འཁོར་གྱི་སྣང་ཚུལ་སྟོན་པའི་མཚར་གཏམ་མེ་ལོང་གསར་པ།

སྐུ་གསུམ་སྟོན་པའི་གསུང་གི་གསང་བ་ཟབ་མོ་ཚིག་དང་ཡི་གེའི་བརྡ་རུ་ལེགས་སྣང་བའི། །གསང་རྒྱུད་རྒྱ་མཚོའི་ཚིག་ཙམ་ཐོས་པའང་བསྐལ་པ་དུ་མར་འདི་ལྟར་ཡང་ཡང་རྙེད་པར་དཀའ། །འོན་ཀྱང་འདི་ན་ལང་ཚོ་རྙིང་པའི་ཁུར་གྱིས་དུབ་རྣམས་སོས་ཁའི་ཚད་པའི་མྱོས་ཆང་གིས། །འདུ་ཤེས་ཉམས་པའི་མགོ་བོ་འགུལ་བས་མི་ཐེག་སྨིན་པའི་ཤིང་འབྲས་བཞིན་དུ་ཡང་ཡང་དུད། །ལང་ཚོའི་མེ་ཏོག་གསར་པའི་གཞོན་ནུ་མཆོག་དང་མཆོག་མིན་རྣམ་རིག་གསལ་བའི་ཟློས་གར་ལ། །གཅིག་ཏུ་བརྩོན་པའི་ཡལ་གའི་རི་དྭགས་གར་ལ་ཚུད་བཞིན་ཡན་ལག་གཡོ་བས་བྲེལ་ཞིང་ཟིང་། །ཕལ་ཆེར་ལུང་དུ་བསྟན་པ་མིན་པའི་ཀུན་སློང་རང་གས་ཕྲེང་བའི་གྲངས་འདྲེན་མིག་དཀྱུས་གཡོ། །འགའ་ཞིག་ཆོས་ཀྱི་ཚིག་དོན་རྣམ་དབྱེ་ཡི་གེའི་འདུ་བྱེད་ཟིན་པ་མེད་པའི་ལས་ཀྱིས་བྲེལ། །ཁ་ཅིག་རྣམ་པར་མི་རྟོག་ཟོལ་ཡང་རྣམ་པར་རིག་བྱེད་ཤེལ་གྱི་ཁང་བུའི་གཟུགས་བཞིན་གསལ། །བདག་ཅག་རྣམས་ཀྱི་སྣང་ཚུལ་གཡོ་མེད་དྲང་པོར་བརྗོད་ན་ཅུང་ཞིག་གསོན་དང་གད་མོ་འཆོར། །ཞེས་པའང་ཡབ་རྗེ་ངག་དབང་ནོར་བུས་རྙིང་རྒྱུད་ལུང་གསུང་སྐབས་འཁོར་གྱི་ངང་ཚུལ་ལ་གཟིགས་ཏེ་མཚུངས་མེད་ཡོན་ཏན་མགོན་པོས་གསུངས་པའོ། །