གསོལ་འདེབས་སྐྱིད་གླུའི་རྒྱང་འབོད།

ཨ་ཧོ་ཡེ། གཞི་དབྱིངས་ཁྱད་ཆོས་དྲུག་ལྡན་འོད་གསལ་གྱི་ཕོ་བྲང་། །མ་བཅོས་གཉུག་མའི་རང་ངོ་སྐུ་གསུམ་གྱི་ཞལ་ཚབ། །བླ་མ་ཕྱི་ན་མི་བཞུགས་རང་རིག་ལ་རྫོགས་པ། །མངོན་སུམ་རྟོགས་པའི་བློ་ཆོད་གཞོན་པ་ངའི་སྐྱིད་པ། །སྣང་བ་ལྷ་སྐུར་ཤར་བ་དག་ཆེན་གྱི་བསྐྱེད་རིམ། །སྒྲ་གྲག་སྔགས་སུ་ཤེས་པ་རང་བབས་ཀྱི་བཟླས་བརྗོད། །རྟོག་ཚོགས་ཡེ་ནས་གྲོལ་བ་ཆོས་ཟད་ཀྱི་སྐྱེལ་སོ། །གང་ཡང་ལམ་དུ་གྱུར་པའི་སྤྲང་པོ་ངའི་སྐྱིད་པ། །འདི་འདྲའི་རྟོགས་པའི་ཕ་ཕོགས་རྗེ་བཙུན་གྱི་སྐུ་དྲིན། །ནམ་ཡང་འཁོར་ཐབས་མེད་དོ་དྲིན་ཆེན་གྱི་བླ་མ། །ཤུགས་འབྱུང་མོས་གུས་སོ་མའི་གདུང་ཤུགས་ཀྱིས་བསྐུལ་ནས། །གསོལ་འདེབས་རྒྱང་གླུའི་འབོད་པས་གླུ་ཆུང་ཞིག་ལེན་ནོ། །