ལེའུ་ཉེར་གཅིག་པ། སྨན་གྱི་སྡེ་ཚན་དང་སྦྱར་ཐབས་བསྟན་པ།
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག སྦྱར་ཐབས་སྡེ་ཚན་རོ་སྦྱོར་ནུས་པར་སྦྱར། ནད་གང་སེལ་བ་སྨན་གྱི་སྡེ་བསྟན་པ། །ག་བུར་ཙན་དན་དཀར་པོ་གི་ཝཾ་དང༌། །ཅུ་གང་གུར་ཀུམ་ཨུཏྤལ་སྔོན་པོ་རྣམས། །ཚ་བ་ཐུན་མོང་སྤྱིར་འཇོམས་སྨན་སྡེ་ཡིན། །ཏིག་ཏ་གསེར་གྱི་མེ་ཏོག་དུག་མོ་ཉུང༌། །བོང་ང་དཀར་པོ་རྩ་མཁྲིས་གཡའ་ཀྱི་མ། །ཀྱི་ལྕེ་སྐྱེར་པ་མཁྲིས་པ་སེལ་བའི་སྡེ། །ཙན་དན་དམར་པོ་མཛོ་མོ་སེང་ལྡེང་དང་། །ཧོང་ལེན་བ་ཤ་ཀ་དང་སྐྱུ་རུ་ར། །རེ་སྐོན་སྤང་རྩི་དོ་བོ་བཙོད་དང་ཚོས། །ཁྲག་ནད་སེལ་བར་བྱེད་པའི་སྨན་སྡེ་ཡིན། །གི་ཝཾ་གསེར་གྱི་མེ་ཏོག་བོང་ང་དཀར། །ག་དུར་བྱི་ཚེར་དེ་བ་པར་པ་ཏ། །ཁྲག་རྐང་རིམས་ནད་སེལ་བའི་སྨན་སྡེ་ཡིན། །གླ་རྩི་བོང་ང་དཀར་སེར་དམར་པོ་གསུམ། །ཁྱུང་སྡེར་དཀར་སྨུག་དཔའ་བོ་དཀར་སེར་རྩད། །རྣམ་པར་རྒུ་ཐུབ་སྟག་ཤ་ཧ་བོ་དང༌། །ཡུང་བ་གང་ག་ཆུང་དང་རེ་རལ་དང༌། །འོམ་བུ་སྤང་རྒྱན་སྤང་རྩི་དོ་བོ་དང༌། །སེ་རྒོད་སྐྱེར་པའི་བར་ཤུན་དུག་སྨན་སྡེ། །ཅུ་གང་ཤིང་མངར་རྒུན་འབྲུམ་སྟར་བུ་དང༌། །རུ་རྟ་ག་དུར་ཨ་ཀྲོང་སྲོ་ལོ་དཀར། །སུག་འདྲ་ལ་སོགས་གློ་སྨན་སྡེ་ཚན་ཡིན། །སླེ་ཏྲེས་ཀཎྜ་ཀ་རི་ཨ་ག་རུ། །གོ་སྙོད་རུ་རྟ་གུ་གུལ་སྒོག་སྐྱ་རྣམས། །རླུང་དང་ཚན་པར་ལྡན་པའི་སྨན་སྡེ་ཡིན། །བསེ་ཡབ་མ་ནུ་འུ་སུ་སྟར་བུ་དང༌། །ཨུཏྤལ་སེ་འབྲུ་སྒ་སྐྱ་སྐྱུ་རུ་ར། །བད་ཀན་ཚ་བ་སེལ་བའི་སྨན་སྡེ་ཡིན། །སྨན་སྒ་སྒ་སྐྱ་ཤིང་ཀུན་ཁ་རུ་ཚྭ། །བཙོང་སྒོག་བད་རླུང་སེལ་བའི་སྨན་སྡེ་ཡིན། །སེ་འབྲུ་ཕོ་བ་རིས་དང་པི་པི་ལིང༌། །སྨན་སྒ་ཙི་ཏྲ་ཀ་དང་ཀ་ཀོ་ལ། །སུག་སྨེལ་ཤིང་ཚ་འཇམ་འབྲས་བྱི་ཏང་ག །ད་ལིས་ཟི་ར་ནག་པོ་ལ་ལ་ཕུད། །དབྱི་མོང་སྲུབ་ཀ་ལྕེ་ཚ་ཙབས་རུ་ཚྭ། །རྒྱ་ཚྭ་རྒྱམ་ཚྭ་རྭ་ཚྭ་ཐལ་ཚྭ་རྣམས། །བད་ཀན་གྲང་བ་སེལ་བའི་སྨན་སྡེ་ཡིན། །ཛཱ་ཏི་བུ་རམ་རུས་སྣ་རླུང་སྨན་ཡིན། །སྤོས་དཀར་ཐལ་ཀ་རྡོ་རྗེ་སོ་མ་ར། །སེང་ལྡེང་སྐྱེར་པ་ཆུ་སེར་སྨན་གྱི་སྡེ། །གླ་རྩི་ཤིང་ཀུན་སྒོག་སྐྱ་མ་རུ་ཙེ། །ཐང་ཕྲོམ་ལང་ཏང་ཚེ་དང་བྱི་ཏང་གདྲེས་འབྲུ་འབུ་སྐྱོགས་ཕུར་ཐལ་སྲིན་ཤིང་འབྲུ། །དྭ་བ་གཡེར་མ་སྤྲུ་མ་སྲིན་སྨན་སྡེ། །ཀ་པེད་བིལ་བ་ད་ཏྲིག་མོན་ཆ་ར། །སྨག་དང་ཐ་རམས་ན་རམས་རྒྱ་སྐྱེགས་ཤིང༌། །གཙོད་ཁྲག་བྱ་རྐང་འཁྲུ་གཅོད་སྨན་སྡེ་ཡིན། །རྒྱ་ཚྭ་རྒྱམ་ཚྭ་གསེར་གྱི་བྱེ་མ་དང༌། །སྡིག་སྲིན་སུག་སྨེལ་ཉི་དགའ་ཆུ་སྨན་སྟེ། །སོན་ཆ་རི་ཤོ་སྤྱང་ཚེར་ཤུ་དག་དང༌། །གསེར་ཕུད་འབྲི་ཏ་ས་འཛིན་སྐྱི་འབྲུ་དང༌། །གཡའ་ཀྱི་ཡུངས་ཀར་ལ་སོགས་སྐྱུགས་སྨན་སྡེ། །ཨ་རུ་དནྡ་དོང་ག་ཤྲཱི་ཁཎ། །དུར་བྱིད་ཐར་ནུ་ལྕུམ་རྩ་སྔོན་བུ་དང༌། །ཁྲོན་བུ་ཙི་སྟག་རེ་ལྕག་ཆུ་རྩ་རྣམས། །འཁྲུ་བར་བྱེད་པའི་སྨན་གྱི་སྡེ་ཚན་ཡིན། །སྦྱར་ཐབས་རོ་སྦྱོར་ནུས་པར་སྦྱོར་བ་གཉིས། །རོ་བསྡེབས་སྦྱོར་བ་ལྔ་བཅུ་རྩ་བདུན་ཏེ། །གཉིས་པར་སྦྱར་ལ་མངར་ལྔ་སྐྱུར་བ་བཞི། །ལན་ཚ་གསུམ་ལ་ཁ་གཉིས་ཚ་བ་གཅིག །གསུམ་དུ་སྦྱར་ལ་མངར་བཅུ་སྐྱུར་བ་དྲུག ལན་ཚ་གསུམ་ལ་ཁ་བ་གཅིག་པུ་ཉིད། བཞི་སྦྱར་མངར་བཅུ་སྐྱུར་བཞི་ལན་ཚྭ་གཅིག །ལྔ་སྦྱོར་མངར་བ་ལྔ་ལ་སྐྱུར་བ་གཅིག བཞི་པ་གཉིས་པ་བཅོ་ལྔ་ལྔ་པ་དྲུག །གསུམ་པ་ཉི་ཤུ་དྲུག་ཏུ་སྦྱར་བ་གཅིག །རྐྱང་པ་དྲུག་སྟེ་དྲུག་ཅུ་རྩ་གསུམ་མོ། འཕེལ་ཟད་བདུན་ཅུ་རྩ་བཞིའི་གཉེན་པོར་སྦྱོར། །ནུས་པར་སྦྱར་ལ་ཞི་དང་སྦྱང་བ་གཉིས། །ཞི་བྱེད་སྨན་སྦྱོར་སྡེ་ཚན་ལྔ་འམ་བདུན། ཐང་ཕྱེ་རིལ་བུ་ལྡེ་གུ་སྨན་མར་ལྔ་། །སྨན་ཆང་འབྲི་ཏ་གཉིས་ཏེ་བདུན་དུ་བཤད། །སྦྱོང་བྱེད་འཇམ་རྩི་བཤལ་སྐྱུགས་ནི་རུ་ཧ། སྣ་སྦྱོངས་ཉེས་གསུམ་འདུས་པ་མགོ་ནད་འབྱིན། །བཞི་བརྒྱ་རྩ་བཞི་ནད་ཀྱི་གཉེན་པོར་སྦྱོར།ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྨན་གྱི་སྡེ་ཚན་དང་སྦྱར་ཐབས་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །།