ཞལ་གདམས་གོ་བདེ་ངེས་ལེགས་སྒྲོན་མེ།ཀྱེ་ཀྱེ། གསོན་དང་སྐལ་བཟང་གཞོན་ནུ། །འདི་སྣང་སྒྱུ་མའི་གྲོང་ན། །འཕྲལ་བདེའི་སྣང་ཤེས་སྤྲོ་ཡང་། །འདོད་ལྔ་ཡུལ་གྱི་བསླུ་བྲིད། །སྡིག་སྡུག་རྩོད་པའི་གཞི་མ། །དུག་བཞིན་སྤོང་བ་ལེགས་སོ། །ཐོས་སོགས་ཡོན་ཏན་རྒྱ་མཚོའི། །གཞི་རྟེན་ཚུལ་ཁྲིམས་བསླབ་པ། །འདི་གཅིག་ཐར་འདོད་ཡོངས་ལ། །མེད་ཐབས་མེད་པའི་ཆོས་ལགས། །ཐོས་བསམ་དག་པའི་མིག་དཀྱུས། །གནས་ལྔ་ཤེས་བྱའི་ཚུལ་ལ། །ཕྱོགས་ལྷུང་མེད་པའི་མཁྱེན་རྒྱ། །གོང་འཕེལ་ཅིས་ཀྱང་མཛོད་དང་། །ཐུན་མིན་ལམ་གྱི་ཟབ་གནད། །འོད་གསལ་ཐེག་རྩེའི་དགོངས་དོན། །མངོན་སུམ་ཆོས་ཉིད་རྗེན་པ། །རྟོགས་ལ་དཀའ་ལས་མི་དགོས། །མ་རྟོགས་རྟོག་གེའི་ཟེར་སྒྲོས། །ཧ་ཅང་འཇུར་སེམས་སྒྲིམ་པོས། །གནས་ལུགས་གཏན་ལ་མི་འབེབས། །དེ་འདྲའི་ལད་མོ་མ་མཛད། །མཐའ་བྲལ་དབུ་མའི་ལྟ་བ། །སྟོང་ཆེན་བདེ་བ་ཆེན་པོ། །བློ་བྲལ་རིག་པའི་ཐིག་ལེར། །ཟུང་འཇུག་ཐེག་རྩེའི་ཁྱད་ཆོས། །སྤྲོས་ཀུན་འགོགས་པའི་གོ་ཡུལ། །བློ་ལ་ངེས་ཙམ་མིན་པའི། །རང་གསལ་མངོན་སུམ་རྟོགས་པ། །ཐེག་རྩེའི་ཁྱད་ཆོས་ལགས་སོ། །སྟོང་པ་སེམས་ཀྱིས་མ་དཔྱད། །གསལ་བ་ཉམས་ཀྱིས་མ་སླད། །རང་བབས་ཟང་ཐལ་རྗེན་པ། །གཤིས་ཀྱི་གནས་ལུགས་ལགས་སོ། །དེ་སྐད་ཡིད་ལ་གང་དྲན། །དུམ་ཆོད་གླུ་རུ་བླངས་སོ། །ཞེས་རྒྱ་ཟིལ་སྤྲུལ་སྐུ་ལ་གདམས་པའོ། ། |