ཐོག་མཐའ་བར་གསུམ་དགེ་བའི་གཏམ་ལྟ་བསྒོམ་སྤྱོད་གསུམ་ཉམས་ལེན་དམ་པའི་སྙིང་ནོར།
ཐོག་མཐའ་བར་གསུམ་དུ་དགེ་བའི་གཏམ་ལྟ་སྒོམ་སྤྱོད་གསུམ་ཉམས་ལེན་དམ་པའི་སྙིང་ནོར་ཞེས་བྱ་བ་བཞུགས་སོ།། །།
ན་མོ་ལོ་ཀེ་ཤྭ་རཱ་ཡ། གང་མཚན་བདུད་རྩིའི་ཟེགས་མ་གཅིག་ལྷུང་བས། །ཚེ་རབས་དུ་མར་རྣ་བར་ཆོས་ཀྱི་སྒྲས། །འགེངས་པའི་ངོ་མཚར་རིན་ཆེན་རྣམ་གསུམ་ཞེས། །གྲགས་པའི་དཔལ་དེས་ཀུན་ཏུ་ཤིས་གྱུར་ཅིག །གང་ཞིག་སྟོན་གྱི་དུས་ན་ཨ་མྲའི་འབྲས། །ཁ་ཅིག་ནང་མ་སྨིན་ཀྱང་ཕྱི་སྨིན་འདྲ། །སྣང་བ་དེ་ལྟར་ཆོས་པའི་གཟུགས་བརྙན་བདག །སེམས་དང་ཆོས་མ་འདྲེས་ཕྱིར་ཆོས་གཏམ་དཀོན། །དེ་ལྟ་ན་ཡང་དམ་པ་ཁྱེད་ཀྱི་བཀས། །བསྐུལ་བའི་ནན་མ་ལྡོག་ཕྱིར་དྲང་པོའི་ངག །སྙིགས་སྤྱོད་ཕལ་པའི་ཚུལ་དང་མི་མཐུན་པར། །གཡོ་སྒྱུ་མེད་པའི་སེམས་ཀྱིས་གསོལ་འདིར་དགོངས། །དྲང་སྲོང་ཆེན་པོ་ཐུབ་དབང་ལྷའི་ཡང་ལྷས། །དྲང་པོའི་ལམ་ནས་དྲང་པོའི་གོ་
འཕང་བརྙེས། །དྲང་པོའི་ལམ་བཟང་འགྲོ་ལ་དྲང་པོར་སྟོན། །དེ་སླད་དྲང་སྲོང་ཆེ་ཞེས་གྲགས་མིན་ནམ། །ཀྱེ་མ་སྙིགས་མའི་དུས་འདིར་འགྲོ་བའི་རྒྱུད། །དྲང་པོའི་གཞུང་བཟང་ཉམས་ནས་གཡོ་སྒྱུ་སྤྱོད། །དེ་སླད་འཁྱོག་པོའི་བློ་དང་འཁྱོག་པོའི་ངག །གྱ་གྱུས་གཞན་སེམས་བསླུ་ལ་སུ་ཡིད་གཏོད། །ཀྱེ་ཧུད་སྙིགས་འགྲོ་མཐོང་ནས་བློ་འདི་རྨོངས། །ཀྱེ་མ་སུ་ཡི་ངག་ལ་སུ་ཡིད་རྟོན། །མི་སྲུན་སྲིན་པོའི་གླིང་ན་གནས་འདྲ་འདི། །དགོངས་ནས་རང་དྲིན་རང་ལ་ཆེ་བར་མཛོད། །སྔོན་ཡང་རང་སེམས་རྣམ་ཤེས་གཅིག་པུ་ཞིག །འཁྱམས་ཤིང་ལས་ཀྱིས་བདས་ནས་འདིར་སྐྱེས་ཟིན། །ད་ཡང་མར་གྱི་དཀྱིལ་ནས་སྤུ་བཏོན་ལྟར། །ཐམས་ཅད་བཞག་ནས་རང་ཉིད་གཅིག་པུར་འགྲོ། །རང་
སེམས་རང་ལ་མི་དཀར་ཐབས་མེད་ཀྱིས། །རང་བློ་རང་ལ་མི་དྲང་མི་སྲིད་ཀྱིས། །རང་དོན་སྙིང་པོའི་ལྷ་ཆོས་མ་འགྲུབ་ན། །རང་སྲིད་རང་གིས་བརླག་པ་མ་ཡིན་ནམ། །སྙིགས་མའི་སྐྱེ་བོ་བསམ་སྤྱོད་དམན་ཆེས་པས། །སུས་ཀྱང་རང་ལ་མི་ཕན་གཡོ་སྒྱུས་བསླུ། །སུ་ལའང་རང་གིས་ཕན་པ་འགྲུབ་དཀའ་བས། །འདུ་འཛིའི་འབྲེལ་ཐག་བཅད་ན་མི་ལེགས་སམ། །བཀུར་ཀྱང་གོང་མ་མཉེས་དུས་མི་འོང་གིས། །སྐྱོང་ཡང་འོག་མ་མགུ་དུས་མི་འོང་གིས། །བརྩེ་ཡང་ཕར་བསམ་ཚུར་ལ་མི་སེམས་པའི། །ཚུལ་འདི་དགོངས་ལ་བློ་ཐག་ཆོད་པར་མཛོད། །མཁས་ཀྱང་བསྟན་དོན་མི་འགྲུབ་རྩོད་པ་འཕེལ། །གྲུབ་ཀྱང་གཞན་དོན་མི་འབྱུང་སྒྲོ་སྐུར་མང་། །མཐོ་ཡང་སྡེ་ཆུས་མི་འོང་ཁེངས་ལོག་ཆེ། །ད་ལྟའི་དུས་འདི་དགོངས་ལ་སྐྱོ་བར་མཛོད། །བཤད་ཀྱང་བདེན་དུ་མི་འཛིན་གཞན་དུ་གོ །ཕན་སེམས་གཏིང་ནས་དཀར་ཀྱང་ལོག་པར་འཛིན། །འཁྱོག་པོས་དྲང་པོ་འཁྱོག་པོར་མཐོང་དུས་འདིར། །སུ་ལའང་ཕན་པ་མི་འགྲུབ་རེ་ཐག་ཆོད། །ཆོས་ཀུན་སྒྱུ་མ་ལྟ་བུར་རྒྱལ་བས་གསུངས། །ད་ནི་སྒྱུ་མ་ལས་ཀྱང་སྒྱུ་ཆེན་ཏེ། །གཡོ་སྒྱུའི་སྒྱུ་མ་ཤོམ་པའི་མིག་འཕྲུལ་མཁན། །སྙིགས་སྤྱོད་སྒྱུ་མ་འདི་ལ་འཇིགས་པར་མཛོད། །གཏམ་རྣམས་བྲག་ཅ་ལྟ་བུ་རྒྱལ་བས་གསུངས། །ད་ནི་བྲག་ཅ་ལས་ཀྱང་ཡང་ཅ་སྟེ། །ཁ་དང་དོན་དུ་མི་མཚུངས་
བྲག་ཅའི་གཏམ། །སླུ་ཚིག་བྲག་ཅ་འདི་ལ་སུན་པ་སྐྱེད། །སུ་མཐོང་མི་མ་ལགས་ཏེ་སླུ་བྱེད་མཁན། །སུས་བཤད་གཏམ་མ་ལགས་ཏེ་བསླུ་བྲིད་ཚིག །ད་ནི་སུ་ལའང་བློ་གཏད་མི་འདུག་གིས། །རང་ཉིད་གཅིག་པུ་རང་དགར་གནས་པར་མཛོད། །ལུས་སྤྱོད་ཆོས་བཞིན་སྤྱོད་ན་ཀུན་དང་འགལ། །ངག་གཏམ་དྲང་པོར་བཤད་ན་ཕལ་ཆེར་ཁྲོ། །སེམས་བཟང་གཏིང་ནས་དཀར་ཀྱང་སྐྱོན་དུ་རྩི། །ད་ནི་རང་ཚུལ་སྦེད་པའི་དུས་ལ་བབ། །ལུས་སྦས་དབེན་པའི་རི་ལ་གཅིག་པུར་སྡོད། །ངག་སྦས་སྨྲ་བ་མ་མང་འབྲེལ་ཐག་ཆོད། །སེམས་སྦས་རང་སྐྱོན་ཁོ་ནར་ཅེར་རེ་ལྟོས། །སྦས་པའི་རྣལ་འབྱོར་ཟེར་ན་དེ་ལ་ཟེར། །སུ་ལའང་བློ་གཏད་མི་འདུག་ཞེ་ལོག་གེ། །གང་ལའང་སྙིང་པོ་མི་འདུག་སྐྱོ་ཆད་དེ། །གང་བསམ་འགྲུབ་དུས་མི་འདུག་རྦད་ཐག་ཆོད། །འདི་གསུམ་གཏན་དུ་འགྲོགས་ན་ཕན་པར་མཆིས། །སྐྱིད་དུས་མི་འདུག་སྐྱིད་པོ་ང་ནི་ཟད། །སྡུག་པོ་མི་འདོད་སྡུག་མཐའ་ཆོས་ཀྱིས་ཆོད། །སྐྱིད་སྡུག་ཅི་འོང་སྔོན་ལས་བཙན་པོས་ཤེས། །ད་ནི་སུ་ལའང་མི་རེ་མི་དོགས་སོ། །མི་ལ་རེ་ཆེ་རེ་ཁ་འཛུམ་མུལ་མུལ། །རང་ལ་དགོས་མང་དགོས་དགོས་སྒྲུབ་པའི་ཤོམས། །འདི་བྱ་འདི་བྱེད་ཕྱི་ཚིས་རེ་དོགས་བློ། །ད་ནི་ཅི་ལ་བབ་ཀྱང་མི་བྱེད་དོ། །དེ་རིང་ཤི་ཡང་མི་འགྱོད་འཁོར་བའི་ཆོས། །ལོ་བརྒྱར་བསྡད་
ཀྱང་མི་དགའ་ལང་ཚོ་སོང་། །ད་ནི་ཤི་ཡང་གསོན་ཡང་ཚེ་འདིས་ཅི། །ཕྱི་མའི་ཆོས་ཙམ་འགྲུབ་ན་དེ་ག་རང་། །ཀྱེ་མ་བདག་གི་མགོན་གཅིག་ཐུགས་རྗེའི་གཏེར། །རྩ་བའི་བླ་མ་མགོན་པོ་སྤྱན་རས་གཟིགས། །གསུང་གི་སྙིང་པོ་དམ་ཆོས་ཡི་གེ་དྲུག །ད་ནི་རེ་ས་ཁྱེད་ལས་མི་འདུག་གོ །ཤེས་ཚད་གོ་བར་ལུས་ནས་ད་མ་ཕན། །བྱས་ཚད་ཚེ་འདིར་ཤོར་ནས་ད་མ་ཕན། །བསམ་ཚད་འཁྲུལ་པར་སོང་ནས་ད་མ་ཕན། །ཕན་ངེས་ཡིག་དྲུག་བགྲང་བའི་དུས་ལ་བབ། །མི་བསླུ་གཏན་གྱི་སྐྱབས་གཅིག་དཀོན་མཆོག་གསུམ། །དཀོན་མཆོག་ཀུན་འདུས་ངོ་བོ་སྤྱན་རས་གཟིགས། །ཁྱེད་ཤེས་བློ་གཏད་གཅིག་ལས་མི་འགྱུར་བའི། །ངེས་ཤེས་བློ་ཐག་ཆོད་ལ་ཡིག་དྲུག་སྒྲོངས། །ཐེག་ཆེན་ལམ་གྱི་རྩ་བ་བྱང་ཆུབ་སེམས། །སེམས་མཆོག་རྒྱལ་བ་ཀུན་གྱི་བགྲོད་གཅིག་ལམ། །ལམ་བཟང་བྱང་ཆུབ་སེམས་དང་མི་འབྲལ་ཞིང་། །འགྲོ་ལ་སྙིང་རྗེའི་ངང་ནས་ཡིག་དྲུག་སྒྲོངས། །ཐོག་མེད་འཁོར་བར་འཁྱམས་ནས་ད་ཕན་ཆད། །ཅི་བྱེད་སྡིག་ཏུ་སོང་ནས་སྲིད་པར་འཁྱམས། །སྡིག་ལྟུང་སྙིང་ནས་མཐོལ་ཞིང་བཤགས་སེམས་ཀྱིས། །སྟོབས་བཞི་ཚང་བའི་ངང་ནས་ཡིག་དྲུག་སྒྲོངས། །བདག་འཛིན་ཞེན་པའི་བློ་འདི་སྲིད་པའི་རྒྱུ། །དེ་སླད་ལུས་དང་ལོངས་སྤྱོད་དགེ་བའི་ཚོགས། །ཡར་མཆོད་མར་སྦྱིན་འཁོར་འདས་ཀུན་ལ་བསྔོ། །གཅེས་འཛིན་རྐྱངས་ཀྱིས་
སྐྱུར་ལ་ཡིག་དྲུག་སྒྲོངས། །སངས་རྒྱས་ཀུན་གྱི་ངོ་བོ་བླ་མ་རྗེ། །སྐུ་དྲིན་སངས་རྒྱས་ཀུན་ལས་ལྷག་པའི་མགོན། །བླ་མ་སྤྱན་རས་གཟིགས་དང་དབྱེར་མེད་དུ། །དད་པའི་གདུང་ཤུགས་སྐྱེད་ལ་ཡིག་དྲུག་སྒྲོངས། །སྒྲིབ་བྱང་ལམ་སྒོམ་སྐུ་བཞི་མངོན་དུ་བྱེད། །དབང་བཞིའི་བདག་ཉིད་བླ་མ་སྤྱན་རས་གཟིགས། །རང་སེམས་བླ་མར་ཤེས་ན་དབང་བཞི་རྫོགས། །རང་དབང་རང་ཐོབ་རང་ནས་ཡིག་དྲུག་སྒྲོངས། །འཁོར་བ་རང་སྣང་ཙམ་སྟེ་ལོགས་ན་མེད། །སྣང་སྲིད་ལྷ་རུ་ཤེས་ན་གཞན་དོན་རྫོགས། །དག་སྣང་དབང་བཞི་འགྲོ་ལ་དུས་གཅིག་བསྐུར། །འཁོར་བ་དོང་སྤྲུགས་ངང་ནས་ཡིག་དྲུག་སྒྲོངས། །བསྐྱེད་རིམ་རྣམ་གྲངས་མང་མང་བློར་མི་འཁྱུང་། །བདེ་གཤེགས་གཅིག་བསྒོམ་རྒྱལ་བ་ཀུན་གྱི་ངང་། །གང་སྣང་སྣང་བ་ཐུགས་རྗེ་ཆེན་པོའི་སྐུ། །སྣང་སྟོང་ལྷ་སྐུའི་ངང་ནས་ཡིག་དྲུག་སྒྲོངས། །བཟླས་བརྗོད་བསྙེན་སྒྲུབ་ལས་སྔགས་སྤྲོས་པ་ཙམ། །ཆིག་ཆོད་ཡི་གེ་དྲུག་པ་ཆོས་ཀྱི་སྒྲ། །སྒྲ་གྲགས་འཕགས་པའི་གསུང་དང་འདུ་འབྲལ་མེད། །གྲགས་སྟོང་སྔགས་སུ་ཤེས་པས་ཡིག་དྲུག་སྒྲོངས། །སྒྲིབ་གཉིས་རྣམ་རྟོག་ཞི་ན་ཉམས་རྟོགས་རྒྱས། །རང་སྣང་དབང་དུ་འདུས་ན་དགྲ་བགེགས་ཐུལ། །མཆོག་ཐུན་ཚེ་འདིར་སྩོལ་མཛད་སྤྱན་རས་གཟིགས། །ལས་བཞི་ལྷུན་གྲུབ་ངང་ནས་ཡིག་དྲུག་
སྒྲོངས། །གང་ཤར་གཏོར་མ་ཤར་གྲོལ་མགྲོན་ལ་བསྔོས། །སྣང་སྟོང་གང་སྣང་ས་ལ་འདེབས། །གཉིས་མེད་ལྷ་ཕྱག་སེམས་ཉིད་མགོན་ལ་འཚལ། །ཆོས་སྤྱོད་ཡོངས་རྫོགས་ངང་ནས་ཡིག་དྲུག་སྒྲོངས། །ཞེ་སྡང་དགྲ་བོ་བྱམས་པའི་མཚོན་གྱིས་ཐུལ། །རིགས་དྲུག་གཉེན་འཁོར་སྙིང་རྗེའི་ཐབས་ཀྱིས་སྐྱོངས། །དད་པའི་ཞིང་ལ་ཉམས་རྟོགས་ལོ་ཏོག་རྨོས། །ཚེ་འདིའི་ལས་རྫོགས་ངང་ནས་ཡིག་དྲུག་སྒྲོངས། །བདེན་ཞེན་རོ་རྒན་ཞེན་མེད་མེ་ལ་སྲེགས། །འདིར་སྣང་བདུན་ཚིགས་སྙིང་པོའི་ཆོས་ཀྱིས་དེད། །ཚོགས་བསགས་རོ་བརྒྱགས་ཚེ་རབས་གསུར་དུ་བསྔོས། །གཤིན་པོའི་དགེ་རྫོགས་ངང་ནས་ཡིག་དྲུག་སྒྲོངས། །དད་པའི་བུ་ཚ་ཉམས་ལེན་ཆོས་སྒོར་ཚུད། །འདིར་སྣང་ཁྱིམ་དུ་ཞེན་ལོག་བུ་ཐང་ཞོག། སྙིང་རྗེའི་བུ་མོ་ཁམས་གསུམ་མག་པར་བྱིན། །གསོན་པོའི་ཆུས་རྫོགས་ངང་ནས་ཡིག་དྲུག་སྒྲོངས། །སྣང་ཚད་འཁྲུལ་བ་ལགས་ཏེ་བདེན་པར་མེད། །འཁོར་འདས་རྣམ་རྟོག་ཙམ་སྟེ་ལོགས་ན་མེད། །རྣམ་རྟོག་ཤར་གྲོལ་ཤེས་ན་ས་ལམ་རྫོགས། །གྲོལ་ལུགས་གནད་ཀྱི་ངང་ནས་ཡིག་དྲུག་སྒྲོངས། །རང་སེམས་རིག་སྟོང་གཉིས་མེད་ཆོས་སྐུའི་ངང་། །མ་བཅོས་གཉུག་མར་བཞག་ན་རང་གསལ་འཆར། །བྱར་མེད་ཆིག་ཆོད་ངང་དུ་བྱས་ཆོས་ཟིན། །རིག་སྟོང་རྗེན་བར་
ཞོག་ལ་ཡིག་དྲུག་སྒྲོངས། །གནས་པའི་སྟེང་ནས་འགྱུ་བའི་རྗེས་མཐུད་ཆོད། །འགྱུ་བའི་ངང་ནས་གནས་པའི་རང་ངོ་ལྟོས། །གནས་འགྱུ་གཉིས་མེད་ཐ་མལ་ཤེས་པ་སྐྱོངས། །རྩེ་གཅིག་ཉམས་ཀྱི་ངང་ནས་ཡིག་དྲུག་སྒྲོངས། །ཀུན་རྫོབ་བརྟགས་ནས་དོན་དམ་གཏན་ལ་ཕོབ། །དོན་དམ་ངང་ནས་ཀུན་རྫོབ་འཆར་ཚུལ་ལྟོས། །བདེན་གཉིས་དབྱེར་མེད་བློ་བྲལ་གཉུག་མའི་གཤིས། །སྤྲོས་བྲལ་ལྟ་བའི་ངང་ནས་ཡིག་དྲུག་སྒྲོངས། །སྣང་བའི་སྟེང་དུ་སེམས་ཀྱི་ཞེན་པ་ཆོད། །སེམས་ཀྱི་སྟེང་དུ་སྣང་བའི་རྫུན་ཕུག་རྡིབ། །སྣང་སེམས་གཉིས་མེད་རྒྱ་གྲོལ་ཕྱལ་བ་ཆེ། །རོ་གཅིག་རྟོགས་པའི་ངང་ནས་ཡིག་དྲུག་སྒྲོངས། །སེམས་ཀྱི་རང་བཞིན་རིག་སྟོང་གཉུག་མར་གྲོལ། །རིག་པའི་རང་རྩལ་སེམས་རྟོག་རང་སར་དག །སེམས་རིག་གཉིས་མེད་ཐིག་ལེ་གཅིག་གི་ངང་། །བསྒོམ་མེད་ཆོས་སྐུའི་ངང་ནས་ཡིག་དྲུག་སྒྲོངས། །གཟུགས་སྣང་ལྷ་རུ་ཤེས་ན་བསྐྱེད་རིམ་གནད། །མཛེས་དང་མི་མཛེས་སྣང་ཞེན་རང་སར་གྲོལ། །ཞེན་མེད་སེམས་ཀྱི་སྣང་ཆ་འཕགས་པའི་སྐུ། །མཐོང་སྣང་རང་གྲོལ་ངང་ནས་ཡིག་དྲུག་སྒྲོངས། །སྒྲ་སྣང་སྔགས་སུ་ཤེས་ན་བཟླས་བརྗོད་གནད། །སྙན་དང་མི་སྙན་སྣང་ཞེན་རང་སར་གྲོལ། །ཞེན་མེད་འཁོར་འདས་རང་སྒྲ་ཡིག་དྲུག་གསུང་། །ཐོས་སྣང་རང་གྲོལ་ངང་ནས་ཡིག་དྲུག་
སྒྲོངས། །དྲི་སྣང་སྐྱེ་མེད་ཤེས་ན་རྫོགས་རིམ་གནད། །ཞིམ་དང་མི་ཞིམ་ཞེན་སྣང་རང་སར་གྲོལ། །ཞེན་མེད་དྲི་སྣང་འཕགས་པའི་ཚུལ་ཁྲིམས་དང་། །དྲི་སྣང་རང་གྲོལ་ངང་ནས་ཡིག་དྲུག་སྒྲོངས། །རོ་སྣང་ཚོགས་སུ་ཤེས་ན་མཆོད་པའི་གནད། །བཅུད་དང་མི་བཅུད་ཞེན་སྣང་རང་སར་གྲོལ། །ཞེན་མེད་བཟའ་བཏུང་འཕགས་པ་དགྱེས་པའི་རྫས། །རོ་སྣང་རང་གྲོལ་ངང་ནས་ཡིག་དྲུག་སྒྲོངས། །རེག་སྣང་མཉམ་ཉིད་ཤེས་ན་རོ་སྙོམས་གནད། །འགྲང་ལྟོག་ཚ་གྲང་སྣང་བ་རང་སར་གྲོལ། །ཞེན་མེད་ཕྱི་ནང་རེག་བྱ་ལྷའི་ཕྲིན་ལས། །རེག་སྣང་རང་གྲོལ་ངང་ནས་ཡིག་དྲུག་སྒྲོངས། །ཆོས་ཀུན་སྟོང་པར་ཤེས་ན་ལྟ་བའི་གནད། །བདེན་རྫུན་བློ་ཡི་འཛིན་སྟངས་རང་སར་གྲོལ། །ཞེན་མེད་སྣང་སྲིད་འཁོར་འདས་ཆོས་སྐུའི་ངང་། །རྟོག་ཚོགས་རང་གྲོལ་ངང་ནས་ཡིག་དྲུག་སྒྲོངས། །ཞེ་སྡང་ཡུལ་རྗེས་མི་འབྲང་ཁྲོ་བློ་ལྟོས། །ཁྲོ་སྣང་རང་ཤར་རང་གྲོལ་གསལ་སྟོང་ངང་། །གསལ་སྟོང་མེ་ལོང་ཡེ་ཤེས་ལོགས་ན་མེད། །ཞེ་སྡང་རང་གྲོལ་ངང་ནས་ཡིག་དྲུག་སྒྲོངས། །ང་རྒྱལ་ཡུལ་རྗེས་མ་འཛིན་འཛིན་བློ་ལྟོས། །མཆོག་འཛིན་རང་ཤར་རང་གྲོལ་ཡེ་སྟོང་ངང་། །ཡེ་སྟོང་མཉམ་ཉིད་ཡེ་ཤེས་ལོགས་ན་མེད། །ང་རྒྱལ་རང་གྲོལ་ངང་ནས་ཡིག་དྲུག་སྒྲོངས། །འདོད་ཆགས་ཡུལ་རྗེས་མ་ཞེན་ཞེན་བློ་ལྟོས། །ཞེན་སྣང་རང་ཤར་རང་གྲོལ་བདེ་
སྟོང་དང་། །བདེ་སྟོང་སོར་རྟོག་ཡེ་ཤེས་ལོགས་ན་མེད། །འདོད་ཆགས་རང་གྲོལ་ངང་ནས་ཡིག་དྲུག་སྒྲོངས། །ཕྲག་དོག་ཡུལ་རྗེས་མ་འབྲང་དཔྱོད་བློ་ལྟོས། །རྟོག་དཔྱོད་རང་ཤར་རང་གྲོལ་བློ་སྟོང་ངང་། །བློ་སྟོང་བྱ་གྲུབ་ཡེ་ཤེས་ལོགས་ན་མེད། །ཕྲག་དོག་རང་གྲོལ་ངང་ནས་ཡིག་དྲུག་སྒྲོངས། །གཏི་མུག་ཡུལ་ལ་མ་རློམ་རང་ངོ་ལྟོས། །རྟོག་ཚོགས་རང་ཤར་རང་གྲོལ་རིག་སྟོང་ངང་། །རིག་སྟོང་ཆོས་དབྱིངས་ཡེ་ཤེས་ལོགས་ན་མེད། །གཏི་མུག་རང་གྲོལ་ངང་ནས་ཡིག་དྲུག་སྒྲོངས། །གཟུགས་ཕུང་ཡེ་སྟོང་སྐྱེ་མེད་ནམ་མཁའི་ངང་། །སྟོང་ཉིད་རིག་པའི་ཐིག་ལེ་སྤྱན་རས་གཟིགས། །འཕགས་པ་ནམ་མཁའི་རྒྱལ་པོ་ལོགས་ན་མེད། །སྟོང་ཉིད་ལྟ་བའི་ངང་ནས་ཡིག་དྲུག་སྒྲོངས། །ཚོར་བ་ཡུལ་སེམས་གཉིས་སྦྲེལ་འཆིང་བའི་ཞགས། །མཉམ་ཉིད་གཉིས་མེད་རྟོགས་ན་སྤྱན་རས་གཟིགས། །འཕགས་པ་དོན་ཡོད་ཞགས་པ་ལོགས་ན་མེད། །རོ་མཉམ་རྟོགས་པའི་ངང་ནས་ཡིག་དྲུག་སྒྲོངས། །འདུ་ཤེས་མཚན་མར་འཛིན་པ་འཁྲུལ་པའི་བློ། །འགྲོ་ཀུན་སྙིང་རྗེས་འཛིན་ན་སྤྱན་རས་གཟིགས། །འཕགས་མཆོག་འཁོར་བ་དོང་སྤྲུགས་ལོགས་ན་མེད། །དམིགས་མེད་སྙིང་རྗེའི་ངང་ནས་ཡིག་དྲུག་སྒྲོངས། །འདུ་བྱེད་འཁོར་བའི་ལས་ཀྱིས་རིགས་དྲུག་འཁོར། །སྲིད་ཞི་མཉམ་ཉིད་རྟོགས་ན་སྤྱན་རས་གཟིགས། །
འཕྲོ་འདུལ་ཐུགས་རྗེ་ཆེན་པོ་ལོགས་ན་མེད། །གཞན་ཕན་རོ་གཅིག་ངང་ནས་ཡིག་དྲུག་སྒྲོངས། །རྣམ་ཤེས་སེམས་ཀྱི་རང་བཞིན་ཚོགས་བརྒྱད་ཆ། །སེམས་ཉིད་ཆོས་སྐུར་རྟོགས་ན་སྤྱན་རས་གཟིགས། །འཕགས་མཆོག་རྒྱལ་བ་རྒྱ་མཚོ་ལོགས་ན་མེད། །རང་སེམས་སངས་རྒྱས་ཤེས་པས་ཡིག་དྲུག་སྒྲོངས། །ལུས་སྣང་གདོས་བཅས་འཛིན་པ་འཆིང་བའི་རྒྱུ། །སྣང་སྟོང་ལྷ་རུ་ཤེས་ན་སྤྱན་རས་གཟིགས། །འཕགས་མཆོག་ཁ་སརྤ་ཎི་ལོགས་ན་མེད། །སྣང་སྟོང་ལྷ་སྐུའི་ངང་ནས་ཡིག་དྲུག་སྒྲོངས། །ངག་སྣང་བརྗོད་པའི་སྒྲ་རྟོག་འཁྲུལ་པའི་རྒྱུ། །གྲགས་སྟོང་སྔགས་སུ་ཤེས་ན་སྤྱན་རས་གཟིགས། །འཕགས་མཆོག་སེངྒེ་སྒྲ་ཞེས་ལོགས་ན་མེད། །སྒྲ་གྲགས་སྔགས་སུ་ཤེས་པས་ཡིག་དྲུག་སྒྲོངས། །སེམས་སྣང་བདེན་ཞེན་འཁྲུལ་པ་འཁོར་བའི་རྒྱུ། །རྟོག་བྲལ་གཤིས་ལ་བཞག་ན་སྤྱན་རས་གཟིགས། །འཕགས་མཆོག་སེམས་ཉིད་ངལ་བསོ་ལོགས་ན་མེད། །སེམས་ཉིད་ཆོས་སྐུའི་ངང་ནས་ཡིག་དྲུག་སྒྲོངས། །སྣང་སྲིད་ཡེ་ནས་དག་པ་ཆོས་སྐུའི་ངང་། །ཆོས་སྐུའི་རང་ཞལ་མཇལ་ན་སྤྱན་རས་གཟིགས། །འཕགས་མཆོག་འཇིག་རྟེན་དབང་ཕྱུག་ལོགས་ན་མེད། །དག་པ་རབ་འབྱམས་ངང་ནས་ཡིག་དྲུག་སྒྲོངས། །ལྷ་གཅིག་རྒྱལ་བ་ཀུན་འདུས་སྤྱན་རས་གཟིགས། །སྔགས་གཅིག་སྙིང་པོ་ཀུན་འདུས་ཡི་གེ་དྲུག །ཆོས་
གཅིག་བསྐྱེད་རྫོགས་ཀུན་འདུས་བྱང་ཆུབ་སེམས། །གཅིག་ཤེས་ཀུན་གྲོལ་ངང་ནས་ཡིག་དྲུག་སྒྲོངས། །བྱས་པས་ཅི་བྱ་བྱ་བྱེད་འཁོར་བའི་རྒྱུ། །བྱས་ཚད་སྙིང་པོ་མེད་པའི་ཚུལ་ལ་ལྟོས། །ད་ནི་བྱར་མེད་ངང་ལ་བཞག་ན་དགའ། །བྱ་བྱེད་ཅམས་སེ་ཞོག་ལ་ཡིག་དྲུག་སྒྲོངས། །སྨྲས་པས་ཅི་བྱ་སྨྲས་ཚད་བྲེ་མོའི་གཏམ། །འབྲེལ་མེད་རྣམ་གཡེང་སྐྱེད་པའི་ཚུལ་ལ་ལྟོས། །ད་ནི་བརྗོད་མེད་ངང་ལ་གནས་ན་དགའ། །སྨྲ་བརྗོད་རྦད་ཀྱིས་ཆོད་ལ་ཡིག་དྲུག་སྒྲོངས། །སོང་པས་ཅི་བྱ་འགྲོ་འདུག་ངལ་བའི་རྒྱུ། །འཁྱམས་ཤིང་ཆོས་ལས་རིང་བའི་ཚུལ་ལ་ལྟོས། །ད་ནི་གཅིག་ཏུ་སེམས་བག་ཕབ་ན་དགའ། །བག་ཕེབ་ལྷོད་ཀྱིས་སྡོད་ལ་ཡིག་དྲུག་སྒྲོངས། །ཟོས་པས་ཅི་བྱ་ཟོས་ཚད་མི་གཙང་རྒྱུ། །ཟ་འདོད་ཚིམ་པ་མེད་པའི་ཚུལ་ལ་ལྟོས། །ད་ནི་ཏིང་འཛིན་ཟས་སུ་ཟོས་ན་དགའ། །བཟའ་བཏུང་བྱེད་འཕྲོ་བོར་ལ་ཡིག་དྲུག་སྒྲོངས། །བསམ་པས་ཅི་བྱ་བསམ་ཚད་འཁྲུལ་པའི་རྒྱུ། །བསམ་དོན་ཐོག་ཏུ་མི་ཁེལ་ཚུལ་ལ་ལྟོས། །ད་ནི་ཚེ་འདིའི་བློ་སྣ་བསྟུངས་ན་དགའ། །བློ་ཐག་རྦད་ཀྱིས་ཆོད་ལ་ཡིག་དྲུག་སྒྲོངས། །འབྱོར་པས་ཅི་བྱ་ལོངས་སྤྱོད་ཞན་པའི་བློ། །བསགས་ཚད་ཤུལ་དུ་ལུས་པའི་ཚུལ་ལ་ལྟོས། །ད་ནི་བདག་འཛིན་ཞེན་པ་བཅད་ན་དགའ། །གསོག་འཇོག་རྩོལ་སྒྲུབ་བོར་ལ་ཡིག་དྲུག་
སྒྲོངས། །ཉལ་བས་ཅི་བྱ་གཉིད་ཚད་གཏི་མུག་ངང་། །སོས་དལ་མི་ཚེ་འཛད་པའི་ཚུལ་ལ་ལྟོས། །ད་ནི་སྙིང་ནས་བརྩོན་འགྲུས་བསྐྱེད་ན་དགའ། །ཉིན་མཚན་རྣམ་གཡེང་སྤངས་ནས་ཡིག་དྲུག་སྒྲོངས། །ལོང་མེད་ལོང་མེད་སྡོད་པའི་ལོང་མི་འདུག །འཆི་བདག་གློ་བུར་སླེབ་ན་ཅི་ཞིག་བྱ། །ད་ནི་འཕྲལ་ལ་ལྷ་ཆོས་འགྲུབ་ན་དགའ། །ད་ལྟ་ལ་འུར་ཉིད་དུ་ཡིག་དྲུག་སྒྲོངས། །ལོ་དང་ཟླ་གྲངས་ཞག་གི་རྩིས་ཀྱིས་ཅི། །ད་ལྟ་སྐད་ཅིག་འགྱུར་བའི་ཚུལ་ལ་ལྟོས། །སྐད་ཅིག་རེ་རེར་སོང་བཞིན་འཆི་ལ་ཉེ། །ད་ལྟ་ད་ལྟ་ཉིད་ནས་ཡིག་དྲུག་སྒྲོངས། །ཚེ་ནི་ཉི་མ་བཞིན་དུ་ཕར་ཕར་འགྲོ། །འཆི་བདག་གྲིབ་སོ་བཞིན་དུ་ཚུར་ཚུར་འོང་། །ད་ནི་ཚེ་ལྷག་ཉི་རྒས་གྲིབ་སོ་ཙམ། །སྡོད་པའི་ལོང་ཁོམ་མི་འདུག་ཡིག་དྲུག་སྒྲོངས། །ཆོས་སུ་ཡི་གེ་དྲུག་པ་བཟང་མོད་དེ། །ཁ་ཡེངས་མིག་ཡེངས་བཟླས་པས་འབྲས་མི་འབྱིན། །ངག་བཟླས་གྲངས་ལ་ཞེན་པ་ཨ་འཐས་བློ། །རྩེ་གཅིག་སེམས་ལ་ལྟོས་ལ་ཡིག་དྲུག་སྒྲོངས། །ཡང་དང་ཡང་དུ་རང་གི་སེམས་བརྟགས་ན། །ཅི་ལྟར་བྱས་ཀྱང་ཡང་དག་ལམ་ལ་འགྲོ། །གདམས་པའི་གནད་བརྒྱ་འདུས་པ་འདི་ཁོ་ན། །གནད་དོན་གཅིག་ལ་སྒྲིལ་ལ་ཡིག་དྲུག་སྒྲོངས། །དང་པོར་སྙིགས་མའི་སྤྱོད་ལ་སྐྱོ་བའི་གཏམ། །གཏམ་འདི་རང་གིས་རང་ལ་གདམས་པ་སྟེ། །རང་བློ་གཏིང་ནས་འགྱུར་བའི་སྨྲེ་སྔགས་ཚིག །ཁྱེད་
ལའང་འདྲ་འམ་སྙམ་ནས་ཕུལ་བ་ལགས། །མི་འདྲ་ལྟ་སྒོམ་མཐོན་པོའི་གདེངས་ཚད་དང་། །ལུགས་གཉིས་བྱ་བཞག་འགྲུབ་པའི་རྣམ་དཔྱོད་བློ། །རང་གཞན་བློ་གཏད་ཕེར་བའི་འདུན་གྲོས་ཤོམས། །ཁྱེད་ལ་ཡོད་པར་གྱུར་ན་མཐོལ་ལོ་བཤགས། །བར་དུ་ལྟ་སྒོམ་གཏན་ལ་འབེབས་པའི་གཏམ། །རྟོགས་པའི་ཉམས་མྱོང་བདག་ལ་མེད་མོད་ཀྱང་། །ཀུན་མཁྱེན་ཡབ་སྲས་བརྒྱུད་པ་རིན་གྲོ་ཆེའི། །གསུང་གིས་བསྐྱངས་པའི་གོ་ཡུལ་བཤད་པ་ལགས། །ཐ་མ་ངེས་འབྱུང་ཆོས་ལ་སྐུལ་བའི་གཏམ། །གཏམ་འདི་བརྗོད་དོན་མེད་ཀྱང་ཤུགས་ཀྱིས་ཐལ། །འོན་ཀྱང་སྲས་བཅས་རྒྱལ་བའི་བཞེད་གཞུང་དང་། །མི་འགལ་ཉམས་སུ་བླངས་ན་སྐུ་དྲིན་ཆེ། །དེ་ལྟར་ཐོག་མཐའ་བར་དུ་དགེ་བའི་གཏམ། །བྲག་དཀར་རྩེ་རྒྱལ་གྲུབ་པའི་བྲག་ཟུག་ཏུ། །སྔར་འདྲིས་གྲོགས་ཀྱིས་བསྐུལ་བ་མ་བཟོད་ནས། །དུག་ལྔ་མེ་འབར་ཨ་བུ་ཧྲལ་པོས་བྲིས། །ཁ་བཤད་རྐྱང་པར་སོང་ཡང་ཅི་ཆ་སྟེ། །དོན་བཟང་འཁྲུལ་བ་མེད་པའི་དགེ་ཚོགས་རྒྱུན། །ཁྱེད་དང་བདག་བཅས་ཁམས་གསུམ་འགྲོ་བ་ཀུན། །ཆོས་མཐུན་བསམ་པ་འགྲུབ་པའི་རྒྱུ་རུ་བསྔོ། །དགེའོ། ༈ འདབ་རྒྱས་ཟེའུ་འབྲུ་རྒྱས་པའི་གེ་སར་གྱི་ལང་ཚོ། །ཉ་གང་ཟླ་བས་ནོན་པའི་འོད་དཀར་གྱི་གདན་ལ། །བདེ་སྟོང་ཕྱག་རྒྱའི་རྣམ་
རོལ་གཡོ་མེད་དུ་བཞུགས་པའི། །ལྷ་གཅིག་བླ་མ་རྡོ་རྗེ་སེམས་དཔའ་དེ་མཁྱེན་ནོ། །ལས་ངན་ཨ་བུ་ཤྲཱི་རྣམ་གཡེངས་ཅན་ཁྱོད་ཉོན་དང་། །སྔར་འཁྲུལ་འཁྲུལ་པས་བསླུས་བསླུས་ཨི་དྲན་ཨི་གོ །ད་འཁྲུལ་འཁྲུལ་པ་འདི་ལ་བག་ཟོན་དགོས་སོ། །སྟོང་ཟོབ་མི་ཚེ་མ་བསྐྱལ་རང་སེམས་བསྐོར་དང་། །དགོས་མེད་བྱ་བློ་མང་པོ་ད་ནི་སྐྱུར་ཐོང་། །བསམ་བརྒྱ་འགྲུབ་དུས་མེད་པའི་རང་སེམས་སྡུག་ཁུར། །བྱས་བྱས་ཟིན་པ་མེད་པའི་རྣམ་གཡེངས་ཆུ་རིས། །རང་མགོ་རང་གིས་མ་བསྐོར་ཁ་རོག་འདུག་དང་། །བརྒྱ་ཐོས་གཅིག་ཀྱང་མ་ཟིན་ཐོས་པས་ཅི་ཕན། །ཐོས་ཀྱང་དགོས་དུས་མི་དྲན་བསམ་པས་མི་ཕན། །ཉོན་མོངས་གཉེན་པོར་མ་སོང་སྒོམ་པ་སྐྱུར་ཐོང་། །བཟླས་གྲངས་བསྙེན་ཚད་སོང་ཡང་བསྐྱེད་རིམ་མ་གོམས། །ཨ་འཐས་ལྷ་སྐུ་གསལ་ཡང་གཉིས་འཛིན་མ་ཞིག །ལྟར་སྣང་འདྲེ་གདོན་འདུལ་ཡང་རང་རྒྱུད་མ་ཐུལ། །བསྙེན་སྒྲུབ་ཁྲིགས་ཆགས་ལེགས་པའི་ཐུན་བཞི་སྐྱུར་ཐོང་། །མཐོ་ན་གསལ་གསལ་འདྲ་ཡང་ལྷོད་ཆ་མ་སྐྱེས། །དམའ་ན་གནས་གནས་འདྲ་ཡང་དངས་ཆ་མ་ཐོན། །ཕུར་ཚུགས་རིག་ཆ་འདྲ་ཡང་གཏད་སོ་མདུང་ཚུགས། །སེམས་འཛིན་རྟོད་ཕུར་བརྟན་པའི་ལྟ་སྟངས་སྐྱུར་ཐོང་། །བཤད་ཡམ་སྙན་སྙན་འདྲ་ཡང་སེམས་ལ་མི་ཕན། །རིགས་ལམ་རྣོ་རྣོ་འདྲ་ཡང་འཁྲུལ་བའི་རུ་མ། །
གདམས་ངག་ཟབ་ཟབ་འདྲ་ཡང་ཉམས་སུ་མི་ལེན། །སེམས་གཡེངས་མིག་ནད་སྐྱེད་པའི་དཔེ་ལྟས་སྒྱུར་ཐོང་། །རྔ་ཆུང་ཏིང་ཏིང་བརྡུངས་ཀྱང་ཉན་ཡུལ་མཛེས་ཆོས། །ཤ་ཁྱེར་ཁྲག་ཁྱེར་ཟེར་ཀྱང་གཅེས་འཛིན་མ་ཞིག །ཏིང་ཤག་སིལ་སིལ་བརྡུང་ཡང་དམིགས་གཏད་མི་འདུག །མཛེས་མཛེས་ལྟར་སྣང་ལེགས་པའི་ཨོ་ཟོས་སྐྱུར་ཐོང་། །ད་ལྟ་སློབ་སློབ་འདྲ་ཡང་ནམ་ཕུག་མི་སྐྱོང་། །དེ་རིང་ཤེས་ཤེས་འདྲ་ཡང་ག་ལེར་རྗེས་མེད། །བརྒྱ་ལ་ལོབ་ནས་སོང་ཡང་སེམས་ལ་མི་སྐོར། །དོ་གལ་ཆེ་མདོག་ཁ་པོའི་སློབ་མ་སྐྱུར་ཐོང་། །ད་ལོ་གཅེས་གཅེས་འདྲ་ཡང་སང་ཕོད་དེ་མེད། །ཉམ་ཆུང་བྱེད་མདོག་ཁ་ཡང་མཐོ་སྣང་ཆེ་འོང་། །ཕར་ལ་བརྩེ་བས་བསྐྱངས་ན་ཕར་ཕར་རིང་བའི། །ཨ་གསར་ཁ་འཛུམ་ངོ་དགའི་སྙིང་གྲོགས་སྐྱུར་ཐོང་། །འཛུམ་ལམ་དགའ་དགའ་འདྲ་ཡང་ཨི་བདེན་མི་ཤེས། །སྐོར་ཅིག་བདེ་སྣང་འཆར་ཡང་ཟླ་དགུའི་སེམས་ནད། །ཟླ་གཅིག་སྟབས་ཀ་བསྒྲིགས་ཀྱང་འགྲིགས་དུས་དཀའ་བས། །མིས་འཕྱ་རང་སེམས་ཁྲེལ་བའི་གྲོགས་མོ་སྐྱུར་ཐོང་། །བཤད་བཤད་ཟིན་དུས་མེད་པའི་ཆགས་སྡང་རུ་མ། །མཚར་མཚར་ཡག་ཡག་འདྲ་ཡང་གཞན་སྐྱོན་རྗེས་ཟློས། །བཤད་ཡུལ་ཉན་ཉན་འདྲ་ཡང་ཞེ་ཁྲེལ་ཕྲོད་འོང་། །དོན་མེད་ཁ་སྐོམ་སྐྱེ་བའི་སྐད་ཆ་སྐྱུར་ཐོང་། །རང་ལ་ཉམས་མྱོང་མེད་པའི་དཔེ་ཐོག་
བྲོ་བརྡུང་། །ཉན་མཁན་མོས་མོས་འདྲ་ཡང་མི་བདེན་ངོ་མ། །ཆོས་འགལ་རང་གིས་བྱས་ན་ག་ལེར་ངོ་ཚ། །ཁ་བཤད་ལེགས་ལེགས་འདྲ་བའི་ཆོས་བཤད་སྐྱུར་ཐོང་། །མེད་དུས་མཁོ་སྣང་འཆར་ཏེ་ཡོད་ན་མི་མཁོ། །ལྡེབ་གྲངས་ཉུང་སྣང་འཆར་ཡང་བྲི་དུས་ཟད་དཀའ། །ས་སྟེང་དཔེ་ཆ་བྲིས་ཀྱང་ཆོག་ཤེས་མི་སྐྱེ། །བེད་མེད་བྲིས་གླ་མེད་པའི་དཔེ་ཆོད་སྐྱུར་ཐོང་། །དེ་རིང་དགའ་དགའ་འདྲ་ཡང་སང་ཉིན་ཁྲོས་ཡོད། །མི་ངོ་དཀར་ནག་འཚོས་འཚོས་དགའ་དུས་མི་འོང་། །དགའ་ཡང་དགོས་དུས་མི་ཕན་ཡི་ཆད་སྣོན་པ། །ངོ་དགའ་ངོ་བསྟོད་དགོས་པའི་ངོ་འཛིན་སྐྱུར་ཐོང་། །ཆོས་དང་འཇིག་རྟེན་བྱ་བཞག་པོ་རབ་ཕྱག་ལེན། །དེ་འདྲའི་ཤག་པོ་མ་རེ་ཨ་བུ་བུ་ལུ། །གླང་རྒན་སླས་ན་ཉལ་བའི་འདུན་ཕུག་ཨེ་གཟིགས། །ཟ་ཉལ་བཤང་གཅི་འདོར་འདི་མི་བྱེད་ཁ་མེད། །བྱ་བྱེད་དེ་ལས་མ་མང་ཁྱོད་ཀྱི་ཡུལ་མིན། །རང་ཚོད་བྱ་བ་གྱིས་ལ་ཁ་རོག་ཉོལ་སྡོད། །སྟོང་གསུམ་མནན་ཁྱོད་ཡོད་དམན་ས་ཟིན་དགོས། །རྒྱལ་ཁམས་གོང་ན་ཡོད་ཀྱི་མཐོ་སྣང་མ་ཆེ། །རང་འདྲར་གཅིག་ཀྱང་མེད་ཀྱིས་ཤག་པོ་མ་མང་། །ལུགས་གཉིས་བྱ་བ་མེད་ཀྱང་ཡོད་དགོས་མ་ཟེར། །ཐམས་ཅད་ཐམས་ཅད་སྐྱུར་ན་མདོ་དོན་དེ་ཡིན། །ཞེས་རྣལ་འབྱོར་དྲི་མེད་བློ་གྲོས་ཀྱིས་རང་གི་རྒྱུད་ཚོད་དང་བསྟུན་པའི་ཞལ་གདམས་ཨ་བུ་ཤྲཱི་སྙིང་དང་འདྲ་བ་ལ་གདམས་པ་ཉམས་
སུ་ལེན་དགོས། །ཉམས་སུ་ལེན་རྒྱུ་ཅང་མེད་ཀྱང་བྱ་བ་ཐམས་ཅད་སྐྱུར་ན་མདོ་དོན་དེ་ཡིན། ཆོས་མ་འགྲུབ་ཀྱང་མ་ཁྲོ། །ཞེས་གསུངས་སོ། ༈ །གང་ཞིག་འཁོར་བར་འཁྱམས་པའི་འགྲོ་མང་ཁམས། །ཐུགས་བསྐྱེད་སྨོན་པས་དུས་ཀུན་མི་གཏོང་བའི། །བྱང་ཆུབ་སེམས་ཀྱི་མངའ་བདག་དམ་པའི་མགོན། །ཀུན་མཁྱེན་ཡབ་སྲས་བརྒྱུད་པར་གསོལ་བ་འདེབས། །རིང་ནས་དྲིན་གྱིས་བསྐྱངས་པའི་མ་རྒན་འགྲོ། །སྣ་ཚོགས་ལས་ངན་ཁུར་གྱིས་ཆེས་ནོན་ཅིང་། །བཟོད་དཀའི་སྡུག་བསྔལ་ཆར་བཞིན་འབབས་མཐོང་ནས། །བདག་གི་སྙིང་འདི་དུམ་བུར་གས་ལ་ཐུག །འཁྲུལ་རྟོག་གྱ་གྱུའི་བློ་སྣ་བསླུ་བྲིད་མཁས། །ལས་ངན་སྡིག་པའི་གྲོགས་པོ་སྤང་རེ་དཀའ། །རང་ཐག་དམ་པའི་ཆོས་སུ་མ་ཆོད་ནས། །བདག་ཀྱང་འཁོར་བའི་བཙོན་རར་ད་དུང་ཉལ། །ཆུང་ནས་གཞན་དབང་སོང་བས་ཆོས་མ་འགྲུབ། །དར་ནས་འདོད་པའི་རྩེ་དགས་ཆོས་མ་འགྲུབ། །རྒས་ནས་ལང་ཚོ་རྒུད་པས་ཆོས་མ་འགྲུབ། །ཀྱེ་མ་ཀྱི་ཧུད་ད་ནི་ཅི་ཞིག་བྱ། །དུས་ངན་སྐྱེ་བོའི་བསམ་སྤྱོད་གྱ་མ་གྱུ། །སུ་དང་བསྟུན་ཀྱང་དམ་པའི་ཆོས་དང་འགལ། །གང་ལྟར་བྱས་ཀྱང་ཀུན་ལ་མགུ་དུས་མེད། །ད་ནི་དབེན་པའི་རི་ཁྲོད་མི་སྙོགས་རེ། །ཅི་ཙམ་འབྱོར་ཀྱང་སེམས་ལ་ཁེངས་དུས་མེད། །གང་ཙམ་བསྒྲུབས་ཀྱང་ལས་ལ་འགྲུབ་དུས་མེད། །སུ་ངོ་ཟིན་ཡང་ཀུན་ངོ་ཟིན་དུས་མེད། །ད་ནི་མཐུན་འཇུག་བློ་སྣ་མི་བསྟུང་རེ། །ཅི་ཙམ་སྤྱོད་ཀྱང་འདོད་
པར་ཆོག་ཤེས་མེད། །གང་མང་ཤེས་ཀྱང་ཚིག་ལ་སྙིང་པོ་མེད། །ཚེ་གཅིག་ཟད་ཀྱང་རྣམ་གཡེངས་ཟད་དུས་མེད། །ད་ནི་བློ་སྣ་འབྲལ་ཆོད་མི་བྱེད་རེ། །ཉམས་སུ་མ་ལོན་ཐོས་པས་ཅི་ཞིག་བྱ། །འཁྲུལ་རྟོག་སྐྱེད་འཕེལ་བསམ་པས་ཅི་ཞིག་བྱ། །གཞི་མེད་རེ་དོགས་སྒོམ་པས་ཅི་ཞིག་བྱ། །ད་ནི་ཆོས་མེད་གཅེར་ཉལ་མི་བྱེད་རེ། །ཚུལ་འཆོས་གཟུགས་བཅོས་འདུལ་བས་ཅི་ཞིག་བྱ། །ཉམས་ལེན་ཁ་བཤད་མདོ་སྡེས་ཅི་ཞིག་བྱ། །དོན་མིང་སྟོང་འདི་ངས་མངོན་པས་ཅི་ཞིག་བྱ། །ད་ནི་སྨྱོན་པ་གང་བདེ་མི་བྱེད་རེ། །བསོག་དཀའ་བསྲུང་དཀའ་འབྱོར་པས་ཅི་ཞིག་བྱ། །མངགས་དཀའ་མགུ་དཀའ་འཁོར་གྱིས་ཅི་ཞིག་བྱ། །འགྲུབ་དཀའ་བསྐྱུར་དཀའ་ཁྱིམ་གྱིས་ཅི་ཞིག་བྱ། །ད་ནི་སྤྲང་པོ་ལམ་ཟན་མི་བསྒུགས་རེ། །སྣང་བ་དགྲར་ལངས་ཉན་ཐོས་དེས་ཅི་བྱ། །རྒན་མོ་བསམ་བཟང་བྱང་སེམས་དེས་ཀོ་ཅི། །ཉོན་མོངས་འཆོལ་ཉོག་གསང་སྔགས་དེས་ཅི་བྱ། །ད་ནི་གུ་ཡངས་ཐ་མལ་མི་སྡོད་རེ། །རང་སྤྱོད་བསམ་ན་རང་ལ་ཁྲེལ་རྒོད་འཆོར། །གཞན་སྤྱོད་བསམ་ན་གཞན་ལ་ཡི་མུགས་སྐྱེ། །ད་ནི་གང་ལ་བསམས་ཀྱང་སྙིང་རླུང་ལྡང་། །ད་ནི་སུ་ལ་བསམས་ཀྱང་ཡི་ཆད་སྐྱེས། །འབྱུང་བ་དགྲར་ལངས་སྣོད་ལ་ཡི་རེ་ཆད། །གཡོ་སྒྱུ་ཟོལ་ཟོག་བཅུད་ལ་ཡི་རེ་ཆད། །ལས་ངན་རྒྱུན་རིང་འགྲོ་ལ་ཡི་རེ་ཆད། །ཚེ་གང་དོན་མེད་ཀུན་ལ་ཡི་རེ་ཆད། །ཡི་ཆད་ཉམས་ཐག་སྡུག་གི་མཆི་མ་འདི། །ཐུགས་རྗེ་ཡས་སྤྲུལ་མགོན་གྱིས་མ་ཕྱིས་ན། །འཁྲུལ་
བ་རྒྱུན་རིང་འཁོར་བའི་སེམས་ཅན་ལ། །ལས་ངན་སྡུག་བསྔལ་ངལ་གསོ་སུ་ཡིས་སྦྱིན། །ཡོད་ཡོད་མེད་མེད་ཁ་འབྱམས་ཁ་ལ་ཁྱེར། །ཡིན་ཡིན་མིན་མིན་ཚིག་གིས་མགོ་བསྐོར་གཏོང་། །ཏོག་གེ་མགོ་མཁྲེགས་ལྟ་བས་བསླུས་མཐོང་ནས། །ད་ནི་ལྟ་བ་ཕྱགས་མས་འདེགས་སྙིང་འདོད། །ལྷ་མཐོང་འདྲེ་མཐོང་ཉམས་ཀྱིས་སྣང་བ་བྲིད། །ཁ་གདངས་མིག་བགྲད་ལྷ་བསྒོམ་འདྲེ་རུ་ལོག །ཨུ་ཚུགས་གླེན་སྒོམ་སྒོམ་པས་བསླུས་མཐོང་ནས། །ད་ནི་སྒོམ་པ་རླུང་ལ་བསྐུར་སྙིང་འདོད། །ཚེ་འདིར་དོན་གཉེར་འདུལ་སྤྱོད་རྟགས་ལ་རེ། །འདོད་ཆགས་དོན་གཉེར་སྔགས་སྤྱོད་རྐུབ་ལ་རེ། །གནད་མེད་སྟོང་རྒྱུག་སྤྱོད་པས་བསླུས་མཐོང་ནས། །ད་ནི་སྤྱོད་པ་ཆུ་ལ་བསྒྱུར་སྙིང་འདོད། །རང་འདོད་ཕུག་བཅུག་གཞན་ཕན་ཁ་ལ་རེ། །རང་ངོ་མ་འཕྲོད་ངོ་སྤྲོད་རོ་ལ་འདེབས། །རང་དོན་མ་འགྲུབ་གཞན་ཕན་བསླུས་མཐོང་ནས། །ད་ནི་འགྲོ་དོན་གཡངས་ལ་བསྐུར་སྙིང་འདོད། །རྟོག་ངོ་རང་རིག་བཅོས་མའི་གཅེར་ལ་རེ། །གནས་ངོ་རྒྱ་ཡན་ཟིན་བུའི་ཉམས་ཀྱིས་བཅིངས། །ཡིན་རློམ་ང་རྒྱལ་འབྲས་བུས་བསླུས་མཐོང་ནས། །ད་ནི་འབྲས་བུ་ཆུ་ལ་འཕེན་སྙིང་འདོད། །རང་ཉམས་མ་ལོན་གཞན་ལ་ཆོས་བཤད་བྱེད། །ཐོས་པ་དགྲར་ལངས་ལོག་ལྟས་རང་རྒྱུད་སྤོས། །ཚིག་མཐའ་རྒྱང་དེད་ཐོས་པས་བསླུས་མཐོང་ནས། །ད་ནི་ཐོས་བསམ་རྒྱུན་ཐག་བཅད་སྙིང་འདོད། །དབང་མེད་འཁོར་ངན་འཐབ་མོས་རང་སྐྱིད་ཕུད། །ལོག་ལྟ་སྐུར་འདེབས་མི་ཁས་རང་གཞན་ཕུང་། །
དམ་པ་མདོ་མེད་ནག་མོས་བསླུས་མཐོང་ནས། །ད་ནི་མཇེ་གོག་རྩད་ནས་བཅད་སྙིང་འདོད། །རང་ལུགས་མི་སྒྲུབ་གཞན་ལུགས་སྒྲུབ་ལ་རྒྱུག །གཅིག་ཉམས་མ་ལོན་གཉིས་སྒྲུབ་ཟབ་ལ་རེ། །བློ་མང་སེམས་གཡེངས་ཡིག་སྣས་བསླུས་མཐོང་ནས། །ད་ནི་ཉམས་ལེན་གཅིག་ལ་དྲིལ་སྙིང་འདོད། །གཏོང་ཕོད་མེད་པའི་ནོར་སྒྲུབ་བསེ་རག་འཁོར། །བྱང་སེམས་མེད་པའི་དབང་སྡུད་རང་དབང་འཆོར། །མཆོག་བོར་ལས་སྒྲུབ་ལྷ་འདྲེས་བསླུས་མཐོང་ནས། །ད་ནི་རང་སེམས་དབང་དུ་སྡུད་སྙིང་འདོད། །གང་ལྟར་བསམས་ཀྱང་འགྲུབ་དུས་མི་འདུག་གི །ཇི་ལྟར་བྱས་ཀྱང་སྙིང་པོ་མི་འདུག་གི །བྱས་བྱས་བསྒྲུབས་བསྒྲུབས་རང་གཞན་བསླུས་མཐོང་ནས། །ད་ནི་བྱར་མེད་འཆི་བ་སྒུགས་སྙིང་འདོད། །རྟོག་གེ་ཟོལ་ཟོག་གསར་མ་བྱེད་རེ་ཤི། །ཟོག་པོ་གཏེར་རྫུན་རྙིང་མ་བྱེད་རེ་ཤི། །ཚུལ་འཆོས་ངོམ་ཁྱེར་ཆོས་པ་བྱེད་རེ་ཤི། །ང་རྒྱལ་མགོ་མཐོ་བླ་མ་བྱེད་རེ་ཤི། །ཟ་འདོད་སྟོང་རྒྱུག་གྲྭ་པ་བྱེད་རེ་ཤི། །ཕྱི་ཆེ་ནང་སྟོང་བླ་བྲང་བྱེད་རེ་ཤི། །རྙེད་མང་ཡོད་ཉུང་གདུལ་བྱ་བྱེད་རེ་ཤི། །རང་གཡེང་གཞན་བསླུ་ཆོས་བཤད་བྱེད་རེ་ཤི། །མགོ་དམ་མཇུག་ལྷོད་དགེ་སློང་བྱེད་རེ་ཤི། །ཁ་འཇམ་རྒྱུད་རྩུབ་བྱང་སེམས་བྱེད་རེ་ཤི། །སྡོམ་ཤོར་སྟུ་དགའ་སྔགས་པ་བྱེད་རེ་ཤི། །རེ་དོགས་ཟད་མེད་སྒྲུབ་པ་བྱེད་རེ་ཤི། །ད་ནི་མི་བྱེད་བྱས་པས་བསླུས་ལ་ལྟོས། །ད་ནི་མི་བསམ་བསམས་པས་འཁྲུལ་ལ་ལྟོས། །ད་ནི་མི་བཤད་བཤད་པས་གཡེངས་ལ་ལྟོས། །ད་ནི་མི་སྒྲུབ་བསྒྲུབས་པས་བཅིངས་ལ་ལྟོས། །ད་ནི་ཁྱི་རྒན་གྲོང་
མཐའ་ཉུལ་སྙིང་འདོད། །ད་ནི་བ་རྒན་སླས་སུ་ཉལ་སྙིང་འདོད། །ད་ནི་མདོ་མེད་ཅི་དགར་བྱེད་སྙིང་འདོད། །ད་ནི་མངོན་ཆུང་སྤྲང་འཁྱམས་བྱེད་སྙིང་འདོད། །བླ་མ་མི་དགོས་རང་རྒྱུས་རང་གིས་ཤེས། །གྲ་པ་མི་དགོས་རང་གཡོག་རང་གིས་ཐུབ། །བློ་རྩེ་མི་དགོས་སྐྱབས་འགྲོ་ཁ་ཏོན་ཤེས། །ད་ནི་ཅི་བྱུང་གང་བྱུང་ཡིན་པ་སྙམ། །མདོ་མེད་ཤི་རོའི་རང་ཚུགས་དེ་འདྲ་སྟེ། །ཁྱི་རྒན་རུལ་བའི་སྣང་ཚུལ་དེ་ལྟར་ལགས། །ང་རྗེས་མ་སློབ་བསྟན་འཛིན་དམ་པ་རྣམས། །ཡ་རབས་སྤྱོད་ལ་སྤྱན་མིག་ཡངས་པར་མཛོད། །ཕྱི་ཚུལ་སོ་ཐར་ཆོས་གོས་སེར་ཟང་ཟང་། །ནང་ཚུལ་བྱང་སེམས་གཏོང་སྡུད་འཚུབ་ཉིལ་ཉེལ། །གསང་བསྔགས་སྤྱོད་པ་རླ་ཁུག་རློན་ཅ་རེ། །དེ་འདྲའི་སྡོམ་པ་སུམ་ལྡན་མཛད་པར་ཞུ། །རང་དོན་ལྟ་སྒོམ་ལྟ་སྟངས་མཐོ་ཅེར་ཅེར། །གཞན་དོན་ཆོས་བཤད་སྙན་འགྱུར་འུར་ཆེམ་ཆེམ། །གཉིས་དོན་འཁོར་སློབ་འདུ་བ་བྲེལ་ལིང་ལིང་། །དེ་འདྲའི་དོན་གཉིས་མཐར་ཕྱིན་མཛད་པར་ཞུ། །ཆོས་ཕྱོགས་ཐོས་བསམ་སྒོམ་པའི་རྣམ་གྲངས་མང་། །འཇིག་རྟེན་གཡོ་སྒྱུ་སྐོར་མགོའི་བློ་སྣ་རྒོད། །ཟུང་འཇུག་བྱ་བ་ལས་ཀྱི་འཁོར་ལོ་རྒྱས། །དེ་འདྲའི་ལུགས་གཉིས་ཁྱད་འཕགས་མཛད་པར་ཞུ། །མཚན་ཉིད་གཞུང་བཤད་མཁས་མང་ཁ་ལས་ཉོས། །གསང་སྔགས་ཟབ་དོན་ཟབ་གཏེར་རྡོ་
ལས་བརྐོས། །སྣ་ཚོགས་ཉམས་དབྱངས་ཀློང་རྡོལ་ཐུགས་ལ་ཤར། །དེ་འདྲའི་མཁས་གྲུབ་གཏེར་སྟོན་མཛད་པར་ཞུ། །གྲུབ་མཐའ་ཀུན་ཤེས་ཤེས་ཐོབ་ཡིག་ཚོགས་མང་། །ཡི་དམ་ཀུན་སྒྲུབ་ཐུགས་དམ་རྣམ་གྲངས་མང་། །ཆོས་སྐྱོང་ཀུན་བསྟེན་གཏོར་བསྔོས་སོད་ཁ་མཐོ། །དེ་འདྲའི་བླ་མ་མཚན་ལྡན་མཛད་པར་ཞུ། །ཕྱི་ཚུལ་གཟུགས་མཛེས་སྤྱོད་ལམ་ཆ་ལུགས་གཙང་། །ནང་ཚུལ་བློ་རྣོ་ངོ་དགའ་རྙེད་ཚོལ་མཁས། །བལྟ་དགའ་འགྲོགས་སྐྱིད་སེར་སྣའི་མདུད་བ་གྲོལ། །དེ་འདྲའི་གྲ་པ་མཚན་ལྡན་བསྟེན་པར་ཞུ། །ཆོས་ཕྱོགས་ལག་དམ་མཐུན་འཇུག་རྣམ་གྲངས་མཁས། །རང་དབང་མི་སྦྱིན་དཀོར་ཐོག་འགྱེད་ལ་མཁས། །རྙེད་ལོན་འཕྲལ་སྡུད་འཇའ་ཚོན་བྲིད་མཁས་པའི། །དེ་འདྲའི་ཕྱག་མཛོད་ཚད་ལྡན་བསྟེན་པར་ཞུ། །ཟད་བསྒོམ་མེད་བཟླས་ཐབས་མེད་གཏོང་སྒོ་ཡངས། །བཟང་བཅོད་ངན་འཇོག་ཁངས་དཀའ་སྟོང་པར་སླ། །བཞིན་སྡུད་སྡང་གཟིགས་དམན་ལ་ཕྱག་ཀྱང་འབེབས། །དེ་འདྲའི་གཉེར་པ་ཚད་ལྡན་བསྟེན་པར་ཞུ། །དེ་ལྟར་མཛད་ན་སྤྲུལ་སྐུའི་གྱོང་མ་བརྡབས། །བསླུས་པ་ཁེབ་ཆེ་བླ་བྲང་རྐང་མ་སྟོང་། །གྲ་པའི་མགོ་བདུས་རང་གཞན་དོན་གཉིས་འགྲུབ། །དེ་འདྲའི་ཕུན་སུམ་ཚོགས་པའི་བཀྲ་ཤིས་ཤོག ༈ །ཆིག་བརྒྱུད་མན་ངག་གི་ཡི་གེ་རིན་པོ་ཆེའི་མཛོད་ཅེས་
བྱ་བ་བཞུགས་སོ། །བུ་ཤྲཱིའི་ཡིད་ལ་ངེས་རྒྱུ། བརྗེད་མི་ཉན་པ་གསུམ་ཡོད་དེ། བཀའ་དྲིན་ཅན་གྱི་བླ་མ། །ཐུགས་རྗེ་ཅན་གྱི་སངས་རྒྱས། དྲན་པ་དང་ཤེས་བཞིན། དྲན་དགོས་པ་གསུམ་ཡོད་དེ། །བསླབ་པ་སྦྱིན་པའི་མཁན་པོ། བསླབ་པ་སྟོན་པའི་ཆོས། བསླབ་བྱ་དམ་སྡོམ། ཡོད་དགོས་པ་གསུམ་ཡོད་དེ། ལུས་ན་སེམས། མ་ལན་ལུས། སེམས་ན་ལྷོད། བརྗེད་ན་དགའ་བ་གསུམ་ཡོད་དེ། ཁྲོ་བའི་དགྲ། ཆགས་པའི་ཡུལ། གཏི་མུག་གཉིད། འཛིན་ན་དགའ་བ་གསུམ་ཡོད་དེ། ཚོགས་སུ་ཁ། གཅིག་པུར་ལག །ནམ་ཡང་སེམས། གསང་དགོས་པ་གསུམ་ཡོད་དེ། །རང་གི་ཡོན་ཏན། གཞན་གྱི་སྐྱོན། ཕྱིན་ཆད་ཀྱི་བསམ་བློ། ངོམ་མི་ཉན་པ་གསུམ་ཡོད་དེ། གློ་བུར་གྱི་ངེས་འབྱུང་། གཡོ་སྒྱུའི་ཁུག་མགོ །འཕྲལ་གྱི་དགེ་སྦྱོར། འགྲོར་མི་ཉན་པ་གསུམ་ཡོད་དེ། འཁོན་གྱི་གསེབ། མང་པོའི་ཚོགས། རྩེད་མོའི་གྲལ། བཤད་མི་ཉན་པ་གསུམ་ཡོད་དེ། མི་མོས་པ་ལ་ཆོས། མ་འདྲིས་པ་ལ་ལོ་རྒྱུས། མི་སྲིད་པའི་སྐད་ཆ། མི་དགོས་པ་གསུམ་ཡོད་དེ། གྲོགས་ལ་དགའ་སྡུག །གཏམ་ལ་འགྱུར་ལྡོག །ཕྱ་བ་ལ་ངོ་ལྐོག །བྱེད་མི་ཉན་པ་གསུམ་ཡོད་དེ། རང་མཐོང་གི་འགྱིང་། གཞན་གྱི་བླ་བཙག །སུ་ལའང་བརྙས་བཅོས། འཆོར་མི་ཉན་པ་
གསུམ་ཡོད་དེ། མཐོན་པོ་ལ་རྒྱུ། ཟོག་པོ་ལ་དད་པ། སུ་ལའང་སྙིང་གཏམ། བརྟག་མི་ཉན་པ་གསུམ་ཡོད་དེ། མཛེས་མའི་ལུས། གྲོགས་ཀྱི་བྱ་བ། །རང་གི་ཡོན་ཏན། བསྟུན་དགོས་པ་གསུམ་ཡོད་དེ། གཏམ་གྲོགས་དང་བསྟུན། གོས་ཡུལ་དང་བསྟུན། སེམས་ཆོས་དང་བསྟུན། ཉན་མི་ཉན་བ་གསུམ་ཡོད་དེ། གཞན་གྱིས་བསྟོད་པ། ཨ་གསར་གྱི་སྐད་ཆ། ཤེས་མེད་ཀྱི་ཁྱད། ཡིད་ཀྱིས་སྨོན་མི་ཉན་པ་གསུམ་ཡོད་དེ། ཕྱུག་པོའི་རྒྱུ། མཐོན་པོའི་ཐོབ། འཕྱོར་པོའི་རྒྱན། གཏམ་གྱིས་སྨོད་མི་ཉན་པ་གསུམ་ཡོད་དེ། ཡུལ་སྡེས་བརྩི་པའི་མི། གཞན་གྱིས་བཙོང་རྒྱུའི་ནོར། རང་ལ་བརྩེ་བའི་བཤེས། །བསྟོད་མི་ཉན་པ་གསུམ་ཡོད་དེ། ཀུན་གྱིས་སྨད་པའི་མི། རང་མཐོང་ཅན་གྱི་གླེན་པ། ཅང་མི་ཤེས་པའི་བྱིས་པ། བསྟོད་སྨད་གཉིས་ཀ་མི་ཉན་པ་གསུམ་ཡོད་དེ། རང་གི་ཉེ་འབྲེལ། རྒྱུས་མེད་ཀྱི་བླ་མ། ལར་སུ་ལ་ཡང་། དེ་ལ་སོགས་པ་དུ་མ་ཞིག་ཡོད་དེ། མདོར་དྲིལ་ན་དུས་ནམ་ཡང་རང་གྒིས་རང་ལ་ལྟོས། མ་བརྗེད། ཆོས་དང་འཇིག་རྟེན་གཉིས་ཀ་འདིར་འདུས། གདམས་ངག་ཚིག་གཅིག་ཡིན། ཤིན་ཏུ་ཟབ། རྣལ་འབྱོར་བ་དྲི་མེད་བློ་གྲོས་ཀྱིས་བུ་ཤྲཱི་སྙིང་དང་འདྲ་བ་ལ་གདམས་པ་ཡིན་པས་ཉམས་སུ་ལོངས་ཤིག །།དགེའོ།། ཀུན་བཟང་
ཆོས་རྒྱལ་ལ་གདམས་པ། །རྒྱལ་དང་རྒྱལ་བའི་སྲས་པོ་ཇི་སྙེད་པ།། །།ཀུན་གྱི་ཐུགས་རྗེ་བྱིན་རླབས་འདུས་པའི་དཔྱིད། །དྲིན་ཆེན་བླ་མ་རྫོགས་པའི་སངས་རྒྱས་དགོས། །མི་འབྲལ་སྤྱི་གཙུག་རྒྱན་དུ་རྟག་པར་བཞུགས། །གང་ཞིག་འཁོར་བའི་གནས་ཀུན་ཉེས་པའི་སྣོད། །དུག་སྦྲུལ་གཡབ་དང་འདྲ་བར་ལེགས་མཁྱེན་ནས། །ཡང་དག་ཐར་པའི་ལམ་ལ་འབྱོན་བཞེད་པ། །དེ་དག་ཀུན་གྱི་ལག་ལེན་འདི་ལྟར་ལགས། །དང་པོ་ངེས་འབྱུང་ཆོས་ཀྱི་མགོ་ཡིན་པས། །ཡ་ཀི་དགའ་ལྡན་ལྷ་ཡུལ་མན་ཆད་ནས། །མ་ཀི་ངན་སོང་གནས་གསུམ་ཡན་ཆད་ཀྱི། །འཁོར་བའི་གནས་འདི་མེ་ཡི་འོབས་ལྟ་བུར། །ཤེས་ནས་ཐེག་གསུམ་ལམ་ལ་སློབ་པ་དགོས། །བར་དུ་བྱང་སེམས་ཆོས་ཀྱི་ལུས་ཡིན་པས། །འགྲོ་བ་འདི་ཀུན་ཕ་དང་མར་ཤེས་ནས། །དེ་དག་དོན་དུ་སངས་རྒྱས་ཐོབ་འདོད་བློ། །བཅོས་མ་མིན་པར་སྙིང་ནས་སྐྱེ་བ་དགོས། །ཐ་མ་ཡང་དག་ལྟ་དང་དེའི་ཉམས་ལེན། །ཕར་ལམ་མྱུར་དགྲོད་ཆོས་ཀྱི་རྐང་པ་སྟེ། །སྣང་སྲིད་ཆོས་ཀུན་སྤྲོས་བྲལ་སྟོང་བའི་ངང་། །ལུང་དང་རིགས་པས་གཏན་ལ་འབེབས་པ་ལགས། །འཁོར་འདས་ཆོས་ཀུན་རྩ་བ་རང་གི་སེམས། །སེམས་ནི་དང་པོ་བྱུང་བའི་ཡུལ་མེད་ཅིང་། །བར་དུ་གནས་པའི་གཞི་མེད་སྟོང་པ་ཉིད། །ཐ་མ་འགྲོ་འོང་བྲལ་བ་
གཉུག་མའི་ངང་། །བྱུང་གནས་འགྲོ་གསུམ་དྲལ་བའི་རང་སེམས་ལ། །བལྟར་མེད་རང་ངོ་བལྟས་ན་སྟོང་པར་མཐོང་། །སྟོང་ཉིད་ལེགས་སུ་མེད་དེ་སེམས་ཀྱི་གཤིས། །ཡུལ་མེད་ཟང་ཐལ་མཐོང་ན་ལྟ་བ་ལགས། །གནས་ལུགས་ལྟ་བའི་ཉམས་ལེན་དེའི་ངང་དུ། །རྩལ་སྣང་འཁྲུལ་པའི་རྣམ་རྟོག་ཅི་ཤར་ཡང་། །སྤང་བླང་ཆེད་འཛིན་མེད་པར་ཕྱམ་བརྡལ་བའི། །ཡེངས་སྒོམ་བྲལ་བའི་མཉམ་བཞག་སྒོམ་པ་ལགས། །ཡུལ་སྣང་དགའ་སྡུག་ཆགས་སྡང་རེ་དོགས་བློ། །གང་ལའང་སྤང་བླང་དགག་སྒྲུབ་མི་བྱ་བར། །ཐམས་ཅད་མཉམ་པའི་ངང་ནས་འགྲོ་དང་འདུག །སྒྱུ་མའི་རོལ་པར་འཆར་བ་སྤྱོད་པ་ལགས། །མདོར་ན་རང་ངོ་ཤེས་པ་ལྟ་བ་ལ། །དེ་ཡི་ངང་ལ་གནས་པ་སྒོམ་པ་སྟེ། །དེ་ཉིད་རྐྱེན་དང་བསྲེ་བ་སྤྱོད་པའི་གནད། །ལྟ་སྒོམ་སྤྱོད་འབྲས་ཐ་དད་མེད་པ་ལགས། ལྟ་བ་གང་ཡང་ཞེན་པ་མེད་པ་གཙོ། །སྒོམ་པ་གང་ཡང་འཛིན་པ་མེད་པ་གནད། །སྤྱོད་པ་གང་ཡང་ཆོས་དང་མཐུན་པ་མཆོག །ལྟ་སྒོམ་སྤྱོད་འབྲས་གཅིག་ཏུ་འདྲིལ་བ་གནད། །ཅི་ནས་རང་གི་སེམས་ལ་མི་ཕན་པའི། །ཆོས་དེ་ཁ་ཆོས་ཡིན་གྱི་དོན་ཆོས་མིན། །རང་གི་སེམས་ལ་ཁྱད་པར་མི་འདུག་ན། །ལོ་བརྒྱར་མཚམས་སྒྲུབ་བྱས་ཀྱང་ངལ་བའི་རྒྱུ། །དེ་ཡང་ཡང་དག་ཆོས་ཀྱི་གནད་འགགས་ཀུན། །
དོར་ནས་གཟུགས་བརྙན་སྒྲུབ་པའི་སྒྲུབ་པ་པོས། །ནེ་ཙོའི་འདོན་པ་ལྟ་བུའི་ཉམས་ལེན་འདི། །འཁྲུལ་མེད་རྒྱལ་བསྟན་ཡིན་སྙམ་བདག་ལ་མེད། །ལོ་མཚམས་ཟླ་མཚམས་ཁ་གྲངས་གྲངས་རྫོགས་ཤིང་། །དུང་ཕྱུར་དུང་ཕྱུར་བཟླས་པའི་གྲངས་འཁྱོལ་ཡང་། །སེམས་ལ་ཆགས་སྡང་རྨོངས་གསུམ་མ་བྲི་ན། །ཆོས་དེ་དོན་མེད་ཁོ་ན་ལགས་སྙམ་བགྱིད། །བསྐྱེད་རྫོགས་མེད་པའི་ཆོ་ག་ཐུན་བཞི་དང་། །དྲག་དྲན་མེད་པའི་རྔ་རོལ་འུར་ཆེམས་དང་། །ཏིང་འཛིན་མེད་པའི་བཟླས་བརྗོད་འབུག་འབུག་འདི། །ཐར་པའི་ལམ་ལ་ཕྱོགས་ཙམ་ཉེ་རེ་ཀུན། །གལ་ཏེ་བསྐྱེད་རྫོགས་ཏིང་འཛིན་ཡོད་ན་ཡང་། །ཡང་དག་བྱང་ཆུབ་སེམས་དང་མ་འབྲེལ་ན། །འཁྲུལ་སྣང་འཁོར་བར་སྐྱེ་བའི་ས་བོན་ལས། །རྣམ་མཁྱེན་གོ་འཕང་འཐོབ་ལ་མི་ཕན་ནོ། །དེས་ན་གནད་དོན་མེད་པའི་ཆོས་གཟུགས་དང་། །འཁྲུལ་སྣང་ཚེ་འདི་སྒྲུབ་བའི་བན་འཁྱམས་དང་། །དཀོར་ཟན་དལ་ཁོམ་མེད་པའི་བླ་ཆུང་གི །ལད་མོ་མ་བྱེད་རང་སེམས་ཆོས་ཀྱིས་ཐུལ། །སེམས་ཐུལ་སེམས་ཐུལ་རང་སེམས་ཆོས་ཀྱིས་ཐུལ། །བློ་ལྡོག་རྣམ་བཞིས་རང་གི་སེམས་ཐུལ་ན། །ལྟ་སྒོམ་བཟླས་བརྗོད་བསྐྱེད་རྫོགས་མེད་ན་ཡང་། །ཐར་པའི་ལམ་ལས་གཞན་དུ་འཕྱུགས་པ་མེད། །བློ་སྦྱོངས་
བློ་སྦྱོངས་རང་གི་བློ་འདི་སྦྱོངས། །བྱང་ཆུབ་སེམས་ཀྱིས་རང་གི་བློ་སྦྱངས་ན། །ལུས་ངག་དགེ་བ་སྣ་གཅིག་མ་འགྲུབ་ཀྱང་། །རང་གཞན་དོན་གཉིས་མ་འབད་ཤུགས་ཀྱིས་འགྲུབ། །གལ་ཆེན་བྱང་ཆུབ་སེམས་ལ་་ཐུན་གཅིག་ཀྱང་། །ཉམས་ལེན་མི་བྱེད་བསྐྱེད་རྫོགས་སྒོམ་ལོ་དང་། །བཟླས་བརྗོད་བྱེད་ལོ་ཆོས་པའི་གཟུགས་བརྙན་འདིའི། །ཁ་དེ་གྲོང་ཚོ་དགུ་ཡི་རྐྱགས་པས་ཆོད། །གྲོགས་ཁྱེད་ཡང་དག་ཆོས་ཞིག་སྒྲུབ་དགོངས་ན། །བློ་སྦྱོངས་བློ་སྦྱོངས་སྙིང་རྗེ་བྱང་སེམས་སྦྱོངས། །གལ་ཆེན་ལན་དགུ་བཟླས་འདི་དགོངས་མཛད་ནས། །རང་སེམས་ཆོས་ཀྱིས་ཐུལ་དང་གནད་དེ་ལགས། །ཁོ་བོས་ཡང་དག་བླ་མ་མང་བསྟེན་ཞིང་། །ཕྱོགས་མེད་གྲུབ་མཐར་ཐོས་བསམ་རྒྱ་ཆེར་བྱས། །གནད་དོན་སྙིང་པོར་བཏོན་ན་ཚིག་གཅིག་ཡིན། །ཚིག་འདི་དཔེ་ལ་མ་བཞག་ཉམས་སུ་ལོངས། །ཞལ་གདམས་ཞལ་གདམས་ཟེར་མཁན་མང་ན་ཡང་། །དཔེ་བྲིས་ཤོག་བུར་དྲིལ་ནས་ཉར་ཚག་བྱེད། །དེ་དོན་ཅི་ཡོད་ཙམ་ཡང་མི་ལྟ་ན། །དོན་མེད་ཡི་གེ་བྲིས་པ་ངལ་བའི་རྒྱུ། །དེ་འདྲའི་རང་བཞིན་མ་བྱེད་སྐུ་ཚེ་རིང་། །དེ་དོན་ཉམས་སུ་ལོངས་མཛོད་སྐུ་ཚེ་རིང་། །དེ་འབྲས་འདི་ཕྱིར་མངོན་འོངས་སྐུ་ཚེ་རིང་། །ཞལ་གདམས་དེ་ལས་མེད་དོ་སྐུ་ཚེ་རིང་། །
སྐུ་ཚེ་རིང་མཛོད་ཀུན་བཟང་ཆོས་རྒྱལ་ཁྱེད། །ལུགས་གཉིས་བྱ་བཞག་བྲལ་བའི་སྤྲང་འཁྱམས་བདག །བླ་མར་མཐོང་ན་ཞལ་གདམས་དེ་ཡིན་ནོ། །གྲོགས་པོར་མཐོང་ན་སྙིང་གཏམ་དེ་ཡིན་ནོ། །རྒྱལ་འཕགས་དགོན་དུ་ཀུན་བཟང་ཆོས་རྒྱལ་ལ་གདམས་པ་དགེ།། །།དགེའོ།། ༈ ལྷུན་གྲུབ་རྡོ་རྗེར་གདམས་པ། རྟག་ཏུ་རྒྱལ་བ་ཀུན་དང་སེམས་ཅན་གྱི། །སྙིང་ལ་བདེ་ཆེན་རོ་གཅིག་ཡེ་ཤེས་སེམས། །འཇམ་པའི་དབྱངས་དེ་ང་དང་ཁྱོད་ཀྱི་ཡང་། །བྱང་ཆུབ་བར་དུ་རིགས་བདག་དགེ་གྱུར་ཅིག །ངན་སྤྱོད་སྣ་དགུ་བག་མེད་བྱུང་རྒྱལ་གྱིས། །རྒྱུས་ཡོད་ཡིད་ལ་སུན་པ་བསྐྱེད་ཟིན་ཀྱང་། །རྒྱུས་མེད་ཡུལ་ནས་ལྷུན་གྲུབ་རྡོ་རྗེ་དེས། །བཟང་པོར་མཐོང་ནས་ཨ་བུ་ཧྲལ་པོ་བཀུར། །མ་སྨིན་སྨིན་འདྲའི་ཕྱི་ཡི་ཚུལ་དཔགས་ནས། །ཨ་མྲའི་རོ་བཞིན་ཆོས་དོན་བླང་འདོད་དེ། །སྤང་བླང་གནས་ལ་རྩོམ་པ་གྱིས་ཤིག་ཅེས། །ནན་གྱིས་བསྒོས་ནས་བྲི་གཞིའི་ལྡེབ་མའང་བྱིན། །དམ་པའི་ཞལ་གདམས་དམན་པས་ཉན་རིགས་ཀྱང་། །གདོལ་པའི་གཏམ་ལ་སུ་ཡིས་ཡིད་ཆེས་འོས། །འོན་ཀྱང་རི་དྭགས་རོ་ལས་གླ་རྩི་བཞིན། །ལེགས་པར་བཤད་པ་ཀུན་ལས་བླང་འོས་ཡིན། །དམ་པ་དུ་
མས་ཐུགས་རྗེས་བཟུང་བ་དང་། །མཁས་པའི་གཞུང་ལ་ཅུང་ཟད་སྦྱངས་བའི་མཐུས། །ཉམས་སུ་མ་བླངས་ནེ་ཙོའི་འདོན་པ་ལྟའི། །ལེགས་བཤད་སྨྲ་བ་ལྷ་ཡུལ་བྱ་བཞིན་དབང་། །དེ་སླད་སྤོབས་པ་བསྐྱེད་དེ་ཐོས་པ་དང་། །བསམ་དང་སྒོམ་པའི་གནས་ལས་ལེགས་བརྩམས་ཏེ། །ཁྱོད་ལ་ཅུང་ཟད་གསོལ་གྱིས་འདིར་གསོན་ལ། །བླང་འོས་ལགས་ན་བུང་བས་སྦྲང་བཞིན་བྱེད། །ཀྱེ་ལགས་ཐོས་པ་རིན་ཆེན་སྒྲོན་མེ་སྟེ། །ཐར་ལམ་སྣང་བྱེད་ལམ་དང་ལམ་མིན་འབྱེད། །བླང་དོར་གོ་འབྱེད་མིག་དང་འདྲ་བས་ན། །ལམ་ཞུགས་རྣམས་ཀྱིས་ཅིས་ཀྱང་བསྟེན་འོས་ཡིན། །དྲུག་པའི་ས་བརྙེས་རྒྱལ་སྲས་ཆེ་རྣམས་ཀྱང་། །ཚིགས་བཅད་གཅིག་ཕྱིར་སྟོང་གསུམ་མེ་མདག་གིས། །གང་ལས་འབོག་ནས་ཐོས་པ་འཚོལ་མཛད་ན། །གནས་འདི་འདོར་ལ་ལམ་བཟང་ཇི་ལྟར་ཡོད། །ཐར་པའི་ཆ་མཐུན་ཚོགས་ཀྱི་ལམ་མཆོག་ཏུ། །ཐོས་པ་ཁོ་ནས་རང་རྒྱུད་གྲོལ་དགོས་ཀྱི། །སྒོམ་པའི་ཡེ་ཤེས་ཅིག་ཅར་སྐྱེ་དཀའ་བས། །ཤེས་རབ་གསུམ་ལས་དང་པོར་ཐོས་པ་བསྔགས། །ཐོས་བྲལ་གང་ཟག་བསམ་དང་སྒོམ་པ་ལ། །སྦྱོར་བར་རློམ་ཡང་ལམ་དང་ལམ་མིན་པ། །ཤེས་པ་མེད་པས་ལམ་གོལ་གཡང་ས་རུ། །མུན་པར་རྡོ་འཕེན་རང་རྒྱུད་བསླུས་པ་མང་། །ཐོས་པ་བྱ་བ་
གསུང་རབ་རིན་པོ་ཆེ། །རྒྱལ་བའི་སྡེ་སྣོད་བྱིན་རླབས་འོད་སྣང་ཅན། །ཚིག་གཅིག་ཐོས་ཀྱང་བསྐལ་མང་སྒྲིབ་སྦྱོང་བའི། །ཁྱད་ཆོས་དགོངས་ལ་ཉན་ཀློག་ལྟ་བ་བརྩོན། །རྒྱལ་དང་རྒྱལ་སྲས་སེམས་དཔའ་ཆེ་རྣམས་ཀྱི། །མཛད་པའི་ཚུལ་དང་བསམ་གྱིས་མི་ཁྱབ་པའི། །ཆོས་ཚུལ་མཐོང་ནས་ཐུན་མོངས་མ་ཡིན་པའི། །མོས་གུས་སྐྱེ་ངེས་ཆོས་ཀྱི་བྱིན་རླབས་ཡིན། །འདི་ལ་མོས་བློ་སྐད་ཅིག་སྐྱེས་པས་ཀྱང་། །བསྐལ་མང་སྒྲིབ་བྱང་ཚེ་རབས་ཐམས་ཅད་དུ། །དཀོན་མཆོག་མི་འབྲལ་རྒྱལ་དང་རྒྱལ་སྲས་དྲུང་། །པདྨོའི་སྟན་གནས་དམ་ཆོས་ཉན་པར་དབང་། །དེ་སླད་གཉིས་སུ་མེད་གསུང་སངས་རྒྱས་ཀྱི། །གསུང་རབ་ཐོག་མཐའ་བར་དུ་དགེ་བ་སྟེ། །འཁྲུལ་མེད་ལེགས་བཤད་གཅིག་པུར་ཤེས་གྱིས་ལ། །ཐོས་པའི་སྒོ་ཆེན་དང་པོ་ཕྱོགས་འདིར་དབྱེ། །བཀའ་ཡི་དགོངས་འགྲེལ་ཕུན་ཚོགས་བསྟན་བཅོས་གཞུང་། །འཕགས་ཡུལ་རྒྱན་དྲུག་ཞི་ལྷ་ཟླ་གྲགས་དང་། །ཡོངས་གྲགས་གྲུབ་བརྙེས་རྒྱལ་བ་དངོས་འདྲ་བའི། །ལེགས་བཤད་ཐོས་བསམ་འཇུག་སྒོ་གཉིས་པར་བཟུང་། །ཁྱད་པར་འཇམ་པའི་དབྱངས་དངོས་ཞི་བ་ལྷའི། །གཞུང་བཟང་བྱང་ཆུབ་ལམ་གྱི་སྲོག་གཅིག་པུར། །བཟུང་ནས་གྲུབ་བརྒྱའི་སྤྱི་མེས་ས་ར་ཧའི། །དོ་ཧའི་སྐོར་ལས་བློ་
བྲལ་ཡེ་ཤེས་བཙལ། །ལྔ་རིག་སྣང་བའི་ཉིན་བྱེད་ས་པན་རྗེ། །མདོ་སྔགས་ལེགས་བཤད་འབྱུང་གནས་ཙོང་ཁ་བ། །ཡོངས་རྫོགས་བསྟན་པའི་མངའ་བདག་ཀློང་ཆེན་པ། །གངས་ལྗོངས་འཇམ་པའི་དབྱངས་དངོས་རྣམ་གསུམ་ཡིན། །ཕྱོགས་ལྷུང་གདོན་གྱི་དབང་དུ་མ་གྱུར་བས། །རྣམ་གསུམ་མཁས་པའི་གཞུང་ལ་ལེགས་སྦྱངས་ན། །ཡོངས་རྫོགས་རྒྱལ་བའི་བསྟན་པ་རིན་པོ་ཆེ། །ཇི་སྙེད་གཞུང་དང་སྤོབས་པའི་ཡུལ་དུ་འགྱུར། །མཁས་པའི་གཞུང་ལ་གོམས་པ་ཆེར་བསྐྱེད་ནས། །འཁྲུལ་མེད་ལམ་ལ་ངེས་ཤེས་མ་ཐོབ་བར། །རྟོག་གེ་ཟོལ་མའི་ཆགས་སྡང་བསྟན་བཅོས་དང་། །རྫུན་གཏེར་ཟོག་པོའི་བསླུ་ཆོས་དུག་ལྟར་འཛེམ། །རང་བློ་ཡང་དག་ལམ་ལས་མི་ཕྱེད་ཅིང་། །སྤང་བླང་གནས་ལ་སྤྱོད་པའི་སྐལ་ཐོབ་ཚེ། །ངང་པས་ཆུ་ལས་འོ་མ་ཇི་ལྟ་བར། །ཕྱོགས་མེད་གཞུང་ལས་ལེགས་བཤད་ཆ་ཤས་ལོངས། །དེ་ཚེ་ཐོས་པའི་ཉིན་བྱེད་བཀྲག་འབར་བ། །རྨོངས་བློའི་མུན་པ་འཇོམས་པའི་དཀྱིལ་འཁོར་དེ། །གློ་གྲོས་རླུང་གི་རྟ་བདུན་ལ་ཞོན་ནས། །འཆད་རྩོད་རྩོམ་པའི་གླིང་བཞི་འོས་ཀྱང་བསྐོར། །ཐོས་པའི་ཚིག་གི་གོ་ཡུལ་མང་ན་ཡང་། །བསམ་པས་རང་གི་རྒྱུད་ལ་མ་སྦྱར་ན། །རང་རྒྱུད་ཡང་དག་ལམ་ལས་ཕྱི་རོལ་དུ། །གྱུར་ནས་ངན་འགྲོའི་གཡང་སར་འཁྱམས་
པ་མང་། །དེ་སླད་ཐོས་པའི་ཆོས་རྣམས་རང་རྒྱུད་ལ། །སྦྱར་ནས་ནན་ཏན་བསམ་པས་ཉམས་བླངས་ན། །ཆོས་དང་སེམས་སུ་འདྲེས་ནས་རྒྱུད་གྲོལ་ཞིང་། །ཐོས་པ་མི་བརྗེད་གཟུངས་ཀྱིས་རྒྱས་ཐེབས་འགྱུར། །སྡེ་སྣོད་རྒྱ་ཆེ་གཞུང་ལུགས་གྲངས་མང་ཡང་། །ཀུན་གྱི་སྙིང་པོ་རྒྱལ་བའི་ལམ་དུ་གཅིག །རྒྱལ་བའི་ལམ་བཟང་སྨོན་འཇུག་བྱང་ཆུབ་སེམས། །འདི་ལས་གཞན་མེད་ཆོས་ཀུན་ཉིང་ཁུ་ཡིན། །དམ་ཆོས་འོ་མའི་རྒྱ་མཚོ་བསྲུབས་པའི་སྐྱེས། །བྱང་ཆུབ་སེམས་མཆོག་མར་གྱི་ཉིང་ཁུ་འདི། །ཐར་པའི་སྲོག་གི་ཟུངས་གཅིག་འགྲན་ཟླ་མེད། །དེ་ཕྱིར་ཆོས་ཀྱི་སྡོམ་དུ་བསམ་པར་མཛོད། །ཆོས་གཅིག་བསམས་ན་ཆོས་ཀུན་དེར་འདུ་ཞིང་། །ཆོས་ཀུན་བསམས་ཀྱང་མཐར་ཐུག་དེར་འབབས་པ། །ཆོས་ཀྱི་སྙིང་པོ་སེམས་མཆོག་རིན་པོ་ཆེ། །འདི་ལ་སྤྲོས་ཏེ་ཆོས་རྣམས་བསམ་པར་མཛོད། །དེ་ལྟར་བསམས་ན་རྒྱལ་བའི་ཆོས་མཛོད་ཡིན། །རང་གཞན་གྲུབ་མཐའི་ཆགས་སྡང་རང་སར་ཞི། །བསྟན་པ་ཐམས་ཅད་འགལ་མེད་གཅིག་ཏུ་རྟོགས། །རྒྱལ་བའི་ལམ་དང་ནམ་ཡང་འབྲལ་བ་མེད། །དེ་ལྟར་མ་ཤེས་ཕྱོགས་རེའི་ཐོས་པའི་རྗེས། །བསམས་ཤིང་བསམས་ན་འཆལ་བའི་ཤེས་
རབ་སྐྱེ། །གཞུང་ལུགས་ཐམས་ཅད་འགལ་འདུ་ཁོ་ནར་མཐོང་། །ཆགས་སྡང་དབང་གིས་རང་གཞན་ཕྱོགས་སུ་རྩོད། །ཁྱད་ཆོས་བྱེད་འདོད་ཆོས་སྤངས་ལས་ངན་བསག །ཐ་སྙད་རྟོག་གེའི་རྩོད་པ་རྣམ་འཕེལ་ཏེ། །ཡང་དག་གཞུང་ལུགས་ལོག་པའི་ལམ་དུ་འགྲེལ། །ཆོས་ལ་བརྟེན་ནས་ཆོས་མིན་འཕེལ་བར་འགྱུར། །ཆགས་དང་སྡང་ཞུགས་མི་བཟད་ཀུན་སློང་འཕེལ། །ཆོས་མིན་ཆོས་ལྟར་བཅོས་ནས་སྟོན་པ་དང་། །རྙེད་དང་བཀུར་སྟིའི་ཆེད་དུ་བདག་འཚོང་བའི། །བྱང་ཆུབ་སེམས་དཔའ་ཕམ་པའི་ལག་རྗེས་སུ། །ཤར་བའི་ཡིག་ཕྲན་བདུད་ཀྱིས་བྱས་པ་ན། །རང་སྡེས་མཐོང་ན་ལོག་པའི་ལམ་འགྲོ་ཞིང་། །གཞན་སྡེས་མཐོང་ན་བསྟན་པའི་བླ་འཚོང་ལ། །སུ་ཡིས་མཐོང་ཡང་ཆགས་སྡང་ཁོ་ན་འཕེལ། །དེ་སླད་གསར་ཕྱོགས་རྟོག་གེ་ཟོལ་མ་དང་། །རྙིང་ཕྱོགས་རྫུན་གཏེར་ཟོག་པོའི་བདུད་ལས་འདིས། །ཐར་འདོད་ལོག་ལམ་ཁྲིད་པ་གྲངས་མང་ཞིང་། །བསྟན་སེལ་སྡེ་འཁྲུགས་སློང་བའི་རྗེས་མི་འབྲང་། །ཡང་དག་ལམ་ལ་ཐོས་བསམ་བྱས་པའི་རྗེས། །སྒོམ་པའི་ཉམས་ལེན་བླ་མའི་མན་ངག་བཞིན། །བྱང་ཆུབ་སེམས་ཀྱི་བསླབ་པས་གཞི་བཟུང་ནས། །བསྐྱེད་དང་རྫོགས་དང་རྫོགས་པ་ཆེན་པོར་དྲིལ། །བྱང་ཆུབ་སེམས་བྲལ་བསྐྱེད་རྫོགས་སྒོམ་ལོ་ལང་། །
ཐར་བའི་ལམ་དུ་འགྲོ་བར་དཀའ་བས་ན། །ཡང་དག་རྒྱལ་བའི་ལམ་བཟང་གཞུང་བསྲངས་ཏེ། །ཀུན་ཏུ་བཟང་པོའི་སྤྱོད་ལ་དོན་གཉེར་དགོས། །བསྐྱེད་རིམ་གསང་ཆེན་ལམ་གྱི་གཞི་མ་སྟེ། །གསང་སྔགས་ཐབས་ཀྱིས་ཆེ་བའི་ཁྱད་ཆོས་མཆོག །ཐ་མལ་མཚན་རྡོག་སྡོམ་ལ་མེད་ཐབས་མེད། །དེ་ཕྱིར་འོག་མིན་བགྲོད་པའི་ཐེམ་སྐས་བཞིན། །གཡོ་ཐོབ་གོམས་བརྟན་མཐར་ཕྱིན་གྱུར་གྱི་བར། །རྟོག་པའི་ལྷ་སྐུར་རྩལ་སྦྱོང་ཆོས་ཉིད་དུ། །བསྲེ་བའི་སྣང་སྟོང་ཟུང་འཇུག་རྩལ་འབྱོངས་ནས། །སྲོག་སྡོམ་གཟེར་གཞིའི་མན་ངག་གནད་དུ་བསྣུན། །རྫོགས་རིམ་མཚན་བཅས་རྣམ་པ་གྲངས་མང་ཡང་། །ཀུན་གྱི་རྩ་བ་གཏུམ་མོའི་གནད་ལ་འདུས། །དེ་སླད་མན་ངག་གནད་དང་ལྡན་པ་ཡིས། །དྲོད་ཙམ་དོན་དུ་གཉེར་བ་མ་ཡིན་པར། །རླུང་སེམས་དབུ་མར་འཛུད་པའི་མན་ངག་གིས། །སྣང་གསུམ་དོན་གྱི་འོད་གསལ་ལ་འདྲེས་ན། །རིམ་ལྔ་ཆོས་དྲུག་སྦྱོར་དྲུག་ལ་སོགས་པ། །ཀུན་གྱི་གནད་དོན་གཅིག་ཏུ་འདུས་པ་ཡིན། །རྫོགས་ཆེན་ཀ་དག་ལྷུན་གྲུབ་ཟུང་འཇུག་ལམ། །ཁྲེགས་ཆོད་ཐོད་བརྒལ་གདམས་པའི་ཉམས་ལེན་མཐིལ། །སྙིང་ཏིག་གསང་བའི་མན་ངག་ཇི་ལྟ་བར། །ཚེ་གཅིག་འོད་ལུས་འགྲུབ་པའི་ལམ་ལ་བསླབ། །
དེ་ལྟར་ཐོས་བསམ་སྒོམ་པས་རྒྱལ་བའི་བསྟན། །ཡོངས་རྫོགས་རང་གི་རྒྱུད་ལ་ཉམས་ལེན་པའི། །གནད་དོན་དེ་ལྟར་དགོངས་ན་བསྟན་པ་ཀུན། །འགལ་མེད་ལམ་གྱི་ཆ་ལག་གཅིག་ཏུ་རྟོགས། །དེ་ཕྱིར་རྒྱལ་བའི་བསྟན་པའི་གནད་སྟོན་པའི། །ལེགས་བཤད་ཚིག་འདིས་ཁྱེད་ཐུགས་དགྱེས་སྐྱེད་པའི། །ཆོས་བཞིན་སྨྲ་བའི་ཨ་བུ་ཧྲལ་པོ་ཡང་། །ཆོས་ལ་གོམས་པས་བསྐལ་མང་འདའ་གྱུར་ཅིག །མངྒ་ལམ། བཀའ་དྲིན་མཚུངས་པ་མེད་པའི་ཐུགས་རྗེ་ཅན། །བྱིན་རླབས་བསླུ་བ་མེད་པའི་དཀོན་མཆོག་གསུམ། །ཡིད་ཆེས་ཁྱེད་ཤེས་དད་པས་གསོལ་བ་འདེབས། །རེ་ལྟོས་འགྲོ་བའི་ཤེས་རྒྱུད་ཆོས་ལ་སྒྱུར། །གྲོགས་ཁྱོད་ཡང་དག་ཆོས་ལ་སློབ་འདོད་ན། །སྙིང་ནས་ཡིད་ཆེས་དད་པ་རྩེ་གཅིག་གིས། །བསླུ་མེད་དཀོན་མཆོག་གསུམ་ལ་སྐྱབས་སུ་སོང་། །བློ་གཏད་བསླུ་བ་མེད་པ་འདི་ལ་གྱིས། །ཆོས་རྣམས་ཀུན་གྱི་གཞི་རྟེན་སྐྱབས་འགྲོ་སྟེ། །སྐྱབས་འགྲོ་མེད་ན་ཐེག་དགུའི་ཆོས་ཤེས་ཀྱང་། །མུ་སྟེགས་ཕྱི་པའི་གཞུང་དང་ཁྱད་པར་མེད། །དེ་ཕྱིར་སྐྱབས་འགྲོ་ཆོས་ཀྱི་རྟེན་གཞིར་ཟུངས། །རྒྱལ་དང་རྒྱལ་སྲས་ཀུན་གྱི་བགྲོད་ཅིག་ལམ། །ཐེག་ཆེན་ལམ་གྱི་བློ་སྦྱོང་འདི་ཡིན་ཏེ། །བྱང་ཆུབ་སེམས་མཆོག་
ཡིད་བཞིན་རིན་པོ་ཆེ། །འདི་ལ་མ་བརྟེན་རྫོགས་པའི་སངས་རྒྱས་མེད། །བྱང་ཆུབ་སེམས་ཀྱིས་མ་ཟིན་བསྐྱེད་རྫོགས་སོགས། །གསང་སྔགས་ལམ་གྱི་ཉམས་ལེན་བྱེད་ལོ་ཡང་། །ཐེག་ཆེན་ལྟ་ཅི་ནང་པའི་ཆོས་སུ་ཡང་། །འགྲོ་དང་མི་འགྲོ་ཤེས་པར་དཀའ་བ་ལགས། །བྱང་ཆུབ་སེམས་དང་ལྡན་ན་ཚེ་རབས་ཀུན། །ངན་འགྲོར་མི་ལྟུང་ཚོགས་གཉིས་ཤུགས་ཀྱིས་རྫོགས། །རང་གཞན་དོན་གཉིས་མ་ལུས་མཐར་ཕྱིན་ནས། །མཐར་ཐུག་རྫོགས་པའི་སངས་རྒྱས་ངེས་པར་ཐོབ། །དེ་ཕྱིར་སྐྱབས་སུ་འགྲོ་དང་སེམས་བསྐྱེད་པ། །འདི་གཉིས་ཆོས་རྣམས་ཀུན་གྱི་མདོ་འགགས་ཏེ། །གཉིས་འདི་ཇི་ལྟར་བཤད་བཞིན་ཉམས་བླང་ན། །སྡོམ་པ་གསུམ་སོགས་ཆོས་ཀྱི་གནད་ཀུན་འདུས། །དེ་བས་གཉིས་འདིར་མ་འདུས་གཞན་པའམ། །གཉིས་པོ་འདི་ལས་ལྷག་པའི་ཉམས་ལེན་ཞིག །ངས་ནི་སྡེ་སྣོད་བལྟས་ཀྱང་མ་མཐོང་ལ། །དམ་པའི་བཤེས་གཉེན་བརྟེན་ཀྱང་མ་ཐོས་སོ། །གང་ཞིག་འཁོར་བ་མེ་དོང་འདྲ་བའི་འོབས། །འདི་རུ་ཆུད་ན་སྡུག་བསྔལ་རང་བཞིན་ཏེ། །བདེ་བའི་གོ་སྐབས་གང་ནའང་མེད་པའི་ཚུལ། །ཡང་དག་ཤེས་ནས་ངེས་འབྱུང་བློ་སྐྱེ་མཛོད། །ངེས་འབྱུང་འདི་ལ་བརྟེན་ནས་རང་དང་
གཞན། །གཉིས་པོའི་དོན་དུ་སྐྱབས་སུ་འགྲོ་བ་དང་། །བླ་ན་མེད་པའི་བྱང་ཆུབ་སེམས་མཆོག་བསྐྱེད། །རྒྱུན་དུ་རང་གི་སེམས་ལ་བརྟགས་བྱ་སྟེ། །རང་རྒྱུད་རྣམ་རྟོག་ཡན་པར་མ་ཤོར་བར། །དགེ་བློ་བསྐྱེད་ཅིང་མི་དགེའི་རྟོག་པ་སྤང་། །གང་ཡང་རང་བཞིན་མེད་པར་ཤེས་པར་བྱ། །རྒྱུན་དུ་རང་གི་སེམས་ལ་མ་བརྟགས་ན། །ཆོས་སྒྲུབ་རློམ་ཡང་ང་རྒྱལ་སྣོན་མ་སྟེ། །གཞན་གྱིས་བསྟོད་ཅིང་དཀོར་ནག་འཕེལ་བའི་རྒྱུས། །ཆོས་དེ་ངན་སོང་སྐྱེ་བའི་སྣོན་མ་ལགས། །གཞན་གྱིས་མི་ཤེས་རང་སེམས་སྐོག་ཏུ་འདུལ། །ཆོས་དང་སེམས་རྒྱུད་དབྱེར་མེད་འདྲེས་པ་དེར། །བསྒོམས་བསྒོམས་བཟླས་བཟླས་ཁ་ཕོ་མེད་ན་ཡང་། །རྒྱལ་བ་རྣམས་ཀྱི་རྗེས་འཇུག་ངེས་པར་ཡིན། །དེ་ཕྱིར་ཁྱེད་ཀྱང་འདི་འདྲའི་ཚུལ་བསླབས་ཏེ། །ཆོས་བརྫུ་ཟོག་པོའི་རྗེས་སུ་མི་འབྲང་བར། །ཆོས་མཛད་དམ་པའི་མཛད་བཟང་ལྟར་བགྱིས་ཏེ། །རང་གཞན་དོན་གཉིས་མཐར་ཕྱིན་མཛད་པར་ཞུ། །ཁོ་བོའི་རྒྱུད་ན་ཡོན་ཏན་སྣ་གཅིག་ཀྱང་། །མེད་མོད་རྩ་བའི་བླ་མ་སངས་རྒྱས་དངོས། །དེ་ཡི་གསུང་སྒྲོས་མང་ཞིག་ཐོས་དེའི་ཕྱིར། །བཤད་པའི་ཚིག་འདི་ཡང་དག་ཆོས་དང་མཐུན། །དེ་སྐད་དམ་པ་གང་གི་བཀས་བསྐུལ་ནས། །མི་འདོད་ལས་ཀྱིས་དེད་པའི་སྒར་གྲལ་ནས། །བརྒྱ་བསམ་གཅིག་
དོན་མེད་པའི་ལས་ངན་པོ། །ཁྱི་རྒན་དཔལ་དགེ་སྡོམ་པོས་བྲིས་མདོག་བྱས། །དགེའོ། །དགེའོ། །དགེའོ།། ༈ །བླ་མ་ལ་ཕྱག་འཚལ་ལོ། །ཐོག་མཐའ་མི་མངོན་སྲིད་པའི་གྲོང་ཁྱེར་དུ། །སྡུག་བསྔལ་གསུམ་གྱིས་མནར་བའི་འགྲོ་ཁམས་ལ། །གཅིག་ཏུ་བརྩེར་དགོངས་ཡེ་ཤེས་སྒྱུ་མའི་འཕྲུལ། །ཅིར་ཡང་ངོམ་མཛད་དཔལ་མགོན་བླ་མར་འདུད། །མ་རིག་ཤིང་ལ་དུག་ལྔའི་མེས་བཟུང་བའི། །རྨོངས་པའི་ཁ་འདི་ནགས་ཀྱི་མེ་ཆེན་བཞིན། །གདམས་པའི་རླན་བཅུད་སྤྲོ་བ་མ་མཆིས་ཀྱང་། །བསྐུལ་པའི་ཚུལ་གྱིས་རྔ་ལ་དབྱུག་གུ་བཞིན། །རང་ཉམས་མེད་པའི་བཤད་ཡམ་རི་དྭགས་ཁྱུས། །སྙིང་གི་སྡང་ཐང་ལྷས་སུ་བགྱིད་མོད་ཀྱང་། །ཐུགས་ལ་འཕྲོད་པའི་དོན་བཟང་བདུད་རྩིའི་ཞོ། །དམ་པའི་གྲོགས་ལ་དྲང་དུ་མེད་དེས་ནོངས། །དེ་ལྟ་ན་ཡང་གྲུབ་བརྙེས་གོང་མ་རྣམས། །ཕྱི་ཡི་ཡུལ་འདི་དཔེ་ཆར་གསུངས་པས་ན། །དཔེ་ལས་བཤུས་ཏེ་ངེས་ཤེས་དམ་པའི་དག །ཁྱེད་ལ་གསོལ་ན་བརྩེ་བའི་ཐུགས་ཀྱིས་དགོངས། །ཀྱེ་ལགས་ལྟོས་དང་མི་རྟག་སྲིན་མོའི་ཁ། །གླལ་བའི་ཁྱོན་འདི་བདེན་བཞིའི་ཆོས་ཀུན་གྱི། །གླེང་གཞི་ལགས་ཏེ་འཁོར་བའི་གྲོང་ཁྱེར་ན། །སྣོད་
བཅས་འཇིག་རྟེན་ཟ་བ་པོ་ཡང་འདི། །སྔར་ཞིག་བཀོད་ཅིང་བཀོད་པའི་སྟོང་ཁམས་བརྒྱ། །ཟོས་པའི་སྒྲེགས་སྐད་ཐོས་པ་ཡོད་ལགས་ཀྱང་། །ངེས་འབྱུང་རླུང་གིས་བ་སྤུ་མི་གཡོ་བ། །རྟག་འཛིན་བདུད་འདིས་ཡིད་དབང་འཕྲོག་པས་ལེན། །ཀྱེ་མ་གཅིག་ཏུ་བརྟན་པའི་ནོར་འཛིན་མ། །སྲིད་ན་སྲ་བའི་དཔེ་རུ་བགྱི་མོད་ཀྱང་། །མི་རྟག་སྲིན་མོ་འདི་མཐོང་རླུང་ཤུགས་ཀྱིས། །བཏང་བའི་རང་བཞིན་འདར་བ་གཟིགས་ལགས་སམ། །ཚུལ་འདི་མཁས་པའི་རང་བཞིན་གྲོང་བའི་ཁྱིམ། །གྲུབ་པའི་གདན་སར་བཏགས་པའི་བརྗིད་བག་བརྒྱ། །གཏུབས་ནས་རྡུལ་གྱི་ཕུང་པོར་སྤུངས་པ་འདིས། །སེམས་ཞིག་ཡོད་ན་ངེས་འབྱུང་མགྲོན་དུ་འབོད། །མི་རྟག་སྲིན་མོས་བྱ་གཏོང་འདི་མཐོང་ཡང་། །ད་དུང་སྐྱོ་བ་མེད་པའི་ལུས་ཅན་བ། །རང་གསོད་འཇུར་བུ་བཅའ་བའི་བྲེལ་རྒྱུག་ལས། །ངེས་འབྱུང་ནགས་སུ་མི་འབྲོས་འདི་སྨྱོས་སམ། །ཀྱི་ཧུད་སུན་པ་མེད་པའི་འཁོར་བ་ན། །བྱ་བྱེད་ཡང་པོས་དམྱལ་བའི་འཐབ་མོ་བཞིན། །རང་གཞན་གཉིས་ཕུང་ལན་བརྒྱར་མཐོང་ན་ཡང་། །སྐྱོ་ནས་སྒྱུར་དུ་མེད་པ་འདི་ཅི་ཞིག །གདམས་ཟབ་ཐོང་བཤོལ་ཡོད་དགུའི་རྣོ་སོ་ཡང་། །འདེབས་ས་འདི་སྣང་ཐ་བ་འདི་ལགས་ན། །སྲིད་འབྱོར་རྡུལ་དུ་ཞིག་པའི་ལྟད་མོ་འདི། །གདམས་ཟབ་སྟོང་གི་
ཉིང་ཁུ་ཉིད་དུ་དགོངས། །འཁྲུལ་མེད་རྒྱལ་བའི་བཀའ་ཞེས་གྲགས་ན་ཡང་། །དད་མེད་མིག་སྔར་ཤོག་ལོགས་རི་མོ་ཙམ། །ཟབ་གནད་དམ་པའི་གསུང་ཞེས་ཉན་ན་ཡང་། །ངེས་འབྱུང་མེད་ལ་ཞལ་གྱི་རླངས་པར་ཟད། །སྐྱེས་ཚད་འཆི་དང་བསགས་ཚད་འཛད་པ་དང་། །བརྩིགས་ཚད་འགྱེལ་བའི་སྣང་ཚུལ་ཕྱོགས་རེ་ཙམ། །མང་དུ་མཐོང་ཡང་སྙིང་ལ་མ་ངེས་པ། །ཆོས་ཀྱིས་དྲེད་པའི་རང་རྒྱུད་སྲ་བས་ལན། །མི་རྟག་ཡོད་དགུའི་སྣང་ཚུལ་དུས་གཅིག་ཏུ། །ངོམས་པའི་གཤིན་རྗེའི་གར་མཁན་སླེབ་པ་འདི། །དམ་པའི་གསུང་སྒྲོས་སྟོང་གི་བདེན་དབང་དུ། །ངེས་ན་ཡིད་ཆེས་འདི་ལ་འཆའ་བར་རིགས། །སློབ་དཔོན་འདི་ལགས་གདམས་པའི་ཟབ་གནད་འདི། །དྲན་བགྱིད་སྐྱོ་ཤས་བསྐྱེད་བོས་འདི་ལགས་ཏེ། །ད་རེས་གཤིན་རྗེ་གདུག་པའི་གར་སྟབས་འདིས། །མི་རྟག་སྲིན་མོའི་འཇབ་ཁུར་བུད་པ་ལགས། །ཀྱེ་ལགས་ཕུན་ཚོགས་དབེན་པའི་ལྗོངས་ཤིག་ན། །དབེན་གསུམ་གྲིབ་བསིལ་སྣུམ་པའི་རེག་འཇམ་ཅན། །རབ་དགའི་ལྗོན་ཤིང་ལྷ་མོའི་མཛེས་སྡུག་གིས། །ལག་པད་བསྐྱོད་བཞིན་འབོད་པ་དེ་གཟིགས་སམ། །རྒྱང་ནས་མི་རྟག་སྲིན་མོ་འཇབ་འདུག་ཀྱེ། །མཆོངས་པའི་གོམས་སྟབས་ནན་སླེབས་
མི་ཤེས་ཀྱི། །མྱུར་བ་རང་ཅན་ཤོག་ཅེས་དུས་བཞིའི་མགྲོན། །གྲོགས་སུ་སྦྲན་ནས་འབོད་པ་མ་ལགས་སམ། །ལྷ་མོ་མཆོག་འདི་ལྷ་ཡི་ཡང་ལྷ་དེས། །ལྷ་སྲས་སྟོང་གི་མ་མ་ཡིན་སྐད་དེ། །འདི་དྲུང་ཕྱིན་ན་འཁྲུལ་པའི་ཁུར་ཆེན་ཡང་། །ཕོག་ནས་ངལ་བསོའི་སྟེགས་ལ་འགོད་ཅེས་ཐོས། །ངེས་འབྱུང་མདོག་དཀར་ཉམས་ལེན་བཅུད་ཀྱིས་རྒྱས། །དབེན་གསུམ་ཏོག་ལས་གཞིབས་པའི་སྟབས་བདེ་བ། །སྙིང་ལ་ངེས་པར་འབབས་པའི་ལྷ་ཆོས་བཅུད། །རོ་མངར་ནུ་མ་འདི་ཡིས་སྣུན་པར་ངེས། །སྔོན་བྱོན་དམ་པའི་སྐྱེ་བོ་སྟོང་དག་ཀྱང་། །འདི་དྲུང་ཕྱི་ནས་ཉམས་ལེན་བཅུད་གསོལ་ཏེ། །ཡོན་ཏན་ལུས་རྩལ་རྒྱས་པའི་གར་སྟབས་དང་། །རྟོགས་པའི་མྱོས་གླུ་ཅིར་ཡང་ངོམས་ཞེས་གྲགས། །ད་ལྟའི་དུས་ནའང་གཞན་ལ་ཕན་བརྩོན་ཞིང་། །མཐའ་ཡས་ཡོན་ཏན་གཏེར་ལ་དབང་བསྐྱུར་བའི། །དམ་པ་དེ་དག་དབེན་པའི་ནགས་ཚལ་ལ། །གཅིག་ཏུ་དགྱེས་དེས་བསླབ་གསུམ་རྫོགས་པ་ལགས། །དེ་སླད་ཁྱེད་ཀྱང་མཁས་པའི་རྗེས་བསླབས་ཏེ། །འདུ་འཛིའི་གནས་ལས་དབེན་བར་ཕེབས་ཟིན་དེས། །ཡི་རངས་མེ་ཏོག་ཆར་སིལ་འཐོར་བ་ལས། །སྐུལ་འདེབས་ལྷ་ཡི་རྔ་ཆེན་ད་ཅི་བརྡུང་། །འོན་ཀྱང་བག་ཡངས་གནས་ལས་བག་མེད་པས། །སྐྱེ་བ་ངེས་འབྱུང་བདུད་རྩིས་མ་ངོམས་ཤིང་། །སྐུལ་འདེབས་མི་རྟག་ལྕག་གིས་བྲབ་ཉུང་བའི། །
རྒྱུ་ལས་ངེས་པར་འབྱུང་བ་མཁྱེན་པར་མཛོད། །འཆི་བ་མ་དྲན་ཆོས་ཀྱི་གཟུགས་བརྙན་དེས། །འཆི་བདག་དྲུང་ན་ཆོས་གོ་མི་ཆོད་ཀྱི། །སེམས་དང་ཆོས་སུ་འདྲེས་པའི་ནོར་བུ་དེ། །རྟག་ཏུ་ཆོས་དོན་སེམས་པའི་ལག་རྗེས་ལགས། །ངུར་སྨྲིག་འཛིན་པའི་སེམས་ལ་གཡོ་སྒྱུ་དང་། །དབེན་པའི་ནགས་ན་ཚེ་འདི་གཉེར་བའི་ལས། །མཐོང་ནས་ལྷ་ཡི་རྒྱལ་པོས་དམོད་འདོར་བས། །རྟག་ཏུ་རང་སེམས་འདི་ལ་བྱ་ར་མཛོད། །འཁྲུལ་པའི་སེམས་འདི་ངེས་པར་མ་བཏུལ་ན། །མཆུ་འདབ་རླུང་གིས་བསྐྱོད་པའི་བཟླས་བརྗོད་དང་། །ལེགས་སྨོན་དུག་གིས་བསྐྱེད་པའི་སྲུང་སྡོམ་དེ། །འབྲས་བུ་ཐར་མཆོག་བཅུད་དུ་སྨིན་པར་དཀའ། །དྲན་དང་ཤེས་བཞིན་སེམས་ཀྱི་ཁ་ལོ་པ། །བག་ཡོད་སེམས་ཀྱི་སྲུང་མ་དཔའ་བོ་སྟེ། །བྱང་ཆུབ་སེམས་མཆོག་སེམས་ཀྱི་ནོར་བུ་འདི། །ཤེས་ནས་སེམས་འདི་དབྱིག་དང་ལྡན་པར་མཛོད། །སེམས་ཀྱི་བུ་ཆུང་ཡན་པར་ཤོར་བ་འདི། །དྲན་ཤེས་རྒན་པོའི་མིག་ལྕིབས་འགེབས་ཚེར་ཡང་། །ཚུལ་མིན་ཡིད་བྱེད་ཚུལ་ལ་རྒྱུག་འཆོར་བས། །ལས་གཞན་སྤངས་ནས་འདི་ངོ་ཅེར་རི་འཆོས། །ཕྱིན་དྲུག་ལམ་དང་བསྐྱེད་རྫོགས་རྫོགས་ཆེན་དོན། །འདི་ལ་དགོས་ཀྱི་གཞན་དུ་སུ་ཡིས་སྤྱོད། །བརྒྱད་ཁྲི་བཞི་སྟོང་ཆོས་ཀྱི་ཆར་པ་ཡང་། །འབེབས་པ་སེམས་ཀྱི་ཞིང་ས་འདི་ཁོ་ན། །
གཞན་གྱིས་མཐོང་དང་རང་གིས་བགྲང་རྒྱུ་ཡོད། །བྱས་ཡུས་ཅན་གྱི་ཆོས་དེ་གཟུགས་བརྙན་ཙམ། །ལགས་ཏེ་དེ་འདྲ་ང་རྒྱལ་སྣོན་མ་ལས། །ཐར་པའི་ལམ་དང་ཞལ་འདྲིས་མེད་པ་འདྲ། །འཁྲུལ་པའི་སེམས་དང་འཐབ་མོ་རྒྱུན་བསྲིངས་པས། །ཆོས་དང་རང་སེམས་ལྐོག་ནས་འདྲེས་པ་དེ། །ཆོས་བྱས་སྙམ་དུ་རློམ་པ་མི་སྐྱེ་ཡང་། །ལྷ་དང་བླ་མ་དེ་ལ་དགྱེས་པར་འདུག །དེ་སླད་དྲན་པའི་མདུང་རྣོན་དེ་བརྡར་ནས། །རྟག་ཏུ་སེམས་ཀྱི་སྒོ་འདི་བསྲུང་ནུས་ན། །ཐེག་གསུམ་ལམ་གྱི་ཡོན་ཏན་ཇི་སྙེད་པ། །མ་ཚོར་ཤུགས་ཀྱིས་རྒྱུད་ལ་མཛའ་བར་འགྱུར། །ཕྱོགས་འདི་གང་གིས་བཟུང་བའི་འདུས་པའི་སྡེ། །འདི་ན་ལམ་གྱི་སྲོལ་ཆེན་གཉིས་སྣང་སྟེ། །གཅིག་གིས་ཆོས་དང་གཅིག་གིས་རྙེད་པ་ཡིས། །རྙེད་པ་བསྒྲུབ་ལ་ཕྱག་ལེན་གཅིག་ཏུ་མཐུན། །སོ་དཀར་གཞོན་པའི་དུས་ན་འདོད་ལྔའི་ཡུལ། །རང་དགའ་དང་དུ་བླངས་ཏེ་རྩེས་རྩེས་ནས། །ཕྱེད་དཀར་མགོ་སྐྱེས་དུས་ན་སྒྲུབ་པའི་ཟོལ། །དབུ་དཀར་བླ་མའི་རྣམ་རོལ་དང་པོ་ལགས། །ཟ་ཆོག་ཚོགས་གྲལ་འགྲིམ་པ་གཞོན་ནུའི་དུས། །སྐྱ་སེར་གཉིས་གོ་ཆོད་པ་བར་དུ་སྟེ། །ཕྱི་ནས་རྒྱ་དབུས་འགྲིམ་པའི་ཚོང་དཔོན་དུ། །ཆས་པ་ཕྱོགས་འདིའི་ལམ་སྲོལ་གཉིས་པ་ལགས། །གཉིས་པོ་གང་ཡང་བསྟན་པའི་བཅུད་ཆེན་པོ། །འཛིན་པའི་བུམ་བཟང་ལགས་ཞེས་དར་དམར་གྱི། །མགུལ་ཆིངས་སྒྲོན་པའི་འོ་ན་
འཆི་བདག་གིས། །ལྕགས་ཀྱུའི་རྩེ་ཡང་དེ་ལ་ཉེ་བར་གྱུར། །སྔར་ནས་ཆོས་དང་རང་རྒྱུད་མ་བསྲེས་པས། །དེ་བློ་བསྟན་པའི་ཕྱོགས་སུ་ཅི་སྟེ་འགྲོ། །ཚེ་གང་ཚེ་འདིའི་ཕྱོགས་སུ་ཤོར་ཤོར་ནས། །འཆི་ཁ་བྲང་ལག་འཐབ་ཚེ་འགྱོད་ཀྱང་འཕྱིས། །དེ་བས་ཁྱེད་ཀྱང་དབེན་པའི་ནགས་ཁྲོད་དུ། །རང་གི་ཚེ་འདི་དོན་ཡོད་འདའ་བྱས་ན། །འདི་སྣང་ཆེ་དགུས་ཞལ་འཛུམ་མ་སྩལ་ཡང་། །ལྷ་དང་བླ་མ་དབྱིངས་ནས་དགྱེས་པར་ངེས། །རང་དྲིན་རང་ལ་ཆེ་བའི་ཉམས་ལེན་ཞིག །ནུས་ན་དལ་འབྱོར་རིན་ཆེན་དོན་བཅས་ཏེ། །བསྒྲུབས་འབྲས་ཚེ་འདིའི་ཕྱོགས་སུ་ཤོར་བ་ཕལ། །ལམ་རིང་ཕྱི་མའི་རྒྱགས་ཕྱེ་གང་དུ་ཚོལ། །ཀྱེ་མ་བྱང་ཆུབ་སེམས་མཆོག་དམ་པའི་ལམ། །ལམ་འདི་སྲས་བཅས་རྒྱལ་བའི་གཤེགས་ཤུལ་ཏེ། །ལམ་མཆོག་འདི་ལ་བརྟེན་ན་རྣམ་མཁྱེན་ལམ། །རིང་བ་མིན་ཞེས་ལམ་མཐར་ཕྱིན་ཀུན་གསུངས། །དེ་སླད་བདེན་གཉིས་རང་བཞིན་དམ་པའི་སེམས། །སྙིང་གི་བདུད་རྩིར་སྤྱོད་དུ་ཡོད་པ་འདི། །བསྐལ་མང་རྙེད་དཀར་དགོངས་ནས་ཉམས་ལེན་རྒྱུན། །འཆི་བས་གཏུགས་པ་དེ་སྲིད་གཏོད་མི་འཚལ། །དེའང་རྣམ་ལ་ཀུན་ཏུ་དོན་ཆེ་བས། །སྐྱེ་དང་སྐྱེ་བར་འཕགས་པའི་རིགས་སད་ཅིང་། །མཐར་ཐུག་རྣམ་མཁྱེན་ཡེ་ཤེས་སྒྲིབ་བྲལ་དུ། །རྒྱས་ནས་སྲིད་ན་ཆོས་ཆར་འབེབས་པར་འགྱུར། །དེ་ལྟར་གང་གསོལ་འདི་ཡང་
དོན་བཅས་ཏེ། །མཚུངས་མེད་བླ་མ་སངས་རྒྱས་དངོས་ཞིག་གིས། །གསུང་གིས་བསྐྱངས་ཕྱིར་གསུང་སྒྲོས་ཉག་གཅིག་ཕྱིར། །ཞལ་གྱི་གདམས་པར་བཏགས་ཀྱང་འོས་པ་ཙམ། །གཞན་དུ་རང་རྒྱུད་ཆོས་དང་མ་འདྲེས་པའི། །བག་མེད་བདག་ལྟས་གདམས་ངག་ཅི་འཆད་དེ། །ཁ་སྦུབ་བུམ་པའི་དྲུང་ན་ཞལ་སྐམ་ཡང་། །དེ་ལས་བཏུང་བའི་རེ་བ་སུ་ཞིག་འཆའ། །འདི་ན་མཁས་གྲུབ་ཉི་ཟླའི་དཀྱིལ་འཁོར་ཟུང་། །བཀྲག་ཏུ་འབར་དྲུང་སྲིན་བུའི་འོད་སྣང་ལ། །གཟིགས་པ་རྩེད་མོའི་རྣམ་འགྱུར་ཡིན་མཆི་ཡང་། །འདི་རུ་ཅུང་ཟད་ངལ་ལས་དྲོན་གཞན་མེད། །དེ་སྐད་བུདྡྷའི་མཚན་ཅན་དེས་བསྐུལ་ནས། །ཁམས་གསུམ་ཟ་བར་བྱེད་པ་འཇིགས་བྱེད་དུས། །དུས་ཀྱང་ཟ་བར་བྱེད་པ་འཇམ་པའི་དབྱངས། །དུས་དགྲའི་དབང་པོའི་ཕོ་བྲང་བརྗིད་པ་ནས། །དུག་ལྔའི་མེ་དཔུང་འབར་བའི་འཛུམ་ཟེར་རྩེར། །ཡེ་ཤེས་སྣང་བ་འཆར་བ་ལ་དགའ་ཞིང་། །སྙིང་གི་ཉི་མ་འཇམ་མགོན་སྨྲ་བའི་ལྷར། །གསོལ་བ་འདེབས་པ་ཨ་བུ་ཧྲལ་བོས་བྲིས། །དེ་ལས་རབ་དགེ་ཅུང་ཟད་ཐོབ་སྲིད་ན། །དགེ་བ་དེ་ཡང་གཏམ་འདི་སྐུལ་བ་པོའི། །རྗེས་སུ་འབྲང་ནས་སྐྱེ་དང་ཚེ་རབས་སུ། །སྙིང་པོའི་སྒྲུབ་པ་མཐར་ཕྱིན་གྲོགས་བགྱིད་ཤོག །ཅེས་མདོ་སྨད་ཀྱི་མཁས་པ་ཤུ་བྷཾ་ཤྲཱི་ཞེས་བྱ་བས་སྦྱར་བའོ། །དགེའོ། ༈ འཇམ་པའི་རྡོ་རྗེ་དྲང་སྲོང་ཆེན་པོའི་གསུང་། །
འདི་རྣམས་རིས་མེད་འགྲོ་ལ་ཆོས་སྦྱིན་སླད། །གཉེར་མཛོད་ཚེ་དབང་རིན་ཆེན་མཆོག་གྲུབ་པས། །སྤར་དུ་བསྒྲུབས་དགེས་འགྲོ་ཀུན་རྣམ་གྲོལ་ཤོག། །།མངྒ་ལཾ།། །།