད་སྡེ་གསུམ་སྟེ། དེ་དག་གི་ལུང་གི་སྤྱིར་གྱུར་པས་ན་ལུང་གི་སྤྱི་ཞེས་བཤད་པ་ཡིན་ནོ། །གསུམ་པ་དོན་རང་གི་ངོ་བོ་ལ་བཏགས་པ་མན་ངག་གི་མཚན་ནི། གླེགས་བམ་གྱི་ཀླད་དུ་བཀོད་པའི་མཚན་ལ། གསང་བ་སྙིང་པོ་དེ་ཁོ་ན་ཉིད་ངེས་པའོ། ༈ །གཞན་ཡང་མཚན་ནང་ལྟར་ཐབས་ལམ་སྟེང་སྒོ་དང་སྦྱར་ཏེ་འཆད་པ་ལ་གཉིས་ལས། དང་པོ་སྙིང་གའི་འཁོར་ལོ་དང་སྦྱར་ཏེ་བཤད་པ་ནི། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཀྱི་དབུས་ན་དྭངས་མ་ཆེན་པོ་ལྔ་དང་། དེའི་དཀྱིལ་ན་ཡེ་ཤེས་ཀྱི་སྙིང་པོའི་ཐིག་ལེ་ཡེ་ནས་གནས་ཀྱང་རང་གསང་ཐབས་ཀྱིས་ཆོད་ནས་མ་མཐོང་བ་ནི་གསང་བ། དེ་ཉིད་ལ་གསང་སྔགས་ཀྱི་ཟབ་གནད་ཐམས་ཅད་འདུས་པས་སྙིང་པོ། ཐབས་ཀྱི་མན་ངག་དང་ལྡན་པའི་སྒོ་ནས་ཉམས་སུ་བླངས་བས་ཡེ་ཤེས་ཀྱི་སྣང་བ་དེ་ཉིད་གསལ་བར་སད་པ་དེ་ཁོ་ན་ཉིད། སྙིང་པོའི་ཐིག་ལེ་དེ་གཞི་ལམ་འབྲས་གསུམ་གྱི་སྲོག་ཏུ་ངེས་པས་ན་ངེས་པའོ། །གཉིས་པ་མཚན་བཞི་དང་འཁོར་ལོ་བཞི་སྦྱར་ཏེ་བཤད་པ་ནི། ལྟེ་བའི་འཁོར་ལོ་རྩ་འདབ་དྲུག་ཅུ་རྩ་བཞིའི་དབུས་ན་དབྱིངས་ཕྱུག་ལྔའི་ཐིག་ལེ་ཡི་གེ་ཨའི་རྣམ་པར་གནས་པ་ནི་གསང་བ། སྙིང་གའི་འཁོར་ལོ་རྩ་འདབ་བརྒྱད་ཀྱི་དྭངས་མ་ལྔའི་དབུས་ན་ཡེ་ཤེས་སྙིང་པོའི་ཐིག་ལེ་བཞུགས་པས་ན་སྙིང་པོ། མགྲིན་པའི་འཁོར་ལོ་རྩ་འདབ་བཅུ་དྲུག་གི་དབུས་ན་མཁའ་འགྲོ་རྔམ་མའི་ཐིག་ལེ་ཨཾ་ཡིག་གི་རྣམ་པར་གནས་པ་ནི་དེ་ཁོ་ན་ཉིད། སྤྱི་བོའི་འཁོར་ལོ་རྩ་འདབ་སོ་གཉིས་ཀྱི་དབུས་ན་ཀུན་ཏུ་བཟང་པོའི་ཐིག་ལེ་ཧཾ་ཡིག་གི་རྣམ་པར་གནས་པ་དེ་ལ་ངེས་པ་ཞེས་བཤད་དོ། །གསང་བ་ལྟར་འོག་སྒོ་དང་སྦྱར་ཏེ་བཤད་པ་ནི། རྩ་གནས་ཀྱི་ཐིག་ལེ་བདེ་བའི་ཡེ་ཤེས་ཀྱི་རོ་དང་བཅས་པ་རང་ཆས་སུ་ཡོད་ཀྱང་མ་ཤེས་པས་གསང་བ། ཐིག་ལེ་དེ་ལ་ཕུང་ཁམས་ཐམས་ཅད་ཀྱི་བཅུད་འདུས་པས་སྙིང་པོ། ཐབས་ལམ་ཟབ་མོས་གནད་དུ་བསྣུན་པས་ལྷན་སྐྱེས་ཀྱི་རང་ཞལ་ཇི་བཞིན་མཐོང་བ་དེ་ཁོ་ན་ཉིད། ཐིག་ལེ་དེ་ཉིད་གཞི་ལམ་འབྲས་བུ་གསུམ་གའི་གནད་སྲོག་ཏུ་ངེས་པ་ལ་ངེས་པ་ཞེས་བཤད་དོ། ༈ །དེ་ཡང་དཔལ་གསང་བ་འདུས་པའི་རྒྱུད་ཅེས་བྱ་བ་ཡང་དག་པར་བརྗོད་པར་བྱ་བ་དོན་གྱི་རྒྱུད་དང་། རྗོད་པར་བྱེད་པ་སྒྲའི་རྒྱུད་གཉིས་སུ་གནས་པ་ལས། དོན་ནི། གསང་བ་འདུས་པ་ཞེས་བྱ་བ་ནི། །སྐུ་གསུང་ཐུགས་ནི་རྣམ་པ་གསུམ། །གསང་བ་ཞེས་ནི་བཤད་པ་ཡིན། །ཚོགས་པ་འདུས་པར་རབ་བརྗོད་དེ། །སངས་རྒྱས་ཐམས་ཅད་མངོན་བརྗོད་བྱེད། །ཅེས་གསུངས་པའི་ཕྱིར། སྐལ་བ་ཅན་མ་ཡིན་པ་དག་ལ་གསང་བར་བྱ་བ་ཉིད་ཀྱི་ཕྱིར། སངས་རྒྱས་རྣམས་ཀྱི་དོན་དམ་པའི་སྐུ་དང་གསུང་དང་ཐུགས་ལ་གསང་བ་ཞེས་བྱ་ལ། དེ་ཡང་ཞིང་ཕྱོགས་གཅིག་པ་དང་། གདུལ་བར་བྱ་བ་ཕྱོགས་གཅིག་པའི་དབང་དུ་བྱས་པའི་སངས་རྒྱས་ཀྱི་མ་ཡིན་པར། སངས་རྒྱས་ཐམས་ཅད་ཚོགས་པའམ་འདུས་པའི་བདག་ཉིད་ཅན་ཟུང་དུ་འཇུག་པའི་སྐུ་ལ་རྡོ་རྗེ་འཆང་ཆེན་པའམ་སངས་རྒྱས་ཐམས་ཅད་ཅེས་བྱའོ། །དེ་ནི་མཐར་ཐུག་པའི་གནས་ཡིན་པའི་ཕྱིར། དེ་རྗོད་པར་བྱེད་པའི་རྒྱུད་ལ་ཡང་རྒྱུད་རྣམས་ཀུན་གྱི་སྤྱི་བོ་ཞེས་བཤད་དོ། །རྡོ་རྗེ་འཆང་ཞེས་བྱ་བ་ཡང་། སྒྲོན་མ་གསལ་བ་ལས། རིགས་ཐམས་ཅད་ཀྱི་བདག་ཉིད། ཐོག་མ་དང་ཐ་མ་མེད་པ། དང་པོའི་སངས་རྒྱས། རིག་པ་ཆེན་པོ་སྐྱེས་བུའི་གཟུགས་ཡེ་ཤེས་ཀྱི་སྐུ། རང་བཞིན་གྱིས་འོད་གསལ་བའི་བདག་ཉིད་ཅན། འཇིག་རྟེན་གསུམ་གྱི་བདག་ཉིད་ཅན། སྐུ་གསུམ་གྱི་བདག་ཉིད་ཅན། ཐེག་པ་གསུམ་གྱི་བདག་ཉིད་ཅན། དུས་གསུམ་གྱི་བདག་ཉིད་ཅན། རྡོ་རྗེ་གསུམ་གྱི་བདག་ཉིད་ཅན། བདེན་པ་གཉིས་ཀྱི་བདག་ཉིད་ཅན། ཞེས་གསུངས་པས་ན། འདུས་པ་ཁ་ཅིག་གིས་རྡོ་རྗེ་འཆང་ཆེན་པོའི་སྐུ་མདོག་དང་ཕྱག་མཚན་ཅི་ཡིན་པ་འཚོལ་ཞིང་། སྐུ་མདོག་དཀར་པོ་ཞལ་གཅིག་ཕྱག་གཉིས་པ་ཡིན་ནོ། །ཞེས་བྱ་བ་ལ་སོགས་པ་སྨྲ་བ་ནི། དེ་ལྟར་བཤད་པའི་སྒྲོན་མ་གསལ་བའི་དོན་ཐུགས་སུ་མ་ཆུད་པ་ལས་ཡིན་པར་སྣང་ལ། འོན་ཀྱང་གཟུགས་རྣམ་པར་སྣང་མཛད་ཅེས་བྱ་བ་ལ་སོགས་པ་དང་འདྲ་བར། བཏགས་པའི་དབང་གིས་དེའི་སྐུ་མདོག་དང་ཕྱག་མཚན་ཅི་ཡིན་པ་འཚོལ་བ་ནི། རིགས་དྲུག་པར་རྣམ་པར་བཞག་པའི་རྡོ་རྗེ་སེམས་དཔའི་སྐུ་མདོག་ལ་སོགས་པ་གང་ཡིན་པ་དེ་ཡིན་པར་ཤེས་པར་བྱའོ། །དེ་ལྟར་སློབ་དཔོན་ཀླུ་སྒྲུབ་སློབ་མར་བཅས་པ་རྣམས་ཀྱིས་ཀྱང་འདུས་པ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི་པོ་ཐམས་ཅད་ཀྱི་དོན་གྱི་གཙོ་བོ་ཡིན་པར་བཞེད་ལ། དེང་སང་ལ་ལ་དག་རྒྱུད་གཞན་དང་མ་འདྲེས་པའི་རང་དབང་ཅན་ཉི་ཚེ་བ་ཞིག་ཏུ་ཁས་ལེན་པ་ནི་ཐེག་པ་དམན་པ་ལ་མངོན་པར་ཞེན་པའི་བག་ཆགས་ལས་བྱུང་བ་ཡིན་ནོ། །དེ་བཞིན་དུ་དྲི་མ་མེད་པའི་འོད་དུ་ཡང་། དེ་བཞིན་གསོལ་བ་འདེབས་པ་པོ་ནི་དཔལ་འདུས་པར། དེ་ནས་ཕྱག་ན་རྡོ་རྗེ་དེ་བཅོམ་ལྡན་འདས་རྡོ་རྗེ་འཛིན་པས་བྱིན་གྱིས་བརླབ་པར་འགྱུར་བས་འདི་སྐད་ཅེས་གསོལ་ཏོ། །རྒྱུད་ཀྱི་རྒྱལ་པོ་ཆེན་པོ་རྒྱུད་ཐམས་ཅད་ཀྱི་བླ་ན་མེད་པ་སངས་རྒྱས་ཐམས་ཅད་ཀྱི་དཔལ་འདུས་པར་སངས་རྒྱས་ཐམས་ཅད་མངོན་པར་བརྗོད་པ་བཅོམ་ལྡན་འདས་ཀྱིས་བསྟན་དུ་གསོལ། ཞེས་པ་དེ་ལྟ་བུ་ལ་སོགས་པས་ཕྱག་ན་རྡོ་རྗེས་གསོལ་བ་བཏབ་བོ། །ཞེས་གསུངས་པའི་ཕྱིར། དུས་ཀྱི་འཁོར་ལོ་འགྲེལ་བ་དང་བཅས་པ་ཡང་གསང་བ་འདུས་པ་འཆད་བྱེད་དུ་འགྱུར་བ་ཡིན་པར་བཞེད་པ་ཡིན་ནོ། །དཔལ་ཀྱེ་རྡོ་རྗེ་ཡང་། སེམས་ནི་འདུས་པའི་གཟུགས་ཅན་ནོ། །ཞེས་ཀྱེའི་རྡོ་རྗེའི་རྒྱུད་འདུས་པ་ལ་མངོན་དུ་ཕྱོགས་པར་གསུངས་སོ། །སློབ་དཔོན་ནག་པོ་པས་གསང་བའི་དེ་ཁོ་ན་ཉིད་གསལ་བ་ཞེས་བྱ་བའི་གཞུང་བརྩམས་པ་ཡང་གསང་བ་འདུས་པའི་དེ་ཁོ་ན་ཉིད་བདེ་མཆོག་འཁོར་ལོས་གསལ་བར་འཆད་དོ་ཞེས་བཞེད་པ་ཡིན་ནོ། །འདི་བསྟན་པ་སྔ་དར་གྱི་དུས་སུ་ལོ་ཙཱ་བ་ལྕེ་བཀྲ་ཤིས་ཞེས་བྱ་བས་བསྒྱུར་ནས། བླ་མ་རྙིང་མ་བ་དག་གིས་ཏནྟྲ་སྡེ་བཅོ་བརྒྱད་པོའི་གཙོ་བོར་ཡང་འཆད་ཅིང་། བོད་ཀྱི་སློབ་དཔོན་སྔ་མས་འགྲེལ་བ་མཛད་པ་ཡང་ཡོད། ཕྱིས་སུ་ནི་ལོ་ཙཱ་བ་རིན་ཆེན་བཟང་པོ་ལ་སོགས་ཀྱི་རྗེས་སུ་འབྲང་བ་དང་བཅས་པ་རྣམས་སོ། །ཞེས་དེབ་ཐེར་སྔོན་པོ་ལས་གསུངས་སོ། ༈ །ཐེག་ཆེན་གྱི་མདོ་རྣམས་ལས། བདེ་གཤེགས་སྙིང་པོ་སྟོབས་སོགས་ཀྱི་ཡོན་ཏན་ཡེ་ལྡན་དུ་གསུངས་པ་དེ་ངེས་དོན་ཡིན་ཡང་། སེམས་ཅན་ཕལ་པ་ཁྱི་ཕག་སོགས་ཐ་མལ་པའི་རྒྱུད་ན་སྟོབས་བཅུའི་ཡོན་ཏན་མངོན་གྱུར་དུ་ཡོད་པ་ལྟ་ཅི། རྒྱུན་ཞུགས་ཞིག་གི་རྟོགས་པ་ཙམ་དང་། སོ་སྐྱེ་ཕལ་བ་ཞིག་གི་ཤེས་རབ་ཀྱང་མངོན་གྱུར་དུ་ཡོད་པ་བསྒྲུབ་ཏུ་མེད་པས་ཡོན་ཏན་ཡེ་ལྡན་གསུངས་པ་དྲང་དོན་དུ་བྱས་ནས་སངས་རྒྱས་ཀྱི་རྒྱུ་ཙམ་དུ་ཁས་ལེན་པའི་ལུགས་དེ་འཛིན་པ་དང་། སྔགས་ནང་པ་གཞི་འབྲས་དབྱེར་མེད་དུ་བཤད་པ་ལའང་དེའི་ཚུལ་གྱིས་སངས་རྒྱས་ཀྱི་རྒྱུ་ཡོད་པ་ཙམ་ལ་དགོངས་སོ། །ཞེས་དང་། འབྲས་བུ་རྣམ་དག་རིགས་ལྔ་ལ་སོགས་པའི་ལྷའི་རྣམ་པ་ཙམ་ལམ་དུ་བྱེད་ཀྱི། དེ་དང་དེ་དངོས་མ་ཡིན་ཏེ། བསྐྱེད་རིམ་པས་བདག་རྡོ་རྗེ་སེམས་དཔའ་དངོས་ཡིན་པར་མོས་པས་བསྒོམ་དགོས་ཀྱང་། སངས་རྒྱས་ཀྱི་ཡོན་ཏན་ཏིལ་འབྲུ་ཙམ་ཡང་བདག་ལ་མེད་པས་ཕུང་ཁམས་སངས་རྒྱས་དངོས་མ་ཡིན་ནོ་སྙམ་དུ་བསམ་པ་དང་། སྔགས་ཀྱི་རྫོགས་རིམ་གྱི་སྒྱུ་ལུས་དང་། འོད་གསལ་གྱི་སྣང་བ་བསྒོམ་པ་སོགས་ཀྱང་གཞི་དབྱིངས་འདུས་མ་བྱས་ཀྱི་ངོ་བོ་ཉིད་ལམ་དུ་བྱེད་པ་མིན་པར། འདུས་བྱས་སེམས་ཀྱིས་དེ་དང་དེའི་རྣམ་པ་བསྒོམས་པས་སེམས་ཡོངས་སུ་དག་པའི་གནས་སྐབས་ན་སྐད་ཅིག་མའི་སེམས་འགྱུར་བ་ཅན་དེས་ཆོས་ཐམས་ཅད་མཁྱེན་པ་དང་། དེ་རྒྱུན་གྱི་རྟག་པའི་རྡོ་རྗེའི་སྐུ་དང་། དེ་མྱོང་བྱར་གྱུར་པའི་བདེ་བའི་ཚོར་བ་དང་ལྡན་པའི་བདེ་ཆེན་གྱི་སྐུ་དང་། དེའི་ཕྲིན་ལས་སྣ་ཚོགས་མངོན་པར་འདུ་བྱེད་པ་དང་། དེས་ཆོས་ཐམས་ཅད་མཁྱེན་པ་པོ་དང་མཁྱེན་བྱ་གཉིས་སུ་འབྱེད་པའི་སྒོ་ནས་ཤེས་པ་དང་། དེ་འཁོར་བ་ལས་རྣམ་པར་གྲོལ་བ་དང་། རྣམ་གྲོལ་དེ་ལྟ་བུའི་ཡེ་ཤེས་གཟིགས་པ་པོ་ཡིན་ནོ་སྙམ་དུ་འཁོར་བའི་སྐྱོན་གྱིས་དག་པའི་ཕུང་པོ་ལྔ་སྐད་ཅིག་དང་དུ་མའི་ཆོས་ཅན་བདག་ཏུ་མི་འཛིན་ཡང་རྒྱུད་ཐ་དད་དུ་ཕྱེ་བ་ཞིག་གི་གང་ཟག་ཁྱད་པར་ཅན་ཞིག་ལ་སངས་རྒྱས་སུ་འཛིན་པས་ནི། སངས་རྒྱས་ཀྱི་ཡེ་ཤེས་སྐུའི་ཕྱོགས་ཙམ་མ་ཤེས་ཏེ། སངས་རྒྱས་ཞེས་པའི་གང་ཟག་རང་རྒྱུད་པ་ཞིག་ཏུ་རྣམ་པར་བཞག་པའི་གྲུབ་མཐའ་སྙིང་ལ་འཆང་བས་མདོ་སྔགས་ཀྱི་ལམ་གྱི་རྣམ་བཞག་ཐམས་ཅད་དེ་ལྟར་འཆད་ཅིང་སངས་རྒྱས་ཀྱི་ཡེ་ཤེས་ཀྱི་སྐུ་རྣམ་པ་ཐམས་ཅད་པར་འཆར་བ་ལ་སྐྱོན་བརྗོད་པ་ནི་ཐེག་པ་ཆེན་པོའི་དགོངས་དོན་ལ་ཕྱོགས་སུ་མ་ཕྱིན་པ་ཡིན་ནོ། །ཞེས་དང་། དེས་ན་སྟོབས་སོགས་ཀྱི་ཡོན་ཏན་ཡེ་ལྡན། རལ་གྲི་ཚད་ལྡན་ལ་གཅོད་པའི་ཡོན་ཏན། མེ་ལོང་དྭངས་བ་ལ་གཟུགས་བརྙན་སྣང་བའི་ཡོན་ཏན། ནོར་བུ་ལ་འོད་དང་དགོས་འདོད་རྩོལ་བའི་ཡོན་ཏན་ཡེ་ནས་རང་ཆས་ལྷུན་གྲུབ་ཏུ་ཡོད་ཀྱང་རལ་གྲི་ཤུབ་དང་། མེ་ལོང་སྒྲོམ་དུ་ཆུད་པ། ནོར་བུ་ལ་འདམ་གོས་པ་བཞིན་ནོ། །དེའི་སྒྲིབ་པ་བསལ་ན་ཡོན་ཏན་གསར་བསྐྱེད་མིན་ཡང་མངོན་དུ་སྣང་བ་གསར་སྐྱེ་ལྟར་སྣང་ངོ་། །འོ་ན་སེམས་ཅན་རྣམས་ཀྱི་གཞི་དུས་ཀྱི་སེམས་ཀྱི་ཆོས་ཉིད་བདེ་གཤེགས་སྙིང་པོ་དེས། རང་ངོས་ན་ཤེས་བྱ་ཐམས་ཅད་མཁྱེན་བཞིན་ཡོད་དམ་སྙམ་ན་ཡོད་མི་དགོས་ཏེ། མཁྱེན་བཞིན་ཡོད་པ་ཡོན་ཏན་མངོན་དུ་སྣང་བ་དེ་ལ་ཅི་ཡོད། མི་མཁྱེན་ན་ཆོས་ཀུན་མཁྱེན་པའི་ཡོན་ཏན་ཡེ་ལྡན་ཇི་ལྟར་ཡིན་སྙམ་ན། སེམས་ཅན་ཐམས་ཅད་ཀྱི་སེམས་ཀྱི་ཆོས་ཉིད་དེ་ནི་རིག་སྟོང་ཟུང་འཇུག་གདོད་མའི་གནས་ལུགས་ཡིན་པས། དེ་རང་གི་ངོ་བོའི་དབང་དུ་བྱས་ན་མཁྱེན་མི་མཁྱེན་སོགས་ཀྱི་ཐ་སྙད་ཀྱི་སྤྲོས་པ་ཉེ་བར་ཞི་བ་ཡིན་པས་དཔེར་ན་འཕགས་པའི་མཉམ་བཞག་གི་ཡེ་ཤེས་ཀྱི་དོན་ཇི་ལྟ་བ་བཞིན་ཡིན་ཏེ། ཇི་ལྟ་བ་ལས་མ་གཡོས་པའི་ཕྱིར་ན་དེ་ལ་གཉིས་ཆོས་ཀྱི་རྣམ་པ་གང་ཡང་མི་སྣང་ཡང་གང་དུ་མི་འཛིན་པས་དེ་ལྟར་བསམ་དུ་མེད་དོ། །དེའི་ཕྱིར་ཆོས་ཉིད་གཞི་ལས་མ་གཡོས་པའི་དོན་དེ་ལ་བསམས་ན་འཁོར་འདས་གཉིས་ཀ་དེ་ལས་མ་གཡོས་ཤིང་གཉིས་ཆོས་མེད་པས་དེ་ལྟར་ཐ་སྙད་གདགས་པ་མེད་དེ་སྤྲོས་པ་ཞི་བའི་ཕྱིར་རོ། །དེའི་ཕྱིར་རྫོགས་ཆེན་གྱིས་འཁོར་འདས་གང་ཡང་མ་བྱུང་བའི་ཡེ་ཐོག་གཞིའི་གནས་ལུགས་བསྟན་པའང་དེ་དང་འདྲའོ། །འཁོར་འདས་གཉིས་ནི་དེ་ལས་གཞི་སྣང་བསྐྱོད་ནས་འབྱུང་དགོས་པས་གློ་བུར་བ་ཡིན་ནོ། །དེའི་ཕྱིར་སྟོབས་བཅུ་ལ་སོགས་པ་འདི་སངས་རྒྱས་སེམས་ཅན་གཉིས་སུ་འབྱེད་པའི་ཆ་ནས་བཞག་གི་གཉིས་མེད་ལ་དེ་ལྟར་ཕྱེ་བ་མེད་དེ་ཇི་ལྟ་བ་གཉིས་སུ་མེད་པའི་དོན་ཡིན་ནོ། །གཞི་སྣང་ཤར་ནས་གདོད་མའི་གཞི་ལ་མ་གྲོལ་གྱི་བར་དུ་གློ་བུར་གྱི་དྲི་མ་མཐའ་དག་མ་ཟད་ལ། ཟད་པའི་ཚེ་ཇི་ལྟ་བ་ལས་མ་གཡོས་བཞིན་དུ། ཇི་སྙེད་པའི་དོན་ཀུན་མཁྱེན་པའི་ཡོན་ཏན་མངོན་དུ་སྣང་བ་ནི་དག་པ་གཉིས་ལྡན་ལ་ཡོད་ཀྱི། རང་བཞིན་རྣམ་དག་ཙམ་ལ་མེད་ཀྱང་། དེའི་ཡོན་ཏན་ཡེ་ལྡན་དུ་ཁས་ལེན་དགོས་པ་རལ་གྲིའི་དཔེ་སོགས་བཞིན་ནོ། །དེས་ན་གཞིའི་དུས་ན་བདེ་གཤེགས་སྙིང་པོ་ལ་ཡོན་ཏན་མངོན་དུ་ཡོད་རུང་ཙམ་དུ་ཤེས་པར་བྱའོ། །ཇི་ལྟ་བའི་གནས་ལུགས་ཀྱི་དབང་དུ་བྱས་ན་གཉིས་ཆོས་ཡེ་ནས་མེད་པའི་ཕྱིར། དེས་ན་གཉིས་སུ་མ་གཟིགས་པ་དེ་མ་ལུས་པར་མཁྱེན་པ་ཡིན་གྱི་རེ་རེ་ནས་མཁྱེན་པར་བགྲང་དུ་མེད་དོ། །རོང་ཟོམ་པ་སོགས་ཇི་ལྟའི་གནས་ལུགས་དབང་བཙན་དུ་བྱས་ནས་སྟོབས་བཅུ་སོགས་གཞན་སྣང་དུ་བཞེད་པ་སོགས་མཁས་པ་ཐམས་ཅད་ཕྱོགས་རེའི་གཞལ་ཚུལ་ལས་དོན་ལ་མི་འགལ་བར་ཤེས་པར་བྱའོ། །ནོར་བུ་ཡོངས་སུ་དག་ཚེ་རྟོག་པ་མེད་བཞིན་དགོས་འདོད་འབྱུང་བ་དེ་བཞིན་རལ་གྲི་དང་མེ་ལོང་ལ་རྟོག་པ་མེད་ཀྱང་གཅོད་པ་དང་གཟུགས་བརྙན་སྣང་བ་དག་ཀྱང་རང་གི་ངོ་བོའི་ཡོན་ཏན་ཡིན་ཡང་། དེ་ལྟར་སྣང་བ་རང་ལས་གཞན་པའི་ཡུལ་ལ་ལྟོས་དགོས་ཀྱི། རང་ཁོ་ན་ལ་གཅོད་སྣང་དགོས་འདོད་རྩོལ་བའི་ནུས་པ་མངོན་གྱུར་བཞག་མི་ཤེས་པ་བཞིན་ནོ། །ཞེས་སོ། །༡གཞི་རང་བཞིན་རྣམ་དག་འོད་གསལ་བའི་ཆོས་ཉིད་དེ་སངས་རྒྱས་ཡིན་ནམ་ཞེ་ན། རང་བཞིན་རྣམ་དག་གི་སངས་རྒྱས་ཡིན་ཏེ་རང་བཞིན་གནས་ལུགས་ཀྱི་དབང་དུ་བྱས་ན་ཡེ་ནས་དག་ཅིང་ཡོན་ཏན་ལྷུན་གྲུབ་ཡིན་པ་ལས་གསར་དུ་སྐྱེད་འདོན་དུ་མེད་དེ་འདུས་མ་བྱས་ཡིན་པའི་ཕྱིར་སངས་རྒྱས་ཡིན་ཞེས་ཀྱང་བརྗོད། སྣང་ལུགས་ཀྱི་དབང་དུ་བྱས་ན། གཞི་དེ་ཉིད་རྒྱུད་ལྡན་གྱི་གང་ཟག་དེས་ལམ་རྐྱེན་གྱིས་ཟིན་ན་གྲོལ་གཞི་བྱས་ནས་གྲོལ་བ་ཡིན་པས་དག་པ་གཉིས་ལྡན་གྱི་སངས་རྒྱས་ཡིན་ཞེས་བྱའོ། །ཞེས་སོ། །༢སྒྲིབ་གཉིས་བག་ཆགས་དང་བཅས་པ་ཡོངས་སུ་དག་པའི་ཡེ་ཤེས་མཐར་ཐུག་པ་སངས་རྒྱས་ཀྱི་མཚན་ཉིད། ཡེ་ཤེས་དེ་ལ་ཆོས་ཉིད་གཟིགས་པའི་ཆ་ནས་ཇི་ལྟ་བ་མཁྱེན་པའི་ཡེ་ཤེས་ཞེས་དང་། ཆོས་ཅན་མཐའ་དག་གཟིགས་པའི་ཆ་ནས་ཇི་སྙེད་པའི་ཡེ་ཤེས་ཞེས་ལྡོག་ཆས་བཏགས་ཀྱི་ངོ་བོ་ནི་རྣམ་པ་ཐམས་ཅད་མཁྱེན་པའི་ཡེ་ཤེས་ཉག་གཅིག་ལས་ཐ་དད་དུ་མེད་དེ། བདེན་གཉིས་དབྱེར་མེད་ཀྱི་གནས་ལུགས་མཐར་ཐུག་གཟིགས་པའི་ཡེ་ཤེས་ཡིན་ནོ། །དེས་ན་རྣམ་ཤེས་ཚོགས་བརྒྱད་ཆོས་ཅན་དང་། དེའི་རང་བཞིན་ཆོས་ཉིད་ཀྱི་ཡེ་ཤེས་གཉིས་ནི་གཅིག་ཐ་དད་གང་དུའང་ཁས་བླང་བྱ་མིན་པར། དགོངས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་དུ་ཡང་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་གསུངས། དེའི་ཕྱིར་དེ་གཉིས་ཐ་སྙད་དུ་གཅིག་མ་ཡིན་ཏེ་སེམས་རྟོགས་པ་ཙམ་གྱིས་སེམས་ཀྱི་ཆོས་ཉིད་ཡེ་ཤེས་མི་རྟོགས་པ་དང་། ཆོས་ཅན་དང་ཆོས་ཉིད་ཡིན་པ་སོགས་ཀྱི་ཕྱིར་རོ། །དོན་དམ་པར་ཐ་དད་མིན་ཏེ་སེམས་ཀྱི་རང་བཞིན་ཡེ་ཤེས་ཡིན་པས་ཡེ་ཤེས་རྟོགས་དུས་སེམས་ཀྱང་དེ་ལས་ཐ་དད་དུ་མ་དམིགས་པའི་ཕྱིར་དང་། ཡེ་ཤེས་རྟོགས་ཚེ་སེམས་རང་གྲོལ་དུ་འཆར་བ་སོགས་ཀྱི་ཕྱིར་ནའོ། ༈ །སྤྱིར་ངག་ཙམ་ལ་ཡོད་པའི་དགོས་འབྲེལ་ཡན་ལག་བཞི་ནི། རྟོགས་ལྡན་གྱི་ངག་དེས་བསྟན་པར་བྱ་བའི་དོན་ནི་དེའི་བརྗོད་བྱ། ངག་དེ་ལས་རྟོགས་པར་བྱ་བ་ནི་དགོས་པ། རྟོགས་པ་ལས་འབྲས་བུ་གྲུབ་པ་ནི་ཉིང་དགོས། དགོས་པ་ངག་ལས་བྱུང་བ་ནི་འབྲེལ་བའོ། །དཔེར་ན་བུམ་པ་ནི་བརྗོད་བྱ། བུམ་པ་འོན་ཅིག་གི་སྒྲ་ལས་དེ་ཐོས་པ་ནི་དགོས་པ། དེ་ལས་ཆུ་བླངས་ཏེ་བྱ་བ་བྱེད་པ་ནི་ཉིང་དགོས། དེ་དག་གཅིག་ལ་གཅིག་བརྟེན་པ་ནི་འབྲེལ་པ་སྟེ་མེད་ན་མི་འབྱུང་བའི་ཕྱིར་རོ། །རྒྱུད་དོན་ལུས་ལ་ཡོད་པའི་དགོས་འགྲེལ་ཡན་ལག་བཞི་ནི། རྒྱུད་འདིའི་གཞི་ལམ་འབྲས་བུ་གསུམ་ནི་བརྗོད་བྱ། དེའི་མཚོན་པ་མིང་ཚིག་ཡི་གེར་སྣང་བའི་གཞུང་ལེའུ་ཉི་ཤུ་རྩ་གཉིས་ནི་རྗོད་བྱེད། རྗོད་བྱེད་ཚིག་རྒྱུད་ལ་བརྟེན་ནས་བརྗོད་བྱ་དོན་གྱི་རྒྱུད་རྟོགས་པ་ནི་དགོས་པ། རྟོགས་པ་བཞིན་ཉམས་སུ་བླངས་པས་གནས་སྐབས་དང་མཐར་ཐུག་གི་དོན་འགྲུབ་པ་ནི་ཉིང་དགོས། འབྲས་བུ་འགྲུབ་པ་དེ་ཉིད་རྒྱུད་དོན་རྟོགས་པ་ལ་ལྟོས་ཤིང་། རྟོགས་པའང་རྗོད་བྱེད་དང་བརྗོད་བྱ་ལ་བརྟེན་པའམ་ལྟོས་པ་ནི་འབྲེལ་བའོ། །ཚུལ་འདི་ཉིད་མན་ངག་ལྟ་ཕྲེང་དུ་གསུངས་ཏེ། གཞི་རང་བཞིན་གྱི་རྒྱུད་བརྗོད་བྱ། རྐྱེན་འཇུག་པའི་མཚན་ཉིད་དགོས་པ། རྒྱུ་ཤེས་པའི་མཚན་ཉིད་འབྲེལ་བ། དེ་གཉིས་ཀྱིས་མངོན་དུ་གྱུར་པ་འབྲས་བུའི་མཚན་ཉིད་དགོས་པའི་ཡང་དགོས་པའོ། །ཞེས་གསུངས་སོ། །དབྱེ་ན་གསུམ་ལས། གཞི་དཀྱིལ་འཁོར་གསུམ་དུ་ཡེ་ནས་སངས་རྒྱས་པའི་དོན་བརྗོད་བྱ། དེ་སྟོན་པའི་ཚིག་གླེང་གཞི་དང་གླེང་བསླང་བ་ལྟ་བུ་ནི་རྗོད་བྱེད། དེ་ཉིད་སྟོན་པས་གསུངས་པ་བཞིན་འཁོར་གྱིས་རྟོགས་པ་དགོས་པ། དེ་ཉིད་གདུལ་བྱ་འདུལ་བྱེད་གཞན་ལ་བརྟེན་ནས་དོན་འགྲུབ་པ་ཉིང་དགོས། དེ་དག་གཅིག་ལ་གཅིག་བརྟེན་པ་ནི་འབྲེལ་བའོ། །ལམ་དབང་མནོས་ཏེ་བསྐྱེད་རྫོགས་ཡན་ལག་དང་བཅས་པའི་ཐབས་ཤེས་ཟུང་འབྲེལ་ནི་བརྗོད་བྱ། དེ་སྟོན་པའི་ཚིག་ཡི་གེ་སྤྲིན་གྱི་ཚོགས་བསྒྲུབ་པ་ལ་སོགས་པ་རྒྱུད་དོན་དངོས་རྣམས་རྗོད་བྱེད། དེ་ལ་བརྟེན་ནས་རྣལ་འབྱོར་པས་ཆོས་ཐམས་ཅད་ཐབས་ཤེས་ཟུང་འཇུག་ཏུ་རྟོགས་པ་ནི་དགོས་པ། རྟོགས་པ་བཞིན་ཉམས་སུ་བླངས་པས་འབྲས་བུ་གྲུབ་པ་ནི་ཉིང་དགོས། དེ་དག་གཅིག་ལ་གཅིག་བརྟེན་ཅིང་། ཁྱད་པར་དུ། དཀྱིལ་འཁོར་གཟུང་མ་དང་འབྲེལ། གཟུང་མ་དབང་དང་འབྲེལ། དབང་སྒྲུབ་པ་དང་འབྲེལ། སྒྲུབ་པ་འབྲས་བུ་དང་འབྲེལ་བ་ནི་འབྲེལ་བའོ། །འབྲས་བུ་དཀྱིལ་འཁོར་གསུམ་དུ་སངས་རྒྱས་ནས་སྐུ་དང་ཡེ་ཤེས་སུ་ལྷུན་གྱིས་གྲུབ་པ་ནི་བརྗོད་བྱ། དེ་སྟོན་པའི་ཚིག་གླེང་གཞི་གླེང་བསླང་བ་ལྟ་བུ་ནི་རྗོད་བྱེད། སེམས་ཅན་གྱི་དོན་དུ་སྤྲུལ་པ་འཕྲོ་བ་ནི་དགོས་པ། དེ་ལས་འགྲོ་བའི་དོན་གཉིས་འགྲུབ་པ་ནི་ཉིང་དགོས། དེ་དག་གཅིག་ལ་གཅིག་བརྟེན་དུ་བྱུང་བ་ནི་ཐུགས་རྗེ་ཡེ་ཤེས་ཀྱི་འབྲེལ་བ་གྲུབ་པའོ། ༈ །དེ་ཡང་སྒྲར་སྣང་རུང་ཙམ་སྟོན་པ་རིགས་དྲུག་པའི་ཀློང་ན་རང་གསལ་བ་ཉིད། རྒྱལ་བ་རིགས་ལྔ་ལ་སོགས་པའི་ཐུགས་སུ་ཆུད་པར་མཛད་པ་བཞིན། གསང་བདག་ལ་སོགས་པ་གཞན་སྣང་དུ་སྟོན་པའི་སྟོན་པས་སྒྲར་གྲགས་པའི་སྒོ་ནས་གཞན་ལ་སྣང་བར་མཛད་པ་སྟེ། བློ་གྲོས་ཐབས་ལྡན་ལ་སོགས་པས་བརྡར་གྱུར་པའི་ཡི་གེའི་ཚོགས་སུ་བྱས་ནས་རིམ་པར་བརྒྱུད་དེ། ད་ལྟར་ཡང་ཡི་གེའི་ཕྱི་མོ་བརྡར་གྱུར་པའི་ཚུལ་དུ་ཡོད་པ་སོགས་ལས་འཆད་པ་པོའི་བློ་ལ་བརྗོད་བྱའི་དོན་མཚོན་པའི་སྒྲ་སྤྱི་སྣང་ནས་སྒྲར་གྲགས་པའི་ཚུལ་གྱིས་བཤད་པས་ཉན་པ་པོའི་བློ་ལའང་དེ་ལྟར་སྣང་བ་ནི་དེ་བཞིན་གཤེགས་པའི་གསུང་གི་ཆོ་འཕྲུལ་ཡི་གེ་འཁོར་ལོའི་ཆོ་འཕྲུལ་རྨད་དུ་བྱུང་བའོ། །ཐ་སྙད་ཀྱི་དབང་དུ་བྱས་ནས་ཡི་གེས་དོན་སྟོན་པ་ནི། ཡི་གེ་འཇུག་པའི་གནས་བརྒྱད་ལ་བརྟེན་པ་ཡིན་ཏེ། སྒྲ་དང་། སྐད་དང་། མིང་དང་། མཚན་མ་དང་། བརྡ་དང་། ཐ་སྙད་དང་། ཚིག་དང་། དོན་རྣམས་སོ། །དེ་ལ་སྒྲ་ནི་སྤྱིར་ཟིན་མ་ཟིན་སོགས་ཀྱི་དབྱེ་བ་ཡོད་ཀྱང་། འདིར་ཟིན་པའི་སྒྲ་སེམས་ཅན་དུ་སྟོན་ཅིང་ལུང་སྟོན་པའོ། །སྐད་ནི་ལེགས་སྦྱར་ལ་སོགས་པ་ཡུལ་སོ་སོའི་སྐད་དེ། སྤྱིར་ཡུལ་དབུས་ལས་མཐའ་འཁོབ་པའི་སྐད་རྣམས་ཟུར་ཆག་ཏུ་བསྡུ་བར་གསུངས་པ་སོགས་ཡོད་ཀྱང་། བྱེ་བྲག་བོད་ཀྱི་སྐད་ནི། སྒྲ་དག་སྐད་སྙན་སཾ་སྐྲྀ་ཏ་དང་མཚུངས། །ཞེས་མཁས་པས་བསྔགས་པར་མཛད་པའོ། །མིང་ནི། ཆོས་མངོན་པའི་ལུགས་ཀྱི་ཡི་གེ་འདུས་པའི་བདག་ཉིད་ཅན་དང་། བརྡ་སྤྲོད་པའི་ལུགས་ལ། རྣམ་དབྱེའི་མཐའ་ཅན་ནི་ཚིག་གོ །རྣམ་དབྱེ་མེད་པ་ནི་མིང་ངོ་ཞེས་འབྱུང་ཡང་། བོད་སྐད་ལ་དེ་འདྲ་མི་འབྱུང་གཤིས་དོན་གྱི་ངོ་བོ་ཙམ་སྟོན་པའི་སྒྲ་སྟེ་ཀ་བ་བུམ་པ་སོགས་དངོས་མིང་བླ་དྭགས་སོ། །མཚན་མ་ནི། མིང་དེས་དོན་དེ་མཚོན་པར་བྱེད་ཅིང་སྣང་བར་ནུས་པའི་ཆ་སྟེ། བུམ་པ་ཞེས་བརྗོད་པས་ལྟོ་ལྡིར་གྱི་རྣམ་པ་མཚོན་ནུས་པ་ལྟ་བུའོ། །བརྡ་ནི་མིང་དང་མིང་ཅན་འབྲེལ་བར་བྱེད་པ། སྒྲ་དང་དོན་སྤྱིའི་རྣམ་པ་ཅན་ཏེ། དཔེར་མེ་ཞེས་བརྗོད་དུས་དེ་གཉིས་ཀའི་བློ་ལ་ཚ་འབར་གྱི་རྣམ་པ་ཅན་གྱི་དོན་སྤྱི་འཆར་ཞིང་། དེ་ལ་བརྟེན་ནས་དོན་རང་མཚན་གྱི་ཡུལ་ལ་འཇུག་ལྡོག་བྱེད་པའོ། །ཐ་སྙད་ནི་དངོས་ལ་ཐ་སྙད་མེད་ལ། འཇུག་ལྡོག་བྱེད་པའི་ཕྱིར་ནན་གྱིས་བཏགས་ཏེ། གདུང་འདེགས་ཀྱི་ཤིང་ལ་ཀ་བ་ཞེས་བཏགས་ནས་བསྟན་པ་ན། འདི་ཀ་བ་ཡིན་ནོ་སྙམ་པའི་ཤེས་པ་ནི་བཏགས་པའི་ཤེས་པ་དང་། དེ་སླར་ཀ་བ་ཞེས་སྒྲར་བརྗོད་པ་ནི་བརྗོད་པ། དེས་གདུང་འདེགས་སོགས་ཀྱི་བྱ་བ་ལ་འཇུག་པར་བརྩམ་པ་ནི་འཇུག་པ་སྟེ། ཤེས་བརྗོད་འཇུག་གསུམ་ག་སྐྱེ་བར་བྱེད་པའི་གཞི་བརྡ་ལས་ཐོབ་པའི་བློ་དེའོ། །ཚིག་ནི། ཆོས་མངོན་པའི་ལུགས་ཀྱིས་མིང་འདུས་ནས་དོན་གྱི་ཁྱད་པར་བརྗོད་པ་སྟེ། འདུས་བྱས་མི་རྟག་ཅེས་པ་ལྟ་བུའོ། །དོན་ནི་ཆོས་རྣམས་ཀྱི་གནས་ལུགས་ཇི་ལྟར་གནས་པ་ཉིད་དོ། །དེ་ལྟར་སྒྲ་སྐད་སོགས་བརྒྱད་པོ་དེ་དག་ལ་ཡི་གེའི་འཇུག་ཚུལ་ནི། སྒྲ་དོན་འདྲེས་འཛིན་གྱི་བློའི་དབང་གིས་ཏེ། བློ་དེ་སྐྱེ་བ་ལ་ཡང་། བརྡ་བྱེད་པའི་དུས་ན་ཤེས་པ་གཞན་ལས་ཁྱད་པར་དུ་བྱེད་པའི་ཆོས་ལྔ་དང་ལྡན་དགོས་ཏེ། དེ་ཡང་དོན་ལ་དམིགས་པས་དོན་སྤྱིའི་ནུས་པ་སྐྱེད། སྒྲ་ལས་བྱུང་བས་སྒྲ་སྤྱིའི་རྣམ་པ་སྐྱེད། མཐུན་པར་སྣང་བ་དང་ཐུན་མོང་དུ་གྲགས་པ་གཉིས་ཀྱི་ཞེན་པ་སྐྱེ་ཞིང་གཞན་ལ་གོ་བར་བྱེད་ནུས། མངོན་པར་ཞེན་པས་ནི་མིང་དང་མིང་ཅན་འབྲེལ་བར་བྱེད་པ་ཡིན་ནོ། །དེ་ཡང་གདུང་འདེགས་ཀྱི་ཤིང་མཐོང་ན་འདིའི་མིང་ཅི་སྙམ་པ་དང་། ཀ་བ་ཞེས་པའི་སྒྲ་ཐོས་ན་འདི་གང་གི་མིང་ཡིན་སྙམ་པའི་བློ་སྐྱེ་ལ། དེའི་ཚེ་གཞན་གྱིས་བརྡ་སྤྲད་པ་ན་མིང་དང་མིང་ཅན་འབྲེལ་བའི་ཤེས་པ་སྟེ། དེ་མངོན་སུམ་དུ་གྱུར་ནས་ཕྱིས་དེ་དང་འདྲ་བའི་རྣམ་པ་ལ་དེ་ཉིད་དུ་མངོན་པར་ཞེན་པ་སྐྱེ། དེ་ལས་སྒྲ་དོན་འདྲེས་རུང་གི་མངོན་ཞེན་ཁོང་དུ་ཆུད་པར་འགྱུར་ལ། གང་ཟག་བསྟན་བཅོས་ལ་བློ་མ་བྱང་བ་རྣམས་ཡི་གེ་སྟོན་པའི་གཟུགས་ལ་ཡི་གེ་ཉིད་དུ་འཛིན་པ་དང་། སྒྲ་སྤྱིའི་རྣམ་པའང་ཡིག་གཟུགས་ལ་ཞེན་ཅིང་གླེགས་བམ་དུ་བྲིས་པ་ལ་བརྗོད་ཡུལ་དུ་བྱེད་པ་ཡིན། སྨྲ་བ་པོ་དང་ཉན་པ་པོ་བརྡ་ལ་བྱང་བ་དག་ལ་སྒྲ་དོན་འདྲེས་རུང་གི་ཤེས་པ་སྐྱེ་ཚུལ་ནི། སྨྲ་བ་པོས་སྒྲ་དེ་བརྗོད་པ་ན་སྔོན་བརྡ་བྱེད་པའི་དུས་ཀྱི་ཁྱད་ཆོས་ཡན་ལག་ལྔ་ལ་ཚུལ་བཞིན་དུ་འདྲེས་པར་བྱས་པས་ཐ་སྙད་འདོར་ལེན་གྱི་སྐབས་ཚུལ་དེ་འབད་མེད་དུ་འབྱུང་སྟེ། སྨྲ་བ་པོས་སྒྲ་རང་མཚན་པ་བརྗོད་པའི་ཚེ་ཉན་པ་པོའི་ངོར་སྒྲ་ཙམ་གྱི་རྣམ་པ། དེ་ནས་དོན་གྱི་རྣམ་རྟོགདེ་ནས་སྒྲ་དོན་འདྲེས་རུང་གི་བློ། དེ་ལས་སྣང་ཞེན་གྱི་དམིགས་པ། དེ་ནས་མཐུན་པར་སྣང་བའི་ཤེས་པ། དེ་ནས་མངོན་པར་ཞེན་པའམ་ཤེས་པའི་བློ་ཚུལ་བཞིན་སྐྱེ་བ་ཡིན་ནོ། ༈ །གླེང་གཞིའི་སྐབས། ནང་ཐབས་ལམ་སྟེང་སྒོ་དང་སྦྱར་ཏེ་བཤད་རྒྱུད་རྒྱ་མཚོས་བཤད་པ་དང་། གསང་བ་འོག་སྒོ་དང་སྦྱར་ཏེ་བཤད་རྒྱུད་ཐལ་བས་བཤད་པ་གཉིས་ལས། དང་པོ་ལ་ལྔ་ལས། དང་པོ་གནས་ཕུན་སུམ་ཚོགས་པ་ནི། བཤད་རྒྱུད་རྒྱ་མཚོ་ལས། དྷརྨ་ཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །ཞེས་པས་བསྟན་ཏེ། སྙིང་ག་ཆོས་ཀྱི་འཁོར་ལོ་ན་རྩ་འདབ་བརྒྱད་ཡོད་པ་རིགས་བསྡུ་ན་བཞིར་འདུ་སྟེ། མདུན་གྱི་རྩ་གསུམ་པོ་དེས་ཆོས་ཉིད་སྐྱེ་བ་མེད་པར་འཆར་བའི་ལས་བྱེད་པས་ཆོས་ཉིད་ཀྱི་རྩ་ཞེས་བྱ་ལ་དབྱིབས་མདོག་ཀྱང་དཀར་པོ་ཟླུམ་པོའི་རྣམ་པར་གནས། གཡས་ན་གཅིག་སྟེ་ཡེ་ཤེས་འཆར་བའི་ལས་བྱེད་པས་ཡེ་ཤེས་ཀྱི་རྩ་ཞེས་བྱ་ལ་དབྱིབས་མདོག་ཀྱང་གྲུ་བཞི་སེར་པོའི་རྣམ་པར་གནས། གཡོན་ན་གཅིག་སྟེ་ཡོན་ཏན་དང་མངོན་ཤེས་འཆར་བའི་ལས་བྱེད་པས་ཡོན་ཏན་གྱི་རྩ་ཞེས་བྱ་ལ་དབྱིབས་མདོག་ཀྱང་ཟླ་གམ་དམར་པོའི་རྣམ་པར་གནས། རྒྱབ་ན་གསུམ་ཡོད་པས་གཉིད་རྨུགས་དང་བཅས་པའི་ལས་བྱེད་པས་རང་རྒྱུད་ཀྱི་རྩ་ཞེས་བྱ་ལ་དབྱིབས་མདོག་ཀྱང་གྲུ་གསུམ་དམར་ནག་གི་རྣམ་པར་གནས་ཏེ། ཨེ་སོགས་ལས་བཞིའི་དབྱིབས་མདོག་ཅན་ནི་དོན་དམ་འོད་གསལ་གྱི་བཞུགས་གནས་ཡིན་པའི་ཕྱིར་གནས་སོ། །གཉིས་པ་སྟོན་པ་ཕུན་སུམ་ཚོགས་པ་ནི། མི་ཤིགས་ཞེས་པ་ཁམས་མི་ཤིགས་༼ཁམས་དཀར་དམར་གྱི་དྭངས་ཆ་རླུང་མི་ཤིགས་པ་ཡེ་ཤེས་ཀྱི་རླུང་། སེམས་མི་ཤིགས་པ་རང་བྱུང་གི་ཡེ་ཤེས་དེ། ངོ་བོ་དབྱེར་མེད་དུ་བཞུགས་པའོ། །མཆན། ༽ཐིག་ལེ་ཝཾ་དབྱིབས་ཅན། རང་ལ་བདེ་བ་གསལ་བྱེད་དག །ཅེས་པས་བསྟན་ཏེ། སྙིང་ག་ཆོས་ཀྱི་འཁོར་ལོའི་དབུས་ན་དྭངས་མ་ཆེན་པོ་ལྔ་བཞུགས་ཏེ། སའི་དྭངས་མ་རྩ་དར་དཀར་གྱི་སྐུད་པ་ལྟ་བུ་རྟ་རྔ་བཅུ་གཤགས་ཙམ་པ། དེའི་དབུས་ན་ཆུའི་དྭངས་མ་རྒྱ་མཚལ་ལྕོག་ལའི་ཁུ་བ་ལྟ་བུ་དེའི་དབུས་ན་མེའི་དྭངས་མ་མེ་ལོང་ཉི་མ་ལ་བཞག་པའི་ངད་ཙམ་པ། དེའི་དབུས་ན་རླུང་གི་དྭངས་མ་གསེར་ས་འོག་ན་ཡོད་པའི་རླངས་པ་ནམ་མཁའ་ལ་རྒྱུ་བ་ཙམ་པ། དེའི་དབུས་ན་ནམ་མཁའི་དྭངས་མ་བར་སྣང་སང་སེང་གོ་འབྱེད་པའི་རྣམ་པ་ཅན་དུ་གནས་པ་སྟེ། དེ་ལྟར་དྭངས་མ་ལྔ་འདུས་ཀྱི་དབུས་ན་སེམས་ཀྱི་དྭངས་མ་ཡེ་ཤེས་སྙིང་པོའི་ཐིག་ལེ་སྟོང་གསལ་འགག་མེད་ཡི་གེ་ཝཾ་དབྱིབས་ཀྱི་རྣམ་པར་གནས་པ་སྟེ། དེ་ཉིད་མར་མེ་གསལ་བྱེད་གཞན་ལ་ལྟོས་མི་དགོས་པ་ལྟར་རང་གིས་རང་ལ་བདེ་བ་གསལ་བར་སྟོན་པས་ན་སྟོན་པའོ། །གསུམ་པ་འཁོར་ཕུན་སུམ་ཚོགས་པ་ནི། མ་ནུ་ཡིད་སོགས་རྣམ་ཤེས་བཞི། །ཡེ་ཤེས་མྱོང་བས་བསྡུས་པར་བཤད། །ཅེས་པས་བསྟན་ཏེ། མ་ནུའི་སྒྲ་ལས་དྲངས་ན། མ་ན་ཤེས་པ་ལའོ་ཞེས་པས་ཡིད་ལ་སོགས་པའི་རྣམ་ཤེས་ཚོགས་བརྒྱད་པོ་དེ། མདུན་ཆོས་ཉིད་ཀྱི་རྩ་ལ་ཀུན་གཞི། གཡས་ཡེ་ཤེས་ཀྱི་རྩ་ལ་ཡིད། གཡོན་ཡོན་ཏན་གྱི་རྩ་ལ་ཉོན་ཡིད། རྒྱབ་རང་རྒྱུད་ཀྱི་རྩ་ལ་སྒོ་ལྔའི་རྣམ་ཤེས་ཏེ། ཚོགས་བརྒྱད་པོ་དེས་ཡེ་ཤེས་ལྔ་ཉམས་སུ་མྱོང་བའི་ཆ་ནས་འཁོར་ཕུན་སུམ་ཚོགས་པའོ། །བཞི་པ་ཆོས་ཕུན་སུམ་ཚོགས་པ་ནི། ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱརྠ་དོན་ཟབ་མོ། །ཞེས་པས་བསྟན་ཏེ། དེའི་མན་ངག་སྟེང་སྒོའི་ལམ་ཉམས་སུ་བླངས་པ་ལས་བདེ་གསལ་རྣམ་པར་མི་རྟོག་པའི་ཡེ་ཤེས་ནམ་མཁའི་གཟུགས་ཅན་རྒྱུད་ལ་སྐྱེས་པ་ནི། པ་ར་མཱརྠ་ཞེས་པའི་སྒྲ་ལས། དོན་དམ་པའམ་དོན་ཟབ་མོ་ཞེས་གནས་ལུགས་ཀྱི་ཆོས་ཉིད་ཟབ་མོ་ནི་ཆོས་ཕུན་སུམ་ཚོགས་པའོ། །ལྔ་པ་དུས་ཕུན་སུམ་ཚོགས་པ་ནི། བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་པས་བསྟན་ཏེ། ཡེ་ཤེས་ནམ་མཁའི་གཟུགས་ཅན་རྒྱུད་ལ་སྐྱེས་པ་དེའི་ཚེ་སྔ་ཕྱིར་འཛིན་པའི་རྟོག་པ་ཐམས་ཅད་དང་བྲལ་བས་བསམ་གྱིས་མི་ཁྱབ་པའི་དུས་ཏེ་དུས་ཕུན་སུམ་ཚོགས་པའོ། །གསང་བ་འོག་སྒོ་དང་སྦྱར་ཏེ་བཤད་པ་ལ་ལྔ་ལས། དང་པོ་གནས་ཕུན་སུམ་ཚོགས་པ་ནི། བཤད་རྒྱུད་ཐལ་བ་ལས། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །ཞེས་པས་བསྟན། ཨེས་མཚོན་པས་ཆོས་འབྱུང་གི་རྣམ་པར་གནས་པའི་ཡུམ་གྱི་བྷ་ག་སྒོ་གྲུ་གསུམ་ཁྱམས་གྲུ་བཞི། སྐྱེ་གནས་ཟླ་གམ། དབྱིངས་ཕྱུག་གི་སྣ་རྩེ་ཟླུམ་པོར་གནས་པ་སྟེ། ཨེ་སོགས་ལས་བཞིའི་དབྱིབས་ཅན་ནི་གསང་བའི་སྟོན་འཁོར་བཞུགས་པའི་གནས་ཡིན་པས་ན་གནས་སོ། །གཉིས་པ་སྟོན་པ་ཕུན་སུམ་ཚོགས་པ་ནི། སྐད་ཅེས་གསལ་བྱེད་ལས་མིང་ཅན། །ཝཾ་ཡིག་ཐིག་ལེར་བཅས་སྟོན་པའོ། །ཞེས་པས་བསྟན། ཡབ་ཀྱི་རྡོ་རྗེ་ནོར་བུའི་དབུར་རྩ་ས་ཡ་ཕྲག་བཅུ་གསུམ་གྱི་བཅུད་འདུས་པའི་ཀུན་རྫོབ་ཡེ་ཤེས་ཀྱི་ཐིག་ལེ་ཝཾ་དབྱིབས་ཀྱིས་རྣམ་པ་ཅན་དུ་གནས་པ་ནི་ཡབ་ཡུམ་གཉིས་ཀའི་རྒྱུད་ལ་བདེ་བ་གསལ་བར་སྟོན་པའི་བདག་ཉིད་ཅན་ཡིན་པས་ན་སྟོན་པའོ། །གསུམ་པ་འཁོར་ཕུན་སུམ་ཚོགས་པ་ནི། མ་ད་མ་ནུ་སྡོམ་བྱེད་ཡིད། །ལུས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །ཅེས་པས་བསྟན། མ་ད་ནི་སྡོམ་བྱེད་དང་མ་ནུ་ནི་ཡིད་དེ་བྱེད་པ་སྡོམས་པའི་ཐབས་དེ་ནི་འདུ་ཤེས་གསུམ་ལྡན་གྱི་མཚན་རྟོག་སྡོམ་པར་བྱེད་པས་གསང་བའི་རྣམ་ཤེས་ཀྱིས་རེག་བདེ་ཉམས་སུ་མྱོང་བར་བྱེད་པས་ན་འཁོར་རོ། །བཞི་པ་ཆོས་ཕུན་སུམ་ཚོགས་པ་ནི། པ་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་ཆེན་འདི་ཡིན་ནོ། །ཞེས་པས་བསྟན། ཐབས་ལམ་བདེ་བ་ཆེན་པོའི་ཡེ་ཤེས་ཉམས་སུ་མྱང་བྱ་སེམས་ལྔ་རྫོགས་པའི་དགའ་བ་བཅུ་དྲུག་གི་ཡེ་ཤེས་ནི་རྣམ་ཐར་བཞི་ལྡན་ཏེ། ངོ་བོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། འོད་གསལ་བའི་རྣམ་པར་ཐར་བ་བཞི་ལྡན་རང་བཞིན་ལྷན་ཅིག་སྐྱེས་པའི་ཡེ་ཤེས་ནི་ཆོས་སོ། །ལྔ་པ་དུས་ཕུན་སུམ་ཚོགས་པ་ནི། དུས་ནི་བསམ་གྱིས་མི་ཁྱབ་དུས། །ཞེས་པས་བསྟན། ཡེ་ཤེས་དེ་ཉམས་སུ་མྱོང་བའི་ཚེ་དུས་འདི་ཞེས་མཚོན་དུ་མེད་པས་ན་བསམ་གྱིས་མི་ཁྱབ་པའི་དུས་སོ། །ཕུན་སུམ་ཚོགས་པ་ལྔའི་སྐད་དོད་དུ་ཨེ་ཝཾ་མཱ་ཡཱ་ཞེས་འབྱུང་ལ། དེ་བོད་སྐད་དུ་བསྒྱུར་ན་འདི་སྐད་བཤད་ཅེས་འབྱུང་ལ། ཨེས་མཚོན་པའི་གནས་དང་། ཝཾ་གིས་མཚོན་པའི་སྟོན་པ་དང་། མཱས་མཚོན་པའི་འཁོར་དང་། ཡཱ་ནི་ཆོས་དང་དུས་གཉིས་ཀ་ལ་འཇུག་སྟེ། ཡཱ་ནི་སྒྲ་ལས་ཐེག་པ་ཆེན་པོ་ཞེས་བསྙད་པས་ཆོས་ཕུན་སུམ་ཚོགས་པ་དང་། ཡཱ་ཡིག་གིས་མཚོན་པའི་དུས་ཏེ་བསམ་གྱིས་མི་ཁྱབ་པའི་དུས་རྣམས་སོ། །གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཐུགས་རྗེའི་ངང་ལས་འཆར་ཚུལ་བསྟན་པ་ལ་གསུམ་ལས། ཆོས་སྐུའི་སྟོན་པ་ཉིད་དབྱིངས་ལས་མ་གཡོས་པར་ལྷུན་སྡུག་པོ་བཀོད་པའི་ཞིང་དུ་རྡོ་རྗེ་དབྱིངས་ཀྱི་དཀྱིལ་འཁོར་རང་སྣང་བར་ཇི་ལྟར་བཀོད་པའི་ཚུལ། སྟོན་པ་ཉིད་རིགས་ལྔར་བཞེངས་པའི་ཐུགས་རང་བྱུང་གི་ཡེ་ཤེས་གཉིས་སུ་མེད་པའི་ཆོས་ཐམས་ཅད་ཡེ་ནས་སངས་རྒྱས་པར་ཆེད་དུ་བརྗོད་ཅིང་ཐུགས་རྗེ་གཡོ་བའི་ཚུལ། ཐུགས་རྗེ་རང་བཞིན་ཆོས་ཉིད་ངང་ལས་མ་གཡོས་བཞིན་དུ་རྣམ་པས་འཇིག་རྟེན་ན་སྒྲོན་མ་བཀོད་དེ་ཆོས་ཐམས་ཅད་གཏན་ལ་དབབ་པའི་ཚུལ་ལོ། །དང་པོ་ལ་གསུམ་སྟེ། ཕུན་སུམ་ཚོགས་པའི་གླེང་གཞི་མདོར་བསྟན་པ། དེའི་རང་བཞིན་རྒྱས་པར་བཤད་པ། ཡེ་ཤེས་རང་སྣང་བཀོད་པར་དོན་བསྡུ་བའོ། །དང་པོ་ལ་གསུམ་སྟེ། ཕྱི་ལྟར་རྒྱུད་འབྱུང་བ་གླེང་གཞིའི་ཚུལ་དུ་བཤད་པ། ནང་ལྟར་བཀོད་པ་བྱང་ཆུབ་སེམས་སུ་བཤད་པ། གསང་བ་འོད་གསལ་ལྟར་བཤད་པའོ། །དང་པོ་ནི། ཨེ་ཝཾ་མཱ་ཡཱ་ཞེས་པའི་སྒྲས་གོ་བར་བྱ་སྟེ། ཨེ་ཝཾ་ནི་དབྱིངས་ཀྱི་ཡི་གེ་ཡིན་པས་དེ་ལས་ཡི་གེ་ཀུན་འབྱུང་བའི་ཕྱིར་འོག་ནས་འབྱུང་བའི་ཚུལ་འདི་སྐད་ཅེས་པ་སྣང་བར་བྱེད་དོ། །མཱ་ཡཱའི་སྒྲ་ལ། རང་བཞིན། སྒྱུ་མ། བདག་འབྱུང་བ་སོགས་ཡོད་ཀྱང་འདིར་འབྱུང་བ་བཟུང་སྟེ་བཤད་པའི་དུས་ཞེས་པ་ཡིན་ནོ། །དེ་ལ་འདི་སྐད་འོག་གི་རྒྱུད་རྒྱས་པ་རྣམས་ཏེ་ཆོས་ཕུན་སུམ་ཚོགས་པའོ། །བཤད་པའི་ཞེས་རྒྱུད་སྡུད་པ་པོ་ཉིད་སྟོན་པ་ཕུན་སུམ་ཚོགས་པར་ཞལ་གྱི་བཞེས་པ་དང་། འཁོར་ཕུན་སུམ་ཚོགས་པའང་ཤུགས་ལ་བསྟན་པའོ། །དུས་ན་ཞེས་པས་དུས་བཞི་མཉམ་པ་ཉིད་ཀྱི་རང་བཞིན་དུས་ཕུན་སུམ་ཚོགས་པ་བསྟན་ལ། དེ་ལྟར་སྟོན་པ་དང་། ཆོས་དང་། འཁོར་རྣམས་སྣང་བ་དེའི་ཚེ་གནས་ཀྱང་ཡོད་ངེས་པས་འོག་མིན་ཤུགས་ལ་བསྟན་པའོ། །གཉིས་པ་ནི་གནས་ཡུམ་གྱི་གསང་བ་དང་། འཁོར་ལོ་བཞིའི་རྩ་རྣམས་སོ། །སྟོན་པ་ཡབ་ཡུམ་ནི་དྭངས་མ་དཀར་དམར་དང་ཡེ་ཤེས་ཀྱི་རླུང་ངོ་། །འཁོར་དགའ་བ་བཅུ་དྲུག་གི་ཉམས་དང་བཅས་པའོ། །ཆོས་བདེ་སྟོང་གཉིས་མེད་ཀྱི་ཡེ་ཤེས་སོ། །དུས་གཙུག་ཏོར་འཁོར་ལོས་བསྒྱུར་བ་བསམ་གྱིས་མི་ཁྱབ་པའི་དུས་ནའོ། །གསུམ་པ་ནི། གནས་སྙིང་རིན་པོ་ཆེ་ཟུར་བརྒྱད་པའི་དབུས་ན་སྲོག་གི་རྩ་མཐིང་ག །ཤར་ན་ཆུའི་རྩ་དཀར་པོ། ལྷོ་ན་སའི་རྩ་སེར་པོ། ནུབ་ན་མེའི་རྩ་དམར་པོ། བྱང་ན་རླུང་གི་རྩ་ལྗང་གུ་རྣམས་ཀྱི་ནང་ནས་ཀུན་རྫོབ་ཀྱི་ཐིག་ལེ་ཉུངས་འབྲུ་ཙམ་རེ་གནས་སོ། །སྟོན་པ་ནི། རང་བྱུང་གི་ཡེ་ཤེས་འོད་ལྔ་སོ་སོར་མ་འདྲེས་པའི་ཁ་དོག་ལ་ཡེ་ཤེས་ལྔའི་རང་རྩལ་མ་འགགས་པར་བཞུགས་པའོ། །འཁོར་ནི་རྩ་དང་ཐིག་ལེ་དེ་དག་ལས་ལུས་ཀྱི་སྟེང་འོག་ཀུན་ཏུ་ཁྱབ་པའི་རྩ་རྣམས་སོ། །དུས་ནི་གནས་སྐབས་ལུས་དང་དབང་པོའི་རྟེན་འབྲེལ་ཚང་བ་དང་། རང་བཞིན་དུས་གསུམ་འཕོ་འགྱུར་མེད་པའི་དུས་བཞི་མཉམ་པ་ཉིད་ཀྱི་དུས་སོ། །ཆོས་ནི་སྟོང་གསལ་སྤྲོས་པ་དང་བྲལ་བའི་ཡེ་ཤེས་སོ། །རང་བཞིན་རྒྱས་པར་བཤད་པ་སོགས་འགྲེལ་བ་ལས་ཤེས་པར་བྱའོ། ༈ །བྱ་རྒྱུད་ཀྱི་སྐབས་སུ། སྡོམ་གསུམ་རབ་དབྱེ་ལས། བྱ་བའི་རྒྱུད་ལ་བདག་བསྐྱེད་མེད། །བྲིས་སྐུ་བཀོད་ནས་གསོལ་བ་འདེབས། །བདག་བསྐྱེད་བསྒྲུབ་ཐབས་ཡོད་པ་ནི། །རྣལ་འབྱོར་རྒྱུད་ཀྱི་རྗེས་འབྲངས་ནས། །དེ་ཡི་ལུགས་སུ་བྱས་པ་ཡིན། །ཞེས་གསུངས་ཀྱང་། སྤྱིར་བྱ་རྒྱུད་ཙམ་པོ་བ་རྣམས་སུ་ནི་བདག་ཉིད་ལྷར་བསྐྱེད་པ་མེད་ལ། ཁྱད་པར་བ་རྣམས་སུ་ནི་བདག་ཉིད་ལྷར་བསྐྱེད་པ་བཤད་པ་ལ། རྒྱུད་ཀྱི་བཀའ་བསྡུ་བ་པོ་གསང་བདག་དང་མཁའ་འགྲོ་མ་སོགས་ཀྱི་མན་ངག་ལ་བརྟེན་ཏེ་བཀྲལ་བའི་ལུགས་ཟབ་མོ་ཤིན་ཏུ་མང་བའི་ཕྱིར་ན། ལམ་འདིའི་ཤིང་རྟ་ཆེན་པོ་དངོས་གྲུབ་བརྙེས་ཤིང་མཁས་པའི་དབང་པོར་འཛམ་གླིང་ན་ཡོངས་སུ་གྲགས་པ་སློབ་དཔོན་སངས་རྒྱས་གསང་བ་སོགས་ཀྱི་རྗེས་སུ་འབྲང་བ་ནི་ཤིན་ཏུ་རིགས་པ་དང་ལྡན་ཞིང་དངོས་གྲུབ་ཀྱི་ལམ་པོ་ཆེ་ཡིན་པ་ཉིད་དུ་ཤེས་པར་བྱའོ། །དེ་ལ་བྱ་བའི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི། དོན་དམ་པར་ཆོས་ཐམས་ཅད་རང་གི་ངོ་བོ་སྐྱེ་འགག་མེད་པ་ལས། ཀུན་རྫོབ་ཏུ་ལྷའི་གཟུགས་ཀྱི་སྐུར་བསྒོམ་ཞིང་ཞེས་བྱང་ཆུབ་ཀྱི་སེམས་དང་དེ་ཉིད་གསུམ་དང་ལྡན་པ་ནི་དངོས་གྲུབ་ཀྱི་སྣོད་དུ་བཤད་དོ། །དེ་ལྟར་རང་ཉིད་ལྷ་སྐུར་སྒོམ་པའི་གསལ་སྣང་ལ་དམིགས་པ་རྩེ་གཅིག་པའི་ཏིང་ངེ་འཛིན་སྟོབས་སུ་གྱུར་པའི་ཚེ་ན་སྔགས་རྣམས་ཉེ་བར་འགྲུབ་བོ། དེ་ལ་ལྷའི་སྙིང་པོ་སྲོག་ལྟ་བུ་ནི་གསང་སྔགས་ཡིན་ལ་སྔགས་དེ་ཡང་བསྒོམ་པ་དང་བཟླས་པ་གཉིས་ཀྱི་ཚུལ་གྱིས་བསྒྲུབ་པ་ཡིན་ནོ། །བསྒོམ་པ་ནི། ལྷའི་ཐུགས་ཀར་ཟླ་བའི་དཀྱིལ་འཁོར་སོགས་ལ་ས་བོན་དང་སྔགས་ཕྲེང་བཀོད་དེ་འཕྲོ་འདུའི་དམིགས་པ་བྱ་བ་སྤྱིར་བཏང་། ཁྱད་པར་མན་ངག་གི་དབང་དུ་བྱས་ན། རྣམ་སྣང་མངོན་བྱང་ལས། ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལས་གཞིར་གྱུར་པ། །ཤིན་ཏུ་བསྡམ་པའི་ཡིད་ལ་ནི། །བཟླས་བརྗོད་འབུམ་ཕྲག་གཅིག་བྱའོ། །ཞེས་གསུངས་པའི་ཡི་གེ་དང་ནི་ཞེས་པ་ནི། ཡི་གེ་དང་པོ་བྱང་ཆུབ་ཀྱི་སེམས། ཡི་གེ་གཉིས་པ་སྔགས་ཀྱི་སྒྲ། གཞི་དང་པོ་རང་ལུས་ལྷར་བསྒོམ་པ། གཞི་ཕྱི་མ་མདུན་དུ་བསྒོམ་པའི་ལྷ་ཡེ་ཤེས་པ་སྟེ། བཞི་པོ་དེ་ལ་དམིགས་པའི་སྒོ་ནས་སྔགས་བཟླ་བར་གསུངས་པ་དེ་ཉིད། བསམ་གཏན་ཕྱི་མར། སྒྲ་དང་སེམས་དང་གཞི་ལ་གཞོལ། །གསང་སྔགས་མི་འགྱུར་གཞི་ལ་གནས། །ཡན་ལག་མ་ཉམས་གསང་སྔགས་བཟླས། །ཞེས་པ་ལྟར། སྒྲ་ནི་སྔགས་ཀྱི་ཡི་གེའི་ཕྲེང་བ་འོ། །སེམས་ནི་བྱང་ཆུབ་ཀྱི་སེམས་རྣམ་པར་རྟོག་པ་དང་བྲལ་བ་ཤིན་ཏུ་རྣམ་དག་དྲི་མེད་བརྟན་ཞིང་མི་གཡོ་བ་ཟབ་ཅིང་ཕྲ་བ་མེ་ལོང་ལྟ་བུ་དེ་ཉིད་ཟླ་བའི་དཀྱིལ་འཁོར་གྱི་རྣམ་པར་སྣང་བའོ། །གཞི་ནི་མདུན་དུ་བཞུགས་པ་དེ་བཞིན་གཤེགས་པའི་སྐུ་ལ་དམིགས་པ་རྩེ་གཅིག་ཏུ་གཞོལ་བའོ། །གསང་སྔགས་མི་འགྱུར་ཞེས་པ་ནི་གཞི་བཞི་པོ་གསལ་ཞིང་བརྟན་པར་གྱུར་པ་ལ་བྱའོ། །གཞི་ལ་གནས་ཞེས་པའི་གཞི་ཕྱི་མ་ནི་བདག་གི་གཞི་སྟེ་བདག་ལྷར་གསལ་བ་ལ་དམིགས་པ་རྩེ་གཅིག་ཏུ་གནས་པའོ། །དེ་ལྟར་ཡན་ལག་བཞི་པོ་མ་ཉམས་པའི་ཏིང་ངེ་འཛིན་དང་ལྡན་པའི་སྒོ་ནས་གསང་སྔགས་བཟླ་བར་བྱ་ཞེས་གསུངས་སོ། །དེ་ལ་བཟླས་བརྗོད་ཀྱི་དེ་ཉིད་གསུམ་ནི། དེ་ཉིད་ལས། གསང་སྔགས་མེར་གནས་དངོས་གྲུབ་སྟེར། །སྒྲ་གནས་རྣལ་འབྱོར་སྟེར་བར་དྲན། །སྒྲ་མཐར་ཐར་བ་སྟེར་བ་ཉིད། །འདི་དག་དེ་ཉིད་གསུམ་པོ་ཡིན། །ཞེས་པ་ལྟར། དང་པོ་གསང་སྔགས་མེར་གནས་ཞེས་པ་གང་ཞེ་ན། རང་ཉིད་དང་མདུན་གྱི་ལྷའི་ཐུགས་ཀར་རྣམ་པར་མི་རྟོག་པའི་གཟུགས་ཅན་ཐོགས་རེག་དང་བྲལ་བ་དངས་ཤིང་འོད་གསལ་ལ་དྲི་མ་མེད་པའི་ཟླ་བའི་དཀྱིལ་འཁོར་གྱི་སྟེང་ན། མི་གནོད་ཅིང་ཟུག་རྔུ་མེད་ལ་ཡིད་དུ་འོང་བའི་རང་བཞིན་ཅན། རབ་ཏུ་ཞི་བའི་མེ་ལྕེ་འོད་རབ་ཏུ་བཟང་བར་བསམ་པ་ཡིན་ལ་མེ་ལྕེ་དེ་ཡི་ནང་ན་གནས་པ། དེ་ཉིད་གཉིས་པ་སྒྲར་གནས་ཞེས་པ་ནི། སྔགས་ཀྱི་ཡི་གེའི་ཕྲེང་བ་བརྒྱུད་མར་གནས་པའི་སྒྲ་གདངས་གསལ་ཞིང་ཟུར་ཕྱིན་པ་དྲིལ་བུའི་སྒྲ་ལྟ་བུར་བར་མ་ཆད་དུ་ཡིད་ངོར་སྣང་བ་ལ་སེམས་རྩེ་གཅིག་ཏུ་གནས་ལ་གསལ་སྣང་བརྟན་པ་ནི་གསང་སྔགས་ཀྱི་གཞི་ཞེས་གསུངས་ཏེ་ངག་གི་བཟླས་བརྗོད་མེད་པར་ལྷའི་ངོ་བོ་སྔགས་ཀྱི་སྒྲ་ཡིད་ལ་ཞེན་པར་བསམ་པའོ། །དེ་ཉིད་གསུམ་པ་སྒྲ་མཐའ་ཞེས་པ་ནི། སྒྲར་སྣང་ཡལ་ཞིང་མི་དམིགས་པ་སྟེ་ཡལ་བའི་གནས་ནི་མཐའ་དང་བྲལ་བ་ཆོས་ཀྱི་དབྱིངས་སོ། །ཇི་ལྟར་སྒྲར་སྣང་ཡལ་བར་གཏོང་ན། སྒྲར་སྣང་གི་གནས་ཡིག་འབྲུའི་གཟུགས་ཀྱི་རྣམ་པར་སྣང་བ་གཏད་པ་དང་། སྒྲ་མངོན་དུ་བྱེད་པ་ཡིད་བཟླས་དང་ཤུབ་བཟླས་ཀྱང་བཏང་། རང་བཞིན་ནི་སྒྲར་སྣང་བ་དེ་ཡང་ཡལ་ཏེ་མི་དམིགས་པ་ཞི་བ་གདོད་ནས་མ་སྐྱེས་པའི་དོན་ལ་གནས་པའི་བསམ་གཏན་བྱེད་པ་སྟེ། དེ་ནི་ལྟོས་པ་དང་བཅས་པའམ་རྩོལ་བ་དང་བཅས་པ་ཐམས་ཅད་སྤངས་པ་ཡིན་ནོ། །མདོར་ན་གསང་སྔགས་ཀྱི་གཞི་བཞི་པོ་མི་འགྱུར་བའི་བསམ་གཏན་ནི་ཡན་ལག་མ་ཉམས་པའི་བཟླས་བརྗོད་ཡིན་པས་བཟླས་བརྗོད་གྱི་དེ་ཁོ་ན་ཉིད་ཅེས་བྱ་སྟེ་དེ་ལྟར་བཟླ་དགོས་སོ། །བདག་གི་དེ་ཁོ་ན་ཉིད་ཕུང་ལྔའི་དོན་བློས་རྣམ་པར་མ་ཕྱེ་ཙམ་ནི་བདག་ཡིན་ལ་དེའི་དེ་ཉིད་ནི། ཉན་ཐོས་དང་སྒོ་བསྟུན་ན་ཕུང་པོ་ལྔའི་ཚོགས་འདི་ནི། མུ་སྟེགས་ཅན་གྱིས་ཀུན་ཏུ་བརྟགས་པའི་བདག་དང་བདག་གི་དང་རྟག་པ་དང་ཆད་པ་ལ་སོགས་པར་ཀུན་བརྟགས་པས་སྟོང་པ་ཕུང་པོ་དང་ཁམས་དང་སྐྱེ་མཆེད་ཀྱི་ཆོས་ཙམ་མེད་པར་སྐུར་བ་གདབ་ཏུ་མི་རུང་བ་འདི་ནི་བདག་གི་དེ་ཁོ་ན་ཉིད་དུ་འདོད་པའོ། །རྣལ་འབྱོར་སྤྱོད་པ་དང་སྒོ་བསྟུན་ན། ཕུང་པོ་ལྔའི་ཚོགས་པ་འདིའི་དེ་ཁོ་ན་ཉིད་ནི། བདག་དང་བདག་གིས་སྟོང་པར་མ་ཟད་ཀྱི། ཉན་ཐོས་ཀྱི་གཟུང་བ་དང་འཛིན་པར་ཀུན་ཏུ་བརྟགས་པས་ཀྱང་སྟོང་པ། སེམས་དང་སེམས་ལས་བྱུང་བ་རང་རིག་པ་ཙམ་མེད་པར་སྐུར་བ་གདབ་ཏུ་མི་རུང་སྟེ་གང་གིས་ཀྱང་གཟུང་བ་མ་ཡིན་ཞིང་། གང་ལའང་འཛིན་པར་བྱེད་པ་མ་ཡིན་པ་འདི་ནི། དེའི་དེ་ཁོ་ན་ཉིད་དུ་འདོད་པ་ཡིན་ནོ། །དབུ་མ་དང་སྒོ་བསྟུན་ན། ཕུང་པོའི་ཚོགས་འདིའི་དེ་ཁོ་ན་ཉིད་ནི། རྣལ་འབྱོར་སྤྱོད་པ་པས་རྣམ་པར་མི་རྟོག་པའི་ཡེ་ཤེས་དོན་དམ་པར་ཡོད་པར་བརྟགས་པས་ཀྱང་སྟོང་སྟེ། སྤྲོས་པའི་མཚན་མ་ཐམས་ཅད་ཡོངས་སུ་ཞི་བ་འདི་ནི་དེའི་དེ་ཁོ་ན་ཉིད་དུ་འདོད་པའོ། །དེ་ལྟར་བདག་གི་དེ་ཁོ་ན་ཉིད་ནི་བདག་དང་ཕུང་པོ་རྣམ་རིག་གི་སྤྲོས་པ་ལས་འདས་པ་གཟུང་འཛིན་མེད་ཅིང་མི་གཡོ་བར་རབ་ཏུ་འོད་གསལ་བ་ཉིད་དུ་རང་རིག་པས་གསལ་བར་རྗེས་སུ་མྱོང་བའོ། །དེ་ལྟ་བུའི་དོན་ལ་བློ་བཞག་ནས། རིག་སྔགས་ཀྱི་དེ་ཁོ་ན་ཉིད་ནི་ལྷར་བསྒོམ་པ་སྟེ། དང་པོ་སྟོང་པའི་ལྷ་ནི་བདག་དང་ལྷའི་དེ་ཉིད་རྣམ་པར་མི་རྟོག་པ་ཆོས་ཀྱི་དབྱིངས་སུ་དབྱེར་མེད་པའི་ངེས་ཤེས་སམ་ང་རྒྱལ་དུ་བྱ་བ་སྣང་བ་མེད་པའི་ཏིང་ངེ་འཛིན་ནོ། །དེའི་ངང་ལས་ལྷ་གང་ཡིན་གྱི་སྔགས་ཀྱི་ཡི་གེའི་སྒྲ་གདངས་ཙམ་ནམ་མཁའ་ལས་གྲགས་པར་བསམ་པ་སྒྲའི་ལྷའོ། །གདངས་དེ་ལས་སྔགས་ཀྱི་ཡི་གེའི་གཟུགས་ཀྱི་རྣམ་པར་ནམ་མཁར་སྣང་བ་ཡི་གེའི་ལྷའོ། །དེ་ནས་གཟུགས་ཀྱི་ལྷ་སྐུ་མངོན་དུ་རྫོགས་པའི་ཕྱིར། བདག་གི་དེ་ཁོ་ན་ཉིད་ཟླ་བའི་དཀྱིལ་འཁོར་གྱི་རྣམ་པར་གྱུར་པའི་སྟེང་དུ་ལྷའི་ངོ་བོ་སྔགས་ཀྱི་ཡི་གེ་ནམ་མཁར་གནས་པ་དེ་དག་འདུས་ཏེ་དག་པའི་དངུལ་ཆུ་གསེར་གྱི་ཕྱེ་མར་ཞེན་པ་ལྟར་འདྲེས་པ་ལས། བདག་དང་ལྷ་གཉིས་སུ་མེད་པ་གཅིག་ཏུ་གྱུར་པའི་རང་བཞིན་ལས་འོད་འཕྲོས། འཕགས་པ་མཆོད། སེམས་ཅན་གྱི་སྒྲིབ་པ་སྦྱངས། ཚུར་འདུས་པས་ལྷག་པའི་ལྷ་ཡི་གཟུགས་གང་ཡིན་པ་གསལ་ཞིང་དེ་ཉིད་དུ་ང་རྒྱལ་བྱ་བ་ནི་གཟུགས་ཀྱི་ལྷའོ། །དེ་ནས་མཚན་མ་སྤྱི་གཙུག་སོགས་སུ་ལྷ་གང་ཡིན་པའི་རིགས་ཀྱི་ཕྱག་རྒྱས་བཏབ་པས་བརྟེན་ཞིང་བྱིན་གྱིས་བརླབས་པ་ནི་ཕྱག་རྒྱའི་ལྷའོ། །དེ་ནས་དེ་ལྟ་བུའི་ལྷ་དེའི་སྐུ་དང་ཡན་ལག་གི་ཆ་ཤས་རེ་རེ་ནས་ཀྱང་གསལ་བཏབ་ལ། དེའི་མཚན་མ་ལ་སེམས་བཟུང་ཞིང་འདི་དང་འདི་ལྟ་བུ་ཞེས་བརྟག་ཅིང་རྒྱུན་དུ་ཞེན་པ་ནི་མཚན་མའི་ལྷའོ། །དེ་ནས་བདག་དང་ལྷ་ཐ་དད་མེད་པར་བྱས་ཏེ་སྲོག་རྩོལ་བསྡམ་ནས་བསྒོམས་པའི་མཐར་རྩོལ་བ་མེད་ཅིང་རྟོག་མེད་ངང་གིས་གསལ་བ་ན་ཏིང་ངེ་འཛིན་ལ་གནས་པའོ། །དེ་ལྟར་ནང་གི་སྒོམ་པ་དང་། ཕྱི་ཡི་བྱ་བ་ཁྲུས་དང་གཙང་སྦྲ་བྱེད་ཚུལ་ནི། ཁྲུས་གསུམ་བྱེད་པ་གོས་གསུམ་བརྗེ་བར་གསུངས་པ་ནི། ཕྱི་ཡི་ཁྲུས་ཡན་ལག་ལྔ་ཁྲུས། ནང་གི་ཁྲུས་རྩ་རླུང་དག་པར་བྱེད་པ། གསང་བའི་ཁྲུས་མཚན་རྟོག་དག་པར་བྱེད་པའོ། །ཕྱིའི་གོས་གསར་བ་གྱོན་པ། ནང་གི་གོས་སྡོམ་པ་བསྲུང་བ། གསང་བའི་གོས་ལྷ་བསྒོམ་པའོ། །གྲུབ་པའི་འབྲས་བུ་ནི། དེ་ལྟར་བརྩོན་པས་གནས་སྐབས་སུ་འདོད་གཟུགས་ཀྱི་ལྷ་དང་སྐལ་པ་མཉམ་པའི་རིག་འཛིན་གྱི་ལུས་ལ་སོགས་པ་ཐུན་མོང་གི་གྲུབ་པ་ཅི་རིགས་དང་། མཐར་ཐུག་གི་འབྲས་བུ་རྣམས་འགྲུབ་པའོ། །སྤྱོད་རྒྱུད་ཀྱི་སྐབས་སུ། གཉིས་ཀའི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི་དོན་དམ་པར་སྐྱེ་འགག་མེད་པ་ལས་ཀུན་རྫོབ་ཏུ་ལྷའི་གཟུགས་ཀྱི་སྐུ་བསྒོམ་ཞིང་དེ་ཉིད་རྣམ་པ་བཞི་དང་ལྡན་པར་བསྒོམ་པའི་ཏིང་ངེ་འཛིན་ཞེས་བདག་གི་དེ་ཁོ་ན་ཉིད་དང་། ལྷའི་དེ་ཁོ་ན་ཉིད་དང་། ཏིང་ངེ་འཛིན་གྱི་དེ་ཁོ་ན་ཉིད། བཟླས་པའི་དེ་ཁོ་ན་ཉིད་བཞི། དང་པོ་ནི་བདག་དམ་ཚིག་པར་བསྐྱེད་པའོ། །གཉིས་པ་ཡེ་ཤེས་པ་སྤྱན་དྲངས་ནས་སྨིན་ཐད་བཞུགས་པའོ། །གསུམ་པ་ནི་བདག་མདུན་གྱི་ཐུགས་ཀ་ན་ཟླ་བ་དང་ཡིག་འབྲུ་བཀླག་སྔགས་བཀོད་པའོ། །བཞི་པ་ནི་དབུགས་དང་སྤྲད་དེ་ཕར་འགྲོས་ཐུགས་དམ་བསྐུལ། ཚུར་བྱུང་དངོས་གྲུབ་སྩོལ་བའི་དམིགས་པ་དང་བཅས་སྐྱོན་བཅུ་སྤངས་ལ་བཟླས་པའོ། །མཚན་མ་མེད་པའི་རྣལ་འབྱོར་ནི། ཕུང་སོགས་ཀྱི་ཆོས་ཐམས་ཅད་ལ་རྣམ་པར་དཔྱད་པས་སྐྱེ་མེད་དུ་རྟོགས་པ་འཇུག་པའི་སེམས། དེ་མི་རྟོག་པའི་ངོ་བོར་མངོན་དུ་གྱུར་པ་གནས་པའི་སེམས། དེ་ལྟར་མ་རྟོགས་པ་ལ་སྙིང་རྗེ་ཆེན་པོས་རྗེས་སུ་འཇུག་པ་ལྡང་བའི་སེམས་ཏེ། དེ་ལྟར་འཇུག་གནས་ལྡང་གསུམ་གྱིས་ཁྱད་པར་དུ་བྱས་པའི་དོན་དམ་བྱང་ཆུབ་ཀྱི་སེམས་བསྒོམ་པའོ། །གྲུབ་པའི་འབྲས་བུ་ནི། ཐུན་མོང་རྫས་ལུས་ལོངས་སྤྱོད་གསུམ་ཡིན་ལ། རྫས་ནི་རལ་གྲི་མིག་སྨན་ལ་སོགས་པ་བླངས་ནས་བཟླས་བརྗོད་བྱས་པས། རྫས་དེ་འབར་བ་དང་ལག་ཏུ་བླངས་བས་རིག་འཛིན་ལ་སོགས་པ་གྲུབ་ནས་མཁའ་སྤྱོད་དུ་འགྲོ་བ་དང་། ལུས་ཀྱི་ཕུང་པོ་སོགས་ཀྱི་ལུས་རགས་པ་སྦྱངས་ནས་ཕྲ་བ་དང་ཡང་བ་སོགས་ཀྱི་དབང་ཕྱུག་གི་ཡོན་ཏན་བརྒྱད་མངོན་དུ་བྱས་ཏེ། མཁའ་སྤྱོད་དུ་འགྲོ་བ་དང་། ལོངས་སྤྱོད་ནི་མིའི་ལོངས་སྤྱོད་འཁོར་ལོས་སྒྱུར་རྒྱལ་ལྟ་བུ་ནས། མཁའ་སྤྱོད་དུ་འདོད་ལྷ་རྣམས་དང་མཚུངས་པའི་ལོངས་སྤྱོད་དུ་འགྲོ་བའི་བར་རོ། །ཐུན་མོང་མ་ཡིན་པ་འབྱུང་བཞིའི་དཀྱིལ་འཁོར་ལ་བརྟེན་ནས་རླུང་གི་སྦྱོར་བ་བསྒོམས་པ་ལས་རྫུ་འཕྲུལ་དང་མངོན་ཤེས་བསྒྲུབས་ཏེ་རིག་པ་འཛིན་པའི་ནང་དུ་འགྲོ་བ་ལ་སོགས་པའོ། །རྣལ་འབྱོར་རྒྱུད་བཤད་པའི་སྐབས་སུ། དེ་ལ་རྣལ་འབྱོར་ཕྱི་པ་ཐུབ་པའི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི། ཀྲི་ཡ་ལྟར་ཕྱིའི་ཡོ་བྱད་ལ་གཙོ་བོར་མི་འཛིན་པར་དོན་དམ་པར་སྐྱེ་འགག་མེད་པའི་རང་བཞིན་སྣང་ཆར་ཤར་བ་ལྷ་དང་ལྷ་མོ་དང་། སྒོམ་པ་ལྟ་བ་དེ་དང་རྣམ་པ་འདྲ་བའི་རྒྱུད་ཡོངས་སུ་དག་པའི་ཏིང་ངེ་འཛིན་གྱིས་འཕགས་པའི་གཟུགས་ཀྱི་སྐུ་ཞེས། དོན་དམ་པའི་ལྷ་དང་། སེམས་པའི་བྱེ་བྲག་གི་ལྷ་གཉིས་ནི། དོན་དམ་པ་དང་ཀུན་རྫོབ་ཀྱི་སྣང་ཆའི་ལྷ་གཉིས་ཡིན་ལ། དེའི་ཆར་གཏོགས་པའི་རྒྱུ་མཐུན་པའི་ལྷར་བསྒོམ་པ་དམ་ཚིག་ཅན་གྱི་སྐྱེ་བོས་བཏགས་པའི་ལྷ་སྟེ། དེ་ལྟར་གོམས་ན་བདེན་གཉིས་ལྷའི་རང་བཞིན་ཡིན་ཚུལ་མངོན་དུ་གྱུར་པར་བྱེད་པ་སྟེ། དེ་ཡང་ཐབས་ཀྱི་རྣལ་འབྱོར་དང་ཤེས་རབ་ཀྱི་རྣལ་འབྱོར་གཉིས་ལས། དང་པོ་སྲིད་པ་བསྐྱེད་པའི་རིམ་པ་ཀུན་ནས་ཉོན་མོངས་པའི་ཕྱོགས་དང་བསྟུན་ནས་བསྒོམ་པ་རྒྱུད་སྡེ་འོག་མ་གསུམ་གྱི་ལུགས་མ་ཡིན་ཀྱང་རྣམ་བྱང་གི་ཕྱོགས་དང་བསྟུན་ནས་མངོན་བྱང་ལྔའི་རིམ་པས་བསྒོམ་པའི་ཚུལ། དང་པོ་རྣམ་པར་མི་རྟོག་པའི་སྟོང་ཉིད་བསྒོམ་པ་དང་། གཉིས་པ་སྟོང་ཉིད་ཀྱི་སྣང་ཆ་ཟླ་བ་ཚེས་པ་ལྟ་བུར་བསམ་པ་དང་། གསུམ་པ་དེ་ཉིད་ཉ་བ་ལྟ་བུར་བསྒོམ་པ་དང་། བཞི་པ་དེའི་སྟེང་དུ་རྡོ་རྗེ་རྩེ་ལྔ་པའི་ཕྱག་མཚན་བསྒོམ་པ་དང་། ལྔ་པ་དེ་ལས་འོད་ཟེར་སྤྲོ་བསྡུ་བྱས་ཏེ་ཡོངས་སུ་གྱུར་པ་ལས་རིགས་ཀྱི་ལྷ་གང་ཡིན་གྱི་སྐུར་བསྒོམ་པའོ། །ཡང་ན་སྟོང་པའི་ངང་ལས། ཞིང་དང་གནས་ཕུན་སུམ་ཚོགས་པ་ལས་གྲུབ་པའི་རྒྱུ་གདན་པད་ཟླ་ལས་མངོན་པར་བྱང་ཆུབ་པ་དང་། ཆོས་ཕུན་སུམ་ཚོགས་པ་འབྱུང་བའི་རྒྱུ་གསུང་ཡིག་འབྲུ་ལས་མངོན་པར་བྱང་ཆུབ་པ་དང་། དུས་ཕུན་སུམ་ཚོགས་པ་རྟག་པ་བསམ་མི་ཁྱབ་པར་གནས་པའི་རྒྱུ་ཐུགས་ཕྱག་མཚན་ལས་མངོན་པར་བྱང་ཆུབ་པ་དང་། འཁོར་དང་སྟོན་པ་ཕུན་སུམ་ཚོགས་པའི་རྒྱུ་སྐུ་ཡོངས་རྫོགས་དཀྱིལ་འཁོར་གྱི་འཁོར་ལོ་དང་བཅས་པ་ལས་མངོན་པར་བྱང་ཆུབ་པ་དང་། སྐུའི་ངོ་བོའམ་ཡེ་ཤེས་ཕུན་སུམ་ཚོགས་པའི་རྒྱུ་ལྷ་ཡེ་ཤེས་སེམས་དཔའ་ལས་མངོན་པར་བྱང་ཆུབ་པ་སྟེ་མངོན་བྱང་ལྔའི་ཚུལ་གྱིས་བསྐྱེད་པའོ། །ཆོ་འཕྲུལ་བཞི་ལས། ཏིང་ངེ་འཛིན་གྱི་ཆོ་འཕྲུལ་ནི། དབུས་སུ་རྣམ་པར་སྣང་མཛད་ལ་ཡུམ་བཞིའི་འཁོར་གྱིས་བསྐོར་བ། ཤར་དུ་མི་བསྐྱོད་པ་ལ་རྡོ་རྗེ་རིགས་བཞིའི་འཁོར་གྱིས་བསྐོར་བ། ལྷོར་རིན་ཆེན་འབྱུང་ལྡན་ལ་རིན་ཆེན་རིགས་ཀྱི་སེམས་དཔའི་འཁོར་གྱིས་བསྐོར་བ། ནུབ་སྣང་བ་མཐའ་ཡས་ལ་རྡོ་རྗེ་ཆོས་སོགས་སེམས་དཔའི་འཁོར་གྱིས་བསྐོར་བ། བྱང་དོན་ཡོད་གྲུབ་པ་ལ་རྡོ་རྗེ་ལས་སོགས་སེམས་དཔའི་འཁོར་གྱིས་བསྐོར་བའོ། །བྱིན་གྱིས་བརླབས་པའི་ཆོ་འཕྲུལ་ནི། ལྷ་རྣམས་སོ་སོའི་སྤྱི་བོར་ཟླ་བ་ལ་གནས་པའི་ༀ་དཀར་པོ། མགྲིན་པར་པདྨ་ལ་གནས་པའི་ཨཱཿདམར་པོ། སྙིང་གར་ཉི་མ་ལ་གནས་པའི་ཧཱུྃ་སྔོན་པོ་སོ་སོའི་འོད་ཟེར་གྱིས་རྒྱལ་བ་རབ་འབྱམས་ཀྱི་ཐུགས་རྒྱུད་བསྐུལ་རྡོ་རྗེ་གསུམ་གྱི་ལྷ་ཚོགས་ནམ་མཁའ་གང་བར་བྱོན། ཡི་གེ་གསུམ་ལ་ཐིམ་པ་ཡོངས་སུ་གྱུར་པ་ལས་སྤྱི་བོར་རྣམ་སྣང་དཀར་པོ་འཁོར་ལོ་འཛིན་པ། མགྲིན་པར་སྣང་མཐའ་དམར་པོ་པདྨ་འཛིན་པ། སྙིང་གར་མི་བསྐྱོད་པ་སྔོན་པོ་རྡོ་རྗེ་འཛིན་པ་རྣམས་ཀྱིས་རྒྱས་བཏབ་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་དང་གཉིས་སུ་མེད་པར་བྱས་པའོ། །དབང་བསྐུར་བའི་ཆོ་འཕྲུལ་ནི། ལྷ་ཚོགས་རྣམས་སོ་སོའི་ཐུགས་ཀའི་ས་བོན་ལས་འོད་ཟེར་འཕྲོས། ཕྱོགས་བཅུའི་རྒྱལ་བ་རབ་འབྱམས་ཐམས་ཅད་དབང་ལྷ་རིགས་ལྔའི་རྣམ་པར་སྤྱན་དྲངས་དབང་བསྐུར་ཆུའི་ལྷག་མ་ཡར་ལུད་པ་ལས་རང་རང་རིགས་ཀྱི་བདག་པོ་གང་ཡིན་གྱིས་དབུ་བརྒྱན་པར་བསྒོམ་པའོ། །མཆོད་པའི་ཆོ་འཕྲུལ་ནི། དེ་དག་ལ་ཕྱག་དང་མཆོད་པ་བསྟོད་པ་རྣམས་བྱ་བའོ། །དེ་ལྟར་བདག་ལྷར་བསྐྱེད་པ་ལ་དབྱིངས་ནས་ཡེ་ཤེས་པ་དགུག་ཅིང་བདག་དང་ལྷ་དོན་ལ་མཉམ་པར་ཤེས་པའི་ངེས་ཤེས་ཀྱིས་ཆུ་ལ་ཆུ་བཞག་པ་བཞིན་དབྱེར་མེད་དུ་བསྟིམས་ནས། སྐུ་ཕྱག་རྒྱ་ཆེན་པོ་སྐུ་དངོས་དང་། དེའི་རྒྱུ་ཡིག་འབྲུ་དང་ཕྱག་མཚན་སོགས་སོ། །གསུང་ཆོས་ཀྱི་ཕྱག་རྒྱ་ལྗགས་ཏེ་རྡོ་རྗེ་རྩེ་ལྔ་སོགས་བསྒོམ་པ། ཐུགས་དམ་རྒྱ་ལ་འཛིན་འཆང་གཉིས་ལས། འཛིན་པ་ཡེ་ཤེས་ལྔ་ཐུགས་སུ་ཆུད་པའི་རྟགས་རྡོ་རྗེ་རྩེ་ལྔ་སོགས་རྣམ་པ་དང་། འཆང་བ་རྡོར་དྲིལ། ཕྲིན་ལས་ལས་རྒྱ་ཐུགས་ཀར་ཟླ་སྟེང་རྡོ་རྗེ་རྒྱ་གྲམ་ལས་འོད་ཟེར་འཕྲོ་འདུས་འཕགས་པ་སྤྱན་དྲངས་པ་འགྲོ་བའི་དོན་བྱེད་པ་སོགས་ཏེ། དེ་དག་གིས་བདག་ཉིད་ཆེན་པོ་རྣམས་ཀྱི་སྐུ་གསུང་ཐུགས་ཕྲིན་ལས་དང་བཅས་པའི་ངང་ཚུལ་ལས་མི་འདའ་ཞིང་བརྩོན་པར་བྱེད་པའམ། དེ་དང་ངོ་བོ་གཅིག་པར་རྒྱས་འདེབས་པའི་ཚུལ་གྱིས་བསྒོམ་པའོ། །གཉིས་པ་ཤེས་རབ་གྱི་རྣལ་འབྱོར་ནི། དོན་དམ་མཚན་མ་མེད་པའི་ཡེ་ཤེས་དང་ཀུན་རྫོབ་རྡོ་རྗེ་དབྱིངས་ཀྱི་ལྷ་སྣང་གཉིས་ཀ་གཉིས་སུ་མེད་པའི་ཡེ་ཤེས་ཀྱི་ངང་ལ་མཉམ་པར་འཇོག་པ་ཡིན་ནོ། །གྲུབ་པའི་འབྲས་བུ་ནི་ཐུན་མོང་དང་མཆོག་གི་དངོས་གྲུབ་འགྲུབ་པར་འདོད་པའོ། །༢བྱ་རྒྱུད་ཀྱི་སྐབས། དོན་དམ་པར་མཐའ་བཞི་དང་བྲལ་བའི་དག་པར་རྟོགས་པས་ཀུན་རྫོབ་ཏུ་དངོས་གྲུབ་གཞན་ལ་རེ་ཞིང་རྩོལ་བའི་ཐབས་སུ་གྱུར་པ་དང་། ལྟ་བ་ནི་བདེན་པ་གཉིས་ཏེ། དོན་དམ་བདེན་པ་ནི། སེམས་ཉིད་དག་པ་སྟོང་གསལ་གྱི་ཡེ་ཤེས་ཡོད་མེད་སྣང་སྟོང་གི་མཐའ་བཞི་དང་བྲལ་བར་འདོད་པ་དང་། ཀུན་རྫོབ་ལ་ཡང་ལོག་གཉིས་ལས། ལོག་པའི་ཀུན་རྫོབ་ནི། དབུ་མ་པ་མན་ཆད་ཀྱིས་ཡང་དག་དང་ལོག་པར་བརྟགས་པའི་ཀུན་རྫོབ་ཐམས་ཅད་ཡིན་ལ། ཡང་དག་ཀུན་རྫོབ་ནི། ཆོས་ཉིད་དེ་ལྟར་རྟོགས་པའི་ཡོན་ཏན་རིགས་གསུམ་སྟེ། ཀུན་རྫོབ་སྣང་བའི་དངོས་པོ་སྤྱན་གཟིགས། འཇམ་དཔལ། ཕྱག་རྡོར་ཏེ། རིགས་གསུམ་ལྷའི་དཀྱིལ་འཁོར་དུ་སྣང་བར་འདོད་པའོ། །དེ་ཁོ་ན་ཉིད་བཞིར་གསུངས་པའི་བདག་གི་དེ་ཁོ་ཉིད་ནི། གཞི་གནས་ལུགས་ལྟ་བས་གཏན་ལ་འབེབས་པ་སྟེ། སློབ་དཔོན་སངས་རྒྱས་གསང་བས་བདག་གི་དེ་ཁོ་ན་ཉིད་ནི་རིགས་པས་དཔྱད་པའི་སྟོང་པ་ཙམ་ལ་མི་བྱ་ཡི། བདག་གི་དེ་ཁོ་ན་ཉིད་གཉིས་སུ་མེད་པའི་ཡེ་ཤེས་ཀྱི་མཚན་ཉིད་དེ་ཐོན་ན་སངས་རྒྱས་སུ་འགྱུར་བས་དེ་འཛིན་ཞེས་གསུངས་ཏེ། མདོར་ན་རྣམ་པར་ཤེས་པའི་མཚན་ཉིད་ཀྱི་ཆོས་ལས་འདས་ཏེ་སྣང་སྟོང་གཉིས་སུ་མེད་པའི་ཡེ་ཤེས་ཀྱི་བཞུགས་ཚུལ་གཏན་ལ་ཕེབས་ན། བདག་གི་དེ་ཁོ་ཉིད་ཀྱང་དེ་ཡིན་ལ་དོན་དམ་པའི་ལྷ་ཡང་དེར་ཚུལ་གཅིག་སྟེ་ཆོས་ཐམས་ཅད་ཀྱི་གནས་ལུགས་དང་དོན་དམ་བྱང་ཆུབ་ཀྱི་སེམས་ཞེས་ཀྱང་བྱའོ། །ཨུ་པའི་ལྟ་སྒོམ་ཡོ་ག་དང་། སྤྱོད་པ་བྱ་བ་ལྟར་སྤྱོད་པ་སྟེ། རང་ཤར་ལས། ཨུ་པ་ཡ་ནི་འདི་ལྟ་སྟེ། །ལྟ་བ་ཡོ་གར་ལྟ་བ་ལས། །སྤྱོད་པ་ཀྲི་ཡར་སྤྱོད་པའོ། །དེ་ཕྱིར་གཉིས་ཀའི་རྒྱུད་ཅེས་གྲགས། །ཞེས་སོ། །ཡོ་གས་དོན་དམ་མཚན་མ་མེད་པའི་ཆོས་ཉིད་རྟོགས་པའི་ཡེ་ཤེས་ཀྱི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་ལྷར་བརྟགས་ཏེ་རྟོག་པ་བཟང་ངན་བླང་དོར་གྱི་རྩོལ་བས་འབྲས་བུ་སྒྲུབ་པར་འདོད་པ་དང་། ལྟ་བ་ནི་བདེན་པ་གཉིས་ཏེ། དོན་དམ་བདེན་པ་ནི་ཆོས་ཐམས་ཅད་སྤྲོས་པའི་མཚན་མ་དང་བྲལ་བའི་རང་བཞིན་འོད་གསལ་བའི་སྟོང་པ་ཉིད་དང་། ཀུན་རྫོབ་ལ་གཉིས་ཀྱི་ལོག་པའི་ཀུན་རྫོབ་སྔར་དང་འདྲ། ཡང་དག་ཀུན་རྫོབ་ནི། ཅི་སྣང་ཐམས་ཅད་ཆོས་ཉིད་རྟོགས་པའི་ཡེ་ཤེས་ཀྱི་བྱིན་རླབས་རྡོ་རྗེ་དབྱིངས་ཀྱི་དཀྱིལ་འཁོར་དུ་སྣང་བའི་ཕྱིར། སྐྱེ་བོའི་སྣང་བ་རང་རྒྱུད་དུ་བརྟག་པ་འདི་མེད་པར་འདོད་དོ། མི་ཚེ་བདུན་ཞེས་པ་ནི། རིག་འཛིན་གྲུབ་ནས་རིང་པོར་འཚོ་བའི་དབང་དུ་བྱས་པ་སྟེ། བྱ་རྒྱུད་རང་ལམ་གྱིས་བསྐལ་ཆེན་བརྒྱད་ནས་འབྲས་བུ་ལ་སྦྱོར་བར་བཤད་པ་དང་མི་འགལ་བར་ཤེས་པར་བྱའོ། །འདིར་བསྟན་པའི་རིག་འཛིན་ནི་འཇིག་རྟེན་ལས་འདས་པའི་ཁོངས་སུ་གཏོགས་པ་སྟེ། རྫས་ལ་བརྟེན་པའི་རིག་འཛིན་ཞེས་ཐུན་མོང་གི་གྲུབ་པ་ཆུང་ངུ་ནི། ལུས་དེ་ཉིད་ཀྱིས་ལྷ་དང་མིའི་གནས་སུ་ཐོགས་མེད་དུ་རྒྱུ་ཞིང་ནམ་མཁའ་ལ་འགྲོ་བ་དང་། རིག་སྔགས་ཀྱིས་སེམས་ཅན་ལ་ཕན་འདོགས་ཤིང་ཚར་གཅོད་པ་སོགས་སོ། །འབྲིང་པོ་འདོད་པའི་རིག་འཛིན་ཞེས། ཚོགས་ལམ་ཆེན་པོ་དེས་དྲོད་ཐོབ་པ་ན་སྤྱོད་པ་སྤྱོད་སྒྲུབ་པའི་ལུས་འདོད་ཁམས་ཀྱི་ལྷ་དང་སྐལ་བ་མཉམ་པ། རིགས་སྔགས་དང་དངོས་གྲུབ་སྣ་ཚོགས་བྱེད་པ་ཚེ་ལ་དབང་བར་གྱུར་རོ། །འདི་ནི་ལུས་ཀྱི་རིག་པ་འཛིན་པ་ཞེས་ལུས་ཕྲ་ཡང་སོགས་ཡོན་ཏན་བརྒྱད་དང་ལྡན་པ་ཡིན་ནོ། །ཆེན་པོ་གཟུགས་ཀྱི་རིག་འཛིན་ཞེས་ལུས་ཚངས་རིས་ནས་འོག་མིན་གྱི་བར་གྱི་གཟུགས་ཁམས་ཀྱི་ལྷ་དང་སྐལ་པ་མཉམ་ཞིང་དབང་ཕྱུག་གི་ཡོན་ཏན་ཤིན་ཏུ་ཕྲ་བས་གོང་དུ་བཤད་པ་ལས་ཁྱད་པར་འཕགས་པ་ཅན་དུ་གྱུར་ཏེ། དེའི་ལུས་འདོད་ཁམས་སུ་མི་འབྱུང་ཡང་སྤྲུལ་པ་སྣ་ཚོགས་པས་འགྲོ་བའི་དོན་མཛད་པ་སྟེ། དེ་ལྟར་ཐུན་མོང་གི་དངོས་གྲུབ་ལ་འདུན་པའི་སྤྱོད་པ་དེས་འཕྲལ་དུ་མཆོག་གི་དངོས་གྲུབ་ཐོབ་པ་མིན་ཀྱང་། ཚེ་ལ་དབང་ཐོབ་པ་ཡིན་པས་རིམ་གྱིས་ལུས་རྟེན་དེ་ལ་བརྟེན་ནས་ལམ་གོང་མར་སྦྱོར་བར་བྱེད་དོ། །མཁའ་སྤྱོད་ཆེན་པོ་ནི་གཞན་ལས་ཤེས་པར་བྱའོ། །མཁའ་སྤྱོད་ཆུང་ངུ་ལ་རྣམ་གྲངས་ཤིན་ཏུ་མང་ཡང་རིགས་བསྡུ་ན་གཟུགས་ཁམས་བཅུ་བདུན། འདོད་ལྷ་རིགས་དྲུགམི་ཡུལ་གྱི་ནམ་མཁར་སྤྱོད་པ་ཕྱོགས་གཅིག་ཏུ་ངེས་པ་རྣམས་སོ། །དེ་ལ་མི་ཡུལ་གྱི་མཁའ་སྤྱོད་ནི། མིའི་ནང་དུ་གནས་ཀྱང་ཡང་དག་པའི་གང་ཟག་རེ་རེ་ཙམ་གྱིས་མཐོང་བ་དང་འཕྲད་པ་སྲིད་ཀྱི། གཞན་ཕལ་བ་རྣམས་ཀྱིས་མཐོང་བར་མི་ནུས་སོ། །ལྷ་ཡུལ་གྱི་མཁའ་སྤྱོད་ནི་འདོད་གཟུགས་གང་དང་གང་དུ་སྤྱོད་ནུས་པ་དེར་དེ་དང་དེའི་ལོངས་སྤྱོད་ལ་སྤྱོད་ཅིང་། དེ་དང་དེའི་ཚེ་ཚད་དང་མཉམ་པའམ་ལྷག་པར་སྤྱོད་པའོ། །ཕྱག་རྒྱ་བཞི་ནི་ལུས་ངག་ཡིད་དང་བྱ་བ་བཞི་ལ་རིམ་པར་སྐུ་ཕྱག་རྒྱ་ཆེན་པོ། གསུང་ཆོས་རྒྱ། ཐུགས་དམ་རྒྱ། ཕྲིན་ལས་ལས་རྒྱ་རྣམས་ཀྱིས་རྒྱས་བཏབ་ནས་བསྒོམ་པའི་ཕྱིར་ཕྱག་རྒྱ་སྟེ། ཀུན་གཞིའི་རྣམ་པར་ཤེས་པའི་འཁྲུལ་བ་གློ་བུར་བ་བསལ་ནས། རང་བཞིན་མེ་ལོང་ལྟ་བུའི་ཡེ་ཤེས་དེ་མངོན་དུ་བྱ་བ་ལ་སྐུ་ཕྱག་རྒྱ་ཆེན་པོའི་རྣལ་འབྱོར། ཉོན་ཡིད་ཀྱི་གློ་བུར་འཁྲུལ་བ་བསལ་ནས་རང་བཞིན་མཉམ་པ་ཉིད་ཀྱི་ཡེ་ཤེས་དེ་མངོན་དུ་བྱ་བ་ལ་ཐུགས་དམ་ཚིག་གི་ཕྱག་རྒྱའི་རྣལ་འབྱོར། ཡིད་ཀྱི་ཤེས་པའི་གློ་བུར་གྱི་འཁྲུལ་བ་བསལ་ནས་རང་བཞིན་སོ་སོར་རྟོག་པའི་ཡེ་ཤེས་དེ་མངོན་དུ་བྱ་བ་གསུང་ཆོས་ཀྱི་ཕྱག་རྒྱའི་རྣལ་འབྱོར། སྒོ་ལྔའི་རྣམ་ཤེས་འཁྲུལ་པ་བསལ་ནས་རང་བཞིན་བྱ་བ་གྲུབ་པའི་ཡེ་ཤེས་དེ་མངོན་དུ་བྱ་བའི་ཕྲིན་ལས་ལས་ཀྱི་ཕྱག་རྒྱའི་རྣལ་འབྱོར། ཆོས་ཀྱི་དབྱིངས་ཀྱི་ཡེ་ཤེས་ནི་དེ་ཐམས་ཅད་ཀྱི་རང་བཞིན་དུ་གནས་པའོ། ། ༈ མ་ཧཱ་ཡོ་གའི་སྐབས། ལུས་ཅན་རྣམས་འཆི་བའི་ཚེ་ཐིམ་རིམ་རྫོགས་པའི་མཐར་འཆི་སྲིད་ཆོས་སྐུའི་འོད་གསལ་འཆར་བ་ཡིན་ལ། དེ་ཡང་འཆི་སྲིད་ཀྱི་བག་ཆགས་སྦྱོང་བྱེད་སྟོང་ཆེན་ལ་བསླབ་པ་དང་། འོད་གསལ་དེ་ཉིད་ངོས་མ་ཟིན་པར་བར་དོའི་ཡིད་ལུས་སྒྱུ་མ་ལྟ་བུའི་གནས་སྐབས་ཀྱི་བག་ཆགས་སྦྱོང་བྱེད་སྙིང་རྗེ་སྒྱུ་མ་ལ་བསླབ་པ་དང་། བར་དོར་མ་གྲོལ། བར་མའི་མངལ་དུ་སྐྱེ་བ་བཟུང་ནས་ཕྱིར་བཙས་པའི་བར་གྱི་བག་ཆགས་སྦྱོང་བྱེད་ཕྱག་རྒྱ་གཅིག་པ་ལ་ཕྲ་རགས་གཉིས་ཏེ། གང་དུ་སྐྱེ་བར་འགྱུར་བའི་གནས་ལ་སྲེད་པ་སྐྱེས་པའི་རྐྱེན་གྱིས་དེར་འཇུག་ལ་ཁད་པའི་བར་སྲིད་ཀྱི་གནས་སྐབས་ཀྱི་བག་ཆགས་སྦྱོང་བྱེད་ཕྲ་བ་ཡིག་འབྲུ་ལ་བསླབ་པ་དང་། ཕ་མའི་ཁུ་རྡུལ་གྱི་བར་དུ་ཞུགས་ནས་ཕྱི་རོལ་དབང་པོ་ཡུལ་ལ་སད་པའི་གནས་སྐབས་ཀྱི་བག་ཆགས་སྦྱོང་བྱེད་རགས་པ་ལྷ་སྐུ་ལ་བསླབ་པ་ལ་བསྐྱེད་རིམ་རྣམ་པ་བཞི་དང་། བཙས་ནས་ནར་སོན་པའི་བར་གྱི་བག་ཆགས་སྦྱོང་བྱེད་ཕྱག་རྒྱ་སྤྲོས་བཅས་ལ་བསླབ་པ་ལའང་བཞི་སྟེ། དཀྱིལ་འཁོར་སྤྲོ་བ། ཚོམ་བུ་སྤྲོ་བ། གྲངས་སྤྲོ་བ། ཞལ་ཕྱག་སྤྲོ་བའོ། །ནར་སོན་ནས་རྒན་པོའི་བར་གྱི་བག་ཆགས་སྦྱོང་བྱེད་ཚོམ་བུ་ཚོགས་ཀྱི་སྒྲུབ་པའོ། །དེ་ཡང་ཆོས་ཐམས་ཅད་ཀྱི་གནས་ལུགས་ཅིར་ཡང་མི་དམིགས་པ་འོད་གསལ་སྟོང་ཉིད་ཀྱི་དབྱིངས་སུ་མཉམ་པར་འཇོག་པའི་སྟོང་པ་ཆེན་པོའི་རྣལ་འབྱོར་དང་དྲན་པ་ཉེ་བར་བཞག་པ་བཞི་སྦྲེལ་ནས་བསྒོམས་པས་ཚོགས་ལམ་ཆུང་ངུ་བགྲོད་པ་ན། དེ་ལྟ་བུའི་དོན་མ་རྟོགས་པའི་སེམས་ཅན་ལ་དམིགས་མེད་ཀྱི་སྙིང་རྗེ་ཆེན་པོ་སྒོམ་པ་སྙིང་རྗེ་སྒྱུ་མའི་རྣལ་འབྱོར་སྟེ། དེ་དང་ཡང་དག་པའི་སྤོང་པ་བཞི་སྦྲེལ་ནས་བསྒོམས་པས་ཚོགས་ལམ་འབྲིང་པོ་བསྒྲོད་པ་དང་། སྟོང་ཉིད་སྙིང་རྗེ་དབྱེར་མེད་པའི་རང་སེམས་ཨ་དཀར་པོར་བསྒོམས་ནས་ཡི་གེ་སྤྲོ་བསྡུ་ལ་དམིགས་པ་ཕྲ་བ་ཡིག་འབྲུ་དང་། དེ་ལས་བསྐྱེད་ཆོག་རྒྱས་བསྡུས་ཅི་རིགས་ཀྱིས་རྩ་བའི་ལྷ་ཡབ་ཡུམ་ཟུང་གཅིག་བྱིན་རླབས་ཀྱི་ལྷ་གསུམ་དང་དབུ་རྒྱན་གྱི་ལྷ་ལྔ་ཐུགས་ཀའི་ཡེ་ཤེས་སེམས་དཔའ་སྟེ་ཡན་ལག་གི་ལྷ་དགུ་དང་བཅས་པར་བསྒོམ་པ་རགས་པ་ལྷ་སྐུ་ལ་བསླབ་པ་སྟེ་ཕྱག་རྒྱ་གཅིག་པ་ཕྲ་རགས་ཀྱི་རྣལ་འབྱོར། དེ་ལས་ཀྱང་དཀྱིལ་འཁོར་དང་ཚོམ་བུ་གྲངས་དང་ཞལ་ཕྱག་སོགས་གྲངས་མེད་པའི་བར་དུ་སྤྲོ་བ་ཕྱག་རྒྱ་སྤྲོས་བཅས་ཀྱི་རྣལ་འབྱོར་སྟེ། དེ་ལྟར་ཕྱག་རྒྱ་གཅིག་པ་དང་སྤྲོས་བཅས་ཀྱི་སྐབས་དེ་དག་དང་རྫུ་འཕྲུལ་གྱི་རྐང་པ་བཞི་སྦྲེལ་ནས་བསྒོམས་པས་ཚོགས་ལམ་ཆེན་པོ་མངོན་དུ་བྱེད་པའོ། །སྦྱོར་ལམ་དུ་དྲོད་རྩེ་གཉིས་སུ་དབང་པོ་ལྔ་དང་སྦྲེལ་ཞིང་། བཟོད་པ་དང་ཆོས་མཆོག་གཉིས་སུ་སྟོབས་ལྔ་སྦྲེལ་ནས་སྒོམ་ཞིང་དེའི་ཉེ་རྒྱུར་ཐུན་མོང་དུ་སྤྱོད་པ་སྐྱོང་བར་གྲགས་པ་ཚོམ་བུ་ཚོགས་སྒྲུབ་ཀྱི་རྣལ་འབྱོར་རོ། །མཐོང་ལམ་དུ་བྱང་ཆུབ་ཡན་ལག་བདུན་དང་། སྒོམ་ལམ་དུ་འཕགས་ལམ་ཡན་ལག་བརྒྱད་བསྒོམས་པས་མཐོང་ལམ་ཡན་ཆད་དུ་འོད་གསལ་གྱིསྐུ་ཚེ་དབང་རིག་འཛིན་དང་། སློབ་པའི་ཟུང་འཇུག་ཕྱག་ཆེན་རིག་འཛིན། མི་སློབ་པའི་ཟུང་འཇུག་ལྷུན་གྲུབ་རིག་འཛིན་རྣམས་རིམ་གྱིས་ཐོབ་ནས་ཡི་གེ་འཁོར་ལོ་ཚོགས་ཆེན་གྱི་ས་ལ་འབྲས་ཆོས་ཉེར་ལྔའི་བདག་ཉིད་རྡོ་རྗེ་འཆང་ཆེན་པོའི་གོ་འཕང་འགྲུབ་པའོ། །ལུང་ཨ་ནུ་ཡོ་གའི་ས་བཅུ་དང་རྣལ་འབྱོར་ལྔ་སྦྱོར་ཚུལ་མདོ་ཙམ་བརྗོད་ན། དང་པོ་འགྱུར་བ་མ་ངེས་པའི་ས་དང་། བརྟེན་པ་གཞིའི་ས་གཉིས་ནི་ཚོགས་ལམ་འདུན་པ་སེམས་པའི་རྣལ་འབྱོར་གྱིས་བསྡུས་ཤིང་མོས་སྤྱོད་ཀྱི་ལྷ་སྐུ། འདིས་ཐུན་མོང་གི་དངོས་གྲུབ་སྤྱན་དང་མངོན་ཤེས་ལ་སོགས་པ་འགྲུབ་བོ། །གསུམ་པ་གལ་ཆེན་སྦྱོང་བའི་ས་དང་། བཞི་པ་བསླབ་པ་རྒྱུན་གྱི་ས་དང་། ལྔ་པ་བསོད་ནམས་རྟེན་གྱི་ས་གསུམ་ནི་སྦྱོར་ལམ་རིགས་ཆེན་འབྱེད་པའི་རྣལ་འབྱོར་ཏེ་རླུང་སེམས་ཀྱི་ལྷ་སྐུ་འགྲུབ་བོ། །དེར་ཚོགས་ཀྱི་སྤྱོད་པའི་ཉེར་རྒྱུ་ལ་བརྟེན་པས་འགྱུར་བདེ་རགས་པ་བཅོམ་སྟེ་ཟག་པ་ཐམས་ཅད་ཟད་ན། །དྲུག་པ་བརྟན་པ་ཁྱད་པར་དུ་འགྲོ་བའི་ས་ནི་མཐོང་ལམ་དབུགས་ཆེན་འབྱིན་པའི་རྣལ་འབྱོར་ཏེ་བདེ་སྟོང་འོད་གསལ་གྱི་ལྷ་སྐུ་འགྲུབ་པོ། །མཐོང་ལམ་འོད་གསལ་ལས་ལངས་པའི་རྗེས་ལ་བདུན་པ་དམིགས་པ་འབྲས་བུ་སྐྱེ་བའི་ས་སྒོམ་ལམ་ལུང་ཆེན་ཐོབ་པའི་རྣལ་འབྱོར་ཏེ་ཆོས་ཉིད་རྟོགས་པའི་ཡེ་ཤེས་དང་དག་པ་ལྷ་སྐུའི་སྣང་བ་རྒྱུན་མི་འཆད་པ་སློབ་པའི་ཟུང་འཇུག་གི་སྐུ་འགྲུབ་པོ། །དེ་ནས་བརྒྱད་པ་གནས་པ་མི་འགྱུར་བའི་ས་དང་། དགུ་པ་གདལ་བ་ཆོས་ཉིད་ཀྱི་ས་དང་། བཅུ་པ་རྫོགས་པ་སྤྱིར་ཆུབ་ཀྱི་ས་གསུམ་པོ་མཐར་ལམ་རྩལ་ཆེན་རྫོགས་པའི་རྣལ་འབྱོར་གྱིས་བསྡུས་པ་སྟེ། དེའི་མཐར་མི་སློབ་པའི་ལམ་རྒྱུན་མཐའི་བར་ཆད་མེད་ལམ་ལ་བརྟེན་ནས་འདོད་ཆགས་ཆེན་པོའི་ལམ་གྱིས་འབྲས་བུའི་དབང་བསྐུར་བས་སྣང་གསུམ་འཕོ་བའི་བག་ཆགས་ཕྲ་བ་སྦྱངས་ཏེ་མི་སློབ་པའི་ཟུང་འཇུག་འབྲས་བུའི་ཆོས་ཉེར་ལྔ་པོ་དབྱེར་མེད་ལྷུན་གྲུབ་ཀྱི་ངོ་བོ་སྐུ་བཞི་ཡེ་ཤེས་ལྔའི་བདག་ཉིད་དཔལ་ཀུན་ཏུ་བཟང་པོའི་གོ་འཕང་ལ་མངའ་བརྙེས་པའོ། ༈ །གཞི་རྒྱུད་ནི། མ་ཧཱ་ཡོ་ག་པས་ནི་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོའམ། དག་མཉམ་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བར་གཏན་ལ་འབེབས་པའོ། །གནས་ཚུལ་ལ་དག་པ་ལྷའི་རང་བཞིན་དུ་གནས་ཀྱང་། སྣང་ཚུལ་ལ་འཁྲུལ་པ་ཅན་ལ་དེ་ལྟར་སྣང་མི་ནུས་པར་འདོད་དེ། ཐ་སྙད་དུ་ཡོངས་སུ་དག་པའི་ལྷ་དང་མ་དག་པའི་འཁོར་བ་གཉིས་སུ་འབྱེད་པའི་ཚུལ་གྱིས་སྣང་བའི་རང་བཞིན་ལྷར་བསྒྲུབ་པའོ། །འདི་ནི་ལས་དང་པོ་པའི་ངོར་ཚད་མས་བསྒྲུབ་པར་བྱ་བ་ཡིན་པའི་ཕྱིར་གཉིས་སྣང་གི་བློ་ཅན་རྟོག་གེ་བའི་རྒོལ་བ་རྣམས་ལ་ཡང་རིག་པའི་སྟོབས་ཀྱིས་སྒྲུབ་ནུས་པ་ཡིན་ནོ། །ཨ་ནུ་ཡོ་ག་པས་ནི་སྣང་ཆའི་ཆ་ཕྱི་རོལ་གྱི་ཆོས་ཐམས་ཅད་ནང་གི་རྩ་རླུང་ཐིག་ལེ་འཕོ་བའི་དབང་གིས་ཡིན་པས་སྣོད་བཅུད་ཀྱི་ཆོས་ཡེ་ནས་དག་པ་ཀུན་ཏུ་བཟང་པོ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང་། དེའི་སྟོང་ཆ་ནི་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར། དབྱིངས་རིག་དེ་གཉིས་ཀྱང་སོ་སོ་མ་ཡིན་ཐ་མི་དད་དུ་དབྱེར་མེད་པ་ནི་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་ཞེས་བྱ་སྟེ། ཆོས་ཐམས་ཅད་བདེ་བ་ཆེན་པོའི་རང་བཞིན་དུ་གནས་པའི་ཕྱིར་རྒྱ་མཚོ་ལས་རླབས་ལྟར་བདེ་ཆེན་གཅིག་ཉིད་དུ་མའི་རོལ་པར་ཤར་བ་ལ་ཁྱད་མེད་པས། སྐྱེ་བ་རྒྱུའི་སངས་རྒྱས་ལ་སོགས་པའི་ཚུལ་དུ་སེམས་ཅན་ཐམས་ཅད་རང་བཞིན་གྱི་སངས་རྒྱས་སུ་འདོད་པ་ནི་སྣང་སྲིད་ཡེ་སངས་རྒྱས་པ་ལྟ་བུའི་ལུང་ཞེས་བྱ་སྟེ། རྣལ་འབྱོར་ཅན་ལ་ལམ་གྱི་སྟོབས་ལས་དེ་ལྟར་བསླུ་མེད་དུ་གྲུབ་པ་ཡིན་ནོ། །ཨ་ཏི་ཡོ་ག་པས་ནི་སེམས་ཀློང་མན་ངག་གི་རྒྱུད་རྣམས་ལ་བརྟེན་ནས་རང་གི་སེམས་ཉིད་རང་བྱུང་གི་ཡེ་ཤེས་ངོ་བོ་སྟོང་པ་ཉིད་ལ་དམིགས་མཚན་ཐམས་ཅད་ཀ་ནས་དག་ཅིང་། རང་བཞིན་གསལ་བ་ཁྱབ་བརྡལ་ཆེན་པོ་སྐྱེ་འགག་ལས་འདས་པར་ལྷུན་གྱིས་གྲུབ་པ། དེ་ལྟར་ཀ་དག་དང་ལྷུན་གྲུབ་དབྱེར་མེད་པའི་ཆོས་ཉིད་དེའི་རྩལ་ལས་འཁོར་འདས་ཐམས་ཅད་འཆར་བས་ཐུགས་རྗེ་ཀུན་ཁྱབ་ཀྱི་བདག་ཉིད་དུ་བཞུགས་པ་དེ་ཉིད་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྐུ་མཐར་ཐུག་པ་ཡིན་ལ། དེ་ངོས་ཟིན་པའི་ཚེ་ཇི་ལྟར་སྣང་བ་ཐམས་ཅད་དེའི་རྩལ་དུ་ཤར་ཞིང་དོན་གྱི་ངོ་བོ་དེ་དང་གཉིས་སུ་མེད་པའི་ཕྱིར། སྣང་ཚུལ་ལ་སངས་རྒྱས་ཀྱི་སྐུ་དང་ཡེ་ཤེས་སུ་སྣང་ཡང་རུང་། སེམས་ཅན་གྱི་ལས་དང་ཉོན་མོང་པར་སྣང་ཡང་རུང་། དེ་གཉིས་ཀ་ངོ་བོ་ཡེ་ནས་འཁོར་འདས་མིང་མེད་ཀྱི་ཡེ་ཤེས་ཆེན་པོར་རྣམ་པར་དག་པའི་ཕྱིར། དེ་ལྟ་བུའི་ཡེ་ཤེས་ཅན་གྱི་ངོར་ཆོས་ཐམས་ཅད་ཡེ་ནས་རྣམ་པར་དག་ཅིང་རང་གྲོལ་བ་ལས། གནས་སྣང་འབྱེད་པ་དང་། དག་དང་མ་དག་ཅེས་རིས་སུ་ཆད་པ་མེད་པས་ན། ཐ་མལ་གྱི་སྣང་བ་འདི་རྣམས་མདོག་མ་བརྗེས། སྤུ་མ་བསྒྱུར་བར་སངས་རྒྱས་སུ་གནས་པ་ཞེས་བྱ་སྟེ། ཇི་ལྟར་སྣང་བ་དེ་ཉིད་ཡེ་ནས་རྣམ་པར་དག་པ་ཀུན་བཟང་བདེ་བ་ཆེན་པོའི་གནས་ཉིད་ཡིན་གྱི། དེ་ལས་གཞན་ཞིག་ཏུ་དག་པ་ཞེས་བྱ་བ་རྡུལ་ཙམ་མེད་པར་འདོད་དོ། །འདི་ནི་རིག་པ་རང་སྣང་གི་བློ་ཅན་གྱི་ངོར་ཆོས་ཉིད་ཀྱི་སྟོབས་ལས་མངོན་སུམ་དུ་གྲུབ་པའི་ཕྱིར་ལམ་ཐམས་ཅད་ཀྱི་དགོངས་པའི་སྐྱེལ་སོ་ཡིན་ནོ། །ལམ་རྒྱུད་ནི། མ་ཧཱ་ཡོ་ག་པས་སྟོང་པ་ཆེན་པོ་སོགས་བསྐྱེད་པའི་རིམ་པའི་རྣལ་འབྱོར་གཙོ་བོར་བྱས་ཏེ། ཏིང་ངེ་འཛིན་གྱི་རྩལ་རྫོགས་པ་ན་མཚན་བཅས་ཀྱི་རྫོགས་རིམ་དང་དེས་དྲངས་པའི་རྫོགས་པ་ཆེན་པོ་ལ་འཇུག་པར་འགྱུར་རོ། །ཨ་ནུ་ཡོ་ག་པས་ནི་ཞུ་བདེ་འགྱུར་མེད་བསྒྲུབ་པའི་མཚན་བཅས་ཀྱི་རྫོགས་རིམ་ལ་གཙོ་བོར་ལམ་དུ་བྱེད་ཅིང་། སྔགས་ཙམ་བརྗོད་པས་ལྷ་ཡི་འཁོར་ལོ་རྫོགས་པའི་བསྐྱེད་རིམ་དང་ཞུ་བདེ་མཚུངས་ལྡན་གྱི་ལྷ་སྐུ་དང་། རླུང་སེམས་ཙམ་ལས་གྲུབ་པའི་སྒྱུ་མའི་སྐུ་རྣམས་ཀྱི་སྒོ་ནས་སྣང་ཆ་བསྐྱེད་རིམ་གྱི་དོན་ཐུན་མོང་མིན་པ་དང་། བདེ་བའི་ཐབས་ཀྱིས་དྲངས་པའི་དོན་གྱི་ལྷན་སྐྱེས་རྫོགས་པ་ཆེན་པོ་ཉམས་སུ་ལེན་པའང་ཡིན་ནོ། །རྫོགས་པ་ཆེན་པོ་པས་ནི། རིག་པ་ཡེ་ཤེས་ཀྱི་རྩལ་སྣང་ལྷའི་འཁོར་ལོ་ཡེ་ནས་ཡིན་པ་ཉིད་ལ་རྣམ་པ་མ་བསྒྱུར་ཀྱང་ཆོག་སྟེ། ཏིང་ངེ་འཛིན་གྱིས་བསྐྱེད་པ་དང་མཚན་བཅས་ཐབས་ཀྱིས་བསྒྲུབ་པའི་ལྷ་སྐུ་ལ་ཆེད་དུ་མི་རྩོལ་ཡང་། གལ་ཏེ་ལྷའི་རྣམ་པར་བསྒྱུར་འདོད་ན་ཡང་སྐད་ཅིག་དྲན་རྫོགས་ཀྱི་ཚུལ་དུ་ཆུ་ལས་ཉ་ལྡང་བ་ལྟར་རིག་པའི་རྩལ་དེ་ཉིད་དུ་སྣང་བ་ནི་ཡེ་ནས་དམ་ཡེ་དབྱེར་མེད་ལྷུན་གྱིས་གྲུབ་པའི་ལྷ་ཉིད་དུ་གྱུར་པ་ཡིན་ནོ། །མཚན་བཅས་ཀྱི་རྫོགས་རིམ་རླུང་བཅིང་བའི་རིམ་པ་སོགས་ལའང་ཅུང་ཟད་ཀྱང་མི་ལྟོས་ཏེ། བསྐྱེད་རྫོགས་དེ་དག་འདིར་འཇུག་པའི་ལམ་ཡིན་ལ་འབྲས་བུ་ཡེ་ཤེས་ཉིད་ལ་དབང་འབྱོར་བའི་ཚེ་བསྐྱེད་པ་དང་རྫོགས་པའི་རྩོལ་བ་མེད་པར་དེ་ཡི་འབྲས་བུ་ལྷུན་གྱིས་གྲུབ་པའི་ཕྱིར་རོ། །ཡེ་ཤེས་ཀྱི་འོད་རྩའི་ལམ་ནས་རིག་གདངས་རྩོལ་མེད་དུ་ཤར་བའི་ཐོད་རྒལ་གྱི་ཉམས་ལེན་སོགས་ནི་རྡོ་རྗེའི་ལུས་ལ་བརྟེན་པའི་ཐབས་ཁྱད་པར་ཅན་ཡིན་ཀྱང་། མ་དག་ལས་རླུང་གི་བྱེད་པ་བཅིང་བ་སོགས་རྩོལ་བས་དྲངས་པའི་ལམ་འོག་མ་དང་མི་འདྲ་སྟེ། ཡེ་ཤེས་ཆེན་པོ་ཡེ་ནས་གནས་པའི་རང་གདངས་རྩོལ་མེད་ཡིན་པའི་ཕྱིར་རོ། །དེས་ན་ལམ་ཐམས་ཅད་ཀྱི་མཐའ་འདིར་ཐུག་པས་འདི་ནི་ཀུན་གྱི་བླ་མ་དམ་པའོ། །འབྲས་བུའི་རྒྱུད་ནི། རྣམ་གྲངས་སྣ་ཚོགས་ཀྱིས་བསྟན་ཀྱང་དོན་འདྲ་སྟེ་མཐར་ཐུག་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་སྐུ་ཉིད་དུ་དབྱེ་བ་མེད་དོ། །དེ་ལྟར་རྒྱུད་ལུང་མན་ངག་གི་གཞུང་གསུམ་གྱིས་གཞི་གཏན་ལ་འབེབ་པའི་ལྟ་བ་དང་། ལམ་རྒྱུད་བྱེ་བྲག་ཏུ་བཤད་པ་ནི། ལམ་ཉམས་སུ་ལེན་ཚུལ་དེའི་དབང་གིས་སྤྱོད་པ་ལའང་སྤྲོས་བཅས་ཀྱི་སྤྱོད་པ་ཕྱིའི་རྫས་དང་ཡོ་བྱད་སོགས་ཀྱི་རྩོལ་བ་མང་པོ་བརྟེན་པ་ནི་མ་ཧཱ་ཡོ་ག་པ་ཡིན་ལ། ཕྱིའི་བྱ་བ་གཙོ་བོར་མི་བྱེད་པར་སྤྲོས་མེད་ཀྱི་ཚུལ་དུ་ནང་གི་ཐབས་ཟབ་མོ་ལ་འབད་པས། ཞིང་སྔགས་ལྷན་སྐྱེས་ཀྱི་རྣལ་འབྱོར་མ་རྣམས་དང་ལྷན་ཅིག་འདུ་བ་ཐོབ་པའི་ཉེ་རྒྱུའི་སྤྱོད་པ་གཙོ་བོར་བྱེད་པ་ཨ་ནུ་ཡོ་ག་པ་ཡིན་ཅིང་། ཕྱི་དང་ནང་གི་བྱ་རྩོལ་གནས་གསུམ་ནི། གནས་ཉེར་བཞི། ཡུལ་སོ་གཉིས། དུར་ཁྲོད་ཆེན་པོ་བརྒྱད་དེ་ཞིང་དེ་རྣམས་སུ་དོན་གྱི་འོད་གསལ་ལ་དབང་ཐོབ་པའི་ལྷན་སྐྱེས་མ་དང་། དང་པོ་ནས་དེར་གནས་ཤིང་སྤྱོད་པའི་ཞིང་སྐྱེས་མ་དང་། སྔགས་ཀྱི་སྒོམ་སྤྱོད་གོམས་པའི་སྟོབས་ཀྱིས་གནས་དེ་དག་ཏུ་བགྲོད་ནུས་པའི་སྔགས་སྐྱེས་མའོ། །དེ་དག་གང་ཡང་གཙོ་བོར་མི་བྱེད་པར། ཤིན་ཏུ་སྤྲོས་མེད་ཀྱི་ཚུལ་དུ་རིག་པ་ཡེ་ཤེས་ཉིད་ཀྱི་ངང་ལས་རྩོལ་་མེད་ཤུགས་འབྱུང་གི་སྤྱོད་པ་བྱེད་པ་ནི་ཨ་ཏི་ཡོ་ག་པའི་སྤྱོད་པ་ཡིན་ནོ། །དེ་བཞིན་དུ་སྒོམ་པ་ལའང་མ་ཧཱས་སེམས་གནས་པའི་ཐབས་རིམ་བཞིན་གོམས་པས་ཏིང་ངེ་འཛིན་ཁྱད་པར་ཅན་བསྒྲུབ་པ་དང་། ཨ་ནུའི་རྡོ་རྗེའི་ལུས་ལ་གནད་དུ་བསྣུན་པའི་ཐབས་ཀྱིས་རླུང་སེམས་བཅིངས་ཏེ་ཞི་གནས་ཁྱད་པར་ཅན་མྱུར་དུ་བསྒྲུབ་པ་དང་གཉིས་ནི་རྩོལ་བ་དང་བཅས་པ་ཡིན་ལ། ཨ་ཏིའི་ལུགས་ལ་ནི་རིག་པ་ཡེ་ཤེས་ཉིད་ངོས་ཟིན་པས་རང་བཞིན་ལྷུན་གྱིས་གྲུབ་པའི་བསམ་གཏན་ཙམ་ལས་སེམས་འཛིན་གྱི་རྩོལ་བ་ཅི་ཡང་མི་དགོས་པའོ། །དེ་བཞིན་དུ་དཀྱིལ་འཁོར་ལ་ཡང་བསྐྱེད་རྫོགས་རྫོགས་ཆེན་གསུམ་པོས་རིམ་པ་བཞིན་གཟུགས་བརྙན་དང་ལྷག་ཏིང་གི་དཀྱིལ་འཁོར་གཙོ་བོར་ཉམས་སུ་ལེན་པ་དང་། བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་ལ་ཉམས་སུ་ལེན་པ་གཙོ་བོར་བྱེད་པ་དང་། རང་བཞིན་གདོད་མའི་དཀྱིལ་འཁོར་རྩོལ་མེད་དུ་ལམ་དུ་བྱེད་པ་གསུམ་གྱི་ཁྱད་པར་དང་། དབང་ལའང་སྔགས་བླ་མེད་ཐམས་ཅད་དབང་བཞིས་སྨིན་པར་བྱེད་པ་འདྲ་ཡང་། གཟུགས་བརྙན་དང་ཏིང་ངེ་འཛིན་གྱི་དཀྱིལ་འཁོར་དུ་ཕྱི་རོལ་རྫས་ལ་བརྟེན་ཏེ་དབང་ནོད་པ་གཙོ་བོར་བྱེད་པ་དང་། རྡོ་རྗེ་ལུས་ཀྱི་དཀྱིལ་འཁོར་ལས་ཡབ་ཡུམ་མཉམ་པར་སྦྱོར་བའི་བྱང་ཆུབ་སེམས་ཀྱི་དབང་རྫས་ལས་དབང་ནོད་པ་གཙོ་བོར་བྱེད་པ་དང་། རིག་པ་བྱང་ཆུབ་སེམས་ཀྱི་དཀྱིལ་འཁོར་དུ་བསྐུར་ཐོབ་མེད་པའི་ཆོས་ཉིད་ངོ་སྤྲོད་པ་རིག་པ་རྩལ་གྱི་དབང་བསྐུར་བ་གཙོ་བོར་བྱེད་པའི་ཁྱད་པར་དང་། དམ་ཚིག་ལའང་རྩ་བ་དང་ཡན་ལག་གིས་བསྡུས་པའི་བསྲུང་བྱ་དང་། བསྒྲུབ་བྱ་རྣམས་དྲན་ཤེས་ཀྱི་སྒོ་ནས་ཚུལ་བཞིན་བླང་དོར་བརྒྱུད་པ་དང་། དམ་ཚིག་ཐམས་ཅད་ལ་དབང་འབྱོར་བའི་ཕྱིར་བདེ་བ་ཆེན་པོ་སྒྲུབ་པའི་རྟེན་ཀུན་དཱ་ལྟ་བུའི་བྱང་ཆུབ་ཀྱི་སེམས་མི་ཉམས་པའི་ཐབས་དང་མཚན་ཉིད་དང་ལྡན་པའི་ལས་ཀྱི་ཕྱག་རྒྱ་བསྟེན་པ་སོགས་ཀྱི་བྱ་བ་གཙོ་བོར་སྒྲུབ་པ་དང་། ཆོས་ཐམས་ཅད་རང་བྱུང་ཡེ་ཤེས་ཉག་གཅིག་གི་ངང་དུ་ལྷུན་གྱིས་གྲུབ་པར་གནས་པས་བྱ་བ་དང་མི་བྱ་བའི་བསྲུང་མཚམས་མེད་པར་ཕྱལ་བར་གནས་པ་འདའ་ཉམས་ལས་འདས་པའི་ཁྱད་པར་དང་། ཏིང་ངེ་འཛིན་དང་ཤེས་རབ་ནང་གི་ཡོ་བྱད་དང་ཕྱིའི་སྒྲུབ་པ་ཆེན་པོའི་ཡོ་བྱད་དེ་ཕྱི་ནང་གི་ཡོ་བྱད་དང་ལྡན་པའི་སྒོ་ནས་བསྙེན་སྒྲུབ་བྱེད་པ་དང་། རང་ལུས་ཐབས་ལྡན་བསྙེན་པ་དང་གཞན་ལུས་ཐབས་ལྡན་སྒྲུབ་པ་རྗེས་སུ་ཆགས་པའི་བརྟུལ་ཞུགས་ཉིད་གཙོ་བོར་བྱེད་པའི་ཚུལ་གྱིས་ལྷ་བསྒྲུབ་པ་དང་། བསྒྲུབ་བྱ་སྒྲུབ་བྱེད་གཉིས་སུ་མེད་པ་བྱང་ཆུབ་ཀྱི་སེམས་ཤེས་ཤིང་དེ་ལ་གོམས་པ་གདེངས་སུ་གྱུར་པ་ཁོ་ནས་བསྙེན་སྒྲུབ་བྱེད་པའི་ཁྱད་པར་དང་། ཕྱི་དང་ནང་གི་དམ་ཚིག་གི་རྫས་དངོས་སུ་བཤམ་པ་དང་ཡིད་ཀྱིས་སྤྲུལ་པའི་མཆོད་པ་གཙོ་བོར་བྱེད་པ་དང་། གསང་བའི་མཆོད་པ་དྷུ་ཏིའི་དབྱིངས་སུ་རླུང་དང་རྟོག་པ་གསོད་ཅིང་གཉིས་སུ་མེད་པར་སྦྱོར་བའི་བདེ་ཆེན་བྱང་ཆུབ་སེམས་ཀྱི་མཆོད་པ་གཙོ་བོར་བྱེད་པ་དང་། ཡེ་ནས་མཆོད་བྱ་མཆོད་བྱེད་མེད་པར་དེ་ཁོ་ན་ཉིད་མཉམ་པ་ཆེན་པོའི་མཆོད་པ་གཙོ་བོར་བྱེད་པའི་ཁྱད་པར་དང་། རྫས་། སྔགས་ཏིང་ངེ་འཛིན་གྱི་ཐབས་གཙོ་བོར་བྱས་ཏེ་ཕྲིན་ལས་སྒྲུབ་པ་དང་། རླུང་སེམས་ལ་རང་དབང་ཐོབ་པའི་སྲོག་གཟུགས་གྲུབ་པའི་སྒོ་ནས་ལས་སྒྲུབ་པ་དང་། སེམས་ཀྱི་ཆོས་ཉིད་ལ་དབང་འབྱོར་བ་ཉིད་ཀྱིས་རྩལ་སྣང་ལས་རབ་འབྱམས་རྩོལ་མེད་དུ་སྒྲུབ་པ་གསུམ་གྱི་ཁྱད་པར་དང་། ཕྱི་བཅའ་བའི་ཕྱག་རྒྱ་དང་ཏིང་ངེ་འཛིན་གྱི་ལྷ་སྐུའི་ཕྱག་རྒྱ་སྒོམ་པའི་རྩོལ་བ་གཙོ་བོར་བྱེད་པ་དང་། རྡོ་རྗེའི་ལུས་ཉིད་ཀྱི་བསྒུལ་བསྐྱོད་ཕྱག་རྒྱ་འགྲོ་འདུག་གར་དུ་ཤེས་ཤིང་གཟུངས་ཀྱི་ཕྱག་རྒྱ་ལ་བརྟེན་ནས་བདེ་བའི་བརྟུལ་ཞུགས་གྲུབ་པའི་ལམ་གཙོ་བོར་བྱེད་པ་དང་། ཆོས་ཐམས་ཅད་ཡེ་ནས་ཕྱག་རྒྱ་ཆེན་པོའི་དཀྱིལ་འཁོར་དུ་ལྷུན་གྱིས་གྲུབ་པས་རྩོལ་བ་མེད་པར་ཕྱག་རྒྱ་བཞིའི་དོན་དང་ལྡན་པའི་ཁྱད་པར་དང་། བཟླས་བརྗོད་ཀྱི་སྔགས་ཀྱི་རྩོལ་བ་ལ་གཙོ་བོར་བྱེད་པ་དང་། རྡོ་རྗེའི་བཟླས་པ་དང་བུམ་ཅན་སོགས་ཀྱིས་སྲོག་མི་ཤིག་པའི་ཐིག་ལེར་སྒྲུབ་པའི་སྔགས་གཙོ་བོར་བྱེད་པ་དང་། ཆོས་ཉིད་རང་བྱུང་གི་ཡེ་ཤེས་ལ་དབང་འབྱོར་བས་གཞོམ་མེད་རྡོ་རྗེ་ནཱ་དའི་གསུང་དང་ཡེ་ནས་ལྡན་པའི་ཕྱིར་ངག་ཏུ་བརྗོད་པ་མེད་ཀྱང་མི་གསུང་མཉམ་པར་བཞག་པ་སྔགས་ཀྱི་རྒྱལ་པོའི་དོན་དང་ལྡན་ཅིང་། ཚིག་ཏུ་བརྗོད་པ་ཐམས་ཅད་ཀྱང་རྡོ་རྗེའི་གླུ་དང་གསུང་སྔགས་ཀྱི་ངོ་བོར་གྱུར་པའི་ཁྱད་པར་འདི་དག་བསྐྱེད་རྫོགས་རྫོགས་ཆེན་གསུམ་གྱི་གཞུང་གི་དགོངས་པས་བསླབ་པའི་མཐའ་བཅུ་གཅིག་ཉམས་སུ་ལེན་ཚུལ་གྱི་ཁྱད་པར་ཡིན་པས་དོན་གྱི་འགག་བཀྲོལ་བ་ཡིན་ཞེས་གསུངས་སོ། ༈ །ལུང་ལྟར་ན་ཕྲ་བའི་ལུས་ངག་ཡིད་གསུམ་དུ་གྲགས་པ། གཙོ་མོ་གསུམ་དང་འཁོར་ལོ་ལྔ་ལ་སོགས་པའི་རྩ་དང་། སྲོག་སྟེ་རྩ་བ་དང་ཡན་ལག་གི་རླུང་དང་། ཙིཏྟ་ནི་སྙིང་པོ་སྟེ་རྩ་དང་རླུང་ལ་བརྟེན་ནས་སེམས་ཀྱི་རྟེན་དུ་གྱུར་པའི་ཐིག་ལེ་དང་། དེ་གསུམ་གྱི་བྱེད་པ་ལ་བརྟེན་ནས་རགས་པའི་ལུས་ངག་ཡིད་གསུམ་པོ་འདི་དག་ནི། གསང་བའི་གསང་བ་ཆེན་པོ་ཞེས་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ཉིད་དུ་ཡེ་ནས་གནས་པ་སྟེ། འདི་ལྟར་ལུས་རྩ་ཁམས་སྣང་སྟོང་སྐུ་ཡི་རྡོ་རྗེ་ཡིན་ཏེ། འདི་དག་རང་བཞིན་གྱིས་སྣང་སྟོང་གཉུག་མའི་དེ་ཉིད་དུ་གནས་པའི་ཕྱིར། དེ་བཞིན་དུ་ངག་རླུང་ཁམས་གྲགས་སྟོང་གསུང་གི་རྡོ་རྗེ། ཡིད་ཐིག་ལེ་གསལ་སྟོང་ཐུགས་ཀྱི་རྡོ་རྗེར་གནས་ཀྱང་དེ་ལྟར་མི་ཤེས་པའི་སེམས་ཅན་རྣམས་ཀྱི་ངོར་རང་བཞིན་གྱིས་གབ་ཅིང་སྦས་པ་ལྟར་གྱུར་པས་ན་གསང་བའི་གསང་བ་ཞེས་སོ། །དེ་ལྟར་ན་ཕྲ་རགས་ཀྱི་སྒོ་གསུམ་པོ་གཉུག་མའི་གསང་བ་གསུམ་དང་དབྱེར་མེད་པར་བཞུགས་པས་ན། དེ་དག་གི་སྣང་ཆ་བདེ་བ་ཀུན་ཏུ་བཟང་པོ་དང་། སྟོང་ཆ་དབྱིངས་ཀུན་ཏུ་བཟང་མོ་ཉིད་གཉིས་སུ་མེད་པ་སྲས་བདེ་ཆེན་བྱང་ཆུབ་ཀྱི་སེམས་ཡེ་ཤེས་རྡོ་རྗེའམ་རང་བྱུང་གི་ཡེ་ཤེས་གཅིག་ཉིད་ལ་ལྡོག་ཆའི་དབྱེ་བས་ཡེ་ཤེས་ལྔ་ལ་སོགས་པའོ། ༈ །རྒྱལ་སྲས་གཞན་ཕན་མཐའ་ཡས་ཀྱིས། དེ་ཡང་རྒྱུའི་ཐེག་པའི་སྐབས་གྲངས་མེད་གསུམ་མམ་བདུན་སོགས་པར་བསོད་ནམས་དང་ཡེ་ཤེས་ཀྱི་ཚོགས་རྒྱ་མཚོ་ལྟ་བུ་བསགས་ནས་ཚོགས་ཆེན་པོས་མཐར་ཐུག་གི་འབྲས་བུ་ལ་སྦྱོར་བར་གསུངས་པ་གང་ཞིགགསང་སྔགས་བླ་མེད་ཀྱི་རྒྱུད་འདིར་དཀའ་ཚེགས་ཆུང་ངུས་ཚེ་གཅིག་གིས་མཐར་ཐུག་གི་འབྲས་བུ་རྡོ་རྗེ་འཆང་ཆེན་པོའི་གོ་འཕང་དེ་ཉིད་མངོན་དུ་ཐོབ་པའི་རྒྱུ་མཚན་ཡང་ཅི་ཞིག་ཡིན་སྙམ་པ་ལ། འདོད་ཚུལ་མང་ཡང་མདོར་ན་དགེ་མི་དགེ་ལུང་མ་བསྟན་དང་གསུམ་དུ་ཡོད་པ་ལས། མི་དགེ་བའི་ལས་འབྲས་དགེ་བར་བསྒྱུར་བའི་ཐབས་ནི་གསང་སྔགས་ཀྱི་གཞུང་ཁོ་ན་ལས་གཞན་དུ་མ་བཤད་ལ། རྒྱུ་མཚན་འདི་ལ་དགོངས་ནས་ཐབས་ཤེས་ཁྱད་པར་ཅན་གྱིས་མཚན་རྟོག་སྡོམ་པ་ཉིད་སྔགས་སྡོམ་གྱི་ངོ་བོར་བཞག་པ་ཡིན། ཞེས་དང་། ཨོ་རྒྱན་འཇིགས་མེད་ཆོས་ཀྱི་དབང་པོས། འཁོར་བའི་རྒྱུ་འབྲས་ཀུན་འབྱུང་དང་སྡུག་བསྔལ་གྱི་བདེན་པ་གཉིས་དང་། མྱང་འདས་ཀྱི་རྒྱུ་འབྲས་འགོག་པ་དང་ལམ་གྱི་བདེན་པ་གཉིས་པོ་དབྱེར་མེད་པ་ནི་ལྟ་བ་འཁོར་འདས་དབྱེར་མེད་ཅེས་བུམ་དབང་གི་ལྟ་བ་དངོས་ཡིན་ཏེ། དེ་ཡང་སྣང་སྲིད་སྣོད་བཅུད་ཐམས་ཅད་གཞི་གནས་ལྷུན་གྱིས་གྲུབ་པའི་དཀྱིལ་འཁོར་དུ་རྟོགས་པས་སྡུག་བདེན་འཁོར་བའི་སྣོད་བཅུད་འགོག་བདེན་སྐུ་དང་ཡེ་ཤེས་སུ་དབྱེར་མེད་ཅིང་། ཉོན་མོངས་དུག་ལྔ་ཡེ་ཤེས་ལྔའི་རྣམ་རོལ་དུ་འཆར་ཞིང་ཐབས་ཀྱིས་ཟིན་པའི་སྦྱོར་སྒྲོལ་གྱི་དགེ་བའི་རྣམ་པ་ཅན་ལ་ལམ་དུ་བྱེད་པས་ཀུན་འབྱུང་ལས་ཉོན་གཉིས་པོ་ལམ་བདེན་དང་དབྱེར་མེད་དུ་ལྟ་བ་ཡིན་ནོ། །ཞེས་དང་། མཁན་ཆེན་གྱིས་མཛད་པའི་བདེན་བཞིའི་རྣམ་བཤད་ལས། གསང་སྔགས་བླ་ན་མེད་པ་རྡོ་རྗེ་ཐེག་པའི་ལུགས་ལ་ཡང་འཁོར་བ་རྒྱུ་འབྲས་ལས་ལོག་སྟེ། མྱ་ངན་ལས་འདས་པའི་རྒྱུ་འབྲས་ལ་ཞུགས་ནས། རྣམ་མཁྱེན་མངོན་དུ་བྱེད་པ་ཡིན་པས། སྤྱིར་བདེན་བཞི་ལས་མི་འདའ་ཡང་། ཉམས་སུ་ལེན་ལུགས་ལ་ཁྱད་པར་འདི་ཡོད་དེ། སྡུག་བདེན་འཁོར་བའི་སྣོད་བཅུད་འདི་རྣམས་ལ་གནས་ལུགས་དང་སྣང་ལུགས་གཉིས་སུ་ཕྱེ་ནས་གནས་ལུགས་ཀྱི་ངོས་ནས་འཇལ་ན་སྣ་ཚོགས་སུ་སྣང་བ་འདི་རྣམས་ཀྱི་རང་བཞིན་སྤྲོས་བྲལ་རང་བྱུང་གི་ཡེ་ཤེས་སྣང་སྟོང་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོར་བཞུགས་པས་གཞི་ལྷུན་གྲུབ་ཀྱི་སངས་རྒྱས་ཞེས་བྱ་སྟེ། དཔེ་འདམ་རྫབ་ཀྱི་ནང་གི་ནོར་བུ་བཞིན་དུ་རང་ངོ་རྣམ་དག་དུ་ཡོད་ཅིང་སྡུག་བདེན་གྱི་རང་བཞིན་འགོག་བདེན་དུ་གནས་པས་འཁོར་འདས་དབྱེར་མེད་ཅེས་བྱའོ། །དེ་ཉིད་གཞི་རྒྱུད་དམ་སྦྱང་གཞི་ཡིན་ནོ། །དེ་ལྟར་རྟོགས་པ་ལ་འཁོར་འདས་དབྱེར་མེད་ཀྱི་ལྟ་བའམ་གྲུབ་མཐའ་ཟེར་བ་ཡིན་ནོ། །སྣང་ལུགས་ཀྱི་ངོས་ནས་འཇལ་ན་སོ་སོའི་སྐྱེ་བོའི་ཐ་མལ་རང་རྒྱུད་དུ་ཞེན་པའི་སྣང་བ་ལ་ཇི་ལྟར་སྣང་བའི་ཕྱི་ནང་གི་དངོས་པོ་འདི་རྣམས་ལ་མ་རྟོགས་འཁྲུལ་བའི་སྣང་བ་ཟེར་ཏེ་སྦྱང་བྱ་ཡིན་ནོ། །དེ་ཉིད་སྡུག་བསྔལ་གྱི་བདེན་པར་བཞག་གོ །ལས་ཉོན་ཀུན་འབྱུང་གི་བདེན་པ་ལ་ཡང་། རང་བཞིན་ཤེས་པས་ལམ་དུ་འགྲོ་ཚུལ་དང་། རང་གར་ཤོར་བས་ཀུན་འབྱུང་དུ་འགྲོ་ཚུལ་གཉིས་ལས། ལམ་དུ་འགྲོ་ཚུལ་ནི་ཉོན་མོངས་གང་སྐྱེས་ཀྱང་དགག་སྒྲུབ་མེད་པར་ཁོ་རང་གི་ཐོག་ཏུ་གློད་ནས་བཞག་པས་རྩལ་གཞི་ཐོག་ཏུ་གྲོལ་བ་ཆབ་རོམ་ཆུར་ཞུ་བའམ། རླབས་རྒྱ་མཚོར་ཐིམ་པ་བཞིན་ཉོན་མོངས་པ་ཁོ་རང་གི་ངོ་བོ་སྤྲོས་བྲལ་གཉུག་མའི་ཡེ་ཤེས་སུ་ལྷང་ངེར་འཆར་། དེ་ཙ་ན་གཉེན་པོ་གཞན་མ་དགོས་པར་ཉོན་མོངས་ཉིད་ཡེ་ཤེས་སུ་ཤར་ནས་ཀུན་འབྱུང་ལམ་བདེན་དུ་སོང་བས་ཉོན་མོངས་པ་ལམ་དུ་བྱེད་པ་ཞེས་བྱའོ། །ལུས་ངག་གི་ལས་རྣམས་ཀྱང་ངོ་བོ་ལུང་མ་བསྟན་ཡིན་ཞིང་། དེ་དགེ་སྡིག་དུ་སྒྱུར་བའི་བྱེད་པ་པོ་སེམས་ཡིན་པས། སེམས་ཉིད་གཟུང་འཛིན་ཨ་འཐས་སུ་མ་ཞེན་པར་གང་ཤར་གྱི་ངོ་བོ་མ་བཅོས་ཆོས་ཉིད་སྟོང་པའི་རང་འགྲོས་ཀྱི་ངང་དུ་གྲོལ་བ་ཤེས་རབ་དང་། སྦྱོར་བ་སེམས་བསྐྱེད་ཁྱད་པར་ཅན་དང་། དངོས་གཞི་ལྷ་སྔགས་ཏིང་ངེ་འཛིན་གྱི་བྱེད་པས་ཐ་མལ་གྱི་སྣང་ཞེན་དག་སྣང་དུ་འཆར་བ། རྗེས་སུ་ཚོགས་གཉིས་རྫོགས་པའི་ཉེ་ལམ་དུ་སོང་བ་ནི་ཐབས་ཏེ། ཐབས་ཤེས་ཁྱད་པར་ཅན་དེ་ལྟ་བུའི་ཟིན་ན་ལས་ཀྱང་ལམ་དུ་འགྲོ་བའོ། །རང་གར་ཤོར་བས་ཀུན་འབྱུང་དུ་འགྲོ་ཚུལ་ནི། ཐབས་ཤེས་ཁྱད་པར་བ་དང་བྲལ་ནས་བསམ་སྦྱོར་གཉིས་ཀ་ཐ་མལ་རང་རྒྱུད་དུ་ཤོར་ན་ལས་བསགས་ནས་འཁོར་བ་མཐའ་མེད་དུ་འཕེན་པས་ཀུན་འབྱུང་གི་བདེན་པར་འགྲོ་བ་ཡིན་ནོ། །དེས་ན་རྡོ་རྗེ་ཐེག་པའི་ལམ་གནད་ཇི་ལྟ་བ་བཞིན་ཤེས་ནས། རྟོགས་གོམས་ཀྱི་གདེངས་དང་ལྡན་ན་སྡུག་བདེན་གྱི་རང་བཞིན་འགོག་བདེན་དུ་ཤེས་ནས། ཀུན་འབྱུང་ལམ་བདེན་དུ་འཁྱེར་ནུས་པས། འཁོར་བ་རྒྱུ་འབྲས་མྱང་འདས་ཀྱི་རྒྱུ་འབྲས་སུ་འགྱུར་ཏེ་སྤང་བྱ་གཉེན་པོར་སོང་ནས་འཁོར་འདས་དབྱེར་མེད་ཀྱི་རྟོགས་པ་མངོན་དུ་འགྱུར་རོ། ༈ །ཨོ་རྒྱན་འཇིགས་མེད་ཆོས་ཀྱི་དབང་པོས། མདོ་སྔགས་ཀྱི་ལྟ་བ་ལ་ཁྱད་པར་མི་འབྱེད་པ་གསར་མའི་ལུགས་ཡིན་ལ། སྔ་འགྱུར་རྙིང་མའི་རིང་ལུགས་ལ་ནི། མདོ་སྔགས་ཀྱི་ལྟ་བ་ལ་ཁྱད་པར་འབྱེད་པ་ཡིན་ཏེ། འདི་ལྟར་ལྟ་བའི་རྣམ་གྲངས་ལ། ཆོས་ཅན་ལྟ་བའི་ལྟ་བ། ཆོས་ཉིད་ལྟ་བའི་ལྟ་བ། རང་རིག་ལྟ་བའི་ལྟ་བ་སྟེ་གསུམ་དུ་ཡོད་པ་ལས་ཆོས་ཉིད་ལྟ་བའི་ངོས་ནས་མདོ་སྔགས་ཀྱི་ལྟ་བ་ལ་ཁྱད་མེད་དེ། སྔགས་ཀྱི་ལྟ་བ་ཡང་ངོ་བོ་སྟོང་པའི་ཆ་ནས་སྤྲོས་པའི་མཚན་མ་ཐམས་ཅད་དང་བྲལ་བའི་སྟོང་ཉིད་དམིགས་བསམ་བརྗོད་པ་ལས་འདས་པའི་ཕྱིར། རྩ་རྒྱུད་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་སོ། །རྒྱུ་མཚན་དེ་ལྟ་བུ་ལ་དགོངས་ནས། ས་སྐྱ་པཎྜི་ཏས་ཀྱང་། ཕ་རོལ་ཕྱིན་པའི་སྤྲོས་བྲལ་ལས། །ལྷག་པའི་ལྟ་བ་ཡོད་གྱུར་ན། །ལྟ་དེ་སྤྲོས་པ་ཅན་དུ་འགྱུར། །ཞེས་གསུངས་སོ། །ཆོས་ཅན་ཀུན་རྫོབ་ལྟ་བའི་ངོས་ནས་མདོ་སྔགས་ཀྱི་ལྟ་བ་ལ་ཁྱད་པར་ཡོད་པ་ཡིན་ཏེ། རྒྱུ་མཚན་ཉིད་ཀྱི་ཐེག་པའི་བླ་མེད་ཟབ་མོ་དབུ་མའི་ཐེག་པ་ལས་ཀུན་རྫོབ་རྟེན་འབྱུང་དུ་སྣང་བའི་ཆོས་འདི་དག་སྒྱུ་མ་དང་རྨི་ལམ་གྱི་སྣང་བ་ལྟར་རང་བཞིན་བདེན་པར་མ་གྲུབ་པ་ཙམ་དུ་ལྟ་བ་ལས། དག་པ་ལྷའི་དཀྱིལ་འཁོར་ཆེན་པོར་ལྟ་བར་མ་བཤད་ཀྱང་། ཐབས་ཀྱི་ཐེག་པ་ཆེན་པོ་སྔགས་བླ་མེད་ཀྱི་སྐབས་འདི་རུ་ནི། སྣོད་བཅུད་ཀྱིས་བསྡུས་པའི་ཆོས་འདི་དག་རང་བཞིན་ལྷ་དང་ལྷ་མོའི་ཚུལ་དུ་རང་ཆས་སུ་བཞུགས་པར་བལྟ་སྟེ། གསང་སྙིང་ལས། རྡོ་རྗེ་ཕུང་པོའི་ཡན་ལག་ནི། །ཞེས་སོགས་དང་། བརྟགས་གཉིས་ལས། སེམས་ཅན་རྣམས་ནི་སངས་རྒྱས་ཏེ། །ཞེས་སོགས་དང་། རྨད་བྱུང་རྒྱལ་པོའི་རྒྱུད་ལས། བདག་དང་མཐའ་ཡས་སེམས་ཅན་རྣམས། །ཞེས་སོགས་སོ། །དེ་ལྟར་རྟེན་ཆོས་ཀུན་རྫོབ་ཀྱི་ངོས་ནས་སྔགས་ཀྱི་ལྟ་བ་མདོ་ལས་འཕགས་པའི་རྒྱུ་མཚན་གྱིས། དེ་ཉིད་ཀྱི་སྣང་གཞི་སྟོང་ཉིད་ཀྱང་སྤྲོས་བྲལ་ཡིན་པ་འདྲ་ཡང་འདིར་དོན་དམ་དཀོར་བདུན་ངོ་བོ་ཉིད་ལྷུན་གྱིས་གྲུབ་པའི་རྣམ་ཀུན་མཆོག་ལྡན་གྱི་སྟོང་ཉིད་ལ་འདོད་པ་ཡིན་ཏེ། ལམ་རིམ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་དུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ལྟ་སྤྱོད་ཆེན་པོ་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་ལ། །ལྟ་བ་མཐོ་དམན་དེ་ཙམ་མོ། །ཞེས་གསུངས་སོ། །ངེས་ཤེས་སྒྲོན་མེ་ལས། ལ་ལས་དོན་དམ་ཕར་བཅད་ནས། །ཀུན་རྫོབ་ཙམ་གྱི་ངོས་ནས་ནི། །རྒྱུད་སྡེའི་ལྟ་བ་མཐོ་དམན་བྱེད། །དོན་དམ་སྟོང་པས་མ་ཟིན་པའི། །ཀུན་རྫོབ་རང་ཉིད་ལྟ་བ་ཡི། །མཐོ་དམན་བྱེད་ཆོས་སུ་མི་འཐད། །ཅེས་སོ། །སྤྱིར་མདོ་སྔགས་གཉིས་པོ་ལམ་ཉེ་རིང་ཙམ་ལས་འབྲས་བུ་སངས་རྒྱས་ཀྱི་གོ་འཕང་ཐོབ་པ་ལ་ཁྱད་མེད་པར་བཞེད་པ་དང་། གསང་སྔགས་རྡོ་རྗེ་ཐེག་པའི་ལམ་ལ་མ་བརྟེན་པར་མཐར་ཐུག་རྫོགས་པའི་བྱང་ཆུབ་ཀྱི་གོ་འཕང་མངོན་དུ་བྱེད་མི་ནུས་པར་འདོད་པ་དང་། མདོ་ལམ་ནས་རང་ལམ་གྱི་ས་བཅུ་གཅིག་ཀུན་ཏུ་འོད་ཀྱི་སའི་བར་འགྲོ་ནུས་ཀྱང་མདོ་ལམ་གྱི་སངས་རྒྱས་བཏགས་པ་བ་དེས་སྔགས་སུ་བསྟན་པའི་སྐུ་དང་ཡེ་ཤེས་རྒྱ་མཚོའི་བདག་ཉིད་ཟུང་འཇུག་རྡོ་རྗེ་འཆང་གི་གོ་འཕང་མཚན་ཉིད་པ་དེའི་དོད་མི་ཐུབ་པས་མདོ་སྔགས་ཀྱི་སངས་རྒྱས་ལ་ཁྱད་པར་དབྱེ་བའི་ལུགས་དང་གསུམ་ལས། ཕྱི་མ་གཉིས་པོ་འདི་ལེགས་པར་བརྟགས་ན་དགོངས་པའི་གནད་གཅིག་ཏུ་འབབ་པ་ཡིན་ཏེ། བཞེད་པ་སྔ་མས་ཀྱང་མདོ་ལམ་དུ་མི་སློབ་པའི་ལམ་བཅུ་གཅིག་ཀུན་ཏུ་འོད་ཀྱི་ས་སངས་རྒྱས་ཀྱི་གོ་འཕང་མཐར་ཐུག་གི་བསྒྲུབ་བྱར་བསྟན་པར་ནི་བཞེད་དགོས་ལ། མདོ་རང་ལམ་ནས་བཤད་པའི་འབྲས་བུ་དེ་ལམ་དེས་ཐོབ་མི་ནུས་ན་ནི་ལམ་དང་འབྲས་བུ་ཡ་བྲལ་མུ་སྟེགས་བྱེད་ཀྱི་ཐར་ལམ་ལྟར་འགྱུར་བས་མཚན་ཉིད་ཐེག་པ་ལ་སྐུར་བ་མིི་བཟད་པ་བཏབ་པར་འགྱུར་ལ། ཕྱི་མས་ཀྱང་མདོ་ལམ་ནས་བཤད་པའི་སངས་རྒྱས་ཀྱི་གོ་འཕང་དེ་བསྒྲུབས་ཟིན་ནས་སྔགས་ལམ་དུ་ད་གཟོད་ངེས་པར་ཞུགས་ཏེ་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པ་ནི་བཞེད་དགོས་ལ། དེ་ལྟར་མ་ཡིན་པ་མདོ་ལམ་གྱི་སངས་རྒྱས་དེ་ཡང་རང་ལམ་གྱི་མཐར་ཐུག་པ་ཡིན་ཞིང་དེ་སྔགས་ལམ་དུ་མི་འཇུག་པར་བཞེད་ན་ནི་མཐར་ཐུག་ཐེག་པ་གཉིས་སུ་འགྱུར་ཞིང་། སྔགས་ཀྱི་ཐེག་པ་ཐེག་པ་གསུམ་དུ་མི་འདུ་བའི་སྐྱོན་དུ་འགྱུར་རོ། །དེས་ན་བཞེད་པ་གཉིས་པོ་མཁས་གྲུབ་དུ་མས་བཞེད་པ་ཡིན་ཞིང་ཁྱད་པར་མདོ་སྔགས་ཀྱི་སངས་རྒྱས་ལ་ཁྱད་འབྱེད་པ་ནི་སྒྱུ་འཕྲུལ་དང་མཚན་བརྗོད་ཀྱི་ལུང་གིས་ཀྱང་བསྒྲུབ་དུ་ཡོད་ལ་འཕགས་ཡུལ་གྱི་སློབ་དཔོན་སངས་རྒྱས་ཡེ་ཤེས་ཞབས་ཀྱིས་རྩལ་དུ་བཏོན་ནས་བཤད་ཅིང་དེ་ལས་གཞན་པའི་ལུང་ཡང་དུ་མ་ཡོད་པས་གནས་སྐབས་ཀྱི་འདོད་པ་གྱི་ན་ཙམ་དུ་བལྟ་བར་ནི་མི་བྱའོ། ༈ །མན་ངག་གསེར་ཞུན་ལས། ཨ་ཏི་ཡོ་ག་ནི་དབང་བཞི་པའི་ཡེ་ཤེས་ཡིན་པས་རྒྱུད་སྡེ་བཞིར་འདོད་པ་ལྟར་ན་ཨ་ཏི་ཡེ་ཤེས་ཡིན་གྱི་ཐེག་པ་རང་རྐྱ་ཞིག་འཇོག་པ་མིན་ཏེ་བསླུ་མེད་ཀྱི་ལམ་གྱི་ཡེ་ཤེས་ཡིན་ནོ། །འོ་ན་གསང་སྔགས་རྙིང་མར་དེ་བརྗོད་བྱར་བྱས་པའི་གཞུང་དོན་མེད་དོ་ཞེ་ན། དེ་རྩལ་དུ་བཏོན་ནས་བཤད་པས་ཐེག་རྩེ་ཤིན་ཏུ་རྣལ་འབྱོར་གྱི་གདུལ་བྱ་ལ་ངེས་པ་སྟེར་ཏེ་སྔགས་བླ་མེད་ཀྱི་མཐར་ཐུག་གི་དོན་རྗེན་པར་སྟོན་པས་སོ། །འོན་ཀྱང་བརྗོད་མེད་ཀྱི་ཡེ་ཤེས་ནི་སེམས་ཀྱི་སྤྱོད་ཡུལ་དང་སྤྲོས་པ་ལས་འདས་པ་ཡིན་པ་ལ། དེ་བརྗོད་བྱའམ་སེམས་ཀྱི་སྤྱོད་ཡུལ་དུ་སྟོན་པ་ནི་རིག་འཛིན་བརྒྱུད་པའི་དགོངས་པའི་ཨ་ཏི་དེ་ནི་མིན་པར་ཤེས་པར་བྱའོ། །འདི་ལྟར་མ་རྟོགས་པར་ཨ་ཏི་ཡེ་ཤེས་ཡིན་གྱི་ཐེག་པ་མིན་ཞེས་༼དཔལ་ལྡན་ས་སྐྱ་པཎ་ཆེན་གྱི་དགོངས་པ་མ་རྟོགས་པར། རྫོགས་ཆེན་ཨ་ཏི་ཡོ་ག་ནི་ཡེ་ཤེས་ཡིན་གྱི་ཐེག་པ་མིན་ཟེར་བ་ཉོན་ཅིགཨ་ཏི་ཡོ་ག་ཡེ་ཤེས་ཡིན་ན། གཞིར་གནས་ཀྱི་ཡེ་ཤེས་ཤིག་ཁས་བླངས་ཟེར་ནས་དེ་ཡིན་ནམ། ལམ་དང་འབྲས་བུ་ཡེ་ཤེས་གང་ཡིན། དང་པོ་མ་ཡིན་པར་གསལ་ཞིང་གལ་ཏེ་འདོད་ནའང་སྟོང་ཉིད་ཐེག་པ་མིན་ཞེས་པ་འདྲ། དེ་བཤད་ཅི་དགོས། གཉིས་པ་ལྟར་ན་ལམ་ཡིན་ན་རྒྱུའི་ཐེག་པ་དང་། འབྲས་བུ་ཡིན་ན་འདིར་འདེགས་པའི་ཐེག་པ་ཡིན་པར་ཁས་བླངས་ནས་ཡེ་ཤེས་ལ་ཐེག་པ་མིན་པ་ཇི་ཞིག་འཇོགདེས་ན་འདི་རྒྱུད་སྡེ་བཞི་དང་དྲུག་ཏུ་འདོད་པའི་ཁྱད་པར་བཤད་པ་ཡིན་པར་སྔར་བཤད་ཟིན་པ་ལྟར་ཤེས་པར་གྱིས་ཤིགཧོ་ཧོ། མཆན། ༽མི་སྨྲ་སྟེ་ཡིན་ན་སློབ་མི་སློབ་ཀྱི་ཡེ་ཤེས་གང་ཡིན་ཀྱང་འབྲས་བུའི་ཐེག་པ་ཡིན་པས་ཚིག་དེ་རང་འགལ་བར་འགྲོའོ། །དེ་ལྟར་ཨ་ཏི་ཚིག་གི་ལམ་ལས་འདས་པ་ཡིན་ཅིང་བློ་འདས་ཀྱི་ཡེ་ཤེས་མཐར་ཐུག་ཡིན་ནའང་ད་ལྟ་ནས་ལམ་དུ་བྱེད་པའི་གཞུང་དང་མི་འགལ་ཏེ། སྟོང་པ་ཉིད་རྟོགས་པའི་ཡེ་ཤེས་མཚན་ཉིད་པ་འཕགས་རྒྱུད་ལ་ཡོད་པ་ཞིག་ནའང་། སོ་སྐྱེས་དེ་ལ་འཇུག་པའི་ཐབས་མེད་པ་ག་ལ་ཡིན། དེ་བཞིན་ཕར་ཕྱིན་ཐེག་པར་བཤད་པའི་མཐའ་བཞི་སྤྲོས་པ་ཐམས་ཅད་དང་བྲལ་བའི་སྟོང་ཉིད་ཀྱི་ངོས་ནས་གཞལ་ན། དེས་མ་ཁྱབ་པའི་ཆོས་ཉིད་མེད་པས། དེ་ལས་ལྷག་པའི་ལྟ་བ་ཞིག་ཡོད་ན་སྤྲོས་པ་ཅན་དུ་འགྱུར་ངེས་པའི་གཏན་ཚིགས་དོན་དུ་གནས་མོད། དབྱིངས་དེ་རྟོགས་པའི་ཡུལ་ཅན་ནམ། ཐབས་བདེ་བ་ཆེན་པོའི་ངོས་ནས་གཞལ་ན་སྔགས་ཀྱི་ལྟ་བ་ཆེས་འཕགས་ཏེ། ཡུལ་གྱི་གནས་ལུགས་དང་ཤིན་ཏུ་ཉེ་བའི་བློ་ཡིན་པས་སོ། །དེས་ན་གནས་ལུགས་རྟོགས་པའི་བློ་དེ་ལྟ་བ་མིན་ན་ཐབས་ཀྱི་སྒོ་ནས་སྔགས་ཀྱི་ཡེ་ཤེས་གནས་ལུགས་ལ་ཤིན་ཏུ་ཉེ་བར་འགྱུར་བའི་ཡེ་ཤེས་མིན་པར་སུས་ཀྱང་ཁས་ལེན་ནུས་ཞེས་གསུངས། ༈ །ཆོས་ཉིད་རྣམ་འབྱེད་ཀྱི་འགྲེལ་བ་ཡེ་ཤེས་སྣང་བ་རྣམ་འབྱེད་ལས། མཚན་ཉིད་ལ་འཇུག་པ་ནི་རྣམ་པ་གསུམ་གྱིས་ཤེས་པར་བྱ་སྟེ། ཆོས་ཉིད་རང་གི་ངོ་བོ་ལ་གནས་པའི་མཚན་ཉིད་དང་། དེ་ལ་སྣང་མེད་དུ་བཞག་པའི་མཚན་ཉིད་དང་། སྣང་བཅས་སུ་བཞག་པའི་མཚན་ཉིད་དོ། །དང་པོ་ཆོས་ཐམས་ཅད་ཀྱི་ཆོས་ཉིད་དེ་བཞིན་ཉིད་ལ་གནས་པ་ཉིད་ལས་ནི། གཟུང་འཛིན་གཉིས་སམ་ཡང་ན་བདེན་པ་གཉིས་སུ་བློས་དབྱེར་མེད་ཅིང་ངག་གིས་མཐའ་འམ་རྣམ་པ་གང་དུའང་བརྗོད་དུ་མེད་པའི་ཆོས་ཉིད་ལ་རབ་ཏུ་གནས་པའི་ཕྱིར་རོ། །དེ་ཡང་མཐར་ཐུག་པ་ནི་བདེན་གཉིས་དབྱེར་མེད་རོ་གཅིག་ཏུ་ཐུགས་སུ་ཆུད་པ་སངས་རྒྱས་ཀྱི་ཡེ་ཤེས་ཀྱིས་དེ་ཇི་ལྟ་བ་བཞིན་དུ་གཟིགས་ལ་སློབ་ལམ་ན་དེ་ཡི་རྗེས་སུ་མཐུན་པ་ཡོད་པའོ། །གཉིས་པ་མི་རྟོག་པའི་ཡེ་ཤེས་སྣང་བ་མེད་པ་ཉིད་ཐོབ་པ་ལས་འདི་ལྟར་རྟོག་མེད་དབང་ཤེས་ལ་གཟུང་འཛིན་གཉིས་སུ་སྣང་བ་དང་གཉིས་སྣང་དེ་ལ་དེར་ཞེན་ནས་རྟོག་པ་དང་བཅས་པའི་ཡིད་ཀྱིས་ཇི་ལྟར་སྣང་བ་དེ་ལ་དེ་དང་དེར་མངོན་པར་བརྗོད་པ་སྟེ། ནང་གི་བརྗོད་པའམ་ཡིད་ཀྱིས་གཟུང་འཛིན་དུ་རྟོག་པ་དང་། མིག་སོགས་ནང་གི་དབང་པོ་དང་། གཟུགས་སོགས་ཕྱི་ཡི་ཡུལ་དང་། མིག་གི་རྣམ་ཤེས་སོགས་རྣམ་པར་རིག་པ་དང་། ཐུན་མོང་སྣོད་ཀྱི་འཇིག་རྟེན་དུ་སྣང་བ་འདི་དག་ཐམས་ཅད་ནས་ཐམས་ཅད་དུ་ནུབ་སྟེ་མེད་པའི་ཕྱིར་དེ་གང་གིས་ཀྱང་ཁྱད་པར་བྱར་མེད་པས་དེ་བཞིན་ཉིད་རོ་གཅིག་ཏུ་སྣང་བ་ནི་སྟོང་པ་ཉིད་ལ་གཉིས་སྣང་ནུབ་པ་ཞེས་བྱའོ། །དེས་ན་བཤད་མ་ཐག་པའི་དོན་དྲུག་བསྟན་པ་འདིས་ནི་རིམ་པ་ལྟར་དབང་པོ་སོགས་ཀྱི་ཤེས་པས་བརྟག་ཏུ་མེད་པ། ངག་གིས་བསྟན་དུ་མེད་པ། ཤེས་པ་སྐྱེ་བའི་གནས་སམ་རྟེན་མེད་པ། ཡུལ་དུ་སྣང་བ་མེད་ཅིང་། ཡུལ་ཅན་རྣམ་པར་རིག་པ་མེད་པ། ཐུན་མོང་གི་རྟེན་སྣོད་ཀྱི་གནས་མེད་པ་ཞེས་བྱ་བ་སྟེ། ཚུལ་འདིས་རྣམ་པར་མི་རྟོག་པའི་ཡེ་ཤེས་ཀྱི་མཚན་ཉིད་བསྟན་པ་ཡིན་ནོ། །དེའི་ཕྱིར་སྣང་བ་དེ་དག་གི་རང་བཞིན་ལས་འདས་པའི་སྣང་བ་མེད་པའི་ཡེ་ཤེས་རང་འོད་གསལ་བ་ནམ་མཁའ་དང་མཉམ་པ་དེ་ལ་རྣམ་པར་མི་རྟོག་པའི་ཡེ་ཤེས་སྣང་བ་མེད་པ་ཞེས་བྱ་ལ། དེ་རང་གི་ངོ་བོ་ནི་རྣམ་པར་ཤེས་པ་ལས་འདས་པའི་ཡེ་ཤེས་ཡིན་ཏེ། འདུས་བྱས་འདུས་མ་བྱས་སོགས་ཀྱི་ཁམས་གང་དུའང་མ་གཏོགས་པའོ། །དེའི་ཕྱིར་དེའི་ངོ་བོ་ལ་སྣང་བ་དེ་དག་གིས་རིས་སུ་བཅད་པ་མེད་པ་སྟེ་ཆོས་ཉིད་དང་གཉིས་སུ་མེད་པར་རང་གསལ་བའོ། །ཇི་ལྟ་བ་རྟོགས་པའི་ཡེ་ཤེས་ཀྱི་ལྡོག་ཆ་ནས་བསྟན་ན་རྟག་ཏུ་འདིའི་ངང་ཚུལ་ལས་མ་གཡོས་བཞིན་དུ་ཇི་སྙེད་པའི་ཡེ་ཤེས་ཀྱི་སྣང་བ་ཐམས་ཅད་མཉམ་ལ་མ་འདྲེས་པར་གཟིགས་པ་འབྱུང་སྟེ་འགལ་མེད་ཟུང་གཅིག་ཏུ་རུང་ངོ་། །དེ་ཅིའི་ཕྱིར་ན་ཆོས་ཉིད་དེ་བཞིན་ཉིད་ཀྱི་ངང་དུ་ཆོས་ཐམས་ཅད་རོ་མཉམ་པ་ལས་མ་གཡོས་བཞིན་དུ་ཆོས་ཅན་ཐམས་ཅད་སྣང་བར་ཟད་ཀྱི་དེ་གཉིས་མི་འགལ་བ་བཞིན་དུ། ཆོས་ཉིད་གཟིགས་པའི་ཡེ་ཤེས་ཀྱི་རང་སྣང་ལ་སྣང་བ་མི་འགོག་པར་ཤར་ཀྱང་དེ་དང་དེར་དམིགས་པ་མེད་པའི་ཆ་ནས་གོང་གི་སྣང་མེད་དུ་བསྟན་པའི་དོན་ཡོངས་སུ་རྫོགས་པ་ཡིན་ཏེ་ཐ་མལ་པའི་རང་བཞིན་ལས་འདས་པའི་ཕྱིར་རོ། །འདི་ཤིན་ཏུ་གལ་ཆེ་བའི་ཟབ་དོན་དེ་འཕྲོས་སུ་བཤད་པའོ། །གསུམ་པ་སྣང་བ་ལས་ནི་ཇི་ལྟར་ན་མཉམ་བཞག་ཏུ་ནི་ཆོས་ཐམས་ཅད་རོ་མཉམ་པར་དེ་བཞིན་ཉིད་ཀྱི་ངོ་བོས་དམིགས་པར་བྱར་མེད་པ་དཔེར་ན་ནམ་མཁའི་དཀྱིལ་ལྟར་མཉམ་པ་ཉིད་དུ་སྣང་བའི་ཕྱིར་རོ། །མཉམ་བཞག་དེ་ལྟ་བུའི་རྗེས་ལས་ཐོབ་པའི་ཡེ་ཤེས་ཀྱིས་ནི་འདུ་བྱེད་པའི་ཆོས་ཐམས་ཅད་ཅི་དང་གང་སྣང་བ་མ་ལུས་པ་སྣང་ཡང་རང་བཞིན་མ་གྲུབ་པའི་སྒྱུ་མ་དང་སྨིག་རྒྱུ་དང་རྨི་ལམ་ལ་སོགས་པ་ལྟར་སྣང་བ་ཡིན་པའི་ཕྱིར་རོ། །མཉམ་རྗེས་མེད་པར་ཟུང་གཅིག་ཏུ་ཆུད་པ་མཐར་ཐུག་པ་ནི་སངས་རྒྱས་ཀྱི་སར་འབྱུང་ཞིང་རྗེས་མཐུན་པ་འཕགས་པའི་ས་དང་། ཆ་འདྲ་བ་སྔགས་ལམ་གྱི་དཔེ་ཡི་ཡེ་ཤེས་རྒྱུད་ལ་སྐྱེས་པ་ན་ཡང་འབྱུང་སྟེ་ཐབས་ཟབ་པའི་ཕྱིར་རོ། །ཚུལ་འདིས་མཐར་ཐུག་སངས་རྒྱས་ཀྱིས་ཇི་ལྟ་ཇི་སྙེད་ཀྱི་ཡེ་ཤེས་རྣམ་པ་གཉིས་པོས་གཟིགས་ཚུལ་དང་སློབ་ལམ་དུ་མཉམ་བཞག་སྣང་བཅས་སྣང་མེད་མི་འགལ་བའི་གནད་ཤེས་དགོས་པས་ཤིན་ཏུ་གལ་ཆེ་བའི་ཕྱིར་འཕྲོས་དོན་དང་བཅས་ཏེ་བཤད་པ་ཡིན་ནོ། །ཞེས་སོ། ༈ །འགའ་ཞིག་གིས་ཀྱང་ཆོས་དབྱིངས་ལ་མཉམ་པར་བཞག་བཞིན་པའི་རང་དུས་ལ་རྟེན་འབྲེལ་གྱི་སྣང་བ་མ་འགགས་ན་སྣང་བཅས་སྣང་མེད་གཉིས་ཀ་ཡིན་པར་བཞེད། སྣང་བཅས་ནི་རྟེན་འབྲེལ་གྱི་སྣང་བ་མ་འགགས་པའོ། །ཀུན་ཏུ་འོད་ཀྱི་ས་ལ་བློ་སྦྱོང་བའི་ཕྱིར་དེ་བཞིན་ཉིད་ཀྱི་ཏིང་ངེ་འཛིན་རྣམ་པར་མི་རྟོག་པ་སྒོམ་པ་དང་། པདྨ་ཅན་གྱི་ས་ལ་གོམས་པར་བྱ་བའི་ཕྱིར་ཀུན་ཏུ་སྣང་བའི་ཏིང་ངེ་འཛིན་ཤེས་རབ་དང་སྙིང་རྗེ་འབྲེལ་བ་དང་། ཡི་གེ་འཁོར་ལོ་ཚོགས་ཆེན་གྱི་ས་ལ་གོམས་པར་བྱ་བའི་ཕྱིར་རྒྱུའི་ཏིང་ངེ་འཛིན་ཡིག་འབྲུ་སྒོམ་པ་སྟེ་ཏིང་ངེ་འཛིན་རྣམ་པ་གསུམ་རིམ་གྱིས་བསྐྱེད་པའོ། །དེ་ཡང་འཆི་བའི་འོད་གསལ་ཆོས་སྐུར་ལམ་དུ་འཁྱེར་བ་སྟོང་པ་ཆེན་པོ། བར་དོའི་རླུང་སེམས་ལོངས་སྐུར་འཁྱེར་བ་སྙིང་རྗེ་སྒྱུ་མ། སྐྱེ་སྲིད་རགས་པ་འཁོར་བཅས་སྤྲུལ་སྐུར་སྦྱོང་བྱེད་ལ། དྲི་ཟ་མངལ་དུ་ཞུགས་པ་ནས་ཕྱིར་བཙས་པའི་བར་དང་མཐུན་པ་ཕྱག་རྒྱ་གཅིག་པ། བཙས་ནས་བུ་ཚ་འཁོར་འདབ་རྒྱས་པའི་བར་དང་མཐུན་པ་ཕྱག་རྒྱ་སྤྲོས་བཅས། ནར་སོན་ནས་བཅད་རིས་དང་ཁས་གྲགས་སྒྲུབ་པ་དང་མཐུན་པ་ཚོམ་བུ་ཚོགས་སྒྲུབ་བོ། །༈ སྟོང་པ་ཆེན་པོ་དེ་བཞིན་ཉིད་ཀྱི་ཏིང་ངེ་འཛིན་གྱིས། དང་པོར་ལྟ་བས་ཐག་བཅད་པས། བསྐྱེད་རྫོགས་རང་རྒྱུད་དུ་མི་ཞེན་པའི་དགོས་པ་ཡོད་ཅིང་། སངས་རྒྱས་པའི་ཚེ་ཆོས་སྐུའི་ངང་ལས་གཟུགས་སྐུ་འཆར་བའི་གཞིར་འགྱུར་བས་དེའི་རྟེན་འབྲེལ་མངོན་དུ་བྱེད་པ་དང་། ལམ་ཡེ་ཤེས་ཀྱི་ཚོགས་རྫོགས་པའི་དགོས་པ་ཡོད་དོ། །ཀུན་སྣང་གི་ཏིང་ངེ་འཛིན་གྱིས་སྟོང་པའི་མཐར་ཞེན་པ་ལས་གྲོལ་ཞིང་། ཐབས་སྙིང་རྗེ་ཆེན་པོས་སྒོམ་པ་ལམ་དུ་བྱེད་པས་བསོད་ནམས་ཀྱི་ཚོགས་རྫོགས་པ་དང་། སངས་རྒྱས་པའི་ཚེ་འོག་མིན་གྱི་ཞིང་ཁམས་རྒྱ་དང་བྲལ་བའི་རང་བཞིན་མངོན་དུ་བྱེད་པའི་དགོས་པ་ཡོད་དོ། །རྒྱུའི་ཏིང་ངེ་འཛིན་ཡི་གེའི་སྤྲིན་ལས་ཕྱག་རྒྱ་གཅིག་པའི་བར་བསྒོམས་པས། ཐབས་དང་ཤེས་རབ་ཟུང་དུ་འབྲེལ་ཞིང་རྟག་ཆད་ཞེན་པའི་མཐའ་ལས་འདས་པས་ལམ་རང་གི་ངོ་བོ་གཉིས་སུ་མེད་པ་དང་། སངས་རྒྱས་པའི་ཚེ་འོག་མིན་གྱི་དཀྱིལ་འཁོར་ལོངས་སྐུ་རང་གི་ངོ་བོ་ལས་མཆེད་པ་ཡོངས་སུ་རྫོགས་པའི་རང་བཞིན་གཙོ་བོ་ལྷུན་གྱིས་གྲུབ་པ་རྟེན་འབྲེལ་མངོན་དུ་བྱེད་པའི་དགོས་པ་ཡོད་དོ། །ཡེ་ཤེས་དྲྭ་བའི་ཏིང་ངེ་འཛིན་གྱིས། དཀྱིལ་འཁོར་གྱི་རྒྱན་དང་བཀོད་པ་དང་། འོད་ཟེར་དང་འཕྲོ་འདུ་དང་། འཁོར་གྱི་རོལ་པ་དཔག་ཏུ་མེད་པ་རྫོགས་ལ། ཕྱག་རྒྱ་སྤྲོས་པའི་ཏིང་ངེ་འཛིན་གྱིས་འོག་མིན་གྱི་ལོངས་སྤྱོད་ཆེན་པོ་སྤྲུལ་པའི་སྐུ་འཕྲོ་གཞི་རྫོགས་པ་དང་། ལམ་ཡེ་ཤེས་དང་སྟོང་པ་ཆེན་པོའི་ཚོགས་གཉིས་ལྷུན་གྱིས་རྫོགས་པའི་དགོས་པ་དམ་པ་འགྲུབ་བོ། །བར་ཆད་མེད་པའི་ཚོགས་བསྒྲུབས་པས་བསྐྱེད་རྫོགས་ཀྱི་ནུས་པ་འབྱིན་ཞིང་རིག་འཛིན་གྱི་སྒྲུབ་པ་ལ་དངོས་སུ་བར་ཆད་མེད་པར་སྦྱོར་བའི་དགོས་པ་ཡོད་དོ། །དེ་དག་རིམ་གྱིས་སྒོམ་པའི་ཚེ་ལམ་གྱི་རྫོགས་ཚུལ་ཡང་། དེ་བཞིན་ཉིད་ནི་ཚོགས་ལམ་ཆུང་ངུ། ཀུན་ཏུ་སྣང་ཚོགས་ལམ་འབྲིང་། རྒྱུའི་ཕྱག་རྒྱ་གཅིག་སྤྲོས་ཚོགས་ལམ་ཆེན་པོ། ཡེ་ཤེས་དྲྭ་བའི་ཕྱག་རྒྱ་རྣམས་སོ། །སྦྱོར་ལམ་དྲོད་དང་། རྩེ་མོ། བར་ཆད་མེད་པ། བཟོད་པ་དང་། ཆོས་མཆོག་ཆེན་པོ་མཐར་ཐུག་པའི་ཡེ་ཤེས་རྫོགས་སོ། །འདི་དག་ལམ་ཟག་པ་དང་བཅས་པ་སྟེ་འཇིག་རྟེན་པའི་ལམ་ཡིན་པའི་ཕྱིར་རོ། ༈ །ཚོགས་ལམ་རྫོགས་པའི་རྟགས་སངས་རྒྱས་མཆོག་གི་སྤྲུལ་སྐུ་མཐོང་བ་ལ་སོགས་པའོ། ༈ །བར་ཆད་མེད་པའི་སྐབས་སུ་རྣམ་སྨིན་རིག་འཛིན་ཐོབ་པའོ། །དེ་བཞིན་ཉིད་ཀྱི་འབྲས་བུ་ནི་དངོས་སུ་དོན་དམ་རྟོགས་པ་དང་། བརྒྱུད་ནས་ཆོས་སྐུ་ཐོབ་པའོ། །ཡེ་ཤེས་སྒྱུ་མའི་འབྲས་བུ་ནི་དངོས་སུ་ཀུན་རྫོབ་ཀྱི་བདེན་པ་རྟོགས་པ་དང་བརྒྱུད་ནས་ལོངས་སྐུ་ཐོབ་པའོ། །ཕྱག་རྒྱ་གཅིག་པའི་འབྲས་བུ་ནི། དངོས་སུ་བདེན་པ་དབྱེར་མེད་རྟོགས་པ་དང་བརྒྱུད་ནས་ཡི་གེ་འཁོར་ལོ་ཚོགས་ཆེན་གྱི་ས་ཐོབ་པའོ། །ཕྱག་རྒྱ་སྤྲོས་བཅས་ལ་དབྱེ་ན་ཞི་ཁྲོ་གཉིས་ལས་རེ་རེ་ལའང་དཀྱིལ་འཁོར་ཚོམ་བུ། གྲངས། ཞལ་ཕྱག་དང་བཞི་ལས། དང་པོ་ཞི་དཀྱིལ་ལ་བསྡུས་འབྲིང་རྒྱས་པའོ། །ཚོམ་བུ་ལ་བསྡུས་འབྲིང་རྒྱས་པའོ། །གྲངས་ལ་དང་པོ་རིགས་གསུམ་སློབ། དེ་ནས་རིགས་ལྔ། དེ་ནས་བཞི་བཅུ་རྩ་གཉིས་ལ། དེ་ནས་སངས་རྒྱས་སྟོང་གི་དཀྱིལ་འཁོར་ལ། དེ་ནས་ཉི་ཁྲི་ཆིག་སྟོང་ལ། དེ་ནས་བསམ་ཡས་ལྷུན་གྲུབ་ལ་སློབ་པ་སྟེ་སྣང་སྲིད་ཐམས་ཅད་ལྷ་ཡི་དཀྱིལ་འཁོར་དུ་གསལ་བར་བསྒོམ་མོ། །ཞལ་ཕྱག་ལ། དང་པོ་ཞལ་གཅིག་ཕྱག་གཉིས་ལ་སློབ་བོ། །དེ་ནས་ཚོམ་བུའི་ལྷ་ཐམས་ཅད་ཞལ་གསུམ་ཕྱག་དྲུག་པར་སློབ་བོ། །གཉིས་པ་ཁྲོ་བོའི་དཀྱིལ་འཁོར་ལ་བཞི་ལས། དང་པོ་དཀྱིལ་འཁོར་ལ་བསྡུས་འབྲིང་རྒྱས་པའོ། །ཚོམ་བུ་ལའང་བསྡུས་འབྲིང་རྒྱས་པའོ། །གྲངས་ལ་དང་པོ་ཁྲོ་བོ་རིགས་ལྔ་ལ་བསླབ། དེ་ནས་བརྒྱ་རྩ་བརྒྱད་ལ་བསླབ། དེ་ལ་བརྟེན་ནས་བྷུདྡྷུ་ཧེ་རུ་ཀ་ཡབ་ཡུམ་ལ་ཡན་ལག་གི་ལྷ་ཐབས་ཀྱི་ཧེ་རུ་ཀ་ལྔ་བཅུ་རྩ་བརྒྱད། དེ་ལ་དབུ་རྒྱན་ལྔ་ལྔ་བྱས་པས། ཡན་ལག་གི་ལྷ་ཉིས་བརྒྱ་དང་དགུ་བཅུ་ལ་བསླབ་པའོ། །དེ་ལས་ཀྱང་སྤྲོས་ན་རྩ་བ་ཧེ་རུ་ཀ་ཡབ་ཡུམ་ལ་ཡན་ལག་གི་ལྷ་ལྔ་བཅུ་རྩ་བརྒྱད་བསྒོམས་ཏེ། ཐབས་ཀྱི་ལྷ་ལྔ་བཅུ་རྩ་བརྒྱད་དེའི་སྙིང་ཁར་ཤེས་རབ་ཀྱི་ལྷ་ཕར་བཞག་པའི་ཐབས་ཀྱི་ལྷ་ལ་སྐུ་གསུང་ཐུགས་ཀྱི་ལྷ་གསུམ་གསུམ་བསྒོམ་པས་བརྒྱ་བདུན་ཅུ་རྩ་བཞི། དེ་ལ་དབུ་རྒྱན་རིགས་ལྔ་ལྔབསྒོམས་པས་སྐུ་གསུང་ཐུགས་ཀྱི་ལྷའི་དབུ་རྒྱན་བརྒྱ་བདུན་ཅུ་ཚན་པ་གསུམ་དང་། ཐབས་ཀྱི་ལྔ་བཅུ་རྩ་བརྒྱད་ལ་ཉིས་བརྒྱ་དགུ་བཅུ་སྟེ། དབུ་རྒྱན་གྱི་ལྷ་ཉིས་སྟོང་དགུ་བཅུའོ། །དེ་ཐམས་ཅད་བསྡོམས་པས་སུམ་སྟོང་ཆིག་བརྒྱ་དང་དགུ་བཅུ་ཡོད་དོ། །ཞལ་ཕྱག་ནི་གཙོ་བོ་དབུ་ཕྱག་གྲངས་མེད་དང་དབུ་དགུ་ཕྱག་བཅོ་བརྒྱད་པ། འཁོར་གྱི་མ་མོ་རྣམས་ཀྱང་ཞལ་གསུམ་ཕྱག་དྲུག་པ་སོགས་རྒྱུད་ནས་མ་བཤད་ཀྱང་བརྒྱུད་པའི་ཕྱག་བཞེས་སུ་རྒྱས་པ་ལ་རིགས་ལྔ་དང་། འབྲིང་པོ་ལ་གཙོ་བོ་ཙམ་ཞལ་གསུམ་ཕྱག་དྲུག་པ་དང་། བསྡུས་པ་ཐམས་ཅད་ཞལ་གཅིག་ཕྱག་གཉིས་པའོ། །འབྲས་བུ་ནི་དངོས་སུ་བར་ཆད་མེད་པ་ལ་སྦྱོར་ལ་བརྒྱུད་ནས་ཡི་གེ་འཁོར་ལོའི་ས་ཐོབ་པའོ། །བར་ཆད་མེད་པའི་ལམ་ཚོགས་སྒྲུབ་ཀྱི་འབྲས་བུ་ནི་དངོས་སུ་མཐོང་ལམ་ལ་སྦྱོར་ལ་བརྒྱུད་ནས་ཡི་གེ་འཁོར་ལོའི་ས་ཐོབ་པའོ། ༈ །རྡོ་གྲུབ་རིན་པོ་ཆེས། རྫོགས་ཆེན་དང་བསྟུན་ནས་བསྐྱེད་རིམ་ཏིང་འཛིན་རྣམ་གསུམ་སྒོམ་དུས། དེ་ཏིང་ཀ་དག་གཞིའི་སྐབས། ཀུན་སྣང་རང་བཞིན་ལྷུན་གྲུབ་གཞི་སྣང་གི་ཡེ་ཤེས། རྒྱུ་ཏིང་ཀ་དག་ལྷུན་གྲུབ་ཟུང་འཇུག་ཐུགས་རྗེའི་རིག་པ་ཤེས་རབ་ཀྱི་ཆ་ཐམས་ཅད་ཐོད་རྒལ་བའི་རྡོ་རྗེ་ལུ་གུ་རྒྱུད་དུ་འོང་རྒྱུ་དེ་རེད། དཀྱིལ་འཁོར་ལྷ་བསྐྱེད་པ་ཤེས་རབ་སྐུར་སྨིན་པའི་ཞིང་སྐུ་ཕོ་བྲང་སོགས་ལ་སྦྱོར་སྙམ། ཤེས་རབ་སྐུར་སྨིན་པ་འདི་ལ་སྤྲུལ་སྐུ་ལོངས་སྐུ་གཉིས་ཀ་ཡོད་པས་སྒྱུ་འཕྲུལ་ལྟར་ལྷ་བསྐྱེད་ཀྱི་ལྷ་སོ་དྲུག་ཆོས་སྐུ་ལོངས་སྐུ་དྲུག་སྤྲུལ་སྐུར་བྱས་ནས་སྒོམ་པ་ལྟ་བུར་ཡང་སྦྱར་བཏུབ་གསུང་། རིམ་ལྔ་ལ། སྤྱིར་སྔོན་འགྲོ་དབེན་པ་གསུམ། དངོས་གཞི་བདེན་པ་གཉིས། འབྲས་བུ་ཟུང་འཇུག་རྣམས་སུ་འདུ་བ་ལས། དང་པོ་ལ། ལུས་དབེན་ངག་དབེན་ཡིད་དབེན་གསུམ། གཉིས་པ་ལ་ཀུན་རྫོབ་སྒྱུ་ལུས་དང་། དོན་དམ་འོད་གསལ་གཉིས། གསུམ་པ་འབྲས་བུ་ཟུང་འཇུག་ནི་འོད་གསལ་དེ་ཡི་ངང་ལས་སྒྱུ་ལུས་ཀྱི་ལྷ་སྐུར་ལྡང་བ་སྣང་སྟོང་ཟུང་དུ་འཇུག་པ་གང་ཡིན་པའོ། །དེ་དག་གི་སྒྲ་བཤད་ནི། ལུས་དབེན་ཆོས་ཅན། ཁྱོད་ལ་ལུས་དབེན་ཞེས་བརྗོད་པའི་རྒྱུ་མཚན་ཡོད་དེ། དབེན་གཞིའི་ལུས་རང་རྒྱུད་ཀྱི་བསྡུས་པའི་ཕུང་ཁམས་སྐྱེ་མཆེད་སོགས་ལ་རྫོགས་རིམ་པའི་བདེ་སྟོང་གི་རྒྱབ་བཏབ་ནས་ཐ་མལ་གྱི་སྣང་ཞེན་ལས་དབེན་པར་བྱས་ཏེ། དག་པ་ལྷའི་རྣམ་པར་ཤར་བའི་རྣལ་འབྱོར་ཡིན་པས་ལུས་དབེན་ཞེས་བརྗོད། ངག་དབེན་ཆོས་ཅན། ཁྱོད་ལ་ངག་དབེན་ཞེས་བརྗོད་པའི་རྒྱུ་མཚན་ཡོད་དེ། ངག་གི་རྩ་བ་ཤིན་ཏུ་ཕྲ་བའི་རླུང་ཐ་མལ་དུ་རྒྱུ་བ་ལས་དབེན་པར་བྱས་ཏེ་རླུང་སྔགས་དབྱེར་མེད་དུ་སྦྱོར་བའི་རྣལ་འབྱོར་ཡིན་པས་ན་ངག་དབེན་ཞེས་བརྗོད། སེམས་དབེན་ཆོས་ཅན། ཁྱོད་ལ་སེམས་དབེན་ཞེས་བརྗོད་པའི་རྒྱུ་མཚན་ཡོད་དེ། འཁོར་འདས་ཀུན་གྱི་རྩ་བ་སེམས་ཀུན་རྟོག་བཞོན་པའི་རླུང་དང་བཅས་པ་ལས་དབེན་པར་བྱས་ཏེ་བདེ་སྟོང་དབྱེར་མི་ཕྱེད་པའི་ངོ་བོར་ཤར་བའི་རྣལ་འབྱོར་ཡིན་པས་ན་སེམས་དབེན་ཞེས་བརྗོད། སྒྱུ་ལུས་ཆོས་ཅན། ཁྱོད་ལ་སྒྱུ་ལུས་ཞེས་བརྗོད་པའི་རྒྱུ་མཚན་ཡོད་དེ། སྒྱུ་མ་ལ་སོགས་པའི་དཔེ་བཅུ་གཉིས་ཀྱིས་མཚོན་པའི་ཤིན་ཏུ་ཕྲ་བའི་རླུང་སེམས་ཙམ་གྱིས་ལྷ་སྐུའམ་ལུས་ཡིན་པས་ན་སྒྱུ་ལུས་ཞེས་བརྗོད། དོན་དམ་འོད་གསལ་ཆོས་ཅན། ཁྱོད་ལ་འོད་གསལ་ཞེས་བརྗོད་པའི་རྒྱུ་མཚན་ཡོད་དེ། ཡུལ་ཅན་ལྷན་སྐྱེས་ཀྱི་བདེ་བས་ཡུལ་དོན་དམ་བདེན་པ་འོད་གསལ་མངོན་དུ་གྱུར་པའི་སྒོ་ནས་ཀུན་རྫོབ་ཀྱི་སྤྲོས་པ་མ་ལུས་པ་ནུབ་པའི་ཡེ་ཤེས་ཡིན་པས་ན་དོན་གྱི་འོད་གསལ་ཞེས་བརྗོད། ༈ ཆོས་དྲུག་ནི། གཏུམ་མོ་བདེ་དྲོད་རང་འབར། སྒྱུ་ལུས་ཆགས་སྡང་རང་གྲོལ། འོད་གསལ་གཏི་མུག་རང་སངས། རྨི་ལམ་ཉིང་འཁྲུལ་རང་དག །འཕོ་བ་མ་བསྒོམ་འཚང་རྒྱ། བར་དོ་རྒྱལ་བ་ལོངས་སྐུ་དང་དྲུག་ཡིན་ཏེ། རྗེ་མར་པ་ལ། དཔལ་ནཱ་རོ་པས། ཕྱི་ནི་སྒྱུ་མ་ལྷ་ཡི་སྐུ། །ནང་ན་རྩ་གསུམ་འཁོར་ལོ་བཞི། །འོག་ན་ཨ་ཤད་ཙཎྚཱ་ལི། །སྟེང་ན་ཧཾ་ཡིག་རྣམ་པ་ཅན། །སྟེང་འོག་རླུང་གི་འཁོར་ལོ་ནི། །སྲོག་རྩོལ་བུམ་ཅན་ཉམས་ལེན་གྱིས། །བར་ན་བདེ་སྟོང་གསལ་བའི་ཉམས། །མིང་ཡང་གཏུམ་མོའི་གདམས་ངག་ཟེར། །རླུང་གནད་དུ་ཆུད་དམ་ལོ་ཙཱ་བ། །ཕྱི་ན་སྣང་བ་སྒྱུ་མ་ཙམ། །ནང་ན་ཉམས་མྱོང་སྨྲ་མ་བཏུབ། །ཉིན་མཚན་སྣང་བ་སྤྲུལ་པའི་སྐུ། །མིང་ཡང་སྒྱུ་ལུས་ཀྱི་གདམས་ངག་ཟེར། །ཞེན་པ་ལོག་གམ་ལོ་ཙཱ་བ། །རྨི་ལམ་ཉམས་ཀྱི་འཁྲུལ་པའི་དུས། །མགྲིན་པར་ༀ་ཡིག་འོད་ཟེར་ཅན། །དྲན་འདུན་བག་ཆགས་ཀྱི་མཚམས་སྦྱོར་ལས། །སྐྱེས་པ་རྨི་ན་ཕོ་འདྲེ་ཟེར། །བུད་མེད་རྨི་ན་མོ་འདྲེ་ཟེར། །བྱོལ་སོང་རྨི་ན་ཀླུ་རུ་འཛིན། །དགའ་བ་རྨི་ན་སེམས་སངས་བསྐྱེད། །མི་དགའ་རྨི་ན་སྙིང་མི་དགའ། །འདྲེ་སེམས་ཀྱི་རྩ་བར་མ་ཤེས་ན། །རྣམ་རྟོག་གི་འདྲེ་ལ་ཟད་པ་མེད། །བཟང་ངན་རང་གྲོལ་སྟོན་པའི་དོན། །མིང་ཡང་རྨི་ལམ་གྱི་གདམས་ངག་ཟེར། །རང་བཞིན་ཤེས་སམ་ལོ་ཙཱ་བ། །གཉིད་དང་རྨི་ལམ་བར་ཞིག་ན། །གཏི་མུག་ཆོས་སྐུའི་ངོ་བོ་ཅན། །བརྗོད་མེད་འོད་གསལ་བདེ་བའི་ཉམས། །རྗེས་ལ་འོད་གསལ་རྒྱ་ཡིས་ཐེབས། །རྨི་ལམ་འོད་གསལ་འཐུག་པོ་ཉིད། །མིང་ཡང་འོད་གསལ་གྱི་གདམས་ངག་ཟེར། །སེམས་སྐྱེ་མེད་དུ་རྟོགས་སམ་ལོ་ཙཱ་བ། །སྒོ་བརྒྱད་འཁོར་བའི་སྐར་ཁུང་ཅན། །སྒོ་གཅིག་ཕྱག་རྒྱ་ཆེན་པོའི་ལམ། །སྒོ་བརྒྱད་བཅད་ནས་སྒོ་གཅིག་འབྱེད། །སེམས་ཀྱི་མདའ་ལ་རླུང་གི་གཞུ། །ཧིཀ་གི་རྒྱུད་ཀྱིས་རབ་བསྐུལ་ནས། །རྣམ་ཤེས་ཚངས་པའི་ལམ་ནས་འཕེན། །མིང་ཡང་འཕོ་བའི་གདམས་ངག་ཟེར། །རླུང་དུས་སུ་ཁེགས་སམ་ལོ་ཙཱ་བ། །རང་ལུས་དུས་ཀྱི་ཚད་ཕེབས་ལ། །གཞན་ལུས་མཚན་ལྡན་དམ་པའི་ཡུལ། །བར་ན་ཡིག་འབྲུ་རླུང་གི་རྟ། །རྟེན་འབྲེལ་རླུང་གི་འཁོར་ལོ་ཡིས། །རང་ལུས་ཁང་སྟོང་བཞིན་དུ་བོར། །གཞན་ལུས་སྤྲུལ་སྐུའི་ངོ་བོ་ཅན། །མིང་ཡང་གྲོང་འཇུག་གི་གདམས་ངག་ཟེར། །རླུང་ལས་སུ་རུང་ངམ་ལོ་ཙཱ་བ། །རྨི་ལམ་དུས་ཀྱི་ཤེས་པ་དེ། །བར་དོའི་སེམས་དང་བསྲེ་དགོས་པས། །ལོངས་སྤྱོད་རྫོགས་སྐུའི་ངོ་བོ་ཅན། །དག་དང་མ་དག་གཟུགས་སྐུ་གཉིས། །བར་དོའི་དུས་སུ་ཟིན་ཡང་འཚལ། །རྨི་ལམ་བར་དོ་བསྲེ་འཕོའི་གནད། །མིང་ཡང་བར་དོའི་གདམས་ངག་ཟེར། །བར་དོ་འབྱོངས་སམ་ལོ་ཙཱ་བ། །ཞེས་པ་ལྟར། དང་པོ་ལམ་གྱི་རྩ་བ་གཏུམ་མོ་ལ་གསུམ་ལས། ལུས་ཀྱི་གཏུམ་མོ་ནི། ལུས་ཀྱི་བྱེད་བཅིངས་ཏེ་ཆོས་བདུན། ངག་གི་བྱེད་བཅིངས་རླུང་ཁ་སྦྱོར། སེམས་ཀྱི་བྱེད་བཅིངས་གཏུམ་མོ་འབར་འཛག་བསྒོམ་པ་སོགས་སོ། །ཉམས་ཀྱི་གཏུམ་མོ་ནི། རླུང་སེམས་དབུ་མར་འདུས་པའི་རྟགས་དུ་བ་སོགས་སྣང་ཞིང་བདེ་སྟོང་གི་ཉམས་སྐྱེ་བའོ། །མཆོག་གི་གཏུམ་མོ་ནི། སྣང་གསུམ་གྱིས་དྲངས་པའི་འོད་གསལ་མངོན་དུ་འགྱུར་པའོ། །གཉིས་པ་ལམ་གྱི་གཞི་མ་སྒྱུ་ལུས་ལའང་མ་དག་པའི་སྒྱུ་ལུས་ནི། ཕྱི་ནང་གི་སྣང་བ་ཐམས་ཅད་སྒྱུ་མ་ལྟར་བསྒོམ་པའོ། །དག་པའི་སྒྱུ་ལུས་ནི། སྣང་བ་ཐམས་ཅད་ལྷ་སྐུ་སྒྱུ་མ་ལྟར་བསྒོམ་པའོ། སྦས་དོན་རླུང་སེམས་ཀྱི་སྒྱུ་ལུས་ནི། རླུང་སེམས་ཙམ་ལས་གྲུབ་པའི་སྒྱུ་མ་ལྟ་བུའི་ལྷ་སྐུའོ། །གསུམ་པ་ལམ་གྱི་དྲོད་ཚད་རྨི་ལམ་ནི། རྨི་ལམ་ངོ་ཤེས་ནས་སྤྲུལ་བསྒྱུར་བྱེད་པ་དང་། དག་མ་དག་གི་ཞིང་ཉུལ་བ་དང་། འོད་གསལ་ལ་འཇུག་ལྡང་བྱས་ཏེ་མཐར་རྨི་ལམ་དབྱིངས་སུ་དག་པའོ། །བཞི་པ་ལམ་གྱི་སྙིང་པོ་འོད་གསལ་ནི། རང་ལུས་དང་གཞན་ལུས་གང་རུང་ལ་བརྟེན་ནས་སྟོང་བཞིའམ་དགའ་བཞིས་དྲངས་པའི་འོད་གསལ་རྒྱུད་ལ་སྐྱེ་བའོ། །ལྔ་པ་ལམ་གྱི་བསུན་མ་བར་དོ་ནི། རབ་འཆི་སྲིད་ཆོས་སྐུའི་འོད་གསལ་ངོས་ཟིན་པ་དང་། འབྲིང་སྲིད་པའི་བར་དོར་སྒྱུ་མའི་ལྷ་སྐུར་ལྡང་བ་དང་། ཐ་མ་མངལ་སྒོ་བཟང་པོ་འདམ་པ་སོགས་སོ། །དྲུག་པ་ལམ་གྱི་བློ་ཆོད་འཕོ་བ་ནི། ཐིམ་རིམ་མགོ་རྩོམ་པའི་དུས་འོད་ཀྱི་གོང་བུས་འཕོ་བ་དང་། སྒྲ་ཡིས་འཕོ་བ་སོགས་ཀྱིས་རྣམ་ཤེས་དག་པའི་ཞིང་དུ་འཕོ་བའོ། ༈ །སྦྱོར་བ་དྲུག་ནི། སྔོན་འགྲོ་ལྟོས་མེད་བཞི་ལྡན་ནམ། དབེན་པ་གསུམ་ལྡན་བྱས་ནས། ཉིན་མོ་སྤྲིན་བྲལ་གྱི་ནམ་མཁའ་འམ་མཚན་མོ་གསེང་མེད་ཀྱི་མུན་པར་བྱེད་བཅིངས་གི་སྒོ་ནས་སྨིན་མཚམས་ཀྱི་ནམ་མཁའ་དང་། རང་སེམས་དབྱེར་མེད་ལྷན་ནེར་བཞག་པས་སྒོ་ལྔའི་ཤེས་པ་ཡུལ་ལ་འཕྲོ་བ་སྡུད་ནས་ལས་རླུང་དབུ་མར་འཇུག་པའི་རྟགས་དུ་བ་སོགས་བཅུ་གསུམ་རྫོགས་པར་མཐོང་བ་སོར་སྡུད་དོ། །སྔར་སོར་སྡུད་ཀྱིས་གྲུབ་པའི་སྟོང་གཟུགས་མངོན་དུ་གྱུར་ནས་ཡུལ་སེམས་གཉིས་སུ་མེད་པའི་མཉམ་བཞག་སྐྱེས་པ་བསམ་གཏན། དེ་ནས་གཡས་གཡོན་དང་སྟེང་འོག་གི་རླུང་གཅིག་ཏུ་བསྲེས་པ་སྲོག་རྩོལ། འཁོར་ལོ་བཞིའི་རླུང་སེམས་ལས་སུ་རུང་སྟེ་གཟུང་འཛིན་དབུ་མར་ཐིམ་པ་འཛིན་པ། དེ་ནས་ལས་དང་ཡེ་ཤེས་ཕྱག་རྒྱ་ཆེན་པོ་གསུམ་གང་རུང་ལ་བརྟེན་ནས་དགའ་བཞིའི་ཉམས་མྱོང་འདྲེན་པ་རྗེས་དྲན། མི་འགྱུར་བའི་བདེ་བ་དང་། རྣམ་ཀུན་མཆོག་ལྡན་གྱི་སྟོང་པ་ཉིད་ཟུང་དུ་འཇུག་པའི་ཉམས་མྱོང་ཁྱད་པར་ཅན་ཏིང་འཛིན། ༈ དེ་ཡང་སྟོང་པ་བཞི་ནི། རྙིང་མ་བ་ལྟར་ན། དང་པོ་རྣམ་ཤེས་སྣང་བ་ལ་ཐིམ་པའི་སྐབས་སུ་ཞེ་སྡང་གི་རྟོག་པ་སོ་གསུམ་འགགས། ཕྱི་རྟགས་སུ་སྟོན་གནམ་ཟླ་འོད་ཀྱིས་བསླད་པ་ལྟར་དཀར་ལམ་པའི་སྣང་བ་དང་། ནང་རྟགས་སུ་གསལ་བའི་ཉམས་མཐའ་དབུས་མེད་པར་འཆར་ཏེ་སྟོང་པ་ཞེས་བྱ། དེ་ནས་སྣང་བ་མཆེད་པ་ལ་ཐིམ་པས་འདོད་ཆགས་ཀྱི་རྟོག་པ་བཞི་བཅུ་འགགས། ཕྱི་རྟགས་སུ་སྟོན་ནམ་ཉི་འོད་ཀྱིས་བསླད་པ་ལྟ་བུའི་དམར་ལམ་པ་དང་། ནང་རྟགས་སུ་བདེ་བ་མུ་མཐའ་མེད་པར་འཆར་ཏེ་སྟོང་པ་ཆེན་པོ་ཞེས་བྱ། དེ་ནས་མཆེད་པ་ཉེར་ཐོབ་ལ་ཐིམ་པས་གཏི་མུག་གི་རྟོག་པ་བདུན་འགགས། ཕྱི་རྟགས་སུ་སྟོན་ནམ་སྨག་གིས་བསླད་པ་ལྟ་བུའི་ནག་ལམ་པ་དང་། ནང་རྟགས་སུ་རྣམ་པར་མི་རྟོག་པའི་ཉམས་མཐའ་དབུས་མེད་པར་འཆར་ཏེ་ཤིན་ཏུ་སྟོང་པ་ཞེས་བྱ། དེ་ནས་ཉེར་ཐོབ་འོད་གསལ་ལ་ཐིམ་པས་སྟོན་གྱི་དུས་སུ་ཐོ་རངས་ཀྱི་ནམ་མཁའ་སླད་བྱེད་ཀྱི་རྐྱེན་གསུམ་དང་བྲལ་བ་ལྟ་བུ་སྟེ་ཐམས་ཅད་སྟོང་པའི་འོད་གསལ་ཞེས་བྱའོ། །གསར་མ་ལྟར་ན་འོད་གསལ་སྣང་བའི་ཡེ་ཤེས་ཆོས་ཅན། ཁྱོད་ལ་སྟོང་པ་ཞེས་བརྗོད་པའི་རྒྱུ་མཚན་ཡོད་དེ། འོད་གསལ་སྣང་བའི་ཡེ་ཤེས་ཀྱི་རང་དུས་སུ་ཀུན་རྟོག་བརྒྱད་ཅུ་དང་དེའི་བཞོན་པར་གྱུར་པའི་ལས་རླུང་དང་བྲལ་བས་ན་སྟོང་པ་ཞེས་བརྗོད། འོད་གསལ་མཆེད་པའི་ཡེ་ཤེས་ཆོས་ཅན། ཁྱོད་ལ་ཤིན་ཏུ་སྟོང་བ་ཞེས་བརྗོད་པའི་རྒྱུ་མཚན་ཡོད་དེ། འོད་གསལ་མཆེད་པའི་ཡེ་ཤེས་ཀྱི་རང་དུས་སུ་སྔ་མ་འོད་གསལ་སྣང་བའི་ཡེ་ཤེས་དང་དེའི་བཞོན་པར་གྱུར་པའི་རླུང་གཉིས་ཀས་སྟོང་པས་ན་ཤིན་ཏུ་སྟོང་པ་ཞེས་བརྗོད། འོད་གསལ་ཉེར་ཐོབ་ཀྱི་ཡེ་ཤེས་ཆོས་ཅན། ཁྱོད་ལ་སྟོང་པ་ཆེན་པོ་ཞེས་བརྗོད་པའི་རྒྱུ་མཚན་ཡོད་དེ། འོད་གསལ་ཉེར་ཐོབ་ཀྱི་ཡེ་ཤེས་ཀྱི་རང་དུས་སུ་སྔ་མ་འོད་གསལ་མཆེད་པའི་ཡེ་ཤེས་དང་དེའི་བཞོན་པར་གྱུར་པའི་རླུང་གཉིས་ཀས་སྟོང་པས་ན་སྟོང་པ་ཆེན་པོ་ཞེས་བརྗོད། བཞི་པ་འོད་གསལ་ཆོས་ཅན། ཁྱོད་ལ་ཐམས་ཅད་སྟོང་པ་ཞེས་བརྗོད་པའི་རྒྱུ་མཚན་ཡོད་དེ། བཞི་པ་འོད་གསལ་གྱི་རང་དུས་སུ་སྔ་མ་ཉེར་ཐོབ་ཀྱི་ཡེ་ཤེས་དང་དེའི་བཞོན་པར་གྱུར་པའི་རླུང་གཉིས་ཀས་སྟོང་པས་ན་ཐམས་ཅད་སྟོང་པ་ཞེས་བརྗོད་དོ། ༈ །དེ་ཡང་ཆོས་ཉིད་ལྟ་བའི་ལྟ་བས་འཁོར་འདས་ཀྱི་ཆོས་ཐམས་ཅད་རང་བཞིན་མཉམ་པ་ཆེན་པོར་གཏན་ལ་དབབ། ཆོས་ཅན་ལྟ་བའི་ལྟ་བས་སྣང་སྲིད་ཀྱི་ཆོས་ཐམས་ཅད་སྐུ་དང་ཡེ་ཤེས་ཀྱི་རང་བཞིན་དག་པ་ཆེན་པོར་གཏན་ལ་དབབ། རང་རིག་ལྟ་བའི་ལྟ་བས་དེ་གཉིས་དབྱེར་མེད་མཚན་ཉིད་བསམ་བརྗོད་དང་བྲལ་བར་མངོན་སུམ་རང་ཐོག་ཏུ་གཏན་ལ་ཕབ་ནས་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་ཤེས་པར་བྱ་བ་ནི་རྡོ་རྗེ་རྩེ་མོའི་གྲུབ་མཐའི་གནད་གསང་བ་བླ་ན་མེད་པའོ། །གཞན་ཡང་ཁ་ཅིག་གིས། གསང་སྔགས་ཀྱི་གྲུབ་མཐའ་ནི་ལྟ་བ་དབུ་མ་ལས་ཐབས་ཁྱད་པར་དུ་འཕགས་པ་ཙམ་དུ་འདོད་པ་ནི་མི་རིགས་ཏེ། དབུ་མ་དང་སྔགས་གཉིས་དོན་དམ་སྤྲོས་བྲལ་དང་ཀུན་རྫོབ་སྒྱུ་མ་ཙམ་དུ་མཉམ་པར་ལྟ་བ་མཐུན་ན་ཡང་དེ་ཙམ་གྱིས་སྔགས་ཀྱི་ལྟ་བ་གཏན་ལ་མི་ཕེབས་ཏེ། སྔགས་ཀྱི་ཐུན་མོང་མ་ཡིན་པའི་ལྟ་བ་ནི་བདེན་པ་དབྱེར་མེད་སྣོད་བཅུད་དག་མཉམ་ཆེན་པོར་གཏན་ལ་འབེབས་དགོས་པའི་ཕྱིར། དེ་ཡང་ཆོས་ཉིད་ལྟ་བའི་ངོས་ནས་ཆོས་ཐམས་ཅད་སྤྲོས་བྲལ་དམིགས་བསམ་བརྗོད་འདས་ཆེན་པོར་གཏན་ལ་འབེབས་པའི་ཆ་ནས་མདོ་སྔགས་ཀྱི་ལྟ་བ་ལ་ཁྱད་མེད་ཀྱང་། ཆོས་ཅན་ཀུན་རྫོབ་ལྟ་བའི་ངོས་ནས་ཕུང་ཁམས་སྐྱེ་མཆེད་དག་པ་ལྷ་ཡི་འཁོར་ལོར་མདོ་ནས་བཤད་པ་མེད་ཅིང་སྔགས་བླ་མེད་ནས་བསྟན་པས་ཁྱད་པར་དུ་འབྱེད་པ་སྟེ། དེ་ལྟར་ཀུན་རྫོབ་ཀྱི་ངོས་ནས་སྔགས་ཀྱི་ལྟ་བ་མདོ་ལས་འཕགས་པའི་རྒྱུ་མཚན་གྱིས་དེ་ཉིད་ཀྱི་སྣང་གཞི་སྟོང་ཉིད་ཀྱང་སྤྲོས་བྲལ་ཡིན་པ་ཙམ་དུ་འདྲ་ཡང་། འདིར་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པའི་རྣམ་ཀུན་མཆོག་ལྡན་གྱི་སྟོང་ཉིད་ལ་འདོད་པས་ཁྱད་པར་ཤིན་ཏུ་ཆེའོ། །གལ་ཏེ་ཁྱེད་ཅག་གི་རྒྱུ་རྒྱུད་དེ་རིག་པ་འགྱུར་མེད་ལ་དེ་བཞིན་ཉིད་དུ་བྱེད་པར་འདུག་པས། དེ་འདྲ་དེ་འཁོར་ལོ་ཐ་མའི་ངེས་དོན་གྱི་མདོ་ཟབ་མོ་རྣམས་དང་། དེའི་དགོངས་འགྲེལ་རྒྱུད་བླ་མ་སོགས་ལས་ཀྱང་འབྱུང་བས་རྟོགས་བྱའི་ཡུལ་ལ་ཁྱད་མེད་དམ་ཞེ་ན། རིག་པ་འགྱུར་མེད་ལ་རྒྱུ་རྒྱུད་བྱེད་པ་འཁོར་ལོ་ཐ་མ་ནས་གསུངས་པ་དང་འདྲ་བ་བདེན་མོད་ཀྱི། ད་དུང་དེས་སྔགས་ཀྱི་ཐུན་མོང་མིན་པའི་ལྟ་བ་གཏན་ལ་ཕེབས་པར་མི་འགྱུར་ཏེ། དེ་བཞིན་ཉིད་དེ་བླ་ན་མེད་པའི་རྒྱུད་འདིར་རྒྱུ་རྒྱུད་དུ་འཇོག་པའི་ཚེ་ན་ལྷན་ཅིག་སྐྱེས་པ་མི་འགྱུར་བའི་བདེ་བ་ཆེན་པོའི་རང་བཞིན་དུ་བྱས་པ་ནི་སྔགས་ཀྱི་ཁྱད་ཆོས་སུ་དེ་བཞིན་གཤེགས་པ་སྲས་བཅས་བཞེད་པའི་ཕྱིར་ཏེ། རྡོ་རྗེ་མེ་ལོང་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཞེས་དང་། དུས་འཁོར་ལས། དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། །ཞེས་གསུངས། དེ་ཡང་གཉིས་སྣང་འཁོར་བའི་ཆོས་འདི་རྣམས་ཐག་ཁྲའི་སྦྲུལ་ལྟར་མེད་སྣང་གློ་བུར་བ་དང་། དེའི་སྣང་གཞི་གནས་ལུགས་དེ་བཞིན་ཉིད་ཡིན་པའི་གནད་ཀྱིས། རྟོག་ཚོགས་སྐུ་དང་ཡེ་ཤེས་ཀྱི་དཀྱིལ་འཁོར་དུ་དག་པ་ལས་གསུངས་པ། ཕུང་སོགས་སྣང་གཞི་དེ་བཞིན་ཉིད་ཀྱི་རྩལ་གཉུགས་མ་སྟེ། ཤིན་ཏུ་ཕྲ་བའི་ཡེ་ཤེས་ཀྱི་རྩ་དང་། ཡེ་ཤེས་ཀྱི་རླུང་། ཡེ་ཤེས་ཀྱི་ཁམས་ཞེས་སམ། ཡང་ན་ས་ཆུ་གཉིས། མེ་རླུང་གཉིས། མཁའ་སེམས་གཉིས་ཟུང་དུ་འཇུག་པ་རྣམས་རིམ་པར་ཡེ་ནས་སྐུ་གསུམ་རྡོ་རྗེ་གསུམ་གྱི་ངོ་བོར་གཞན་གྱིས་མ་བཙལ་བར་ལྷུན་གྱིས་གྲུབ་པ་དང་། ཁམས་ལྔའི་དྭངས་མ་ཡེ་ཇི་བཞིན་རིགས་ལྔ་དང་། ཡེ་ཤེས་ཀྱི་ཁམས་རིགས་དྲུག་པའི་བདག་ཉིད་དུ་དག་པས་ལྷའི་བདག་ཉིད་དུ་བཞུགས་པ་ཡིན་ནོ་གསུངས། ། ༈ གསར་མས་མདོ་སྔགས་གཉིས་ཀ་ལྟ་བས་ནི་མི་འབྱེད་དེ། ཤེས་རབ་ནི་འཕགས་བཞི་བསྐྱེད་པའི་མ་ཡིན་ལ། དེས་ན་མདོ་སྔགས་གཉིས་ཀ་ཐབས་ཀྱི་སྒོ་ནས་འབྱེད་དགོས་ལ། ཐབས་དེ་ལ་མཚན་ཉིད་ཐེག་པ་ནས་རྒྱུ་ཕ་རོལ་ཕྱིན་པ་དྲུག་རྒྱུའི་སྒོ་ནས་ཉམས་སུ་ལེན་ལ། སྔགས་ནས་ད་ལྟ་མ་དག་པའི་གཟུང་རྣམ་འདི་དག་དག་པ་སངས་རྒྱས་ཀྱི་གནས་ལུས་ལོངས་སྤྱོད་མཛད་པ་དང་བཅས་པ་ད་ལྟ་ནས་ལམ་དུ་བྱེད་པ་ཡིན་ཏེ། དེ་ཡང་གནས་འོག་མིན་སྟུག་པོ་བཀོད་པའི་ཞིང་ཁམས། ལུས་ལོངས་སྤྱོད་རྫོགས་པའི་སྐུ་མཚན་དཔེས་བརྒྱན་པ། ལོངས་སྤྱོད་གསལ་ཞིང་དག་པའི་འོད་ཟེར། དགྱེས་དགུར་སྤྱོད་པའི་ལོངས་སྤྱོད། ཁྱད་པར་འཕགས་པའི་གདན་ཁྲི། མཛད་པ་སངས་རྒྱས་ཀྱི་མཛད་པ་ལྟར་འབྲས་བུ་ཡོངས་དག་བཞིའི་སྒོ་ནས་ལམ་དུ་བྱེད་པས་ཁྱད་པར་འཕགས་སོ་ཞེས་ཟེར། རང་ལུགས་ལ། ཐབས་ཀྱིས་ཁྱད་པར་དུ་འཕགས་པ་བཞིན་དུ་ལྟ་བས་ཀྱང་འཕགས་ཏེ། ལྟ་བ་ནི་གཏན་ལ་འབེབ་བྱེད་ཡུལ་ཅན་གྱི་ངོས་ནས་འཇོག་དགོས་པའི་ཕྱིར། དོན་དམ་བདེ་བ་ཆེན་པོ་དང་ཀུན་རྫོབ་སྐུ་དང་ཡེ་ཤེས་སུ་བལྟ་བ་སོགས་ཀྱིས་ཁྱད་པར་འཕགས་སོ། ཞེས་གསུངས། མི་ཕམ་རིན་པོ་ཆེས། སྣང་བ་རང་ག་མ་འདི་རང་བཞིན་སྟོང་ཆེན་གྱི་དབྱིངས་སུ་སྡོམ་ཐུབ་མ་ཐུབ་ཀྱི་བློ་ཁྱད་ལས། སྣང་སྲིད་འདི་གདོད་ནས་དག་པ་རབ་འབྱམས་ཀྱི་འཁོར་ལོར་འདོད་དང་མི་འདོད་འབྱུང་བ་ཡིན་ཏེ། སྣང་བ་འདི་དག་བསལ་ཞིང་སྤངས་ཏེ་ཐག་རིང་བ་ལྟ་བུ་ཞིག་ནས་སྟོང་པ་ཉིད་བཙལ་མི་དགོས་པར། འདི་དག་དང་རང་བྱུང་ལྷན་ཅིག་སྐྱེས་པའི་ཆོས་སྐུ་ཤེས་རབ་ཀྱི་ཕ་རོལ་ཏུ་ཕྱིན་མ་མཐོང་ནས། སྣང་སྲིད་འདི་ལྷུན་གྲུབ་གཞིར་བཞེངས་ཀྱི་དཀྱིལ་འཁོར་དུ་ཁས་བླངས་ན་ཤིན་ཏུ་ཅིའི་མི་འཐད་དེ་སོམ་ཞིག །ཚུལ་འདི་ལྟ་བུ་དབུ་མས་མིང་གིས་བསྟན་ཀྱང་དོན་བདེན་གཉིས་དབྱེར་མེད་ཀྱི་གནས་ལུགས་ལ་གཞོལ་བའི་དབུ་མ་ཆེན་པོ་ཡིན་པས་འདི་ལ་དགོངས་ནས་མདོ་སྔགས་ཀྱི་ལྟ་བ་ལ་ཁྱད་མེད་གསུངས་པ་མ་གོ་ནས། མེད་དགག་གི་རྟོག་པ་ཡོད་འཛིན་གྱི་གཉེན་པོ་བྱེད་ཙམ་ལས་སྔགས་ཀྱི་ལྟ་བ་མ་འཕགས་ཟེར་བ་ནི། གཞི་ལམ་འབྲས་རྒྱུད་ཀྱི་རྣམ་བཞག་སོགས་སྔགས་ལ་སྐུར་བ་གདབ་པའི་ཕུང་ཁྲོལ་ཆེན་པོ་ཡིན་ནོ། །དེ་ལྟར་མཐོང་ན་ངེས་དོན་མཐར་ཐུག་རྫོགས་པ་ཆེན་པོའི་གནད་ཐུན་མིན་ལ་ངེས་ཤེས་སྐྱེ་ཞིང་། ངན་རྟོག་ཐེ་ཚོམ་གྱི་རྩིག་པ་ཐམས་ཅད་ཅིག་ཆར་འཇིག་པར་འགྱུར་བ་གདོན་མི་ཟའོ། །ཞེས་མི་ཕམ་རིན་པོ་ཆེའི་ལྕང་སྐྱའི་ལྟ་མགུར་འགྲེལ་བ་ལས་གསུངས། ༈ །དཔལ་སྤྲུལ་རིན་པོ་ཆེས། རང་རྒྱུད་ཀྱི་དབང་པོ་ལྔ་ནི་རང་གི་ལུས་དང་། གཞན་རྒྱུད་ཀྱི་དབང་པོ་ལྔ་ནི་ཕྱི་ནང་གི་ལུས། ཡུལ་ལྔ་ཕྱིའི་ལུས་ཏེ་ལུས་ལ་བདེན་ཞེན་སྤངས་པས་ལུས་རང་ངོས་ནས་མ་གྲུབ་པར་རྟོགས་པ་ནི་ལུས་དྲན་པ་ཉེར་བཞགཡུལ་དང་དབང་པོ་བདེན་པར་མ་གྲུབ་ཕྱིན་དབང་ཡུལ་ཕྲད་པའི་རེག་པ་ཡང་བདེན་པར་མེད་ལ། དེ་མེད་པས་ཚོར་བ་ཡང་བདེན་པར་དམིགས་སུ་མེད་པ་ནི་ཚོར་བ་དྲན་པ་ཉེར་བཞགསེམས་དང་རིག་པའི་ལ་ཤན་དབྱེ་སྟེ་སེམས་རྟོག་འཁྲུལ་བའི་སྣང་བ་རྫུན་པར་ཤེས་པ་ནི་སེམས་དྲན་པ་ཉེར་བཞགཡུལ་ཅན་གྱི་བློ་འཁྲུལ་བ་ཡིན་ཕྱིར་དེའི་ཡུལ་བདེན་པར་ཡོད་མི་སྲིད་པས་སེམས་འཁྲུལ་སྣང་གི་ཡུལ་དུ་གྱུར་པའི་ཆོས་ཐམས་ཅད་རང་བཞིན་མེད་པར་ཤེས་པ་ནི་ཆོས་དྲན་པ་ཉེར་བཞག་སྟེ་ལྟ་བ་ཤེས་རབ་ཀྱི་རང་བཞིན་སྤྲོས་བྲལ་རྗེན་པར་མཐོང་བའི་ངོ་བོར་འདུས་པ་ཡིན་ནོ། །ངན་རྟོག་མི་དགེ་བའི་ཀུན་སློང་སྐྱེས་ཙམ་ནས་རང་བབ་དགོངས་པའི་ངོ་བོར་རང་གྲོལ་དུ་དག་པ་ནི་མི་དགེ་བའི་ཕྱོགས་སྐྱེས་པ་རྒྱུན་གཅོད་པ། རྟོགས་པ་རང་གནས་ཀྱི་ངང་དང་མ་བྲལ་བས། ཆགས་སྡང་རང་མཚན་པ་སྐྱེ་མི་སྲིད་པ་ནི། མི་དགེ་བའི་ཆོས་མ་སྐྱེས་པ་མི་བསྐྱེད་པ། རྟོགས་པ་གནས་ལུགས་ཀྱི་དོན་རང་ངོ་སྤྲད་པས་ཇི་ལྟ་བ་བཞིན་དུ་རྟོགས་པ་ནི་དགེ་བའི་ཆོས་ཉིད་ཀྱི་གཤིས་ལ་འདུན་པ་ཡིན་པས་ཆོས་མ་སྐྱེས་པ་བསྐྱེད་པ། ངོ་འཕྲོད་པའི་རྟོགས་པ་དེ་ཉིད་ཕྱིས་འབད་རྩོལ་ལ་མ་ལྟོས་པར་རང་ཤུགས་ཀྱིས་འཆར་ཞིང་དེའི་རྩལ་ངེས་འབྱུང་དང་སྙིང་རྗེ་ལ་སོགས་ལམ་གྱི་ཡོན་ཏན་ཐམས་ཅད་རང་ཤུགས་ཀྱིས་འཆར་བ་ནི་དགེ་བའི་ཆོས་སྐྱེས་པ་གོང་དུ་སྤེལ་བ་སྟེ། སྤང་བླང་རྟོག་པའི་འདོར་ལེན་རིག་ངོར་སྤངས་པའི་སྤྱོད་པ་ནི་ཡང་དག་སྤོང་བ་བཞིའོ། །རྩོལ་མེད་ཀྱི་ངང་ལ་གནས་པ་ནི་ཆོས་ཉིད་ཀྱི་གཤིས་ལ་འདུན་པ་ཡིན་པས་འདུན་པའི་རྫུ་འཕྲུལ་གྱི་རྐང་པ། མི་བརྩོན་པའི་བརྩོན་པ་རང་བཞག་གི་ཡེ་ཤེས་ནི་བརྩོན་པའི་རྫུ་འཕྲུལ་གྱི་རྐང་པ། རྟོག་པ་ཐམས་ཅད་དང་བྲལ་བའི་རང་གནས་ཀྱི་བསམ་གཏན་ནི་སེམས་པའི་རྫུ་འཕྲུལ་གྱི་རྐང་པ། ཟང་མ་ཐལ་བྱུང་གི་ཡེ་ཤེས་རིག་པའི་དྭངས་ཆ་དཔྱོད་བྱེད་ཤེས་རབ་ཀྱི་ངོ་བོ་ནི་དཔྱོད་པའི་རྫུ་འཕྲུལ་གྱི་རྐང་པ་སྟེ་རྫུ་འཕྲུལ་གྱི་རྐང་པ་བཞི་ནི་མི་སྒོམ་པའི་སྒོམ་པ་མཉམ་བཞག་རྟོགས་པའི་ཡེ་ཤེས་ཀྱི་ངོ་བོར་རྫོགས་པ་ཡིན་ནོ། །གཤིས་གནས་ལུགས་ཆོས་སྐུའི་དགོངས་པའི་གཤིས་ལ་གཅིག་ཏུ་མོས་པ་ནི་དད་པའི་དབང་པོ། དེའི་ཕྱིར་བློ་བྱས་བཅོས་མའི་བྱ་རྩོལ་ཐམས་ཅད་དང་བྲལ་བའི་བློ་བྲལ་རྟོགས་པའི་ཁོར་ཡུག་ལ་བརྩོན་པ་དང་ལྡན་པ་ནི་བརྩོན་འགྲུས་ཀྱི་དབང་པོ། འདིའི་སྐབས་ཀུན་མཁྱེན་ཆེན་པོས། སྒོམ་པས་དྲན་སྣང་ཡེ་ཤེས་མ་ཡེང་བྱ། །ཞེས་པ་ལྟར། དྲན་སྣང་ཡེ་ཤེས་སུ་སངས་པས་དྲན་བྱ་དང་དྲན་བྱེད་ཐ་དད་པ་མེད་དེ་དྲན་པ་ཡེ་ཤེས་ཀྱི་ངོ་བོར་མཚན་མའི་རྣམ་རྟོག་རང་གྲོལ་དུ་དག་ནས་སྤྲོས་བྲལ་རྗེན་པའི་རིག་ངོར་གནས་པ་ནི་དབང་པོ་ཕྱི་མ་གསུམ་སྟེ། རང་བབས་ཀྱི་དྲན་པ་ནི་དྲན་པའི་དབང་པོ། དེ་ཚེ་ཆོས་ཉིད་འོད་གསལ་ལས་མི་གཡོ་བའི་དགོངས་པ་ནི་ཏིང་ངེ་འཛིན་གྱི་དབང་པོ། ཟང་ཐལ་རིག་པའི་ཡེ་ཤེས་རང་ཤར་དགོངས་པའི་རྩལ་སྣང་དང་བཅས་པ་ནི་ཤེས་རབ་ཀྱི་དབང་པོའོ། །འདིར་བསྒོམས་བྱུང་ཤེས་རབ་ཀྱི་རྩལ་རྒྱས་པ་ནི་དྲོད་སྣང་བ་ཐོབ་པའི་ཡེ་ཤེས། ཐེག་པ་ཐམས་ཅད་ཀྱི་རྩེ་མོ་ཨ་ཏིའི་དགོངས་དོན་རྟོགས་པ་ནི་རྩེ་མོ་སྣང་བ་མཆེད་པའི་ཡེ་ཤེས་ཏེ་སྦྱོར་ལམ་སྔ་མ་གཉིས་པོའང་རིག་ངོར་ཤུགས་ཀྱིས་རྫོགས་པའོ། །ཡང་དག་པའི་ཆོས་ཉིད་ལ་མོས་པ་དང་བྲལ་བ་ནི་དད་པའི་མི་མཐུན་ཕྱོགས། བྱ་བ་ངན་ཞེན་དང་སྙོམ་ལས་སྒྲིབ་པའི་ལེ་ལོ་ནི་བརྩོན་འགྲུས་ཀྱི་མི་མཐུན་ཕྱོགས། ཉམས་ལེན་བརྗེད་འབྱམས་སུ་ཤོར་བའི་བརྗེད་ངས་ནི་དྲན་པའི་མི་མཐུན་ཕྱོགས། ཞི་གནས་ཀྱི་ཏིང་ངེ་འཛིན་ལ་སྒྲིབ་པའི་གཉིད་རྨུགས་རྒོད་འགྱོད་ལ་སོགས་བྱིང་རྒོད་ཀྱི་ཆ་ནི་ཏིང་ངེ་འཛིན་གྱི་མི་མཐུན་ཕྱོགས། ལྷག་མཐོང་རྟོགས་པའི་ཡེ་ཤེས་ལ་སྒྲིབ་པ་ཡང་དག་པའི་གནས་ལུགས་ལ་ཡིན་ནམ་མ་ཡིན་སྙམ་དུ་ཡིད་མི་ཆེས་པའི་ཐེ་ཚོམ་དང་། ཕྱིན་ཅི་ལོག་ཏུ་འཛིན་པའི་ལོག་ལྟ་ལ་སོགས་པ་ནི་ཤེས་རབ་ཀྱི་མི་མཐུན་ཕྱོགས་ཏེ་མི་མཐུན་ཕྱོགས་ཀྱི་རྟོག་པ་དེ་དག་རིག་པ་མ་བཅོས་པའི་ཆོས་སྐུ་རང་ངོ་ཤེས་པའི་སྐད་ཅིག་ཐུག་ཕྲད་ཅེར་གྲོལ་དུ་དག་པ་ནི། སྔར་གྱི་རྣམ་བྱང་བསྐྱེད་པའི་དབང་པོ་ལྔ་པོ་དེ་དག་གི་མི་མཐུན་ཕྱོགས་ཀྱིས་མི་བརྫི་བས་སྟོབས་སུ་གྱུར་པ་ཡིན་པས་སྟོབས་ལྔའོ། །དེ་ཡང་གྲོལ་ལུགས་ཀྱི་གདེངས་མེད་ན། ཞི་གནས་ལ་བརྟེན་ནས་ཉོན་མོངས་དེ་དག་མགོ་མནན་པས་འཕྲལ་དུ་མི་སྐྱེ་བ་ལྟར་སྣང་ཡང་རྐྱེན་དང་འཕྲད་ཚེ་རྟོག་པའི་དུག་རོ་ལྡང་ཞིང་། དེ་ཚེ་གྲོལ་ལུགས་ཀྱི་གདེངས་མེད་པས་ཐ་མལ་པ་དང་ཁྱད་མེད་ལ་རྗེས་དཔག་གི་དཔྱོད་པས་ཉོན་མོངས་པའི་རང་བཞིན་སྟོང་པ་ཉིད་ལ་སོགས་པར་གཏན་ལ་ཕབ་ནས་དཔྱད་ཀྱང་དེས་རྟོག་པ་རང་གྲོལ་དུ་འགྲོ་མི་ནུས་པས་ཉོན་མོངས་པའི་གཉེན་པོ་མི་བྱེད། རང་གྲོལ་གྱི་གནད་ཤེས་ན་ཉོན་མོངས་དང་རྣམ་རྟོག་ཅི་ཙམ་སྐྱེས་ཀྱང་རྟོག་པའི་རྩལ་སྦྱོང་དུ་འགྲོ་བ་ཡིན་པས་ཉོན་མོངས་པ་ལམ་དུ་བྱེད་པའི་གནད་ཀྱང་འདིར་འདུ་ལ། ལམ་གྱི་ཡོན་ཏན་ཐམས་ཅད་སྟོབས་སུ་འགྱུར་བ་ཡང་རང་གྲོལ་གྱི་གནད་ལ་ཐུག་པ་ཡིན་ནོ། །དེའི་ཚེ་ཆོས་སྐུའི་གཤིས་ལ་མི་སྐྲག་པ་ནི་བཟོད་པ་དང་། ཆོས་ཉིད་ཀྱི་རྟོགས་པ་མཆོག་དང་ལྡན་པ་ནི་ཆོས་མཆོག་གི་ཡེ་ཤེས་ཏེ། སྦྱོར་ལམ་ཕྱི་མ་གཉིས་ཀྱང་རང་གྲོལ་དགོངས་པའི་སྐད་ཅིག་མ་ལ་འདུ་བ་ཡིན་ནོ། །ཀུན་མཁྱེན་ཆེན་པོས། ཀློང་གྱུར་དུས་ན་ཡེངས་མེད་ཡེངས་མཁན་མེད། །བརྟན་པ་མཐར་ཕྱིན་ཡེངས་ཡུལ་ཆོས་ཉིད་ངེས། །ཞེས་པ་ལྟར་ཡེང་ཡུལ་ཆོས་ཉིད་དུ་ཤར་ཏེ། ཆོས་ཉིད་ཀུན་ཏུ་འགྲོ་བའི་རང་བཞིན་དུ་རྟོགས་ཚེ་རྩོལ་བྱུང་འདུ་བྱེད་ཀྱི་དྲན་པ་དང་བྲལ་ཏེ་རྩོལ་མེད་རང་ཤར་གྱི་དྲན་པ་ཡང་དག་བྱང་ཆུབ་ཀྱི་ཡན་ལགམཉམ་བཞག་ཏུ་ཤེས་རབ་རང་བྱུང་གི་སྒྲོན་མ་ཀ་དག་དངོས་མཚན་སྤངས་པའི་མངོན་སུམ་གྱི་དགོངས་པ་ཇི་ལྟ་བའི་རང་ངོ་ལ་གནས་ཤིང་། རྗེས་ཐོབ་ཏུ་བསྒོམས་བྱུང་རྟོགས་པའི་ཤེས་རབ་རྩལ་འབར་ཏེ། ཆོས་ཅན་ཇི་སྙེད་པའི་རྣམ་གྲངས་མཁྱེན་པའི་བསྒོམས་བྱུང་གི་ཤེས་རབ་ནི་ཆོས་རབ་རྣམ་འབྱེད་ཡང་དག་བྱང་ཆུབ་ཀྱི་ཡན་ལགངང་གནས་ཆུ་བོ་རྒྱུན་གྱི་བརྩོན་འགྲུས་ཀྱིས་ཆོས་ཉིད་རྟོགས་པ་དང་བརྟན་པར་བྱེད་པ་ནི་བརྩོན་འགྲུས་ཡང་དག་བྱང་ཆུབ་ཀྱི་ཡན་ལགབརྩོན་འགྲུས་དེའི་ལག་རྗེས་སེམས་ལ་ཤར་ནས་སེམས་ངན་རྟོག་གི་འཆིང་བ་ལས་གྲོལ་ཏེ། དགའ་བདེ་རྒྱུན་ཆད་མེད་པའི་ཏིང་ངེ་འཛིན་ལ་གནས་པ་ནི་དགའ་བ་ཡང་དག་བྱང་ཆུབ་ཀྱི་ཡན་ལགངང་གནས་བསམ་གཏན་གྱི་བརྩོན་པའི་ལག་རྗེས་ལུས་ལ་ཤར་ཏེ་ལུས་རང་དབང་དང་བྲལ་བའི་ལས་ཉོན་ལས་གྲོལ་ནས་ཤིན་སྦྱངས་ཀྱི་བདེ་བ་ཁྱད་པར་ཅན་སྐྱེས་ཤིང་། སྐྱེ་ཤིའི་སྡུག་བསྔལ་ལས་གྲོལ་བ་ནི་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ཡིན་ཏེ། རྒྱུད་བླ་མ་ལས། འཕགས་པས་སྐྱེ་དང་ན་བ་དང་། །རྒ་བའི་སྡུག་བསྔལ་རྩད་ནས་སྤངས། །ཞེས་སོ། །དེ་ལྟ་ན་རྟོགས་པ་ཀློང་དུ་གྱུར་པའི་རྣལ་འབྱོར་པ་ལ་སྐྱེ་རྒ་ན་འཆི་ལྟར་སྣང་བ་ཅི་ཡིན་ཞེ་ན། དེ་ནི་གཞན་སྣང་གདུལ་བྱའི་དབང་གིས་དེ་ལྟར་བསྟན་པ་ཡིན་གྱི་རང་ངོར་སྐྱེ་འཆི་རང་མཚན་པ་མེད་དོ། །མདོ་སྡེ་རྒྱན་ལས། དེ་ཡིས་ཆོས་ཀུན་སྒྱུ་མ་ལྟ་བུ་དང་། །སྐྱེ་བ་སྐྱེད་མོའི་ཚལ་འགྲོ་ལྟར་རྟོགས་ནས། །ཞེས་སོ། །དགོངས་པ་རང་གནས་ཀྱི་བསམ་གཏན་རྟོག་བྲལ་ཟང་ཐལ་གྱི་ཡེ་ཤེས་དང་འདུ་འབྲལ་མེད་པ་ནི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལགརོ་མཉམ་བླང་དོར་མེད་པའི་དགོངས་པ་མངོན་དུ་གྱུར་པས་ཡིན་མིན་ཡོད་མེད་བཟང་ངན་ལ་སོགས་གཉིས་ཆོས་ཐམས་ཅད་གཉིས་མེད་རིག་པའི་ཀློང་དུ་རོ་གཅིག་པ་ནི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་སྟེ་བྱང་ཆུབ་ཀྱི་ཡན་ལག་བདུན་དགོངས་པའི་རྩལ་ལ་རྫོགས་པའི་མཐོང་ལམ་འཕགས་པའི་ཡེ་ཤེས་ནི། ཆོས་ཉིད་ཀུན་ཏུ་འགྲོ་བའི་རང་བཞིན་རྟོགས་པས་ན་ཀུན་ཁྱབ་ཀྱི་ཡེ་ཤེས་ཡིན་ནོ། །དེ་ནས་ལྟ་བ་མངོན་སུམ་གྱི་ཡེ་ཤེས་རྟོགས་པས་བཟང་ངན་གྱི་རྟོག་པ་ཐམས་ཅད་ཆོས་ཉིད་དུ་གྲོལ་ཏེ་སྨྲ་སྤྱོད་ཡེ་ཤེས་སུ་འཆར་ཞིང་ཡུལ་སྣང་བདེ་ཆེན་དུ་འཆར་བས་ཡེང་ཡུལ་ཆོས་ཉིད་དུ་དག་སྟེ་རྩོལ་མེད་ཀྱི་དྲན་པ་ལ་གནས་པ་ནི་ཁྱབ་གདལ་ཆེན་པོའི་ཏིང་ངེ་འཛིན་ཅེས་བྱ་སྟེ། ཇི་སྐད་དུ། དྲན་པ་རང་གྲོལ་ཐིག་ལེའི་ངང་། །ཁྱབ་གདལ་ནམ་མཁའི་ཁོར་ཡུག་ལ། །དྲན་པས་བཟུང་དང་མ་བཟུང་མེད། །དྲན་པའི་སྒྲོག་བཅིངས་མཐོལ་ལོ་བཤགས། །ཞེས་སོ། །དེ་ལྟར་འཕགས་པའི་ལམ་ཡན་ལག་ཀྱང་རིག་ངོར་རོ་གཅིག་ཏུ་རྫོགས་པ་ཡིན་ཏེ། ལྟ་བ་ཆོས་ཉིད་ཀྱི་གནས་ལུགས་མཐོང་བ་ནི་ཡང་དག་པའི་ལྟ་བ། ལྟ་བ་དེའི་རྩིས་ཟིན་པས་བཟང་ངན་གྱི་རྟོག་པ་ཐམས་ཅད་རང་ངོར་གྲོལ་བ་ནི་ཡང་དག་པའི་རྟོག་པ། དེས་ན་ངག་གི་སྨྲ་བ་ཐམས་ཅད་ཀྱང་ཡེ་ཤེས་ཀྱི་རོལ་པར་འཆར་བ་ནི་ཡང་དག་པའི་ངགསྤྱོད་ལམ་ཐམས་ཅད་ཡེ་ཤེས་ཀྱི་རོལ་པར་ཅིར་སྣང་དགག་སྒྲུབ་མེད་པས་ཅི་བྱེད་གཞན་དོན་དུ་འབྱུང་བ་ནི་ཡང་དག་པའི་ལས་མཐའ། གཟུགས་སྒྲ་དྲི་རོ་རེག་བྱ་ལ་སོགས་པའི་ཕྱི་ཡུལ་ལྔའི་འདོད་ཡོན་ཐམས་ཅད་བདེ་བ་ཆེན་པོའི་ཡེ་ཤེས་ཀྱི་རྣམ་རོལ་དུ་འཆར་བ་ན་ལོག་པའི་འཚོ་བ་འབྱུང་མི་སྲིད་པ་ནི་ཡང་དག་པའི་འཚོ་བ། ལམ་རང་ཤུགས་ཀྱིས་འབྱུང་བས་རང་དོན་ལམ་གྱི་རྩོལ་བ་ངང་གིས་སྐྱེས་ནས་རྩོལ་མེད་ཀྱི་བརྩོན་པ་ཡང་དག་པའི་བརྩོན་འགྲུས། རྩོལ་བ་མེད་བཞིན་དགོངས་པ་ཆོས་ཉིད་ལས་མི་གཡོ་བའི་དྲན་པ་ནི་ཡང་དག་པའི་དྲན་པ། དེའི་ཚེ་དཔའ་བར་འགྲོ་བ་ལ་སོགས་པའི་ཏིང་ངེ་འཛིན་གྱི་སྒོ་བརྒྱ་ཕྲག་ལ་སྙོམས་པར་འཇུག་ཅིང་ལྡང་བ་ནི་ཡང་དག་པའི་ཏིང་ངེ་འཛིན་ཏེ་སྒོམ་ལམ་དུ་འཕགས་ལམ་བརྒྱད་སྒོམ་པའི་དོན་ནོ་ཞེས་གསུངས། ༈ ཚོགས་ལམ་འབྲིང་པོའི་སྐབས་སུ་ཡང་དག་པར་སྤོང་བ་བཞི་གཙོ་བོ་བསྒོམ་པ་སྟེ། མི་དགེ་བའི་ཆོས་མ་སྐྱེས་པ་མི་བསྐྱེད་པ་དང་། མི་དགེ་བའི་ཆོས་ཞིག་རྒྱུད་ལ་སྐྱེས་ན་སྐྱེས་པ་དེ་མྱུར་དུ་གཅོད་པ་དང་། དགེ་བའི་ཆོས་རྣམས་རྒྱུད་ལ་མ་སྐྱེས་པ་བསྐྱེད་པར་བྱེད་པ་དང་། སྐྱེས་པ་རྣམས་གོང་ནས་གོང་དུ་འཕེལ་བར་བྱེད་པ་ལ་བརྩོན་འགྲུས་རྩོམ་པ་སྟེ་བཞིའོ། །ཚོགས་ལམ་ཆེན་པོ་ནི། རྫུ་འཕྲུལ་གྱི་རྐང་པ་བཞི་སྒོམ་པ་སྟེ། འདུན་པའི་རྫུ་འཕྲུལ་གྱི་རྐང་པས་མ་དད་པ་དང་ལོག་པར་ལྟ་བ་ལ་སོགས་པས་སེམས་མི་གཡོ་བར་ཏིང་ངེ་འཛིན་ལ་མོས་ཤིང་དགའ་བས་འཇུག་ཅིང་བསྒོམ་པའོ། །བརྩོན་པའི་རྫུ་འཕྲུལ་གྱི་རྐང་པས་ཏིང་ངེ་འཛིན་གྱི་སྒོ་ལ་མཉམ་པར་འཇོག་པ་ལ་རབ་ཏུ་བརྩོན་པས་དེ་དག་གི་སྐྱོན་དང་གེགས་སེལ་བ་དང་། ཡོན་ཏན་བསྒྲུབ་པ་ལ་རབ་ཏུ་བརྩོན་ཞིང་རྐྱེན་དབང་དུ་མི་གཏོང་བའོ། །སེམས་པའི་རྫུ་འཕྲུལ་གྱི་རྐང་པས་སེམས་རྩེ་གཅིག་ཏུ་གནས་ཤིང་རྣམ་རྟོག་དང་གཞན་དབང་སོགས་ཀྱི་ཆ་གཉིས་སུ་མ་གྱུར་ཅིང་བསམ་གཏན་ཏིང་ངེ་འཛིན་མངོན་དུ་བྱེད་དོ། །དཔྱོད་པའི་རྫུ་འཕྲུལ་གྱི་རྐང་པས་སྤྱོད་ལམ་ཐམས་ཅད་དུ་ཏིང་ངེ་འཛིན་དེའི་རྒྱུན་སྐྱོང་སྟེ། དེ་ཡང་མངོན་པར་ཤེས་པ་ལ་སོགས་པ་ནི་རྫུ་འཕྲུལ་ཡིན་ཏེ་རང་རྒྱུད་ལ་ཐོབ་པར་བྱེད་པའི་ཐབས་ཡིན་ནོ། །འདིར་ཏིང་ངེ་འཛིན་གྱི་རྩལ་དུ་མ་རྣམ་པ་མང་པོར་བརྫུ་ཞིང་འཕྲུལ་པ་ནི་ཏིང་ངེ་འཛིན་ཏེ། དེའི་ཕྱིར་ན་རྐང་པ་ཞེས་བྱའོ། །སྦྱོར་ལམ་ངེས་འབྱེད་ཆ་བཞིའི་སྐབས་སུ་དྲོད་རྩེ་གཉིས་ལ་དབང་པོ་ལྔ་བསྒོམ་པ་ནི། དད་པའི་དབང་པོས་མཐོང་ལམ་གྱི་ཡེ་ཤེས་ལ་ལྷག་པར་མོས་ཤིང་། བརྩོན་འགྲུས་ཀྱི་དབང་པོས་གཡེལ་བ་མེད་པར་མཐོང་ལམ་གྱི་ཡེ་ཤེས་རང་རྒྱུད་ལ་བསྐྱེད་པའི་ཐབས་འབད་པར་བྱའོ། །དྲན་པའི་དབང་པོས་ལྷག་པ་ཚུལ་ཁྲིམས་ཀྱི་བསླབ་པ་མི་ཉམས་པར་བསྲུང་བ་དང་། ཏིང་ངེ་འཛིན་གྱི་དབང་པོས་ལྷག་པ་ཏིང་ངེ་འཛིན་གྱི་བསླབ་པ་ལ་མཉམ་པར་འཇོག །ཤེས་རབ་ཀྱི་དབང་པོས་ལྷག་པ་ཤེས་རབ་ཀྱི་བསླབ་པས་གནས་ལུགས་ཀྱི་ལྟ་བ་རང་རྒྱུད་ལ་བསྐྱེད་དེ་ཉམས་སུ་ལེན་ནོ། །བཟོད་པ་དང་ཆོས་མཆོག་གཉིས་ཀྱི་སྐབས་སུ་གོང་གི་དབང་པོ་ལྔ་པོ་དེ་ཉིད་ཀྱང་རང་རང་གི་སྒྲིབ་པ་དང་བྲལ་བར་ཉམས་སུ་ལེན་ཏེ། དེ་ཡང་མ་དད་པ་དང་། ལེ་ལོ་དང་། བརྗེད་ངེས་དང་། རྣམ་གཡེང་དང་། ཤེས་བཞིན་མ་ཡིན་པའི་བར་ཆད་ཀྱིས་གཏན་ནས་བརྫི་མི་ནུས་པའི་དད་བརྩོན་དྲན་པ་ཏིང་ངེ་འཛིན་ཤེས་རབ་དང་ལྔ་པོ་དེ་དག་སྟོབས་སུ་གྱུར་པའོ། །མཐོང་ལམ་གྱི་སྐབས་སུ་བྱང་ཆུབ་ཀྱི་ཡན་ལག་བདུན་ནི། དྲན་པ་ཡང་དག་བྱང་ཆུབ་ཀྱི་ཡན་ལག་ནི། གནས་ཀྱི་ཡན་ལག་སྟེ། སྔར་ཡང་ཡང་གོམས་པའི་དྲན་པ་དེ་ལས་བདེན་དོན་མངོན་སུམ་མཐོང་བ་སྐྱེ་ཞིང་དེས་སྔར་མ་ཤེས་ཤིང་མ་རྒྱལ་བ་ལས་རྒྱལ་བར་བྱེད་པས་འཁོར་ལོ་རིན་པོ་ཆེ་ལྟ་བུའོ། །ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི། རང་བཞིན་གྱི་ཡན་ལག་སྟེ་བདེན་དོན་མཐོང་བའི་ཤེས་རབ་ཀྱི་ངོ་བོ་མཚན་མ་ཐམས་ཅད་འཇོམས་པ་གླང་པོ་རིན་པོ་ཆེ་ལྟ་བུ་མི་མཐུན་ཕྱོགས་གཅོད་པའོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི། ངེས་པར་འབྱུང་བའི་ཡན་ལག་སྟེ། རང་གི་རྟོགས་བྱའི་མངོན་པར་ཤེས་པ་ལ་ངེས་པར་འབྱུང་བའམ་སྦྱོར་བར་བྱེད་པ་རྟ་མཆོག་རིན་པོ་ཆེ་ལྟར་གང་འདོད་དུ་ཕྱིན་པར་བྱེད་པའོ། །དགའ་བ་ཡང་དག་བྱང་ཆུབ་ཀྱི་ཡན་ལག་ནི་ཕན་ཡོན་གྱི་ཡན་ལག་སྟེ་བདེན་དོན་མཐོང་བའི་ཆོས་ཀྱི་སྣང་བ་འཕེལ་བའི་དགའ་བས་ལུས་སེམས་རྒྱས་པར་ཁྱབ་པ་ནོར་བུ་རིན་པོ་ཆེའི་འོད་ཀྱིས་ཁྱབ་པ་བཞིན་ནོ། །ཤིན་ཏུ་སྦྱངས་བ་ཡང་དག་བྱང་ཆུབ་ཀྱི་ཡན་ལག་ནི། ཤིན་སྦྱངས་སོགས་གསུམ་ནི་ཉོན་མོངས་མེད་པའི་ཡན་ལག་ཡིན་ཞིང་། དེ་ཡང་ཤིན་སྦྱངས་ནི་ཉོན་མོངས་མེད་པའི་གནས་ཡིན་ཏེ་ལུས་སེམས་ཤིན་ཏུ་སྦྱངས་བའི་བདེ་བས་ལས་སུ་རུང་བར་བྱས་པ་ནི་ཉོན་མོངས་མེད་པའི་སེམས་ཀྱི་གནས་སུ་གྱུར་པ་སྟེ། དཔེར་ན་བཙུན་མོ་རིན་པོ་ཆེས་རེག་པའི་བདེ་བ་སྟེར་བ་ལྟ་བུའོ། །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི། ཉོན་མོངས་མེད་པའི་གཞི་ཡི་ཡན་ལག་སྟེ་ཉོན་མོངས་པ་མི་སྐྱེ་བར་བྱེད་པ་སེམས་རྩེ་གཅིག་ཏུ་གནས་པ་ཡིན་ལ། དེ་ལས་བསམ་པའི་དོན་ཀུན་འབྱོར་པ་འབྱུང་བས་ཁྱིམ་བདག་རིན་པོ་ཆེ་ལས་ནོར་ཅི་འདོད་འབྱུང་བ་ལྟ་བུའོ། །བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི། ཉོན་མོངས་མེད་པའི་ངོ་བོ་སྟེ་ཆགས་སྡང་སོགས་དང་བྲལ་བའི་རང་བཞིན་དེ་ལས། དུས་ཇི་ལྟར་འདོད་པར་འཕགས་པའི་གནས་པ་ལ་གནས་པར་བྱེད་པས་བློན་པོ་རིན་པོ་ཆེས་དཔུང་གི་ཚོགས་འགྲོ་བ་དང་གནས་པ་དང་ལྡོག་པར་བྱེད་པ་ལྟ་བུའོ། །ཡང་ན་བཏང་སྙོམས་ཞེས་པ་ནི། དེ་ལྟར་བྱང་ཆུབ་སེམས་དཔའ་གང་ཞིག་རྣམས་ལ་གཡས་ནས་ཙན་དན་གྱི་ལྡེ་གུ་བྱུག་པ་དང་གཡོན་ནས་སྟེ་འུའི་ཤ་བཅད་ན་གཉིས་ལ་ཆགས་སྡང་མེད་ཅིང་མཉམ་པའོ། །སྒོམ་ལམ་གྱི་སྐབས་སུ་འཕགས་ལམ་ཡན་ལག་བརྒྱད་ནི། མཐོང་ལམ་རྣམ་པར་མི་རྟོག་པའི་ཡེ་ཤེས་མངོན་དུ་མཐོང་བས་ན་གནས་ལུགས་ཀྱི་ལྟ་བ་ཡང་དག་པར་རྟོགས་པ་ནི་ཡང་དག་པའི་ལྟ་བ། དེའི་མཐུས་ཉོན་མོངས་པ་ཐམས་ཅད་རྒྱུད་ལ་མི་སྐྱེ་ཞིང་རྟོག་པ་ཐམས་ཅད་ཤུགས་ཀྱིས་དགེ་བ་ནི་ཡང་དག་པའི་རྟོག་པ། སེམས་དགེ་བ་ལས་ངག་དང་ལུས་ཀྱི་མི་དགེ་བ་མི་འབྱུང་ཞིང་སྨྲས་ཚད་འགྲོ་ལ་ཕན་པ་ནི་ཡང་དག་པའི་ངགབྱ་བ་བྱེད་པ་གང་བྱས་ཀྱང་གཞན་དོན་དུ་འགྱུར་བ་ཡང་དག་པའི་ལས་ཀྱི་མཐའ་དང་། ལོག་པའི་འཚོ་བ་ལྔས་མ་བསླད་པ་རྟག་པར་ཆོག་ཤེས་པ་ནི་ཡང་དག་པའི་འཚོ་བ་དང་། ལོག་འཚོ་ལྔ་ནི། ཁ་གསག །ཚུལ་འཆོས། གཞོག་སློང་། རྙེད་ཚོལ། ཐོབ་འཇལ་ཏེ་ལྔ་པོ་སྤངས་བར་བྱས་སོ། །གཞན་དོན་དུ་སྐྱོ་ངལ་མེད་པ་གཡེལ་བ་སྤངས་ནས་བརྩོན་པ་ནི་ཡང་དག་པའི་བརྩོན་འགྲུས། རྟག་ཏུ་དྲན་པའི་རྒྱུན་སྐྱོང་བ་ནི་ཡང་དག་པའི་དྲན་པ། བསམ་གཏན་བཞི་ལ་སོགས་པར་མཉམ་པར་འཇོག་ཅིང་ཏིང་ངེ་འཛིན་དུ་མ་ལ་འཇུག་པ་ནི་ཡང་དག་པའི་ཏིང་ངེ་འཛིན་ཏེ་འཕགས་པའི་ལམ་ཡན་ལག་བརྒྱད་དོ། ། ༈ སེམས་ཀྱི་ཆོས་ཉིད་རང་བྱུང་གི་ཡེ་ཤེས་རང་བཞིན་གྱིས་འོད་གསལ་བ་དེ་ལ་སྤྲོས་པ་གང་ཡང་མེད་པས། དེ་ལ་གསར་དུ་རྟོགས་མ་རྟོགས་སོགས་གཉིས་ཆོས་ཀྱི་ཐ་སྙད་མེད་དོ། །སེམས་ལ་ནི་རྟོགས་མ་རྟོགས་གཉིས་སུ་ཡོད་དོ། དེའི་ཕྱིར་སེམས་ཀྱི་ཆོས་ཉིད་དེ་ལམ་གྱིས་རྟོགས་བྱ་ཡེ་ནས་གནས་པའི་དེ་བཞིན་ཉིད་ཡིན་ལ། དེ་རྟོགས་བྱེད་ནི་བློ་སྟེ། ཐོས་བསམ་སྒོམ་པའི་ཤེས་རབ་ཡིན་ལ། དེ་ནི་ཉན་པ་སོགས་ཀྱི་རྣམ་རྟོག་མ་འགགས་པའི་སྐབས་ཀྱི་ཡིད་ཡིན་ནོ། །ཡིད་དེས་ཆོས་ཉིད་དེ་ངོ་འཕྲོད་དུས། ཡིད་རང་ཉིད་ཀྱང་ཆོས་ཉིད་དེའི་ངང་དུ་རྟོགས་པ་ལ་གཟུང་འཛིན་ཐ་དད་དུ་མེད་དོ། །དེས་ན་གཞི་ཆོས་ཉིད་ལ་རྟོགས་མ་རྟོགས་ཀྱི་ཐ་སྙད་མེད་ཀྱང་། རྟོགས་མ་རྟོགས་ཀྱི་ཐ་སྙད་འདི་ཆོས་ཉིད་ཀྱི་ངང་ལས་ཤར་བའི་སེམས་ཅན་གྱི་བློ་དེ་ཡི་དབང་ལས་ཡིན་པར་ཤེས་པར་བྱའོ། །དེ་ལ་གྲོལ་ལམ་གྱིས་ཆོས་ཉིད་གཞིའི་འོད་གསལ་ལམ་གནས་ལུགས་ངོ་འཕྲོད་ན་དེའི་རྒྱུན་བསྐྱངས་བས། གོམས་པ་ཆགས་པའི་ཚེ། སྒོ་ལྔའི་རྣམ་ཤེས་ཡིད་ལ་ཐིམ། ཡིད་ཀུན་གཞིའི་རྣམ་ཤེས་དང་། དེ་ཀུན་གཞི། དེ་གཞི་ཆོས་ཉིད་འོད་གསལ་སྟོང་པ་ཉིད་ལ་ཐིམ་ཚེ་ཚོགས་བརྒྱད་ཀྱི་རྣམ་ཤེས་གཏན་ནས་ལོག་སྟེ་མེད་ནའང་། ཆོས་ཉིད་ཀྱི་རིག་གདངས་རང་བྱུང་འོད་གསལ་གྱི་ཤེས་རབ་ཉིད། སྔར་གོམས་པ་དེའི་དབང་གིས་སློང་བྱེད་རྐྱེན་གསུམ་བྲལ་བའི་ནམ་མཁའ་དཔེར་བྱས་པ་ལྟ་བུའི་ནང་གི་མངོན་པར་བྱང་ཆུབ་པ་འོད་གསལ་ངོས་ཟིན་པ་འབྱུང་ངོ་། །ལམ་རྐྱེན་དང་མི་ལྡན་པའི་ཕལ་པ་རྣམས་ལ་འཆི་དུས་དང་གཉིད་འཐུག་གི་དུས་སུ་ཚོགས་བརྒྱད་ལོག་རྗེས་སུ་ཡང་། ཆོས་ཉིད་ཀྱི་སེམས་སམ། གཉུག་སེམས་ལྡོག་པ་མི་སྲིད་དེ་འདུས་མ་བྱས་འཕོ་འགྱུར་མེད་པ་ཡིན་པས། དེ་མེད་པ་མ་ཡིན་ཀྱང་ངོས་མི་ཟིན་ཏེ་དེའི་ཕྱིར་དེ་སྐབས་སེམས་མེད་མུན་པའི་གནས་སྐབས་ཞེས་བཏགས་སོ། །རྣལ་འབྱོར་པས་ཐབས་ཀྱི་ལམ་གྱིས་འོད་གསལ་བའི་སེམས་མངོན་དུ་འགྱུར་ཕྱིར་བསྐྱེད་པའི་རིམ་པ་དང་། རྡོར་བཟླས་སོགས་སྔོན་དུ་བཏང་ནས། རྫོགས་རིམ་སྙིང་གི་ནཱ་ད་ཕྲ་བ་ལ་སེམས་ཟིན་པས་སྨིག་རྒྱུ་ལ་སོགས་པའི་རྣམ་པ་དང་། སྣང་མཆེད་ཐོབ་གསུམ་གྱི་སྐབས་སུ་དཀར་ལམ་དམར་ལམ་ནག་ལམ་གྱི་སྣང་བ་གསུམ་གྱི་མཐར་སྤྲིན་མེད་ནམ་མཁའ་ལྟ་བུའི་ཉམས་སྐྱེས་པ་དེའི་ཚེ། ཡིད་ཕྲ་བ་མ་འགགས་པས་གཞི་ཡི་འོད་གསལ་དངོས་མ་ཡིན་ཡང་དེའི་རྣམ་པ་ཆ་འདྲ་ཙམ་ཡིན་ལ། དེ་ཡང་ཡང་གོམས་པས་རྟོགས་པ་དོན་གྱི་འོད་གསལ་གྱི་བར་དུ་འགྱུར་རོ། །དེར་མ་ཟད་མཚན་མོ་སྙིང་ནང་གི་ཨ་དཀར་པོ་ལ་སེམས་བཟུང་བས། གཉིད་ཀྱི་ཤེས་པ་ནང་དུ་སྡུད་ཚེ་སྣང་བ་གསུམ་གྱི་ཉམས་དང་། ནམ་མཁའ་དག་པ་ལྟ་བུའི་འོད་གསལ་ཆ་འདྲ་འཆར་བ་དང་། ནམ་མཁའ་སུམ་ཕྲུག་སོགས་གདམས་པ་སྣ་ཚོགས་ཀྱི་སྒོ་ནས་ཀྱང་། དྭངས་གསལ་ནམ་མཁའ་འདྲ་བའི་ཉམས་འཆར་ཏེ་དེ་ཀུན་འོད་གསལ་དང་ཆ་འདྲ་ཙམ་དུ་རུང་མོད་ཀྱི། རྟོགས་པ་དོན་གྱི་འོད་གསལ་དངོས་མ་ཡིན་ཏེ་ཉམས་ཡིན་ལ། ཉམས་ཞེས་པ་སེམས་ལ་གནས་ལུགས་འོད་གསལ་དེའི་རྣམ་པ་ཆ་འདྲ་ཤར་བ་སྟེ་དཔེ་ཡི་འོད་གསལ་ཡང་ཟེར་རོ། །ཡེ་ཤེས་ཀྱི་ངོ་བོ་ལ་ཉམས་ཞེས་མི་བྱ་སྟེ། དོན་གྱི་འོད་གསལ་ཞེས་བྱའོ། །དེས་ན་ཡིད་རང་མཚན་པས་བསྒོམ་བྱ་འོད་གསལ་ལམ་སྟོང་ཉིད་ཅེས་གཟུང་འཛིན་དུ་སྒོམ་པ་ཐམས་ཅད། རྣམ་པ་སྟོང་ཉིད་འོད་གསལ་གྱི་ཆ་འདྲ་ཤར་ཀྱང་རི་མོ་བྲིས་པའི་ཟླ་བ་ལྟ་བུ་ཡིན་ལ། རྫོགས་ཆེན་གྱིས་སེམས་ཉིད་ངོ་སྤྲད་པའི་དོན་བཞིན་རང་སེམས་སྐྱེ་མེད་ཀྱི་གནས་ལུགས་ཐད་ཀར་བཟོ་བཅོས་དཔྱད་ར་མི་དགོས་པར་ཐག་ཆོད་ན་དཔེ་ཡི་ཡེ་ཤེས་དངོས་ཡིན་ཏེ་ཆུ་ནང་གི་ཟླ་གཟུགས་ལྟ་བུའོ། །འདི་འདྲའི་སེམས་ཀྱི་གནས་ལུགས་ཕྱག་ཆེན་ནམ་རྫོགས་ཆེན་རྟོགས་པའི་སྒོམ་པ་པོ་རྣམས་ཀྱིས་འདི་རྗེས་དཔག་གིས་རྟོགས་པ་མ་ཡིན་ཏེ། རང་གིས་མངོན་སུམ་དུ་རྟོགས་པ་ཡིན་པས། སྐྱེས་བུ་དམ་པ་མང་པོས་ཀྱང་འདི་སྔགས་ཀྱི་མཐོང་ལམ་ཡིན་ཞེས་གསུངས། ཡོན་ཏན་བརྒྱ་ཕྲག་བཅུ་གཉིས་སོགས་མེད་པ་ནི་ལུས་རྒྱས་སྒྲིབ་པ་སོགས་སུ་འཆད། ཀློང་ཆེན་རབ་འབྱམས་གྱིས་སྔགས་ཀྱི་མཐོང་ལམ་དངོས་མིན་ཡང་ཆོས་ཉིད་དེ་བཞིན་ཉིད་དངོས་སུ་རྟོགས་པ་ཡིན། མཐོང་ལམ་ལ་ཡོན་ཏན་བརྒྱ་ཕྲག་བཅུ་གཉིས་སོགས་ཡོད་དགོས་པས། འདི་རང་རིག་མངོན་སུམ་ཡིན་ཡང་དཔེ་ཡི་ཡེ་ཤེས་སུ་བཞེད། དོན་གྱི་ཡེ་ཤེས་ཟླ་བ་དངོས་མཐོང་ལམ་དུ་བཞེད་དོ། །དེས་ན་རྟོགས་བྱ་དང་རྟོགས་བྱེད་ནོར་བ་དང་། ཚོགས་བརྒྱད་ཀྱི་ནང་ཚན་གྱི་ཡིད་དང་། ཚོགས་བརྒྱད་ལས་འདས་པའི་ཡེ་ཤེས་ཀྱི་རང་རྩལ་དཔྱོད་བྱེད་ཀྱི་ཤེས་རབ་རང་བྱུང་གཉིས། ཆོས་རྣམས་རྣམ་པར་འབྱེད་པའི་མཚན་ཉིད་དུ་མཚུངས་པས། ཡེ་ཤེས་ནི་མ་ཤར་ཞིང་། རྣམ་ཤེས་ལ་རྫོགས་ཆེན་གྱི་དོན་འཚོལ་བ་དག་གིས། རྫོགས་པ་ཆེན་པོའི་བསྟན་བྱ་གཉུག་མའི་སེམས་ཞེས་པ་ཡིད་ཕྲ་བ་ཡིན་ནོ་ཞེས་སྨྲ། དེ་ཤིན་ཏུ་ནོར་ཏེ། གཉུག་སེམས་དང་། བདེ་གཤེགས་སྙིང་པོ་དང་། འོད་གསལ་བའི་སེམས་དང་། དོན་དམ་བྱང་ཆུབ་ཀྱི་སེམས་དང་། རང་བྱུང་གི་ཡེ་ཤེས་དང་། ཆོས་ཀྱི་དབྱིངས་རྣམས་མིང་གི་ལྡོག་པས་ཐ་དད་ཀྱང་། དོན་གྱི་ཐ་མི་དད་པ་ཡིན་ལ་དེ་འདྲའི་གཉུག་མ་འོད་གསལ་བའི་སེམས་འདུས་མ་བྱས་ཀྱི་དབྱིངས་ལས་འཁོར་འདས་གཉིས་སྣང་བ་ཡིན་ཡང་། འོད་གསལ་དེ་ཉིད་དེའི་རྒྱུད་དང་འཁོར་འདས་གཉིས་སུ་གྲུབ་པ་ནི་མ་ཡིན་ནོ། ། ༈ མི་ཕམ་རིན་པོ་ཆེས་མཛད་པའི་མཛོད་བདུན་དཀར་ཆག་རིན་ཆེན་མེ་ལོང་ལས། རྫོགས་ཆེན་ཁྲེགས་ཆོད་ཀྱི་ཉམས་ལེན་མཐར་ཕྱིན་པས་མ་དག་པའི་རླུང་སེམས་རང་འགགས་སུ་སོང་ནས་ལུས་རྡུལ་ཕྲན་དུ་དེངས་པ་ཡོད་ལ། འོད་གསལ་ཐོད་རྒལ་གྱི་སྣང་བཞི་མཐར་ཕྱིན་ཚེ། གདོས་བཅས་རགས་ལུས་འདི་འོད་དུ་ཡལ་ཏེ་རིག་པའི་ཡེ་ཤེས་འོད་གསལ་ཤིན་ཏུ་རྣམ་དག་གི་ངང་ལས་རང་ཤར་བའི་ཟུང་འཇུག་གི་ལྷ་སྐུ་ནམ་མཁའ་དང་མཉམ་པ་འགྲུབ་པ་ལ་འཇའ་ལུས་འོད་སྐུ་ཞེས་གསུངས་པ་འདི་རགས་ལུས་འདི་ཉིད་ཉེར་ལེན་གྱི་རྒྱུར་བྱས་ནས་སྒྲུབ་དགོས་པ་གཏན་མིན་ནོ། །རིམ་ལྔར་ཕྲ་བའི་རླུང་སེམས་ལས་སྒྱུ་མའི་སྐུ་སྒྲུབ་པ་འདི་ནི། རྣམ་ཤེས་དང་ཡེ་ཤེས། ལས་རླུང་དང་ཡེ་ཤེས་རླུང་གི་བྱེད་པ་འདྲེས་པ་ལས་སྒྲུབ་པ་ཡིན་པས། འདི་མ་དག་པ་དང་དག་པ་སློབ་པ་དང་མི་སློབ་པའི་ལྷ་སྐུར་རིམ་བཞིན་གནས་འགྱུར་དགོས་པ་ཡིན་ནོ། །སྔགས་ཕྱི་རྒྱུད་རྣམས་ལས་སྔགས་གྲུབ་པའི་མཐུས་འདོད་གཟུགས་ཀྱི་ལྷ་དང་སྐལ་པ་མཉམ་པའི་ལུས་སུ་གྱུར་ནས་མཁའ་སྤྱོད་ཀྱི་རིག་འཛིན་སོགས་གྲུབ་པ་ནི། སྔགས་ཀྱི་ལྷན་ཅིག་བྱེད་རྐྱེན་བྱས་པའི་མཐུས་རགས་ལུས་འདི་ཉིད་དྭངས་མར་གནས་གྱུར་པ་ཡིན་ཏེ། དཔེར་ན་གསེར་འགྱུར་གྱི་རྩིས་ལྕགས་ཉིད་གསེར་དུ་བསྒྱུར་བ་དང་། །བཅུད་ཀྱིས་ལེན་པས་རྒས་ལུས་གཞོན་ནུར་གྱུར་པ་བཞིན་ནོ། །དེས་ན་འདི་གསུམ་ལ་ཕྲ་རགས་དང་དག་མ་དག་གི་ཁྱད་པར་གནམ་ས་ལྟར་ཡོད་པ་ཤེས་ན། འཕགས་སྐོར་རིམ་ལྔའི་སྒྱུ་ལུས་བསྒྲུབ་ཚུལ་ཤེས་པས་རྙིང་མའི་འཇའ་ལུས་ཟེར་བ་བྱེ་མའི་འཆིང་བུ་ལྟར་འཇིག་ཟེར་བ། རྫོགས་ཆེན་གྱི་ཆོས་ལ་རྒྱུས་མེད་པའི་བབ་ཅོལ་གྱི་གཏམ་ཡིན་པའི་མཚངས་མངོན་དུ་རྟོགས་པར་འགྱུར་རོ། །རྫས་དང་སྔགས་དང་ཏིང་ངེ་འཛིན་དང་ལྷ་ཡི་ནུས་པས་རགས་ལུས་དྭངས་མར་སྦྱོང་ནུས་ན། མཚན་བཅས་ཐབས་ཀྱི་རྫོགས་རིམ་ཀུན་གྱི་བླ་མར་གྱུར་པ། མཚན་མ་མེད་པའི་རྫོགས་རིམ་ཨ་ཏིའི་ལམ་གྱིས། ཆོས་ཉིད་གཉུག་མའི་དོན་དང་། རང་བཞིན་འོད་གསལ་གྱི་སྣང་བ་དངོས་ཡུལ་དུ་བྱས་ཤིང་གོམས་པའི་མཐུ་ཡིས་རགས་ལུས་སྦྱོང་ནུས་པ་ལྟ་ཅི་སྨྲོས། དེས་ན་འདི་ལ་ཐེ་ཚོམ་སྐྱེ་བའི་གནས་ཅུང་ཟད་ཀྱང་མེད་དོ། །དེར་མ་ཟད་ཐུན་མོང་གི་ཐེག་པར་བརྟེན་ནས་འབྱུང་བའི་སྣང་བ་དང་རང་བཞིན་མེད་པའི་སྟོང་པ་ཉིད་བདེན་གཉིས་ཟུང་འཇུག་ཏུ་བཤད་པ་ལམ་གྱི་སྙིང་པོ་ཡིན་ལ། སྔགས་བླ་མེད་དུ་རྫོགས་པའི་རིམ་པ་ཟབ་མོའི་ཐབས་ལས་ཤར་བའི་སྒྱུ་ལུས་དང་འོད་གསལ་བའི་བདེན་གཉིས་ཟུང་དུ་འཇུག་པ་འདི་ལམ་གྱི་དངོས་གཞི་ཡིན་ཞིང་། འདི་ནི་རྒྱུ་ཡི་ཐེག་པ་ལས་སྦས་པའང་ཡིན་ནོ། །དེ་ལྟ་བུའི་བདེན་གཉིས་དེ་དག་གི་གནད་མཐར་ཐུག་པ་ནི། ཆོས་ཐམས་ཅད་ཀྱི་གནས་ལུགས་ངོ་བོ་ཀ་ནས་དག་པའི་སྟོང་ཉིད་འོད་གསལ་དང་། རང་བཞིན་ལྷུན་གྲུབ་ཏུ་གསལ་བའི་རང་གདངས་འགག་མེད་གཉིས་ཟུང་དུ་འཇུག་པ་རྫོགས་པ་ཆེན་པོར་ལ་བཟླ་དགོས་པ་ཡིན་པས། ཨ་ཏི་ཡོ་གའི་དགོངས་པ་འདི་དག་མཐར་ཐུག་ངེས་པའི་དོན་ཡིན་ཕྱིར། མདོ་སྔགས་ཐམས་ཅད་ཀྱི་འབྲས་བུ་འདི་རང་ལ་ཐུག་པ་ཤེས་པར་བྱའོ། །ཞེས་གསུངས་སོ། ། ༈ གང་ཟག་གི་བློ་རིམ་དང་མཐུན་པར། མ་རྟོགས་པ་འཇིག་རྟེན་ཕྱལ་བ་དང་། རྒྱང་འཕེན་གཉིས། ལོག་པར་རྟོག་པ་ཕྱི་རོལ་མུར་རྟུག་པ་དང་། མི་སྟེགས་གཉིས། ཕྱོགས་ཙམ་རྟོགས་པ་ཉན་ཐོས་དང་། རང་རྒྱལ་བ་གཉིས། ཡང་དག་ཉིད་མ་རྟོགས་པ་ཕ་རོལ་ཏུ་ཕྱིན་པའི་ཚུལ་ལ་གནས་པའི་བྱང་སེམས། འདུལ་བ་བྱ་བའི་རྒྱུད། དགོངས་པ་རྣལ་འབྱོར་གྱི་རྒྱུད། གསང་བ་རྣལ་འབྱོར་ཆེན་པོའི་ཚུལ། སྔགས་ནང་པ་བསྐྱེད་རྫོགས་གཉིས། རང་བཞིན་གསང་བ་རྫོགས་པ་ཆེན་པོའི་ཚུལ་ཏེ། འཇིག་རྟེན་ལས་འདས་མ་འདས་ཀྱི་ལྟ་བ་དང་། ཁྱད་པར་དུ་ཉན་རང་བྱང་སེམས་ཏེ་མཚན་ཉིད་ཀྱི་ཐེག་པ་གསུམ་དང་། བྱ་སྤྱོད་རྣལ་འབྱོར་ཏེ་སྔགས་ཕྱི་པ་གསུམ་དང་། བསྐྱེད་རྫོགས་རྫོགས་ཆེན་ཏེ་ནང་པ་གསུམ་དང་བཅས་པའོ། །ཕྱལ་བ་ནི། འདི་ལྟར་ཕྱི་ནང་གི་ཆོས་འདི་དག་ཐམས་ཅད་གང་འབྱུང་བའི་རྒྱུ་དང་གང་ལས་འབྱུང་བའི་འབྲས་བུ་འདི་དག་ཡོད་པའམ་མེད་པ་དག་ཏུ་ཡང་མ་རྟོགས་ཏེ་རང་གར་གནས་པ་སྟེ་དེ་དག་ནི་རྒྱུ་འབྲས་ལ་ཀུན་ཏུ་རྨོངས་པའི་མ་རིག་པ་དང་མཚུངས་པར་ལྡན་པའོ། །རྒྱང་འཕེན་ནམ་རྒྱང་ཕན་པ་ནི། ཚེ་སྔ་ཕྱི་ཡོད་པའམ་མེད་པ་དག་ཏུ་མ་རྟོགས་ཤིང་ཚེ་གཅིག་ལ་བཙན་ཕྱུག་དང་མཐུ་སྟོབས་སྒྲུབ་པ་ཡི་ཐབས་སྣ་ཚོགས་པ་ལ་འབད་པར་བྱེད་པ་སྟེ། དེ་ཡང་རྣམ་གྲོལ་གྱི་སྒོར་མ་གྱུར་པ་འཇིག་རྟེན་པས་བཤད་པ། འཇིག་རྟེན་གྱི་བྱ་བ་སྒྲུབ་པ་འཚོ་རྩིས་དང་སྲིད་སྐྱོང་དཔྱད་སོགས་དང་། གར་ཤིའི་ངན་སྔགས་དང་མོ་བོན་འདྲེ་མནན་ས་བདག་མཆོད་པ་གཡང་ལེན་སོགས་རང་ངམ་གཞན་ལ་བྱེད་དུ་འཇུག་པ་ལྟ་བུ་འཇིག་རྟེན་པའི་གསང་ཚིག་ལ་བརྟེན་པའོ། །མུར་ཐུག་པ་ནི། ལྟ་ཡུལ་ཤེས་བྱའི་ཆོས་ཐམས་ཅད་ལ་རྒྱུ་དང་འབྲས་བུ་མེད་པ་སྟེ། དེ་ཡང་ཚེ་གཅིག་ལ་སྐྱེས་པའི་ཆོས་ཐམས་ཅད་ཚེ་སྔ་མའི་ལས་ཀྱིས་མ་འཕངས་བར་སྤང་ལ་ཤྭ་མོ་དང་ཆུ་ལ་ཆུ་བུར་བཞིན་གློ་བུར་དུ་སྐྱེས་ལ་མཐའ་མར་མེ་རྒྱུན་ཆད་པ་ལྟར་ཆད་པར་བལྟ་བའོ། །མུ་སྟེགས་པ་ནི་རྟག་པར་སྨྲ་བའོ། །དེ་ཡང་འོད་སྲུང་གིས་ཞུས་པའི་མདོ་ལས། མུར་ཐུག་ནི་ཕྱི་རོལ་པ་ཐུན་མོང་དུ་བཤད་པ་དང་། མུ་སྟེགས་ཀྱང་རྟག་ཆད་དུ་སྨྲ་བའི་ཕྱི་རོལ་པ་སྤྱི་ལ་འཇུག་ཀྱང་། འདིར་དེ་གཉིས་རིམ་པ་ལྟར་ཆད་པ་དང་རྟག་པར་སྨྲ་བའི་ཕྱི་རོལ་པ་སྤྱི་མིང་དུ་སྦྱར་བར་བྱས་ན་སྒྲ་དོན་ལེགས་པར་འཕྲོད་ཅིང་གཞུང་འདིའི་དགོངས་པ་ཡིན་ནོ། །རྟག་ཆད་ཀྱི་ལྟ་བ་དེ་གཉིས་ཀྱི་ཁོངས་སུ་ཕྱི་རོལ་བའི་འདོད་པའི་རྟག་ཆད་ཀྱི་རྣམ་པ་མ་ལུས་པ་ཟད་པར་འདུའོ། །ཟག་མེད་ཀྱི་ལམ་དང་རྗེས་སུ་འབྲེལ་བ་འཇིག་རྟེན་ལས་འདས་པའི་ལམ་ལའང་དབྱེ་ན་རྣམ་པ་གཉིས་ཏེ། ཆོས་རྣམས་ཀྱི་རང་སྤྱི་དང་། ཀུན་བྱང་གི་མཚན་ཉིད་རྣམས་སོ་སོར་མ་འདྲེས་པར་སྟོན་ཅིང་དེ་ལ་སྤང་བླང་དུ་སྟོན་པ་མཚན་ཉིད་ཀྱི་ཐེག་པ་དང་ཀུན་བྱང་གཉིས་ངོ་བོ་དབྱེར་མེད་སྐུ་གསུང་ཐུགས་ཀྱི་དཀྱིལ་འཁོར་དུ་མི་ཕྱེད་པར་སྟོན་པ་རྡོ་རྗེའི་ཐེག་པའོ། །མཚན་ཉིད་ཀྱི་ཐེག་པ་ལའང་སྐལ་བ་དང་མོས་པ་དབང་པོའི་བྱེ་བྲག་གིས་མཚན་ཉིད་དེ་ལ་མངོན་པར་ཞེན་མ་ཞེན་གྱི་དབང་གིས་རྣམ་པ་གསུམ་སྟེ། རང་ཉིད་ཀྱི་གདམས་ངག་གཞན་ལས་ཉན་ཞིང་གཞན་ལ་ཐོས་པར་བྱེད་པ་ཉན་ཐོས་ཀྱི་ཐེག་པ་དང་། སྲིད་པ་ཐ་མའི་དུས་སུ་རང་ཉིད་ཀྱི་བདེན་པའི་འབྲས་བུ་ཁོང་དུ་ཆུད་པ་རང་སངས་རྒྱས་ཀྱི་ཐེག་པ་དང་། བྱང་ཆུབ་ཀྱི་ཕྱིར་བསམ་པ་བརྟན་པའམ་བྱང་ཆུབ་དང་སེམས་ཅན་ལ་དམིགས་པ་ཡོད་པས་བྱང་ཆུབ་སེམས་དཔའི་ཐེག་པའོ། །རྡོ་རྗེ་ཐེག་པ་དེ་ལའང་དབྱེ་ན་རྣམ་པ་གསུམ་སྟེ། ནང་གི་ཏིང་ངེ་འཛིན་རྒྱུའི་གཙོ་བོ་ཡིན་མོད་ཀྱི་ཕྱིའི་གཙང་སྦྲ་དང་དཀའ་ཐུབ་སོགས་ཀྱི་བྱ་བ་ལ་མ་ལྟོས་པར་དངོས་གྲུབ་མི་ཐོབ་པར་འདོད་པ་བྱ་བའི་རྒྱུད་ཀྱི་ཐེག་པ་དང་། ཕྱིའི་བྱ་བ་དང་ནང་གི་ཏིང་ངེ་འཛིན་གཉིས་ཀས་གྲུབ་པར་འདོད་པ་གཉིས་ཀའི་རྒྱུད་ཀྱི་ཐེག་པ་དང་། ཕྱིའི་བྱ་བ་ལ་མ་ལྟོས་ཀྱང་ནང་གི་ཏིང་ངེ་འཛིན་འབའ་ཞིག་གིས་གྲུབ་པར་འདོད་པ་རྣལ་འབྱོར་རྒྱུད་ཀྱི་ཐེག་པའོ། །རྣལ་འབྱོར་ནང་པ་ཐབས་ཀྱི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི་རྣམ་པ་གསུམ་སྟེ། ཐབས་བསྐྱེད་པ་གཙོ་བོར་སྟོན་པ་བསྐྱེད་པའི་ཚུལ་མ་ཧཱ་ཡོ་ག་དང་། ཤེས་རབ་རྫོགས་རིམ་ཤས་ཆེར་སྟོན་པ་རྫོགས་པའི་ཚུལ་ཨ་ནུ་ཡོ་ག་དང་། གཉིས་མེད་ཟུང་འཇུག་གཙོ་བོར་སྟོན་པ་ཨ་ཏི་རྫོགས་པ་ཆེན་པོའི་ཚུལ་ལོ། ། ༈ ཕྱོགས་བཅུའི་མུན་སེལ་ལས། སེམས་ལ་དབང་མ་ཐོབ་ཀྱི་བར་དུ་ནི་རྐྱེན་དང་ལས་ཀྱི་རྗེས་སུ་བྱེད་ལ། དེ་ཕན་ཆད་ནི་དུས་ཀྱང་ཅི་དགར་སྣང་སྟེ་རིང་བ་ཐུང་བར་བསྒྱུར་ཅིང་ཐུང་བ་རིང་བར་འཕྲུལ་བ་ལ་སོགས་པ་ཡོད་དེ། དུས་ཀྱང་སེམས་ཀྱི་སྣང་བ་ཙམ་ཡིན་པའི་ཕྱིར་རོ། །དེ་སྐད་དུའང་དྲི་མ་མེད་པར་གྲགས་པས་བསྟན་པའི་མདོ་ལས། དུས་ཐུང་བར་འདོད་པ་རྣམས་ལ་བསྐལ་པ་མང་པོ་ཞག་བདུན་གྱིས་འདའ་བར་བྱིན་གྱིས་རློབས་སོ། །ཞེས་པ་ལ་སོགས་པ་གསུངས་སོ། །དེའི་ཕྱིར་འཕགས་པའི་གོ་འཕང་ཐོབ་པ་ཚུན་ཆད་ལ་ལམ་ཟབ་པའི་ཟབ་ལ་སོགས་པ་ཉེ་རིང་དུ་སྣང་ཡང་། དེ་ཕན་ཆད་སེམས་ལ་དབང་ཐོབ་པས་ཇི་ཙམ་གྱིས་གྲོལ་བར་རང་དབང་ཡོད་དེ། ཡུམ་བར་མ་ལས། རབ་འབྱོར་གང་གི་ཚེ་ཆོས་རྣམས་ལ་ཆོས་ཀྱི་མིག་དྲི་མ་མེད་པ་ཐོབ་པ་དེའི་ཚེ་འདོད་ན་ཞག་བདུན་གྱིས་བླ་ན་མེད་པའི་བྱང་ཆུབ་ཏུ་འཚང་རྒྱ་ལ། འདོད་ན་བསྐལ་པ་བྱེ་བ་ཁྲག་ཁྲིག་རབ་ཏུ་མང་པོས་ཀྱང་བླ་ན་མེད་པའི་བྱང་ཆུབ་ཏུ་འཚང་རྒྱ་སྟེ། འདི་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཐབས་ལ་མཁས་པའི་ཁྱད་པར་དང་པོའོ། །ཞེས་གསུངས། ། ༈ ཆོས་ཐམས་ཅད་གདོད་ནས་རྣམ་པར་དག་པ་དང་། རང་བཞིན་གྱིས་མྱ་ངན་ལས་འདས་པ་དང་། མངོན་པར་རྫོགས་པར་སངས་རྒྱས་པ་དང་། རང་བཞིན་གྱིས་འོད་གསལ་བ་དང་། ཡེ་ནས་མ་སྐྱེས་མ་འགགས་པའི་མཉམ་པ་ཉིད་ཀྱི་ངོ་བོས་ཐམས་ཅད་ཐིག་ལེ་ཉག་གཅིག་ཆོས་དབྱིངས་འོད་གསལ་སྒྲིབ་བྲལ་ཆེན་པོར་རོ་མཉམ་དུ་སྒོམ་པ་ནི་མཉམ་བཞག་ཡེ་ཤེས་ཀྱི་ངོ་བོའོ། །དེའི་ཚུལ་ཇི་ལྟ་བུ་ཞེ་ན། འདི་ལྟར་གཟུགས་ཀྱི་དག་པ་ཞེས་པས་མཚོན་ཏེ་ཤེས་བྱའི་ཡུལ་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་ནི་ཡེ་ནས་གཟུང་བ་དང་འཛིན་པ་ཀུན་ཉོན་དང་རྣམ་བྱང་བདག་དང་གཞན་དངོས་དང་དངོས་མེད་ལ་སོགས་པའི་གཉིས་ཆོས་ཀྱི་རང་བཞིན་གང་དུའང་མ་གྲུབ་པ་ཆོས་དབྱིངས་ཐིག་ལེ་ཉག་གཅིག་གདོད་ནས་སྐྱེ་འགག་དང་བྲལ་བའི་མཉམ་པ་ཉིད་རང་བཞིན་རྣམ་དག་སྒྲིབ་བྲལ་ཆེན་པོར་གནས་སུ་ཟིན་ཀྱང་། དེ་ལྟར་མ་རྟོགས་པའི་འཁྲུལ་བ་གློ་བུར་བ་སྐྱེས་པའི་ཚེ་ན་བདག་དང་ཆོས་སུ་སྒྲོ་འདོགས་པའི་བློ་དྲི་མ་ཅན་གྱི་ངོར་ཡུལ་ཀྱང་མ་དག་པ་ལྟར་སྣང་ལ་བློས་ཀྱང་དེ་ལྟར་བཟུང་བས་ཀུན་ནས་ཉོན་མོངས་པའི་ཕྱོགས་ཀྱི་དྲི་མ་དང་སྒྲིབ་པ་ཡོད་པ་ལ་མ་དག་པའི་སེམས་ཅན་ཞེས་བྱའོ། །གློ་བུར་གྱི་དྲི་མ་དེ་བསལ་བའི་ཕྱིར་ཐེག་པ་གསུམ་གྱི་ལམ་བསྟན་པ་དེ་ལ་ཞུགས་པས་ཆོས་ཉིད་ཀྱི་གནས་ལུགས་རང་བཞིན་རྣམ་དག་དེ་ཇེ་གསལ་དུ་མཐོང་བའི་ཚུལ་ལས་འདི་ལྟར་ཉན་ཐོས་ཀྱི་འབྲས་བུ་བཞི་དང་རང་རྒྱལ་བའི་འབྲས་བུ་དང་བྱང་ཆུབ་སེམས་དཔའི་མཐོང་ལམ་དང་སྒོམ་ལམ་ས་དགུའི་རྟོགས་པ་སྐྱེས་ཏེ་སྤང་བྱའི་དྲི་མ་རྣམས་སྤང་བའི་ཆ་ནས་དག་པ་ཆུང་འབྲིང་ཆེན་པོ་ཞེས་སུ་བརྗོད་དེ་དེ་དག་ནི་དྲི་མ་ཅི་རིགས་པར་དག་པའི་སེམས་ཅན་ཞེས་བྱའོ། །དེ་ཡང་ཡུལ་གཟུགས་སོགས་ཀྱི་རང་བཞིན་ལ་ཡེ་ནས་མ་དག་པ་མེད་ཀྱང་། ཕྱིན་ཅི་ལོག་ཏུ་བཟུང་བའི་དྲི་མ་གློ་བུར་བ་རྣམས་དག་པའི་རིམ་པ་དང་མཚུངས་པར་མིག་སྐྱོན་དག་པས་ཡུལ་ཇེ་གསལ་དུ་མཐོང་བ་ལྟར་ཡུལ་ཅན་དེས་ཡུལ་གྱི་དག་པ་མཐོང་ལ་དེ་མཐོང་བའི་དབང་གིས་ཡུལ་ཅན་དེའང་དག་པ་ཞེས་བརྗོད་པ་ལས་ཐ་དད་དུ་དག་ཚུལ་གཞན་མེད་དེ། འདི་ལྟར་སྣང་ཚུལ་ལ་ནི་ཡུལ་ཅན་ཇེ་དག་ཏུ་སོང་བ་དང་ཡུལ་ཀྱང་གསར་དུ་དག་པར་སྣང་བ་ལྟར་ཡོད་ཀྱང་། གནས་ཚུལ་ལ་ནི་ཡུལ་གཟུ༵གས་སོགས་ཀྱི་༵རང་བཞིན་ཡེ་ནས་དག༵་པ༵་མཐོང་བ་དེ་ཉིད་ཡུལ་ཅན་གློ་བུར་གྱི་དྲི་མ་ལས་གྲོལ་བ་འབྲས༵་བུ༵་ཡི་དག༵་པ་ཉིད་ཡིན་པར༵་ཤེས༵་པར༵་བྱ༵་སྟེ། དེ་གཉིས་ཡེ་ནས་ཡུལ་ཡུལ་ཅན་གཉིས་སུ་མེད་པར་དག་པ་ཆེན་པོར་གནས་པའི་གནད་ལ་དོན་གཅིག་པས་དག་པ་དེ་གཉིས་ངོ་བོ་ཐ་མི་དད་དུ་ཤེས་པར་བྱའོ། །དེ་བཞིན་དུ་འབྲས༵་བུ༵་དག་པ་དང་གཟུགས༵་སོགས་ཀྱི་དག༵་པ་དེ་ཉིད་གློ་བུར་བྲལ་དག་གི་མཐར་ཐུག་པ་སྒྲིབ་གཉིས་ཡོངས་སུ་སྤང་བའི་ཤིན་ཏུ་རྣམ་པར་དག་པ་ཐམས༵་ཅད༵་མཁྱེན༵་པའི་ཡེ་ཤེས་ཉིད༵་ཀྱི་དག༵་པར༵་འགྱུར༵་ཏེ་དག་པ་དེ་ཐམས་ཅད་རྩ་བ་རང་བཞིན་རྣམ་དག་གི་དོན་ལ་གནད་གཅིག་པ་བཤད་མ་ཐག་པ་བཞིན་ནོ། །དེ་ལྟར་དག་པ་མཐར་ཐུག་པ་ཐམས༵་ཅད༵་མཁྱེན༵་པ་ཉིད༵་གྱི་དག་པ་དང་། གནས་སྐབས་ཀྱི་ལམ་སོ་སོའི་འབྲས་བུ་ཐོབ་པའི་དག༵་པ༵་དང༵་། གཞི་གཟུགས༵་སོགས་ཕུང་ཁམས་སྐྱེ་མཆེད་ཀྱི་ཆོས་རྣམས་ཀྱི་དག་༵པ༵་གསུམ་པོ་འདི་ནི་སྣང་ཚུལ་ལ་ཐ་དད་དུ་བཞག་ཀྱང་། གནས་ཚུལ་ལ་ནམ༵་མཁའི༵་ཁམས༵་ལ་ཐ་དད་མེད་པ་དང༵་མཚུངས་༵ཏེ༵་ཆོས་དབྱིངས་རང་བཞིན་གྱིས་རྣམ་པར་དག་པ་གཅིག་གི་ངོ་བོར་དབྱེར༵་མེད༵་ལ་བློས་ཀྱང་ཐ་དད་དུ་གཅད༵་དུ༵་མེད༵་དེ། ཆོས་ཉིད་རྣམ་དག་དེའི་རང་བཞིན་ཇི་ལྟ་བ་བཞིན་དུ་མངོན་སུམ་གཟིགས་པ་སངས་རྒྱས་ཀྱི་ཡེ་ཤེས་ངོར། ཆོས་ཐམས་ཅད་མངོན་པར་སངས་རྒྱས་པའམ་གདོད་ནས་མྱ་ངན་ལས་འདས་པའི་རང་བཞིན་དུ་གཟིགས་པས་མ་དག་པ་མེད་ལ། དེ་ལྟར་རྟོགས་པའི་ཡེ་ཤེས་དེའང་གློ་བུར་གྱི་དྲི་མ་བག་ཆགས་དང་བཅས་པའི་སྒྲིབ་པ་མཐའ་དག་གཏན་ནས་སྤངས་པའི་དག་པ་མཐར་ཐུག་པ་ཡིན་པས། དེས་ཇི་ལྟར་གཟིགས་པ་ལྟར་ཆོས་ཐམས་ཅད་ཡུལ་དང་ཡུལ་ཅན་ལ་སོགས་པའི་གཉིས་ཆོས་ཀྱི་རང་བཞིན་དུ་མེད་པར་གཉིས་མེད་མཉམ་པ་ཆེན་པོར་ཡེ་ནས་དག་ཅིང་སངས་རྒྱས་པ་ཉིད་དུ་དབྱེ་བ་མེད་པར་རོ་གཅིག་ཏུ་ཤེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་པ་མཐར་ཐུག་པ་ཡིན་ལ། གཤིས་རྣལ་མ་དེའི་དོན་བབ་ཀྱིས་ཅོག་བཞག་ཏུ་སྐྱོང་བའི་ཚུལ་ཡང་། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་གང་ཡང་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ནས་རྣམ་པར་གྲོལ། །ཞེས་པ་བཞིན་དུ་ཤེས་པར་བྱའོ། །རྒྱུད་བླ་མ་ལས། མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང་། །དེ་བཞིན་གཤེགས་ཞེས་མཚན་གསོལ་ཏོ། །ཞེས་པ། མི་ཕམ་རིན་པོ་ཆེའི་རྒྱུད་བླའི་ཕྱག་མཆན་ལས། གློ་བུར་གྱི་དྲི་མ་ལ་ལྟོས་ནས་ཁམས་དེ་དྲི་མས་མ༵་དག༵་པའི་སྐབས་དང་། མ༵་དག༵་དག༵་པ༵་གཉིས་ལྡན་གྱི་སྐབས་དང༵་། ཤིན༵་ཏུ༵་རྣམ༵་པར་དག༵་པའི་གནས་སྐབས་ན་གོ༵་རིམ༵་བཞིན༵་དུ་སེམས༵་ཅན༵་དང་། བྱང༵་ཆུབ༵་སེམས༵་དཔའ༵་དང་༵། དེ་༵བཞིན༵་གཤེགས༵་པ༵་ཞེས༵་པའི་མིང་གསུམ་གྱིས་བརྗོད༵་ཅིང་བསྟན་ཏོ༵། ཞེས་གསུངས། ། ༈ དོན་རྣམ་པར་ངེས་པ་ཤེས་རབ་རལ་གྲི་ལས། དངོས་པོར་དམིགས་དང་དངོས་མེད་དམིགས། །གཉིས་སུ་དམིགས་དང་གཉིས་མིན་དམིགས། །ཇི་ལྟར་དམིགས་ཀྱང་དམིགས་པ་སྟེ། །དམིགས་པས་གང་བཟུང་བདུད་ཀྱི་ནི། །སྤྱོད་ཡུལ་ཡིན་ཞེས་མདོ་ལས་གསུངས། །ཞེས་དངོས་པོར་དམིགས་པ་དང་། དེ་བཀག་པའི་དངོས་མེད་དུ་དམིགས་པ་དང་། གཉིས་ཀ་མིན་པར་དམིགས་པ་སོགས་ཇི་ལྟར་དམིགས་ཀྱང་སེམས་ཀྱི་གཡོ་བ་ཡོད་པས་དམིགས་པ་སྟེ། དམིགས་པ་དངོས་མེད་དང་དངོས་པོ་སོགས་གང་ཞིག་བཟུང་ཡང་བདུད་ཀྱི་ནི་སྤྱོད་ཡུལ་ཡིན་ཞེས་འཇམ་དཔལ་རྣམ་པར་རོལ་བའི་མདོ་དང་། ལང་ཀར་གཤེགས་པའི་མདོ་སོགས་ལས་གསུངས་སོ། །གློག་སྒྲོན་ལས། རྟེན་ཅིང་འབྲེལ་བར་འབྱུང་བའི་དབང་གིས་བྱུང་བའི་ཀུན་བྱང་གི་ཆོས་ཐམས་ཅད་མ་བརྟག་ཉམས་དགའ་ཙམ་དུ་སྣང་ཡང་། དོན་དམ་པར་རང་བཞིན་གྱི་གྲུབ་པ་མེད་པས། གང་སྣང་བའི་གཟུགས་སོགས་ཆོས་ཐམས་ཅད་རང་བཞིན་གྱིས་སྟོང་པས་གཟུགས་སྟོང་པ་དང་། གནས་སྐབས་རྟེན་འབྲེལ་གྱི་སྣང་བ་མ་འགགས་པར་ཤར་བས་སྟོང་པ་ཉིད་གཟུགས་དང་། སྣང་ཙམ་ཉིད་ན་ངོ་བོ་སྟོང་ཉིད་ལས་མ་གཡོས་པས་གཟུགས་ལས་ཀྱང་སྟོང་པ་ཉིད་གཞན་མ་ཡིན་པ་དང་། ངོ་བོ་སྟོང་ཉིད་ལས་མ་གཡོས་པར་གཟུགས་སོགས་སུ་སྣང་བས་སྟོང་པ་ཉིད་ལས་ཀྱང་གཟུགས་གཞན་མ་ཡིན་པ་སྟེ་སྟོང་ཉིད་བཞི་སྦྱོར་གྱི་དགོངས་པ། འཕགས་པ་ཀླུས། ཀུན་རྫོབ་དང་ནི་དོན་དམ་དག །སོ་སོའི་ཆར་ནི་ཤེས་གྱུར་ཏེ། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་གསུངས། མི་ཕམ་རིན་པོ་ཆེས། མཉམ་པ་ཉིད་ལ་ངེས་པ་རིམ་གྱིས་སྐྱེ་བའི་དབང་དུ་ན། ལས་དང་པོ་བས༴སོགས། ༈ རྒྱུ་གང་གིས་འབྲས་བུ་གང་བསྐྱེད་པའི་བྱ་བ་བྱེད་པ་ཐམས་ཅད་ལ་ནི་བྱ་བ་བྱེད་པའི་རིག་པ་ཞེས་བྱ་ཞིང་། མྱུ་གུ་ལ་སོགས་པ་འབྲས་བུར་གྱུར་པ་ཐམས་ཅད་ནི་རང་རང་གི་རྒྱུ་རྣམས་ལ་ངེས་པར་ལྟོས་པ་ཅན་ཡིན་པ་ནི་ལྟོས་པའི་རིགས་པའོ། །དེ་ལྟར་རྒྱུ་གང་གིས་འབྲས་བུ་གང་བསྐྱེད་པའི་བྱ་བ་བྱེད་པར་གྱུར་པ་དང་འབྲས་བུ་དེ་རྒྱུ་དེ་ལ་ལྟོས་པ་རྣམས་ནི་ཕན་ཚུན་རྒྱུ་འབྲས་སུ་རུང་བའི་གནས་ཡིན་པ་སྟེ། དགེ་བའི་ལས་ཀྱིས་བདེ་འབྲས་དང་། མི་དགེ་བས་སྡུག་བསྔལ་བསྐྱེད་པའམ། འབྲས་ཀྱི་ས་བོན་ལས་འབྲས་ཀྱི་མྱུ་གུ་སྐྱེ་བ་ལ་སོགས་པ་ལྟ་བུའོ། །དེ་ལས་ལྡོག་པ་སྐྱེད་པར་མི་བྱེད་པ། དགེ་བས་སྡུག་བསྔལ་དང་། མི་དགེ་བས་བདེ་བ། ནས་ཀྱི་ས་བོན་ལས་འབྲས་ཀྱི་མྱུ་གུ་སྐྱེ་བ་ལྟ་བུ་གནས་མ་ཡིན་ནོ། །རིགས་པ་དང་པོ་འདི་གཉིས་ཀྱིས་ཆོས་ཐམས་ཅད་ལ་གནས་དང་གནས་མིན་ཤེས་པའི་སྒོ་ནས་དགག་སྒྲུབ་དང་འཇུག་ལྡོག་བྱེད་པ་ཡིན་པའི་ཕྱིར། བཟོ་ཡི་གནས་སོགས་རིག་བྱེད་ཐམས་ཅད་དང་། འཇིག་རྟེན་དང་འཇིག་རྟེན་ལས་འདས་པའི་གྲུབ་མཐའ་ཐམས་ཅད་ཀྱང་ཚུལ་འདི་གཉིས་གྱིས་སྒོ་ནས་རྣམ་པར་དཔྱོད་པའི་རྩ་བ་ཅན་ནོ། །དེས་ན་གནས་དང་གནས་མིན་ཤེས་པ་ལ་ཇི་ཙམ་མཁས་པ་དེ་ཙམ་དུ་རིག་བྱེད་དང་གྲུབ་མཐའི་ཚུལ་རྣམ་པར་དག་ཅིང་བཟང་བར་འགྱུར་རོ། །ཆོས་ཉིད་ཀྱི་རིགས་པ་ནི། ཐ་སྙད་དུ་ཆོས་རྣམས་རང་རང་གི་ངོ་བོ་ཉིད་ཀྱིས། ས་སྲ་བ་དང་ཆུ་གཤེར་བ་དང་ནམ་མཁའ་མི་སྒྲིབ་པ་སོགས་སུ་གནས་པ་སྟེ། དེ་ཡང་བུམ་པ་ལྟ་བུའི་ཆོས་གཅིག་ལ་ཡང་། མི་རྟག་པ་ཡིན་པ། བེམ་པོ་ཡིན་པ་སོགས་སྒྲུབ་པའི་རྣམ་བཞག་དུ་མ་དང་། ཤེས་པ་མ་ཡིན་པ་རྟག་པ་མ་ཡིན་པ་སོགས་སེལ་བའམ་དགག་པའི་ཆ་ནས་བཞག་པའི་རྣམ་བཞག་དུ་མའི་ཆོས་ཡོད་ཀྱང་མདོར་བསྡུ་ན་མངོན་སུམ་གྱི་ཡུལ་དུ་གྱུར་པའི་རང་མཚན་རྫས་ཡོད་བུམ་པ་ལྟ་བུ་ལ། གཞན་བསལ་བའི་སྒོ་ནས་བཏགས་པའི་བྱས་མི་རྟག་སོགས་ཀྱི་ལྡོག་པ་ཐ་དད་པའི་རྣམ་བཞག་སྣ་ཚོགས་པར་རྟོག་པ་དང་བཅས་པའི་ཡིད་ཀྱིས་སྦྱོར་བར་བྱེད་པ་ཡིན་པས་རྫས་བཏགས་ཀྱི་ཚུལ་གཉིས་སུ་འདུ་ཞིང་དེ་ལས་རང་མཚན་དང་སྤྱི་མཚན། སྤྱི་དང་བྱེ་བྲག །འགལ་འབྲེལ་དང་། མཚན་མཚོན་ལ་སོགས་པའི་ཐ་སྙད་དོན་མཐུན་གྱི་རྣམ་བཞག་སྣ་ཚོགས་བྱས་པ་ལ་བརྟེན་ནས་དོན་མཐའ་དག་ལ་མི་རྨོངས་པར་འགྱུར་རོ། །དེ་ལྟར་རྒྱུ་འབྲས་ངོ་བོ་ཉིད་གསུམ་དུ་བཞག་པ་དེ་ནི་ཐ་སྙད་དཔྱོད་པའི་སྐབས་ཀྱི་རིགས་པ་གསུམ་ཡིན་ལ། དོན་དམ་པར་ནི་རྡོ་རྗེ་གཟེག་མའི་གཏན་ཚིགས་ཀྱིས་དཔྱད་ན་རྒྱུ་གང་གིས་འབྲས་བུ་གང་བསྐྱེད་པ་མི་དམིགས་ལ། ཡོད་མེད་སྐྱེ་འགོག་གིས་དཔྱད་ན་འབྲས་བུ་རྣམས་རྒྱུ་ལ་ལྟོས་ཏེ་སྐྱེ་བ་ཡང་མེད་ཅིང་། གཅིག་དུ་བྲལ་སོགས་ཀྱི་རིགས་པས་དཔྱད་ན། སྲ་བ་ལ་སོགས་པའི་ངོ་བོ་ཉིད་གང་ཡང་མི་འགྲུབ་པས། རྒྱུ་མཚན་མ་མེད་པ། འབྲས་བུ་སྨོན་པ་མེད་པ། ངོ་བོ་སྟོང་པ་ཉིད་དེ་རྣམ་ཐར་སྒོ་གསུམ་གྱི་རང་བཞིན་དུ་གནས་པ་ནི་དོན་དམ་པའི་ཆོས་ཉིད་དོ། །བྱ་བྱེད་ལྟོས་པ་གཉིས་ཀྱང་ཐ་སྙད་ཀྱི་དངོས་པོའི་ཆོས་ཉིད་དུ་འདུ་སྟེ་མེ་ཚ་བ་དང་མེ་སྲེག་པར་བྱེད་པ་དང་། མེ་བུད་ཤིང་ལ་ལྟོས་པ་ཆོས་ཉིད་ཡིན་པ་ལྟ་བུའོ། །དེའི་ཕྱིར་རིགས་པའི་མཐའ་ཐམས་ཅད་ཆོས་ཉིད་ཀྱི་རིགས་པ་ལ་ཐུག་ནས་རྒྱུ་མཚན་གཞན་ཚོལ་དུ་མེད་དེ། དངོས་པོའི་ཆོས་ཉིད་མེའི་ཚ་བ་ལྟ་བུ་ལ་སུས་ཀྱང་གཞན་དུ་བསྙོན་མི་ནུས་པ་བཞིན་ནོ། །དེ་ལྟར་རིགས་པ་སྔ་མ་གསུམ་གྱི་དོན་བསྡུས་ནས་ཐ་སྙད་དུ་ཆོས་རྣམས་ཀྱི་རྒྱུ་འབྲས་ངོ་བོ་ཉིད་གསུམ་ཇི་ལྟ་བུར་གནས་པའི་དོན་ནི་ཐ་སྙད་ཀྱི་གནས་ཚུལ་ལམ་ཆོས་ཉིད་དང་། རྒྱུ་འབྲས་ངོ་བོ་ཉིད་གསུམ་རང་བཞིན་མེད་པ་ནི་དོན་དམ་པའི་གནས་ལུགས་སམ་ཆོས་ཉིད་དེ། མདོར་ན་བདེན་པ་གཉིས་ཀྱི་དོན་ནི་གཏན་ལ་དབབ་པར་བྱ་བ་ཡིན་པའི་ཆ་ནས་རིགས་པ་སྔ་མ་གསུམ་གསུངས་ཏེ། ཆོས་རྣམས་ཀྱི་རང་བཞིན་དེ་ལྟ་བུར་གནས་པ་ནི་འོས་ཤིང་རིགས་པ་ཉིད་ཀྱི་ཕྱིར་རིགས་པ་ཞེས་བརྗོད་པའམ་དེ་དང་མཐུན་པར་གཞལ་བ་ལ་རིགས་པ་ཞེས་བརྗོད་པའང་ཡིན་ནོ། །དེ་ལྟར་གཞལ་བྱ་བདེན་པ་གཉིས་ཀྱི་དོན་ཇི་བཞིན་མ་ནོར་བར་རྗེས་སུ་གཞལ་བ་ནི་དངོས་པོའི་སྟོབས་ཀྱིས་གྲུབ་པ་ཡིན་པས་དེ་ལ་འཐད་པ་སྒྲུབ་པའི་རིགས་པ་ཞེས་བྱ་སྟེ། སྒྲུབ་བྱེད་གང་ཞིག་ཡང་དག་པའི་འཐད་པ་དང་བཅས་པ་ཡིན་པའི་ཕྱིར་རོ། །འཐད་པ་དེ་གང་གི་སྒོ་ནས་སྒྲུབ་ཅེ་ན། ཇི་ལྟར་སྣང་བ་ཐ་སྙད་ཀྱི་དོན་དང་ཇི་ལྟར་གནས་པ་དོན་དམ་པའི་དོན་གཉིས་པོ་དེ་མངོན་དུ་གྱུར་པ་ལ་མངོན་སུམ་ཚད་མ་དང་། ལྐོག་ཏུ་གྱུར་པ་ལ་དེ་དཔོག་ནུས་ཀྱི་རྟགས་མངོན་པར་སྣང་བ་ལས་མི་བསླུ་བ་གཞན་རྗེས་སུ་དཔག་པའི་ཚད་མ་གཉིས་ཀྱི་སྒོ་ནས་སོ། །དེ་ཡང་ཀུན་རྫོབ་པའི་ངོ་བོ་མངོན་སུམ་གྱུར་པ་ནི་མིག་ཤེས་མ་འཁྲུལ་བས་ཨུཏྤལ་སྔོན་པོ་མངོན་སུམ་མཐོང་བ་ལྟ་བུའོ། །དོན་དམ་པའི་ངོ་བོ་མངོན་སུམ་དུ་དམིགས་པ་ནི་འཕགས་པ་རྣམས་ཀྱི་མཉམ་བཞག་གི་ཡེ་ཤེས་ལྟ་བུའོ། །ཐ་སྙད་པའི་དོན་རྗེས་སུ་དཔག་པ་ནི་དུ་བ་ལས་མེ་དང་བྱས་པ་ལས་མི་རྟག་པར་དཔོག་པ་ལྟ་བུའོ། །དོན་དམ་པ་རྗེས་སུ་དཔག་པ་ནི། གཅིག་དུ་བྲལ་ལ་སོགས་པའི་གཏན་ཚིགས་ཀྱིས་སྟོང་པ་ཉིད་རྗེས་སུ་དཔག་པ་ལྟ་བུའོ། ། ༈ སྒྱུ་འཕྲུལ་གསང་སྙིང་གི་རྒྱུད་འཆད་པའི་སྐབས་འདིར་བསྟན་གྱི་གཏན་ཚིགས་ཐུན་མིན་ལ་གསུམ། ཚད་མ་བཀའ་གཞུང་། སྒྲ་མཐུན་དོན་འཕགས། ཚིག་དོན་མི་མཐུན་པའི་གཏན་ཚིགས་སོ། །དང་པོ་ཚད་མ་བཀའ་གཞུང་གི་གཏན་ཚིགས་ལ་བཞི། རྟོགས་པ་བཞི། དག་པ་གསུམ། མཉམ་པ་བཞི། བདག་ཉིད་ཆེན་པོའི་གཏན་ཚིགས་རྣམས་སོ། །དང་པོ་ལའང་བཞི། རྒྱུ་གཅིག་པ། ཡིག་འབྲུའི་ཚུལ། བྱིན་གྱིས་བརླབས་པ། མངོན་སུམ་པའི་གཏན་ཚིགས་སོ། །དང་པོ་ནི། སྣང་སྲིད་ཀྱི་ཆོས་རྣམས་ཆོས་ཅན། དོན་དམ་དབྱིངས་ཡེ་ཟུང་འཇུག་རང་བྱུང་གི་ཡེ་ཤེས་སུ་རྒྱུའམ་ཚུལ་གཅིག་པ་ཡིན་ཏེ། ཆོས་ཐམས་ཅད་དེའི་ངང་ཚུལ་ལས་མ་འདས་པའི་ཕྱིར། གཉིས་པ་ནི། དབྱིངས་ལས་ཤར་བའི་སྣང་བ་རྣམས་ཆོས་ཅན། དཔེ་ཡིག་འབྲུའི་ཚུལ་གྱིས་ཀུན་རྫོབ་སྐུ་དང་ཡེ་ཤེས་སུ་སྣང་བ་ཡིན་ཏེ། དབྱིངས་ཀྱི་རང་བཞིན་ལས་མ་འདས་པའི་སྣང་བ་ཡིན་པའི་ཕྱིར། གསུམ་པ་ནི་ཀུན་རྫོབ་དང་དོན་དམ་གཉིས་ཆོས་ཅན། ཕན་ཚུན་གཅིག་གིས་གཅིག་བྱིན་གྱིས་བརླབས་ཤིང་དབྱེར་མེད་པ་ཡིན་ཏེ། ངོ་བོ་ཐ་དད་དུ་མ་གྲུབ་པའི་ཕྱིར། བཞི་པ་ནི། དབྱེར་མེད་པའི་གནས་ལུགས་ཆོས་ཅན། བློའི་སྤྱོད་ཡུལ་ཐམས་ཅད་དང་བྲལ་བ་ཡིན་ཏེ། ཐ་སྙད་ཀྱི་བློས་བསམ་གྱིས་མི་ཁྱབ་པ་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་ཡིན་པའི་ཕྱིར་རོ། །གཉིས་པ་ནི། འབྱུང་ལྔ། ཕུང་ལྔ། རྣམ་ཤེས་ཚོགས་བརྒྱད་རྣམས་ཆོས་ཅན། དག་པ་གསུམ་གྱི་བདག་ཉིད་དུ་གནས་ཏེ། ཡུམ་ལྔ། རིགས་ལྔ། ཡེ་ཤེས་ལྔའི་རང་བཞིན་དུ་གནས་པའི་ཕྱིར་རོ། །གསུམ་པ་ནི། སྤྲོས་པ་ཕྱོགས་རེ་ཆོད་པའི་རྣམ་གྲངས་པའི་དོན་དམ་དང་། སྤྲོས་པ་མཐའ་དག་ཆོད་པའི་རྣམ་གྲངས་མ་ཡིན་པའི་དོན་དམ་གཉིས་ཆོས་ཅན། དོན་དམ་ཙམ་དུ་མཉམ་པ་ཡིན་ཏེ། རང་བཞིན་མ་གྲུབ་པ་ཙམ་གྱིས་རབ་ཏུ་ཕྱེ་བའི་ཕྱིར། སྣང་ལ་དོན་བྱེད་ནུས་པ་ཡང་དག་ཀུན་རྫོབ་དང་། སྣང་ཡང་དོན་བྱེད་མི་ནུས་པ་ལོག་པའི་ཀུན་རྫོབ་གཉིས་ཆོས་ཅན། ཀུན་རྫོབ་ཙམ་དུ་མཉམ་པ་ཡིན་ཏེ། རང་ངོའི་སྣང་བ་དང་ལྡན་ཞིང་བརྟགས་ན་དབེན་པའི་ཕྱིར། རྣམ་གྲངས་དང་རྣམ་གྲངས་མ་ཡིན་པའི་དོན་དམ་གཉིས་ཆོས་ཅན། ལྷག་པའི་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པར་མཉམ་སྟེ། དབྱིངས་དེ་ནི་ཡེ་ནས་ཡེ་ཤེས་དང་གཉིས་སུ་མེད་པའི་གནས་ལུགས་ཡིན་པའི་ཕྱིར། ཡང་ལོག་གི་ཀུན་རྫོབ་གཉིས་ཆོས་ཅན། སྐུ་དང་ཡེ་ཤེས་ཀྱི་དཀྱིལ་འཁོར་དུ་མཉམ་སྟེ། སྣང་བའི་གནས་ཚུལ་ཡེ་ནས་དག་པའི་བདག་ཉིད་ཡིན་པའི་ཕྱིར་རོ། །བཞི་པ་ནི། སྣང་ལུགས་དུ་མར་སྣང་བའི་འཁོར་འདས་ཀྱི་ཆོས་རྣམས་ཆོས་ཅན། གནས་ལུགས་བདག་ཉིད་ཆེན་པོ་རང་བྱུང་གི་ཡེ་ཤེས་གཅིག་ཏུ་ངེས་པ་ཡིན་ཏེ། གནས་ལུགས་མཐར་ཐུག་དཔྱོད་པའི་རིགས་ཤེས་ཀྱིས་དེ་ལྟར་གྲུབ་པའི་ཕྱིར་རོ། །གཉིས་པ་སྒྲ་མཐུན་དོན་འཕགས་ཀྱི་གཏན་ཚིགས་ནི། སྔགས་ན་མི་སྤོང་བར་བསྟན་པའི་དུག་ལྔ་ཆོས་ཅན། སྒྲ་མཐུན་ཀྱང་དོན་འཕགས་པ་ཡིན་ཏེ། གཉེན་པོས་སྤང་བ་མ་ཡིན་ལ། དེ་ཉིད་རྟོགས་པའི་ཐབས་ཀྱིས་ཡེ་ཤེས་ལྔར་ཤར་བའི་ཕྱིར་རོ། །གསུམ་པ་ཚིག་དོན་མི་མཐུན་པའི་གཏན་ཚིགས་ནི། ཆོས་རྣམས་ཀྱི་ཆོས་ཉིད་ཆོས་ཅན། སྤྲོས་པའི་རང་བཞིན་ཅིར་ཡང་མཐའ་གཅིག་ཏུ་གྲུབ་པ་མ་ཡིན་ཏེ། འཁོར་འདས་ཀྱི་སྣང་བ་སྣ་ཚོགས་པ་ཅིར་ཡང་འཆར་བ་ཡིན་པའི་ཕྱིིར། ཀུན་རྫོབ་ཀྱི་སྣང་བ་འདི་ཆོས་ཅན། མཐའ་གཅིག་ཏུ་ངེས་པ་མེད་པར་ཅིར་ཡང་འཆར་བ་ཡིན་ཏེ། རང་གི་རང་བཞིན་ཅིར་ཡང་མ་གྲུབ་པ་ཡིན་པའི་ཕྱིར་རོ། །འདི་རྣམས་ནི་རྒྱུ་གཅིག་པ་ལ་སོགས་པར་རིགས་པས་བསྒྲུབ་པའི་གཏན་ཚིགས་འགོད་ཚུལ་ཡིན་ལ། རྒྱུ་གཅིག་པ་ལ་སོགས་པར་གསུངས་པའི་ལུང་ཉིད་གཏན་ཚིགས་སུ་འགོད་པ་ནི་འགྲེལ་བ་སྔ་མ་རྣམས་ལས་ཤེས་པར་བྱའོ། །དགེའོ། ༈ །རྒྱུ་གཅིག་པར་རྟོགས་པ་དང་། ཡིག་འབྲུའི་ཚུལ་གྱིས་རྟོགས་པ་དང་། བྱིན་གྱིས་བརླབས་ཀྱིས་རྟོགས་པ་དང་། མངོན་སུམ་པར་རྟོགས་པ་དང་། དེ་ཡང་རྟོགས་པ་བཞི་འདི་ལ་རིམ་ཅིག་ཆར་གཉིས་ཀྱི་བཤད་པ་འབྱུང་ཡང་འདིར་རྫོགས་པ་ཆེན་པོ་རང་བྱུང་གི་ཡེ་ཤེས་ཐིག་ལེ་ཉག་གཅིག་ཏུ་གཏན་ལ་ཕེབས་པས་ཅིག་ཆར་བ་ལྟར་དུ་བཤད་དེ། དེ་ལ་རྒྱུ་སྟེ་རང་བཞིན་ནམ་གཞི་གཅིག་པར་རྟོགས་པ་ཡིན་ལ། མདོར་ན་རང་བྱུང་ཡེ་ཤེས་བྱང་ཆུབ་སེམས་ཀྱི་ངོ་བོ་ནི་སྣང་སྟོང་དབྱེར་མི་ཕྱེད་པའི་རང་བཞིན་ཡིན་ལ། འཁོར་འདས་ཐམས་ཅད་དེའི་ཚུལ་གཅིག་ལས་མི་འདའ་བ་ནི་རྒྱུ་གཅིག་པའོ། །ཡིག་འབྲུའི་ཚུལ་གྱི་རྟོགས་པ་ནི། དེ་ལྟ་བུའི་སྣང་སྟོང་དབྱེར་མེད་ཀྱི་རང་བཞིན་དེ་ཉིད་ཀྱང་གདོད་མ་ནས་སྐུ་གསུང་ཐུགས་འབྲས་བུའི་ཆོས་སུ་སངས་རྒྱས་པར་བསྟན་པ་སྟེ། དེ་ལ་ཆོས་ཐམས་ཅད་མ་སྐྱེས་པ་ནི་ཨ་ཡིས་མཚོན་ཏེ་གསུང་གི་རང་བཞིན། མ་སྐྱེས་པ་ཉིད་སྒྱུ་མར་སྣང་ཞིང་བྱ་བ་བྱེད་ནུས་པ་ནི་ཨོ་ཡིས་མཚོན་ཏེ་སྐུའི་རང་བཞིན། དེ་ལྟར་རྟོགས་པའི་རིག་པ་སྒྱུ་མའི་ཡེ་ཤེས་མཐའ་དབུས་མེད་པ་ནི་ༀ་གྱིས་མཚོན་ཏེ་ཐུགས་ཀྱི་རང་བཞིན་དུ་རྟོགས་པའོ། །དེ་ཡང་གདོད་ནས་སྣང་སྟོང་ཟུང་འཇུག་གི་ཡེ་ཤེས་དེ་ལ་བསལ་བཞག་གི་བྲི་གང་ནམ་ཡང་མེད་ཅིང་། དེ་ཉིད་རང་བཞིན་རྣམ་པར་དག་པས་འཁོར་བ་ཡེ་སངས་ཆེན་པོ་ཡིན་ལ། དེ་ཉིད་ཀྱི་རོལ་པ་ནི་གདོད་ནས་དཀྱིལ་འཁོར་གསུམ་དུ་གནས་པ་ཡིན་པར་ནི་ཡིག་འབྲུའི་ཚུལ་གྱིས་རྟོགས་པའོ། །བྱིན་གྱིས་བརླབས་ཀྱིས་རྟོགས་པ་ནི། རྟོགས་པ་རྣམ་པ་གཉིས་པོ་དེའི་མཐུ་དང་བྱིན་རླབས་ཤེས་པ་སྟེ། དཔེར་ན་རས་དཀར་པོ་དམར་པོར་བྱིན་གྱིས་བརླབས་པའི་མཐུ་བཙོད་ལ་ཡོད་པ་བཞིན་དུ། ཆོས་ཐམས་ཅད་གདོད་མ་ནས་སངས་རྒྱས་པར་བྱིན་གྱིས་བརླབས་པའི་མཐུ་ཡང་རྒྱུ་གཅིག་པ་དང་ཡིག་འབྲུའི་ཚུལ་གྱི་མཐུས་བྱིན་གྱིས་བརླབས་པར་ཤེས་ཤིང་རྟོགས་པའོ། །དེ་ལ་ཆོས་ཐམས་ཅད་ཡེ་ནས་སངས་རྒྱས་པ་ཡིན་མོད་ཀྱི་རྟོགས་པ་གཉིས་དང་མི་ལྡན་པ་རྣམས་ལ། དེས་ཕན་འདོགས་པར་མི་འགྱུར་ལ། དེ་གཉིས་དང་ལྡན་ན་ནི་ཕན་ཐོགས་པར་སྣང་བར་འགྱུར་བས། རྟོགས་པ་གཉིས་ཀྱི་མཐུས་ཆོས་ཐམས་ཅད་ཡེ་ནས་སངས་རྒྱས་པར་བྱིན་གྱིས་བརླབས་པ་ལྟར་སྣང་བར་འགྱུར་བས་བྱིན་གྱིས་བརླབས་པར་རྟོགས་པ་ཞེས་བྱའོ། །མངོན་སུམ་པར་རྟོགས་པ་ནི། སྤྱིར་དབང་པོའི་མངོན་སུམ་སོགས་ཡོད་ཀྱང་འདིར་ཤེས་རབ་ཀྱི་དབང་པོའི་མངོན་སུམ་སྟེ། དེ་ཡང་སོ་སོར་རྟོག་པའི་ཤེས་རབ་ཉིད་ལ་གོ་བར་བྱ་སྟེ། ཆོས་ཐམས་ཅད་ཡེ་ནས་སངས་རྒྱས་པར་གནས་པ་དེ་ཡང་ཡིན་ཞེས་པའི་ལུང་དང་བླ་མ་བརྒྱུད་པའི་མན་ངག་དང་འགལ་བའང་མ་ཡིན་པ་སྟེ། དཔེར་ན་བསྲེག་བཅད་བརྡར་བས་གསེར་ཡིན་མིན་སྐྱོན་ཡོད་མེད་གསེར་བཟང་ངན་ཤེས་པ་བཞིན་དུ། ལུང་གིས་སྤྱི་ལ་མི་འཁྲུལ། ལུང་ལ་དྲང་ངེས་ལྡེམ་དགོངས་སྣ་ཚོགས་པ་ལ་མན་ངག་གིས་དེའི་སྐྱོན་བསལ་བས་ཡིད་ཆེས། ལུང་དང་མན་ངག་ཡོད་ཀྱང་ཚིག་ཙམ་གྱི་སྒྲ་ཕྱིར་འབྲངས་བས་བློའི་གཏིང་དུ་ཉམས་སུ་མ་ལོན་པ་ཡང་ཡོད་པས། ལུང་དང་མན་ངག་གི་ཚིག་ཙམ་ལ་བརྟེན་པའང་མ་ཡིན་པར་སོ་སོར་རྟོག་པའི་ཤེས་རབ་བམ་རང་གི་རིག་པས་བློའི་གཏིང་དུ་ཡིད་ཆེས་པས་མངོན་སུམ་དུ་རྟོགས་པའོ། །ཞེས་འདིས་ནི་ལུང་གིས་དོན་སྤྱི་ཕྱིན་ཅི་མ་ལོག་པ་ཤེས་པར་འགྱུར་ལ། མན་ངག་གིས་ལུང་གི་དགོངས་པ་གཞན་དུ་འདྲེན་པ་གཅོད་ཅིང་། ཤེས་རབ་ཀྱིས་མངོན་སུམ་དུ་རྟོགས་པས་ཐོས་པ་ཙམ་ལ་སོགས་པ་ཉིད་དུ་ཞེན་པ་སེལ་ཞིང་གཅོད་པར་བྱེད་པ་ཡིན་ནོ། །དེ་ལྟར་ལམ་གྱིས་ཡིད་ཆེས་པ་ནི། རྟོགས་པ་རྣམ་བཞིའི་དོན་དེ་ཉིད་ཤེས་ཤིང་རིག་པ་ཉིད་རྣལ་འབྱོར་པའི་ལམ་སྟེ། དེའང་མཚན་ཉིད་ཐེག་པར་རྒྱུ་སྔོན་དུ་བསྒྲུབས་པའི་འབྲས་བུ་སངས་རྒྱས་ཉིད་ཕྱིས་ནམ་ཞིག་ན་འབྱུང་བའི་དུས་ལ་ལྟོས་པ་ལྟ་བུ་མ་ཡིན་གྱི། ད་ལྟ་ཉིད་དུ་ཤེས་རབ་ཀྱི་དབང་པོས་རང་གིས་མངོན་སུམ་དུ་རྟོགས་ཤིང་ཡིད་ཆེས་པའོ། ༈ །ཤན་འབྱེད་ལས། མ་ཧཱ་ཡོ་གས་དཀོར་བདུན་ངོ་བོ་ཉིད་ལྷུན་གྲུབ་ཏུ་ཁས་ལེན་པ་ནི། རྫོགས་ཆེན་གྱི་གཞི་སྣང་མ་ཤར་བའི་ཡེ་ཐོག་མའི་གཞི་བཞག་ལུགས་ལྟར་མིན་ཏེ། གཞི་སྣང་ཤར་ཟིན་གྱི་དུས་འདིར། རང་བཞིན་མཉམ་པ་ཇི་ལྟ་བའི་དབྱིངས་ལས་མ་གཡོས་པའི་ཆོས་ཉིད་དང་། དེའི་ངང་ལས་སྣང་བའི་ཆོས་ཇི་སྙེད་པ་ཐམས་ཅད་རང་བཞིན་གྱིས་དག་པའི་དག་པ་ཆེན་པོར་གཏན་ལ་ཕབ་པའི་གཞི་དེ། གློ་བུར་དྲི་མ་བྲལ་སྟོབས་ཀྱིས་དག་པ་གཉིས་ལྡན་གྱི་དུས་ནའང་། སྔར་གྱི་དག་མཉམ་ཆེན་པོར་གཏན་ལ་ཕབ་པ་དེ་མངོན་དུ་གྱུར་པ་ལས་ལྷག་པའི་འབྲས་བུ་མེད་པའི་གནས་ཚུལ་གྱི་དབང་དུ་བྱས་པའོ། །སྣང་ཚུལ་གྱི་དབང་དུ་བྱས་ན། རང་བཞིན་རྣམ་དག་གཞི་དང་། གློ་བུར་བྲལ་དག་གི་ཁྱད་པར་དུ་བྱས་པའི་དབྱིངས་འབྲས་བུར་འདོད་པས་ཁྱད་མེད་པ་མིན་ཡང་། ལ་ཟློའི་ཚེ་གནས་ཚུལ་ལྟར་གཏན་ལ་འབེབས་དགོས་ཀྱི། དེ་མ་ཕེབས་ན་འཁོར་བ་ཉིད་མྱང་འདས་སུ་མི་རྟོགས་སོ། །ཤན་འབྱེད་པའི་ཚེ་སྣང་ཚུལ་ལྟར་ཡིན་ཡང་། དེས་གནས་ལུགས་ལ་འཁོར་འདས་མཉམ་ཉིད་ཡིན་པའང་མི་ཁེགས་ཏེ། གནས་ཚུལ་ལ་མ་དག་པ་མེད་པས་སོ། །ཞེས་གསུངས། ༈ ངོ་བོ་ཉིད་ཡེ་མེད་ན་ཆོས་ཐམས་ཅད་ཇི་ལྟར་སྣང་ཞེ་ན། མིང་ཙམ་གྱིས་བཞག་པས་ན་ཡི་གེའི་རྣམ་འཕྲུལ་ཙམ་མོ། །ཡི་གེ་དེའང་གནས་སྣང་མི་མཐུན་པའི་འཁྲུལ་བ་ཕྱིན་ཅི་ལོག་གི་བསླད་པ་གཏན་མ་ཞུགས་ན། དེས་གང་བཏགས་དང་ཅིར་སྤྲུལ་གྱི་སྣང་བ་ཐམས་ཅད་ཀྱང་སྣང་ཚུལ་ཕྱིན་ཅི་ལོག་ལས་འདས་པའི་ཤིན་ཏུ་རྣམ་དག་གི་སྣང་བ་འབའ་ཞིག་ཏུ་ཟད་པས། སྣང་སྲིད་ཐམས་ཅད་གདོད་མའི་སྡོད་ཚུལ་ལ་གསུངས་གསང་སྔགས་ཀྱི་སྒྱུ་འཕྲུལ་ཁོ་ནར་གནས་ཏེ། གསུང་གསང་སྔགས་ཀྱི་ཡི་གེ་བྱ་བ་ཕྱིན་ལོག་གི་བསླད་པ་དང་བྲལ་བའི་དག་པའི་ཡི་གེ། དག་པ་རབ་འབྱམས་ཀྱི་རྣམ་འཕྲུལ་དང་བྱེད་ལས་ཅན་དེ་ལས་བྱེད་པས་སོ། །སྣང་ཚུལ་སེམས་རང་སྣང་གི་ཡི་གེ་ལ་འཕྲུལ་བའི་མིང་ཚིག་མཐའ་མེད་སྲིད་ཀྱང་། གནས་ཚུལ་ཡེ་ཤེས་རང་སྣང་གི་མིང་ཚིག་ལ་གསང་སྔགས་ཀྱི་ཡི་གེ་སྤྲིན་མིན་པ་མེད་པའོ། །འདི་ལེའུ་བཞི་པ་དང་། ཡིག་འབྲུའི་གཏན་ཚིགས་སྐབས་མཁོ་མིན་དཔྱོད། ༈ ཡོངས་སུ་དག་པའི་ལྷ་སྐུ་ཐམས་ཅད་བསྐྱེད་པའི་ས་བོན་ནི་གསུང་སྔགས་ཀྱི་ཡི་གེ་སྟེ། སངས་རྒྱས་ཐམས་ཅད་མིང་ཙམ་ལ་གནས་པ་ལ་གཏུག་ནས་ལེའུ་བཞི་པར་རྒྱས་བཤད་མཛད། ཕུང་སོགས་ཅིར་སྣང་ཐམས་ཅད་བསྐྱེད་པའི་ས་བོན་ནི་ཆོས་ཀྱི་དབྱིངས་སམ་སེམས་ཀྱི་གཉུག་མའི་ཁམས་ཏེ་འདིར་འོད་གསལ་གྱི་བསམ་མི་ཁྱབ་པ་མི་རྟོག་པའམ་སྤྲོས་པ་མེད་པའི་བཞུགས་ཚུལ་གྱི་ཆའོ། །དེ་ཉིད་ནི་ཡིད་སྐྱོབ་པའི་མནྟྲ་ཐམས་ཅད་ཀྱི་མཐར་ཐུག་པ་སྟེ། ཕྱག་རྡོར་དབང་བསྐུར་དུ། ཆོས་ཀྱི་དབྱིངས་ལ་ལྷ་སྔགས་ཕྱག་རྒྱ་སོགས་མིང་མང་པོར་བརྟགས་ནས་དངོས་གྲུབ་ཀྱི་དོན་བྱེད་པར་གསུངས་པ་ལྟ་བུ། དེ་གློ་བུར་བའི་སྤྲོས་པས་སྟོང་པའམ་དག་པ་ཡིན་ཅིང་། གང་སྣང་ཐམས་ཅད་ནི་དེའི་ངང་ལས་མཆེད་པ་ནི་སྣང་བ་ཐམས་ཅད་ཀ་ནས་དག་པའམ་མཆེད་གཞིའི་ས་བོན་མཐར་ཐུག་ནས་དག་པ་དང་གདོད་ནས་དག་པའོ། །དེའི་ཕྱིར་དབྱིངས་དེ་ནི་ས་བོན་གྱི་སྔགས་ཏེ་ཨ། དེ་རྣམ་འགྱུར་རང་སྣང་རིས་མེད་སྔགས་ཀྱི་མིག་བསྒྱུར་བའི་རང་སྣང་གི་སྒྱུ་མ་ལྟ་བུར་མཆེད་པ་ནི་ལྷའི་སྐུ་སྟེ་ཨོས་མཚོན། དེ་ལྟར་དབྱིངས་དང་། དེ་ཉིད་སྣང་བ་སྣ་ཚོགས་སུ་ཤར་བ་ཐམས་ཅད་སྔགས་བླ་མེད་ཀྱི་རང་ལུགས་ཐུན་མོང་མ་ཡིན་པའི་རང་བཞིན་རྣམ་དག་གི་སྐུ་གསུམ་ལྷ་སྔགས་ཀྱི་ཡོ་ལང་ཁོ་ནར་གནས་པ་དེ་རྟོགས་བྱེད་ཀྱི་ཐུགས་ནི་འོད་གསལ་རང་གི་མཁྱེན་ཆའམ་རིག་པའི་ཆ་སྟེ། དེས་རྟོགས་ཚུལ་ཡང་དབྱིངས་དང་ཡུལ་སྣང་གཉིས་ཆར་རིག་ཆ་ཉིད་ལས་མི་གཞན་པར་མངོན་དུ་གྱུར་ནས་རྟོགས་བྱ་གཉིས་ཀ་རྟོགས་བྱེད་ཀྱི་ཀློང་དུ་རྫོགས་པ་ཨ་ཨོ་གཉིས་ཆར་ༀ་ལ་རྫོགས་པ་ལྟ་བུའོ། །ༀ་གྱི་དོན་ནི། གཟུང་འཛིན་བྲལ་བའི་སེམས་ལ་ལྟོས། །སྣང་བ་ཐམས་ཅད་རང་སྣང་ཡིན། །ཡེ་ཤེས་རིག་པ་ངོ་མཚར་ཆེ། །ཞེས་པ་དང་གཅིག་རེད། རྟོགས་དུས་སྣང་རིག་དབྱིངས་གསུམ་ཁྱབ་བརྡལ་དུ་འདྲེས་ནས་མཐའ་དབུས་མེད་པའི་འོད་གསལ་དུ་འགྱུར་བར་མ་ཟད། དབྱིངས་མ་རྟོགས་པར་རང་སྣང་སྣོད་བཅུད་རྒྱུད་གསུམ་རང་རྒྱུད་པར་ཞེན་པའི་དུས་ཉིད་ནས་ཤེས་པས་གར་ཁྱབ་རིག་པའི་བདག་ཉིད་གཅིག་པའི་ཚུལ་གྱིས་ཁྱབ་ཅིང་། རིག་པ་རང་གི་ངོ་བོ་བཟང་ངན་དུ་མི་འགྱུར་བར་མཐའ་དང་དབུས་མེད་པ་སྟེ་ཟབ་ཅིང་རྒྱ་ཆེ་རྒྱ་ཆད་ཕྱོགས་ལྷུང་མེད་པར་གདལ་བ་སྟེ། སེམས་རང་སྣང་རྣམས་སེམས་དང་ཡེ་ཤེས་རང་སྣང་གཉིས་ཀྱི་ཟླས་ཕྱེ་བའི་ཡེ་ཤེས་རང་སྣང་མིན་ཡང་མཐར་གཏུགས་ན་ཡེ་ཤེས་ཀྱི་རང་སྣང་ཡིན་དགོས། རང་སྣང་ཞེས་པའི་སྐོར་ཐམས་ཅད་སྣང་བ་སྣང་ཡུལ་གཉིས་ཀྱི་ཟླས་ཕྱེ་བའི་སྔ་མ་རང་ལ་སྦྱར་ན་འགྲིགས་ཆེ། ཀུན་མཁྱེན་ཆེན་པོས་སྣང་བ་འདི་རྣམས་བག་ཆགས་སྨིན་པའི་སྣང་ཆར་བཤད་པའང་དེ་ལྟར་གོ་དགོས། སྣང་ཡུལ་དག་མ་དག་གམ་ཕྱིན་ཅི་ལོག་ཡིན་མིན་སྣང་བ་དག་མིན་གྱིས་ཕྱེ་བ་ཐལ་འགྱུར་བའི་ཡང་ལོག་གི་རྣམ་བཞག་དང་ཀུན་རྫོབ་བདེན་པ་གནས་སྣང་མི་མཐུན་པའི་སྟེང་ནས་བཤད་ལུགས་ལྟ་བུ་སྟེ་ཞར་བྱུང་ངོ་། །རང་སྣང་ཐམས་ཅད་དག་པའི་ལྷའི་རང་བཞིན་ནམ་ངོ་བོ་ཉིད་ཡིན་ལུགས་ནི། དག་པའི་དུས་སུ་རྣམ་སྣང་དུ་འོང་རྒྱུ་དེ། མ་རིག་པའི་བག་ཆགས་ཀྱིས་བསླད་ཚེ་ཐ་མལ་པའི་གཟུགས་ཕུང་དུ་འཆར་བ་སོགས་སོ། །རྫོགས་པ་ཆེན་པོའི་ཚུལ་ལ་རྟོགས་པ་བཞིས་ཡིད་ཆེས་ཚུལ་ཡང་གཙོ་བོར་འདི་དང་རྒྱུ་གཅིག་པ་གཉིས་སུ་སྣང་། རྒྱུ་གཅིག་པར་ཆོས་ཐམས་ཅད་ཅེས་པ་ནི་གོང་དུ་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་ཅེས་པ་དང་གཅིག་རེད། དོན་དམ་འོད་གསལ་གྱི་དབྱིངས་ལ་འཇིག་འདས་ཀྱི་མཚན་མའམ་སྤྲོས་པ་གཉིས་ཆར་མི་དམིགས་ཀུན་རྫོབ་རང་སྣང་གི་ངོར་དེ་གཉིས་སོ་སོའི་བྱ་བ་བྱེད་ནུས་སུ་ཤར་བའི་རྟེན་འབྲེལ་དུ་མཉམ། དེ་གཉིས་དབྱེར་མེད་དུ་མཉམ་པ་རྣམས་རེད་པས་འདིས་མཉམ་པ་དང་། ཡིག་འབྲུས་དག་པར་རྟོགས་པ་བསྟན་འདྲ། འདིའི་སྟོང་མཉམ་སྣང་མཉམ་གཉིས་ཀ་དབུ་མ་ལྟར་མི་འཇོག་པར་བླ་མེད་ལུགས་ཁོ་ན་ལྟར་འཆད་པ་འདི་གཙང་ཊིཀ་ན་གསལ། མཉམ་ལུགས་སྔ་མ་གཉིས་ཐུན་མོང་པ་དང་། ཕྱི་མ་གཅིག་ཐུན་མིན་དུ་རོང་འགྲེལ་གཉིས་ན་སྣང་བ་ནི། སྲིད་ཞི་གཉིས་བདེན་མཉམ་རྫུན་མཉམ་ཙམ་ཐུན་མོང་ཐེག་པར་ཡང་བཞེད་ཀྱང་། དེ་གཉིས་བདེན་པ་གཉིས་ཀར་འོད་གསལ་ལས་ཕྱི་རོལ་དུ་མ་གྱུར་བར་གཅིག་པའམ་དབྱེར་མེད་པས་བཟང་ངན་མེད་པར་མཉམ་པ་འདི་བླ་མེད་ཀྱི་ཐུན་མིན་ཡིན་ཟེར་རམ་སྙམ་སྟེ། ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་པ་ལྟ་བུ་རེད་དམ་བརྟགདོན་དམ་མ་སྐྱེས་པ་ཨ་དང་། ཀུན་རྫོབ་སྒྱུ་མ་ཨོ་གཉིས་རིག་པ་འོད་གསལ་གཅིག་པུར་རྫོགས་པའི་ༀ་འདི་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོ་ཟེར་རྒྱུ་དེ་ཡིན་པ་འདྲ། བྱིན་གྱིས་བརླབས་པར་རྟོགས་པའི་ཐད། དཔེ་ལ་ལར། ཡེ་ནས་སངས་རྒྱས་པར་བྱིན་གྱིས་བརླབས་པའི་ཞེས་སྣང་ཡང་ཡེ་ནས་ཞེས་པ་མེད་པའི་དཔེ་དག་པར་སྣང་། དེའང་རྟོགས་པ་སྔ་མ་གཉིས་ཀྱིས་ཕུང་སོགས་ཆོས་ཐམས་ཅད་དག་པ་རབ་འབྱམས་སུ་རྟོགས་པ་ན་རྟོགས་པ་བཞིན་དུ་ཕུང་སོགས་བྱིན་གྱིས་བརླབས་ནུས་པ་སྟེ། རྟོགས་པ་དེ་དག་གི་སྟོབས་ཀྱིས་རྟོགས་བྱའི་དོན་དེ་དག་མངོན་དུ་གྱུར་འོང་བའོ། །དེའང་རྟོགས་པ་གཉིས་པའི་སྟོབས་ཀྱིས་མ་དག་པའི་འམ་ཐ་མལ་བའི་སྣང་ཞེན་གློ་བུར་བ་གཉིས་ཀ་ནུབ་ནས་གཞི་དུས་སུ་གཟུགས་ཚོར་སོགས་ཐ་མལ་བའི་སྣང་བར་འོང་རྒྱུ་དེ་རྣམ་སྣང་རིན་འབྱུང་སོགས་ཀྱི་སྣང་ཞེན་དུ་གོ་འཕོ་བ་སྐྱེ་ཤི་བར་དོ་སྐུ་གསུམ་དུ་སྒྱུར་ཞིང་རློབ་པ་ལྟ་བུ། དེའང་རས་དཀར་པོ་ལྟ་བུ་ནི་ཕུང་སོགས་རང་བཞིན་རྣམ་དགདམར་པོ་ནི་གློ་བུར་རྣམ་དག་གམ་རྟོགས་པ་མངོན་གྱུར། བཙོད་ནི་རྟོགས་པ་གཉིས་རེད། རས་ནག་པོ་སོགས་ལ་ཚོས་ཁ་གཞན་དུ་སྒྱུར་མི་བཏུབ། དཀར་པོ་ཁོ་ན་གང་འདོད་དུ་བཏུབ། དེ་བཞིན་དུ་གང་སྣང་ཐམས་ཅད་རང་སྣང་རིས་མེད་ཡིན་པའི་གནད་ཀྱིས་ཡོངས་སུ་དག་པའི་ལྷར་སྒྱུར་ནུས་པ་སྣ་ཚོགས་ནོར་བུ་ལྟ་བུ་རེད། དེའང་རང་སྣང་ཡིན་ཚད་མཐར་གཏུག་ན་ཡེ་ཤེས་རང་སྣང་ཁོ་ནར་ངེས་པ་ལ་ཐུགལར་སྐྱེ་འཆི་བར་དོའང་ཐབས་མཁས་ཀྱིས་ཟིན་ན་སྐུ་གསུམ་དུ་འོང་ཞེས་པ་ཙམ་གྱིས་འདིའི་ལུགས་ཀྱི་ལྷར་སྒྲུབ་ལ་དྲན་པ་རྙེད་དཀའ། དེའི་ཁ་སྐོར་ཕྱོགས་བསྒྱུར་ནས་གདོད་ནས་སྐུ་གསུམ་དངོས་སུ་འོང་རྒྱུ་དེ་འཁྲུལ་རྒྱུས་རྙོག་ནས་ཐ་མལ་བའི་སྐྱེ་ཤི་བར་དོར་འཆར་ཞེས་པའི་སྟེང་ནས་འགྲོ་དགོས། འདིར་སྒྱུ་མ་ངལ་གསོའི་ལེའུ་དང་པོར་མ་དག་གཞན་དབང་ནུབ་སྟེ་དག་པའི་གཞན་དབང་འོང་ཚུལ་གསུངས་པའང་དྲན་པར་བྱ། དེ་ལྟ་བུའི་རྟོགས་པ་གསུམ་པོའང་ཐོས་བསམ་རྐྱང་བའི་གོ་ཡུལ་ཙམ་གྱིས་ནི་གོང་དུ་རྫོགས་པ་ཆེན་པོའི་ཚུལ་ལ་རྟོགས་པ་བཞིའི་ལམ་གྱིས་ཡིད་ཆེས་ཞེས་གསུངས་པའི་ཡིད་ཆེས་མཚན་ཉིད་རྫོགས་པར་མི་འགྱུར་གྱི་རྟོགས་པ་དེ་གསུམ་གྱི་དོན་ཐོས་ཤིང་བསམ་པས་འདི་ཅིག་ཆར་བ་རེད་པས་རྟོགས་པ་མྱུར་བའི་རྒྱུ་མཚན་གྱིས་མེ་དང་སྤྲ་བ་ཕྲད་པ་ལྟར་སྣང་སེམས་རང་རྒྱུད་པར་འཛིན་པའི་སྒྲོ་འདོགས་རང་ཞིག་སྟེ་རིག་པ་ཡུལ་མེད་རང་གསལ་དུ་བུད་པའི་སྟེང་ནས་དག་མཉམ་ཆེན་པོའི་བཞུགས་ཚུལ་ལ་མྱོང་སྟོབས་ཀྱིས་གཏིང་སླེབ་པ་ལས་ཡིད་ཆེས་རྙེད་པ་ཤེས་ནས་དད་པ་ཐོབ་པ་ཞེས་པ་ལྟ་བུར་གྱུར་དུས་ལྟ་བའི་ལག་རྗེས་འཇོག་ཐུབ་པ་རེད་པས་ཤེས་པའི་མཚན་ཉིད་ཀྱི་ལམ་དངོས་ལ་སླེབ་པའོ། །འདི་ནི་མངོན་སུམ་པར་རྟོགས་པ་སྟེ། རྫོགས་པ་ཆེན་པོའི་ཚུལ་ལ་ཡིད་ཆེས་པ་ཞེས་པའི་རྟོགས་པར་འཇོག་པ་ལ་རྟོགས་པ་སྔ་མ་གསུམ་པོའི་ཁྱད་པར་འདི་ལྟ་བུ་དགོས་ཞེས་བྱེ་བྲག་ཏུ་ཕྱེ་ནས་བསྟན་པའོ། །རོང་ཟོམ་པས་སོ་སོར་རྟོག་པའི་དུས་ན་ཡིན་གྱི་རྣལ་འབྱོར་གྱི་དུས་ན་མིན་གསུངས་པ་དང་། གཡུང་གིས། སྔ་མ་སྔ་མའི་རྒྱུ་མཚན་གྱིས་ཕྱི་མ་ཕྱི་མ་བསྟན་ཡོད་སྣང་ཤར་བས་དཔྱོད། ༈ སྣང་སྤྱོད་ཐམས་ཅད་སྐུ་དང་ཡེ་ཤེས་ཆེན་པོར་གཏན་ལ་འབེབས་བྱེད་རྒྱུ་གཅིག་པ་དང་། ཡིག་འབྲུའི་ཚུལ་དང་། བྱིན་གྱིས་བརླབས་དང་། མངོན་སུམ་པའི་གཏན་ཚིགས་ཀྱིས། ཆོས་ཉིད་སྐྱེ་མེད། རོལ་པ་འགགས་མེད། ངོ་བོ་དབྱེར་མེད། མཚན་ཉིད་བློ་བྲལ། ཡུལ་མེད་རང་གསལ་དུ་རང་རིག་པའི་མངོན་སུམ་གྱི་ཚད་མས་གཏན་ལ་ཕབ་ནས་སྣང་སྲིད་ཡེ་སངས་རྒྱས་པའི་རང་བཞིན་དུ་མི་ཕྱེད་རྡོ་རྗེའི་གྲུབ་པའི་མཐའ་ཆེན་པོ་འཆར་བ་སྟེ། སྤྱིར་རྟོགས་པ་བཞིའི་གཏན་ཚིགས་འདི་ལ་སྦྱོར་ཚུལ་མང་སྟེ། ཐུན་མོང་པ་གྲུབ་མཐའ་བཞི་དང་སྦྱོར་ན། ཆོས་ཐམས་ཅད་སེམས་དང་ཡེ་ཤེས་ཀྱི་རང་སྣང་དུ་རྒྱུ་གཅིག་པས་ཕྱི་དོན་གྱི་བདེན་ཞེན་འགོག་པ་སེམས་ཙམ། སེམས་ཉིད་ཡིག་འབྲུ་ལས་མཚོན་ཏེ་ཆོས་ཐམས་ཅད་སྐྱེ་མེད་སྤྲོས་བྲལ་དུ་གཏན་ལ་འབེབས་པ་དབུ་མ། སེམས་ཉིད་དག་པ་མཐའ་བཞིར་རྟོགས་པའི་བྱིན་རླབས་ཀྱིས་ཀུན་རྫོབ་རྡོ་རྗེ་དབྱིངས་ཀྱི་དཀྱིལ་འཁོར་སོགས་སུ་སྣང་བ་སྔགས་ཕྱི་རྒྱུད། ཆོས་ཐམས་ཅད་བདག་ཉིད་ཆེན་པོ་རང་བྱུང་གི་ཡེ་ཤེས་སུ་མངོན་སུམ་པར་རྟོགས་པ་སྔགས་ནང་རྒྱུད་བླ་མེད་ཀྱི་དགོངས་པའོ། །ཐུན་མིན་རང་གི་ལྟ་བ་གཏན་ལ་འབེབས་བྱེད་ལ་གཉིས་ཀྱི་ཅིག་ཆར་བ་ལྟར་ན་ཆོས་ཀུན་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོར་རྟོགས་པའི་སྐད་ཅིག་མ་གཅིག་ལ་ལྡོག་ཆས་དབྱེ་བ་ཙམ་ཡིན་ལ། རིམ་གྱིས་པ་ལྟར་ན། སྔ་མ་སྔ་མས་གཞལ་འབྲས་ཕྱི་མ་ཕྱི་མས་གཞལ་བྱར་བྱས་ཏེ་རིམ་གྱིས་མངོན་སུམ་པར་གཏན་ལ་འབེབས་པའོ། །ལམ་དང་སྦྱར་ན། བསྐྱེད་རིམ་པས། དེ་ཏིང་སྟོང་ཆེན། ཀུན་སྣང་སྒྱུ་མ། ཟུང་འཇུག་གཅིག་སྤྲོས་རྣམས་ལ་བརྟན་པ་ཐོབ་ནས། ཚོགས་སྒྲུབ་ཀྱིས་ཟག་མེད་ཉིད་མངོན་དུ་བྱེད་པའོ། །རྫོགས་རིམ་ལ། སྟེང་སྒོ་ལྟར་ན། སྙིང་དབུས་མི་ཤིགས་པའི་ཐིག་ལེ་ནི་ཆོས་ཀུན་འབྱུང་བའི་གཞིར་གྱུར་པས་རྒྱུ་གཅིག་པ། དེ་ཉིད་གདངས་རྩ་ཁམས་ཡི་གེ་སྤྲིན་དུ་གནས་པ་ནི་ཡིག་འབྲུའི་ཚུལ། དེ་ལ་གནད་དུ་བསྣུན་པས་རྟོག་ཚོགས་སྐུ་དང་ཡེ་ཤེས་སུ་འཆར་བ་ནི་བྱིན་གྱིས་རླབས་དང་། མཐར་བདེན་གཉིས་དབྱེར་མེད་ཀྱི་དོན་མངོན་སུམ་ཡུལ་མེད་དུ་རྟོགས་པར་བྱེད་པ་ནི་མངོན་སུམ་པའོ། །འོག་སྒོ་དང་སྦྱར་ན། ཡུམ་མཁའ་ཆོས་འབྱུང་རྡོ་རྗེ་བཙུན་མོའི་བྷ་ག་ནི་ཆོས་ཀུན་འབྱུང་བའི་དབྱིངས་ཡིན་པས་རྒྱུ་གཅིག་པ་དང་། ཐབས་བདེ་བ་ཆེན་པོ་ཡབ་ཀྱི་བྱང་སེམས་ཝཾ་ཡིག་གི་རྣམ་པར་གནས་པ་ནི་ཡིག་འབྲུའི་ཚུལ། དེ་གཉིས་མཉམ་པར་སྦྱོར་བའི་ཐབས་མཁས་ཀྱིས་བདེ་བ་ཆེན་པོའི་ཡེ་ཤེས་རང་ལ་གསལ་བ་ནི་བྱིན་གྱིས་རླབས་དང་། ཡས་བབས་མས་བརྟན་གྱི་དགའ་བཞི་ལུགས་འབྱུང་ལྡོག་གི་མཐར་མ་དག་སྙིགས་མའི་རླུང་སེམས་འགགས་ནས་དཔེ་དང་དོན་གྱི་ཡེ་ཤེས་མངོན་དུ་བྱེད་པ་ནི་མངོན་སུམ་པའི་གཏན་ཚིགས་སོ། །གཞན་ཡང་ཨ་ནུའི་དབྱིངས་ཡེ་དབྱེར་མེད་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་དུ་མངོན་སུམ་པར་རྟོགས་པ་དང་། ཨ་ཏིའི་ངོ་བོ་རང་བཞིན་ཐུགས་རྗེ་གསུམ་དབྱེར་མེད་པའི་ཆོས་ཉིད་བྱང་ཆུབ་སེམས་སུ་ཡེ་ནས་སངས་རྒྱས་པའི་རང་བཞིན་དུ་རྟོགས་པ་རྣམས་ཀྱང་དོན་གྱི་གནད་གཅིག་གོ །རྟོགས་པ་བཞི་འདི། འཁོར་འདས་ཀྱི་ཆོས་ཐམས་ཅད་སེམས་དང་ཡེ་ཤེས་ཀྱི་རང་སྣང་ཙམ་སྟེ་དོན་དམ་པར་རྩ་བ་རང་བྱུང་གི་ཡེ་ཤེས་སུ་རྒྱུ་གཅིག་པ་དང་། དེ་ལས་ཤར་བའི་ཀུན་རྫོབ་ཀྱི་ཆོས་རྣམས་ཀྱང་དེའི་ངང་ཚུལ་ལས་མ་འདས་པས་དཔེ་ཡིག་འབྲུའི་ཚུལ་གྱིས་སྐུ་དང་ཡེ་ཤེས་སུ་སྣང་བ་དང་། བདེན་པ་དེ་གཉིས་ངོ་བོ་དབྱེར་མེད་པར་ཕན་ཚུན་གཅིག་གིས་གཅིག་བྱིན་གྱིས་བརླབས་ཏེ་ངོ་བོ་ཐ་མི་དད་པར་གནས་པ་དང་། དེ་ལྟའི་གནས་ལུགས་ཟབ་མོ་དེ་ཐ་སྙད་ཀྱི་བློའི་སྤྱོད་ཡུལ་དང་བྲལ་བར་རང་རིག་པའི་ཡེ་ཤེས་ཀྱིས་མངོན་དུ་བྱེད་པའོ། །དག་པ་གསུམ་ནི། སྣོད་འབྱུང་བ་ལྔ་ཡུམ་ལྔ། བཅུད་ཕུང་པོ་ལྔ་བདེ་གཤེགས་རིགས་ལྔ། རྒྱུད་རྣམ་ཤེས་ཚོགས་བརྒྱད་ཡེ་ཤེས་ལྔར་ཡེ་ནས་རྣམ་པར་དག་པ་ཡིན་ནོ། །མཉམ་པ་བཞི་ནི། སྤྲོས་པ་ཕྱོགས་རེ་ཆོད་པ་རྣམ་གྲངས་པ་དང་། མཐའ་དག་ཆོད་པ་རྣམ་གྲངས་མ་ཡིན་པའི་དོན་དམ་གཉིས་ཀ་རང་བཞིན་མ་གྲུབ་ཙམ་གྱིས་ཕྱེ་བས་དོན་དམ་ཙམ་དུ་མཉམ་པ་དང་། སྣང་ལ་དོན་བྱེད་ནུས་པ་ཡང་དག་དང་། དོན་བྱེད་མི་ནུས་པ་ལོག་པའི་ཀུན་རྫོབ་གཉིས་ཀ་ངོ་བོ་སྣང་ཙམ་ལས་བརྟགས་ན་དབེན་པའི་ཕྱིར་ཀུན་རྫོབ་ཏུ་མཉམ་པ་ནི་ཐུན་མོང་གི་མཉམ་པ་གཉིས་དང་། ཡེ་ནས་དབྱིངས་དང་ཡེ་ཤེས་གཉིས་སུ་མེད་པའི་གནས་ལུགས་ཡིན་པའི་ཕྱིར། རྣམ་གྲངས་པ་དང་རྣམ་གྲངས་མ་ཡིན་པའི་དོན་དམ་གཉིས་ཀའང་ལྷག་པའི་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པར་མཉམ་པ་དང་། ཡང་དག་དང་ལོག་པའི་ཀུན་རྫོབ་གཉིས་ཀའང་གནས་ཚུལ་དུ་ཡེ་ནས་དག་པའི་ཕྱིར་ལྷག་པའི་ཀུན་རྫོབ་སྐུ་དང་ཡེ་ཤེས་ཀྱི་ངོ་བོར་མཉམ་པ་ནི་ལྷག་པའི་མཉམ་པ་གཉིས་བཅས་བཞིའོ། །བདག་ཉིད་ཆེན་པོ་ནི། འཁོར་འདས་ཀྱི་ཆོས་རྣམས་སྣང་ལུགས་ནས་དུ་མར་སྣང་ཡང་། གནས་ལུགས་བདག་ཉིད་ཆེན་པོ་རང་བྱུང་གི་ཡེ་ཤེས་ཉག་གཅིག་ཏུ་ངེས་ཏེ་མཐར་ཐུག་དཔྱོད་རིགས་ཀྱིས་དེ་ལྟར་གྲུབ་པའི་ཕྱིར་རོ། ། ༈ ཐོག་མར་བསྐྱེད་རིམ་ལ་འཇུག་པའི་སྒོ་མ་ནོར་བ་ཏིང་ངེ་འཛིན་གསུམ་གྱི་ཡིན་ལུགས་ལ་སློབ་པ་ཡང་། གཞི་དེ་བཞིན་ཉིད་ཀྱི་ཏིང་ངེ་འཛིན། ལམ་ཀུན་ཏུ་སྣང་བའི་ཏིང་ངེ་འཛིན། འབྲས་བུ་རྒྱུ་ཡི་ཏིང་ངེ་འཛིན་དང་གསུམ་ལས། དང་པོ་ནི་རྟག་པའི་མཐའ་བསལ་ཞིང་གཟུགས་མེད་ཁམས་ཀྱི་བག་ཆགས་དང་འཆི་བའི་སྲིད་པ་བཅས་ཆོས་ཀྱི་སྐུ་རུ་སྦྱངས་ཤིང་དག་པར་བྱེད་པས་ན་དེ་བཞིན་ཉིད་ཀྱི་ཏིང་ངེ་འཛིན་ཞེས་རིག་པའི་ངོ་བོ་བསམ་གྱིས་མི་ཁྱབ་པའི་ཆ་ནས་བཞག་གོ །གཉིས་པ་ནི། ཆད་པའི་མུའམ་མཐའ་བསལ་ཞིང་གཟུགས་ཁམས་ཀྱི་བག་ཆགས་དང་བར་དོའི་སྲིད་པ་བཅས་གནས་འགྱུར་ལོངས་སྐུ་རུ་རྫོགས་པར་བྱེད་པས་ན་ཀུན་ཏུ་སྣང་བའི་ཏིང་ངེ་འཛིན་ཞེས་རིག་གདངས་ཐུགས་རྗེའི་རང་བཞིན་གོ་མ་འགགས་པའི་ཆ་ནས་བཞག་གོ །གསུམ་པ་ནི། བདག་ལྟ་མཚན་འཛིན་གྱི་དྲི་མ་དང་འདོད་ཁམས་ཀྱི་བག་ཆགས་སྦྱངས་ཤིང་སྐྱེ་བ་སྤྲུལ་པའི་ལྷ་སྐུར་སྨིན་པར་བྱེད་པས་རྒྱུ་ཡི་ཏིང་ངེ་འཛིན་ཞེས་རིག་རྩལ་ཡུལ་ལ་ཤར་བའི་ཆ་ནས་བཞག་པ་སྟེ། བསྐྱེད་རིམ་རྒྱས་པ་སོགས་ཀྱི་སྐབས་སུ་རྒྱུ་ཡི་རིག་པ་ཧཱུྃཿཧྲཱིཿལ་སོགས་པའི་སྒྲ་དོན་གྱིས་གོ་སླ། དེ་ལྟ་བུའི་ཏིང་ངེ་འཛིན་རྣམ་པ་གསུམ་གྱིས་བསྐྱེད་གཞིའི་ཁོག་ཕུབ་ནས། སྐྱེ་གནས་བཞིའི་བག་ཆགས་སྦྱོང་ཞིང་གང་ཟག་གི་བློ་ལ་བརྟན་པ་རིམ་གྱིས་ཐོབ་ཕྱིར་བསྐྱེད་རིམ་རྣམ་པ་བཞིའི་ལམ་ལ་འཇུག་པ་ཡང་སྒོང་སྐྱེས། མངལ་སྐྱེས། དྲོད་གཤེར་སྐྱེས། རྫུས་སྐྱེས་དང་བཞི་ལས། སྒོང་སྐྱེས་ཀྱི་བག་ཆགས་སྦྱོང་བ་རྒྱས་པ་ཆེན་པོའི་བསྐྱེད་རིམ་ནི་བདག་སྲས་དང་གཞན་སྲས་གཉིས་ལས། དང་པོ་བདག་གི་སྲས་སུ་གཞན་བྱ་བ་ལྔ་ནི། རྒྱུའི་ས་བོན་ལས་གཙོ་བོ་ཡབ་ཡུམ་བསྐྱེད་པ་དང་གཅིག །ཕྱོགས་བཅུའི་སངས་རྒྱས་སྲས་བཅས་ཡུམ་མཁར་བཀུག་པ་དང་གཉིས། སེམས་ཅན་བཀུག་ནས་སྒྲིབ་པ་སྦྱངས་པ་དང་གསུམ། འཁོར་འདས་གཉིས་སུ་མེད་པ་ལ་ཆེ་བ་བསྐྱེད་པ་དང་བཞི། དཀྱིལ་འཁོར་གྱི་ལྷ་ཚོགས་མཁའ་ནས་བཏོན་ཏེ་གདན་ལ་འཁོད་པ་དང་ལྔའོ། །གཉིས་པ་གཞན་གྱི་སྲས་སུ་བདག་བྱ་བ་བརྒྱད་ནི། གཙོ་བོ་ཡབ་ཡུམ་འོད་དུ་ཞུ་བ་ས་བོན་དུ་གྱུར་པ་དང་གཅིག །དེ་ཉིད་འབྲས་བུའི་རྡོ་རྗེ་འཛིན་པ་ཡབ་ཡུམ་གྱི་སྐུར་བཞེངས་པ་དང་གཉིས། ཡབ་ཀྱི་རྟོགས་པའི་ཚོགས་ཡི་གེའི་རྣམ་པར་འགོད་པ་དང་གསུམ། ཡུམ་གྱིས་ཡབ་ལ་ཐུགས་རྗེའི་དཀྱིལ་འཁོར་སྤྲོ་བར་གསོལ་བ་གདབ་པ་དང་བཞི། སྔ་མ་དཀྱིལ་འཁོར་གྱི་འཁོར་ལོ་བསྒོམས་པ་རྣམས་སྐབས་འདིར་རང་ལ་བསྟིམ་ཞིང་གཉིས་སུ་མེད་པའི་ཡེ་ཤེས་ང་རྒྱལ་ལ་གནས་པ་དང་ལྔ། དེ་མ་ཐག་ཡབ་ཡུམ་བདེ་སྟོང་གཉིས་སུ་མེད་པར་སྦྱོར་བའི་ཡུམ་མཁར་དཀྱིལ་འཁོར་གསལ་བ་དང་དྲུགརྟོགས་ཚོགས་ལྷར་གྱུར་པ་ཡུམ་མཁའ་ནས་ཕྱིར་འདོན་ཞིང་ཕྱི་རོལ་གྱི་གདན་ལ་འཁོད་པ་དང་བདུན། ཡེ་ཤེས་པ་སྤྱན་དྲངས་ཤིང་དབང་བསྐུར་རྒྱས་གདབ་པ་དང་བརྒྱད་དོ། །དེ་ལྟར་བདག་སྲས་ལྔ་དང་གཞན་སྲས་བརྒྱད་དེ་བཅུ་གསུམ་གྱིས་དཀྱིལ་འཁོར་ལྷའི་ཕྱག་རྒྱར་རྫོགས་པ་ནི་སྒོང་སྐྱེས་ཀྱི་བག་ཆགས་སྦྱོང་པའོ། །མངལ་སྐྱེས་ཀྱི་བག་ཆགས་སྦྱོང་པའི་མངོན་བྱང་ལྔ་བསྐྱེད་ནི། རྒྱུད་འགྲེལ་ཉི་སེང་ལྟར་ན། ཐོག་མར་སེམས་བསྐྱེད་དེ། ཡུད་ཙམ་གྱིས་ཀུན་ཏུ་བཟང་པོར་བསྒོམས་ནས་འོག་གི་ཕྱོགས་སུ་ཡེ་ཤེས་ཀྱི་ས་གཞི་ནས་བཟུང་གཞལ་ཡས་ཁང་གདན་དང་བཅས་པ་བསྐྱེད། དེ་ནས་ཉི་ཟླའི་གདན་ལ་སེམས་སྐྱིལ་ཀྱིས་འདུག་པར་མོས་ལ་བྱང་ཆུབ་ཀྱི་སེམས་ཡེ་ཤེས་སུ་བསྐྱེད་པའི་དོན་གྱིས་༼དེ་བཞིན་ཉིད་དང་ཀུན་སྣང་གི་མཆན་༽སྟོང་ཉིད་ཡེ་ཤེས། དེའི་ངང་ལས་རང་སེམས་ཨའི་ངོ་བོར་བསྒོམས་ནས་སྤྲོ་བསྡུ་ཨ་ལས་ཟླ་དཀྱིལ་གྱི་སྟེང་དུ་མཚན་གྱི་ས་བོན་ཨ་ལི་ཉིས་འགྱུར་དང་། ཨཱ་རིང་ལས་ཉི་དཀྱིལ་གྱི་སྟེང་དུ་དཔེ་བྱད་ཀྱི་ས་བོན་ཀ་ལི་ཉིས་རིམ་དུ་འགོད་པ་མེ་ལོང་ཡེ་ཤེས། དེ་དག་འོད་ཀྱི་གོང་བུ་གཅིག་ཏུ་འདྲིལ་བ་མཉམ་ཉིད་ཡེ་ཤེས། འོད་ཀྱི་གོང་བུ་དེ་ལས་ཧཱུྃ་དུ་གྱུར་ནས་དེའི་རྒྱུ་མཐུན་པའི་འབྲས་བུ་རྡོ་རྗེར་བྱིན་གྱིས་རློབ་པ་སོར་རྟོག་ཡེ་ཤེས། དེ་ཡོངས་སུ་གྱུར་པ་ལས་ཀུན་ཏུ་བཟང་པོའི་སྐུར་བསྐྱེད་པ་བྱ་གྲུབ་ཡེ་ཤེས་ཏེ་ཆོ་ག་ལྔའོ། །དེ་ནས་ཡུམ་བསྐྱེད་དེ་བྱང་ཆུབ་སེམས་སྤྲིན་ལས་ལྷ་སོ་སོའི་སྐུར་བསྐྱེད་པ་རང་རང་གི་སྔགས་ཀྱིས་ཕྱིར་ཕྱུང་ནས་དཀྱིལ་འཁོར་དུ་འགོད་པར་མཛད་དོ། །དཔེ་བྱད་ཀྱི་མཚོན་བྱེད་ཀ་ལི་བཞི་བཅུ་བརྩི་སྐབས་སུ་གསལ་བྱེད་སོ་བཞི་ལ་ཡི་གེ་ལྷག་པོ་དྲུག་སྣོན་ཚུལ་ལ། སློབ་དཔོན་སྐལ་ལྡན་རྡོ་རྗེའི་སྒྲུབ་ཐབས་གཙུག་ནོར་ལས། ཊ་ཌྷ་ད་དྷ་ལ་ཡ་དང་དྲུག་བསྣན། ཨ་བྷྱ་ཀ་རའི་མན་ངག་སྙེ་མ་ལས། ཊ་དྷ་ཡ་ར་ལ་ཝ་དང་དྲུག་བསྣན་པའོ། །ཀུན་མཁྱེན་ཆེན་པོས་གསལ་བྱེད་སོ་བཞིའི་སྟེང་། ཡ་ར་ལ་ཝ་སོགས་དྲུག་བསྣན་པའི་ཉིས་རིམ་དུ་གསུངས། གཞན་ཡང་བར་དོའི་རྣམ་ཤེས་དང་གཅིག །མངལ་དུ་འཇུག་ཁ་མ་དང་གཉིས། མངལ་དུ་ཞུགས་པ་དང་གསུམ། ཞུགས་ནས་ཟླ་བཅུར་རྫོགས་པ་དང་བཞི། ལུས་ཡོངས་སུ་རྫོགས་ནས་ཕྱི་རོལ་དུ་བཙའ་བ་དང་ལྔའོ། །ཆོ་ག་བཞི་བསྐྱེད་ནི། དེ་ཡང་མངལ་དུ་ཐིག་ལེ་དཀར་དམར་འདུས་པར་རྣམ་ཤེས་ཞུགས་པ་ལྟར་ལྷའི་ས་བོན་ཧཱུྃ་ལྟ་བུ་དང་། མེར་མེར་པོ་དང་ནུར་ནུར་པོ་ལྟར་ཧཱུྃ་ལས་རྡོ་རྗེ་དང་། ལྟར་ལྟར་པོ་དང་མཁྲང་གྱུར་ལྟར་རྡོ་རྗེ་ལས་སྐུ་དེའི་རྒྱུ་འོད་ལྔའི་གོང་བུ་དང་། ཁྱབ་འཇུག་ཉ་དང་རུས་སྦལ་ནས་ལུས་ཡོངས་སུ་རྫོགས་པ་ལྟར་འོད་ལྔའི་གོང་བུ་ལས་སྐུར་གྱུར་པ་ནས་བསྐྱེད་པའི་རིམ་པ་རྫོགས་པར་བསྒོམ་པའོ། །འབྲིང་པོ་རྡོ་རྗེའི་ཆོ་ག་གསུམ་བསྐྱེད་ནི། བར་དོའི་རླུང་སེམས་ཕ་མའི་ཁུ་རྡུལ་གྱི་དབུས་སུ་དང་པོར་ཞུགས་པ་ལྟར་གསུང་ཡིག་འབྲུ། མེར་ནུར་ལྟར་མཁྲང་གི་གནས་སྐབས་ལྟར་ཐུགས་ཕྱག་མཚན་དང་། གོར་ཉ་རུས་སྦལ་ནས་ལུས་རྫོགས་ཏེ་བཙས་པ་ལྟར་སྐུ་ཡོངས་སུ་རྫོགས་པའོ། །གཞན་ཡང་བར་སྲིད་དང་གཅིགམངལ་གནས་དང་གཉིས། ཕྱི་རོལ་དུ་བཙའ་བ་དང་གསུམ་མོ། །དྲོད་གཤེར་སྐྱེས་ཀྱི་བག་ཆགས་སྦྱོང་བ་བསྡུས་པའི་བསྐྱེད་རིམ་ནི། ས་བོན་བཀོད་པའམ་རྩ་བའི་སྔགས་བརྗོད་པ་ཙམ་གྱིས་དཀྱིལ་འཁོར་གྱི་ཕྱག་རྒྱ་ཚང་ལ་མ་འཁྲུལ་བར་གསལ་བ་སྟེ་གང་ཟག་དབང་པོ་རབ་ལ་འདི་ཙམ་གྱིས་ཆོག་པ་ཡིན་ནོ། །འདིར་གདན་གྱི་ཉི་མ་དྲོད། ཟླ་བ་གཤེར། ས་བོན་ཕྱག་མཚན་ནི་བར་དོའི་རླུང་སེམས། འོད་ཟེར་སྤྲོ་བསྡུ་དང་སྐུ་ཡོངས་སུ་རྫོགས་པས་དེ་གསུམ་འདུས་པ་ལས་དྲོད་གཤེར་གྱི་དབུས་ནས་ལུས་གྲུབ་པ་དེ་སྦྱོང་། བརྫུས་སྐྱེས་ཀྱི་བག་ཆགས་སྦྱོང་པ་ཤིན་ཏུ་བསྡུས་པའི་བསྐྱེད་རིམ་ནི། རིག་པ་ཆོས་ཉིད་ཀྱི་རང་གདངས་སྐད་ཅིག་ལ་ཆུ་ལས་ཉ་ལྡང་བ་ལྟར་ལྷར་སྣང་དུ་ཤར་བ་སྟེ། བསྐྱེད་རྫོགས་གདེངས་དུ་ཚུད་པའི་དབང་པོ་ཡང་རབ་ཀྱི་རྣལ་འབྱོར་པ་ལ་འདི་ཉིད་ཤིན་ཏུ་བདེ་ཞིང་འཐད་པ་དང་བཅས་པའོ། །འདི་ལ་ལྷའི་གདན་ནི་སྐྱེ་གནས། ས་བོན་ཕྱག་མཚན་ནི་བར་དོའི་རླུང་སེམས། འོད་ཟེར་སྤྲོ་བསྡུ་ནི་གནས་ལུས་ལ་སྲེད་པ་དང་ལེན་པའི་མཐུས་གསོས་བཏབ་པ། སྐུ་ཡོངས་སུ་རྫོགས་པ་ནི་ལུས་སྐད་ཅིག་ཏུ་འགྲུབ་པ་དེ་སྦྱོང་བར་བྱེད་པའོ། །དེ་ཡང་སྔ་འགྱུར་གཏེར་མའི་ཕྱོགས་འདིར་རྡོ་རྗེའི་ཆོ་ག་གསུམ་བསྐྱེད་ཉིད་མང་ཞིང་བསྐྱེད་ཚུལ་འདིས་སྐྱེ་གནས་བཞི་གའི་བག་ཆགས་སྦྱོང་བར་ནུས་ཏེ། སྐྱེ་གནས་གཞན་གསུམ་ནི་གོང་དུ་བཤད་པ་ལྟར་ཡིན་ལ། སྒོང་སྐྱེས་ལ་ཡང་ལྷའི་ས་བོན་ནི་དྲི་ཟའི་སེམས། ས་བོན་ཕྱག་མཚན་དུ་བསྒྱུར་བ་ནི་མངལ་དུ་ཁུ་ཁྲག་གི་དབུས་སུ་ཞུགས་པ། འོད་ཟེར་སྤྲོ་བསྡུའི་མཐར་ཕྱག་མཚན་དེ་ཉིད་འོད་དུ་ཞུ་བའི་གོང་བུས་སྒོ་ངར་གྱུར་པའི་བག་ཆགས་སྦྱོང་བར་བྱེད་པའོ། །འདིར་སྒྲུབ་སྡེའི་ལུགས་བཀའ་བརྒྱད་གསང་རྫོགས་ནས་གསུངས་པ་ལྟར་ན། སྤྱིར་བདག་སྲས་གཞན་སྲས་ཞེས་པའི་དོན། བདག་སྲས་ཞེས་པ་རང་སེམས་བདེ་བར་གཤེགས་པའི་སྙིང་པོ་ནི་འཁོར་འདས་ཀྱི་ཆོས་ཐམས་ཅད་ཀྱི་འཆར་གཞིར་གནས་པས་ན་རིག་པའི་ངོ་བོ་དེ་གཙོ་བོ་ཡབ་ཡུམ་དུ་བསྐྱེད་ནས་དེའི་སྲས་སུ་གཞན་དེ་བཞིན་གཤེགས་པ་རྣམས་བསྐྲུན་ཏེ་འཁོར་དུ་བཀོད་པའི་དོན་ཡིན་ལ། གཞན་སྲས་ནི་བདག་སྲས་ཀྱི་སྐབས་སུ་གཞན་དེ་བཞིན་གཤེགས་པ་ཐམས་ཅད་རང་ལ་བསྟིམས་ནས་མངལ་འབྱིན་གྱི་སྒོ་ནས་སྲས་ཀྱི་རྣམ་པར་འཁོར་དུ་བཀོད་པ་དེ་རྣམས་གཙོ་བོའི་ཐུགས་སུ་གྱུར་ནས་བདག་གི་རྟོག་ཚོགས་ཡི་གེའི་རྣམ་པར་ཡོད་པ་མཁའ་རུ་ཕབ་སྟེ་སྲས་སུ་བསྐྲུན་ནས་འཁོར་དུ་བཀོད་པའི་དོན་ནོ། །དེ་ཡང་བདག་གི་སྲས་སུ་གཞན་བྱ་བ་ལ་ལྔ་སྟེ། རྒྱུའི་ས་བོན་གྱི་ཡི་གེ་གདན་སྟེང་དུ་བབ་པ་སྤྲོ་བསྡུས་ཡོངས་སུ་གྱུར་པ་ལས་རྒྱུའི་ཧེ་རུ་ཀ་གཙོ་བོ་ཡབ་ཡུམ་དུ་བསྐྱེད་པ་དང་། ཡབ་ཡུམ་མཁའ་གསང་མཉམ་པར་སྦྱོར་བའི་བདེ་བའི་འོད་ཟེར་གྱིས་ཕྱོགས་བཅུའི་སངས་རྒྱས་ཐམས་ཅད་བཀུག་ནས་ཡབ་ཀྱི་སྤྱི་བོ་ནས་ཞུགས་ཏེ་ཡུམ་མཁར་བསྟིམ་པ་དང་། ཡང་འོད་ཟེར་འཕྲོས་པས་སེམས་ཅན་རྣམས་བཀུག་ལ་སྒྲིབ་པ་སྦྱངས་ཏེ་ཡུམ་མཁར་བསྟིམ་པ་དང་། འཁོར་འདས་ཀུན་གྱི་སྤྱི་དཔལ་ཆེན་པོ་ནི་ངའོ་ཞེས་འཁོར་འདས་གཉིས་སུ་མེད་པའི་བདག་ཉིད་ལ་ཆེ་བའི་ང་རྒྱལ་བསྐྱེད་པ་དང་། ལྷ་ཚོགས་རྣམས་མཁའ་གསང་ནས་བཏོན་ཏེ་སོ་སོའི་གདན་ལ་འགོད་པར་བྱེད་པའོ། །གཞན་སྲས་བརྒྱད་དེ། དཔེར་ན་སྒོང་སྐྱེས་རྣམས་དང་པོ་སྒོ་ང་སྨིན་པ་དང་། དེ་ནས་སྒོང་ཁྱིམ་བརྡོལ་ནས་དབང་པོ་དང་ཡན་ལག་རྫོགས་པ་དེ་བཞིན་ཏུ་གཙོ་བོ་ཡབ་ཡུམ་འོད་དུ་ཞུ་ནས་འོད་ཀྱི་གོང་བུ་ས་བོན་ཕྱག་མཚན་དང་བཅས་པར་གྱུར་པ་དང་། དེ་ཡོངས་སུ་གྱུར་པ་ལས་འབྲས་བུའི་ཧེ་རུ་ཀ་ཡབ་ཡུམ་དུ་བསྐྱེད་པ་དང་། དེའི་ཚེ་ཡབ་ཀྱི་རྟོག་པ་ཐམས་ཅད་ཡི་གེའི་ངོ་བོར་གྱུར་ནས་སྲས་འདོན་གྱི་ནུས་པ་ཡོད་པར་བསམ་པ་དང་། ཡུམ་ལས་འོད་ཟེར་འཕྲོས་པས་བསྐུལ་ཏེ་འཁོར་གྱི་ལྷ་རྣམས་ལ་སྲས་བསྐྱེད་པའི་དོན་དུ་གསོལ་བ་གདབ་པ་དང་། འཁོར་གྱི་ལྷ་རྣམས་དགྱེས་པས་འོད་དུ་ཞུ་ནས་གཙོ་བོ་ཡབ་ཡུམ་གྱི་ཐུགས་ཀར་བསྟིམས་ཏེ་གཙོ་བོའི་ཐུགས་སུ་གྱུར་ནས་དཀྱིལ་འཁོར་ཀུན་གྱི་ཁྱབ་བདག་ཡེ་ཤེས་ཆེན་པོའི་བདག་ཉིད་ངའོ་ཞེས་ང་རྒྱལ་བཟུང་བ་དང་། ཡབ་ཡུམ་མཁའ་གསང་བྱིན་གྱིས་བརླབ་ཅིང་མཉམ་པར་སྦྱོར་བའི་ཡུམ་གྱི་མཁར་དཀྱིལ་འཁོར་གཞལ་ཡས་ཁང་གདན་དང་བཅས་པ་བསྐྱེད་པ་དང་། བདག་གི་རྟོག་པ་ཞེ་གཉིས་ཡི་གེའི་ངོ་བོར་གནས་པ་ཡོངས་སུ་གྱུར་པ་ལས་གཙོ་འཁོར་གྱི་ལྷ་ཚོགས་ཡོངས་རྫོགས་སུ་གསལ་བཏབ་སྟེ་ཡུམ་མཁའ་ནས་ཕྱིར་གདོན་པ་དང་། དབྱིངས་ནས་ཡེ་ཤེས་པ་སྤྱན་དྲངས་ཤིང་བསྟིམས་ལ་གནས་གསུམ་རྡོ་རྗེ་གསུམ་གྱིས་རྒྱབ་བཏབ་སྟེ་འཁོར་རྣམས་གདན་ལ་བཀོད། གཙོ་བོ་འབྲས་བུའི་ཧེ་རུ་ཀ་ལ་བསྟིམས། གཞལ་ཡས་ཁང་དང་། གདན་རྣམས་ཀྱང་རང་རང་ལ་བསྟིམ་པའོ། །མངལ་སྐྱེས་སྦྱོང་བྱེད་ལ་གསུམ་ལས་དང་པོ་མངོན་བྱང་ལྔ་བསྐྱེད་ནི། དེ་ཡང་གཞི་དུས་སུ་དཀར་དམར་རླུང་སེམས་ཚོགས་པ་དང་བཅས་པ་ཡེ་ནས་ཡེ་ཤེས་ལྔའི་ངོ་བོར་སངས་རྒྱས་པ་གཞིའི་མངོན་བྱང་། ༼གང་དུ་སྐྱེས་འགྱུར་གྱི་གནས་ལ་སྲེད་པ་ནི། བརྫུས་ཏེ་སྐྱེ་ན་གནས་ལ། དྲོད་གཤེར་ལས་སྐྱེ་ན་དྲི་རོ་ལ། སྒོ་ང་དང་མངལ་ལས་སྐྱེ་ན་ཕ་མའི་འདུ་འཕྲོད་ལ་སྲེད་པ་ཡིན་ནོ། །༽ལམ་དུས་སུ་ཚོགས་སྦྱོར་དུ་དཔེ་ཡི་ཡེ་ཤེས་དང་། མཐོང་ལམ་དུ་དོན་གྱི་འོད་གསལ་མངོན་དུ་བྱས་པའི་སྟོང་བཞི་ཟུང་འཇུག་དང་བཅས་པ་ལམ་གྱི་མངོན་བྱང་ཡིན་པས། དེ་རྒྱུད་ལ་སྐྱེད་བྱེད་བསྐྱེད་རིམ་གྱི་དུས་སུ་ཟླ་ཉི་ཕྱག་མཚན་སོགས་བསྒོམ་པའོ། །འབྲས་དུས་སུ་སྐུ་ལྔ་ཡེ་ཤེས་ལྔ་མི་སློབ་ཟུང་འཇུག་གི་ཡོན་ཏན་ཐམས་ཅད་ནི་འབྲས་བུའི་མངོན་བྱང་ངོ་། །དེ་ལྟར་གཞི་ལམ་འབྲས་གསུམ་དུ་སྦྱོར་ཚུལ་ངེས་པར་བྱས་ནས། བྱེ་བྲག་ལམ་གྱི་མངོན་བྱང་ལྔ་བསྒོམ་ཚུལ་ནི་སྦྱང་གཞི་གཟུགས་ཀྱི་ཕུང་པོ་དང་། ནམ་མཁའི་ཁམས། ལུས། ཀུན་གཞིའི་རྣམ་ཤེས། ཉོན་མོངས་པ་གཏི་མུག །མངལ་སྐྱེས་ཀྱི་ཕའི་ཁམས། དྲོད་གཤེར་སྐྱེས་ཀྱི་གཤེར། སྒོང་སྐྱེས་ཀྱི་ཕ། རྫུས་སྐྱེས་ཀྱི་སྟོང་པའི་ཆ་སོགས། སྦྱོང་བྱེད་མངོན་བྱང་དང་པོ་མེ་ལོང་ཡེ་ཤེས་དང་། རྣམ་སྣང་གི་ངོ་བོ་ཨཱཿལི་ལས་བྱུང་བའི་ཟླ་བའི་དཀྱིལ་འཁོར་བསྒོམ་པ་དང་། དེ་བཞིན་དུ་ཚོར་ཕུང་། ས་ཁམས། ཉོན་ཡིད། སེར་སྣ། ང་རྒྱལ། མངལ་སྐྱེས་ཀྱི་མའི་ཁམས་དམར་ཆ། སྒོང་སྐྱེས་ཀྱི་མའི་ཆ། དྲོད་གཤེར་སྐྱེས་ཀྱི་དྲོད། རྫུས་སྐྱེས་ཀྱི་གསལ་བའི་ཆ་རྣམས་སྦྱོང་བྱེད་མངོན་བྱང་གཉིས་པ་མཉམ་ཉིད་དང་རིན་འབྱུང་གི་ངོ་བོ་ཀཱ་ལི་ལས་བྱུང་བའི་ཉི་མའི་དཀྱིལ་འཁོར་བསྒོམ་པ་དང་། ཁུ་རྡུལ་གཉིས་ཀྱི་བར་དུ་དྲི་ཟ་ཉེ་བར་ལེན་པའི་སེམས་བར་དོའི་རྣམ་ཤེས་ཞུགས་པ་དང་། འདུ་ཤེས་ཀྱི་ཕུང་པོ། མེ་ཡི་ཁམས། ངགཡིད་ཀྱི་རྣམ་པར་ཤེས་པ། ཉོན་མོངས་པ་འདོད་ཆགས། སྐྱེ་གནས་བཞིར་འཇུག་པའི་བར་དོའི་རྣམ་ཤེས་རྣམས་སྦྱོང་བྱེད་མངོན་བྱང་གསུམ་པ་སོར་རྟོག་དང་འོད་དཔག་མེད་ཀྱི་ངོ་བོ་ས་བོན་ཕྱག་མཚན་དང་བཅས་པར་བསྒོམ་པ་དང་། ཁུ་རྡུལ་སེམས་གསུམ་རོ་གཅིག་ཏུ་འདྲེས་པ། འདུ་བྱེད་ཀྱི་ཕུང་པོ། རླུང་ཁམས། སྒོ་གསུམ་གྱི་བྱ་བ་དང་། སྒོ་ལྔའི་རྣམ་ཤེས། ཉོན་མོངས་ཕྲག་དོགསྐྱེ་གནས་བཞིའི་མངལ་སྒོང་གཉིས་ཀྱི་བར་དོའི་རྣམ་ཤེས་དང་ཁུ་ཁྲག་འདྲེས་པ། དྲོད་སྐྱེས་ཀྱི་རྣམ་ཤེས་དང་དྲོད་གཤེར་འདྲེས་པ། རྫུས་སྐྱེས་ཀྱི་གསལ་ལ་སྟོང་པ་ཙམ་དང་བར་སྲིད་ཀྱི་རྣམ་ཤེས་འདྲེས་པའི་ཆ་རྣམས་སྦྱོང་བྱེད་མངོན་བྱང་བཞི་པ་བྱ་གྲུབ་དང་དོན་གྲུབ་ཀྱི་ངོ་བོ་ཟླ་ཉི་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པའི་ཐིག་ལེ་གོང་བུའི་རྣམ་པ་ཅན་དུ་བསྒོམ་པ་དང་། མངལ་གྱི་གནས་སྐབས་ཡོངས་སུ་རྫོགས་ནས་ཕྱིར་བཙས་པ་དང་། རྣམ་ཤེས་ཀྱི་ཕུང་པོ། ཆུའི་ཁམས། ཡིད་ཀྱི་རྣམ་ཤེས་ཚོགས་བརྒྱད་ཀྱི་ཆོས་ཉིད་དུ་འཛིན་པའི་ཆ། ཉོན་མོངས་པ་ཞེ་སྡང་། སྐྱེ་གནས་བཞིར་སྐྱེ་བ་ལེན་པའི་སྐྱེ་མཆེད་རྫོགས་པའི་གནས་སྐབས་རྣམས་སྦྱོང་བྱེད་མངོན་བྱང་ལྔ་པ་ཆོས་དབྱིངས་ཡེ་ཤེས་དང་མི་སྐྱོད་པའི་ངོ་བོ་སྐུ་ཡོངས་རྫོགས་སུ་བསྒོམ་པ་རྣམས་སོ། །འདིའི་དག་རྫོགས་སྨིན་གསུམ་ནི། འགྲོ་བའི་ལུས་རྟེན་ཁྱད་པར་ཅན་ཁམས་དྲུག་ལྡན་གྱི་མི་ལྟ་བུ་ལ་ཁམས་ཀྱི་སྦྱང་གཞི་རྩ་ཐིག་རླུང་སེམས་རགས་པའི་ཆ་མངོན་གྱུར་དུ་ཡོད་པ་ཐབས་ཀྱིས་ཟིན་པས་གྲོལ་བར་འགྱུར་ཏེ། དང་པོར་དབང་གིས་སྨིན་པར་བྱས་ནས། རྟོག་བཅས་ཀྱི་ལམ་བསྐྱེད་རིམ་གྱི་དུས་སུ་མངོན་བྱང་ལྔ་བསྒོམ་པའི་ཚེ་ནའང་གནད་དུ་བསྣུན་བྱའི་གཙོ་བོ་དཀར་དམར་སེམས་གསུམ་ཡིན་པའི་ཕྱིར་འཁོར་བ་དང་མཐུན་པའི་རྣམ་པ་ལམ་བྱེད་ཀྱིས་སྦྱང་བྱ་སྲིད་པའི་རང་བཞིན་ཁུ་རྡུལ་རླུང་གསུམ་སེམས་དང་བཅས་པའི་ཆ་ཐམས་ཅད་རྣམ་པར་དག་པ་རྒྱལ་བའི་བཞུགས་ཚུལ་དང་མཐུན་པར་མོས་པ་ལམ་བྱེད་བསྒོམས་པས་འབྲས་ཆོས་ལྔ་དང་ཡེ་ཤེས་ལྔའི་ཡོན་ཏན་ཐམས་ཅད་གཞི་ལ་རྫོགས། དེ་གཉིས་ཀ་སྣང་བ་དང་། མཆེད་པ་དང་། ཉེར་ཐོབ་དང་། འོད་གསལ་དང་། ཟུང་འཇུག་ལ་སོགས་པའི་རྫོགས་རིམ་གྱི་སྨིན་བྱེད་དུ་འགྱུར་བ་ཡིན་ནོ། །གཉིས་པ་མངོན་བྱང་བཞི་བསྐྱེད་ལ། དང་པོ་ལ་སྤྲོས་བྲལ་རྣམ་པར་མི་རྟོག་པའི་ཏིང་ངེ་འཛིན་ལ་མཉམ་པར་བཞག་ནས། དེའི་ངང་ལས་དེ་ལྟར་མ་རྟོགས་པའི་སེམས་ཅན་རྣམས་ལ་ཞེན་མེད་སྒྱུ་མ་ལྟ་བུའི་སྙིང་རྗེ་བྱང་ཆུབ་ཀྱི་སེམས་བསྒོམ་པ་སྟེ། འདིས་མར་སྦྱང་བྱ་རང་བཞིན་བརྒྱད་ཅུའི་རྟོག་ཚོགས་ཐམས་ཅད་འཁྲུལ་སྟོབས་ཀྱིས་ནུབ་པའི་འཆི་སྲིད་དང་། སླར་ཡང་ལས་རླུང་མཆེད་པའི་སྟོབས་ཀྱིས་བར་དོའི་སྣང་བ་ཡད་ཡུད་དུ་འབྱུང་བ་བཅས་དགཡར་ཆོས་སྐུ་དང་ལོངས་སྐུ་གཉིས་གཞི་ལ་རྫོགས་པར་བྱེད། བར་དུ་འོད་གསལ་དང་སྒྱུ་ལུས་གཉིས་ཀྱི་སྨིན་བྱེད་དུ་འགྱུར་རོ། །གཉིས་པ་ནི། ངོ་བོ་སྟོང་ཉིད་སྙིང་རྗེ་ཟུང་དུ་འཇུག་པའི་ཡེ་ཤེས་རྣམ་པ་ལྷའི་ས་བོན་གྱི་རྣམ་པར་བསྒོམ་པ་སྟེ། འདིས་དྲི་ཟ་ཉེ་བར་ལེན་པ་བར་དོའི་རྣམ་ཤེས་དེ་ཕ་མའི་ཁུ་ཁྲག་གི་དབུས་སུ་ཞུགས་ཤིང་འདྲེས་པའི་ཆ་སྦྱོང་ཞིང་དགསྤྲུལ་སྐུ་གཞི་ལ་རྫོགས། དཔེའི་འོད་གསལ་ལས་སྒྱུ་ལུས་ཀྱི་ལྷ་སྐུར་ལྡང་བའི་སྨིན་བྱེད་དུ་འགྱུར་རོ། །གསུམ་པ་ནི་ས་བོན་གྱི་ཡི་གེ་ཉིད་ཐུགས་རྡོ་རྗེ་ཕྱག་མཚན་གྱི་རྣམ་པར་གྱུར་ཞིང་དེ་ལས་སྐུ་ཡོངས་རྫོགས་སུ་བསྐྱེད་པ་སྟེ། འདིས་ཁུ་རྡུལ་རླུང་སེམས་ཀྱི་ཆ་འདྲེས་པ་དེ་རླུང་གི་བྱེད་ལས་ཀྱིས་མེར་ནུར་ལྟར་གོར་མཁྲང་གྱུར་ཁྱབ་འཇུག་ཉ་དང་རུས་སྦལ་གྱི་རྣམ་པ་དང་མིག་སོགས་དབང་པོ་དང་ཡན་ལག་ཡོངས་སུ་རྫོགས་པ་དེ་བྱང་ཞིང་དགཟུང་འཇུག་ངོ་བོ་ཉིད་སྐུ་གཞི་ལ་རྫོགས། དོན་གྱི་འོད་གསལ་ཟུང་འཇུག་གི་ལྷ་སྐུར་ལྡང་བའི་སྨིན་བྱེད་དུ་འགྱུར་རོ། །བཞི་པ་ནི། ལྷ་མངལ་འབྱིན་གྱི་ས་བོན་སྤྲོ་བའམ། མིན་ཀྱང་གནས་གསུམ་ལ་ཡི་གེ་བཀོད་དེ་རྒྱས་གདབ་པ་སྟེ། འདིས་བྱིས་པ་དེ་བཙས་ནས་དབང་པོ་ཡུལ་ལ་སད་དེ་སྣ་ཚོགས་པའི་དངོས་པོ་སྤྱོད་པའི་ཞེན་པ་དགསངས་རྒྱས་ཀྱི་ལྷུན་གྱིས་གྲུབ་པའི་འབྲས་བུ་གཞི་ལ་རྫོགས། རྫོགས་རིམ་པ་སློབ་པའི་ཟུང་འཇུག་གི་ལྷ་སྐུར་ལྡང་ནས་འདོད་ཡོན་གྱི་སྣང་བ་ལ་ཞེན་མེད་དུ་རོལ་བས་རིག་པའི་རྒྱན་དུ་འཆར་བའི་སྨིན་བྱེད་དུ་འགྱུར་རོ། །གསུམ་པ་རྡོ་རྗེའི་ཆོ་ག་གསུམ་བསྐྱེད་ནི། སྔ་འགྱུར་གཏེར་མའི་ཕྱོགས་འདིར་མངལ་སྐྱེས་སྦྱོང་བྱེད་བསྡུས་པ་འདི་ཉིད་མང་ཞིང་དེ་ལྟ་ན། འདིའི་སྦྱང་བྱ་བར་དོའི་རྣམ་ཤེས་དེ་ཕ་མའི་ཁུ་ཁྲག་གི་དབུས་སུ་ཞུགས་ནས་རིམ་གྱིས་ལུས་རྫོགས་པ་དང་མཐུན་པར། སྦྱོང་བྱེད་གཞལ་མེད་ཁང་གི་དབུས་སུ་པདྨ་དམར་པོའི་གདན། དེའི་སྟེང་དུ་ཉི་མའི་དཀྱིལ་འཁོར་དམར་པོ་དང་ཟླ་བའི་དཀྱིལ་འཁོར་ཉ་གང་བ་གཉིས་བརྩེགས་པ། པདྨའི་ལྟེ་བ་དང་མཉམ་པའི་གདན་ལ་ས་བོན་རྒྱུའི་ཏིང་ངེ་འཛིན་གྱི་ཡི་གེ་བབ་པ་བར་དོའི་རྣམ་ཤེས་མའི་མངལ་དུ་དཀར་དམར་ཚོགས་པ་ལ་འཇུག་མ་རག་གི་གནས་སྐབས་དེ་ཡིན། ས་བོན་ལྷ་གང་ཡིན་གྱི་ཕྱག་མཚན་དུ་བསྒྱུར་བ་ནི་ཁམས་དཀར་དམར་གྱི་དབུས་སུ་རྣམ་ཤེས་ཞུགས་ནས་ཁུ་རྡུལ་སེམས་གསུམ་གཅིག་ཏུ་འདྲེས་པ་དེ་སྦྱོང་། དེ་ལས་འོད་ཟེར་སྤྲོ་བསྡུ་ནི་མངལ་གྱི་ལུས་དེ་ཉིད་འབྱུང་བ་བཞིའི་བྱེད་ལས་ཀྱིས་ཕུང་ཁམས་སྐྱེ་མཆེད་རིམ་གྱིས་གྲུབ་པ་དང་། ཕྱག་མཚན་དེ་ཡོངས་སུ་གྱུར་པ་ལས་སྐུ་ཡོངས་སུ་རྫོགས་པ་ནི་མངལ་གྱི་སེམས་ཅན་དེ་རྣམས་ལུས་རྫོགས་ནས་བཙས་པའི་བར་གྱི་བག་ཆགས་རྣམས་སྦྱོང་བར་བྱེད་པ་ཡིན་ལ། དེ་ལྟར་བསྐྱེད་ཚུལ་འདིས་སྐྱེ་གནས་གཞན་གྱི་བག་ཆགས་ཀྱང་ཞར་ལ་སྦྱོང་བར་ནུས་སོ། །མདོར་ན་རྡོ་རྗེའི་ཆོ་ག་དང་པོས་བར་དོའི་རླུང་སེམས་ཕ་མའི་ཁུ་རྡུལ་གྱི་དབུས་སུ་དང་པོར་ཞུགས་པ་ལྟར་གསུང་ཡིག་འབྲུ། གཉིས་པ་མེར་ནུར་ལྟར་མཁྲང་གི་གནས་སྐབས་ལྟར་ཐུགས་ཕྱག་མཚན། གསུམ་པ་གོར་ཉ་རུས་སྦལ་ནས་ལུས་རྫོགས་ཏེ་བཙས་པ་ལྟར་སྐུ་ཡོངས་སུ་རྫོགས་པའོ། །དྲོད་གཤེར་སྐྱེས་སྦྱོང་བྱེད་ཨ་ནུ་ཡོ་གའི་དགོངས་པ་སྤྲོས་མེད་ཀྱི་བསྐྱེད་རིམ་ནི། སེམས་ཅན་དྲོད་གཤེར་ལས་སྐྱེས་པ་རྣམས་ནི་མངལ་སྐྱེས་ལྟར་ཡུན་རིང་དུ་སྨིན་མི་དགོས་པར། དྲོད་གཤེར་གཉིས་ལྷན་དུ་འདུས་པར་རྣམ་ཤེས་ཞུགས་པས་དེའི་མོད་ལ་གཟུགས་ཀྱི་དངོས་པོ་ཡོངས་སུ་རྫོགས་པར་འགྲུབ་པ་བཞིན། དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་ཤེས་པ་ལུང་ཆེན་ཨ་ནུའི་ལྟ་བ་ལས་མ་གཡོས་བཞིན་དུ། རྩལ་སྣང་སྙིང་རྗེའི་འཕེན་པ་གཏད་པས་དྲོད་གཤེར་སྐྱེས་རྣམས་གནས་ལུས་ལ་སྲེད་པའི་བག་ཆགས་སྦྱང་བའི་ཕྱིར། གང་བསྐྱེད་བྱའི་ལྷའི་སྙིང་པོ་བརྗོད་པ་ཙམ་གྱིས། དོན་དམ་ཤེས་རབ་ཀྱི་དབྱིངས་སྟོང་ཉིད་ཀུན་ཏུ་བཟང་མོའི་ཀློང་ནས་ཀུན་རྫོབ་བདེན་པའི་སྣང་ཆ་རྟེན་དང་བརྟེན་པའི་ལྷའི་ཕྱག་རྒྱ་ཡོངས་སུ་བསྒོམ་ཞིང་བདེ་སྟོང་དབྱེར་མེད་ཀྱི་ལམ་ལ་སློབ་པ་སྟེ་འདི་ལ་ཡུལ་སྣང་བདེན་མེད་དུ་ཤེས་པ་སྒྱུ་མའི་བསྐྱེད་རིམ་ཞེས་བྱའོ། །རྫུས་སྐྱེས་སྦྱོང་བྱེད་མན་ངག་ཨ་ཏི་ཡོ་གའི་དགོངས་པ་དང་མཐུན་པར་ཤིན་ཏུ་སྤྲོས་མེད་ཀྱི་བསྐྱེད་རིམ་ནི། སེམས་ཅན་རྫུས་ཏེ་སྐྱེ་བ་རྣམས་གསལ་སྟོང་གི་ཆ་ལ་རྣམ་ཤེས་ཞུགས་པ་ཙམ་གྱིས་ལུས་ཡོངས་སུ་རྫོགས་པར་གྲུབ་པ་ནི་དྲོད་གཤེར་སྐྱེས་ལས་ཀྱང་མྱུར་བ་ལྟར་དེ་སྦྱོང་བྱེད་ཀྱི་ལམ་ཡང་། རྡོ་རྗེ་དྲིལ་བུ་ལས། སེམས་ཅན་རྫུས་ཏེ་སྐྱེ་བ་བཞིན། །ས་བོན་མེད་པར་རྣམ་པར་བསྒོམ། །ཞེས་གསུངས་པ་ལྟར། འདི་ལྟར་སྣང་གྲགས་རྟོག་ཚོགས་ཀྱིས་བསྡུས་པའི་ཆོས་ཐམས་ཅད་ཡེ་ནས་རྒྱལ་བའི་སྐུ་གསུང་ཐུགས་རྡོ་རྗེའི་ངོ་བོར་སངས་རྒྱས་པས་མ་བསྐྱེད་ལྷུན་གྱིས་རྫོགས་པའི་དཀྱིལ་འཁོར་རྩོལ་བྲལ་འབྲས་བུའི་ས་ལ་ད་ལྟ་ནས་གནས་པ་མན་ངག་ཨ་ཏི་ཡོ་གའི་ལྟ་བའི་ངང་ལས་རྟེན་དང་བརྟེན་པའི་དཀྱིལ་འཁོར་ཡོངས་སུ་རྫོགས་པ་ཆུ་ལས་ཉ་འཕར་བའི་ཚུལ་དུ་སྐད་ཅིག་གིས་གསལ་འདེབས་པའོ། ། ༈ དཀོན་མཆོག་འགྲེལ་ལས། འདི་ལྟར་རྣམ་པར་སྣང་མཛད་སྒྱུ་འཕྲུལ་དྲྭ་བ་ལས། དང་པོ་དམ་ཚིག་བྱིན་བརླབ་པ། །བརྟགས་པ་རྣལ་འབྱོར་སྤྱོད་པའོ། །དབུ་མ་རྫོགས་པར་བྱ་བ་དག །འདི་ནི་རྣལ་འབྱོར་ཆོ་གར་བཤད། །ཅེས་གསུངས་སོ། །དེ་ལ་དང་པོའི་ཚིག་ནི་གཞུང་ལུགས་ལ་འཇུག་པས་གཞུང་ལུགས་དང་པོ་སྟེ། ཉན་ཐོས་པའི་གཞུང་ངོ་། །དེ་དང་མཐུན་པ་བྱིན་གྱིས་བརླབ་པའི་རྣལ་འབྱོར་ཏེ། ཇི་ལྟར་ཞེ་ན། འདིར་བདག་གི་དེ་ཁོ་ན་ཉིད་ལ་བདག་གི་ནི་ཕུང་པོ་ལྔ་བློས་རྣམ་པར་མ་ཕྱེ་བའོ། །དེ་ཁོ་ན་ཉིད་ནི་མུ་སྟེགས་ཅན་གྱིས་བདག་དང་བདག་གི་ལ་སོགས་པ་ཀུན་ཏུ་བརྟགས་པས་སྟོང་པ། ཕུང་པོ་ཁམས་དང་སྐྱེ་མཆེད་ཀྱི་ཆོས་ཙམ་མེད་པར་སྐུར་བ་གདབ་ཏུ་མི་རུང་བ་འདི་ནི་བདག་གི་དེ་ཁོ་ན་ཉིད་དོ། །དེ་ནི་བྱིན་གྱིས་བརླབ་ཏུ་རུང་བའི་གཞི་སྟེ། དེ་ལ་བྱིན་གྱིས་རློབ་པར་བྱེད་པ་ནི་ལྷའི་དངོས་པོའོ། །དེ་ཡང་ཆོས་ཉིད་དག་པ་དང་། རྣམ་པར་མི་རྟོག་པའི་ཡེ་ཤེས་དང་། རྣམ་པར་རྟོག་པ་དང་བཅས་པའི་ཡེ་ཤེས་དང་། སྒྲ་དང་ཡི་གེ་དང་། གཟུགས་ལ་སོགས་པའི་ལྷར་རྟོག་པ་རྣམས་སོ། །འདིར་ཕྱི་རོལ་གྱི་གཟུགས་གྱི་བློ་མི་གཏོང་བས་གཞུང་ལུགས་དང་པོ་ཉན་ཐོས་དང་མཐུན་པ་ཡིན་ཏེ། དེ་ལྟ་བུས་འདུལ་བའི་གང་ཟག་གི་དབང་དུ་གསུངས་པའི་ལྷའི་རྣལ་འབྱོར་སྒོམ་པའི་ཐབས་ཡིན་ནོ། །ཡོངས་སུ་བརྟགས་པའི་རྣལ་འབྱོར་ནི་རྣལ་འབྱོར་སྤྱོད་པ་པ་དང་སྒོ་མཐུན་པ་ཡིན་ཏེ། འདི་ལྟར་བདག་གི་དེ་ཁོ་ན་ཉིད་ཀྱང་གཟུང་བ་དང་འཛིན་པར་ཀུན་ཏུ་བརྟགས་པས་སྟོང་པ་སེམས་དང་སེམས་ལས་བྱུང་བ་རང་རིག་པ་གང་གིས་ཀྱང་གཟུང་བར་བྱ་བ་མ་ཡིན་པ་གང་ལ་ཡང་འཛིན་པར་བྱེད་པ་མ་ཡིན་པ། སྐད་ཅིག་མ་རྒྱུན་འབྲེལ་བར་གནས་པ་འདི་ཙམ་མེད་པར་སྐུར་བ་གདབ་ཏུ་མི་རུང་སྟེ། དེ་ཡང་འདི་ལྟར་གྱུར་ན་ནི་འཕགས་པ་ཉིད་དང་ཁྱད་མེད་པ་ཡིན་མོད་ཀྱི། འོན་ཀྱང་སོ་སོའི་སྐྱེ་བོའི་སྐབས་སུ་ཡང་འདི་ལྟར་རྟོགས་ཤིང་གོམས་པ་ལས་རིམ་གྱིས་ལྷའི་སྐུར་བསྐྱེད་པར་བྱའོ། །འདི་ནི་སེམས་དང་ཡེ་ཤེས་རང་སྣང་མ་གཏོགས་པར་ཡུལ་གུད་དུ་མི་དམིགས་པས་རྣལ་འབྱོར་སྤྱོད་པ་དང་མཐུན་པ་སྟེ། འདི་ལྟར་འདུལ་བའི་དབང་དུ་གསུངས་པ་ནི་སྔ་མ་བཞིན་ནོ། །རྫོགས་པའི་རྣལ་འབྱོར་ནི་དབུ་མ་དང་སྒོ་མཐུན་པ་སྟེ། བདག་གི་དེ་ཁོ་ན་ཉིད་ཀྱང་བཏགས་པ་ཙམ་སྟེ། དེ་ལ་བདག་ནི་ཕུང་པོ་ལྔ་ལ་བློས་མ་ཕྱེ་བ་ཙམ་མོ། །དེའི་དེ་ཁོ་ན་ཉིད་ནི་སྤྲོས་པ་ཐམས་ཅད་ཡོངས་སུ་ཞི་བ་ཙམ་སྟེ། འདི་ལྟར་རྟེན་གང་ཡང་དམིགས་པ་མེད་དོ། །དེ་ལས་སྐུ་དང་ཡེ་ཤེས་ཀྱི་དཀྱིལ་འཁོར་སྣ་ཚོགས་སུ་འཕྲུལ་ཡང་རྟེན་མེད་ཅིང་ངོ་བོ་ཉིད་མེད་པའོ། །ཞེས་གསུངས་སོ། ། ༈ གྲོལ་ལམ་རིམ་གྱིས་པའི་སྤྱོད་པ་ལ་བདུན་ལས། དང་པོ་དད་བརྩོན་གྱི་སྤྱོད་པ་འདི་ལ་གསང་སྔགས་ཀྱིས་བསླབ་པའི་མཐའ་བཅུ་འདུ་བ་ཡིན་ཏེ། དང་པོ་རྒྱུད་ཐོས་པས་གྲོལ་བ་ནི་ཐོག་མར་རྒྱུད་ལུང་མན་ངག་གི་དོན་ཟབ་མོ་མ་ཐོས་ན་བླང་དོར་གྱི་མིག་མི་འབྱེད་པས་རྒྱུད་ཐོས་པས་གྲོལ་བ་རྟ་ཕོ་སྒྲོག་བཀྲོལ་བ་ལྟ་བུར་གཞིར་བཞག་དང་། གཉིས་པ་སྒོ་ཀུན་ནས་སྡུད་པ་ནི། དེ་ཡང་ཐོས་པ་ཉུང་ངུས་ཤེས་རབ་རྒྱ་ཆེན་པོ་གྲོལ་བར་མི་ནུས་པས་ཐོས་པའི་སྒོ་མང་པོ་བཙལ་ཏེ་སྒོ་ཀུན་ནས་སྡུད་པ་བུང་བ་ཚང་ཚོལ་བ་ལྟ་བུའི་མང་དུ་ཐོས་པར་བྱ་བ་དང་། གསུམ་པ་མདོ་གཅིག་ཏུ་བསྡུས་པ་ནི། མང་དུ་ཐོས་ཀྱང་ལག་ལེན་གནད་དུ་མ་ཁེལ་ན་རང་རྒྱུད་མི་གྲོལ་བས་མཐར་ཐུག་པའི་མན་ངག་གིས་གནད་ཟབ་མོ་ཉམས་འོག་ཏུ་ཚུད་པར་བྱས་ནས་མདོ་གཅིག་ཏུ་སྡུད་པ་ཚོང་པ་ཁེ་ཚོལ་བ་ལྟ་བུའི་དོན་གནད་དུ་ཕོག་པར་བྱ་བ་དང་། བཞི་པ་མཁས་པ་ཕུལ་དུ་ཕྱིན་པ་ནི། དེ་ལྟར་བྱས་ནས་ཐོས་པས་རྒྱུད་ཀྱི་དོན་ཤེས། ལུང་གིས་རྒྱུད་དོན་ཉམས་སུ་བླངས། མན་ངག་གིས་ཡིད་ཆེས་ནས་ཐེ་ཚོམ་མེད་པའི་གདེངས་དང་ལྡན་པར་བསླབ་པའི་སྒོ་ནས་མཁས་པ་ཕུལ་དུ་ཕྱིན་པ་རི་མཐོན་པོའི་རྩེར་ཕྱིན་པ་ལྟ་བུ་ཞེས་བྱ་སྟེ། དེ་བཞི་ནི་གསང་སྔགས་ལ་བསླབ་པའི་ཚུལ་ལོ། །ལྔ་པ་རིམ་པ་དབང་གིས་བསྒྲོད་པ་ནི། གསང་སྔགས་ཀྱི་དབང་ཐོབ་པ་དང་གསང་བའི་དབང་ཐོབ་ནས་ཉོན་མོངས་པས་མི་བརྫི་བའི་ལས་ཅན་དུ་གྱུར་པ་རྒྱལ་བུ་རྒྱལ་ས་ཟིན་པ་ལྟ་བུའོ། །དྲུག་པ་གཞི་དམ་ཚིག་གིས་བཟུང་བ་ནི། བླ་མ་མཉེས་པར་བྱས་ལ་ཇི་སྐད་གསུངས་པའི་དམ་ཚིག་ལས་མི་འདའ་བ་ཞིང་ས་གཤིན་པོ་ལྟ་བུ་དངོས་གྲུབ་ཀྱི་ལོ་ཏོག་སྐྱེ་རུང་བའི་ལས་ཅན་ནོ། །བདུན་པ་ཐག་ལྟ་བས་བཅད་པ་ནི། འཁོར་འདས་ཀྱི་ཆོས་ཐམས་ཅད་རང་གི་སེམས་སུ་འདུ་ལ་སེམས་ཡེ་ནས་སངས་རྒྱས་པ་རང་བྱུང་གི་ཡེ་ཤེས་སུ་རྟོགས་ནས་བྱ་རྩོལ་རེ་དོགས་དང་བྲལ་ཏེ་བག་ཡངས་སུ་རྒྱུ་བ་ཁྱུང་ནམ་མཁའ་ལ་ལྡིང་བ་ལྟ་བུའོ། །བརྒྱད་པ་ཉམས་སུ་ཏིང་ངེ་འཛིན་གྱིས་བླང་བ་ནི། ཤེས་རབ་ཀྱིས་དམིགས་པའི་དོན་ལ་ཏིང་ངེ་འཛིན་གྱིས་གཡེང་བ་མེད་པར་རྩེ་གཅིག་ཏུ་བྱས་པ་ནོར་བུ་རིན་པོ་ཆེ་ལེན་པ་ལྟ་བུའོ། །དགུ་པ་ལ་སྤྱོད་པས་དོར་བ་ནི། མཉམ་བཞག་ཏུ་བྱ་བའི་ལས་ཐམས་ཅད་སྤངས་ནས་སྒོམ་པའི་ལས་ལ་འཇུག་པ་དང་། རྗེས་ཐོབ་ཏུ་བླང་དོར་མེད་པ་མཉམ་པ་ཉིད་ཀྱི་ལྟ་བ་ཟབ་མོ་དང་མཐུན་པར་འཇིགས་མེད་དུ་རྒྱུ་ཞིང་ཕྲིན་ལས་སྣ་ཚོགས་ལ་ཇི་ལྟར་འདོད་པ་བཞིན་འཇུག་པ་གླང་པོ་ཆེ་ཆུར་འཇུག་པ་ལྟ་བུའོ། །བཅུ་པ་དོན་མན་ངག་གིས་བསྒྲུབ་པ་ནི། གང་ཆེད་དུ་སྒྲུབ་པའི་དོན་ལ་གནད་དུ་འབྱོར་བའི་མན་ངག་གིས་ཐེ་ཚོམ་མེད་པའི་གདེངས་དང་ལྡན་པར་སྒྲུབ་པས་ཉམས་སུ་ལོན་ན་ཏིང་འཛིན་ཐོབ་པའི་དུས་ནས་བདུད་བཞི་ཆོམ་ནས་སྐུ་གསུམ་ཐོབ་པ་རིན་པོ་ཆེ་ཉོས་པ་ལྟ་བུ་སྟེ་བསླབ་པའི་མཐའ་དྲུག་གོ །གཉིས་པ་ཤེས་རབ་དང་མཐུན་པ་ཞེས་སྟོང་ཆེན་གྱི་དུས་སུ་ཐུན་མཚམས་ཀྱི་བྱ་བ་ཐམས་ཅད་མི་དམིགས་པའི་ཤེས་རབ་ཀྱི་རྩལ་སྦྱང་དུ་འཁྱེར་བ་དང་། གསུམ་པ་ཐབས་དང་མཐུན་པ་ཞེས་སྙིང་རྗེ་སྒྱུ་མའི་སྐབས་སུ་སྣང་སྤྱོད་ཡེ་ཤེས་སྒྱུ་མའི་ཡོ་ལང་དུ་བལྟ་བ་དང་། བཞི་པ་ཕྱོགས་གཅིག་པ་ནི་ཕྱག་རྒྱ་གཅིག་པའི་སྟེ། མཉམ་བཞག་ཏུ་ཟུང་འཇུག་ཕྱག་རྒྱ་གཅིག་པ་བསྒོམ་ཞིང་། རྗེས་ཐོབ་ཏུའང་དེའི་ཡུན་བསྲིང་བའོ། །ལྔ་པ་སྤྲོས་བཅས་ཀྱི་སྤྱོད་པ་ཞེས་མཉམ་བཞག་ཏུ་གང་བསྒོམ་གྱི་ལྷའི་ཏིང་ངེ་འཛིན་དེས་སྣང་བ་ཐམས་ཅད་ལ་རྒྱས་བཏབ་སྟེ་ལོག་རྟོག་འཁྲུལ་བའི་སྣང་བ་ཟིལ་གྱིས་གནོན་པ་དང་། དྲུག་པ་ཚོགས་ཀྱི་སྤྱོད་པ་ཞེས་ཚོགས་སྒྲུབ་ཀྱི་དུས་སུ་དག་མཉམ་བདེ་བ་ཆེན་པོའི་རྣལ་འབྱོར་ཁོར་ཡུག་ཏུ་སྐྱོང་བ་དང་། བདུན་པ་ཟག་མེད་རིག་འཛིན་ཐོབ་ནས་རྫུ་འཕྲུལ་གྱི་སྤྱོད་པ་ཞེས་ནུས་མཐུ་ཐོགས་པ་མེད་པའི་ཕྲིན་ལས་ཀྱིས་གཞན་དོན་རླབས་པོ་ཆེ་སྤྱོད་ཅིང་རང་རྒྱུད་ཀྱི་རྟོགས་པ་གོང་དུ་སྤོར་བའོ། །སྤྲོས་བཅས་ཚོགས་སྒྲུབ། སྤྲོས་མེད་རྣལ་འབྱོར་ཕོ་མོ་གཙོ་བོ་ཡབ་ཡུམ་ཙམ་ཚོགས་པ་ལ་བརྟེན་པ། ཤིན་ཏུ་སྤྲོས་མེད་ནི་ཡབ་མི་འགྱུར་བའི་བདེ་ཆེན་ཉིད་ཡུམ་རྣམ་ཀུན་མཆོག་ལྡན་གྱི་སྟོང་ཉིད་དང་། ཁ་སྦྱོར་སྤྱོད་པས་ཟག་མེད་ཀྱི་ལམ་ལ་སྦྱོར་བར་བྱེད་དོ། །ཆོ་གའི་བྱ་བ་ལ་ལྟོས་པའི་སྤྱོད་པ་གསུམ་ནི། སྤྲོས་ལ་ཤིན་ཏུ་དགའ་བ་ན་ཚོད་གཞོན་པ། ཡོ་བྱད་མང་བ་སོགས་སྤྲོས་བཅས། དེ་དག་འབྲིང་ལ་སྤྲོས་མེད། ཆུང་བ་ལ་ཤིན་ཏུ་སྤྲོས་མེད། སྒོམ་བསམ་ལ་ལྟོས་པའི་སྤྱོད་པ་གསུམ་ནི། བསྐྱེད་རིམ་དང་། རྫོགས་རིམ། ཟུང་འཇུག་གསུམ་གྱི་སྐབས་སོ། །དུས་ལ་ལྟོས་པའི་ཚོགས་སྤྱོད་གསུམ་ནི། སངས་རྒྱས་མཉམ་སྦྱོར་ལས། ཉིན་རེའམ་ཟླ་བ་རེ་རེའམ། །དེ་བཞིན་ལོ་ནི་རེ་རེར་ཡང་། །ཞེས་སོ། །གནས་ཀྱི་སྒོ་ནས་དབྱེ་བ་སྡོམ་འབྱུང་ལས། རང་གི་ཁྱིམ་དུ་སྤྱོད་པ་དང་དུར་ཁྲོད་དུ་སྤྱོད་པ་དང་ཞིང་རྣམས་སུ་རྒྱུ་བ། ཞེས་སོ། །ལས་དང་པོ་བའི་དུས་སུ་ཏིང་ངེ་འཛིན་ལ་བརྟན་པ་མ་ཐོབ་པའི་བག་དང་ལྡན་པའི་གཟོབ་པ་ལྷུར་ལེན་པ་དགེ་སྦྱོང་གཞོན་ནུའི་སྤྱོད་པ་ལྟ་བུ། མཉམ་རྗེས་བསྲེ་བར་ནུས་པ་ན་རྟོགས་པ་རྐྱེན་ཐུབ་ཏུ་བྱེད་པ་སྨྱོན་པ་བརྟུལ་ཞུགས་ཀྱི་སྤྱོད་པ་དང་། ཏིང་ངེ་འཛིན་ལ་བརྟན་པ་ཆེར་ཐོབ་ནས་རྟོགས་པ་ལ་བྲི་གང་མེད་པ་ན་གཞན་ཕན་ཁོ་ན་ལ་བསླབ་པ་རྒྱལ་པོ་ས་འཛིན་གྱི་སྤྱོད་པ་ལྟ་བུའོ། །ཨ་བ་དྷུ་ཏི་སྟེ་ཀུན་འདར་གྱི་སྤྱོད་པ་ནི། གཉིས་སྣང་གི་རྣམ་རྟོག་འཇོམས་པར་བྱེད་པ་དང་། བདེན་འཛིན་གཡོ་ཞིང་འདར་བ་དང་སྐྲོད་པར་བྱེད་པ་ཡིན་ཏེ། ས་པཎ་གྱིས། རྒྱ་སྐད་ཨ་བ་དྷཱུ་ཏིའི་སྒྲ། །གཉིས་སྤངས་སམ་ནི་ཀུན་འདར་ཡིན། །ཞེས་སོ། །ཀུན་བཟང་གི་སྤྱོད་པ་ནི། དེས་བྱ་བ་ཅི་བྱེད་ཐམས་ཅད་བཟང་ངན་གང་དུ་སྣང་ཡང་དུས་ཀུན་ཏུ་ངོ་བོ་བཟང་པོ་འབའ་ཞིག་ཡིན་པའོ། །ཕྱོགས་ལས་རྣམ་རྒྱལ་གྱི་སྤྱོད་པ་ནི། ཉོན་མོངས་ལས་དངོས་སུ་རྒྱལ་ཞིང་བདུད་བཞི་པོ་རྣམས་བཏུལ་བ་དང་། སེམས་ཅན་གྱི་དོན་ལ་སྟོབས་དང་ལྡན་པ་དང་། ཤེས་བྱའི་སྒྲིབ་པའང་འཇོམས་བཞིན་པ་ཡིན་པས་སོ། །ཨ་ཝ་དྷཱུ་ཏི་སྟེ་ཀུན་འདར་གྱི་སྤྱོད་པའམ་གསང་བའི་སྤྱོད་པ་ལ་སྤྲོས་མེད་ཤས་ཆེ། ཀུན་བཟང་གི་སྤྱོད་པ་ལ་སྤྲོས་བཅས་སྤྲོས་མེད་ཆ་མཉམ། ཕྱོགས་ལས་རྣམ་རྒྱལ་ལ་སྤྲོས་བཅས་གཙོ་བོར་སྤྱོད་པ་ཡིན་ནོ། །དེ་ལ་ཨ་ཝ་དྷཱུ་ཏིའི་དོན། ཨ་ཝ་དྷུ་ནོ་ཏི་སྟེ་སྡིག་པ་སྐྲོད་པ་ཞེས་ཀྱང་འགྱུར། གཉིས་སྤངས་དང་ཀུན་འདར་ཞེས་སུའང་འགྱུར་ཏེ། སམ་བུ་ཊི་ལས། སྡིག་བཅོམ་བྱེད་པ་འདི་མྱུར་ཐོབ། །ཅེས་དང་། བསམ་གྱིས་མི་ཁྱབ་པ་ཡི་གནས། །རྣལ་འབྱོར་པས་ནི་སྒོམ་བྱེད་པ། །ཨ་བ་དྷཱུ་ཏིའི་སྤྱོད་པ་བཤད། །རྟོག་པ་ཐམས་ཅད་རྣམ་སྤངས་པ། །ཞེས་གསུངས་པས་སྡིག་པ་དག་པ་དང་གཉིས་སྣང་གི་རྣམ་རྟོག་དང་པོར་འཇོམས་བྱེད་ཡིན་པ་དང་། མཚན་འཛིན་ནམ་བདེན་འཛིན་གཡོ་ཞིང་འདར་བ་དང་སྐྲོད་པར་བྱེད་པའི་དོན་ནོ། །ཀུན་བཟང་གི་དོན་ནི། དེས་བྱ་བ་ཅི་བྱེད་ཐམས་ཅད་བཟང་ངན་གང་དུ་སྣང་ཡང་དུས་ཀུན་ཏུ་ངོ་བོ་བཟང་པོ་འབའ་ཞིག་ཡིན་པའོ། །ཕྱོགས་ལས་རྣམ་རྒྱལ་ནི་ཉོན་མོངས་ལས་དངོས་སུ་རྒྱལ་ཞིང་བདུད་བཞི་པོ་རྣམས་བཏུལ་བ་དང་། སེམས་ཅན་གྱི་དོན་ལ་སྟོབས་དང་ལྡན་པ་དང་། ཤེས་བྱའི་སྒྲིབ་པའང་འཇོམས་བཞིན་པ་ཡིན་པས་སོ། །འདི་དག་དང་པོ་གཉིས་གཙོ་བོར་སྦྱོར་ལམ་སྐབས་དང་ཕྱི་མ་གཙོ་བོར་འཕགས་ལམ་ལ་སྦྱོར་མོད། གསུམ་ཆར་ལ་སྐྱེ་འཕགས་གཉིས་ཀ་ཡོད་དོ། ། ༈ ཡབ་ཡུམ་ལྷར་བསྐྱེད་པ་ལྷའི་འདུ་ཤེས། མཁའ་གསང་རྡོ་རྗེ་དང་པདྨར་རློབ་པ་སྔགས་ཀྱི་འདུ་ཤེས། ཐབས་འདི་ལ་བརྟེན་ནས་ལྷན་སྐྱེས་ཀྱི་ཡེ་ཤེས་བསྒྲུབ་པར་བྱའོ་སྙམ་པ་ཆོས་ཀྱི་འདུ་ཤེས་ཏེ་གསུམ་ལྡན་གྱིས་བརྡ་བཞིའི་བསྣོལ་མར་བསྐུལ་བ་ནི། ས་མ་ཡ་སྟྭཾ་ཞེས་ཆགས་པའི་བརྡས་བསྐུལ་བར། ས་མ་ཡ་ཧོ། ཞེས་ལན་གདབ། སླར་ཡང་རཱ་ག་ཡ་ཧོ། ཞེས་སྦྱོར་བའི་བརྡས་བསྐུལ་བར། རཱ་ག་ཡ་མི། ཞེས་ལན་བཏབ་སོ། ཕྱག་རྒྱ་བཞིས་སྙོམས་པར་ཞུགས་པ་ནི། ཛཿཞེས་པས་ལུས་ཀྱི་ཆ་ཤས་རྣམས་རེག །ཧཱུྃ་ཞེས་པས་ལག་པ་དང་བརླ་འཁྱུད། བཾ་ཞེས་པས་མཁའ་གསང་དམ་དུ་སྤྲད། ཧོ་ཞེས་ཡབ་ཀྱིས་གསོར་ཡུམ་གྱིས་བསྐྱོད་པས་དགའ་བཞིའི་རོས་རྒྱུད་ཡོངས་སུ་གང་ཞིང་ཚིམ་པར་བསམ་མོ། །དེ་ལྟ་བུ་ཡུན་རིང་དུ་གོམས་པས་སྣང་བ་ཐམས་ཅད་བདེ་བར་འཆར། རྩོལ་མེད་ཀྱི་བདེ་བ། འཛག་མེད་ཀྱི་ཚུལ་ཁྲིམས། ཟག་མེད་ཀྱི་ཉམས་མྱོང་ཁྱད་པར་ཅན་རྒྱུད་ལ་སྐྱེས་པ་ན་དེའི་བོགས་དབྱུང་བ་ལ་བརྟེན་ནས་དཔེའི་ཡེ་ཤེས་མངོན་དུ་བྱ་བའི་ཕྱིར་ལས་ཀྱི་ཕྱག་རྒྱ་ལ་བསླབ་པར་བྱ་སྟེ། བཤད་རྒྱུད་ཐལ་བ་ལས། སྤངས་ནས་རྡོ་རྗེ་དབྱིངས་ཕྱུག་རྩ། །དགུག་དང་བསྡམ་པ་མ་ཤེས་ན། །རྡོ་རྗེའི་བསྐལ་བ་མཐའ་ཡས་པར། །ཆོས་སྐུ་ཐོབ་པར་མི་འགྱུར་རོ། །ཞེས་མཚན་འཛིན་གྱི་རྟོག་པ་སྤངས་པ་དང་། རྡོ་རྗེ་ཞེས་པ་སྐྱིལ་ཀྲུང་སྟེ། དེ་ལ་ལུས་རྡོ་རྗེ་སྐྱིལ་ཀྲུང་ནི་ཡབ་ཡུམ་མཉམ་པར་སྦྱོར་བའོ། །རྩ་རྡོ་རྗེ་སྐྱིལ་ཀྲུང་ནི་ཡུམ་གྱི་དབུ་མའི་མར་སྣ་ཡབ་ཀྱི་དབུ་མར་དྲངས་ཏེ་སད་པར་བྱས་པའོ། །རླུང་རྡོ་རྗེ་སྐྱིལ་ཀྲུང་ནི་ཡུམ་གྱི་དབུ་མའི་རླུང་ཡབ་ཀྱི་དབུ་མར་དྲངས་བ་དང་། ཁམས་རྡོ་རྗེ་སྐྱིལ་ཀྲུང་ནི་ཐིག་ལེ་དཀར་དམར་འདྲེས་པའོ། །རགས་པའི་ཕྱག་རྒྱ་བཞི་ནི། ཕྱག་རྒྱ་མཚན་ཉིད་དང་ལྡན་པ་དགུག་པ། ཡབ་ཡུམ་མཉམ་པར་སྦྱོར་བ་འཆིང་བ། ཡན་ལག་ཕན་ཚུན་སྡོམ་པ་བསྡམས་པ། ཡབ་ཡུམ་བདེ་བས་ཚིམ་པ་མྱོས་པའོ། །ཕྲ་བའི་ཕྱག་རྒྱ་བཞི་ནི། དམར་ཆ་གྱེན་དུ་དྲངས་པ་དགུག་པ། རླུང་གིས་བྱེད་བཅིང་གི་སྟོབས་ཀྱིས་གཅུན་པ་འཆིང་བ། ཐིག་ལེ་ཕྱིར་མི་ལྡོག་པ་བསྡོམས་པ། ཡབ་ཡུམ་གྱི་གསང་བའི་རྣམ་ཤེས་བདེ་བས་ཚིམ་པ་མྱོས་པའོ། ། ༈ བསྒྲལ་བའི་སྐབས། ཐོག་མར་རྫོང་འཕྲང་སྲོག་གསུམ་གྱི་དགོངས་སྤྱོད་ཟབ་མོའི་སྒོ་ནས་རྟོགས་པས་བདག་བསྒྲལ་བར་བྱས་ནས། དེའི་འོག་ཏུ་ལས་ངན་གྱི་གདུལ་བྱ་ལ་སྙིང་རྗེ་ཆེན་པོ་མཚུངས་པ་མེད་པ་དང་། མཉམ་ཉིད་དུ་རྟོགས་པའི་ཤེས་རབ་ཆེན་པོ་ཕུལ་དུ་བྱུང་བའི་སྟོབས་ཀྱིས་ཐུགས་རྗེའི་གཞན་སྒྲོལ་བ་དང་དུ་ལེན་པ་ཡིན་ལ། དེ་ཡང་ཐུན་མིན་གྱི་ཚད་མེད་བཞི་ནི། སྙིང་རྗེ་ཁྲོས་པའི་ཚུལ་གྱིས་གདུག་པ་ཅན་རྗེས་སུ་འཛིན་པ་བྱམས་པ། ཤིན་ཏུ་བརྩེ་བ་ཆེན་པོས་མྱུར་དུ་སྒྲོལ་བའི་སྙིང་རྗེ། ཤེས་པ་གནས་སུ་སྤར་ཞིང་ཕུང་པོ་ཚོགས་སུ་སྟོབ་པ་དགའ་བ། གདུལ་བྱ་ཡལ་བར་མི་འདོར་བའི་བཏང་སྙོམས་སོ། །གསལ་བ་གསུམ་ནི། མི་ལྡོག་པའི་ཕྱིར་དུ་སྒྲོལ་མཁན་གྱི་རྣལ་འབྱོར་པ་ལྷར་གསལ་པ། མི་རྡུག་པའི་ཕྱིར་དུ་སྒྲོལ་བྱེད་ཀྱི་ཕུར་པ་ཡཀྴ་ཀཱི་ལར་གསལ་བ། མི་འབྱམས་པའི་ཕྱིར་དུ་བསྒྲལ་བྱའི་རཱུ་ཏྲ་དངོས་སུ་གསལ་གདབ་པའོ། །ལྷ་གསུམ་ནི། ལྟ་བའི་གདེངས་ཀྱིས་ཟིན་པ་སྟོང་ཉིད་གྱད་ཀྱི་ལྷ། བསྐྱེད་རིམ་གྱི་ངར་དང་ལྡན་གཉེན་པོ་ཡེ་ཤེས་ཀྱི་ལྷ། ཟུང་འཇུག་ལས་ཕོ་ཉ་འགྱེད་པ་སྤྱོད་པ་ལས་ཀྱི་ལྷའོ། །ལྟ་སྒོམ་སྤྱོད་གསུམ་ནི། རང་བཞིན་གྱིས་སྒྲོལ་བའི་ལྟ་བ། སྙིང་རྗེས་སྒྲོལ་བའི་སྒོམ་པ། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པའོ། །རང་བཞིན་གྱིས་སྦྱོར་སྒྲོལ་ཞེས་པ་ནི། ཆོས་ཐམས་ཅད་ཀྱི་རང་བཞིན་གཉིས་སུ་མེད་པར་རྟོགས་པ་ནི་སྦྱོར་བ། དེས་གཉིས་འཛིན་གྱི་རྟོག་པ་ལས་སྒྲོལ་བ་ནི་སྒྲོལ་བ་སྟེ། ལམ་རིམ་ལས། གཉིས་མེད་དབྱིངས་སུ་སྦྱོར་བ་ཡིན། །ཞེས་སོ། །དེ་ཡང་སློབ་དཔོན་ནི་མཁས་ཚུལ་ལྔ་དང་ལྡན་དགོས་ཏེ། རང་བཞིན་གྱིས་སྒྲོལ་བའི་ལྟ་བ་ལ་མཁས་པ། ཏིང་ངེ་འཛིན་གྱིས་སྒྲོལ་བའི་སྒོམ་པ་ལ་མཁས་པ། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པ་ལ་མཁས་པ། ཐབས་ཆེན་གསང་བས་སྒྲོལ་བའི་གདམས་ངག་ལ་མཁས་པ། མངོན་སྤྱོད་ཟབ་མོས་སྒྲོལ་བའི་མཛད་སྤྱོད་ལ་མཁས་པའོ། །དབང་པོ་ཡུལ་དུས་ཀྱིས་སྦྱོར་སྒྲོལ་ཞེས་པ་ནི། ཡུལ་ཕྱིར་སྣང་ཡུམ་དང་། དབང་པོ་ནང་ནས་འཆར་བ་ཡབ་སྟེ། ལྷ་ཡབ་ཡུམ་གཉིས་མེད་དུ་སྦྱོར་བ་ནི་སྦྱོར་བ། དེས་ཐ་མལ་གྱི་རྟོག་ཚོགས་རང་སར་དག་པས་སྒྲོལ་བ་སྟེ། དེ་ཉིད་ལས། དབང་པོ་ཡུལ་དུས་རིག་པ་རྣམས། །བྱང་ཆུབ་སེམས་ནི་རྡོ་རྗེས་ཚོགས། །ཞེས་སོ། །རྫོང་འཕྲང་སྲོག་གསུམ་ནི། ལྟ་བ་བློ་འདས་ཀྱི་རྫོང་། སྒོམ་པ་ཡེང་མེད་ཀྱི་འཕྲང་། སྤྱོད་པ་ངེས་མེད་ཀྱི་སྲོག་གོ །དགོངས་པ་གསུམ་ནི། ལས་ངན་གྱི་བག་ཆགས་ཐམས་ཅད་ཡེ་ཤེས་ཀྱི་འོད་ཀྱིས་སྦྱོང་བར་བསམ་པའི་ཁྲུས་ལུང་། ཕ་རོལ་པོའི་ཚེ་བསོད་བདག་གི་ཚེ་ཡི་གསོས་སུ་བསྟིམས་པ་ཚེ་ལུང་། དགྲ་བགེགས་ཀྱི་རྣམ་ཤེས་འོག་མིན་དུ་རྒྱལ་བ་ཡབ་ཡུམ་གྱི་སྦྱོར་འཚམས་སུ་འཕངས་ཏེ་རིགས་ཀྱི་སྲས་སུ་བསྒྱུར་བ་གནས་ལུང་ངོ་། །འཚེངས་པ་གསུམ་ནི། ཕ་རོལ་གྱི་ཚེ་བསོད་རང་ལ་ཁུག་པས་བདག་རྣལ་འབྱོར་པ་འཚེངས་པ། དགྲ་བགེགས་ཀྱི་ཤ་ཁྲག་ཡེ་ཤེས་ཀྱི་བདུད་རྩིར་གྱུར་པས་བཀའ་སྡོད་དང་བཅས་པའི་དཀྱིལ་འཁོར་གྱི་ལྷ་རྣམས་འཚེངས་པ། ཕ་རོལ་དགྲ་བགེགས་ཀྱི་ལས་ངན་རྒྱུན་ཆོད་ནས་བདེ་བར་གཤེགས་པའི་སྲས་སུ་གྱུར་པས་གཟས་པོ་འཚེངས་བའོ། །འཚེངས་པ་རྣམ་པ་ལྔ་ཞེས་པ་ནི། ཚེ་ལུང་གི་དགོངས་པས་སྒྲོལ་མཁན་གྱི་རྣལ་འབྱོར་པ་འཚེངས་པ། ཁྲུས་ལུང་གི་དགོངས་པས་བསྒྲལ་བྱའི་གཟས་པ་པོ་འཚེངས་པ། གནས་ལུང་གི་དགོངས་པས་འོག་མིན་དུ་སྦྱོར་མཆོད་ཀྱིས་འཚེངས་པ། སྙིགས་མའི་ཤ་ཁྲག་གིས་དཀྱིལ་འཁོར་པའི་ལྷ་ཚོགས་འཚེངས་པ། གནོད་བྱེད་དང་བྲལ་བས་བསྟན་པ་རིན་པོ་ཆེ་འཚེངས་པའོ། ། ༈ ས་བསླང་བ་ལ། སྣང་བ་མི་ལས་བསླང་བ་དང་། མི་སྣང་བ་ལྷ་ལས་བསླང་བའོ། །དང་པོ་ནི། ས་དེའི་བདག་པོར་གྱུར་པའི་རྒྱལ་པོ་སོགས་ལ་རིན་གཞལ་ཏེ་བསླང་བའོ། །གཉིས་པ་ནི་བདེ་བར་གཤེགས་པ་དང་སའི་ལྷ་མོ་འཁོར་བཅས་ལ་བསླང་བའོ། །དབང་དུ་བྱ་བ་ནི། ཟངས་ཕུར་པདྨ་ཧེ་རུ་ཀ་དམར་པོ་ཞལ་གཅིག་ཕྱག་བཞི་པ་དང་པོ་གཉིས་ཀྱིས་པདྨ་དང་ཞགས་པ། འོག་མ་གཉིས་ཕུར་བུ་བསྒྲིལ་བ་དབལ་ཟླ་གམ་ཅན་དུ་བསྐྱེད་དོ། །གནས་གསུམ་བྱིན་གྱིས་བརླབས་ནས་དཀྱིལ་འཁོར་གྱི་གཞི་ལ་བཏབ་པས་ཕུར་བུ་ལས་བྱུང་བའི་འོད་ཀྱིས་ས་གཞི་ཐམས་ཅད་ཁྱབ་ཅིང་བདག་གི་དབང་དུ་གྱུར་བར་བསམ་མོ། །སྦྱང་བ་ནི་ལས་རིམ་ལས། སྦྱང་བ་ལས་མེ་སྔགས་ཕྱག་རྒྱ། །ཏིང་ངེ་འཛིན་གྱིས་དག་པར་བྱ། །ཞེས་པ་ལྟར། ལས་དང་བྱ་བས་སྦྱང་པ་ལ་ལྟོ་འཕྱེ་བརྟག་པ་དང་། གཏེར་སྦ་བ་དང་། འབྲུ་ལྔ་སྤོས་སོགས་ལྔ་ཚན་དྲུག་གི་ལྡེ་གུས་བྱུག་པའོ། །མེས་སྦྱང་པ་ནི། མཚན་མ་རྣམས་ཤིན་ཏུ་ངན་པར་མཐོང་ན་གཞན་དུ་སྤོ་བའམ། ཡང་ན་ཞི་བའི་སྦྱིན་སྲེག་ཚུལ་བཞིན་དུ་བྱའོ། །སྔགས་དང་ཕྱག་རྒྱས་སྦྱང་པ་ནི། རང་གི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུྃ་མཐིང་ག་རེ་རེས་མཚན་པ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ་ཧཱུྃ་གིས་མཚན་པར་བསམ་ལ། ༀ་བཛྲ་ཧ་ན་ཧ་ན་ཀྲོ་དྷ་ཧཱུྃ་ཕཊ་ཞེས་བརྗོད་ཅིང་ས་ལ་ལན་གསུམ་བསྣུན་པས་རྡོ་རྗེ་དང་ཧཱུྃ་གི་འོད་ཀྱིས་སའི་ཉེས་སྐྱོན་ཐམས་ཅད་སྦྱངས་ནས་ཡེ་ཤེས་རང་སྣང་གི་གཞིར་གྱུར་བར་བསམ་མོ། །ཏིང་ངེ་འཛིན་གྱིས་སྦྱང་པ་ལ། མཚན་མེད་ནི། ཤུ་ནྱ་ཏའི་སྔགས་ཀྱིས་ས་དང་སར་འཛིན་པའི་འཁྲུལ་རྟོག་ཐམས་ཅད་སྟོང་ཉིད་དེ་བཞིན་ཉིད་ཀྱི་དབྱིངས་སུ་རྣམ་པར་དག་པར་བསམ་ལ། མཚན་བཅས་ནི། ཧཱུྃ་གི་སྒྲ་རིང་པོར་བརྗོད་པས་རང་རིག་ཧཱུྃ་ལས་རྡོ་རྗེ་སྔོན་པོ་ཧཱུྃ་ཡིག་མཐིང་ནག་གིས་མཚན་པ་ལས་ས་བོན་སྤྲོས་ཏེ། འབྱུང་ལྔ་རིམ་བརྩེགས་ཀྱི་སྟེང་དུ། ཞི་ཁྲོ་གཉིས་ཀྱི་དཀྱིལ་འཁོར་རྒྱས་བསྡུས་གང་བྱེད་ཀྱི་གཞལ་ཡས་ཁང་གདན་དང་བཅས་པ་བསྐྱེད་པའོ། །བསྲུང་བ་ནི། ཧཱུྃ་ལས་འོད་འཕྲོས། རྡོ་རྗེའི་ས་གཞི་ར་བ་དྲ་བ་གུར་བླ་བྲེ། ཕྱི་རོལ་བསྐལ་བའི་མེ་དཔུང་རབ་ཏུ་འབར་བའི་དབུས་སུ་བྷྲུཾ་ལས་བྱུང་བའི་འཁོར་ལོ་སེར་པོ་རྩིབ་བརྒྱད་ལ་སོགས་དང་བཅས་པ་གསལ། ཕྱོགས་བཅུའི་བགེགས་རྣམས་བཀུག་ནས་ཁྲོ་བཅུའི་ཕུར་པ་གདབ་པ་དང་མཚོན་ཆ་ལྔའི་རྭ་བས་བསྲུང་བར་བྱའོ། །བཟུང་བ་ནི་ལྷ་ཚོགས་ཡབ་ཡུམ་རྣམས་རོལ་པས་འོད་ས་གཞི་ལ་ཐིམ་པས། ས་ཉིད་དཀྱིལ་འཁོར་ཀྱི་རང་བཞིན་དུ་གསལ་བར་བསམ་པའོ། །དཀྱིལ་འཁོར་གྱི་ཚད་ལ་གསུམ་ལས། བསྡུས་པའི་ཚད་ནི་ཁྲུ་གང་པ་དང་། བཞི་པའོ། །འབྲིང་པོ་ནི་ཁྲུ་བཅུ་གཉིས་པ་དང་བཅུ་དྲུག་པའོ། །རྒྱས་པ་ནི་ཉི་ཤུ་པ་དང་། ཉི་ཤུ་རྩ་ལྔ་པའོ། །ཐིག་གི་སྐབས་སུ། དེ་ཡང་སྤྱིར་ཐིག་ཞེས་པ་མི་འགྱུར་བའི་དོན་ཏེ། དེའི་རྒྱུ་འགྱིང་ཕུར་དང་། བསྐོར་ཕུར་ཏེ་ཕུར་བུ་གཉིས་དང་། སྲད་བུ་ཡང་གཉིས་ལས། ཡེ་ཐིག་གི་རྒྱུ། ཞི་བ་ལ་པདྨའི་རྩ་བའི་པད་སྐུད་པདྨའི་རྒྱུས་པ་དང་ཁྲོ་བོ་ལ་རྒྱུས་ཆེན་ཏེ། གཉིས་ཀའི་དམ་ཐིག་གི་རྒྱུ་རས་བལ་གཙང་མ་དཔའ་བོའི་རིན་གྱིས་ཉོས་པ་ཞེས་དང་པོར་བཙལ་བའི་དུས་ན་བདག་པོའི་ལན་གཅིག་ཅི་སྨྲས་པ་ལྟར་རིན་བྱིན་པ་ནི། རིན་ལ་མ་གཙེགས་པར་བྱས་པས་དཔའ་བོའི་རིན་གྱིས་ཉོས་པ་ཞེས་བྱའོ། །དེ་ཡང་ཡེ་ཤེས་ཀྱི་སྐུད་པ་ཉི་ཤུ་རྩ་ལྔའམ་ལྔ་སྒྲིལ་དང་། དམ་ཚིག་གི་སྐུད་པ་དགུ་སྒྲིལ་ལམ་སུམ་སྒྲིལ་དུ་བྱ་བའོ། །གདབ་ཚུལ་ཀྱང་ཐིག་གཡོག་རིག་མ་དངོས་སམ་དེར་མོས་པ་ལ་ཐིག་སྣ་གཏད་དེ་ཡབ་ཡུམ་ལྷར་གསལ་བར་བྱས་པས་དམ་ཐིག་སྐུ་གསུང་ཐུགས་ཀྱི་རང་བཞིན་དུ་ས་ལ་བཏབ་ནས། སྐུ་གསུང་ཐུགས་རེ་རེའང་ཡེ་ཤེས་ལྔ་དང་ལྡན་པར་བྱ་བའི་ཕྱིར། ཡེ་ཐིག་དཀྱིལ་འཁོར་གྱི་གཞིའི་སྟེང་གི་ནམ་མཁའ་ལ་གདབ་པའོ། །༼སྐད་གཉིས་ཤན་སྦྱར་ལས། བི་ཤཾ་པདྨའི་རྩ་བའམ་པད་སྐུད། ཤཱ་ལུ་ཀཾ་ཨུཏྤལའི་རྩ་བ། བྲྀནྟཾ་རྩ་བའམ་ཐག་པ། མྲྀ་ཎཱ་ལཾ་པདྨའི་རྩ་ལག་གམ་པད་སྣལ་པད་སྐུད་ཅེས་སོ། ༽ཚོན་གྱི་རྒྱུ་ནི། རབ་ཀྱིས་རིན་ཆེན་སྣ་ལྔ་དང་། འབྲིང་གིས་འབྲུ་སྨན་ཁ་དོག་བསྒྱུར་བ་དང་། ཐ་མས་དྲི་མ་མེད་པའི་རྡུལ་ཚོན་ཁ་དོག་ལྔ་ལ་བྱ་བའོ། །གྲངས་ནི་ཁ་དོག་ཉི་ཤུ་རྩ་ལྔའམ། །ལྔ་ཡི་ཚོན་གྱིས་བྲི་བར་བྱ། །ཞེས་སོ། །ཚོན་དགྱེ་ལུགས་ནི། འདུལ་བའི་ཆོ་ག་བཞིན་དུ་དགྱེ། །ཞེས་སོ། །དགོས་ཆེད་ནི། ལས་རིམ་ལས། མ་མཐོང་རྨོང་ལ་ཡེ་ཤེས་སོགས། །བསྟན་ཕྱིར་ཚོན་ལྔ་དགྱེ་བར་བྱ། །ཞེས་སོ། །མཚན་མ་འགོད་པ་ནི། སྐུ་གསུང་ཐུགས་ལྡན་གཟུགས་ཀྱིས་འགོད། །ཅེས་དང་། ཡང་ན་རྔམ་གློག་ལས། གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་བ་ལ་ནི་ཡིག་འབྲུའོ། །ཞེས་སོ། །རབ་གནས་ལ་གསུམ་ལས། ཡན་ལག་གི་རབ་གནས་ནི། ལས་བུམ། རྡོར་དྲིལ། ཐོད་ཆུ། ཐིག་ཆེན་རྣམས་དང་། ཡན་ལག་ཅན་གྱི་རབ་གནས་ནི། བུམ་པ། སློབ་མ། ལྷ་སྟ་གོན་གསུམ་གྱིས་བསྙེན་ནོ། །དཀྱིལ་འཁོར་རབ་གནས་ནི། ལས་ཁྲིགས་རྣམ་པ་དགུ་ལ་སོགས་པའི་སྒོ་ནས་སོ། །སྦྱིན་སྲེག་ནི་ས་ཆོག་གི་ཚེ་མཚན་མ་ངན་ན་ཞི་བ། རབ་གནས་ཀྱི་ཚེ་རྒྱས་པ། དབང་བསྐུར་བའི་གོང་དུ་དབང་། སློབ་མ་སྟ་གོན་གྱི་ཚེ་ཀུན་རྨི་ལྟས་ངན་ན་དྲག་པོ་བྱའོ། །དཀྱིལ་འཁོར་དུ་འཇུག་པའི་ཆོ་ག་ནི། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་གདབ་དྲི་དང་ལུས་དབུལ་དང་། །བགེགས་བསྐྲད་ལྷར་སློབ་དམ་ཚིག་སྦྱིན། །དེ་ཉིད་དབབ་དང་ཆུ་ནན་དང་། །བསྒྲག་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོད་ཡོན་དང་རྣམ་བཅོ་བརྒྱད། །འདི་ཡི་ཡན་ལག་རྫོགས་པར་འགྱུར། །ཞེས་ཆོས་བཅོ་བརྒྱད་པོ་རིགས་བསྡུས་ན་གཉིས་ཏེ། སློབ་དཔོན་འཇུག་པའི་ཆོས་གཉིས་དང་། སློབ་མ་འཇུག་པའི་ཆོས་བཅུ་དྲུག་གོ །དང་པོ། སློབ་དཔོན་རང་ཉིད་སློབ་མ་འཇུག་པ་ལྟར་དཀྱིལ་འཁོར་དུ་ཞུགས་པའམ། ཡང་ན་རིགས་པའི་མེ་ཏོག་དོར་བའོ། །གཉིས་པ་གང་ལྟར་ཡང་སློབ་མ་འཇུག་པར་གསོལ་བ་གདབ་པ་དང་བཟོད་པར་གསོལ་བས་དེ་བཞིན་གཤེགས་པ་རྣམས་དགྱེས་ནས་གནང་བ་སྦྱིན་པར་བསམ་པའོ། །གཉིས་པ་ལས་རིམ་བཅུ་དྲུག་ལས། དང་པོ་ཕྱི་རོལ་དུ་སློབ་མ་ལ་ཁྲུས་བྱ། གཉིས་པ་གདོང་གཡོགས་བཅིངས་ཏེ་སྙིམ་པ་མེ་ཏོག་གིས་བཀང་ལ་གསོལ་བ་གདབ། གསུམ་པ་འདོད་དོན་དྲི་ལན་བྱས་ནས་སློབ་དཔོན་གྱི་དྲུང་དུ་དྲངས། བཞི་པ་དུས་གསུམ་ཀྱི་རྒྱལ་བ་ལ་ལུས་དབུལ། ལྔ་པ་སློབ་བུའི་ཚེ་བསྲུང་ལ་བགེགས་བསྐྲད། དྲུག་པ་སྒྲིབ་པ་བྲལ་ནས་ལྷར་བསྐྱེད་དེ་གོ་བསྒོ་ལུས་སྲུང་བྱ། བདུན་པ་རྡོ་རྗེ་གསུམ་གྱི་དམ་ཚིག་སྦྱིན། བརྒྱད་པ་དམ་ཚིག་དེ་ཉིད་ཚིག་གིས་དབབ། དགུ་པ་ཁེ་ཉེན་གྱི་སྒོ་ནས་ཆུ་ནན་བྱ། བཅུ་པ་སྐྲག་པ་དང་དོགས་པ་མེད་པའི་བརྟུལ་ཞུགས་ཀྱིས་རྨད་དུ་བྱུང་བའི་དམ་ཚིག་གཞུང་བཞིན་སྤྱོད་ཅིག་པར་བསྒྲག །བཅུ་གཅིག་པ་ལྷ་དང་ལས་འབྲེལ་བརྟག་ཕྱིར་མེ་ཏོག་དོར། བཅུ་གཉིས་པ་མེ་ཏོག་དེ་སྤྱི་བོར་བཅིང་པ་ལ་འོག་མིན་ནས་ཡི་དམ་གྱི་ལྷ་བཀུག་པ་སྔར་ཆུ་ནན་གྱི་ལྷ་དང་གཉིས་མེད་དུ་བསྟིམ་པ་ཕྱིའི་ལྷ་དབབ། གསང་མཚན་འདོགས་ཤིང་ལྷའི་སྒོམ་ཐབས་སྟོན་པ་ནང་གི་ལྷ་དབབ། བཅུ་གསུམ་པ་ལྷ་སྒོམ་པ་ལ་ནན་ཏན་བྱེད་པར་གདམས་པ་ནི། དེ་ལྟར་དཀྱིལ་འཁོར་དུ་ཞུགས་ཕྱིན་ཆད་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་པས་ཡི་དམ་གྱི་ལྷ་དང་སྐལ་པ་མཉམ་པའི་ཕྱིར། ཡེ་ཤེས་དེ་ཉིད་དོན་དུ་གཉེར་ནས་བསྒྲུབས་ན་ཚེ་འདིར་མཆོག་ཐུན་གྱི་དངོས་གྲུབ་ཐོབ་པའོ། །བཅུ་བཞི་པ་མིག་དབྱེ་བ་ནི་མ་རིག་པའི་ལིང་ཏོག་བསལ་ཏེ་ཡེ་ཤེས་ཀྱི་དཀྱིལ་འཁོར་མཐོང་བར་བསམ་ལ་མིག་ཕྱེ་ཞིང་གདོང་གཡོག་པ་དགྲོལ་བའོ། །བཅོ་ལྔ་པ་དཀྱིལ་འཁོར་གྱི་དོན་རྟགས་བཤད་ཅིང་ལྷ་ངོ་བསྟན་པའོ། །བཅུ་དྲུག་པ་སློབ་མས་ཡོན་དབུལ་ཏེ། དེ་དག་ནི་སློབ་བུ་འཇུག་པའི་ཆོས་སོ། ། ༈ ༡རྡོ་རྗེ་སློབ་དཔོན་གྱི་སྐུ་ལ་མི་འཚེ་ཞིང་བཀའ་མི་གཅོག་པ་དང་། ༢བླ་མའི་ཡུམ་ལ་མི་སྤྱོད་པ་དང་། ༣དད་པ་ཅན་གྱི་ཚོགས་མི་བཅག་པ་དང་། ༤དཀོན་མཆོག་དང་མཁས་པའི་དཀོར་ལ་མི་འབག་ཅིང་ཆང་མྱོས་པར་མི་བཏུང་བ་དང་། ༥རྡོ་རྗེ་མཆེད་ཀྱི་ཡུམ་ལ་མི་སྤྱོད་པ་དང་། ༦མཚན་ངན་གྱི་རིག་མ་མི་བསྟེན་པ་དང་། ༧མཚན་ཉིད་མི་ལྡན་པའི་དམ་རྫས་མི་བསྟེན་པ་དང་། ༨མཁས་པའི་ཡོན་ཏན་ལ་མི་སྨོད་པ་དང་། ༩སྣོད་མིན་ལ་གསང་ཆོས་མི་སྟོན་པ་དང་། ༡༠མཚན་ལྡན་གྱི་གཟུངས་མ་དང་སྣོད་ལྡན་གྱི་སློབ་མ་མི་སྤང་པ་དང་། ༡༡དོན་བདེ་སྟོང་དང་རྟགས་ཡབ་ཡུམ་མི་འབྲལ་བ་དང་། ༡༢མཆེད་ལ་ཀྱལ་ཀ་ཙམ་དུ་ཡང་ནང་འཐབ་མི་བྱེད་པ་དང་། ༡༣གཞན་གྱིས་སྤྱད་པའི་ལྷག་མི་སྤྱད་པ་དང་། ༡༤བླ་མའི་གདན་ས་མི་རློམས་པ་དང་། ༡༥རང་གཞན་གྱིས་མཚམས་མི་འབྲལ་བ་དང་། ༡༦ཏིང་ངེ་འཛིན་བྱིང་རྒོད་ཀྱི་དབང་དུ་མི་གཏང་བ་དང་། ༡༧བཟླས་པ་དང་ཆོ་ག་མི་ཚིག་གིས་བར་མི་གཅོད་པ་དང་། ༡༨དབང་རྟགས་ཀྱི་ཕྱག་རྒྱ་ལས་མི་འདའ་ཞིང་བརྡ་མི་བརྗེད་པར་བྱ་བ་དང་། ༡༩རྣལ་འབྱོར་བའི་དཀྱིལ་འཁོར་མི་དཀྲུགས་ཤིང་སྐྱེ་བོའི་མཐུ་བཟློག་མི་བྱེད་པ་དང་། ༢༠སློབ་དཔོན་གཙུག་ཏུ་བཀུར་བ་ལས་ཉམས་པར་མི་བྱ་བ་རྣམས་སོ། ། ༈ རྩ་ལྟུང་བཅུ་བཞི་ལས་དང་པོ་ནི། སློབ་དཔོན་ལ་ཡང་དང་ཡང་དུ་སྨོད་པར་བྱེད་པ། དེས་ཀྱང་དགའ་བར་བྱེད་པ། འགྱོད་པར་མི་བྱེད་པ། ཕྱིར་འཆོས་པར་མི་བྱེད་པའོ། །གཉིས་པ་ནི། སངས་རྒྱས་ཀྱིས་གསུངས་པའི་བཀའ་སྡོམ་གསུམ་གང་རུང་གི་བཅས་པ་ཡིན་པ། དེ་ལ་ཤེས་བཞིན་དུ་འགལ་བར་བྱས་པ། ཁྱད་དུ་གསོད་འདོད་ཀྱི་ཀུན་སློང་ཡོད་པའོ། །གསུམ་པ་ནི། དབང་བསྐུར་ཐོབ་པའི་རྡོ་རྗེའི་སྤུན་ཡིན་པ། སྔགས་ཀྱི་སྡོམ་པ་དང་ལྡན་པ། དེར་འདུ་ཤེས་པ། ཞེ་སྡང་གིས་ཀུན་ནས་བསླངས་ནས་དེའི་སྐྱོན་བརྗོད་པ། བརྗོད་པ་དེ་ཐོས་ནས་དོན་གོ་བའོ། །བཞི་པ་ནི། སེམས་ཅན་གང་ཡང་རུང་བ་ཞིག་ལ་དམིགས་ནས་འདི་བདེ་བ་ཐམས་ཅད་དང་བྲལ་ན་སྙམ་པའི་སེམས་བསྐྱེད་ནས་བྱམས་པ་བཏང་བའོ། །ལྔ་པ་ནི། བདག་གིས་སེམས་ཅན་མཐའ་ཡས་པའི་དོན་དུ་བྱང་ཆུབ་བསྒྲུབ་པར་མི་ནུས་སྙམ་ནས་སྨོན་སེམས་སྤོང་བའོ། །དྲུག་པ་ནི། རང་གི་གྲུབ་པའི་མཐའ་གསང་སྔགས་དང་གཞན་གྱི་གྲུབ་པའི་མཐའ་ཕར་ཕྱིན་ཐེག་པ་སྟེ་བཀའ་དེ་གཉིས་ལ་སྨོད་པའམ་སུན་འབྱིན་པ་བྱས་ནའོ། །བདུན་པ་ནི། མ་སྨིན་པའི་སེམས་ཅན་ནི་དབང་གིས་རྒྱུད་རུང་བར་མ་བྱས་པ་སྟེ་སྐལ་མེད་ཅེས་ཀྱང་གསུངས། འདི་ལ་ནག་པོ་པས། སྣོད་ཀྱིས་མ་སྨིན་པ་ནི་ལོག་སྲེད་ཅན་ནོ། །ཆོ་གས་མ་སྨིན་པ་ནི་བུམ་དབང་མ་ཐོབ་པའོ། །ཆོ་ག་རྫོགས་པས་མ་སྨིན་པ་ནི་གསང་བ་དང་ཤེས་རབ་ཡེ་ཤེས་མ་ཐོབ་པའོ། །ཉམས་པས་མ་སྨིན་པ་ནི་རྩ་ལྟུང་སོགས་བྱུང་བ་ཕྱིར་མ་བཅོས་པའོ། །ཟབ་མོས་འཇིགས་པས་མ་སྨིན་པ་ནི་དབང་བཞི་པའི་དེ་ཉིད་མ་ཐོབ་པ་སྟེ་མ་སྨིན་པ་ལྔར་བཤད་དོ། །དེ་ལ་གསང་བ་སྒྲོགས་པར་བྱེད་ནའོ། །བརྒྱད་པ་ནི། ཕུང་པོ་སངས་རྒྱས་ལྔའི་བདག་ཉིད་དུ་གསུངས་པ་ལ་རང་གི་ཕུང་པོ་ལ་རྒུད་པར་བྱ་བའི་བསམ་པས་གདུང་བའི་ཐབས་གང་ཡང་རུང་བའི་སྒོ་ནས་གདུང་བར་བྱས་པས་སྡུག་བསྔལ་བར་གྱུར་པའོ། །དགུ་པ་ནི། སྟོང་ཉིད་ཟབ་མོ་ལ་སོམ་ཉི་ཟ་བ་སྟེ་ཡིད་མ་ཆེས་ནས་སྤངས་པའོ། །བཅུ་པ་ནི། གདུག་པ་ཅན་དེ་ལ་མཛའ་བོར་བྱས་ནས་ལུས་ངག་གིས་བྱམས་པར་བྱེད་ནའོ། །འདི་ནི་དེ་ལ་མཛའ་བར་བྱས་པའི་ལྟུང་བ་ཡིན་གྱི་སྒྲོལ་ནུས་མེད་པས་མངོན་སྤྱོད་མ་བྱས་ན་རྩ་ལྟུང་དུ་སྟོན་པ་མིན་ནོ། །བཅུ་གཅིག་པ་ནི། དོན་དམ་པར་མིང་སོགས་སྤྲོས་པ་ཐམས་ཅད་དང་བྲལ་བའི་ཆོས་རྣམས་སྟོང་པ་ཉིད་ལ་མིང་སོགས་ཀྱི་མཚན་མ་དེར་རྟོག་པ་བྱས་ནའོ། །འདི་ལ་ནག་པོ་པས། དོན་རང་གི་མཚན་ཉིད་རིག་པའི་རྟོགས་པའི་ཆོས་མིང་ཚིག་ཡི་གེ་དང་བརྡ་དང་བརྗོད་པ་ཐམས་ཅད་དང་བྲལ་བའི་ཡེ་ཤེས་ལ་ཡིན་མིན་རྩོད་པ་དང་ཡོད་མེད་དུ་རྟོག་པ་དང་གཞན་ལུང་རིགས་ཀྱིས་བྲིད་ནས་ཐེ་ཚོམ་ཟ་བར་འཇུག་པ་ལ་འཆད་དོ། །དངོས་གྲུབ་སྙེ་མ་ལས། ཆོས་བདག་མེད་པའི་ལྟ་བ་ཡོད་བཞིན་དུ་མ་བསྐྱངས་པར་ཞག་གཅིག་འདས་ན་རྩ་ལྟུང་བཅུ་གཅིག་པའོ། །བཅུ་གཉིས་པ་ནི། རང་གི་བླ་མས་སློབ་མ་ལ་བགོ་བཤའ་བྱས་པའི་གདམས་པ་ལ་རབ་ཏུ་དད་པ་ཅན་ལ་འདུན་པ་བཟློག་འདོད་ཀྱི་བསམ་པས་དེའི་སུན་འབྱིན་པ་བྱས་ནའོ། །བཅུ་གསུམ་པ་ནི། ཚོགས་འཁོར་རམ་དཔའ་བོའི་སྟོན་མོའམ་དཔའ་མོའི་སྟོན་མོའི་ཆོ་ག་ཚུལ་བཞིན་དུ་བྱེད་པའི་ཚེ་དམ་རྫས་བཟའ་བཏུང་ཤ་ལྔ་ལ་སོགས་པས་བསྟབས་པའི་ཚེ་མི་གཙང་བའི་བསམ་པའམ་ཐེ་ཚོམ་ཟོས་ནས་དང་དུ་མི་ལེན་པའོ། །བཅུ་བཞི་པ་ནི། བུད་མེད་ཀྱི་ཚུལ་འཛིན་པའི་རྡོ་རྗེ་ཕག་མོ་སོགས་འཇིག་རྟེན་ལས་འདས་པ་རྣམས་དང་བུད་མེད་མཚན་ཉིད་པ་གང་ཡང་རུང་བ་ཞིག་གོ །ཤེས་རབ་ནི་བདེ་བ་ཆེན་པོའི་ཡེ་ཤེས་ཡིན་ལ། རང་བཞིན་ནི་འདིར་འབྱུང་བའི་དོན་ཏེ་རྣལ་འབྱོར་པ་ལ་དེ་སྐྱེད་པར་བྱེད་པའི་བྱེད་པ་པོར་གསུངས་པས་སོ། །ཡུལ་དེ་ལ་སྨོད་པར་བྱེད་ནའོ། ། ༈ བདག་གི་དེ་ཁོ་ན་ཉིད་ནི། མཐར་ཐུག་གི་ལྷ་དང་སྔགས་ཡེ་ཤེས་འགྲུབ་པའི་རྒྱུ་འདུ་འབྲལ་མེད་པར་རྒྱུད་ལ་གནས་པ་དེ་ཡིན་ལ། དེ་ཐོག་མེད་ཀྱི་དུས་ནས་འཁྲུལ་སྣང་གི་བག་ཆགས་མཐུ་བརྟས་པས། མ་དག་པའི་ཕུང་ཁམས་སྐྱེ་མཆེད་ཀྱི་སྣང་བ་འདིས་བསྒྲིབ་ཡོད་པ་ལ་ལྷའི་དེ་ཁོ་ན་ཉིད་ཀྱི་བྱིན་གྱིས་བརླབས་པའི་ཚེ། ཐོག་མར་སྟོང་ཆེན་དེ་བཞིན་ཉིད་ཀྱི་རྣལ་འབྱོར་གྱིས་སྟོང་པར་སྦྱངས་ནས། དེའི་རང་རྩལ་སྙིང་རྗེ་སྒྱུ་མ་ལྟ་བུ་མཁའ་ཁྱབ་ཏུ་སད་པའི་སྟོང་ཉིད་སྙིང་རྗེ་ཟུང་འཇུག་གི་རྩལ་ལས། རང་གི་རིག་པ་དེ་རྒྱུའི་ཧཱུྃ་ཡིག་དང་ཧེ་རུ་ཀ་ལ་སོགས་པའི་རྣམ་པར་ཤར་བ་ལས། འབྱུང་བ་རིམ་བརྩེགས་ནས་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པའི་བར་བཀྲ་ལམ་གྱིས་གསལ་བ་དེ་སྣང་ངོས་ནས་གསལ་བརྟན་གྱི་ཚད་བརྒྱད་དང་ལྡན་པས་ཡུལ་གསུམ་གྱད་དུ་གྱུར་པ་ལྟ་བུ་ལ། དབྱིངས་ཡེ་ཟུང་འཇུག་གི་ལྟ་བ་ལྷའི་ཕྱག་རྒྱར་ཤར་བ་ཁོ་ན་ཡིན་པ་ལ་གསུངས། གསང་སྔགས་ཀྱི་དེ་ཁོ་ན་ཉིད་ནི། མནྟྲ་ཞེས་པའི་སྒྲས་ཡིད་ཤེས་བདེ་མྱུར་དུ་སྐྱོབ་པའི་དོན་དུ་གསུངས་པས། གང་སྐྱོབ་ན་ཡིད་ཤེས། གང་ལས་སྐྱོབ་ན་མཚན་འཛིན་གྱི་རྟོག་པ་ལས། ཚུལ་ཇི་ལྟར་སྐྱོབ་ན་བདེ་ཞིང་མྱུར་བར་སྐྱོབ། ཐབས་གང་གིས་ན་དབྱིངས་ཡེ་ཟུང་འཇུག་ཆོས་ཉིད་དོན་གྱི་ལྷ་དེ་འདུ་འབྲལ་མེད་པ་ལ་གསུངས། ༼སྔགས་ཀྱི་མཚན་ཉིད་ནི། ངོ་བོ་བདེ་བར་གཤེགས་པའི་ཐུགས་ཡིག་འབྲུར་སྣང་བ། ངེས་ཚིག་ནི། བྱིན་རླབས་མངོན་དུ་འབྱིན་པས་སྔགས་༽བཟླས་བརྗོད་ཀྱི་དེ་ཁོ་ན་ཉིད་ནི། འབྱུང་འཇུག་གནས་གསུམ་གཞོམ་མེད་རྡོ་རྗེའི་བཟླས་པས། བཟླ་བྱའི་སྔགས་ཀྱི་རང་སྒྲར་སྦྱངས་པས་དེ་ཁོ་ན་ཉིད་དུ་སྨིན་པའི་ཚེ། ཕྱི་ནང་གི་སྒྲ་རུ་སྣང་བ་སྔགས་སུ་གྲོལ། སྔགས་གྲགས་སྟོང་དུ་སྨིན་པའི་འབྲས་བུ་ལ་བྱ། འཕྲོ་འདུས་དེ་ཁོ་ན་ཉིད་ནི། ཐུགས་སྲོག་ལས་འོད་ཟེར་མཁའ་ཁྱབ་ཏུ་འཕྲོས་པས་དོན་གཉིས་བྱས་ཏེ་སྐུ་གཉིས་བསྒྲུབ་པའོ། ༈ །བླ་མེད་ཀྱི་རྒྱུད་འདིར་རང་གི་ལྟ་བའི་ངང་དུ་འཇོག་པ་ནི་བདག་གི་དེ་ཁོ་ན་ཉིད། རྫོགས་རིམ་ངང་དབྱེར་མེད་པར་ལྷར་བསྒོམ་པ་ནི་ལྷའི་དེ་ཁོ་ན་ཉིད། རྩ་བ་བསྐྱེད་དང་ལས་སྔགས་དང་། །ཞེས་གསང་སྔགས་ཀྱི་དེ་ཁོ་ན་ཉིད། ཀྲི་ཡ་ལྟར་ན་གཞི་ལ་གཞོལ་བ་བདག་མདུན་ལྷར་གསལ་བ། སེམས་ལ་གཞོལ་བ་ལྷའི་ཐུགས་ཀར་ཟླ་དཀྱིལ་སྒོམ་པ། སྒྲ་ལ་གཞོལ་བ་ཟླ་དཀྱིལ་གྱི་སྟེང་དུ་སྔགས་ཕྲེང་རང་སྒྲ་དང་བཅས་པའོ། །གསལ་བ་གསུམ་དང་། ཞལ་ནས་ཞལ་དུ་ཞུགས་པ་སོགས་ཕྱི་ནང་གསང་གསུམ་གྱི་སྤྲོ་བསྡུ་སོགས་ནི་འཕྲོ་འདུའི་དེ་ཁོ་ན་ཉིད་དོ། །འདི་གཉིས་ནི་ར་རྩང་མཁན་པོ་གཉིས་ཀྱིས་གསུངས་པ་ལགས། ༈ ཟླ་གསང་ཐིག་ལེ་ལས། བདག་གི་དེ་ཉིད་མཉམ་བཞག་དང་། །དེ་བཞིན་ལྷ་ཡི་དེ་ཉིད་དང་། །སྔགས་དང་ཕྱག་རྒྱའི་དེ་ཉིད་ནི། །དེ་ཡི་དཀྱིལ་འཁོར་མཆོག་ཏུ་འགྱུར། །ཞེས་སོ། ༈ །དང་པོ་བདག་གི་དེ་ཁོ་ན་ཉིད་ནི། ལྷག་པའི་བདེན་གཉིས་ཟུང་འཇུག་རྟོགས་པའི་ལྟ་བ། གཉིས་པ་ལྷའི་དེ་ཁོ་ན་ཉིད་ནི། རྟེན་བརྟེན་པའི་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་གསལ་བ། གསུམ་པ་གསང་སྔགས་ཀྱི་དེ་ཁོ་ན་ཉིད་ནི། ལྷའི་སྙིང་པོ་སྲོག་ལྟ་བུ་ནི་གསང་སྔགས་ཡིན་ལ་སྔགས་དེ་ཡང་བསྒོམ་པ་དང་བཟླས་པ་གཉིས་ཀྱི་ཚུལ་གྱིས་བསྒྲུབ་པ་སྟེ་ས་བོན་དང་སྔགས་ཕྲེང་བཀོད་པ་སོགས་དང་། བཞི་པ་བཟླས་བརྗོད་ཀྱི་དེ་ཁོ་ན་ཉིད་ནི། རྡོར་བཟླས་ལ་སོགས་པ། ལྔ་པ་འཕྲོ་འདུའི་དེ་ཁོ་ན་ཉིད་ནི། ཐུགས་སྲོག་ལས་འོད་ཟེར་སྤྲོ་བསྡུའོ། ༈ །བདག་གི་དེ་ཁོ་ན་ཉིད་ནི་དག་མཉམ་བདེན་པ་དབྱེར་མེད། ལྷའི༴སྟོང་པ་ཆེན་པོ་ནས་རྗེས་ཐོབ་སྒྱུ་མའི་ལྷ་སྐུ་ཤར་བའི་བར་རོ། །གསང་སྔགས༴ལྷའི་སྙིང་པོའི་སྲོག་ནི་སྔགས་ཡིན་པས་ཐུགས་སྲོག་གི་ཡིག་འབྲུ་ལ་སྔགས་ཕྲེང་གིས་བསྐོར་བ་དེ་ལ་རང་མིང་གི་རང་གདངས་སྒྲོགས་པ་ལ་སེམས་བཟུང་བའོ། །བཟླས་བརྗོད༴རྩ་བསྐྱེད་ལས་གསུམ་གྱིས་ནང་ཆུན་གཅིག་དྲིལ་དུ་བཟླས་པའི་ཚེ་སྐྱོན་བཅུ་སྤོང་བ་དང་། དབྱིངས་དྲུག་པོ་གང་རུང་སྐབས་དང་བསྟུན་ནས་བཟླ་བའོ། །འཕྲོ༴ཕྱག་རྒྱ་གཅིག་པུའི་འོད་ཟེར་འཕྲོ་འདུ་ལས་ཚོགས་སྒྲུབ་ཀྱི་དངོས་གྲུབ་ལེན་དུས་ཀྱི་བར་འཕྲོ་འདུ་ཡོད་ཚད་རྣམས་ཡིན་གསུངས། སྔགས་ཀྱི་ཡན་ལག་ནི། འགྲེལ་ཆུང་ལས། སྙིང་གར་ཡེ་ཤེས་སེམས་དཔའ་བསྒོམས་པའི་སྙིང་གར་ཉི་ཟླའི་དཀྱིལ་དམ་ཚིག་ཕྱག་རྒྱ་བཞག་སྟེ་དེ་སྟེང་ཡིག་འབྲུ་བཞག །ཟློས་ཚེ་སྤྲོ་བསྡུས་བཟླས་པ་སྔགས་ཀྱི་ཡན་ལག་ཡིན་ཞེས་སོ། །སྔགས་གསུམ་ནི། རྒྱུ་མ་ནོར་བ་རྩ་བའི་སྔགས་ས་བོན་གྱི་ཡི་གེ། བསྐྱེད་པ་རྐྱེན་གྱི་སྔགས་བསྐྱེད་རིམ་གསལ་འདེབས་དུས་བརྗོད་རྒྱུ། བཟླས་པ་ལས་ཀྱི་སྔགས་བཟླ་བྱ་ཡིན། ཕྱག་རྒྱ་ནི་རང་ལུས་ལྷར་བསྒོམ་པ་ཕྱག་རྒྱ་ཆེན་པོ། ཐུགས་ཀར་ཡེ་ཤེས་སེམས་དཔའ་དང་ཏིང་འཛིན་སེམས་དཔའ་ཕྱག་མཚན་སྒོམ་པ་ལ་སེམས་གཏད་པ་དམ་རྒྱ། སྔགས་ཕྲེང་བཀོད་པ་སོགས་དང་སྔགས་བཟླ་བ་ཆོས་རྒྱ། མཆོད་བསྟོད་སོགས་བྱ་བ་ལས་རྒྱ་སྟེ་བཞིའོ། ། ༈ སྐྱེད་ལུང་གི་ཡང་ཁྱེད་བླ་མ་རལ་གྲིའི་སྟོང་ཐུན་སྦྱོར། ཆུ་བར་གྱི་གླན་ཤཱཀྱ་བཟང་པོ་སྦྲུལ་ནག་གི་སྟོང་ཐུན་སྦྱོར། ནག་མོ་རིའི་མདའ་ཏིག་ཆོས་ཤཱཀ་དུག་སྡོང་གི་སྟོང་ཐུན་སྦྱོར་བ་ལས། རྗེ་སྒྲོ་ཕུག་པ་ཕྱི་མ་ལྟར་བཞེད་དོ། །དེ་ཡང་ཇི་སྐད་དུ། གཞི་ལ་སྤོང་བར་བྱེད་པ་ནི། །སྐྱེ་བོའི་ལྡུམ་རའི་དུག་སྡོང་འདྲ། །སྦྱོང་བར་བྱེད་པའི་ལམ་པ་ནི། །འཚོ་བྱེད་མཁས་པས་མཐོང་བ་འདྲ། །བསྒྱུར་བར་བྱེད་པས་གསང་སྔགས་པ། །བྲམ་ཟེ་རིགས་སྔགས་གྲུབ་པ་འདྲ། །དབང་དུ་བྱེད་པའི་ནང་པ་ནི། །རྨ་བྱས་ཟས་སུ་མཐོང་བ་འདྲ། །རང་སར་འཇོགས་པའི་རྫོགས་ཆེན་པ། །འབྱུང་ཆེན་ལྟོས་ཀྱི་ས་གཞི་འདྲ། །ཞེས། དཔེར་ན་རྒྱལ་པོའི་བཟའ་ཤིང་གི་ར་བར་དུག་གི་སྡོང་པོ་སྐྱེས་པ་ལ། འབངས་བླུན་པོ་ཁ་ཅིགདུག་ཤིང་གི་རོ་མངར་ལ་ཆགས་ཏེ་བཟའ་ཤིང་སྤངས་ནས་དུག་ཤིང་ལ་ལོངས་སྤྱོད་པས་ནད་གྱིས་མནར་ཞིང་སྲོག་འཚོ་བའི་སྐབས་མེད་པ་ལྟར་དགེ་བཅུ་སྤངས་ཏེ་དུག་ལྔ་རང་རྒྱུད་པར་སྤྱད་པས་ཐར་པའི་སྲོག་འཆད་པར་བྱེད་དོ། །འབངས་དེ་རྣམས་ཀྱི་ནང་ནས་ཁ་ཅིག་གིས། དུག་ཤིང་དང་བཟའ་ཤིང་གི་ཁེ་ཉེན་ཤེས་ནས་བཟའ་ཤིང་ལ་སྤྱོད་ནའང་། དུག་ཤིང་གི་ཁྲོད་ནས་འཕགས་པར་མ་ནུས་པ་ལྟར། དཀར་པོའི་ལས་སད་པ་ཁ་ཅིག་དགེ་འབྲས་མཐོ་རིས་དང་། སྡིག་འབྲས་ངན་སོང་ལས་མི་འདའ་བར་ཡིད་ཆེས་པས་མི་དགེ་བཅུ་སྤངས་ནས་དགེ་བཅུ་སྤྱད་ཀྱང་འཁོར་བ་ལས་ངེས་པར་འབྱུང་མི་ནུས་པ་ནི་ལྷ་མིའི་ཐེག་པ། ལས་དང་ལས་ཀྱི་འབྲས་བུ་ཆུད་མི་ཟ་བ་དང་ཞེས་གསུངས། ཡང་འབངས་ཁ་ཅིག་གིས། དུག་ཤིང་གི་སྡོང་པོ་འདི་རྩ་བ་ནས་བཏོན་ཏེ་རྒྱང་རིང་པོར་དོར་ཟེར། དཔེ་དེ་བཞིན་དུ་ཕུང་ལྔ་དུ་མ་དང་སྐད་ཅིག་མར་རྟོགས་པས་འཁོར་བ་ལས་ངེས་པར་འབྱུང་ཡང་། གཟུང་ཡུལ་རྡུལ་ཕྲན་འཛིན་སེམས་སྐད་ཅིག་མ་དོན་དམ་དུ་འདོད་པ་ཉན་ཐོས་ཀྱི་ཐེག་པ་ལ་ཉོན་མོངས་པ་སྤོང་བའི་ཐབས་སོ། །ཡང་འབངས་ཁ་ཅིག་དུག་སྡོང་རྩ་བ་ནས་འདོན་མི་དགོས་ཏེ། བཅད་མཚམས་ལ་ཁྲོ་ཆུ་ཁོལ་མ་བླུག་པས་སླར་སྐྱེ་བར་མི་འགྱུར་ཟེར་རོ། །དེ་བཞིན་དུ་གཟུང་བ་རང་བཞིན་མེད་པར་རྟོགས་ཀྱང་འཛིན་རིག་སྐད་ཅིག་མ་དོན་དམ་དུ་འདོད་པ་རང་རྒྱལ་གྱི་ཐེག་པ་ལ་ཉོན་མོངས་པ་འགོགས་པའི་ཐབས་སོ། །ཡང་འབངས་དེ་རྣམས་ཀྱི་ནང་ནས་སྨན་པ་ཞིག་ན་རེ། དུག་ཤིང་རྩ་བ་ནས་འདོན་པ་དང་སྡོང་པོ་གཅོད་པ་གཉིས་ཀ་བླུན་པ་སྟེ། འདི་ནི་སྨན་མར་གྱི་རྒྱུར་རྙེད་དཀའ་བ་ཞིག་གོ་ཟེར་ནས་དུག་ཤིང་ལ་སྨན་སྦྱོར་བྱས་པས་ནད་སེལ་ཞིང་རོ་ཙའི་མཆོག་ཏུ་འགྱུར་རོ་ཟེར། དོན་དམ་དུ་བདག་མེད་གཉིས་རྟོགས་པས་ངེས་པར་འབྱུང་བ་བྱང་སེམས་ཀྱི་ཐེག་པ་ལ། ཉོན་མོངས་པ་དང་རྣམ་རྟོག་ཆོས་ཉིད་དུ་སྦྱོང་བའི་ཐབས་སོ། །ཡང་འབངས་རྣམས་ཀྱི་ནང་ནས་སྔགས་མཁན་ཞིག་བྱུང་ནས་དུག་ཤིང་འདུལ་བ་ལ་སྨན་གྱི་འདུལ་སྦྱོང་འདི་ཙམ་བྱེད་ཅི་ཞིག་དགོས་ཟེར་ནས། སྔགས་བཏབ་པ་ཙམ་གྱིས་སྔར་གྱི་སྨན་མར་ལས་ཀྱང་མཆོག་ཏུ་གྱུར་པ་ཞིག་བྱུང་ལ། དཔེ་དེ་བཞིན་དུ་སྔགས་དང་ཕྱག་རྒྱ་ཏིང་ངེ་འཛིན་གྱི་ཆོ་འཕྲུལ་གྱི་སྒོ་ནས། ཉོན་མོངས་དང་རྣམ་རྟོག་ལྷའི་རང་བཞིན་དུ་དབང་བསྒྱུར་བས་དགེ་སྡིག་གི་ལས་ཀྱི་འབྲས་བུ་མི་གོས་པ་ཀྲི་ཡོག་སྡེ་གསུམ་གྱི་ཐེག་པ་ལ། ཉོན་མོངས་པ་དང་རྣམ་རྟོག་ལྷ་དང་ཡེ་ཤེས་སུ་བསྒྱུར་བའི་ཐབས་སོ། །ཡང་རྨ་བྱ་ཞིག་བྱུང་ནས་དུག་ཤིང་གི་སྡོང་པོ་མཐོང་བས། ཤིན་ཏུ་དགའ་ཞིང་ཟོས་པས་ལང་ཚོ་རྒྱས་ཤིང་སྤུ་སྡུག་མདངས་དང་ལྡན་པར་གྱུར་ལ། དཔེ་དེ་བཞིན་དུ་ཉོན་མོངས་པ་སྤྱད་ཀྱང་མི་འཆིང་ཞིང་ཡེ་ཤེས་ལྔར་གསལ་བས་ན་གོས་པར་མི་འགྱུར་བ་སྔགས་ནང་པ་གཉིས་ཀྱི་ཐེག་པ་ལ་ཉོན་མོངས་པ་དབང་དུ་བྱེད་པའི་ཐབས་སོ། །དེ་ལྟར་ལྡུམ་རའི་ས་གཞི་དེ་ལ་དུག་སྐྱེས་པ། བཅད་པ། སྨན་གྱིས་སྦྱངས་པ། སྔགས་ཀྱིས་བསྒྱུར་བ། རྨ་བྱས་ཟོས་པ་སོགས་གང་ལའང་དགའ་མི་དགའི་རྟོག་པ་མེད་ཅིང་དུག་མ་སྐྱེས་ཀྱང་དགག་སྒྲུབ་མེད་པ་བཞིན་དུ། ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་རང་བྱུང་གི་ཡེ་ཤེས་རང་ཤར་བ་ལ་ལས་དང་ལས་ཀྱི་འབྲས་བུས་གོས་སུ་མེད་པ་ལ་ཨ་ཏི་རང་ལུགས་ཀྱི་ཐེག་པ་སྟེ། སྤང་གཉེན་གྱི་ཐ་སྙད་ལས་འདས་པ་ནི་སྟོན་པ་དྲུག་པའི་ཐུགས་ཀྱི་དགོངས་པའི་མཐར་ཐུག་གོ ། ༈ བྱང་སེམས་རྣམས་སྐྱེ་བ་བཞེས་པའི་རྒྱུ་བཞི་ནི། མོས་སྤྱོད་ཀྱི་ས་ལ་གནས་པའི་བྱང་སེམས་ཀྱི་སྐྱེ་བ་ཕལ་ཆེར་ལས་ཀྱི་རྒྱུ་ལས་སྐྱེ་སྟེ། དེ་དག་སེམས་ལ་དབང་མ་ཐོབ་པས་གང་དུ་བསམ་ཤིང་སྨོན་ལམ་བཏབ་པ་དེར་གདོན་མི་ཟ་བར་སྐྱེ་ངེས་པ་མེད་ལ། རེ་འགའ་སྨོན་པ་ལྟར་སྐྱེ་བའང་ཡོད་མོད་ཀྱི། གཙོ་ཆེར་བསོད་ནམས་ཀྱིས་ཚོགས་བསགས་པའི་ལས་ཀྱིས་བདག་གཞན་ལ་ཕན་པར་འགྱུར་པའི་གནས་སུ་སྐྱེ་བ་དང་། ས་དང་པོ་དང་གཉིས་པ་ལ་ཞུགས་པའི་བྱང་ཆུབ་སེམས་དཔའ་རྣམས་ནི་སྨོན་ལམ་གྱི་དབང་གིས་ལྷ་མི་བྱོལ་སོང་ཡི་དྭགས་དམྱལ་བའི་གནས་གང་དང་གང་དུ་སེམས་ཅན་གྱི་དོན་བྱེད་པ་དེར་སྨོན་ལམ་བཏབ་པ་བཞིན་སྐྱེ་སྟེ། ལོ་ཉེས་ཆེན་པོ་བྱུང་བའི་དུས་སུ་ཉ་དང་གླང་ཆེན་སོགས་ཀྱི་ལུས་བླངས་ནས་རང་གི་ཤས་སེམས་ཅན་ཚིམ་པར་བྱེད། ནད་ཀྱི་བསྐལ་པ་བར་མ་སོགས་ཀྱི་ཚེ་ནད་སེལ་བའི་སེམས་ཅན་དང་རིགས་སྔགས་གྲུབ་པ་དང་། སྨན་པ་ཆེན་པོའི་ལུས་བླངས་ནས་ནད་སྣ་ཚོགས་ཞི་བར་བྱེད། ས་གསུམ་པ་ནས་བདུན་པའི་བར་གྱི་བྱང་སེམས་རྣམས་ཏིང་ངེ་འཛིན་གྱི་སྐྱེ་བ་འཛིན་པ་སྟེ། དེ་དག་སེམས་ཀྱི་ཏིང་ངེ་འཛིན་ལས་སུ་རུང་བའི་བསམ་གཏན་བཞི་ཐོབ་ཀྱང་དེས་འབྲས་བུ་གཟུགས་ཁམས་སུ་མི་སྐྱེ་བར་འདོད་ཁམས་སུ་སྐྱེ་བ་དང་། གང་དང་གང་དུ་བསམ་པར་ཏིང་ངེ་འཛིན་གྱིས་སྐྱེ་བ་འཛིན་ཏོ། །དག་ས་གསུམ་ལ་གནས་པའི་བྱང་སེམས་རྣམས་ནི་གནས་གང་དང་གང་དུ་སྐྱེ་བ་ཅི་དང་ཅི་ལྟ་བུ་སྟོན་པ་ལ་རང་དབང་ཡོད་པ་ཡིན་པས་དབང་འབྱོར་བའི་དབང་གིས་སྐྱེ་བར་འདོད་པ་ཡིན་ཏེ། དེ་དག་གིས་སྤྲུལ་པའི་སྐུ་དགའ་ལྡན་ནས་ལྷུམས་སུ་གཤེགས་པ་ལ་སོགས་པ་ཡང་སྟོན་ཅིང་སྐྱེ་བ་སྣ་ཚོགས་སུ་སྟོན་ཏོ། །བྱང་སེམས་མོས་སྤྱོད་པ་སྨོན་ལམ་གྱིས་སྐྱེ་བའང་ཡོད་མོད་ཕལ་ཆེར་ལས་དབང་གིས་སྐྱེ། ས་དང་པོ་དང་གཉིས་པ་ཏིང་ངེ་འཛིན་གྱི་སྐྱེ་བའང་ཡོད་མོད་ཕལ་ཆེར་སྨོན་ལམ་གྱིས་སྐྱེ། ས་གསུམ་པ་ནས་བདུན་པའི་བར་ཏིང་ངེ་འཛིན་དང་། དག་ས་པ་རྣམས་དབང་བཅུ་ཐོབ་པས་དབང་འབྱོར་བའི་དབང་གིས་སྐྱེ་བ་ཡིན་ནོ། །ཉན་ཐོས་ཀྱི་རིགས་མ་ངེས་པ་ཐེག་ཆེན་ལ་ཞུགས་ནས་འཚང་རྒྱ་བར་འགྱུར་བ་ལ་གཉིས་ཡོད་དེ། རང་གི་ཐེག་པའི་དོན་བདེན་པ་མཐོང་བ་རྒྱུན་ཞུགས་ཕྱིར་འོང་ཕྱིར་མི་འོང་གསུམ་དང་། བདེན་པ་མ་མཐོང་བ་སོ་སྐྱེས་མོས་སྤྱོད་པའི་གང་ཟག་གང་ཡིན་པའོ། །བདེན་དོན་མཐོང་བ་ལ་ཡང་འདོད་པའི་འདོད་ཆགས་དང་བྲལ་བ་ཕྱིར་མི་འོང་དང་། འདོད་ཁམས་ལ་འདོད་ཆགས་དང་བྲལ་བ་མིན་པར་རྒྱུན་ཞུགས་དང་ཕྱིར་འོང་བ་རྣམས་སོ། །ཉན་ཐོས་འཕགས་པ་སྲིད་པ་ལ་རྒྱབ་ཀྱི་ཕྱོགས་ནས་སྲིད་པར་མི་སྐྱེ་བར་བྱེད་པ་འཕགས་ལམ་ཐོབ་པ་ཐེག་ཆེན་ལ་ཞུགས་ན་འཁོར་བར་སྐྱེ་ནས་རྫོགས་སྨིན་སྦྱང་བ་སྐལ་བ་གྲངས་མེད་གསུམ་གྱི་བར་དུ་སྒྲུབ་དགོས་ན་སྲིད་པ་ཟད་བྱེད་ཀྱི་ལམ་ཐོབ་པ་དེ་དག་འཁོར་བར་ཇི་ལྟར་སྐྱེ་ཞེ་ན། འདོད་པའི་འདོད་ཆགས་དང་མ་བྲལ་བ་རྒྱུན་ཞུགས་དང་ཕྱིར་འོང་གཉིས་ནི་ཐེག་ཆེན་ལ་ཞུགས་ཚེ་སྐྱེ་བ་འཛིན་པའི་ཚུལ་སེམས་ཅན་སྡུག་བསྔལ་བ་ལ་སྙིང་རྗེའི་དབང་གིས་གང་དང་གང་དུ་སེམས་ཅན་གྱི་དོན་བྱ་བར་འདོད་པ་དེ་དང་དེ་དག་དུ་སྐྱེ་བར་གྱུར་ཅིག་ཅེས་སྨོན་ལམ་གྱི་དབང་གིས་དེ་དང་དེར་སྐྱེ་བ་མཚན་ཉིད་པ་རབ་ཏུ་སྒྲུབ་པར་བྱེད་དེ་སྐྱེས་ནས་སེམས་ཅན་ལ་ཕན་པ་དང་བདེ་བ་བྱས་ནས་ཚོགས་གཉིས་བསགས་ཤིང་མཐར་འཚང་རྒྱ་བར་བྱེད་དོ། །འདོད་པའི་འདོད་ཆགས་དང་བྲལ་བ་ནི་འདོད་ཁམས་སུ་ཕྱིར་མི་འོང་བ་དང་ལྡན་པའི་ཕྱིར་རང་ཉིད་འདོད་ཁམས་སུ་མི་སྐྱེ་ཡང་ཏིང་ངེ་འཛིན་གྱི་སྤྲུལ་པས་འཁོར་བར་སྐྱེ་བ་བསྟན་ནས་ཚོགས་བསགས་པ་སྒྲུབ་པར་བྱེད་ཅིང་འཚང་རྒྱའོ། །ཉན་ཐོས་ཐེག་ཆེན་ལ་ཞུགས་པ་དེ་ནི་སོ་སྐྱེ་ཐེག་ཆེན་ལ་ཞུགས་པ་ལས་དམན་ཞིང་། སྔར་རང་དོན་ལ་གོམས་པའི་སེམས་དང་ལྡན་ཞིང་མྱང་འདས་ལའང་དགའ་བས་ཐེག་ཆེན་གྱི་འབྲས་བུ་ལ་རྟོགས་པ་བུལ་བ་ཡིན་པར་འདོད་དོ། ༈ །དྲི་མ་མེད་པར་གྲགས་པས་བསྟན་པ་ལས། འཇམ་དཔལ་གཞོན་ནུར་གྱུར་པས་དྲི་མ་མེད་པར་གྲགས་པ་ལ་སྨྲས་པ། རིགས་ཀྱི་བུ་འདི་ལྟ་སྟེ་དཔེར་ན་དགོན་དུང་གི་ཕྱོགས་སུ་མེ་ཏོག་ཨུཏྤལ་དང་། པདྨ་དང་། ཀུ་མུ་ད་དང་། པདྨ་དཀར་པོ་དང་། དྲི་མཆོག་རྣམས་མི་སྐྱེ་སྟེ། འདམ་དང་ཆུ་གླིང་དུ་བསྐྱེད་ན་མེ་ཏོག་ཨུཏྤལ་དང་། པདྨ་དང་། ཀུ་མུ་ད་དང་། པདྨ་དཀར་པོ་དང་། དྲི་མཆོག་རྣམས་སྐྱེའོ། །རིགས་ཀྱི་བུ་དེ་བཞིན་དུ་འདུ་མ་བྱས་ངེས་པ་ཐོབ་པའི་སེམས་ཅན་རྣམས་ལ་ནི་སངས་རྒྱས་ཀྱི་ཆོས་རྣམས་མི་སྐྱེའོ། །ཉོན་མོངས་པའི་འདམ་དང་ཆུ་གླིང་དུ་གྱུར་པའི་སེམས་ཅན་རྣམས་ལ་སངས་རྒྱས་ཀྱི་ཆོས་རྣམས་སྐྱེའོ། །ཞེས་སོ། ༈ །སྐད་གཉིས་ཤན་སྦྱར་ལས། མ་རུཿམྱ་ངམ་ཐང་སྟེ། ཆུ་མེད་པའི་ས་ཐང་གི་མིང་། དྷ་ནྭཱ་དགོན་དུང་། དྷ་ནྭ་ནི་སྐམ་ལའམ་ཐང་གི་ལ། ། ༈ གནས་ལུགས་མཛོད་འགྲེལ་ལས། དེ་ཡང་ཆོས་ཐམས་ཅད་རང་བཞིན་མེད་པ་དང་ཡེ་ནས་ལྷུན་གྱིས་གྲུབ་པ་དང་། རྒྱ་ཆད་ཕྱོགས་ལྷུང་མེད་པས་ཕྱལ་བ་དང་། རང་བྱུང་གི་ཡེ་ཤེས་གཅིག་པུའི་ངང་དུ་བསྡུ་བ་དང་བཞི། ཞེས་དང་། ཐེག་མཆོག་མཛོད་ལས། དེ་ཡང་ངོ་བོ་ཀ་དག་ལ་ལྟོས་ནས་ཁྲེགས་ཆོད་ཀྱི་དམ་ཚིག་ཏུ་འཁོར་བའི་ཆོས་སུ་སྣང་ངོ་ཅོག་སྣང་སྲིད་སྣོད་བཅུད་ཕྱི་ནང་ཐམས་ཅད་ཡེ་ནས་མེད་པ་སྨིག་སྒྱུའི་ཆུ་ལ་སོགས་པ་སྒྱུ་མའི་དཔེ་བརྒྱད་དུ་ཤེས་པས་སྣང་བ་ལ་བདེན་ཞེན་གྲོལ་བའི་དགོས་པ་ཡོད་དོ། །ཕྱི་ནང་ཡུལ་མེད་དུ་རྟོགས་པའི་ངང་ལ་སེམས་འཛིན་གྱི་འཇུར་བུས་མ་བཅིངས་བའི་རིག་པ་ཕྱལ་བ་བར་མེད་ཆེན་པོར་སྐྱོང་ཞིང་། ཞེན་འཛིན་གང་ཡང་མི་བྱ་བར་སྒོ་ལྔ་ཧར་སངས་ཡུལ་མེད་ཀྱི་རིག་པ་རྟེན་མེད་དུ་རྗེན་ལ་ཕུད་ནས་ཕྱལ་ཕྱལ་གཏོང་བ་ནི་ཕྱལ་བ་ཞེས་བྱ་སྟེ། སྣང་བཏགས་ཆོས་ཉིད་དུ་གྲོལ་བའི་དགོས་པ་ཡོད་དོ། །རང་བཞིན་ལྷུན་གྲུབ་ལ་ལྟོས་ནས་ཐོད་རྒལ་གྱི་དམ་ཚིག་ཏུ། རང་བྱུང་གི་ཡེ་ཤེས་ལ་ཡོན་ཏན་ལྷུན་གྱིས་གྲུབ་པས་ཚོགས་ལ་མ་ལྟོས་པར་རང་ངོ་ཤེས་པས་འགྲུབ་པར་ཐག་བཅད་ནས། འོད་ལྔ་རང་གསལ་ལྷུན་གྲུབ་ཀྱི་ངོ་བོ་སྣང་བ་བཞིའི་ཉམས་ལེན་དང་མི་འབྲལ་བར་བྱས་པས། སངས་རྒྱས་རང་ཆོས་སུ་གྲུབ་སྟེ། གཞན་ནས་འཚོལ་མི་དགོས་པའི་དགོས་པ་ཡོད་དོ། །རྐྱེན་སྣང་དང་བདེ་སྡུག་བྱུང་ཚོར་དང་རྣམ་རྟོགསྣང་བ་དང་རིག་པ། ཅི་ཤར། ཅི་སྣང་། ཅི་རིག་ཀྱང་རང་བྱུང་གི་ཡེ་ཤེས་གཅིག་པུར་ཐག་ཆོད་པས། ཐམས་ཅད་རང་གྲོལ་ལྷུན་མཉམ་ཆེན་པོའི་དགོངས་པ་ལས་མི་འདའ་ཞིང་། ངོ་བོ་ཆོས་ཀྱི་སྐུ་ཀ་དག་དང་ལྷུན་གྲུབ་ཁྲེགས་ཆོད་དང་ཐོད་རྒལ་གཉིས་སུ་མེད་པར། ཆོས་ཉིད་ཟད་པ་ལ་ཤ་ར་ར་འོལ་ལ་ལ། ཡེ་རེ་རེ་སངས་སངས་སངས་གཏན་སྲིད་ཟིན་པའི་དགོས་པ་ཡོད་དོ། ། ༈ རླུང་སེམས་དབུ་མར་ཐིམ་པས་སྣང་བ་གསུམ་ལུགས་ལྡོག་ཏུ་ཤར་ཏེ་དེའི་རིམ་པ་དང་མཐུན་པར་རང་བཞིན་བརྒྱད་ཅུའི་ཀུན་རྟོག་འགགས་ནས་སློང་བྱེད་རྐྱེན་གསུམ་དང་བྲལ་བའི་ནམ་མཁའ་ལྟ་བུ་ཤིན་ཏུ་མཚོན་པར་དཀའ་བའི་འོད་གསལ་གྱི་གནས་ལུགས་དེའི་ངང་དུ་མཉམ་པར་འཇོག་པ་དང་། དེའི་ངང་ལས་ཆུ་ལས་ཉ་ལྡང་བ་ལྟར་སྣང་བ་གསུམ་ལུགས་འབྱུང་དུ་ཤར་བས་ཉེར་ལེན་གྱིས་རྒྱུ་བྱས། རླུང་འོད་ཟེར་ལྔ་པས་ལྷན་ཅིག་བྱེད་པའི་རྐྱེན་བྱས་ནས་སྒྱུ་མའི་དཔེ་བཅུ་གཉིས་ཀྱིས་མཚོན་པའི་ལྷའི་སྐུར་ལྡང་བ་ཡིན་ནོ། །རླུང་སེམས་ཙམ་ལས་གྲུབ་པའི་ལྷ་སྐུ་དེ་ཉིད་མཚོན་བྱེད་ཀྱི་དཔེ་བཅུ་གཉིས་ནི། ཡེ་ཤེས་རྡོ་རྗེ་ཀུན་ལས་བཏུས་པའི་ལུང་ལྟར་ན། ངོ་བོས་མ་གྲུབ་ཀྱང་རྒྱུ་རྐྱེན་ཚོགས་པ་ལྟར་ལས་སྣང་བས་སྒྱུ་མ་ལྟ་བུ་དང་། གར་ཡང་ཁྱབ་པ་ཆུ་ཟླ་ལྟ་བུ་དང་། ཤ་རུས་སོགས་བྲལ་ཡང་ལུས་སུ་སྣང་བའི་གཟུགས་བརྙན་མིག་ཡོར་རམ་གྲིབ་མ་ལྟ་བུ་དང་། སྤྲུལ་པ་སྤྲོ་བསྡུ་མང་པོ་བྱེད་པ་སྨིག་རྒྱུ་ལྟ་བུ་དང་། རླུང་སེམས་ཙམ་ལས་གྲུབ་པ་རྨི་ལམ་ལྟ་བུ་དང་། རྣམ་སྨིན་གྱི་ལུས་དང་རྒྱུད་གཅིག་ཀྱང་ཐ་དད་ལྟར་སྣང་བ་བྲག་ཆ་ལྟ་བུ་དང་། རྟེན་བརྟེན་པའི་དཀྱིལ་འཁོར་དུ་སྣང་བ་དྲི་ཟའི་གྲོང་ཁྱེར་ལྟ་བུ་དང་། གཅིག་ཡིན་ཀྱང་དུ་མར་སྟོན་པ་མིག་འཕྲུལ་ལྟ་བུ་དང་། ཁམས་ལྔའི་དྭངས་མ་ལས་གྲུབ་པའམ་ཁ་དོག་གསལ་ལ་མ་འདྲེས་པ་འཇའ་ཚོན་ལྟ་བུ་དང་། རགས་པའི་ལུས་སྤྲིན་དང་འདྲ་བའི་གསེབ་ན་ཞིང་ཁམས་སྣང་བར་བྱེད་པས་འོད་གློག་འགྱུ་བ་དང་འདྲ་བའི་གློག་ལྟ་བུ་དང་། སྟོང་པའི་ངང་ལས་རྣམ་རྟོག་མེད་བཞིན་ཐོལ་གྱིས་རང་ཤར་དུ་བསྐྱེད་པ་ཆུ་ལས་ཆུ་བུར་རྡོལ་བ་ལྟ་བུ་དང་། ཡན་ལག་དང་ཉིང་ལག་ཅིག་ཆར་རྫོགས་པ་མེ་ལོང་གི་གཟུགས་བརྙན་ལྟ་བུའོ། ༈ །ཀུན་རྫོབ་སྒྱུ་ལུས་ལ་མཚོན་ན་དེ་ལས་ཀྱང་ཆོས་ཐམས་ཅད་སྒྱུ་མ་ལྟ་བུར་གསུངས་པས། ཚིག་ཙམ་གྱི་དོན་ཕ་རོལ་དུ་ཕྱིན་པ་དང་མཐུན་ཞིང་། ལྷ་སྐུ་སྒྱུ་མ་ལྟ་བུ་སོགས་བསྐྱེད་པ་དང་། རླུང་སེམས་ཀྱི་ལྷ་སྐུ་སྒྱུ་མ་ལྟ་བུ་སོགས་རྫོགས་པ་དང་། ལྷུན་གྲུབ་ཀྱི་རིག་གདངས་ལྟ་བུ་རྫོགས་པ་ཆེན་པོ་དང་མཐུན་པའི་ཚུལ་དུ་གོ་རིམ་བཞིན་ཚིག་དོན་དང་། སྤྱི་དོན་དང་། སྦས་དོན་དང་། མཐར་ཐུག་གི་དོན་གྱི་གནད་ལ་འཇུག་པ་དང་། དོན་དམ་འོད་གསལ་ལ་མཚོན་ན། སེམས་ཀྱི་རང་བཞིན་ནི་འོད་གསལ་བའོ། །ཞེས་པ་ལ་སོགས་པ་འོད་གསལ་ཙམ་ཕར་ཕྱིན་ལས་ཀྱང་བསྟན་པས་ཕར་ཕྱིན་དང་མཐུན་པའི་ཚིག་དོན། བསྐྱེད་རིམ་འོད་གསལ་དུ་ཞུགས་པ་ལྟ་བུ་བསྐྱེད་པ་དང་མཐུན་པའི་སྤྱི་དོན། རྫོགས་རིམ་གྱི་སྟོང་བཞིའི་དྲངས་པའི་འོད་གསལ་ལྟ་བུ་རྫོགས་པ་དང་མཐུན་པའི་སྦས་དོན། རིམ་པ་གཉིས་པའི་གཉིས་པ་ཆོས་ཐམས་ཅད་ཡེ་ནས་སྟོང་པའི་གདོད་མའི་གནས་ལུགས་རྟོགས་པ་དབང་བཞི་པའི་ཡེ་ཤེས་ཀ་དག་གི་རྟོགས་པ་རྫོགས་པ་ཆེན་པོ་དང་མཐུན་པའི་མཐར་ཐུག་གི་དོན་གྱི་གནད་ལ་འཇུག་པ་སྟེ། དེ་བཞིན་དུ་ཟུང་འཇུག་ཀྱང་སོ་སོའི་སྐབས་ཀྱིས་ཤེས་པར་བྱ་བ་གནད་ཀྱི་དོན་ཡིན་ལ། གཞན་དུ་ཚིག་ཙམ་གྱི་དོན་དང་། མདོ་སྔགས་ཐུན་མོང་གི་སྤྱི་དོན་དང་། རྫོགས་རིམ་སྦས་དོན་དང་། མཐར་ཐུག་གི་འབྲས་བུའི་དོན་གྱི་ཚུལ་བཞིར་བཤད་པ་ནི་ཡོངས་སུ་གྲགས་པ་བཞིན་ནོ། །ཞེས་གསུངས། ༈ ཚུལ་བཞི་ལས། ཚིག་གི་ཚུལ། འོད་གསལ་ཙམ་ཕར་ཕྱིན་ལས་ཀྱང་བསྟན་པས་ཕར་ཕྱིན་དང་མཐུན་པའོ། །སྤྱིའི་ཚུལ་ནི། ཕར་ཕྱིན་ཐེག་པའི་ས་ལམ་སྔགས་ཀྱིས་ཀྱང་བརྗོད་བྱར་བསྟན་པས་ཐུན་མོང་ཡིན་པའོ། །སྦས་པའི་ཚུལ་ནི། གོང་མའི་ཡུལ་དུ་གྱུར་པ་འོག་མའི་ཡུལ་དུ་མ་གྱུར་པའོ། །མཐར་ཐུག་གི་ཚུལ་ནི། དེ་ལས་གོང་དུ་བོག་དབྱུང་དུ་མེད་པ་སངས་རྒྱས་ཀྱི་ཡེ་ཤེས་སོ། ། ༈ ཕྱི་མཆོད་ནི། དངས་བསིལ་མངར་བའི་ཞལ་སྐྱེམས་མཆོད་ཡོན། ཕྱག་ཞབས་བསིལ་བྱེད་རྙོག་བྲལ་གྱི་ཞབས་བསིལ། རྣམ་བཀྲའི་མེ་ཏོག་སྤྱན། དྲི་ཞིམ་བདུག་སྤོས་ཤངས། སྣང་གསལ་མར་མེ་སྤྱན། དྲི་ལྡན་མའི་ཆབ་ཐུགས་ཀ། བཅུད་ལྡན་ཞལ་ཟས་ལྗགས། སྙན་པའི་རོལ་མོ་སྙན་དབང་རྣམ་ལ་མཆོད་པ་སྟེ། དེ་དག་གི་མཚོན་དོན་ཀྱང་རིག་པའི་ཡེ་ཤེས་ཉིད་རྣམ་པར་བཀྲ་བས་མེ་ཏོགདམིགས་མེད་ཀྱི་སྙིང་རྗེའི་རྟོག་པ་བསྲེག་པས་སྤོས། ལྷན་སྐྱེས་འོད་གསལ་གྱིས་མ་རིག་པའི་མུན་པ་སེལ་བས་མར་མེ། ཤིན་ཏུ་ཟབ་པའི་དོན་དབྱིངས་རིག་སྤྲོས་བྲལ་གྱི་ཡེ་ཤེས་སུ་ཤར་བས་ཆོས་ཐམས་ཅད་ལ་ཁྱབ་པས་བྱུག་པ། དེས་ཀུན་རྟོག་གི་དྲི་མ་འཁྲུད་པས་ཞབས་བསིལ། ཏིང་འཛིན་ཟག་མེད་ཀྱི་རོ་མྱོང་བ་ནི་ཞལ་ཟས་དང་མཆོད་ཡོན། གྲགས་སྟོང་གཞོམ་མེད་ཀྱི་སྔགས་སྒྲ་ནི་རོལ་མོའོ། །ནང་མཆོད་ཐུན་མོང་བ་ནི། མཚོན་བྱེད་བམ་གཙང་མ་ལ་རང་བྱུང་དུ་གནས་པའི་དམ་རྫས་མིག་ལྕེ་རྣ་བ་སྣ་སྙིང་སྟེ་དབང་ལྔའི་མེ་ཏོགཚིལ་ཆེན་བསྲེག་གསུར་གྱི་བདུག་སྤོས། ཞུན་ཆེན་སྐྲ་ལ་སྦར་བའི་མར་མེ། མཁྲིས་པའི་དྲི་ཆབ། ཤ་ཆེན་གྱི་ཞལ་ཟས་སོགས་ཏེ་དེ་དག་གི་མཚོན་དོན་ལུས་ཅན་རྣམས་ལ་རང་བྱུང་དུ་གྲུབ་པའི་རྫས་སྒོ་ལྔའི་རྣམ་ཤེས་ཀྱི་རྟེན་གཟུགས་ཅན་དྭངས་མའི་དབང་པོ་ལྔ་ནི་རང་ཡུལ་ལ་མ་འདྲེས་པར་དབང་བྱེད་པས་རྣམ་བཀྲའི་མེ་ཏོགཚིལ་ཆེན་གྱི་རྒྱུ་ཤ་སྟེ་དེ་ཉིད་ཀྱི་སྙིགས་མ་དྲིར་འགྱུར་བས་ཚིལ་གསུར་གྱི་སྤོས། ཞུན་ཆེན་གྱི་འབྲས་བུ་ཁུ་བ་ལས་ལུས་ཀྱི་བཀྲག་མདངས་སུ་འགྱུར་བས་ཞུན་མེ། མཁྲིས་པ་ནི་དྲི་མཛོད་ཡིན་པས་བྱུག་པ། བཟའ་བཏུང་སོགས་འཇུ་བའི་དངས་མ་ཁྲག་དང་ཤར་སྨིན་ཏེ་ཕུང་ཁམས་སྐྱེ་མཆེད་ཀྱི་ལྷ་རྣམས་གསོ་བར་བྱེད་པའི་ཕྱིར་ཞལ་ཟས་སོ། །ནང་མཆོད་ཁྱད་པར་བ་ལ་སྨན་གཏོར་རཀྟ་གསུམ་ལས། སྨན་མཆོད་ནི། འཁོར་འདས་ཀྱི་ཆོས་ཐམས་ཅད་མ་བཅོས་རང་བྱུང་གི་བདུད་རྩིར་གནས་པའི་ཕྱིར་རྩ་བརྒྱད་ཡན་ལག་སྟོང་སྦྱར་ཚུལ་བཞིན་གྲུབ་པའི་དམ་རྫས། ཆོས་ཉིད་མཉམ་པའི་ངང་ལས་བྱུང་ཞིང་གཉིས་འཛིན་གྱི་རྟོག་པ་སེལ་བའི་བདུད་རྩི་སྨན་གྱི་བཅུད་ལེན་རིགས་ལྔ་ཡེ་ཤེས་ལྔ་ཡི་ངོ་བོར་གྲུབ་པ་ཉིད་མཐེབ་སྲིན་ཉི་ཟླའི་གའུས་བཅུས་ཏེ་ཕུལ་བས་ལྷ་རྣམས་མཉེས་པར་མོས་པ་དང་། ལྷ་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་ཡི་གེ་འབྲུ་གསུམ་གྱི་རྣམ་པར་འཕྲོས་ནས་བདུད་རྩིའི་སྟེང་དུ་གནས་པ་མཐེབ་སྲིན་གྱིས་བླངས་ཏེ་རང་གི་གནས་གསུམ་དང་ལྕེ་ལ་བཞག་པས་རྡོ་རྗེ་གསུམ་གྱི་དངོས་གྲུབ་ཐོབ་པར་མོས་པ་སྟེ། སྦས་དོན་གྱི་དབང་དུ་བྱས་ན་བདུད་རྩི་ལྔ་ནི་ཕུང་ལྔའི་དྭངས་མ། ཤ་ལྔ་ནི་དབང་ལྔའི་དྭངས་མ་སྟེ། དེ་དག་འཛག་མེད་དུ་བཅིངས་པ་ལས་འཆི་མེད་གྲུབ་པས་ན་བདུད་རྩིའོ། །གཏོར་མའི་མཆོད་པ་ནི། ཕྱི་མཆོད་རྣམ་དག་དབྱིངས་ཀྱི་གཏོར་གཞོང་དུ། ནང་བཅུད་གཏོར་རྫས་བཟའ་བཏུང་གི་དངོས་པོ་མཁོ་དགུའི་ལོངས་སྤྱོད་འདོད་ཡོན་ལྔའི་སྤྲིན་ཆེན་པོར་སྤྲོས་ཏེ་ཕུལ་བས། ལྷ་རྣམས་ཀྱི་ལྗགས་རྡོ་རྗེའི་རྣམ་པ་ཅན་ལས་བྱུང་བའི་འོད་ཀྱི་སྦུ་གུས་བཅུད་དྲངས་ཤིང་གསོལ་བས་ཐུགས་དམ་བསྐང་བར་མོས་ཏེ། ངེས་དོན་དུ་ཡུལ་ལྔའི་བཟའ་བ་དང་། རྣམ་ཤེས་ཀྱི་བཏུང་བ་རྣམས་འོད་གསལ་གྱི་ཀློང་དུ་གསོལ་ཞིང་ཐིམ་པར་མོས་པའོ། །རཀྟའི་མཆོད་པ་ནི། ཉོན་མོངས་པའི་རྩ་བ་ནི་ཁམས་གསུམ་དུ་ཆགས་ཤིང་ཞེན་པའི་ཀུན་རྟོག་སྟེ། དེས་འཁོར་བ་འགྲུབ་པར་བྱེད་པས་ན་འཁོར་བ་རྩད་ནས་གཅོད་པའི་ཕྱིར་ཆགས་རྟོག་ཐམས་ཅད་ཁྲག་གི་རྣམ་པར་བསྡུས་ནས་ཆགས་མེད་བདེ་ཆེན་གྱི་ངང་དུ་བཅོམ་སྟེ་དྭངས་མའི་རྒྱ་མཚོར་འཁྱིལ་བ་འཁོར་བ་སྐྱེ་མེད་ཀྱི་དབྱིངས་སུ་སྒྲོལ་བའི་དམ་རྫས་ཉིད་འཁོར་འདས་མཉམ་ཉིད་ཀྱི་དབྱིངས་སུ་འབུལ་བ་སྟེ། ངེས་དོན་དུ་མཁའ་གསང་གི་རྩེར་ཉི་ཟླའི་འགྲོས་བཅིངས་པས་འཁོར་བའི་རྒྱུན་གཅོད་པར་བྱེད་པའོ། །དེ་ལྟར་ཕུལ་བས་འཁོར་བ་ཁྲག་གི་རྒྱ་མཚོ་ལྷག་མེད་དུ་གསོལ་བས་འཁོར་བའི་གནས་སྟོང་པར་མོས་པའོ། །གསང་མཆོད་ལ་གཉིས་ལས་སྦྱོར་མཆོད་ནི། སྣང་བ་ཐམས་ཅད་ཐབས་ཡབ་ཀྱི་རང་བཞིན། སྟོང་པ་ཐམས་ཅད་ཤེས་རབ་ཡུམ་གྱི་ཕྱག་རྒྱར་གནས་པས། དེ་གཉིས་ངོ་བོ་དབྱེར་མི་ཕྱེད་པར་གནས་པ་ནི་ཆོས་ཐམས་ཅད་རང་བཞིན་གཉིས་སུ་མེད་པར་སྦྱོར་བ་སྟེ་སྣང་སྲིད་ཡེ་སྦྱོར་གྱི་དགོངས་པ་ཡིན་ལ། དེའི་རྩལ་སྣང་རང་ཉིད་ལྷ་ཡབ་ཡུམ་དུ་གསལ་ཏེ་འདུ་ཤེས་གསུམ་ལྡན་གྱིས་མཉམ་པར་སྦྱོར་བས་ཡས་བབས་དང་མས་བརྟན་གྱི་དགའ་བ་བཞི་ལུགས་འབྱུང་ལྡོག་གི་སྦྱོར་བས་བདེ་སྟོང་གཉིས་སུ་མེད་པའི་མཆོད་སྤྲིན་ཟག་བྲལ་སྒྱུ་མའི་བཀོད་པས་ཕུང་ཁམས་སྐྱེ་མཆེད་གདོད་ནས་དག་པའི་ལྷ་ཡི་འཁོར་ལོར་རྫོགས་པ་རྣམས་མཉེས་པར་བྱེད་པའོ། །སྒྲོལ་མཆོད་ནི། བསྒྲལ་བྱ་བདག་ཏུ་ལྟ་བའི་དབང་གིས་གཟུང་འཛིན་ལ་མངོན་པར་ཞེན་པའི་རྒྱུ་ལས་བྱུང་བའི་ཉོན་མོངས་པའི་དགྲ་བོ་ཐར་བ་ལ་བར་དུ་གཅོད་ཅིང་འབྲས་བུ་ཁམས་གསུམ་གྱི་འཁོར་བར་འཆིང་བྱེད་ཡིན་པས། དེ་ཐམས་ཅད་སྒྲོལ་བྱེད་གཉིས་སུ་མེད་པའི་ཡེ་ཤེས་རང་རིག་པའི་ངོ་བོར་རྫོགས་པའི་མཚོན་ཆ་ཆེན་པོས། རིག་སྟོང་སྐྱེ་མེད་གདོད་ནས་དག་པའི་ཆོས་དབྱིངས་མཉམ་པ་ཆེན་པོའི་ཀློང་དུ་བསྒྲལ་བ་ནི་སྲིད་གསུམ་ཡེ་གྲོལ་གྱི་དགོངས་པ་ཡིན་ལ། དེའི་རྩལ་སྣང་དེ་ལྟར་མ་རྟོགས་པའི་འགྲོ་བ་རྣམ་སྨིན་རྩུབ་མོས་འཕངས་བའི་བདུད་དང་རུ་ཏྲ་མ་རུང་ཞིང་བཅུའི་ཚོགས་རྣམས་ཀུན་སློང་སྙིང་རྗེ་ཆེན་པོའི་རྣམ་པ་སྒྱུ་མ་ལྟ་བུའི་ཚུལ་གྱིས་དབྱིངས་སུ་བསྒྲལ་ཞིང་རྣམ་ཤེས་བདེ་བ་ཆེན་པོའི་འཁོར་ལོར་སྦྱར་ཏེ་དུག་གསུམ་སྙིགས་མ་ཤ་ཁྲག་རུས་པའི་ཕུང་པོ་རྣམས་ལྷ་རྣམས་ཀྱི་ཞལ་དུ་ཕུལ་བས་དགྱེས་པར་མོས་པའོ། །དེ་ཁོ་ན་ཉིད་ཀྱི་མཆོད་པ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་སྤྲོས་བྲལ་ཐིག་ལེ་ཉག་གཅིག་གི་ངང་དུ་རྫོགས་པས། གང་ལ་མཆོད་པར་བྱ་བའི་ཡུལ་དང་། གང་གིས་མཆོད་པར་བྱེད་པའི་གང་ཟག་དང་། ཇི་ལྟར་མཆོད་པའི་ཚུལ་གསུམ་གཉིས་མེད་བྱང་ཆུབ་སེམས་ཀྱི་དཀྱིལ་འཁོར་དུ་དབྱེར་མེད་པར་རོ་མཉམ་པས་ཅིར་སྣང་ཀུན་བཟང་སྤྱོད་པའི་ཕྱག་རྒྱ་ཟུང་འཇུག་བདེ་བ་ཆེན་པོར་འབུལ་བ་སྟེ་མཆོད་པ་ཀུན་གྱི་ནང་ནས་བླ་ན་མེད་པའོ། ། ༈ དང་པོ་ཕྱག་ནི། ཕྱག་འཚལ་བའི་ཡུལ་རྟེན་གཉིས་སུ་མི་དམིགས་པར་རྟོགས་པ་དོན་གྱི་ཕྱག་དང་། ལྷ་རྣམས་ཀྱི་ཡོན་ཏན་དྲན་ནས་གུས་པས་འདུད་པ་བརྡའི་ཕྱག་གཉིས་ཟུང་འབྲེལ་དུ་འཚལ་ཞིང་། ལྷ་ཚོགས་རྣམས་ཀྱིས་ལན་གནང་བར་བསམ་པའོ། །གཉིས་པ་ཕྱག་རྒྱ་ནི་འཆད་པར་འགྱུར་བ་ལྟར་རོ། །གསུམ་པ་ཀུན་བཟང་ནི། ཆོས་ཐམས་ཅད་རིག་པ་རང་སྣང་དུ་མཉམ་པ་ལ་བཟང་ངན་དང་བླང་དོར་མ་གྲུབ་པས་མཆོད་པར་མ་གྱུར་པའི་དངོས་པོ་རྡུལ་ཙམ་ཡང་མེད་དེ་སྤྱོད་ཡུལ་ཡོངས་སུ་དག་པ་ཀུན་དུ་བཟང་པོའི་མཆོད་པའོ། །འདི་དང་འོག་མ་རྣམས་ཀྱི་སྔགས་རྒྱ་སོགས་སྒྲུབ་ཐབས་ལྟར་རོ། །བཞི་པ་ཞབས་བསིལ་ནི། བསིལ་ཆབ་ཐོགས་པའི་ལྷ་མོས་ལན་གསུམ་དུ་ཕུལ་བས་ཕྱག་དང་ཞབས་བསིལ་བར་བསམ་མོ། །ལྔ་པ་བཞི་བསྣོལ་ནི། རྡོ་རྗེ་སྤོས་མ་སོགས་ལྷ་མོ་དཔག་མེད་སྤྲོས་ཏེ། ཤངས་ལ་བདུག་སྤོས། དབུ་ལ་མེ་ཏོག །སྤྱན་ལ་མར་མེ། ཐུགས་ཀར་བྱུག་པ་རྣམས་ཀྱིས་མཆོད་དེ། མཐར་ལྷ་མོ་རྣམས་ཀྱང་གནས་དེ་དང་དེར་ཐིམ་པ་དང་། སྐྱེས་ལན་གྱི་ཚུལ་དུ་ལྷ་རྣམས་ཀྱི་གནས་དེ་དག་ལས་ལྷ་མོ་བཞི་སླར་བྱུང་ནས་ལས་སེམས་ཀྱི་ཤངས་སོགས་གནས་བཞིར་ཐིམ་པས་དངོས་གྲུབ་ཐོབ་པར་བསམ་པ་སྟེ། དེ་ལྟར་སྐྱེས་དང་སྐྱེས་ལན་གྱི་ཚུལ་གཉིས་བསྣོལ་མར་བྱེད་པས་ན་བཞི་བསྣོལ་ཞེས་བརྗོད་གསུངས་སོ། །དྲུག་པ་སྨན་མཆོད་ནི། བདུད་རྩིའི་ཆེ་བ་བརྗོད་པ་སྔོན་ཏུ་བཏང་སྟེ། མཐེབ་སྲིན་ཉི་ཟླ་ཁ་སྦྱོར་གྱི་ཕྱག་རྒྱས་གཏོར་བས་བདུད་རྩིའི་ཟེགས་མ་ནམ་མཁའ་ལ་སྤྲིན་ལྟར་ཆགས་པ་ལས་ར་ས་ཡ་ནའི་ཆར་བབ་པས་ལྷ་རྣམས་གཟི་བརྗིད་བསྐྱེད་ཅིང་། དེ་ནས་རང་གི་ལྕེ་ལ་ཧཱུྃ་དང་སྨན་ལ་འབྲུ་གསུམ་བཀོད་ལ་མཐེབ་སྲིན་གྱིས་བླངས་ནས་ལྕེར་བཞག་པས་གནས་གསུམ་དུ་ཆགས་ཏེ་འཕྲོ་འདུས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་པའོ། །བདུན་པ་གཏོར་མ་ནི་གཏོར་མ་འདོད་ཡོན་གྱི་ལྷ་མོ་དྲུག་གི་རྣམ་པར་ཕུལ་བས་གཟུགས་རྡོ་རྗེ་མ་དང་མེ་ལོང་སྤྱན་ལ་དང་། སྒྲ་རྡོ་རྗེ་མ་དང་རྒྱུད་མང་སྙན་ལ་སོགས་དབང་པོ་སོ་སོ་ལ་ཐིམ་ནས་མཉེས་པར་བསམ་པའོ། །བརྒྱད་པ་བདུད་རྩི་གསང་ནན་ནི། གསང་ནན་ནམ་རྩད་ནན་ཞེས་པ་སྐྱེམས་ཀྱི་བརྡ་སྟེ། བདུད་རྩིའི་རྒྱུན་གཏོར་མར་ལན་གསུམ་སྦྲེང་བས་དང་པོས་ལྷ་རྣམས་དགྱེས་པ་བསྐྱེད། གཉིས་པས་ཉན་ཐོས་རྣམས་འགོག་པ་ལས་བསླང་། གསུམ་པས་རྒྱལ་བ་རྣམས་གཞན་དོན་ལ་བསྐུལ་བའོ། །དགུ་པ་ལྷག་པ་ཏིང་ངེ་འཛིན་གྱི་མཆོད་པ་ནི། སྤྲུལ་པ་དང་བསྒྱུར་པ་གཉིས་ལས་འདིར་ཕྱི་མ་ལྟར་བྱེད་དོ། །བདག་ཉིད་ལས་ཀྱི་སེམས་དཔའི་ཐུགས་ཀ་ནས་བྷྲུཾ་ཡིག་སྤྲོས་པས་ས་གཞི་དང་ཁང་ཁྱིམ་སོགས་དག་པའི་ཞིང་དང་གཞལ་མེད་ཁང་དུ་བྱིན་གྱིས་རློབ་པ་དང་། ཚུལ་དེ་བཞིན་དུ་ཏྲཾ་ལས་རྒྱན་དང་ནགས་ཚལ། ཧྲཱིཿལས་གླུ་དབྱངས། ཨ་ལས་ཁྲུས་རྫིང་། ༀ་ལས་ཞལ་ཟས། མྃ་ལས་གོས་དར། ཧཱུྃ་ལས་བྲོ་གར་སོགས་རེ་རེ་འང་མཐའ་ཡས་པ་སྤྲོས་ཏེ་མཆོད་པའོ། །བཅུ་པ་སྒྲོལ་མཆོད་ནི་རྒྱུད་ཉིད་ལས། བློ་ངན་འཇིག་རྟེན་སྙིང་རེ་རྗེ། །ཞེས་པ་ལྟར་འཁྲུལ་བའི་གཞན་དབང་དུ་སོང་བའི་སེམས་ཅན་རྣམས་ལ་སྙིང་རྗེ་བསྐྱེད་དེ་རང་གི་ཐུགས་ཀ་ནས་སྤྲོས་པའི་རཾ་ཡིག་ལས་ཡེ་ཤེས་ཀྱི་མེ་འབར་བས་བསྒྲལ་བྱའི་སྙིང་ནང་གི་ས་བོན་དྲུག་བག་ཆགས་དང་བཅས་པ་བསྲེགས་ནས་རྣམ་ཤེས་འོད་གསལ་གྱི་དགོངས་དབྱིངས་སུ་བསྟིམ་པའོ། །བཅུ་གཅིག་པ་སྦྱོར་མཆོད་ནི། ལྷ་ཚོགས་རྣམས་རྗེས་ཆགས་ཀྱིས་སྙོམ་པར་ཞུགས་པས་བདེ་བའི་འོད་ཟེར་སྤྲོ་བསྡུས་རྒྱལ་བ་ཐམས་ཅད་མཆོད་ཅིང་གསང་བའི་དབང་ཐོབ་པར་བསམ་པ་ཨ་ནུ་རཱ་གའི་སྔགས་ཀྱིས་ང་རྒྱལ་བཟུང་བའོ། །བཅུ་གཉིས་པ་འདོད་ཡོན་རོ་མཉམ་པ་ནི། སྣང་སྲིད་ཐམས་ཅད་འདོད་ཡོན་གྱི་ལྷ་མོར་དག་པས་ལྷ་ལ་ལྷ་དང་ཆོས་ཉིད་ལ་ཆོས་ཉིད་རོལ་པའི་ཚུལ་གྱིས་མཆོད་པའོ། །བཅུ་གསུམ་པ་རོལ་མོ་ཡེ་ཤེས་ནི། མཆོད་པའི་ཡོ་བྱད་ཇི་སྙེད་པ་སེམས་ཉིད་ཀྱི་རོལ་པར་སྡུད་པ་སྟེ། དེ་རྣམས་བསྒྲིགས་ན། དང་པོ་ཀུན་བཟང་གིས་འདོད་པའི་ཡོན་ཏན་གྱི་རྣམ་པ་ཡིན་མིན་གྱི་རྣམ་དབྱེ་མེད་པར་ཡེ་ཤེས་ཀྱི་རང་སྣང་ཁོ་ནར་བལྟས་ཏེ་མཆོད་པ་དང་། དེ་ནས་དགུས་དག་པའི་འདོད་ཡོན་གྱི་བྱེ་བྲག་སོ་སོར་སྤྲུལ་ཏེ་མཆོད་པ་དང་། ཕྱི་མ་འདིས་དེ་དག་ཐམས་ཅད་ཡེ་ཤེས་ཀྱི་དབྱིངས་སུ་རོ་གཅིག་པར་བསྡུས་ནས་མདོར་ན་སྣང་སྤྱོད་མ་ལུས་པ་དགྱེས་མཉམ་ཆེན་པོའི་ཡེ་ཤེས་རྩལ་འབར་བའི་གྲོགས་སུ་འཁྱེར་བ་ཉིད་མཆོད་པའི་ལམ་གྱི་གནད་ཡིན་པས། རོལ་མོ་ཡེ་ཤེས་ཀྱི་མཐར་མ་ཧཱ་པུ་ཛ་བཛྲ་ཞེས་སོགས་དེ་བཞིན་གཤེགས་པ་ཐམས་ཅད་ཀྱི་མཆོད་པའི་རྡོ་རྗེར་ང་རྒྱལ་བཟུང་བ་གསུངས་ཏེ་མཆོད་པར་མ་ཟད་བླ་མེད་ཀྱི་རྒྱུད་ལས་འདོད་ཡོན་ལམ་འཁྱེར་གྱི་ཐབས་མཁས་ཇི་སྙེད་བསྟན་པ་རྣམས་ཀྱི་གནད་གཟེར་ཡང་འདི་ཉིད་དོ། །བཅུ་བཞི་པ་གླུ་ཡེ་ཤེས་ནི། དཀྱིལ་འཁོར་གྱི་ལྷ་རྣམས་ལ་ཆེ་བའི་ཡོན་ཏན་གྱི་སྒོ་ནས་བསྟོད་པའི་གླུ་ཆོས་ཉིད་ཀྱི་རང་སྒྲའི་དབྱངས་སུ་གྲགས་པར་མོས་ལ་བསྟོད་པ་གླུ་དྲུག་བླང་པའོ། །ཁྲོ་བོ་ལའང་ཕལ་ཆེར་དེ་དང་འདྲ་བ་ལས། དགུ་པའི་གནས་སུ་རཀྟ་ཚར་གསུམ་སྟེ་ལྷ་ཚོགས་རྣམས་མཉེས་པར་བྱ་བའི་ཕྱིར་དང་། ཞིང་བཅུ་སོགས་གདུག་ཅན་རྣམས་བརླག་པའི་ཕྱིར་དང་། ཁམས་གསུམ་གྱི་གདུལ་དཀའི་འགྲོ་བ་རྣམས་ཐུགས་རྗེས་སྒྲོལ་བའི་ཕྱིར་གོ་རིམ་བཞིན་དུ་རཀྟའི་དྭངས་མ་ཡེ་ཤེས་ཀྱི་བདུད་རྩི་དང་། ཁུ་བ་བསྒྲལ་བྱར་དང་། རྩིགས་མ་དུག་གསུམ་ཤ་རུས་ཀྱི་རྣམ་པར་བྱས་ཏེ་འབུལ་བའི་ཆེད་དུ་རཀྟ་ལན་གསུམ་སྦྲེང་བའོ། ༈ །ཚོགས་ཀྱི་སྐབས་སུ། ཕུར་པ་བཀའ་མའི་འགྲེལ་ཆེན་ལས་གསུངས་པ་ལྟར། ཚོགས་པ་གསུམ་ནི། དགའ་ལྡན་ལྷ་ཡི་ཚོགས་གསང་སྔགས་ནང་གི་ལྷ་མཐུན་པ། དགྱེས་ལྡན་མི་ཡི་ཚོགས་དམ་ཚིག་རྩ་བ་གཅིག་པ། འབྱོར་ལྡན་ཡོ་བྱད་ཀྱི་ཚོགས་བཟང་ལ་གྱ་ནོམ་པའོ། །གསོག་པ་གསུམ་ནི། གནས་དུར་ཁྲོད་ལྟ་བུའི་ཚོགས་ཁང་དུ། གྲུབ་པ་ཐོབ་པའི་བླ་མ། ལྷ་གྲངས་མཉམ་པའི་རྣལ་འབྱོར་ཕོ་མོ། འདོད་ཡོན་ལྔའི་ལོངས་སྤྱོད་ཚང་བར་གསོག་པའོ། །བསང་བ་གསུམ་ནི། བདག་ཉིད་ཀྱི་ཉེས་སྐྱོན། མཆེད་ལྕམ་གྱི་ཉམས་གྲིབ། ཚོགས་ཀྱི་མ་དག་པ་བསང་བའོ། །སྦྱང་བ་གསུམ་ནི། རཾ་ཡཾ་ཁཾ་ལས་མེ་ཆུ་རླུང་བྱུང་སྟེ་སྨེ་བཙོག་སྦྱང་བའོ། །བརླབ་པ་གསུམ་ནི། འབྲུ་གསུམ་གྱིས་བདུད་རྩིའི་རང་བཞིན་དུ་བརླབ་པའོ། །བསྐྱེད་པ་གསུམ་ནི། མཆོད་པའི་དུས་སུ་འདོད་ཡོན་ལྔ། བཤགས་པའི་དུས་སུ་ཡེ་ཤེས་ལྔ། བསྟབ་པའི་དུས་སུ་དགྲ་བགེགས་ཀྱི་ཤ་ཁྲག་ཏུ་བསྐྱེད་པའོ། །ཡུལ་གསུམ་ནི་བླ་མ་ཡི་དམ་མཁའ་འགྲོ་ལ་འབུལ་བའོ། །དམ་ཚིག་གསུམ་ལ་གསུམ་ཚན་བཞི་ལས། མི་བྱ་བ་གསུམ་ནི་རང་སེམས་འཁྲུགས་པའི་རྩོད་པ། གཟུང་འཛིན་སྐྱེ་བའི་འཁྲུལ་གཏམ། ཐེག་པ་འོག་མའི་འབག་རྩོག་གི་རྟོག་པ་མི་བྱའོ། མི་སྨྲ་བ་གསུམ་ནི། ཚོགས་རྫས་གཞན་ལ་ཆེ་སྟེ་བདག་ལ་ཆུང་། ན་ནིང་བཟང་སྟེ་ད་ལོ་ངན། ཁར་སང་མང་སྟེ་དེ་རང་ཉུང་ཞེས་མི་སྨྲ་བའོ། །མི་བསམ་པ་གསུམ་ནི། ཚོགས་རྫས་ཀྱི་དངོས་པོ་མཐོང་བའི་ཚེ་བཟའ་སྙམ་བཏུང་སྙམ་ཞིམ་སྙམ་དུ་མི་བསམ་པའོ། །མི་འབྲལ་བ་གསུམ་ནི། ལུས་ལྷ། ངག་སྔགས། སེམས་ཏིང་ངེ་འཛིན་དང་མི་འབྲལ་བར་བྱའོ། །ཞེས་སོ། །ཚིམ་པ་དྲུག་ལྡན་ནི། ཚོགས་ཞིང་རྣམས་མཆོད་པས་ཚིམ་པ། རྣལ་འབྱོར་པ་རྣམས་རྡོ་རྗེའི་བཟའ་བཏུང་གིས་ཚིམ་པ། ཡེ་ཤེས་ཀྱི་འཁོར་ལོ་བདུད་རྩིའི་དྭངས་མས་ཚིམ་པ། ལུས་དཀྱིལ་གྱི་ལྷ་རྣམས་བདེ་སྟོང་ཡེ་ཤེས་ཀྱིས་ཚིམ་པ། ཕྱིི་ནང་གི་མཁའ་འགྲོ་མ་རྣམས་གླུ་དབྱངས་ཀྱིས་ཚིམ་པ། དྲེག་པ་ལས་བྱེད་ཀྱི་འབྱུང་པོ་རྣམས་གཏོར་མས་ཚིམས་པའོ། ༈ །སྔགས་མཚན་བཅས་ཐུན་མོང་པའི་ལམ་གྱིས་དབུ་མར་གཞུག་པའི་ཐབས་ལས་དཔེ་དོན་གྱི་ཡེ་ཤེས་འདྲེན་པར་བྱེད་པ་ལའང་། གྲོལ་ལམ་བླ་མའི་མན་ངག་རྫོགས་པ་ཆེན་པོའི་ངོ་སྤྲོད་ལ་བརྟེན་དགོས་ཏེ། དེ་ལས་གཞན་དུ་རླུང་དབུ་མར་ཞུགས་ཀྱང་ཡེ་ཤེས་ངོས་མི་ཟིན། དེ་མ་ཟིན་ན་རླུང་དབུ་མར་ཞུགས་ཀྱང་ཅི་ཞིག་ཕན། དོན་འོད་མཚོན་པའི་སྒོར་མ་གྱུར་ན་རྩ་རླུང་ཐིག་ལེ་སོགས་ཟག་བཅས་འཇིག་རྟེན་པའི་ལམ་གྱི་རོལ་པ་སོགས་དང་ཁྱད་མེད་པར་རྒྱ་གར་གྱི་སློབ་དཔོན་ཨིནྟྲ་བོ་དྷི་དང་བོད་ཀྱི་རོག་བདེ་གཤེགས་ཆེན་པོ་སོགས་གསུངས། དེས་ན་ཐབས་ལམ་པ་དག་གིས་མི་ཤེས་སུ་མི་རུང་བའི་གནད་ནི། སློབ་དཔོན་ཤྲཱི་སེང་ཧ་ནས་བཻ་རོ་ལ་བརྒྱུད་པའི་གཤིན་རྗེའི་རྫོགས་རིམ་མཐར་ཐུག་ཐབས་ལམ་གནད་ཀྱི་ལྡེའུ་མིག་ལས། རྟེན་གཞལ་ཡས་ཁང་ལུས་གནས་རྩ་ཡི་ཕོ་བྲང་ན། ནང་གི་མཁའ་འགྲོ་རྩ་ཡི་གེ་ཚུལ་དུ་བཞུགས། རྩ་གནས་ཡི་གེའི་ཕོ་བྲང་ན་དེ་ཁོ་ན་ཉིད་སྟོང་ཉིད་ཡེ་ཤེས་ཀྱི་མཁའ་འགྲོ་བདེ་སྟོང་གཉིས་མེད་ཀྱི་ཡེ་ཤེས་སྲོག་མི་ཤིགས་པའི་ཐིག་ལེ་བཞུགས་སོ། །དེ་ཡང་ལུས་གང་ན་གནས་པ་ན་རྩ་གནས། རྩ་གང་ན་གནས་པ་ན་རླུང་གནས། རླུང་གང་དུ་གནས་པ་ན་ཐིག་ལེ་གནས། ཐིག་ལེ་གང་དུ་གནས་པ་ན་སྤྲོས་མེད་ལྷན་ཅིག་སྐྱེས་པའི་ཡེ་ཤེས་གནས་སོ། །ཞེས་སོགས་ལུས་གནས་རྩ་ཡི་ཆགས་ཚུལ། རྩ་གནས་ཡི་གེ་སྤྲིན་གྱི་འཁོར་ལོ། དེ་ན་ལྷ་གཙོ་འཁོར་སོགས་ཇི་ལྟར་གནས་པའི་ཚུལ་རྣམས་གསལ་བར་གསུངས་ཤིང་། དེ་ལས་རྩ་ཐམས་ཅད་སྲོག་ཤིང་གི་རྩ་གསུམ་ལ་འདུས་ཤིང་། དེ་ཡང་རང་བཞིན་གཉུག་མའི་ཨ་བ་དྷུ་ཏི་གཉིས་མེད་སྟོང་པའི་རྩ་ཡིན་ཏེ་ཅིར་ཡང་མ་གྲུབ་པ་སྤྲོས་བྲལ་ཆོས་ཀྱི་སྐུ། བཤད་ཚོད་ཀྱི་ཨ་བ་དྷུ་ཏི་ལུས་དཀྱིལ་སྒལ་ཚིགས་མདུན་སྲོག་ཤིང་ཀ་བ་ལྟར་གནས་ཏེ་དབྱིབས་དཀར་འཚེར་རླུང་དང་ཐིག་ལེ་གང་གིས་ཀྱང་དབེན་པ། དེའི་གཡས་སུ་རོ་མ་དམར་མོ་རྡུལ་དང་། གཡོན་རྐྱང་མ་དཀར་མོ་ཁུ་བས་གང་བ། རྩ་གསུམ་པོ་དེའང་སྐུ་གསུང་ཐུགས་རྡོ་རྗེ་སྟེ། རྐྱང་མ་སྐུ། རོ་མ་གསུང་། ཀུན་འདར་མ་ཐུགས་རྡོ་རྗེར་གསུངས་པ་དང་། སྐུ་སོགས་དེ་ཐམས་ཅད་གཞི་དངོས་པོ་གཤིས་ཀྱི་གནས་ལུགས་རང་བྱུང་གི་ཡེ་ཤེས་ཕྱོགས་གཅིག་ཏུ་མ་ངེས་ཏེ། རྒྱ་གར་ཡང་མ་ཆད། ཕྱོགས་གང་དུའང་མ་ལྷུང་བའི་གནད་ཀྱི་སྣང་ཚུལ་ཡང་ངེས་མེད་དུ་ཤར་བའི་ཕྱོགས་གཅིག་ཏུ་ཆད་པ་མེད་པ་དང་། རྩ་ཡིག་དེ་རྣམས་ཀྱང་རང་རང་གི་བག་ཆགས་དང་མཐུན་པར་ཤར་ཏེ། རྒྱ་གར་ལ་རྒྱ་ཡིག་བོད་ལ་བོད་ཡིག་ལྷ་ལ་ལྷའི་ཡི་གེ་སོགས་སུ་གནས་པར་བཤད། གཞན་ཡང་རླུང་དང་ཐིག་ལེའི་རྣམ་བཞག་རྒྱས་པར་གསུངས་ཤིང་། དེ་ཁོ་ན་ཉིད་སྟོང་ཉིད་ཡེ་ཤེས་ཀྱི་མཁའ་འགྲོའི་བཞུགས་ཚུལ་ཡང་། རྩ་སྟོང་ཕྲག་བདུན་ཅུ་རྩ་གཉིས་ནི་རྟེན་བྱེད་པས་སྐུ་རྡོ་རྗེ། རྩ་ལ་གནས་པའི་ཡི་གེ་རྣམས་ནི་བརྡ་སྤྲོད་པས་གསུང་། ཡི་གེའི་ཕོ་བྲང་ན་རླུང་དང་ཐིག་ལེ་དཀར་དམར་ཐམས་ཅད་རང་གསལ་བར་བྱེད་པས་ཐུགས་རྡོ་རྗེ། དེས་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་གི་ལུས་ལ་རྫོགས་པར་གནས་པ་ལས་གཞན་གུད་ན་མེད་དོ། །ཞེས་དང་། དེ་ལས་རླུང་ལ། འཕེན་པ་ལས་ཀྱི་རླུང་ནི་དྭངས་མ་ཕྲ་བའི་སྲོག་འཛིན་གྱི་རླུང་གིས་ཡིད་ཀྱི་རྣམ་ཤེས་ཀྱི་རླུང་བསྐྱེད། ཁ་ནང་དུ་བལྟས་ནས་རང་རྒྱུད་ཀྱི་རྩ་ལ་རྒྱུས་པས་ང་བདག་ཏུ་འཛིན་པ་སྐྱེ། ཉོན་མོངས་པའི་འཚུབ་མང་། ཁ་ཕྱིར་བལྟས་ཏེ་རྟོག་ངན་སྣ་ཚོགས་འགྱུས་ནས་ལས་སྣ་ཚོགས་བསགས་པས་འཁོར་བར་འཕེན་པར་བྱེད། གསལ་བ་ཡེ་ཤེས་ཀྱི་རླུང་ནི་རིག་པའི་རླུང་ཡིན་ཏེ། རིག་པ་གསལ་བ་ཅིར་ཡང་མ་འགགས་པར་གསལ་ལ་གང་གིས་ཀྱང་སྒྲིབ་པ་མེད་པར་གསལ་བ་སྟེ། གནས་ནི་ཀུན་འདར་མ་ན་གནས་ཏེ་མཉམ་རྒྱུའི་སྐབས་རིག་པ་རྟོག་མེད་དྭངས་ཆ་དང་བཅས་ཏེ་འགྱུ་བ་ཡིན། དེ་ངོས་བཟུང་བ་ལ་འབྱུང་བ་མཉམ་པར་གནས་པ་གཅིག་ལ། རླུང་ཕྱིར་འགྲོ་ནང་འགྲོའི་ཁུག་པ་གཅིག་ལ་གཅིག་ཏུ་བགྲང་བའི་ཉིན་ཞག་ཕྲུགས་གཅིག་ལ་ཉི་ཁྲི་ཆིག་སྟོང་དྲུག་དང་བཅུ་རྒྱུ་བ་ལས། གཡས་ནས་གཡོན་དུ་འཕོ་བ་ལ་དང་། གཡོན་ནས་གཡས་སུ་འཕོ་བའི་སྐབས་འཕོ་མཚམས་བཅུ་གཉིས་པོ་མཉམ་གནས་ཀྱི་རླུང་རྒྱུ་བས་བཅུ་གཉིས་པོ་སྙིགས་མའི་རླུང་ཡིན། བཅུ་གསུམ་པ་མཉམ་གནས་ཡེ་ཤེས་ཀྱི་རླུང་དབུས་ཀུན་འདར་མ་ན་རྒྱུ་བ་ཡིན་ནོ། །རིག་པའི་རླུང་ལ་དྭངས་སྙིགས་གཉིས་ལས། དྭངས་མའི་རླུང་ནི། གནས་དྭངས་མ་ལྔ་འདུས་ཀྱི་དབུས། ངོ་བོ་སྲོག་མི་ཤིགས་པའི་ཐིག་ལེ། བྱང་ཆུབ་ཀྱི་སེམས་སྤྲོས་བྲལ་ཆོས་ཀྱི་སྐུ། ལམ་ཀུན་འདར་མ་ནས་རྒྱུ་དུས་འཕོ་མཚམས་བཅུ་གསུམ་པ་ལའོ། །སྙིགས་མའི་རླུང་གནས་གསང་འཁོར། ངོ་བོ་རྣམ་ཤེས་ཚོགས་བརྒྱད། ལམ་རྩ་འདབས་བརྒྱད། འཁོར་བརྒྱད་ཁྲི་བཞི་སྟོང་དུ་གསུངས། དེ་ལས་དྭངས་མའི་རླུང་འཕོ་མཚམས་བཅུ་གསུམ་པ་ངོས་བཟུང་བ་ནི་རླུང་གཡས་གཡོན་གཉིས་ནས་མཉམ་དུ་ཤ་ར་ར་རྒྱུ་དུས། རིག་པ་གསལ་སྟོང་རྟོག་པ་མེད་པ། ངོས་བཟུང་ཞེས་ཀྱང་སྟོང་པ་སྤྲོས་མེད་ནམ་མཁའ་ལྟ་བུའི་ཉམས་སྔར་བས་ལྷག་པའི་ཤེས་པ་གཅིག་ཤར་བ་དེ་ནི་ནང་གི་སྒྲ་གཅན་འཛིན་རྩ་དབུ་མའི་ནང་དུ་ཉི་ཟླ་རོ་རྐྱང་གཉིས་ཀྱི་རླུང་ཚུད་ནས་རྒྱུ་བའི་རྟགས་ཡིན། དེ་ནི་སངས་རྒྱས་ཀྱི་དགོངས་པ་དངོས་སུ་ཤར་བ་ཡིན། སེམས་ཅན་ཐམས་ཅད་ལ་ཉིན་ཞག་ཕྲུགས་གཅིག་ལ་ཐེབས་རེ་མི་འཆར་མི་སྲིད་ཀྱང་བླ་མའི་མན་ངག་མེད་པས་ངོས་མི་ཟིན། ཡུན་ཀྱང་འགའ་ཞིག་ལ་སེ་གོལ་བདུན་གྱི་ཡུན་ཙམ་ལས་མི་འཆར་བའང་ཡོད། བསོད་ནམས་བསགས་པ་འགའ་ཞིག་ལ་ཟན་རེ་ཟ་ཡུན་ཙམ་ལ་འཆར། སྲོག་རྩོལ་ལ་གནད་དུ་བསྣུན་པའི་རྣལ་འབྱོར་པ་ལ་ཉི་མ་ཕྱེད་དང་ཟླ་བ་དང་ལོ་ལ་སོགས་པར་མི་གཡོ་བའི་ཉམས་ཤར་ནས་བརྟན་པ་ཐོབ་པ་ཡོད། རླུང་སྒོམ་པ་དང་། བདེ་བ་སྒོམ་པ་དང་། དེ་བཞིན་དུ་སྒྱུ་ལུས། ཞི་གནས། འོད་གསལ་སྒོམ་པ་སོགས་ཐམས་ཅད་འདི་ངོས་ཟིན་ཅིང་རྟོགས་པར་བྱ་བ་ལས་མེད། འདི་ངོས་ཟིན་ཞིང་རྟོགས་པའི་དུས་རླུང་ཨ་བ་དྷཱུ་ཏིར་ཚུད་པ་ཡིན། འདི་ནི་གསང་བའི་ངེས་པའོ། །ནང་གི་ངེས་པ་ནི་རླུང་གཡས་གཡོན་གཉིས་ནས་མཉམ་དུ་རྒྱུ་བའི་དུས་སོ། །ཕྱིའི་ངེས་པ་ནི། ཟླ་བ་གཟས་ཟིན་དུས་དྭངས་མ་ཀུན་འདར་གྱི་རླུང་རྒྱུ་བའོ། །དེ་ལྟར་ཕྱི་ནང་གསང་བའི་རྟགས་གསུམ་གྱི་ཡེ་ཤེས་ཀྱི་རླུང་ངོས་བཟུང་ནས། ལུས་གནད་བསྲང་། མ་ནིང་གི་རླུང་དལ་ལ་འཇམ་པར་བཟུང་། མ་བསྒོམ་པའི་མངོན་སུམ་གསལ་བའི་ཡེ་ཤེས་ཀྱི་རླུང་ཐུག་ཕྲད་གསུམ་དུ་ཤར་བ་དེ། སྒོམ་པའི་མངོན་སུམ་བཞག་ཕབ་གསུམ་གྱི་ཀློད་ལ་བཞག་གོ །འདིའི་གནད་ངོས་ཟིན་ན་བསྐལ་པར་བསགས་པའི་སྒྲིབ་པའང་སྐད་ཅིག་གཅིག་གིས་འདག་ལ། སངས་རྒྱས་ཀྱི་དགོངས་པ་ཡང་འདིས་མངོན་སུམ་དུ་གཏན་ལ་ཕེབས་པ་ཡིན་ནོ། །གསུངས། དེས་ན་གནད་འདི་ངོས་ཟིན་ན་རིག་པ་རང་བབས་སུ་བཞག་པས་རླུང་དབུ་མར་མི་ཞུགས་པ་མ་ཡིན་ཏེ། དུས་འཁོར་གྱི་སོར་བསམ་དང་རྫོགས་ཆེན་གྱི་བཞག་ཐབས་རྣམས་བཞིན་ནོ། །དེ་བཞིན་ཐབས་ལམ་དངོས་གཞིའི་ཉམས་ལེན་སྐབས་མེད་དུ་མི་རུང་བའི་མན་ངག་གི་ངོ་སྤྲོད་དྲུག་གསུངས་ཏེ། དང་པོ་མི་བཏང་བ་གསུམ་གྱི་སྲོག་བཟུང་བ་ནི། ཐིག་ལེ་རྡོ་རྗེའི་ཁ་ནས་མི་བཏང་། ཡིད་ཆགས་པའི་དབང་དུ་མི་བཏང་། ལྟ་སྒོམ་བློ་ཡུལ་དུ་མི་བཏང་བའོ། །གཉིས་པ་བཅད་པ་གསུམ་གྱི་འཁོར་བའི་རྒྱུན་ལམ་བཅད་པ་ནི། འཇིག་རྟེན་པའི་རིགས་རྒྱུད་བཅད། འདོད་ཆགས་ཀྱི་གཞི་རྩ་བཅད། འཁོར་བའི་རྒྱུན་ལམ་བཅད་པ་སྟེ། དེ་གསུམ་རིམ་པར་ཐིག་ལེ་མ་ཤོར་ན། ཆགས་རྟོག་རང་སར་གྲོལ་བ། རང་བྱུང་གི་ཡེ་ཤེས་མངོན་དུ་རྟོགས་པས་སྐྱེ་ཤི་འཁོར་བ་ལས་གྲོལ་བའོ། །གསུམ་པ་དགའ་བཞི་ངོས་བཟུང་བ་ལ་དབྱེ་བ་བཅུ་དྲུག་ལས། གོ་རིམ་ལ་ལྟོས་པའི་དགའ་བ་བཞི་ནི། ཐབས་ཤེས་ཀྱི་འདོད་ཡོན་ལྔ་ལ་སློབ་པའི་དུས་སུ་གཟུགས་ནས་རེག་བྱའི་བར་གྱི་བདེ་ཉམས་ཅི་སྐྱེས་ཐམས་ཅད་དགའ་བ། མཁའ་གསང་རྩ་སྤྲད་དུས་ཀྱི་བདེ་བ་ཆེར་འབར་བ་མཆོག་དགའ། ནང་སྤྲད་གྲུབ་པའི་དུས་ཀྱི་བདེ་བ་ལྷན་ཅིག་སྐྱེས་དགའ། ཁ་སྦྱོར་བཞི་འཛོམས་པའི་དུས་བདེ་བ་ལ་མི་རྟོག་པ་དང་ལྡན་པ་དགའ་བྲལ་གྱི་ཡེ་ཤེས་སོ། །གནས་ལ་ལྟོས་ནས་བཞག་པའི་དགའ་བཞི་ལའང་གཉིས། ༡ཕྱིའི་གནས་ལ་ལྟོས་པ། ལུས་ཁོལ་བུར་བདེ་བ་སྐྱེ་བ་དགའ་བ། ལུས་ཕལ་ཆེར་ལ་ཁྱབ་སྙམ་བྱེད་པ་མཆོག་དགའ། ལུས་ཐམས་ཅད་ལ་བདེ་བ་སྐྱེས་པ་དགའ་བྲལ། ཕྱི་ནང་གི་དངོས་པོ་གར་བལྟས་ཀྱང་བདེ་ཉམས་འབའ་ཞིག་སྐྱེས་པ་ལྷན་ཅིག་སྐྱེས་དགའི་ཡེ་ཤེས་སོ། ༢། ནང་གི་དགའ་བ་ལ་ལྟོས་ནས། ཡབ་ཡུམ་སྙོམ་པར་ཞུགས་པའི་སྐབས་ཐིག་ལེ་སྤྱི་བོ་ནས་མགྲིན་པར་བབ་དུས་ཀྱི་བདེ་བ་ཅི་སྐྱེས་དགའ་བ། དེ་བཞིན་སྙིང་ཁར་བབ་པ་མཆོག་དགའ། ལྟེ་བར་དགའ་བྲལ། གསང་བར་ལྷན་ཅིག་སྐྱེས་དགའ་འོ། ༣། སྤང་བྱ་ལ་ལྟོས་ནས་བཞག་པའི་དགའ་བཞི་བདེ་བ་ལ་སེམས་ཟིན་ཏེ་གཟུང་འཛིན་གྱི་རྟོག་པ་རགས་རིམ་འགག་པ་དགའ་བ། དེ་བཞིན་བདག་འཛིན་གྱི་རྟོག་པ་རགས་རིམ་འགག་པ་མཆོག་དགའ། རང་དང་ཕྱག་རྒྱར་འཛིན་པའི་རྣམ་རྟོག་འགག་པ་དགའ་བྲལ། ཉམས་ཐམས་ཅད་རང་སྣང་རང་སྟོང་རང་རིག་ཏུ་རྟོགས་ཏེ་ཟག་བཅས་ཀྱི་དགའ་བདེ་རང་ཁ་མའི་འཛིན་རྟོགས་འགགས་པ་ལྷན་ཅིག་སྐྱེས་དགའི་ཡེ་ཤེས་སོ། ༤། རང་རང་གི་ངོ་བོའི་སྒོ་ནས་བཞག་པ་ནི། བདེ་ཉམས་ཆུང་བ་དགའ་བ། ཆེར་འཕེལ་བ་མཆོག་དགའ། བདེ་བ་ལ་མི་རྟོག་པ་དགའ་བྲལ། བདེ་སྟོང་གཉིས་མེད་རང་རིག་ཡེ་ཤེས་སུ་རྟོགས་པ་ལྷན་ཅིག་སྐྱེས་དགའི་ཡེ་ཤེས་སོ། ། ༈ ཇི་ལྟར་བཟླ་བའི་ཚུལ་ནི། ངག་བཟླས་སྐད་གསང་མཐོན་པོར་བཟླ་བ་དང་། མཆུ་དང་ལྕེ་རྩེ་འགུལ་ཙམ་གྱིས་ཤུབ་བུར་བཟླ་བ་དང་། རླུང་བཟུང་སྟེ་སྔགས་ཀྱི་གཟུགས་དང་སྒྲ་ལ་སེམས་གཏད་པ་འགོག་བཟླས་དང་། རླུང་འཛིན་པ་ཙམ་ཡང་མི་བྱ་བར་ཡིད་ཁོ་ནས་སྔགས་ཀྱི་གཟུགས་སམ་སྒྲ་གདངས་དྲན་པ་ཡིད་བཟླས་དང་། ས་བོན་གྱི་ནཱ་ད་ལས་དབུགས་ཕྱིར་དབྱུང་བ་དང་ལྷན་ཅིག་ཧཱུྃ་གི་སྒྲས་སྐུའམ་འོད་ཟེར་འཕྲོས་ཏེ་དོན་གཉིས་བསྒྲུབ། ནང་དུ་འཇུག་པའི་ཚེ་ༀ་གྱི་སྒྲས་ཚུར་བསྡུ། གནས་པའི་ཚེ་ཨཱཿའི་སྒྲས་ནཱ་ད་ལ་ཐིམ་པའམ། ཡང་ན་རང་སྔགས་དང་སྦྱར་ཏེ་རྡོ་རྗེའི་བཟླས་པ་བྱ་བ་སོགས་ཀྱང་ཡོད་དོ། །བཟླ་ཚུལ་དངོས་ནི། ཤེས་ན་ཡི་གེའི་སྐྱེ་གནས་སྒྲའི་འབྱིན་ཚུལ་ལྕེ་མཆུའི་བྱེད་རྩོལ་སོགས་མ་འཁྲུགས་པར། ཡི་གེ་རེ་རེ་ནས་ཤིན་ཏུ་མྱུར་བ་དང་ཧ་ཅང་བུལ་བ་མ་ཡིན་པ་དང་། ཡི་གེ་རིང་པོ་རྣམས་ཐུང་བ་དང་། ཐུང་ངུ་རྣམས་རིང་བ་མ་ཡིན་པ་དང་། ཡི་གེ་གཞན་ལྷག་པའམ། ཡི་གེ་དེ་ཉིད་ཆད་པ་མ་ཡིན་པ་དང་། གཞན་ཡང་སྒྲ་ཧ་ཅང་ཆེ་བ་དང་། ཆུང་བ་ལ་སོགས་པའི་སྐྱོན་རྣམས་སྤངས་ལ་ཐུན་ནང་དུ་གཞན་དུ་གཏམ་སྨྲ་བ་དང་གླལ་བ་དང་ལུ་བ་སོགས་གཞན་གྱིས་བར་མ་ཆད་པར་བཟླ་བར་བྱ་སྟེ། རྔམ་གློག་ལས། སྒྲ་ཆེན་མ་ཡིན་ཆུང་བ་མིན། །མགྱོགས་པར་མ་ཡིན་བུལ་བར་མིན། །དྲག་པོར་མ་ཡིན་ཞན་པར་མིན། །ཡིག་འབྲུ་ཡན་ལག་ཉམས་པས་མིན། །ཡེངས་བ་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པས་མིན། །ཞེས་གསུངས། དེ་ཡང་སྔགས་ཀྱི་སྒྲ་དོན་ཤན་སྦྱར་བ་ཤེས་ན་དོན་གྱི་གཟུངས་འགྲུབ་པ་སོགས་ཀྱི་དགོས་པ་ཡོད་དེ། རྒྱུད་ལས། དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་ཉེ། །ཞེས་གསུངས། དེ་ལྟར་སྦྱར་མ་ཤེས་ཀྱང་དད་མོས་རྩེ་གཅིག་པས་བཟླས་ན་དངོས་གྲུབ་ཆེན་པོ་ཇི་ལྟ་བ་བཞིན་འབྱུང་སྟེ། ཡང་ན་བླུན་པོ་དད་པ་ཅན། །དེ་ལ་སྦྱོར་བའི་དངོས་གྲུབ་ཉེ། །ཞེས་གསུངས་ཤིང་། སྔོན་གྱི་གྲུབ་ཐོབ་འདར་ཕྱར་བ་དང་ས་པཎ་གྱིས་འཕྲོག་བྱེད་བཏུལ་བའི་ལོ་རྒྱུས་ཀྱིས་ཀྱང་ཤེས་སོ། །གལ་ཏེ་སྔགས་རྒྱ་སྐད་དུ་ཡོད་པ་བོད་སྐད་དུ་བསྒྱུར་བ་དང་། རྒྱ་བོད་འདྲེས་པར་ཡོད་པའི་བོད་སྐད་རྣམས་རྒྱ་སྐད་དུ་བསྒྱུར་བ་དང་། མཁའ་འགྲོའི་བརྡ་སྐད་སོགས་གཞན་གྱི་སྐད་དུ་ཡོད་པ་བརྡ་སྤྲོད་པའི་ལུགས་དང་བསྟུན་ནས་གསར་དུ་བཅས་ཏེ་བཟླས་ན་ནི་དངོས་གྲུབ་མེད་དོ། །ཅིའི་ཕྱིར་ན་སྔོན་གྱི་གསང་སྔགས་གསུངས་པ་པོ་ཉིད་ཀྱིས་སྐད་དེ་དང་དེར་བྱིན་གྱིས་བརླབས་ཀྱིས། གསར་དུ་བཅོས་ཤིང་བསྒྱུར་བ་དེར་མ་ཡིན་པའི་ཕྱིར་གང་གསུང་པ་པོ་དེའི་བདེན་ཚིག་འགྲུབ་པར་མི་འགྱུར་བའི་ཕྱིར་རོ། །སྤྱིར་ཡང་གསང་སྔགས་ཀྱི་ཆོ་ག་སོགས་ལ་དཔྱད་པས་དངོས་གྲུབ་རིང་བར་བཤད་དེ། རྟོག་ཅིང་དཔྱོད་པའི་རྟོག་གེ་མཁན། །དེ་ལ་དངོས་གྲུབ་ཤིན་ཏུ་རིང་། ཞེས་དང་། རྫས་དང་སྔགས་ཀྱི་སྦྱོར་བ་ལ། །དཔྱད་ན་དངོས་གྲུབ་མི་འབྱུང་སྟེ། །གལ་ཏེ་ཡིད་གཉིས་ཟ་གྱུར་རམ། །བསམ་པ་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་ལྡོག་འགྱུར་བ་གདོན་མི་ཟ། །ཞེས་གསུངས། དེས་ན་དད་མོས་རྩེ་གཅིག་པས་བཟླ་བར་གཅེས་སོ། །སྔགས་ཕྲེང་བཀོད་ཚུལ། དེ་ཡང་སངས་རྒྱས་ཀྱི་ཡེ་ཤེས་དང་རྣམ་འཕྲུལ་ཚད་མེད་པའི་གསང་བ་ཟབ་མོ་གདུལ་བྱའི་ཡུལ་ལ་མཉམ་པོར་འཇུག་པ་ལས་རྒྱ་བོད་ཀྱི་ཡིག་གཟུགས་ཀྱི་ཁྱད་པར་ཙམ་ལ་བྱིན་གྱིས་རློབ་པར་ནུས་མི་ནུས་སོགས་ཀྱི་དབྱེ་བསལ་མ་དམིགས་པའི་ཕྱིར་གཤར་གཟབ་གང་རུང་གི་བློ་ལ་འཆར་བ་གང་བདེར་བྱ་བ་ལས་གཞན་དུ་བསྒྱུར་མི་དགོས་གསུངས། རྩ་བའི་ཐུགས་སྲོག་ས་བོན་གྱི་ཡི་གེ་དེའི་མདུན་ནས་བརྩམས་ཏེ་བཟླས་བྱའི་སྔགས་ཀྱི་ཡིག་འབྲུ་རྣམས་ཤིན་ཏུ་ཕྲ་བ་སྤུས་བྲིས་པ་བཞིན་གསལ་ཞིང་འབར་བའི་ཕྲེང་བས་བསྐོར་བ་སྟེ། དེ་ཡང་རང་གཞུང་དང་བསྟུན་སྔགས་ཕྲེང་གཡས་སུ་འཁོར་དགོས་པ་རྣམས་སྔགས་ངོ་ཕྱིར་བསྟན་པ་དང་། ཕྱི་ནས་བཀླག་ཕྱོགས་ལྟར་ཡིག་འབྲུ་རྣམས་ལངས་ཐབས་སུ་གཡོན་དུ་བཀོད་པ་ཕྲེང་བ་ལྟར་འཁོར་བའི་མགོ་འདྲེན་ༀ་ལྟ་བུ་དང་ཧཱུྃ་ཧྲཱིཿསོགས་མཇུག་གི་སྔགས་འབྲུ་ཐུག་པ། དེ་ཡང་རིང་བའི་རིགས་ལ་མདུན་ནས་ཡིག་མགོ་བརྩམ་པའི་སྔགས་མགོ་ནང་བསྟན་དང་སྔགས་མཇུག་ཕྱི་རོལ་དུ་ཐད་ཀར་འགྲིགས་པའི་རིམ་པ་གཉིས་གསུམ་སྦྲུལ་འཁྱིལ་བ་ལྟར་བསྒོམས་ལ་བཟླས་པའི་དུས་གཡས་སུ་བཀླགས་ཐབས་སུ་འཁོར་དགོས་པ་ཡིན། སྔགས་ཕྲེང་གཡོན་དུ་འཁོར་དགོས་པ་རྣམས་ཐུགས་སྲོག་གི་མདུན་ནས་སྔ་མ་ལྟར་ཡིག་འབྲུ་རྣམས་ལངས་སྟབས་སུ་སྔགས་ངོ་ནང་བསྟན། ནང་ནས་བཀླགས་ཕྱོགས་སུ་གཡས་བསྐོར་དུ་བཀོད། སྔགས་རིང་རྣམས་ཕྱི་ནང་བསྐོར་ལུགས་སྔ་མ་ལྟར་བྱ། བཟླ་བའི་སྐབས་གཡོན་དུ་འཁོར་དགོས་པ་ཡིན། སྔགས་ཕྲེང་གཡས་གཡོན་དུ་འཁོར་ཚུལ། སྤྱིར་བཏང་ལྷ་ཡབ་ཀྱི་རིགས་རྣམས་གཡས་འཁོར་དང་ཡུམ་རྣམས་ལ་གཡོན་འཁོར་ལྟ་བུར་འདུག་ཀྱང་མཐའ་གཅིག་ཏུ་ངེས་པ་མེད་པས་རང་གཞུང་དང་བསྟུན། ཡང་སྔགས་ཕྲེང་དངོས་འཁོར་མི་དགོས་པར་དེ་ལས་འོད་ཟེར་སྤྲོ་བསྡུ་སོགས་བྱེད་པའི་རིགས་ལ་སྔགས་ངོ་བསྟན་ཕྱོགས་གོང་ལས་བཟློག་ཏེ་བཀོད་ལུགས་ཀྱིས་གཡས་གཡོན་བསྐོར་ཕྱོགས་ཉིད་གཙོ་ཆེ་བས་དེ་ལྟར་སྐབས་དང་སྦྱར་ཤེས་པར་བྱའོ། །ཛབ་དགོངས་བཞི་ལས། དང་པོ་བསྙེན་པའི་ཡན་ལག་བཀོད་པའི་བཟླས་པའམ་ཟླ་བ་སྐར་ཕྲེང་ལྟ་བུ་ནི། ས་བོན་དང་སྔགས་ཕྲེང་འོད་ཟེར་འཕྲོ་བ་ལ་ཡང་ཡང་སེམས་བཟུང་། དེ་ནས་རིམ་པར་ལྷ་ཐམས་ཅད་ཀྱི་ཞལ་ནས་སྔགས་སྒྲ་སྒྲོགས་པ་དང་སྔགས་འབྲུ་རྣམས་ཀྱང་རང་སྒྲ་དང་བཅས་གདན་ལས་ཅུང་ཟད་འཕར་ཏེ་ཐོག་མར་འོད་ཟེར་འཁོར། དེ་ནས་སྔགས་ཕྲེང་ཉིད་རིམ་གྱིས་ཇེ་མགྱོགས་སུ་འཁོར་བ་ལས་འོད་ཟེར་འཕྲོས། ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་བག་ཆགས་དང་བཅས་སངས་ཀྱིས་བསལ་བར་མོས་པའོ། །གཉིས་པ་ཉེ་བར་བསྙེན་པ་འགལ་མེ་འཁོར་བ་ལྟ་བུའམ། ཁྱོགས་ཀྱི་བཟླས་པ་ནི། ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཞིག་འཕྲོས་པ་ཡིག་འབྲུ་རྣམས་གཅིག་རྗེས་གཅིག་ནོན་རེག་ལ་མ་འབྱར་ཞིང་བར་མ་ཆད་པའི་ཕྲེང་བ་སྔགས་ཀྱི་རང་སྒྲ་དང་བཅས་པ་འགལ་མེ་འཁོར་ལོ་བསྐོར་བ་བཞིན་ཡེ་ཤེས་པ་དང་དམ་ཚིག་སེམས་དཔའི་ཞལ་ནས་རིམ་པར་ཐོན་པ་ཡུམ་གྱི་ཞལ་དུ་ཞུགས་ཐུགས་རྒྱུད་བསྐུལ། སྐུའི་ནང་བརྒྱུད་པདྨ་ནས་བྱུང་སྟེ་ཡབ་དང་ཡེ་ཤེས་སེམས་དཔའ་གཉིས་ཀྱི་རྡོ་རྗེའི་ལམ་ནས་སྟེང་དུ་བྱང་ཆུབ་ཀྱི་སེམས་བདེ་བ་ཆེན་པོའི་ངོ་བོར་བདེ་ཕྲིལ་ཕྲིལ་བྱུང་བ་ཐུགས་ཀའི་ས་བོན་ལ་ཐིམ་པས་མཆོག་གི་དངོས་གྲུབ་ཐོབ་པར་མོས་པ་ནི་ཡེ་ཤེས་ཀྱི་བཟླས་པའོ། །གསུམ་པ་བསྒྲུབ་པའི་ཡན་ལག་རྒྱལ་པོའི་ཕོ་ཉ་ལྟ་བུའམ་སྤྲོ་བསྡུའི་བཟླས་པ་ནི་སྔགས་བཟླས་པའི་རྐྱེན་གྱིས་ཐུགས་སྲོག་སྔགས་ཕྲེང་དང་བཅས་པ་ལས་འོད་ཟེར་ཁ་དོག་ལྔ་ལྡན་ནམ་མཁའ་གང་བར་འཕྲོས་པའི་རྩེ་ལས་མཆོད་པའི་ལྷ་མོ་མཆོད་རྫས་ཐོག་པ་དཔག་ཏུ་མེད་པ་འཕྲོས། མཁའ་ཁྱབ་ཀྱི་རྒྱལ་བ་སྲས་དང་བཅས་པ་ལ་ཐུགས་མཉེས་པའི་མཆོད་པ་བསམ་གྱིས་མི་ཁྱབ་པ་ཕུལ། ལྷ་རྣམས་ཟག་མེད་ཀྱི་བདེ་བ་ཆེན་པོས་ཐུགས་མཉེས་པར་བྱས། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་སྐུ་ཕྱག་རྒྱ་གསུང་ཡིག་འབྲུ་ཐུགས་ཕྱག་མཚན་གྱི་རྣམ་པར་རམ། འོད་ཟེར་དཀར་དམར་མཐིང་གསུམ་གྱི་རྣམ་པར་ཆར་བབས་པ་ལྟར་བྱོན་ནས་རང་གི་སྒོ་གསུམ་ལ་ཐིམ་པས་སྒྲིབ་གཉིས་བག་ཆགས་དང་བཅས་པ་དགཚོགས་གཉིས་ཡོངས་སུ་རྫོགས། དབང་བཞི་ཆིག་རྫོགས་སུ་ཐོབ་པར་བསམ་པ་ནི་བདག་དོན་བྱིན་རླབས་བསྡུ་བའི་དམིགས་པའོ། །ཡང་འོད་ཟེར་འཕྲོས་ཏེ་ཁམས་གསུམ་རིགས་དྲུག་གི་སེམས་ཅན་རྣམས་ལ་ཕོག་པས་ལས་ཉོན་སྡིག་སྒྲིབ་དང་སོ་སོའི་སྡུག་བསྔལ་ཐམས་ཅད་སྐད་ཅིག་ལ་སྦྱངས། ཉན་རང་བྱང་སེམས་རྣམས་ཀྱང་ཤེས་སྒྲིབ་ལས་གྲོལ་བར་བྱས། ཐམས་ཅད་ཀྱི་ལུས་ངག་ཡིད་གསུམ་རྡོ་རྗེ་གསུམ་གྱི་ངོ་བོར་གནས་གྱུར་བར་བསམ་པ་ནི་གཞན་དོན་ཕྲིན་ལས་ཀྱི་བཟླས་པ་སྟེ་འདིའི་སྐབས་སུ་ལས་བཞི་གང་འདོད་ཀྱི་དམིགས་པའང་འཕྲུལ་ཤེས་པར་བྱའོ། །བཞི་པ་སྒྲུབ་པ་ཆེན་པོའི་ཡན་ལག་བུང་བ་ཚང་ཞིག་པ་ལྟ་བུ་ནི། ལྷ་སྔགས་ལས་སྤྲོས་པའི་འོད་ཟེར་གྱིས་སྣོད་གཞལ་ཡས་ཁང་། བཅུད་ལྷའི་འཁོར་ལོ། སྒྲ་གྲགས་སྔགས་ཀྱི་རང་བཞིན། དྲན་རྟོག་ཡེ་ཤེས་ཀྱི་རོལ་པར་བསྒྱུར་བར་མོས་ལ་འཛིན་མེད་ཀྱི་ངང་ནས་བཟླ་བ་ནི་བདག་གཞན་གཉིས་མེད་ཀྱི་བཟླས་པའོ། ། ༈ དབྱངས་དང་གསལ་བྱེད་སོགས་ཡི་གེ་ལྔ་བཅུ་རྩ་གསུམ་བརྩི་སྐབས། དབྱངས་ཡིག་བཅུ་དྲུག །གསལ་བྱེད་སོ་བཞི་མགོ་ཏིག་ཤད་གསུམ་རྣམས་སོ། །དེ་ཡང་མགོ་ཏིག་ཤད་གསུམ་ནི། རྩ་རྒྱུད་ལས། མགོ་ནི་མ་ནོར་ལམ་ཡིན་ཏེ། །ཏིག་ནི་ཤེས་རབ་མིང་དུ་སྨྲ། །ཤད་ནི་ཐབས་ཆེན་ཚིགས་སུ་གཅོད། །ཅེས་པ་ལྟར། མགོ་ནི་གླང་པོ་ཆེའི་སྣ་འདྲ་བའོ། །ཏིག་ནི་ཨཱཿདབང་ཕྱུག་ཆེན་པོའི་མིག་འདྲ་བའོ། །ཤད་ནི་ཨཱ་རིང་པོ་མདའ་ལྟ་བུའོ། །ས་པཎ་གྱིས། ཨ་དེ་ལ་གསུམ། སེང་གེ་ལྟ་བུའི་ཨ། གླང་པོ་ཆེའི་སྣ་ལྟ་བུའི་ཨ། མཚམས་རྣམ་པར་གཅོད་པའི་ཨ་དང་གསུམ་ཞེས་གསུངས། དཔེ་བྱད་ཀྱི་མཚོན་བྱེད་ཀ་ལི་བཞི་བཅུ་བརྩི་སྐབས་སུ་གསལ་བྱེད་སོ་བཞི་ལ་ཡི་གེ་ལྷག་པོ་དྲུག་སྣོན་ཚུལ་ལ། སློབ་དཔོན་སྐལ་ལྡན་རྡོ་རྗེའི་སྒྲུབ་ཐབས་གཙུག་ནོར་ལས། ཌ་ཌྷ་ད་དྷ་ལ་ཡ་དང་དྲུག་བསྣན། ཨ་བྷྱ་ཀ་རའི་མན་ངག་སྙེ་མ་ལས། ཌ་ཌྷ་ཡ་ར་ལ་ཝ་དང་དྲུག་བསྣན་པའོ། ༈ །བཟོད་པ་ཐོབ་པ་སྒོའི་གཟུངས། ཚིག་གི་གཟུངས། དོན་གྱི་གཟུངས། སྔགས་བྱིན་གྱིས་རློབ་པར་ནུས་པའི་གཟུངས་སྟེ་གཟུངས་ཀྱི་སྒོ་བཞིའོ། ༈ །སྔགས་བཟླ་བའི་ཚེ་སྐྱོན་དྲུག་སྤོང་དགོས་ཏེ། སྒྲ་མྱུར་ཆེས་ན་འབྲུ་འདྲེས་པའི་སྐྱོན། བུལ་ཆེ་ན་སྦྱོར་བའི་སྐྱོན། སྒྲ་དྲག་ཆེས་ན་ཕོག་ཐུག་འོང་ཞིང་བྱིན་རླབས་འགྱང་། སྒྲ་ཞན་ཆེ་ན་ནུས་པ་མི་ཐོན། བྱིང་རྨུགས་སུ་སོང་ན་སྒྲ་མི་དགརྒོད་ན་གཡེངས་ཤིང་སེམས་འཕྲོས་པས་ཏིང་ངེ་འཛིན་མི་གསལ་བའི་སྐྱོན་འབྱུང་། གཞན་ཡང་མི་ཚིག་གིས་བར་མ་ཆོད་པར་བྱ། ཇི་ལྟར་བཟླ་ན། གསལ་བར་བཟླ་སྟེ། སྒྲ་མ་འདྲེས། མ་ཕྲལ། བར་མ་ཆད་པར་བཟླ། དག་པར་བཟླ་སྟེ། སྔགས་ཆད་ལྷག་མེད་པར་ཟུར་ཕྱིན་པར་བཟླ། བརྩོན་པར་བཟླ་སྟེ་རྒྱུན་མི་ཆད་པར་ཆུ་བོའི་གཞུང་བཞིན་དུ་བཟླའོ། ། ༈ སངས་རྒྱས་རྣམས་ཀྱི་ཐུགས་རྗེ་སྐྱེ་ཚུལ་ནི་བཞི་སྟེ། ལུང་ལས། རྟག་རྒྱུན་རང་བཞིན་ཤུགས་སྐྱེ་དང་། །ཡུལ་དང་གསོལ་བ་བཏབ་པས་སྐྱེ། །ཞེས་པ་ནི། རྟག་པ་རྒྱུན་དུ་ཐུགས་རྗེ་སྐྱེ་ཚུལ་དང་། རང་བཞིན་ཤུགས་ཀྱིས་ཐུགས་རྗེ་སྐྱེ་ཚུལ་དང་། ཡུལ་དང་འཕྲད་ནས་ཐུགས་རྗེ་སྐྱེ་ཚུལ་དང་། བསྐུལ་ཞིང་གསོལ་བ་བཏབ་པའི་ཐུགས་རྗེ་སྐྱེ་ཚུལ་ལོ། །དང་པོ་རྟག་པར་རྒྱུན་དུ་ཐུགས་རྗེ་སྐྱེ་ཚུལ་ལ་ཡང་བཞི་ལས། དེ་ཡང་རང་བཞིན་ཐུགས་རྗེའི་རྒྱུན་ནི། བདེ་བར་གཤེགས་པའི་སྙིང་པོ་རྒྱུན་ཆད་མེད་པར་ཆོས་ཐམས་ཅད་ཀྱི་རང་བཞིན་འཛད་པ་མེད་པའི་མཛད་པ་འགྲོ་བའི་དོན་དུ་གྱུར་པ་རྒྱུན་ཆད་མེད་པར་འབྱུང་བ་ལ་བྱའོ། །འབྱུང་བ་ཐུགས་རྗེའི་རྒྱུན་ནི། འབྱུང་བ་སྤྱིའི་དབང་བཙན་ཙམ་དུ་སོ་སོའི་ནུས་པས་འགྲོ་བའི་དོན་བྱེད་པའོ། །དེ་རྟག་པ་རྒྱུན་གྱི་འཁོར་ལོར་འབྱུང་བ་ལ་བྱའོ། །སྤྲུལ་པ་ཐུགས་རྗེའི་རྒྱུན་ནི། གསང་སྙིང་ལས། འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར། ཐུབ་པ་ཆེན་པོ་བཅོམ་ལྡན་འདས་རེ་རེས། འདུལ་བ་རྣམས་བཞིས་འགྲོ་བ་ལྔའི་དོན་མཛད་པ་གསུངས་པ་ལྟར་རོ། །ཡེ་ཤེས་སྤྱན་གྱི་ཐུགས་རྗེའི་རྒྱུན་ནི། ཐམས་ཅད་མཁྱེན་པའི་ཡེ་ཤེས་ཀྱི་སྤྱན་གྱིས་དུས་ཐོག་མཐའ་མེད་པར་འཁོར་བའི་ཁམས་ཇི་སྲིད་གཟིགས་པ་དེ་སྲིད་དུ་ཐུགས་རྗེ་རྒྱུན་དང་བཅས་པའོ། །གཉིས་པ་རང་བཞིན་ཤུགས་ཀྱིས་ཐུགས་རྗེ་སྐྱེ་ཚུལ་ནི། རང་བྱུང་ཡེ་ཤེས་ཆེན་པོ་ནི་ཐུགས་རྗེའི་བདག་ཉིད་མ་རིག་པའི་མུན་པ་སེལ་བའི་ཡེ་ཤེས་ཀྱི་རང་བཞིན་ཡིན་ཏེ། དཔེ་ཉི་མའི་འོད་རང་ཚུགས་ཙམ་རྩོལ་བ་མེད་པར་འཇིག་རྟེན་དུ་སྣང་བ་ལྟ་བུའོ། །གསུམ་པ་ཡུལ་དང་འཕྲད་ནས་ཐུགས་རྗེ་སྐྱེ་ཚུལ་ནི། ཐུས་རྗེའི་ཡུལ་རུ་ཏྲ་ལྟ་བུ་དང་། གཞན་ཡང་སྡུག་བསྔལ་ཅན་དང་འཕྲད་པས། ཐམས་ཅད་མཁྱེན་པའི་ཐུགས་གདུང་བ་སྐྱེ་བ་ལྟ་བུའོ། །དེ་ལྟར་ནི་ཁམས་གསུམ་གྱི་སེམས་ཅན་སྡུག་ཕོངས་ཅན་རྒྱུན་མི་ཆད་པ་ཐུགས་རྗེ་སྐྱེ་བ་རྒྱུན་མི་ཆད་ཞེས་བྱའོ། །བཞི་པ་བསྐུལ་ཞིང་གསོལ་བ་བཏབ་པས་ཐུགས་རྗེ་སྐྱེ་ཚུལ་ལ་གཉིས་ཏེ། རང་དོན་དུ་བསྐུལ་ཞིང་གསོལ་བ་བཏབ་པ་ནི། སྡུག་བསྔལ་ཅན་སྨྲེ་སྔགས་བཏོན་པས་ཐུགས་རྗེ་སྐྱེ་བ་ནི་སྔོན་བྱུང་རུ་ཏྲའི་གདུང་ཚིག་བཞིན་ནོ། །གཞན་དོན་དུ་བསྐུལ་བ་ནི། ལེའུ་གསུམ་པར་དམ་པའི་རིགས་ཅན་ལྔས་བསྐུལ་ཞིང་གསོལ་བ་བཏབ་པའོ། །ལེའུ་ལྔ་པར་གདུང་བ་སེལ་བར་ཞལ་གྱིས་བཞེས་པའོ། །ཞེས་དང་། རྡོ་གྲུབ་རིན་པོ་ཆེས། དེ་ཡང་རྟག་པ་རྒྱུན་གྱི་ཐུགས་རྗེ་ནི་ཆུ་བོའི་རྒྱུན་ལྟ་བུ། རང་བཞིན་ཤུགས་ཀྱི་ཐུགས་རྗེ་ནི་ཉི་མའི་འོད་ཟེར་ལྟ་བུ། བསྐུལ་ཞིང་གསོལ་བ་འདེབས་པའི་ཐུགས་རྗེ་ནི་གཏོང་ཕོད་ཅན་ལ་སློང་མོ་བྱེད་པ་ལྟ་བུ། ཡུལ་དང་འཕྲད་པའི་ཐུགས་རྗེ་ནི་གདོན་གྱིས་བཏབ་པའི་བུ་ལ་མས་བརྩེ་བ་ལྟ་བུའོ། །ཞེས་གསུངས།། །། གསང་སྙིང་སྐོར་ཞལ་རྒྱུན་ཕྱོགས་བསྡུས།༈ སྟོང་བཞིས་དྲང་བའི་འོད་གསལ་དང་དགའ་བཞིས་དྲང་བའི་ཡེ་ཤེས། ཕྱག་ཆེན་སྔགས་ལུགས་སོགས་གང་ཡིན་ཀྱང་ཀུན་རྟོག་རྣམས་འགགས་དགོས་ཀྱང་། འོད་གསལ་རྫོགས་ཆེན་གྱི་སེམས་སེམས་བྱུང་གི་རྟོག་ཚོགས་མ་འགགས་བཞིན་ཏུ་རིག་པ་ངོ་སྤྲད་ནས་ཀུན་རྟོག་ཐམས་ཅད་ཡེ་ཤེས་ཀྱི་བདག་ཉིད་དུ་གྲོལ་བར་བྱེད་པ་ནི་རྫོགས་ཆེན་གྱི་ཁྱད་ཆོས་ཡིན་གསུངས། སྤྱིར་མདོ་སྔགས་གཉིས་ཀྱི་ངེས་འབྱུང་། སེམས་བསྐྱེད། ལྟ་བ། ཚུལ་ཁྲིམས་ལ་སོགས་ཁྱད་པར་ཆེ། མདོ་ཕྱོགས་ནས་འཁོར་བ་ལ་སྐྱོ་བའི་ངེས་འབྱུང་། སྔགས་ནས་ཐ་མལ་མ་དག་པའི་སྣང་ཞེན་ལ་སྐྱོ་བའི་ངེས་འབྱུང་དང་། མདོ་ན། སྙིང་རྗེས་དྲངས་པའི་སེམས་བསྐྱེད་སྒྱུ་མ་ལྟ་བུ་དང་། སྔགས་ན་ན་མོ་བདག་དང་མཐའ་ཡས་སོགས༴གསུངས་པ་ལྟར། ཆོས་ཐམས་ཅད་ཡེ་ནས་སངས་རྒྱས་པའི་དོན་མ་རྟོགས་པའི་སེམས་ཅན་ལ༴ལྟ་བ་ནི་མདོ་ན་སྟོང་ཉིད་རྟོགས་པ་དང་། སྔགས་ན་ལྷག་བདེན་དབྱེར་མེད་རྟོགས་པ། ཚུལ་ཁྲིམས་ཀྱང་སོ་ཐར་ན་གསོལ་བཞིའི་ལས་ཀྱིས་བསྙེན་པར་རྫོགས་པ་སོ་ཐར་གྱི་ཚུལ་ཁྲིམས། བྱང་སེམས་ན་ཉེས་སྤྱོད་སྡོམ་པ། དགེ་བ་ཆོས་སྡུད༴སེམས་ཅན་དོན་བྱེད། སྔགས་བླ་མེད་སྤྱི་ན་མི་འཕོ་བའི་ཚུལ་ཁྲིམས། ཕྱག་རྫོགས་ཀྱི་ལྟ་བ་རྟོགས་ན་རྒྱལ་བ་དགྱེས་པའི་ཚུལ་ཁྲིམས་ཟེར། ༈ སྔགས་རྫོགས་ཀྱི་ཕ་རོལ་ཕྱིན་དྲུག་ནི། ཡུལ་ལ་འཛིན་ཞེན་རང་སར་གྲོལ་བས་སྦྱིན་པ། དུས་གསུམ་ཡིད་ཀྱི་འཁྲུལ་རྟོག་གི་དྲི་མས་མ་གོས་པ་ཚུལ་ཁྲིམས། ཟབ་མོའི་དོན་ལ་མི་སྐྲག་པས་ནི་བཟོད་པ། དེ་སྐྲག་ནི་མི་དགོས་འཇུག་འདོད་ཡོད་ནི་རེད། གཉུགས་མ་ཆོས་སྐུའི་དབྱིངས་ན་རིག་པས་བཙན་ས་བཟུང་པ་ལས་གཞན་པའི་བརྩོན་འགྲུས་ཤིག་ཆོས་སྐུ་རྡོ་རྗེ་འཆང་གིས་ཀྱང་བསྟན་ནི་མ་རེད། འཁྲུལ་བའི་དབང་དུ་མི་འགྲོ་བས་བསམ་གཏན། མཁྱེན་ཆ་རྩོལ་མེད་དུ་རྒྱས་པ་ཤེས་རབ་ཟབ་མོ། ཕ་རོལ་དུ་ཕྱིན་པ་དྲུག་དུས་གཅིག་སྤྱོད་ནི་རེད། ༈ ཁ་ཕར་བསྐོར་ནས་ཡུལ་ལྔ་འབྱུང་ལྔ་སོགས་དག་པ་ཡིན་ནི་རེད་བརྫས་ནས་ཡུལ་ཞིག་ལ་གཞལ་བས་ནི་མཁས་དོ་ནི་མ་རེད། དེ་བས་བླ་མའི་མན་ངག་གིས་ནང་དོན་གྱི་ཡེ་ཤེས་ངོ་འཕྲོད་ན་རྒྱ་གཏོར་ཁྱེར་ནི་རེད། དེ་འདྲའི་ཚུལ་རིན་པོ་ཆེས་གསུངས་ནི་རེད། གནས་སྣང་མཐུན་པའི་མགོ་བརྩམས་པ་སོགས་རང་གིས་ཤེས་ཡོང་ནི་རེད། ཐོད་རྒལ་བ་ཞིག་ཡིན་ན་སྣང་ངོར་ཡེ་ཤེས་ཀྱི་དཀྱིལ་འཁོར་མངོན་སུམ་རེད། ༈ སྣང་ཞེན་འདི་རགས་མི་ཉན། འདི་ཐོག་མཐའ་གཉིས་ན་མེད་པ་གློ་བུར་གྱི་མགྲོན་པོ་ལྟ་བུ་ཞིག་ལས་ཡོད་ནི་མ་རེད། ཤིན་ཏུ་སྲབ་པ་དུང་གི་སེར་སྣང་ལོག་མ་ལོག་ལྟ་བུ་ཙམ་ལས་གཡག་རོ་འདྲ་འདྲ་ཞིག་གིས་བཅད་ཡོད་ནི་མ་རེད། འདི་ཤིན་ཏུ་སྲབ་ནི་རེད། རིག་མ་རིགགོ་མ་གོངོ་ཤེས་མ་ཤེས་ཙམ་ཟིག་མི་ཡོད་ནི་ལྷ་རེད་ན་གསུངས། ༈ གསང་སྙིང་གི་སྐོར་ཞལ་རྒྱུན་དུ། རིག་པ་ཉིད་མངོན་དུ་གྱུར་ན་ཆོས་ཀྱི་དབྱིངས་རང་སྟོབས་ཀྱིས་མཐོང་བྱ་མཐོང་བྱེད་ཀྱི་སྤྲོས་པ་མེད་པར་མངོན་སུམ་གཟིགས་པས་ན་རང་རིག་པ་ཞེས་བརྗོད་དོ། ༈ །གསང་སྙིང་གི་ཕྱོགས་རྣམས་ཞལ་རྒྱུན་དུ། ཚིག་དོན་མཛོད་སོགས་ལས་བཤད་པ་ལྟར་གྱི་སེམས་ཀྱི་གནས་རོ་རྐྱང་། ངོ་བོ་བཞོན་པ་ལས་རླུང་དང་འགྲོགས་པའི་སེམས་རྣམས། རིག་གདངས་མི་འཕྱེ་བོ་ལས་རླུང་རྟ་ལོང་བ་བཞོན་ནས་ཡུལ་བསྒྲོད་པའི་དཔེས་མཚོན་པའི་དོན་རིག་གདངས་ཉིད་ལས་གཞན་མིན་ལ། གལ་ཏེ་རིག་གདངས་མ་འགྲོགས་ན་ཡུལ་ཤེས་པའི་བྱ་བ་སོགས་གང་ཡང་མི་བྱེད་པར་གསུངས་སོ། །༈ བླ་མ་ཉག་བླས་སྤྱི་དོན་འོད་གསལ་སྙིང་པོ་འདི་སྔགས་ཀྱི་རྒྱུད་དང་བཅས་པའི་སྤྱི་དོན་དང་། ཁྱད་པར་དུ་ནང་རྒྱུད་སྡེ་གསུམ་ཕྱོགས་བཅུའི་མུན་སེལ་དང་དཀོན་མཆོག་འགྲེལ་གྱི་སྤྱི་དོན་རེད་གསུངས་གི། ༈ སྤྱིར་མ་ཧཱ་ཡོ་ག་ཆོས་ཐམས་ཅད་ཀྱི་གཞི་ལྟ་བུ་ཡིན་ཚུལ་ནི། ཐེག་དམན་ནས་འོད་གསལ་རྫོགས་ཆེན་གྱི་བར་གྱི་ཐེག་པ་ཐམས་ཅད་ཀྱང་། གནས་ཚུལ་མཐར་ཐུག་ལྷག་པའི་བདེན་གཉིས་དབྱེར་མེད་བསྐྱེད་པ་མ་ཧཱ་ཡོ་གའི་བརྗོད་བྱར་གྱུར་པ་ཉིད་རྟོགས་པའི་ཐབས་སུ་བསྟན་པའི་ཕྱིར་ན། ཐེག་པ་ཐམས་ཅད་འཕྲོ་བའི་གཞིར་གྱུར་པ་དང་། ཁྱད་པར་སྔགས་བླ་མེད་ཞིག་ཉམས་སུ་ལེན་པ་ལ་སྣང་སྲིད་རྣམ་དག་གི་དག་སྣང་གཞིར་བཞག་གི་སྟེང་ནས་འཆད་ཉན་སྒོམ་སྒྲུབ་ལ་འཇུག་དགོས་པས་ན་ཆོས་ཐམས་ཅད་ཀྱི་གཞི་ལྟ་བུ། དེ་ལྟ་བུའི་མ་ཧཱ་ཡོ་གའི་ལུགས་ཀྱིས། སྤྱིར་རྡུལ་ཚོན་རས་བྲིས་སོགས་ཀྱི་དཀྱིལ་འཁོར་ལ་བརྟེན་ནས་བུམ་དབང་བསྐུར་ནས་དེའི་ལྟ་བ་སྣང་སྲིད་དག་མཉམ་བདེན་པ་དབྱེར་མེད་སྣང་སྲིད་ཡེ་སངས་རྒྱས་པའི་དཀྱིལ་འཁོར་དུ་རྟོགས་དགོས། དེའི་ལམ་བསྐྱེད་རིམ་མོ། །དེ་ཙམ་མ་རྟོགས་ཀྱང་ལུང་རིགས་རྣམ་པར་དག་པ་ལ་བརྟེན་ནས། ཐ་མལ་མ་དག་པ་སྐུ་དང་ཡེ་ཤེས་ཀྱི་དཀྱིལ་འཁོར་དུ་སྡོམ་པ་ཐབས་བསྐྱེད་པའི་རིམ་པ་དང་སྡོམ་པའང་རེད། ལྷ་སྔགས་ཆོས་ཉིད་དུ་མཚན་འཛིན་གྱི་རྟོག་པ་དབྱིངས་སུ་སྡོམ་པ་ཤེས་རབ་རྫོགས་པའི་རིམ་པ་དང་སྡོམ་པའང་རེད། དེ་གཉིས་དབྱེར་མེད་ཟུང་འཇུག་ཏུ་རྟོགས་པ་དེ་བསྐྱེད་རྫོགས་ཟུང་འཇུག་གི་ངོ་བོ་དང་། ཨེ་ཝཾ་ཟུང་འཇུག་གི་སྡོམ་པ་རེད། དེ་ལྟར་ངེས་པའི་གང་ཟག་དེས་མཉམ་བཞག་སྐད་ཅིག་མ་དེ་ལ་རྒྱུད་ཀྱི་དངོས་པོ་བཅུ་གཅིག་པོ་ཚང་ཚུལ་ནི། སྣང་སྲིད་དག་མཉམ་དུ་རང་ངོ་འཕྲོད་པ་ལྟ༵་བ། ངང་ལ་གནས་པ་སྒོམ་པའམ་ཏིང༵་ངེ་འཛིན། སྒོ་གསུམ་གསང་བ་གསུམ་གྱི་དཀྱིལ་འཁོར་ལ་སྤྱོད་པ་སྤྱོད༵་པ་སྣོད་དག་པ་རྒྱལ་བའི་དཀྱིལ་འཁོར། བཅུད་དག་པ་རིག་འཛིན་གྱི་ལྷ་ཚོགས། རྒྱུད་དག་པ་ཡེ་ཤེས་ཀྱི་འཁོར་ལོ་སད་པ་སྣང་སྲིད་གཞིར་བཞེངས་ཀྱི་དཀྱིལ་འཁོར། དཔེར་ན་རྒྱལ་བུ་རྒྱལ་སར་འཁོད་ནས་རྒྱལ་འབངས་མངའ་འོག་ཏུ་ཚུད་པ་ལྟར། སྔར་ཐ་མལ་མ་དག་པའི་དབང་གིས་དག་པ་རབ་འབྱམས་སུ་མ་དབང་བ་དེ། ད་ལྟ་སྐད་ཅིག་ལ་དབང་བས་ན་སྐྱེ་མེད་དོན་གྱི་དབང༵་། དག་མཉམ་དེ་ལས་མི་འདའ་བ་དམ་ཚིགགནས་ཚུལ་དག་མཉམ་རྟོགས་པའི་གང་ཟག་དེའི་ཅི་བསམ་གྱི་ལས་བཞི་ལྷུན་གྱིས་གྲུབ་པ་ནི་ཕྲིན་ལས༵། དེ་ལྟ་བུའི་རིག་པ་འཛིན་པ་དེ་ཡི་སྙིང་རྗེའི་རྡུལ་ཚོན་གྱི་ཐིག་ལེ་འགུལ་བསྐྱོད་ཡེ་ཤེས་ཀྱི་ཕྱག༵་རྒྱ། བཟའ་བཏུང་ཚོགས་འཁོར་གྱི་རང་བཞིན་ཟེར་བ་ལྟར་གང་སྤྱོད་ཐམས་ཅད་ཡེ་ཤེས་ཕྱག་རྒྱ། མ་དག་མཚན་འཛིན་གྱི་ཡིད་ལས་སྐྱོབས་པས་ན༵་སྔགས་སོགས་མཉམ་བཞག་གཅིག་གི་ལྡོག་ཆ་ལ་ཚང་ནི་རེད། དེ་ལྟར་ཤེས་ན་གསང་སྙིང་ཤེས་ནི་ཡིན། དཔེར་ན་འོ་མ་བསྲུབས་པ་ལས་མར་བྱུང་བ་བཞིན་དུ་སྙིང་པོ་ལོན་ནི་ཡིན་ཡང་བཤད་དགོས་ནི་མ་རེད་བླ་མ་ཉག་བླས་གསུང་གི། དག་མཉམ་ཡིན་ཚུལ་ལ་ཡང་ཡང་དཔྱད་ནས། དང་པོ་ངེས་ཤེས་སྐྱེ། བར་དུ་བརྟན། མཐར་ངེས་ཤེས་ལས་རྟོགས་དགོས། དེ་ལྟར་ངེས་པའི་གང་ཟག་དེ་ལུས་མ་སྤངས་བཞིན་དུ་དག་པའི་ཞིང་ན་བཞུགས་ནི་རེད། ཅེས་དཔལ་སྤྲུལ་རིན་པོ་ཆེས་གསུངས་ནི་རེད། ཐོག་མེད་ནས་བསགས་པའི་དམ་ཚིག་ཉམས་ཆག་དེ་ཧྲལ་ཧོལ་ཙམ་ལས་མི་ལུས་གསུངས་གི། ༈ རིན་པོ་ཆེས་རྫོགས་ཆེན་ལ་མ་གཏུག་བར་དུ་གསང་སྙིང་མི་ཤེས་གསུངས་རྒྱུ་བོ་རྫོགས་ཆེན་ལ་ཞུགས་པའི་གང་ཟག་ཞིག་ལ། བླ་མས་ངོ་སྤྲད་ནས་སྙིང་ཁ་ཆོས་ཀྱི་ཕོ་བྲང་ནས་འོད་གསལ་གྱི་རིག་པ་ཉིད་སད་ནས་སེམས་སེམས་བྱུང་དང་བཅས་པའི་ཡུལ་ཅན་ཐམས་ཅད་ཡེ་ཤེས་ཉིད་དུ་ཤར། ཡུལ་ལྔ་སོགས་ཡུལ་ཐམས་ཅད་རིག་པའི་རྣམ་ལྡན་དུ་ཤར་བས། དེ་དུས་སྣང་བ་ལྷ་ཡུལ་ཅན་ཡེ་ཤེས་སུ་སད་ནས། རང་དུས་ན་གནས་ཚུལ་དང་། སྣང་ཚུལ་མཐུན། དཔེར་ན་རིན་པོ་ཆེའི་གསེར་གླིང་དུ་ཕྱིན་པ་ན་ས་རྡོ་ཕལ་བ་བཙལ་ཀྱང་མི་རྙེད་པ་ལྟར། དག་པ་འབའ་ཞིག་ལས་མེད། མ་དག་པའི་སྣང་བ་ནི་སྣང་བའི་མདུན་ན་མུན་པའམ་འཁོར་བསྒྱུར་གྱི་ཁྲི་ལ་མུ་ཏོ་བ་བཞིན་དུ་འདུག་པའི་གནས་ག་ལ་ཡོད་དེ་མེད་དོ། །ད་ལྟ་ཉིད་ནས་འོག་མིན་གྱི་ཞིང་རེད། སྤྱིར་བགྲང་བའི་འོག་མིན་སོགས་མང་ཡང་། རང་སྣང་གི་འོག་མིན་ནི། རང་ཉིད་གང་དུ་སྒྲིབ་པ་མཐའ་དག་དང་བྲལ་བ་དེ་མ་གཏོགས་ཕྱོགས་གང་ན་ཡང་ཡོད་ཚུལ་མ་གསུངས་ནི་རེད། ༈ ངེས་པ་ཙམ་གྱི་ངོར་མ་དག་པ་སྣང་ཡང་ཞེན་པ་མེད་གསུངས་གི། རིག་ངོ་འཕྲོད་པ་ལ་སྣང་ངོར་ངེས་ངོར་གཉིས་ཀ་ལ་དག་པ་རེད། དཔྱད་པའི་ངེས་ཤེས་ངོར་ན་སྣང་ངོར་མ་དག་པ་དང་། ངེས་ངོར་དག་པ་གཉིས་ཕྱེ་དགོས། ༈ ཀུན་གཞི་ལུང་མ་བསྟན་མ་རིག་པའི་རྒྱ་དང་མ་བྲལ་བའི་ངང་ལས་རྟོག་པ་གཅིག་ཤར་ན་ལོག་རྟོག་གཉིས་ཤར་ན་ཕྱིན་ཅི་ལོག་དེ་བས་གཅིག་ཨེ་ཤེས་ཡ་བསམས་ན། རྗེ་བཙུན་འཇམ་དཔལ་དབྱངས་ལ་མིག་ཕྱེ་བཙུམ་གོམས་པའི་འདེགས་འཇོག་གི་ཡུན་ལ་ཡང་གསོལ་བ་བཏབ་ན་དེའི་དགའ་ནི་རེད། ༈ གསར་མའི། ཕ་རྒྱུད། མ་རྒྱུད། གཉིས་མེད་ཀྱི་རྒྱུད་གསུམ་དང་། རྙིང་མའི་ནང་རྒྱུད་སྡེ་གསུམ་ལ་དོན་གྱི་ཆ་ནས་བརྗོད་བྱ་ལ་བཟང་ངན་མེད་པར་ཤེས་དགོས། འོན་ཀྱང་རྫོགས་ཆེན་གྱི་ཁྱད་ཆོས་ནི་དུས་འཁོར་སོགས་ལ་ཡོད་ནི་མ་རེད། དཔལ་དུས་ཀྱི་འཁོར་ལོ་ནས་རྣམ་ཀུན་མཆོག་ལྡན་གྱི་སྟོང་པ་ཉིད་དང་། མཆོག་དུ་མི་འགྱུར་བའི་བདེ་བ་ཆེན་པོའི་ཡེ་ཤེས་གཉིས་དབྱེར་མེད་ཟུང་འཇུག་ཏུ་བཞུགས་པ་ལ། མཁའ་ཁྱབ་མཁའ་ཡི་རྡོ་རྗེ་གསུངས་པ་དང་། རྫོགས་ཆེན་གྱི་གཞུང་རྣམས་ནས། གདོད་མའི་སྟོང་ཆེན་གྱི་དབྱིངས་དང་། བདེ་བ་ཆེན་པོའི་ཡེ་ཤེས་གཉིས་ཟུང་འཇུག་ཏུ་བཞུགས་པ་ལ་ཁྱབ་བརྡལ་རིག་པ་ཀུན་ཏུ་བཟང་གསུངས་པ་རྣམས་དོན་གཅིག་མིང་གི་རྣམ་གྲངས་རེད། ༈ རིག་པ་ངོ་བོ་ཡེ་སྟོང་དུ་བཞུགས་པར་རྟོགས་པ་ལ་ཆོས་ཉིད་ལྟ་བ་དང་། རང་བྱུང་ཡེ་ཤེས་ཀྱི་བདག་ཉིད་དུ་བཞུགས་པར་རྟོགས་པ་ལ་ཆོས་ཅན་ལྟ་བའི་ལྟ་བ་དང་། དེ་གཉིས་དབྱེར་མེད་དུ་རྟོགས་པ་ལ་ཟུང་འཇུག་ལྟ་བའི་ལྟ་བ་གསུངས་ནི་རེད། ༈ འཁོར་བ་ཡ་མཐའ་ཐུག་མེད་ནས་ད་ལྟའི་བར་དུ་སྐྱེ་འཆིའི་ཁ་བརྒྱུད་ཡོང་ཀྱང་སྔ་མའི་རླུང་སེམས་རྣམས་འགགས། ཕྱི་མའི་རླུང་སེམས་རྣམས་མ་མཆེད་པའི་བར་དེར་གཞིའི་འོད་གསལ་རྐྱང་བ་ཤར་ནི་རེད། དེའི་རང་དུས་ན་འཁྲུལ་སྣང་འདི་གཏན་ནས་ཡོད་ནི་མ་རེད། མཐར་ཐུག་སངས་རྒྱས་ཀྱི་གཟིགས་ངོར་ན་དག་པ་རབ་འབྱམས་ཡིན་ནི་རེད། དེས་ན་མ་དག་འཁྲུལ་སྣང་འདི་ཐོག་མའི་སྤྱི་གཞི་དུས་ན་མ་གྲུབ། མཐར་ཕྱིན་འབྲས་བུ་དུས་ན་མ་གྲུབ་པ། ད་ལྟ་གློ་བུར་གྱི་མགྲོན་པོ་དང་ནམ་མཁའི་སྐྲ་ཤད་ལྟ་བུ་ཞིག་ཡིན་ནི་རེད། ༈ ཨ་ནུ་ཡོ་གས་ཕྱི་གཉུག་མའི་མཁའ་དཀྱིལ་དང་། ནང་བཀོད་པ་ལུས་ཀྱི་དཀྱིལ་འཁོར་རྩལ་དུ་བཏོན། སྤྱིར་གཟུངས་མ་ལ་ཡུལ་རིག་ཆོས་ཀྱི་གཟུངས་མ་ཡུལ་རིག་ཆོས་ཀྱི་གཟུངས་མ་ནི་ཡིད་ཀྱིས་སྤྲུལ་བའི་ལྷ་མོ། ཆོས་ཉིད་དོན་གྱི་གཟུངས་མ་དང་། སྟོང་གཟུགས་ལྷ་མོའི་གཟུངས་མ། ཤེས་རབ་མ་མོའི་གཟུངས་མ་དང་བཞི་ཡོད། དབང་གསང་ཤེར་གཉིས་རེད། དེའང་རང་ལུས་ཐབས་ལྡན་རྩ་ཐིག་རླུང་གསུམ་གནད་དུ་བཏོན་ནས་སྣོད་རུང་བྱ་བ་སྦྱོར་ལམ་སྟེ། ཤེར་དབང་གི་སྔོན་འགྲོ་རེད། དེའི་ལྟ་བ་གསལ་སྟོང་ཟུང་འཇུག་རེད། དངོས་གཞི་ཤེར་དབང་ནི་གཞན་ལུས་ལ་བརྟེན་པ་འོག་སྒོའི་ལམ། ལྟ་བ་བདེ་སྟོང་ཟུང་འཇུག་རེད། དེ་གཉིས་གྱི་ལམ་རྫོགས་རིམ་ཨ་ནུ་དེས་ནི་ཆོས་ཐམས་ཅད་སྣང་ཆ་ཡབ་ཀུན་ཏུ་བཟང་པོའི་དཀྱིལ་འཁོར། སྟོང་ཆ་ཡུམ་ཀུན་ཏུ་བཟང་མོའི་དཀྱིལ་འཁོར། ཟུང་འཇུག་སྲས་བདེ་བ་ཆེན་པོའི་དཀྱིལ་འཁོར་དུ་འདོད། ༈ ཨ་ཏི་ཡོ་གའི་དཀྱིལ་འཁོར་ནི་ནང་སེམས་ཉིད་རང་བྱུང་གི་ཡེ་ཤེས་ཡིན། ལྟ་བ་རིག་སྟོང་ཟུང་འཇུག་རེད། ༈ སེམས་སེམས་བྱུང་ཐམས་ཅད་ཡེ་ཤེས་སུ་ཤར་སོང་ན། དབང་པོ་མ་ཤོར་ནའང་གཉིས་སྣང་ནུབ་ཟེར་ནི་རེད། ༈ དག་མཉམ་འདི་བསྒོམ་ནུས་ན། བློ་གྲུབ་མཐས་བསྒྱུར་བ་ཙམ་གྱིས་ཚད་ནི་མ་རེད། ལམ་ཞུགས་ཏེ་ཚོགས་ལམ་ལ་ཞུགས་པའི་གང་ཟག་རེད། ༈ རླུང་སེམས་འགགས་པའི་མཉམ་བཞག་འུར་མཐིལ་ཙམ་ལ་ལམ་ཁྱད་མེད་པས། འོད་གསལ་རྫོགས་ཆེན་ལ་ཁྱད་ཆོས་ཡོད་ཚུལ་མི་ཕམ་རིན་པོ་ཆེས་གསུངས། ༈ རང་ལུགས་ལ་ཐེག་པ་རིམ་དགུར་འཇོག་ཚུལ་བསྐྱེད་པ་མ་ཧཱ་ཡོ་ག་དང་། ཁྱད་པར་དུ་ཨ་ནུ་ལས་ནི་ལྟ་བས་མ་ཟད་དབང་གྲངས་རེ་གསུངས་ཡོད། རྫོགས་ཆེན་གྱི་རྒྱུད་རིག་པ་རང་ཤར་སོགས་ལས་ཀྱང་ཐེག་པ་རིམ་དགུར་གསུངས་ནི་རེད། སློབ་དཔོན་པདྨའི་མན་ངག་ལྟ་ཕྲེང་། སྐ་བ་དཔལ་བརྩེགས་ཀྱིས་ལྟ་རིམ་སོགས་ལས་ཀྱང་གསུངས། ༈ དྲན་པ་བརྒྱ་སྟོང་བསྟེན་ཀྱང་དྲན་མཁན་ཆོས་ཉིད་དུ་དེངས་སུ་དྲན་སྣང་ཡེ་ཤེས་ཀྱི་འཁོར་ལོ་ཤར་བ་ན། རང་གི་རང་རྩལ་གཡོས་ནས་རང་ངོ་ཤེས་པ་ཙམ་རེད། གཉུག་མའི་དྲན་པ་དང་། ཁྱབ་བརྡལ་ལྷུན་གྲུབ་ཀྱི་དྲན་པའང་ཟེར། དེ་ལྟ་བུ་དེ་དག་མཉམ་གཞི་ཡི་དཀྱིལ་འཁོར་རེད། དེ་མིན་པར་སེམས་འཇུར་བུས་བཅིང་བའི་ཐུགས་དམ་པ་གསུངས་པ་ལྟར་བུད་སོང་ན་བསྐྱུར་ན་དགའ། ༈ འོད་གསལ་གྱི་རིག་པ་ངོ་འཕྲོད་ན་ཆོས་ཉིད་མངོན་སུམ་ཟེར། ཡོན་ཏན་བརྒྱ་ཕྲག་བཅུ་གཉིས་མེད་པའི་ཆ་ནས་དོན་སྤྱི་ཟེར། མངོན་སུམ་ཡིན་པའི་ཆ་འདིར་མངོན་སུམ་ཟེར། ༈ མི་ཕམ་གྱི་སྡུད་འགྲེལ་ལས་མ་དག་པ་ཚོགས་སྦྱོར། ཅི་རིག་དག་པ་མཐོང་ལམ། ཤིན་ཏུ་དག་པ་སངས་རྒྱས་ཀྱི་ས་སྟེ་གསུམ་ལས་འདིར་ཤིན་ཏུ་དག་པ་སངས་རྒྱས་ཀྱི་གཟིགས་པ་ལྟར་གཏན་ལ་དབབ་དགོས། །དགེའོ། །བཀྲ་ཤིས་པར་གྱུར་ཅིག །།། བསྐྱེད་རྫོགས་གཉིས་དང་གཟེར་བཞིའི་རྣམ་བཞག་བཤད་པ།རིགས་དང་དཀྱིལ་འཁོར་ཀུན་གྱི་ཁྱབ་བདག་དཔལ་ལྡན་བླ་མ་གདོད་མའི་མགོན་པོ་ལ་ཕྱག་འཚལ་ལོ། །དང་པོ་ཁྲིད་ཉན་ཚུལ་གྱི་ཀུན་སློང་ལ། སྔགས་ཀྱི་སྨོན་སེམས་ནི། བདག་དང་མཐའ་ཡས་སོགས་ལྟར། སེམས་ཡེ་ཤེས་སུ་བསྐྱེད་པ་ཞེས་རང་གཞན་གྱི་གཟུང་འཛིན་འཁྲུལ་སེམས་རང་གནས་ཀྱི་ཡེ་ཤེས་རང་རིག་དཔལ་ཆེན་བླ་མའི་དབྱིངས་སུ་གྲོལ་འདོད་ཀྱི་ཐུགས་བསྐྱེད། སྔགས་སྤྱི་དང་ཁྱད་པར་ནང་རྒྱུད་སྡེ་གསུམ་དག་སྣང་གི་ལམ་པ་ཡིན་པས་ཕུན་སུམ་ཚོགས་པ་ལྔ་གསལ་བཏབ་ནས་སྨིན་གྲོལ་ཐམས་ཅད་སངས་རྒྱས་ཀྱི་མཛད་པའི་རྗེས་སུ་འགྲོ་དགོས། ཀུན་སྤྱོད་ཀྱང་སྤང་བླང་མ་འཛོལ་བར་གསན་འཚལ། གང་གསན་བྱའི་ཆོས་ལ་སྟོན་པས་གདུལ་བྱའི་ཁམས་དབང་དང་བསྟུན་ནས་ཆོས་སྒོ་བསམ་མི་ཁྱབ་པར་གསུངས་ཀྱང་བསྡུ་ན་འཇིག་རྟེན་པའི་ཐེག་པ་དང་འཇིག་རྟེན་ལས་འདས་པའི་ཐེག་པ་གཉིས་ལ་འདུ། འཇིག་རྟེན་ལས་འདས་པའི་ཐེག་པ་དེ་ལ་ཐེག་པ་ཆེ་ཆུང་གཉིས་ཡོད། ཐེག་པ་ཆེན་པོ་ལ་རྒྱུ་ལམ་བྱེད་མཚན་ཉིད་ཐེག་པ་དང་། འབྲས་བུ་ལམ་བྱེད་རྡོ་རྗེ་ཐེག་པ་གཉིས་ཡོད། དང་པོ་རྒྱུ་ལམ་བྱེད་ཀྱི་ཐེག་པས་ནི་འབྲས་བུ་སྐུ་གཉིས་ཀྱི་རྒྱུ་ཚོགས་གཉིས་ལམ་དུ་བྱེད་པ་དང་། ཆོས་སྤྱི་དང་རང་གི་མཚན་ཉིད་གཏན་ལ་ཕབ་ནས་རིང་ལམ་བསྐལ་པའི་མཐར་སངས་རྒྱས་ཐོབ། དེའི་ནང་ཚན་བཀའ་ཐ་མ་ངེས་དོན་དུ་འདོད་པས་བདེ་གཤེགས་སྙིང་པོ་ཉེར་ལེན་གྱི་རྒྱུ་དང་ཚོགས་གཉིས་ལྷན་ཅིག་བྱེད་རྐྱེན་བྱས་ནས་སངས་རྒྱས་ཐོབ། སྔགས་ཀྱིས་མཐར་ཐུག་གི་འབྲས་བུ་སྐུ་གཉིས་ཀྱི་རྣམ་པ་དེ་ལྟ་བུ་བསྐྱེད་རྫོགས་གཉིས་ཀྱིས་ལམ་དུ་བྱེད་པ་ཡིན། རྣམ་པ་ལམ་བྱེད་དེའང་སོལ་བ་ལ་གསེར་འཛིན་ལྟར་བློས་སྒྲོ་བཏགས་པ་མ་ཡིན་པར་གཞི་འབྲས་ཀྱི་བཞུགས་ཚུལ་དང་མཐུན་པར་ལམ་བསྒོམས་པ་ཡིན་སྟབས་ཀྱིས་ཚེ་ལུས་གཅིག་གིས་ཟུང་འཇུག་ཐོབ། དོན་དུ་གཞི་ལམ་འབྲས་བུའི་དུས་ཐམས་ཅད་ན་གནས་ཚུལ་ལ་གནས་ལུགས་ཆོས་སྐུ་དང་། དེའི་རང་རྩལ་གཟུགས་སྐུ་སྟེ་སྐུ་གཉིས་ལས་ནམ་ཡང་འདའ་མི་སྲིད་ཅིང་དེ་གསུམ་གྱི་ངོ་བོ་དབྱེར་མི་ཕྱེད་པས་ན་རྡོ་རྗེའི་ཐེག་པ་ཞེས་བྱའོ། །རྡོ་རྗེའི་ཐེག་པའི་ནང་ཚན་ནང་རྒྱུད་སྡེ་གསུམ་གྱི། ཐབས་བསྐྱེད་རིམས་དང་རླུང་གི་རྫོགས་རིམ་གཙོ་བོར་བྱེད་པ་ཕ་རྒྱུད། རང་ལུས་དང་གཞན་ལུས་ལ་བརྟེན་པའི་ཐིག་ལེའི་རྫོགས་རིམ་གཙོ་བོར་བྱེད་པ་མ་རྒྱུད་དང་། གྲོལ་ལམ་ལྟ་བ་ཁོ་ན་གཙོ་བོར་བྱེད་པ་གཉིས་མེད་ཀྱི་རྒྱུད་ཡིན། དེའང་གསར་མ་ལྟར་ཕ་རྒྱུད་རིམ་ལྔ། མ་རྒྱུད་ཆོས་དྲུགགཉིས་མེད་རྒྱུད་སྦྱོར་དྲུག་རྣམས་ཡིན་ཀྱང་དོན་དུ་བསྐྱེད་རྫོགས་གཉིས་ཀའི་ར་བ་ལས་མི་འདའ་བས། བསྐྱེད་པའི་རིམ་པར་ལེགས་གནས་ཤིང་། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་གདང་བུ་ལྟ་བུར་བསྟན། །ཞེས་བསྐྱེད་རྫོགས་རིམ་པ་གཉིས་ལས་རིམ་པ་གཉིས་པའི་རིམ་པ་གཉིས་པ་གྲོལ་ལམ་རྫོགས་པ་ཆེན་པོ་དང་ཕྱག་ཆེན་གཉིས་ཁས་མི་ལེན་ཏེ། སྔགས་ཀྱི་རིམ་པ་གཉིས་པ་ཐབས་ལམ་ཡིན་པའི་གནད་ཀྱིས་ས་པཎ་སོགས་ཀྱིས་ཕྱག་ཆེན་ལ་དབང་དང་རྡོ་རྗེའི་ལུས་ཀྱི་ཕྱེད་བཅིང་སོགས་མི་འདུག་པས་མདོ་ཡིན་ནམ་སྔགས་ཡིན། མདོ་ཡིན་ན་ཚེ་ལུས་གཅིག་གི་སྤྲོས་བྲལ་མི་མཐོང་། སྔགས་ཡིན་ན་དབང་དང་ཐབས་ལམ་དགོས་གསུངས། དེའི་ཕྱིར། ངེད་ཀྱི་ཕྱག་རྒྱ་ཆེན་པོ་ནི། །དབང་ལས་སྐྱེས་པའི་ཡེ་ཤེས་ཡིན། །ཞེས་གསུངས་སོ། །ཕྱག་ཆེན་མདོ་ལུགས་སུ་ཁྲིད་ཟེར་བ་ལ་དབང་དགོས་པ་དང་མི་དགོས་པ་གཉིས་ཀ་བསྒྲུབ་མེད་གསུངས། མ་ཧཱའི་གྲོལ་༼ཚིག་ཁ་ཤས་སམ་ཕྲེང་གཅིག་ཆད་པ་འདྲ་༽མན་ངག་ལྟ་ཕྲེང་དང་རྫོགས་ཆེན་གཉིས་ལའང་ཐབས་བསྐྱེད་རྫོགས་གང་ཡང་མི་དགོས་ཕྱིར་མདོ་ཡིན་ན་ཚེ་གཅིག་གིས་ཟུང་འཇུག་མི་འགྲུབ། སྔགས་ཡིན་ན་ཐབས་ལམ་ཡོད་དགོས་ཟེར་ནས་ཁས་མི་ལེན་ཀྱང་། འཕགས་ཡུལ་ལའང་གྲོལ་ལམ་ཡོད་དེ་མཁས་ཤིང་གྲུབ་པའི་ཚོགས་རྣམས་ཀྱི་དོ་ཧ་སྐོར་དྲུག་དང་གྲུབ་པ་སྡེ་བདུན་སོགས་ནའང་ཐབས་ལམ་བཀག་ནས་གྲོལ་ལམ་ཁོ་ནར་བསྔགས། ཁྱད་པར་འཕགས་མཆོག་ཀླུའི་བྱང་ཆུབ་སེམས་འགྲེལ་གྱི་བཤད་བྱ་ཕ་རྒྱུད་རིམ་ལྔའི་ནང་ཚན་རིམ་པ་བཞི་པ་དོན་དམ་བྱང་ཆུབ་ཀྱི་སེམས་འོད་གསལ་གྱི་སྐབས་འགྲེལ་བ་ཡིན་ལ། དེ་ལའང་བྱེད་བཅིང་སོགས་ཀྱི་ཐབས་གང་ཡང་མ་བསྟན་པར་གྲོལ་ལམ་གྱི་ལྟ་བ་ཁོ་ནས་གཏན་ལ་དབབ་པ་ཡིན་ནོ། །སྔ་འགྱུར་བའི་ལྟ་བ་དག་མཉམ་ཆེན་པོ་མངོན་སུམ་མྱོང་ཐོག་ཏུ་ཁེལ་བའི་གང་ཟག་གིས་ལྷ་བསྒོམ་པའི་བསྐྱེད་རྫོགས་ཟུང་འཇུག་ཀྱང་འཕགས་ཡུལ་ན་དེ་འདྲ་མེད་ཅེས་ཁས་མི་ལེན་ཀྱང་ཡོད་དེ་གསང་འདུས་ལ་འཕགས་པ་ཀླུའི་ལུགས་དང་ཡེ་ཤེས་ཞབས་ལུགས་གཉིས་སུ་གྲགས་པའི་ཕྱི་མའི་ལུགས་ལ་གནས་ལུགས་མངོན་སུམ་མྱོང་བའི་གང་ཟག་གིས་ལྷ་བསྒོམས་ན་བསྐྱེད་རིམ་ལ་རྫོགས་རིམ་གྱི་རྒྱས་བཏབ་པ་ཞེས་ཟབ་གསལ་གཉིས་སུ་མེད་པའི་ཡེ་ཤེས་དེ་མཚན་མེད་ཀྱི་རྫོགས་རིམ་དང་། ལྷ་སྒོམ་པ་དེ་ཐབས་བསྐྱེད་རིམ་ཡིན་པས་འོད་གསལ་དང་སྒྱུ་ལུས་གཉིས་ཟུང་དུ་འཇུག་པ་དང་མཚུངས་གསུངས། ཨིནྡྲ་བོ་དྷིས་ཀྱང་འདི་ལ་བསྐྱེད་རིམ་ལ་ལྟོས་པའི་རྫོགས་རིམ་དང་། རྫོགས་རིམ་ལ་ལྟོས་པའི་བསྐྱེད་རིམ་ཞེས་གསུངས་ཏེ། བསྐྱེད་རྐྱང་བཅོས་མའི་ལྷ་སྐུ་ལ་ལྟོས་ན་འདིའི་རྩ་བ་མཚན་མེད་ཀྱི་རྫོགས་རིམ་གྱི་ཡེ་ཤེས་ཡིན་པས་རྫོགས་རིམ་དང་། སྣང་བ་གསུམ་གྱི་འོད་གསལ་གྱིས་རྒྱུ་བྱས་རླུང་འོད་ཟེར་ལྔ་བས་རྐྱེན་བྱས་ནས་རྩོལ་མེད་དུ་ལྡང་བའི་རྫོགས་རིམ་མ་བཅོས་པའི་ལྷ་སྐུ་ལ་ལྟོས་ན་བློ་རྩོལ་གྱིས་བཅོས་པའི་ལྷ་སྐུ་ཡིན་པས་བསྐྱེད་རིམ་ཡིན། དོན་དུ་བསྐྱེད་རྫོགས་ཟུང་འཇུག་མཐོང་ལམ་འོད་གསལ་དེ་དང་། རྗེས་ཐོབ་ལྷ་སྐུ་ཟུང་འཇུག་ཡིན། བསྐྱེད་རྫོགས་ཟུང་འཇུག་འདི་ལ་གཞན་ཡང་ལུགས་མང་རུང་གསར་མས་དགོངས་པ་མ་ལོན་ནས་རྙིང་མས་དགོངས་པ་ལོན་ཞེས་གསུང་། ཟུང་དུ་འཇུག་རྒྱུའི་སྣང་ཕྱོགས་སྐུའི་མགོ་བཤད་མ་ཐག་པའི་བསྐྱེད་རིམ་འདི་དང་། སྒྱུ་ལུས་སློབ་པའི་ཟུང་འཇུགཐོད་རྒལ་མི་སློབ་པའི་ཟུང་འཇུག་རྣམས་དང་། འོད་གསལ་ཡང་གྲོལ་ལམ་གྱིས་གཏན་ལ་ཕབ་པའི་མངོན་སུམ་དང་། བྱེད་བཅིང་གིས་དྲངས་པའི་དཔེའི་འོད་གསལ། དོན་གྱི་འོད་གསལ་ཁྲེགས་ཆོད་ཆོས་སྐུ་རྣམས་ཡིན། དེའི་ནང་ཚན་སྔ་མ་རྣམས་ལ་ཟུང་འཇུག་གི་དོད་ཐུབ་ཡོད་ཀྱང་ཟུང་འཇུག་མཚན་ཉིད་པ་མིན། མཚན་ཉིད་པ་ནི། མཐོང་ལམ་ཐུགས་དོན་གྱི་འོད་གསལ་དང་སྐུ་སློབ་པའི་ཟུང་འཇུག་ཡིན་ལ་སྐུ་ཐུགས་ཟུང་འཇུག་ཟེར་རོ། །དངོས་གཞི་བསྐྱེད་རྫོགས་ཟུང་འཇུག་འདི་ལ་དགོངས་ནས་སྲོག་སྡོམ་གཟེར་བཞི་འདི་གསུངས་པ་ཡིན་པས་སྔ་འགྱུར་བའི་བསྐྱེད་རྫོགས་ཟུང་འཇུག་གི་ལམ་དང་སྦྱར་ནས་འཆད་ཤེས་དགོས། འོག་མ་བསྐྱེད་རྐྱང་འདིའི་དགོངས་པ་མི་འབྱོར། འདི་ལ་རྒྱུད་གསུམ་གྱི་རྣམ་བཞག་ཤེས་དགོས་པས། རྒྱུད་གསུམ་ནི། གཞི་རྒྱུད་དང་། ལམ་རྒྱུད། འབྲས་རྒྱུད་དོ། །དང་པོ་ལ་གནས་ལུགས་ངོ་བོ་ཉིད་ཀྱི་གཞི་དང་། འཁྲུལ་བ་བཏགས་པའི་གཞི་གཉིས་ལས། དང་པོ་ནི། ཧེ་རུ་གལ་པོ་ལས། གནས་ལུགས་ངོ་བོ་ཉིད་ཀྱི་གཞི། །ལྷག་པའི་ཆོས་སྐུ་བཅིངས་གྲོལ་མེད། །ཡེ་ནས་ལྷུན་གྲུབ་ཆེན་པོ་ལ། །ངོ་བོ་ཀ་དག་ཆེན་པོ་གནས། །སྣང་ཚུལ་འཁོར་འདས་གཉིས་སུ་སྣང་། །ཞེས་པ་ལྟར། དོན་དུ་དབྱིངས་རིག་ཟུང་འཇུག་རིག་སྟོང་ཟུང་འཇུག་གི་ཡེ་ཤེས་ངོ་བོ་ཀ་དག་གི་སངས་རྒྱས་སམ་གཞི་ལྷུན་གྲུབ་ཀྱི་སངས་རྒྱས་སམ་རང་བཞིན་རྣམ་དག་གི་སངས་རྒྱས་ཞེས་གཞི་བཅིང་གྲོལ་ལས་འདས་པ་འདི་ལ་གནས་ལུགས་ངོ་བོ་ཉིད་ཀྱི་གཞི་ཞེས་བྱ། གཞི་རྒྱུད་ཀྱང་འདི་ཡིན་ཏེ། དཔེར་ན་ཆུ་བོའི་རྒྱུད་ལྟར་གཞི་ལམ་འབྲས་བུའི་དུས་ཐམས་ཅད་ན་མི་འགྱུར་བར་རྒྱུད་གཅིག་པས་སོ། །སྒྱུ་འཕྲུལ་ལྟར་འདི་ལ་ལྷག་པའི་དོན་དམ་དཀོར་བདུན་ངོ་བོ་ཉིད་ལྷུན་གྱིས་གྲུབ་པ་ཞེས་དབྱིངས་དོན་དམ་ཡེ་ཤེས་དོན་དམ་ཟུང་འཇུག་དོན་དམ་གསུམ་དང་ཟུང་འཇུག་གི་སྟེང་ནས་སྐུ་གསུང་ཐུགས་ཡོན་ཏན་ཕྲིན་ལས་ལྔར་དབྱེ་བས་བདུན་ནོ། །འཁྲུལ་བ་བཏགས་པའི་གཞི་ནི་ཕུང་པོ་ལྔའམ། གཟུང་འཛིན་གཉིས་སམ་ཚོགས་བརྒྱད་སེམས་བྱུང་དང་བཅས་པའམ། སྒོ་གསུམ་མམ་དེ་བསྡུ་ན་རྟོག་སྒྲིབ་འདི་ཁོ་ནར་འདུ། འདི་ནི་གློ་བུར་བ་དཔེར་ན་གསེར་དང་གཡའ་འམ་མེ་ལོང་དང་གཡའ་ལྟ་བུ་ཡིན་པས་རྒྱུན་མཐའི་རྡོ་རྗེ་ལྟ་བུའི་ཡེ་ཤེས་ཀྱིས་ལྷག་མ་མ་ལུས་པར་ལྡོག་གོ །ལམ་རྒྱུད་རིམ་གཉིས་ཀྱང་གློ་བུར་བ་དཔེར་ན་སྒྲིབ་པ་ལྕགས་ལྟ་བུ་དེ་ཟད་ཚེ་གཉེན་པོའི་ལམ་བདེན་བཙའ་ལྟ་བུ་དེ་ལྡོག་འགྲོ་བས་ཡེ་ཤེས་སམ་དོན་གྱི་འོད་གསལ་རྒྱུད་ལ་སྐྱེས། རྗེས་ཐོབ་ཟུང་འཇུག་གི་སྐུར་ལྡང་། དེ་དུས་མཛོ་མོ་སྒོ་ཁྱི་བྱ་ཆུ་ལེན་སོགས་ཚོམ་བུ་འབུམ་ཕྲག་ཙམ་འཁོར་ཚོགས་དང་བཅས་པས་ཟུང་འཇུག་གྲུབ། བསྐྱེད་རྐྱང་ལས་བསྐྱེད་རྫོགས་ཟུང་འཇུག་ལ་བོགས་འདོན་འདི་མི་དགོས། ཚོགས་པ་དེའི་ནང་དམ་ཉམས་གཅིག་ཡོད་ན་གཞན་ཐམས་ཅད་དམ་ལྡན་ཁོ་ན་ཡིན་ཀྱང་དམ་ཉམས་གཅིག་པོའི་སྟོབས་ཀྱིས་ཐམས་ཅད་ཀྱི་དངོས་གྲུབ་གྱི་སྐལ་བ་ཆད་གསུངས། དེང་སང་དེའི་དོད་ཐུབ་སྨན་སྒྲུབ་དང་བུམ་སྒྲུབ་རྣམས་ཡིན། ཚིག་དབང་གི་ལམ་རྫོགས་ཆེན་ལྟར་ཐབས་བསྐྱེད་རྫོགས་གང་ལ་མི་ལྟོས་པར་བླ་མའི་མན་ངག་གི་སྟོབས་ཀྱིས་གཞི་ལྟ་བ་ངོ་སྤྲད་ནས་ཡེ་ཤེས་རྩོལ་མེད་ཁོ་ན་ལ་གོམས་པས་མཉམ་ཉིད་རྫོགས་པ་ཆེན་པོའི་མཆོག་གི་དངོས་གྲུབ་མྱུར་བར་ཐོབ་ནས་རང་དོན་དུ་ཆོས་བརྒྱད་མགོ་སྙོམ་པ་དང་གཞན་དོན་དུ་བརྩེ་བའི་སྙིང་རྗེ་རང་ཤུགས་ཀྱིས་འབྱུང་གསུངས། དབང་བཞིའི་ལམ་དེ་བསྡུ་ན་སྔགས་སྤྱི་ལྟར་བསྐྱེད་རྫོགས་གཉིས་དང་རྙིང་མ་ལྟར་བསྐྱེད་རྫོགས་རྫོགས་ཆེན་གསུམ་ལ་འདུ། ༈ བསྐྱེད་རྫོགས་གཉིས་པོ་ལ། ལྟ་བ་སྒོམ་པ་སྤྱོད་པ་གསུམ་རེ་ཡོད་པའི། དང་པོ་ལྟ་བ་དག་མཉམ་ཆེན་པོ། བསྒོམ་པ་བསྐྱེད་རྫོགས་གཉིས། སྤྱོད་པ་སྤྲོས་བཅས་སྤྲོས་མེད་ཀྱིས་ལྟ་སྒོམ་དེ་དག་བོགས་དབྱུང་བའོ། །དང་པོ་ལྟ་བ་ལ་གོ་བ་མྱོང་བ་རྟོགས་པ་གསུམ་ཡོད། དང་པོ་གོ་བ་ལ་གསར་ཕྱོགས་ཀྱིས་མདོ་སྔགས་ཀྱི་ལྟ་བ་ལ་ཁྱད་པར་མེད་པར་བཞེད་དོ། །ས་པཎ་གྱིས། ཕ་རོལ་ཕྱིན་པའི་སྤྲོས་བྲལ་ལས། །ལྷག་པའི་ལྟ་བ་ཡོད་གྱུར་ན། །ལྟ་དེ་སྤྲོས་པ་ཅན་དུ་འགྱུར། །ཞེས་གསུངས་པ་ལྟར་རོ། །སྔགས་ཐབས་ཁོ་ནས་འཕགས་པར་བཞེད་པས་མཐའ་བྲལ་སྟོང་ཉིད་དབུ་མའི་ལྟ་བ་གཏན་ལ་ཕབ་ནས་སྣང་སྲིད་ཀྱི་གནས་ཚུལ་མ་དག་པ་ཞིག་ལ་ཐབས་ཀྱིས་བཅོས་ནས་སྣང་སྲིད་དག་པ་རབ་འབྱམས་སུ་བསྒོམ་པ་རིམ་པ་དང་པོ་བསྐྱེད་རིམ་ཡིན། རྙིང་མས་མདོ་སྔགས་ཀྱི་ལྟ་བ་ལ་ཁྱད་ཡོད་པར་བཞེད་པས་ན། དང་པོ་སེམས་ཅན་རྣམས་ནི་སོགས་ཀྱི་ལུང་དང། ཆོས་ཉིད་ཀྱི་རིགས་པས་གནས་ལུགས་ཆོས་སྐུ་དང་། དེའི་རང་རྩལ་གྱི་སྣང་སྲིད་ཐམས་ཅད་ཆོས་སྐུའི་རང་རྩལ་དག་པ་རབ་འབྱམས་ལ་གཏན་ལ་ཕབ་པ་ན། དེ་ནི་ལྟ་བ་དག་མཉམ་ཆེན་པོ་ལུང་རིགས་གཉིས་ཀས་ངེས་པའི་སྒོ་ནས་འཛིན་པ་ཡིན་པས་དེ་ཙམ་ལའང་རྡོ་རྗེ་འཛིན་པའི་སྒྲ་འཇུག །ལུང་རིགས་སྔོན་དུ་མ་སོང་ཡང་བླ་མའི་གསུང་སོགས་ལ་བརྟེན་ནས་སྣང་སྲིད་དག་མཉམ་ཆེན་པོར་རྟོགས་པའི་ལམ་བདེན་འདུས་བྱས་ཡིན་ནོ། །ལམ་བདེན་གྱི་ངོ་བོ་ཤེར་ཕྱིན་གྱི་བདག་ཉིད་རྟོགས་པའི་ཤེས་རབ་དང་སྔགས་ཀྱི་རིག་པའི་ཡེ་ཤེས་ཡིན་པས་དེ་འདུས་བྱས་ཡིན་ནམ་སྙམ་ན་རང་ངོ་འགྱུར་བ་མེད་པས་འདུས་བྱས་མིན་ཀྱང་གོང་ནས་གོང་དུ་རྩལ་རྫོགས་རིམ་ལ་ལྟོས་ན་འདུས་བྱས་ལྟ་བུར་སྣང་། གཉིས་པ་ལམ་རྒྱུད་ནི་སྨིན་གྲོལ་གཉིས་ཡིན་པས། དབང་ནི་སྔགས་གྱི་འཇུག་སྒོ་སྨིན་བྱེད་སྡོམ་ཆོག་རྣམས་ཡིན། དེ་ལ་གཞི་དབང་རྡོ་རྗེ་བཞིའི་ས་བོན་དང་། འབྲས་དབང་ནི་རྡོ་རྗེ་བཞིའི་འབྲས་བུ་དང་། ལམ་དབང་ནི་གཞི་ཉིད་འབྲས་བུར་སྨིན་བྱེད་ཀྱི་དབང་ཐམས་ཅད་ཡིན་ལ། དེ་ལྟ་བུའི་གཞི་དབང་དེ་སེམས་ཅན་གྱི་རྒྱུད་ན་མེད་ན་བསྐུར་བས་མི་ཐོབ་ཏེ། རྒྱུད་ལས། དབང་བསྐུར་རང་ལ་སོགས་ལྟར་རོ། །ལམ་དབང་གི་དུས་སློབ་མའི་སྒོ་གསུམ་ནས་ཆུ་རྒོད་ལྟ་བུ་ལ་བླ་མ་ཆང་མ་ལྟ་བུ་དེས། སྐྱབས་སེམས་སྡོམ་བཟུང་སོགས་ནས་བཙོས་པ་ལྟ་བུ་དང་། བླ་མས་དགོངས་པ་གཏད་སློབ་མས་མོས་གུས་བྱས། དེ་ནས་བླ་སློབ་ལྷར་གསལ་བའི་གནས་གསུམ་ལས་འོད་ཟེར་འཕྲོས། མཁའ་ཁྱབ་ཀྱི་དེ་བཞིན་གཤེགས་པའི་ཡེ་ཤེས་སློབ་མའི་སྒོ་གསུམ་ལ་བསྟིམ་པ་ནི་ཕབ་བཏབ་པ་ལྟ་བུ་ཡིན། དེ་དུས་རབ་ལ་རྟོགས་པ་སྐྱེས། འབྲིང་ལ་སྒྲིབ་པ་བྲལ་རུང་དང་ཡེ་ཤེས་སྐྱེས་རུང་གི་ནུས་པ་རྒྱུད་ལ་བཞག་ནས་ཉམས་སྐྱེས། ཐ་མ་ཤེས་རྒྱུད་འགྱུར། དེ་ནས་དབང་བཞི་རིམ་པར་བསྐུར་བས། ཡང་ཐ་ཡིན་ཡང་སྒོ་གསུམ་རྡོ་རྗེ་གསུམ་ཡིན་པའི་གོ་བ་རྣམ་དག་ཞིག་ནི་སྐྱེས་དགོས། རྟགས་དེ་རྣམས་གང་རུང་བྱུང་ན་དབང་ཐོབ་པའི་ཚད་ཡིན་པས། སྐྱེ་བ་སྔ་ཕྱི་ནམ་ཡིན་ཀྱང་དེ་འདྲའི་དབང་དང་པོ་ནམ་ཐོབ་པ་ལམ་དབང་གི་གཞི་དབང་དང་། དེ་ནས་རང་བཞིན་གྱི་རྐྱེན་གྱིས་དབང་ཞུས་ཚད་ལམ་དབང་གི་ལམ་དབང་དང་། མཐར་རྒྱུན་མཐར་རྡོ་རྗེ་འཆང་གི་མདུན་ནས་ཟབ་གསལ་གཉིས་སུ་མེད་པའི་དབང་གསུམ་ཞུ་བ་ནི་ལམ་དབང་གི་འབྲས་དབང་ངོ་། །དེ་ལྟ་བུའི་དབང་དེ་སྔགས་ཀྱི་སྡོམ་ཆོག་ཡིན་པས་དབང་ཐོབ་པ་ཙམ་གྱིས་མི་ཆོག །དམ་ཚིག་བསྲུང་དགོས། དམ་ཚིག་ཀྱང་དབང་བཞི་རང་རང་ལ་ལྟོས་པའི་དམ་ཚིག་གམ། མདོར་ན་སྐུའི་དམ་ཚིག་བླ་མ་དང་མཆེད་ཀྱི་སྐུ་མི་བརྙས། གསུང་མི་བཅག །ཐུགས་མི་དཀྲུགས། གསུང་གི་དམ་ཚིག་ལྷ་སྔགས་ཏིང་ངེ་འཛིན་ལ་བརྩོན། ཐུགས་ཀྱི་དམ་ཚིག་གསང་བཅུ་མི་བསྒྲག །སྤྱིར་སྒོ་གསུམ་རྡོ་རྗེ་གསུམ་གྱི་དག་སྣང་དང་བྲལ་ཚེ་དམ་ཚིག་ཉམས་པ་ཡིན་གསུངས་པས་གཟབ་འཚལ། དེ་ལྟར་དམ་ཚིག་དག་ན་དེས་དབང་དོན་གྱི་ཡེ་ཤེས་མ་རྟོགས་ཀྱང་གྲོལ་བྱེད་ཀྱི་གདམས་པ་ཟབ་མོ་ཉམས་སུ་བླངས་ན་ཆང་ལང་པ་ལྟར་རང་རྒྱུད་གྲོལ་བར་འགྱུར། དམ་ཚིག་ཉམས་ན་ཆན་ལ་ཕབ་བཏབ་ཀྱང་ཆང་རུལ་བའམ་རྒོད་པ་ལྟར་རྒྱུད་ཚིག་སྟེ་མཆོག་ཐུན་མོང་གི་དངོས་གྲུབ་ཀྱི་སྐལ་བ་ཆད་ནས། ལྟར་སྣང་ལ་བསྐྱེད་རྫོགས་ཟབ་མོའི་གདམས་པ་ལ་ཇི་ལྟར་བརྩོན་ཀྱང་དོན་དུ་སྒྲུབ་པ་ལོག་པར་གྱུར་ནས་རུ་ཏྲ་དང་རྒྱལ་འགོང་དམ་སྲི་ཁོ་ན་འགྲུབ་པར་འགྱུར་ལ། རང་བརླག་པར་མ་ཟད། ཇི་ལྟར་འོ་མ་སོགས་ལྟར། གཞན་གྱིས་ཀྱང་དངོས་གྲུབ་ཀྱི་གེགས་བྱེད་པ་དང་། དེར་ཡང་མ་ཟད་ཡེ་ཤེས་གསང་རྒྱུད་ལས་ཀྱང་། དམ་ཚིག་མི་ལྡན་རྡོ་རྗེའི་ནི། །བེའུ་སྦྲེལ་གཡང་ལ་ལྟུང་བ་བཞིན། །བདག་གཞན་རྡོ་རྗེའི་ཁབ་ཏུ་ལྟུང་། །ཞེས་པ་ལྟར་མཐར་རང་གཞན་རྡོ་རྗེའི་དམྱལ་བར་འཁྲིད་པས་དྲན་ཤེས་ཀྱི་སྒོ་ནས་དམ་ལས་མི་འདའ་བ་ཤིན་ཏུ་གལ་ཆེའོ། །དེ་ལྟར་དབང་ཐོབ་དམ་ཚིག་རྣམ་པར་དག་པའི་གང་ཟག་གིས་གྲོལ་བྱེད་ཀྱི་གདམས་པ་ཟབ་མོ་ཉམས་སུ་ལེན་པ་ལ། དང་པོ་བུམ་དབང་གི་ལམ་བསྐྱེད་རིམ་དང་དེས་ཐ་མལ་གྱི་སྣང་ཞེན་སྦྱངས་ནས་ཡུལ་གསུམ་གྱད་དུ་གྱུར་ཀྱང་། ད་དུང་གྱ་ནོམ་ལྷར་ཞེན་གྱི་སྣང་བ་རྫོགས་རིམ་གྱིས་སྡོམ་དགོས་པས་དེ་ཡང་གསང་ཤེར་གཉིས་ཀའི་ལམ་རྫོགས་རིམ་མཚན་བཅས་དང་། ཚིག་དབང་གི་ལམ་རྫོགས་ཆེན་མཚན་མ་མེད་པའི་རྫོགས་རིམ་ཡིན། དེའི་ནང་ཚན་གསང་དབང་གི་ལམ་རླུང་གི་རྫོགས་རིམ་དང་། ཤེར་དབང་གི་ཐིག་ལེའི་རྫོགས་རིམ་མམ། ཡང་ན་གསང་དབང་གི་ལམ་བདག་བྱིན་གྱིས་རློབ་པ་སྒྱུ་ལུས་འོད་གསལ་ཟུང་འཇུག་གསུམ༷་ཡིན་པས། དང་པོ་རང་ལུས་ཐབས་ལྡན་ལ་བརྟེན་ནས་རླུང་བུམ་ཅན་སྦྱོར་བ་བཞི་ལྡན་བསྒོམས་པས་སྟོང་བཞིས་དྲངས་བའི་དཔེ་ཡི་འོད་གསལ་ལམ་ཡང་ན་ཐིག་ལེ་གནད་དུ་བསྣུན་པས་དགའ་བཞིས་དྲངས་བའི་དཔེ་ཡི་འོད་གསལ་རྒྱུད་ལ་འདྲེན། དེའི་རྗེས་ཐོབ་སྣང་བ་གསུམ་གྱི་འོད་གསལ་གྱིས་རྒྱུ་བྱས། རླུང་འོད་ཟེར་ལྔ་བས་རྐྱེན་བྱས་ནས་སྒྱུ་ལུས་ཀྱི་ལྷ་སྐུར་ལྡང་། དེ་དཔེ་ཡི་འོད་གསལ་དང་སྒྱུ་ལུས་ཟུང་འཇུག་ཡིན། ཤེར་དབང་གི་ལམ་དཔེ་ཡི་འོད་གསལ་དེ་དོན་གྱི་འོད་གསལ་ལ་སྦྱོར་བའི་ཐབས་གཞན་ལུས་ཕྱག་རྒྱའི་ལམ་ལ་བརྟེན་པ་ཡིན་པས་གསར་མ་ཡིན་ན་སྦྱོར་ལམ་ཐོབ་ཚེ་ཆོས་གོས་སོགས་དགེ་འདུན་ལ་ཕུལ་ནས་སྤྱོད་པ་གཤེགས་ཞེས་ཕྱག་རྒྱ་མཚན་དང་ལྡན་ན་རང་གི་སྲིང་མོ་ཡིན་ཀྱང་ཁྲིད་དེ་དུར་ཁྲོད་བརྒྱད་སོགས་ལ་གཤེགས་ནས་ཕྱག་རྒྱའི་སྟོབས་ཀྱིས་ཐུགས་དོན་གྱི་འོད་གསལ་དྲངས་ནས་རྗེས་ཐོབ་སློབ་པའི་ཟུང་འཇུག་གི་སྐུར་ལྡང་བ་ས་ར་ཧ་པ་སོགས་གསར་མའི་གྲུབ་ཐོབ་ཕལ་ཆེར་ལྟ་བུ་ཡིན། རྙིང་མས་སྦྱོར་ལམ་ཐོབ་པའི་གང་ཟག་སྟོང་ཕྲག་སོགས་ཡབ་ཡུམ་ཟུང་འབྲེལ་ལྷན་དུ་ཚོགས་ནས། ཚོམ་བུ་ཚོགས་ཀྱི་སྒྲུབ་པ་བྱས་ནས་མཐར་དགོང་མོ་ལྷ་ལས་དངོས་གྲུབ་བླང་། ནམ་གུང་ཏིང་ངེ་འཛིན་གྱི་སྟོབས་ཀྱིས་དགྲ་བོ་དངོས་སུ་མདུན་དུ་བཀུག་སྟེ་ཆང་གིས་མྱོས་པར་བྱས་ནས་རལ་གྲིས་དངོས་སུ་གཤགས་ནས་འཚེང་བ་གསུམ་ལྡན་གྱི་སྒོ་ནས་བསྒྲལ་ཏེ་དགྲ་ལས་དངོས་གྲུབ་བླང་། ཐོ་རེངས་རིགས་དང་མཐུན་པར་ཡབ་ཡུམ་སྦྱོར་བ་བྱས་པས་ཐིག་ལེ་ཡས་བབ་ཀྱི་འགྲོས་ཀྱིས་དངོས་པོ་ལྷན་ཅིག་སྐྱེས་པའི་དགའ་བའི་ཡེ་ཤེས་རྒྱུད་ལ་སྐྱེས། རྡོ་རྗེའི་དམྱལ་བར་སྐྱེ་ངེས་ཀྱི་སེམས་ཅན་སྔགས་ཀྱི་ཐབས་མཁས་ཀྱིས་རྡོ་རྗེ་འཆང་གི་སར་བཙན་ཐབས་སུ་བཀོད། དེ་ནས་མས་བརྟན་གྱིས་མཐར་སྔ་མའི་ཉམས་དང་བྲལ་ནས་རང་བཞིན་ལྷན་ཅིག་སྐྱེས་པའི་དགའ་བའི་ཡེ་ཤེས་རྒྱུད་ལ་སྐྱེས་ཏེ་རིག་འཛིན་རྣམ་པ་བཞིའི་ས་ལ་བསྒྲོད་པ་རྒྱལ་སྲས་པདྨ་འབྱུང་གནས་སོགས་སྔགས་རྙིང་མའི་གྲུབ་ཐོབ་ཕལ་ཆེར་ལྟ་བུའོ། །ལུང་རིགས་ཀྱི་ངེས་པ་མེད་པར་མོས་པ་ཙམ་གྱིས་ལྟ་བ་བཟུང་ན་མོས་པས་འཛིན་པ་ཟེར། ལྟ་བ་དངོས་གྲུབ་སློབ་དཔོན་སོགས་མཆན་དེ་བླ་མ་བཟང་པོའི་གསུང་ལ་བརྟེན་པ་དང་དངོས་པོའི་གནས་ཚུལ་དང་མཐུན་པ་ཡིན་པའི་ཕྱིར་འདི་ཙམ་གྱིས་བསྒྲུབས་ན་མཆོག་ཐུན་གྱི་དངོས་གྲུབ་འགྲུབ་གསུངས། སྔ་མ་ལ་ལུང་རིགས་སྔོན་དུ་སོང་བས་གཞན་གྱིས་བློ་མི་འཕྲོག་པར་བརྟན་པ་དང་ཕྱི་མ་ལ་ལུང་རིགས་མེད་པས་མི་བརྟན་པར་འགྱུར་སླ། སྤྱིར་སྔགས་བླ་མེད་ཀྱི་ལྟ་བ་ཡིན་ན་མངོན་སུམ་ཡིན་པས་ཁྱབ་གསུངས་པ་གཙོ་བོ་ཐབས་གྲོལ་གང་རུང་གིས་དྲང་བས་མྱོང་ཐོག་ཏུ་ཁེལ་བ་ཡིན་པ་ལ་གོ་དགོས་ཀྱང་། གོ་བ་དེ་ལྟ་བུའང་མཚན་ཉིད་ཐེག་པའི་ལྟ་བ་ཕུང་པོ་རྣམ་དཔྱད་ཀྱི་སྟོང་བ་ཁ་ཕྱི་ལྟས་ལ་ལྟོས་ན་མངོན་སུམ་ལྟ་བུ་ཡིན། གསར་རྙིང་གི་ལྟ་བ་ལའང་དེ་ཙམ་ཁྱད་ཡོད་གསུངས། གོ་ལྟ་དེ་ལྟ་བུའི་སྟེང་ནས་བསྐྱེད་རིམ་བསྒོམས་ན་དངོས་པོའི་གནས་ཚུལ་དང་མཐུན་པའི་སྒོམ་པ་ཕྱིན་ཅི་མ་ལོག་པ་ཡིན་པས་ཐབས་བསྐྱེད་པའི་རིམ་པ་མཚན་ཉིད་པ་ཡིན་ལ། འདིས་ཐུན་མོང་གི་དངོས་གྲུབ་འགྲུབ་ཅིང་མཆོག་གི་དངོས་གྲུབ་ཡང་འགྲུབ་པར་འགྱུར་རོ། །གཉིས་པ་མྱོང་ལྟ་འདྲེན་ཚུལ། ཐབས་གྲོལ་གཉིས་ལས། དང་པོ་ཐབས་ལམ་ནི། སྣང་བ་གསུམ་གྱི་ནང་ཚན་ཡང་དག་ཡེ་ཤེས་ཀྱི་སྣང་བ། བསྐྱེད་རྐྱང་གི་གྱ་ནོམ་ལྷར་ཞེན་གྱི་སྣང་བ་རྫོགས་རིམ་གྱི་ཡེ་ཤེས་ཀྱིས་སྡོམ་དགོས་པས་དེ་འདྲེན་ཐབས་རླུང་དང་ཐིག་ལེའི་རྫོགས་རིམ་གང་རུང་ལ་བརྟེན་པའི་ཐབས་རྡོ་རྗེའི་ལུས་ཀྱི་ཕྱེད་བཅིང་གིས་ཐབས་བྱུང་དཔེ་ཡི་འོད་གསལ་མངོན་སུམ་རང་རྒྱུད་ལ་འདྲེན། དེའི་རྗེས་ཐོབ་སྒྱུ་ལུས་ཀྱི་ལྷ་སྐུར་ལྡང་། དེ་ནི་ཉམས་རྟོགས་གཉིས་ཀའི་ནང་ཚན་ཉམས་དང་དཔེ་དོན་གཉིས་ཀའི་ནང་ཚན་དཔེ་གོ་མྱོང་རྟོགས་གསུམ་གྱི་ནང་ཚན་མྱོང་བ་ཡིན། དེ་ནས་ཕྱག་རྒྱའི་ཉེར་རྒྱུར་བརྟེན་ནས་རྟོགས་པ་དོན་གྱི་འོད་གསལ་དྲངས་ནས་རྗེས་ཐོབ་སློབ་པའི་ཟུང་འཇུག་གི་སྐུར་ལྡང་། གསར་ཕྱོགས་ཀྱིས་སྔགས་ལུགས་ལ་ཐབས་ལམ་ཁོ་ནས་དྲངས་བའི་མངོན་སུམ་མ་གཏོགས་གྲོལ་ལམ་གཏན་ནས་མི་བཞེད། བདེ་གཤེགས་སྙིང་པོ་དྲང་དོན་ལ་བཀྲལ་ནས་ས་སྐྱས་ཀུན་གཞི་དང་། དགེ་ཕྱོགས་ཀྱིས་ཡིད་རྟོག་མེད་ལ་འདོད། རྙིང་མས་ཚོགས་བརྒྱད་སེམས་བྱུང་དང་བཅས་པ་ལ་འཁྲུལ་བ་བཏག་པའི་གཞི་ཞེས་དག་བྱར་འདོད། གསར་ཕྱོགས་ཀྱིས་མདོ་སྔགས་ཀྱི་ལྟ་བ་ལ་ཁྱད་པར་མེད་པ་བཞེད། གལ་སྲིད་ཁྱད་ཞིག་བཏོན་ན་ཕུང་པོ་རྣམ་དཔྱད་ཀྱི་སྟོང་བ་དེ་དང་གཉིས་སྦྱོར་གྱི་བདེ་བ་གཉིས་ཟུང་འཇུག་ལ་ལྷན་སྐྱེས་ཀྱི་ཡེ་ཤེས་སམ་ཟུང་འཇུག་བདེ་བ་ཆེན་པོའི་ཡེ་ཤེས་སམ་མཆོག་ཏུ་མི་འགྱུར་བའི་བདེ་བ་ཆེན་པོའི་ཡེ་ཤེས་སུ་འདོད་ཀྱང་། དེ་ནི་ལྷན་སྐྱེས་མིན་པར་གློ་བུར་བ། འགྱུར་མེད་མིན་པར་འགྱུར་བཅས་གཉིས་སྦྱོར་གྱི་བདེ་བ། འདུས་མ་བྱས་མིན་པར་དབང་པོ་གཉིས་སྦྱོར་ལས་བྱུང་བའི་འདུས་བྱས་ཡིན་ནོ། །རྙིང་མའི་གསང་བ་སྙིང་པོ་སོགས་ཐབས་ལམ་དབང་བཙན་ལྟར་བཀྲལ་ན་གཞི་གནས་ཡེ་ཤེས་འདོད་པ་མ་གཏོགས་སྔ་མ་དང་མཐུན་ནོ། །གཉིས་པ་རྙིང་མའི་ཁྱད་ཆོས་གྲོལ་ལམ་ནི། དང་པོ་དབང་བསྐུར་ཚེ་དབང་དོན་གྱི་ཡེ་ཤེས་རྟོགས་པའམ་མ་རྟོགས་ཀྱང་ཆན་ལ་ཕབ་ཀྱིས་ཐེབ་པ་ལྟར་སྒྲིབ་པ་བྲལ་རུང་དང་ཡེ་ཤེས་སྐྱེ་རུང་གི་ནུས་པ་རྒྱུད་ལ་འཇོགདེ་ནས་གྲོལ་ལམ་ལྟ་བས་ཕྱེ་ཞེས་སྔ་འགྱུར་རྙིང་མའི་སྒྱུ་འཕྲུལ་དྲ་བའི་གཏན་ཚིགས་ཀྱིས་ལྟ་བ་དག་མཉམ་ཆེན་པོ་གཏན་ལ་འབེབས་པ་ཡིན་པས། དེའི་ཚུལ་ལ། རྟོགས་པ་བཞིའི་གཏན་ཚིགས། མཉམ་པ་བཞིའི་གཏན་ཚིགས། དག་པ་གསུམ་གྱི་གཏན་ཚིགས་སོགས་ཡོད་ཀྱང་། རྟོགས་པ་བཞིའི་གཏན་ཚིགས་ནི། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཞེས་པ་ལྟར། རྒྱུ་གཅིག་པའི་གཏན་ཚིགས་ཀྱིས་རང་བཞིན་སྐྱེ་མེད་དུ་གཏན་ལ་ཕབ། ཡིག་འབྲུའི་ཚུལ་གྱི་གཏན་ཚིགས་ཀྱིས་རོལ་པ་འགག་མེད་དུ་གཏན་ལ་ཕབ། བྱིན་གྱིས་བརླབས་པའི་གཏན་ཚིགས་ཀྱིས་ངོ་བོ་དབྱེར་མེད་དུ་གཏན་ལ་ཕབ། མངོན་སུམ་པའི་གཏན་ཚིགས་ཀྱིས་མཚན་ཉིད་མངོན་སུམ་བློ་བྲལ་དུ་གཏན་ལ་ཕབ་པས། རིག་པ་ཆོས་སྐུ་དག་མཉམ་བདེན་པ་དབྱེར་མེད་མངོན་སུམ་རང་རྒྱུད་ལ་དྲངས་ནས་མྱོང་ནུས། གལ་སྲིད་མ་མྱོང་ཀྱང་གོ་བ་རྣམ་དག་སྔར་ངེས་པ་འཛིན་པ་ཟེར་བ་དེ་འོང་། དེ་ནས་མན་ངག་ལྟ་བའི་ཕྲེང་བ་དང་སེམས་སྡེ་པྲ་ཁྲིད་སོགས་ཀྱི་མན་ངག་གི་ལག་ཁྲིད་བཏབ་པས་དག་མཉམ་བདེན་པ་དབྱེར་མེད་ཆོས་སྐུ་ཆེན་པོ་མངོན་སུམ་དུ་མྱོང་ནུས། མྱོང་ལྟ་དེའི་སྟེང་ནས་ལྷ་བསྒོམ་པ་སྔ་འགྱུར་བའི་བསྐྱེད་རྫོགས་ཟུང་འཇུག་ཡིན། དེ་རྟོགས་པ་ལ་ན་སྤར་དགོས་པས་དེ་ལ་སྔོན་གྱི་མཁས་པ་ཐམས་ཅད་ཀྱིས་ཕྱག་རྒྱས་མཚམས་སྦྱོར་དགོས་གསུངས་ཀྱང་། མཁས་མཆོག་མི་ཕམ་གྱིས་རང་གི་ལྟ་བ་གོམས་སྟོབས་དང་མོས་གུས་ཀྱི་སྟོབས་གྱིས་འོད་གསལ་ན་འཕར་འགྲོ། ཕྱག་རྒྱ་མི་དགོས། གལ་སྲིད་དགོས་ན་མདོའི་སྦྱོར་ལམ་པས་ཕྱག་རྒྱ་མ་བསྟེན་པར་མཐོང་ལམ་མི་ཐོབ་པ་ཞིག་ཁས་ལེན་དགོས་གསུངས། དགེ་མང་རིན་པོ་ཆེས་ཀྱང་། མོས་གུས་ཉེ་རྒྱུའི་སྤྱོད་པར་བཞག་གསུངས། དོན་གྱི་འོད་གསལ་རྟོགས་ཚེ་ལྷ་མ་བསྒོམས་ཀྱང་ཐ་མལ་གྱི་སྣང་གྲགས་རིག་གསུམ་འདི་སྤུ་མ་བརྗེ་མདོག་མ་བསྒྱུར་བློས་མ་བཅོས་པར་ལྷ་སྔགས་ཡེ་ཤེས་ཀྱི་གོ་ཆོད་དགོས། གལ་སྲིད་ཐབས་བསྐྱེད་རིམ་གྱིས་སྣང་སྲིད་གཞིར་བཞེངས་ཀྱི་དཀྱིལ་འཁོར་དུ་བློས་བསྒོམས་ཏེ་རྩལ་སྦྱངས་བྱས་ཀྱང་ཆོག་གསུངས། སྒྱུ་འཕྲུལ་འདི་ཀུན་མཁྱེན་རོང་ཀློང་གཉིས་ཀས་ཨ་ཏིའི་མ་ཧཱ་དང་། བཀའ་སྡེ་ཟུར་བས་མ་ཧཱའི་ཨ་ཏིར་བཞེད། དེ་ལྟར་དབང་དང་རྒྱུད་བཤད་མན་ངག་གང་རུང་གིས་མངོན་སུམ་ཡེ་ཤེས་མྱོང་ཐོག་ཏུ་ཁེལ་བའི་གང་ཟག་གིས་ལྷ་བསྒོམ་པའི་བསྐྱེད་རྫོགས་ཟུང་འཇུག་འདི་ཀའི་སྟེང་དུ་སྲོག་སྡོམ་གཟེར་བཞིའི་མན་ངག་ཁྲིད་ཤེས་དགོས་པས། དེ་ནི་སྲོག་སྡོམ་གཟེར་བཞིའི་དམིགས་པའི་གནད་འགགས་སོགས་ནས། རྣམ་མཁྱེན་རྒྱ་མཚོར་རོ་གཅིག་ཤོག་ཅེས་པའི་བར་རྒྱུད་གསུམ་གྱི་ནང་ཚན་ལམ་རྒྱུད་དང་། ལྟ་སྒོམ་སྤྱོད་གསུམ་གྱི་ནང་ཚན་སྒོམ་པ། བསྐྱེད་རྫོགས་ཟུང་འཇུག་གི་སྐབས་འདིར་རྒྱས་པར་འཆད་ཤེས་པའི་རྟེན་འབྲེལ་ཞུ་ལགས། སྲོག་སྡོམ་གཟེར་བཞིའི་གནད་ཀྱང་རང་གི་ལུས་ངག་ཡིད་གསུམ་བྱ་བ་དང་བཅས་པའི་སྲོག་དང་། ལྷ་ཡེ་ཤེས་པའི་སྐུ་གསུང་ཐུགས་ཕྲིན་ལས་དང་བཅས་པའི་སྲོག་གཉིས་ལྷན་དུ་སྡོམ་པའི་གཟེར་བུ་ལྟ་བུ་ནི་ཏིང་ངེ་འཛིན་ལྷའི་གཟེར་སོགས་བཞི་ཡིན་ལ། དེའང་གནས་ཚུལ་མ་དག་པར་འདོད་ཚེ་དེ་གཉིས་ཐ་དད་ལྟ་བུར་སྣང་ཡང་། གནས་ཚུལ་དག་པར་འདོད་ཚེ་དོན་ལ་རང་གི་སྒོ་གསུམ་བྱ་བ་དང་བཅས་པ་གནས་ཚུལ་ལ་ཡེ་ནས་ལྷ་ཡེ་ཤེས་པའི་སྐུ་གསུང་ཐུགས་ཕྲིན་ལས་དང་བཅས་པར་གནས་རུང་། སྣང་ཚུལ་མ་དག་པའི་ངོར་འདི་ན་སྒོ་གསུམ་བྱ་བ་དང་བཅས་པ་སྐུ་གསུང་ཐུགས་ཕྲིན་ལས་དང་བཅས་པའི་སྒྲིབ་བྱེད་ཀྱི་དྲི་མ་ལྟར་ཤར་ཡོད་པ་ཡིན་པས། སྲོག་སྡོམ་གཟེར་བཞིའི་མན་ངག་འདིས། སྣང་ཚུལ་ལ་སྒྲིབ་པ་ལྟར་ཤར་བའི་སྒོ་གསུམ་བྱ་བ་དང་བཅས་པ་དག་ནས། གནས་ཚུལ་ཡེ་ཤེས་པའི་སྐུ་གསུང་ཐུགས་ཕྲིན་ལས་དང་བཅས་པ་མངོན་དུ་གྱུར་དགོས་པ་ཡིན་ནོ། །རྒྱས་པར་བཀྲལ་ན་རང་གཞུང་ལྟར་རོ། །གསུམ་པ་སྤྱོད་པ་སྤྲོས་བཅས་སྤྲོས་མེད་ཀྱིས་ལྟ་སྒོམ་བོགས་འདོན་ཚུལ་ལ། སྤྱིར་ཐབས་ལམ་བརྟུལ་ཞུགས་གྱི་སྤྱོད་པ་དང་། གྲོལ་ལམ་བག་ཡོད་ཀྱི་སྤྱོད་པ་གཉིས་ལས། དང་པོ་ནི་སྦྱོར་སྒྲོལ་སོགས་ཡིན་ལ། དེ་ལ་ནང་གསེས་ཀྱིས་སྤྲོས་བཅས་སྤྲོས་མེད་གཉིས་སུ་དབྱེ་ན། དངོས་རིགས་ལས་ཀྱི་ཕྱག་རྒྱ་བསྟེན་པའམ་དེ་ཡང་རྙིང་ལུགས་ལྟར་ཚོགས་སྒྲུབ་དང་འབྲེལ་བ་སྤྲོས་བཅས་དང་། སྟོང་གཟུགས་ཀྱི་ལྷ་མོ་སོགས་བརྟེན་པའམ། དངོས་རིགས་ལས་ཀྱི་ཕྱག་རྒྱ་བསྟེན་ཀྱང་། གསར་ལུགས་ལྟར་གཅིག་པུར་སྤྱོད་པ་གཤེགས་འགྲོ་བའི་སྤྲོས་མེད་ཀྱི་སྤྱོད་པ་ཡིན་ནོ། །འདི་གཉིས་ཀས་བསྐྱེད་རྐྱང་དང་མཚན་བཅས་ཀྱི་རྫོགས་རིམ་གཉིས་བོགས་འདོན་དགོས། གཉིས་པ་གྲོལ་ལམ་བག་ཡོད་ཀྱི་སྤྱོད་པ་ནི། ལྟ་བ་ཡས་བབས་དང་། སྤྱོད་པ་མས་འཛེགལྟ་བ་དཔའ་དགོས། སྤྱོད་པ་སྡར་དགོས་གསུངས་པ་ལྟར། ལྟ་བ་དག་མཉམ་ཆེན་པོ་ལ་གོམས་རུང་ལྟ་བའི་ཕྱོགས་སུ་སྤྱོད་པ་མ་ཤོར་བར་བྱས་ནས་ཉན་ཐོས་ཀྱི་འདུལ་ཁྲིམས་བྱང་སེམས་གྱི་བསླབ་པ་སོགས་ལ་ལེགས་པར་སློབ་པའོ། །འདི་ནི་གྲོལ་ལམ་བསྐྱེད་རྫོགས་ཟུང་འཇུག་སོགས་ཀྱི་བོགས་འདོན་ཡིན་ནོ། །དེས་ལམ་རྒྱུད་ལ་སྨིན་གྲོལ་གཉིས་དང་གྲོལ་བྱེད་གྱི་ལྟ་སྒོམ་སྤྱོད་གསུམ་དང་བཅས་པ་མདོ་ཙམ་སོང་། གསུམ་པ་གང་དུ་མཐར་ཕྱིན་པ་འབྲས་བུའི་རྒྱུད་ནི། མ་ཧཱ་ཡོ་གའི་ས་ལམ་རིག་འཛིན་རྣམ་པ་བཞིས་བསྒྲོད་དགོས་པས། འདི་ལ་འདོད་ཚུལ་གཉིས་ཏེ། བཀའ་སྡེ་ཟུར་བས་རིག་འཛིན་བཞི་ག་འཕགས་པ་སློབ་ལམ་ཁོ་ནར་བཞེད་པས། མཐོང་ལམ་དོན་གྱི་རྟོགས་པ་སྐྱེས་ཚེ་རྟོགས་པའི་རྩལ་ཤུགས་ཆུང་བ་དག་གིས་རྣམ་སྨིན་གྱི་ཕུང་པོ་སྦྱང་མ་ནུས་པ་རྣམ་སྨིན་རིག་འཛིན། དེ་ཚེ་ལ་མི་དབང་བར་འདས་དུས་འཆི་སྲིད་ཆོས་སྐུའི་འོད་གསལ་གྱི་སྟེང་ནས་ས་གཉིས་པའི་ཡེ་ཤེས་ལ་ན་འཕར་ནས་རྗེས་ཐོབ་ཕྱག་ཆེན་ལ་ལྡང་། རྟོགས་པ་རྩལ་ཤུགས་ཆེ་བས་རྣམ་སྨིན་གྱི་ཕུང་པོ་སྦྱངས་ནས་འོད་ལུས་སུ་གྱུར་པ་ལམ་མཆོག་ཡོངས་རྫོགས་ཚེ་དབང་རིག་འཛིན་དང་། སྒོམ་ལམ་ས་དགུ་ལ་ཕྱག་ཆེན་རིག་འཛིན། ས་བཅུའི་རྒྱུན་མཐའ་ལ་ལྷུན་གྲུབ་རིག་འཛིན་དུ་བཞེད། ཀུན་མཁྱེན་ཆེན་པོས། སོ་སྐྱེས་ནས་འཕགས་པ་མི་སློབ་པའི་བར་རིག་འཛིན་བཞི་བོས་བསྡུ་བ་ཡིན་པས། དཔེའི་འོད་གསལ་རྒྱུད་ལ་སྐྱེས་ནས་རྗེས་ཐོབ་སྒྱུ་ལུས་ཀྱི་ལྷ་སྐུར་ལྡང་བ་རྣམ་སྨིན་རིག་འཛིན། ས་དང་པོའི་ཡེ་ཤེས་རྒྱུད་ལ་སྐྱེས་ནས་རྗེས་ཐོབ་སློབ་པའི་ཟུང་འཇུག་གི་སྐུར་ལྡང་བ་ཚེ་དབང་རིག་འཛིན། ས་གཉིས་པ་ནས་རྒྱུན་མཐའ་མན་ཕྱག་ཆེན་རིག་འཛིན། མི་སློབ་པའི་འབྲས་བུ་དག་པ་གཉིས་ལྡན་གྱི་སངས་རྒྱས་ཁ་སྦྱོར་བདུན་ལྡན་མངོན་དུ་གྱུར་པ་ལྷུན་གྲུབ་རིག་འཛིན་དུ་བཞེད་པ་ཡིན་པས་འབྲས་རྒྱུད་དངོས་ནི་ཀུན་མཁྱེན་གྱི་ལུགས་ཀྱི་ལྷུན་གྲུབ་རིག་འཛིན་འདི་ལ་ངོས་འཛིན་དགོས་སོ། །ཞེས་པ་འདི་ཡང་དཔལ་མགོན་བླ་མ་དམ་པས་སྲོག་སྡོམ་གཟེར་བཞིའི་གནད་འགག་ཉིན་གཅིག་ལ་གསུངས་པའི་ཚེ་རྡོ་རྗེའི་མཆེད་པོ་རྣམས་ཀྱི་བཀའ་ནན་མ་ལྡོག་པ་དང་རང་གིས་ཀྱང་བརྗེད་དུ་ཕངས་ནས་ཟབ་གསང་གདམས་པའི་གནད་རྣམས་ཟིན་རིས་སུ་བྲི་མདོག་བྱས་པ་ཡིན་རུང་རྨོངས་པ་བདག་སྔོན་གྱི་སྦྱང་འཕྲོ་ཞན་ཅིང་ཚེ་འདིར་ཐོས་བསམ་སྒོམ་གསུམ་གྱི་སྐལ་བས་དབེན་པའི་སྟབས་ཀྱིས་ཚིག་དོན་ཐམས་ཅད་ལོག་ལམ་ཁོ་ནར་བཀྲལ་ཡོད་སྙམ་པས་ཤེས་ལྡན་དམ་པ་རྣམས་ནས་དཔེ་ངན་རྒྱུན་འབྱམས་སོགས་གཏན་ནས་མི་མཛད་པར་ཅིས་ཀྱང་བསྐུལ་ལོ། །དགེའོ། །དགེའོ། །དགེའོ། །༈ བདག་མདུན་ཐ་དད་ཅིང་འཇུག་པ་གཅིག་པ་ནི། བདག་དང་མདུན་བསྐྱེད་གཉིས་དབྱེར་མེད་པ་སྟོང་པར་སྦྱངས་པའི་ངང་ལས་བདག་མདུན་གཉིས་མེ་ལོང་གཅིག་ལ་གཉིས་ཤར་གྱི་ཚུལ་ཆོ་ག་གཅིག་གིས་དུས་གཅིག་ཏུ་བསྐྱེད་པ་དེ་ཡིན། བདག་མདུན་ཐ་མི་དད་ཅིང་འཇུག་པ་གཅིག་པ་ནི། ཐོག་མར་བདག་དང་མདུན་བསྐྱེད་གཉིས་དབྱེར་མེད་པ་སྟོང་པར་གྱུར་བའི་ངང་ལས་རྟེན་དང་བརྟེན་པའི་དཀྱིལ་འཁོར་གསལ་བཏབ་ལ་བསྟོད་པའི་མཇུག་ཏུ་རྩ་སྔགས་ལ་ཕཊཿཛ་བཏགས་པའི་རྐྱེན་གྱིས་དམ་ཚིག་གི་དཀྱིིལ་འཁོར་ལས་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་གོ་ས་ལོགས་སུ་ཕྱེ་ལ་མེ་རི་འདབ་འབྱར་གྱི་ཚུལ་དུ་བསྒོམ་པ་སྟེ། དེ་གཉིས་ཐ་དད་དང་ཐ་མི་དད་ཅེས་པ་ནི་རྣམ་པ་ཐ་དད་དང་ཐ་མི་དད་ལ་ཟེར་བ་ཡིན་གྱི་ངོ་བོ་ལ་ཟེར་བ་མིན་ཏེ། དེ་གཉིས་གང་ལྟར་བྱས་ཀྱང་ངོ་བོ་དབྱེར་མེད་དུ་བསྒོམ་དགོས་པའི་ཕྱིར་རོ། །འཇུག་པ་གཅིག་ཅེས་པ་ཆོ་ག་གཅིག་གིས་བསྐྱེད་པ་ལ་བྱའོ། །བདག་མདུན་ཐ་དད་འཇུག་པའང་ཐ་དད་ནི། ཐོག་མར་བདག་བསྐྱེད་རྫོགས་པར་བྱས་ནས། གདོད་མདུན་བསྐྱེད་རྫོགས་པར་བསྒོམ་པ་སྟེ་གོ་སླའོ། །དེ་གཉིས་སྔོན་དུ་སོང་ནས་གསལ་ཆ་ཀུན་སྣང་ཏིང་ངེ་འཛིན། གསལ་སྟོང་གཉིས་སུ་མེད་པའི་ཡེ་ཤེས་དེ་ཧཱུྃ་ལས་རྡོ་རྗེ་འཛིན་པ་ཞལ་གཅིག་ཕྱག་གཉིས། སློབ་དཔོན་སངས་རྒྱས་གཉིས་པས། སྙིང་རྗེ་མེད་ན་ཆོས་ཀྱི་རྩ་བ་རུལ། །རྒྱུ་ལས་འབྲས་བུ་གྲུབ་པའི་ཚུལ། །ཞེས། བྱ་རྒྱུད་རང་ལམ་ནས་མངོན་བྱང་ལྔའི་འབྲས་བུ་ཡེ་ཤེས་ལྔར་བྱང་ཆུབ་བོ། །ནང་རྒྱུད་ཀྱི་མངོན་བྱང་ལྔས་ཡེ་ཤེས་ལྔར་བྱང་ཆུབ་བོ། །དེ་གཉིས་འབྲས་བུ་ཐ་དད་མ་ཡིན་ཏེ། གདུལ་བྱ་རང་རང་གི་ངོར་དེ་ལྟར་མཛད་པའོ། ། བསྐྱེད་རིམ་ལ་སྐུ་མདོག་ཕྱག་མཚན་ངེས་ཅན་གསལ་དགོས་མི་དགོས་སོགས་ཀྱི་དྲིས་ལན་སྐོར།ཐུགས་དམ་སྐྱབས་ཡུལ་དང་བླ་མའི་རྣལ་འབྱོར་བསྐྱེད་རིམ་སོགས་ལ་སྐུ་མདོག་ཕྱག་མཚན་ངེས་ངེས་དག་དག་ཅན་གསལ་དགོས་མི་དགོས་དྲི་བ་མཛད་པའི་ལན་དུ་ཕུལ་བ། དེ་ཡང་སྤྱི་ཁྱབ་ལྟར་ན་དམིགས་པ་རྣོན་པོ་ནི་རྣལ་འབྱོར་བའི་མཚོན་ཆ་ཡིན་པས་ཇི་ལྟར་གསལ་བཞིན་བཟང་བར་བཞེད་པ་དང་། བྱེ་བྲག་ཏུ་ནི་བཀའ་གསར་རྙིང་གཉིས་ཀྱང་བཞེད་ཚུལ་ཅུང་མི་མཐུན་པར་ཡོད་དེ་གསར་མའི་ལུགས་ལ་ནི། དམིགས་པའི་རིགས་གང་ཡང་ཤིན་ཏུ་གསལ་བ་སྤྱན་གྱི་དཀར་ནག་དང་སྐུའི་བ་སྤུ་ཚུན་ཆད་གསལ་བ་ཞིག་མེད་ན་བསྐྱེད་རིམ་གྱི་གོ་མི་ཆོད་པར་འདོད། རྙིང་མའི་ལུགས་ལ་ནི་ལྷ་སྒོམ་པ་དང་རང་སེམས་མ་བཅོས་གནས་ལུགས་སྐྱོང་བ་གཉིས་ཀ་ཁྱད་མེད་པའི་ངང་ནས། ལྷ་སྒོམ་མཁན་སེམས་ཡིན། བསྒོམ་རྒྱུའི་ལྷ་ཡང་སེམས་ཀྱི་རང་མདངས་ཡིན། ལྷའི་དབྱིབས་མ་བསྒོམས་པར་སེམས་རང་བབས་སུ་རང་ངོ་ཤེས་ཐོག་ཏུ་འཇོག་པ་ཡང་ལྷ་ཡེ་ཤེས་སེམས་དཔའ་ཡང་དག་པ་ཆོས་སྐུའི་ངོ་བོ་ཡིན། དེའི་ཕྱིར་ཐ་མལ་རྣམ་རྟོག་འཁྲུལ་རྗེས་འབྲངས་ན་ནི་བསྐྱེད་རྫོགས་གང་གི་ཡང་གོ་མི་ཆོད། འཁྲུལ་བ་ཨ་འཐས་ཀྱི་དབང་དུ་མ་ཤོར་བ་རིག་པ་ངོས་ཟིན་ན་ལྷ་གསལ་ཀྱང་ཆོག་ལ་མ་གསལ་ཀྱང་ཆོག་སྟེ། གནས་ལུགས་ཀྱི་རང་ངོ་ལ་བསྐྱེད་རྫོགས་གཉིས་ཀ་ཡེ་ནས་ཟུང་འཇུག་ཏུ་ལྷུན་གྱིས་གྲུབ་པ་ཡིན། ལར་ཡང་འགྲོ་བ་ཀུན་གྱི་ལུས་ངག་ཡིད་གསུམ་དང་ཕུང་པོ་ཁམས་དང་སྐྱེ་མཆེད་མཐའ་དག་ལྷ་དང་སྔགས་ཀྱི་རང་བཞིན་དུ་གདོད་མ་ནས་ཡིན་པའི་ཡིན་ལུགས་མ་ཤེས་པས་འཁྲུལ་ཞིང་འཁོར་བར་འཁྱམས་པ་ཡིན་ལ། དེ་ཡིན་པའི་ཡིན་ཚུལ་ངོ་ཤེས་པར་བྱ་བའི་ཐབས་སུ་སྨིན་བྱེད་ཀྱི་དབང་བསྐུར། གྲོལ་བྱེད་ཀྱི་བསྐྱེད་རྫོགས་སྒོམ་པ་ཡིན་མོད་ཀྱི། ཡེ་ནས་ཡིན་པ་ལ་ཡིན་པར་ངོ་ཤེས་ནས་བསྐྱེད་པ་དེ་ལ་བསྐྱེད་རིམ་ཟེར་བ་ཡིན་གྱི། མ་ཡིན་པ་ལ་ཡིན་པར་བསྒོམས་ཀྱང་དོན་མི་འགྲུབ་སྟེ། དཔེར་ན་དངུལ་ལ་དངུལ་དུ་ཤེས་ན་དངུལ་གྱི་དོན་འགྲུབ་ལ། སོལ་ནག་ཞིག་ལ་དངུལ་དུ་བསྒོམས་ན་དོན་མི་འགྲུབ་པ་དང་། ཡིད་བཞིན་ནོར་ལ་ནོར་བུར་ཤེས་ནས་གསོལ་བ་བཏབ་ན་དངོས་གྲུབ་འབྱུང་གི། རྡོ་ཕལ་བ་ཞིག་ལ་ནོར་བུར་བསྒོམ་ཞིང་གསོལ་བ་བཏབ་ཀྱང་དངོས་གྲུབ་མི་འབྱུང་བ་དང་མཚུངས་སོ། །དཔེར་ན་བསྐྱེད་རིམ་དང་ཁ་ཏོན་ཆོས་སྤྱོད་སོགས་གང་ལ་ཡང་ལྷ་ཡི་དབྱིབས་དང་རྣམ་འགྱུར་ཡིད་ལ་ཤར་ཐོག་ཏུ་སེམས་མ་ཡེངས་ཙམ་གྱི་ངང་ནས་ཁ་ཏོན་བཟླས་བརྗོད་བྱ། ལྷ་སྐུ་མ་གསལ་ན་ཡང་ཅིས་ཀྱང་གསལ་དགོས་སྙམ་པའི་ཞེ་འདོད་དང་འཛིན་རྟོག་བསྐྱེད་མི་དགོས་ཏེ། དོན་རིག་པ་མ་ཡེངས་པའི་ངང་ནས་དགེ་སྦྱོར་གང་ཡང་བྱས་པས་ཆོག །དོན་དམ་པར་ལྷ་དམ་ཚིག་ཡེ་ཤེས་སམ་ཆོས་སྐུ་དང་གཟུགས་སྐུ་ཞེས་མིང་ཅི་བཏགས་ཀྱང་དོན་གྱི་ངོ་བོ་རང་རིག་འདི་ལས་གཞན་མེད་དེ། ཨོ་རྒྱན་ཆེན་པོས། རྟགས་ཀྱི་སངས་རྒྱས་ལོངས་སྤྱོད་རྫོགས་སྐུ་དང་། །དོན་གྱི་སངས་རྒྱས་ཆོས་སྐུ་གང་ཡིན་པ། །ཆོས་ཉིད་རིག་པ་མངོན་སུམ་འདི་ཡིན་པས། །སངས་རྒྱས་གཞན་ནས་མ་འཚོལ་རྗེ་འབངས་རྣམས། །ཞེས་གསུངས་སོ། །དེ་བཞིན་དུ་བླ་མའི་རྣལ་འབྱོར་ཡང་། ཕྱི་རོལ་གྱི་བླ་མ་གཟུགས་དབྱིབས་སུ་སྣང་བ་ནི་མཚོན་བྱེད་དཔེའི་བླ་མ་ཙམ་ཡིན་མོད་ཀྱི། རང་རིག་རང་ངོ་ཤེས་པ་ནི་མཚོན་བྱ་དོན་གྱི་བླ་མ་ཆོས་སྐུ་དངོས་ཡིན་པས། གཙོ་བོ་རང་རིག་མ་ཡེངས་ན་བླ་མ་དང་འདུ་འབྲལ་མེད་པ་ཡིན་ཏེ། གླིང་རས་ཀྱི་ཞལ་ནས། བླ་མ་རང་སེམས་དབྱེར་མེད་ལ། །གཟུགས་སྐུར་འཛིན་པ་སྟོར་ནས་ཐལ། །ཞེས་གསུངས་པ་ལྟར་ཡིན་ཞིང་། སྐུ་མདོག་ཕྱག་མཚན་མ་བསྒོམས་ཀྱང་བླ་མ་ཡིད་ལ་དྲན་ཙམ་ནས་རང་སེམས་བླ་མ་དང་མཇལ་ཚར་བ་ཡིན། སླར་བཟོ་བཅོས་མི་དགོས། ཡང་བླ་མ་སངས་རྒྱས་ཆོས་སྐུ་ཡེ་ནས་ཡིན་པར་ཐག་མི་ཆོད་པར་གདོས་བཅས་ཤ་ཁྲག་གི་སྐུར་བསྒོམས་ན་ལོག་རྟོག་ཡིན། བྱིན་རླབས་མི་འབྱུང་། དེང་སང་གི་གང་ཟག་རྣམས་བླ་མ་ལ་སངས་རྒྱས་སུ་མ་མཐོང་བར་མིའི་འདུ་ཤེས་བྱས་པའི་སྐྱོན་གྱིས་བྱིན་རླབས་མི་འཇུགབྱིན་རླབས་མ་ཞུགས་པས་ཉམས་ལེན་རྒྱུད་ལ་མི་སྐྱེ། དེ་མ་སྐྱེས་པས་གྲུབ་པ་ཐོབ་དུས་མེད་པ་ཡིན་ཏེ། འབྲི་གུང་སྐྱོབ་པ་རིན་པོ་ཆེས། བླ་མའི་བྱིན་རླབས་མ་ཞུགས་ན། །ཇི་ལྟར་བྱས་ཀྱང་བློས་བྱས་ཡིན། །ཞེས་གསུངས་པ་ལྟར། བླ་མ་མི་ཐ་མལ་གྱི་འདུ་ཤེས་མ་ཡིན་པར་སངས་རྒྱས་སུ་ཐག་ཆོད་དགོས་པས། དེའི་ཕྱིར་བླ་སྒྲུབ་ཐམས་ཅད་དུ་བླ་མ་རྡོ་རྗེ་འཆང་ངམ་པདྨ་འབྱུང་གནས་སོགས་སུ་བསྒོམ་ཚུལ་གསུངས་པ་དེ་ཡང་ཐ་མལ་གྱི་འདུ་ཤེས་སྤང་ཕྱིར་ཡིན་མོད་ཀྱི། དོན་ལ་རྡོ་རྗེ་འཆང་ངམ་པདྨ་འབྱུང་གནས་སོགས་སངས་རྒྱས་ཀྱི་མཚན་དང་ཆ་ལུགས་ཅི་ལྟ་བུར་བསྟན་ཀྱང་རང་གི་ངོ་བོ་རྩ་བའི་བླ་མ་ཉིད་ལས་གཞན་མ་ཡིན་པར་གོ་དགོས་པ་ལགས། མིག་ཡུལ་དུ་འཆར་བའི་ཐིག་ལེའི་རྣམ་པ་གྱ་གྱུར་འཆར་བ་དེ་ལ་ཆོས་ལུགས་གཞན་དང་ཕྱག་ཆེན་སོགས་ལས་ནི་མ་གསུང་ལ། དུས་འཁོར་སྦྱོར་དྲུག་པ་རྣམས་སྟོང་གཟུགས་ཀྱི་རེ་ཁ་ནག་པོ་ཞེས་ཟེར། རྫོགས་པ་ཆེན་པོའི་སྙིང་ཐིག་རྣམས་སུ་ནི་འདི་ཡི་དོན་དང་ཉམས་སུ་ལེན་ཐབས་ཁོ་ན་ཡིན་པ་སྟེ། འདི་ཡི་མིང་རིག་གདངས་རྡོ་རྗེ་ལུ་གུ་རྒྱུད་ཅེས་བྱ་ཞིང་། རང་གི་རིག་པའི་གདངས་དབང་པོའི་ཡུལ་དུ་འཆར་བ་ཡིན་ཏེ། དཔེར་ན་ཉི་མ་ཡོད་སར་ཆུ་ཕོར་བ་གང་བཞག་ན་དེའི་འོད་གདངས་ཐོག་གི་གདུང་མཚམས་ལ་སྐྱ་འཁྱིལ་ལེ་འཆར་ཞིང་། ཆུ་ཕོར་བསྒུལ་ན་དེ་ཡང་འགུལ། ཆུ་མ་འགུལ་ན་དེ་ཡང་མི་འགུལ་བ་དང་མཚུངས། རྒྱུད་ལས། རིག་པ་རྡོ་རྗེ་ལུ་གུ་རྒྱུད། །ཕྲ་ཞིང་རྟ་རྔའི་མདུད་པ་འདྲ། །བར་བར་ཐིག་ལེ་ཡུངས་འབྲུ་ཙམ། །དེ་ཡང་འགྲོ་འོང་དག་དང་བཅས། །ལུ་གུ་རྒྱུད་ཀྱི་མཚན་ཉིད་དོ། །ཞེས་གསུངས། རྫོགས་ཆེན་འོད་གསལ་ཐོད་རྒལ་གྱི་ཉམས་ལེན་ཀུན་ཀྱང་གཙོ་བོ་འདི་བརྟན་དགོས། འདིས་ནི་རང་རིག་འདི་ཡེངས་ཤོར་མ་ཤོར་གྱི་ཚོད་བཟུང་བ་ཡིན་ཏེ། སེམས་མ་ཡེངས་ན་ཁོ་ཡང་ལྷམ་མེར་སྡོད་ཅིང་སེམས་འགྱུ་ན་ཁོ་རང་ཡང་འགྲོ་བས་ཁོ་འགྲོ་བའི་རྗེས་སུ་མ་འབྲང་བར། མིག་དང་སེམས་གཉིས་ཀ་རང་ཚོད་བཟུང་དགོས་པ་ཡིན། རྒྱུད་སེང་གེ་རྩལ་རྫོགས་ལས། སངས་རྒྱས་ཐམས་ཅད་ཀྱི་སྐུ་མཐོང་བར་འདོད་ན་རིག་པ་རྡོ་རྗེ་ལུ་གུ་རྒྱུད་ལ་ལྟོས་ཤིགསངས་རྒྱས་ཐམས་ཅད་ཀྱི་ཐུགས་དང་དབྱེར་མེད་པར་འདོད་ན་རིག་པ་རྡོ་རྗེ་ལུ་གུ་རྒྱུད་དང་མ་བྲལ་བར་གྱིས་ཤིགཅེས་སོགས་རྒྱས་པར་གསུངས་ཡོད་པས་འགྲོ་འདུག་སྤྱོད་ལམ་ཅི་བྱེད་ཀྱང་རང་ཚོད་ཟིན་ཙམ་ལ་རྒྱུན་དུ་འབད་པ་ནི་ཉམས་ལེན་ཐམས་ཅད་ཀྱི་སྙིང་པོ་ཡིན་པས་ཐུགས་ལ་བཞགས་པར་ཞུ། ཐུགས་དམ་སྐོར་གྱི་ཆར་སྤྱིར་ནི། སྒོམ་ཕྱོགས་ཀྱི་ཉམས་ལེན་འདི་ལ་ལན་གཅིག་བོགས་བསྐྱེད་ཐོན་ཐུབ་པ་ཞིག་དང་། མཚན་མོའི་རྨི་ལམ་དང་འོད་གསལ་སོགས་ཟིན་ཐུབ་པ་ཞིག་བྱེད་རྒྱུ་ཡིན་ན། གནས་སྐབས་ཚེ་འདིའི་བྱ་བྱེད་དང་གཏན་ནས་འདྲེས་མི་དགོས་པར་མི་མེད་ལུང་སྟོང་ཁོ་ན་འགྲིམ་ཞིང་དཀའ་སྤྱད་དང་སྨྲ་བཅད། འདག་སྦྱར་སོགས་ལ་མི་ཚེ་གཅིག་དྲིལ་ཞིག་ཐུབ་ན། བོགས་སྐྱེད་མེད་ཐབས་མེད་ལ། ངེད་རང་རྣམས་ལྟོ་གོས་དང་བྱ་བྱེད་གཞན་དང་བསྒྲགས་ཤིང་མིའི་ཁ་ཡ་བྱེད་དགོས་མཁན་ལ་ཐུགས་དམ་ཀྱི་བོགས་དང་རྩལ་ཐོན་པ་ནམ་ཡང་དཀའ་ལ། འོན་ཀྱང་དུས་དང་རྣམ་པ་ཀུན་ཏུ། འགྲོ་འདུག་ཟ་ཉལ་སྨྲ་བརྗོད་སོགས་དང་ཕྱག་བསྐོར་ཁ་ཏོན་བཟླས་བརྗོད་ཅི་དང་ཅི་བྱེད་པའི་སྐབས་ཐམས་ཅད་དུ། རིག་པའི་རང་ངོ་དེ་ཉིད་རྗེན་ཅེར་རེ་བར་ངོས་ཟིན་པ་ཞིག་ལ་གཅིག་ཏུ་དྲིལ་ཞིང་། གནས་སམ། འགྱུའམ། བདེ་སྡུག་བཟང་ངན་ལ་སོགས་གང་དང་གང་ལྟར་འཆར་ཡང་། དེ་ཚེ་དེ་ལ་བརྟགས་དཔྱད་དང་རྗེས་འབྲང་དགག་སྒྲུབ་སོགས་གཏན་ནས་མི་བྱ་བར། དེ་དག་ངོས་ཟིན་མཁན་གྱི་རིག་པ་རྗེན་པ་ཁོ་རང་ལ་སྒོམ་གྱི་སྙིང་པོ་བྱ་ཞིང་གལ་ཏེ་རྣམ་རྟོག་འོག་འགྱུ་ལ་འབྱམས་སོང་ནའང་། སླར་ངོས་ཟིན་ཙ་ན། ཟིན་པ་དེ་ཀའི་ཐོག་ཏུ་རང་སར་བཞག་པ་ལས། དགག་སྒྲུབ་གཞན་མི་དགོས། ཡེངས་སོང་བ་མ་ཚོར་བ་ལྟ་བུ་བྱུང་ན་བྱིང་སྐྱོན་ཡིན་པས་རིག་པ་གསལ་ངར་བཏོན། ཡང་གཞན་གྱི་ལབ་བརྗོད་སོགས་ཀྱི་རྐྱེན་གྱིས་ཡེངས་སོང་ན་དྲན་རིག་ཤུགས་ཆེ་རུ་བཏང་ནས་རང་ཚོད་ཐུབ་པར་བྱ། མདོར་ན་རིག་པ་རང་ངོ་ཤེས་རུང་གི་ངང་ལས་བྱ་བྱེད་ཐམས་ཅད་མ་བརྗེད་མ་འཁྲུལ་བ་ཞིག་དགོས། དེ་མ་ཡིན་པར་བྱ་བྱེད་དང་སྨྲ་བརྗོད་ཀྱི་སྐབས་སུ་དྲན་རིག་བསྐུར། དྲན་རིག་སྐྱོང་དུས་བྱ་བྱེད་གཞན་མི་ལྕོགས་ན་སྒོམ་དེ་ནམ་ཡང་ལྷག་མཐོང་དངོས་ཀྱི་རང་ངོ་མ་མཐོང་བར་ཞི་གནས་ལ་སོང་བའི་རྟགས་ཡིན་ལ། ལར་ཕྱག་ཆེན་ལ་སྒོམ་གྱི་དངོས་གཞི་དྲན་པ་ཁོ་ན་ལ་མཛད་པ་དང་། རྫོགས་ཆེན་ལ་རིག་མ་རིག་ཁོ་ན་ལ་སྒོམ་ཡིན་མིན་གྱི་སོ་མཚམས་ཕྱེ་བ་སྟེ། དེ་གཉིས་ཀྱི་ཁྱད་པར་ནི་དྲན་པ་སྐྱོང་བ་དེ་ལ་བཅོས་མའི་ཅུང་ཟད་གྲིམ་ཉམས་གཅིག་དགོས་ཤིང་ཡེངས་ཀྱི་དོགས་པས་སེམས་ཁྲལ་ལྟ་བུ་བྱེད་མཁན་དེ་ཀ་རྣམ་རྟོག་ཡིན། རྫོགས་ཆེན་ལུགས་ཀྱི་གང་སྣང་ཐམས་ཅད་ལ་དགག་སྒྲུབ་མེད་པའི་ངང་ལས་ཤར་བ་ངོ་ཤེས་མཁན་དེ་ལ་རང་རིག་ཟེར་བ་ཡིན། རང་རིག་དེ་དང་མ་བྲལ་བ་གཅིག་པུས་ཆོག་པ་མ་གཏོགས་ཡེངས་ཀྱི་དོགས་པའམ། དྲན་པ་ཆེད་དུ་བཟུང་མི་དགོས་པར་རང་ངོ་རིག་ན་རྣམ་རྟོག་ཐམས་ཅད་སྒོམ་ཡིན། རང་ངོ་མ་རིག་ན་གནས་པ་བརྟན་པོ་འཁོར་ཡུག་ཏུ་སོང་ཡང་སྒོམ་མིན་ཏེ། ཉམས་ཀྱི་བྱེ་བྲག་ཙམ་ཡིན་ནོ། །དེས་ན་ཐུགས་དམ་གྱི་སྙིང་པོ་ནི་རང་རིག་རང་ངོ་ཤེས་པ་གཅིག་པུ་ལ་འབད་འཚལ་ཞིང་། བཟླས་བརྗོད་ནི་དེ་སྔ་ཕན་ཆད་གང་མཛད་ཡོད་ན་ད་རུང་ཡང་དེ་ཀ་ལ་དྲིལ་བ་ལེགས་ཏེ། ཡེ་ཤེས་ལྷ་ཐམས་ཅད་དོན་ལ་དབྱེར་མེད་ཡིན་ཚེ། སྤང་ལེན་འདམ་ཁ་མང་པོ་གཏན་ནས་མི་དགོས། ལྷ་གཅིག་འགྲུབ་ན་ཀུན་འགྲུབ་པར་མདོ་རྒྱུད་ཐམས་ཅད་མཐུན་པར་གསུངས་སོ། །སླད་དུའང་རང་གི་གེགས་སོགས་ལ་སླེབས་ཚེ་ཡང་། འཇིག་རྟེན་པ་ཞིག་ཡིན་ན་རིམ་གྲོ་དང་ཚེ་སྒྲུབ་སོགས་ཐབས་གཞན་དགོས་མོད་ཀྱང་། སྤྱིར་ཆོས་པ་དང་ཁྱད་པར་སྒོམ་ཅན་ལ་གེགས་དང་སྲི་ངན་སོགས་ཀྱིས་གཟབ་ཆའི་རྣམ་རྟོག་ལར་ནས་མི་སྐྱེ་སྟེ། ནམ་ཡང་འཆི་བ་མ་གཏོགས་འགྲོ་ས་མེད་པ་ཐག་ཆོད། འཆི་བར་ལོ་ཟླ་ཞག་རེ་སོང་བཞིན་ཐག་ཉེ་རུ་འགྲོ་བར་ནི་ཤེས། ཤི་བ་ནི་གེགས་ཆུང་སྟེ། འཁོར་བར་གཏན་འཁྱམས་སུ་གྱུར་པ་འདི་ལ་ཕན་ཐབས་དང་ཐར་ཐབས་ནི། དགེ་སྦྱོར་ལས་ལྷག་པ་གང་ཡང་མ་མཆིས་པ་ལ་བསམས་ནས། དོ་ནུབ་རང་འཆི་ནད་ཕོག་བྱུང་ནའང་། ཐུགས་དམ་བྱེད་པའི་འཕྲོ་ལ་འཆི་ཐུབ་ན་དེ་ཀ་ཡིན། གེགས་དང་ལོ་ཚད་སོགས་ལ་མ་ལྟོས་པར་ན་སོ་རྒན་དུ་སོང་བཞིན་དགེ་སྦྱོར་ལ་བརྩོན་འགྲུས་ཆེ་རུ་བཏང་བ་ལ་མི་ཚེ་འཁྱོལ་དགོས་པ་མ་གཏོགས། སྐུ་རིམ་དང་ཐབས་ལ་རེ་མི་དགོས་པས་དེ་ལྟར་ཐུགས་ལ་བཞག་པར་ཞུ་ཞིང་། སྤྱིར་ཡང་དེང་སང་གི་ཆོས་པ་དང་བླ་མའི་རིགས་བན་བཙུན་རྟོགས་ལྡན་སོགས་ལས་ཕལ་ཆེར་ཞིག་ཚེ་སྟོད་ལ་དཀའ་སྤྱད་དང་སྙིང་རུས་མཚམས་སྒྲུབ་བཅད་རྒྱ། དགེ་སྦྱོར་དམ་བཅའ་སོགས་དགའ་རབ་བྱས་ཀྱང་། ཚེ་སྨད་རྒས་ཁ་ཤི་ཁར་སོང་བཞིན་ཏུ་དེ་བསྐྱུར། བསྐྱར་ནས་གྲོང་ཆོག་དང་གཞན་གྱི་མགོ་དཔོན་བྱེད་ཅིང་། དཀོར་ཟས་ལ་བག་མེད་དུ་སྤྱོད་པ་དང་། ཁ་ནས་བདག་དང་པོ་དེ་འདྲ་བྱས་པ་ཡིན་ཏེ། ད་ནི་རྒས་ནས་ལུས་གནད་མི་ཁྱག་འདུག་ཟེར་བ་ཚོ་རང་གིས་རང་བསླུས་པ་ཡིན་མོད་ཚེ་ཕྱི་མའི་དོན་བསྒྲུབ་པ་ལ་གནད་མ་ཁྱག་ཟེར་བ་དེ་ནི་སེམས་གནད་མ་ཁྱག་པ་ལོས་ཡིན། ཆོས་ཀྱི་དཀའ་བ་སྤྱད་ནས་ཤི་ནུས་ན། ཚེ་རབས་ཐམས་ཅད་ཀྱི་སྡིག་སྒྲིབ་དག་འགྲོ་བས་འགྱོད་རྒྱུ་ཅི་ཡོད། དེ་ལྟ་བུའི་གནད་གོ་མཁན་དེང་སང་གར་ཡང་དཀོན་པར་སྣང་བས་དེས་ན་རྒྱུ་མཚན་འདི་རྣམས་སྙིང་གཏམ་གྱི་གདམས་ངག་ཟབ་ཤོས་ཡིན་པས་དགོངས་པའི་དབྱིངས་སུ་ནན་འཇོག་མཁྱེན་མཁྱེན། གཞན་ཡང་འདུས་བྱས་ཀྱི་དགེ་རྩར་འཇུག་པ་ཐམས་ཅད་ཀྱང་རྒྱུ་བསོད་ནམས་ཀྱི་ཚོགས་རྫོགས་པ་ཁམས་ཆེ་མོད་ཀྱང་། དེང་སང་གི་ཆོས་པ་ཐམས་ཅད་ཤ་ཆང་ལ་མི་བརྟེན་མཁན་མེད་ཚུལ་དང་། ཁྱད་པར་ཤི་གསོན་ཀུན་གྱི་དགེ་རྩ་ཅི་བྱེད་ཀྱང་སྲོག་གཅོད་ཁོ་ན་བྱེད་དགོས་པ་འདི་འདྲ་དང་། ཆང་ཚོང་ལ་འཇུག་པ་སོགས་དར་བ་འདི་འདྲ་མདོ་རྒྱུད་ཐམས་ཅད་ནས་བཟང་པོར་མ་གསུངས་ཏེ། བཅོམ་ལྡན་འདས་ཀྱིས་མཆོད་སྦྱིན་བྱེད་པ་རྣམས་ཀྱི་ནང་ནས་ཆང་གི་སྦྱིན་པ་དང་། ཤའི་སྦྱིན་པ་དང་། མཚོན་ཆའི་སྦྱིན་པ་དང་། དུག་གི་སྦྱིན་པ་དང་། གཞན་གྱི་ནོར་ལ་རྐུ་ཕྲོག་བྱས་ནས་སྦྱིན་པ་བྱས་པ་རྣམས་ནི་དམྱལ་བར་སྐྱེ་བའི་རྒྱུ་ཁོ་ནར་གསུངས་པས། དེས་ན་དགེ་རྩ་ཆེ་ཆུང་ཅི་བྱེད་ཀྱང་སྲོག་གཅོད་ལ་སོགས་སྡིག་པ་དང་འདྲེས་མི་དགོས་པ་ཞིག་རང་གལ་ཆེ་བ་ཡིན། དེ་འདྲར་ཐུགས་ལ་འཇོག་པར་ཞུ། ཐུགས་དམ་གྱི་ཆ་ཐམས་ཅད་ལ་གཞན་ཐ་མལ་གྱི་ཤེས་པ་རྗེན་པ་རང་བབས་ཀྱི་ངང་ནས། གང་ཤར་ཐམས་ཅད་རང་ངོ་རིག་པར་བྱ་བ་འདི་ཁོ་ན་ལ་གཅིག་དྲིལ་མཛད་པ་དང་། མཚན་མོའི་སྐབས་སོགས་སུ་རྨི་ལམ་ཟིན་ཞིང་རང་དབང་འདུག་པར་བྱུང་ན་ནི་དེ་ཡང་རང་རིག་གིས་སླེབས་པ་ཞིག་གལ་ཆེ་ཞིང་། རྨི་ལམ་མ་ཟིན་ན་ཡང་གཉིད་དུ་འགྲོ་ཁར་རྟོག་པ་གཞན་གྱིས་བར་མ་ཆོད་པར་རང་ངོ་རིག་ལ་གཉིད་དུ་ལོགནམ་སད་སད་ལ་རང་རིག་དེ་ཉིད་རང་འཕྲོ་མཐུད། ནངས་པར་ལངས་པའི་དུས་སུ་ཐོག་མར་ཡང་རྣམ་རྟོག་ཕལ་བའི་མདུན་མི་བསུ་བར་རིག་པ་ངོ་ཤེས་པ་རང་ལ་འབུང་བར་བྱ། འདི་ལྟ་བུ་ལ་རྒྱུན་དུ་འབད་ན་འཆི་ཁར་ཡང་བར་དོའི་གདམས་པའི་གནད་ཀྱང་འདི་ལ་འདུས་ཤིང་། གཉིད་དང་འཆི་བ་གཉིས་ཐིམ་ཚན་ཆེ་ཆུང་མ་གཏོགས་གཞན་གཅིག་སྟེ། དེས་ན་རྣམ་རྟོག་ན་ཚ་སྡུག་བསྔལ་འཆི་བ་སོགས་ཐམས་ཅད་རིག་པས་སླེབ་པ་རང་མཛད་པར་ཞུ། ཤ་ཆང་སོགས་སྤང་བ་ནི་གལ་ཤིན་ཏུ་ཆེ། སྤྱིར་གསང་སྔགས་ལ་ཤ་ཆང་འདོད་ཡོན་སོགས་མི་སྤང་བར་བཤད་པ་དེ་ནི་རྣལ་འབྱོར་བ་རྟོགས་པ་མངོན་དུ་གྱུར་པ་ཕྱོགས་ལས་རྣམ་རྒྱལ་གྱི་སྤྱོད་པ་ལམ་དུ་ལྷོང་ཐུབ་པ་རྣམས་ལ་དགོངས་པ་ཡིན་ཏེ། སློབ་དཔོན་པདྨ། ཏེ་ལོ་པ་དང་། བིཪྺ་པ་སོགས་ཉིན་གཅིག་ལ་ཆང་ཚོང་ལྔ་བརྒྱའི་ཆང་ཐམས་ཅད་བཞེས་ནས་ཆང་རིན་ལ་ཉི་མ་བཙོན་དུ་བཟུང་སྟེ་བསྲིང་དུ་བཅུག་པའི་ལོ་རྒྱུས་འདྲ་བར་ཆང་གིས་བཟི་བ་ལ་སོགས་ནུས་པའི་སྐྱོན་ཐམས་ཅད་ཟིལ་གྱིས་གནོན་ཐུབ་པའི་གྲུབ་ཐོབ་རྣམས་མ་གཏོག་གང་ཟག་ལས་དང་པོ་བས་ཤ་ཆང་ལ་བག་མེད་དུ་སྤྱོད་པ་ནི་སྔགས་ཀྱི་ལྟུང་བ་ཕོག་པར་གསུངས་ལ། ཚོགས་ཀྱི་འཁོར་ལོ་ཡང་དངོས་གཙང་ཚུལ་ལྡན་ཞིག་བྱེད་པ་པོ་ཡང་རྣལ་འབྱོར་ཕོ་མོ་གྲུབ་པ་ཐོབ་པ་ཤ་སྟག་མ་གཏོགས་ཕལ་བས་མི་འོང་ཞིང་། ཚོགས་ཀྱི་ཡོ་བྱད་ཀྱང་གསེར་སྲང་བཅོ་བརྒྱད་ཀྱི་རིན་ཐང་ཡན་ཆད་མ་གཏོགས་དེ་ལས་ཞན་པས་ནི་ཚོགས་འཁོར་མི་རུང་བར་གསུངས་ཀྱང་། དེང་སང་འོ་སྐོལ་རྣམས་ཀྱིས་འགྲུབ་པའི་ཡུལ་མ་ཡིན་ཏེ། ད་ལྟ་ཆོ་ག་དང་དབང་སྐུར་ལ་སོགས་པའི་སྐབས་སུ་བརྡ་ཙམ་བྱེད་པ་འདི་ལ་ནི་ཚོགས་ཀྱི་མཆོད་པ་ཞེས་བྱ་བ་ཡིན་པས་དཀྱིལ་འཁོར་གྱི་ལྷ་ལ་ཕུལ་བའི་ལྷག་མ་སྒྲུབ་པ་པོ་རྣམས་ཀྱིས་དངོས་གྲུབ་ཀྱི་རྫས་ཙམ་དུ་བླང་བ་ཡིན་ཏེ། དེས་ན་དེང་སང་གི་ཆོས་པ་རྣམས་ཀྱི་སྤྱོད་འགྲོས་དང་བྱ་བྱེད་གང་ས་ཅི་ཐད་ནས་མདོ་སྔགས་ཀྱི་ཆོས་ལུགས་གང་དང་ཡང་མཐུན་པ་ཞིག་བཀའ་གསར་རྙིང་སུ་ལའང་མི་རྙེད་པར་འདུག་ཀྱང་གོ་མཁན་དཀོན་པ་དང་། དགེ་བ་ཅི་དང་ཅི་བྱེད་ཀྱང་སྲོག་བཅད་སོགས་སྡིག་པ་ཁོ་ན་ལ་བརྟེན་དགོས་པ་འདི་ལྟ་བུ་དང་། གསང་སྔགས་ལ་ཁག་བཀལ་ནས་རྩིང་སྤྱོད་དང་འཆོལ་སྤྱོད་དང་ཆོས་མིན་འབའ་ཞིག་དར་བ་འདིས་འཕྲལ་ཕུག་རང་གཞན་གཉིས་ཀ་ཕུང་བའི་རྒྱུ་ཁོ་ནར་འདུག་པས། དེས་ན་རང་ཉིད་ཀྱི་ཆོས་ཁྲིམས་རང་གིས་བྱས་ནས་རང་རྒྱུད་འདུལ་བ་ཁོ་ན་གལ་ཆེ་ཚུལ་དགོངས་པར་བཅག་པར་ཞུ། བྱ་བ་ཐམས་ཅད་ལྷ་འདྲེའི་ཆོ་འཕྲུལ་ལྟ་བུ་བྱུང་དུས་ཉམས་ལེན་བོགས་འདོན་ལ་གང་ཁེབ་ཆེ་གསུངས་པ་དེ་ལ། སྤྱིར་འཇིག་རྟེན་ཕལ་བ་དང་གང་ཟག་ཐུན་མོང་ཀུན་གྱི་སྣང་ངོར་ནི་སྣང་སྲིད་ཀྱི་ལྷ་འདྲེ་ཕན་གནོད་བཟང་ངན་ཐམས་ཅད་ཀུན་རྫོབ་རྒྱུ་འབྲས་རྟེན་འབྲེལ་བསླུ་མེད་ཡིན་པས་རྒྱུ་འབྲས་ཁྱད་དུ་གསད་མི་རུང་། སྤྱིར་ལྷ་འདྲེ་གདོན་བགེགས་ཐམས་ཅད་ཕ་མར་ཤེས་པའི་བྱམས་སྙིང་རྗེ་བསྒོམ་ཞིང་། གསུར་བསྔོ་དང་སྒྱུ་ལུས་མཆོད་སྦྱིན་སོགས་ཀྱིས་ཚིམ་པར་བྱས་ལ་གནས་སྐབས་མཐར་ཐུག་ཕན་བདེའི་གོ་འཕང་ཐོབ་ཕྱིར་སྨོན་ལམ་བཟང་པོ་བཏབ་པ་འདི་ནི་ཤིན་ཏུ་ཟབ་ཅིང་དགེ་ཚོགས་ཆེ་བ་ལགས། ཡང་དོན་དམ་པའི་ངོ་བོར་ནི། ལྷ་འདྲེའི་ཆོ་འཕྲུལ་ཙམ་དུ་མ་ཟད་སྣང་སྲིད་འཁོར་འདས་ཐམས་ཅད་རང་སེམས་ཁོ་ནའི་ཆོ་འཕྲུལ་ལས་མ་འདས་པས་སེམས་ཀྱི་འཁྲུལ་སྣང་ལས་གཞན་པའི་འདྲེ་གདོན་ནི་གང་དུའང་མ་གྲུབ། མེད་པ་ལ་ཡོད་པར་མཐོང་བའི་མཐོང་མཁན་དང་ཚོར་མཁན་ནི་རང་སེམས་འདི་ཉིད་ཡིན་ཏེ། དཔེར་ན་རྨི་ལམ་གྱི་སྣང་བ་ལ་སྐྱིད་སྡུག་ལེགས་ཉེས་ཅི་ཙམ་མཐོང་ཡང་སེམས་ཀྱི་སྣང་བ་ཙམ་ལས་མངོན་སུམ་དུ་མ་གྲུབ་པ་དང་མཚུངས་སོ། །དེའི་ཕྱིར་ཆོ་འཕྲུལ་དང་འཇིགས་སྐྲག་གི་རྣམ་པ་དེ་ཡང་རང་གིས་ཉམ་ལེན་སྙིང་པོར་གང་ལ་དྲིལ་བ་དེ་གས་བོགས་འདོན་ཞིང་ལམ་དུ་འཁྱེར་དགོས་ཏེ། རང་ཉིད་བླ་མའི་རྣལ་འབྱོར་ལ་ཐག་ཆོད་མཁན་ཞིག་ཡིན་ཕྱིན་ལྷ་འདྲེ་ཡང་བླ་མའི་རྣམ་རོལ་ཡིན་པའི་མོས་གུས་བྱ། རང་ཉིད་ཡི་དམ་ལྷའི་བསྐྱེད་རིམ་ལ་བློ་འགེལ་མཁན་ཞིག་ཡིན་ན་སྣང་གྲགས་ཐམས་ཅད་ལྷ་དང་སྔགས་ཀྱི་རང་བཞིན་ཡིན་པས་ལྷ་འདྲེ་ཡང་ཡི་དམ་གྱི་ལྷ་ལོས་ཡིན་སྙམ་པས་དག་སྣང་སྦྱང་། རང་ཉིད་ཕྱག་རྫོགས་ཀྱི་ལྟ་སྒོམ་ཁོ་ནའི་ཉམས་ལེན་གང་ལ་བློ་ཁེལ་བ་དེ་དག་བསྲེས་ནས་ལམ་དུ་འཁྱེར་བ་མ་གཏོགས་ཐབས་གཞན་འཚོལ་མི་དགོས་པས་ཐུགས་ལ་བཞག་པར་ཞུ། དཔོན་དྲུང་ཉིད་ཐུགས་དམ་ལ་ནན་ཏན་མཛད་པ་ཤིན་ཏུ་རྗེས་སུ་ཡི་རང་ཞིང་། བསམ་གཏན་གྱི་ངང་ལ་གནས་བཞིན་ཏུ་འདུག་བསམ་མཁན་དེ་དྲན་རིག་གི་ངོ་བོ་ཡིན་ལ། གནས་མཁན་དང་གནས་ལུག་བསམ་མཁན་དེ་གཉིས་མིན་པས་གཅིག་རང་ཡིན་ཀྱང་། རེ་ཞིག་དབྱེ་ན་གནས་པ་དེ་ཉམས་ཀྱི་བྱེ་བྲག་ཡིན་ཞིང་གནས་འདུག་བསམ་མཁན་དེ་སེམས་ཀྱི་ངོ་བོ་དངོས་ཡིན་པས་གཙོ་བོ་དེ་རང་དགོས་རྒྱུ་ཡིན། དེ་བཞིན་དུ་འགྱུ་དུས་ཀྱང་འགྱུ་བ་དེ་རྣམ་རྟོག་ཡིན། འགྱུ་འདུག་སྙམ་མཁན་དེ་དྲན་པ་སེམས་ཀྱི་ངོ་བོ་ཡིན་པས་དེ་དགོས་རྒྱུ་ཡིན། དྲན་པའི་རིག་པ་ཐུགས་༼འཐུག་ཡིན་ནམ་དཔྱད་༽ཆུང་སྐྱོན་གྱིས་འགྱུས་པ་མ་གཏོགས་དྲན་ཐུགས་༼འཐུག་༽ཆེ་དུས་འགྱུ་རྒྱུ་མེད། དོན་ལ་ཁོ་རང་གཅིག་པུ་མ་གཏོགས་འགྱུ་མཁན་དྲན་མཁན་ཐ་དད་གཉིས་མེད་པའི་གནད་ཀྱིས་ཡིན། ལབ་པ་དང་ལས་ཀ་བྱེད་དུས་དྲན་རིག་ཧྲིག་གེར་ཡོད་ཐོག་ནས་བྱེད་རྒྱུ་འམ། ལབ་རྒྱུ་དེ་ཡང་མ་འཆུག་ཙམ་དང་། དེ་ལ་ཧ་ཅང་གི་འཛིན་པ་མ་ཞུགས་པར་དྲན་རིག་སོ་མས་ཚི་ཟིན་ཙམ་གྱི་ངང་ནས་སྨྲ་བརྗོད་དང་ཁ་ཏོན་བཟླས་བརྗོད་སོགས་དང་འགྲོ་འདུག་ཟ་འཐུང་ཐམས་ཅད་བསྲེ་ཐུབ་པར་བྱེད་པ་དེ་ལ་སྒྱུ་མ་ལྟ་བུའི་ཏིང་འཛིན་ཟེར་ཏེ། བྱ་བྱེད་ཐམས་ཅད་ལ་དེ་འདྲ་མ་ཐུབ་པར་ལབ་བརྗོད་དང་ལག་ལས་སོགས་གང་ཡིན་དེ་ལ་སེམས་འཛིན་ཆེར་བྱས་ནས་དྲན་རིག་དེ་མི་ཡོང་ཚེ་འཇིག་རྟེན་ཐ་མལ་པ་དང་ཁྱད་མི་འོང་བས་སྒོམ་གྱི་མིང་མེད། དྲན་རིག་གསལ་རུང་གི་ངང་ནས་ལབ་ཆོག་པ་དེ་ལ་སླར་ད་དུང་དྲན་པ་འདུག་གོ་སྙམ་མཁན་ཞིག་མི་དགོས་ཏེ་དྲན་པ་ཁོ་རང་གིས་ཁོ་རང་ངོས་ཟིན་ཤུགས་ལ་ཡོད་པ་ཡིན། ལར་འཁོར་འདས་གཉིས་ཀྱི་སོ་མཚམས་དེ། རང་ལ་རང་གིས་རིག་མ་རིག་འདི་ཙམ་གཅིག་པུས་ཡིན་པས། རང་ངོ་མ་རིག་པ་ཡེངས་སོང་བ་དེ་ནི་འཁྲུལ་བ་ཡིན་མོད། རང་ངོ་ནམ་རིག་དུས་ཀྱི་སེམས་དེ་ལས་ལྷག་པ་ཞིག་གང་ཡང་མི་དགོས་པས། གནས་ཆའམ་བདེ་གསལ་མི་རྟོག་སོགས་ཅི་དང་ཅི་བྱེད་ཀྱང་ཉམས་ཀྱི་བྱེ་བྲག་ཙམ་མ་གཏོགས་སེམས་ངོ་དངོས་མཐོང་བ་མིན་པས། ཉམས་སུ་ལེན་རྒྱུའི་སྙིང་པོ་ནི་རང་རིག་རྗེན་པ་ཁོ་རང་མ་བརྗེད་ཙམ་བསྐྱང་བ་དེ་ཡིན་ནོ། །གཉིད་དུ་འགྲོ་ཁར་ཁྱོད་རང་ལ་བྱུང་ལུགས་དེ་ཚོ་འབྱུང་བ་ཐིམ་རིམ་གྱི་འཆར་ཚུལ་སྣང་ཞིང་། ཤི་ཁ་དང་གཉིད་དུ་འགྲོ་ཁ་གཉིས་ཐིམ་ཚད་ཆེ་ཆུང་མ་གཏོགས་ཕྱོགས་འདྲ་ཙམ་འོང་བ་ཡིན་འདུག །གང་ལྟར་ཡང་གཉིད་འོད་གསལ་དུ་འགྲོ་ཐབས་ཀྱི་གདམས་ངག་རིགས་མི་འདྲ་བ་གསར་རྙིང་གི་བཀའ་སོ་སོར་མང་མོད་ཀྱང་གནད་བསྣུན་བྱེད་པར་ཐུབ་དཀའ་བས། དེ་བས་ད་ལྟའི་དྲན་རིག་འདི་རང་ལ་གོམས་བཅུག་པ་དགའ་ཆེ་བས་ན། གཉིད་འགྲོ་ཁར་དྲན་པ་ཤུགས་ཧ་ཅང་ཆེ་ན་གཉིད་མི་འོང་། ཤུགས་ཆུང་ན་ཟིན་ཐུབ་དཀའ་བས། གཉིད་དུ་འགྲོ་ཁར་བསམ་བློ་གཞན་མི་གཏང་བར་དྲན་རིག་མ་ཡེངས་ཙམ་ལ་བཞག །གཉིད་ནམ་སད་ལ་དྲན་པ་འཕྲོ་མཐུད་དེ་འབད་ན། གཉིད་ལ་མ་ཟིན་ཡང་སད་པའི་འཕྲོ་ལ་དྲན་པ་སླེབས་ན་རེ་ཞིག་དེས་ཆོག །འོད་གསལ་ཐོད་རྒལ་གྱི་ཉམས་ལེན་ཚུལ་ལྡན་བྱེད་ན་ལག་ཁྲིད་ཞིབ་ནན་ཞིག་མེད་ཐབས་མ་མཆིས་ལགས། གཙོ་བོ་ནི་འཇའ་འོད་ཐིག་ལེ་ཅི་དང་ཅི་ལྟར་ཤར་བ་ཐམས་ཅད་རང་རིག་པའི་རང་མདངས་ཁོ་ན་མ་གཏོགས་ཕྱི་ནས་ཚུར་བྱུང་བ་མ་ཡིན་པར་ཐག་ཆོད་དགོས། དེ་ལྟར་ཤར་བ་ལ་དགའ་བྲོད་དང་ཞེན་འཛིན་སྐྱེ་ན་གོ་མི་ཆོད། དེ་ཡང་ཟླ་འོད་དང་མར་མེ་སོགས་ལ་བལྟ་ཚུལ་བཤད་ཀྱང་། གཙོ་བོ་ཉི་མ་ཤར་མ་ཐག་དང་ནུབ་ཁ་གཉིས་ཀྱི་དུས་ལ་བལྟ་བ་རང་འཕེལ་སྐྱེད་ཆེ་ཞིང་། ཉི་མ་ཚ་དུས་ནི་མིག་ལ་གཟེན་ཏེ། ཅིས་ཀྱང་བལྟ་ན་སྣམ་བུ་རྒྱ་ཚོས་མ་དང་དམར་པོ་གང་རུང་མིག་ལ་བཀབ་ནས་བལྟ་དགོས། འོད་གསལ་གྱི་སྣང་བ་ལ་ནམ་བལྟས་ཀྱང་ཐུགས་དམ་དྲན་རིག་ངོས་ཟིན་ཐོག་དང་མ་བྲལ་བ་གལ་ཆེ་ཞིང་། འཇའ་འོད་ལྔ་ལྡན་དབྱིབས་མ་ངེས་པར་གྱེན་ཐུར་འཕྲེད་སོགས་གར་ཡང་འཆར་བ་དང་། འོད་ལྔའི་ཐིག་ལེ་སྦྲེལ་མ་ཆེ་ཆུང་སྣ་ཚོགས་སུ་ཤར་བ་དེ་དགདབྱིངས་རྣམ་དག་གི་སྒྲོན་མ་དང་། ཐིག་ལེ་སྟོང་པའི་སྒྲོན་མ་ཡིན་ལ། དེའི་ནང་དང་བར་མཚམས་གང་དུ་ཡང་ངེས་མེད་དུ་ཐིག་ལེ་ཉ་མིག་འདྲ་བ་མང་པོ་དང་། མུ་ཏིག་གི་ཕྲེང་བ་ཐག་པ་ཆད་པ་ལྟ་བུ་གྱ་གྱུར་འགྲོ་འོང་བྱེད་པ་དེ་ཐམས་ཅད་ནི་ཤེས་རབ་རང་བྱུང་གི་སྒྲོན་མ་རིག་པ་ཁོ་རང་གི་མདངས་འཆར་བ་རྡོ་རྗེ་ལུ་གུ་རྒྱུད་ཡིན་པས་ན། མིག་དང་སེམས་གཉིས་ཀ་དེ་ལ་གཏད་ཅིང་ཡེངས་མེད་འཛིན་མེད་དུ་ཉམས་སུ་བླང་བར་བྱ། འདིའི་སྐབས་སུ་གསར་མ་བ་ཐམས་ཅད་ཀྱིས་འཇའ་འོད་ཀྱི་ཐིག་ལེ་དེ་འདྲ་ལ་རིག་པ་གཏད་པ་དང་ཕྱི་རོལ་ས་རྡོ་རི་བྲག་སོགས་ལ་གཏད་པ་དང་ཁྱད་པར་མི་འོང་སྟེ། འཁྲུལ་ན་འཁྲུལ་མཉམ་དང་། གྲོལ་ན་གྲོལ་མཉམ་ཡིན་ཟེར་མོད་ཀྱང་། དེ་གཉིས་མི་འདྲ་སྟེ་ཕྱི་ཡི་སྣང་ཡུལ་འདི་ནི་བག་ཆགས་འཁྲུལ་བའི་ལས་སྣང་ཡིན་ཞིང་། འོད་གསལ་གྱི་འཆར་སྒོ་འདི་ཀ་རང་རིག་པ་ཡེ་ཤེས་ཀྱི་འཆར་སྒོའི་རང་མདངས་ཡིན་པས་གཏན་ནས་མི་མཚུངས་པའི་རྒྱུ་མཚན་རྒྱས་པ་རྫོགས་ཆེན་རྣམས་སུ་འབྱུང་བ་ལྟར་རོ། །མདོར་ན་ཉམས་སུ་ལེན་རྒྱུའི་ཆོས་ཐམས་ཅད་ཀྱི་སྙིང་པོ་ནི་ཁྲེགས་ཆོད་རང་རིག་ཁོ་ན་ལ་དྲིལ་བ་མཛད་པར་ཞུ། ཐུགས་དམ་གྱི་ངོ་བོ་ལ། བཀའ་གསར་རྙིང་དང་ཕྱག་རྫོགས་སོགས་མིང་བཟང་བཟང་མང་པོ་དང་ཟབ་ཟབ་ཡིན་ཡིན་ཅི་ཙམ་བརྗོད་ཀྱང་དོན་དམ་པའི་སྙིང་པོ་ལ་ད་ལྟའི་སེམས་མི་བྱེད་དགུ་བྱེད་འདི་ཁོ་རང་གང་དྲན་གང་ཤར་ལ་རིག་པ་ངོས་ཟིན་ཙམ་བྱེད་པ་ལས་ལྷག་པ་གང་ཡང་བྱ་རྒྱུ་མེད། གནས་པ་སྐྱོང་མི་སྐྱོང་ཞེས་ཟེར་སྲོལ་འདུག་ཀྱང་དེ་ནི་དང་པོ་ཞི་གནས་སྦྱང་དུས་ཀྱི་སྐད་ཆ་ཡིན། སྒོམ་དངོས་གཞི་ལ་གནས་པ་གཅིག་པུ་དགོས་པ་མ་ཡིན་ཏེ། གནས་འགྱུ་གང་བྱུང་ཐམས་ཅད་ལ་དྲན་རིག་ངོས་ཟིན་ན་ཐམས་ཅད་སྒོམ་ཡིན། མཉམ་བཞག་ཡིན། རིག་པ་རང་ངོ་མ་ཤེས་ན་ནི། གནས་ཀྱང་སྒོམ་མིན་ལ། འགྱུ་ཡང་སྒོམ་མིན། མདོར་ན་སྒོམ་ཞེས་བྱ་བ་ནི་ད་ལྟའི་རང་སེམས་ཧྲིག་གེ་བ་འདི་ངོས་ཟིན་པ་དེ་ལ་སྒོམ་གྱི་ངོ་བོ་ཡང་ཟེར། མཉམ་བཞག་ཀྱང་ཟེར། ལྟ་བ་སྒོམ་པ་སྤྱོད་པ་ལ་སོགས་མིང་ཅི་བཏགས་ཀྱང་འདི་ལས་གཞན་མེད། སེམས་འཕྲོ་མ་བཅུག་པར་གནས་པ་ཁོ་ན་ལ་སྒོམ་དུ་ཞེན་ན་བློས་བྱས་ཀྱི་སྒོམ་ཡིན། རང་ངོ་མ་རིག་པར་སེམས་ཡུན་རིང་པོར་མི་འཕྲོ་བར་གནས་ཀྱང་ཉམས་ཙམ་ཡིན། འཕྲོ་བ་རྣམ་རྟོག་ཡིན། དེ་གཉིས་ཀས་སྒོམ་གྱི་གོ་མི་ཆོད། འགག་དོན་ལ་རྣམ་རྟོག་དུག་ལྔ་འཁྲུལ་བའི་བྱེ་བྲག་ཅི་དང་ཅི་ཤར་བྱུང་ཡང་། དེ་སྤང་བ་དང་བཀག་པའི་རྩོལ་བ་ཡང་མི་བྱ། དེའི་རོ་མྱངས་བའི་རྗེས་ལ་ཕར་ཡང་མི་འབྲང་། ཁོ་རང་བདག་མེད་དུ་བསྐྱུར་བ་གཅིག་པུས་ཆོག །རང་རིག་རྗེན་པ་ཧྲིག་གེ་བ་འདི་འགྲོ་འདུག་ཟ་ཉལ་ཐམས་ཅད་དུ་མ་བརྗེད་ན་གཞན་པའི་སྒོམ་རྒྱུ་གང་ཡང་མི་དགོས། ཡི་དམ་གྱི་ལྷ་དངོས་སུ་བཀྲ་ལམ་མེར་མཇལ་ཡང་རང་སེམས་ཀྱི་འཆར་སྣང་ཙམ་ཡིན། དེ་ལ་ཕར་སྐྱབས་མཆི་མི་དགོས་རང་རིག་པས་ཆོག །བདུད་བགེགས་བྱེ་བ་དུང་ཕྱུར་གྱི་དམག་བྱུང་ནས་རང་ཉིད་ཤ་དུམ་ཁྲག་འཐོར་དུ་བཏང་བྱུང་ཡང་རང་སྣང་ཡིན་པས་ཞེད་མི་དགོས། དོན་དམ་པ་ལ། འཁོར་འདས་ཐམས་ཅད་སེམས་ཀྱི་སྣང་བ་མིན་པ་ནི་གང་ཡང་མེད་པས་གང་ལའང་བདེན་འཛིན་མེད་པ་གལ་ཆེ། དེའི་ངང་ནས་སེམས་ཀྱི་རྩལ་མདངས་འགག་མེད་ཀྱི་འཆར་སྒོ་ཀུན་རྫོབ་ཀྱི་རང་གཟུགས་རྨི་ལམ་ལྟ་བུ་འདི་ཁྱད་དུ་མི་གསད་པར་ལས་རྒྱུ་འབྲས་ཀྱི་ཞིབ་ཆ། སྤྲོས་བཅས་ཀྱི་དགེ་སྦྱོར། ཚོགས་བསགས་སྒྲིབ་སྦྱང་། ཡུལ་གོང་མ་ལ་མོས་གུས། འོག་མ་ལ་སྙིང་རྗེ། བར་མ་ལ་དག་སྣང་སོགས་མི་སྤང་། སྒོ་གསུམ་ཆོས་དང་མཐུན་པར་བྱ། སེམས་སྟོང་པ་ཉིད་ཀྱི་གནས་ཚུལ་གོ་ཡང་འཁྲུལ་བའི་བག་ཆགས་མ་ཟད་བར་ལ་ཚིག་ལེགས་ཉེས་ཀྱི་གཏམ་ཙམ་ཡང་མི་ཁྱག་ཅིང་། ཚེར་མ་ཟུག་པའམ་མེ་སྟག་ཕོག་པ་ཙམ་ཡང་མི་བཟོད་པ་ལགས། སྟོང་སྐད་ཐོ་ཅོ་བྱེད་པ་མ་ཡིན་པར། རང་རྒྱུད་རང་གིས་བཏུལ། སྐྱིད་སྡུག་ཅི་བྱུང་ཡང་བླ་མ་དཀོན་མཆོག་གསུམ་ལ་བློ་ལིང་བསྐྱུར་བྱ། རྟག་ཏུ་དམན་ས་བཟུང་ཞིང་དག་སྣང་སྦྱང་། ཚེ་འདི་བློས་བཏང་ནས་རི་ཁྲོད་དུ་མི་ཚེ་འཁྱོལ་བས་བླ་མའི་སྐུ་དྲིན་དང་མཁའ་མཉམ་གྱི་ཕ་མའི་དྲིན་ཆོས་ཀྱིས་འཁོར་བ་ཡིན་པས་ཐུགས་བཞག་ཞུ། བདག་རྒན་པོའི་ཁ་ཆེམས་སྙིང་གཏམ་ཡིན་ནོ་ཐུགས་ལ་སྟིམས། ཐུགས་དམ་གྱི་ཆ་ཐམས་ཅད་ལ་སྔར་ཞུས་པ་ལྟར་ལས་ལྷག་པ་མེད་ཀྱང་གཙོ་བོར་ཕྱག་རྫོགས་གང་ལའང་ཉིན་སྣང་གི་རང་རིག་བཅོས་མིན་འདི་ག་ཡེངས་མེད་འཛིན་མེད་དུ་སྐྱོང་བ་ཁོ་ན་གཅིག་དྲིལ་མཛད་པ་དང་། གཉིད་དང་འཆི་ཁ་བར་དོ་སོགས་ནམ་གྱི་ཚེ་ཡང་གདམས་པ་སྣ་ཁ་མང་པོ་མི་དགོས་པར་མ་བཅོས་ཆོས་སྐུ་འདི་ག་རང་གིས་ཆོག་ཅིང་ཟབ་པར་འདུག་པས། འགྲོ་འདུག་ཟ་ཉལ་གཉིད་སོགས་ཀུན་ལ་འདི་དམར་འཇུས་གནང་ན་ལེགས་སམ་སྙམ་འདུག་པས་དགོངས་འཇགས་འཚལ། དལ་འབྱོར་དོན་ཡོད་འདོད་པ་རྣམས་ནས་དམ་པའི་ཆོས་ཁོ་ན་ལ་བརྩོན་ཞིང་སྐྱིད་སྡུག་ལེགས་ཉེས་ན་ཚ་སྡུག་བསྔལ་རྐྱེན་ངན་གང་བྱུང་ཡང་སྒྲིབ་སྦྱང་དང་བྱིན་རླབས་སུ་ཤེས་ནས་གསོལ་འདེབས་ལ་འབད་ཅིང་བླ་མ་རང་སེམས་དབྱེར་མེད་སྐུ་གསུམ་གདོད་ནས་ལྷུན་གྲུབ་ཡེ་ནས་ཡིན་པར་ཤེས་པས་མ་ཡེངས་ཙམ་དུ་མ་འཁྲུལ་ཙམ་གསལ་ལེ་ཧྲིག་གེ་གུ་ཡངས་ཁྲོལ་ལེ་བའི་ངང་ནས་དགེ་སྦྱོར་རྣམས་དང་ཟུང་འཇུག་མཛད་པར་ཞུ། སྐྱབས་གནས་དཀོན་མཆོག་གསུམ་དང་རྩ་བ་དང་བརྒྱུད་པའི་བླ་མ་ཡི་དམ་ལྷ་ཚོགས་མཁའ་འགྲོ་ཆོས་སྲུང་ཐམས་ཅད་ཀྱི་ཐུགས་རྗེ་ནུས་སྟོབས་དང་། ཆོས་ཉིད་རྣམ་པར་དག་པའི་རྟེན་འབྲེལ་གྱི་འཇུག་སྒོ་མཐའ་ཡས་པའི་བདེན་པ་དང་། ནུས་པའི་སྟོབས་ཀྱིས་ཟབ་ཆོས་འདིའི་བཀའ་ལུང་གཏད་ཡོངས་སུ་རྫོགས་པ་དུས་འདིར་ཐོབ་པར་གྱུར་ཅིགའདིའི་ཚིག་དོན་མ་ལུས་པ་ཡོངས་སུ་རྫོགས་པ་རྒྱུད་ལ་འདྲེས་ཤིང་ཉམས་ལེན་མངོན་དུ་གྱུར་ནས་ཚེ་འདི་ཉིད་ལ་རང་གཞན་གྱི་དོན་གཉིས་ལྷུན་གྱིས་གྲུབ་ཅིང་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་ནུས་པར་ཤོག་ཅིགཀཱ་ཡ་སིདྡྷི་ཨཱོཾཿཝཀྐ་སིདྡྷི་ཨཱཿཙིཏྟ་སིདྡྷི་ཧཱུྃཿསརྦ་སིདྡྷི་ཧྲཱིཿའགག་དོན་ལ་ད་ལྟའི་རྣམ་རྟོག་འགྱུ་དྲན་འདི་ཀ་ལ་གསལ་བ་ཟེར་བ་ཡིན། འདི་ག་རང་གིས་རིག་ཙམ་དྲན་ཙམ་བྱེད་མཁན་དེ་ལ་དྲན་པ་ཡང་ཟེར། རང་རིག་ཀྱང་ཟེར། མཉམ་བཞག་ཀྱང་ཟེར། ལྷག་མཐོང་ཡང་ཟེར་བ་སྟེ་ཆོས་ལུགས་ཐམས་ཅད་ཀྱི་དགོངས་པ་མཐུན་པར་སྒོམ་ཉམས་སུ་ལེན་རྒྱུ་འདི་རང་གིས་ཆོག་པ་ཡིན་པས། འདི་ལས་ལྷག་པའི་སྒོམ་གནས་ཆའི་བདེ་གསལ་མི་རྟོག་སོགས་ཅི་ལྟ་བུ་བསྒྲུབས་ཀྱང་བཅོས་མ་ཁོ་ན་ཡིན་པས་མ་བཅོས་ཐ་མལ་གྱི་ཤེས་པ་བཟོ་མེད་དུ་མི་འགྲོ་ཞིང་། སྒོམ་སྐྱོན་མེད་དུ་མི་འགྱུར་བས་དེས་ན་གནད་གཅིག་པུ་ལ་ངེས་ཤེས་འདྲོང་ཐག་ཆོད་ཞིག་དགོས་ལགས་པས་དགོངས་འཚལ། ལྷ་དང་དཀྱིལ་འཁོར་སྔགས་དང་འོད་ཟེར་སྤྲོ་བསྡུ་སོགས་མཐའ་དག་ཀྱང་དོན་དེ་ཉིད་སྒོམ་མཁན་བསྒོམ་རྒྱུ་སྒོམ་པ་སོགས་སེམས་ལས་གཞན་མེད་པས་སེམས་ཀྱི་ངོ་བོ་སྟོང་པ་རྫོགས་རིམ། གསལ་ཆ་ལྷར་སྣང་བ་བསྐྱེད་རིམ། དེ་གཉིས་སེམས་གཅིག་པུར་ཚང་ཕྱིར་བསྐྱེད་རྫོགས་དབྱེར་མེད་ཡིན་ཏེ། འདི་སྐབས་ཀྱི་གོ་དོན་གསལ་བར་ཤེས་དགོས་སོ། །དེང་སང་བསྐྱེད་རིམ་པ་ཕལ་མོ་ཆེ་རྣམས་ནི་ཀུན་རྟོག་བློས་བྱས་ཀྱི་བསྐྱེད་རིམ་མ་གཏོགས། བསྐྱེད་རྫོགས་དབྱེར་མེད་ལ་བློ་ཁེལ་མཁན་ཆེར་མ་མཐོང་། ཡང་ཀུན་གྱི་སེམས་དང་རང་སེམས་བསྲེ་བ་གང་ཡིན་སྙམ་ན། སྤྱིར་ཡང་། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །གསུངས་པ་དེ་ཡང་མི་རེ་རེ་ལ་དུམ་བུ་བགོས་ནས་ཡོད་པ་ལྟ་བུ་མ་ཡིན་ཏེ། སངས་རྒྱས་ཐམས་ཅད་ཀྱི་ཐུགས། སེམས་ཅན་ཐམས་ཅད་ཀྱི་སེམས། སྣང་གྲགས་ཐམས་ཅད་ཀྱི་རང་ཚུལ་མཐའ་དག་རྒྱར་མ་ཆད་ཕྱོགས་སུ་མ་ལྷུང་པ། ཡེ་གདོད་མ་ནས་རང་བཞིན་ཆོས་ཀྱི་སྐུར་ཀུན་ལ་རྟག་ཁྱབ་ལྷུན་གྲུབ་ཕྱོགས་རིས་བྲལ་བའི་ཐིག་ལེ་ཉག་གཅིག་ཡིན་ཀྱང་རིག་མ་རིག་དང་། རྟོགས་མ་རྟོགས། འཁྲུལ་མ་འཁྲུལ་ཁོ་ནའི་ཁྱད་པར་དུ་གྱུར་པ་ཡིན་ལ། ད་ལྟ་ལམ་ཉམས་ལེན་གྱི་སྐབས་སུ་ཡང་གོང་མ་ཚོར་ཡང་བཤད་པ་ལྟར་བདག་དང་སེམས་ཅན་ཐ་དད་དུ་མ་གྲུབ་ཀྱང་སྣང་ཚུལ་ཐ་དད་ལྟར་སྣང་བ་ཙམ་ཡིན་པའི་ཚུལ་རྟོགས་ན་སེམས་ཅན་གྱི་སེམས་དང་རང་གི་སེམས་སླར་བསྲེ་རྒྱུ་ཞིག་མ་གྲུབ་སྟེ། ཡེ་ནས་འདྲེས་པ་ཡིན་ལ། འོན་ཀྱང་ལས་དང་པོ་པའི་རྣལ་འབྱོར་དག་གིས་ནི། སེམས་ཀྱི་རྩལ་སྦྱོང་ངམ་འགག་མེད་ཀྱི་རོལ་རྩལ་སྒྱུ་འཕྲུལ་ཙམ་དུ་བླ་མའི་རྣལ་འབྱོར་བསྒོམ་པ་དང་། སེམས་ཅན་ཐམས་ཅད་ལ་བྱམས་སྙིང་རྗེ་སེམས་བསྐྱེད་དང་། ལས་འབྲས་བསླུ་མེད་ལ་ཡིད་ཆེས་སོགས་བསྐྱེད་པ་གལ་ཆེ། དཔལ་སྤྲུལ་རིན་པོ་ཆེའི་ཞལ་རྒྱུན་ནོ།། །། སྟོང་ཐུན་སེང་གེའི་ང་རོའི་ཉེར་མཁོའི་བར་ལྡེབ་ཕྱོགས་བསྡུས།ལྡེབ་གཉིས་པའི་རྒྱབ། ལུང་གི་ཚད་མ་དང་ཡིད་ཆེས་རྗེས་དཔག་དོན་གཅིག་ཡིན་པ་བཞིན་དུ་ལུང་ཚད་མ་དང་། དཔྱད་གསུམ་གྱིས་དག་པའི་ལུང་གཉིས་དོན་གཅིག་ཡིན་ལ། དེ་ལ་མཐོང་བ་མངོན་གྱུར་ལ་མངོན་སུམ་ཚད་མས་མི་གནོད་པ་དང་། མི་མཐོང་བ་ལྐོག་གྱུར་ལ་རྗེས་དཔག་ཚད་མས་མི་གནོད་པ་དང་། ཤིན་ཏུ་ལྐོག་གྱུར་ལ་ལུང་སྔ་ཕྱི་དང་མི་འགལ་བ་དང་གསུམ་ལས། དང་པོ། བརྒྱད་སྟོང་པ་ལྟ་བུའི་ལུང་དེས་འདི་ནི་གཟུགས་སོ་ཞེས་སོགས་མངོན་གྱུར་བསྟན་པའི་དོན་དེ་ཉིད་རང་གིས་མངོན་སུམ་གྱིས་དེ་ལྟར་ཡིན་མིན་དཔྱད་ནས་དེ་ལྟར་ཡིན་པ་ལ་ཚད་མས་གནོད་པ་མེད་པ་དང་། གཉིས་པ། སྒྲ་མི་རྟག་པའོ་ཞེས་སོགས་ལྐོག་གྱུར་བསྟན་པའི་དོན་དེ་ཉིད་དེ་ལྟར་ཡིན་མིན་དངོས་སྟོབས་རྗེས་དཔག་གིས་དཔྱད་ནས་དེ་ལྟར་ཡིན་པ་ལ་གནོད་པ་མེད་པ་དང་། གསུམ་པ། སྦྱིན་པས་ལོངས་སྤྱོད་ཁྲིམས་ཀྱིས་བདེ་ཞེས་པ་ལ་སོགས་པའི་ཤིན་ཏུ་ལྐོག་གྱུར་བསྟན་པའི་དོན་དེ་ཉིད་ལ་ལུང་རང་གིས་དངོས་བསྟན་ཤུགས་བསྟན་དང་གོང་འོག་འགལ་མི་འགལ་བརྟགས་ནས་འགལ་བའི་གནོད་པ་མེད་པར་མཐོང་བའི་ལུང་དེ་ལུང་ཚད་མ་དང་དཔྱད་གསུམ་གྱིས་དག་པའི་ལུང་ཡིན་པའི་ཕྱིར་རོ། །ལུང་ཚད་མའི་མཚན་གཞི་ནི་ཤེར་ཕྱིན་གྱི་མདོ་ལྟ་བུའོ། ༈ །ཐོས་པ་ལས་བྱུང་བའི་ཤེས་རབ། བསམ་པ་ལས་བྱུང་བའི་ཤེས་རབ། བསྒོམས་པ་ལས་བྱུང་བའི་ཤེས་རབ། ཐོས་པ་འཆད་ཉན་བྱ་བ་དང་། བསམ་པ་ལ་རིགས་པ་བཞིའི་སྒོ་ནས་ལེགས་པར་དཔྱད་པར་བྱ་བ་སྟེ། དེ་ཡང་རིགས་པ་བཞི་ནི། བྱ་བ་བྱེད་པའི་རིགས་པ། ལྟོས་པའི་རིགས་པ། ཆོས་ཉིད་ཀྱི་རིགས་པ། འཐད་པས་སྒྲུབ་པའི་རིགས་པ་དང་བཞིའོ། །དེ་ཡང་ཀུན་རྫོབ་ཏུ་རྒྱུ་འབྲས་ངོ་བོ་ཉིད་གསུམ་ཇི་ལྟ་བར་རྟོགས་པ་དང་། དོན་དམ་པར་དེ་གསུམ་རང་བཞིན་མེད་པའི་རྣམ་ཐར་གསུམ་གྱི་བདག་ཉིད་དུ་ཤེས་དགོས་ལ། དེ་ལྟར་རྒྱུ་འབྲས་ངོ་བོ་ཉིད་གསུམ་དུ་བཞག་པ་དེ་ནི་ཐ་སྙད་དཔྱོད་པའི་སྐབས་ཀྱི་རིགས་པ་གསུམ་ཡིན་ལ། དོན་དམ་པར་ནི་རྡོ་རྗེ་གཟེག་མའི་གཏན་ཚིགས་ཀྱིས་དཔྱད་ན་རྒྱུ་གང་གིས་འབྲས་བུ་གང་བསྐྱེད་པ་མི་དམིགས་ལ། ཡོད་མེད་སྐྱེ་འགོག་གིས་དཔྱད་ན་འབྲས་བུ་རྣམས་རྒྱུ་ལ་ལྟོས་ཏེ་སྐྱེ་བ་ཡང་མེད་ཅིང་། གཅིག་དུ་བྲལ་སོགས་ཀྱི་རིགས་པས་དཔྱད་ན། སྲ་བ་ལ་སོགས་པའི་ངོ་བོ་ཉིད་གང་ཡང་མི་འགྲུབ་པས། རྒྱུ་མཚན་མ་མེད་པ། འབྲས་བུ་སྨོན་པ་མེད་པ། ངོ་བོ་སྟོང་པ་ཉིད་དེ་རྣམ་ཐར་སྒོ་གསུམ་གྱི་རང་བཞིན་དུ་གནས་པ་ནི་དོན་དམ་པའི་ཆོས་ཉིད་དོ། །འཐད་སྒྲུབ་ལ་མངོན་སུམ་རྗེས་དཔག་གཉིས། མངོན་སུམ་ལ་དོན་དམ་མངོན་སུམ། ཀུན་རྫོབ་མངོན་སུམ། རྗེས་དཔག་ལའང་། ཀུན་རྫོབ་པ་རྗེས་སུ་དཔག་པ། དོན་དམ་པ་རྗེས་སུ་དཔག་པ་སྟེ་གཉིས། མཐར་བདེན་གཉིས་དབྱེར་མེད་སོ་སོ་རང་རིག་པའི་སྤྱོད་ཡུལ་ཆོས་ཀྱི་དབྱིངས་རྟོགས་པ་ན་མཐར་ཕྱིན་པའོ། ། ༈ ལྡེབ་གསུམ་པའི་སྐབས། ཆོས་དང་ཆོས་ཉིད་རྣམ་པར་འབྱེད་པའི་ཚིག་ལེའུར་བྱས་པའི་འགྲེལ་པ་ཡེ་ཤེས་སྣང་བ་རྣམ་འབྱེད་ལས། དེ་ཡང་རྒྱལ་བའི་སྲས་པོ་འཕགས་པ་ཐོགས་མེད་ཀྱིས་མི་ལོ་བཅུ་གཉིས་སུ་རྗེ་བཙུན་བྱམས་པ་བསྒྲུབས་པའི་མཐར་ཞལ་མངོན་སུམ་དུ་བསྟན་ནས་དགའ་ལྡན་ལྷའི་གནས་སུ་ཁྲིད་དེ། རྒྱལ་བའི་བཀའ་ཐམས་ཅད་ཀྱི་དགོངས་པ་འགྲེལ་བའི་བསྟན་བཅོས་རྒྱན་གཉིས་འབྱེད་གཉིས་རྒྱུད་བླ་མ་སྟེ་ཆོས་ལྔ་བསྟན་པ་འདི་ལ། མཁས་པ་ཁ་ཅིག་གིས་ལྔ་ག་བསྟན་བཅོས་དཀྱུས་གཅིག་གི་ཚུལ་དུ་བཞེད་ལ། ཡང་ཁ་ཅིག་གིས་ཐེག་གསུམ་དང་ཐེག་གཅིག་ངེས་དོན་དུ་བཤད་པ་སོགས་མཐར་ཐུག་གི་བསྟན་བྱ་མི་མཐུན་པས་བསྟན་བཅོས་ཀྱི་ལུས་གཅིག་ཏུ་འདོད་པ་དེ་བཀག་ནས། རང་ལུགས་བཀའ་སོ་སོའི་དགོངས་འགྲེལ་དུ་བཞེད་ལ། དེ་ལ་ཡང་ཐོག་མཐའ་གཉིས་དབུ་མ་དང་། བར་མ་གསུམ་སེམས་ཙམ་གྱི་དགོངས་འགྲེལ་དུ་བཞེད་པ་དང་། མདོ་རྒྱན་ཁོ་ན་སེམས་ཙམ་གྱི་གཞུང་དང་། གཞན་བཞི་དབུ་མར་བཞེད་པ་དང་། མངོན་རྟོགས་རྒྱན་དབུ་མ་དང་། གཞན་བཞི་སེམས་ཙམ་དུ་བཞེད་པ་དང་། ཡང་ཁ་ཅིག་གིས་ལྔ་ག་སེམས་ཙམ་གྱི་དགོངས་པར་གནས་པ་དང་། ཡང་ལྔ་ག་དབུ་མའི་དགོངས་པར་གནས་པར་བཞེད་པ་སོགས་ཡོད་ཀྱང་། དོན་ལ་མངོན་རྟོགས་རྒྱན་ནི་བཀའ་བར་པ་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་འགྲེལ་དང་། རྒྱུད་བླ་མ་འཁོར་ལོ་ཐ་མའི་ངེས་དོན་བདེ་གཤེགས་སྙིང་པོ་བསྟན་པའི་མདོ་རྣམས་ཀྱི་དགོངས་འགྲེལ་དུ་རྩོད་པ་མེད་པར་གྲུབ་ཅིང་། དེ་གཉིས་ཀས་མཐར་ཐུག་རིགས་གཅིག་དང་ཐེག་པ་གཅིག་ཏུ་འདོད་ལ་དབུ་མའི་དོན་དུ་དགོངས་པ་མཐུན་པ་ཉིད་དོ། །མདོ་སྡེ་རྒྱན་ནི་སྔ་མ་དེ་གཉིས་ཀྱི་བཤད་བྱའི་མདོ་ལས་གཞན་པའི་མདོ་སྡེ་ཕལ་མོ་ཆེའི་དོན་ཕྱོགས་གཅིག་བསྡེབས་པའི་དགོངས་འགྲེལ་ཡིན་ལ། དེར་རིགས་དང་ཐེག་པ་གཅིག་ཏུ་མ་ངེས་པར་བསྟན་པ་སོགས་ཕལ་ཆེར་སེམས་ཙམ་གྱི་མདོ་སྡེའི་དགོངས་པ་གཙོ་བོར་འགྲེལ་བར་གསལ་ལོ། །འབྱེད་གཉིས་པོ་འདི་ནི་ཐེག་པ་སྤྱི་ཡི་རྒྱ་ཆེ་བ་དང་ཟབ་མོའི་ཕྱོགས་སྟོན་པར་བྱེད་པ་སྟེ། འདི་དག་ཏུ་རང་བཞིན་གསུམ་དང་ཕྱི་དོན་མ་གྲུབ་པའི་ཚུལ་རྒྱ་ཆེར་བསྟན་ཀྱང་དེ་ཙམ་ཞིག་གིས་སེམས་ཙམ་པའི་གཞུང་ཁོ་ནར་འགྱུར་བའི་ངེས་པ་མེད་དེ། དབུ་མའི་དགོངས་པ་ཡང་ཆོས་སྐད་དེ་དག་གི་ཚུལ་གྱིས་བཞག་པ་ཙམ་ལ་འགལ་བ་མེད་པ་ནི། ལང་གཤེགས་ལས། ཆོས་ལྔ་རང་བཞིན་གསུམ་དང་ནི། །རྣམ་པར་ཤེས་པའི་ཚོགས་བརྒྱད་དང་། །བདག་མེད་དོན་གྱི་རྣམ་གཉིས་པོར། །ཐེག་ཆེན་མཐའ་དག་བསྡུས་པ་ཡིན། །ཞེས་ཆོས་སྐད་འདི་དག་ཐེག་ཆེན་མཐའ་དག་གི་སྤྱི་སྡོམ་དུ་གསུངས་པ་དང་། ཡུམ་གྱི་དགོངས་པ་གསལ་བར་བྱེད་པའི་མདོ་བྱམས་ཞུས་ན་ཡང་ངོ་བོ་ཉིད་གསུམ་གྱི་ཆོས་སྐད་འདི་དག་བསྟན་པ་སོགས་ཀྱིས་དངོས་སུ་གསལ་ལ། སེམས་ཙམ་པའི་འདོད་གཞུང་བཞིན་གཉིས་སྟོང་གི་ཤེས་པ་བདེན་གྲུབ་ཏུ་མི་འདོད་པའི་འོས་མེད་ཀྱི་ཚིག་ཟིན་དང་རིགས་པ་གང་ཡང་མི་སྣང་བས་ན། ཕྱོགས་སུ་མ་ལྷུང་བར་ཐེག་པ་སྤྱི་ཡི་དགོངས་འགྲེལ་དུ་བཤད་པ་ལ་ཉེས་པ་ཅི་ཡང་མེད་པར་མ་ཟད་གཞུང་གི་བབ་དེ་ལྟར་གནས་པས་ན། དབུས་མཐའ་རྣམ་འབྱེད་འདི་ཐེག་པ་གསུམ་གྱི་ལམ་རྒྱ་ཆེ་བའི་རྣམ་བཞག་སྟོན་པའི་གཞུང་དང་། ཆོས་ཉིད་རྣམ་འབྱེད་འདི་བདེན་གཉིས་ཟུང་འཇུག་དབུ་མ་རྣལ་འབྱོར་སྤྱོད་པའི་ཚུལ་དང་མཐུན་པར། ཟབ་མོའི་མདོ་སྡེ་ཀུན་གྱི་བརྗོད་བྱའི་སྙིང་པོ་རྣམ་པར་མི་རྟོག་པའི་ཡེ་ཤེས་གཏན་ལ་འབེབ་པའི་གཞུང་ཡིན་ལ། དེའི་ཕྱིར་ཤིན་ཏུ་ཟབ་པས་ན་འདི་དང་རྒྱུད་བླ་གཉིས་བཀའ་རྒྱ་དམ་པའི་ཚུལ་གྱིས་རྒྱ་གར་དུའང་ཕྱིས་སུ་དཔེ་རྒྱུན་མ་བྱུང་བའི་ཚེ། མངའ་བདག་མཻ་ཏྲི་པས་མཆོད་རྟེན་ཞིག་གི་སེར་ཀ་ནས་འོད་བྱུང་བ་གཟིགས་པ་དེ་ནས་ཆོས་ཉིད་རྣམ་འབྱེད་དང་རྒྱུད་བླ་མ་གཉིས་ཀྱི་དཔེ་བྱུང་སྟེ་སླར་འཕེལ་བ་ཡིན་པས། ཞ་མ་ལོ་ཙཱ་བ་སེང་གེ་རྒྱལ་མཚན་གྱིས་ཆོས་ཉིད་རྣམ་འབྱེད་ཀྱི་དཔེ་འདི་འགྱུར་ཞུས་མཛད་པའི་ཚེ། པཎྜི་ཏས་ཤོག་ལྡེབ་རེ་རེ་བཞིན་གནང་ནས་འདི་ཆུད་མ་ཟོས་པར་གྱིས། དེས་བཀའ་དམ་པས་རྒྱུན་དཀོན་ཕྱིར་འདི་མེད་སོང་ན་རྗེ་བཙུན་བྱམས་པ་འཛམ་བུའི་གླིང་དུ་སྐུ་མྱ་ངན་ལས་འདས་པ་ཡིན་ནོ་ཞེས་གཙིགས་སུ་མཛད་པར་གསུངས་པ་ལྟར། ལྟ་བའི་ངེས་གསང་སྟོན་པའི་ཟབ་དོན་ཡིན་པས་ཐེག་པ་ཆེན་པོ་བ་ཀུན་གྱིས་ལྟ་བ་འདི་ལྟར་རྟོགས་དགོས་པས་དབུ་སེམས་སུ་ཡི་ལུགས་སུ་བཀྲལ་ཀྱང་མི་རུང་བ་མེད་མོད། དཔེར་ན་ཤེར་ཕྱིན་གྱི་མདོ་སྡེ་ལ་དབུ་སེམས་ཀྱི་སློབ་དཔོན་རྣམས་ཀྱིས་སོ་སོ་རང་རང་གི་བཞེད་གཞུང་དུ་བཀྲལ་ཀྱང་གཞུང་དེའི་དགོངས་པ་མཐར་ཐུག་དབུ་མར་གནས་པ་ལྟར། གཞུང་འདི་ཡང་སེམས་ཙམ་གྱི་ལྟ་བ་སྟོན་པའི་བསྟན་བཅོས་སུ་བཞེད་མཁན་ཡང་། རང་བློའི་རྩལ་དང་སྦྱར་ཏེ་དེ་ལྟར་བཤད་ཀྱང་འགལ་བ་མེད་ལ། འོན་ཀྱང་དོན་དུ་གཞུང་འདིས་ཐེག་པ་ཆེན་པོའི་ཟབ་དོན་མཐར་ཐུག་པ་རྣམ་པར་མི་རྟོག་པའི་ཡེ་ཤེས་ཉིད་ཅི་ལྟ་བུ་ཡིན་པ་གསལ་བར་སྟོན་པས་ན། ཟབ་མོའི་མདོ་སྡེ་མཐའ་དག་གི་སྤྱི་འགྲེལ་དུ་འགྲོ་ཞིང་། ཀུན་རྫོབ་ཆོས་ཅན་གྱི་འདོད་ཚུལ་སེམས་ཙམ་དང་མཐུན་ལ། དོན་དམ་ཆོས་ཉིད་ཀྱི་འདོད་ཚུལ་དབུ་མ་དང་མཐུན་པས་མཐར་ཐུག་གི་དགོངས་པ་དབུ་མར་གནས་ཤིང་དབུ་སེམས་ཟུང་འཇུག་གི་ཚུལ་གྱིས་ཐེག་པ་ཆེན་པོའི་ལྟ་བའི་གནད་སྟོན་པའི་ཚུལ་དུ་གོ་ཞིང་བཤད་ན་བསྟན་བཅོས་ཆེན་པོའི་དགོངས་པ་གཏིང་ཕྱིན་པར་བཤད་པར་འགྱུར་རོ། །ཞེས་གསུངས། ༈ བོད་སྔ་རབས་པ་ཞེས་པའི་སྐབས། ཆོས་རྒྱལ་ཁྲི་སྲོང་ལྡེ་བཙན་གྱི་བློན་པོ་རྔོག་ཆེན་པོ་བྱ་བ་དེའི་བརྒྱུད་པ། ཡར་འབྲོག་དོའི་ཕྱི་རོལ་གྱི་མཚོ་ཆེན་པོའི་འགྲམ་དུ་གྲོང་ཆགས་པའི་སྔགས་རྙིང་མ་བའི་དགེ་བཤེས་རྡོ་རྗེ་གཞོན་ནུ་ཞེས་བྱ་བ་ལ་སྲས་ལྔ་བྱུང་བའི། ཆེ་བ་རྔོག་ལེགས་པའི་ཤེས་རབ། གཉིས་པ་ཀླུ་ཁྲི། གསུམ་པ་ཀླུ་བྱང་། བཞི་པ་ཆོས་སྐྱབས། ལྔ་བ་ཐུབ་པ་རྡོ་རྗེ་རྣམས་ལས། རྔོག་ལེགས་ཤེས་ཀྱི་དབོན་པོ་རྔོག་ལོ་ཆེན་པོ་དེ་ནི། ཆོས་སྐྱབས་ཀྱི་སྲས་སུ་ས་མོ་ཕག་གི་ལོ་ལ་འཁྲུངས། དེ་ནས་ལོ་བཅོ་བརྒྱད་སོང་བ་ན་ཁ་ཆེར་བྱོན་ཏེ། པཎྜི་ཏ་སཛྫ་ན་དང་། བ་ར་ཧེ་ཏ་བྷ་ཏྲ་ལ་སོགས་པ་དྲུག་ཙམ་བསྟེན། ཁ་ཆེར་ལོ་བཅུ་བདུན་སྦྱངས་པ་མཛད་ནས་ཆུ་ཕོ་སྤྲེའུ་སུམ་ཅུ་རྩ་ལྔ་པ་ལ་སླར་བོད་དུ་བྱོན། བོད་དུ་ཡང་པཎྜི་ཏ་འབུམ་ཕྲག་གསུམ་པ་དང་སུ་མ་ཏི་ཀཱིརྟིིཿསོགས་ལ་ཆོས་མང་དུ་གསན། འདི་ཡིས་འགྱུར་མཛད་པའི་ཚད་ནི་གྲོ་ལུང་པས། དམ་ཆོས་བསྒྱུར་ལ་མངའ་བརྙེས་པས། །རྒྱལ་ཡུམ་གཉིས་དང་བསྟན་བཅོས་གཞུང་། །འབུམ་ཕྲག་གཅིག་དང་ཁྲི་ཕྲག་གསུམ། །སྟོང་ཕྲག་བདུན་ཅུ་ལྷག་བཅས་བསྒྱུར། །ཞེས་གསུངས་པ་དེའོ། དེ་ལ་སློབ་མའི་ཚོགས་མཐའ་ཡས་པ་ཡོད་མོད། སྲས་ཀྱི་ཐུ་བོ་བཞི་ནི། གསུང་རབ་ཀུན་ལ་མཁས་པ་གྲོ་ལུང་པ་བློ་གྲོས་འབྱུང་གནས། ཕར་ཕྱིན་ལ་མཁས་པ་འབྲེ་ཆེན་པོ་ཤེས་རབ་འབར། དབུ་མ་ལ་མཁས་པ་ཁྱུང་རིན་ཆེན་གྲགས། དངོས་ཀྱི་གདན་ས་པ་ཞང་ཚེ་སྤོང་ཆོས་ཀྱི་བླ་མ་དང་བཞིའོ། །གྲོ་ལུང་བའི་སྲས་ཀྱི་ཐུ་བོ་བཞི་ནི། ཟུར་ཆོས་པ་སྐུ་འབུམ་གྱི་ཤར་དུ་ཕྱྭ་བས་ཚད་མ། ལྷོར་རྒྱ་མཆིང་རུ་བས་བྱམས་ཆོས། ནུབ་ཏུ་རིན་ཚུལ་གྱིས་མངོན་པ། བྱང་དུ་ཡོན་ཏན་ཤེས་རབ་ཀྱིས་འདུལ་བ་འཆད་དོ། །དེ་རྣམས་ཀྱི་སློབ་བརྒྱུད་མཁས་པ་གནམ་གྱིས་ས་བཀབ་པ་ལྟ་བུ་རིམ་པར་བྱོན་པ་རྣམས་ཀྱིས་བཤད་གྲྭ་མང་དུ་བཙུགས་ཏེ་བོད་ཡུལ་རིག་པའི་འབྱུང་གནས་གསང་ཕུ་ནེའུ་ཐོག་ཅེས་ཡོངས་སུ་གྲགས་པའོ། །གངས་པ་ཤེའུ་དང་། ཁྱུང་རི་གཉིས་ཀྱི་སློབ་མ་སྟོད་ལུང་རྒྱ་དམར་བ་བྱང་ཆུབ་གྲགས་པ་ཡིན་ནོ། །འབྲེ་ཤེར་གྱི་སྲས་ཀྱི་ཐུ་བོ་ཨར་བྱང་ཆུབ་ཡེ་ཤེས་སོ། །གྲོ་ལུང་པ་སོགས་ཀྱི་སློབ་མ་ཕྱྭ་པ་ཆོས་ཀྱི་སེང་གེ་ལ། སློབ་མ་སེང་ཆེན་བརྒྱད། ཇོ་སྲས་བཞི། ཤེས་རབ་ཅན་བཞིའོ། །སེང་ཆེན་བརྒྱད་ནི། གཙང་ནག་པ་བརྩོན་འགྲུས་སེང་གེ། དན་ཕག་པ་སྨྲ་བའི་སེང་གེ། བྲུ་ཤ་བསོད་ནམས་སེང་གེ། རྨ་བྱ་རྩོད་པའི་སེང་གེ། རྩགས་དབང་ཕྱུག་སེང་གེ། མྱང་བྲན་ཆོས་ཀྱི་སེང་གེ། ལྡན་མ་དཀོན་མཆོག་སེང་གེ། གཉལ་པོ་ཡོན་ཏན་སེང་གེའོ། །ཁ་ཅིག་གཙང་པ་འཇམ་དཔལ་སེང་གེའང་ཟེར། ཇོ་སྲས་བཞི་ནི། འཁོན་ཇོ་སྲས་རྩེ་མོ། རྔོག་ཇོ་སྲས་ར་མོ། ཁུ་ཇོ་སྲས་ནེ་ཙོ། གཉོས་ཇོ་སྲས་དཔལ་ཡེའོ། །ཤེས་རབ་ཅན་བཞི་ནི། འགར་དབང་གྲུབ། ཀོང་པོ་འཇག་ཆུང་། ལྷོ་པ་སྒོག་ཟན། པར་བུ་བ་དང་བཞིའོ། །ཕྱྭ་བས་ཚད་མ་བསྡུས་པ་ལ་སོགས་མཛད་དེ་ཀློག་པ་བ་རྣམས་ཀྱི་བསྡུས་པ་ཞེས་པའང་འདི་ནས་དར་རོ། །གཙང་ནག་པ་དང་རྨ་བྱ་པ་ཕལ་ཆེར་མ་གཏོགས་པས་རང་རྒྱུད་པའི་སྲོལ་བཟུང་། གཞན་ཡང་ཀརྨ་པ་དུས་མཁྱེན་དང་། ཕག་གྲུ་རྡོ་རྗེ་རྒྱལ་པོ་གཉིས་ཀྱིས། རྒྱ་དམར་བ་དང་། ཕྱྭ་པ་ཆོས་ཀྱི་སེང་གེ་ལ་ཆོས་གསན་པ་དང་། ས་ཆེན་ཀུན་དགའ་སྙིང་པོས། ཁྱུང་རིན་ཆེན་གྲགས་པ་ལས་དབུ་ཚད་གསན། སློབ་དཔོན་བསོད་ནམས་རྩེ་མོས། ཕྱྭ་པ་ཆོས་སེང་ལས་དབུ་མ། ས་པཎ་གྱིས། རྨ་བྱ་བྱང་བརྩོན་དང་། མཚུར་སྟོན་གཞོན་སེང་ལས་ཚད་མ། རྩགས་པ་དབང་ཕྱུག་སེང་གེ་ལས་གྲུབ་མཐའ་གསན། ༈ ཐལ་འགྱུར་བ་ལོ་ཙཱ་བ་བ་ཚབ་ཉི་མ་གྲགས་པ་ནི། འཕན་ཡུལ་ན་བ་ཚབ་སྟོད་སྨད་གཉིས་ཡོད་པའི་སྟོད་པ་ཡིན། ཁ་ཆེར་བྱོན་ཏེ་སཛྫ་ནའི་སྲས་གཉིས་སོགས་པཎྜི་ཏ་མང་པོ་ལ་ཆོས་གསན་ཏེ་ལོ་ཉི་ཤུ་རྩ་གསུམ་དུ་སྦྱང་བ་མཛད་ནས་བོད་དུ་རྩ་འཇུག་བཞི་གསུམ་སོགས་ཀྱི་འགྲེལ་བ་ཟླ་བས་མཛད་པའི་རིགས་རྣམས་བསྒྱུར། འཕན་ཡུལ་དུ་ཕེབས། དབུ་མའི་འཆད་ཉན་ལེགས་པར་བཙུགས། དཔལ་ལྡན་ཟླ་བ་གྲགས་པའི་གཞུང་ལུགས་འཆད་རྩོད་རྩོམ་གསུམ་གྱི་ལམ་སྲོལ་ཆེན་པོ་ཕྱེས་ཤིང་། གངས་ཅན་ལྗོངས་ཀྱི་དབུ་མ་ཐལ་འགྱུར་སྨྲ་བ་ཐམས་ཅད་དེ་ལས་གྱེས། སློབ་མ་རྣམས་ཀྱི་ནང་ནས། གཙང་པ་སར་སྦོས། རྨ་བྱང་ཆུབ་ཡེ་ཤེས། དར་ཡོན་ཏན་གྲགས། ཚིག་ལ་མཁས་པ་གངས་པ་ཤེའུ། དོན་ལ་མཁས་པ་གཙང་པ་འབྲེ་སྒུར། གཉིས་ཀ་ལ་མཁས་པ་རྨ་བྱ་བྱང་བརྩོན། གཉིས་ཀ་ལ་མི་མཁས་པ་ཞང་ཐང་སག་པ་ཡེ་ཤེས་འབྱུང་གནས་རྣམས་ལ་བ་ཚབ་ཀྱི་བུ་བཞི་ཞེས་གྲགས། དེ་རྣམས་ལ་བརྟེན་ནས་དབུས་གཙང་དུ་དབུ་མའི་བཤད་པ་དར་བའོ། །ཕྱྭ་པའི་སློབ་མ་རྨ་བྱ་བྱང་བརྩོན་གྱིས་བ་ཚབ་ལ་དབུ་མ་སོགས་གསན། ཞང་ཐང་སག་པས་ནི། ཐང་སག་བཏབ་ནས་དབུ་མའི་འཆད་ཉན་ལེགས་པར་མཛད་དོ། ། ༈ ལྡེབ་བཞི་པའི་སྐབས། དོན་རྣམ་པར་ངེས་པ་ཤེས་རབ་རལ་གྲི་ལས། །དངོས་པོར་དམིགས་དང་དངོས་མེད་དམིགས། །གཉིས་སུ་དམིགས་དང་གཉིས་མིན་དམིགས། །ཇི་ལྟར་དམིགས་ཀྱང་དམིགས་པ་སྟེ། །དམིགས་པས་གང་བཟུང་བདུད་ཀྱི་ནི། །སྤྱོད་ཡུལ་ཡིན་ཞེས་མདོ་ལས་གསུངས། །ཞེས། དངོས་པོར་དམིགས་པ་དང་། དེ་བཀག་པའི་དངོས་མེད་དུ་དམིགས་པ་དང་། དངོས་པོ་དངོས་མེད་གཉིས་སུ་དམིགས་པ་དང་། གཉིས་ཀ་མིན་པར་དམིགས་པ་སོགས་ཇི་ལྟར་དམིགས་ཀྱང་སེམས་ཀྱི་གཡོ་བ་ཡོད་པས་དམིགས་པ་སྟེ། དམིགས་པས་དངོས་མེད་དང་དངོས་པོ་སོགས་གང་ཞིག་བཟུང་ཡང་བདུད་ཀྱི་ནི་སྤྱོད་ཡུལ་ཡིན་ཞེས་འཇམ་དཔལ་རྣམ་པར་རོལ་པའི་མདོ་དང་། ལངྐར་གཤེགས་པའི་མདོ་སོགས་ལས་གསུངས་སོ། ༈ །གློག་སྒྲོན་ལས། རྟེན་ཅིང་འབྲེལ་བར་འབྱུང་བའི་དབང་གིས་བྱུང་བའི་ཀུན་བྱང་གི་ཆོས་ཐམས་ཅད་མ་བརྟགས་ཉམས་དགའ་ཙམ་དུ་སྣང་ཡང་། དོན་དམ་པར་རང་བཞིན་གྱིས་གྲུབ་པ་མེད་པས། གང་སྣང་བའི་གཟུགས་སོགས་ཆོས་ཐམས་ཅད་རང་བཞིན་གྱིས་སྟོང་པས་གཟུགས་སྟོང་པ་དང་། གནས་སྐབས་རྟེན་འབྲེལ་གྱི་སྣང་བ་མ་འགག་པར་ཤར་བས་སྟོང་པ་ཉིད་གཟུགས་དང་། སྣང་ཙམ་ཉིད་ན་ངོ་བོ་སྟོང་ཉིད་ལས་མ་གཡོས་པས་གཟུགས་ལས་ཀྱང་སྟོང་པ་ཉིད་གཞན་མ་ཡིན་པ་དང་། ངོ་བོ་སྟོང་ཉིད་ལས་མ་གཡོས་པས་གཟུགས་སོགས་སུ་སྣང་བས་སྟོང་པ་ཉིད་ལས་ཀྱང་གཟུགས་གཞན་མ་ཡིན་པ་སྟེ་སྟོང་ཉིད་བཞི་སྦྱོར་གྱི་དགོངས་པ། འཕགས་པ་ཀླུས། ཀུན་རྫོབ་དང་ནི་དོན་དམ་དག །སོ་སོའི་ཆར་ནི་ཤེས་གྱུར་ཏེ། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་གསུངས། ༈ མི་ཕམ་རིན་པོ་ཆེས། མཉམ་པ་ཉིད་ལ་ངེས་པ་རིམ་གྱིས་སྐྱེ་བའི་དབང་དུ་ན། ལས་དང་པོ་པས་གཅིག་དུ་བྲལ་སོགས་སྟོང་ཉིད་སྒྲུབ་པའི་རིགས་པ་རྣམས་ཀྱིས་ཚུལ་བཞིན་བརྟགས་ཚེ། བུམ་སོགས་མ་གྲུབ་པའི་དོན་ལ་བསམས་ནས། མ་དཔྱད་པའི་ངོར་ཡོད་ཀྱང་དཔྱད་ན་མི་རྙེད་པའི་ཕྱིར། མ་གྲུབ་པ་ཉིད་གནས་ལུགས་སོ་སྙམ་པས་སྣང་སྟོང་རེས་འཇོག་གི་ཚུལ་དུ་སྟོང་པའི་རྣམ་པ་ཞིག་འཆར་ཞིང་། དེའི་ཚེ་དེའི་མེད་པ་ཉིད་ཀྱང་བཏགས་པ་ཙམ་ལས་དོན་ལ་མ་གྲུབ་པའམ། ཡེ་ནས་སྟོང་བཞིན་དུ་སྣང་བ་ཡིན་པའི་ཚུལ་ལ་བསམས་པས་ཆུ་ཟླ་ལྟར་སྣང་བཞིན་སྟོང་ལ་སྟོང་བཞིན་སྣང་བའི་ངེས་པ་ཁྱད་པར་ཅན་སྐྱེ་སྟེ། དེའི་ཚེ་རང་བཞིན་མེད་པ་དང་རྟེན་འབྱུང་འགལ་མེད་དུ་ཤར་བའམ་ཟུང་འཇུག་ཏུ་གོ་བ་ཞེས་བྱ་ཞིང་། དེ་དུས་རང་བཞིན་མེད་པ་དང་རྟེན་འབྱུང་དེ་གཉིས་ཚིག་གི་བརྗོད་ཚུལ་ལ་ཐ་དད་ཡོད་ཀྱང་ངོ་བོ་ལ་ཐ་དད་ཅུང་ཟད་མེད་པར་དབྱེར་མེད་པའི་ཚུལ་ལ་ངེས་ཤེས་བསྐྱེད་པས་དགག་གཞི་སྣང་བ་དང་དགག་བྱ་བཅད་པ་སྦྱར་ནས་འཛིན་པའི་རྣམ་རྟོག་རང་སར་ཞིག་སྟེ། དགག་སྒྲུབ་བསལ་བཞག་མེད་པར་སོར་བཞག་ཏུ་ནུས་པ་ལྟ་བུའི་སྤྲོས་བྲལ་གྱི་རྣམ་པར་འཆར་ཞིང་། དེ་འདྲའི་སྤྲོས་བྲལ་ལ་ཡང་ནས་ཡང་དུ་གོམས་པས། ཆོས་ཅན་རེ་རེ་བ་ལ་ལྟོས་པའི་ཆོས་ཉིད་སོ་སོ་ལྟ་བུའི་བློ་རིས་ཆད་ཀྱི་དམིགས་པའི་སྤྱོད་ཡུལ་གཉིས་ཆོས་ཀྱི་རྣམ་པ་ཐམས་ཅད་དག་ནས་ཆོས་ཐམས་ཅད་རང་བཞིན་མཉམ་པ་ཉིད་ལ་ངེས་ཤེས་ཁྱད་པར་ཅན་སྐྱེ་བས་མཐར་ཕྱིན་ཏོ། །དེ་ལྟར་སྟོང་པ་དང་། ཟུང་འཇུག་དང་། སྤྲོས་བྲལ་དང་། མཉམ་པ་ཉིད་དེ་དེ་བཞི་པོ་སྔ་མ་སྔ་མ་ཤེས་པ་ལ་བརྟེན་ནས་ཕྱི་མ་ཕྱི་མའི་ཚུལ་ལ་འཇུག་གི། སྔ་མ་ལ་ངེས་པ་མ་རྙེད་བར་དུ་ཕྱི་མ་གཏན་ལ་ཕེབས་པ་མི་འབྱུང་ངོ་། །དེས་ན་རྣམ་གྲངས་པའི་དོན་དམ་བདེན་མེད་རྐྱང་པ་ཙམ་ལ་གནས་ལུགས་སོ་སྙམ་དུ་བློ་རྩེ་གཏད་པས་ནི་སྐབས་འདིའི་མཉམ་པ་ཉིད་ཀྱི་ཕྱོགས་ཙམ་དུ་ཡང་མི་ཕྱིན་ཏེ། བདེན་གྲུབ་བཅད་ཙམ་གྱི་ལྡོག་པ་ཀ་བ་དང་བུམ་པ་སོགས་ཀྱི་སྟེང་ན་སོ་སོར་ཡོད་པར་གོ་བ་ཙམ་ཞིག་གིས། ཆོས་ཐམས་ཅད་ལ་བླང་དོར་དང་མཚན་མའི་འདུ་ཤེས་གཞིག་པ་མཉམ་པ་ཉིད་ཀྱི་བྱ་བ་བྱེད་མི་ནུས་ཏེ། དམངས་ཀྱིས་རྒྱལ་པོའི་བྱ་བ་བྱེད་མི་ནུས་པ་བཞིན་ནོ། །ཞེས་གསུངས། ༈ ལྡེབ་བདུན་པའི་སྐབས། རྒྱུད་བླའི་མཆན་འགྲེལ་མི་ཕམ་ཞལ་ལུང་ལས། ཇི༷་ལྟར༷་སྔར༷་འཁོར་བར་གནས་ཚེ་ཇི་ལྟ་ཡིན་པ་བཞིན༷་ཕྱིས༷་མྱང་འདས་ན་ཡང་དེ༷་བཞིན༷་དུ་རྟག་ཏུ་རང་བཞིན་འགྱུར༷་བ༷་མེད༷་པའི༷་ཆོས༷་ཉིད༷་ཅན་དུ་འདོད་དོ༷། །ཞེས་དང་། ༈ སེམས༷་ཀྱི༷་རང༷་བཞིན༷་འོད༷་གསལ༷་བདེ་གཤེགས་སྙིང་པོ་གང༷་ཡིན༷་པ༷་དེ༷་ནི༷་ནམ༷་མཁའ༷་དུ་སྤྲིན་སོགས་ཀྱིས་མི་འགྱུར་བ་བཞིན༷་དུ༷་འགྱུར༷་བ་མེད༷་དེ༷་ཡང༷་དག༷་མིན༷་རྟོག༷་ཚུལ་མིན་ཡིད་བྱེད་ལས༷་བྱུང༷་བའི་འདོད༷་ཆགས༷་ཞེ་སྡང་སོགས༷། རིན་ཆེན་ཕྲེང་བ་ལས། དང་པོ་བརྒྱད་པ་དགུ་ཉོན་མོངས། །གཉིས་དང་བཅུ་པ་ལས་ཡིན་ཏེ། །ལྷག་མ་རྣམས་ནི་སྡུག་བསྔལ་ལོ། །ཞེས་ཉོན་མོངས་པའི་ཀུན་ནས་ཉོན་མོངས་པ་དང་། ལས་ཀྱི་ཀུན་ནས་ཉོན་མོངས་པ་དང་། སྐྱེ་བའི་ཀུན་ནས་ཉོན་མོངས་པ་གློ༷་བུར༷་གྱི་དྲི༷་མས༷་ཆོས་ཉིད་དེ༷་ཉོན་༷མོངས༷་པར་མི༷་འགྱུར༷་ཏེ་རང་བཞིན་གྱིས་དག་པའི་ཕྱིར་རོ། །ཞེས་དང་། ༈ རང་དང་ངོ་བོ་ཉིད་ཀྱིས་རྣམ༷་དབྱེ༷་མེད༷་པའི༷་འབྲལ་མི་རུང་བའི་མཚན༷་ཉིད༷་ཅན༷་སྟོབས་སོགས་ཡོན་ཏན་བླ༷་ན་མེད༷་པའི་ཆོས་ཀྱིས༷་སྟོང༷་པ་མ༷་ཡིན༷་ཏེ་གདོད་ནས་ལྡན་པས་གསར་དུ་བཞག་མི་དགོས་པས་ཉི་མ་དང་ཟེར་བཞིན་ནོ། །ཞེས་དང་། ༈ རྒྱུད་བླའི་དོགས་བཤད་ལས། འོ་ན་ཁྱི་ཕག་སོགས་སེམས་ཅན་རྣམས་ཀྱི་སེམས་ཀྱི་རྒྱུད་ལ་སྟོབས་བཅུའི་ཡེ་ཤེས་ཡོད་དམ་ཟེར་ན། སྟོབས་བཅུའི་ཡེ་ཤེས་ཀྱི་ཡོན་ཏན་དེའི་རྒྱུད་ཀྱི་གཤེགས་སྙིང་ལ་ཡེ་ནས་ཡོད་དོ། །ཁོ་རང་གི་ཆོས་ཉིད་ཀྱི་ཡོན་ཏན་ཡིན་པས་ཁམས་ཡོད་ན་ཡོན་ཏན་ཡོད་མོད་ཀྱི་མངོན་དུ་མི་འགྱུར་ཏེ། རལ་གྲི་ལ་གཅོད་པའི་བྱ་བ་ཡོད་ཀྱང་། ཤུབས་སུ་ཆུད་པ་ལ་གཅོད་པའི་བྱ་བ་མངོན་གྱུར་དུ་མེད་པ་དང་། མེ་ལོང་ལ་གཟུགས་བརྙན་འཆར་རུང་གི་ཡོན་ཏན་ཡོད་ཀྱང་སྒྲོམ་དུ་བཅུག་པ་ལ་མངོན་གྱུར་དུ་མི་འཆར་བ་དང་འདྲ་སྟེ། རང་རྒྱུད་ལྡན་གྱི་གང་ཟག་དེའི་རྒྱུད་ལ་ཡོད་པའི་སྒྲིབ་པས་ཁམས་ཀྱི་ཡོན་ཏན་མངོན་དུ་མི་སྣང་སྟེ། དེར་མ་ཟད་དེའི་རང་སེམས་ཀྱི་ཆོས་ཉིད་རྣམ་ཀུན་མཆོག་ལྡན་གྱི་སྟོང་ཉིད་ཡོད་ཀྱང་མངོན་དུ་མི་འགྱུར་ན་ཡོན་ཏན་ཅི་ལ་མངོན། དེའི་ཕྱིར་མངོན་གྱུར་དུ་མེད་པ་འདི་ལ་བསམས་ནས། སྟོབས་བཅུ་སྐྱེ་རུང་གི་རྒྱུ་ཙམ་ཡོད་ཀྱི་དངོས་སུ་མེད་ཟེར་བ་ཡོད་པའང་དཔྱད་ཚུལ་དེའི་དབང་དུ་དེ་ལྟར་རུང་མོད། སྐྱེ་རུང་གི་རྒྱུ་དེ་འདུས་བྱས་སེམས་ཀྱི་ཡིན་ན་སེམས་ཡིན་ཚད་སྟོབས་བཅུ་སྐྱེད་རུང་དུ་སྒྲུབ་དཀའ་ལ། སྒྲིབ་གཉིས་བག་ཆགས་བཅས་སྦྱངས་སྟོབས་ཀྱིས་སེམས་ཉིད་རང་གིས་བྱེད་པ་ཡིན་ན། འདི་འདུས་མ་བྱས་ཀྱི་དབྱིངས་ཀྱི་ཡོན་ཏན་ཡིན་པས། སྨིན་པའི་རྒྱུ་རུ་མི་རུང་ངོ་། །འདི་ལྟ་བུའི་ཁམས་དེ་སེམས་ཀྱི་རང་བཞིན་འོད་གསལ་གཉུག་སེམས་གསུངས་པ་དེ་ཡིན། དེ་ནམ་ཡང་རྒྱུན་ཆད་པ་མེད་ལ་ངོ་བོ་སྟོང་པས་དམིགས་མཚན་གང་ཡང་མེད་ཀྱང་། སྟོང་རྐྱང་མིན་ཏེ་མཚན་མ་མེད་པའི་རང་འོད་གསལ་བ་ཡིན། སྒྲིབ་པ་མ་ཟད་པའི་སེམས་རྒྱུད་ཀྱི་གཤེགས་སྙིང་ལ་སྟོབས་བཅུའི་ཡེ་ཤེས་མངོན་གྱུར་དུ་མེད་པ་ནི་བདག་ཅག་ཀྱང་འདོད་མོད། བླ་མེད་ཆོས་ཀྱི་ཡོན་ཏན་དབྱིངས་དེ་ལ་མེད་པ་མིན་ཀྱང་། མངོན་དུ་མི་འགྱུར་བའི་སྒྲིབ་པ་ཡོད་པའི་ཕྱིར་རོ། །ཁམས་རང་གི་ངོ་བོ་སངས་རྒྱས་ཀྱི་ཡོན་ཏན་ཡེ་ལྡན་མིན་ན། དེ་འདྲའི་ཁམས་དེ་ཡོད་ཀྱང་སངས་རྒྱས་ཀྱི་རིགས་སུ་མི་འགྲུབ་སྟེ། སྟོང་རྐྱང་བཞིན་ནོ། །དེས་ན་ཆོས་དབྱིངས་འོད་གསལ་ལམ། རང་བྱུང་ཡེ་ཤེས་སམ། གཉུག་སེམས་འོད་གསལ་ལམ། བདེ་གཤེགས་སྙིང་པོ་ཞེས་པ་རྣམས་དོན་གཅིག་ཏེ། འདི་སངས་རྒྱས་ཀྱི་རིགས་ཡིན་ཏེ། སྒྲིབ་བཅས་ཀྱི་རྒྱུད་ལ་ཡོད་ཚེ་སངས་རྒྱ་རུང་གི་རིགས་དང་། སངས་རྒྱས་ཚེ་མངོན་གྱུར་ཡིན། སངས་རྒྱ་རུང་ཡིན་ཡང་འདུས་མ་བྱས་པའི་ཆོས་ཉིད་ལ་སྔ་ཕྱིའི་ཁྱད་པར་གནས་ཚུལ་ལ་མེད་དེ་ངོ་བོ་འགྱུར་མེད་ཡིན་པས་སོ། །སྣང་ཚུལ་ལ་གནས་གྱུར་པའི་ཐ་སྙད་བརྗོད་རུང་ངོ་། །དེ་འདྲའི་སངས་རྒྱས་ཀྱི་རིགས་ཡོད་པར་བསྟན་པས་ཉེས་པ་ལྔ་སྤངས་ནས་བླ་མེད་བྱང་ཆུབ་ལ་ཕྱིར་མི་ལྡོག་པར་འགྱུར་རོ། །ཉེས་པ་ལྔ་པོ་གཤེགས་སྙིང་སེམས་ཅན་ཐམས་ཅད་ལ་ཡོད་པར་མ་ཐོས་པ་ལས་འབྱུང་། མཐར་ཐུག་ཐེག་གཅིག་འགྲུབ་པའི་གནད་འདི་ཡིན་ལ། རྡོ་རྗེ་ཐེག་པར་སེམས་ཉིད་ཡེ་སངས་རྒྱས་པའི་གནད་ཀྱང་འདི་ཡིན་ནོ། །ཞེས་གསུངས། ༈ རྔོག་ལོ་དང་། གཙང་ནག་པས་ནི། དེ་བཞིན་གཤེགས་པའི་སྙིང་པོ་ཞེས་བྱ་བ་དོན་དམ་པའི་བདེན་པ་ལ་ཟེར་མོད་ཀྱི། དོན་དམ་པའི་བདེན་པ་ནི་སྒྲ་དང་རྟོག་པའི་དངོས་ཀྱི་ཡུལ་མ་ཡིན་པ་ལྟ་ཞོག །ཞེན་པའི་ཡུལ་ཙམ་ཡང་མ་ཡིན་ཞེས་གསུངས། ཕྱྭ་པས་ནི། དངོས་པོ་རྣམས་བདེན་པས་སྟོང་པའི་མེད་པར་དགག་པ་ནི་དོན་དམ་པའི་བདེན་པ་ཡིན་ཞིང་། དེ་སྒྲ་རྟོག་གི་ཞེན་པའི་ཡུལ་དུ་ཡང་བཞེད། བཙན་ལུགས་པ་རྣམས་ནི་སེམས་ཀྱི་རང་བཞིན་འོད་གསལ་བ་བདེ་བར་གཤེགས་པའི་སྙིང་པོ་ཡིན་པས། དེ་སངས་རྒྱས་ཀྱི་རྒྱུ་༼ཡང་༽གྲུང་པོར་བཞེད། རྗེ་བཙུན་རེད་མདའ་བས། དང་པོར་རྒྱུད་བླ་མ་སེམས་ཙམ་གྱི་བསྟན་བཅོས་སུ་མཛད་ནས་སེམས་ཙམ་དང་མཐུན་པའི་ཊཱི་ཀ་ཡང་མཛད། ཕྱིས་དབེན་པ་བསྟེན་ནས་ནི། དེ་ཕྱིར་རང་སེམས་རིག་སྟོང་དབྱེར་མེད་འདི། །སེམས་ཅན་ཀུན་ལ་ཁྱབ་པར་ཡོད་གཟིགས་ནས། །ས་འོག་གཏེར་དང་སྦྲུམ་མའི་མངལ་སོགས་དཔེས། །འགྲོ་ཀུན་བདེ་གཤེགས་སྙིང་པོ་ཅན་དུ་གསུངས། །ཞེས་བྱ་བའི་མགུར་བླངས་པ་ལས་གསུངས་པ་བཞིན་ནོ། ༈ །ལྡེབ་དགུ་བའི་སྐབས། མི་ཕམ་རིན་པོ་ཆེའི་སྡུད་འགྲེལ་ལས། འདི་ལྟར་སྣང་ཚུལ་ལ་ནི་ཡུལ་ཅན་ཇེ་དག་ཏུ་སོང་བ་དང་ཡུལ་ཀྱང་གསར་དུ་དག་པར་སྣང་བ་ལྟར་ཡོད་ཀྱང་། གནས་ཚུལ་ལ་ནི་ཡུལ་གཟུགས༷་སོགས་ཀྱི༷་རང་བཞིན་ཡེ་ནས་དག༷་པ༷་མཐོང་བ་དེ་ཉིད་ཡུལ་ཅན་གློ་བུར་གྱི་དྲི་མ་ལས་གྲོལ་བ་འབྲ༷ས་བུ༷་ཡི་དག༷་པ་ཉིད་ཡིན་པར༷་ཤེས༷་པར༷་བྱ༷་སྟེ། དེ་གཉིས་ཡེ་ནས་ཡུལ་ཡུལ་ཅན་གཉིས་སུ་མེད་པར་དག་པ་ཆེན་པོར་གནས་པའི་གནད་ལ་དོན་གཅིག་པས་དག་པ་དེ་གཉིས་ངོ་བོ་ཐ་མི་དད་དུ་ཤེས་པར་བྱའོ། །དེ་བཞིན་དུ་འབྲས༷་བུ༷་དག་པ་དང་གཟུགས༷་སོགས་ཀྱི་དག༷་པ་དེ་ཉིད་གློ་བུར་བྲལ་དག་གི་མཐར་ཐུག་པ་སྒྲིབ་གཉིས་ཡོངས་སུ་སྤངས་པའི་ཤིན་ཏུ་རྣམ་པར་དག་པ་ཐམས༷་ཅད༷་མཁྱེན༷་པའི་ཡེ་ཤེས་ཉིད༷་ཀྱི་དག༷་པར༷་འགྱུར༷་ཏེ་དག་པ་དེ་དག་ཐམས་ཅད་རྩ་བ་རང་བཞིན་རྣམ་དག་གི་དོན་ལ་གནད་གཅིག་པ་བཤད་མ་ཐག་པ་བཞིན་ནོ། །དེ་ལྟར་དག་པ་མཐར་ཐུག་པ་ཐམས༷་ཅད༷་མཁྱེན༷་པ་ཉིད༷་ཀྱི་དག་པ་དང་། གནས་སྐབས་ཀྱི་ལམ་སོ་སོའི་འབྲས༷་བུ༷་ཐོབ་པའི་དག༷་པ་དང་༷། གཞི་གཟུགས༷་སོགས་ཕུང་ཁམས་སྐྱེ་མཆེད་ཀྱི་ཆོས་རྣམས་ཀྱི་དག༷་པ༷་གསུམ་པོ་འདི་ནི་སྣང་ཚུལ་ལ་ཐ་དད་དུ་བཞག་ཀྱང་། གནས་ཚུལ་ལ་ནམ༷་མཁའི༷་ཁམས༷་ལ་ཐ་དད་མེད་པ་དང༷་མཚུངས༷་ཏེ༷་ཆོས་དབྱིངས་རང་བཞིན་གྱིས་རྣམ་པར་དག་པ་གཅིག་གི་ངོ་བོར་དབྱེར༷་མེད༷་ལ་བློས་ཀྱང་ཐ་དད་དུ་གཅད༷་དུ༷་མེད༷་དེ། ཆོས་ཉིད་རྣམ་དག་དེའི་རང་བཞིན་ཇི་ལྟ་བ་བཞིན་དུ་མངོན་སུམ་གཟིགས་པ་སངས་རྒྱས་ཀྱི་ཡེ་ཤེས་ཀྱི་ངོར། ཆོས་ཐམས་ཅད་མངོན་པར་སངས་རྒྱས་པའམ་གདོད་ནས་མྱ་ངན་ལས་འདས་པའི་རང་བཞིན་དུ་གཟིགས་ཀྱི་མ་དག་པ་མེད་ལ། དེ་ལྟར་རྟོགས་པའི་ཡེ་ཤེས་དེའང་གློ་བུར་གྱི་དྲི་མ་བག་ཆགས་དང་བཅས་པའི་སྒྲིབ་པ་མཐའ་དག་གཏན་ནས་སྤངས་པའི་དག་པ་མཐར་ཐུག་པ་ཡིན་པས། དེས་ཇི་ལྟར་གཟིགས་པ་ལྟར་ཆོས་ཐམས་ཅད་ཡུལ་དང་ཡུལ་ཅན་ལ་སོགས་པའི་གཉིས་ཆོས་ཀྱི་རང་བཞིན་དུ་མེད་པར་གཉིས་མེད་མཉམ་པ་ཆེན་པོར་ཡེ་ནས་དག་ཅིང་སངས་རྒྱས་པ་ཉིད་དུ་དབྱེ་བ་མེད་པར་རོ་གཅིག་ཏུ་ཤེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་པ་མཐར་ཐུག་པ་ཡིན་ལ། གཤིས་རྣལ་མ་དེའི་དོན་བབ་ཀྱི་ཅོག་བཞག་ཏུ་སྐྱོང་བའི་ཚུལ་ཀྱང་། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་གང་ཡང་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ནས་རྣམ་པར་གྲོལ། །ཞེས་པ་བཞིན་དུ་ཤེས་པར་བྱའོ། །ཞེས་གསུངས། ༈ ལྡེབ་བཅུ་གཉིས་པའི་སྐབས། བདེན་པ་གཉིས་པོ་དེ་ཡང་གནས༷་ཚུལ་དང་སྣང༷་ཚུལ་ཐ་དད་པས་ཕན༷་ཚུན༷་འགལ༷་བ༷་ཉིད་ཡིན་ན༷་བདེན༷་གཉིས༷་ཐ༷་དད༷་དུ་འདོད་པ་ལ་ཡང་སྐྱོན༷་བཞི༷་འབབ༷་པར་མདོ་སྡེ་དགོངས་པ་ངེས་འགྲེལ་ལས་གསུངས་པའི་དོན། འདི་ལྟར་དོན་དམ་མངོན་སུམ་དུ་རྟོགས་ཀྱང་ཀུན་རྫོབ་དེ་དེར་མ་འདུས་པས་ལོགས་སུ་དམིགས་པའི་ཕྱིར་མྱང་འདས་མི་ཐོབ་པ་དང་། ཀུན་རྫོབ་དང་ཐ་དད་པའི་དོན་དམ་པའི་བདེན་པ་དེ་ཀུན་རྫོབ་བདེན་པའི་ཆོས་ཉིད་མ་ཡིན་པར་འགྱུར་ཏེ་བུམ་པ་སྣམ་བུའི་ཆོས་ཉིད་མ་ཡིན་པ་བཞིན་ནོ། །བདེན་གཉིས་ཐ་དད་པའི་ཕྱིར་ཀུན་རྫོབ་ཀྱི་བདག་རབ་ཏུ་མ་གྲུབ་པ་ཙམ་དོན་དམ་པའི་བདེན་པ་ནི་མ་ཡིན་པར་འགྱུར་ཏེ། བུམ་པ་རབ་ཏུ་མ་གྲུབ་པ་ཙམ་སྣམ་བུ་མ་ཡིན་པ་བཞིན་ནོ། །དོན་དམ་བདེན་པ་རྟོགས་ནས་མྱང་འདས་ཐོབ་པའི་དུས་ནའང་ཀུན་རྫོབ་དེ་བས་ལོགས་སུ་དམིགས་པས་ཀུན་ནས་ཉོན་མོངས་པར་ཡང་འགྱུར་བས་སྐྱེས་བུ་གཅིག་གི་རྒྱུད་ལ་ཀུན་ཉོན་དང་རྣམ་བྱང་དུས་གཅིག་ལ་འཇུག་པ་མི་འགལ་བར་འགྱུར་བ་དང་བཞིའོ། །ཡང་གལ་ཏེ་དེ་འདྲའི་བདེན་གཉིས་གནས༷་སྣང༷་ཕན༷་ཚུན༷་གཞན༷་མིན༷་པས་གཅིག་པ་ཉིད་ཡིན་ན༷་བདེན༷་གཉིས༷་གཅིག༷་པའི༷་སྐྱོན༷་ཡང་བཞིས༷་གནོད༷་པར་མདོ་དེ་ལས་གསུངས་པ་ནི། སོ་སོའི་སྐྱེ་བོ་ཐམས་ཅད་ཀྱིས་ཀུན་རྫོབ་མཐོང་བའི་ཕྱིར་དོན་དམ་ཡང་མཐོང་བར་འགྱུར་བ་དང་། ཀུན་རྫོབ་ལ་བརྟེན་ནས་ཟག་པ་འཕེལ་བ་ལྟར་དོན་དམ་ལ་བརྟེན་ནས་ཀྱང་ཟག་པ་འཕེལ་བར་ཐལ་བ་དང་། དོན་དམ་ལ་དབྱེ་བ་མེད་པ་ལྟར་ཀུན་རྫོབ་ལའང་དབྱེ་བ་མེད་པར་ཐལ་བ་དང་། ཀུན་རྫོབ་ཇི་ལྟར་མཐོང་བ་དང་ཐོས་པ་ལས་བཙལ་བར་བྱ་མི་དགོས་པ་བཞིན་དོན་དམ་ཀྱང་དེ་ལྟར་འགྱུར་བ་སྟེ་བཞིའོ། །དེས་ན་གནས་སྣང་གཅིག་ཐ་དད་དུ་ཁས་བླང་བར་མི་བྱ་གསུངས། ། ༈ ལྡེབ་བཅུ་གསུམ་པའི་སྐབས། མི་ཕམ་རིན་པོ་ཆེའི་རྒྱུད་བླའི་ཕྱག་མཆན་ལས། དཔེ་དགུ་ནི་སངས༷་རྒྱས༷་ཀྱི་སྐུ་པདྨ༷་ངན༷་པའི་ནང་ན་གནས་པ་དང་། དེ་བཞིན་དུ་སྦྲང༷་རྩི༷་སྦྲང༷་མ༷་མང་པོ་ཡི་དབུས་ལ༷་དང་། སྤུན༷་པ་ལ༷་འབྲས་བུའི་སྙིང༷་པོ༷་དང་། མི༷་གཙང༷་པའི་ནང༷་ན༷་གསེར༷་དང་། དབུལ་པོའི་ཁྱིམ་གྱི་ས༷་འོག་ལ༷་རིན་པོ་ཆེའི་གཏེར༷་དང༷་། མྱུ་གུ་སོགས༷་སྐྱེ་བའི་ནུས་པ་འབྲས༷་བུ་ཆུང༷་ངུ་ལ་ཡོད་པ་དང་༷། གོས༷་ཧྲུལ༷་ནང༷་ན༷་རིན་པོ་ཆེ་ལས་བྱས་པའི་རྒྱལ༷་བའི༷་སྐུ༷་གཟུགས་ཡོད་པ་དང༷་ནི༷། བུད༷་མེད༷་ངན༷་མའི༷་ལྟོ༷་ན༷་མི༷་བདག༷་འཁོར་བསྒྱུར་ཡོད་པ་དང་༷། བླུག་གོང་གི་ས༷་ལ༷་རིན༷་ཆེན༷་གསེར་གྱི་གཟུགས༷་ཡོད༷་པ་ཇི༷་ལྟ༷་བར༷་གློ༷་བུར༷་ཉོན༷་མོངས༷་དྲི༷་མས༷་བསྒྲིབས༷་པ༷་ཡི༷་སེམས༷་ཅན༷་རྣམས༷་ལ༷་དཔེ་དེ༷་བཞིན༷་དུ། ཁམས༷་རང་བཞིན་གྱིས་རྣམ་པར་དག་པ་འདི༷་གནས༷་སོ། །ཞེས་དང་། སངས༷་རྒྱས༷་ཡེ༷་ཤེས༷་ཆོས་ཀྱི་སྐུ་སེམས༷་ཅན༷་གྱི་ཚོགས༷་ལ་ཞུགས༷་ཤིང་གནས་པ་ནམ་ཞིག་མངོན་དུ་འགྱུར་བ་འཕྲོ་བའི་ཕྱིར༷་དང་། རང༷་བཞིན༷་དྲི༷་མེད༷་ཆོས་ཉིད་དེ༷་ནི༷་འཁོར་འདས་གཉིས༷་ལ་ཁྱད་མེད༷་དེ༷། སངས༷་རྒྱས༷་རིགས༷་གདོད་ནས་དག་པ་དེ་མངོན་དུ་གྱུར་པ་ལ༷་དེ༷་འབྲས༷་སངས་རྒྱས་སུ་ཉེར༷་བཏགས༷་ཕྱིར༷་འགྲོ༷་ཀུན༷་སངས༷་རྒྱས༷་སྙིང༷་པོ༷་ཅན༷་དུ༷་གསུངས༷་སོ། །ཞེས་དང་། རང་བཞིན་གསུམ་གང་ཞེ་ན། སྙིང་པོ་འདི༷་ཡི༷་རང༷་བཞིན༷་ནི་རང་བྱུང་ཡེ་ཤེས་ཆོས༷་ཀྱི་སྐུ༷་དང༷་། གཞན་དུ་མི་འགྱུར་བ་དེ༷་བཞིན༷་ཉིད༷་དང༷་། སངས་རྒྱས་འགྲུབ་པའི་རིགས༷་ཀྱང༷་སྟེ༷་གསུམ་མོ། །ཞེས་དང་། གློ་བུར་གྱི་དྲི་མ་ལ་ལྟོས་ནས་ཁམས་དེ་དྲི་མས་མ༷་དག༷་པའི་སྐབས་དང་། མ༷་དག༷་དག༷་པ༷་གཉིས་ལྡན་གྱི་སྐབས་དང༷་། ཤིན༷་ཏུ༷་རྣམ༷་པར་དག༷་པའི་གནས་སྐབས་ན་གོ༷་རིམ༷་བཞིན༷་དུ་སེམས༷་ཅན༷་དང་། བྱང༷་ཆུབ༷་སེམས༷་དཔའ༷་དང་༷། དེ༷་བཞིན༷་གཤེགས༷་པ༷་ཞེས༷་པའི་མིང་གསུམ་གྱིས་བརྗོད༷་ཅིང་བསྟན་ཏོ༷། །ཞེས་གསུངས། ༈ ལྡེབ་བཅུ་བཞིའི་སྐབས། འཇམ་དཔལ་གནས་པའི་མདོ་ལས། འཇམ་དཔལ་གཞོན་ནུར་གྱུར་པས་གསུངས་པ། བྱིས་པ་རྣམས་ཀྱང་མི་དམིགས། བྱིས་པའི་ཆོས་དང་དགྲ་བཅོམ་པའི་ཆོས་རྣམས་ཀྱང་མི་དམིགས་སོ། །ནམ་མི་དམིགས་པ་དེའི་ཚེ་ན་མི་རྟོག་གོ །ཀུན་ཏུ་མི་སྤྱོད་དོ། །དེ་སྤྱོད་པ་མེད་ལ། སྤྲོས་པ་མེད་ཅིང་ཉེ་བར་ཞི་བ་སྟེ། ཡོད་དོ་ཞེས་ཁས་མི་ལེན། མེད་དོ་ཞེས་ཁས་མི་ལེན། ཡོད་ཀྱང་ཡོད་ལ་མེད་ཀྱང་མེད་དོ་ཞེས་ཁས་མི་ལེན། ཡོད་པའང་མ་ཡིན་མེད་པའང་མ་ཡིན་ཞེས་དེ་སྐད་ཀྱང་ཁས་མི་ལེན་ཏོ། །ནམ་ཁས་མི་ལེན་པ་དེ་ནི་དམིགས་པ་མེད་དོ། །དེ་དམིགས་པ་ཐམས་ཅད་དང་བྲལ་བས་སེམས་མེད་ཅིང་སེམས་དང་བྲལ་ཏེ་གནས་མེད་པའི་ཚུལ་གྱིས་དགེ་སྦྱོང་གི་ཆོས་ལ་གནས་པ་ཞེས་བྱའོ། །ཚུལ་འདི་བཤད་པ་ན་འཁོར་དེའི་དགེ་སློང་ལྔ་བརྒྱ་སྟན་ལས་ལངས་ཏེ་འདི་སྐད་ཅེས། འཇམ་དཔལ་གཞོན་ནུར་གྱུར་པ་ལ་མི་བལྟའོ། །མི་མཉན་ཏོ། །འཇམ་དཔལ་གང་དུ་གནས་པའི་ཕྱོགས་དེ་ཡང་སྤང་བར་བྱའོ། །དེ་ཅིའི་ཕྱིར་ཞེ་ན། འདི་ལྟར་འཇམ་དཔལ་གཞོན་ནུར་གྱུར་པས་སྟོན་པ་མངོན་སུམ་དུ་གྱུར་བཞིན་དུ་ཀུན་ནས་ཉོན་མོངས་པ་དང་རྣམ་པར་བྱང་བ་མཚན་ཉིད་གཅིག་ཏུ་སྟོན་པས་ཆོས་མ་ཡིན་པ་སྨྲའོ་ཞེས་བརྗོད་ནས། བདག་ཅག་བཅོམ་ལྡན་འདས་ཀྱིས་གསུངས་པའི་ཆོས་འདུལ་བ་ལ་ཚངས་པར་སྤྱོད་པ་སྤྱད་དོ་སྙམ་ནས་དོང་ངོ་། །དེ་ནས་ཤཱ་རིའི་བུས། འཇམ་དཔལ་ལ་སྨྲས་པ། དགེ་སློང་ལྔ་བརྒྱ་པོ་སྟན་ལས་ལངས་ཏེ་མི་སྙན་པ་ཟེར་ཞིང་སོང་ངོ་ཞེས་སྨྲས་པ་ལ། འཇམ་དཔལ་གྱིས་སྨྲས་པ། དགེ་སློང་ལྔ་བརྒྱ་པོ་འདི་སྐད་ཅེས་འཇམ་དཔལ་གཞོན་ནུར་གྱུར་པ་ལ་མི་བལྟའོ། །མི་མཉན་ཏོ། །འཇམ་དཔལ་གཞོན་ནུར་གྱུར་པ་གང་དུ་གནས་པའི་ཕྱོགས་དེ་ཡང་སྤང་བར་བྱའོ་ཞེས་ཟེར་བ་ནི་ལེགས་སོ་ལེགས་སོ། །ཤཱ་རིའི་བུ། དེ་དག་གིས་ཚིག་དེ་ལེགས་པར་སྨྲས་པ་སྟེ། དེ་ཅིའི་ཕྱིར་ཞེ་ན། འདི་ལྟར་འཇམ་དཔལ་གཞོན་ནུར་གྱུར་པ་ནི་ཡོད་པ་མ་ཡིན་ཏེ། དམིགས་སུ་མེད་དོ། །གང་ཡོད་པ་མ་ཡིན་ཅིང་དམིགས་སུ་མེད་པ་དེ་ལ་བལྟ་བའམ་མཉན་པར་མི་ནུས་སོ། །འཇམ་དཔལ་གཞོན་ནུར་གྱུར་པ་ཕྱོགས་གང་ན་གནས་པའི་ཕྱོགས་དེ་ཡང་སྤང་བར་བྱ་ཞེས་པ་ཡང་། འཇམ་དཔལ་ཡོད་པ་མ་ཡིན་ཏེ་དམིགས་སུ་མེད་ན། གང་དེའི་གནས་ཀྱང་ཡོད་པ་མ་ཡིན་ཏེ་དམིགས་སུ་མེད་དོ། །དགེ་སློང་དེ་དག་འཇམ་དཔལ་གྱིས་བསྟན་པ་དེ་ཐོས་ནས་སླར་ཡང་དེར་ཕྱིར་ལོག་སྟེ། འཇམ་དཔལ་ཁྱོད་ཀྱིས་བསྟན་པ་བདག་ཅག་གིས་མི་ཤེས་སོ། །འཇམ་དཔལ་གྱིས་སྨྲས་པ། དགེ་སློང་དག་ལེགས་སོ། །དེ་ལྟ་བུ་ནི་སྟོན་པའི་ཉན་ཐོས་ཀྱི་བྱ་བ་སྟེ། དགེ་སློང་དག་འདི་ལ་ནི་ཀུན་ཤེས་པར་བྱ་བ་མེད། རྣམ་པར་ཤེས་པར་བྱ་བ་མེད་དོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཀྱི་དབྱིངས་འདི་ནི་མི་གནས་པའི་ཚུལ་གྱིས་གནས་པ་ཉིད་དོ། །དེ་ནི་ཡོད་པ་མ་ཡིན་ཏེ་དམིགས་སུ་མེད་ཅིང་གཡོ་བ་མེད་པ་ལ་འཆི་འཕོ་བ་མེད་དོ་ཞེས་སོགས་གསུངས་པས། དགེ་སློང་བཞི་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བརྒྱ་ནི་སེམས་ཆེར་འཁྲུགས་ནས། ལུས་དེས་སེམས་ཅན་དམྱལ་བ་ཆེན་པོ་ངུ་འབོད་དུ་སྐྱེས་ཀྱང་། ཆོས་འདི་ཐོས་པས་མྱུར་དུ་དེ་ལས་ལྡང་ནས། དགའ་ལྡན་པའི་ལྷ་རྣམས་དང་སྐལ་པ་མཉམ་པར་སྐྱེས་ནས་བྱམས་པའི་འདུས་པ་དང་པོར་དགྲ་བཅོམ་པ་ཐོབ་པར་ལུང་བསྟན་ཏོ། །ཞེས་དང་། ལྷའི་བུ་བློ་གྲོས་རབ་གནས་ཀྱིས་ཞུས་པའི་མདོ་ལས། འཇམ་དཔལ་གྱིས། རིགས་ཀྱི་བུའམ་བུ་མོ་གང་དག་བདག་དང་སེམས་ཅན་དུ་ལྟ་བ་བརྟེན་པ་གང་གིས་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ་གངྒཱའི་ཀླུང་གི་བྱེ་མ་སྙེད་ཅིག་ལ། ཇི་སྲིད་འཚོའི་བར་དུ་བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པ་དང་། གང་གིས་ཆོས་ཟབ་མོ་ཤེས་པར་དཀའ་བ། འཇིག་རྟེན་ཐམས་ཅད་དང་མི་མཐུན་པ་འདི་ལྟ་བུ་ཐོས་ཤིང་ཆོས་སྟོང་པ་དང་མཚན་མེད་སྨོན་པ་མེད་པ་འདི་ལྟ་བུ་ཐོས་ནས་སྤངས་ཏེ་སེམས་ཅན་དམྱལ་བ་རྣམས་སུ་ལྟུང་བར་གྱུར་པ་ནི་ཆེས་མྱུར་བར་གནས་དེ་ལས་ལྡང་བར་འགྱུར་གྱི། དམིགས་པ་ཅན་སངས་རྒྱས་ལ་བསྙེན་བཀུར་བྱེད་པ་ནི་དེ་ལྟ་མ་ཡིན་ནོ་ཞེས་བཤད་པ་ལ། བཅོམ་ལྡན་འདས་ཀྱི་འཇམ་དཔལ་ལེགས་སོ་ལེགས་སོ་ཇི་སྐད་སྨྲས་པ་དེ་བཞིན་ཏེ། ཐོས་པ་འདི་ནི་སངས་རྒྱས་འབྱུང་བ་དང་འདྲའོ་ཞེས་སོགས་བསྔགས་པ་མཛད་ཅིང་། གཞན་ཡང་ཤཱ་རིའི་བུ། དགེ་སློང་དེ་དག་ཆེས་མྱུར་བར་ལྡང་ཞིང་ཡོངས་སུ་མྱ་ངན་ལས་འདའ་བར་འགྱུར་གྱི། མི་གཏི་མུག་ཅན་དམིགས་པའི་ལྟ་བ་དང་ལྡན་པ་ཐེ་ཚོམ་དུ་གྱུར་པ་གང་དག་དེ་བཞིན་གཤེགས་པ་ལ་མཆོད་པ་བྱེད་པ་དེ་ནི་དེ་ལྟ་མ་ཡིན་ནོ། །དེ་ནི་དེའི་ཡོངས་སུ་མྱ་ངན་ལས་འདའ་བའི་རྒྱུར་འགྱུར་གྱི་མྱུར་དུ་རྣམ་པར་ཐར་པར་ནི་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཟབ་མོ་དག་མ་ཐོས་པའི་ཕྱིར་རོ་ཞེས་བཀའ་སྩལ་བ་ལྟར། ཟབ་མོ་ཁུ་འཕྲིགས་ཅན་འཇིགས་པ། །ཞེས་གསུངས་པ་ལྟ་བུའི་ཆོས་འདིས་བྱིས་པ་རྣམས་སྐྲག་པར་འགྱུར་ན་ཡང་ཇི་ལྟར་སྨན་རྩུབ་མོ་མ་བྱིན་པར་ནད་མི་འབྱིན་པ་ལྟར་བསྒྲགས་དགོས་པར་འཇམ་དཔལ་གྱིས་གསུངས་པ་ལྟར་རོ། །ཞེས་གསུངས། ༈ ལང་ཀར་གཤེགས་པ་ལས་གསུང་པའི་སྟོང་པ་ཉིད་རྣམ་པ་བདུན་ནི། འདི་ལྟར་མཚན་ཉིད་སྟོང་པ་ཉིད་དང་། དངོས་པོའི་རང་བཞིན་སྟོང་པ་ཉིད་དང་། སྲིད་པ་སྟོང་པ་ཉིད་དང་། མི་སྲིད་པ་སྟོང་པ་ཉིད་དང་། ཆོས་ཐམས་ཅད་བརྗོད་དུ་མེད་པ་སྟོང་པ་ཉིད་དང་། དོན་དམ་པ་འཕགས་པའི་ཡེ་ཤེས་སྟོང་པ་ཆེན་པོ་ཉིད་དང་། གཅིག་གིས་གཅིག་སྟོང་པ་ཉིད་དང་བདུན་ལས། དང་པོ་ནི། དངོས་པོ་ཐམས་ཅད་ནི་རང་དང་སྤྱིའི་མཚན་ཉིད་ཀྱིས་སྟོང་པའོ། །གཉིས་པ་ནི། རང་གི་རང་བཞིན་གྱིས་དངོས་པོ་སྐྱེ་བ་མེད་པའི་ཕྱིར་ཆོས་ཐམས་ཅད་དངོས་པོའི་རང་བཞིན་གྱིས་སྟོང་པ་ཉིད་ཡིན་ཏེ། དེའི་ཕྱིར་དངོས་པོའི་རང་བཞིན་སྟོང་པ་ཉིད་ཅེས་བྱའོ། །གསུམ་པ་ནི། བདག་དང་བདག་གི་དང་བྲལ་བའི་ཕུང་པོ་རྣམས་ཏེ། རྒྱུ་དང་། རིགས་པ་དང་། བྱེད་པ་དང་། ལས་དང་། འབྱོར་བ་ལས་སྐྱེ་ཞིང་འབྱུང་སྟེ། དེའི་ཕྱིར་སྲིད་པའི་སྟོང་པ་ཉིད་ཅེས་བྱའོ། །བཞི་པ་ནི། ཕུང་པོ་རྣམས་ལ་མྱ་ངན་ལས་འདས་པ་སྔོན་མི་སྲིད་པ་ཡིན་ཏེ། དེའི་ཕྱིར་མི་སྲིད་པ་སྟོང་པ་ཉིད་ཅེས་བྱའོ། །ལྔ་པ་ནི། ཀུན་བརྟགས་པའི་རང་བཞིན་བརྗོད་དུ་མེད་པའི་ཕྱིར་ཆོས་ཐམས་ཅད་བརྗོད་དུ་མེད་པའི་སྟོང་པ་ཉིད་དེ། དེའི་ཕྱིར་བརྗོད་དུ་མེད་པ་སྟོང་པ་ཉིད་ཅེས་བྱའོ། །དྲུག་པ་ནི། བདག་གིས་སོ་སོ་རང་གི་འཕགས་པའི་ཡེ་ཤེས་ཁོང་དུ་ཆུད་པ་ནི་ལྟ་བ་དང་། ཉེས་པའི་བག་ཆགས་ཐམས་ཅད་ཀྱིས་སྟོང་སྟེ། དེའི་ཕྱིར་དོན་དམ་པ་འཕགས་པའི་ཡེ་ཤེས་སྟོང་པ་ཆེན་པོ་ཉིད་ཅེས་བྱའོ། །བདུན་པ་ནི། གང་ན་ཅི་མེད་པ་དེ་ནི་དེས་སྟོང་ཞེས་བྱའོ། །རི་དྭགས་འཛིན་གྱི་མའི་ཁང་པ་ན་གླང་པོ་དང་། བ་ལང་དང་། ལུག་ལ་སོགས་པ་མེད་ཀྱང་དགེ་སློང་དང་། དགེ་སློང་མ་ལ་སོགས་པས་ནི་སྟོང་པ་ཉིད་མ་ཡིན་ནོ། །དེ་བཞིན་དུ་ཆོས་ཐམས་ཅད་རང་དང་སྤྱིའི་མཚན་ཉིད་ནི་གཅིག་ལ་གཅིག་མེད་དེ། དེའི་ཕྱིར་གཅིག་གིས་གཅིག་སྟོང་པ་ཉིད་ཅེས་བྱའོ། །འདི་ནི་སྟོང་པ་ཉིད་བདུན་གྱི་ཐ་ཤལ་ཏེ་དེ་ནི་སྤང་བར་བྱའོ། །ཞེས་སོ། ༈ །མི་ཕམ་རིན་པོ་ཆེའི་སྡུད་འགྲེལ་ལས། རིགས་པས་དཔྱད་པ་ལ་བརྟེན་པ་ཕུ༷ང་པོ་འདི༷་ཀུན་གྱི་རང་བཞིན་ནི་དགག་བྱ་བདེན་གྲུབ་བཀག་པའི་མེད་དགག་སྟོང༷་པ་དེ་ཙམ་གནས་ལུགས་སོ་ཞེས༷་རྟོག༷་པར་བྱེད་ན༷འང༷་དེ་འདྲའི་བྱང༷་ཆུབ༷་སེམས༷་དཔའ༷་དེ་ནི༷། གནས་ལུགས་སྒྲོ་སྐུར་དང་བྲལ་བ་རྟོགས་པའི་སྤྱོད་ཡུལ་ལས་འདས་པའི་དོན་ལ་མི་གནས་པའི་ཕྱིར། དམིགས་པ་ཅན་གྱི་མཚན༷་མ༷་ལ༷་སྤྱོད༷་པ་ཡིན་གྱི་མཚན་མའི་སྤྲོས་པ་ཀུན་གྱིས་དབེན་པའི་སྐྱེ༷་མེད༷་ཆོས་དབྱིངས་ཟབ་མོའི་གནས༷་ལ༷་ཡིད་ཆེས་པའི་དད༷་པ་ཐོབ་མ༷་ཡིན༷་ཏེ་དམིགས་གཏད་མཚན་འཛིན་གྱིས་བཅིངས་པ་ཅན་དུ་ཤེས་པར་བྱའོ། །ཞེས་གསུངས། ༈ ལྡེབ་བཅུ་དགུ་བའི་སྐབས། མཁས་འཇུག་ལས། སེམས་ཀྱི་རང་བཞིན་འོད་གསལ་བ་ལ། དྲི་མ་གློ་བུར་བ་མཐའ་དག་སྤངས་པས་རང་བཞིན་རྣམ་དག་ཆེན་པོའི་བདག་ཉིད་དུ་གྱུར་པ་སྤང་རྟོགས་ཡོངས་སུ་རྫོགས་པའི་གནས་གྱུར་མཐར་ཐུག་པ་སངས་རྒྱས་ཆོས་ཀྱི་སྐུ་ནི་ཡོན་ཏན་ཚད་མེད་ཀྱང་མདོར་བསྡུ་ན། གཙང་བདེ་རྟག་བདག་གི་ཕ་རོལ་ཏུ་ཕྱིན་པ་སྟེ། ཇི་ལྟར་ན། ཆོས་ཀྱི་དབྱིངས་ངོ་བོ་རང་བཞིན་གྱིས་རྣམ་པར་དག་པ་དེ་ཇི་ལྟ་བ་བཞིན་དུ་བདག་མེད་གཉིས་རྟོགས་པའི་ཡེ་ཤེས་ཆེན་པོས་གློ་བུར་གྱི་སྒྲིབ་གཉིས་བག་ཆགས་དང་བཅས་པ་སླར་མི་སྐྱེ་བར་བཅོམ་པས་དག་པ་གཉིས་ལྡན་ནི་གཙང་བའི་ཕ་རོལ་ཏུ་ཕྱིན་པ་རྣམ་གྲོལ་གྱི་སྐུའམ། ཤིན་ཏུ་རྣམ་པར་དག་པའི་སྐུའོ། །སྡུག་ཀུན་གྱི་ཉེས་པ་རགས་པ་ལྟ་ཅི་སྨོས་ཀྱི་ཉན་རང་རྣམས་ཀྱིས་ཀྱང་སྤང་བར་མ་ནུས་པ་ཡིད་ཀྱི་རང་བཞིན་གྱི་ཕུང་པོ་དང་། དེའི་རྒྱུ་མ་རིག་བག་ཆགས་ཀྱི་ས་ཡང་རྣམ་པ་ཀུན་དུ་སྤངས་པས། འགྱུར་བའི་ཟུག་རྔུ་ཐམས་ཅད་དང་བྲལ་བ་ནི་བདེ་བ་དམ་པའི་ཕ་རོལ་ཏུ་ཕྱིན་པ་བདེ་ཆེན་ཀྱི་སྐུའོ། །འཁོར་བ་དང་མྱང་འདས་ལ་ཐ་དད་དུ་འཛིན་པ་མེད་པར་མཉམ་པ་ཉིད་དུ་རྟོགས་པས་དངོས་དངོས་མེད་ཀྱི་མཐའ་ལ་མི་གནས་པའི་འདུས་མ་བྱས་ཆེན་པོ་འཇིག་པ་མེད་པ་ནི་རྟག་པའི་ཕ་རོལ་ཏུ་ཕྱིན་པ་རྡོ་རྗེ་ལྟ་བུའི་སྐུ་སྟེ། དེ་ཡང་སྲིད་པ་སྔ་མ་རྒྱུན་ཆད་ནས་གསར་དུ་སྐྱེ་བ་དང་། འདུ་བྱེད་རྣམས་རྙིང་ནས་མྱགས་པའི་རྒ་བ་དང་། ཁམས་རྣམ་པར་འགྱུར་བའི་ན་བ་དང་། བསམ་གྱིས་མི་ཁྱབ་པར་འགྱུར་བའི་འཆི་འཕོ་བ་བཞིའི་ཉེས་པ་ཆ་ཙམ་ཡང་མི་གནས་པས་ན་རིམ་པ་ལྟར། རྟག་བརྟན་ཞི་བ་འཕོ་མེད་གཡུང་དྲུང་གི་རང་བཞིན་དུ་གྱུར་པའོ། །བདག་དངོས་པོར་ཡོད་པ་དང་། བདག་མེད་པ་ཙམ་གྱིས་རབ་ཏུ་ཕྱེ་བ་དངོས་མེད་ཉི་ཚེ་བའི་མཐའ་ལས་འདས་ཏེ། དེ་དག་གི་སྤྲོས་པ་ཉེ་བར་ཞི་བ། ཆོས་ཐམས་ཅད་ཀྱི་ཆོས་ཉིད་སྲིད་ཞི་ཀུན་ཁྱབ་ཀྱི་ཡེ་ཤེས་ཉིད་དུ་གནས་གྱུར་ཐོབ་པ་ནི་བདག་དམ་པའི་ཕ་རོལ་ཏུ་ཕྱིན་པ་སྟེ། བདག་ཉིད་ཆེན་པོ་ནམ་མཁའ་ལྟ་བུ་མཉམ་པ་ཉིད་ཡེ་ཤེས་ཀྱི་སྐུ་ཆོས་ཐམས་ཅད་ལ་མངའ་དབང་བསྒྱུར་བ། སྟོབས་བཅུ་དང་དབང་བཅུ་ལ་སོགས་པ་ཟག་པ་མེད་པའི་ཆོས་རྒྱ་མཚོ་གཞལ་དུ་མེད་པ་མཉམ་པ་མེད་པ་མཐའ་དག་གི་གནས་སུ་གྱུར་པ་དོན་གཉིས་ལྷུན་གྱིས་གྲུབ་པའི་རྟེན་དམ་པར་གྱུར་པའོ། །ཞེས་གསུངས། ༈ །མི་ཕམ་རིན་པོ་ཆེའི་རྒྱུད་བླའི་ཕྱག་མཆན་ལས། ལུང་ལ་བརྟེན་ནས་བློ༷་ལྡན༷་གང་ཞིག་རྒྱལ༷་བའི༷་ཡུལ༷་བཞི་པོ་དེ༷་ལ༷་མོས༷་པ༷་དེ་ནི་སངས༷་རྒྱས༷་ཀྱི་ཡོན༷་ཏན༷་གྱི་ཚོགས༷་ཀྱི༷་སྟེ་ཚོགས་བསམ་མི་ཁྱབ་པ་གནས་པའི་སྣོད༷་དུ་རུང་བར་འགྱུར༷་ཏེ༷། ཕལ་བས་བསམ༷་དུ་མེད༷་པའི་ཡོན༷་ཏན༷་གྱི་ཚོགས༷་ཅན་གྱི་གནས་འདི་བཞི་ལ༷་མངོན༷་པར་དགའ༷་བའི་དགེ་བས༷། དེ་དང་མ་འབྲེལ་བའི་སེམས༷་ཅན༷་ཀུན༷་གྱི༷་སྦྱིན་སོགས་བསོད༷་ནམས༷་ཀྱི་ཚོགས་ཐམས་ཅད་ཟིལ༷་གྱིས༷་གནོན༷་ཏེ་འདི་ལས་གོང་དུ་གྱུར་པའི་ཆོས་གཞན་མེད་པའི་ཕྱིར་རོ། །གང་ཟག་གང༷་ཞིག༷་གིས་བསམ་པ་བླ་ན་མེད་པའི་བྱང༷་ཆུབ༷་ཆེན་པོ་དོན༷་དུ༷་གཉེར༷་བའི་བསམ་པས༷་གསེར༷་ལས་གྲུབ་པའི་ཞིང༷་ཁམས་རྒྱ་ཆེན་པོ་ནོར༷་བུས༷་ཏེ་ནོར་བུ་རིན་ཆེན་དཔག་ཏུ་མེད་པས་སྤྲས༷་པ༷་ནི༷། གྲངས་སངས༷་རྒྱས༷་ཀྱི་ཞིང༷་མཐའ༷་ཡས་པ་དག་གི་རྡུལ༷་དང་མཉམ༷་པ༷་དུས་ཉིན༷་རེ༷་བཞིན་དུ་རྒྱུན་མི་འཆད་པར་ཡུལ་མཆོག་ཏུ་གྱུར་པ་ཆོས༷་ཀྱི་རྒྱལ༷་པོ་སངས་རྒྱས་བཅོམ་ལྡན་འདས་རྣམས༷་ལ༷་དུས་རྟག༷་པར་འབུལ༷་ན༷་བསོད་ནམས་ཆེས་མང་དུ་འཕེལ་མོད། དེ་བས་ཀྱང་གང་ཟག་གཞན༷་གང༷་ལ་ལ་ཞིག་གིས་དོན་གནས་བཞི་པོ་འདི༷་ལས༷་བརྩམས་ཏེ་དོན་རྟོགས་ན་ལྟ་ཅི་སྨོས། ཐ་ན་ཚིག༷་ཙམ༷་ཐོས༷་ཤིང༷་ཐོས༷་ནས༷་ཀྱང༷་ནི༷་ཡིད་ཆེས་པས་མོས༷་ན༷་མོས་པའི་དགེ་བ་འདི༷་གོང་དུ་བཤད་པའི་སྦྱིན༷་པ༷་ལས༷་བྱུང༷་བའི་དགེ༷་བ༷་རྒྱ་ཆེན་པོ་དེ༷་ལས༷་ཀྱང་བསོད༷་ནམས༷་ཆེས༷་མང༷་པོ་ཐོབ༷་པར༷་འགྱུར༷་རོ། །བློ༷་ལྡན༷་གང༷་ཞིག༷་བསམ་པ་བླ༷་མེད༷་བྱང༷་ཆུབ༷་འདོད༷་པས༷་དུས་བསྐལ༷་པ༷་དུ༷་མར༷་ཡང༷་། ལུས༷་ང༷ག་ཡིད༷་ཀྱི༷་སྒོ་ནས་གོམས་པའི་དབང་གིས་དཀའ་ཚེགས་ཀྱིས་འབད༷་པ༷་མེད༷་པར༷་འཇུག་པའི་སྟོབས་ཀྱིས་ཚུལ༷་ཁྲིམས༷་ཉེས་པ་ཕྲ་མོས་ཀྱང་དྲི༷་མ་མེད༷་པ་སྲུང༷་བར་བྱེད༷་པ་ལ༷་བསོད་ནམས་ཆེས་འཕེལ་མོད། དེ་ལས་ཀྱང་གང་ཟག་གཞན༷་གང༷་ལ་ལ་ཞིག་གིས་གནས་བཞི་པོ་འདི༷་ལས༷་དོན་རྟོགས་པ་ལྟ་ཅི་སྨོས་ཚིག༷་ཙམ༷་ཐོས༷་ཤིང༷་ཐོས༷་ནས༷་ཀྱང༷་ནི༷་མོས༷་པར་གྱུར་ན༷་མོས་པའི་དགེ་བ་འདིས༷་གོང་བཤད་ཀྱི་ཚུལ༷་ཁྲིམས༷་ལས༷་བྱུང༷་བའི་དགེ༷་བ༷་དེ༷་ལས༷་བསོད༷་ནམས༷་ཆེས༷་མང༷་དུ་ཐོབ༷་པར༷་འགྱུར༷་རོ། །གང་ཟག་གང༷་ཞིག༷་འཇིག་རྟེན་འདི༷་ན༷་བྱེད་ལས་སྲིད༷་པ༷་གསུམ༷་གྱི༷་ཉོན༷་མོངས༷་པའི་མེ༷་འཇིལ༷་བར་ནུས་པའི་བསམ༷་གཏན༷་ནི༷། ལྷ༷་ཡི་གནས་པ་བསམ་གཏན་བཞི་དང༷་ཚངས༷་པའི་གནས༷་པ་ཚད་མེད་བཞི་རྣམས་ཕུལ་བྱུང་མཐར༷་སོན༷་པ་ཞིག་རྫོགས༷་པའི༷་བྱང༷་ཆུབ༷་འཕོ༷་བ་མེད༷་པ་ཐོབ་པའི་ཐབས༷་སུ་བསྒོམས༷་པ་ལ༷་བསོད་ནམས་ཆེས་མང་པོ་འཕེལ་མོད། དེ་བས་ཀྱང་གང་ཟག་གཞན༷་གང༷་ལ་ལ་ཞིག་གིས་གནས་བཞི་པོ་འདི༷་ལས༷་བརྩམས་ཏེ་དོན་རྟོགས་པ་ལྟ་ཅི་སྨོས། ཐ་ནའང་ཚིག༷་ཙམ༷་ཐོས༷་ཤིང༷་ཐོས༷་ནས༷་ཀྱང༷་ནི༷་ཡིད་ཆེས་པས་མོས༷་ན༷་དེ་ལྟར་མོས་པའི་དགེ་བ་འདི༷་གོང་བསྟན་གྱི་བསམ༷་གཏན༷་ལས༷་བྱུང༷་དགེ༷་བ༷་དེ༷་ལས༷་བསོད༷་ནམས༷་ཆེས༷་མང༷་འཕེལ་ཞིང་ཐོབ༷་པར༷་འགྱུར༷་རོ། །འདི་རྣམས་ཡེ་ཤེས་སྣང་བ་རྒྱན་གྱི་མདོ་ཚིགས་བཅད་དུ་བྱས་པའོ། །ཞེས་གསུངས། ། ཞལ་གདམས་སོགས་གསུང་ཐོར་བུའི་སྐོར་ལས།༄༅། །ཧོར་བླ་གཞན་ཕན་ལ་ཕུལ་བའི་ཞུ་ཡིག །རྒྱལ་ཀུན་ཕྲིན་ལས་གཅིག་བསྡུས་མཚོ་སྐྱེས་རྗེ། །ཞལ་མི་གཉིས་པ་བདག་སོགས་འགྲོ་བའི་མགོན། །བཀའ་དྲིན་གསུམ་ལྡན་རྡོ་རྗེ་འཛིན་པ་པོ། །གཏེར་ཆེན་ཆོས་ཀྱི་རྒྱལ་པོའི་གསེར་ཁྲིའི་དྲུང་། །སྲ་མཁྲེགས་རྡོ་གདན་སྟེང་ནས། །ཆོས་མེད་སྤྲང་པོ་ཞིག་གིས། །སོར་བཅུ་སྤྱི་བོར་བཟླུམས་ནས། །སྙིང་ནས་གསོལ་བ་འདེབས་སོ། །གང་སྐུ་གསེར་རི་ལྷུན་པོ། །མི་མཐུན་ཕྱོགས་ལས་རྒྱལ་ཞིང་། །ཟབ་ཆོས་བདུད་རྩིའི་དགའ་སྟོན། །འགྱེད་བཞིན་བཞུགས་པ་དགའ་སྤྲོ། །དངོས་ངན་ཕྲན་རྨོངས་བདག་ཀྱང་། །བླ་མ་མཆོག་གསུམ་དྲིན་ལས། །སྒྱུ་ལུས་མ་བོར་ཙམ་དུ། །བག་མེད་བྱུང་རྒྱལ་གནས་ལགས། །དེང་སྐབས་འཕྲལ་གྱི་ཞུ་བ། །ཉིད་གསུང་བདུད་རྩིའི་ཟེགས་མ། །བཀའ་སྩལ་སྤྱིི་བོར་ཕེབས་པ། །རབ་དགའི་དཔལ་ལས་ཆེར་འཕེལ། །དྲིན་ཆེན་ཉིད་ཀྱིས་གསུངས་བཞིན། །སྐྱབས་རྗེའི་མདུན་སར་ལྷག་ནས། །ཟས་སྐོམ་རོ་ལ་སྲེད་བཞིན། །རྡོ་ཡུལ་སློང་མོར་སོང་སྐབས། །ཆུ་བོ་རླུང་གིས་བསྐྱོད་ནས། །གྲུ་གཟིངས་གཏོར་ལ་ཁད་བྱུང་། །བདག་གིས་ཁྱེད་ལ་གསོལ་བཏབ། །ཆུ་བོའི་ཕ་རོལ་སླེབས་སོང་། །དེ་ནས་ཡར་ལ་སོང་ནས། །ས་ངན་འཕྲང་ཆེན་ཞིག་ཏུ། །མི་ངན་གྲོགས་མེད་རྒྱུ་དུས། །རྐྱེན་ངན་གཅན་གཟན་གཟིག་ནི། །མ་བུ་གསུམ་དང་འཕྲད་ནས། །ཡར་བདའ་མར་དེད་བྱས་ནས། །སྐྲག་སྔངས་དྲག་པོ་བྱུང་དུས། །སྐྱབས་རྗེ་ཁྱེད་ཉིད་དྲན་བཞིན། །གསོལ་བ་སྙིང་ནས་བཏབ་པས། །རྐྱེན་ངན་ཁ་ནས་ཐར་སོང་། །སྐྲག་སྔངས་དེ་ཡིས་རྐྱེན་བྱས། །ཞག་གྲངས་ངེས་མེད་མང་པོར། །གཅན་གཟན་དུ་མ་རྨིས་ཚེ། །སྐྲག་སྔངས་འཇིགས་གསུམ་མང་བྱུང་། །རེ་ཞིག་བུད་མེད་ཞིག་གིས། །གཅན་གཟན་དེ་རྣམས་ཁྲིད་ནས། །འདི་རྣམས་ང་ཡི་ཆོ་འཕྲུལ། །དེ་སྔོན་ཁྱོད་ཀྱིས་མ་གོ །དེ་སྐད་ཟེར་མ་ཐག་ཏུ། །གཅན་གཟན་བུད་མེད་ཐིམ་ཞིང་། །བུད་མེད་ཡི་གེར་གྱུར་སོང་། །སྐྱབས་རྗེ་བླ་མར་ཞུས་ཚེ། །དེ་རྣམས་ཐམས་ཅད་ལྷོང་ཡིན། །ད་བར་ཁྱོད་ཀྱིས་མ་ཆོད། །ད་ནི་ཆོད་པ་ཡིན་གསུངས། །རྗེ་བཙུན་བཞད་པ་རྡོ་རྗེའི། །རྣམ་ཐར་དཔེ་ཆར་མཇལ་རྐྱེན། །ཉིན་ཞག་ལྔ་ཕྲག་གཅིག་ལ། །དབང་མེད་མལ་དུ་ལུས་ཐལ། །དེ་ཕྱིན་སྣང་བ་ཐམས་ཅད། །འདི་ཡིན་གཏད་སོ་མེད་འདྲ། །སྣང་བའི་འཆིང་ཞེན་ལྷོད་ནས། །དེ་རྗེས་ཉམས་སྣང་ཞིག་ལ། །དྲིན་ཆེན་ཁྱེད་དང་མཇལ་ནས། །རིགས་ལྔའི་ཕྱག་མཚན་གཏད་བཞིན། །སྟོད་ཕྱོགས་མར་པའི་གདན་སར། །ད་ནི་འགྲོ་རན་གསུངས་ནས། །སྐྱབས་རྗེ་བླ་མའི་དྲུང་དུ། །འགྲོ་བའི་ཞུ་བ་ཕུལ་ཚེ། །མཁའ་འགྲོའི་ལུང་བསྟན་ཡིན་ཡང་། །ད་དུང་མ་འགྲོ་གསུངས་ནས། །དེ་རྗེས་ལོ་ཟུང་སོང་ཚེ། །དྲིན་ཆེན་སྐྱབས་རྗེ་བླ་མའི། །སྐུ་ལུས་བསྙུང་གཞིས་ཟིན་ནས། །མཆོག་སྤྲུལ་རོལ་པའི་རྡོ་རྗེ། །བླ་མའི་ཞབས་པད་བརྟན་ཕྱིར། །ཡུལ་འདིར་ཆགས་ཕེབས་བྱུང་ཚེ། །དད་གུས་གདུང་བ་ཆེན་པོས། །དངོས་ངན་མདུན་སར་སོང་ནས། །ཀྱེ་ཀྱེ་རྗེ་བཙུན་ཆེན་པོ། །དེང་སང་རྫོགས་པ་ཆེན་པོའི། །ཆོས་སྐད་གླེང་བ་མང་ཡང་། །བདག་གི་རྒྱུད་ལ་མ་འབྱོར། །ད་ནི་ཅིས་ཀྱང་ཁྱེད་ལས། །སྐྱབས་གནས་གཞན་ན་མེད་པས། །ཐུགས་རྗེས་འཛིན་དགོས་ཞུས་ཚེ། །དྲིན་ཆེན་དེ་ཡི་ཞལ་ནས། །ཨོ་ལོ་བན་ཆུང་ཁྱོད་ཉིད། །མཆོག་སྤྲུལ་གཞན་ཕན་ཉིད་ནས། །འདི་རུ་མངག་པ་ཡིན་སྐད། །བདག་ཀྱང་གཞན་ཕན་ཉིད་ལ། །མཇལ་འདོད་ལྷག་པར་ཆེ་ཡང་། །དེང་སྐབས་མཇལ་སྟབས་མ་འགྲིགས། །མི་རྒན་ང་ཡི་ཁོང་ནས། །རྫོགས་ཆེན་རྟོགས་པ་མེད་ཀྱང་། །ཁྱོད་རང་ང་དང་ལྷན་དུ། །མགོ་ལོག་ཕྱོགས་སུ་ཤོག་དང་། །ལྟོ་གོས་གཉིས་པོ་ངས་སྟེར། །རྡོ་གྲུབ་མདུན་སར་སོང་དང་། །རྫོགས་ཆེན་རྒྱུད་ལ་འབྱོར་འོང་། །ཞེས་པའི་བཀའ་ཞུས་གནང་ནས། །སྐྱབས་རྗེ་ཉིད་ལ་ཁོང་གིས། །ཞུ་བ་ནན་ཏན་བྱས་ཀྱང་། །འགྲོ་བའི་གནང་བ་མ་སྟེར། །ད་ནི་བན་ཆུང་ཁྱོད་ལ། །སྐྱབས་རྗེས་གནང་བ་མེད་ཀྱང་། །མཆོག་སྤྲུལ་རྡོ་གྲུབ་ཉིད་ཀྱི། །གདམས་པའི་བྱིན་བརྒྱུད་ཕ་ཕོག །ང་ཡིས་ཁྱོད་ལ་སྟེར་ཞེས། །དགྱེས་བཞིན་རྫོགས་པ་ཆེན་པོའི། །ཁྲིད་ཡིག་ཡེ་ཤེས་བླ་མའི། །གཙོ་བྱས་རྫོགས་ཆེན་ཁྲིད་དེ། །ཟབ་གནད་མང་པོ་གནང་ནས། །ད་ནི་མཐར་ཐུག་ཡང་ཟབ། །གྲུབ་རྗེ་ཉིད་ཀྱིས་བཞེད་ལྟར། །སྙིང་པོ་འདི་ཉིད་ཡིན་ཞེས། །གསུངས་ནས་བདག་ལ་གནང་བ། །སྤྱིར་ནི་བདེ་གཤེགས་སྙིང་པོ། །འགྲོ་བའི་ཁམས་ལ་བཞུགས་ཀྱང་། །སྣང་གསུམ་ཀུན་རྟོག་བརྒྱད་ཅུ། །ལས་རླུང་ཉི་ཁྲི་སོགས་ཀྱིས། །རྐྱེན་བྱས་རང་ཞལ་བསྒྲིབས་ནས། །སུས་ཀྱང་རྟོགས་པར་དཀའ་འོ། །དེ་ཕྱིར་མངོན་དུ་བྱེད་པའི། །གདམས་པ་རྫོགས་པ་ཆེན་པོ། །ཀུན་མཁྱེན་ཡབ་སྲས་སོགས་ནས། །བརྒྱུད་པའི་གསང་ལམ་ཟབ་མོ། །གསང་བདག་དཔའ་བོའི་ཟློས་གར། །རྡོ་གྲུབ་བསྟན་པའི་རྒྱལ་མཚན། །བར་དུ་རིམ་པར་བརྒྱུད་ནས། །ཟབ་པའི་ཟབ་གནད་ཡིན་པས། །གཟུང་འཛིན་ལས་རླུང་བཞོན་པ། །དབུ་མར་ཞུགས་གནས་ཐིམ་གསུམ། །ཐིམ་པའི་རང་རྩལ་རྫོགས་ཚེ། །བཞི་ཆ་གསུམ་དང་བྲལ་བ། །ཁྱད་ཆོས་དྲུག་དང་ལྡན་པའི། །ཉེར་ཐོབ་ཆོས་སྐུའི་འོད་གསལ། །སྐུ་བཞིའི་བདག་ཉིད་ཆེན་པོར། །མངོན་དུ་གྱུར་ནས་འོང་ཞེས། །བཀའ་ཡི་གནང་བ་བྱུང་ཚེ། །དཀའ་སྤྱད་དུ་མ་བྱས་ནས། །རྩོལ་བའི་འབད་པས་བསྒྲུབ་ཚེ། །བདུན་ཕྲག་གཅིག་ཙམ་སོང་ནས། །རེ་ཞིག་མལ་ན་ཉལ་ཚེ། །གཉིད་དང་རྨི་ལམ་མཚམས་སུ། །མི་མང་འཚོགས་སར་ཐོན་འདུག །ང་ལ་གཅིག་གིས་མདའ་འཕང་། །རཱ་ཧུ་ལ་ཡི་མདའ་གཞུ། །ཡིན་ཞེས་ང་རྩར་སྣང་ནས། །ང་ཡི་ཕར་ལ་འཕངས་བས། །མི་གཅིག་བསད་ནས་ཡང་ནི། །འཕེན་པའི་བསམ་པ་ཤར་ཚེ། །མཆོག་སྤྲུལ་རོལ་པའི་རྡོ་རྗེས། །ང་ཡིས་ཁྱོད་ལ་སྣང་སྲིད། །བླ་མར་ངོ་སྤྲོད་ཐིང་ཞིང་། །ང་ལ་འཕང་བ་མི་རིགས། །ཁྱོད་རང་ཤར་ལ་སོང་དང་། །མདའ་མོ་ང་ཡིས་འཕེན་ཞེས། །མདའ་བརྒྱག་ནམ་མཁར་བཀྱགས་པས། །ས་གཞི་རྒྱ་མཚོ་ཆེན་པོར། །ཕྱེད་ཚལ་མེ་དཔུང་འབར་ཞིང་། །ཕྱེད་ཚལ་ཆུ་ཆེན་མཆེད་སོགས། །སྣང་བ་དུ་མ་ཤར་ནས། །ཉི་ཤར་བར་དུ་ལུས་ཐལ། །དེ་སོགས་ཉམས་སྣང་མང་པོ། །ངལ་ནས་བྲི་བར་མ་ནུས། །གཟུང་འཛིན་ལས་རླུང་བཞོན་པ། །དབྱིངས་སུ་ནུབ་པའི་ཟླ་ཤར། །མི་རྟོག་དབུ་མའི་གཤིས་ལ། །ཐིམ་ཡང་དྲན་མེད་མུན་པ། །ལྟ་བུའི་གཟེབ་ལས་གྲོལ་ནས། ལུང་མ་བསྟན་དུ་མ་འབྱམས། །བུམ་ནང་མར་མེ་སྦར་བཞིན། །འོད་གསལ་འཆར་སྒོ་འགག་མེད། །འཁོར་འདས་སོ་སོའི་མཚངས་རྣམས། །རིག་ཅིང་དེ་རུ་འཛིན་པས། །ཀུན་རྟོག་བློ་དང་བྲལ་བའི། །གཞོན་ནུ་བུམ་སྐུའི་ཞིང་ཁམས། །མཐོང་བ་ཡིན་ཞེས་གཟུགས་མེད། །སྒྲ་ཡི་རྣམ་པས་བསྟན་སོང་། །དེ་ཡང་སྟོང་པའི་རང་མདངས། །ཆེས་ཆེར་རབ་ཏུ་འབར་ནས། །སྣང་སྲིད་སྣོད་བཅུད་ཐམས་ཅད། །རྟོག་མེད་འོད་གསལ་ངང་དུ། །མེ་ལོང་གཟུགས་བརྙན་ལྟར་རམ། །རྒྱ་མཚོར་གཟའ་སྐར་ཤར་བཞིན། །དེ་ལ་དེར་འཛིན་མེད་པའི། །ངང་ནས་ལྟད་མོ་མཐོང་ཞིང་། །གཞི་དབྱིངས་མཐིང་གསལ་ཀློང་དུ། །རིགས་ལྔའི་ཞིང་སོགས་ཤར་ཚེ། །སྣང་ཆ་ཡིན་ཞེས་གསལ་ཞིང་། །སྟོང་ཆ་ཡིན་ཞེས་གཞིར་ཐིམ། །དབུ་མེད་རྒྱན་ལྡན་དུ་མས། །འདི་རྣམས་རིགས་ལྔའི་ཞིང་སོགས། །ཡིན་ཞེས་བརྡ་སྤྲད་སྣང་ངོ་། །རྒྱ་ཡིག་བོད་ཡིག་ལ་སོགས། །ཡིག་རིགས་དུ་མ་མང་པོའི། །སྣང་བརྙན་སྣ་ཚོགས་ཤར་ནས། །ཡང་ཡང་བུད་མེད་དུ་མས། །ཚེ་རབས་སྔོན་ནས་འབྲེལ་པའི། །བླ་མ་སངས་རྒྱས་ཐོགས་མེད། །ཡིན་ཞེས་ཁ་བ་ལ་དེར། །བཞུགས་ཡོད་དེ་རུ་སོང་སོགས། །ཉམས་སྣང་དུ་མ་ཤར་རོ། །ཉམས་སྣང་དེ་ཡི་ངང་ནས། །ཉིན་ཞག་ཟུང་སོགས་ཐལ་ལོ། །དེ་ནས་སད་རྒྱུ་མེད་ཀྱང་། །སད་པའི་སྣང་བ་ཤར་རོ། །ཐོད་རྒལ་ཉམས་དང་མ་མཚུངས། །དེ་སོགས་ཉམས་སྣང་ཆ་ལ། །འཁྲུལ་རྟོག་གྱ་གྱུའི་རི་མོ། །རྗེ་བཙུན་ཆེན་པོའི་སྙན་དུ། །ལྷད་མེད་བྱིས་པས་བླངས་ཡོད། །ཞུ་གསོལ་དོན་གྱི་སྙིང་པོ། །མཆོག་སྤྲུལ་རང་ཡུལ་ཕེབས་སོང་། །སྤྲང་པོ་གཏད་མེད་ལུས་ཐལ། །ད་ནི་ཅིས་ཀྱང་ཉིད་ཀྱིས། །ཡོ་ག་གསུམ་གྱི་རྫོགས་རིམ། །གཞི་ལམ་འབྲས་བུར་འབྲེལ་བའི། །ཞལ་གདམས་ཟབ་པའི་མཐར་ཐུག །བདག་གཞན་ཡོངས་ལ་ཕན་ཕྱིར། །ཅིས་ཀྱང་གནང་བར་འཚལ་ལོ། །སྤྲང་པོའི་རེ་འབྲས་དེ་རྣམས། །མ་ཧཱ་གུ་རུའི་ཐུགས་ནས། །གལ་ཏེ་ཡལ་བར་དོར་ན། །སྤྲང་པོ་བསད་དང་ཁྱད་པར། །ཡོད་ན་དཀོན་མཆོག་གསུམ་པོ། །སྐབས་སུ་དད་པའི་རྟེན་དུ། །ཕྱག་ཐམ་ན་བཟའ་དབུ་སྐྲ། །སྤྱི་བོར་སྩོལ་བའི་བཀའ་དྲིན། །རེ་འབྲས་དོན་ལྡན་ཞུ་ཞུ། །ཉིད་ཀྱི་བཀའ་བཞིན་འདི་རུ། །ལོ་བར་ཆ་ཤས་སོང་འདུག །ད་ནི་སྤྲང་པོ་བདག་ལ། །སྐྱབས་རྗེ་དགུང་ལོ་བགྲེས་རྐྱེན། །ཡུལ་འདིར་འདུག་སྙམ་མེད་མོད། །འོན་ཀྱང་ད་དུང་སྐྱབས་རྗེའི། །བཀའ་ཡི་གནང་བ་མ་བྱུང་། །དེ་ཚེ་སྤྲང་པོ་བདག་ནི། །ངེས་མེད་ཞིག་ཏུ་འགྲོ་ངེས། །སྔ་སོར་རྗེ་བཙུན་ཉིད་དང་། །ཕ་མ་ཨ་ཁུ་སོགས་ལ། །མཇལ་འདོད་ལྷག་པར་ཡོད་ཀྱང་། །ད་ནི་དྲིན་ཆེན་ཨ་ཁུའི། །སྒྱུ་ལུས་མེ་ཏོག་འཐོར་སོང་། །དེ་ཕྱིར་འོང་སྙམ་སྤྲང་པོ། །བདག་ལ་གཏན་ནས་མི་འདུག །དེང་ནས་བྱང་ཆུབ་བར་དུ། །ཁྱེད་ལས་རེ་ས་སྐྱབས་གནས། །སྤྲང་པོ་བདག་ལ་མེད་པས། །དུས་དང་རྣམ་པ་ཀུན་ཏུ། །ཟབ་གསལ་ཐུགས་ཀྱི་ཀློང་ནས། །ནམ་ཡང་འདོར་མེད་མཁྱེན་མཁྱེན། །ཆེད་གསོལ་གངས་ཅན་བོད་ཡུལ། །གསེར་གྱི་ས་གཞིའི་ཁྱོན་འདིར། །གང་སྐུ་གསེར་རི་ལྷུན་པོ། །བསྐལ་བརྒྱའི་བར་དུ་བཞུགས་ཤིག །དེ་སྐད་ཉམས་སྣང་རྫུན་གཏམ། །ལྷ་དགོན་ཉེ་བའི་རི་ནས། །རྗེ་ཡི་འབངས་ཀྱི་ཐ་ཤལ། །ངེས་མེད་སྤྲང་པོས་བྲིས་སོ། །དགེའོ། ། ༄༅། །འབྲུག་པ་རིན་པོ་ཆེ་ལ་ཕུལ་བའི་ཞུ་ཡིག །དུས་བཞི་མཉམ་ཉིད་ཀྱི་ཞིང་ན། །སྐུ་གསུམ་རང་སྣང་གི་སྟོན་མཆོག །ཐུགས་རྗེའི་ཕྱག་ཡངས་དེ་རྐྱོངས་ལ། །བྱིན་རླབས་སྙིང་དབུས་སུ་སྩོལ་དང་། །ཀ་དག་ཡེ་གྲོལ་གྱི་ཞིང་ན། །འཕོ་མེད་ཆོས་སྐུ་ཡི་རྒྱལ་ས། །ཆོས་མེད་སྤྲང་པོ་ངས་ཟིན་ཚེ། །རྒྱང་གླུ་རིང་མོ་ཞིག་མཆོད་ཡ། །མཉམ་བཞག་ལྟ་སྟངས་ཀྱི་འཛིན་པ། །སེམས་འཛིན་ཡིད་དཔྱོད་ཀྱི་བསམ་གཏན། །སྡུག་བཙིར་འཇུར་བཅིངས་ཀྱི་དྲན་པ། །མ་བཅོས་ལྷོད་གྲོལ་ལ་ལངས་སོང་། །དབྱིངས་རིག་ཕྱམ་བརྡལ་གྱི་ཀློང་ན། །རིག་རྩལ་འགག་མེད་ཀྱི་རོལ་པ། །རྒྱུ་འབྲས་སྔ་ཕྱི་རུ་འབྲེལ་བའི། །བག་ཆགས་གསོག་ལོང་ནི་མི་འདུག །འཁོར་འདས་ཡེ་གྲོལ་གྱི་ཀློང་ན། །གང་ཤར་ཡེ་ཤེས་ཀྱི་རོལ་པ། །སྣང་སེམས་ཁྲལ་ཁྲོལ་དང་བན་བུན། །རྟོགས་གྲོལ་ཉམས་ལེན་རང་མཐར་ཐུག །ན་རུང་འཚེར་བ་ནི་མི་འདུག །ཤི་ཡང་འགྱོད་པ་ཡང་མི་སྐྱེ། །ན་དགའ་ཤི་སྐྱིད་ཀྱི་ངང་ནས། །ངེས་མེད་དབེན་ཁྲོད་དུ་ཆས་འགྲོ། །རྗེ་ཡི་བཀའ་དྲིན་ལ་བསམས་ན། །སྡོད་མི་ཚུགས་པ་ཞིག་བྱུང་ཡང་། །གཞན་ནས་བྱ་ཐབས་ནི་མི་འདུག །བཀའ་ཤོག་ལེགས་པོ་ཞིག་གནང་ཤོག །ཕྲན་ལ་ཐུགས་རྗེ་ཡིས་གཟིགས་དང་། །ནམ་ཞིག་མགོན་ཁྱོད་ཀྱི་དྲུང་དུ། །སྐྱིད་པའི་ཞབས་བྲོ་དེ་འཁྲབ་བཞིན། །དགའ་བའི་གླུ་དབྱངས་ཀྱིས་མཆོད་འོང་། །ཞེས་འབྲུག་པ་རིན་པོ་ཆེ་ལ་ཕུལ་བའི་ཞུ་ཡིག་ལས་ཁོལ་དུ་ཕྱུང་བའོ།། །། ངལ་གསོའི་མགྲོན་པོའི་རྒྱང་གླུ་ཞེས་བྱ་བ་བཞུགས་སོ། །སྡེ་གསུམ་ཀློང་དགུ་ཡི་མན་ངག །འཁྲུལ་མེད་ལམ་བཟང་གི་རྫོགས་ཆེན། །སྟོན་མཛད་བརྒྱུད་གསུམ་གྱི་བླ་མའི། །ཞབས་པད་སྤྱི་བོ་རུ་མཆོད་ཡ། །གྲུབ་བརྙེས་རིག་འཛིན་གྱི་བླ་མའི། །བརྒྱུད་པའི་གྲལ་རིམ་ལ་བསམས་ན། །གྲལ་མཐའི་མདོ་མེད་ཀྱི་སྤྲང་པོས། །ཉམས་དགའི་གླུ་ཆུང་ཞིག་འཐེན་ཡ། །ཨ་ཧོ། གྲོང་དགོན་སྤེལ་མ་ཡི་ཁྲོད་ན། །གནས་ཉམས་འཐུག་པོ་ཡི་མལ་དུ། །ཉམས་ཞེན་རོ་མྱོང་ལ་ཆགས་པའི། །ངལ་བ་དོན་མེད་ཀྱི་སྒོམ་ཆེན། །ཨ་འཐས་ཉམས་ཞེན་གྱི་འཆིང་བས། །རང་རྒྱུད་བསྡམ་པ་དེ་ཨེ་གོ །དབང་མེད་བྱེད་པོ་ནི་མ་མཆིས། ཅུང་ཟད་གློད་ན་ནི་བདེའོ། །ཅིར་ཡང་མ་གྲུབ་པའི་ངང་ནས། །དྭངས་གསལ་འགག་མེད་ཀྱི་ཉམས་ལེན། །ཞང་ཞུང་བོན་པོ་དང་མཐུན་པའི། །ལྟ་དེ་སྤྲོས་ཅན་དུ་འདུག་གོ །བསྒོམས་ཀྱང་སེམས་འཛིན་གྱི་བསམ་གཏན། །མ་བསྒོམས་འཁྲུལ་འབྱམས་ཀྱི་རང་བཞིན། །དེ་འདྲའི་གནས་འགྱུ་ཡི་ངང་ལ། །མི་ཚེ་ཟད་པ་འདི་ཨེ་གཟིགས། །གཟུགས་མེད་བསམ་གཏན་གྱི་ཁུང་བུར། །སེམས་གནས་དགུང་ལོ་ནི་བགྲེས་ཀྱང་། །གནས་དགའ་འགྱུ་སྡུག་གི་ངང་ནས། ད་དུང་འོ་བརྒྱལ་ཞིག་ཡོད་སྐད། །ལྟ་བའི་བགྲོ་གླེང་རེ་བྱས་ཚེ། །འདྲི་ས་གླེང་ས་ཙམ་མེད་པའི། །ཁྱོད་ཀྱི་ལོག་རྟོག་དེ་སྤོངས་དང་། །ང་ཚོས་ལྟ་མགུར་ཞིག་འཐེན་ཡ། །ཨ་ཧོ། མཉམ་བཞག་ལྟ་སྟངས་ཀྱི་འཛིན་པ། །ད་ནི་གར་འགྲོ་ལ་ཐོངས་ཞོག །སེམས་འཛིན་ཡིད་དཔྱོད་ཀྱི་བསམ་གཏན། དགོས་མེད་རང་བབ་དུ་སྐྱུར་ཐོངས། །སྐྱེ་མེད་ཀ་དག་གི་དབྱིངས་ན། འགག་མེད་ཡེ་གྲོལ་གྱི་རིག་པ། །ཉམས་ཞེན་ཤུན་པ་དང་བྲལ་ནས། གཅེར་བུ་རྗེན་པ་རུ་འདུག་གོ །འཕྲལ་བྱུང་དགག་སྒྲུབ་ཀྱི་ཤེས་པ། །མི་སྡོད་རང་ཡལ་ལ་སོང་ནས། ཀུན་རྟོག་ལས་རླུང་གི་རྒྱུ་བ། །གདོད་མའི་གཞི་དབྱིངས་སུ་ཕེབས་ཐལ། །འཇུར་བཅིང་ཨ་འཐས་ཀྱི་དྲན་པ། །མ་བཅོས་ལྷོད་གྲོལ་ལ་སོང་ནས། །གཉིས་འཛིན་རྣམ་རྟོག་གི་མདུད་རྒྱ། ནམ་མཁའི་བྱ་རྗེས་ལ་འགྲན་ཐལ། །དྲན་པ་རང་གྲོལ་གྱི་དགོངས་པ། །དྲན་སྣང་ཡེ་ཤེས་ཀྱི་འཁོར་ལོ། །ཁྱབ་བརྡལ་ལྷུན་གྲུབ་ཀྱི་དྲན་པ། །མ་བཅོས་ཕྱམ་བརྡལ་ལ་ལངས་སོང་། །ཆོས་ཉིད་ཡེ་གྲོལ་གྱི་ཀློང་ན། །གཟུང་འཛིན་གཞི་གྲོལ་དང་རྒྱ་གྲོལ། །ཀ་དག་ཆོས་ཟད་ཀྱི་དགོངས་པ། །ཟང་ཐལ་རྗེན་པ་རུ་ཐལ་ལོ། །ཕར་ལ་མ་བསྒོམ་པས་ཅོག་བཞག །ཚུར་ལ་མ་བཅིངས་པས་རྒྱ་ཡན། །དབུས་ལ་མི་གནས་པས་ཟང་ཐལ། །འཕོ་མེད་ཆོས་སྐུ་ཡི་རྒྱལ་ཁབ། །གང་སྣང་བདེན་མེད་དུ་ཤར་བ། །སྒྱུ་མའི་དཔེ་བརྒྱད་ཀྱི་རྣམ་རོལ། །རྒྱུན་འཛིན་ཤེས་པའང་མི་སྡོད། །རང་ཡལ་རྗེས་མེད་ལ་ཕེབས་སོང་། །བསྒོམས་ཀྱང་གཏད་སོ་ནི་མི་འདུག །མ་བསྒོམས་འཁྲུལ་འབྱམས་ནི་མི་སྣང་། །སྒོམ་དང་མི་སྒོམ་དང་བྲལ་བའི། །འོད་གསལ་མཐའ་དབུས་ལས་འདས་སོང་། །ཡེ་གཞི་ཀ་དག་གི་རང་མདངས། །ལྷུན་གྲུབ་འོད་གསལ་གྱི་སྣང་ཆ། །སྐུ་དང་ཡེ་ཤེས་ཀྱི་ཚོམ་བུ། །གཉིས་མེད་རོལ་པ་འདི་ཧ་ཧ། །ཀ་དག་ཡེ་གྲོལ་གྱི་ལྟ་བ། །མཐའ་དབུས་སྤྲོས་མཐའ་དང་བྲལ་སོང་། ལྷུན་གྲུབ་འོད་གསལ་གྱི་སྒོམ་པ། །ཉིན་མཚན་འཁོར་ཡུག་ཏུ་འབྱམས་ཐལ། གང་ཤར་རང་གྲོལ་གྱི་སྤྱོད་པ། །མ་བཅོས་ལྷོད་གྲོལ་ལ་ལངས་སོང་། །སྐུ་གསུམ་ལྷུན་གྲུབ་ཀྱི་འབྲས་བུ། །རེ་དོགས་ཡིད་སྨོན་ནི་མི་འདུག །ཕ་རྒན་དྲིན་ཆེན་གྱི་ཐུགས་རྗེས། །ང་ཅག་སྐྱིད་པོ་རང་འདུག་གི། །སྨྱོན་པ་འུར་ལངས་ཀྱི་ཚུལ་དུ། །ཞབས་བྲོ་ཅི་ཞིག་ན་མི་བརྡུང་། །ཨ་ཧོ། བློ་བྲལ་ཟང་ཐལ་གྱི་ལྟ་བ། །གཉུག་མའི་དྲན་པ་ཡིས་སྐྱོངས་དང་། །འཕོ་མེད་ཆོས་སྐུ་རུ་གྲོལ་ལ། །དེ་ཙམ་དཀའ་རྒྱུ་ཞིག་མི་འདུག །ས་ལམ་བྱར་མེད་ཀྱི་ངང་དུ། ཚོགས་དྲུག་ལྷུག་པ་རུ་ཞོག་དང་། །སྒྱུ་ལུས་ཕུང་པོ་ཁོ་ཞིག་ཚེ། །གདོད་མའི་ནང་དབྱིངས་སུ་ཆས་འགྲོ། །དེ་འདྲའི་ལྟ་མགུར་ནི་སྙན་པོའི། །རྒྱང་གླུ་རིང་མོ་ཞིག་འཐེན་མཁན། །ཆོས་མེད་བཙུན་པ་ཡི་གཟུགས་བརྙན། །སྤྲང་པོ་སྨྱོན་པ་དེ་ཡིན་སྐད། །འདི་ནས་བྱང་ཆུབ་ཀྱི་བར་དུ། །འབྲལ་མེད་མཆེད་པོ་དེས་བསྐུལ་ཚེ། །གང་ཤར་ཐོལ་བྱུང་གི་ཚུལ་དུ། །མིག་འཕྲུལ་ལྟ་བུ་རུ་བྲིས་སོ། །ཞེས་སྐྱབས་རྗེ་རིན་པོ་ཆེའི་ཞབས་རྡུལ་སྤྱི་བོར་འཛིན་པ་ཆོས་མེད་བཙུན་པའི་གཟུགས་བརྙན་ཀུན་བཟང་གཞན་ཕན་མཐའ་ཡས་སུ་༼གཡུ་ཁོག་བླ་མའི་མཚན་གྱི་རྣམ་གྲངས་༽འབོད་པས་བྲིས་པའོ། །བྷ་ཝནྟུ། ༄༅། །བླ་མ་དམ་པ་ཆོས་དགའ་ལ་གདམས་པ། བླ་མ་དམ་པ་ཆོས་དགའ་ལ་གདམས་པ། མགོན་རིགས་བརྒྱའི་ཁྱབ་བདག་རྡོ་རྗེ་འཆང་། །ཕ་བཀའ་དྲིན་མཚུངས་མེད་རྔ་ཡབ་གླིང་། །དེ་དབྱེར་མེད་བླ་མ་རིན་པོ་ཆེ། །སྟེང་སྤྱི་གཙུག་འཁོར་ལོའི་རྒྱན་དུ་བཞུགས། །ཨ་ཧོ། མཐའ་མེད་ཀྱི་འཁོར་བའི་གྲོང་ཁྱེར་དུ། །ཟིན་མེད་ཀྱི་ཚེ་འདིའི་བྱ་བཞག་རྣམས། །བར་མེད་དུ་སྐུ་ཚེ་འདི་ཉིད་ལ། །དེ་བསྒྲུབས་ཀྱང་འགྲུབ་དུས་མི་འོང་གི། དོན་དེ་ཕྱིར་སྐལ་བཟང་གྲོགས་ཁྱེད་ཀྱིས། །འཇིག་རྟེན་གྱི་བྱ་བ་བློ་ཡིས་ཐོངས། །ངེས་མེད་ཀྱི་དབེན་པའི་རི་ངོགས་སུ། །ཐེག་རྒྱལ་གྱི་ཁྱད་ཆོས་ཉམས་སུ་ལོངས། ཨ་ཧོ། གནས་ཙིཏྟ་སྨུག་པོའི་གུར་ཁང་ནས། །རྩ་རྒྱ་མཚོ་གསེར་གྱི་ཉི་མ་ལས། བྱུང་བ་ཡི་ཀ་ཏི་ཤེལ་སྦུག་ཅན། །དེ་རྒྱང་ཞག་ཆུ་ཡི་སྒྲོན་མར་འབྲེལ། འདུས་མ་བྱས་རྡུལ་བྲལ་ནམ་མཁའི་དབྱིངས། །བློ་འཇུར་བུ་མ་ཡིན་ལྷོད་གྲོལ་དུས། །དོན་གཟིགས་སྟངས་གསུམ་གྱིས་དབྱིངས་ལ་ལྟོས། །དབྱིངས་རྣམ་པར་དག་པའི་སྒྲོན་མ་འདི། །འོད་ལྔ་ཡི་ཟླུམ་འཁྲིགས་ར་བ་ཅན། །དེ་དབུས་ཐིག་ལེ་སྟོང་པའི་སྒྲོན། །ལྔ་ལྡན་འོད་ཀྱི་ཚོམ་བུ་ཅན། །པདྨ་འདབ་མ་བཞི་བཞིས་བརྒྱན། །དེ་དབུས་རྡོ་རྗེ་ལུ་གུ་རྒྱུད། མུ་ཏིག་བསྟར་ལ་བརྒྱུས་པའམ། །གསེར་གྱི་སྐུད་པ་ལྡིང་འདྲ་ལ། །ཐིག་ལེ་དང་ཐིག་ཕྲན་མང་པོས་བརྒྱན། །དོན་དེ་མཐོང་གི་སྐྱེས་བུ་སྐལ་བ་བཟང་། །ཐབས་ཅོག་བཞག་འཁྱིལ་བའི་མན་ངག་གིས། །ལུས་མི་གཡོ་སྐུ་གསུམ་བཞུགས་སྟངས་དང་། །ངག་མི་སྨྲ་ལས་རླུང་དབུ་མར་བསྐྱལ། །སེམས་འཁྲུལ་མེད་དབྱིངས་རིག་མ་བུ་བསྲེ། །གནས་དག་དབྱིངས་དབུ་མའི་གྲོང་ཁྱེར་ན། །གཞི་ཆོས་སྐུའི་རང་བཞིན་སྤྲོས་དང་བྲལ། །ལམ་ལྷུན་གྲུབ་སྣང་བཞི་མཐར་ཕྱིན་ནས། །དོན་འབྲས་བུ་སྐུ་བཞིའི་རྒྱལ་ས་ཟིན། །ཞེས་བླ་མ་དམ་པ་ཆོས་དགའ་ནས་ཞལ་གདམས་ཤིག་དགོས་ཞེས་ཡང་ཡང་བསྐུལ་བའི་ངོར་ཆོས་དབྱིངས་རང་གྲོལ་གྱིས་བྲིས་པ་དགེ། ༈ དབྱིངས་རིག་དབྱེར་མེད་དགོངས་པ་སངས་རྒྱས་ཀྱི་མཐར་ཐུག །དག་ཆེན་དབྱིངས་དེ་དམ་ཆོས་རྒྱ་མཚོ་ཡི་བརྗོད་བྱ། །དགོངས་པ་དེ་རྟོགས་འཕགས་པའི་དགེ་འདུན་དུ་བཞུགས་པ། །དཀོན་མཆོག་ཀུན་འདུས་རྩ་བའི་བླ་མ་དེ་མཁྱེན་ནོ། །ཐབས་མཁས་རྣམ་རོལ་དུས་གསུམ་བླ་མ་ཀུན་དབྱེར་མེད། །ཟུང་འཇུག་ཀློང་ན་དཀྱིལ་འཁོར་རྒྱ་མཚོ་ཡི་ཁྱབ་བདག །ཆོས་ཉིད་མཁའ་ལ་དགོངས་པའི་རྩལ་ཤུགས་ཀྱིས་འགྲོ་བའི། །རྩ་གསུམ་ཀུན་འདུས་རྩ་བའི་བླ་མ་དེ་མཁྱེན་ནོ། །ཆོས་ཟད་དགོངས་པ་ཆོས་སྐུའི་སངས་རྒྱས་ཡི་ངོ་བོ། །ཚད་ཕེབས་རིག་གདངས་ལོངས་སྐུའི་དཀྱིལ་འཁོར་གྱི་འཆར་གཞི། །མངོན་སུམ་གོང་འཕེལ་སྤྲུལ་སྐུའི་སྣང་བ་ལ་རོལ་བའི། །སྐུ་གསུམ་དབྱེར་མེད་རྩ་བའི་བླ་མ་དེ་མཁྱེན་ནོ། ། ༄༅། །སྐྱེ་མེད་ཆོས་སྐུའི་སོགས་ཤོ་ལོ་ཀ་ང་གསུམ་ཅན། སྐྱེ་མེད་ཆོས་སྐུའི་བླ་མ་ཀུན་མཁྱེན་རྗེ། །འགག་མེད་ལོངས་སྐུའི་བླ་མ་འཇིགས་མེད་གླིང་། །རིས་མེད་སྤྲུལ་སྐུའི་བླ་མ་འབྲུག་པ་དང་། །དབྱེར་མེད་རང་བྱུང་རིག་པའི་རྒྱལ་པོར་འདུད། །སྲིད་རྩེ་ནས་བཟུང་མནར་མེད་ཡན་ཆད་དུ། །སྡུག་བསྔལ་ལས་གཞན་བདེ་བ་ཡོད་མིན་ཕྱིར། །དེ་ལས་ཐར་འདོད་བློ་ཤུགས་དྲག་པོ་ཡིས། །འཁོར་བར་ཞེན་པ་ལོག་པའི་ངེས་འབྱུང་སྒོམས། །མཐའ་མེད་འཁོར་བའི་གྲོང་ཁྱེར་དྲུག་པོ་ན། །མ་རྒན་ཉམ་ཐག་ལས་ཀྱི་རྗེས་འབྲང་ནས། །ཡང་ནས་ཡང་འཁོར་ཤིང་རྟའི་འཕང་ལོ་བཞིན། །དེ་ཚུལ་སོམས་ལ་བྱང་ཆུབ་སེམས་གཉིས་སྒོམས། །རིག་སྟོང་ཟུང་འཇུག་ཆེན་པོའི་རང་རྩལ་ལས། །རོལ་བ་འགག་མེད་སྣོད་བཅུད་ཞིང་སྐུར་ཤར། །བརྗོད་བྲལ་སྔགས་ཀྱི་རྒྱལ་པོའི་རང་རྩལ་ལས། །རོལ་པ་འགག་མེད་སྒྲ་གྲགས་སྔགས་སུ་ཤར། །ཐུགས་རྗེ་ཀུན་ལ་ཁྱབ་པའི་རིག་རྩལ་ལས། །རོལ་པ་འགག་མེད་དྲན་རྟོག་བཟང་ངན་ཀུན། །སྤང་བླང་མེད་པར་གང་ཤར་རང་སར་གྲོལ། །དེ་ལྟར་སྣང་སྲིད་རྣམ་དག་དག་སྣང་སྒོམས། །གདོད་མའི་སྟོང་ཆེན་དབྱིངས་ཀྱི་དགོངས་ཀློང་ན། །རིག་པའི་ཡེ་ཤེས་གཡོ་མེད་ཡེ་ནས་བཞུགས། །རང་རྩལ་འགག་མེད་མེ་ལོང་གཡའ་བྲལ་བཞིན། །རོལ་པ་ཤར་གྲོལ་ནམ་མཁའི་བྱ་རྗེས་ལྟར། །དགེ་དང་མི་དགེ་རྟོག་ཚོགས་བཟང་ངན་ཀུན། །བག་ཆགས་བསགས་ལོང་མེད་པར་གྲོལ་བའི་ཚེ། །ཐ་མལ་འཁྲུལ་འབྱམས་ཡོད་པ་མ་ཡིན་ཏེ། རིན་ཆེན་གླིང་དུ་ས་རྡོ་བཙལ་བཞིན་ནོ། །ཆོས་ཀྱི་དབྱིངས་ལ་མཐའ་དབུས་ཡོད་མིན་ཞིང་། །དབྱིངས་ཀྱིས་གར་ཁྱབ་རིག་པའི་ཡེ་ཤེས་ཀྱིས། །ཁྱབ་པ་ཡིན་ཏེ་རིག་སྟོང་དབྱེར་མེད་ཕྱིར། །མེ་དང་ཚ་བ་ཆུ་དང་རླན་བཞིན་ནོ། །དེ་འདྲའི་དགོངས་ཀློང་མངོན་དུ་མ་གྱུར་ན། །ཀ་དག་ཟང་ཐལ་མཐའ་དབུས་བྲལ་ཞེས་དང་། །ཁྱབ་བརྡལ་རིག་པ་ཚིག་ཙམ་བརྗོད་པ་ལ། །གཤིས་དེར་ཕེབས་པའི་སྐལ་བ་ཡོད་མི་སྲིད། །དེ་ཕྱིར་སེམས་རིག་ལ་ཤན་མ་ཕྱེ་བར། །ཉམས་དང་སེམས་ཀྱི་སྦུབས་དང་བྲལ་བ་ཡི། །རིག་སྟོང་རྗེན་པའི་རང་ཞལ་མཐོང་སྲིད་ན། །གྲུབ་པའི་དབང་ཕྱུག་རྣམས་ཀྱི་བཞད་གད་གནས། །རྣམ་རྟོག་མེད་པའི་སྟོང་ཉམས་ཙམ་ཞིག་ལ། །མཉམ་པར་བཞག་ན་འཁྲུལ་རྟོག་བག་ཉལ་དུ། །ཡོད་པ་རེ་ཞིག་ལྡང་བར་མི་ནུས་ཀྱང་། །རྟོག་ངན་དུག་རོ་རྐྱེན་དང་ཕྲད་ན་ལྡང་། །ལྟ་མཚང་སྤྱོད་པས་ཕུད་ཅེས་གསུངས་པ་དེ། །འདི་ལ་མི་སྨྲ་གཞན་དུ་ཡོད་དམ་ཅི། །དེ་ཕྱིར་གྲོལ་ཚུལ་གདེངས་དང་ལྡན་བྱས་ན། །སྒྲུབ་བརྒྱུད་དམ་པའི་ཕྱག་བཞེས་ཁོ་ན་འོ། །ཆོས་མེད་སྤྲང་པོ་སྨྱོན་པའི་ངང་ཚུལ་ངས། །གླུ་དབྱངས་དར་དིར་སྒྲོགས་པའི་བྷྲ་མ་ར། །ལྷ་རྫས་དར་གྱི་འདབ་གཤོག་ལེགས་བསྐྱོད་དེ། །ཁྱོད་དྲུང་པདྨའི་ཚལ་དུ་དེ་རིང་མངག །དགེའོ། ། ༄༅། །སེམས་རིག་ཤན་འབྱེད་ཀྱི་མན་ངག་བཞུགས། ཨ་ཧོ། དཔལ་མགོན་བླ་མའི་ཐུགས་རྒྱུད་ཀྱི། །བྱིན་རླབས་མོས་གུས་ཁོ་ན་ཡིས། །འདྲེན་པར་འདོད་པ་གང་སུ་ཞིག །ཡོད་ན་སྙན་གྱི་དབང་པོས་གསོན། །ཁྲེགས་ཆོད་སྟོང་པའི་ཡེ་ཤེས་དང་། །ཐོད་རྒལ་སྣང་བའི་འོད་གསལ་གཉིས། །ཟུང་འཇུག་ཆེན་པོར་བཞུགས་པ་ལ། །འཕགས་ལམ་རྫོགས་པ་ཆེན་པོར་གྲགས། །གཞོན་ནུ་བུམ་སྐུའི་མཁའ་ཀློང་ན། །འཕོ་ཆེན་རྡོ་རྗེའི་རོལ་མོ་ཅན། །ནང་གསལ་ཐིམ་ལ་མ་རྨུགས་པའི། །ཕྲ་བའི་ཡེ་ཤེས་འགག་པ་མེད། །དེ་ལ་རྟོག་གེའི་དཔྱད་ར་དང་། །བླུན་སྒོམ་མུན་རྡོ་འཕེན་པ་ཡིས། །གོ་རྒྱུ་མྱོང་རྒྱུ་མེད་མོད་ཀྱང་། །གཉིད་དང་བརྒྱལ་བ་ལྟ་བུ་མིན། །རྩོལ་མེད་ཅོག་བཞག་རྣམ་བཞིའི་ངང་། །སེམས་དང་སེམས་བྱུང་འགགས་པའི་ཆ། །ཡེ་ཤེས་རྗེན་པར་མཐོང་འདོད་ན། །རྫོགས་པ་ཆེན་པོར་བློ་ཕུག་གཏོད། །ལས་ཀྱི་རླུང་འདི་རང་སོར་ཞོག །རྟོག་ཚོགས་ཉོན་རླུང་བག་ལ་ཞ། །ཡེ་ཤེས་རླུང་ནི་དབྱིངས་སུ་འཁྱིལ། །འདི་ནི་གདོད་མའི་གྲོལ་ས་འོ། །སེམས་དང་ཡེ་ཤེས་འཕྲད་པའི་ཚེ། །རིག་གདངས་ལས་ཀྱི་རླུང་གིས་བསྐྱོད། །ཀུན་རྟོག་འཁྲུལ་བའི་འཁོར་ལོ་ལ། །བརྟེན་པའི་རྟོགས་ལྡན་འོ་རེ་བརྒྱལ། །འགྱུ་བའི་ཆ་ནི་སེམས་ཡིན་ལ། །རིག་པའི་ཆ་ལ་ཡེ་ཤེས་ཟེར། །རིག་གདངས་རླུང་དང་བྲལ་བའི་ཚེ། །ཡིད་ལས་འདས་པའི་འོད་གསལ་འཆར། །དེ་ཚེ་སྐུ་གསུམ་འདུ་འབྲལ་མེད། །ངོ་བོ་སྟོང་པས་རྟག་མཐའ་བྲལ། །རང་བཞིན་གསལ་བས་ཆད་མཐའ་བྲལ། །ཐུགས་རྗེའི་རིག་པ་བེམ་སྟོང་མིན། །འདི་ནི་ཀུན་ལ་བརྗོད་མི་བྱ། །གནད་མེད་སྡུག་སྒུར་བྱེད་རྣམས་ཀྱིས། །མཐོང་ན་ཅ་ཅོའི་འུར་སྐད་འདོན། །སྙིང་གི་དབུས་སུ་ཨ་ཐམ་རྒྱ། །དེ་ལྟར་སྨྱོན་པའི་རྒྱང་གླུ་འདི། །ཚིག་དང་དཔེ་ལ་མ་ལྟོས་པར། །མཉམ་བཞག་ངོས་ལ་ཞལ་བཤུས་ནས། །དད་ལྡན་དགེ་བའི་གྲོགས་ལ་གདམས། །ཞེས་ཆོས་མེད་སྤྲང་པོ་སྨྱོན་པ་ཆོས་དབྱིངས་རང་གྲོལ་གྱིས་ཤར་མར་བྲིས་པའོ། ། ༄༅། །སྔ་མའི་རྟོག་པ་སོགས་ཚིགས་བཅད་ལྔ་པ། ཨ་ཧོ། སྔ་མའི་རྟོག་པ་དེ་འགགས་ནས། །ཕྱི་མའི་རྟོག་པ་ཡང་མ་སྐྱེས། །བར་གྱི་སྟོང་ཉམས་ལ་ཞེན་ནས། །མི་ཚེ་སྟོང་ཟད་དུ་མ་གཏོང་། །བསྒོམས་ཀྱང་སེམས་འཛིན་གྱི་བསམ་གཏན། །མ་བསྒོམས་འཁྲུལ་འབྱམས་ཀྱི་རང་བཞིན། །དེ་འདྲའི་གནས་འགྱུ་ཡི་ཉམས་ལེན། །ངལ་བ་དོན་མེད་དེ་སྐྱུར་ཐོངས། བརྒྱུད་གསུམ་དཔལ་མགོན་གྱི་བླ་མ། །སྤྱི་གཙུག་བདེ་ཆེན་དུ་བསྒོམས་ལ། །དབང་བཞི་ལེགས་པོ་ཞིག་བླངས་རྗེས། །ཐུགས་ཡིད་དབྱེར་མེད་དུ་སྲེས་ཤོག །འཁོར་བ་ཞེན་ལོག་གི་ངེས་འབྱུང་། །གཞན་ཕན་དོན་གཉེར་གྱི་བྱང་སེམས། །སྣང་སྲིད་རྣམ་དག་གི་དག་སྣང་། །ཆོས་ཀྱི་རྩ་བ་རུ་འདུག་གོ །ཀ་དག་ཡེ་གྲོལ་གྱི་ལྟ་བ། །གཉུག་མའི་དྲན་པ་ཡིས་སྐྱོངས་དང་། །ཨ་ཝ་དྷུ་ཏི་ཡི་མདུད་རྒྱ། །འགྲོལ་བ་དཀའ་མོ་རང་མི་འདུག །དགེའོ། ། ༄༅། །སངས་རྒྱས་གཉིས་པ་སོགས་ཤོ་ལོ་ཀ་ཉེར་གཉིས་པ། སངས་རྒྱས་གཉིས་པ། །རྔ་ཡབ་གླིང་པ། །གང་དང་མི་གཉིས། །ཀུན་མཁྱེན་ཡབ་སྲས། །སྙིང་གི་དབུས་ན། །འདུ་འབྲལ་མེད་དོ། །རང་རེ་ཀུན་མཁྱེན། །ཆེན་པོའི་རྗེས་འཇུག །འཁོར་བར་ཞེན་པ། །ལོག་པའི་ངེས་འབྱུང་། །གཞན་ཕན་དོན་དུ། །གཉེར་བའི་བྱང་སེམས། །བླ་མ་སངས་རྒྱས། །དངོས་སུ་མཐོང་བའི། །དད་དང་མོས་གུས། །ཡང་ཡང་བྱས་ན། །བྱིན་རྒྱུན་སྙིང་གི། །དབུས་སུ་འཕོ་འོང་། །རྡོ་རྗེའི་མཆེད་པོ། །བདག་ལ་གསོན་དང་། །གང་གིས་རྣལ་མ། །བསྒོམ་པའི་ཚེ་ན། །བྱིང་དང་རྨུགས་པའི། །དབང་དུ་སོང་ན། །ཅི་ཙམ་བསྒོམ་ཡང་། །ངལ་བ་དོན་མེད། །བྱིང་བ་དྭངས་བའི། །དྭངས་ཆ་ཐོན་ན། །ཡུལ་མེད་སངས་བའི། །ཡེ་ཤེས་ངང་ལ། །མི་གཡོ་རྒྱ་མཚོ། །ལྟ་བུར་གནས་ལགས། །རྨུགས་པ་སངས་བའིི། །གསལ་ཆ་ཐོན་ན། །གསལ་ལ་རྟོག་མེད། །ཉི་མའི་དཀྱིལ་འཁོར། །ལྟ་བུའི་ངང་ལ། །གནས་པ་ཡིན་ལགས། །སྟོང་ཆ་དག་པའི། །རྗེན་ཆ་ཐོན་ན། །བྱ་རྩོལ་བྲལ་བ། །ནམ་མཁར་དྭངས་པའི། །དཀྱིལ་འཁོར་ལྟ་བུའི། །ངང་ལ་གནས་ལགས། །གསུམ་དུ་དབྱེ་ཡང་། །ཐ་མི་དད་ཅིང་། །དུས་གསུམ་དུས་མེད། །ཆོས་ཉིད་འཁོར་ལོ། །ཐུན་མཚམས་རིས་མེད། །ཉམས་ལེན་མ་ཤེས། །དྭངས་གསལ་རྗེན་པ། །རྗེན་འདེད་གྱིས་དང་། །གཟུང་འཛིན་ལས་རླུང་། །ཉི་ཁྲི་ཆིག་སྟོང་། །དབུ་མར་ཞུགས་པ། །དཀའ་མོར་མི་འདུག །ཨ་ཝ་དྷུ་ཏིའི། །མདུད་རྒྱ་གྲོལ་ན། །གང་ལྟར་བསྒོམས་ཀྱང་། །དེ་ཡིས་མི་འཆིང་། །ཀ་དག་རིག་པ། །དེ་ལ་ལོས་ཟེར། །འཁྲུལ་སྣང་གཞི་ལ། །ཐིམ་པའི་ལག་རྗེས། །ཆོས་ཀྱི་འཁོར་ལོའི། །རྩ་མདུད་གྲོལ་ཚེ། །ལོངས་སྤྱོད་འཁོར་ལོའི། །རྫ་རྔ་རྡུངས་ཤོག །ཐོད་རྒལ་བསྒོམས་པས། །ཚེ་འདི་ཉིད་ལ། །སྣང་ཆ་ལོངས་སྤྱོད། །རྫོགས་སྐུར་གྲོལ་འོང་། །རང་ལུས་རྡུལ་ཕྲན། །དེངས་བ་ཨ་ཏི། །རྫོགས་པ་ཆེན་པོའི། །ཁྱད་ཆོས་ཡིན་ལགས། །དྲན་པ་རྣམ་གྲངས། །མང་དུ་ཡོད་ཀྱང་། །ཚོགས་བརྒྱད་བློ་དང་། །བྲལ་བའི་ཚེ་ན། །མིང་ལ་གཉུག་མའི། །དྲན་པ་ཐོགས་ཤིག །ཆོས་གྲོགས་དམ་པ། །ཡོན་ཏན་རྒྱ་མཚོས། །འདི་ལྟར་དགོས་ཞེས། །ཡང་ཡང་བསྐུལ་ནས། །སྙོམ་ལས་མཁན་གྱིས། །མིག་འཕྲུལ་ལྟ་བུར། །གང་ཤར་ཐོལ་བྱུང་། །མྱུར་དུ་བྲིས་སོ། ། ༄༅། །མཚུངས་མེད་དྲིན་ཆེན་སོགས་ཚིག་རྐང་བཅུ་བདུན་པ། མཚུངས་མེད་དྲིན་ཆེན་གྱི་བླ་མའི། །ཞབས་རྡུལ་སྤྱི་བོ་རུ་མཆོད་ཡ། །འདི་ནས་བྱང་ཆུབ་ཀྱི་བར་དུ། །འབྲལ་མེད་མཆེད་པོ་དེས་ཞུ་འབྲས། །རྟེན་བཟང་འདི་རྙེད་པར་དཀའ་བས་དལ་བ་ལ་སྙིང་པོ་ལོངས། །མི་ཚེ་ལ་ངེས་པ་མེད་པས་ནམ་འཆི་ཆ་མེད་སོམས། །ལས་འབྲས་ལ་བསླུ་བ་མེད་པས་རྒྱུ་འབྲས་ལ་བླང་དོར་གྱིས། །འཁོར་བ་ལ་སྙིང་པོ་མེད་པས་ཆོས་བརྒྱད་ཀྱི་བྱ་བ་ཐོངས། །དགེ་ཆོས་ཀྱི་འབྲས་བུ་ཡིན་པས་ཐར་ལམ་ལ་སྤྲོ་བ་སྐྱེད། །དངོས་གྲུབ་ཀྱི་འབྱུང་གནས་ཡིན་པས་བླ་མ་ལ་གསོལ་བ་ཐོབས། །སྐྱབས་གནས་ཀྱི་མཆོག་གྱུར་ཡིན་པས་དཀོན་མཆོག་ལ་བློ་སྙིང་གཏོད། །འགྲོ་དྲུག་འདི་ཕ་མ་ཡིན་པས་བརྩེ་བའི་སྙིང་རྗེ་སྒོམས། །སྡིག་སྒྲིབ་ཀྱི་ཕྱགས་ཤིང་ཡིན་པས་གཉེན་པོ་སྟོབས་བཞི་སྒོམས། །ལྷ་ཆོས་ཀྱི་རྩ་བ་ཡིན་པས་ཀུན་ལ་དག་སྣང་སྦྱོངས། །སྣང་སྲིད་འདི་བདེན་མེད་ཡིན་པས་སྒྱུ་མའི་རྩལ་སྦྱངས་གྱིས། །ཞལ་གདམས་ཀྱི་ཉིང་ཁུ་ཡིན་པས་རང་སེམས་འདི་ཆོས་ཀྱིས་ཐུལ། །སྤྲང་ང་ཡི་སྙིང་གཏམ་ཡིན་པས་གྲོགས་ཁྱེད་ཀྱི་ཐུགས་ལ་ཟུངས། །མངྒ་ལཾ། ༄༅། །སྣང་སྟོང་ཟུང་འཇུག་ཞེས་བྱའི་མཚན་དོན་ནི། དུས་གསུམ་གཞི་རྩ་བྲལ་ལ་སྟོང་ཞེས་བརྗོད། །སྣ་ཚོགས་འཆར་གཞི་མ་འགགས་སྣང་བ་ཞེས། །གཉིས་མེད་རོལ་ལ་སྣང་སྟོང་ཟུང་འཇུག་སྨྲ། །དབྱིངས་རིག་འདུ་འབྲལ་མེད་པའི་ཐ་སྙད་ཡང་། །གདོད་ནས་སྤྲོས་མཐའ་བྲལ་ལ་དབྱིངས་སུ་བརྗོད། །ཡེ་ཤེས་རྗེན་པར་བཞུགས་ལ་རིག་པ་ཞེས། །ཡེ་ནས་འདུ་འབྲལ་མེད་ལ་དབྱིངས་རིག་གྲགས། །སྣང་སེམས་མ་བུ་འཕྲད་པ་ཞེས་བྱ་ཡང་། །སེམས་ཉིད་གདོད་ནས་གྲོལ་ལ་མ་ཞེས་བརྗོད། །གང་སྣང་འཛིན་ཞེན་བྲལ་ལ་བུ་རུ་གྲགས། །གཉིས་མེད་རོལ་ལ་མ་བུ་འཕྲད་པར་སྨྲ། །ཞེས་ཆོས་དབྱིངས་རང་གྲོལ་པས་སོ། ། ༄༅། །སྐྱབས་གནས་ཀུན་འདུས་སོགས་ཚིགས་སུ་བཅད་པ་བཅུ་དྲུག་པ། སྐྱབས་གནས་ཀུན་འདུས་ཀྱི་ངོ་བོ། །དྲིན་ཆེན་བླ་མ་དེ་མཁྱེན་ནོ། །ཤི་བ་སྲོག་ལ་ནི་ཐུག་ཀྱང་། །ཆོས་ཚུགས་བཟང་པོ་ཞིག་མེད་ན། །ངེས་འབྱུང་ཡད་ཡུད་དང་སད་སུད། །ཆུ་ནང་ཀོ་གྲུ་བཞིན་བསྒྱུར་སླ། །ཚུལ་མིན་ཡིད་བྱེད་ཀྱི་རྟོག་ངན། །གང་དྲན་ལག་ལེན་དུ་བཏབ་ན། །ལས་མཐའ་ཅི་འགྲོ་ནི་མི་ཤེས། །སྣ་ཐག་རང་མགོ་ལ་དཀྲིས་ཤིག །མི་རྟག་མཛའ་བཤེས་ཀྱི་གྲོགས་ལ། །ཡུན་རིང་འགྲོག་རློམ་ཞིག་བྱས་ཀྱང་། །འཆི་བདག་གཤིན་རྗེ་ཡི་བསུ་མ། །ནམ་འོང་རང་རེས་ནི་མི་ཤེས། །འཕྲང་རིང་བར་དོ་ཡི་ཡུལ་དུ། །རང་ཉིད་གཅིག་པུ་རུ་ཕེབས་དུས། །བརྩེ་བའི་མཛའ་བཤེས་ཀྱི་གྲོགས་ལ། །འགྲོག་པའི་ཐབས་ཤིག་དེ་ཨེ་ཡོད། །འཆི་བདག་ཁྲིམས་ཁ་རང་ཚ་བས། །དབང་མེད་ཤི་གསོན་གྱི་སྣང་བ། །མི་འདོད་སོ་སོ་རུ་བྲལ་ཏེ། །རང་ཉིད་གཅིག་པུ་རུ་འགྲོ་དགོས། །དེ་བས་ད་ལྟ་ནས་རང་ཉིད། །གྲོགས་མེད་གཅིག་པུ་རུ་བསྡད་ནས། །འཆི་ཁ་འགྱོད་མེད་ཀྱི་ཆོས་ཤིག །ད་ལྟ་ད་ལྟ་ནས་སྒྲུབས་ཤིག །ཚེ་སྲོག་མི་རྟག་པའི་རང་བཞིན། །རླུང་གསེབ་མར་མེ་དང་འདྲ་བས། །རྟག་བརྟན་མེད་ཚུལ་ལ་བསམས་ན། །འཆི་བ་མི་རྟག་དེ་དྲན་འོང་། །ཟིན་མེད་ཚེ་འདི་ཡི་བྱ་བཞག །ཉིན་མཚན་བར་མེད་དུ་བསྒྲུབས་ཀྱང་། །ངལ་བ་འབྲས་མེད་ཀྱི་རང་བཞིན། །ཤེས་ནས་དགོས་མེད་དུ་སྐྱུར་ཐོངས། །མཐའ་མེད་འཁོར་བ་ཡི་གནས་སུ། །མ་རྒན་ཉམ་ཐག་གི་འགྲོ་བ། །སྡུག་བསྔལ་སྣ་ཚོགས་ཀྱིས་མནར་ཚུལ། །བསམ་ན་སྙིང་རྗེ་རང་སྐྱེ་འོང་། །ཕྱི་ནང་སྣོད་བཅུད་ཀྱི་གནས་ཚུལ། །སྐུ་དང་ཡེ་ཤེས་ཀྱི་དཀྱིལ་འཁོར། །གདོད་ནས་རྣམ་དག་ཏུ་ཤེས་ན། །སྣང་སྲིད་དག་མཉམ་དུ་རྟོགས་འོང་། །སྣང་གྲགས་རིག་གསུམ་གྱི་རང་བཞིན། །ཕ་ཅིག་དྲིན་ཆེན་གྱི་བླ་མའི། །སྐུ་གསུང་ཐུགས་གསུམ་དུ་ཤེས་ན། །སྣང་སྲིད་བླ་མ་རུ་ཤར་འོང་། །སྙིང་གི་པདྨོ་ཡི་དབུས་ན། །སྐྱབས་གནས་ཀུན་འདུས་ཀྱི་བླ་མ། །རིག་སྟོང་ཆོས་སྐུ་ཡི་ཚུལ་དུ། །འདི་ནས་བྱང་ཆུབ་ཀྱི་བར་དུ། །འཕོ་མེད་མངོན་སུམ་དུ་བཞུགས་ལ། །ཁ་ཙམ་ཚིག་ཙམ་དེ་མིན་པའི། །ངེས་ཤེས་གཏིང་ཚུགས་ཤིག་རྙེད་ན། །ཐུགས་ཡིད་དབྱེར་མེད་དུ་འདྲེས་འོང་། །སྣ་ཚོགས་ཉམས་ཞེན་གྱི་ཤུན་པ། །དུས་གསུམ་འཁྲུལ་རྟོག་གི་ཡོ་ལང་། །མ་བཅོས་ལྷོད་གྲོལ་ལ་སོང་ན། །རིག་སྟོང་རྗེན་པ་རུ་ཤར་འོང་། །ཨ་ཧོ། ཉམས་སྣང་ཟ་ཟི་ཡི་ངང་ནས། །ཉམས་ཆོད་དམ་དུམ་དུ་བགྱིས་པ། །མགོ་མེད་མཇུག་རྡུམ་གྱི་ཞལ་གདམས། །བླུན་པོ་མགོ་བསྐོར་འདིས་ཅི་བྱ། །ཞེས་བསྐུལ་ངོར་ལྡོག་མིན་ཙམ་དུ་བྲིས་པ་ལགས། །༄༅། །འཁྲུལ་འབྱམས་ལ་སོང་ཚེ་ཅི་བྱེད་མི་འདུག་ཅེས་དྲིས་པའི་ལན་ནི། ཨ་ཧོ། །སྟོང་ཆེན་དབྱིངས་ཀྱི་ཕོ་བྲང་ན། །རང་བྱུང་རིག་པའི་རྒྱལ་པོ་དེ། །དུས་གསུམ་འཕོ་འགྱུར་མེད་པར་བཞུགས། །དེ་རུ་སྡོད་དང་འཁྲུལ་འབྱམས་མེད། །གལ་ཏེ་ལས་རླུང་དང་འགྲོགས་ནས། །ཚོགས་དྲུག་ཡུལ་ལ་རྒྱ་འབྱམས་ན། །འོད་གསལ་ཁང་པའི་སྒོ་དྲུང་དུ། །རང་གྲོལ་གཉུག་མའི་དྲན་པ་ཡོད། །དེ་ལ་མྱུར་དུ་སྦྲན་གྱུར་ན། །སྐད་ཅིག་ཉིད་ལ་གཞི་དབྱིངས་སུ། །སླེབས་ནས་རྒྱལ་ས་ཟིན་པ་རུ། །ཐེ་ཚོམ་མེད་དོ་ས་མ་ཡ། །རྗེས་ཐོབ་སྐབས་ཀྱི་འཁྲུལ་འབྱམས་དང་། །རྨི་ལམ་ཡུལ་གྱི་འཁྲུལ་སྣང་སོགས། །འོད་གསལ་ཀློང་དུ་གྲོལ་འདོད་ན། །ལུས་ངག་ཡིད་ཀྱི་བྱ་བ་ཐོངས། །རླུང་སེམས་གདོད་མའི་གཤིས་ཐོག་ཏུ། །ཐིམ་ནས་རིག་སྟོང་ཆོས་སྐུའི་ཞལ། །མངོན་སུམ་མཇལ་ནས་ཤི་མཐའི་བར། །ཉམས་ལེན་ཐང་ལྷོད་མེད་པར་མཛོད། །དེ་མིན་འདི་ལས་ཐབས་གཞན་ནི། །ཁོ་བོས་མི་ཤེས་གཞན་ལ་དྲིས། །དེ་ལྟར་བསྐུལ་ངོར་ལྡོག་མིན་ཙམ། །གང་ཤར་ཐོལ་བྱུང་ཚུལ་གྱིས་སྨྲས། །ཞེས་ཆོས་དབྱིངས་རང་གྲོལ་པས་སོ། ༈ །བླ་མ་ཐོགས་མེད་ལ་གདམས་པ། །ཀུན་མཁྱེན་རྗེ་ལ་ཕྱག་འཚལ་ལོ། །དྲན་པ་རྣམ་གྲངས་མང་མོད་ཀྱང་། །གྲོགས་ཁྱོད་ཡེངས་པ་ཚོར་ཙམ་ནས། །གནས་ལུགས་ཐོག་ཏུ་ཕེབས་འདུག་ཀྱང་། །དེ་ལ་ད་དུང་གོམས་གྱུར་ན། །ཡེངས་ཚོར་ཙམ་གྱི་དྲན་པ་དེ། །ཡུལ་མེད་སངས་པའི་དུས་ཤིིག་ཡོད། །དེ་ཚེ་དྲན་སྣང་ཡེ་ཤེས་སུ། །འཆར་བའི་མགོ་བོ་རྩོམ་པ་ཡིན། །དེ་ཡི་ངང་མདངས་བསྐྱངས་གྱུར་ན། །ནམ་ཞིག་ཡེངས་ཡུལ་ཚོགས་དྲུག་དང་། །ཡེངས་བའི་མཁན་པོ་གཉིས་འཛིན་སེམས། །ཆོས་ཉིད་དབྱིངས་སུ་སྟོར་བའི་ཚེ། །མཉམ་རྗེས་ཐམས་ཅད་སྒོམ་དུ་ཤར། །ཉི་མ་སྤྲིན་ལས་གྲོལ་བ་བཞིན། །དེ་དག་མདོར་ན་འདི་ལྟར་ལགས། །ཤེས་བྱ་ཡུལ་དང་ཤེས་བྱེད་བློ། །གཉིས་སུ་མེད་པའི་ཡེ་ཤེས་ནི། །མཉམ་པ་ཉིད་དུ་ཤར་བའི་ཚེ། །ཡེངས་ཡུལ་ཆོས་ཉིད་སངས་པ་ཞེས། །དཔལ་མགོན་བླ་མའི་ཞལ་རྒྱུན་ཡིན། །ཚུལ་འདི་བླ་མ་ཐོགས་མེད་ཀྱི། །ཐུགས་ཀྱི་དགྱེས་བཞེད་བསྐང་ཕྱིར་དུ། །སྨྱོན་པས་རྩེད་མོ་བྱས་པ་ལ། །གཞན་གྱིས་ཐུགས་ཁྲེལ་མཛད་དོགས་མེད། །དགེ་ཞིང་བཀྲ་ཤིས་བྷ་ཝནྟུ། ། ༄༅། །སེམས་དོན་ལ་གལ་གནད་ཀྱི་སྐོར་ཁ་ཤས། རིག་པའི་ངོ་བོ་སྟོང་པ། གདངས་རང་གསལ་འགག་པ་མེད་པ། ཐུགས་རྗེ་རིས་མེད་པར་ཁྱབ་པའི་གཤིས་ཀྱི་བཞུགས་ཚུལ་ངོ་འཕྲོད་ཕན་ཆན། དེའི་ངང་ལ་འགགས་མེད་ཤུགས་འབྱུང་དུ་འཇོག་པ་མ་གཏོགས། བསལ་བཞག་སྤྲོ་བསྡུ་དང་། ཡིན་མིན་གྱི་རྩིས་གདབ་སོགས་རྡུལ་ཕྲ་རབ་ཙམ་ཡང་བྱ་རྒྱུ་མེད་པ་ལགས། དྷཱ་ཀི་བཛྲ་གྱི་ཞལ་ནས། རྒྱ་གྲོལ་རྣལ་འབྱོར་ནམ་ལངས་ཉི་ཤར་འདྲ། །ཆོས་སྐུའི་སྣང་བ་ཡིན་ནོ་ཨེ་མ་ཧོ། །ཞེས་གསུངས་སོ། །རིག་སྟོང་ཁ་སྦྱོར་གྱི་དགོངས་པ་ནི། དང་པོ་རླུང་སེམས་གཉིས་ཀྱི་རྒྱབ་གྱེས་པ་དང་། བར་དུ་སྣ་ཚོགས་ཉམས་ལ་ཞེན་པའི་ཤུན་པ་བྲལ་བ་དང་། ཐ་མ་དབྱིངས་ལུང་མ་བསྟན་གྱི་སྟོང་ཆ་དྭངས་བ་དང་། དེ་ལྟ་བུའི་བྲལ་བྱའི་ཆོས་གསུམ་བྲལ་བའི་ཚེ་ན། ཡུལ་ཅན་གྱི་རིག་པ་རྗེན་པ། ཡུལ་ཆོས་ཉིད་མཐའ་དབུས་དང་བྲལ་བའི་ཀློང་དུ་གཉིས་མེད་ཟུང་འཇུག་ཏུ་བཞུགས་པ་ནི། དཔེར་ན་གནམ་སྟོང་གི་ཟླ་བ་མཁའ་དབྱིངས་སུ་འཁྱིལ་བ་ལྟ་བུའི་ཆ་དེ་ནི་རིག་སྟོང་ཁ་སྦྱོར་ཡིན་ཏེ། དེ་ཡི་རྩལ་ཤར་གྲོལ་དུས་མཉམ་ཡིན་པས་འོད་གསལ་གྱི་འཆར་སྒོ་འགག་མེད་དུ་བརྗོད་པའོ། །རང་ཐོག་ཏུ་ངོ་ཤེས། ཡིན་ཐོག་ཏུ་ཐག་ཆོད། གྲོལ་ཐོག་ཏུ་གདེངས་བཅའ་བ་ནི་གནད་དམ་པའོ། །དེ་ལམ་རིག་གི་ཆའོ། གཞི་རིག་ནི་ཆོས་དབྱིངས་གདོད་མའི་གཞི་དང་། ཡེ་ཤེས་ཐིམ་བྱའི་རིག་པ་གཉིས་མེད་ཟུང་འཇུག་ཏུ་བཞུགས་པ་ཡིན་ཏེ། དེའི་རྩལ་ཡེ་ཤེས་ལ་ཡེ་ཤེས་རོལ་པའོ། །འབྲས་བུའི་རིག་པ་ནི། སེམས་ཅན་གྲོལ་བའམ་སངས་རྒྱས་པ་གདོད་མའི་སྟོང་ཆེན་གྱི་དབྱིངས་དང་ནང་གསལ་ཕྲ་བའི་ཡེ་ཤེས་གཉིས་མེད་ཟུང་འཇུག་ཆེན་པོར་བཞུགས་ནས་རྩལ་ཆོས་ཉིད་ལ་ཡེ་ཤེས་རོལ་པའོ། །གཞན་ཡང་། བྱིང་བ་ནི་རིག་པའི་གསལ་ངར་གྱི་ཆ་ལྷོད་པ་དང་། རྒོད་པ་ནི་འདོད་པའི་ཕྱོགས་སུ་གཏོགས་པའི་འཕྲོ་བའི་ཆའོ། །རྨུགས་པ་ནི་སེམས་ལ་མུན་པ་བབས་པའི་རྣམ་པ་ཅན་ནོ། །དེའང་རང་སྟོབས་ཀྱིས་དྭངས་བ་ནི་རྩོལ་མེད་ཅོག་བཞག་རྣམ་གསུམ་གྱི་ངང་མདངས་བསྐྱང་བའི་ཚེ་ན། བྱིང་རྒོད་རྨུགས་གསུམ་སྤྲིན་བཞིན་དུ་དྭངས་འགྲོ་བ་དང་། ཐབས་ལ་བརྟེན་པ་ནི། བྱིང་བའི་ཚེ་རླུང་རོ་དགུ་ཕྲུགས་བྱས་ནས། དོན་དམ་ཡེ་ཤེས་ཀྱི་རྩ་རླུང་འཛིན་རྩོལ་དང་བྲལ་བ་ལ་བརྟེན་ནས་རླུང་སེམས་གཉིས་ཀྱི་རྒྱབ་གྱེས་ཚུལ་ལ་མཁས་པར་བྱའོ། །རྒོད་ན་བླ་མ་སྙིང་དབུས་སུ་བསྒོམས་ནས་ཐུགས་ཡིད་དབྱེར་མེད་དུ་བསྲེས་ཏེ་དྲན་པ་རང་ཡལ་གྱི་སྟེང་དུ་བླ་མའི་ཞལ་མཐོང་བ་ལ་མཁས་པར་བྱའོ། །རྨུག་ན་དབྱིངས་རིག་བསྲེ་བ་སྟེ། ལས་དང་པོ་པས་ཤེས་པ་མིག་ལ་གཏད་ན་དབྱིངས་དང་ཐིག་ལེ་འཆར་མི་སྲིད། ཤར་ཀྱང་ཡུལ་དང་ཡུལ་ཅན་ལས་མ་འདས་པའི་ཆོས་ཡིན་པའི་ཕྱིར་ན་དབྱིངས་རིག་བསྲེ་དགོས། དེའང་ཤེས་པ་ནང་དུ་ལོག་ནས་དག་དགོས་པ་ཡིན་ཏེ། དེའི་རྟགས་དབྱིངས་ཐིག་སྲབ་མོ་ཙམ་དུ་འགྲོ་བ་ཡིན། དེའི་ངང་ལ་བསྒོམས་ན་དབྱིངས་ཐིག་འཐུག་པོར་འཆར་བ་ཡིན་ཏེ། དེའི་ཚེ་དབྱིངས་རིག་དབྱེར་མེད་དུ་འདྲེས་པ་ཡིན། དེའི་རྟགས་དབྱིངས་ཐིག་ལ་འགུལ་འཕྲིག་གི་རྣམ་པ་ཡོད་པ་མིན་ནོ། །ཉིད་ཀྱིས་འོད་གསལ་རྫོགས་པ་ཆེན་པོ་ཉམས་སུ་ལེན་པར་འདོད་ན། གླེན་བསྒོམ་ཨུ་ཚུགས་བྱས་པ་ལ་སྙིང་པོ་མེད་པར་མ་ཟད། སྲོག་རྩ་ལ་ལས་རླུང་འཇུག་པའི་གྲོགས་སུ་འགྲོ་བ་ལས་ལོ་བརྒྱར་བསྒོམས་ཀྱང་གྲོལ་བ་མེད་ལགས། དེ་ཕྱིར་གསང་སྔགས་རྡོ་རྗེ་ཐེག་པའི་ཉེ་ལམ་ཟབ་མོ་ལ་བརྟེན་ནས་འཁོར་འདས་གཉིས་ཀྱི་སྤྱི་གཞི་གཏན་ལ་དབབ་ནས་འཁོར་འདས་དག་མཉམ་གྱི་ལྟ་བ་རྟོགས་དགོས་པ་ཡིན། དེ་ཡང་འདི་ཉིད་རྟོགས་ན་གདོད་མའི་གྲོལ་གཞི་བྱེད་པ་དང་། མ་རྟོགས་ན་སེམས་ཅན་གྱི་འཁྲུལ་གཞི་བྱེད་པས་སྤྱི་གཞི་ཟེར་བ་ཡིན། མདོར་ན་མ་རིག་བདེན་འཛིན་གྱིས་དྲངས་པའི་དུས་གསུམ་ཡིད་ཀྱི་འཁྲུལ་བ་ལས་གཞན་པའི་འཁོར་བ་མེད་པ་དང་། འཁྲུལ་བའི་རྟོག་ཚོགས་ཞི་བ་ལས་གཞན་པའི་མྱང་འདས་མེད་པར་ཤེས་པར་གྱིས་ལ་ཞིབ་ཏུ་གཏན་ལ་དབབ་དགོས་སོ། །འཁོར་ལོ་བར་པའི་བསྟན་དོན་ཆོས་ཐམས་ཅད་དབྱིངས་སྤྲོས་པ་དང་བྲལ་བའི་སྟོང་པ་ཆེན་པོ་དང་། འཁོར་ལོ་ཐ་མའི་བསྟན་དོན་སྐུ་དང་ཡེ་ཤེས་བསྟན་པ་དེ་གཉིས། དབྱེར་མེད་ཟུང་འཇུག་ཆེན་པོར་ཀུན་མཁྱེན་ཀློང་ཆེན་དང་། འཇམ་མགོན་མི་ཕམ་རྣམ་རྒྱལ་སོགས་ཀྱི་བཞེད་པ་ཡིན་ལ། གསང་སྔགས་ཐུན་མོང་མ་ཡིན་པའི་རྒྱུད་སྡེ་རྣམས་སུ། གདོད་མའི་ཡེ་གཞིའམ་ཆོས་སྐུ་གཞི་གནས་ཀྱི་རིག་པ་ཞེས་གསུངས་པ་དང་། འོད་གསལ་རྫོགས་པ་ཆེན་པོའི་སྐབས་སུ་གཞི་བཅིངས་གྲོལ་མེད་པའི་གནས་ལུགས་ཆོས་ཟད་ཀ་དག་གི་དགོངས་པ་ངོ་འཕྲོད། ལྷུན་གྲུབ་རང་གདངས་འགག་པ་མེད་པས་འཁོར་འདས་ཀྱི་འཆར་གཞི་མ་འགག་པར་ངོ་ཤེས། ཐུགས་རྗེའི་རོལ་བ་ཡུལ་ཐོག་ཏུ་ཤར་ནས་བག་ཆགས་བསགས་ལོང་མེད་པར་དྲན་རྟོགས་རྗེས་མེད་དུ་གྲོལ་བས་ཡིད་ཆེས། དེ་གསུམ་གདོད་ནས་དབྱེར་མེད་དུ་བཞུགས་པ་ལ་སྐུ་གསུམ་དབྱེར་མེད་ཀྱི་རིག་པའམ་རིག་སྟོང་ཟུང་འཇུག་ཞེས་སྔ་འགྱུར་རིག་འཛིན་བརྒྱུད་པ་རྣམས་ཀྱི་བཞེད་པ་ཡིན་ནོ། །ཡེ་གྲོལ་ཞེས་པ་ནི། གཞི་རིག་སྟོང་ཟུང་འཇུག་གི་ལྟ་བ་དེ་ཉིད་ཡེ་གདོད་མ་ནས་གྲོལ་བའི་བདག་ཉིད་ཅན་ཡིན་ཏེ། ད་གཟོད་འབད་པས་སུས་ཀྱང་བཀྲོལ་མི་དགོས་ཞེས། འབད་པ་དང་རྩོལ་བའི་སྒོ་ནས་སུས་ཀྱང་བཀྲོལ་མི་དགོས་ཏེ། གྲོལ་བ་མེད་དེ་གྲོལ་གཞི་རྡུལ་ཙམ་མེད། །ཅེས་གསུངས་སོ། །ཤར་གྲོལ་ཞེས་ཁང་སྟོང་གི་རྐུན་མ་ལྟ་བུའི་གྲོལ་ཚུལ་ནི། ཁང་སྟོང་ལ་ཤོར་རྒྱུ་དང་རྐུན་མ་ལ་ཐོབ་རྒྱུ་མེད་པ་ལྟར་རྟོག་ཚོགས་གང་ཤར་ཐམས་ཅད་བག་ཆགས་གསོག་ལོང་མེད་པར་ལྟ་བའི་ཀློང་དེར་གྲོལ་བའོ། །རང་གྲོལ་ཞེས་སྦྲུལ་གྱི་མདུད་པ་ལྟ་བུའི་གྲོལ་ཚུལ་ནི། སྦྲུལ་མདུད་དེ་གཞན་རྐྱེན་ལ་ལྟོས་མི་དགོས་པར་རང་སྟོབས་ཀྱིས་ཞིག་འགྲོ་བ་ལྟར་རྟོག་ཚོགས་གང་ཤར་ཐམས་ཅད་རྐྱེན་གཞན་ལ་ལྟོས་མི་དགོས་པར་རང་སྟོབས་ཀྱིས་རང་གྲོལ་བའོ། །ཅེར་གྲོལ་ཞེས་སྔར་འདྲིས་ཀྱི་མི་དང་འཕྲད་པ་ལྟར་རྟོག་པ་ཡུལ་ལ་གཡོ་བའི་ཚེ་དྲན་པས་ཟིན་ཙམ་ནས་དྲན་མཁན་ཆོས་ཉིད་དུ་སྟོར་བའི་དུས། ཐོག་མའི་སྐྱོང་ཚུལ་མ་ནོར་བ་ཡིན་གསུངས་སོ། །རིག་པའི་ངོ་རང་ཐོག་ཏུ་སྤྲད་པ་ལ། ད་ནི་ཁྱོད་ཀྱིས་རིག་པའི་དབྱིངས་འདི་ལ་ལྟོས་དང་། དབྱིངས་ཀུན་བཟང་བདེ་བ་ཆེན་པོའི་ཕོ་བྲང་ཀློང་ཆེན་ཆོས་སྐུའི་མཁའ་ལྟར་ཕྱལ་བའི་དོན་འདི་ནི་ཆོས་ཐམས་ཅད་ཀྱི་སྣང་གཞི་མཐར་ཐུག་པ། སྣོད་བཅུད་ཐམས་ཅད་དབྱིངས་འདི་ལ་གནས་ཤིང་། དབྱིངས་འདི་ལས་གཡོས་པ་སྐད་ཅིག་ཀྱང་མེད་པར། དབྱིངས་འདིའི་ཀློང་དུ་སོ་སོར་མ་འདྲེས་པར་རྒྱ་མཚོ་ལ་གཟའ་སྐར་ཤར་བ་བཞིན་དུ་རྫོགས་ཤིང་། དབྱིངས་ཀྱི་རོལ་པ་རང་བྱུང་གི་ཡེ་ཤེས་རང་ཤར་ཞིང་རང་གྲོལ་བ་ཆུ་ལས་ཆུ་རླབས་གཡོ་བ་ལྟར་བཟང་ངན་མེད་པའི་ཐུགས་རྗེའི་རང་རྩལ་ཀུན་ལ་ཁྱབ་པ། དེ་ལྟ་བུའི་རིག་པ་འདི་ནི། དཔེ་རྐྱེན་གསུམ་དང་བྲལ་བའི་ནམ་མཁའ་ལྟ་བུ། དོན་དབྱིངས་དང་ཡེ་ཤེས་འདུ་འབྲལ་མེད་པ། རྟགས་རོལ་པ་འགག་མེད་དུ་ཤར་ནས་གྲོལ་བ། ངོ་བོ་ཆོས་སྐུའི་དབྱིངས་ལ་བལྟས་ན། གྲུབ་པའི་ཆོས་རྡུལ་ཙམ་ཡང་མེད་པ་ཡེ་གཞི་ཀ་དག་གི་དགོངས་པ་རྒྱ་ཆད་ཕྱོགས་ལྷུང་དང་བྲལ་བ། རང་བཞིན་ལྷུན་གྲུབ་ལོངས་སྐུའི་གདངས་མ་སྤངས་རང་གསལ་གྱི་རྒྱན་ལ་བལྟས་ན། སྣང་སྲིད་འཁོར་འདས་ཀྱི་ཆོས་རྣམས་དབང་ཡུལ་དུ་སྣང་བ་ཐམས་ཅད་ཀློང་ཆེན་ཆོས་སྐུའི་རྒྱ་མཚོ་ལ་ནམ་མཁའི་གཟའ་སྐར་སྣང་བ་བཞིན་དུ་མ་བྱས་ལྷུན་གྱིས་གྲུབ་པའི་ངང་དུ་རང་སྣང་ཞིང་རང་གསལ་བ། ཚོགས་དྲུག་ལྷུག་པའི་དགོངས་པ། སྣང་སྲིད་དག་མཉམ་ཆེན་པོ། སྐུ་དང་ཡེ་ཤེས་ཀྱི་ཉམས་སྣང་། བདེ་ཆེན་འོད་གསལ་གྱི་ཕོ་བྲང་སོགས་རང་སྣང་གནས་དག་གི་དཀྱིལ་འཁོར་སོགས་སུ་སྣང་བ་དང་། ཐུགས་རྗེ་རང་བྱུང་སྤྲུལ་སྐུའི་ཡེ་ཤེས་རོལ་པ་གནས་དག་གི་འཆར་ཚུལ་ལ་བལྟས་ན། རང་བྱུང་འགག་པ་མེད་པའི་རང་གདངས་ལས་རང་ཤར་བའི་ཡེ་ཤེས་ཀྱི་རོལ་པ་འདུ་འཕྲོ་དང་བྲལ་བ་སྐྱེ་འགག་ལས་འདས་པ། མ་བྱུང་མ་སྐྱེས་པ་མ་འགག་པའི་ཐུགས་རྗེ། ཤར་བ་ལྟར་སྣང་ཡང་ཤར་ས་དང་ཤར་མཁན་མེད། གྲོལ་བ་ལྟར་སྣང་ཡང་གྲོལ་རྒྱུ་དང་གྲོལ་མཁན་མེད། ཐམས་ཅད་མཉམ་ཉིད་རིག་པའི་རོལ་པ་འཕྲོ་འདུ་གནས་དག་གི་དགོངས་པ་རྒྱ་མཚོ་ལས་རྦ་རླབས་གཡོ་བ་ལྟར། དབྱིངས་ལས་མ་གཡོས་ཤིང་བཟང་ངན་མེད་པ་སྟེ། རིག་པའི་རང་བཞིན་དེ་ལྟ་བུར་ངོ་འཕྲོད་པའི་གང་ཟག་དེ་ལ་ངེས་ཤེས་ཀྱི་ཉམས་སྣང་བསམ་ལས་འདས་པའང་འཆར་ཞིང་། བླ་མ་དང་ཆོས་ལ་ཡིད་ཆེས་དང་ངེས་པ་གཏིང་ནས་འདྲོང་བ་ཡིན་ནོ་གསུངས་སོ། །མཉམ་བཞག་གི་སྐབས་སུ་ཉམས་ཞེན་གྱི་ཤུན་པ་དང་བྲལ་བའི་རིག་སྟོང་ཟུང་འཇུག་གི་དབྱིངས་སུ་དུས་གསུམ་གྱི་རྟོག་ཚོགས་གང་ཤར་ཐམས་ཅད་བག་ཆགས་གསོག་ལོང་མེད་པར་ཤར་གྲོལ་རྗེས་མེད་དུ་དག་པ་དང་། རྗེས་ཐོབ་ཀྱི་སྐབས་སུ་དེ་ཉིད་སྤྱོད་ལམ་ལ་བསྲེ་བ་གལ་ཆེ། བརྟན་ཆ་ཐོབ་མ་ཐོབ་རྨི་ལམ་དུ་ཚད་འཛིན་པ་ཡིན། རྟོག་པ་རང་སར་གྲོལ་མི་གྲོལ་རྐྱེན་ངན་པ་དང་འཕྲད་དུས་གོ་དགོས། ཡང་དག་པའི་ལམ་དུ་འགྲོ་མི་འགྲོ་མཉམ་བཞག་གི་ཤུགས་རྗེས་ཐོབ་སྤྱོད་ལམ་སྐབས་སུ་དག་སྣང་དང་སྙིང་རྗེ་ལ་སོགས་པས་ཤེས་པར་གྱིས། རྣམ་ཤེས་དང་ཡེ་ཤེས་གཉིས་ཀ་གསལ་ཞིང་རིག་པ་ཙམ་དུ་མཚུངས་ཀྱང་། ཡུལ་ཇི་བཞིན་མི་རིག་པར་ཕྱིན་ཅི་ལོག་ཏུ་འཛིན་པ་དང་། ཇི་བཞིན་རིག་པ་གཉིས་ཀྱི་ཁྱད་ཡོད་ལ། གཟུང་འཛིན་ཅན་གྱི་རྣམ་ཤེས་ལྡོག་ཀྱང་ཡེ་ཤེས་མི་ལྡོག་པར་ཤེས་པར་བྱའོ། །མདོར་ན་རྣམ་ཤེས་ཚོགས་བརྒྱད་ལས་འདས་པའི་རིག་སྟོང་གཉུག་མ་སྤྲོས་བྲལ་རང་བྱུང་གི་ཡེ་ཤེས་སུ་ཐད་ཀར་རྗེན་པར་ཤར་བ་ངོ་སྤྲད་པར་བྱའོ། །འོད་གསལ་ཞེས་པ་ནི། མེད་དགག་སྟོང་རྐྱང་ཙམ་མིན་ཏེ། དབྱིངས་སྤྲོས་བྲལ་ལ་རིག་གདངས་ཀྱི་ཆ་ཡོད་པའོ། །གཞི་ལས་གཞི་སྣང་འཆར་ཚུལ་དང་། དེ་ལས་འཁྲུལ་གྲོལ་འབྱུང་ཚུལ། འཁྲུལ་བ་གཞི་ལ་ལྡོག་ནས་སླར་འཁྲུལ་མི་སྲིད་པའི་ཚུལ་ཤེས་པར་བྱའོ། །ཐེག་བརྒྱད་གྲུབ་མཐའི་ཞེ་འདོད་ཀྱི་འཛིན་པ་དབྱིངས་སུ་ཞིག་པ་དང་། ལོག་རྟོག་འཁྲུལ་བའི་སྣང་བ་འདི་ཀུན་ཐད་ཀར་རང་སར་དག་པས་ཐ་སྙད་ཀྱི་རྫུན་རིས་དབྱིངས་སུ་ཡལ་ནས་གནས་ཚུལ་ཇི་ལྟ་བ་བཞིན་གཟིགས་པའོ། །མཉམ་བཞག་གི་སྐབས་སུ་ཤེས་རིག་རང་ཚུགས་ཟིན་པ་གནད་གལ་པོ་ཆེ་ཡིན། དེ་ལས་གཞན་པའི་སྟོང་པ་ནམ་མཁའ་འདྲ་བ་སོགས་ལ་དགོས་པ་ཅི་ཡང་མི་འདུགསྤྱོད་ལམ་གྱི་སྐབས་སུ་རིག་ངོ་དྲན་པས་རྒྱུན་དུ་སྐྱོང་བ་གལ་ཆེ་བས་དེ་ལུགས་རེམ། ། ༈ ༈ རིག་པའི་ངོ་རང་ཐོག་ཏུ་སྤྲད་པ་ལ། ད་ནི་ཁྱོད་ཀྱིས་རིག་པའི་དབྱིངས་འདི་ལ་ལྟོས་དང་། དབྱིངས་ཀུན་བཟང་བདེ་བ་ཆེན་པོའི་ཕོ་བྲང་ཀློང་ཆེན་ཆོས་སྐུའི་མཁའ་ལྟར་གསལ་བའི་དོན་འདི་ནི་ཆོས་ཐམས་ཅད་ཀྱི་སྣང་གཞི་མཐར་ཐུག་པ། སྣོད་བཅུད་ཐམས་ཅད་དབྱིངས་འདི་ལ་གནས་ཤིང་། དབྱིངས་འདི་ལས་གཡོས་པ་སྐད་ཅིག་ཀྱང་མེད་པར། དབྱིངས་འདིའི་ཀློང་དུ་སོ་སོར་མ་འདྲེས་པར་རྒྱ་མཚོ་ལ་གཟའ་སྐར་ཤར་བ་བཞིན་དུ་རྫོགས་ཤིང་། དབྱིངས་ཀྱི་རོལ་པ་རང་བྱུང་གི་ཡེ་ཤེས་རང་ཤར་ཞིང་རང་གྲོལ་བ་ཆུ་ལས་ཆུ་རླབས་གཡོ་བ་ལྟར་བཟང་ངན་མེད་པའི་ཐུགས་རྗེའི་རོལ་རྩལ་ཀུན་ལ་ཁྱབ་པ། དེ་ལྟ་བུའི་རིག་པ་འདི་ནི། དཔེ་སྐྱོན་གསུམ་བྲལ་བའི་ནམ་མཁའ་ལྟ་བུ། དོན་དབྱིངས་དང་ཡེ་ཤེས་འདུ་འབྲལ་མེད་པ། རྟགས་རོལ་བ་འགགས་མེད་དུ་ཤར་ནས་གྲོལ་བ། ངོ་བོ་ཆོས་སྐུའི་དབྱིངས་ལ་བལྟས་ན། གྲུབ་པའི་ཆོས་རྡུལ་ཙམ་ཡང་མེད་པ་ཡེ་གཞི་ཀ་དག་གི་དགོངས་པ་རྒྱ་ཆད་ཕྱོགས་ལྷུང་དང་བྲལ་བ། རང་བཞིན་ལྷུན་གྲུབ་ལོངས་སྐུའི་གདངས་མ་སྤང་རང་གསལ་གྱི་རྒྱན་ལ་བལྟས་ན། སྣང་སྲིད་འཁོར་འདས་ཀྱི་ཆོས་རྣམས་དབང་ཡུལ་དུ་སྣང་བ་ཐམས་ཅད་ཀློང་ཆེན་ཆོས་སྐུའི་རྒྱ་མཚོ་ལ་ནམ་མཁའི་གཟའ་སྐར་སྣང་བ་བཞིན་དུ་མ་བྱས་ལྷུན་གྱིས་གྲུབ་པའི་ངང་དུ་རང་སྣང་ཞིང་རང་གསལ་བ་ཚོགས་དྲུག་ལྷུག་པའི་དགོངས་པ། སྣང་སྲིད་དག་མཉམ་ཆེན་པོ། སྐུ་དང་ཡེ་ཤེས་ཀྱི་ཉམས་སྣང་། བདེ་ཆེན་འོད་གསལ་གྱི་ཕོ་བྲང་སོགས་རང་སྣང་གནས་དག་གི་དཀྱིལ་འཁོར་སོགས་སུ་སྣང་བ་དང་། ཐུགས་རྗེ་རང་བྱུང་སྤྲུལ་སྐུའི་ཡེ་ཤེས་རོལ་བ་གནས་དག་གི་འཆར་ཚུལ་ལ་བལྟས་ན། རང་བྱུང་འགགས་པ་མེད་པའི་རང་གདངས་ལས་རང་ཤར་བའི་ཡེ་ཤེས་ཀྱི་རོལ་བ་འདུ་འཕྲོ་དང་བྲལ་བ་སྐྱེ་འགགས་ལས་འདས་པ། མ་བྱུང་མ་སྐྱེས་མ་འགགས་པའི་ཐུགས་རྗེ། ཤར་བ་ལྟར་སྣང་ཡང་ཤར་ས་དང་ཤར་མཁན་མེད་པ། གྲོལ་བ་ལྟར་སྣང་ཡང་གྲོལ་རྒྱུ་དང་གྲོལ་མཁན་མེད། ཐམས་ཅད་མཉམ་ཉིད་རིག་པའི་རོལ་བ་འཕྲོ་འདུ་གནས་དག་གི་དགོངས་པ་རྒྱ་མཚོ་ལས་རྦ་རླབས་གཡོ་བ་ལྟར། དབྱིངས་ལས་མ་གཡོས་ཤིང་བཟང་ངན་མེད་པ་སྟེ། རིག་པའི་རང་བཞིན་དེ་ལྟ་བུར་ངོ་འཕྲོད་པའི་གང་ཟག་དེ་ལ་ངེས་ཤེས་ཀྱི་ཉམས་སྣང་བསམ་ལས་འདས་པའང་འཆར་ཞིང་བླ་མ་དང་ཆོས་ལ་ཡིད་ཆེས་དང་ངེས་པ་གཏིང་ནས་འདྲོང་བ་ཡིན་གསུངས་སོ། ། ༈ སེམས་རིག་ཤན་འབྱེད། ལགས། སེམས་རིག་དབྱེ་བ་བྲིས་ཤིག་གསུངས་པ་ལ། འདི་བྱ་འདི་བྱེད་དང་ཉོན་མོངས་རྣམ་རྟོག་སོགས་དང་ཚོགས་དྲུག་གི་ཡུལ་ལ་ཞེན་ཅིང་། བཟང་ངན་སོགས་དབྱེ་ཞིང་རེ་དོགས་སྤང་བླང་བྱེད་མཁན་འདི་ལ་སེམས་ཟེར། དེ་རྣམས་ཇི་ལྟར་ཤར་ཡང་རེ་དོགས་སྤང་བླང་ཅི་ཡང་བྱ་མི་དགོས་པའི་སྐད་ཅིག་མའི་ཤེས་པ་གྲ་མ་ཉམས་པ། བྱིང་རྨུགས་དང་བཟང་རྟོག་ངན་རྟོག་གང་གིས་ཀྱང་མ་བསླད་པའི་རིག་སྟོང་རྗེན་པ་འདི་ལ་རིག་པ་ཟེར་བ་ལགས། སེམས་ཀྱི་ཆ་ཐམས་ཅད་ནི་གཟུང་འཛིན་གྱི་རྟོད་ཕུར་ཡོད་པས་རྣམ་རྟོག་ཤར་ཚད་རྡོ་ལ་རི་མོ་བྲིས་པ་ལྟ་བུ་ཡིན། རིག་པ་ནི་གཟུང་འཛིན་རང་སར་དག་པས་རྣམ་རྟོག་ཤར་ཚད་ཤར་བ་དང་གྲོལ་བ་དུས་མཉམ་པ་ཆུ་དང་བར་སྣང་ལ་རི་མོ་བྲིས་པ་ལྟ་བུ་ཡིན། བདེ་གསལ་མི་རྟོག་སོགས་ཉམས་ཀྱི་ཞེན་པ་ཡོད་པ་ཐམས་ཅད་ཀྱང་སེམས་སུ་གདགས་ལ། ཉམས་ཞེན་རྣམས་རང་སར་དག་ནས་རང་རིག་རྗེན་པ་སྨྲ་བརྗོད་ལས་འདས་པ་གཏད་སོ་ཐམས་ཅད་དང་བྲལ་བའི་ཟང་ཀ་མ་འདི་ལ་རིག་པ་དང་། ཆོས་སྐུ་ཀ་དག་སོགས་ཀྱི་ཐ་སྙད་ཙམ་དུ་བཏགས་པ་ཡིན་པས་གོ་བར་གྱིས་ཤིགལུང་ལས། བསྒོམ་མ་མྱོང་དང་བྲལ་མ་མྱོང་། །མི་སྒོམ་དོན་དང་མི་འབྲལ་བ། །ཞེས་གསུངས་པ་ལྟར། མི་སྒོམ་པའི་སྒོམ་པ་ཆེན་པོ། བསྒོམ་རྒྱུ་སྤུ་ཙམ་མེད་ལ། ཡེངས་སུ་སྐད་ཅིག་ཀྱང་མེད་པའི་ཆུ་བོའི་རྒྱུན་གྱི་རྣལ་འབྱོར་འདི་དང་འབྲལ་བ་མེད་པར་མཛོད་ཅིག །ཅེས་ཕུལ་ལགས། ༄༅། །འཚོ་བྱེད་སྨན་པ་གཞོན་ནུས་སེམས་དོན་གྱི་དྲིས་ལན་བྱིས་པའི་རྣ་རྒྱན་ཞེས་བྱ་བ་བཞུགས་སོ། །བླ་མ་ལ་ཕྱག་འཚལ་ལོ། །དེ་ལ་འདིར་ཉིད་ཀྱིས་སེམས་དོན་གྱི་དྲིས་ལན་རྫོགས་ཆེན་སེམས་སྡེའི་ཉམས་རིམ་དང་ཕྱོགས་མཚུངས་པར་སྦྱར་ནས་བཤད་ན། ཉམས་དང་པོའི་སྐྱེ་ལུགས་ནི་དཔེ་རི་གཟར་གྱི་རྦབ་ཆུ་དང་འདྲ་སྟེ། ཆགས་སྡང་ལ་སོགས་པའི་རྣམ་རྟོག་མང་དུ་སོང་བ་ཞིག་འོང་། དེ་ཚེ་རེ་འགའ་རྣམ་རྟོག་ཤར་བ་ལ་སྐྱོན་དུ་བལྟས་ནས་དགག་སྒྲུབ་བྱས་པས་སྙིང་རླུང་ལྡང་ནས་ཚིག་པ་ཟ་བ་དང་། རེས་ང་ལ་སྒོམ་མི་འོང་བར་འདུག་སྙམ་ནས་ཡི་མུག་སྐྱེ་བའང་ཡོད། འདི་དུས་བློ་ཚབ་ཚུབ་མང་པོ་མི་བྱེད་པར་ལུས་སེམས་ལྷོད་པ་གནད་ཡིན། ཡང་ན་འགྱུ་བ་ཨར་ལ་གཏད་པའི་མན་ངག་ཡང་ཟབ། ཉམས་གཉིས་པའི་སྐྱེ་ལུགས་ནི། དཔེ་ཆུ་ནང་གི་བྱིའུ་དང་འདྲ་སྟེ། རེས་ཆུ་ནང་འཛུལ། རེས་སྟེང་དུ་ཐོན། སྐབས་རེ་རྡོ་སྟེང་སྡོད་པ་དང་འདྲ། རེས་འགའ་འཕྲོ། རེས་འགའ་གནས། འདིའི་ཚེ་གནས་པར་དགའ་སྤྲོ་མི་བྱ། ཤར་བ་སྐྱོན་དུ་མི་བལྟ་བ་གནད་ཡིན། ཉམས་གསུམ་པའི་སྐྱེ་ལུགས་ནི། དཔེ་མི་རྒན་དང་འདྲ་སྟེ། སྡོད་པ་ཤས་ཆེ་སྐབས་རེར་འཕྲོ་ཡང་། ཤས་ཆེར་གནས་པའི་ཉམས་ཤུགས་ཆེ་བ་ཞིག་འོང་། དེའི་ཚེ་སྒོམ་ཡོང་དུ་རེ་བ་དང་། མ་བྱུང་བའི་དོགས་པ་གཉིས་ཀ་མི་བྱ་བ་གནད་ཡིན། ཉམས་བཞི་པའི་སྐྱེ་ལུགས་ནི། དཔེ་ཕུབ་མའི་འོག་གི་ཆུ་དང་འདྲ་སྟེ། ལྷོད་ཆེ་ན་རྣམ་རྟོག་མི་རྟོག་པ་འདྲ་མོ་འགྱུ་དྲན་གང་ཡང་མེད་པ་ཞིག་འོང་། དེའི་རྗེས་སུ་སྒོམ་མཁན་རང་གིས་མི་ཚོར་བ་རྣམ་རྟོག་ཕྲ་མོ་འོག་འགྱུར་འགྲོ་བ་ཡིན་པས་འདི་དུས་དྲན་པ་ཅུང་ཟད་སྒྲིམ་པ་གནད་ཡིན། ཉམས་ལྔ་པའི་སྐྱེ་ལུགས་ནི། དཔེ་རི་བོ་དང་འདྲ་སྟེ། སེམས་གང་དུ་མི་འགྲོ་བར་ཉིན་མཚན་ཀུན་ཏུ་གནས་པ་ཞིག་འབྱུང་། འདི་ཉེས་ན་ཉན་ཐོས་འགོག་པའི་ཕྱོགས་སུ་འགྲོ། ལེགས་ན་ཞི་གནས་ཕུལ་དུ་ཕྱིན་པ་ཡིན། འདིའི་སྐབས་སུ་ངའི་ལྟ་བ་འདི་ལས་ལྷག་པ་གཞན་སུ་ལ་ཡོད་སྙམ་པའི་རང་མཐོང་གི་ང་རྒྱལ་སྐྱེས་ནས་འདྲི་ས་དང་གླེང་ས་ཙམ་མེད་པའི་བླུན་སྒོམ་མུན་རྡོ་འཕེན་པར་ཡང་འགྲོ་སྲིད། དེ་ནི་བྱམས་སྙིང་རྗེ་བྱང་ཆུབ་ཀྱི་སེམས་དང་མ་འབྲེལ་ན་དཔལ་སྤྲུལ་རིན་པོ་ཆེའི་བསྐྱེད་རིམ་ལྷའི་དཀའ་གནད་ལས། སྟོང་ཉིད་ཀྱི་གོ་ཡུལ་ཡོད་པ། བསྐྱེད་རིམ་གྱི་གསལ་སྣང་ཐོན་པ། བཟླས་པའི་གྲངས་འཁྱོལ་བ་དུ་མ་བྱམས་སྙིང་རྗེ་དང་བྲལ་ནས་རྒྱལ་འགོང་དུ་སྐྱེ་བ་ཡིན་ཅེས་ཡང་ཡང་ཞལ་གྱིས་བཞེས་པ་ཡིན་པས་གཟབ་པར་བྱ་དགོས། མདོར་ན་ཞི་གནས་ཀྱི་ཉམས་མི་རྟོག་པ་དེ་ཉིད་ལྷག་མཐོང་གསལ་བའི་ཡེ་ཤེས་ཀྱིས་སད་པར་བྱས་ནས་ཞི་ལྷག་ཟུང་འབྲེལ་དུ་བསྒོམ་པ་གནད་ཡིན་པས་ཐུགས་ལ་ངེས་པར་ཞུ་ཞེས་ཕྲན་ཆོས་དབྱིངས་རང་གྲོལ་ནས་ཕུལ། ༄༅། །ཤར་རྒྱལ་མོ་རོང་བ་འཇིགས་མེད་ཡེ་ཤེས་ལ་ཡིག་འཛར་ཕུལ་བ། འོད་གསལ་རྫོགས་པ་ཆེན་པོའི་ལམ་མ་ནོར་བ་དེ་བརྒྱུད་ལྡན་གྱི་བླ་མའི་བྱིན་རླབས་ལ་བརྟེན་དགོས་པས་བསགས་སྦྱང་སྤེལ་གསུམ་གྱི་གནད་འདུས་པ་བླ་རྣམ་ལ་འབད་པ་གལ་ཆེ། དེ་ནས་ཨོ་རྒྱན་པདྨ་དང་རང་སེམས་དབྱེར་མེད་བསྲེས་ལ། བཟང་ངན་གྱི་རྣམ་རྟོག་གང་གིས་ཀྱང་མ་བསླད་ཅིང་སྤང་བླང་དགག་སྒྲུབ་ཀྱི་རྩོལ་བས་མ་གོས་པའི་གཤིས་རང་བབས་ཀྱི་རིག་ཆ་རྗེན་པ་དེ་ཤེས་པར་བྱས་ཏེ། ཕྱིའི་ཡུལ་སྣང་མི་སྣང་དང་། ནང་རྣམ་རྟོག་འཆར་མི་འཆར་སོགས་ལ་རྗེས་འདེད་རྩིས་འདེབས་གང་ཡང་མི་བྱ་བར། རིག་པ་ཟང་ཐལ་གྱི་ངང་ལས་མ་གཡོས་པ་ལ་བསླབ། ཅུང་ཟད་ཡེངས་གྲབ་བྱེད་ཚེ་ཡང་། ང་ཡེངས་འགྲོ་འམ་ཞེས་དང་། འདི་ལྟར་ཡེངས་འདུག་ཅེས་དང་། མི་གཡེང་པའི་ཕྱིར་དུ་གཉེན་པོ་ཇི་ལྟར་བསྟེན་ན་དྲག་ཅེས་སོགས་ཙབ་ཙུབ་ཟང་ཟིང་གཏན་ནས་མི་བྱེད་པར་རིག་པ་དེ་ཀ་ཧུར་ཕྱུང་ལ་གཤིས་ཐོག་ཏུ་ས་བཟུང་། མདོར་ན་ངོ་སྤྲོད་གེགས་སེལ་བོག་འདོན་ཐམས་ཅད་ཁ་ཁ་སོ་སོ་མང་པོ་མི་དགོས། ད་ལྟའི་རིག་པ་ངོ་བོ་མི་རྟོག་པ། གདངས་མ་འགགས་པ། རྩལ་ཕྱོགས་མེད་དུ་འཆར་བ་ཉམས་སུ་མྱོང་ཡང་བརྗོད་མི་ཤེས་པ་དེ་གའི་རང་འགྲོས་བཟོ་མེད་དུ་སྐྱོང་བས་ཆོག་པར་གསུངས་ཡོད་པས་ཐུགས་ལ་ཟུངས་མཛོད། ང་རང་ནད་རོས་མནར་ནས་ཞལ་གདམས་སློབ་སྟོན་ཟེར་བའི་ཟ་ཟིའི་རིགས་ཅི་ཡང་འབྲི་ལོང་མེད་ཀྱང་ཁྱེད་ཐག་རིང་ནས་འོང་བ་ཤ་ཚ་ནས་གླེན་གཏམ་ཡིག་ནག་ཏུ་ཕབ་ཏེ་བྱིན་པ་དགེ་བར་གྱུར་ཅིག །༄༅། །བླ་མ་བསོད་ནམས་ཕུན་ཚོགས་ལ་གདམས་པ། ཀྱེ་ལགས། མཚུངས་མེད་དྲིན་ཆེན་བླ་མ་རིན་པོ་ཆེ། །འདུག་པའི་དུས་སུ་སྤྱི་བོའི་གཙུག་ཏུ་བསྒོམ། །ཡང་ཡང་གསོལ་བ་ཐོབ་ལ་དབང་བཞི་ལོངས། །ཐུགས་ཡིད་དབྱེར་མེད་འདྲེས་པའི་དགོས་པ་ཡོད། །སྤྱོད་ལམ་སྐབས་སུ་གཟུགས་སྣང་བླ་མའི་སྐུ། །སྒྲ་གྲགས་ཐམས་ཅད་གསུང་གི་རང་བཞིན་དང་། །དྲན་རྟོག་བཟང་ངན་ཐུགས་སུ་འཁྱེར་ཤེས་ན། །སྣང་སྲིད་བླ་མར་འཆར་བའི་གདམས་ངག་ཡིན། །ཟ་བའི་དུས་སུ་མགྲིན་པའི་དབུས་སུ་བསྒོམ། །བཟའ་བཏུང་བདུད་རྩིའི་ཕུད་ཀྱིས་ལེགས་མཆོད་ན། །བཟའ་བཅའ་བཏུང་བའི་སྒྲིབ་པ་མི་འབྱུང་ཞིང་། །དགའ་སྟོན་ཚོགས་སུ་འགྱུར་བའི་དགོས་པ་ཡོད། །ཉལ་བའི་དུས་སུ་སྙིང་གི་དཀྱིལ་དུ་བསྒོམ། །སྐུ་ཡི་འོད་ཀྱིས་བརྟན་གཡོའི་སྣང་བ་ཀུན། །འོད་དུ་གྱུར་ནས་སླར་ཡང་རང་ལ་བསྡུས། །རྨི་ལམ་འོད་གསལ་འཆར་བའི་གདམས་ངག་ཡིན། །ནམ་ཞིག་མི་སྡོད་ཕྱི་མར་འགྲོ་བའི་ཚེ། །བློ་སྣ་ཚབ་ཚུབ་མང་པོ་མི་བྱེད་པར། །རང་རིག་བླ་མའི་ཐུགས་དང་དབྱེར་མེད་དུ། །འཇོག་པ་འཕོ་བ་ཀུན་ཀྱི་རྒྱལ་པོ་ཡིན། །ཁྱོད་དང་ང་གཉིས་མི་ཚེ་གང་པོ་ལ། །མཉམ་དུ་བསྡད་ཀྱང་འདི་ལས་ལྷག་པ་ཡི། །ཟབ་པའི་མན་ངག་བདག་ལ་འབུལ་རྒྱུ་མེད། །དེ་ཕྱིར་སྙིང་གི་དབུས་སུ་འདི་ཟུངས་ཤིག །ཅེས་ཆོས་མཐུན་གྱི་སྐྱེས་བུ་དམ་པ་བསོད་ནམས་ཕུན་ཚོགས་ནས་ཡང་ཡང་ཞལ་གདམས་ཞིག་དགོས་ཞེས་བསྐུལ་བའི་ཚེ་བཞེད་སྐོང་ལྡོག་མིན་ཙམ་དུ་མདོ་མེད་ཀྱི་སྤྲང་པོ་ཆོས་དབྱིངས་རང་གྲོལ་ནས་བྲིས་པའོ། །དགེ་ཞིང་བཀྲ་ཤིས། ༄༅། །བསོད་ནམས་རྒྱལ་མཚན་ལ་གདམས་པ། སྐྱབས་གནས་ཀུན་འདུས་དྲིན་ཆེན་བླ་མ་དེ་མཁྱེན་ནོ། །སེམས་རིག་ལ་ཤན་འབྱེད་པའི་མན་ངག་འདི་ཤེས་ན། །སྣང་བའི་མདུན་ན་མུན་པ་མི་གནས་པ་བཞིན་དུ། །སྣ་ཚོགས་ཉམས་ལ་ཞེན་པའི་ཤུན་པ་དེ་འཐོར་བའི། །རིག་སྟོང་ཟང་ཐལ་རྗེན་པའི་བཞུགས་ཚུལ་ལ་གཟིགས་ཤིག །གང་ཤར་རང་སར་གྲོལ་བའི་གནད་གསང་འདི་ཤེས་ན། །གསེར་གླིང་ས་རྡོ་ཕལ་པ་མི་རྙེད་པ་བཞིན་དུ། །བློ་ལ་གང་ཤར་ཆོས་སྐུའི་ཡོ་ལང་དུ་ཤར་ནས། །བག་ཆགས་གསོགས་ལོང་མེད་པའི་གྲོལ་ཚུལ་ལ་གཟིགས་ཤིག །ཅེས་བུ་མཆོག་བསོད་ནམས་རྒྱལ་མཚན་ལ་ཆོས་དབྱིངས་རང་གྲོལ་གྱིས་གདམས་པའོ། །༄༅། །ཞལ་གདམས་བཞུགས། དུས་གསུམ་སངས་རྒྱས་ཐམས་ཅད་ཀྱི། །ངོ་བོ་དཔལ་མགོན་བླ་མ་ཡིན། །སྣང་སྲིད་བླ་མའི་རྣམ་རོལ་དུ། །འབྲལ་བར་མ་བྱེད་རིགས་ཀྱི་བུ། །འདུག་པའི་དུས་སུ་སྤྱི་བོར་སྒོམས། །གསོལ་བ་ཐོབ་ལ་དབང་བཞི་ལོངས། །ཟ་བའི་དུས་སུ་མགྲིན་པར་སྒོམས། །བཟའ་བཏུང་བདུད་རྩིའི་ཕུད་ཀྱིས་མཆོད། །ནམ་ཞིག་འཆི་བའི་དུས་བྱུང་ཚེ། །བླ་མ་སྤྱི་བོའི་གཙུག་ཏུ་སྒོམས། །རང་རིག་བླ་མའི་ཐུགས་ཀར་འཕོ། །ཐུགས་ཡིད་དབྱེར་མེད་ངང་ལ་ཞོག །འཕོ་བ་ཀུན་ཀྱི་རྒྱལ་པོ་ཡིན། །ཞེས་བླ་མ་ནས་སོ། །དགེའོ། ༈ །མཐའ་མེད་འཁོར་བ་ཡི་ཁྲོད་ན། །ཟིན་མེད་ཚེ་འདི་ཡི་བྱ་བཞག །ཉིན་མཚན་བར་མེད་དུ་བསྒྲུབས་ཀྱང་། །འགྲུབ་པའི་དུས་ཚོད་ནི་མི་འདུག །ངལ་བ་དོན་མེད་དུ་མཐོང་ནས། །དབེན་པའི་རི་ངོགས་སུ་ཕེབས་ཏེ། །ཕྱི་མར་འགྲོ་ཆས་རེ་བྱས་ན། །རང་དྲིན་རང་ལ་ནི་ཆེ་འོ། །ར་བཤའ་རྔ་བརྡུང་གི་གཏོ་རྒན། །དཀའ་བའི་ཁུར་ཆེན་ཞིག་ཁུར་ནས། །འཕྲང་རིང་བར་དོ་རུ་ཕེབས་དུས། །ཁྱོད་ལ་འོ་བརྒྱལ་ཞིག་འོང་གི། ཚེ་གང་གཏོ་ཡས་ལ་འབྱམས་ཀྱང་། །ལོན་ལོན་རིག་རྒྱུ་ནི་མི་འདུག །ད་ནི་ཆོག་ཤེས་རེ་བྱས་ནས། །དཀོར་སྦྱོང་ལེགས་པོ་རེ་མཛད་རན། །ཞེས་ཆོས་དབྱིངས་རང་གྲོལ་ནས་བྲིས་པ་དགེ། ༄༅། །མདོ་པ་གདམས་ངག་རྒྱ་མཚོ་ལ་གདམས་པ། བླ་མ་ལགས། དལ་བའི་རྟེན་འདི་རྙེད་པར་དཀའ་བས་ཚེ་འདིའི་བྱ་བ་ལ་བློ་ལྡོག་དགོས་པ་དང་གཅིགརྙེད་པར་དཀའ་བ་རྙེད་ཀྱང་འཆི་བར་སླ་བས་རྟག་འཛིན་གྱི་བློ་ལྡོག་དགོས་པ་དང་གཉིས། ཤི་ནས་ལས་འབྲས་ཀྱི་རྗེས་སུ་འབྲངས་པས་མི་དགེ་བའི་ལས་ལ་བློ་ལྡོག་དགོས་པ་དང་གསུམ། འཁོར་བའི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཡིན་པས་མཐོ་རིས་ཐོབ་འདོད་ཀྱི་བློ་ཡང་ལྡོག་དགོས་པ་དང་བཞི། མངོན་མཐོ་དང་ངེས་ལེགས་ཀྱི་ཡོན་ཏན་ཐམས་ཅད་རྒྱུ་དགེ་བ་བསྒྲུབས་པ་ལས་བྱུང་བ་ཡིན་པས་སྒོ་གསུམ་དགེ་བ་ལ་འཇུག་དགོས་པ་དང་ལྔ། ལམ་གྱི་དེད་དཔོན་དྲིན་ཆེན་གྱི་བླ་མ་ཡིན་པས་ཅི་མཛད་ཆོས་སུ་མཐོང་བའི་སྒོ་ནས་མཉེས་པ་གསུམ་གྱིས་བསྟེན་དགོས་པ་དང་དྲུག་གོ །འདི་དག་རྣམས་ལ་ཐུན་མོང་ཕྱི་ཡི་སྔོན་འགྲོའི་ཁྲིད་རྐང་དྲུག་ཏུ་གྲགས་པ་ཡིན་ནོ། །སྡོམ་པ་ཐམས་ཅད་ཀྱི་གཞི་རྟེན་སྐྱབས་འགྲོ་ཡིན་པས་དཀོན་མཆོག་གསུམ་ལ་སྐྱབས་སུ་འགྲོ་དགོས་པ་དང་གཅིག །རྒྱལ་བའི་སྲས་པོ་བྱང་ཆུབ་སེམས་དཔའ་རྣམས་ཀྱི་གཤེགས་ཤུལ་གྱི་ལམ་པོ་ཆེ་ཡིན་པས། བསམ་པ་བྱང་ཆུབ་མཆོག་ཏུ་སེམས་བསྐྱེད་དགོས་པ་དང་གཉིས། ལམ་གྱི་འགལ་རྐྱེན་སྡིག་སྒྲིབ་ཡིན་པས་བླ་མ་རྡོ་རྗེ་སེམས་དཔའི་སྒོམ་བཟླས་ལ་བརྩོན་དགོས་པ་དང་གསུམ། ལམ་གྱི་མཐུན་རྐྱེན་ཚོགས་བསགས་ཡིན་པས་སྐུ་གསུམ་གྱི་མཎྜལ་འབུལ་དགོས་པ་དང་བཞི། སྡུག་བསྔལ་ཐམས་ཅད་ཀྱི་འབྱུང་ཁུངས་ངར་འཛིན་ཡིན་པས་མ་རིག་བདེན་འཛིན་གྱིས་དྲངས་པའི་དུས་གསུམ་ཡིད་ཀྱི་འཁྲུལ་བ་ཆོས་ཉིད་ཀྱི་དབྱིངས་སུ་གཅོད་དགོས་པ་དང་ལྔ། མཆོག་དང་ཐུན་མོང་གི་དངོས་གྲུབ་ཐམས་ཅད་བླ་མ་བསྒོམས་པ་ལས་བྱུང་བ་ཡིན་པས་སྣང་སྲིད་བླ་མར་ཤར་བའི་བསྐྱེད་རིམ་དང་། ཐུགས་ཡིད་དབྱེར་མེད་འདྲེས་པའི་རྫོགས་རིམ་ལ་ཉམས་ལེན་གྱི་སྙིང་པོ་མཛད་དགོས་པ་དང་དྲུག་གོ །འདི་དག་རྣམས་ལ་ནི་ཐུན་མིན་ནང་གི་སྔོན་འགྲོའི་ཁྲིད་རྐང་དྲུག་ཏུ་གྲགས་པ་ཡིན་ནོ། །ལམ་གྱི་སུན་མ་འཕོ་བ་ཡིན་པས་རང་རིག་བླ་མའི་ཐུགས་དང་དབྱེར་མེད་དུ་འཇོག་པ་འཕོ་བ་ཀུན་གྱི་རྒྱལ་པོ་ཡིན་ཞིང་གནད་ཟབ་པས་ཅིས་ཀྱང་ཉིད་ཀྱི་ཐུགས་ལ་ཟུངས་ཤིགཅེས་མདོ་བ་གདམས་ངག་རྒྱ་མཚོ་ལ་ཆོས་དབྱིངས་རང་གྲོལ་གྱིས་གདམས་པའོ། །དགེའོ། ། ༄༅། །མདོ་པ་གདམས་ངག་རྒྱ་མཚོ་རང་ཡུལ་དུ་ཕེབས་དུས་གཅེས་ནོར་དུ་གདམས་པ། བླ་མ་ལགས། ཉམས་ལེན་གྱི་སྙིང་པོ་ནི། མཉམ་བཞག་གི་སྐབས་སུ་ཉམས་ཞེན་གྱི་ཤུན་པ་དང་བྲལ་བའི་རིག་སྟོང་ཟང་ཐལ་གྱི་ངང་ནས་དུས་གསུམ་གྱི་རྟོག་ཚོགས་གང་ཤར་ཐམས་ཅད་བག་ཆགས་བསགས་ལོང་མེད་པར་རང་ཤར་རང་གྲོལ་དུ་འགྲོ་དགོས་པས་ལྟ་བ་གདེངས་དང་ལྡན་པ་གལ་ཆེ། རྗེས་ཐོབ་ཀྱི་དུས་སུ་དྲན་པས་ཟིན་པ་ཙམ་ནས་དྲན་མཁན་ཆོས་ཉིད་ཀྱི་དབྱིངས་སུ་གྲོལ་ནས་ཆོས་ཉིད་ཀྱི་ངང་དུ་རྒྱ་འབྱམས་དགོས་པས་ཡེངས་པའི་ཚེ་དྲན་པས་ཟིན་པ་གལ་ཆེ། ཞེས་མདོ་བ་གདམས་ངག་རྒྱ་མཚོ་རང་ཡུལ་དུ་ཕེབས་དུས་གཅེས་ནོར་དུ་གདམས་པ་ཡིན་ནོ། ༈ །འཕྲིན་ཡིག་ཞལ་གདམས་དང་སྦྲེལ་ཏེ་གནང་བ། བླ་མ་དམ་པ་གང་གི་ཕྱག་ཏུ། གང་སྐུ་བདེ་བར་བཞུགས་པས་དགའ་སྤྲོ་འཕེལ། འདིར་སྙོམ་ལས་པ་ཡང་བདེ་སྐབས་ལགས། སྤྱིར་འདུས་བྱས་མི་རྟག་པ་འཁོར་བའི་ཆོས་ཉིད་ཡིན་པས་བྱ་ཐབས་བྲལ་བ་ལ་ཐུགས་ངལ་མ་མཛད། ཁྱད་པར་ཉམས་ལེན་གྱི་སྐབས་སྔར་ཞུས་པ་ལས་ལྷག་པ་མེད་ཀྱང་། ངེས་འབྱུང་གི་བསམ་པ་དང། བྱང་ཆུབ་ཀྱི་སེམས། དད་པ་དང་དག་སྣང་སོགས་གཞིར་བྱས་ནས། གདོད་མའི་ཡེ་གཞི་བཅིངས་གྲོལ་མེད་པའི་གནས་ལུགས་ཆོས་ཟད་ཀ་དག་གི་དགོངས་པ་ད་ལྟའི་ཐ་མལ་གྱི་ཤེས་པ་སྤུ་མ་བརྗེ། མདོག་མ་བསྒྱུར་བར་སངས་རྒྱས་སུ་ངོ་འཕྲོད། ལྷུན་གྲུབ་ཀྱི་གདངས་འགག་པ་མེད་པ་འཁོར་འདས་ཀྱི་འཆར་གཞི་མ་འགག་པར་ངོ་ཤེས། ཐུགས་རྗེའི་རྩལ་ཡུལ་ཐོག་ཏུ་ཤར་ཡང་བག་ཆགས་བསགས་ལོང་མེད་པར་དྲན་རྟོག་རྗེས་མེད་དུ་ཡལ་བ་ཆུ་ལ་རི་མོ་བྲིས་པ་བཞིན་དུ། གང་ཤར་རང་གྲོལ་དུ་ཤར་བ་ལ་ཡིད་ཆེས། དེ་ལྟ་བུའི་གནས་ལུགས་ཀྱི་ངོ་སྤྲོད་ཕྱིན་ཅི་མ་ལོག་པ་ཞིག་ཐོབ་ནས་རིག་པ་ཡིན་ལུགས་ཀྱི་སྟེང་དུ་འཇོག་པ་གལ་ཆེ་བ་དང་། ལུང་མ་བསྟན་གྱི་ལ་ཤན་འབྱེད་ཚུལ་གསུངས་སྐབས། བསྒོམ་བྱའི་ཡུལ་དང་སྒོམ་བྱེད་ཀྱི་བློ་དབྱིངས་སུ་ནུབ་ནས་ཆོས་ཉིད་ཀྱི་ངང་དུ་རྒྱ་འབྱམས་པ་དང་། རྣམ་རྟོག་བག་ལ་ཉལ་བའི་སེམས་རྩེ་གཅིག་གི་སྒོམ་པ་དབྱིངས་ལུང་མ་བསྟན་གྱི་ངང་དུ་དུས་འདའ་བ་གཉིས་ལ་ནོར་འཁྲུལ་མེད་པར་ཐུགས་ལ་ངེས་པར་ཞུ་ཞེས་ཕྲན་ཆོས་དབྱིངས་རང་གྲོལ་ནས་ཕུལ། ༄༅། །རྡོ་ལེ་ཁ་སྤུ་ཅན་ལ་གདམས་པའི་ཉམས་ལེན་གནད་བདུན་མ། བླ་མ་དམ་པ་རྣམས་ལ་ཕྱག་འཚལ་ལོ། །ཉིད་ནས་ཁ་ཙམ་མ་ཡིན་པར་སྙིང་ནས་དམ་པའི་ཆོས་ཤིག་སྒྲུབ་པར་འདོད་ན། ལས་འབྲས་བསླུ་མེད་ལ་ཡིད་ཆེས་ཀྱི་ངེས་པ་རྙེད་ནས་བླང་དོར་བྱེད་པ་དང་གཅིག །འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ཐར་འདོད་ཀྱི་བློ་ཤུགས་དྲག་པོ་བཅོས་མིན་རྒྱུད་ལ་སྐྱེ་བ་དང་གཉིས། མཁའ་ཁྱབ་ཀྱི་སེམས་ཅན་ཐམས་ཅད་དྲིན་ཆེན་གྱི་ཕ་མར་ཤེས་ནས་བྱམས་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་སྒོམ་པ་དང་གསུམ། ཕྱི་ནང་སྣོད་བཅུད་ཀྱི་གནས་ཚུལ་སྐུ་དང་ཡེ་ཤེས་ཀྱི་རང་བཞིན་ཡིན་པས་དག་སྣང་སྦྱང་པ་དང་བཞི། ཆོས་དང་དམ་ཚིག་གིས་བསྡུས་པ་རྣམས་རྡོ་རྗེའི་སྤུན་གྲོགས་ཡིན་པས་བརྩེ་གདུང་རྒྱུན་ཆད་མེད་པར་བྱེད་པ་དང་ལྔ། དུས་གསུམ་སངས་རྒྱས་ཀྱི་ངོ་བོ་དྲིན་ཆེན་གྱི་བླ་མ་ཡིན་པས་ཡིད་ཁྱེད་ཤེས་ཀྱི་དད་པས་གསོལ་འདེབས་བྱས་ཏེ་ཐུགས་ཡིད་དབྱེར་མེད་དུ་བསྲེ་བ་དང་དྲུགཉམས་ཞེན་གྱི་སྦུབས་དང་བྲལ་བའི་རིག་སྟོང་ཟང་ཐལ་གྱི་ལྟ་བ་ཡང་དག་གཉུག་མའི་དྲན་པས་རྒྱུན་དུ་སྐྱོང་བ་དང་བདུན་པོ་འདི་ཉིད་ཉིན་མཚན་ཐང་ལྷོད་མེད་པར་ཉམས་ལེན་མཛད་པར་ཞུ་ཞུ་ཞེས་བླ་མ་ནས་རྡོ་ལེ་ཁ་སྤུ་ཅན་ལ་གདམས་པའོ། །དགེའོ། །༄༅། །བསྟན་འཛིན་ངོར་གདམས་པ། བླ་མ་ལགས། འཁོར་བ་ལ་ཞེན་ལོག་གི་ངེས་འབྱུང་། གཞན་ཕན་དོན་དུ་གཉེར་བའི་བྱང་སེམས། བླ་མ་སངས་རྒྱས་དངོས་སུ་མཐོང་བའི་དག་སྣང་སྟེ། གནད་གསུམ་དང་བྲལ་ན་ཆོས་གང་བསྒྲུབ་ཀྱང་ཁ་ཆོས་ཡིན་ལ་དོན་ཆོས་མིན་པ་སྔར་ཞུས་ལྟར་དང་། ཁྱད་པར་ཉམས་ལེན་གྱི་སྐབས་སུ། ཚོགས་དྲུག་གི་ཡུལ་ལ་གཡེངས་ཀྱང་དྲན་པས་ཟིན་པ་ཙམ་གྱིས་སེམས་གསལ་སྟོང་ཙམ་དུ་གནས་པ་དང་། རྣམ་རྟོག་གི་འཕྲོ་འདུ་དང་བྲལ་བའི་ཧད་དེ་གནས་པའི་སྟོང་ཆ་ངོས་བཟུང་བྲལ་བ་དང་། སྒོ་ལྔའི་གདངས་མ་འགག་ལ་ཡིད་ཀྱི་རྣམ་ཤེས་གསལ་ལ་མི་རྟོག་པ་དང་། འཆར་ཚུལ་འདི་གསུམ་ལ་རྫོགས་ཆེན་གྱི་མན་ངག་དུ་མ་ནས་བྱིས་པ་ཉེར་སྤྱོད་ཀྱི་བསམ་གཏན་ཙམ་སྐྱེ་བའི་རྟེན་བྱེད་པ་ཡིན་གསུངས་ཡོད་པ་ལ་ཐུགས་བཞག་མཛོད། གཞན་ཡང་། རྟོག་མེད་རང་གསལ་ཡུལ་དང་མ་འདྲེས་པ་ཀུན་གཞིའི་རྣམ་ཤེས་དང་། རླུང་སེམས་ཀྱི་བཞོན་པ་བལྟར་མི་མངོན་པའི་དབྱིངས་དྭངས་པའི་རིག་པའི་ཆ་འོད་གསལ་གྱི་གདངས་མ་འགག་པ་གཉིས་ལ་ལྟ་ཐོག་ནས་ལ་ཤན་འབྱེད་པ་གནད་དམ་པའོ། །ཞེས་བསྟན་འཛིན་ངོར་བྲིས་སོ། ། ༈ འཁོར་བ་ལ་ངེས་འབྱུང་། སེམས་ཅན་ལ་སྙིང་རྗེ། ཀུན་ལ་དག་སྣང་། བླ་མ་ལ་མོས་གུས་སོགས་གཞིར་བཞག་གི་སྟེང་ནས་ཉམས་ལེན་བྱེད་དགོས་པ་ཡིན། མཉམ་བཞག་གི་སྐབས་སུ་བདེ་གསལ་མི་རྟོག་ལ་སོགས་པའི་ཉམས་ཞེན་གྱི་ཤུན་པ་དང་བྲལ་བའི་རིག་སྟོང་ཟུང་འཇུག་གི་དབྱིངས་སུ། ང་རྒྱལ་དང་ཁོང་ཁྲོ། ཕྲག་དོག་དང་ཟུར་ཟ། གཞན་ལ་ཁྱད་གསོད་ཀྱི་རྟོག་པ་སོགས་སྐྱེ་བ་དང་གྲོལ་བ་དུས་མཉམ་དུ་སོང་ནས་བག་ཆགས་བསགས་ལོང་མེད་པ་ལ་ཕྱག་རྫོགས་ཀྱི་ལྟ་བ་རྣམ་དག་གསུངས་པ་ལགས། རྗེས་ཐོབ་ཀྱི་སྐབས་སུ་ཆོས་རྣམས་བདེན་མེད་རྨི་ལམ་ལྟ་བུར་ཤེས་པའི་ངང་ནས་ཉམས་ལེན་སྤྱོད་ལམ་ལ་བསྲེ་བ་དང་ཚོགས་བསགས་པ་གལ་ཆེ་ཞིང་། དེ་ལྟར་མ་ཡིན་པར་རང་རྒྱུད་ཀྱི་ཆགས་སོགས་ཉོན་མོངས་པ་ཤར་གྲོལ་ལྟ་ཅི་རེ་ཞིག་མགོ་ནོན་ཙམ་ཡང་མེད་པར། ང་ནི་སྒོམ་ཆེན་ཡིན། ང་རང་ལ་ཡེངས་འཁྲུལ་མེད་ཟེར་བ་རྣམས་ནི་བཞད་གད་ཀྱི་གནས་ཡིན་ཞེས་བླ་མ་ནས་སོ། ། ༄༅། །རྒུ་ནང་བླ་མ་འཇིགས་མེད་རང་གྲོལ་ལ་གདམས་པ། རིགས་བརྒྱའི་ཁྱབ་བདག་འབྲུག་པ་རྡོ་རྗེ་འཆང་ལ་གུས་པས་འདུད་དོ་ཐུགས་རྗེས་ཟུངས། གང་དག་སེམས་ལས་འདས་པའི་ཡེ་ཤེས་ཆེན་པོ་ལམ་དུ་བྱེད་པའི་ཚུལ་ལ། ཀུན་གཞི་དང་ཆོས་སྐུ། སེམས་དང་ཡེ་ཤེས་ལ་སོགས་དབྱེ་བ་མང་དུ་ཡོད་མོད་ཀྱང་། བླུན་སྒོམ་མུན་རྡོ་འཕེན་པ་བདག་འདྲས་རྡོ་རྗེའི་ཚིག་རྣམས་དགྲོལ་བར་ག་ལ་ནུས། དེ་ཕྱིར་གནས་པ་དང་ནི་རྩལ་གྱི་ཤན་འབྱེད་རི་མོའི་མར་མེ་བཞིན་དུ་འདི་ན་སྤྲོ། དེ་ལ་གནས་པ་ངོ་བོའི་ཤན་འབྱེད་དང་འཕྲོ་བ་རྩལ་གྱི་ཤན་འབྱེད་དེ་གཉིས་ལས། དང་པོ་ལ་སེམས་ཀྱི་ངོ་བོ་དང་རིག་པའི་ངོ་བོ་སྟེ་གཉིས་ལས། དང་པོ་ནི། གསལ་ལ་རྟོག་མེད་ཙམ་དུ་སེམས་དང་རིག་པ་མཚུངས་ནའང་། ཀུན་མཁྱེན་གཉིས་པས། སེམས་ནི་ལྟེང་ཀ་ལྟ་བུར་འཁྱིལ་ཞིང་རྨོངས། ཞེས་གསུངས་པས་ཤེས་སོ། །གཉིས་པ་ནི། ཆོས་ཀྱི་དབྱིངས་མཐའ་ལས་འདས་པའི་ཀློང་ན་རང་བཞིན་ལྷུན་གྲུབ་ཀྱི་གདངས་ནང་གསལ་ཐིམ་ལ་མ་རྨུགས་པའི་ཤིན་ཏུ་ཕྲ་བའི་ཡེ་ཤེས་དཔེར་ན་གནམ་སྟོང་གི་ཟླ་བ་མཁའ་དབྱིངས་སུ་འཁྱིལ་བ་ལྟ་བུ་ཡིན་ཏེ། ཅང་མེད་སྟོང་རྐྱང་དུ་འདོད་པ་ནི་མིན་ཏེ། ཡོན་ཏན་རིན་པོ་ཆེའི་མཛོད་ལས། རིག་པ་གནམ་སྟོང་ཟླ་བ་གཏིང་གསལ་འདྲ། །ཞེས་གསུངས་པ་བཞིན་ནོ། །གཉིས་པ་འཕྲོ་བ་རྩལ་གྱི་ཤན་འབྱེད་ལའང་གཉིས་ལས། དང་པོ་སེམས་ཀྱི་རྩལ་ནི། ཐོག་མར་ཡུལ་ལ་ཤར། བར་དུ་དྲན་པས་ཟིན། ཐ་མ་ནང་དུ་ལོག་པ་དེ་ནི་གཟུང་འཛིན་ལས་མ་འདས་པའི་ཆོས་སོ། །གཉིས་པ་རིག་པའི་རྩལ་ནི། ཤར་བ་དང་གྲོལ་བ་དུས་མཉམ་དུ་སོང་ནས་ཤར་གྲོལ་དབྱེ་བའི་མཁན་པོ་དབྱིངས་སུ་དག་ནས་གཟུང་འཛིན་གྱི་རྟོག་པ་ཐད་ཀར་དུ་ཞིག་པའོ། །ཚུལ་འདི་བླ་མ་འཇིགས་མེད་རང་གྲོལ་ནས་ལན་གྲངས་དུ་མའི་བར་དུ་བསྐུལ་ཚེ་བཞེད་སྐོང་ལྡོག་མིན་ཙམ་དུ་ཆོས་མེད་སྤྲང་པོ་སྨྱོན་པའི་ངང་ཚུལ་ཅན་དེས་མྱུར་དུ་བྲིས། དགེའོ། ། ༄༅། །རྨ་ཐུགས་ལ་གདམས་པ། བདེ་ལྡན་ཞིང་གི་མགོན་པོའི་ཐུགས་ཀའི་ཧྲཱིཿ། །སིནྡྷཱུའི་དྭངས་མཚོར་སྨིན་པའི་མཚོ་སྐྱེས་རྗེའི། །སྤྲུལ་པའི་རོལ་གར་ཞིང་རྡུལ་གྲངས་མཉམ་པའི། །ཐུགས་སྲས་རྗེ་འབངས་བརྒྱུད་བཅས་རྒྱལ་གྱུར་ཅིག །ཀྱེ་ལགས། །ཆོས་མེད་ཆོས་གཟུགས་སྤྲང་པོ་སྨྱོན་པ་བདག །གལ་ཏེ་ཁྱོད་ཀྱིས་བླ་མར་འཛིན་སྲིད་ན། །དགོས་མེད་རལ་རྫོང་འཐུག་པོ་རྩད་ནས་ཆོད། །སོར་གསུམ་གཙུག་སྐྲའི་མཆོད་པ་མཁན་པོར་ཕུལ། །མཐིང་གོས་ཟླུམ་པོའི་སྣམ་ཕྲན་ལུས་ལ་གྱོན། །ལྕུགས་ཕྲན་སྣལ་མ་སེར་པོའི་སྐ་རགས་ཆོངས། །རབ་ཏུ་བྱུང་བའི་བསིལ་ཁང་ལ་ཞུགས་ནས། །ངུར་སྨྲིག་རྒྱལ་མཚན་འཛིན་ལ་སྙིང་སྟོབས་སྐྱེད། །དཔའ་བོའི་ལྕང་ལོ་མི་བྲེག་ཟུར་འཆང་ནས། །བདེ་སྟོང་དགའ་བཞིའི་རོ་ལ་དགྱེས་རོལ་ཀྱང་། །དེ་འདྲའི་ཤག་པོ་མ་རེད་སྐུ་ཚེ་རིང་། །ལས་ངན་ཟོག་པོའི་གྲལ་དུ་ལྷུང་ལ་ཁད། །རང་གཞན་གཉིས་ཀའི་སྤྱོད་ངན་སྣ་ཚོགས་ལ། །ཡང་ཡང་བསམས་ན་མིག་ནས་མཆི་མ་འཐོར། །བསམ་ཞིང་བསམས་ན་གདུངས་བའི་སྨྲེ་སྔགས་འདི། །མི་འདོན་རང་དབང་རང་ལ་མི་འདུག་གི། དེང་དུས་སྙིགས་མ་ལྔ་བདོའི་མར་གཤམ་འདིར། །རྫུན་གྱི་རྣལ་འབྱོར་མང་པོས་ལྗོངས་འདིར་གང་། །རྒྱན་མེད་རལ་རྫོང་འཐུག་པོས་མགོ་བོ་འཕྱིངས། གཏུམ་མོ་མི་ཤེས་རས་གོས་གོས་སུ་གྱོན། །ཐབས་ལམ་མི་ཤེས་ནག་མོའི་གཞང་སྒོ་འགྲིམ། །ཉིན་མཚན་མེད་པར་བྱི་རྐུན་བྱེད་པ་འདི། །རྫོགས་པའི་སངས་རྒྱས་རྣམས་ཀྱིས་མ་གསུངས་ཀྱང་། །གཏེར་རྫུན་སྟུ་ལ་དགའ་བའི་ཁྱད་ཆོས་ལགས། །དགོས་འབྲེལ་མི་ཤེས་འཕྱོར་སྒེག་བསམ་པ་ཡིས། །རྣ་ཆ་གདུ་བུ་སོགས་ཀྱིས་ལུས་པོ་བརྒྱན། །གྲུབ་རྫུན་སྨྱོན་པ་བག་མའི་ངང་ཚུལ་ཅན། །འདི་མཐོང་མི་སྐྱོ་སེམས་ལྡན་སུ་ཞིག་ཡོད། །གནད་མེད་སྟོང་འུར་བྱེད་པའི་གཏེར་རྫུན་འགས། །བླ་གཏེར་བརྒྱད་དང་ཐུགས་གཏེར་ཆེན་པོ་ལྔ། །ཟབ་པའི་གཏེར་ཆེན་ཉེར་ལྔ་ལ་སོགས་པའི། །མིང་ཙམ་མི་ཤེས་གཏེར་བཞེས་ལྟ་ཅི་སྨྲོས། །གཅིག་གིས་གཅིག་ལ་ནག་མོ་མ་བསྟེན་ན། །ཁྱོད་ཀྱི་སྲོག་གི་དབང་པོ་འགག་ལ་ཁད། །ཤ་དང་རུས་པའི་ཚོགས་ཀྱང་ཞིག་ཏུ་ཉེ། །ཁོ་བོར་འབྱུང་འགྱུར་ལུང་བསྟན་བྱུང་ངོ་ལོ། །དེ་སྐད་སྨྲ་བའི་ཟོག་པོ་ཆོས་རྫུན་མཁན། །ཚུལ་འཆལ་སྡོམ་པ་ཤོར་ལ་གཏེར་ཡུམ་ཞེས། །ངོ་ཚ་ཁྲེལ་མེད་གྲོང་གི་ཁྱི་ཕག་བཞིན། །ནག་མོ་ལས་ངན་རྣམས་ལ་ཤི་སྤར་འཐམ། །གཟའ་ཚང་མི་སོས་མི་ཚེ་སྡུག་གིས་ཟད། །དབྱར་དགུན་གཉིས་ལ་སྤྲང་དབྱུག་སྤྲང་སྒྱེ་བཟུང་། །དུས་རྣམས་ཀུན་ཏུ་ངན་ཤག་འཐབ་མོ་བྱས། །སྨྱོན་པ་འདིས་ནི་རང་སྐྱོན་མི་སེམས་ཀྱི། །བན་བཙུན་ཕོ་མོ་རྣམས་ལ་དཀའ་ལོག་དང་། །ཁྱོད་ཀྱིས་འགྲོ་དོན་དཔག་མེད་འབྱུང་བ་ནི། །བསླུ་བ་མེད་དོ་པདྨའི་ལུང་བསྟན་ཞེས། །མི་ཆོས་བླ་མའི་རྫུན་གྱི་ཆོ་ངེ་འདེབས། །ཟོག་པོ་ངན་སྐྱུག་མཁན་འདིས་ཅིར་སྨྲས་ཀྱང་། །སྙིང་ནས་བརྩེ་བའི་བརྩེ་ལྡན་གྲོགས་ཁྱེད་ཀྱིས། །དེ་འདྲའི་སྤྱོད་ངན་བསྟེན་པ་ལྟ་ཅི་སྨོས། །ཐོས་པར་གྱུར་ན་རྣ་བ་མཛུབ་མོས་ཁོབས། །འཕུང་བྱེད་ནག་མོ་མང་པོའི་ཁྱོ་ག་འདི། །གཏེར་སྟོན་ཡིན་ན་གཏེར་མིན་དེ་སུ་ཞིག །བསྐྱེད་དང་རྫོགས་པའི་རིམ་པ་མི་ཤེས་ཀྱང་། །ཐ་ན་མ་ཎི་ཕྲེང་སྐོར་གཅིག་ཀྱང་མེད། །ད་དུང་དད་གཤིན་དཀོར་ལ་ལོངས་སྤྱད་ནས། །རང་མགོ་མི་ཐོན་རོ་མགོར་ཧིཀ་སྒྲ་བྱེད། །མཚན་མོ་ནག་མོ་རྣམས་དང་ལྷན་ཅིག་ཉལ། །འདི་ལས་སྨྱོན་པ་སྲིད་འདིར་སུ་ཞིག་ཡོད། །ངན་སྤྱོད་སྣ་དགུ་བྱེད་པའི་གཏེར་རྫུན་འདི། །ཡུལ་ན་ཡོད་ཀྱང་བསྟན་པ་སྤྱི་ཡི་དགྲ། །དགོན་དུ་གནས་ན་སྤྱོད་ངན་ཀུན་ལ་འགོ །གྲོང་དུ་བསྡད་ཀྱང་ཀུན་ལ་བྱི་རྐུན་བྱེད། །པདྨའི་ཟབ་གཏེར་འདི་ལ་མི་དབང་ཀྱང་། །ལས་ངན་ནག་མོ་མང་པོའི་ལྟོ་བ་ནས། །ཤི་གསོན་བྱིས་པ་མང་པོ་གཏེར་ནས་དྲངས། །སུས་མཐོང་མི་ཡིས་ལོག་ལྟ་སྐྱེ་ངེས་བྱ། །འཁྲུལ་མེད་གླིང་པ་བཅུ་གསུམ་ལ་སོགས་པའི། །གཏེར་སྟོན་བརྒྱ་དང་རྩ་བརྒྱད་བྱོན་མོད་ཀྱང་། །འདི་འདྲའི་གཏེར་སྟོན་དེ་སྔོན་མ་བྱོན་པས། །འདི་ཡི་མཚན་ལ་བྱི་གཏེར་ཞེས་སུ་གསོལ། །འགྲོ་བ་བསླུ་བའི་གཏེར་རྫུན་འགའ་ཞིག་གིས། །བཙུན་མ་སྡོམ་ལྡན་རྣམས་ཀྱི་སྡོམ་པ་བཤིག །འདི་འདྲའི་གྲོང་སྔགས་སྐྱ་མིན་སེར་མིན་གྱི། །ལུས་དེ་ནམ་ཡང་ལེན་པར་མ་གྱུར་ཅིག །ཅེས་མདོ་ཁམས་པ་གྲུབ་དབང་རྫོགས་པ་ཆེན་པོའི་རྣལ་འབྱོར་པ་འབྲུག་པ་རྡོ་རྗེ་འཆང་ཞེས་ཡོངས་སུ་གྲགས་པ་དེ་ཉིད་ཀྱི་ཞབས་རྡུལ་སྤྱི་བོར་འཛིན་པའི་བཙུན་པ་ཀུན་བཟང་གཞན་ཕན་མཐའ་ཡས་སུ་འབོད་པས་ཐུགས་མཆོག་ལ་གདམས་པ་དགེའོ། །སརྦ་དཱ་སུ་ཤེ་ཡོ་མངྒ་ལཾ། བྷ་ཝནྟུ། ༄༅། །ཡང་མཉམ་བཞག་གི་རང་ས་ཟིན་ཀྱང་དེ་ཉིད་རྐྱེན་དང་བསྲེས་ནས་རྟོགས་པའི་རྩལ་སྦྱང་མ་བྱས་ན་གཉེན་པོས་རྐྱེན་མི་ཐུབ་པས། མཉམ་བཞག་ལེགས་པོ་དེའི་ཀློང་ན་རྟོག་ངན་གྱི་དུག་སྦྲུལ་འཇིགས་སུ་རུང་བ་མང་པོ་གནས་གཅིག་ཏུ་འཚོགས་ནས་སྡོད་པ་ལྟ་བུ་ཡིན་པས། མཛེས་མའི་གཟུགས་སོགས་ཆགས་ཡུལ་ཡིད་དུ་འོང་བ་དང་། གཞན་གྱིས་བརྙས་སྨོད་སོགས་སྡང་བའི་ཡུལ་རྐྱེན་གང་རུང་རེའི་དབང་གིས་ཁོང་ཁྲོ་དང་འདོད་ཆགས་སོགས་མངོན་དུ་གྱུར་འོང་བ་དེ། རང་རྒྱུད་ཀྱི་སྒོམ་དེའི་ཀློང་ནས་བྱུང་བ་མིན་ན་ཤ་ལས་མི་འབྱུང་ཁྲག་དང་ལྤགས་པ་དང་རུས་པ་དང་རྐང་སོགས་གང་ལས་བྱུང་སོམས་ཤིགདེ་དག་སྦྱང་མ་ཐུབ་ན་ཞེ་སྡང་གི་དབང་གིས་དམྱལ་བ། འདོད་ཆགས་ཀྱི་དབང་གིས་ཡི་དྭགས། གཏི་མུག་གིས་དུད་འགྲོ། ཕྲག་དོག་གིས་ལྷ་མིན། ང་རྒྱལ་གྱིས་ལྷ་སོགས་སུ་སྐྱེ་བ་ཐོས་གྲོལ་གྱི་གཞུང་ན་གསལ་བ་ལྟར་ཡིན་པས་དེ་དག་སྦྱང་དགོས། དེ་ཡང་ཇི་ལྟར་སྦྱང་བའི་ཚུལ་ནི། རྒྱ་གར་གྲུབ་ཆེན་ཚོས་དང་པོ་དབེན་པའི་གནས་སུ་མཉམ་བཞག་ལ་བརྟན་པ་ཐོབ་པའི་རྗེས་སུ་ཚོགས་དུས་སོགས་སུ་སོང་ནས་མི་མང་གི་རྒྱུ་འགྲུལ་དང་བདེ་སྡུག་སོགས་ལ་བལྟས་ནས་རྩལ་སྦྱང་། དེ་ནས་གྲོང་དགུའི་མི་གཙང་བ་སློགས་ཏེ་གཙང་རྨེའི་གཉིས་རྟོག་ལ་རྩལ་སྦྱང་པ་དང་། རྒྱལ་པོའི་ཆད་པ་གཅོད་པའི་སར་ཕྱིན་ཏེ་མིག་འབྱིན་པ་དང་རྐང་ལག་གཅོད་པ་གསོད་པ་སོགས་ལ་བལྟས་ཏེ་སེམས་ཅན་རང་རྒྱུད་པ་དང་སྙིང་རྗེ་རང་རྒྱུད་པ་ལ་རྩལ་སྦྱང་། དེ་ནས་དུར་ཁྲོད་དུ་ཕྱིན་ཏེ་གཅན་གཟན་གཏུམ་པོ་དང་མི་མ་ཡིན་གདུག་པ་ཅན་སོགས་མཐོང་ན་འཇིགས་སྐྲག་ལ་རྩལ་སྦྱང་པ་སོགས་མཛད་པ་ལྟར། གནས་རི་རྩེ་མཚོ་གླིང་སྐྱེད་མོས་ཚལ་སོགས་སུ་ཕྱིན་ནས་མིག་གིས་གཟུགས་མཐོང་ན་དེ་ལ་ཡང་ཡང་བལྟ། རྣ་བས་སྒྲ་ཐོས་ན་ཡང་ཡང་ཉན་པ་སོགས་དང་ཡིད་ལ་ཅི་ཤར་ཡང་འཆར་དུ་བཅུག་སྟེ་ངག་ནས་ཀྱང་མིང་བརྗོད་སེམས་རྟོག་ཀྱང་ཡུལ་ལ་འཕྲོ་བཅུག་སྟེ་ཡུལ་ཀ་བ་ལྟ་བུ་གཅིག་གི་སྟེང་དུ་འབྱམས་པ་གཅོད་པའི་ཕྱིར་ཀ་བའོ་སྙམ་པའི་དེ་མ་ཐག་བུམ་པའོ། །རྡོའོ། །ཤིང་ངོ་ཞེས་པ་ལྟ་བུར་ཁ་སྤོ་ཞིང་རྩ་བ་རིག་པའི་རང་ས་མ་ཤོར་བཞིན་ཤེས་པ་ཡུལ་ལ་འཕྲོར་གཞུག་སྟེ་རིག་ཐོག་ཏུ་གྲོལ་བ་ལ་བསླབས་པས་རྐྱེན་ངན་དང་རྣམ་རྟོག་གང་ཤར་རིག་པའི་རྩལ་སྦྱང་དུ་འཆར་ནུས་པ་ནི་དཔེར་ན་བླ་མ་ཞང་རིན་པོ་ཆེས་དབུ་བྲག་ཕུག་ལ་བརྡབ་པ་དང་ཞབས་རྐང་ལ་ཚེར་མ་ཟུག་པ་ཡང་བདེ་སྟོང་དུ་འཆར་ནུས་པ་བཞིན་ནོ། །དེ་ལྟར་རྩལ་སྦྱང་བྱ་བ་ནི། ལས་དང་པོ་པ་ལ་རིག་པ་ངོ་སྤྲོད་པའི་དུས་སུ་ཉམས་ཞེན་གྱི་ཤུན་པ་གཏོར་བའི་ཐབས་དང་ཉམས་ལེན་ལ་བརྟན་པ་ཐོབ་པའི་གང་ཟག་གིས་རྐྱེན་ཐུབ་ཀྱི་རྟོགས་པ་འཕེལ་བའི་ཆེད་དུ་བྱ་བ་སྟེ། མ་མཐའ་ཞག་པོ་བརྒྱ་རེ་ཙམ་ལ་ངེས་པར་སློབ་དགོས་གསུངས། ། ༈ ཀུན་མཁྱེན་འཇིགས་མེད་གླིང་པས། རང་ངོ་འཕྲོད་ཀྱང་གོམས་འདྲེས་མ་བྱས་ན། །རྣམ་རྟོག་དགྲས་ཁྱེར་གཡུལ་ངོའི་བུ་ཆུང་འདྲ། །ཞེས་དང་། ལས་རླུང་ཡེ་ཤེས་ཀློང་དུ་མ་གྱུར་བར། །གཉུག་མའི་ཡིན་ལུགས་སུས་ཀྱང་མཐོང་བ་མེད། །ཅེས་དང་། ཇི་སྲིད་སྣང་བའི་འདུ་ཤེས་མ་ཟད་པར། །དེ་སྲིད་རྒྱལ་བའི་དགོངས་པ་ལོན་པ་མེད། །ཅེས་དང་། ཀུན་མཁྱེན་ཀློང་ཆེན་པས། ལྷུན་གྲུབ་སྣང་བཞིའི་ས་རྒྱ་མ་ཆོད་པར། །ཇི་ལྟར་བྱས་ཀྱང་རྫོགས་པ་ཆེན་པོ་མིན། །ཞེས་གསུངས། ཚོགས་དྲུག་རང་གྲོལ་གྱིས། ད་ནི་བལྟ་རྒྱུ་མི་བལྟ་རྒྱུ། །མེད་དེ་གར་བཞག་འདྲ་བ་དེས། །ཁ་རོག་བསྡད་པ་འདྲ་བ་ཡི། །ཇི་ཡང་བྱ་རྒྱུ་མ་རྙེད་པ། ངོ་བོ་དང་པོ་མཐོང་བ་སྟེ། ཐ་མལ་ཤེས་པ་མིང་དུ་བཏགས། །དེ་ཡི་ངང་དུ་གནས་ཙམ་ན། །གཟུགས་སྒྲ་དྲི་རོ་རེག་བྱ་སོགས། ཚོགས་དྲུག་སྣང་བ་གང་ཤར་ཡང་། །སྣ་ཚོགས་སོ་སོར་གསལ་མོད་ཀྱང་། །དེ་དུས་འཛིན་པ་སོ་སོར་མེད། །གཟུགས་རྣམས་སྣ་ཚོགས་གང་མཐོང་ཡང་། །བྱིས་པས་ལྷ་ཁང་མཐོང་བ་བཞིན། །སྣ་ཚོགས་མཐོང་ཡང་འཛིན་པ་མེད། །སྙན་དང་མི་སྙན་སྒྲ་རྣམས་ཀྱང་། །སོ་སོར་ཐོས་ཀྱང་ཆགས་སྡང་མེད། །བྲག་རི་ཁྱོད་ཀྱི་སྒྲ་སྐད་བཞིན། །ཆུ་ནང་ཤར་བའི་ཟླ་གཟུགས་བཞིན། །རྣམ་པ་སོ་སོར་གསལ་ན་ཡང་། །ངོ་བོ་སྟོང་པ་ཉིད་དུ་སྣང་། །རང་གྲོལ་ཆུ་དང་ཆུ་རླབས་བཞིན། །ཆོས་ཀྱི་བདག་མེད་དེ་ལ་ཟེར། །སྟོང་ཉིད་ཡོངས་རྫོགས་རྟོགས་མོད་ཀྱང་། །ད་རུང་ཡེངས་སྐབས་བརྗེད་སྐབས་མང་། །ཡེངས་ཚེ་ཐ་མལ་འཁྲུལ་པ་སྟེ། །ཉོན་མོངས་གང་སྐྱེས་ཐ་མལ་བ། །འདི་སྐབས་དྲན་པས་ཡང་དང་ཡང་། །གསལ་གདབ་བྱེད་པ་གལ་ཆེ་སྣང་། །ཡེངས་དང་མ་ཡེངས་ཁྱད་པར་མེད། །དྲན་དང་མ་དྲན་ཁྱད་པར་མེད། །འཁྲུལ་དང་མ་འཁྲུལ་ཁྱད་པར་མེད། །ཐམས་ཅད་སྟོང་པར་འདུག་སྙམ་པའི། །གོ་བ་སྐྱེས་ཏེ་རེ་འགའ་སྐྱེས། །དེ་ལ་གདེངས་བཅས་ལྷོད་དྲག་ན། །ཐ་མལ་ཉིད་དུ་འཆོར་ཉེན་ཡོད། །གོ་བ་རྟོགས་པ་བྱེད་པ་གཅེས། །ད་རུང་དྲན་པའི་གསལ་འདེབས་ནི། །མ་བརྗེད་ཡང་དང་ཡང་དུ་དགོས། །ཅིའི་ཕྱིར་ཞེ་ན་ན་དུག་ལྔ་ཡི། །རྟོག་པ་མ་ནོན་ཚིག་ངན་སོགས། །ཐེ་ཚོམ་དེ་ལན་སྒྲ་ཤོར་སོགས། །འབྱུང་བ་ཡེངས་པའི་སྐྱོན་དུ་ངེས། །དེ་ནི་དྲན་རྗེས་ཡང་ཡང་དགོས། །ཞེས་གསུངས། ཨོ་རྒྱན་རིན་པོ་ཆེས། ཡུན་ཐུང་གྲངས་མང་ཁང་སྟོང་ཐིག་པ་བཞིན། །མ་ཡེངས་མ་སྒོམ་ལྷོད་དེ་ཧྲིག་གེ་ཞོག །ཅེས་གསུངས། ད་རེས་འཕྲོ་མཐུད་པ་ལ་གཉུག་མའི་དེ་ཉིད་ཡོད། ཅེས་གསུངས། ༈ བླ་མའི་རྣལ་འབྱོར་རྩེ་གཅིག་ཏུ་བསྒོམ་ལ་དད་པས། །རང་རིག་དོན་གྱི་བླ་མའི་བྱིན་རླབས་ལས་ཤར་བའི། །སྣང་སྲིད་འཁོར་འདས་མ་ལུས་བླ་མ་ཡི་སྤྲུལ་པ། །རང་སེམས་རྩལ་དུ་ཤར་བའི་དངོས་གྲུབ་ཞིག་ཞུའོ། །དང་པོ་ཕྱི་རུ་བཟུང་ནས་གསོལ་འདེབས་དང་མོས་གུས། བར་དུ་སེམས་དང་བསྲེས་ནས་ཐུགས་ཡིད་གཉིས་མཚམས་སྦྱོར། །མཐར་ཐུག་དབྱེར་མེད་རོ་གཅིག་སངས་རྒྱས་སུ་གྲོལ་ནས། །འགྲོ་དོན་རྒྱུན་མི་འཆད་པའི་སྨོན་ལམ་དེ་འགྲུབ་ཤོག །ཅེས་བླ་མ་སྒྲུབ་ཐབས་གསོལ་འདེབས་མོས་གུས་ལ་བརྟེན་པ་འབྲུག་པ་རིན་པོ་ཆེའི་ཞབས་རྡུལ་སྤྱི་བོར་ལེན་པ་ཆོས་དབྱིངས་རང་གྲོལ་ནས་བྲིས་པ་དགེའོ། །སརྦ་མངྒ་ལམ། ༄༅། །སྦྱོར་དངོས་མཇུག་གསུམ་ཚང་བས་དམ་པའི་ལྷ་ཆོས་སྒྲུབ་ཚུལ། བླ་མ་ལ་ཕྱག་འཚལ་ལོ། །ཆོས་གང་བསྒྲུབ་པའི་ཐོག་མར་ཀུན་སློང་བཅོས་པ་གལ་ཆེ་བས། དང་པོ་རང་གི་སེམས་ལ་བརྟགས་ཏེ། ལུང་མ་བསྟན་གྱི་ཀུན་སློང་། མི་དགེ་བའི་ཀུན་སློང་། དགེ་བའི་ཀུན་སློང་གསུམ་ལས། དང་པོ་ལུང་མ་བསྟན་གྱི་ཀུན་སློང་ནི། ཆོས་གྲལ་དུ་འཚོགས་ཚེ་ལྟ་བུར་ཅི་བསམ་འདི་བསམ་མེད་པར། དད་སོགས་དགེ་བའི་བསམ་པས་མ་ཟིན། ཆགས་སོགས་མི་དགེ་བའི་དབང་དུ་མ་སོང་བར། མི་དྲེད་ཀྱི་མིའི་ལད་མོ་ལྟ་བུ། མི་རྗེས་ཁྱི་ཞེན་པ་ལྟ་བུ། བྱིས་པས་མེ་ཏོག་ཐུ་བ་ལྟ་བུ། མདའ་སྟོང་འཕེན་འདྲ་བ་དང་། གཞན་སྦྱོར་དངོས་རྗེས་གསུམ་གང་ཡང་མེད་པར་རང་གར་མཉམ་བཞག་ཏུ་འདུག་པ་མི་རྒན་ཆད་པོ་མའ་ལེན་པ་༼ངལ་བསོས་པ་༽ལྟ་བུ་རྒྱ་རྒན་ཧ་ལོག་པ་འདྲ་བ་རྣམས་བཅོས། དཔལ་སྤྲུལ་རིན་པོ་ཆེའི་ཞལ་གསུངས། ལུང་མ་བསྟན་གྱི་དགེ་སྦྱོར་ལ་འབྲས་བུ་མེད་པས་ཐར་བའི་ས་བོན་ཙམ་ཡང་མི་ཐེབ་གསུངས། བླ་མ་ལུང་རྟོགས་ནས་གང་ཟག་དབང་བཙན་དུ་བྱས་ན་དེ་ལྟར་ཡིན་མོད་ཆོས་དབང་བཙན་བྱས་ན་ཆོས་ཀྱི་བྱིན་རླབས་ཀྱིས་ཐར་བའི་ས་བོན་ཙམ་ཐེབ་གསུངས། གཉིས་པ་མི་དགེ་བའི་ཀུན་སློང་ནི། གཉེན་ལ་ཆགས་པ། དགྲ་ལ་སྡང་བ། བར་མ་ལ་གཏི་མུག་སྟེ་མདོར་ན་དུག་གསུམ་དང་འདྲེས་པའི་ཀུན་སློང་དང་གཞན་ཚེ་འདི་སྒྲུབ་འདོད་ཀྱིས། དགྲ་གདོན་ན་ཚ་སོགས་ཞི་བྱེད་འཇིགས་སྐྱོབས་དང་ཆོས་བརྒྱད་དུ་ཞེན་ནས་གཞན་གྱིས་རྙེད་བསྟོད་སྙན་གྲགས་དཀོར་ཁ་གྲོང་ཆོག་སོགས་ལེགས་སྨོན་གྱི་ཀུན་སློང་རྣམས་རྩ་བ་དུག་གསུམ་ལ་ཟུག་པས་སྤོང་དགོས་པ་ནི། ཚེ་འདི་ལ་ཞེན་ན་ཆོས་པ་མིན། །ཞེས་གསུངས། གསུམ་པ་དགེ་བའི་ཀུན་སློང་ལའང་། རང་དོན་སྒྲུབ་པའི་ཀུན་སློང་དང་གཞན་དོན་སྒྲུབ་པའི་ཀུན་སློང་གཉིས་ལས། དང་པོ་ནི། རང་ངན་སོང་གསུམ་ལས་ཐར་ནས་མངོན་མཐོ་ཐོབ་འདོད་སྐྱེས་བུ་ཆུང་ངུའི་ཀུན་སློང་སྟེ། འཁོར་བ་ལ་ཞེན་ན་ངེས་འབྱུང་མིན། །ཞེས་གསུངས། རང་འཁོར་བ་ལས་ངེས་པར་འབྱུང་ཏེ་རང་འབྲས་དོན་དུ་གཉེར་བ་སྐྱེས་བུ་འབྲིང་ཉན་རང་གི་ཀུན་སློང་སྟེ། བདག་དོན་ལ་ཞེན་ན་བྱང་སེམས་མིན། །ཞེས་གསུངས་པས་ཀུན་སློང་དེ་དག་སྤང་དགོས། གཉིས་པ་གཞན་དོན་སྒྲུབ་པ་སྐྱེས་བུ་ཆེན་པོའི་ཀུན་སློང་ནི། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་སྙམ་པས། སྐྱབས་འགྲོའི་ཚོགས་ཞིང་ངམ་བླ་མའི་རྣལ་འབྱོར་ནི་ལས་དང་པོ་བས་ཞལ་ཕྱག་མཚན་མའི་རྣམ་པ་སོགས་གསལ་མ་ཐུབ་ཀྱང་མོས་སྒོམ་གྱི་སྐབས་འདིར་ཆོག་ལ། དེ་ཡང་གུ་རུ་རིན་པོ་ཆེ་རང་གིས། གཞན་གང་ཟག་ལས་ལ་བཟང་ངན། ལུས་ལ་ཕོ་མོ། རིགས་ལ་མཐོ་དམན། ན་ཚོད་ལ་རྒན་གཞོན་མེད་པར་སུ་ཞིག་གིས་ང་ཉིད་དྲན་པས་མོས་ཤིང་དད་པའི་སྒོ་དེ་ལ་བྱོན་གསུངས་པ་ནི། དད་པ་ཅན་ལ་པད་འབྱུང་སྒོ་ཉལ་ཡོད། །གསུངས་པས་དེས་ན་རང་གི་སྤྱི་བོར་སྐྱབས་གནས་ཀུན་འདུས་ཀྱི་ངོ་བོ་ཨོ་རྒྱན་རྡོ་རྗེ་འཆང་ཡེ་ཤེས་ཀྱི་ཕུང་པོར་བཞུགས་ཡོད་སྙམ་པས་དད་པ་མོས་གུས་རྩེ་གཅིག་ཏུ་བསྐྱེད། དད་པ་དེ་ཡང་ཁམས་གསུམ་འཁོར་བ་འདི་སྡུག་བསྔལ་གྱི་རྒྱ་མཚོ་རུ་ངེས་པས་དེ་ལས་སྒྲོལ་བའི་ནུས་པ་རང་ཉིད་དང་གཞན་ཕ་མ་ཉེ་འབྲེལ་རི་དང་ཤིང་གི་ལྷ་དང་ཚངས་པ་དང་ཁྱབ་འཇུག་སོགས་ལ་མེད་པར་ཤེས་ནས། དེ་ལས་སྒྲོལ་བའི་ནུས་པ་སུ་ལ་ཡོད་ན་སྐྱབས་གནས་རྒྱ་མཚོའི་མངའ་བདག་གུ་རུ་རིན་པོ་ཆེ་ལ་ཡོད་པར་ཤེས་པའི་ཤེས་པ་གཉིས་ཚོགས་པ་ཤེས་ཐོབ་ཀྱི་དད་པ་བསྐྱེད་དགོས་ལ། ཇི་སྐད་དུ། ཤེས་ལས་བྱུང་བའི་དད་པ་ནི། །ཐམས་ཅད་མཁྱེན་པ་ཉིད་ཀྱིས་བཞེད། །ཅེས་གསུངས་པས་དད་པ་མོས་གུས་དྲག་པོས་གུ་རུ་རིན་པོ་ཆེ་དེ་ཉིད་སངས་རྒྱས་ཆོས་དགེ་འདུན་ཏེ་དཀོན་མཆོག་ཀུན་འདུས། བླ་མ་ཡི་དམ་མཁའ་འགྲོ་སྟེ་རྩ་གསུམ་ཀུན་འདུས། ཆོས་སྐུ་ལོངས་སྐུ་སྤྲུལ་སྐུ་སྟེ་སྐུ་གསུམ་ཀུན་འདུས་ཏེ་སྐྱབས་གནས་དགུའི་བདག་ཉིད་དུ་མོས་པ་དང་། གཞན་ཡང་གནས་ཉི་ཤུ་རྩ་བཞི། ཡུལ་སུམ་ཅུ་སོ་གཉིས། དུར་ཁྲོད་ཆེན་པོའི་གནས་བརྒྱད། ཧེ་རུ་ཀའི་གནས་བཅུ་སོགས་ན་བཞུགས་པའི་དཔའ་བོ་མཁའ་འགྲོ་རྣམས་འདུས་པའི་ངོ་བོར་བསམ་པ་དང་། མདོར་ན། ཆོས་སྐུ་རྡོ་རྗེ་འཆང་ནས། རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་དེ་བརྒྱུད་པ་དེ་དག་ནས་རང་གི་རྩ་བའི་བླ་མའི་བར་དང་། རང་ལ་ཡི་གེ་སློབ་པའི་སློབ་དཔོན་ཡན་ཆད། གཞན་དམ་ཚིག་གཅིག་པའི་རྡོ་རྗེའི་མཆེད་གྲོགས་ཚངས་པ་མཚུངས་པར་སྤྱོད་པ་རྣམས་དང་། ཐ་ན་གོས་དམར་སེར་ཙམ་འཛིན་པ་དང་། རང་ལ་ཕན་བཏགས་པའི་ཕ་མ་དགྲ་གདོན་སོགས་དང་སེམས་མེད་ས་རྡོའི་རྣམ་པ་ཡན་ཆད་འདུས་པར་བསམ་པ་ཀུན་འདུས་ནོར་བུའི་ལུགས་སུ་བསྒོམ་ཞིང་། དེ་ཡང་ཇི་སྐད་དུ། གཞན་ཡང་སྐྱབས་གྱུར་རེ་ས་རྣམས༔ཨོ་རྒྱན་བདག་ལ་རྫོགས་པར་སོམས༔ཞེས་དང་། ཨོ་རྒྱན་པདྨ་ང་ཉིད་ལ༔མོས་གུས་གདུང་ཤུགས་དྲག་པོ་ཡིས༔གསོལ་བ་དྲག་ཏུ་བཏབ་པའི་ཚེ༔ང་ཉིད་དེ་ཡི་དྲུང་དུ་བྱོན༔ཞེས་དང་། ལྷ་སྐུ་འབུམ་ཕྲག་སྒོམ་པ་བས༔བླ་མའི་སྐུ་གཅིག་སྒོམ་པ་མཆོག༔ཞེས་དང་། ང་བསྒྲུབ་སངས་རྒྱས་ཐམས་ཅད་འགྲུབ༔ང་མཐོང་སངས་རྒྱས་ཐམས་ཅད་མཐོང༔ང་ནི་བདེ་གཤེགས་འདུས་པ་ཡིན༔མོས་གུས་ཅན་གྱི་དྲུང་དུ་ན༔ང་ཉིད་འདུ་འབྲལ་མེད་པར་གནས༔ཞེས་དང་། ཇི་སྐད་དུ། ཨོ་རྒྱན་ང་ཉིད་རྔ་ཡབ་དཔལ་རི་ནས༔གཅེས་པའི་བུ་ངུ་མ་ཡིས་མི་བཟོད་ལྟར༔བྱིན་གྱིས་རློབ་བྱོན་དམ་ཚིག་ན་ར་ཀན༔ཞེས་དང་། བོད་ཀྱི་རྒྱལ་བློན་བུ་སློབ་ལ༔བྱུང་ངོ་ཟླ་བའི་ཚེས་བཅུ་ལ༔ང་ཉིད་བྱོན་པའི་དབུ་བསྙུང་མཛད༔པདྨ་འབྱུང་གནས་གཞན་མི་བསླུ༔ཞེས་སོགས་རྡོ་རྗེའི་ཞལ་བཞེས་བསླུ་མེད་མང་པོས་མོས་གུས་ཅན་གྱི་དྲུང་དུ་བྱོན་པ་དབུ་བསྙུང་མཛད་པ་ཡིན་པས། དད་པ་ཅན་ལ་བྱིན་རླབས་འཇུག་པའི་རྟགས་སུ་དེའི་དུས་སུ་དུས་གསུམ་ཡིད་གྱི་འཁྲུལ་རྟོག་དང་བདེ་གསལ་མི་རྟོག་སོགས་ཉམས་ཞེན་རང་འགགས་སུ་འགྲོ་བའོ། །བླ་མ་རྒྱང་འབོད་ལན་གསུམ་གྱི་བླ་མ་མཁྱེན་དང་པོར་འཁོར་བ་ཞེན་ལོག་གི་ངེས་འབྱུང་རྒྱུད་ལ་སྐྱེ་བའི་ཆེད་དུ་འཁོར་བ་འདི་སྡུག་བསྔལ་གྱི་རང་བཞིན་དུ་ཤེས་ནས་དེ་ལས་ཐར་འདོད་ཞེན་ལོག་གི་སྣ་དྲངས་ནས་རང་གཞན་སེམས་ཅན་ཐམས་ཅད་དེ་ལས་ངེས་པར་འབྱུང་བ་ཞིག་ཁྱེད་མཁྱེན་སྙམ་པས་སོ་ཐར་ལམ་གྱི་རྩ་བ་ངེས་འབྱུང་དང་འབྲེལ། བླ་མ་མཁྱེན་གཉིས་པའི་དུས། གཞན་ཕན་དོན་གཉེར་གྱི་བྱང་ཆུབ་སེམས་རྒྱུད་ལ་སྐྱེ་བའི་ཆེད་དུ་སྡུག་བསྔལ་བའི་སེམས་ཅན་རྣམས་ལ་སྙིང་རྗེ་བྱང་ཆུབ་སེམས་ཀྱིས་སྣ་དྲངས་ནས་སེམས་ཅན་ཐམས་ཅད་སྡུག་བསྔལ་དེ་ལས་ཐར་ཏེ་སངས་རྒྱས་ཐོབ་པ་ཞིག་ཁྱེད་མཁྱེན་སྙམ་པས་བྱང་སེམས་ལམ་གྱི་རྩ་བ་དང་འབྲེལ། བླ་མ་དཀོན་མཆོག་གསུམ་པོ་ཁྱེད་མཁྱེན་ནོ། །ཞེས་གསུམ་པའི་དུས་སུ་སྣང་སྲིད་དག་མཉམ་གྱི་ལྟ་བ་རྟོགས་པའི་ཆེད་དུ་འཁོར་བའི་སེམས་ཅན་ཐམས་ཅད་གནས་ཚུལ་སྐུ་དང་ཡེ་ཤེས་ལྷ་སྔགས་ཆོས་ཉིད་ཀྱི་རང་བཞིན་ཡིན་པ་དེ་ཉིད་སྣང་ཚུལ་དེ་ལྟར་མ་རྟོགས་པ་རྣམས་གློ་བུར་གྱི་དྲི་མ་ཐམས་ཅད་དང་བྲལ་ནས་གནས་ཚུལ་སྐུ་དང་ཡེ་ཤེས་མངོན་དུ་གྱུར་པ་ཞིག་ཁྱེད་མཁྱེན་སྙམ་པས་གསང་སྔགས་ལམ་གྱི་རྩ་བ་དང་འབྲེལ། དེ་ནི་སྔགས་ཀྱི་སྣང་སྲིད་རྣམ་དག་གི་དག་སྣང་ཡང་ཡིན་ལ་སེམས་བསྐྱེད་ཀྱང་ཡིན་ནོ། །དེ་ནས་བློ་ལྡོག་རྣམ་བཞིའི་གནད་བསྡུས་ནི། དལ་འབྱོར་རྙེད་དཀའ་ཐོབ་པ་ད་རེས་ཙམ། །གསུངས་པས་དལ་བརྒྱད་འབྱོར་བཅུ་རང་ལ་ཚང་ངམ་མི་ཚང་ལེགས་པར་བརྟགས་ཏེ་མ་ཚང་ན་དེ་ཚང་པའི་ཐབས་ལ་འབད། ཚང་ན་དེ་ལྟ་བུའི་ལུས་རྟེན་ཕུན་སུམ་ཚོགས་པ་དེ། རྒྱུ་དཔེ་གྲངས་ཀྱི་སྒོ་ནས་རྙེད་པར་དཀའ་ཚུལ་ལ་བསམས་ཏེ། དལ་འབྱོར་ཆུད་ཟ་བ་ཚེ་འདིར་སྣང་གི་བྱ་བ་བསྒྲུབ་པ་ལས་བློ་ལྡོག་སྟེ། དལ་འབྱོར་ཆོས་ལ་བཀོལ་ཏེ་སྙིང་པོ་ལེན་འདོད། མི་རྟག་འཆི་བ་ནམ་འོང་ཆ་མ་མཆིས། །ཞེས་ཆོས་སང་བསྒྲུབ་གནང་བསྒྲུབ་སོགས་ཀྱི་རྟག་འཛིན་ལས་བློ་ལྡོག་ཏེ་ནམ་འཆི་ཆ་མེད་བསམ། འཁོར་བ་གང་དུ་སྐྱེས་ཀྱང་སྡུག་བསྔལ་རྒྱུ། །ཞེས་འཁོར་བ་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཡིན་པ་དེ་ལ་བདེ་བར་རློམ་པ་སྡིག་པ་མི་དགེ་བ་ལས་བློ་ལྡོག་སྟེེ་སྡུག་བསྔལ་གྱི་རང་བཞིན་ལ་ཞེན་ལོག་སྐྱོ་ཤས་ངེས་འབྱུང་བསྐྱེད། དགེ་སྡིག་ལས་འབྲས་བདེ་སྡུག་བསླུ་བ་མེད། །ཅེས་རྒྱུ་དགེ་སྡིག་ལས་འབྲས་བུ་བདེ་སྡུག་བསླུ་མེད་ཡིན་པ་ལ་ཐེ་ཚོམ་ཟ་བ་ལས་བློ་ལྡོག་སྟེ། ལས་འབྲས་ལ་ཡིད་ཆེས་བརྟན་པོ་བསྐྱེད། ཐར་ལམ་ཐོབ་པ་བླ་མས་ཐུགས་རྗེས་ཟུངས། །ཐར་པ་རྣམ་མཁྱེན་གྱི་གོ་འཕང་ལ་རང་གི་སྦྱོར་དངོས་རྗེས་གསུམ་ཚང་བའི་ཉམས་ལེན་ཡང་དག་པ་ཐོབ་པ་ཞིག་སྐྱབས་གནས་ཀུན་འདུས་ཀྱི་བླ་མ་ཁྱེད་མཁྱེན་ཁྱེད་ཀྱི་ཐུགས་རྗེས་ཟུངས། སྐྱབས་འགྲོ་སེམས་བསྐྱེད་ཀྱི་ངག་འདོན་ནི་སངས་རྒྱས་ཆོས་དང་ཚོགས་སོགས་ཤོ་ལོ་ཀ་ཚད་མེད་བཞི་དང་བཅས་བྱ། དམིགས་རིམ་ནི། རང་གི་སྤྱི་བོར་སྐྱབས་གནས་ཀུན་ཀྱིི་ངོ་བོ་གུ་རུ་རིན་པོ་ཆེ་གསལ་བཏབ་ལ། སྐྱབས་སུ་འགྲོ་བའི་གང་ཟག་ནི་རང་གཞན་ཐམས་ཅད་སྐྱབས་སུ་འགྲོ་བའོ། །དུས་ནི་རང་ཐུན་དུ་འདུག་པའི་དུས་འདི་ནས་བྱང་ཆུབ་སྙིང་པོའི་བར་དུ། སྐྱབས་སུ་འགྲོ་བའི་ཚུལ་ནི་སྐྱབས་གནས་ཀུན་འདུས་ཀྱི་ངོ་བོ་གུ་རུ་རིན་པོ་ཆེ་ལ་སྐྱབས་སུ་མཆིའོ་སྙམ་པས་མོས་གུས་གདུང་ཤུགས་དྲག་པོས་བློ་ཡག་ན་ཉེས་ན། ལས་མཐོ་རུ་གཏོང་ན་དམའ་རུ་གཏོང་ན་ཁྱེད་ལས་གཞན་པའི་སྐྱབས་གནས་རེ་ས་གཞན་མེད་པས་སྲོག་དམར་པོ་ལ་བབ་ཀྱང་ཁྱེད་མི་གཏོང་སྙམ་པའི་དམ་བཅའ་དང་ལྡན་པས་གསོལ་བ་སྙིང་ཁོང་རུས་པའི་གཏིང་ནས་སྐྱབས་སུ་འགྲོ་སྟེ། ཇི་སྐད་དུ། སྐྱིད་སྡུག་ལེགས་ཉེས་ལ་སོགས་པ༔ཤི་གསོན་ཚེ་འདི་ཕྱི་མ་སོགས༔གནས་སྐབས་མཐར་ཐུག་ཐམས་ཅད་དུ༔སྐྱིད་སྡུག་རེ་ལྟོས་ཁྱེད་ཤེས་པས༔བདག་ལ་རེ་ས་གཞན་ན་མེད༔ཨོ་རྒྱན་མཁྱེན་ནོ་སྙམ་པ་ཡི༔བློ་ཡིས་ཡང་ཡང་གཏད་པར་བྱ༔ཞེས་གསུངས། འདི་ལྟ་བུའི་རྒྱུའི་སྐྱབས་འགྲོས། བདེ་གཤེགས་སྙིང་པོའི་སྟེང་ན་སྐུ་གསུམ་འདུ་འབྲལ་མེད་པའི་ཡོན་ཏན་རང་ཆས་སུ་ཡོད་པ་སད་པ་འབྲས་བུའི་སྐྱབས་འགྲོའོ། །སེམས་བསྐྱེད་ཀྱི་དམིགས་རིམ་ནི་ཟུར་དང་པོ་སྙིང་རྗེས་གཞན་དོན་ལ་དམིགས་པ་སེམས་ཅན་ཐམས་ཅད་གྱི་དོན་དུ། ཟུར་ཕྱི་མ་ཤེས་རབ་ཀྱིས་རྫོགས་བྱང་ལ་དམིགས་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ་སྙམ་པའི་དམ་བཅའ་དང་ལྡན་པས་སྨོན་པ་བྱང་ཆུབ་མཆོག་ཏུ་སེམས་བསྐྱེད། སངས་རྒྱས་ཀྱི་གོ་འཕང་དེ་ཡང་རྒྱུ་མེད་ལས་མི་སྐྱེ་བས་དེའི་ཆེད་དུ་ལམ་ཟབ་མོའི་རིམ་པ་བསྒོམ་པར་བྱའོ་སྙམ་དུ་དམ་བཅའ་དངོས་སུ་འཇུག་པ་འཇུག་པ་སེམས་བསྐྱེད་དེ་སྨོན་འཇུག་སེམས་བསྐྱེད་སྒོམ། འདི་ལྟ་བུའི་ཀུན་རྫོབ་བྱང་ཆུབ་སེམས་ལ་བརྟེན་ནས་དབྱིངས་ཡེ་ཟུང་འཇུག་དོན་དམ་སེམས་བསྐྱེད་མངོན་དུ་གྱུར་དགོས་པའོ། །དེ་ཡན་ཆད་གྱིས་སྦྱོར་བ་སྐྱབས་འགྲོ་སེམས་བསྐྱེད་དང་ལྡན་པས་དངོས་གཞི་ཐུགས་ཡིད་དབྱེར་མེད་བསྲེ་བ་སོགས་བླ་མ་རིན་པོ་ཆེའི་མན་ངག་ལྟར་བསྐྱངས་ཏེ་མཉམ་བཞག་ལས་ལྡང་མ་ཐག །འཛིན་པ་བྱུང་ན་ལྟ་བ་མིན། །གསུངས་པས་རྗེས་བསྔོ་སྨོན་གྱིས་ཟིན་དགོས་པས། བསྔོ་སྨོན་གྱི་དམིགས་རིམ་ནི། བསྔོ་བའི་དཔང་པོར་མདུན་གྱི་ནམ་མཁར་མོས་གུས་གདུང་ཤུག་དྲག་པོས་སྐྱབས་གནས་ཀུན་འདུས་ཀྱི་ངོ་བོ་གུ་རུ་རིན་པོ་ཆེ་བཞུགས་པར་མོས་ལ་དེའི་མདུན་དུ་བདེ་སྡུག་གཏོང་ལེན་གྱི་དམིགས་པ་ནི། གུ་རུ་རིན་པོ་ཆེ་སོགས་ཀྱི་ཐུགས་རྗེའི་སྟོབས་དང་རང་གི་དཀར་པོ་དགེ་བའི་སྟོབས་ཀྱིས་རང་ལ་དགེ་བ་རྒྱུ་འབྲས་དང་བཅས་པ་བདེ་སྐྱིད་བདེ་བའི་དངོས་པོ་ཇི་སྙེད་ཅིག་ཡོད་པ་ཐམས་ཅད་འོད་དཀར་པོའི་རྣམ་པས་སེམས་ཅན་ཐམས་ཅད་ལ་ཕོག་མ་ཐག་སེམས་ཅན་རེ་རེ་ལ་ཆ་ཤས་ཕྲན་བུ་རེ་ཙམ་མིན་པར་བདེ་སྐྱིད་བདེ་བའི་དངོས་པོ་ཡོངས་རྫོགས་རེ་ཐོབ་པར་བསམ། སེམས་ཅན་དེ་དག་གི་མི་དགེ་བ་རྒྱུ་འབྲས་དང་བཅས་པ་རླུང་ནག་པོའི་རྣམ་པས་རང་གི་སྙིང་གར་བདག་འཛིན་གྱི་རྣམ་པ་ཐིག་ལེ་དུད་ཁ་ཡོད་པ་དེ་ལ་ཕོག་པས་བདག་འཛིན་དེ་ན་བུན་རླུང་གིས་གཏོར་བ་ལྟར་དང་སེ་ལུང་ལྕགས་ཀྱི་རྒྱ་མདུད་འཐོར་བ་ལྟར་གཏོར་ནས་ཆོས་ཀྱི་དབྱིངས་སུ་དེངས་བར་བསམ་པ་དང་། སེམས་ཅན་ཐམས་ཅད་བདེ་བ་དང་ལྡན་ཏེ་སངས་རྒྱས་པར་བསམ་པའི་ངང་དུ་དར་ཅིག་མཉམ་པར་བཞག །དེ་ནས་སྐྱབས་ཀུན་འདུས་པའི་ངོ་བོ་གུ་རུ་རིན་པོ་ཆེ་ལ། བསྔོ་བའི་ཐོག་མར་སྙན་གསན་དབབ་ཏེ་བསྔོ་རྒྱུའི་དགེ་རྩ་རང་གི་སྦྱོར་དངོས་རྗེས་གསུམ་ཚང་བའི་དགེ་བ་དང་རང་གཞན་གྱི་དུས་གསུམ་བསགས་ཡོད་གྱི་དགེ་བ་ལ་རྗེས་སུ་ཡི་རང་ཞིང་དགའ་བ་སྒོམ་བཞིན་པས་དགེ་རྩ་རྣམས་གཅིག་ཏུ་བསྡུས་ཏེ་ཕུད་གུ་རུ་རིན་པོ་ཆེ་སོགས་ལ་མཆོད་པ་དཔག་ཏུ་མེད་པ་འབུལ། བསྔོ་ཡུལ་ནམ་མཁའ་དང་མཉམ་པའི་སེམས་ཅན་ཐམས་ཅད་ལ། བསྔོ་བའི་དོན་པོ་སེམས་ཅན་ཐམས་ཅད་སངས་རྒྱས་ཐོབ་པའི་ཆེད་དུ། བསྔོ་བའི་ཚུལ་གུ་རུ་རིན་པོ་ཆེ་སོགས་ཀྱིས་ཇི་ལྟར་བསྔོས་པ་བཞིན་བདག་གིས་ཀྱང་བསྔོ་བར་བགྱིའོ་སྙམ་པས་འཁོར་གསུམ་དམིགས་མེད་ཀྱི་བསྔོ་བ་རྗེས་མཐུན་པ་བྱའོ། །སྨོན་ལམ་ནི། དེ་ལྟར་བསྔོས་པ་བཞིན་དུ། གུ་རུ་རིན་པོ་ཆེ་སོགས་ཀྱི་ཐུགས་རྗེས་སྟོབས་ཀྱིས་འགྲུབ་པར་གྱུར་ཅིགའགྲུབ་པར་གྱུར་པའི་མཐུན་གྱུར་གུ་རུ་རིན་པོ་ཆེ་སོགས་ཀྱིས་མཛད་པའི་སྨོན་ལམ་ཅི་རིགས་པ་བརྗོད་དོ། །དེ་ལྟར་སྦྱོར་དངོས་རྗེས་གསུམ་ཚང་བའི་དགེ་རྩ་ཁོང་ཁྲོས་མི་འཇིགལོག་ལྟས་མི་གཅོད་ཞེས་དཔལ་སྤྲུལ་སོགས་དམ་པ་དུ་མས་འཆད་དོ། །དེ་ལྟ་བུར་དང་པོ་གུ་རུ་རིན་པོ་ཆེ་སྤྱི་བོར་བསྒོམས་ཏེ་སྐྱབས་འགྲོ་སེམས་བསྐྱེད་བྱ། བར་དུ་སྙིང་དབུས་སུ་བསྒོམས་ཏེ་ཐུགས་ཡིད་དབྱེར་མེད་བསྲེ། མཐར་མདུན་གྱི་ནམ་མཁར་བསྒོམས་ཏེ་བསྔོ་བ་དང་སྨོན་ལམ་བྱས་ཏེ། སྦྱོར་དངོས་རྗེས་གསུམ་ཚང་བའི་སྒོ་ནས་ཉམས་ལེན་ཚེ་གཅིག་ལ་ནུས་ན། རབ་ཚེ་འདིར་གྲོལ་བ་དང་། མིན་ཀྱང་འཆི་ཁ་བར་དོར་གྲོལ་ནུས་ལ། དེར་གྲོལ་མ་ནུས་ན་བར་དོའི་གནས་སྐབས་སུ་གུ་རུ་རིན་པོ་ཆེ་དངོས་སུ་བྱོན་ནས་གདམས་ངག་མི་སྟོན་མི་སྲིད། བསྟན་ནས་མི་གྲོལ་མི་སྲིད་གསུངས་སོ། །ཀུན་མཁྱེན་འཇིགས་མེད་གླིང་པས་བློ་བླ་མར་གཏོད་པ་སྐྱབས་འགྲོ་ཡི་མཐར་ཐུག་གསུངས་པ་དེ་དེ་ཡིན་ནོ། །དགེའོ། །བཀྲ་ཤིས། ། ༄༅། །སྦྱོར་དངོས་རྗེས་གསུམ་གྱི་རྣམ་བཞག་ཞེ་ཆེན་རྒྱལ་ཚབ་ཀྱི་གསུང་ལས་བཏུས་པ། སྐྱབས་སུ་འགྲོ་བ་ནི། གང་ལ་སྐྱབས་སུ་འགྲོ་ན་བླ་མ་མཆོག་གསུམ་དཀྱིལ་འཁོར་གྱི་ལྷ་ཚོགས། གང་སྐྱབས་སུ་འགྲོ་ན་རང་གཞན་སེམས་ཅན་ཐམས་ཅད། རྒྱུ་ཅི་ཡི་ཕྱིར་འགྲོ་ན་སྐྱབས་གནས་ཀྱི་ཡོན་ཏན་ཤེས་པས། སྤྱིར་འཁོར་བའི་སྡུག་བསྔལ། དགོས་རང་དོན་ཡིད་བྱེད། ཡང་སྒོས་ཐ་མལ་འཁྲུལ་འཛིན་གྱི་ཞེན་རྟོག་ལས་སྐྱོབ་པའི་ཕྱིར། ཚུལ་ཇི་ལྟར་ན་ཀུན་རྫོབ་ཏུ་སྟོན་པ་ལམ་གྲོགས་ཀྱི་ཚུལ་ཏུ་ཁས་ལེན་པ་དང་། དོན་དམ་པར་རང་སེམས་དང་གཉིས་སུ་མེད་པར་ཤེས་པས། དུས་ཇི་སྲིད་བྱང་ཆུབ་ཀྱི་བར་ཏེ་སྐྱབས་ཡུལ་རང་རྒྱུད་ལ་ནམ་གྲུབ་པའི་བར་རོ། །སེམས་བསྐྱེད་ནི། ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ། ཐོབ་བྱ་བླ་མེད་ཀྱི་འབྲས་བུ་ཉིད་ཐོབ་པར་འདོད་པས་འབྲས་བུ་ལ་དམ་བཅའ་བ་སྨོན་པ་དང་། རྒྱུ་ལ་དམ་བཅའ་བ་འཇུག་པ་སེམས་བསྐྱེད། དེ་ཀུན་རྫོབ་བརྡ་ལས་བྱུང་དང་། དོན་དམ་ཆོས་ཉིད་སྒོམ་སྟོབས་ལས་ཤར་བ་བདག་དང་སེམས་ཅན་ཐམས་ཅད་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་ཡིན་པ་ལ་ཡིན་པར་ཤེས་པའི་ངེས་ཤེས་ཀྱིས་གསལ་བཏབ་སྟེ། དེ་ཡི་ངང་དུ་བསལ་བཞག་དང་བྲལ་བར་སྒོམ་པ་དོན་དམ་སེམས་བསྐྱེད་དེ་མདོར་ན་སྟོང་ཉིད་སྙིང་རྗེའི་སྙིང་པོ་ཅན་གྱི་བྱང་ཆུབ་ཀྱི་སེམས་སོ། །མཐར་དབང་བཞི་ལེན་པའི་དམིགས་པ་དང་བཅས་འོད་དུ་ཞུ་ནས་རང་ལ་ཐིམ་པས་བླ་མ་དང་རང་སེམས་དབྱེར་མེད་པའི་གནས་ལུགས་གཤིས་བདེ་བ་ཆེན་པོ་གསལ་སྟོང་བརྗོད་བྲལ་རྣམ་པར་མི་རྟོག་པའི་ངང་དུ་ཅི་གནས་སུ་མཉམ་པར་འཇོག་པ་ནི་དོན་དམ་བླ་མའི་རྣལ་འབྱོར་རོ། །རྗེས་ལ་བསྔོ་བ་ནི། གང་བསྔོ་རྒྱུའི་དགེ་བ་དེ་ལྟར་བསྐྱེད་རྫོགས་ཀྱི་ལམ་རིམ་པ་གཉིས་ལ་སྦྱོར་དངོས་རྗེས་གསུམ་ཚང་བའི་སྒོ་ནས་ཚུལ་བཞིན་དུ་སློབ་པར་བྱས་པ་དེ་ཉིད་ཀྱིས་མཚོན་རྟེན་དུ་བྱས་ཏེ་དུས་གསུམ་བྱས་ཡོད་ཀྱི་རྣམ་དཀར་མཐའ་དགགང་དུ་བསྔོ་ན་གཉིས་ལ་མི་གནས་པ་ཡང་དག་པར་རྫོགས་པའི་བྱང་ཆུབ་སྐུ་བཞི་ཡེ་ཤེས་ལྔ་ཡི་བདག་ཉིད་ཁྱབ་བདག་རིགས་དྲུག་པ་རྡོ་རྗེ་འཆང་གི་སར། སུའི་ཆེད་དུ་བསྔོ་ན་ནམ་མཁའི་མཐའ་དང་མཉམ་པའི་སེམས་ཅན་བླ་མེད་ཡེ་ཤེས་ཀྱི་འབྲས་བུ་ཐོབ་པར་བྱ་བའི་ཕྱིར། ཚུལ་ལམ་རྣམ་པ་ཇི་ལྟ་བུས་བསྔོ་ན། དོན་དམ་པར་ཆོས་ཐམས་ཅད་རང་བཞིན་གཉིས་སུ་མེད་པས་བསྔོ་བྱ་བསྔོ་བྱེད་སོགས་ཀྱི་སྤྲོས་པ་མ་དམིགས་ཀྱང་། ཀུན་རྫོབ་ཐ་སྙད་ཙམ་དུ་གང་གིས་བྱེད་པ་པོ་དང་གང་ལ་བྱ་བའི་ཡུལ་དང་། ཇི་ལྟར་བྱ་བའི་དགེ་བ་ཐམས་ཅད་རྨི་ལམ་སྒྱུ་མ་ལྟ་བུར་སྣང་ལ་རང་བཞིན་མེད་པའི་ཚུལ་གྱིས་ཇི་ལྟར་དུས་གསུམ་དུ་གཤེགས་པའི་རྒྱལ་བ་སྲས་དང་བཅས་པས་དགེ་རྩ་བླ་ན་མེད་པའི་བྱང་ཆུབ་ཏུ་ཇི་ལྟར་བསྔོ་བར་མཛད་པ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ་སྙམ་དུ་འདུན་པ་རྩེ་གཅིག་པས་བསྔོ་བའི་ཚིག་བརྗོད། དེ་ལྟར་བསྔོས་པའི་དགོས་པའམ་ཕན་ཡོན་ནི་བསྒྲུབ་པ་མི་ཟད་པ་སྟེ། བློ་གྲོས་རྒྱ་མཚོས་ཞུས་པའི་མདོ་ལས་གསུངས་པ་བཞིན་ནོ། །ཞེ་ཆེན་རྒྱལ་ཚབ་རིན་པོ་ཆེའི་གསུང་ལས་བསྡུས་པའོ། ། ༄༅། །བླ་མའི་ཞལ་མཚར་གྱི་གསུང་འགའ་ཞིག །བླ་མ་གཡུ་ཁོག་པའི་ཞལ་མཚར་གྱི་གསུང་འགའ་ཞིག་ནི། གཞན་དག་གིས་སྣང་བའི་དངོས་པོ་རང་ངོས་ནས་མི་སྟོང་ཀྱང་། འདི་བདེན་པར་གྲུབ་པས་སྟོང་པར་འདོད་པ་མི་འཐད་གསུངས་ཀྱང་། དེ་བུ་སྣང་བས་མི་འཆིང་ཞེན་པས་འཆིང་། །ཞེན་པ་ཆོད་ཅིག་ན་རོ་པ། །ཞེས་གསུངས་པ་དེ་བདེན་ཞེན་ནམ་གཉིས་འཛིན་ཡིན་པས། དེ་འཁོར་བར་འཆིང་བྱེད་དུ་གསུངས་པས། སྣང་བ་འཆིང་བྱེད་མ་གསུངས་ཏེ། གང་སྣང་བའི་དངོས་པོ་དེ་དགག་སྒྲུབ་གཉིས་ཀ་མི་དགོས་པར། དོན་བྱེད་ནུས་པ་ནི་དངོས་པོའི་མཚན་ཉིད་ཡིན་ལ། དེ་བཞིན་དུ། ཇི་ལྟར་མཐོང་ཐོས་ཤེས་པ་དག །འདི་ནི་དགག་པར་བྱ་མིན་ཏེ། །བདེན་པར་རྟོག་པ་དགག་བྱ་ཡིན། །ཞེས་གསུངས་པས། བདེན་འཛིན་འཁོར་བའི་རྩ་བ་ཡིན་པས་དགག་བྱར་ངོས་བཟུང་བ་ལ། ཡེ་མི་འཐད་དོ་སྙམ་ཀྱང་། མདའ་འཕངས་སའི་ལན་ཡིན་གྱི་བདག་ལ་ཁུར་ཐང་ཆེར་མེད་དོ། །སྣང་བའི་དངོས་པོ་འདི་རང་གི་ངོ་བོས་སྟོང་པར་རྒྱ་སྡེ་བ་སློབ་ཚོགས་དང་བཅས་པ་ཞེས་གསུངས་གནང་ཡང་། སྤྱིར་རྒྱ་སྡེ་བ་ཁོ་ན་མ་ཡིན་དེ། ངེས་པ་དོན་གྱི་མདོ་དང་། དེའི་དགོངས་པ་འགྲེལ་བའི་ཀླུ་སྒྲུབ་ཡབ་སྲས་ལ་སོགས་པའི་རྒྱ་གར་མཁས་པའི་ལེགས་བཤད་ཐམས་ཅད་ན་གསལ་བཞིན་པ་ལ། སྒྲོན་མེ་བཟུང་ནས་ཉི་མ་བཙལ་མི་དགོས་པ་ཡིན་ནོ། །འོན་ཀྱང་སྤྱིར་སྣང་བའི་ཆོས་འདི་ཐམས་ཅད་སྟོང་པར་འདོད་དམ་མི་འདོད། སྟོང་པར་མི་འདོད་ན། ཞུས་པས་དབེན་ལ། སྟོང་པར་ཞལ་གྱིས་བཞེས་ན། ཡེ་སྟོང་ཡིན་ནམ་གསར་སྟོང་གང་ཡིན་ལ། ཕྱག་རྫོགས་ཀྱི་ཆོས་སྐད་འདྲ་འདྲེ་ཞིག་གསུངས་འདུག་པས། ཡེ་སྟོང་ཡིན་པར་དགོངས་ན་རང་གི་ངོ་བོས་སྟོང་པ། གཞན་གྱི་ངོ་བོས་སྟོང་པ། གཉིས་ཀའི་དངོས་པོ་སྟོང་པ། གཉིས་མིན་གྱི་ངོ་བོས་སྟོང་གང་ཁས་ལེན་ལགས། དང་པོ་ལྟར་འདོད་ན་ཡེ་མི་མཐུན་པ་མེད་དོ། །ཇི་སྐད་དུ། སྟོང་པ་བདེེ་བར་གཤེགས་པའི་སྙིང་པོ་ལ། །ངེས་དོན་མདོ་སྡེ་དག་གིས་ཤེས་པར་བྱ། །ཞེས་དང་། གདོད་ནས་སྐྱེ་མེད་རང་བཞིན་འདི། །བློ་ཡི་གཏིང་ནས་རྟོགས་གྱུར་ན། །སོགས་དང་། རང་རང་ངོ་བོས་སྟོང་པའི་ཕྱིར། །སྟོང་པ་ཉིད་ནི་ཉི་ཤུའོ། །ཞེས་དང་། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཞིག་བདག་གིས་རྙེད། །ཅེས་སོགས་དང་། ཡོད་པས་སྲིད་པ་འདི་ལ་མིན། །མེད་པས་རྣལ་འབྱོར་མི་གྲོལ་དེ། །དངོས་དང་དངོས་མེད་སོགས་ཤེས་ན། །བདག་ཉིད་ཆེན་པོ་རྣམ་པར་གྲོལ། །ཞེས་སོགས་ལུང་རིགས་མང་དུ་ཡོད་ཀྱང་། ཞུ་མི་དགོས་པ་རེད། ཁྱེད་ཀྱིས་བླ་མ་མི་ཕམ་གྱིས་ཀ་གསུངས་ན་ཁྱེད་གྱིས་ཀྱང་ཀ། མི་ཕམ་གྱིས་ཁ་གསུང་ན་ཁྱེད་ཀྱིས་ཀྱང་ཁ་གསུངས་པ་ལད་མོ་ཙམ་གྱིས་མི་ཡོང་གི། སྣང་སྟོང་ཟུང་འཇུག་ཐུགས་ལ་མེད་ན། གཞན་ལ་ཁ་བཙག་པ་ནི། རང་གི་ནང་ཆ་ཕྱིར་ངོམ་པས་མི་རིགས་ལ། འབེལ་གཏམ་ཙམ་བྱ་ན་རོགས་གི་དྲི་རྩོད་ལྟ་གྲུབ་རྒྱ་བོད་ཀྱི་ལེགས་བཤད་མཐའ་དག་ལ། གོ་མྱོང་རྟོགས་གསུམ་གང་རུང་ལ་ངེས་པ་རྙེད་པ་མེད་ན་ལུང་རིགས་ཀྱི་ར་བར་ཚུད་ཚེ་ཕྱིར་འབྱོན་དབང་དཀའ་འོ། །དེ་ཡང་སྣང་བ་བཞིན་སྟོང་པ། སྟོང་པ་བཞིན་སྣང་བ་ནི། ནང་པ་སངས་རྒྱས་པའི་མདོ་སྔགས་ཀྱི་གཞུང་ཐམས་ཅད་ཀྱི་ཁྱད་ཆོས་སུ་གསུངས་ཏེ། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་དང་། སྟོང་དང་མི་སྟོང་ལ་སོགས་བཞི། །ཞི་བ་འདི་ལ་ག་ལ་ཡོད། །ཅེས་དང་། སྟོང་ངོ་ཞེས་ཀྱང་མི་བརྗོད་དེ། །མི་སྟོང་ཞེས་ཀྱང་ག་ལ་ཡོད། །གཞན་ལས་ཤེས་མིན་ཞི་བ་སྟེ། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མེད། །དེ་ནི་དེ་ཡི་མཚན་ཉིད་དོ། །ཞེས་སོགས་ནི་སྤྲོས་བྲལ་རབ་ཏུ་མི་གནས་པའི་དབུ་མའི་ལྟ་བ་ཡིན་པས། ཡུལ་ཅན་བློ་དོན་མཐུན་པའོ། །གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་སྟོང་པ་ཉིད་གཞན་མ་ཡིན་ནོ་ཞེས་སོགས་སྟོང་ཉིད་བཞི་སྦྱོར་ཀྱི་རིགས་པས། སྟོང་ཉིད་རྟེན་འབྱུང་། ཆོས་དང་ཆོས་ཅན། སྣང་བ་སྟོང་པ། ཀུན་རྫོབ་དང་དོན་དམ་སོགས་ནི། ས་ཐོབ་འཕགས་པའི་མཉམ་རྗེས་གང་གི་སྐབས་སུ་བཞག་ཀྱང་། སུས་ཀྱང་དགག་པའི་གནས་མེད་དོ། །སྣང་བའི་དངོས་པོ་གཅིག་གཞིར་བཞག་ནས། དེ་ལ་སྟོང་པའི་ངོ་བོ་ཞིག་འཇུག་པ་ནི། སྣང་སྟོང་ཟུང་འཇུག་མི་ཟེར་རོ། །ཆུ་ལ་འོ་མ་འཇུག་པ་ལྟ་བུའོ། །ལར་སྣང་སྟོང་ཟུང་འཇུག་གི་ཆོས་འབྱུང་བ། དབུ་མ་རང་རྒྱུད་པ་ཤས་ཆེ་བས་དེ་ཡི་གྲུབ་མཐས་གོང་མ་རྣམ་དག་འགེབ་པ་ནི་མཚར་ཆེ་ཧ་ཧ། དམ་པ་ཁྱེད་ཀྱི་ཞལ་གསུང་བདུད་རྩིའི་བཅུད། །རྟོག་གེ་བདག་གི་མགྲིན་པའི་ཁོང་དུ་མིད། །གཉིས་སྣང་འཁྲུལ་བའི་གཅོང་ནད་སེལ་ནུས་པའི། །བྱིན་རླབས་དངོས་གྲུབ་སྩོལ་ཤོག་དྲིན་ཆེན་རྗེ། །བོད་འདིར་རང་འདོད་བཞག་པའི་གྲུབ་མཐའ་མང་། །དེ་ཡི་རྗེས་འཇུག་ཐམས་ཅད་དེ་བཞིན་མཛོད། །ཆོས་ཁུངས་རྒྱ་གར་གཞུང་ལ་གཏུག་པ་ལ། །དགག་པའི་གོ་སྐབས་ཡོད་ན་ལྷག་པར་གྱིས། །ཧོ་ཧོ། མཚར་མཚར་ཡིན། རྒྱ་རྒྱ་རྒྱ། མཚོ་སྤྲུལ་མཁན་པོ་ཐེག་མཆོག་བསྟན་འཛིན་གྱིས་གཡུ་ཁོག་བླ་མ་ལ་ཞལ་རྩེད་ཀྱི་ཚུལ་དུ་བསྐུར་ནི་ཞིག་རེད་ཡོད་ཁི། དབུ་མ་ཐལ་འགྱུར་བའི་ལྟ་བ་ཡང་དག་ཞིག་གོ་དགོས་ན་མཁན་པོའི་གསུང་འདི་ཡིས་གོ་ནུས་ངེས་ཅན་རེད་ལགས། ༄༅། །སྡིག་ཅན་རྣམས་ཚེ་འཕོས་ཚེ་ཇི་ལྟར་བྱེད་ཚུལ་མདོ་ལས་ཁོལ་དུ་ཕྱུང་བ། ཚེ་འཕོ་བ་ཇི་ལྟར་འགྱུར་བ་ཞུས་པའི་མདོ་ལས། ཡབ་རྒྱལ་པོས་གསོལ་བ། བཅོམ་ལྡན་འདས་སེམས་ཅན་གང་དག་གིས་མཚམས་མེད་པ་ལ་སོགས་པའི་ལས་མི་དགེ་བ་དག་བགྱིས་པས་དེའི་རྣམ་པར་སྨིན་པ་མི་བཟད་པ་མྱོང་བར་འགྱུར་བ་འདི་དག་གིས་ཇི་ལྟར་བགྱིས་ན་བདེ་བར་འགྱུར། བཀའ་སྩལ་པ། རྒྱལ་པོ་ཆེན་པོ་སེམས་ཅན་གང་དག་གིས་མཚམས་མེད་པ་ལ་སོགས་པའི་ལས་མི་དགེ་བ་བྱས་པ་དག་གིས་སྒྱུ་མེད་པའི་སེམས་དྭངས་བས་རྣམ་པར་སྨིན་པ་ལ་ཡིད་ཆེས་པར་བྱས་ཏེ། སེམས་ཐག་པ་ནས་བཤགས་ན་འབྱང་བར་འགྱུར་རོ། །འཆི་བའི་ཚེ་མི་དགེ་བ་སྔར་བྱས་པ་དག་ལ་འགྱོད་པ་བསྐྱེད་དེ་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ཞིང་སྐྱབས་གསོལ་ན་སྡིག་པ་འབྱང་བར་འགྱུར་རོ། །མཐོ་རིས་སུ་སྐྱེ་བར་འགྱུར་རོ། །ཚེ་ཕྱི་མ་མེད་པའི་འདུ་ཤེས་བསྐྱེད་པར་མི་བྱའོ། །ལས་འབྲས་རྣམ་བཞག་ལས་ཁོལ་དུ་ཕྱུང་བའོ། ། ༄༅། །ཤན་འབྱེད་སོགས་ལས་བཏུས་པ། རྫོགས་ཆེན་ལས་ནི་རིག་སྟོང་གཉུག་མ་རང་བྱུང་གི་ཡེ་ཤེས་ངོ་སྤྲད་པ་དེ་ཉིད་དོན་གྱི་ལྷན་སྐྱེས་ངོ་སྤྲད་པ་ཡིན། དེ་ལ་ངེས་ཤེས་སྐྱེས་པས་ཚོགས་ལམ་ཆེན་པོ་དང་སྐལ་བ་མཉམ། གོམས་པས་ཉམས་མྱོང་སྦྱོར་ལམ། རྟོགས་པ་མཐོང་ལམ། རྩལ་རྫོགས་སྒོམ་ལམ། སྒྲིབ་གཉིས་ཟད་པ་མཐར་ཕྱིན་ལམ་མོ། ༈ །མཚན་མེད་རྫོགས་པ་ཆེན་པོར་ནི། གཉིས་སྣང་གི་རྟོག་པ་རང་སར་མ་འགག་ཀྱང་། བླ་མའི་མན་ངག་དང་དབང་གི་དོན་བརྒྱུད་འཕོ་བའི་སྟོབས་ཀྱིས་སེམས་ཀྱི་ཆོས་ཉིད་ངོ་སྤྲད་དུ་ཡོད་པ་ནི་རྫོགས་པ་ཆེན་པོའི་ལམ་གྱི་ཁྱད་ཆོས་སོ། །སྣང་གསུམ་མཐའི་འོད་གསལ་ཉམས་སུ་མྱོང་བ་དང་། རྫོགས་ཆེན་རིག་ངོ་རྗེན་པར་རྟོགས་པ་གཉིས། འཇིག་རྟེན་ལས་འདས་པའི་ཤེས་རབ་ཀྱི་དབང་པོ་འམ་སོ་སོ་རང་རིག་པས་མངོན་སུམ་ཡིན་གྱི་རྗེས་དཔག་ལ་ལྟོས་པ་མིན་ནོ། །འོ་ན་ཆོས་ཉིད་ཀྱི་བདེན་པ་གཟིགས་པའི་འཕགས་ལམ་ས་དང་པོ་ཡིན་ནམ་ཞེ་ན་མ་ཡིན་ཏེ། སྤྲིན་བྲལ་ཉི་མཐོང་བཞིན་དུ་མངོན་སུམ་རྟོགས་ཀྱང་། རྣལ་འབྱོར་གོམས་པ་རྫོགས་ན་ཆོས་ཐམས་ཅད་དེ་ཁོ་ནའི་ངང་དུ་འུབ་ཆུབ་པར་མངོན་སུམ་རྟོགས་པའི་རྟོགས་པ་འཕོ་འགྱུར་མེད་པ་ཐོབ་ཚེ་ས་དང་པོའི་རྟོགས་པ་མངོན་གྱུར་ཡིན་ཏེ། དེའི་ཚེ་དོན་གྱི་འོད་གསལ་མངོན་དུ་བྱས་པ་ཡིན་གྱི། ད་ལྟ་སྔགས་མཚན་བཅས་ཀྱི་ལམ་གྱི་འོད་གསལ་ཤར་བ་དང་། མཚན་མེད་རྫོགས་ཆེན་གྱི་རིག་ངོ་འཕྲོད་པ་དེ་ལ་དཔེ་ཡི་ཡེ་ཤེས་ཞེས་བྱ་བ་ཡིན་ནོ། ༈ །མཚན་མོ་སྙིང་ནང་གི་ཨ་དཀར་པོ་ལ་སེམས་བཟུང་བས། གཉིད་ཀྱི་ཤེས་པ་ནང་དུ་སྡུད་ཚེ་སྣང་བ་གསུམ་གྱི་ཉམས་དང་། ནམ་མཁའ་དག་པ་ལྟ་བུའི་འོད་གསལ་ཆ་འདྲ་འཆར་བ་དང་། ནམ་མཁའ་སུམ་ཕྲུག་སོགས་གདམས་པ་སྣ་ཚོགས་ཀྱི་སྒོ་ནས་ཀྱང་། དྭངས་གསལ་ནམ་མཁའ་འདྲ་བའི་ཉམས་འཆར་ཏེ་དེ་ཀུན་འོད་གསལ་དང་ཆ་འདྲ་ཙམ་དུ་རུང་མོད་ཀྱི། རྟོགས་པ་དོན་གྱི་འོད་གསལ་དངོས་མ་ཡིན་ཏེ་ཉམས་ཡིན་ལ། ཉམས་ཞེས་པ་སེམས་ལ་གནས་ལུགས་འོད་གསལ་དེའི་རྣམ་པ་ཆ་འདྲ་ཤར་བ་སྟེ་དཔེ་ཡི་འོད་གསལ་ཡང་ཟེར་རོ། །ཡེ་ཤེས་ཀྱི་ངོ་བོ་ལ་ཉམས་ཞེས་མི་བྱ་སྟེ། དོན་གྱི་འོད་གསལ་ཞེས་བྱའོ། །དེས་ན་ཡིད་རང་མཚན་པས་བསྒོམ་བྱ་འོད་གསལ་ལམ་སྟོང་ཉིད་ཅེས་གཟུང་འཛིན་དུ་སྒོམ་པ་ཐམས་ཅད། རྣམ་པ་སྟོང་ཉིད་འོད་གསལ་གྱི་ཆ་འདྲ་ཤར་ཀྱང་རི་མོ་བྲིས་པའི་ཟླ་བ་ལྟ་བུ་ཡིན་ལ། རྫོགས་ཆེན་གྱི་སེམས་ཉིད་ངོ་སྤྲད་པའི་དོན་བཞིན་རང་སེམས་སྐྱེ་མེད་ཀྱི་གནས་ལུགས་ཐད་ཀར་བཟོ་བཅོས་དཔྱད་ར་མི་དགོས་པར་ཐག་ཆོད་ན། དཔེ་ཡི་ཡེ་ཤེས་དངོས་ཡིན་ལ། ཆུ་ནང་གི་ཟླ་གཟུགས་ལྟ་བུ་ཡིན་ཏེ། ཉི་ཟླའི་གཟུགས་བརྙན་ཆུ་ལ་ཤར་བ་ལ་ཉི་ཟླ་དངོས་ལ་ཡོད་པའི་རྣམ་པ་རྣམས་སྣང་བ་ཡིན་ནོ། །འདི་འདྲའི་སེམས་ཀྱི་གནས་ལུགས་ཕྱག་ཆེན་ནམ་རྫོགས་ཆེན་རྟོགས་པའི་སྒོམ་པ་པོ་རྣམས་ཀྱིས་འདི་རྗེས་དཔག་གིས་རྟོགས་པ་མ་ཡིན་ཏེ། རང་གིས་མངོན་སུམ་དུ་རྟོགས་པ་ཡིན་པས། སྐྱེས་བུ་དམ་པ་མང་པོས་ཀྱང་འདི་སྔགས་ཀྱི་མཐོང་ལམ་ཡིན་ཞེས་གསུངས། ཡོན་ཏན་བརྒྱ་ཕྲག་བཅུ་གཉིས་སོགས་མེད་པ་ནི་ལུས་རྒྱས་སྒྲིབ་པ་སོགས་སུ་འཆད། ཀློང་ཆེན་རབ་འབྱམས་ཀྱིས་སྔགས་ཀྱི་མཐོང་ལམ་དངོས་མིན་ཡང་ཆོས་ཉིད་དེ་བཞིན་ཉིད་དངོས་སུ་རྟོགས་པ་ཡིན། མཐོང་ལམ་ལ་ཡོན་ཏན་བརྒྱ་ཕྲག་བཅུ་གཉིས་སོགས་ཡོད་དགོས་པས། འདི་རང་རིག་མངོན་སུམ་ཡིན་ཡང་དཔེ་ཡི་ཡེ་ཤེས་སུ་བཞེད། དོན་གྱི་ཡེ་ཤེས་ཟླ་བ་དངོས་མཐོང་བ་ལྟ་བུ་མཐོང་ལམ་དུ་བཞེད་དོ། ༈ །མདོར་ན་རང་རིག་གཉུག་མའི་དོན་རང་སྣང་མ་འགག་པའི་དུས་སུ་རྟོགས་ཀྱང་རུང་། སྣང་གསུམ་མཐའི་འོད་གསལ་གྱི་དུས་སུ་རྟོགས་ཀྱང་རུང་སྟེ། རིག་སྟོང་རྗེན་པར་འཆར་ཏེ། དེ་སུས་ཤེས་ན་ཤེས་བྱེད་ཤེས་བྱ་ཐ་དད་དུ་མེད་དེ་རང་གསལ་དུ་འཆར་གྱི། རྟོགས་པར་བྱེད་པ་པོ་ཡིད་ཕྲ་བ་མ་ཡིན་ཏེ། ཤེས་རབ་རང་བྱུང་གིས་རང་གསལ་དུ་ཤེས་པ་ཡིན། སྣང་གསུམ་མཐའི་འོད་གསལ་ཉམས་སུ་མྱོང་བའི་རྗེས་སུ་ཡིད་རགས་པས་དེ་དྲན་པ་ནི། ཤེས་རབ་རང་བྱུང་ཤེས་པ་ཐམས་ཅད་ལ་ཁྱབ་པའི་ཆ་ནས་ཡིད་དང་ཐ་དད་དུ་འབྱེད་དུ་མེད་པ་དེས་ཤེས་པ་ཡིན། ཤེས་རབ་རང་བྱུང་གི་སྒྲོན་མ་ལ། རྫོགས་པ་ཆེན་པོ་སྒྲ་ཐལ་འགྱུར་གྱི་རྒྱུད་ལས་དབྱེ་བ་ལྔ་གསུངས་ཏེ། གཞི་གནས་རང་བྱུང་གི་ཤེས་རབ་ཀྱིས་ཆོས་ཐམས་ཅད་ཀྱི་རྟེན་བྱེད་ལ། སྣང་བ་ཅེར་འཛིན་གྱི་ཤེས་རབ་ཀྱིས་དབྱིངས་རིག་ཐད་ཀར་རྟོགས་པ། དྲན་པ་འགག་མེད་ཀྱི་ཤེས་རབ་ཀྱིས་མཉམ་བཞག་ཏུ་གསལ་དྭངས་འབྱེད་པ་ཡིན་ལ། འདི་རང་བྱུང་ཡེ་ཤེས་ལ་ལྡན་པ་དང་། ལྡན་ཆོས་སུ་ངོ་བོ་གཅིག་པར་བསྟན་པ་སྟེ། རང་གནས་ཀྱི་ཤེས་རབ་ཡིན་པས། ཡེ་ཤེས་ཀྱི་ཆ་ཡིན་ལ། རྟོག་དཔྱོད་དང་གཟུང་འཛིན་ཅན་སེམས་ཀྱིས་བསྡུས་པ་མིན་པར་ཀུན་མཁྱེན་ཆེན་པོས་གསུངས། ལྟ་བ་ཐོས་བསམ་གྱིས་གཏན་ལ་འབེབས་པ་ཡང་ཡིད་ཤེས་ཀྱི་ཆ་ལ་ཁྱབ་པའི་སོ་སོར་རྟོག་པའི་ཤེས་རབ་ཀྱིས་སྤྱི་དང་རང་གི་མཚན་ཉིད་ཤེས་པ་དང་། འཇུག་བྱེད་རྣམ་གསུམ་གྱི་ཤེས་རབ་ཀྱིས་ཐོས་བསམ་སྒོམ་པའི་མཚམས་བྱེད་པ་ཞེས་གསུངས་པའི་ཤེས་རབ་འདི་ལྟ་བུས་དོན་གྱི་འོད་གསལ་མངོན་དུ་བྱེད་པ་ཡིན་ཡང་། ཡིད་དང་ཆ་འདྲ་བ་ཡིད་ཤེས་ཀྱིས་ཆོས་ཉིད་ཀྱི་བདེན་པ་མཐོང་བར་གཞུང་སྤྱི་ལས་གསུངས། ༈ སྣང་གསུམ་གྱི་འོད་གསལ་ཤར་བའི་སྐབས་སུ། ཤར་རྒྱུ་ཆོས་ཉིད་གཉུག་མ་དེ་ཡིན། ཤར་ནས་ངོས་ཟིན་པ་པོ་ཚོགས་བརྒྱད་མེད་ན་སུ་ཡིན་སྙམ་ན། ཤེས་རབ་རང་བྱུང་ཡིན་ཏེ། གཟུང་འཛིན་གྱི་མཚན་མ་མེད་པའི་ཆོས་ཉིད་དེ་ལྟ་བུ་ཉམས་སུ་མྱོང་བའི་སྟོབས་ཀྱིས་རྗེས་ཐོབ་ཏུ་ཆོས་ཉིད་བསམ་མི་ཁྱབ་པའི་དོན་ལ་སྒྲོ་འདོགས་ཆོད་པ་ཡོད་པར་བསྙོན་དུ་མེད་ལ། དེ་དུས་ཀྱི་ཉམས་སུ་མྱོང་མཁན་གྱི་བློ་གཞན་དང་མྱོང་བྱ་འོད་གསལ་གཉིས་སུ་མེད་པར་རང་བཞིན་འོད་གསལ་མཐའ་དབུས་བྲལ་བའི་ཉམས་ཤར་བ་དེ། གཉུག་མའི་འོད་གསལ་གྱི་རང་གདངས་སུ་གྱུར་པའི་ཤེས་རབ་ཡིན་ལ། ཡིད་ཤེས་ཀྱི་འཁོར་གྱི་ཤེས་རབ་མ་ཡིན་ཏེ། ཡིད་མེད་ན་དེ་དང་མཚུངས་ལྡན་གྱི་སེམས་བྱུང་ཤེས་རབ་ག་ལ་ཡོད་དེ་མེད་དོ། །ཡིད་ཤེས་འཁོར་གྱི་སེམས་བྱུང་ཤེས་རབ་རྐྱེན་བཞི་ལས་ངེས་པར་སྐྱེ་དགོས་པས་འདུས་བྱས་ཡིན་གྱི་རང་བྱུང་ག་ལ་ཡིན། འདི་ལ་རྐྱེན་བཞི་མེད་དེ། དམིགས་གཏད་ཀྱི་མཚན་མའི་རྐྱེན་དང་། རང་གི་ཉེར་ལེན་དུ་གྱུར་པའི་དེ་མ་ཐག་རྐྱེན་དང་། སྐལ་མཉམ་སོགས་རྒྱུ་རྐྱེན་དང་བྱེད་རྒྱུ་བདག་རྐྱེན་བཞི་དཔྱད་དུ་མེད། ཡུལ་ཆོས་ཉིད་ལས་ཐ་དད་པའི་བློ་མེད་པས་དམིགས་རྐྱེན་མེད་ལ། དེ་མེད་པས་རྒྱུ་རྐྱེན་སོགས་མེད་དོ། །དེ་དག་ལ་ཡུལ་ཡུལ་ཅན་ཐ་དད་ཀྱི་མཚན་མ་ཅུང་ཟད་དམིགས་ན་དེ་ལྟར་ཡོད་རུང་ཡང་། དེར་དམིགས་པ་ཅུང་ཟད་མེད་པ་ལ་རྐྱེན་བཞིའི་ཐ་སྙད་མེད་དོ། །དེས་ན་གཞི་རང་བྱུང་གི་ཡེ་ཤེས་དང་གཉིས་སུ་མེད་ཀྱང་རྣམ་པའི་ཆ་ནས་གཞི་ཇི་བཞིན་པར་རང་འོད་དུ་གསལ་བ་ལ་མྱོང་བའི་ཐ་སྙད་བཏགས་ཀྱི་མྱང་བྱ་མྱོང་བྱེད་ཀྱི་རྫས་ཐ་དད་དུ་མེད་དོ། །འོ་ན་འོད་གསལ་རང་ལ་རང་གདངས་ཤེས་རབ་རང་བྱུང་ཡོད་ན། ལམ་ལ་མ་འབད་པའི་སོ་སྐྱེ་རྣམས་ཀྱིས་འབད་པ་མེད་པར་དེ་འདྲའི་ངོས་ནས་འོད་གསལ་ངོས་ཅིས་མི་ཟིན་སྙམ་ན། མི་ཟིན་ཏེ། གཞི་རང་བྱུང་གི་ཡེ་ཤེས་རང་གདངས་ཤེས་རབ་འཆར་རུང་གི་རང་བཞིན་དུ་ཡེ་ནས་ཡོད་ཀྱང་། འཁྲུལ་པའི་སྒྲིབ་པ་འཐུག་པོས་མནན་ནས་གཞི་ཐོག་ཏུ་གནས་པའི་དུས་དེར། སྒྲིབ་པའི་དབང་གིས་འོད་གསལ་མི་མཐོང་བས་སེམས་མེད་ཀྱི་གནས་སྐབས་འདི་ཤེས་འདི་དྲན་ཅི་ཡང་མེད་པར་བརྒྱལ་བ་ལྟར་འགྱུར་བའི་ཕྱིར་རོ། ༈ །ད་ལྟ་གསལ་ཙམ་རིག་ཙམ་ཡིད་ཀྱི་སྟེང་གི་འདི་གཉུག་སེམས་ཀྱི་གསལ་ཆ་ཚོགས་དྲུག་ལ་ཁྱབ་པའི་ནང་གི་ཡིད་ཀྱི་སྟེང་གི་དེ་རེད། འདིའི་ངང་དུ་ལམ་པས་སྟོང་ཉིད་སྒོམ་པ་སོགས་ཡིད་ཁོ་ནས་བྱེད་པས། ཡིད་ཕྲ་བ་ཟེར་རྒྱུ་འདི་རེད། འདི་གཉུག་སེམས་དངོས་མ་རེད། རྣམ་རྟོག་གིས་བསླད་པའི་སྐབས་ཡིན་པས་སོ། །འདི་འདྲ་མིག་ཤེས་ཀྱི་སྟེང་ནའང་གསལ་ཙམ་ལ་སྔོ་སེར་སོགས་ཀྱིས་བསླད་ཞུགས་པ་སོགས། སྒོ་ལྔ་ལའང་ཡོད་དགོས་སོ། །ཡིད་ཕྲ་བ་གསལ་ཙམ་རྟོག་མེད་དེས་རང་གིས་རང་སྟོང་པར་མཐོང་ན་གཉུག་སེམས་ཀྱིས་སྟོང་ཉིད་བསྒོམས་ན་ཆོད་ཆེ་ཟེར་བ་དེ་རྙིང་མ་ཚོའི་བསྒོམ་རྒྱུ་དེ་རེད། ༈ དགག་རྟོག་སྒྲུབ་རྟོག་གང་ཡིན་ཡང་རྣམ་རྟོག་ལས་མི་འདའ་ལ། མི་རྟོག་ཡེ་ཤེས་ནི་དགག་རྟོག་སྒྲུབ་རྟོག་གང་ཡང་མིན་ཏེ། གང་དུའང་མི་རྟོག་པ་ཡིན་ནོ། །ཁ་ཅིག་ན་རེ། མི་རྟོག་ཡེ་ཤེས་ཆོས་ཅན། དགག་རྟོག་ཡིན་ཏེ། སྤྲོས་པ་དང་བྲལ་བ་ཡིན་པའི་ཕྱིར། སྤྲོས་པ་དགག་པའི་རྟོག་པ་དང་། སྤྲོས་བྲལ་སྒྲུབ་པའི་རྣམ་རྟོག་ཡིན་ནོ་སྙམ་ན་སྤྲོས་པ་མཐའ་དག་ཁེག་པ་ལ་སྤྲོས་པ་དང་བྲལ་ལོ་སྙམ་དུ་འཛིན་པ་ག་ལ་ཡོད། ཡོད་ན་ད་དུང་སྤྲོས་པ་མ་ཁེགས་པས་སྤྲོས་བྲལ་མ་ཡིན་ནོ། ༈ །བདེན་གཉིས་དབྱེར་མེད་རྣམ་ཀུན་མཆོག་ལྡན་གྱི་སྟོང་ཉིད་སོ་སོ་རང་གིས་རིག་པའི་ཡུལ་དེ་ཆོས་དབྱིངས་དང་སྟོང་ཉིད་མཐར་ཐུག་ཡིན། དེ་རྟོགས་ཚེ་རྟོགས་བྱ་ཆོས་དབྱིངས་རྟོགས་བྱེད་ཡེ་ཤེས་ཞེས་ཐ་སྙད་ཀྱིས་ཕྱེ་བ་ལས་དོན་ལ་ཐ་དད་ཅུང་ཟད་ཀྱང་མེད་དོ། །རྣམ་པར་རྟོག་པའི་རང་བཞིན་ཅན་གྱི་གསལ་ཞིང་རིག་པ་རྣམ་ཤེས་ཀྱི་མཚན་ཉིད། རྣམ་པར་མི་རྟོག་པ་གནས་ལུགས་སོ་སོ་རང་གིས་རིག་པའི་རང་བཞིན་འོད་གསལ་བ་ཡེ་ཤེས་ཀྱི་མཚན་ཉིད་དོ། །རྣམ་ཤེས་ཀྱི་ཆོས་ཉིད་ནི་ཡེ་ཤེས་སོ། །སྒྲིབ་གཉིས་བག་ཆགས་དང་བཅས་པ་ཡོངས་སུ་དག་པའི་ཡེ་ཤེས་མཐར་ཐུག་པ་སངས་རྒྱས་ཀྱི་མཚན་ཉིད། ཡེ་ཤེས་དེ་ལ་ཆོས་ཉིད་གཟིགས་པའི་ཆ་ནས་ཇི་ལྟ་བ་མཁྱེན་པའི་ཡེ་ཤེས་ཞེས་དང་། ཆོས་ཅན་མཐའ་དག་གཟིགས་པའི་ཆ་ནས་ཇི་སྙེད་པའི་ཡེ་ཤེས་ཞེས་ལྡོག་ཆས་བཏགས་ཀྱི། ངོ་བོ་ནི་རྣམ་པ་ཐམས་ཅད་མཁྱེན་པའི་ཡེ་ཤེས་ཉག་གཅིག་ལས་ཐ་དད་དུ་མེད་དེ། །བདེན་གཉིས་དབྱེར་མེད་ཀྱི་གནས་ལུགས་མཐར་ཐུག་གཟིགས་པའི་ཡེ་ཤེས་ཡིན་ནོ། །དེས་ན་རྣམ་ཤེས་ཚོགས་བརྒྱད་ཆོས་ཅན་དང་། དེའི་རང་བཞིན་ཆོས་ཉིད་ཀྱི་ཡེ་ཤེས་གཉིས་ནི། གཅིག་ཐ་དད་གང་དུའང་ཁས་བླང་བྱ་མིན་པར། དགོངས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་དུ་ཡང་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་གསུངས་པའི་ལུང་བཞིན་ཀློང་ཆེན་རབ་འབྱམས་ཀྱིས་གསུངས་ལ། དེའི་ཕྱིར་དེ་གཉིས་ཐ་སྙད་དུ་གཅིག་མ་ཡིན་ཏེ། སེམས་རྟོགས་པ་ཙམ་གྱིས་སེམས་ཀྱི་ཆོས་ཉིད་ཡེ་ཤེས་མི་རྟོགས་པ་དང་། ཆོས་ཅན་དང་ཆོས་ཉིད་ཡིན་པ་སོགས་ཀྱི་ཕྱིར་རོ། །དོན་དམ་པར་ཐ་དད་མིན་ཏེ། སེམས་ཀྱི་རང་བཞིན་ཡེ་ཤེས་ཡིན་པས། ཡེ་ཤེས་རྟོགས་དུས་སེམས་ཀྱང་དེ་ལས་ཐ་དད་དུ་མ་དམིགས་པའི་ཕྱིར་དང་། ཡེ་ཤེས་རྟོགས་ཚེ་སེམས་རང་གྲོལ་དུ་འཆར་བ་སོགས་ཀྱི་ཕྱིར་ནའོ། ༈ །སྔགས་མཚན་བཅས་ཐབས་ཀྱི་ལམ་མདོ་ལས་འཕགས་ན། དེ་དག་དཔེ་ཡི་ཡེ་ཤེས་ཀྱི་སྒོ་ནས་དོན་གྱི་ཡེ་ཤེས་འཚོལ་བའི་ལམ་ཡིན་ལ། དེའི་མཚོན་བྱ་དོན་གྱི་ཡེ་ཤེས་དེ་ཉིད་ཐད་ཀར་འཆར་བ་རྫོགས་ཆེན་གྱི་ལམ་མྱུར་ལམ་ཅིས་མ་ཡིན་ཏེ། དེའི་ངང་དུ་གོམས་ན་གང་སྣང་སྐུ་གསུམ་ཀྱི་རོལ་པར་ཤར་ནས་ཚེ་འདི་ལ་སངས་རྒྱས་ནུས་པའི་ཕྱིར་རོ། །དེས་ན་ཆོས་སྐུ་ཀ་དག་གི་དགོངས་པ་ཁྲེགས་ཆོད་ཀྱིས་མངོན་སུམ་མཐོང་ཞིང་། གཟུགས་སྐུ་ལྷུན་གྲུབ་ཀྱི་དགོངས་པ་ཐོད་རྒལ་གྱིས་མངོན་སུམ་མཐོང་བས། སངས་རྒྱས་མངོན་སུམ་ལམ་བྱེད་ཀྱི་ཐེག་པ་འདི་ལྟ་བུ་མདོ་ལམ་ན་མེད་དོ། །དེས་ན་སྟོང་ཉིད་རྗེས་དཔག་གིས་གཏན་ལ་ཕབ་ནས་ཚོགས་རྒྱ་ཆེན་པོ་དང་འབྲེལ་བར་ཉམས་སུ་བླངས་པས། རིམ་བཞིན་ཆོས་ཉིད་ཀྱི་བདེན་པ་མཐོང་བ་ཇེ་ཉེར་འགྱུར་བའི་ལམ་མདོ་ན་ཡོད་ཀྱི། ལས་དང་པོ་པའི་ས་ནས་མངོན་སུམ་ཡིད་ཆེས་སྐྱེད་པའི་ཐབས་མ་བསྟན་ཏོ། དེ་ལྟར་ཆོས་གཟུགས་ཀྱི་སྐུ་གཉིས་ཀྱི་གནས་ཚུལ་ལས་དང་པོ་པའི་ས་ནས་ཀྱང་ཡིད་ཆེས་རྙེད་པ་དེ་བཞིན་བསྒོམས་པས་དོན་གྱི་ཡེ་ཤེས་མྱུར་དུ་འདྲེན་པ་ཡིན་ལ། དེ་ལྟ་བུའི་དཔེ་ཡི་ཡེ་ཤེས་དེ་ཡང་ཆུ་ནང་གི་ཟླ་གཟུགས་ལྟར་དོན་གྱི་ཡེ་ཤེས་མཚོན་ནུས་པས་མདོ་ལས་འཕགས་ཤིང་། ཉི་ཟླའི་གཟུགས་བརྙན་ཆུ་ལ་ཤར་བ་ལ་ཉི་ཟླ་དངོས་ལ་ཡོད་པའི་རྣམ་པ་རྣམས་སྣང་བ་ཡིན། དོན་གྱི་ཡེ་ཤེས་ཟླ་བ་ལྟ་བུ་མངོན་དུ་མཐོང་བའི་ཚེ་ན་དོན་གྱི་ཡེ་ཤེས་དེས་མཐོང་བ་ཡིན་ཡང་། ཚེས་གཅིག་གི་ཟླ་བ་ཟླ་བ་དངོས་ཡིན་ཡང་ད་དུང་བཅོ་ལྔའི་བར་རྒྱ་ཇེ་ཆེར་མཐོང་བ་ཡོད་པ་བཞིན། སྒོམ་པའི་ལམ་དུ་དོན་གྱི་ཡེ་ཤེས་མཐོང་བ་ཇེ་ཆེར་འཕེལ་ཏེ། མཐར་ཐུག་བཅོ་ལྔའི་ཟླ་བ་མཐོང་བ་ལྟར། མཐོང་བ་ཡོངས་སུ་རྫོགས་པ་སངས་རྒྱས་ཀྱི་གོ་འཕང་འགྲུབ་པའོ། ༈ །རོང་ཀློང་གཉིས་ནི་མདོ་ལམ་གྱི་ས་བཅུ་གཅིག་པ་སངས་རྒྱས་ཀྱི་ས་མཚན་ཉིད་པར་བཞེད་ཅིང་མ་ཆགས་པདྨ་དང་ཡི་གེ་འཁོར་ལོ་ཚོགས་ཆེན་སྐུ༵་གསུམ༵་གྱི་ལྡོག་ཆས་དབྱེ་བར་བཞེད། ༈ ད་ལྟ་ཚོགས་བརྒྱད་ཀྱི་ཡུལ་ཀུན་མ་འགག་བཞིན་དུ་གདོད་མའི་འོད་གསལ་ངོས་ཟིན་རྒྱུ་ཡོད་པ་འདི་རྫོགས་ཆེན་གྱི་ལམ་གྱི་ཁྱད་ཆོས་ཡིན། ལམ་གཞན་བླ་མེད་ཡིན་ཡང་དེ་ངོས་ཟིན་ཕྱིར་སྣང་གསུམ་གྱི་འོད་གསལ་ཇེ་བས་ཇེ་གསལ་དུ་སྦྱང་དགོས་པ་དེ་རྩོལ་བའི་ལམ་ཡིན། འདི་རྩོལ་མེད་རང་སར་རྙེད་པའི་མན་ངག་ཡིན་པ་ཁྱད་ཕྱེད་དགོས། རིག་པ་ཉིད་རྣམ་རྟོག་བྲལ་ཏེ་རྗེན་པར་ཤར་ཚེ་སྣང་བའི་འོད་གསལ་མཐར་ཐུག་དང་ཁྱད་མེད། ༈ རྣལ་འབྱོར་པ་ལ་ཤར་བའི་དུས་སུ་འོད་གསལ་ཤར་ཞེས་ཟེར་ཀྱང་། རྣལ་འབྱོར་པ་མིན་ཡང་ཐ་མལ་བ་རྣམ་ལ་གཉིད་འཐུག་སོགས་ཀྱི་དུས་སུ་འོད་གསལ་འགག་པ་ནི་མ་ཡིན་པས། རྣལ་འབྱོར་གྱི་ངོ་ཤེས་དུས་འོད་གསལ་ཡོད་ལ། གཞན་རྣམས་ལ་དེ་དུས་གཞི་འོད་གསལ་མེད་པ་མ་ཡིན་པས། འདི་གཉིས་བརྗོད་ཚུལ་མི་འདྲ་ཡང་དོན་དེ་ལྟ་བུར་སུས་ཀྱང་ཁས་བླང་དགོས་སོ། འོ་ན་དེ་དུས་ཤེས་བྱེད་ཀྱི་བློ་མེད་པས། རྣལ་འབྱོར་པས་ལམ་གྱི་སྟོབས་ལས་ཀྱང་དེ་ཤེས་པར་མི་སྲིད་སྙམ་ན་མ་ཡིན་ཏེ། མདོ་སྔགས་ཀྱི་ལམ་གང་ཡིན་ཡང་བདེན་གཉིས་དབྱེར་མེད་གཞི་ཡི་ཆོས་ཉིད་ལ་ངེས་པ་རྙེད་ནས། བསྒོམས་པས་མྱོང་བ་སྐྱེས་པའི་སྟོབས་ཀྱིས་གཞི་ཡི་སྟེང་གི་འཁྲུལ་བའི་སྒྲིབ་པ་བསལ་སྟོབས་ཀྱིས། དེ་དུས་ཤེས་རབ་ཀྱི་གདངས་ཀྱིས་དེ་ངོས་ཟིན་པ་སྲིད་དེ། སྔགས་ཀྱི་གྲོལ་ལམ་ལྟར་ན་ཚོགས་བརྒྱད་མ་འགག་པའི་དུས་ཀྱི་ཡིད་ཀྱི་ཤེས་པསསེམས་རང་གི་ཆོས་ཉིད་རིག་སྟོང་ཟུང་འཇུག་ཏུ་མྱོང་བ་ན། སེམས་དེ་ཉིད་རིག་སྟོང་བློ་འདས་སུ་རྟོགས་ནུས་ལ། དེ་ལ་གོམ་པས་སེམས་དབེན་སོགས་ཆེད་དུ་མ་བསྒོམས་ཀྱང་། གཉིད་འཐུག་དང་འཆི་དུས་ཀྱི་འོད་གསལ་ངོས་ཟིན་པ་འབྱུང་ངོ་། །རིག་སྟོང་གི་ཆོས་ཉིད་རྟོགས་པའི་སྐབས་ན་ཡིད་རྟོག་བཅས་རྟོག་མེད་ཀྱིས་མཚོན་པའི་ཚོགས་བརྒྱད་དམ་དྲུག་གི་ཤེས་པ་ཐམས་ཅད་ཡེ་ཤེས་འབའ་ཞིག་གི་རང་བཞིན་དུ་འཆར་གྱི་ཡེ་ཤེས་ལས་ཐ་དད་པའི་རྣམ་ཤེས་མི་དམིགས་ཏེ། སེམས་ཀུན་གྱི་ཆོས་ཉིད་དེ་ལས་གཞན་པའི་སེམས་མེད་པའི་ཕྱིར་རོ། ༈ །གློག་གི་སྒྲོན་མ་ལས། ཕྱག་རྫོགས་ཀྱི་ཁྱད་པར། ཕྱག་ཆེན་པ་ལྟ་བས་ཡུལ་ལ་ཕར་རྒྱས་བཏབ་ནས་གསལ་སྟོང་དུ་གཏན་ལ་འབེབས། རྫོགས་ཆེན་པས་ཆོས་ཐམས་ཅད་སེམས་ཀྱི་རོལ་བར་བསྡུས་ནས་ཡུལ་རིག་སྟོང་དུ་གཏན་ལ་འབེབས་པ་ཡིན། རྫོགས་ཆེན་སྡེ་གསུམ་ག་ཡུལ་སྣང་བ་དང་བཅས་པ་ཡུལ་ཅན་རིག་པའི་ཀློང་དུ་རྫོགས་པར་འདུ་ཡང་སེམས་སྡེས་ཆོས་ཐམས་ཅད་རང་བྱུང་གི་ཡེ་ཤེས་བརྗོད་བྲལ་དུ་འདོད། ཀློང་སྡེས་སེམས་ཉིད་རྩལ་སྣང་དང་བཅས་པ་ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་ས་མེད་པར་ཡེ་གྲོལ་རང་དག་ཏུ་འདོད། མན་ངག་སྡེས་ཡེ་ནས་ཟུང་འཇུག་བློ་འདས་རང་བྱུང་གི་ཡེ་ཤེས་རྩོལ་བྲལ་དུ་འདོད་པས། མདོར་ན་བསྐྱེད་རྫོགས་གསུམ་ཀྱི་དབང་བཞི་པའི་ཡེ་ཤེས་ལུས་རྫོགས་པར་སྟོན་པ་ལ་སྡེ་གསུམ་རིམ་གྱིས་འབྱུང་ངོ་། །ཞེས་དང་། མདོ་ལམ་དུ་སྟོང་ཉིད་དོན་སྤྱིའི་ཚུལ་དུ་གཏན་ལ་ཕབ་ནས་གོམས་ཚུལ་ལས་ད་ལྟ་སོ་སྐྱེའི་སར་དོན་རང་མཚན་གོམས་པ་མེད་ཀྱང་། སྔགས་སུ་ཐབས་མ་སྦས་པར་གསལ་བར་བསྟན་པས། གང་ཟག་གི་སྐལ་བའི་ཁྱད་པར་གྱིས་ད་ལྟ་མངོན་དུ་བྱེད་ནུས་མི་ནུས་དང་། དེ་ཡང་དབང་རབ་ཅིག་ཅར་བ་དབང་དུས་སུ་ངོ་འཕྲོད་པའམ་གཏན་ཚིགས་བསྟན་པ་ཙམ་གྱིས་རྟོགས་ནུས་པ་དང་། དབང་འབྲིང་ལ་རྩ་མདུད་འགྲོལ་བའི་དམིགས་གནད་སོགས་གོམས་སྟོབས་ཀྱིས་རིམ་གྱིས་རྟོགས་པ་དང་། དབང་རྟུལ་བསགས་སྦྱང་སོགས་བརྒྱུད་ནས་རྟོགས་ཚུལ་སོགས་ཀྱི་དབྱེ་བ་ཡོད་མོད་ཀྱི། སྤྱི་ལྡོག་ཏུ་ད་ལྟ་ཚོགས་སྦྱོར་གྱི་ལམ་དུའང་ཆོས་ཉིད་རང་མཚན་མངོན་སུམ་དུ་མཐོང་བ་ནི་ཡོད་དོ། །ཞི་བྱེད་ཆུ་ཀླུང་རོལ་པ་ལས། རང་གིས་བསགས་པ་རབ་ཏུ་གྱུར་པ་དང་། །བླ་མ་དམ་པ་བསྟེན་ལ་མཁས་པ་དང་། །རྣལ་འབྱོར་རིག་པ་དྭངས་པས་མངོན་སུམ་དུ། །མཐོང་ལམ་ཆེ་ཆུང་སྐྱེ་བ་ཁོ་ནར་བཤད། །ཅེས་དང་། ངེས་དོན་འདུས་པའི་རྒྱུད་ལས། ད་ལྟ་ཆོས་སྐུར་མ་ཤེས་ན། །གསང་སྔགས་མན་ངག་ཅི་ལ་ཆེ། །དེ་ཕྱིར་བསྟན་ཤེས་སྒོམ་མ་དགོས། །ཞེས་གསུངས། དེ་ལས་གཞན་དུ་ན། གསང་སྔགས་འབྲས་བུའི་ལམ་མ་ཡིན་ཞིང་རྒྱུ་ལམ་བྱེད་དང་ཁྱད་མེད་དུ་ཐལ་བ་དང་། ཆོས་ཉིད་ངོ་སྤྲོད་ཀྱི་མན་ངག་རྒྱུན་ཆད་པར་ཐལ་བ་དང་། རང་རིག་པའི་ཚད་མ་རྒྱུན་ཆད་པར་ཐལ་བ་དང་། མངོན་སུམ་རྟོགས་བྱེད་ཀྱི་རིགས་པའི་གཏན་ཚིགས་རྒྱུན་ཆད་པར་ཐལ་བའི་སྐྱོན་བཞིས་གནོད་ཅིང་། མཐོང་ཚུལ་ཡང་གསལ་བ་མཐར་ཕྱིན་མ་ཕྱིན་གྱི་བྱེ་བྲག་གིས། དཔེར་ན་དབང་པོའི་ཡུལ་དུ་མཐོང་ཡང་ཐག་ཉེ་རིང་གིས་གསལ་བ་མཐར་ཕྱིན་མ་ཕྱིན་ཡོད་པ་བཞིན། ལམ་རིམ་ལས། དབང་པོ་དྭངས་པའི་སྤྱོད་ཡུལ་ལས། །ཉེ་རིང་དྲུང་ཕྱིན་སྟོབས་འཕེལ་བས། །རྒྱུ་རྐྱེན་གོང་འོག་འབྲས་བུ་བགྲོད། །གསལ་བས་བྱེ་བྲག་རིམ་པར་འགྲོ། །ཞེས་གསུངས་སོ། ༈ །སེམས་རྣམ་ཤེས་ཚོགས་བརྒྱད་ཆོས་ཅན་དང་། དེའི་རང་བཞིན་ནམ་ཆོས་ཉིད་ཀྱི་ཡེ་ཤེས་གཉིས་ཐ་སྙད་དུ་གཅིག་མ་ཡིན་ཏེ། སེམས་རྟོགས་པ་ཙམ་གྱིས་སེམས་ཀྱི་ཆོས་ཉིད་ཡེ་ཤེས་མི་རྟོགས་པ་དང་། ངོ་བོ་འཁྲུལ་མ་འཁྲུལ་དང་། གཟུང་འཛིན་ཡོད་མེད་སོགས་ཀྱི་ཁྱད་པར་ཡོད་པའི་ཕྱིར། དོན་དམ་པར་ཐ་དད་པ་མ་ཡིན་ཏེ་སེམས་ཀྱི་རང་བཞིན་ཡེ་ཤེས་ཡིན་པ་དང་། ཡེ་ཤེས་རྟོགས་དུས་སེམས་ཀྱང་དེ་ལས་ཐ་དད་དུ་མ་དམིགས་པ་དང་། ཡེ་ཤེས་རྟོགས་ཚེ་སེམས་རང་གྲོལ་དུ་འཆར་བ་སོགས་ཀྱི་ཕྱིར། དེས་ན་དེ་གཉིས་གཅིག་ཐ་དད་གང་དུའང་ཁས་ལེན་པར་མི་བྱའོ། །ཞེས་དང་། ༈ རྫོགས་ཆེན་གྱི་རིག་ངོ་འཆུག་མེད་འཕྲོད་ན་སྔགས་ལམ་གྱི་དཔེ་ཡི་འོད་གསལ་སྐྱེས་པ་ཡིན། འདི་ཉིད་མངོན་སུམ་ཡིན་ཕྱིར་དོན་གྱི་ཡེ་ཤེས་དངོས་སུ་བཞེད་པ་ཡོད་ཀྱང་། རང་ལུགས་ཀུན་མཁྱེན་ཆེན་པོས་ནི། དོན་གྱི་ཡེ་ཤེས་དངོས་མཐོང་ལམ་ཡིན་པས་དེ་ལ་ཡོན་ཏན་བརྒྱ་ཕྲག་བཅུ་གཉིས་མངོན་གྱུར་དུ་ཡོད་དགོས་པའི་ཕྱིར། འདིར་མངོན་སུམ་གྱིས་མཐོང་བ་ཡིན་ཡང་ད་དུང་མཐོང་སྤང་གི་དྲི་མའི་སྦུབས་ལས་མ་གྲོལ་བའི་ཕྱིར་དོན་གྱི་འོད་གསལ་དངོས་མ་ཡིན་ལ། དཔེའི་འོད་གསལ་དུ་བཞེད་དོ། ༈ །ཨ་ནུས་ནི། དབྱིངས་སྟོང་ཉིད་ཀུན་ཏུ་བཟང་མོའི་དཀྱིལ་འཁོར་དང་། ཐབས་བདེ་བ་ཀུན་ཏུ་བཟང་པོའི་དཀྱིལ་འཁོར་གཉིས་དབྱེར་མེད་པ་ནི་སྲས་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་ཡིན་པས། དེ་ཉིད་རིགས་དང་དཀྱིལ་འཁོར་ཀུན་གྱི་ཁྱབ་བདག་ཏུ་ངེས་པའི་བདེ་སྟོང་གི་ལྟ་བ་ཞེས། དོན་ལ་རང་བྱུང་ཟག་མེད་བདེ་བ་ཆེན་པོ་ཞེས་པ་ཡེ་ནས་བདེ་སྟོང་འདུ་འབྲལ་སྤངས་པའི་ལྷན་ཅིག་སྐྱེས་པའི་ཡེ་ཤེས་ཉིད་ཡིན་ལ་དེ་ཉིད་ཀྱིས་ཆོས་ཐམས་ཅད་ལ་ཁྱབ་ཅིང་རྗེས་སུ་སོང་བས་སྣང་སྲིད་ཡེ་ནས་སངས་རྒྱས་པར་གཏན་ལ་ཕབ་བོ། །ཞེས་གསུངས། ༈ ཀུན་མཁྱེན་ཆོས་རྗེས་གཞི་སྣང་ཡེ་ཤེས་སྒྲོན་མེར། བདག་ཉིད་གཅིག་པ་ཡེ་ལྡན་གྱི་ཚུལ། ལྷན་ཅིག་སྐྱེས་པ་དུས་མཉམ་གྱི་ཚུལ། ཀུན་ཏུ་བརྟགས་པ་ཕྱིས་འབྱུང་གི་ཚུལ་དུ་རང་མ་རིག་པའི་ཆ་ལས་སོ་སོར་བཏགས་སོ། །ཞེས་གསུངས། ༈ གཏེར་ཆེན་བླ་མའི་འདས་རྗེས་བསྡུས་འགྲེལ་ལས། གཞི་སྣང་ཤར་བའི་ཚེ། འོད་ལྔ་ལ་བཟུང་བས་འབྱུང་ལྔ་སྣོད་ཀྱི་འཇིག་རྟེན་གྲུབ། སྐུ་ལ་འཛིན་པ་ཞུགས་པས་ལུས་དང་། ཆོས་ཉིད་ཀྱི་སྒྲ་ལ་འཛིན་པ་ཞུགས་པས་ངག་དང་། རིག་པའི་གདངས་རིག་ཙམ་གསལ་ཙམ་ལ་འཛིན་པ་ཞུགས་པས་སེམས་སུ་སྣང་ནས་འཁྲུལ་བས་དོན་ལ་མ་དག་པའི་སྣང་བ་ཞེས་རྡུལ་ཆ་ཕྲ་མོ་ཙམ་དུ་གྲུབ་མ་མྱོང་ཡོད་མ་མྱོང་བར་ད་ལྟ་སྣང་དུས་ཉིད་ནས་སྐུ་དང་ཡེ་ཤེས་ཀྱི་རོལ་བ་ཡིན་ནོ། །ཞེས་གསུངས། ༈ གློག་གི་སྒྲོན་མ་ལས། དེ་ལྟར་གདོད་མའི་སྤྱི་གཞི་ལས་གྲོལ་འཁྲུལ་གྱི་སྒོ་ཇི་ལྟར་འབྱུང་ཚུལ་ཡང་། ད་ལྟའི་གཉིད་དང་འཆི་བའི་འོད་གསལ་འདི་ཉིད་ཀྱིས་མཚོན་ནུས་ཏེ། གཉིད་ཀྱི་སྐབས། སྒོ་ལྔ་ཉོན་ཡིད་དང་བཅས་པ་ཡིད་ཤེས་ལ་ཐིམ། ཡིད་ཤེས་ཀུན་གཞིའི་རྣམ་ཤེས་ལ། དེ་ཀུན་གཞི་རྟོག་མེད་ལ། དེ་ཆོས་དབྱིངས་སུ་ཐིམ་པས་ཕྲ་རགས་ཀྱི་འཛིན་པ་ནུབ་ལ་སྟོང་གསལ་སྤྲོས་པ་དང་བྲལ་བའི་ཆོས་ཉིད་འཆར་བས་དེ་ངོས་ཟིན་ན་འཁྲུལ་བ་བཟློག་སྟེ། གསང་བ་རིན་པོ་ཆེའི་རྒྱུད་ལས། ཚོགས་བདུན་ཀུན་གཞིའི་རྣམ་ཤེས་སུ། །ཐིམ་པས་ཀུན་གཞི་དབྱིངས་སུ་དག །དེ་ཚེ་གདོད་མའི་ལྷན་ཅིག་སྐྱེས། །སྟོང་གསལ་རང་བྱུང་ཡེ་ཤེས་སོ། །དེ་ཉིད་རྣལ་འབྱོར་པས་ཤེས་བྱ། །ཞེས་གསུངས། དེ་ལས་སླར་མཆེད་པའི་ཚེ། ཆོས་དབྱིངས་ལས་ཀུན་གཞི། དེ་ལས་ཀུན་གཞིའི་རྣམ་ཤེས། དེ་ལས་ཡིད་ཤེས་གཅིག་པོ་ལངས་པས་རྨི་ལམ་འཆར་བ་དང་། དབང་པོ་སོ་སོར་བརྟེན་པའི་རྩར་རླུང་ཞུགས་པས་གཉིད་སད་དེ་ཉིན་སྣང་གི་ཡུལ་ལ་གཟུང་འཛིན་རགས་པ་འཆར་བར་ཤིང་རྟ་ཆེན་མོར་གསུངས། འདིས་གྲོལ་འཁྲུལ་དང་ཁྱད་པར་སེམས་ཕྲ་བ་ནས་རིམ་གྱིས་མཆེད་ཚུལ་མཚོན། སེམས་ཅན་རྣམས་འཆི་བའི་ཚེ་ས་ཆུ་མེ་རླུང་རྣམས་རིམ་པས་ཐིམ་མཐར། རླུང་རྣམ་ཤེས་ལ་ཐིམ་སྟེ། ཕྱི་དབུགས་ཆད་པའི་བར་རགས་པ་ཐིམ་པ་དང་། དེ་ནས་ནང་དབུགས་གནས་པའི་དང་པོར། རྟོག་པ་ཐིམ་པའི་རིམ་པ་ཕྱི་རྟགས་ཟླ་བ། ནང་རྟགས་དུ་བ། སྣང་བའི་སྐབས་དེ་མཆེད་པ་ལ་ཐིམ། ཞེ་སྡང་གི་རྟོག་པ་སོ་གསུམ་འགག །ཕྱི་རྟགས་ཉི་མ། ནང་རྟགས་མེ་ཁྱེར། མཆེད་པའི་སྐབས་སྣང་བ་ཉེར་ཐོབ་ལ་ཐིམ། འདོད་ཆགས་ཀྱི་རྟོག་པ་བཞི་བཅུ་འགག །ཕྱི་རྟགས་ནག་ལམ་སྒྲ་གཅན་གྱི་སྣང་བ། ནང་རྟགས་བུམ་ནང་གི་མར་མེ། སྣང་བ་ཉེར་ཐོབ་དེ་འོད་གསལ་ལ་ཐིམ། གཏི་མུག་གི་རྟོག་པ་བདུན་འགག །ཕྲ་བ་ཐིམ། ཕྱི་རྟགས་སྐྱ་རེངས་ཤར་བ་ལྟ་བུ། ནང་རྟགས་སྟོན་གནམ་དྲི་མེད། བཞི་པའི་འོད་གསལ་དེ་འཆི་སྲིད་ཀྱི་དངོས་གཞིར་བཞེད་ཅིང་། དེ་ངོས་ཟིན་པ་རྣམས་འོད་གསལ་དེ་ལ་ཇི་ཙམ་འདོད་པར་གནས་ཤིང་། དེ་ནས་ཟུང་འཇུག་གི་སྐུར་ལངས་པར་བཞེད་པས་འདིས་གྲོལ་ཚུལ་དང་། ངོ་མ་ཤེས་པ་རྣམས་དེ་ལས་རིམ་པར་ལུགས་བཟློག་ཏུ། གཏི་མུག་གི་རྟོག་པ་བདུན་ལངས། ཉེར་ཐོབ་ཤར། དེ་ལས་འདོད་ཆགས་ཀྱི་རྟོག་པ་བཞི་བཅུ་ལངས། མཆེད་པ་ཤར། དེ་ནས་ཞེ་སྡང་གི་རྟོག་པ་པོ་གསུམ་ལངས། སྣང་བ་ཤར། དེ་ནས་ཁྱབ་བྱེད་ཀྱི་རླུང་གིས་འདུ་བྱས་ཏེ་རྣམ་པར་ཤེས་པ་སྔར་གྱི་ཕུང་པོ་རྙིང་པའི་སྒོ་དགུ་གང་རུང་གི་ལམ་ལས་འཕོས་ནས་བར་དོའི་སྲིད་པ་འགྲུབ་པར་གསུངས་ཏེ། འདིས་ཐོག་མའི་འཁྲུལ་ཚུལ་མཚོན་ནུས། ༈ ཡེ་ཐོག་གཞི་ཡི་གནས་ལུགས་སམ་འོད་གསལ་ནི་རྟོགས་ཟིན་འཁྲུལ་ཟིན་གཉིས་ཀ་མིན་པས་གཞི་དབྱིངས་ལུང་མ་བསྟན་ཞེས་བྱ་སྟེ་དཔེ་འཆི་བའི་འོད་གསལ་བཞིན་ནོ། །དེ་ཡང་སེམས་ཅན་རྣམས་འཆི་བའི་ཚེ་སྣང་གསུམ་མཐའི་ཉེར་ཐོབ་འོད་གསལ་ལ་ཐིམ་པའི་སྐབས་སུ་ཤར་བའི་འོད་གསལ་དེའི་རང་གི་ངོ་བོ་ནི་དྭངས་གསལ་སྒྲིབ་གཡོགས་དང་བྲལ་བ་སྟོན་གནམ་དྭངས་པ་ལྟ་བུ་སྟེ། དེའི་ཚེ་འཁྲུལ་སེམས་གཟུང་འཛིན་གྱི་ཀུན་རྟོག་རགས་ཕྲ་རྣམས་ནི་ཆོས་ཉིད་ཀྱི་རྩལ་གཞི་ཐིམ་དུ་སོང་བས་དེའི་དུས་ན་མེད་པའི་ཕྱིར་རོ། །འོན་ཀྱང་ཕལ་པ་རྣམས་ལ་ལམ་རྐྱེན་མེད་པས་འོད་གསལ་དེའི་རང་རྩལ་ཡེ་ཤེས་ནི་མ་ཤར་བས། ཡུལ་འོད་གསལ་ཡོད་ཀྱང་ཡུལ་ཅན་མེད་པས་སུ་ཞིག་གིས་ངོས་ཟིན། དེ་ལྟར་ངོས་མ་ཟིན་པའི་ཆ་ནས་སེམས་མེད་མུན་པའི་གནས་སྐབས་སམ་བརྒྱལ་བ་ཞེས་བྱ་སྟེ། འོད་གསལ་རང་གི་ངོ་བོ་ནི་ནག་ཐོམ་ལུང་མ་བསྟན་བརྒྱལ་བ་ལྟ་བུ་མིན་ནོ། །ཞེས་གསུངས། ༈ མ་རིག་པ་གསུམ་ནི། ཐོག་མའི་སྤྱི་གཞི་མཉམ་པ་ཆེན་པོའི་ངོ་བོ་མི་རྟོག་པའི་ཆ་དེ་རང་ངོ་མ་ཤེས་ན་འཁྲུལ་བ་འབྱུང་རུང་གི་ཆ་ཙམ་མ་འགག་པ་དེ་ལ་རྒྱུ་བདག་ཉིད་གཅིག་པའི་མ་རིག་པ་ཞེས་བྱ་སྟེ་གཞི་མཉམ་པ་ཆེན་པོ་ལས་མ་གཡོས་པའི་ཕྱིར་འདི་ལ་ཐོག་མ་བཞག་རྒྱུ་མེད་དེ། རྒྱུད་བླ་མར། ཐོག་མེད་གྱུར་ཀྱང་ཐ་མ་དང་ལྡན་པ། །ཞེས་གསུངས། དེ་ནས་ཀ་དག་སྟོང་པ་ཆེན་པོས་འཆར་གཞིའི་གོ་ཕྱེས་ཏེ། ལྷུན་གྲུབ་འོད་གསལ་གྱི་འཆར་ཆ་མ་འགག་པའི་གདངས་ཏེ། ཐུགས་རྗེའི་རྩལ་སྐྱོད་བྱེད་ཡེ་ཤེས་ཀྱི་རླུང་གིས་རྟ་བྱས་ཏེ། འཆར་ལུགས་དྲུག་སྒོ་གཉིས་དང་བརྒྱད་ཀྱི་ཆ་ནས་ལྷུན་གྲུབ་རིན་པོ་ཆེའི་སྣང་བ་ཞེས་བྱ་སྟེ་གཞི་སྣང་ཡེ་ཤེས་ཆེན་པོའི་བཀོད་པ་རང་ཤར་བའི་ཚེ། གཞི་གཞི་སྣང་གཉིས་ཀའི་ངོ་བོ་ལ་འཁྲུལ་བ་མེད་ཀྱང་། སྔར་གྱི་རྒྱུ་བདག་ཉིད་གཅིག་པའི་མ་རིག་པ་མ་སྤངས་ལྡན་པའི་ཚུལ་གྱིས་ཡོད་པའི་དབང་གིས། རང་བཞིན་འོད་གསལ་གྱི་སྣང་ཆ་དེ་རང་རྩལ་དུ་མ་ཤེས་པ་ནི་སྣང་བ་དེ་དང་དུས་སྔ་ཕྱི་མེད་པར་བྱུང་བས་ལྷན་ཅིག་སྐྱེས་པའི་མ་རིག་པ་ཞེས་བྱ། དེའི་ཚེ་མ་ཤེས་པ་ཙམ་དུ་མི་སྡོད་པར་ཤེས་པ་སྤུན་པོ་ཕ་གི་ལས་བདག་བྱུང་ངམ། བདག་ལས་ཕ་གི་བྱུང་སྙམ་དུ་ཐུགས་རྗེ་རང་རིག་ཏུ་མ་ཤེས་པའི་གཟུང་འཛིན་གྱི་ཆ་ཤིན་ཏུ་ཕྲ་བ་བྱུང་བ་ནི་ཀུན་ཏུ་བརྟགས་པའི་མ་རིག་པ་ཞེས་བྱའོ། །རྐྱེན་བཞི་ནི། རྒྱུའི་རྐྱེན་མ་རིག་པ་གསུམ་མམ་ལྷན་ཅིག་སྐྱེས་པའི་མ་རིག་པས་རང་ངོ་མ་ཤེས་པ། དམིགས་པའི་རྐྱེན་འོད་སྣང་སོགས་སྣ་ཚོགས་སུ་སྣང་བ། བདག་པོའི་རྐྱེན་རང་སྣང་དུ་མ་ཤེས་ཏེ་གཞན་དུ་བཟུང་བས། དེ་མ་ཐག་རྐྱེན་གཟུང་འཛིན་གྱི་འཁྲུལ་བ་ཇེ་རགས་སུ་སོང་བས་རང་སྣང་ཡེ་ཤེས་ཉིད་བསྒྲིབས་ཏེ་འཁྲུལ་བའི་སྦུབས་སུ་ཆུད་དེ་འཁྲུལ་སྣང་མུ་མེད་པར་ཤར་བ་ཡིན་ནོ། །ཞེས་གསུངས་སོ། ༈ །ཀུན་གཞིའི་སྐབས། མི་ཕམ་རིན་པོ་ཆེས། དོན་གྱི་ཀུན་གཞི་བདེ་གཤེགས་སྙིང་པོ་ཟག་མེད་ཀྱི་ཆོས་ཀུན་གྱི་གཞི་ཡིན་ལ། འཁོར་བའི་ཀུན་གཞི་ཟག་བཅས་ཀྱི་ཆོས་ཀུན་གྱི་གཞི་མ་ཡིན་པས་ཀུན་གཞིར་གསུངས་ལ། ངེས་དོན་སྒྲོན་མེར། ཀུན་སྨོན་ལས། ཁམས་གསུམ་སེམས་ཅན་ཐམས་ཅད་ཀྱང་། །ཀུན་གཞི་སངས་རྒྱས་ང་དང་མཉམ། །ཞེས་གསུངས་ཏེ། འདིའི་ཀུན་གཞི་ནི་སྦྱོར་བ་དོན་གྱི་ཀུན་གཞིའམ་ཀུན་གཞིའི་ཡེ་ཤེས་བདེ་གཤེགས་སྙིང་པོ་ཉིད་ཡིན་ནོ། །ཞེས་དང་། རྒྱན་སྟུག་པོ་བཀོད་པའི་མདོ་ལས། ས་རྣམས་སྣ་ཚོགས་ཀུན་གཞི་སྟེ། །བདེ་བར་གཤེགས་པའི་སྙིང་པོའང་དེ། །སྙིང་པོ་དེ་ལ་ཀུན་གཞིའི་སྒྲས། །བདེ་བར་གཤེགས་པས་བསྟན་པར་མཛད། །སྙིང་པོ་ཀུན་གཞིར་བསྒྲགས་པར་མཛད། བློ་ཞན་རྣམས་ཀྱིས་མི་ཤེས་སོ། །དེ་ཡང་འཁོར་འདས་ཀྱི་ཆོས་རྣམས་ཀྱི་བག་ཆགས་སྣ་ཚོགས་པའི་སྒྲིབ་པ་དང་། འདུས་བྱས་ཀྱི་ཆོས་ཐམས་ཅད་ཀུན་གྱི་གཞི་འམ། འབྱུང་ཁུངས། ཆོས་ཉིད་དེ། དེ་འདྲའི་གཞི། སྤྲོས་བྲལ་བདེ་བར་གཤེགས་པའི་སྙིང་པོའང་དེ་ཡིན་ཞེས་ངོས་བཟུང་བར་མཛད་ལ། བདེ་གཤེགས་སྙིང་པོ་དེ་ལ་ཀུན་གཞིའི་སྒྲས་བདེ་བར་གཤེགས་པ་རྫོགས་པའི་སངས་རྒྱས་ཀྱིས་བཏགས་པར་མཛད་དོ། །བདེ་གཤེགས་སྙིང་པོ་ཀུན་གཞིར་བསྒྲགས་པར་མཛད་ལ། དགོངས་པ་ངེས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་གི། ངས་འདི་བྱིས་པ་རྣམས་ལ་ཡོངས་མ་བསྟན། །ཞེས་གསུངས་པ་ལྟར། བག་ཆགས་སྣ་ཚོགས་པའི་ཀུན་གཞི་ལ་རྟོག་པའི་ཚུལ་དང་སྦྱར་ཏེ། བློ་ཞན་པ་རྣམས་ཀྱིས་བདེ་གཤེགས་སྙིང་པོ་ཀུན་གཞིའི་འཇོག་ཚུལ་ལ། ཀུན་གཞི་ཞེས་པའི་རགས་པ་ཞིག་ཏུ་འཁྲུལ་ཏེ་ཕྲ་བའི་འཇོག་ཚུལ་མི་ཤེས་སོ། །ཞེས་དང་། ཡེ་ཤེས་རྒྱས་པའི་རྒྱུད་ལས། གནས་པ་ཞེས་བྱ་ཀུན་གཞི་སྟེ། །ལས་དང་རྣམ་ཤེས་དེ་ལ་བརྟེན། །ཞེས་པས། དེ་ལྟ་བུའི་ཀུན་གཞིའི་དེའི་ངོ་བོ་གང་ཡིན་སྙམ་ན། རྣམ་པར་ཤེས་པ་ཇི་སྙེད་ཅིག་འཕྲོ་བའི་གཞིར་གྱུར་པ་ཤེས་པ་ཕྱོགས་སུ་མ་ལྷུང་བ་སྣོད་བཅུད་རྒྱ་ཆེན་པོ་ལ་དམིགས་པ་ཡུལ་གྱི་སྤུ་རིས་མི་འབྱེད་པ། རང་གི་ངོ་བོ་ལ་རྣམ་རྟོག་རགས་པའི་རླབས་ཞི་བ་རྒྱ་མཚོ་ལྟ་བུའི་རྩེ་གཅིག་ཏུ་གནས་པའི་གཟུགས་མེད་ཀྱི་ཏིང་ངེ་འཛིན་གྱི་སས་བསྡུས་པ་དང་། རང་གི་ངོ་བོ་ཤེས་པ་རང་བློ་ལྐོག་ཏུ་མ་གྱུར་པའི་གསལ་བ་གཟུགས་ཁམས་ཀྱི་སས་བསྡུས་པ་དེ་ནི་རྟོག་པ་མེད་པ་ནམ་མཁའ་སྤྲིན་དང་བྲལ་བ་ལྟར་མི་རྟོག་པ་དེ་ནི་ཤེས་པ་སྔ་མའི་བག་ཆགས་འཛིན་ཞིང་ཕྱི་མའི་རྟེན་དུ་གྱུར་པའི་ཞི་བ་ཟབ་པ་ཕྲ་བའི་རང་བཞིན་ཅན་གྱིས་རྟོགས་པར་དཀའ་བ་ཡིན་ནོ། །ཞེས་གསུངས་སོ། །མཁའ་འགྲོ་ཡང་ཏིག་ལས། དེ་ཡང་ཕྱོགས་རེའི་དཔེར་མཚོན་ན། །སྐྱེས་བུ་གཅིག་ངལ་བསོ་བ་ལྟ་བུའི་ཚེ་ཤེས་པ་དར་ཅིག་གང་དུ་ཡང་མི་རྟོག་པར་ལུང་མ་བསྟན་དུ་གནས་པ་ཀུན་གཞི། དེ་ལས་དར་གཅིག་སྣང་ཡུལ་མ་འགག་པར་ལམ་མེ་གསལ་ཡང་། དེར་འཛིན་མ་ཞུགས་པས་གསལ་ལ་རྟོག་མེད་ཀྱི་རྣམ་པ་དེ་ཀུན་གཞིའི་རྣམ་པར་ཤེས་པར་གསུངས། ཉིན་དུས་ཤེས་པ་འཕྲོ་བ་ན་ཡང་ཀུན་གཞི་ལས་མཆེད་དེ་ཡུལ་དང་མཐུན་པའི་ཚོགས་སུ་འཆར་གསུངས། མཚན་མོ་ཉལ་དུས་གཟུགས་སྒྲ་དྲི་རོ་རེག་བྱ་ལ་སོགས་པ་ལ་རྟོག་པའི་ཚོགས་བདུན་རགས་པ་སྟེ། གཉིད་དུ་འགྲོ་བའི་ཤེས་པ་གསལ་ལ་རྟོག་མེད་ཀུན་གཞིའི་རྣམ་ཤེས་སུ་ཐིམ་ནས། ཀུན་གཞིའི་རྣམ་ཤེས་དེ་ཡང་རིམ་གྱིས་རྟོག་མེད་གཉིད་ཀྱི་ཤེས་པ་ཀུན་གཞིར་ཐིམ་ནས། དེ་ཡང་སྐྱེ་མེད་བསམ་ཡུལ་ལས་འདས་པའི་ཆོས་སྐུར་ཐིམ་སྟེ་དར་ཅིག་གནས་སོ། །དེ་ཉིད་ཟིན་པ་ལ་མི་རྟོག་པ་གཞིའི་འོད་གསལ་ཟིན་པ་ཞེས་བྱའོ། །༈ ཀུན་གཞི་ནི་རྟོག་མེད་ཡེངས་འཁྲུལ་དང་བྲལ་བའི་རྨོངས་ཆ་ཅན་དེ་ཀུན་གཞི་ཡིན། ཆོས་སྐུ་ནི་རིག་སྟོང་ཟུང་འཇུག་ཐིག་ལེ་ཉག་གཅིག་གོ །ཆོས་སྐུ་དེ་ལ་ཕྱེ་ན་གཞིའི་ཆོས་སྐུ་ནི་གློ་བུར་གྱི་དྲི་མ་དང་བཅས་པའི་སྐབས་ཡིན། ལམ་གྱི་ཆོས་སྐུ་ནི་རྣལ་འབྱོར་པས་ལམ་དུས་སུ་གནས་ལུགས་ཅི་རིགས་པ་རྟོགས་པ་ཡིན། འབྲས་བུའི་ཆོས་སྐུ་ནི་འབྲས་བུ་སྒྲིབ་བྲལ་གྱི་དུས་ན་དག་པ་གཉིས་ལྡན་གྱི་སངས་རྒྱས་ཡིན། ༈ གང་ཤར་ཆོས་སྐུའི་རང་རྩལ་ལ་ངོ་སྤྲད་པ་དེ་ནི་ཀུན་རྫོབ་ཀྱི་ཆོས་ཡོད་དོ་ཅོག་ཐམས་ཅད་རིག་པ་ཆོས་སྐུ་ཆེན་པོ་དེའི་རྩལ། རོལ་པ་ཆེ་བའི་རྒྱན། གཞི་སྣང་ལྷུན་གྲུབ་ཀྱི་སྣང་བ་ཡིན་པས་ན། གནས་ལུགས་ཡེ་ཤེས་ཆེན་པོ་དེ་ལུས་ལྟར་སྣང་བ་རྒྱལ་བའི་སྐུ་རྡོ་རྗེ། དེའི་རང་གདངས་ཨ་ཨཱ་སོགས་དབྱངས་དང་། ཀ་སོགས་གསལ་བྱེད་རྣམས་དབྱིངས་ཡེ་ཟུང་འཇུག་གམ་དེའི་གདངས་ངག་ལྟར་དུ་གྲགས་པ་རྒྱལ་བའི་གསུང་རྡོ་རྗེ། ཡིད་ལྟར་དུ་འཕྲོ་བ་རྒྱལ་བའི་ཐུགས་རྡོ་རྗེ་ཡིན་ནོ། །ཡེ་ཤེས་དེ་ཉིད་ལུས་ངག་ཡིད་གསུམ་དང་གནས་ཀྱི་རྣམ་པར་ཤར་བ་ནི་དག་པ་རབ་འབྱམས་ཡིན། ཇི་ལྟར་ཡིན་ན་འགྲོ་དྲུག་གི་ཤེས་རྒྱུད་ལ་ཡེ་ཤེས་ཆེན་པོས་ཁྱབ་ཡོད་པས། དེ་ཉིད་ལུས་ངག་ཡིད་གསུམ་ལྟར་དུ་ཤར་བ་ནི་རྡོ་རྗེ་གསུམ་དང་། གནས་ལྟར་དུ་ཤར་བ་འོག་མིན་གྱི་གནས་ཡིན་པས་དག་པ་རབ་འབྱམས་ཡིན། འཁོར་འདས་ལམ་གསུམ་གྱིས་བསྡུས་པའི་ཆོས་ལ་ཡེ་ཤེས་ཆེན་པོས་ཁྱབ་ཡོད་པས་ན། འཁོར་འདས་ཐམས་ཅད་ཡེ་ཤེས་ཀློང་དུ་གཅིག །ཅེས་སོ། ༈ །ཉི་མ་ཤར་བ་ལྟ་བུའི་མན་ངག་ལས་ཀྱང་ལྷུག་པར་བཞག་ཅེས་པ་ནི། དབང་པོ་ལྔ་ཡུལ་ལ་ཡན་པའོ། །འོ་ན་སོ་སོའི་སྐྱེ་བོ་དང་ཁྱད་ཅི་ཡོད་ཅེ་ན། དེས་ནི་དེ་ལྟར་མ་རྟོགས་ཏེ་ཡེ་ཤེས་ལ་ཡེ་ཤེས་རོལ་པ་མེད་པའི་ཕྱིར་རོ། ༈ །གནས་ལུགས་ཀྱི་རང་ངོ་ལ་བསྐྱེད་རྫོགས་གཉིས་ཀ་ཡེ་ནས་ཟུང་འཇུག་ལྷུན་གྲུབ་ཏུ་བཞུགས་པ་ཡིན་པས་སྣང་གྲགས་རིག་གསུམ་ལྷ་སྔགས་ཆོས་ཉིད་ཀྱི་རྣམ་རོལ་དུ་ཤེས་ན་ལྷ་བསྐྱེད་ཀྱང་རུང་ལ་མ་བསྐྱེད་ཀྱང་རུང་བ་ཡིན་ཏེ། ཨོ་རྒྱན་ཆེན་པོས། རྟགས་ཀྱི་སངས་རྒྱས་ལོངས་སྤྱོད་རྫོགས་སྐུ་དང་། །དོན་གྱི་སངས་རྒྱས་ཆོས་སྐུ་གང་ཡིན་པ། །ཆོས་ཉིད་རིག་པ་མངོན་སུམ་འདི་ཡིན་པས། །སངས་རྒྱས་གཞན་ནས་མ་འཚོལ་རྗེ་འབངས་རྣམས། །ཞེས་གསུངས། དེ་བཞིན་དུ་བླ་མའི་རྣལ་འབྱོར་ཡང་ཕྱི་རོལ་གྱི་བླ་མ་གཟུགས་དབྱིབས་སུ་སྣང་བ་ནི་མཚོན་བྱེད་དཔེའི་བླ་མ་ཙམ་ཡིན། རང་རིག་རང་ངོ་ཤེས་པ་ནི་མཚོན་བྱ་དོན་གྱི་བླ་མ་ཆོས་སྐུ་དངོས་ཡིན་པས། གཙོ་བོ་ཤེས་རིག་གི་རང་ཚུགས་མ་ཤོར་བ་བླ་མ་དང་འདུ་འབྲལ་མེད་པ་ཡིན་ཏེ། ཀློང་རས་ཀྱི་ཞལ་ནས། བླ་མ་རང་སེམས་དབྱེར་མེད་ལ། །གཟུགས་སྐུར་འཛིན་པ་སྟོར་ནས་ཐལ། །ཞེས་གསུངས། ༈ རང་ཉིད་བླ་མའི་རྣལ་འབྱོར་ཁོ་ན་ལ་བརྩོན་པའི་སྐབས་འདིར་ལྷ་འདྲེ་ཡང་བླ་མའི་རྣམ་རོལ་ཡིན་པར་ཤེས་དགོས་ཏེ། སྣང་སྲིད་བླ་མར་ཤར་བའི་བསྐྱེད་རིམ་དང་། ཐུགས་ཡིད་དབྱེར་མེད་འདྲེས་པའི་རྫོགས་རིམ་ལ་གནད་དུ་བསྣུན་དགོས་སོ། ༈ །མི་གཡེང་བའི་ཞི་གནས་ཇི་ལྟ་བུ་ཞེ་ན། གཡེང་བ་རྣམ་པ་དྲུག་དང་བྲལ་བའི་ཏིང་ངེ་འཛིན་གང་ཡིན་པའོ། །གཡེང་བ་རྣམ་པ་དྲུག་པོ་གང་ཞེ་ན། ངོ་བོ་ཉིད་ཀྱིས་གཡེང་བ་ནི། མིག་ཤེས་སོགས་ཚོགས་ལྔ་སྟེ། དེ་དག་རང་བཞིན་གྱིས་ཁ་ཕྱིར་བལྟས་པས་ཏིང་ངེ་འཛིན་ལས་ལྡང་བ་ཡིན་པ་དང་། ཕྱི་རོལ་དུ་གཡེང་བ་ཡིད་ཤེས་ཡུལ་ལ་འཕྲོ་བའམ་འཇུག་པ་དང་། དེ་བཞིན་དུ་ནང་གི་གཡེང་བ་ནི། ཏིང་ངེ་འཛིན་གྱི་རོ་མྱོང་བ་དང་། བྱིང་རྒོད་དང་། མཚན་མའི་གཡེང་བ་ནི། ཏིང་ངེ་འཛིན་དེ་ཉིད་ལ་ཡིད་ཆེས་པ་ཡི་བསམ་པས་མཚན་མར་བཟུང་ཞིང་ཞེན་པ་དང་། གནས་ངན་ལེན་གྱི་གཡེང་བ་ནི། ངར་འཛིན་དང་བཅས་པའི་སྒོ་ནས་ཡིད་ལ་བྱེད་པ་སྟེ། ང་རྒྱལ་གྱིས་གཞན་ལས་ཁྱད་པར་དུ་འཕགས་པར་ཡིད་ལ་བྱེད་པའམ་ངར་འཛིན་དང་བཅས་པ་ཞེས་བྱའོ། །ཡིད་ལ་བྱེད་པའི་གཡེང་བ་ནི། ཐེག་པ་ཆུང་ངུའི་སེམས་དང་མ་བྲལ་བ་ཐེག་དམན་ཡིད་ལ་བྱེད་པ་དང་ནི་དེ་ལྟར་གཡེང་བ་དྲུག་སྟེ། དེ་དྲུག་པོ་རྣམ་བཅད་ལ་ཁེགས་པའི་ཡོངས་གཅོད་མི་གཡེང་བའི་ཞི་གནས་ནི་ཐེག་པ་ཆེན་པོའི་ཞི་གནས་ཁྱད་པར་ཅན་ཏེ། ནང་དུ་རྩེ་གཅིག་པར་གནས་པའི་ཞི་གནས་སྐྱོན་མེད་པ་ཡིན་ནོ། ༈ །རིག་པའི་རང་ངོ་ཤེས་ནས་ཤེས་རིག་གི་རང་ཚུགས་མ་ཤོར་ན། གནས་འགྱུ་གང་བྱུང་ཐམས་ཅད་སྒོམ་ཡིན། མཉམ་བཞག་ཡིན། རིག་པའི་རང་ངོ་མ་ཤེས་ན་སེམས་ཡུན་རིང་པོར་མི་འཕྲོ་བར་གནས་པ་དང་། འགྱུ་བ་གང་ཤར་གྱི་ངོ་བོ་ལ་བལྟ་བ་དང་ངོས་བཟུང་ཏེ་མ་བཅོས་པར་བཞག་ནས་མེད་འགྲོ་བར་སྣང་བ་དེ་ཡང་དོན་དུ་སྣང་བ་ལ་སྟོང་པས་རྒྱས་གདབ་པ་ཡིན་པས་དེ་གཉིས་ཀས་སྒོམ་གྱི་གོ་མི་ཆོད་དེ། ཀུན་མཁྱེན་གྱིས། སྣང་བ་གང་སྣང་གང་ཤར་གྱི་ཐོག་ཏུ་བཞག་ནས་སྐྱོང་བ་འདི། ཡང་ན་ཞི་གནས་ལྟེང་པོར་འགྲོ། ཡང་ན་རྒོད་པར་འགྲོ་གསུངས་པས་རིག་པ་བློ་བྲལ་གྱི་ཡེ་ཤེས་ཀྱིས་རང་ཚུགས་མ་ཟིན་པས་མཉམ་པར་བཞག་པ་ཡུལ་ལ་ལྟོས་དགོས་པས་མཉམ་བཞག་ལྟོས་འཇོག་ཅན་དང་། རྐྱེན་ཁར་ལུས་པ་དང་། སྣང་རྟོག་བཟང་ངན་ལ་སོགས་པ་གང་ཤར་ལ་ཆེད་དུ་བལྟས་པས་གཟུང་འཛིན་ཅན་དུ་འགྲོ་བས། ལེགས་ན་སེམས་སྡེའི་ཕྱོགས་སུ་གཏོགས་པ་ཙམ་ལས་ཡང་གསང་བླ་མེད་དང་བསྟུན་ན་ལམ་གྱི་གོལ་ས་མ་ཆོད་པའི་སྐྱོན་ཡོད་གསུངས། ༈ སྤྱིར་གོལ་ཤོར་ནོར་གསུམ་གསུངས་པ་ལས། འདིར་གོལ་ཤོར་ནི། གེགས་སེལ་རྡོ་རྗེའི་ཐོལ་གླུ་རིན་པོ་ཆེའི་དྲྭ་བ་ལས། ཁྱད་པར་བདེ་གསལ་མི་རྟོག་ཀྱང་། །ལམ་གྱི་འཆར་སྒོ་ཙམ་ཉིད་དེ། །དེ་ཡི་ངོ་བོར་ཞེན་གྱུར་ནི། །འདོད་གཟུགས་གཟུགས་མེད་དག་ཏུ་གོལ། །ངོ་བོ་གདོད་ནས་དག་པ་ཡི། །ཀ་དག་ཕྱོགས་ཡན་མ་རྟོགས་བཞིན། །སྟོང་པ་ལོག་ནས་བསྒྲུབ་པ་ནི། །གཤིས་ལ་ཤོར་བ་ཞེས་སུ་བཤད། །རང་རིག་ཟང་ཐལ་ཆེན་པོ་ལ། །རྒྱུ་འབྲས་ལྷུན་གྲུབ་མ་ཤེས་པར། །སྟོང་ཉིད་ལམ་ནས་འབྲས་བུ་གཞན། །བཙལ་བ་ལམ་དུ་ཤོར་བའོ། །སྤང་གཉེན་གཉིས་ལས་རབ་འདས་པའི། །སྦྲུལ་མདུད་ཞིག་ལྟར་ངང་གནས་ལས། །ཉམས་མྱོང་སྟེང་དུ་གཉེན་པོ་གཞན། །སྒོམ་པ་གཉེན་པོར་ཤོར་བའོ། །གསལ་སྟོང་ལྷུན་གྲུབ་མ་རྟོགས་བཞིན། །བློ་དང་རྣམ་རྟོག་རྗེས་འབྲང་ནས། །རྒྱུ་འབྲས་མེད་པར་སྐུར་འདེབ་པ། །འདི་ནི་རྒྱས་འདེབ་སྟོང་པའོ། །ཆེད་དུ་འཛིན་པ་ཞུགས་པ་ནི། །གོལ་ཤོར་ནོར་ས་ཀུན་གྱི་གཞི། །དེས་ན་གང་ལའང་མཆོག་འཛིན་གྱི། །ཞེན་པ་མི་བྱ་རང་སར་གློད། །ཅེས་དང་། གཞན་ཡང་། དགག་སྒྲུབ་བྲལ་བའི་རིག་པ་ལ། །ཤེས་བྱ་གཤིས་ལ་ཤོར་བ་ཟད། །སྐུ་གསུམ་ལྷུན་གྲུབ་ཆེན་པོ་ལ། །སྟོང་ཉིད་ལམ་དུ་ཤོར་བ་བྲལ། །ཡེ་ནས་ཤར་གྲོལ་དུས་མཉམ་ལ། །གཉེན་པོ་གཞན་ལས་བཙལ་བ་སྤང་། །སྒོམ་དང་མི་སྒོམ་བློ་བྲལ་ལ། །རྒྱས་འདེབས་འཛིན་པ་རང་སར་ཡལ། །ཞེས་སོ། ༈ །གཞི་ལྷུན་གྲུབ་རིན་པོ་ཆེའི་སྦུབས་ན། འཁོར་འདས་གཉིས་ཀྱི་སྣང་བ་འཆར་རུང་གི་གདངས་མ་འགག་པར་ཡོད། གཞི་སྣང་ལམ་ལྷུན་གྲུབ་རིན་པོ་ཆེའི་སྦུབས་ནི་འཁོར་འདས་སུ་སྣང་བའི་འཁྲུལ་གཞི་དང་གྲོལ་གཞི་གཉིས་ཀ་ཡིན། འབྲས་བུ་ལྷུན་གྲུབ་རིན་པོ་ཆེའི་སྦུབས་ལ་སྐུ་དང་ཞིང་ཁམས་སོགས་འཆར་རུང་དུ་ཡོད། ༈ གཞོན་ནུ་བུམ་སྐུ་ཞེས་བྱ་བ་ནི། ངོ་བོ་སྐུར་གནས། རང་བཞིན་གསུང་དུ་གནས། ཐུགས་རྗེ་ཐུགས་སུ་གནས་པ། དེ་ཡང་རྟོགས་ཏེ་སངས་རྒྱས་མ་བྱུང་། མ་རྟོགས་ཏེ་སེམས་ཅན་མ་བྱུང་བའི་སྔོན་རོལ་ལོ། །ཞེས་དང་། ནང་དབྱིངས་ཀ་དག་གི་ངོ་བོ་སྤྲོས་པ་དང་བྲལ་བ་ཆོས་སྐུ། ལྷུན་གྲུབ་ཀྱི་ཆ་འོད་གདངས་ཉིད་ཀ་དག་གི་སྦུབས་སུ་མི་གསལ་བའི་ཚུལ་དུ་ཡོད་པ་ལོངས་སྐུ། མི་འགག་པའི་ཆ་ལ་སྤྲུལ་སྐུ་སྟེ་གཞོན་ནུ་བུམ་སྐུའི་བཞུགས་ཚུལ་ཡིན་ནོ། །དེ་ལས་གཞི་སྣང་གི་འཆར་ལུགས་ནི། ནང་དབྱིངས་ཀ་དག་གི་ཡེ་གཞི་གཞོན་ནུ་བུམ་པ་སྐུའི་རྒྱ་ཁ་རལ་ཏེ་ཡེ་ཤེས་ཀྱི་རླུང་གཡོས་པས་རིག་པ་གཞི་ནས་འཕགས་པས་རང་སྣང་ལྷུན་གྲུབ་ཀྱི་སྒོ་བརྒྱད་ཤར་དུས། སྟེང་དུ་ཀ་དག་ཆོས་སྐུའི་སྣང་བ་ནམ་མཁའ་སྤྲིན་མེད་ལྟ་བུ་ཐད་ཀར་ལོངས་སྐུ་འོད་གསལ་གྱི་ཞིང་སྣང་ནམ་མཁའི་དབྱིངས་ཁྱབ་པ། དེའི་རྩལ་ལས་འོག་ན་གཞི་སྣང་ཆེན་པོའི་ངང་། དེའི་རྩལ་ལས་འོག་ན་ལོངས་སྐུའི་སྣང་བ་དང་། ཕྱོགས་མཚམས་ན་རང་བཞིན་སྤྲུལ་སྐུའི་ཞིང་སྣང་དང་། མར་འོག་ནས་འཁོར་བའི་སྒོ་ལས་འགྲོ་དྲུག་རང་སྣང་གི་ཞིང་ཁམས་ཚད་མེད་པ་སྟེ། དེ་ཐམས་ཅད་ལྷུན་གྲུབ་སྒོ་བརྒྱད་ཀྱི་སྣང་བ་ལས་རང་ཤར་བས་འཁོར་འདས་ཀྱི་སྣང་བ་ཆེན་པོ་དུས་གཅིག་ལ་ཤར་བ་ཞེས་བྱ། གཞི་ལ་དག་དང་མ་དག་གཉིས་ཀ་མི་སྲིད་ཀྱང་གཞི་སྣང་ལྷུན་གྲུབ་ལ་འཁོར་འདས་གཉིས་སུ་འཆར་བའི་སྒོ་ཡོད་པ་ལ་ལྷུན་གྲུབ་སྒོ་བརྒྱད་ཀྱི་སྣང་བ་ཞེས་བྱ་སྟེ། ཐེག་མཆོག་མཛོད་ལས། ཐུགས་རྗེ་ལྟར་འཆར་བའི་གོ་མ་འགག་པས་སེམས་ཅན་ལ་སྙིང་རྗེ་འབྱུང་། འོད་ལྟར་ཤར་བའི་གོ་མ་འགག་པས་ཡེ་ཤེས་ལྔའི་རང་འོད་འཇའ་ཚོན་ལྟ་བུས་ཁེངས། ཡེ་ཤེས་ལྟར་འཆར་བའི་གོ་མ་འགག་པས་མི་རྟོག་པར་ནང་ལ་གནས། སྐུ་ལྟར་འཆར་བའི་གོ་མ་འགག་པས་ཞི་ཁྲོ་འོད་གསལ་གྱི་སྐུས་ནམ་མཁའ་ཁེངས། གཉིས་མེད་ལྟར་ཤར་བའི་གོ་མ་འགག་པ་གཅིག་དང་དུ་མར་མི་དཔྱོད་པ། མཐའ་གྲོལ་ལྟར་འཆར་བའི་གོ་མ་འགག་པས་ལྷུན་གྲུབ་རང་ངོ་ན་གསལ་བའོ། །ཞེས་གསུངས། མ་དག་པ་ལྟར་ཤར་བས་སྲིད་པའི་བྱུང་ཁུངས་མ་འགག །དག་པ་ལྟར་ཤར་བས་ཡེ་ཤེས་མ་བུ་འབྲེལ་བའོ། །དེ་ཡང་ཐུགས་རྗེ་ལྟར་ཤར་བ་མེད་ན་གདུལ་བྱ་འདུལ་བྱེད་དུ་མི་འབྲེལ། འོད་ལྟར་ཤར་བ་མེད་ན་རིག་པ་ནང་དུ་རྒྱ་ཆད། འབྱུང་བ་ཕྱིར་རྒྱ་ཆད་པས་སྣོད་བཅུད་ཀྱི་སྣང་བའང་མི་འབྱུང་ལ། གཉིས་མེད་ལྟར་ཤར་བ་མེད་ན་སེམས་ཅན་གྱི་སྒོ་གསུམ་དང་སངས་རྒྱས་ཀྱི་སྐུ་གསུང་ཐུགས་སུ་འབྲེལ་མི་ཤེས་པས་སེམས་ཅན་སངས་རྒྱས་སུའང་མི་འགྱུར། སྐུ་ལྟར་ཤར་བ་མེད་ན་འགྲོ་བའི་ལུས་དང་རྒྱལ་བའི་སྐུར་སྣང་བའང་མི་རིགས། ཡེ་ཤེས་ལྟར་ཤར་བ་མེད་ན་ཤེས་བྱ་རང་མཚན་པར་གྱུར་པས་གཞི་ལམ་འབྲེལ་བའི་མཚམས་མི་སྦྱོར། མཐའ་གྲོལ་ལྟར་ཤར་བ་མེད་ན་འབྲས་བུ་རྒྱུར་ལྡོག་པས་ངེས་པའི་ས་ཟིན་མི་ཐུབ། མ་དག་འཁོར་བའི་སྒོ་མེད་ན་སེམས་ཅན་དུ་འཁྲུལ་མི་ཤེས་པས་འཁོར་འདས་ཀྱི་བསྟི་གནས་སུ་མི་རུང་། དག་པ་ཡེ་ཤེས་ཀྱི་སྒོ་མེད་ན་རིག་ངོ་ལ་སངས་རྒྱས་ཀྱི་ཡོན་ཏན་མི་འབྱུང་ངོ་། །དེ་བས་ན་དེ་རྣམས་ལྷུན་གྲུབ་ཏུ་ཡོད་པ་ནི་ལྷུན་གྲུབ་སྒོ་བརྒྱད་ཀྱི་ཡོན་ཏན་ནོ། །སྒོ་བརྒྱད་པོ་དུས་ཅིག་ཆར་ལ་འཆར། ཅིག་ཆར་ལ་ནུབ་པར་གསུངས། ༈ འོད་ལྟར་ཤར་བ་དང་སྐུ་ལྟར་ཤར་བ་གཉིས་ཡུལ་ལྟར་ཤར། ཐུགས་རྗེ་དང་ཡེ་ཤེས་གཉིས་ཡུལ་ཅན་ལྟར་ཤར། གཉིས་མེད་དང་མཐའ་གྲོལ་ལྟར་ཤར་བ་གཉིས་ཡུལ་ཅན་དེས་ཡུལ་ལ་བྱ་བ་བྱེད་ཚུལ་ལྟར་ཤར་བས་སྣང་བ་ལ་ཡོད་ཅེས་སྒྲོ་འདོགས་པའི་བློ་མེད་པས་ཡོད་འཛིན་འཁོར་བའི་མཐའ་སེལ། རིག་པ་ལ་མེད་ཅེས་སྐུར་བ་འདེབས་པའི་བློ་མེད་པས་སྟོང་འཛིན་མྱ་ངན་ལས་འདས་པའི་མཐའ་སེལ། འདི་ལྟར་སྣང་དུས་ཀྱི་འོད་སྣང་སྟོང་གཟུགས་ཐམས་ཅད་རིག་པའི་རང་གདངས་ཡེ་ཤེས་ཀྱི་སྣང་བ་ཡིན་ནོ། ༈ །གདངས་ཕྱིར་ཤར་བ་རྐྱེན་བཞིས་ཡར་གྲོལ་ཏེ། རྒྱུའི་རྐྱེན་དངོས་པོའི་གནས་ལུགས། བདག་པོའི་རྐྱེན་རང་རིག་པའི་ཡེ་ཤེས། དམིགས་པའི་རྐྱེན་རང་སྣང་དུ་ཤེས་པ། མཚུངས་པ་དེ་མ་ཐག་པའི་རྐྱེན་དེ་རྣམས་དུས་མཚུངས་སུ་བྱུང་བའི་སྐད་ཅིག་མ་ལ་སངས་རྒྱས་པའོ། །གློག་སྒྲོན་ལས། རྒྱུའི་རྐྱེན་རིག་པ་རང་བྱུང་གི་ཡེ་ཤེས་རང་ལ་གསལ་བ། དམིགས་པའི་རྐྱེན་འོད་སྣང་སྣ་ཚོགས་སུ་ཤར་བ། བདག་པོའི་རྐྱེན་དེ་ཉིད་རང་སྣང་དུ་ངོ་ཤེས་པ། དེ་མ་ཐག་རྐྱེན་རང་བྱུང་ཡེ་ཤེས་ཆེན་པོ་དེས་མ་དག་འཁྲུལ་པའི་ས་བོན་གཏན་བཅོམ་དུ་སོང་ནས་གདོད་མའི་གཞི་དབྱིངས་ཀ་དག་གི་ཀློང་དུ་གྲོལ་བ་ལ་སྔ་ཕྱིར་གྲོལ་བ་དང་ད་ལྟ་དང་བར་དོ་སོགས་སུ་གྲོལ་བ་ལ་ཁྱད་མེད་པར། གཞི་སྣང་ཤར་བ་ངོ་ཤེས་པའི་སྐད་ཅིག་ལ་གདོད་མར་གྲོལ་ཏེ། དབྱིངས་དང་ཡེ་ཤེས་འདུ་འབྲལ་མེད་པ་ནང་གསལ་ཆོས་ཉིད་ཀྱི་དགོངས་པར་བཞུགས། ༈ ཐེག་མཆོག་མཛོད་ལས། དབྱིངས་ཀ་དག་གི་ཆོས་སྐུའི་ངང་ན་ཡེ་ཤེས་ལྷུན་གྲུབ་ཕྲ་བའི་རང་བཞིན་དུ་གནས་པ་ཡང་། གཞི་འཛིན་པའི་ཡེ་ཤེས་གསུམ་དངོས་སུ་ཕྲ་བར་གནས་ལ། དེའི་ཆ་ལས་མཚན་ཉིད་འཛིན་པའི་ཡེ་ཤེས་ལྔ་དང་། ཤེས་བྱ་མཁྱེན་པའི་ཡེ་ཤེས་འཆར་གཞིའི་ཆ་དངོས་སུ་མ་ཤར་ཙམ་དུ་ཡོད་པའོ། །ཞེས་དང་། ༈ ཚིག་དོན་མཛོད་ལས། ཆོས་སྐུ་གདོད་ནས་དག་པའི་ངོ་བོ་སྐུར་བཞུགས་པས་སྐུ་གསུམ་འདུ་འབྲལ་མེད་པའི་འཆར་གཞིར་གནས་ཀྱང་མཚན་མ་རིས་ཅན་གྱི་ཞལ་ཕྱག་ཏུ་གྲུབ་པ་ནི་ཅུང་ཟད་ཀྱང་མེད་དོ། །རང་བཞིན་གསལ་བ་འོད་ལྔར་བཞུགས་པས་གདངས་གསུམ་ཡེ་ནས་རང་གསལ་ཀྱང་ཁ་དོག་རིས་བཅས་སུ་སོ་སོར་གྲུབ་པ་ནི་མེད་དོ། །ཐུགས་རྗེ་རིག་པའི་ཡེ་ཤེས་སུ་བཞུགས་པས་མཁྱེན་པའི་ཆ་མ་འགག་པར་སོ་སོར་གསལ་ཀྱང་བྱ་བ་དང་བྱེད་པའི་རྣམ་པ་ཡུལ་ཡུལ་ཅན་དུ་སྣང་བ་ནི་མེད་དོ། ༈ །དེ་ཡང་ཀ་དག་གི་རིག་པ་ཚུར་རང་ངོ་ཤེས་པས་ཡེ་ཤེས་ཀྱི་ཚོགས་རྫོགས། ལྷུན་གྲུབ་ཀྱི་སྣང་བ་དེ་རང་སྣང་ཡིན་པ་དང་། དེ་རང་བཞིན་མེད་པར་ཤེས་པས་བསོད་ནམས་ཀྱི་ཚོགས་རྫོགས་པ་ཡིན་ཏེ། ཟག་མེད་རང་ངོ་ཤེས་པའི་དགེ་ཚོགས་ཀྱིས། །ཞེས་གསུངས། དེ་ཡང་ཀུན་ཏུ་བཟང་པོ་དགེ་བ་སྤུ་ཙམ་མ་བྱས་པར་སངས་རྒྱས་ཞེས་བརྗོད་ཀྱང་ལེགས་པར་བརྟགས་ན་ཟག་མེད་རང་ངོ་ཤེས་པ་དེ་འདུས་བྱས་ཀྱི་དགེ་རྩ་གང་གིས་ཀྱང་མི་མཚོན་ཞིང་ཐམས་ཅད་ཀྱང་དེ་རྟོགས་པའི་ཐབས་འབའ་ཞིག་ཏུ་ཟད་པས་དོན་ལ་སྒྲིབ་གཉིས་མ་སྤངས་ཡེ་སངས། ཚོགས་གཉིས་མ་བསགས་ཡེ་རྫོགས་སུ་གྱུར་པའོ། །ཚོགས་གཉིས་ནི་ཡེ་ནས་སྣང་བ་དང་སྟོང་པའི་ཡོན་ཏན་དུ་རྫོགས་ཟིན་པ་ལ་ལྷུན་གྲུབ་ཅེས་བརྗོད་དེ། གློ་བུར་དུ་བསགས་པ་དེ་ནི་དྲི་མ་སེལ་བྱེད་ཀྱི་རྐྱེན་གྱི་ཆ་ཙམ་ལ་རྒྱུ་ཚོགས་གཉིས་ཞེས་བཏགས་པ་ཙམ་མོ། །ཞེས་གསུངས། ༈ ངོ་བོ་སྟོང་པས་ཡེ་ཤེས་ཀྱི་ཚོགས་རྫོགས་ནས་ཆོས་སྐུ་ཐོབ། རང་བཞིན་གསལ་བས་བསོད་ནམས་ཀྱི་ཚོགས་རྫོགས་ནས་ལོངས་སྐུ། ཐུགས་རྗེས་ཀུན་ཁྱབ་ཀྱིས་ཚོགས་གཉིས་ཟུང་འཇུག་ཏུ་རྫོགས་ནས་སངས་རྒྱས་སྤྲུལ་པའི་སྐུ་ཐོབ་པ་ཡིན་ནོ། ༈ །འཁྲུལ་ཚུལ་ནི། གཞི་སྣང་ཤར་བ་དེ་རང་ངོ་མ་ཤེས་པའི་ཆ་ལས་འཁྲུལ་ཏེ། ཚིག་དོན་མཛོད་ལས། ཚུལ་ཇི་ལྟར་ཤར་ན་གཞི་སྣང་དུ་ཤར་དུས་ཐུགས་རྗེའི་རྩལ་ཤེས་པ་གསལ་རིག་ཡུལ་དཔྱོད་ནུས་སུ་རང་ཤར་བ་དེ་རང་ངོ་མ་ཤེས་པ་ལ་ལྟོས་ནས་མ་རིག་པ་གསུམ་དང་མཚུངས་ལྡན་དུ་ཤར་ཏེ། རྒྱུ་བདག་ཉིད་གཅིག་པའི་མ་རིག་པ་ཤེས་པར་སྐྱེས་པ་དེ་ཉིད་དུ་མ་ཤེས་པ་དང་། ལྷན་ཅིག་སྐྱེས་པའི་མ་རིག་པ་རང་ངོ་མ་ཤེས་པ་དེ་དང་ཤེས་པ་དེ་གཉིས་ལྷན་ཅིག་སྐྱེས་པ་དང་། ཀུན་བརྟགས་པའི་མ་རིག་པ་རང་སྣང་ལ་གཞན་དུ་དཔྱོད་པའི་ཆ་དང་གསུམ་མོ། །དེ་གསུམ་ཤེས་པ་གཅིག་ལ་ལྡོག་པ་ཐ་དད་ངོ་བོ་གཅིག་ཏུ་ཡོད་པ་དེས་རང་སྣང་ལ་དཔྱོད་པ་ན་གཞི་ངོ་བོ་རང་བཞིན་ཐུགས་རྗེ་གསུམ་དང་གཞི་སྣང་ལྷུན་གྲུབ་ཀྱི་འཆར་ཚུལ་སྣང་བ་ལ་གཞི་དང་གཞི་སྣང་གི་རང་བཞིན་དུ་མ་ཤེས་ཏེ་གཞན་ཡིན་པར་བཟུང་བའི་ཁྱད་པར་ལས་འཁྲུལ་ལོ། །ཞེས་དང་། དེ་ལྟ་བུའི་རྒྱུ་དེ་ལ་རྐྱེན་ནི་བཞི་སྟེ། ཚིག་དོན་མཛོད་ལས། དེ་ཡང་གཞི་སྣང་དེ་རང་ལས་བྱུང་བར་མ་ཤེས་པས་རྒྱུའི་རྐྱེན། དེ་ཉིད་ཡུལ་དུ་ཤར་བས་དམིགས་པའི་རྐྱེན། བདག་དང་བདག་གིར་བཟུང་བས་བདག་པོའི་རྐྱེན། དེ་གསུམ་དུས་མཚུངས་པས་དེ་མ་ཐག་པའི་རྐྱེན་བཞིར་འཁྲུལ་བའོ། །རྐྱེན་བཞི་པོ་དེ་ལམ་དུ་འགྲོ་ཚུལ་ནི། རྒྱུའི་སྟེང་དུ་སངས་རྒྱས་དང་སེམས་ཅན་གཅིག་པས་སྤང་བླང་ལས་འདས་པའི་ཡེ་ཤེས་སུ་ངོས་ཟིན་པས་རྒྱུའི་རྐྱེན་རང་སར་གྲོལ། ཡུལ་སྣ་ཚོགས་སུ་ཤར་བ་ཆོས་ཉིད་རང་སྣང་དུ་ལོག་པས་བདག་པོའི་རྐྱེན་ལས་གྲོལ། དེ་ཡང་རང་བྱུང་གི་ཡེ་ཤེས་ལས་མི་འདའ་བར་ཤེས་པས་དམིགས་པའི་རྐྱེན་ལས་གྲོལ། དུས་མེད་ཀུན་ཏུ་བཟང་པོ་ལ་སྔ་ཕྱི་ཕན་ཚུན་གྱི་འགལ་བས་དེ་མ་ཐག་པའི་རྐྱེན་ལས་གྲོལ་བའོ། ༈ །ཆོས་ཉིད་མངོན་སུམ་སྐབས། ཐེག་མཆོག་མཛོད་ལས། དོན་དམ་དབྱིངས་ལ་མཇལ་བའི་མངོན་སུམ་ནི་རིག་པའི་ངོ་བོ་ཆོས་ཉིད་སྙིང་ཁ་ན་ཡོད་པར་ངེས་ཏེ། དེའི་རང་གདངས་སྙིང་ནས་མིག་ཏུ་འབྲེལ་བའི་ཕྱིར་ཉི་མ་དང་འོད་ཟེར་བཞིན་ཏུ་རྒྱུ་འབྲས་ངེས་པའི་གཏན་ཚིགས་ཀྱིས་ཡིད་ཆེས་པར་མཇལ་བའོ། །རང་གི་མཚན་ཉིད་ངོས་བཟུང་བ་ནི། དབྱིངས་ལ་ཆོས་རིག་པ་ལ་ཆོས་ཉིད་དུ་གྲགས་པའི་འདི་གཉིས་ཀ་དབྱེར་མེད་དུ་འདོད་པའོ། །མངོན་པ་ནི་དབང་པོའི་སྤྱོད་ཡུལ་བ་དངོས་སུ་བལྟར་ཡོད་པའོ། །གསུམ་ནི་རྣམ་གྲངས་ཏེ་ཕྱིར་ལུས་ངག་ཡིད་གསུམ་གྱི་གནད་གསུམ་གྱིས་གཞི་བཅའ་བ། ནང་དུ་ཆོས་ཉིད་ཡུལ་གྱི་གནད། འཆར་བྱེད་སྒོའི་གནད། རླུང་རིག་གནས་པའི་གནད་གསུམ་གྱིས་ལམ་བསལ་བ་དང་། གསང་བར་གོམས་པ་ཚད་ཀྱི་རིམ་པ། སྨིན་པ་རྟགས་ཀྱི་རིམ་པ། མཐར་ཐུག་ཟད་པའི་རིམ་པ་དང་གསུམ་གྱིས་ཚད་གཟུང་བ་དང་། བླ་ན་མེད་པར་སྣང་བ་འོད། སྨིན་པ་ཐིག་ལེ། རྫོགས་པ་སྐུ་དང་གསུམ་གྱིས་འབྲས་བུ་རྫོགས་པའི་ཕྱིར། གསུམ་ཚན་བཞིར་ངེས་པས་གསུམ་ཞེས་བྱའོ། །ཡང་ན་ཆོས་ཉིད་ལ་སྐུ་གསུམ་ལྷུན་གྲུབ་ཏུ་ཡོད་པའི་རང་གདངས་སྣང་བ་གསུམ་ཕྱིར་ཤར་བའི་གྲངས། ཆོས་སྐུའི་རང་གདངས་ནང་མྱོང་བ་རིག་སྟོང་། ལོངས་སྐུའི་རང་གདངས་འོད་ལྔ་ཕྱིར་གསལ་བ་ཡེ་ཤེས་རང་གསལ། སྤྲུལ་སྐུའི་རང་གདངས་ཤར་གྲོལ་རིས་མེད་ཤེས་རབ་ཀྱི་རྩལ་དང་བཅས་པ་གསུམ་ལ་ལྟོས་ནས་གསུམ་ཞེས་བྱའོ། ༈ །ཆོས་ཉིད་མངོན་སུམ་ལ་ཡིད་དཔྱོད་ཚིག་གིས་སྒྲོ་གདགས་སུ་མེད་པའི་གནད། གོམ་པའི་དུས་ན་འོད་ཐིག་ལེ་སྐུ་གསུམ་མཐོང་བས་འཁྲུལ་བའི་སྣང་བ་རང་འགག་པའི་གནད། ཚད་དུ་ཕྱིན་པའི་དུས་ན་གསལ་བ་སྟོང་པ་བདེ་བ་གསུམ་མངོན་པར་མཐོང་བས། ཆོས་ཉིད་ཟད་པའི་གནད་དོ། ༈ །སྣང་བ་ནི་གང་སྣང་ན་ཆོས་ཉིད་སྣང་ལ། ཡུལ་གང་ལ་སྣང་ན་དབྱིངས་ལ་སྣང་། ཚུལ་ཇི་ལྟར་སྣང་ན་འོད་དང་འོད་ཁྱིམ་རིག་པ་ལུ་གུ་རྒྱུད་དང་བཅས་པ་སྣང་། སྣང་བ་དེ་ཉམས་སུ་བླངས་པ་ལས་འབྲས་བུ་གདོས་བཅས་མི་སྣང་བར་སངས་རྒྱས་པའོ། །ཞེས་སོ། ། ༈ གཉུག་སེམས་ལས། རིག་པའི་རྩལ་ལས་ཚོགས་བརྒྱད་འཆར་ཚུལ་དང་། རིག་པ་ཡེ་ཤེས་ཀྱི་གནས་ལུགས་མ་རྟོགས་ན་རྣམ་ཤེས་ཚོགས་བརྒྱད་ཀྱིས་འཁོར་བར་འཁྱམས་པ་དང་། ཡེ་ཤེས་རྟོགས་ན་ཚོགས་བརྒྱད་པོ་ཡེ་ཤེས་ལྔར་འཆར་ཚུལ་གསུངས། ཞེས་དང་། དབྱིངས་རིག་དབྱེར་མེད་སོ་སོ་རང་གིས་རིག་པའི་གནས་ལུགས་དེའི་ངང་ནས། བག་ཆགས་སྣ་ཚོགས་འཛིན་པའི་འཕོ་འགྱུར་ཅན་གྱི་སེམས་མེད་པས་ཀུན་གཞིའི་རྣམ་ཤེས་ཇི་ལྟར་ཡིན། ཕྱི་ཚོགས་དྲུག་གི་ཡུལ་དང་། ནང་བདག་ཏུ་འཛིན་པའི་བློ་དང་། དེའི་ཡུལ་དུ་གྱུར་པའི་མཚན་མ་ཅུང་ཟད་ཀྱང་མེད་པས་སྒོ་ལྔའི་རྣམ་ཤེས་དང་ཡིད་དང་ཉོན་ཡིད་ཇི་ལྟར་ཡིན་ཏེ། སྤྲོས་བྲལ་དོན་གསལ་ཆེན་པོའི་རྒྱུད་ལས། འཕེལ་འགྲིབ་མེད་པས་ཀུན་གཞིའི་རྣམ་ཤེས་ལས་གྲོལ། གཟུང་འཛིན་མེད་པས་ཡིད་ཀྱི་རྣམ་ཤེས་ལས་གྲོལ། སྐྱེ་འགག་མེད་པས་སྒོ་ལྔའི་རྣམ་ཤེས་ལས་གྲོལ་ཞིང་ལོག་པའོ། །ཞེས་སོ། ༈ །རྣལ་འབྱོར་པ་རྣམས་ཀྱིས་སེམས་ཀྱི་ཆོས་ཉིད་རྟོགས་པའི་དུས་ན། རྟོགས་པ་དེའི་ངོར་རྣམ་ཤེས་ཚོགས་བརྒྱད་རང་མཚན་པ་རྡུལ་ཙམ་མེད་དེ། །རྣམ་ཤེས་ཉིད་ཡེ་ཤེས་སུ་འཆར་ཞིང་། ཆོས་ཐམས་ཅད་ཀྱང་དེ་བཞིན་དུ་རང་བཞིན་གྱིས་རྣམ་པར་དག་པ་ཉིད་དུ་འཆར་རོ། ༈ །གྲུབ་མཐའ་མཛོད་ལས། རྟེན་ཀུན་གཞིའི་རྣམ་པར་ཤེས་པའི་སེམས་དང་། ཉོན་ཡིད་ཡིད་ཤེས་དང་། སྒོ་ལྔའི་རྣམ་ཤེས་རྣམས་མེད་པའི་ཏིང་ངེ་འཛིན་ལ། མངོན་སུམ་ལ་ལྟ་བས་ན་ནང་ཀུན་རྟོག་འཕྲོ་འདུ་མེད་པས་འདོད་པའི་སེམས་ལོག །གསལ་བའི་ངང་ལ་གསལ་བར་འཇོག་བྱེད་ཀྱི་གཉེན་པོ་མེད་པས་གཟུགས་ཀྱི་སེམས་ལོག །རྟོག་མེད་རྩེ་གཅིག་ལ་ཆོས་ཉིད་ཀྱི་ངང་དུ་ཞེན་པའི་བློ་མེད་པས་གཟུགས་མེད་ཀྱི་སེམས་ལོག་པས་ཁམས་གསུམ་པའི་སེམས་ཉེ་བར་ཞི་བའོ། །དེའང་ཀུན་གཞི་ནི་རྟོག་མེད་དྭངས་མ་ཕྱེད་པ་ལུང་མ་བསྟན་ཡིན་ལ། འདིར་དྭངས་ལ་རིག་པའི་ཕྱིར་ཀུན་གཞི་ལོགཀུན་གཞི་རྣམ་ཤེས་གསལ་བ་ཙམ་རིས་སུ་མ་ཆད་པར་གནས་པའི་ཆ་དེ་རང་རིག་པའི་ངོ་བོར་མ་ཤེས་པ་ལས། འདིར་རང་བྱུང་གི་ཡེ་ཤེས་སུ་ཐག་ཆོད་པས་དྭངས་གསལ་སྤྲོས་པ་དང་བྲལ་བས་དེ་དང་མི་འདྲ་བས་ལོག །སྒོ་ལྔའི་རྣམ་ཤེས་ཡུལ་སོ་སོར་གསལ་བ་ལས། འདིར་སྣང་བ་འོད་གསལ་གྱི་ཡུལ་སྣང་བས་ཐ་མལ་གཟུགས་འཛིན་མིག་གི་རྣམ་ཤེས་ལས་ལོག །དེ་བཞིན་དུ་སྒྲ་ལ་སོགས་པའི་རྗེས་སུ་མི་འགྲོ་ཞིང་མི་འཛིན་པས་རྣ་བའི་རྣམ་ཤེས་ལས་ལོག །དེ་ལ་སོགས་པ་གཞན་ནས་ཀྱང་ལོག །དེའི་ཚེ་རྟོག་པ་དང་དཔྱོད་པ་ཆགས་སྡང་གང་ཡང་མེད་པས་ཡིད་ཤེས་དང་ཉོན་ཡིིད་ལས་ལོག་སྟེ། ཀུན་གཞི་ཚོགས་བརྒྱད་དང་བཅས་པ་ཁམས་གསུམ་པའི་སེམས་ལས་རྣམ་པར་གྲོལ་བ་ནི་སངས་རྒྱས་ཀྱི་ཡེ་ཤེས་ཞི་བ་ཉིད་ལས་གཞན་མ་ཡིན་པས་མཐར་ཐུག་པའོ།། །། |