ལེའུ་ཉེར་ལྔ་པ། ངན་གཡོ་སྐྱོན་བརྟག
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ངན་གཡོ་སྐྱོན་གྱི་སྒོ་ནས་བརྟག་པ་ནི། མཚན་ཉིད་ཤེས་བྱ་མཚང་འབྲུ་དེ་དུས་བསྲིང༌། །སྔར་རྗེས་བཅད་དང་བཅུད་ལ་བོར་བ་དང༌། །ཁ་བཅིང་སྤོ་ལ་གདོན་དང་ཐབས་འོག་གཞུག །དང་པོ་མཚན་ཉིད་ཤེས་པར་བྱ་བ་ནི། །ནད་ཀུན་སྤྱི་དང་ཁྱད་པར་རྟགས་ཤེས་པས། འདི་ན་ཙམ་ལས་འདི་འོང་རྟོགས་པར་འགྱུར།དེ་ཕྱིར་འདི་ལ་གོམས་ཤིང་འདྲིས་པ་གཅེས། ། རིན་ཆེན་ལ་སོགས་བཟང་ངན་ཤེས་པ་ཡང༌། བསྟན་བཅོས་མ་ཡིན་དེ་མེད་པར་ཡང་མིན། །མཚང་འབྲུ་ཕོ་ཉ་འབྲེལ་བ་ཐབས་ཀྱི་ཕྱིར། ཅི་ན་ཇི་ལྟར་གང་བཏང་སུ་ཡིན་དང༌། ཞག་གྲངས་དཔྱད་པས་མི་སྨྲ་མངོན་པར་ཤེས། །དུས་བསྲིང་རིངས་སྟབས་མ་ཡིན་ཐང་ཅིག་གནས། །དེ་བར་ལུས་ངག་མ་ཡེངས་གཏམ་ལ་དཔྱད། །རྗེས་བཅད་གཏར་བསྲེག་སྨན་སྦྱོར་ཅི་བྱས་བཙལ། བརྙེད་པ་ཙམ་གྱིས་ཚ་གྲང་ཕྱོགས་མཐུན་རྟོགས། ། །བཅུད་ལ་བོར་བ་མི་སྨྲ་མ་རྟོགས་ན། སྒྲོག་ཕྱིར་ངན་པ་མི་བྱ་གདོན་བཅོས་དགོས། ། སྨན་ཅིག་སྦྱར་ན་ཕན་ཞེས་བྱིང་པོར་སྨྲ། ངང་གིས་མི་ཐུབ་འདི་ན་ཅི་བྱ་འབྱིན། །ཁ་བཅིང་ཞེས་པ་ཁ་ཅིག་ཕྲད་པའི་ཚེ། སྨྲ་བར་བྱེད་པ་སྨོས་པས་ཚུད་བྱས་ཏེ། །ཅི་ན་སྨན་པས་ཤེས་ཀྱི་བཤད་མི་དགོས། ། གསལ་བར་བརྗོད་པས་སྐྱེ་བོ་ངོ་མཚར་ཟེར། །སྤོ་ལ་གདོན་པ་ཐབས་ཀྱིས་རྟོགས་གྱུར་ན། གཞན་དག་རྩ་ཆུ་ན་ལུགས་མང་བརྟག་དགོས། །ང་ལ་མ་ཡིན་གཅིག་ལ་ཁ་དམར་གདགས། །མིག་བལྟས་ཙམ་གྱིས་ཆོག་ཅེས་གྲགས་པ་འབྱུང་། །ཡང་ན་ཞིབ་ཏུ་དཔྱད་པས་བརྟག་མཁས་ཟེར། །ཐབས་འོག་གཞུག་པ་ཀུན་གྱིས་སྐད་མི་སྟེར། རྣམ་པའི་ཁ་དམར་བཏགས་ལ་རྫོང་ལ་བྲོས། །དང་པོ་ཟས་སྤྱོད་མི་འཕྲོད་གདོན་གྱིས་རྐྱེན། རུལ་སྐྱུར་དྲག་ཤུལ་རྗེན་ཟས་གནོད་ཅེས་བྱ། །གཉེན་པོ་ཕན་གནོད་མེད་པའི་སྙོམས་པ་དབོག །རྫོང་ལ་འབྲོས་པ་ནད་དང་སྨན་གྱི་མིང་། །སྔ་ན་མ་གྲགས་མི་ཤེས་ངོ་མཚར་བརྗོད། །དེ་ཡིས་མ་རྟོགས་གྱུར་ཀྱང་མཁས་ཁྱད་འབྱིན།ཞེས་གསུངས་སོ། །བདུན་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ངན་གཡོ་སྐྱོན་གྱི་སྒོ་ནས་བརྟག་པའི་ལེའུ་སྟེ་ཉི་ཤུ་རྩ་ལྔ་པའོ།། །།