 བར་དོ་དྲུག་གི་སྔོན་འགྲོ་རྒྱབ་ཆོས་དང་བཅས་པ།བར་དོ་དྲུག་ཁྲིད།གུ་རུ་ཉི་ཟླ་འོད་ཟེར། གུ་ཎའི་མིང་ཅན། སཱུཪྱ་ཙནྟྲ་རསྨི། ཆོས་དབྱིངས་སྟོབས་ལྡན་རྡོ་རྗེ། གཏེར་ཆེན་ཀརྨ་གླིང་པ།Nitartha Internationalམཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། སྔོན་འགྲོ་རང་རྒྱུད་སྦྱོང་བྱེད།ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ རྡོ་རྗེ་ཐེག་པའི་ཆོས་སྤྱོད་ཐུན་བཞིའི་རྣལ་འབྱོར་སྔོན་འགྲོ་རང་རྒྱུད་སྦྱོང་བྱེད་བཞུགས་སོ༔ ཀུན་བཟང་ཞི་ཁྲོའི་ལྷ་ལ་ཕྱག་འཚལ་ལོ༔ ཟབ་ཆོས་ཞི་ཁྲོ་དགོངས་པ་རང་གྲོལ་གྱི་སྔོན་འགྲོ་ཐུན་མོང་མ་ཡིན་པ༔ རང་རྒྱུད་སྦྱོང་བར་བྱེད་པའི་ཁྲིད་རིམ་བཞི་ལ༔ དང་པོ་ཐོག་མར་ཐོ་རེངས་ཀྱི་དུས་སུ་མ་རིག་པའི་གཉིད་ཀྱི་ཉོན་མོངས་པ་ལས་བསླང་བར་བྱ་བ་ནི༔ ཨོ་རྒྱན་རིན་པོ་ཆེས་ཆོས་སྤྱོད་ཆེན་མོ་ནས་གསུངས་པ་ལྟར་བརྗོད་པར་བྱའོ༔ ཀྱེ་མ་ཀྱེ་ཧོ་སྐལ་ལྡན་རིགས་ཀྱི་བུཿ མ་རིག་གཏི་མུག་དབང་གིས་མ་ནོན་པར༔ བརྩོན་འགྲུས་ངར་བསྐྱེད་ད་ལྟ་ཡར་ལོངས་དང་༔ ཐོག་མ་མེད་ནས་ད་ལྟ་ཐུག་གི་བར༔ མ་རིག་དབང་དུ་ཉལ་ཡུན་དེས་ཆོག་གིས༔ ད་ནི་མ་ཉལ་སྒོ་གསུམ་དགེ་ལ་འབད༔ སྐྱེ་རྒ་ན་འཆིའི་སྡུག་བསྔལ་མི་ཤེས་སམ༔ དེ་རིང་ཙམ་ཡང་རྟག་པའི་གོ་སྐབས་མེད༔ བསྒྲུབ་ལ་བརྩོན་འགྲུས་བསྐྱེད་པའི་དུས་ལ་བབས༔ ད་རེས་གཅིག་པུར་གཏན་བདེ་བསྒྲུབ་དུས་འདིར༔ སྙོམས་ལས་ངང་ལ་བསྡོད་པའི་དུས་མ་ཡིན༔ འཆི་བ་སོམས་ལ་སྒྲུབ་པ་མཐའ་རུ་སྐྱོལ༔ ཚེ་ལ་ལོང་མེད་འཆི་རྐྱེན་བསམ་མི་ཁྱབ༔ དེ་ཚེ་མི་འཚེར་གདེང་ཞིག་མ་ཐོབ་ན༔ སྐྱེས་བུ་ཁྱོད་ཉིད་གསོན་པས་ཅི་ཞིག་རུང་༔ ཆོས་རྣམས་བདག་མེད་སྟོང་ཞིང་སྤྲོས་དང་བྲལ༔ སྒྱུ་མ་སྨིག་རྒྱུ་རྨི་ལམ་གཟུགས་བརྙན་དང་༔ དྲི་ཟའི་གྲོང་ཁྱེར་བྲག་ཆ་ལྟ་བུར་སྤྱོད༔ ཆུ་ཟླ་ཆུ་བུར་མིག་ཡོར་སྤྲུལ་པ་སོགས༔ ཤེས་བྱ་སྒྱུ་མའི་དཔེ་བཅུ་དེ་བཞིན་དུ༔ འཁོར་འདས་ཆོས་རྣམས་ཁྱོད་ཀྱིས་ཤེས་པར་གྱིས༔ ཆོས་རྣམས་རང་བཞིན་སྐྱེ་བ་མེད་པ་སྟེ༔ གནས་མེད་འགག་མེད་འགྲོ་འོང་མེད་པ་སྟེ༔ དམིགས་མེད་མཚན་མ་མེད་ཅིང་བསམ་བརྗོད་བྲལ༔ དོན་འདི་རྟོགས་པར་བྱ་བའི་དུས་ལ་བབས༔ ཅེས་བརྗོད་ཅིང་༔ ན་མོ་གུ་རུ་བྷྱ༔ ན་མོ་དྷེ་ཝ་བྷྱ༔ ན་མོ་ཌཱཀྐི་ནཱི་བྷྱ༔ ཞེས་བླ་མ་ཡི་དམ་མཁའ་འགྲོ་གསོལ་བ་གདབ་ལ། ཨོ་རྒྱན་རིན་པོ་ཆེའི་ཆོས་སྤྱོད་ཆེན་མོ་ནས་གསུངས་པ་ལས་སྐྱབས་ཡུལ་ལ་གསོལ་བ་གདབ་པ་ནི༔ ཀྱེ་མ་ཀྱེ་མ་མི་རྟག་འཁོར་བའི་ཆོས༔ ཐར་མེད་ལས་ཀྱི་རྒྱ་མཚོའི་དོང་རིང་འདིར༔ ལས་ཀྱིས་མནར་བའི་འགྲོ་རྣམས་སྙིང་རེ་རྗེ༔ སྡུག་བསྔལ་རྒྱ་མཚོ་སྐེམ་པར་བྱིན་གྱིས་རློབས༔ མ་རིག་ལས་ཀྱིས་མནར་བའི་འགྲོ་བ་རྣམས༔ བདེ་བ་འདོད་ཕྱིར་སྡུག་བསྔལ་ལས་ལ་སྤྱོད༔ ཐབས་མི་མཁས་པའི་འགྲོ་རྣམས་སྙིང་རེ་རྗེ༔ ཉོན་མོངས་ལས་སྒྲིབ་དག་པར་བྱིན་གྱིས་རློབས༔ བདག་འདོད་བཟུང་འཛིན་བཅིངས་པའི་བརྩོན་ར་འདིར༔ རི་དྭགས་རྒྱར་ཚུད་སླར་ཡང་འཇུག་པ་ལྟར༔ མ་རིག་གཏི་མུག་ཅན་རྣམས་སྙིང་རེ་རྗེ༔ འཁོར་བ་དོང་ནས་སྤྲུག་པར་བྱིན་གྱིས་རློབས༔ ཐར་མེད་ལས་ཀྱི་གྲོང་ཁྱེར་དྲུག་པོ་འདིར༔ གཅིག་ནས་གཅིག་ཏུ་ཟོ་ཆུའི་འཁྱུད་མོ་བཞིན༔ ཐར་མེད་འཁོར་བའི་འགྲོ་རྣམས་སྙིང་རེ་རྗེ༔ རིགས་དྲུག་སྐྱེ་སྒོ་ཆོད་པར་བྱིན་གྱིས་རློབས༔ སྐྱེ་རྒ་ན་དང་འཆི་བའི་སྡུག་བསྔལ་རྣམས༔ ཅི་ཙམ་མཐོང་ཡང་མི་འཇིགས་སྙིང་སྲན་ཅན༔ ཡེངས་མ་ལམ་ལ་དལ་འབྱོར་མི་ཚེ་ཟད༔ མི་རྟག་འཆི་བ་དྲན་པར་བྱིན་གྱིས་རློབས༔ མི་རྟག་བློ་གཏད་མེད་པར་མ་ཤེས་པས༔ ད་རུང་འཁོར་བ་འདི་ལ་ཞེན་ཅིང་ཆགས༔ སྐྱིད་འདོད་ངང་ལ་མི་ཚེ་སྡུག་གིས་འདའ༔ འཁོར་བར་ཞེན་པ་ལོག་པར་བྱིན་གྱིས་རློབས༔ སྣོད་ཀྱི་འཇིག་རྟེན་མི་རྟག་མེ་ཆུས་འཇིག༔ བཅུད་ཀྱི་སེམས་ཅན་མི་རྟག་ལུས་སེམས་འབྲལ༔ དབྱར་དགུན་སྟོན་དཔྱིད་ནམ་ཟླ་དུས་མི་རྟག༔ སྐྱོ་ཤས་གཏིང་ནས་སྐྱེ་བར་བྱིན་གྱིས་རློབས༔ ན་ནིང་ད་ལོ་ནམ་ཟླའི་སྟོད་སྨད་དང་༔ ཞག་དང་ཉིན་མཚན་སྐད་ཅིག་དུས་མི་རྟག༔ ལེགས་པར་བསམ་ན་རང་ཉིད་འཆི་བས་གཏུགས༔ བསྒྲུབ་ལ་སྙིང་རུས་ནུས་པར་བྱིན་གྱིས་རློབས༔ དལ་འབྱོར་འདི་ནི་ཤིན་ཏུ་རྙེད་དཀའ་ཡང་༔ འཆི་བདག་ནད་ཀྱིས་ཉེ་བར་བཏབ་པའི་ཚེ༔ ཆོས་མེད་འགྲོ་རྣམས་སྟོང་ལོག་སྙིང་རེ་རྗེ༔ ལོང་མེད་རྒྱུད་ལ་སྐྱེ་བར་བྱིན་གྱིས་རློབས༔ ཀྱེ་མ་ཀྱི་ཧུད་དཀོན་མཆོག་ཐུགས་རྗེ་ཅན༔ རྒྱལ་བ་ཁྱེད་ལ་བརྩེ་བའི་མཐུ་མངའ་བས༔ བདག་སོགས་རིགས་དྲུག་འཁོར་བའི་སྡུག་བསྔལ་ལས༔ ད་ལྟ་ཉིད་དུ་ཐར་པར་བྱིན་གྱིས་རློབས༔ དེ་ནས་ཕྱི་ནང་གསང་བའི་སྐྱབས་འགྲོ་ནི༔ ཁམས་གསུམ་རིགས་དྲུག་མཐའ་ཡས་སེམས་ཅན་རྣམས༔ འདས་དང་མ་བྱོན་ད་ལྟ་དུས་གསུམ་དུ༔ རྒྱུན་ཆད་མེད་པར་འགྲོ་ལ་དགོངས་མཛད་པའི༔ བླ་མ་རྣམས་ལ་ཕྱག་འཚལ་སྐྱབས་སུ་མཆི༔ རྐང་གཉིས་གཙོ་བོ་མཚན་དང་དཔེ་བྱད་བརྒྱན༔ འཕྲིན་ལས་མི་ཟད་ནམ་མཁའི་མཐའ་དང་མཉམ༔ ཕྱོགས་བཅུ་དུས་བཞིའི་བདེ་གཤེགས་བཅོམ་ལྡན་འདས༔ སངས་རྒྱས་རྣམས་ལ་ཕྱག་འཚལ་སྐྱབས་སུ་མཆི༔ ཞི་བ་ཆགས་བྲལ་དོན་དམ་བདེན་པའི་ཆོས༔ ཐེག་པ་གསུམ་གྱི་ཕྱིར་མི་ལྡོག་པའི་ལམ༔ བཀའ་གཏེར་ལུང་དང་མན་ངག་བསྟན་བཅོས་སོགས༔ དམ་ཆོས་རྣམས་ལ་ཕྱག་འཚལ་སྐྱབས་སུ་མཆི༔ མ་ནོར་ལམ་གནས་ཚོགས་མཆོག་ཀུན་གྱི་ཞིང་༔ ཉོན་མོངས་དྲི་མས་རབ་དབེན་འཕགས་པའི་ཚོགས༔ བྱང་སེམས་ཉན་རང་རྒྱལ་བའི་བསྟན་འཛིན་མཆོག༔ དགེ་འདུན་རྣམས་ལ་ཕྱག་འཚལ་སྐྱབས་སུ་མཆི༔ དུས་གསུམ་སངས་རྒྱས་ཀུན་གྱི་ངོ་བོ་ཉིད༔ གསང་བ་བླ་མེད་དཀྱིལ་འཁོར་ཀུན་གྱི་གཙོ༔ བྱིན་རླབས་ཐུགས་རྗེས་འགྲོ་ཀུན་འདྲེན་མཛད་པ༔ བླ་མ་རྣམས་ལ་ཕྱག་འཚལ་སྐྱབས་སུ་མཆི༔ ཆོས་སྐུ་སྐྱེ་མེད་སྤྲོས་པའི་མཐའ་བྲལ་ཡང་༔ འགྲོ་བའི་དོན་ཕྱིར་ཞི་དང་ཁྲོ་བོར་སྤྲུལ༔ མཆོག་དང་ཐུན་མོང་དངོས་གྲུབ་སྟེར་མཛད་པའི༔ ཡི་དམ་ལྷ་ལ་ཕྱག་འཚལ་སྐྱབས་སུ་མཆི༔ ཆོས་ཉིད་མཁའ་ལ་ཐུགས་རྗེའི་ཤུགས་ཀྱི་འགྲོ༔ དག་པའི་གནས་ནས་བདེ་ཆེན་མཆོག་སྩོལ་ཅིང་༔ དམ་ཚིག་ཅན་ལ་དངོས་གྲུབ་གཏེར་མཛད་མ༔ མཁའ་འགྲོའི་ཚོགས་ལ་ཕྱག་འཚལ་སྐྱབས་སུ་མཆི༔ ཡེ་ཤེས་ལས་གྲུབ་མངོན་ཤེས་རྫུ་ཕྲུལ་ཅན༔ ལེགས་ཉེས་སྟངས་འཛིན་དམ་ཚིག་རྗེས་གཅོད་ཅིང་༔ བཀའ་བཞིན་རྗེས་སུ་བསྒྲུབ་པའི་གྲོགས་མཛད་པ༔ དམ་ཅན་རྣམས་ལ་ཕྱག་འཚལ་སྐྱབས་སུ་མཆི༔ ཡེ་ནས་སྟོང་ཉིད་སྤྲོས་དང་བྲལ་བ་ལ༔ ངོ་བོ་རང་བཞིན་ཐུགས་རྗེ་ཀ་ནས་དག༔ མཉམ་རྫོགས་ཀློང་ཡངས་ཆེན་པོའི་རང་བཞིན་ལ༔ འཛིན་མེད་བློ་འདས་ངང་དུ་སྐྱབས་སུ་མཆི༔ ལྷུན་གྲུབ་རང་བཞིན་ཡེ་ནས་སྐུ་ལྔའི་བདག༔ དབྱིངས་རིག་སྟོང་གསལ་ཐིག་ལེའི་དཀྱིལ་འཁོར་དུ༔ རང་རིག་འོད་གསལ་རྡོ་རྗེ་ལུ་གུ་རྒྱུད༔ རྟོག་མེད་རང་གསལ་རྗེན་པར་སྐྱབས་སུ་མཆི༔ མ་འགགས་རང་རྩལ་ཀུན་ཁྱབ་ཐུགས་རྗེ་ཅན༔ ཤར་གྲོལ་འགག་མེད་རིག་རྩལ་རོལ་པའི་ཟེར༔ རྟོག་མེད་ངང་ནས་འགྲོ་བློའི་མུན་སེལ་བ༔ དུས་གསུམ་ཐོག་མཐའ་མེད་པར་སྐྱབས་སུ་མཆི༔ དེ་ནས་ཐེག་པ་ཆེན་པོའི་སེམས་བསྐྱེད་ནི༔ ཀྱེ་མ་ཆོས་རྣམས་ཐམས་ཅད་སྟོང་ཞིང་བདག་མེད་ཀྱང་༔ དེ་ལྟར་མ་རྟོགས་སེམས་ཅན་སྙིང་རེ་རྗེ༔ སྙིང་རྗེའི་གནས་རྣམས་བྱང་ཆུབ་ཐོབ་བྱའི་ཕྱིར༔ བདག་གི་སྒོ་གསུམ་དགེ་ལ་བསྐུལ་བར་བྱ༔ འགྲོ་དྲུག་སེམས་ཅན་ཀུན་གྱི་དོན་གྱི་ཕྱིར༔ དེང་ནས་བཟུང་སྟེ་བྱང་ཆུབ་མ་ཐོབ་བར༔ བདག་གཅིག་མ་ཡིན་འགྲོ་ཀུན་དོན་གྱི་ཕྱིར༔ བྱང་ཆུབ་མཆོག་ཏུ་སེམས་ནི་བསྐྱེད་པར་བྱ༔ སྡུག་བསྔལ་རྒྱ་མཚོ་དཔག་ཏུ་མེད་པའི་ནང་༔ རང་གིས་རང་བཅིངས་ཆོས་མེད་སྙིང་རེ་རྗེ༔ སྙིང་རྗེའི་གནས་རྣམས་བདེ་ལ་བཀོད་བྱའི་ཕྱིར༔ བྱང་ཆུབ་མཆོག་ཏུ་སེམས་ནི་བསྐྱེད་པར་བྱ༔ བདག་དང་མཐའ་ཡས་འགྲོ་བ་སེམས་ཅན་རྣམས༔ ཡེ་ནས་སངས་རྒྱས་རང་བཞིན་ཡིན་པ་ལ༔ ཡིན་པར་ཤེས་པའི་བདག་ཉིད་ཆེན་པོ་རུ༔ བྱང་ཆུབ་མཆོག་ཏུ་སེམས་ནི་བསྐྱེད་པར་བྱ༔ འཇིག་རྟེན་འཁོར་བའི་རྒྱ་མཚོ་སྒྱུ་མ་བཞིན༔ འདུས་བྱས་ཐམས་ཅན་རྟག་པ་མ་ཡིན་ཏེ༔ ངོ་བོ་སྟོང་པ་བདག་མེད་ཡིན་པ་ལ༔ དེ་ལྟར་མ་རྟོགས་བྱིས་པ་འདི་དག་རྣམས༔ རྟེན་འབྲེལ་བཅུ་གཉིས་སྲིད་པའི་འཁོར་བར་འཁྱམས༔ མིང་དང་གཟུགས་ཀྱི་འདམ་ལ་ཆགས་པ་རྣམས༔ སངས་རྒྱས་ཐོབ་ཕྱིར་བདག་གི་ལུས་དང་ངག༔ ཡིད་དང་གསུམ་པོ་དགེ་ལ་བསྐུལ་བར་བྱ༔ སངས་རྒྱས་ཆོས་དང་ཚོགས་ཀྱི་མཆོག་རྣམས་ལ༔ བྱང་ཆུབ་བར་དུ་བདག་ནི་སྐྱབས་སུ་མཆི༔ བདག་གིས་སྦྱིན་སོགས་བགྱིས་པའི་བསོད་ནམས་ཀྱིས༔ འགྲོ་ལ་ཕན་ཕྱིར་སངས་རྒྱས་མྱུར་འགྲུབ་ཤོག༔ མཐའ་ཡས་འགྲོ་བའི་སེམས་ཅན་ཇི་སྙེད་པ༔ མ་ལུས་འདྲེན་པའི་བླ་མར་བདག་གྱུར་ཅིག༔ དེ་ནས་ཚད་མེད་བཞི་སྒོམ་པ་ནི༔ སེམས་ཅན་ཐམས་ཅད་བདེ་དང་ལྡན་གྱུར་ཅིག༔ ཀུན་ཀྱང་སྡུག་བསྔལ་རྒྱུ་དང་བྲལ་གྱུར་ཅིག༔ སྡུག་བསྔལ་མེད་པའི་བདེ་དང་ལྡན་གྱུར་ཅིག༔ ཆགས་སྡང་མེད་པའི་བཏང་སྙོམས་གནས་གྱུར་ཅིག༔ སྡིག་སྒྲིབ་སྦྱང་ཕྱིར་ཡིག་བརྒྱ་འདྲེན་པ་ནི༔ སྤྱི་གཙུག་པད་ཟླའི་གདན་སྟེང་དུ༔ བླ་མ་རྡོ་རྗེ་སེམས་དཔའི་སྐུ༔ སྐུ་མདོག་ཤེལ་འདྲའི་ཐུགས་ཀ་ནས༔ ཟླ་སྟེང་ཧཱུྃ་ལ་ཡིག་བརྒྱས་བསྐོར༔ བདུད་རྩིའི་ཆུ་རྒྱུན་ཚངས་བུག་བབ༔ བདག་གི་ཉམས་ཆགས་སྡིག་སྒྲིབ་དག༔ བཅོམ་ལྡན་དཔལ་ལྡན་རྡོ་རྗེ་སེམས་དཔའ་ཡིས༔ བདག་དང་འགྲོ་བ་སེམས་ཅན་མ་ལུས་པ༔ སྡིག་སྒྲིབ་སྦྱངས་ཕྱིར་ཡེ་ཤེས་བདུད་རྩིའི་རྒྱུན༔ ད་ལྟ་ཉིད་དུ་བདག་ལ་བསྩལ་དུ་གསོལ༔ ཨོཾ་བཛྲ་ས་ཏྭ་ས་མ་ཡཱ༴ ཏྭ་ཨཱཿ བདག་ནི་མི་ཤེས་གཏི་མུག་རྨོངས་པ་ཡིས༔ དམ་ཚིག་བསྲུང་མཚམས་ལ་ནི་འགལ་ཞིང་ཉམས༔ བླ་མ་མགོན་པོ་ཁྱེད་ཀྱིས་སྐྱབས་མཛོད་ཅིག༔ གཙོ་བོ་དཔལ་ལྡན་རྡོ་རྗེ་འཛིན་པ་སྟེ༔ ཐུགས་རྗེ་ཆེན་པོའི་བརྩེ་བའི་བདག་ཉིད་ཅན༔ འགྲོ་བའི་གཙོ་བོས་བདག་སོགས་སྐྱབས་མཛོད་ཅིག༔ སྡིག་སྒྲིབ་ཉེས་ལྟུང་དྲི་མའི་ཚོགས་བཅས་ཀུན༔ མ་ལུས་བྱང་ཞིང་དག་པར་མཛད་དུ་གསོལ༔ དགེ་བ་འདི་ཡིས་མྱུར་དུ་བདག་ཉིད་ཀྱང་༔ རྡོ་རྗེ་སེམས་དཔའ་དེང་འདིར་འགྲུབ་གྱུར་ནས༔ འགྲོ་བ་སེམས་ཅན་གཅིག་ཀྱང་མ་ལུས་པ༔ དེ་ཡི་ས་ལ་མྱུར་དུ་འཁོད་པར་ཤོག༔ རྡོ་རྗེ་སེམས་དཔའ་ཁྱེད་སྐུ་ཅི་འདྲ་དང་༔ འཁོར་དང་སྐུ་ཚེའི་ཚད་དང་ཞིང་ཁམས་དང་༔ ཁྱེད་ཀྱི་མཚན་མཆོག་བཟང་པོ་ཅི་འདྲ་བར༔ དེ་འདྲ་ཁོ་ནར་བདག་སོགས་འགྱུར་བར་ཤོག༔ དེ་ནས་མཆོད་པའི་མཎྜལ་འབུལ་བ་ནི༔ ཨོཾ་བཛྲ་བྷུ་མི་ཨ་ཧཱུྃ༔ གཞི་དབང་ཆེན་གསེར་གྱི་ས་གཞིར་གྱུར༔ ཨོཾ་བཛྲ་རེ་ཁེ་ཨཱཿཧཱུྃ༔ ཕྱི་རོལ་རིན་ཆེན་ལྕགས་རིའི་ཁོར་ཡུག་གྱུར༔ དབུས་སུ་རི་རྒྱལ་རི་བོ་མཆོག་རབ་ཉིད༔ རིན་ཆེན་སྣ་ལྔ་ལས་གྲུབ་ལྷུན་ཆགས་ཤིང་༔ དབྱིབས་ལེགས་མཛེས་ཤིང་ལྟ་ན་སྡུག་པ་ལ༔ གསེར་གྱི་རི་བདུན་རོལ་མཚོ་བདུན་གྱིས་བསྐོར༔ ཤར་དུ་ལུས་འཕགས་ལྷོ་རུ་འཛམ་བུའི་གླིང་༔ ནུབ་ཏུ་བ་ལང་སྤྱོད་ཀྱི་གླིང་གིས་བརྒྱན༔ བྱང་དུ་སྒྲ་མི་སྙན་གྱི་གླིང་ཆེན་ལ༔ ལུས་དང་ལུས་འཕགས་རྔ་ཡབ་རྔ་ཡབ་གཞན༔ གཡོ་ལྡན་ལམ་མཆོག་འགྲོ་དང་སྒྲ་མི་སྙན༔ སྒྲ་མི་སྙན་གྱི་ཟླ་དང་གླིང་ཕྲན་བརྒྱད༔ ཉི་མ་ཟླ་བ་སྒྲ་གཅན་དུས་མེ་དང་༔ ལྷ་མིའི་ལོངས་སྤྱོད་དཔལ་འབྱོར་ཕུན་ཚོགས་འདི༔ བླ་མ་དཀོན་མཆོག་འཁོར་དང་བཅས་ལ་འབུལ༔ ཐུགས་རྗེས་འགྲོ་བའི་དོན་དུ་བཞེས་སུ་གསོལ༔ ཨོཾ་ཨཱཿཧཱུྃ༔ ཕྱི་ནང་སྣོད་བཅུད་སྟོང་གསུམ་གཞལ་ཡས་སུ༔ རི་རབ་གླིང་བཅས་རྡུལ་སྙེད་མཆོད་སྤྲིན་གཏིབ༔ ལྷ་མིའི་ལོངས་སྤྱོད་དཔལ་འབྱོར་ཕུན་ཚོགས་འདི༔ བླ་མ་དཀོན་མཆོག་སྤྲུལ་སྐུའི་ཞིང་དུ་འབུལ༔ ཐུགས་རྗེས་བརྩེ་བར་དགོངས་ཏེ་བཞེས་ནས་ཀྱང་༔ འགྲོ་ཀུན་སྤྲུལ་སྐུའི་ཞིང་དུ་སྐྱེ་བར་ཤོག༔ ཨོཾ་ཨཱཿཧཱུྃ༔ རང་ལུས་རྩ་ཁམས་དག་པའི་གཞལ་ཡས་སུ༔ དབང་པོ་རྣམ་ལྔ་བཀྲག་དང་མདངས་ཀྱིས་བརྒྱན༔ ཁམས་དང་སྐྱེ་མཆེད་ཡོངས་སུ་དག་པ་འདི༔ བླ་མ་དཀོན་མཆོག་ལོངས་སྐུའི་ཞིང་དུ་འབུལ༔ ཐུགས་རྗེས་བརྩེ་བར་དགོངས་ཏེ་བཞེས་ནས་ཀྱང་༔ འགྲོ་ཀུན་ལོངས་སྐུའི་ཞིང་དུ་སྐྱེ་བར་ཤོག༔ ཨོཾ་ཨཱཿཧཱུྃ༔ སེམས་ཉིད་ཆོས་སྐུ་དག་པའི་གཞལ་ཡས་སུ༔ དམིགས་མེད་སྟོང་གསལ་མཛིན་མེད་ངང་དུ་གནས༔ གདོད་ནས་དག་པའི་གཉུག་མའི་ཡེ་ཤེས་འདི༔ བླ་མ་དཀོན་མཆོག་ཆོས་སྐུའི་ཞིང་དུ་འབུལ༔ ཐུགས་རྗེས་བརྩེ་བས་དགོངས་ཏེ་བཞེས་ནས་ཀྱང་༔ འགྲོ་ཀུན་ཆོས་སྐུའི་ཞིང་དུ་སྐྱེ་བར་ཤོག༔ ཨོཾ་ཨཱཿཧཱུྃ༔ མཉེས་བྱེད་མཎྜལ་བཟང་པོ་འདི་འབུལ་བས༔ བྱང་ཆུབ་ལམ་ལ་བར་ཆད་མི་འབྱུང་ཞིང་༔ དུས་གསུམ་བདེ་གཤེགས་དགོངས་པ་རྟོགས་པ་དང་༔ སྲིད་པར་མི་འཁྲུལ་ཞི་བར་མི་གནས་ཤིང་༔ ནམ་མཁའ་མཉམ་པའི་འགྲོ་རྣམས་སྒྲོལ་བར་ཤོག༔ ཨོཾ་ཨཱཿཧཱུྃ༔ མ་ཧཱ་གུ་རུ་དྷེ་ཝ་ཌཱ་ཀྐི་ནཱི་རཏྣ་མཎྜལ་ལ་པུ་ཙ་མེ་གྷ་ས་མུ་ཏྲ་སྥར་ན་ས་མ་ཡེ་ཧཱུྃ༔ ཞི་ཁྲོ་དགོངས་པ་རང་གྲོལ་གྱི་བླ་མ་བརྒྱུད་པའི་གསོལ་འདེབས་ནི༔ ཐོག་མའི་མགོན་པོ་ཆོས་སྐུ་ཀུན་ཏུ་བཟང་༔ དྲུག་པའི་བདག་ཉིད་རྒྱལ་བ་རྡོ་རྗེ་འཆང་༔ འདྲེན་པའི་གཙོ་བོ་ཐུགས་མཆོག་རྡོ་རྗེ་སེམས༔ རྒྱལ་བ་དགོངས་བརྒྱུད་རྣམས་ལ་གསོལ་བ་འདེབས༔ སྤྲུལ་པའི་སྐྱེས་མཆོག་རིག་འཛིན་དགའ་རབ་ཞབས༔ རྒྱལ་བའི་སྲས་མཆོག་གུ་རུ་ཤྲཱི་སིང་༔ རྡོ་རྗེའི་སྐུ་བརྙེས་འཆི་མེད་པདྨ་འབྱུང་༔ རིག་འཛིན་བརྡ་བརྒྱུད་རྣམས་ལ་གསོལ་བ་འདེབས༔ ཟབ་གཏེར་མངའ་བདག་ཀརྨ་གླིང་པ་དང་༔ ཐུགས་ཀྱི་སྲས་མཆོག་ཆོས་རྗེའི་མཚན་ཅན་དང་༔ སྙིགས་དུས་འགྲོ་འགོན་སུརྱ་ཙཎྜའི་ཞབས༔ གང་ཟག་སྙན་བརྒྱུད་རྣམས་ལ་གསོལ་བ་འདེབས༔ ཟབ་ཆོས་གསལ་མཛད་ནམ་མཁའི་མཚན་ཅན་དང་༔ སྨིན་གྲོལ་དོན་སྟོན་ཐུགས་རྗེའི་འོད་ཟེར་དང་༔ རང་རིག་མངོན་གྱུར་བུདྡྷ་མཾ་གའི་ཞབས༔ ཟབ་མོའི་གཏེར་བརྒྱུད་རྣམས་ལ་གསོལ་བ་འདེབས༔ སྐལ་ལྡན་སྨིན་མཛད་ཀུན་དགའ་གྲགས་པ་དང་༔ འབྲེལ་ཚད་དོན་ལྡན་ཀུན་དགའ་བསྟན་འཛིན་རྗེ༔ གནས་ལུགས་མངོན་གྱུར་བཀྲ་ཤིས་དབང་ཕྱུག་དང་༔ རིག་སྔགས་འཆང་བ་པདྨ་དབང་དྲག་དང་༔ སྤྱན་རས་གཟིགས་དབང་རྣམ་སྤྲུལ་ཆགས་མེད་ཞབས༔ སྣང་བཞི་མཐར་སོན་རྫོགས་ཆེན་པདྨའི་མཚན༔ གྲུབ་པའི་ཁྱུ་མཆོག་ནམ་མཁའ་འོད་གསལ་དང་༔ ལང་གྲོའི་ཟློས་གར་ཐེག་མཆོག་བསྟན་འཛིན་རྗེ༔ བཀའ་དྲིན་འཁོར་མེད་ཀུན་བཟང་རྣམ་པར་རྒྱལ༔ རྒྱལ་ཀུན་སྤྱི་གཟུགས་དྲིན་ཆེན་འཁོར་ལོའི་མགོན༔ རྩ་བརྒྱུད་བླ་མ་རྣམས་ལ་གསོལ་བ་འདེབས༔ བརྒྱུད་ཚུལ་དྲུག་ལྡན་ཕྱོགས་མེད་བླ་མ་དང་༔ སྣང་སྟོང་དབྱེར་མེད་ཡི་དམ་ཞི་ཁྲོའི་ལྷ༔ མཁའ་འགྲོ་ཆོས་སྐྱོང་དམ་ཅན་རྒྱ་མཚོའི་ཚོགས༔ རྩ་གསུམ་ལྷ་ཚོགས་རྣམས་ལ་གསོལ་བ་འདེབས༔ གང་ལ་གང་འདུལ་བཀའ་བརྒྱུད་བླ་མ་རྣམས༔ ཁྱེད་ཀྱི་བསྟན་པ་ཤིན་ཏུ་ཉམས་དམའ་ནས༔ དུས་འདིར་སྐྱེས་པའི་རྣལ་འབྱོར་ཡིད་ཕམ་པས༔ འགྲོ་ཀུན་འཁོར་བའི་འདམ་ནས་དྲངས་ཏུ་གསོལ༔ སྨྲེ་སྔགས་གདུངས་པའི་ང་རོས་ཁྱེད་འབོད་ན༔ སྔོན་གྱི་དམ་བཅའ་གཉན་པོ་ད་དགོངས་ལ༔ མཁའ་དབྱིངས་ཀློང་ནས་མཚན་དཔེའི་ཞལ་བསྟན་འཚལ༔ འགྲོ་ཀུན་འཁོར་བའི་འདམ་ནས་དྲངས་དུ་གསོལ༔ གྲགས་སྟོང་ཚངས་པའི་གསུང་གི་སྒྲ་སྒྲོགས་ནས༔ ཁྱེད་ཀྱི་ཐུགས་མཛོད་གཏེར་གྱི་སྒོ་ཕྱེས་ལ༔ མཁྱེན་རབ་ཐུགས་རྗེའི་འོད་ཟེར་རབ་བཀྱེས་ནས༔ འགྲོ་ཀུན་འཁོར་བའི་འདམ་ནས་དྲངས་དུ་གསོལ༔ དུས་མཐའི་འགྲོ་རྣམས་མ་ལུས་ད་སྒྲོལ་ཅིག༔ རྣམ་དག་དབང་བཞིའི་ཆུ་བོ་ད་སྐུར་ཅིག༔ ཉོན་མོངས་འཁྲུལ་པའི་རྒྱུད་བཞི་ད་སྒྲོལ་ཅིག༔ འགྲོ་ཀུན་འཁོར་བའི་འདམ་ནས་དྲངས་དུ་གསོལ༔ བདེ་གཤེགས་སྐུ་བཞིའི་འབྲས་བུ་ད་སྩོལ་ཅིག༔ མཐའ་ཡས་ཕ་མ་མཁའ་མཉམ་སེམས་ཅན་རྣམས༔ མ་ལུས་འདྲེན་པའི་བླ་མར་བདག་གྱུར་ཅིག༔ འགྲོ་ཀུན་འཁོར་བའི་འདམ་ནས་དྲངས་དུ་གསོལ༔ ཅེས་བརྒྱུད་པའི་གསོལ་འདེབས་དང་སྐུ་གསུམ་གསོལ་འདེབས་མ་སོགས་མོས་གུས་དྲག་པོའི་སྒོ་ནས་གདབ། འདོད་དོན་གསོལ་འདེབས་གང་ཤེས་བྱ། དེ་ནས་དབང་བཞི་ཞུ་བའི་དགོངས་པ་ནི༔ བླ་མ་ཡབ་ཡུམ་སྤྱི་གཙུག་ནས༔ ཨོཾ་དཀར་འོད་ཟེར་དང་བཅས་པ༔ བདག་གི་སྨིན་མཚམས་མཛོད་སྤུར་བབས༔ བུམ་དབང་ཐོབ་ནས་ལུས་སྒྲིབ་དག༔ སྐུ་ཡི་དངོས་གྲུབ་བསྩལ་དུ་གསོལ༔ བླ་མ་ཡབ་ཡུམ་མགྲིན་པ་ནས༔ ཨཱཿདམར་འོད་ཟེར་དང་བཅས་པ༔ བདག་གི་ལྕེ་ཡི་དབང་པོར་བབས༔ གསང་དབང་ཐོབ་ནས་ངག་སྒྲིབ་དག༔ གསུང་གི་དངོས་གྲུབ་བསྩལ་དུ་གསོལ༔ བླ་མ་ཡབ་ཡུམ་ཐུགས་ཀ་ནས༔ ཧཱུྃ་མཐིང་འོད་ཟེར་དང་བཅས་པ༔ བདག་གི་སྙིང་གི་དཀྱིལ་དུ་བབས༔ ཡེ་ཤེས་དབང་ཐོབ་ཡིད་སྒྲིབ་དག༔ ཐུགས་ཀྱི་དངོས་གྲུབ་བསྩལ་དུ་གསོལ༔ བླ་མ་ཡབ་ཡུམ་ལྟེ་བ་ནས༔ ཧྲཱིཿལྗང་འོད་ཟེར་དང་བཅས་པ༔ བདག་གི་ལྟེ་བའི་དཀྱིལ་དུ་བབས༔ སྒོ་གསུམ་ཐ་དད་འཛིན་སྒྲིབ་དག༔ དབྱེར་མེད་ལྷན་སྐྱེས་དབང་བཞི་ཐོབ༔ དཔལ་ལྡན་རྩ་བའི་བླ་མ་རིན་པོ་ཆེ༔ བདག་གི་སྙིང་ཁར་པདྨའི་ཟེའུ་འབྲུ་ལ༔ འབྲལ་བ་མེད་པར་རྟག་པར་བཞུགས་ནས་ཀྱང་༔ བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ༔ སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ༔ དཔལ་ལྡན་བླ་མ་ཁྱེད་སྐུ་ཅི་འདྲ་དང་༔ འཁོར་དང་སྐུ་ཚེའི་ཚད་དང་ཞིང་ཁམས་སོགས༔ ཁྱེད་ཀྱི་མཚན་མཆོག་བཟང་པོ་ཅི་འདྲ་བར༔ དེ་འདྲར་ཁོ་ན་བདག་སོགས་འགྱུར་བར་ཤོག༔ ཅེས་པ་ལ་སོགས་བྱའོ༔ འདི་དག་ཟབ་ཆོས་དགོངས་པ་རང་གྲོལ་གྱི་སྔོན་འགྲོ་རང་རྒྱུད་སྦྱོང་བྱེད་ཀྱི་ལྷན་ཐབས་ལ་སྦྱར་ཡང་རུང་ཞིང་༔ བླ་མེད་ཐེག་པའི་ཆོས་སྤྱོད༔ གུ་རུ་སུརྱ་ཙཎྜས་ཡི་གེར་བཀོད་པ༔ དགེ་ཞིང་བཀྲ་ཤིས་པར་གྱུར་ཅིག༔ དགེའོ༔ དགོངས་པ་རང་གྲོལ་གྱིས་སྔོན་འགྲོ་རང་རྒྱུད་འདུལ་བྱེད་ཀྱི་ལྷན་ཐབས། གུ་རུ་ཉི་ཟླ་འོད་ཟེར།ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ བར་དོའི་དམར་ཁྲིད་ཉམས་ཁྲིད་དགོངས་པ་རང་གྲོལ་གྱིས་སྔོན་འགྲོ་རང་རྒྱུད་འདུལ་བྱེད་ཀྱི་ལྷན་ཐབས་བཞུགས་སོ༔ ཐོག་མའི་མགོན་པོ་ཆོས་སྐུ་ཀུན་ཏུ་བཟང༌༔ ལོངས་སྤྱོད་རྫོགས་སྐུ་རྒྱལ་བ་ཞི་ཁྲོའི་ལྷ༔ སྤྲུལ་སྐུ་སློབ་དཔོན་པདྨ་འབྱུང་གནས་ལ༔ དད་ཅིང་གུས་པའི་ཡིད་ཀྱིས་ཕྱག་འཚལ་ལོ༔ སྨོན་ལམ་དབང་གིས་རྒྱུད་སྦྱོང་སློབ་བུའི་དོན༔ བར་དོའ་ིཉམས་ཁྲིད་དགོངས་པ་རང་གྲོལ་བསྟན༔ གྲོལ་ལམ་སྙིང་རྗེ་ལམ་ཁྱེར་ཁྲིད་ཡིག་བསྟན༔ འདི་ལ་སྔོན་འགྲོ་དངོས་གཞི་རྗེས་གསུམ་སྟེ༔ ཁྲིད་ཀྱི་སྔོན་འགྲོའི་ལག་ལེན་ཁྲིད་རིམ་རྣམས༔ གཞུང་དང་ལག་ལེན་བླ་མའི་ཕྱག་བཞེས་ལྟར༔ བློ་དམན་དོན་དུ་གསལ་བར་འདིར་འགོད་བྱ༔ འདི་ལ་སྤྱི་དོན་དྲུག་གིས་བསྟན་པར་བྱ༔ འཁོར་བའི་སྡུག་བསྔལ་དལ་འབྱོར་རྙེད་དཀའ་བསམ༔ འཆི་བ་མི་རྟག་སྒོམ་པ་གསུམ་པོ་ནི༔ རང་རྒྱུད་འདུལ་བར་བྱེད་པའི་སྔོན་འགྲོའོ༔ གཉིས་པ་རང་རྒྱུད་སྦྱོང་བའི་སྔོན་འགྲོ་ནི༔ བླ་མའི་རྣལ་འབྱོར་ཡི་གེ་བརྒྱ་པ་དང༌༔ མཎྜལ་ཆོས་སྤྱོད་རྗེས་ཀྱི་བྱ་བའོ༔ དང་པོ་རང་རྒྱུད་འདུལ་བར་བྱེད་པའི་སྔོན་འགྲོ་ལ༔ ཐོག་མར་འཁོར་བའི་སྡུག་བསྔལ་བསམ་པར་བྱ་སྟེ༔ དེ་ཡང་འཁོར་བའི་སྡུག་བསྔལ་མ་བསམ་ན༔ འཁོར་བ་ལ་སྐྱོ་བ་མི་སྐྱེ༔ འཁོར་བ་ལ་སྐྱོ་བ་མ་སྐྱེས་ན༔ ཆོས་ཅི་ཙམ་བྱས་ཀྱང་ཚེ་འདི་དང་འབྲལ་མི་ཐུབ༔ ཚེ་འདིའི་མངོན་ཞེན་དང་འཁྲི་བ་མི་ཆོད་པས༔ འཁོར་བའི་སྡུག་བསྔལ་བསམ་པ་ནི་ཤིན་ཏུ་ནས་ཀྱང་གལ་ཆེའོ༔ དེ་ལ་དང་པོར་རང་ཉིད་གཅིག་པུར་སྐྱོ་བ་སྐྱེ་བའི་གནས་སུ་འགྲོ་སྟེ༔ དེ་ཡང་འཛོམ་ན༔ མི་འདུག་པའི་ཤུལ༔ གྱང་ར་དམར་ཟང་ཟང་ཡོད་པ༔ འཇག་སྐྱ་འཕྱོ་བ༔ སྐྱི་གཡའ་བའམ༔ ཡང་ན་ནད་པ་དང༌༔ སྤྲང་པོ་ཉམ་ཐག་པ་ལ་སོགས༔ སྔོན་ཆད་བདེ་སྐྱིད་འཛོམ་ཞིང༌༔ ཕྱིས་རྒུད་པའི་ཤུལ་དུ་ཕྱིན་པའམ༔ དེ་མ་འཛོམས་ན༔ གཅིག་པུར་དབེན་པའི་སར་ཕྱིན་ལ༔ ལུས་གནད་བདེ་བའི་སྟན་ལ༔ རྐང་པ་ཕྱེད་སྐྱིལ་དུ་སྡད་དེ༔ རྐང་པ་གཡས་པ་ས་ལ་བཙུགས་ལ༔ གཡོན་པ་ས་ལ་སྦྱར་ནས༔ རྐང་པ་གཡས་པའི་པུས་མོར་ལག་པ་གཡས་པའི་གྲུ་མོ་བཙུགས་ལ༔ ལག་མཐིལ་འགྲམ་པ་གཡས་སུ་སྦྱར༔ ལག་པ་གཡོན་པའི་མཐིལ་གྱིས༔ རྐང་པ་གཡོན་པའི་པུས་མོ་བཀབ་སྟེ༔ མྱ་ངན་གྱི་འདུག་སྟངས་བྱས་པས༔ དེས་ཀྱང་སྐྱོ་ལྷང་གིས་འགྲོ་བ་ཡིན༔ དེ་ནས་ཡིད་ཀྱིས་འཁོར་བའི་སྡུག་བསྔལ་ལ་བསམ་ཞིང༌༔ ངག་ཏུ་འདི་སྐད་སྨྲ་ཞིང་དྲན་བསྐུལ་གདབ་སྟེ༔ ཀྱེ་མ༔ ཀྱེ་མ༔ ཀྱེ་ཧུད༔ འཁོར་བ་འདི་སྡུག་བསྔལ་བའོ༔ མྱ་ངན་ལས་འདས་པ་ནི་བདེ་བའོ༔ ཞེས་བརྗོད་ཅིང༌༔ ཡིད་ཀྱིས་འདི་ལྟར་བསམ་པར་བྱའོ༔ ཨ་ཙ་མ་ན༔ འཁོར་བ་འདི་སྡུག་བསྔལ་མེ་དོང་གི་འོབས་ལྟ་བུ་འདིར་ཆུད་པ་ནི་འཇིགས་པ་ལ༔ ཨ་ཙི་འདིའི་ནང་ནས་ད་ལན་བྲོས་པའི་དུས་ལ་བབས་སོ༔ ངན་སོང་གསུམ་གྱི་སྡུག་བསྔལ་འདི་ནི༔ བཟོད་པའི་གླག་མེད་ཅིང་མཐའ་ལས་འདས་ཏེ༔ བདེ་བའི་གོ་སྐབས་སྐད་ཅིག་ཀྱང་མི་འདུག་པས༔ ད་ནི་མྱུར་དུ་བྲོས་པའི་གྲབ་བྱ་རེ་རན་ནོ་སྙམ་དུ་བསམ་ཞིང༌༔ དམིགས་པ་འདི་ལྟར་བསྒོམ་སྟེ༔ འཁོར་བ་འདི་ནི༔ མེའི་དོང་ཆེན་པོ༔ ཚ་བའི་ངར་དང་ལྡན་པ་གཏིང་ཟབ་པ༔ རྒྱ་ཆེ་བ༔ དཔང་མཐོ་བ་དེ་ལྟ་བུའི་མེ་དོང་འཇིགས་སུ་རུང་བ་གཅིག་ཏུ༔ རང་ཉིད་ཀྱི་གཙོར་བྱས་པའི་འཁོར་བའི་སེམས་ཅན་ཐམས་ཅད་སྤང་དེ་ཙི་ཏི་རི་རི་ཆུད་ནས་ཡོད་པར་བསྒོམ༔ ཡང་ངག་ཏུ་མྱ་ངན་གྱི་སྐད་ཀྱིས་འདི་ལྟར་ལྷང་ལྷང་བརྗོད་དེ༔ ཨ་ཙ་མ་ན་ང་རེ་འཇིགས༔ ཨ་ཙ་མ་ན་ང་རེ་འཇིགས༔ འཁོར་བ་མེ་དོང་འོབས་ཆེན་འདིར༔ སྔོན་ཆད་ཐོག་མ་མེད་དུས་ནས༔ ད་རུང་ཚིགས་སོ་ང་རེ་འཇིགས༔ ཞེས་སྨྲེ་སྔགས་འདོན་ཞིང་ཡོད་པའི་ཚེ༔ རང་གི་སྟེང་གི་ནམ་མཁའ་ལ༔ རང་གི་དྲིན་ཆེན་རྩ་བའི་བླ་མ་དེ༔ སྐུ་ལ་རུས་པའི་རྒྱན་དྲུག་གསོལ་བ༔ ཕྱག་ན་འོད་ཟེར་གྱི་ལྕགས་ཀྱུ་བསྣམས་པ་གཅིག་བྱུང་ནས༔ བདག་ལ་འདི་སྐད་ཟེར་བར་སྒོམས་ཤིག༔ ཀྱཻ་མ་འཁོར་བ་སྐྱིད་མེད་མེ་དོང་འོབས་ལྟ་བུ༔ འདི་ལ་བྲོས་དུས་ད་ལེན་དུས་གཅིག་ཡིན༔ ངན་སོང་གསུམ་གྱི་སྡུག་བསྔལ་མཐའ་ལས་འདས༔ བདེ་བའི་གོ་སྐབས་སྐད་ཅིག་མ་མཆིས་སོ༔ ད་ནི་མེ་དོང་འོབས་ནས་བྲོས་རེ་རན༔ ཅེས་གསུངས་པའི་སྒྲ་ཐོས་པ་ཙམ་གྱིས༔ བདག་གི་བསམ་པ་ལ༔ ཀྱཻ་མ་འཁོར་བ་སྡུག་བསྔལ་གྱི་མེ་དོང་འདིར༔ སྔོན་ཆད་ཡུན་རིང་པོ་དེ་ཙམ་གཅིག་ཏུ་ཚུད༔ ད་ནི་བླ་མའི་བཀའ་ལ་ཉན་ནས༔ བདག་ཀྱང་མེ་དོང་འདི་ལས་བྲོས་ཏེ༔ སེམས་ཅན་འདི་རྣམས་གཅིག་ཀྱང་མ་ལུས་པར་བདག་གིས་བསྒྲལ་བར་བྱའོ་སྙམ་པའི་བསམ་པ་དྲག་པོས་སེམས་བསྐྱེད་མ་ཐག༔ བླ་མའི་ཕྱག་གི་ལྕགས་ཀྱུས་བདག་གི་སྙིང་ཁ་ནས་བཟུང་སྟེ༔ བདེ་བ་ཆེན་པོའི་གནས་སུ་ཡེར་གྱིས་བསྒྲལ་མ་ཐག་ཏུ༔ ཡང་བདག་གི་ལག་ཏུ་ཡང༌༔ འོད་ཟེར་གྱི་ལྕགས་ཀྱུ་གཅིག་བྱུང་ནས༔ མེ་དོང་གི་སེམས་ཅན་ཐམས་ཅད་རིམ་གྱིས་གཅིག་ཀྱང་མ་ལུས་པར་ཐོན་པར་བསམ་ཞིང༌༔ འཁོར་བའི་སེམས་ཅན་ཐམས་ཅད་ལ་སྙིང་རྗེ་དྲག་ཏུ་སྒོམས་ཤིག༔ དེ་ལྟར་རྒྱུན་དུ་འཁོར་བ་འདི་མེ་དོང་དུ་བསམ་ཞིང༌༔ གཞན་ཡང་འཁོར་བའི་སྡུག་བསྔལ་ཐམས་ཅད་ཞིབ་ཏུ་བསམ་ཞིང༌༔ ཉིན་དང་མཚན་དུ་དྲན་པ་ཡེངས་མེད་དུ་བརྟན་པར་བྱའོ༔ མདོ་ལས་ཀྱང༌༔ འཁོར་བར་ཁབ་ཀྱི་རྩེ་ཙམ་ཡང༌༔ བདེ་བ་ནམ་ཡང་ཡོད་མ་ཡིན༔ ཅེས་གསུངས་སོ༔ དེ་ལྟར་སྐྱོ་བ་མ་སྐྱེས་ཀྱི་བར་དུ༔ འཁོར་བའི་ཉེས་པ་བསྒོམ་མོ༔ དེ་བསྒོམས་པས་འཁོར་བ་ལ་བློ་ལྡོག་ནས༔ ཆོས་དགོས་པར་ཐག་ཆོད་ཅིང༌༔ ཚེ་འདི་ལ་མ་ཞེན་ན་ཉམས་སྐྱེས་པ་ཡིན་ནོ༔ འཁོར་བ་ལ་བློ་མ་ལོག་ན༔ བསྒོམས་པ་དོན་མེད་ཡིན་ནོ༔ འདི་ལ་ཞག་གསུམ་སྒོམ་ལ་བྱོན་ཅིག༔ འདི་བསྒོམས་པས་གནས་སྐབས་སུ་འཁོར་བ་ལ་ཡིད་དབྱུང་བ་དང་༔ མཐར་ཐུག་མྱ་ངན་ལས་འདས་པ་ཐོབ་པར་འགྱུར་རོ༔ ཉམས་སུ་ལོངས་ཤིག༔ བར་དོའི་ཉམས་ཁྲིད་དགོངས་པ་རང་གྲོལ་ལས༔ འཁོར་བའི་སྡུག་བསྔལ་བསྒོམ་པ་སྟེ་ཆོས་ཐུན་དང་པོའོ༔ དེ་ནས་དལ་འབྱོར་རྙེད་དཀའ་བ་ལ་བསམ་པར་བྱ་སྟེ༔ དལ་འབྱོར་རྙེད་པར་དཀའ་བ་མ་བསམ་ན་ཆོས་མི་དྲན་པས༔ དལ་འབྱོར་རྙེད་དཀའ་བསམ་པ་ནི་ཤིན་ཏུ་གལ་ཆེའོ༔ དེ་ཡང་གནས་ནི་འབུ་སྲིན་དང༌༔ གྲོགས་སྦུར་དང༌༔ དུད་འགྲོའི་རིགས་མང་དུ་ཡོད་པའི་སར་ཕྱིན་ལ༔ ལུས་གནད་ནི༔ རྐང་པ་སྐྱིལ་དྲུང༌༔ ལག་པ་མཉམ་བཞག་བྱས་ལ༔ ཡིད་ཀྱིས་འདི་ལྟར་བསམ་ཏེ༔ ཨ་ཙ་མ༔ མི་ལུས་ཐོབ་པ་ནི་ད་རེས་ཙམ་ཡིན༔ ད་རེས་འདི་ལ་ཆོས་གཅིག་ཅིས་ཀྱང་མ་འགྲུབ་ན༔ ཕྱིས་ནི་མི་ལུས་ཐོབ་པ་ཤིན་ཏུ་དཀའ་བར་གདའ་བས༔ ད་བདག་གཅིག་པུས་མི་ལུས་ཐོབ་པས་མི་ཆོག༔ ཁམས་གསུམ་གྱི་སེམས་ཅན་ཐམས་ཅད་འདི་ཙམ་ཞིག་ངན་སོང་དུ་ཡུན་རིང་འཁྱམས་ནས་འདུག་པ༔ སྙིང་རེ་རྗེ་སྙམ་དུ་བསམ་ཞིང༌༔ ངག་ཏུ་ཡང་བརྗོད་ཅིང༌༔ དྲན་བསྐུལ་བཏབ་ས༔ྟེ ཀྱེ་མ༔ ཀྱེ་མ༔ ཀྱེ་ཧུད༔ མི་ལུས་རིན་ཆེན་ཐོབ་པ་ད་རེས་ཙམ༔ འདི་ལ་ཆོས་གཅིག་ཅིས་ཀྱང་མ་འགྲུབ་ན༔ ཕྱིས་ནི་མི་ལུས་ཐོབ་པར་དཀའ་བར་གདའ༔ ངན་སོང་གསུམ་དུ་སྐྱེས་རྣམས་སྙིང་རེ་རྗེ༔ ཞེས་དྲན་བསྐུལ་གདབ་ཅིང༌༔ དམིགས་པ་འདི་ལྟར་དུ་བསྒོམ་པར་བྱའོ༔ འཇིག་རྟེན་གྱི་ཁམས་འདི་ཡངས་ཤིང་རྒྱ་ཆེ་བ༔ ནམ་མཁས་གར་ཁྱབ་སས་ཁྱབ་ནས་ཡོད་པ་ལ༔ དེའི་སྟེང་དུ་སེམས་ཅན་དམྱལ་བའི་སྡུག་བསྔལ༔ ངུ་ཙི་ཏི་རི་རི་ཡོད༔ ཡི་དྭགས་བཀྲེས་སྐོམ་གྱི་སྡུག་བསྔལ་ཆོ་ངེ་ཏིར་ཏིར་ཡོད་པ༔ དུད་འགྲོ༔ སྟག༔ གཟིག༔ དོམ༔ དྲེད༔ ཁྱི༔ ཝ༔ འཕར་བ༔ སྤྱང་ཀུ༔ གཡག༔ ར༔ ལུག་ལ་སོགས་ཐམས་ཅད་ཀྱང་གཅིག་གིས་གཅིག་ཟ་བ༔ གཞན་ཡང་ས་འོག་ཏུ་ནི༔ འབུ་གྲོག་མ༔ སྦུར་བ༔ སྡིག་པ༔ སྡོམ་ལ་སོགས་པ༔ སྣ་རེ་རེས་ཀྱང་ས་གཞི་གང་བ༔ དེ་དག་ཀྱང་གཅིག་གིས་གཅིག་གསོད་པ༔ ཆུ་ལ་ནི༔ ཉ༔ སྦལ་པ༔ ལྕོང་མོ་ལ་སོགས་པ༔ ཆུ་ཡི་སེམས་ཅན་དཔག་ཏུ་མེད་པ་ཡོད་པ་དེ་དག་ཀྱང་གཅིག་གིས་གཅིག་གསོད་པ༔ ནམ་མཁའ་ལ་ཡང༌༔ བྱ་རྒོད༔ འོལ་བ༔ ཀླག༔ ཁྲ༔ བྱིའུ༔ ཁྭ་ཏ༔ ཕུག་རོན༔ ཀང་ཀ༔ འཇོལ་མོ་ལ་སོགས་པས་ནམ་མཁའ་གང་བ༔ དེ་དག་ཀྱང་གཅིག་གིས་གཅིག་གསོད་ཅིང་ཟ་བ༔ སྦྲང་བུ་གཅིག་པུས་ཀྱང་ནམ་མཁའ་དང༌༔ ས་གཞི་གང་བ་ལ༔ ཐམས་ཅད་ཀྱང་གཅིག་གིས་གཅིག་ལ་གསོན་པོར་ཟ་ཞིང་ཆོ་ངེ་དང་སྐད་ངན་ཏི་རི་རི་ཡོད༔ ནམ་མཁའ་བར་སྣང་ས་གཞི་ཐམས་ཅད་འགུལ་ཤིག་ཤིག་ཡོད་པ༔ ཤིན་ཏུ་མང་ཞིང་རྒྱ་ཆེ་བ་ཡོད་པར་སྒོམས༔ དེ་རྣམས་ཀྱི་དཀྱིལ་དུ༔ བྲག་རི་མཐོན་པོ་གཅིག་གི་སྟེང་དུ༔ བདག་རང་གཅིག་པུར་གྲོགས་མེད་པ༔ རང་གཅིག་པུས་མི་ལུས་ཐོབ་ནས་དེར་ཡོད་དེ༔ དེ་ནས་རང་མར་ལ་ལྷུང་ལ་ཁད་ཁད་ཡོད་པ་དང་༔ རང་གིས་བསམ་པ་ལ༔ ཨ་ཙ་མ༔ དམྱལ་བ་ཡི་དྭགས་དུད་འགྲོ་འདི་ལྟ་བུ་མང་པོ་ཞིག་གི་ནང་ནས༔ བདག་རང་གཅིག་པུས་མི་ལུས་ཐོབ་པ་འདི་ནི༔ ད་རེས་གཅིག་པོ་སྟབས་ཀ་ཡག་པའམ༔ དགེ་བའི་མཐུ་གཅིག་ལས་བྱུང་བར་འདུག་སྟེ༔ ཐོབ་པར་དཀའ་བ་འདི་ཐོབ་ནས་དོན་མེད་པར༔ ད་ནི་ཡང་སྟོང་ལོག་ཏུ༔ མ་ཀི་སྡུག་བསྔལ་ཚན་པོ་ཆེ་དེ་ལྟ་བུར་འགྲོ་དགོས་པ་ལ་ཕངས་པ་ལ༔ ད་ཐོབ་པར་དཀའ་བའི་མི་ལུས་འདི་ལྟ་བུ་ཐོབ་ཀྱང་རིང་དུ་གནས་པའི་དབང་མེད་པར༔ ད་ཡང་མགྱོགས་པར་མ་ཀིར་ལྷུང་ངེས་པར་འདུག་པས༔ ད་མ་ཀི་ན་མི་ལྷུང་བའི་ཐབས་ལ་ཅི་ལྟ་བུ་གཅིག་གིས་དྲག་གམ༔ གང་ན་ཡོད་དམ༔ ཨ་ཙ་མ༔ ཀྱི་ཧུད༔ ཨ་ཛི་འཇིགས་པ་ལ༔ སྙམ་དུ་བསམ་ཞིང༌༔ ངག་ཏུ་མྱ་ངན་གྱི་སྐད་འདི་ལྟ་བུ་ལྷང་ལྷང་བརྗོད་དོ༔ ཨ་ཙ་མ་ང་རེ་འཇིགས༔ ཨ་ཙ་མ་ན་ང་རེ་འཇིགས༔ ངན་སོང་སེམས་ཅན་མང་ལུགས་སམ༔ མི་ལུས་ཐོབ་པ་དཀོན་ལུགས་སམ༔ མ་ཀིར་ལྟུང་བའི་མགྱོགས་ལུགས་སམ༔ རྙེད་པར་དཀའ་ལ་འཇིག་པར་སླ༔ འདི་ལས་ཅི་ལྟར་བྱས་ན་ཐར༔ ཐབས་ཤིག་ཡོད་ན་བསྒྲུབ་པ་ལ༔ ཞེས་སྨྲེ་སྔགས་འདོན་ཞིང་ཡོད་པའི་ཚེ༔ རང་གི་སྟེང་གི་ནམ་མཁའ་ལ་གོང་བཞིན༔ རང་གི་རྩ་བའི་བླ་མ་དེ་ཉིད་སྐྱབས་སྦྱིན་གྱི་ཕྱག་རྒྱ་དང་བཅས་ནས་བྱུང་སྟེ༔ བདག་ལ་འདི་སྐད་ཟེར་བར་སྒོམས་ཤིགཀྱཻ་མ་དལ་འབྱོར་རྙེད་པར་དཀའ་བ་ཐོབ་པ་ད་རེས་ཙམ༔ ཐོབ་པ་འདི་ཡང་རྟག་པ་མ་ཡིན་ཏེ༔ མྱུར་དུ་ངན་འགྲོའི་གནས་སུ་ལྟུང་ལ་ཁད༔ ད་རེས་འདི་ལ་དོན་ཆེན་མ་བསྒྲུབས་ན༔ ཕྱིས་ནི་མི་ལུས་ཐོབ་པ་ཤིན་ཏུ་དཀའ༔ དཀའ་འམ་མི་དཀའ་སེམས་ཅན་གྲངས་ལ་ལྟོས༔ མི་ལུས་འདི་ལ་བརྟེན་ཏེ་སངས་རྒྱས་བསྒྲུབ་པར་གྱིས༔ ཞེས་གསུངས་པའི་སྒྲ་ཐོས་པ་ཙམ་གྱིས༔ བདག་གི་བསམ་པ་ལ༔ ཀྱཻ་མ་འདི་ལྟ་བུའི་སེམས་ཅན༔ གྲངས་མང་པོའི་ནང་ནས༔ བདག་གཅིག་པུས་མི་ལུས་ཐོབ་པར་དཀའ་བ་འདི་ཐོབ་པས༔ ད་ལན་བདག་རང་ཡང་འཁོར་བའི་སྡུག་བསྔལ་ལས་གྲོལ་བར་བྱས་ནས༔ མ་ཀིའི་སེམས་ཅན་གཅིག་ཀྱང་མ་ལུས་པ་བདག་གིས་བསྒྲལ་བར་བྱའོ༔ ད་ནི་ཡེངས་པའི་ལོང་མི་འདུག་གིས༔ མྱུར་དུ་སངས་རྒྱས་ཀྱི་ས་ལ་བཀོད་པར་བྱའོ་སྙམ་པའི་སེམས་བསྐྱེད་མ་ཐག་ཏུ༔ བླ་མའི་ཐུགས་ཀ་ནས༔ འོད་ཟེར་གྱི་སྙིང་པོ་གཅིག་བདག་ལ་ཟུག་པ་ཙམ་གྱིས༔ བདག་བདེ་བ་ཅན་གྱི་ཞིང་དུ་ཡེར་གྱིས་སླེབ་བྱུང་བ་དང༌༔ ཡང་བདག་གི་ཐུགས་ཀ་ནས༔ འོད་ཟེར་དཔག་ཏུ་མེད་པ་འཕྲོས་ནས༔ སེམས་ཅན་དེ་དག་གཅིག་ཀྱང་མ་ལུས་པར་བདེ་ཆེན་གྱི་གནས་སུ་དྲངས་པར་བསམ་ཞིང༌༔ སེམས་ཅན་ཐམས་ཅད་ལ་སྙིང་རྗེ་དྲག་ཏུ་བསྒོམ་མོ༔ དེ་ལྟར་རྒྱུན་དུ་མི་ལུས་ཐོབ་དཀའ་བ་དེ་ལྟ་བུ་བསམ་ཞིང༌༔ བླ་མས་ཀྱང་མི་ལུས་ཐོབ་པར་དཀའ་བའི་རྒྱུ་མཚན་རྣམས་ཞིབ་ཏུ་བཤད་པར་བྱའོ༔ མདོར་བསྡུས་ན༔ སྤྱོད་འཇུག་ལས༔ དལ་འབྱོར་འདི་ནི་ཤིན་ཏུ་རྙེད་པར་དཀའ༔ སྐྱེས་བུའི་དོན་གྲུབ་ཐོབ་པར་གྱུར་པ་ལ༔ གལ་ཏེ་འདི་ལ་ཕན་པ་མ་བསྒྲུབས་ན༔ ཕྱིས་ནས་ཡང་དག་འབྱོར་བ་ག་ལ་འགྱུར༔ ཞེས་པ་དང༌༔ མདོ་ལས༔ ལོགས་ལ་སྲན་མ་སྟོར་བས་གཅིག་ཆགས་སྲིད༔ ཐམས་ཅད་ས་ལ་ལྷུང་ནས་འགྲོ་བ་ལྟར༔ ཐོབ་པར་དཀའ་བོ་སེམས་ཅན་གྲངས་ལ་ལྟོས༔ ཞེས་གསུངས་པ་དང༌༔ ཡང་མདོ་ལས༔ བཅོམ་ལྡན་འདས་ལ་ཤ་རིའི་བུས་གསོལ་བ༔ བཅོམ་ལྡན་འདས༔ དམྱལ་བ་ནི་ཅི་ཙམ་ཡོད༔ ཡི་དྭགས་ནི་ཅི་ཙམ་ཡོད༔ དུད་འགྲོ་ནི་ཅི་ཙམ་ཡོད༔ ལྷ་མ་ཡིན་ནི་ཅི་ཙམ་ཡོད༔ ལྷ་མི་གཉིས་པོ་ཅི་ཙམ་ཡོད༔ ཅེས་ཞུས་པས༔ བཅོམ་ལྡན་འདས་ཀྱིས་བཀའ་བསྩལ་པ༔ ཤ་རིའི་བུ༔ དམྱལ་བ་ནི་ས་གཞི་ཙམ་ཡོད་དོ༔ ཡི་དྭགས་ནི་བྱེ་མའི་གྲངས་ཙམ་ཡོད་དོ༔ དུད་འགྲོ་ནི་ཆང་གི་སྦང་མ་ཙམ་ཡོད་དོ༔ ལྷ་མ་ཡིན་ཁ་བ་བུ་ཡུག་ཙམ་ཡོད་དོ༔ ལྷ་མི་གཉིས་ནི་སེན་མོའི་སྟེང་དུ་རྡུལ་ཆགས་པ་ཙམ་ཡོད་དོ༔ ཞེས་གསུངས་པའི་ཕྱིར༔ ཤིན་ཏུ་ཐོབ་པར་དཀའ་བར་ཤེས་སོ༔ ཡང་མདོ་ལས༔ སངས་རྒྱས་འབྱུང་བ་བརྒྱ་ལམ་རྙེད་པར་དཀའ༔ མིར་སྐྱེ་པ་ཡང་ཤིན་ཏུ་རྙེད་པར་དཀའ༔ གྲོགས་པོ་གང་དག་དད་དང་ཆོས་ཉན་པ༔ འདི་འདྲ་བསྐལ་པ་བརྒྱར་ཡང་རྙེད་མི་འགྱུར༔ ཞེས་གསུངས་པས་ན༔ དེ་ལྟར་དལ་འབྱོར་རྙེད་པར་དཀའ་བ་ནི༔ འཁོར་བ་ལ་བློ་མ་ལྡོག་གི་བར་དུ་སྒོམས་ཤིག༔ དེ་ཙམ་དུ་མི་ལུས་ཐོབ་པར་དཀའ་ན༔ ད་ལན་དུས་བརྒྱའི་ཟ་མ་ལན་གཅིག་འདི་ལ༔ ཅིས་ཀྱང་ཆོས་དང་ལྡན་པར་བྱ་དགོས་སོ༔ མི་ལུས་གཙང་མ་ཐོབ་ཀྱང༌༔ སྟོང་ལོག་བྱེད་པ་འདི་རྣམས་ལ༔ སྙིང་རྗེ་དུང་དུང་མ་སྐྱེས་ཀྱི་བར་དུ་བསྒོམ་དགོས་ཏེ༔ འཇིག་རྟེན་པ་འདི་རྣམས་མཐོང་བའི་ཚེ༔ སྙིང་རྗེ་མ་སྐྱེས་ན་ཉམས་མ་བྱུང་བ་ཡིན་ནོ༔ སྙིང་རྗེ་དུང་དུང་བ་སྐྱེ་ཞིང་བརྩོན་འགྲུས་ཆེར་སོང་ན་སྐྱེ་བ་ཡིན་ནོ༔ བརྩོན་འགྲུས་ཆེར་མ་སོང་ན༔ བསྒོམས་པ་དོན་མེད་ཡིན་ནོ༔ འདི་ལ་ཞག་གསུམ་སྒོམས་ལ་བྱོན་ཅིག༔ འདི་ལྟར་དལ་འབྱོར་རྙེད་པར་དཀའ་བ་བསྒོམས་པས༔ ཕྱིས་མི་ལུས་ཐོབ་པ་དང༌༔ ཚེ་འདིར་ཞེན་པ་དང་བྲལ་བ་དང༌༔ ཆོས་མིན་པ་ཡིད་ལ་མི་དྲན་པ་དང༌༔ མཐར་སངས་རྒྱས་པར་འགྱུར་རོ༔ ཉམས་སུ་ལོངས་ཤིག༔ བར་དོའི་ཉམས་ཁྲིད་དགོངས་པ་རང་གྲོལ་ལས་དལ་འབྱོར་རྙེད་དཀའ་བ་བསྒོམ་པ་སྟེ༔ ཆོས་ཐུན་གཉིས་པའོ༔ དེ་ནས་འཆི་བ་མི་རྟག་པ་བསྒོམ་པར་བྱ་སྟེ༔ དེ་ཡང༌༔ འཆི་བ་མི་རྟག་པ་མ་བསམ་ན༔ ལོང་མེད་རྒྱུད་ལ་མི་སྐྱེ༔ ལོང་མེད་རྒྱུད་ལ་མ་སྐྱེས་ན༔ ལེ་ལོ་སྙོམས་ལས་སུ་ལུས་ཏེ༔ ཆོས་མི་དྲན༔ ཚེ་འདིའི་བྱ་བ་ལ་འཇུག༔ ལོང་ཡོད་དང་ཚོད་ཡོད་དུ་ལུས༔ མཇུག་ཐ་མལ་གྱི་ངང་ལ་འཆི་ཤོར་ནས༔ མི་ལུས་རིན་པོ་ཆེ་ཆུད་ཟོས་པར་འགྱུར་བས༔ འཆི་བ་མི་རྟག་པ་བསྒོམ་པ་ཤིན་ཏུ་ནས་ཀྱང་གལ་ཆེའོ༔ མི་རྟག་པ་རྒྱུད་ལ་སྐྱེས་ན༔ སྙོམ་ལས་སུ་སྡོད་པའི་ལོང་མེད༔ སྙིང་ནས་འཆི་བ་དྲན་ཏེ༔ ཆོས་རང་ཤུགས་ཀྱིས་འབྱུང་བས༔ མི་རྟག་པ་བསྒོམ་པར་བྱ་སྟེ༔ དེ་ཡང༌༔ གནས་འདི་ལྟ་བུ་རྣམས་སུ་བསྒོམ་སྟེ༔ བདག་གཅིག་པུར་གྲོགས་མེད་པར་བྱིན་ལ༔ ལུང་གི་ཕུ་ན༔ འགྲོ་བ་མི་ཞེས་བྱ་བའི་འགྲིམས་འགྲུལ་མེད་པ༔ རྫ་རི་སྔོ་སྤུང་སྤུང་ཡོད་པ༔ གྲོག་པོ་ཁམ་པ་ཤལ་བཤལ་ཡོད་པ༔ འཇག་མ་རླུང་གིས་བསྐྱོད་དེ་ཤུལ་ཤུལ་ཟེར་བ༔ ཉི་མ་རྩེ་རེ་རེ་ནུབ་པ༔ རྫ་ཆུ་ཁྲ་ལ་ལ་འབབ་པ༔ སྙིང་མི་དགའ་ཞིང༌༔ ཡིད་སྐྱོ་བའི་གནས་སམ༔ ཡང་ན་དུར་ཁྲོད་ཀྱི་གནས༔ མི་རོ་མང་པོ་ཧྲིལ་ལེ་འགྱེལ་བ༔ རོའི་རྐང་ལག་དང༌༔ ཤ་དང་རུས་པ་དང༌༔ པགས་པ་དུམ་བུ་ཐོ་རེ་ཡོད་པ༔ ཝ་མོ་ཁྲོང་ཁྲོང་བརྒྱལ་བ༔ བྱ་རོག་བཟུར་འགྲོས་ལིང་ལིང༌༔ འུག་པ་སྐན་སྒྲ་ཆེམ་ཆེམ༔ ལྷག་པ་འུག་འུག་ཟེར་བ༔ ཝ་དང་སྤྱང་ཀིས་རོ་ལ་ཕར་འཐེན་ཚུར་འཐེན་བྱེད་པ༔ ཤིན་ཏུ་འཇིགས་པ༔ སྐྱོ་བ༔ སྐྱི་བུན་པ༔ ཡ་ང་བ༔ དེ་ལྟ་བུའི་གནས་སུ༔ རང་གཅིག་པུར་འགྲོ་བའམ༔ མ་འཛོམ་ན་བསྒོམ་པར་བྱའོ༔ དེ་ཡང་བསྒོམ་པའི་གནས་ཀྱང་ཁྱད་པར་ཆེ་སྟེ༔ གནས་དེ་ལྟ་བུ་རྣམས་སུ་ཕྱིན་ནས་བསྒོམས་པས༔ མི་རྟག་པ་རང་ཤུགས་ཀྱིས་སྐྱེ་བ་ཡིན་པས་གལ་ཆེའོ༔ དེར་ཕྱིན་ནས་ལུས་གནད་སྐྱིལ་ཀྲུང་དུ་བྱས་ལ༔ ལག་མཐིལ་གཉིས་ཀྱིས་པུས་མགོ་བཀབ་པའམ༔ ཡང་ན་གོང་བཞིན་མྱ་ངན་གྱི་འདུག་སྟངས་བྱས་ལ༔ ཡིད་ཀྱིས་ཁ་ནང་དུ་ལོག་ལ༔ ཞེ་ཐག་པ་ནས༔ འདི་ལྟར་བསམ་པར་བྱའོ༔ ཨ་ཙ་མ་ག་རེ༔ ཕྱིའི་ནམ་ཟླ་འདི་རྣམས་སྐད་ཅིག་ཀྱང་མི་རྟག་པར་དབྱར་དགུན༔ སྟོན་དཔྱིད་ལ་སོགས་པ་རིམ་གྱིས་མི་སྡོད་པར་འགྱུར་ནས་འགྲོ་བར་འདུག༔ དེ་རིང་གི་ཉི་མ་གཅིག་པོ་འདི་ལ་ཡང༌༔ སྔ་དྲོ་དང༌༔ ཕྱེད་གུང་དང༌༔ དགོངས་མོ་རིམ་གྱིས་འགྱུར་ནས་འགྲོ་བར་འདུག་དུས་ཀྱང་ཚིག་སྔ་མ་དང༌༔ ཕྱི་མའི་བར་དུ་ཡང༌༔ མི་སྡོད་པར་འགྲོ་བར་འདུག་རང་གི་ཕ་མ་རྒན་རྒོན༔ ཡུལ་མི་ཁྱིམ་མཚེས༔ གྲོགས་པོ༔ ན་ཟླ༔ དགྲ་གཉེན་ཐམས་ཅད་ཀྱང༌༔ མི་རྟག་པར་ཐ་ར་ར་ཤི་བར་འདུག༔ ན་སོ་ཡང་རིམ་གྱིས༔ བུ་ཆུང༌༔ བྱིས་པ༔ དར་མ༔ རྒས་པ་ནས༔ འཆི་བའི་བར་དུ༔ སྐད་ཅིག་ཀྱང་མི་སྡོད་པར་འགྱུར་ནས་འགྲོ་བར་འདུག་པས༔ ད་ནི་བདག་རང་ལ་ཡང༌༔ མགྱོགས་པར་འཆི་བ་ཞིག་འོང་སྟེ༔ ལོ་ཟླ་ཞག་གྲངས་འགྲོ་བའི་མགྱོགས་ལུགས་ནི་འདི་ལྟ་བུ་ཡིན༔ བདག་སོང་ཕོད་ད་ཙམ་ན༔ ས་སྟེང་འདིར་སྡོད་རྒྱུ་ཨི་ཡོད་དམ༔ དེར་མ་ཟད༔ བདག་གི་ཚེ་ལ་ནི༔ གདེང་མེད་པས༔ སང་འཆིའམ༔ གནངས་འཆི་འམ༔ ནམ་འཆི་ཆ་མེད་པ་ལ༔ བདག་ཐ་མལ་དུ་སྡོད་པའི་ལོང་མེད༔ ཡེངས་མ་ལམ་ལ་མི་ཚེ་ཟད་ཤོར་ན་ནི་ཤིན་ཏུ་འཕངས་ཏེ༔ འཆི་ངེས་པར་ནི་ཐག་ཆོད་སྔར་མ་ཤི་བར་ཚེ་ཐར་དུ་ལུས་པ་ནི་མི་འདུག་པས་ཀྱང་འཆི་ངེས༔ ལུས་འདུས་བྱས་ཡིན་པས་ཀྱང་འཆི་ངེས༔ ཚེ་འདི་ཡང་སྐད་ཅིག་ཀྱང་མི་སྡོད་པར་འགྲོ་བས་ཀྱང་ཤི་ངེས་ཏེ༔ དཔེར་ན་རི་གཟར་གྱི་ཆུ་ཐུར་དུ་རྒྱུག་པ་འམ༔ གསོད་སར་ཁྲིད་པའི་དུད་འགྲོ་དང་འདྲ་སྟེ༔ མྱུར་དུ་འཆི་བའི་ཕྱོགས་སུ་འགྲོ་བར་འདུག༔ དེ་ཡང༌༔ ཤི་བར་ངེས་པའི་སྟེང་དུ༔ ནམ་འཆི་ཆ་མེད་དེ༔ ཚེ་ལ་འདི་ཙམ་ཐུབ་ཀྱི་ངེས་པ་མེད་པས་ཀྱང༌༔ ནམ་འཆི་ཆ་མེད་དེ༔ འཆི་བའི་རྐྱེན་ཤིན་ཏུ་མང་བས་ཀྱང༌༔ ནམ་འཆི་ཆ་མེད༔ ལུས་ལ་སྙིང་པོ་མེད་པས་ཀྱང༌༔ ནམ་འཆི་ཆ་མེད་པས༔ བདག་ལེ་ལོར་སྡོད་པའི་ལོང་ག་ལ་ཡོད༔ དེ་ཡང་བདག་རང་ཤི་ཙམ་ན་སུས་ཀྱང་བཟུང་དུ་མེད༔ བསྲུང་དུ་མེད༔ སུས་ཀྱང་མི་སྟོངས་ཏེ༔ བསགས་པའི་ནོར་གྱིས་ཀྱང་འཆི་བ་ལ་མི་སྟོངས༔ བུ་དང་ཆུང་མ༔ འདུས་པའི་གཉེན་གྱིས་ཀྱང་འཆི་བ་ལ་མི་སྟོངས༔ རང་གི་ལུས་ཀྱིས་ཀྱང་ཤི་བ་ལ་མི་སྟོངས་ཏེ༔ ལུས་ཉིད་ཀྱང་ཤུལ་དུ་བསྐྱུར་ནས་མེ་ལ་བསྲེགས་ཏེ༔ ཐལ་བ་སྤར་གང་དུ་འགྲོ༔ དེ་ནས་ཐལ་བ་དེ་ཡང་རླུང་གིས་ཁྱེར་ཏེ༔ གར་སོང་ཆ་མེད་དུ་འགྲོ་ངེས་ཏེ༔ བསགས་པའི་ནོར་ཀྱང་ཤུལ་དུ་ལུས་ནས༔ ཁབ་གཅིག་ཀྱང་ཁྱེར་བའི་དབང་མེད༔ འདུས་པའི་གཉེན་ཀྱང་སོ་སོར་བྲལ་ཏེ༔ དེ་རིང་ཕྱིན་ཆད་འཕྲད་ནས་མི་འོང་བར༔ ལམ་ས་ཐག་རིང་པོ་ཞིག་ལ༔ ད་ནི་མགྱོགས་པར་འགྲོ་དགོས་པར་འདུག་པ༔ གྲོགས་ཟླ་བོ་གཅིག་ཀྱང་ཁྲིད་པའི་དབང་མེད༔ ད་རང་གཅིག་པུ་གྲོགས་མེད་དུ་འགྲོ་དགོས་པའི་དུས་དེར༔ ད་ནི་སླེབ་ལ་ཁད་པས༔ སྙོམས་ལས་སུ་སྡོད་པ་ག་ལ་ཁོམ༔ ཚེ་འདིའི་བྱ་བ་བྱེད་པ་ག་ལ་ཁོམ༔ གཉིད་ལོག་པ་ཡང་ག་ལ་ཁོམ༔ ཨ་ཙ་མ་དེ་རིང་ཁོ་ན་ནས་སྡིག་པ་སྤང༌༔ དེ་རིང་ཁོ་ན་ནས་དགེ་བ་བསྒྲུབ་ནས༔ འཆི་ཁར་བློ་བདེ་བ་ཕྱི་མར་ལམ་སྣ་ཟིན་པ་ཞིག་ཅིས་ཀྱང་བྱ༔ ཀྱཻ་མ༔ ཀྱཻ་མ༔ ཨ་ཙི༔ འཇིགས་པ་སྙམ་དུ་བསམ་ཞིང༌༔ ངག་ཏུ་འདི་སྐད་དུ་མྱ་ངན་གྱི་སྐད་དུ་བརྗོད་ཅིང༌༔ དྲན་བསྐུལ་ལྷང་ལྷང་གདབ་སྟེ༔ ཀྱཻ་མ༔ ཀྱཻ་མ༔ ཀྱི་ཧུད༔ འདུས་བྱས་འདི་མི་རྟག་པའོ༔ ཉིན་མཚན་གཉིས་ཀྱིས་ནི་ཚེ་ལ་རྐུ་བའོ༔ ནམ་འཆི་ཆ་མེད་དོ༔ དེ་སྔ་མ་ཤི་བ་ནི་ཁ་རྗེ་ཆེའོ༔ ད་ནི་འཆི་བ་ལ་སླེབ་ལ་ཁད་དོ༔ ཞེས་ངག་ནས་ལྷང་ལྷང་དྲན་བསྐུལ་གདབ་བོ༔ ཡིད་ཀྱིས་དམིགས་པ་འདི་ལྟར་བསྒོམས་པར་བྱའོ༔ ཡང་བདག་ག་ནས་ཕྱིན་ཆ་མེད་པར༔ ལུང་པ་གཅིག་ཏུ་སླེབས་ཏེ༔ ལུང་པ་དེ་ནི༔ ཁ་བྱང་དུ་གཏད་པ༔ ཁ་དོག་ནག་པ༔ མིའི་རྒྱུ་འགྲུལ་དང་སྐད་མེད་པ༔ ཆུ་ཤ་ར་ར་བབ་པ༔ རླུང་སྒྲ་འུ་རུ་རུ་སྒྲོགས་པ༔ འཇག་མ་ཀྱུ་རུ་རུ་ཟེར་བ༔ ཉི་མ་ནི་རི་རྩེ་ནས་རྩེ་རེ་རེ་ནུབ་པ༔ བྲག་རི་སྔོ་སང་སང་ཡོད་པ་ལ༔ བྱ་རོག་ཏང་ཏང་ཟེར་བ༔ དེ་འདྲ་བ་ཞིག་ཏུ༔ གང་ནས་ཕྱིན་ཆ་མེད་པར་སླེབས་ཏེ༔ གྲོགས་པོ་ཟླ་བོ་ནི་སུ་ཡང་མེད༔ སྔོན་ཆད་ནི་འགྲོ་མ་མྱོང༌༔ གར་འགྲོའི་གཏད་སོ་ནི་མེད་པར༔ ཐོམ་ཐོམ་འགྲོ་བ་ཡོད་པ་ལ༔ ངག་ཏུ་འདི་སྐད་དུ་བརྗོད་དོ༔ ཀྱེ་མ་ཀྱེ་མ་ཀྱི་ཧུད་ཨ་ཙ་མ༔ གྲོགས་མེད་གཅིག་པུར་ལུང་སྟོངས་འཁྱམས༔ གར་འགྲོའི་གཏད་སོ་བདག་ལ་མེད༔ ང་ཡི་ཡུལ་དེ་གར་ཡོད་དམ༔ ང་ཡི་ཕ་མ་གར་ཡོད་དམ༔ བུ་དང་ནོར་རྫས་གར་ཡོད་དམ༔ རང་ཡུལ་སླེབ་དུས་ནམ་འོང་ན༔ ཀྱཻ་མ་ཀྱི་ཧུད་ང་རེ་སྐྱོ༔ དེ་སྐད་ལྷང་ལྷང་ཟེར་ཞིང༌༔ གར་འགྲོ་གཏོལ་མེད་བཞིན་དུ༔ ཐོམ་ཐོམ་ཕྱིན་པ་ལ༔ ནམ་ཞིག་གི་ཚེ་ན༔ བྲག་རོང་གཅིག་ཏུ་ཕྱིན་ཏེ་ལྷུང་ཉེ་བ་ལ༔ བདག་གི་ལག་པ་གཡས་པ་ལ༔ ནམ་ཞིག་(རྩ་ན་)བྲག་དཀྱིལ་དེར་རྩྭ་ཕོན་གཅིག་འདུག་པ་ལ༔ ལག་པས་ཟིན་ཏེ༔ དེ་ལ་དམ་དུ་བཅངས་ཤིང༌༔ འདར་ཁྲི་ལི་ལི་ཡོད་པ་ལ༔ མར་ལ་བལྟས་པས་ནི་གཏིང་མེད་པ༔ ཡར་ལ་བལྟས་པས་ནི་རི་གནམ་ལ་རེག་པ༔ བྲག་རི་མེ་ལོང་གི་ངོས་ལྟར་འདྲེད་རྒྱ་ཆེ་བ༔ རླུང་སྒྲ་འུ་རུ་རུ་ཟེར་བ༔ དེ་འདྲ་བ་ཞིག་ཏུ་ལྷུང་བ་ལ༔ རྩྭ་ཕོན་དེའི་གཡས་ཕྱོགས་ནས༔ བྲག་གི་སེར་ག་གཅིག་ནས༔ བྱི་བ་དཀར་པོ་གཅིག་བྱུང་ནས༔ རྩྭ་འཇག་མ་གཅིག་བཅད་དེ་ཁྱེར་ནས་སོང༌༔ གཡོན་ཕྱོགས་ནས༔ བྲག་གི་སེར་ཁ་གཅིག་ནས༔ བྱི་བ་ནག་པོ་གཅིག་བྱུང་ནས་རྩྭ་འཇག་མ་གཅིག་བཅད་དེ་ཁྱེར་ནས་སོང༌༔ དེ་གཉིས་རེས་མོས་བྱས་ནས༔ རྩྭ་ཕོན་ནི་ཇེ་ཆུང་ལ་སོང༌༔ བྱི་བ་ལ་རྒོལ་ཐབས་ནི་མ་རྙེད༔ ཤི་བ་ལ་ནི་འཇིགས་སྐྲག་ཅིང་སྔངས་ནས་འདར་ཞིང་ཡོད་པ་དང༌༔ རང་གི་བསམ་པ་ལ༔ ཨ་ཙ་མ༔ ད་ནི་བདག་ལ་འཆི་བ་སླེབ་ནས་གདའ་སྟེ༔ བྲོས་པའི་ས་ནི་མི་འདུག༔ སྔོན་ཆད་ནི་ཤི་བ་མ་དྲན་པས་ཆོས་ནི་མེད༔ འགྲོ་ཁུང་ནི་འཇིགདེ་རིང་ལ་ཤི་བ་ཡིད་ལ་མེད་པ་ལ༔ ད་ནི་འཆི་བ་གློ་བུར་དུ་ཕེབས༔ ད་ནི་བུ་ཚ་བོ་ནོར་རྫས་ཉེ་བ་གཉེན་འབྲེལ༔ ཡུལ་མི་ཁྱིམ་མཚེས་དང་ཡང་ད་ནི་དེ་རིང་ནས་བྲལ་ཏེ༔ དེ་རིང་ཕྱིན་ཆད་ནས་འཕྲད་ནས་མི་འོང༌༔ ནོར་བསོགས་པ་ནི་ཤུལ་དུ་ལུས༔ སྔོན་ཆད་འགྲོ་མ་མྱོང་བའི་ས་རྒྱུས་མེད༔ ཐག་རིང་ཞིག་ཏུ་དེ་རིང་ནས་འགྲོ་དགོས་པར་འདུག་པས༔ ཨ་ཙི༔ འཇིགས་པ༔ འདི་ནས་ཐར་པའི་ཐབས་ནི་ཅི་དྲག་གམ༔ གང་ན་ཡོད་དམ༔ ཅི་ཚུག་བྱེད་ན༔ ཨ་ཙ་མ༔ སྙམ་དུ་བསམ་ཞིང༌༔ ངག་ཏུ་མྱ་ངན་གྱི་སྒྲ་སྐད་འདི་ལྟར་ལྷང་ལྷང་བརྗོད་དོ༔ ཨ་ཙ་མ་ན་ང་རེ་འཇིགས༔ ཨ་ཙ་མ་ན་འཆི་བ་འོང༌༔ ད་ལྟ་མྱུར་དུ་འཆི་བ་འོང༌༔ གྲོགས་མེད་གཅིག་པུར་འགྲོ་དགོས་པས༔ ཐག་རིང་ཞིག་ཏུ་འགྲོ་དགོས་པས༔ ཆ་མེད་ཡུལ་དུ་འགྲོ་དགོས་པས༔ ལ་བོ་ཆེ་ལ་བརྒལ་དགོས་པས༔ འདི་ལས་ཅི་ལྟར་བྱས་ན་ཐར༔ ཐབས་ཤིག་ཡོད་ན་བསྒྲུབ་པ་ལ༔ ཨ་ཙ་མ་ན་འཆི་བ་འོང༌༔ ཨ་ཙ་མ་ན་ང་རེ་འཇིགས༔ ཞེས་སྨྲེ་སྔགས་འདོན་ཞིང་ཡོད་པའི་ཚེ༔ རང་གི་སྟེང་གི་ནམ་མཁའ་ནས༔ རང་གི་རྩ་བའི་བླ་མ་དེ་ཉིད་པདྨ་དང་ཟླ་བའི་སྟེང་ན༔ ཌཱ་མ་རུ་དང་དྲིལ་བུ་བསྣམས་ཏེ༔ རུས་པའི་རྒྱན་དྲུག་གསོལ་ནས༔ གར་ལིང་ལིང་བྱེད་ཅིང༌༔ བདག་ལ་འདི་སྐད་ཟེར་བར་སྒོམས་ཤིག༔ ཀྱཻ་མ་འདུས་བྱས་འདི་ནི་མི་རྟག་མྱུར་དུ་འཇིག༔ ཕྱི་ཡི་དུས་བཞི་མི་རྟག་འགྱུར་ཞིང་འགྲོ༔ རྒན་རིམ་དགྲ་གཉེན་ཤི་ཞིང་རྒུད་པ་དང༌༔ གཞོན་རིམ་དར་དང་ལོ་ཟླ་ཞག་གྲངས་འགྱུར༔ ཚེ་འདི་རི་གཟར་ཆུ་འདྲ་མྱུར་འགྲོ་ཡང༌༔ བདག་ཉིད་ཤི་བ་མ་ཤེས་འགྲོ་བ་བླུན༔ ད་ནི་མི་རྟག་ཤི་བ་སླེབ་ལ་ཁད༔ ཤི་བ་འདི་ལ་བཟློག་ཐབས་ཅི་ཡང་མེད༔ བཟློག་ཐབས་འདུག་གམ་ད་ལྟ་འདི་ལ་ལྟོས༔ ད་ནི་ལོང་མེད་བླ་མའི་མོས་གུས་མཛོད༔ ཅེས་གསུངས་པའི་སྒྲ་ཐོས་པ་ཙམ་གྱིས༔ བདག་གིས་བསམ་པ་ལ༔ ཀྱེ་མ་འདི་ལྟ་བུའི་ཤི་བ་ལ་མ་ཐུག་པའི་སྔོན་ནས༔ ཆོས་ཤིག་བྱ་རྒྱུ་ཡིན་པར་འདུག་པ་ལ༔ དེ་སྔ་ཆོས་མ་བྱས་པ་ང་རེ་འགྱོད༔ ད་ནི་ཤི་རུང་གསོན་རུང་བླ་མ་དཀོན་མཆོག་མཁྱེན་ནོ༔ བླ་མ་དཀོན་མཆོག་ལ་ཐུགས་རྗེ་ཡོད་ན༔ བདག་གཡང་ས་ཆེན་པོ་འདི་ལས་བསྒྲལ་ན་ཅི་མ་རུང༌༔ ཕ་བླ་མ་དཀོན་མཆོག་མཁྱེན་སྙམ་པས་ཞེ་ཐག་པ་ནས༔ མོས་གུས་དྲག་པོ་བྱས་པ་ཙམ་གྱིས༔ བླ་མའི་ཐུགས་ཀ་ནས་འོད་ཟེར་གྱི་སྙིང་པོ་གཅིག༔ བདག་གི་ཐུགས་ཀར་ཟུག་པ་དང༌༔ རྩྭ་ཕོན་ཟད་པ་དང་དུས་མཚུངས་ཏེ༔ བདག་འོད་ཟེར་དེས་གཡེངས་ཏེ་བཏེག་ནས༔ བདག་བདེ་བ་ཅན་གྱི་ཞིང་དུ་སླེབས་ཏེ་བྱུང་བ་དང༌༔ ཡང་བདག་གི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་ནས༔ ཁམས་གསུམ་སེམས་ཅན་ཐམས་ཅད་གཅིག་ཀྱང་མ་ལུས་པ༔ བདེ་བ་ཅན་དུ་དྲངས་པར་བསམ་ཞིང༌༔ སེམས་ཅན་ཐམས་ཅད་ལ་སྙིང་རྗེ་དྲག་ཏུ་བསྒོམ་པར་བྱའོ༔ དེ་ལྟར་འཆི་བ་མི་རྟག་པ་དེ་ལྟ་བུ་བསམ་ཞིང༌༔ བླ་མས་ཀྱང་འཆི་བ་མི་རྟག་པའི་རྒྱུ་མཚན་ཞིབ་ཏུ་རྒྱས་པར་བཤད་ལ༔ སྐྱོ་བ་བསྐྱེད་པར་བྱའོ༔ མདོར་བསྡུས་ན༔ མདོ་ལས༔ འདུས་བྱས་རྟག་པར་གྱུར་པ་ཡི༔ གནས་ནི་རྙེད་པར་མི་འགྱུར་བས༔ འདུས་བྱས་ཐམས་ཅད་མི་རྟག་གིས༔ མྱ་ངན་མ་བྱེད་ཀུན་དགའ་བོ༔ ཞེས་པ་དང༌༔ ལང་ཀར་གཤེགས་པ་ལས༔ རི་གཟར་ཆུ་འབབ་མགྱོགས་པ་དང༌༔ མི་ཡི་ཚེ་ཡང་དེ་དང་འདྲ༔ ཞེས་པ་དང༌༔ ཐེགས་ཆེན་རྣལ་འབྱོར་ལས༔ གང་དུ་ཕྱིན་ཡང་མི་འཆིའི་ས་ཕྱོགས་ནི༔ རི་བོའི་རྩེ་ན་མེད་དེ་རྒྱ་མཚོའི་གཏིང་ནའང་མེད༔ འཇིམ་པའི་བུམ་པ་བཞིན་དུ་འཇིག་པ་ཅན༔ གཡར་པོ་འདྲ་སྟེ་འདི་ལ་ཐེར་ཟུག་མེད༔ ཅེས་པ་དང༌༔ ཆེད་དུ་བརྗོད་པ་ལས༔ ཁ་ཅིག་མངལ་དུ་འཆི་བ་མཐོང༌༔ ཁ་ཅིག་བཙས་པའི་སར་འཆི་ཞིང༌༔ དེ་བཞིན་ཁ་ཅིག་གོགས་ཙམ་ནས༔ ལ་ལ་རྒས་དང་ལ་ལ་གཞོན༔ ལ་ལ་དར་ལ་བབས་པའི་ཚེ༔ དེ་དག་རིམ་གྱིས་འགྲོ་འགྱུར་ལ༔ དེ་ལ་མི་འདི་གཞོན་ཞེས་ནས༔ གསོན་པའི་གདེང་བྲོད་སུ་ཞིག་འཆང༌༔ ཞེས་པ་དང༌༔ ཡང་མདོ་ལས༔ གསོད་སར་ཁྲིད་པའི་བཙོན་བཞིན་དུ༔ གོམ་རེ་སྤོ་ཞིང་འཆི་ལ་ཉེ༔ ཞེས་པ་དང༌༔ སློབ་དཔོན་ཀླུ་སྒྲུབ་ཀྱི་ཞལ་ནས༔ འཆི་བའི་རྐྱེན་མང་འཚོ་བའི་རྐྱེན་ནི་ཉུང༌༔ འཚོ་རྐྱེན་ཉིད་ཀྱང་འཆི་བའི་རྐྱེན་དུ་འགྱུར༔ དེས་ན་རྟག་ཏུ་ཆོས་ལ་འབད་པར་བྱ༔ ཞེས་པ་དང༌༔ མདོ་རིན་པོ་ཆེའི་ཏོག་ལས༔ གྲོགས་དག་ཚེ་འདི་མི་རྟག་སྟེ༔ རི་གཟར་ཆུ་དྲག་ལྟར་མགྱོགས་ན༔ བྱིས་པའི་སྐྱེ་བོས་མ་རྟོགས་པས༔ མི་མཁས་འདོད་པའི་དྲེགས་པས་མྱོས༔ ཞེས་པ་དང༌༔ མདོ་ལས༔ འཆི་བདག་བདུད་ནི་སོ་བྱ་ཉ་སྡོད་འདྲ༔ སྐྱེ་རྒ་ན་འཆི་རང་འཐག་རི་མོ་འདྲ༔ འཇིག་རྟེན་འདི་ནས་ཆེ་ཆུང་དབུལ་ཕྱུག་ཀུན༔ འཆི་བདག་ལག་ཏུ་མི་འགྲོ་གཅིག་ཀྱང་མེད༔ ཅེས་པ་དང༌༔ ཡང་ཐེག་ཆེན་རྣལ་འབྱོར་ལས༔ སྔ་མ་ཤི་བའི་རྒན་རབས་ཀུན་གྱིས་ཀྱང༌༔ རྟག་ཏུ་རེ་ནས་བུ་དང་ནོར་བསོགས་ཀྱང༌༔ བུ་ནོར་ཕྱི་ལུས་བདག་ལ་ཕན་པ་ཉུང༌༔ ཞེས་གསུངས་ཏེ༔ དེ་ལྟར་དུ་མི་རྟག་ཅིང་སྐད་ཅིག་ཀྱང་མི་སྡོད་པར་འགྲོ་བས༔ ལེ་ལོར་སྡོད་པའི་ལོང་མེད་དོ༔ ཞེས་མདོ་རྒྱུད་རྣམས་ནས་ལུང་མང་དུ་དྲངས་ལ་སྐྱོ་བ་བསྐྱེད་པར་བྱའོ༔ དེ་ལྟ་བུའི་འཆི་བ་མི་རྟག་པའི་ཉེས་པ་བསྒོམ་པ་ཉམས་སུ་བླངས་ན༔ འཇིག་རྟེན་གྱི་བྱ་བྱེད་ཐམས་ཅད་མི་རྟག་པར་གོ་ནས་ལྷག་པར་རང་རྒྱུད་ཞི་སྟེ༔ ཆོས་ལ་བརྩོན་པ་ལ་སོགས་པའི་ཉམས་འབྱུང་ངོ༌༔ མི་རྟག་པ་བསྒོམས་ཀྱང༌༔ ཚེ་འདིའི་འདོད་པ་ཆེར་སོང་ནས༔ དབེན་པར་མི་ཆགས་ན་ཉམས་མ་སྐྱེས་ཀྱི་བར་དུ་བསྒོམ་པར་བྱའོ༔ འདི་ནི་ཆོས་ཐམས་ཅད་ཀྱི་བཅུད་ཡིན་ཏེ༔ འདི་ལ་བོགས་མ་ཐོན་ན༔ བསྒོམ་ཉམས་སྐྱེ་བར་མི་འགྱུར་བས༔ འདི་ལ་བརྩོན་པ་གལ་ཆེའོ༔ དབང་པོ་རབ་འབྲིང་ཐ་མ་གང་ཡང་འདིས་གྲོལ་བར་འགྱུར་བས༔ འདི་ལ་འབད་པ་གལ་ཆེ་སྟེ༔ འཆི་བ་མི་དྲན་པའི་སེམས་ཅན་མཐོང་བའི་ཚེ༔ མཆི་མ་ཕྲོམ་ཕྲོམ་པའི་སྙིང་རྗེ་མ་བྱུང་གི་བར་དུ་སྒོམས་ཤིག༔ འདི་ལ་ཞག་གསུམ་བསྒོམ་པར་བྱོས་ཤིག༔ དེ་ལྟར་བསྒོམས་པས༔ གནས་སྐབས་སུ་བདེ་བ་ཕུན་སུམ་ཚོགས་པ་ཐོབ་པ་དང༌༔ མཐར་ཐུག་སངས་རྒྱས་སོ༔ ཉམས་སུ་ལོངས་ཤིག༔ བར་དོ་དྲུག་གི་ཉམས་ཁྲིད་དགོངས་པ་རང་གྲོལ་ལས༔ འཆི་བ་མི་རྟག་པ་བསྒོམ་པ་སྟེ༔ ཆོས་ཐུན་གསུམ་པའོ༔ དེ་གསུམ་ནི་རང་རྒྱུད་འདུལ་བར་བྱེད་པའི་སྔོན་འགྲོ་སྟེ༔ ཐོག་མར་འདི་གསུམ་ལ་ནན་ཆགས་བྱེད་པ་ནི་ཤིན་ཏུ་ནས་ཀྱང་གལ་ཆེའོ༔ འདི་རྣམས་ལ་རྐང་མ་ཚུགས་ན༔ ཆོས་གཞན་ཐམས་ཅད་འདྲེད་ནས་འགྲོ་བར་འདུག་པས༔ དེ་རྣམས་ཀྱིས་རྒྱུད་སྐྱོ་ལྷང་གིས་སྐྱེས་བུའི་སྙིང་ལ་མདའ་ཟུག་པ་ལྟར༔ དུས་རྒྱུན་དུ་མི་རྟག་པ་སྐྱོ་ལྷང་ངེ་བ་ཞིག་མ་བྱུང་བར་དུ་བསྒོམ་པར་བྱའོ༔ ས་མ་ཡཱ༔ ཉམས་སུ་ལོངས་ཤིག༔ སྔོན་འགྲོ་རང་རྒྱུད་འདུལ་བྱེད་ཅེས་བྱ་བ༔ འཁོར་བ་མ་སྟོང་གི་བར་དུ་མ་རྫོགས་སོ༔ བར་དོ་དྲུག་གི་ཉམས་ཁྲིད༔ དགོངས་པ་རང་གྲོལ་གྱི་སྔོན་འགྲོ་རང་རྒྱུད་འདུལ་བྱེད་འདི་ཉིད༔ གཏེར་སྟོན་ཀརྨ་གླིང་པའི་སྲས་ཀྱི་ཐུ་བོ༔ ཆོས་རྗེ་གླིང་པའི་ཕྱག་སྲོལ་ཞལ་གདམས་རྣམས༔ གུ་རུ་ཉི་ཟླ་འོད་ཟེར་གྱིས་ཡི་གེར་བཀོད་པ་འདིས༔ སངས་རྒྱས་ཀྱི་བསྟན་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག༔ དགེའོ༔ དགེའོ༔ དགེའོ༔ རྫོགས་རིམ་བར་དོ་དྲུག་གི་སྔོན་འགྲོ་རང་རྒྱུད་སྦྱོང་བའི་ཁྲིད་ཐར་ལམ་སྣང་བྱེད། གུ་ཎའི་མིང་ཅན་གྱིས་བྲིས་པའོ། །ཟབ་ཆོས་ཞི་ཁྲོ་དགོངས་པ་རང་གྲོལ་གྱི་རྫོགས་རིམ་བར་དོ་དྲུག་གི་སྔོན་འགྲོ་རང་རྒྱུད་སྦྱོང་བའི་ཁྲིད་ཐར་ལམ་སྣང་བྱེད་བཞུགས་སོ། ། ན་མོ་ཤྲཱི་ས་མནྟ་བྷ་དྲ་ཡེ། ཀ་དག་སྤྲོས་བྲལ་གདོད་མའི་གཞི་དབྱིངས་སུ། །ལྷུན་གྲུབ་རིག་པའི་ཡེ་ཤེས་མཐར་ཕྱིན་ཏེ། །ཟུང་འཇུག་བདེ་ཆེན་སྒྱུ་མའི་རོལ་མོ་ཉིད། །ཅིར་ཡང་འཕྲུལ་མཛད་ཐོག་མའི་མགོན་དེར་འདུད། །བདེ་སྟོང་ཐུགས་ཀྱི་སྒྱུ་འཕྲུལ་རྡོ་རྗེ་སེམས། །བདེ་གཤེགས་གསུང་གི་དབང་ཕྱུག་པདྨ་འབྱུང༌། །བརྒྱུད་གསུམ་གསང་བའི་མཛོད་འཆང་བླ་མ་རྗེ། །འབྲལ་མེད་བདེ་ཆེན་འཁོར་ལོའི་རྒྱན་དུ་བཞུགས། །རྒྱལ་ཀུན་ཐུགས་ཀྱི་ཡང་བཅུད་གསང་ཆེན་གྱི། །གདམས་པའི་གནད་ཟབ་དྲིན་ལྡན་བླ་མ་ཡི། །ཞལ་གསུངས་གང་དེ་ཆོས་ཀྱི་མཆེད་རྣམས་དང༌། །རང་གིས་གང་ཟིན་གཅིག་ཏུ་བསྡོམས་ཏེ་བྲི། །དེ་ལ་འདིར་ཟབ་ཆོས་ཞི་ཁྲོ་དགོངས་པ་རང་གྲོལ་ལས་རྫོགས་རིམ་བར་དོ་དྲུག་གི་ཁྲིད་ཀྱི་བྱུང་ཁུངས་ལོ་རྒྱུས་ནི། རང་བཞིན་གདོད་མའི་གནས་ལུགས་ཆོས་ཉིད་འདུས་མ་བྱས་ཇི་བཞིན་པར་མངོན་སུམ་དུ་མཛད་པའི་ཆོས་སྐུ་ཀུན་བཟང་ཡབ་ཡུམ། རང་སྣང་རྣམ་པར་དག་པ་འོག་མིན་གྱི་ཞིང་དུ་མཚན་མ་རྟགས་ཀྱི་ཕྱག་རྒྱ་རྡོ་རྗེ་འཆང་གི་རྣམ་པར་བཞེངས་ནས། རང་ལས་མི་གཞན་པའི་འཁོར་རྒྱལ་བ་ཞི་ཁྲོའི་ལྷ་ཚོགས་རྣམས་ལ་རང་བཞིན་རྫོགས་པ་ཆེན་པོའི་ཆོས་ཀྱི་འཁོར་ལོ་སྒྲ་ཚིག་བརྗོད་པ་ལས་འདས་པ་རང་བྱུང་ཡེ་ཤེས་ཆེན་པོའི་དགོངས་པའི་རྩལ་ལས་སྣང་བར་མཛད་པ་ནི་རྒྱལ་བ་དགོངས་བརྒྱུད་དང༌། དེ་ནས་དཔལ་རྡོ་རྗེ་སེམས་དཔའ་ཉིད་མིའི་སྐྱེ་བར་སྣང་བ་སྤྲུལ་པའི་སྐུ་དགའ་རབ་རྡོ་རྗེས་སློབ་དཔོན་འཇམ་དཔལ་བཤེས་གཉེན་དང༌། དེས་ཤྲཱི་སིངྷ། དེས་སློབ་དཔོན་པདྨ་འབྱུང་གནས་ལ་བརྒྱུད་པ་སྟེ་དེ་རྣམས་བརྡ་ཐབས་བསྟན་པ་ཙམ་གྱིས་རྟོགས་པ་ཀློང་དུ་གྱུར་ནས་རིག་འཛིན་གྱི་ས་ལ་གནས་པས་རིག་འཛིན་བརྡ་བརྒྱུད་ཅེས་བྱ། དེ་ནས་གུ་རུ་རིན་པོ་ཆེ་བོད་ཡུལ་དུ་ཕེབས་ནས་བཞུགས་པའི་དུས་ཆོས་རྒྱལ་ཁྲི་སྲོང་ལྡེའུ་བཙན། མཁའ་འགྲོ་ཡེ་ཤེས་མཚོ་རྒྱལ། ཅོག་རོ་ཀླུའི་རྒྱལ་མཚན་སོགས་ལས་ཅན་དག་པའི་འཁོར་རྣམས་ཀྱིས་ཞུས་ཏེ། རང་བཞིན་རྫོགས་པ་ཆེན་པོའི་རྒྱུད་སྡེ་ཐམས་ཅད་ཀྱི་སྙིང་པོའི་ཡང་བཅུད་བར་དོ་དྲུག་གི་ཁྲིད་དུ་བཏབ་སྟེ་གནང་ནས་དཔལ་དྭགས་ལྷ་སྒམ་པོའི་རི་ལྷ་བྲན་གར་བྱེད་པ་འདྲ་བར་གཏེར་དུ་སྦས་སོ། །ཕྱིས་སུ་དུས་རྟགས་རྟེན་འབྲེལ་མངོན་དུ་གྱུར་པའི་ཚེ་ཉི་ཟླ་སངས་རྒྱས་ཀྱི་སྲས་ཀརྨ་གླིང་པས་གཏེར་ནས་བཏོན་ཏེ། རང་གི་སྲས་ཉི་ཟླ་ཆོས་རྗེ་ལ་གནང༌། དེ་ཉི་ཟླ་འོད་ཟེར་ལ། དེས་རྒྱ་ར་བ་ནམ་མཁའ་ཆོས་ཀྱི་རྒྱ་མཚོ་ལ་གནང་བ་སྟེ་མི་རབས་གསུམ་གྱི་བར་ཆིག་བརྒྱུད་དུ་མཛད་ནས། རྒྱ་ར་བས་ཁྱབ་བརྡལ་དུ་སྤེལ་ཏེ་བསྟན་པ་བྱང་ནས་བྱང་དུ་རྒྱ་ཆེར་དར་ཞིང་ད་ལྟའི་བར་དུ་བཞུགས་པ་འདི་གཅིག་ནས་གཅིག་གམ་མོང་པོ་རུ་ཞལ་ནས་སྙན་དུ་བརྒྱུད་པས་ན་གང་ཟག་སྙན་བརྒྱུད་ཅེས་བྱའོ། །དེ་ལྟར་བྱུང་བའི་གདམས་པ་འདི་ནི་དུས་ཅི་ཙམ་སྙིགས་མར་གྱུར་པ་དེ་ཙམ་དུ་བྱིན་རླབས་ཀྱི་ཚན་ཁ་ཡང་ཆེས་ཆེ་བས་ན། སྙིགས་མའི་སྐྱེ་བོ་ཉོན་མོངས་པ་ཤེས་ཆེ་(རགས)ཞིང་སྡིག་སྒྲིབ་ཇི་ལྟར་ཆེ་བ་ཞིག་ཡིན་ནའང༌། གདམས་ངག་འདི་ལ་ཡིད་ཆེས་ཤིང་ཉམས་སུ་བླང་ན་ཚེ་གཅིག་ལ་སོགས་པ་ལ་གྲོལ་བར་འགྱུར་བས་འདི་ལྟ་བུའི་གདམས་པ་ཟབ་མོ་འདི་དང་འཕྲད་ནས་ཉམས་སུ་ལེན་དུ་ཡོད་པ་འདི་སྐལ་བ་བཟང་ངོ་སྙམ་དུ་སྙིང་ནས་དགའ་བ་བསྐྱེད་དེ་འདུག་(འཇུག)པར་བྱའོ། །དེ་ཇི་ལྟར་ཉམས་སུ་ལེན་པའི་ཚུལ་ལ་སྦྱོར་དངོས་རྗེས་གསུམ་ལས། དང་པོ་ལ་ཐུན་གྱི་སྔོན་འགྲོའི་དབང་དུ་བྱས་ན་གདམས་ཁྲིད་ཐོབ་པའི་གང་ཟག་དེས་མཚན་ཐུན་དང་པོ་ལ་དགེ་སྦྱོར་དང་ཉམས་ལེན་ལ་བརྩོན་ནས། མཚན་ཐུན་བར་མ་ལ་ཉལ་བའི་ཚེ་ན་རིག་པ་སྐུ་གསུམ་གྱི་བཞུགས་གནས་སྙིང་པདྨ་འདབ་བཞིའི་དབུས་སུ་མཆོག་གསུམ་རྩ་བ་གསུམ་དང་ཆོས་སྐྱོང་སྲུང་མ་ཐམས་ཅད་འདུས་པའི་ངོ་བོ་གུ་རུ་མཚོ་སྐྱེས་རྡོ་རྗེ་ཚོན་གང་བ་ཞིག་བཞུགས་པའི་སྐུའི་འོད་ཟེར་གྱིས་རང་གི་ལུས་རྡོས་བཅས་ཤ་ཁྲག་གི་ཕུང་པོ་འདི་སྦྱངས་ནས་འོད་ཀྱི་རང་བཞིན་དང༌། ཕྱི་ནང་སྣོད་བཅུད་ཀྱི་སྣང་བ་ཐམས་ཅད་ཀྱང་སྦྱངས་ནས་འོད་གསལ་གྱི་ངོ་བོར་ཚུར་ཐུམ་སྟེ་རང་སེམས་རིག་པའི་ངོ་བོ་གསལ་ལམ་མེ་བླ་མའི་སྐུ་དང་རང་སེམས་དབྱེར་མེད་དུ་བསམ་ནས་མོས་གུས་དང་མ་བྲལ་བར་ཉལ་བས་གཉིད་དུ་འགྲོ་ཁར་པདྨ་ཁ་ཟུམ་པར་བསམ་ནས་མ་ཡེངས་པར་གཉིད་འོད་གསལ་དུ་སྦ། ནམ་སད་སད་་དུ་སྔར་གྱི་རྒྱུན་བསྐྱངས་ཏེ་མོས་གུས་དུང་དུང་བ་རེ་བྱ། དེ་ནས་མཚན་ཐུན་ཐ་མ་ཐོ་རེངས་ཀྱི་དུས་སུ་ནམ་མཁའི་དབྱིངས་ནས་དཔའ་བོ་མཁའ་འགྲོ་མ་མང་པོས་ཌཱའ་མ་རུ་དང་དྲིལ་བུའི་སྒྲས་བསྐུལ་ནས་གཉིད་སད་པར་བསམ་སྟེ། དེ་མ་ཐག་གཉིད་ཀྱི་བདེ་བ་ལ་མི་ཞེན་པར་མལ་ནས་ཧར་གྱིས་ལང་སྟེ་གཉིད་ད་རུང་ཅུང་ཟད་མ་སངས་བར་ཡོད་ན་ཕན་ཚུན་འགྲོ་བ་དང༌། ཕྱིར་འགྲོ་བ་དང༌། མལ་སའི་ནང་ནས་གཞན་དུ་འདུག་པ་སོགས་བྱ། གང་ལྟར་ཡང་ཐོག་མར་ལུས་ཀྱི་སྔོན་འགྲོ་རྣམ་སྣང་ཆོས་བདུན་སོགས་འདུག་ཚུལ་ལེགས་པར་བྱ། ལག་གཉིས་པུས་མོར་བཀབ། ངག་གི་སྔོན་འགྲོ་རླུང་དགུ་ཕྲུགས་སུ་འབུད། ཡང་ན་རླུང་རོ་བསལ་བ་འོག་ཏུ་བྱ། སེམས་ཀྱི་སྔོན་འགྲོ་དབྱིངས་ན་བཞུགས་པའི་དཔའ་བོ་མཁའ་འགྲོ་རྣམས་ཀྱིས་དྲན་བསྐུལ་མཛད་པའི་རྐྱེན་གྱིས་རང་གིས་རང་ལ་བསྐུལ་མ་གདབ་སྟེ་དམ་བཅའ་ཞིང༌། ཀྱེ་མ་ཕ་པོ་དལ་འབྱོར་ཐོབ་ཅིང་དགེ་བ་ལ་བརྩོན་དུ་ཡོད་པའི་སྐལ་བ་དང་ལྡན་ཕྱིར་སྐལ་ལྡན་ཞེས་བོས་ཏེ། འཁོར་བ་ཐོག་མ་མེད་པ་ནས་ད་ལྟའི་བར་དུ་མ་རིག་གཏི་མུག་གི་གཉིད་ཀྱིས་ནོན་ཏེ་ལེ་ལོ་བག་མེད་ཀྱི་ངང་དུ་ཉལ་བས་ཡུན་དེ་ཙམ་སོང་བས་ཆོག་གི ། ད་ནི་གཏན་བདེ་སྒྲུབ་པའི་སྐལ་བ་ཡོད་པའི་གནས་སྐབས་འདིར་བག་མེད་སོས་དལ་དུ་སྡོད་པའི་ལོང་ཁོམ་མི་འདུག་སྒོ་གསུམ་འབད་པ་དྲག་པོས་སྙིང་པོའི་སྒྲུབ་པ་ལ་གཞོལ་བར་བྱ། དེ་ཡང་ཆོས་ཐམས་ཅད་རང་བཞིན་གྱིས་སྟོང་ཞིང་སྤྲོས་པ་དང་བྲལ་བ་ཡིན་པ་ལ་དེ་ལྟར་མ་རྟོགས་པའི་འགྲོ་བ་རྣམས་ཀྱི་འཁྲུལ་ངོར་སྤང་བྱ་འཁོར་བ་དང༌། ཐོབ་བྱ་མྱང་འདས་སུ་སྣང་བའི་ཆོས་ཐམས་ཅད་གཞི་མེད་རྩ་བ་དང་བྲལ་བཞིན་འཁྲུལ་བ་རྒྱུན་མ་ཆད་ཀྱི་བར་དུ་སྣང་བ་འདི་ནི་རྒྱུ་མ་དང་སྨིག་རྒྱུ་སོགས་དཔེ་བཅུའི་རང་བཞིན་དུ་ཤེས་པར་བྱ་ཞིང༌། གདོད་མའི་གནས་ལུགས་རང་བཞིན་རྫོགས་པ་ཆེན་པོའི་ལམ་གྱི་མན་ངག་ཟབ་མོས་བསྟན་བྱ་ནི། ཆོས་ཀུན་གྱི་གནས་ལུགས་རིག་པ་སྐུ་གསུམ་གྱི་བདག་ཉིད་ཅན་དུ་བཞུགས་པ་འདི་ཡི་ངོ་བོ་སྐྱེ་གནས་འགགས་པ་འགྲོ་འོང་དམིགས་པ་སྟེ་རྣམ་པ་ལྔ་དང་བྲལ་བའི་སྟོང་པ་ཉིད་ལ། རང་གདངས་འགགས་མེད་དུ་གསལ་ཡང་བླང་དོར་གྱི་དངོས་པོའི་མཚན་མ་གང་ཡང་མེད་ཅིང་རྩལ་སྣ་ཚོགས་སུ་འཆར་བ་འདི་ལ་ཡང་བློ་ཡིས་ཆེད་དུ་སྤང་བ་དང་སྒྲུབ་པའི་ཆོས་རང་མཚན་པ་ཞིག་བསམ་སྟེ་སྨོན་དུ་མེད་པས་བརྗོད་པ་དང་བྲལ་བའི་རྣམ་ཐར་སྒོ་གསུམ་གྱི་བདག་ཉིད་ཅན་འདི་རྟོགས་པར་བྱ་བའི་དུས་ལ་བབས་པས་ཅི་ནས་བརྩོན་པར་བྱའོ་སྙམ་དུ་བསམ་ནས། ཀྱེ་མ་ཀྱི་ཧུད་སྐལ་ལྡན་རིགས་ཀྱི་བུ། །ཞེས་པ་ནས། དོན་འདི་རྟོགས་པར་བྱ་བའི་དུས་ལ་བབས། །ཅེས་པའི་བར་ལན་གསུམ་སོགས་ཅི་ནུས་སུ་ཚིག་གི་རྗེས་སུ་དོན་དྲན་བཞིན་གདོན་པར་བྱའོ། །དེ་ནས་རླུང་རོ་སྔར་མ་བསལ་ན་འདིར་བྱ་སྟེ། གང་ལྟར་ཡང་དཔེར་ན་སྣོད་དུག་ཅན་ཞིག་གི་ནང་དུ་བཅུད་བཟང་པོ་བླུགས་དགོས་ན་ཐོག་མར་བཀྲུ་བཤལ་བྱེད་དགོས་པ་བཞིན་དུ་མ་དག་པའི་རྩ་ཁམས་རྣམས་ན་ལས་རླུང་དང་འགྲོགས་པའི་སྐྱོན་དུ་མས་གང་ནས་རང་རྒྱུད་ལ་ཡོན་ཏན་གང་ཡང་འབྱུང་དུ་མི་འཇུག་ཅིང༌། གལ་ཏེ་ཡོན་ཏན་ཅུང་ཟད་རེ་སྐྱེས་ན་དེ་སྐྱོན་ཅན་དུ་བྱེད་པས་ན་མཚན་ཉིད་ཐེག་པ་བས་ལས་རླུང་གིས་བསྐྱེད་ཟིན་པའི་གཟུང་འཛིན་གྱི་རྟོག་པ་དང་ཉོན་མོངས་ལ་དཔྱད་ཅིང་གཞིག་སྟེ་གཉེན་པོ་བསྟེན་པ་བས། འདིར་སྔགས་སུ་དེ་ཐམས་ཅད་ཀྱི་རྩ་བ་ལས་རླུང་ཉིད་དམིགས་གནད་དང་ལྡན་པས་བསལ་བ་ལ་སོགས་པ་ནི་དོན་ཆེའོ། ། དེའི་ཚུལ་ནི། ལུས་དྲང་པོར་བསྲང་སྟེ་སྣ་བུག་གཉིས་ནས་རླུང་ལྷག་མ་མ་ལུས་པ་དགུ་ཕྲུགས་སུ་འབུད་དེ། དང་པོ་གསུམ་གྱི་དུས་ཉོན་མོངས་པས་བསྐྱེད་པའི་བཞི་བརྒྱ་རྩ་བཞིའི་ནད་ཐམས་ཅད་རླངས་པ་སྔོ་དམར་གྱི་རྣམ་པས་ཕྱིར་སོང་སྟེ་སོར་བཅུ་དྲུག་གི་མཚམས་སུ་ཆོས་ཉིད་ཀྱི་དབྱིངས་སུ་ཐིམ་པར་བསམ། དེ་བཞིན་དུ་བར་བ་གསུམ་ལ་ཉོན་མོངས་པའི་དབང་གིས་སྣང་བའི་གདོན་བགེགས་དང༌། དམ་པའི་ཆོས་སྒྲུབ་པའི་བར་ཆད་ཐམས་ཅད་དང༌། ཐ་མ་ལ་སྔ་མའི་སྡིག་སྒྲིབ་ཀྱི་རྒྱུན་དང༌། ཕྱི་མར་བསྐྱེད་པའི་ནུས་པ་ཐམས་ཅད་ཕྱིར་སོང་བར་བསམ། དེ་ནས་མགོ་དང་ལག་པ་རྣམས་ལན་གསུམ་སྤྲུགས་ཏེ་ཧ་ཞེས་ནད་གདོན་སྡིག་སྒྲིབ་ཐམས་ཅད་དུད་སོལ་ཁུ་རླངས་ཀྱི་རྣམ་པ་དང༌། སྦལ་སྦྲུལ་ཉ་ལྕོང་ལ་སོགས་པའི་རྣམ་པས་ཁ་སྣ་དང༌། ལག་སོར་གཉིས་ནས་ཕྱིར་ཐོན་ཏེ་སྔར་ལྟར་མེད་པར་བསམ་མོ། །དེ་ནས་དད་པ་མོས་གུས་དྲག་པོས་བསྐུལ་ཏེ་སྙིང་གི་པདྨོ་ཁ་བྱེ་ནས་རྩ་གསུམ་ཀུན་འདུས་ཀྱི་ངོ་བོ་དྲིན་ཆེན་རྩ་བའི་བླ་མ་དེ་ཉིད་རྩ་དབུ་མའི་ལམ་བརྒྱུད་དེ་ཡར་བྱོན་ནས་སྤྱི་བོའི་སྟེང་གི་ནམ་མཁར་པདྨ་དང་ཉི་ཟླའི་གདན་ལ་སྐུ་འོད་ཟེར་གྱི་ཕུང་པོར་འབར་ཞིང་ཐུགས་བརྩེ་བ་ཆེན་པོས་དགོངས་ཏེ་ཡེ་རེ་འཁྱིལ་ལེ་དགྱེས་བཞིན་ཡོད་པར་བསམ་ལ། དེ་ཡང་ཡི་དམ་རྒྱུད་སྡེ་དྲུག་གི་ལྷ་ཚོགས་དང༌། གནས་གསུམ་གྱི་དཔའ་བོ་མཁའ་འགྲོ་ཇི་སྙེད་པ་ཐམས་ཅད་འདུས་པའི་བདག་ཉིད་ཅན་ཡིན་པར་མ་ཟད། འཕགས་ཡུལ་གྱི་པཎ་གྲུབ་ཐམས་ཅད་དང༌། བོད་ཀྱི་དགེ་ལྡན་པའི་ར་ྗེཡབ་སྲས་སོགས། ས་སྐྱའི་གོང་མ་རྣམ་ལྔ། བཀའ་བརྒྱུད་པའི་མར་མི་དྭགས་གསུམ་སོགས་གསར་རྙིང་གི་བླ་མ་ཐམས་ཅད་ཀྱང་གདུལ་བྱའི་དབང་གིས་སྣང་ཚུལ་ཐ་དད་ཙམ་ལས་དགོངས་པ་ཆོས་ཉིད་ཀྱི་ཀློང་ན་ཐ་དད་མེད་པས་ན། བདེ་གཤེགས་གཅིག་བསྒོམ་ཀུན་གྱི་ངང༌། །ཞེས་པ་ལྟར་ཨོ་རྒྱན་ཆེན་པོ་ལ་གསོལ་བ་བཏབ་ན་དེ་ཐམས་ཅད་ཀྱི་ཐུགས་རྗེ་བྱིན་རླབས་ཀུན་འཇུག་པས་ངེས་ཤེས་བསྐྱེད་དེ་དད་པ་དང་མོས་གུས་དྲག་པོས་གསོལ་བ་འདེབས་པ་ནི། བདག་དང་འགྲོ་བ་ཐམས་ཅད་འཁོར་བ་ཐོག་མ་མེད་པ་ནས་ད་ལྟའི་བར་དུ་འཁྲུལ་བའི་རྟོག་པ་སྣ་ཚོགས་ལུ་གུ་རྒྱུད་དུ་བར་མ་ཆད་པ་འདི་ལ་ཞེན་ནས་འཁོར་བའི་གནས་འདི་ལས་མ་ཐར་པས་གུ་རུ་རིན་པོ་ཆེ་ཁྱེད་ཀྱི་ཐུགས་རྗེས་བདག་སོགས་སེམས་ཅན་རྣམས་ཀྱི་འཁྲུལ་རྟོག་ཐམས་ཅད་རྒྱུན་ཆད་པ་ཞིག་བྱིན་གྱིས་རླབས་པར་མཛད་དུ་གསོལ། ཁྱད་པར་དུ་ཡང་ཆགས་སྡང་རྨོངས་གསུམ་གྱི་རྟོག་ངན་དང༌། འཇིག་རྟེན་འདིར་སྣང་གི་ཞེན་པ་ཆོད་པ་དང༌། སྔོན་འགྲོའི་ཉམས་ལེན་འཁོར་བ་སྡུག་བསྔལ་གྱི་རང་བཞིན་དུ་ཤེས། དལ་འབྱོར་རྙེད་དཀའ་དྲན། ལོང་མེད་རྒྱུད་ལ་སྐྱེ་བ་ཞིག་བྱིན་གྱིས་རླབས་པར་མཛད་དུ་གསོལ་སྙམ་དུ། ན་མོ་གུ་རུ་བྷྱ༔ སོགས་ལན་གསུམ། ཡང་མོས་གུས་གདུང་ཤུགས་དྲག་པོས་འདི་ལྟར། དཀོན་མཆོག་གསུམ་ལ་ཡིད་ཆེས་ཀྱི་དད་པ་ཐོབ་ནས་སྐྱབས་འོག་ཏུ་ཚུད། གཞན་ཕན་དོན་གཉེར་གྱི་བློ་འབྱོར། བསོད་ནམས་ཀྱི་ཚོགས་རྫོགས། ཉམས་ཆགས་སྡིག་སྒྲིབ་ཐམས་ཅད་ལྷག་མེད་དུ་དག །བརྒྱུད་ལྡན་བླ་མ་དམ་པའི་ཐུགས་རྒྱུད་རྟོགས་པའི་ཡོན་ཏན་ཐམས་ཅད་དུས་ད་ལྟ་ཉིད་དུ་རྒྱུད་ལ་འཕོ་བ་ཞིག་བྱིན་གྱིས་རླབས་པར་མཛད་དུ་གསོལ་སྙམ་སྟེ། ན་མོ་སོགས་གསུམ། ཡིད་མོས་གུས་གདུང་ཤུགས་དྲག་པོ་བསྐྱེད་དེ། འདི་ལྟར་དངོས་གཞི་བར་དོ་དྲུག་གི་ཉམས་ལེན་རང་བཞིན་སྐྱེ་གནས་ཀྱི་བར་དོར་ཞི་གནས་ལ་བརྟན་པ་ཐོབ་ཅིང་རིག་པ་ངོ་འཕྲོད་པ་དང༌། རྨི་ལམ་བར་དོའི་ཉམས་ལེན་ཆོས་ཐམས་ཅད་མེད་བཞིན་སྣང་བ་སྒྱུ་མའི་དཔེ་བཅུའི་ཚུལ་དུ་ཤེས་ནས་དག་པ་ལྷའི་རང་བཞིན་དུ་འཆར་བའི་སྒྱུ་ལུས་འབྱོངས་ཞིང་རྨི་ལམ་ཟིན་ནས་སྤྲུལ་བསྒྱུར་ནུས་པ་དང༌། སྲོག་རྩོལ་གྱི་གནད་གཟིར་བ་སོགས་ཀྱིས་གེགས་ཐམས་ཅད་བསལ་ཏེ་འོད་གསལ་དུ་འཇུག་ནུས་པ་དང༌། བསམ་གཏན་བར་དོའི་ཉམས་ལེན་གྲོལ་ཚུལ་གྱི་གདེངས་བཞི་ལ་རང་བྱན་ཚུད་ནས་གང་ཤར་ཆོས་སྐུའི་ཡོ་ལངས་སུ་འགྱུར་བ་དང༌། འཆི་ཁ་བར་དོའི་ཉམས་ལེན་འཕོ་བ་གསུམ་གྱི་མན་ངག་ལས་སུ་རུང་སྟེ་སྐུ་གསུམ་དག་པའི་ཞིང་དུ་འཕོ་ནུས་པ་དང༌། ཆོས་ཉིད་བར་དོའི་ཉམས་ལེན་དབྱིངས་དང་རིག་པའི་ཡེ་གདངས་སྐུ་གསུམ་ལམ་སྣང་དུ་རྩལ་རྫོགས་པ་དང༌། གལ་ཏེ་དེར་མ་གྲོལ་ན་སྲིད་པ་བར་དོའི་འཁྲུལ་སྣང་རང་ངོ་ཤེས་ཏེ་བླ་མའི་མན་ངག་གི་གནད་བཟང་པོ་དྲན་ནས་དག་པའི་ཞིང་སོགས་སུ་དབུགས་དབྱུང་བ་ཞིག་བྱིན་གྱིས་བརླབ་པར་མཛད་དུ་གསོལ་སྙམ་པའི་སྒོ་ནས། ན་མོ་གུ་རུ་སོགས་ལན་གསུམ་བརྗོད་པར་བྱའོ། །དེ་ནས་སྤྱི་བོའི་བླ་མ་ཨོ་རྒྱན་ཆེན་པོ་དགྱེས་པ་ཆེན་པོས་འོད་དུ་ཞུ་ནས་རང་ལ་ཐིམ། རྒྱུད་བྱིན་གྱིས་རླབས་པར་བསམ་ཞིང་ཅུང་ཟད་ངལ་གསོ། །༈ དེ་ནས་ཁྲིད་ཀྱི་སྔོན་འགྲོ་ལ། རང་རྒྱུད་འདུལ་བའི་སྔོན་འགྲོ། རང་རྒྱུད་སྦྱོང་བའི་སྔོན་འགྲོ་གཉིས་ལས། དང་པོའི་སྐབས་སུ་ཀུན་སློང་དང༌། ཀུན་སྤྱོད་ཀྱི་རིམ་པ་རྣམས་འཆད་དེ་ཐུན་འོག་མ་ཐམས་ཅད་ལ་འགྲེའོ། །དེ་ཡང་ཐོག་མར་ཀུན་སློང་རྣམ་པར་དག་པ་ཞིག་མེད་ན་ཆོས་དེ་ཡང་རྣམ་དག་ཞིག་མི་འོང་བས་ཆོས་ཉན་དུས་སྒྲུབ་དུས་ནམ་ཡིན་ཀྱང་བློ་ཁ་ནང་དུ་ལོག་ནས་རང་སེམས་ལ་བསྐོར་བ་རེ་བྱས་ཏེ་ངས་ད་རེས་ཉན་རྒྱུ་བསྒྲུབ་རྒྱུ་འདི་ཚོ་ཇི་ཞིག་གི་དོན་དུ་བསམ་གྱིན་འདུག་སྙམ་དུ་བསམས་ནས། ཆགས་སྡང་རྨོངས་གསུམ་གྱི་རྟོག་ངན་ཐམས་ཅད་རྒྱུན་བཅད། དེ་སྔ་ཡན་ཆད་འཇིག་རྟེན་ཚེ་འདིའི་བྱ་བ་ཁོ་ན་ལ་བློ་རྩེ་གཏོད་པ་རེ་ངན། འཇིག་རྟེན་གྱི་བྱ་བ་ཇི་ལྟར་སྒྲུབ་ཀྱང་གཅིག་རྗེས་སུ་གཅིག་འོང་བ་ལས་ཟིན་པའི་དུས་མེད་པས་སྐྱེ་བོ་ཕལ་བ་ཐམས་ཅད་དེ་ཁོ་ནའི་ངང་དུ་འཆི་བ་ལ་ཐུག་པ་དེ་ཚོ་སྙིང་རེ་རྗེ། འཇིག་རྟེན་གྱི་བྱ་བ་ནི་ནམ་བཞག་ན་ཟིན་པ་ཡིན་པས་ད་ནི་དགྲ་འདུལ་གཉེན་སྐྱོང་ཚོང་ཁེ་སྐྱེད་གྱོད་ནོག་མཁོན་དཀོར་ཁ་གྲོང་ཆོག་ཁོ་ནས་དུས་འདའ་བ་འདི་ཐམས་ཅད་ཆེ་བཞག་ཆུང་བསྐྱུར་བྱས་ཏེ་དུས་དེ་རིང་ནས་བཟུང་སྟེ་བློ་ཕ་ལ་མི་འདྲི། གྲོས་མ་ལ་མི་བྱེད། རང་ཐག་རང་གིས་བཅད་ནས་བླ་མའི་བཀའ་བཞིན་ཉན་ཏེ། མ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་གདོད་མའི་མགོན་པོ་ཀུན་ཏུ་བཟང་པོའི་གོ་འཕང་ཚེ་འདི་ཉིད་ལ་བསྒྲུབ་ནས་རང་གཞན་གྱི་དོན་རྒྱ་ཆེན་པོ་བསྒྲུབ་པར་བྱ། དེའི་ཆེད་དུ་ལམ་ཟབ་མོ་འདི་ལྟ་བུ་མཉན་ནས་ལེ་ལོ་དང་སོས་དལ་ཚེ་འདིའི་རྣམ་པར་གཡེང་བ་ལ་སོགས་པའི་དབང་དུ་མི་གཏོང་བར་ཉམས་སུ་བླང་བར་བྱ་སྙམ་པ་ནི་བསམ་པ་རྒྱ་ཆ་ེབ་བྱང་ཆུབ་སེམས་ཀྱི་ཀུན་སློང་ཡིན། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ནི། གསང་སྔགས་ཀྱི་ཆོས་ཐམས་ཅད་ཀྱི་རྩ་བ་དག་སྣང་ཡིན་པས་དེ་ཅི་ནུས་སུ་བསྐྱེད་པ་གལ་ཆེ། དེ་ཡང་ཕྱི་སྣོད་འོག་མིན་གྱི་ཞིང་དང་གཞལ་ཡས། ནང་བཅུད་ལྷ་དང་ལྷ་མོ། ཆོས་འཆད་པ་པོའི་བླ་མ་དྲུག་པ་རྡོ་རྗེ་འཆང༌། རང་རེ་ཆོས་ཉན་པ་པོ་རྣམས་རྒྱལ་བ་ཞི་ཁྲོའི་ལྷ་ཚོགས། ཆོས་དེ་ཡང་རང་བཞིན་རྫོགས་པ་ཆེན་པོའི་ཆོས་འཁོར། དེ་ཐམས་ཅད་རང་བཞིན་འོད་གསལ་བའི་དགོངས་པ་འཕོ་འགྱུར་མེད་པའི་ངང་ན་དུས་གསུམ་འདུ་འབྲལ་མེད་པར་བཞུགས་པར་མོས་པ་སྟེ་ཕུན་སུམ་ཚོགས་པ་ལྔ་གསལ་བཏབ་ནས་མཉན་ནོ། །སྤྱིར་དུས་དང་རྣམ་པ་ཐམས་ཅད་དུ་གཞན་གྱི་སྐྱོན་ལ་མི་བརྟག་པར་ཡོན་ཏན་གྱི་ཆ་ཅི་ཡོད་པ་ལ་བསམ་ནས་ཐམས་ཅད་ལ་དག་སྣང་སྦྱང་དགོས། ཁྱད་པར་དུ་སྔགས་ཀྱི་སྐབས་སུ་ཆོས་ཐམས་ཅད་ཡེ་ནས་རྣམ་པར་དག་པ་ཡིན་པ་ལ་ངེས་ཤེས་བསྐྱེད་དགོས། དེ་ལྟར་བྱས་ན་དངོས་སུ་དག་པར་ཡང་སྣང་ཞིང་རང་བཞིན་དེ་ལྟར་ཡིན་པའི་ཚུལ་གང་ཟག་མཆོག་རྣམས་ཀྱི་གཟིགས་ངོར་སྣང་བ། སྔོན་བླ་མ་མཚམ་པས་དཔལ་དགེའི་མ་ཎི་ལ་ཁྲི་སྐོར་མཛད་དེ་མ་མོར་གྱེན་དུ་བྱོན་དུས་འོག་མིན་གྱི་ཞིང་དུ་གཟིགས་པ་དང༌། རྡོ་གྲུབ་རྒན་དང༌། རིག་འཛིན་ཆེན་མོ་སོགས་ཀྱིས་སེམས་ཅན་ཕལ་བ་རྣམས་ཀྱང་རྡོ་རྗེ་སེམས་དཔར་དངོས་སུ་གཟིགས་ནས་ཕྱག་འཚལ་དགོས་པའི་ཐུགས་འདུན་བྱུང་ཡང་འཇིག་རྟེན་པའི་ངོར་མི་མཛའ་དགོངས་ནས་དེ་ལྟར་མ་མཛད་གསུངས་པ་ལ་སོགས་པ་ལྟ་བུའོ། །དེ་ལམ་གྱི་རྩ་བ་དམ་པ་གསུམ་ལས་སྦྱོར་བ་སེམས་བསྐྱེད་དམ་པའོ། །དངོས་གཞི་དམིགས་མེད་དམ་པ་ནི། ཆོས་ཐམས་ཅད་བདེན་པར་མ་གྲུབ་པ་སྒྱུ་མ་དང་རྨི་ལམ་ལྟ་བུའི་དྲན་འདུན་བཞག་སྟེ་གང་ལ་ཡང་མ་ཞེན་པར་བྱ་སྟེ། བྱང་ཆུབ་སེམས་དཔའ་རྣམས་ཀྱིས་ཆོས་ཉན་པ་དང༌། དགེ་སྡིག་ལ་བླང་དོར་བྱེད་པ་དང༌། ཞི་ལྷག་བསྒོམ་པ་སོགས་ཅི་བྱེད་ཀྱང་ལམ་ལ་གོམས་ཆ་འགྲོ་བའི་ཕྱིར་མ་གཏོགས་དེའི་ཕན་ཡོན་དང་འབྲས་བུ་ལ་རེ་བ་མེད་པ་ཞིག་བྱ་དགོས། དེ་ཡང་དགེ་བའི་འབྲས་བུ་མཐོ་རིས་སུ་སྐྱེ། དགེ་སྡིག་གི་གཞི་སྟོང་ན་ཐར་པ་ཡིན་པས་དགེ་བ་གང་བསྒྲུབ་ལ་བདག་ཏུ་མི་འཛིན་ཞེན་པར་མི་བྱའོ། །རྗེས་སུ་གཞན་དོན་དུ་རྒྱལ་བ་སྲས་བཅས་ཀྱིས་ཇི་ལྟར་བསྔོས་པ་བཞིན་བསྔོ་བར་བྱ་བ་ནི་རྗེས་བསྔོ་བ་དམ་པའོ། །ཀུན་སྤྱོད་ཀྱི་རིམ་པ་ནི། སྤྱིར་ཐུབ་པའི་རྗེས་འཇུག་ཡིན་ཟེར་ནས་གོས་སྣེ་གསུམ་གྱོན་པ་ཞིག་ཡིན་ཕྱིན་ཆད་ཁྱིམ་གྱི་མགོ་འཛིན། བཤས་ཉོ་བཤས་ཚོང༌། དགྲ་འདུལ་གཉེན་སྐྱོང་གི་བྱ་བ་གྱོད་ནག་འཁོན་ཚོང་སོ་ནམ་སོགས་བྱེད་པ་དེ་ནི་ཤིན་ཏུ་ཐ་ཆད་དེ་བསྟན་པའི་བླ་བཙོང་དཀོན་མཆོག་གི་རྐང་འདྲེན་དེས་དད་ཟས་གཤིན་དཀོར་ཟོས་པ་ཐམས་ཅད་ཀྱང་རང་ཕུང་གཞན་བརླགས་ཀྱི་རྒྱུ་ཡིན་པས་འཇིག་རྟེན་ཕལ་པ་ལས་ཀྱང་དེས་ཐུའོ། །ཡང་དེ་ཙམ་མིན་ནའང༌། དང་པོ་ཆོས་བསྒྲུབ་འདོད་ཀྱི་འདུན་པས་མན་ངག་རེ་ཟུང་ཞུས། སྒྲུབ་པ་ཉམས་ལེན་ལའང་ཅུང་ཟད་བརྩོན་ནས་སྐྱོན་མེད་ལྟ་བུ་རེ་བྱུང་ཡང་ཆོས་བརྒྱད་བློས་མ་ཐོང༌། དཀོར་ཁ་གྲོང་ཆོག་ལ་གཡེང་ནས་མི་ཚེ་འདའ་བར་བྱས་ན་ལོ་ཏོག་སད་ཀྱིས་ཁྱེར་བ་བཞིན་འཆི་ཁ་ཆོས་མེད་དུ་འགྲོ་དགོས་པ་འབྱུང༌། དེ་བས་ན་དང་པོ་ཆོས་ལམ་ལ་ཞུགས་ནས་ཚེ་འདིའི་བྱ་བ་བློས་དོར་ནས་ཆོས་ཁོ་ན་ལ་བློ་རྩེ་གཏད་ནས་ཉིན་མཚན་དུ་གཉུག་བསྲིངས་ན་ཐུན་རེ་བཞིན་རང་རྒྱུད་ལ་ཡར་བསྐྱེད་ཐོན་པས་དེ་འདྲ་དེ་ལ་ཆོས་པ་སད་ཀྱིས་མ་ཁྱེར་བ་ཟེར། དེས་ན་ད་ནི་ཚེ་ལྷག་ཅི་ཙམ་ཡོད་པ་འདི་ལ་ཉིན་མཚན་ཀུན་ཏུ་འབད་པ་མ་བྱས་ན་བདག་གི་སྡུག་མཐའ་ནམ་ཞིག་ལ་ཆོད་པའི་དུས་འོང་ཏེ་མི་འོང་བས་འབད་པར་བྱའོ་སྙམ་དུ་སྙིང་ལ་དམ་བཅས་ཏེ་ཆོས་ཉན་དུས་སྒྲུབ་དུས། དུས་དང་རྣམ་པ་ཐམས་ཅད་དུ་སྤྱོད་ལམ་ཞི་དུལ་དྲན་ཤེས་བག་ཡོད་བརྟེན་ཏེ་ཆོས་ཞིག་ཉན་པའི་ཚེ་ནའང༌། སྣོད་ཀྱི་སྐྱོན་གསུམ། དྲི་མ་དྲུག །མི་འཛིན་པ་ལྔ་སོགས་སྤང༌། ཁྱད་པར་དུ་ཐོས་བསམ་ཅུང་ཟད་རེ་བྱས་ནས་རྟོག་གེ་བར་གྱུར་ཏེ། བླ་མས་མན་ངག་གི་གནད་གསང་ཇི་འདྲ་བ་ཞིག་གསུངས་ཀྱང་འདི་ཚོ་ངས་ཤེས། འདི་བས་ལྷག་ཞིག་ཀྱང་ངས་ཤེས། འདིས་གསུངས་རྒྱུ་འདི་ཚོ་ཕལ་ཆེར་ནོར་འདུག །འདི་ལྟར་རེད་སྙམ་དུ་རང་རྒྱུད་ང་རྒྱལ་གྱིས་སྦོས། གཞན་གྱི་སྐྱོན་ལ་རྟོག །བཤད་ཚད་འགལ་འདུར་གོ་བ་དེ་ཆོས་ཤེས་པ་རང་རྒྱུད་ལ་མ་སྦྱར་བས་ཆོས་དྲེད་དམ་ཉམས་རྒྱུད་གསོར་མི་རུང་བར་སོང་བས་དེ་ཚོ་བས་བླུན་པོ་སྡིག་ཅན་ཞིག་ཡིན་ཀྱང་དད་མོས་ཡོད་པའི་སྐྱེ་བོ་ཕལ་པ་དེ་ཚོས་དགའ་སྟེ། སྡིག་ཅན་ཆོས་ཀྱིས་ཐུལ་ཀྱང༌། །ཆོས་དྲེད་ཆོས་ཀྱིས་མི་ཐུལ་ཟེར་བ་ལྟར་རོ། །དེ་ལྟ་བུའི་ཆོས་ཉན་ཚུལ་དང་སྒྲུབ་ཚུལ་ནི་གལ་ཆེ་སྟེ། གནད་དུ་མ་སོང་བའི་ཆོས་ཤིག་ཡུན་རིང་པོར་བསྒྲུབ་པ་བས། གནད་ཤེས་པའི་ཆོས་ཅུང་ཟད་ཅིག་གིས་དགའ་སྟེ། དཔེར་ན་གནད་ལ་ཕོག་ན་མྱུར་དུ་སྲོག་འགག་པ་ལྟར་བླ་མའི་མན་ངག་གིས་གནད་ཁྱད་པར་ཅན་གྱིས་ཟིན་ན་ཐོག་མེད་ནས་གོམས་པའི་འཁྲུལ་རྟོག་འདི་ཡང་མྱུར་དུ་འགག་པ་ལ་ཚེགས་མེད་པ་ཞིག་འོང་བས། ཆོས་སྒྲུབ་སྔ་བྱེད་པ་ལས་སྒྲུབ་ཚུལ་ཤེས་པ་གལ་ཆེའོ། །ཡང་འདུ་ཤེས་བཞི་ཡང་བསྟེན་པར་བྱ་སྟེ། རང་ཐོག་མེད་ནས་ཉོན་མོངས་པའི་གཞན་དབང་དུ་གྱུར་ཏེ་སྡུག་བསྔལ་གྱིས་གཟིར་བའི་ནད་པ་ལྟ་བུ་འདི་ལ་བླ་མ་སྨན་པ་མཁས་པ་ལྟ་བུ་བླ་མས་རང་བློ་དང་འཚམས་པའི་གདམས་ངག་ནད་བརྒྱ་སྨན་གཅིག་ལྟ་བུ་བསྟན་པ་འདི་ཉམས་སུ་བླངས་ཏེ་ཉིན་རེ་བཞིན་ཉོན་མོངས་པའི་རྟོག་པ་ཇེ་ཞིར་འགྲོ་བ་ཞིག་བྱའོ་སྙམ་དུ་བསམ་པ་དང༌། ཕ་རོལ་ཏུ་ཕྱིན་པ་དྲུག་དང་ཡང་ལྡན་པར་བྱའོ། །དེ་ལྟར་མིན་པར་ང་བླ་མ་འདིའི་མདུན་ནས་ཆོས་ཞིག་ཐོབ་ན་རྙེད་པ་འདི་ལྟ་བུ་ཨེ་ལོན། སྙན་པ་དང་གྲགས་པ་འདི་ལྟ་བུ་ཞིག་ཨེ་ཡོད་སྙམ་ནས་དམ་ཚིག་ལ་འདང་མི་རྒྱག །བླ་མ་ལ་དྲིན་དུ་མི་རྩི། མན་ངག་ཟོང་དུ་འཚོང་བའི་གང་ཟག་དེས་ནི་བླ་མའི་སྐུ་ཚེ་དང་མཛད་ཕྲིན་ལ་གནོད། རང་ཉིད་ཆོས་ལ་བརྟེན་ནས་ངན་སོང་དུ་འགྲོ་སྟེ། མཉམ་མེད་དྭགས་པོས། ཆོས་ཆོས་བཞིན་དུ་མ་སྒྲུབ་ན། །ཆོས་ཀྱིས་སླར་ངན་སོང་དུ་འགྲོ་བའི་རྒྱུ་བྱེད་ཅེས་གསུངས་པ་ལྟར་བླ་མ་ལ་གླ་བ། ཆོས་ལ་གླ་རྩིའི་འདུ་ཤེས་སོགས་ལོག་པའི་འདུ་ཤེས་བཞི་ལྡན་གྱི་སློབ་མ་ཞེས་བྱ་བས་དེ་ལ་མན་ངག་ཟབ་མོ་རྣམས་རླུང་ཕྱོགས་ཙམ་ཡང་སྟོན་མི་རུང་ངོ༌། །སྔོན་འགྲོ་དངོས་ལ། རང་རྒྱུད་འདུལ་བའི་སྔོན་འགྲོ་དང༌། རང་རྒྱུད་སྦྱོང་བའི་སྔོན་འགྲོ་གཉིས། དང་པོ་ལ་ཁྲིད་ཚུལ་གཞན་དུ་དལ་འབྱོར་རྙེད་དཀའ་སོགས་བློ་ལྡོག་རྣམ་པ་བཞི་གསུངས། འདིར་གསུམ་ལས་མེད་ཀྱང་འཁོར་བའི་སྡུག་བསྔལ་དྲན་པའི་ཞོར་ལ་ལས་འབྲས་ཀྱང་དྲན་པར་བྱ་སྟེ་ངན་སོང་གསུམ་སོགས་སྲིད་པའི་གནས་འདི་ན་སྡུག་བསྔལ་ཇི་སྙེད་ཡོད་པ་ཐམས་ཅད་མི་དགེ་བའི་དབང་ལས་ཡིན་པ་དང༌། མཐོ་རིས་སོགས་ན་གནས་སྐབས་བདེ་བ་ལྟར་སྣང་བ་ཇི་སྙེད་པ་དགེ་བ་ལས་བྱུང་བ་ཡིན་པར་ཤེས་ཤིང་དྲན་ནས་ཡིད་ཆེས་པར་འགྱུར་རོ། །དེས་ན་འདིར་ཐོག་མར་འཁོར་བའི་སྡུག་བསྔལ་བསམ་པའི་ཚུལ་གསུངས་པ་འདི་ཡང་ཡང་བསམ་སྟེ་རྒྱུད་ལ་འབྱོར་ངེས་པ་ཞིག་དགོས་ཏེ། བཅོམ་ལྡན་འདས་ཀྱིས་ཐོག་མར་ཆོས་འཁོར་དང་པོ་བསྐོར་ཚེ་ཀཽཎྜ་ཎྱ་འདི་ནི་སྡུག་བསྔལ་ལོ་ཞེས་པ་ལ་སོགས་པ་སྡུག་བསྔལ་གྱི་བདེན་པ་དང་པོ་གསུངས་པ་དེ་འཁོར་བ་སྡུག་བསྔལ་དུ་མ་ཤེས་ན་ཐར་ལམ་རྣམ་པར་དག་པ་ཞིག་རྒྱུད་ལ་མི་འབྱུང་བ་ལ་དགོངས་པའི་ཕྱིར་རོ། །སྔོན་དུས་བླ་མས་ཁྲིད་རྐང་རིམ་པ་བཞིན་བཏབ་སྟེ། སློབ་མས་ཀྱང་རིམ་བཞིན་བློ་སྦྱངས་ཏེ་སྔ་མ་འབྱོངས་དུས་ཕྱི་མ་ཕྱི་མ་ལ་རིམ་གྱིས་སློབ་པ་ཡིན་ཀྱང༌། དེང་སང་ཁྲིད་སྦྱོངས་བྱེད་པ་ཡིན་ཟེར་ནས་བློ་ལྡོག་རྣམ་པ་བཞི་ལ་འདང་ཙམ་ཡང་མི་རྒྱག་པར་འབུམ་ལྔ་བསོགས་པའི་ཁྲལ་ལས་ལྟ་བུ་མགོ་མེད་པའི་སྦྱང་པ་གནད་དུ་མ་སོང་བ་དེས་ཅི་ཡང་མི་ཕན། དཔེར་ན་བཟའ་བཏུང་སྣ་ཚོགས་པ་ཞིག་ཡོད་པ་ལ་རེ་རེ་བཞིན་མཛུབ་ལྡག་རེ་བྱས་ན་མངར་སྐྱུར་སོགས་རོ་ཅུང་ཟད་རེ་ཚོར་བ་ཙམ་ལས་ཁོང་དུ་སོང་སྟེ་ལྟོ་བ་ལ་ཕན་ཐོགས་པ་མེད་པ་ལྟར། ཆོས་སྣ་ཚོགས་ཞུས་ལོ་ཙམ་རེ་དང༌། འགའ་ཞིག་ལ་གཟུགས་བརྙན་ཙམ་གྱི་སྦྱངས་པ་ཅུང་ཟད་རེ་བྱས་པས་སེམས་ལ་ཅི་ཡང་མི་ཕན་ནོ། །དེས་ན་སྙིང་ནས་འཁོར་བའི་སྡུག་བསྔལ་ལ་སྐྱོ་ཤས་དང༌། འཇིག་རྟེན་འདིར་སྣང་གི་དངོས་པོ་ཐམས་ཅད་ལ་གཏིང་ནས་ཞེན་པ་ལོག་པ་ཞིག་མ་བྱུང་ན། ཆོས་ཅི་ཙམ་སྒྲུབ་ལོ་བྱས་ཀྱང་སྲིད་པའི་རྒྱུ་ལས་མི་འདའ་སྟེ། སྔོན་བྱོན་གྱི་སངས་རྒྱས་བྱང་སེམས། རྒྱ་བོད་ཀྱི་མཁས་གྲུབ་དགེ་བའི་བཤེས་གཉེན་ཇི་སྙེད་ཅིག་བྱུང་བ་དེ་ཐམས་ཅད་ཀྱི་ཐུགས་ཀྱིས་དོར་བ་མ་ཡིན་ཀྱང་རང་ཉིད་ལས་ངན་སྡིག་སྒྲིབ་ཆེ། ཉོན་མོངས་པའི་གཞན་དབང་ཁོ་ནར་སོང་ནས་བྲག་ཕུག་ཁ་བྱང་བསྟན་གྱི་ནང་དུ་ཉི་མ་མི་འཆར་བ་ལྟར། དད་པ་མེད། མོས་གུས་ཞན། བརྩོན་པ་ལྷོད་པའི་དབང་གིས་ཆོས་ཀྱི་ལམ་སྲོལ་དུ་མ་ཚུད་པར་ད་བར་དུ་ལུས་པ་ཡིན། ད་དུང་ཡང་ཚེ་འདི་བློས་མ་ཐོང་བར་སྙིང་པོ་ཅན་དུ་རློམ་ནས་འབད་པར་བྱས་ཀྱང༌། དཔེར་ན་སེར་བའི་རིལ་བུ་ཞིག་ནོར་བུ་རིན་པོ་ཆེ་ཡིན་པར་རློམ་ནས་ཆང་པའི་ནང་ནས་བཏང་མི་བྲ་བར་བཟུང་ན་ཆུ་ཐིགས་པ་ཞིག་ལས་ཅི་ཡང་མེད་པ་བཞིན་ཟས་གོས་རྙེད་བཀུར་སྙན་གྲགས་སྟོབས་འབྱོར་སོགས་ཅི་ལ་ཞེན་ཀྱང་སྙིང་པོ་མེད་པར་མ་ཟད་འཆི་ཁར་སྡུག་བསྔལ་གྱི་སྣོན་མར་འགྱུར་བའི་ཚུལ་ལ་བསམ་གཞིག་ལེགས་པར་བཏང༌། སྔོན་བྱོན་གྱི་དམ་པ་ཐམས་ཅད་ཀྱིས་ཀྱང་འཁོར་བ་སྡུག་བསྔལ་དུ་ཤེས་ཤིང་འཇིག་རྟེན་གྱི་བྱ་བ་ཐམས་ཅད་རྒྱབ་ཏུ་བོར་ནས་མི་མེད་དབེན་པའི་རི་ཁྲོད་དུ་སྙིང་པོ་སྒྲུབ་པ་ལ་བརྩོན་ནས་གྲུབ་པ་ཐོབ་པ་ཤ་སྟག་ཡིན་མ་གཏོགས། ཆོས་དང་འཇིག་རྟེན་མཉམ་དུ་སྒྲུབ་ནུས་པ་སུ་ཡང་མ་བྱུང་བས་རང་ཉིད་ཀྱང་དེ་རྣམས་ཀྱི་མཛད་སྤྱོད་རྣམ་ཐར་གྱི་རྗེས་སུ་སློབ་པར་བྱས་ནས་འཁོར་བ་ལ་བློ་ལྡོག་ངེས་པ་ཞིག་བྱ་དགོས་སྙམ་དུ་ཁྲིད་ཡིག་གི་ནང་ལྟར་འཁོར་བའི་སྡུག་བསྔལ། དལ་འབྱོར་རྙེད་དཀའ། ཚེ་མི་རྟག་པ་རྣམས་བསྒོམ་པར་བྱའོ། །དེ་ཡང་འཁོར་བ་སྡུག་བསྔལ་དུ་བསམ་པའི་སྐབས་སུ་འཁོར་བའི་བདེ་སྡུག་གི་རྒྱུ་ལས་འབྲས་ལ་ཡིད་ཆེས་དང༌། སྡུག་བསྔལ་དང་ལྡན་པའི་སེམས་ཅན་གཞན་ལ་སྙིང་རྗེ་དང༌། འཁོར་བ་ལས་སྐྱོབ་ནུས་པའི་དཀོན་མཆོག་ལ་དད་པ་དང༌། བདེ་སྡུག་གཏོང་ལེན་བྱེད་པ་སོགས་ཆུན་གཅིག་ཏུ་བསྒོམ་པ་མན་ངག་ཡིན་གསུངས། དལ་འབྱོར་རྙེད་དཀའི་སྐབས་སུ་དལ་ཁོམ་རེས་འགའི་ཆོས་ཙམ་གྱིས་མི་འོང་དབུལ་པོས་ཡིད་བཞིན་ནོར་བུ་རྙེད་པ་ལྟར་སྙིང་ཐག་པ་ནས་རྙེད་དཀའ་ཞིང་དོན་ཆེ་བའི་ཚུལ་ལ་བསམ་ནས་ཉི་མ་གཅིག་གམ་ཆུ་ཚོད་གཅིག་ཙམ་ཡང་སྟོང་ཟད་དུ་མ་སོང་བར་མི་ཡི་ལུས་ལ་སྙིང་པོ་ལོན་པ་ཞིག་དགོས་སྙམ་པའི་བསམ་པ་དུང་ངེ་བ་ཞིག་ཡོད་དགོས་པ་མ་གཏོགས། སྐོར་རེ་སྐོར་གཉིས་ཙམ་ལ་བསྒོམས་པས་གར་ཡང་མི་ཕྱིན་གསུངས། ཚེ་མི་རྟག་པའི་སྐབས་སུའང༌། རྟག་ཏུ་འཆི་བ་དྲན་ཞིང་ཟ་ཉལ་འགྲོ་འདུག་སྨྲ་བརྗོད་སོགས་ཅི་བྱེད་ནའང་འདི་ནི་སྤྱོད་ལམ་འདིའི་ཐ་མའོ་སྙམ་དུ་སྒོ་གསུམ་གྱི་བྱ་སྤྱོད་ཐ་མལ་དུ་མ་སོང་བ་ཞིག་ཨེ་ཐོན་བལྟ་དགོས། དེ་ལྟར་འོང་ན་དམ་པའི་ལྷ་ཆོས་ཐམས་ཅད་ཤུགས་གྱིས་འགྲུབ་པ་ལ་ཚེགས་མེད་པས་ནང་པ་སངས་རྒྱས་པའི་སྒོམ་ཐམས་ཅད་ཀྱི་ནང་ན་འདི་ལས་གལ་ཆེ་བ་མེད། འཆི་བ་མ་དྲན་པའི་ཆོས་དེ་ལྟར་སྣང་ལ་ཇི་ལྟར་བཟང་ཡང་ཚེ་འདིར་ཤོར་བས་ཆོས་གོ་མི་ཆོད་གསུངས། དེ་ལྟར་བློ་སྦྱོང་རྣམ་པ་གསུམ་གྱིས་རང་རྒྱུད་འདུལ་བ་དེ་ནི་ཐོག་མར་གཅེས་ཏེ། དཔེར་ན་ཀོ་བ་གྱོང་པོ་ས་སྦང་མ་བྱས་ན་སྣུམ་གྱིས་མི་འདུལ་བ་དང༌། ཞིང་ས་ཐ་རྒོད་གཤོལ་གྱིས་མ་རྨོས་ན་ལོ་ཏོག་མི་སྐྱེ་བ་བཞིན། ཐོག་མེད་ནས་གོམས་པའི་ཀུན་རྟོག་ངན་པས་སེམས་རྒྱུད་གྱོང་པོར་སོང་བ་འདི་མ་དུལ་ན་སྐྱབས་སེམས་ནས་དངོས་གཞིའི་བར་གྱི་ཉམས་རྟོགས་ཀྱི་ཡོན་ཏན་རྣལ་མ་ཞིག་འབྱུང་མི་སྲིད་པས་འབུམ་ལྔ་བསོགས་པ་དང༌། དངོས་གཞིའི་ཉམས་ལེན་ལ་འཇུག་སྔ་མི་བྱེད་པར་བློ་སྦྱོང་འདི་རྣམས་རྒྱུད་ལ་འདྲོངས་ངེས་བྱེད་པ་གལ་ཆེའོ། །དེ་ལྟར་ཁྲིད་གཞུང་ལྟར་བློ་སྦྱོང་བའི་ཚེ་དྲན་བསྐུལ་གྱི་ཚིག་ངག་ཏུ་བརྗོད་པར་གསུངས་པ་རྣམས་སྨྲེ་སྔགས་གིས་དལ་བུས་ཚིག་སྣ་ཅུང་ཟད་རིང་བ་རྣམས་ཀྱང་དུམ་བུར་བཅད་དེ་ལན་མང་དུ་བརྗོད། དེ་ཐམས་ཅད་ཀྱི་རྗེས་སུ་དེ་དག་གི་དོན་དྲན་བཞིན་གཞན་ལ་སྙིང་རྗེའ་ིབློ་བསྐྱེད་དེ། ཀྱེ་མ་ཀྱེ་མ་མི་རྟག་སོགས་ནས། ད་ལྟ་ཉིད་དུ་ཐར་པར་བྱིན་གྱིས་རློབས། །ཞེས་པའི་བར་ལན་གསུམ་སོགས་དང༌། ཀྱེ་མ་ཀྱི་ཧུད་དཀོན་མཆོག་སོགས་ལན་གསུམ་ལ་སོགས་པ་གདོན་པར་བྱའོ། །༈ གཉིས་པ་རང་རྒྱུད་སྦྱང་བའི་སྔོན་འགྲོ། དཔེར་ན་ཀོ་བ་བརླན་པར་བྱས་པ་སྣུམ་གྱིས་མཉེ་བ་དང༌། ཞིང་ས་གཤིན་པོ་ལ་ས་བོན་བཏབ་ནས་ཆུ་ལུད་བཀྲམ་པ་བཞིན། ལམ་ལོག་པ་ལས་སྐྱོབ་པའི་ཕྱིར་དཀོན་མཆོག་གསུམ་ལ་སྐྱབས་སུ་འགྲོ་བ་དང༌། ལམ་དམན་པ་ལས་སྐྱོབ་པའི་ཕྱིར་བྱང་ཆུབ་མཆོག་ཏུ་སེམས་བསྐྱེད་པ་དང༌། སྡིག་སྒྲིབ་ཉམས་ཆགས་ཐམས་ཅད་དག་པའི་ཕྱིར་བླ་མ་རྡོ་རྗེ་སེམས་དཔའི་བསྒོམ་བཟླས་བྱ་བ་དང༌། བསོད་ནམས་ཀྱི་ཚོགས་རྫོགས་པའི་ཕྱིར་མཎྜལ་འབུལ་བ་དང༌། བྱིན་རླབས་བཙན་ཐབས་སུ་རྒྱུད་ལ་སྐྱེ་བའི་ཕྱིར་བླ་མའི་རྣལ་འབྱོར་བསྒོམས་པ་རྣམས་ལས། དང་པོ་ནི་རྣམ་པར་གྲོལ་བའི་ཆོས་ཐམས་ཅད་ཀྱི་སྒོ་འབྱེད་པ་དང༌། སྡོམ་པ་ཐམས་ཅད་ཀྱི་རྟེན་གཞིར་གྱུར་པ་སྐྱབས་འགྲོ་ཡིན་ཞིང༌། སྐྱབས་འགྲོའི་སྒོ་འབྱེད་པ་ནི་དད་པ་ཡིན་ལ། དེ་ཡང་ཐོག་མར་དཀོན་མཆོག་གསུམ་གྱི་མཚན་དང་ཆེ་བའི་ཡོན་ཏན་ཐོས་པ་དང༌། དཀོན་མཆོག་གི་རྟེན་མཐོང་བ་དང༌། ཡིད་ལ་དྲན་པ་ཙམ་གྱི་མོད་ལ་སྙིང་ནས་དགའ་ཞིང་སྤྲོ་བའི་སེམས་ཀྱིས་ལུས་བ་སྤུ་གཟེང༌། མིག་མཆི་མ་འཁྲུགས་པ་ཞིག་བྱུང་ན་དྭངས་པའི་དད་པ་ཞེས་བྱ། དེ་ནས་མཆོག་གསུམ་གྱི་ཡོན་ཏན་དེ་ལྟ་བུ་རང་གཞན་གྱི་རྒྱུད་ལ་སྒྲུབ་འདོད་ཀྱི་དོན་གཉེར་བཀྲེས་པ་ཟས་དང་སྐོམ་པ་ཆུར་གདུང་བ་ལྟ་བུ་བྱུང་ན་འདོད་པའི་དད་པ་ཡིན། དེ་ནས་ཕྱི་རོལ་པའི་དྲང་སྲོང༌། འཇིག་རྟེན་པའི་ལྷ་ཀླུ་མཐུ་བོ་ཆེ། མི་དཔོན་ཆེ་གྲག་སུས་ཀྱང་སྐྱོབ་མི་ནུས་པའི་ལམ་ལོག་པ་འཁོར་བའི་འཁྲུལ་སྣང་འདི་ལས་ངེས་པར་སྐྱོབ་ནུས་པ་ནི་དཀོན་མཆོག་གསུམ་ཁོ་ནའོ་སྙམ་དུ་སྙིང་ནས་ཡིད་ཆེས་ཏེ་རང་གི་སྲོག་ལ་བབས་ཀྱང་དཀོན་མཆོག་གསུམ་སྐྱབས་སུ་བསྟེན་པ་འདི་ལས་བློ་ལྡོག་པར་མི་བྱའོ་སྙམ་པ་ཞིག་བྱུང་ན་ཡིད་ཆེས་པའི་དད་པ་ཞེས་བྱ། དེ་ལྟ་བུའི་དད་པ་ཞིག་རྒྱུད་ལ་བྱུང་ན་མཆོག་གསུམ་གྱི་སྐྱབས་འོག་ཏུ་ཚུད་ཀྱི། རང་ལ་དད་པ་མེད་ན་དཀོན་མཆོག་གི་བྱིན་རླབས་འཇུག་མི་ནུས་ཏེ། དཔལ་སྤྲུལ་རིན་པོ་ཆེ་ལ་འགའ་ཞིག་གིས་སྐྱབས་འཇུག་ཞུས་ཚེ། སྐྱ་འཛུག་སྔོ་འཛུག་ཚོ་ངས་ཀྱང་མི་ཤེས། རང་རང་གི་དཀོན་མཆོག་གསུམ་ལ་ཡིད་ཆེས་ཤེས་ཀྱི་དད་པ་ཞིག་མེད་ན། ལུག་ར་བའི་ནང་དུ་བཅུག་པ་ལྟར་གཅིག་གིས་གཅིག་མཆོག་གསུམ་གྱི་སྐྱབས་འོག་ཏུ་འཛུད་རྒྱུ་ག་ལ་ཡོད་གསུངས། དེ་བས་ན་དེ་ལྟ་བུའི་དད་པའི་གདུང་ཤུགས་དྲག་པོས་སྐྱབས་སུ་འགྲོ་བ་ནི་ཆོས་ཐམས་ཅད་ཀྱི་རྩ་བ་ཁང་པའི་རྨིང་གཞི་ལྟ་བུ་ཡིན་པས་དོན་ཆུང་བར་སེམས་པར་མི་བྱ་སྟེ། སྔོན་ཇོ་བོ་རྗེས་བོད་དུ་སྐྱབས་འགྲོ་ཁོ་ནར་གསུངས་པས་ན་སློབ་མ་ཞིག་གིས་ཇོ་བོ་ལ་ཁྱེད་ཀྱིས་མདོ་རྒྱུད་ཀྱི་ཆོས་མང་པོ་མཁྱེན་ན་སྐྱབས་འགྲོ་ཁོ་ན་ཅིའི་ཕྱིར་གསུངས། ཁྱེད་ལ་སྐྱབས་འགྲོའི་པཎྜི་ཏ་ཞེས་གླེང་གིན་འདུག་ཞུས་པས་ཇོ་བོ་ཐུགས་དགྱེས་ཏེ་ངའི་མིང་དེས་ཀྱང་སངས་རྒྱས་ཀྱི་བསྟན་པ་ལ་བྱ་བ་བྱས། སྐྱབས་འགྲོ་ལས་ལྷག་པའི་ཆོས་ཞིག་གང་ན་ཡོད་གསུངས། དེ་ལྟར་དད་པ་དང་ལྡན་པས་སྐྱབས་སུ་འགྲོ་བ་ལ་ཚོགས་ཞིང་གསལ་གདབ་པ་ནི། རང་ཉིད་འདུག་པའི་ས་ཕྱོགས་ཐམས་ཅད་ཐ་མལ་པ་འདི་ལྟ་བུ་མ་ཡིན་པར་ཆོས་ཀྱི་དབྱིངས་དང་མཉམ་པའི་རྒྱ་ཁྱོན་ལ་དག་པའི་ཞིང་གི་བཀོད་པས་མཛེས་པར་བྱས་པའི་རང་བཞིན་དུ་བསམ་ལ། དེའི་དབུས་རང་མདུན་གྱི་ཐད་དྲང་པོ་ཅུང་ཟད་རིང་བ་ན་དཔག་བསམ་གྱི་སྡོང་པོ་ཡལ་ག་ལྔ་པ་ནམ་མཁའི་དབྱིངས་ཐམས་ཅད་ཁྱབ་པའི་ཡལ་ག་དང་ལོ་མ་ཐམས་ཅད་ནོར་བུ་རིན་པོ་ཆེ་དང༌། དྲིལ་གཡེར་དང༌། འཕྱང་འཕྲུལ་དང༌། རིན་པོ་ཆེའི་དྲྭ་བ་དྲྭ་ཕྱེད། དར་སྣ་ཚོགས་པའི་རྒྱན་གྱིས་མཛེས་པར་བརྒྱན་པའི་དབུས་ཀྱི་ཡལ་ག་ཅུང་ཟད་མཐོ་བའི་སྟེང་དུ་སེངྒེ་བརྒྱད་ཀྱིས་བཏེགས་པའི་རིན་པོ་ཆེའི་ཁྲིའི་སྟེང་པདྨ་ཉི་མ་ཟླ་བའི་གདན་གྱི་དབུས་སུ། དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་མཚུངས་མེད་ཐུགས་རྗེའི་གཏེར་མཛོད་དཔལ་ལྡན་རྩ་བའི་བླ་མ་དང་དབྱེར་མེད་པའི་ཨོ་རྒྱན་མཚོ་སྐྱེས་རྡོ་རྗེ་སྐུ་མདོག་དཀར་ལ་དམར་བའི་མདངས་ཆགས་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ་ཕྱག་གཡས་རིག་སྟོང་གི་རྡོ་རྗེ་རྩེ་ལྔ་པ་ཐུགས་ཀར་འཛིན་པ། གཡོན་མཉམ་བཞག་གི་སྟེང་ན་འཆི་མེད་ཡེ་ཤེས་ཀྱི་བདུད་རྩིས་གང་བའི་ཀ་པ་ལ་དང་བྱེ་རུའི་བུམ་པ་དཔག་བསམ་ཤིང་གི་ཁ་རྒྱན་ཅན་བསྣམས་པ། སྐུ་ལ་ནང་ནས་རིམ་པ་བཞིན་རྡོ་རྗེའི་གསང་གོས་དཀར་པོ། སྔགས་ཀྱི་ཕོད་ཆེན་མཐིང་ག །ཆོས་གོས་དམར་པོ་ཟ་འོག་གི་བེར་སྨུག་རྣམས་བརྩེགས་མར་གསོལ་བ། དབུ་ལ་པདྨ་མཐོང་གྲོལ་རྡོ་རྗེའི་ཏོག་གི་རྩེར་རྒོད་ཀྱི་ལྡེམ་འཕྲུས་མཛེས་ཤིང་དར་སྣ་ལྔའི་ཅོད་པན་འཕུར་བ་གསོལ་བ། པང་གཡོན་དུ་མི་འགྱུར་བའི་བདེ་བ་ཆེན་པོ་དང༌། རྣམ་ཀུན་མཆོག་ལྡན་གྱི་སྟོང་ཉིད་ཟུང་དུ་འཇུག་པའི་བརྡར་མཚོ་རྒྱལ་མ་དཀར་མོ་གྲི་གུག་དང་ཐོད་པ་འཛིན་པས་འཁྲིལ་བ། དེའི་དབུ་གཙུག་ན་ཤྲཱི་སིངྷ་དང༌། འཇམ་དཔལ་བཤེས་གཉེན་དང༌། དགའ་རབ་རྡོ་རྗེ་རྣམས་ཐོར་བརྩེགས་སུ་བཞུགས་པའི་སྟེང་གི་ནམ་མཁར་འཇའ་འོད་འཁྱིལ་པའི་ཀློང་ན་ལོངས་སྐུ་རིགས་ལྔ་ཡབ་ཡུམ་གྱི་མཐའ་བསྐོར་དུ་སེམས་དཔའ་བརྒྱད། སེམས་མ་བརྒྱད་རྣམས་ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་གྱིས་བརྒྱན་ཅིང་ཞི་བའི་ཚུལ་དགུས་བརྗིད་པ་དང༌། འགྲོ་འདུལ་ཐུབ་པ་དྲུག་སྤྲུལ་སྐུའི་ཆ་བྱད་ཅན་དང༌། དུར་ཁྲོད་རོལ་པའི་ཆས་ཀྱིས་བརྒྱན་པའི་སྒོ་བ་ཡབ་ཡུམ་བརྒྱད་རྣམས་ཀྱིས་བསྐོར་བ། དེའི་སྟེང་གི་ནམ་མཁར་ཆོས་སྐུ་ཀུན་བཟང་ཡབ་ཡུམ་ལ་ཆོས་སྐུའི་ལྷ་ཚོགས་ཀྱིས་བསྐོར་བར་གསལ། མདུན་གྱི་ཡལ་གའི་སྟེང་དུ་མེ་རི་དང་མེ་དཔུང་འབར་བའི་ཀློང་ན་ཁྲག་འཐུང་ཁྲོ་བོའི་ལྷ་ཚོགས་ཆེ་མཆོག་ཧ་ེརུ་ཀ་དང༌། ཁྲག་འཐུང་རིགས་ལྔ་ལ། མ་མོ་ཀཽ་རི་མ་བརྒྱད། ཕྲ་མེན་སེངྷ་མ་བརྒྱད། སྒོ་མ་བཞི་རྣམས་ཀྱིས་བསྐོར་བ་ཐམས་ཅད་ཀྱང་དུར་ཁྲོད་རོལ་པའི་ཆས་ཀྱིས་བརྒྱན་ཅིང༌། གར་དགུའི་ཉམས་ཀྱིས་བརྗིད་པར་བཞུགས་པའི་ཕྱོགས་མཚམས་སུ་ཡི་དམ་རྒྱུད་སྡེ་དྲུག་དང༌། སྒྲུབ་སྡེ་བཀའ་བརྒྱད་ཀྱི་ལྷ་ཚོགས་ཐམས་ཅད་ཡོད་པར་བསམ། གཡས་ཀྱི་ཡལ་གའི་སྟེང་དུ་མར་མེ་མཛད། ཤཱཀྱ་ཐུབ་པ། བྱམས་པ་མགོན་པོ་རྣམས་ཀྱིས་གཙོས་དུས་གསུམ་གྱི་སངས་རྒྱས་ཐམས་ཅད་སྐུ་མཚན་དང་དཔེ་བྱད་ཀྱིས་བརྒྱན་ཅིང་ཆོས་གོས་རྣམ་པ་གསུམ་གསོལ་བ། ཞབས་རྡོ་རྗེའི་སྐྱིལ་མོ་ཀྲུང་དུ་བཞུགས་ཤིང༌། ཕྱག་ས་གནོན། མཉམ་བཞག །མཆོག་སྦྱིན། སྐྱབས་སྦྱིན། བྱང་ཆུབ་མཆོག་གི་ཕྱག་རྒྱ་ཅན། སྐུ་མདོག་དཀར་སེར་དམར་ལྗང་མཐིང་ག་ལ་སོགས་པའི་རྣམ་པར་བཞུགས་པའི་མཐའ་བསྐོར་དུ་ཉེ་བའི་སྲས་ཆེན་བརྒྱད་ལ་སོགས་པའི་བྱང་ཆུབ་སེམས་དཔའི་ཚོགས་སྐུ་མདོག་ཕྱག་མཚན་སྣ་ཚོགས་པ། ལོངས་སྐུའི་རྒྱན་གྱིས་མཛེས་ཤིང་ཞབས་བཞེངས་སྟབས་སུ་བཞུགས་པ། དེའི་མཐའ་བསྐོར་དུ་ཤཱ་རིའི་བུ་དང༌། མོའུ་གལ་གྱི་བུ་ལ་སོགས་པ་ཉན་རང་འཕགས་པའི་དགེ་འདུན་དཔག་ཏུ་མེད་པ་ཐམས་ཅད་ཀྱང་དབུ་རེག་ཞབས་རྗེན། སྐུ་ལ་ཆོས་གོས་རྣམ་པ་གསུམ་གསོལ་ཞིང་ཕྱག་ན་འཁར་གསིལ་དང་ལྷུང་བཟེད་ཐོགས་པ། ཞབས་བཞེངས་སྟབས་སུ་བཞུགས་པར་གསལ། གཡོན་གྱི་ཡལ་གའི་སྟེང་དུ་མཁའ་འགྲོ་མ་སེང་གེའི་གདོང་པ་ཅན་དང༌། དཔལ་ལྡན་རྡོ་རྗེ་ཕག་མོ་ལ་གནས་གསུམ་གྱི་དཔའ་བོ་མཁའ་འགྲོའི་ཚོགས་ཀྱིས་བསྐོར་བ། དེ་ཐམས་ཅད་ཀྱི་སྐུ་ལ་རུས་པའི་རྒྱན་ལ་སོགས་པས་མཛེས་ཤིང་སྐུ་མདོག་ཕྱག་མཚན་སྣ་ཚོགས་པ། རྒྱབ་ཀྱི་ཡལ་གའི་སྟེང་དུ་དམ་པའི་ཆོས་དཀོན་མཆོག་འཇའ་དང་འོད་ཀྱི་དྲྭ་མིག་གི་ཀློང་ན་ཡི་གེ་གླེགས་བམ་གྱི་རྣམ་པར་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིས་སྟེང་མ་བྱས་ཏེ་གདོང་དར་མདུན་ཕྱོགས་སུ་ཁྲ་ཤིག་གེར་ཡོད་པ། ཨཱ་ལི་ཀཱ་ལིའི་རང་སྒྲ་སྒྲོག་པར་བསམ། དཔག་བསམ་ཤིང་གི་ཡལ་ག་ཆེ་བ་བཞི་པོའི་འོག་གི་མཐའ་བསྐོར་གྱི་ཡལ་ག་དང་ལོ་མ་རྣམས་ཀྱི་སྟེང་དུ། དབང་ཕྱུག་མ་ཉི་ཤུ་རྩ་བརྒྱད་དང༌། བཀའ་སྲུང་དམ་ཅན་སྡེ་བདུན་སོགས་བཀའ་སྲུང་དམ་ཅན་རྒྱ་མཚོའི་ཚོགས་རྣམས་ཆོས་སྐྱོང་ཕོ་རྒྱུད་ཐམས་ཅད་ཞལ་ཕྱིར་ཕྱོགས་ཏེ་བགེགས་ཚོགས་ལོག་པར་འདྲེན་པ་ཐམས་ཅད་ཕྱིར་བསྐྲད་ནས་ཕྱིའི་བར་ཆད་ནང་དུ་མི་འཇུག་པའི་ལས་མཛད། ཆོས་སྐྱོང་མོ་རྒྱུད་ཐམས་ཅད་ཀྱི་ཞལ་ནང་དུ་ཕྱོགས་ཏེ་ནང་གི་དངོས་གྲུབ་ཕྱིར་མི་གཏོང་བའི་ལས་མཛད་དེ་བཞུགས་ཤིང༌། ཚོགས་ཞིང་གི་ལྷ་ཚོགས་དེ་ཐམས་ཅད་ཀུན་སྐུ་འོད་དང་འོད་ཟེར་གྱི་ཕུང་པོ་འབར་ཞིང་བདག་སོགས་འགྲོ་བ་རྣམས་ལ་དགྱེས་པའི་ཞལ་གྱིས་ཕྱོགས་ཤིང༌། འཛུམ་པའི་སྤྱན་གྱིས་གཟིགས། ཐུགས་མཁྱེན་བརྩེ་ནུས་གསུམ་གྱི་བདག་ཉིད་ཅན་གྱིས་བརྩེ་བས་དགོངས། གསུངས་ཚངས་པའི་དབྱངས་ཀྱིས་འཁོར་བ་ངན་སོང་གི་སྡུག་བསྔལ་ལས་དབུགས་དབྱུང་བར་བསམ་ལ། ཚོགས་ཞིང་དེ་རྣམས་ཀྱི་མདུན་ས་གཞིའི་ངོས་རང་གི་གཡས་སུ་སྐྱེ་བ་ད་རེས་ཀྱི་ཕ། གཡོན་ན་མ། མདུན་དུ་སྡང་བྱེད་ཀྱི་དགྲ་དང༌། གནོད་བྱེད་ཀྱི་བགེགས། རྒྱབ་ཏུ་ལན་ཆགས་ཀྱི་བདག་པོ་བདག་མོ། མཐའ་སྐོར་དུ་རིགས་དྲུག་གི་སེམས་ཅན་ཐམས་ཅད་མའི་ལུས་རྟེན་དུ་ས་ཆེན་པོའ་ིངོས་ན་རྡུལ་འཁྲིགས་པ་ལྟར་འཁོད་པར་བསམ་ནས། བདག་གིས་བྱང་འདྲེན་བྱས་ཏེ་ངག་གུས་པའི་སྒོ་ནས་སྐྱབས་འགྲོའི་ཚིག་བརྗོད་ཚེ་ཐམས་ཅད་ཀྱིས་ཀྱང་འུར་དིར་གྱིས་སྒྲོག་པར་བསམ། ལུས་གུས་པའི་སྒོ་ནས་ཐལ་མོ་སྦྱར། ཡིད་གུས་པའི་སྒོ་ནས་མ་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་བསྒྲལ་བའི་ཕྱིར། དུས་དེ་རིང་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ་མཐོ་རུ་གཏོང་ངམ། དམའ་རུ་གཏོང་ངམ། སྐྱིད་སྡུག་ལེགས་ཉེས་ཅི་བྱུང་ཡང་སྐྱབས་དང་སྐྱོབས་པ་མགོན་དང་དཔུང་གཉེན་གཞན་ནས་མི་འཚོལ་བར་མཆོག་གསུམ་རྩ་བ་གསུམ་གྱི་ལྷ་ཚོགས་ཁྱེད་ཅིག་བརྟེན། ཁྱེད་ཅིག་སྒྲུབ། ཁྱེད་ཁོ་ན་ལ་སྐྱབས་བཅོལ་བར་བྱའོ་སྙམ་དུ་སྙིང་ཐག་པ་ནས་དམ་བཅའ་བར་བྱའོ། །དེ་ཡང་སྐྱབས་འགྲོའི་ངོ་བོ་གསོལ་བ་འདེབས་པ་ཙམ་མ་ཡིན་པར་ངེས་པར་དམ་བཅའ་བ་ཡིན་ལ། དམ་བཅའ་བའི་ཚུལ་ནི་ཕྱི་ནང་གསང་བ་གསུམ་ལས། ཕྱི་ལྟར་ན་དཀོན་མཆོག་གསུམ་ལ་སྟོན་པ་ལམ་གྲོགས་ཀྱི་ཚུལ་དུ་དམ་བཅའ་སྟེ། སངས་རྒྱས་བཅོམ་ལྡན་འདས་རྣམས་ཁོ་ན་བདག་གི་སྟོན་པ་ཡིན་མ་གཏོགས་གཞན་ཕྱི་རོལ་པའི་སྟོན་པ་དང༌། རྗེ་བོ་དཔོན་པོ། གཉེན་ཉེ་བ་སོགས་འཇིག་རྟེན་པའི་ལམ་སྟོན་རྣམས་བདག་གི་སྟོན་པ་མ་ཡིན་སྙམ་པ་དང༌། དམ་པའི་ཆོས་ལ་ཐོས་བསམ་སྒོམ་སྒྲུབ་བྱེད་པ་འདི་ཁོ་ན་བདག་གི་ལམ་ཡིན་གྱི་འཇིག་རྟེན་འཁོར་བའི་བྱ་བ་ཐམས་ཅད་བསྒྲུབ་བྱ་མ་ཡིན་སྙམ་པ་དང༌། བྱང་ཆུབ་སེམས་དཔའི་དགེ་འདུན་རྣམས་ཁོ་ན་བརྟེན་པར་བྱ་བའི་གྲོགས་ཡིན། དེ་རྣམས་ལ་བློ་གཏོད་ཅིང་དེའི་རྗེས་སུ་སློབ་ཀྱི། དེ་ལས་གཞན་བྱིས་པ་དང༌། སྡིག་པའི་གྲོགས་པོ་དང༌། བློ་དམན་པའི་གང་ཟག་རྣམས་མ་ཡིན་པས་དེ་དག་ལ་བློ་མི་གཏོད། ལད་མོ་མི་བྱེད་སྙམ་དུ་དམ་བཅའོ། །ནང་ལྟར་ན་མཆོག་གསུམ་གྱི་ངོ་བོ་རྩ་བ་གསུམ་ལ་སྐྱབས་སུ་འགྲོ་བར་དམ་བཅའ་བ་སྟེ། སྒོ་གསུམ་བླ་མ་ལ་འབུལ། ཡི་དམ་ལ་བརྟེན། མཁའ་འགྲོ་ལ་གྲོགས་སུ་དམ་བཅའ་ཞིང༌། གསང་བ་ལྟར་ན་རང་གི་སེམས་ཉིད་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་ཀུན་ཁྱབ་སྤྲུལ་སྐུ་ལ་ཡེ་ནས་སངས་རྒྱས་ཟིན་པ་འདི་མངོན་དུ་འགྱུར་པ་ཞིག་བྱ་སྙམ་དུ་སྐྱབས་དང་བསྐྱབ་བྱ་ཐ་དད་མེད་པའི་ཚུལ་དུ་དམ་འཆའ་བཞིན། ཁམས་གསུམ་རིགས་དྲུག་སོགས་ནས། དུས་གསུམ་ཐོག་མཐའ་མེད་པར་སྐྱབས་སུ་མཆི། །ཞེས་པའི་བར་ལན་གསུམ་སོགས་མང་དུ་བརྗོད། ཡང༌། ནམ་མཁའི་གནས་སུ་ནམ་མཁའ་ཞེས་པ་ལ་སོགས་པའི་ཤླཽ་ཀ་མང་དུ་གདོན་པར་བྱའོ། །ཐུན་འཇོག་ཁར་སླར་ཡང་དད་པ་དང་མོས་འདུན་དྲག་པོ་ཞིག་བྱས་པས་ཚོགས་ཞིང་གི་ལྷ་ཚོགས་རྣམས་ཀྱི་སྐུ་ལས་འོད་ཟེར་དཔག་ཏུ་མེད་པ་བྱུང༌། རང་གཞན་སེམས་ཅན་ཐམས་ཅད་ཀྱི་ལུས་ལ་ཕོག་པའི་རྐྱེན་གྱིས་བྱ་ཁྱུ་འུར་རྡོས་དཀྲོགས་པ་བཞིན་དུ་འུར་དུར་གྱིས་ཚོགས་ཞིང་གི་ལྷ་ཚོགས་རྣམས་ལ་ཐིམ། ཚོགས་ཞིང་དེ་རྣམས་ཀྱང་མཐའ་ནས་རིམ་བཞིན་བསྡུས་ཏེ་ཨོ་རྒྱན་ཆེན་པོ་ལ་ཐིམ། སྟེང་གི་ཆོས་སྐུའི་ལྷ་ཚོགས་རྣམས་ལོངས་སྐུ་ལ། ལོངས་སྐུ་རྣམས་དགའ་རབ་རྡོ་རྗེ་སོགས་སྤྲུལ་སྐུ་ལ། སྤྲུལ་སྐུ་རྣམས་འོད་དུ་ཞུ་ནས་ཨོ་རྒྱན་ཆེན་པོ་ལ་ཐིམ། ཨོ་རྒྱན་ཆེན་པོ་སླར་ཡང་རང་གི་ལུས་སྣང་ལ་ཐིམ་སྟེ་དམིགས་མེད་ཀྱི་ངང་ལ་ཅུང་ཟད་མཉམ་པར་བཞག་ནས་རྒྱུད་བྱིན་གྱིས་རླབས་པར་བསམ་མོ། །དགེ་བ་འདི་ཡིས་སོགས་འདོན། དེ་ལྟར་སྐྱབས་སུ་སོང་ནས་བཟུང༌། དེའི་བསླབ་བྱ་རྣམས་སྲུང་བ་གལ་ཆེ་བས་དང་པོ་དགག་པའི་བསླབ་བྱ་གསུམ་ནི། སངས་རྒྱས་ལ་སྐྱབས་སུ་སོང་ནས་ཚངས་དང་དབང་པོ་ཁྱབ་འཇུག་སོགས་ལྷ་ཀླུ་མཐུ་བོ་ཆེ་རྣམས་དང༌། གཞི་བདག་སོགས་འཁོར་བར་འཁོར་བའི་ལྷ་དེ་རྣམས་ལ་སྐྱབས་མི་འཚོལ། འཇིག་རྟེན་པའི་ལྷ་དེ་དག་མཆོད་ཅིང་ལས་བཅོལ་དགོས་པའི་ཚེ་དཀོན་མཆོག་གི་ཕྲིན་ལས་སྒྲུབ་པའི་ཕོ་ཉ་བར་དམིགས་ཏེ་རྗེ་བོས་བྲན་ལ་བཟའ་བཏུང་སོགས་བྱིན་ནས་ལས་འདི་ལྟ་བུ་གྱིས་ཤིག་ཅེས་བསྒོ་བ་དང་འདྲ་བར་བྱེད་དགོས་ཀྱི། མཆོག་གསུམ་ཡིད་ཀྱིས་བོར་ཏེ་དེ་དག་ལ་རེ་བར་བྱས་ན་བསླབ་བྱ་ཉམས་ཤིང་འདི་ཕྱི་ཀུན་ཏུ་ཕོངས་བར་འགྱུར་རོ། །ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་སྤང་དགོས། བླ་མ་སེར་མོ་བ་རྣམས་གྲོང་ཆོག་ཏུ་བྱོན་དུས། དེ་དག་གི་བཞེས་རྒྱུའི་དོན་དུ་ཡོན་བདག་དེས་སེམས་ཅན་ཞིག་དངོས་སུ་བསད་དེ་དྲངས་ན་སྐྱབས་འགྲོའི་བསླབ་བྱ་ཉམས་པར་མ་ཟད་སོ་བྱང་སྔགས་ཀྱི་སྡོམ་པ་ཐམས་ཅད་ཆུད་ཟ་ཞིང༌། རང་གཞན་ཀུན་བསླུས་པར་བྱས་པས་དེ་བས་ཐུ་ཅི་ཡོད་གསུངས། ཡང་གནས་སྐབས་དེར་མ་བསད་ཀྱང་གཞན་ལས་ཤ་བསྐྱིས་ཏེ་དྲངས་ནའང༌། ཕྱིས་ནི་སྐྱིན་པོའི་དོན་དུ་གསོད་དགོས་པས་འདྲ་གསུངས། དེར་མ་ཟད་བྱོན་པའི་ཚེའང་རྟ་ཁལ་ལ་སྡུག་ཆེན་པོ་གཏད་པའང་སངས་རྒྱས་ཀྱི་རྗེས་འཇུག་གི་ཚུལ་མ་ཡིན་ཏེ། སྔོན་སངས་རྒྱས་བཅོམ་ལྡན་འདས་འཁོར་དགྲ་བཅོམ་པའི་ཚོགས་མང་པོ་དང་བཅས་ཏེ་གྲོང་སོགས་སུ་བྱོན་པའི་ཚེ་ན་ཐམས་ཅད་ཞབས་ཐང་དུ་བྱོན་པ་དེ་སེམས་ཅན་ལ་འཚེ་བ་སྤང་དགོས་པས་ཡིན་གྱི་ཐབས་སྡུག་ནས་རྟ་རྒན་ཞིག་ཆིབས་རྒྱུ་མ་རྙེད་པ་ག་ལ་ཡིན། ཡང་ཇོ་བོ་རྗེ་བོད་དུ་བྱོན་དུས། བོད་ཀྱི་བླ་ཆེན་ཚོས་མངའ་ཐང་བསྐྱེད་དེ་རྟ་དྲེལ་མང་པོ་དེད་ནས་ཆིབ་བསུར་བྱོན་ཚེ། ཇོ་བོ་རྗེ་བཤུམས་ནས་སེམས་ཅན་མང་པོ་ལ་སྡུག་གཏོད་པ་འདི་འདྲ་བ་ཐུབ་པའི་རྗེས་འཇུག་གི་ཚུལ་མ་ཡིན་གསུངས་ནས་ཕྱིར་བྲོས་པའི་ལོ་རྒྱུས་གསུངས། དེས་ན་སེམས་ཅན་ལ་གནོད་པའི་ལས་ཕྲ་བ་ཚུན་ཆད་ཅི་ནུས་སུ་སྤང་བར་བྱ་དགོས། དགེ་འདུན་ལ་སྐྱབས་སུ་སོང་ནས་གྲོགས་མི་སྟེགས་ཅན་དངོས་སམ། མིན་ཀྱང་དཀོན་མཆོག་ལ་ཡིད་མི་ཆེས་ཞིང༌། ཆོས་དགེ་བའི་ཕྱོགས་ལ་མི་དགའ་ཞིང་རྒྱབ་ཀྱིས་ཕྱོགས་པའི་གང་ཟག་དེ་འདྲ་ལ་མི་འགྲོགས་ཏེ། དེ་དང་ཁ་བློ་སྤྱོད་གསུམ་གཅིག་པར་བྱས་ན་སྐྱབས་འགྲོའི་བསླབ་བྱ་ཉམས་པར་མ་ཟད་རང་རྒྱུད་ལ་ཡར་སྐྱེད་མེད་པའི་སྟེང་ཆོས་ཕྱོགས་ཀྱི་ཡོན་ཏན་དགེ་སྦྱོར་ཅུང་ཟད་རེ་ཡོད་པ་ཡན་ཆད་ཉམས་པར་འགྱུར་བས་གཟབ་པར་བྱ་དགོས་སོ། །དེ་ལྟར་སྐྱབས་སུ་སོང་ཞིང་བསླབ་བྱ་བསྲུངས་ན་དེའི་ཕན་ཡོན་ནི་དཔག་ཏུ་མེད་ཀྱང་བསྡུ་ན། ནང་པའི་ཁྱུར་འག།ྲོ མཆོག་གསུམ་གྱི་སྐྱབས་འོག་ཏུ་ཚུད་པས་ན་ཚ་སྡུག་བསྔལ་དང༌། མི་དང་མི་མིན་གྱི་གནོད་པ་ཐམས་ཅད་ཞི། སྔོན་གྱི་ལས་སྒྲིབ་འདགས། ཚེ་རབས་ཀུན་ཏུ་དཀོན་མཆོག་གི་སྣང་བ་དང་མི་འབྲལ། མཐར་ཐུག་སངས་རྒྱས་ཀྱི་གོ་འཕང་ཐོབ་པ་སོགས་སོ། །༈ དེ་ནས་སེམས་བསྐྱེད་སྐྱེ་བ་ལ་སོགས་པའི་དོན་དུ་ཚོགས་བསགས་ཡན་ལག་བཅུ་པ་བྱ་སྟེ། སྔར་ལྟར་མཆོག་གསུམ་རྩ་བ་གསུམ་གྱི་ལྷ་ཚོགས་ལ་སྐྱབས་སུ་འགྲོ་བ་དང༌། དབྱིངས་ནས་རྒྱལ་བ་ཞི་ཁྲོ་རབས་འབྱམས་ཀྱི་ལྷ་ཚོགས་ཐམས་ཅད་དད་མོས་དྲག་པོས་སྤྱན་འདྲེན་པ་དང༌། རིན་པོ་ཆེ་དང་པདྨ་ཉི་མ་ཟླ་བ་ལ་སོགས་པའི་གདན་ལ་བཞུགས་སུ་གསོལ་བ་དང༌། ལུས་རྡུལ་སྙེད་དུ་སྤྲུལ་ཏེ་སྒོ་གསུམ་གུས་པས་ཕྱག་འཚལ་བ་དང༌། དངོས་འབྱོར་ཡིད་སྤྲུལ་གྱི་ཕྱི་ནང་གསང་བའི་མཆོད་པ་རྒྱ་མཚོ་ལྟ་བུའི་མཆོད་པ་དང༌། ཐོག་མེད་ནས་བསགས་པའི་སྡིག་ལྟུང་སྙིང་ནས་བཤགས་པ་དང༌། ཕྱོགས་བཅུའི་ཞིང་ན་བཞུགས་པའི་རྒྱལ་པ་སྲས་དང་བཅས་པ་རྣམས་ཀྱིས་འགྲོ་བའི་དོན་དཔག་ཏུ་མེད་པ་མཛད་པ་སོགས་ཟག་བཅས་དང་ཟག་པ་མེད་པའི་དགེ་བ་ལ་ཡི་རང་བ་དང༌། རྒྱལ་བ་རྣམས་ཀྱི་ཐུགས་དམ་གནད་ནས་བསྐུལ་ཏེ་ཆོས་ཀྱི་འཁོར་ལོ་རྒྱུན་མི་འཆད་པར་བསྐོར་བར་བསྐུལ་བ་དང༌། རྒྱལ་བ་རྣམས་འཁོར་བ་མ་སྟོངས་ཀྱི་བར་དུ་མྱ་ངན་ལས་མི་འདའ་བར་གསོལ་བ་འདེབས་པ་དང༌། དགེ་བའི་རྩ་བ་དུས་གསུམ་དུ་བསགས་པ་ཀུན་རང་གཞན་སེམས་ཅན་ཐམས་ཅད་རྒྱལ་བ་ཞི་ཁྲོ་རབ་འབྱམས་ཀྱི་གོ་འཕང་ཐོབ་པའི་ཕྱིར་བསྔོ་བའི་རིམ་པ་དང་བཅུ་སྟེ། དེ་རྣམས་ཚིག་གི་རྗེས་སུ་དོན་དྲན་པའི་སྒོ་ནས་ཕྱག་འཚལ་བཞིན། ཨོཾ་ཨཱཿཧཱུྃ་ནམ་མཁའི་མཐར་ཐུགས་སོགས་ནས། ཞི་ཁྲོ་རབ་འབྱམས་གོ་འཕང་མྱུར་ཐོབ་ཤོག །ཅེས་པའི་བར་དུ་ལན་གསུམ་སོགས་འདོན། ཡང་སྒྲིབ་སྦྱོང་ཞིག་ལ་ཕྱག་འཚལ་བ་འདི་བས་ལྷག་མེད་པས། ཕྱག་འཚལ་བའི་རིམ་པ་བྱེ་བྲག་ཏུ་ཡང་བྱ་སྟེ། དེ་ཡང་ཐལ་མོ་གནས་གསུམ་དུ་འཇོག་དུས་བཅོམ་ལྡན་འདས་རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་ཡོན་ཏན་ཐམས་ཅད་ཐོབ་པར་བསམ། ཁྱད་པར་དུ་ཐལ་མོ་སྙིང་གར་སྦྱར་བས་གནས་སྐབས་སུའང་ཉམས་རྟོགས་ཀྱི་ཡོན་ཏན་ཁྱད་པར་ཅན་ཐོབ་པར་བསམ་མོ། །མ་ལྔ་ས་ལ་འཇོག་དུས་ཉོན་མོངས་པ་ལྔས་བསྐྱེད་པའི་ལས་དང་བག་ཆགས་ཐམས་ཅད་དག་པར་བསམ་སྟེ་ལུས་ཐམས་ཅད་སར་བརྐྱངས་ཏེ་དཔྲལ་བ་ས་ལ་གཏུགས་བཞིན་ཐལ་མོ་སྤྱི་བོར་བཞག་སྟེ་སངས་རྒྱས་ཀྱི་དབུའི་གཙུག་ཏོར་བལྟར་མི་མངོན་པ་ཐོབ་པར་བསམ། ཡང་ན་དང་པོ་ནས་ཐལ་མོ་གནས་གསུམ་དུ་གཏུགས་འཕྲལ་ལུས་ཐམས་ཅད་ཤད་ཀྱིས་སར་གདབ་སྟེ་བརྐྱང་ཕྱག་བཙལ་བར་བྱའོ། །བརྐྱང་ཕྱག་འདི་སྔགས་ཀྱི་ལུགས་ཏེ་སྔོན་གྱི་དུས་འཕགས་ཡུལ་གྱི་གྲུབ་པ་ཐོབ་པ་རྣམས་ཀྱི་དྲུང་དུ་ལས་ལྡན་གྱི་སློབ་མ་དག་གིས་བརྐྱང་ཕྱག་ལན་མང་དུ་བཙལ་ཞིང་གསེར་མང་པོ་ཕུལ་ཏེ་གསང་སྔགས་ཀྱི་གདམས་པ་ཞུས་པར་བཤད་པ་དང༌། སྔགས་རྒྱུད་ནས་ཀྱང༌། དད་པས་བརྐྱང་ཕྱག་གདབ་སྟེ་འཚལ། །ཞེས་པ་ལ་སོགས་པ་གསུངས་པའི་ཕྱིར་རོ། །གཞན་དུ་མར་མེ་མཛད་ཀྱི་ཕྱག་ཀྱང་ཟེར་རོ། །དེ་ལྟར་ཕྱག་འཚལ་བཞིན་བརྒྱ་ཕྱག་རྒྱས་པའམ། ཕྱག་འཚལ་བསྡུས་པ་གང་རུང་ལེན་ཅི་རིགས་སུ་འདོན་པར་བྱའོ། །དེ་ནས་བྱང་ཆུབ་མཆོག་ཏུ་སེམས་བསྐྱེད་པ་ནི། སྐྱབས་འགྲོ་དང་ལྷན་དུ་བྱེད་ཚེ་སྔར་གྱི་ཚོགས་ཞིང་མི་བསྡུ་བར་དེའི་མདུན་ནམ། སོ་སོར་བྱེད་པའི་ཚེ་སྔར་ལྟར་ཚོགས་ཞིང་གསལ་བཏབ་པའི་མདུན་སེམས་བསྐྱེད་པར་བྱ་ཞིང༌། དེ་ཡང་དང་པོ་ཚད་མེད་བཞིས་བློ་སྦྱོང་བ་གལ་ཆེ་ཞིང༌། དེ་ལ་སྒོམ་ཚུལ་གྱི་རིམ་པ་མཐའ་གཅིག་ཏུ་མ་ངེས་ཀྱང༌། ཐོག་མར་བཏང་སྙོམས་ཀྱི་བློ་མ་འབྱོངས་ན་གཞན་གསུམ་རིས་ཆད་ཅན་དུ་འགྱུར་བས། དང་པོ་བཏང་སྙོམས་བསྒོམ་པར་བྱ་སྟེ། འདི་ལྟར་ཐོག་མ་མེད་པ་ནས་ད་ལ་ཐུག་གི་བར་དུ་ཉེ་རིང་ཕྱོགས་ལྷུང་གི་བསམ་པ་ངན་པ་འདིའི་དབང་གིས་འཁོར་བའི་གནས་སུ་འཁྱམས་ཤིང༌། ད་རུང་ཡང་འདི་ལྟ་བུའི་བསམ་པ་འདི་མ་སྤང་ན་འཁོར་བ་ལས་ཐར་པའི་དུས་མི་འོང༌། བྱང་ཆུབ་ཀྱི་སེམས་རྒྱུད་ལ་མི་སྐྱེ། དགྲ་ལ་སྡང་བའི་དབང་གིས་དམྱལ་བའི་གཏིང་རྡོར་འགྱུར། གཉེན་སོགས་ལ་ཆགས་པའི་དབང་གིས་ད་ལྟ་རང་གི་ཆོས་སྐལ་ཆད། གཏན་དུ་འཁོར་བའི་འདམ་དུ་བྱིང་བར་འགྱུར་བས། ད་ནི་ཆགས་སྡང་གི་བྱ་བ་ཐམས་ཅད་འཕྲོ་གཅོད་པར་བྱ་སྟེ། སྤྱིར་འཇིག་རྟེན་པའི་བྱ་བ་གང་ཡིན་ཀྱང་ནམ་བཞག་པ་དེའི་ཚེ་མཐའ་བུད་པ་ཡིན་ཞིང༌། མ་བཞག་ན་ནི་མི་ཚེ་གང་པོ་ལ་འབད་ཀྱང་ད་དུང་འཆི་ཁ་བློ་ལྷག་དང་བཅས་པ་ཞིག་ལས་འོང་རྒྱུ་མེད་པས་ད་ནི་ཆགས་སྡང་གི་བྱ་བ་ཐམས་ཅད་ཆམ་གྱིས་བཞག་སྟེ་དགྲ་གཉེན་བར་མའི་ཕྱོགས་ཐམས་ཅད་ལ་ཕན་ཅི་ཐོག་ཞིག་ལ་བརྩོན་པར་བྱ་སྙམ་དུ་བཏང་སྙོམས་ཚད་མེད་དྲང་སྲོང་གི་མགྲོན་འགྱེད་པ་ལྟ་བུ་ལ་བསླབ་པར་བྱ། དེ་རྒྱུད་ལ་འབྱོངས་ནས་བྱམས་པ་ཚད་མེད་བྱ་མས་བྱེའུ་གསོ་བ་ལྟ་བུ་ལ་བསླབ་པར་བྱ་སྟེ། དེ་ཡང་བཏང་སྙོམས་ཀྱི་བློ་འབྱོངས་པ་དེ་ལ་བརྟེན་ནས་སེམས་ཅན་ཐམས་ཅད་ལ་ཕན་འདོད་ཀྱི་བསམ་པ་ཁྱད་མེད་པ་ཞིག་བྱུང་ན་རྣམ་པར་དག་པར་འགྱུར་གྱི། དེ་ལྟ་མ་ཡིན་པར་རང་ཉིད་དགའ་བའི་ཕྱོགས་འགའ་ཞིག་ཙམ་ལས། གཞན་ཕྱོགས་ལ་བདེ་འབྱོར་ཡོན་ཏན་ཡོད་པ་ལ་སྙིང་མི་དགའ་བའི་ཕྲག་དོག་བྱེད་པ་དེ་འདྲ་བའི་རྒྱུད་ལ་ནི། ཕྲག་དོག་དེའི་རྩ་བ་མ་ཆད་ཀྱི་བར་དུ་བྱང་ཆུབ་ཀྱི་སེམས་ཏིལ་འབྲུ་ཙམ་ཡང་མི་སྐྱེ་ཐག་ཆོད་ཡིན་པས་འདི་ལྟར་བསམ་པར་བྱ་སྟེ། ད་ལྟ་ཙམ་དུ་དགའ་བ་དང༌། མི་དགའ་བའི་ཕྱོགས་སུ་བཟུང་བ་འདི་ནི་མི་རིགས་ཏེ། སེམས་ཅན་ཐམས་ཅད་ཐོག་མ་མེད་པ་ནས་མ་རུ་མ་གྱུར་པ་གཅིག་ཀྱང་མེད། མར་གྱུར་པའི་དུས་སུ་ད་ལྟའི་མ་འདི་བཞིན་དྲིན་ཆེན་པོས་བསྐྱངས་པ་ཤ་སྟག་ཡིན་པས་དེ་ཐམས་ཅད་འཕྲལ་དང་ཡུན་གྱི་བདེ་བ་དམ་པ་དང་འཕྲད་ན་ཅི་མ་རུང་དེ་ལྟ་བུ་ཞིག་བདག་གིས་བྱ་སྙམ་དུ་བསམ་མོ། །དེ་ནས་སྙིང་རྗེ་ཚད་མེད་འགྲོ་བ་རིགས་དྲུག་གི་སེམས་ཅན་སྡུག་བསྔལ་གྱིས་མནར་བ་ཐམས་ཅད་མཐོང་ནས་བཟོད་དུ་མེད་པ་མ་ལག་རྡུམ་མའི་བུ་ཆུས་ཁྱེར་པ་ལྟ་བུ་ལ་སེམས་སྦྱང་བར་བྱ་སྟེ། མ་རྒན་ནམ་མཁའ་དང་མཉམ་པའི་སེམས་ཅན་ཐམས་ཅད་འདོད་པ་བདེ་བ་འདོད་ཀྱང་བདེ་བའི་རྒྱུ་དགེ་བ་ནི་ཅུང་ཟད་ཀྱང་དང་དུ་ལེན་མི་ཤེས། སྡུག་བསྔལ་མི་འདོད་ཀྱང་སྡུག་བསྔལ་གྱི་རྒྱུ་མི་དགེ་བ་བཅུ་ལ་འཆོལ་ཉོག་ཏུ་སྤྱོད་དེ་ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་པ་འདི་རྣམས་སྙིང་རེ་རྗེ། འདི་ཐམས་ཅད་རིགས་དྲུག་སོ་སོའི་ལས་སྣང་སྡུག་བསྔལ་བག་ཆགས་ཐམས་ཅད་དང་བྲལ་ན་ཅི་མ་རུང༌། བདག་ད་རེས་དལ་འབྱོར་གྱི་མི་ལུས་ཐོབ། བླ་མ་དགེ་བའི་བཤེས་གཉེན་དམ་པ་དང་འཕྲད། གདམས་པ་ཟབ་མོ་འདི་ལྟ་བུ་ཉམས་སུ་ལེན་དུ་ཡོད་པ་འདི་སྐལ་བ་རེ་བཟང༌། བདག་གིས་མན་ངག་འདི་ལ་བརྟེན་ནས་སེམས་ཅན་དེ་ཐམས་ཅད་སྡུག་བསྔལ་མཐའ་དག་དང་བྲལ་བ་ཞིག་བྱ་སྙམ་དུ་དམ་བཅའ་བར་བྱ། དངོས་སུ་ཡང་སྙིང་རྗེའི་ཡུལ་ནད་པ་སྡུག་ཐུག །སྤྲང་པོ་ཉམས་ཐག །ཐག་རིང་གི་ཨ་ཅོ་(ལྕོ་)སོགས་ལ་ཕན་བཏགས་ན་ཕན་ཡོན་དཔག་ཏུ་མེད་དེ། མི་བརྒྱགས་ཆེན་ཞིག་ལ་དངུལ་རྡིལ་ཚད་ཞིག་བྱིན་པ་བས། དབུལ་པོ་སྡུག་ཐུག་གཅིག་ལ་ཟ་མ་ཕོར་གང་བྱིན་ན་དེ་དགའ་ཚོར་ཆེ་བས་ཕན་ཡོན་ཀྱང་དེས་ཆེ་གསུངས། སྤྱིར་མཆོད་སྦྱིན་གཉིས་ལས། ཕལ་པ་འབྲས་བུ་ལ་རེ་བ་རྣམས་ཀྱིས་ཞིང་དག་པ་ལ་མཆོད་པ་འབུལ་བ་འདམ་ཡང༌། བྱང་ཆུབ་སེམས་དཔས་ནི་སེམས་ཅན་ལ་ཕན་འདོགས་པ་དང༌། གཏོང་སེམས་གོམས་པ་ཁོ་ན་དོན་དུ་གཉེར་བས་མཆོད་སྦྱིན་གཉིས་ཀ་མིག་རྡོག་གཡས་གཡོན་འདྲ་བར་ཁྱད་པར་ཅུང་ཟད་ཀྱང་མེད། དེས་ན་དགེ་བ་ཅི་བྱས་ན་རང་འདོད་ཀྱི་འཁྲིས་མེད་པ་ཞིག་ཨེ་ཐོན་བལྟ་དགོས་གསུངས། དེ་ནས་དགའ་བ་ཚད་མེད་རྔ་མོང་གི་རྔེའུ་སྟོར་བ་སླར་རྙེད་པ་ལྟ་བུ་ལ་བསླབ་པར་བྱ་སྟེ། སེམས་ཅན་གཞན་སྟོབས་འབྱོར་མངའ་ཐང་ཅན་ཆོས་དང་འཇིག་རྟེན་གྱི་ཡོན་ཏན་གཞན་གྱིས་ཡིད་སྨོན་གྱི་གནས་སུ་གྱུར་པ་དེ་ལྟ་བུ་ལ་དམིགས་ནས་ཕྲག་དོག་མི་དགའ་བའི་བསམ་པ་ཐམས་ཅད་སྤངས་ནས། འདི་རྣམས་ཡོན་ཏན་དང་བདེ་བ་འདི་དང་གཏན་དུ་མ་བྲལ་ན་ཅི་མ་རུང༌། འདི་བས་ཀྱང་ལྷག་པར་གྱུར་ན་ང་རེ་དགའ། དེ་ལྟ་བུ་ཞིག་བདག་གིས་བྱ་སྙམ་དུ་བསྒོམ་པར་བྱའོ། །དེ་ནས་སེམས་བསྐྱེད་པ་དངོས་ནི། ཆོས་ཐམས་ཅད་ཡེ་ནས་སྟོང་ཞིང་བདག་མེད་པ་ཡིན་པ་ལ། དེ་ལྟར་མ་རྟོགས་པའི་སེམས་ཅན་དེ་ཐམས་ཅད་གློ་བུར་འཁྲུལ་རྟོག་གི་བག་ཆགས་གོམས་པའི་གཉིས་སྣང་འཁོར་བའི་སྡུག་བསྔལ་ཐམས་ཅད་དབྱིངས་སུ་དག་སྟེ་ཟུང་འཇུག་གདོད་མའི་མགོན་པོ་ཀུན་ཏུ་བཟང་པོའི་གོ་འཕང་ལ་འགོད་པར་བྱ་བའི་ཆེད་དུ་གསང་སྔགས་རྡོ་རྗེ་ཐེག་པའི་ཉེ་ལམ་ཟབ་མོ་ཉམས་སུ་བླང་བར་བྱ་སྙམ་དུ་སྨོན་པ་དང་འཇུག་པའི་དོན་དྲན་པའི་སྒོ་ནས། ཀྱེ་མ་ཆོས་རྣམས་ཐམས་ཅད་ཐམས་ཅད་སྟོང་ཞིང་སོགས་ནས། ཆགས་སྡང་མེད་པའི་བཏང་སྙོམས་གནས་གྱུར་ཅིག །ཅེས་པའི་བར་ལན་གསུམ་སོགས་ཅི་རིགས་པ་དང༌། གཏེར་གཞུང་གཞན་ལས་བྱུང་བའི། བདག་དང་མཐའ་ཡས་པའི་སེམས་ཅན་སོགས་འབུམ་ཐེར་ཙམ་འདོན། ཐུན་བསྡུ་བ་ན་ཚོགས་ཞིང་གི་ལྷ་ཚོགས་རྣམས་སྔར་བཞིན་ཨོ་རྒྱན་ཆེན་པོ་ལ་ཐིམ། དེ་ཉིད་རང་ལ་ཐིམ་པས་རང་རྒྱུད་ལ་དོན་དམ་བྱང་ཆུབ་ཀྱི་སེམས་ལྷག་གེར་སྐྱེས་པར་བསམས་ནས་མི་དམིགས་པའི་ངང་ལ་ཅི་ཙམ་གནས་ཀྱི་བར་དུ་འཇོག །དེ་ལྟར་སེམས་བསྐྱེད་ནས་དེའི་བསླབ་བྱ་རྣམས་ལ་ཚུལ་བཞིན་ཅི་ནུས་སུ་བསླབ་པར་བྱ་སྟེ། དེ་ལ་སྨོན་པའི་བསླབ་བྱ་ནི། བདག་གཞན་མཉམ་པ་བརྗེ་བ། བདག་བས་གཞན་གཅེས་གསུམ་ལས། དང་པོ་ནི། རང་དང་གཞན་སེམས་ཅན་ཐམས་ཅད་བདེ་བ་འདོད་པ་ལ་འདྲ། སྡུག་བསྔལ་མི་འདོད་པ་ལ་འདྲ་ཞིང་ཁྱད་པར་མེད་པའི་ཚུལ་ལ་ལེགས་པར་བསམས་ནས་བདག་གཞན་གཉིས་པོ་ལ་བདེ་སྡུག་བླང་དོར་དུ་ཁྱད་པར་མེད་པ་ལ་སེམས་སྦྱང་ཞིང༌། དངོས་སུའང་ཅི་ནུས་སུ་བརྩོན་པར་བྱ་སྟེ། སྔོན་རྒྱ་གར་དམ་པ་སངས་རྒྱས་ལ། དྲུང་པ་གཟི་རྣ་ཅན་གྱིས་ཆོས་ཐམས་ཅད་ཀྱི་ནང་ནས་གང་བྱས་ན་ལྷག་ཞུས་པ་ལ། རང་གི་མི་འདོད་ཚད་སེམས་ཅན་གཞན་ལ་མ་བྱེད། རང་གི་འདོད་ཚད་ཐམས་ཅད་སེམས་ཅན་གཞན་ལ་གྱིས་དང་དེ་ལས་ལྷག་མེད། གསུངས། བདག་གཞན་བརྗེ་བ་ནི། བདག་གི་བདེ་དགེ་ཐམས་ཅད་གཞན་ལ་གཏོང་བ་དང༌། གཞན་གྱི་སྡུག་བསྔལ་ཐམས་ཅད་བདག་གི་ཐོག་ཏུ་འབབ་པ་ལ་ཅི་ནུས་སུ་དངོས་སུ་བརྩོན་པ་དང༌། དམིགས་པས་ཀྱང་རླུང་ཕྱིར་འགྲོ་དུས་རང་གི་བདེ་བ་དང་ཡོན་ཏན་དགེ་བའི་དངོས་པོ་ཐམས་ཅད་གོས་ཕུད་པ་ལྟར་རླུང་དཀར་པོའི་རྣམ་པར་སོང་ནས་གཞན་གྱི་རྒྱུད་ལ་སྨིན། རླུང་ཚུར་རྔུབ་དུས་གཞན་སེམས་ཅན་ཐམས་ཅད་ཀྱི་སྡིག་སྒྲིབ་སྡུག་བསྔལ་ཐམས་ཅད་རླུང་ནག་པོའི་རྣམ་པར་རང་རྒྱུད་ལ་བླང་བར་བསམས་ཏེ་ཡང་ཡང་གོམས་པར་བྱའོ། །བདག་པས་གཞན་གཅེས་ནི། ད་སྔ་ཡན་ཆད་རང་ཁོ་ན་བདེ་ཐབས་སྐྱིད་ཐབས་ཞིག་ཐོན་ན་གཞན་ཅི་རེད་རེད་དུ་ཆུག་སྙམ་པ་དེ་དོར་ནས། ད་ཕྱིན་ཆད་བདག་འདི་ཕྱི་ཐམས་ཅད་དུ་སྡུག་བསྔལ་ཡང༌། ངན་སོང་དུ་ལྟུང་ཡང༌། ཉམས་ཉེས་ཅི་བྱུང་ཡང་རུང་ཅི་རེད་རེད་དུ་ཆུག །གཞན་སེམས་ཅན་འདི་རྣམས་བདེ་ཐབས་སྐྱིད་ཐབས་ཡོན་ཏན་དང་ལྡན་ཐབས་ཤིག་ཐོན་དགོས་སྙམ་དུ་སྙིང་ནས་བསྒོམ་ཞིང༌། དངོས་སུ་ཡང་དེ་ལྟ་བུ་ལ་ཅི་ནུས་སུ་བརྩོན་པར་བྱའོ། །འཇུག་པའི་བསླབ་བྱ་ནི། ཕ་རོལ་ཏུ་ཕྱིན་པ་དྲུག་ལ་ཅི་ནུས་སུ་རྟག་ཏུ་བསླབ་པར་བྱ་སྟེ། སྦྱིན་པ་ཡང་རང་ལ་ཡོད་པའི་དངོས་པོ་ལུས་ལོངས་སྤྱོད་ཁ་རྗེ་དབང་ཐང་ཚེ་བསོད་ནམས་དགེ་བའི་རྩ་བ་ཇི་སྙེད་ཡོད་པ་ཐམས་ཅད་ལ་བདག་འཛིན་བཅད་དེ་སེམས་ཅན་ཐམས་ཅད་ལ་གཏོང་སེམས་ཡང་ཡང་གོམས་པར་བྱ། དངོས་སུ་ཡང་རང་ལ་ཡོད་པའི་དངོས་པོ་ཐམས་ཅད་འཆི་བའི་དུས་སུ་རྗེས་སུ་མི་འབྲང་ཞིང༌། ད་ལྟ་ཡང་རྨི་ལམ་གྱི་ནོར་རྫས་ལྟར་སྙིང་པོ་མེད་པའི་ཚུལ་ལ་ལེགས་པར་བསམ་སྟེ་ཡར་མཆོད་མར་སྦྱིན་ལ་བརྩོན། དེ་ཡང་སེར་སྣའི་གཉེན་པོར་འགྲོ་དགོས་པས་རང་གང་ལ་ཞེན་པ་ཆེ་བའི་དངོས་པོ་དེ་གཏོང་བ་གལ་ཆེ། སྤྱིར་རབ་བྱུང་རྣམས་ཀྱིས་ལྟོ་འགྲང་ལྷག་སྐྱོབ་ཙམ་གྱི་ཟས་གོས་ཀྱིས་ཆོག་ཤེས་པར་བྱས་ནས་དངོས་རྫས་གཞན་བསོག་འཇོག་མ་བྱས་ན་ཆོག་ཤེས་དེ་ཉིད་གཏོང་བའི་མཆོག་ཡིན་པས་འདོད་ཆུང་ཆོག་ཤེས་རེ་བྱེད་པ་གལ་ཆེ། ཆོག་ཤེས་མེད་པའི་རྟག་ཏུ་དཀོར་གྲོང་ཆོག་ཞིག་ལ་གཡེང་འདུག་པ་དེ་དང༌། ཁྱད་པར་དུ་གོས་སྣེ་གསུམ་གྱོན་ནས་ཚོང་ཁེ་སྐྱེད་ཀྱིས་དུས་འདའ་བ་དེ་ནི་བསྟན་པ་བཤིག་པའི་ཆོམ་རྐུན་དུ་སོང་བས་སོ་བྱང་སྔགས་གསུམ་གྱི་བསླབ་པ་དང་རྒྱབ་འགལ། ཉོ་ཚོང་ཁེ་སྐྱེད་བྱེད་པ་དེ་ལ་མི་དགེ་བ་བཅུ་ལས་མི་ཚངས་སྤྱོད་པ་མ་གཏོགས་ཐམས་ཅད་ཚང་བས་ཤིན་ཏུ་ཉེས་པ་ཆེ་གསུངས། ཚུལ་ཁྲིམས་ནི་སྡོམ་པ་གསུམ་གྱི་གནས་སྐབས་ཀྱི་སྤང་བྱ་ཐམས་ཅད་རྟག་ཏུ་དྲན་ཤེས་བག་ཡོད་ཀྱིས་གཅེས་སྤྲས་སུ་བལྟས་ཏེ་བསྲུང་བར་བྱ། ཁྱད་པར་དུ་རང་ལ་ཉེས་པ་གང་འབྱུང་ཉེ་བ་དེ་ལ་ཆེད་དུ་གཉེན་པོ་བསྟེན་ནས་སྤང་དགོས། ཚུལ་ཁྲིམས་དེ་ཡང་ཕྱི་ལུས་ངག་གི་ཀུན་སྤྱོད་ཙམ་ཞིག་གིས་གཞན་གྱི་མིག་སྔར་བཙུན་ཞིང་དུལ་དུལ་བྱས་པས་མི་འོང༌། མངོན་ལྐོག་མེད་པ་རང་སེམས་དཔང་པོར་འཛུག་ནུས་པ་ཞིག་ཨེ་ཐོན་བལྟ་དགོས། ཚུལ་ཁྲིམས་མ་དག་ན་ཉམས་རྟོགས་ཀྱི་ཡོན་ཏན་མི་སྐྱེ་བས་གཟབ་པར་བྱའོ། །བཟོད་པ་ནི། གཞན་གྱི་ལོག་སྒྲུབ། ཆོས་ཀྱི་ཕྱིར་དཀའ་ཚེགས་དང༌། སྡུག་བསྔལ་ཐམས་ཅད་ལ་སེམས་སྲན་ཐུབ་ཅིང་མི་འཁྲུགས་པ་དང༌། ཁྱད་པར་དུ་ཟབ་མོའི་དོན་ཤེས་པ་དང་ཉམས་སུ་ལེན་དཀའ་བའི་གནས་རྣམས་ལ་སྐྲག་ནས་འདི་འདྲ་བ་བདག་གིས་ཤེས་མི་ནུས་སོ། །ཉམས་སུ་ལེན་མི་ནུས་སྙམ་དུ་ཞུམ་པར་མི་བྱ་བར་སྔོན་གྱི་དུས་སུ་བླུན་པོ་བ་ལང་རྫིར་གྱུར་པའི་ཚེ། ཕྱི་ནས་མཁས་པ་པཎྜི་ཏར་གྱུར་པ་ཡང་ཡོད། སྡིག་རྒན་བླུན་པོ་འགའ་ཞིག་ཀྱང་ཆོས་ཟབ་མོ་རེ་ཉམས་སུ་བླངས་ནས་གྲུབ་པ་ཐོབ་སོང་བ་ཡང་དུ་མ་བཤད་རྒྱུ་ཡོད་ན་བདག་གིས་ཅིའི་ཕྱིར་མི་ཤེས། ཅིའི་ཕྱིར་ཉམས་སུ་མི་ལོན་སྙམ་དུ་སྙིང་སྟོབས་ཀྱི་སྤོབས་པ་བསྐྱེད་དགོས། ཁྱད་པར་དུ་ཁོང་ཁྲོ་ཚོགས་ངན། ནོག་མནའ་བཞེད་འདི་ནི་ཤིན་ཏུ་ཉེས་པ་ཆེ་སྟེ། སྡོམ་པ་དམ་ཚིག་ཐམས་ཅད་རལ། རང་གཞན་གྱི་རྒྱུད་འཚིག་ཁྱིམ་པ་རྣམས་ཀྱི་སེམས་སུན་འབྱིན་པར་འགྱུར་བས། ཡོན་ཏན་བརྒྱ་ཡོད་ཀྱང་སྐྱོན་གཅིག་པོ་འདིས་འོག་ཏུ་འགྲོ་བས་གཟབ་པར་བྱེད་དགོས། སྐྱེ་བོ་ཕལ་བ་ཞིག་གིས་ཁོང་ཁྲོ་དང༌། གྱོད་ལ་དཀྲི་བ་སོགས་བྱེད་གིན་ཡོད་ན་འདི་ལྟ་བུ་ལོས་བྱེད་སྙམ་པ་ལས་མེད་ཀྱང༌། ངུར་སྨིག་གི་གོས་བགོས་པ་ཞིག་གིས་དེ་ལྟར་བྱས་ན་ཀུན་གྱིས་ཁྲེལ་བའི་གནས་སུ་འགྱུར་བས་ཁོང་ཁྲོའི་དབང་དུ་མི་འགྱུར་བ་ཞིག་ལ་ཅི་ནུས་ཀྱང་བསླབ་དགོས། བརྩོན་འགྲུས་ནི། འཇིག་རྟེན་པའི་བྱ་བ་སྙིང་པོ་མེད་ཅིང་ཉེས་དམིགས་ཆེ་བ་དེ་རྣམས་ལ་ད་སྔ་ཡན་ཆད་འབད་པས་ཆོག་གི །ད་ནི་གཏན་གྱི་འདུན་མ་འགྲུབ་པའི་ཆོས་ཞིག་ཉམས་སུ་བླངས་པར་བྱ་སྙམ་དུ་སྙིང་ནས་སྤ་ྲོབར་བྱ་བ་དེ་ཡིན། དེ་འདྲའི་སྤ་ྲོབ་ཞིག་ཡོད་ན་ནི་ལུས་ངག་གཉིས་པོ་ཡང་ངམ་ངམ་ཤུགས་ཀྱིས་དགེ་བའི་ཕྱོགས་སུ་བཀོལ་བཏུབ་པ་ཞིག་འོང༌། སེམས་སྤྲོ་བ་ཅང་མེད་ན་ནི་ལུས་ངག་གིས་འཕྲལ་དུ་བརྩོན་པར་བྱས་ཀྱང་སྣ་སུན་པ་ལ་ཅང་མི་འགོར་བར་ཡང་ལེ་ལོའི་དབང་དུ་ཤོར་འགྲོ། དེས་ན་སེམས་འདི་ནི་ཀུན་ལ་དབང་པའི་རྒྱལ་པོ་དང་འདྲ། ངག་ནི་གོ་བརྡ་སྤྲོད་པའི་བློན་པོ་དང་འདྲ། ལུས་ནི་ལས་ཀུན་བྱེད་པའི་བྲན་དང་འདྲ་བས། སེམས་འདི་དམ་པའི་ཆོས་ཀྱི་ཕྱོགས་སུ་སྤྲོ་བ་ཞིག་བྱུང་ན། ལུས་ངག་གཉིས་པོ་ཡང་དེའི་དབང་དུ་གྱུར་ནས་དཀའ་ཚེགས་སྡུག་བསྔལ་ཅི་བྱུང་ཡང་མི་གནོད་པ་ཞིག་འོང་བས་སེམས་དགེ་བའི་ཕྱོགས་ལ་སྤྲོ་བ་དང༌། དོན་གཉེར་གྱི་འདུན་པ་འདི་གལ་ཆེ། ཆོས་ལ་མོས་འདུན་མེད་པའི་རིགས་རྣམས་ནི། དཔེར་ན་ནད་པ་ཟ་མ་ལ་ཡི་ག་ཆད་པ་རྣམས་ཀྱི་མདུན་དུ་བཟའ་བཏུང་ཅི་བཞག་ཀྱང་ཁར་རེ་རེ་བླངས་ཏེ་ཞེན་པ་ལོག་འདུག་པ་དེ་བཞིན། ཁ་ཏོན་བཟླས་བརྗོད། ཐོས་བསམ་སློབ་གཉེར། སྒོམ་ཉམས་ལེན་གང་ལ་ཁ་བསྐོར་ཀྱང་མོས་པ་མེད་པ་དེ་རྣམས་ལ་ཆོས་ཀྱི་སྐལ་བ་ཆད་པ་ཡིན་གསུངས། བསམ་གཏན་ནི། འདུ་འཛི་སྤངས་ཏེ་དབེན་པའི་གནས་སུ་རྩེ་གཅིག་པའི་ཏིང་ངེ་འཛིན་ལ་མཉམ་པར་བཞག་པ་དེ་ཡིན་པས། མི་མང་པོ་ཞིག་གི་ནང་དུ་བྱ་བ་སྣ་ཚོགས་བྱེད་ཞོར་དང༌། གཏམ་སྐད་ཆ་བཤད་ཞོར་ལ་ཟར་བལྟས་ཟུར་བལྟས་ཞིག་གིས་མི་འོང་དེར་མ་ཟད་གྲོང་ཆོག་གི་འདོན་པ་དེ་ཚོས་ཀྱང་སེམས་རྣལ་དུ་མི་འདུག་པར་ཡེངས་འགྲོ་བས་ཉམས་ལེན་ངོ་མ་ཞིག་བསམ་ན་དེ་ཐམས་ཅད་སྤང་དགོས། རི་ཁྲོད་དུ་བསྡད་ཀྱང་མང་པོ་ཡོད་ན་རྣམ་གཡེང་དང་ཆགས་སྡང་སྐྱེ། གཉིས་ཡོད་ཀྱང་གཏམ་དང་བཅས་པར་འགྱུར་བས་གཅིག་པུར་སྡོད་ཚུགས་ན་ཉམས་ལེན་ངང་གིས་འབྱུང་བ་ཡིན། བསྒོམ་རྒྱུའི་དངོས་གཞི་ནི། སྔོན་འགྲོ་དུས་ཀྱི་བློ་སྦྱོང་རྣམས་དང༌། དངོས་གཞི་བར་དོ་དྲུག་གི་ཉམས་ལེན་གང་བསྒོམ་ཀྱང་དེ་ལས་གཞན་དུ་སེམས་མ་ཡེངས་པ་ཞིག་དགོས། གལ་ཏེ་དེ་ལྟར་དབེན་པའི་གནས་སུ་རྟག་ཏུ་འདུག་མ་ནུས་ཀྱང༌། ཚེ་གཅིག་གི་རིང་ལ་དཀོར་བརྡ་གིན་མི་འདུག །རྒྱུ་བསོགས་གིན་མི་འདུག །རང་གིས་རང་ལ་བསམ་བློ་རེ་གཏོང༌། ཕྱི་མ་ཕན་ཆད་ལ་འདང་རེ་བརྒྱབ་ནས་རྟག་ཏུ་དྲན་ཤེས་བག་ཡོད་བརྟེན་ནས་རང་གིས་དེ་སྔ་ཐོབ་པའི་མན་ངག་གང་ཡིན་ཀྱང་དེའི་ཉམས་ལེན་རེ་ལ་བརྩོན། རྟག་ཏུ་སྐྱོ་ཤས་ངེས་འབྱུང༌། འཆི་བ་མི་རྟག་པའི་དྲན་འདུན་དེ་ཚོ་མི་བརྗེད་པར་བྱ། ནམ་ཁོམ་ཁོམ་དུ་ཐུན་རེ་བསྡམ། ཐུན་མཚམས་རྣམས་སུའང། ཐུན་གྱི་དུས་སུ་ཇི་ལྟར་བསྒོམ་པ་དེའི་ངང་མ་ཤོར་བར་བྱ། ཟླ་མཚམས་ལོ་མཚམས་ཙམ་རེ་ལའང་བསྡད་དེ་ཉམས་ལེན་ལ་བརྩོན་ན་བསམ་གཏན་ཞེས་བྱ། ཤེས་རབ་ནི། སྤྱིར་ཐོས་བསམ་སྒོམ་པའི་ཤེས་རབ་ཐམས་ཅད་ཡིན་པས་རྒྱུད་ལ་སྐྱེད་པར་བྱ་དགོས་མོད། འོན་ཀྱང་ཆོས་ཀྱི་གནད་མ་ཟིན་པར་ཚིག་ཙམ་ལ་འཆེལ་ནས་ཧ་ཅང་རྟོག་གེ་བྱེད་ཆེ་ན་ཐམས་ཅད་འགལ་འདུ་ཅན་དུ་སོང་ནས་ཅི་ལ་ཡང་ཡིད་མི་ཆེས་པ་དེ་འདྲ་འབྱུང་ཉེན་ཆེ། དེས་ན་བླ་མའི་མན་ངག་གི་གནད་ཟབ་མོ་རེ་མ་ཤེས་ན། གཞུང་པོ་ཏི་མང་པོ་རྫོགས་པའི་མཁས་པ་ཚོའི་ནང་ནའང་ད་དུང་གནས་ལུགས་ཀྱི་ངོ་བོ་སྐྱོང་ཚུལ་ལ་བློ་ཁ་ཕྱོགས་མི་ཤེས་པ་དེ་འདྲ་བ་ཡོད་པས་ཐ་སྙད་ཀྱི་རྣམ་གྲངས་རྒྱ་ཆེན་པོ་དང༌། ཚིག་གི་སྤྲོས་པ་ཤེས་པ་ལས་ཆོས་ཉམས་སུ་ལེན་ཚུལ་གྱི་གནད་དོན་མ་ནོར་བ་རེ་འཛིན་ཤེས་ན་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་གསུངས། དེ་ནས་སྡིག་སྒྲིབ་སྦྱོང་བར་བྱེད་པ་བླ་མ་རྡོ་རྗེ་སེམས་དཔའི་བསྒོམ་བཟླས་ནི། སྤྱིར་སྡིག་པ་བཤགས་པར་བྱེད་པ་ལ་གཉེན་པོ་སྟོབས་བཞི་ཚང་ན་སྡིག་པ་ལྷག་མེད་དུ་འདག་མ་ཚང་ན་མི་འདག་པས་སྔོན་གྱི་དམ་པ་རྣམས་ཀྱིས་ཀྱང་སྤྱིར་སྡིག་པ་ལ་ཡོན་ཏན་མེད་ཀྱང༌། བཤགས་ན་འདག་པ་སྡིག་པའི་ཡོན་ཏན་ཡིན་གསུངས། གལ་ཏེ་ཁ་ཙམ་གྱིས་སྡིག་བཤགས་ཀྱི་ཚིག་ཙམ་བཏོན་ནའང་ཅུང་ཟད་སྲབ་པར་གསུངས་ཀྱང་འདག་མི་ནུས། སྡིག་ལྟུང་ཚུལ་བཞིན་བཤགས་པ་ལ་ཐབས་མང་པོ་ཞིག་གསུང་པ་ལས་རྡོ་རྗེ་སེམས་དཔའི་སྒོམ་བཟླས་འདི་ཤིན་ཏུ་ཟབ་སྟེ། སྔོན་བྲམ་ཟེ་དུང་གི་ཕྲེང་བ་ཅན་ཞེས་བྱ་བ་ཞིག་ལ། སློབ་མ་རྒྱལ་བུ་དགེ་མཐོང་ཞེས་བྱ་བ་ཞིག་ཡོད་པ་དེས་ཕྲག་དོག་གི་བསམ་པས་རང་གི་སློབ་དཔོན་ལ་མི་འཚམ་པའི་ལས་རྔམ་པོ་ཆེ་བྱས་པ་ལ། སློབ་དཔོན་དེས་ཀྱང་དེ་ལ་ཁོང་འཁྲུགས་ནས་དམོད་ངན་བོར་བས། ལས་དེས་དཔོན་སློབ་གཉིས་ཀ་དམྱལ་བའི་གནས་སུ་ལྟུང་ངོ༌། །དེའི་ཚེ་དེ་བཞིན་གཤེགས་པ་ཐམས་ཅད་བཀའ་བགྲོས་ཏེ་དཔལ་རྡོ་རྗེ་སེམས་དཔའ་བྱོན་ནས་ཉམས་ཆགས་ཐམས་ཅད་སྐོང་བའི་རྒྱལ་པོ་ན་རག་དོང་སྤྲུགས་ཀྱི་གདམས་པ་བསྟན་ནས་རིམ་གྱིས་རིག་འཛིན་གྱི་ས་ལ་འགོད་པར་མཛད་དོ། །དེ་ལྟ་བུའི་གདམས་པ་ཟབ་མོའི་དོན་འདིར་གནད་བསྡུས་ཏེ་ཉམས་སུ་ལེན་པ་ལ། རྟེན་གྱི་སྟོབས་ནི། རང་ཉིད་ཐ་མལ་དུ་གནས་པའི་སྤྱི་བོར་མདའ་གང་ངམ་ཁྲུ་གང་གི་སྟེང་གི་ནམ་མཁར་པདྨ་དཀར་པོ་འདབ་མ་སྟོང་དུ་བརྡལ་བའི་སྟེང་ཟེའུ་འབྲུའི་ཚད་དང་མཉམ་པའི་ཟླ་བའི་དཀྱིལ་འཁོར་ཆ་ཤས་ཡོངས་སུ་རྫོགས་པའི་ཉ་གང་བ་ཞིག་བསམ། དེའི་དབུས་སུ་ཧཱུྃ་ཡིག་དཀར་པོ་འོད་ཟེར་བཀྲག་མདངས་འབར་བ་ཞིག་བསམ། དེ་ཉིད་ཡོངས་སུ་གྱུར་པ་ལས་བླ་མ་རྡོ་རྗེ་སེམས་དཔའ་སྐུ་མདོག་དཀར་པོ་ཤེལ་གཙང་མའི་མདོག་ལྟ་བུ་ཞལ་གཅིག་ཕྱག་གཉིས། གཡས་རིག་སྟོང་གི་རྡོ་རྗེ་རྩེ་ལྔ་པ་ཐུགས་ཀར་གཏོད་པའི་ཚུལ་དུ་འཛིན་པ། གཡོན་སྣང་སྟོང་གི་དྲིལ་བུ་དཀུ་ལ་བརྟེན་པ། ཞབས་གཉིས་གཡས་ཅུང་ཟད་བརྐྱང་པའི་ཕྱེད་སྐྱིལ་དུ་བཞུགས་པ། སྐུ་ལ་ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་གྱིས་བརྒྱན་པ་སྟེ། དེ་ཡང་དར་གྱི་ཆས་གོས་ལྔ་དང༌། རིན་པོ་ཆེའ་ིརྒྱན་བརྒྱད་དེ། དར་གྱི་ཆས་གོས་ལྔ་ནི། དར་དཀར་པོའི་སྟོད་གཡོག །ཚི་གུས་སྨད་དཀྲིས་ཁྲ་བོའི་སྐུ་རེགས་བཅིང་ནས་ཁ་སོ་གདན་གྱི་སྟེང་ལ་སླེབ་པ། དར་མཐིང་ཁྲའི་རྒྱབ་དར། དར་དཔྱང་སྙན་གོང་གཡས་གཡོན་གྱི་མདུན་དུ་དཔྱང་པའི་ཅོད་པན་ཏེ་འཕན་གཉིས་གཅིག་ཏུ་བརྩིས་ཏེ་ལྔའོ། །རྒྱན་བརྒྱད་ནི། རིན་པོ་ཆེའི་དབུ་རྒྱན། སྙན་རྒྱན་གཉིས་གཅིག་ཏུ་བརྩིས་པ། མགུལ་རྒྱན། དཔུང་རྒྱན་གཉིས་གཅིག་ཏུ་བྱས་པ་སེ་མོ་དོ་དང་དོ་ཤལ་གཅིག་ཏུ་བྱས་པ་སྟེ་རིན་པོ་ཆེ་ཚར་དུ་བརྒྱུས་པའི་ཁུག་མགོ་ནུ་སྟེང་དང༌། སྣེ་གཉིས་མགུལ་རྒྱབ་ཏུ་བསྣོལ་ནས་མདུན་གཡས་གཡོན་དུ་དཔྱང་པ། ཕྱག་ཞབས་ཀྱི་གདུ་བུ་ཐམས་ཅད་གཅིག་ཏུ་བྱས་པ། སོ་གདུབ་རྣམས་གཅིག་ཏུ་བྱས་པ། སྐུ་རེགས་ཏེ་བརྒྱད་དོ། །རྡོ་རྗེ་སེམས་དཔའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ། དབུས་སུ་ཧཱུྃ་དཀར་པོ་བཀྲག་མདངས་དང་ལྡན་པ། དེའི་མཐར་གཡོན་བསྐོར་གྱིས་མདུན་དུ་ཨོཾ་ནས་བརྩམས་ཏེ་རིམ་པ་གསུམ་དུ་བྱས་པའི་མཇུག་གི་ཨ༔ ཡང་ཧཱུྃ་གི་མདུན་དུ་ཡོད་པར་བསམ། དེ་ལྟར་བསྒོམ་ཚུལ་འདི་ཀུན་འདུས་ནོར་བུའི་ལུགས་ཞེས་བྱ་སྟེ། བླ་མ་རྡོ་རྗེ་སེམས་དཔའ་ནི། རྩ་བརྒྱུད་ཀྱི་བླ་མ་ཐམས་ཅད་དང༌། བཅོམ་ལྡན་འདས་རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་ཐམས་ཅད་དང༌། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་འདུས་པའི་བདག་ཉིད་ཡིན། དེ་ཁོ་ན་ལ་གསོལ་བ་བཏབ་ན། དེ་ཐམས་ཅད་ཀྱི་ཐུགས་རྗེའི་བྱིན་རླབས་ཐམས་ཅད་འཇུག་པར་འགྱུར་ཏེ། དཔེར་ན་རྒྱ་མཚོའི་ཆུ་བཏུང་ན་གླིང་བཞིའི་ཆུ་ཐམས་ཅད་བཏུང་བར་གྱུར་པ་དང་འདྲའོ། །སུན་འབྱིན་པའི་སྟོབས་ནི། སྔར་བྱས་ཀྱི་སྡིག་པ་ལ་སྙིང་ཐག་པ་ནས་ཉེས་དམིགས་དྲན་ནས་འགྱོད་པ་བྱེད་པ་སྟེ། སྡིག་པའི་རྣམ་གྲངས་དཔག་ཏུ་མེད་ཀྱང༌། བསྡུས་ཏེ་སེམས་ཐོག་ཏུ་ལེན་རྒྱུ། མི་དགེ་བ་བཅུ་མཚམས་མེད་ལྔ། ཉ་ེབའི་མཚམས་མེད་ལྔ། ལྕི་བ་བཞི། ལོག་པ་བརྒྱད། ཕྱི་སོ་ཐར་གྱི་འདུལ་ཁྲིམས་དང་འགལ་བ། ནང་བྱང་སེམས་ཀྱི་བསླབ་པ་དང་འགལ་བ། གསང་བ་རིག་འཛིན་སྔགས་ཀྱི་དམ་ཚིག་དང་འགལ་བ། ཁྱད་པར་རྡོ་རྗེའི་མཆེད་ལ་ནང་འཐབ་བྱས་པ་དང༌། བླ་མའི་བཀའ་བཅག་སྟེ་ཁ་དུད་དང་སྣ་དུད་འཐེན་པ་འདི་ཉེས་པ་ཆེ་སྟེ། སྔོན་བླ་མ་མཚམས་པ་རིན་པོ་ཆེས་ཀྱང་སྣ་དུད་ཀྱི་ཉེས་པ་འདི་ཡང་ཡང་གསུངས། ཡང་དགོས་བླ་སེར་ཞིག་སྣ་དུད་འཐེན་ན་མ་རབས་ཀྱི་སྤྱོད་པ་ཞིག་ལ་དེ་བས་ཐུ་བ་མེད། སྤྱིར་སྣ་དུད་ཀྱི་ཉེས་པ་ཆགས་ཞེན་དང་སྲེད་པ་རྒྱུན་མི་འཆད། རྫུན་ངག་འཆལ་ལ་སོགས་པའི་ཉེས་པའི་སྣ་འདྲེན། ཤི་བའི་དུས་སུའང་ལས་ཀྱི་མུན་པ་མཐུག་པོས་བསྒྲིབས་ནས་ཐར་པའི་ལམ་མི་མཐོང༌། བླ་མས་འཕོ་བ་མི་ཐེབ། ཆོས་ཀྱི་སྣང་བ་མི་རྙེད་པ་སོགས་དཔག་ཏུ་མེད། དེས་ན་བླ་སེར་ཞིག་གི་ནང་ན་སྣ་དུད་འཐེན་མཁན་ཞིག་ཡོད་ན་དེ་གཏིང་ནས་ཐུགས་ཁྲེལ་བར་མཛད། མ་བརྟགས་ན་མི་དགེ་བ་བཅུ་བདག་གིས་ཅང་མ་བྱས་སྙམ་པ་ཡོད་ཀྱང༌། བརྟགས་ན་གྲོང་ཆོག་ལ་འགྲོ་མཁན་ཞིག་ཡིན་ཕྱིན་ཆད་སེམས་ཅན་གྱི་སྲོག་ལ་དབང་བ་གྲངས་ཀྱིས་མི་ཆོད། ཡང་ཚོང་ལྟ་བུ་གཅིག་ལ་མཚོན་ན་སྔར་བཤད་པ་བཞིན། རང་ལ་ཡོད་པའི་དངོས་པོ་བཙོང་རྒྱུ་དེ་ལ་བསྟོད་ར་དང༌། གཞན་ལ་ཡོད་པའི་དངོས་པོ་ཉོ་རྒྱུ་དེ་བཟང་ཡང་ངན་ནོ་ཞེས་སྨད་པ་བྱེད་པས་མཚོན་རྫུན་དང༌། རྟག་ཏུ་ཆགས་ཞེན་གྱིས་ཚོང་གི་དོན་དུ་ལྔ་ཟ་བཅུ་འབོད་ལ་སོགས་པའི་གཏམ་སྣ་ཚོགས་བཤད་པའི་ངག་འཁྱལ། གཞན་གཉིས་ཚོང་བྱེད་པ་ལ་ཚོང་བར་དུ་བུད་ནས་དེ་ལ་མ་བཙོངས། དེས་རིན་ཇི་བཞིན་མི་སྟེར། ང་ལ་ཚོང་ཟེར་བ་སོགས་ཕྲ་མ། ཉོ་ཚོང་བྱེད་པ་དང༌། དོམ་བསྙེགས་དེད་སོགས་ཀྱི་དུས་གཅིག་ལ་གཅིག་གིས་ཚིག་རྩུབ་སྨྲ་བ་སྟེ་ངག་གི་བཞི་ཡང་ཚང༌། ཡང་མི་རི་གོང་མོ་ཆེ་བརྒྱབ་ནས་གཞན་བསླུས་ཏེ་ལེན་པས་མ་བྱིན་ལེན། དེང་སང་ཤ་འདི་རིན་ཆེན་པོ་བྱིན་ནས་ཉོས་ན་སེམས་ཅན་མང་པོའི་སྲོག་ལ་འཚེ་བར་འགྱུར། ཉོ་ཚོང་བྱེད་རྒྱུའང་འབྲི་དང་ཁལ་ཁ་མཐོ་སོགས་སེམས་ཅན་དུད་འགྲོ་ཞིག་ཕར་ཉོ་ཚུར་ཚོང་བྱས་ཕན་ཆད་དེ་ཀུན་བཤས་རའི་ནང་དུ་ཚུད་འགྲོ་བས་དངོས་སུ་བསད་པ་དང་ཁྱད་མེད་པས་སྲོག་གཅོད་མང་པོ་འབྱུང༌། ཕ་རོལ་གྱི་རྒྱུ་རྫས་དེ་ཉིད་ཐབས་སྣ་ཚོགས་ཀྱིས་རང་གིས་ལེན་འདོད་ཀྱི་བརྣབ་སེམས། ཕ་རོལ་པོ་ཕམ་འདོད་སོགས་ཀྱི་གནོད་སེམས། ཚོང་ལ་ཉེས་པ་དེ་ཙམ་ཅི་ཡོད་སྙམ་པ་དང་ཡང་དགོན་ནང་གི་བླ་སེར་ཚོ་ཚོང་བྱས་དུས་རང་ཕམ་ཡོད་ན་དེའི་བླ་མ་གྲྭ་པ་དེ་ཚོ་དགེ་སྡིག་མེད་པ་རེད་ཟེར་བ་དང༌། དེར་མ་ཟད་དེའི་དགོན་པ་ཐམས་ཅད་ལ་དགེ་སྡིག་ཅང་མེད་ཟེར་ནས་སྐུར་བ་འདེབས་པའི་ལོག་ལྟ་སྟེ་ལུས་ཀྱི་གཉིས་དང༌། ཡིད་ཀྱི་གསུམ་པོ་ཡང་ཚང༌། ཚོང་དེའི་དབང་གིས་ཉེས་པ་རང་རྒྱུད་ལ་འབྱུང་བར་འགྱུར་བས་བླ་སེར་ཞིག་གི་རྒྱུད་ཆུད་ཟོས་སུ་འགྲོ་བ་ལ་ཚོང་འདི་ལས་ཐུ་བ་མེད། དགེ་སེམས་བཟང་པོ་རེ་ཨེ་སྐྱེ་སྙམ་ན་ཚོང་བྱེད་པ་འདི་སྤང་དགོས་ཏེ། དེ་མ་སྤང་ན་ཉིན་མཚན་ཐམས་ཅད་དུ་དེ་ཁོ་ན་ལ་སེམས་གཡེངས། སྐྱོ་ཤས་དང་ངེས་འབྱུང་གི་བསམ་པ་ཐམས་ཅད་རྒྱུན་ཆད་དེ་དགེ་སེམས་ཏིལ་འབྲུ་ཙམ་མི་འབྱུང་བས་གཟབ་པར་བྱ། དེ་ལྟར་ཉེས་པའི་རྣམ་གྲངས་ཚེ་འདིར་རང་གིས་བྱས་པ་དྲན་པ་ཐམས་ཅད་སེམས་ཐོག་ཏུ་བླང༌། ཚེ་འདིར་དངོས་སུ་རང་གིས་བྱས་པ་མེད་པ་རྣམས་ཀྱང་ཚེ་རབས་སྔ་མ་རྣམས་སུ་བྱས་པ་གྲངས་ཀྱིས་མི་ཆོད་པས་དེ་ཐམས་ཅད་ལ་སྙིང་ནས་འགྱོད་པར་བྱ། རང་གི་དམ་ཚིག་དང་སྡོམ་པ་རྣམ་པར་དག་ཀྱང་ཆོས་གྲལ་གཅིག་ཏུ་ལྷན་དུ་འཚོགས་པའི་མི་མང་པོའི་ནང་ན་དམ་ཚིག་ཆགས་ཉམས་ཞིག་རལ་ཅན་དུ་མ་ཡོད་ན། དེ་དག་གིས་དངོས་གྲུབ་ལ་བར་དུ་གཅོད་དེ་ཟླས་ཉམས་ཞེས་བྱ་བ་ཡིན་པས་དེ་ལྟ་བུ་ལའང་དམིགས་དགོས། ཡང་སློབ་མ་དམ་ཚིག་ཉམས་པ་ཡོད་ན་དེའི་དམ་སེལ་གྱིས་བླ་མ་ལ་གནོད་དེ། རྗེ་འགྲོ་བའི་མགོན་པོ་ཉིད་ཀྱིས། ཁོང་སྐུ་ན་ཆུང་དུས་ནས་བཟུང་རྨི་ལམ་དུའང་རང་གིས་སྣ་དུད་འཐེན་པ་རྨིས་མ་མྱོང་ཡང༌། གཞན་གྱིས་འཐེན་པའི་དྲི་ཙམ་ཚོར་བ་རྨིས་ན་དེའི་ཉིན་པར་མི་འདོད་པ་སྣ་ཚོགས་འབྱུང་བར་གསུངས། འདི་མ་སྤངས་ན་རང་རེའི་བླ་མའི་བཀའ་བཅག་ཞིག་ལ་འདི་ལས་ཐུ་བ་མེད་པས་ཅིས་ཀྱང་གཟབ་པར་བྱའོ། །སྔོན་གྲུབ་ཐོབ་ཨོ་རྒྱན་པ་ཟེར་བ་ཞིག་གི་མདུན་དུ་སློབ་མ་དམ་ཉམས་ཞིག་འོང་བའི་རྐྱེན་གྱིས་ཐུགས་སྨྱོས་པ་སོགས་བྱུང་བར་བཤད་ན་ད་ལྟ་སྨོས་ཅི་དགོས། སྤྱིར་སྡིག་པ་འདི་ལ་རང་གི་བྱས་པ་དང༌། གཞན་ལ་བྱེད་དུ་བཅུག་པ་དང༌། བྱས་པ་ལ་རྗེས་སུ་ཡི་རང་བ་གསུམ་ལ་ཁྱད་པར་མེད་གསུངས་པས་དེ་ཐམས་ཅད་ལ་སྙིང་ནས་འགྱོད་པ་དྲག་ཏུ་བྱའོ། །ཀུན་ཏུ་སྤྱོད་པའི་སྟོབས་ནི། སེམས་ཅན་ཐམས་ཅད་ཀྱི་དོན་དུ་སྡིག་པའི་དངོས་པོ་དེ་ཐམས་ཅད་བཤགས་པར་བྱ་སྙམ་དུ་སེམས་བསྐྱེད་དེ། སྤྱི་གཙུག་པད་ཟླའི་གདན་སྟེང་སོགས་ནས། མ་ལུས་བྱང་བར་མཛད་དུ་གསོལ། །ཞེས་པའི་བར་བརྗོད་དེ་ཡིག་བརྒྱ་བཟླས་ནས། བདག་གིས་ཐོག་མེད་ནས་བསགས་པའི་སྡིག་སྒྲིབ་ཉམས་ཆགས་ཐམས་ཅད་དུས་ད་ལྟ་ཉིད་དུ་འདུག་ས་འདི་རུ་ལྷག་མ་མ་ལུས་པར་དག་པ་ཞིག་བླ་མ་རྡོ་རྗེ་སེམས་དཔའ་ཁྱེད་ཀྱིས་བྱིན་གྱིས་བརླབ་པར་མཛད་དུ་གསོལ་སྙམ་དུ་སྙིང་ནས་གསོལ་བ་བཏབ་པའི་རྐྱེན་གྱིས་བསྐུལ་ཏེ། ཐུགས་ཀར་སྔགས་ཕྲེང་གཡོན་དུ་བཀོད་པ་དེ་ཉིད་གཡས་སུ་འཁོར་བ་ལས་བདུད་རྩིའི་རྒྱུན་བབས་ཏེ་སྐུའི་དབྱིབས་བརྒྱུད། ཞབས་གཡས་པའི་མཐེ་བོང་གི་རྩེ་ལས་བྱུང་སྟེ་རང་གི་སྤྱི་བོ་ནས་མར་བབས་ཏེ་ལུས་ཀྱི་ནང་ཐམས་ཅད་བཀྲུ་བཤལ་བྱས་པ་བཞིན་ནད་ཐམས་ཅད་ཁྲག་རུལ་དང་རྣག་རུལ། གདོན་ཐམས་ཅད་སྲོག་ཆགས་སྦལ་སྦྲུལ་སྡོམ་སྡིག་ཉ་ལྕོང་ལ་སོགས་པའི་རྣམ་པ། སྡིག་སྒྲིབ་ཐམས་ཅད་དུད་ཁུ་དང་སོལ་ཁུའི་རྣམ་པར་འོག་སྒོ་གཉིས་དང་རྐང་མཐིལ་གཉིས་ནས་ནག་ནུར་གྱིས་ཐོན། རང་གི་མར་ཞབས་ཀྱི་ས་གས་པའི་འོག་ཏུ་འཆི་བདག་ལས་ཀྱི་གཤིན་རྗེ་ལ་འཁོར་ལན་ཆགས་ཀྱི་བདག་པོ་བདག་མོ་ཐམས་ཅད་ཀྱིས་བསྐོར་ཏེ་ཁ་ལག་སྦར་གསུམ་བཟེད་ནས་ཐམས་ཅད་ཟ་སྙམ་འཆའ་སྙམ་འགྲོགས་ནས་ཡོད་པའི་ཁ་ལག་སྦར་གསུམ་གྱི་ནང་སྔར་གྱི་ཁྲག་རུལ་སོགས་དེ་ལྟ་བུ་མ་ཡིན་པར་བདུད་རྩིའི་རང་བཞིན་དུ་གྱུར་ཏེ་བབས་པས་ཐམས་ཅད་ངོམ་ཞིང་ཚིམ། ལན་ཆགས་བྱང༌། བུ་ལོན་སོད། ཤ་འཁོན་བྱང༌། དུས་མ་ཡིན་པའི་འཆི་བ་ལས་བསླུས་པར་བསམ་ལ་ཡིག་བརྒྱ་བརྒྱ་སྟོང་སོགས་ཅི་ནུས་བཟླ། སྤྲོ་ན་ཞི་ཁྲོའི་ཀློང་བཤགས་རྒྱས་པ་འམ། བརྗོད་མེད་དོན་བཤགས། རུ་ཏྲའི་སྨྲེ་བཤགས། བདེ་གཤེགས་སྤྱི་བཤགས་སོགས་གསུམ་པོ་གང་འོས་བཏོན་མཐར་ཁ་ལག་སྦར་གསུམ་བཟེད་པ་ཡང་ཟུམ། ས་གས་པ་ཡང་སོས། རང་གི་ལུས་ཀྱང་ཕྱི་གསལ་ནང་གསལ་དུ་ཡོད་པར་བསམ། དེ་ནས་རྡོ་རྗེ་སེམས་དཔའི་སྐུ་ལས་བདུད་རྩིའི་རྒྱུན་བབས་པ། དབུ་མ་ནས་གྱེས་པའི་སྤྱི་བོ་བདེ་ཆེན་གྱི་འཁོར་ལོ་ན་རྩ་འདབ་སུམ་ཅུ་རྩ་གཉིས་གདུགས་ཀྱི་རྩིབ་མ་བཞིན་ཁ་མར་བསྟན་པ་དང༌། མགྲིན་པ་ལོངས་སྤྱོད་ཀྱི་འཁོར་ལོ་ན་རྩ་འདབ་བཅུ་དྲུག་ཡར་གྱུ་བ། སྙིང་ག་ཆོས་ཀྱི་འཁོར་ལོ་ན་རྩ་འདབ་བརྒྱད་མར་གྱུ་བ། ལྟེ་བ་སྤྲུལ་པའི་འཁོར་ལོ་ན་རྩ་འདབ་དྲུག་ཅུ་རྩ་བཞི་ཡར་བསྟན་པ་རྣམས་རིམ་གྱིས་གང་སྟེ་སྤྱི་བོའི་རྩ་འདབ་རྣམས་གང་ནས་བུམ་པའི་དབང་ཐོབ། དགའ་བའི་ཡེ་ཤེས་སྐྱེས། ལས་ཀྱི་སྒྲིབ་པ་དག །སྤྲུལ་པའི་སྐུ་ཐོབ་པར་བསམ། དེ་བཞིན་དུ་མགྲིན་པར་གསང་བའི་དབང་ཐོབ། མཆོག་དགའི་ཡེ་ཤེས་སྐྱེས། ཉོན་སྒྲིབ་དག །ལོངས་སྤྱོད་རྫོགས་པའི་སྐུ་ཐོབ་པར་བསམ། སྙིང་གར་ཤེས་རབ་ཡེ་ཤེས་ཀྱི་དབང་ཐོབ། ཁྱད་པར་གྱི་དགའ་བ་སྐྱེས། ཤེས་བྱའི་སྒྲིབ་པ་དག །ཆོས་ཀྱི་སྐུ་ཐོབ་པར་བསམ། ལྟེ་བར་ཚིག་གི་དབང་ཐོབ། ལྷན་སྐྱེས་ཀྱི་ཡེ་ཤེས་རྒྱུད་ལ་སྐྱེས། བག་ཆགས་ཀྱི་སྒྲིབ་པ་དག །ངོ་བོ་ཉིད་ཀྱི་སྐུ་ཐོབ་པར་བསམ། དེ་ནས་ཡང་བདུད་རྩིའི་རྒྱུན་བབས་པས་རང་གི་ལུས་ཀྱི་ནང་ཐམས་ཅད་སོར་མོའི་རྩེ་མོ་ཚུན་ཆད་དཀར་ལྟེམ་གྱིས་ཤེལ་བུམ་འོ་མས་གང་བ་བཞིན་དུ་གྱུར་པར་བསམ། སོར་ཆུད་པའི་སྟོབས་སྡོམ་སེམས་ཏེ། སྡོམ་སེམས་བརྟན་པོ་ཞིག་མེད་ན་སྡིག་པ་མི་འདག་པས། དེང་སང་སྡིག་པ་འགའ་རེས་ཁས་ལེན་བྱེད་དུས། སྡུག་མ་ཐུག་ན་མི་བྱེད་ཟེར་མཁན་ཡོད་ཀྱང་དེ་ལྟ་བུ་ཞིག་གིས་སྡིག་པ་འདགས་ཐབས་མེད་པས། ད་ཕྱིན་ཆད་ནི་སྲོག་ལ་བབས་ཀྱང་མི་བྱེད་སྙམ་པའི་སྡོམ་སེམས་དང་བཅས་བདག་ནི་མི་ཤེས་པའི་དབང་གིས་བསགས་པའི་སྡིག་སྒྲིབ་ཉེས་ལྟུང་འདི་ལས་རྡོ་རྗེ་སེམས་དཔའ་ཁྱོད་ཀྱིས་བསྐྱབས་ཏེ་སྡིག་སྒྲིབ་ཉེས་ལྟུང་བག་ཆགས་དང་བཅས་པ་ཐམས་ཅད་བྱང་ཞིང་དག་པ་ཞིག་བྱིན་གྱིས་བརླབ་པར་མཛད་དུ་གསོལ་སྙམ་དུ། བདག་ནི་མི་ཤེས་གཏི་མུག་སོགས་ནས། མ་ལུས་བྱང་ཞིང་དག་པར་མཛད་དུ་གསོལ། །ཞེས་པའི་བར་བརྗོད་པས་རྡོ་རྗེ་སེམས་དཔའ་ཞལ་འཛུམ་པ་དང་བཅས་དགྱེས་པ་ཆེན་པོས་འོད་དུ་ཞུ་ནས་རང་ལ་ཐིམ་པའི་རྐྱེན་གྱིས་རང་ཡང་སྐད་ཅིག་གིས་རྡོ་རྗེ་སེམས་དཔའི་སྐུར་གསལ་བའི་ཐུགས་ཀར་ཟླ་དཀྱིལ་གྱི་དབུས་སུ་ཧཱུྃ་མཐིང་ག །ཤར་དུ་ཨོཾ་དཀར་པོ། ལྷོ་རུ་བཛྲ་སེར་པོ། ནུབ་ཏུ་ས་དམར་པོ། བྱང་དུ་ཏྭ་ལྗང་གུ་རྣམས་གསལ་བ་ལས་འོད་ཟེར་ཁ་དོག་སྣ་ལྔ་འཕྲོས་པའི་རྩེ་ལས་མཆོད་རྫས་སྣ་ཚོགས་ཐོགས་པའི་མཆོད་པའི་ལྷ་མོ་དཔག་ཏུ་མེད་པ་འཕྲོས་ཏེ། རྒྱལ་པ་སྲས་དང་བཅས་པ་ལ་ཐུགས་མཉེས་པའི་མཆོད་པ་ཕུལ། དེ་རྣམས་ཀྱི་སྐུ་ལས་འོད་ཟེར་དཔག་ཏུ་མེད་པ་བྱུང་ནས་རང་གི་སྙིང་གའི་ཡིག་འབྲུ་རྣམས་ལ་ཐིམ། བྱིན་རླབས་དང་དངོས་གྲུབ་ཐམས་ཅད་ཐོབ་པར་བསམ། ཡང་ཡིག་འབྲུ་རྣམས་ལས་འོད་ཟེར་མར་འཕྲོས། འགྲོ་བ་དྲུག་གི་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་དང་བཅས་པ་བསལ་ནས་ཕྱི་སྣོད་ཀྱི་འཇིག་རྟེན་ཐམས་ཅད་མངོན་པར་དགའ་བའི་ཞིང་དུ་གྱུར། ནང་བཅུད་ཀྱི་དབུས་ན་གནས་པའི་སེམས་ཅན་རྣམས་བུདྡྷ་རྡོར་སེམས། ཤར་ན་གནས་པ་རྣམས་བཛྲ་རྡོར་སེམས། ལྷོར་གནས་པའི་འགྲོ་བ་ཐམས་ཅད་རཏྣ་རྡོར་སེམས། ནུབ་ཕྱོགས་ཀྱི་འགྲོ་བ་ཐམས་ཅད་པདྨ་རྡོར་སེམས། བྱང་ཕྱོགས་ཀྱི་འགྲོ་བ་ཐམས་ཅད་ཀརྨ་རྡོར་སེམས་སུ་གྱུར་ཏེ་ཐམས་ཅད་ཀྱིས་ཨོཾ་བཛྲ་ས་ཏྭ་ཧཱུྃ་ཞེས་པའི་སྒྲ་འུར་དིར་གྱིས་སྒྲོག་པར་བསམས་ལ་མང་དུ་བཟླ། མཐར་ཕྱི་སྣོད་ཀྱི་ཞིང་ཁམས་ཐམས་ཅད་ནང་བཅུད་ཀྱི་ལྷ་ཚོགས་རྣམས་ལ་ཐིམ། དེ་ནས་རིམ་པ་བཞིན་ནང་བཅུད་རྡོར་སེམས་རིགས་ལྔ་རང་ལ། རང་ཉིད་ཐུགས་ཀའི་ཡིག་གེ་ལ། ཡིག་འབྲུ་ལྔ་པོ་ཡང༌། ཨོཾ་བཛྲ་ལ། བཛྲ་ས་ལ། ས་ཏྭ་ལ། ཏྭ་ཧཱུྃ་གི་ཞབས་ཀྱུ་ལ། ཞབས་ཀྱུ་འ་ཆུང་ལ། འ་ཆུང་ཧ་ཁོག་ལ། ཧ་ཁོག་མགོ་བོ། མགོ་བོ་ཟླ་ཚེས། ཟླ་ཚེས་ཐིག་ལེ། ཐིག་ལེ་ན་ད། ན་ད་ཇེ་ཕྲར་སོང་ནས་མི་དམིགས་པའི་ངང་ལ་མཉམ་པར་བཞག །འདི་ནི་འགྱོད་ཚང་ཐམས་ཅད་ཀྱི་མཆོག་ཡིན་ཏེ། དྲང་པོར་འདུག་ལ་ཡང་དག་བལྟ། །འདི་ནི་འགྱོད་ཚང་མཆོག་ཡིན་ནོ། །ཅེས་གསུངས་སོ། །དེ་ནས་དགེ་བ་བསྔོ་བ་ནི། དགེ་བ་འདི་ཡིས་མྱུར་དུ་སོགས་སོ། །དེ་ནས་ཚོགས་བསགས་པ་མཎྜལ་གྱི་རིམ་པ་ནི། སྤྱིར་རང་རྒྱུད་ལ་ཉམས་རྟོགས་ཀྱི་ཡོན་ཏན་བཟང་པོ་ཞིག་སྐྱེ་བར་འདོད་ན། བཤད་མ་ཐག་པ་ལྟར་སྒྲིབ་པ་སྦྱོང་བ་དང༌། ཚོགས་བསགས་པ་གཉིས་གལ་ཆེ་སྟེ། དོན་དམ་ལྷན་ཅིག་སྐྱེས་པའི་ཡེ་ཤེས་ནི། །ཚོགས་རྫོགས་སྒྲིབ་པ་དག་པའི་ལག་རྗེས་དང༌། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བརྟེན་པ་རྨོངས་པར་ཤེས་པར་བྱ། །ཞེས་པ་ལྟར་རོ། །དེས་ན་བླ་སེར་གྲོང་ཆོག་མཁན་རྣམས་ཀྱིས་ཀྱང་རང་གི་མཚམས་སྒྲུབ་ཀྱི་ཆ་རྐྱེན་ཟས་གོས་ཙམ་མ་གཏོགས་ལྷག་མ་ཅི་ཡོད་ཡར་མཆོད་མར་སྦྱིན་རེ་བྱེད་དགོས་ཀྱི། ནོར་རྫས་ལ་ཞེན་ཆགས་ཀྱིས་བསོགས་ནས་སྦྱིན་གཏོང་ཅི་ཡང་མི་བྲ་བར་ཤི་ན་འདྲེ་ངན་གདུག་པ་ཅན་དུ་སྐྱེས་ནས་རང་གི་ལོངས་སྤྱོད་གར་ཡོད་དུ་འཁྲིས་ནས་ཐམས་ཅད་ལ་གནོད་པར་འགྱུར་ཞིང་མཐར་ངན་སོང་དུ་སྐྱེ་བས་ཕུང་ཚབས་དེ་ལས་ཆེ་བ་མེད། ལོངས་སྤྱོད་མང་པོའི་བསོགས་བྲུན་བྱེད་པ་འདི་ཐུབ་པ་བཅོམ་ལྡན་འདས་ཀྱི་རྗེས་འཇུག་གི་ལུགས་མིན་པས་སྤང་དགོས་ལ། དེང་སང་ནི་བན་རྒན་རྩ་མེད་བདག་མེད་རྒས་ཤིང་འཁོགས་པ་རྣམས་ཀྱིས་ཀྱང་འཆི་སྙམ་ཡིད་ལ་མི་སྐྱེད། འབྲི་མང་པོ་དང༌། རྒྱ་དངུལ་རྡིལ་ཚད་མང་པོ་ཡོད་ཀྱང་མཆོད་སྦྱིན་ལྟ་ཅི་རང་གི་ཁ་ཟས་རྒྱབ་གོས་ཙམ་ཡང་མི་བྲ་བར་ཆགས་ཞེན་གྱིས་འཆང་འདུག་པའི་མི་དེ་ཚོ་འཆི་བའི་གནས་སྐབས་ན་ནི་འབྲི་རྒན་གཅིག་ཙམ་མི་དགོས་སྤུ་ཤར་གཅིག་དང༌། དངུལ་སྐར་མ་གང་ཙམ་ཡང་ཁྱེར་དབང་ནི་མེད། ཤུལ་མི་དག་གིས་འཇིག་རྟེན་པས་མི་ཁྲེལ་བ་ཙམ་གྱི་དོན་དུ་གནད་དུ་མ་སོང་བའི་ཆོས་ཕྱོགས་སུ་ཅུང་ཟད་རེ་བཏང་ན་ཡང་ཕན་པ་ཆུང༌། ཕལ་ཆེར་ནི་གཞན་དོན་མེད་ཀྱི་མི་མང་པོས་བགོ་བཤར་བྱེད་འགྲོ་བས་ད་ལྟ་རང་ལ་དབང་ཡོད་ཚེ་འདི་ལ་མཆོད་སྦྱིན་སོགས་བྱེད་པ་གལ་ཆེ། དེར་མ་ཟད་ཞེན་པ་མེད་རུང་རྫས་མང་པོ་ཡོད་ན་རང་རྒྱུད་ལ་སྒྲིབ་པར་འགྱུར་ཏེ། ཡང་རྡོ་ཡོན་སོགས་གཞན་ལ་སྦྱིན་རྒྱུ་ཞིག་ཡིན་ནའང་ཞག་ཆ་རེ་ལ་མ་བྱིན་པར་བཟུང་ན་རང་རྒྱུད་ལ་སྐྱོན་ཅུང་ཟད་འགོ་བར་འགྱུར་བ་ལ་རྒྱ་མ་ལ་བཀྱག་གྲངས་མང་ན་རྒྱ་མིག་ཟད་འགྲོ་བའི་དཔེ་ལྟ་བུ་ཡིན་པ་དཔལ་སྤྲུལ་རིན་པོ་ཆེས་གསུངས། དེས་ན་བསོག་འཇོག་སྤངས་ཏེ་མཆོད་སྦྱིན་སྤྱི་དང༌། ཁྱད་པར་དུ་ལག་པ་ནར་གྱིས་བརྐྱངས་པ་ལ་མཎྜལ་འདི་ཕན་ཡོན་ཆེ་བར་གསུངས་པས་སྔོན་གྱི་དམ་པ་དག་གིས་ཀྱང་འོ་བརྒྱལ་ལ་མ་འཛེམ་པར་མཎྜལ་གྱི་གཞི་བྱི་དོར་བྱེད་པ་ནའང་ཕྱག་གི་མཁྲིག་མའི་ནང་ཟད་དེ་རྨར་སོང་པ་ན་རྒྱབ་ནས་ཕྱི་བ་དང༌། ཕྱག་གཡས་གཡོན་བརྗེས་ནས་ཕྱི་བ་སོགས་མཛད། རྗེ་བདག་ཉིད་ཆེན་པོར་ཡང་རྡོའི་མཎྜལ་ཞིག་དབུལ་རྒྱུ་ཡོད་པ་དེ་ད་དུང་མཇལ་རྒྱུ་ཡོད་པ་དེ་བྱི་དོར་ཤིན་ཏུ་བྱས་པས་རིན་པོ་ཆེ་འདྲ་བར་ཡོད་གསུངས། མཎྜལ་གྱི་རྒྱུ་ནི། རབ་རིན་པོ་ཆེ་གསེར་དངུལ་སོགས་ཀྱི་གཞི་ལ་གཡུ་བྱུར་སོགས་ཀྱི་ཚོམ་བུ་དགོད། འབྲིང་ཟངས་རག་མཁར་བ་སོགས་ལ་སྨན་དང་འབྲུ་སོགས་ཀྱི་ཚོམ་བུ། ཐ་མ་ཤིང་ངམ་རྡོ་སོགས་ལ་བྱེ་མ་སོགས་ཀྱི་ཚོམ་བུ་བཀོད་དེ་ཕུལ་ན་ཡང་ཆོག་ཤེས་ཡོད་ཅིང་བསམ་པ་དག་ན་ཚོགས་རྫོགས་པ་ལ་ཁྱད་མེད། དཔལ་སྤྲུལ་རིན་པོ་ཆེས་ཀྱང་ཤིང་གི་མཎྜལ་ཞིག་ཕུལ་བར་མཛད། ཡང་དངོས་པོ་བཟང་པོ་ཡིན་ན་དེ་ལ་ནོར་དང་འཕྱོར་འདོད་ཀྱི་འདུ་ཤེས་བཞག་ནས་ཞེན་ཆགས་སྐྱེ་མི་རུང༌། ཚོམ་བུར་དགོད་རྒྱུའི་འབྲུ་སོགས་ཀྱང་སེར་སྣ་མི་བྱེད་པར་རྙིང་པ་མཆོད་ནས་གསར་བས་བརྗེ་དགོས། སྔོན་དཔལ་སྤྲུལ་རིན་པོ་ཆེས་འཇུ་མང་དགོན་དུ་སྤྱོད་འཇུག་གསུང་དུས་མཎྜལ་གྱི་ནང་གི་གསེར་གཡུ་མོད་པོ་དང་ཕྱིའི་ཐུམ་དང་བཅས་ཐམས་ཅད་མཆོད་པར་མཛད། ཁྱེའུ་ཡོལ་རིག་འཛིན་ཆེན་པོས་ལྷ་སའི་ཇོ་བོའ་ིམདུན་གསེར་གྱི་བྱེ་མ་མཆོད་པར་མཛད་པས་སྐུ་པང་དུ་རིང་བསྲེལ་བྱ་མོའི་སྒོ་ང་ཙམ་ཞིག་བབས་པ་ཕྱིས་སྐུ་གདུང་གི་མཆོད་རྟེན་ནང་དུ་བཞག །རིག་འཛིན་འཇིགས་མེད་གླིང་པས་ཇོ་བོའི་མདུན་དུ་གསེར་གྱི་མཎྜལ་ཕུལ་ཏེ་བྱང་སྡོམ་བླངས་པས་ཇོ་བོའི་མཛོད་སྤུ་ནས་འོད་བྱུང་ནས་མཁྱེན་བརྩེའི་ལྷ་ཞེས་གསུངས། ཡང་ཞབས་དཀར་ཚོགས་དྲུག་རང་གྲོལ་གྱིས་ཙཱ་རིའི་ལམ་དུ་དངུལ་རྡིལ་ཚད་བཅུ་གསུམ་གྱི་རིན་རྩིའི་གཡུ་བྱུར་སོགས་རིན་པོ་ཆེ་གཏོར་བས་ཙཱ་རི་བསྐོར་དུ་འགྲོ་བའི་མི་མང་པོའི་ཟླ་བ་དུ་མའི་གྲོ་ཁའི་ཆ་རྐྱེན་སོགས་ཡོད་པར་བཤད། དེས་ན་མཎྜལ་གྱིས་མཚོན་པའི་མཆོད་པ་ཐམས་ཅད་ནི་སེར་སྣའི་གཉེན་པོ་ཡིན་པས་སེར་སྣ་དང་འཇུར་འགགས་ཀྱིས་བཅིངས་པ་དང༌། ང་རྒྱལ་གྱིས་རློམ་པ་དང༌། གཞན་ལ་ངོམས་ཆོས་སུ་མ་སོང་བ་ཞིག་དགོས། སྤྱིར་རབ་ཏུ་བྱུང་བའི་གང་ཟག་གི་གོས་སྣེ་གསུམ་གྱོན་པ་ཞིག་ཡིན་ནས་བཟུང་ཆོས་དགེ་བའི་བསམ་པ་འདོད་ཆུང་ཆོག་ཤེས་ཞིག་ལ་བསླབ་པ་གལ་ཆེ། འདོད་ཆུང་ཆོག་ཤེས་ཞིག་ཡོད་ན་མཆོད་པ་ཐམས་ཅད་ཀྱི་མཆོག་ཡིན་པར་གསུངས། མཎྜལ་འབུལ་བ་དངོས་ལ། འཛོམ་ན་རང་གི་མདུན་དུ་སྟེགས་བུ་མཐོ་བ་ཞིག་གི་ཁར་སྒྲུབ་པའི་མཎྜལ་བཤམས་ཏེ་དེར་ཚོགས་ཞིང་བསྐྱེད་པའམ། ཡང་ན་མདུན་གྱི་ནམ་མཁར་རྒྱལ་པ་ཞི་ཁྲོའི་ལྷ་ཚོགས་ཐམས་ཅད་བཞུགས་པར་བསམ་ལ། མཆོད་པའི་མཎྜལ་འབུལ་ཚུལ་ནི། ལག་གཡོན་པའི་ནང་འབྲུ་དང་སྨན་སོགས་ཅུང་ཟད་ཅིག་བཟུང་ནས་མཎྜལ་གྱི་གཞི་བཏེགས་ནས་དེ་ཉིད་དབང་ཆེན་གསེར་གྱི་ས་གཞི་རྒྱ་ཁྱོན་ཤིན་ཏུ་ཡངས་པར་བསམས་པའི་སྟེང༌། དྲི་བཟང་གི་ཆུས་བྱུག་ཅིང་བརླན་པར་བྱས་ན་རང་རྒྱུད་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་བརླན་པའི་དགོས་པ་ཡོད། དེ་ནས་ལྕགས་རི་ཡོད་ན་འཇོག་ཅིང༌། མེད་ཀྱང་སྲིན་ལག་གིས་མཎྜལ་གྱི་མཐའ་ནས་གཡོན་དུ་བསྐོར་ནས་ཕྱིའི་ལྕགས་རིའི་ཁོར་ཡུག་ཏུ་བསྐོར་བ་སྟོང་གསུམ་གྱི་ཚད་དང་མཉམ་པར་བསམ། དབུས་སུ་ཚོམ་བུ་ཆེ་བ་གཅིག་བཀོད་དེ། དེ་ཉིད་རི་རྒྱལ་ལྷུན་པོ། གསེར་གྱི་རི་བདུན་དང༌། རོལ་པའི་མཚོ་བདུན་གྱིས་བསྐོར་བའི་རང་བཞིན་དུ་མོས། དེ་ནས་ཕྱོགས་མཚམས་ཀྱི་ཚོམ་བུ་རྣམས་རིམ་གྱིས་བཀོད་དེ། གླིང་བཞི་དང༌། གླིང་ཕྲན་བརྒྱད་པོ། དབྱིབས་ཟླུམ་པོ། སོག་ཀ ཟླ་གམ། གྲུ་བཞི་པའི་རྣམ་པར་བསམ་ཞིང༌། དེ་ཡང་ཤར་ལུས་འཕགས་གླིང་ཤེལ་ལས་གྲུབ་པ། ལྷོ་འཛམ་བུ་གླིང་བཻ་ཌཱུརྱ་ལས་གྲུབ་པ། ནུབ་བ་ལང་སྤྱོད་པདྨ་ར་གའམ་བྱུ་རུ་ལས་གྲུབ་པ། བྱང་སྒྲ་མི་སྙན་གསེར་ལས་གྲུབ་པ་སྟེ། རང་རང་གི་གླིང་ཕྲན་རྣམས་ཀྱང་དེ་བཞིན་དུ་བསམ་མོ། །ཤར་གླིང་གི་སྟེང་གི་ནམ་མཁར་ཉི་མའི་དཀྱིལ་འཁོར་མེ་ཤེལ་ལས་གྲུབ་པ་དཔག་ཚད་གཅིག་པ། ནུབ་གླིང་གི་སྟེང་གི་ནམ་མཁར་ཟླ་བའི་དཀྱིལ་འཁོར་ཆུ་ཤེལ་ལས་གྲུབ་པ་དཔག་ཚད་ལྔ་བཅུ་པ། ལྷོར་སྒྲ་གཅན་ཆུ་སྲིན་གྱི་མགོ་བོ་ཅན། བྱང་དུ་དུས་མེ་སྤྱང་ཀིའི་མགོ་བོ་ཅན། དེ་གཉིས་ཀྱི་བར་སྒྲ་གཅན་གྱི་ལུས་དངོས་མེད་དམ་ཤེལ་དུ་ཡོད་པར་མོས། དེ་རྣམས་ན་ལྷ་དང་མིའི་ལོངས་སྤྱོད་ཀྱི་འབྱོར་བ་དཔག་ཏུ་མེད་པས་གང་བར་དམིགས་ཏེ། མཆོག་གསུམ་རྒྱལ་བ་ཞི་ཁྲོའ་ིལྷ་ཚོགས་འཁོར་དང་བཅས་པ་རྣམས་ལ་ཕུལ་བར་བསམ། དེ་ནས་སྐུ་གསུམ་གྱི་མཎྜལ་ནི། དང་པོ་སྤྲུལ་སྐུའི་མཎྜལ་གླིང་བཞི་རི་རབ་ཉི་ཟླ་དང་བཅས་པ་བྱེ་བ་ཕྲག་བརྒྱ་སོགས་མང་པོར་བསམས་ནས་ཚོམ་བུ་བདུན་བཀོད་དེ་སྤྲུལ་སྐུའི་ལྷ་ཚོགས་རྣམས་ལ་འབུལ། དེ་སྟེང་ལོངས་སྐུའི་མཎྜལ་རང་གི་ལུས་ཀྱི་ཟོ་ཁོག་རིའི་རྒྱལ་པོ་རི་རབ། ཡན་ལག་བཞི་གླིང་བཞི། ཉིང་ལག་རྣམས་གླིང་ཕྲན་བརྒྱད། མིག་གཉིས་ཉི་མ་དང་ཟླ་བ། མགོ་བོ་རྣམ་པར་རྒྱལ་བའི་ཁང་བཟང༌། སྙིང་ཡིད་བཞིན་གྱི་ནོར་བུ། དོན་སྣོད་རྣམས་ལྷ་མིའི་ལོངས་སྤྱོད་དུ་དམིགས་པའམ། ཡང་ན་ཟོ་ཁོག་རིན་པོ་ཆེའི་གཞལ་མེད་ཁང༌། ཡན་ལག་བཞི་སྒོ་བཞི། ཉིང་ལག་རྣམས་རྟ་བབས། དབང་པོ་རྣམས་རིན་པོ་ཆེའི་རྒྱན། ཁམས་དང་སྐྱེ་མཆེད་ཐམས་ཅད་རིགས་ལྔའི་ཚོམ་བུ་ལྷ་དང་ལྷ་མོར་དམིགས་ནས་ཚོམ་བུ་ལྔ་བཀོད་ནས་བླ་མ་ལོངས་སྐུའི་ལྷ་ཚོགས་རྣམས་ལ་འབུལ། དེ་སྟེང་ཆོས་སྐུའི་མཎྜལ་སེམས་ཉིད་སྐྱེ་མེད་ཀྱི་གཞི་ལ། ཡེ་ཤེས་ལྔའི་རྩལ་འགགས་མེད་དུ་འཆར་བའི་ཚོམ་བུས་བརྒྱན་པར་དམིགས་ཏེ་ཚོམ་བུ་བཀོད་ལ་བླ་མ་ཆོས་སྐུའི་ལྷ་ཚོགས་རྣམས་ལ་དབུལ་བྱ་འབུལ་བྱེད་མེད་པའི་ངང་དུ་དབུལ་ལོ་སྙམ་པའི་སྒོ་ནས། ཨོཾ་བཛྲ་བྷུ་མི་སོགས་ནས་འབུལ་སྔགས་ཀྱི་བར་དང༌། ཡང་ཨོཾ་ཨཱཿཧཱུྃ་ཕྱི་ནང་སྣོད་བཅུད་སྟོང་གསུམ་སོགས་མན་ཆད་ཅི་ནུས་སུ་འདོན། གྲངས་བསོགས་ཚེ་མཚམས་མཚམས་སུ་གོང་ལྟར་རྒྱས་པ་རེ་ཕུལ་ནས། ས་གཞི་སྤོས་ཆུས་སོགས་ཚོམ་བུ་བདུན་མ་བཅས་འབུམ་ཐེར་ཙམ་འགྲོ་ངེས་བྱའོ། །དེ་ནས་བྱིན་རླབས་བཙན་ཐབས་སུ་འཇུག་པ་བླ་མའི་རྣལ་འབྱོར་ནི། དང་པོ་བརྟེན་བྱའི་བླ་མ་དེ་ཉེ་རིང་ཀུན་ནས་ལེགས་པར་བརྟགས་ཏེ་མཚན་ཉིད་དང་ལྡན་པར་མཐོང་ན་བརྟེན་པར་བྱ་དགོས་ཀྱི། ཁྱི་དང་གློ་བ་འཕྲད་པ་བཞིན་མ་བརྟགས་པར་བརྟེན་ན་གཏན་གྱི་འདུན་མ་བརླགས་པར་འགྱུར་ཏེ། ཟོག་པོ་བསླུ་བྲིད་ཅན་གྱི་རིགས་དང་འཕྲོད་ན། དེ་ལས་ཡོན་ཏན་གསར་དུ་རང་རྒྱུད་ལ་མི་འབྱུང་བར་མ་ཟད། སྔར་ཡོད་ཀྱི་ཡོན་ཏན་རྣམས་ཀྱང་མེ་ཏོག་སད་ཀྱིས་བཏབ་པ་བཞིན་དུ་ཉམས་པར་འགྱུར་བས་གཟབ་པར་བྱ་དགོས། བརྟེན་པར་བྱ་བའི་བླ་མ་ནི། བྱང་ཆུབ་ཀྱི་སེམས་རིན་པོ་ཆེ་ཐུགས་རྒྱུད་ལ་འཁྲུངས་ཤིང་བརྒྱུད་པའི་བྱིན་བརླབས་དང་ལྡན་ལ། གཞན་ལ་ཕན་པའི་དོན་དུ་བརྩོན་པ་ཞིག་ཡིན་ཕྱིན་ཆད་ཡོན་ཏན་གཞན་མི་སྣང་ཡང་ཐེ་ཚོམ་མེད་པར་བསྟེན་པར་བྱས་ན་མི་བསླུ་བར་ངེས་པ་ཡིན། དེ་ལས་གཞན་དུ་ཐོས་རྒྱ་ཆེ་བ་དང༌། མངོན་ཤེས་དང་ལྡན་པ་ལ་སོགས་པའི་ཡོན་ཏན་ཅི་ལྟར་བཟང་ཡང་བྱམས་སྙིང་རྗེ་བྱང་ཆུབ་ཀྱི་སེམས་དང་བྲལ་ན་དེ་བསྟེན་པ་ལ་དགོས་པ་ཆུང༌། མདོར་ན་ཡོན་ཏན་གྱི་ཁྱད་པར་རང་ལས་ལྷག་པ་ཞིག་དགོས་ཏེ། སློབ་མ་ཚོགས་ལམ་པ་ཞིག་ཡིན་ན། བླ་མ་སྦྱོར་ལམ་པ་ཞིག་དགོས་པ་ནས་སློབ་མ་སྒོམ་ལམ་ལ་གནས་པ་ཞིག་ཡིན་ན་བླ་མ་སངས་རྒྱས་ཞིག་དགོས་པའི་བར་དུ་ཤེས་པར་བྱའོ། །དེ་ལྟར་བརྟགས་ཤིང་བསྟེན་བྱར་མཐོང་ནས་གདམས་ངག་ཞུས་ནས་བཟུང༌། བླ་མ་དེ་ལ་སངས་རྒྱས་དང་མཉམ་པར་བལྟ་ཞིང་བཀའ་དྲིན་གྱི་ངོས་ནས་བསམས་ན་སྔོན་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་འདུལ་མ་ནུས་པའི་སྙིགས་མཐར་སྐྱེས་པའི་སྐྱེ་བོ་བདག་འདྲ་བའི་ངོར་བཤེས་གཉེན་དམ་པའི་ཚུལ་དུ་བྱོན་ནས་མན་ངག་ཟབ་མོ་འདི་ལྟ་བུའི་སྒོ་ནས་རྗེས་སུ་འཛིན་པ་ནི་སངས་རྒྱས་ལས་ཀྱང་ལྷག་པའི་དད་པ་དང་མོས་གུས་དྲག་པོས་རྟག་ཏུ་མི་བརྗེད་པར་རྣལ་འབྱོར་དུ་བསྒྲུབ་པར་བྱ་དགོས་ཤིང༌། དེ་ལ་སྐབས་འདིར་ཇི་ལྟར་སྒོམ་པའི་ཚུལ་ནི། རང་ཉིད་འདུག་པའི་ས་ཕྱོགས་འདི་ཐམས་ཅད་ཐ་མལ་གྱི་སྣང་བ་འདི་ལྟ་བུ་མ་ཡིན་པར་མ་དག་པའི་སྣང་བ་དབྱིངས་སུ་ཐིམ་པའི་འོག་མིན་གྱི་ཞིང་དང་གཞལ་ཡས་ཁང་གི་བཀོད་པ་ཕུན་སུམ་ཚོགས་པས་བརྒྱན་པའི་དབུས་སུ་རང་ཉིད་ད་ལྟའི་འདི་ལྟ་བུའི་གདོས་བཅས་ཤ་ཁྲག་གི་རང་བཞིན་མ་ཡིན་པར་བདེ་བ་ཆེན་པོའི་ཡེ་ཤེས་ཀྱི་རྟེན་དང་རྗེས་སུ་འཛིན་པའི་རྟེན་འབྲེལ་དུ་གསང་བ་ཡེ་ཤེས་ཀྱི་མཁའ་འགྲོ་མ་སྐུ་མདོག་དམར་གསལ་ཞལ་གཅིག་ཕྱག་གཉིས་སྤྱན་གསུམ་པ་ཞབས་གཉིས་གཡས་བརྐྱང་པ་བམ་རོའི་སྙིང་གར་བརྫིས་ཤིང༌། གཡོན་བསྐུམ་པའི་གར་སྟབས་བྱས་པ། ཕྱག་གཡས་གྲི་གུག་ནམ་མཁར་འཕྱར་ཞིང༌། གཡོན་ཐོད་པ་བདུད་རྩིས་གང་བ་བསྣམས་པ། རུས་པའི་རྒྱན་དྲུག་དང༌། མ་ེཏོག་གི་ཕྲེང་བས་སྐུ་ལ་བརྒྱན་པ། སྐུ་སྣང་ལ་སྟོང་པའི་རང་བཞིན་དུ་གསལ་བའི་སྤྱི་བོའི་སྟེང་གི་ནམ་མཁར་མདའ་གང་ཙམ་གྱི་སར་སེངྒེ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་པདྨ་ཉི་མ་ཟླ་བས་བརྒྱན་པའི་སྟེང་དུ། ངོ་བོ་དྲིན་ཆེན་རྩ་བའི་བླ་མ་ཡིན་པ་ལ། རྣམ་པ་ཨོ་རྒྱན་ཆེན་པོ་ཡབ་ཡུམ་སྐྱབས་འགྲོའི་ཚོགས་ཞིང་གི་སྐབས་ལྟར་གསལ་བའི་སྟེང་གི་ནམ་མཁར་ཞི་བའི་ལྷ་ཚོགས་བཞི་བཅུ་པོ་འཇའ་འོད་ཀྱི་ཀློང་ན་བཞུགས་པ། དེའི་སྟེང་གི་ནམ་མཁར་ཆོས་སྐུ་ཀུན་བཟང་ཡབ་ཡུམ། གུ་རུ་རིན་པོ་ཆེའི་མཐའ་བསྐོར་དུ། སྟེང་གི་ཆ་ལ་རྒྱ་གར་གྱི་རིག་འཛིན་བརྒྱད་དང༌། བོད་ཀྱི་རྗེ་འབངས་ཉེར་ལྔ་སོགས་རྩ་བརྒྱུད་ཀྱི་བླ་མ་རྣམས་དང༌། བར་གྱི་ཆ་ལ་གཡས་གཡོན་དུ། ཁྲག་འཐུང་ལྔ་བཅུ་རྩ་བརྒྱད་སོགས་ཡི་དམ་རྒྱུད་སྡེ་དྲུག་གི་ལྷ་ཚོགས་རྣམས་དང༌། འདབ་སྐོར་དུ་གནས་གསུམ་གྱི་དཔའ་བོ་མཁའ་འགྲོ་དམ་ཅན་ཆོས་སྐྱོང་སྲུང་མའི་ཚོགས་དང་བཅས་པ་སྟེ། ཚོགས་ཞིང་གི་ལྷ་ཚོགས་དེ་ཐམས་ཅད་སྐུ་འོད་ཟེར་གྱི་ཕུང་པོ་འབར་ཞིང༌། ཐུགས་མཁྱེན་བརྩེ་ནུས་གསུམ་གྱི་བདག་ཉིད་དུ་བདག་ལ་དགྱེས་པར་དགོངས་ཏེ་ཏིལ་གྱི་གོང་བུ་ཁ་ཕྱེ་བའམ། ནམ་མཁའ་ལ་སྤྲིན་ཕུང་གཏིབས་པ་བཞིན་བཞུགས་པར་བསམས་ལ། དེ་དག་གི་སྤྱི་མགྲིན་ཐུགས་ཀ་གསུམ་གྱི་ཨོཾ་ཨཱཿཧཱུྃ་གསུམ་ལས་འོད་ཟེར་དཔག་ཏུ་མེད་པ་འཕྲོས་ཏེ། འོག་མིན་ཆོས་ཀྱི་དབྱིངས་ཀྱི་ཕོ་བྲང་དང༌། ཕྱོགས་བཅུའི་ཞིང་ཁམས་ཐམས་ཅད་ནས་རྩ་གསུམ་རྒྱལ་བ་ཞི་ཁྲོའི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཁ་ཆར་བུ་ཡུག་འཚུབ་པ་ལྟར་བྱོན་ནས་ཚོགས་ཞིང་གི་ལྷ་ཚོགས་རྣམས་ལ་ཆུ་ལ་ཆུ་བཞག་པ་ལྟར་དབྱེར་མེད་དུ་གྱུར་པར་བསམ་མོ། །དེ་ནས་བརྒྱུད་པ་གསུམ་གྱི་བླ་མ་རྣམས་ལ་དད་པ་དང་མོས་གུས་ཀྱི་གདུང་ཤུགས་དྲག་པོ་བསྐྱེད་ནས་སྔོན་གྱི་ཐུགས་དམ་གནད་ནས་བསྐུལ་ཏེ། བདག་ཅག་ལས་ངན་པའི་འགྲོ་བ་རྣམས་འཁོར་བ་ཐོག་མ་མེད་པ་ནས་སྲིད་པ་ཁ་བརྒྱུད་དེ་སྡུག་བསྔལ་སྣ་ཚོགས་ཀྱིས་གདུང་ཞིང་ཉོན་མོངས་བརྒྱད་ཁྲི་བཞི་སྟོང་གིས་གཟིར་ཏེ་ཐར་པའི་ལམ་ཙམ་ཡང་བསྒྲུབ་མ་ཤེས། ད་ལྟ་ཐར་པ་སྒྲུབ་པའི་རྟེན་མི་ལུས་ཞིག་ཐོབ་པའི་དུས་ཚོད་འདི་ཡང་སྙིགས་མ་ལྔའི་ཡང་མཐར་སྐྱེས། ཉོན་མོངས་པ་རགས་ཤིང་གཉེན་པོ་མཐུ་ཆུང༌། ནད་མུག་མཚོན་འཁྲུགས་མང༌། ནག་ཕྱོགས་ཀྱི་མི་དང་འདྲེ་བདུད་དང་དམ་སྲི་ཁ་དར། བསྟན་འཛིན་གྱི་སྐྱེས་བུ་དམ་པ་རྣམས་དབུ་འཕང་དམའ་ཞིང༌། རྒྱལ་བའི་བསྟན་པ་རིན་པོ་ཆེ་ཡང་ཉམས་དམས་པར་གྱུར་པའི་གནས་སྐབས་འདི་མཐོང་ནས། བདག་ཅག་རྒྱལ་བའི་རྗེས་འཇུག་རྣལ་འབྱོར་པ་རྣམས་ཀྱང་ཡིད་ཤིན་ཏུ་ཕམ་ནས་སྨྲེ་སྔགས་ཀྱི་ང་རོས་འོ་དོད་བོས་ཏེ་སྙིང་ནས་གསོལ་བ་འདེབས་ན། སྤྱིར་འགྲོ་བ་ཐམས་ཅད་སྲིད་མཚོ་ལས་བསྒྲལ་བ་དང༌། ཁྱད་པར་དུ་སྙིང་ནས་གསོལ་བ་འདེབས་པའི་གང་ཟག་རྣམས་ཀྱི་རྒྱུད་དེ་མ་ཐག་ཏུ་བྱིན་གྱིས་བརླབས་པར་མཛད་པ་ཞལ་གྱིས་བཞེས་ཤིང་ཐུགས་དམ་དུ་བཅས་པ་དེ་ད་ལྟ་དགོངས་པར་མཛད་ནས་མཚན་དཔེའི་ཞལ་བཟང་སྟོན་པ་དང༌། ཚངས་པའི་གསུང་གིས་དམ་པའི་ཆོས་ཀྱི་སྒྲ་དབྱངས་སྒྲོགས་པ་དང༌། ཐུགས་ཀྱི་དགོངས་བཅུད་ཟབ་མོའི་གཏེར་གྱི་སྒོ་ཕྱེས་ཏེ་མཁྱེན་པའི་ཡེ་ཤེས་དང་བརྩེ་བའི་ཐུགས་རྗེའི་འོད་སྣང་གིས་བདག་སོགས་འགྲོ་བ་ཀུན་གྱི་མི་ཤེས་རྨོངས་པའི་མུན་པ་ཐམས་ཅད་རབ་ཏུ་བསལ་ནས། རང་བཞིན་རྣམ་པར་དག་པའི་ཆོས་སྐུའི་རང་ཞལ་མཐོང་སྟེ་ལུས་ངག་ཡིད་གསུམ་དུ་འཛིན་པ་དང༌། དེ་གསུམ་ཐ་དད་དུ་འཛིན་པ་སྟེ་དེ་བཞི་ཡོད་པ་དེ་སྲིད་དུ་ཉོན་མོངས་པ་དང༌། དེས་བཞག་པའི་འཁྲུལ་སྣང་གི་བག་ཆགས་རྒྱུན་མི་འཆད་པས། འཁྲུལ་པའི་རྒྱུ་བཞི་པོ་དེ་ད་ལྟ་ཉིད་དུ་ཁྲོལ་བར་མཛད་ནས་རང་དོན་དུ་བདེ་གཤེགས་སྐུ་བཞིའི་འབྲས་བུ་རང་ལ་ཡེ་ནས་གནས་པའི་དོན་མངོན་དུ་གྱུར་པའི་དངོས་གྲུབ་དང༌། གཞན་དོན་དུ་མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་འཁོར་བའི་འདམ་ནས་འདྲེན་པའི་བླ་མར་གྱུར་པ་སྟེ་དོན་གཉིས་ཕུན་སུམ་ཚོགས་པའི་དངོས་གྲུབ་དམ་པ་སྩོལ་བར་མཛོད་ཅིག་ཅེས་དད་པ་རྩེ་གཅིག་པས། ཐོག་མའི་མགོན་པོ་སོགས་ནས། བདག་གྱུར་ཅིག །ཅེས་པའི་བར་ལན་གསུམ་སོགས་དང༌། གང་ལ་གང་འདུལ་མན་ཆད་ལན་གསུམ་བརྗོད། གཞན་ཡང་སྤྲོ་ན་གསོལ་འདེབས་ལེའུ་བདུན་མ་དང༌། བསམ་ལྷུན་རྒྱས་བསྡུས་རྣམས་དང༌། ཀུན་བཟང་རྡོར་སེམས་སོགས་རྫོགས་ཆེན་བརྒྱུད་པའི་གསོལ་འདེབས་རྣམས་བཏང་འཕྲལ་གཏེར་རྙིང་དུ་མ་ནས་བྱུང་བའི། སྐྱབས་གནས་ཀུན་འདུས་ཀྱི་ཞེས་པ་ལ་སོགས་པའི་ཤོ་ལོ་ཀ་དང༌། ཀུན་བཟང་བཀའ་བརྒྱུད་སོགས་དང༌། རྒྱལ་བ་ཀུན་འདུས་སོགས་ཀྱི་ཤོ་ལོ་ཀ་རྣམས་ལན་གསུམ་གསུམ་གྱིས་གུ་རུ་རིན་པོ་ཆེ་སྐྱབས་ཀུན་འདུས་པའི་ངོ་བོར་ངེས་ཤེས་བསྐྱེད་པས་ཚོགས་ཞིང་གི་ལྷ་ཚོགས་སྟེང་གི་རྡོ་རྗེ་འཆང་ནས་འདབ་སྐོར་གྱི་ཆོས་སྐྱོང་སྲུང་མའི་བར་ཐམས་ཅད་འོད་དུ་ཞུ་ནས་གུ་རུ་ཡབ་ཡུམ་ལ་ཐིམ་པས་སྐུ་བཀྲག་མདངས་འོད་ཟེར་དང་ལྡན་པའི་སྤྱི་བོར་རྒྱལ་བ་ཐམས་ཅད་ཀྱི་སྐུ་རྡོ་རྗེའི་ངོ་བོ་ཡི་གེ་ཨོཾ་དཀར་པོ། མགྲིན་པར་གསུང་རྡོ་རྗེའི་ངོ་བོ་ཨཱཿདམར་པོ། ཐུགས་ཀར་ཐུགས་རྡོ་རྗེའི་ངོ་བོ་ཧཱུྃ་མཐིང་ག །ལྟེ་བར་སྐུ་གསུང་ཐུགས་དབྱེར་མེད་པའི་རང་བཞིན་ཡོན་ཏན་དང་ཕྲིན་ལས་ཀྱི་ངོ་བོ་ཧྲིཿཡིག་ལྗང་གུ་སྟེ་དེ་རྣམས་འོད་ཟེར་བཀྲག་ཏུ་འཚེར་བར་བསམ་ལ། བདག་གསང་བ་ཡེ་ཤེས་ཀྱི་མཁའ་འགྲོ་མས་མོས་གུས་ཞིག་བྱས་པའི་རྐྱེན་གྱིས་གུ་རུའི་སྤྱི་བོའི་ཨོཾ་ཡིག་འོད་ཟེར་དང་བཅས་པ་རང་གི་སྨིན་མཚམས་སུ་བབས་ཏེ་ཐིམ་པས་བུམ་པའི་དབང་ཐོབ། ལུས་ཀྱི་སྒྲིབ་པ་དག །སྐུ་རྡོ་རྗེའི་བྱིན་རླབས་ཞུགས། ལམ་སྣང་སྲིད་དག་པ་རབ་འབྱམས་སུ་འཆར་བའི་བསྐྱེད་རིམ་བསྒོམ་པ་ལ་དབང༌། འབྲས་བུ་སྐུ་རྡོ་རྗེ་སྤྲུལ་པའི་སྐུ་ཐོབ་པའི་ནུས་རུང་དུ་བྱས་པར་བསམ། མགྲིན་པའི་ཨཱཿཡིག་འོད་ཟེར་དང་བཅས་པ་རང་གི་ལྕེའི་དབང་པོར་བབས། གསང་བའི་དབང་ཐོབ། ངག་གི་སྒྲིབ་པ་དག །ལམ་སྒྲ་གྲགས་ཐམས་ཅད་སྔགས་སུ་ཤེས་པའི་བཟླས་བརྗོད་ལ་དབང༌། འབྲས་བུ་གསུང་རྡོ་རྗེ་ལོངས་སྤྱོད་རྫོགས་པའི་སྐུ་ཐོབ་པའི་ནུས་པ་རྒྱུད་ལ་བཞག་པར་བསམ། ཐུགས་ཀའི་ཧཱུྃ་ཡིག་འོད་ཟེར་དང་བཅས་པ་རང་གི་སྙིང་གའི་དཀྱིལ་དུ་བབས། ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་སྒྲིབ་པ་དག །ལམ་རླུང་དང་གཏུམ་མོའི་རྫོགས་རིམ་སྒོམ་པ་ལ་དབང༌། འབྲས་བུ་ཐུགས་རྡོ་རྗེ་ཆོས་སྐུ་ཐོབ་པའི་ནུས་པ་རྒྱུད་ལ་བཞག །ལྟེ་བའི་ཧྲིཿཡིག་འོད་ཟེར་དང་བཅས་པ་བདག་གི་ལྟེ་བའི་དཀྱིལ་དུ་ཐིམ། ཚིག་གི་དབང་ཐོབ། སྒོ་གསུམ་ཆ་མཉམ་གྱི་སྒྲིབ་པ་དག །ལམ་ཀ་དག་ཁྲེགས་ཆོད་དང༌། ལྷུན་གྲུབ་ཐོད་རྒལ་སྒོམ་པ་ལ་དབང༌། འབྲས་བུ་ཡེ་ཤེས་རྡོ་རྗེའི་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་པར་བསམ་མོ། །དེ་ནས་སླར་ཡང་མོས་གུས་དུང་དུང་བ་ཞིག་བྱས་པ་དང་མཉམ་དུ་གུ་རུ་རིན་པོ་ཆེའི་ཐུགས་ཀ་ནས་འོད་ཟེར་དམར་པོ་དྲོད་ཚ་ལམ་པ་ཞིག་བྱུང་བ་རང་གསང་བ་ཡེ་ཤེས་ཀྱི་མཁའ་འགྲོ་མར་གསལ་བའི་སྙིང་གར་རེག་པའི་མོད་ལ་རང་ཉིད་ལུས་སེམས་བདེ་ཧྲིལ་གྱིས་སོང་ཞིང་འོད་དུ་ཞུ་ནས་འོད་ཀྱི་ཐིག་ལེ་དམར་པོ་སྲན་མ་ཙམ་ཞིག་ཏུ་གྱུར་ཏེ་མེ་སྟག་ཡར་བ་བཞིན་དུ་གུ་རུ་རིན་པོའི་ཐུགས་ཀར་ཐིམ་སྟེ་ཐུགས་ཡིད་བསྲེས་པའི་ངང་ལ་ཅི་ནུས་སུ་མཉམ་པར་འཇོག་གོ ། དེ་ལྟར་བླ་མའི་རྣལ་འབྱོར་བསྒོམས་པའི་དོན་པོ་དུས་རྒྱུན་དུ་སྒོ་གསུམ་དང༌། སྣང་གྲགས་རིག་གསུམ་བླ་མའི་རྣམ་རོལ་ཏུ་ཤེས་པའི་ངང་ནས། འགྲོ་བའི་ཚེ་ཚོགས་ཞིང་དེ་རྣམས་ཐམས་ཅད་ཡི་དམ་གུ་རུ་ཕྲག་པ་གཡས་པར་བསྒོམ་སྟེ་བསྐོར་བ་བྱེད་པའི་རྟེན་བྱེད། འདུག་པའི་ཚེ་སྤྱི་བོའི་གཙུག་ཏུ་བསྒོམ་སྟེ་གསོལ་བ་འདེབས་པའི་ཡུལ་བྱེད། བཟའ་བཏུང་བྱེད་པའི་ཚེ་མགྲིན་པར་བསྒོམ་སྟེ་ཕུད་ཀྱིས་མཆོད། ཉལ་བའི་ཚེ་སྙིང་གར་བསྒོམ་སྟེ་གཉིད་འོད་གསལ་དུ་སྦ། ཡུལ་རྐྱེན་བཟང་པོ་དང་འཕྲད་དེ་དགའ་སྣང་སྐྱིད་སྣང་འཆར་ཚེ་བླ་མ་དང་ཐུགས་ཡིད་བསྲེས་ཏེ་མཉམ་པར་འཇོག་པ་ལས་དྲེགས་པ་དང་ང་རྒྱལ་མི་བྱ། སྡུག་བསྔལ་རྐྱེན་ངན་བྱུང་ཚེའང་དེ་བཞིན་དུ་བྱ་བ་ལས་སེམས་ཞུམ་ཞིང་ཁོང་འཁྲུགས་པར་མི་བྱ། འདྲེ་དང་རྒྱལ་འགོང་སོགས་ཀྱི་གནོད་པ་བྱུང་ཚེའང་འཁྲུལ་སྣང་གི་གནོད་བྱེད་དེ་དང་རང་སེམས་བླ་མའི་ཐུགས་གསུམ་དབྱེར་མེད་དུ་བསྲེས་པའི་ངང་ལ་འཇོག་པ་སོགས་བྱས་ན་རེ་དོགས་དང་དགག་སྒྲུབ་ཀྱི་འཁྲི་བ་ཆོད། གདོན་བགེགས་རང་སར་ཞི། སྣང་བ་གཏན་མེད་དུ་གོ ། ཅི་བྱས་ཚོགས་སུ་འགྲོ་བས་འདི་གཅིག་པུས་ཀྱང་རྒྱུད་གྲོལ་བར་འགྱུར་བས་གལ་ཆེ་བའི་གནད་དམ་པའོ། །དེ་ལྟར་དབང་བཞི་བླང་བའི་རྗེས་སུ། དཔལ་ལྡན་རྩ་བའི་བླ་མ་སོགས་དང༌། སྐྱེ་བ་ཀུན་ཏུ་སོགས་བསྔོ་བ་དང་སྨོན་ལམ་གྱིས་མཐའ་བརྒྱན་པར་བྱའོ། །དེ་ལྟར་རང་རྒྱུད་སྦྱོང་བའི་སྔོན་འགྲོ་ཡི། །ཁྲིད་ཀྱི་ཟིན་བྲིས་ཐར་ལམ་སྣང་བྱེད་འདི། །བགྱིས་པའི་དགེ་བས་བདག་གཞན་འགྲོ་བ་ཀུན། །འབད་པ་མེད་པར་གདོད་མའི་སར་ཕྱིན་ཤོག །ཅེས་པ་འདི་སྐྱབས་རྗེ་མུ་སྤྲུལ་རིན་པོ་ཆེས་བར་དོ་དྲུག་གི་ཁྲིད་གསུངས་སྐབས་རང་དང་མཆེད་པོ་རྣམས་ཀྱིས་ཟིན་ཐོ་ཕྱོགས་གཅིག་ཏུ་གུ་ཎའི་མིང་ཅན་གྱིས་བྲིས་པའོ། །ཨེ་མ་མན་ངག་ཆུ་གཏེར་ཟབ་དགུའི་གནད། །གཅིག་བསྡུས་བླ་མའི་ཞལ་ཆབ་བདུད་རྩིའི་བཅུད། །སྔོན་མེད་ཀར་གླིང་ཞི་ཁྲོའི་སྔོན་འགྲོའི་ཁྲིད། །མ་དྲོས་མཚོ་ཡི་ཆ་ཤས་འདི་ཁོ་ནར། །དེས་ཕྱིར་དམ་པ་ཟུང་གི་སློབ་འབངས་བ། །ཐ་ཤལ་པདྨའི་མིང་གིས་དད་མོས་རྟེན། །སྤར་གྱི་ཕྱི་མོར་འཕྲུལ་པའི་རྣམ་དཀར་དགེ། །འཇམ་དཔལ་གཞོན་ནུས་ཡོངས་བསྔོས་རྒྱས་བཏབ་ནས། །རྒྱལ་བའི་བསྟན་པ་མི་ཉམས་དར་རྒྱས་ཤིང༌། །ཚེ་འདིའི་ཕ་མ་འབྲེལ་ཐོགས་སེམས་ཅན་གཙོས། །མཁའ་ཁྱབ་འགྲོ་ཀུན་གནས་སྐབས་མངོན་མཐོའི་འབྱོར། །མཐར་ཐུག་རྣམ་མཁྱེན་རྫོགས་བྱང་མྱུར་ཐོབ་ཤོག །དགེའོ། །དགེའོ། །དགེའོ། ། འོག་སྒོ་བདེ་ཆེན་འདོད་ཆགས་རང་གྲོལ་གྱི་ཉམས་ཁྲིད། སཱུཪྱ་ཙནྟྲ་རསྨིའི་མིང་ཅན་གྱིས།ཟབ་ཆོས་ཞི་ཁྲོ་དགོངས་པ་རང་གྲོལ་ལསཿ འོག་སྒོ་བདེ་ཆེན་འདོད་ཆགས་རང་གྲོལ་གྱི་ཉམས་ཁྲིད་གུད་དུ་བཀོལ་བ་དོན་བསྡུས་ཟབ་ཁྲིད་བདེ་བ་རང་གྲོལ་བཞུགས་སོ། ། བར་དོ་དྲུག་གི་སྔོན་འགྲོ་རྒྱབ་ཆོས་དང་བཅས་པ་བཞུགས་སོ། བདེ་ཆེན་རང་གྲོལ་སྐུ་གསུམ་ལྷ་ལ་འདུད། །ཟབ་ཆོས་ཞི་ཁྲོ་དགོངས་པ་རང་གྲོལ་ལས། །འོག་སྒོ་བདེ་ཆེན་འདོད་ཆགས་རང་གྲོལ་གྱི། །རྫོགས་རིམ་ཉམས་ཁྲིད་དོན་བསྡུས་དམར་ཁྲིད་འདི། །རང་འདྲ་བློ་དམན་དོན་དུ་བསྡུས་ཏེ་བྲིས། །དེ་ལ་གསང་སྔགས་རྡོ་རྗེ་ཐེག་པའི་ཟབ་གནད་རྫོགས་རིམ་ཉམས་སུ་ལེན་པ་ལ། སྤྱི་དོན་གསུམ་སྟེ། སྔོན་འགྲོ་དངོས་གཞི་རྗེས་དང་གསུམ་མོ། །སྔོན་འགྲོ་ལ་གཉིས་ཏེ། སྤྱི་དང་ཁྱད་པར་རོ། །སྤྱིའི་སྔོན་འགྲོ་ནི། ཀུན་དང་མཐུན་པར། སྔོན་འགྲོ་བདུན་སྦྱོར་རམ། བཞི་སྦྱོར་ལྟར་གཞན་དུ་ཤེས་པར་བྱའོ། །ཁྱད་པར་གྱི་སྔོན་འགྲོ་ལ་གཉིས་ཏེ། སྟོང་ར་གསུམ་གྱིས་སྒོ་གསུམ་སྦྱངས་པ་དང༌། སྟེང་སྒོ་རྣམ་གྲོལ་གཏུམ་མོ་འབར་འཛག་གིས་ལམ་སྦྱོང་བའོ། །དང་པོ་ལ་གསུམ། རྩ་དང་རླུང་དང༌། ཐིག་ལེའི་སྟོང་ར་གཉིས་སྦྱང་བ་ནི། གཞུང་ལས། མཚན་ལྡན་བླ་མས་ཐེག་པའི་རིམ་པ་ལྟར། །དམ་ཚིག་སྡོམ་པ་དབང་བསྐུར་རིམ་པར་བྱ། །ཁྱད་པར་གསུམ་པའི་དབང་ཐོབ་སྐྱེས་བུ་དེས། །ཐོག་མར་ཚད་མེད་སྙིང་རྗེས་ཀུན་བསླངས་ནས། །སྐྱབས་འགྲོ་སེམས་བསྐྱེད་རྒྱ་ཆེན་ཏིང་འཛིན་གསུམ། །རང་ལུས་ལྷར་གསལ་ངང་ནས་སྟོང་ར་བསྒོམ། །ཞེས་གསུངས་པས། ཐོག་མར་བླ་མེད་ཀྱི་དབང་བཞི་རྫོགས་པར་ཞུ། ཁྱད་པར་གསུམ་པ་ཤེས་རབ་ཡེ་ཤེས་ཀྱི་དབང་རྫོགས་པར་མནོས་ལ། དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི། གདོད་མའི་གནས་ལུགས་རང་བྱུང་ཡེ་ཤེས་ལེགས་པར་ངོ་འཕྲོད་ནས། ངེས་ཤེས་ལེགས་པར་དྲང་བར་བྱ་སྟེ། དེ་མ་གཏོགས་པའི་ཆོས་ཐམས་ཅད་འདུས་བྱས་བསླུ་བའི་རང་བཞིན་ཅན་ཏེ། ཞི་བ་བསྒོམས་ཤིང་བརྟན་པ་ཐོབ་ཀྱང༌། གཟུགས་ཁམས་འོད་ལུས་ཀྱི་ལྷར་སྐྱེ། ཁྲོ་བོ་བསྒོམས་པས་ནི་རུ་ཏྲ་སྲིན་པོ་མ་རུངས་པར་སྐྱེ། ཐབས་ལམ་དབང་པོ་གཉིས་སྦྱོར་གྱི་བདེ་བ་ལ་ཞེན་ཆགས་ཀྱིས་སྤྱོད་པས། མངལ་གྱི་སྲིན་བུར་སྐྱེ་བར་གསུངས་པས། ལྟ་བའི་ཡང་རྩེ་དེ་བཞིན་ཉིད་ཀྱིས་ཟིན་པ་གལ་ཆེའོ། །འདིས་ཟིན་ན་ནི། བདུད་དང་སྲིན་པོ་བསྒོམས་ཀྱང་ཆོས་སྐུ་ལས་འགྲོ་ས་མེད་དོ། །དེ་ནས་གཉིས་པ་ཀུན་སྣང་གི་ཏིང་ངེ་འཛིན་ནི། དེ་ལྟར་མ་རྟོགས་པའི་སེམས་ཅན་རྣམས་ལ། བརྩེ་བའི་སྙིང་རྗེས་མཆི་མ་འཁྲུགས་པ་ཙམ་དུ་བསྒོམ་མོ། །དེ་ནི་འགྲོ་བ་ཐམས་ཅད་ལ་ཐུགས་རྗེས་སྤྲུལ་སྐུ་སྣང་བར་བྱེད་པའི་ཕྱིར། ཀུན་སྣང་གི་ཏིང་ངེ་འཛིན་ཏོ། །དེ་ལྟར་སྟོང་ཉིད་སྙིང་རྗེའི་ངང་ནས། འགྲོ་བའི་དོན་བྱེད་པ་ལ། རྒྱུའི་ཏིང་ངེ་འཛིན་ནི། གང་ལ་གང་འདུལ་གྱི་གཟུགས་སྐུ་མ་སྤྲོས་ན། སྟོང་ཉིད་སྙིང་རྗེ་ཁོ་ནས་གཞན་དོན་དངོས་སུ་མི་འགྲུབ་པས། རྒྱུའི་ཏིང་ངེ་འཛིན་བསྒོམ་པ་ནི། རང་གི་ཡི་དམ་སོ་སོར་བཤད་ཀྱང༌། འདིར་དབང་གི་ཁྲིད་བདེ་བ་ཆེན་པོ་བསྒོམ་པའི་ཕྱིར། དབང་གི་ལྷ་རྟ་ཕག་ཡབ་ཡུམ་བསྒོམ་པ་ནི། ཧྲཱིཿ སྐད་ཅིག་སྟོང་གསལ་ཆེན་པོའི་ངང་ཉིད་ལས། །གར་འདུག་བདེ་ཆེན་འབར་བའི་གཞལ་ཡས་སུ། །པད་ཉི་རོ་སྟེང་ཧྲིཿལས་རྟ་མགྲིན་སྐུ། །མདོག་དམར་རབ་འཇིགས་རྟ་མགོ་ལྗང་བཞུར་མཚེར། །གྲི་གུག་ཐོད་ཁྲག་ཡུམ་དང་བདེ་ཆེན་རོལ། །མཿལས་རྡོ་རྗེ་ཕག་མོ་གཉིས་མེད་འཁྲིལ། །ཁྲོ་འཛུམ་ཞལ་སྦྱཽར་ཕག་ཞལ་མཐིང་ག་ངུར། །གྲི་གུག་ཐོད་ཁྲག་ཡབ་ལ་འཁྱུད་ཅིང་སྟོབས། །གཞོན་ཚུལ་ནུ་མ་བྷ་ག་རབ་རྒྱས་ཤིང༌། །རྡོ་རྗེ་པདྨ་དམ་སྦྱར་སྤྱོད་ཅིང་བསྒུལ། །སྣང་ལ་རང་བཞིན་མེད་པའི་སྐུ་རུ་གསལ། །ཞེས་ཚིག་གིས་གསལ་གདབ་ཅིང་ཡེངས་མེད་དུ་བསྒོམ་མོ། །བསྐྱེད་རིམ་མ་སྦྱངས་པའི་གང་ཟག་ཡིན་ན། འདི་ཡུན་རིང་དུ་བསྒོམ་མོ། །ཆོས་ཐུན་གཅིག་གོ །གཉིས་པ་རྩའི་སྟོང་ར་བསྒོམ་པ་ནི། གཞུང་ལས། ལུས་གནད་སྐྱིལ་ཀྲུང་མཉམ་གཞག་སྒལ་ཚིགས་བསྲངས། །མགྲིན་འགུག་སྣ་རྩེར་ལྟ་ཞིང་དཔུང་པ་བརྒྱངས། །ཞེས་གསུངས་པས། རྣམ་སྣང་ཆོས་བདུན་བཅའ་འོ། །དེ་ནས་རང་ལུས་ཡི་དམ་ཡབ་ཡུམ་སྣང་སྟོང་དབྱེར་མེད་འོད་ཀྱི་རང་བཞིན། ནང་ཁྲོལ་རྡོས་བཅས་ཀྱི་རང་བཞིན་ལས་གྲོལ་བས། དེའི་སྤྱི་བོར་བླ་མ་ཐམས་ཅད་འདུས་པའི་ངོ་བོ་ཨུ་རྒྱན་ཡབ་ཡུམ་དཀར་དམར་གཞོན་ཤ་ཆགས་པ། གཉིས་མེད་འཁྲིལ་སྦྱོར་བདེ་ཆེན་རོལ་པའི་གནས་བཞི་ནས། ཡི་གེ་འབྲུ་བཞི་རང་གི་གནས་བཞིར་བསྟིམ་ཞིང་དབང་བཞི་བླངས་ལ། དེ་ནས་རང་གི་ཁོག་པ་སྟོང་པ་འོད་ཀྱི་རང་བཞིན་ཅན་གྱི་དབུས་སུ། རྩའི་གཙོ་བོ་དྷཱུ་ཏཱི་དབུ་མ་ཞེས། སྣང་ལ་རང་བཞིན་མ་གྲུབ་འོད་ཀྱི་རྩ། །དཀར་སེར་ལྦ་ལྕག་ཙམ་པའི་ཁོང་སྟོང་ཅན། །ཕྱི་ནང་སྟོང་གསལ་འོད་ཀྱི་རྣམ་པ་རུ། །ཡར་སྣེ་སྤྱི་བོའི་ཚང་བུག་ཧཾ་ལ་ཟུག །མར་སྣེ་ཆོས་འབྱུང་ལྟེ་འོག་ལ་ཟུག་སྟེ། །ཁང་སྟོང་ལུག་རིད་(རྒྱུད)རྒྱུ་མ་ཕུས་བཏབ་བཞིན། །ལུས་ཀྱི་སྲོག་ཤིང་ལྟ་བུར་ཟང་ཐལ་གསལ། །ཞེས་གསུངས་པས། དེ་ལྟར་མ་ཡེངས་པར་འགག་མེད་ཟང་ཐལ་དུ་བསྒོམ་མོ། །དེ་ནས་རོ་རྐྱང་གསལ་གདབ་པ་ནི། གཡས་སུ་རྐྱང་མ་དཀར་གསལ་མདའ་སྨྱུག་ཙམ། །ཡར་སྣེ་རྩེ་འགུགས་སྣ་བུག་གཡས་ན་གཏད། །མར་སྣེ་ལྟེ་འོག་དབུ་མར་ཚུད་ཙམ་གསལ། །གཡོན་དུ་རོ་མ་དམར་གསལ་མདའ་སྨྱུག་ཙམ། །ཡར་སྣེ་རྩེ་འགུགས་སྣ་བུག་གཡོན་ལ་ཟུག །མར་སྣེ་ལྟེ་འོག་དབུ་མར་ཚུད་ཙམ་གསལ། རོ་རྐྱང་གཉིས་གཞུང་ཕལ་ཆེར་རོ་མ་གཡས་རྐྱང་མ་གཡོན་དུ་བཤད། ཅེས་པས། དེ་ལ་ཞག་གསུམ་མ་ཡེངས་པར་བསྒོམ་མོ། །དེ་ནས་རྩ་འཁོར་ལྔའི་སྟོང་ར་བསྒོམ་པ་ནི། སྤྱི་བོ་བདེ་བ་ཆེན་པོའི་གཞལ་ཡས་སུ། །རྩ་འདབ་སུམ་ཅུ་སོ་གཉིས་ཐེམ་པ་ནི། །གདུགས་ཀྱི་རྩིབས་མ་ཕུབ་འདྲ་དཀར་གསལ་བསྒོམ། །དེ་ལ་ཞག་གཅིག ། མགྲིན་པ་ལོངས་སྤྱོད་རྫོགས་པའི་འཁོར་ལོ་རུ། །རྩ་འདབ་བཅུ་དྲུག་སྦྲུལ་གྱི་ཆུན་པོ་བཞིན། །དམར་གསལ་མདངས་ལྡན་འགག་མེད་ཟང་ཐལ་བསྒོམ། །ཞག་གཅིག སྙིང་ག་ཆོས་ཀྱི་འཁོར་ལོའི་རྩ་འདབ་ནི། །བརྒྱད་པ་མཐིང་གསལ་གྲུ་གུ་སྒྲིལ་མ་ལྟར། །གསལ་འཚེར་མདངས་ལྡན་འགག་མེད་ཟང་ཐལ་བསྒོམ། །ཞག་གཅིག །ལྟེ་བ་སྤྲུལ་པའི་འཁོར་ལོའི་རྩ་འདབ་ནི། །དྲུག་ཅུ་རྩ་བཞི་སེར་གསལ་མདངས་ལྡན་དུ། །རིན་ཆེན་བང་རིམ་བ་ཐག་ལྟར་ཡང་ཟེར། བརྩེགས་ལྟར་རིམ་བཞིན་དུ། །ཕྱི་ནང་མེད་པར་འགག་མེད་ཟང་ཐལ་བསྒོམ། །ཞག་གཅིག །གསང་གནས་བདེ་སྐྱོང་འཁོར་ལོའི་རྩ་འདབ་ནི། །ཉི་ཤུ་རྩ་བཞི་ལྗང་གསལ་མདངས་ལྡན་དུ། །སྦྲ་ཡི་ཆོན་ཐག་ལྗོན་ཤིང་གྱེས་པ་ལྟར་ཡང་ཟེར། ཇི་བཞིན་ཟང་ཐལ་བསྒོམ། །ཞག་གཅིག །དེ་ལྟར་འཁོར་ལོ་རེ་ལ་ཞག་རེ་བསྒོམ་མོ། །དེ་ནི་གྲངས་ཅན་རྩའི་སྟོང་རའོ། །དེ་ནས་གྲངས་མེད་རྩའི་སྟོང་ར་ནི། ཡ་ཀི་སྤྱི་བོའི་གཙུག་ནས་མ་ཀི་རྐང་པའི་མཐིལ་ཡན་ཆད། འཁོར་ལོ་ལྔ་ཡི་རྩ་ལས་ཕྱིར་གྱེས་པ་ལས། ལུས་རྩའི་དྲྭ་བས་འབྲེལ་ཏེ། ཕྱི་ནང་མེད་པར་འགག་མེད་ཟང་ཐལ་དུ་བསྒོམ། དམིགས་པ་རྣོན་པོས་དངོས་སུ་མཐོང་བ་ཡང་འབྱུང་ངོ༌། །དེ་ཡང་རྩ་དངོས་པོ་ཅན་དུ་བསྒོམས་ན་གེགས་འབྱུང་བས། འགག་མེད་ཟང་ཐལ་གྱི་རྣམ་པར་བསྒོམས་པས་གེགས་མི་འབྱུང་སྟེ། དམིགས་པའི་གནད་འདི་ཤིན་ཏུ་ཟབ་བོ། །གཉིས་པ་རླུང་གི་སྟོང་ར་བསྒོམ་པ་ནི། སྟན་ལ་ལུས་སྐྱིལ་ཀྲུང༌། སྒལ་ཚིགས་དྲང་པོར་བསྲངས། ཐོག་མར་རླུང་རོ་ལན་གསུམ་འབུད་ནས། ནད་གདོན་སྡིག་སྒྲིབ་ཐམས་ཅད་སང་སང་སོང་བར་བསྒོམ། དེ་ནས་དལ་བུས་ཨོཾ་གྱི་རྣམ་པར་ཚུར་རྔུབས་པས། དུས་གསུམ་རྒྱལ་བའི་བྱིན་རླབས་ནུས་མཐུ་འགྲོ་བའི་ཚེ་དང་བསོད་ནམས་ཐམས་ཅད། ཨོཾ་གྱི་ཚུལ་དུ་བསྡུས་ནས། མཆིལ་མ་གཅིག་མིད་པ་དང་མཉམ་དུ། ལྟེ་འོག་ཏུ་ཀྲིགས་ཀྱིས་བསྐྱིལ། འོག་རླུང་འུབ་ཀྱིས་ཡར་འཐེན་ནས་ལྟེ་འོག་ཏུ། བར་རླུང་རིག་པ་སྟོང་གསལ་ཨཱཿའི་ཚུལ་དུ་ཅི་ཙམ་ཐུབ་ཀྱི་བར་དུ་བསྐྱིལ། ཚད་ནི་འཛུམ་མོས་པུས་མོ་ལ་གཡས་སྐོར་རེ་ལ་སེ་གོལ་རེ་གཏོགས་ལ། ཉི་ཤུ་སུམ་ཅུ་བཞི་བཅུ་བརྒྱ་སྟོང་ལ་སོགས་པ་བསྐྱིལ། མི་ཐུབ་པ་དང་བཏང་བའི་ཚེ། ཧཱུྃ་གི་རྣམ་པར་འབུད་པས། སྤྲུལ་པ་གྲངས་ལས་འདས་པས་འགྲོ་བའི་དོན་བྱེད་པར་བསྒོམ། རླུང་གནས་པ་ཇེ་རིང་ཇེ་རིང་དུ་བསྐྱིལ། བསྐྱིལ་བའི་ཚེ་རིག་པ་གསལ་སྟོང་རྗེན་ནེ་ཧྲིག་གེ་བའི་ངང་ནས་བཞག འདི་ཡི་སྐབས་སུ་རྩ་བཟང་བའི་རིགས་ལ། མཐོང་སྣང་བསམ་གྱིས་མི་ཁྱབ་པར་འཆར་ཏེ། བཟང་ངན་གཉིས་འཛིན་མེད་པའི་ངང་ནས་སྦྱོང་ངོ༌། །གཉིས་འཛིན་སྐྱེས་ན་གེགས་སུ་འགྲོ། འཛིན་མེད་ཀྱི་ངང་ནས་སྦྱངས་ནས། ཉམས་རྟོགས་མྱུར་དུ་འཕེལ་ལོ། །དེ་ནས་རླུང་འབུད་པའི་རྗེས་སུ། ཧཱུྃ་རིང་ལན་གསུམ་འབུད་ནས། ཧ་དྲག་ཡང་ཡང་བཏུད་ནས། ནད་གདོན་ཐམས་ཅད་སེང་སེང་ཐོན་པར་བསམ། དེས་རླུང་སྐྱོན་དང་གེགས་མི་འབྱུང་ཞིང༌། ནད་གདོན་སྡིག་སྒྲིབ་ཐོན་པའི་གནད་ཟབ་མོའོ། །གཞན་ཡང་རླུང་བཟུང་བའི་གནད་ནི། སྣ་བུག་གཡས་ནས་རླུང་རྒྱུ་བའི་ཚེ་མི་བཟུང༌། ཉོན་མོངས་པའི་རླུང་རྒྱུ་བས་གེགས་མང་བའི་ཕྱིར་འབུད་པ་གཅེས་སོ། །གཡོན་ནས་རྒྱུ་བའི་ཚེ། ཐབས་ཤེས་གཉིས་སུ་མེད་པ་ཡེ་ཤེས་ཀྱི་རླུང་ཨ་བ་དྷཱུ་ཏཱིའི་སྒོར་འགྲིམས་པས། བཟུང་ཞིང་བསྐྱིལ་ན་གེགས་མེད་ཅིང་ཡེ་ཤེས་ཡོན་ཏན་མྱུར་དུ་འཆར་རོ། །གཞན་ཡང་དུག་ལྔ་འཁྲུལ་སྣང་འཆར་དུས། མི་བཟུང་བར་འབུད། དག་སྣང་མོས་གུས་དགེ་སེམས་སྐྱེས་པའི་ཚེ། མི་འབུད་པར་བཟུང༌། དེ་ལ་སོགས་པ་རྟེན་འབྲེལ་བཟང་ངན་ཐམས་ཅད་རླུང་ལ་རག་ལས་པས། རླུང་ལ་མཁས་པར་བྱས་ཏེ། རྒྱས་པར་གཞན་དུ་ལྟའོ། །གཞུང་ལས། ཨོཾ་གྱིས་རླུང་རྔུབ་ཨཱཿལས་གནས་བཟུང་སྟེ། །ཧཱུྃ་གིས་རླུང་འབུད་དེ་ལ་སྦྱང་བ་གཅེས། །དེ་རྗེས་ཁ་དོག་ལྔ་ལྡན་རླུང་ལ་སྦྱང༌། །ཅེས་པས། རྒྱས་པར་བྱེད་ན། རྩ་པའི་རླུང་ཟིན་ནས། འབྱུང་བ་ལྔ་ཡི་རླུང་ལ་སྦྱངས་པས། ཡོན་ཏན་དཔག་ཏུ་མེད་དོ། །འདོད་ཆགས་རང་གྲོལ་གཞུང་ལས། སྔོན་ལ་རླུང་སྦྱོར་བཤད་ནས་དེ་ནས་རྩ་བཤད་པ་ནི། ལུས་གཅུན་པ་ཡིན་ནོ། །དེ་ནས་རླུང་བྱང་བ་དང་སྟེང་སྒོ་རྣམ་གྲོལ་གཏུམ་མོ་འབར་འཛག་བསྒོམ་པ་ནི། གཞུང་ལས། ལྟེ་འོག་སུམ་མདོར་ཨ་ཐུང་མེ་འདྲ་བསྒོམ། །ལུས་བཞིན་མེ་འབར་སྤྱི་བོའི་ཧཾ་ཉིད་ཞུ། །བདེ་བ་ཡས་འཛག་མེ་དྲོད་མས་ནས་འབར། །འབར་འཛག་བདེ་དྲོད་གཏུམ་མོ་ཡུན་རིང་བསྒོམ། །ཞེས་པས་གཏུམ་མོ་བསྒོམ་པའི་སྔོན་དུ། ཐིག་ལེའི་སྟོང་ར་བསྒོམ་པ་ནི། ཐོག་མར་སྤྱི་བོ་བདེ་ཆེན་འཁོར་ལོ་རུ། །སངས་རྒྱས་དཔའ་པོ་ཌཱཀྐི་ཡབ་ཡུམ་གཉིས། །སྦྱོར་བ་མཛད་པས་བདེ་བའི་ཡེ་ཤེས་རྒྱས། །རྩ་འདབ་སོ་གཉིས་དཔའ་བོ་མཁའ་འགྲོ་མ། །སུམ་ཅུ་སོ་གཉིས་དགྱེས་པའི་འཁྲིལ་སྦྱོར་རོལ། །བདེ་བ་རྒྱས་ཤིང་ཐིག་ལེ་ཕྱིར་འཕྲོས་པས། །རྩ་འདབ་ཐམས་ཅད་ཐིག་ལེས་གང་བར་བསམ། །བདེ་སྟོང་གཉིས་མེད་ངང་དུ་མ་ཡེངས་བསྒོམ། །ཞག་གཅིག །དེ་ནས་མགྲིན་པ་ལོངས་སྤྱོད་འཁོར་ལོ་རུ། །པདྨ་དཔའ་བོ་ཌཱཀྐི་ཡབ་ཡུམ་གཉིས། །སྦྱོར་བ་མཛད་ཅིང་རྩ་འདབ་བཅུ་དྲུག་ལའང༌། དཔའ་བོ་ཡབ་ཡུམ་བཅུ་དྲུག་བདེ་བ་རོལ། བདེ་བ་རྒྱས་ཤིང་རྩ་འདབ་ཐིག་ལེས་གང༌། ཞག་གཅིག །དེ་ནས་སྙིང་ག་ཆོས་ཀྱི་འཁོར་ལོ་རུ། །རྡོ་རྗེ་དཔའ་བོ་ཌཱཀྐི་ཡབ་ཡུམ་གཉིས། །སྦྱོར་བ་མཛད་ཅིང་རྩ་འདབ་བརྒྱད་ལ་ཡང༌། །དཔའ་བོ་ཡབ་ཡུམ་བརྒྱད་པོས་བདེ་བ་རོལ། །བདེ་བ་རྒྱས་ཤིང་རྩ་འདབ་ཐིག་ལེས་གང༌། །ཞག་གཅིག །དེ་ནས་ལྟེ་བ་སྤྲུལ་པའི་འཁོར་ལོ་རུ། །རིན་ཆེན་དཔའ་བོ་ཌཱཀྐི་ཡབ་ཡུམ་གཉིས། །སྦྱོར་བ་མཛད་ཅིང་རྩ་འདབ་དྲུག་ཅུ་ཡིས། །དཔའ་བོ་ཌཱཀྐི་དྲུག་ཅུ་བདེ་བ་རོལ། །བདེ་བ་རྒྱས་ཤིང་ཐིག་ལེས་རྩ་འདབ་གང༌། །ཞག་གཅིག །དེ་ནས་གསང་གནས་བདེ་སྤྱོད་འཁོར་ལོ་རུ། །ལས་ཀྱི་དཔའ་བོ་ཌཱཀྐ་ིཡབ་ཡུམ་གཉིས། །སྦྱོར་བ་མཛད་ཅིང་རྩ་འདབ་ཉེར་བཞི་ཡི། །དཔའ་བོ་ཌཱཀྐི་ཉེར་བཞི་བདེ་བ་རོལ། །བདེ་བ་རྒྱས་ཤིང་ཐིག་ལེས་རྩ་འདབ་གང༌། །ཞག་གཅིག ། དེ་ནི་གྲངས་ཅན་ལྷ་ཡི་སྟོང་རའོ། །དེ་ནས་གྲངས་མེད་ལྷ་ཡི་སྟོང་ར་ནི། སྤྱི་བོའི་གཙུག་ནས་རྐང་པའི་མཐིལ་ཡན་དུ། །རྩ་རྣམས་ཐམས་ཅད་དཔའ་བོའི་རང་བཞིན་ལ། །རླུང་རྣམས་ཐམས་ཅད་དཔའ་མོའི་རང་བཞིན་གསལ། །ཐིག་ལེ་ཐམས་ཅད་ཞི་ཁྲོ་རིགས་བརྒྱའི་ལྷ། །ཐམས་ཅད་ཡབ་ཡུམ་འཁྲིལ་སྦྱོར་མཛད་པ་ལས། །ཐིག་ལེ་འཕེལ་ཞིང་ལུས་ཀྱི་ནང་ཀུན་ཡང༌། །བྱང་སེམས་དཀར་དམར་བདེ་བ་ཆེན་པོས་གང༌། །དཔེར་ན་ཞོ་རྐྱལ་འོ་མས་གང་ལྟར་བསྒོམ། ཞག་གཅིག ། དེ་ལྟར་བསྒོམས་པས་བདེ་བ་བཟོད་མེད་སྐྱེ་ཡང་སྲིད། །དེ་ཚེ་བཟློག་བཀྲམ་ཆུང་ཟད་ཙམ་ཡང་བྱ། །འདི་དུས་ཐིག་ལེ་ཤོར་ན་གེགས་སུ་འགྲོ་བས་གཟབ་བོ། །དེ་ལྟར་ཐིག་ལེའི་སྟོང་ར་བསྒོམས་པའི་རྗེས་སུ། གཏུམ་མོ་འབར་འཛག་གི་བདེ་བ་སྦར་བ་ནི། རང་ཉིད་ལྷར་གསལ་བའི་ཁང་པའི་དབུས་སུ། རྩ་གསུམ་ཁྱད་པར་དུ་དབུ་མ་མཚན་ཉིད་བཞི་ལྡན་བསྒོམ། ལུས་གནད་མེ་ཐབ་དྲུག་ཆིངས། སྐང་པ་རེ་མིག་ལྟར་བསྣོལ། སྒལ་ཚིགས་དོང་རྩེ་ལྟར་བསྲངས། དཔུང་བ་རྒོད་གཤོག་ལྟར་བརྒྱངས། རྟིང་པས་བཤང་ལམ་དགག །ལག་གཉིས་པུས་མགོར་འཁྱུད། ལུས་སེམས་ལི་ཁྲི་ལྟར་སྒྲིམ། ཤེས་པ་ཁབ་མིག་ཏུ་སྐུད་པ་འཛུད་པ་ལྟར། རྩེ་གཅིག་པའི་ངང་ནས་ལྟེ་འོག་རྩ་གསུམ་འདུས་མདོར། ཆོས་འབྱུང་དམར་པོའི་དབུས་སུ། གཏུམ་མོ་ཨ་ཐུང་གི་མེ་མ་ལས་ཐོབ་པའི་རཀྟའི་དྭངས་མ་དེ་ཁྲོས་པ་ལས། ཨ་ཐུང་ལྟ་བུའི་མེར་གྱུར་ཏེ། རྩ་བ་བརྟན་པ། རྩེ་མོ་རྣཽ་བ། རྣམ་པ་གསལ་བ། རེག་བྱ་བདེ་བ་ལ་ཚ་བའི་ངར་དང་ལྡན་པ། ཕྲ་ཞིང་དྲང་བ། ཁ་དོག་དམར་བ། ཕྲ་སྦོམ་རྒྱ་ཁབ་ཕྲ་ཤོས་ཙམ་ཅིག དམིགས་པ་ཕུར་ཚུགས་སུ་གསལ་བར་བསྒོམ། ཞག་གཅིགཡང་རླུང་ཁ་སྦྱོར་བཟུང་ལ་རྐེད་སྐོར་བྱས་པས། རླུང་གིས་མེ་བུས་ནས་ཇེ་ཆེར་མེ་དང་བདེ་བ་གཉིས་སུ་མེད་པར་འབར་ཏེ། ཕལ་པའི་ཁབ་ཙམ་ཅིག་ཏུ་དབུ་མའི་ནང་དུ་གྱེན་ལ་ལྟེ་བར་སླེབ་པར་བསྒོམ། ཞག་གཅིག །ཡང་རླུང་བཟུང་ཞིང་རྐེད་སྐོར་བྱས་པས། མེ་དང་བདེ་བ་གཉིས་སུ་མེད་པར་ཉུང་འབྲུ་ཙམ་སྙིང་གར་སླེབ་པར་བསྒོམ། ཞག་གཅིག །ཡང་རླུང་བཟུང་ཞིང་རྐེད་སྐོར་གྱིས་མེ་ཇེ་ཆེར་དབུ་མའི་ནང་དུ། མཐེབ་མོ་ཙམ་གྱེན་ལ་འབར་བས། མགྲིན་པར་སླེབས་པའི་དྲོད་ཀྱིས་སྤྱི་བོའི་ཧཾ་ཞུ་ནས། སངས་རྒྱས་དཔའ་བོ་ཡབ་ཡུམ་གྱི་སྤྱི་བོར་ཐིམ། ཁོང་གསེང་བརྒྱུད་ནས་སྦྱོར་མཚམས་སུ་ཐོན་ཏེ། བྱང་ཆུབ་སེམས་ཀྱིས་བདེ་ཆེན་འཁོར་ལོ་གང་བ་ལ་སེམས་གཏད། ཞག་གཅིག །ཡང་རླུང་བཟུང་བས། མས་ནས་མེ་འབར། ཡས་ནས་བྱང་སེམས་ཞུ་བའི་བདེ་བ་གཉིས་མགྲིན་པར་འཕྲད་པས། བདེ་དྲོད་འབར་ཞིང་མེ་དང་ཐིག་ལེ་འདྲེས་པས། སྙིང་ག་ལྟེ་བ་ལུས་ཀུན་ལ་མེ་དང༌། ཐིག་ལེ་འདྲེས་པའི་བདེ་དྲོད་ཀྱིས་གང་བར་བསྒོམ། ཞག་གཅིག །བདེ་བ་ཆེས་ན་མེས་ཐིག་ལེ་ཡར་ཕུལ་བས། སྤྱི་བོའི་ཧཾ་ཡིག་ལ་ཐིམ་པར་བསམ། དྲོད་ཆེ་བདེ་བ་ཆུང་ན་ཐིག་ལེ་མར་བབས་ནས། ཐིག་ལེ་མེས་མནན་ནས་རིམ་པ་བཞིན་དུ་ལུས་ཀུན་བདེ་བ་ཐིག་ལེས་ཁྱབ་པར་བསྒོམ། བདེ་དྲོད་སྐྱེས་པ་དང་བདེ་བའི་ངོ་བོ་ལ་ཅེར་གྱིས་བལྟས་པས། ཅིར་ཡང་མ་གྲུབ་སྟེ་ཡེ་ནས་སྟོང་པ་ཉིད། སྟོང་པའི་རང་རྩལ་མ་འགགས་པར་བདེ་དྲོད་དུ་ལྷང་ངེ་བ་ལ་ཞེན་པ་མེད་པར་བཞག །དེ་ནི་ཡེ་ཤེས་ཀྱི་གཏུམ་མོ་འདི་ཐིག་ལེ་བདེ་བ་སྦྱང་བའི་གཏུམ་མོ་མདོར་བསྡུས་ཡིན་ལ། རྒྱས་པར་གཞན་དུ་ཤེས་སོ། །ཞེས་བྱ་སྟེ། གེགས་མི་འབྱུང་ཞིང་བདེ་དྲོད་ཀྱི་ཏིང་ངེ་འཛིན་ཁྱད་པར་ཅན་སྐྱེའོ། །དམིགས་པའི་རྐང་གྲངས་དང་། ཞག་གྲངས་མང་ཉུང་ཉམས་དང་སྦྱར་ལ་བསྒོམ་དུ་བཅུག་གོ །དེ་ཡན་ཆད་སྔོན་འགྲོའི་ཁྲིད་དོ། །དེ་ནས་དངོས་གཞི་ལ་ཡང་གསུམ་སྟེ། འོད་ཀྱི་རིག་མ། རང་ལུས་ཐབས་ལྡན། གཞན་ལུས་ཐབས་ལྡན་གྱི་ཁྲིད་དང་གསུམ་མོ། །དང་པོ་འོད་ཀྱི་རིག་མ་བརྟེན་ནས་བསྒོམ་པ་ནི། འདོད་ཆགས་རང་གྲོལ་གྱི་གཞུང་ལས། ཐོག་མར་འོད་རིག་ཡེ་ཤེས་ཕྱག་རྒྱ་ནི། །རང་གི་ཡིད་དུ་འོང་བའི་བུ་མོ་དེ། །ཁ་དོག་དབྱིབས་དང་སྤྱོད་ལམ་མངོན་སུམ་ལྟར། །ཆགས་པའི་དབང་གིས་མདུན་དུ་བྱུང་བར་བསྒོམ། །རང་ཉིད་ཡི་དམ་རྟ་མགྲིན་བསྒོམ་པའམ། །ཡང་ན་པདྨ་འབྱུང་གནས་གཅེར་བུའི་ཚུལ། །བུ་མོ་དེ་ཉིད་ངོ་བོ་མཚོ་རྒྱལ་ལ། །རྣམ་པ་བུ་མོ་དེ་ཉིད་དངོས་སུ་བསྐྱེད། །དང་པོ་ཆགས་པའི་ཚུལ་གྱིས་གཟུགས་ལ་བལྟ། །དེ་ནས་འཛུམ་ཞིང་ལག་པས་འཁྱུད་པར་བསྒོམ། །ནུ་མ་མཉེ་ཞིང་འོ་བྱེད་ལྕེ་འཇིབས་བསྒོམ། །བདེ་བ་འབར་ནས་མཁའ་གསང་སྤྲད་པ་ལས། །དལ་བུས་བསྒུལ་ཞིང་སྤྱོད་པས་བདེ་བ་གཡོས། །བུ་མོས་མ་བཟོད་མཁུན་ཆུང་ཅལ་ཅོལ་བཏོན། །རང་ཉིད་བདེ་བ་མ་ཤོར་བསྐྱིལ་བར་བསྒོམ། །རིག་པ་མ་བཅོས་བདེ་སྟོང་གཉིས་མེད་བསྲེ། །དེ་ལྟར་བསྒོམ་ཞིང་དབང་ཉམས་བདེ་བ་བསྒོམ། །ལུས་གནད་ལག་གཉིས་པུས་མོ་དམ་དུ་འཁྱུད། །བདེ་བ་དངོས་སུ་རྒྱས་ན་དེ་ཀ་བསྒོམ། །མཇུག་ཏུ་བཟློག་བཀྲམ་འཁྲུལ་འཁོར་འབད་པར་བྱ། །ཞེས་པ་ལྟར་ཞག་གྲངས་ཉམས་དང་སྦྱར་ལ་བསྒོམ་དུ་བཅུག་གོ །དེ་ནས་གཉིས་པ་རང་ལུས་ཐབས་ལྡན་ནི། གཞུང་ལས། དེ་ནས་ལག་པས་ཕྱག་རྒྱ་འདི་ལྟར་བྱ། །ཞེས་པ་ནས། དེ་ཕྱིར་རང་ལུས་ཐབས་ལྡན་འདི་ལ་འབད། ཅེས་པའི་བར་ཏེ། དེའི་ལག་ལེན་ནི། སེམས་བསྐྱེད་དང་ལྡན་པས་བདག་ཉིད་རྟ་མགྲིན་དུ་བསྐྱེད། པང་དུ་ཡུམ་རྡོ་རྗེ་ཕག་མོ་ལ་རྣམ་པ་རང་གི་ཡིད་དུ་འོང་བའི་བུ་མོ་མཛེས་མ་ཅིག །ཆགས་པ་སྐྱེས་ནས་རང་ལ་གུས་པར་བསམ། སྤྱི་བོར་ཨུ་རྒྱན་མཚོ་རྒྱལ་གཉིས། གཉིས་མེད་སྦྱོར་བས་བྱང་སེམས་རང་གི་སྤྱི་བོར་ཐིམ་པས། བདེ་བ་རྒྱས་ཤིང་དབང་བཞི་ཐོབ་པར་བསམས་ལ། དེ་ནས་ཕན་ཚུན་ཆགས་པའི་སེམས་ཀྱིས་གཟུགས་ལ་བལྟ། ཆགས་པའི་གཏམ་བརྗོད་དྲི་མ་བསྣམས་ལ། རོ་ལྕེ་འཇིབས། རེག་ནུ་མ་མཉེ་བ་དང༌། ཤ་ལུས་ལ་རེག་ཅིང་ཆགས་པ་རྒྱས་པར་བསྒོམ། ཁེ་ཀེར་ཁས་སློ་མཁས་པས་ཆམ་ཐས་ཉས་ཆ་རས་ཛ། ཐི་ཏེར་སྠོ་སླེ་མཐས་པས། ཕ་ཉུ་ཁ་མས་ཕར་ས་ཤ། མཛུབ་མོ་ལྔ་རིགས་ལྔའི་མཁའ་འགྲོར་བསམ་ནས་རིག་པ་རྗེན་ནེ་བའི་ངང་ལས་མ་ཤོར་བར། རྡོ་རྗེ་དལ་བུས་ཉུག་ཉུག་སྤྱོད་པས། སྤྱི་བོའི་ཧཾ་ལས་བྱང་སེམས་གཡོས་ནས་མགྲིན་པར་སླེབས་པས། དགའ་བ་ངོས་བཟུང་ཞིང་བདེ་སྟོང་དབྱེར་མེད་ཀྱི་ཉམས་སྐྱོང༌། ཞག་གསུམ། ཡང་སྤྱོད་པས་སྙིང་གར་མཆོག་དགའ་ངོས་བཟུང་ཞིང་བཟློག །ཞག་གསུམ། དེ་ནས་ལྟེ་བར་ལྷན་སྐྱེས་ངོས་བཟུང་ཞིང་བཟློག །ཞག་གསུམ། དེ་ནས་གསང་གནས་རྡོ་རྗེའི་རྩ་བར་དལ་བུས་ཕབ། བདེ་བ་ལྷང་གིས་སྐྱེས་པ་དང༌། ཞེན་མེད་ཀྱི་ངང་ནས་ཡང་ཡང་བཟློག་འདི་ལ་ཞག་བདུན་ཙམ་སྦྱང༌། ཡང་སུན་པ་དང་དུབ་པ་བྱུང་ན། ཞག་གསུམ་ཙམ་གློད་ལ་ངལ་བ་གསོ། ཡང་སྦྱོང་ཞིང་འདུན་པ་གཏད་པ་ཙམ་གྱིས་ལོག་ན། བྱང་སེམས་རྡོ་རྗེའི་རྐེད་པར་ཕབས་ལ། ལག་པས་སྤྱོད་འཕྲོ་བཅད་ལ་བཞག །བདེ་བ་ཆེན་པོ་སྐྱེས་པ་དང༌། ཤ་ཁ་མར་ཥ་སྨྱ་ཐ་ཡོ་གྦ་ཕ་ཉ་ཐ་ཤ ཞེན་པ་མེད་པའི་ངང་ནས་དགའ་བྲལ་གྱི་བདེ་བ་ངོས་བཟུང་ལ། རིག་པ་དྲི་མ་མེད་པའི་ངང་ལ་ལྷན་ནེ་བཞག །འོག་སྒོ་དང་ཉྭ་བཞི་ལྷོད་ཀྱིས་ལྷོད་པས། བདེ་བ་ལྷན་ནེ་ཟིན་ནོ། །བདེ་བ་ཡར་ལོག་ནས་ཆུང་དུ་སོང་ན། ལག་པས་ཅུང་ཟད་ཉུག་ཉུག་སྤྱོད། མར་རམ་མཆིལ་མས་བརླན་ལ་སྤྱོད། ཕྱི་ལ་འཆོར་འཆོར་འདྲ་ན་བསྒུལ་བསྐྱོད་བཤོལ་ལ། རིག་པ་དབྱིངས་ལ་གཏད། སྐབས་འདིར་ཐིག་ལེ་ཉམས་ན་ཕྱིན་ཆད་ངན་ལང་ལ་ཤོར་ནས། བསྐྱིལ་མི་ཐུབ་པར་འཆོར་བས། གཉེན་པོ་དྲག་པོས་ཅི་ནས་ཀྱང་མ་ཤོར་བར་བྱའོ། །བསྐྱིལ་བའི་ཉམས་དང་ལྡན་ན། ཡུན་ཅི་རིང་དུ་བསྐྱིལ་ཞིང་ཉམས་ཀྱིས་ཟིན་པར་འགྱུར། བདེ་ཉམས་ཆུང་ན། པས་པས། པ་ཇི་ཤ་པར་ཨ་ལ་ཕ་རྒྱ་ཐོ། བདེ་བ་ཆེ་ཆེ་འདྲ་ན་འོག་སྒོ་ཀློད། དེ་གཉིས་རེས་མོས་ཀྱིས་བདེ་བ་ཡུན་རིང་ཟིན་ནོ། །དེ་ནས་བཟློག་པའི་འཁྲུལ་འཁོར་ནི། གྱད་བཞི་དྲག་ཏུ་བསྐུམ། ངན་འགྲོའི་ལམ་གཉིས་བསྡམ། ཐུར་སེལ་གྱེན་ལ་འདྲེན། རྒྱ་མཚོ་རི་ལ་སྦྱར། དར་དམར་དགུང་ལ་བསྐྱོད་རྒྱང་ཞགས་ནམ་མཁའ་ལ་བཀན། ཁོང་འདྲེན་དྲག་པོས་རིག་པ་ག་གའི་དབྱིངས་སུ་གཏད་དེ། ལག་པའི་ཁུ་ཚུར་གཉིས་ལྟེ་འོག་ནས་དྲག་ཏུ་འཐེན་ལ། ལྟག་པ་ནས་གནམ་དུ་འཕང་བ་ལན་གསུམ་མམ། ལྔ་ཙམ་བྱས་པ་ལ། དེ་མ་ཐག་ཏུ་རྡོ་རྗེའི་ངར་འཆོར། གསང་གནས་ཀྱི་བདེ་བ་གྱེན་དུ་ལོག་སྟེ། ལྟེ་བར་བདེ་བ་སྐྱེ། ད་རུང་འདྲེན་པས་སྙིང་གར་བདེ་བ་སྐྱེ། རྩ་བཟང་བ་དང་ལུས་ཉམས་བཟང་ན་མགྲིན་པ་དང༌། སྤྱི་བོའི་བར་དུ་མས་བསྟེན་གྱི་དགའ་བ་སྐྱེ། ཕལ་ཆེར་སྙིང་ག་ནས་ཡལ་འགྲོ། དེ་ནས་བཀྲམ་པ་ནི། ཁུ་ཚུར་གཉིས་སྙིང་ག་ནས་ཐད་དཀར་འཕོང་བ། རླུང་དྲག་ཏུ་འབུད་པ་དང་དམིགས་པ་སྤྱི་བོ་ནས་བདེ་བས་ལུས་ཀུན་ཁྱབ་པར་བསམ་ཞིང༌། ལུས་གཡང་མོའི་བཞི་སྤྲུག་དྲག་ཏུ་བྱ་བ་རྣམས་དུས་གཅིག་ཏུ་བྱས་པས། ཐིག་ལེ་རྩ་མིག་ཀུན་ཏུ་ཁྱབ་ནས་འགྲེམ་པར་འགྱུར་རོ། །དེ་རྗེས་སུ་བུམ་པ་ཅན་གྱི་རླུང་ལ་སྦྱངས་པས། ཐིག་ལེ་རླུང་དང་འདྲེས་ན་ལས་སུ་རུང་བ་ཡིན་ནོ། །དེ་ནས་མ་བཅོས་ཀ་དག་གི་ངང་ལ་ཡུན་རིང་དུ་བཞག་པས། གེགས་རྣམས་གཏན་ནས་མི་འབྱུང་ཞིང༌། བདེ་སྟོང་གི་ཏིང་ངེ་འཛིན་སྐྱེ་བར་འགྱུར་རོ། །དེ་རྗེས་དག་ེབ་བླ་ན་མེད་པའི་བྱང་ཆུབ་ཏུ་བསྔོའ།ོ ། དེ་ནི་རང་ལུས་ཐབས་ལྡན་ཞེས་བྱ་སྟེ། །དེ་ཀས་ཀྱང་ནི་བདེ་བ་ཆེར་འཕེལ་ན། །བདེ་སྟོང་ཟག་མེད་མཆོག་གི་ཏིང་འཛིན་ཐོབ། །ཁྱད་པར་འདུལ་བ་འཛིན་པའི་དགེ་སློང་གིས། །གཞན་ལུས་བསྟེན་ན་གཞན་གྱི་སྒྲོ་སྐུར་འབྱུང༌། །དེ་ཕྱིར་རང་ལུས་ཐབས་ལྡན་འདི་ལ་འབད། །སྤྱི་དོན་གསུམ་པ། གཞན་ལུས་ཐབས་ལྡན་ཀྱི་ཁྲིད་ལ་དྲུག་སྟེ། ཕྱག་རྒྱ་བརྟག་པ། དགུག་པ། སྒྲིབ་པ་རང་ལུས་ཚགས་སུ་གཞུག་པ། སྒྱུ་ལུས་སྦྱང་བ། དངོས་གཞི་ཉམས་སུ་ལེན་པ་དང་དྲུག་ལས། དང་པོ་ལ་གཉིས། རང་དང་གཞན་གཉིས་སོ། །ཐོག་མར་གཞན་ལུས་བསྟེན་རུང་གི་གང་ཟག་ནི། གཞུང་ལས། གཞོན་ཞིང་ནད་མེད་ལུས་དར་ལང་ཚོ་རྒྱས། །རྩ་བཟང་བློ་ཆེ་གསང་སྔགས་ལ་མོས་ཤིང༌། །གསུམ་པའི་དབང་ཐོབ་རང་ལུས་སྔོན་སོང་བས། །ཡོན་ཏན་དགུ་དང་ལྡན་པས་གཞན་ལུས་བསྟེན། བསྟེན་མི་རུང་བ་རྒས་རྒུད་དབང་པོ་ཉམས། །གཅོང་ཅན་བློ་ཆུང་རྩ་ངན་དབང་མ་ཐོབ། །གསང་སྔགས་བློར་མི་ཤོང་བའི་གང་ཟག་ལ། །གཞན་ལུས་གདམས་པའི་མིང་ཡང་བསྒྲག་མི་བྱ། །ཞེས་སོ། །གཉིས་པ་མཚན་ལྡན་བརྟག་པ་ལ་སྤང་བླང་གཉིས་ཏེ། རྒྱས་པར་མཚན་འབུམ་ཀུན་དང་མཐུན་ལ། མདོར་བསྡུས་ན། གཞུང་ལས། །ཁྱད་པར་གཟུགས་བཟང་ལང་ཚོ་དར་ལ་མཛེས། །ངག་སྙན་དྲི་ཞིམ་ཡིད་འོང་སྤྱོད་ལམ་དལ། །ནུ་མ་ཆུང་མཁྲེགས་པདྨ་དམ་ཅིང་རུབ། །སོ་དཀར་སྨིན་མཚམས་གཉེར་མ་གྱེན་འགྲེང་གསུམ། །སྐྲ་ལི་ལུས་རན་སྐེད་པ་ཕྲ་བ་དང༌། །བློ་ཆེ་དད་ལྡན་གསང་སྔགས་ལ་མོས་ཤིང༌། །ཁྱད་པར་རང་གི་ཡིད་འོང་རང་ལ་གུས། །གསང་ཐུབ་སྦྱོར་བ་མཁས་ཤིང་ཆགས་པ་ཆེ། །རྩ་བཟང་བཅུ་དྲུག་ཡན་ནས་བཞི་བཅུ་མན། །དེ་ལྟར་རྟགས་ཀུན་རྫོགས་པ་རབ་ཡིན་ཏེ། །ཆ་ཤས་ཚང་བ་འབྲིང་ལ་ཐ་མ་ཡང༌། །སྐྱོན་མེད་ཡོན་ཏན་མེད་ཀྱང་བསྟཻན་རུང་ཙམ། །སྐྱོན་ཅན་རྒས་རྒུད་གཅོང་ཅན་རྩ་ཞིག་ཉམས། །བློ་ཆུང་གསང་མི་ཐུབ་ཅིང་སྔགས་ལ་གཤེ། །ཁྱད་པར་རང་ལ་མ་གུས་པ་ཉིད་སྤང༌། །ཞེས་སོ། །གཉིས་པ་འགུགས་པ་ལ་གསུམ་སྟེ། རྫས་དང་སྔགས་དང་ཏིང་ངེ་འཛིན་གྱིས་འགུགས་པ་ནི་གཞུང་ལྟར་རོ། །གསུམ་པ་སྒྲིབ་པ་ལ་ཡང་གསུམ། ཐབས་དང༌། རྫས་དང༌། སྔགས་ཀྱིས་སྒྲིབ་པ་དང་གསུམ་སྟེ། དེ་ཡང་གཞུང་ལྟར་རོ། །བཞི་པ་རང་ལུས་ཚགས་སུ་གཞུག་པ་ལ་གཉིས། ལུས་སྟོབས་བསྐྱེད་པའི་བཅུད་སྦྱོར་བསྟེན་པ་དང༌། ཁ་ཟས་སྤྱོད་ལམ་གྱིས་ཐིག་ལེ་སྤེལ་བ་ཡང་གཞུང་ལས་ཤེས་སོ། །ལྔ་པ་སྒྱུ་ལུས་སྦྱང་བ་ལ་གཉིས། ལས་དང་པོ་པས། སྒྱུ་ལུས་མ་འབྱོངས་པའི་གང་ཟག་ཡིན་ན། སྒྱུ་ལུས་སྣང་བ་རང་གྲོལ་གྱི་ཁྲིད་ལྟར་རམ། སྒྱུ་ལུས་ཀྱི་ཁྲིད་གཞན་ལྟར་ཡང་རུང་སྟེ་བྱང་བར་བྱའོ། །སྔོན་ནས་བྱང་ཞིང་བདེན་ཞེན་མེད་པའི་གང་ཟག་ཡིན་ན། འདིར་སྦྱང་མི་དགོས་སོ། །མདོ་ཙམ་དུ་སྦྱངས་ན། འདོད་ཆགས་རང་གྲོལ་གྱི་གཞུང་ལྟར་སྦྱོང་ངོ༌། །དངོས་འཛིན་ཞེན་པ་མེད་པའི་ཉམས་མ་སྐྱེས་ཀྱི་བར་དུ་སྦྱང་ཞིང༌། ཆགས་ཞེན་འདོད་ཆགས་རང་ཁར་སྤྱོད་ནས་ཐིག་ལེ་ཉམས་ན། གེགས་མང་བ་དང༌། ཕྱི་མ་མངལ་གྱི་སྲིན་བུར་སྐྱེ་བ་ལ་སོགས་པས། ཉེས་པ་ཆེ་བས་སྒྱུ་ལུས་འདི་སྦྱང་བ་གལ་ཆེའོ། །དྲུག་པ་དངོས་གཞི་ཉམས་སུ་ལེན་པ་ལ་བཅུ་སྟེ། རང་ལུས་ལྷར་བསྐྱེད་སྐྱབས་འགྲོ་སེམས་བསྐྱེད། བཤགས་པ་མཁའ་གསང་བྱིན་རླབས། སྦྱོར་བ་དངོས། དབབ་བསྐྱིལ་བཟློག་བཀྲམ་པ་དང་བཅུ་ལས། དང་པོ་ནི་འདུག་པའི་གནས་གཞལ་ཡས་ཁང་གི་དབུས་སུ། པདྨ་ཉི་མ་རོའི་སྟེང་དུ་ཧྲཱིཿདང་མཿདམར་པོ་གཉིས་ལས་འོད་འཕྲོས། རྒྱལ་བ་རྣམས་ལ་མཉེས་པའི་མཆོད་པ་འབུལ། རྒྱལ་བ་རྣམས་ཀྱི་སྦྱོར་མཚམས་ནས། བྱིན་རླབས་ཡེ་ཤེས་ཀྱི་བདུད་རྩི་བྱང་སེམས་དཀར་དམར་བདེ་བ་ཆེན་པོའི་རང་བཞིན་དུ་བྱོན་ནས། ཧྲཱིཿམཿགཉིས་ལ་ཐིམ་འོད་དུ་ཞུ་བ་ལས། བདག་ཉིད་དཔའ་བོ་རྟ་མགྲིན་སྐུ་མདོག་དམར་པོ་ཞལ་གཅིག་ཕྱག་གཉིས། གྲི་གུག་ཐོད་ཁྲག་ཡུམ་ལ་འཁྱུད་པ། དུར་ཁྲོད་ཀྱི་ཆས་བརྒྱད་དང་ལྡན་པ། སྤྱི་གཙུག་ཏུ་རྟ་ཞལ་ལྗང་ཞུར་མཚེར་བའི་པང་དུ་མཿཡོངས་སུ་གྱུར་པ་ལས། མུ་དྲ་རྡོ་རྗེ་ཕག་མོ་དམར་མོ་ཕྱག་གཡས་གྲི་གུག་ཡབ་ཀྱི་མགུལ་ནས་འཁྱུད་ཅིང༌། གཡོན་པས་ཐོད་ཁྲག་ཡབ་ལ་སྟོབས་པའམ། ཡང་ན་རྒྱན་དང་ཕྱག་མཚན་མེད་པ་གཅེར་བུ་འཁྲིལ་སྦྱོར་བསྒོམས་ན་བདེ་བ་ཆེ་བར་གསུངས། འཛུམ་ཞིང་གཞོན་ཚུལ་དང་ལྡན་པ་ནུ་མ་འབུར་ཞིང་བྷ་ག་རྒྱས་པ། སྤྱི་གཙུག་ན་ཕག་ཞལ་ངུར་སྒྲ་སྒྲོགས་པ། རྡོ་རྗེ་པདྨ་མཉམ་པར་སྦྱོར་བའི་སྤྱི་བོར། པདྨ་གེ་སར་གྱི་སྟེང་དུ། ཨུ་རྒྱན་ཡབ་ཡུམ་དཀར་དམར་མདངས་ལྡན་རྒྱན་མེད་གཅེར་བུ་འཁྲིལ་སྦྱོར་བདེ་བའི་མཉམ་སྦྱོར་མཛད་པར་བསྐྱེད་ལ། གཉིས་པ་སྐྱབས་སུ་འགྲོ་བ་ནི། ན་མོ། ལུས་དག་བདེ་ཆེན་ལྷ་ཡི་གཞལ་ཡས་སུ། །རྩ་དག་བདེ་ཆེན་རིག་པའི་ཕོ་བྲང་མཆོག །ཁམས་དག་བདེ་ཆེན་དཔའ་བོ་མཁའ་འགྲོ་རྣམས། །སེམས་དག་བདེ་སྟོང་དབྱེར་མེད་མཆོད་པ་འབུལ། །རླུང་དག་བདེ་བའི་རྒྱུད་བཞི་(གཏེར་གཞུང་ལས་རང་རྒྱུད་)རབ་འགགས་ཏེ། །རྡོ་རྗེ་པདྨར་བདེ་ཆེན་དམ་སྦྱར་བས། །བདེ་སྟོང་དབྱེར་མེད་དགའ་བཞིའི་དོན་རྟོགས་ནས། །དགའ་བདེ་སྣང་སྟོང་དག་པར་སྐྱབས་སུ་འཆི། །དེ་སྐད་གཉིས་ཀས་ལན་གསུམ་བརྗོད། གསུམ་པ་སེམས་བསྐྱེད་པ་ནི། ཧོཿ སྐྱེ་བཞིས་བསྡུས་པའི་སེམས་ཅན་སྡུག་བསྔལ་རྣམས། །རྟེན་འབྲེལ་བཅུ་གཉིས་སྲིད་པའི་རྒྱུན་བཅད་ཕྱིར། །བདེ་ཆེན་རྒྱལ་བའི་བླ་མེད་ལམ་འཇུག་ཕྱིར། །བདེ་ཆེན་ཆགས་པའི་ལམ་མཆོག་འདིར་ཞུགས་ནས། །རྡོ་རྗེ་པདྨ་སྲུབ་ཅིང་བསྒུལ་བསྐྱོད་གཡེམ། །བདེ་ཆེན་སེམས་བཟུང་སྟོང་པའི་ངང་ལས་སྦྱང༌། །ཕ་རོལ་ཕྱིན་དྲུག་ལམ་ལྔ་ས་བཅུ་གནོན། །བླ་མེད་རྒྱུད་སྡེ་ཐེག་པའི་གནད་ཁྲོལ་ཏེ། །ལོངས་སྐུ་སྤྲུལ་སྐུས་འགྲོ་བའི་དོན་བྱེད་ཅིང༌། །ཉོན་མོངས་བདེ་བར་གྲོལ་བར་སེམས་བསྐྱེད་དོ། །བཞི་པ་བཤགས་པ་ནི། སྐྱེ་བ་ཐོག་མཐའ་མེད་པའི་དུས་རིང་ནས། །བདེ་ཆེན་གནད་བཞི་མ་ཤེས་ཉོན་མོངས་པས། །ཉོན་མོངས་རང་ཁར་སྤྱད་པ་མཐོལ་ལོ་བཤགས། །བདེ་སྟོང་ཟག་མེད་མཆོག་གི་དངོས་གྲུབ་སྩོལ། །ལྔ་པ་མཁའ་གསང་བྱིན་གྱིས་བརླབ་པ་ནི། ཡུམ་གྱིས་ཧཱུྃ་བཛྲ་ཞེས་བརྗོད་པས། ཡུམ་གྱི་ཐུགས་ཀ་ནས་ཧཱུྃ་གཅིག་ཆད་པ། ཡབ་ཀྱི་གསང་བ་ལ་ཕོག །འོད་དུ་ཞུ་བ་ལས། གསང་བ་ཧཱུྃ་ལས་རྡོ་རྗེ་རྩེ་ལྔ་པའི་ནང་དུ་བྱང་ཆུབ་སེམས་ཀྱི་ངོ་བོ། དངུལ་ཆུ་ཞུན་མ་ལྟ་བུའི་ཨོཾ་དཀར་པོ་གནས་ཤིང༌། བུག་པ་ཕཊཿནག་པོས་བཀག་པར་གྱུར། ཡབ་ཀྱིས་བྂ་པདྨ་མཎྜལ་ཨེ་ཨེ། བརྗོད་པས། ཡབ་ཀྱི་ཐུགས་ཀ་ནས་བྂ་གཅིག་ཆད་པ་ལས། ཡུམ་གྱི་མཁའ་ལ་ཕོག །འོད་དུ་ཞུ་བ་ལས། མཁའ་པདྨ་འདབ་བརྒྱད་དམར་གསལ། གེ་སར་ཨེས་མཚན་པའི་ནང་དུ་རཀྟའི་ངོ་བོ་ཨཱཿདམར་པོ་མཚལ་ལྕོག་ལའི་མདོག་ལྟ་བུའི་དམར་གསལ་དུ་གནས་པར་གྱུར། རྡོ་རྗེ་པདྨ་བྱིན་གྱིས་བརླབས་པའི་སྔགས་ལ། བཛྲ་པདྨ་མ་ཧཱ་སུ་ཁ་དྷ་རི་ཧཱུྃ། གསུམ་གྱིས་མཁའ་གསང་བྱིན་གྱིས་བརླབས། བདེ་ཆེན་བྱང་སེམས་བྱིན་གྱིས་བརླབ་པའི་སྔགས། ཨོཾ་ཨཱཿཧཱུྃ། བོ་དྷི་ཙིཏྟ་ག་ཎ་གུ་ཧྱ་སརྦ་པུཙྪ་ཧོ། གསུམ་བརྗོད་པས། མཁའ་གསང་བསྣོལ་མར་བྱིན་གྱིས་བརླབས་སོ། །དྲུག་པ་སྦྱོར་བ་དངོས་ལ་གཉིས་ཏ།ེཆགས་པ་བསླང་བ་དང༌། བདེ་བ་སྦྱང་བའོ། །དང་པོ་ནི། ཕྱག་རྒྱ་ཁྲུས་བྱ། རྒྱན་གྱིས་མཛེས་པར་སྤྲས་ལ། དབེན་པར་ནང་ཚངས་ཅན་གྱི་གདན་ལ། རང་དང་ཕྱག་རྒྱ་ལྷན་གཅིག་བྱས་ལ། ཡུལ་ལྔའི་སྒོ་ནས་ཆགས་པ་བསླང་སྟེ། དང་པོ་ཕན་ཚུན་ཆགས་པའི་གདུང་སེམས་ཀྱིས། གཟུགས་ལ་ལྟ་ཞིང་འཛུམ་པ་དང་དགོད་པར་བྱ། གཉིས་པ་སྒྲ་ནི། ཆགས་པ་སྐྱེ་བའི་འཁྲིག་ཚིག་སྣ་ཚོགས་སྨྲ། གསུམ་པ་དྲི་ནི། ཕན་ཚུན་དྲི་མ་སྣོམ། དྲི་ངན་ན་ཞེན་པ་ལོག་པས་དྲི་བཟང་གིས་ཁྲུས་དང་བྱུག་པར་བྱ། བཞི་པ་རོ་ནི། བུ་རམ་ཀ་ར་ལ་སོགས་པ་རོ་བཅུད་དང་ལྡན་པའི་ཟས་མྱོང་ཞིང་ལྕེ་འཇིབས། ལྔ་པ་རེག་བྱ་ནི། གཅེར་བུ་དམ་དུ་འཁྱུད་པ་དང༌། ཤ་ལུས་ཕན་ཚུན་རེག་ཅིང་དྲུད་པ་དང༌། འོ་བྱ་ནུ་མ་མཉེ། གཡའ་བསྒག །རྡོ་རྗེས་པདྨ་མཉེ་བ་དང༌། ཆགས་པ་བསླང་བའི་ཐབས་སྣ་ཚོགས་བྱ། རྒྱས་པར་ནི་ཆགས་ཞེན་གྱི་སྤྱོད་པ་ཉི་ཤུ་རྩ་བཞིར་བཤད། བསྡུས་པ་ནི་ལྔ་པོ་འདིར་འདུས་སོ། །དེ་ཚེ་རིག་མ་ཆགས་པ་སྐྱེ་བའི་རྟགས་སུ། འཛུམ་ཞིང་མིག་ཟིམ་བུས་ལྟ་བ་དང༌། བྱད་བཞིན་འགྱུར་ཞིང་གདོང་ལ་ཟིལ་པ་ཆགས་པ་དང༌། འཁྲིག་ཚིག་སྨྲ་ཞིང་མཁུན་ཆུང་བཏོན་པ་དང༌། རྐང་ལག་གཡོ་འགུལ་མང་བ་དང༌། ངོ་ཚ་མེད་པར་རང་ལ་དམ་དུ་འཁྱུད་པ་དང༌། སྤྱོད་ལམ་མཉེན་འབོལ་གྱིས་འགྲོ་བ་ལ་སོགས་པ་ཆགས་པ་ལངས་པའི་རྣམ་འགྱུར་སྟོན་པར་འགྱུར་རོ། །གཉིས་པ་དངོས་གཞིའི་བདེ་བ་སྦྱང་བ་ནི། གོང་ལྟར་འདུ་ཤེས་གསུམ་དང་ལྡན་པའི་ངང་ནས། དང་པོ་རྡོ་རྗེ་ལས་སུ་རུང་བར་བྱས་ལ། པདྨའ་ིགཡས་གཡོན་དང་སྟེང་འོག་དང་ཟེའུ་འབྲུ་མཉེ། རྡོ་རྗེས་ཉག་ཅས་ཛ་ཐ་ས་ཛ་ཛ་ཐ་ཆ་རྩ་ཀུ་ཀ་ཉ་ཅ། མཐ་པས་སཁ་ཝས་ས་ཁས་ཝས་ཕརྟུཏ་མར། ཡུམ་ཆགས་པ་སྐྱེ་རྟགས་སུ། དབུགས་རྒོད་ཅིང༌། དམ་དུ་འཁྱུད་པ་དང༌། འོ་བྱེད་ལྕེ་དྲག་ཏུ་འཇིབས། པདྨ་རློན་འཇིབས་འབྱུང༌། ཡུམ་ཆགས་པ་མ་ལངས་པར་སྤྱད་ན་བདེ་བ་ཆུང་ཞིང༌། ཆགས་པ་གཏིང་ནས་ལངས་ནས་སྤྱད་ན། བདེ་བ་བདུན་འགྱུར་གྱིས་འཕེལ་ཞིང༌། བཟོད་པ་མེད་པའི་བདེ་བ་སྐྱེ་བས་གལ་ཆེའོ། །པདྨའི་ཁར་རེག་ཙམ་བསྣུན། ཆགས་པ་གཏིང་ནས་འབར་ན། རྩ་སྣ་མར་ལུག་པར་འགྱུར་རོ། །བདུན་པ་ཐིག་ལེ་དབབ་པ་ལ་བཞི་སྟེ། གནས་བཞིར་དགའ་བ་བཞི་དང་སྦྱར་ནས་དབབ་པ་ནི། དེ་ནས་རིག་པ་གསལ་སྟོང་དྲི་མ་མེད་པའི་ངང་ནས། རྡོ་རྗེའི་རྩ་བ་གཏིམ་གྱིས་ཕུལ་ནས་ཅུང་ཟད་མི་བསྒུལ་བར་གཏིམ་མེ་བཞག །རིག་པའི་ངོ་བོ་ལ་རྗེན་ཅེར་གྱིས་བལྟས་ལ། དེའི་ངང་ལས་མ་ཤོར་བར། དལ་བུས་ཅུང་ཟད་ཅུ་ཁ་ཅུ་ཁ་བསྒུལ་ཞིང་སྤྱོད་པས། བཅུད་ཀྱི་ཐིག་ལེའི་དྭངས་མ་ཟག་མེད་ཀྱི་བརྒྱད་དང༌། རྩ་མདུད་ལྔ་དང་། སྨིན་ཕྲག་དང༌། སྙིང་གི་དཀྱིལ་དང༌། རྡོ་རྗེ་པདྨའི་རྩེར་གནས་པ་རྣམས། རང་དབང་མེད་པར་གཡོས་ནས། གསང་བར་བབ་སྟེ། ལུས་ཀྱི་རྩ་ཐམས་ཅད་ཀྱི་མདོ་གསང་བར་འདུས་པས། དེ་གཉིས་བསྒུལ་བས་རྩ་བྲན་ཐམས་ཅད་གཡོས་ཤིང༌། ཐིག་ལེ་དཀར་དམར་དབུ་མའི་འདུས་མདོར་བབ་སྟེ། དཔེར་ན་སྡོང་པོ་བསྒུལ་བས། ཡལ་ག་ཀུན་རང་དབང་མེད་པར་འགུལ་ནས། ཟིལ་པའི་ཆུ་རྣམས་མཐུར་དུ་བབ་པ་ལྟར། རྩ་ཕྲན་ཀུན་གྱི་ཐིག་ལེ་དང༌། ཁྱད་པར་སྤྱི་བོའི་ཧཾ་ཞུ་ནས་བབ་སྟེ། བྱང་སེམས་མགྲིན་པར་སླེབས་པ་དང༌། ཕྱི་རོལ་རྣམ་རྟོག་རགས་རིམ་འགག །འདོད་ཆགས་གཉིས་འཛིན་གྱི་རྟོག་པ་རགས་པ་ཡང་ནུབ། འདོད་ཆགས་ལས་གྱུར་པའི་རྟོག་པ་བཞི་བཅུ་འགག །བདེ་བ་རྟོག་པ་མེད་པའི་ཉམས་སྣང་འཆར་ཏེ། ལུས་སེམས་བདེ་བར་འཆར་བ་སྤྲུལ་སྐུའི་དགོངས་པའོ། །དགའ་བ་བཞི་ལས། དང་པོ་དགའ་བའི་ཡེ་ཤེས་ཞེས་བྱ་སྟེ། བདེ་སྟོང་དབྱེར་མེད་པའི་ཉམས་དེ་ངོས་བཟུང་ལ། མགྲིན་པར་བདེ་པའི་ངང་ལ་བསྒུལ་སྤྱོད་བཤོལ་ལ་ལྷན་ནེ་བཞག །དེ་ནས་ཉམས་ཚོད་དང་སྦྱར་ལ། ཅུང་ཟད་དྲག་ཏུ་སྤྱོད། རྩ་བཟང་བ་མ་གཏོགས་པ། རྩ་ངན་པའི་རིགས་ལ་དྲག་ཏུ་སྤྱོད་ན་ཐིག་ལེ་མྱུར་དུ་འཆོར་བས། དལ་བུས་སྤྱོད་པས་བཅུད་ཀྱི་ཐིག་ལེ་རྣམས་ནས་དྭངས་སྙིགས་ཀྱི་ཐིག་ལེའི་ཞུན་ཆུ་ཐད་ཐད་ནས་འཁྱག་པའི་ཞུན་ཆུ་ལྟར་ཟག་སྟེ། དྷཱུ་ཏིའི་ནང་ནས་རླུང་གིས་མར་མར་ཕུལ་ནས། མགྲིན་པའི་ཐད་ནས་སྙིང་གར་སླེབས་པ་དང༌། གོང་ལས་བདེ་བ་སུམ་འགྱུར་ཙམ་གྱིས་འཕེལ་ཏེ། གཞན་སྣང་གིས་རྟོག་པ་མེད་པར་བདེ་ལྷང་གིས་སོང་བ་ནི། ལོངས་སྐུའི་དགོངས་པ་ཉམས་སུ་མྱོང་བ་སྟེ། དགའ་བ་བཞི་ལས་མཆོག་དགའི་ཡེ་ཤེས་སོ། །ཞེ་སྡང་ལས་གྱུར་པའི་རྟོག་པ་སོ་གསུམ་འགག །སྣང་བ་ཞེས་བྱ་བ་ཤེས་པ་གསལ་ལམ་གྱིས་འཆར་ཏེ། སྐད་ཅིག་མ་དང་པོའི་ཡེ་ཤེས་ཞེས་བྱ་བ། དེ་ངོས་བཟུང་ལ་སྙིང་གར་བསྒུལ་བསྐྱོད་བཤོལ་ལ་ལྷན་ནེ་བཞག །དེ་ནས་ཚད་དང་སྦྱར་ནས་རིག་པ་མ་ཡེངས་པར་བསྒུལ་ཅིང་སྤྱོད་པས། བདེ་བ་ཇེ་ཆེར་བྱང་སེམས་ལྟེ་བའི་ཐད་དུ་སླེབ། གོང་ལས་བདེ་བ་ལྔ་འགྱུར་ཙམ་གྱིས་འཕེལ་ཏེ་འཛིན་པའི་རྣམ་རྟོག་མེད་པར་ཤེས་པ་དགའ་བདེའི་ངོ་བོར་འཆར་བ་སྟེ། ངོ་བོ་ཉིད་ཀྱི་སྐུའི་དགོངས་པ་མངོན་སུམ་དུ་ཉམས་སུ་མྱོང་བ་སྟེ། དགའ་བ་བཞི་ལས་ལྷན་ཅིག་སྐྱེས་དགའི་ཡེ་ཤེས་སོ། །གཏི་མུག་ལས་གྱུར་པའི་རྟོག་པ་བདུན་འགག །སྣང་བ་མཆེད་པ་ཞེས་བྱ་བ་བདེ་གསལ་མི་རྟོག་པའི་ཉམས་སྔར་བས་གསལ་དུ་འཆར་བས། སྐད་ཅིག་གཉིས་པའི་ཡེ་ཤེས་ཞེས་བྱ་སྟེ། དེ་ངོས་བཟུང་ལ་ལྟེ་བར་བསྒུལ་སྤྱོད་བཤོལ་ལ་ངང་ལ་ལྷན་ནེ་བཞག །དེ་ནས་ཡང་ཚོད་དང་སྦྱར་ནས་དལ་བུས་བསྒུལ་ཞིང་སྤྱོད་དེ། འདི་ཕན་ཆད་ནས་ཤིན་ཏུ་གཟབ་པར་བྱ་སྟེ། བདེ་བ་མྱོང་བས་ཐིག་ལེ་རང་དབང་མེད་པར་འཆོར་བས། གཉེན་པོ་དྲག་པོ་དང་རིག་པ་དྲི་མ་མེད་པའི་ངང་ལས་མ་ཤོར་བ་གལ་ཆེའོ། །བྱང་སེམས་རྡོ་རྗེའི་རྩ་བར་ཕེབས་པ་དང༌། གོང་ལས་བདེ་ཉམས་བདུན་འགྱུར་ཙམ་གྱིས་འཕེལ་ཏེ། ལས་དང་པོ་པས། གཉེན་པོ་དྲག་པོ་བསྟེན་ཅིང༌། རིག་མ་གཡོ་འགུལ་མེད་པར་བྱའོ། །བརྒྱད་པ་བསྐྱིལ་བ་ནི། ཞེན་པ་མེད་པའི་ངང་ནས་བདེ་སྟོང་དབྱེར་མེད་པའི་དོན་ལ་རིག་པ་གཏད་དེ། བདེ་བ་མ་ཡལ་ཙམ་དུ་དལ་བུས་བསྲུབ། བདེ་བ་འཆོར་སྙམ་བྱུང་ན་འོག་སྒོ་དང་ཉྭ་བཞི་ལྷོད་ཀྱིས་ཀློད། རིག་པ་ཀ་དག་ངང་ལ་ལྷན་ནེ་བཞག་པས། བདེ་བ་མི་འཆོར་བར་ལྷན་ནེ་ཟིན་པར་འགྱུར་རོ། །འདིའི་སྐབས་སུ་བྱི་ལ་སྦྲུལ་རྩེད་ལྟར་བྱས་ཏེ། བདེ་བ་ཡལ་བ་འདྲ་ན་ཉམས་དང་སྦྱར་ལ་བསྒུལ་ཞིང་སྤྱོད། བདེ་བ་འཆོར་འཆོར་འདྲ་ན་འོག་སྒོ་ལྷོད། དེ་ལྟར་རེས་མོས་ཀྱིས་བདེ་བ་བསྐྱིལ་བས། མི་འཆོར་བར་ལྷན་ནེ་ཇི་ཙམ་འདོད་པར་གནས་པ་འོང༌། གནད་འདི་ཤིན་ཏུ་ཟབ་སྟེ་རིལ་བ་ཞབ་ཚགས་ཅན་ཡང་ཟེར། ཐབས་ལམ་གསར་བུ་པས་ནི་དེ་ལས་འདས་ན་ཐིག་ལེ་འཆོར་བས། རྡོ་རྗེའི་རྩ་བར་ཆིལ་གྱིས་ཕེབས་པ་དང༌། བསྒུལ་སྤྱོད་བཤོལ་ལ་ངང་ལ་ལྷན་ནེར་བཞག །འདི་དུས་འཁྲུལ་འཁོར་གང་ཡང་མི་བྱ་བར། བདེ་བ་འཚོ་ཤེས་པ་གལ་ཆེ། རྩབ་རྩུབ་མང་ན་ཤོར་ཉེན་ཆེ་བས། གཉེན་པོས་ཟིན་ཅིང་ལྷོད་པ་གཅེས་སོ། །གལ་ཏེ་འཛིན་ལོང་མེད་པར་འཆོར་སྙམ་བྱུང་ན། ཆུ་སྲིན་གྲེ་འགག་བྱ་སྟེ། མཁའ་འགྲོ་བཞིའི་དབུ་རྒྱན་ཕུད་ལ། ཟོ་རློན་ཁ་ཅིར་ཕྱི་ཕས་ཐུ། གསང་རྩ་དྲག་ཏུ་མནན་པས། དེ་མ་ཐག་ཏུ་ཐིག་ལེ་གྱེན་དུ་ལོག་ནས། བསྐྱིལ་བཟློག་བཀྲམ་པ་གསུམ་དུས་གཅིག་ཏུ་འབྱུང༌། གཟེར་འགག་གནད་ཀྱི་ཐེམ་བུ་ཞེས་ཀྱང་བྱ་སྟེ། ཤིན་ཏུ་ཟབ་བོ། །དེ་ལྟར་བདེ་བ་ཆེ་བདེ་བའི་དུས་ཀྱི་ཚེ། བདེ་བ་དེ་ཀའི་ངོ་ལ་ཅེར་གྱིས་བལྟས་པས། གོང་མའི་བདེ་བ་གསུམ་པོ་གང་བས་ཀྱང༌། ལྷག་པའི་བདེ་ཉམས་འབར་ཏེ། འདིའི་སྐབས་སུ་ལུས་འདར་བ་དང༌། གཉིས་ཀ་རྩ་བཟང་ན་དྲན་མེད་དུ་བརྒྱལ་བ་ལྟ་བུ་སོང་ནས། དེའི་དབང་དུ་མི་གཏོང་བར་རིག་པ་རྗེན་པའི་ཉམས་ཀྱིས་ཟིན་པར་བྱ། ཀློང་དུ་མ་གྱུར་པའི་བར་དུ། དེ་ཕྱིན་ལ་ཐལ་དུ་མི་གཞུག་པར། རྡོ་རྗེའི་རྩ་བར་ཡུན་ཅི་རིང་དུ་བསྐྱིལ་ལ། དེའི་དུས་ཀྱི་བདེ་ཉམས་དེ་འཛིན་མེད་བདེ་སྟོང་ཆོས་སྐུའི་དགོངས་པ་ཉམས་སུ་བླངས་པ་སྟེ། ངོས་ཟིན་པ་གལ་ཆེའོ། །བདེ་བ་ཚད་ལས་འདས་པའི་ཕྱིར་དགའ་བ་བཞི་པ་དགའ་བྲལ་གྱི་དགའ་བ་ཞེས་བྱ་སྟེ། དེའི་ཚེ་རང་བཞིན་བརྒྱད་ཅུའི་རྟོག་པ་ཡུད་ཙམ་འགག་པའི་བར་དེར། གསུམ་པའི་ཡེ་ཤེས་ཉེ་བར་ཐོབ་པ་ཞེས་བྱ་བ་འཆར་ཏེ། སྐད་ཅིག་གསུམ་པའི་ཡེ་ཤེས་ཆོས་སྐུ་རྗེན་པར་འཆར་ཀྱང༌། རྟོགས་ལྡན་ཉམས་ཅན་མ་གཏོགས་པ་བདེ་བས་ཤེས་པ་མྱོས་པ་དང༌། རང་བྱུང་ཡེ་ཤེས་ལ་གོམས་འདྲིས་ཆུང་བ་རྣམས། ངོས་མི་ཟིན་པར་འདོད་ཆགས་རང་ཁ་མར་འཆོར་ཉེན་ཆེའོ། །ངོས་ཟིན་ན་ཆོས་སྐུ་རྗེན་པའི་ཞལ་མཐོང་སྟེ། དབང་བཞི་བའི་དོན། ཚིག་དབང་རིན་པོ་ཆེ་རིག་པའི་རྩལ་དབང་ཐོབ་པ་ཡིན་ནོ། །དེའི་དུས་ཀྱི་དབང་ཉམས་བདེ་བ་ངོ་སྤྲད་པ་ནི། གཞུང་ལས། དུས་གསུམ་རྒྱལ་བའི་དགོངས་པ་དེ་ཀ་ཡིན། །དེ་དུས་བདེ་བའི་ངོ་བོ་ལ་བལྟས་པས། །ཅིར་ཡང་མ་གྲུབ་ངོ་བོ་ཀ་དག་སྟོང༌། །དགའ་བ་བཞི་ལས་དགའ་བྲལ་དགའ་བ་སྟེ། །ཆད་ལྟ་བེམ་སྟོང་མ་ཡིན་རིག་ཅིང་གསལ། །གསལ་བ་མཚན་མར་མ་གྲུབ་བདེ་བ་སྟོང༌། །མཚན་མའི་རྣམ་རྟོག་མེད་དེ་བདེ་བའི་ངང༌། །དེ་ཉིད་ངོ་བོ་སྟོང་ལ་རང་བཞིན་མེད། །རྣམ་པ་གསལ་ཞིང་རིག་པ་རྟོག་པ་མེད། །མཚན་ཉིད་གཉིས་སུ་མེད་པའི་ངང་ལ་གནས། །དེ་ཀའི་ངང་ལ་ཐམས་ཅད་ཀུན་རྫོགས་པའི། །བླ་མེད་སྔགས་ཀྱི་རྫོགས་རིམ་དེ་ཉིད་ཡིན། །རྒྱལ་བ་སྐུ་བཞིའི་དགོངས་པ་དེ་ཀ་ཡིན། །དེ་ཉིད་རྒྱུན་མར་གནས་པ་སངས་རྒྱས་ཡིན། །དེ་འདྲའི་གནད་འདི་སྐྱེས་བོས་མ་ཤེས་པས། །སྙོམས་འཇུག་དུས་སུ་བདེ་བ་ཡུད་ཙམ་རེ། །ཐ་མལ་འདོད་ཆགས་སྤྱོད་དུས་ཡོད་མོད་ཀྱང༌། །དེ་ཉིད་བཟུང་བསྐྱིལ་སྤེལ་གསུམ་མ་ཤེས་པས། །ཐ་མལ་འདོད་ཆགས་རང་ཁར་སྤྱོད་པ་ལ། བདེ་བ་ཡུན་ཐུང་སྡུག་བསྔལ་རྒྱུ་རུ་སོང༌། །བདེ་ལ་ཞེན་པས་འདོད་ཁམས་གནས་སུ་གོལ། །གསལ་བ་ལ་ཞེན་གཟུགས་ཁམས་གནས་སུ་གོལ། །སྟོང་པ་ལ་ཞེན་གཟུགས་མེད་ཁམས་སུ་གོལ། །བདེ་གསལ་སྟོང་པ་ཉིད་ལ་ཞེན་མེད་དུ། །ཉམས་སུ་ལེན་པས་ཁམས་གསུམ་གནས་ནས་འཕགས། །དེ་ཡི་ཕྱིར་ན་འཕགས་པ་ཞེས་བྱའོ། །བདེ་བ་དེ་ཀའི་ངང་ལ་རྒྱུན་མར་གནས། །སྡུག་བསྔལ་འདམ་ནས་བདེ་བར་གཤེགས་པའི་ཕྱིར། །དེ་ཕྱིར་བདེ་བར་གཤེགས་པ་ཞེས་བྱའོ། །སྡུག་བསྔལ་བྱ་བའི་མིང་ཡང་མེད་པར་སངས༌། །བདེ་བ་ཆེན་པོའི་ཡེ་ཤེས་རྒྱས་པའི་ཕྱིར། །དེ་ཕྱིར་སངས་རྒྱས་ཞེས་སུ་མིང་བཏགས་སོ། །ཞེས་པ་དང་། ཟབ་བསྡུས་སྙིང་པོ་ལས་ཀྱང༌། དེ་ཚེ་བདེ་བ་ཆེ་བའི་དུས་ཀྱི་ཚེ། །བདེ་བ་དེ་ཀའི་ངོ་ལ་ཅེར་བལྟས་པས། །བདེ་བ་ཅིར་ཡང་མ་གྲུབ་རང་བཞིན་སྟོང༌། །སྟོང་པ་ཕྱང་ཆད་མ་སོང་སྟོང་པའི་གདངས། །རྣམ་པ་བདེ་བའི་ངོ་བོར་ལྷན་ནེ་བ། རང་རྩལ་འགག་པ་མེད་པར་ས་ལེ་བ། །རྣམ་རྟོག་ཅིར་ཡང་མི་མངའ་ལྷན་ནེ་བ། །བདེ་གསལ་མི་རྟོག་གསུམ་ཀའི་ཉམས་མྱོང་འཆར། །དེ་ཀའི་ངང་ལ་རྒྱུན་དུ་ཁྱེར་ཞིང་བསྒོམ། །བདེ་བ་མྱོང་མཁན་སེམས་ལ་ཅེར་བལྟས་པས། །མཁན་པོ་ཅིར་ཡང་མ་གྲུབ་སྟོང་སེང་ང༌ེ། །སྟོང་པ་ཕྱང་ཆད་མ་སོང་མྱོང་མཁན་ག།ྱི ། ཤེས་རིག་འགག་པ་མེད་པར་ས་ལ་ེབ། །རྣམ་པ་བདེ་བ་ཆེན་པོར་ཡམ་མེ་བ། །སུས་ཀྱང་གནས་པ་མེད་པར་ཧྲིག་གེ་བ། །ངོ་བོ་སྟོང་ལ་རང་བཞིན་གསལ་ཞིང་རིག །རྣམ་པ་བདེ་བ་གསུམ་ཀ་དབྱེར་མེད་པའི། །དེ་ཡི་དུས་ཀྱི་ཤེས་པ་བཟོ་མེད་དེ། །བདེ་བ་ཆེན་པོའི་ཡེ་ཤེས་དེ་ཀ་ཡིན། །བླ་མེད་སྔགས་ཀྱི་རྫོགས་རིམ་དེ་ཉིད་ཡིན། །དུས་གསུམ་རྒྱལ་བའི་དགོངས་པ་དེ་ཀ་ཡིན། །དེ་ལ་རྒྱུན་དུ་གནས་པས་སངས་རྒྱས་ཡིན། །དེ་ལ་མ་ཞེན་སྐྱོང་བས་མན་ངག་ཡིན། །བདེ་སྟོང་རང་ངོ་འཕྲོད་པ་གདམ་ངག་ཡིན། །རང་གིས་ཉམས་སུ་མྱོང་བ་ཉམས་མྱོང་ཡིན། །མྱོང་བཞིན་བརྗོད་དུ་མེད་པ་ཆོས་ཉིད་ཡིན། །མྱོང་ཡང་རང་ངོ་མ་འཕྲོད་འཁོར་བ་ཡིན། །དེ་ལ་ཞེན་ཆགས་སྐྱེས་ན་འཁྲུལ་སྣང་ཡིན། །དེ་ཕྱིར་འཁོར་འདས་གཉིས་ཀྱི་གྱེས་སོ་ཡིན། །དུས་གསུམ་སངས་རྒྱས་བདེ་ཆེན་ངང་ལས་སྐྱེས། །ཁམས་གསུམ་སེམས་ཅན་ཞེན་ཆགས་ངང་ལས་འཁྲུལ། །དེ་ཕྱིར་གདམས་པའི་ཁྱད་པར་ཤིན་དུ་ཆེ། །སྙོམས་མཇུག་དུས་སུ་བདེ་བ་ཡུད་ཙམ་རེ། །ཐ་མལ་འགྲོ་བ་ཀུན་ལ་ཡོད་མོད་ཀྱང༌། །བཟུང་ཞིང་བསྐྱིལ་དང་སྤེལ་བ་མ་ཤེས་པས། །ཞེན་ཆགས་ངང་ནས་སྤྱོད་པས་ཐིག་ལེ་ཉམས། །བདེ་བ་ཡུན་ཐུང་སྡུག་བསྔལ་རྒྱུ་རུ་སོང༌། །འཁོར་བའི་སྲིད་པ་འཕེལ་ཞིང་དུཿཁ་སྤྱོད། །ཞེན་མེད་ངང་ནས་བཟུང་བསྐྱིལ་སྤེལ་པ་ཡིས། །སྡུག་བསྔལ་ཞེས་བྱ་མིང་ཡང་མེད་པར་སོང༌། །བདེ་ཆེན་ཡེ་ཤེས་མཐའ་ཡས་རྒྱས་པའི་ཕྱིར། །སངས་རྒྱས་ཞེས་བྱའི་མིང་ཙམ་བཏགས་པ་ཡིན། །བདེ་གསལ་མི་རྟོག་གསུམ་ལ་ཞེན་ཅིང་ཆགས། །བདེ་བས་འདོད་ཁམས་གསལ་པས་གཟུགས་ཁམས་ལྷ། །མི་རྟོག་ཞེན་པས་གཟུགས་མེད་ཁམས་སུ་གོལ། །ཞེན་པ་མེད་པའི་ངང་ནས་ལམ་དུ་ཁྱེར། །བདེ་བ་ལོངས་སྐུ་གསལ་བ་སྤྲུལ་པའི་སྐུ། །མི་རྟོག་ཆོས་ཀྱི་སྐུ་རུ་མངོན་སངས་རྒྱས། །དེ་ཕྱིར་འཁོར་འདས་གཉིས་ཀྱི་རྩ་བའོ། །ཞེས་གསུངས་པ་ལྟར་རྟོགས་པར་བྱའོ། །འདིའ་ིསྐབས་སུ་ཕྲ་ཞིང་ཤིན་ཏུ་བརྟག་དཀའ་བའི་ཕྱིར། བླ་མ་ཉམས་ཅན་དང༌། རང་གི་མྱོང་བས་ལེགས་པར་ཁེལ་བར་བྱའོ། །དེ་ལྟར་བདེ་བའི་ངོ་འཕྲོད་ནས། དགུ་པ་ཐིག་ལ་ེབཟློག་པ་ལ་གསུམ། ལུས་ཀྱིས་འཁྲུལ་འཁོར་ངག་གིས་རླུང༌། ཡིད་ཀྱིས་དམིགས་པའོ། །གཞུང་ལས། དེ་ལ་བདེ་བ་འཆོར་འཆོར་འདྲ་བ་ན། །བྱང་སེམས་བདེ་བ་བཏང་རེ་ཤི་སྙམ་པས། །གཉེན་པོ་ཞེ་བཅད་དྲག་པོས་བཟློག་པར་བྱ། །དེ་ནི་དཀའ་ཐུབ་སྡོམ་པའི་མཆོག་ཏུ་འགྱུར། །ཉན་ཐོས་བུད་མེད་རྒྱང་དུ་བསྲིང་བ་ཡིས། །ཆགས་པས་གདུང་བ་གཉེན་པོས་བཟློག་རྒྱུ་མེད། །དཀའ་ཐུབ་སྡོམ་པ་ཐོབ་པའི་མིང་ཡང་མེད། །འདིར་ནི་བུད་མེད་དངོས་དང་དམ་འཁྱུད་ནས། །བྱང་སེམས་རྡོ་རྗེའི་རྩེ་ནས་བཟློག་པ་ཡི། །གཉེན་པོ་བཟང་ཞིང་དཀའ་ཐུབ་དྲག་པོའོ། །ཞེས་སོ། །དེ་ལ་དང་པོ་ལུས་ཀྱིས་འཁྲུལ་འཁོར་ནི། མིང་ཅན་གྱིས་ནི་མིང་མེད་རྩ་བ་མནན། ཞེས་པས། མཐེ་བོང་གཉིས་ཀྱི་སྲིན་ལག་རྩ་བ་དམ་དུ་མནན་ལ། བསྐྱོད་བྱེད་ལྔ་བསྐུམ་ཞེས་པ། སོར་མོ་ལྔ་བསྐུམ་ནས་རྡོ་རྗེ་ཁུ་ཚུར་བཅངས། གྱད་བཞི་བསྐུམ་ཞེས་པ་རྐང་ལག་བཞི་ཀའི་མཐེ་བོང་དྲག་ཏུ་བསྐུམ། ངན་འགྲོའི་ལམ་གཉིས་ཞེས་པ་འོག་སྒོ་གཉིས་དྲག་ཏུ་བཙུམས། སྟེང་འོག་གཉིས་རླུང་གཉིས་ཁ་སྦྱར་ནས། རྒྱ་མཚོ་རིར་སྦྱར་ཞེས་པ། གསུས་པ་སྒལ་བ་ལ་སྦྱར༌། དར་དམར་གུང་ལ་བསྐྱོད། ཅེས་པ་ལྕེ་ཡར་རྐན་ལ་སྦྱར། རྒྱང་ཞགས་གནམ་ལ་བལྟ་ཞེས་པ། མིག་གཉིས་ནམ་མཁའ་བལྟ། ངག་གིས་རླུང་ནི། བུམ་པ་ཅན་བཟུང༌། ཁྱད་པར་འོག་རླུང་དྲག་ཏུ་འཐེན། ཁོང་འདྲེན་དྲག་པོ་ཐེབ་རེ་རེ་ལ་ཡང་ནས་ཡང་དུ་དྲག་ཏུ་འདྲེན་ཅིང་སྤྱི་བོར་བསྐྱལ། ལག་པ་གཉིས་གསང་གནས་མཚམས་ནས་དྲག་ཏུ་འཐེན་ལ་སྤྱི་བོའི་ནམ་མཁར་འཕོང༌། །སེམས་ཀྱིས་དམིགས་པ་ནི། དབུ་མའི་ནང་དུ་ཐིག་ལེ་སྐར་མདའ་འཕངས་པ་ལྟར་བྲིང་མ་ཆད་པར་སྤྱི་བོའ་ིཧཾ་ལ་ཐིམ་པར་བསྒོམ། དེ་ལྟར་རླུང་དང་འཁྲུལ་འཁོར་དམིགས་པ་གསུམ་དུས་གཅིག་ཏུ་དྲག་ཏུ་སྤྲུགས་པས། བདེ་བ་ལྟེ་བར་ཚད་མེད་སྐྱེས། དེ་ནས་དྲངས་པས་སྙིང་གར། དེ་ནས་དྲངས་པས་མགྲིན་པར། རིམ་བཞིན་མས་བསྟེན་གྱི་དགའ་བཞི་ཉམས་སུ་མྱོང་ནས། དྲངས་པའི་རྟགས་སུ། གསང་གནས་ཀྱི་བདེ་བ་ཡལ་ནས། རྡོ་རྗེའི་ངར་འཆོར། རབ་ལ་རྡོ་རྗེ་སྦུབས་སུ་ནུབ། ལུས་ཀྱིས་སྟོད་ཟས་ཞིམ་པོས་གང་བ་ལྟར་བདེ་བ་རྒྱས་པར་འགྱུར། ཁྱད་པར་དུ་འཁྲུལ་འཁོར་གྱི་གནད་ལ། ལུས་ཀྱི་འཁྲུལ་འཁོར་ལུས་པོ་འདར་བ་གཅེས། །འདྲེན་གྱི་གནད་ནི་ཁོང་འདྲེན་དྲག་པོ་གཅེས། །དམིགས་པའི་གནད་ནི་སྤྱི་བོར་གཏད་པ་གཅེས། །ལུས་ཀྱི་བྱིན་ལོག་ཤེད་སྐྱེད་འདར་ཕྲིལ་བཏང༌། །ཞེས་པ་ལྟར་དྲངས། འདི་དུས་དམིགས་པ་མཚན་མ་ཅན་དུ་བསྒོམས་ན། གོང་ལྟར་བསྒོམས་པའི་ཐིག་ལེ་ཡི་གེ་ལོག་པའི་དབྱིབས་ཅན་དུ་འགྲོལ་ནས་གེགས་སུ་འགྲོ་བས། དམིགས་མེད་ཀྱི་ངང་ནས་འདུན་པ་སྤྱི་བོར་དྲག་ཏུ་གཏད་པ་ཟབ་བོ། །ད་བཅུ་པ་བཀྲམ་པ་ལ་གསུམ། འཁྲུལ་འཁོར་རླུང་དམིགས་པ་གསུམ་ལས། འཁྲུལ་འཁོར་ནི་ལག་པ་སྙིང་ག་ནས་མདུན་དུ་འཕོང་བ་གསུམ་དང་མཉམ་དུ། རླུང་དྲག་ཏུ་འབུད་པ་དང༌། ལུས་སྤྱང་(གཡང)མོའི་བཞི་སྤྲུགས་ལྟར་དྲག་ཏུ་སྤྲུགས་པ་རྣམས་དུས་གཅིག་ཏུ་བྱས་པས། ཐིག་ལེ་ལུས་དང་རྩ་དམིགས་ཐམས་ཅད་དུ་ཀུན་ལ་ཁྱབ་པར་འགྱུར་རོ། །མ་ཁྲེམས་ན་ནད་དུ་འགྲོ་བས། བཀྲམ་པ་ལ་ནན་ཏན་བྱའོ། །རྗེས་སུ་རླུང་བུམ་པ་ཅན་བཟུང་ནས་རིག་པ་ཀ་དག་གི་ངང་ལ་ཡུན་རིང་དུ་བཞག་པས། གེགས་མི་འབྱུང་ཞིང་ཐིག་ལེ་ཁྲེམས་པ་དང༌། བདེ་སྟོང་གི་ཏིང་ངེ་འཛིན་ཁྱད་པར་ཅན་སྐྱེའོ། །དེ་ལ་བྱང་ན་བཟློག་བཀྲམ་གྱི་འཁྲུལ་འཁོར་ལ་འབད་མི་དགོས་ཏེ། །ཀློད་པ་ཙམ་དང་འདུན་པ་གཏད་པ་ཙམ་གྱིས། ལོག་ཅིང་རང་ཁྲེམས་སུ་འགྲོའོ། དེ་ནི་ཟབ་ལམ་དགའ་བཞིས་འགྲོས་ཐིམ་གྱི་གདམས་པ་ཤིན་ཏུ་ཟབ་སྟེ། ཐབས་ལམ་གཞན་དང་མི་འདྲའོ། །གཞན་རྣམས་དྲག་འཛིན་དང༌། བཙན་འཛིན་ལ་སོགས་པ་རྣམས་ནི། རྩོལ་བ་ཆེ་ལ་གེགས་མང་བ་ཡིན་ནོ། །འདི་ནི་འཇམ་བཟུང་ཞེས་བྱ་སྟེ། འཁྲུལ་འཁོར་ལུས་སྦྱང་དང༌། རླུང་རྩོལ་ཡུན་རིང་ལ་སོགས་པ་མི་དགོས་སོ། །དེ་ལྟར་བྱང་ནས། ཤེས་རབ་མའི་བདེ་བ་དྲང་བ་དང༌། དྭངས་སྙིགས་འབྱེད་པ་དང༌། གེགས་སེལ་བོགས་འདོན། འབྱོངས་རྟགས་ངོ་སྤྲོད་ཡོན་ཏན་རྣམས་ནི། གཞུང་ལས་ཤེས་པར་བྱའོ། །འདིར་ནི་རྩ་བ་ལག་ལེན་གྱི་ཉམས་ཁྲིད་གོ་བདེ་བར་བསྟན་པའོ། །དེ་ལྟར་ཟབ་གནད་གདམས་པ་མང་པོ་ཀུན། །འདིར་ནི་མདོར་བསྡུས་རྒྱས་པར་གཞན་དུ་གཟིགས། །ཟབ་ལམ་བླ་མེད་ཐབས་ལམ་བསྒོམ་པ་ལ། །ངོ་ཚ་བསྲུང་ཞིང་ཐ་མལ་ཁྱི་ཕག་ལྟར། །དམ་ཉམས་སྡོམ་ཤོར་བྱི་ཕྲུག་ལྐོག་གསོད་ལ། །ངོ་ཚ་མེད་པར་དམྱལ་བར་ཡང་ལྷུང་ནས། །དེ་ལྟར་ཆོས་པའི་གཟུགས་བསྙན་ཅི་ཞིག་བྱ། །འདུལ་བ་འཛིན་ཞེས་བསླབ་གསུམ་ཁྲིམས་སྡོམ་མེད། །གསང་སྔགས་པ་ཞེས་ཟབ་ལམ་སྦྱོར་སྒྲོལ་མེད། །སྐྱེ་བོ་ཡིན་ཞེས་ཡུལ་ཁྲིམས་ངོ་ཚ་མེད། །ལོག་འཚོའི་དཀོར་ཟ་བརྫུན་ཚིག་འགྲོ་བ་བསླུ། །ཐབས་ལམ་པ་ཞེས་བུ་སྨད་ར་ཁྱུ་ཙམ། །ཀྱི་ཧུད་ཚུལ་འདི་མཐོང་ཞིང་ཡི་རེ་མུག །མདོ་སྔགས་བསྟན་པའི་རྒྱལ་མཚན་ནུས་པ་ཉམས། །དུས་འདིར་སྐྱེས་པའི་འགྲོ་རྣམས་སྐལ་བ་ཕམ། །དེ་ཕྱིར་གཞན་ཕན་དུས་འདིར་རབ་དཀའ་ཞིང༌། །མྱུར་མགྱོགས་ཕོ་ཉའི་ལམ་འདིར་ཞུགས་རེ་རན། །ལམ་འདི་དུག་སྦྲུལ་མགོ་ཡི་ནོར་བུ་ལྟར། །ཕུང་འཚིང་ཤིན་ཏུ་ཆེ་བས་གཟབ་པར་གྱིས། །དེས་ན་ཡིག་ཆུང་ཟབ་བསྡུས་སྙིང་པོ་འདི། །ཤིན་ཏུ་སྦས་ཤིང་གསང་ལ་སྤྱད་པར་བྱའོ། །འཆལ་ན་ཀུན་གྱིས་གཤེ་ཞིང་སྒྲོ་སྐུར་འབྱུང༌། །ཡང་ན་ཕལ་ཆེར་འདི་ལ་བསྙད་བཀལ་ན། །བསླབ་གསུམ་ནོར་བུ་ཆུ་ལ་ཕོ་ཉེན་ཡོད། །འདི་ན་ཟབ་གནད་ལག་ལེན་དགོངས་པ་བསྡུས། །འདི་ལ་གཅེས་པར་མཛོད་ལ་ཉམས་སུ་ལོང༌། །ཉམས་མྱོང་དྲོད་རྟགས་འབྱུང་བར་ཐེ་ཚོམ་མེད། །གུ་རུ་ག་ག་པ་མུ་ཏྲ་ཉིད་ཀྱིས། །བསྐུལ་བའི་དོན་དུ་སྙིགས་མའི་ཀུ་སུ་ལུ། །སཱུརྱ་ཙནྟྲ་རསྨིའི་མིང་ཅན་གྱིས། །ཀོང་ཡུལ་ལྟ་བ་ཐ་འབྲོག་དགོན་པ་རུ། །སྤྲེའུ་ལོ་ཕག་གི་ཟླ་བའི་དུས་བཟང་ལ། །འདི་བརྩམས་དགེ་བས་འགྲོ་ཀུན་མཆོག་ཐོབ་ཤོག །ཟབ་ལམ་རྫོགས་རིམ་གྱི་ཉམས་ཁྲིད་བདེ་བ་རང་གྲོལ་ཞེས་བྱ་བ། འགྲོ་ཀུན་སྐུ་གསུམ་བདེ་བ་ཆེན་པོ་མྱུར་དུ་ཐོབ་པར་གྱུར་ཅིག །ཤུབྷཾ། འགལ་འབྲེལ་ཟློས་སྐྱོན་མ་བརྟགས་མུ་ཅོར་བྲིས། །འདི་ལ་མཁས་རྣམས་བཟོད་པ་མཛད་པར་ཞུ། །བདེ་ཆེན་ལྷན་སྐྱེས་ཉམས་རྟོགས་ཕུལ་དུ་ཕྱིན་པའི་རྗེ་བཙུན་སཱུརྱ་ཙནྟྲའི་དྲུང་དུ། ནམ་མཁའ་ཆོས་ཀྱི་རྒྱ་མཚོས་ཞུས། དེ་ལ་བདག་དགེ་འདུན་རྒྱལ་མཚན་གྱིས་ཞུས་པས། གསང་སྔགས་རྡོ་རྗེ་ཐེག་པ་འདི་བཀའ་བཙན་ཅིང་བྱིན་ཆེ་བ། དར་ཞིང་རྒྱས་ནས། འགྲོ་ཀུན་ཀུན་བཟང་བླ་མེད་ཀྱི་ས་ལ་འགོད་པར་གྱུར་ཅིག །དགེའོ།། །། རྫོགས་པ་ཆེན་པོ་ལས་ཤེར་དབང་དང་འབྲེལ་བའི་ཕོ་ཉའི་ཁྲིད་ཡིག། ཆོས་དབྱིངས་སྟོབས་ལྡན་རྡོ་རྗེས།འོད་གསལ་རྫོགས་པ་ཆེན་པོ་ལས་ཤེར་དབང་དང་འབྲེལ་བའི་ཕོ་ཉའི་ཁྲིད་ཡིག་བདེ་སྟོང་ལྷན་སྐྱེས་བཞུགས། ། བླ་མ་དང་ཕྱག་རྒྱ་ཆེན་པོའི་རིག་འཛིན་དབྱེར་མ་མཆིས་པའི་ཞབས་ལ་གུས་པས་ཕྱག་འཚལ་ལོ། །འདིར་འོད་གསལ་རྫོགས་པ་ཆེན་པོའི་སྔགས་ཀྱི་སྐོར་ལས། ཤེས་རབ་ཡེ་ཤེས་ཀྱི་དབང་དང་འབྲེལ་བའི་རྫོགས་པ་ཨ་ནུ་ཡོ་ག །ཟབ་ལམ་ཕོ་ཉའི་ཁྲིད་ཀྱི་རིམ་པ་ལ་གསུམ་ལས། དང་པོ། དགོས་པའི་རྒྱུ་མཚན་ནི། ཆོས་ཐམས་ཅད་ཀྱི་མཐར་ཐུག་བདེ་སྟོང་ལྷན་ཅིག་སྐྱེས་པའི་ཡེ་ཤེས་མངོན་དུ་བྱེད་པ་ལ། བོག་འདོན་ཕོ་ཉའི་མྱུར་ལམ་ལས་ཐབས་གཞན་མེད་དེ། ཀློང་གསལ་ལས། དུས་གསུམ་སངས་རྒྱས་ཐམས་ཅད་ཀྱང༌། །བྷ་གའི་དབྱིངས་ནས་རང་བྱུང་སྟེ། །ཆོས་རྣམས་ཀུན་གྱི་འབྱུང་གནས་ཉིད། །བྷ་ག་གསང་སྔགས་ཀུན་གྱི་གནས། །བདེ་ཆེན་ཡེ་ཤེས་འབྱུང་བ་ཡིན། །འདི་ཉིད་མ་བསྟེན་ཐབས་གཞན་མེད། །ཐབས་ཀྱི་རྒྱུད་ཀྱིས་གྲོལ་བ་ཡིན། །བདེ་ཆེན་འདི་བསྟེན་གྲོལ་བ་ཐོབ། །ཡང་དག་སངས་རྒྱས་འདི་ལས་བྱུང༌། །ཞེས་པས། གསང་སྔགས་ཀྱི་ལམ་ནི་ཟབ་མོ་ཐབས་ཀྱིས་གྲོལ་བ་ཡིན་ལ། ཐབས་ཀྱི་མཆོག་ནི་བདེ་བ་ཆེན་པོ་བསྒོམ་པ་སྟེ། དེ་འབྱུང་བ་ནི་ཡུམ་ལས་འབྱུང་ལ་ཡུམ་གྱི་ལུས་ཀྱི་རང་བཞིན་བྷ་ག་ཡེ་ཤེས་ཀྱི་མཁའ་དབྱིངས་ཆེན་པོ་ཡིན། སྤྱིར་འདོད་པའི་ཡོན་ཏན་ཐམས་ཅད་ཀྱི་མཆོག་ནི་ཆགས་པ་སྤྱོད་པ་ཡིན་ལ། ཆགས་པ་འདི་འཁོར་བའི་རྩ་བ་ཡིན་ཡང༌། ལྕགས་ཀྱིས་ལྕགས་གཅོད་པ་དང༌། རྡོས་རྡོ་གཅོག་པའམ། ཤིང་གི་འབུས་ཤིང་ཟ་བ་བཞིན་དུ། ཆགས་པ་ཉིད་ལམ་དུ་ཁྱེར་བས་འབྲས་བུ་མྱུར་དུ་འཐོབ་པ་ནི། ཆགས་ཅན་སྔགས་ཀྱི་ཐེག་པ་འདི་ཡིན་ལ། དབང་པོ་གཉིས་སྦྱོར་གྱིས་ཆགས་པ་ལམ་དུ་བྱེད་པ་སྔགས་བླ་མེད་ཀྱི་རྒྱུད་ཡིན་པས། ཏཱ་རེ་ཕྱི་རྒྱུད་ལས། འདོད་ཆགས་ཆེན་པོའ་ིཡེ་ཤེས་འདིས། །ཆགས་ལྡན་རྣམས་ལ་བྱང་ཆུབ་སྟེར། །ཞེས་དང༌། བསྐལ་བ་བྱེ་བ་གྲངས་མེད་པར། །བཟང་པོ་སྤྱོད་པ་ཁོ་ནས་ཀྱང༌། །བྱང་ཆུབ་རིན་ཆེན་མ་ཐོབ་པ། །ཕྱག་རྒྱའི་སྦྱོར་བ་འདི་ཡིས་ནི། །ཚེ་འདི་ཉིད་ཀྱིས་ཐོབ་པར་འགྱུར། །བུད་མེད་སྦྱོར་ལས་ཕྱག་རྒྱ་ཆེ། །མངོན་དུ་མཚོན་པར་བྱེད་པ་དེ། །ཁྲུས་དང་གཙང་སྦྲ་མི་དགོས་ཤིང༌། །དཀའ་སྤྱད་སྡོམ་པ་མེད་པར་ཡང༌། །བདེ་བ་ཉིད་དང་དགའ་བས་འགྲུབ། །གཟུགས་བརྙན་བླུགས་མ་ལ་སོགས་པས། །རྣལ་འབྱོར་སྐྱེ་བར་མི་འགྱུར་གྱི། །བྱང་ཆུབ་སེམས་ལ་རབ་བརྩོན་ན། །དེ་ལ་རྣལ་འབྱོར་ལྷར་འགྱུར་རོ། །གཡོ་དང་སྨྲ་བ་སྤྱོད་པ་ཀུན། །ཕྱག་རྒྱ་སྔགས་དང་ཆོ་གར་འགྱུར། །མར་མེ་ལེགས་པར་བླངས་ནས་ནི། །མུན་པའི་ཁྲོད་ནས་ནོར་བུ་ལེན། །སྒྲིབ་པའི་མུན་པར་ཆོས་ཀྱི་དབྱིངས། །བུད་མེད་བདེ་བས་འཚོལ་བར་བྱ། །ཞེས་སོ། །གཉིས་པ་བརྟགས་ཏེ་འགུགས་པ་ལས། དང་པོ། ཕྱག་རྒྱ་མ་བྱེ་བྲག་ཏུ་བརྟགས་པ་དང༌། སྤྱིར་བརྟགས་པ་གཉིས་ལས། དང་པོ་ལ་ཡང་བཅུ་སྟེ། དང་པོ་ན་ཚོད་ལ་བརྟགས་པ་ནི། བཅུ་གཉིས་མ་ནི་སྒྱུ་འཕྲུལ་ལས། །བདེན་དོན་རྣམ་པ་བཅུ་གཉིས་ལྡན། །ཞེས་སོ། །བཅུ་དྲུག་མ་ནི། མཚན་བརྗོད་ལས། བཅུ་དྲུག་ཕྱེད་ཕྱེད་ཐིག་ལེ་འཆང༌། །ཞེས་སོ། །ཉི་ཤུ་མ་ནི། རྣམ་པ་ཉི་ཤུ་བྱང་ཆུབ་པ། །ཞེས་པས་མཆོག་ཏུ་བསྔགས་པའོ། །ཞེས་སོ། །གཉིས་པ་གཟུགས་ལ་བརྟགས་པ་ནི། མི་འཕྲ་མི་སྦོམ་ཆེ་ཆུང་རན་པ། སྟོད་སྨད་རྒྱས་པ། རྐེད་པ་འཕྲ་བ། ཤ་འཇམ་པ། མཉེན་ལྕུགས་འཁྲིལ་ལྡེམ། སོ་ཚགས་དམ་ལ་ཐུང་བ། གང་ནས་བལྟས་ཀྱང་སྐྱོན་མེད་ཅིང༌། འཛུམ་མདངས་ཆེ་ལ་མཛེས་པའོ། །གསུམ་པ་ཁ་དོག་ལ་བརྟགས་པ་ནི། སྣུམ་ཞིང་དཀར་ལ་དམར་ཆགས་པ། །སྐྲ་སེར་བ་སྨིན་མ་ནག་ལ་འཁྱུག་པ། མིག་དཀར་ནག་འབྱེད་པ། སོ་དཀར་བ། མཆུ་སྙིང་དམར་བ། མདངས་དང་ལྡན་ཞིང་གཟི་བརྗིད་འོད་དུ་འབར་བའོ། །བཞི་པ་སྐད་ལ་བརྟགས་པ་ནི། སྐད་ཕྲ་ལ་སྙན་པ་མདངས་ཆགས་པ། སེང་བག་དང་ལྡན་པའོ། །ཚིག་ཉུང་ལ་སྒོ་གསལ་བ། དྲང་པོར་སྨྲ་ཞིང་རྫུན་མི་ཟེར་བའོ། །ལྔ་པ་དྲི་ལ་བརྟགས་པ་ནི། གླ་རྩི་དང་ཙནྡན་ལ་སོགས་པ་དྲི་བཟང་སྨན་དྲི་སྣོམ་ཞིང༌། ཁམས་གསོ་བ་དང་བདེ་བ་བསྐྱེད་ནུས་པའོ། །དྲུག་པ་སྤྱོད་ལམ་ལ་བརྟགས་པ་ནི། རྩ་དབུག་མི་བྲེལ་ཞིང་སོས་དལ་བ། བྱ་བ་གང་ཡང་ཤེས་པ། ཕྱག་དང་མཆོད་པ་བསྐོར་བ་ལ་དགའ་བ། བླ་མ་དང་སྒྲུབ་པ་པོ་ལ་གུས་པ། ཅི་བྱེད་ཡིད་དུ་འོང་བ། མཛེས་ཤིང་སྐྱོན་མེད་པ། སྦྱིན་པ་གཏོང་བ་ལ་སོགས་ཆོས་སྤྱོད་ལ་དགའ་བའོ། །བདུན་པ་སེམས་ལ་བརྟགས་པ་ནི། མི་དགེ་བ་ལ་མི་མོས་ཤིང༌། དད་པ་དང་མོས་གུས་སྙིང་རྗེ་ཆེ་བ། བློ་ཡངས་པ། གསང་ཐུབ་པ། རིག་པ་གསལ་ཞིང་དངས་པ། རྣམ་ཤེས་གཞན་དུ་མི་འཇུག་པ། མཐོ་དམན་གང་ཡང་རིག་པ། སྒྲུབ་པ་པོ་ལ་དད་པ་དང་དུང་སེམས་ཆེ་བའོ། །བརྒྱད་པ་བསགས་པ་ལ་བརྟགས་པ་ནི། སྔ་མ་ནས་ཚོགས་བསགས་པ་དག་ལས། ཆོས་ཟབ་མོ་དང་མཇལ་ཞིང་སྣོད་དུ་རུང་བ། ཀུན་གྱིས་ཡིད་དུ་འོང་བ། མཐོ་དམན་ཀུན་གྱིས་བྱམས་པ། ལུས་ཐུབ་ཅིང་དམ་ཚིག་གཙང་བ། ཟས་ནོར་འཐིབས་པ། བག་དྲོ་བ། མཁའ་འགྲོ་འདུ་བ། ཅི་བསམ་འགྲུབ་པ། བདེ་སྐྱིད་ལོངས་སྤྱོད་ཀྱི་སྐལ་བ་ཡོད་པའོ། །དགུ་པ་རིགས་ལ་བརྟགས་པ་ནི་རྣམ་པ་དྲུག་སྟེ། པདྨ་ཅན་དང༌། དུང་ཅན་མ་དང༌། རི་མོ་ཅན་དང༌། རི་དྭགས་ཅན་དང༌། གླང་པོ་ཅན་དང༌། སྣ་ཚོགས་མ་དང་དྲུག་གོ །དེ་ལ་པདྨ་ཅན་རབ་ནི། ཧ་ཅང་རིང་བ་མ་ཡིན། ཐུང་བ་མ་ཡིན། བྱད་ཧ་ཅང་ཟུར་བ་མ་ཡིན། ལེབ་པ་མ་ཡིན། ཤ་རྩ་ཧ་ཅང་སྔོ་བ་མ་ཡིན། སེར་བ་མ་ཡིན་ཞིང་མཛེས་པ། བྱད་བཞིན་དཀར་ལ་རྩ་དམར་བ། སྐྲ་སེར་ཞིང་ལི་བ། སྐྱེས་པ་བས་རྩ་སྣ་བདུན་ཅུ་རྩ་གཉིས་ཀྱི་མང་བ། ལུས་ལ་ཙནྡན་དང་ཁ་ནས་ཨུཏྤལ་གྱི་དྲི་དང་ལྡན་པ། ལུས་རྒྱས་ཀྱང་རྐེད་པ་ཕྲ་བ། བདེ་བ་བསྐྱེད་པའི་རྩ་བཟང་བ། རྐང་ལག་བྱ་ལྟར་དམར་ཞིང་ཕྲ་བ། མཆུ་སྐོར་ཅུང་ཟད་ཆེ་ཞིང༌། མཆུ་ལ་པདྨའི་རི་མོ་ཡོད་པ། སོ་ལེབ་ཅིང་ཚགས་དམ་པ། མཆུ་ལ་བུང་བ་འདུ་བ། ལྟེ་བ་ལ་པདྨའ་ིརི་མོ་ཡོད་པ། ལྟེ་འོག་ན་རི་མོ་འགྲེང་བུ་གསུམ་ཡོད་པ། འོག་སྒོའི་རྩ་ཤིན་ཏུ་བཟང་བ། སྨིན་མཚམས་སུ་རི་མོ་གསུམ་གྱེན་དུ་འགྲེང་བ། སྐྲ་མཚམས་དང་མུར་གོང་ན་དར་ཐོད་ལྟ་བུའི་རི་མོ་ཡོད་པ། ལྕེ་ལ་རལ་གྲི་ལྟ་བུའི་རི་མོ་ཡོད་པ། ཕྲག་གོང་ངམ་སོག་ཕྲག་ན་གཡང་དྲུང་འཁྱིལ་བ་ལྟ་བུའི་རི་མོ་ཡོད་པ། ནུ་མ་ཕྲ་ལ་འབུར་བ། བྷ་ག་རུབ་པ། བྷ་གའི་མཐའ་མ་རུས་སྦལ་གྱི་རྒྱབ་འདྲ་ཞིང་སྤུ་མེད་ཅིང་ཤའི་སྒང་མཐོ་བ། བདེ་བ་ཆེ་བ། གཞན་གྱིས་བློ་བཅོས་དཀའ་བ། གཞན་དགའ་བ་བསྐྱེད་ཅིང༌། བྱིན་གྱིས་བརླབས་པར་ནུས་པ། སྐད་ཐོས་པའམ་གཟུགས་མཐོང་བའམ་རེག་པ་ཙམ་གྱིས་བདེ་བ་སྟེར་བ་སྟེ། དེ་ཉིད་གང་ན་ཡོད་པའི་ཡུལ་ཕྱོགས་ཙམ་བཀྲ་ཤིས་ཤིང༌། ཐ་མལ་པ་ལའང་བདེ་བ་སྟེར་ནུས་པ་ཡིན། དེ་ཡང་མཚན་དེ་ལྟ་བུ་དང་ལྡན་ན་ཁྱད་པར་འཕགས་ཏེ། མ་ཧཱ་མ་ཡ་ལས། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཞེས་སོ། །པདྨ་ཅན་འབྲིང་ནི། ཤ་དཀར་ལ་རུས་ཁྱིམ་ཆ་ེཞིང་རགས་ལ། སྤྱོད་ལམ་གཙང་ཞིང་ཁོང་དལ་བ། འཇིག་རྟེན་གྱི་བྱ་བ་ལ་མཁས་ཤིང༌། བུ་ཁྱེའུ་འབའ་ཞིག་སྐྱེ་བ། མཛེས་ཤིང་བཅོས་དཀའ་བ་ཅན་ནོ། །ཐ་མ་ནི་དེ་རྣམས་ལས་ལྡོག་པས་སྤང་བར་བྱའོ། །དུང་ཅན་མ་རབ་ནི། ཤ་སེར་ལ་མདོག་སྣུམ་པ། སྐྲ་རྩེ་འཁྱིལ་ཞིང་རྩ་དམར་བ། ཚིག་གསལ་ལ་ཟུར་མིག་བལྟ་བ། ཚིག་ཟུར་རྣོ་ཞིང་ཤེས་རབ་ཆེ་བ། སྤྱོད་ལམ་ལ་མཁས་པ། འདུག་ཚུགས་ལེགས་པ། ཤ་ལུས་སྦོམ་ཞིང༌། སྐད་གདངས་མཐོ་བ། སྐད་ངར་ཆེ་ཞིང་ཤ་ཚུགས་འཇམ་པ་སྟེ་བཟང་བའོ། །འབྲིང་ནི། ལུས་མཛེས་ཤིང་སྔོ་ཤས་ཆུང་བ། རྒྱབ་ནས་བལྟས་ན་དགྱེས་པ་སྙམ་ཞིང་མདུན་ནས་བལྟས་ན་རྒུ་བ་སྙམ་བྱེད་པ། ནང་དུ་མགོ་འཕང་དམའ་བ། བྱད་ཀྱི་གཟིངས་ཐུང་ལ། ཨོལ་ཀོ་ལེགས་པ། ལུས་འདྲེས་ན་སྙིང་ཉེ་ཞིང་སེམས་གདུང་བ་ཅན་ནོ། །ཐ་མ་ནི་དེ་ལས་ལྡོག་པས་སྤང་ངོ༌། །རི་མོ་ཅན་རབ་ནི། ཤ་རྩ་སྔོ་ལ་བྱད་དཀྱུས་དང་ཡན་ལག་རིང་བ། མཆུ་སྐོར་ཆེ་ཞིང་ལུས་སྦོམ་པ། མིག་དཀྱུས་རིང་ཞིང་ལེགས་པ། བྱད་ལུས་ལ་སྨེ་བ་ཆུང་ངུ་དུ་མ་ཡོད་པ། སོ་མཉམ་པ། སྐད་སྙན་ཞིང་ཡིད་དུ་འོང་བ། ཞི་དེས་ཆེ་ཞིང་སྤྱོད་ལམ་འཇམ་པ། བྱ་བ་ཐམས་ཅད་ལ་ཁྲམ་ཆེ་བ། གཟུགས་བཟང་ཞིང་ཤེས་པ་མཁས་པ། དབྱིབས་ཕྱེད་ཅིང་སྨིན་ཕྲག་ན་རྩེ་གསུམ་ལྟ་བུའི་གཉེར་མ་གསུམ་གྱེན་ལ་འགྲེང་བ། དེའི་གོང་ན་ཐོད་བཅིང་ལྟ་བུའི་རི་མོ་གཅིག་གམ་གསུམ་འཕྲེད་ལ་ཡོད་པ་སྟེ་བཟང་བའོ། །འབྲིང་ནི། སྔོ་བསངས་ལ་དཔྲལ་བའི་དབྱིབས་ཆེ་བ། ཡན་ལག་ཕྲ་ཞིང་ངག་དངས་པ་བྱད་གཟུགས་བཟང་ཞིང་གདངས་སྙན་པ། སྨིན་ཕྲག་ན་སྨེ་བ་གཅིག་གམ་གསུམ་ཡོད་པ་ཅན་ནོ། །ཐ་མ་ནི་དེ་ལས་ལྡོག་པས་སྤང་ངོ༌། །རི་དྭགས་ཅན་མ་ནི། རི་དྭགས་ཀྱི་རོ་སྟོད་འདྲ་བ། ཤ་རྒྱས་ཤིང་ནུ་མ་ཆེ་བ། རི་དྭགས་ཀྱི་སྨད་འདྲ་བ་ཤ་རྒྱས་ཤིང་བྷ་ག་རུབ་པ། དབུགས་དང་ཉེ་གནས་ལ་གླ་རྩི་བྲོ་བ། སྐེད་པ་ཕྲ་ཞིང་འགྲོས་དལ་བ། སྐྱེས་པ་ལ་མིག་མི་འཛུམ་པར་བལྟ་བ། སྐད་སྙན་པ། ཤེས་རབ་དང་དད་པ་ཆེ་བ་སྟེ་བཟང་ངོ༌། །འབྲིང་ནི་དེ་ལྟ་བུ་ལས་མོས་གུས་དང་གདུང་སེམས་ཅན་ནོ། །ཐ་མ་ནི་དེ་གང་དང་མི་ལྡན་ན་མི་བསྟེན་ནོ། །གླང་པོ་ཅན་རབ་ནི་མིག་དཀྱུས་རིང་ཞིང་སྨིན་ཕྲག་ཡངས་པ། ལུས་རིང་ཞིང་ཁོངས་དལ་བ། གཞན་གྱི་ངག་མི་ཆོག་པ། རྣ་བ་ཆེ་ཞིང་ཡན་ལག་ཐུང་བ། ངོ་ཚ་ཆེ་ཞིང་ཁ་དབང་ཆེ་བ། སྤྱོད་ལམ་སྒྲིམ་པོ་མི་ཤིས་ཤིང་ལྷོད་ཆགས་པ། སྐད་སྙན་ལ་དྲི་ཞིམ་པ་སྟེ་བཟང་ངོ༌། །འབྲིང་ནི་བྱད་སྔོ་ལ་གཟིངས་མཐོ་བ། ལུས་ཁྱིམ་ལེགས་ཤིང་ཡིད་དུ་འོང་བ། ཁོང་ཆེ་བས་དོན་མི་འཆོར་ཞིང་སླར་མི་བཏུབ་པ། ཕོད་ཆེ་ལ་ངང་རིང་བ་ཅན་ནོ། །ཐ་མ་ནི་དེ་གང་དང་མི་ལྡན་ན་མི་བསྟེན་ནོ། །སྣ་ཚོགས་ཅན་མ་ནི། གོང་གི་མཚན་རྟགས་བཟང་བ་འགའ་རེ་དང་ལྡན་པ་སྟེ། དེ་ལ་དུང་ཅན་མ་ལ་སོགས་པའི་རྩ་ཅི་རིགས་སུ་ཡོད་པ་བདེ་བ་སྟེར་ནུས་ཤིང༌། རི་དྭགས་ཅན་མ་སོགས་ལྟར་དད་པ་དང་བློ་གསལ་བ་སོགས་ཀྱི་རབ་འབྲིང་དུ་དབྱེ་བར་ཤེས་དགོས་སོ། །བཅུ་པ་རང་གི་ཉམས་འཆར་ཚུལ་ལ་བརྟགས་པ་ནི། བུ་མོ་མཚན་ལྡན་མ་དེ་མཐོང་བའམ། སྐད་ཐོས་པའམ་རེག་པ་ཙམ་ལ་བདེ་ཉམས་སྐྱེ་ཞིང༌། ལུས་པོ་གཡའ་བ་དང༌། སྐྱེ་བུན་སྦྲིད་ཆིལ་བྱེད་པ། ཆགས་པ་གཡོ་བ་དང་འཁྲིལ་བ་ཙམ་ལ་བདེ་ཉམས་སྐྱེ་ཞིང༌། རྟོག་པ་འགགས་པ་དང་སྙོམས་པར་ཞུགས་དུས་མ་བསྲུབས་ཀྱང་བདེ་བ་རྫོགས་པར་སྐྱེ་བ། ཐིག་ལེ་མ་གཡོས་ཀྱང་ཡེ་ཤེས་རང་ཤུགས་ལ་སྐྱེ་བ། མ་བཟུང་ཀྱང་ཐིག་ལེ་མི་ཉམས་ཤིང༌། ཐིག་ལེ་འཆུགས་ཀྱང་ལུས་པོ་ལ་མི་གནོད་པ། ཡེ་ཤེས་གསལ་བ་མི་རྟོག་པ་དང་ཤེས་རབ་སྐྱེ་བ། ཆགས་ཞེན་ཨ་འཐས་ཀྱི་རྟོག་པ་རང་སར་འཇིག་ཅིང༌། འཁོར་བའི་སྤྲོས་པ་ཆོད་ལ་རྗེས་སུ་བརྟན་པའོ། །བྱེ་བྲག་ཏུ་བརྟེན་དུ་རུང་བའི་རིགས་བརྟགས་པ་ནི། ཀློང་གསལ་ཉི་མའི་རྒྱུད་ལས། ཕྱི་ནང་གསང་བའི་རྟགས་ཚང་ཞིང༌། །དྲི་ཞིམ་སྐད་སྙན་ཡིད་འོང་མཛེས། །བདེ་བའི་མདངས་ལྡན་ཆོས་ལ་མོས། །གསང་ཐུབ་ཤེས་རབ་ཆ་ེབའོ། །ཞེས་པས། ཕྱི་ལུས་ནང་རྩ་གསང་བ་སེམས་ཀྱི་རྟགས་གསུམ་ཚང་བ་སྟེ། དེའང་ལུས་ལང་ཚོ་དར་ལ་བབས་པ་ལོ་བཅུ་གཉིས་སམ། བཅུ་གསུམ་ནས་རྩ་བརྒྱད་ཀྱི་བར་གོང་གི་སྐྱོན་དང་བྲལ་བ་ཅན་ནོ། །ཡོན་ཏན་ནི་ལུས་རྒྱས་པས་རྩ་རྒྱས། རྩ་རྒྱས་པས་རླུང་རྒྱས། རླུང་རྒྱས་པས་ཐིག་ལེ་རྒྱས། ཐིག་ལེ་རྒྱས་པས་བདེ་བ་ཤིན་ཏུ་རྒྱས་སོ། །བདེ་བ་རྒྱས་པས་རྣལ་འབྱོར་པའི་ཐིག་ལེ་འཕེལ་ཞིང་བདེ་སྟོང་གི་ཡོན་ཏན་སྐྱེ་བའོ། །དེའང་གཞོན་ནུ་མ་དེའི་ནང་གི་བདེ་བའི་སྟོབས་ཕྱིར་ཤར་བས། གཞན་ཀྱི་མིག་ཏུ་མཛེས་ཤིང་ཡིད་དུ་འོང་བ། སྐྲ་ལི་ཞིང་སོ་ལེགས་པ། ཡན་ལག་གི་ཤ་རྒྱས་པའོ། །དེ་ཉིད་གང་ན་གནས་པའི་ཡུལ་དང༌། རྣལ་འབྱོར་པ་ལ་བཀྲ་ཤིས་པ་ཡིན་ནོ། །དེ་ཡང་ཕྱི་རྟགས་ནི་དྲི་ཞིམ་པས་བདེ་བ་མི་སུན་ཞིང་སྤྲོ་ལ། སྐད་སྙན་པས་བདེ་བ་ལ་ཡིད་འཇུག །སྐེད་པ་ཕྲ་བས་མཉེན་ཅིང་བདེ་བ་རྒྱུན་མི་འཆད། སྨད་ཀྱི་ཞིང་རྒྱས་ཤིང་བྷ་ག་རུབ་པས་རྩ་བཙལ་སླ། ཆགས་པའི་མདངས་དང་ལྡན་པས་བདེ་བ་རང་དབང་མེད་པར་སྐྱེ་བའི་དགོས་པ་ཡོད་དོ། །ནང་རྟགས་ནི་གསང་ཐུབ་པས། གསང་སྤྱོད་གཞན་དུ་མི་སྨྲ་ཞིང༌། བདེ་བའི་སྐད་འབྱིན་པས་བདེ་བ་གཡོ་ལ། བྷ་གའི་ནང་ན་རྩའི་རྩེ་མོ་རིང་བ། དེ་ལ་རྡོ་རྗེས་རེག་པ་ཙམ་གྱིས་བདེ་བ་མི་བཟོད་པ་སྐྱེ་ཞིང་སྐད་འབྱིན་པའོ། །གསང་རྟགས་ནི་དད་པ་ཆེ་ཞིང་ཆོས་ལ་མོས་པས་ལོག་པའི་ལམ་དུ་མི་འགྲོ་ཤེས་རབ་ཆེ་བས་བླ་མས་བརྡ་དང་གསུང་སྒྲོས་ཕྱིན་ཅི་མ་ལོག་པར་གོ །དམ་ཚིག་གཙང་ལ་དབང་ཐོབ་པས་གསང་སྤྱོད་ལ་སྐུར་བ་མི་འདེབས་པའི་དགོས་པ་ཡོད་དོ། །ཁྱད་པར་གོང་བཞིན་མཚན་རྟགས་རྣམས་ཚང་ཞིང༌། དཔྲལ་བར་སྨེ་བ་ཡོད་ན་སྐུ་རྡོ་རྗེ་མ་ཞེས་བྱ་སྟེ་སྐུའི་དངོས་གྲུབ་སྟེར་བར་ནུས་སོ། །མགྲིན་པར་ཡོད་ན་གསུང་རྡོ་རྗེ་མ་ཞེས་བྱ་བ་སྟེ་གསུང་གི་དངོས་གྲུབ་སྟེར་བར་ནུས་སོ། །སྙིང་གར་ཡོད་ན་ཐུགས་རྡོ་རྗེ་མ་ཞེས་བྱ་བ་སྟེ་ཐུགས་ཀྱི་དངོས་གྲུབ་སྟེར་བར་ནུས་སོ། །གནས་གསུམ་ཀར་སྨེ་བ་ཡོད་ན་ཡེ་ཤེས་ཀྱི་མཁའ་འགྲོ་དངོས་ཡིན་པ་ལས། དེ་ནི་ཕལ་བའི་བུ་མོ་ཡིན་སྙམ་མི་བྱའོ། །དེ་ཅིའི་སླད་དུ་ཞེ་ན། དེ་ནི་འབྱུང་བར་དཀོན་ཞིང་མཆོག་གི་དངོས་གྲུབ་སྩོལ་ནུས་པས་ན་ཚུལ་བཞིན་བསྟེན་པར་བྱའོ། །དེ་ནི་ཡིད་བཞིན་ནོར་བུ་ལས་ཀྱང་ལྷག་གོ །མདོར་ན་ཀློང་གསལ་ལས། སྐྱོན་ཅན་སྤང་ཞིང་ཡོན་ཏན་ལྡན་པ་བསྟེན། །འབྲས་བུ་གནས་སྐབས་མཐར་ཐུག་ཕུན་སུམ་ཚོགས། །ཞེས་གསུངས་སོ། །དེ་ནས་བསྟེན་དུ་མི་རུང་བའི་རིགས་ནི། ཀློང་གསལ་ལས། དད་དང་ངོ་ཚ་མེད་པ་དང༌། །རིགས་དང་རང་བཞིན་ཉམས་པ་སྤང༌། །ཞེས་པས། དད་པ་མེད་པ་དང༌། ངོ་ཚ་དང་ཁྲེལ་མེད་པ་དང༌། རིགས་ལྔའི་མཚན་ལྟས་བཟང་པོ་ཉམས་པ་དང༌། རང་བཞིན་ངན་ལ་རྩུབ་པ། སྒོ་གསུམ་རྣམ་པར་མི་དགེ་བ་ཅན་ནོ། །ཡང་དེ་ཉིད་ལས། རྩ་ཞིག་རྩ་ཞ་རྩ་རྒུད་གསུམ། །བདེ་བ་མེད་པས་སྤང་བར་བྱ། །ཞེས། རྩ་ཞིག་ནི་བུ་ཚ་སྐྱེས་པས་རུས་ཚིགས་ཕྱེ་ཞིང་ལྷོད་པའོ། །ཞ་བ་ནི་ནད་གཅོང་ལ་སོགས་པས་གཏར་བསྲེག་བྱས་པས་བདེ་བའི་ལམ་ཉམས་པའོ། །རྒུད་པ་ནི་ལས་དྲག་པོ་དང་མྱ་ངན་དང་ཟས་བཅུད་མེད་བརྟེན་པ་ལ་སོགས་པས་བདེ་བ་སྟེར་མི་ནུས་པས་སོ། །ཡང༌། མ་སྨིན་ཡལ་དང་ཟད་པ་དང༌། །ཆུང་དང་ཉམས་དང་སྐྱོན་ཅན་སྤོང༌། །ཞེས་པས། མ་སྨིན་པ་ནི་ཁམས་ནར་མ་རྫོགས་པ་ལོ་བཅུ་མན་ཆད་པའོ། །ཡལ་བ་ནི་དངས་མ་ཟག་ནས་མེད་པ་སྟེ་སུམ་ཅུ་ཡན་ཆད་དོ། །ཟད་པ་ནི་བུ་ཚ་སྐྱེས་པའམ་ཟས་མེད་པ་ལ་སོགས་པས་ཁམས་ཉམས་པའོ། །ཆུང་བ་ནི་ཁམས་ཉུང་བའི་བུད་མེད་ཀྱི་རིགས་ཅན་བདེ་བ་ཤེས་ཆུང་བའོ། །ཉམས་པ་ནི་ཁམས་ཟག་པའོ། །སྐྱོན་ཅན་ནི་ནལ་བུ་ཡོད་པ་ཅན་ནོ། །ཁྱད་པར་བུད་མེད་ནག་མོ་མ་དག་པའི་རིགས་སྤང་བྱའི་ཚོགས་ནི་འདི་ལྟར་ཏེ། བདུད་མོ་འགྲིབ་བྱེད་མའི་རིགས་ཞེས་བྱ་བ་ནི། གཟུགས་ཆེ་ལ་ཡན་ལག་རག་ཅིང་ཁ་སྣ་ཆེ་བ། རྐང་པ་གཡས་འདོར་ཤ་མདོག་དམར་ནག་ཅན། སྐད་སྦོམ་བྲང་རུས་འབུར་ལ་སྐེད་པ་གྱི་ལིང་དུ་ཡོད་པ། ཆོས་ལ་མི་དད་ཅིང་སེར་སྣ་ཤིན་ཏུ་ཆེ་བ། ཕྲ་མ་གཡེམ་ལ་དགའ་བ། ཀུན་ལ་སྙིང་རྗེ་ཆུང་ཞིང༌། མཛའ་བོ་ལ་ངན་པ་སྟེ། དེས་ནི་ཚེ་བསོད་ལོངས་སྤྱོད་ཐམས་ཅད་འགྲིབ་པར་འགྱུར་རོ། །བདུད་མོ་མནོལ་བྱེད་མའི་རིགས་ནི། གཟུགས་བོང་ཤིན་ཏུ་ཆུང་ངམ་ཡང་ན་སྦོམ་པ། ཤ་རྩུབ་ཉ་སུལ་རག་ཅིང༌། རྐང་ལག་གི་མགོ་རྣམས་ཆེ་བ། མདོག་ཀྱང་དམར་ལ། མིག་གོར་བ། སྤྱོད་ལམ་ཚུབ་ལ་ཕྱིན་ཅི་ལོག་པ། དབང་པོ་གསལ་ཡང་བཟང་ལན་བརྗེད་ངེས་ཆེ་ཞིང༌། བདེན་པ་ཁྱད་དུ་གསོད་པ། གཡོ་རྒྱུ་དང་མིག་སེར་ཆེ་ལ། གོ་ཡུལ་ཤེས་རབ་ངན་པ། ཉོན་མོངས་ཤིང་གཏི་མུག་འཐིབ་པ། གོམ་པ་མགྱོགས་ལ་བཟང་ལན་ངན་འདོན་ཅན། ལས་དྲག་ཏུ་འཇུག་ཅིང་བཟང་བཏུང་བསྣོལ་འབོག་ཆེ་སྟེ། དེས་ནི་ཕུང་གསུམ་ལངས་ཤིང་ཚེ་རྒུད་མི་རུང་སྣ་ཚོགས་འབྱུང་བར་འགྱུར་རོ། །བདུད་མོ་ཟ་བྱེད་མའི་རིགས་ནི། ལུས་བོང་རགས་ལ་ཤ་སྣ་རྩུབ་པ། མིག་དམར་ཁ་ཆེ་སྣ་ཉག །མདོག་དམར་རམ་ནག་པ། གདོང་སྨེ་མང་པོ་ཡོད་པ། སྐྲ་བོང་ཆེ་ལ་ཀོ་ལོང་དམ་པ། གང་དང་འགྲོགས་ཀྱང་འཁོན་ཐབས་མང་ཞིང༌། གཙང་སྦྲ་ཆུང་ཞིང་དམར་ལ་རྔམས་པ། ཞེ་སྡང་རགས་ལ་ཁྲོ་གཏུམ་ཆེ་བ་སྟེ། འདི་བསྟེན་དཔལ་རྣམས་རིང་པོར་འགྱུར་བས་མི་བསྟེན་པར་བྱའོ། །དེ་བཞིན་གནོད་སྦྱིན་མའི་རིགས་ཀྱི་བུད་མེད་ནི་བློ་རྒོད་ཅིང་གོམ་པ་དྲག་པོར་འགྲོ་བ། བློ་མི་བརྟན་ཅིང་འགྱུར་ལྡོག་ཆེ་བ། ཁ་ནང་དུ་དྲི་ངན་བསྣམས་ཞིང༌། རྐང་ལག་རགས་ལ་ཚིག་སྣ་ཚོགས་སྨྲ་བ། མིག་སེར་ཆེ་ཞིང་མཆན་འོག་ནས་བསེ་དྲི་བསྣམས་པ། གསང་གནས་ཡང་རོ་ཁ་བ། ཞེ་ཁ་ལྡོག་ཅིང་ཉམས་མི་དགའ་སྟེ། དེས་ནི་ཕྲ་མེན་དང་བཀྲ་མི་ཤེས་སྣ་ཚོགས་འོང་བས་སྤང་བར་བྱའོ། །དེ་བཞིན་ལས་ངན་རིགས་ཀྱི་བུད་མེད་ནི། ལུས་ཕྲ། སྐྲ་ནག །མཁུར་ཚོས་ཆེ་བ། ཨོག་མ་རྣོ་ཞིང་ཤ་མདོག་སེར་ལ་རིད་པ། རྐན་ཕུག་ནག་ལ་དྲི་མ་ཆེ་བ། མིག་ཞུད་དམའ་ལ་མཚུལ་བ་མཐོ་བ། མཆ་ེབ་ཡོད་ཅིང་ཁ་དོག་དམར་བ་སྟེ། མིག་སེར་རྒོད་ལ་འདོད་ཆགས་ཆེ་བ་རྣམས་བསྟེན་པས་ཚེ་ལ་བར་དུ་གཅོད་ཅིང་མི་རུང་བས་སྤང་བར་བྱའོ། །དེ་བཞིན་དམ་སྲིའི་རིགས་ནི། དཔུང་མགོ་མཐོ་ལ་ཚིགས་ཐམས་ཅད་སྦོམ་པ། གསུས་པ་ཆ་ེཞིང་འཕུང་རུས་ཆུང་བ། སྣ་ཉག་འཁུར་ཚོས་ཆེ་ལ་དྲི་ངན་བསྣམས་པ། གསང་མི་ཐུབ་ཅིང་ཀོ་ལོང་རགས་པ། ཙབ་ཙུབ་མང་ལ་ཕྲག་དོག་དང་མིག་སེར་ཆེ་བ། འཁོར་བར་སྐྱོ་ལ་སེར་སྣ་རགས་ཞིང་བསམ་སྦྱོར་ངན་པ་སྟེ། འདི་བསྟེན་མཆོག་གི་དངོས་གྲུབ་སྐྱེ་བ་ལྔ་བརྒྱར་མི་འཐོབ་ཅིང༌། ཡུལ་མཐའ་འཁོབ་དང་མ་རུང་བ་ཁོ་ནར་དེ་འདྲ་མང་བས་སྤང་དགོས་སོ། །དེ་བཞིན་ཤ་ཟའི་རིགས་ནི། ཤ་མདོག་ནག་ལ་ཕོ་སྐད་ཅན། རྗི་མ་རིང་ཞིང་སྨིན་མ་འཚུབ་པ། གསུས་པ་ལྡིར་ལ་གཤང་ལྕི་དང་གཡའ་ཆུ་མང་བ། ཁ་རྩོག་གི་གཏམ་ལབ་ལ་དགའ་ཞིང༌། སྦྱོར་བའི་འཁྱེར་སོ་མེད་པར་རོ་ཉལ་བྱེད་པ། མིག་སེར་ཤིན་ཏུ་རྒོད་པ་ལ་སོགས་ཏེ། དེ་བསྟེན་ཚེ་འདིར་དངོས་གྲུབ་ཆད་ཅིང་ཚེའི་བར་ཆད་མྱུར་དུ་འོང་ཞིང༌། ཚེ་འཕོས་ནས་ཀྱང་དམྱལ་བར་འགྲོ་བས་སྤང་དགོས་སོ། །དེ་བཞིན་དུ་རྐང་འཇིབས་མའི་རིགས་ནི། གདོང་བ་དྲག་ཅིང༌། ཧ་འདང་ཆེ་བ། ཚིག་རྩུབ་ཅིང་ལུད་པ་ཕྱོགས་བཅུར་འཕེན་པ། མི་ནོར་ལ་སྡང་ཞིང་ཟས་བཅུད་ཆུང་བ། བྱ་བ་བྲེལ་བས་དོན་མི་འགྲུབ་པ། སེམས་འཚབ་ཁ་རྒོད་ཕུག་སྡུག་པ། རྨི་ལམ་ལྷ་མཐོང་དང་འདྲེ་མཐོང་མང་བ། མིག་སྤྲིན་ཁྲ་ལ་རྗི་མ་རིང་བ། མཛའ་བ་ལ་སྡང་ཞིང་ཀུན་ལ་འཐབས་ཏེ། དེས་ནི་དངོས་གྲུབ་རྣམ་གཉིས་ཟད་ཅིང༌། ཚེ་ལ་བར་ཆད་འབྱུང་བས་སྤང་ངོ༌། །དེ་བཞིན་བཅུད་འཕྲོག་མའི་རིགས་ནི། ཤ་མདོག་སྐྱ་བོ་ཐལ་མདོག་ལྟ་བུའམ། ཡང་ན་སེར་ལ་རིང་བ། ཡང་ན་སྔོན་པོ་ནག་པོ་སྨུག་པོ་ལ་སོགས་སྐྲ་ཡང་ནག་ལ་རྩུབ་པ། ལུས་དྲི་མ་ཆེ་བ། མིག་འབྲས་དམའ་ལ་སྣ་གདོང་ཉག་པ། ཁ་རྩོག་ཅིང་ཚིག་ངན་སྣ་ཚོགས་རྒྱུན་དུ་སྨྲ་བ། ཁ་འཁྱལ་ཞིང་ཀུན་ལ་གཤེ་བ་དང༌། མིག་སེར་ཆེ་ཞིང་ཟས་ལ་ངན་པ། སྐྱེས་པ་ཚུད་ན་འབྲལ་མི་ཕོད་པ་སྟེ། དེས་ནི་ཚེ་ཐུང་ནད་སྣ་ཚོགས་འབྱུང་ཞིང༌། རྣལ་འབྱོར་པའི་ཉམས་རྟོགས་འགྲིབ་པས་ན་དེ་རྣམས་ནི་སྤང་བར་བྱ་བ་ཡིན་ནོ། །ཡང་དེ་ལྟར་མ་ཡིན་པའི་མ་རུང་བའི་རིགས་རྣམས་ནི་དབང་པོ་སྟེ། འབྱུང་བ་རླུང་གི་དྭངས་མ་སྐྲ་ཡིན་པས། ཕག་གི་ཟེ་བ་ལྟར་ལངས་ན་དམ་སྲི་དང༌། རུས་པ་བྱང་ཆུབ་ཀྱི་དྭངས་མ་ཡིན་པས་སོ་སེར་ཞིང་ཧྲལ་ཧྲོལ་འདྲ། ན་མ་ཡམས་དང༌། རྐང་ལག་གི་སེན་མོ་བྱ་སྡེར་འདྲ་ན་གསོད་བྱེད་མ་དང༌། མཆན་ཁུང་གཡོན་དུ་སྨེ་བ་བྱུང་ན་འཇོམས་བྱེད་མ་དང༌། ཅེར་གྱིས་བལྟས་པས་སྙིང་མི་དགའ་ཞིང༌། ལྷང་གིས་སྨྲས་པས་སྒྲ་མི་སྙན་པ་གནོད་སྦྱིན་མ་སྟེ་འདྲེ་མོའི་རིགས་ཡིན་པས་སྤང༌། གཞན་ཡང༌། གསང་སྒོ་འཆལ་བ། རྫུན་དང་དབྱེན་རྒོད་པ། དག་སྣང་ཆུང་ཞིང་དད་གུས་མེད་པ། ཕྱི་ལ་དགའ་ཞིང་ཕྲག་དོག་རྒོད་པ་ལ་སོགས་པ་སྟེ། ཆོས་དང་མི་ལྡན་ཅིང༌། ཆོས་ལ་གནོད་པར་བྱེད་པ་རྣམས་ནི་འདྲེ་བདུད་ཀྱི་རིགས་ཡིན་པས་སྤང་བྱ་ཡིན་ནོ། །ལར་ནི་མ་བརྟགས་པའི་མཛེས་མོ་ཕྱག་རྒྱར་བསྟེན་ན། རང་སངས་རྒྱས་ཐོབ་ཀྱང༌། གཞན་དོན་གཏན་ནས་མི་ནུས། ཡུག་ས་མོ་ཕྱག་རྒྱར་བརྟེན་ན་སྐྱེ་བ་བརྒྱ་སྟོང་དུ་དངོས་གྲུབ་མི་ཐོབ། བླ་མ་དང་སློབ་དཔོན་ལ་དམ་ཉམས་པའི་བུད་མེད་ཕྱག་རྒྱར་བསྟེན་ན། འགོ་བའི་ལྷ་དང་ཕྲལ་ཞིང༌། ཡི་དམ་གྱི་ལྷ་མི་འགྲུབ་ཅིང༌། མཁའ་འགྲོ་རྣམས་རིང་དུ་འབྲོས། ཆོས་སྐྱོང་གི་ཕྲིན་ལས་རྒུད། གདུལ་བྱའི་སྣ་འགགས། སྐྱེས་བོའི་ཡ་ཁ་ལྡང༌། མཚན་དང་མི་ལྡན་པའི་བུད་མེད་ནི། ལན་གཅིག་བརྟེན་ཀྱང་མི་རུང་བ་སྣ་གཅིག་ཡོངས། ནོར་དང་འབྲལ། དགྲ་སྡང༌། ལོངས་སྤྱོད་དབུལ། མི་མཐུན་པའི་བྱུར་རྣམས་འཕེལ་བར་འགྱུར་བས་སྤང་བྱ་ཡིན་ནོ། །ཕྱག་རྒྱ་རྐྱེན་དང་ལྡན་ཡང་བཟློག་པ་ནི། སྐུ་གསུང་ཐུགས་ཀྱི་སྨེ་བ་གང་ཡོད་པ་དང༌། སྣ་བུག་གཡོན་གྱི་འགྲམ་སྟོད་སྨད་ལ་སྨེ་བས་བརྒྱན་པ་ཡོད་ན། རྐྱེན་རྣམས་ལྡན་ཡང་བཟློག་པར་འགྱུར་བས། དེ་ལྟར་ལས་ཀྱི་ཕྱག་རྒྱའི་མཚན་ཉིད་རྣམས་མ་ཚང་ན་སྤང་ལ། ཚང་ན་བརྟེན་པར་བྱ་བའོ། །གཉིས་པ་མཚན་ཉིད་དང་ལྡན་པ། དབང་དུ་བསྡུ་བའི་ཐབས་ལ། དང་པོ་རྫས་ནི་གཞན་གྱི་སེམས་གཟིར་བར་བྱེད་པ་གོ་བོའི་བྲུན། ཡིད་དུ་འོང་བར་བྱེད་པ་སེ་བའི་མེ་ཏོག །ཡིད་འགྱུར་བར་བྱེད་པ་ཁུར་མོང་གི་མེ་ཏོག །རྟག་ཏུ་རང་ལ་གུས་པར་བྱེད་པ་ཕོ་དུང༌། རྟག་ཏུ་སེམས་བརྩེ་བར་བྱེད་པ་ནས་ཟན་ཀླད་པ། མོ་དབང་དུ་འདུ་བར་བྱེད་པ་ཁུག་རྟའི་བྲུན། བཙུན་མོ་དབང་དུ་འདུ་བར་བྱེད་པ་ཟངས་ཀྱི་ཕྱེ་མ། ཐང་ཕྲོམ་འབྲུ་གུ། རང་གི་ཐིག་ལེ་བཅས་ཞིབ་ཏུ་བརྡུང་ལ། རིལ་བུ་སྲན་མ་ཙམ་བྱས་ཏེ། བསྒྲུབ་པ་ནི། རང་ཉིད་ཡི་དམ་དུ་གསལ་བའི་གསང་གནས་སུ། དབང་ཕྱུག་ཆེན་པོ་མདའ་གཞུ་འགེངས་པའི་རྡོ་རྗེ་གྱེན་དུ་ལངས་པ་ལ། མོ་རྒྱུད་ཐམས་ཅད་ཀྱི་སེམས་ཆགས་པར་བསམ། གཞུ་ཡཾ་གྱིས་མཚན་པ་ལས་རླུང་གཡོས། མདའ་རཾ་གྱིས་མཚན་པ་ལས་མེ་འབར་བས་རཾ་དམར་པོ་ཞིག་ཆད་དེ་དམིགས་བྱའི་གཙོ་བོ་བུད་མེད་ཐམས་ཅད་ཀྱི་སྙིང་ནང་དུ་ཕོག་པས་སེམས་གཡོས་ལུས་འདར་བས། ཁམས་དམར་པོ་དམར་ལྷད་ལྷད་མར་བབས་ནས་རང་ལ་ཐིམ་པར་བསྒོམ། མོ་ཐམས་ཅད་འཕར་ལིང་ལིང་བྱས་ནས་གཡོན་སྐོར་དུ་སྒ་ར་ར་འཁོར་བར་བསམ། དམིགས་བྱ་རྣམས་འཕར་ཡེད་ཡེད་སྡངས་ཡེད་ཡེད་བྱུང་ནས་རང་དབང་མེད་པར་རང་ལ་དད་པ་དང་གདུང་བ་དང་གུས་པར་བསྒོམ་ལ། སྔགས་འདི་བཟླ། ཨོཾ་མ་ཧཱ་དེ་ཝ་ཧཱུྃ། ཨུ་མ་དེ་ཝི་ཧྲཱིཿ བུད་མེད་ཐམས་ཅད་ཀྱི་མངལ་གྱི་སྲིན་བུ་སློང༌། ཨཱ་མོ་ལཾ་ལཾ་སྟོད་དུ་ལཾ་ཨ་ཏི་ཁོལ་ཁོལ། སྨད་དུ་ཁོལ། སེམས་ཀྱི་འདོད་ཆགས་འབྱུང་བ་དཀྲུགས་ཤིག །རླུང་གི་ཞགས་པས་དེད་ལ་ཤོག །ཎི་ཨཱ་ཀར་ཤ་ཡ་ཧྲིཾ་ཛ་ཛ། ཞེས་ཞག་བདུན་བཟླས་ཏེ་རྫས་ལ་བསྔགས་ནས། ཆང་ངམ་ཟས་དང་སྦྱར་དེ་དམིགས་བྱའི་ལྟོར་ཐང་བར་བྱས་ན་རང་དབང་མེད་པར་དབང་དུ་འདུ་བར་འགྱུར་རོ། །གཉིས་པ་འཁོར་ལོ་ལ་བརྟེན་ནས་དབང་དུ་བསྡུ་བ་ནི། ཟིལ་གནོན་སེང་གེའི་ཙཀྲ་དང་གཅིག །མཛེས་བྱེད་རྨ་བྱའི་ཙཀྲ་དང་གཉིས། སྙན་བྱེད་དུང་གི་ཙཀྲ་དང་གསུམ་ལས། རེ་རེ་ལ་མུ་ཁྱུད་རིམ་པ་ལྔ་རུ་བསྐོར་ལ། སེང་གེའི་ཙཀྲའི་ལྟེ་བར། བུད་མེད་བསྙལ་མའི་སྟེང་དུ་རང་གི་གཟུགས་བྲིས། ཕྱི་རིམ་མུ་ཁྱུད་ལ་ལྷ་འདྲེ་མི་གསུམ་ཐམས་ཅད་དང༌། འགྲོ་བ་ཕོ་མོ་ཁྱད་པར་དུ་ཡང་ཆེ་གེ་མོ་འདི་ཞེས་བྱ་བ་རང་གི་དམིགས་ཡུལ་དུ་གྱུར་པ་ཐམས་ཅད་བདག་གི་དབང་དུ་སྡུས་ཤིག་མྱུར་དུ་ཁུག་ཅིག དེའི་ཕྱི་རིམ་ལ། ཨོཾ་ཙག་ཤུ་ཙེར་སྡེམ་གུམ་བུད་མེད་གང་ལ་བྱེད་པ་དེ་ཐམས་ཅད་བདག་གི་དབང་དུ་སྡུས་ཤིག །ཅེས་བྲི། དེའི་ཕྱི་རོལ་དུ་རྩིབ་བདུན་ལ། ཨེ་རྣི¿་ཡ་མ་དུ་ཧྲཱིཿཛ། ཡི་གེ་རེ་རེ་བྲི། རྩིབ་མཆན་དུ་བུད་མེད་ཡིད་དུ་འོང་བའམ། ཡུལ་དེའི་རྒྱལ་པོ་དང་བཙུན་མོ་རྣམས་ཀྱིས་རང་ལ་གུས་པ་དང་འདུད་པའི་ཚུལ་བྱའོ། །དེའི་ཕྱི་རིམ་ལ། ཨོཾ་ཤ་ཤ་སྲང་སྲང་ཏྲི་ཙམ་ཏྲི་ཙམ་ཏྲཾ་མོས་ཤོག་ཤོག་ཙག་ཙག་ཙིག་ཙིག་མེ་འབར་ལྷབ་ལྷབ་ཆེ་གེ་མོ་བདག་གི་དབང་དུ་སྡུས་ཤིག་སྭཱ་ཧཱ། ཞེས་བྲི། དེའི་ཕྱི་རོལ་དུ་ཨ་ལི་ཀ་ལི་དང་རྟེན་འབྲེལ་སྙིང་པོ་བྲིའོ། །རྨ་བྱའི་ལྟེ་བར་རང་དང་བུད་མེད་ཁ་སྦྱོར་བྱས་པའི་གཟུགས་བྲི། དེའི་སྔགས་རྣམས་གོང་དང་འདྲ། དེའི་ཕྱི་རོལ་དུ་ཙག་ཤུ་གོང་ལྟར་དང༌། རྩིབ་བདུན་དང་རྩིབ་མཆན་དང་དེའི་ཕྱི་རོལ་དང༌། མཐར་བསྐོར་བཅས་རྟེན་འབྲེལ་སྙིང་པོ་གོང་ལྟར་བྱའོ། །དུང་གི་ཙཀྲའི་ལྟེ་བར། རང་ལ་བུད་མེད་དེ་རྒྱལ་པོ་ལ་གུས་པའི་ཚུལ་བྲི། གཞན་ཐམས་ཅད་གོང་དང་འདྲ་ཞིང༌། བསྙེན་པ་གོང་མའི་ཤམ་དུ་ཨོཾ་ཙག་ཤུ་དང་ཨེ་རྣི¿་དང་ཤ་ཤ་གསུམ་སྦྲེལ་ནས། གང་གི་སྔགས་རྫས་རྣམས། འཁོར་ལོ་སོ་སོའི་ལྟེ་བར་བྱུགས་ཤིང༌། དེ་ཡང་སེང་གེ་གཡས། རྨ་བྱ་གཡོན། དུང་དབུས་སུ་བཏགས་པས་ལྷ་འདྲེ་མི་གསུམ་རང་དབང་མེད་པར་དབང་དུ་འདུས་པའི་འཁོར་ལོ་ཟབ། ཨིཐྀ། འབྱུང་བ་རླུང་ལ་བཅོལ་ནས་རླུང་འཁོར་བྱེད་ན། འཁོར་ལོ་སྟེང་འོག་གཉིས་བྱེད། མུ་ཁྱུད་གསུམ་དུ་བྱས་པའི་ལྟེ་བར་བུ་ག་བུག་པར་བྱ། དེའི་ཕྱི་རོལ་དུ་མུ་ཁྱུད་ལ། ཨོཾ་ཙག་ཤུ་ཙེར་ལྡེམ་འགྲོ་བ་ཕོ་མོ་ཐམས་ཅད་བདག་གི་དབང་དུ་སྡུས་ཤིག །ཅེས་བྲི། ཕྱི་རོལ་དུ་རྩིབས་བདུན་ལ་ཨེ་རྣི¿་ཡ་མ་དུ་ཧྲཱིཿཛཿ ཡིག་འབྲུ་རེ་རེ་བཞིན་གཟབ་ཏུ་བྲི། དེའི་ཕྱི་རོལ་དུ་ཨོཾ་ཤ་ཤ་སྦྲང་(སྲུང)ཏི་སོགས་ཚང་བར་བྲི། ཕོ་འཁོར་གཡས་སུ་དང་མོ་འཁོར་གཡོན་དུ་འཁོར་བ་བྲིའོ། །ཕོ་མོ་སྟེང་ཞབས་བྱས་པའི་བར་དུ། འཁོར་ལོ་རབ་བརྒྱ་རྩ། འབྲིང་ལྔ་བཅུ། ཐ་མ་ཡང་ཉི་ཤུ་རྩ་བདུན་བྱས་པའི་སྟེང་ཐམས་ཅད་ཡིག་མགོ་རྒྱབ་ཏུ་བསྟན། འོག་ཐམས་ཅད་ནང་དུ་བསྟན་ལ་སྔགས་འདི་རྣམས་ལྷག་ཆད་མེད་པར་བྲི་བ་ནི། ཨོཾ་ཆུ་ལྷུད་ལྷུད་འདར་ཡེར་ཡེར། སྟོད་ལ་ཁུག་ཁུག་རྩ་ལ་གྲམ་གྲམ་འདར་རྒྱས་ལ་སྭཱ་ཧཱ། མིང་དང༌། ཨོཾ་ཨ་ཏི་ཁོལ་ཁོལ་སྟོད་ནས་ཁོལ། ཨ་མོ་ནན་ནན་སྨད་ནས་ནན། འདོད་ཆགས་ཀྱི་རྩ་བ་གཏིང་ནས་དཀྲུག་གྷི་ཏི་ཆུག་ཙིཏྟ་ཕྱུང་སྣང་རྒྱལ་རྣམས་ཟེད་ཟེད་ཕུལ་ཕུལ་ལྷུང་ལྷུང་ལྷ་མོ་མྱུར་དུ་ཁུག་ཁུག །ཡུངས་དཀར་གྱི་ཕོ་ཉས་ཕོ་མོའི་དབང་པོ་ཤིག །ཨོཾ་ཡ་ཁ་གཟིར་གཟིར་ན་ཏུར་ཏུར་དམ་ལ་ཤོག་ཤོག་ཆུཾ་ཁྲིད་འདོད་ཆགས་ཀྱི་མཚོ་མོ་གཏིང་དཀྲུག་དཀྲུགཿ སྲིན་བུ་མགོ་མང་གི་ཚང་ཤིག་ཕཊཿ ཆེ་གེ་མོའི་དབང་ཐང་ལུས་ལ་ནད་ཕོབ་སྭཱ་ཧཱ༔ མིང་བཅུག །ཨོཾ་ཡ་མ་འཛུར་འཛུར་ཧྲིམ་ཧྲིམ་རྨ་ཧྲི་རྨ་ཧྲིང་ཧྲིང་ས་བདག་མོ་བུད་མེད་དར་མའི་ཙིཏྟ་ཁུག་ཁུག་སྭཱ་ཧཱཿ མིང་བཅུག །ཨོ་ཾདྲི་ལ་དཀར་པོ་ཆོག་ཆོགཏྲི་ལ་བ་ཤཾ་དུ་ན་ཁ་ལ་མྱང་མྱང་སྭཱ་ཧཱཿ ཛུབ་ཛུབ་ཧྲིང་ཏྲི་སློང་སློང་བྷ་ཤག་ཁུག་ཁུར་སྭཱ་ཧཱ་༔ མིང་བཅུག །ཨོཾ་འཛབས་འཛུབས་ཧྲཱི་ཏྲི་སློང་སྭཱ་ཧཱ༔ རྣི¿་ཛ་སྭཱ་ཧཱཿ བྷ་ཤ་ཁོལ་ཁོལ་ཙཀ་ཙཀ་དུང་དུང་ཡེད་ཡེད་བདག་གི་དབང་དུ་སྡུས་ཤིག །ཅེས་དབང་སྡུད་ཐམས་ཅད་ཀྱི་ཡང་སྙིང་ཟབ་པའི་མཐར་ཐུག་འདི། ཡི་ག་ེཕྱི་ནང་གང་ཤོང་ལྷག་ཆད་མེད་པར་བྲི། བར་དུ་ཡུལ་ཁམས་དེའི་དམིགས་བྱ་གང་ཡིན་གྱི་མིང་ཐེབས་སུ་བཅུག་ལ་བདག་གི་དབང་དུ་སྡུས་ཤིག་ཅེས་བྲི། འཁོར་ལོ་དེ་རྣམས་ལ་གོང་གི་རྫས་བྱུགས། བཀྲ་ཤིས་པའི་ཉི་མ་ཐེབས་ཡོད་པའི་དུས་ལ། རང་གི་ཁྱིམ་གྱི་ཕྱོགས་ནས་ཁམས་དང་བསྟུན་ལ་མཐུན་ཕྱོགས་སུ་བཙུག་གོ །འཁོར་ལོའི་ཐོག་ཏུ་བྱིན་རླབས་ཅན་གྱི་གདུང་དང་རིང་བསྲེལ་ལ་སོགས་པ་གོང་ནོན་དུ་གཞུག་གོ །ཚོགས་དང་གཏོར་མ་ལ་གཟབ་བོ། །བཀྲ་ཤིས་བརྗོད། གཞི་བདག་ལ་བཀའ་བསྒོ། གཏོར་མ་བྱིན། གསེར་སྐྱེམས་མཆོད། འདི་ནི་གཞན་ལ་མེད་པའི་དབང་སྡུད་ཀྱི་རླུང་འཁོར་འདི་ལས་ཟབ་པ་ནི། རྒྱལ་ཁམས་གཞན་དུ་ཡོད་རེ་ཀན། གཞན་རྣམས་ཕྱིའི་དབང་སྡུད་ཡིན། འདི་ནི་ནང་གི་དབང་སྡུད་ཡིན་པས་ཤིན་ཏུ་ཟབ། གཞན་ཡང་སོར་གདུབ་དང༌། ཚང་སྐུད་སོགས་ལ་བརྟེན་པ་རྣམས་ནི་གཞན་ལས་ཤེས་པར་བྱའོ། །ཁྱད་པར་དུ་ཁམས་རྒྱས་པ་དག་གིས་ཡང་ཡང་ཡིད་ལ་བྱས་ན་དབང་དུ་བསྡུ་བ་རྣམས་ཀྱི་མཆོག་ཏུ་གྱུར་པ་ཡིན་ནོ། །གསུམ་པ་ལས་སྦྱོར་ལ་བཞི་ལས། དང་པོ་དབང་དུ་བསྡུས་ནས། ཚེ་མི་རྟག་པ་དང་ལས་རྒྱུ་འབྲས་སོགས་ཀྱིས་བློ་སྣ་ཆོས་ཕྱོགས་ལ་བསྒྱུར། སྐྱབས་འགྲོ་ནས་བརྩམས་ཏེ་དགེ་བསྙེན་དང༌། བྱང་ཆུབ་སེམས་བསྐྱེད་ཀྱི་སྡོམ་པ་བཅས་འབོག །དབང་བཞི་རྣམས་རྫོགས་པར་བསྐུར་ཏེ། རྒྱ་བོད་ཀྱི་རིག་འཛིན་ཕལ་མོ་ཆེ་རྣམས། ལམ་འདི་ལ་བརྟེན་ནས་གྲུབ་པ་ཐོབ་པའི་ལོ་རྒྱུས་དང༌། མྱུར་དུ་འཁོར་བའི་སྡུག་བསྔལ་ལས་ཐར་པ་དང༌། ཆོས་ཐམས་ཅད་ཀྱི་མཐར་ཐུག་ཡིན་ཚུལ་དང༌། དཀའ་ཚེགས་མེད་པའི་མྱུར་ལམ་ཟབ་མོའི་ལོ་རྒྱུས་སོགས་ཞིབ་ཏུ་བརྗོད་དེ་ངེས་ཤེས་སྐྱེ་རུ་བཅུག་ནས། བསྐྱེད་རྫོགས་དང་ལྟ་བ་ལ་གོམས་ཤིང་འདྲིས་སུ་བཅུག །བླ་མའི་ཞབས་ཏོག་དང་གསང་སྤྱོད། འགྲོ་འདུག་སོགས་ལ་མཁས་པར་བསླབ། འཁྲུལ་འཁོར་དང༌། ཕྱི་ནང་གི་མཆོད་པ་འབུལ། བདེ་བ་བསྐྱེད་ཅིང་ཡིད་འཇུག་པའི་རྣམ་འགྱུར་ལ་སློབ་ཅིང་ཕྱི་ནང་གི་ཁྲུས་བྱ། གླ་རྩི་དང་ཙནྟན་ལ་སོགས་པའི་དྲི་བཟང་གིས་ལུས་ལ་བྱུགས། གོས་དང་རྒྱན་གྱིས་མཛེས་པར་བྱའོ། །རང་ལུས་ཐབས་ལྡན་དུ་བསྒོམ་པ་ལ། གཞུང་མང་པོ་ལས་གསུངས་པའི་དོན་གཅིག་ཏུ་འདུས་པ་ནི། ཟབ་ཆོས་ཞི་ཁྲོ་དགོངས་པ་རང་གྲོལ་ལས། དེ་ནས་རང་ལུས་བདེ་བ་བསྒོམ་པ་ལ། །ཐོག་མར་འོད་རིག་ཡེ་ཤེས་ཕྱག་རྒྱ་ནི། །རང་གི་ཡིད་དུ་འོང་བའི་བུ་མོ་དེ། །ཁ་དོག་དབྱིབས་དང་སྤྱོད་ལམ་མངོན་སུམ་ལྟར། །ཆགས་པའི་དབང་གིས་མདུན་དུ་བྱུང་བར་བསྒོམ། །རང་ཉིད་ཡི་དམ་རྟ་མགྲིན་བསྒོམ་པའམ། །ཡང་ན་པདྨ་འབྱུང་གནས་གཅེར་བུའི་ཚུལ། །བུ་མོ་དེ་ཉིད་ཡེ་ཤེས་མཚོ་རྒྱལ་མ། །རྣམ་པ་བུ་མོ་དེ་ཉིད་དངོས་སུ་དམིགས། །དང་པོ་ཆགས་པའི་ཚུལ་གྱིས་གཟུགས་ལ་བལྟ། །དེ་ནས་འཛུམ་ཞིང་ལག་པ་འཁྱུད་པར་བསྒོམ། །ནུ་མ་མཉེ་ཞིང་འོ་བྱེད་ལྕེ་འཇིབས་བསམ། །བདེ་བ་འབར་ནས་མཁའ་གསང་སྤྲད་པ་ལས། །དལ་བུས་བསྒུལ་ཞིང་བསྐྱོད་པས་བདེ་བ་གཡོ། །བུ་མོས་མ་བཟོད་མཁུན་ཆུང་ཅལ་ཅོལ་འདོན། །རང་ཉིད་བདེ་བ་མ་ཤོར་སྐྱེས་པ་བསྒོམ། །རིག་པ་མ་བཅོས་བདེ་སྟོང་གཉིས་མེད་བསྲེ། །དེ་ལྟར་བསྒོམ་ཞིང་དབང་ཉམས་བདེ་བ་བསྒོམ། །ལུས་གནད་ལག་གཉིས་པུས་མོ་དམ་དུ་འཁྱུད། །བདེ་བ་དངོས་སུ་རྒྱས་ན་དེ་ཀ་བསྒོམ། །མཇུག་ཏུ་ལྡོག་བཀྲམ་འཁྲུལ་འཁོར་འབད་པར་བྱ། །དེ་ནས་ལག་པས་ཕྱག་རྒྱ་འདི་ལྟར་བྱ། །འཛུབ་མོ་ལྔ་ནི་རིགས་ལྔའི་མཁའ་འགྲོར་བསྒོམ། །རྡོ་རྗེ་ཞི་བ་དལ་བུས་ཉུལ་བར་བྱ། །སྤྱི་བོའི་ཧཾ་ལས་དཀར་པོ་བབས་པ་ལས། །མགྲིན་པར་དགའ་བ་ངོས་བཟུང་ཞག་གསུམ་སྦྱངས། །དེ་ནས་སྙིང་གར་མཆོག་དགའ་ངོས་བཟུང་བསྒོམ། །དེ་ནས་ལྟེ་བར་ཁྱད་དགའ་ངོས་བཟུང་བསྒོམ། །དེ་ནས་རྡོ་རྗེའི་རྩ་བར་བབས་པ་དང༌། །ལག་པས་བསྐྱོད་འཕྲོ་བཅད་ལ་འོག་རླུང་ཀློད། །བདེ་བ་མི་འཆོར་ལྷན་ནེ་ཟིན་པར་འགྱུར། །ཡིད་ཀྱིས་ཡིད་འོང་བུ་མོ་མཚན་ལྡན་བསྒོམ། །བདེ་བ་སྐྱེས་མ་ཐག་ཏུ་རང་ངོར་བལྟ། །བདེ་སྟོང་ལྷན་སྐྱེས་ངང་ལ་ལྷན་ནེར་བཞག །བདེ་བ་ཆུང་ན་ལག་པས་ཉུག་ཉུག་བསྐྱོད། །ཡང་ན་ལག་མཐིལ་འཇིབ་པར་པྴ་ཏ་ཤ་པ་ཏྷཡོཐཱ། (བི་ཛ་ཤ་པར་སྣ་ཏ་ཤ་ཕཊ¿་ཐོ།) འཇམ་དཔལ་ལས། རང་གི་ལག་གི་རྡོ་རྗེ་མཆོག །ཡང་དང་ཡང་དུ་བསོར་བྱེད་པ། ཁྲོ་གཉེར་རིམ་པར་ལྡན་ལ་སོགས། །ཅེས་སོ། །བདེ་བ་ཆེན་པོ་སྐྱེས་འཕྲོ་བཅད་ལ་བསྐྱིལ །མིག་གཉིས་གྱེན་བསྒྲད་སྒལ་ཚིག་དྲང་པོར་བསྲང༌། །གླིང་ཆེན་བཞི་བསྐུམ་འོག་རླུང་དྲག་ཏུ་འཐེན། །འོག་སྒོ་བཙུམ་ལ་རྒྱུ་ཞབས་སྒལ་བར་སྦྱར། །དར་དམར་དགུང་ལ་སྦྱར་ཞིང་ཁོང་འདྲེན་བྱ། །ཡང་ནི་བདེ་བ་དབབ་ཅིང་ལག་པས་བསྐྱོད། །གསང་བར་བདེ་བ་ཆིལ་གྱིས་ཕེབ་པ་དང༌། །འོག་རླུང་མི་འཐེན་ཀློད་ལ་ཉ་བཞི་ཀློད། །ལག་པས་བསྐྱོད་འཕྲོ་བཅད་ལ་རང་བབས་བཞག །འོག་རླུང་ཀློད་པས་ཐིག་ལེ་ལྷན་ནེ་གནས། །བདེ་བ་ཡལ་ཡལ་འདྲ་ན་ལག་པས་བསྐྱོད། །བདེ་བ་ཆེ་ཆེ་འདྲ་ན་འོག་སྒོ་ལྷོད། །དེ་གཉིས་རེས་མོས་བདེ་བ་ཡུན་རིང་ཟིན། །ཐིག་ལེ་བསྐྱིལ་བའི་གནད་ལ་དེ་ཀ་ཟབ། །དེ་ནས་འཆོར་འཆོར་འདྲ་ན་ལྡོག་པ་ནི། །ཉ་བཞི་དྲག་བསྐུམ་ངན་འགྲོའི་ལམ་གཉིས་བསྡམས། ཐུར་སེལ་གྱེན་འདྲེན་རྒྱ་མཚོ་རི་ལ་སྦྱར། །དར་དམར་དགུང་བསྐྱོད་རྒྱང་ཞགས་གནམ་དུ་བཀན། །ཁོང་འདྲེན་དྲག་པོས་རིག་པ་ནམ་མཁར་གཏད། །དེས་ནི་ཐིག་ལེ་གནས་སུ་ལྡོག་པར་བྱེད། །རྟག་ཏུ་བདེ་བ་ལྟེ་བ་སྙིང་ག་དང༌། །མགྲིན་པ་སྤྱི་བོ་རྣམས་སུ་རིམ་བཞིན་དུ། །བདེ་བ་མས་བརྟན་དགའ་བཞིའི་ཡེ་ཤེས་མྱོང༌། །རྡོ་རྗེའི་ངར་འཆོར་སེམས་ལ་བདེ་བ་འཆར། །དེས་ཀྱང་མ་ཐུབ་འཆོར་འཆོར་འདྲ་བ་ན། །ཐིག་ལེ་བཏང་རེ་ན་ར་ཀན་སྙམ་དུ། །ཞེ་བཅད་དྲག་པོས་བདུད་བཞི་དྷཱུ་ཏིར་མནན། །རིག་པ་དབྱིངས་ལ་གཏད་པས་ངེས་པར་ལྡོག །བསྐྱིལ་ལྡོག་ཁྲེམ་པ་དུས་གཅིག་འབྱུང་བ་ཡིན། །དེ་ནས་ཁུང་འདྲེན་མང་པོ་བྱས་པའི་མཐར། །ལག་གཉིས་མཐེ་བོང་སྲིན་ལག་ཁུ་ཚུར་བཅིང༌། །གསང་གནས་མཚམས་ནས་འཐེན་ནས་སྤྱི་བོར་འཕང༌། །ཐིག་ལ་ེདབུ་མར་ཡར་ལ་འགྲིམ་ནས་སུ། །སྤྱི་བོའ་ིཧཾ་ལ་ཐིམ་བསམ་དྲག་ཏུ་དཀྲུག །ཧཾ་ལས་ཐིག་ལེ་འཕེལ་ནས་ལུས་ཀུན་ཁྱབ། །བདེ་བས་ལུས་རྒྱས་བསམ་ལ་དམིགས་མེད་བཞག །དེ་རྗེས་བུམ་པ་ཅན་གྱི་རླུང་ལ་སྦྱང༌། །དེས་ནི་བགེགས་རྣམས་མི་འབྱུང་ཁྲེམས་པར་འགྱུར། །ཁྱད་པར་ཀ་དག་ངང་ལ་བཞག་པ་གཅེས། །དེས་ནི་བགེགས་རྣམས་གཏིང་ནས་འབྱུང་མི་སྲིད། །དེ་རྗེས་དགེ་བ་བླ་མེད་བྱང་ཆུབ་བསྔོ། །དེ་ནི་རང་ལུས་ཐབས་ལྡན་ཞེས་བྱ་སྟེ། །དེ་ཀས་ཀྱང་ནི་བདེ་བ་ཆེར་འཕེལ་ནས། །འདོད་ཆགས་ཟག་མེད་མཆོག་གི་ཏིང་འཛིན་ཐོབ། །ཁྱད་པར་འདུལ་བ་འཛིན་པའི་དགེ་སློང་གིས། །གཞན་ལུས་བསྟེན་ན་གཞན་གྱིས་སྒྲོ་སྐུར་འབྱུང༌། །དེ་ཕྱིར་རང་ལུས་ཐབས་ལྡན་འདི་ལ་འབོད། །ཅེས་གསུངས་པ་ཡིན་ནོ། །གཉིས་པ་དངོས་གཞི་གཞན་ལུས་ལམ་དུ་སློང་བ་ནི། རི་ཁྲོད་སོགས་ཡིད་དུ་འོང་བའི་གནས་དབེན་པར། རྟེན་ལ་མཆོད་པ་རྒྱ་ཆེར་བཤམས། ཤ་ཆང་དང་བུར་ཐུད་ལ་སོགས་པའི་ཚོགས་ཀྱི་ཡོ་བྱད་དང༌། ཁ་ཟས་བཟང་པོ་སྨན་སྦྱོར་ལ་སོགས་པ་ཅི་འབྱོར་དུ་བསགས། དྲི་བཟང་གིས་བྱུགས་པའི་སྟན་བདེ་མོ་དང༌། སྐུ་རྟེན་འབོལ་བ་སོགས་པ་བསགས། གཞན་ཡང་མཁོ་བའི་ཡོ་བྱད་བསྒྲུབ་ཅིང༌། མཚམས་དམ་དུ་བཅད་ལ། སྒོ་རུ་མཚམས་གཡོག་པ་བསྐོས་ལ་བཞག་གོ །ཕྱག་རྒྱ་མ་དེ་གཅེར་བུར་བསྡད་ལ་མེ་ལོང་ནང་དུ་འཆར་དུ་བཅུག་སྟེ། སོ་ལུས་ནུ་མ་པདྨ་སོགས་ལ་བལྟས་ཏེ། གཏད་མེད་རང་བཞིན་མེད་པར་ཕྱག་རྒྱ་སྒྱུ་ལུས་དག་ལ་སྦྱང་ཞིང་ཨ་འཐས་ཞེན་པ་མེད་པར་སྦྱང་ངོ༌། །དེ་ནས་སྟན་ནང་ཚང་ཅན་གྱི་སྟེང་དུ། ཡབ་ཁ་ཤར་དང་ཡུམ་ཁ་ནུབ་ཏུ་བལྟས་ཏེ། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་མྱུར་དུ་འཐོབ་པའི་ཆེད་དུ། བདེ་སྟོང་ལྷན་ཅིག་སྐྱེས་པའི་ཡེ་ཤེས་མངོན་དུ་བྱ་སྙམ་པའི་སྒོ་ནས། གཉིས་ཀ་རྟ་ཕག་ཡབ་ཡུམ་དུ་སྐད་ཅིག་གིས་གསལ་བཏབ་པའི་སྐུ་དབུས་སུ་རྩ་གསུམ་ཐབས་ཤེས་ཀྱི་ཡི་གེ་དང་བཅས་པ་གསལ་བས། ཡབ་ཀྱི་སྤྱི་བོར་ར་ལས་རྡོ་རྗེ་མཁའ་འགྲོ་མགྲིན་པར་ཙ་ལས་རིན་ཆེན་མཁའ་འགྲོ། སྙིང་གར་ཨ་ལས་སངས་རྒྱས་མཁའ་འགྲོ། ལྟེ་བར་ཧྲཱི་ལས་པདྨ་མཁའ་འགྲོ། གསང་བར་ཡ་ལས་ལས་ཀྱི་མཁའ་འགྲོ། སྔར་བསྟན་པའི་སྐུ་མདོག་ཕྱག་མཚན་བཞིན་བསྒོམ། ཡུམ་གྱི་སྤྱི་བོར་ཧ་ལས་རྡོ་རྗེ་མཁའ་འགྲོ་མ། མགྲིན་པར་རཾ་ལས་རིན་ཆེན་མཁའ་འགྲོ་མ། སྙིང་གར་མ་ལས་སངས་རྒྱས་མཁའ་འགྲོ་མ། ལྟེ་བར་ནི་ལས་པདྨ་མཁའ་འགྲོ་མ། གསང་བར་ས་ལས་ལས་ཀྱི་མཁའ་འགྲོ་མ་བསྐྱེད། དེ་ལྟར་བདག་ཡབ་ཡུམ་འཁྲིལ་སྦྱོར་གྱི་སྤྱི་བོར་སློབ་དཔོན་པདྨ་ཐོད་ཕྲེང་མཐིང་ནག་རྡོ་རྗེ་དྲིལ་བུ་འཛིན་པའི་པང་ན་ཡུམ་མཁར་ཆེན་མཚོ་རྒྱལ་དམར་མོ་གྲི་གུག་དང་ཐོད་པ་འཛིན་པས་འཁྱུད་པ། གཉིས་ཀའང་རིན་པོ་ཆེ་དང་རུས་པས་བརྒྱན་ཅིང་སྙོམས་འཇུག་མཛད་པར་བསྒོམ་མོ། །དེ་ནི་ལུས་ལྷའི་འདུ་ཤེས་ཡིན་ནོ། །མཁའ་གསང་བྱིན་གྱིས་བརླབས་པ་ནི། ཡབ་ཀྱི་གསང་རྡོར་ཕྱི་ཕོ་རྟགས་ཀྱི་རྣམ་པ་ལ་ནང་དུ་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པའི་ཁོང་གསལ་ལ་ཨོཾ་དཀར་པོ་དང་བུ་ག་ཕཊ་ཀྱིས་བཀག་པ། ཡུམ་གྱི་གསང་གནས་ཕྱི་བྷ་གའི་རྣམ་པ་ལ། ནང་དུ་པཾ་ལས་པདྨ་དམར་པོ་འདབ་མ་བཞི་པའི་གེ་སར་ཨས་མཚན་པར་བསམ་པ་ནི། ངག་སྔགས་ཀྱི་འདུ་ཤེས་ཐབས་འདི་ལ་བརྟེན་ནས་ཟག་མེད་ཀྱི་བདེ་བ་མངོན་དུ་བྱའོ་སྙམ་པའི་ཡིད་ཆོས་ཀྱི་འདུ་ཤེས་ཏེ། འདུ་ཤེས་གསུམ་དང་མ་བྲལ་བ་དགོས་སོ། །དེ་ནས་འོ་འཁྱུད་དང་ལྕེ་གཞིབ་ལ་སོགས་པ་བྱས་པས་གཉིས་ཀའི་གསང་གནས་ནས་བའི་ཁ་ཆུ་ལྟ་བུ་ནར་གྱིས་བྱུང་དུས་ཀ་དག་གི་ངང་ནས་ལུས་སྤྲུག་ཐོན་པར་བྱས་རྗེས་རྡོ་རྗེ་པདྨར་བསྟིམ་ཏེ་ལུས་སེམས་ཁོང་གློད་ལ། བདེ་བ་དམིགས་མེད་ཀྱི་དབྱིངས་སུ་བསྐྱལ་བ་ནི། ཆགས་པའི་དབལ་གཞོམ་པ་སྟེ། དྭངས་མ་སྤྱང་རྒྱུག་ཏུ་མི་འཆོར་བའི་གནད་ཡོད་དོ། །དེ་ནས་རུས་སྦལ་འགྲོས་ཀྱིས་དབབ་པ་ནི། རྩ་བཞི་ལྷོད་ཅིང་འོག་སྒོ་བསྒྲད་པར་རླུང་མནན། མིག་བར་སྣང་ལ་ཧ་རེ་བལྟ། ཡབ་ཡུམ་གཉིས་ཀྱི་གནས་ལྔའི་ལྷ་རྣམས་བདེ་སྟོང་དུ་སྦྱར་བའི་ངང་གསལ་ལེ་བ་ཀ་དག་སྤྲོས་བྲལ་གྱི་ངང་ནས་དལ་བུས་བསྐྱོད་པས་སྤྱི་བོར་བདེ་བ་གཡོས་པ་དང༌། བདེ་སྟོང་གི་ངང་དུ་དར་ཅིག་བཞག་ཅིང་བསྐྱོད་པས་མགྲིན་པ་དང༌། སྙིང་ག་ལྟེ་བ་རྣམས་སུ་གོང་བཞིན་བཞག །གོམས་པ་དང་རླུང་སྟོབས་ཆུང་བ་རྣམས་ཀྱིས་ལྟེ་བ་ནས་ཡར་ལྡོག་ཏེ། ཀུན་ལ་ལྟག་སློག་དང༌། ཕྱིར་འཛིན་གྱི་སྤུག་ཐོན་པར་བྱ་བ་ལ་ཡུན་བསྲིང༌། ནུས་པ་ཆེ་བས་རྡོ་རྗེ་བུ་གར་ཆིལ་གྱིས་དབབ་པ་ལ། ལྟ་བ་སྟོང་ཉིད་སྒོམ་པ་ཏིང་འཛིན་སྤྱོད་པ་རླུང་གནད་གསུམ་གྱིས་འཛིན་པ་ནི་རྫོང་གི་ཨོར་མོ་བགག་པའོ། །སོར་མོ་དང་རྟིང་པའི་རྩ་ཐེམ་སོགས་རྣམ་གྲངས་སུ་བཤད་ཀྱང༌། པདྨར་མི་དབབ་པ་ཙམ་ལས་དོན་ལ་གསང་རྩར་གཤེར་སྐྱེ་བས་ཤོར་ཆེ་བའི་སྐྱོན་བྱེད་དོ། །དེ་ཡང་ཐིག་ལེ་སྤྱི་བོ་ནས་མགྲིན་པར་བབས་པས་དགའ་བའི་ཡེ་ཤེས། མགྲིན་པ་ནས་སྙིང་གར་བབས་པས་མཆོག་དགའི་ཡེ་ཤེས། སྙིང་ག་ནས་ལྟེ་བར་བབས་པ་ལས་ཁྱད་པར་གྱི་དགའ་བའི་ཡེ་ཤེས། ལྟེ་བ་ནས་གསང་གནས་སུ་བབས་པས་ལྷན་ཅིག་སྐྱེས་དགའི་ཡེ་ཤེས་ཏེ། ཡེ་ཤེས་དེ་བཞི་ངོས་ཟིན་པ་གལ་ཆེ་ཏེ། སློབ་དཔོན་ཆེན་པོས། དེ་ནས་དལ་བུས་ཉུག་ཉུག་སྤྱོད་པ་ལས། །བཅུད་ཀྱི་ཐིག་ལེ་དྭངས་མ་ཟག་མེད་བརྒྱད། །རྩ་མདུད་ལྔ་དང་སྨིན་ཕྲག་སྙིང་དཀྱིལ་དང༌། །རྡོ་རྗེ་པདྨའི་རྩེ་ནས་གནས་རྣམས་གཡོ། །ཧཾ་ལས་ཏི་ལ་འཛག་ནས་སྙིང་གར་སླེབས། །འདོད་ཆགས་ཉི་ཚེའི་རྟོག་པ་རག་པ་འགགས། །ལུས་སེམས་བདེ་བ་འཆར་བ་སྤྲུལ་སྐུ་ཡིན། །དེས་ནི་ཉམས་སད་ཅུང་ཞིག་དྲག་པར་བསྐྱོད། །རྩ་བཟང་མིན་པ་ངན་པའི་རིགས་རྣམས་ལ། །དྲག་ཏུ་བསྐྱོད་ན་མྱུར་དུ་འཆོར་འགྱུར་བས། །དེ་ཕྱིར་ཚོང་(ཚོད)ལེན་བྱེད་ཅིང་དལ་བུས་བསྐྱོད། །བཅུད་ཀྱི་ཐིག་ལེ་རྣམས་ནི་དྭངས་སྙིགས་ཀྱི། །ཐིག་ལེ་ཞུན་ཆུ་ཐད་ཀ་ཐད་ཀ་ནས། །འཁྱགས་པའི་ཞུན་ཆུ་ལྟ་བུ་མར་ལ་ཟག །དྷཱུ་ཏིའི་ནང་ནས་རླུང་གིས་མར་ལ་ཕུལ། །མགྲིན་པའི་ཐད་ནས་སྙིང་གར་སླེབ་པ་དང༌། །གོང་ལས་བདེ་བ་ཇེ་ཆེར་འཆར་བ་དེས། །གཞན་སྣང་རྟོག་པ་མེད་པར་བདེ་ལྷང་འགྲོ། །བདེ་བ་ལོངས་སྐུ་ཉམས་སུ་མྱོང་བ་སྟེ། །དགའ་བ་བཞི་ལས་མཆོག་དགའི་ཡེ་ཤེས་སོ། །ཞེ་སྡང་ལས་གྱུར་རྟོག་པ་སོ་གསུམ་འགག །དང་པོ་སྣང་བ་བག་ཙམ་གསལ་བ་ཡིན། །ད་དུང་རིག་པ་མ་ཡེངས་བསྐྱོད་པ་དང༌། །བདེ་བ་ཇེ་ཆེར་ལྟེ་བའི་ཐད་དུ་སླེབ། །གོང་ལས་བདེ་སྟོབས་ཆེ་ཞིང་དགའ་བདེ་འཆར། །ངོ་བོ་ཉིད་སྐུ་ཉམས་སུ་མྱོང་བ་སྟེ། །དགའ་བ་བཞི་ལས་ཁྱད་དགའི་ཡེ་ཤེས་སོ། །འདོད་ཆགས་ལས་བྱུང་རྟོག་པ་བཞི་བཅུ་འགག །གཉིས་པ་མཆེད་པ་ཞེས་བྱ་སྔར་བས་གསལ། །དེ་ནས་ཚོད་སྦྱར་དལ་བུས་ཉུག་ཅིང་བསྐྱོད། །བྱང་སེམས་རྡོ་རྗེའི་རྩ་བར་ཕེབས་པའི་ཚེ། །གོང་ལས་བདེ་ཉམས་བདུན་འགྱུར་ཙམ་གྱིས་འཕེལ། །བདེ་ལ་རྟོག་པ་མེད་པའི་ཉམས་སྣང་འཆར། །དེ་དུས་ཞེན་མེད་བདེ་སྟོང་དབྱེར་མེད་བསྲེ། །ཞེན་ན་ཐ་མལ་ཉོན་མོངས་འཁྲུལ་སྣང་ཡིན། །ཞེན་མེད་ངང་ནས་བདེ་ལ་སེམས་གཏད་ནས། །བདེ་བ་མ་ཡལ་ཙམ་དུ་དལ་བུས་བརླབ། བདེ་བ་འཆོར་སྙམ་བྱུང་ན་འོག་སྒོ་ཀློད། །རིག་པ་ཀ་དག་ངང་ལ་ལྷན་ནེར་བཞག །ཐེབ་མཛུབ་མི་བསྐུམ་ཉ་བཞི་ཀློད་པ་དང༌། །བདེ་བ་མི་འཆོར་ལྷན་ནེ་གནས་པའོ། །བདེ་བ་ཡལ་བ་འདྲ་ན་ཅུང་ཟད་བསྐུལ། །བདེ་བ་འཆོར་བ་འདྲ་ན་འོག་སྒོ་ཀློད། །དེ་གཉིས་རེས་མོས་ཉམས་ཚད་བྱ་ཞིང་བསྐྱིལ། །བདེ་བ་ཡུན་རིང་དགའ་བ་དཔག་མེད་ཅིང༌། །བདེ་སྟོང་འཛིན་མེད་ཆོས་སྐུའི་དགོངས་པ་ཡིན། །དགའ་བ་བཞི་ལས་ལྷན་ཅིག་སྐྱེས་དགའ་སྟེ། །གཏི་མུག་ལས་གྱུར་རྟོག་པ་བདུན་འགག་གོ །གསུམ་པའི་ཡེ་ཤེས་ཉེ་བར་ཐོབ་པ་ཞེས། །བདེ་གསལ་མི་རྟོག་པ་ཡི་ཉམས་སྐྱེའོ། །དུས་གསུམ་རྒྱལ་བའི་དགོངས་པ་འདི་ཀ་ཡིན། །བདེ་དུས་བདེ་བའི་ངོ་བོ་ལ་བལྟས་པས། །ཅིར་ཡང་མ་གྲུབ་ངོ་བོ་ཀ་དག་སྟོང༌། །དགའ་བ་བཞི་ལས་དགའ་བྲལ་དགའ་བ་སྟེ། །ཞེས་དང༌། འཇམ་དཔལ་ལས། ཆགས་བྲལ་ལུས་ལས་འདས་པ་པོ། །ཐུབ་པ་མེད་པ་དཔེ་མེད་པ། །མི་མངོན་མི་སྣང་གསལ་བྱེད་མིན། །མི་འགྱུར་ཀུན་འགྲོ་ཁྱབ་པ་པོ། །ཕྲ་ཞིང་ཟག་མེད་ས་བོན་བྲལ། །ཞེས་སོ། །ཆད་ལྟ་བེམ་སྟོང་མ་ཡིན་རིག་ཅིང་གསལ། །གསལ་བ་མཚན་མར་མ་གྲུབ་བདེ་ལ་སྟོང༌། །མཚན་མའི་རྣམ་རྟོག་མེད་དེ་བདེ་བའི་ངང༌། །དེ་ཉིད་ངོ་བོ་སྟོང་ལ་རང་བཞིན་བདེ། །རྣམ་པ་གསལ་ཞིང་རིག་ལ་རྟོག་པ་མེད། །མཚན་ཉིད་གཉིས་སུ་མེད་པའི་ངང་ལ་གནས། །དེ་ཀའི་ངང་ལ་ཐམས་ཅད་ཀུན་རྫོགས་པ། །བླ་མེད་སྔགས་ཀྱི་རྫོགས་རིམ་དེ་ཉིད་ཡིན། །རྒྱལ་བའི་སྐུ་བཞིའི་དགོངས་པ་དེ་ཀ་ཡིན། །དེ་ཉིད་རྒྱུན་བར་གནས་པ་སངས་རྒྱས་ཡིན། །དེ་འདྲའི་གནད་འདི་སྐྱེ་བོས་མ་ཤེས་པས། །སྙོམས་འཇུག་དུས་སུ་བདེ་བ་ཡུད་ཙམ་རེ། །ཐ་མལ་འདོད་ཆགས་སྤྱོད་དུས་ཡོད་མོད་ཀྱང༌། །དེ་ཉིད་བཟུང་བསྐྱིལ་སྤེལ་གསུམ་མ་ཤེས་པར། །ཐ་མལ་འདོད་ཆགས་རང་གར་སྤྱད་པ་ལས། །བདེ་བ་ཡུན་ཐུང་སྡུག་བསྔལ་རྒྱུ་རུ་སོང༌། །བདེ་ལ་ཞེན་པས་འདོད་ཁམས་གནས་སུ་གོལ། །གསལ་བ་ལ་ཞེན་གཟུགས་ཁམས་གནས་སུ་གོལ། །སྟོང་པ་ལ་ཞེན་གཟུགས་མེད་ཁམས་སུ་གོལ། །བདེ་གསལ་སྟོང་པ་ཉིད་ལ་ཞེན་མེད་དུ། །ཉམས་སུ་བླང་པས་ཁམས་གསུམ་གནས་ལས་འཕགས། །དེས་ན་འཕགས་པ་ཞེས་ཀྱང་བྱ་བའོ། །བདེ་བ་དེ་ཀའི་ངང་ལ་རྒྱུན་བར་གནས། །སྡུག་བསྔལ་འདམ་ནས་བདེ་བར་གཤེགས་པའི་ཕྱིར། །སྡུག་བསྔལ་བྱ་བའི་མིང་ཡང་མེད་པར་སངས། །བདེ་བ་ཆེན་པོའི་ཡེ་ཤེས་རྒྱས་པའི་ཕྱིར། །དེ་ཕྱིར་སངས་རྒྱས་ཞེས་སུ་མིང་བཏག་གོ །དེ་ལྟར་བདེ་བའི་ངོ་བོ་ངོ་འཕྲོད་ན། །འཇམ་དཔལ་ལས། སྡུག་བསྔལ་གསུམ་གྱི་སྡུག་བསྔལ་ཞི། །གསུམ་སེལ་མཐའ་ཡས་གྲོལ་གསུམ་ཐོབ། །སྒྲིབ་པ་ཀུན་ལས་ངེས་པར་གྲོལ། །ཅེས་སོ། །དེ་ནས་བདེ་བ་འཆོར་འཆོར་འདྲ་བ་ན། །བྱང་སེམས་བདེ་བ་བཏང་སྟེ་ཤི་སྙམ་པའི། །གཉེན་པོ་ཞེ་བཅད་དྲག་པོས་ལྡོག་པར་བྱ། །དེ་ནི་དཀའ་ཐུབ་སྡོམ་པའི་མཆོག་ཏུ་འགྱུར། །ཉོན་མོངས་བུད་མེད་རྒྱང་དུ་བསྲིང་བ་ཡིས། །ཆགས་པའི་གདུང་བ་གཉེན་པོས་བཟློག་ཏུ་མེད། །དཀའ་ཐུབ་སྡོམ་པ་ཐུབ་པའི་མིང་ཡང་མེད། །འདིར་ནི་བུད་མེད་དངོས་དང་དམ་འཁྱུད་ནས། །བྱང་སེམས་རྡོ་རྗེའི་རྩེ་མོ་ནས་ལྡོག་པས། །གཉེན་པོ་བཟང་ཞིང་དཀའ་ཐུབ་དྲག་པོའོ། །འཇམ་དཔལ་ལས། ཚུལ་ཁྲིམས་ཆེན་པོ་འཆང་བའི་མཆོག །བཟོད་ཆེན་འཆང་བ་བརྟན་པ་པོ། །བརྩོན་འགྲུས་ཆེན་པོ་བརྟུལ་བ་ཡིན། །དཀའ་ཐུབ་མཐར་ཕྱིན་དཀའ་ཐུབ་ཆེ། །ཞེས་སོ། །དེ་ནས་ལྡོག་པའི་འཁྲུལ་འཁོར་འདི་ལྟར་བྱ། །བསྐྱེད་བྱེད་ལྔ་བསྐུམ་ཁྱད་པར་གྱད་བཞི་བསྐུམ། །ངན་འགྲོའ་ིལམ་གཉིས་དྲག་ཏུ་བསྡམ་ནས་ཀྱང༌། །འོག་རླུང་དྲག་པོ་གྱེན་དུ་དྲང་བར་བྱ། །རྒྱ་མཚོ་རིར་སྦྱར་དར་དམར་དགུང་ལ་བསྐྱོད། །རྒྱང་ཞགས་གནམ་ལྟ་ཁོང་འདྲེན་དྲག་པོ་བྱ། །མཐེ་བོང་གཉིས་ཀྱིས་སྲིན་ལག་རྩ་བ་མནན། །ཁུ་ཚུར་དམ་བཅང་ལྟེ་འོག་གསང་གནས་ནས། །དྲག་ཏུ་འཐེན་ལ་སྤྱི་བོར་ཡང་ཡང་འཕང༌། །བྱང་སེམས་སྐར་མདའ་འཕང་ལྟར་སྤྱི་བོར་བསྐྱིལ །ཁྱད་པར་འཁྲུལ་འཁོར་གནད་ནི་འདི་ལྟར་བྱ། །ལུས་ཀྱི་འཁྲུལ་འཁོར་ལུས་པོ་འདར་བ་གཅེས། །འདྲེན་པའི་གནད་ནི་ཁོང་འདྲེན་དྲག་པོ་གཅེས། །དམིགས་པའི་གནད་ནི་སྤྱི་བོར་གཏད་པ་གཅེས། །ལུས་ཀྱི་བྱིང་ལོག་ཤེད་བསྐྱེད་འདར་ཕྲིལ་བཏང༌། །རླུང་འབུད་ལུས་སྤྲུགས་སོག་འགྱུར་ཡང་ཡང་བྱ། །དེ་ནས་བདེ་བ་ལྟེ་བར་ཚད་མེད་སྐྱེ། །དེ་ནས་ཡར་དྲངས་སྙིང་གར་བདེ་བ་སྐྱེ། །དེ་ནས་རིམ་བཞིན་མས་བརྟན་དགའ་བཞི་མྱོང༌། །དེ་རྗེས་ཐབས་ཤེས་གཉིས་པོ་ཡ་བྲལ་ནས། །ལག་པ་ས་གནོན་རྐང་པ་སྐྱིལ་ཀྲུང་བཅའ། །རླུང་འབུད་ལུས་སྤྲུགས་སོག་འགྱུར་དྲག་པོ་བྱ། །དམིགས་པ་ཐིག་ལེ་ལུས་ཀུན་ཁྱབ་པར་བསྒོམ། །ཡང་ཞིག་ཐིག་ལེ་བཞི་པའི་གནས་གཅིག་ལ། །ཐིག་ལེ་མི་ཐུབ་འཆོར་འཆོར་འདྲ་གྱུར་ན། །བདུད་བཞི་སུག་པ་གཉིས་ཀྱི་བར་དག་ཏུ། །རྡོ་རྗེའི་རྩ་བ་ཆིལ་གྱིས་མནན་ནས་སུ། །དམིགས་པ་མ་ཡེངས་སྒོམ་དུ་ཅི་ཡང་མེད། །སྒོམ་མེད་ངང་ལ་འདུན་པ་སྤྱི་བོར་གཏད། །དེ་མ་ཐག་ཏུ་བྱང་སེམས་གྱེན་ལ་ལྡོག །གཟེར་འགག་གནད་ཀྱི་ཐེམ་བུ་ཞེས་བྱའོ། །ཆུ་སྲིན་གྲེ་འགག་ཅེས་ཀྱང་ཟེར་བ་ཡིན། །བསྐྱིལ་ལྡོག་ཁྲེམས་པ་དུས་གཅིག་འབྱུང་བ་ཡིན། །དེ་རྗེས་བུམ་པ་ཅན་གྱི་རླུང་བཟུང་ནས། །རིག་པ་ཀ་དག་ངང་ལ་ཡུན་རིང་བཞག །དེས་ནི་གེགས་མི་འབྱུང་ཞིང་ལུས་ལ་ཁྱབ། །གཞན་ཡང་བྱང་སེམས་རྩ་མིག་གཏབ་པ་ལ། །ལག་པ་གཡོན་པའི་སྲིན་ལག་ས་ལ་བཙུག །ལུས་ཀྱི་ལྗིད་ནི་སྲིན་ལག་ལ་བཀལ་ནས། །འཇམ་རླུང་བཟུང་བས་བཟུང་བའི་གནད་ལ་དྲུག་སྟེ། དང་པོ་ནི། ལུས་སེང་གེའི་མཆོང་སྟབས་དང༌། རྐང་ལག་གི་ཚིག་བསྐུམ་པས་འཁོར་བའི་རྩ་བ་ཆོད། །གཉིས་པ་ནི་རོ་སྟོད་གསེང་ལ་བོར་བས་རླུང་སེམས་གཉིས་ཁ་སྦྱོར། གསུམ་པ་ནི། མིག་ཧུར་འདོན་པས་ཡེ་ཤེས་ཀྱི་སྒོ་སེལ། བཞི་པ་ནི། རྒྱུ་མ་སྒལ་བར་བཟེད་པས་ལུས་ཀྱི་འདེབས་གྲོལ། ལྔ་པ་ནི། ཧཱུྃ་རིང་བགྲང་བས་རླུང་སེམས་ཆོས་ཉིད་དུ་འདྲེས། དྲུག་པ་ནི། སྐབས་སུ་ཨིག་སྒྲ་བརྗོད་པས་ཆོས་ཉིད་རྣམ་དག་གི་འབྲས་བུ་རྙེད། དེ་དྲུག་གི་བཟུང་བའི་གནད་འགྲུབ་པའི་གདམ་ངག་གོ །མཆན་ཐིག་ལེ་རྩ་མིག་ཐིམ། །ཡང་ན་གཡོན་པའི་མཐེ་བོང་སྲིན་ལག་མནན། །ཁུ་ཚུར་དམ་བསྡམས་ས་ལ་བཙུག་ནས་ནི། །ལུས་ཀྱི་ལྗིད་བསྐྱུར་རྩ་མིག་ཐིམ་པར་འགྱུར། །ཅེས་གསུངས་སོ། །ཡང༌། རྣལ་འབྱོར་པ་ཐིག་ལེ་དང་ཆགས་པ་རྒྱས་པ་དང༌། རྡོ་རྗེ་རྩལ་ཆེ་བ་འགུལ་བསྐྱོད་དྲག་ཅིང་བདེ་བ་ལ་ཞེན་ནས་བསྐྱོད་འཕྲོ་མ་ཆོད་པ། ཆང་གིས་བཟི་ནས་མན་ངག་དང་གཉེན་པོས་མ་ཟིན་པ། ཐོས་ཆུང་ཚོད་ཡོད་བྱེད་པ། ཡུམ་གཞོན་ཞིང་བྷ་ག་རུབ་དྲག་པ་དང༌། ཡུམ་གྱིས་མ་བཟོད་ཅིང་ཆགས་པས་བརྒྱལ་བ་དང༌། ཡུམ་ཉམས་ཆུང་ཞིང་རྣམ་འགྱུར་དྲག་པ་དང༌། སྟོང་པས་མ་ཟིན་པ་ལ་སོགས་པར། དབབ་དྲག་ན་འཆོར་ཞིང༌། ཐིག་ལེ་མི་ཟིན་པའི་སྐྱོན་ཡིན་པས། དེ་རྣམས་ལ་མ་ཡེངས་ཤིང་བག་ཡོད་དྲན་པས་ཟིན་པ་དང༌། དལ་བུས་བསྐྱོད་ཅིང་ཐིག་ལེ་འཛིན་པའི་སྦྱོར་བ་གལ་ཆེ། རང་སར་འཛིན་ཅིང་བསྐྱིལ་བ་ནི། །དེ་ལྟར་བབས་པས་བདེ་བ་ཅི་རིགས་སུ་སྐྱེས་པ་དང༌། བསྐྱོད་འཕྲོ་བཅད་ལ་ལུས་རྩ་བཞི་ཀློད། འོག་རླུང་ཡན་པར་བཞག །སྟེང་རླུང་མནན། མིག་ལྡོག ལྕེ་རྐན་ལ་འབྲུད། ཤེས་པ་ནམ་མཁའི་མཐོངས་སུ་འཕངས། དེ་ཡང་ལས་དང་པོ་པས། བདེ་བ་མགོ་གཡོས་ཤིང་ལུས་སེམས་དགའ་ཡལ་ལེ་བདེ་ཁྲིལ་ཁྲིལ་བྱུང་འཕྲོ་ལ་ཐད་དུ་མི་བཞུག་པར་འཛིན་དགོས། ཡབ་ཡུམ་གཉིས་ཀ་བདེ་བ་དངོས་འཛིན་ལུས་སེམས་ཀློད། བདེ་བའི་ངར་ཡལ། རྡོ་རྗེ་ངར་འཆོར། ཡང་གོང་བཞིན་དལ་བུར་བསྲུབ། ཡང་ཀློད། ཡང་བསྐྱོད། བདེ་བ་ཆེར་སྐྱེས་ན་ཤེས་པ་སྤྱི་གཙུག་གི་ཧཾ་ལ་གཏད། སྦྱོར་བ་དྲུག་ལྡན་དང་ཁོང་འདྲེན་བསྟུན་ལ་ཅུང་ཟད་བསྐྱིལ ཡང་བདེ་ཉམས་ཡལ་བ་དང༌། བསྐྱོད་ཅིང་བདེ་བ་སྐྱེས་པ་དང་ངལ་གསོ། ཤེས་པ་སོར་བཞག །དེ་བཞིན་གདམས་པས་ཟིན་པར་བྱས་པའི་ཐིག་ལེ་གཅིག་གིས་ལོ་དང་ཟླ་བ་ཡང་ཐུབ་ལ། སྦས་དོན་ལ། ཐིག་ལེ་རྩ་ཡི་ནང་དུ་སྦ། རྣམ་རྟོག་ཡེ་ཤེས་དབྱིངས་སུ་སྦ། །བདེ་བ་འོད་གསལ་ཀློང་དུ་སྦ༔ འོད་གསལ་འཛིན་མེད་ངང་དུ་སྦ༔ སྦ་བཞིའི་གནད་ལ་གོམས་པ་ཡིས༔ རླུང་སེམས་དབུ་མར་ཡང་དག་འཛུད༔ ཅེས་གསུངས་སོ། །མཆན་ཐིག་ལེ་གཅིག་གིས་རིག་མ་བརྒྱ་ལ་ཡང་ནུབ་གཅིག་ལ་ལོངས་སྤྱོད་པར་ནུས་སོ། །འཛིན་མ་ཤེས་ན་ཐིག་ལེ་འཆོར། བདེ་བ་ཡུན་ཐུང་རྩ་ཆུ་སྡོམ་པ་ལ་སོགས་ཟུག་གཟེར་ཡོང་ངོ༌། །བཟུང་ཤེས་ན་བདེ་བ་ཡུན་རིང༌། ཟག་བཅས་ཀྱི་བདེ་བ་ཟག་མེད་དུ་འཆར། གནས་མ་འཆུགས་པར་རང་སར་གཡོ་སྟེ་བདེ་བ་སྐྱེ། གཏིང་ནས་འདྲེན་པ་སླ། པདྨ་སྐམ་ཞིང་ཆུང་དུ་འགྲོ། རྡོ་རྗེ་ངར་སྟོབས་སྐྱེའོ། །ཆགས་པའི་རྟོག་པ་བཅོམ་སྟེ་བདེ་བ་དང་སྟོང་པ་རོ་སྙོམས་ཤིང་བསྲུབ་པ་དང༌། འཛིན་པ་བསྒྲགས་ལ་ཡུན་རིང་དུ་སྦྱང་ངོ༌། །ཐིག་ལེ་བཟུང་བས་རྡོ་རྗེ་རྩལ་སྟོབས་འཆོར་བ་འདྲ་ན། རྡོ་རྗེ་པདྨར་འདོན་འཇུག་བྱེད་པ་ལ་དངོས་སུ་བལྟ། མི་མཐོང་ན་ལག་པས་ཉུལ་ཞིང་འོག་སྒོ་འབྱེད་བཙུམ་དང་ཡུམ་ལ་ཆགས་པ་དུང་དུང་བསྒོམ་པས་རྩལ་སྟོབས་སྐྱེའོ། །ཡུམ་ཚུར་ལ་རྣམ་འགྱུར་བྱེད་དུ་བཅུག་པས་ཀྱང་སྐྱེའོ། །ཡང་ཐལ་མ་དྲགས་པར་འཛིན་པར་བྱའོ། །ཡར་ལ་ལྡོག་ཅིང་དྲངས་པ་ནི། མིག་གྱེན་ལ་བསྒྲིལ། ལྕེ་རྐན་ལ་སྦྱར། ལྟོ་བ་སྐེད་པ་ལ་བཅར་ལག་པའི་སྲིན་ལག་བསྡམས་པ་ས་ལ་བཙུགས་ཏེ་ལུས་ཀྱིས་ལྗིད་བསྐུར། རླུང་གི་གནད་འོག་རླུང་དྲག་ཏུ་འཐེན་ཏེ་སྟེང་རླུང་སྡིག །སྟེང་འོག་བསྲེས་ལ་ཁོངས་འདྲེན་བྱའོ། །དམིགས་པ་ནི་རྡོ་རྗེའ་ིརྩ་བར་ཧཱུྃ་དམར་པོ་གཅིག་བསམ། དེས་དྭངས་མ་ཐམས་ཅད་བསྡུས། སོག་སྦུག་ནས་འོ་མ་འཐུངས་པ་བཞིན་ནར་གྱིས་སྤྱི་གཙུག་ཏུ་དྲངས། དེ་ཡང་དམིགས་པ་དང་རླུང་འཁྲུལ་འཁོར་རྣམས་གཅིག་ཏུ་ཆུན་པས་གྱེན་ལ་དྲངས་ཤིང་སྟེང་དུ་བཅིངས། དེས་ནི་ངེས་པར་འདྲོངས་སོ། །གཞན་ཡང་ཁོང་འདྲེན་དང་ཧཱུྃ་འདྲེན་ལ་སོགས་པ་ཡུམ་དང་མ་བྲལ་བར་འདྲེན་ནོ། །འདྲེན་མ་ཤེས་ན་ཐིག་ལེ་འཛག་པས། རྡོ་རྗེ་དང་རྒྱུ་ཞབས་དང་མཁལ་མ་ལ་ན་ཚ་འོང༌། ལྡོག་ཤེས་ན་རྡོ་རྗེའི་ངར་འཆོར། ཐུང་དུ་འགྲོ། བདེ་བ་སྟོང་ན་ཆེ་བློ་ཚིམ། དབང་པོ་བདེ། ཤེས་པ་མཉེན། ལུས་སེམས་འབོལ་དུ་འག།ྲོ སྨད་ཡང་ཆ་བསིལ་སང་གིས་འགྲོའ།ོ ། དེ་ལྟར་འདྲོངས་ནས་ལུས་པོ་ཀུན་ལ་ཁྱབ་པར་བཀྲམ་པ་ནི། རླུང་གནད་འོག་རླུང་འཐེན། སྟེང་རླུང་དྲག་ཏུ་མནན་ནས་ཁ་སྦྱོར་བུམ་པ་ཅན་དུ་བཟུང་སྟེ་གསུས་པ་ཐེར་གྱིས་བརྒྱང༌། དམིགས་པ་ལུས་ཀྱི་རྩ་ཕྲན་དང་བ་སྤུའི་བུ་ག་ཐམས་ཅད་སྟོང་སེང་ངེ་འདུག་པའི་ནང་ན་ཕར་ཐིག་ལེ་དངུལ་ཆུའི་རྡོག་མ་བཞིན་ཧྲིལ་ཧྲིལ་སོང་ནས་ནང་ཐམས་ཅད་བདེ་བས་མེར་གྱིས་གང༌། བུ་ག་ཐམས་ཅད་ནས་ཕར་ལྷུད་བྱུང་བར་བསྒོམ། འཁྲུལ་འཁོར་ནི། སེང་གེ་རྣམ་རོལ་དང༌། མགོ་བོ་སྤྲུག་པ་དང་བསྐོར་བ་དང༌། སེང་ག་ེརྩལ་སྤྲུག་དང༌། རོ་སྟོད་གཅུ་བ་དང་བརྡུང་བ་དང༌། ལག་པ་སར་བཙུག་ལ་སྲིན་ལག་ལ་ལྗིད་བསྐུར། སྐེད་པ་བསྐོར། ལུས་པོ་རྡེག་ཅིང་སྡིག་པ་དང༌། རྐང་པ་འཁྲབ་དང་བྲོ་བརྡུང་བ་དང༌། རྒྱུག་འདུར་བྱེད་པ་དང༌། ལུས་པོ་ཀུན་འཁྱུགས་པ་བྱེད་པ་དང༌། གཟུགས་བཞི་འཁྲབ་དང་རླུང་དྲག་ཏུ་འཛིན་པ་དང༌། སེམས་སྟོང་ཉིད་ཀྱི་ངང་དུ་འཇོག་པ་སོགས་བྱའོ། །དེ་ལྟར་བཀྲམ་པའི་རྗེས་ལ་ལུས་དྲང་པོར་བསྲང་བའམ། གན་སྐྱལ་དུ་ཉལ་ལ་འགུལ་བསྐྱོད་མི་བྱའོ། །ངག་མི་བརྗོད་སེམས་མི་བསམ་པར་ལྷོད་ཀྱིས་ཀློད་པས་ཡིན་ལུགས་སྤྲོས་པ་དང་བྲལ་བ། བློ་ངོ་བོ་ཉིད་ཀྱིས་དག་པ། རིག་པ་དགག་བསྒྲུབ་ལས་འདས་པ་སྣང་བ་ངོས་བཟུང་མེད་པ་སེམས་ཡེངས་པའི་སྣང་ཡུལ་ལྟ་བུ་སྟོང་ལ་མཚན་མ་མེད་པ་ངལ་སོས་པའི་བདེ་བ་ལྟ་བུ། འདི་ཡིན་གྱི་གཟའ་གཏད་མེད་པ་སྨྱོན་པའི་སེམས་ཡེངས་པ་ལྟ་བུ། དྲན་འཛིན་གྱི་གཉེན་པོ་མེད་པ། ཡུལ་ལ་ཡེངས་པའི་བྱིས་པ་ལྟ་བུ། སྒོ་གསུམ་མ་བཅོས་ལྷུག་པ་རྒན་པོའི་ཉི་མ་འདེ་བ་ལྟ་བུ། ཚོགས་དྲུག་ཡུལ་ལས་གྲོལ་བ་བུ་ཆུང་ལྟོ་འགྲངས་པ་ལྟ་བུ། གང་ལྟར་སྣང་ཡང་བདེ་བར་ཤར་བ་གཞོན་ནུ་མ་ཡིད་སོས་པ་ལྟ་བུའི་ཉམས་དང་རྟོགས་པ་སྐྱེའོ། །དེ་ལྟར་འདོད་ཡོན་ལྔ་ལ་སྤྱོད་པ་ནས་འགྲེམ་མཚམས་ཀྱི་བར་ཐམས་ཅད་དུ་ཟག་བཅས་ཀྱི་བདེ་བ་དང༌། རྟོག་བཅས་ཆགས་པའི་དབང་དུ་སྐད་ཅིག་ཀྱང་མི་གཏོང་བར། བདེ་སྟོང་རོ་སྙོམས་ཞིང་སྟོང་ཉིད་ནམ་མཁའ་ལྟ་བུར་རྟོགས་པའི་ཉམས་དང་མ་བྲལ་བར་བྱེད་དགོས། འདོད་ཡོན་ཐམས་ཅད་ལ་མ་ཡེངས་མ་ཆགས་མ་ཞེན་པར་རྨི་ལམ་སྒྱུ་མ་ལྟ་བུ་ཆོས་ཉིད་ཀྱི་རོལ་པར་ཤེས་པས་ལོངས་སྤྱོད་པར་བྱའོ། །སྙོམས་པར་འཇུག་པའི་དུས་སུ་རླུང་དབུ་མར་འཇུག་ཅིང་བག་ལ་ཉལ་གྱི་རྟོག་པ་མངོན་དུ་བསླངས་ཏེ། གསལ་ལ་མི་རྟོག་པའི་ཡེ་ཤེས་སངས་རྒྱས་ཀྱི་དགོངས་པ་འཆར་བ་ཡིན་པས། འགྲོ་འོང་རྟག་ཆད་མཐའ་དབུས་མེད་པའི་ངང་དུ་བློ་བྲལ་ཡིད་ལ་བྱར་མེད་རྗེན་ནེ་ཁྲེས་སེ་བཞག །ཟག་བཅས་ལུས་ཀྱི་བདེ་བ་ལ་བརྟེན་ནས་ཟག་མེད་སེམས་ལ་ཡེ་ཤེས་སྐྱེ་ཞིང་རྐྱེན་འདོད་ཆགས་ལ་བརྟེན་ནས་ཆོས་ཉིད་རྟོགས་པར་འགྱུར་རོ། །བློ་དང་བྲལ་བ་ཡིད་ལ་བྱར་མེད་པའི་ཆོས་ཉིད་ཟག་པ་མེད་པ་དེ་འཆར་རོ། །ངོ་ཤེས་པར་བྱས་ལ་རྩ་བྲལ་གྱི་ངང་དུ་བསྐྱལ་ལོ། །གསུམ་པ་ཡུམ་གྱི་དྭངས་མ་དྲངས་པ་ལ། ཞག་འགའ་དལ་དུ་བཅུག་ལ། ཟས་བཅུད་ཅན་དང༌། ཆང་དང་སྦྲང་རྩི་མར་ནག་གི་བྱུག་པ་བརྟེན་ཅིང༌། ལྟོ་སྟོང་ལ་ཉི་དགའ་དང་གཡེར་མའི་རིལ་བུ་བཏང་བས་རྩ་ཁ་འབྱེད་དོ། །དེ་ནས་བདེ་འཕེལ་རོལ་རྩེད་སྦྱང་བ་ནི། དེ་ལྟར་ས་ྒོགསུམ་ལྷ་རུ་གསལ་བའི་ངང་ནས། རིག་མ་བུ་མོ་མཛེས་མའི་ཆ་ལུགས་སུ་བྱས་ཏེ། ཡིད་དུ་འོང་བའི་སྤྱོད་པ་དང་རྣམ་འགྱུར་བྱ་སྟེ། དེ་ཡང་ངོ་ཞུམ་པ་དང༌། ཟུར་མིག་བལྟ་བ་དང༌། འཛུམ་པ་ལ་སོགས་པ་བྱས་ལ། ཡབ་ཡུམ་གཅིག་ལ་གཅིག་བལྟ་ཞིང༌། བདེ་བ་བསྐྱེད་དོ། །དེ་ནས་གཉིས་ཀའི་གླུ་དབྱངས་དང་ཡིད་འདྲེས་ཤིང་བག་ཕེབ་པའི་གསུང་གླེང་དང༌། ཆགས་པའི་གཏམ་ལ་སོགས་པས་བདེ་བ་བསྐུལ། དེ་ནས་ཐག་ཉེ་རུ་བསྡད་ལ་གཅིག་གིས་གཅིག་ལ་དྲི་སྣོམ་ཞིང་བདེ་བ་བསྐུལ། དེ་ནས་གདན་ཐོག་གཅིག་ཏུ་ཚོགས་ཏེ་སྟོད་གཡོགས་ཕུད་ལ། འོ་བྱེད་པ་དང་ལྕེ་འཇིབས་པ་དང༌། ནུ་མ་མཉེ་བ་དང༌། གཡའ་སྒོག་པ་དང༌། སེན་མོ་འདེབས་པར་བྱ། དེ་ལ་ཆགས་པ་གཡོ་བ་དཀའ་ཞིང་བདེ་ཉམས་ཙམ་མ་སྐྱེས་ན། གཉིས་ཀ་གཅེར་བུ་བྱས་ཏ་ེའཁྱུད་པ་དང༌། འཛིན་པ་དང༌། ཞོན་པ་དང༌། ལྕག་གིས་བྲབ་པ་དང༌། པདྨ་དང་རྡོ་རྗེ་ལ་བལྟ་བ་དང༌། རྩེད་མོ་སྣ་ཚོགས་ཡིད་ལ་ཅི་དྲན་བྱའོ། །དེ་ལྟར་ཆགས་པ་རྒྱས་ཤིང་རྩ་སློང་བའི་ཐབས་ཞག་མང་དུ་བྱའོ། བདེ་བ་སྐྱེ་དུས་སྟོང་པ་དང་བསྲེས། ཐིག་ལེ་ཉམས་དོག་ན་འདྲེན་འགྲེམ་བྱ། དངོས་ཀྱི་སྦྱོར་བ་མི་བྱའོ། །དེ་ནས་གཉིས་ཀ་ལ་བདེ་བ་དང་ཆགས་པ་རྒྱས་ཏེ། ཁྱད་པར་དུ་ཡུམ་ཆགས་པ་རྒྱས་པས་ལུས་ལ་དྲོད་སྐྱེ། ངོ་དམར་ཏེང་ངེ་འགྲོ། པདྨ་གཤེར་བར་འགྱུར། མཁུན་པ་དང་གཡེམ་པ་བྱུང་བའི་དུས་ན་རྩ་བཙལ་ཞིང་བཟུང་བ་ནི། བསྐྱེད་རིམ་གསལ་བའི་ངང་ནས་མཁའ་གསང་བསྣོལ་མར་རྡོ་རྗེ་པདྨ་སྔགས་དང་བཅས་པས་བྱིན་གྱིས་བརླབས་ལ། ཡུམ་གཅེར་བུ་གན་རྐྱལ་ལ། ཡུམ་གྱི་རྐང་པ་གཉིས་ཡབ་ཀྱི་གྲུ་མོའི་ཁུག་གཉིས་ནས་བཏང་ལ། ལས་སུ་རུང་བའི་རྡོ་རྗེས་པདྨ་ལ་རེག་པ་དང༌། བྲུད་པ་དང༌། ནང་དུ་རེག་ཙམ་ཕྱི་རུ་རེག་ཙམ། གཡས་གཡོན་སྟོད་སྨད་དུ་རེག་རེག་བྱེད་ཅིང༌། ཨབ་ཧ་ཕུལ་སོགས་པ་བདེ་བའི་སྐད་སྣ་ཚོགས་བཏོན་པས་རྩ་བཟང་ན་མུ་ཏྲ་ལ་བདེ་སྐད་སྣ་ཚོགས་དང་རྣམ་འགྱུར་མང་དུ་ཡོང་ངོ༌། །དེ་ནས་ཕྱིང་བ་རང་གི་རྡོ་རྗེ་དང་མཉམ་པར་དར་གྱིས་བཏུམ་ལ་ཚིལ་ཞུན་དང༌། འབྲུ་མར་བྱུག་ལ་ཕྱག་རྒྱའི་གཤང་ལམ་དུ་གཞུག་ཅིང༌། མཁལ་ཁུང་གཉིས་སུ་གྲུ་གུ་ཁུ་ཚུར་ཙམ་རེ་སྐེ་རག་སྲབ་མོས་བསྡམས་ལ། རྒྱབ་ནས་རྟ་སྒ་བསྟད་དེ་གན་རྐྱལ་དུ་ཉལ་བའི་མཁལ་མ་གཉིས་དང་གཤང་ལམ་ནང་དུ་འགྲོའོ། །དེ་གཉིས་ནང་དུ་སོང་བས་བྷ་གའི་གཡས་གཡོན་གཉིས་སུ་ནུ་མ་འདྲ་བའི་འབུར་གཉིས་འོང༌། དེ་ནས་བྷ་ག་ཕྱེས་ནས་བལྟས་པས་རྩ་སྣ་རབ་རིབ་ཏུ་འོང་སྟེ། དེ་ཡང་དུང་ཅན་མ་ནི་རྩ་འཁྱིལ་ནས་འོང༌། པདྨ་ཅན་ནི་རྩ་སྣ་པདྨ་འདྲ་བའོ། །རི་དྭགས་ཅན་མ་ནི་རི་དྭགས་ཀྱི་མཇིང་པ་ལྟར་འོང༌། བྱ་རོག་གདོང་མ་ནི་རྩ་སྣ་བྱ་རོག་གི་མཆུ་ལྟར་འོང༌། བདེ་བྱེད་མ་ནི་གཟིག་མོའི་བྱི་ཐུར་ལྟར་འོང༌། མ་ནིང་གི་རྩ་ནི་མདུད་པ་ཅན་དུ་འོང༌། རྩ་ཕལ་བ་ནི་ཐང་ཁུག་ཁ་ཕྱིར་བགྲད་པ་ལྟར་འོང༌། དེ་ཡང་རྩ་སྦོམ་ན་འུག་ཆོས་རྩ་བ། ར་དཀར་མོའི་འོ་མ་སྦྲང་རྩི་དང་སྦྱར། ད་བྱིད་ཤ་ཁྱི་ཚིལ་རྣམས་སྦྱར་ནས་རྩ་ལ་བྱུགས་པས། རྩ་སྣ་རིང་ན་སོར་དྲུག །འབྲིང་ན་སོར་བཞི། ཐ་མ་སོར་གསུམ་འོང་ངོ༌། །ཡང་མགྲོན་བུ་བུ་མ་གཅིག །ཚ་ལ་ཞུན་མ་གཅིག །སྦྲང་རྒོད་གསུམ། ཆང་ཞིམ་པའི་ཉིང་ཁུ་དང་སྦྱར་ལ་པདྨར་བྱུགས་པས་རྩ་རྣམས་རིང་དུ་འོང་ངོ༌། །ཕྱག་རྒྱའི་ཐིག་ལེ་འབེབས་པ་ལ་མཁས་པ། བུང་བས་རྩི་འཚོལ་བ་ལྟ་བུ་སྟེ། དེའང་རྩ་སྣ་དེ་རང་གི་རྡོ་རྗེའི་བུ་གར་བཅུག་ནས་རྡོ་རྗེ་ཡར་ཕུལ་བ་ལྟར། ཕྱིང་བ་མར་ལ་འཐེན་ནས་འོ་དང་འཁྱུད་པ་ལ་སོགས་པ་བྱས་པས་ཕྱག་རྒྱ་མ་ཆགས་པ་རྒྱས་དུས་དུམ་རེ་འགུལ་ཞིང་མི་བསྐྱོད་པར་བཞག་པས་ཐིག་ལེ་རྩ་མིག་ཏུ་ལྷུང་འོང་ངོ༌། །ཕྱག་རྒྱ་རབ་ལ་རྩེའི་རྩེ་མོ་ན་དྭངས་མ་ཡོད། འབྲིང་ལ་རྐེད་པ་ཐ་མ་གཏིང་ན་ཡོད་པས། དྲངས་ཐབས་གསུམ་ལས། རབ་ལ་རྡོ་རྗེ་གསང་བར་བཅུག་ལ་མི་བསྐྱོད་པར། རིག་པ་སྐྱེ་མེད་ཀྱི་ངང་ལ་བཞག་པས་དྭངས་མ་འདྲོངས་སོ། །འདྲོངས་རྟགས་སུ་རྡོ་རྗེ་མགོར་འཁྱོལ་བས་ལུས་སྦྲིད་ཆིལ་བ་འབྱུང་ངོ༌། །དེས་མ་འདྲོངས་ན་འབྲིང་ནི་ལུས་ཀྱིས་འགུལ་ཞིང་དལ་བུས་བསྐྱོད་པས་བདེ་བ་སྐྱེ་དུས་ཀློད་ལ་དྲོངས་རྟགས་སྔ་མ་བཞིན་ནོ། །དེས་ཀྱང་མ་འདྲོངས་ན། ཐ་མ་ལ་དྲག་ཏུ་བསྐྱོད་ཅིང་བདེ་བ་ཡུན་རིང་དུ་བཟུང༌། བདེ་བ་དུས་མཉམ་གྱི་དུས་སུ་སྟེང་རླུང་མནན་འོག་རླུང་དྲག་ཏུ་འཐེན། རྐང་ལག་བརྐྱངས་ལ། དྭངས་མ་དྲངས་པའི་འཁྲུལ་འཁོར་གོང་ལྟར་བྱའོ། །དམིགས་པ་ནི་སོག་སྦུབས་ནས་ཆུ་འཐུང་བ་ལྟར་འུབ་ཀྱིས་དྲག་པར་འཐེན་ལ། ཧཱུྃ་དྲག་ལ་རྒྱུན་མི་ཆད་པར་བསྒྲང་ངོ༌། །དྭངས་མ་འདྲོངས་པའི་རྟགས་སུ་ཡུམ་གྱི་སྣང་བ་འུབ་ཀྱིས་བསྡུ་བ་སྙམ་བྱེད་ཅིང༌། ཡུམ་གྱི་བདེ་བ་དེ་འཕྲོ་ལ་ཡལ་ན་ཐེ་ཚོམ་མེད་པར་འདྲོངས་པའོ། །ཡང་སྔ་མ་བཞིན་རྡོ་རྗེ་བྷ་གའི་གཏིང་དུ་ཕུལ་བས་ཡུམ་བདེ་བ་མི་བཟོད་པ་སྐྱེས་དུས། རང་གི་ལུས་མ་འཆུས་པར་དྲང་པོར་བྱས་ལ། སེམས་ཀྱི་དམིགས་པ། ལུས་ཀྱི་འཁྲུལ་འཁོར། ངག་གི་བརྗོད་པ་གསུམ་གྱིས་དྲངས་ཏེ། དེའང་ཡུམ་གྱི་རྩ་ནང་གི་སྙིགས་མ་སྦང་མ་ལྟ་བུའི་ནང་ནས་དྭངས་མ་ཆང་ལྟ་བུ་དེ། རང་གི་རྡོ་རྗེའི་གསང་ལམ་ནས་ཡར་ལ་ཐིག་ལྟར་བྲེང་མ་ཆད་པར་དྭངས་མ་སྤྱི་བོ་བདེ་ཆེན་གྱི་འཁོར་ལོ་ལ་སིབ་སིབ་སོང་བར་བསམ་ཞིང༌། ངག་ཏུ་ཧཱུྃ་དྲག་ལ་མི་འཆད་པར་བསྒྲང་པས། ལུས་ནི་འོག་རླུང་དྲག་ཏུ་འཐེན་ནས་མིག་གྱེན་ལ་བསྒྲད། རྐང་པའི་མཐེ་བོང་གཉིས་གཤིབ་ཏེ་ནང་དུ་དགུག །གུང་མོ་དང་སྲིན་ལག་དྲག་ཏུ་གཤིབས་ཅིང་རྒྱུ་ཞབས་སྒལ་པ་ལ་དྲག་ཏུ་སྦྱར། ལྕེ་ཡ་སྐན་ལ་སྒྲིལ་ཞིང་ཡིད་ཀྱིས་ཧཱུྃ་ངག་ཏུ་བརྗོད་ནས་འཐེན་པས། ཡུམ་དྲན་པ་མེད་པ་དང༌། གྲུ་གུ་ལྟར་འགྲོ་ཞིང་རྩུབ་པའམ། རང་དབང་མེད་པར་སྐད་ཕྱུང་ན་འདྲོངས་པའི་རྟགས་སོ། །དེ་ནས་དལ་གྱིས་འཕྲོ་བཅད་དེ། ཡི་དམ་དུ་གསལ་བའི་ཡན་ལག་བཞི་དང་ལུས་ཐམས་ཅད་སྤྲུག་གོ ། དེའང་རྣལ་འབྱོར་པ་ལ་མགོ་འཁྱོམ་པའམ་ཚ་ཆིལ་སྦྲིད་བེར་བེར་བ་འོང༌། དྭངས་མ་རབ་ཏུ་ལོན་ན་ལུས་ཚ་ཆིལ་གྱིས་འགྲོ། འབྲིང་གིས་ལུས་ལྷན་ནེར་འོང༌། ཐ་མས་ཀྱང་སེམས་བདེ་སྟོང་ལ་གནས་པའོ། །ཕྱག་རྒྱའི་བཀྲག་འཆོར། བདག་ཉིད་བྱུ་རུ་ལྟར་དམར་ལམ་གྱིས་འགྲོ། ཡུམ་གྱི་ལུས་ཟུང་གསོའོ། །འོག་སྒོ་བདེ་བ་ཆེན་པོ་ལས། བདེ་བ་མཆོག་ཏུ་འཕེལ་བ་དམིགས་པའི་གནད༔ སྙོམས་འཇུག་དུས་སུ་དམིགས་པ་མ་ཡེངས་པར༔ ཕྱག་རྒྱ་ཡིད་དུ་འོང་བའི་པདྨར་གཏད༔ བདེ་བ་མྱུར་དུ་སྐྱེ་བ་རྩ་རླུང་གནད༔ སྙོམས་པར་འཇུག་པའི་དུས་དེར་རྐང་ལག་བཞིའི༔ རྩ་དང་ཉ་བཞི་སྒྲིམ་ཞིང་འོག་སྒོ་བཙུམ༔ འོག་རླུང་འཐེན་ཅིང་རྡོ་རྗེ་གཏིང་ནས་བཀོན༔ བདེ་བ་ཚད་དུ་ཕེབས་པ་འཁྲུལ་འཁོར་གནད༔ བསྐྱོད་པ་དྲག་ཏུ་ཐལ་ནས་ལ་ཐལ་ན༔ ཕྲལ་ཚད་འཕྲལ་ལ་ལེན་ཅིང་དལ་བུས་བསྐྱོད༔ ལུས་སེམས་བདེ་བ་ཕྲིལ་གྱིས་སྐྱེ་བ་དང་༔ གཉེན་པོ་བསྐྱོད་འཕྲོ་བཅད་ལ་བདེ་གསལ་ངང་༔ མ་བཅོས་རང་ལུགས་ཐོག་ཏུ་ཙེན་ནེ་བཞག༔ ཡང་ན་བདེ་བ་ཡལ་ན་དལ་བུས་བསྐྱོད༔ བདེ་བ་ཕྲིལ་གྱི་བྱུང་ན་གཉེན་པོས་བསྐྱིལ༔ བདེ་བ་ཐལ་དུ་མི་གཞུག་གཉེན་པོའི་གནད༔ ཐོག་མར་སྙོམས་པར་འཇུག་པའི་དུས་དེ་ནས༔ གཉེན་པོ་དྲག་པོའི་གོ་ཆས་ཅི་ནས་ཀྱང་༔ ཐིག་ལེ་བཏང་ན་ན་ར་ཀན་སྙམ་དུ༔ རྟོག་པ་གཅེས་ལ་གཉེན་པོ་རྒྱུན་དུ་བསྟེན༔ བདེ་བ་ཡེ་ཤེས་འགྱུར་བ་རྟོགས་པའི་གནད༔ ཕྲ་བ་བག་ལ་ཉལ་གྱི་ཉོན་མོངས་རྣམས༔ ལྐོག་གྱུར་གནས་ལ་སྙོམས་འཇུག་སྦྱོར་བ་ཡིས༔ མངོན་གྱུར་སློང་ན་ཉོན་མོངས་ཐོལ་སྐྱེས་དུས༔ ཆགས་མཁན་ཆགས་ཡུལ་གྲུབ་པ་མེད་པའི་ངང་༔ སྣང་སྟོང་བདེན་མེད་གསལ་སྟོང་འཛིན་མེད་ངང་༔ (དེས་ནི་འདོད་ཆགས་སྐྱེས་ཀྱང་ཡེ་ཤེས་ངང་༔) བདེ་སྟོང་དབྱེར་མེད་ངང་དུ་ཀློད་ལ་ཞོག༔ དེ་ནས་འདོད་ཡོན་སྐྱེས་པའི་ཡེ་ཤེས་ངང་༔ ཉམས་རྟོགས་མཐོ་དམན་སྦྱར་བ་དགའ་བཞིའི་གནད༔ སྦྱངས་པ་ཐ་མས་དགའ་བ་སྐྱེས་པའི་དུས༔ ཚོད་བཟུང་དགའ་བའི་ངང་ལ་བལྟ་ཞིང་སྦྱོང་༔ སྦྱངས་པ་འའབྲིང་གིས་མཆོག་དགའ་སྐྱེས་པའི་དུས༔ ཚོད་བཟུང་དགའ་བདེའི་ངང་ལ་བལྟ་ཞིང་སྦྱོང་༔ སྦྱངས་པ་རབ་ཀྱིས་ལྷན་ཅིག་སྐྱེས་དགའི་ཚེ༔ བསྐྱིལ་ཞིང་དགའ་བའི་ངང་ལ་བལྟ་ཞིང་སྦྱོང་༔ བྱང་སེམས་གཡོ་ཞིང་དགའ་བདེ་སྐྱེས་རྟགས་གནད༔ རྣལ་འབྱོར་སྟོབས་རྒྱས་རིག་མ་མཚན་ལྡན་ན༔ ཤ་ལུས་ཕན་ཚུན་རེག་ཙམ་རྡོ་རྗེ་ལང་༔ བྱང་སེམས་གཡོ་ཞིང་བདེ་བ་ལྷང་ལྷང་སྐྱེ༔ རྣལ་འབྱོར་འབྲིང་སྟོབས་རིག་མ་མཚན་འབྲིང་ན༔ པདྨར་རྡོ་རྗེ་རེག་ཙམ་ལང་ཞིང་ལྡང་༔ ལུས་འདར་སྤུ་ཟིང་བདེ་བའི་ཐིག་ལེ་ཡོང་༔ དེ་དུས་མཁན་པོ་རྩར་བཅད་ངང་ལ་བཞག༔ རྣལ་འབྱོར་རྩ་ངན་རང་ལུས་ཡུན་ཐུང་ན༔ དེ་ལས་ཐལ་ནས་འདས་འཕྲོ་(འགྲོ)ཐལ་མི་གཞུག༔ དེ་ཚེ་ཚོད་བཟུང་ལྡོག་བཀྲམ་ངང་ལ་བཞག༔ སྦྱངས་པ་འབྲིང་ནི་དེ་ལས་ཆེར་བསྐྱོད་པས༔ རྡོ་རྗེ་པདྨར་ནུབ་ཅིང་བསྒུལ་བའི་ཚེ༔ རིག་མས་མ་བཟོད་ཆགས་པ་སྐྱེས་པའི་རྟགས༔ པདྨ་བརླན་ལྗོན་དབུགས་ནི་རྒོད་འགྱུར་ཞིང་༔ རྩ་དང་ལུས་ཀུན་སྦྲིད་གཡའ་དགའ་བདེ་སྐྱེ༔ དེ་ཡི་དུས་སུ་ཚད་བཟུང་ངང་ལ་བཞག༔ སྦྱང་པ་རབ་ཀྱིས་དེ་ལས་ཆེར་བསྐྱོད་པའི༔ ཐབས་ཤེས་གཉིས་ཀས་ཕན་ཚུན་བསྐྱོད་པའི་ཚེ༔ ཟག་བཅས་བདེ་བ་་གཡོ་ཚབ་ཆེར་འབྱུང་སྟེ༔ དེ་དུས་བདེ་བ་སྟོང་པ་གཉིས་བསྲེ་སྟེ༔ བདེ་སྟོང་ཀ་དག་ངང་ལ་ལྷན་ནེ་བཞག༔ དུས་གསུམ་རྣམ་རྟོག་བཀག་སྟེ་བརྗོད་མེད་ཉམས༔ བློ་འདས་བདེ་དང་བྲལ་བའི་ཉམས་འཆར་ཏེ༔ དེ་ནི་ལྷན་ཅིག་སྐྱེས་པའི་ཡེ་ཤེས་སོ༔ དེའི་ངང་ཡུན་རིང་བཞག་ཀྱང་ཐལ་མི་གཞུག༔ ཐལ་ན་ཉམས་པས་གཉེན་པོ་བཟུང་ཞིང་བསྐྱིལ༔ སྦྱང་པ་རབ་འབྲིང་གསུམ་ཀའི་ཐད་ཀ་ཡི༔ དགའ་བ་གསུམ་པོ་དེ་ལས་ཐལ་མི་གཞུག༔ དེ་ཀའི་ངང་ལ་ཡུན་ནི་ཅི་རིགས་བཞག༔ བདེ་བ་ཡལ་ནས་ཆུང་དུ་སོང་བ་ན༔ ཡང་ནི་བསྐྱོད་ནས་བདེ་བ་སྦར་བར་བྱ༔ བདེ་བ་ལྷང་སྐྱེས་ཚད་བཟུང་བསྐྱིལ་བར་བྱ༔ དེ་ཡང་དབབ་བསྐྱིལ་ཡང་ལྡོག་ཡང་བཀྲམ་ཞིང་༔ བསྐྱིལ་བའི་བདེ་བ་བསྐྱིལ་ཡུན་རིང་བ་གཅེས༔ དེ་ལ་ཡུན་དུ་སྦྱང་བས་བརྟན་པའི་ཚད༔ ཚོགས་དྲུག་ཡུལ་སྣང་བདེ་བར་འཆར་བ་དང་༔ ཉིན་མཚན་ཕྱེད་ཀྱིས་ཡབ་ཡུམ་གཉིས་ཀ་ལ༔ དགའ་བདེ་བརྗོད་དུ་མེད་པའི་ཉམས་འཆར་ཏེ༔ ཡུན་ནི་ཅི་ཙམ་འདོད་པ་བསྐྱིལ་ཐུབ་ཚེ༔ དེ་ཚེ་རབ་ཀྱིས་ཆུ་བོའི་གཞུང་བཞིན་དུ༔ མཚན་ལྡན་བཙལ་ནས་ཉིན་མཚན་རྒྱུན་དུ་སྦྱོར༔ དེ་ཡི་གཏན་ཚིག་ལོངས་སྐུའི་སངས་རྒྱས་རྣམས༔ རྡོ་རྗེ་བཙུན་མོའི་བྷ་ག་ལ་བཞུགས་ནས༔ བདེ་བ་ཆེན་པོ་རྡོ་རྗེའི་ཏིང་འཛིན་བཞུགས༔ དེ་ཕྱིར་ལོངས་སྐུའི་སངས་རྒྱས་ཐམས་ཅད་ཀུན༔ ཡབ་ཡུམ་གཉིས་མེད་འཁྲིལ་སྦྱོར་བཞུགས་པ་ཡིན༔ དེ་ལ་རྡོ་རྗེ་གསང་བའི་སྐུ་ཞེས་བྱ༔ འབྲིང་གིས་ཉིན་མཚན་དུས་དྲུག་བདེ་སྟོང་སྦྱོར༔ ཐ་མས་ཀྱང་ནི་ཉིན་མཚན་ཐུན་བཞི་རུ༔ མཚན་ལྡན་མ་ལ་བདེ་བའི་ཉམས་བསྐྱེད་ཅིང་༔ ཡང་མཐས་ཉིན་མཚན་ལན་རེ་ཅིས་ཀྱང་སྦྱོར༔ དེ་ཡི་ཐ་མ་ཟླ་རེ་ལོ་རེས་ནི༔ མཚན་ལྡན་པདྨར་མ་བསྟེན་དམ་ཚིག་ཉམས༔ དེ་ཡང་རྟེན་འབྲེལ་ཅིས་ཀྱང་མ་འགྲིགས་ན༔ ལོ་རེ་བར་དུ་ལན་རེ་ཅི་ནས་ཀྱང་༔ དམ་ལས་མི་འགལ་ཕྱིར་ན་རབ་ཏུ་བཙལ༔ གཞན་ཡང་དམ་ལས་མི་འགལ་དོན་ཕྱིར་དུ༔ ཉིན་རེ་བུད་མེད་མཚན་ཉིད་ལྡན་པ་དང་༔ འཕྲད་པར་བྱ་ཞིང་ལྟ་དང་འཁྱུད་པ་དང་༔ བདེ་བའི་གླེང་མོ་བྱ་ཞིང་ཡིད་དང་སྦྱོར༔ རྣལ་འབྱོར་གཟུགས་ངན་རིག་མ་མི་འདུ་ཞིང་༔ ཐབས་ལམ་བདེ་བ་སྐྱོང་བའི་ཡུལ་མེད་ན༔ ཐ་མ་དུད་འགྲོ་ལ་ཡང་སྦྱོར་ཞེས་བཤད༔ དེ་ཕྱིར་རྫས་དང་དམིགས་པ་སྣ་ཚོགས་ཀྱིས༔ རིགས་བཟང་མཚན་ལྡན་བུད་མེད་མ་ལུས་པ༔ དབང་དུ་བསྡུས་ཤིང་བདེ་བའི་ཉམས་སྐྱོང་བའི༔ གསང་སྔགས་ཐེག་ཆེན་ཉམས་སུ་ལེན་པ་ལ༔ འཛིན་པའི་ཡ་ག་ལ་སྐྲག་ཚུལ་འཆོས་ན༔ བདུད་ཀྱི་བར་ཆད་ཡིན་པས་ཉམས་ལེན་གཅེས༔ ཚེ་འདིའི་བསྟོད་སྨད་ཡ་གའི་རིགས་རྣམས་ཀུན༔ རྨི་ལམ་བྲག་ཆ་འདྲ་ལ་ཡལ་བའི་རྒྱུ༔ སྲོག་ལ་བབ་ཀྱང་གཞན་ལུས་ཐབས་ལམ་སྦྱོར༔ འོན་ཀྱང་བསྟན་པའི་དོན་དུ་གསང་བ་གཅེས༔ ཐབས་མཁས་པ་དང་སྒྲིབ་ཤིང་ལ་སོགས་པས༔ གཞན་གྱི་མ་ཚོར་གསང་ན་དངོས་གྲུབ་མྱུར༔ གཞན་ཡང་མཆོད་པའི་ནང་ནས་ཁྱད་པར་དུ༔ བདེ་བ་ཆེན་པོ་གསང་བའི་མཆོད་པ་འདི༔ ཕྱི་ནང་མཆོད་པ་ནམ་མཁའ་གང་བ་ལས༔ བདེ་ཆེན་ཉམས་ཀྱི་མཆོད་པ་ས་ེགོལ་ཙམ༔ བསོད་ནམས་འབུམ་གྱི་ཆར་ཡང་མི་ཕོད་ཕྱིར༔ བདེ་བ་སྐྱོང་བའི་ཉམས་དེ་དཀོན་མཆོག་གསུམ༔ བླ་མ་ཡི་དམ་དཔའ་བོ་ཌཱཀྐ་ིལ༔ ནམ་མཁའ་གང་བར་དམིགས་ཏ་ེམཆོད་པར་བྱ༔ ཞེས་སོ། །བདེ་བའི་རང་བཞིན་གྲོལ་བ་ལ། མཁས་པ་མཁའ་ལ་ན་བུན་དྭངས་པ་ལྟ་བུ་སྟེ། བདེ་བའི་ངོ་བོ་ཇི་ལྟར་གནས་ཀྱང་ཡེ་སྟོང་རྩ་བྲལ་ཆེན་པོའི་གདོད་མའི་ཀ་དག་ངང་དུ་ལ་བཟླའོ། །དེའང་ཐེག་པ་འོག་མའི་བདེ་སྟོང་ལྟར། བདེ་བ་ལ་སྟོང་པས་རྒྱས་འདེབས་པ་དང༌། བདེ་ཉམས་ལ་ཆགས་པ་མ་ཡིན་ཏེ། འདིར་དང་པོ་བདེ་བ་གཡོ་བ་ནས་མཐར་ཀ་དག་ཏུ་ལ་བཟླས་པའི་བར། གདོད་མའི་གནས་ལུགས་ཡེ་སྟོང་རྩ་བྲལ་དུ་རྟོགས་པ་དང་མ་བྲལ་བའི་བདེ་བ་དང༌། བདེ་བའི་ཉམས་རང་བཞིན་སྟོང་པར་འཛིན་པ་ཙམ་ལས་ཀྱང་འདས་ཏེ། མཐའ་གྲོལ་བློ་འདས་ཆེན་པོ་ཆགས་བྲལ་དུ་བསྒྲུབ་སྟེ། འདོད་ཆགས་ཀྱི་འཛིན་པ་ཡེ་སྟོང་ཆེན་པོར་ལ་བཟླས། དེའང་རྟོག་པ་ཇི་སྙེད་བདེ་བར་བསྡུས་ནས། བདེ་བ་འཛིན་མེད་དུ་ངོ་སྤྲད་དེ། འཛིན་མེད་ཀ་དག་ཆེན་པོར་ཕྱམས་བརྡལ་ནས། ཡེ་བདེའི་སྟེང་དུ་བློ་བདེ་རྒྱུན་མི་འཆད་པ། གཞི་བདེ་བའི་ངོ་བོ་ལྷུན་གྲུབ་ཆོས་ཉིད་ཀྱི་རོལ་པར་འཆར་བ་ལ་རྣལ་འབྱོར་པའི་སྐྱེལ་སོ་བྱེད་དོ། །བཞི་པ་སྙོམས་འཇུག་བྱས་པ་ཡེ་ཤེས་བཞི་དང་ངོ་སྤྲད་པ་ནི། དེ་ཡང་སྙོམས་པར་ཞུགས་ཏེ་སྤྱི་བོ་ནས་བདེ་བ་གཡོས་ཏེ་མགྲིན་པར་བབས་པས་བདེ་བའི་ངོ་བོ་སྟོང་པར་ཤར་བ་སྟེ། དགའ་བའི་ཡེ་ཤེས་ཏེ་རྣམ་རྟོག་རགས་པ་རྣམས་སྤོང་ཞིང༌། ཉན་རང་གི་གྲུབ་མཐའ་རྫོགས་པ་བསམ་གཏན་དང་པོའི་དགའ་བའོ། །དེ་ནས་སྙིང་གར་སླེབ་དུས་མཆོག་དགའི་ཡེ་ཤེས་བདག་ཏུ་འཛིན་པའི་རྣམ་རྟོག་སྤོང་ཞིང༌། བྱང་ཆུབ་སེམས་དཔའི་གྲུབ་མཐའ་རྟོགས་ཏེ་བསམ་གཏན་གཉིས་པའི་དགའ་བའོ། །དེ་ནས་ལྟེ་བར་སླེབ་དུས་དགའ་བྲལ་གྱི་ཡེ་ཤེས་ཏེ། ཕྱག་རྒྱར་འཛིན་པའི་རྟོག་པ་སྤོང་ཞིང་གསང་སྔགས་ཀྱི་གྲུབ་མཐའ་རྟོགས་ཏེ། བསམ་གཏན་གསུམ་པའི་དགའ་བའོ། །དེ་ནས་གསང་བར་སླེབ་དུས་ལྷན་ཅིག་སྐྱེས་དགའི་ཡེ་ཤེས་ཏེ་དགའ་བ་གསུམ་དུ་འཛིན་པའི་རྟོག་པ་མཐའ་དག་སྤོང་ཞིང་གསང་བ་བླ་ན་མེད་པའི་གྲུབ་མཐའ་རྟོགས་ཏེ་བསམ་གཏན་བཞི་པའི་དགའ་བའོ། །མདོ་ལས། དགེ་སློང་བསམ་གཏན་བཞི་པ་ལ་སྙོམས་པར་ཞུགས་པའི་བདེ་བ་ལྟ་བུ་དང་ཞེས་པའང་འདི་དང་དོན་གཅིག་གོ །དེ་ནི་ཡས་བབས་བསམ་གཏན་དགའ་བ་བཞིའོ། །དེ་བཞིན་དུ་གསང་གནས་ནས་ལྟེ་བའི་བར་དྭངས་མ་ལྡོག་ཏེ་མཉམ་པར་བཞག་པ་ནི། ནམ་མཁའ་མཐའ་ཡས་སོ། །སྙིང་གར་རྣམ་ཤེས་མཐའ་ཡས་སོ། །མགྲིན་པར་ཅི་ཡང་མེད་པའོ། །སྤྱི་བོར་ཡོད་མེད་ཀྱི་སྤྲོས་པ་ཞི་བའི་སྐྱེ་མཆེད་དེ་སྲིད་རྩིའི་སེམས་སོ། །དེ་ནས་དུས་གསུམ་སྐྱེ་མེད་ཀྱི་ངང་ལ་མཉམ་པར་བཞག་པ་ནི་འགོགས་པའི་ཏིང་ངེ་འཛིན་ནོ། །དེ་བཞིན་དུ་འཁོར་ལོ་གསུམ་དུ་བབས་དུས་སྐྱེ་འགགས་གནས་གསུམ་མ་གྲུབ་པའི་རྣམ་པར་ཐར་པའི་སྒོ་སྟོང་པ་ཉིད་དང་མཚན་མ་མེད་པ་དང༌། སྨོན་པ་མེད་པའི་ཡེ་ཤེས་སོ། །དེ་བཞིན་དུ་འཁོར་ལོ་བཞིར་བབས་པས་ཚད་མེད་པ་བཞི་ལས། དམིགས་པ་མེད་པས་ཚད་མེད་བཞིའི་ཡེ་ཤེས་སོ། །དེ་བཞིན་དུ་དྭངས་མ་མི་འཛགས་པས་སོ་སོར་ཐར་པའི་སྡོམ་པ་གོང་དུ་འཕེལ་བས་བྱང་ཆུབ་སེམས་དཔའི་སྡོམ་པ་ཡེ་ཤེས་ཆེན་པོའི་རིག་པ་འཛིན་པའི་སྡོམ་པའོ། །དེ་བཞིན་དུ་ཕ་རོལ་ཏུ་ཕྱིན་པ་དྲུག་གི་མི་མཐུན་པའི་ཕྱོགས་རྣམ་པར་དག་པས་ཕ་རོལ་ཏུ་ཕྱིན་པ་གཉིས་ཀྱི། ནང་གི་ཕ་རོལ་ཏུ་ཕྱིན་པ་དྲུག་གོ །ཁམས་དཀར་དམར་གཉིས་མི་ཉམས་ཤིང་འཕེལ་བས་སྨོན་འཇུག་གི་སེམས་གཉིས་སོ། །མཁའ་གསང་བྱིན་གྱིས་བརླབས་པ་ནི་བསྙེན་པ། འཁྱུད་པ་སོགས་བྱ་བ་ནི་ཉེ་བསྙེན། སྲུབ་ཅིང་སྦྱོར་བ་ལ་བརྟེན་ནས་ཡས་བབས་ཀྱི་དགའ་བཞི་མྱོང་བ་ནི་བསྒྲུབ་པ། སླར་ཡང་ཡར་ལ་དྲངས་ཏེ་མས་བརྟན་ཀྱི་དགའ་བཞི་མྱོང་ཞིང་བཀྲམ་པ་ནི་བསྒྲུབ་པ་ཆེན་པོའོ། །མདོར་ན་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་དུ་མའི་གང་ཆེན་མཚོ་ཡིན་ནོ། །མཇུག་གི་དོན་བདེ་བའི་འཆར་ལུགས་ལ། དང་པོ་བདེ་བ་ཕ་རོལ་དུ་ཕྱིན་པ་དྲུག་དང་སྦྱར་བ་ནི། ཡབ་ཡུམ་ལྷར་བསྐྱེད་པས་ཚོགས་རྫོགས་པ་སྦྱིན་པའི་ཕ་རོལ་ཏུ་ཕྱིན་པ་ཐིག་ལེ་མི་ཉམས་པ་ཚུལ་ཁྲིམས། སྣང་བ་ཐམས་ཅད་བདེ་བར་ཤར་བའི་ཚེ་ཁོང་ཁྲོ་མེད་པར་བཟོད་པས་བཟོད་པ། སྦྱོར་བ་བྱེད་པ་ལ་ལེ་ལོ་མེད་པས་བརྩོན་འགྲུས་བདེ་སྟོང་ལ་སེམས་གནས་པས་བསམ་གཏན། བདེ་སྟོང་གི་དོན་མཐར་ཕྱིན་པས་ཤེས་རབ་ཀྱི་ཕ་རོལ་ཏུ་ཕྱིན་པའོ། །གཉིས་པ་ལམ་ལྔ་དང་སྦྱར་བ་ནི། ཡབ་ཡུམ་སྟན་གཅིག་ཏུ་ཚོགས་ནས་ལྷའི་སྐུར་བསྐྱེད་པ་ཚོགས་ལམ། ཡབ་ཡུམ་སྙོམས་པར་ཞུགས་པས་སྦྱོར་ལམ། དགའ་བཞིའི་ཡེ་ཤེས་མཐོང་བས་མཐོང་ལམ། དེའི་རྗེས་ཤེས་སྐྱོང་བས་བསྒོམ་ལམ། བདེ་སྟོང་གི་ཡེ་ཤེས་མངོན་དུ་གྱུར་པས་མི་སློབ་པའི་ལམ་མོ། །གསུམ་པ་ཐེག་པ་དགུ་དང་སྦྱར་བ་ནི། ལུས་ཐ་མལ་དུ་གནས་པ་ལྷ་མིའི་ཐེག་པ། བདེ་བ་ཐ་མལ་དུ་སྤྱོད་པ་ཕྱི་བའི་ཐེག་པ། བདེ་བ་རང་དོན་དུ་སྤྱོད་པ་ཉན་རང་གི་ཐེག་པ། བདེ་བ་སྤྱོད་ཚེ་སེམས་བསྐྱེད་ཀྱིས་རྩིས་ཟིན་ཅིང་རང་རིག་ཏུ་ཤེས་པ་བྱང་ཆུབ་སེམས་དཔའི་ཐེག་པ། ཐ་མལ་གྱི་ལུས་ངག་ཡིད་གསུམ་ལྷར་དག་པ་ཀྲི་ཡའི་ཐེག་པ། ཕྱག་རྒྱ་བཞི་དང་ལྡན་པར་སྤྱོད་པ་ཨུ་པའི་ཐེག་པ། ཕྲིན་ལས་བཞི་འགྲུབ་པ་ཡོ་གའི་ཐེག་པ། ཕུང་ཁམས་ལྷར་ཤེས་པ་མ་ཧཱའི་ཐེག་པ། བདེ་སྟོང་དབྱེར་མེད་དུ་རྟོགས་པ་ཨ་ནུའི་ཐེག་པ། ཐམས་ཅད་ཡོངས་གྲོལ་དུ་རྟོགས་པ་ཨ་ཏིའི་ཐེག་པའོ། །བཞི་པ་རྒྱུད་སྡེ་བཞི་དང་སྦྱར་བ་ནི། ཡབ་ཡུམ་ལྷར་བསྐྱེད་པ་བྱ་བའི་རྒྱུད། སྙོམས་འཇུག་བྱེད་པ་སྤྱོད་པའི་རྒྱུད། དེ་ལས་བདེ་སྟོང་སྐྱེས་པ་རྣལ་འབྱོར་གྱི་རྒྱུད། དགའ་བཞིའི་ཡེ་ཤེས་མཐར་ཕྱིན་པ་བླ་ན་མེད་པའི་རྒྱུད་དོ། །ལྔ་པ་ཐེག་པ་གསུམ་དང་སྦྱར་བ་ནི། རང་དོན་དུ་སྤྱོད་པས་ཉན་རང་གི་ཐེག་པ། གཞན་དོན་དུ་སྤྱོད་པས་བྱང་ཆུབ་སེམས་དཔའི་ཐེག་པ། མཐའ་གྲོལ་དུ་སྤྱོད་པས་རྡོ་རྗེའི་ཐེག་པའོ། །དྲུག་པ་བཀའ་བརྒྱད་དང་སྦྱར་བ་ནི། ཡབ་ཡུམ་ལྷའི་སྐུར་གསལ་བས་འཇམ་དཔལ་སྐུ། བདེ་བའི་སྒྲ་སྟོང་པར་ཤེས་པས་པདྨ་གསུངས། ངོ་བོ་རིག་སྟོང་དུ་ཤེས་པས་ཡང་དག་ཐུགས། ངོ་བོ་བདེ་སྟོང་དུ་ཤེས་པས་བདུད་རྩི་ཡོན་ཏན། ངོ་བོ་སྣང་སྟོང་དུ་ཤེས་པས་ཕུར་པ་ཕྲིན་ལས། འོད་གསལ་དབྱེར་མེད་པས་རིག་འཛིན་སློབ་དཔོན། རང་བཞིན་སྟོང་པར་རྟོགས་པས་མ་མོ་རྦོད་གཏོང༌། ཐམས་ཅད་རླུང་གི་རྩལ་དུ་ཤེས་པས་འཇིག་རྟེན་མཆོད་བསྟོད། བདེ་གསལ་ངར་དང་ལྡན་པས་དམོད་པ་དྲག་སྔགས་སོ། །བདུན་པ་དབང་བཞི་དང་སྦྱར་བ་ནི། ཡབ་ཡུམ་ལྷའི་སྐུར་བསྐྱེད་པ་བུམ་དབང༌། སྦྱོར་བ་བྱེད་པ་གསང་དབང༌། བདེ་སྟོང་གི་ཉམས་ལ་གནས་པ་ཤེས་རབ་ཡེ་ཤེས་ཀྱི་དབང༌། མཐར་བློ་འདས་ཡེ་གྲོལ་ཏུ་ཤེས་པ་ཚིག་དབང་རིན་པོ་ཆེའོ། །བརྒྱད་པ་རིགས་ལྔ་དང་སྦྱར་བ་ནི། བདེ་སྟོང་གི་ངོ་བོ་འགྱུར་བ་མེད་པ་རྡོ་རྗེའི་རིགས། ཆགས་སེམས་དག་པ་པདྨའི་རིགས། ཡོན་ཏན་འབྱུང་བ་རིན་ཆེན་རིགས། ཕྲིན་ལས་འགྲུབ་པ་ལས་ཀྱི་རིགས། ཆོས་ཉིད་རྟོགས་པ་དེ་བཞིན་གཤེགས་པའི་རིགས་སོ། །དགུ་པ་ཡབ་ལྔ་དང་སྦྱར་བ་ནི། བདེ་སྟོང་གི་རྣམ་པར་སྦྱོར་བ་མཛད་པ་རྣམ་པར་སྣང་མཛད། ངོ་བོ་མི་འགྱུར་བས་མི་བསྐྱོད་པ། ཡོན་ཏན་འབྱུང་བས་རིན་ཆེན་འབྱུང་ལྡན། བདེ་བའི་སྣང་བ་ཚད་མེད་པས་སྣང་བ་མཐའ་ཡས། ཡེ་ཤེས་བཞི་འགྲུབ་པས་དོན་ཡོད་གྲུབ་པའོ། །བཅུ་པ་ཡུམ་ལྔ་དང་སྦྱར་བ་ནི། བྷ་ག་དང་རྡོ་རྗེ་སངས་རྒྱས་སྤྱན་མ། གཡོ་བ་དང་བསྐྱོད་པ་དམ་ཚིག་སྒྲོལ་མ། བསྐྱོད་པས་དྲོད་འབྱུང་བ་གོས་དཀར་མོ། ཐིག་ལེ་མཉམ་པས་མ་མ་ཀཱི། དེ་ཐམས་ཅད་མི་རྟོག་པའི་ཡེ་ཤེས་དབྱིངས་ཀྱི་དབང་ཕྱུག་མའོ། །བཅུ་གཅིག་པ་ཡེ་ཤེས་ལྔ་དང་སྦྱར་བ་ནི། ལྷ་དང་ཡེ་ཤེས་ངོ་བོ་གསུམ་དུ་གསལ་བས་མེ་ལོང་ཡེ་ཤེས། བྱེ་བྲག་ཕྱེད་པས་སོར་རྟོགས་ཡེ་ཤེས། ངོ་བོ་གཅིག་པས་མཉམ་ཉིད་ཡེ་ཤེས། ཆོས་སྐུར་རྟོགས་པས་ཆོས་དབྱིངས་ཡེ་ཤེས། ཕྲིན་ལས་གྲུབ་པས་བྱ་བ་གྲུབ་པའི་ཡེ་ཤེས་སོ། །བཅུ་གཉིས་པ་འབྱུང་བ་ལྔ་དང་སྦྱར་བ་ནི། བྷ་ག་དང་རྡོ་རྗེ་དངོས་སུ་གྲུབ་པས་ས། གཡོ་བས་རླུང༌། ཐིག་ལེ་ཆུ། དྲོད་མེ། མཐར་མི་རྟོག་པར་སྔོན་བཞིན་གནས་པ་ནམ་མཁའོ། །བཅུ་གསུམ་པ་ས་བཅུ་དང་སྦྱར་བ་ནི། ཡབ་ཡུམ་ཕན་ཚུན་མཐོང་བའི་དགའ་བ་སྐྱེས་པས་དང་པོ་རབ་ཏུ་དགའ་བ། ལྷའི་སྐུར་བསྐྱེད་པས་ཐ་མལ་གྱི་དྲི་མ་མེད་པས་ས་གཉིས་པ་དྲི་མ་མེད་པ། སྦྱོར་བ་བྱས་པས་ཐིག་ལེ་རྩ་ནང་དུ་ཀུན་ལ་ཁྱབ་པས་གསུམ་པ་འོད་བྱེད་པ། བདེ་བ་འབར་བས་བཞི་པ་འོད་འཕྲོ་བ། གསང་བར་ཐིག་ལེ་ཟིན་པས་ལྔ་པ་སྦྱང་དཀའ་བ། ཟིན་ནས་ཡེ་ཤེས་མྱོང་བས་དྲུག་པ་མངོན་དུ་གྱུར་པ། ལྡོག་ཅིང་བཀྲམ་པས་རིང་དུ་སོང་བ་སྟེ་བདུན་པ་རིང་སོང༌། དེ་ནས་བློ་བྲལ་དུ་གནས་པས་བརྒྱད་པ་མི་གཡོ་བ། དེ་ལས་བདེ་སྟོང་གི་ཡེ་ཤེས་ཉམས་སུ་མྱོང་བ་ནི་དགུ་པ་ལེགས་པའི་བློ་གྲོས། སྣང་བ་གང་ཤར་བདེ་སྟོང་དུ་གྲོལ་བ་ནི་ས་བཅུ་པ་ཆོས་ཀྱི་སྤྲིན་ནོ། །བཅུ་བཞི་པ་སྐུ་ལྔ་དང་སྦྱར་བ་ནི། ཡབ་ཡུམ་སྦྱོར་བ་བྱེད་པ་སྤྲུལ་པའི་སྐུ། ལྷའི་སྐུར་བསྐྱེད་པ་ལོངས་སྐུ། བདེ་སྟོང་གི་རྣམ་པར་ཤར་བ་ཆོས་སྐུ། ངོ་བོ་འཛིན་པ་ལས་གྲོལ་བ་ངོ་བོ་ཉིད་སྐུ། ཕྲིན་ལས་མཐའ་དག་གྲུབ་པས་མངོན་པར་བྱང་ཆུབ་པའི་སྐུའོ། །བཅོ་ལྔ་པ་རྒྱུད་སྡེ་གསུམ་དང་སྦྱར་བ་ནི། ཡབ་ཡུམ་བདེ་བ་མྱོང་བ་མའི་རྒྱུད། ཐིག་ལེ་གཟུང་འདྲེན་འགྲེམ་པ་ཕའི་རྒྱུད། བདེ་སྟོང་གི་ངོ་བོ་གཉིས་སུ་མེད་པ་གཉིས་སུ་མེད་པའི་རྒྱུད་དོ། །གཞན་ཡང་སྦྱོར་བ་བྱས་པའི་ཚེ། འཁོར་འདས་གཉིས་ཀའི་ས་བོན་འབྱུང་བས། འཁོར་འདས་གཉིས་ཀྱི་སྤྱི་གཞི་ཡིན་ནོ། །བདེ་བའི་ཡེ་ཤེས་ངང་ལ་རྩལ་སྦྱང་པས་སྡུག་བསྔལ་གྱི་འཁྲུལ་སྣང་ཐམས་ཅད་གྲོལ་བར་བྱེད་པའི་ལམ་ཡིན་ནོ། །སྟོང་པ་ཆོས་སྐུ། བདེ་བ་ལོངས་སྐུ། ཤུག་འབྱུང་མ་འགགས་པར་རང་གྲོལ་བ་སྤྲུལ་པའི་སྐུའོ། །སྐུ་གསུམ་དབྱེར་མི་ཕྱེད་པ་ནི་འབྲས་བུ་ཉིད་ཡིན་ནོ། །དགེ་སྡིག་རྩིས་གདབ་མེད་པ་ལྟ་བ། མྱོང་ཞིང་བརྗོད་དུ་མེད་པ་བསྒོམ་པ། ཞེན་མེད་ངང་དུ་མི་གཡོ་བར་སྤྱོད་པས་སྤྱོད་པ། བདེ་སྟོང་ངང་ལས་མི་འདའ་བ་དམ་ཚིག །དེ་ལས་སངས་རྒྱས་གཞན་ན་མེད་པས་ལྷུན་གྱིས་གྲུབ་པའི་འབྲས་བུ་ཡིན་ནོ། །རྡོ་རྗེ་དང་པདྨ་མཉམ་པར་སྦྱོར་བས་གཉིས་སུ་མེད་པའི་ཡེ་ཤེས། གཡོ་འགུལ་ཙམ་གྱིས་དགའ་བདེའི་ཡེ་ཤེས་དཔག་མེད་སྐྱེས་པས་ཐུགས་རྗེ་ཤུགས་འབྱུང་གི་ཡེ་ཤེས། དེ་ལྟར་ཡོན་ཏན་ཐམས་ཅད་གསལ་བར་གྱུར་ཀྱང་དེའི་དོན་ལ་བདག་འཛིན་མེད་པས་ན་ངོ་བོ་སྟོང་པའི་ཡེ་ཤེས། གཟུགས་སུ་གྲུབ་པ་ཡབ་ཀྱི་གསང་བ་ལས། རང་བཞིན་ངོ་བོ་མེད་པ་ཡུམ་གྱི་མཁའ་གསང་ཡིན་པས་སྣང་སྟོང་གཉིས་སུ་མེད་པའི་ཡེ་ཤེས། གཉིས་མེད་ཟང་ཐལ་གཡོ་ཞིང་སྤྱོད་པ་ནི་ལྷུན་གྲུབ་ཆེན་པོའི་ཡེ་ཤེས། བདེ་སྟོང་གསལ་ལ་འཛིན་པ་མེད་པས་ནི་གཟུང་འཛིན་རང་སར་གྲོལ་བའི་ཡེ་ཤེས། དེ་དག་ཐམས་ཅད་ཡབ་ཡུམ་གཉིས་སྦྱོར་གྱིས་གདན་ཐོག་གཅིག་གི་བདེ་བ་ལ་རྫོགས་པ་ཡིན་ནོ། །འཇམ་དཔལ་རྩ་རྒྱུད་ལས། འདོད་པའི་དོན་གྲུབ་དམ་པ་སྟེ། །ངན་སོང་ཐམས་ཅད་རྣམ་པར་སྦྱོངས། །ཞེས་གསུངས་སོ། །གསང་འདུས་ལས། སློང་མོ་བཟའ་ཞིང་མི་བཟའ་སྟེ། སློང་ལའང་དགའ་བར་མི་བྱའོ། །འདོད་པ་ཀུན་ལ་ལོངས་སྤྱོད་ཅིང༌། །སྔགས་ཀྱི་ཡན་ལག་མ་ཉམས་བཟླས། །ལུས་དང་ངག་དང་སེམས་དང་ནི། །བདེ་བར་གནས་ན་བྱང་ཆུབ་འཐོབ། །གཞན་དུ་དུས་མིན་འཆི་བ་དང༌། །དམྱལ་བར་ངེས་པར་བསྲེག་པར་འགྱུར། །ཞེས་དང༌། སངས་རྒྱས་བྱང་ཆུབ་སེམས་དཔའ་དང༌། །སྔགས་ཀྱི་སྤྱོད་པ་མཆོག་སྤྱོད་རྣམས། །ཆོས་མཆོག་མི་གཡོ་བརྙེས་པ་ཡང༌། །འདོད་པ་ཐམས་ཅད་བསྟེན་པས་སོ། །ཆགས་ཅན་ཡེ་ཤེས་འདོད་པ་ཡིས། །རྟག་ཏུ་འདོད་ཡོན་ལྔ་རྣམས་བསྟེན། །བྱང་ཆུབ་སེམས་དཔའ་མཉེས་པར་བྱ། །བྱང་ཆུབ་ཉི་མ་གསལ་བར་བྱ། །ཞེས་གསུངས་སོ། །དེ་ལྟ་བུའི་ཟབ་པའི་མན་ངག་འདི་ཉིད་ལ་མཁོ་བའི་གེགས་སེལ་དང་བོགས་འདོན་དམ་ཚིག་སོགས་ལོགས་ནས་ཀྱང་ཤེས་པར་གྱིས་ལ་ཉམས་ལེན་གནད་དུ་དྲིལ་བར་མཛོད་ཅིག །སྨྲས་པ། ཤིན་ཏུ་ཆེས་གསང་མྱུར་ལམ་གནད་ཀྱི་དོན། །ལྷན་སྐྱེས་བདེ་ཆེན་འོད་གསལ་ཆོས་སྐུའི་ཞལ། །མངོན་སུམ་མཇལ་བའི་ཕོ་ཉའི་གསང་ལམ་འདི། །ཐ་མལ་ཆགས་པ་ཁོ་ནའི་དབང་གྱུར་ངང༌། །བསགས་སྦྱང་ཕལ་གྱི་དོ་ཟླར་མ་བསྔོ་བར། །དགོས་མེད་ངོ་ཚའི་རྒྱ་ལས་ཡོངས་གྲོལ་མཛོད། །ཟབ་མོའི་གདམ་ངག་འདི་ལ་སྐུར་པ་འདེབས་བཞིན་དུ་ཉམས་སུ་ལེན་པ་མཁན་ཡོད་ན། དེ་ཡི་སྙིང་ཁྲག་གཟའ་མཆོག་ཆེན་པོས་རོལ་ཅིག་ར་ཧུ་ལ་ས་མ་ཡ་རཀྵ། ཅེས་པ་འདི་ནི་སློབ་བུ་པདྨ་རྣམ་རྒྱལ་སོགས་ཀྱིས་ནན་ཏན་ཆེན་པོས་བསྐུལ་ངོར། ཆོས་དབྱིངས་སྟོབས་ལྡན་རྡོ་རྗེས་རང་ལོ་ཉེར་དྲུག་གི་སྟེང༌། དབང་ཆེན་སྤྲེལ་གྱི་ལོར་དོག་རོང་གསང་ཆེན་སྒྲུབ་སྡེའི་གླིང་ནས་སྦྱར་བའི་ཡི་གེ་པ་ནི་བསྐུལ་བ་པོ་ཉིད་དོ། །རྗེ་བཙུན་མཁའ་འགྲོ་ཉི་མའི་རྒྱལ་མཚན་དང༌། མཁའ་འགྲོ་ཟླ་བའི་གཙུག་རྒྱན་གཉིས་ཀྱིས་སྤར་དུ་བསྒྲུབས་སོ། ། ཆོས་ཉིད་བར་དོའི་གསལ་འདེབས་ཐོས་གྲོལ་ཆེན་མོ། ཀརྨ་གླིང་པས།ཟབ་ཆོས་ཞི་ཁྲོ་དགོངས་པ་རང་གྲོལ་ལས་ཆོས་ཉིད་བར་དོའི་གསལ་འདེབས་ཐོས་གྲོལ་ཆེན་མོ་ཞེས་བྱ་བ་བཞུགས་སོ༔ ཆོས་སྐུ་སྣང་བ་མཐའ་ཡས་འོད་དཔག་མེད༔ ལོངས་སྤྱོད་རྫོགས་སྐུ་པདྨ་ཞི་ཁྲོའི་ལྷ༔ པདྨ་འབྱུང་གནས་སྤྲུལ་སྐུ་འགྲོ་བའི་མགོན༔ སྐུ་གསུམ་བླ་མ་རྣམས་ལ་ཕྱག་འཚལ་ལོ༔ རྣལ་འབྱོར་འབྲིང་རྣམས་བར་དོར་གྲོལ་བའི་ཐབས༔ ཐོས་གྲོལ་ཆེན་མོ་འདི་ལ་དོན་གསུམ་སྟེ༔ སྔོན་འགྲོ་དངོས་གཞི་རྗེས་དང་གསུམ་ཡིན་ནོ༔ དང་པོ་སྔོན་འགྲོ་ལུས་ཅན་གྲོལ་བ་ཡི༔ ཁྲིད་ཀྱི་རིམ་པ་ཐོག་མར་ཉམས་སུ་ལོངས༔ དབང་པོ་རབ་རྣམས་ཁྲིད་ཀྱིས་ངེས་པར་གྲོལ༔ དེ་མ་གྲོལ་ན་འཆི་ཁའི་བར་དོ་ལ༔ འཕོ་བ་དྲན་པ་རང་གྲོལ་ཉམས་སུ་ལོངས༔ དེས་ནི་རྣལ་འབྱོར་འབྲིང་རྣམས་ངེས་པར་གྲོལ༔ དེས་མ་གྲོལ་ན་ཆོས་ཉིད་བར་དོ་ལ༔ ཐོས་གྲོལ་ཆེན་མོ་འདི་ལ་ནན་ཏན་བྱོས༔ དེ་ལ་དང་པོ་རྣལ་འབྱོར་བས་འཆི་བ་བརྟག་པ་རྣམས་འཆི་ལྟས་མཚན་མ་རང་གྲོལ་ལྟར་བརྟག་པར་བྱའོ༔ དེས་ན་ངེས་པར་འཆི་བའི་རྟགས་ཚང་བའི་ཚེ༔ འཕོ་བ་དྲན་པ་རང་གྲོལ་གདབ་པར་བྱའོ༔ དེས་འཕོ་བ་ཐེབས་ན་ནི་ཐོས་གྲོལ་བཀླག་མི་དགོས༔ གལ་ཏེ་འཕོ་བ་མ་ཐེབས་ན་ཐོས་གྲོལ་འདི་རོའི་རྩར་སྒྲ་དག་ལ་གསལ་བར་བཀླག་པར་བྱའོ༔ རོ་མེད་ན་ཚེ་འདས་ཀྱི་མལ་སའམ༔ འདུག་སར་བསྡད་ལ་བདེན་པའི་སྟོབས་བརྗོད་དེ༔ རྣམ་ཤེས་བཀུག་ལ་མདུན་དུ་ཉན་པར་དམིགས་ཤིང་བཀླག་པར་བྱའོ༔ དེའི་དུས་སུ་ཉེ་དུ་དང་སེམས་ལ་བརྩེ་བའི་མཛའ་བཤེས་ཚོས་ངུ་སྐད་དང་༔ སྨྲེ་སྔགས་ཡེ་ནས་འདོན་དུ་མི་རུང་བས་དམ་བསྒྲག་གོ༔ རོ་ཡོད་ན་ཕྱི་དབུགས་ཆད་ནང་དབུགས་མ་ཆད་པའི་མཚམས་སུ༔ བླ་མའམ༔ མཆེད་གྲོགས་སམ༔ དད་པ་ཐོབ་པ་ཡིད་མཐུན་པའི་གྲོགས་མཆེད་ལ་སོགས་པས་རྣ་བར་མཆུས་མ་རེག་པ་ཙམ་གཏད་ལ༔ ཐོས་གྲོལ་ཆེན་མོ་འདི་བཀླགས་པར་བྱའོ༔ དེ་ལ་ཐོས་གྲོལ་དངོས་བཤད་པ་ནི༔ དཀོན་མཆོག་གསུམ་ལ་མཆོད་པ་འབྱོར་ན་རྒྱ་ཆེན་པོ་ཕུལ༔ མ་འབྱོར་ན་དམིགས་པའི་རྟེན་གང་འབྱོར་བཤམས་ལ༔ ཡིད་ཀྱིས་དཔག་ཏུ་མེད་པ་སྤྲུལ་ལ་མཆོད༔ དེ་ནས་སངས་རྒྱས་དང་བྱང་ཆུབ་སེམས་དཔའ་རྣམས་ར་མདའ་སྦྲན་པའི་སྨོན་ལམ་དེ་ལན་བདུན་ནམ་གསུམ་འདོན༔ དེ་ནས་བར་དོའི་འཇིགས་སྐྱོབ་མའི་སྨོན་ལམ་དང་༔ བར་དོ་འཕྲང་སྒྲོལ་གྱི་སྨོན་ལམ་དང་༔ བར་དོའི་རྩ་ཚིག་རྣམས་དག་པར་དབྱངས་དང་བཅས་ཏེ་གདབ་ལ༔ དེ་ནས་ཐོས་གྲོལ་ཆེན་མོ་འདི་ལན་བདུན་ནམ་གསུམ་སོགས་སྐབས་དང་སྦྱར་ལ་བཀླག་པ་ནི༔ འཆི་ཁ་བར་དོ་ལ་འོད་གསལ་ངོ་སྤྲོད་པ་དང་༔ ཆོས་ཉིད་བར་དོ་ལ་ངོ་སྤྲོད་གསལ་འདེབས་ཆེན་མོ་གདབ་པ་དང་༔ སྲིད་པ་བར་དོ་ལ་མངལ་སྒོ་དགག་གདམ་བསྟན་པ་དང་གསུམ་མོ༔ དང་པོ་འཆི་ཁ་བར་དོར་འོད་གསལ་ངོ་སྤྲོད་པ་ནི༔ འདིར་གང་ཟག་གོ་བ་བཟང་ཡང་ངོ་མ་འཕྲོད་པ་དང་༔ འཕྲོད་ཀྱང་གོམས་འདྲིས་ཆུང་བ་རྣམས་དང་༔ སོ་སོའི་སྐྱེ་བོ་ཉམས་ཁྲིད་ཞུ་མྱོང་བའི་རིགས་ཐམས་ཅད་ལ་འདི་གདབ་པས༔ གཞིའི་འོད་གསལ་ལ་ངོ་འཕྲོད་དེ་བར་དོ་མེད་པར་ཡར་གྱི་ཟང་ཐལ་དུ་ཆོས་སྐུ་སྐྱེ་བ་མེད་པ་ཐོབ་བོ༔ གདབ་ལུགས་ནི༔ རང་གི་ཁྲིད་ཞུས་པའི་རྩ་བའི་བླ་མ་འཛོམས་ན་མཆོག་ཡིན་ནོ༔ དེ་མ་འཛོམས་ན་མཆེད་གྲོགས་དམ་ཚིག་གཅིག་པའམ༔ དེ་ཡང་མ་འཛོམས་ན་ཆོས་བརྒྱུད་གཅིག་པའི་བཤེས་གཉེན་དམ་པའམ༔ དེ་རྣམས་གང་ཡང་མ་འཛོམས་ན༔ ཡི་ག་ེའདི་སྒྲ་དག་ལ་ཚིག་གསལ་བར་འདོན་ཤེས་པ་གཅིག་གིས་ཚར་མང་དུ་ཀློག་གོ༔ དེས་བླ་མས་ངོ་སྤྲད་པའི་དོན་དྲན་ནས་དེ་མ་ཐག་ཏུ་གཞིའི་འོད་གསལ་ངོ་འཕྲོད་དེ་གྲོལ་བར་ཐེ་ཚོམ་མེད་དོ༔ གདབ་པའི་དུས་ནི་ཕྱི་དབུགས་ཆད་ནས༔ རླུང་ཡེ་ཤེས་ཀྱི་དྷཱུ་ཏིར་ཐིམ་པ་དང་༔ ཤེས་པ་འོད་གསལ་སྤྲོས་བྲལ་དུ་ལྷག་གིས་འཆར་རོ༔ དེ་ནས་རླུང་ལོག་སྟེ་རྩ་གཡས་གཡོན་དུ་བྲོས་ནས་བར་དོའི་སྣང་བ་ལམ་གྱིས་འཆར་བས་རྩ་གཡས་གཡོན་དུ་མ་ཤོར་བའི་བར་དེར་གདབ་པའོ༔ ཡུན་ནི་ཕྱི་དབུགས་ཆད་ནང་དབུགས་གནས་ཀྱི་བར་དེར་ཟན་གཅིག་ཟ་ཡུན་ཙམ་ཞིག་ཡིན་ནོ༔ གདབ་ལུགས་ནི༔ དབུགས་ཆད་ལ་ཁད་པའི་དུས་ནས་འཕོ་བ་ཐེབས་ན་རབ༔ མ་ཐེབས་ན་འདི་སྐད་བཤད་དོ༔ ཀྱཻ་རིགས་ཀྱི་བུ་ཆེ་གེ་མོ་ཁྱོད་ད་ནི་ལམ་བཙལ་བའི་དུས་ལ་བབས་པར་འདུག་པས༔ ཁྱེད་རང་དབུགས་ཆད་མ་ཁད་དུ་བར་དོ་དང་པོའི་འོད་གསལ་ཞེས་བྱ་བ༔ སྔར་བླ་མས་ངོ་སྤྲད་པའི་དོན་དེ་ཕྱི་དབུགས་ཆད་པ་དང་༔ ཆོས་ཉིད་ནམ་མཁའ་ལྟར་སྟོང་རྗེན་ནེ་བ༔ གསལ་སྟོང་མཐའ་དབུས་མེད་པའི་རིག་པ་དྲི་མེད་རྗེན་པ་ཞིག་འཆར་ནས་འོང་ངོ་༔ དེའི་དུས་སུ་ཁྱོད་རང་གིས་ངོ་ཤེས་པར་གྱིས་ལ་དེའི་ངང་ལ་ཞོག་ཅིག༔ ངས་ཀྱང་དེའི་དུས་སུ་ངོ་སྤྲོད་དོ༔ ཞེས་ཕྱི་དབུགས་མ་ཆད་པའི་གོང་ནས་རྣ་བར་ལན་མང་དུ་བཤད་ལ་ཡིད་ལ་འཇག་ཏུ་བཅུག་གོ༔ དེ་ནས་ཕྱི་དབུགས་ཆད་པའི་གྲབས་འདུག་ན༔ གློ་གཡས་པ་ས་ལ་ཕབས་ནས་སེངྒེའི་འདུག་སྟངས་དང་བཅས་ཏེ༔ རྩ་རྦ་རླབས་བཙིར་བ་ཡིན་ཏེ༔ གཉིད་ལོག་རྩ་གཉིས་འཕར་འཕྲོ་ཆད་ནས་དྲག་ཏུ་མནན་ནོ༔ དེས་རླུང་དྷཱུ་ཏིར་ཚུད་ནས་ཕྱིར་ལོག་མི་ཤེས་ཏེ༔ ཚངས་བུག་གི་ལམ་དུ་ཐོན་ངེས་སོ༔ ངོ་སྤྲོད་ཀྱང་འདིའི་དུས་སུ་གདབ་བོ༔ འདིའི་དུས་སུ་བར་དོ་དང་པོ་ཆོས་ཉིད་འོད་གསལ་ཞེས་ཀྱང་བྱ༔ ཆོས་སྐུའི་དགོངས་པ་ཕྱིན་ཅི་མ་ལོག་པ་ཅིག་འགྲོ་བ་ཀུན་གྱི་རྒྱུད་ལ་འཆར་ཏེ༔ དེ་ཡང་ཕྱི་དབུགས་ཆད་ནས༔ ནང་དབུགས་མ་ཆད་པའི་བར་དེར་རླུང་ཨ་ཝ་དྷཱུ་ཏིར་ཐིམ་པའི་དུས་ཡིན་ཏེ༔ དེ་ལ་ཕལ་བས་ནི་རྣམ་ཤེས་བརྒྱལ་ཟེར་རོ༔ ཡུན་ནི་ངེས་པ་མེད་དེ༔ རྟེན་བཟང་ངན་དང་༔ རྩ་རླུང་གི་རིམ་པ་ཡིན་ཏེ༔ ཉམས་ལེན་དུམ་རེ་ཡོད་པ་དང་༔ ཞི་གནས་བརྟན་པོ་ཡོད་པ་དང་༔ རྩ་བཟང་བའི་རིགས་རྣམས་ནི་ཡུན་རིང་དུ་གནས་པ་ཡང་ཡོད་དོ༔ དེ་ལ་ནི་ངོ་སྤྲོད་འདི་ནན་ཏན་བསྐྱར་རོ༔ དབང་པོའི་བུ་གར་ཆུ་སེར་མ་ཐོན་གྱི་བར་དུ་བསྐྱར་ལ་གདབ་བོ༔ སྡིག་པོ་ཆེ་དང་རྩ་ངན་པའི་རིགས་ལ་ནི༔ ཡུད་ཙམ་རེ་སེ་གོལ་རེའི་ཡུན་ལས་མི་གནས་པ་འང་ཡོད་དོ༔ ལ་ལར་ཟན་ཟ་ཡུན་ཙམ་ལས་མི་གནས་པ་ཡང་ཡོད་དེ༔ མདོ་རྒྱུད་ཕལ་ཆེར་ལས་ཞག་ཕྱེད་དང་བཞིར་བརྒྱལ་གསུངས་པས་ཕལ་ཆེར་ཞག་ཕྱེད་དང་བཞིར་གནས་པས་འོད་གསལ་ངོ་སྤྲོད་འདི་ལ་ནན་ཏན་བྱའོ༔ གདབ་ལུགས་ནི་རང་གི་ཐུབ་ན་རང་གིས་གོང་ནས་འཕེན་པ་གཏང་ངོ་༔ རང་གིས་མ་ཐུབ་ན་བླ་མའམ༔ སློབ་མ་འམ༔ མཆེད་གྲོགས་བློ་སེམས་འདྲེས་པ་གཅིག་རྩར་བཞག་སྟེ༔ དེས་ད་ནི་ས་ཆུར་ཐིམ་པའི་རྟགས་གདབ་པོ༔ ཞེས་པ་རྣམས་རིམ་པ་ལྟར་གསལ་གདབ་ལ༔ རྟགས་རྣམས་རིམ་པར་རྫོགས་ལ་ཁད་པ་དེར༔ སེམས་བསྐྱེད་འདི་ལྟར་ཕོག་པར་བྱའོ༔ ཀྱེ་རིགས་ཀྱི་བུ་ཞེས་པའམ། བླ་མ་ཡིན་ན༔ དྲུང་པ་ལགས༔ ཐུགས་བསྐྱེད་མ་ཡེངས་པར་མཛད་འཚལ༔ ཞེས་སྙན་དུ་སྐད་ཆུང་ངུས་ཞུ༔ མཆེད་གྲོགས་དང་གཞན་མིའི་མིང་ནས་འབོད་ལ་འདི་སྐད་དོ༔ ཀྱཻ་རིགས་ཀྱི་བུ༔ ད་ནི་འཆི་བ་ཞེས་བྱ་བ་དེ་འོངས་ནས་འདུག་པས་ཁྱོད་རང་སེམས་བསྐྱེད་འདི་ལྟར་དུ་མཛོད་ཅིག༔ ཀྱེ་མ་བདག་ནི་འཆི་བའི་དུས་ལ་བབས་ནས་འདུག་གི༔ ད་རེས་འཆི་བ་འདི་ལ་བརྟེན་ནས་བྱམས་སྙིང་རྗེ་བྱང་ཆུབ་ཀྱི་སེམས་འབའ་ཞིག་གིས་ཐུགས་བསྐྱེད་དེ༔ ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱའོ༔ སྙམ་དུ་སེམས་བསྐྱེད་པ་དང་༔ ཁྱད་པར་དུ་ད་རེས་སེམས་ཅན་ཐམས་ཅད་ཀྱི་དོན་དུ་འཆི་བ་འོད་གསལ་ཆོས་སྐུར་ངོ་ཤེས་པར་བྱ་སྟེ༔ དེའི་ངང་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས་སེམས་ཅན་ཐམས་ཅད་ཀྱི་དོན་བྱའོ༔ དེ་མ་ཐོབ་ཀྱང་བར་དོ་ལ་བར་དོར་ངོ་ཤེས་པར་བྱས་ལ༔ བར་དོ་ཟུང་འཇུག་ཕྱག་རྒྱ་ཆེན་པོའི་སྐུ་མངོན་དུ་བྱས་ནས༔ གང་ལ་གང་འདུལ་གྱི་སྣང་བས་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་དོན་བྱའོ་སྙམ་པའི་སེམས་བསྐྱེད་ཀྱི་འདུན་དང་མ་བྲལ་བར་ཁྱེད་རང་སྔར་གང་ལ་གོམས་པའི་གདམས་ངག་དེའི་ཉམས་ལེན་དྲན་པར་མཛོད་ཅིག༔ ཅེས་རྣ་བར་མཆུ་གཏད་ལ་ཚིག་གསལ་བར་བཤད་དེ༔ སྐད་ཅིག་ཀྱང་ཡེངས་སུ་མི་འཇུག་པར་ཉམས་ལེན་གསལ་གདབ་བོ༔ དེ་ནས་ཕྱི་དབུགས་ཆད་ཚར་བ་དང་༔ རྩ་གཉིད་ལོག་དྲག་ཏུ་མནན་ལ་ཚིག་གི་གསལ་འདི་སྐད་གདབ་བོ༔ བླ་མའམ་རང་ལས་ཆེ་བའི་བཤེས་གཉེན་པ་ཡིན་ན༔ དྲུང་པ་ལགས་རང་རེ་ལ་ད་ལྟ་གཞིའི་འོད་གསལ་འཆར་ནས་ཡོད་དེ༔ ངོ་ཤེས་པར་གྱིས་ཤིག༔ ཉམས་ལེན་གྱི་ཐོག་ཏུ་འཇོག་པར་མཛོད་ཅིག༔ ཞེས་ཞུའོ༔ གཞན་ཐམས་ཅད་ལ་འདི་ལྟར་ངོ་སྤྲད་དེ༔ ཀྱཻ་རིགས་ཀྱི་བུ་ཆེ་གེ་མོ་ཉོན་ཅིག༔ ཁྱོད་ལ་ད་ལྟ་ཆོས་ཉིད་དག་པའི་འོད་གསལ་ཤར་ནས་ཡོད་དོ༔ ངོ་ཤེས་པར་གྱིས་ཤིག༔ ཀྱེ་རིགས་ཀྱི་བུ་ཁྱོད་རང་གི་ད་ལྟའི་ཤེས་རིག་གི་ངོ་བོ་སང་ངེ་བ་འདི་དངོས་པོ་དང་མཚན་མ་ཁ་དོག་ཅིའི་ངོ་བོར་མ་གྲུབ་པར་སྟོང་སང་ངེ་བ་འདུག་པ་འདི་ཀ་ཆོས་ཉིད་ཀུན་ཏུ་བཟང་མོ་ཡིན་ནོ༔ ཁྱོད་རང་གི་ཤེས་རིག་སྟོང་བརྡོ་ཙམ་ནས་སྟོང་པ་ཕྱལ་ཆད་དུ་མ་སོང་བར་རང་གི་ཤེས་རིག་མ་འགགས་པར་སལ་ལེ་སང་ངེ་ཝ་ལེ་བ༔ འདི་ཀ་རིག་པ་སངས་རྒྱས་ཀུན་ཏུ་བཟང་པོ་ཡིན་ནོ༔ རང་གི་རིག་པ་དངོས་པོ་ཅིར་ཡང་མ་གྲུབ་པའི་ངོ་བོ་སྟོང་པ་དང་རང་གི་ཤེས་རིག་ཝ་ལེར་གསལ་བར་འདུག་པ་འདི་གཉིས་དབྱེར་མི་ཕྱེད་པར་འདུག་པ་འདི་ཀ་སངས་རྒྱས་ཆོས་ཀྱི་སྐུ་ཡིན་ནོ༔ རང་གི་རིག་པ་གསལ་སྟོང་དབྱེར་མེད་འོད་ཀྱི་ཕུང་པོ་ཆེན་པོར་བཞུགས་པ་འདི་ལ་སྐྱེ་འཆི་མེད་པས་སངས་རྒྱས་འོད་མི་འགྱུར་བ་འདི་ཀ་ཡིན་ནོ༔ དེ་ངོ་ཤེས་པས་ཆོག་གོ༔ རང་གི་ཤེས་རིག་གི་ངོ་བོ་སང་ངེ་བ་འདི་སངས་རྒྱས་སུ་ངོ་ཤེས་ནས་རང་གི་རིག་པ་ལ་རང་གི་ལྟ་བ་དེ༔ སངས་རྒྱས་ཀྱི་དགོངས་པ་ལ་འཇོག་པ་ཡིན་ནོ༔ ཅེས་ལན་གསུམ་མམ༔ བདུན་གྱི་བར་དུ་སྒྲ་དག་ལ་གསལ་བར་བརྗོད་དོ༔ དེས་དང་པོ་སྔར་བླ་མས་ངོ་སྤྲད་པ་དྲན༔ གཉིས་པས་རང་རིག་རྗེན་པ་འོད་གསལ་དུ་ངོ་འཕྲོད༔ གསུམ་པས་རང་ངོ་ཤེས་ནས་ཆོས་སྐུ་འདུ་འབྲལ་མེད་པར་གྱུར་ཏེ་གྲོལ་བར་ངེས་སོ༔ དེས་འོད་གསལ་དང་པོ་ལ་ངོ་འཕྲོད་དེ་གྲོལ་ལོ༔ ཡང་གལ་ཏེ་འོད་གསལ་དང་པོ་ལ་ངོས་མ་ཟིན་དོགས་ན༔ ཡང་འོད་གསལ་གཉིས་པ་ཞེས་བྱ་བ་འཆར་ཏེ༔ དེ་ཡང་དུས་ནི་ཕྱི་དབུགས་ཆད་ནས་ཟན་གཅིག་ཟ་ཡུན་ལྷག་ཙམ་ཅིག་ནས་འོང་ངོ་༔ ལས་བཟང་ངན་གྱིས་རྩ་གཡས་གཡོན་གང་རུང་གཅིག་ཏུ་རླུང་ཤོར་ནས༔ སྒོ་གང་རུང་ཞིག་ནས་ཐོན་ཏེ་ཤེས་པ་གསལ་ལམ་གྱིས་འོང་ངོ་༔ དེ་ཡང་ཟན་གཅིག་ཟ་ཡུན་ཟེར་ཡང་རྩ་བཟང་ངན་དང་༔ ཉམས་ལེན་ཡོད་མེད་དང་བསྟུན་ནོ༔ དེའི་ཚེ་རྣམ་ཤེས་ཕྱིར་ཐོན་པ་དང་ཤི་བ་ཡིན་ནམ་མ་ཤི་བ་ཡིན་ནམ་སྙམ་དུ་ངོ་མི་ཤེས༔ ཉེ་དུའི་འབྲེལ་བ་སྔར་བཞིན་དུ་མཐོང་ནས་འོང་༔ ངུ་འབོད་ཀྱང་ཐོས༔ ལས་ཀྱི་འཁྲུལ་སྣང་དྲག་པོ་ཡང་མ་ཤར༔ གཤིན་རྗེའི་འཇིགས་སྐྲག་ཀྱང་མ་སླེབ་པའི་བར་དེར༔ ཡང་གདམས་ངག་གདབ་སྟེ༔ དེ་ལ་རྫོགས་རིམ་པ་དང་༔ བསྐྱེད་རིམ་པ་གཉིས་སོ༔ རྫོགས་རིམ་པ་ཡིན་ན་མིང་ནས་ལན་གསུམ་འབོད་ལ༔ གོང་གི་འོད་གསལ་ངོ་སྤྲོད་དེ་ཀ་བསྐྱར་ལ་གདབ་བོ༔ བསྐྱེད་རིམ་པ་ཡིན་ན་ཁོ་རང་གི་ལྷ་གང་ཡིན་དེའི་སྒོམ་ཁོག་དང་མངོན་རྟོགས་བཀླགས་ཏེ༔ ཀྱཻ་རིགས་ཀྱི་བུ༔ ཁྱེད་རང་གི་ཡི་དམ་འདི་སྒོམས་ཤིག༔ མ་ཡེངས་ཤིག༔ འདུན་པ་དྲག་པོ་ཡི་དམ་ལ་གཏོད་ཅིག༔ སྣང་ལ་རང་བཞིན་མེད་པ་ཆུ་ནང་གི་ཟླ་བ་ལྟར་སྒོམས་ཤིག༔ གདོས་པོ་ཅན་དུ་མ་སྒོམས་ཤིག༔ ཅེས་གསལ་གདབ་བོ༔ སྐྱེ་བོ་ཐ་མལ་བ་ཡིན་ན༔ ཇོ་བོ་ཐུགས་རྗེ་ཆེན་པོ་སྒོམས་ཤིག༔ ཅེས་ངོ་སྤྲོད་དོ༔ དེ་ལྟར་ངོ་སྤྲོད་པས་བར་དོ་ངོས་མི་ཟིན་ངེས་པ་རྣམས་ཀྱང་ཟིན་པར་ཐེ་ཚོམ་མེད་དོ༔ དེ་ཡང་གསོན་པོའི་དུས་སུ་བླ་མའི་ངོ་སྤྲད་ཀྱང་གོམས་འདྲིས་ཆུང་ན་བར་དོ་རང་གིས་གསལ་མི་ཐུབ་པས༔ བླ་མའམ་མཆེད་གྲོགས་ཀྱིས་ངེས་པར་གསལ་གདབ་དགོས་སོ༔ ཡང་གོམས་འདྲིས་ཡོད་ཀྱང་འཆི་ཁར་ནད་གཅོད་དྲག་པོས་འཁྲུལ་ནས་དྲན་པ་མི་ཟིན་པའི་རིགས་ལ་གདམས་པ་འདི་ཅིས་ཀྱང་དགོས་སོ༔ སྔར་ལམ་གྱི་གོམས་འདྲིས་ཡོད་ཀྱང་སྡོམ་པ་ཤོར་བ་དང་རྩ་བའི་དམ་ཚིག་ཉམས་ནས་ངན་སོང་དུ་འགྲོ་བའི་རིགས་ལ་འདི་ཤིན་ཏུ་ནས་ཀྱང་དགོས་སོ༔ བར་དོ་དང་པོ་ལ་ཐེབས་ན་རབ༔ དེ་ལ་མ་ཐེབས་ན་བར་དོ་གཉིས་པ་ལ་གསལ་གདབ་པས་རིག་པ་སད་ནས་གྲོལ་བ་ཡིན༔ དེ་ཡང་བར་དོ་གཉིས་པ་ལ་མ་དག་པའི་སྒྱུ་ལུས་ཞེས་བྱ་བ་ཤི་བའམ་མ་ཤི་ངོ་མ་ཤེས་པའི་ཤེས་པ་གསལ་ལམ་མེ་བ་གཅིག་འོང་༔ དེའི་དུས་སུ་དེར་གདམས་པ་དེ་ཐེབས་ནས་ཆོས་ཉིད་མ་བུ་འཕྲད་ནས་ལས་ཀྱིས་ཁ་བསྒྱུར་དུ་མེད་དེ༔ དཔེར་ན་ཉི་མའི་འོད་ཀྱིས་མུན་པ་བཅོམ་པ་བཞིན་དུ་ལམ་གྱི་འོད་གསལ་གྱིས་ལས་ཀྱི་ནུས་པ་བཅོམ་ནས་གྲོལ་བ་ཡིན་ནོ༔ དེ་ཡང་བར་དོ་གཉིས་པ་ཞེས་བྱ་བ་ནི་ཡིད་ཀྱི་ལུས་སུ་ལམ་གྱིས་འཆར་བ་ཡིན་ཏེ༔ ཤེས་པ་སྔར་བཞིན་དུ་མཐོང་ཡུལ་དུ་འཁོར་རོ༔ དེའི་དུས་སུ་གདམས་ངག་འདི་ཐེབས་ན་དོན་ཀུན་འགྲུབ་སྟེ༔ ད་རུང་ལས་ཀྱི་འཁྲུལ་སྣང་མ་ཤར་བས་གང་དུ་ཡང་བསྒྱུར་དུ་བཏུབ་བོ༔ དེ་ལྟར་གཞིའི་འོད་གསལ་ལ་ངོ་མ་འཕྲོད་ཀྱང་༔ བར་དོ་གཉིས་པའི་འོད་གསལ་ལ་ངོ་འཕྲོད་དེ་གྲོལ་ལོ༔ དེས་ཀྱང་མ་གྲོལ་ན་དེ་ནས་བར་དོ་གསུམ་པ་ཡང་ཟེར༔ ཆོས་ཉིད་ཀྱི་བར་དོ་ཤར་ཏེ་བར་དོ་གསུམ་པ་ལས་ཀྱི་འཁྲུལ་སྣང་བྱ་བ་འཆར་དུ་འོང་བས༔ དེའི་དུས་སུ་ཆོས་ཉིད་བར་དོའི་ངོ་སྤྲོད་ཆེན་མོ་བཀླག་པ་གལ་ཆེ་སྟེ༔ སྟོབས་དང་ཕན་ཡོན་ཤིན་ཏུ་ཆེའོ༔ དེ་ཡང་རྩ་ན་ཉེ་དྲུང་གིས་ངུ་སྐད་དང་སྨ་ྲེསྔགས་བཏོན༔ ཟས་སྐལ་བཅད༔ གོས་བཤུས༔ མལ་ས་ཕྱགས༔ རང་གིས་ཁོང་རྣམས་མཐོང་ཡང་ཁོང་རྣམས་ཀྱིས་རང་མ་མཐོང་༔ ཁོང་རྣམས་ཀྱིས་རང་ལ་བོས་པ་ཐོས་ཀྱང་རང་གི་བོས་པ་ཁོང་གིས་མ་ཐོས་པས་སྙིང་མི་དགའ་ཕྱད་དེ་འགྲོ༔ དེའི་དུས་སུ་སྒྲ་འོད་ཟེར་གསུམ་གྱི་སྣང་བ་ཤར་ནས་འཇིགས་སྐྲག་སྔངས་གསུམ་གྱིས་བརྒྱལ་ནས་འོང་བས་དེའི་དུས་སུ་ཆོས་ཉིད་བར་དོའི་ངོ་སྤྲོད་ཆེན་མོ་གདབ་པར་བྱ་སྟེ༔ ཚེ་འདས་ཀྱི་མིང་ནས་འབོད་ལ་སྒྲ་དག་ལ་གསལ་བར་འདི་སྐད་བཤད་དོ༔ ཀྱཻ་རིགས་ཀྱི་བུ་མ་ཡེངས་པར་འདུན་པ་དྲག་པོས་ཉོན་ཅིག༔ བར་དོ་ནི་རྣམ་པ་དྲུག་ཡིན་ཏེ༔ གང་ཞེ་ན༔ རང་བཞིན་སྐྱེ་གནས་ཀྱི་བར་དོ་དང་༔ རྨི་ལམ་གྱི་བར་དོ་དང་༔ ཏིང་ང་ེའཛིན་བསམ་གཏན་གྱི་བར་དོ་དང་༔ འཆི་ཁའི་བར་དོ་དང་༔ ཆོས་ཉིད་ཀྱི་བར་དོ་དང་༔ ལུགས་འབྱུང་སྲིད་པའི་བར་དོ་དང་དྲུག་གོ༔ ཀྱེ་རིགས་ཀྱི་བུ་ཁྱོད་ལ་ནི་བར་དོ་གསུམ་འབྱུང་སྟེ༔ འཆི་ཁའི་བར་དོ་དང་༔ ཆོས་ཉིད་བར་དོ་དང་༔ སྲིད་པ་བར་དོ་དང་གསུམ་འཆར་བ་ལས༔ ཁར་སང་ཕན་ཆད་འཆི་ཁའི་བར་དོ་ལ་ཆོས་ཉིད་འོད་གསལ་ཤར་ཡང་ཁྱོད་ཀྱིས་ངོས་མ་ཟིན་པས༔ འདིར་འཁྱམས་དགོས་བྱུང་བ་ཡིན་ནོ༔ ད་ནི་ཁྱེད་ལ་ཆོས་ཉིད་ཀྱི་བར་དོ་དང་༔ སྲིད་པའི་བར་དོ་དང་གཉིས་འབྱུང་སྟེ༔ བདག་གིས་ངོ་སྤྲད་པ་རྣམས་ཁྱེད་རང་མ་ཡེངས་པར་ངོས་ཟིན་པར་གྱིས་ཤིག༔ ཀྱེ་རིགས་ཀྱི་བུ་ད་ནི་འཆི་བ་ཞེས་བྱ་བ་དེ་སླེབས་པ་ཡིན་ནོ༔ འཇིག་རྟེན་འདི་ནས་ཕ་རོལ་ཏུ་འགྲོ་སྟེ༔ ཁྱོད་གཅིག་པུ་མ་ཡིན་ཏེ༔ ཀུན་ལ་འབྱུང་བས་ཚེ་འདི་ལ་ཆགས་པ་དང་ཞེན་པ་མ་བྱེད་ཅིག༔ ཆགས་པ་དང་ཞེན་པ་བྱས་ཀྱང་སྡོད་དབང་ནི་མེད༔ ཁྱོད་རང་འཁོར་བར་འཁྱམས་པ་ལས་མི་འོང་༔ མ་ཆགས་ཤིག༔ མ་ཞེན་ཅིག༔ དཀོན་མཆོག་གསུམ་རྗེས་སུ་དྲན་པར་གྱིས་ཤིག༔ ཀྱེ་རིགས་ཀྱི་བུ༔ ཆོས་ཉིད་བར་དོའི་སྣང་བ་འཇིགས་སྐྲག་ཇི་ལྟར་ཤར་ནས་བྱུང་ཡང་༔ ཁྱོད་རང་ཚིག་འདི་མ་བརྗེད་པར་གྱིས་ལ་ཚིག་དོན་ཡིད་ལ་དྲན་བཞིན་དུ་སོངས་ཤིག༔ དེས་ངོ་འཕྲོད་པའི་གནད་ཡོད་དོ༔ ཀྱེ་མ་བདག་ལ་ཆོས་ཉིད་བར་དོ་འཆར་དུས་འདིར༔ ཀུན་ལ་སྔངས་སྐྲག་འཇིགས་སྣང་སྤངས་བྱས་ནས༔ གང་ཤར་རང་སྣང་རིག་པ་ངོ་ཤེས་བྱ༔ བར་དོའི་སྣང་ཚུལ་ཡིན་པར་ཤེས་པར་བྱ༔ དོན་ཆེན་འགག་ལ་ཐུག་པའི་དུས་ཚོད་འདིར༔ རང་སྣང་ཞི་ཁྲོའི་ཚོགས་ལ་འཇིགས་མི་བྱ༔ དེ་སྐད་ངག་ནས་ལྷང་ལྷང་བརྗོད་ལ་དོན་ཡིད་ལ་དྲན་བཞིན་དུ་སོངས་ཤིག༔ དེས་འཇིགས་སྐྲག་གི་སྣང་བ་ཅི་ཤར་ཡང་རང་སྣང་དུ་ངེས་པར་ངོ་འཕྲོད་པའི་གནད་ཡོད་པས་མ་བརྗེད་ཅིག༔ ཀྱཻ་རིགས་ཀྱི་བུ་ཁྱོད་ཀྱི་ལུས་དང་སེམས་བྲལ་བའི་དུས་སུ༔ ཆོས་ཉིད་དག་པའི་སྣང་བ་ཕྲ་ལ་དྭངས་པ༔ གསལ་ལ་འཚེར་བ༔ རང་བཞིན་བཀྲག་གསལ་ལ་ཉམ་ང་བ༔ སོས་ཀའི་ཐང་ལ་སྨིག་སྒྱུ་འགྱུ་བ་བཞིན་དུ་མེ་རེ་རེ་འཆར་དུ་འོང་ངོ་༔ དེ་ལ་མ་འཇིགས་ཤིག༔ མ་སྐྲག་ཅིག༔ མ་སྔངས་ཤིག༔ དེ་ནི་ཁྱོད་རང་གི་ཆོས་ཉིད་ཀྱི་རང་མདངས་ཡིན་པས་ངོ་ཤེས་པར་གྱིས་ཤིག༔ འོད་ཀྱི་ནང་ནས་ཆོས་ཉིད་ཀྱི་རང་སྒྲ་དྲག་ལ་ལྡིར་ཆེ་བ༔ འབྲུག་སྟོང་དུས་གཅིག་ལ་ལྡིར་བ་ཙམ་དུ་ལྡི་རི་རི་འོང་ངོ་༔ དེ་ཡང་ཁྱོད་རང་གི་ཆོས་ཉིད་ཀྱི་རང་སྒྲ་ཡིན་པས་དེ་ལ་མ་འཇིགས་ཤིག༔ མ་སྐྲག་ཅིག༔ མ་སྔངས་ཤིག༔ ཁྱོད་ལ་བག་ཆགས་ཡིད་ཀྱི་ལུས་ཞེས་བྱ་བ་ཞིག་ཡོད་ཀྱི༔ གདོས་བཅས་ཤ་ཁྲག་གི་ལུས་ནི་མེད་པས་སྒྲ་འོད་ཟེར་གསུམ་གང་བྱུང་ཡང་༔ ཁྱོད་ལ་གནོད་པ་མི་ཡོང་སྟེ༔ ཁྱོད་ལ་འཆི་རྒྱུུ་མེད་དོ༔ ཁྱོད་རང་གི་རང་སྣང་དུ་ངོ་ཤེས་པས་ཆོག་གོ༔ བར་དོ་ཡིན་པར་ངོ་ཤེས་པར་གྱིས་ཤིག༔ ཀྱེ་རིགས་ཀྱི་བུ་ད་ལྟ་རང་སྣང་དུ་ངོ་མ་ཤེས་ན༔ མི་ཡུལ་དུ་བསྒོམ་བསྒྲུབ་ཇི་ལྟར་བྱས་ཀྱང་ད་ལྟར་གྱི་གདམས་པ་འདི་དང་མ་འཕྲད་ན་འོད་ཀྱིས་འཇིགས་སོ༔ སྒྲས་སྔངས་སོ༔ ཟེར་གྱིས་སྐྲག་གོ༔ གདམས་པའི་གནད་འདི་མ་ཤེས་ན༔ སྒྲ་འོད་ཟེར་གསུམ་ངོ་མ་ཤེས་པས་འཁོར་བར་འཁྱམ་མོ༔ ཀྱེ་རིགས་ཀྱི་བུ་ཞག་ཕྱེད་དང་བཞིའི་བར་དུ་ཤེས་པ་བརྒྱལ་འགྲོ་སྟེ༔ བརྒྱལ་སངས་པ་དང་ང་ལ་ཅི་བྱུང་སྙམ་པའི་སྣང་བ་འབྱུང་བས་ཁྱོད་ཀྱིས་བར་དོ་ངོ་ཤེས་པར་གྱིས་ཤིག༔ དེའི་ཚེ་འཁོར་བ་རུ་ལོག་ནས་སྣང་བ་ཐམས་ཅད་འོད་དང་སྐུར་འཆར་རོ༔ ནམ་མཁའ་ཐམས་ཅད་འོད་དང་ཁ་དོག་མཐིང་གར་འཆར་རོ༔ དེའི་དུས་སུ་དབུས་ཕྱོགས་ཐིག་ལེ་བརྡལ་བའི་ཞིང་ཁམས་ནས༔ བཅོམ་ལྡན་འདས་རྣམ་པར་སྣང་མཛད་སྐུ་མདོག་དཀར་པོ་སེང་གེའི་ཁྲི་ལ་བཞུགས་པ་ཕྱག་ན་འཁོར་ལོ་རྩིབས་བརྒྱད་པ་བསྣམས་པ༔ ཡུམ་ནམ་མཁའ་དབྱིངས་ཕྱུག་མ་དང་ཞལ་སྦྱོར་ནས་རང་ལ་འཆར་དུ་འོང་ངོ་༔ རྣམ་པར་ཤེས་པའི་ཕུང་པོ་གནས་སུ་དག་པས༔ འོད་མཐིང་ཀ་ཆོས་ཀྱི་དབྱིངས་ཀྱི་ཡེ་ཤེས་ཁ་དོག་མཐིང་ག་གསལ་ལ་དྭངས་པ་བཀྲག་ལ་འཚེར་བ་གཅིག་རྣམ་པར་སྣང་མཛད་ཡབ་ཡུམ་གྱི་ཐུགས་ཀ་ནས་ཁྱོད་རང་གི་མདུན་དུ་མིག་གིས་ལྟ་མི་བཟོད་པ་ཙམ་དུ་ཟུག་ནས་འོང་ངོ་༔ དེ་དང་མཉམ་དུ་ལྷའི་འོད་དཀར་པོ་བཀྲག་མེད་པ་གཅིག་ཀྱང་མདུན་དུ་འོད་དང་གཤིབ་མར་འཆར་རོ༔ དེའི་དུས་སུ་ཁྱོད་ལས་ངན་གྱི་དབང་གིས་འོད་མཐིང་ག་བཀྲག་མདངས་དང་ལྡན་པ་ཆོས་ཀྱི་དབྱིངས་ཀྱི་ཡེ་ཤེས་དེ་ལ་ཁྱོད་འཇིགས་པ་དང་སྐྲག་པ་སྐྱེས་ནས་བྲོས་ཤིང་༔ ལྷའི་འོད་དཀར་པོ་བཀྲག་མེད་དེ་ལ་ཁྱོད་དགའ་བའི་འདུ་ཤེས་སྐྱེས་ནས་འོང་གི་དེ་ཙ་ན༔ འོད་མཐིང་ཀ་གསལ་ལ་འཚེར་བ༔ དངས་ལ་བཀྲག་ཆེ་བ་མཆོག་གི་འོད་གསལ་དེ་ལ་མ་སྔངས་ཤིག་མ་སྐྲག་པར༔ དེ་ནི་དེ་བཞིན་གཤེགས་པའི་འོད་ཟེར་ཆོས་ཀྱི་དབྱིངས་ཀྱི་ཡེ་ཤེས་ཞེས་བྱ་བ་ཡིན་གྱི༔ དེ་ལ་དད་པ་དང་མོས་པ་དུང་དུང་གྱིས་ཤིག༔ བཅོམ་ལྡན་འདས་རྣམ་པར་སྣང་མཛད་ཡབ་ཡུམ་གྱི་ཐུགས་རྗེའི་འོད་ཟེར་ཡིན་ནོ༔ སྐྱབས་སུ་མཆིའོ་སྙམ་པའི་མོས་པ་གྱིས་ལ་གསོལ་བ་ཐོབ་ཅིག༔ དེ་ནི་བཅོམ་ལྡན་འདས་རྣམ་པར་སྣང་མཛད་ཡབ་ཡུམ་གྱིས་ཁྱོད་བར་དོའི་འཕྲང་ལ་བསུ་བ་ལ་འོང་བ་ཡིན་ནོ༔ རྣམ་པར་སྣང་མཛད་ཀྱི་ཐུགས་རྗེའི་འོད་ཟེར་ཡིན་ནོ༔ ལྷའི་འོད་དཀར་པོ་བཀྲག་མེད་པ་དེ་ལ་དགའ་བ་མ་བྱེད་ཅིག༔ དེ་ནི་ཁྱོད་ཀྱི་གཏི་མུག་དྲག་པོས་བསགས་པའི་འོད་ཀྱི་ལམ་ཡིན་ནོ༔ དེ་ལ་མ་ཆགས་ཤིག༔ མ་ཞེན་ཅིག༔ དེ་ལ་ཆགས་ན་ལྷའི་གནས་སུ་འཁྱམས་ཏེ༔ རིགས་དྲུག་ཏུ་འཁོར་ནས་ཐར་པའི་ལམ་འགག་པའི་བར་ཆད་ཡིན་པས་དེ་ལ་མིག་གིས་མ་ལྟ་བར༔ འོད་མཐིང་ག་བཀྲག་མདངས་ཅན་དེ་ལ་མོས་པ་གྱིས་ལ༔ རྣམ་པར་སྣང་མཛད་ཡབ་ཡུམ་ལ་འདུན་པ་དྲག་པོ་གཏོད་ལ་སྨོན་ལམ་འདི་སྐད་བདག་གི་ལད་མོ་གྱིས་ལ་གསོལ་བ་ཐོབ་ཅིག༔ ཀྱེ་མ༔ གཏི་མུག་དྲག་པོས་འཁོར་བར་འཁྱམས་པའི་ཚེ༔ ཆོས་དབྱིངས་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་རྣམ་པར་སྣང་མཛད་ལམ་སྣ་དྲོངས༔ ཡུམ་མཆོག་དབྱིངས་ཕྱུག་མ་ཡིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་ཏུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ ཞེས་མོས་གུས་དྲག་པོས་སྨོན་ལམ་བཏབ་པས༔ རྣམ་པར་སྣང་མཛད་ཡབ་ཡུམ་གྱི་ཐུགས་ཀར་འཇའ་འོད་དུ་ཐིམ་ནས༔ དབུས་ཕྱོགས་སྟུག་པོ་བཀོད་པའི་ཞིང་དུ་ལོངས་སྤྱོད་རྫོགས་པའི་སྐུར་སངས་རྒྱས་པར་འགྱུར་རོ༔ ཡང་གལ་ཏེ་ངོ་སྤྲོད་ཀྱང་ཞེ་སྡང་དང་སྡིག་སྒྲིབ་ཀྱི་སྐྱོན་གྱིས་འོད་དང་ཟེར་ལ་སྐྲག་ནས་བྲོས་ཏེ༔ སྨོན་ལམ་བཏབ་ཀྱང་ཡང་འཁྲུལ་ན༔ ཞག་གཉིས་པ་ལ་རྡོ་རྗེ་སེམས་དཔའི་ལྷ་ཚོགས་དང་༔ དམྱལ་བའི་ལས་ངན་གཉིས་ཀྱིས་བསུ་བ་ལ་འོང་སྟེ༔ ཡང་ངོ་སྤྲད་པ་ནི༔ ཚེ་འདས་ཀྱི་མིང་ནས་འབོད་ལ་འདི་སྐད་དོ༔ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ ཞག་གཉིས་པ་ལ་འབྱུང་བ་ཆུ་རྣམ་པར་དག་པའི་འོད་དཀར་པོ་འཆར་རོ༔ དེའི་དུས་སུ་ཤར་ཕྱོགས་མངོན་པར་དགའ་བའི་ཞིང་ཁམས་མཐིང་ཀ་ནས༔ བཅོམ་ལྡན་འདས་རྡོ་རྗེ་སེམས་དཔའ་མི་བསྐྱོད་པ་སྐུ་མདོག་མཐིང་ཀ་ཕྱག་ན་རྡོ་རྗེ་རྩེ་ལྔ་བ་བསྣམས་པ༔ གླང་པོ་ཆེའི་གདན་ལ་བཞུགས་པ༔ ཡུམ་སངས་རྒྱས་སྤྱན་མ་དང་ཞལ་སྦྱོར་ནས་རང་ལ་ཤར་དུ་འོང་ངོ་༔ བྱང་ཆུབ་སེམས་དཔའ་སའི་སྙིང་པོ་དང་བྱམས་པ་མཻ་ཏྲི་གཉིས་ལ༔ སེམས་མ་ལཱ་སྱེ་མ་དང་པུཥྤེ་མ་གཉིས་ཀྱིས་བསྐོར་ནས༔ སངས་རྒྱས་ཀྱི་སྐུ་དྲུག་ཏུ་འཆར་ནས་འོང་ངོ་༔ གཟུགས་ཀྱི་ཕུང་པོ་གནས་སུ་དག་པའི་འོད་དཀར་པོ་མེ་ལོང་ལྟ་བུའི་ཡེ་ཤེས་དཀར་ལ་འཚེར་བ༔ གསལ་ལ་དྭངས་པ་གཅིག་རྡོ་རྗེ་སེམས་དཔའ་ཡབ་ཡུམ་གྱི་ཐུགས་ཀ་ནས༔ ཁྱོད་རང་གི་མདུན་དུ་མིག་གིས་ལྟ་མི་བཟོད་པ་ཙམ་དུ་ཟུག་ནས་འོང་ངོ་༔ དེ་དང་མཉམ་དུ་དམྱལ་བའི་འོད་དུད་ཀ་བཀྲག་མེད་པ་ཅིག་ཀྱང་༔ མདུན་དུ་ཡེ་ཤེས་ཀྱི་འོད་དང་གཤིབ་མར་ཟུག་ནས་འོང་ངོ་༔ དེའི་དུས་སུ་ཁྱོད་ཞེ་སྡང་གི་དབང་གིས་འོད་དཀར་པོ་བཀྲག་དང་ལྡན་པ་དེ་ལ༔ འཇིགས་པ་དང་སྐྲག་པ་སྐྱེས་ནས་བྲོས་ཤིང་༔ དམྱལ་བའི་འོད་དུད་ཁ་བཀྲག་མེད་དེ་ལ་ཁྱོད་དགའ་བའི་འདུ་ཤེས་སྐྱེས་ནས་འོང་གི༔ དེ་ཙ་ན་ཁྱོད་འོད་དཀར་པོ་བཀྲག་ལ་འཚེར་བ་གསལ་ལ་དྭངས་པ་དེ་ལ་མ་འཇིགས་པར་ཡེ་ཤེས་སུ་ངོ་ཤེས་པར་གྱིས་ཤིག༔ དེ་ལ་དད་པ་དང་མོས་པ་དུང་དུང་གྱིས་ཤིག༔ བཅོམ་ལྡན་འདས་རྡོ་རྗེ་སེམས་དཔའི་ཐུགས་ཀའི་འོད་ཟེར་ཡིན་ནོ༔ སྐྱབས་སུ་མཆིའོ་སྙམ་པའི་མོས་པ་གྱིས་ལ་གསོལ་བ་ཐོབ་ཅིག༔ དེ་ནི་བཅོམ་ལྡན་འདས་རྡོ་རྗེ་སེམས་དཔའ་ཁྱོད་བར་དོའི་འཇིགས་སྐྲག་ལ་བསུ་བ་ལ་འོང་བ་ཡིན་ནོ༔ རྡོ་རྗེ་སེམས་དཔའི་ཐུགས་རྗེའི་འོད་ཟེར་གྱི་ལྕགས་ཀྱུ་ཡིན་པས་མོས་པ་གྱིས་ཤིག༔ དམྱལ་བའི་འོད་དུད་ཁ་བཀྲག་མེད་དེ་ལ་དགའ་བར་མ་བྱེད་ཅིག༔ དེ་ཁྱོད་ཀྱི་ཞེ་སྡང་དྲག་པོས་བསགས་པའི་སྡིག་སྒྲིབ་ཀྱིས་སུན་མའི་ལམ་ཡིན་ནོ༔ དེ་ལ་ཆགས་ན་ཁྱོད་དམྱལ་བའི་གནས་སུ་ལྟུང་སྟེ༔ སྡུག་བསྔལ་བསྲན་མི་བཟོད་པའི་འདམ་དུ་ཚུད་དེ་ཐོན་པའི་དུས་མི་འབྱུང་གི༔ དེ་ཐར་པའི་ལམ་དགག་པའི་བར་ཆད་ཡིན་པས༔ དེ་ལ་མིག་གིས་མ་ལྟ་བར་ཞེ་སྡང་སྤོངས་ཤིག༔ དེ་ལ་མ་ཆགས་ཤིག༔ མ་ཞེན་ཅིག༔ འོད་དཀར་པོ་གསལ་ལ་འཚེར་བ་དེ་ལ་མོས་པ་གྱིས་ཤིག༔ བཅོམ་ལྡན་འདས་རྡོ་རྗེ་སེམས་དཔའ་ལ་འདུན་པ་དྲག་པོ་གཏོད་ལ་སྨོན་ལམ་འདི་སྐད་ཐོབ་ཅིག༔ ཀྱེ་མ་ཞེ་སྡང་དྲག་པོས་འཁོར་བར་འཁྱམས་པའི་ཚེ༔ མེ་ལོང་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་རྡོ་རྗེ་སེམས་དཔས་ལམ་སྣ་དྲོངས༔ ཡུམ་མཆོག་སངས་རྒྱས་སྤྱན་མས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ ཞེས་མོས་གུས་དྲག་པོས་སྨོན་ལམ་བཏབ་པས་བཅོམ་ལྡན་འདས་རྡོ་རྗེ་སེམས་དཔའི་ཐུགས་ཀར་འཇའ་འོད་དུ་ཐིམ་ནས༔ ཤར་ཕྱོགས་མངོན་པར་དགའ་བའི་ཞིང་དུ་ལོངས་སྤྱོད་རྫོགས་པའི་སྐུར་སངས་རྒྱས་པར་འགྱུར་རོ༔ དེ་ཡང་དེ་ལྟར་དུ་ངོ་སྤྲོད་ཀྱང་༔ ང་རྒྱལ་དང་སྡིག་སྒྲིབ་ཆེ་བའི་གང་ཟག་ལ་ལ་ཐུགས་རྗེའི་འོད་ཟེར་གྱི་ལྕགས་ཀྱུ་ལ་འཇིགས་ཏེ་བྲོས་པས༔ ཡང་ཞག་གསུམ་པ་ལ་བཅོམ་ལྡན་འདས་རིན་ཆེན་འབྱུང་ལྡན་གྱི་ལྷ་ཚོགས་དང་༔ མིའི་འོད་ལམ་གཉིས་ཀྱིས་བསུ་བ་ལ་འོང་སྟེ༔ ཡང་ངོ་སྤྲད་པ་ནི༔ ཚེ་འདས་ཀྱི་མིང་ནས་འབོད་ལ་འདི་སྐད་དོ༔ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ ཞག་གསུམ་པ་ལ་འབྱུང་བ་ས་རྣམ་པར་དག་པའི་འོད་སེར་པོ་འཆར་རོ༔ དེའི་དུས་སུ་ལྷོ་ཕྱོགས་དཔལ་དང་ལྡན་པའི་ཞིང་ཁམས་སེར་པོ་ནས༔ བཅོམ་ལྡན་འདས་རིན་ཆེན་འབྱུང་ལྡན་སྐུ་མདོག་སེར་པོ་ཕྱག་ན་ནོར་བུ་རིན་པོ་ཆེ་བསྣམས་པ༔ རྟ་མཆོག་གི་གདན་ལ་བཞུགས་པ་ཡུམ་མཆོག་མཱ་མ་ཀི་དང་ཞལ་སྦྱོར་ནས་རང་ལ་འཆར་དུ་འོང་ངོ་༔ བྱང་ཆུབ་སེམས་དཔའ་ནམ་མཁའི་སྙིང་པོ་དང་༔ ཀུན་ཏུ་བཟང་པོ་གཉིས་ལ༔ སེམས་མ་མཱ་ལེ་མ་དང་༔ དྷུ་པེ་མ་གཉིས་ཀྱིས་བསྐོར་ནས་འཇའ་དང་འོད་དང་ཟེར་གྱི་ཀློང་ནས་སངས་རྒྱས་ཀྱི་སྐུ་དྲུག་ཏུ་འཆར་ནས་འོང་ངོ་༔ ཚོར་བའི་ཕུང་པོ་དབྱིངས་སུ་དག་པའི་འོད་སེར་པོ་མཉམ་པ་ཉིད་ཀྱི་ཡེ་ཤེས་སེར་ལ་འཚེར་པ༔ ཐིག་ལེ་དང་ཐིག་ཕྲན་གྱིས་བརྒྱན་པ༔ གསལ་ལ་དྭངས་པ༔ མིག་གིས་ལྟ་མི་བཟོད་པ་ཞིག༔ རིན་ཆེན་འབྱུང་ལྡན་ཡབ་ཡུམ་གྱི་ཐུགས་ཀ་ནས་ཁྱོད་རང་གི་མདུན་དུ་སྙིང་གི་ཐད་ཀར་མིག་གིས་ལྟ་མི་བཟོད་པ་ཙམ་དུ་ཟུག་ནས་འོང་ངོ་༔ དེ་དང་མཉམ་དུ་མིའི་འོད་སྔོན་པོ་བཀྲག་མེད་པ་ཅིག་ཀྱང་ཡེ་ཤེས་ཀྱི་འོད་དང་གཤིབ་མར་ཁྱོད་རང་གི་སྙིང་ཀར་ཟུག་ནས་འོང་ངོ་༔ དེའ་ིདུས་སུ་ཁྱོད་རང་ང་རྒྱལ་གྱི་དབང་གིས་འོད་སེར་པོ་བཀྲག་མདངས་ཅན་དེ་ལ་འཇིགས་སྐྲག་སྐྱེས་ནས་བྲོས་ཤིང་༔ མིའི་འོད་སྔོན་པོ་བཀྲག་མེད་དེ་ལ་ཁྱོད་དགའ་བ་དང་ཆགས་སེམས་སྐྱེས་ནས་འོང་གི༔ དེ་ཙམ་ན་ཁྱོད་འོད་སེར་པོ་གསལ་ལ་དྭངས་བ༔ བཀྲག་ལ་དྭངས་པ་དེ་ལ་མ་འཇིགས་པར་ཡེ་ཤེས་སུ་ངོ་ཤེས་པར་གྱིས་ཤིག༔ དེའི་ཐོག་ཏུ་རིག་པ་བྱར་མེད་ཀྱི་ངང་དུ་ལྷོད་ལ་ཞོག་ཅིག༔ ཡང་ན་དེ་ལ་དད་པ་དང་མོས་པ་དུང་དུང་གྱིས་ཤིག༔ ཁྱོད་རང་གི་རིག་པའི་རང་མདངས་སུ་ངོ་ཤེས་ན་ནི༔ མོས་གུས་མ་བྱས་སྨོན་ལམ་མ་བཏབ་ཀྱང་སྐུ་དང་འོད་ཟེར་ཐམས་ཅད་ཁྱོད་རང་དང་དབྱེར་མེད་དུ་ཐིམ་ནས་སངས་རྒྱས་པར་འགྱུར་རོ༔ རང་གི་རིག་པའི་རང་མདངས་སུ་ངོ་མ་ཤེས་ན་ནི་བཅོམ་ལྡན་འདས་རིན་ཆེན་འབྱུང་ལྡན་གྱི་ཐུགས་རྗེའི་འོད་ཟེར་ཡིན་ནོ༔ སྐྱབས་སུ་མཆིའོ་སྙམ་པའི་མོས་གུས་གྱིས་ལ་གསོལ་བ་ཐོབ་ཅིག༔ དེ་ནི་བཅོམ་ལྡན་འདས་རིན་ཆེན་འབྱུང་ལྡན་གྱི་ཐུགས་རྗེའི་འོད་ཟེར་གྱི་ལྕགས་ཀྱུ་ཡིན་པས་མོས་པ་གྱིས་ཤིག༔ མིའི་འོད་སྔོན་པོ་བཀྲག་མེད་དེ་ལ་དགའ་བར་མ་བྱེད་ཅིག༔ དེ་ཁྱོད་ཀྱི་ང་རྒྱལ་དྲག་པོས་བསགས་པའི་བག་ཆགས་ཀྱིས་སུན་མའི་འོད་ལམ་ཡིན་ནོ༔ དེ་ལ་ཆགས་ན་ནི་ཁྱེད་མིའི་གནས་སུ་ལྷུང་ནས་སྐྱེ་རྒ་ན་འཆིའི་སྡུག་བསྔལ་མྱོང་ཞིང་འཁོར་བའི་གནས་ནས་ཐར་པའི་དུས་མི་འབྱུང་སྟེ༔ ཐར་པའི་ལམ་འགག་པའི་བར་ཆད་ཡིན་པས་དེ་ལ་མིག་གིས་མ་ལྟ་བར་ང་རྒྱལ་སྤོངས་ཤིག༔ བག་ཆགས་སྤོངས་ཤིག༔ དེ་ལ་མ་ཆགས་ཤིག་མ་ཞེན་ཅིག༔ འོད་སེར་པོ་གསལ་ལ་འཚེར་བ་དེ་ལ་མོས་པ་གྱིས་ལ་བཅོམ་ལྡན་འདས་རིན་ཆེན་འབྱུང་ལྡན་ལ་འདུན་པ་རྩེ་གཅིག་ཏུ་གཏོད་ལ་སྨོན་ལམ་འདི་སྐད་དུ་ཐོབ་ཅིག༔ ཀྱེ་མ་ང་རྒྱལ་དྲག་པོས་འཁོར་བར་འཁྱམས་ཚེ༔ མཉམ་ཉིད་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་རིན་ཆེན་འབྱུང་ལྡན་ལམ་སྣ་དྲོངས༔ ཡུམ་མཆོག་མཱ་མ་ཀི་ཡིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ དེ་སྐད་མོས་གུས་དྲག་པོས་སྨོན་ལམ་བཏབ་པས༔ བཅོམ་ལྡན་འདས་རིན་ཆེན་འབྱུང་ལྡན་ཡབ་ཡུམ་གྱི་ཐུགས་ཀར་འཇའ་འོད་དུ་ཐིམ་ནས་ལྷོ་ཕྱོགས་དཔལ་དང་ལྡན་པའི་ཞིང་ཁམས་ནས་ལོངས་སྤྱོད་རྫོགས་པའི་སྐུར་སངས་རྒྱས་པར་འགྱུར་རོ༔ དེ་ལྟར་ངོ་སྤྲད་པས་དབང་པོ་ཇི་ལྟར་ཞན་ཀྱང་གྲོལ་བར་ཐ་ེཚོམ་མེད་དོ༔ ཡང་དེ་ལྟར་ལན་མང་དུ་ངོ་སྤྲད་ཀྱང་མི་སྡིག་པོ་ཆེ་ལ་སོགས་པ་དང་༔ དམ་ཚིག་ཉམས་པ་ལ་སོགས་སྐལ་ཆད་ཀྱི་རིགས་ལ་ལ་ད་རུང་ཡང་ངོ་མི་འཕྲོད་པའི་རིགས་འོང་སྟེ༔ འདོད་ཆགས་དང་སྡིག་སྒྲིབ་ཀྱིས་བསྐྱོད་ནས་སྒྲ་འོད་ལ་འཇིགས་ཏེ་བྲོས་པས༔ ཡང་ཞག་བཞི་པ་ལ་བཅོམ་ལྡན་འདས་སྣང་བ་མཐའ་ཡས་ཀྱི་ལྷ་ཚོགས་དང་༔ འདོད་ཆགས་སེར་སྣ་ལས་གྲུབ་པའི་ཡི་དྭགས་ཀྱི་འོད་ལམ་གཉིས་ཀྱིས་བསུ་བ་ལ་འོང་སྟེ༔ ཡང་ངོ་སྤྲད་པ་ནི༔ ཚེ་འདས་ཀྱི་མིང་ནས་འབོད་ལ་འདི་སྐད་དོ༔ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ ཞག་བཞི་པ་ལ་འབྱུང་བ་མེ་རྣམ་པར་དག་པའི་འོད་དམར་པོ་འཆར་རོ༔ དེའི་དུས་སུ་ནུབ་ཕྱོགས་བདེ་བ་ཅན་གྱི་ཞིང་ཁམས་དམར་པོ་ནས་བཅོམ་ལྡན་འདས་སྣང་བ་མཐའ་ཡས་སྐུ་མདོག་དམར་པོ༔ ཕྱག་ན་པདྨ་བསྣམས་པ༔ རྨ་བྱའི་གདན་ལ་བཞུགས་པ༔ ཡུམ་མཆོག་གོས་དཀར་མོ་དང་ཞལ་སྦྱོར་ནས་རང་ལ་འཆར་དུ་འོང་ངོ་༔ བྱང་ཆུབ་སེམས་དཔའ་སྤྱན་རས་གཟིགས་དང་འཇམ་དཔལ་གཉིས་ལ༔ སེམས་མ་གིརྟི་མ་དང་ཨཱ་ལོ་མ་གཉིས་ཀྱིས་བསྐོར་ནས་འཇའ་འོད་ཀྱི་ཀློང་ནས་སངས་རྒྱས་ཀྱི་སྐུ་དྲུག་ཏུ་འཆར་ནས་འོང་ངོ་༔ འདུ་ཤེས་ཀྱི་ཕུང་པོ་གནས་སུ་དག་པའི་འོད་དམར་པོ་སོ་སོར་རྟོགས་པའི་ཡེ་ཤེས་དམར་ལ་འཚེར་བ༔ ཐིག་ལེ་དང་ཐིག་ཕྲན་གྱིས་སྤྲས་པ༔ གསལ་ལ་དྭངས་པ༔ བཀྲག་ལ་འཚེར་བ་ཞིག༔ སྣང་བ་མཐའ་ཡས་ཡབ་ཡུམ་གྱི་ཐུགས་ཀ་ནས་ཁྱོད་རང་གི་སྙིང་གི་ཐད་ཀར་མིག་གིས་ལྟ་མི་བཟོད་པ་ཙམ་དུ་ཟུག་ནས་འོང་ངོ་༔ དེ་ལ་མ་འཇིགས་ཤིག༔ དེ་དང་མཉམ་དུ་ཡི་དྭགས་ཀྱི་འོད་སེར་པོ་བཀྲག་མེད་པ་ཞིག་ཀྱང་༔ ཡ་ེཤེས་ཀྱི་འོད་དང་གཤིབ་མར་ཁྱོད་ལ་འཆར་དུ་འོང་པས་དེ་ལ་མི་དགའ་བར་གྱིས་ཤིག༔ ཆགས་ཞེན་སྤོངས་ཤིག༔ དེའི་དུས་སུ་ཁྱོད་འདོད་ཆགས་དྲག་པོའི་དབང་གིས་འོད་དམར་པོ་བཀྲག་མདངས་ཅན་དེ་ལ་སྐྲག་པ་སྐྱེས་ནས་བྲོས་སུ་འོང་ཞིང་༔ ཡི་དྭགས་ཀྱི་འོད་སེར་པོ་བཀྲག་མེད་དེ་ལ་ཁྱོད་དགའ་བ་དང་ཆགས་སེམས་སྐྱེས་ནས་འོང་གི༔ དེ་ཙ་ན་ཁྱོད་འོད་དམར་པོ་བཀྲག་ལ་འཚེར་བ༔ གསལ་ལ་དྭངས་པ་དེ་ལ་མ་འཇིགས་པར་ཡེ་ཤེས་སུ་ངོ་ཤེས་པར་གྱིས་ཤིག༔ དེའི་ཐོག་ཏུ་རིག་པ་བྱར་མེད་ཀྱི་ངང་ལ་ཀློད་ལ་ཞོག་ཅིག༔ ཡང་ན་དེ་ལ་དད་པ་དང་མོས་པ་དུང་དུང་གྱིས་ཤིག༔ ཁྱོད་རང་གི་རང་མདངས་སུ་ངོ་ཤེས་ན་ནི༔ མོས་གུས་མ་བྱས་སྨོན་ལམ་མ་བཏབ་ཀྱང་སྐུ་དང་འོད་ཟེར་ཐམས་ཅད་ཁྱོད་རང་དང་དབྱེར་མེད་དུ་ཐིམ་ནས་སངས་རྒྱས་པར་འགྱུར་རོ༔ དེ་ལྟར་མ་ཤེས་ན་བཅོམ་ལྡན་འདས་སྣང་བ་མཐའ་ཡས་ཀྱི་ཐུགས་རྗེའི་འོད་ཟེར་ཡིན་ནོ༔ སྐྱབས་སུ་མཆིའོ་སྙམ་པའི་མོས་གུས་གྱིས་ལ་གསོལ་བ་ཐོབ་ཅིག༔ དེ་ནི་བཅོམ་ལྡན་འདས་སྣང་བ་མཐའ་ཡས་ཀྱི་ཐུགས་རྗེ་ལྕགས་ཀྱུའི་འོད་ཟེར་ཡིན་ནོ༔ མོས་པ་གྱིས་ཤིག༔ མ་བྲོས་ཤིག༔ བྲོས་ཀྱང་ཁྱོད་རང་དང་མི་འབྲལ་བར་འོང་ངོ་༔ མ་འཇིགས་ཤིག༔ ཡི་དྭགས་ཀྱི་འོད་སེར་པོ་བཀྲག་མེད་དེ་ལ་ཆགས་པ་མ་བྱེད་ཅིག༔ དེ་ཁྱོད་ཀྱི་འདོད་ཆགས་དྲག་པོས་བསགས་པའི་བག་ཆགས་ཀྱི་སུན་མའི་ལམ་ཡིན་ནོ༔ དེ་ལ་ཆགས་ན་ནི་ཁྱོད་ཡི་དྭགས་ཀྱི་གནས་སུ་ལྟུང་ནས་བཀྲེས་སྐོམ་གྱི་སྡུག་བསྔལ་བཟོད་གླགས་མེད་པ་མྱོང་སྟེ༔ ཐར་ལམ་བཀག་པའི་བར་ཆད་ཡིན་པས་དེ་ལ་མ་ཆགས་པར་བག་ཆགས་སྤོངས་ཤིག༔ མ་ཞེན་ཅིག༔ འོད་དམར་པོ་གསལ་ལ་འཚེར་བ་དེ་ལ་མོས་པ་གྱིས་ལ༔ བཅོམ་ལྡན་འདས་སྣང་བ་མཐའ་ཡས་ཡབ་ཡུམ་ལ་འདུན་པ་རྩེ་གཅིག་ཏུ་གཏོད་ལ་སྨོན་ལམ་འདི་སྐད་ཐོབ་ཅིག༔ ཀྱེ་མ་འདོད་ཆགས་དྲག་པོས་འཁོར་བར་འཁྱམས་པའི་ཚེ༔ སོར་རྟོག་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་སྣང་བ་མཐའ་ཡས་ལམ་སྣ་དྲོངས༔ ཡུམ་མཆོག་གོས་དཀར་མོ་ཡིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ དེ་སྐད་མོས་གུས་དྲག་པོས་སྨོན་ལམ་བཏབ་པས༔ བཅོམ་ལྡན་འདས་སྣང་བ་མཐའ་ཡས་འོད་དཔག་མེད་ཡབ་ཡུམ་གྱི་ཐུགས་ཀར་འཇའ་འོད་དུ་ཐིམ་ནས་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་ལོངས་སྤྱོད་རྫོགས་པའི་སྐུར་སངས་རྒྱས་པར་འགྱུར་རོ༔ དེས་མི་གྲོལ་མི་སྲིད་དོ༔ ཡང་འདི་ལྟར་ངོ་སྤྲད་ཀྱང་༔ སེམས་ཅན་བག་ཆགས་དང་འགྲོགས་ཡུན་རིང་པའི་དབང་གིས་བག་ཆགས་མ་སྤངས་བར་ཕྲག་དོག་དང་ལས་ངན་གྱི་དབང་གིས་སྒྲ་འོད་ལ་སྔངས་སྐྲག་སྐྱེས་ཏེ་ཐུགས་རྗེའི་འོད་ཟེར་གྱི་ལྕགས་ཀྱུས་མ་ཟིན་པར་ཞག་ལྔ་བའི་བར་དུ་མར་ལ་འཁྱམས་ཏེ་དེའི་ཚེ་བཅོམ་ལྡན་འདས་དོན་ཡོད་གྲུབ་པའི་ལྷ་ཚོགས་ཀྱི་ཐུགས་རྗེའི་འོད་ཟེར་དང་བཅས་ཏེ་བསུ་མ་ལ་བྱོན་ཏེ༔ ཉོན་མོངས་པ་ཕྲག་དོག་ལས་གྲུབ་པའི་ལྷ་མ་ཡིན་གྱི་འོད་ལམ་གྱིས་ཀྱང་བསུ་བ་ལ་འོང་ངོ་༔ དེའི་ཚེ་ཡང་ངོ་སྤྲོད་པ་ནི༔ ཚེ་འདས་ཀྱི་མིང་ནས་འབོད་ལ་འདི་སྐད་དོ༔ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ ཞག་ལྔ་པ་ལ་འབྱུང་བ་རླུང་རྣམ་པར་དག་པའི་འོད་ལྗང་ཁུ་འཆར་རོ༔ དེའི་དུས་སུ་བྱང་ཕྱོགས་ལས་རབ་རྫོགས་པའི་ཞིང་ཁམས་ལྗང་ཁུ་ནས༔ བཅོམ་ལྡན་འདས་སངས་རྒྱས་དོན་ཡོད་གྲུབ་པ་སྐུ་མདོག་ལྗང་ཁུ་ཕྱག་ན་རྡོ་རྗེ་རྒྱ་གྲམ་བསྣམས་པ༔ མཁའ་ལྡིང་ཤང་ཤང་གི་ཁྲི་ལ་བཞུགས་པ༔ ཡུམ་དམ་ཚིག་སྒྲོལ་མ་དང་ཞལ་སྦྱོར་ནས་རང་ལ་འཆར་དུ་འོང་ངོ་༔ སེམས་དཔའ་ཕྱག་ན་རྡོ་རྗེ་དང་༔ སྒྲིབ་པ་རྣམ་པར་སེལ་བ་གཉིས་ལ༔ སེམས་མ་གནྡྷེ་མ་དང་༔ ནིརྟི་མ་གཉིས་ཀྱིས་བསྐོར་ནས་འཇའ་དང་འོད་ཀྱི་ཀློང་ནས་སངས་རྒྱས་ཀྱི་སྐུ་དྲུག་ཏུ་འཆར་ནས་འོང་ངོ་༔ འདུ་བྱེད་ཀྱི་ཕུང་པོ་གནས་སུ་དག་པ་འོད་ལྗང་ཁུ་བྱ་བ་གྲུབ་པའི་ཡེ་ཤེས་ལྗང་ལ་འཚེར་བ་གསལ་ལ་དྭངས་པ༔ བཀྲག་ལ་ཉམ་ང་བ་ཐིག་ལེ་དང་ཐིག་ཕྲན་གྱིས་སྤྲས་པ་གཅིག་དོན་ཡོད་གྲུབ་པ་ཡབ་ཡུམ་གྱི་ཐུགས་ཀ་ནས་ཁྱེད་རང་གི་སྙིང་གི་ཐད་ཀར་མིག་གིས་བལྟ་མི་བཟོད་པ་ཙམ་དུ་ཟུག་ནས་འོང་ངོ་༔ དེ་ལ་མ་འཇིགས་པར་ཁྱོད་རང་གི་རིག་པའི་ཡེ་ཤེས་ཀྱི་རང་རྩལ་ཡིན་པས༔ ཆགས་སྡང་ཉེ་རིང་མེད་པའི་བཏང་སྙོམས་བྱར་མེད་ཆེན་པོའི་ངང་དུ་ཞོག་ཅིག༔ དེ་དང་མཉམ་དུ་ལྷ་མ་ཡིན་གྱི་འོད་དམར་པོ་ཕྲག་དོག་གི་རྒྱུ་ལས་གྲུབ་པ་བཀྲག་མེད་པ་གཅིག་ཀྱང་ཡེ་ཤེས་ཀྱི་འོད་དང་ལྷན་ཅིག་ཏུ་ཁྱོད་ལ་འཆར་དུ་འོང་ངོ་༔ དེ་ལ་ཆགས་སྡང་མེད་པའི་བཏང་སྙོམས་སུ་སྒོམས་ཤིག༔ དེ་ལ་དགའ་བ་མ་བྱེད་ཅིག༔ དེའི་དུས་སུ་ཁྱོད་ཕྲག་དོག་དྲག་པོའི་དབང་གིས་འོད་ལྗང་ཁུ་བཀྲག་ལ་འཚེར་བ་དེ་ལ་བྲེད་ནས་བྲོས་སུ་འོང་གི༔ ལྷ་མ་ཡིན་གྱི་འོད་དམར་པོ་བཀྲག་མེད་དེ་ལ་དགའ་བ་དང་ཆགས་སེམས་སྐྱེས་ནས་འོང་གི༔ དེ་ཙ་ན་འོད་ལྗང་ཁུ་བཀྲག་ལ་འཚེར་བ་གསལ་ལ་དྭངས་པ་དེ་ལ་མ་འཇིགས་པར་ཡེ་ཤེས་སུ་ངོ་ཤེས་པར་གྱིས་ཤིག༔ དེའི་ཐོག་ཏུ་རིག་པ་བྱར་མེད་ཀྱི་ངང་དུ་ཀློད་ལ་ཞོག་ཅིག༔ ཡང་ན་བཅོམ་ལྡན་འདས་དོན་ཡོད་གྲུབ་པའི་ཐུགས་རྗེའི་འོད་ཟེར་ཡིན་ནོ༔ སྐྱབས་སུ་མཆིའོ༔ སྙམ་དུ་མོས་གུས་གྱིས་ལ་གསོལ་བ་ཐོབ་ཅིག༔ དེ་ནི་བཅོམ་ལྡན་འདས་དོན་ཡོད་གྲུབ་པའི་ཐུགས་རྗེའི་ལྕགས་ཀྱུའི་འོད་ཟེར་བྱ་བ་གྲུབ་པའི་ཡེ་ཤེས་ཞེས་བྱ་བ་ཡིན་པས༔ དེ་ལ་མོས་པ་གྱིས་ཤིག༔ མ་བྲོས་ཤིག༔ བྲོས་ཀྱང་ཁྱོད་རང་དང་འབྲལ་མེད་དུ་འོང་ངོ་༔ དེ་ལ་མ་འཇིགས་ཤིག༔ ལྷ་མ་ཡིན་གྱི་འོད་དམར་པོ་བཀྲག་མེད་དེ་ལ་ཆགས་པར་མ་བྱེད་ཅིག༔ དེ་ནི་ཁྱོད་ཀྱི་ཕྲག་དོག་དྲག་པོས་བསགས་པའི་ལས་ཀྱིས་སུན་མའི་ལམ་ཡིན་ནོ༔ དེ་ལ་ཆགས་ན་ནི་ཁྱོད་ལྷ་མ་ཡིན་གྱི་གནས་སུ་ལྟུང་བས་འཐབ་རྩོད་ཀྱི་སྡུག་བསྔལ་བཟོད་གླགས་མེད་པ་མྱོང་སྟེ་ཐར་ལམ་འགག་པའི་བར་ཆད་ཡིན་པས་དེ་ལ་མ་ཆགས་པར་བག་ཆགས་སྤོངས་ཤིག༔ མ་ཞེན་ཅིག༔ འོད་ལྗང་ཁུ་གསལ་ལ་འཚེར་བ་དེ་ལ་མོས་པ་གྱིས་ལ༔ བཅོམ་ལྡན་འདས་དོན་ཡོད་གྲུབ་པ་ཡབ་ཡུམ་ལ་འདུན་པ་རྩེ་གཅིག་ཏུ་གཏོད་ལ་སྨོན་ལམ་འདི་སྐད་དུ་ཐོབ་ཅིག༔ ཀྱེ་མ་ཕྲག་དོག་དྲག་པོས་འཁོར་བར་འཁྱམས་པའི་ཚེ༔ བྱ་གྲུབ་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་དོན་ཡོད་གྲུབ་པས་ལམ་སྣ་དྲོངས༔ ཡུམ་མཆོག་དམ་ཚིག་སྒྲོལ་མས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ དེ་ལྟར་མོས་གུས་དྲག་པོས་སྨོན་ལམ་གདབ་པས༔ བཅོམ་ལྡན་འདས་དོན་ཡོད་གྲུབ་པ་ཡམ་ཡུམ་གྱི་ཐུགས་ཀར་འཇའ་འོད་དུ་ཐིམ་ནས་བྱང་ཕྱོགས་ལས་རབ་རྫོགས་པའི་ཞིང་ཁམས་སུ་ལོངས་སྤྱོད་རྫོགས་པའི་སྐུར་སངས་རྒྱས་པར་འགྱུར་རོ༔ དེ་ལྟར་དུ་རིམ་པ་མང་དུ་ངོ་སྤྲད་པས༔ ལས་འཕྲོ་ཇི་ལྟར་ཞན་ཀྱང་གཅིག་ལ་ངོས་མ་ཟིན་ཀྱང་གཅིག་ལ་ངོ་འཕྲོད་དེ༔ མི་གྲོལ་མི་སྲིད་དོ༔ ཡང་དེ་ལྟར་ལན་མང་དུ་ངོ་སྤྲད་ཀྱང་བག་ཆགས་ཚན་ཆེ་ལ་འགྲོགས་ཡུན་རིང་བས་དག་སྣང་ཡེ་ཤེས་སུ་སྔར་འདྲིས་མེད་པའི་དབང་གིས༔ ངོ་སྤྲད་ཀྱང་བག་ཆགས་ངན་པས་ཕྱིར་ལ་འཁྲིད་དེ༔ ཐུགས་རྗེའི་འོད་ཟེར་གྱི་ལྕགས་ཀྱུས་མ་ཟིན་པར་འོད་དང་ཟེར་ལ་སྔངས་སྐྲག་སྐྱེས་ནས་མར་ལ་འཁོར་བས༔ དེ་ནས་ཞག་དྲུག་པ་ལ་རིགས་ལྔ་ཡབ་ཡུམ་འཁོར་དང་བཅས་པ་དུས་གཅིག་ལ་འཆར་ནས་འོང་སྟེ༔ དེའི་ཚེ་རིགས་དྲུག་གི་འོད་དྲུག་ཀྱང་དུས་གཅིག་ཏུ་འཆར་ནས་འོང་ངོ་༔ ངོ་སྤྲོད་པ་ནི༔ ཚེ་འདས་ཀྱི་མིང་ནས་འབོད་ལ་འདི་སྐད་དོ༔ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ ཁྱོད་རང་ཁར་སང་ཕན་ཆད་རིགས་ལྔ་སོ་སོའི་སྣང་བ་ཤར་ནས་ངོ་སྤྲད་ཀྱང་ཁྱོད་བག་ཆགས་ངན་པའི་དབང་གིས་དེ་ལ་སྔགས་སྐྲག་སྐྱེས་པས༔ ད་ཕན་ཆད་དུ་འདིར་ལུས་པ་ཡིན་ནོ༔ ཁྱོད་ཀྱིས་གོང་དུ་རིགས་ལྔའི་ཡེ་ཤེས་ཀྱི་རང་མདངས་དེ་རྣམས་རང་སྣང་དུ་ངོ་ཤེས་ན་རིགས་ལྔ་སོ་སོའི་སྐུ་ལ་འཇའ་འོད་དུ་ཐིམ་ནས་ལོངས་སྤྱོད་རྫོགས་པའི་སྐུར་སངས་རྒྱ་རྒྱུ་ཡིན་པ་ལ་ཁྱོད་ཀྱིས་ངོ་མ་ཤེས་པས་ད་བར་དུ་འདིར་འཁྱམས་པ་ཡིན་ནོ༔ ད་ནི་མ་ཡེངས་པར་ལྟོས་ཤིག༔ ད་ནི་རིགས་ལྔ་ཡོངས་རྫོགས་ཀྱི་སྣང་བ་དང་༔ ཡེ་ཤེས་བཞི་སྦྱོར་གྱི་སྣང་བ་ཞེས་བྱ་བ་ཁྱོད་ལ་བསུ་བ་ལ་འོང་ངོ་༔ དེ་ངོ་ཤེས་པར་གྱིས་ཤིག༔ ཀྱེ་རིགས་ཀྱི་བུ་འབྱུང་བ་བཞི་རྣམ་པར་དག་པའི་འོད་ཁ་དོག་བཞི་འཆར་དུ་འོང་ངོ་༔ དེའི་དུས་སུ་དབུས་ཕྱོགས་ཐིག་ལེ་བརྡལ་བའི་ཞིང་ཁམས་ནས་སངས་རྒྱས་རྣམ་པར་སྣང་མཛད་ཡབ་ཡུམ་གོང་ལྟར་དུ་འཆར་ནས་འོང་ངོ་༔ ཤར་ཕྱོགས་མངོན་པར་དགའ་བའི་ཞིང་ཁམས་ནས་སངས་རྒྱས་རྡོ་རྗེ་སེམས་དཔའ་ཡབ་ཡུམ་འཁོར་དང་བཅས་པ་འཆར་དུ་འོང་ངོ་༔ ལྷོ་ཕྱོགས་དཔལ་དང་ལྡན་པའི་ཞིང་ཁམས་ནས་སངས་རྒྱས་རིན་ཆེན་འབྱུང་ལྡན་ཡབ་ཡུམ་འཁོར་དང་བཅས་པ་འཆར་དུ་འོང་ངོ་༔ ནུབ་ཕྱོགས་པདྨ་བརྩེགས་པ་བདེ་བ་ཅན་གྱི་ཞིང་ཁམས་ནས་སངས་རྒྱས་སྣང་བ་མཐའ་ཡས་ཡབ་ཡུམ་འཁོར་དང་བཅས་པ་འཆར་དུ་འོང་ངོ་༔ བྱང་ཕྱོགས་ལས་རབ་རྫོགས་པའི་ཞིང་ཁམས་ནས་སངས་རྒྱས་དོན་ཡོད་གྲུབ་པ་ཡབ་ཡུམ་འཁོར་དང་བཅས་པ་འཇའ་འོད་ཀྱི་ཀློང་ནས་ཁྱོད་ལ་ད་ལྟ་འཆར་རོ༔ ཀྱེ་རིགས་ཀྱི་བུ་རིགས་ལྔ་ཡབ་ཡུམ་དེ་རྣམས་ཀྱི་ཕྱི་རོལ་ཏུ་སྒོ་བ་ཁྲོ་བོ་རྣམ་པར་རྒྱལ་བ་དང་༔ གཤིན་རྗེའི་གཤེད་པོ་དང་༔ རྟ་མགྲིན་རྒྱལ་པོ་དང་༔ བདུད་རྩི་འཁྱིལ་བ་དང་༔ སྒོ་མ་ལྕགས་ཀྱུ་མ་དང་༔ ཞགས་པ་མ་དང་༔ ལྕགས་སྒྲོག་མ་དང་༔ དྲིལ་བུ་མ་དང་༔ ལྷ་ཡི་ཐུབ་པ་དབང་པོ་བརྒྱ་བྱིན་དང་༔ ལྷ་མ་ཡིན་གྱི་ཐུབ་པ་ཐག་བཟང་རིས་དང་༔ མིའི་ཐུབ་པ་ཤཱཀྱ་ཐུབ་པ་དང་༔ བྱོལ་སོང་གི་ཐུབ་པ་སེང་གེ་རབ་བརྟན་དང་༔ ཡི་དྭགས་ཀྱི་ཐུབ་པ་ཁ་འབར་མ་དང་༔ དམྱལ་བའི་ཐུབ་པ་ཆོས་ཀྱི་རྒྱལ་པོ་དང་༔ བཅོམ་ལྡན་འདས་ཐུབ་པ་དྲུག་ཀྱང་འཆར་དུ་འོང་ངོ་༔ ཀུན་ཏུ་བཟང་པོ་དང་༔ ཀུན་ཏུ་བཟང་མོ་དང་༔ སངས་རྒྱས་ཐམས་ཅད་ཀྱི་སྤྱི་མྱེས་ཀུན་བཟང་ཡབ་ཡུམ་གཉིས་ཀྱང་འཆར་དུ་འོང་ངོ་༔ ལོངས་སྐུའི་ལྷ་ཚོགས་བཞི་བཅུ་རྩ་གཉིས་རང་གི་སྙིང་ཁའི་ནང་ནས་ཕྱིར་ཐོན་ནས༔ ཁྱོད་རང་ལ་འཆར་དུ་འོང་བས་ཁྱོད་རང་གི་དག་པའི་སྣང་བ་ལ་འཆར་བ་ཡིན་པས་ངོ་ཤེས་པར་གྱིས་ཤིག༔ ཀྱེ་རིགས་ཀྱི་བུ་ཞིང་ཁམས་དེ་དག་ཀྱང་གཞན་ཞིག་ན་ཡོད་པ་མ་ཡིན་ཏེ༔ ཁྱོད་རང་གི་སྙིང་ཁའི་ཕྱོགས་བཞི་དང་དབུས་ལྔ་ན་གནས་པ་ཡིན་ཏེ༔ སྙིང་ཁའི་ནང་ནས་ད་ལྟར་ཕྱིར་ཐོན་ནས་ཁྱོད་ལ་ཤར་བ་ཡིན་ནོ༔ སྐུ་དེ་རྣམས་ཀྱང་གཞན་ཞིག་ནས་འོང་བ་མ་ཡིན་ཏེ༔ ཁྱོད་རང་གི་རིག་པའི་རང་རྩལ་ལ་ཡེ་ནས་གྲུབ་པ་ཡིན་པས་དེ་ལྟར་ཡིན་པར་ངོ་ཤེས་པར་གྱིས་ཤིག༔ ཀྱེ་རིགས་ཀྱི་བུ་སྐུ་དེ་དག་མི་ཆེ་བ༔ མི་ཆུང་བ༔ ཆ་མཉམ་པ༔ རྒྱན་ཆ་ལུགས་ཁ་དོག་བཞུགས་ཚུལ་དང་༔ གདན་ཁྲི་རང་རང་གི་ཕྱག་རྒྱ་དང་བཅས་ཏེ༔ སྐུ་དེ་དག་ཀྱང་ལྔ་ལྔའི་ཟུང་གིས་བརྒྱན་པ༔ ལྔ་ཚན་རེ་རེ་ལ་འོད་ལྔའི་མུ་ཁྱུད་དང་བཅས་པ༔ ཡབ་ཀྱི་ཆ་འཛིན་པའི་རིགས་ཀྱི་སེམས་དཔའ་དང་༔ ཡུམ་གྱི་ཆ་འཛིན་པའི་རིགས་ཀྱི་སེམས་མ་དང་༔ དཀྱིལ་འཁོར་ཐམས་ཅད་དུས་གཅིག་ལ་རྫོགས་པར་འཆར་དུ་འོང་ངོ་༔ དེ་ཁྱོད་ཀྱི་ཡི་དམ་གྱི་ལྷ་ཡིན་པས་ངོ་ཤེས་པར་གྱིས་ཤིག༔ ཀྱཻ་རིགས་ཀྱི་བུ་རིགས་ལྔ་ཡབ་ཡུམ་དེ་དག་གི་ཐུགས་ཀ་ནས་ཡེ་ཤེས་བཞི་སྦྱོར་གྱི་འོད་ཟེར་ཤིན་ཏུ་ཕྲ་ལ་དྭངས་པ༔ ཉི་མའི་འོད་ཟེར་བ་ཐག་སྦྲེལ་བ་ལྟ་བུ་རེ་རེ་ཁྱོད་ཀྱི་སྙིང་ཁར་འཆར་དུ་འོང་སྟེ༔ དེ་ཡང་དང་པོར་རྣམ་པར་སྣང་མཛད་ཀྱི་ཐུགས་ཀ་ནས་ཆོས་ཀྱི་དབྱིངས་ཀྱི་ཡེ་ཤེས་དཀར་ལ་གསལ་བ༔ བཀྲག་ལ་ཉམ་ང་བའི་འོད་ཟེར་གྱི་སྣམ་བུ་གཅིག་ཁྱོད་རང་གི་སྙིང་ཀ་དང་འབྲེལ་མར་འཆར་དུ་འོང་ངོ་༔ འོད་ཟེར་གྱི་སྣམ་བུ་དེའི་སྟེང་དུ་ཐིག་ལེ་དཀར་པོ་ཟེར་དང་ལྡན་པ༔ མེ་ལོང་ཁ་སྦུབ་པ་ཙམ་ཤིན་ཏུ་གསལ་བ་བཀྲག་ལ་འཚེར་བ༔ དེ་ཡང་རང་བཞིན་གྱི་ཐིག་ལེ་ལྔ་ལྔས་བརྒྱན་པ༔ དེའི་མཐའ་དང་དབུས་མེད་པར་ཐིག་ལེ་དང་ཐིག་ཕྲན་གྱིས་བརྒྱན་པ་འཆར་དུ་འོང་ངོ་༔ རྡོ་རྗེ་སེམས་དཔའི་ཐུགས་ཀ་ནས་མེ་ལོང་ལྟ་བུའི་ཡེ་ཤེས་མཐིང་ལ་གསལ་བའི་སྣམ་བུའི་སྟེང་དུ་ཐིག་ལེ་མཐིང་ཀ་གཡུའི་ཕོར་བ་ཁ་སྦུབ་པ་ཙམ་ཐིག་ལེ་དང་ཐིག་ཕྲན་གྱིས་བརྒྱན་པ་འཆར་དུ་འོང་ངོ་༔ རིན་ཆེན་འབྱུང་ལྡན་གྱི་ཐུགས་ཀ་ནས་མཉམ་པ་ཉིད་ཀྱི་ཡེ་ཤེས་སེར་ལ་གསལ་བའི་སྣམ་བུའི་སྟེང་དུ་ཐིག་ལེ་སེར་པོ་གསེར་གྱི་ཕོར་བ་ཁ་སྦུབ་པ་ལྟ་བུ་ཐིག་ལེ་ཐིག་ཕྲན་དང་བཅས་པ་འཆར་དུ་འོང་ངོ་༔ སྣང་བ་མཐའ་ཡས་ཀྱི་ཐུགས་ཀ་ནས་སོ་སོར་རྟོག་པའི་ཡེ་ཤེས་དམར་ལ་གསལ་བའི་སྣམ་བུའི་སྟེང་དུ་ཐིག་ལེ་དམར་པོ་འོད་ཟེར་དང་ལྡན་པ་དཔེར་ན་བྱི་རུའི་ཕོར་བ་ཁ་སྦུབ་པ་ལྟ་བུ་ཡེ་ཤེས་ཀྱི་གཏིང་མདངས་དང་ལྡན་པ༔ ཤིན་ཏུ་གསལ་ལ་འཚེར་བ་དེ་ཡང་རང་བཞིན་གྱིས་ཐིག་ལེ་ལྔ་ལྔས་བརྒྱན་པ༔ དེའི་མཐའ་དབུས་མེད་པ་ཐིག་ལེ་དང་ཐིག་ཕྲན་གྱིས་བརྒྱན་པ་འཆར་དུ་འོང་ངོ་༔ དེ་རྣམས་ཀྱང་ཁྱོད་རང་གི་སྙིང་ཀ་དང་འབྲེལ་མར་འཆར་དུ་འོང་ངོ་༔ ཀྱེ་རིགས་ཀྱི་བུ་དེ་རྣམས་ཀྱང་ཁྱོད་རང་གི་རིག་པའི་རང་རྩལ་ལས་ཤར་བ་ཡིན་ཏེ༔ གཞན་ཞིག་ནས་འོང་བ་མ་ཡིན་པས༔ དེ་རྣམས་ལ་ཆགས་པ་མ་བྱེད་ཅིག༔ སྐྲག་པར་ཡང་མ་བྱེད་པར་རྣམ་པར་མི་རྟོག་པའི་ངང་དུ་ལྷོད་ལ་ཞོག་ཅིག༔ དེའི་ངང་ལ་སྐུ་དང་འོད་ཟེར་ཐམས་ཅད་ཁྱོད་རང་ལ་ཐིམ་ནས་སངས་རྒྱས་པར་འགྱུར་རོ༔ ཀྱེ་རིགས་ཀྱི་བུ་བྱ་བ་གྲུབ་པའི་ཡེ་ཤེས་ཀྱི་འོད་ལྗང་ཁུ་ནི་ཁྱོད་ཀྱི་རིག་པའི་ཡེ་ཤེས་ཀྱི་རང་རྩལ་མ་རྫོགས་པས་མི་སྣང་ངོ་༔ ཀྱེ་རིགས་ཀྱི་བུ་དེ་རྣམས་ནི་ཡེ་ཤེས་བཞི་སྦྱོར་གྱི་སྣང་བ་ཞེས་བྱ་སྟེ༔ རྡོ་རྗེ་སེམས་དཔའི་ཁོང་སེང་གི་ལམ་ཞེས་བྱའོ༔ དེའི་ཚེ་ཁྱོད་ཀྱིས་སྔར་བླ་མས་ངོ་སྤྲད་པའི་གདམས་ངག་དྲན་པར་གྱིས་ཤིག༔ ཁྱོད་ཀྱིས་ངོ་སྤྲོད་ཀྱི་དོན་དྲན་ན་སྔར་ཤར་བའི་སྣང་བ་དེ་རྣམས་ལ་ཡིད་ཆེས་པས་མ་བུ་འཕྲད་པ་ལྟ་བུའམ་སྔར་འདྲིས་པའི་མི་ཕྱིས་མཐོང་བ་བཞིན་ངོ་ཤེས་ཏེ་སྒྲོ་འདོགས་ཆོད་པ་ལྟ་བུ༔ རང་སྣང་ལ་རང་སྣང་དུ་ངོ་ཤེས་པས་ཆོས་ཉིད་རྣམ་པར་དག་པའི་ལམ་འགྱུར་བ་མེད་པ་ཡིན་པར་ཡིད་ཆེས་པས་རྒྱུན་གྱི་ཏིང་ངེ་འཛིན་སྐྱེས་ཏེ༔ རིག་པ་ལྷུན་གྲུབ་ཆེན་པོའི་སྐུ་ལ་ཐིམ་ནས་ལོངས་སྤྱོད་རྫོགས་པའི་སྐུར་སངས་རྒྱས་ཏེ་ཕྱིར་མི་ལྡོག་གོ༔ ཀྱེ་རིགས་ཀྱི་བུ་དག་པ་ཡེ་ཤེས་ཀྱི་འོད་དང་མཉམ་དུ་མ་དག་འཁྲུལ་བའི་སྣང་བ་རིགས་དྲུག་གི་འོད་འཆར་དུ་འོང་སྟེ༔ གང་ཞེ་ན༔ ལྷའི་འོད་དཀར་པོ་བཀྲག་མེད་དང་༔ ལྷ་མ་ཡིན་གྱི་འོད་དམར་པོ་བཀྲག་མེད་དང་༔ མིའི་འོད་སྔོན་པོ་བཀྲག་མེད་དང་༔ དུད་འགྲོའི་འོད་ལྗང་ཁུ་བཀྲག་མེད་དང་༔ ཡི་དྭགས་ཀྱི་འོད་སེར་པོ་བཀྲག་མེད་དང་༔ དམྱལ་བའི་འོད་དུད་ཁ་བཀྲག་མེད་པ་དྲུག་ཀྱང་༔ དག་པ་ཡེ་ཤེས་ཀྱི་འོད་དང་གཤིབ་མར་འཆར་དུ་འོང་ངོ་༔ དེ་ཙ་ན་ཁྱོད་འོད་གང་ལ་ཡང་འཛིན་པ་དང་ཆགས་པ་མ་བྱེད་ཅིག༔ མི་དམིགས་པའི་ངང་དུ་ལྷོད་ལ་ཞོག་ཅིག༔ ཁྱོད་དག་པ་ཡེ་ཤེས་ཀྱི་འོད་ལ་སྐྲག་ཅིང་མ་དག་རིགས་དྲུག་འཁོར་བའི་འོད་ལ་ཆགས་ན༔ འགྲོ་བ་རིགས་དྲུག་གི་ལུས་བླངས་ཏེ་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ནས་ཐར་པའི་དུས་མེད་པས་འོ་བརྒྱལ་ལོ༔ ཀྱེ་རིགས་ཀྱི་བུ༔ ཁྱོད་བླ་མའི་གདམས་ངག་གི་ངོ་སྤྲོད་མེད་པ་ཅིག་ཡིན་ན༔ གོང་གི་སྐུ་དང་དག་པ་ཡེ་ཤེས་ཀྱི་འོད་ལ་འཇིགས་ཤིང་སྐྲག་ནས༔ མ་དག་འཁོར་བའི་འོད་ལ་ཆགས་ཏུ་འོང་བས༔ དེ་ལྟར་མ་བྱེད་པར་དག་པ་ཡེ་ཤེས་ཀྱི་འོད་བཀྲག་ལ་འཚེར་བ་དེ་རྣམས་ལ་མོས་གུས་གྱིས་ཤིག༔ བཅོམ་ལྡན་འདས་རིགས་ལྔ་བདེ་བར་གཤེགས་པའི་ཐུགས་རྗེའི་ཡེ་ཤེས་ཀྱི་འོད་ཟེར་བདག་ཐུགས་རྗེས་འཛིན་པ་ལ་འབྱོན་པར་འདུག་གི༔ སྐྱབས་སུ་མཆིའོ་སྙམ་པའི་མོས་པ་མཛོད་ལ༔ འཁྲུལ་བ་རིགས་དྲུག་གི་འོད་ལ་མ་ཆགས་མ་ཞེན་པར་སངས་རྒྱས་རིགས་ལྔ་ཡབ་ཡུམ་ལ་འདུན་པ་རྩེ་གཅིག་ཏུ་གཏོད་ལ་སྨོན་ལམ་འདི་སྐད་དུ་ཐོབ་ཅིག༔ ཀྱེ་མ་དུག་ལྔ་དྲག་པོས་འཁོར་བར་འཁྱམས་པའི་ཚེ༔ ཡེ་ཤེས་བཞི་སྦྱོར་གསལ་བའི་འོད་ལམ་ལ༔ བཅོམ་ལྡན་རྒྱལ་བ་རིགས་ལྔས་ལམ་སྣ་དྲོངས༔ ཡུམ་མཆོག་རིགས་ལྔའི་ཡུམ་གྱིས་རྒྱབ་ནས་སྐྱོར༔ མ་དག་རིགས་དྲུག་འོད་ལམ་བསྒྲལ་དུ་གསོལ༔ བར་དོ་འཇིགས་པའི་འཕྲང་ལས་བསྒྲལ་ནས་ཀྱང་༔ དག་པའི་ཞིང་མཆོག་ལྔ་རུ་བསྐྱལ་དུ་གསོལ༔ དེ་ལྟར་དུ་སྨོན་ལམ་བཏབ་པས་རབ་རང་སྣང་དུ་ངོ་ཤེས་ནས་གཉིས་མེད་དུ་ཐིམ་ནས་སངས་རྒྱས་སོ༔ འབྲིང་མོས་གུས་དྲག་པོས་རང་ངོ་ཤེས་ནས་གྲོལ་བ་ཐོབ་བོ༔ ཐ་མས་ཀྱང་སྨོན་ལམ་རྣམ་པར་དག་པའི་མཐུས་རིགས་དྲུག་གི་སྐྱེ་སྒོ་བཀག་ནས་ཡེ་ཤེས་བཞི་སྦྱོར་གྱི་དོན་རྟོགས་ཏེ༔ རྡོ་རྗེ་སེམས་དཔའི་ཁོང་སེང་གི་ལམ་ལ་སངས་རྒྱས་པར་འགྱུར་རོ༔ ཡང་དེ་ལྟར་དུ་ཞིབ་ལ་གསར་བར་ངོ་སྤྲད་པས༔ འགྲོ་བ་ཤས་ཆེ་བ་ཞིག་ངོ་འཕྲོད་དེ་གྲོལ་བ་མང་དུ་འབྱུང་ངོ་༔ ཐ་མའི་ཡང་ཐ་མ་མིའི་ཡུལ་ལ་ཆོས་ཀྱི་བག་ཆགས་ཡེ་ནས་མེད་པའི་སྡིག་ཅན་དང་དམ་ཉམས་ལ་སོགས་པ་འགའ་ཞིག་ལས་ཀྱིས་འཁྲུལ་ནས་ངོ་སྤྲད་ཀྱང་མ་འཕྲོད་པར་མར་ལ་འཁྱམས་དུ་འོང་བས༔ ཞག་བདུན་པ་ལ་དག་པ་མཁའ་སྤྱོད་ཀྱི་ཞིང་ཁམས་ནས་རིག་འཛིན་གྱི་ལྷ་ཚོགས་རྣམས་བསུ་བ་ལ་འོང་བས༔ དེའི་དུས་སུ་ཉོན་མོངས་པ་གཏི་མུག་ལས་གྲུབ་པའི་དུད་འགྲོའི་འོད་ལམ་གྱིས་ཀྱང་བསུ་ལ་ལ་འོང་ངོ་༔ དེའི་དུས་སུ་ཡང་ངོ་སྤྲད་པ་ནི༔ ཚེ་འདས་ཀྱི་མིང་ནས་འབོད་ལ་འདི་སྐད་དོ༔ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ ཞག་བདུན་པ་ལ་བག་ཆགས་དབྱིངས་སུ་དག་པའི་འོད་ཁྲ་བོ་ཤར་དུ་འོང་ངོ་༔ དེའི་དུས་སུ་དག་པ་མཁའ་སྤྱོད་ཀྱི་ཞིང་ཁམས་ནས་རིག་འཛིན་གྱི་ལྷ་ཚོགས་རྣམས་བསུ་བ་ལ་འོང་སྟེ༔ འཇའ་དང་འོད་དུ་འཐིམ་པའི་དཀྱིལ་འཁོར་གྱི་དབུས་སུ་རྣམ་པར་སྨིན་པའི་རིག་འཛིན་བླ་ན་མེད་པ་པདྨ་གར་གྱི་དབང་ཕྱུག་ཅེས་བྱ་བ་སྐུ་མདོག་འོད་ལྔའི་མདངས་དང་ལྡན་པ་ཡུམ་མཁའ་འགྲོ་མ་དམར་མོ་སྐུ་ལ་འཁྲིལ་བ༔ གྲི་གུག་དང་ཐོད་ཁྲག་གིས་གར་མཛད་ཅིང་༔ ལྟ་སྟངས་ཀྱི་ཕྱག་རྒྱ་ནམ་མཁའ་ལ་མཛད་པ་ཞིག་འཆར་དུ་འོང་ངོ་༔ དཀྱིལ་འཁོར་དེའི་ཤར་ནས་ས་ལ་གནས་པའི་རིག་འཛིན་ཞེས་བྱ་བ༔ སྐུ་མདོག་དཀར་ཞིང་འཛུམ་པའི་མདངས་དང་ལྡན་པ༔ ཡུམ་མཁའ་འགྲོ་མ་དཀར་མོ་སྐུ་ལ་འཁྲིལ་བ༔ གྲི་གུག་དང་ཐོད་ཁྲག་གིས་གར་མཛད་ཅིང་༔ ལྟ་སྟངས་ཀྱི་ཕྱག་རྒྱ་ནམ་མཁའ་ལ་མཛད་པ་ཞིག་འཆར་དུ་འོང་ངོ་༔ དཀྱིལ་འཁོར་དེའི་ལྷོ་ནས་ཚེ་ལ་དབང་བའི་རིག་འཛིན་ཞེས་བྱ་བ༔ སྐུ་མདོག་སེར་ཞིང་མཛེས་པའི་དཔེ་བྱད་དང་ལྡན་པ༔ ཡུམ་མཁའ་འགྲོ་མ་སེར་མོ་སྐུ་ལ་འཁྲིལ་བ༔ གྲི་གུག་དང་ཐོད་ཁྲག་གིས་གར་མཛད་ཅིང་༔ ལྟ་སྟངས་ཀྱི་ཕྱག་རྒྱ་ནམ་མཁའ་ལ་མཛད་པ་ཞིག་འཆར་དུ་འོང་ངོ་༔ དཀྱིལ་འཁོར་དེའི་ནུབ་ནས་ཕྱག་རྒྱ་ཆེན་པོའི་རིག་འཛིན་ཞེས་བྱ་བ༔ སྐུ་མདོག་དམར་ཞིང་འཛུམ་པའི་མདངས་ལྡན་པ༔ ཡུམ་མཁའ་འགྲོ་མ་དམར་མོ་སྐུ་ལ་འཁྲིལ་བ༔ གྲི་གུག་དང་ཐོད་ཁྲག་གིས་གར་མཛད་ཅིང་༔ ལྟ་སྟངས་ཀྱི་ཕྱག་རྒྱ་ནམ་མཁའ་ལ་མཛད་པ་ཞིག་འཆར་དུ་འོང་ངོ་༔ དཀྱིལ་འཁོར་དེའི་བྱང་ནས་ལྷུན་གྱིས་གྲུབ་པའི་རིག་འཛིན་ཞེས་བྱ་བ༔ སྐུ་མདོག་ལྗང་ཞིང་ཞལ་ཁྲོ་འཛུམ་དང་ལྡན་པ༔ ཡུམ་མཁའ་འགྲོ་མ་ལྗང་ཁུ་སྐུ་ལ་འཁྲིལ་བ༔ གྲི་གུག་དང་ཐོད་ཁྲག་གིས་གར་མཛད་ཅིང་༔ ལྟ་སྟངས་ཀྱི་ཕྱག་རྒྱ་ནམ་མཁའ་ལ་མཛད་པ་ཅིག་འཆར་དུ་འོང་ངོ་༔ རིག་འཛིན་དེ་རྣམས་ཀྱི་ཕྱི་རིམ་དུ་མཁའ་འགྲོ་མའི་ཚོགས་དཔག་ཏུ་མེད་པ་དང་༔ དུར་ཁྲོད་བརྒྱད་ཀྱི་མཁའ་འགྲོ༔ རིགས་བཞིའི་མཁའ་འགྲོ༔ གནས་གསུམ་གྱི་མཁའ་འགྲོ༔ གནས་བཅུའི་མཁའ་འགྲོ༔ ཡུལ་ཉི་ཤུ་རྩ་བཞིའི་མཁའ་འགྲོ་མ་རྣམས་དང་༔ དཔའ་བོ་དང་༔ དཔའ་མོ་དང་༔ གིང་དང་༔ ཆོས་སྐྱོང་བའི་སྲུང་མ་དང་བཅས་པ་ཐམས་ཅད་རུས་པའི་རྒྱན་དྲུག་གསོལ་ནས༔ རྔ་དང་༔ རྐང་དུང་དང་༔ ཐོད་རྔ་དང་༔ ཞིང་ལྤགས་ཀྱི་རྒྱལ་མཚན་དང་༔ མི་ལྤགས་ཀྱི་བླ་རེ་དང་༔ མི་ལྤགས་ཀྱི་འཕན་དང་༔ མི་གསུར་གྱི་དུད་པ་དང་༔ རོལ་མོའི་བྱེ་བྲག་དཔག་ཏུ་མེད་པ་དང་བཅས་ཏེ་འཇིག་རྟེན་གྱི་ཁམས་ཐམས་ཅད་ཁེངས་པར༔ ཤིག་ཤིག་ཡོམ་ཡོམ་འགུལ་འགུལ་དུ་འོང་ངོ་༔ རོལ་མོའི་སྒྲ་ཐམས་ཅད་ཀྱང་མགོ་འགས་པ་ཙམ་དུ་ལྡིར་ནས་འོང་ངོ་༔ གར་སྣ་ཚོགས་བྱེད་ཅིང་དམ་ཚིག་ཅན་རྣམས་ཀྱི་བསུ་བར་འོང་ངོ་༔ དམ་ཉམས་རྣམས་ལ་ཆད་པ་བཅད་དུ་འོང་ངོ་༔ ཀྱེ་རིགས་ཀྱི་བུ༔ བག་ཆགས་དབྱིངས་སུ་དག་པ་ལྷན་ཅིག་སྐྱེས་པའི་ཡེ་ཤེས་འོད་ཁ་དོག་ལྔ་དང་ལྡན་པ་ཚོན་སྐུད་བསྒྲིལ་བ་ལྟ་བུར་ཁྲ་ཤིག་ཤིག་པ༔ མེར་མེར་པ༔ ཕྱམ་ཕྱམ༔ ཞིག་གསལ་ལ་དྭངས་པ༔ བཀྲག་ལ་ཉམ་ང་བ་གཅིག་རིག་འཛིན་གྱི་གཙོ་བོ་ལྔའི་ཐུགས་ཀ་ནས་ཁྱོད་རང་གི་སྙིང་གི་ཐད་ཀར་མིག་གིས་ལྟ་མི་བཟོད་པ་ཙམ་དུ་ཟུག་ནས་འོང་ངོ་༔ དེ་དང་མཉམ་དུ་དུད་འགྲོའ་ིའོད་ལྗང་ཁུ་བཀྲག་མེད་པ་ཞིག་ཀྱང་ཡེ་ཤེས་ཀྱི་འོད་དང་མཉམ་དུ་འཆར་དུ་འོང་ངོ་༔ དེའི་དུས་སུ་ཁྱོད་བག་ཆགས་འཁྲུལ་བའི་དབང་གིས་འོད་ཁ་དོག་ལྔ་ལྡན་དེ་ལ་སྐྲག་ཅིང་བྲོས་ནས་དུད་འགྲོའི་འོད་བཀྲག་མེད་དེ་ལ་ཆགས་སུ་འོང་བས་དེ་ཙ་ན་ཁྱོད་འོད་ཁ་དོག་ལྔ་ལྡན་བཀྲག་མདངས་ཅན་དེ་ལ་མ་འཇིགས་ཤིག༔ མ་སྐྲག་ཅིག༔ ཡེ་ཤེས་སུ་རང་ངོ་ཤེས་པར་གྱིས་ཤིག༔ འོད་ཀྱི་ནང་ཐམས་ཅད་ཆོས་ཉིད་ཀྱི་རང་སྒྲ་འབྲུག་སྟོང་ལྡིར་བ་ཙམ་འོང་༔ སྒྲ་དྲག་ལ་ལྡིར་ཆེ་བ༔ འུར་སྒྲ༔ བསོ་སྒྲ༔ སྒྲ་དྲག་པོའི་དྲག་སྔགས་དང་བཅས་ནས་འོང་ངོ་༔ (སྐྲག་སྔངས་དྲག་པོ་བཅས་ནས་འོང་ངོ༔) དེ་ལ་མ་འཇིགས་ཤིག༔ མ་བྲོས་ཤིག༔ མ་སྐྲག་ཅིག༔ ཁྱོད་རང་གི་རང་སྣང་རིག་པའི་རང་རྩལ་དུ་ངོ་ཤེས་པར་གྱིས་ཤིག༔ དུད་འགྲོའི་འོད་ལྗང་ཁུ་བཀྲག་མེད་དེ་ལ་མ་ཆགས་ཤིག༔ མ་ཞེན་ཅིག༔ དེ་ལ་ཆགས་ན་ཁྱོད་གཏི་མུག་དུད་འགྲོའི་གནས་སུ་ལྷུང་སྟེ་གླེན་ལྐུགས་བཀོལ་སྤྱོད་ཀྱི་སྡུག་བསྔལ་མཐའ་ལས་འདས་པ་མྱོང་སྟེ༔ ཐོན་པའི་དུས་མི་འབྱུང་བས༔ དེ་ལ་མ་ཆགས་ཤིག༔ འོད་ཁ་དོག་ལྔ་ལྡན་གསལ་ལ་འཚེར་བ་དེ་ལ་མོས་པ་གྱིས་ལ༔ བཅོམ་ལྡན་འདས་རིག་འཛིན་སློབ་དཔོན་གྱི་ལྷ་ཚོགས་ལ་འདུན་པ་རྩེ་གཅིག་ཏུ་གཏོད་ལ༔ རིག་འཛིན་གྱི་ལྷ་ཚོགས་དཔའ་བོ་མཁའ་འགྲོ་དང་བཅས་པ་འདི་རྣམས་བདག་དག་པ་མཁའ་སྤྱོད་ཀྱི་གནས་སུ་བསུ་བ་ལ་འབྱོན་པར་འདུག་པས༔ ཁྱེད་རྣམས་རེ་མཁྱེན་བདག་ལྟ་བུའི་སེམས་ཅན་ཚོགས་མ་བསགས་པ༔ ད་ཞག་ཕན་ཆད་དུས་གསུམ་གྱི་བདེ་བར་གཤེགས་པ་ལྔའི་ལྷ་ཚོགས་དེ་ཙམ་གྱི་ཐུགས་རྗེའི་འོད་ཟེར་གྱིས་བཟུང་ཡང་མ་ཟིན་པ་འདི་བདག་འདྲ་བ་ཨ་ཙ་མ༔ ད་ནི་རིག་འཛིན་གྱི་ལྷ་ཚོགས་ཁྱེད་རྣམས་ཀྱིས་ང་འདི་མན་ཆད་དུ་ཅི་ནས་ཀྱང་མ་གཏོང་ཞིག༔ ཐུགས་རྗེའི་ལྕགས་ཀྱུས་ཟུངས་ཤིག༔ དག་པ་མཁའ་སྤྱོད་ཀྱི་ཞིང་དུ་ད་ལྟ་ཁོ་ནར་དྲངས་དུ་གསོལ༔ སྙམ་པའི་འདུན་པ་རྩཻ་གཅིག་ཏུ་གཏོད་ལ་སྨོན་ལམ་འདི་སྐད་དུ་ཐོབ་ཅིག༔ ཀྱེ་མ་རིག་འཛིན་ལྷ་ཚོགས་རྣམས་ཀྱང་དགོངས་སུ་གསོལ༔ བརྩེ་བ་ཆེན་པོས་ལམ་སྣ་དྲངས་དུ་གསོལ༔ བག་ཆགས་དྲག་པོས་འཁོར་བར་འཁྱམས་པའི་ཚེ༔ ལྷན་སྐྱེས་ཡེ་ཤེས་གསལ་བའི་འོད་ལམ་ལ༔ དཔའ་བོ་རིག་འཛིན་རྣམས་ཀྱིས་ལམ་སྣ་དྲོངས༔ ཡུམ་མཆོག་མཁའ་འགྲོའི་ཚོགས་ཀྱིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་ནས་ཀྱང་༔ དག་པ་མཁའ་སྤྱོད་ཞིང་ཁམས་དེ་རུ་སྐྱོལ༔ ཅེས་མོས་གུས་དྲག་པོས་སྨོན་ལམ་བཏབ་པས༔ རིག་འཛིན་ལྷ་ཚོགས་རྣམས་ཀྱི་ཐུགས་ཀར་འཇའ་འོད་དུ་ཐིམ་ནས༔ དག་པ་མཁའ་སྤྱོད་ཀྱི་གནས་སུ་སྐྱེ་བར་ཐེ་ཚོམ་མེད་དོ༔ དགེ་བའི་བཤེས་གཉེན་གྱི་རིགས་ཐམས་ཅད་ཀྱང་འདི་ནས་ངོ་འཕྲོད་དེ་གྲོལ་བ་ཤ་སྟག་གོ༔ འདིར་བག་ཆགས་ངན་ཀྱང་གྲོལ་བར་ངེས་སོ༔ དེ་ཡན་ཆད་ནི་འཆི་ཁའི་བར་དོར་འོད་གསལ་ངོ་སྤྲད་པ་དང་༔ ཆོས་ཉིད་ཞི་བའི་བར་དོ་ངོ་སྤྲད་པ་ཐོས་གྲོལ་ཆེན་མོ་ཐལ་ལོ༔ ཨིཐྀ གུ་ཧྱ༔ ས་མ་ཡ༔ རྒྱ་རྒྱ་རྒྱ༔ ད་ནི་ཁྲོ་བོའི་བར་དོ་འཆར་ཚུལ་བསྟན་པར་བྱ་སྟེ༔ དེ་ཡང་གོང་དུ་ཞི་བའི་བར་དོ་འཕྲང་རིམ་པ་བདུན་ཡོད་དེ༔ དེ་རྣམས་ལ་རིམ་པ་བཞིན་དུ་ངོ་སྤྲོད་པ་གཅིག་ལ་ངོ་མ་འཕྲོད་ཀྱང་གཅིག་ལ་ངོ་འཕྲོད་དེ་གྲོལ་བ་ཐོབ་པ་ནི་དཔག་ཏུ་མེད་པ་འབྱུང་ངོ་༔ དེ་ལྟར་གྲོལ་བ་མང་དུ་འབྱུང་ཡང༌། སེམས་ཅན་ནི་གྲངས་མང་༔ ལས་ངན་ནི་ཚན་ཆ༔ེ སྡིག་སྒྲིབ་ནི་ལྷུན་འཐུག༔ བག་ཆགས་ནི་ཡུན་རིང་༔ མ་རིག་འཁྲུལ་འཁོར་འདི་ལ་ཟད་ཅིང་འཕྲི་བ་མེད་པས༔ དེ་ལྟར་ཞིབ་ཏུ་ངོ་སྤྲད་ཀྱང་མ་གྲོལ་བར་ཐུར་དུ་འཁྱམས་པ་ཚན་ཆེ་སྟེ༔ དེ་ཡང་ཞི་བའི་ལྷ་ཚོགས་དང་༔ རིག་འཛིན་མཁའ་འགྲོའི་བསུན་མ་འདས་པའི་འོག་ཏུ༔ ཁྲག་འཐུང་ཁྲོ་བོའི་ལྷ་ཚོགས༔ འབར་བ་ལྔ་བཅུ་རྩ་བརྒྱད༔ གོང་གི་ཞི་བའི་ལྷ་ཚོགས་གནས་འགྱུར་ནས་འཆར་དུ་འོང་ངོ་༔ དེ་ནི་གོང་དང་མི་འདྲ་སྟེ༔ འདིར་ཁྲོ་བོའི་བར་དོ་ཡིན་པས་འཇིགས་སྐྲག་སྔངས་གསུམ་གྱི་དབང་དུ་འགྲོ་སྟེ༔ ངོ་འཕྲོད་པ་ཡང་དཀའ་རུ་འགྲོའོ༔ རིག་པ་རང་དབང་མི་ཐོབ་པར་བརྒྱལ་བ་ཁོར་ཡུག་ཏུ་འོང་སྟེ༔ ཅུང་ཟད་ཅིག་ངོས་ཟིན་ནས་གྲོལ་བ་ཡང་སླ་སྟེ༔ དེ་ཅིའི་ཕྱིར་ཞེ་ན༔ སྔངས་སྐྲག་འཇིགས་གསུམ་གྱི་སྣང་བ་ཤར་བས་རིག་པ་ཡེངས་ལོངས་མེད་དེ༔ རིག་པ་རྩེ་གཅིག་ཏུ་བསྒྲིམ་ནས་ཡོད་པའི་ཕྱིར་རོ༔ འདིའི་སྐབས་སུ་འདི་ལྟ་བུའི་གདམས་པ་དང་མ་འཕྲད་ན༔ ཐོས་པ་རྒྱ་མཚོ་ལྟ་བུ་ཡོད་ཀྱང་འདིར་ཕན་པ་མེད༔ འདུལ་བ་འཛིན་པའི་མཁན་པོ་དང་༔ མཚན་ཉིད་པའི་སྟོན་པ་ཆེན་པོ་རྣམས་ཀྱང་སྐབས་འདིར་འཁྲུལ་ནས་ངོ་མ་འཕྲོད་དེ༔ འཁོར་བར་འཁྱམས་པ་ཡོད་དོ༔ སྐྱེ་བོ་ཐ་མལ་པ་རྣམས་ནི་ཧ་ཅང་ཡང་ཆེ་སྟེ༔ སྔངས་སྐྲག་འཇིགས་གསུམ་ལ་བྲོས་པས་ངན་སོང་གི་གཡང་ས་ལ་ལྷུང་ནས་སྡུག་བསྔལ་ལོ༔ གསང་སྔགས་ལ་སྤྱོད་པའི་རྣལ་འབྱོར་བ་ཐ་མའི་ཐ་མ་ཞིག་ཡིན་ན་ཡང་༔ ཁྲག་འཐུང་གི་ལྷ་ཚོགས་མཐོང་མ་ཐག་ཏུ་སྔར་འདྲིས་ཀྱི་མི་དང་འཕྲད་པ་ལྟ་བུར་ཡི་དམ་གྱི་ལྷ་ཡིན་པ་ངོ་ཤེས་པས་ཡིད་ཆེས་ཏེ༔ གཉིས་སུ་མེད་པར་ཐིམ་ནས་སངས་རྒྱས་པར་འགྱུར་རོ༔ དེ་ཡང་མི་ཡུལ་དུ་ཁྲག་འཐུང་གི་སྐུ་འདི་རྣམས་ལ་མངོན་རྟོགས་བསྒོམས་པ་དང་༔ མཆོད་བསྟོད་བྱས་པ་དང་༔ ཐ་ན་སྐུ་གཟུགས་རིས་སུ་བྲིས་པ་དང་༔ འབུར་དུ་དོད་པ་ལ་སོགས་མཐོང་བ་ཁོ་ནས་ཀྱང་འདིར་སྐུ་གཟུགས་ཤར་བ་དང་༔ ངོ་ཤེས་ནས་གྲོལ་བ་ཐོབ་པའི་གནད་ཀྱང་དེ་ལྟར་ཡིན་ནོ༔ ཡང་མི་ཡུལ་དུ་འདུལ་འཛིན་གྱི་མཁན་པོ་དང་༔ མཚན་ཉིད་ཀྱི་སྟོན་པ་ཆོས་སྤྱོད་ལ་ཇི་ལྟར་བརྩོན་ཞིང་༔ བཤད་པའི་ཆོས་ལ་ཇི་ལྟར་མཁས་ཀྱང་གྲོངས་པའི་ཚེ༔ གདུང་དང་རིང་བསྲེལ་དང་༔ འཇའ་འོད་ལ་སོགས་པའི་རྟགས་མི་འབྱོན་ཏེ༔ དེ་ནི་གསོན་པོའི་དུས་སུ་གསང་སྔགས་བློར་མ་ཤོང་པ་དང་༔ གསང་སྔགས་ལ་གཤེ་སྐུར་བཏབ་པ་དང་༔ གསང་སྔགས་ཀྱི་ལྷ་ཚོགས་རྣམས་རྒྱུས་མེད་པའི་དབང་གིས་བར་དོར་ཤར་ཡང་ངོ་མ་ཤེས་ཏེ༔ སྔར་མ་མཐོང་བ་ཞིག་གློ་བུར་དུ་མཐོང་བ་དེ་དགྲར་སོང་ནས༔ དེ་ལ་སྡང་སེམས་སྐྱེས་ནས་དེའི་རྐྱེན་བྱས་ནས་ངན་སོང་དུ་འགྲོ་བས༔ དེའི་ཕྱིར་འདུལ་བ་འཛིན་པ་དང་༔ མཚན་ཉིད་པ་ཇི་ལྟར་བཟང་ཡང་༔ ནང་ན་གསང་སྔགས་ཀྱི་ཉམས་ལེན་མེད་པས༔ གདུང་དང་༔ ཤ་རི་རམ་དང་༔ རིང་བསྲེལ་དང་༔ འཇའ་འོད་ལ་སོགས་པའི་རྟགས་མི་འབྱོན་པའི་མཚན་ཉིད་དེ་ལྟར་རོ༔ གསང་སྔགས་པ་མཐའ་མའི་ཡང་མཐའ་ཞིག་ཡིན་ཡང་འཕྲལ་དུ་སྤྱོད་ལམ་རྩིང་པ་དང་༔ མི་བཙུན་པ་དང་༔ མི་མཁས་པ་དང་༔ ཚུལ་དང་མི་མཐུན་པའི་སྤྱོད་ལམ་མི་མཛེས་པ་ཇི་ལྟར་འདུག་ཀྱང་༔ དེས་གསང་སྔགས་ཀྱི་ཆོས་ལ་ཉམས་སུ་ལེན་མ་ཐུབ་ན་ཡང་༔ དེ་ལ་ལོག་ལྟ་མ་སྐྱེས་པ་དང་༔ ཐེ་ཚོམ་མེད་པ་དང་༔ གསང་སྔགས་ལ་མོས་པ་བྱས་པ་ཁོ་ནས་ཀྱང་༔ སྐབས་འདིར་གྲོལ་བ་ཐོབ་པ་ཡིན་ཏེ༔ མི་ཡུལ་དུ་སྤྱོད་ལམ་མ་མཛེས་ཀྱང་༔ ཤི་བའི་ཚེ་ན་གདུང་དང་༔ རིང་བསྲེལ་དང་༔ སྐུ་གཟུགས་དང་༔ འཇའ་འོད་ལ་སོགས་པའི་རྟགས་སྣ་རེ་ཅིས་ཀྱང་འབྱུང་བར་འགྱུར་རོ༔ དེས་ན་གསང་སྔགས་འདི་བྱིན་རླབས་ཤིན་ཏུ་ཆེ་བའི་ཕྱིར་རོ༔ གསང་སྔགས་ཀྱི་རྣལ་འབྱོར་པ་འབྲིང་ཡན་ཆད༔ བསྐྱེད་རྫོགས་བསྒོམས་པ་དང་༔ སྙིང་པོ་བཟླས་པ་ལ་སོགས་པས་ཉམས་སུ་བླངས་པ་རྣམས་ནི༔ ཆོས་ཉིད་བར་དོ་འདི་ཙམ་དུ་མར་འཁྱམས་མི་དགོས་ཏེ༔ དབུགས་ཆད་མ་ཁད་དུ་རིག་འཛིན་དང་༔ དཔའ་བོ་མཁའ་འགྲོ་ལ་སོགས་པས་དག་པ་མཁའ་སྤྱོད་དུ་ངེས་པར་གདན་དྲངས་པར་འགྱུར་ཏེ༔ དེའི་རྟགས་སུ་ནམ་མཁའ་གཡའ་དག་པ་དང་༔ འཇའ་དང་འོད་དུ་འཐིམ་པ་དང་༔ མེ་ཏོག་གི་ཆར་བ་དང་༔ སྤོས་དྲི་དང་༔ ནམ་མཁའ་ལ་རོལ་མོའི་སྒྲ་དང་ཟེར་དང་༔ གདུང་དང་༔ རིང་བསྲེལ་དང་༔ སྐུ་གཟུགས་ལ་སོགས་པ་ནི་དེའི་རྟགས་ཡིན་ནོ༔ དེའི་ཕྱིར་འདུལ་བ་འཛིན་པ་དང་༔ མཚན་ཉིད་སྟོན་པ་དང་༔ དམ་ཚིག་ཉམས་པའི་སྔགས་པ་དང་༔ སྐྱེ་བོ་ཐ་མལ་བ་ཐམས་ཅད་ལ་ཐོས་གྲོལ་ཆེན་མོ་འདི་མེད་པའི་ཐབས་མེད་དོ༔ རྫོགས་པ་ཆེན་པོ་དང་༔ ཕྱག་རྒྱ་ཆེན་པོ་བསྒོམ་པ་ལ་སོགས་པའི་སྒོམ་ཆེན་པ་དག་ནི༔ འཆི་ཁའི་བར་དོ་འོད་གསལ་ངོས་ཟིན་ནས་ཆོས་སྐུ་ཐོབ་པར་འགྱུར་བས་ཐོས་གྲོལ་ཆེན་མོ་འདི་ཀླག་མི་དགོས་པ་ཤ་སྟག་འོང་ངོ་༔ དེ་ཡང་འཆི་ཁའི་བར་དོར་འོད་གསལ་ངོས་ཟིན་ནས་ཆོས་སྐུ་ཐོབ་བོ༔ ཆོས་ཉིད་བར་དོར་ཞི་ཁྲོའི་སྣང་བ་ཤར་བའི་དུས་སུ་ངོས་ཟིན་ནས་ལོངས་སྤྱོད་རྫོགས་པའི་སྐུ་ཐོབ༔ སྲིད་པའི་བར་དོར་ངོས་ཟིན་ནས་སྤྲུལ་སྐུ་ཐོབ་པ་དང་གནས་མཐོ་རིས་སུ་སྐྱེས་ཏེ༔ ཆོས་འདི་དང་འཕྲད་ནས་སྐྱེ་བ་ཕྱི་མ་ལ་སྤྱོད་པའི་ལས་འཕྲོ་ཡོད་པས་དེའི་ཕྱིར་ཐོས་གྲོལ་འདི་ནི༔ མ་སྒོམ་པར་སངས་རྒྱས་པའི་ཆོས༔ ཐོས་པ་ཙམ་གྱིས་གྲོལ་བ་ཐོབ་པའི་ཆོས༔ སྡིག་པོ་ཆེ་གསེབ་ལམ་ལ་འཁྲིད་པའི་ཆོས༔ སྐད་ཅིག་གཅིག་གིས་བྱེ་བྲག་ཕྱེད་པའི་ཆོས༔ སྐད་ཅིག་གཅིག་གིས་རྫོགས་སངས་རྒྱས་པའི་ཆོས་ཟབ་མོ་ཡིན་ཏེ༔ འདིས་སླེབ་པའི་སེམས་ཅན་ངན་སོང་དུ་འགྲོ་བ་མི་སྲིད་དོ༔ འདི་དང་བཏགས་གྲོལ་གཉིས་བསྒྲགས་པས་གསེར་གྱི་མཎྜལ་ལ་གཡུའི་འཕྲ་བཀོད་པ་དང་འདྲ་བས་བསྒྲགས་པར་གྱིས་ཤིག༔ དེ་ལྟར་ཐོས་གྲོལ་གྱི་དགོས་ཆེད་བསྟན་ནས་ད་ནི་ཁྲོ་བོའི་བར་དོ་འཆར་ཚུལ་ངོ་སྤྲོད་པར་བྱ་སྟེ༔ དེ་ཡང་ཚེ་འདས་ཀྱི་མིང་ནས་ལན་གསུམ་བོས་ལ་འདི་སྐད་དོ༔ ཀྱཻ་རིགས་ཀྱི་བུ༔ མ་ཡེངས་པར་ཉོན་ཅིག༔ ཁྱོད་ཀྱིས་གོང་དུ་ཞི་བའི་བར་དོ་ཤར་ཡང་ངོས་མ་ཟིན་པས་ད་དུང་འདིར་འཁྱམས་པ་ཡིན་ནོ༔ ད་ནི་ཞག་བརྒྱད་པ་ལ་ཁྲག་འཐུང་ཁྲོ་བོའི་ལྷ་ཚོགས་འཆར་དུ་འོང་ངོ་༔ མ་ཡེངས་པར་ངོས་ཟིན་པར་གྱིས་ཤིག༔ ཀྱེ་རིགས་ཀྱི་བུ་༔ དཔལ་ཆེན་བུདྡྷ་ཧེ་རུ་ཀ་ཞེས་བྱ་བ་སྐུ་མདོག་སྨུག་ནག་དབུ་གསུམ་ཕྱག་དྲུག་ཞབས་བཞི་བགྲད་པ༔ གཡས་ཞལ་དཀར་བ༔ གཡོན་ཞལ་དམར་བ༔ དབུས་སྨུག་ནག་ཏུ་ཡོད་པ༔ སྐུ་འོད་ཀྱི་ཕུང་པོ་འབར་བ༔ སྤྱན་དགུ་འཇིགས་པའི་སྡང་མིག་ཏུ་གཟིགས་པ༔ སྨིན་མ་གློག་བཞིན་དུ་འཁྱུག་པ༔ མཆེ་བ་ཟངས་ཡག་ཏུ་འབར་བ༔ ཨ་ལ་ལ་དང་༔ ཧ་ཧེའི་གད་རྒྱང་སྒྲོག་པ༔ ཤའུ་ཞེས་པ་དང་བཤུག་པའི་སྒྲ་ཆེན་པོ་སྒྲོག་པ༔ དབུ་སྐྲ་དམར་སེར་གྱེན་དུ་འཕྱོ་ཞིང་འབར་བ༔ ཉི་ཟླ་དང་ཐོད་སྐམ་གྱིས་དབུར་བརྒྱན་པ༔ སྦྲུལ་ནག་དང་ཐོད་རློན་གྱིས་སྐུ་ལ་བརྒྱན་པ༔ ཕྱག་དྲུག་གཡས་ཀྱི་དང་པོ་ན་འཁོར་ལོ༔ བར་བ་ན་དགྲ་སྟྭ༔ ཐ་མ་ན་རལ་གྲི༔ གཡོན་གྱི་དང་པོ་ན་དྲིལ་བུ༔ བར་བ་ན་བྷན་དྷ༔ ཐ་མ་ན་ཐོང་གཤོལ་བསྣམས་པ༔ ཡུམ་བྷུདྡྷ་ཀྲོ་ཏི་ཤྭ་རི་མ་སྐུ་ལ་འཁྲིལ་བ༔ གཡས་པས་ཡབ་ཀྱི་མགུལ་ནས་འཁྱུད་པ༔ གཡོན་པས་དུང་དམར་ཞལ་དུ་སྟོབས་པ༔ རྐན་སྒྲ་ཐུག་ཆོམ་དང་༔ འུར་སྒྲ་འབྲུག་སྟོང་ལྡིར་བ་ཙམ་སྒྲོག་པ༔ རྡོ་རྗེ་འབར་བའི་སྤུ་གསེབ་ནས་ཡེ་ཤེས་ཀྱི་མེ་འབར་བ༔ ཁྱུང་གིས་འདེགས་པའི་གདན་ལ་བརྐྱང་བསྐུམས་སུ་བཞུགས་པ༔ རང་གི་ཀླད་པའི་ནང་ནས་ཐོན་ནས་རང་ལ་མངོན་སུམ་དེ་ཀ་ལྟར་འཆར་རོ༔ དེ་ལ་མ་འཇིགས་ཤིག༔ མ་སྐྲག་ཅིག༔ མ་སྔངས་ཤིག༔ རང་གི་རིག་པའི་སྐུར་ངོ་ཤེས་པར་གྱིས་ཤིག༔ ཁྱོད་རང་གི་ཡི་དམ་གྱི་ལྷ་ཡིན་པས་མ་སྐྲག་ཅིག༔ དོན་ལ་བཅོམ་ལྡན་འདས་རྣམ་པར་སྣང་མཛད་ཡབ་ཡུམ་དངོས་ཡིན་པས་མ་སྐྲག་ཅིག༔ ངོ་ཤེས་པ་དང་གྲོལ་བ་དུས་མཉམ་དུ་འོང་ངོ་༔ ཞེས་བསྒྲགས་པས་ཡི་དམ་དུ་ངོ་ཤེས་ནས་གཉིས་སུ་མེད་པར་ཐིམ་ནས་ལོངས་སྤྱོད་རྫོགས་པའི་སྐུར་སངས་རྒྱས་པར་འགྱུར་རོ༔ ཡང་དེ་ལ་སྔངས་སྐྲག་སྐྱེས་ཤིང་བྲོས་ནས་ངོ་མ་འཕྲོད་ན༔ ཡང་ཞག་དགུ་པ་ལ༔ ཁྲག་འཐུང་རྡོ་རྗེ་རིགས་ཀྱིས་བསུ་བ་ལ་འོང་བས་ངོ་སྤྲད་པ་ནི༔ ཚེ་འདས་ཀྱི་མིང་ནས་བོས་ལ་འདི་སྐད་དོ༔ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ ཞག་དགུ་བ་ལ་ཁྲག་འཐུང་རྡོ་རྗེའི་རིགས༔ བཅོམ་ལྡན་འདས་བཛྲ་ཧེ་རུ་ཀ་ཞེས་བྱ་བ༔ སྐུ་མདོག་མཐིང་ནག་ཞལ་གསུམ་ཕྱག་དྲུག་ཞབས་བཞི་བགྲད་པ༔ གཡས་དཀར་བ༔ གཡོན་དམར་བ༔ དབུས་མཐིང་ནག༔ ཕྱག་དྲུག་གཡས་ཀྱི་དང་པོ་ན་རྡོ་རྗེ༔ བར་བ་ན་བྷན་དྷ༔ ཐ་མ་ན་དགྲ་སྟྭ༔ གཡོན་གྱི་དང་པོ་ན་དྲིལ་བུ༔ བར་བ་ན་བྷན་དྷ༔ ཐ་མ་ན་ཐོང་གཤོལ༔ ཡུམ་བཛྲ་ཀྲོ་ཏི་ཤྭ་རི་མ་ཡབ་ཀྱི་སྐུ་ལ་འཁྲིལ་བ༔ གཡས་པས་འགུལ་ནས་འཁྱུད་ཅིང་༔ གཡོན་པས་དུང་དམར་ཞལ་དུ་སྟོབ་པ༔ རང་གི་ཀླད་པའི་ནང་གི་ཤར་ནས་ཐོན་ནས་རང་ལ་འཆར་དུ་འོང་ངོ་༔ དེ་ལ་མ་འཇིགས་ཤིག༔ མ་སྐྲག་ཅིག༔ མ་སྔངས་ཤིག༔ རང་གི་རིག་པའི་སྐུ་རུ་ངོ་ཤེས་པར་གྱིས་ཤིག༔ ཁྱོད་རང་གི་ཡི་དམ་གྱི་ལྷ་ཡིན་པས་མ་སྐྲག་ཅིག༔ དོན་ལ་བཅོམ་ལྡན་འདས་རྡོ་རྗེ་སེམས་དཔའ་ཡབ་ཡུམ་དངོས་ཡིན་པས་མོས་གུས་གྱིས་ཤིག༔ ངོ་ཤེས་པ་དང་གྲོལ་བ་དུས་མཉམ་དུ་འོང་ངོ་༔ ཞེས་བསྒྲགས་པས་ཡི་དམ་དུ་ངོ་ཤེས་ནས༔ གཉིས་སུ་མེད་པར་ཐིམ་ནས་ལོངས་སྤྱོད་རྫོགས་པའི་སྐུར་སངས་རྒྱས་པར་འགྱུར་རོ༔ ཡང་ལས་སྒྲིབ་ཆེ་བ་རྣམས་དེ་ལ་སྔངས་སྐྲག་སྐྱེས་ནས་བྲོས་པས་ངོ་མ་འཕྲོད་ན༔ ཞག་བཅུ་པ་ལ་ཁྲག་འཐུང་རིན་ཆེན་རིགས་ཀྱིས་བསུ་བ་ལ་འོང་པས༔ ཡང་ངོ་སྤྲད་པ་ནི༔ ཚེ་འདས་ཀྱི་མིང་ནས་བོས་ལ་འདི་སྐད་དོ༔ ¿ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ ཞག་བཅུ་པ་ལ་ཁྲག་འཐུང་རིན་ཆེན་རིགས༔ བཅོམ་ལྡན་འདས་རཏྣ་ཧེ་རུ་ཀ་ཞེས་བྱ་བ༔ སྐུ་མདོག་སེར་ནག་ཞལ་གསུམ་ཕྱག་དྲུག་ཞབས་བཞི་བགྲད་པ༔ གཡས་དཀར་བ༔ གཡོན་དམར་བ༔ དབུས་སེར་ནག་འབར་བ༔ ཕྱག་དྲུག་གཡས་ཀྱི་དང་པོ་ན་རིན་པོ་ཆེ༔ བར་མ་ན་ཁ་ཊྃ་ྭཱཀ༔ ཐ་མ་ན་བེ་ཅོན་བསྣམས་པ༔ གཡོན་གྱི་དང་པོ་ན་དྲིལ་བུ༔ བར་བ་ན་བྷན་དྷ༔ ཐ་མ་ན་ཏྲི་ཤུལ་བསྣམས་པ༔ ཡུམ་རཏྣ་ཀྲོ་ཏི་ཤྭ་རི་མ་ཡབ་ཀྱི་སྐུ་ལ་འཁྲིལ་བ༔ གཡས་པས་མགུལ་ནས་འཁྱུད་ཅིང་༔ གཡོན་པས་དུང་དམར་ཞལ་དུ་སྟོབ་པ༔ རང་གི་ཀླད་པའི་ནང་གི་ལྷོ་ནས་ཐོན་ནས་རང་ལ་འཆར་དུ་འོང་བས༔ དེ་ལ་མ་འཇིགས་ཤིག༔ མ་སྐྲག་ཅིག༔ མ་སྔངས་ཤིག༔ རང་གི་རིག་པའི་སྐུ་རུ་ངོ་ཤེས་པར་གྱིས་ཤིག༔ ཁྱོད་རང་གི་ཡི་དམ་གྱི་ལྷ་ཡིན་པས་མ་སྐྲག་ཅིག༔ དོན་ལ་བཅོམ་ལྡན་འདས་རིན་ཆེན་འབྱུང་ལྡན་ཡབ་ཡུམ་དངོས་ཡིན་པས་མོས་པ་གྱིས་ཤིག༔ ངོ་ཤེས་པ་དང་གྲོལ་བ་དུས་མཉམ་དུ་འོང་ངོ་༔ ཅེས་བསྒྲགས་པས་ཡི་དམ་དུ་ངོ་ཤེས་ནས་གཉིས་སུ་མེད་པར་ཐིམ་ནས་སངས་རྒྱས་པར་འགྱུར་རོ༔ ཡང་དེ་ལྟར་ངོ་སྤྲད་ཀྱང་བག་ཆགས་ངན་པས་ཕྱིར་འཁྲིད་དེ་སྔངས་སྐྲག་སྐྱེས་ནས་བྲོས་པས༔ ཡི་དམ་དུ་མ་ཤེས་པར་གཤིན་རྗེར་མཐོང་ནས་ངོ་མ་འཕྲོད་ནས༔ ཡང་ཞག་བཅུ་གཅིག་པ་ལ་ཁྲག་འཐུང་པདྨ་རིགས་ཀྱིས་བསུ་བ་ལ་འོང་སྟེ༔ ཡང་ངོ་སྤྲད་པ་ནི༔ ཚེ་འདས་ཀྱི་མིང་ནས་བོས་ལ་འདི་སྐད་དོ༔ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ ཞག་བཅུ་གཅིག་པ་ལ་ཁྲག་འཐུང་པདྨ་རིགས་ཀྱི་བཅོམ་ལྡན་འདས་པདྨ་ཧེ་རུ་ཀ་ཞེས་བྱ་བ༔ སྐུ་མདོག་དམར་ནག་ཞལ་གསུམ་ཕྱག་དྲུག་ཞབས་བཞི་བགྲད་པ༔ གཡས་དཀར༔ གཡོན་སྔོ༔ དབུས་དམར་ནག༔ ཕྱག་དྲུག་གཡས་ཀྱི་དང་པོ་ན་པདྨ༔ བར་བ་ན་ཁ་ཊྭཾ་ཀ༔ ཐ་མ་ན་དབྱུག་ཏོ༔ གཡོན་གྱི་དང་པོ་ན་དྲིལ་བུ༔ བར་བ་ན་དྷན་དྷ་དམར་གྱིས་བཀང་བ༔ ཐ་མ་ན་རྔེའུ་ཆུང་བསྣམས་པ༔ ཡུམ་པདྨ་ཀྲོ་ཏི་ཤྭ་རི་མ་སྐུ་ལ་འཁྲིལ་བ༔ གཡས་པས་མགུལ་ནས་འཁྱུད་ཅིང་༔ གཡོན་པས་དུང་དམར་ཞལ་དུ་སྟོབ་པ༔ ཡབ་ཡུམ་ཞལ་སྦྱོར་བ་མངོན་སུམ་རང་གི་ཀླད་པའི་ནང་གི་ནུབ་ནས་ཐོན་ནས་རང་ལ་འཆར་དུ་འོང་བས་དེ་ལ་མ་འཇིགས་ཤིག༔ མ་སྐྲག་ཅིག༔ མ་སྔངས་ཤིག༔ དྲན་པ་བསྐྱེད་ཅིག༔ རང་གི་རིག་པའི་སྐུར་ངོ་ཤེས་པར་གྱིས་ཤིག༔ ཁྱོད་རང་གི་ཡི་དམ་གྱི་ལྷ་ཡིན་པས་མ་སྐྲག་ཅིག༔ མ་སྔངས་ཤིག༔ དོན་ལ་ནི་བཅོམ་ལྡན་འདས་སྣང་བ་མཐའ་ཡས་ཡབ་ཡུམ་དངོས་ཡིན་པས་མོས་པ་གྱིས་ཤིག༔ ངོ་ཤེས་པ་དང་གྲོལ་བ་དུས་མཉམ་དུ་འོང་ངོ་༔ ཞེས་བསྒྲགས་པས་ཡི་དམ་གྱི་ལྷ་ཡིན་པར་ངོ་ཤེས་ནས་གཉིས་སུ་མེད་པར་ཐིམ་ནས་སངས་རྒྱས་པར་འགྱུར་རོ༔ ཡང་དེ་ལྟར་ངོ་སྤྲད་ཀྱང་བག་ཆགས་ངན་པས་ཕྱིར་ཁྲིད་དེ༔ སྔངས་སྐྲག་སྐྱེས་ནས་བྲོས་པས་ཡི་དམ་དུ་ངོ་མ་འཕྲོད་པ་སྲིད་པས༔ ཡང་ཞག་བཅུ་གཉིས་པ་ལ༔ ཁྲག་འཐུང་ལས་ཀྱི་རིགས་ཀྱི་ལྷ་ཚོགས་དང་༔ ཀོའུ་རི་མ་དང་༔ ཕྲ་མེན་མ་དང་༔ དབང་ཕྱུག་མ་རྣམས་བསུ་བ་ལ་འོང་སྟེ༔ ངོ་མི་ཤེས་པར་སྐྲག་ཏུ་འོང་བས༔ ངོ་སྤྲད་པ་ནི༔ ཡང་ཚེ་འདས་ཀྱི་མིང་ནས་བོས་ལ་འདི་སྐད་དོ༔ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ ཞག་བཅུ་གཉིས་སོང་བའི་དུས་སུ་ཁྲག་འཐུང་ལས་ཀྱི་རིགས་ཀྱི་བཅོམ་ལྡན་འདས་ཀརྨཱ་ཧེ་རུ་ཀ་ཞེས་བྱ་བ་སྐུ་མདོག་ལྗང་ནག་ཞལ་གསུམ་ཕྱག་དྲུག་ཞབས་བཞི་བགྲད་པ༔ གཡས་དཀར་གཡོན་དམར༔ དབུས་ལྗང་ནག་རྔམ་པ༔ ཕྱག་དྲུག་གཡས་ཀྱི་དང་པོ་ན་རལ་གྲི༔ བར་པ་ན་ཁ་ཊཾྭཱ་ཀ༔ ཐ་མ་ན་དབྱུག་ཏོ༔ གཡོན་གྱི་དང་པོ་ན་དྲིལ་བུ༔ བར་པ་ན་བྷན་དྷ༔ ཐ་མ་ན་ཐོང་གཤོལ་བསྣམས་པ༔ ཡུམ་ཀརྨཱ་ཀྲོ་ཏི་ཤྭ་རི་མ་ཡབ་ཀྱི་སྐུ་ལ་འཁྲིལ་བ༔ གཡས་པས་ཡབ་ཀྱི་མགུལ་ནས་འཁྱུད་ཅིང་གཡོན་པས་དུང་དམར་ཞལ་དུ་སྟོབ་པ༔ ཡབ་ཡུམ་ཞལ་སྦྱོར་མངོན་སུམ་དུ་རང་གི་ཀླད་པའི་ནང་གི་བྱང་ནས་ཐོན་ནས་རང་ལ་འཆར་རོ༔ དེ་ལ་མ་འཇིགས་ཤིག༔ མ་སྐྲག་ཅིག༔ མ་སྔངས་ཤིག༔ རང་གི་རིག་པའི་སྐུར་ངོ་ཤེས་པར་གྱིས་ཤིག༔ ཁྱོད་རང་གི་ཡི་དམ་གྱི་ལྷ་ཡིན་པས་མ་སྐྲག་ཅིག༔ དོན་ལ་ནི་བཅོམ་ལྡན་འདས་དོན་ཡོད་གྲུབ་པ་ཡབ་ཡུམ་དངོས་ཡིན་ནོ༔ མོས་པ་དང་གུས་པ་དུང་དུང་གྱིས་ཤིག༔ ངོ་ཤེས་པ་དང་གྲོལ་བ་དུས་མཉམ་དུ་འོང་ངོ་༔ ཞེས་བསྒྲགས་པས་ཡི་དམ་དུ་ངོ་ཤེས་ནས་གཉིས་སུ་མེད་པར་ཐིམ་ནས་སངས་རྒྱས་པར་འགྱུར་རོ༔ དེ་དག་བླ་མའི་གདམས་ངག་གིས་རང་སྣང་རིག་པའི་རྩལ་དུ་ངོ་ཤེས་པས༔ དཔེར་ན་སེང་གེའི་གསོབ་མཐོང་བ་ལྟ་བུར་གྲོལ་ཏེ༔ དེ་ཡང་སེང་གེའི་གསོབ་དེ་ལྟར་ཡིན་གྱི༔ དོན་མ་རྟོགས་ན་སྔངས་སྐྲག་སྐྱེ་སྟེ༔ མི་གཅིག་གིས་འདི་ལྟར་ཡིན་གྱིས་ངོ་སྤྲད་པས་མཚང་རིག་སྟེ༔ འཇིགས་པ་དང་བྲལ་བ་འདྲ་བར་འདིར་ཡང་ཁྲག་འཐུང་གི་ལྷ་ཚོགས་སྐུ་ཆེ་ལ་ཡན་ལག་རགས་པ༔ ནམ་མཁའི་ཁམས་དང་མཉམ་པ་འཆར་བའི་ཚེ༔ ངེས་པར་སྔངས་སྐྲག་སྐྱེས་ཏེ༔ ངོ་སྤྲོད་འདི་ཐོབ་མ་ཐག་ཏུ་རང་སྣང་ངམ༔ ཡི་དམ་དུ་ངོ་ཤེས་ཏེ་སྔར་གོམས་པའི་འོད་གསལ་མ་དང་༔ ཕྱིས་ཤར་བའི་བུ་རང་བྱུང་གི་འོད་གསལ་མ་བུ་གཉིས་འདྲེས་ཏེ༔ རང་ལ་རང་ཤར་རང་གྲོལ་དུ་སྔར་འདྲིས་ཀྱི་མི་དང་འཕྲད་པ་ལྟར༔ རང་རིག་རང་གསལ་རང་གྲོལ་དུ་འགྱུར་རོ༔ འདིས་ངོ་སྤྲོད་མ་ཐེབ་ན༔ གང་ཟག་བཟང་པོ་ཡིན་ཀྱང་༔ འདི་ནས་ཕྱིར་ལོག་སྟེ༔ འཁོར་བར་འཁྱམ་མོ༔ དེ་ནས་ཀོའུ་རཱི་བརྒྱད་ཀྱི་ཁྲོ་མོ་དང་༔ ཕྲ་མེན་མགོ་བརྙན་སྣ་ཚོགས་རང་གི་ཀླད་པའི་ནང་ནས་ཐོན་ནས་རང་ལ་ཤར་དུ་འོང་བས་༔ ཡང་ངོ་སྤྲད་པ་ནི༔ ཚེ་འདས་ཀྱི་མིང་ནས་བོས་ལ་འདི་སྐད་དོ༔ ཀྱཻ་རིགས་ཀྱི་བུ་མ་ཡེངས་པར་ཉོན་ཅིག༔ རང་གི་ཀླད་པའི་ནང་ནས་ཀོའུ་རཱི་མ་མོ་བརྒྱད་ཐོན་ནས་རང་ལ་འཆར་དུ་འོང་ངོ་༔ དེ་ལ་མ་འཇིགས་ཤིག༔ རང་གི་ཀླད་པའི་ཤར་ནས་ཀོའུ་རཱི་མ་དཀར་མོ༔ གཡས་ན་ཞིང་གི་དབྱུག་ཏོ་ཐོགས་པ༔ གཡོན་ན་བྷན་དྷ་དམར་གྱིས་བཀང་བ་བསྣམས་ནས་རང་ལ་འཆར་དུ་འོང་ངོ་༔ མ་འཇིགས་ཤིག༔ ལྷོ་ནས་ཙོའུ་རཱི་སེར་མོ་མདའ་གཞུ་འགེངས་པ་དང་༔ ནུབ་ནས་པྲ་མོ་དམར་མོ་ཆུ་སྲིན་གྱི་རྒྱལ་མཚན་བསྣམས་པ་དང་༔ བྱང་ནས་བ་ེཏ་ལཱ་ིནག་མོ་རྡོ་རྗེ་དང་བྷན་དྷ་དམར་གྱིས་བཀང་བ་བསྣམས་པ་དང་༔ ཤར་ལྷོ་ནས་པུསྐ་སཱི་དམར་སེར་གཡས་པས་རྒྱུ་མ་བཟུང་ནས་གཡོན་པས་ཞལ་དུ་གསོལ་བ༔ ལྷོ་ནུབ་ཏུ་ཀསྨ་རཱ་ིལྗང་ནག་གཡོན་པས་བྷན་དྷ་ཁྲག་གིས་བཀང་བ་བཟུང་ནས་གཡས་པས་རྡོ་རྗེས་དཀྲུག་ཅིང་ཞལ་དུ་གསོལ་བ་དང་༔ ནུབ་བྱང་ནས་ཙན་དྷ་ལཱི་སེར་སྐྱ་མགོ་ལུས་ཕྲལ་ཏེ༔ གཡས་པས་ཙིཏྟ་བསྣམས་ནས་གཡོན་པས་ལུས་པོ་ཟ་བ་དང་༔ བྱང་ཤར་དུ་སྨེ་ཤ་ནཱི༔ མཐིང་ནག་ཞིང་གི་མགོ་ལུས་ཕྲལ་ནས་ཟ་བ་དང་༔ གནས་ཀྱི་ཀོའུ་རཱི་མ་བརྒྱད་པོ་ཡང་ཁྲག་འཐུང་ཡབ་ལྔ་བསྐོར་ནས་རང་གི་ཀླད་པའི་ནང་ནས་ཐོན་ནས་རང་ལ་འཆར་རོ༔ དེ་ལ་མ་འཇིགས་ཤིག༔ ཀྱེ་རིགས་ཀྱི་བུ་མ་ཡེངས་པར་ཉོན་ཅིག༔ དེའི་ཕྱི་རིམ་ནས་ཡུལ་གྱི་ཕྲ་མེན་བརྒྱད་ཐོན་ནས་རང་ལ་འཆར་དུ་འོང་ངོ་༔ ཤར་ནས་སེང་ཧ་མུ་ཀ་སྨུག་ནག་སེང་མགོ་ཅན་ལག་པ་གཉིས་བྲང་ཁར་བསྣོལ་ནས་ཁའི་ནང་དུ་རོ་ཐོགས་ཏེ་རལ་བ་བསིགས་པ་དང་༔ ལྷོ་ནས་བྱ་ཀྲི་མུ་ཀ་དམར་མོ་སྟག་གི་མགོ་ཅན་ལག་གཉིས་མཐུར་དུ་བསྣོལ་ནས་མིག་འབྲུ་ཚུགས་སུ་ལྟ་ཞིང་མཆེ་བ་གཉེར་བ་དང་༔ ནུབ་ནས་སྲི་ལ་མུ་ཀ་ནག་མོ་ཝ་མགོ་ཅན་གཡས་པས་སྤུ་གྲི་ཐོགས་ནས་༔ གཡོན་པས་རྒྱུ་མ་བཟུང་ཞིང་ཟ་བ་དང་༔ ཁྲག་ལྡག་པ༔ བྱང་ནས་ཤྭ་ན་མུ་ཀ་མཐིང་ནག་སྤྱང་མགོ་ཅན་ལག་པ་གཉིས་ཀྱིས་རོ་ཁར་ཁྱེར་ནས་མིག་འབྲུ་ཚིགས་སུ་ལྟ་བ་དང་༔ ཤར་ལྷོར་ཀྲི་ཏ་མུ་ཀ་དཀར་སེར་བྱ་རྒོད་མགོ་ཅན་ཞིང་ཆེན་ཕྲག་ལ་ཁུར་ནས་ཀེང་རུས་ལག་ཏུ་ཐོགས་པ་དང་༔ ལྷོ་ནུབ་ནས་ཀང་ཀ་མུ་ཀ་དམར་ནག་དུར་བྱའི་མགོ་ཅན་ཞིང་ཆེན་ཕྲག་ལ་ཁུར་བ་དང་༔ ནུབ་བྱང་ནས་ཁ་ཁཱ་མུ་ཀ་ནག་མོ་བྱ་རོག་མགོ་ཅན་གཡོན་དུ་བྷན་དྷ་ཐོགས་ནས་གཡས་རལ་གྲི་ཐོགས་ཏེ༔ གློ་སྙིང་ཟ་བ་དང་༔ བྱང་ཤར་ནས་ཧུ་ལུ་མུ་ཀ་མཐིང་ནག་འུག་པའི་མགོ་ཅན་གཡས་སུ་རྡོ་རྗེ་ཐོགས་ནས༔ གཡོན་པས་དུང་ཁྲག་འཐུང་བ་དང་༔ ཡུལ་གྱི་ཕྲ་མེན་བརྒྱད་པོ་དེ་ཡང་ཁྲག་འཐུང་ཡབ་ལྔ་ལ་བསྐོར་ནས༔ རང་གི་ཀླད་པའི་ནང་ནས་ཐོན་ནས་རང་ལ་འཆར་རོ༔ དེ་ལ་མ་འཇིགས་ཤིག༔ གང་ཤར་ཐམས་ཅད་རང་སྣང་རིག་པའི་ངང་དུ་ངོ་ཤེས་པར་གྱིས་ཤིག༔ ཀྱེ་རིགས་ཀྱི་བུ་སྒོ་མ་བཞི་ཡང་རང་གི་ཀླད་པའི་ནང་ནས་ཐོན་ནས་རང་ལ་འཆར་དུ་འོང་བས་ངོ་ཤེས་པར་གྱིས་ཤིག༔ རང་གི་ཀླད་པའི་ཤར་ནས་རྟ་གདོང་དཀར་མོ་ལྕགས་ཀྱུ་འཛིན་པ་ཤར་དུ་འོང་ངོ་༔ ལྷོ་ནས་ཕག་གདོང་མ་སེར་མོ་ཞགས་པ་འཛིན་པ་དང་༔ ནུབ་ནས་སེང་གདོང་མ་དམར་མོ་ལྕགས་སྒྲོག་འཛིན་པ་དང་༔ བྱང་ནས་སྤྲུལ་གདོང་མ་ལྗང་ཁུ་དྲིལ་བུ་འཛིན་པ་དང་༔ སྒོ་མ་བཞི་ཡང་རང་གི་ཀླད་པའི་ནང་ནས་ཐོན་ནས་རང་ལ་འཆར་དུ་འོང་ངོ་༔ ཡི་དམ་གྱི་ལྷ་ཡིན་པས་ངོ་ཤེས་པར་གྱིས་ཤིག༔ ཀྱེ་རིགས་ཀྱི་བུ་ཧེ་རུ་ཀ་དྲག་པོའི་ལྷ་སུམ་ཅུ་ཐམ་པའི་ཕྱི་རིམ་དུ་དབང་ཕྱུག་མ་ཉི་ཤུ་རྩ་བརྒྱད་མགོ་བརྙན་སྣ་ཚོགས་དང་བཅས་ཏེ༔ མཚོན་ཆ་སྣ་ཚོགས་པ་ཐོགས་ནས་ཀླད་པའི་ནང་ནས་ཐོན་ནས་རང་ལ་འཆར་དུ་འོང་ངོ་༔ དེ་ལ་མ་འཇིགས་པར་གང་ཤར་ཐམས་ཅད་རང་སྣང་རིག་པའི་རྩལ་དུ་ངོ་ཤེས་པར་གྱིས་ཤིག༔ དོན་ཆེན་འགགས་ལ་ཐུག་པའི་དུས་ཚོད་འདིར༔ བླ་མའི་གདམས་ངག་དྲན་པར་གྱིས་ཤིག༔ ཀྱེ་རིགས་ཀྱི་བུ་ཤར་ནས་སྲིན་མོ་སྨུག་ནག་གཡག་མགོ་མ་ལག་ན་རྡོ་རྗེ་ཐོགས་པ་དང་༔ ཚངས་པ་དམར་སེར་སྦྲུལ་མགོ་མ་ལག་ན་པདྨ་འཛིན་པ་དང་༔ ལྷ་ཆེན་ལྗང་ནག་གཟིག་མགོ་མ་ལག་ན་ཏྲི་ཤུལ་ཐོགས་པ་དང་༔ གཏོགས་འདོད་སྔོན་མོ་སྲེ་མོང་མགོ་ཕྱག་ན་འཁོར་ལོ་འཛིན་པ་དང་༔ གཞོན་ནུ་དམར་མོ་དྲེད་མགོ་མ་ལག་ན་མདུང་ཐུང་འཛིན་པ་དང་༔ བརྒྱ་བྱིན་དཀར་མོ་དོམ་མགོ་མ་ལག་ན་རྒྱུ་ཞགས་ཐོགས་པ་དང་༔ ཤར་གྱི་རྣལ་འབྱོར་མ་དྲུག་ཀླད་པའི་ནང་ནས་ཐོན་ནས་རང་ལ་འཆར་རོ༔ དེ་ལ་མ་འཇིགས་ཤིག༔ ཀྱེ་རིགས་ཀྱི་བུ་ལྷོ་ནས་རྡོ་རྗེ་སེར་མོ་ཕ་ཝཾ་མགོ་ལག་ན་སྤུ་གྲི་ཐོགས་པ་དང་༔ ཞི་བ་དམར་མོ་ཆུ་སྲིན་མགོ་ལག་ན་བུམ་པ་ཐོགས་པ་དང་༔ བདུད་རྩི་དམར་མོ་སྡིག་པའི་མགོ་ལག་ན་པདྨ་ཐོགས་པ་དང་༔ ཟླ་བ་དཀར་མོ་ཁྲའི་མགོ་ལག་ན་རྡོ་རྗེ་ཐོགས་པ་དང་༔ བེ་ཅོན་ལྗང་ནག་ཝའི་མགོ་ལག་ན་དབྱུག་ཏོ་ཕྱར་བ་དང་༔ སྲིན་མོ་སེར་ནག་སྟག་གི་མགོ་ལག་ན་ཐོད་ཁྲག་ཐོགས་པ་དང་༔ ལྷོའི་རྣལ་འབྱོར་མ་དྲུག་ཀླད་པའི་ནང་ནས་ཐོན་ནས་རང་ལ་འཆར་དུ་ཡོང་ངོ་༔ དེ་ལ་མ་འཇིགས་ཤིག༔ ཀྱཻ་རིགས་ཀྱི་བུ་ནུབ་ནས་ཟ་བ་ལྗང་ནག་བྱ་རྒོད་མགོ་ལག་ན་བེ་ཅོན་ཐོགས་པ་དང་༔ དགའ་བ་དམར་མོ་རྟའི་མགོ་ལག་ན་ཁོག་ཆེན་ཐོགས་པ་དང་༔ སྟོབས་ཆེན་དཀར་མོ་ཁྱུང་གི་མགོ་ལག་ན་དབྱུག་ཏོ་ཐོགས་པ་དང་༔ སྲིན་མོ་དམར་མོ་ཁྱིའི་མགོ་ལག་ན་རྡོ་རྗེ་སྤུ་གྲིས་གཅོད་པ་དང་༔ འདོད་པ་དམར་མོ་པུ་ཤུད་མགོ་ལག་ན་མདའ་གཞུ་འགེངས་པ་དང་༔ ནོར་སྲུངས་དམར་ལྗང་ཤ་བའི་མགོ་ལག་ན་བུམ་པ་འཛིན་པ་དང་༔ ནུབ་ཀྱི་རྣལ་འབྱོར་མ་དྲུག་ཀླད་པའི་ནང་ནས་ཐོན་ནས་རང་ལ་འཆར་རོ༔ དེ་ལ་མ་འཇིགས་ཤིག༔ ཀྱེ་རིགས་བུ་བྱང་ནས་རླུང་ལྷ་སྔོན་མོ་སྤྱང་ཀིའི་མགོ་ལག་ན་བ་དན་ཕྱར་བ་དང་༔ མི་མོ་དམར་མོ་སྐྱིན་གྱི་མགོ་ལག་ན་གསལ་ཤིང་འཛིན་པ་དང་༔ ཕག་མོ་ནག་མོ་ཕག་གི་མགོ་ལག་ན་མཆེ་ཞགས་བསྣམས་པ་དང་༔ རྡོ་རྗེ་དམར་མོ་ཁྭ་ཏའི་མགོ་ལག་ན་ཞིང་ཆུང་འཛིན་པ་དང་༔ སྣ་ཆེན་ལྗང་ནག་གླང་ཆེན་མགོ་ལག་ན་བམ་ཆེན་ཐོགས་ཤིང་ཐོད་ཁྲག་འཐུང་བ་དང་༔ ཆུ་ལྷ་སྔོན་མོ་སྦྲུལ་གྱི་མགོ་ལག་ན་སྦྲུལ་ཞགས་བསྣམས་པ་དང་༔ བྱང་གི་རྣལ་འབྱོར་མ་དྲུག་ཀླད་པའི་ནང་ནས་ཐོན་ནས་རང་ལ་འཆར་རོ༔ དེ་ལ་མ་འཇིགས་ཤིག༔ ཀྱེ་རིགས་ཀྱི་བུ་མ་ཡེངས་པར་ཉོན་ཅིག༔ སྒོ་མ་རྣལ་འབྱོར་མ་བཞི་ཀླད་པའི་ནང་ནས་ཐོན་ནས་རང་ལ་འཆར་དུ་འོང་ངོ་༔ ཤར་ནས་རྡོ་རྗེ་དཀར་མོ་ཁུ་བྱུག་གི་མགོ་ཅན་ལག་ན་ལྕགས་ཀྱུ་འཛིན་པ་དང་༔ ལྷོ་ནས་རྡོ་རྗེ་སེར་མོ་ར་མགོ་མ་ལག་ན་ཞགས་པ་འཛིན་པ་དང་༔ ནུབ་ནས་རྡོ་རྗེ་དམར་མོ་སེང་མགོ་མ་ལག་ན་ལྕགས་སྒྲོག་འཛིན་པ་དང་༔ བྱང་ནས་རྡོ་རྗེ་ལྗང་ནག་སྦྲུལ་མགོ་མ་ལག་ན་དྲིལ་བུ་འཛིན་པ་དང་༔ རྣལ་འབྱོར་མ་སྒོ་མ་བཞི་ཀླད་པའི་ནང་ནས་ཐོན་ནས་རང་ལ་འཆར་དུ་འོང་ངོ་༔ དབང་ཕྱུག་མ་ཉི་ཤུ་རྩ་བརྒྱད་ཀྱང་༔ ཧེ་རུ་ཀ་དྲག་པོའི་ལྷ་རང་བྱུང་གི་སྐུའི་རང་རྩལ་ལས་རང་ཤར་བ་ཡིན་པས༔ ངོ་ཤེས་པར་གྱིས་ཤིག༔ ཀྱེ་རིགས་ཀྱི་བུ༔ ཆོས་སྐུ་སྟོང་པའི་ཆ་ལས་ཞི་བའི་ལྷ་རུ་ཤར་བ་ཡིན་ནོ༔ ངོ་ཤེས་པར་གྱིས་ཤིག༔ ལོངས་སྐུ་གསལ་བའི་ཆ་ལས་ཁྲོ་བོའི་ལྷ་རུ་འཆར་བ་ཡིན་པས་ངོ་ཤེས་པར་གྱིས་ཤིག །རང་གི་ཀླད་པའི་ནང་ནས་ཁྲག་འཐུང་ལྔ་བཅུ་རྩ་བརྒྱད་ཀྱི་ལྷ་ཚོགས་ཐོན་ནས་རང་ལ་འཆར་བའི་དུས་འདིར་གང་ཤར་ཐམས་ཅད་རང་གི་རིག་པའི་རང་མདངས་ལས་ཤར་བ་ཤེས་ན༔ དེ་མ་ཐག་ཏུ་ཁྲག་འཐུང་གི་སྐུ་དང་གཉིས་སུ་མེད་པར་སངས་རྒྱས་སོ༔ ཀྱེ་རིགས་ཀྱི་བུ༔ དེ་ལྟར་ངོ་མ་ཤེས་ན་ཁྱེད་དེ་རྣམས་ལ་ཞེད་ཅིང་བྲེད་པས་སླར་སྡུག་བསྔལ་གྱིས་ནོན་པར་འགྲོའོ༔ དེ་ལྟར་ངོ་མ་ཤེས་ན་ཁྲག་འཐུང་གི་ལྷ་ཚོགས་ཐམས་ཅད་གཤིན་རྗེ་རུ་མཐོང་ནས་ཁྲག་འཐུང་གི་ལྷ་ལ་འཇིགས་སོ༔ སྔངས་སོ༔ སྐྲག་གོ༔ བརྒྱལ་ལོ༔ རང་སྣང་བདུད་དུ་སོང་ནས་འཁོར་བར་འཁྱམ་མོ༔ མ་ཞེན་མ་སྐྲག་ན་འཁོར་བར་མི་འཁྱམ་མོ༔ ཀྱེ་རིགས་ཀྱི་བུ༔ ཞི་བ་དང་ཁྲོ་བོའི་སྐུ་དེ་རྣམས་ཀྱང་༔ ཆེ་བ་ནམ་མཁའི་མཐའ་དང་མཉམ་པ༔ འབྲིང་རྣམས་ནི་རི་རབ་ཙམ་པ༔ ཐ་མ་ཡང་རང་ལུས་བཅོ་བརྒྱད་བརྩེགས་པ་ཙམ་འབྱུང་བས༔ དེ་ལ་མ་སྐྲག་ཅིག༔ སྣང་སྲིད་ཐམས་ཅད་འོད་དང་སྐུ་རུ་འཆར་རོ༔ སྣང་བ་ཐམས་ཅད་འོད་དང་སྐུ་རུ་འཆར་བ་དེ་རང་གི་རིག་པའི་རང་མདངས་སུ་ངོ་ཤེས་ནས༔ རང་མདངས་རང་འོད་དང་སྐུ་གཉིས་སུ་མེད་པར་ཐིམ་ནས་སངས་རྒྱས་སོ༔ བུ་ཁྱོད་མཐོང་སྣང་འཇིགས་སྐྲག་གི་སྣང་བ་གང་བྱུང་ཡང་རང་སྣང་དུ་ངོ་ཤེས་པར་གྱིས་ཤིག༔ འོད་གསལ་རང་རིག་རང་མདངས་སུ་ངོ་ཤེས་པར་གྱིས་ཤིག༔ དེ་ལྟར་ངོ་ཤེས་ན་ད་ལྟ་རང་ལ་སངས་རྒྱས་པ་ལ་ཐེ་ཚོམ་མེད་དོ༔ སྐད་ཅིག་གཅིག་གིས་རྫོགས་སངས་རྒྱས༔ ཞེས་བྱ་བ་དེ་ད་རེས་འབྱུང་བ་ཡིན་ནོ༔ ཡིད་ལ་དྲན་པར་གྱིས་ཤིག༔ ཀྱེ་རིགས་ཀྱི་བུ༔ རང་གི་ད་ལྟ་ངོ་མ་ཤེས་ནས་སྐྲག་ན༔ ཞི་བའི་སྐུ་ཐམས་ཅད་མགོན་པོ་ནག་པོའི་སྐུར་ཤར་རོ༔ ཁྲོ་བོའི་སྐུ་ཐམས་ཅད་གཤིན་རྗེ་ཆོས་ཀྱི་རྒྱལ་པོའི་སྐུ་རུ་ཤར་ནས་རང་སྣང་བདུད་དུ་སོང་ནས་འཁོར་བར་འཁྱམ་མོ༔ ཀྱེ་རིགས་ཀྱི་བུ༔ རང་སྣང་ངོ་མ་ཤེས་ན༔ བཀའ་མདོ་རྒྱུད་ཐམས་ཅད་ལ་མཁས་ཤིང་བསྐལ་པར་ཆོས་བྱས་ཀྱང་སངས་མི་རྒྱའོ༔ རང་སྣང་ངོ་ཤེས་ན་གནད་གཅིག་དང་ཚིག་གཅིག་གིས་སངས་རྒྱས་སོ༔ རང་སྣང་ངོ་མ་ཤེས་ན་ཤི་མ་ཐག་ཏུ་ཆོས་ཉིད་བར་དོར་གཤིན་རྗེ་ཆོས་ཀྱི་རྒྱལ་པོའི་སྐུ་འཆར་རོ༔ གཤིན་རྗེ་ཆོས་ཀྱི་རྒྱལ་པོ་སྐུ་ཆེ་བ་ནི་ནམ་མཁའི་མཐའ་དང་མཉམ་པ༔ འབྲིང་བ་ནི་རི་རབ་ཙམ་གྱིས་འཇིག་རྟེན་གྱི་ཁམས་གང་ནས་འོང་ངོ་༔ དེ་ཡང་ཡ་སོས་མ་མཆུ་མནན་པ༔ མིག་ཤེལ་མིག་ཏུ་ཡོད་པ༔ སྐྲ་སྤྱི་བོར་བཅིང་བ༔ གསུས་པ་ཆེ་བ༔ སྐེ་ཕྲ་བ༔ ལག་ན་ཁྲམ་ཤིང་ཐོགས་པ༔ ཁ་ནས་རྒྱོབ་སོད་ཀྱི་སྒྲ་སྒྲོག་པ༔ ཀླད་པ་འཐུང་བ༔ མགོ་ལུས་ཕྲལ་བ༔ དོན་སྙིང་འདོན་པ༔ དེ་ལྟ་བུའི་འཇིག་རྟེན་གྱི་ཁམས་གང་ནས་འོང་ངོ་༔ ཀྱེ་རིགས་ཀྱི་བུ༔ དེ་ལྟ་བུའི་སྣང་བ་ཤར་ནས་བྱུང་བའི་ཚེ༔ ཁྱོད་འཇིགས་པ་དང་སྐྲག་པ་མ་བྱེད་ཅིག༔ ཁྱོད་རང་བག་ཆགས་ཡིད་ཀྱི་ལུས་ཡིན་པས༔ བསད་པ་དང་༔ གཏུབ་པ་བྱུང་ཡང་འཆི་རྒྱུ་མེད་དོ༔ དོན་ལ་ཁྱོད་སྟོང་པའི་རང་གཟུགས་ཡིན་པས་བྲེད་སྔངས་མི་དགོས་སོ༔ གཤིན་རྗེ་རྣམས་ཀྱང་རང་གི་རིག་པའི་རང་མདངས་ལས་ཤར་བ་ཡིན་པས༔ དངོས་པོ་ཅན་དུ་གྲུབ་པ་མེད་དོ༔ སྟོང་པ་ཉིད་ལ་སྟོང་ཉིད་ཀྱིས་གླགས་མི་རྙེད་དོ༔ ཁྱོད་རང་གི་རིག་པའི་རང་རྩལ་ལས་ཤར་བ་མ་གཏོགས་པ༔ ཕྱི་རོལ་ན་ཞི་བ་དང་ཁྲོ་བོ་དང་༔ ཁྲག་འཐུང་དང་༔ མགོ་བརྙན་དང་༔ འཇའ་འོད་དང་༔ གཤིན་རྗེའི་གཟུགས་འཇིགས་འཇིགས་ལ་སོགས་པ༔ དངོས་སུ་གྲུབ་པ་མེད་པར་ཐག་ཆོད་དོ༔ དེ་ལྟར་ཤེས་ན་འཇིགས་སྐྲག་ཐམས་ཅད་རང་སར་གྲོལ་ནས༔ གཉིས་སུ་མེད་པར་ཐིམ་ནས་སངས་རྒྱས་པར་འགྱུར་རོ༔ དེ་ལྟར་མ་ཤེས་ནའང་ཡི་དམ་གྱི་ལྷ་ཡིན་ནོ༔ བདག་བར་དོའི་འཕྲང་ལ་བསུ་བ་ལ་འབྱོན་པར་འདུག་གོ༔ སྐྱབས་སུ་མཆིའ༔ོ སྙམ་པའི་མོས་པ་དུང་དུང་མཛོད་ཅིག༔ དཀོན་མཆོག་གསུམ་རྗེས་སུ་དྲན་པར་གྱིས་ཤིག༔ ཁྱོད་རང་གི་ཡི་དམ་གྱི་ལྷ་གང་ཡིན་པ་དེ་དྲན་པར་གྱིས་ཤིག༔ མཚན་ནས་བོས་ཤིག༔ བདག་བར་དོར་འཁྱམས་ནས་ཡོད་པས་ར་མདའ་མཛོད་ཅིག༔ ཐུགས་རྗེས་ཟུངས་ཤིག༔ ཡི་དམ་རིན་པོ་ཆེ་ཞེས་བོས་ལ་གསོལ་བ་ཐོབ་ཅིག༔ ཁྱོད་རང་གི་བླ་མའི་མཚན་ནས་བརྗོད་ལ་བར་དོར་འཁྱམས་ནས་ཡོད་པས་ར་མདའ་མཛོད་ཅིག༔ ཐུགས་རྗེས་མ་གཏང་གྱིས་ལ་གསོལ་བ་ཐོབ་ཅིག༔ ཁྲག་འཐུང་གི་ལྷ་ཚོགས་ལ་མོས་པ་གྱིས་ལ་གསོལ་བ་ཐོབ་ཅིག༔ སྨོན་ལམ་འདི་ཡང་ཐོབ་ཅིག༔ ཀྱེ་མ་བག་ཆགས་དྲག་པོས་འཁོར་བར་འཁྱམས་པའི་ཚེ༔ སྔངས་སྐྲག་འཇིགས་སྣང་སྤངས་པའི་འོད་ལམ་ལ༔ བཅོམ་ལྡན་ཞི་ཁྲོའི་ཚོགས་ཀྱིས་ལམ་སྣ་དྲོངས༔ དབྱིངས་ཕྱུག་ཁྲོ་མོའི་ཚོགས་ཀྱིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ དགའ་བའི་གྲོགས་དང་བྲལ་ནས་གཅིག་པར་འཁྱམས༔ རང་སྣང་སྟོང་བའི་གཟུགས་བརྙན་འཆར་དུས་དེར༔ སངས་རྒྱས་རྣམས་ཀྱིས་ཐུགས་རྗེའི་ཤུགས་ཕྱུངས་ནས༔ སྔངས་སྐྲག་བར་དོའི་འཇིགས་པ་མི་འབྱུང་ཤོག༔ ཡེ་ཤེས་གསལ་བའི་འོད་ལྔ་འཆར་དུས་འདིར༔ མི་འཇིགས་མི་སྐྲག་རང་ངོ་ཤེས་པར་ཤོག༔ ཞི་དང་ཁྲོ་བོའི་སྐུ་གཟུགས་འཆར་དུས་འདིར༔ མི་འཇིགས་གདེངས་ཐོབ་བར་དོ་ངོ་ཤེས་ཤོག༔ ལས་ངན་དབང་གིས་སྡུག་བསྔལ་མྱོང་ཙ་ན༔ ཡི་དམ་ལྷ་ཡིས་སྡུག་བསྔལ་སེལ་བར་ཤོག༔ ཆོས་ཉིད་རང་སྒྲ་འབྲུག་སྟོང་ལྡིར་ཙ་ན༔ ཐམས་ཅད་ཡིག་དྲུག་སྒྲ་རུ་འགྱུར་བར་ཤོག༔ སྐྱབས་མེད་ལས་ཀྱི་རྗེས་སུ་འབྲང་དུས་འདིར༔ ཐུགས་རྗེ་ཆེན་པོས་བདག་ལ་བསྐྱབ་ཏུ་གསོལ༔ བག་ཆགས་ལས་ཀྱིས་སྡུག་བསྔལ་མྱོང་དུས་འདིར༔ འོད་གསལ་བདེ་བའི་ཏིང་འཛིན་འཆར་བར་ཤོག༔ འབྱུང་ལྔའི་ཁམས་རྣམས་སྒྲ་རུ་མི་སྡང་ཞིང་༔ སངས་རྒྱས་རིགས་ལྔའི་ཞིང་ཁམས་མཐོང་བར་ཤོག༔ ཅེས་དེ་སྐད་མོས་གུས་དྲག་པོ་དང་བཅས་པས་སྨོན་ལམ་ཐོབ་ཅིག༔ འཇིགས་སྐྲག་ཐམས་ཅད་ཡལ་ནས་ངེས་པར་ལོངས་སྐུར་སངས་རྒྱས་པར་འགྱུར་བས་གལ་ཆེའོ༔ མ་ཡེངས་ཤིག༔ ཅེས་ལན་གསུམ་མམ་བདུན་གྱི་བར་དུ་བརྗོད་དོ༔ དེས་ནི་སྡིག་པ་ཇི་ལྟར་ཆེ་ཞིང་ལས་འཕྲོ་ནི་ཇི་ལྟར་ངན་ཡང་མི་གྲོལ་མི་སྲིད་དོ༔ འདི་རྣམས་ཇི་ལྟར་བྱས་ཀྱང་ངོ་མ་འཕྲོད་ན༔ བར་དོ་གསུམ་པ་སྲིད་པ་བར་དོར་འཁྱམས་དགོས་པས༔ དེའི་ངོ་སྤྲོད་འོག་ཏུ་ཞིབ་པར་བསྟན་ཏོ༔ སྤྱིར་གོམས་འདྲིས་ཆེ་ཆུང་གང་ལའང་འཆི་ཁར་བག་རེ་ཙམ་འཁྲུལ་བ་མང་པས་ཐོས་གྲོལ་འདི་མེད་པའི་ཐབས་མེད་དོ༔ གོམས་པ་ཆེ་བ་རྣམས་ལ་བེམ་རིག་བྲལ་ནས་ཆོས་ཉིད་ལམ་གྱིས་འོང་ངོ་༔ གསོན་པོའི་དུས་སུ་རིག་ཐོག་ཏུ་ངོ་འཕྲོད་པ་དང་༔ ཉམས་མྱོང་ཡོད་པ་རྣམས་འཆི་ཁའི་བར་དོར་འོད་གསལ་ཤར་བའི་དུས་སུ༔ སྟོབས་ཤིན་ཏུ་ཆེ་བས༔ གསོན་པོའི་དུས་ཉམས་ལེན་གལ་ཆེའོ༔ ཡང་གསོན་པོའི་དུས་སུ་གསང་སྔགས་ཀྱི་ལྷའི་བསྐྱེད་རྫོགས་བསྒོམས་པ་རྣམས་ནི་ཆོས་ཉིད་བར་དོ་ལ་ཞི་ཁྲོའི་སྣང་བ་ཤར་བའི་དུས་སུ་སྟོབས་ཤིན་ཏུ་ཆེ་བར་ཡོད་དོ༔ དེ་བས་ན་གསོན་པོའི་དུས་སུ་ཡང་ཁྱད་པར་བར་དོ་ཐོས་གྲོལ་འདི་ཡིད་ལ་ཤིན་ཏུ་བྱང་བར་བྱེད་པ་ནི་གལ་ཆེའོ༔ འདི་བཅང་བར་བྱའོ༔ ཀུན་ཆུབ་པར་བྱའོ༔ ཀླག་པར་བྱའོ༔ ཚུལ་བཞིན་དུ་ཡིད་ལ་བྱའོ༔ དུས་གསུམ་དུ་མ་ཆགས་པར་བཀླག་པར་བྱའོ༔ ཚིག་དོན་ཡིད་ལ་ཤིན་ཏུ་གསལ་བར་བྱའོ༔ གཤེད་མ་བརྒྱས་དེད་ནས་བྱུང་ཡང་འདིའི་ཚིག་དོན་ཡིད་ལ་མ་བརྗེད་པར་བྱའོ༔ འདི་ནི་ཐོས་གྲོལ་ཆེན་མོ་ཞེས་བྱ་བ་ཡིན་པས༔ མཚམས་མེད་པ་ལྔ་བསགས་པའི་མིའི་རྣ་ལམ་དུ་ཐོས་ན་ཡང་༔ ངེས་པར་གྲོལ་བར་འགྱུར་རོ༔ དེའི་ཕྱིར་ཁྲོམ་ཆེན་པོའི་ནང་དུ་བཀླག་པར་བྱའོ༔ སྤེལ་བར་བྱའོ༔ དེ་ལྟར་ལན་གཅིག་ཚོར་བས་དོན་མ་རྟོགས་ཀྱང་༔ བར་དོའི་རིག་པ་དགུ་འགྱུར་གྱིས་གསལ་དུ་འགྲོ་བས་དེའི་དུས་སུ་ཚིག་གཅིག་ཀྱང་མ་བརྗེད་པར་དྲན་པར་འགྱུར་རོ༔ དེའི་ཕྱིར་ན་གསོན་པོའི་དུས་སུ་ཀུན་གྱི་རྣ་བར་བསྒྲགས་པར་བྱའོ༔ ནད་པ་ཀུན་གྱི་སྔས་སུ་བཀླག་པར་བྱའོ༔ ཤི་བའི་རོ་ཐམས་ཅད་ཀྱི་རྩར་ཀློག་པར་བྱའོ༔ རྒྱ་ཆེར་སྤེལ་བར་བྱའོ༔ འདི་དང་འཕྲད་པ་ནི་སྐལ་བ་ཤིན་ཏུ་བཟང་པ་ཡིན་ནོ༔ ཚོགས་བསགས་ཤིང་༔ སྒྲིབ་པ་བྱང་བ་རྣམས་མ་གཏོགས་པ་འདི་དང་འཕྲད་པར་དཀའོ༔ གལ་ཏེ་ཕྲད་ན་ཡང་བློར་ཤོང་པར་དཀའོ། །འདི་ཐོས་ནས་ལོག་ལྟ་མ་སྐྱེས་པ་ཁོ་ནས་གྲོལ་བར་འགྱུར་རོ༔ དེའི་ཕྱིར་འདི་ལ་ཤིན་ཏུ་གཅེས་སྤྲས་སུ་བྱའོ༔ འདི་ནི་ཆོས་ཐམས་ཅད་ཀྱི་བཅུད་ཡིན་ནོ༔ བར་དོའི་གདམས་པ་ཐོས་པ་ཙམ་གྱིས་གྲོལ་བ༔ བལྟས་པ་ཙམ་གྱིས་གྲོལ་བ༔ བར་དོ་ཐོས་གྲོལ་ཆེན་མོ་ཞེས་བྱ་བ༔ ཆོས་ཉིད་བར་དོའི་ངོ་སྤྲོད་རྫོགས་སོ༔ གྲུབ་ཆེན་ཉི་ཟླ་སངས་རྒྱས་ཀྱི་སྲས་ཀྱི་ཐུ་བོ༔ གྲུབ་ཐོབ་ཀརྨ་གླིང་པས་ཆུ་བོ་གསེར་ལྡན་གྱི་འགྲམ་སྒམ་པོ་གདར་གྱི་རི་བོ་རི་ལྷ་བྲན་གྱིས་གར་བྱེད་པ་འདྲ་བའི་གཏེར་ནས་གསང་སྟེ་གདན་དྲངས་པའོ༔ དེས་སྲས་ཆོས་རྗེ་གླིང་པ་ལ་བཀའ་ལུང་གཏད་དོ༔ དེས་གུ་རུ་སུརྻ་ཙནྟྲ་རསྨི་ལ་བཀའ་བབས་པ་ལགས་སོ༔ དེའི་དྲུང་དུ་བདག་ག་ག་དྷརྨ་པ་མུ་དྲས་གུས་པར་ཞུས་སོ༔ འདི་བྲིས་དགེ་བས་སངས་རྒྱས་ཀྱི་བསྟན་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག༔ སྲིད་པ་བར་དོའི་ངོ་སྤྲོད་གསལ་འདེབས་ཐོས་གྲོལ་ཆེན་མོ། ཀརྨ་གླིང་པས།ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ སྲིད་པ་བར་དོའི་ངོ་སྤྲོད་གསལ་འདེབས་ཐོས་གྲོལ་ཆེན་མོ་བཞུགས་སོ༔ བླ་མ་ཡི་དམ་ལྷ་ཚོགས་ལ༔ གུས་པའི་ཡིད་ཀྱིས་ཕྱག་འཚལ་ལོ༔ བར་དོ་གྲོལ་བར་མཛད་དུ་གསོལ༔ བར་དོ་ཐོས་གྲོལ་ཆེན་མོ་ལས༔ ཆོས་ཉིད་བར་དོ་གོང་དུ་བསྟན༔ འདི་ནས་སྲིད་པ་བར་དོ་ཡི༔ གསལ་འདེབས་བྱ་བ་འདི་སྐད་དོ༔ དེའང་གོང་དུ་ཆོས་ཉིད་བར་དོའི་གསལ་འདེབས་མང་དུ་བྱས་ཀྱང་༔ ཆོས་ཀྱི་གོམས་འདྲིས་ཆེ་བ་དང་༔ ལས་འཕྲོ་བཟང་བ་མ་གཏོགས་པ༔ གོམས་འདྲིས་མེད་པ་དང་༔ སྡིག་ཅན་རྣམས་ལ་ནི་འཇིགས་སྐྲག་དང་༔ ལས་ངན་གྱིས་དབང་གིས༔ ངོ་འཕྲོད་པར་དཀའ་བས༔ ཞག་བཅུ་མན་ཆད་དུ་སླེབ་ནས༔ ཡང་འདི་སྐད་གསལ་འདེབས་པར་བྱ་སྟེ༔ དཀོན་མཆོག་ལ་མཆོད་པ་འབུལ༔ སངས་རྒྱས་དང་བྱང་ཆུབ་སེམས་དཔའ་རྣམས་ལ་ར་མདའ་སྦྲན་ལ་སྨོན་ལམ་བཏབ༔ དེ་ནས་ཡང་༔ ཚེ་འདས་ཀྱི་མིང་ནས་ལན་གསུམ་མམ༔ བདུན་དུ་འབོད་ལ་འདི་སྐད་བརྗོད་དོ༔ ཀྱཻ་རིགས་ཀྱི་བུ༔ ཁྱོད་ལེགས་པར་ཉོན་ལ་ཡིད་ལ་ཟུངས་ཤིག༔ དམྱལ་བ་དང་༔ ལྷ་དང་༔ བར་དོའི་ལུས་ནི་བརྫུས་སྐྱེས་སུ་འབྱུང་བ་ཡིན་ནོ༔ དེའང་ཁྱོད་ཆོས་ཉིད་ཀྱི་བར་དོ་ལ་ཞི་ཁྲོའི་སྣང་བ་ཤར་དུས་སུ༔ རང་ངོ་མ་ཤེས་པས་ཞག་ཕྱེད་དང་ལྔ་སོང་བ་དང་༔ སྐྲག་པས་བརྒྱལ་འགྲོ་སྟེ༔ བརྒྱལ་སངས་ཙ་ན་ཤེས་པ་ཇེ་གསལ་དུ་སོང་སྟེ༔ ལུས་སྔ་མ་ལྟ་བུ་ཞིག་ཀྲོང་ངེ་སྐྱེའོ༔ དེའང་རྒྱུད་ལས༔ སྔོན་འབྱུང་སྲིད་པའི་ཤ་གཟུགས་ཅན༔ དབང་པོ་ཀུན་ཚང་ཐོགས་མེད་རྒྱུ༔ ལས་ཀྱི་རྫུ་འཕྲུལ་ཤུགས་དང་ལྡན༔ རིགས་མཐུན་ལྷ་མིག་དག་པས་མཐོང་༔ ཞེས་གསུངས་པས༔ དེའང་སྔོན་འབྱུང་ཞེས་པ་ནི༔ ཁྱོད་སྔ་མའི་བག་ཆགས་ཀྱི་ལུས་ཤ་ཁྲག་གི་ལུས་ཇི་ལྟ་བ་བཞིན་ཅིག་འོང་སྟེ༔ དེའང་བསྐལ་པ་བཟང་པོའི་ལུས་བཞིན༔ མཚན་དཔེ་ཅུང་ཟད་དང་འོད་ཡོད་པ༔ ཡིད་ལུས་ཀྱི་སྣང་བ་ཡིན་པས༔ བར་དོའི་སྣང་བ་ཡིད་ཀྱི་ལུས་དེའི་དུས་སུ་ལྷར་སྐྱེས་ན་ནི༔ ལྷ་ཡུལ་གྱི་སྣང་བ་འབྱུང་༔ ལྷ་མིན་དང་༔ མི་དང་༔ དུད་འགྲོ་དང་༔ ཡི་དྭགས་དང་༔ དམྱལ་བ་དང་༔ གང་དུ་སྐྱེ་བ་དེ་ཉིད་ཀྱི་སྣང་བ་ཁྱོད་ལ་འབྱུང་བ་ཡིན་ནོ༔ དེའི་ཕྱིར་ན༔ སྔོན་ཞེས་བྱ་བ་ནི༔ ཞག་ཕྱེད་དང་བཞི་ཚུན་ཆད་སྔ་མའི་བག་ཆགས༔ སྲིད་པའི་ཤ་གཟུགས་ཡོད་པ་སྙམ་བྱེད་ལ༔ འབྱུང་ཞེས་བྱ་བ་ནི༔ དེ་ཕྱིན་ཆད་ཕྱི་མའི་གནས་གང་དུ་སྐྱེ་བའི་སྣང་བ་འབྱུང་བས་ན༔ སྔོན་འབྱུང་ཞེས་བྱ་བ་ཡིན་ནོ༔ དེ་ཙ་ན་སྣང་བ་གང་བྱུང་བ་དེའི་རྗེས་སུ་མ་འབྲངས་ཤིག༔ མ་ཆགས་ཤིག༔ མ་ཞེན་ཅིག༔ ཞེན་ཅིང་ཆགས་ན་ནི༔ ཁྱོད་རིགས་དྲུག་ཏུ་འཁྱམས་ཤིང་སྡུག་བསྔལ་བར་འགྱུར་བས༔ ཁར་སང་ཕན་ཆད་ཆོས་ཉིད་བར་དོ་ཤར་ཡང་༔ ངོས་མ་ཟིན་པས༔ འདིར་འཁྱམས་དགོས་བྱུང་བ་ཡིན་ནོ༔ ད་ནི་མ་ཡེངས་པར་ཁྱོད་རང་ལ་ངོ་བོ་སྐྱོང་རྒྱུ་ཡོད་ན་ནི༔ བླ་མས་ངོ་སྤྲད་པའི་རིག་པ་འོད་གསལ་སྟོང་སེང་ངེ་བ༔ རྗེན་ནེ་ཅེར་རེ་བ་དེའི་ཐོག་ཏུ་འཛིན་མེད་བྱར་མེད་དུ་ལྷོད་ལ་ཞོག་ཅིག༔ མངལ་སྒོ་མི་འགྲིམ་པར་ཐར་པ་ཐོབ་པོ༔ ཁྱོད་རང་གི་རང་ངོ་མ་ཤེས་ན་ནི༔ ཡི་དམ་གང་ཡིན་པའམ༔ ཁྱོད་རང་གི་བླ་མ་སྤྱི་བོར་བསྒོམ་ལ༔ མོས་གུས་དྲག་པོ་དུང་དུང་གྱིས་ཤིག༔ གལ་ཆེའོ༔ མ་ཡེངས་ཤིག༔ ཅེས་བརྗོད་དོ༔ དེ་ལ་ངོས་ཟིན་ན་རིགས་དྲུག་ཏུ་མི་འཁྱམས་པར་གྲོལ་ཏེ༔ ཡང་ལས་ངན་གྱི་དབང་གིས་ངོས་ཟིན་པར་དཀའ་བས༔ ཡང་འདི་སྐད་བརྗོད་དོ༔ ཀྱཻ་རིགས་ཀྱི་བུ༔ ཡང་མ་ཡེངས་པར་ཉོན་ཅིག༔ དེའང་དབང་པོ་ཀུན་ཚང་ཐོགས་མེད་རྒྱུ༔ ཞེས་བྱ་བ་ཁྱོད་གསོན་པོའི་དུས་ན༔ མིག་ལོང་བ་དང་༔ འོན་པ་དང་༔ ཞ་བ་ལ་སོགས་པ་ཡོད་ཀྱང་༔ ད་ལྟ་བར་དོར་མིག་གིས་གཟུགས་གསལ༔ རྣ་བས་སྒྲ་ཐོས་པ་ལ་སོགས་པ༔ དབང་པོ་ལ་སྐྱོན་མེད་པར་གསལ་ཞིང་༔ ཚང་བར་འོང་བས༔ དེའི་ཕྱིར་དབང་པོ་ཀུན་ཚང་ཞེས་གསུངས་པས༔ ཁྱོད་རང་ཤི་ནས་བར་དོར་འཁྱམས་པའི་རྟགས་ཡིན་པས༔ ངོ་ཤེས་པར་གྱིས་ཤིག༔ གདམས་ངག་དྲན་པར་གྱིས་ཤིག༔ ཀྱཻ་རིགས་ཀྱི་བུ༔ ཐོགས་མེད་ལྡན་ཞེས་བྱ་བ༔ ཁྱོད་ཡིད་ཀྱི་ལུས་ཡིན་ཏེ༔ རིག་པ་རྟེན་དང་བྲལ་བས༔ གདོས་བཅས་ཀྱི་ལུས་མེད་དེ༔ དེའི་ཕྱིར་རི་རབ་དང་༔ ཁང་ཁྱིམ་དང་ས་རྡོ་ལ་སོགས་རི་བྲག་ཐམས་ཅད་ལ་ཐོགས་པ་མེད་པར་ཟང་ཐལ་དུ་འགྲོ་ནུས་པ་ཞིག་ད་ལྟར་ཁྱོད་ལ་ཡོད་དོ༔ འོན་ཀྱང་མའི་མངལ་དང་༔ རྡོ་རྗེ་གདན་མ་གཏོགས་པའི་རིའི་རྒྱལ་པོ་རི་རབ་ལའང་ཕར་ཐལ་ཚུར་ཐལ་དུ་འགྲོ་བ་ཞིག་ད་ལྟར་ཁྱོད་ལ་ཡོད་དོ༔ དེའང་ཁྱོད་སྲིད་པ་བར་དོར་འཁྱམས་པའི་རྟགས་ཡིན་པས་༔ བླ་མའི་གདམས་ངག་དྲན་པར་གྱིས་ཤིག༔ ཇོ་བོ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག༔ ཀྱཻ་རིགས་ཀྱི་བུ༔ ལུས་ཀྱི་རྫུ་འཕྲུལ་ཤུགས་དང་ལྡན༔ ཞེས་བྱ་བ་ནི༔ ཁྱོད་ལ་ད་ལྟར་ཡོན་ཏན་ནམ༔ ཏིང་ངེ་འཛིན་གྱི་རྫུ་འཕྲུལ་གང་ཡང་མ་ཡིན་པ༔ ལས་ཀྱི་ཤུགས་ལས་བྱུང་བའི་རྫུ་འཕྲུལ་ལས་དང་མཐུན་པའི༔ སྐད་ཅིག་ཙམ་ལ་གླིང་བཞི་རི་རབ་དང་བཅས་པ་འཁོར་ནས༔ གང་འདོད་པའི་ཡུལ་དེ་དྲན་པ་ཙམ་གྱིས༔ སྐད་ཅིག་མ་དེ་ཉིད་ལ་སླེབ་ཟིན་པ་དང་༔ སྐྱེས་བུའི་ལག་པ་བརྐྱངས་བསྐུམ་ཙམ་དུ་སླེབ་པའི་ཤུགས་ཡོད་པས༔ རྫུ་འཕྲུལ་ཡ་མ་ཟུང་རྣམ་པ་སྣ་ཚོགས་པ་མ་དྲན་ན་མ་དྲན༔ དྲན་པ་ཐམས་ཅད་ལ་འདི་དང་འདི་སྟོན་ནུས་དང་མི་ནུས་བྱ་བ་མེད་དེ༔ ཐོགས་པ་མེད་པར་སྟོན་ནུས་པ་ཞིག་ད་ལྟར་ཁྱོད་ལ་ཡོད་པས༔ ངོ་ཤེས་པར་གྱིས་ལ༔ བླ་མ་ལ་གསོལ་བ་ཐོབ་ཅིག༔ ཀྱཻ་རིགས་ཀྱི་བུ༔ རིགས་མཐུན་ལྷ་མིག་དག་པས་མཐོང་༔ ཞེས་བྱ་བ༔ རིགས་མཐུན་ཞེས་པ་ནི༔ བར་དོར་སྐྱེ་བ་རིགས་མཐུན་པའི་ནང་ཚན་རྣམས༔ གཅིག་གིས་གཅིག་མཐོང་བ་འོང་ངོ་༔ དེའང་ལྷར་སྐྱེ་བའི་རིགས་མཐུན་པ་ཡོད་ན༔ གཅིག་གིས་གཅིག་མཐོང་ངོ་༔ དེ་བཞིན་དུ་རིགས་དྲུག་གང་དུ་སྐྱེ་བའི་རིགས་མཐུན་རྣམས༔ གཅིག་གིས་གཅིག་མཐོང་ནས་འོང་བས༔ དེ་ལ་མ་ཞེན་པར་ཐུགས་རྗེ་ཆེན་པོ་སྒོམས་ཤིག༔ དེའང་ལྷ་མིག་དག་པས་མཐོང་ཞེས་བྱ་བ་ནི༔ ལྷ་ལ་སོགས་པའི་བསོད་ནམས་ཀྱི་མཐུ་ལས་གྲུབ་པ་མ་ཡིན་ཏེ༔ བསམ་གཏན་ཡང་དག་པར་བསྒོམས་པའི་ལྷའི་མིག་རྣམ་པར་དག་པས་མཐོང་བའང་ཡོད་དོ༔ དེའང་དུས་ཐམས་ཅད་དུ་མཐོང་བ་མ་ཡིན་ཏེ༔ ལྟ་བའི་འདུན་པ་བཏང་ན་མཐོང་ལ༔ མ་བཏང་ན་མི་མཐོང་སྟེ༔ བསམ་གཏན་གྱིས་ཡེངས་འགྲོ་བའང་ཡོད་དོ༔ ཀྱཻ་རིགས་ཀྱི་བུ༔ དེ་འདྲའི་ལུས་ཅན་ཏེ༔ ཡུལ་དང་ཉེ་དུ་འབྲེལ་བ་རྣམས་དང་༔ རྨི་ལམ་དུ་འཕྲད་པ་ལྟ་བུ་འབྱུང་སྟེ༔ ཁྱཽད་ཀྱིས་ཉེ་བ་དང་༔ འབྲེལ་བ་ཚོ་ལ་གཏམ་སྨྲས་ཀྱང་༔ གཏམ་ལན་མི་འོང་བ་དང་༔ ཉེ་བ་དང་བཟའ་ཚང་ངུ་བ་མཐོང་བས༔ ད་ང་ཤི་ནས་འདུག་པས་ཇི་ལྟར་བྱ་སྙམ་ནས༔ སྡུག་བསྔལ་དྲག་པོ་ཉ་བྱེ་ཚན་ལ་བསྒྲེས་པ་ལྟ་བུའི་སྡུག་བསྔལ་ཅིག་ཁྱོད་ལ་ད་ལྟར་ཡོད་པས་ད་ཁྱོད་རང་སྡུག་བསྔལ་བྱས་ཀྱང་ཕན་པ་མེད་དོ༔ ཁྱེད་རང་གི་བླ་མ་ལ་གསོལ་བ་ཐོབ་ཅིག༔ ཡི་དམ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག༔ ཁྱོད་ཉེ་འབྲེལ་ལ་ཆགས་ཀྱང་ཕན་པ་མེད་པས་མ་ཆགས་ཤིག༔ ཁྱོད་རང་ཇོ་བོ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག༔ སྡུག་བསྔལ་དང་སྔངས་སྐྲག་མི་འོང་ངོ་༔ ཀྱཻ་རིགས་ཀྱི་བུ༔ ཁྱོད་གཡོ་བ་ལས་ཀྱི་རླུང་གིས་ནི་བསྡད་པའི་དབང་མེད་པར་རིག་པ་རྟེན་མེད་བྱ་སྒྲོ་རླུང་གིས་ཁྱེར་བ་ལྟ་བུ༔ དབུགས་ཀྱི་རྟ་ལ་ཞོན་ནས༔ ཕྱད་ཕྱོད་ལང་ལོང་དུ་འགྲོ་ཞིང་༔ ངུ་བ་ཀུན་ལ་ང་འདི་ན་ཡོད་པས་མ་ངུ་ཅིག་བྱས་པས༔ དེ་ཁོང་ཚོས་མ་ཐོས་པས༔ ཡང་ང་ཤི་ནས་འདུག་སྙམ་ནས༔ སྡུག་བསྔལ་ཤིན་ཏུ་ཆེ་བ་ཅིག་ད་ལྟར་ཁྱོད་ལ་ཡོད་པས༔ ཁྱོད་དེ་ལྟ་བུའི་སྡུག་བསྔལ་མ་བྱེད་ཅིག༔ ཉིན་མཚན་མེད་པར་སྟོན་ནམ་སྐྱ་འོད་ལྟ་བུ་སྐྱ་ཐོམ་མེ་བ་ཞིག་རྒྱུན་དུ་འོང་ངོ་༔ དེ་ལྟ་བུའི་བར་དོ་ལ་ཞག་བདུན་ཕྲག་གཅིག་གམ༔ གཉིས་སམ༔ གསུམ་མམ༔ བཞིའམ༔ ལྔའམ༔ དྲུག་གམ༔ བདུན་ཕྲག་བདུན་ལ་སོགས་པ༔ ཞག་བཞི་བཅུ་ཞེ་དགུའི་བར་དུ་འོང་བའང་ཡོད་དོ༔ ཕལ་ཆེར་ནི་སྲིད་པ་བར་དོར་སྡུག་བསྔལ་བ༔ ཞག་ཉི་ཤུ་རྩ་གཅིག་འོང་གསུངས་ཏེ༔ ལས་ཀྱི་དབང་གིས་གཅིག་ཏུ་མ་ངེས་སོ༔ ཀྱཻ་རིགས་ཀྱི་བུ༔ དུས་དེ་ཙ་ན༔ ལས་ཀྱི་རླུང་དམར་ཆེན་པོ༔ ཤིན་ཏུ་འཇིགས་ཤིང་མི་བཟོད་པ་དྲག་ཏུ་འཚུབ་པས༔ རྒྱབ་ནས་ཕུལ་དུ་འོང་ངོ་༔ དེ་ལ་མ་འཇིགས་ཤིག༔ ཁྱོད་རང་གི་འཁྲུལ་སྣང་ཡིན་ནོ༔ ཤིན་ཏུ་འཇིགས་པའི་མུན་ནག་ཆེན་པོ༔ རབ་ཏུ་མི་བཟོད་པས༔ མདུན་ནས་བསུ་ཞིང་༔ རྒྱོབ་ཅིག༔ སོད་ཅིག༔ ཅེས་པའི་ཀུ་སྒྲ་སྣ་ཚོགས་ཀྱིས་ཤིན་ཏུ་འཇིགས་པ་འོང་སྟེ་དེ་རྣམས་ལ་ཁྱོད་མ་འཇིགས་གཞན་ཡང་སྡིག་པོ་ཆེ་རྣམས་ལ་ནི་ལས་ཀྱི་ཤ་ཟ་སྲིན་པོ་མཚོན་ཆ་སྣ་ཚོགས་ཐོགས་པ་མང་པོས༔ སོད་སོད༔ རྒྱོབ་རྒྱོབ་ལ་སོགས་པའི་ཀུ་སྒྲ་ཏི་རི་རི་ཧབ་ཤ་བྱེད་དུ་འོང་ངོ་༔ གཅན་གཟན་འཇིགས་སུ་རུང་བ་སྣ་ཚོགས་པས་དེད་པའི་སྣང་བ་འོང་ངོ་༔ ཁ་ཆར་དང་བུ་ཡུག་དང་༔ མུན་ནག་དང་༔ མི་མང་པོས་དེད་པའི་སྣང་བ་འབྱུང་ངོ་༔ རི་ཉིལ་བའི་སྒྲ་དང་༔ མཚོ་ལུད་པའི་སྒྲ་དང་༔ མེ་མཆེད་པའི་སྒྲ་དང་༔ རླུང་ཆེན་པོ་ལྡང་བའི་སྒྲ་འབྱུང་སྟེ༔ དེ་རྣམས་ལ་ཞེད་ནས་གར་བབ་བབས་སུ་བྲོས་པས༔ མདུན་དུ་གཡང་ས་གསུམ་གྱིས་ཆོད་དེ༔ དཀར་བོ༔ དམར་པོ༔ ནག་པོ་གཏིང་རིང་བ་ཉམ་ང་བ་གསུམ་ལ་བྲུལ་ལ་ཁད་ཁད་པ་འབྱུང་ངོ་༔ ཀྱཻ་རིགས་ཀྱི་བུ༔ དེའང་ཡང་དག་པར་ན་གཡང་ས་མ་ཡིན་ཏེ༔ ཞེ་སྡང་དང་༔ འདོད་ཆགས་དང་༔ གཏི་མུག་གསུམ་ཡིན་ནོ༔ དེའི་ཚེ་སྲིད་པ་བར་དོ་ཡིན་པར་ངོ་ཤེས་པར་གྱིས་ལ་ཐུགས་རྗེ་ཆེན་པོའི་མཚན་ནས་བརྗོད་ཅིག༔ ཇོ་བོ་ཐུགས་རྗེ་ཆེན་པོ་བླ་མ་དཀོན་མཆོག་ལ༔ བདག་མིང་འདི་ཞེས་བྱ་བ་ངན་སོང་གསུམ་དུ་མ་བཏང་ཤིག་གྱིས་ལ་གསོལ་བ་དྲག་ཏུ་ཐོབ་ཅིག༔ མ་བརྗེད་པར་གྱིས་ཤིག༔ གཞན་ཡང་ཚོགས་བསགས་ཤིང་ཆོས་གཤའ་མར་བྱས་པ་རྣམས་ལ་ནི༔ ལོངས་སྤྱོད་ཕུན་སུམ་ཚོགས་པ་སྣ་ཚོགས་ཀྱིས་བསུས་ནས༔ བདེ་སྐྱིད་ཕུན་སུམ་ཚོགས་པ་རྣམ་པ་སྣ་ཚོགས་པ་ཉམས་སུ་མྱོང་བར་འགྱུར་རོ༔ དགེ་སྡུག་གང་ཡང་མ་བྱས་པའི་གཏི་མུག་བཏང་སྙོམས་པ་རྣམས་ལ་ནི༔ བདེ་སྡུག་གང་ཡང་མི་མྱོང་ཞིང་༔ གཏི་མུག་བཏང་སྙོམས་འབའ་ཞིག་འཆར་བར་འགྱུར་རོ༔ དེ་ལྟར་གང་བྱུང་ཡང་༔ ཀྱཻ་རིགས་ཀྱི་བུ༔ ཁྱོད་ལ་འདོད་ཡོན་དང་བདེ་སྐྱིད་ཇི་ལྟར་བྱུང་ཡང་དེ་ལ་མ་ཆགས་ཅིག༔ མ་ཞེན་ཅིག༔ བླ་མ་དཀོན་མཆོག་མཆོད་ཅིག་སྙམ་དུ་སོམས༔ ཆགས་ཞེན་སྤོངས་ཤིག༔ སྐྱིད་སྡུག་གི་སྣང་བ་མེད་པར་བཏང་སྙོམས་ཀྱི་སྣང་བ་ཤར་ནས་བྱུང་ཡང་༔ རིག་པ་བསྒོམ་མེད་ཡེངས་མེད་ཕྱག་རྒྱ་ཆེན་པོའི་ངང་ལ་ཞོག་ཅིག༔ དེ་གལ་ཆེའོ༔ ཀྱཻ་རིགས་ཀྱི་བུ༔ དུས་དེ་ཙམ་ན༔ ཟམ་སྡུར་དང་༔ ལྷ་ཁང་དང་༔ རྩ་སྤྱིལ༔ མཆོད་རྟེན་ལ་སོགས་པ་ལ་ཡུད་ཙམ་རེ་བརྟེན་ཏེ༔ ཡང་ཡུན་རིང་པོར་མི་ཆགས་ཏེ༔ རིག་པ་ལུས་དང་བྲལ་བའི་དབང་གིས༔ སྡོད་མི་ཚུགས་པར༔ བག་གྲང་ཞིང་ཚིག་པ་ཟ༔ སྐྱི་ཟིང་ཟིང་བྱེད༔ ཤེས་པ་བན་བུན་ཕྱད་ཕྱོད༔ ཡད་ཡུད་བྱེད་པ་འོང་ངོ་༔ དེའི་དུས་སུ་བསམ་བློ་གཅིག་བཏང་བས༔ ཨ་བ་ང་ཤི་བ་ཡིན་པར་འདུག་པས་ད་ཅི་ཚུག་བྱེད་སྙམ་པའི་ཤེས་པ་སྐྱེ་ཞིང་༔ སྙིང་གྲང་ལྷང་གིས་འགྲོ༔ སྡུག་བསྔལ་དྲག་པོ་དཔག་ཏུ་མེད་པ་འོང་ངོ་༔ ས་གཅིག་ཏུ་མི་ཆགས་པར་འགྲོ་དགོས་པས༔ ཡིད་ཀྱི་དྲན་པ་སྣ་ཚོགས་པ་མ་བྱེད་པར༔ རིག་པ་རྣལ་དུ་ཕོབ་ཅིག༔ ཁྱོད་ལ་ཟས་ཀྱང་བསྔོས་པ་མ་གཏོགས་ཟར་མེད་ཅིང་༔ གྲོགས་ལའང་ངེས་པ་མེད་པའི་དུས་འབྱུང་ངོ་༔ དེ་སྲིད་པ་བར་དོར་ཡིད་ལུས་འཁྱམས་པའི་རྟགས་ཡིན་ནོ༔ དེ་ཙ་ན་སྐྱིད་སྡུག་ཀྱང་ལས་ཀྱི་རྗེས་སུ་འབྲངས་སོ༔ རང་གི་ཡུལ་འཁོར་ཉེ་དུ་དང་རང་གི་རོ་ལ་སོགས་པའང་མཐོང་ནས༔ ད་ནི་ང་ཤི་བར་འདུག་པས་ཅི་དྲག་སྙམ་སྟེ༔ ཡིད་ལུས་དེ་ནན་ཏར་སྐྱོ་བའང་འབྱུང་སྟེ༔ ངས་ལུས་གཅིག་ཐོབ་ན་ཅི་མ་རུང་སྙམ་ནས༔ ཕྱོགས་ཐམས་ཅད་དུ་ལུས་ཚོལ་དུ་འགྲོ་བའི་སྣང་བ་ཁྱོད་ལ་འོང་ངོ་༔ རང་གི་རོ་དེ་ལ་ལན་དགུའི་བར་དུ་འཇུག་པར་བྱེད་ཀྱང་༔ ཆོས་ཉིད་བར་དོར་ཡུན་རིང་བའི་གནད་ཀྱིས༔ དགུན་ནི་འཁྱགས༔ དབྱར་ནི་རུལ༔ དེ་མ་ཡིན་ནའང་ཉེ་དུས་མེར་བསྲེགས་སམ༔ དོང་དུ་སྦས་སམ༔ བྱ་གཅན་ལ་བྱིན་ནས༔ ཚུར་ཞུགས་ས་མ་རྙེད་པས༔ ཤིན་ཏུ་སྙིང་མ་དགའ་ནས༔ བྲག་དང་ས་རྡོ་ཐམས་ཅད་ཀྱི་གསེབ་ཏུ་བརྫངས་པའི་སྣང་བ་ཁྱོད་ལ་འོང་སྟེ༔ དེ་ལྟར་སྡུག་བསྔལ་བྱུང་བ་དེ་སྲིད་པ་བར་དོ་ཡིན་པས༔ ཁྱོད་རང་ལུས་ཚོལ་ཡང་སྡུག་བསྔལ་ལས་མི་འོང་གིས༔ ལུས་ཀྱི་ཞེན་པ་ཆོད་ལ༔ བྱར་མེད་ཀྱི་ངང་ལ་ཞོག་ལ༔ མ་ཡེངས་པར་གྱིས་ཤིག༔ དེ་ལྟར་ངོ་སྤྲད་པས༔ བར་དོར་གྲོལ་བ་ཐོབ་པ་ཡིན་ནོ༔ ཡང་གལ་ཏེ་ལས་ངན་གྱི་དབང་གིས༔ དེ་ལྟར་ངོ་སྤྲད་ཀྱང་མི་འཕྲོད་པ་སྲིད་པས༔ ཡང་ཚེ་འདས་ཀྱི་མིང་ནས་འབོད་ལ༔ འདི་སྐད་བརྗོད་དོ༔ ཀྱཻ༔ རིགས་ཀྱི་བུ་ཆེ་གེ་མོ་ཁྱོད་ཉོན་ཅིག༔ ཁྱོད་དེ་ལྟར་དུ་སྡུག་བསྔལ་བར་གྱུར་པ་དེ་ཁྱོད་རང་གི་ལས་ཡིན་པས༔ གཞན་སུས་ཀྱང་ལན་པ་མེད་དོ༔ ད་ནི་དཀོན་མཆོག་གསུམ་ལ་གསོལ་བ་དྲག་ཏུ་ཐོབ་ཅིག༔ དེས་སྐྱོབ་པར་འགྱུར་རོ༔ དེ་ལྟར་གསོལ་བའང་མ་བཏབ༔ ཕྱག་རྒྱ་ཆེན་པོའང་བསྒོམ་མ་ཤེས༔ ཡི་དམ་གྱི་ལྷའང་མ་བསྒོམས་ན་ནི༔ ད་ནི་ལྷན་ཅིག་སྐྱེས་པའི་ལྷས་དགེ་བ་བྱས་ཚད་ཐམས་ཅད་བསོགས་ནས་རྡེལ་བུ་དཀར་པོ་འགྲེམས་སུ་འོང་ངོ་༔ མཉམ་པོར་འོང་བའི་འདྲེས་ཀྱང་༔ སྡུག་པ་བྱས་ཚད་ཐམས་ཅད་བསོགས་ནས་རྡེལ་བུ་ནག་པོ་འགྲེམས་སུ་འོང་ངོ་༔ དེའི་དུས་སུ་ཁྱོད་ཤིན་ཏུ་བྲེད་པ་དང་༔ སྔངས་པ་དང་༔ སྐྲག་པ་དང་༔ འདར་བར་བྱས་ནས་ངས་སྡིག་པ་མ་བྱས་ཟེར་ནས་བརྫུན་སྨྲས་ཀྱང་༔ དེར་གཤིན་རྗེ་ན་རེ༔ ངས་ལས་ཀྱི་མེ་ལོང་ལ་དྲི་ཡི་ཟེར་ནས་ལུས་ཀྱི་མེ་ལོང་ལ་བལྟས་པས༔ དགེ་སྡིག་ཐམས་ཅད་མེ་ལོང་དུ་བཀྲ་ལམ་གྱིས་བྱུང་བས༔ བརྫུན་བྱས་ཀྱང་མ་ཕན་པས༔ གཤིན་རྗེས་སྐེ་ལ་ཐག་པ་བཏགས་ཏེ་ཁྲིད་ནས༔ སྐེ་བྲག་སྙིང་འདོན༔ རྒྱུ་མ་ཕྱུང་༔ ཀླད་པ་ལྡག༔ ཁྲག་འཐུང་༔ ཤ་ཟ༔ རུས་པ་མུར་ཡང་༔ འཆིར་མི་བཏུབ་པས༔ ལུས་དུམ་བུར་གཏུབ་ཀྱང་༔ ཡང་སོས་ནས་འོང་ངོ་༔ ཡང་ཡང་གཏུབ་པས་སྡུག་བསྔལ་ཆེན་པོ་འོང་བས༔ དེ་ཙ་ན༔ རྡེའུ་འགྲམས་ནས་འདུག་ཀྱང་ཁྱོད་རང་མ་ཞེད་ཅིག༔ མ་སྐྲག་ཅིག༔ བརྫུན་མ་ཟེར༔ གཤིན་རྗེ་ལ་མ་སྐྲག་ཅིག༔ ཁྱོད་ཡིད་ཀྱི་ལུས་ཡིན་པས༔ བསད་པ་དང་གཏུབ་པ་བྱུང་ཡང་༔ འཆི་རྒྱུ་མེད་དེ༔ དོན་ལ་ནི་ཁྱོད་སྟོང་པའི་རང་གཟུགས་ཡིན་པས༔ ཞེད་མི་དགོས༔ གཤིན་རྗེ་རྣམས་རང་སྣང་འཁྲུལ་ནས་སྟོང་པའི་རང་གཟུགས་ཡིན་པས༔ ཁྱོད་རང་བག་ཆགས་ཀྱི་ཡིད་ལུས་ཡིན་པས༔ སྟོང་པ་ཉིད་ཀྱིས་སྟོང་པ་ཉིད་ལ་གླགས་མི་རྙེད་དོ༔ མཚན་མ་མེད་པས་མཚན་མ་མེད་པ་ལ་གླགས་མི་རྙེད་དོ༔ རང་གི་འཁྲུལ་སྣང་མ་ཡིན་པའི་ལོགས་སམ༔ ཕྱི་རོལ་ནས་གཤིན་རྗེ་དང་༔ ལྷ་དང་༔ འདྲེ་དང་༔ རཀྴ་གླང་མགོ་ལ་སོགས་དངོས་སུ་གྲུབ་པ་མེད་པས༔ ངོ་ཤེས་པར་གྱིས་ཤིག༔ དེ་ཙ་ན་ཐམས་ཅད་བར་དོ་ཡིན་པར་ངོ་ཤེས་པར་གྱིས་ཤིག༔ ཕྱག་རྒྱ་ཆེན་པོའི་ཏིང་ངེ་འཛིན་སྒོམས་ཤིག༔ སྒོམ་མ་ཤེས་ན་ཁྱོད་རང་གིས་འཇིགས་སྐྲག་སྐྱེ་མཁན་གྱི་ངོ་བོ་དེ་ལ་ཅེར་གྱིས་ལྟོས་དང་༔ ངོ་བོ་ཅིར་ཡང་མ་གྲུབ་པའི་སྟོང་པ་ཞིག་ཡིན་ནོ༔ དེ་ནི་ཆོས་སྐུ་ཞེས་བྱ་བ་ཡིན་ནོ༔ སྟོང་པ་དེ་ཡང་སྟོང་པ་ཕྱལ་ཆད་དུ་མ་སོང་བ་སྟེ༔ སྟོང་པའི་ངོ་བོ་དེ་ལ་འཇིགས་སོ་སྙམ་པའི་རིག་པ་ཧྲིག་གེ་ས་ལེ་བ་ཞིག་ཡོད་ཀྱིས༔ དེ་ནི་ལོངས་སྤྱོད་རྫོགས་པའི་དགོངས་པ་ཡིན་ནོ༔ སྟོང་པ་དང་གསལ་བ་གཉིས་ཡ་མ་བྲལ་བར་སྟོང་པའི་ངོ་བོ་གསལ་བ༔ གསལ་བའི་ངོ་བོ་སྟོང་པ༔ གསལ་སྟོང་དབྱེར་མེད་པའི་རིག་པ་རྗེན་པ་ཐེར་ལ་བུད་པ་ཞིག་ད་ལྟ་རང་ལ་བཟོ་མེད་ཀྱི་ངང་ལ་གནས་ནས་ཡོད་དོ༔ དེ་ནི་ངོ་བོ་ཉིད་ཀྱི་སྐུ་ཡིན་ནོ༔ དེའང་དེ་ཉིད་ཀྱི་རང་རྩལ་མ་འགགས་པར༔ ཅིར་ཡང་ཤར་བ་ཞིག་ཡོད་ཀྱིས༔ དེ་ནི་ཐུགས་རྗེ་སྤྲུལ་པའི་སྐུ་ཡིན་ནོ༔ ཀྱཻ་རིགས་ཀྱི་བུ༔ དེ་ལྟར་མ་ཡེངས་པར་ལྟོས་ཤིག༔ ངོ་ཤེས་པ་ཙམ་གྱིས་སྐུ་བཞི་ཡོངས་རྫོགས་སུ་འཚང་རྒྱ་བར་ངེས་སོ༔ མ་ཡེངས་ཤིག༔ སངས་རྒྱས་དང་སེམས་ཅན་གཉིས་ཀྱི་ས་མཚམས་འདི་ནས་ཕྱེད་པ་ཡིན་ནོ༔ དུས་ད་ལྟ་གལ་པོ་ཆེ་འདིའི་དུས་ལ་ཡེངས་ན་ནི༔ དུས་རྟག་ཏུ་སྡུག་བསྔལ་གྱི་འདམ་ནས་ཐོན་པའི་དུས་མི་འོང་ངོ་༔ སྐད་ཅིག་གཅིག་གིས་བྱེ་བྲག་བྱེད༔ སྐད་ཅིག་གཅིག་གིས་རྫོགས་སངས་རྒྱས༔ ཞེས་བྱ་བ་དེ་ད་རེས་ཡོད་པ་ཡིན་ནོ༔ ཁྱོད་རང་ཁར་སང་ཕན་ཆོད་ཡེངས་ཤོར་བས༔ བར་དོ་དེ་ཙམ་ཞིག་ཤར་ཡང་ངོ་མ་འཕྲོད་པས༔ འཇིགས་སྐྲག་དེ་ཙམ་ཞིག་བྱུང་བ་ཡིན༔ ད་ནི་ཡེངས་ཤོར་ན་ནི༔ ཐུགས་རྗེའི་དཔྱང་ཐག་ཆད་ནས༔ ཐར་མེད་ཀྱི་གནས་སུ་འགྲོ་བས་གཟོབ་ཅིག༔ ཅེས་ངོ་སྤྲད་པས་གོང་དུ་ངོ་མ་འཕྲོད་ཀྱང་༔ འདིར་ངོ་འཕྲད་ནས་གྲོལ་བ་ཐོབ་པོ༔ དེ་ལྟར་བསྒོམ་མི་ཤེས་པའི་མི་ནག་པ་ཡིན་ན་འདི་སྐད་བརྗོད༔ ཀྱཻ་རིགས་ཀྱི་བུ༔ དེ་ལྟར་བསྒོམ་མ་ཤེས་ན་སངས་རྒྱས་དང་༔ ཆོས་དང་༔ དགེ་འདུན་དང་༔ ཡི་དམ་ཐུགས་རྗེ་ཆེན་པོ་རྣམས་དྲན་པར་གྱིས་ལ་གསོལ་བ་ཐོབ་ཅིག༔ འཇིགས་སྐྲག་གི་སྣང་བ་ཐམས་ཅད་ཐུགས་རྗེ་ཆེན་པོའམ་ཁྱོད་རང་གི་ཡི་དམ་དུ་སྒོམས་ཤིག༔ མི་ཡུལ་དུ་དབང་ཞུས་པའི་གསང་མཚན་གང་བཏགས་དང་༔ བླ་མ་དྲན་པར་གྱིས་ལ་གཤིན་རྗེ་ཆོས་ཀྱི་རྒྱལ་པོ་ལ་ཤོད་ཅིག༔ གཡང་སར་བྲུལ་ཡང་༔ མི་གནོད་པས་སྔངས་སྐྲག་སྤོངས་ཤིག༔ ཅེས་བརྗོད་ནས་ངོ་སྤྲད་པས་གོང་དུ་མ་གྲོལ་ཡང་༔ འདི་ནས་གྲོལ་བར་འགྱུར་རོ༔ ཡང་ངོ་མ་འཕྲོད་མ་གྲོལ་བ་སྲིད་པས༔ ནན་ཆགས་གལ་ཆེ་བའི་ཕྱིར༔ ཡང་ཚེ་འདས་ཀྱི་མིང་ནས་འབོད་ལ༔ འདི་སྐད་བརྗོད་དོ༔ ཀྱཻ་རིགས་ཀྱི་བུ༔ ད་ལྟའི་སྣང་བ་ཡུད་ཙམ་རེས་བདེ་སྡུག་གི་གནས་རྔམ་པོ་ཆེར་འཕངས་ནས་འོང་བས༔ དཔེར་ན་སྒྱོགས་ཀྱི་འཁྲུལ་འཁོར་དང་འདྲ་བས༔ ད་ལྟར་ཆགས་སྡང་གི་སྣང་བ་ཡེ་ནས་མ་བྱེད་ཅིག༔ ཁྱོད་མཐོ་རིས་སུ་སྐྱེ་རྒྱུ་ཡིན་ན༔ མཐོ་རིས་ཀྱི་སྣང་བ་འཆར་བའི་ཚེ༔ ཤུལ་དུ་ཉེ་བ་གསོན་པོ་རྣམས་ཀྱིས༔ གཤིན་པོའི་དོན་དུ་བསྔོས་ནས་སེམས་ཅན་མང་པོའི་སྲོག་གཅོད་དེ་མཆོད་སྦྱིན་བྱས་པས༔ ཁྱོད་ལ་མ་དག་པའི་སྣང་པ་འཆར་ནས༔ ཞེ་སྡང་དྲག་པོ་སྐྱེས་ཏེ༔ དེས་མཚམས་སྦྱར་ནས༔ དམྱལ་བར་སྐྱེ་བར་འགྱུར་བས༔ ཤུལ་དུ་ལས་ཅི་བྱས་ནས་འདུག་ཀྱང་༔ ཁྱོད་རང་ཞེ་སྡང་མ་བསྐྱེད་པར་བྱམས་པ་སྒོམས་ཤིག༔ ཡང་ཁྱོད་རང་གི་ཤུལ་གྱི་ནོར་རྫས་ལ་ཆགས་སེམས་སྐྱེ་བའམ༔ ཁྱོད་ཀྱི་ནོར་རྫས་གཞན་གྱིས་དབང་དུ་བྱས་ནས༔ སྤྱོད་ཅིང་འདུག་པ་ཤེས་ཏེ༔ ཁྱོད་ནོར་རྫས་དེ་རྣམས་ལ་ཆགས་ཤིང་ཤུལ་མི་དེ་རྣམས་ལ་ཞེ་སྡང་སྐྱེས་པས༔ དེས་མཚམས་སྦྱར་ནས༔ མཐོ་རིས་འཐོབ་རྒྱུ་ཡང་༔ དམྱལ་བའམ༔ ཡི་དྭགས་སུ་ངེས་པར་སྐྱེ་བར་འགྱུར་བས༔ དེ་བས་ཁྱོད་རང་ཤུལ་གྱི་ནོར་རྫས་ལ་ཆགས་སེམས་སྐྱེས་ཀྱང་ཐོབ་དབང་ནི་མེད༔ ཁྱོད་རང་ལ་ཕན་མི་ཐོགས་པས་ཤུལ་གྱི་ནོར་ལ་ཆགས་པ་དང་ཞེན་པ་སྤོངས༔ ལིངས་ཀྱིས་བསྐྱུར༔ ཁོ་ཐག་ཆོད༔ ཁྱོད་རང་གི་ནོར་ལ་སུས་སྤྱོད་ནས་འདུག་ཀྱང་༔ སེར་སྣ་མ་བྱེད་ལ་བློས་ཐོངས་པར་གྱིས་ཤིག༔ བླ་མ་དང་དཀོན་མཆོག་གསུམ་ལ་འབུལ་སྙམ་པའི་འདུན་པ་རྩེ་གཅིག་གྱིས་ལ༔ ཆགས་མེད་ཞེན་མེད་ཀྱི་ངང་ལ་གནས་པར་གྱིས་ཤིག༔ ཡང་ཁྱོད་ཀྱི་ཕྱིར་དུ༔ གཤིན་པོའི་ཆོ་ག་ཀཾ་ཀ་ནི་འདོན་པ་དང་༔ ངན་སོང་སྦྱོང་བ་ལ་སོགས་པ་ཁྱོད་ཀྱི་དོན་དུ་བྱས་ཀྱང་༔ དེ་མ་དག་པ་དང་༔ གཉིད་པ་དང་༔ གཡེང་བ་ལ་སོགས་པས་བྱས་པ་དང་༔ དམ་ཚིག་དང་སྡོམ་པ་མི་གཙང་བ་དང་༔ བག་མེད་པའི་སྤྱོད་པ༔ དེ་རྣམས་ཁྱོད་ཀྱི་ལས་ཀྱི་མངོན་ཤེས་ཕྲ་མོས་མཐོང་ནས་འོང་གིས༔ དེ་ལ་ཁྱོད་མ་དད་པ་དང་༔ ལོག་ལྟ་སྐྱེས་པ་དང་༔ འཇིགས་ཤིང་སྐྲག་ནས༔ ལས་ནག་པོ་རྣམས་དང་༔ ཆོས་སྤྱོད་དང་༔ ཆོ་ག་མ་དག་པ་རྣམས་ཀྱང་ཤེས་ནས་འོང་གི༔ དེར་ཁྱོད་ཀྱི་བསམ་པ་ལ༔ ཀྱཻ་མ་འདི་རྣམས་ཀྱིས་བདག་བསླུས་སོ་ངེས་པར་བསླུས་སོ་སྙམ་ནས༔ ཤིན་ཏུ་ཡི་མུག་སྟེ༔ མི་དགའ་བ་ཆེན་པོ་དང་བཅས་ནས༔ དག་སྣང་མོས་གུས་མི་སྐྱེ་བའི་སྟེང་དུ༔ ལོག་ལྟ་དང་མ་དད་པ་སྐྱེས་ནས་འོང་བས་དེས་མཚམས་སྦྱར་ནས་ངེས་པར་ངན་སོང་དུ་འགྲོ་བས༔ དེས་ན་ཕན་པ་བས་གནོད་པ་ཆེ་བ་ཡིན་གྱིས༔ ཁྱོད་རང་གི་ཤུལ་གྱི་བཤེས་གཉེན་རྣམས་ཀྱིས་ཆོས་སྤྱོད་མ་དག་པ་ཇི་ལྟར་བྱས་ནས་འདུག་ཀྱང་༔ ག་རེ་ང་རང་སྣང་བ་མ་དག་པ་ཡིན༔ རྒྱལ་བའི་གསུང་ལ་མ་དག་པ་ག་ལ་སྲིད༔ རང་གི་བྱད་ཀྱི་དྲི་མ་མེ་ལོང་ན་མཐོང་བ་དང་འདྲ༔ བདག་རང་སྣང་མ་དག་པའི་སྟོབས་ཀྱིས༔ འདི་དག་བྱུང་གིས༔ འདི་རྣམས་སྐུ་དགེ་འདུན༔ གསུང་དམ་ཆོས༔ ཐུགས་སངས་རྒྱས་ཀྱི་ངོ་བོ་ཡིན་ནོ༔ སྐྱབས་སུ་མཆིའོ་སྙམ་པའི་མོས་པ་དང་༔ དག་སྣང་ཞེ་ཐག་པ་ནས་གྱིས་ཤིག༔ དེས་ཁྱོད་རང་གི་ཤུལ་ན་ཅི་བྱས་རྣམས༔ ཁྱོད་རང་ལ་ཕན་པར་ངེས་པས༔ དེ་ལྟར་དག་སྣང་བྱེད་པ་གལ་ཆེ་བས༔ མ་བརྗེད་པར་གྱིས་ཤིག༔ ཡང་ཁྱོད་ངན་སོང་གསུམ་དུ་སྐྱེ་རྒྱུ་ཡིན་ན༔ ངན་སོང་གི་སྣང་བ་འཆར་བའི་ཚེ༔ ཤུལ་དུ་ཉེ་འབྲེལ་རྣམས་ཀྱིས་སྡིག་པ་དང་མ་འདྲེས་པའི༔ དཀར་པོའི་ཆོས་སྤྱོད་པ་དང་༔ བླ་མ་སློབ་དཔོན་རྣམས་ཀྱང་༔ ལུས་ངག་ཡིད་གསུམ་དགེ་བའི་ཆོ་ག་རྣམ་པར་དག་པ་བྱེད་པ་དེ་མཐོང་ནས༔ ཁྱོད་ཀྱིས་དེ་ལ་དགའ་སྤྲོ་ཆེན་པོ་སྐྱེས་པ་ཙམ་གྱིས་ཀྱང་༔ དེས་མཚམས་སྦྱར་ནས༔ ངན་སོང་དུ་ལྟུང་རྒྱུའང་༔ མཐོ་རིས་སུ་ངེས་པར་ལྡོག་པའི་ཕན་པ་ཡོད་པས༔ ཁྱོད་རང་མ་དག་པའི་སྣང་བ་མེད་པར༔ དག་སྣང་མོས་གུས་ཕྱོགས་མེད་དུ་བྱེད་པ་ཤིན་ཏུ་གལ་ཆེ་བས་གཟོབ་ཅིག༔ ཀྱཻ་རིགས་ཀྱི་བུ༔ མདོར་ན་ད་ལྟར་ཁྱོད་བར་དོའི་རིག་པ་ལ་རྟེན་མེད་པས་ཡང་ཞིང་གཡོ་བ་དེ་ལ༔ དགེ་མི་དགེའི་སྣང་བ་གང་འཆར་བ་དེ༔ སྟོབས་ཆེ་བ་ཡིན་པས༔ མི་དགེ་བའི་ལས་གང་ཡང་ཡིད་ལ་མ་བསམ་པར༔ ཁྱོད་རང་དགེ་སྦྱོར་ཡོད་ན་དྲན་པར་གྱིས་ཤིག༔ དགེ་སྦྱོར་མེད་ནའང་དག་སྣང་དང་མོས་གུས་གྱིས་ཤིག༔ ཡི་དམ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག༔ འདུན་པ་དྲག་པོས་སྨོན་ལམ་འདི་ཐོབ་ཅིག༔ ཀྱཻ་མ༔ དགའ་བའི་གྲོགས་དང་བྲལ་ནས་གཅིག་པུར་འཁྱམས༔ རང་སྣང་སྟོང་པའི་གཟུགས་བརྙན་འཆར་དུས་འདིར༔ སངས་རྒྱས་རྣམས་ཀྱི་ཐུགས་རྗེའི་ཤུགས་ཕྱུང་ནས༔ སྔངས་སྐྲག་བར་དོའི་འཇིགས་པ་མི་འབྱུང་ཤོག༔ ལས་ངན་དབང་གིས་སྡུག་བསྔལ་མྱོང་ཙམ་ན༔ ཡི་དམ་ལྷ་ཡིས་སྡུག་བསྔལ་སེལ་བར་ཤོག༔ ཆོས་ཉིད་རང་སྒྲ་འབྲུག་སྟོང་ལྡིར་ཙམ་ན༔ ཐམས་ཅད་ཡིག་དྲུག་སྒྲ་རུ་འགྱུར་བར་ཤོག༔ སྐྱབས་མེད་ལས་ཀྱི་རྗེས་སུ་འབྲང་དུས་འདིར༔ ཐུགས་རྗེ་ཆེན་པོས་བདག་ལ་སྐྱོབས་ཏུ་གསོལ༔ བག་ཆགས་ལས་ཀྱིས་སྡུག་བསྔལ་མྱོང་དུས་འདིར༔ འོད་གསལ་བདེ་བའི་ཏིང་འཛིན་འཆར་བར་ཤོག༔ དེ་སྐད་དུ་སྨོན་ལམ་དྲག་པོ་ཐོབ་ཅིག༔ ལམ་སྣ་འདྲེན་པར་ངེས༔ མི་བསླུ་ངེས་པར་ཐག་ཆོད་ཀྱིས་ཤིན་ཏུ་གལ་ཆེའོ༔ ཞེས་བརྗོད་པས་དྲན་པ་རྙེད་ནས་ངོས་ཟིན་ཏེ༔ གྲོལ་བ་ཐོབ་པར་འགྱུར་རོ༔ ཡང་དེ་ལྟར་ལན་མང་དུ་བྱས་ཀྱང་ལས་ངན་པ་ཤས་ཆེ་བའི་སྟོབས་ཀྱིས༔ ངོ་འཕྲོད་པར་དཀའ་བས་ད་རུང་ལན་མང་དུ་བསྐྱར་ན༔ ཕན་ཡོན་ཆེ་བས༔ ཡང་ཚེ་འདས་ཀྱི་མིང་ནས་ལན་གསུམ་བོས་ལ་འདི་སྐད་བརྗོད་དོ༔ ཀྱཻ་རིགས་ཀྱི་བུ༔ གོང་གི་དེ་རྣམས་ལ་དྲན་པས་མ་ཟིན་ན༔ དུས་འདི་ནས་ཚེ་སྔ་མའི་ལུས་དེ་མི་གསལ་དུ་འགྲོ་ཞིང་༔ ཕྱི་མའི་ལུས་དེ་ཇེ་གསལ་དུ་འགྲོ་བས༔ དེ་ལ་སྐྱོ་ནས་ང་འདི་ལྟ་བུའི་སྡུག་བསྔལ་བ་ད་ལུས་ཅི་འདྲ་བ་ཅིག་བྱུང་ཡང་ཚོལ་སྙམ་ནས༔ གང་བྱུང་དུ་ཕྱད་ཕྱོད་ལང་ལིང་དུ་ཕྱིན་པས༔ འགྲོ་བ་རིགས་དྲུག་གི་འོད་དྲུག་འཆར་ཏེ༔ ལས་ཀྱིས་གང་དུ་སྐྱེ་བ་དེ་གཙོ་ཆེར་འཆར་ནས་འོང་ངོ་༔ ཀྱཻ་རིགས་ཀྱི་བུ་ཉོན་ཅིག༔ འོད་དྲུག་པོ་གང་ཞེ་ན༔ ལྷའི་འོད་དཀར་པོ་བཀྲག་མེད་འཆར་དུ་འོང་ངོ་༔ དེ་བཞིན་དུ༔ ལྷ་མ་ཡིན་འོད་དམར་པོ་བཀྲག་མེད་འཆར་དུ་འོང་ངོ༔ མིའི་འོད་སྔོན་པོ་བཀྲག་མེད་འཆར་དུ་འོང་ངོ༔ དུད་འགྲོའི་འོད་ལྗང་གུ་བཀྲག་མེད་འཆར་དུ་འོང་ངོ༔ ཡི་དྭགས་ཀྱི་འོད་སེར་པོ་བཀྲག་མེད་འཆར་དུ་འོང་ངོ༔ དམྱལ་བའི་འོད་དུད་ཁ་སྟེ་འོད་དྲུག་པོ་དེ་དག་འབྱུང་ངོ༔ དེ་ཙ་ན༔ ལུས་ཀྱི་མདོག་ཀྱང་གང་དུ་སྐྱེ་བའི་འོད་ཀྱི་མདོག་ཏུ་འོང་ངོ་༔ ཀྱཻ་རིགས་ཀྱི་བུ་འདིའི་དུས་སུ་གདམས་ངག་གནད་ཤིན་ཏུ་གལ་ཆེ་བས༔ དེའི་དུས་སུ་འོད་གང་ཤར་བ་དེ་ཐུགས་རྗེ་ཆེན་པོར་སྒོམས་ཤིག༔ འོད་ནམ་བྱུང་དུས་ཐུགས་རྗེ་ཆེན་པོ་ཡིན་སྙམ་དུ་སྒོམས་ཤིག༔ འདི་ཤིན་ཏུ་གནད་ཟབ་མོ་ཡིན་ཏེ་འདི་ཤིན་ཏུ་གལ་ཆེ་སྟེ་སྐྱེ་བ་ཁེགས་པར་འགྱུར་རོ༔ ཡང་ན་ཁྱོད་རང་གི་ཡི་དམ་གྱི་ལྷ་གང་ཡིན་པ་དེ༔ སྒྱུ་མ་ལྟ་བུའི་སྣང་ལ་རང་བཞིན་མེད་པ་ཡུན་རིང་དུ་སྒོམས་ཤིག༔ དེ་ནི་དག་པའི་སྒྱུ་ལུས་ཞེས་བྱའོ༔ དེ་ནས་ཡི་དམ་དེ་མཐའ་ནས་ཡལ་ཏེ༔ ཅིར་ཡང་མ་གྲུབ་པའི་སྟོང་གསལ་འཛིན་པ་མེད་པའི་ངང་ལ་དར་ཅིག་ཞོག་ཅིག༔ ཡང་ཡི་དམ་སྒོམས༔ ཡང་འོད་གསལ་སྒོམས༔ དེ་ལྟར་རེས་མོས་སུ་སྒོམས་ལ་དེའི་རྗེས་སུ་རིག་པ་མཐའ་ནས་ཡལ་ཏེ༔ ནམ་མཁའི་གར་ཁྱབ་ཏུ་རིག་པས་ཁྱབ༔ རིག་པས་གར་ཁྱབ་ཏུ་ཆོས་སྐུས་ཁྱབ༔ ཆོས་སྐུ་བདག་མེད་སྤྲོས་བྲལ་གྱི་ངང་དུ་ཆམ་མེ་ཞོག་ཅིག༔ དེའི་ངང་ནས་སྐྱེ་བ་ཁེགས་ནས་འཚང་རྒྱ་བར་འགྱུར་རོ༔ དེ་ཡང་སྦྱང་བ་ཤིན་ཏུ་ཞན་ནས་གོམས་འདྲིས་མེད་པ་རྣམས་ཀྱིས་མི་ཟིན་པས༔ ཡང་འཁྲུལ་ཏེ་མངལ་སྒོ་འགྲིམས་པར་འགྱུར་བས༔ མངལ་སྒོ་དགག་པའི་གདམས་ངག་ཤིན་ཏུ་གལ་ཆེ་བས༔ ཚེ་འདས་ཀྱི་མིང་ནས་འབོད་ལ་འདི་སྐད་དོ༔ ཀྱཻ་རིགས་ཀྱི་བུ༔ གོང་ལྟར་ངོས་མ་ཟིན་ན༔ འདིའི་དུས་སུ་ལས་ཀྱི་དབང་གིས་གྱེན་ལ་འགྲོ་བ་དང་༔ འཕྲེད་ལ་འགྲོ་བ་དང་༔ མགོ་ཐུར་ལ་བསྟན་ནས་འགྲོ་བའི་སྣང་བ་འཆར་ཏེ༔ དེ་ཙ་ན་ཁྱེད་རང་ཐུགས་རྗེ་ཆེན་པོ་སྒོམས་ཤིག༔ དྲན་པར་གྱིས་ཤིག༔ དེ་ནས་གོང་དུ་བཤད་པ་ལྟར༔ རླུང་འཚུབས་པ་དང་བུ་ཡུག་དང་༔ སེར་བ་དང་༔ གནམ་རྨུགས་པ་དང་༔ མི་མང་པོས་དེད་པའི་སྣང་བ་ཤར་ནས༔ དེ་ལ་བྲོས་པ་དང་༔ བསོད་ནམས་དང་མི་ལྡན་པ་རྣམས་ནི༔ སྡུག་བསྔལ་གྱི་གནས་སུ་བྲོས་པའི་སྣང་བ་འབྱུང་༔ བསོད་ནམས་དང་ལྡན་པ་རྣམས་ནི༔ བདེ་བ་དང་ལྡན་པའི་གནས་སུ་སླེབ་པའི་སྣང་བ་འབྱུང་བས༔ དུས་དེ་ཙ་ན༔ རིགས་ཀྱི་བུ་གླིང་གང་དུ་སྐྱེ་བ་དང་༔ གནས་གང་དུ་སྐྱེ་བའི་རྟགས་ཐམས་ཅད་དུས་འདིར་འཆར་དུ་འོང་བས༔ འདིའི་དུས་སུ་གདམས་ངག་གི་གནད་ཤིན་ཏུ་ཟབ་པ་མང་པོ་ཡོད་པས་མ་ཡེངས་པར་ཉོན་ཅིག༔ གོང་གི་ངོ་སྤྲོད་ཀྱི་གནད་དེ་རྣམས་མ་ཟིན་ནའང་༔ འདིར་སྦྱངས་པ་ཤིན་ཏུ་ཞན་པར་གྱུར་པས་ཀྱང་༔ གནད་དངོས་ཟིན་དུ་འོང་བས་ཀྱང་ཉོན་ཅིག༔ ད་ནི་འདིའི་དུས་སུ་མངལ་སྒོ་དགག་པའི་ཐབས་ལ་གཟབ་པ་ཤིན་ཏུ་གལ་ཆེ་བས༔ དེ་དགག་ཐབས་ལ་གཉིས་ཡོད་དོ༔ འཇུག་བྱེད་ཀྱི་གང་ཟག་དགག་པ་དང་༔ འཇུག་བྱའི་མངལ་སྒོ་དགག་པ་དང་གཉིས་ཡོད་དོ༔ དེ་ལ་འཇུག་བྱེད་ཀྱི་གང་ཟག་དགག་པའི་གདམས་ངག་ནི༔ ཀྱཻ་རིགས་ཀྱི་བུ༔ ཆེ་གེ་མོཁྱོད༔ རང་གི་ཡི་དམ་གང་ཡིན་པ་དེ་ཉིད༔ སྒྱུ་མ་ལྟ་བུ་སྣང་ལ་རང་བཞིན་མེད་པར༔ ཆུ་ནང་གི་ཟླ་བ་ལྟ་བུར་ཝལ་གྱིས་སྒོམས་ཤིག༔ ཡི་དམ་ངེས་པ་མེད་ན༔ ཇོ་བོ་ཐུགས་རྗེ་ཆེན་པོ་རང་ཡིན་ནོ༔ སྙམ་དུ་ཝལ་གྱིས་སྒོམས་ཤིག༔ དེ་ནས་ཡི་དམ་མཐའ་ནས་ཡལ་ནས༔ ཅི་ཡང་མི་དམིགས་པ་འོད་གསལ་སྟོང་པར་སྒོམས་ཤིག༔ དེ་ནི་གནད་ཟབ་མོ་ཡིན་ནོ༔ དེས་ནི་མངལ་དུ་མི་འཇུག་གསུངས་པས༔ དེ་ལྟར་དུ་སྒོམས་ཤིག༔ གལ་ཏེ་དེས་ཀྱང་མ་ཁོགས་པར་མངལ་དུ་འཇུག་པའི་གྲབ་བྱུང་ན་ཡང་༔ འཇུག་བྱའི་མངལ་སྒོ་དགག་པའི་གདམས་ངག་ཟབ་མོ་ཡོད་པས༔ ཁྱོད་རང་ཉོན་ཅིག༔ བར་དོའི་རྩ་ཚིག་ནང་ནས་འདི་སྐད་གསུངས་ཏེ༔ ཁྱེད་རང་གིས་ངའི་ལན་མོ་གྱིས་ཤིག༔ ཀྱཻ་མ༔ བདག་ལ་སྲིད་པ་བར་དོ་འཆར་དུས་འདིར༔ འདུན་པ་རྩེ་གཅིག་སེམས་ལ་བཟུང་བྱས་ནས༔ བཟང་པོ་ལས་ཀྱི་འཕྲོ་ལ་ནན་གྱིས་མཐུད༔ མངལ་སྒོ་དགགས་ནས་རུ་ལོག་དྲན་པར་བྱ༔ སྙིང་རུས་དག་སྣང་དགོས་པའི་དུས་གཅིག་ཡིན༔ མིག་སེར་སྤངས་ལ་བླ་མ་ཡབ་ཡུམ་བསྒོམ༔ ཞེས་ཁ་ནས་ཀྱང་དེ་སྐད་ལྷང་ལྷང་བརྗོད་ལ༔ དྲན་བསྐུལ་གྱིས་ཤིག༔ དེའི་དོན་བསྒོམས་ལ་ཉམས་སུ་ལེན་པ་གལ་ཆེའོ༔ ད་དེའི་དོན་ནི༔ བདག་ལ་སྲིད་པ་བར་དོ་ཤར་དུས་འདིར༔ ཞེས་པ་ནི༔ ཁྱོད་རང་ད་ལྟར་སྲིད་པ་བར་དོར་འཁྱམས་ནས་ཡོད་པ་ཡིན་ཏེ༔ དེའི་རྟགས་སུ་ཁྱོད་རང་ཆུ་ནང་དུ་ལྟོས་དང་༔ ཁྱོད་རང་གི་བྱད་མི་མཐོང་ངོ༔ ལུས་ལ་གྲིབ་མ་ཡང་མེད་དོ༔ དེ་ནི་གདོས་བཅས་ཤ་ཁྲག་གི་ལུས་མེད་པས༔ སྲིད་པ་བར་དོ་ཡིད་ལུས་འཁྱམས་པའི་རྟགས་ཡིན་པས༔ ད་ནི་འདུན་པ་རྩེ་གཅིག་ཏུ་མ་ཡེངས་པར་སེམས་ལ་བཟུང་དགོས་ཏེ༔ ད་ལྟར་ནི་འདུན་པ་ཁོ་ན་གཙོ་ཆེ་བ་ཡིན་ནོ༔ རྟ་ཁ་སྲབ་ཀྱིས་བསྒྱུར་བ་དང་འདྲའོ༔ འདུན་པ་གང་ལ་གཏད་པ་དེ་གྲུབ་ནས་འོང་བས༔ ངན་པའི་ལས་རྣམས་ཡིད་ལ་མ་འགྱུ་བར༔ མི་ཡུལ་དུ་ཆོས་དང་གདམས་ངག་དབང་དང་བཀའ་ལུང་༔ བར་དོ་ཐོས་གྲོལ་ལ་སོགས་པ་གང་དང་འབྲེལ་བ་ཡོད་པ་དེ༔ ད་ལྟ་དྲན་པར་གྱིས་ལ༔ བཟང་པོ་ལས་ཀྱི་འཕྲོ་ལ་ནན་གྱིས་མཐུད་ཅིག༔ ཤིན་ཏུ་གལ་ཆེའོ༔ མ་བརྗེད་ཅིག༔ མ་ཡེངས་ཤིག༔ ཡར་འགྲོ་མར་འགྲོའི་ས་མཚམས་ད་རེས་ཡིན་ནོ༔ ལེ་ལོ་དར་ཅིག་ཤོར་བས༔ སྡུག་བསྔལ་གཏན་དུ་འོང་བའི་དུས་ད་རེས་ཡིན་ནོ༔ འདུན་པ་སྐད་ཅིག་བཟུང་བས༔ བདེ་བ་གཏན་དུ་འོང་བའི་དུས་ད་རེས་ཡིན་ནོ༔ འདུན་པ་རྩེ་གཅིག་སེམས་ལ་ཟུངས་ཤིག༔ བཟང་པོ་ལས་ཀྱི་འཕྲོ་ལ་ནན་གྱིས་མཐུད་ཅིག༔ ད་ནི་མངལ་སྒོ་དགག་པའི་དུས་ལ་བབ་པོ༔ མངལ་སྒོ་བགགས་ནས་རུ་ལོག་དྲན་པར་བྱ༔ སྙིང་རུས་དག་སྣང་དགོས་པའི་དུས་གཅིག་ཡིན༔ ཞེས་གསུངས་པ་དེ་ད་ལྟ་དུས་ལ་བབ་པས༔ དང་པོ་མངལ་སྒོ་དགག་པར་བྱ་སྟེ༔ དེ་ཡང་དགག་ཐབས་རྣམ་པ་ལྔ་ཡོད་པས༔ སེམས་ལ་ལེགས་པར་ཟུངས་ཤིག༔ ཀྱཻ་རིགས་ཀྱི་བུ་འདི་དུས་སུ༔ ཕོ་མོ་ཆགས་པ་སྤྱོད་པའི་སྣང་བ་ཁྱོད་ལ་འོང་ངོ་༔ དེ་མཐོང་བའི་དུས་སུ་དེའི་བར་ན་མ་འཇུག་པར༔ དྲན་པས་ཟུངས་ལ༔ ཕོ་མོ་གཉིས་པོ་བླ་མ་ཡབ་ཡུམ་གཉིས་སུ་བསྒོམས་ལ༔ ཕྱག་འཚལ་ཡིད་ཀྱིས་མཆོད་པ་སྤྲུལ་ལ་ཕུལ་ཞིང་༔ མོས་གུས་དྲག་པོ་གྱིས་ལ༔ ཆོས་ཞུ་སྙམ་པའི་འདུན་པ་དྲག་པོ་གཏད་པ་ཙམ་གྱིས༔ མངལ་སྒོ་ངེས་པར་ཁེགས་པར་འགྱུར་རོ༔ གལ་ཏེ་དེས་ཀྱང་མ་ཁེགས་པར་མངལ་དུ་འཇུག་པའི་གྲབ་བྱུང་ན༔ བླ་མ་ཡབ་ཡུམ་གཉིས་པོ་དེ་ཡི་དམ་གང་ཡང་རུང་བའམ༔ ཡི་དམ་ཐུགས་རྗེ་ཆེན་པོ་ཡབ་ཡུམ་དུ་བསྒོམས་ལ༔ དེ་ལ་མཆོད་པ་ཡིད་ཀྱིས་སྤྲུལ་ལ་འབུལ༔ བདག་ལ་དངོས་གྲུབ་ཞུ་སྙམ་པའི་འདུན་པ་དྲག་པོ་གྱིས་ཤིག༔ དེས་ནི་མངལ་སྒོ་ཁེགས་པར་འགྱུར་རོ༔ ཡང་དེས་ཀྱང་མ་ཁེགས་པར༔ མངལ་དུ་འཇུག་པའི་གྲབས་བྱུང་ན༔ གསུམ་པ་ཆགས་སྡང་བཟློག་པའི་གདམས་པ་བསྟན་ཏེ༔ དེའང་སྐྱེ་བ་རྣམ་པ་བཞི་ཡོད་པ་ལས༔ སྒོང་སྐྱེས་དང་༔ མངལ་སྐྱེས་དང་༔ བརྫུས་སྐྱེས་དང་༔ དྲོད་གཤེར་ལས་སྐྱེས་པ་དང་བཞི་ཡོད་དོ༔ དེ་ལ་སྒོང་སྐྱེས་དང་༔ མངལ་སྐྱེས་གཉིས་ཆ་མཐུན་ཏེ༔ གོང་ལྟར་ཕོ་མོ་གཉིས་འཁྲིག་པ་སྤྱོད་པ་མཐོང་ནས་འོང་སྟེ༔ དེའི་དུས་སུ་ཆགས་སྡང་གི་དབང་གིས་མངལ་དུ་འཇུག་ནས༔ རྟ་དང་བྱ་ཁྱི་མི་ལ་སོགས་པ་གར་སྐྱེས་ཀྱང་རུང་སྟེ༔ གལ་ཏེ་ཕོར་སྐྱེས་ན་ནི༔ རང་ཉིད་ཕོ་ཡི་སྣང་བ་འཆར་ཏེ༔ ཕ་ལ་ཞེ་སྡང་དྲག་པོ་སྐྱེ་ཞིང་༔ མ་ལ་མིག་སེར་དང་ཆགས་པ་སྐྱེ་བའི་སྣང་བ་འོང་ངོ་༔ གལ་ཏེ་མོར་སྐྱེས་ན་ནི༔ རང་ཉིད་མོའི་སྣང་བ་འཆར་ཏེ༔ མ་ལ་མིག་སེར་དང་ཕྲག་དོག་དྲག་པོ་སྐྱེ་ཞིང་༔ ཕ་ལ་ཆགས་པ་དང་གདུང་སེམས་དྲག་པོ་སྐྱེས་པ་དང་༔ དེས་རྐྱེན་བྱས་ནས༔ ཁའི་ལམ་ནས་ཞུགས་ཏེ༔ ཐིག་ལེ་དཀར་དམར་འཕྲད་པའི་དབུས་སུ་ལྷན་ཅིག་སྐྱེས་པའི་དགའ་བ་ཉམས་སུ་མྱོང་བས༔ བདེ་བའི་ངང་ནས་ཤེས་པ་བརྒྱལ་ལོག་གིས་སོང་བ་སྟེ༔ མེར་མེར་པོ་དང་༔ ནུར་ནུར་པོ་ལ་སོགས་པས་ལུས་སྨིན་ནས༔ མའི་མངལ་ནས་ཕྱིར་ཐོན་ནས༔ མིག་ཕྱེད་པ་དང་༔ ཁྱིའུ་གཅིག་ཏུ་ལོག་གིས་སོང་སྟེ༔ དང་པོ་མི་ཡིན་པ་ལ༔ ད་དུས་ཁྱིར་སོང་སྟེ༔ ཁྱིའི་ཚང་ནང་ན་སྡུག་བསྔལ་བའམ༔ དེ་བཞིན་དུ་ཕག་གི་ཚང་ངམ༔ གྲོག་སྦུར་གྱི་ཚང་ངམ༔ འབུ་སྲིན་གྱི་ཚང་ངམ༔ བ་གླང་ངམ༔ ར་ལུག་ལ་སོགས་པའི་ཕྲུ་གུར་སྐྱེ་སྟེ༔ ཚུར་ལོག་པ་ནི་མེད༔ ཤིན་ཏུ་བླུན་ཞིང་༔ རྨུགས་པའི་ངང་ནས༔ སྡུག་བསྔལ་རྣམ་པ་སྣ་ཚོགས་ཉམས་སུ་མྱོང་བར་འགྱུར་རོ༔ དེ་ལྟར་དམྱལ་བ་དང་༔ ཡི་དྭགས་ལ་སོགས་འགྲོ་བ་རིགས་དྲུག་ཏུ་འཁོར་ཏེ༔ སྡུག་བསྔལ་དཔག་ཏུ་མེད་པས་ཉམ་ཐག་པར་འགྱུར་རོ༔ འདི་ལས་སྟོབས་ཆེ་བའམ༔ འདི་ལས་ཞེ་འཇིགས་མེད་པ་ན༔ ཨ་རྩི༔ འཇིགས་པ༔ ཨ་རྩི་ཚི༔ ཨ་རྩི་ཚི༔ དེ་བས་ན༔ བླ་མ་དམ་པའི་གདམས་ངག་མེད་པ་རྣམས༔ ཚུལ་དེ་ལྟར་འཁོར་བའི་གཡང་ས་ཆེན་པོར་ལྟུང་སྟེ༔ སྡུག་བསྔལ་རྒྱུན་ཆད་མེད་པ༔ བཟོད་པའི་གླགས་མེད་པས་མནར་བར་འགྱུར་བས༔ དེ་བས་ན་ང་ཡི་ཁ་ལ་ཉོན་ཅིག༔ ངའི་གདམས་ངག་འདི་ཡིད་ལ་ཟུངས་ཤིག༔ ད་ནི་ཆགས་སྡང་བཟློག་ནས༔ མངལ་སྒོ་དགག་པའི་གདམས་ངག་གཅིག་བསྟན་ནོ༔ ཉོན་ལ་ཡིད་ལ་ཟུངས་ཤིག༔ དེའང་༔ མངལ་སྒོ་བགགས་ནས་རུ་ལོག་དྲན་པར་བྱ༔ སྙིང་རུས་དག་སྣང་དགོས་པའི་དུས་ཤིག་ཡིན༔ མིག་སེར་སྤངས་ལ་བླ་མ་ཡབ་ཡུམ་སྒོམས༔ ཞེས་གསུངས་པ་ཡིན་པས༔ གོང་ལྟར་ཕོ་རུ་སྐྱེ་ན་མ་ལ་ཆགས་ཤིང་ཕ་ལ་སྡང་ངོ་༔ མོར་སྐྱེ་ན་ཕ་ལ་ཆགས་ཤིང་མ་ལ་སྡང་ནས་མིག་སེར་སྐྱེ་བའི་སྣང་བ་ལང་སྟེ༔ དེའི་དུས་སུ་གདམས་ངག་ཟབ་མོ་ཞིག་ཡོད་དོ༔ ཀྱཻ་རིགས་ཀྱི་བུ༔ དེ་ལྟ་བུའི་ཆགས་སྡང་བྱུང་བའི་དུས་སུ་འདི་ལྟར་སྒོམས་ཤིག༔ ཀྱཻ་མ་བདག་ལྟ་བུའི་སེམས་ཅན་ལས་ངན་པ༔ དེ་སྔ་འཁོར་བར་འཁྱམས་པའང་ཆགས་སྡང་གཉིས་ལ་བརྟེན་ནས་འཁྱམས་པ་ཡིན༔ ད་རུང་འདི་ལྟ་བུའི་ཆགས་སྡང་བྱས་ན་ནི༔ འཁོར་བ་མཐའ་མེད་པར་འཁྱམས་ནས༔ སྡུག་བསྔལ་གྱི་རྒྱ་མཚོར་ཡུན་རིང་དུ་བྱིང་ཉེན་ཡོད་པས༔ ད་ནི་ཆགས་སྡང་ཡེ་ནས་མི་བྱེད་དགོས༔ ཨ་ཙ་མ༔ ད་ནི་ཆགས་སྡང་བྱེད་རེ་ཀན་སྙམ་པའི་འདུན་པ་དྲག་པོ་རྩེ་གཅིག་སེམས་ལ་བཟུང་བས༔ དེ་རང་གིས་མངལ་སྒོ་ཁེགས་པར་རྒྱུད་ནས་གསུངས་འདུག་པས༔ ཀྱཻ་རིགས་ཀྱི་བུ་མ་ཡེངས་ཤིག༔ འདུན་པ་རྩེ་གཅིག་སེམས་ལ་ཟུངས་ཤིག༔ ཡང་དེ་ལྟར་བྱས་ཀྱང་མངལ་སྒོ་མ་ཁེགས་པར་མངལ་དུ་འཇུག་པའི་གྲབས་བྱུང་ན༔ ཡང་བདེན་མེད་སྒྱུ་མ་ལྟ་བུའི་གདམས་ངག་གིས་མངལ་སྒོ་དགག་པར་བྱ་སྟེ༔ དེའང་འདི་ལྟར་བསྒོམ་པར་བྱའོ༔ ཀྱཻ་མ་ཕ་མ་ཡབ་ཡུམ་གཉིས་དང་༔ ཆར་ནག་རླུང་འཚུབས་པ་དང་༔ འུར་ཆེམས་དང་༔ འཇིགས་སྐྲག་གི་སྣང་བ་དང་༔ སྣང་ཞིང་སྲིད་པའི་དངོས་པོ་འདི་རྣམ་པ་ཐམས་ཅད་རང་བཞིན་སྒྱུ་མ་ལྟ་བུ་ཡིན༔ ཇི་ལྟར་ཤར་ཡང་བདེན་པ་མེད༔ དངོས་པོ་ཐམས་ཅད་མི་བདེན་པ་རྫུན་པ་ཡིན༔ སྨིག་རྒྱུ་དང་འདྲ་བ་རྟག་པ་མ་ཡིན༔ ཐེར་ཟུག་མ་ཡིན༔ ཆགས་ནས་ཅི་བྱེད༔ སྔངས་ཤིང་སྐྲག་ནས་ཅི་བྱེད༔ མེད་པ་ཡོད་པར་མཐོང་བ་ཡིན༔ འདི་རྣམས་ཐམས་ཅད་རང་གི་སྣང་བ་ཡིན༔ སེམས་ཉིད་སྒྱུ་མ་ལྟ་བུ་ཡེ་ནས་མེད་པ་ལ༔ ཕྱི་རོལ་ནས་དེ་ལྟ་བུར་འོང་བ་མ་ཡིན༔ བདག་གིས་སྔོན་ཆད་དེ་ལྟར་མ་རྟོགས་པས༔ མེད་པ་ལ་ཡོད་པར་བཟུང་༔ མི་བདེན་པ་ལ་བདེན་དུ་བཟུང་༔ སྒྱུ་མ་ལ་བདེན་དུ་བཟུང་བས༔ ཡུན་འདི་སྙེད་གཅིག་འཁོར་བར་འཁྱམས་པ་ཡིན༔ ད་རུང་ཡང་སྒྱུ་མར་མ་ཤེས་ན༔ འཁོར་བར་ཡུན་རིང་དུ་འཁྱམས་ནས༔ སྡུག་བསྔལ་སྣ་ཚོགས་ཀྱི་འདམ་ལ་ཆུད་པར་ངེས༔ ད་འདི་རྣམས་ཐམས་ཅད༔ རྨི་ལམ་ལྟ་བུ༔ སྒྱུ་མ་ལྟ་བུ༔ བྲག་ཆ་ལྟ་བུ༔ དྲི་ཟའི་གྲོང་ཁྱེར་ལྟ་བུ༔ སྨིག་རྒྱུ་ལྟ་བུ༔ གཟུགས་བརྙན་ལྟ་བུ༔ མིག་ཡོར་ལྟ་བུ༔ ཆུ་ཟླ་ལྟ་བུར༔ བདེན་པར་སྐད་ཅིག་ཙམ་ཡང་གྲུབ་པ་མེད༔ ངེས་པར་མི་བདེན་བརྫུན་པ་ཡིན་སྙམ་པའི་འདུན་པ་རྩེ་གཅིག་ཏུ་བཟུང་བས་བདེན་འཛིན་ཞིག་ནས༔ དེ་ལྟར་དུ་རྒྱུད་ལ་ཁེལ་ནས་བདག་འཛིན་ལྡོག་གོ༔ དེ་ལྟར་ཞེ་ཐག་པ་ནས་བརྫུན་པར་ཤེས་ན༔ ངེས་པར་མངལ་སྒོ་ཁེགས་པར་འགྱུར་རོ༔ ཡང་དེ་ལྟར་བྱས་ཀྱང་བདག་འཛིན་མ་ཞིག་སྟེ༔ མངལ་སྒོ་མ་ཁེགས་པར་མངལ་དུ་འཇུག་པའི་གྲབས་བྱུང་ན༔ ཡང་གདམས་ངག་ཟབ་མོ་ཞིག་ཡོད་དོ༔ ཀྱཻ་རིགས་ཀྱི་བུ༔ ཁྱོད་དེ་ལྟར་བྱས་ཀྱང་མངལ་སྒོ་མ་ཁེགས་ན༔ ད་ནི་ལྔ་པ་འོད་གསལ་དུ་བསྒོམས་ནས་མངལ་སྒོ་དགག་པར་བྱ་སྟེ༔ དེ་ཡང་སྒོམ་ལུགས་འདི་ལྟར་བྱའོ༔ ཀྱཻ་མ༔ དངོས་པོ་ཐམས་ཅད་རང་གི་སེམས་ཡིན་པས༔ སེམས་ཉིད་སྐྱེ་འགག་དང་བྲལ་བའི་སྟོང་པ་ཉིད་ཡིན་ནོ་སྙམ་དུ་བསམས་ལ༔ སེམས་ལ་བཅོས་སླད་མི་བྱ་བར༔ དཔེར་ན་ཆུ་ལ་ཆུ་བཞག་པ་བཞིན་ཏུ་སེམས་ཁོ་རང་གི་ཐོག་ཏུ༔ རང་ལུགས་སུ་ཙན་ནེ༔ རང་བབས་སུ་ལྷོད་དེ༔ ཡེ་རེ༔ ཤིག་གེ༔ མ་བཅོས་པར་ལྷོད་དེ་བཞག་པས༔ སྐྱེ་བ་རྣམ་པ་བཞི་ཀའི་མངལ་སྒོ་ངེས་པར་ཁེགས་པར་ཐག་ཆོད་དོ༔ དེ་ལྟར་ཡང་ནས་ཡང་དུ་མ་ཁེགས་ཀྱི་བར་དུ་སྒོམས་ཤིག༔ དེ་ཡན་ཆད་དུ་མངལ་སྒོ་དགག་པའི་གདམས་ངག་ཟབ་མོ་ཡང་དག་པ་མང་དུ་སོང་བས༔ དེ་རྣམས་ཀྱིས་གང་ཟག་དབང་པོ་རབ་འབྲིང་ཐ་མ་གང་ཡང་མི་གྲོལ་མི་སྲིད་དོ༔ དེ་ཅིའི་ཕྱིར་ཞེ་ན༔ བར་དོའི་རྣམ་ཤེས་དེ་ལ་ཟག་བཅས་ཀྱི་མངོན་ཤེས་ཡོད་པས༔ བདག་གིས་ཅི་སྨྲོས་ཁོས་ཐོས་ནས་འོང་བ་དང་གཅིག༔ འོན་ལོང་ཡིན་ཀྱང་དེའི་དུས་སུ་དབང་པོ་ཚང་བས་ཅི་སྨྲས་གོ་བ་དང་གཉིས༔ འཇིགས་སྐྲག་གིས་རྟག་ཏུ་བདས་པས་ཅི་དྲག་ན་སྙམ་པའི་དྲན་པ་ཡེངས་མེད་དུ་ཡོད་པས༔ བདག་གིས་ཅི་སྨྲས་ཉན་ནས་འོང་བ་དང་གསུམ༔ རྣམ་ཤེས་རྟེན་མེད་པས༔ འདུན་པ་གར་གཏད་དུ་ཐལ་གྱིས་སླེབ་སྟེ༔ ཁ་ལོ་བསྒྱུར་སླ་བ་དང་བཞི༔ དྲན་པ་དགུ་འགྱུར་གྱིས་གསལ་བས་ལྐུགས་པ་ཡིན་ཀྱང་༔ དེའི་དུས་སུ་ལས་ཀྱི་དབང་གིས་རིག་པ་ཇེ་གསལ་དུ་སོང་ནས༔ ཅི་བསླབ་ཐམས་ཅད་སྒོམ་ཤེས་པའི་ཡོན་ཏན་དང་༔ གནད་དེ་ལྟ་བུ་ཡོད་པའི་ཕྱིར་རོ༔ དེས་ན་གཤིན་པོའི་ཆོ་ག་བྱས་པས་ཕན་ཡོན་ཡོད་པའི་རྒྱུ་མཚན་ཡང་དེ་ལྟར་ཡིན་ནོ༔ དེ་བས་ན་ཞག་བཞི་བཅུ་ཞེ་དགུའི་བར་དུ་བར་དོ་ཐོས་གྲོལ་ཆེན་པོ་འདི་བཀླག་པ་ལ་ནན་ཏན་བྱ་བ་གལ་ཤིན་ཏུ་ཆེའོ༔ ངོ་སྤྲོད་གཅིག་ལ་མ་གྲོལ་ནའང་གཅིག་ལ་གྲོལ་བ་ཐོབ་པ་ཡིན་ནོ༔ ངོ་སྤྲོད་ལ་མི་གཅིག་པ་མང་དུ་དགོས་པའི་དོན་ཡང་དེ་ལྟར་ཡིན་ནོ༔ དེ་ནས་ཡང་དགེ་བའི་ལུས་ལ་གོམས་འདྲིས་ཆུང་བ་དང་༔ མི་དགེ་བའི་ལུས་ལ་ཡེ་ཐོག་མའི་དུས་ནས་གོམས་འདྲིས་ཆེ་དྲགས་པ་དང་༔ སྡིག་སྒྲིབ་སྟོབས་དང་དཔུང་ཆེ་བའི་དབང་གིས༔ གོང་གི་ངོ་སྤྲོད་དང་དམིགས་པ་དེ་ཙམ་ཞིག་ཕོག་ཀྱང་༔ མི་གྲོལ་བའི་རིགས་མང་པོ་ཡོད་པས༔ ད་ནི་གོང་དུ་མངལ་སྒོ་མ་ཁེགས་ན༔ དེ་ཡང་འདི་ནས་མར་ལ་མངལ་སྒོ་བདམས་པའི་གདམས་ངག་ཟབ་མོ་གཅིག་ཀྱང་བསྟན་པར་བྱ་སྟེ༔ ཡང་སངས་རྒྱས་དང་བྱང་ཆུབ་སེམས་དཔའ་རྣམས་ལ་ར་མདའ་སྦྲན་པའི་སྐྱབས་འགྲོ་བྱས་ཏེ༔ ཡང་ཚེ་འདས་ཀྱི་མིང་ནས་ལན་གསུམ་བོས་ལ༔ འདི་སྐད་བརྗོད་དོ༔ ཀྱཻ་རིགས་ཀྱི་བུ༔ ཚེ་ལས་འདས་པ་ཆེ་གེ་མོ་ཁྱོད་ཉོན་ཅིག༔ ཁྱོད་ལ་གོང་དུ་གདམས་པའི་ངོ་སྤྲོད་དེ་ཙམ་ཅིག་བཏབ་ཀྱང་༔ ཁྱོད་ཀྱིས་མ་གོ་བར་འདུག་གིས༔ ད་ནི་མངལ་སྒོ་མ་ཁེགས་ན༔ ལུས་བླང་རན་པའི་དུས་ལ་བབས་པས༔ ཁྱོད་རང་མངལ་སྒོ་བདམས་པའི་གདམས་ངག་ཟབ་མོ་ཡང་དག་པ༔ རིགས་མི་གཅིག་པ་མང་དུ་ཡོད་པས༔ དྲན་པས་ཟུངས་ཤིག༔ མ་ཡེངས་ཤིག༔ འདུན་པ་དྲག་པོས་ལེགས་པར་ཉོན་ལ་ཡིད་ལ་ཟུངས་ཤིག༔ ཀྱཻ་རིགས་ཀྱི་བུ༔ ད་ནི་གླིང་གང་དུ་སྐྱེ་བའང་༔ རྟགས་དང་མཚན་མ་འོང་བས་ངོ་ཤེས་པར་བྱ་སྟེ༔ དེའང་གང་དུ་སྐྱེ་བ་བརྟགས་ལ༔ གླིང་ཡང་བདམས་པར་བྱའོ༔ ཤར་ལུས་འཕགས་པོར་སྐྱེ་ན་ནི༔ ངང་པ་ཕོ་མོས་བརྒྱན་པའི་མཚོ་འདུག་པ་མཐོང་ངོ་༔ དེར་ཡང་མ་འགྲོ་བར༔ རུ་ལོག་དྲན་པར་གྱིས་ཤིག༔ དེར་སྐྱེས་ན་ནི༔ བདེ་སྐྱིད་འཛོམ་ཡང་༔ ཆོས་མི་དར་བའི་གླིང་ཡིན་པས༔ དེར་ཡང་མ་འཇུག་ཅིག༔ ལྷོ་འཛམ་བུ་གླིང་དུ་སྐྱེ་ན་ནི༔ ཁང་བཟང་ཉམས་དགའ་བར་མཐོང་ནས་འོང་ངོ་༔ གལ་ཏེ་འཇུག་ན་དེར་འཇུག་པར་གྱིས་ཤིག༔ ནུབ་བ་ལང་སྤྱོད་ན་སྐྱེ་ན༔ རྟ་ཕོ་མོས་བརྒྱན་པའི་མཚོ་འདུག་པ་མཐོང་ངོ་༔ དེར་ཡང་མ་འགྲོ་བར་ཚུར་ལ་ལོག་ཅིག༔ ལོངས་སྤྱོད་ཡོད་ཀྱང་ཆོས་མི་དར་བའི་གླིང་ཡིན་པས༔ མ་འཇུག་ཅིག༔ བྱང་སྒྲ་མི་སྙན་དུ་སྐྱེ་ན༔ བ་གླང་གི་བརྒྱན་པའི་མཚོའམ༔ ལྗོན་ཤིང་གིས་བརྒྱན་པའི་མཚོ་འདུག་པ་མཐོང་ངོ་༔ དེ་དག་ཏུ་སྐྱེ་བ་ལེན་ལྟས་སུ་ངོ་ཤེས་པར་གྱིས་ཤིག༔ དེར་ཡང་མ་འཇུག་ཅིག༔ ཚེ་ཚད་དང་བསོད་ནམས་ཡོད་ཀྱང་༔ དེར་ཡང་ཆོས་མི་དར་བས་མ་འཇུག་ཅིག༔ ལྷར་སྐྱེས་ན་ནི༔ རིན་པོ་ཆེ་སྣ་ཚོགས་ལས་གྲུབ་པའི་ལྷ་ཁང་བརྩེགས་མ་ཉམས་དགའ་བ་མཐོང་ངོ་༔ དེར་ཞུགས་ཀྱང་རུང་གིས་ཞུགས་པར་གྱིས་ཤིག༔ ལྷ་མ་ཡིན་དུ་སྐྱེ་ན་ནི༔ ནགས་ཚལ་ཉམས་དགའ་བར་མཐོང་ངམ༔ མགལ་མེའི་འཁོར་ལོ་བསྐོར་བ་ལྟར་དུ་མཐོང་ངོ་༔ དེར་ཅི་ནས་ཀྱང་མ་འཇུག་པར་རུ་ལོག་དྲན་པར་གྱིས་ཤིག༔ དུད་འགྲོར་སྐྱེ་ན་ནི༔ བྲག་ཕུག་དང་༔ གྲོག་ཕུག་དང་༔ སྤྱིལ་པོ་དང་༔ ན་བུན་གྱི་ཚུལ་དུ་མཐོང་ངོ་༔ དེར་ཡང་མ་འཇུག་ཅིག༔ ཡི་དྭགས་སུ་སྐྱེ་ན་ནི༔ སྡོང་དུམ་དང་༔ ནག་བྲིང་ངེ་བའམ༔ གྲོག་པོ་ཕུག་རྡུག་གམ་ནག་ལིང་ངེ་བར་མཐོང་ངོ་༔ དེར་ཕྱིན་ན་ཡི་དྭགས་སུ་སྐྱེ་ནས༔ བཀྲེས་སྐོམ་གྱི་སྡུག་བསྔལ་སྣ་ཚོགས་ཉམས་སུ་མྱོང་བར་འགྱུར་བས༔ དེར་ཅི་ནས་ཀྱང་མ་འགྲོ་བར་རུ་ལོག་དྲན་པར་གྱིས་ཤིག༔ སྙིང་རུས་དག་སྣང་དྲག་པོ་གྱིས་ཤིག༔ དམྱལ་བར་སྐྱེས་ན་ནི༔ ལས་ངན་པས་གླུ་དབྱངས་ཐོས་པའམ༔ དབང་མེད་དུ་འཇུག་དགོས་པའམ༔ མུན་ནག་གི་གླིང་དང་ཁང་པ་ནག་པོ་དང་༔ ཁང་པ་དམར་པོ་དང་༔ ས་དོང་ནག་པོ་དང་༔ ལམ་ནག་པོ་ལ་སོགས་པ་ཕྱིན་པའི་སྣང་བ་འོང་ངོ་༔ དེར་ཕྱིན་ན་ནི་དམྱལ་བར་ཚུད་དེ༔ ཚ་གྲང་གི་སྡུག་བསྔལ་བཟོད་པའི་གླགས་མེད་པར་མྱོང་ནས་ཐོན་པའི་དུས་མི་འོང་བས༔ དེའི་གསེབ་ཏུ་མི་འགྲོ་བར༔ གཟབ་པར་བྱའོ༔ ཅི་ནས་ཀྱང་མ་ཆུད་པར་བྱའོ༔ མངལ་སྒོ་བགགས་ནས་རུ་ལོག་དྲན་པར་བྱའོ༔ ཞེས་གསུངས་པ་དེ་དུས་ད་རེས་དགོས་པ་ཡིན་ནོ༔ ཀྱཻ་རིགས་ཀྱི་བུ༔ ཁྱོད་རང་མི་འགྲོ་བར་འདོད་ཀྱང་༔ རང་ལ་དབང་མེད་པར་རྒྱབ་ནས་ལས་ཀྱི་གཤེད་མས་དེད་ནས༔ མི་འགྲོ་བའི་དབང་མེད་པར་འགྲོ་དགོས་པ་དང་༔ མདུན་ནས་གཤེད་མ་དང་༔ སྲོག་གཅོད་ཀྱིས་ཁྲིད་པ་དང་༔ མུན་ནག་དང་༔ རླུང་དམར་འཚུབས་མ་ཆེན་པོ་དང་༔ ཀུ་སྒྲ་དང་༔ ཁ་ཆར་དང་༔ སེར་བ་དྲག་པོ་དང་༔ བུ་ཡུག་འཚུབས་ནས་བྲོས་པའི་སྣང་བ་ཁྱོད་ལ་འོང་ངོ་༔ ད་ཁྱོད་བྲེད་ཅིང་སྐྱབས་ཚོལ་བ་ལ་ཕྱིན་པས༔ གོང་དུ་བཤད་པའི་ཁང་བཟང་ངམ༔ བྲག་སྐྱིབས་དང་༔ ས་ཕུག་དང་༔ ནག་གསེབ་དང་༔ མེ་ཏོག་པདྨ་ལ་སོགས་ཁ་ཟླུམ་པོའི་ནང་དུ་ཐར་པ་དང་༔ དེ་ན་གབ་སྟེ༔ ཕྱིར་འདོན་གྱིས་དོགས་ནས༔ ད་འདི་ནས་ཕྱིར་འདོན་ན་མི་རུང་ངམ་སྙམ་ནས༔ དེ་དང་བྲལ་གྱིས་དོགས་ནས༔ གནས་དེ་ལ་ཤིན་ཏུ་ཆགས་པར་འགྱུར་རོ༔ ཕྱི་རོལ་དུ་འདོན་ན་ནི༔ བར་དོའི་འཇིགས་སྐྲག་དེ་རྣམས་དང་འཕྲད་ཀྱིས་དོགས་ནས༔ དེ་དག་ལ་འཇིགས་ཤིང་སྔངས་པས་ནང་དུ་གབ་པས༔ གོང་ན་མེད་པའི་ལུས་ངན་གཅིག་བླངས་ནས༔ སྡུག་བསྔལ་སྣ་ཚོགས་ཉམས་སུ་མྱོང་བས༔ དེ་ནི་ཁྱོད་ལ་འདྲེ་སྲིན་གྱིས་བར་དུ་གཅོད་པའི་རྟགས་ཡིན་པས༔ དེའི་ཚེ༔ གདམས་ངག་གནད་ཟབ་མོ་གཅིག་ཡོད་པས་ཁྱོད་རང་ཉོན་ལ་ཡིད་ལ་ཟུངས་ཤིག༔ དེའི་དུས་སུ་གཤེད་མའི་དབང་མེད་དུ་དེད་པ་དང་༔ འཇིགས་སྐྲག་ནམ་བྱུང་བའི་དུས་སུ༔ སྐད་ཅིག་དྲན་རྫོགས་སུ༔ བཅོམ་ལྡན་འདས་ཆེ་མཆོག་ཧེ་རུ་ཀའམ༔ རྟ་མགྲིན་ནམ༔ ཕྱག་ན་རྡོ་རྗེ་ལ་སོགས་པའམ༔ ཁྱོད་རང་གི་ཡི་དམ་ཡོད་ན༔ དེ་ཉིད་སྐུ་ཆེ་ལ་ཡན་ལག་རགས་པ༔ བགེགས་རིགས་ཐམས་ཅད་ཐལ་བར་བརླག་པའི་ཁྲོ་བོ་འཇིགས་སུ་རུང་བ་གཅིག་ཏུ་དཀྲོང་གི་བསྐྱེད་ཅིག༔ དེའི་བྱིན་རླབས་དང་ཐུགས་རྗེས་གཤེད་མ་དང་བྲལ་ཏེ༔ མངལ་སྒོ་འདམ་པའི་དབང་ཐོབ་པ་ཡིན་པས་དེ་ནི་གདམས་ངག་གནད་ཟབ་མོ་ཡང་དག་པ་ཡིན་གྱིས་ཡིད་ལ་ཟུངས་ཤིག༔ ཀྱཻ་རིགས་ཀྱི་བུ༔ གཞན་ཡང་བསམ་གཏན་གྱི་ལྷ་ལ་སོགས་པ་རྣམས་ནི༔ ཏིང་ངེ་འཛིན་གྱི་དབང་གིས་སྐྱེ་བ་ལེན་ནོ༔ ཡི་དྭགས་ལ་སོགས་པ་གདོན་གྱི་རིགས་ཚན་ཆེ་བ་གཅིག་ནི༔ བར་དོ་ཉིད་དུ་འདུ་ཤེས་འགྱུར་ནས༔ ཡི་དྭགས་དང་༔ འདྲེ་སྲིན་གྱི་ལུས་རྫུ་འཕྲུལ་སྣ་ཚོགས་སུ་སྟོན་པ༔ ཡིད་ལུས་དེ་ཀར་འགྱུར་ནས་འོང་བ་ཡིན་ནོ༔ བྱིང་དེར་གནས་པའི་ཡི་དྭགས་དང་༔ མཁའ་ལ་རྒྱུ་བའི་ཡི་དྭགས་དང་༔ བགེགས་རིག་སྟོང་ཕྲག་བརྒྱད་ཅུ་ལ་སོགས་པ་ཐམས་ཅད༔ ཡིད་ལུས་དེ་ཉིད་དུ་འདུ་ཤེས་འགྱུར་ནས་འགྲོའོ༔ དེའི་དུས་སུ༔ སྟོང་ཉིད་ཕྱག་རྒྱ་ཆེན་པོའི་དོན་དྲན་ན་ནི་མཆོག་ཏུ་འགྱུར་ཏེ༔ དེ་ལྟར་མ་བྱུང་ན༔ སྒྱུ་མ་ལྟ་བུའི་རྩལ་སྦྱོང་གྱིས་ཤིག༔ དེ་ལྟར་ཡང་མ་བྱུང་ན༔ གང་ལ་ཡང་ཆགས་སེམས་མ་བྱེད་པར༔ ཡི་དམ་ཐུགས་རྗེ་ཆེན་པོ་བསྒོམས་པས༔ བར་དོ་ནས་ལོངས་སྐུར་འཚང་རྒྱ་བར་འགྱུར་རོ༔ ཀྱཻ་རིགས་ཀྱི་བུ༔ དེ་ལྟར་གལ་ཏེ་ལས་ཀྱི་དབང་གིས༔ མངལ་དུ་འཇུག་དགོས་པ་བྱུང་ན༔ ད་ནི་མངལ་སྒོ་འདམ་་པའི་གདམས་ངག་བསྟན་པར་བྱའོ༔ ཉོན་ཅིག༔ དེའང་མངལ་སྒོ་གང་བྱུང་དུ་མ་འགྲོ་ཤིག༔ གཤེད་མ་བྱུང་ནས་མི་འགྲོ་བའི་དབང་མ་བྱུང་ན༔ རྟ་མགྲིན་སྒོམས་ཤིག༔ དེའང་ད་ལྟར་ཁྱོད་ལ་མངོན་ཤེས་ཕྲ་མོ་ཡོད་པས༔ གནས་ཐམས་ཅད་རིམ་པ་ལྟར་ཤེས་ནས་འོང་བས༔ གདམ་པར་གྱིས་ཤིག༔ དེ་ཡང་དག་པ་སངས་རྒྱས་ཀྱི་ཞིང་དུ་འཕོ་བ་དང་༔ མ་དག་འཁོར་བའི་མངལ་སྒོ་འདམ་པའི་གདམས་ངག་གཉིས་ཡོད་པས༔ འདི་ལྟར་གྱིས་ཤིག༔ དང་པོ་རབ་དག་པ་མཁའ་སྤྱོད་ཀྱི་གནས་སུ་འཕོ་བ་ནི༔ དེའང་འཕེན་པ་འདི་ལྟ་བུ་ཅིག་བཏང་སྟེ༔ ཀྱཻ་མ༔ བདག་བསྐལ་པ་གྲངས་མེད་ཚད་མེད་ཐོག་མ་མེད་པའི་དུས་རིང་པོ༔ དེ་ཙམ་ཞིག་ནས༔ ད་རུང་ཡང་འཁོར་བའི་འདམས་འདིར་ལུས་པ་ནི་སྐྱོ་བ་ལས༔ སྔོན་གྱི་དེ་སྙེད་ཅིག་སངས་རྒྱས་པའི་རིང་ལ༔ བདག་མ་གྲོལ་བ་འདི་ཨ་ཙ་མ༔ ད་ནི་འཁོར་བ་འདི་ལ་སྐྱུག་རེ་ལོག༔ ཞེ་རེ་འཇིགས༔ གཉུག་རེ་བུད༔ ད་ནི་བྲོས་པའི་གྲབས་བྱེད་རན་ནས་འདུག་པས༔ བདག་རང་ནུབ་ཕྱོགས་བདེ་བ་ཅན་གྱི་ཞིང་ཁམས་སུ༔ སངས་རྒྱས་སྣང་བ་མཐའ་ཡས་ཀྱི་ཞབས་དྲུང་དུ༔ མེ་ཏོག་པདྨའི་ཁ་ལ་བརྫུས་ཏེ་སྐྱེ་བ་ཞིག་བྱེད་དགོས་སྙམ་པས༔ ནུབ་བདེ་བ་ཅན་གྱི་ཞིང་ཁམས་སུ་འདུན་པ་དྲག་པོ་གཏོད་ལ༔ དེ་ལ་བརྩོན་འགྲུས་བྱེད་པ་གཅེས༔ གཞན་ཡང་རང་གང་མོས་པའི་ཞིང་ཁམས་མངོན་པར་དགའ་བའམ༔ སྟུག་པོ་བཀོད་པའམ༔ ལྕང་ལོ་ཅན་ནམ༔ པོ་ཏ་ལའམ༔ པདྨ་འོད་ཀྱི་གཞལ་ཡས་སུ༔ ཨོ་རྒྱན་གྱི་དྲུང་ངམ༔ གང་ལ་མོས་པའི་ཞིང་དུ་འདུན་པ་དྲག་ཏུ་གཏད་དེ༔ རྩེ་གཅིག་ཏུ་མ་ཡེངས་པར་བྱས་པས༔ དེ་མ་ཐག་ཏུ་ཞིང་ཁམས་དེར་སྐྱེ་བར་འགྱུར་ཏེ༔ གཞན་ཡང་དགའ་ལྡན་དུ་བྱམས་པ་མགོན་པོའི་དྲུང་དུ་འགྲོ་བར་འདོད་ནའང་༔ བདག་བར་དོའི་སྐབས་འདིར༔ དགའ་ལྡན་ན༔ མི་ཕམ་ཆོས་ཀྱི་རྒྱལ་པོའི་དྲུང་དུ་འགྲོ་བའི་དུས་ལ་བབ་པས༔ འགྲོ་བའི་འདུན་པ་གཏད་ན༔ བྱམས་པའི་དྲུང་དུ་པདྨའི་སྙིང་པོར་བརྫུས་ཏེ་སྐྱེའོ༔ གཞན་ཡང་དེ་ལྟར་མ་བཏུབ་ཅིང་༔ མངལ་དུ་འཇུག་པར་སྤྲོ་བའམ༔ འཇུག་དགོས་པར་བྱུང་ན་མ་དག་འཁོར་བའི་མངལ་སྒོ་འདམ་པའི་གདམས་ངག་ཡོད་པས་ཉོན་ཅིག༔ དེའང་གོང་ལྟར་གླིང་ཡང་འདམ་པར་བྱ་སྟེ༔ མངོན་ཤེས་ཀྱིས་བལྟས་པས༔ ཆོས་དར་བའི་སར་འཇུག་པར་བྱའོ༔ དེའང་མི་གཙང་བའི་རྫས་ལྗན་ལྗིན་གཅིག་ལ་བརྫུས་ཏེ་སྐྱེ་བ་ཡིན་ན༔ མི་གཙང་བའི་གོང་བུ་དེ་ལ་དྲི་ཞིམ་པོའི་འདུ་ཤེས་སྐྱེ་ནས༔ དེར་ཆགས་ཏེ༔ སྐྱེ་བར་འགྱུར་བས༔ དེ་རྣམས་གང་དང་གང་གི་སྣང་བ་ཤར་བ་དེ་དང་དེར་འཛིན་པར་མི་བྱེད་པར༔ ཆགས་སྡང་གིས་མཚན་མ་མེད་པར་བྱས་ལ༔ མངལ་སྒོ་བཟང་པོ་འདམ་པར་བྱའོ༔ དེའང་འདུན་པ་གཏད་པ་གལ་ཆེ་བས༔ འདི་ལྟར་བྱའོ༔ ཀྱཻ་མ་བདག་ནི་སེམས་ཅན་ཐམས་ཅད་ཀྱི་དོན་དུ༔ འཁོར་ལོས་སྒྱུར་བའི་རྒྱལ་པོའམ༔ བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའམ༔ གྲུབ་པ་ཐོབ་པ་སྐྱེས་བུའི་སྲས་སམ༔ ཆོས་རྒྱུད་དྲི་མ་མེད་པའི་རིགས་སམ༔ ཕ་མ་དད་པ་ཅན་གྱི་རིགས་སུ་སྐྱེས་ནས༔ འགྲོ་བ་སེམས་ཅན་ཐམས་ཅད་ཀྱི་དོན་བྱེད་ནུས་པའི་བསོད་ནམས་ཅན་གྱི་ལུས་ཅིག་བླང་བར་བྱའོ་སྙམས་པའི་འདུན་པ་གཏོད་ལ༔ མངལ་དུ་འཇུག་པར་བྱའོ༔ དེའི་ཚེ་འཇུག་པའི་མངལ་དེ་ཡང་ལྷའི་གཞལ་ཡས་ཁང་དུ་བྱིན་གྱིས་བརླབ་ལ༔ ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དང་༔ ཡི་དམ་གྱི་ལྷ་རྣམས་དང་༔ ཁྱད་པར་དུ་ཇོ་བོ་ཐུགས་རྗེ་ཆེན་པོ་ལ་གསོལ་བ་ཐོབ་ལ༔ དབང་བསྐུར་ཞུ་བའི་མོས་པ་བྱས་ལ༔ མངལ་དུ་འཇུག་པར་བྱའོ༔ དེ་ལྟར་མངལ་སྒོ་འདམ་པ་འདིའང་༔ ནོར་བའི་ཉེན་ཡོད་པས༔ ལས་ཀྱི་དབང་གིས་མངལ་སྒོ་བཟང་པོ་ལ་ངན་པ་མཐོང་བ་དང་༔ ངན་པ་ལ་བཟང་པོར་མཐོང་ནས་ནོར་བའི་ཉེན་ཡོད་པས༔ དེའི་དུས་སུ་འདམ་པའི་གནད་གལ་ཆེ་བས་ཡང་འདི་ལྟར་དུ་བྱའོ༔ དེ་ལྟར་མངལ་སྒོ་བཟང་པོའི་སྣང་བ་བྱུང་ནའང་དེ་ལ་མ་ཆགས༔ ངན་པའི་སྣང་བ་བྱུང་ཡང་དེ་ལ་མི་སྡང་བར༔ བཟང་ངན་བླང་དོར་མེད་པར་ཆགས་སྡང་དང་བྲལ་བའི་བཏང་སྙོམས་ཆེན་པོའི་ངང་ནས་འཇུག་པ་ནི༔ གནད་ཟབ་མོ་ཡང་དག་པ་ཡིན་གྱིས༔ དེ་ལའང་ཉམས་མྱོང་ཡོད་པའི་མི་འགའ་ཞིག་མ་གཏོགས་པ༔ བག་ཆགས་ངན་པའི་ནད་རོ་བྲལ་དཀའ་བས༔ དེ་ལྟར་ཆགས་སྡང་དང་བྲལ་མ་ཐུབ་ནའང་དབང་པོ་ཐ་མའི་ཡང་མཐའ་སྡིག་ཅན་དུད་འགྲོ་ལྟ་བུ་རྣམས་ལ༔ སྐྱབས་སུ་འགྲོ་བས་བཟློག་པ་ནི༔ ཡང་ཚེ་འདས་ཀྱི་མིང་ནས་བོས་ལ་འདི་སྐད་དོ༔ ཀྱཻ་རིགས་ཀྱི་བུ༔ ཁྱོད་ཀྱིས་མངལ་སྒོ་འདམ་མ་ཤེས་ཤིང་༔ ཆགས་སྡང་དང་བྲལ་མ་ཐུབ་ན༔ གོང་གི་སྣང་བ་དེ་རྣམས་གང་ཤར་ཡང་༔ དཀོན་མཆོག་གསུམ་གྱི་མཚན་ནས་བརྗོད་ཅིང་སྐྱབས་སུ་འགྲོ་བར་གྱིས་ཤིག༔ ཐུགས་རྗེ་ཆེན་པོ་ལ་གསོལ་བ་ཐོབ་ཅིག༔ མགོ་གྱེན་ལ་བསྟན་ནས་འགྲོ་བར་གྱིས་ཤིག༔ བར་དོ་ངོ་ཤེས་པར་གྱིས་ཤིག༔ ཤུལ་གྱི་ཉེ་བ་དང་༔ བུ་དང་བུ་མོ་ཉེ་འབྲེལ་རྣམས་ལ་ཆགས་ཞེན་སྤོངས་ཤིག༔ འདི་རྣམས་ཀྱིས་ཁྱོད་ལ་མི་ཕན་ནོ༔ ད་མིའི་འོད་སྔོན་པོ་དང་༔ ལྷའི་འོད་དཀར་པོ་ལ་ཞུགས་ཤིག༔ རིན་པོ་ཆེའི་ཁང་བཟང་དང་༔ སྐྱེད་མོས་ཚལ་དུ་ཞུགས་ཤིག༔ ཅེས་ལན་བདུན་ཙམ་གྱི་བར་བཤད་དོ༔ དེ་ནས་སངས་རྒྱས་དང་བྱང་ཆུབ་སེམས་དཔའ་རྣམས་ལ་གསོལ་བ་གདབ་པར་བྱའོ༔ བར་དོའི་སྨོན་ལམ་འཇིགས་སྐྱོབས་མ་དང་༔ བར་དོ་རྩ་ཚིག་དང་༔ བར་དོ་འཕྲང་སྒྲོལ་རྣམས་ཀྱང་ལན་བདུན་གྱི་བར་དུ་བཀླག་པར་བྱའོ༔ དེ་ནས་བཏགས་གྲོལ་ཕུང་པོ་རང་གྲོལ་ཡང་སྒྲ་དག་ལ་གསལ་བར་བཀླག་པར་བྱའོ༔ ཆོས་སྤྱོད་བག་ཆགས་རང་གྲོལ་ཡང་བཀླག་པར་བྱའོ༔ དེ་ལྟར་དུ་ཚུལ་བཞིན་དུ་བྱས་པས་རྣལ་འབྱོར་པ་རྟོགས་པ་མཐོ་བ་རྣམས་ནི༔ འཆི་ཁར་འཕོ་བ་ཐེབས་ནས༔ བར་དོ་འགྲིམས་མི་དགོས་པར་ཡར་གྱི་ཟང་ཐལ་ཆེན་པོར་གྲོལ་བར་འགྱུར་རོ༔ དེའི་འོག་མ་ཉམས་ལེན་ཡོད་པའི་གང་ཟག་འགའ་ཞིག་ནི༔ འཆི་ཁ་བར་དོའི་འོག་ཏུ་ཆོས་ཉིད་འོད་གསལ་ངོས་ཟིན་ཏེ༔ ཡར་གྱི་ཟངས་ཐལ་དུ་འགྱུར་རོ༔ དེའི་འོག་མ་རྣམས་ཆོས་ཉིད་བར་དོ་ལ་ཞག་བདུན་ཕྲག་གི་རིམ་པ་བཞིན་དུ༔ ཞི་ཁྲོའི་སྣང་བ་འཆར་བའི་ཚེ༔ ལས་འཕྲོ་དང་དབང་པོའི་བྱེ་བྲག་གིས་གཅིག་ལ་མ་གྲོལ་ནའང་༔ གཅིག་ལ་གྲོལ་ཏེ༔ འཕྲང་རིམ་པ་མང་བས་གང་རུང་གཅིག་ལ་ངོས་ཟིན་ནས་གྲོལ་བར་འགྱུར་རོ༔ དེར་ཡང་ལས་འཕྲོ་ཞན་པ་དང་༔ སྡིག་སྒྲིབ་དང་ལས་ངན་ཤེས་ཆེ་བ་རྣམས་ནི༔ ཡང་མར་ལ་སྲིད་པ་བར་དོར་འཁྱམས་དགོས་ཏེ༔ དེའང་ངོ་སྤྲོད་རིག་མི་གཅིག་པ༔ སྐས་ཀྱི་རིམ་པ་བཞིན་དུ་ཡོད་པས༔ གཅིག་ལ་ངོ་མ་འཕྲོད་ནའང་༔ གཅིག་ལ་འཕྲོད་ཏེ་གྲོལ་བར་འགྱུར་རོ༔ དེ་ཡང་གོང་མ་རྣམས་ལ༔ ལས་འཕྲོ་ཤིན་ཏུ་ཞན་པ་རྣམས༔ ངོ་མ་འཕྲོད་པར་འཇིགས་སྐྲག་གི་དབང་དུ་སོང་ནའང་༔ མངལ་སྒོ་དགགས་པ་དང་༔ མངལ་སྒོ་བདམསཔའི་རིམ་པ་ལ༔ རིགས་མི་གཅིག་པ་རིམ་པ་བཞིན་ཏུ་ཡོད་པས༔ གཅིག་ལ་ངོས་མ་ཟིན་ནའང་༔ གཅིག་ལ་ངོ་འཕྲོད་དེ༔ དམིགས་པ་ཟིན་ནས་གནས་མཐོ་བའི་ཡོན་ཏན་དཔག་ཏུ་མེད་པ་ཡོད་དོ༔ ཐ་མའི་ཡང་མཐའ་དུད་འགྲོ་ལྟ་བུའི་རིགས་ཡིན་ཀྱང་སྐྱབས་འགྲོ་བྱས་པའི་ཡོན་ཏན་གྱིས༔ ངན་སོང་ནས་རུ་ལྡོག་སྟེ༔ མི་ལུས་རིན་པོ་ཆེ་དལ་འབྱོར་ཕུན་སུམ་ཚོགས་པའི་ལུས་སུ་གྱུར་ནས༔ སྐྱེ་བ་ཕྱི་མ་ལ་བླ་མ་དགེ་བའི་བཤེས་གཉེན་དང་འཕྲད་དེ༔ གདམས་པ་ཐོབ་ནས་གྲོལ་བར་འགྱུར་རོ༔ སྲིད་པ་བར་དོར་ཆོས་འདིས་སླེབ་ན༔ བཟང་པོ་ལས་ཀྱི་འཕྲོ་མཐུད་པ༔ ཡུར་བ་རྐང་ཆད་པ་ལ་ཝ་འཛུག་པ་ལྟ་བུའི་གདམས་ངག་ཡིན་པས༔ སྡིག་པོ་ཆེ་ཐམས་ཅད་ཀྱང་ཆོས་འདི་ཐོབ་ན་མི་གྲོལ་མི་སྲིད་དོ༔ དེ་ཅིའི་ཕྱིར་ཞེ་ན༔ བར་དོའི་སྐབས་སུ༔ རྒྱལ་བ་ཞི་ཁྲོའི་ལྷ་ཚོགས་ཐམས་ཅད་ཀྱི༔ ཐུགས་རྗེའི་བསུ་མ་ཡོད་པ་དང་༔ བདུད་དང་བར་ཆད་ཀྱི་བསུ་མ་གཉིས་ཀ་འཛོམ་ནས་ཡོད་ཏེ༔ དེའི་ཚེ་ཆོས་འདི་ཐོས་པ་ཙམ་གྱིས་སྣང་བ་བསྒྱུར་ནས་གྲོལ་བ་ཐོབ་པ་ཡིན་ཏེ༔ དེ་ཡང་ཤ་ཁྲག་གི་རྟེན་མེད་པར་ཡིད་ཀྱི་ལུས་ཡིན་པས་སླ་བ་ཡིན་ནོ༔ བར་དོ་ཐག་རིང་གར་འཁྱམས་ནས་ཡོད་ཀྱང་ལས་ཀྱི་མངོན་ཤེས་ཕྲ་མོས་མཐོང་བ་དང་༔ མཐོང་ནས་འོང་སྟེ༔ དྲན་པས་ཟིན་ནས༔ སྐད་ཅིག་ལ་བློ་བསྒྱུར་དུ་བཏུབ་པས༔ ཤིན་ཏུ་ཕན་ཡོན་ཆེའོ༔ དཔེར་ན་སྒྱོགས་ཀྱི་འཁྲུལ་འཁོར་ལྟ་བུའམ༔ སྡོང་པོ་ཆེན་པོ་མི་བརྒྱས་མི་ཐེག་པ༔ ཆུ་ནང་དུ་བཅུག་པས༔ ཡུད་ཙམ་གཅིག་ལ་གར་འདོད་པའི་ས་ལ་འདྲེན་པ་དང་འདྲའོ༔ རྟ་ཁ་སྲབ་ཀྱིས་བསྒྱུར་བ་དང་འདྲའོ༔ དེའི་ཕྱིར་ཚེ་ལས་འདས་པ་ཐམས་ཅད་ཀྱི་རྩར་ཕྱིན་ནས༔ རོ་ཡོད་ན་གྲོགས་ཀྱིས་རོའི་སྣ་བུག་ནས་ཁྲག་གམ་ཆུ་སེར་མ་ཐོན་ཀྱི་བར་དུ་བསྐྱར་ཞིང་༔ གསལ་གདབ་པར་བྱའོ༔ དེའི་བར་དུ་རོ་མི་སྒུལ་བར་བཞག་གོ༔ འདིའི་དམ་ཚིག་ལ༔ གཤིན་པོ་ལ་བསྔོ་ནས་སེམས་ཅན་གྱི་སྲོག་མི་གཅོད༔ རོའི་རྩར་རང་གཞན་སུ་ཡང་རུང་སྟེ༔ གཉེན་བཤེས་ཀུན་གྱི་ཀུ་སྒྲ་སྤང་༔ ཀུ་ཅོ་དང་མྱ་ངན་སྤང་༔ སྨྲེ་སྔགས་མི་འདོན༔ དགེ་བའི་ལས་འགྲུབ་ཚད་བྱའོ༔ གཞན་ཡང་བར་དོ་ཐོས་གྲོལ་ཆེན་མོའི་ཆོས་འདི༔ ཆོས་ཀྱི་རིགས་གང་གསུངས་ཀྱང་རུང་སྟེ༔ ཁྲིད་ཀྱི་ཞབས་སུ་འདི་དང་བསྒྲགས་ནས་བསྟན་ན་ཤིན་ཏུ་ཟབ་པོ༔ གཞན་ཡང་འདི་རྟག་ཏུ་འདོན་པར་བྱ་ཞིང་༔ ཚིག་དང་ཐ་སྙད་བློ་ལ་བྱང་བར་བྱས་ལ༔ ནམ་འཆི་བར་ངེས་པའམ༔ ཚེ་ཚད་འཆི་རྟགས་རྣམས་ངོ་ཤེས་ནས༔ ཁམས་ཀྱིས་ལྕོགས་ན༔ རང་གིས་འདོན་ཞིང་༔ དོན་ཡིད་ལ་བསམ༔ མ་ལྕོག་ན་མཆེད་གྲོགས་ལ་དཔེ་བཀླག་བཅོལ་ཞིང་༔ གསལ་འདེབས་པས༔ ངེས་པར་གྲོལ་བ་ལ་ཐེ་ཚོམ་མེད་དོ༔ བསྒོམ་བསྒྲུབ་བྱ་མི་དགོས་པའི་ཆོས༔ བལྟས་པས་གྲོལ་བ༔ ཐོས་པས་གྲོལ་བ༔ བཀླགས་པས་གྲོལ་བའི་གདམས་ངག་ཟབ་མོ་ཡིན་ཏེ༔ སྡིག་པོ་ཆེ་གསེབ་ལམ་དུ་ཁྲིད་པར་བྱེད་པའི་གདམས་ངག་ཟབ་མོ་འདི༔ ཁྱི་བདུན་གྱིས་བདས་ཀྱང་༔ ཚིག་དང་ཐ་སྙད་མ་བརྗེད་པར་བྱས་ན༔ འཆི་ཁར་སངས་རྒྱས་པའི་གདམས་ངག༔ དུས་གསུམ་སངས་རྒྱས་ཀྱིས་བརྩལ་ཡང་༔ འདི་ལས་ལྷག་པའི་ཆོས་རྙེད་པར་མི་སྲིད་དོ༔ བར་དོའི་གདམས་པ་ལས་ཅན་གྲོལ་བར་བྱེད་པའི༔ བར་དོ་ཐོས་གྲོལ་ཆེན་མོ་ཞེས་བྱ་བ་ཟབ་པའི་སྙིང་ཁུ་རྫོགས་སོ༔ ིཨྠི༔ གྲུབ་ཐོབ་ཀརྨ་གླིང་པས་སྒམ་པོ་གདར་གྱི་རི་བོ་ནས་གདན་དྲངས་པའོ༔ སྐྱེ་གནས་བར་དོའི་ཁྲིད་ཡིག་ཀུན་གཞི་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་གྱི༔ རྫོགས་རིམ་བར་དོ་དྲུག་གི་ཁྲིད་ཡིག་ལས་ཉམས་ཁྲིད་དགོངས་པ་རང་གྲོལ་གྱི་དང་པོ་སྐྱེ་གནས་བར་དོའི་ཁྲིད་ཡིག་ཀུན་གཞི་རང་གྲོལ་ཞེས་བྱ་བ་བཞུགས་སོ༔ དང་པོའི་མགོན་པོ་སྐྱེ་མེད་ཀུན་ཏུ་བཟང་༔ དེ་རྩལ་འགག་མེད་ལོངས་སྐུ་ཞི་ཁྲོའི་ལྷ༔ སྣ་ཚོགས་ཤར་གྲོལ་སྤྲུལ་སྐུ་མཐའ་ཡས་འཕྲོ༔ ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ༔ མངལ་གྱིས་མ་གོས་རང་བྱུང་པདྨ་ངས༔ མ་འོངས་སྙིགས་མའི་འགྲོ་ལ་ཕན་བྱའི་ཕྱིར༔ རྒྱལ་བའི་དགོངས་པ་ཀུན་གྱི་དོན་བསྡུས་ནས༔ བར་དོ་རྣམ་པ་དྲུག་ཏུ་གཏན་ལ་ཕབ༔ དེ་དག་ཀུན་ཀྱང་རྩ་བ་ཉམས་ལེན་ལ༔ རག་ལས་ཕྱིར་ན་བར་དོ་དམར་ཁྲིད་ཀྱི༔ ཉམས་ཁྲིད་དགོངས་པ་རང་གྲོལ་འདི་བསྟན་གྱིས༔ འདི་ལྟར་ཉམས་སུ་ལོངས་ཤིག་ཕྱི་རབས་རྣམས༔ ས་མ་ཡ༔ དེ་ལ་འདིར་འཁོར་འདས་ཀྱི་ཆོས་ཐམས་ཅད་བར་དོ་དྲུག་ལ་མ་འདུས་པ་མེད་ཅིང་༔ དེ་ཉམས་སུ་བླང་བ་ལ་སྤྱི་དོན་གསུམ་གྱིས་སྟོན་ཏེ༔ སྒོམ་མ་སྐྱེས་པ་སྐྱེ་བར་བྱེད་པའི་སྔོན་འགྲོ་རྣམ་པ་གཉིས༔ སྐྱེས་པ་ཉམས་སུ་བླང་བ་ལ༔ ཉམས་ལེན་དངོས་གཞིའི་ཁྲིད༔ དེ་བོགས་དབྱུང་བ་རྗེས་ཀྱི་རིམ་པའོ༔ དང་པོ་སྔོན་དུ་འགྲོ་བ་ལ་གཉིས་ཀྱི་དང་པོ་ལ༔ རང་རྒྱུད་སྦྱོང་བར་བྱེད་པའི་ཁྲིད་ལ་བཞི་སྟེ༔ སྐྱབས་འགྲོ་སེམས་བསྐྱེད་ཀྱི་ཁྲིད༔ སྡིག་པ་སྦྱོང་བར་བྱེད་པ་ཡི་གེ་བརྒྱ་པའི་ཁྲིད༔ བྱིན་བརླབས་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད༔ ཚོགས་གཉིས་རྫོགས་པར་བྱེད་པ་མཎྜལ་ཆོས་སྤྱོད་ཀྱི་ཁྲིད་དང་བཞིའོ༔ གཉིས་པ་རང་རྒྱུད་འདུལ་བར་བྱེད་པའི་ཁྲིད་ལ་གསུམ་སྟེ༔ དལ་འབྱོར་རྙེད་པར་དཀའ་བ་ལ་བསམ་པ༔ འཁོར་བའི་སྡུག་བསྔལ་བསམ་པ༔ འཆི་བ་མི་རྟག་པ་བསྒོམ་པ་དང་གསུམ་སྟེ༔ སྔོན་འགྲོ་ཡན་ལག་བདུན་ལྡན་ཉམས་སུ་བླངས་བར་བྱའོ༔ དེ་ལྟར་སྔོན་འགྲོ་རྣམས་ལ་ཉམས་མ་སྐྱེས་ཀྱི་བར་དུ་སྒོམ་ཞིང་གཏན་ལ་ཕེབ་པ་དང་༔ ༈ གཉིས་པ་དངོས་གཞིའི་རིམ་པ་ཉམས་སུ་བླང་བ་ལ་དྲུག་སྟེ༔ སྐྱེ་གནས་བར་དོའི་ཁྲིད་ཡིག་ཀུན་གཞི་རང་གྲོལ༔ རྨི་ལམ་བར་དོའི་མུན་ཁུང་དུ་སྒྲོན་མེ་བཏེགས་པ་ལྟ་བུའི་གདམས་ངག །ཁྲིད་ཡིག་འཁྲུལ་པ་རང་གྲོལ༔ བསམ་གཏན་བར་དོའི་དྭ་ཕྲུག་མ་དང་འཕྲད་པ་ལྟ་བུའི་གདམས་ངག །ཁྲིད་ཡིག་རིག་པ་རང་གྲོལ༔ འཆི་ཁ་བར་དོའི་རྒྱལ་པོའི་བཀའ་ཐེམ་བསྐུར་བ་ལྟ་བུའི་གདམས་ངག །ཁྲིད་ཡིག་འཕོ་བ་དྲན་པ་རང་གྲོལ༔ ཆོས་ཉིད་བར་དོའི་མ་པང་དུ་བུ་འཇུག་པ་ལྟ་བུའི་གདམས་ངག །ཁྲིད་ཡིག་མཐོང་བ་རང་གྲོལ༔ སྲིད་པ་བར་དོའི་ཡུར་བ་རྐང་ཆད་ལ་ཝ་འཛུགས་པ་ལྟ་བུའི་གདམས་ངག །ཁྲིད་ཡིག་སྲིད་པ་རང་གྲོལ་དང་དྲུག་གོ༔ དེ་ལས་དང་པོ་སྐྱེ་གནས་བར་དོ་ཕྱི་ནང་གི་སྒྲོ་འདོགས་བཅད་པ་ཐི་བྱ་ཚང་དུ་འཇུག་པ་ལྟ་བུའི་གདམས་ངག །ཉམས་སུ་ལེན་པ་ལ༔ ཀུན་གཞིའི་གནས་ལུགས་གཏན་ལ་དབབ་པ་ལ་གསུམ་གྱི༔ དང་པོ་ལུས་རྣལ་དུ་དབབ་པ་ལ༔ ལུས་གནད་ལེགས་པར་བཅའ་མ་ཤེས་ན༔ བསྒོམ་མཚན་ཉིད་པ་རྒྱུད་ལ་མི་སྐྱེ༔ སྐྱེས་ཀྱང་གེགས་སུ་འགྲོ་བས་ལུས་གནད་གལ་ཆེ་སྟེ༔ ལུས་དྲང་བས་རྩ་དྲང་༔ རྩ་དྲང་བས་རླུང་དྲང་༔ རླུང་དྲང་པོར་གནས་པས་རིག་པ་རྣལ་དུ་ཕེབས་ནས༔ བསྒོམ་རང་བབས་སུ་འབྱུང་བས༔ ལུས་རྣལ་དུ་ཕབ་པ་ལའང་༔ ལས་དང་པོ་པས༔ ལུས་ཀྱི་བྱ་བ་ཕྱི་སོ་ནམ་ལ་སོགས་པ་འཁོར་བའི་བྱ་བ་ཐམས་ཅད་ལིངས་ཀྱིས་བཏང་༔ ནང་ཕྱག་དང་སྐོར་བ་ལ་སོགས་པའི་ཆོས་སྤྱོད་རྣམས་ཀྱང་བཏང་༔ གསང་བ་ལུས་ཀྱི་འགུལ་བསྐྱོད་ཙམ་ཡང་མི་བྱ་བར་ལུས་གནད་ཀྱི་ཐོག་ཏུ་ཙན་ནེ་མ་ཡེངས་པར་བསྒོམ་མོ༔ དེས་ལུས་རྣལ་དུ་ཕེབས་ནས་བསྒོམ་སྐྱེ་བའི་ཡོན་ཏན་ཡོད་དོ༔ དེ་ཡང་ལུས་ཀྱི་འཁྲུལ་འཁོར་དངོས་ནི༔ ལུས་རྣམ་སྣང་གི་ཆོས་བདུན་དུ་བྱ་སྟེ༔ རྐང་པ་རྡོ་རྗེའི་སྐྱིལ་ཀྲུང་བཅའ༔ ལག་པ་མཉམ་བཞག་གི་ཕྱག་རྒྱ་ལྟེ་འོག་ཏུ་བཅའ༔ སྒལ་ཚིགས་མདའ་ལྟར་དུ་བསྲངས༔ གསུས་པ་སྒལ་ཚིགས་ལ་སྦྱར༔ མགྲིན་པ་བག་ཙམ་དགུག༔ ལྕེ་ཡ་རྐན་ལ་སྦྱར༔ མིག་སྣ་རྩེའི་ཐད་ཀྱི་བར་སྣང་ལ་བསྒོམ་རྒྱུ་ཅི་ཡང་མེད་པར་ཧྲིག་གེ་བལྟ་བ་དང་བདུན་པོ་འདི༔ སྐྱོན་མེད་པར་ལེགས་པར་བཅའ༔ འཁྲུལ་འཁོར་རྣམས་རྣལ་མར་བཅའ་ཤེས་ན་བསྒོམ་རང་བབས་སུ་འོང་ངོ་༔ གཉིས་པ་ངག་རྣལ་དུ་དབབ་པ་ལའང་གསུམ་གྱི༔ ཕྱི་ཁ་སྨྲ་དང་འཁྲུལ་གཏམ་གྱི་བྲེ་མོའི་གཏམ་ཐམས་ཅད་ཆམ་གྱིས་བཞག་ལ་སྨྲ་བ་བཅད༔ ནང་འདོན་པ་དང་ཆོས་སྤྱོད་ཀྱི་བྱ་བ་བཏང་ལ་སྨྲ་བ་བཅད༔ གསང་བ་བཟླས་བརྗོད་དང་༔ སྔགས་ཀྱི་བྱ་བའང་བཏང་༔ ངག་པི་ཝཾ་གི་རྒྱུན་ཐག་བཅད་པ་ལྟར་གཅོམ་བསྐྱུངས་ལ་རྣལ་དུ་ཕབ༔ གསུམ་པ་ཡིད་རྣལ་དུ་དབབ་པ་ལའང་གསུམ་གྱི་དང་པོ༔ ལུས་ངག་གོང་ལྟར་བཅད་པའི་ངང་ནས༔ ཡིད་ཀྱིས་ཐ་མལ་གྱི་འཁྲུལ་སྣང་སྔ་ཕྱི་དུས་གསུམ་གྱི་རྟཽག་པ་གང་ཡང་ཡིད་ལ་མི་བྱེད་པར་ལྷན་ནེ་བཞག༔ ནང་ལྷ་བསྒོམ་པ་ལ་སོགས་པ་བཟང་རྟོག་གི་རྟོག་པ་གང་ཡང་ཡིད་ལ་མི་བྱེད་པར་ཕྱམ་མེ་བཞག༔ གསང་བ་སེམས་འཛིན་ལྟ་བསྒོམ་ཡིད་ལ་བྱེད་པའི་རྟོག་པ་ཐམས་ཅད་ཅི་ཡང་ཡིད་ལ་མི་བྱེད་པར་སེམས་ཁོ་རང་རང་ལུགས་སུ་མདུན་གྱི་ནམ་མཁའ་ལ་ཧྲིག་གེ༔ གསལ་ཡེ་རེ༔ ལྷན་ནེ་ཅི་བཞིན་ཉིད་ཀྱི་ངང་ལ་བཞག་སྟེ་རྣལ་དུ་ཕབ་པར་བྱའོ༔ དེ་ལ་ཞག་གསུམ་བྱའོ༔ དེ་ནས་སེམས་རྣལ་དུ་ཕབ་པ་ནི༔ འོ་སྐོལ་གྱི་སེམས་ཞེས་བྱ་བ་རིག་རིག་ཏུར་ཏུར་མི་དྲན་དགུ་དྲན་འདིས༔ འཁོར་འདས་ཀུན་གྱི་གཞི་བྱེད་པས༔ ཀུན་གཞི་ཞེས་མིང་དུ་བཏགས་སོ༔ དེ་ཡང་བདེ་སྡུག་ཐམས་ཅད་ཀྱི་རྩ་བ་རང་གི་སེམས་འདི་ཡིན་ཏེ༔ ཐོག་མར་འདི་གཏན་ལ་དབབ་པ་གལ་ཆེ་ཞིང་༔ ལས་དང་པོ་བའི་སེམས་འདི་ནི་རྟ་དམུ་རྒོད་དང་འདྲ་སྟེ༔ དཔེར་ན་རྟ་དམུ་རྒོད་འཛིན་པ་ལ་ཡང་༔ ཁོའི་ཐོག་ཏུ་དྲག་པོར་རྒྱུག་ན་འདྲོགས་ནས་མི་ཟིན་པས༔ ཐབས་སྣ་ཚོགས་ཀྱིས་བྲིད་ཅིང་དལ་གྱི་བཟུང་ན་ཟིན་ཁོལ་དུ་ཐུབ་པ་ལྟར༔ སེམས་དམུ་རྒོད་འདི་ཡང་དྲག་ཏུ་འཛིན་ན་རྟོག་པ་ཇེ་མང་དུ་འཕྲོ་ཞིང་༔ སྙིང་རླུང་ལ་སོགས་པ་མི་འདོད་པ་དུ་མ་སྐྱེད་པའི་གེགས་སུ་འགྲོ་བས༔ ཐབས་སྣ་ཚོགས་ཀྱི་དམིགས་པས་དལ་གྱིས་རྣལ་དུ་ཕབ་པས༔ ཞི་གནས་མཚན་ཉིད་པ་རྒྱུད་ལ་སྐྱེའོ༔ དེ་ལ་མཚན་མ་དང་བཅས་པའི་ཞི་གནས་ཀྱི་ཁྲིད་ནི༔ ཐོག་མར་ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཐོབ་པར་བྱ༔ དེའི་དོན་དུ་ཚེ་འདི་ཉིད་ལ༔ སྟན་ཐོག་འདི་ཉིད་དུ་བླ་ན་མེད་པའི་གོ་འཕང་རིན་པོ་ཆེ་ཐོབ་པར་བྱས་ལ༔ གང་ལ་གང་འདུལ་གྱི་འགྲོ་བའི་དོན་རྫོགས་པར་བྱ་བའི་ཕྱིར༔ ཐེག་པ་ཆེན་པོའི་ཆོས་བསྒོམ་སྙམ་དུ་སེམས་བསྐྱེད་ལ༔ བླ་མའི་རྣལ་འབྱོར་དང་ལྡན་པས་སྒོ་གསུམ་རྣལ་དུ་ཕབ༔ ལུས་རྣམ་སྣང་གི་ཆོས་བདུན་བཅའ་བ་རྣམས་དམིགས་པ་ཀུན་ལ་གཞི་བཞག་ཏུ་ཤེས་པར་བྱའོ༔ དེའི་ངང་ནས་མདུན་དུ་ཤིང་བུ་རྡིལ་བུ་ལ་སོགས་པའི་དངོས་པོ་ཕྲ་མོ་གཅིག་བཞག་ལ༔ མིག་མི་བཙུམས་པར་དེ་ལ་ཅེར་རེ་བལྟ་བ་དང་ལྷན་ཅིག་ཏུ་སེམས་ཀྱང་གཞན་གང་དུའང་མ་ཡེངས་པར་དེའི་ཐོག་ཏུ༔ ཧྲིག་གེ༔ གསལ་ལེ༔ ལྷན་ནེ་བཞག༔ དེ་ལ་མདུང་ཚུགས་ཙིར་ཟིན་ཏུའང་མི་བྱ༔ ཐ་མལ་དུ་ཡེངས་སུ་མི་འཇུག་པར་རིག་པ་མ་ཡེངས་པའི་རྟེན་ཙམ་དུ་ཡེ་རེ་བཞག་གོ༔ ལྷན་ནེ་གནས་བདོ་ལ་ལྷོད་ཀྱིས་ཀློད་ལ་ཅུང་ཟད་ངལ་གསོ༔ དེའི་རིང་ལ་རྟོག་པ་འབྱམས་སུ་མི་གཞུག་པར༔ ཡང་རྟེན་དེ་ལ་ཅེ་རེ་ཡེངས་མེད་དུ་སེམས་རང་བབས་སུ་བཞག༔ སྙིང་རྗེ་ལམ་ཁྱེར་ལས༔ གསལ་བདོར་འཕྲོ་བཅད་ཡུན་ཐུང་གྲངས་མང་བསྒོམ༔ ཞེས་གསུངས་པས༔ ཡུན་ཐུང་བས་བྱིང་རྒོད་ཀྱི་གེགས་མི་འཇུག་ལ༔ གྲངས་མང་བས་སྐྱོན་མེད་ཀྱི་བསྒོམ་སྐྱེ་བའི་ཕྱིར༔ དེ་ལྟར་བསླབ་པར་བྱའོ༔ ཐུན་འཇོག་པའི་ཚེ༔ ཧར་ལངས་སུ་མི་བྱ་བར༔ བག་ཡོད་དང་ལྡན་པས་དེའི་ངང་མ་ཤོར་བར་དལ་བུས་སྤྱོད་ལམ་དང་བསྲེ་ཞིང་ལམ་དུ་ཁྱེར་རོ༔ སྤྱོད་ལམ་ཐམས་ཅད་མགོ་ཆག་གི་ནད་པ་འགྲམ་དུ་དོགས་པ་ལྟར༔ བསྒོམ་གྱི་ངང་འཚོ་ཞིང་བག་ཡོད་དང་ལྡན་པར་བྱའོ༔ དེ་ལ་ཞག་གསུམ་མོ༔ དེ་ནས་ཡང་ལུས་གནད་ལ་སོགས་སྔར་ལྟར་ལས༔ དམིགས་པ་ནི༔ རང་གི་སྨིན་མཚམས་ཀྱི་མཛོད་སྤུར་ཐིག་ལེ་དཀར་ལ་འཚེར་བ༔ གསལ་ལ་དངས་པ༔ ཆེ་ཆུང་སྲན་མ་དཀར་པོ་ཙམ༔ སྣང་ལ་རང་བཞིན་མེད་པ་གཅིག་དཀར་ཡེ་རེ་བ་ལ་སེམས་མ་ཡེངས་པར་གཏད༔ གསལ་བདོ་ལ་ལྷོད་ཀྱིས་ཀློད་ལ་སེམས་རང་བབས་སུ་བཞག༔ རྟོག་པས་བར་མ་ཆོད་པར་བྱ༔ ཡང་དེ་ཀ་ལྟར་བསྒོམ༔ ཐུན་ཆུང་ལ་གྲངས་མང་བ་གོང་ལྟར་རོ༔ དེའང་ཞག་གསུམ་མམ་ཉམས་དང་བསྟུན་ལ་བསྒོམ་དུ་བཅུག་ལ༔ སྐབས་སུ་ཉམས་ཅི་བྱུང་ཉུལ་བར་བྱའོ༔ དེ་ནས་ཡང་གཞན་སྔར་ལྟར་ལས༔ རང་གི་ལུས་ཕྲུ་མ་ཕུས་བཏབ་པ་ལྟར༔ ནང་སྟོང་སང་ངེ་བའི་སྙིང་ཁའི་ཐད་ཀར་རླུང་སེམས་འདྲེས་པའི་ངོ་བོ་འོད་ཀྱི་ཐིག་ལེ་དམར་པོ་མར་མེ་འབྲིང་པོ་ཙམ་ཅིག་འཚེར་བ༔ ཁ་དོག་སྔོ་ལ་གསལ་བ༔ རེག་བྱ་ཚ་བ་ཕར་རྒལ་བ་ལ་མ་རེག་པ་ཚུར་བྲང་ལ་མ་རེག་པ༔ སྙིང་ཁའི་ཚོད་དུ་གསལ་ཡེ་རེ་བསྒོམ༔ དེ་ལ་ཤེས་པ་ཡུད་དེ་གཏད༔ གསལ་བདོ་ལ་འཕྲོ་བཅད༔ ཡེངས་ན་དམིགས་པ་གསལ་གདབ༔ ཤེས་པ་ཟ་ཟིར་གྱུར་ནས་དམིགས་པ་མ་ཟིན་ན་རླུང་ཁམས་སྐྱེས་པ་ཡིན་པས༔ ཟས་བཅུད་ཆེན་བཏང་༔ དམིགས་པ་ཅུང་ཟད་ཀློད་ལ་ངལ་བསོ༔ དེའི་རིང་ལ་ཐ་མལ་དུ་མ་ཡེངས་པར་དྲན་པ་དང་༔ བག་ཡོད་ཡུད་དེ་བརྟེན༔ ཕལ་ཆེར་ཀློད་པ་གཙོ་ཆེ་བས༔ རང་བབས་སུ་ཀློད་ལ་མ་ཡེངས་ཙམ་དུ་རྟོག་པར་བྱའོ༔ ཡང་སྐྱོ་བའམ༔ འཚེར་བ་བྱུང་ན༔ ཤེས་པ་འཁྱོག་པ་བྱ་བ་ཡིན་པས༔ འཁོར་བའི་ཉེས་དམིགས་དལ་འབྱོར་རྙེད་དཀའ༔ མི་རྟག་བསྒོམ་པ༔ བླ་མའི་མོས་གུས་རྣམས་བྱ༔ ད་ལན་དལ་འབྱོར་ཐོབ༔ བསྟན་པ་རིན་པོ་ཆེ་དང་མཇལ༔ ཟབ་ལམ་འདི་ལྟ་བུ་དང་འཕྲད་པ་རེ་དགའ༔ ད་ལན་མ་འབད་ན༔ རྡོག་སྣ་འདྲེད་ནས་ཕྱིན་ཆད་གསོར་མི་རུང་བར་འགྱུར་ཏ་རེ༔ སྙམ་དུ་བྲོད་པ་བརྩོན་འགྲུས་དགའ་བ་བསྒོམ་མོ༔ དེ་རྣམས་ཀྱིས་ཞི་གནས་རྒྱུད་ལ་སྐྱེས་པ་ཡོང་༔ དེ་ལ་མ་བྱུང་ན༔ ཡང་མདུན་གྱི་ནམ་མཁར༔ རྡོ་རྗེ་སེམས་དཔའི་སྐུ་མཐོ་གང་པ་ཙམ་གཅིག༔ སྣང་ལ་རང་བཞིན་མེད་པ༔ ཤེལ་ཕྱིས་པ་ལྟ་བུ་དཀར་ལ་གསལ་པ༔ འོད་ཀྱི་རང་བཞིན་ཅན་གཅིག་གསལ་བོར་བསྒོམ༔ དེའི་ཐུགས་ཀར་རིག་པ་གཏད་ལ་གསལ་ཡེ་རེ་བསྒོམ༔ ཡུན་ཐུང་ལ་གྲངས་མང་བ་གོང་ལྟར་བྱ༔ འདི་ལ་ནི༔ སངས་རྒྱས་དགོངས་པ་འདུས་པའི་མདོ་ལས༔ རྡོ་རྗེ་སེམས་དཔའ་དྲན་པ་ཙམ་ལའང་༔ ཕན་ཡོན་བརྗོད་ལས་འདས་པ་གསུངས་སོ༔ ཡང་མདུན་གྱི་ནམ་མཁར༔ བཅོམ་ལྡན་འདས་ཤཱཀྱ་ཐུབ་པའི་སྐུ་གསེར་འོད་དུ་ལམ་མེ་བ་ལ་རིག་པ་གཏད༔ འདིར་ཡང་དམིགས་པའི་ཕན་ཡོན་དཔག་ཏུ་མེད་པ་ཏིང་འཛིན་རྒྱལ་པོའི་མདོ་ནས་གསུངས་སོ༔ ཡང་མདུན་གྱི་ནམ་མཁར༔ འཕགས་པ་སྤྱན་རས་གཟིགས་དབང་ཕྱུག་ལམ་མེར་གསལ་བའི་ཐུགས་ཀར་ཧྲཱིཿ དཀར་པོ་ཚག་དྲག་ཅན་ལ་སེམས་མ་ཡེངས་ཙམ་དུ་ལྷན་ནེ་གཏད༔ འདི་ལ་ཡང་མདོ་ཟ་མ་ཏོག་ནས་ཕན་ཡོན་དཔག་ཏུ་མེད་པ་གསུངས༔ དམིགས་པ་དེ་རྣམས་ཀྱིས་རྟོག་པ་ཉུང་ཕྱམ་གྱིས་འགྲོ༔ དེའང་དང་པོར་རྟོག་པ་མང་དུ་འགྲོ་ཞིང་ཇེ་རྒོད་ལ་འགྲོ་བ་འོང་སྟེ༔ དེ་ནི་བསྒོམ་ཅུང་ཟད་སྐྱེ་བའི་རྟགས་ཡིན༔ འདིའི་དུས་སུ་སྒོམ་གྱིས་སྣ་སུན་ཁྱེར་ནས་སྒྱིད་ལུག་པའམ༔ ང་ལ་བསྒོམ་མི་འོང་བར་འདུག༔ སྒོམ་གྱིན་རྟོག་པ་ཇེ་རགས་སུ་སོང་སྙམ་ནས༔ འཕྲོ་བསྐྱུར་ཉེན་ཡོད་པས༔ སྣ་མ་སུན་པར་དལ་བུས་ཁྲིད་ལ་སྐྱོང་འཇུག་གོ༔ རྟོག་པ་མང་དུ་སོང་བ་དེ་བསྒོམ་གྱི་སྣ་ཟིན་པ་ཡིན་ནོ༔ སྔ་གོང་རྣམ་རྟོག་འཁོར་མོར་རྒྱ་ཡན་དུ་སོང་ཡང་༔ དྲན་པའི་བྱ་ར་མེད་པས༔ རང་ཁར་ཤོར་བ་ཡིན་ནོ༔ ད་མང་དུ་སོང་བ་དེ་དྲན་པའི་བྱ་ར་བས་མཐོང་ནས་ངོས་ཟིན་ཏེ༔ བསྒོམ་སྐྱེ་འདོད་པའི་རྟགས་ཡིན་པས༔ དལ་བུས་རྟོག་པ་ངོས་ཟིན་པར་བྱས་ལ་བཀག་ཀྱང་མི་བཀག༔ རྗེས་སུ་མི་འབྲང་བར་དམིགས་པ་གཏད་པས༔ རྟོག་པ་ཇེ་ཕྲ་ཇེ་ཉུང་དུ་འགྲོ་བ་ཡིན་ནོ༔ དེའང་དམིགས་པ་གོང་ལྟར་བསྒོམས་ཀྱང་རྟོག་པ་ངན་ལང་ཅན་ཐོལ་ཐོལ་འཕྲོ་ན༔ རྣམ་རྟོག་ཁོ་རང་དམིགས་པའི་རྟེན་བྱ་སྟེ༔ འདོད་ཆགས༔ ཞེ་སྡང་༔ བག་ཆགས་ངན་གོམས་གང་ཤར་བ་དེ་ངོས་ཟིན་ལ༔ དེ་ཀའི་ཐོག་ཏུ་སེམས་ལྷོད་དེ་ཀློད་ལ་བཞག༔ རེས་རྟོག་པ་གཅིག་སྐྱེས༔ ངོས་ཙིར་གྱིས་བཟུང་ལ་རང་གྲོལ་དུ་ཁྲོལ་བཏང་༔ གཉིས་སྐྱེས་ངོས་བཟུང་༔ གང་ཤར་གྱི་རྗེས་སུ་མི་འབྲང་བར་ཤར་གྲོལ་དུ་བཏང་༔ རེས་མི་དམིགས་པ་ལ་གཏད༔ རེས་རྟོག་པ་ཤར་གྲོལ་དུ་བཏང་༔ རྗེས་སུ་མ་བཅོས་པའི་ངང་ལ་ལྷོད་དེ་ཀློད༔ དེ་ལྟར་རེས་མོས་སུ་བྱས་པས་རྣམ་རྟོག་ལུ་གུ་རྒྱུད་དུ་མ་འབྲེལ་བར༔ རྟོག་པ་དུམ་བུར་སོང་བས༔ ངན་རྟོག་ཇེ་ཉུང་དུ་གནས་པ་བཟང་པོ་སྐྱེའོ༔ དེ་ལ་ཞག་གསུམ་སོགས་ཉམས་དང་བསྟུན་ལ་བསྒོམ་མོ༔ དེ་རྣམས་ལས་ཞི་གནས་མཚན་ཉིད་པ་སྐྱེས་ནས༔ རིག་པ་རྩད་བཅད་ལ་བསླབ་བོ༔ དེའང་ཕལ་ཆེར་བག་ཆགས་ངན་གོམས་འདི་འདུལ་དཀའ་བས༔ ཐབས་དུ་མ་ནས་རྣལ་དུ་ཕབ་པ་གལ་ཆེའོ༔ དེ་ནས་ཡང་རླུང་ལ་བསླབ་པ་ནི༔ ལུས་རྣམ་སྣང་ཆོས་བདུན་གྱི་ངང་ནས༔ སྒལ་ཚིགས་དྲང་པོར་བསྲངས༔ ལག་པས་ས་གནོན་དུ་བཅའ་སྟེ༔ རླུང་སྣ་བུག་གཡས་ནས་གཅིག༔ གཡོན་ནས་གཅིག༔ དབུས་ནས་གཅིག་དང་གསུམ་སངས་ཀྱིས་འབུད་པ་དང་མཉམ་དུ་སྡིག་སྒྲིབ་ཐམས་ཅད་སངས་སངས་སྡིག་པ་རྭ་ཅན་གྱི་རྣམ་པ་སྣ་སྒོ་ནས་ཐོན༔ མདུན་གྱི་ནམ་མཁར་ཡེ་ཤེས་ཀྱི་མེས་ཐུལ་ཐུལ་ཚིག་པར་བསམ་པ་ནི༔ རླུང་གི་དུག་དབྱུང་བའོ༔ དེ་ནས་ཚུར་རྔུབས་པ་དང་མཉམ་དུ༔ མཆིལ་མ་གཅིག་མིད་པས་ལྟེ་འོག་ཏུ་སྡིག་བསྐྱལ་ལ་དམིགས་པ་ཅི་ལ་ཡང་མི་བསམ་པར་ལྷན་ནེ་བཞག༔ མི་ཐུབ་པ་དང་སངས་སངས་འབུད༔ དེ་ལ་ཞག་གཅིག་གོ༔ དེ་ནས་འབྲུ་གསུམ་སྐྱེ་མེད་རྡོ་རྗེའི་བཟླས་པ་ལ་བསླབ་པ་ནི༔ རླུང་རོ་དབྱུང་བ་དང་༔ ལུས་གནད་གོང་ལྟར་ལས༔ རླུང་རྔུབ་པའི་ཚེ༔ དུས་གསུམ་གྱི་སངས་རྒྱས་ཐམས་ཅད་ཀྱི་སྐུའི་བྱིན་རླབས་ཡི་གེ་ཨོཾ་དཀར་པོའི་རྣམ་པར་ཚུར་བསྡུས་སྟེང་རླུང་མནན༔ འོག་རླུང་འཐེན་ཏེ༔ ལྟེ་འོག་ཏུ་བསྐྱིལ་བ་དེའང་སྟེང་འོག་རླུང་ཁ་སྦྱོར་གྱི་བར་དུ༔ དུས་གསུམ་གྱི་སངས་རྒྱས་ཐམས་ཅད་ཀྱི་གསུང་གི་ངོ་བོ་ཡི་གེ་ཨཱཿདམར་པོའི་རང་བཞིན་སྣང་ལ་རང་བཞིན་མེད་པ༔ གསལ་སྟོང་ཡེ་རེ་བ་ལ་རིག་པ་ཅི་གནས་ཀྱི་བར་དུ་བཞག༔ མི་ཐུབ་པ་དང་རླུང་གཏོང་བའི་ཚེ༔ དུས་གསུམ་སངས་རྒྱས་ཐམས་ཅད་ཀྱི་ཐུགས་ཀྱི་ངོ་བོ་ཡི་གེ་ཧཱུྃ་སྔོན་པོའི་རྣམ་པར་འཕྲོས་པས༔ དེ་དག་ཀྱང་འགྲོ་བའི་དོན་དུ་སྤྲུལ་སྐུ་རྒྱུན་མི་ཆད་པར་འཕྲོ་བར་བསམས་ལ༔ དེ་ལྟར་རླུང་རྔུབ་པ་ཨོཾ༔ གནས་པ་ཨཱ༔ འབུད་པ་ཧཱུྃ་གི་རང་བཞིན་ལ་རིག་པ་ཡེངས་མེད་དུ་སེམས་བཟུང་༔ འདི་ནི་དུས་ནམ་དུའང་བྱས་པས་སྐྱེ་མེད་རྡོ་རྗེའི་བཟླས་པ་ཞེས་བྱ་སྟེ༔ ཞག་རེ་ལ་རླུང་ཉི་ཁྲི་ཆིག་སྟོང་དྲུག་བརྒྱའི་རླུང་རྒྱུ་བ་དེ་སྙེད་ཀྱི་འབྲུ་གསུམ་སྐྱེ་མེད་རྡོ་རྗེའི་བཟླས་པ་ཐེམ་པས༔ ཡོན་ཏན་བརྗོད་ལས་འདས་པས་རྒྱུན་ཁྱེར་དུ་ཉམས་སུ་བླང་ངོ་༔ འདི་ལ་ཞག་གསུམ་ཙམ་བྱ༔ དེ་ནས་རྒྱུན་དུ་འཁྱེར་རོ༔ དེ་ཡན་ཆད་མཚན་མ་དང་བཅས་པའི་ཞི་གནས་སྒྲུབ་པ་སོང་ནས༔ དེ་ནས་མཚན་མ་མེད་པའི་ཞི་གནས་ལ་བསླབ་པ་ནི༔ ལུས་གནད་སྔར་ལྟར་ལས༔ མིག་གིས་ནམ་མཁའ་ལ་ཅེ་རེ་བལྟས་པའི་ངང་ནས་དམིགས་པ་ཅི་ཡང་མི་སྒོམ་པར༔ ཤེས་པ་མདུན་གྱི་ནམ་མཁའ་ལ་ཡེངས་པ་མེད་པར་ཧྲིག་གེ་བསྒྲིམ༔ གནས་བདོ་བ་དང་ཡང་ངལ་བསོ༔ སྐབས་སུ་སྒྲིམ་མཁན་གྱི་ཤེས་པ་དེ་ཅི་འདྲ་བ་ཞིག་འདུག་གང་ཡིན་རྩད་བཅད༔ ཡང་ཧྲིག་གེ་བསྒྲིམ༔ རྩད་བཅད་དེ༔ རེས་མོས་སུ་བྱའོ༔ དེས་བྱིང་རྨུག་གི་སྐྱོན་ཡོད་ན་ཡང་སེལ་ལོ༔ སྤྱོད་ལམ་ཐམས་ཅད་དུ་དྲན་པ་ཡེངས་མེད་དུ་བསྟེན་ནོ༔ དེ་ལ་ཞག་གཅིག་གོ༔ དེ་ནས་ཡང་ལུས་གནད་སྔར་ལྟར་ལས༔ ལྟ་སྟངས་ཐུར་དུ་ཕབ་སྟེ༔ སེམས་ལྷོད་ཀྱིས་ཀློད་ལ༔ འདི་བསྒོམ་བྱ་བའི་དམིགས་པ་ཅི་ཡང་མེད་པར་ཀློད་དེ་རང་བབས་སུ་ལུས་སེམས་གཉིས་ཀ་ཁོང་ཀློད་ལ༔ བསྒོམ་རྒྱུ་ཅི་ཡང་མེད་ལ༔ མ་ཡེངས་ཙམ་དུ་རང་བབས་རང་དྭངས༔ གཤིས་ལུགས༔ ཅི་བཞིན་ཉིད་ཀྱི་ངང་ལ་བཅོས་སླད་དང་བྲལ་བར་བཞག༔ ལྷན་ནེ་གནས་པ་དང་༔ ཤིག་གི་བཤིག༔ ཡང་ལྷོད་ལ་བཞག་གོ༔ རེས་གོང་དུ་སྒྲིམ་མཁན༔ རེས་ཀློད་མཁན་དེ་སུ་ཡིན་པར་འདུག་བལྟ༔ སེམས་ཡིན་པར་འདུག་ན་སེམས་ཀློད་མཁན་སྒྲིམ་མཁན་དེ་ཅི་འདྲ་འདུག་རང་ལ་ཅེ་རེ་བལྟ༔ ཡང་ཀློད་པར་བྱའོ༔ དེ་ནས་གནས་པ་བཟང་པོ་སྐྱེ༔ རིག་པ་ངོ་འཕྲོད་པའང་འབྱུང་སྲིད་དོ༔ དེ་ལའང་ཞག་གཅིག་གོ༔ དེ་ནས་ཡང་སྔར་ལྟར་ལས༔ རེས་ཤེས་པ་གྲིམ་གྱིས་བསྒྲིམ་ལ་ཡེངས་མེད་དུ་ཕྲི་ལི་ལི་བསྒྲིམ༔ ཡང་ལྷོད་ཀྱིས་ཀློད་ལ་གུ་ཡངས་སུ་ཕྱལ་ལེ་བཞག༔ ཡང་བསྒྲིམ་ཡང་ཀློད༔ དེ་ལྟར་སྒྲིམ་ལྷོད་སྤེལ་ཞིང་བསྒོམ༔ རེས་ལྟ་སྟངས་ནམ་མཁའི་དབྱིངས་སུ་གྱེན་དུ་ཅེ་རེ་བལྟ༔ རིག་པ་ཡང་བསྒོམ་རྒྱུ་མེད་ཀྱང་འདུན་པ་དེ་ཧྲིག་གེ་གཏད༔ ཡང་ལྷོད༔ རེས་གཡས་སུ་ལྟ་སྟངས་ཧྲིག་གེ་དབྱིངས་རིག་མ་ཡེངས་པར་གཏད༔ རེས་གཡོན་དུ་གཏད༔ རེས་ཐུར་དུ་གཏད་པ་རྣམས་རེས་མོས་སུ་ཐུན་རེ་རེ་འཁོར་བར་བསྒྱུར༔ སྐབས་སུ་འདུན་པ་གཏད་མཁན་གྱི་རིག་པ་དེ་ཅི་འདྲ་བ་ཞིག་འདུག༔ རིག་པ་ཁོ་རང་གིས་ཁོ་རང་ལ་ཅེ་རེ་བལྟ༔ རེས་སེམས་སྙིང་གི་དཀྱིལ་དུ་ཕབ་ལ་ཕྱམ་མེ་བཞག༔ རེས་ནམ་མཁས་གར་ཁྱབ་ཏུ་ཕྱམ་མེ་བཞག༔ རེས་ནམ་མཁས་གར་ཁྱབ་ཏུ་ཕྱལ་གྱིས་བཏང་ལ་བཞག༔ དེ་ལྟར་རེས་མོས་སུ་སྣ་ཚོགས་ཀྱི་ལྟ་སྟངས་བསྒྱུར་བས༔ སེམས་རྣལ་དུ་ཕེབས་པའི་རྟགས་སུ༔ རིག་པ་གར་བཞག་ཕྱམ་མེ༔ ལྷན་ནེ༔ ཧྲིག་གེ་གནས་པ་བྱུང་ན་ཞི་གནས་སྐྱེས་པ་ཡིན༔ དེའང་དྲན་པ་མེད་པར་ཐོམ་པོར་སོང་ན་བྱིང་བའམ༔ འཐིབ་པའི་སྐྱོན་ཡིན་པས་རིག་པ་གཡེར་བཏོན༔ གཟེངས་བསྟོད༔ ལྟ་སྟངས་བསྒྱུར༔ ཡེངས་ཤིང་རྒོད་ན་ལྟ་སྟངས་ཐུར་ལ་ཕབ༔ ཀློད་པ་གལ་ཆེའོ༔ བསྒོམ་འདི་ཡིན་རྟོག་པ་འདི་ཡིན་མེད་པའི་ཏིང་ངེ་བ་བྱུང་ན༔ ལྡིང་བའི་སྐྱོན་ཡིན་པས༔ སྒྲིམ་ཀློད་རེས་མོས་སུ་བསྒོམ་ཞིང་སྒོམ་མཁན་ངོས་བཟུང་ངོ་༔ གཞན་ཡང་ཞི་གནས་ཀྱི་སྐྱོན་ངོས་བཟུང་ཞིང་ཐད་ཀའི་སྐྱོན་བསལ་བར་བྱའོ༔ ཞི་གནས་སྐྱོན་མེད་ནི༔ མར་མེ་རླུང་གིས་མ་བསྐྱོད་པ་ལྟ་བུ་སྟེ༔ རིག་པ་གར་བཞག་བཞག་ཏུ་གཡོ་བ་མེད་པར་བརྟན་པ༔ བྱིང་རྨུགས་འཐིབ་གསུམ་གྱིས་མ་གོས་པས་རིག་པ་གསལ་ཡེ་རེ་གསལ་བ༔ རིག་པ་གར་གཏད་དུ་ཧྲིག་གེ་བ་དེ་རྩེ་མོ་རྣོ་བ༔ གློ་བུར་གྱི་རྟོག་པས་མ་བསྐྱོད་པ་སྟེ་དྲང་བའོ༔ དེ་ལྟ་བུ་ནི་བསྒོམ་སྐྱོན་མེད་རྒྱུད་ལ་སྐྱེས་པ་ཡིན་ཏེ༔ དེ་མ་བྱུང་གི་བར་དུ་སེམས་རྣལ་དུ་ཕབ་པ་གལ་ཆེའོ༔ ཞི་གནས་མཚན་ཉིད་པ་རྒྱུད་ལ་མ་སྐྱེས་པར་རིག་པ་ངོ་སྤྲོད་ཀྱང་༔ གོ་ཡུལ་ཙམ་དུ་ལུས་ནས་ཁ་ལྟ་ལ་ཤོར་ཏེ་དྲེད་པོར་འགྲོ་ཉེན་ཡོད་པས༔ བསྒོམ་ཐམས་ཅད་ཀྱི་རྩ་བ་འདི་ལ་རག་ལུས་པ་ཡིན་པས༔ ངོ་སྤྲོད་མ་སྔ་བར་གནས་པའི་ཉམས་མྱོང་བཟང་པོ་མ་བྱུང་གི་བར་དུ་བསྒྲུབ་པར་བྱའོ༔ དེ་ཡན་ཆད་མཚན་བཅས་དང་མཚན་མ་མེད་པའི་ཁྲིད་ཀྱི་ཞི་གནས་སྒྲུབ་པའོ༔ ས་མ་ཡ༔ དེ་ལྟར་ཞི་གནས་མཚན་ཉིད་པ་རྒྱུད་ལ་མ་སྐྱེས་ཀྱི་བར་དུ་ཐབས་དུ་མས་སེམས་རྣལ་དུ་ཕབ་ཅིང་༔ དཔེར་ན་ཆུའི་ནང་དུ་བྱད་དང་གཟའ་སྐར་བལྟ་བར་འདོད་ནའང་༔ རྦ་ཀློང་དང་༔ ཆུ་རླབས་དང་༔ དྲག་ཏུ་འབབ་པའི་སར་མི་མཐོང་ཞིང་༔ ཆུ་རང་སར་དྭངས་ཤིང་གཡོ་མེད་དུ་འཁྱིལ་བའི་ནང་དུ་བལྟས་པས་གསལ་བར་མཐོང་བ་བཞིན་དུ་འདིར་ཡང་སེམས་ཡུལ་གྱི་རླུང་གི་རྟ་ལ་བསྐྱོད་ནས༔ རྟོག་པ་འཚུབས་པའི་དུས་སུ་རིག་པ་ངོ་སྤྲོད་ཀྱང་ངོ་མི་འཕྲོད་དེ༔ སེམས་རང་དབང་མེད་པར་རྣམ་རྟོག་གིས་བསྐྱོད་ནས་རང་ངོ་མི་མཐོང་བའི་ཕྱིར་རོ༔ དེའང་ཁྲིད་ལུགས་ལ་ལའི་ཕྱག་བཞེས་ལ༔ སྔོན་ལ་ལྟ་བ་ངོ་སྤྲད་ནས་ལྟ་ཐོག་ནས་སྒོམ་བཙལ་བ་ནི་ངོ་འཕྲོད་དཀའ་བ་ཡིན་ནོ༔ འདིའི་ལུགས་ཀྱིས་སྔོན་ལ་སྒོམ་པ་གཏན་ལ་ཕབ་ནས་སྒོམ་ཐོག་ནས༔ ལྟ་བ་ངོ་སྤྲོད་པས་ངོ་མི་འཕྲོད་མི་སྲིད་པའི་གནད་ཟབ་མོ་ཡོད་པས༔ སྔོན་ལ་སེམས་རྣལ་དུ་ཕབ་ནས༔ ཞི་གནས་མཚན་ཉིད་དང་ལྡན་པ་རྒྱུད་ལ་སྐྱེས་པ་དང་༔ རིག་པ་ངོ་བསྟན་པར་བྱ་སྟེ༔ དེ་ཡང་ལུས་གནད་ཆོས་བདུན་སྔ་ལྟར་བྱས་ལ༔ མིག་མདུན་གྱི་ནམ་མཁར་སྣ་རྩེའི་ཐད་ཀྱི་བར་སྣང་ལ༔ བཙམ་བཙུམས་དང་གྱ་གྱུ་མེད་པར༔ ཅེ་རེ༔ ཧྲིག་གེ་བལྟ༔ ལྟ་སྟངས་ཀྱི་ཡོན་ཏན་ནི༔ འགྲོ་བ་ཐམས་ཅད་ཀྱི་སྙིང་གི་དཀྱིལ་དུ༔ རྩ་ཀ་ཏི་ཤེལ་གྱི་སྦུ་གུ་ཅན་ཞེས་བྱ་བ་ཡེ་ཤེས་ཀྱི་རྩ་གཅིག་ཡོད་དེ༔ དེ་ཐུར་དུ་བལྟས་ཤིང་ཁ་ཟླུམ་ན་ཡེ་ཤེས་འགྲིབ་ཅིང་གཏི་མུག་འཕེལ་བར་བྱེད་པས༔ དེས་ན་དུད་འགྲོའི་རྩ་དེ་ཐུར་ལ་བསྟན་ནས་ཟླུམ་པས་བླུན་ཞིང་གཏི་མུག་པའོ༔ མི་ལ་རྩ་དེ་འཕྲེད་ལ་ཕྱོགས་ཤིང་ཅུང་ཟད་ཁ་བྱེ་བས་མི་ཤེས་རིག་བཀྲ་ཞིང་ཤེས་པ་གསལ་བ་ཡིན་ནོ༔ གྲུབ་པ་ཐོབ་པའི་སྐྱེས་བུ་དང་བྱང་ཆུབ་སེམས་དཔའ་རྣམས་ལ་རྩ་དེ་ཁ་ཕྱེ་ནས་གྱེན་དུ་བསྟན་ནས་ཡོད་པས༔ ཏིང་ངེ་འཛིན་བསམ་གྱིས་མི་ཁྱབ་པ་དང་༔ མཁྱེན་པའི་ཡེ་ཤེས་དང་མངོན་པར་ཤེས་པ་རྒྱ་ཆེན་པོ་འཆར་བའང་༔ ཡེ་ཤེས་ཀྱི་རྩ་དེ་ཁ་ཕྱེ་བའི་ཡོན་ཏན་ལས་བྱུང་བའོ༔ དེས་ན་མིག་བཙུམས་ཙ་ན་རྩ་དེ་ཁ་ཟླུམ་ནས་ཐུར་དུ་ཕྱོགས་པས་ཤེས་པ་ནག་ཐུམ་གྱིས་གཏི་མུག་གིས་འཐིབ་པོ༔ ལྟ་སྟངས་ཧྲིག་གེ་བྱས་པས་རྩ་དེ་ཁ་གྱེན་ལ་ཁ་ཕྱེ་བས་རིག་པ་དྭངས་སྙིགས་ཕྱེད་ནས༔ གསལ་ལ་རྟོག་པ་མེད་པའི་ཏིང་ངེ་འཛིན་དང་༔ དག་པའི་མཐོང་སྣང་དུ་མར་འཆར་བར་འགྱུར་བས་ལྟ་སྟངས་གལ་ཆེའོ༔ དེའང་རྩ་ཀ་ཏི་ཤེལ་གྱི་སྦུ་གུ་ཅན་ཞེས་བྱ་བ༔ རྫོགས་པ་ཆེན་པོ་ཀློང་གསལ་ཉི་མའི་རྒྱུད་དང་༔ དགོངས་པ་རང་གྲོལ་རྣམས་ལས༔ གཞན་ཐམས་ཅད་དུ་སྦས་ནས་ཡེ་ཤེས་ཀྱི་རྩ་ཁྱད་པར་ཅན་འདི་བཤད་པ་མེད་དོ༔ འདི་ནི་དབུ་མ༔ རོ་མ༔ རྐྱང་མ༔ འཁོར་ལོ་ལྔའི་རྩ་གང་ཡང་མི་འདྲ་ཞིང་༔ གཏན་ནས་མི་གཅིག་གོ༔ དབྱིབས་ནི་གཡེར་མ་ཁ་བྱེ་ལ་ཁད་པ་ལྟ་བུ༔ ནང་དུ་ཁྲག་དང་ཆུ་སེར་གང་ཡང་མེད་པ༔ དྭངས་ཤིང་གསལ་བ་ཞིག་ཡོད་དེ༔ འདི་ལ་ཁ་འབྱེད་པར་བྱེད་པའི་ཐབས་ཁྱད་པར་ཅན༔ འོག་སྒོ་བདེ་བ་ཆེན་པོ་འདོད་ཆགས་རང་གྲོལ་གྱི་ཁྲིད་དུ་གབ་ནས་ཡོད་དོ༔ ཐེག་པ་འོག་མ་ལ་ནི་རྩ་འདིའི་མིང་ཙམ་ཡང་མེད་དོ༔ དེ་ལྟར་ལྟ་སྟངས་ཧྲིག་གེ་བའི་ངང་ལ་རིག་པ་ནམ་མཁའི་དབྱིངས་སུ་བསྒོམ་རྒྱུ་ཅི་ཡང་མེད་པ་ལ་རིག་པ་ཡེངས་མེད་ཧྲིག་གེ༔ གསལ་ལེ༔ རྗེན་ནེ་ཅེ་རེ་བཞག༔ གནས་བདོ་བའི་དུས་སུ༔ གནས་མཁན་གྱི་ཤེས་པ་དེ་ཅི་འདྲ་གཅིག་འདུག་བལྟ༔ ཡང་ལྷོད་དེ་ཀློད་ལ་ངལ་བསོ༔ ཡང་ཧྲིག་གེ་བཞག་ལ༔ དེའི་དུས་ཀྱི་ཤེས་པ་དེ་ལ་ཅེ་རེ་བལྟས་ལ༔ སེམས་ཀྱི་ངོ་བོ་དེ་ཅི་འདྲ་ཞིག་འདུག༔ རང་གིས་རང་ལ་ཅེ་རེ་ལྟོས༔ གསལ་ཧྲིག་གེ་བ་ཞིག་འདུག་གམ༔ ཅི་ཡང་མེད་པའི་སྟོང་པ་གཅིག་འདུག་གམ༔ ངོས་བཟུང་རྒྱུ་གཅིག་འདུག་གམ༔ ཡང་ནས་ཡང་དུ་ལྟོས་ལ་ཉམས་མྱོང་གཅིག་ཁྱེར་ལ་ཤོག༔ ཅེས་ངོ་བོ་ལ་བལྟར་འཇུག་གོ༔ དེ་ལ་ཞག་གཅིག་གོ༔ དེ་ནས་སེམས་བཙལ་དུ་འཇུག་པ་ནི༔ དེའང་འཁྲུལ་འཁོར་ལྟ་སྟངས་གོང་ལྟར་གྱིས་ལ་སེམས་མདུན་གྱི་ནམ་མཁར་ཧྲིག་གེ་ཞོག་བྱས་ནས་ཡོད་པས༔ དེ་རིང་ནས་བཞག་རྒྱུ་རང་གི་དངོས་པོ་དེ་ཅི་འདྲ་བ་འདུག་ལེགས་པར་ལྟོས༔ བཞག་མཁན་དེ་དང་བཞག་རྒྱུའི་སེམས་གཅིག་དང་གཉིས་སུ་འདུག་གམ་ལྟོས༔ གཉིས་འདུག་ན་སེམས་གཉིས་ཡོད་དགོས་པས༔ གཅིག་སངས་རྒྱས་ཙམ་ན་གཅིག་འཁོར་བར་འཁྱམས་དགོས་པས༔ གཉིས་སུ་ཨེ་འདུག་ལེགས་པར་ཐག་ཆོད་པ་གཅིག་ལྟོས༔ གཅིག་ལས་མི་འདུག་ན༔ གཅིག་པོ་དེ་སེམས་ཡིན་པར་འདུག་གམ༔ སེམས་ཟེར་བ་དེ་དོན་ལ་ཅི་འདྲ་རང་གཅིག་འདུག་ལྟོས༔ ཕྱིའི་ཡུལ་དུ་ཚོལ་བས་རྙེད་པ་ནི་མི་སྲིད་དོ༔ དེ་ཡང་སེམས་དེ་ཅི་འདྲ་གཅིག་ཡོད་དམ་སྙམ་མཁན་གྱི་ཤེས་པ་དེ་ཁོ་རང་ལ་ལྟོས་ལ་ཚོལ་ཅིག༔ སྒོམ་མཁན་གྱི་ཤེས་པ་དེ་ལ་ཅེ་རེ་ལྟོས་ལ་ཚོལ་དང་༔ དོན་ལ་སེམས་ཟེར་བ་དེ་ཡོད་པ་གཅིག་ཡིན་པར་འདུག་གམ་ལྟོས༔ ཡོད་ན་དབྱིབས་སུ་གྲུབ་དགོས་པ་ལ༔ དབྱིབས་ཅི་འདྲ་འདུག༔ ཅེར་གྱིས་ལྟོས་ལ་ཚོལ་དང་༔ ཟླུམ་པོར་འདུག་གམ༔ གྲུ་བཞི༔ ཟླ་གམ༔ གྲུ་གསུམ་ལ་སོགས་པ་གང་གི་དབྱིབས་སུ་འདུག་ལྟོས༔ ཐག་ཆོད་པ་གཅིག་ལྟོས༔ ཅིས་ཀྱང་འདུག་ཟེར་ན༔ དབྱིབས་དེ་ང་ལ་སྟོན་ཅིག་བྱ༔ བསྟན་རྒྱུ་མི་འདུག་ཟེར་ན༔ བསྟན་རྒྱུ་མེད་པའི་དབྱིབས་དངོས་པོ་ཅན་སྲིད་དམ༔ ཞེས་དབྱིབས་ཀྱིས་སྟོང་པར་ངོ་སྤྲོད༔ དེ་བཞིན་དུ༔ ཁ་དོག༔ ཆེ་ཆུང་༔ ཕྱོགས་རིས་གང་དུ་འདུག་རྩད་བཅད་དུ་བཅུག་ལ༔ དེ་རྣམས་གང་དུའང་མི་འདུག་ཟེར་ན༔ འོ་ན་ཅི་ཡང་མེད་པའི་སྟོང་པ་གཅིག་འདུག་གམ་ཚོལ་ཅིག་བྱ༔ ཅི་ཡང་མེད་པའི་སྟོང་པ་གཅིག་འདུག་ཟེར་ན༔ འོ་ན་ཅི་ཡང་མེད་པའི་སྟོང་པས་སྒོམ་ཅི་ལ་ཤེས༔ མ་རྙེད་ཟེར་རྒྱུུ་ཅི་ལ་ཡོད༔ ཅི་ཡང་མེད་ན་ཞེ་སྡང་སྐྱེ་མཁན་དེ་གང་ཡིན༔ སེམས་མ་རྙེད་སྙམ་མཁན་གཅིག་མི་འདུག་གམ༔ དེ་ཀ་རང་ལ་ཅེ་རེ་ལྟོས༔ དེ་ཅི་འདྲ་བ་གཅིག་འདུག༔ མ་རྙེད་ན་གང་ན་ཡོད་སྙམ་མཁན་གྱི་ཤེས་པ་དེ་སེམས་ཡིན་པར་འདུག་གམ༔ ལེགས་པར་ལྟོས༔ ཡིན་པར་འདུག་ན་ཅི་འདྲ་ཅིག་འདུག༔ ཡོད་ན་དངོས་པོ་དང་ཁ་དོག་ཀྱང་དགོས་ཏེ༔ ཁྱེར་རྒྱུ་འདུག་གམ༔ མེད་ན་བསམ་མེད་རོ་དང་འདྲ་སྟེ༔ དྲན་མཁན་གཅིག་མི་འདུག་གམ༔ དེས་ན་ཡོད་མེད་ཀྱི་མཚམས་སུ་ཅི་འདྲ་འདུག་ཐག་ཆོད་པར་ལྟོས༔ ཞེས་འཇུར་ལ་དྲང་༔ དེས་བློའི་ཁྱད་པར་གྱིས༔ ལ་ལས་ཡོད་མེད་གཉིས་གའི་མཚམས་སུ་ཅི་ཡང་མ་རྙེད་ཟེར་ན༔ མ་རྙེད་སྙམ་མཁན་གྱི་སེམས་དེ་ལ་ལེགས་པར་ལྟོས་ལ༔ ཧྲིག་གེ་བ་གཅིག་འདུག་གམ༔ གསལ་བ་གཅིག་འདུག༔ སྟོང་ལྷང་ངེ་བ་གཅིག་འདུག་གམ་ལྟོས་ཤིག་བྱ༔ ཡེ་རེ་བ་ཅིག་འདུག་ཟེར་ན༔ ཞི་གནས་ཡིན་པས༔ དེས་མི་འོང་༔ རིག་པ་རྩད་ཆོད་ལ༔ ངོ་བོ་གཅིག་ཁྱེར་ལ་ཤོག་ཅིག་བྱ༔ སྟོང་པ་གཅིག་འདུག་ཟེར་ན༔ ཕྱོགས་གཅིག་ཡིན་པས་རིག་པ་ཚོལ་དུ་བཅུག་གོ༔ ཧྲིག་གེ་བ་འདྲ་བ་གསལ་ལེ་བ་འདྲ་བའི་ཤེས་པ་གཅིག་འདུག་སྟེ༔ སྨྲ་མི་བཏུབ་ཟེར་ན་ཅུང་ཟད་ངོ་འཕྲོད་པས༔ ཐག་ཆོད་པ་དང་ངོ་སྤྲད་པར་བྱའོ༔ ཆོས་ཐུན་ཞག་གཅིག་གམ་ཅི་རིགས་པར་བྱའོ༔ ད་ནི་རིག་པ་ངོ་སྤྲོད་པ་ནི༔ སློབ་མ་ཐམས་ཅད་མདུན་དུ་རྣམ་སྣང་ཆོས་བདུན་དང་ལྡན་པས༔ ལུས་གནད་བཅའ་རུ་བཅུག་ལ༔ ད་ཁྱེད་རང་རྣམས་རིག་པ་མདུན་གྱི་ནམ་མཁའ་ལ༔ བཟོ་མེད་དུ་ཅེ་རེ༔ ཡེངས་མེད་དུ་ཧྲིག་གེ༔ དམིགས་མེད་དུ་གསལ་ལེ་བ༔ འདི་ཀའི་ངང་དུ་ཞོག་ཅིག་བྱ༔ དེ་ལྟར་བཞག་པའི་དུས་སུ༔ བློ་ཁྱད་ཀྱིས༔ ལ་ལ་རྟོག་མེད་དུ་རྗེན་ནེ༔ སྤྲོས་མེད་ཀྱི་དོན་གཅིག་རྒྱུད་ལ་སྐྱེས༔ ལ་ལ་རིག་ཐོག་ཏུ་ཧྲིག་གེ་བ༔ ལ་ལ་སེམས་ཅང་མེད་སྟོང་པ་མ་ཡིན་པ༔ སྟོང་པའི་རང་མདངས་ཧྲིག་གེ་བ་འདི་རིག་པ་ཁོ་ན་ཡིན་པར་འདུག༔ སེམས་ཀྱི་ངོ་བོ་ཡིན་པར་འདུག༔ སྙམ་པའི་རྟོག་པ་འཆར༔ ལ་ལ་གསལ་ཧྲིག་གེ་བའི་ཉམས་འཆར༔ ལ་ལ་སྟོང་ཕྱང་ཕྱང་བའི་ཉམས་འཆར༔ ལ་ལ་སྣང་སེམས་འདྲེས་ནས་སྣང་བ་ཕྱིར་མ་ལུས༔ རིག་པ་ནང་དུ་མ་ལུས་པར་དབྱེར་མེད་དུ་ཕྱལ་ལེ་བའི་ཉམས་འཆར༔ དེ་ལ་སོགས་པའི་ཉམས་སྣང་སྣ་རེ་མི་འཆར་མི་སྲིད་དོ༔ དེའི་དུས་སུ་བླ་མའི་འདི་སྐད་ངོ་སྤྲད་དེ༔ འོ་དེ་ལྟར་སེམས་མ་བཅོས་པར་ལྷན་ནེ་བཞག་པའི་དུས་ཀྱི་ཤེས་པ་འདི་ལ༔ ཅེ་རེ་ལྟོས་ཤིག༔ ཁྱེད་རང་རྣམས་ཀྱི་སེམས་རྣམ་རྟོག་རང་སར་ཞི་ནས༔ མ་བཅོས་པའི་ངང་ལ་ལྷན་ནེ་གནས་པ་གཅིག་མི་འདུག་གམ༔ འོ་འདི་ལ་ཞི་གནས་ཞེས་བྱ་བ་ཡིན་ཏེ༔ སེམས་ཀྱི་ངོ་བོ་མ་ཡིན་ནོ༔ ད་ཁྱེད་ཀྱི་སེམས་གནས་མཁན་གྱི་ངོ་བོ་ཁོ་རང་ལ་ཅེ་རེ་ལྟོས་དང་༔ དངོས་པོ་དབྱིབས་དང་ཁ་དོག་ཅིའི་ངོ་བོར་ཡང་མ་གྲུབ་པའི་ཅི་ཡང་མེད་པའི་སྟོང་ལྷན་ནེ་བ་གཅིག་མི་འདུག་གམ༔ འདི་ལ་ངོ་བོ་སྟོང་པ་ཞེས་པ་ཡིན་ནོ༔ སྟོང་པ་དེའི་གདངས་མ་འགགས་པར་གསལ་བ་འདྲ་བ༔ སང་ངེ་བ་འདྲ་བ༔ འོལ་ལེ་གསལ་བ་གཅིག་མི་འདུག་གམ༔ འདི་ལ་རང་བཞིན་གསལ་བ་ཞེས་བྱ་བ་ཡིན་ནོ༔ ངོ་བོ་ཅིར་ཡང་མ་གྲུབ་པའི་སྟོང་སང་ངེ་བ་དང་༔ དེའི་གདངས་མ་འགགས་པར་སལ་ལེ་བ་དེ་གཉིས་དབྱེར་མི་བྱེད་པར༔ ཧྲིག་གེ་བ་འདྲ་བ༔ ལྷང་ངེ་བ་འདྲ་བའི་རིག་པ༔ ཡོད་རྒྱུ་གཅིག་ཡོད་ལ༔ ཁར་དངོས་སུ་སྨྲ་རྒྱུ་མ་རྙེད་པའི་ཤེས་པ༔ ད་ལྟའི་ཧྲིག་གེ་བ་འདི་ལ་རིག་པ་ཞེས་མིང་དུ་བཏགས་པ་ཡིན་ནོ༔ བསམ་པར་བྱེད་པའི་མཁན་པོའང་འདི་ཁོ་ན་ཡིན་པས༔ སེམས་ཞེས་མིང་དུ་བཏགས་པ་ཡིན༔ མི་དྲན་དགུ་དྲན་གྱི་མཁན་པོའང་འདི་ཡིན་པས༔ དྲན་པ་ཞེས་མིང་དུ་བཏགས་པ་ཡིན༔ མཐོང་རྒྱུ་མེད་བཞིན་དུ་གསལ་ཧྲིག་གེ༔ རྗེན་ནེ་ཅེ་རེ༔ ལྷག་གེ་མཐོང་བས་ལྷག་མཐོང་ཞེས་མིང་དུ་བཏགས་པ་ཡིན༔ བྱེ་བྲག་ཐམས་ཅད་དུ་ཤྭ་མང་གི་སུལ་བཞིན་འབྱེད་པར་བྱེད་པའི་མཁན་པོའང་འདི་ཡིན་པས༔ སོ་སོར་རྟོག་པའི་ཤེས་རབ་ཅེས་མིང་དུ་བཏགས་པ་ཡིན༔ དེ་ལ་སོགས་པ༔ བདེ་གཤེགས་སྙིང་པོ༔ ཐིག་ལེ་ཉག་གཅིག༔ དབྱིངས་དང་ཡེ་ཤེས༔ དབུ་མ༔ དོན་དམ་པའི་བདེན་པ༔ ཕྱག་རྒྱ་ཆེན་པོ༔ རྫོགས་པ་ཆེན་པོ༔ སྟོང་པ་ཉིད་ལ་སོགས་པ༔ ཐམས་ཅད་འདི་གཅིག་པུའི་མིང་ཡིན་མོད༔ རིག་པ་ཧྲིག་གེ་བ་འདི་ཡོད་པས༔ མིག་གིས་གཟུགས་མཐོང་མཁན་ཡང་འདི་ཡིན༔ རྣ་བས་སྒྲ༔ སྣས་དྲི༔ ལྕེས་རོ་ལ་སོགས་པ་མྱོང་མཁན༔ ཚོར་མཁན་ཐམས་ཅད་ད་ལྟའི་ཤེས་རིག་གསལ་བ་འདི་ཁོ་ན་ཡིན་མོད༔ འོ་སྐོལ་རྣམས་ལ་འདི་ཡོད་པས་དགའ་བ་དང་༔ མི་དགའ་བ་དང་༔ འདོད་ཆགས་དང་༔ ཞེ་སྡང་ལ་སོགས་པ་སྣ་ཚོགས་སུ་འཆར་བ༔ ཤེས༔ དྲན༔ རིག་པའི་ཕྱིར༔ སེམས་ཅན་ཞེས་མིང་དུ་བཏགས་པའོ༔ འདི་མངོན་སུམ་དུ་དྲན་རིག་རྒྱུན་མ་ཆད་པར་ཡོད་ཀྱང་༔ ཁོ་རང་གིས་ཁོ་རང་ངོ་མ་ཤེས་པ་ལ་ལྷན་ཅིག་སྐྱེས་པའི་མ་རིག་པ་ཞེས་མིང་དུ་བཏགས་པའོ༔ དེ་ཡང་ཅི་ལྟར་མ་རིག་ན་མིག་གིས་ཕར་ཐམས་ཅད་མཐོང་ཡང་༔ ཚུར་ཁོ་རང་གིས་ཁོ་རང་མ་མཐོང་བ་ལྟར༔ སེམས་ཁོ་རང་གིས་ཁོ་རང་མ་མཐོང་༔ མ་རིག་མ་ཤེས་པས༔ མ་རིག་པ་ཞེས་བྱའོ༔ རང་གིས་རང་ལྷང་གི་ཤེས་པ་ལ་རིག་པ་ཞེས་བྱ༔ ཡེ་ཤེས་ཞེས་བྱ༔ མདོར་ན་ད་ལྟ་རང་ཐ་མལ་རང་ཁ་མ་ལ་གནས་པའི་དུས་ཀྱི་ཤེས་པ་གསལ་ཧྲིག་གེ་བ་འདི་ཁོ་ན་ཡིན་ནོ༔ འདི་ལ་དབྱིབས་ཁ་དོག་ཅིའི་ངོ་བོར་ཡང་མ་གྲུབ་པས༔ རྟག་པའི་མཐའ་དང་བྲལ༔ མེད་བཞིན་དུ་ཧྲིག་གེ་གསལ་བ༔ སུས་ཀྱང་མ་བྱས་པའི་རང་བཞིན་གྱིས་འོད་གསལ་བས་ཆད་པའི་མཐའ་དང་བྲལ༔ དུས་འདི་ཙམ་ནས་བྱུང་༔ རྒྱུ་རྐྱེན་འདི་ལས་བྱུང་བྱ་བ་མེད་པས༔ སྐྱེ་བའི་མཐའ་དང་བྲལ༔ དུས་འདི་ཙམ་ནས་སེམས་ཤིའམ་འགག་བྱ་བ་མེད་པས༔ འགག་པའི་མཐའ་དང་བྲལ༔ མེད་བཞིན་འགག་མེད་ཀྱི་རྩལ་ཅིར་ཡང་འཆར་བས༔ གཅིག་གི་མཐའ་དང་བྲལ༔ སྣ་ཚོགས་སུ་འཆར་ཡང་རང་བཞིན་མེད་པར་གྲོལ་བས༔ དུ་མའི་མཐའ་དང་བྲལ༔ དེ་བས་ན་མཐའ་བྲལ་གྱི་ལྟ་བ་ཞེས་བྱ༔ རྒྱ་ཆད་ཕྱོགས་ལྷུང་དང་བྲལ་བ་ཞེས་བྱ༔ འདི་ཁོ་ན་སངས་རྒྱས་ཀྱི་ཐུགས་ཞེས་བྱ༔ སེམས་ཅན་གྱི་སེམས༔ སངས་རྒྱས་མཁན༔ འཁོར་བར་འཁྱམས་མཁན༔ བདེ་སྡུག་མྱོང་མཁན་ཐམས་ཅད་འདི་ཁོ་ན་ཡིན་མོད༔ འདི་མེད་ན་འཁོར་འདས་བདེ་སྡུག་ཅི་ཡང་མྱོང་མཁན་མེད་པས༔ ཆད་ལྟ་ཧམ་ཆད་དུ་ཐལ་བར་འགྱུར་རོ༔ དེ་ཡང་འདི་ཁོ་ན༔ སུས་ཀྱང་མ་བྱས་པར་རང་བྱུང་ཡེ་ནས་ལྷུན་གྱིས་གྲུབ་པས༔ ཡེ་ཤེས་ཞེས་བྱ༔ དེ་ལྟ་བུའི་རིག་པ་འདི༔ བླ་མའི་གདམས་ངག་ཟབ་ནས་བྱུང་བའང་མ་ཡིན༔ ཁྱེད་རང་རྣམས་རིག་པ་རྣོ་བ་ལས་བྱུང་བའང་མ་ཡིན༔ སེམས་ཁོ་རང་ཡེ་གདོད་མ་ནས་ཁོ་རང་གི་གཤིས་དེ་ཀ་ལྟར་ཡོད་པ་ཡིན་ཡང་༔ སྔར་ལྷན་ཅིག་སྐྱེས་པའི་མ་རིག་པས་བསྒྲིབས་ནས་ངོ་མ་ཤེས༔ ཐག་མ་ཆོད༔ ཞེ་མ་ཚིམ༔ ཡིད་མ་ཆེས་པས༔ ད་བར་འཁྲུལ་བ་ཡིན་ནོ༔ ད་ནི་ནོར་བདག་པོ་ལ་འཕྲོད༔ རང་ངོ་རང་གིས་ཤེས༔ རང་(མཚན་)རང་གིས་རིག༔ སེམས་ངོ་འཕྲོད་པ་ཞེས་བྱ་བ་ཡིན་ནོ༔ དེ་ཡང་སེམས་སྟོང་པ་ཅང་མེད་ཡེ་མེད་ཡིན་ན་འཁོར་བར་འཁྱམས་ནས༔ སྡུག་བསྔལ་མྱོང་མཁན་སུས་བྱེད༔ སངས་རྒྱས་ནས་མཁྱེན་པའི་ཡེ་ཤེས༔ བརྩེ་བའི་ཐུགས་རྗེ༔ མཛད་པའི་ཕྲིན་ལས་ཅི་ལ་བྱུང་༔ དེ་ཐམས་ཅད་གསལ་རིག་སྟོང་གསུམ་དབྱེར་མེད་པའི་རིག་པ་ཧྲིག་གེ་བ་འདི་ཁོ་ནས་མྱོང་ཞིང་བྱས་པ་ཡིན་ཏེ༔ ཡེ་ཤེས་མིག་གཅིག་དྲི་མ་མེད་བྱ་བའང་འདི་ལ་ཟེར༔ ཤེས་རབ་ཆེན་པོས་སྐད་ཅིག་ལ༔ ཆོས་ཀུན་ཁོང་དུ་ཆུད་པར་འཆང་༔ ཞེས་པ་དང་༔ སྣ་ཚོགས་གཟུགས་ཅན་ཡིད་ལས་སྐྱེས༔ ཞེས་པའང་འདི་ཁོ་ན་ཡིན༔ སོ་སོ་རང་རིག་ཡེ་ཤེས་སྤྱོད་ཡུལ་བ༔ ཞེས་པ་དང་༔ གཞན་ཡང་ཡིད་ཆེས་པའི་ལུང་ནི༔ བལྟས་པས་གྲོལ་བ་ཚིག་གསུམ་པའི་རྒྱུད་ལས༔ ཀྱེ་གསང་བའི་བདག་པོ་ཉོན་ཅིག༔ རང་གི་ཤེས་རིག་གི་ངོ་བོ་སང་ངེ་བ༔ དངོས་པོ་དང་ཁ་དོག་ཅིའི་ངོ་བོར་ཡང་མ་གྲུབ་པ༔ སྟོང་སང་ངེ་བ་འདི༔ སངས་རྒྱས་ཀུན་ཏུ་བཟང་མོ་ཡིན་ནོ༔ རང་གི་ཤེས་རིག་གི་ངོ་བོ་སྟོང་བདོ་ཙམ་ན༔ སྟོང་པ་ཕྱང་ཆད་དུ་མ་སོང་བར་རང་གི་ཤེས་རིག་མ་འགགས་པར་ཝ་ལེ་གསལ་བ་འདི་ཀ༔ སངས་རྒྱས་ཀུན་ཏུ་བཟང་པོ་ཡིན་ནོ༔ རང་གི་རིག་པ་དངོས་པོ་ཅིར་ཡང་མ་གྲུབ་པའི་ངོ་བོ་སྟོང་པ་དང་༔ རང་གི་ཤེས་རིག་ཝ་ལེ་གསལ་བར་འདུག་པ་འདི་གཉིས་དབྱེར་མི་ཕྱེད་པར་འདུག་པས༔ སངས་རྒྱས་ཆོས་ཀྱི་སྐུ་ཡིན་ནོ༔ རང་གི་རིག་པ་གསལ་སྟོང་༔ དབྱེར་མེད་འོད་ཀྱི་ཕུང་པོ་ཆེན་པོར་བཞུགས་པ་འདི་ལ༔ སྐྱེ་འཆི་མེད་པས༔ སངས་རྒྱས་འོད་མི་འགྱུར་བ་འདི་ཡིན་ནོ༔ དེ་ངོ་ཤེས་པས་ཆོག་གོ༔ ཞེས་གསུངས་པ་དང་༔ ཡང་༔ ཀྱེ་གསང་བའི་བདག་པོ༔ ཁྱོད་མ་ཡེངས་པར་གསོན་ཅིག༔ རང་གི་ཤེས་རིག་ཝ་ལེ་བ་འདི་སངས་རྒྱས་ཡིན་པས༔ སངས་རྒྱས་གཞན་ནས་བཙལ་དུ་མེད་དོ༔ རང་གི་རིག་པ་ཝ་ལེ་ཁྱུག་གེ་བ་འདི་རྒྱུན་དུ་གསལ་བས༔ སངས་རྒྱས་ཆོས་ཀྱི་སྐུ་ལ་བསྒོམ་སྒྲུབ་བྱར་མེད་དོ༔ རང་གི་རིག་པ་ཆོས་ཀྱི་སྐུ་ལ་སྐྱེ་ཤི་མེད་པས༔ ལས་ལ་དགེ་སྡིག་མེད་དོ༔ ཞེས་གསུངས་པ་དང་༔ ཡང་༔ ཀྱཻ་གསང་བའི་བདག་པོ༔ རང་གི་རིག་པ་འགག་པ་མེད་པར་ཝ་ལེ་བ་གསལ་ཞིང་འདུག་པ་འདི་ཀ་སངས་རྒྱས་ཡིན་ནོ༔ རང་གི་རིག་པ་འགག་པ་མེད་པར་གསལ་བ་འདི་དང་འབྲལ་བ་མེད་པས༔ སངས་རྒྱས་ཆོས་ཀྱི་སྐུ་ལ་བསྒོམ་དུ་མེད་དོ༔ རང་གི་རིག་པ་ཝལ་ལེ་གསལ་བ་འདི་སངས་རྒྱས་ཡིན་པར་རང་གིས་དེ་ངོ་ཤེས་པས་ཆོག་གོ༔ ཞེས་པ་དང་༔ ལུང་ཡེ་ཤེས་མར་མེའི་རྒྱུད་ལས༔ ཀྱཻ་གསང་བའི་བདག་པོ་ཁྱོད་ཉོན་ཅིག༔ རང་གི་སྙིང་གི་དཀྱིལ་ན་ཡང་དག་པར་རྫོགས་པའི་སངས་རྒྱས༔ རིག་པ་གསལ་ལ་མ་འགག་པ་ཆོས་ཀྱི་སྐུ༔ ལྷུན་གྲུབ་ཡེ་ཤེས་ཀྱི་ཁ་མིག་ཅན་དུ་བཞུགས་སོ༔ གསང་བའི་བདག་པོ༔ རང་གི་སྙིང་གི་དཀྱིལ་ན༔ ཆོས་ཀྱི་སྐུ་མཚན་མར་མ་གྲུབ་པས་སྟོང་པར་བཞུགས་སོ༔ རིག་པ་མ་འགགས་པས༔ གསལ་བར་བཞུགས་སོ༔ སྒྲིབ་པ་མེད་པར་ཟང་ཐལ་དུ་བཞུགས་སོ༔ ལྷུན་གྱིས་གྲུབ་པས་ཕྱོགས་མེད་དུ་འཆར་གཞི་མ་འགགས་པར་བཞུགས་སོ༔ གསང་བའི་བདག་པོ༔ ཆོས་སྐུ་མཚན་མར་མ་གྲུབ་པར་སྟོང་པར་བཞུགས་པ་ནི༔ རང་གི་ཤེས་རིག་གི་ངོ་བོ་སང་ངེ་པ་དེ་དང་༔ དངོས་པོ་དང་ཁ་དོག་ཅིའི་ངོ་བོར་ཡང་མ་གྲུབ་པས༔ སྟོང་སང་ངེ་འདུག་པ་ཡིན་ནོ༔ ཞེས་པ་དང་༔ ཡང་༔ ཀྱཻ་གསང་བའི་བདག་པོ༔ རང་གི་སྙིང་གི་དཀྱིལ་ན༔ ཆོས་ཀྱི་སྐུ་རིག་པ་མ་འགགས་པར་གསལ་བར་བཞུགས་པ་ནི༔ རང་གི་རིག་པ་ངོ་བོ་མ་འགགས་པར་ཝལ་ལེ་གསལ་བ་འདི་ཡིན་ནོ༔ ཀྱཻ་གསང་བའི་བདག་པོ༔ རང་གི་རིག་པ་ལ་སྐྱེ་ཤི་མེད་པར་དུས་གསུམ་མཉམ་པ་ཉིད་དུ་གསལ་ལོ༔ སངས་རྒྱས་ཀྱི་སྐུ་ལ་མདུན་རྒྱབ་མེད་པས་ཡེ་ཤེས་ཟང་ཐལ་དུ་གསལ་ལོ༔ ཡེ་ཤེས་ཀྱི་མདངས་ལ་ཕྱི་ནང་མེད་པས་ཡུལ་དང་ཤེས་པ་གཉིས་མེད་དུ་གསལ་ལོ༔ མཁྱེན་པའི་ཡེ་ཤེས་ལ་ཕྱོགས་རིས་མེད་པས༔ ཡེ་ཤེས་ཀྱི་སྤྱན་ལ་ཆོས་ཐམས་ཅད་དགོངས་པ་ཉག་གཅིག་ཏུ་གསལ་ལོ༔ ཞེས་པ་དང་༔ གསང་བའི་བདག་པོ༔ ཆོས་ཀྱི་སྐུ་བརྟེན་པ་རང་གི་ལུས་ལ་བརྟེན་ནས་ཡོད་དོ༔ བཞུགས་པ་རང་གི་སྙིང་གི་དཀྱིལ་ན་བཞུགས་སོ༔ གསལ་བ་རང་གི་མིག་ནས་ཕར་གསལ་ལོ༔ སངས་རྒྱས་རང་གི་སྙིང་གི་ནང་ན་བཞུགས་ནས༔ ཤ་ཁྲག་གི་ལུས་ཀྱིས་གཏུམས་ནས་ཡོད་ཀྱང་མ་ཐུབ་བར༔ ལུས་ཀྱིས་མ་བསྒྲིབས་པར༔ དུས་གསུམ་དུ་ཟང་ཐལ་དུ་གསལ་བར་བཞུགས༔ རང་གི་རིག་པ་ལ་སྐྱེ་འཆི་མེད་པའི་ཡོན་ཏན་ཡིན༔ མཚན་མའི་ལུས་ལྔས་མ་སྒྲིབ་པར་ཟང་ཐལ་དུ་བཞུགས་སོ༔ སངས་རྒྱས་ཀྱི་སྐུ་ལ་མདུན་རྒྱབ་མེད་པའི་ཡོན་ཏན་ཡིན་ནོ༔ ལས་ལ་དགེ་སྡིག་གི་བག་ཆགས་ཀྱིས་མ་བསྒྲིབས་པར་ཟང་ཐལ་དུ་བཞུགས༔ ཡེ་ཤེས་ཀྱི་གདངས་ལ་ཕྱི་ནང་མེད་པས༔ ཡུལ་དང་ཡེ་ཤེས་ལ་གཉིས་སུ་མེད་པའི་ཡོན་ཏན་ཡིན་ནོ༔ མུན་སྣང་གི་རྐྱེན་གྱིས་མ་བསྒྲིབས་པར་ཟང་ཐལ་དུ་བཞུགས་སོ༔ ཞེས་གསུངས་པ་དང་༔ ཡང་༔ གསང་བའི་བདག་པོ༔ ལྷུན་གྱིས་གྲུབ་པ་ནི༔ རང་གི་སྙིང་གི་དཀྱིལ་ན༔ རང་གི་རིག་པ་འོད་གསལ་གྱི་ཕུང་པོར་བཞུགས་པ་ཡིན་ནོ༔ ཐམས་ཅད་དུ་འཆར་གཞི་མ་འགགས་པ་ནི༔ རང་གི་རིག་པ་མིག་ནས་ཕར་སོང་བས༔ གཟུགས་མཐོང་བ་མ་འགགས་པར་འཆར་རོ༔ རང་གི་མིག་གིས་མཐོང་བ་མ་འགགས་པ་དེ་ཀ་ཆོས་ཀྱི་སྐུའི་ཡེ་ཤེས་ཡིན་ནོ༔ རྣ་བས་སྒྲ་ཐོས་མཁན་གྱི་རིག་པ་མ་འགགས་པ་དེ་ཀ་ཆོས་ཀྱི་སྐུ་ཡིན་ནོ༔ ལྕེས་རོ་མྱོང་བའི་མཁན་པོ་དེ་ཀ་རང་ཆོས་ཀྱི་སྐུ་ཡིན་ནོ༔ རང་གི་རིག་པ་སྣ་ནས་ཕར་སོང་བ་དེས་དྲི་མ་འགགས་པར་ཚོར༔ དྲི་ཚོར་མཁན་གྱི་རིག་པ་དེ་རང་ཆོས་སྐུ་ཡིན་ནོ༔ རང་གི་རིག་པ་ཕར་ལ་སོང་བས་ཕོ་མོའི་དབང་པོ་འཕྲོད་པས་བདེ་བ་མ་འགགས་པར་འཆར་རོ༔ བདེ་བ་མྱོང་མཁན་གྱི་རིག་པ་དེ་རང་ཆོས་ཀྱི་སྐུ་ཡིན་ནོ༔ དེ་རང་ངོ་ཤེས་པར་གྱིས་ཤིག༔ ཅེས་པ་ལ་སོགས་པ་གསུངས་སོ༔ གཞན་ཡང་རྫོགས་པ་ཆེན་པོ་ངེས་དོན་འདུས་པ་ནམ་མཁའ་དང་མཉམ་པའི་རྒྱུད་ལེའུ་བརྒྱ་དང་བཅུ་དགུ་པ་ལས༔ མཐའ་དང་བྲལ་བའི་ཆོས་སྐུ་འདི༔ མེད་པ་མ་ཡིན་དྲན་ཞིང་ཚོར༔ ཆད་པ་མ་ཡིན་རིག་ཅིང་གསལ༔ རྟག་པ་མ་ཡིན་དངོས་པོ་མེད༔ གཉིས་སུ་མ་སོང་ཟླ་བོ་མེད༔ གཅིག་ཏུ་མ་སོང་ཀུན་ལ་ཁྱབ༔ ཅེས་པ་དང་༔ ཡང་༔ རང་བྱུང་སྐྱེ་མེད་རང་གསལ་ལ༔ འགགས་མེད་མི་འགྱུར་རིག་པ་དེ༔ ཡེ་ནས་གནས་པའི་དོན་ཤེས་པས༔ རྡོ་རྗེ་སེམས་དཔའི་དགོངས་པ་ཡིན༔ ཅེས་པ་དང་༔ ཡང་༔ སེམས་ཉིད་སྐྱེ་འཆི་མེད་པའི་ཕྱིར༔ ཐོག་མ་ཐ་མ་མེད་པར་གནས༔ དེ་ཕྱིར་དུས་གསུམ་མི་འགྱུར་བས༔ དངོས་མེད་ཁྱབ་པས་ནམ་མཁའ་འདྲ༔ མཐའ་ཡི་སྒྲོ་སྐུར་བྲལ་བ་ཡང་༔ ཡོད་པ་བྲལ་ཞིང་རྟག་པ་མེད༔ མེད་པ་མ་ཡིན་ཆད་པ་བྲལ༔ ཡོད་པ་མཐའ་བྲལ་རང་བྱུང་ཞིང་༔ རིག་པ་རང་གི་ངོ་བོ་ལ༔ སྐྱེ་འགགས་མེད་ཕྱིར་རང་གསལ་སྐུ༔ སང་ངེ་སལ་ལེ་ཕྱི་ནང་མེད༔ དེ་ཕྱིར་རང་རིག་ཆོས་སྐུ་ཉིད༔ ཅེས་པ་ལ་སོགས་པ་རྒྱ་ཆེར་གསུངས་སོ༔ གཞན་ཡང་ཀུན་བྱེད་རྒྱལ་པོ་ལས་ཀྱང་༔ ཀྱཻ་སེམས་དཔའ་ཆེན་པོ་ཉོན་ཅིག༔ ང་ཡི་རང་བཞིན་འདི་ལྟ་སྟེ༔ ཡོད་ནི་གཅིག་ལས་མེད་པ་སྟེ༔ བསྟན་ནི་རྣམ་པ་གཉིས་སུ་བསྟན༔ བྱུང་ནི་ཐེག་པ་དགུ་རུ་བྱུང་༔ འདུས་ནི་རྫོགས་པ་ཆེན་པོར་འདུས༔ ཡིན་ནི་བྱང་ཆུབ་སེམས་ཡིན་ཏེ༔ གནས་ནི་ཆོས་ཀྱི་དབྱིངས་ལ་གནས༔ གསལ་ནི་རིག་པའི་མཁའ་ལ་གསལ༔ ཁྱབ་ནི་སྣོད་བཅུད་ཀུན་ལ་ཁྱབ༔ བྱུང་ནི་སྣང་སྲིད་ཀུན་ཏུ་བྱུང་༔ བསྟན་དུ་མཚན་མའི་དངོས་པོ་མེད༔ མཐོངས་སུ་དམིགས་པའི་ཡུལ་དང་བྲལ༔ ཤེས་སུ་ཚིག་ཏུ་བརྗོད་དུ་མེད༔ རྒྱུ་ལས་མ་བྱུང་སྙིང་པོ་མེད༔ སྤྲོས་(སྒྲོན)ཀྱིས་བཏགས་པ་ཀུན་དང་བྲལ༔ དོན་དེ་ངེས་པར་རྟོགས་འདོད་ན༔ དཔེ་ནི་ནམ་མཁའ་ལྟ་བུར་བརྟགས༔ དོན་ནི་ཆོས་ཉིད་སྐྱེ་བ་མེད༔ རྟགས་ནི་སེམས་ཉིད་འགགས་པ་མེད༔ ནམ་མཁའ་ལྟ་བུའི་ཆོས་ཉིད་ལ༔ ནམ་མཁའ་ལྟ་བུའི་དཔེ་ཡིས་མཚོན༔ དམིགས་སུ་མེད་པའི་ཆོས་ཉིད་ལ༔ དམིགས་སུ་མེད་པས་མཚོན་ཏེ་བསྟན༔ ཚིག་ཏུ་བརྗོད་དུ་མེད་པ་ལ༔ བརྗོད་དུ་མེད་པའི་ཚིག་བརྗོད་དེ༔ དམིགས་མེད་དོན་གྱི་ངོ་བོ་བསྟན༔ འདི་ཡི་ངེས་དོན་མ་རྟོགས་ན༔ དོན་གྱི་སྒྲ་ཚིག་ཅི་བསྟན་ཡང་༔ ང་དང་འཕྲད་པར་མི་འགྱུར་ཏེ༔ ང་ལས་གོལ་ལ་ང་བསྒྲིབས་པས༔ ཆོས་ཀྱི་ངོ་བོ་ཐོབ་མི་འགྱུར༔ ཞེས་གསུངས་པ་དང་༔ ཡང་༔ བྱང་ཆུབ་སེམས་ཀྱི་རང་བཞིན་འདི་ཉིད་ནི༔ ཆོས་ཀུན་མ་ལུས་པ་ཡི་སྙིང་པོ་སྟེ༔ མ་སྐྱེས་རྣམ་པར་དག་པས་སྒྲིབས་པ་མེད༔ བགྲོད་པའི་ལམ་དང་བྲལ་བས་གོལ་ས་མེད༔ ཡེ་ནས་ལྷུན་གྱིས་གྲུབ་པས་བཙལ་མི་དགོས༔ ཞེས་པ་ལ་སོགས་པ་རྒྱ་ཆེར་གསུངས་སོ༔ རྡོ་རྗེ་བཀོད་པ་ཀུན་འདུས་རིག་པའི་མདོ་ལེའུ་བཞི་པ་ནས་ཀྱང་༔ ཆོས་ཉིད་དོན་ལ་གཞན་མེད་པས༔ རང་བྱུང་ཡེ་ཤེས་གསལ་བའོ༔ ཡིད་བཞིན་ནོར་བུ་རིན་པོ་ཆེ༔ མ་བཙལ་རང་ལ་ཡོད་པ་ཡིན༔ ཅེས་གསུངས་པ་དང་༔ ཡང་༔ ཀུན་བྱེད་རྒྱལ་པོ་ལས༔ རང་བྱུང་ཡེ་ཤེས་ཞེས་ནི་བྱ་བ་ཡང་༔ རང་བྱུང་རྒྱུ་རྐྱེན་མེད་པར་བྱུང་བ་ཡིན༔ ཡེ་ཤེས་འགག་པ་མེད་པར་གསལ་བ་ཡིན༔ ཅེས་པ་དང་༔ རྒྱུ་རྐྱེན་མེད་པའི་སྙིང་པོ་དེས༔ ཀུན་ལ་དབང་བསྒྱུར་ཐམས་ཅད་བྱེད༔ ཅེས་པ་དང་༔ ཆོས་རྣམས་ཐམས་ཅད་ང་ཡིན་པས༔ ང་ཡི་རང་བཞིན་འདི་རིག་ན༔ ཆོས་རྣམས་རང་བཞིན་རིག་པར་འགྱུར༔ ཞེས་པ་དང་༔ ང་ནི་སྟོན་པ་ཀུན་བྱེད་བྱང་ཆུབ་སེམས༔ བྱང་ཆུབ་སེམས་ནི་ཀུན་བྱེད་རྒྱལ་པོ་སྟེ༔ དུས་གསུམ་སངས་རྒྱས་བྱང་ཆུབ་སེམས་ཀྱིས་བྱས༔ ཁམས་གསུམ་སེམས་ཅན་བྱང་ཆུབ་སེམས་ཀྱིས་བྱས༔ སྣང་སྲིད་སྣོད་བཅུད་བྱང་ཆུབ་སེམས་ཀྱིས་བྱས༔ ཞེས་པ་ལ་སོགས་པ་མདོ་རྒྱུད་དུ་མ་ནས་རྒྱ་ཆེར་གསུངས་པ་ཐམས་ཅད༔ ད་ལྟའི་སེམས་གསལ་སྟོང་དུ་ཧྲིག་གེ་པ་འདི་ཁོ་ན་ལ་ཟེར་བ་ཡིན་ཏེ༔ འདི་རང་ངོ་མ་ཤེས་ཤིང་༔ འཁྲུལ་བའི་གཞིར་གྱུར་པ་ལས༔ མ་རིག་པ་ཞེས་བྱ་སྟེ༔ ཁམས་གསུམ་གྱི་སེམས་ཅན༔ འཁྲུལ་གཞི་ཞེས་མིང་དུ་བཏགས་པ་ཡིན་ཏེ༔ འདིའི་རང་ངོ་རང་གིས་ཤེས་པ་ལ༔ ཀུན་ཏུ་བཟང་པོའི་གྲོལ་གཞི་ཞེས་མིང་དུ་བཏགས་ཤིང་༔ འདི་ཉིད་གསལ་སྟོང་ལུང་མ་བསྟན་དུ་གནས་པའི་དུས་ན༔ ཀུན་གཞི་ཞེས་མིང་དུ་བཏགས་པའོ༔ དེའང་འཁོར་འདས༔ བདེ་སྡུག་ཀུན་གྱི་གཞི་ད་ལྟའི་ཤེས་རིག་གཅིག་པུ་འདི་ལས་གཞན་མེད་དེ༔ བླ་མས་ངོ་སྤྲད༔ སློབ་མས་རང་ངོ་ཤེས་ཤིང་༔ ཡིད་ཆེས་ཐག་ཆོད་པས༔ ཀུན་གཞི་རང་སར་གྲོལ་བས༔ སྐྱེ་གནས་བར་དོའི་ཁྲིད་ཡིག༔ ཀུན་གཞི་རང་གྲོལ་ཞེས་བྱ་བ་ཡིན་པས༔ དེ་བཞིན་དུ་ཤེས་པར་མཛོད་ཅིག༔ དེ་ཡན་ཆད་ཞི་གནས་བསྒྲུབ་ཅིང་༔ ལྷག་མཐོང་རིག་པའི་ཡེ་ཤེས་ངོ་སྤྲད་པའི་ཆོས་ཐུན་དང་པོའོ༔ ས་མ་ཡ༔ རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་གྱི༔ རྫོགས་རིམ་བར་དོ་དྲུག་གི་ཁྲིད་ཡིག་ལས་སྤྱི་དོན་གཉིས་པ་རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ་ཞེས་བྱ་བ་བཞུགས་སོ༔ སྤྱི་དོན་གཉིས་པ་རྨི་ལམ་བར་དོའི་ཁྲིད་ལའང་གསུམ་སྟེ༔ བག་ཆགས་མཚམས་སྦྱོར་ཞིང་འོད་གསལ་ལམ་དུ་ཁྱེར་བ་མུན་ཁང་ལ་སྒྲོན་མེ་བཏེགས་པ་ལྟ་བུའི་གདམས་ངག༔ ཉིན་པར་སྒྱུ་ལུས་ཀྱི་ཁྲིད་སྣང་བ་རང་གྲོལ་དང་༔ ནུབ་མོ་རྨི་ལམ་གྱི་ཁྲིད་འཁྲུལ་བ་རང་གྲོལ་དང་༔ རྗེས་འོད་གསལ་གྱི་ཁྲིད་གཏི་མུག་རང་གྲོལ་ལོ༔ དང་པོ་སྒྱུ་ལུས་ཀྱི་ཁྲིད་ལའང་གཉིས་ཏེ༔ མ་དག་པའི་སྒྱུ་ལུས་དང་༔ དག་པའི་སྒྱུ་ལུས་སོ༔ མ་དག་པའི་སྒྱུ་ལུས་ནི༔ དབེན་པའི་གནས་སུ༔ སྟན་བདེ་བ་ལ་འདུག་སྟེ༔ ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཐོབ་པར་བྱ༔ དེའི་ཆེད་དུ་བདག་གིས་སྒྱུ་ལུས་སྣང་བ་རང་གྲོལ་གྱི་ཁྲིད་བསྒོམ་པར་བྱ་སྙམ་དུ་སེམས་བསྐྱེད༔ དེ་ནས༔ བདག་གི་སྒྱུ་ལུས་འབྱོངས་པར་བྱིན་གྱིས་བརླབ་ཏུ་གསོལ༔ སྒྱུ་མ་ལྟ་བུའི་ཏིང་ངེ་འཛིན་རྟོགས་པར་བྱིན་གྱིས་བརླབ་ཏུ་གསོལ༔ ཞེས་གསོལ་བ་གདབ་བོ༔ འདི་ལྟར་གྱི་སྣང་བ་ཐམས་ཅད་མེད་པ་ལ་ཡོད་པར་སྣང་བས༔ དཀར་དམར་སྣ་ཚོགས་སུ་གྲུབ་པ༔ མི་རྟག་པ་ལ་རྟག་པར་འཛིན་པ༔ མི་བདེན་པ་ལ་བདེན་པར་འཛིན་པ༔ འགྲོ་བ་རྣམས་འཆིང་བའི་རྒྱུ་འདི༔ སྒྱུ་མ་ལྟ་བུ་ཡིན་ཞེས་གསུངས་འདུག་ཀྱང་༔ འཁྲུལ་སྣང་བདེན་འཛིན་གྱི་དུས་འདིར༔ ད་ལྟར་སྣང་བ་བདེན་པར་སྣང་བ༔ འདི་རྣམས་དང་པོར་དངོས་པོ་མེད་པ་ལས་རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ། བྱུང་བས༔ ད་ལྟ་ཡང་མེད་བཞིན་དུ་སྣང་བ༔ ཐ་མར་ཡང་ཅིར་ཡང་མེད་པར་འགྲོ་ཞིང་༔ རྟག་བརྟན་ཐེར་ཟུག་ཏུ་གྲུབ་པ་མེད་པ་འདི་དག་རང་བཞིན་མེད་པས༔ སྒྱུ་མ་ལྟ་བུ་ཡིན་སྙམ་དུ་བསམ་ཞིང་༔ དེ་ནས་རང་གི་མདུན་དུ་ཤིང་ཁྲུ་གང་བ་ཙམ་གཅིག་ལ༔ མེ་ལོང་ཤིན་ཏུ་གསལ་བ་གཅིག་བཏགས་ལ༔ རང་ཁྲུས་དང་རྒྱན་གྱིས་སྤྲས་པའི་གཟུགས་མེ་ལོང་དུ་འཆར་བ་ལ་བལྟ་ཞིང་༔ དེ་ལ་བསྟོད་པ་ལ་སོགས་པ་བྱ་ཞིང་༔ དགའ་མི་དགའི་སེམས་ཨེ་འདུག་བལྟ༔ འདུག་ན༔ རང་གིས་རང་ལ༔ རེ་སྡུག༔ མེ་ལོང་གི་གཟུགས་བརྙན་འདྲ་བའི་ལུས་འདི༔ བསྟོད་པས་དགའ་བ་སྐྱེ་བ་ཁྱོད་རེ་འཁྲུལ༔ ལུས་འདི་ནི་རྒྱུ་རྐྱེན་རྟེན་འབྲེལ་ཚོགས་པའི་ལྟར་སྣང་ཙམ་ལས༔ དོན་ལ་ཡོད་མ་མྱོང་བས༔ བདག་ཏུ་འཛིན་ཅིང་དགའ་བ་ཅི་ལ་བྱེད༔ སྙམ་དུ་བསམ་ཞིང་མེ་ལོང་གཟུགས་བརྙན་གྱི་ལུས་དེ་ཡུན་རིང་དུ་བསྒོམ༔ ཡང་སྨད་པ་དང་སྐྱོན་མཚང་དུ་མ་བརྗོད་ལ༔ མི་དགའ་བ་འདུག་གམ་བལྟ༔ འདུག་ན་བསྟོད་སྨད་ཐམས་ཅད་ནི་བྲག་ཆ་དང་འདྲ་ཞིང་ལུས་ལ་སྙིང་པོ་མེད་པས༔ དགའ་མི་དགའི་འདུ་ཤེས་སྐྱེ་བ་འཁྲུལ་སྙམ་དུ་བསམ་ཞིང་༔ མེ་ལོང་གི་གཟུགས་བརྙན་དེ་བློ་ཡུལ་དུ་གསལ་བར་བསྒོམ༔ བསྟོད་སྨད་གཉིས་རེས་མོས་བྱ་ཞིང་རོ་སྙོམས་མོ༔ ཐུན་གཅིག་གོ༔ དེ་ནས་ངག་བྲག་ཆ་ལྟར་སྦྱང་བ་ནི༔ བྲག་ཆ་ཡོད་པའི་གནས་སུ་གྲོགས་མེད་པར་ཕྱིན་ལ༔ ལེགས་ཉེས་བཟང་ངན་གྱི་སྐད་ཆེན་པོ་བརྗོད་པས༔ ཚུར་ལན་མོ་བྱུང་བ་དང་༔ བྲག་ཆའི་སྒྲ་དེ་ལ་གྲགས་སྟོང་འཛིན་པ་མེད་པ་ལྟར༔ རང་གི་ངག་ཀྱང་བྲག་ཆ་ལྟར་སྦྱོང་ངོ་༔ ཡིད་སྨིག་རྒྱུ་ལྟར་སྦྱང་བ་ནི༔ སྨིག་རྒྱུ་ལ་ལྟ་བའམ་བསྒོམ་ཞིང་བཙལ་བས་མ་རྙེད་པ་ལྟར༔ ཡིད་གཡོ་བའི་རྟོག་ཚོགས་ཐམས་ཅད་ཀྱང་སྨིག་རྒྱུ་ལྟར་རང་བཞིན་མེད་པར་སྦྱང་༔ ཐུན་གཉིས་པའོ༔ དེ་ནས་མེ་ལོང་གི་གཟུགས་བརྙན་དེ་རང་གི་ལུས་ལ་བསྟིམ་ལ༔ ལུས་སྣང་ལ་རང་བཞིན་མེད་པར་བསྒོམ་ཞིང་༔ སྐབས་སུ་འདི་ལྟར་བསམ་སྟེ༔ བཅོམ་ལྡན་འདས་ཐུབ་པ་ཆེན་པོས༔ ཆོས་ཐམས་ཅད་སྒྱུ་མའི་དཔེ་བཅུར་གསུངས་ཏེ༔ འདུས་བྱས་ཀྱི་ཆོས་ཐམས་ཅད་ནི་སྒྱུ་མ་ལྟ་བུ༔ སྨིག་རྒྱུ་ལྟ་བུ༔ རྨི་ལམ་ལྟ་བུ༔ གཟུགས་བརྙན་ལྟ་བུ༔ དྲི་ཟའི་གྲོང་ཁྱེར་ལྟ་བུ༔ བྲག་ཆ་ལྟ་བུ༔ ཆུ་ཟླ་ལྟ་བུ༔ ཆུ་བུར་ལྟ་བུ༔ མིག་ཡོར་ལྟ་བུ༔ སྤྲུལ་པ་ལྟ་བུ་ཡིན་ཏེ༔ བདེན་པར་གྲུབ་པ་མེད་སྙམ་དུ་བསམ༔ སྐབས་སུ་གྲོགས་ཡོད་ན་དངོས་སུ་སྨྲ་བཅུག་པའམ༔ མེད་ན་ཡིད་ཀྱིས༔ རང་ལ་བསྟོད་པ་དང་བཀུར་སྟི་མང་པོ་བྱེད་པར་བསྒོམ༔ དགའ་བའི་རྟོག་པ་སྐྱེས་ན་བདེན་མེད་དུ་རོ་སྙོམས༔ ཡང་༔ སྨད་པ་དང་༔ འཕྲོག་བཅོམ་བརྡུང་བཙོག་བྱེད་པར་བསྒོམ༔ མི་དགའ་བ་སྐྱེས་ན་བདེན་མེད་དུ་རོ་སྙོམས་ཤིང་༔ མེ་ལོང་གི་གཟུགས་བརྙན་ལ་བསྟོད་སྨད་བྱེད་པ་དང་ཁྱད་པར་མེད་པར་བསྒོམ་ཞིང་རོ་སྙོམས༔ དངོས་སུ་ཡང་བསྟོད་སྨད་ཀྱི་བྱ་བ་བྱུང་དུས༔ མེ་ལོང་གི་གཟུགས་བརྙན་ལྟར་རོ་སྙོམས༔ གལ་ཏེ་ཆགས་སྡང་སྐྱེས་ན༔ གོང་གི་དམིགས་པ་ལ་ཡུན་རིང་དུ་སྦྱང་ངོ་༔ དེ་ལྟར་ཆོས་བརྒྱད་ཐམས་ཅད་སྒྱུ་མའི་དཔེ་བཅུ་དང་འདྲ་བར་རྒྱུད་ལ་སྐྱེས་ན༔ མ་དག་པའི་སྒྱུ་ལུས་འབྱོངས་པའོ༔ ཐུན་གསུམ་པའོ༔ གཉིས་པ་དག་པའི་སྒྱུ་ལུས་སྦྱང་བ་ནི༔ སེམས་བསྐྱཻད་གོང་ལྟར་བྱས་ཏེ༔ ལུས་སྐྱིལ་ཀྲུང་གིས་འདུག་ལ༔ བླ་མ་ཁྲིའི་སྟེང་དུ་རང་གི་ཡི་དམ་མམ༔ རྡོ་རྗེ་སེམས་དཔའི་ཆ་ལུགས་རྒྱན་དྲུག་གིས་སྤྲས་ཏེ་བཞུགས་ལ༔ སློབ་མ་རྣམས་ཤེལ་མིག་ལ་སྦྱར་ལ༔ རྡོ་རྗེ་སེམས་དཔའི་སྐུ་ལ་བལྟས་པས༔ འཇའ་འོད་སྣ་ལྔ་ལས་གྲུབ་པའི་རྡོ་རྗེ་སེམས་དཔའི་སྐུ་གཉིས་བརྩེགས་གསུམ་བརྩེགས་ལ་སོགས་པ་འཆར་རོ༔ སྣང་ལ་རང་བཞིན་མེད་པའི་སྐུ་དེ་བློ་ཡུལ་དུ་ལམ་མེ་བསྒོམ་མོ༔ ཐུན་བཞི་པའོ༔ དེ་ནས་ལྷ་སྐུ་སྣང་ལ་རང་བཞིན་མེད་པའི་སྐུ་དེ་ཡང་༔ བློ་ཡུལ་དུ་གསལ་བར་བྱུང་བ་དང་༔ རང་གི་ལུས་ལ་བསྟིམ་ཞིང་༔ རང་རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ། ལུས་དེ་ལྟར་གསལ་བར་འབྱོངས་པ་དང་༔ སྣོད་བཅུད་ཐམས་ཅད་དེ་ལྟར་བསྒོམ་ཞིང་གསལ་བར་འབྱོངས་ཙམ་ན༔ དག་པའི་སྒྱུ་ལུས་འབྱོངས་པ་ཡིན་ཏེ༔ བར་དོར་ཞི་ཁྲོའི་སྐུ་ཤར་བའི་དུས་སུ་གྲོལ་བར་ཐག་ཆོད་པས༔ སྐྱེ་གནས་བར་དོའི་ཉམས་ལེན་གྱི་དངོས་གཞི་ཡང་འདི་ཁོ་ན་ཡིན་ལ༔ རྨི་ལམ་བར་དོ་དང་ཆོས་ཉིད་བར་དོའི་སྔོན་འགྲོ་ནི་འདི་ཁོ་ན་ལ་རག་ལས་པས༔ ཤིན་ཏུ་འབད་པར་བྱའོ༔ མ་དག་པའི་སྒྱུ་ལུས་ནི༔ སྲིད་པ་བར་དོའི་སྔོན་འགྲོར་ཡང་གཅེས་པས༔ སྒྱུ་ལུས་གཉིས་པོ་འདི་བར་དོའི་ཉམས་ལེན་དངོས་གཞིའོ༔ སྒྱུ་ལུས་ཞེན་པ་རང་གྲོལ་གྱི་ཁྲིད༔ ས་མ་ཡ༔ དེ་ནས་མཚན་མོའི་ཁྲིད་རྨི་ལམ་འཁྲུལ་བ་རང་གྲོལ་གྱི་ཁྲིད་ལ་གསུམ་སྟེ༔ རྨི་ལམ་བཟུང་བ༔ སྤྲུལ་ཞིང་བསྒྱུར་བ༔ རྨི་ལམ་གྱི་གེགས་བསལ་བའོ༔ དང་པོ་རྨི་ལམ་བཟུང་བ་ནི༔ རྨི་ལམ་བག་ཆགས་ཁྲིད་པ་ཡིན་པས༔ ཉིན་པར་གྱི་སྣང་བ་ཐམས་ཅད་རྨི་ལམ་ལྟ་བུ༔ སྒྱུ་མ་ལྟ་བུར་སྦྱང་བར་བྱ་སྟེ༔ ཕར་ཕྱིན་ལས༔ ཆོས་རྣམས་ཐམས་ཅད་རྨི་ལམ་ལྟ་བུ༔ སྒྱུ་མ་ལྟ་བུའོ༔ ཞེས་གསུངས་པ་ལྟར་ཁོང་དུ་ཆུད་པར་བྱ་ཞིང་༔ ཁྱད་པར་དུ༔ ཉིན་སྣང་སྒྱུ་ལུས་ཀྱི་ཁྲིད་ལ་སྦྱང་བ་གཅེས་ཤིང་༔ འདིའི་སྐབས་སུ༔ ཡུལ་དང་གྲོང་ཁྱེར་ཁང་ཁྱིམ༔ གྲོགས་དང་གླེང་བརྗོད་བྱ་བྱེད་ཐམས་ཅད་རྨི་ལམ་ཡིན་ནོ་སྙམ་པའི་འདུན་པ་དྲག་པོ་བྱ༔ ངག་ཏུ་ཡང་རྨི་ལམ་ཡིན་རྨི་ལམ་ཡིན་ཞེས་བརྗོད་ཅིང་༔ རྨི་ལམ་རང་ཡིན་ནོ་སྙམ་པའི་འདུན་པ་དྲག་པོ་རྒྱུན་ཆགས་སུ་བྱའོ༔ དེ་ནས་སྲོད་ལ་ཉལ་བའི་དུས་སུ་ཡང་༔ ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སྒྱུ་མ་ལྟ་བུའི་ཏིང་ངེ་འཛིན་ཉམས་སུ་བླངས་ནས༔ རྫོགས་པའི་སངས་རྒྱས་ཐོབ་པར་བྱ༔ དེའི་ཆེད་དུ་རྨི་ལམ་སྦྱང་སྙམ་དུ་སེམས་བསྐྱེད་ཅིང་༔ དེ་ནས་ཉལ་བའི་དུས་སུ༔ གཞོགས་གཡས་པ་ས་ལ་ཕབ༔ མགོ་བྱང་དུ་བསྟན༔ ལག་པ་གཡས་ཀྱིས་འགྲམ་པ་སྐྱོར༔ གཡོན་པ་དཔྱིའི་སྟེང་དུ་བཞག་ལ༔ ལུས་ཡི་དམ་དུ་གསལ་ན་བསྒོམ༔ མ་གསལ་ན་ཡིན་ནོ་སྙམ་པའི་ང་རྒྱལ་བྱ༔ སྔས་སུ་རྩ་བའི་བླ་མ་བཞུགས་པ་དེའི་པང་དུ་མགོ་བཞག་པར་བསམ་ལ༔ རང་གི་མགྲིན་པར་ཨོ་རྒྱན་པདྨ་ཚོན་གང་བ་འཛུམ་མདངས་ཅན༔ སྣང་ལ་རང་བཞིན་མེད་པ་གཅིག་ཡེ་རེ་བ་ལ་སེམས་གཏད་དེ༔ རྨི་ལམ་ཟིན་པར་བྱིན་གྱིས་བརླབ་ཏུ་གསོལ༔ རྨི་ལམ་རྨི་ལམ་དུ་ངོ་ཤེས་པར་བྱིན་གྱིས་བརླབ་ཏུ་གསོལ༔ ཞེས་གསོལ་བ་ཡིད་ཀྱིས་བཏབ་ལ༔ སེང་གེའི་ཉལ་སྟབས་བྱ་སྟེ་རྨི་ལམ་རྨི་ལམ་དུ་ངོ་ཤེས་པར་བྱའོ་སྙམ་པའི་འདུན་པ་དྲག་པོའི་ངང་ནས༔ རྟོག་པ་གཞན་གྱིས་བར་མ་ཆོད་པར་གཉིད་དུ་འགྲོ་བར་བྱའོ༔ དེས་ལན་གཅིག་ལ་མ་ཟིན་ནའང་༔ ལན་མང་དུ་བསྐྱར་ཞིང་འདུན་པ་དྲག་པོས་ནན་ཏན་བྱའོ༔ ནངས་པར་གཉིད་སད་པ་དང་༔ མདངས་རྨི་ལམ་དེ་ཙམ་ཞིག་རྨིས་པ་ཐམས་ཅད་སད་པའི་དུས་ན་གཅིག་ཀྱང་མི་འདུག་པ༔ དེ་དང་འདྲ་བ༔ དེ་རིང་གི་ཉིན་སྣང་འདི་རྣམས་ཐམས་ཅད་དོ་ནུབ་རྨི་ལམ་ཤར་བ་དང་༔ ཁྱད་གཅིག་ཀྱང་མེད་དེ་༔ ཉིན་མཚན་གཉིས་ཀ་རྨི་ལམ་ལ་ཁྱད་མི་འདུག་པས༔ སྒྱུ་མ་ཡིན༔ རྨི་ལམ་ཡིན་སྙམ་པའི་འདུན་པ་དྲག་པོ་ཧུ་རེ་བ་བྱ༔ ཐུན་གཅིག་པའོ༔ དེ་ལ་ལན་མང་དུ་སྦྱངས་ཀྱང་མ་ཟིན་ན༔ ཡང་གཞན་སྔར་དང་འདྲ་བ་ལས༔ རང་ཉིད་ཡི་དམ་དཔའ་བོ་གཅིག་པར་བསྒོམས་པའི་མགྲིན་པར་ཡང་ཡི་དམ་ཚོན་གང་བ་གསལ་ཡེ་རེ་བ་ལ་ཤེས་པ་དྲག་པོ་གཏད་པས༔ རྨི་ལམ་རྨི་ལམ་དུ་ཤེས་པར་བྱའོ་སྙམ་པའི་འདུན་པས་གཉིད་ལོག་གཽ༔ ཐུན་གཉིས་པའོ༔ དེ་ལ་ཡང་ཟིན་པར་དཀའ་ན༔ མགྲིན་པར་པདྨ་འདབ་བཞི་གསལ་བའི་དབུས་སུ་ཨོཾ༔ མདུན་དུ་ཨཱ༔ གཡས་སུ་ནུ༔ རྒྱབ་ཏུ་ཏ༔ གཡོན་ཏུ་ར་བཞི་བསྒོམས་ལ༔ དང་པོར་དབུས་ཀྱི་ཨོཾ་ལ་འདུན་པ་གཏད༔ དེ་ནས་གཉིད་ཐམ་ཐུམ་ལ༔ མདུན་གྱི་ཨཱ༔ ལ་རིག་པ་གཏད༔ གཉིད་ཟིམ་འགྲོ་བ་དང་༔ གཡས་ཀྱི་ནུ་ལ་གཏད༔ གཉིད་ཆེར་ཡུར་རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ། ཙ་ན་རྒྱབ་ཀྱི་ཏ་ལ་གཏད༔ གཉིད་དུ་ཧྲུལ་འགྲོ་ཙ་ན༔ གཡོན་གྱི་ར་ལ་གཏད༔ གཉིད་ཀྱི་དུས་སུ་དབུས་ཀྱི་ཨོཾ་ལ་འདུན་པ་གཏད༔ རྨི་ལམ་གྱི་འདུན་པ་དང་བཅས་པས་རྟོག་པ་གཞན་གྱིས་བར་མ་ཆོད་པར་གཉིད་པས༔ རྨི་ལམ་ཟིན་ནོ༔ ཐུན་གསུམ་པའོ༔ ཡིག་འབྲུ་མི་གསལ་ཞིང་དེ་ལ་ཡང་མ་ཟིན་ན༔ ཡང་མགྲིན་པར་འོད་ཀྱི་ཐིག་ལེ་གསལ་ཡེ་རེ་བ་ལ་དམིགས་པ་གཏད་ཅིང་༔ རྨི་ལམ་གྱི་འདུན་པས་གཉིད་ལོག་པས་ཟིན་ནོ༔ ཐུན་བཞི་པའོ༔ དམིགས་པ་དེ་རྣམས་རེས་མོས་སུ་བསྒོམ་ཞིང་ཉིན་སྣང་རྨི་ལམ་གྱི་འདུན་པ་དྲག་པོ་སྦྱངས་པས༔ ཐ་མ་ཡང་ཟླ་བ་གཅིག་ཚུན་ཆད་ལ་ཟིན་ནོ༔ དེའང་དང་པོར་རྨི་ལམ་མང་དུ་འགྲོ༔ དེ་ནས་གསལ་དུ་འགྲོ༔ དེ་ནས་ཟིན་པར་འགྱུར་རོ༔ དེའང་འཇིགས་སྐྲག་གི་རྐྱེན་གཅིག་ལ་བརྟེན་ནས༔ རྨི་ལམ་ཡིན་སྙམ་དུ་ངོས་ཟིན་པར་སླ༔ རང་ཤུགས་སུ་ཟིན་པར་དཀའ་སྟེ༔ ཟིན་ན་བརྟན་པ་ཡིན་ནོ༔ དེ་རྣམས་གང་ལ་ཡང་མ་ཟིན་ན༔ དམ་ཚིག་ལ་སེལ་ཡོད་པ་ཡིན་པས༔ སྐྱབས་འགྲོ་སེམས་བསྐྱེད༔ བསྐངས་བཤགས་ཡིག་བརྒྱ༔ ཚོགས་འཁོར་ལ་འབད༔ གྲིབ་ལ་འཛེམ་ཞིང་སྔར་བཞིན་བསྒོམས་པས་ཟླ་བ་གཉིས་གསུམ་ཙམ་ལ་ཟིན་ནོ༔ དེའང་ནམ་བཟུང་དུ་ཟིན་པར་གྱུར་པ་དང་༔ དེ་ནས་རྨི་ལམ་སྤྲུལ་བསྒྱུར་ལ་བསླབ་པ་ནི༔ རྨི་ལམ་ཟིན་པའི་དུས་སུ༔ ད་ལྟ་རྨི་ལམ་གྱི་དུས་ཡིན་པས༔ གང་དུའང་བསྒྱུར་དུ་རུང་སྙམ་དུ༔ རྨི་ལམ་དུ་འདྲེའི་ཆོ་འཕྲུལ་སྤྲེའུ་ལ་སོགས་པའམ༔ མི་ཁྱི་ལ་སོགས་པ་གང་བྱུང་བ་དེ༔ ཡི་དམ་གྱི་ལྷར་བསྒོམ་པས་དེར་འགྱུར་རོ༔ དེ་མང་དུ་སྤྲུལ་ཞིང་གང་འདོད་པ་དེར་བསྒྱུར་བ་ལ་བསླབ་པའོ༔ ཐུན་ལྔ་པའོ༔ ཡང་རྨི་ལམ་ཟིན་པའི་ཚེ༔ ཤར་མངོན་པར་དགའ་བའམ༔ ནུབ་ཕྱོགས་ཨོ་རྒྱན་གྱི་ཞིང་དུ་འགྲོ་བའི་འདུན་པ་དྲག་པོ་གཏད་པས༔ དེར་འགྲོ་ཞིང་ཆོས་ཞུ་ནུས་པ་དང་༔ གདོན་གྱི་ཆོ་འཕྲུལ་ལ་ཁྱུང་ལ་སོགས་པའམ་རྟ་མགྲིན་ལ་སོགས་པར་སྤྲུལ་ནས་བཏུལ་པ་ལ་སོགས་པ་གང་འདོད་དུ་སྤྲུལ་ཞིང་བསྒྱུར་བ་ལ་སྦྱང་ངོ་༔ གཞན་ཡང་མང་པོ་གཅིག་ཏུ་བསྡུ༔ གཅིག་མང་པོ་ལ་སྤེལ་བ་ལ་སོགས་ལ་སྦྱོང་ངོ་༔ ཐུན་དྲུག་པའོ༔ དེ་ནས་རྨི་ལམ་ཐོག་རྫིས་ལ་བསླབ་པ་ནི༔ རྨི་ལམ་ཟིན་པ་དང་༔ ཆུ་ཆེན་པོའ་ིའགྲམ་དུ་ཕྱིན་པ་ལ༔ བདག་རྨི་ལམ་ཡིད་ཀྱི་ལུས་ཡིན་པས༔ ཆུ་ཡིས་ཁྱེར་བ་མེད་སྙམ་དུ་བསམ་ལ་ཆུར་མཆོངས་པས་ཆུས་ཁྱེར་བ་མེད་པར་བདེ་སྟོང་དུ་ཕྲིལ་ཕྲིལ་འཆར་རོ༔ དང་པོར་བདག་འཛིན་གྱི་ཞེན་པས་ཅུང་ཟད་མི་ཕོད་དེ༔ གོམས་ནས་ཡ་ང་བག་ཚ་མི་འབྱུང་ངོ་༔ དེ་བཞིན་དུ༔ མེ་དང་༔ གད་གཡང་དང་༔ གཅན་གཟན་ལ་སོགས་པ་ཐམས་ཅད་ལ༔ དེའི་ཐོག་རྫིས་བྱས་པས༔ ཡ་ང་བ་ཐམས་ཅད་ཏིང་ངེ་འཛིན་དུ་འཆར་རོ༔ དེ་ཐམས་ཅད་ཀྱི་གནད་ཉིན་སྣང་སྒྱུ་ལུས་ལ་སྦྱང་ཞིང་༔ རྨི་ལམ་གྱི་འདུན་པ་དྲག་པོ་བྱ་གཉིད་ཁར་མགྲིན་པར་བླ་མའམ་ཡི་དམ༔ ཡིག་འབྲུ༔ ཐིག་ལེ་གང་ལ་ངོས་ཟིན་པ་དེ་ལ་དམིགས་པ་གཏད་པ་གལ་ཆེ་ཞིང་༔ བག་ཆགས་ཀྱི་བར་མ་ཆོད་པ་གཅེས་སོ༔ ཐུན་བདུན་པའོ༔ རྗེས་སུ་རྨི་ལམ་གྱི་གེགས་བསལ་བ་ལ་བཞི་སྟེ༔ སད་འབྱམས༔ བརྗེད་འབྱམས༔ འཁྲུལ་འབྱམས༔ སྟོང་འབྱམས་དང་བཞིའོ༔ དང་པོ་སད་འབྱམས་ནི༔ ལས་དང་པོ་བས༔ རྨི་ལམ་ཡིན་སྙམ་ནས༔ ངོས་ཟིན་མ་ཐག༔ གཉིད་སད་པ་ལ་འབྱམས་པའོ༔ དེ་བསལ་བ་ནི༔ དམིགས་པ་སྙིང་ཁ་མན་ཆད་ལ་བཟུང་ཞིང་༔ རྐང་མཐིལ་གཉིས་སུ་མུན་པའི་ཡི་གེ་ཞེས་བྱ་བ༔ ཐིག་ལེ་ནག་པོ་སྲན་མའི་རྡོག་མ་ཙམ་ལ་སེམས་གཏད་དེ་གཉིད་པས་སེལ་ལོ༔ གཉིས་པ་བརྗེད་འབྱམས་ནི༔ རྨི་ལམ་ཟིན་པ་དང་༔ ཡང་དེ་ཀ་ལ་འཁྲུལ་ཞིང་༔ རྨི་ལམ་རང་ཁ་མར་འགྲོ་བའོ༔ དེ་བསལ་བ་ནི༔ ཉིན་པར་སྒྱུ་ལུས་སྦྱང་ཞིང་རྨི་ལམ་གྱི་འདུན་པ་ལ་གོམས་པར་བྱ༔ གཉིད་དུ་འགྲོ་ཁར་ཡང་༔ རྨི་ལམ་རྨི་ལམ་དུ་ཤེས་ཤིང་མ་འཁྲུལ་བར་བྱ་སྙམ་པའི་འདུན་པས་གཉིད་ལོག་རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ། ཅིང་༔ རྨི་ལམ་ཟིན་དུས་ཀྱང་མ་འཁྲུལ་བར་བྱ་སྙམ་པའི་དྲན་པ་བརྟན་པོ་བྱས་པས་སེལ་ལོ༔ གསུམ་པ་འཁྲུལ་འབྱམས་ནི༔ བག་ཆགས་ངན་པའི་འཁྲུལ་སྣང་ཁོ་ན་རྨི་ཞིང་འབྱམས་ནས་ཡེ་མ་ཟིན་ན༔ ཉིན་པར་རྨི་ལམ་གྱི་འདུན་པ་དྲག་པོ་དང་༔ སྒྱུ་ལུས་ནན་ཆེར་སྦྱང་༔ སྒྲིབ་སྦྱང་༔ བསྐང་བཤགས༔ ཚོགས་བསགས་ལ་འབད༔ རླུང་སྲོག་རྩོལ་དྲག་ཏུ་བསྒོམས་ཤིང་གཉུག་བསྲིངས་བས་སེལ་ལོ༔ བཞི་པ་སྟོང་འབྱམས་ནི༔ འདུན་པ་དྲག་པོས་གཉིད་ཡར་ཏེ་ཤེས་པ་གཏིང་ནས་གཉིད་མི་ཕེབས་པར་འབྱམས་ན༔ དེ་བསལ་བ་ནི༔ སྙིང་གི་དཀྱིལ་དུ་ཐིག་ལེ་ནག་པོ་ཞིག་བསམ་སྟེ༔ འདུན་པ་མི་དྲག་ཙམ་ཡུད་དེ་བ་ལ་གཉིད་ལ༔ མི་བསྒོམ་པར་ཀློད་པས༔ གཉིད་ཕེབས་པ་དང་༔ ཟིན་པར་འགྱུར་རོ༔ གཞན་ཡང་དྲེད་འབྱམས་ཀྱི་གེགས་ཞེས་བྱ་བ་ནི༔ དང་པོ་སྐྱོ་ཤས་ངེས་འབྱུང་གིས་རི་ཁྲོད་ལ་སོགས་ལ་སྒྲུབ་པ་ཅུང་ཟད་རེ་ཡང་བྱས༔ རྨི་ལམ་ཡང་ཟིན་ནས་ཡོད་པ་ལ༔ རྗེས་སུ་འདོད་ཡོན་གྱི་འཁྲི་བ་མ་ཆོད་ནས་འདུ་འཛི་ལ་གཡེངས་བས༔ ཇེ་ཞན་ལ་ཐ་མལ་དུ་ཁྲེས་ཀྱིས་སོང་ནས༔ དྲེད་པོ་ཆོས་རྒྱུས་མཁན༔ གཞན་གྱིས་ཆོས་དང་ཉམས་ལེན་གང་བྱེད་པ་ཐམས་ཅད་ལ་དག་སྣང་མི་སྐྱེ་བར༔ རང་ཉམས་ལ་མཇལ་ཞིང་དེ་ཙམ་གཅིག་དང་རང་གིས་ཀྱང་བྱས་ཏེ་ད་ལྟ་འདི་འདྲ་རེད༔ གཞན་ཡང་དེ་དང་འདྲ་སྙམ་ནས་དྲེད་པོར་འབྱམས་པའོ༔ དེ་སེལ་བ་ནི༔ དལ་འབྱོར་རྙེད་དཀའ་བ༔ འཆི་བ་མི་རྟག་པ་བསྒོམ་པ༔ འཁོར་བའི་ཉེས་དམིགས་བསྒོམ་པ་གཙོ་ཆེར་བྱས་ལ་ཚཻ་འདི་བློས་བཏང་ཞིང་༔ རི་ཁྲོད་ལ་སོགས་དབེན་པར་རྩེ་གཅིག་ཏུ་སྒྲུབ་པ་ལ་འབད་པས༔ སྔར་གྱི་ཉམས་རྟོགས་སོར་ཆུད་ནས་རྨི་ལམ་ཡང་ཟིན་པར་འགྱུར་རོ༔ གཞན་ཡང་བླ་མ་ལ་མོས་གུས་མེད་ན་རྨི་ལམ་མི་ཟིན༔ དམ་ཚིག་ཉམས་ན་མི་ཟིན༔ གོམས་པ་ཆུང་ན་མི་ཟིན༔ གདམས་པའི་གནད་མེད་ན་མི་ཟིན་པས༔ དེའི་བཅོས་ཐབས་ཤེས་པར་བྱའོ༔ དེ་ཡང་རྨི་ལམ་བར་དོ་འདི་བྱང་ན༔ ཆོས་ཉིད་དང་སྲིད་པ་བར་དོ་ཡང་༔ རྨི་ལམ་དང་འདྲ་བས་བར་དོ་ཟིན་པར་གསུངས་སོ༔ དེ་ཡང་རྨི་ལམ་ལན་བདུན་ཟིན་ན་བར་དོ་ངོས་ཟིན་པར་གསུངས་སོ༔ རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ་ཞེས་བྱ་བ༔ ས་མ་ཡ༔ དེ་ནས་རྨི་ལམ་བརྟན་པར་གྱུར་པ་དང་༔ རྨི་ལམ་འོད་གསལ་དུ་བསྒྱུར་བའི་ཁྲིད་གཏི་མུག་རང་གྲོལ་ལ་བསླབ་པ་ནི༔ ཟླ་བ་གཅིག་གི་བར་དུ་མཚམས་དམ་དུ་བཅད་ཅིང་གྲིབ་མ་ལ་འདུག༔ ཟས་བཟང་ཞིང་བཅུད་ཆེ་བ་ཟ༔ བསྐུ་མཉེ་ལ་སོགས་པ་བྱའོ༔ དེ་ནས་ཚེས་གཅིག་ནས་གསུམ་གྱི་བར་དུ་གཉིད་བཅག་ལ༔ དེ་ནས་བཅོ་ལྔའི་བར་དུ༔ མཚན་ཐུབ་པའི་མར་མེ་ཚིལ་ཆེན་བཞུས་པ་བལྟམས༔ བླ་མ་ཡི་དམ་མཁའ་འགྲོ་ལ་ཚོགས་འཁོར་འབུལ༔ མི་ཤས་བརྒྱན་པའི་གཏོར་མ་བཤམས༔ གྲོགས་ཉམས་མྱོང་ཡོད་པ་གཅིག་ཀྱང་རྩར་བཞག་གོ༔ དེ་ནས་དངོས་གཞི་ལ༔ ཐོག་མར་ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཐོབ་པར་བྱ༔ དེའི་ཆེད་དུ་འོད་གསལ་གཏི་མུག་རང་གྲོལ་བསྒོམ་པར་བྱ་སྙམ་དུ་སེམས་བསྐྱེད༔ ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་གཏི་མུག་འོད་གསལ་དུ་འཆར་བར་བྱིན་གྱིས་བརླབ་ཏུ་གསོལ༔ འོད་གསལ་ཟིན་པར་བྱིན་གྱིས་བརླབ་ཏུ་གསོལ༔ ཞེས་གསོལ་བ་བཏབ་པས༔ མགོ་བྱང་དུ་བསྟན་ལ་སེང་གེའི་ཉལ་སྟབས་ཀྱིས་ཉལ་ལ༔ རླུང་ཅུང་ཟད་བཟུང་ལ་མགྲིན་པར་དགུག༔ མིག་གྱེན་ལ་ཧྲིག་གེ་བལྟ༔ སྙིང་གར་ཐིག་ལེ་དཀར་པོ་འོད་ཀྱི་རྣམ་པ་ཅན་གཅིག་ཡེ་རེ་གསལ་བ་ལ་དམིགས་པ་གཏད་དེ༔ རིག་པ་གསལ་ཡེ་རེ་བ༔ འོད་གསལ་གྱི་ངང་ལ་གཉིད་དུ་སོང་བ་དང་༔ རྨི་ལམ་དུ་སེམས་འོད་གསལ་ནམ་མཁའ་དྭངས་པའི་དཀྱིལ་ལྟ་བུ༔ གསལ་སྟོང་བློ་བྲལ་དུ་འཆར་རོ༔ དེ་ཡང་དབང་པོ་རབ་ནི༔ ད་ལྟའི་རིག་པ་རྗེན་པར་ངོ་འཕྲོད་པའི་གང་ཟག་རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ། དེ༔ ད་ལྟའི་རྟོག་པ་གཉིད་འཐུམ་པོ་ལ་འགྲོ་བ་འོད་གསལ་ཞེས་བྱ་སྟེ༔ དེ་ནི་འཆི་ཁའི་དུས་སུ༔ བར་དོ་གཞིའི་འོད་གསལ་འཇག་མའི་སྲིན་བུ་ཡན་ཆད་ལ་འཆར་བས༔ དེའི་དུས་སུ་མ་པང་དུ་བུ་རྒྱུག་པ་ལྟར་ངོ་འཕྲོད་པར་འགྱུར་ཏེ༔ སྐད་ཅིག་གི་ཆོས་སྐུའི་དགོངས་པ་མངོན་དུ་གྱུར་པ་ལ་ཐེ་ཚོམ་མེད་པས༔ བར་དོ་དྲུག་གི་ནང་ན་འདི་ཁོ་ན་གཅེས་སོ༔ འདི་ངོ་འཕྲོད་པར་བྱེད་པ་ལ་སྐྱེ་གནས་བར་དོར་རིག་པ་ངོ་འཕྲོད་པ་ཤིན་ཏུ་གལ་ཆེ་ཞིང་༔ དེའི་རྟོགས་པ་དེ་རྨི་ལམ་བར་དོར་འོད་གསལ་འཛིན་པ་འདི་གཅེས་པའོ༔ དེ་ཡང་རིག་པ་རྗེན་པར་ངོ་འཕྲོད་པའི་གང་ཟག་གིས་ཆོས་ཉིད་ཀྱི་ངང་དུ་འོད་གསལ་འཛིན་པ་ནི༔ ལུས་གནད་གོང་ལྟར་བཅས་པའི་ངང་ནས༔ རིག་པ་གཅུན་ཏེ༔ གསལ་སྟོང་དུ་ཡེ་རེ་བ་ལ་རིག་པ་སྙིང་ཁར་གཏད་ལ་མ་ཡེངས་པར་གཉིད་ལོག་གོ༔ གཉིད་ཟ་ཟིའི་དུས་སུ༔ གསལ་སྟོང་དབྱེར་མེད་ཀྱི་ངང་མ་ཤོར་བར་བྱ༔ དེ་ནས་གཉིད་དུ་ཧྲུལ་སོང་བ་དང་༔ གཉིད་འཐུག་པོའི་ངོ་བོ་གསལ་སྟོང་དབྱེར་མེད་དུ་ཡེ་རེ་བ་དེ་ངོས་ཟིན་ན༔ འོད་གསལ་ངོས་ཟིན་པའོ༔ དེས་རྨི་ལམ་དང་བག་ཆགས་མི་འོང་བར་གཉིད་ལོག་པ་ཐམས་ཅད་བསྒོམ་པའི་ཉམས་དང་མ་བྲལ་བར་གནས་པ་ནི༔ གཉིད་འོད་གསལ་གྱི་ངང་ལ་གནས་པའོ༔ ཐུན་གཅིག་གོ༔ དེའང་ཁམས་ཀྱི་འོད་གསལ་དང་བསྲེ་བ་ནི༔ དང་པོར་དཔྲལ་བ་ཚ་ཐིབས་ཀྱིས་གཉིད་ལོག་ཙ་ན༔ ས་ཆུ་ལ་ཐིམ་པ་ཡིན༔ དེའི་དུས་སུ་གསལ་སྟོང་ཡེ་རེ་བའི་ཉམས་ལ་བསླབ་ཅིང་༔ འདུན་པ་སྙིང་ཁར་གཏད་དོ༔ དེ་ནས་ཤེས་པ་བྱིང་སོང་ཙ་ན༔ ཆུ་མེ་ལ་ཐིམ་པ་ཡིན༔ དེ་ཙ་ན་ཡང་གསལ་སྟོང་ཡེ་རེ་བའི་ངང་མ་ཤོར་བར་བྱའོ༔ ཤེས་པ་ཟ་ཟི་བྱུང་ཙ་ན༔ མེ་རླུང་ལ་ཐིམ་པ་ཡིན༔ དེ་ཙ་ན་ཡང་གསལ་སྟོང་ཡེ་རེ་བའི་ཉམས་ལ་བསླབ༔ གཉིད་དུ་ཁྲིལ་གྱིས་སོང་བ་དེ༔ རླུང་རྣམ་པར་ཤེས་པ་ལ་ཐིམ་པ་ཡིན༔ དེ་དུས་ཀྱང་གོང་གི་གསལ་སྟོང་གི་ཉམས་དེའི་ངང་མ་ཤོར་བར་གསལ་ཡེ་རེ་བ་སྙིང་ཁར་གཏད༔ དེ་ནས་རྨི་ལམ་མེད་པ་ལྷན་ནེ་བ་དེ༔ རྣམ་པར་ཤེས་པ་འོད་གསལ་ལ་ཐིམ་པ་ཡིན༔ དེ་ཙ་ན་གཉིད་སྐྱེ་མེད་དྲན་མེད་གསལ་སྟོང་དུ་ལྷན་ནེ་གནས་པར་འགྱུར་ཏེ༔ དེའི་དུས་ཀྱི་གསལ་སྟོང་བློ་བྲལ་དེ་ངོས་ཟིན་ན་འོད་གསལ་ངོས་ཟིན་པ་ཞེས་བྱ་སྟེ༔ དེ་དང་འཆི་བའི་དུས་ཀྱི་རྣམ་པར་ཤེས་པ་འོད་གསལ་ལ་ཐིམ་པའི་ཉམས་འདྲ་བས༔ བར་དོ་འབྱོངས་པ་ཡིན་ཏེ༔ ད་ལྟར་རྨི་ལམ་དུ་ངོས་ཟིན་པ་དང་༔ བར་དོའི་རྩལ་སྦྱང་དངོས་གཞིའོ༔ ཐུན་གཉིས་པའོ༔ དེ་ལ་ཡང་ནས་ཡང་དུ་སྦྱངས་ཤིང་༔ གྲོགས་པོས་གཉིད་དུ་སོང་ནས་དར་གཅིག་ཙམ་ན་དལ་བུས་བསླངས་ལ་འོད་གསལ་ཟིན་ནམ་དྲི༔ མ་ཟིན་ན་ལན་མང་དུ་བསྐྱར་བས་ཟིན་པར་འགྱུར་རོ༔ འདི་ནི་རྟོགས་པའི་འོད་གསལ་ཞེས་བྱ་སྟེ༔ འོད་གསལ་ཀུན་གྱི་ནང་ནས་མཆོག་ཏུ་གྱུར་པའོ༔ འདི་ལ་ཅིས་ཀྱང་མ་ཟིན་ན༔ ཉམས་ཀྱི་འོད་གསལ་ལ་བསླབ་པ་ནི༔ ལུས་གནད་གོང་ལྟར་ལས༔ རང་གི་སྙིང་གི་དབུས་སུ༔ པདྨ་འདབ་བཞིའི་ལྟེ་བ་ལ༔ རང་གི་རྩ་བའི་བླ་མ་དང་༔ ཨུ་རྒྱན་པདྨ་གཉིས་སུ་མེད་པའི་ངོ་བོ་གསལ་ཡེ་རེ་བ་ལ་དམིགས་པའི་འབེན་བྱས་ཏེ༔ རིག་པ་གསལ་ཡེ་རེ་བ་ལ་གོང་ལྟར་གཉིད་ལོག་པ་ནས༔ རྣམ་པར་ཤེས་པ་འོད་གསལ་ལ་ཐིམ་པའི་བར་དུ་ངང་མ་ཤོར་བར་བྱས་པས༔ དང་པོ་གཉིད་འཐུམ་པའི་དུས་སུ༔ དྲན་མེད་གསལ་སྟོང་དུ་ཡེ་རེ་གནས་ཤིང་༔ རྗེས་སུ་རྨི་ལམ་གྱི་དོད་ལ༔ སྙིང་ཁའི་ཨུ་རྒྱན་གྱི་སྐུ་དེ་གསལ་ལམ་གྱིས་འཆར༔ དེ་ནས་ལུས་རངས་པ༔ དེ་ནས་ཉལ་མལ༔ སྤྱིལ་པོ༔ ཡུལ་ཁམས་ཉིན་པར་དང་འདྲ་བའི་གསལ་སྣང་འཆར༔ ཤིན་ཏུ་འབྱོངས་པས༔ རི་རབ་གླིང་བཞི་དང་བཅས་པ་གསལ་ལམ་གྱིས་འཆར་རོ༔ དེ་ལྟར་འཆར་བ་ཉམས་ཀྱི་འོད་གསལ་ཞེས་བྱ་བ་ཡིན་ཏེ༔ དེ་ལ་རྟོགས་པའི་འོད་གསལ་གྱིས་རྒྱས་གདབ་པས་གཞིའི་འོད་གསལ་ངོ་འཕྲོད་དེ༔ བར་དོ་དང་པོར་རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ། སངས་རྒྱས་པ་ལ་ཐེ་ཚོམ་མེད་དོ༔ ཐུན་གསུམ་པའོ༔ དེ་ལ་ཡང་ངོས་མ་ཟིན་ན༔ རང་གི་ལུས་ཡི་དམ་དུ་གསལ་བའི་ཁོང་པའི་ནང་ཕྲུ་མ་ཕུས་བཏབ་པ་བཞིན༔ དྭངས་སིང་ངེ་བའི་དབུས་སུ༔ རྩའི་དྭངས་མ་དབུ་མ་འོད་ཀྱི་རྣམ་པ༔ སྣང་ལ་རང་བཞིན་མེད་པ༔ ཚངས་བུག་ནས་ལྟེ་འོག་གི་བར་དུ་དྲང་ཐལ་ལེ་བའི་སྙིང་ཁའི་ཐད་ཀྱི་དབུ་མའི་ནང་དུ༔ ཐིག་ལེའི་དྭངས་མ་དཀར་ལ་དམར་བའི་མདངས་ཅན༔ གསལ་བའི་འོད་དང་ལྡན་པ༔ རླུང་གི་དྭངས་མ་ལས་བྱུང་བས༔ འཕུར་ལྷབ་ལྷབ་འོད་ཀྱི་རྣམ་པ་གསལ་བ༔ དེའི་འོད་ཀྱིས་ཁོང་པའི་ནང་ཐམས་ཅད༔ འོད་ཀྱི་རང་བཞིན་གསལ་ལྷང་ངེ་བ་ལ་དམིགས་ནས༔ རིག་པ་གསལ་སྟོང་ཡེ་རེ་གཉིད་ལོག་པ་ནས་འཐུག་པོའི་བར་དུ༔ དེའི་ངང་མ་ཤོར་བར་བཟུང་བས་འོད་གསལ་ཟིན་པར་འགྱུར་རོ༔ ལན་གཅིག་མ་ཟིན་ནའང་༔ གྲོགས་ཀྱིས་ཡང་ཡང་དམིགས་པ་གསལ་གདབ་ཅིང་༔ དམིགས་པ་རྣམས་རེས་མོས་སུ་བསྒོམས་པས་གང་རུང་གཅིག་ལ་ཟིན་པར་འགྱུར་རོ༔ འོད་གསལ་གྱི་ངོ་བོ་ནི་རྟོག་པ་རྒྱུན་ཆད་དེ༔ གཉིད་དུ་སོང་བ་ནའང་༔ རྨི་ལམ་གྱི་དངོས་པོ་གསལ་སྟོང་ནམ་མཁའ་དྭངས་པའི་དཀྱིལ་ལྟ་བུ་ཡུལ་མེད་རྗེན་པར་གནས་པ་ཡིན་ཏེ༔ གཉིད་སད་རྒྱུ་ཡོད་པ་ཙམ་ལས༔ ཏིང་ངེ་འཛིན་ཁོར་ཡུག་ཏུ་སོང་བའོ༔ ཉམས་ཀྱི་འོད་གསལ་ནི༔ གཉིད་དུ་སོང་ཡང་༔ མཐོང་སྣང་ཉིན་པར་མངོན་སུམ་ལྟར་རང་གནས༔ ལུང་པ༔ ཡུལ་ཁམས་ལ་སོགས་པ་གསལ་བར་མཐོང་ཞིང་༔ གཉིད་དུ་མ་སོང་ངམ་སྙམ་ན་སད་རྒྱུ་ཡོད་པའོ༔ གཉིད་དུ་སོང་སྙམ་ན་ནི༔ ཁྱིམ་གྱི་ནང་གི་དངོས་པོ་གསལ་བར་མཐོང་བའོ༔ དེ་ལ་རྟོགས་པའི་འོད་གསལ་གྱིས་རྒྱས་ཐེབ་ན་མཆོག་ཏུ་གྱུར་ཏེ་བར་དོར་གྲོལ་བར་ངེས་སོ༔ བར་དོ་དྲུག་གི་གལ་ཆེ་བའི་ཁྲིད༔ འོད་གསལ་གཏི་མུག་རང་གྲོལ་ཞེས་བྱ་བ༔ ས་མ་ཡ༔ བསམ་གཏན་བར་དོའི་ཁྲིད་ཡིག་རིག་པ་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་གྱི༔ རྫོགས་རིམ་བར་དོ་དྲུག་གི་ཁྲིད་ཡིག་ལས་སྤྱི་དོན་གསུམ་པ་བསམ་གཏན་བར་དོའི་ཁྲིད་ཡིག་རིག་པ་རང་གྲོལ་ཞེས་བྱ་བ་བཞུགས་སོ༔ སྤྱི་དོན་གསུམ་པ་བསམ་གཏན་བར་དོའི་ཁྲིད་ཡིག་རིག་པ་རང་གྲོལ་ཞེས་བྱ་བ་སྟོན་ཏེ༔ མི་གསལ་བ་གསལ་གདབ་པ་སྒེག་མོས་མེ་ལོང་ལ་བལྟ་བ་ལྟ་བུའི་གདམས་ངག༔ དེའང་གོང་དུ་རིག་པ་ངོ་སྤྲོད་ཅིང་འདི་ཁོ་ནའོ་ཞེས་བསྟན་པས་དེ་ལ་སེམས་གསལ་རིག་པ་ལ་ཙིར་ཟིན་དུ་སོང་བས༔ དེ་ཉིད་ཁོ་ན་འཛིན་པར་སོང་བས་གྲོལ་མི་བཏུབ་པའི་ཕྱིར༔ འདིར་ངོ་འཕྲོད་པ་དེ་འཛིན་མེད་བློ་འདས་སུ་སྐྱོང་ཞིང་༔ བོགས་འདོན་པའི་བསམ་གཏན་གྱི་ཁྲིད༔ རིག་པ་ཙིར་གྱིས་འཛིན་པ་གྲོལ་བར་བྱེད་པས༔ རིག་པ་རང་གྲོལ་གྱི་ཁྲིད་ཅེས་བྱའོ༔ དེའང་གོང་དུ་ངོ་སྤྲད་ཅིང་རང་ངོ་ཤེས་པ་ཙམ་གྱིས་མི་ཆོག་སྟེ༔ དཔེར་ན་རང་གི་རྟ་རྒོད་ལོ་མང་པོར་ཡན་པར་བཞག་པས༔ བདག་པོས་ངོ་མ་ཤེས་པ་སྟེ༔ རྫིའུས་ངོ་སྤྲད་ནས་ངོ་ཤེས་པ་ཙམ་གྱིས་མི་ཆོག་སྟེ༔ རྟ་རྒོད་དེ་ཐབས་ཀྱིས་བཟུང་ནས་བཏུལ་ཞིང་ཁོལ་དུ་བཏུབ་པ་གཅིག་དགོས་པ་ལྟར༔ སེམས་དམུ་རྒོད་འདི་ཡང་ངོ་འཕྲོད་པ་ཙམ་གྱིས་མི་ཆོག་སྟེ༔ ཀྱེ་མ་བདག་ལ་བསམ་གཏན་བར་དོ་འཆར་དུས་འདིར༔ རྣམ་གཡེང་འཁྲུལ་བའི་ཚོགས་རྣམས་སྤངས་བྱས་ནས༔ ཡེངས་མེད་འཛིན་མེད་མཐའ་བྲལ་ངང་ལ་འཇུག༔ ཅེས་པས༔ ལས་དང་པོ་བས་ཡེངས་མེད་ཀྱི་དྲན་པས་སྐྱོང་ཞིང་བསྒོམ་དགོས་ཏེ༔ རྟ་རྒོད་པོ་བཏུལ་བའི་དུས་སུ་ཡེངས་མེད་ཀྱི་བརྩོན་འགྲུས་ཀྱིས་འདུལ་དགོས་ཤིང་༔ ཡེངས་ན་རྟ་ཤོར་རང་བརྡབ་ནས་ཕུང་བ་ལྟར༔ འདིར་ཡང་ལས་དང་པོ་པས་ཡེངས་ན༔ རྟོག་པ་རང་ཁར་འཆོར་ནས༔ ངན་སོང་དུ་ལྟུང་ཞིང་ཕུང་བར་འགྱུར་བས༔ ཡེངས་པ་མེད་པའི་དྲན་པས་སྒོམ་འཚོལ་བར་བྱའོ༔ དེ་ལ་སྒོམ་པ་ཞེས་བྱ་བ་ནི༔ ཅི་ཡང་མི་སྒོམ་པའི་བླ་དྭགས་ཡིན་ལ༔ དོན་ལ་ནམ་མཁའ་སུམ་སྤྲུག་གི་བསམ་གཏན་ལ་མཉམ་པར་བཞག་པ་ནི༔ བལྟས་པས་གྲོལ་བ་ཚིག་གསུམ་པའི་རྒྱུད་ལས༔ ཀྱཻ་གསང་བའི་བདག་པོ༔ ཆོས་ཀྱི་སྐུ་ཉམས་སུ་བླང་ན༔ ནམ་མཁའ་གསུམ་སྤྲུག་གི་གདམས་ངག་གོ༔ ཕྱིའི་ནམ་མཁའ་བར་སྣང་སྟོང་པ་འདི་ཡིན་ནོ༔ ནང་གི་ནམ་མཁའ་མིག་དང་སྙིང་གཉིས་འབྲེལ་བའི་རྩ་སྦུག་སྟོང་པ་དེ་ཡིན་ནོ༔ གསང་བའི་ནམ་མཁའ་རང་གི་སྙིང་རིན་པོ་ཆེའི་གཞལ་ཡས་ཁང་ངོ་༔ རང་གི་རིག་པ་མིག་ལ་གཏད༔ མིག་བར་སྣང་ལ་གཏད༔ མིག་བར་སྣང་ལ་གཏད་ནས་བཞག་པས༔ ཡེ་ཤེས་ལྷུག་པར་སྐྱེའོ༔ རང་གི་མིག་ལ་ཤེས་པ་གཏད་པའི་དུས་སུ༔ རྣམ་རྟོག་གང་གིས་ཀྱང་མ་བསྒྲིབས་པར༔ རྟོག་མེད་ཀྱི་རིག་པ་རྐྱང་པ་འཆར་རོ༔ ཞེས་གསུངས་པས༔ བསྒོམ་གྱི་དངོས་གཞི་ནི༔ ལུས་རྣམ་སྣང་གི་ཆོས་བདུན་གྱི་ངང་ནས༔ ནམ་མཁའ་སུམ་སྤྲུག་གི་བསྒོམ་པ་ཞེས་བྱ་བ༔ ནང་སེམས་ཉིད་སྟོང་པ་འདི༔ བར་འགྱུ་བའི་ལམ་རྩ་སྦུབ་སྟོང་པ་ལ་གཏད་དེ༔ སྒོ་རྒྱང་ཞགས་ཆུའི་སྒྲོན་མ་ཞེས་བྱ་བ༔ རིག་པ་མིག་ལ་གཏད༔ མིག་ཕྱིའི་ནམ་མཁའ་སྟོང་པ་འདི་ལ་ཅེ་རེ་བལྟས་ལ༔ རིག་པ་ཡང་མདུན་གྱི་ནམ་མཁའ་ལ་དམིགས་པ་དང་བསྒོམ་རྒྱུ་ཅི་ཡང་མེད་པར༔ མ་ཡེངས་ཙམ་དུ་ཧྲིག་གེ༔ གསལ་ལེ༔ ཡེ་རེ༔ ཕྱམ་མེ་བཞག༔ དང་པོར་ཐུན་ཆུང་བ་ལ་བསླབ༔ གོམས་ནས་ཇེ་རིང་ཇེ་རིང་དུ་བསླབ་ཅིང་༔ འཕྲོ་འཇོག་པའི་ཚེ་ཧར་ལང་དུ་མི་བྱ་བར༔ བསྒོམ་ཉམས་དེ་མ་ཤོར་བར་དལ་བུས་ལངས་ལ་རིག་པའི་ངང་མ་ཤོར་བར་མ་ཡེངས་འཛིན་མེད་ཀྱི་ངང་ལ་འགྲོ༔ བཟའ་བཏུང་སྨྲ་བརྗོད༔ བྱ་བ་གང་བྱེད་ཀྱང་༔ ཡེངས་མེད་ཀྱི་དྲན་པ་སོ་མ་ཤོར་བར་བསྐྱང་ངོ་༔ མཉམ་བཞག་ལ་བྱུང་ནས་རྗེས་ཐོབ་ལ་མ་བྱུང་ན་ཆོས་སྤྱོད་དང་འགྲོ་འཆགས་ཉལ་འདུག་སྤྱོད་ལམ་གང་བྱེད་པ་དེ་དང་བསྲེས་པས༔ ཅི་བྱེད་བསྒོམ་དུ་འཆར་རོ༔ ལུང་ལས༔ སྒོམ་པའི་ཚེ་ན་ཅི་ཡང་མི་བསྒོམ་སྟེ༔ ཆོས་ཀྱི་དབྱིངས་ལ་བསྒོམ་རྒྱུ་ཅི་ཡང་མེད༔ ཅེས་པ་དང་༔ ཀུན་བྱེད་ལས༔ ཀྱེ་ཀྱེ་སྟོན་པ་ཀུན་བྱེད་ང་ཡི་ལུང་བསྟན་པ༔ མ་ལུས་སྐྱེ་མེད་རྣམ་དག་ཏིང་འཛིན་ཏེ༔ བསྒོམ་དང་མི་བསྒོམ་རྐྱེན་ལ་རག་མ་ལུས༔ བསྒོམ་བྱ་ཅི་ལྟར་སྣང་བའི་ཆོས་རྣམས་ཀུན༔ གང་དུ་ཅི་ལྟར་བཞག་པའི་ཚུལ་མེད་པར༔ མ་བཙལ་རང་སར་བཞག་པ་སྒོམ་པ་ཡིན༔ ཅེས་པ་དང་༔ ཀྱཻ་སེམས་དཔའ་རྡོ་རྗེ་དོན་ལ་གོམས་པར་གྱིས༔ དགོངས་དོན་གསང་བའི་རིག་པ་མ་ཤར་ན༔ ཚིག་དང་སྒྲ་ལ་འཛིན་ཅིང་གོམས་པ་དག༔ ཀུན་བྱེད་ང་ཡི་ལུང་དང་འཕྲད་མི་འགྱུར༔ ཞེས་པ་དང་༔ གང་ལ་སེམས་པར་མ་བྱེད་སྒོམ་མ་བྱེད༔ སྒོ་གསུམ་བཅོས་པར་མི་བྱེད་ལྷུག་པར་བཞག༔ གཟའ་དང་རྒྱུ་སྐར་ཚེས་གྲངས་དུས་ཚོད་མེད༔ ཡིད་ལ་མི་བྱེད་སྔགས་དང་ཕྱག་རྒྱ་བྲལ༔ ཅེས་གསུངས་སོ༔ དེ་ལྟར་མཉམ་པར་བཞག་པའི་བསྒོམ་པ་དེ༔ རྗེས་ཤེས་དུས་སུ་ཁྲིད་པ་གལ་ཆེ་སྟེ༔ མཉམ་བཞག་གི་ཉམས་དེ་རྗེས་ཤེས་ལ་ངང་མ་ཤོར་བར་སྐྱོང་ཞིང་༔ ཁྱད་པར་དུ་རྣམ་རྟོག་ཅི་སྐྱེས་ཤར་གྲོལ་དུ་ཁྲོལ་ཁྲོལ་རང་གྲོལ་དུ་ཤིག་ཤིག༔ འཛིན་མེད་དུ་ཕྱལ་ཕྱལ་བཏང་༔ རྣམ་རྟོག་གི་རང་གཤིས་ཀྱང་ཡེ་ནས་རང་གྲོལ་དུ་གནས་པ་ཡིན་ཏེ༔ རྟོག་པ་སྔ་མ་ཞེ་སྡང་དུ་སྐྱེས་པའི་ཚེ༔ ཕྱི་མར་སྙིང་རྗེ་སྐྱེས་ན༔ སྔ་མའི་ཞེ་སྡང་དེ་གང་དུའང་མ་སོང་༔ སུས་ཀྱང་བཀྲོལ་བ་མེད་པར་རང་གྲོལ་དུ་གྲོལ་ཏེ༔ ཞེ་སྡང་ཐེར་ཟུག་ཏུ་གནས་མ་མྱོང་༔ ཞེ་སྡང་སྐྱེས་པའང་རང་བྱུང་ཡེ་ཤེས་ཀྱི་རྩལ་ལས་ཤར་བ་ལས༔ འདི་ནས་སྐྱེས་བྱ་བ་མེད་པས༔ ཞེ་སྡང་གི་རང་བཞིན་སྐྱེ་མེད་ཡིན༔ བར་དུ་ཞེ་སྡང་འདི་ན་གནས་མེད་དེ༔ ཡོད་ན་བསྐལ་པ་ཐོག་མེད་ནས༔ ད་ཕན་ཆད་དུ་སྐྱེས་པའི་ཞེ་སྡང་ཐམས་ཅད་ཕྱོགས་གཅིག་ཏུ་གནས་ཤིང་བསག་ཏུ་ཡོད་ན༔ སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་ཡང་ཤོང་མི་སྲིད་དོ༔ ཞེ་སྡང་སྐྱེ་མེད་གནས་མེད་ཡིན་པས༔ དེ་ལྟར་སྐྱེས་ཀྱང་བདེན་པར་གྲུབ་མ་མྱོང་༔ དེས་ན་ཁར་སང་ཕན་ཆད་སྐྱེས་པའི་ཞེ་སྡང་དེ་དེ་རིང་གར་སོང་༔ སང་ཉིན་སྐྱེ་རྒྱུའི་ཞེ་སྡང་དེ་དེ་རིང་གང་ནས་འོང་ཞིང་ཡོད༔ དེ་རིང་སྐྱེས་པའི་ཞེ་སྡང་དེ་ད་ལྟར་གར་གནས༔ བྱམས་པ་སྐྱེ་བའི་དུས་སུ་ཞེ་སྡང་གར་སོང་༔ དེ་ཐམས་ཅད་རང་བྱུང་ཡེ་ཤེས་ཀྱི་རྩལ་ལས་ཤར་བས་སྤང་དུ་མེད༔ སྤང་ཡང་མི་སྤང་ངོ་༔ ཁོ་རང་གི་གཤིས་རང་གྲོལ་དུ་གནས་པས༔ གཉེན་པོ་གཞན་གྱིས་བཤིག་པའམ་བཀྲོལ་དུའང་མེད་དེ༔ ཞེ་སྡང་ནི་གཅེར་མཐོང་རང་གྲོལ་དུ་ཡེ་ནས་གནས་ཤིང་༔ འབད་མེད་དུ་རང་སར་གྲོལ་ཞིང་འདུག་པས༔ ད་གཟོད་གྲོལ་གཞི་བསྐྱར་དུ་མེད་ཅིང་༔ ཞེ་སྡང་རང་བྱུང་ཡེ་ཤེས་སུ་ངོ་འཕྲོད་པས༔ ཞེ་སྡང་རང་བསྒོམ་གྱི་དངོས་གཞིར་ལམ་དུ་ཁྱེར་བས༔ ཅིར་སྣང་བསྒོམ་དུ་འཆར་ནས༔ བསྒོམ་ལོགས་སུ་བཙལ་མི་དགོས་པར༔ ཞི་གནས་སེམས་འཛིན་གྱི་འཇུར་བུ་རང་སར་གྲོལ་ལོ༔ དེ་ལྟར་ཞེ་སྡང་སྐྱེ་མེད་རང་གྲོལ་དུ་ཐག་ཆོད་པ་ལྟར༔ ཉོན་མོངས་པ་བརྒྱད་ཁྲི་བཞི་སྟོང་ལ་སོགས་པའི་རྣམ་པར་རྟོག་པའི་མཚན་མ་ཅི་སྐྱེས་པ་ཐམས་ཅད་སྐྱེ་མེད་རང་གྲོལ་དུ་ཤེས་པས༔ རྣམ་རྟོག་སྤང་ནས་མི་རྟོག་པ་བསྒོམ་དུ་མེད་དེ༔ འདམ་བུ་གཅིག་ཁོང་སྟོང་ན་འདམ་བུ་ཐམས་ཅད་ཁོང་སྟོང་༔ ཚལ་བུ་གཅིག་ཁོང་རུབ་ན་ཚལ་བུ་ཐམས་ཅད་ཁོང་རུབ༔ ཆུ་ཐིགས་གཅིག་རླན་པར་ཤེས་ན་ཆུ་ཐམས་ཅད་རླན་པར་ཤེས་པ་བཞིན༔ རྣམ་རྟོག་སྐད་ཅིག་མ་སྐྱེ་མེད་རང་གྲོལ་དུ་ཤེས་པས༔ རྟོག་པ་ཅི་སྙེད་པ་སྐྱེ་མེད་རང་གྲོལ་དུ་ཤེས་ཏེ༔ ཤེས་པ་སྐད་ཅིག་མའི་རྣམ་རྟོག་སྐྱེ་མེད་རང་གྲོལ་དུ་ཐག་ཆོད་པ་ལ་ཐག་གཅིག་ཐོག་ཏུ་བཅད་པ་ཞེས་བྱའོ༔ ཤེས་པ་སྐད་ཅིག་མ་དེ་སྤངས་ནས༔ དེ་མ་ཡིན་པ་གཞན་གཅིག་བཙལ་ནས་ངོ་སྤྲད་རྒྱུ་མེད་པས༔ ངོ་རང་ཐོག་ཏུ་སྤྲད་པ་ཞེས་བྱའོ༔ དེའི་གཤིས་རང་གྲོལ་དུ་སྟོན་པས༔ གདེང་གྲོལ་ཐོག་ཏུ་བཅའ་བ་ཞེས་བྱའོ༔ གདེང་གྲོལ་ཐོག་ཏུ་བཅའ་བ་ལ་གྲོལ་ལུགས་ཆེན་པོ་བཞི་སྟེ༔ རྟོག་པ་གང་སྐྱེས་ཀྱི་དེའི་གཤིས་ཡེ་གྲོལ༔ རང་གྲོལ༔ གཅེར་གྲོལ༔ ཡོངས་གྲོལ་དུ་གནས་ཏེ༔ འདོད་ཆགས་ཀྱི་རྟོག་པ་གཅིག་ལྷང་གིས་སྐྱེས་པའི་ཚེ༔ གཤིས་ཡེ་གྲོལ་དུ་གནས་པས༔ ད་གྲོལ་གཞི་ཞིག་བསྐྱར་དུ་མེད༔ ཁོང་རང་གིས་ཁོང་རང་སུས་ཀྱང་མ་བཀྲོལ་བར༔ རང་གིས་རང་གྲོལ་བས༔ དེ་ལ་གཉེན་པོ་གཞན་གྱིས་བཀྲོལ་དུ་མེད༔ རྟོག་པ་ཁོ་རང་གིས་ཁོ་རང་ལ་གཅེར་གྱིས་བལྟས་པས༔ རང་བཞིན་མེད་པས་མཐོང་རྒྱུ་མེད་དེ༔ གཅེར་གྲོལ་དུ་གྲོལ་བས་ཚུགས་མི་ཐུབ༔ རྟོག་པ་སྐྱེས་པ་རང་བྱུང་དུ་སྐྱེས་པའི་ཕྱིར༔ གྲོལ་བའང་ཡོངས་གྲོལ་དུ་གྲོལ་བས༔ ད་འབད་པ་བསྐྱེད་དེ་བཀྲོལ་མི་དགོས་པར༔ གཅིག་སྐྱེས་ཡེ་གྲོལ༔ གཉིས་སྐྱེས་རང་གྲོལ༔ གཅེར་གྲོལ༔ ཡོངས་གྲོལ་དུ་འདུག་པས༔ དེ་སྔ་ཕན་ཆད་གྲོལ་ཚུལ་གྱི་གནད་འདི་མི་ཐིག་པས༔ རྟོག་པ་རང་ཁ་མའི་འཛིན་པས༔ འཁོར་བར་འཁྱམས་ཤིང་གྲོལ་བའི་དུས་མ་བྱུང་བས༔ ད་ནི་གྲོལ་ལུགས་བཞིའི་མཚང་རིག༔ བླ་མས་ངོ་སྤྲོད༔ གྲོལ་བར་ངེས་ཤེས་སྐྱེས་པས༔ ད་ནི་སེམས་འཛིན་བརྟོད་ཕུར་གྱི་བསྒོམ་གྱིས་ཅི་བྱེད༔ ཤར་ཚད་རང་གྲོལ་ལ་ཐོང་༔ མ་བསྒོམ་པར་རྒྱ་ཡན་ལ་ཐོང་༔ ཕྱལ་བར་ཞོག༔ དེ་ལྟར་གྲོལ་ལུགས་བཞི་པོ་བླ་མའི་གདམས་ངག་ཟབ་ནས་བྱུང་བ་མིན༔ ཁྱེད་རང་རྣམས་ཕོ་སྒོ་བཟང་བས་རྙེད་པ་མིན༔ ཁ་རྗེ་ཆེ་བས་གློ་བུར་དུ་རྙེད་པ་མིན༔ ཡེ་ནས་སེམས་ཅན་ཐམས་ཅད་ཀྱི་གཤིས་གྲོལ་ལུགས་ཆེན་པོ་བཞིར་གནས་ཀྱང་༔ དེ་ལྟར་གྲོལ་བར་མ་ཤེས་ཏེ་འཛིན་པས་བཅིངས་ནས་འཁོར་བར་འཁྱམས་པར་འདུག་གོ༔ འཁོར་བར་འཁྱམས་ཀྱང་གྲོལ་ལུགས་ཆེན་པོ་བཞི་ལས་ནམ་ཡང་འདའ་མ་མྱོང་༔ འདའ་མི་སྲིད༔ འདའ་བར་མི་འགྱུར་ཀྱང་༔ གཤིས་གྲོལ་རུང་ལ་འཛིན་པས་འཁྲུལ་རུང་གིས་སྡུག་བསྔལ་མྱོང་བར་འདུག་མོད༔ དཔེར་ན་དམྱལ་བ་མནར་མེད་པའི་སྡུག་བསྔལ་མྱོང་བདོ་བའི་ཚེ་ཡང་༔ གཤིས་གྲོལ་ལུགས་ཆེན་པོ་བཞི་ལ་གནས་རུང་༔ ངོ་མ་ཤེས་པས་སྡུག་བསྔལ་བ་ཡིན་ནོ༔ སྡུག་བསྔལ་གྱི་རྟོག་པ་དེའི་གཤིས་གྲོལ་བར་ཤེས་ན༔ སྡུག་བསྔལ་ཡོད་མ་མྱོང་སྟེ༔ མ་རིག་པ་གསུམ་གྱིས་བསྒྲིབས་ནས་གྲོལ་ཚུལ་མ་ཤེས་པ་ཡིན་ནོ༔ དེ་ལྟར་གྲོལ་ལུགས་ཆེན་པོ་བཞིའི་ལུང་ནི༔ སྒྲ་ཐལ་འགྱུར་ཆེན་པོ་རྩ་བའི་རྒྱུད་ལས༔ རང་རིག་རྟོག་པ་ཀུན་བྲལ་བས༔ གྲོལ་ལུགས་ཆེན་པོ་བཞི་དང་བཅས༔ ཡེ་ནས་མ་བཅོས་པའི་གནད་ཡིན། གྲོལ་བའི་བསྐྱར་གཞི་མེད༔ རང་གིས་གྲོལ་བས་རྟོག་དཔྱོད་མ་བྱས་པའི་གནད་ཡིན། གཉེན་པོ་མེད༔ གཅེར་གྱི་གྲོལ་བས་ལར་རང་སར་བཞག་པའི་གནད་ཡིན། མཐོང་སར་ཡལ༔ ཡོངས་སུ་གྲོལ་བས་ལར་ངོ་སྤྲད་པ་གནད་ཡིན། འབད་རྩོལ་མེད༔ ཅེས་སོ༔ མུ་ཏིག་ཕྲེང་བ་ལས༔ ཡེ་གྲོལ་ཡིན་པས་གཏན་ནས་འཕགས༔ རང་གྲོལ་ཡིན་པས་ཡུལ་རྐྱེན་ཟད༔ གཅེར་གྲོལ་ཡིན་པས་སྣང་བ་དག༔ མཐའ་གྲོལ་ཡིན་པས་མུ་བཞི་དག༔ གཅིག་གྲོལ་ཡིན་པས་དུ་མ་སྟོང་༔ ཞེས་པས༔ དེ་ལྟར་སྣང་གྲག་ཐམས་ཅད་གྲོལ་ལུགས་བཞིར་གནས་པའི་ཕྱིར༔ གང་གིས་ཀྱང་མ་བཅིངས༔ གང་གིས་ཀྱང་མ་བཀྲོལ་ཏེ༔ ཐམས་ཅད་རང་ས་ནས་རང་ཤར་རང་གྲོལ༔ ཇི་ལྟར་སྣང་ཡང་སྐྱེ་འགགས་གནས་གསུམ་གྱི་མཐའ་དང་བྲལ་བའི་ཆོས་ཉིད་ཀྱི་རང་སྣང་ཡིན་པས༔ དེ་བླ་མས་ངོ་སྤྲད་པ་ཙམ་གྱིས་ཆོས་ཉིད་རང་སྣང་དུ་ཤེས་ནས་སྣང་ཤེས་ཆོས་ཉིད་ཏུ་རྟོགས་པས་ཅིར་སྣང་རང་སར་གྲོལ་བའི་སྣང་བ་དགག་བསྒྲུབ་དང་བྲལ་བ་ནི༔ ཐལ་འགྱུར་ལས༔ དེ་ལྟར་ཐམས་ཅད་ཆོས་ཉིད་ལས༔ བླང་བར་བྱ་བ་གང་མེད་ཅིང་༔ བཞག་པར་བྱ་བ་ཅུང་ཟད་མེད༔ གང་དུ་མེད་པའི་ཆོས་ཉིད་དེ༔ ཅིར་སྣང་རང་གི་ཆོས་ཉིད་ལས༔ བཅོས་པའི་ཆོས་ཉིད་ལོགས་ན་མེད༔ ཇི་ལྟར་བཅོས་ཀྱང་མི་རྟོག་སྐྱེ༔ དང་དུ་བླང་མེད་རང་སྣང་ངོ་༔ ཞེས་པ་དང་༔ ནོར་བུ་ཕྲ་བཀོད་ལས༔ རྟོག་བྱེད་ཀྱི་ཤེས་པ་ཡུལ་ལ་སྣང་བའི་ཚེ་ན་སྣང་བ་རང་སྣང་སྟེ་དེའི་ཚེ་ཤེས་པ་ཁ་ཡན་དུ་བཏང་བར་བྱའོ༔ ཞེས་པ་དང་༔ རིག་པ་རང་ཤར་ལས༔ བསྒོམ་དུ་མེད་པའི་དོན་ནི་གང་དུའང་མ་སྤང་ལ༔ འཛིན་ཆགས་མེད་ན་བླ་མེད་རྙེད་པ་ཡིན༔ སྤང་རྒྱུ་མེད་ཅིང་སྤང་བའི་ཆོས་དང་བྲལ༔ སྤང་བ་པོ་ཡང་མ་དམིགས་སྤང་བྱ་ག་ལ་ཡོད༔ ཅེས་པ་དང་༔ རིན་ཆེན་སྤུངས་པ་ལས༔ ཀྱེ་གསུང་གི་རྡོ་རྗེ༔ རང་གི་ཤེས་པ་སྟོང་པ་ཀུན་སྣང་གི་ཡེ་ཤེས་ལ་ལྟོས་དང་༔ གང་ལྟར་སྣང་བ་ཐམས་ཅད་རང་གི་གྲོགས་སུ་ཤར་བ་ངོ་མཚར༔ ཅི་ལྟར་སྣང་ཡང་རང་གི་གཞི་ལས་གཡོས་པ་མེད་པ་ཧ་ཧ༔ རིག་པ་སྟོང་པ་ཀུན་གྲོལ་གྱི་སྣང་བ་ལ་ལྟོས་དང་༔ རང་གི་གཉེན་པོ་རང་ཆེ་བ་ངོ་མཚར༔ ཉོན་མོངས་པ་རྣམས་རང་གིས་རང་གྲོལ་བ་ཧ་ཧ༔ རིག་པ་སྟོང་པ་ཡེ་ནས་གྲོལ་བ་ཀུན་དག་གི་ངོ་བོ་ལ་ལྟོས་དང་༔ འབད་རྩོལ་མེད་པར་འབྲས་བུ་རྙེད་པ་ངོ་མཚར༔ གཅིག་ཟིན་པས་འཁོར་འདས་ཐམས་ཅད་གཉིས་མེད་དུ་དག་པ་ཧ་ཧ༔ ཞེས་པ་དང་༔ ཡང་རང་ཤར་ལས༔ སྣང་བ་ལ་མི་ཞེན༔ མེད་པ་མི་བསྒྲུབ༔ ཡོད་པ་མི་སྤང་༔ སངས་རྒྱས་མི་བསྒྲུབ༔ བསྒོམ་པ་མི་བསྒོམ༔ ལྟ་བ་མི་ལྟ༔ འཁྲུལ་སྣང་མི་འགེག༔ དག་སྣང་མི་ཚོལ༔ ཅེས་གསུངས་སོ༔ ཡང་གོང་མ་ལས༔ ལྟ་བ་རང་བྱུང་གི་ཡེ་ཤེས་ལ་ལྟོས་དང་༔ དགེ་སྡིག་དང་ལྟ་བསྒོམ་ལས་འདས་པ་ངོ་མཚར༔ གཞི་མ་བསྐྱོད་པར་ལུས་ཀྱིས་བྱ་བ་ཅི་བྱས་ཀྱང་དགེ་སྡིག་ཕན་གནོད་དང་བྲལ་བ་ཧ་ཧ༔ དངོས་པོ་གཤིས་ཀྱི་འདུག་ཚུལ་ལ་ལྟོས་དང་༔ སྣང་བ་འདི་སྤུ་མ་བརྗེས་མདོག་མ་བསྒྱུར་བ་ངོ་མཚར༔ བདེ་སྡུག་ཅི་ལྟར་བྱས་ཀྱང་དོན་ལ་འགྱུར་བ་མེད་པ་ཧ་ཧ༔ སྟོང་པ་ཆེན་པོ་ཀུན་འབྱུང་གི་ཡེ་ཤེས་ལ་ལྟོས་དང་༔ དྲན་བསམ་གྱི་སྣང་བ་སྣ་ཚོགས་ཤར་བ་ངོ་མཚར༔ ཅི་ལྟར་བྱས་ཀྱང་འགག་མེད་ཀྱི་ཀློང་དུ་སྐྱེ་མེད་གྲོལ་བ་འདི་ཧ་ཧ༔ ཞེས་གསུངས༔ ཀུན་བྱེད་ལས༔ རྟོག་པ་རང་སར་གྲོལ་བའི་ལྟ་བ་ལས༔ མ་ཡེངས་རང་བཞིན་བཞག་པས་བྱ་རྩོལ་མེད༔ ཀུན་ཀྱང་རང་བྱུང་རང་སར་གྲོལ་བ་ཡིན༔ ཅེས་སོ༔ དེ་ལྟར་སྣང་ཤེས་ཀྱི་ཆོས་ཐམས་ཅད་སུས་ཀྱང་མ་བཅིངས༔ སུས་ཀྱང་མ་བཀྲོལ༔ ཡེ་ནས་བཅིངས་གྲོལ་དང་བྲལ་བའི་ངོ་བོ་ལ༔ དེ་ཅི་ལྟ་བར་རྟོགས་པའི་ཚེ༔ གང་ལའང་སྤང་བླང་མེད་དེ༔ ཅི་སྣང་ཆོས་ཉིད་ཀྱི་རང་སྣང་དུ་ཤེས་པས༔ བསྒོམ་བཟང་པོ་གཅིག་ལོགས་ན་བསྒོམ་རྒྱུ་མེད་ལ༔ རྣམ་རྟོག་ངན་པ་གཅིག་གུད་དུ་སྤང་དུ་མེད་དེ༔ ཅི་ལྟར་བྱས་ཀྱང་བཅིངས་གྲོལ་དང་བྲལ་ཏེ༔ ཕ་རོལ་དུ་ཕྱིན་པ་ལས༔ གཟུགས་མ་བཅིངས་མ་གྲོལ་བའོ༔ ཅེས་པ་ནས༔ རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་མ་བཅིངས་མ་གྲོལ་བའོ༔ ཞེས་གསུངས་སོ༔ དེ་ལྟར་རྟོགས་ཤིང་གྲོལ་བས༔ དཔེར་ན་རིན་པོ་ཆེ་གསེར་གླིང་དུ་ཕྱིན་པ་ལྟར༔ ཆོས་ཐམས་ཅད་སྟོང་པ་ཆེན་པོར་གྲོལ་ནས༔ བསྒོམ་པའི་དམིགས་འཛིན་རང་སར་གྲོལ་ཏེ༔ བར་དོ་མེད་པར་སངས་རྒྱས་པ་ཡིན་ནོ༔ སངས་རྒྱས་ལུགས་གསུམ་སྟེ༔ རབ་གྲོལ་ལུགས་ཆེན་པོ་བཞིའི་དོན་རྟོགས་པས༔ ཚེ་འདི་ཉིད་ལ་ཟག་པ་དང་བཅས་ཏེ༔ ཕུང་པོ་མི་སྣང་བར་སངས་རྒྱས༔ འབྲིང་འཕོ་བའི་གདམས་པས་འཆི་ཁར་སངས་རྒྱས་པའམ༔ ཆོས་ཉིད་ཀྱི་བར་དོར་བདེན་པའི་སྟོབས་མངོན་དུ་གྱུར་ནས་སངས་རྒྱས༔ ཐ་མ་སྲིད་པའི་བར་དོར་རིང་བཞིན་སྤྲུལ་སྐུའི་ཞིང་ཁམས་སུ་དབུགས་དབྱུང་སྟེ་སངས་རྒྱས་པའམ༔ མངལ་སྒོ་བཟང་པོ་གཅིག་བདམ་ནས་སྐྱེ་བ་གཅིག་བླངས་ཏེ་ཆོས་འདི་དང་འཕྲད་ནས་སངས་རྒྱས་པར་འགྱུར་རོ༔ དེ་ལ་འདིར༔ རབ་ཚེ་འདིར་བསམ་གཏན་བར་དོར་ཏིང་ངེ་འཛིན་གྱི་ཞེན་པ་དང་བྲལ་ཏེ༔ གྲོལ་ལུགས་ཆེན་པོ་བཞིར་ངོ་སྤྲད་དོ༔ སངས་རྒྱས་པར་བྱེད་པའི་ཁྲིད༔ བསམ་གཏན་བར་དོའི་ཁྲིད་ཡིག༔ རིག་པ་རང་གྲོལ་ཞེས་བྱ་བ༔ ས་མ་ཡ༔ འཕོ་བ་དྲན་པ་རང་གྲོལ་ཞེས་བྱ་བ་འཆི་ཁ་བར་དོའི་གདམས་པ།ཟབ་ཆོས་ཞི་ཁྲོ་དགོངས་པ་རང་གྲོལ་གྱི༔ རྫོགས་རིམ་བར་དོ་དྲུག་གི་ཁྲིད་ཡིག་ལས་སྤྱི་དོན་བཞི་པ་འཕོ་བ་དྲན་པ་རང་གྲོལ་ཞེས་བྱ་བ་འཆི་ཁ་བར་དོའི་གདམས་པའོ༔ སྤྱི་དོན་བཞི་པ་འཆི་ཁ་བར་དོའི་ཁྲིད་ཡིག་ལས༔ རྒྱལ་པོའི་བཀའ་ཐེམ་བསྐུར་བ་ལྟ་བུའི་གདམས་ངག༔ འཕོ་བ་དྲན་པ་རང་གྲོལ་བསྟན་པ་ནི༔ དེ་ཡང་གོང་གི་ཁྲེགས་ཆོད་ཀྱི་སྐོར་དང་༔ སྒྱུ་ལུས་རྨི་ལམ་འོད་གསལ་རྣམས་མ་འབྱོངས་ཤིང་༔ གྲོལ་ལུགས་བཞིའི་དོན་མ་རྟོགས་པ་དང་༔ ཁྱད་པར་དུ་དེ་རྣམས་ཐོབ་ཀྱང་བསྒོམ་ལོང་མེད་པའི་གང་ཟག་སྡེ་དཔོན༔ ཁྱིམ་པ༔ རྣམ་གཡེངས་ཅན་རྣམས༔ གདམས་པ་ཟབ་མོ་ཐོབ་ཀྱང་ཉམས་སུ་མ་ལོན་པར༔ གདམས་ངག་ཡིག་ཐོག་ཏུ་ལུས༔ ཆོས་གོ་ཐོག་ཏུ་ལུས༔ རང་སེམས་ཐ་མལ་དུ་འཆི་བ་རྣམས་ལ༔ འཆི་ཁར་སངས་རྒྱས་པའི་གདམས་ངག༔ བསྒོམ་མི་དགོས་པར་བཙན་ཐབས་སུ་སངས་རྒྱས་པའི་ཐབས༔ འཕོ་བ་དྲན་པ་རང་གྲོལ་འདི་གལ་ཆེ་སྟེ༔ དེ་ཡང་སྐྱེས་པ་གཅིག་ཡིན་ཕན་ཆད་ངེས་པར་འཆི༔ འཆི་བའི་སྟེང་དུ་ཡང་ནམ་འཆི་ཆ་མེད༔ དེ་བས་ཀྱང་མྱུར་དུ་འཆི་བས༔ དུས་རྟག་ཏུ་འཆི་བ་བརྟག་པར་བྱ་སྟེ༔ རིང་བའི་འཆི་ལྟས༔ ཉེ་བའི་འཆི་ལྟས༔ མ་ངེས་པའི་འཆི་ལྟས༔ ངེས་པའི་འཆི་ལྟས་རྣམས༔ འཆི་ལྟས་མཚན་མ་རང་གྲོལ་ལྟར་བརྟག་པར་བྱའོ༔ དེའང་འཆི་ལྟས་དང་མཐུན་པའི་འཆི་བསླུ་ལ་ནན་ཏན་བྱ་ཞིང་༔ འཆི་ལྟས་མ་ཚང་བའམ་ཚང་ཡང་འཆི་བསླུ་མ་བྱས་པར་འཕོས་ན་ནི༔ ལྷ་བསད་པའི་ཉེས་པ་འབྱུང་བ་དང་༔ རང་གིས་རང་ལྕེབ་པའི་ཉེས་པ་ཕོག་པས༔ མཚམས་མེད་ལས་ཀྱང་ཆེ་བའི་ཉེས་པ་འབྱུང་བའི་ཕྱིར༔ ཅི་ནས་ཀྱང་འཆི་བསླུ་སྤྱི་དང་བྱེ་བྲག་གང་འོས་འཆི་བསླུ་འཇིགས་པ་རང་གྲོལ་ལྟར་ལན་གསུམ་མམ་ཅི་རིགས་པར་བྱ༔ འཆི་བསླུ་ལན་གསུམ་བྱས་ཀྱང་འཆི་ལྟས་མི་འགྱུར་ན༔ ངེས་པར་འཆི་བས༔ ཤི་ནས་འཕོ་བའི་མཚམས་སྦྱོར་བརྩམ་པར་བྱ་སྟེ༔ དུས་ལ་བབ་པའི་འཕོ་བ་ནི༔ མཚམས་མེད་པ་ལྔ་བྱས་པའི་གང་ཟག་གཅིག་ཡིན་ཀྱང་༔ མཐོ་རིས་སམ་ཐར་པ་ཐོབ་པར་གསུངས་པས༔ ཕན་ཡོན་ཤིན་ཏུ་ཆེའོ༔ འཕོ་བ་ལའང་གཉིས་ཏེ༔ སྦྱང་བ་དང་༔ ལས་ལ་སྦྱར་བ་གཉིས་སོ༔ དང་པོ་སྦྱང་བ་ནི༔ དཔེར་ན་སྐྱེས་པས་ཕྱི་དགྲ་འོང་གིས་དོགས་ནས༔ དགྲ་མེད་པའི་གོང་ནས༔ གོ་མཚོན་དང་༔ མདའ་དང་སྒྱུ་རྩལ་སྦྱང་སྟེ༔ དགྲ་ནམ་བྱུང་བ་དང་རྡེག་མ་རག་བྱེད་པ་ལྟར༔ འདིར་ཡང་འཆི་ལྟས་མ་བྱུང་བའི་གོང་ནས་སྦྱངས་ཏེ༔ ནམ་འཆི་མི་ཤེས་པས༔ ད་ལྟ་ནས་བྱང་བར་བྱས་ཏེ༔ ནམ་འཆི་བར་ངེས་པ་དང་༔ ལས་ལ་སྦྱར་མ་རག་པར་བྱང་བར་བྱ་བ་ཤིན་ཏུ་གཅེས་སོ༔ དེ་ལ་དང་པོ་འཕོ་བ་སྦྱང་བ་ནི༔ ཁྲིད་ཀྱི་དུས་སམ༔ འཕོ་བའི་སྒོས་ཁྲིད་བྱེད་ཀྱང་རུང་སྟེ༔ ཁྲིད་ཀྱི་སྔོན་འགྲོ་ལྟར༔ དལ་འབྱོར་རྙེད་པར་དཀའ་བ༔ འཁོར་བའི་སྡུག་བསྔལ་ལ་བསམས་པས༔ འཁོར་བ་ལ་ཡིད་སྐྱོ་ཞིང་༔ ངེས་པར་འབྱུང་བར་འདོད་པའི་བསམ་པ་བསྐྱེད༔ དེའི་སྟེང་དུའང་༔ རྙེད་པར་དཀའ་བ་རྙེད་ཀྱང་༔ རིང་དུ་མི་གནས་པའི་འཆི་བ་ཞེ་ཐག་པ་ནས་དྲན་པར་བྱ༔ དེ་ནས་བདེ་བའི་གདན་ལ་སེམས་དཔའི་སྐྱིལ་ཀྲུང་གིས་འདུག་ལ༔ འཁོར་བའི་སྒོ་དགག་པ་ནི༔ ལུས་དྲང་པོར་བསྲངས༔ ལག་གཉིས་ས་གནོན་གྱི་ཕྱག་རྒྱས༔ པུས་མོ་གཉིས་ཀ་བཀབ་ལ༔ དཔུང་པ་བརྒྱང་༔ དེ་ནས་རང་གི་སྙིང་ཁར་ཡི་གེ་ཧཱུྃ་མཐིང་ཁ་འོད་དུ་འབར་བ་གཅིག་ལས་ཧཱུྃ་གཅིག་ཆད༔ བཤང་ལམ་དུ་སོང་༔ དམྱལ་བའི་སྒོ་ཁྲིག་གིས་བཀག༔ ཡང་ཧཱུྃ་གཅིག་ཆད་སྲིད་པའི་སྒོར་སོང་༔ ཡི་དྭགས་ཀྱི་སྒོ་དགག༔ དེ་བཞིན་དུ་ཧཱུྃ་གཅིག་གིས་ཆུ་ལམ་དུད་འགྲོའི་སྒོ་བཀག༔ ཧཱུྃ་གཅིག་ལྟེ་བ༔ དེ་ནས་ཁ༔ དེ་ནས་སྣ་བུག་གཉིས༔ དེ་ནས་མིག་གཉིས༔ དེ་ནས་རྣ་བའི་བུག་པ་གཉིས༔ ཧཱུྃ་འོད་དང་ལྡན་པ་རེ་རེས་ཁྲིག་གིས་བཀག་པར་བསམ༔ སྤྱི་བོ་ཚངས་པའི་བུ་ག་ནི༔ ཧཾ་དཀར་པོ་མགོ་ཐུར་དུ་བསྟན་པས་བཀག་པར་བསམ༔ ལུས་ཀྱི་དབུས་སུ་རྩ་དབུ་མ་ལུག་རྒྱུད་ཀྱི་རྒྱུུ་མ་ཕུས་བཏབ་པ་ལྟར་མར་སྣེ་ལྟེ་འོག་ཏུ་ཟུག་པ༔ ཡར་སྣེ་ཚངས་བུག་ཏུ་ཟུག་པ༔ དཀར་ལ་སེར་བའི་མདངས་དང་ལྡན་པ༔ ལུས་ཀྱི་དབུས་སུ་དྲང་ཁྲོང་ངེ་ཡོད་པའི་མར་སྣེ་ལྟེ་འོག་རྩ་གསུམ་འདུས་མདོར༔ རིག་པའི་ངོ་བོ་ཐིག་ལེ་དཀར་ལ་འཚེར་བ༔ གསལ་ལ་དྭངས་པ༔ དབུགས་ཀྱིམ་ཀྱིམ༔ འཕར་ལྷབ་ལྷབ༔ ཡར་ལ་ཁད་ཁད་ཡོད་པར་བསམ༔ སྤྱི་བོའི་སྟེང་གི་ནམ་མཁར༔ བླ་མ་རྡོ་རྗེ་འཆང་གི་ཆ་ལུགས་འཛུམ་མུ་ལེ་བཞུགས་པར་བསམ་ལ༔ ལུས་ཤེད་སྟོད་དུ་སྤུངས་ལ་བསྒྲིམ༔ བཤང་ལམ་དྲག་ཏུ་བསྡམས༔ མིག་གྱེན་ལ་ལྡོག༔ ལྕེ་རྐན་ལ་སྦྱར༔ ལག་པའི་མཐེ་བོང་གཉིས་ཀྱིས་སྲིན་ལག་གི་རྩ་བ་མནན་པའི་ཚུར་དྲག་ཏུ་བཅང་ཞིང་༔ ལྟེ་འོག་ནས་ཡར་དྲག་ཏུ་འཐེན་ཞིང་༔ ངག་གི་གནད་དུ༔ ཧིག་ཀ༔ ཧིག་ཀ༔ ཞེས་ཁོང་ཤེད་དང་བཅས་པས་ཡར་དྲངས་པས༔ འོག་རླུང་གི་ཤུགས་ཀྱིས་ཐིག་ལེ་དེ་རང་དབང་མེད་པར་དབུ་མའི་ནང་ནས་ཡར་ངང་ཧྲི་ལི་ལི་དྲངས་པས༔ ཧིག་ཀ་བདུན་གྱིས་ལྟེ་བར་དྲངས༔ དེ་ནས་ཧིག་ཀ་བདུན་གྱིས་སྙིང་ཁར༔ དེ་ནས་བདུན་གྱིས་མགྲིན་པར༔ དེ་ནས་བདུན་གྱིས་སྨིན་མཚམས་སུ༔ དེ་ནས་ཧིག་ཀ་ཞེས་ཚངས་བུག་གི་ཧཾ་དེ་ལ་ཏུག་ཐུག་པ་དང་༔ ཡང་ཐིག་ལེ་མར་བབས་ཏེ་ལྟེ་འོག་ཏུ་ངང་འཁྱིལ་ལེ་གནས་པར་བསམ༔ དེའི་བར་དུ་ཅུང་ཟད་ངལ་བསོ༔ དེ་ལྟ་བུ་ལ་ལན་འགའ་ཙམ་གྱིས་འཕོ་བ་ཐེབས་པའི་རྟགས་སུ༔ ཚངས་བུག་ཏུ་དྲོད་ཚ་ཆིལ་གྱིས་འོང་བ་དང་༔ གཡའ་བ་དང་༔ ཟ་བ་དང་༔ སྦྲིད་པ་དང་༔ སྐྲང་བ་དང་༔ སྤྱི་གཙུག་ཉོལ་མོར་སོང་བ་དང་༔ བེམ་པ་དང་༔ ཚངས་བུག་ཏུ་ཆུ་སེར་ཐོན་པ་དང་༔ ཁྲག་ཐོན་པ་ལ་སོགས་པ་འབྱུང་༔ དེའི་ཚེ་བླ་མས་ཚངས་བུག་ལེགས་པར་བཙལ་ལ་རྨ་བྱའི་མདོངས་སམ་འཇག་མ་བཙུགས་པས་ལྟེམ་མེ་ནུབ་པར་འགྱུར་རོ༔ དེས་ནི་འཕོ་བ་འབྱོང་བ་ཡིན་ཏེ༔ དེ་ཙམ་ལ་ཚོད་མ་བཟུང་ན༔ ཚེ་སྲོག་གི་བསྐུལ་མར་འགྲོ་བས༔ དམིགས་པ་དང་འཁྲུལ་འཁོར་འཕྲོ་བཅད༔ སྤྱི་བོར་མར་རམ་འབྲུ་མར་གྱིས་བསྐུ་མཉེ་བྱའོ༔ དེ་ལྟར་རྟགས་མ་བྱུང་ན་རྩོལ་བ་དྲག་པོས་ཡར་འདྲེན་གྲངས་མང་དུ་བྱས་པས་རྟགས་འབྱུང་ངོ་༔ སྤྱི་བོར་སྐྲངས་ཀྱང་ཚངས་བུག་མ་རྙེད་ན༔ མགོ་ན་བ་ལ་སོགས་པ་འབྱུང་བས༔ ཚངས་བུག་གི་ཧཾ་ཕྱེས་ནས༔ ཐིག་ལེ་ཚངས་བུག་ནས་ཡར་རྒྱངས་སེ་ཐོན་ནས༔ བླ་མའི་ཞབས་ལ་ཏུག་པ་རེ་བྱས་ནས༔ ཡང་ཚངས་བུག་ཏུ་མར་བྱུང་སྟེ་ལྟེ་འོག་ཏུ་གནས་པར་བསམ༔ དེ་ལྟ་བུ་ལ་ལན་འགའ་ཙམ་གྱིས་ཚངས་བུག་བྱེ་སྟེ༔ ཁྲག་གམ་ཆུ་སེར་ངེས་པར་ཐོན་ནས་འཇག་མ་ཚུགས་པར་འགྱུར་རོ༔ དེ་ནས་ཚངས་བུག་ཧཾ་གིས་མ་བཀག་ན༔ ཚེ་སྲོག་གི་བསྐུལ་མར་འགྲོ་བས་བཀག་པ་གལ་ཆེའོ༔ དེ་ཕྱིན་ཆད་ནས་ཧིག་ཀ་དང་འཁྲུལ་འཁོར་མི་བྱ་བར༔ དབུ་མའི་ནང་དུ་ཐིག་ལེ་འགྲིམ་འགྲུལ་བྱང་བར་བྱ་ཞིང་༔ ཚངས་བུག་ཧཾ་གིས་བཀག་པ་གལ་ཆེའོ༔ དེས་ནི་འཕོ་བ་བྱང་བར་འགྱུར་རོ༔ ཧིག་ཀ་ནི་ཚེ་བསྟུང་བའི་སྔགས་ཡིན་པས༔ འཕོ་བ་མ་ཐེམས་ཀྱི་བར་འདྲེན་པ་ལས་ཐེབས་ནས་ཧིག་ཀ་འདྲེན་པར་མི་བྱའོ༔ གལ་ཏེ་རྩོལ་བ་དྲག་པོས་འཕོ་ཐལ་ན༔ རྟགས་སུ་ཤེས་པ་དྲན་མེད་དུ་འགྲོ་ལ་ཁད་པ་དང་༔ རྣམ་ཤེས་སྟོད་དུ་བརྫངས་པ༔ མགོ་ཡུ་འཁོར་བ་ལ་སོགས་པ་བྱུང་ན༔ རྐང་མཐིལ་གཉིས་སུ་ཁུ་ཚུར་རྡེག༔ སྤྱི་བོར་བསྐུ་མཉེ་བྱ༔ དམིགས་པ་རྐང་མཐིལ་གཉིས་སུ་གསེར་གྱི་མཆོད་རྟེན་ཤིན་ཏུ་ལྕི་བ་ལ་དམིགས་པ་དྲག་ཏུ་གཏད་ཅིང་༔ འབེབས་མང་དུ་བྱས་པས་ཞི་བར་འགྱུར་རོ༔ གནད་ཕལ་ཆེར་ལག་ལེན་ལ་བལྟའོ༔ དེ་ཡན་ཆད་སྦྱངས་བའི་འཕོ་བ་ཞེས་བྱ་བ༔ ནད་མེད་ཅིང་འཆི་ལྟས་མ་བྱུང་གི་གོང་ནས་ལེགས་པར་སྦྱང་བར་བྱའོ༔ ས་མ་ཡ༔ གཉིས་པ་ལས་ལ་སྦྱོར་བའི་འཕོ་བ་ནི༔ འཆི་ལྟས་ཚང་ཞིང་འཆི་བསླུ་ལན་གསུམ་བྱས་ཀྱང་མ་སོས་ན༔ ད་ནི་རྣམ་ཤེས་འཕོ་བར་བྱ་སྟེ༔ འདི་ལ་བཞི༔ ཆོས་སྐུའི་འཕོ་བ་དང་༔ ལོངས་སྐུའི་འཕོ་བ་དང་༔ སྤྲུལ་སྐུའི་འཕོ་བ་དང་༔ ཐ་མལ་པའི་འཕོ་བ་དང་བཞིའོ༔ དེ་རྣམས་གང་ལའང་༔ ཀྱཻ་མ་བདག་ལ་འཆི་ཁ་བར་དོ་འཆར་དུས་འདིར༔ ཀུན་ལ་ཆགས་སེམས་ཞེན་འཛིན་སྤངས་བྱས་ནས༔ གདམས་ངག་གསལ་བའི་ངང་ལ་མ་ཡེངས་འཇུག༔ རང་རིག་སྐྱེ་མེད་ནམ་མཁའི་དབྱིངས་སུ་འཕོ༔ ཞེས་གསུངས་པས༔ དེ་ལ་འཆི་ཁ་བར་དོ་ཡིན་པའི་རྟགས་སུ༔ ཤི་ནད་ཀྱིས་ཐེབ༔ འཆི་ལྟས་ཚང་བའི་དུས་སུ༔ འཆི་ཁ་བར་དོ་ལ་མི་གསལ་བ་གསལ་གདབ་པ༔ སྒེག་མོས་མེ་ལོང་ལ་བལྟ་བ་ལྟ་བུའི་གདམས་ངག་ལ་གཉིས་ཏེ༔ གཞན་གྱིས་གསལ་གདབ་པ་དང་༔ རང་གི་གསལ་གདབ་པའོ༔ དང་པོ་ནི༔ འཆི་ལྟས་ཚང་བ་རང་གིས་རིག་གམ༔ མ་རིག་ཀྱང་སྨན་པ་དང་༔ ནད་གཡོག་གི་རྣམ་འགྱུར་གྱིས་ཀྱང་ཤེས་ལ༔ རང་གིས་ཀྱང་དྲན་པ་གསལ་ན༔ ཉེ་བའི་འཆི་ལྟས་རྣམས་བརྟགས་ལ༔ འཆི་བར་འདུག་ན༔ ཉེ་འཁོར་དུ་རྩ་བའི་བླ་མ་བཞུགས་ན་སྤྱན་འདྲེན་དུ་བཏང་ལ༔ རང་ལ་དངོས་པོ་ཅི་ཡོད་པ་ཐམས་ཅད་བླ་མ་ལ་ཕུལ་ལ༔ ཆགས་པ་སྐད་ཅིག་ཀྱང་མེད་པར་བྱ༔ ཅུང་ཟད་གཅིག་ལ་ཆགས་ཀྱང་ངན་སོང་དུ་བསྐྱུར་བས༔ དགེ་སློང་འབར་བ་གསུམ་གྱི་གཏམ་རྒྱུད་ལྟ་བུའོ༔ དངོས་སུ་ཕུལ་དབང་མ་ཐོབ་ཀྱང་༔ ཡིད་ཀྱིས་ཕུལ་བས་བློས་ཐོངས་བར་བྱའོ༔ ཁྱད་པར་དུའང་ཆགས་སྡང་སྐྱེ་བའི་དངོས་པོ་གཅིག་ཀྱང་ཐོ་ཕྱིར་མི་བཞག་གོ༔ དེ་ནི་ཀུན་ལ་ཆགས་སེམས་ཞེན་འཛིན་སྤངས་བྱས་ནས༔ ཞེས་པའི་དོན་ནོ༔ དེའི་དུས་སུ་ཅི་ཡོད་སྤང་དག་བྱ་སྟེ༔ ཉི་ཟླ་ཁ་སྦྱོར་ལས༔ རང་གི་བླ་མ་དགེ་འདུན་དང་༔ ཚོགས་བསགས་ཞིང་ནི་ཁྱད་པར་ལ༔ ཡོན་དང་སྟོན་མོས་མཉེས་བྱས་ལ༔ ཞེས་སོ༔ དེ་ནས་བླ་མ་བྱོན་ནས༔ སྔར་གྱི་དམ་ཚིག་ཉམས་ཆགས་ཡོད་ན་བཤགས༔ ཉེས་ལྟུང་ཅི་ཡོད་ཕྱིར་བཅོས་བྱ༔ སྡོམ་ལྡན་ཡིན་ན་སྡོམ་པ་གསོ༔ སྡོམ་ལྡན་མིན་ན་སྐྱབས་འགྲོ་ནས་གཞི་བླངས་ལ་སྡོམ་པ་འབོག༔ དེ་ནས་སྔར་ནས་འཕོ་བ་བྱང་བ་གཅིག་ཡིན་ན༔ ལུས་གནད་བཅོས་ལ༔ སྔར་གྱི་འཕོ་བའི་དམིགས་པ་དེ་ཀ་བླ་མས་ལན་མང་དུ་གསལ་གདབ་པས༔ ཐེབས་པའི་རྟགས་སུ༔ དབུགས་སོང་མ་ཐག་ཏུ་སྤྱི་བོ་སྐྲངས་པའམ༔ ཁྲག་གམ་ཆུ་སེར་ལ་སོགས་པ་ཐེབས་པའི་རྟགས་ངེས་པར་འབྱུང་ངོ་༔ རྟགས་བྱུང་ན་བར་དོའི་གསལ་འདེབས་མི་དགོས་ལ༔ མ་བྱུང་ན༔ བླ་མས་རྣ་བར་མཆུ་གཏད་པའམ༔ སྙུག་མའམ༔ ཤོག་གུའི་སྦུ་གུ་རྣ་བ་ལ་གཏད་དེ༔ དེའི་ནང་ནས་ཕར་ལ་ཆོས་ཉིད་འོད་གསལ་གྱི་བར་དོ་ནས་བཟུང་ནས༔ རིམ་པ་བཞིན་བར་དོའི་ཚིག་རྣམས་དལ་བུས་ཐོས་གྲོལ་ལྟར་དུ་གསལ་གདབ་པས༔ མི་ཐེབས་མི་སྲིད་དེ༔ དཔེར་ན་མི་བརྟན་པོ་གཅིག་ལ་རྒྱལ་པོ་ཆེན་པོ་གཅིག་གི་བཀའ་ཕྲིན་བསྐུར་ན་བརྗེད་མི་སྲིད་དེ༔ བརྗེད་ན་རྒྱལ་པོའི་ཆད་པ་འོང་བས༔ འཇིགས་ནས་ངེས་པར་བརྡའ་འཕྲོད་པ་བྱེད་པ་ལྟར༔ འདིར་ཡང་ངན་སོང་གི་གཡང་ལ་འཇིགས་ནས༔ ངེས་པར་གདམས་པ་རྣམས་ཡིད་ལ་ཟིན་ཏེ༔ ཆོས་ཉིད་ཀྱི་བར་དོར་ངེས་པ་རྙེད་པར་འགྱུར་རོ༔ གལ་ཏེ་བླ་མ་མི་བཞུགས་ན༔ ཆོས་བརྒྱུད་གཅིག་པའི་བཤེས་གཉེན་དམ་པའམ༔ རང་གི་རྡོ་རྗེ་སྤུན་སྲིང་དམ་ཚིག་གི་སེལ་མེད་པ༔ ལྟ་སྤྱོད་མཐུན་པ་གཅིག་གིས་གསལ་གདབ་བོ༔ ཉི་ཟླ་ཁ་སྦྱོར་ལས༔ དེ་ཚེ་བླ་མའི་མན་ངག་རྣམས༔ རང་གི་རྒྱུད་ལ་འདྲིས་པར་བྱ༔ དོན་འདི་རྣམས་ཀྱིས་གསལ་ཡང་གདབ༔ བླ་མ་མེད་ན་རྡོ་རྗེ་སྤུན༔ ཤེས་པས་གསལ་ཡང་གདབ་པར་བྱ༔ ཞེས་པའོ༔ དེ་ནི་གཞན་གྱིས་གསལ་གདབ་པའོ༔ གཉིས་པ་རང་གིས་གསལ་གདབ་པ་ནི༔ བླ་མ་མཆེད་གྲོགས་མ་འཛོམས་པའམ་རི་ཁྲོད་ན་གཅིག་པུར་འཆི་བ་ལྟ་བུའམ༔ ཉམས་མྱོང་བཟང་ཞིང་གཞན་གྱིས་གསལ་འདེབས་མི་དགོས་པ་ལྟ་བུ་ལ་ནི༔ རང་གིས་རང་ལ་སྔར་གྱི་ཉམས་ལེན་རྣམས་གསལ་གདབ་པར་བྱ་སྟེ༔ དེ་ཡང་འོད་གསལ་ཟིན་པོ་ཡོད་པ་དང་༔ སྟོང་པ་ཉིད་ཀྱི་ལྟ་བ་ལ་བྱང་བ་དང་༔ རིག་ཐོག་ཏུ་རྡོ་རུས་འཕྲོད་པའི་གང་ཟག་ཡིན་ན༔ ཆོས་སྐུའི་འཕོ་བ་མཆོག་ཡིན་པས༔ གོང་མ་ལྟར་ཆགས་སྡང་སྐྱེ་བའི་དངོས་པོ་གཅིག་ཀྱང་མེད་པར་བྱ༔ ལུས་ཀྱིས་ཐུབ་ན་ཆོས་བདུན་ནམ༔ ཙོག་པུར་ལངས༔ མ་ཐུབ་ན་གཡས་པ་ས་ལ་ཕབ་མགོ་བྱང་དུ་བསྟན་ཏེ༔ ད་ནི་བདག་འཆི་བར་འདུག་པས༔ སྤྱིར་ཁམས་གསུམ་འཁོར་བ༔ ཁྱད་པར་སྙིགས་མའི་དུས་འདིར༔ བདག་གདམས་པ་ཟབ་མོ་འདི་ལྟ་བུ་དང་འགྲོགས་ནས་འཕོ་བ་ནི་རེ་བྲོད༔ ད་རེས་འཆི་བ་འོད་གསལ་ཆོས་ཀྱི་སྐུ་ངོ་ཤེས་པར་བྱས་ལ༔ གང་ལ་གང་འདུལ་གྱི་སྤྲུལ་པ་དཔག་ཏུ་མེད་པ་བཀྱེ་ནས༔ འཁོར་བ་མ་སྟོང་གི་བར་དུ་སེམས་ཅན་ཐམས་ཅད་ཀྱི་དོན་བྱ་དགོས་སྙམ་པའི་སེམས་བསྐྱེད་ཏུང་ཏུང་བ་ལན་འགའ་བྱ༔ དེ་ནས་བདག་གིས་བླ་མ་བརྟེན་ཅིང་གདམས་པ་ཟབ་མོ་ཞུས་པའི་དོན་དེ་ད་ལྟར་དགོས་པ་ཡིན་ནོ་སྙམ་དུ་མ་ཡེངས་པར་བྱ་སྟེ༔ གདམས་ངག་གསལ་བའི་ངང་ལ་མ་ཡེངས་འཇུག༔ ཅེས་པའི་དོན་ཡིན་ནོ༔ དེ་ནས་སེམས་མ་བཅོས་པར་འཕོ་བྱ་འཕོ་བྱེད་ཀྱི་རྟེན་དང་ཕྲལ་ཏེ༔ རང་གི་རིག་པ་བཟོ་མེད་དུ་ཡེ་རེ༔ ཡེངས་མེད་དུ་ཧྲིག་གེ༔ གསལ་སྟོང་དུ་རྗེན་ནེ་ཅེ་རེ་བ་ལ་ཡུན་རིང་དུ་བཞག་གོ༔ དེའི་ངང་ལ་དབུགས་སོང་ན༔ གཞིའི་འོད་གསལ་དང་༔ ད་ལྟར་བསྒོམས་པའི་ལམ་གྱི་འོད་གསལ་གཉིས༔ ཆུ་སྣ་དང་རྒྱ་མཚོ་བྲེང་འཕྲད་པ་ལྟ་བུ༔ འོད་གསལ་མ་བུ་འཕྲད་དེ༔ ཡར་གྱི་ཟང་ཐལ་ཆོས་སྐུ་སྐྱེ་བ་མེད་པ་ཐོབ་སྟེ༔ སྐད་ཅིག་ལ་གྲོལ་བར་འགྱུར་རོ༔ ཉམས་རྟོགས་བཟང་བ་རྣམས་ནི༔ འདི་ཁོ་ན་ལ་ཡང་ནས་ཡང་དུ་བསྐྱར་བས༔ རྣམ་དག་ཆོས་སྐུའི་འཕོ་བ་ཞེས་བྱ་སྟེ༔ འཕོ་བ་ཀུན་གྱི་མཆོག་ཡིན་ནོ༔ དེའང་ངོ་མ་འཕྲོད་པ་དང་༔ ཉམས་རྟོགས་མེད་པ་རྣམས་ལ་ནི༔ ཆོས་སྐུའི་འཕོ་བ་བཏབ་རུང་༔ དམུས་ལོང་ལ་རྫས་བསྟན་པའམ༔ ཁྱི་ལ་སྐར་མ་བསྟན་པ་དང་འདྲ་བས༔ གང་ཟག་གི་བློ་ཚོད་དང་སྦྱར་བའི་འཕོ་བ་དང་གསལ་གདབ་པ་གལ་ཆེའོ༔ དེ་ལྟར་ཆོས་སྐུའི་འཕོ་བ་ཐེབས་ན༔ ཕྱིའི་རྟགས་སུ་ནམ་མཁའ་གཡའ་དག་པ་དང་༔ ནང་གི་རྟགས་སུ་ཕུང་པོ་ལ་ཡུན་རིང་དུ་བཀྲག་མི་ཡལ་ཞིང་མདངས་གསལ་བ་དང་༔ གསང་བའི་རྟགས་སུ་ཨཱ༔ དམར་པོ་དང་ཧཱུྃ་མཐིང་ག་ལ་སོགས་པ་འབྱོན་པར་འགྱུར་རོ༔ ཆོས་སྐུའི་འཕོ་བ་ས་མ་ཡ༔ གཉིས་པ་ལོངས་སྐུའི་འཕོ་བ་ནི༔ བསྐྱེད་རིམ་ལ་གཙོ་བོར་བྱེད་པ་དང་༔ ཁྱད་པར་སྟོང་པ་ཉིད་ལ་ངེས་ཤེས་ཆུང་ན༔ ལོངས་སྐུའི་འཕོ་བ་བརྩམ་པར་བྱ་སྟེ༔ ལུས་གནད་གོང་ལྟར་ཙོག་པུར་ཐུབ་ན་ལངས་ལ༔ གོང་གི་སྦྱོང་བའི་དུས་ཀྱི་འཕོ་བའི་དམིགས་པ་གསལ་གདབ༔ ཁྱད་པར་སྤྱི་བོའི་གཙུག་ཏུ་པདྨ་ཉི་མ་ཟླ་བའི་གདན་གྱི་སྟེང་དུ༔ བླ་མ་ལོངས་སྤྱོད་རྫོགས་པའི་ཆ་ལུགས༔ རྡོ་རྗེ་འཆང་ཆེན་ནམ༔ རྡོ་རྗེ་སེམས་དཔའམ༔ སྤྱན་རས་གཟིགས་ལ་སོགས་པ༔ ཁྱད་པར་རང་གི་ཡི་དམ་བསྐྱེད་རིམ་གང་ལ་མོས་པ་དེ་ཉིད་རྣམ་པ་གསལ་བར་བསྒོམ༔ ཁོང་པའི་ནང་དུ་རྩ་དབུ་མ་དྭངས་སང་ངེ་བའི་མར་སྣེ་ལྟེ་འོག་ཏུ་རང་གི་རིག་པའི་ངོ་བོ༔ ཐིག་ལེ་དཀར་པོའམ༔ ཨ་དཀར་པོའམ༔ ཧཱུཾ་མཐིང་གའམ༔ ཧྲཱིཿདམར་པོ་ལ་སོགས་པ་རང་གི་ཡི་དམ་དེ་ཉིད་ཀྱི་ས་བོན་གསལ་བར་བསྒོམ༔ ཧཱུཾ་གིས་བུག་པ་དགག་པ་རྣམས་བློས་གསལ་ན་རབ༔ མ་གསལ་ན་བུག་པ་རྣམས་ཡིད་ལ་མི་བྱེད་པར༔ དབུ་མའི་ནང་དུ་ཤེས་པ་རྩེ་གཅིག་གཏད་དེ༔ ལུས་ཤེད་སྟོད་དུ་སྤུངས་འོག་སྒོ་དྲག་ཏུ་བཙུམ༔ མིག་གྱེན་ལ་བསྒྲིལ༔ ལྕེ་རྐན་ལ་སྦྱར༔ འོག་རླུང་སྟེང་དུ་འཐེན་ལ༔ དབུ་མའི་ནང་དུ་ཤེས་པ་གཏད་དེ༔ ཧིག་ཀ་ཧིག་ཀ་ཞེས་པ་དང་སྦྲགས་ཏེ༔ རིམ་བཞིན་གྱེན་ལ་དྲངས་ཏེ༔ ཚངས་བུག་ཏུ་སླེབས་པ་དང་༔ ཚངས་པའི་བུ་ག་ཧཾ་གིས་བཀག་པ་དེ་ཁ་བྱེ་སྟེ༔ དཀར་སང་ངེ་ཡོད་པའི་ནང་ནས་ཡར་མདའ་འཕངས་པ་བཞིན་སོང་ནས༔ ཡི་དམ་གྱི་ཐུགས་ཀར་སིང་གིས་བསྟིམ༔ རིག་པ་ཡི་དམ་གྱི་ཐུགས་ཀར་ཡེ་རེ་གཏད་དེ༔ མར་མི་ཕབ་པར་ཡར་ཡང་འདྲེན་ཞིང་བསྟིམ༔ དེ་ནས་ཡི་དམ་གྱི་ལྷ་ཡང་དམིགས་མེད་ཀྱི་ངང་ལ་བཞག་གོ༔ དེའི་ངང་ལ་དབུགས་སོང་ན༔ ཡི་དམ་གྱི་ལྷ་དང་དབྱེར་མེད་པར་རིག་པ་འཛིན་པའི་གོ་འཕང་ཐོབ་སྟེ༔ ལོངས་སྤྱོད་རྫོགས་པའི་སྐུ་རུ་སངས་རྒྱས་པར་འགྱུར་རོ༔ དེ་ལྟར་ལོངས་སྐུའི་འཕོ་བ་ཐེབས་ན༔ ཕྱིའི་རྟགས་སུ་ནམ་མཁའ་འཇའ་དང་འོད་ཀྱིས་གང་བ་དང་༔ ནང་གི་རྟགས་སུ་སྤྱི་བོའི་ཚངས་བུག་ཏུ་ཁྲག་གམ་ཆུ་སེར་ཐོན་པ་དང་༔ ཟིལ་པ་ཕྲོམ་པའམ་སྐྲངས་པ་ལ་སོགས་པ་འབྱུང་༔ གསང་བའི་རྟགས་སུ་གདུང་རིགས་རྣམ་པ་ལྔའམ་གང་རུང་རེ་འབྱོན་པ་དང་༔ ལྷའི་སྐུ་གཟུགས་དང་༔ ཕྱག་མཚན་ལ་སོགས་འབྱོན་པར་འགྱུར་རོ༔ ལོངས་སྐུའི་འཕོ་བ་ས་མ་ཡ༔ གསུམ་པ་སྤྲུལ་སྐུའི་འཕོ་བ་ནི༔ ལུས་གནད་གཡས་ས་ལ་ཕབ་པས༔ རླུང་སྣ་བུག་གཡོན་ནས་རྒྱུ་བར་འགྱུར་རོ༔ དེའི་དུས་སུ་རང་གི་མདུན་དུ་སྤྲུལ་པའི་སྐུུ་ཐུབ་པ་ཆེན་པོའམ༔ སྨན་པའི་རྒྱལ་པོའམ༔ བྱམས་པའམ༔ ཡང་ན་ཨོ་རྒྱན་པདྨའི་སྐུའམ༔ བླ་མ་དགེ་བའི་བཤེས་གཉེན་གྱི་སྐུ་རིས་སུ་བྲིས་པའམ༔ འབུར་དུ་དོད་པ་གཅིག་བཞུགས་སུ་གསོལ༔ དེ་ལ་མཆོད་པ་རྒྱས་པར་བཤམས༔ སྐུ་དངོས་སུ་མེད་ན་ཡིད་ཀྱིས་གསལ་བོར་དམིགས་ལ༔ ཡིད་ཀྱིས་སྤྲུལ་པའི་མཆོད་པ་འབུལ༔ བདག་ད་ལྟ་འཆི་བ་འདི་ལ་བརྟེན་ནས༔ སེམས་ཅན་ཐམས་ཅད་ཀྱི་དོན་དུ་སྤྲུལ་པའི་སྐུ་སྐྱེ་ནས༔ འགྲོ་དོན་རྒྱ་ཆེན་པོ་འབྱུང་བར་ཤོག་ཅིག༔ སྤྲུལ་པའི་སྐུ་དེ་ཉིད་ཀྱང་མཚན་དང་དཔེ་བྱད་ལྡན་པ༔ སྐུ་ཚེ་དང་ཕྲིན་ལས་ལ་བར་ཆད་མི་འབྱུང་ཞིང་༔ དུས་གསུམ་རྒྱལ་བའི་གདུང་འཚོབ་པའི་རིག་འཛིན་ཆེན་པོར་སྐྱེ་བར་གྱུར་ཅིག༔ ཅེས་རང་གཞན་ཐམས་ཅད་ཀྱི་དོན་དུ་སྨོན་ལམ་ཀྱང་བཏབ༔ ཡིད་ཀྱིས་ཀྱང་དེ་ལྟ་བུའི་འདུན་པ་དུང་ངེ་བ་བྱས་ལ༔ རྩ་དབུ་མ་དྭངས་སང་ངེ་ཡོད་པའི་ནང་ནས༔ རིག་པའི་ངོ་བོ་དེ་ཐིག་ལེ་དཀར་ལ་དམར་བ༔ སྣུམ་ལ་འདྲིལ་བ༔ ཡར་ལ་ཁད་པ་གཅིག་ལྟེ་འོག་ཆོས་འབྱུང་གྲུ་གསུམ་དུ་ཡོད་པར་བསམ༔ འོག་སྒོ་འུབ་ཀྱིས་བཙུམ་ལ་འཐེན་པས༔ འོག་རླུང་གིས་ཐིག་ལེ་དེ་ཡར་ལ་རང་དབང་མེད་པར་ཕུལ་བ་དང་༔ ཧིག་ཀ་ཧིག་ཀ་ཞེས་ཅི་ནུས་པས་ཡར་ལ་དྲངས་པས༔ སྣ་བུག་གཡོན་གྱི་སྒོར་སླེབ་པ་དང་༔ རིག་པ་རླུང་དང་སྒྲགས་ཏེ༔ སྐད་ཅིག་གིས་མདུན་གྱི་སྤྲུལ་པའི་སྐུའི་ཐུགས་ཀ་ན་མདའ་འཕང་བ་བཞིན་དུ་བསྟིམས་ལ༔ རླུང་རིག་ཚུར་མི་བསྡུ་བར་གཞག༔ རྣམ་ཤེས་མ་སོང་གི་བར་དུ་ཡང་ཡང་བསྐྱར་བས་ཐེབས་པར་ངེས་སོ༔ དེའི་ངང་ལ་རྣམ་ཤེས་སོང་ན༔ ཕྱི་མ་སེམས་ཅན་གྱི་དོན་བྱེད་པའི་སྤྲུལ་པའི་སྐུ་གཅིག་ཏུ་སྐྱེ་བར་ངེས་སོ༔ དེ་ལྟར་སྤྲུལ་སྐུའི་འཕོ་བ་ཐེབས་ན༔ ཕྱིའི་རྟགས་སུ་ནམ་མཁའ་ལ་སྤྲིན་འཇའ་དཔག་བསམ་གྱི་ལྗོན་ཤིང་ལྟ་བུ་དང་༔ དར་དཀར་བརྒྱངས་པ་ལྟ་བུ་དང་༔ མེ་ཏོག་གི་ཆར་པ་ལ་སོགས་པ་འབྱུང་ངོ་༔ ནང་གི་རྟགས་སུ་སྣ་བུག་གཡོན་དུ་ཁྲག་གམ་ཆུ་སེར་རམ་བྱང་སེམས་ཐོན་པའམ༔ ཟིལ་པ་ཕྲོམ་པ་ལ་སོགས་པ་འབྱུང་ངོ་༔ གསང་བའི་རྟགས་སུ་རིང་བསྲེལ་ཕྲ་མོ་མང་པོ་དང་༔ དབུའི་ཐོད་པ་མ་ཞིག་པ་ཧྲིལ་པོ་དང་༔ ལྷའི་ཕྱག་མཚན་ལ་སོགས་པ་འབྱུང་ངོ་༔ སྤྲུལ་སྐུའི་འཕོ་བ་ས་མ་ཡ༔ དེ་རྣམས་ནི་རིམ་གྱིས་འཆི་བའི་དབང་དུ་བྱས་པ་ཡིན་ལ༔ ཅིག་ཆར་དུ་འཆི་བ་ལ་ནི༔ དེ་ལྟའི་སྒོམ་ལོང་མེད་དེ༔ སྐད་ཅིག་མའི་འཕོ་བ་འདི་གལ་ཆེའོ༔ དེའང་འཆི་བའི་རྐྱེན་གང་གིས་བྱེད་མི་ཤེས་པས༔ ད་ལྟ་ནས་རེས་སྦྱང་བའི་འཕོ་བ་ལ་བསླབ༔ རེས་སྐད་ཅིག་མའི་འཕོ་བ་ལ་བསླབ་བོ༔ དེ་ཡང་འདི་ལྟར་བྱ་སྟེ༔ བདག་གལ་ཏེ་གློ་བུར་དུ་འཆི་བར་འགྱུར་ན༔ འདུན་པ་སྤྱི་བོ་ལ་གཏད་དགོས་སྙམ་པའི་དྲན་འདུན་ཡེར་ཡེར་བྱ༔ འདུན་པ་འདི་གནད་ཆེ་བ་ཡིན་ནོ༔ དཔེར་ན་ཉི་ཤུ་གཉིས་ཀྱི་ཟླ་བ་ཤར་བ་དང་ལངས་ནས་འགྲོ་དགོས་སྙམ་པའི་འདུན་པ་དེའི་ནུབ་མོ་ནས་དུང་ངེ་ཡོད་ན༔ ནམ་ཕྱེད་ནས་ཟླ་བ་ཤར་བ་དང་གཉིད་སད་པ་ལྟ་བུའོ༔ དེའང་ད་ལྟར་བྲེད་སྔངས་དྲག་པོ་ནམ་བྱུང་བྱུང་དུ༔ འདུན་པ་སྤྱི་བོར་རྒྱང་རྒྱང་གཏད་པ་ལ་བསླབ་བོ༔ དེ་ནས་ཅིག་ཆར་དུ་འཆི་བ་ཞེས་བྱ་བ༔ བྲག་གཡང་མཐོན་པོ་ལ་ཕྱོད་ཀྱིས་ལྷུང་བའི་ཚེ༔ བདག་འཆིའོ་སྙམ་པ་གཅིག་འོང་བས༔ དེ་མ་ཐག་ཏུ༔ སྤྱི་བོར་བླ་མ་དུང་གིས་དྲན་པའམ༔ ཡི་དམ་དུང་གིས་དྲན་ན་རབ་ཡིན༔ དེ་དྲན་ལོང་མ་བྱུང་ན༔ འདུན་པ་སྤྱི་བོར་རྒྱང་གིས་གཏད་པ་གནད་ཡིན་ནོ༔ དེའི་ཚེ་འདུན་པ་གཏད་རྒྱུ་འོང་བའི་རྒྱུ་མཚན་ནི༔ ད་ལྟར་ཡང་རང་རེ་ཚོ་བྲེད་སྔངས་དྲག་པོ་བྱུང་བ་དང་༔ ཁ་ནས་ཕ་བླ་མ༔ ཞེས་རྒྱང་གིས་བཏོན་རྒྱུ་འོང་ནས་འདུག་པའི་ཕྱིར༔ དེའི་དུས་ཀྱང་བླ་མ་དྲན་པའམ༔ རིག་པ་སྤྱི་བོར་གཏད་རྒྱུ་ངེས་པར་འོང་བས༔ གནད་འདི་ཤིན་ཏུ་ཟབ་བོ༔ དེ་བཞིན་དུ༔ མེ་ཆེན་པོའི་ནང་དུ་ཧྲིལ་ཐུམ་པའམ༔ ཆུ་ཆེན་པོའི་ནང་དུ་ཡུད་ཀྱིས་ཁྱེར་བའམ༔ མགོ་ལ་ཐོག་ཕོག་པའམ༔ སྙིང་ལ་མདའ་ཕོག་པ་ལྟ་བུའམ༔ དེ་མ་ཐག་ཏུ་སྤྱི་བོར་བླ་མ་དུང་གིས་དྲན་པའམ༔ རིག་པ་སྤྱི་བོར་ཏུང་གིས་གཏད་པ་ནི༔ སྐད་ཅིག་མའི་འཕོ་བའང་ཟེར༔ བཙན་ཐབས་ཀྱི་འཕོ་བ་ཞེས་ཀྱང་བྱ་སྟེ༔ ཤིན་ཏུ་ཟབ་པས་ལེགས་པར་བློ་ལ་བྱང་བར་བྱའོ༔ དེའང་ཐ་མལ་པ་བྲེད་སྔངས་དྲག་པོ་བྱུང་བའི་དུས་སུ༔ ཕ་བླ་མ་ཞེས་པའམ་ཨོ་རྒྱན་ཅེས་སངས་རྒྱས་ཀྱི་མཚན་ནས་བོས་པ་ལའང་ཡོན་ཏན་དུ་མ་ཡོད་པར་གསུངས་ན༔ འདུན་པ་སྤྱི་བོར་བླ་མ་ལ་གཏད་པ་ནི༔ ཡོན་ཏན་བསམ་གྱིས་མི་ཁྱབ་བོ༔ དེ་ཡང་རྣམ་ཤེས་འཕོ་བའི་ལམ་ལ་ཁྱད་པར་ཆེ་སྟེ༔ དེ་ལ་རབ་འབྲིང་ཐ་མ་གསུམ་སྟེ་དགུའོ༔ སྤྱི་བོར་ཚངས་པའི་བུ་ག་ནི་དག་པ་མཁའ་སྤྱོད་དུ་འགྲོ་བའི་ལམ་ཡིན་པས༔ དེར་རིག་པ་ཐོན་ན་ཐར་པ་ཐོབ་པར་འགྱུར་རོ༔ ལམ་མཆོག་ཏུ་གྱུར་པ་ཡིན་པས༔ དེར་འདུན་པ་གཏད་པ་ལ་བྱང་བ་གལ་ཆེའོ༔ མིག་ནས་རྣམ་ཤེས་འཕོས་ན་འཁོར་ལོས་སྒྱུར་བའི་རྒྱལ་པོར་སྐྱེ༔ སྣ་བུག་གཡོན་ནས་མི་ལུས་གཙང་མ་སྟཻ༔ སྒོ་རབ་གསུམ་མོ༔ སྣ་བུག་གཡས་ནས་གནོད་སྦྱིན༔ རྣ་བ་གཉིས་ཀ་ནས་གཟུགས་ཁམས་ཀྱི་ལྷ༔ ལྟེ་བ་ནས་འདོད་པའི་ལྷར་སྐྱེས༔ སྒོ་འབྲིང་གསུམ་མོ༔ ཆུ་ལམ་ནས་དུད་འགྲོ༔ སྲིད་པའི་སྒོ་ཞེས་བྱ་བ་ཁ་དང་ཐིག་ལེ་དཀར་དམར་རྒྱུ་བའི་ལམ་ནས་ཡི་དྭགས༔ བཤང་ལམ་ནས་དམྱལ་བར་སྐྱེ་སྟེ༔ སྒོ་ཐ་མ་གསུམ་མོ་དེ་ལྟར་རྣམ་ཤེས་འཕོ་བའི་སྒོ་ལ་ཁྱད་པར་ཤིན་ཏུ་ཆེ་བས༔ ཤི་ཁར་རིག་པ་སྤྱི་བོར་གཏད་པ་ལ་ཡོན་ཏན་དཔག་ཏུ་མེད་དོ༔ བཙན་ཐབས་སུ་འཕོ་བ་ས་མ་ཡ༔ ༈ བཞི་པ་ཐ་མལ་པའི་འཕོ་བ་ནི༔ སྟོང་ཉིད་ཀྱི་དོན་མ་རྟོགས་པ་དང་༔ བསྐྱེད་རྫོགས་ཀྱི་དོན་མི་ཤེས་པ་རྣམས་ལ་ནི༔ མགོ་བྱང་དུ་བསྟན༔ གཡས་ས་ལ་ཕབ༔ བླ་མའམ་མཆེད་གྲོགས་ཀྱིས༔ རིག་པ་གསལ་བ་དང་༔ ཁམས་ཀྱིས་ལྕོག་པར་འདུག་ན༔ སྐྱབས་འགྲོ་སེམས་བསྐྱེད་དང་༔ སྡིག་པ་བཤགས་སུ་བཅུག༔ དེ་ནས་དགེ་བསྙེན་གྱི་སྡོམ་པ་ཕོག༔ ལོང་བྱུང་ན་གསང་སྔགས་ཀྱི་དབང་བསྐུར་བྱ༔ དེ་ཁོ་ནས་ཀྱང་དམ་ཚིག་དང་སྡོམ་པ་མ་ཉམས་པ༔ སོ་མ་ལ་ལས་འཕྲོ་བཟང་པོ་ལ་ཤི་བས༔ ངན་སོང་ལས་ཐར་ཏེ་ཡོན་ཏན་དཔག་ཏུ་མེད་དོ༔ དེ་ཙམ་ཡང་མི་ནུས་པའི་མི་ལ༔ དལ་བུས་མིང་ནས་འབོད་ལ༔ ཁྱེད་རང་གི་སྤྱི་བོར་ཇོ་བོ་ཐུགས་རྗེ་ཆེན་པོ་བཞུགས་ནས་ཡོད་དོ༔ མོས་གུས་ཀྱིས་ཤིག༔ ཅེས་བརྗོད་ལ་སྤྱི་བོར་རེག་རེག་བྱ༔ ཚངས་བུག་གི་སྐྲ་ལ་རན་ཙམ་རེ་འཐེན་ནོ༔ དེས་རྣམ་ཤེས་ཚངས་བུག་ནས་ཐོན་ནོ༔ དེ་ཙམ་ཡང་མི་ནུས་པའི་དུད་འགྲོ་དང་ཁྱད་མེད་པ་རྣམས་ལ༔ མགོ་ཕྱོགས་ནས་སངས་རྒྱས་རིན་ཆེན་གཙུག་ཏོར་ཅན་ལ་ཕྱག་འཚལ་ལོ༔ ཞེས་མང་དུ་བརྗོད་པས༔ ངན་སོང་ལས་ངེས་པར་གྲོལ་ནས་མཐོ་རིས་སུ་སྐྱེ་སྟེ༔ སངས་རྒྱས་འདི་ནི་སྔོན་སྨོན་ལམ་བཏབ་པའི་ཚེ༔ བདག་གི་མིང་ཐོས་པ་ཐམས་ཅད་ངན་སོང་ལས་ཐར་པར་གྱུར་ཅིག༔ ཅེས་སྨོན་ལམ་བཏབ་པའི་ཕྱིར་རོ༔ གཞན་ཡང་སངས་རྒྱས་སྨན་གྱི་བླ་བཻ་ཌཱུརྻ་འོད་ཀྱི་རྒྱལ་པོའི་མཚན་ནས་བརྗོད་ན་ཡང་༔ མཚན་ཙམ་ཐོས་པས་ངན་འགྲོའི་སྡུག་བསྔལ་སྐྱོབ༔ ཅེས་གསུངས་སོ༔ དེ་བཞིན་དུ་སངས་རྒྱས་ཀྱི་མཚན་ཤེས་ཚད་བསྒྲགས༔ ཡི་གེ་དྲུག་པ་ལ་སོགས་པའི་སྙིང་པོ་བྱིན་རླབས་ཅན་གང་ཤེས་འདོན༔ ཁྱད་པར་དུ་བཏགས་གྲོལ་ཡོད་ན་བཀླག༔ ཐོས་གྲོལ་འདོན༔ སྨོན་ལམ་ཤེས་ཚད་བཏབ་བོ༔ དེས་ལས་འཕྲོ་བཟང་པོ་བཞག་ནུས་པས་ཡོན་ཏན་ཤིན་ཏུ་ཆེའོ༔ ཐ་མའང་གཡས་པ་ས་ལ་ཕབ༔ མགོ་བྱང་དུ་གཏད་ནས་ཤི་བ་ཁོ་ནས་ཀྱང་ངན་སོང་དུ་མི་འགྲོ་བར་གསུངས་སོ༔ དེས་ན་ཆོས་བྱས་པའི་ཡོན་ཏན་ཐམས་ཅད་ཤི་ཁར་སླེབ་པ་ཅིག་དགོས་པས༔ ཤི་བ་ལ་མཁས་པ་གཅིག་གལ་ཆེའོ༔ འཆི་ཁ་བར་དོའི་ཁྲིད་ཡིག༔ འཕོ་བ་དྲན་པ་རང་གྲོལ་ཞེས་བྱ་བ༔ ས་མ་ཡ༔ རྒྱ་རྒྱ་རྒྱ༔ ཆོས་ཉིད་བར་དོའི་ཁྲིད་ཡིག་མཐོང་བ་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་གྱི༔ རྫོགས་རིམ་བར་དོ་དྲུག་གི་ཁྲིད་ཡིག་ལས་སྤྱི་དོན་ལྔ་པ་ཆོས་ཉིད་བར་དོའི་ཁྲིད་ཡིག་མཐོང་བ་རང་གྲོལ་ཞེས་བྱ་བ་བཞུགས་སོ༔ སྤྱི་དོན་ལྔ་པ་ཆོས་ཉིད་བར་དོའི་ཁྲིད་ཡིག་ལས༔ རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་གདམས་ངག །མཐོང་བ་རང་གྲོལ་བསྟན་པ་ནི༔ སྐྱེ་གནས་བར་དོའི་ཁྲིད་ཡིག་ཀུན་གཞི་རང་གྲོལ་དང་༔ བསམ་གཏན་བར་དོའི་ཁྲིད་ཡིག་རིག་པ་རང་གྲོལ་ལ་སོགས་པ་རྣམས་ནི༔ སྟོང་ཉིད་ཀ་དག་གི་གནས་ལུགས་གདར་ཤ་བཅད་ནས་ཉམས་སུ་ལེན་པ་སྟེ༔ གཞི་ཁྲེགས་ཆོད་ཀྱི་སྐོར་ཞེས་བྱ་བ་ཡིན་ནོ༔ ད་ནི་ཆོས་ཉིད་མངོན་སུམ་གྱི་རིག་པ་ངོ་སྤྲོད་ནས་གོམས་པར་བྱས་པས༔ ཆོས་ཉིད་བར་དོའི་སྣང་བ་ད་ལྟར་གཏན་ལ་ཕབ་ནས་གྲོལ་བར་བྱེད་པའི༔ ལམ་ཐོད་རྒལ་གྱི་ཁྲིད་ཅེས་བྱའོ༔ འདི་ལའང་དོན་བཞི་སྟེ༔ སྔོན་དུ་ལུས་ངག་ཡིད་གསུམ་གྱི་གནད་གཟིར་བ་དང་གཅིག༔ གནད་རྣམ་པ་གསུམ་ལ་བརྟེན་ནས་མངོན་སུམ་རང་ཐོག་ཏུ་དབབ་པ་དང་གཉིས༔ ཉམས་སུ་བླངས་པས་སྣང་བ་བཞི་འཆར་ཚུལ་བསྟན་པ་དང་གསུམ༔ མཐའ་རྟེན་རྗེས་ཀྱི་མན་ངག་དང་བཞིའོ༔ དང་པོ་གནད་གཟིར་བ་ལ་གསུམ་སྟེ༔ ལུས་ཀྱི་གནད་དང་༔ ངག་གི་གནད་དང་༔ ཡིད་ཀྱི་གནད་དང་གསུམ་མོ༔ དང་པོ་ལུས་ཀྱི་གནད་གཟིར་བ་ལའང་གསུམ་སྟེ༔ སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ལྟར་བྱ་བ་དང་༔ ལོངས་སྐུའི་བཞུགས་སྟངས་གླང་པོ་ཆེ་ཉལ་བ་ལྟར་བྱ་བ་དང་༔ ཆོས་སྐུའི་བཞུགས་སྟངས་སེང་གེ་ཁྱི་ཚུགས་ལྟར་བྱ་བ་དང་གསུམ་སྟེ༔ ཐལ་འགྱུར་ལས༔ ཆོས་སྐུའི་བཞུགས་སྟངས་སེངྒེ་ཡིས༔ འཁྲུལ་བའི་འཇིགས་པ་ཀུན་བྲལ་ནས༔ རྡོ་རྗེའི་མིག་གིས་མཐོང་བར་འགྱུར༔ ལོངས་སྤྱོད་རྫོགས་སྐུའི་བཞུགས་སྟངས་ནི༔ གླང་ཆེན་ཉལ་བ་ལ་བརྟེན་ནས༔ ཆོས་ཉིད་རྣམས་ལ་ལོངས་སྤྱོད་ནས༔ པདྨའི་སྤྱན་གྱིས་མཐོང་བར་འགྱུར༔ སྤྲུལ་པ་སྐུ་ཡི་བཞུགས་སྟངས་ནི༔ དྲང་སྲོང་ཙོག་པུ་ལ་བརྟེན་ནས༔ ཆོས་ཉིད་རྣམ་པ་རང་སྤྲུལ་ནས༔ ཆོས་ཀྱི་མིག་གིས་མཐོང་བར་འགྱུར༔ ཞེས་པ་དང་༔ མུ་ཏིག་ཕྲེང་བ་ལས༔ ལུས་ཀྱི་གནད་ནི་གསུམ་ཡིན་ཏེ༔ སེངྒེའི་ཚུལ་དང་གླང་ཆེན་དང་༔ དྲང་སྲོང་ལྟ་བུར་གནས་པར་བྱ༔ ཞེས་གསུངས་པས༔ སློབ་བུ་བདུན་ལས་མི་མང་བར་བྱས་ལ༔ ནམ་མཁའ་དྭངས་ཤིང་སེར་བུ་མེད་པའི་དུས་སུ༔ སློབ་བུ་རྣམས་དབེན་པའི་གནས་སུ་ཁྲིད་དེ༔ དང་པོ་ཆོས་སྐུའི་འདུག་སྟངས་སེངྒེ་ཁྱི་ཚུགས་ལྟ་བུ་ནི༔ ལུས་ཁྱི་ཚུགས་སུ་འདུག༔ རྐང་མཐིལ་གཉིས་སར་ཕབ༔ ལག་པ་རྡོ་རྗེ་ཁུ་ཚུར་བཅངས་ཏེ༔ རྐང་པའི་མཐེའུ་ཆུང་རྩར་ས་ལ་བཙུགས༔ རོ་སྟོད་སེངྒེ་ལྟར་བརྒྱང་སྟེ་གསེང་ལ་བོར༔ རྩལ་འཇིང་པ་ལ་བསྐུར༔ དབང་པོ་ཡུལ་ལ་གཏད་པའོ༔ གཉིས་པ་ལོངས་སྐུའི་འདུག་སྟངས་གླང་ཆེན་ཉལ་བ་ལྟ་བུ་ནི༔ གླང་ཆེན་ལྟར་ལུས་ཁ་སྦུབས་སུ་ཉལ༔ པུས་མོ་དང་བྲང་སྤྲད༔ རྐང་སོར་ཕྱིར་ཕུལ༔ གྲུ་མོ་གཉིས་ས་ལ་སྦྱར༔ འཇིང་པ་ཡིད་ཙམ་གྱེན་ལ་བཏེགས་པའོ༔ གསུམ་པ་སྤྲུལ་སྐུའི་འདུག་སྟངས་དྲང་སྲོང་ཙོག་པུ་ནི༔ ལུས་ཙོག་པུར་བྱས་ལ༔ རྐང་པའི་ལོང་བུ་གཉིས་གཤིབ༔ རྐང་མཐིལ་ས་ལ་ཕབ༔ ལུས་ཆ་བསྲངས༔ པུས་མོ་གཉིས་བྲང་ལ་སྦྱར༔ ལག་པའི་མཁྲིག་མ་གཉིས་བསྣོལ་ལ་པུས་མོ་ལ་འཁྱུད༔ རྒལ་ཚིགས་དྲང་པོར་བསྲང་ངོ་༔ དེ་ལྟར་ལུས་ཀྱི་གནད་རྣམ་པ་གསུམ་གཟིར་བས༔ ལུས་ལ་རིག་པའི་ཡེ་ཤེས་ཡོད་པ་དེ༔ གནད་གཟིར་བས་མངོན་སུམ་དུ་མཐོང་སྟེ༔ དཔེར་ན་སྦྲུལ་ལ་རྐང་ལག་ཡོད་ཀྱང་༔ མ་གཅུས་ན་མི་གསལ་བ་ལྟ་བུའོ༔ གཉིས་པ་ངག་གི་གནད་ལ་གསུམ་སྟེ༔ ངག་བསླབ་པར་བྱ་བ་དང་༔ གནས་པར་བྱ་བ་དང་༔ བརྟན་པར་བྱ་བ་དང་གསུམ་མོ༔ དང་པོ་བསླབ་པ་ནི༔ ཉི་མ་གཅིག་ལ་ལན་གསུམ་མམ་བཞི་ལས་མི་སྨྲ་བར༔ ངག་ཇེ་ཉུང་ཇེ་ཉུང་དུ་བཅད་པར་བྱའོ༔ གཉིས་པ་གནས་པ་ནི༔ གཞན་དང་ཚིག་མ་འདྲེས་པར་ངག་ཁྲིག་གིས་བཅད་པར་བྱའོ༔ གསུམ་པ་བརྟན་པ་ནི༔ ཅི་ཡང་མི་བརྗོད་པར་ལྐུག་པ་ལྟར་བརྟན་པར་བྱའོ༔ གསུམ་པ་སེམས་ཀྱི་གནད་ནི༔ རིག་པ་གཞན་དུ་མ་ཡེངས་པར༔ གཏད་པའི་འབེན་དང་མ་བྲལ་བར་བྱའོ༔ གཉིས་པ་གནད་རྣམ་པ་གསུམ་ལ་བརྟེན་ནས༔ མངོན་སུམ་རང་ཐོག་ཏུ་དབབ་པ་ལ་གསུམ་སྟེ༔ སྒོའི་གནད་དང་༔ ཡུལ་གྱི་གནད་དང་༔ རླུང་གི་གནད་དང་གསུམ་མོ༔ དང་པོ་སྒོའི་གནད་ནི་མིག་ཡིན་ཏེ༔ ཐལ་འགྱུར་ལས༔ སྒོ་ནི་སྐུ་གསུམ་མིག་གིས་བལྟ༔ ཞེས་པ་དང་༔ ཡི་གེ་མེད་པ་ལས༔ མིག་ནི་ནམ་མཁའི་ཁམས་སུ་བལྟ༔ ཞེས་པ་དང་༔ མུ་ཏིག་ཕྲེང་བ་ལས༔ སྒོ་ནི་དེ་ཉིད་མ་འགུལ་དང་༔ ཞེས་པ་དང་༔ འདས་རྗེས་ལས༔ སྒོ་གནད་བཟློག་ཕབ་ཟུར་གྱིས་བལྟ༔ ཞེས་པས༔ འདི་ལ་གསུམ༔ ཆོས་སྐུའི་གཟིགས་སྟངས་གྱེན་དུ་ལོག་ནས་བལྟས་པས༔ འཁྲུལ་བའི་སྣང་བ་དུས་གཅིག་ལ་འགག་པའི་དགོས་པ་ཡོད༔ ལོངས་སྐུའི་གཟིགས་སྟངས་ཟུར་གྱིས་བལྟས་པས༔ ཡེ་ཤེས་དག་པའི་སྣང་བ་མཐོང་བའི་དགོས་པ་ཡོད༔ སྤྲུལ་སྐུའི་གཟིགས་སྟངས་ཐུར་དུ་ཕབ་པའི་ཚུལ་གྱིས་བལྟས་པས༔ རླུང་སེམས་ལ་རང་དབང་ཐོབ་པའི་དགོས་པ་ཡོད༔ དེ་ལྟར་སྒོའི་གནད་གཟིགས་སྟངས་གསུམ་དང་མ་བྲལ་བར་བྱའོ༔ གཉིས་པ་ཡུལ་གྱི་གནད་ནི་གཉིས་ཏེ༔ ཕྱིའི་དབྱིངས་དང་༔ ནང་གི་དབྱིངས་གཉིས་ཏེ༔ ཐལ་འགྱུར་ལས༔ དབྱིངས་ནི་ཕྱི་དང་ནང་དུ་སྟེ༔ ཕྱི་ནི་སྤྲིན་བྲལ་མཁའ་ལ་འཛིན༔ ནང་གི་སྒྲོན་མ་ལམ་དུའོ༔ ཞེས་པ་དང་༔ སྒྲོན་མ་འབར་མ་ལས༔ རིག་པ་ཕྱི་ཡི་དབྱིངས་བཞག་པས༔ རང་རིག་རང་སར་དག་སྟེ་སྣང་༔ ཞེས་པ་དང་༔ རིག་པ་རང་ཤར་ལས༔ དབྱིངས་ནི་རང་བཞིན་འོད་ཀྱི་ཁྱིམ༔ ཞེས་པ་དང་༔ འདས་རྗེས་ལས༔ ཡུལ་གནད་ནམ་མཁའ་རྐྱེན་བྲལ་ལས༔ ཞེས་པས་ཕྱིའི་དབྱིངས་ནམ་མཁའ་རྐྱེན་དང་བྲལ་བ་ལ༔ ནང་གི་དབྱིངས་དབྱིངས་རྣམ་པར་དག་པའི་སྒྲོན་མའོ༔ དེ་ཡང་ནམ་མཁའ་སྟོང་པ་ལས༔ རིག་པ་སྟོང་པ་འཆར་བའི་ཡུལ་ཡིན་པའི་ཕྱིར༔ ཡུལ་གྱི་གནད་དབྱིངས་ལ་གཏད་པས༔ ཡེ་ཤེས་ལྷུག་པར་འཆར་རོ༔ གསུམ་པ་རླུང་གི་གནད་ལ་གསུམ་སྟེ༔ བཟུང་བ་དང་༔ འཕང་བ་དང་༔ དལ་བ་བརྟེན་པ་དང་གསུམ་མོ༔ ཐལ་འགྱུར་ལས༔ རླུང་ནི་ཅི་ནས་དལ་བྱ་སྟེ༔ རབ་ཏུ་འཕང་བ་ལས་བྱུང་བ༔ ཞེས་པ་དང་༔ འདས་རྗེས་ལས༔ རླུང་གནད་ཤིན་ཏུ་དལ་བར་བསླབ༔ ཅེས་པས་དང་པོ་དལ་བར་བཟུང་༔ དེ་ནས་རྒྱང་རིང་པོར་མདའ་ལྟར་འཕངས་ལ༔ རྗེས་སུ་རླུང་རང་བབས་སུ་ཤིན་ཏུ་དལ་བར་བྱའོ༔ རིག་པའི་གནད་ནི༔ ལུ་གུ་རྒྱུད་བཙོན་དུ་བཟུང་བར་བྱ་སྟེ༔ ཡི་གེ་མེད་པ་ལས༔ ངོ་བོ་ལུ་གུ་རྒྱུད་ལྟར་འབྱུང་༔ འཕྲ་དང་འཁྱུག་དང་འགྱུ་བའོ༔ ཞེས་པ་དང་༔ རང་ཤར་ལས༔ ཡེ་ཤེས་ལྔ་ལྡན་འོད་ཀྱི་སྐུ༔ ལུ་གུ་རྒྱུད་དུ་རབ་ཏུ་གསལ༔ དེ་ཡང་འགྲོ་དང་འོང་བ་དང་༔ འགུལ་བ་དང་ནི་འཕྲིག་པའོ༔ ཞེས་པ་དང་༔ སེངྒེ་རྩལ་རྫོགས་ལས༔ རང་སྣང་རིག་པའི་དངོས་པོ་དེ༔ ཡེ་ཤེས་ལུ་གུ་རྒྱུད་དུ་གནས༔ ཞེས་པ་དང་༔ འདས་རྗེས་ལས༔ ལུག་རྒྱུད་རིག་པ་བཙོན་དུ་བཟུང་༔ ཞེས་པས༔ དེ་ལྟར་གནད་གསུམ་དང་མ་བྲལ་བས༔ རིག་པ་ལུ་གུ་རྒྱུད་ལ་བལྟའོ༔ དང་པོ་ཐུན་ཆུང་ལ་གྲངས་མང་དུ་བྱ༔ དེ་ནས་ཐུན་ཇེ་རིང་ཇེ་རིང་དུ་ཡུན་བསྲིང་༔ དེ་ནས་ཉིན་མཚན་ཁྱད་པར་གྱི་དུས་སུ་ཉམས་སུ་བླང་བར་བྱའོ༔ ཟླ་བ་ཕྱེད་དང་གཉིས་ཀྱི་འབྱོང་བར་འགྱུར་རོ༔ དེ་ལྟར་ཉམས་སུ་བླངས་པས༔ གསུམ་པ་སྣང་བ་བཞིའི་འཆར་ཚུལ་ལ་བཞི་སྟེ༔ ཆོས་ཉིད་མངོན་སུམ་གྱི་སྣང་བ་དང་༔ ཉམས་སྣང་གོང་འཕེལ་གྱི་སྣང་བ་དང་༔ རིག་པ་ཚད་ཕེབས་ཀྱི་སྣང་བ་དང་༔ ཆོས་ཉིད་ཟད་པའི་སྣང་བ་དང་བཞིའོ༔ དེ་ཡང་འདས་རྗེས་ལས༔ ཆོས་ཉིད་མངོན་སུམ་སྣང་བ་ཡིས༔ ཡིད་དཔྱོད་འཛིན་པའི་ལྟ་བ་བསྣུབ༔ ཉམས་སྣང་གོང་དུ་འཕེལ་བ་ཡིས༔ བར་དོའི་ཡེ་ཤེས་མངོན་དུ་བྱས༔ རིག་པ་ཚད་ཕེབས་སྣང་བ་ཡིས༔ ལོངས་སྤྱོད་རྫོགས་པའི་སྐུ་ངོས་ཟིན༔ ཆོས་ཉིད་ཟད་པའི་སྣང་བ་ཡིས༔ རྫོགས་ཆེན་བྱ་བྲལ་འབྲས་བུ་ཐོབ༔ འདི་ལྟར་གཞི་ལམ་མཐར་ཕྱིན་ནས༔ མྱང་འདས་གཞན་ནས་བཙལ་དུ་མེད༔ ཅེས་གསུངས་པས༔ དང་པོ་ཆོས་ཉིད་མངོན་སུམ་གྱི་སྣང་བ་ནི༔ བླ་མས་ལུས་གནད་འདི་ལྟར་གྱིས་ལ༔ ངག་གནད་འདི་ལྟར་བྱ་སྟེ༔ སེམས་གནད་འདི་ལ་གཏོད་ཅིག༔ ཅེས་ཚིག་གསུམ་གྱིས་བསྟན་པས༔ སློབ་མས་དེ་ལྟར་ཉམས་སུ་བླངས་བས༔ ཡིད་དཔྱོད་ཚིག་གི་སྒྲོ་འདོགས་ལ་རག་མ་ལུས་པར༔ ཡུལ་ནམ་མཁའ་སྟོང་པ་ལ༔ ཆོས་ཉིད་རིག་པའི་སྣང་བ་མངོན་སུམ་དུ་༔ རྣམ་རྟོག་གང་གིས་ཀྱང་མ་བསླད་པར་མཐོང་བས༔ ཆོས་ཉིད་མངོན་སུམ་གྱི་སྣང་བ་ཞེས་བྱའོ༔ ཐལ་འགྱུར་ལས༔ ཆོས་ཉིད་མངོན་སུམ་སྣང་བ་ནི༔ དབང་པོ་སྒོ་ལ་ངེས་ཐོན་ཏེ༔ སྤྲིན་མེད་དྭངས་པའི་མཁའ་ལ་གསལ༔ ཞེས་པས༔ དེ་ལྟར་གནད་གསུམ་བསྣུན་ཏེ་ཉམས་སུ་བླངས་པས༔ རང་གི་སྨིན་ཕྲག་ཏུ༔ དབྱིངས་རྣམ་པར་དག་པའི་སྒྲོན་མ་ཞེས་བྱ་བ༔ འཇའ་ཚོན་ལྟ་བུའམ༔ རྨ་བྱའི་མདོངས་ལྟ་བུ་འཆར་རོ༔ དེའི་ནང་དུ་ཐིག་ལེ་སྟོང་པའི་སྒྲོན་མ་ཞེས་བྱ་བ༔ ཀོ་མོག་ཏུ་རྡོ་བསྐྱུར་བའི་ཆུ་གཉེར་ལྟ་བུའམ༔ ཕུབ་ཀྱི་སྦ་སྐོར་ལྟ་བུའི་ནང་དུ༔ ཐིག་ལེ་ཉུང་འབྲུའམ་སྲན་འབྲུ་ཙམ་དུ་འཆར་རོ༔ དེའི་ནང་དུ་རིག་པ་རྡོ་རྗེ་ལུ་གུ་རྒྱུད་ཅེས་བྱ་བ༔ ཕྲ་བ་རྟ་རྔ་ལ་མདུད་པ་བྱས་པ་ལྟ་བུ་དང་༔ མུ་ཏིག་རྩར་ལ་བརྒྱུས་པ་ལྟ་བུ་དང་༔ ལྕགས་ཐག་ལྟ་བུ་དང་༔ མེ་ཏོག་གི་དྲྭ་བ་རླུང་གིས་བསྐྱོད་པ་ལྟ་བུ་ལ་སོགས་པ་སྟེ༔ དེ་ཐམས་ཅད་ཀྱང་གཉིས་སྦྲེལ་དང་༔ གསུམ་སྦྲེལ་ལ་སོགས་པ་འཆར་ཏེ༔ དེ་ནི་རང་གི་རིག་པ་ལུ་གུ་རྒྱུད་ཐིག་ལེ་ཉག་གཅིག་ཅེས་བྱ་བ་ཡིན་ནོ༔ དེ་ཡང་དབྱིངས་དང་རིག་པ་འདུ་འབྲལ་མེད་པས༔ ཉི་མ་དང་ཟེར་གྱི་ཚུལ་དུ་གནས་སོ༔ དེའང་དབྱིངས་ཀྱི་རྟགས་སུ་འོད་ཁྱིམ༔ ཡེ་ཤེས་ཀྱི་རྟགས་སུ་ཐིག་ལེ༔ རིག་པ་སྐུའི་རྟགས་སུ་ལུ་གུ་རྒྱུད༔ དེ་རྣམས་གནས་ལུགས་ཙིཏྟའི་དཀྱིལ་ན་གནས་ནས༔ ལམ་དབང་པོའི་དྭངས་མ་མིག་ལ་མངོན་སུམ་དུ་འཆར་རོ༔ ཐལ་འགྱུར་ལས༔ ཆོས་ཉིད་མངོན་སུམ་སྣང་བ་ནི༔ དབང་པོའི་སྒོ་ལ་ངེས་ཐོན་ཏེ༔ སྤྲིན་མེད་དྭངས་པའི་མཁའ་ལ་གསལ༔ ཞེས་སོ༔ དེས་ནི་ཡིད་དཔྱོད་འཛིན་པའི་ལྟ་བ༔ ཚིག་དང་བློས་བྱས་ཤེས་རབ་ལ་སོགས་རྟོག་དཔྱོད་ཀྱི་ལྟ་བ་བསྣུབ་པའོ༔ འདས་རྗེས་ལས༔ ཆོས་ཉིད་མངོན་སུམ་སྣང་བ་ཡིས༔ ཡིད་དཔྱོད་འཛིན་པའི་ལྟ་བ་བསྣུབ༔ ཅེས་སོ༔ གཉིས་པ་ཉམས་སྣང་གོང་འཕེལ་གྱི་སྣང་བ་ནི༔ སྣང་ཉམས་དང་༔ ཤེས་ཉམས་གཉིས་ལས༔ ཤེས་ཉམས་ནི༔ བདེ་ཉམས་གསལ་ཉམས་སྟོང་ཉམས་ལ་སོགས་པ་སྣ་ཚོགས་སུ་འཆར་ཞིང་༔ མི་བརྟན་ལ་འགྱུར་བ་ཡིན་པས༔ ཐེག་པ་ཐུན་མོང་པའི་ལུགས་ཡིན་པས༔ གཙོ་ཆུང་ཞིང་དེར་མ་ཟད༔ ཕྱག་རྒྱ་ཆེན་པོ་ལ་སོགས་པ་རྣམས་ཀྱང་༔ ཤེས་པའི་ཉམས་ནི་ན་བུན་དང་འདྲ་ཞེས༔ ཉམས་མཐོ་དམན་ལ་ཡིད་ཆེས་མི་བྱེད་ཅིང་༔ རྟོགས་པ་མཐོ་དམན་ལ་གཙོར་བྱེད་པའི་ཕྱིར་རོ༔ འདིར་ཡང་རྟོགས་པ་མཐོ་དམན་གྱི་ཚད་སྣང་ཉམས་ཀྱིས་བཟུང་ཞིང་༔ སྣང་བ་མི་འགྱུར་བས་སྣང་ཉམས་གཙོ་ཆེའོ༔ དེ་ལྟར་སྣང་ཉམས་ཉམས་སུ་བླངས་པ་ལས༔ དབྱིངས་རིག་རེས་གསལ༔ རེས་མི་གསལ་བ་འབྱུང་ངོ་༔ ད་རུང་ཉམས་སུ་བླངས་པས༔ དབྱིངས་རིག་སྨིན་མཚམས་ལས་འབྲལ་ཏེ༔ དབང་པོའི་དངོས་པོ་དང་བྲལ་ཏེ༔ ཐིག་ལེ་སྟོང་པའི་སྒྲོན་མ་རྩོལ་བ་མེད་པར་ཤར་ནས་འོང་ངོ་༔ ཐིག་ལེ་རྣམས་སྲན་མ་ཙམ་དུ་འགྲོ༔ རིག་པ་ནི་འདབ་ཆགས་འཕུར་སྐྱེན་ཙམ་དུ་འགྲོ༔ ད་རུང་ཉམས་སུ་བླངས་པས༔ འོད་ལྔའི་སྣང་བ་དུམ་བུར་སྣང་བ་དང་༔ གྱེན་འགྲེང་དང་རྩིབས་ཤར་དང་༔ མདུང་རྩེ་ལྟ་བུ་དང་༔ རེ་ལྡེའི་རྣམ་པ་ལྟ་བུ་དང་༔ གྲུ་ཆད་ཀྱི་རྣམ་པ་ལྟ་བུར་འགྱུར་ཞིང་༔ འོད་དེ་དག་རང་གི་མདུན་ཙམ་ཁྱབ་པར་འཆར་རོ༔ ཐིག་ལེའང་མེ་ལོང་ཙམ་དུ་འགྱུར་ཞིང་༔ རིག་པ་ནི་རི་དྭགས་རྒྱུག་པ་ཙམ་དུ་འགྱུར་རོ༔ ད་རུང་ཉམས་སུ་བླང་བས་དབྱིངས་ཀྱི་སྣང་བ་དེ་ལ༔ རིན་པོ་ཆེའི་དྲྭ་བ་ལྟ་བུ་དང་༔ འོད་ཀྱི་དྲྭ་བ་དང་དྲྭ་ཕྱེད་དང་མིག་མང་རིས་ལྟ་བུ་དང་༔ མིག་ཚག་དང་༔ མདུང་རྩེ་དང་༔ མཆོད་རྟེན་བརྩེགས་པ་ལྟ་བུ་དང་༔ པདྨ་སྟོང་ལྡན་དང་༔ གུར་ཁྱིམ་དང་༔ ཉི་ཟླ་དང་༔ མཁར་ཐབས་རིས་དང་༔ རལ་གྲི་དང་༔ རྡོ་རྗེ་དང་༔ འཁོར་ལོ་དང་༔ ཉ་མིག་གི་རྣམ་པ་ལྟ་བུར་འགྱུར་རོ༔ འོད་དེ་ཡང་རང་གནས་པའི་ལུང་པ་གང་བར་འགྱུར་རོ༔ ཐིག་ལེ་རྣམས་མཁར་ཕོར་ཙམ་དུ་འགྱུར་ཞིང་༔ རིག་པ་ནི་བུང་བ་བཅུད་ལ་ལྡིང་བ་ཙམ་དུ་འགྱུར་རོ༔ ད་རུང་ཉམས་སུ་བླངས་པས༔ འོད་ནི་ཡུལ་ཁམས་ཙམ་དུ་ཁེངས༔ ཐིག་ལེ་ནི་བསེ་ཕུབ་ཙམ་དུ་འགྱུར་རོ༔ འོད་བལྟས་ཚད་ལ་ཁྱབ༔ དབྱིངས་རིག་ཉིན་མཚན་མེད་པར་འཆར༔ ཐིག་ལེའི་ནང་དུ་ལྷ་སྐུ་རྐྱང་བ་རེ་སྣང་༔ རིག་པའི་བར་དུ་ཡང་ལྷ་སྐུ་ཕྲ་མོ་རེ་འབྱུང་ངོ་༔ རིག་པ་འགུལ་འཕྲིག་མེད་པར་སྡོད༔ དེ་ལྟར་ཤར་བའི་དུས་ན་བར་དོའི་སྣང་བ་ད་ལྟར་གཏན་ལ་ཕེབས་པས༔ ཕྱིས་བར་དོ་མེད་དོ༔ དེས་ན་ཆོས་ཉིད་བར་དོའི་ཉམས་ལེན་དངོས་གཞི་འདི་ཁོ་ནའོ༔ ཐལ་འགྱུར་ལས༔ ཉམས་ཀྱི་སྣང་བ་གོང་འཕེལ་ནི༔ ཡེ་ཤེས་ཁ་དོག་ཕྱིར་བྱུང་ནས༔ གྱེན་འགྲེང་བ་དང་རྩིབ་ཤར་དང་༔ ཐིག་ལེ་སྣ་ཚོགས་སྐུ་ཉིད་དང་༔ རག་པ་སྣང་བའི་ཡུལ་ལས་གསལ༔ ཅེས་པ་དང་༔ འདས་རྗེས་ལས༔ ཉམས་སྣང་གོང་དུ་འཕེལ་བ་ཡིས༔ བར་དོའི་ཡེ་ཤེས་མངོན་དུ་བྱས༔ ཞེས་སོ༔ གསུམ་པ་རིག་པ་ཚད་ཕེབས་ཀྱི་སྣང་བ་ནི༔ དེ་ནས་ཉམས་སུ་བླངས་པས༔ གོང་གི་ཐིག་ལེ་དེ་དག་རེ་རེའི་ནང་དུ༔ སྐུ་ཡབ་ཡུམ་ལྔ་ལྔ་འཆར༔ དེ་དག་ཀྱང་གྲངས་ལས་འདས་པ་ལས༔ འགྱུར་བ་མེད་པས་བྲེ་ཚད་སྲང་ཚད་ལ་ཕེབས་པ་ལྟར་ཚད་ལ་ཕེབས་ཏེ༔ དེ་ནས་མ་བསྒོམས་ཀྱང་ཆོག་པའོ༔ དེ་ཙམ་ནས་ལུས་འོད་གསལ་དུ་གྲོལ༔ འབྱུང་བ་རང་དག་ཏུ་སོང་བས༔ གདོས་བཅས་ཀྱི་ཕུང་པོ་རང་སར་གྲོལ་ཏེ༔ སྣང་ལ་རང་བཞིན་མ་གྲུབ་པ༔ ལོངས་སྤྱོད་རྫོགས་པའི་སྐུར་རང་གྲོལ་ཏེ༔ ལོངས་སྤྱོད་རྫོགས་སྐུ་རྗེན་པར་ངོས་ཟིན་པས༔ སྐུའི་འཛིན་པ་རང་སར་གྲོལ་བའོ༔ ཐལ་འགྱུར་ལས༔ རིག་པ་ཚད་ཕེབས་སྣང་བ་ལ༔ ལོངས་སྐུའི་མཚན་དཔེ་གསལ་བ་ནི༔ མ་ངེས་ཁ་དོག་འཇའ་ཚོན་ལས༔ རིགས་ལྔ་ཡབ་དང་ཡུམ་དུ་སྣང་༔ དེ་ནས་ལྔ་ལྔ་ཟུང་དུ་བཅས༔ རབ་ཏུ་གསལ་བའི་ཐིག་ལེས་འབྲེལ༔ ཡབ་ཡུམ་སྐུ་ཡི་སྣང་བ་ཅན༔ འཁྲུལ་སྣང་ཟད་ནས་ཞིང་ཁམས་གཡོ༔ ཞེས་པ་དང་༔ འདས་རྗེས་ལས༔ རིག་པ་ཚད་ཕེབས་སྣང་བ་ཡིས༔ ལོངས་སྤྱོད་རྫོགས་པའི་སྐུ་ངོས་ཟིན༔ ཅེས་སོ༔ བཞི་པ་ཆོས་ཉིད་ཟད་པའི་སྣང་བ་ནི༔ དེའང་གོང་གི་ཉམས་དེ་རྣམས་ཀྱི་འཕེལ་བ་ཟད་དེ༔ སྣང་བའི་ཉམས་དེ་དག་ལ༔ སྣང་དང་མི་སྣང་དུ་འཛིན་པའི་ངོ་བོ་མེད་དེ༔ དེའི་ཚེ་ཆོས་ཉིད་ཟད་པའི་སྣང་བ་ཞེས་ཐ་སྙད་དུ་བཏགས་པའོ༔ ཉམས་ཟད་གདོས་བཅས་ཀྱི་ལུས་ཟད༔ དབང་པོའི་འཛིན་པ་ཟད༔ འཁྲུལ་བའི་རྟོག་ཚོགས་ཟད༔ གྲུབ་མཐའ་དང་འཁྲུལ་སྣང་ཐམས་ཅད་དག་ནས༔ ཟག་བཅས་ཀྱི་ཕུང་པོ་མི་སྣང་བར་སངས་རྒྱས་པ་ཡིན་ཏེ༔ ཆོས་ཉིད་ཟད་པ་ཞེས༔ བྱ་ཆོས་དང་འཁྲུལ་སྣང་དང་༔ ཉམས་སྣང་གི་འཕེལ་བ་ཟད་པའི་ཕྱིར༔ ཆོས་ཉིད་ཟད་པ་ཞེས་མིང་དུ་བཏགས་པ་ལས༔ ཅི་ཡང་མེད་པར་ཟད་ནས་ཆད་ལྟ་ལྟ་བུ་མེད་པ་ནི་མ་ཡིན་ཏེ༔ མཁྱེན་པའི་ཡེ་ཤེས་དང་༔ ཡོན་ཏན་བརྗོད་ཀྱིས་མི་ལང་བ་མངོན་དུ་གྱུར་ཏེ༔ མདོར་ན་སྐུ་གསུམ་གྱི་ཡོན་ཏན་རྩལ་རྫོགས་ཟིན་པའོ༔ དེ་ལྟར་ཆོས་ཉིད་མངོན་སུམ་གྱི་སྣང་བ་མཐོང་ནས་ཉམས་གོང་འཕེལ་གྱི་ཉམས་སྣང་དབྱིངས་རིག་རྣམས་གོང་ནས་གོང་དུ་འཕེལ་བ་ལ་བརྟེན་ནས༔ རིག་པ་ཚད་ལ་ཕེབས་ཏེ༔ སྐུ་གསུམ་གྱི་ཞིང་ཁམས་ལ་ལོངས་སྤྱོད་ཅིང་༔ དེ་ཉིད་ཟླ་བ་ཉ་རྫོགས་པའམ༔ སྲུས་ནས་སུ་སྨིན་པ་ལྟར༔ ཉམས་ཀྱི་འཕེལ་ཟད༔ བློ་ཟད༔ ཆོས་ཟད༔ འཛིན་པ་ཟད་པའི་ཚེ༔ ཆོས་ཉིད་ཟད་པའི་སྣང་བ་ཞེས་མིང་དུ་བཏགས་པ་ཙམ་མོ༔ དེའང་རྫོགས་ཆེན་གྱི་ཆོས་ཉིད་ཟད་པ་དང་༔ མདོ་ལུགས་ཀྱི་ལམ་ལྔ་ལས༔ མཐར་ཕྱིན་པའི་ལམ་དང་ཡོན་ཏན་མཉམ་མོ་སྙམ་ན༔ གཏན་ནས་མི་མཉམ་སྟེ༔ མདོ་ལུགས་ཁོ་རང་གི་ས་བཅུ་ལམ་ལྔའི་ཡོན་ཏན་བརྒྱ་ཕྲག་དྲུག་ཅུའི་རྩལ་རྫོགས་ནས༔ མཐར་ཕྱིན་པ་ཡིན་ཀྱང་༔ ད་རུང་སྔགས་ཀྱི་ཡོན་ཏན་དང་རྩལ་གཏན་ནས་མ་མཐོང་ཞིང་མ་རྫོགས་པའི་ཕྱིར༔ ཆོས་ཉིད་ཟད་པ་དང་༔ མཐར་ཕྱིན་པའི་ལམ་གཉིས་ཤིན་ཏུ་ཁྱད་པར་ཆེའོ༔ ཐལ་འགྱུར་ལས༔ ཆོས་ཉིད་ཟད་པའི་སྣང་བ་ནི༔ ཉམས་ཀྱི་སྣང་བ་སྟོང་ནས་ནི༔ ལུས་ཟད་དབང་པོའི་ཡུལ་ཡང་ཟད༔ རྟོག་ཚོགས་འཁྲུལ་བ་རང་གྲོལ་ནས༔ བརྗོད་གཞིའི་ཚིག་དང་བྲལ་བའོ༔ ཞེས་པ་དང་༔ དེ་ལྟར་ལུག་རྒྱུད་རྒྱུན་ཆད་ནས༔ ཟག་བཅས་ཕུང་པོ་མི་སྣང་བར༔ འདི་ལ་མངོན་པར་སངས་རྒྱའོ༔ ཞེས་པ་དང་༔ འདས་རྗེས་ལས༔ ཆོས་ཉིད་ཟད་པའི་སྣང་བ་ཡིས༔ རྫོགས་ཆེན་བྱ་བྲལ་འབྲས་བུ་ཐོབ༔ འདི་ལྟར་གཞི་ལམ་མཐར་ཕྱིན་ནས༔ མྱང་འདས་གཞན་དུ་བཙལ་དུ་མེད༔ ཅེས་གསུངས་པས༔ རྫོགས་པ་ཆེན་པོ་མཐར་ཕྱིན་པའི་ལམ་ཡིན་ཏེ༔ དེ་ནས་མྱ་ངན་འདས་པའི་ཆོས་དང་༔ ལམ་གཞན་དུ་བཙལ་རྒྱུ་མེད་དེ༔ མཐར་ཐུག་པའོ༔ ཐེག་པ་འོག་མའི་མཐར་ཕྱིན་པའི་ལམ་ཐོབ་ཀྱང་༔ སྔགས་ཀྱི་ཡོན་ཏན་གྱི་སྒོ་མ་མཐོང་ན༔ དེ་ནས་སྔགས་ལ་འཇུག་ཅིང་༔ ཐོས་བསམ་ལ་སྦྱང་དགོས་པའི་ཕྱིར༔ མདོའི་མཐར་ཕྱིན་ཀྱང་༔ སྔགས་ཀྱི་མཐར་མ་ཕྱིན་པའོ༔ འདི་ནི་ལམ་ཐམས་ཅད་མཐར་ཕྱིན་པ་ཡིན་པས༔ དེ་ལས་ཡར་ཕུལ་ས་མེད་པས༔ ས་རྫོགས༔ ལམ་རྫོགས༔ དེ་ལས་ལམ་ཡར་ཆེ་བ་གཞན་མེད་པས༔ རྫོགས་པ་ཆེན་པོ་ཞེས་མིང་དུ་བཏགས་སོ༔ དེ་ལྟར་སྣང་བཞིའི་འཆར་ཚུལ་བསྟན་ནས༔ དེ་ནས་མཐའ་རྟེན་རྗེས་ཀྱི་མན་ངག་ནི་བཞི་སྟེ༔ མི་འགུལ་པ་གསུམ་ལ་གཞི་བཅའ༔ སྡོད་པ་གསུམ་གྱིས་ཚད་བཟུང་༔ ཐོབ་པ་གསུམ་གྱིས་གཟེར་གདབ༔ གདེང་བཞིའི་མཐར་ཕྱིན་པ་སྟེ༔ རྒྱས་པར་གཞན་ནས་འབྱུང་ངོ་༔ ཆོས་ཉིད་བར་དོའི་ཁྲིད་ཡིག༔ མཐོང་བ་རང་གྲོལ་ཞེས་བྱ་བ༔ ས་མ་ཡ༔ སྲིད་པ་བར་དོའི་ཁྲིད་ཡིག་སྲིད་པ་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་གྱི༔ རྫོགས་རིམ་བར་དོ་དྲུག་གི་ཁྲིད་ཡིག་ལས་སྤྱི་དོན་དྲུག་པ་སྲིད་པ་བར་དོའི་ཁྲིད་ཡིག་སྲིད་པ་རང་གྲོལ་ཞེས་བྱ་བ་བཞུགས་སོ༔ སྤྱི་དོན་དྲུག་པ་སྲིད་པ་བར་དོའི་ཁྲིད་ཡིག༔ ལས་ཀྱི་འཕྲོ་མཐུད་པ་ཡུར་བ་རྐང་ཆད་པ་ལ་ཝ་འཛུགས་པ་ལྟ་བུའི་གདམས་ངག། སྲིད་པ་རང་གྲོལ་བསྟན་པ་ནི༔ སྣང་བ་བཞི་མ་མཐོང་བ་དང་༔ ཆོས་ཉིད་བར་དོ་ངོས་མ་ཟིན་པ་རྣམས༔ དེ་ནས་སྲིད་པའི་བར་དོ་ལ་ཉམས་སུ་བླང་བའི་གདམས་ངག༔ ལས་ཀྱི་འཕྲོ་མཐུད་པ་ཡུར་ཆད་ལ་ཝ་འཛུགས་པ་ལྟ་བུའི་གདམས་ངག་ནི༔ ད་ལྟར་ལྷའི་སྐུ་བསྒོམས་པ་གཅིག་ཡིན་ན༔ བར་དོའི་སྣང་བ་ཤར་བའི་དུས་སུ་ཡང་༔ ཁ་ཆར་དང་༔ བུ་ཡུག་དང་༔ མི་མང་པོས་དེད་པའི་སྣང་བ་ཤར་བའི་ཚེ༔ ལྷའི་གསལ་སྣང་དྲན་མ་ཐག་ཏུ་དེ་དག་ཐམས་ཅད་ཡི་དམ་དུ་འཆར་རོ༔ དེ་རྩལ་སྦྱང་བ་ནི༔ དབེན་པའི་གནས་སུ་གཅིག་པུར་འདུག་ལ༔ འདི་ལྟར་སྒོམ་པར་བྱ་སྟེ༔ ག་རེ་ད་ལྟའི་སྣང་བ་འདི༔ བདག་ཤི་ནས་བར་དོར་འཁྱམས་པར་འདུག༔ གནས་དང་༔ གྲོགས་དང་༔ སྣང་བ་ཡད་ཡུད་འདི་སྲིད་པ་བར་དོའ་ིསྣང་བ་ཡིན་པར་འདུག་པས༔ ད་སྔོན་བར་དོ་ངོས་མ་ཟིན་ནས་འཁྲུལ་བར་འདུག༔ ད་ནི་ཡི་དམ་ལྷའི་སྐུར་ལྡང་བར་བྱའོ་སྙམ་པའི་ངང་ནས༔ ཕྱི་སྣོད་རྣམ་པར་དག་པ་སངས་རྒྱས་ཀྱི་ཞིང་ཁམས༔ ནང་བཅུད་རྣམ་པར་དག་པ་ཡི་དམ་གྱི་ལྷ་ཚོགས༔ སྒྲ་གྲགས་རྣམ་པར་དག་པ་ཡི་དམ་ལྷའི་སྔགས་ཀྱི་རང་སྒྲར་བསྒོམས༔ རྗེས་སུ་ཐམས་ཅད་དམིགས་པ་མེད་པའི་ངང་ལ་ཕྱམ་མེ་བཞག༔ དེ་ལ་སྲིད་པ་བར་དོའི་ཁྲིད་ཡིག་སྲིད་པ་རང་གྲོལ། ཡང་ནས་ཡང་དུ་བྱང་བར་བྱས་པས༔ སྲིད་པ་བར་དོ་འཆར་བའི་ཚེ༔ དང་པོར་བར་དོ་ངོས་ཟིན༔ དེ་ནས་བསྐྱེད་རིམ་དྲན་ནས༔ བར་དོར་ལྷའི་སྐུར་ལྡང་སྟེ༔ མངལ་སྒོ་ཁེགས་ནས༔ རིག་འཛིན་གྱི་གོ་འཕང་ཐོབ་པར་འགྱུར་རོ༔ གཞན་ཡང་མི་དང་སེམས་ཅན་ཆགས་པ་སྤྱོད་པ་མཐོང་བའམ༔ བུད་མེད་ཡིད་དུ་འོང་བས་རང་ལ་ཡིད་ཆགས་པར་མཐོང་ནས༔ དེར་ཆགས་པ་སྐྱེས་མ་ཐག་ཏུ༔ ཨ་ཙ་མ༔ བདག་སྲིད་པ་བར་དོར་འཁྱམས་ནས་མངལ་དུ་འཇུག་པའི་གྲབས་བྱེད་པར་འདུག་པས༔ ད་ནི་མངལ་སྒོ་དགག་པར་བྱ་སྙམ་དུ་བསམས་ལ༔ དང་པོ་འཇུག་བྱེད་ཀྱི་གང་ཟག་དགག་པ་ནི༔ ཆགས་པ་ལྷང་གིས་སྐྱེས་མ་ཐག༔ སྐད་ཅིག་དྲན་རྫོགས་སུ་ཡི་དམ་གྱི་སྐུ་རུ་ལྷང་ལྷང་དྲན་པར་བྱའོ༔ དེ་ལ་བྱང་བར་གྱུར་པ་དང་༔ བར་དོར་ཕོ་མོ་ཆགས་པ་སྤྱོད་པ་མཐོང་བའི་ཚེ༔ རང་ཕོར་སྐྱེ་ན་ཕ་ལ་མིག་སེར་སྐྱེ༔ མ་ལ་ཆགས༔ མོར་སྐྱེ་ན༔ མ་ལ་མིག་སེར་སྐྱེ༔ ཕ་ལ་ཆགས་པ་སྐྱེའོ༔ དེའི་དུས་སུ་རང་བསྐྱེད་རིམ་ལ་གོམས་ན༔ ཆགས་པ་དང་མིག་སེར་སྐྱེ་བའི་མོད་ལ༔ ཡི་དམ་ལྷའི་སྐུ་ཀྲོང་ཀྲོང་དྲན་པར་འགྱུར་རོ༔ དེ་གསལ་བ་དང་༔ མངལ་སྒོ་ཁེགས་པ་དང་༔ རང་ལྷའི་སྐུ་རུ་སྨིན་པ་དུས་མཉམ་དུ་འབྱུང་བས༔ ད་ལྟར་ཡང་བུད་མེད་ཡིད་དུ་འོང་བའམ༔ ཆགས་པ་སྐྱེ་བའི་སྨྲ་བརྗོད་དང་སྤྱོད་ལམ་བྱ༔ ཆགས་པ་ལྷང་སྐྱེས་པ་དང་༔ དེས་རྐྱེན་བྱས་ནས༔ རང་ལུས་ལྷའི་གསལ་སྣང་དུ་ལྷང་ལྷང་དྲན་པར་བྱུང་ན༔ འདོད་ཆགས་མ་སྤངས་གྲོགས་སུ་འགྱུར་ཏེ༔ འདོད་ཆགས་ཅི་ལྟར་ཆེ་བ་ལྟར༔ ཡི་དམ་ལྷ་ཡི་བསྐྱེད་རིམ་འབྱོངས་པས༔ བར་དོར་གྲོལ་བ་ལ་ཚེགས་མེད་དོ༔ གཉིས་པ་འཇུག་བྱའི་མངལ་སྒོ་དགག་པ་ནི༔ ཕོ་མོ་གང་ཡང་རུང་བ་སྦྱོར་བ་བྱེད་པ་མཐོང་ན༔ ཆགས་པ་དང་༔ མིག་སེར་སྐྱེས་མ་ཐག༔ བདག་བར་དོར་འཁྱམས་པར་འདུག༔ ཀྱཻ་མ༔ བདག་ལ་སྲིད་པ་བར་དོ་འཆར་དུས་འདིར༔ འདུན་པ་རྩེ་གཅིག་སེམས་ལ་བཟུང་བྱས་ནས༔ བཟང་པོའི་ལས་ཀྱི་འཕྲོ་ལ་ནན་གྱིས་མཐུད༔ མངལ་སྒོ་དགག་ནས་རུ་ལོག་དྲན་པར་བྱ༔ སྙིང་རུས་དག་སྣང་དགོས་པའི་དུས་གཅིག་ཡིན༔ ཅེས་བརྗོད་ལ༔ ཕོ་མོ་གཉིས་པོ་དེ་ཡི་དམ་ཡབ་ཡུམ་དུ་ལྷང་ལྷང་དྲན་པར་བྱ༔ གསོལ་བ་གདབ༔ མོས་གུས་བྱ༔ དབང་བསྐུར་ཞུ་བའི་འདུན་པ་དུང་དུང་བྱེད་པ་ལ་གོམས་པར་བྱའོ༔ ཆགས་པ་སྤྱོད་པ་མ་མཐོང་ན་ཡང་༔ ཡིད་ལ་དྲན་པར་བྱ་ཞིང་༔ ཡི་དམ་གྱི་གསལ་སྣང་དྲན་པར་བྱས་པས༔ ད་ལྟར་བསྐྱེད་རིམ་གྱི་གྲོགས་སུ་འགྱུར་ཞིང་༔ སྲིད་པ་བར་དོར་མངལ་སྒོ་ཁེགས་པར་འགྱུར་བས་ཟབ་བོ༔ ས་མ་ཡ༔ གཉིས་པ་བླ་མ་ཡབ་ཡུམ་གྱི་དམིགས་པས་མངལ་སྒོ་དགག་པ་ནི༔ ཆགས་པ་སྤྱོད་པ་མཐོང་བའམ༔ ཆགས་ཡུལ་དྲན་པའམ༔ རང་ཆགས་པ་དྲག་པོ་སྐྱེས་པའི་དུས་སུ༔ ཆགས་ཡུལ་དེ་བླ་མ་ཨོ་རྒྱན་པདྨ་དང་༔ ཡེ་ཤེས་མཚོ་རྒྱལ་ཡབ་ཡུམ་འཁྲིལ་སྦྱོར་དུ་བསམ་ལ༔ མིག་སེར་གྱི་བློ་སྤངས་ལ༔ མོས་གུས་དུང་དུང་བ་བྱ༔ དབང་ཞུ་བའི་འདུན་པ་དྲག་པོ་བྱ་ཁྱད་པར་དུ་དབང་གསུམ་པའི་དོན་དྲན་པར་བྱས་པས༔ ལྷན་ཅིག་སྐྱེས་པའི་དོན་དྲན་ནས་མངལ་སྒོ་ཁེགས་ནས་བར་དོར་གྲོལ་བར་འགྱུར་རོ༔ དེ་ཡང་༔ མིག་སེར་སྤངས་ནས་བླ་མ་ཡབ་ཡུམ་བསྒོམ༔ སྙིང་རུས་དག་སྣང་དགོས་པའི་དུས་གཅིག་ཡིན༔ ཅེས་གསུངས་པ་དེ་ཡིན་ནོ༔ གསུམ་པ་དགའ་བཞི་ཉམས་སུ་བླངས་ནས་མངལ་སྒོ་དགག་པ་ནི༔ འོག་སྒོ་བདེ་བ་ཆེན་པོའི་ཁྲིད་ལ་ཤིན་ཏུ་བྱང་བར་བྱས་ལ༔ དེ་ནས་མཚན་དང་ལྡན་པའི་མུ་དྲ་བཙལ་ཏེ༔ དབེན་པའི་གནས་སུ་ཁྲིད་དེ༔ མུ་དྲ་སྒྱུ་མའི་ལུས་སུ་སྦྱངས༔ དེ་ནས་རང་དང་མུ་དྲ་གཉིས་ཀ་ཡི་དམ་གྱི་ལྷའི་འདུ་ཤེས་ཀྱིས༔ དང་པོ་གཟུགས་ལ་བསླབ་པ་ནི༔ ཕར་ཚུར་ཆགས་པའི་མིག་གིས་ཟིམ་བུས་བལྟ༔ སྒྲ་ལ་བསླབ་པ་ནི༔ འཁྲིག་ཚིག་དང་ཆགས་པ་སློང་བའི་གླེང་མོ་བྱ༔ དྲི་ལ་སྲིད་པ་བར་དོའི་ཁྲིད་ཡིག་སྲིད་པ་རང་གྲོལ། བསླབ་པ་ནི༔ མུ་དྲ་དང་པདྨའི་དྲི་ལ་སྣོམ༔ རོ་ནི་བུ་རམ་དང་ཀ་ར་མུར་ལ་ལྕེ་འཇིབ༔ རེག་བྱ་ནི༔ དཀར་འཛིན་མ་མཉེ་བ་དང་༔ ལྕེ་འཇིབ༔ དམ་དུ་འཁྱུད༔ གཡའ་དགག༔ པདྨའི་ཟེའུ་འབྲུ་མཉེ༔ གཅེར་བུར་ཕྱུང་ལ་རྡོ་རྗེ་པདྨ་བལྟ་ཞིང་ཆགས་པ་བསླང་༔ མུ་དྲ་འདོད་པས་མྱོས་ནས་ཆགས་པ་ལངས་པ་དང་༔ རྡོ་རྗེ་ལས་སུ་རུང་བར་བྱས་ལ༔ པདྨར་དལ་བུས་ཕུལ༔ རྩ་བར་གཏིམ་མེ་གཏང་ལ་ཅུང་ཟད་མི་བསྒུལ་བར་སྟོང་ཉིད་ཀྱི་ངང་ལ་བཞག༔ དེའི་ངང་མ་ཤོར་བར་དལ་བུས་བསྐྱོད་པས༔ དང་པོར་དགའ་བ་སྐྱེས་པ་དང་ངོས་བཟུང་ལ༔ དེའི་ངང་ལ་བདེ་སྟོང་དུ་ཕྲིལ་ལེ་བཞག༔ བདེ་བ་ཡལ་བ་འདྲ་ན་ཉམས་དང་བསྟུན་ཞིང་༔ ཇེ་དྲག་ཇེ་དྲག་ཏུ་བསྒུལ་ཞིང་བསྐྱོད་ལ༔ བདེ་བ་ཇེ་ཆེར་མཆོག་དགའ་ངོས་བཟུང་༔ དེ་ནས་ལྷན་ཅིག་སྐྱེས་པའི་དགའ་བ་དང་༔ སྟོང་པ་གཉིས་སུ་མེད་པའི་ཡེ་ཤེས་ངོས་བཟུང་ཞིང་སྦྱངས་པས༔ རང་འཆི་བའི་དུས་སུ༔ འབྱུང་བ་རིམ་གྱིས་བསྡུས་ནས་ཐིམ་པའི་མཐར༔ མ་ལས་ཐོབ་པའི་རཀྟ་གྱེན་དུ་འབྱུང་༔ ཕ་ལས་ཐོབ་པའི་བྱང་སེམས་སྤྱི་བོ་ནས་ཐུར་དུ་བབ་སྟེ༔ བྱང་སེམས་དཀར་དམར༔ དཀར་ལམ་དམར་ལམ་གྱི་སྣང་བ་ཤར་བའི་རྗེས་སུ་སྙིང་ཁར་ཕྲད་དོ༔ ལྷན་ཅིག་སྐྱེས་པའི་དགའ་བ་ཚད་མེད་པ་གཅིག་སྐྱེས་པ་དང་མཉམ་དུ༔ རྣམ་ཤེས་སྟོར་ནས་བརྒྱལ་ལོག་གིས་འགྲོ་བའི་དུས་སུ་ནང་དབུགས་ཆད་པས༔ དེའི་དུས་སུ་དགའ་བ་བཞི་དང་ཐབས་ལམ་བདེ་སྟོང་ལ་སྦྱངས་ཤིང་༔ དབང་གསུམ་པའི་དུས་ཀྱི༔ ལྷན་ཅིག་སྐྱེས་པའི་དགའ་བ་ངོ་འཕྲོད་པའི་གང་ཟག་དེ༔ ངེས་པར་ངོས་ཟིན་ནས་སྐད་ཅིག་གིས་ཡར་གྱི་ཟང་ཐལ་དུ་གྲོལ་བར་འགྱུར་བས༔ དེས་ན་གསང་སྔགས་ཐབས་ལམ་ཕོ་ཉའི་ལམ་ཟབ་པའི་གཏན་ཚིགས་དེ་ལྟར་རོ༔ དེར་ངོས་མ་ཟིན་ན་ཡང་༔ ཆོས་ཉིད་ཀྱི་བར་དོར་ཞི་ཁྲོ་ཡབ་ཡུམ་འཁྲིལ་སྦྱོར་གྱི་སྐུ་མཐོང་མ་ཐག་ཏུ༔ དབང་གསུམ་པའི་དུས་ཀྱི་ལྷན་ཅིག་སྐྱེས་པའི་དགའ་བའི་ཡེ་ཤེས་དྲན་ནས༔ ངོས་ཟིན་ཏེ་གྲོལ་བར་འགྱུར་རོ༔ དེར་ཡང་ངོས་མ་ཟིན་ན༔ སྲིད་པ་བར་དོ་ཕོ་མོ་ཆགས་པ་སྤྱོད་པ་མཐོང་མ་ཐག༔ ལྷན་ཅིག་སྐྱེས་པའི་དགའ་བའི་ཡེ་ཤེས་ངོས་ཟིན་ནས༔ མངལ་སྒོ་ཁེགས་ནས་ངེས་པར་བར་དོར་གྲོལ་ཏེ༔ རིག་འཛིན་ཐོབ་པར་འགྱུར་བས༔ གསང་སྔགས་གཞན་ལས་ཟབ་ཅིང་ལམ་མྱུར་བའི་ཕྱིར༔ ད་ལྟའང་འཇིག་རྟེན་གྱི་མི་ཁ་ལ་མི་སྐྲག་པར༔ འོག་སྒོ་བདེ་བ་ཆེན་པོའི་ཁྲིད་ལ་སྦྱང་བ་ནི་བར་དོའི་ཉམས་ལེན་དངོས་གཞི་ཡིན་པས༔ མཚན་ལྡན་གཞོན་ནུ་བཙལ་ཞིང་༔ ཟབ་ལམ་བདེ་བ་ལ་སྦྱང་བ་གལ་ཆེའོ༔ ཞིབ་པར་ནི་འོག་སྒོ་བདེ་བ་ཆེན་པོའི་ཁྲིད་ལས་ཤེས་སོ༔ དེ་ནི་ཆགས་ལམ་པའི་མངལ་སྒོ་དགག་པ་སྟེ༔ སྐལ་ལྡན་སྐྱེས་བུ་རབ་རྣམས་ཀྱི་སྤྱོད་ཡུལ་ལོ༔ ས་མ་ཡ༔ བཞི་པ་གྲོལ་ལམ་པའི་སྤོང་སེམས་ཀྱི་གཉེན་པོས་མངལ་སྒོ་དགག་པ་ནི༔ ད་ལྟར་དགེ་བསྙེན༔ དགེ་ཚུལ༔ དགེ་སློང་གང་ཡིན་ཡང་རུང་སྟེ༔ སྡོམ་པ་ལ་གཅེས་པར་བྱས་ནས༔ ཆགས་པ་སྤྱོད་པ་མཐོང་བའམ༔ ཆགས་ཡུལ་དྲན་པ་དང་༔ མི་སྡུག་པ་སྒོམ་པའམ༔ སྤོང་སེམས་དྲག་པོས་བསླབ་པ་ལ་གཅེས་པར་བྱས་པས༔ བར་དོར་ཕོ་མོ་ཆགས་པ་སྤྱོད་པ་མཐོང་བ་དང་༔ བསླབ་པ་དང་སྤོང་སེམས་དྲན་ཏེ༔ མངལ་དུ་མི་འཇུག་པར་མངལ་སྒོ་ཁེགས་པའམ༔ ཡང་དག་པའི་མངལ་དུ་སྐྱེས་ནས་མཐོ་རིས་ཐོབ་པར་འགྱུར་རོ༔ འདི་ནི་གོང་མ་ལས་ལམ་ཅུང་ཟད་དམན་པ་ཡིན་ནོ༔ ས་མ་ཡ༔ ལྔ་པ་འོད་གསལ་གྱིས་མངལ་སྒོ་དགག་པ་ནི༔ དེ་ལྟར་ཁྲེགས་ཆོད་ཀྱི་ཁྲིད་ལ་སྦྱང་ཞིང་༔ སྟོང་ཉིད་ཀྱི་དོན་ལ་འདྲེས་པར་བྱས་པས༔ རབ་འཆི་ཁའི་བར་དོའི་གཞིའི་འོད་གསལ་ངོས་ཟིན་ཏེ༔ བར་དོ་མེད་པར་ཆོས་སྐུ་ཟང་ཐལ་དུ་འགྲོ་བར་འགྱུར་རོ༔ ཐ་མའང་སྲིད་པ་བར་དོར་ཆགས་པ་སྤྱོད་པ་མཐོང་བ་དང་༔ སྟོང་ཉིད་འོད་སྲིད་པ་བར་དོའི་ཁྲིད་ཡིག་སྲིད་པ་རང་གྲོལ། གསལ་གྱི་དོན་རྒྱུད་ལ་ལྷང་གིས་ཤར་ནས་གྲོལ་བར་འགྱུར་རོ༔ ས་མ་ཡ༔ དྲུག་པ་སྒྱུ་ལུས་ཀྱིས་མངལ་སྒོ་དགག་པ་ནི༔ ད་ལྟར་སྒྱུ་ལུས་སྣང་བ་རང་གྲོལ་ལ་སྦྱངས་བས༔ བར་དོའི་འཇིགས་སྐྲག་དང་༔ མངལ་སྒོ་ཤར་བའི་ཚེ༔ སྒྱུ་མ་ལྟ་བུའི་ཏིང་ངེ་འཛིན་རྒྱུད་ལ་སྐྱེས་ཏེ་གྲོལ་བར་འགྱུར་རོ༔ དེ་རྣམས་ཐམས་ཅད་ཀྱི་ཉམས་ལེན་རྩ་བ་མདོར་བསྡུ་ན༔ སྐྱེ་གནས་བར་དོའི་སྣང་བ་ཐམས་ཅད༔ བསྐྱེད་རིམ་པས་ལྷ་དང་ལྷ་མོའི་རང་བཞིན་དུ་སྦྱང་༔ རྫོགས་རིམ་པས་ཅི་ཤར་ཅི་སྣང་ཐམས་ཅད་རང་བྱུང་ཡེ་ཤེས་སྟོང་ཉིད་ལྷང་ལྷང་སྦྱང་༔ གཞན་ཡང་སྣང་བ་ཐམས་ཅད་མེ་ལོང་ནང་གི་གཟུགས་བརྙན་ལྟར་སྣང་ལ་རང་བཞིན་མེད་པ༔ སྣང་སྟོང་དབྱེར་མེད་དུ་སྦྱངས་བས༔ ཉིན་པར་གྱི་འཁྲུལ་སྣང་དག་སྣང་དུ་འཆར༔ དེས་རྨི་ལམ་གྱི་བདེན་ཞེན་གྲོལ་ནས༔ རྨི་ལམ་རྨི་ལམ་དུ་ཤེས་པའམ༔ འོད་གསལ་དུ་འཆར༔ དེས་བར་དོའི་འཁྲུལ་སྣང་དག་སྣང་དུ་འཆར་ནས་བར་དོར་གྲོལ་བར་འགྱུར་རོ༔ དེ་ཉམས་སུ་ལེན་པ་ནི༔ དུས་རྒྱུན་དུ་ད་ལྟར་གྱི་སྣང་བ་སོ་མ་འདི༔ མ་བཅོས་ཀ་དག་གི་ངང་ལ་ཕྱམ་མེ་བཞག༔ གལ་ཏེ་རྟོག་པ་འཕྲོ་ན༔ གྲོལ་ལུགས་ཆེན་པོ་བཞིའི་གདེང་གིས་ཟིན་པར་བྱས་ལ༔ ཅི་སྣང་གང་ཤར་རང་གྲོལ་དུ་སྦྱང་ངོ་༔ གཞན་ཡང་འདི་སྙམ་དུ༔ ད་ལྟའི་སྣང་ཡུལ་འདི་རྣམས་ཐམས་ཅད༔ ང་ཤི་ནས་བར་དོར་འཁྱམས་པའི་སྣང་ཡུལ༔ ཡད་ཡུད་ཟང་ཟིང་དུ་འདུག༔ ཡུལ་འདི་རྣམས་ཀྱང་སྲིད་པ་བར་དོའི་ཡུལ་དུ་འདུག་ཅིང་༔ སེམས་ཅན་སྐྱེ་འགྲོ་འདི་རྣམས་ཀྱང་བར་དོའི་སེམས་ཅན་ཡིན༔ རླུང་སྒྲ་འུ་རུ་རུ་ཟེར་བ་དང་༔ འབྲུག་དང་༔ གློག་དང་༔ ཆར་པ་དང་༔ སེར་བ་དང་༔ མུན་རུག་པ་དང་༔ མི་སྐད་ཁྱི་སྐད་ཀུ་ཏིར་ཏིར་བ་དང་༔ གླུ་གར་དང་༔ རྩེད་བྲོ་དང་༔ དམག་འཁྲུགས་དང་༔ ཁ་སྐད་མི་གཅིག་པའི་གླེང་མོ་འདི་རྣམས་དང་༔ ལས་སྣ་ཚོགས་བྱེད་པ་དང་༔ གཅིག་ཏུ་མ་ངེས་ཤིང་༔ ཟང་ཟིང་སྣ་ཚོགས་ཀྱིས་ཟང་ཟིང་པོར་གྱུར་པ་འདི་བར་དོ་ཡིན་པར་ཐག་ཆོད༔ དེ་རིང་དོ་ནུབ་འཕྲད་པའི་གྲོགས་དང་གཉེན་འདུན་འགྲུལ་རོག༔ འདི་རྣམས་ཀྱང་ཤི་ནས་བདག་དང་ལྷན་ཅིག་ཏུ་བར་དོར་འཁྱམས་པ་ཡིན་པར་འདུག༔ མི་བདེན་པར་འདུག༔ རྨི་ལམ་ལྟ་བུ༔ སྒྱུ་མ་ལྟ་བུ༔ གཏད་མེད་དུ་འདུག་བདེན་མེད་དུ་འདུག་སྙམ་དུ་བསམ་ལ༔ ཡང་སྔར་གྱི་སྐྱབས་འགྲོ་ནས་བཟུང་སྟེ༔ བསྐྱེད་རིམ༔ རྫོགས་རིམ༔ སྟོང་ཉིད་ཕྱག་རྒྱ་ཆེན་པོའི་ངང་ལ་ཕྱམ་ཕྱམ་བཞག༔ བག་ཆགས་གོམས་འདྲེས་སུ་བྱེད་པ་ཡིན་པས༔ རྒྱུན་དུ་བར་དོ་ཡིན་སྙམ་དུ་བསམས་ཤིང་༔ ངག་ནས་ཀྱང་བར་དོ་ཡིན་བར་དོ་ཡིན༔ ཨ་ཙ་མ༔ བདག་བར་དོར་འཁྱམས་ནས་འདུག་པས༔ བླ་མ་བླ་མ་ཞེས་བརྗོད༔ སྐབས་སུ་རབ་མདའ་སྦྲོན་པའི་སྨོན་ལམ་དང་༔ བར་དོ་རྩ་ཚིག༔ འཕྲང་སྒྲོལ༔ འཇིགས་སྐྱོབ་མའི་སྨོན་ལམ་རྣམས་ཡང་ཡང་གདབ༔ ཐོས་གྲོལ་དང་བར་དོའི་ཆོས་སྐོར་ཐམས་ཅད་ལ་ཡང་ནས་ཡང་དུ་བལྟའོ༔ མདོར་ན་བར་དོའི་ཆོས་ལ་བློ་བྱང་བར་བྱེད་པ་དང་༔ འདུན་པ་སྦྱང་བ་ལས༔ ལྷག་པར་བསྒོམ་རྒྱུ་མེད་དེ༔ བར་དོའི་འདུན་པ་རྒྱུན་མི་ཆད་པར་བྱ༔ རྗེས་སུ་སེམས་ཉིད་མ་བཅོས་པའི་ངང་ལ་ཕྱམ་ཕྱམ་བཞག༔ བར་དོའི་འདུན་པ་དེས་རྒྱུད་བསྐུལ་ནས་དགེ་སྦྱོར་ལ་བརྩོན་པར་བྱའོ༔ ཞིབ་ཏུ་ཆོས་ཉིད་བར་དོའི་ཐོས་གྲོལ་དང་༔ སྲིད་པ་བར་དོའི་ཐོས་གྲོལ་གཉིས་སུ་བལྟའོ༔ སྒྲོན་མ་དྲུག་དང་༔ བར་དོའི་རྒྱབ་ཆོས་དང་བར་དོའི་ངོ་སྤྲོད་ཐམས་ཅད་ལ་བློ་ཤིན་ཏུ་སྦྱང་བར་བྱའོ༔ དེས་ནི་རབ་ཚེ་འདིར༔ འབྲིང་འཆི་ཁ༔ ཐ་མ་ཆོས་ཉིད་བར་དོ༔ ཡང་ཐ་སྲིད་པའི་བར་དོར༔ ལས་ཀྱི་འཕྲོ་མཐུད་ནས་གྲོལ་བར་ཐེ་ཚོམ་མེད་དོ༔ སྲིད་པ་བར་དོའི་ཁྲིད་ཡིག༔ སྲིད་པ་རང་གྲོལ་ཞེས་བྱ་བ༔ ས་མ་ཡ༔ ཨེ་མ༔ བར་དོ་དྲུག་གི་དམར་ཁྲིད་རང་གྲོལ་འདི༔ རྒྱལ་བའི་དགོངས་པ་ཀུན་གྱི་མདོ་འགག་སྲིད་པ་བར་དོའི་ཁྲིད་ཡིག་སྲིད་པ་རང་གྲོལ། ཡིན༔ ཐེག་པའི་ཟབ་ཆོས་ཀུན་གྱི་ཡང་སྙིང་ཡིན༔ འགྲོ་རྣམས་ཐར་ལམ་ཁྲིད་པའི་ཉམས་ཁྲིད་ཡིན༔ མ་འོངས་བསྐལ་པ་དུས་ཀྱི་ཐ་མ་ལ༔ འགྲོ་བ་ཐམས་ཅད་ཆོས་མིན་སྤྱོད་པའི་ཚེ༔ ཟབ་ལམ་འདི་ཡིས་འགྲོ་ཀུན་སྒྲོལ་བར་ཤོག༔ མ་ལུས་རྫོགས་པའི་སངས་རྒྱས་ཐོབ་པར་ཤོག༔ བར་དོ་དྲུག་གི་ཁྲིད་ཡིག་ཆེན་མོ༔ ཉམས་ཁྲིད་དགོངས་པ་རང་གྲོལ་ཞེས་བྱ་བ༔ ཇི་སྲིད་འཁོར་བ་སྟོང་པར་མ་གྱུར་ཚེ༔ དེ་སྲིད་དམ་པའི་ཆོས་འདི་མ་རྫོགས་སོ༔ ས་མ་ཡ༔ གཏེར་རྒྱ༔ སྦས་རྒྱ༔ གྲུབ་ཐོབ་ཀརྨ་གླིང་པས༔ སྒམ་པོ་གདར་གྱི་རི་བོ་ནས་བཏོན་པའོ༔ གཅིག་བརྒྱུད་དུ་བྱས་ནས༔ གུ་རུ་ཉི་ཟླ་འོད་ཟེར་ལ་ཟབ་ཆོས་འདིའི་བདག་པོར་བཀའ་བབས་སོ༔ རྒྱབ་ཆོས་འཁྲུལ་བ་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་ལསཿ བར་དོ་དྲུག་གི་རྒྱབ་ཆོས་འཁྲུལ་བ་རང་གྲོལ་ཞེས་བྱ་བཿབར་དོ་ཐོས་གྲོལ་གྱི་ཆ་ལགས་བཞུགས་སོ༔ ཀུན་ཏུ་བཟང་པོ་རྒྱལ་བ་ཞི་ཁྲོའི་ལྷ༔ ཉེ་རིང་མེད་པའི་འཕགས་པ་སྤྱན་རས་གཟིགས༔ སྤྲུལ་པའི་སྐྱེས་མཆོག་སློབ་དཔོན་པདྨ་འབྱུང་༔ པདྨ་ཞི་ཁྲོའི་ལྷ་ལ་ཕྱག་འཚལ་ལོ༔ བར་དོ་ཐོས་པ་རང་གྲོལ་ངོ་སྤྲོད་ཀྱི༔ རྒྱབ་ཆོས་ལྷན་ཐབས་འཁོར་བ་རང་གྲོལ་བསྟན༔ དེ་ཡང་བར་དོའི་ཆོས་ཀུན་མདོར་བསྡུས་ན༔ རྣམ་གྲངས་བཅོ་བརྒྱད་དག་གིས་ཕྱེ་སྟེ་བསྟན༔ བར་དོའི་ངོ་བོ་༡ངེས་ཚིག་༢དབྱེ་བ་༣དང་༔ རང་བཞིན་༤མཚན་ཉིད་༥ས་མཚམས་༦དཔེ་དྲུག་༧དང་༔ རྟགས་དྲུག་༨གནས་དྲུག་༩ལུས་དྲུག་༡༠ཚེ་ཚད་༡༡དྲུག་༔ སྣང་ལུགས་༡༢ངོ་སྤྲོད་༡༣ཉམས་ལེན་༡༤ གདམས་ངག་དྲུག༡༥༔ ཉེས་དམིགས་༡༦ ཕན་ཡོན་༡༧ རྩ་ཚིག་དྲུག་དང་༡༨ནི༔ རྣམ་གྲངས་བཅོ་བརྒྱད་བར་དོའི་ཆོས་ཀུན་རྫོགས༔ སྐལ་ལྡན་ལས་ཅན་དད་གུས་ལྡན་པ་རྣམས༔ འདི་ལྟར་ཡིད་ལ་ཟུངས་ཤིག་ས་མ་ཡ༔ དེ་ལ་དང་པོ་བར་དོའི་ངོ་བོ་གང་ཞེ་ན༔ ད་ལྟ་ཐ་མལ་གྱི་ཤེས་པ་བཟོ་བཅོས་མ་བྱས་པའི་རང་ལུགས་གསལ་སྟོང་དུ་ཧྲིག་གེ༔ འཆར་བ་འདི་ཁོ་ན་བར་དོ་ཐམས་ཅད་ཀྱི་ངོ་བོ་ཉིད་ཡིན་ཏེ༔ དེ་ཅིའི་ཕྱིར་ཞེ་ན༔ འདི་ཁོ་ན་རྟོགས་མ་རྟོགས་ཀྱི་ཁྱད་པར་ལས༔ བར་དོ་ཐམས་ཅད་འབྱུང་བའི་ཕྱིར་རོ༔ དེའི་ཕྱིར་ད་ལྟར་གྱི་ཤེས་པ་མ་བཅོས་པ་སོ་མ་འདི་བླ་མས་ངོ་སྤྲད༔ རང་གིས་ཉམས་སུ་བླངས་ནས་མངོན་དུ་གྱུར་ན་བར་རྒྱབ་ཆོས་འཁྲུལ་བ་རང་གྲོལ། དོ་ཐམས་ཅད་དེ་ནས་ཆོད་པའི་ཕྱིར༔ འདི་ངོ་སྤྲད་ནས་མ་བཅོས་པར་སྐྱོང་བ་ནི་བར་དོའི་ཉམས་ལེན་དངོས་གཞིའོ༔ གཉིས་པ་བར་དོའི་ངེས་ཚིག་དྲུག་ནི༔ དེ་ཡང་བར་དོ་ཞེས་བྱ་བ་ཅིའི་ཕྱིར༔ བར་དོ་ཞེས་བྱ་ཞེ་ན༔ སྔ་མའི་བག་ཆགས་དང་སྣང་བ་ནི་འདས༔ ཕྱི་མའི་སྣང་བ་ནི་མ་ཤར༔ སྔ་ཕྱི་གཉིས་ཀྱི་བར་དེའི་སྣང་བ་ཉམས་སུ་མྱོང་བདོ་བའི་ཕྱིར༔ བར་དོ་ཞེས་མིང་དུ་བཏགས་པ་ཡིན་ནོ༔ དེའང་སྐྱེ་གནས་བར་དོ་ཞེས་བྱ་བ་ཅིའི་ཕྱིར་ཞེ་ན༔ མ་ལས་སྐྱེས་ནས་མ་ཤིའི་བར་དུ་ད་ལྟའི་སྣང་བ་ཡད་ཡུད་བན་བུན་འདི་ལ་གནས་བདོ་བའི་ཕྱིར༔ དེ་ཡང་སྐྱེ་གནས་བར་དོ་ཞེས་མིང་དུ་བཏགས་པ་ཡིན་ནོ༔ རྨི་ལམ་བར་དོ་ཞེས་བྱ་བ་ཅིའི་ཕྱིར་རྨི་ལམ་བར་དོ་ཞེས་བྱ་ཞེ་ན༔ དཔེར་ན་ཁར་རྩང་གི་ཉིན་སྣང་ནི་ནུབ༔ ནང་པར་གྱི་ཉིན་སྣང་ནི་མ་ཤར༔ གཉིད་དུ་ཧྲུལ་སོང་པ་དང་༔ བག་ཆགས་འཁྲུལ་པའི་ལུས་གཅིག་ལམ་སྟེ་ཤར་ནས༔ དེའི་བར་དེར་རྨི་ལམ་གྱི་སྣང་བ་ལ་འཁྱམས་བདོ་ཕྱིར༔ རྨི་ལམ་བར་དོ་ཞེས་མིང་དུ་བཏགས་སོ༔ བསམ་གཏན་བར་དོ་ཞེས་བྱ་བ་ཅིའི་ཕྱིར་བསམ་གཏན་བར་དོ་ཞེས་བྱ་ཞེ་ན༔ བསམ་རྟོག་འཁྲུལ་པའི་འགྱུ་བ་ཐམས་ཅད་རང་སར་ཞི་ནས༔ གནས་ལུགས་ཁོ་རང་གི་ཐོག་ཏུ་མ་བཅོས་པར་བསམ་གཏན་ལ་གནས་པའི་ཕྱིར༔ བསམ་གཏན་བར་དོ་ཞེས་མིང་དུ་བཏགས་སོ༔ འཆི་ཁ་བར་དོ་ཞེས་བྱ་བ་ཅིའི་ཕྱིར༔ འཆི་ཁ་བར་དོ་ཞེས་བྱ་ཞེ་ན༔ འཇིག་རྟེན་འདིའི་སྣང་བ་ནི་ནུབ་ལ་ཁད༔ ཕྱི་མའི་ཡུལ་དུ་འགྲོ་ལ་ཁད་དེ༔ དཔེར་ན་མི་གཅིག་ག་ཤེད་དུ་འགྲོ་ལ་ཁད་པ་དེ་ལ༔ འགྲོ་ཁ་མ་ཟེར་བ་བཞིན་དུ༔ འཆི་བའི་འཇིགས་པ་འོང་ལ་ཁད༔ འཇིག་རྟེན་ཕ་རོལ་དུ་འགྲོ་ལ་ཁད་པའི་ཕྱིར༔ འཆི་ཁ་ཞེས་བྱ༔ དེའི་བར་གྱི་སྡུག་བསྔལ་མྱོང་བདོ་བའི་ཕྱིར༔ འཆི་ཁ་བར་དོ་ཞེས་མིང་དུ་བཏགས་སོ༔ ཆོས་ཉིད་བར་དོ་ཞེས་བྱ་བ་ཅིའི་ཕྱིར་ཆོས་ཉིད་བར་དོ་ཞེས་བྱ་ཞེ་ན༔ འཇིག་རྟེན་འདིའི་སྣང་བ་ནི་འདས༔ སྲིད་པའི་བར་དོ་དང་༔ ཕྱི་མའི་སྣང་བ་མ་ཤར་བའི་བར་དེར༔ ཆོས་ཉིད་འོད་གསལ་དང་༔ ཞི་ཁྲོ་ལོངས་སྤྱོད་རྫོགས་པའི་ལྷ་ཚོགས་དང་༔ སྒྲ་འོད་ཟེར་གསུམ་གྱི་སྣང་བ་ཉམས་སུ་མྱོང་བདོ་བའི་ཕྱིར༔ ཆོས་ཉིད་བར་དོ་ཞེས་མིང་དུ་བཏགས་སོ༔ སྲིད་པ་བར་དོ་ཞེས་བྱ་བ་ཅིའི་ཕྱིར་སྲིད་པ་བར་དོ་ཞེས་བྱ་ཞེ་ན༔ ཆོས་ཉིད་ཞི་ཁྲོའི་སྣང་བ་ཤར་དུས་སུ་ངོས་མ་ཟིན་པས་ཡལ༔ ཕྱི་མའི་ལུས་མ་བླངས་བའི་བར་དེར༔ ཡར་མཐོ་རིས་ཀྱི་བདེ་བ་ཡང་དུས་དེ་ནས་སྲིད་ལ༔ མར་ངན་སོང་གི་སྡུག་བསྔལ་ཀྱང་དུས་དེ་ནས་སྲིད་དེ༔ བདེ་སྡུག་འཁོར་འདས་རིགས་དྲུག་གི་སྣང་བ་ཐམས་ཅད་དེའི་དུས་ཁོ་ན་ནས་སྲིད་པས༔ དེ་རྣམས་གང་གི་ཐོག་ཏུའང་མ་ཁེལ་བའི་བར་དེར་འཁྱམས་བདོ་བའི་ཕྱིར༔ སྲིད་པ་བར་དོ་ཞེས་མིང་དུ་བཏགས་སོ༔ དེ་ནི་བར་དོ་དྲུག་གི་ངེས་ཚིག་དྲུག་བསྟན་པའོ༔ ས་མ་ཡ༔ ༈གསུམ་པ་བར་དོའི་དབྱེ་བ་བསྟན་པ་ལ་དྲུག་སྟེ༔ རང་བཞིན་སྐྱེ་གནས་ཀྱི་བར་དོ་དང་གཅིག༔ རྨི་ལམ་འཁྲུལ་པའི་བར་དོ་དང་གཉིས༔ བསམ་གཏན་ཏིང་འཛིན་གྱི་བར་དོ་དང་གསུམ༔ འཆི་ཁ་སྡུག་བསྔལ་གྱི་བར་དོ་དང་བཞི༔ ཆོས་ཉིད་ཞི་ཁྲོའི་བར་དོ་དང་ལྔ༔ རྣམ་སྨིན་སྲིད་པའི་བར་དོ་དང་དྲུག་གོ༔ དེ་ནི་བར་དོའི་དབྱེ་བ་དྲུག་བསྟན་པའོ༔ ས་མ་ཡ༔ ༈ བཞི་པ་བར་དོའི་རང་བཞིན་གང་ཞེ་ན༔ བར་དོ་ཐམས་ཅད་ཀྱི་རང་བཞིན་ནི་སྟོང་པ་ཉིད་དོ༔ དེ་ཡང་༔ བར་དོའི་རང་བཞིན་སྟོང་པ་ཉིད་ཡིན་པ་ཅིའི་ཕྱིར་ཞེ་ན༔ བར་དོའི་གནས་སྐབས་ཐམས་ཅད་ནི་ཀུན་རྫོབ་ཀྱི་བདེན་པ་ཙམ་ལས༔ དོན་དམ་པར་ནི་བར་དོ་ཞེས་བྱ་བ་ཡོད་མི་སྲིད་པའི་ཕྱིར་རོ༔ བར་དོའི་རང་བཞིན་སྟོང་པ་ཉིད་ཡིན་ནོ༔ དེ་ཡང་ཕ་རོལ་ཏུ་ཕྱིན་པ་ལས༔ ཕྱི་སྟོང་པ་ཉིད་ཅེས་གསུངས་རྒྱབ་ཆོས་འཁྲུལ་བ་རང་གྲོལ། ཏེ༔ ཕྱིའི་ཆོས་གཟུགས་སྒྲ་དྲི་རོ་རེག་བྱ་ཆོས་ལ་སོགས་པ་འདི་རྣམས༔ ཐེར་ཟུག་ཏུ་གནས་པ་ཡང་མ་ཡིན༔ འཇིག་པའམ་འགག་པར་གྱུར་པ་ཡང་མ་ཡིན་པའི་ཕྱིར༔ དོན་དམ་པར་ནི་གཟུགས་ལ་སོགས་པ་འདི་རྣམས་ལ་རང་བཞིན་དུ་གྲུབ་པ་སྤུ་ཙམ་ཡང་མེད་པའི་ཕྱིར་ཕྱི་སྟོང་པ་ཉིད་དོ༔ ནང་སྟོང་པ་ཉིད་ཅེས་གསུངས་ཏེ༔ ནང་གི་ཆོས་མིག་དང་༔ རྣ་བ་དང་༔ སྣ་དང་༔ ལྕེ་དང་༔ ལུས་དང་༔ ཡིད་ལ་སོགས་པ་འདི་རྣམས་ཀྱང་༔ ཐེར་ཟུག་ཏུ་གནས་པ་ཡང་མ་ཡིན༔ འཇིག་པའམ༔ འགག་པར་གྱུར་པ་ཡང་མ་ཡིན་པའི་ཕྱིར༔ དོན་དམ་པར་ནི་མིག་ལ་སོགས་པའི་ནང་གི་ཁམས་འདི་རྣམས་རང་བཞིན་དུ་གྲུབ་པ་རྡུལ་ཙམ་ཡང་མེད་པའི་ཕྱིར་ནང་སྟོང་པ་ཉིད་དོ༔ ཕྱི་ནང་སྟོང་པ་ཉིད་ཅེས་གསུངས་ཏེ༔ ཕྱི་ནང་གི་ཁམས་བཅོ་བརྒྱད༔ སྐྱེ་མཆེད་བཅུ་གཉིས་ལ་སོགས་པ་རྣམས་ཀྱང་༔ དོན་དམ་པར་ནི་གཟུང་བ་དང་འཛིན་པ་གཉིས་ཀ་མེད་དེ༔ ཡུལ་དང་ཡུལ་ཅན་གྱི་ཚུལ་དང་བྲལ་བས་ན་ཕྱི་ནང་སྟོང་པ་ཉིད་དོ༔ དེ་སྐད་དུ་ཡང་༔ ཧེ་རུ་ཀ་གལ་པོའི་རྒྱུད་ལས༔ གཟུགས་སྒྲ་ལ་སོགས་འཇིག་འགྱུར་ཕྱིར༔ དངོས་པོ་མེད་པ་ཕྱི་སྟོང་ཉིད༔ དབང་པོ་ལྔ་ནི་ཐེར་ཟུག་མིན༔ ནང་ནི་སྟོང་པ་ཡིན་པ་ལ༔ ཕྱི་དང་ནང་གི་སྐྱེ་མཆེད་རྣམས༔ ཕྱི་ནང་སྟོང་པ་ཉིད་གྱུར་པ༔ རང་བཞིན་གྱིས་སྟོང་གཞན་ནི་མིན༔ སྟོང་པ་ཉིད་ནི་སྟོང་པ་ཉིད༔ འཇིག་རྟེན་ཆེན་པོ་སྟོང་པ་ཉིད༔ མྱང་འདས་དོན་དམ་སྟོང་པ་ཉིད༔ ཁམས་གསུམ་འདུས་བྱས་སྟོང་པ་ཉིད༔ ཅེས་པ་ལ་སོགས་ཏེ་སྟོང་པའི་རྣམ་གྲངས་བཅོ་བརྒྱད་དུ་གསུངས་ཏེ༔ མདོར་བསྡུ་ན་འཁོར་འདས་ཀྱིས་བསྡུས་པའི་ཆོས་ཐམས་ཅད་སྟོང་པ་ཉིད་ཡིན་པའི་ཕྱིར༔ བར་དོའི་རང་བཞིན་ནི་སྟོང་པ་ཉིད་དོ༔ ས་མ་ཡ༔ ༈ལྔ་པ་བར་དོ་དྲུག་གི་མཚན་ཉིད་གང་ཞེ་ན༔ དང་པོ་སྐྱེ་གནས་བར་དོའི་མཚན་ཉིད་ནི༔ རང་ལུས་འདོམ་གང་གྲུ་བཞི་འདི་ཉིད༔ ཕུང་པོ་ལྔ་དང་༔ ཁམས་ལྔ་དང་༔ སྐྱེ་མཆེད་དྲུག་དང་༔ དབང་པོ་ལྔ་དང་༔ ཡུལ་ཡུལ་ཅན་དང་༔ ཉོན་མོངས་པ་ལ་སོགས་འདི་དག་ཅི་ལྟར་གནས་པ་གཏན་ལ་དབབ་སྟེ༔ དེའི་མཚན་ཉིད་ཅི་ལྟ་བར་ཤེས་པའི་རྣལ་འབྱོར་པ་ནི༔ སྣང་པ་ཀུན་ལ་དབང་བསྒྱུར་བར་ནུས་པ་སྟེ༔ དེ་སྐད་དུ་ཡང་༔ འཁོར་འདས་རང་གྲོལ་གྱི་རྒྱུད་ལས༔ སྐྱེ་གནས་བར་དོའི་མཚན་ཉིད་ནི༔ རང་ལུས་འདོམ་གང་གྲུ་བཞི་འདི༔ ཁམས་རྣམས་དང་ནི་ཕུང་པོ་དང་༔ སྐྱེ་མཆེད་དབང་པོ་ཡུལ་ཡུལ་ཅན༔ ཉོན་མོངས་ཇི་ལྟར་གནས་གཏན་དབབ༔ འདི་དག་ཤེས་པའི་རྣལ་འབྱོར་པ༔ སྣང་བ་ཀུན་ལ་དབང་བསྒྱུར་ནུས༔ ཞེས་གསུངས་སོ༔ གཉིས་པ་རྨི་ལམ་བར་དོའི་མཚན་ཉིད་ནི༔ གཉིད་འཐུག་པོའི་དུས་སུ་ནི་རྟོག་པ་མེད་པར་རང་བཞིན་གྱིས་འོད་གསལ་བའི་མཚན་ཉིད་ཅན་ནོ༔ རྨི་ལམ་གྱི་དུས་སུ་ནི་སྒྱུ་མ་ལྟ་བུར་མི་གནས་ཤིང་བརྟག་མི་བཟོད་པའི་མཚན་ཉིད་ཅན་ནོ༔ གསུམ་པ་བསམ་གཏན་བར་དོའི་མཚན་ཉིད་ནི༔ སྟོང་པའི་ངང་ལས༔ བསྐྱེད་རིམ་དང་༔ རྫོགས་རིམ་དང་༔ ཞི་གནས་དང་༔ ལྷག་མཐོང་ལ་སོགས་པ་འཆར་བའོ༔ བཞི་བ་འཆི་ཁ་བར་དོའི་མཚན་ཉིད་ནི༔ འཆི་རྐྱེན་ནད་ཀྱིས་འབྱུང་བ་འཁྲུག་སྟེ༔ ལུས་ངག་ཡིད་གསུམ་སྡུག་བསྔལ་བའི་མཚན་ཉིད་ཅན་ཏེ༔ འཛིན་ཆགས་དང་ཞེན་པའི་མཚོ་བརྡོལ་ནས༔ ལུས་སེམས་བྲལ་གྱི་དོགས་པའི་སྡུག་བསྔལ་དང་༔ མི་འགྲོ་བའི་དབང་མེད་པར་འགྲོ་དགོས་པའི་སྡུག་བསྔལ་དང་༔ མཛའ་བཤེས་དང་༔ ནོར་རྫས་ཡུལ་འཁོར་ལ་ཆགས་ཀྱང་འགྲོགས་པའི་དབང་མེད་དེ༔ སེམས་ཞེན་ཅིང་ཆགས་པའི་སྡུག་བསྔལ་དང་༔ དེ་ལྟ་བུའི་སྡུག་བསྔལ་ཤིན་ཏུ་རགས་པ་དེའི་དབང་གིས་ཤེས་པ་བན་བུན་ལང་ལོང་དུ་སོང་སྟེ༔ ཤེས་པ་གཅིག་ཏུ་མི་གནས་པ་ནི་འཆི་ཁ་བར་དོའི་མཚན་ཉིད་དེ༔ འཁོར་འདས་རང་གྲོལ་གྱི་རྒྱུད་ལས༔ འཆི་རྒྱབ་ཆོས་འཁྲུལ་བ་རང་གྲོལ། ཁ་མ་ཡི་མཚན་ཉིད་ནི༔ འཆི་རྐྱེན་ནད་ཀྱིས་འབྱུང་བ་འཁྲུགས༔ ལུས་ངག་ཡིད་གསུམ་སྡུག་བསྔལ་ཏེ༔ འཛིན་ཆགས་ཞེན་པའི་མཚོ་བརྡོལ་ནས༔ ལུས་སེམས་བྲལ་གྱིས་དོགས་པ་ཡིས༔ སྡུག་བསྔལ་ཤིན་ཏུ་རགས་པ་སྟེ༔ བན་བུན་དང་ནི་ལང་ལོང་དང་༔ ཤེས་པ་གཅིག་ཏུ་མི་གནས་པའོ༔ ཞེས་གསུངས་སོ༔ ལྔ་པ་ཆོས་ཉིད་བར་དོའི་མཚན་ཉིད་ནི༔ ཕུང་པོ་ཤ་ཁྲག་གི་ལུས་དང་བྲལ༔ ཟག་པ་མེད་པའི་ལུས་སུ་གྱུར་ཏེ༔ ཞི་བ་དང་༔ ཁྲོ་བོ་དང་༔ སྒྲ་འོད་ཟེར་གསུམ་དང་༔ ཡེ་ཤེས་ཀྱི་གསལ་ཆ་དང་༔ སྣང་བ་ཐམས་ཅད་བདེ་བ་ཆེན་པོ་དག་པ་རབ་འབྱམས་ཀྱི་སྣང་བ་འཆར་ཏེ༔ ཅིར་སྣང་ཆོས་ཉིད་ཀྱི་ཞིང་ཁམས་སུ་འཆར་བ་ནི༔ ཆོས་ཉིད་བར་དོའི་མཚན་ཉིད་དེ༔ འཁོར་འདས་རང་གྲོལ་གྱི་རྒྱུད་ལས༔ ཆོས་ཉིད་བར་དོའི་མཚན་ཉིད་ནི༔ ཕུང་པོ་མེད་ཅིང་ཟག་བཅས་བྲལ༔ ཞི་བའི་སྐུ་དང་ཁྲོ་བོའི་སྐུ༔ ཡེ་ཤེས་འོད་དང་ཁ་དོག་དང་༔ ཐིག་ལེའི་ཆ་དང་འབྱུང་སྣང་དག༔ སྣང་བ་ཐམས་ཅད་བདེ་ཆེན་ཞིང་༔ རང་སྣང་དག་པ་ཀུན་སྣང་སྟེ༔ ཅིར་སྣང་ཆོས་ཉིད་གཞལ་ཡས་སོ༔ ཞེས་གསུངས་སོ༔ དྲུག་པ་སྲིད་པ་བར་དོའི་མཚན་ཉིད་ནི༔ ཤ་ཁྲག་གི་གཟུགས་དང་ནི་བྲལ༔ སྒྱུ་མ་ཡིད་ཀྱི་གཟུགས་ཅན་དེ༔ ཆོས་ཉིད་ཞི་ཁྲོའི་སྣང་བ་འཆར་བའི་དུས་སུ༔ བདེན་པའི་དོན་མ་རྟོགས་པར༔ སྐུ་དང་སྒྲ་འོད་ཟེར་གསུམ་ལ་བྲེད་ཅིང་བསྔངས་པས༔ ཆོས་ཉིད་ཀྱི་དོན་ངོས་མ་ཟིན་པར༔ སྟོང་གསུམ་ཀུན་ཏུ་ཡིད་གྱ་གྱུ༔ ཡད་ཡུད་བྱ་སྒྲོ་རླུང་གིས་ཁྱེར་བ་བཞིན་ཏུ༔ ས་གཅིག་ཏུ་འདུག་མི་ཟུག་པར༔ ཕྱད་ཕྱོད༔ ཡད་ཡུད༔ བན་བུན༔ ལང་ལོང་༔ རྨི་ལམ་གྱི་ལུས་ལྟར༔ ས་གཅིག་ཏུ་མི་ཟུག་པར༔ ཚིག་པ་ཟ་ཞིང་རིགས་དྲུག་གི་འོད་དྲུག་གི་རྗེས་སུ་འབྲང་ཞིང་སྣང་བ་ཤར་བ་ནི༔ སྲིད་པ་བར་དོའི་མཚན་ཉིད་དེ༔ འཁོར་འདས་རང་གྲོལ་གྱི་རྒྱུད་ལས༔ སྲིད་པ་བར་དོའི་མཚན་ཉིད་ནི༔ ཤ་ཁྲག་རང་གི་གཟུགས་བྲལ་ནས༔ སྒྱུ་མ་ཡིད་ཀྱི་གཟུགས་ཅན་དེ༔ ཆོས་ཉིད་བདེན་པའི་དོན་མ་མཐོང་༔ འོད་སྣང་ཀུན་ལ་བྲེད་སྔངས་དང་༔ སྟོང་གསུམ་ཀུན་ཏུ་ཡིད་གྱ་གྱུ༔ བྱ་སྒྲོ་རླུང་གིས་ཁྱེར་བ་བཞིན༔ ཕྱད་ཕྱོད་ཡད་ཡུད་སྙམ་ཅིང་འཇུག༔ བན་བུན་ལང་ལོང་རྨི་ལམ་འདྲ༔ ས་གཅིག་མི་ཟུག་ཚིགས་པ་ཟ༔ དཀར་སྔོ་ལ་སོགས་རིགས་དྲུག་འོད༔ སོ་སོར་དམིགས་པས་སྣང་བའོ༔ ཞེས་གསུངས་སོ༔ དེ་ནི་བར་དོ་དྲུག་གི་མཚན་ཉིད་དྲུག་བསྟན་པའོ༔ ས་མ་ཡཱ༔ ༈ དྲུག་པ་བར་དོའི་ས་མཚམས་དྲུག་གང་ཞེ་ན༔ དང་པོ་སྐྱེ་གནས་བར་དོ་ནི༔ མའི་མངལ་ནས་ཐོན་ནས༔ འཆི་རྐྱེན་ནད་ཀྱིས་བཏབ་པ་ཚུན་ཆད་ཀྱི་སྣང་བ་འདི་ཡིན་ནོ༔ གཉིས་པ་རྨི་ལམ་བར་དོའི་ས་མཚམས་ནི༔ གཉིད་ཧྲུལ་དུ་སོང་ནས༔ གཉིད་མ་སད་བར་དེའོ༔ གསུམ་པ་བསམ་གཏན་བར་དོའི་ས་མཚམས་ནི༔ བསམ་གཏན་ལ་མཉམ་པར་བཞག་ནས༔ དེ་ལས་མ་ལྡང་གི་བར་རམ༔ རྟོག་པ་སྔ་མ་ནི་འགགས༔ ཕྱི་མ་མ་སྐྱེས་བའི་བར་དེར་རིག་པ་ཅི་ཙམ་གནས་ཀྱི་བར་དེའོ༔ བཞི་པ་འཆི་ཁ་བར་དོའི་ས་མཚམས་ནི༔ འཆི་རྐྱེན་གྱིས་ཐེབས་ནས༔ ནང་དབུགས་མ་ཆད་ཀྱི་བར་དེའོ༔ ལྔ་པ་ཆོས་ཉིད་བར་དོའི་ས་མཚམས་ནི༔ ནང་དབུགས་ཆད་ནས༔ ལྷུན་གྲུབ་ཀྱི་སྣང་བ་ལ་མ་སླེབས་ཚུན་ཆད་དེ༔ སྲིད་པའི་བར་དོ་མ་ཤར་ཚུན་ཆད་ཀྱི༔ ཆོས་ཉིད་ཞི་ཁྲོའི་སྣང་བ་ཤར་བའི་བར་དེའོ༔ དྲུག་པ་སྲིད་པ་བར་དོའི་ས་མཚམས་ནི༔ ལྷུན་གྲུབ་ཞི་ཁྲོའི་སྣང་བ་ཐམས་ཅད་རང་སར་ཐིམས་ནས༔ མངལ་གྱི་གྲོང་ཁྱེར་དུ་ཚུད་པ་ཚུན་ཆད་སྲིད་པ་བར་དོའི་ས་མཚམས་སོ༔ དེ་ནི་བར་དོ་དྲུག་གི་ས་མཚམས་དྲུག་བསྟན་པའོ༔ ས་མ་ཡཱ༔ ༈ བདུན་པ་བར་དོ་དྲུག་གི་དཔེ་དྲུག་གང་ཞེ་ན༔ དང་པོ་སྐྱེ་གནས་བར་དོའི་དཔེ་ཅི་དང་འདྲ་ན༔ ལུས་སེམས་གཉིས་ཐོ་ཁ་ན་བྱ་གནས་པ་དང་འདྲ་སྟེ༔ དཔེར་ན་རྒྱབ་ཆོས་འཁྲུལ་བ་རང་གྲོལ། བརྩིགས་པའི་ཐོ་ནི་ཡུན་རིང་དུ་རྟག་མི་ཐུབ་སྟེ༔ ནམ་བོར་ཆ་མེད་ཅིང་༔ རྐྱེན་གྱི་དབང་དུ་འགྲོ་ལ་ཁད༔ ཞིག་ལ་ཁད་ཀྱི་རང་བཞིན་ཅན་ནོ༔ སེམས་འདི་ཐོ་ཁའི་བྱ་དང་འདྲ་སྟེ༔ དཔེར་ན་ཐོ་ཁའི་བྱིས་ཆུང་དེ༔ ཐོའི་སྟེང་དུ་དུས་ཡུན་རིང་དུ་མི་གནས་ཤིང་འཕུར་བར་ངེས་ལ༔ དེའི་སྟེང་དུའང་མྱུར་བར་ཐོ་དེ་བཞག་ནས༔ བྱིས་ཆུང་དེས་ཕྱོགས་མི་གཅིག་པའི་ཡུལ་གཅིག་ཏུ་ངེས་པར་འཕུར་ཏེ་འགྲོའོ༔ དཔེ་དེ་བཞིན་ཏུ༔ སེམས་རིག་རིག་པོ་འདི་ཡང་༔ ལུས་འདིའི་ཐོག་ཏུ་ཡུན་རིང་དུ་མི་སྡོད་དེ་འགྲོ་བར་ངེས་སོ༔ དེའི་སྟེང་དུའང་མྱུར་བར་མྱུར་བར༔ སྒྱུ་ལུས་འདུས་བྱས་ཀྱི་ཕུང་པོ་འདི་ཤུལ་ཏུ་བསྐྱུར་ནས༔ སེམས་རིག་རིག་པོ་འདི་ཕྱོགས་མི་གཅིག་པའི་ཡུལ་ག་ཤེད་དུ་ངེས་པར་འགྲོ་སྟེ༔ འཁོར་འདས་རང་གྲོལ་གྱི་རྒྱུད་ལས༔ ཨེ་མ་བདག་འཛིན་སེམས་ཅན་རྣམས༔ ལུས་འདི་མི་རྟག་ཐོ་ཡོར་འདྲ༔ སེམས་འདི་ཐོ་ཁའི་བྱ་དང་འདྲ༔ བྱ་ནི་ཡུན་རིང་བསྡད་པ་མེད༔ ཅེས་གསུངས་སོ༔ ངག་མི་རྟག་པ་ནི་བྲག་ཆའི་སྒྲ་དང་འདྲ༔ ནམ་མཁའི་འབྲུག་དང་འདྲ་སྟེ༔ མི་རྟག་མྱུར་དུ་ཡལ་བའི་ཆོས་ཅན་ཡིན་ཏེ༔ འཁོར་འདས་རང་གྲོལ་གྱི་རྒྱུད་ལས༔ ངག་འདི་བར་སྣང་འབྲུག་སྒྲ་འདྲ༔ འབྲུག་སྒྲ་ཡུན་རིང་ཅང་བསྡད་དམ༔ ཞེས་སོ༔ གཉེན་བཤེས་ཐམས་ཅད་ནི་བྱ་ཚང་གི་བཟའ་མི་དང་འདྲ་སྟེ༔ ཚང་གཅིག་ཏུ་ལྷན་ཅིག་ཏུ་གསོས་ཀྱང་༔ མྱུར་དུ་སོ་སོར་གྱེས་པ་ལྟར༔ རང་རང་གི་ཡུལ་མི་ཁྱིམ་མཚེས༔ ཉེ་དུ་གཉེན་འབྲེལ་ཐམས་ཅད་ཀྱང་༔ གནས་སྐབས་ཀྱི་འབྲེལ་བ་ཡུད་ཙམ་ལས༔ གཅིག་ཤི་གཉིས་ཤི་སོ་སོར་བྲལ་བར་ངེས་ཏེ༔ འཁོར་འདས་རང་གྲོལ་གྱི་རྒྱུད་ལས༔ གཉེན་བཤེས་བྱ་ཚང་བཟའ་མི་འདྲ༔ གཅེས་གསོས་འགྲོགས་ཀྱང་སོ་སོར་གྱེས༔ ཞེས་སོ༔ བཟའ་རོགས་མི་རྟག་པ་ནི་རྨོས་གླང་གཉའ་སྦྲེལ་བ་དང་འདྲ་སྟེ༔ ཡུད་ཙམ་ལྷན་གཅིག་འགྲོགས་ཀྱང་༔ མྱུར་དུ་བྲལ་བ་ལས་མ་འདས་ཏེ༔ འཁོར་འདས་རང་གྲོལ་གྱི་རྒྱུད་ལས༔ གཟའ་མི་རྨོས་གླང་གཉའ་སྦྲེལ་འདྲ༔ གཉའ་སྦྲེལ་སོ་སོར་ནམ་ཞིག་གྱེས༔ ཞེས་སོ༔ ཚེ་མི་རྟག་པ་རི་གཟར་གྱི་རྦབ་དང་འདྲ་སྟེ༔ སྐད་ཅིག་ཀྱང་མི་སྡོད་པར་འཆི་བའི་ཕྱོགས་སུ་འགྲོ་བ་ནི༔ འཁོར་འདས་རང་གྲོལ་གྱི་རྒྱུད་ལས༔ ཚེ་འདི་རི་གཟར་རྦབ་དང་འདྲ༔ རྦབ་ནི་སྐད་ཅིག་བསྡད་དབང་མེད༔ ཅེས་སོ༔ ནོར་མི་རྟག་པ་ནི་སྦྲང་མའི་སྦྲང་རྩི་དང་འདྲ་སྟེ༔ རང་གི་བསོགས་ཀྱང་གཞན་གྱིས་སྤྱད་ནས་ཁྱེར་ས་མེད་དེ༔ འཁོར་འདས་རང་གྲོལ་གྱི་རྒྱུད་ལས༔ ནོར་རྫས་སྦྲང་མའི་སྦྲང་རྩི་འདྲ༔ རང་གིས་བསོགས་ཀྱང་གཞན་གྱིས་སྤྱོད༔ ཅེས་སོ༔ དེ་དག་ནི་སྐྱེ་གནས་བར་དོའི་མི་རྟག་པ་སྟོན་པའི་དཔེའོ༔ གཉིས་པ་རྨི་ལམ་བར་དོའི་དཔེ་ཅི་དང་འདྲ་ན༔ སྒྱུ་མའི་དཔེ་དང་འདྲ་སྟེ༔ སྒྱུ་མ་ནི་མེད་བཞིན་དུ་ཅིར་ཡང་སྣང་བའོ༔ དེ་བཞིན་དུ༔ རྨི་ལམ་ཀྱང་རང་བཞིན་མེད་བཞིན་དུ་ཅིར་ཡང་སྣང་ངོ་༔ གསུམ་པ་བསམ་གཏན་བར་དོའི་དཔེ་ཅི་དང་འདྲ་ན༔ ཐང་ཆད་པས་ངལ་བསོས་པ་དང་འདྲ་སྟེ༔ དེ་ཡང་ཐང་ཆད་པའི་མི་དེས་ངལ་བསོས་ཙམ་ན༔ ངལ་བའི་སྡུག་བསྔལ་ཐམས་ཅད་རང་སར་ཞི་ནས༔ ལུས་ངག་ཡིད་གསུམ་བདེ་ལྷན་ནེ་འོང་བ་ལྟར༔ འོ་སྐོལ་ཀྱང་ལུས་ངག་ཡིད་གསུམ་འཁྲུལ་བའི་རྦ་ཀློང་གིས་གཡེངས་ནས་སྡུག་བསྔལ་བ་དེ༔ བླ་མའི་གདམས་ངག་གིས་སྒོ་གསུམ་རྣལ་དུ་དབབ་ནས༔ བསམ་གཏན་ལ་མཉམ་པར་བཞག་པས༔ ལུས་བྱ་བྱེད་ཀྱི་སྡུག་བསྔལ་རང་སར་ཞི་ནས༔ སོག་ཕོན་ཐག་པ་ཆད་པ་ལྟར་རང་སར་འབོལ་ལེ་ཤིག་གེ་ལྷོད་དེ་བཞག་པས༔ བདེ་ལྷན་ནེ་ལུས་ངལ་སོས་པའོ༔ ངག་པི་ཝཾ་གི་རྒྱུན་ཐག་ཆད་པ་དང་འདྲ་སྟེ༔ དཔེར་ན་པི་ཝཾ་གི་སྒྲ་སྣ་ཚོགས་སུ་འགྱུར་བ་དེ༔ རྒྱུན་ཐག་ཆད་ནས་སྒྲ་རྒྱུན་ཆད་པ་བཞིན་དུ༔ ངག་སྨྲ་བའི་ལོང་གཏམ་གྱིས་རྒྱབ་ཆོས་འཁྲུལ་བ་རང་གྲོལ། ཐང་ཆད་པ་དེ༔ སྨྲ་བརྗོད་དང་བྲལ་ནས༔ རང་སར་བཞག་པས་ངག་བདེ་ལྷན་ནེ་ངལ་སོས་པའོ༔ སེམས་ཆུ་བཅད་པའི་རང་འཐག་དང་འདྲ་སྟེ༔ དཔེར་ན་རང་འཐག་ཆུས་བསྐྱོད་པ་དེ་ཆུ་ཆད་ནས་འཁོར་བ་ཆད་པ་བཞིན༔ དྲན་བསམ་སྣ་ཚོགས་ཀྱིས་སེམས་ཐང་ཆད་པ་དེ༔ མ་བཅོས་རང་སར་ལྷོད་ཀྱིས་ཀློད་ནས་བཞག་པས༔ ཡིད་བདེ་ལྷན་ནེར་གནས་ཏེ༔ སེམས་ངལ་སོས་པའོ༔ དེ་ནི་བསམ་གཏན་བར་དོའི་དཔེའོ༔ བཞི་པ་འཆི་ཁ་བར་དོའི་དཔེ་ཅི་དང་འདྲ་ན༔ མཚང་ཅན་གྱི་མི་གཅིག་ཡུས་ཅན་གྱི་ལག་ཏུ་བཙོན་ལ་འགྲོ་བ་དང་འདྲ་སྟེ༔ དེ་ཡང་དཔེར་ན་མཚང་ཅན་གྱི་མི་གཅིག་ཡུས་ཅན་གྱི་ལག་ཏུ་བཙོན་ལ་འགྲོ་བ་ཏེ༔ འགྲོ་བ་ལ་ནི་ཤིན་ཏུ་འཚེར༔ སྡུག་བསྔལ་འོང་བ་ནི་ཤེས༔ མི་འགྲོ་བའི་དབང་ནི་མེད༔ འདུག་པར་སྤྲོ་ཡང་འདུག་དབང་མེད་པ་བཞིན་དུ༔ འཆི་ཁ་བར་དོ་ཡང་༔ འཆི་བ་འོང་བ་ནི་ཤེས༔ མི་འཆི་བར་བསྡད་སྤྲོ་ཡང་བསྡད་དབང་ནི་མེད༔ བསོགས་པའི་ནོར་ནི་ཁྱེར་དབང་མེད་པར་ཤུལ་དུ་ལུས༔ འགྲོགས་པའི་གྲོགས་ནི་དབང་མེད་དུ་སོ་སོར་བྲལ་ལ་ཁད༔ བདག་གཅིག་པུར་ཆ་མེད་ཀྱི་ཡུལ་དུ་རྒྱུས་མེད་འཁྱམས་དགོས་པར་ཤེས་ཀྱང་༔ རང་དབང་མེད་པར་ཤིན་ཏུ་སྡུག་བསྔལ་བའོ༔ དེ་ནི་འཆི་ཁ་བར་དོའི་དཔེ་བསྟན་པའོ༔ ལྔ་བ་ཆོས་ཉིད་བར་དོའི་དཔེ་ཅི་དང་འདྲ་ན༔ གཡུལ་ཆེན་གྱི་དམག་སྟོང་གི་དཀྱིལ་དུ༔ མཚང་ཆེན་གྱི་མི་གཅིག་ཚུད་པ་དང་འདྲ་སྟེ༔ ཕྱོགས་གང་དུ་བལྟས་ཀྱང་༔ སྐུ་དང་སྒྲ་འོད་ཟེར་གསུམ་གྱིས་སྔངས༔ སྐྲག༔ བརྒྱལ༔ བྲེད་ཅིང་༔ འཇིགས་སྐྲག་གིས་དུས་འདའ་བར་གྱུར་ཏེ༔ བྲོས་པས་ནི་མི་ཐར་རྒོལ་བས་ནི་མི་ཐུབ༔ བརྒྱལ་བ་འཁོར་ཡུག་གི་སྣང་བ་ལ་དུས་འདའ་པའོ༔ དེ་ནི་ཆོས་ཉིད་བར་དོའི་དཔེ་བསྟན་པའོ༔ དྲུག་པ་སྲིད་པ་བར་དོའི་དཔེ་ཅི་དང་འདྲ་ན༔ བྱ་སྤུ་རླུང་གིས་ཁྱེར་བའམ༔ བྱིས་པ་བྱང་ཐང་ཡར་བ་དང་འདྲ་སྟེ༔ དེ་ཡང་དཔེར་ན་བྱིས་པ་བྱང་མཐར་ཡར་བ་དེ༔ དང་པོ་གང་ནས་འོང་གི་གནས་སྟོང་ནས༔ ལོག་པའི་ཁུངས་མེད༔ ད་གར་དུ་འགྲོ་བའི་གནས་མེད་པས༔ འདིར་འགྲོ་བའི་ཁུངས་མེད༔ བར་དུ་འདིར་བསྡད་ཀྱི་ས་མེད་པས་སྡོད་མི་ཟུག་པར༔ ངུ་འབོད་བྱེད་ཅིང་བག་གྲང་ཤེས་པ་སྐྱོ༔ སྙིང་མི་དགའ༔ འདར་ཕྲི་ལི་ལི་ཉིན་མཚན་གྱི་སྣང་བ་མེད་པར༔ ཕྱོད་ཕྱོད༔ ཡད་ཡུད༔ ཕྱོགས་ཐམས་ཅད་དུ་གྲོགས་མེད་གཅིག་པུར་འཁྱམས་ཏེ༔ རེས་གཅན་གཟན་གྱི་སྒྲ་དང་༔ རེས་ཆར་རླུང་གིས་དེད་པ་དང་༔ སྔངས་པ་དང་༔ སྐྱོ་བས་དུས་འདའ་སྟེ༔ ས་ཕུག་གམ༔ ཁང་པ་སོགས་བརྟེན་ས་གཅིག་མ་རྙེད་ཀྱི་བར་དུ༔ ཕྱོགས་ཐམས་ཅད་དུ་ཕྱོད་ཕྱོད་ཡད་ཡུད་དུ་འགྲོའོ༔ དཔེ་དེ་བཞིན་ཏུ༔ སྲིད་པ་བར་དོར་འཁྱམས་པའི་ཡིད་ལུས་དེ་ཡང་༔ དང་པོ་འདི་ནས་ཕྱིན་པའི་གནས་སུ་ལོག་དབང་མེད་དེ༔ རོ་མེ་ལ་བསྲེགས་སམ༔ དོང་དུ་སྦས་སམ༔ བྱ་གཅན་གྱིས་ཟོས་ནས་ལོག་པའི་ཁུངས་མེད༔ ད་གང་དུ་འགྲོ་བའི་གནས་མེད༔ ས་འདིར་སྡོད་ཀྱི་ཚུགས་མེད་པར༔ སྡོད་མི་ཚུགས་ཤིང་༔ ངུ་འབོད་བྱེད༔ བག་གྲང་༔ ཤེས་པ་སྐྱོ༔ སྙིང་མི་དགའ༔ འདར་ཁྲི་ལི་ལི་ཉིན་མཚན་གྱི་སྣང་བ་མེད་པར༔ དབུགས་ཀྱི་རྟ་ལ་ཞོན་ནས༔ སྔར་གྱི་ལུས་ཡོད་པ་སྙམ་བྱེད་དེ༔ ཕྱད་ཕྱོད༔ ཡད་ཡུད་ཕྱོགས་ཐམས་ཅད་དུ་འཁྱམས་ཏེ༔ གཅན་གཟན་མང་པོས་དེད་པའི་སྣང་བ་དང་༔ རི་ཆེན་པོ་ཉིལ་བའི་འུར་ཆོམ་དང་༔ མཚོ་ཆེན་པོ་ལུད་པའི་སྒྲ་དང་༔ མེ་ཆེན་པོ་འབར་བའི་འུར་སྒྲ་དང་༔ རླུང་ཆེན་པོ་ལང་བའི་སྒྲ་དང་༔ མི་མང་པོས་དེད་པའི་སྣང་བ་དང་༔ མུན་ནག་དང་ཆར་དྲག་པོས་དེད་པའི་སྣང་བས༔ དེ་རྣམས་ལ་བྲེད་ནས་ཕྱོགས་ཐམས་ཅད་དུ་གར་བབས་བབས་སུ་བྲོས་པའི་སྣང་བ་དང་༔ འཇིགས་སྐྲག་དང་༔ སྐྱོ་བའི་སྣང་བས་དུས་འདའ་སྟེ༔ རིགས་དྲུག་གང་དུ་སྐྱེ་བས་གནས་གཅིག་མ་རྙེད་བར་དུ་རྒྱབ་ཆོས་འཁྲུལ་བ་རང་གྲོལ། ཚོལ་བ་ལ་ཡད་ཡུད་དུ་འགྲོའོ༔ དེ་ནི་སྲིད་པ་བར་དོའི་དཔེ་བསྟན་པའོ༔ དེ་ཡང་བར་དོ་ཀུན་གྱི་དཔེ་ཅི་དང་འདྲ་ན༔ དཔེར་ན་མི་གཅིག་དོན་གཉེར་དུ་འགྲོ་བ་ལ༔ རང་གི་ཡུལ་དེ་ནི་འདས༔ ཕ་རོལ་གྱི་ཡུལ་དེར་ནམ་སླེབ་པའི་བར་གྱི་ལམ་འཕྲང་དེ་ལ་འགྲོ་བདོ་བ་དང་འདྲ་སྟེ༔ ཀློང་གསལ་ཉི་མའི་རྒྱུད་ལས༔ བར་དོ་མཐུན་པའི་དཔེ་བསྟན་པ༔ དཔེར་ན་དོན་གཉེར་སྐྱེས་བུ་ཞིག༔ དོན་སར་མ་སླེབ་བར་ཞག་འདྲ༔ ཞེས་སོ༔ དེ་ནི་བར་དོ་དྲུག་གི་དཔེ་བསྟན་པའོ༔ ས་མ་ཡཱ༔ ༈ བརྒྱད་པ་བར་དོ་དྲུག་གི་རྟགས་དྲུག་བསྟན་པ་ནི༔ སྐྱེ་གནས་བར་དོའི་རྟགས་ནི༔ ད་ལྟར་སྒྱུ་ལུས་གདོས་བཅས་ཤ་ཁྲག་གི་ལུས༔ རེག་ཅིང་ཐོགས་པ་དང་བཅས་པ་འདི་བ་ཡིན་ཏེ༔ དེ་ཡང་ཐོགས་བཅས་ཀྱི་རྟགས་སུ༔ ལུས་ལ་གྲིབ་མ་དང་བཅས་པའོ༔ ཆུ་དང་མེ་ལོང་གི་ནང་དུ་གཟུགས་བརྙན་གསལ་བའོ༔ དེ་ནི་སྐྱེ་གནས་བར་དོ་ཤ་ཁྲག་གི་ལུས་ལེན་པའི་རྟགས་སོ༔ གཉིས་པ་རྨི་ལམ་བར་དོའི་རྟགས་ནི༔ བརྟག་མི་བཟོད་པ་སྣ་ཚོགས་ཅིར་ཡང་འཆར་བའོ༔ གསུམ་པ་བསམ་གཏན་བར་དོའི་རྟགས་ནི༔ ཉམས་ཀྱི་སྣང་བ་སྣ་ཚོགས་སུ་འཆར་བའོ༔ བཞི་པ་འཆི་ཁ་བར་དོའི་རྟགས་ནི༔ འཆི་ལྟས་ཀྱི་རིམ་པ་རྣམས་སོ༔ ངོ་སྤྲོད་ཀྱི་རྟགས་ནི༔ རྩ་གཉིད་ལོག་མནན་པས་བརྒྱལ་ལོག་གིས་སོང་བ་དེའོ༔ ལྔ་བ་ཆོས་ཉིད་བར་དོའི་རྟགས་ནི༔ སྒྲ་འོད་ཟེར་གསུམ་གྱི་སྣང་བ་འཆར་འོ༔ ད་ལྟར་ངོ་སྤྲོད་ཀྱི་རྟགས་ནི༔ དང་པོ་སྒྲ་ཡི་རྟགས་ནི༔ རྣ་བའི་བུག་པ་མཛུབ་མོས་མནན་པས༔ གཏིང་ནས་འུར་ཏིང་གི་སྒྲ་འོང་སྟེ༔ དེ་ནི་ཆོས་ཉིད་བར་དོའི་ཆོས་ཉིད་ཀྱི་རང་སྒྲ་འབྲུག་སྟོང་ལྡིར་བ་ཙམ་འོང་བའི་རྟགས་སོ༔ གཉིས་པ་འོད་ཀྱི་རྟགས་ནི༔ མིག་མཛུབ་མོས་མནན་པས༔ འཇའ་ཚོན་སྣ་ལྔའི་འོད་ཀོར་འོང་སྟེ༔ དེ་ནི་ཆོས་ཉིད་བར་དོར་ཞི་ཁྲོའི་སྐུ་ཡོང་བའི་རྟགས་སོ༔ གསུམ་པ་ཟེར་གྱི་རྟགས་ནི༔ མིག་ལག་པས་ཡུན་རིང་དུ་མནན་པས༔ འོད་དང་༔ ཟེར་དང་༔ ཐིག་ལེ་དང་ལུ་གུ་རྒྱུད་དང་༔ ཟ་འོག་གི་གུར་ཁྱིམ་ལྟ་བུ༔ ཁྲ་ཤིག་ཤིག་བ༔ མེར་མེར་བ༔ འགུལ་བ༔ འཕྲིག་པ༔ ནམ་མཁའི་ཁམས་གང་བ་མངོན་སུམ་དུ་འཆར་རོ༔ དེ་ནི་ཟེར་གྱི་རྟགས་སོ༔ དྲུག་པ་སྲིད་པ་བར་དོའི་རྟགས་ནི༔ གཉིད་དུ་ཧྲུལ་སོང་བ་དང་༔ རྨི་ལམ་ཟིང་གིས་འོང་བ་དེ་ཡང་ཡིན་ལ༔ རྩ་གཉིད་ལོག་མནན་པས་བརྒྱལ་ལོག་གིས་སོང་བ་དང་༔ རྨི་ལམ་ལྟ་བུའི་སྣང་བ་ཡད་ཡུད་འོང་བ་དེ་ཡིན་ནོ༔ བར་དོར་འཁྱམས་པའི་དུས་ཀྱི་རྟགས་ནི༔ ས་རྡོ་རི་བྲག་ཐམས་ཅད་ལ་ཐོག་པ་མེད་པར་འགྲོ་ནུས་པ་དང་༔ ལུས་ལ་གྲིབ་མ་མེད་པ་དང་༔ ཆུའི་ནང་དུ་བྱད་ཀྱི་གཟུགས་བརྙན་མི་འབྱུང་སྟེ༔ དེ་ནི་ཤ་ཁྲག་གི་ལུས་དང་བྲལ་ནས༔ སྲིད་པ་བར་དོའི་ཡིད་ལུས་འཁྱམས་པས་རྟགས་སུ་ཤེས་པར་བྱའོ༔ དེ་ནི་བར་དོ་དྲུག་གི་རྟགས་བསྟན་པའོ༔ ས་མ་ཡཱ༔ ༈ དགུ་པ་བར་དོ་དྲུག་གི་གནས་ལུགས་དྲུག་བསྟན་པ་ནི༔ དང་པོ་སྐྱེ་གནས་བར་དོའི་གནས་ལུགས་ནི༔ སྐྱེས་ནས་མི་ཤིའི་བར་དུ༔ ལུས་ཁང་ཁྱིམ་ལྟ་བུའི་ནང་ན༔ སེམས་ཁྱིམ་བདག་ལྟ་བུར་གནས་སོ༔ དེ་ཡང་སྤྱིར་ལུས་ཀུན་ལ་ཁྱབ་པར་གནས་ཏེ༔ ཁྱད་པར་དུ་རིག་པ་སྙིང་གི་དཀྱིལ་ན་གནས་སོ༔ དེའི་རྟགས་སུ་སྙིང་གཞན་བས་གཉན་པ་ཡིན་ནོ༔ རང་གི་ཤེས་རིག་གསལ་ཧྲིག་གེ་བ་འདི་ལུས་ལ་ཁྱབ་པར་གནས་པ་ནི༔ གནས་པ་གཞི་ཡི་སྒྲོན་མ་ཞེས་བྱ་སྟེ༔ ཐལ་འགྱུར་གྱི་རྒྱུད་ལས༔ རང་རིག་ཡེ་ཤེས་ལུས་ལ་གནས༔ ཏིལ་འབྲུུ་ལ་ནི་མར་བཞིན་དུ༔ ལུས་ཀྱི་བཀྲག་དང་གཟི་མདངས་ནི༔ ཡེ་ཤེས་རླན་གྱིས་ཁྱབ་པར་བྱེད༔ ཅེས་གསུངས་སོ༔ ནོར་བུ་ཕྲ་བཀོད་ལས༔ ཏིལ་འབྲུ་འམ་ནི་ཡུང་འབྲུ་ལ༔ མར་ཉིད་ཡེ་ནས་ལྷུན་གྲུབ་བཞིན༔ སེམས་ཅན་ལུས་ལྟར་སྣང་བ་ལ༔ དེ་བཞིན་གཤེགས་པའི་ས་བོན་ནི༔ མཐུན་པའི་འོད་དང་བཅས་པར་སྣང་༔ ཞེས་སོ༔ དེ་ཡང་རིག་པ་དེ་ཁྱད་པར་དུ་སྙིང་གི་ནང་རྒྱབ་ཆོས་འཁྲུལ་བ་རང་གྲོལ། ན་གནས་ཏེ༔ སྙིང་ཙིཏྟ་རིན་པོ་ཆེ་ཟུར་བརྒྱད་པའི་ནང་ན༔ དཔེར་ན་བུམ་ནང་གི་མར་མེ་ལྟར་གནས་ཏེ༔ དེ་ལ་ཙིཏྟ་ཤའི་སྒྲོན་མ་ཞེས་བྱའོ༔ དེ་སྐད་དུའང་སྒྲ་ཐལ་འགྱུར་རྩ་བའི་རྒྱུད་ལས༔ སྤྱིར་ཙིཏྟའི་རྩ་ནང་ན༔ མ་བཅོས་དག་པའི་ཆོས་ཉིད་གནས༔ ཞེས་པ་དང་༔ སེང་གེ་རྩལ་རྫོགས་ཀྱི་རྒྱུད་ལས༔ ཁམས་གསུམ་སེམས་ཅན་ཐམས་ཅད་ལ༔ རང་རང་སྙིང་གི་དཀྱིལ་ན་གནས༔ སྙིང་པོ་ཡེ་ཤེས་གསུམ་བརྩེགས་ཏེ༔ དེ་ཡང་ངོ་བོ་སྒྲིབ་མེད་དོ༔ ཞེས་དང་༔ ངོ་སྤྲོད་སྤྲས་པའི་རྒྱུད་ལས༔ དོན་ནི་རང་གི་ལུས་དཀྱིལ་ན༔ སྙིང་ན་ཡེ་ཤེས་ཆེན་པོ་གནས༔ ཞེས་སོ༔ འོ་ན་རིག་པ་སྙིང་གི་དཀྱིལ་ན་ཚུལ་ཅི་ལྟར་གནས་ན༔ ངོ་བོ་སྐུའི་ཚུལ་དུ་གནས་སོ༔ རང་བཞིན་འོད་ཀྱི་ཐིག་ལེར་གནས་སོ༔ ཐུགས་རྗེ་ཡེ་ཤེས་ཀྱི་སྒྲོན་མར་གནས་སོ༔ ངོ་བོ་སྐུའི་ཚུལ་དུ་གནས་པ་ནི༔ སྙིང་ཁ་ཞི་བའི་ཚུལ་དུ་གནས་སོ༔ དེའི་རྩལ་གླད་པ་དུང་ཁང་ན་ཁྲོ་བོའི་སྐུར་གནས་ཏེ༔ སེང་གེ་རྩལ་རྫོགས་ཀྱི་རྒྱུད་ལས༔ གསང་འདུས་རིན་ཆེན་ཟུར་བརྒྱད་མཛོད༔ རིག་པ་ཡེ་ཤེས་ཡབ་ཡུམ་ཚུལ༔ སྲོག་ལུས་རིན་ཆེན་ཟུར་བཞིའི་མཛོད༔ རིག་པ་ཡེ་ཤེས་ཐིག་ལེར་གནས༔ དོན་འཁྱིལ་བྷན་དྷའི་གཞལ་ཡས་མཛོད༔ རིག་པ་ཡེ་ཤེས་ཁྲོ་སྐུར་གནས༔ འགག་མེད་གསལ་བའི་སྒོ་གཉིས་མཛོད༔ དབྱིངས་དང་ལུ་གུ་རྒྱུད་དུ་གནས༔ ཞེས་སོ༔ རང་བཞིན་འོད་ཀྱི་ཐིག་ལེའི་ཚུལ་དུ་གནས་པ་ནི༔ ནོར་བུ་ཕྲ་བཀོད་ལས༔ ཨེ་མ་རིག་པའི་གནས་ལུགས་ནི༔ རང་རང་ཙིཏྟའི་དཀྱིལ་ན་གནས༔ ཡབ་དང་ཡུམ་གྱི་ཚུལ་དུ་གནས༔ ཡབ་ཀྱི་ཆ་འཛིན་ཐབས་ཀྱི་སྐུ༔ ཡུམ་གྱི་ཆ་འཛིན་ཤེས་རབ་སྐུ༔ འོད་དང་འོད་ཟེར་ཚུལ་དུ་གནས༔ དབྱིངས་དང་རིག་པས་རབ་བརྒྱན་ཏེ༔ ལྷུན་རྫཽགས་ཐིག་ལེ་ཆེན་པོར་གནས༔ དེ་ནི་ཞི་བའི་བཞུགས་ཚུལ་ལོ༔ རང་རང་མགོ་ལ་ཁྲོ་བོར་གནས༔ ཡབ་དང་ཡུམ་དུ་མངོན་པར་སྣང་༔ ཁྲོ་དང་ཁྲོ་མོའི་ཚུལ་འཆང་ཞིང་༔ ཡེ་ཤེས་ལྔ་ལྔ་དག་དང་ལྡན༔ སྐུ་ཡི་ཡེ་ཤེས་རེ་རེ་ལ༔ དབུ་ཡི་ཡེ་ཤེས་ལྔ་ལྔའོ༔ རང་བཞིན་འོད་ཀྱི་ཐིག་ལེ་ནི༔ རྩ་ནང་ཐིག་ལེའི་སྐུ་ལྟར་གནས༔ ཆེ་བ་ནམ་མཁའི་ཁམས་དང་མཉམ༔ ཆུང་ཚད་རྟ་རྔ་བཅུར་གཤག་ཙམ༔ གསལ་ཚད་ཉི་ཟླའི་དཀྱིལ་འཁོར་འདྲ༔ དེ་ཡང་གསལ་འཚེར་གཟི་བརྗིད་ལྡན༔ འགྲོ་དང་འོང་དང་གནས་པའོ༔ ཞེས་སོ༔ ཐུགས་རྗེ་ཡེ་ཤེས་ཀྱི་སྒྲོན་མར་གནས་པ་ནི༔ ནོར་བུ་ཕྲ་བཀོད་ལས༔ ཐུགས་རྗེ་འབྱུང་བ་སྒྲོན་མ་ཉི་ཟེར་བཞིན༔ སྒྲོན་མའི་འོད་ཟེར་གཏིང་ལ་ཐུག་པ་མེད༔ གནས་པའི་ཡུལ་ནི་ཙིཏྟའི་ནང་དུ་གསལ༔ རང་བཞིན་འོད་ནི་ནམ་མཁའི་མཐོང་ན་གསལ༔ ཞེས་སོ༔ དེ་ལྟ་བུའི་རིག་པ་དེ་དཔེ་ཅི་དང་འདྲ་བར་གནས་ན༔ ངོ་བོ་སྐུ་རུ་གནས་ཏེ༔ སྐུ་ཐམས་ཅད་བུམ་སྐུར་གནས་སོ༔ རང་བཞིན་འོད་དུ་གནས་ཏེ༔ བུམ་ནང་གི་མར་མེ་ལྟར་གནས་སོ༔ ཐུགས་རྗེ་ཟེར་དུ་གནས་པས༔ ཡེ་ཤེས་སྒྲོན་མེའི་མདངས་འགག་པ་མེད་པར་གསལ་ཏེ༔ ཉི་མ་དང་འོད་ཟེར་བཞིན་དུ་གནས་ཏེ༔ ཐལ་འགྱུར་ལས༔ ཙིཏྟ་རིན་ཆེན་གཞལ་ཡས་ནས༔ ངོ་བོ་ཀ་ནས་དག་པའི་ཆ༔ སྟོང་གསལ་འདུས་པ་སྐུ་ཡི་གདངས༔ ཞལ་ཕྱག་རྫོགས་པ་བུམ་སྐུའི་ཚུལ༔ ལྷུན་གྲུབ་འོད་ཀྱི་གོང་བུར་གནས༔ ཐུགས་རྗེ་ཁ་དོག་སོ་སོར་གསལ༔ ཞེས་པ་དང་༔ རིག་པ་རང་ཤར་གྱི་རྒྱུད་ལས༔ དཔེར་ན་བུམ་པའི་སྐུ་ལྟ་བུའོ༔ ཞེས་པ་དང་༔ སྙིང་གི་མེ་ལོང་གི་རྒྱུད་ལས༔ གནས་ནི་སྙིང་གི་དབུས་ན་འོད་ཁ་དོག་ལྔ་ཡི་དབུས་སུ༔ ཞི་བའི་སྐུ་ཡུངས་འབྲུ་ཙམ་འོད་ཁྱིམ་གྱི་ཚུལ་དུ་གནས་སོ༔ དེ་ནི་རིག་པའི་གནས་ཏེ༔ དཔེར་ན་བུམ་པའི་སྐུ་ལྟ་བུའོ༔ དེ་ལས་བྱུང་བའི་ཡེ་ཤེས་ནི༔ གླད་པ་དུང་ཁང་ན་གནས་སོ༔ དེ་ཡང་ཁྲོ་བོའི་སྐུ་ཉུངས་འབྲུ་ཙམ་ནི་ཟབ་ཅིང་རྟོགས་དཀའ་བའི་ཆ་ནས་བཞག་ལ༔ ལ་སྤྱན་ཕུར་ཐག་ཙམ་ནི་ཉམས་ལེན་ཕྲ་མོ་ལ་བརྟེན་ནས་ཡེ་ཤེས་ཀྱི་སྣང་བ་རྒྱ་ཆེན་པོ་ལ་དགོངས་པའོ༔ རྒྱབ་ཆོས་འཁྲུལ་བ་རང་གྲོལ། དུ་གནས་སོ༔ དེ་ཡང་འོད་ཟེར་གྱི་ཚུལ་དུ་གནས་སོ༔ དེ་ལས་བྱུང་བའི་འོད་ནི༔ མེ་ལོང་གི་དཀྱིལ་འཁོར་ལྟར་གསལ་ལ་དྭངས་པའམ༔ དཔེར་ན་ཉི་མའི་དཀྱིར་འཁོར་གྱི་འོད་ཟེར་བཞིན་དུ་གནས་སོ༔ ཞེས་གསུངས༔ དེ་ལྟ་བུའི་རིག་པ་དེ་འགྱུ་བར་བྱེད་པའི་ལམ་གང་ལ་བྱུང་ན༔ མིག་དང་སྙིང་འབྲེལ་བའི་རྩ༔ སྐྱོན་ཡོན་དབང་པོ་དྭངས་བྱེད་ཀྱི་རྩ་ཞེས་བྱ༔ ཁ་ཆེ་ལ་རྩ་བ་ཕྲ་བ༔ བ་མེན་གྱི་རྭ་ལྟ་བུའི་ཡལ་ག་གཉིས་མིག་གཉིས་ཀྱི་ཨ་འབྲས་ཀྱི་དྭངས་མ་ལ་བརྟེན་ནས༔ ནང་ན་ཁྲག་དང་ཆུ་སེར་མེད་པའི་སྟོང་གསལ་གཅིག་ཡོད་པ་དེ་རིག་པ་འགྱུ་བར་བྱེད་པའི་ལམ་ཡིན་ནོ༔ དེ་ལ་དཀར་འཇམ་རྩའི་སྒྲོན་མ་ཞེས་བྱ་སྟེ༔ སྒྲོན་མ་འབར་བའི་རྒྱུད་ལས༔ གླད་པ་དུང་ཁང་དཀར་པོ་ནས༔ གཡས་སུ་འཁྱིལ་པ་གསུམ་ཡོད་པའི༔ རྩ་ནི་བ་མེན་རྭ་འདྲའི་དབྱིབས༔ འབྱུང་བའི་དྭངས་མ་ཀུན་འདུས་ནས༔ དབང་པོའི་ཡུལ་ལ་འཆར་བྱེད་པའི༔ རྩ་ཡི་ནང་ན་འདི་ཉིད་གནས༔ ཞེས་སོ༔ རིག་པ་དེ་ལ་འགྱུ་ནས་ཕྱིར་ཐོན་པར་བྱེད་པའི་སྒོ་ནི༔ མིག་གཉིས་ལ་ཕར་མཐོང་བ་མ་འགགས་པར༔ ས་ལེ་མཐོང་བ་འདི་ཡིན་ཏེ༔ དེ་ལ་རྒྱང་ཞག་ཆུའི་སྒྲོན་མ་ཞེས་བྱའོ༔ འདི་ནི་འཁོར་བ་དང་འདས་པ་གཉིས་ཀ་འཛིན་པའི་དཀར་ནག་ཕྱེད་མ་ཆུའི་རང་བཞིན་ཅན་ཏེ༔ ཐལ་འགྱུར་ལས༔ ཡེ་ཤེས་འཆར་བའི་སྒོ་ཉིད་ནི༔ ལུས་བཅུད་དངས་མ་ཀུན་འདུས་པའི༔ ཙཀྵུ་ཞེས་པའི་སྒོ་ལ་ཐོན༔ གཉིས་ཀྱི་ཆ་འཛིན་སྣང་བ་སྟོན༔ ཅེས་སོ༔ དེ་ལྟ་བུའི་རིག་པ་སྒོ་དེ་ལ་ཐོན་ནས་ཡུལ་གང་ལ་འཆར་ན༔ ཕྱི་ཡུལ་ནམ་མཁའ་སྟོང་པ་སྤྲིན་དང་བྲལ་བ་ལ་སྣང་སྟེ༔ དེ་ཡང་ཡུལ་ནམ་མཁའ་སྟོང་པ་རིག་པ་སྟོང་པ་འཆར་བའི་གཞི་ཡིན་པས་སོ༔ དེ་ཡང་རིག་པ་མིག་ལ་གཏད་མིག་བར་སྣང་ལ་ཧྲིག་གེ་བལྟས་པས༔ ཐིག་ལེ་སྟོང་པའི་སྒྲོན་མ་ཞེས་བྱ༔ རྨ་བྱའི་མདོངས་ལྟ་བུར་འཆར་རོ༔ དེའི་མདངས་དབྱིངས་རྣམ་པར་དག་པའི་སྒྲོན་མ་ཞེས་བྱའོ༔ ཡི་གེ་ན་རོ་ལྟ་བུར་འཆར་རོ༔ དེའི་རྩལ་ཤེས་རབ་བྱུང་གི་སྒྲོན་མ་ཞེས་བྱ་བ༔ ཤེས་པའི་རྩལ་དུ་མ་འཆར་རོ༔ དེ་ལྟར་ཡང་༔ མུ་ཏིག་ཕྲེང་བ་ལས༔ འགྲོ་བའི་ལམ་ནི་མཐོང་བྱེད་སྒོ༔ མིག་གཡས་པ་ལ་རྒྱང་ཞག་ཆུའི་སྒྲོན་མ་དང་༔ ཤེས་རབ་རང་བྱུང་གི་སྒྲོན་མ་གཉིས་དེ་ཉིད་གཡས་གཉིས་གཡོན་པ་ལ་དག་པ་དབྱིངས་ཀྱི་སྒྲོན་མ་དང་༔ ཐིག་ལེ་སྟོང་གི་སྒྲོན་མ་གཉིས་འཆར་རོ༔ གཡོན་གཉིས་སྤྱི་བོ་ལུ་གུ་རྒྱུད་དུ་འཆར་རོ་དབུས༔ སྒྲོན་མ་འབར་བའི་ཚུལ་དུ་གནས༔ མཐོང་བྱེད་ཡུལ་ལ་སྣང་བའོ༔ རིག་པ་རྟོག་མེད་ལུ་གུ་རྒྱུད༔ ཐིག་ལེ་སྟོང་པའི་སྒྲོན་མ་དང་༔ དག་པའི་དབྱིངས་ཀྱི་སྒྲོན་མ་དང་༔ ཤེས་རབ་རང་བྱུང་ཉིད་དང་ནི༔ རྒྱང་ཞག་ཆུ་ཡི་སྒྲོན་མ་ནི༔ མཐོང་བྱེད་ཡུལ་ལ་སྣང་བའོ༔ ཞེས་པ་དང་༔ སྒྲོན་མ་འབར་བ་ལས༔ རྒྱང་ཞག་ཆུ་ཡི་སྒྲོན་མ་ནི༔ ངོ་བོ་སྣང་བ་གཉིས་ཀ་སྡུད༔ དབང་པོའི་དྭངས་མ་མིག་གི་སྒོ༔ བསྐྱེད་པ་པདྨའི་སྤྱན་དུ་གནས༔ དཔེར་ན་འཛིན་བྱེད་ལྕགས་ཀྱུ་བཞིན༔ ཤེས་རབ་རང་བྱུང་སྒྲོན་མ་ནི༔ འདི་ནི་སྒྲོན་མ་ཐམས་ཅད་ཀྱི༔ ཤེས་བྱེད་ཉིད་དུ་གནས་པས་ན༔ སྤྲ་བ་ཀུན་མཆེད་མེ་སྲེག་བཞིན༔ ཤེས་རབ་ཀྱིས་ནི་བག་ཆགས་སྲེག༔ ཐིག་ལེ་སྟོང་པའི་སྒྲོན་མ་ནི༔ མི་རྟོག་སྤྲོས་བྲལ་ཟླུམ་པོར་གནས༔ དམར་པོ་རང་གསལ་ཡེ་ནས་དངས་༔ དཔེར་ན་རྨ་བྱའི་མདོངས་དང་མཚུངས༔ རྣམ་དག་དབྱིངས་ཀྱི་སྒྲོན་མ་ནི༔ མཐིང་ཀ་མི་འགྱུར་རང་གསལ་བ༔ མུ་ཁྱུད་ཀྱི་ནི་ར་བར་གནས༔ དཔེར་ན་ཡི་གེའི་ན་རོ་བཞིན༔ ཞེས་སོ༔ དེ་དག་ལ་བརྟེན་ནས་ཆོས་ཉིད་མངོན་སུམ་གྱི་སྣང་བ་ད་ལྟ་ཉིད་དུ་གཏན་ལ་དབབ་ཏུ་བཏུབ་པའོ༔ དེ་ལྟར་འགྲོ་བ་ཐམས་ཅད་ལ་ཡེ་ནས་གནས་ཀྱང་༔ ཉམས་སུ་མི་ལེན་པ་རྣམས་ལ་ཅི་ལྟར་གནས་ན༔ ཕུང་པོ་ལྔས་བཅིངས་པས༔ སྐུ་ཡི་སྣང་བ་རང་འགགས་པ་དང་༔ ཁམས་དང་སྐྱེ་མཆེད་ཀྱིས་བཅིངས་པས༔ འོད་དང་རྒྱབ་ཆོས་འཁྲུལ་བ་རང་གྲོལ། ཁ་དོག་གི་སྣང་བ་རང་འགགས་པ་དང་༔ ལས་དང་ཉོན་མོངས་པས་ཚོགས་ཀྱིས་བཅིངས་པས༔ ཡེ་ཤེས་དང་ཆོས་ཉིད་ཀྱི་སྣང་བ་རང་འགགས་ཏེ༔ ད་ལྟ་འཁྲུལ་སྣང་རང་ཁ་མའི་མཐོང་ཡུལ་འདི་ལྟར་དུ་གནས་ཏེ༔ ཉི་ཟླ་ཁ་སྦྱོར་གྱི་རྒྱུད་ལས༔ ཁམས་རྣམས་དང་ནི་ཕུང་པོ་དང་༔ སྐྱེ་མཆེད་རྣམས་དང་དབང་པོ་དང་༔ ཡུལ་དང་ཡུལ་ཅན་ཤེས་པ་རྣམས༔ ཞེས་གསུངས་སོ༔ དེ་ནི་སྐྱེ་གནས་བར་དོའི་གནས་ལུགས་བསྟན་པའོ༔ གཉིས་པ་རྨི་ལམ་བར་དོའི་གནས་ལུགས་ནི༔ དེ་ཡང་གཉིད་དུ་འགྲོ་བའི་དུས༔ འབྱུང་བ་སོ་སོར་ཐིམས་པས་མགོ་ལྗིད༔ ཤེས་པ་ཐིབས༔ དཔྲལ་བ་ཚ་ཐིབ་པ་གཉིད་དུ་སོང་བ་དང་༔ དབང་པོ་ཚོགས་དྲུག་གི་ཡུལ་སྣང་མི་གསལ་བར༔ རིག་པ་སྙིང་གི་དཀྱིལ་དུ༔ ཀུན་གཞིའི་རྣམ་ཤེས་ལ་ཐིམ་པས༔ ཅི་ཡང་མི་དྲན་པར་སྟོང་པ་ཉིད་ནམ་མཁའ་ལྟ་བུའི་ངང་ལ་ལྷན་ནེར་གནས་པ་སྟེ༔ དེ་ལ་ནི་གཞིའི་འོད་གསལ་ཞེས་ཀྱང་བྱ༔ ཆོས་ཉིད་མ་བུ་ཐིམ་པ་ཞེས་ཀྱང་བྱ༔ དོན་ལ་ཆོས་སྐུའི་དགོངས་པ་ཡིན་ཏེ༔ དེ་ཀ་ངོས་ཟིན་ན་རྨི་ལམ་རྟོགས་པས་འོད་གསལ་དུ་གྲོལ་ལོ༔ ངོས་མ་ཟིན་པ་རྣམས་ནི་གཉིད་འཐུག་པོ་བྱུང་ཚོར་འགགས་ནས༔ དྲན་མེད་ཀྱི་ངང་ལ་གནས་པའོ༔ དེ་ལས་ལངས་ནས་རིག་པ་ཀུན་གཞིའི་སྟེང་དུ་མི་སྡོད་པར༔ སྐྱོད་བྱེད་རླུང་གི་རྟ་ལ་ཞོན་ནས༔ སྙིང་གི་རྩ་རྣམས་ནས་ཕྱིར་ཐོན་ཏེ༔ ལུས་ཀྱི་རྩ་རྣམས་ལ་རླུང་སེམས་ཞུགས་པས་རྨི་ལམ་ཟིང་གིས་འོང་སྟེ༔ ནོར་བུ་ཕྲ་བཀོད་ལས༔ རིན་ཆེན་ཟུར་བརྒྱད་གཞལ་ཡས་དང་༔ འགྱུ་བྱེད་རྩ་ཡི་གཞལ་ཡས་དང་༔ དུང་ཁང་བྷནྡྷའི་གཞལ་ཡས་དང་༔ ལྟ་བྱེད་མིག་གི་གཞལ་ཡས་སོ༔ ཞེས་པ་དང་༔ ཐལ་འགྱུར་ལས༔ སེམས་ཅན་ཀུན་གྱི་ལུས་སྤྱི་ལ༔ ཆོས་ཉིད་རླུང་གི་ཚུལ་དུ་ཁྱབ༔ ཕྲ་དང་ཡང་དང་འགྱུ་དང་འབྱེད༔ ཅེས་པ་དང་༔ ཡང་ལུང་ལས༔ ད་ནི་མི་ཤིག་རྡོ་རྗེ་ལས༔ ཕྱི་རོལ་དམིགས་པ་གཅིག་ཀྱང་མེད༔ ནང་ནས་ཡིད་ཡུལ་རིག་རིག་ཅན༔ ཅེས་པས་སེམས་རིག་རླུང་དང་འགྲོག་ནས༔ སྙིང་གི་མདུན་གྱི་རྩ་ལ་ཕྱིན་པས༔ ཤར་ཕྱོགས་སུ་ཕྱིན་པའི་རྨི་ལམ་འོང་ངོ་༔ དེ་བཞིན་དུ་གཡས་ཀྱི་རྩ་ལ་ལྷོ་ཕྱོགས་སུ་ཕྱིན་པའི་རྨི་ལམ་དང་༔ རྒྱབ་རྩ་ལ་ནུབ༔ གཡོན་གྱི་རྩ་ལ་བྱང་དང་༔ མཚམས་ཀྱང་དེ་འགྲེ་ལ༔ སྙིང་གི་འོག་ཕྱོགས་ཀྱི་རྩ་ལ༔ རིག་པ་རླུང་གི་རྟ་ལ་ཞོན་ནས་ཕྱིན་ན་ཐུར་དུ་བབས་པ་དང་༔ ས་རོང་དོག་མོ་དང་༔ མུན་ནག་དང་༔ དམྱལ་བའི་སྣང་བ་དང་༔ ཡི་དྭགས་དང་༔ དུད་འགྲོའི་སྣང་བ་ཁོ་ནའི་རྨི་ལམ་འོང་ངོ་༔ སྙིང་སྟེང་གི་ཕྱོགས་ཀྱི་རྩ་ལ་ཕྱིན་པས༔ རི་ཆེན་པོ་ལ་འཛེག་པ་དང་༔ གྱེན་དུ་འགྲོ་བ་དང་༔ འཕུར་བ་དང་༔ གླད་པའི་རྩ་ལ་ཞུགས་ན༔ ལྷ་ཁང་དང་༔ ཁྲོ་བོའི་སྐུ་མང་པོ་མཐོང་བ་ལ་སོགས་པ་འོང་༔ མིག་གི་རྩ་ལ་ཞུགས་ན༔ གཟུགས་ཀྱི་རྣམ་པ་མང་པོ་གང་མཐོང་ཡང་གསལ་བར་འོང་ངོ་༔ རྣ་བའི་རྩ་ལ་ཞུགས་ན༔ རོལ་མོ་ཐོས་པ་དང་༔ གླུ་གར་དང་༔ ཁྱད་པར་དུ་སྒྲའི་བྱེ་བྲག་གསལ་བར་ཐོས་པ་རྣམས་རྨིའོ༔ སྣ་ལ་དྲིའི་བྱེ་ཕྲག་གསལ༔ ལྕེ་ལ་རོའི་བྱེ་ཕྲག་གང་རྨིས་ཀྱང་གསལ་བར་འོང་ངོ་༔ ལུས་ལ་འདྲེའི་རྩ་གནས་པ་ཡོད་དེ༔ དེ་རྣམས་ལ་རླུང་སེམས་ཞུགས་ནས༔ སོ་སོའི་གདོན་གྱི་ཆོ་འཕྲུལ་གྱི་རྨི་ལམ་འབྱུང་ཞིང་༔ གློ་བའི་རྩ་ལ་བཙན་གྱི་ཆོ་འཕྲུལ༔ མི་དམར་རྟ་དམར་ལ་སོགས་པའི་རྨི་ལམ་འབྱུང་ཞིང་༔ དེས་ཕྱི་ནང་གི་རྟེན་འབྲེལ་གཅིག་པས༔ ཕྱི་ནས་བཙན་གདོན་པར་འགྱུར་རོ༔ དེ་བཞིན་དུ་སྙིང་རྩ་ལ་རྒྱལ་པོ་གནས་པས་དེར་ཞུགས་ན༔ ལྷ་ཁང་འབག་སེང་དང་༔ རྒྱལ་པོའི་ཆོ་འཕྲུལ་རྨིའོ༔ མཆིན་རྩ་དང་མཁལ་རྩ་ལ་མ་མོའི་ཆོ་འཕྲུལ༔ ཕོ་བ་ལ་བདུད་དང་ཐེའུ་རང་༔ རྒྱུ་མ་ལ་ས་བདག་གི་རྩ་རྣམས་གནས་ཤིང་༔ དེ་རྣམས་སུ་རིག་པ་ལས་རླུང་དང་འགྲོགས་ནས་ཞུགས་ན༔ སོ་སོའི་རྩ་ཁ་ཕྱེ་ནས་གདོན་འཇུག༔ རྩ་དེ་རྣམས་ཉལ་ལུགས་ཀྱིས་སྟབས་ལོག་པ་ལ་བརྟེན་ནས་གཅུས་པ་དང་༔ ཕྱི་རོལ་རྒྱབ་ཆོས་འཁྲུལ་བ་རང་གྲོལ། ནས་འདྲེས་ནོན་པའི་སྣང་བ་འཆར་རོ༔ གཞན་ཡང་རྩ་གནས་ཡངས་པ་ལ་རླུང་སེམས་ཞུགས་ན༔ ལུང་པ་ཡངས་པ་ལ་ཕྱིན་པ་རྨི་བ་དང་༔ རྩ་གནས་དོག་པ་ལ་ལུང་པ་དོག་པ་ལ་ཕྱིན་པའི་རྨི་ལམ་འབྱུང་༔ རྩ་ཕུག་རྡུགས་ལ་རླུང་སེམས་ཞུགས་ན༔ ལུང་པ་ཕུག་རྡུགས་དང་༔ ཁོང་སྟོང་སྒོ་མེད་དུ་ཚུད་པ་ལ་སོགས་པའི་རྨི་ལམ་འབྱུང་༔ གསང་གནས་ཀྱི་རྩ་ལ་འདོད་ཆགས་དང་༔ ཕོ་མོ་འཁྲིག་པ་སྤྱོད་པའི་རྨི་ལམ་དང་༔ ཡི་དྭགས་ཀྱི་རྨི་ལམ་ཕལ་ཆེར་འོང་༔ ཆུ་ལམ་ལ་དུད་འགྲོའི་རྨི་ལམ་དང་༔ བཤང་ལམ་རྐང་མཐིལ་དུ་དམྱལ་བའི་རྨི་ལམ་དང་༔ ལྟེ་བར་རིགས་དྲུག་སྣ་ཚོགས་པའི་རྨི་ལམ་འབྱུང་ཞིང་༔ རྩ་ཞ་བ་དང་༔ འཁུམས་པ་དང་༔ གུད་པ་རྣམས་སུ༔ ཁང་རུལ་དང་རེ་ཧྲུལ་རྙིང་པ་དང་༔ སྤྲང་པོ་དང་༔ ཉམ་ཐག་པའི་རྨི་ལམ་འབྱུང་༔ རྩ་བཟང་བ་ལ་ལོངས་སྤྱོད་ཕུན་སུམ་ཚོགས་པ་དང་༔ རླུང་རྩ་ལ་རྨི་ལམ་གཅིག་ཏུ་མ་ངེས་པར་ཡད་ཡུད་དང་༔ རླུང་འཚུབས་དང་༔ ཟང་ཟིང་སྣ་ཚོགས་དང་༔ གོས་སྔོན་པོ་དང་༔ འཁྲུགས་པ་དང་༔ མཁྲིས་པའི་རྩ་ལ༔ བན་དྷེ་དང་༔ གོས་སེར་པོ་ལ་སོགས་པ་དང་༔ བན་ཀན་གྱི་རྩ་ལ༔ གངས་རི་ཆེན་པོ་དང་༔ ཁ་བ་དང་༔ གོས་དཀར་པོ་དང་༔ ཆ་ལུགས་དཀར་པོ་ལ་སོགས་པའི་རྨི་ལམ་ཕལ་ཆེར་འབྱུང་ལ༔ སྙིང་དང་ཐག་ཉེ་བའི་རྩ་ལ༔ རང་ཡུལ་དང་༔ ཐག་ཉེ་བའི་ཡུལ་དུ་ཕྱིན་པའི་རྨི་ལམ་དང་༔ སྙིང་དང་ཐག་རིང་བའི་རྩ་ལ༔ ས་ཐག་རིང་པོ་ལ་ཕྱིན་པའི་རྨི་ལམ་དང་༔ རླུང་སེམས་འགྲིམ་གྲངས་ཉུང་བའི་རྩ་ལ༔ སྔོན་ཆད་འགྲོ་མ་མྱོང་བའི་ལུང་པ་དང་༔ མི་ངོ་མི་ཤེས་པ་ལ་སོགས་པའི་རྨི་ལམ་འབྱུང་༔ རྐྱང་མ་ལ་གྱེས་པའི་རྩ་ལ་རླུང་སེམས་ཞུགས་པས་ཕོའི་ཚོགས་དང་༔ མི་དཀར་པོ་ལ་སོགས་པ་རྨི་ལམ་འབྱུང་༔ རོ་མ་ལ་གྱེས་པའི་རྩ་ལ་བུད་མེད་ཀྱི་ཚོགས་དང་༔ འདོད་ཆགས་འཁྲིག་པ་སྤྱོད་པའི་རྨི་ལམ་དང་༔ དབུ་མའི་ནང་དུ་ཞུགས་ན༔ འོད་གསལ་བདེ་སྟོང་གཉིས་སུ་མེད་པའི་ཡེ་ཤེས་ངོས་ཟིན་པར་འགྱུར་རོ༔ དེ་སྐད་དུ་ཡང་༔ རྒྱུད་ལས༔ ཅི་ལྟར་ཕྱི་རོལ་དེ་བཞིན་ནང་༔ ཞེས་གསུངས་པས་༔ ཕྱི་རོལ་གྱི་སྣང་བའི་བྱེ་བྲག་ཐམས་ཅད་ནང་ལུས་ལ་ཚང་བའི་ཕྱིར༔ ནང་དུ་རྨི་ལམ་རྨིས་པས་དེའི་རྟེན་འབྲེལ་གྱིས༔ ཕྱི་རོལ་དུའང་ལྟས་བཟང་ངན་རིམ་པ་བཞིན་དུ་འབྱུང་ངོ་༔ དེའི་ཕྱིར་ན༔ རྣལ་འབྱོར་བའི་རྨི་ལམ་བཟུང་བ༔ སྤྲུལ་པ༔ བསྒྱུར་བ༔ འོད་གསལ་སྦྱང་བ་ལ་སོགས་པ་ལ་འབད་པ་གཅེས་སོ༔ མདོར་ན་རིག་པ་རླུང་གི་རྟ་ལ་ཞོན་ནས་རྩ་བཟང་ངན་ལ་རྒྱུ་བར་བྱེད་པ་ནི་རྨི་ལམ་བར་དོའི་གནས་ལུགས་སོ༔ གསུམ་པ་བསམ་གཏན་བར་དོའི་གནས་ལུགས་ནི༔ བསྐྱེད་རིམ་ལ་སེམས་གནས་པ་ནི༔ རིག་པ་ལྷའི་སྐུར་སྣང་བ་དེ༔ སྣང་ལ་རང་བཞིན་མེད་པ་དག་པའི་སྒྱུ་ལུས་ཀྱི་སྐུར་གནས་པའོ༔ རྫོགས་རིམ་ལ་སེམས་གནས་པ་ནི༔ མར་མེ་རླུང་གིས་མ་བསྐྱོད་པ་ལྟར༔ གསལ་ལ་རྟོག་པ་མེད་པ་འོད་གསལ་སྟོང་བ་ཆོས་ཀྱི་སྐུར་གནས་པའོ༔ བདེ་སྟོང་ལ་སེམས་གནས་པ་ནི༔ ཐིག་ལེ་དབབ་ལ་བསྐྱིལ་བའི་ཚེ༔ བདེ་ལ་རྟོག་པ་མེད་པ༔ ཉམས་སུ་མྱོང་རྒྱུ་ཡོད་ལ༔ ཁར་བརྗོད་རྒྱུ་མེད་པ༔ ལྐུགས་པས་བུ་རམ་ཟོས་པ་ལྟར༔ བདེ་སྟོང་གཉིས་སུ་མེད་པ་དེ༔ དགའ་བ་བཞི་ལ་སེམས་གནས་པའོ༔ དེ་ནི་བསམ་གཏན་བར་དོའི་གནས་ལུགས་སོ༔ བཞི་པ་འཆི་ཁ་བར་དོའི་གནས་ལུགས་ནི༔ འཆི་ནད་ཀྱིས་ཐེབས་ནས༔ བེམ་རིག་མ་བྲལ་གྱི་བར་དུ༔ ཞེན་པ་དང་༔ ཆགས་པ་དང་༔ རང་གཅིག་པུར་འགྲོ་བ་ལ་འཚེར་བ་དང་༔ ཤུལ་དུ་ལུས་པ་ལ་སེམས་འཕྲེང་བ་ལ་སོགས་པ་སྟེ༔ སྡུག་བསྔལ་གྱི་རང་བཞིན་དུ་གནས་པའོ༔ ཆུས་ཁྱེར་བའམ༔ གཡང་ལ་ལྷུང་བའི་ཚེ༔ རིག་པ་སྔངས་སྐྲག་གི་རང་བཞིན་དུ་གནས་པའོ༔ དེ་ནི་འཆི་ཁའི་བར་དོའི་གནས་ལུགས་སོ༔ ལྔ་བ་ཆོས་ཉིད་བར་དོའི་གནས་ལུགས་ནི༔ དབུགས་ཕྱི་ནང་གི་རྒྱུ་བ་ཆད་ནས༔ ཕྱིའི་སྣང་བ་ནི་ཉི་མ་ནུབ་པ་ལྟར་ནུབ་པོ༔ རྒྱབ་ཆོས་འཁྲུལ་བ་རང་གྲོལ། ནང་གི་སྣང་བ་ནི་མུན་རུབ་པ་ལྟར་དྲན་མེད་འགག༔ གསང་བའི་སྣང་བ་ནི༔ ནམ་ལངས་པ་ལྟར༔ རིག་པ་འོད་གསལ་གྱི་རང་ལ་གསལ་སྟོང་དུ་ཡེ་རེ༔ སྙིང་གི་དཀྱིལ་དུ་ཆོས་སྐུའི་དགོངས་པ་ལ་ཞག་ཕྱེད་དང་བཞིར་གནས་སོ༔ དེ་ཀ་ངོས་ཟིན་ན་ཆོས་ཉིད་འོད་གསལ་མ་བུ་ཐིམ་ནས༔ ལས་ཀྱིས་ཁ་ལོ་བསྒྱུར་དུ་མེད་པར་གཞིའི་འོད་གསལ་ཆོས་སྐུའི་ཀློང་དུ་གྲོལ་ལོ༔ དེར་ངོས་མ་ཟིན་ན༔ ཆོས་ཉིད་བར་དོའི་སྣང་བ་འཆར་ཏེ༔ ཕུང་པོ་ཤ་ཁྲག་གི་ལུས་མེད་པར༔ ཞི་བ་དང་༔ ཁྲོ་བོ་དང་༔ སྐུ་དང་༔ ཡེ་ཤེས་དང་༔ འོད་དང་༔ ཟེར་དང་༔ ཁ་དོག་དང་༔ ཅིར་སྣང་ཐམས་ཅད་ཆོས་ཉིད་དག་པ་རབ་འབྱམས་ཀྱི་སྣང་བ་ལ་གནས་སོ༔ དེ་ནི་ཆོས་ཉིད་བར་དོའི་གནས་ལུགས་སོ༔ དྲུག་པ་སྲིད་པ་བར་དོའི་གནས་ལུགས་ནི༔ སྒྱུ་མ་ཡིད་ཀྱི་གཟུགས་ཅན་ཏེ༔ ཆོས་ཉིད་བར་དོར་བདེན་པའི་དོན་མ་མཐོང་བར༔ འོད་སྣང་ཀུན་ལ་བྲེད་ཅིང་སྔངས་ནས༔ སྟོང་གསུམ་ཀུན་ཏུ༔ ཡིད་གྱ་གྱུ༔ བྲང་བྲིང་༔ ཡད་ཡུད་༔ ཕྱད་ཕྱོད༔ བན་བུན༔ ལོང་ལོང་༔ རྨི་ལམ་ལྟ་བུར་གནས་པའོ༔ དེ་ནི་སྲིད་པ་བར་དོའི་གནས་ལུགས་སོ༔ དེ་ནི་བར་དོ་དྲུག་གི་གནས་ལུགས་དྲུག་བསྟན་པའོ༔ ས་མ་ཡཱ༔ ༈བཅུ་པ་བར་དོ་དྲུག་གི་ལུས་དྲུག་གང་ཞེ་ན༔ དང་པོ་སྐྱེ་གནས་བར་དོའི་ལུས་ནི༔ འབྱུང་བ་ལྔ་ལ་རྟེན་བཅས་ཏེ༔ ཕ་མའི་ཁུ་ཁྲག་ལ་རྒྱུ་བྱས་ནས༔ གདོས་བཅས་ཤ་ཁྲག་གི་ལུས་ཡིན་ནོ༔ གཉིས་པ་རྨི་ལམ་བར་དོའི་ལུས་ནི༔ ཉིན་པར་གྱི་བག་ཆགས་ནུབ་མོར་གྱི་རྨི་ལམ་དུ་ཁྲིད་ནས༔ ཤ་ཁྲག་གི་ལུས་མལ་དུ་བཞག་སྟེ༔ བག་ཆགས་ཀྱི་ལུས་སུ་ལམ་གྱིས་ཤར་བས༔ རྨི་ལམ་བར་དོ་ནི་བག་ཆགས་ཀྱི་ལུས་སོ༔ གསུམ་པ་བསམ་གཏན་བར་དོའི་ལུས་ནི༔ བསྐྱེད་རིམ་ནི༔ ལྷའི་སྐུ་སྣང་ལ་རང་བཞིན་མེད་པ་སྟེ༔ དག་པའི་སྒྱུ་ལུས་སོ༔ རྫོགས་རིམ་ནི༔ སྟོང་ཉིད་ནམ་མཁའ་ལྟ་བུའི་ངང་ལ་གནས་པ་སྟེ༔ འོད་གསལ་ཏིང་ངེ་འཛིན་གྱི་ལུས་སོ༔ ཐབས་ལམ་ནི་བདེ་བ་ཆེན་པོའི་ལུས་སོ༔ དེ་ནི་བསམ་གཏན་བར་དོའི་ལུས་སོ༔ བཞི་བ་འཆི་ཁ་བར་དོའི་ལུས་ནི༔ ལུས་སེམས་བྲལ་བའི་གནད་གཅོད་ཀྱིས་གདུང་བས༔ འཆི་ཁ་བར་དོ་ནི་སྡུག་བསྔལ་གྱི་ལུས་སོ༔ ལྔ་པ་ཆོས་ཉིད་བར་དོའི་ལུས་ནི༔ ཤ་ཁྲག་གི་རྟེན་དང་བྲལ༔ ལས་ཀྱི་སུན་མས་མ་སླེབ་པའི་བར་དུ༔ དག་པ་ཆོས་ཉིད་ཀྱི་སྣང་བ་ལ་གནས་པས༔ ཆོས་ཉིད་བར་དོ་ནི་འོད་གྱི་ལུས་སོ༔ དྲུག་པ་སྲིད་པ་བར་དོའི་ལུས་ནི༔ ཆོས་ཉིད་ཀྱི་སྣང་བ་ནུབ༔ མའི་མངལ་དུ་མ་ཆུད་པའི་བར་དེར༔ བག་ཆགས་ཡིད་ཀྱི་ལུས་སུ་ལམ་གྱིས་འཆར་བས༔ སྲིད་པ་བར་དོ་ནི་ཡིད་ཀྱི་ལུས་སོ༔ དེ་ནི་བར་དོ་དྲུག་གི་ལུས་དྲུག་བསྟན་པའོ༔ ས་མ་ཡཱ༔ ༈ བཅུ་གཅིག་པ་བར་དོ་དྲུག་གི་ཚེ་ཚད་དྲུག་ནི༔ དང་པོ་སྐྱེ་གནས་བར་དོའི་ཚེ་ཚད་ནི༔ བསྐལ་བ་བཟང་པོ་ཡར་འཕེལ་གྱི་དུས་སུ༔ ཚེ་ལོ་གྲངས་མེད་དོ༔ དེ་ནས་མར་འགྲིབ་ནས༔ བརྒྱད་ཁྲི༔ བཞི་ཁྲི༔ སྟོང་༔ རིམ་བཞིན་བརྒྱ་པ༔ དེང་སེང་ནི་སྤྱི་མཐུན་གྱི་ཚེ་ཚད་དྲུག་བཅུའམ༔ ལྔ་བཅུ་ཁ་རལ་གྱི་ཚེ་ཚད་ཡིན་ལ༔ ཕྱི་མ་ནི་ཚེ་ལོ་བཅུ་པར་ཡང་འགྱུར་ཞིང་༔ གང་ཟག་སོ་སོ་རང་རང་གི་ཚེ་ཚད་ནི༔ གནས་སྐབས་ཀྱི་ཚེ་ལ་ངེས་པ་མེད་དེ༔ ལ་ལ་མངལ་དུ་འཆི༔ ལ་ལ་ནི་བཙས་མ་ཁད་ལ་འཆི༔ ལ་ལ་དར་ལ་བབ་ནས་འཆི༔ ལ་ལ་རྒས་ནས་འཆི་སྟེ༔ སྤྱིར་ན་མངལ་དུ་སླེབ་ནས་འཆི་བའི་རྐྱེན་གྱིས་མ་སླེབ་ཚུན་ཆད་སྐྱེ་གནས་བར་དོའི་ཚེ་ཚད་དོ༔ གཉིས་པ་རྨི་ལམ་བར་དོའི་ཚེ་ཚད་ནི༔ ཞག་གཅིག་གམ༔ གཉིད་ཐུན་གཅིག་གི་ཚེ་ཚད་དོ༔ གསུམ་པ་བསམ་གཏན་བར་དོའི་ཚེ་ཚད་ནི༔ ཏིང་ངེ་འཛིན་ལ་ཡུན་ཅི་ཙམ་གནས་ཀྱི་བར་གྱི་ཡུན་དེ་ཡིན་ཏེ༔ ཏིང་ངེ་འཛིན་ཐུན་རིང་ཐུང་གི་ཚེ་ཚད་དོ༔ བཞི་བ་འཆི་ཁ་བར་དོའི་ཚེ་ཚད་ནི༔ རིམ་གྱིས་ཤི་ན་ཤི་ནད་དེས་ཟིན་ནས༔ ལུས་སེམས་མ་བྲལ་གྱི་བར༔ དེའི་ཚེ་ཚད་དོ༔ གཅིག་ཆར་དུ་ཤི་ན༔ གད་གཡང་སོགས༔ གློ་བུར་རྒྱབ་ཆོས་འཁྲུལ་བ་རང་གྲོལ། དུ་ཤི་བའི་སྐད་ཅིག་གམ༔ ཡུད་ཙམ་གཅིག་གིས་ཚེ་ཚད་དོ༔ ལྔ་པ་ཆོས་ཉིད་བར་དོའི་ཚེ་ཚད་ནི༔ རིང་བ་ལ་ཞག་ཕྱེད་དང་ཉི་ཤུ་རྩ་ལྔ༔ དེ་ལས་ཐུང་བ་ལ་ལྔ༔ དེ་ལས་ཐུང་བ་ལ་ཞག་ཕྱེད་དང་བཞི༔ ཐུང་ཤོས་ལ་སྐྱེས་བུའི་ལག་པ་བརྐྱངས་བསྐུམ་ཙམ་མམ༔ སྐར་མདའ་ནམ་མཁའ་ལ་རྒྱུགས་པ་ཙམ་འོང་ངོ་༔ ཚེ་ཚད་རིང་ཐུང་ངེས་པ་མེད་དོ༔ དྲུག་པ་སྲིད་པ་བར་དོའི་ཚེ་ཚད་ནི༔ ལ་ལ་ནི་ལོ་དང་ཟླ་བ་མང་པོའི་བར་དུ་གནས་པ་ཡང་ཡོད་ལ༔ སྤྱི་བཙན་དུ་ནི་ཞག་བཞི་བཅུ་ཞེ་དགུའི་བར་དུ་གནས་པར་གསུངས་ཤིང་ལུས་ལེན་པའི་ལས་མྱུར་དུ་འཛོམ་ན་ཞག་འགའ་དང་༔ ཡུན་ཐུང་དུ་གནས་པར་ཡང་བཤད་དོ༔ བར་དོ་མེད་པ་ཡང་བཞིར་བཤད་དེ༔ རྟོགས་པ་དང་ལྡན་པའི་རྣལ་འབྱོར་བ་ནི༔ ད་ལྟ་འོད་གསལ་མངོན་དུ་གྱུར༔ གཉིད་འོད་གསལ་དུ་ཤར་བ་དེ༔ འཆི་ཁ་འོད་གསལ་མ་བུ་གཅིག་ཏུ་འདྲེས་ཏེ༔ སྐད་ཅིག་ལ་ཡར་གྱི་ཟང་ཐལ་དུ་འགྲོ་སྟེ༔ བར་དོ་དང་ཚེ་ཚད་མེད་དོ༔ གཉིས་པ་མཚམས་མེད་པའི་ལས་བྱས་པའམ༔ རྩ་བའི་དམ་ཚིག་ཉམས་པ་དེ༔ དབུགས་ཆད་མ་ཁད་དུ་རྣམ་ཤེས་འོག་སྒོར་བུད་དེ༔ དཔག་ཆེན་གྱི་མདའ་འཕངས་པ་བཞིན་དུ༔ དམྱལ་བར་འགྲོ་བ་ནི་མར་གྱི་ཟང་ཐལ་ཞེས་བྱ་སྟེ༔ བར་དོ་མེད་དོ༔ གསུམ་པ་འཕོ་བ་ཟབ་མོ་ཐེབས་པ་དེ་ཡང་སྒྱོགས་དང་འཁྲུལ་འཁོར་གྱི་ཚུལ་དུ་གར་འདོད་པའི་གནས་དེར་ལྷན་གྱིས་འགྲོ་བས་བར་དོ་མེད་དོ༔ བཞི་བ་སྐྱེ་མཆེད་མུ་བཞིའི་ལྷར་སྐྱེ་བ་དེ་ཡང་ཏིང་ངེ་འཛིན་གྱི་ལུས་ཡིན་པས༔ སྐྱེ་གནས་ལེན་པའི་མཚམས་སྦྱོར་མི་དགོས་པས་བར་དོ་མེད་དོ༔ དེ་ལྟར་བཞི་པོ་མ་གཏོགས་པ༔ ལུས་ཅན་ཤི་བ་ཐམས་ཅད་ལ༔ སྲིད་པ་བར་དོའི་སྣང་བ་འཆར་ཞིང་༔ བར་དོ་ལ་ཚེ་ཚད་རིང་ཐུང་གང་རུང་རེ་ཡོད་དོ༔ དེ་ནི་བར་དོ་དྲུག་གི་ཚེ་ཚད་དྲུག་བསྟན་པའོ༔ ས་མ་ཡཱ༔ ༈ བཅུ་གཉིས་པ་བར་དོ་དྲུག་གི་སྣང་ལུགས་དྲུག་གང་ཞེ་ན༔ དང་པོ་སྐྱེ་གནས་བར་དོའི་སྣང་ལུགས་ནི༔ བདེན་འཛིན་དང་བཅས་ཏེ༔ ཨ་འཐས་ཀྱི་སྣང་བའོ༔ གཉིས་པ་རྨི་ལམ་བར་དོའི་སྣང་བ་ནི༔ བག་ཆགས་ཡད་ཡུད་དུ་སྣང་བ་སྟེ༔ བག་ཆགས་སྒྱུ་མའི་སྣང་བའོ༔ གསུམ་པ་བསམ་གཏན་བར་དོའི་སྣང་བ་ནི༔ ཉམས་ཀྱི་མཐོ་དམན་སྣ་ཚོགས་སུ་སྣང་བ་སྟེ༔ ཉམས་ཀྱི་སྣང་བའོ༔ བཞི་པ་འཆི་ཁ་བར་དོའི་སྣང་བ་ནི༔ སྡུག་བསྔལ་དང་ཞེན་ཆགས་ཀྱི་དབང་དུ་སོང་བས༔ ཞེན་ཆགས་སྡུག་བསྔལ་གྱི་སྣང་བའོ༔ ལྔ་པ་ཆོས་ཉིད་བར་དོའི་སྣང་བ་ནི༔ དག་པ་སྐུ་དང་ཡེ་ཤེས་སྣང་བ་འཆར་བས༔ དག་པ་ཆོས་ཉིད་སྣང་བའོ༔ དྲུག་པ་སྲིད་པ་བར་དོའི་སྣང་བ་ནི༔ ལས་བཟང་ངན་གྱིས་སྣང་བ་སྣ་ཚོགས་སུ་འཆར་བས༔ ལས་ཀྱི་སྣང་བའོ༔ དེ་ནི་བར་དོ་དྲུག་གི་སྣང་ལུགས་དྲུག་བསྟན་པའོ༔ ས་མ་ཡཱ༔ ༈ བཅུ་གསུམ་པ་བར་དོ་དྲུག་གི་ངོ་སྤྲོད་དྲུག་གང་ཞེ་ན༔ དང་པོ་སྐྱེ་གནས་བར་དོའི་ངོ་སྤྲོད་ནི༔ སྒྲོན་མ་དྲུག་ཏུ་ངོ་སྤྲོད་དོ༔ གཉིས་པ་རྨི་ལམ་བར་དོའི་ངོ་སྤྲོད་ནི༔ རྨི་ལམ་འཁྲུལ་པ་རང་གྲོལ་ལྟར་ངོ་སྤྲོད་དོ༔ གསུམ་པ་བསམ་གཏན་བར་དོའི་ངོ་སྤྲོད་ནི༔ ལུས་སོག་ཕོན་ཐག་པ་ཆད་པ་ལྟ་བུ་དང་༔ ངག་པི་ཝང་རྒྱུན་ཐག་ཆད་པ་ལྟ་བུ་དང་༔ སེམས་ཆུ་ཆད་པའི་རང་འཐག་ལྟ་བུ་དང་༔ མར་མེ་རླུང་གིས་མི་བསྐྱོད་པ་ལྟ་བུ་ལ་ངོ་སྤྲོད་པ་ནི༔ ཞི་གནས་ཀྱི་ངོ་སྤྲོད་དོ༔ ཉི་མའི་དཀྱིལ་འཁོར་ལ་ངོ་སྤྲོད་པ་དང་༔ ལྐུགས་པས་བུ་རམ་མྱོང་བ་ལྟ་བུ་དང་༔ གཞོན་ནུ་མའི་བདེ་བ་ངོ་སྤྲོད་པ་དང་༔ ཤེལ་དང་ཉི་ཟེར་ལ་ངོ་སྤྲོད་པ་ལ་སོགས་པ་ནི༔ ལྷག་མཐོང་གི་ངོ་སྤྲོད་དོ༔ རྒྱས་པར་ནི་ཁྲེགས་ཆོད་དང་ཐོད་རྒལ་གྱི་ངོ་སྤྲོད་ལྟར་རོ༔ བཞི་པ་འཆི་ཁ་བར་དོའི་ངོ་སྤྲོད་ནི༔ འཇིམ་པའི་མི་མོ་ལ་རྣམ་ཤེས་ཞུགས་གནས་དོན་གསུམ་གྱིས་ངོ་སྤྲོད་པའོ༔ ལྔ་བ་ཆོས་ཉིད་བར་དོའི་ངོ་སྤྲོད་ནི༔ བར་དོའི་ངོ་སྤྲོད་རྒྱབ་ཆོས་འཁྲུལ་བ་རང་གྲོལ། མཐོང་བ་རང་གྲོལ་ལྟར༔ ཞི་ཁྲོའི་ལྷ་ཚོགས་དང་༔ སྒྲ་འོད་ཟེར་གསུམ་ལ་ངོ་སྤྲོད་པའོ༔ དྲུག་པ་སྲིད་པ་བར་དོའི་ངོ་སྤྲོད་ནི༔ ངོ་སྤྲོད་སྲིད་པ་རང་གྲོལ་ལྟར༔ ལྷན་ཅིག་སྐྱེས་པའི་ལྷ་འདྲེ་དང་༔ དགེ་སྡིག་གི་བྱེ་བྲག་ཕྱེད་པ་ལ་སོགས་པས་ངོ་སྤྲོད་པའོ༔ དེ་ནི་བར་དོ་དྲུག་གི་ངོ་སྤྲོད་དྲུག་གོ༔ ས་མ་ཡཱ༔ ༈བཅུ་བཞི་པ་བར་དོ་དྲུག་གི་ཉམས་ལེན་དྲུག་ནི༔ དང་པོ་སྐྱེ་གནས་བར་དོ་ལ་ནི༔ སྤྱིར་ཆོས་སྤྱོད་བཅུ་དང་དགེ་བ་བཅུ་ལ་འབད་ཅིང་༔ ཐོས་བསམ་སྒོམ་གསུམ་ལ་འབད་ཅིང་ཉམས་སུ་ལེན་པའོ༔ ཁྱད་པར་དུ་ཉམས་ཁྲིད་ཀུན་གཞི་རང་གྲོལ་ལྟར་ཉམས་སུ་ལེན་པའོ༔ གཉིས་པ་རྨི་ལམ་བར་དོའི་ཉམས་ལེན་ནི༔ ཉིན་པར་སྒྱུ་ལུས་སྣང་བ་རང་གྲོལ་གྱི་ཁྲིད་དང་༔ རྨི་ལམ་གྱི་འདུན་པ་སྦྱང་ཞིང་༔ ནུབ་མོར་རྨི་ལམ་བཟུང་བ་དང་༔ ཟིན་ནས་སྤྲུལ་ཞིང་བསྒྱུར་བ་ལ་སྦྱང་སྟེ༔ རྨི་ལམ་འཁྲུལ་བ་རང་གྲོལ་ལྟར་ཉམས་སུ་ལེན་ནོ༔ རྨི་ལམ་བརྟན་པ་དང་༔ འོད་གསལ་གཏི་མུག་རང་གྲོལ་ཉམས་སུ་ལེན་ནོ༔ གསུམ་པ་བསམ་གཏན་བར་དོའི་ཉམས་ལེན་ནི༔ བསྐྱེད་རིམ་དང་༔ རྫོགས་རིམ༔ འོག་སྒོ་བདེ་བ་ཆེན་པོ་ལ་སོགས་པ་ཉམས་སུ་ལེན་ནོ༔ ཁྱད་པར་དུ་བསམ་གཏན་བར་དོའི་ཁྲིད་ཡིག་རིག་པ་རང་གྲོལ་ལྟར་ཉམས་སུ་ལེན་ནོ༔ བཞི་བ་འཆི་ཁ་བར་དོའི་ཉམས་ལེན་ནི༔ འཆི་བ་བརྟག་པ་དང་༔ འཆི་བ་བསླུ་བ་དང་༔ འཆི་བ་མ་བསླུས་ན༔ འཕོ་བ་དྲན་པ་རང་གྲོལ་གྱི་ཁྲིད་ལྟར་ཉམས་སུ་ལེན་ནོ༔ ལྔ་བ་ཆོས་ཉིད་བར་དོའི་ཉམས་ལེན་ནི༔ ལམ་ཐོད་རྒལ་གྱི་ཁྲིད་ཡིག་སྣང་བ་རང་གྲོལ་ཉམས་སུ་ལེན་ཅིང་༔ རྒྱས་པར་ཆོས་ཉིད་བར་དོའི་ཐོས་གྲོལ་ཆེན་མོ་ལྟར་ཉམས་སུ་ལེན་ནོ༔ དྲུག་པ་སྲིད་པ་བར་དོའི་ཉམས་ལེན་ནི༔ ཉམས་ཁྲིད་སྲིད་པ་རང་གྲོལ་ལྟར༔ མངལ་སྒོ་དགག་གདམ་གྱི་རིམ་པ་དང་༔ རྒྱས་པར་སྲིད་པ་བར་དོའི་ཐོས་གྲོལ་ཆེན་མོ་ལྟར་ཉམས་སུ་ལེན་ནོ༔ དེ་ནི་བར་དོ་དྲུག་གི་ཉམས་ལེན་དྲུག་བསྟན་པའོ༔ ས་མ་ཡཱ༔ ༈ བཅོ་ལྔ་པ་བར་དོ་དྲུག་གི་གདམས་ངག་དྲུག་ནི༔ དང་པོ་སྐྱེ་གནས་བར་དོ་ལ་ཕྱི་ནང་གི་སྒྲོ་འདོགས་བཅད་པ་ཐི་བྱ་ཚང་དུ་འཇུག་པ་ལྟ་བུའི་གདམས་ངག་དང་༔ གཉིས་པ་རྨི་ལམ་བར་དོ་ལ་བག་ཆགས་ཀྱི་མཚམས་སྦྱོར་བ་ཆུ་བོའི་གཞུང་ལྟ་བུའི་གདམས་ངག༔ གཏི་མུག་འོད་གསལ་དུ་བསྒྱུར་བ་མུན་ཁང་དུ་སྒྲོན་མེ་བཏེག་པ་ལྟ་བུའི་གདམས་ངག་དང་༔ གསུམ་པ་བསམ་གཏན་བར་དོ་ལ་རང་གི་རིག་པ་ངོ་སྤྲོད་པ༔ དྭ་ཕྲུག་མ་དང་འཕྲད་པ་ལྟ་བུའི་གདམས་ངག་དང་༔ བཞི་བ་འཆི་ཁ་བར་དོ་ལ་མི་གསལ་བ་གསལ་གདབ་པ༔ སྒེག་མོའི་མེ་ལོང་ལ་བལྟ་བ་ལྟ་བུའི་གདམས་ངག༔ རྒྱལ་པོའི་བཀའ་ཐེམ་བསྐུར་བ་ལྟ་བུའི་གདམས་ངག་དང་༔ ལྔ་བ་ཆོས་ཉིད་བར་དོ་ལ་རང་སྣང་ལ་ཡིད་ཆེས་པ་མ་པང་དུ་བུ་བརྒྱུགས་པ་ལྟ་བུའི་གདམས་ངག་དང་༔ དྲུག་པ་སྲིད་པ་བར་དོ་ལ་ལས་ཀྱི་འཕྲོ་མཐུད་པ༔ ཡུར་བ་རྐང་ཆད་ལ་ཝ་འཛུག་པ་ལྟ་བུའི་གདམས་ངག་དང་དྲུག་གོ༔ དེ་ནི་བར་དོ་དྲུག་གི་གདམས་ངག་དྲུག་བསྟན་པའོ༔ ས་མ་ཡཱ༔ ༈ བཅུ་དྲུག་པ་བར་དོ་དྲུག་གི་དོན་མ་རྟོགས་པའི་ཉེས་པ་དྲུག་ནི༔ དང་པོ་སྐྱེ་གནས་བར་དོ་ཐོས་བསམ་སྒོམ་གསུམ་གྱིས་ཤེས་བྱའི་སྒྲོ་འདོགས་མ་ཆོད་ན༔ ཆོས་ཐམས་ཅད་ཀྱི་ཉམས་ལེན་གྱི་གཞི་མེད་པས༔ འཁོར་བ་ལ་མཐའ་མེད་པའི་ཉེས་པ་ཡོད་དོ༔ གཉིས་པ་རྨི་ལམ་བར་དོ་ལ་བག་ཆགས་ཀྱི་མཚམས་སྦྱོར་བའི་ཉམས་ལེན་མེད་ན༔ ཉིན་སྣང་མཚན་སྣང་མི་འདྲེས་ཤིང་༔ ཉམས་ལེན་ལ་བར་ཆད་པའི་ཉེས་པ་ཡོད་དོ༔ གསུམ་པ་བསམ་གཏན་བར་དོ་ལ༔ ཏིང་ངེ་འཛིན་གྱི་རྒྱུན་མ་བསྲིངས་ན༔ ཆོས་ཁ་ཆོས་སུ་སོང་ནས༔ ཉམས་མྱོང་རྒྱུད་ལ་མི་སྐྱེ་པའི་ཉེས་པ་ཡོད་དོ༔ བཞི་བ་འཆི་ཁ་བར་དོ་ལ་གདམས་པའི་གསལ་མ་ཐེབས་ན༔ རྒྱབ་ཆོས་འཁྲུལ་བ་རང་གྲོལ། ཆོས་ལམ་དུ་མི་སློང་ཞིང་༔ ཆོས་ཀྱི་དགོས་པ་སྟོར་བའི་ཉེས་པ་ཡོད་དོ༔ ལྔ་བ་ཆོས་ཉིད་བར་དོ་ལ༔ རང་སྣང་གི་ཆོས་ཉིད་ལ་ཡིད་མ་ཆེས་ཤིང་ངོས་མ་ཟིན་ན༔ རང་སྣང་བདུད་དུ་སོང་ནས༔ འཁོར་བར་ལྟུང་བའི་ཉེས་པ་ཡོད་དོ༔ དྲུག་པ་སྲིད་པའི་བར་དོ་ལ༔ བཟང་པོ་ལས་ཀྱི་འཕྲོ་མ་མཐུད་ན༔ ཁམས་གསུམ་འཁོར་བའི་སྲིད་པ་འདི་ནས་ཐར་པའི་དུས་མེད་པའི་ཉེས་པ་ཡོད་དོ༔ དེ་བས་ན་བར་དོ་དྲུག་གི་གདམས་ངག་འདི་ནི༔ ཉམས་ལེན་ཐམས་ཅད་ཀྱི་རྩ་བ་ཡིན༔ དེ་ནི་མ་རྟོགས་པའི་ཉེས་པ་དྲུག་བསྟན་པའོ༔ ས་མ་ཡཱ༔ ༈བཅུ་བདུན་པ་བར་དོའི་དྲུག་ཉམས་སུ་ལེན་པའི་ཕན་ཡོན་དྲུག་ནི༔ དང་པོ་སྐྱེ་གནས་བར་དོར་ཐོས་བསམ་སྒོམ་གསུམ་གྱིས་ཤེས་བྱའི་སྒྲོ་འདོགས་ཆོད་པས༔ ཐར་པའི་ལམ་སྣ་ཟིན༔ བྱང་ཆུབ་ཀྱི་རྨང་ལེགས་པས༔ ཅི་བྱས་ལམ་དུ་འགྲོ་བའི་ཡོན་ཏན་ཡོད་དོ༔ གཉིས་པ་རྨི་ལམ་བར་དོ་བག་ཆགས་ཀྱི་མཚམས་སྦྱོར་བས་ཉིན་མཚན་གྱི་ཉམས་ལེན་ལ་བར་མི་ཆད་དེ༔ ཉམས་ལེན་ཆུ་བོའི་རྒྱུན་ལྟར་རྒྱུད་ལ་ཁེལ་བའི་ཡོན་ཏན་ཡོད་དོ༔ གསུམ་པ་བསམ་གཏན་བར་དོའི་ཏིང་ངེ་འཛིན་གྱི་རྒྱུན་བསྲེངས་པས༔ རྟོགས་པ་མངོན་དུ་གྱུར་ནས༔ འབྲས་བུ་ཕྱི་དུས་ལ་མི་རེ་བའི་དགོས་པ་ཡོད་དོ༔ བཞི་པ་འཆི་ཁ་བར་དོར་གདམས་པའི་གསལ་ཐེབས་པས༔ ཆོས་ལམ་དུ་སོང་ཞིང་རྐྱེན་ངན་བྱང་ཆུབ་ཀྱི་ལམ་དུ་བསློང་བའི་ཡོན་ཏན་ཡོད་དོ༔ ལྔ་པ་ཆོས་ཉིད་བར་དོར་རང་སྣང་ཆོས་ཉིད་དུ་ངོས་ཟིན་པས༔ འབྲས་བུ་བསྒྲུབ་པ་ལ་རག་མ་ལུས་པར༔ སྐད་ཅིག་གཅིག་ལ་རྫོགས་སངས་རྒྱས་པའི་ཡོན་ཏན་ཡོད་དོ༔ དྲུག་པ་སྲིད་པ་བར་དོར་བཟང་པོ་ལས་ཀྱི་་འཕྲོ་མཐུད་ཅིང་༔ ཉོན་མོངས་འཁོར་བའི་མངལ་སྒོ་ཁེགས་པས༔ ཁམས་གསུམ་སྲིད་པ་རྒྱུན་ཆད་ནས༔ བྱང་ཆུབ་ཀྱི་བཙན་ས་ཟིན་པའི་ཡཽན་ཏན་ཡོད་དོ༔ དེ་ནི་བར་དོ་དྲུག་གི་ཆོས་དྲུག་ཉམས་སུ་ལེན་པའི་ཕན་ཡོན་བསྟན་པའོ༔ ས་མ་ཡཱ༔ ༈ བཅོ་བརྒྱད་པ་བར་དོ་དྲུག་གི་རྩ་ཚིག་དྲུག་ནི༔ ཨེ་མ༔ བདག་ལ་སྐྱེ་གནས་བར་དོ་འཆར་དུས་འདིར༔ ཚེ་ལ་ལོང་མེད་ལེ་ལོ་སྤངས་བྱས་ནས༔ ཐོས་བསམ་སྒོམ་གསུམ་མ་ཡེངས་དོན་ལ་འཇུག༔ སྣང་སེམས་ལམ་བསླང་སྐུ་གསུམ་མངོན་གྱུར་བྱའོ༔ ཨེ་མ༔ བདག་ལ་རྨི་ལམ་བར་དོ་འཆར་དུས་འདིར༔ གཏི་མུག་རོ་ཉལ་བག་མེད་སྤངས་བྱས་ནས༔ དྲན་པ་ཡེངས་མེད་གནས་ལུགས་ངང་ལ་འཇུག༔ རྨི་ལམ་བཟུང་ནས་སྤྲུལ་བསྒྱུར་འོད་གསལ་སྦྱང་༔ ཨེ་མ༔ བདག་ལ་བསམ་གཏན་བར་དོ་འཆར་དུས་འདིར༔ རྣམ་གཡེང་འཁྲུལ་པའི་ཚོགས་རྣམས་སྤང་བྱས་ནས༔ ཡེངས་མེད་འཛིན་མེད་མཐའ་བྲལ་ངང་ལ་འཇོག༔ བསྐྱེད་རྫོགས་གཉིས་ལ་བརྟན་པ་ཐོབ་པར་བྱའོ༔ ཨེ་མ༔ བདག་ལ་འཆི་ཁ་བར་དོ་འཆར་དུས་འདིར༔ ཀུན་ལ་ཆགས་སེམས་ཞེན་འཛིན་སྤངས་བྱས་ནས༔ གདམས་ངག་གསལ་བའི་ངང་ལ་མ་ཡེངས་འཇུག༔ རང་རིག་སྐྱེ་མེད་ནམ་མཁའི་དབྱིངས་སུ་འཕོ༔ ཨེ་མ༔ བདག་ལ་ཆོས་ཉིད་བར་དོ་འཆར་དུས་འདིར༔ ཀུན་ལ་སྔངས་སྐྲག་འཇིགས་སྣང་སྤངས་བྱས་ནས༔ གང་ཤར་རང་སྣང་རིག་པ་ངོ་ཤེས་འཇུག༔ བར་དོའི་སྣང་ཚུལ་ཡིན་པར་ཤེས་པར་བྱ༔ ཨེ་མ༔ བདག་ལ་སྲིད་པ་བར་དོ་འཆར་དུས་འདིར༔ འདུན་པ་རྩེ་གཅིག་སེམས་ལ་བཟུང་བྱས་ནས༔ བཟང་པོ་ལས་ཀྱི་འཕྲོ་ལ་ནན་གྱིས་མཐུད༔ མངལ་སྒོ་དགག་ནས་རུ་ལོག་དྲན་པར་བྱའོ༔ སྙིང་རུས་དག་སྣང་དགོས་པའི་དུས་གཅིག་ཡིན༔ མིག་སེར་སྤངས་ལ་བླ་མ་ཡབ་ཡུམ་བསྒོམ༔ ཞེས་པའི་བར་དོ་དྲུག་གི་རྩ་ཚིག་འདི་ལ་རྒྱུན་དུ་སྦྱང་བར་བྱ་ཞིང་༔ ཁྱི་བདུན་གྱིས་བདས་ཀྱང་༔ མ་བརྗེད་པར་ཡིད་ལ་བྱས་པས༔ དེས་བར་དོ་ངོས་ཟིན་པར་འགྱུར་རོ༔ གཞན་ཡང་བར་དོའི་རྣམ་གྲངས་འདི་དག་ལེགས་པར་ཡིད་ལ་བྱ་ཞིང་བཅང་རྒྱབ་ཆོས་འཁྲུལ་བ་རང་གྲོལ། བར་བྱའོ༔ བཀླག་པར་བྱའོ༔ ཁ་དོན་དུ་བྱའོ༔ ཚུལ་བཞིན་དུ་ཡིད་ལ་བྱའོ༔ འཁོར་འདས་ཀྱི་ཆོས་ཐམས་ཅད་རྩ་བ་བར་དོ་དྲུག་ལ་མ་འདུས་པ་མེད་པས༔ དེ་བས་ན་བར་དོ་དྲུག་གི་ཆོས་འདི་ཤིན་ཏུ་ཟབ་པོ༔ འདི་དྲུག་གི་དོན་རྟོགས་ན༔ ཆོས་ཐམས་ཅད་ཀྱི་དོན་རྟོགས་པ་ཡིན་ནོ༔ བར་དོ་དྲུག་གི་རྒྱབ་ཆོས་འཁྲུལ་བ་རང་གྲོལ་ཞེས་བྱ་བ༔ འཁོར་བ་མ་སྟོངས་བར་དུ་མ་རྫོགས་སོ༔ ས་མ་ཡཱ༔ གཏེར་རྒྱ༔ ཨིཐྀ༔ གཏེར་སྟོན་ཀརྨ་གླིང་པས་སྒམ་པོ་གདར་གྱི་རི་བོ་ནས་སྦས་རྒྱ༔ ངྷ་ཐིམ་རྒྱ༔ ཨྠབཏོན་པའོ༔ རིག་པ་ངོ་སྤྲོད་ཅེར་མཐོང་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ རིག་པ་ངོ་སྤྲོད་ཅེར་མཐོང་རང་གྲོལ་ཞེས་བྱ་བ་བཞུགས་སོ༔ རིག་པ་རང་གསལ་སྐུ་གསུམ་ལྷ་ལ་འདུད༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ རིག་པ་ངོ་སྤྲོད་ཅེར་མཐོང་རང་གྲོལ་བསྟན༔ འདི་ལྟར་རང་གི་རིག་པ་ངོ་སྤྲོད་ཀྱིས༔ ལེགས་པར་དགོངས་ཤིག་སྐལ་ལྡན་རིགས་ཀྱི་བུ༔ ས་མ་ཡ༔ རྒྱ་རྒྱ་རྒྱ༔ ཨེ་མ་ཧོ༔ འཁོར་འདས་ཡོངས་ལ་ཁྱབ་པའི་སེམས་གཅིག་པུ༔ ཡེ་ནས་རང་ཉིད་ཡིན་ཀྱང་ངོ་མ་ཤེས༔ གསལ་རིག་རྒྱུན་ཆད་མེད་ཀྱང་ཞལ་མ་མཇལ༔ འགག་མེད་ཅིར་ཡང་འཆར་ཏེ་ངོས་མ་ཟིན༔ འདི་ཉིད་རང་ངོ་ཤེས་པར་བྱ་བའི་ཕྱིར༔ དུས་གསུམ་རྒྱལ་བས་ཆོས་སྒོ་བརྒྱད་ཁྲི་དང་༔ བཞི་སྟོང་ལ་སོགས་བསམ་གྱིས་མི་ཁྱབ་པ༔ གསུངས་པ་ཐམས་ཅད་འདི་ཉིད་རྟོགས་ཕྱིར་ལས༔ གཞན་དུ་ཅི་ཡང་རྒྱལ་བས་གསུངས་པ་མེད༔ གསུང་རབས་ནམ་མཁའི་མཐའ་མཉམ་དཔག་མེད་ཀྱང་༔ དོན་ལ་རིག་པ་ངོ་སྤྲོད་ཚིག་གསུམ་པོ༔ རྒྱལ་བའི་དགོངས་པ་མངོན་སུམ་ངོ་སྤྲོད་འདི༔ སྦ་འཕྲི་མེད་པར་མཛུབ་ཚུགས་འདི་ཀ་ཡིན༔ ཀྱེ་ཧོ་སྐལ་ལྡན་བུ་དག་ཚུར་ཉོན་དང་༔ སེམས་ཞེས་ཟེར་བའི་ཡོངས་གྲགས་སྒྲ་བོ་ཆེ༔ འདི་ཉིད་མ་རྟོགས་ལོག་རྟོག་ཕྱོགས་རྟོགས་དང་༔ ཡང་དག་ཅི་བཞིན་ཉིད་དུ་མ་རྟོགས་པས༔ གྲུབ་མཐའི་འདོད་པ་བསམ་གྱིས་མི་ཁྱབ་བྱུང་༔ དེ་ཡང་སོ་སོའི་སྐྱེ་བོ་ཐ་མལ་པས༔ མ་རྟོགས་རང་ངོ་རང་གི་མ་ཤེས་པས༔ ཁམས་གསུམ་རྒྱུད་དྲུག་འཁྱམས་ཤིང་སྡུག་བསྔལ་སྤྱོད༔ དེ་ཡང་རང་སེམས་འདི་ཉིད་མ་རྟོགས་སྐྱོན༔ ཕྱི་རོལ་མུ་སྟེགས་ལོག་པར་རྟོག་པ་སྟེ༔ རྟག་ཆད་མཐའ་ལ་ལྟུང་བས་ཕྱིན་ཅི་ལོག༔ དེ་ཡང་རང་སེམས་འདི་ཉིད་མ་རྟོགས་སྐྱོན༔ ཉན་ཐོས་རང་རྒྱལ་ཕྱོགས་ཙམ་བདག་མེད་པར༔ རྟོགས་པར་འདོད་ཀྱང་ཅི་བཞིན་ཉིད་མ་རྟོགས༔ གཞན་ཡང་རང་རང་གཞུང་དང་གྲུབ་མཐའ་ཡི༔ འདོད་པས་བཅིངས་པས་འོད་གསལ་མ་མཐོང་བསྒྲིབས༔ ཉན་ཐོས་རང་རྒྱལ་གཟུངས་འཛིན་ཞེན་པས་བསྒྲིབས༔ དབུ་མ་བདེན་གཉིས་མཐའ་ལ་ཞེན་པས་བསྒྲིབས༔ ཀྲི་ཡོག་བསྙེན་སྒྲུབ་མཐའ་ལ་ཞེན་པས་བསྒྲིབས༔ མ་ཧཱ་ཨ་ནུ་དབྱིངས་རིག་ཞེན་པས་བསྒྲིབས༔ གཉིས་མེད་དོན་ལ་གཉིས་སུ་ཕྱེས་བས་གོལ༔ གཉིས་མེད་གཅིག་ཏུ་མ་གྱུར་སངས་མི་རྒྱ༔ ཐམས་ཅད་རང་སེམས་འཁོར་འདས་དབྱེར་མེད་ལ༔ སྤང་བླང་འདོར་ལེན་ཐེག་པས་འཁོར་བར་འཁྱམས༔ རང་རིག་སྐུ་གསུམ་རྩོལ་མེད་ལྷུན་གྲུབ་ལ༔ འདི་མིན་ཐག་རིང་གཞན་དུ་བགྲོད་ཐབས་ཀྱིས༔ ས་ལམ་རྩི་བའི་རྨོངས་པ་དོན་ལ་གཡེལ༔ སངས་རྒྱས་དགོངས་པ་བློ་ལས་འདས་པ་ལ༔ དམིགས་གཏད་མཚན་མའི་སྒོམ་བཟླས་བྱེད་པས་འཁྲུལ༔ དེ་ཕྱིར་བྱས་ཆོས་བྱེ་བྲག་ཀུན་བསྐྱུར་ལ༔ འདི་ལྟར་རིག་པ་ཅེར་མཐོང་རང་གྲོལ་དུ༔ བསྟན་པས་ཆོས་ཀུན་རང་གྲོལ་ཆེན་པོར་རྟོགས༔ དེ་ཕྱིར་རྫོགས་པ་ཆེན་པོར་ཀུན་ཀྱང་རྫོགས༔ ས་མ་ཡ༔ རྒྱ་རྒྱ་རྒྱ༔ ཨེ་མ་ཧོ༔ སེམས་ཞེས་བྱ་བའི་རིག་རིག་ཏུར་ཏུར་པོ༔ ཡོད་ནི་གཅིག་ཀྱང་ཡོད་པ་མ་ཡིན་ཏེ༔ བྱུང་ནི་འཁོར་འདས་བདེ་སྡུག་སྣ་ཚོགས་བྱུང་༔ འདོད་ནི་ཐེག་པ་བཅུ་གཉིས་ལྟར་དུ་འདོད༔ མིང་ནི་བསམ་གྱིས་མི་ཁྱབ་སོ་སོར་བཏགས༔ ལ་ལ་དག་གིས་སེམས་ཉིད་སེམས་ཉིད་ཟེར༔ མུ་སྟེགས་ལ་ལས་བདག་ཅེས་མིང་དུ་བཏགས༔ ཉན་ཐོས་པས་ནི་གང་ཟག་བདག་མེད་ཟེར༔ སེམས་ཙམ་པས་ནི་སེམས་ཞེས་མིང་དུ་བཏགས༔ ལ་ལས་དབུ་མ་ཞེས་པའི་མིང་དུུ་བཏགས༔ ལ་ལས་ཤེས་རབ་ཕ་རོལ་ཕྱིན་པ་ཟེར༔ ལ་ལས་བདེ་གཤེགས་སྙིང་པོ་མིང་དུ་བཏགས༔ ལ་ལས་ཕྱག་རྒྱ་ཆེན་པོ་མིང་དུ་བཏགས༔ ལ་ལས་ཐིག་ལེ་ཉག་གཅིག་མིང་དུ་བཏགས༔ ལ་ལས་ཆོས་ཀྱི་དབྱིངས་ཞེས་མིང་དུ་བཏགས༔ ལ་ལས་ཀུན་གཞི་ཞེས་པའི་མིང་དུ་བཏགས༔ ལ་ལས་ཐ་མལ་ཤེས་པ་མིང་དུ་བཏགས༔ འདི་ཉིད་མངོན་སུམ་མཛུབ་ཚུགས་ངོ་སྤྲད་ན༔ འདས་པའི་རྟོག་པ་རྗེས་མེད་ཡལ་བའི་རྟིང་༔ མ་འོངས་རྟོག་པ་མ་སྐྱེས་སོ་མ་ལ༔ ད་ལྟར་བཟོ་མེད་རང་ལུགས་གནས་པའི་དུས༔ ཐ་མལ་དུས་ཀྱི་ཤེས་པ་འདི་ཀ་ལ༔ རང་གི་རང་ལ་ཅེར་གྱིས་བལྟས་པའི་ཚེ༔ བལྟས་པས་མཐོང་རྒྱུ་མེད་པའི་སལ་ལེ་བ༔ རིག་པ་མངོན་སུམ་རྗེན་པ་ཧྲིག་གེ་བ༔ ཅི་ཡང་གྲུབ་པ་མེད་པས་སྟོང་སང་ངེ་༔ གསལ་སྟོང་གཉིས་སུ་མེད་པས་ཡེར་རེ་བ༔ རྟག་པ་མ་ཡིན་ཅིར་ཡང་གྲུབ་པ་མེད༔ ཆད་པ་མ་ཡིན་སལ་ལེ་ཧྲིག་གེ་བ༔ གཅིག་ཏུ་མ་ཡིན་དུ་མ་རིག་ཅིང་གསལ༔ དུ་མ་མ་གྲུབ་དབྱེར་མེད་རོ་གཅིག་ངང་༔ གཞན་ནས་མེད་དེ་རང་རིག་འདི་ཉིད་དོ༔ དངོས་པོའི་གནས་ལུགས་དོན་གྱི་ངོ་སྤྲོད་དེ༔ འདི་ལ་སྐུ་གསུམ་དབྱེར་མེད་གཅིག་ཏུ་ཚང་༔ ཅིར་ཡང་མ་གྲུབ་སྟོང་པ་ཆོས་ཀྱི་སྐུ༔ སྟོང་པའི་རང་གདངས་གསལ་བ་ལོངས་སྐུ་ཡིན༔ འགག་མེད་ཅིར་ཡང་འཆར་བ་སྤྲུལ་པའི་སྐུ༔ གསུམ་ཀ་གཅིག་ཏུ་ཚང་བ་ངོ་བོ་ཉིད༔ འདི་ཉིད་མཛུབ་ཚུགས་བཙན་ཐབས་ངོ་སྤྲད་ན༔ ད་ལྟ་རང་གི་ཤེས་པ་འདི་ཀ་ཡིན༔ མ་བཅོས་རང་གསལ་འདི་ཀ་ཡིན་པ་ལ༔ སེམས་ཉིད་མ་རྟོགས་བྱ་བ་ཅི་ལ་ཟེར༔ འདི་ལ་བསྒོམ་རྒྱུ་ཅི་ཡང་མེད་པ་ལ༔ བསྒོམ་པས་མ་བྱུང་བྱ་བ་ཅི་ལ་ཟེར༔ རིག་པ་མངོན་སུམ་འདི་ཀ་ཡིན་པ་ལ༔ རང་སེམས་མ་རྙེད་བྱ་བ་ཅི་ལ་ཟེར༔ གསལ་རིག་རྒྱུན་ཆད་མེད་པ་འདི་ཀ་ལ༔ སེམས་ངོ་མ་མཐོང་བྱ་བ་ཅི་ལ་ཟེར༔ ཡིད་ཀྱི་བསམ་མཁན་ཁོ་རང་ཡིན་པ་ལ༔ བཙལ་བས་མ་རྙེད་བྱ་བ་ཅི་ལ་ཟེར༔ འདི་ལ་བྱ་རྒྱུ་ཅི་ཡང་མེད་པ་ལ༔ བྱས་པས་མ་བྱུང་བྱ་བ་ཅི་ལ་ཟེར༔ མ་བཅོས་རང་གསལ་བཞག་པས་ཆོག་པ་ལ༔ གནས་སུ་མ་བཏུབ་བྱ་བ་ཅི་ལ་ཟེར༔ བྱར་མེད་ཅོག་གེར་བཞག་པས་ཆོག་པ་ལ༔ དེ་ལ་མ་ནུས་བྱ་བ་ཅི་ལ་ཟེར༔ གསལ་རིག་སྟོང་གསུམ་དབྱེར་མེད་ལྷུན་གྲུབ་ལ༔ བསྒྲུབས་པས་མ་གྲུབ་བྱ་བ་ཅི་ལ་ཟེར༔ རྒྱུ་རྐྱེན་མེད་པ་རང་བྱུང་ལྷུན་གྲུབ་ལ༔ རྩོལ་བས་མ་ནུས་བྱ་བ་ཅི་ལ་ཟེར༔ རྟོག་པ་ཤར་གྲོལ་དུས་མཉམ་ཡིན་པ་ལ༔ གཉེན་པོས་མ་ཐུབ་བྱ་བ་ཅི་ལ་ཟེར༔ ད་ལྟའི་ཤེས་པ་འདི་ཀ་ཡིན་པ་ལ༔ འདི་ལ་མི་ཤེས་བྱ་བ་ཅི་ལ་ཟེར༔ སེམས་ཉིད་སྟོང་པ་གཞི་མེད་ཡིན་པར་ངེས༔ རང་སེམས་དངོས་མེད་ནམ་མཁའ་སྟོང་པ་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ སྟོང་པ་ཕྱང་ཆད་ཆད་ལྟ་མ་ཡིན་པར༔ རང་བྱུང་ཡེ་ཤེས་ཡེ་ནས་གསལ་བར་ངེས༔ རང་བྱུང་རང་གསལ་ཉི་མའི་སྙིང་པོ་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ རིག་པ་ཡེ་ཤེས་རྒྱུན་ཆད་མེད་པར་ངེས༔ རིག་པ་རྒྱུན་ཆད་མེད་པ་ཆུ་རྒྱུན་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ རྣམ་རྟོག་འགྱུ་དྲན་ངོས་བཟུང་མེད་པར་ངེས༔ འགྱུ་བ་དངོས་མེད་བར་སྣང་སེར་བུ་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ ཅི་སྣང་ཐམས་ཅད་རང་སྣང་ཡིན་པར་ངེས༔ སྣང་བ་རང་སྣང་མེ་ལོང་གཟུགས་བརྙན་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ མཚན་མ་ཐམས་ཅད་རང་སར་གྲོལ་བར་ངེས༔ རང་བྱུང་རང་གྲོལ་བར་སྣང་སྤྲིན་དང་འདྲ༔ འདྲ་འམ་མི་འདྲ་རང་གི་སེམས་ལ་ལྟོས༔ སེམས་ལས་མ་གཏོགས་གཞན་ན་ཆོས་མེད་པས༔ ལྟ་བས་བལྟ་རྒྱུ་གཞན་ན་ཆོས་མེད་དོ༔ སེམས་ལས་མ་གཏོགས་གཞན་ན་ཆོས་མེད་པས༔ སྒོམ་པས་བསྒོམ་རྒྱུ་གཞན་ན་ཆོས་མེད་དོ༔ སེམས་ལས་མ་གཏོགས་གཞན་ན་ཆོས་མེད་པས༔ སྤྱོད་པ་སྤྱོད་རྒྱུ་གཞན་ན་ཆོས་མེད་དོ༔ སེམས་ལས་མ་གཏོགས་གཞན་ན་ཆོས་མེད་པས༔ དམ་ཚིག་བསྲུང་རྒྱུ་གཞན་ན་ཆོས་མེད་དོ༔ སེམས་ལས་མ་གཏོགས་གཞན་ན་ཆོས་མེད་པས༔ འབྲས་བུ་བསྒྲུབ་རྒྱུ་གཞན་ན་ཆོས་མེད་དོ༔ ཡང་ལྟོས་ཡང་ལྟོས་རང་གི་སེམས་ལ་ལྟོས༔ ཕྱི་རོལ་ནམ་མཁའི་དབྱིངས་སུ་ཕར་བལྟས་པས༔ སེམས་འདི་འཕྲོ་བས་འཕྲོ་ས་མི་གདའ་ན༔ ནང་དུ་རང་གི་སེམས་ལ་ཚུར་བལྟས་པས༔ རྟོག་པ་འཕྲོ་བའི་འཕྲོ་མཁན་མི་གདའ་ན༔ རང་སེམས་འཕྲོ་འཕྲོ་མེད་པའི་སལ་ལེ་བ༔ རང་རིག་འོད་གསལ་སྟོང་པ་ཆོས་ཀྱི་སྐུ༔ སྤྲིན་མེད་དྭངས་པའི་མཁའ་ལ་ཉི་ཤར་འདྲ༔ རྣམ་རྟོག་མི་མངའ་ཅིར་ཡང་སལ་ལེར་མཁྱེན༔ འདི་དོན་རྟོགས་དང་མ་རྟོགས་ཁྱད་པར་ཆེ༔ གདོད་ནས་མ་སྐྱེས་རང་བྱུང་འོད་གསལ་འདི༔ ཕ་མ་མེད་པའི་རིག་པའི་ཁྱེའུ་ཆུང་མཚར༔ སུས་ཀྱང་མ་བྱས་རང་བྱུང་ཡེ་ཤེས་མཚར༔ སྐྱེ་མ་མྱོང་ཞིང་འཆི་རྒྱུ་མེད་པ་མཚར༔ མངོན་སུམ་གསལ་ཡང་མཐོང་མཁན་མེད་པ་འཚར༔ འཁོར་བ་འཁྱམས་ཀྱང་ངན་དུ་མི་འགྲོ་མཚར༔ སངས་རྒྱས་ཐོབ་ཀྱང་བཟང་དུ་མི་འགྲོ་མཚར༔ ཀུན་ལ་ཡོད་ཀྱང་ངོ་མ་ཤེས་པ་མཚར༔ འདི་བཞག་འབྲས་བུ་གཞན་ཞིག་རེ་བ་མཚར༔ རང་ལ་ཡོད་ཀྱང་གཞན་དུ་བཙལ་བ་མཚར༔ ཨེ་མ་ཧོ༔ ད་ལྟའི་རིག་པ་དངོས་མེད་གསལ་བ་འདི༔ འདི་ཀ་ལྟ་བ་ཀུན་གྱི་ཡང་རྩེ་ཡིན༔ དམིགས་མེད་ཁྱབ་གདལ་བློ་དང་བྲལ་བ་འདི༔ འདི་ཀ་སྒོམ་པ་ཀུན་གྱི་ཡང་རྩེ་ཡིན༔ མ་བཅོས་འཛིན་མེད་ལྷུག་པར་འཇོག་པ་འདི༔ འདི་ཀ་སྤྱོད་པ་ཀུན་གྱི་ཡང་རྩེ་ཡིན༔ མ་བཙལ་ཡེ་ནས་ལྷུན་གྱིས་གྲུབ་པ་འདི༔ འདི་ཀ་འབྲས་བུ་ཀུན་གྱི་ཡང་རྩེ་ཡིན༔ ནོར་བ་མེད་པས་ཐིག་ཆེན་བཞི་བསྟན་པ༔ ལྟ་བ་ནོར་ས་མེད་པའི་ཐིག་ཆེན་ནི༔ ད་ལྟའི་རིག་པ་སལ་ལེ་འདི་ཡིན་པས༔ གསལ་ལ་མི་ནོར་བས་ན་ཐིག་ཅེས་བྱ༔ སྒོམ་པ་ནོར་ས་མེད་པའི་ཐིག་ཆེན་ནི༔ ད་ལྟའི་ཤེས་པ་སལ་ལེ་འདི་ཡིན་པས༔ གསལ་ལ་མི་ནོར་བས་ན་ཐིག་ཅེས་བྱ༔ སྤྱོད་པ་ནོར་ས་མེད་པའི་ཐིག་ཆེན་ནི༔ ད་ལྟའི་ཤེས་པ་སལ་ལེ་འདི་ཡིན་པས༔ གསལ་ལ་མི་ནོར་བས་ན་ཐིག་ཅེས་བྱ༔ འབྲས་བུ་ནོར་ས་མེད་པའི་ཐིག་ཆེན་ནི༔ ད་ལྟའི་ཤེས་པ་སལ་ལེ་འདི་ཡིན་པས༔ གསལ་ལ་མི་ནོར་བས་ན་ཐིག་ཅེས་བྱ༔ མི་འགྱུར་བ་ཡི་གཟེར་ཆེན་བཞི་བསྟན་པ༔ ལྟ་བ་འགྱུར་བ་མེད་པའི་གཟེར་ཆེན་ནི༔ ད་ལྟའི་ཤེས་རིག་སལ་ལེ་འདི་ཀ་ཡིན༔ དུས་གསུམ་བརྟན་པའི་ཕྱིར་ན་གཟེར་ཞེས་བྱ༔ སྒོམ་པ་འགྱུར་བ་མེད་པའི་གཟེར་ཆེན་ནི༔ ད་ལྟའི་ཤེས་རིག་སལ་ལེ་འདི་ཀ་ཡིན༔ དུས་གསུམ་བརྟན་པའི་ཕྱིར་ན་གཟེར་ཞེས་བྱ༔ སྤྱོད་པ་འགྱུར་བ་མེད་པའི་གཟེར་ཆེན་ནི༔ ད་ལྟའི་ཤེས་རིག་སལ་ལེ་འདི་ཀ་ཡིན༔ དུས་གསུམ་བརྟན་པའི་ཕྱིར་ན་གཟེར་ཞེས་བྱ༔ འབྲས་བུ་འགྱུར་བ་མེད་པའི་གཟེར་ཆེན་ནི༔ ད་ལྟའི་ཤེས་རིག་སལ་ལེ་འདི་ཀ་ཡིན༔ དུས་གསུམ་བརྟན་པའི་ཕྱིར་ན་གཟེར་ཞེས་བྱ༔ དུས་གསུམ་གཅིག་ཏུ་བཞག་པའི་མན་ངག་ནི༔ སྔར་རྗེས་མི་བཅད་འདས་པའི་འདུ་ཤེས་དོར༔ ཕྱི་མདུན་མི་བསུ་ཡིད་ཀྱི་འབྲེལ་ཐག་བཅད༔ ད་ལྟ་འཛིན་མེད་ནམ་མཁའི་ངང་ལ་བཞག༔ སྒོམ་དུ་མེད་དེ་ཅིར་ཡང་མི་སྒོམ་ཞིང་༔ ཡེངས་སུ་མེད་དེ་ཡེངས་མེད་དྲན་པ་བརྟེན༔ སྒོམ་མེད་ཡེངས་མེད་ངང་ལ་ཅེར་གྱིས་ལྟོས༔ རང་རིག་ཤེས་པ་རང་གསལ་ལྷང་ངེ་བ༔ ཤར་བ་དེ་ཀ་བྱང་ཆུབ་སེམས་ཞེས་བྱ༔ བསྒོམ་དུ་མེད་དེ་ཤེས་བྱའི་ཡུལ་ལས་འདས༔ ཡེངས་སུ་མེད་དེ་ངོ་བོ་ཉིད་ཀྱིས་གསལ༔ སྣང་སྟོང་རང་གྲོལ་གསལ་སྟོང་ཆོས་ཀྱི་སྐུ༔ སངས་རྒྱས་ལམ་གྱིས་མི་བསྒྲུབ་མངོན་གྱུར་པས༔ རྡོ་རྗེ་སེམས་དཔའ་དུས་འདིར་མཐོང་བ་ཡིན༔ མཐར་ཐུག་ཟད་སར་སྐྱོལ་བའི་གདམས་པ་ནི༔ ལྟ་བ་མི་མཐུན་རྒྱ་ཆེར་གྲངས་མང་ཡང་༔ རང་རིག་སེམས་ཉིད་རང་བྱུང་ཡེ་ཤེས་ལ༔ འདི་ལ་བལྟ་བྱ་ལྟ་བྱེད་གཉིས་སུ་མེད༔ ལྟ་བ་མ་བལྟ་ལྟ་མཁན་མཁན་པོ་ཚོལ༔ ལྟ་མཁན་ཁོ་རང་བཙལ་བས་མ་རྙེད་ན༔ དེ་ཚེ་ལྟ་བ་ཟད་སར་སྐྱོལ་བ་ཡིན༔ ལྟ་བའི་ཕུག་ཀྱང་དེ་ཀ་རང་ལ་ཐུག༔ ལྟ་བས་བལྟ་རྒྱུ་ཅི་ཡང་མེད་པ་ལ༔ ཡེ་མེད་སྟོང་པ་ཕྱལ་བར་མ་སོང་བར༔ ད་ལྟའི་རང་རིག་ཤེས་པ་སལ་ལེ་བ༔ རྫོགས་པ་ཆེན་པོའི་ལྟ་བ་དེ་ཀ་ཡིན༔ རྟོགས་དང་མ་རྟོགས་དེ་ལ་གཉིས་སུ་མེད༔ སྒོམ་པ་མི་མཐུན་རྒྱ་ཆེན་གྲངས་མང་ཡང་༔ རང་རིག་ཐ་མལ་ཤེས་པ་ཟང་ཐལ་ལ༔ བསྒོམ་བྱ་དང་ནི་སྒོམ་བྱེད་གཉིས་སུ་མེད༔ སྒོམ་པས་མ་སྒོམས་སྒོམ་པའི་མཁན་པོ་ཚོལ༔ སྒོམ་པའི་མཁན་པོ་བཙལ་བས་མ་རྙེད་ན༔ དེ་ཚེ་སྒོམ་པ་ཟད་སར་སྐྱོལ་བ་ཡིན༔ སྒོམ་པའི་ཕུག་ཀྱང་དེ་ཀ་རང་ལ་ཐུག༔ བསྒོམ་པར་བྱ་རྒྱུ་ཅི་ཡང་མེད་པ་ལ༔ བྱིང་རྨུགས་འཐིབ་རྒོད་དབང་དུ་མ་སོང་བར༔ ད་ལྟ་མ་བཅོས་ཤེས་པ་སལ་ལེ་བ༔ མ་བཅོས་མཉམ་པར་བཞག་པ་བསམ་གཏན་ཡིན༔ གནས་དང་མི་གནས་དེ་ལ་གཉིས་སུ་མེད༔ སྤྱོད་པ་མི་མཐུན་རྒྱ་ཆེན་གྲངས་མང་ཡང་༔ རང་རིག་ཡེ་ཤེས་ཐིག་ལེ་ཉག་གཅིག་ལ༔ སྤྱད་བྱ་དང་ནི་སྤྱོད་བྱེད་གཉིས་སུ་མེད༔ སྤྱོད་པ་མ་སྤྱོད་སྤྱོད་མཁན་དེ་ཉིད་ཚོལ༔ སྤྱོད་མཁན་དེ་ཉིད་བཙལ་བས་མ་རྙེད་ན༔ དེ་ཚེ་སྤྱོད་པ་ཟད་སར་སྐྱོལ་བ་ཡིན༔ སྤྱོད་པའི་ཕུག་ཀྱང་དེ་ཀ་རང་ལ་ཐུག༔ སྤྱོད་པར་བྱ་རྒྱུ་ཅི་ཡང་མེད་པ་ལ༔ བག་ཆགས་འཁྲུལ་བའི་དབང་དུ་མ་སོང་བར༔ ད་ལྟའི་ཤེས་པ་མ་བཅོས་རང་གསལ་ལ༔ བཅོས་བསླད་བླང་དོར་གང་ཡང་མི་བྱེད་པར༔ དེ་ཀ་རྣམ་པར་དག་པའི་སྤྱོད་པ་ཡིན༔ དག་དང་མ་དག་དེ་ལ་གཉིས་སུ་མེད༔ འབྲས་བུ་མི་མཐུན་རྒྱ་ཆེ་གྲངས་མང་ཡང་༔ རང་རིག་སེམས་ཉིད་སྐུ་གསུམ་ལྷུན་གྲུབ་ལ༔ བསྒྲུབ་བྱ་དང་ནི་སྒྲུབ་བྱེད་གཉིས་སུ་མེད༔ འབྲས་བུ་མ་སྒྲུབས་སྒྲུབ་མཁན་དེ་ཉིད་ཚོལ༔ སྒྲུབ་མཁན་དེ་ཉིད་བཙལ་བས་མ་རྙེད་ན༔ དེ་ཚེ་འབྲས་བུ་ཟད་སར་སྐྱོལ་བ་ཡིན༔ འབྲས་བུའི་ཕུག་ཀྱང་དེ་ཀ་རང་ལ་ཐུག༔ འབྲས་བུ་བསྒྲུབ་རྒྱུ་ཅི་ཡང་མེད་པ་ལ༔ སྤང་བླང་རེ་དོགས་དབང་དུ་མ་སོང་བར༔ ད་ལྟའི་ཤེས་རིག་རང་གསལ་ལྷུན་གྲུབ་ལ༔ མངོན་གྱུར་སྐུ་གསུམ་རང་གསལ་རྟོགས་པ་ཉིད༔ ཡེ་སངས་རྒྱས་པའི་འབྲས་བུ་དེ་ཉིད་དོ༔ རྟག་ཆད་མཐའ་བརྒྱད་བྲལ་བའི་རིག་པ་འདི༔ གང་གི་མཐར་མ་ལྷུང་བས་དབུ་མ་ཟེར༔ དྲན་རིག་རྒྱུན་ཆད་མེད་པས་རིག་པ་ཟེར༔ སྟོང་པ་རིག་པའི་སྙིང་པོ་ཅན་ཡིན་པས༔ དེ་ཕྱིར་བདེ་གཤེགས་སྙིང་པོ་མིང་དུ་བཏགས༔ འདི་དོན་ཤེས་ན་ཤེས་བྱ་ཀུན་གྱི་རབ༔ དེ་ཕྱིར་ཤེས་རབ་ཕ་རོལ་ཕྱིན་པ་ཟེར༔ བློ་འདས་མཐའ་དང་ཡེ་ནས་བྲལ་བའི་ཕྱིར༔ དེ་ཕྱིར་ཕྱག་རྒྱ་ཆེན་པོ་མིང་དུ་བཏགས༔ དེ་ཉིད་རྟོགས་དང་མ་རྟོགས་ཁྱད་པར་ལས༔ འཁོར་འདས་བདེ་སྡུག་ཀུན་གྱི་གཞིར་གྱུར་པས༔ དེ་ཕྱིར་ཀུན་གཞི་ཞེས་པའི་མིང་དུ་བཏགས༔ བཟོ་མེད་ཐ་མལ་རང་གར་གནས་དུས་ཀྱི༔ ཤེས་པ་སལ་ལེ་ཧྲིག་གེ་འདི་ཀ་ལ༔ ཐ་མལ་ཤེས་པ་ཞེས་བྱའི་མིང་དུ་བཏགས༔ བཟང་མདོག་སྙན་མིང་མང་པོ་ཅི་བཏགས་ཀྱང་༔ དོན་ལ་ད་ལྟའི་ཤེས་རིག་འདི་ཀ་ལས༔ འདི་མིན་གཞན་ལས་ལྷག་པ་སུས་འདོད་པ༔ གླང་པོ་རྙེད་ཀྱང་རྗེས་ཚོལ་དེ་བཞིན་དུ༔ སྟོང་གསུམ་ཐག་ཏུ་བྲན་ཡང་རྙེད་མི་སྲིད༔ སེམས་ལས་མ་གཏོགས་སངས་རྒྱས་རྙེད་མི་སྲིད༔ འདི་ངོ་མ་ཤེས་ཕྱི་རོལ་སེམས་བཙལ་ཀྱང་༔ རང་གིས་གཞན་ཚོལ་རང་ཉིད་ཅི་ཕྱིར་རྙེད༔ དཔེར་ན་གླེན་པ་གཅིག་གིས་མི་མང་ཁྲོད༔ ལྟད་མོ་བྱས་པས་རང་ཉིད་སྟོར་ནས་སུ༔ རང་ངོ་མ་ཤེས་གཞན་དུ་ཚོལ་བ་ཡང་༔ རང་གིས་གཞན་ཚོལ་འཁྲུལ་བ་དེ་བཞིན་ནོ༔ དངོས་པོ་གཤིས་ཀྱི་གནས་ལུགས་མ་མཐོང་བས༔ སྣང་བ་སེམས་སུ་མ་ཤེས་འཁོར་བར་གོལ༔ རང་སེམས་སངས་རྒྱས་མ་རྟོགས་མྱང་འདས་བསྒྲིབས༔ འཁོར་འདས་གཉིས་ལ་རིག་དང་མ་རིག་གིས༔ སྐད་ཅིག་གཅིག་གི་བར་ལ་བྱེ་བྲག་ཕྱེད༔ རང་གི་སེམས་ལ་གཞན་དུ་མཐོང་བས་འཁྲུལ༔ འཁྲུལ་དང་མ་འཁྲུལ་ངོ་བོ་གཅིག་པ་སྟེ༔ འགྲོ་ལ་སེམས་རྒྱུད་གཉིས་སུ་མ་གྲུབ་པས༔ སེམས་ཉིད་མ་བཅོས་རང་སར་བཞག་པས་གྲོལ༔ འཁྲུལ་བ་དེ་ཉིད་སེམས་སུ་མ་རིག་ན༔ ཆོས་ཉིད་དོན་དེ་ནམ་ཡང་མི་རྟོགས་པས༔ རང་བྱུང་རང་ཤར་རང་གསལ་རང་ལ་བལྟ༔ སྣང་བ་འདི་དག་དང་པོ་གང་ནས་བྱུང་༔ བར་དུ་གང་ན་གནས་ཤིང་མཐའ་གར་འགྲོ༔ བལྟས་པས་དཔེར་ན་རྫིང་གི་བྱ་རོག་གིས༔ རྫིང་ནས་འཕུར་ཀྱང་རྫིང་ལས་ལོགས་ས་མེད༔ དེ་བཞིན་སྣང་བ་སེམས་ལ་འཆར་བའི་ཕྱིར༔ རང་གི་སེམས་ལ་ཤར་ཞིང་སེམས་སུ་གྲོལ༔ སེམས་ཉིད་ཀུན་ཤེས་ཀུན་རིག་སྟོང་གསལ་འདི༔ གདོད་ནས་གསལ་སྟོང་དབྱེར་མེད་ནམ་མཁའ་ལྟར༔ རང་བྱུང་ཡེ་ཤེས་མངོན་སུམ་གསལ་བ་རུ༔ གཏན་ལ་ཕེབ་ན་དེ་ཀ་ཆོས་ཉིད་དོ༔ ཡིན་པའི་རྟགས་ནི་སྣང་སྲིད་ཐམས་ཅད་ཀུན༔ རང་གི་སེམས་སུ་རིག་ཅིང་སེམས་ཉིད་འདི༔ རིག་ཅིང་གསལ་བས་ནམ་མཁའ་ལྟ་བུར་རྟོགས༔ ཆོས་ཉིད་མཚོན་པའི་ནམ་མཁའ་དཔེར་བཞག་ཀྱང་༔ རེ་ཞིག་ཕྱོགས་ཙམ་མཚོན་པའི་བརྡ་ཙམ་སྟེ༔ སེམས་ཉིད་རིག་བཅས་སྟོང་པ་ཅིར་ཡང་གསལ༔ ནམ་མཁའ་རིག་མེད་སྟོང་པ་བེམ་སྟོང་སྟེ༔ དེ་ཕྱིར་སེམས་དོན་ནམ་མཁས་མཚོན་དུ་མེད༔ ཡེངས་སུ་མེད་དེ་དེ་ཀའི་ངང་ལ་ཞོག༔ སྣང་བ་ཀུན་རྫོབ་སྣ་ཚོགས་འདི་དག་ཀྱང་༔ གཅིག་ཀྱང་བདེན་པར་མ་གྲུབ་འཛིན་པ་བཞིན༔ དེས་ན་སྣང་སྲིད་འཁོར་འདས་ཐམས་ཅད་ཀུན༔ རང་གི་སེམས་ཉིད་གཅིག་གི་མཐོང་སྣང་ཡིན༔ གང་ཚེ་རང་གི་སེམས་རྒྱུད་འགྱུར་ཙམ་ན༔ ཕྱི་རུ་འགྱུར་བས་དེ་ཡི་མཐོང་སྣང་འབྱུང་༔ དེས་ན་ཐམས་ཅད་སེམས་ཀྱི་མཐོང་སྣང་སྟེ༔ འགྲོ་བ་རིགས་དྲུག་སོ་སོའི་སྣང་བར་མཐོང་༔ ཕྱི་རོལ་མུ་སྟེགས་རྟག་ཆད་གཉིས་སུ་མཐོང་༔ ཐེག་པ་རིམ་དགུ་སོ་སོའི་ལྟ་བ་མཐོང་༔ སྣ་ཚོགས་མཐོང་ཞིང་སྣ་ཚོགས་མི་གཅིག་པ༔ ཐ་དད་བཟུང་བས་སོ་སོའི་ཞེན་པས་འཁྲུལ༔ སྣང་བ་ཐམས་ཅད་སེམས་ཀྱི་རིག་པས་ན༔ མཐོང་སྣང་ཤར་ཡང་འཛིན་མེད་སངས་རྒྱས་ཡིན༔ སྣང་བ་མ་འཁྲུལ་འཛིན་པས་འཁྲུལ་བ་ཡིན༔ འཛིན་རྟོག་སེམས་སུ་ཤེས་ན་ངང་གིས་གྲོལ༔ ཅིར་སྣང་ཐམས་ཅད་སེམས་ཀྱིས་སྣང་བ་ཡིན༔ སྣོད་ཀྱི་འཇིག་རྟེན་བེམ་པོར་སྣང་བའང་སེམས༔ བཅུད་ཀྱི་སེམས་ཅན་རིགས་དྲུག་སྣང་བའང་སེམས༔ མཐོ་རིས་ལྷ་མིའི་བདེ་བ་སྣང་བའང་སེམས༔ ངན་སོང་གསུམ་གྱི་སྡུག་བསྔལ་སྣང་བའང་སེམས༔ མ་རིག་ཉོན་མོངས་དུག་ལྔའི་སྣང་བའང་སེམས༔ རང་བྱུང་ཡེ་ཤེས་རིག་པར་སྣང་བའང་སེམས༔ ངན་རྟོག་འཁོར་བའི་བག་ཆགས་སྣང་བའང་སེམས༔ བཟང་རྟོག་མྱང་འདས་ཞིང་ཁམས་སྣང་བའང་སེམས༔ བདུད་དང་འདྲེ་ཡི་བར་ཆད་སྣང་བའང་སེམས༔ ལྷ་དང་དངོས་གྲུབ་ལེགས་པར་སྣང་བའང་སེམས༔ རྣམ་པར་རྟོག་པ་སྣ་ཚོགས་སྣང་བའང་སེམས༔ མི་རྟོག་རྩེ་གཅིག་བསྒོམ་པར་གནས་པའང་སེམས༔ དངོས་པོ་མཚན་མའི་ཁ་དོག་སྣང་བའང་སེམས༔ མཚན་མ་མེད་ཅིང་སྤྲོས་པ་མེད་པའང་སེམས༔ གཅིག་དང་དུ་མ་གཉིས་མེད་སྣང་བའང་སེམས༔ ཡོད་མེད་གང་དུ་མ་གྲུབ་སྣང་བའང་སེམས༔ སེམས་ལས་མ་གཏོགས་སྣང་བ་གང་ཡང་མེད༔ སེམས་ཉིད་མ་འགགས་སྣང་བ་གང་ཤར་ཡང་༔ ཤར་ཀྱང་མཚོ་ཡི་ཆུ་དང་ཆུ་རླབས་བཞིན༔ གཉིས་སུ་མེད་དེ་སེམས་ཀྱི་ངང་དུ་གྲོལ༔ བཏག་བྱ་མ་འགགས་མིང་འདོགས་ཅིར་བཏགས་ཀྱང་༔ དོན་ལ་སེམས་ཉིད་གཅིག་ལས་ཡོད་མ་ཡིན༔ གཅིག་པུ་དེ་ཡང་གཞི་མེད་རྩ་བྲལ་ཡིན༔ གང་གི་ཕྱོགས་སུའང་མཐོང་བ་གཅིག་ཀྱང་མེད༔ དངོས་པོར་མ་མཐོང་ཅིར་ཡང་གྲུབ་པ་མེད༔ སྟོང་པར་མ་མཐོང་རིག་ཅིང་གསལ་བའི་མདངས༔ སོ་སོར་མ་མཐོང་གསལ་སྟོང་དབྱེར་མེད་ངང་༔ ད་ལྟ་རང་གི་རིག་པ་གསལ་ཧྲིག་གེ༔ ཡིན་པར་བྱས་ཀྱང་དེ་ཉིད་བྱེད་མི་ཤེས༔ རང་བཞིན་མེད་ཀྱང་ཉམས་སུ་མངོན་སུམ་མྱོང་༔ འདི་ཉིད་ཉམས་སུ་མྱོང་ན་ཀུན་གྲོལ་ཏེ༔ དབང་པོ་དག་ལ་རྣོ་རྟུལ་མེད་པར་རྟོགས༔ ཏིལ་དང་འོ་མ་མར་གྱི་རྒྱུ་ཡིན་ཀྱང་༔ མ་བསྲུབས་མ་བཙིར་མར་ཁུ་མི་འབྱུང་ལྟར༔ འགྲོ་ཀུན་སངས་རྒྱས་སྙིང་པོ་དངོས་ཡིན་ཀྱང་༔ ཉམས་སུ་མ་བླངས་སེམས་ཅན་སངས་མི་རྒྱ༔ ཉམས་སུ་བླངས་ན་བ་གླང་རྫི་ཡང་གྲོལ༔ བཤད་མི་ཤེས་ཀྱང་མངོན་སུམ་གཏན་ལ་ཕེབ༔ རང་གི་ཁ་རུ་མྱོང་བའི་བུ་རམ་ལ༔ གཞན་གྱིས་དེ་ཡི་རོ་བཤད་མི་དགོས་བཞིན༔ འདི་ཉིད་མ་རྟོགས་པཎྜི་ཏ་ཡང་འཁྲུལ༔ ཐེག་དགུའི་བཤད་པ་ཤེས་བྱར་མཁས་གྱུར་ཀྱང་༔ མ་མཐོང་རྒྱང་གི་གཏམ་རྒྱུད་སྙན་པ་བཞིན༔ སངས་རྒྱས་ལ་ནི་སྐད་ཅིག་ཉེར་མ་སོང་༔ འདི་ཉིད་རྟོགས་ན་དགེ་སྡིག་རང་སར་གྲོལ༔ འདི་ཉིད་མ་རྟོགས་དགེ་སྡིག་གང་སྤྱད་ཀྱང་༔ མཐོ་རིས་ངན་སོང་འཁོར་བ་ལས་མི་འཕགས༔ རང་སེམས་སྟོངས་གསལ་ཡེ་ཤེས་རྟོགས་ཙམ་ན༔ དགེ་སྡིག་ཕན་གནོད་གང་ཡང་མ་གྲུབ་བོ༔ བར་སྣང་སྟོང་པར་ཆུ་མི་ཆགས་པ་བཞིན༔ སྟོང་པ་ཉིད་ལ་དགེ་སྡིག་ཡེ་མ་གྲུབ༔ དེས་ན་རང་རིག་མངོན་སུམ་ཅར་ཕོག་ཏུ༔ ཅེར་མཐོང་རང་གྲོལ་འདི་ཉིད་རབ་ཏུ་ཟབ༔ དེ་ཕྱིར་རང་རིག་འདི་ལ་འདྲིས་པར་གྱིས༔ ཟབ་རྒྱ་རྒྱ་རྒྱ༔ ཨེ་མ་ཧོ༔ རིག་པ་ངོ་སྤྲོད་ཅེར་མཐོང་རང་གྲོལ་འདི༔ མ་འོངས་ཕྱི་རབས་སྙིགས་མའི་སྐལ་ལྡན་དོན༔ རྒྱུད་ལུང་མན་ངག་རང་རིག་ཉམས་མྱོང་ཀུན༔ དགོངས་པ་མདོར་བསྡུས་ཉུང་གསལ་འདི་སྤྱར་རོ༔ ད་ལྟ་མི་སྤེལ་རིན་ཆེན་གཏེར་དུ་སྦ༔ མ་འོངས་ལས་འཕྲོ་ཅན་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ རིག་པ་མངོན་སུམ་ངོ་སྤྲོད་བསྟན་པའི་ཟབ་ཆོས་གཅེར་མཐོང་རང་གྲོལ་ཞེས་བྱ་བ༔ ཨོ་རྒྱན་གྱི་མཁན་པོ་པདྨ་འབྱུང་གནས་ཀྱིས་སྦྱར་བ་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ གཏེར་སྟོན་གྲུབ་ཐོབ་ཀརྨ་གླིང་པས་སྒམ་པོ་གདར་གྱི་རི་ལྷ་བྲན་གར་བྱེད་པ་འདྲ་བ་ནས་གདན་དྲངས་པའོ༔ ཆོས་ཉིད་བར་དོའི་ཐོད་རྒལ་ངོ་སྤྲོད་མཐོང་བ་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ ཆོས་ཉིད་བར་དོའི་ཐོད་རྒལ་ངོ་སྤྲོད་མཐོང་བ་རང་གྲོལ་བཞུགས་སོ༔ སྐུ་གསུམ་མངོན་དུ་སྟོན་ལ་ཕྱག་འཚལ་ལོ༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ ཐོད་རྒལ་ངོ་སྤྲོད་མཐོང་བ་རང་གྲོལ་བསྟན༔ འདི་ལ་སྤྱི་དོན་རྣམ་པ་གསུམ་ཡིན་ཏེ༔ དཔེ་དོན་རྟགས་དང་གསུམ་གྱིས་གཏན་ལ་དབབ༔ དཔེ་ཡི་ངོ་སྤྲོད་སྤྱི་དང་བྱེ་བྲག་གཉིས༔ སྤྱིར་ནི་ཐོད་རྒལ་ངོ་སྤྲོད་སུམ་ཅུ་གཅིག༔ བྱེ་བྲག་ཆོས་ཉིད་བར་དོའི་ངོ་སྤྲོད་དོ༔ ཐོག་མར་ཁྲེགས་ཆོད་ཁྲིད་རྣམས་ཚར་བའི་རྗེས༔ རིག་པ་ཐོད་རྒལ་ངོ་སྤྲོད་འདི་ལྟར་བྱ༔ ཤིན་ཏུ་དབེན་ཞིང་ནམ་མཁའ་མཐོང་བའི་སར༔ གནས་དང་ཁྲི་སྟེགས་རྒྱན་ཆས་འཛོམ་པར་བྱ༔ དེ་ནས་ངོ་སྤྲོད་རྫས་ཀྱི་མཆོག་གྱུར་པ༔ གངས་སམ་རྒྱ་མཚོ་གནས་ཆེན་བྲག་རི་ནས༔ འབྱུང་བའི་མན་ཤེལ་ཟུར་བརྒྱད་ལྡན་པ་ལ༔ དྭངས་ཤིང་གསལ་ལ་དྲི་མས་མ་གོས་པ༔ གས་ཆག་མེད་པ་འོད་ལྔའི་ཟེར་འཕྲོ་བ༔ འོད་ཀྱིས་ཁྱིམ་གང་ནས་འོང༌། ཆེ་བ་ཁྱི་དཀར་མགོ་བོ་ཙམ་པ་བྱ༔ དེ་འོག་ངང་པའི་ཞིང་ཁམས་བརྩེགས་མ་མང་པོ་འོང༌། སྒོ་ང་ཙམ་པའམ༔ སོར་བཞི་འམ་སོར་གསུམ་ཚོན་གང་ཙམ་པ་དང་༔ ཐ་མའང་སྐྱེས་བུའི་མིག་ལ་ཁེབས་པ་ཙམ༔ དེ་ནི་རྡོ་རྗེ་སེམས་དཔའི་མེ་ལོང་ཞེས༔ དེ་ནི་ངོ་སྤྲོད་ཀུན་གྱི་རྟེན་དུ་གཅེས་པ་ཡིན༔ སྤོས་ཆུས་ཁྲུས་གསོལ་དྲི་བཟང་སྤོས་ཀྱིས་བྱུག༔ དེ་ཉིད་རྡོ་རྗེ་སེམས་དཔའ་དངོས་སུ་བསྒོམ༔ དེ་ནས་ངོ་སྤྲོད་སུམ་ཅུ་རྩ་གཅིག་ནི༔ དང་པོ་འཇིམ་པའི་མི་མོ་ངོ་སྤྲོད་ཀྱིས༔ རྣམ་ཤེས་ཞུགས་གནས་དོན་གསུམ་ངོ་སྤྲད་བྱ༔ གཉིས་པ་རྡོ་རྗེ་རྦ་རླབས་ངོ་སྤྲོད་ཀྱིས༔ འཆི་ཁའི་འོད་གསལ་སྒྲ་འོད་ངོ་སྤྲོད་བྱ༔ གསུམ་པ་སྤྲིན་མེད་ནམ་མཁའི་ངོ་སྤྲོད་ཀྱིས༔ བར་དོ་དང་པོའི་འོད་གསལ་ངོ་སྤྲོད་བྱ༔ བཞི་པ་མུན་ཁང་ཤེལ་ཟེར་ངོ་སྤྲོད་ཀྱིས༔ ཆོས་ཉིད་དག་པའི་སྣང་བ་ངོས་བཟུང་བྱ༔ ལྔ་པ་ཉི་མའི་དཀྱིལ་འཁོར་ངོ་སྤྲོད་ཀྱིས༔ སྐུ་གསུམ་དག་པའི་ཞིང་ཁམས་ངོ་སྤྲོད་བྱ༔ དྲུག་པ་མེ་ལོང་ཁ་སྦྱོར་ངོ་སྤྲོད་ཀྱིས༔ རང་སྣང་ཡེ་ཤེས་བཞི་སྦྱོར་ངོ་སྤྲོད་བྱ༔ བདུན་པ་མེ་ལོང་དཀྱིལ་འཁོར་ངོ་སྤྲོད་ཀྱིས༔ གཟུགས་སྐུའི་ཞིང་ཁམས་རྣམ་གཉིས་ངོ་སྤྲོད་བྱ༔ བརྒྱད་པ་ཉི་ཟེར་ཤེལ་ཟེར་ངོ་སྤྲོད་ཀྱིས༔ ཐིག་ལེ་(ཐུགས་རྗེ་)ཡེ་ཤེས་ཟེར་གྱི་ངོ་སྤྲོད་བྱ༔ དགུ་པ་གཞལ་ཡས་ཁང་གི་ངོ་སྤྲོད་ཀྱིས༔ དག་པ་ལྷ་ཡི་ཞིང་ཁམས་ངོ་སྤྲོད་བྱ༔ བཅུ་པ་ཆུ་ཟླ་དྭངས་བའི་ངོ་སྤྲོད་ཀྱིས༔ སྣང་སྟོང་རང་བཞིན་མེད་པའི་ངོ་སྤྲོད་བྱ༔ བཅུ་གཅིག་མར་མེ་གསལ་བའི་ངོ་སྤྲོད་ཀྱིས༔ བར་དོ་རྟོག་མེད་གསལ་བའི་ངོ་སྤྲོད་བྱ༔ བཅུ་གཉིས་མཐོངས་ཁུང་ཉི་ཟེར་ངོ་སྤྲོད་ཀྱིས༔ ཐུགས་ཀའི་ཡེ་ཤེས་ཟེར་ཐག་ངོ་སྤྲོད་བྱ༔ བཅུ་གསུམ་མན་ཤེལ་བུམ་ནང་མར་མེ་ཡིས༔ རིག་པ་གཞོན་ནུ་བུམ་སྐུར་ངོ་སྤྲོད་བྱ༔ བཅུ་བཞི་གཞོན་ནུ་རྒྱན་ལྡན་ངོ་སྤྲོད་ཀྱིས༔ ཞི་བ་སྐུ་ལྔ་ལྔ་ཚོམ་ངོ་སྤྲོད་བྱ༔ བཅོ་ལྔ་གཞོན་ནུ་ཕྱེད་སྐྱིལ་ངོ་སྤྲོད་ཀྱིས༔ སེམས་དཔའ་སེམས་མ་བཅུ་དྲུག་ངོ་སྤྲོད་བྱ༔ བཅུ་དྲུག་བཙུན་ཆུང་བཞེངས་པའི་ངོ་སྤྲོད་ཀྱིས༔ སྤྲུལ་སྐུ་ཐུབ་པ་དྲུག་གི་ངོ་སྤྲོད་བྱ༔ བཅུ་བདུན་ཁྲོ་བོ་ཡབ་ཡུམ་ངོ་སྤྲོད་ཀྱིས༔ སྒོ་བ་ཡབ་ཡུམ་བརྒྱད་ཀྱི་ངོ་སྤྲོད་བྱ༔ བཅོ་བརྒྱད་ཁྲོ་འབགས་ཆེན་པོའི་ངོ་སྤྲོད་ཀྱིས༔ ཁྲག་འཐུང་ཁྲོ་བོའི་ལྷ་ཚོགས་ངོ་སྤྲོད་བྱ༔ བཅུ་དགུ་དར་ཡུག་མེ་འོང་ངོ་སྤྲོད་ཀྱིས༔ དག་པ་ཡེ་ཤེས་འོད་ལམ་ངོ་སྤྲོད་བྱ༔ ཉི་ཤུ་སྣམ་རས་ཁ་དོག་ངོ་སྤྲོད་ཀྱིས༔ མ་དག་རིགས་དྲུག་འོད་ལམ་ངོ་སྤྲོད་བྱ༔ ཉེར་གཅིག་མེ་ལོང་བསྭེ་ཕུབ་ངོ་སྤྲོད་ཀྱིས༔ ཞི་ཁྲོའི་དཀྱིལ་འཁོར་ཞིང་ཁམས་ངོ་སྤྲོད་བྱ༔ ཉེར་གཉིས་དར་ཡུག་མཁར་ཕོར་ངོ་སྤྲོད་ཀྱིས༔ ཡེ་ཤེས་ཐིག་ལེ་དགུ་བརྩེགས་ངོ་སྤྲོད་བྱ༔ ཉེར་གསུམ་རས་ཡུག་ལྔ་ལྡན་ངོ་སྤྲོད་ཀྱིས༔ དག་པའི་ཡེ་ཤེས་རླུང་ལྔ་ངོ་སྤྲོད་བྱ༔ ཉེར་བཞི་ཉི་ཟླ་འཇའ་ཁྱིམས་ངོ་སྤྲོད་ཀྱིས༔ ཡེ་ཤེས་མུ་ཁྱུད་ར་བའི་ངོ་སྤྲོད་བྱ༔ ཉེར་ལྔ་རྒྱ་མཚོ་ཨར་གཏད་ངོ་སྤྲོད་ཀྱིས༔ རང་འོད་དཀྱིལ་འཁོར་མངོན་སུམ་ངོ་སྤྲོད་བྱ༔ ཉེར་དྲུག་རྒྱ་མཚོ་རྦ་རླབས་ངོ་སྤྲོད་ཀྱིས༔ ཆོས་ཉིད་རང་སྒྲ་མངོན་སུམ་ངོ་སྤྲད་བྱ༔ ཉེར་བདུན་རྒྱང་ཞག་མནན་བཙིར་ངོ་སྤྲོད་ཀྱིས༔ ཆོས་ཉིད་ཟེར་གྱི་སྣང་བ་ངོ་སྤྲད་བྱ༔ ཉེར་བརྒྱད་ཉི་ཟེར་རྩིབས་ཤར་ངོ་སྤྲོད་ཀྱིས༔ འོད་ཟེར་མཚོན་ཆའི་སྣང་བ་ངོ་སྤྲོད་བྱ༔ ཉེར་དགུ་རྒྱ་མ་སེང་རས་ངོ་སྤྲོད་ཀྱིས༔ ཚོམ་བུ་ནམ་མཁའ་ཁྱབ་པའི་ངོ་སྤྲོད་བྱ༔ སུམ་ཅུ་ཤེལ་དང་ཉི་མ་འདྲ་འབག་གསུམ༔ དག་པའི་སྐུ་གསུམ་ཞིང་ཁམས་ངོ་སྤྲོད་བྱ༔ སོ་གཅིག་ནམ་མཁའ་སུམ་སྤྲུག་ངོ་སྤྲོད་ཀྱིས༔ ཅིར་སྣང་ཆོས་ཀྱི་སྐུ་རུ་ངོ་སྤྲོད་དོ༔ དེ་ལ་དང་པོ་འཇིམ་པའི་མི་མོའི་ངོ་སྤྲད་ནི༔ ཤོག་འདག་གིས་འཇིམ་པ་ལ་ལྷ་བཟོ་མཁས་པས་མི་མོའི་གཟུགས་རིད་པ་ཁོང་སྟོང་ཅན༔ དབང་པོའི་བུ་ག་ཐམས་ཅད་ཧ་རེ་བ༔ སྐྱེ་མཆེད་ཚང་བ་དང་བཅས་པ་གཅིག་བྱ༔ དེའི་སྙིང་གར་མར་མེ་གཅིག་བཞག་ལ༔ འོད་དབང་པོ་ལྔ་ལ་ཕྱིར་གསལ་བར་བྱ༔ དེ་མུན་ཁང་ནང་དུ་བཞག༔ དེའི་མདུན་དུ༔ ཁྲོ་བོའི་གཟུགས་མང་པོ་མཚོན་ཆ་དང་རོལ་མོ་ཐོགས་པ་བཀོད་དོ༔ དེ་ལ་དྲང་དོན་ངེས་དོན་གཉིས་སུ་ངོ་སྤྲད་པ་ནི༔ དང་པོ་དྲང་དོན་དུ་བསྟན་པ་ལ༔ འཇིམ་པའི་མི་མོ་འདི་ནི༔ ད་ལྟ་རང་གི་ལུས་འདི་ཡི་དཔེ་ཡིན་ཏེ༔ མར་མེ་འདི་ནི་རྣམ་ཤེས་སྙིང་གར་གནས་པའི་བརྡའོ༔ དེ་ནས་འཆི་བའི་དུས་སུ་དབང་པོ་རྣམས་རིམ་གྱིས་འགགས་ཏེ༔ རྣམ་ཤེས་སྡིག་པོ་ཆེ་ལ་འོག་སྒོར་བུད༔ བར་མ་རྣམས་ནི་སྒོ་གང་རུང་རེ་ལ་ཐོན༔ ཚོགས་བསགས་པ་དང་འཕོ་བ་ཐེབས་པ་ལ་ནི༔ ཚངས་བུག་ཏུ་ཐོན་ཏེ་བར་དོ་མེད་པར་ཡར་གྱི་ཟང་ཐལ་དུ་འགྲོའོ༔ གཞན་དག་རྣམས་ནི༔ སྒོ་གང་རུང་གཅིག་ལ་ཕྱིར་ཐོན་པ་དང་བར་དོའི་འཇིགས་སྐྲགས་གི་སྣང་བ་འཆར་ཏེ༔ དེའི་དུས་སུ་གདམས་ངག་དྲན་པར་གྱིས་ཤིག༔ དེ་ཡང་མར་མེ་སྙིང་གར་ཡོད་པའི་དུས་འདི་ནི༔ ད་ལྟ་སྐྱེ་གནས་བར་དོའི་དཔེ་ཡིན་ནོ༔ དེ་ནས་དབང་པོ་རྣམས་རིམ་གྱིས་འགགས་པ་ནི༔ འཆི་ཁ་བར་དོའ་ིདཔེ་ཡིན་ནོ༔ དེ་ནས་མར་མེ་ཕྱིར་ཐོན་ནས་འཇིགས་གཟུགས་སྣ་ཚོགས་སུ་སྣང་བ་འདི་ནི༔ བརྒྱལ་སངས་པ་དང་ཆོས་ཉིད་བར་དོར་སྒྲ་འོད་ཟེར་གསུམ་ཞི་ཁྲོའི་སྣང་བ་འཆར་བའི་དཔེ་ཡིན༔ ཞེས་པ་དང་༔ མི་མོའི་ངོ་སྤྲོད་དྲང་དོན་རྒྱས་པར་གུད་དུ་ཤེས་པར་བྱའོ༔ གཉིས་པ་ངེས་དོན་དྲུག་ཏུ་ངོ་སྤྲད་པ་ནི༔ སྒྲོན་མ་དྲུག་ཏུ་ངོ་སྤྲད་དོ༔ དེ་ཡང་མི་མོའི་ཁང་པ་འདི་ནི༔ ད་ལྟ་སྐྱེ་གནས་བར་དོར་གདོས་བཅས་ཀྱི་ལུས་འདིའི་དཔེ་ཡིན་ཏེ༔ དེ་འང་སྒྲོན་མ་དྲུག་གི་ཚུལ་དུ་གནས་པ་ནི༔ སྙིང་གར་མར་མེའི་ཀོང་བུ་འདི་ནི༔ ཙིཏྟ་ཤ་ཡི་སྒྲོན་མའི་དཔེ་ཡིན་ཏེ༔ སྙིང་གི་དཔེའོ༔ མར་མེ་གསལ་པོར་འབར་བ་འདི་ནི༔ གནས་པ་གཞི་ཡི་སྒྲོན་མེའི་ཚུལ་ཏེ༔ རིག་པ་སྙིང་གི་དཀྱིལ་ན་གནས་པའི་དཔེའོ༔ མར་མེ་སྙིང་གར་གནས་ཀྱང་༔ འོད་མིག་ནས་ཡར་རྒྱུག་པ་འདི་ནི༔ དཀར་འཇམ་རྩའི་སྒྲོན་མའི་ཚུལ་ཏེ༔ སྙིང་དང་མིག་འབྲེལ་བའི་རྩ་ལ་རྣམ་ཤེས་རྒྱུ་བའི་དཔེའོ༔ མིག་གི་ནང་ནས་འོད་མ་འགགས་པར་གསལ་བ་འདི་ནི༔ རྒྱང་ཞགས་ཆུའི་སྒྲོན་མའི་ཚུལ་ཏེ༔ རིག་པ་མིག་ནས་ཕྱིར་གསལ་བའི་དཔེའོ༔ མར་མེ་ཕྱིར་ཐོན་ནས་ཕྱི་རོལ་དུ་གཟུགས་བརྙན་སྣ་ཚོགས་འཆར་བ་འདི་ནི༔ བར་དོ་དུས་ཀྱི་སྒྲོན་མེའི་ཚུལ་ཏེ༔ རྣམ་ཤེས་ཕྱིར་ཐོན་པ་དང་༔ ཆོས་ཉིད་བར་དོ་འཆར་བའི་དཔེའོ༔ དེའི་དུས་སུ་བར་དོ་རང་ངོ་ཤེས་ནས་སྐད་ཅིག་ཉིད་ལ་གྲོལ་བ་ནི༔ མཐར་ཐུག་འབྲས་བུའི་སྒྲོན་མ་སྟེ༔ རྒྱས་པར་སྒྲོན་མ་དྲུག་གི་ངོ་སྤྲོད་དུ་ཤེས་པར་བྱའོ༔ གཉིས་པ་རྡོ་རྗེ་རྦ་རླབས་ངོ་སྤྲོད་ཀྱིས༔ འཆི་ཁའི་འོད་གསལ་སྒྲ་འོད་ངོ་སྤྲོད་བྱ༔ ཞེས་པ་ནི༔ མུན་ཁང་ནང་དུ་ཉི་ཟེར་མདུང་ཞུར་ཙམ་ཞིག་སྟོན་ལ༔ དེ་ཁ་བཅད་པའི་མུན་པའི་གསེབ་ཏུ་ཁྲོ་བོ་དང་གིང་ཕོ་མོ་མགོ་བརྙན་དང་བཅས་པ་བཀོད་ལ༔ དེ་དག་གི་མདུན་དུ༔ སློབ་བུ་རླུང་སྲོག་རྩོལ་བུམ་པ་ཅན་བཟུང་དུ་བཅོལ་ལ༔ རྩེའུ་ཆུང་གཉིས་ཇེ་དྲག་ཇེ་དྲག་མནན་པས་སྣང་བ་རགས་པ་ཐིམ་པ་ནི༔ འཆི་ཁར་ཕྱི་དབུགས་ཆད་ཚེ་སྣང་བ་རགས་པ་ཐིམ་པར་ངོ་སྤྲད་དོ༔ དེ་ནས་རྟོག་པ་ཐམས་ཅད་འགགས་པ་ནི༔ ཕྲ་བ་ཐིམ་པར་ངོ་སྤྲད་དོ༔ དེ་ནས་ཅི་ཡང་མི་དྲན་པའི་རྟོག་པ་མེད་པར་ནམ་མཁའ་དྭངས་བའི་དཀྱིལ་ལྟ་བུ་ཞིག་འཆར་ཏེ༔ དེ་འཆི་བ་འོད་གསལ་ཆོས་སྐུ་ངོ་སྤྲོད་དོ༔ དེའི་རྗེས་སུ་རྨི་ལམ་ལྟ་བུའི་སྣང་བ་ཡད་ཡུད་བན་བུན་ཅིག་འཆར་ཏེ༔ དེ་ནི་བར་དོའི་སྣང་བ་ངོ་སྤྲོད་དོ༔ དེ་ཡང་རྟོག་མེད་ཀྱི་ཤེས་པ་གསལ་ལ་སྟོང་པ་ཡེ་རེ་བ་དེ་འོད་གསལ་དུ་ངོ་སྤྲད་དོ༔ རྨི་ལམ་ལྟ་བུའི་ཤེས་པ་ཡད་ཡུད་དེ་བར་དོ་སྒྱུ་ལུས་སུ་ངོ་སྤྲད་དོ༔ དེ་ནས་གཉིད་སད་པ་ལྟར་བྱུང་དུས༔ ཉི་ཞུར་ཁ་ཕྱེས་ལ༔ མེ་ལོང་དང་ཤེལ་རྡོ་བསྒྲིལ༔ ཁྲོ་འབག་དང་༔ གིང་ཕོ་མོས་བསྡིག༔ རོལ་མོ་དང་ཧ་ཧ་ཧཱུྃ་ཕཊ་བཤུགས་སྒྲ་བསྒྲགས་པས་བར་དོའི་སྣང་བ་འཆར་ཏེ༔ བྲེད༔ སྔངས༔ སྐྲག༔ འདར༔ བྲོས༔ འཆའ༔ གབ་བྱེད་དུ་འོང་སྟེ༔ དེའི་དུས་སུ་སྒྲ་འོད་ཟེར་གསུམ་ཐམས་ཅད་རང་སྣང་དུ་ངོ་ཤེས་པར་གྱིས་ཤིག༔ སྒྲ་རང་སྒྲ༔ འོད་རང་འོད༔ རང་སྣང་ཆོས་ཉིད་དུ་ངོ་ཤེས་པར་གྱིས་ཤིག༔ ཅེས་ངོ་སྤྲོད་ནས༔ མེ་ལོང་ལ༔ འོད་འཆར༔ ཤེལ་རྡོ་ལ་འཇའ་དང་ཟེར་འཆར་བས༔ འོད་ལྔའི་ནང་ནས་ཟེར་ཕྲ་མོ་ཁྱུག་ཁྱུག་ཅིག་འདར་ཞིང་རྒྱུགས་ཏེ༔ འཽ༔ འདི་ནི་བར་དོ་ཡིད་ཀྱི་ལུས་ཞེས་བྱ་སྟེ༔ འོད་ལྔ་དང་ཟེར་མི་འདྲེས་པས༔ སྐྱ་ཡུད་ཡུད་པ་ཕ་ཀི༔ དོན་མེད་དུ་འདར༔ འབྲོས༔ གབ་བྱེད་ཅིང་གདའ་འོ༔ དེའི་རྗེས་སུ་འོད་གཉིས་རྒྱུགས་པ་འདི་ནི༔ ལྷན་ཅིག་སྐྱེས་པའི་ལྷ་དང་འདྲེ་གཉིས་ཡིན་ནོ༔ དེའི་གདོང་འདི་ན༔ འཇའ་ཚོན་སྣ་ལྔའི་མདངས་གཡོ་ཞིང་འགུལ་བ་འདི་ནི༔ ཡི་དམ་ཞི་ཁྲོ་རིགས་ལྔས་བར་དོ་ན་བསུ་བ་ལ་འོང་བ་ཡིན་ནོ༔ དེ་ཡང་འཇའ་ཁ་དོག་ལྔ་དང་ལྡན་པ་འདི་ནི༔ ཡེ་ཤེས་ལྔའི་འོད་ལམ་ཡིན་ཏེ༔ དེ་ཡང་ངོ་ཤེས་ན་སྐུ་ལྔ་དང་ཡེ་ཤེས་ལྔ་ཡིན་ནོ༔ མ་ཤེས་ན་དུག་ལྔ་དང་ཕུང་པོ་ལྔ་ཡིན་ནོ༔ ཞེས་ལྔ་ཚན་ལྔའི་ངོ་སྤྲོད་གུད་དུ་བཀོལ་བ་རྒྱས་པར་བཤད་དེ༔ བར་དོའི་སྨོན་ལམ་བཏབ་ལ༔ འཽ་ད་བླ་མའི་གདམས་ངག་གིས་ངོ་སྤྲོད་ཅིང་༔ སྨོན་ལམ་རྣམ་པར་དག་པ་བཏབ་པས༔ བར་དོའི་རྣམ་ཤེས་ཡེ་ཤེས་ལྔའི་འོད་ལམ་དང་དབྱེར་མེད་དུ་ཐིམ་ནས་མཚང་རྒྱ་ནས་སོང་ངོ་༔ ཞེས་ངོ་སྤྲོད་རྒྱས་བསྡུས་སྐབས་དང་སྦྱར་ཏེ་བསྟན་ནོ༔ གསུམ་པ་སྤྲིན་མེད་ནམ་མཁའི་ངོ་སྤྲོད་ཀྱིས༔ བར་དོ་དང་པོའི་འོད་གསལ་ངོ་སྤྲོད་བྱ༔ ཞེས་པ་ནི༔ ནམ་མཁའ་སྤྲིན་མེད་དངས་བའི་དུས་སུ༔ སློབ་བུ་ཐམས་ཅད་ཉི་མ་ལ་རྒྱབ་གཏད་ནས༔ གྲལ་ལ་བསྒྲིགས་ཏེ༔ ཆོས་སྐུའི་འདུག་སྟངས་སེང་གེ་ཁྱི་ཚུག་མོ་བྱས་ལ༔ ལྟ་སྟངས་སྟེང་གི་ནམ་མཁའ་དངས་པའི་དཀྱིལ་དུ༔ གྱེན་ལ་ཧྲིག་གེ་བལྟ་སྟེ༔ སེམས་ཀྱིས་ཅི་ཡང་མི་བསྒོམས་པར༔ ཡེངས་མེད་དུ་ཧྲིག་གེ༔ ས་ལེ༔ སྟོང་ལྷང་ངེར་བཞག་པས༔ གསལ་རིག་སྟོང་གསུམ་དབྱེར་མེད་པའི་ཉམས་ཡུད་ཙམ་པ་ཞིག་འཆར་རོ༔ དེ་ལ་བླ་མས༔ འཽ༔ རིགས་ཀྱི་བུ་རྣམས༔ རང་འཆི་བའི་དུས་སུ༔ ས་ཆུ་ལ་ཐིམ༔ ཆུ་མེ་ལ་ཐིམ༔ མེ་རླུང་ལ་ཐིམ༔ རླུང་རྣམ་པར་ཤེས་པ་ལ་ཐིམ༔ རྣམ་པར་ཤེས་པ་འོད་གསལ་ལ་ཐིམ་པའི་དུས་སུ༔ དཀར་ལམ༔ དམར་ལམ༔ ནག་ལམ་གྱི་སྣང་བ་ཤར་བའི་མཐར༔ གཞིའི་འོད་གསལ་གདོད་མའི་སངས་རྒྱས༔ ཀ་དག་ཆེན་པོ༔ དོན་གྱི་ཀུན་ཏུ་བཟང་པོ་དང་ཞལ་མཇལ་ཏེ༔ དེའི་དུས་སུ་ངོ་ཤེས་པར་གྱིས་ཤིག༔ སྐད་ཅིག་མ་ལ་ཡར་གྱི་ཟང་ཐལ་ལ་འཚང་རྒྱ་བར་འགྱུར་རོ༔ མ་ཡེངས་ཤིག༔ ཅེས་ངོ་སྤྲོད་དོ༔ བཞི་པ་མུན་ཁང་ཤེལ་ཟེར་ངོ་སྤྲོད་ཀྱིས༔ ཆོས་ཉིད་དག་པའི་སྣང་བ་ངོས་བཟུང་བྱ༔ ཞེས་པ་ནི༔ གོང་ལྟར་མུན་ཁང་གི་ཉི་ཞུར་ལ་ཤེལ་རྡོ་བསྟན་ཏེ་འདི་སྐད་དོ༔ རིགས་ཀྱི་བུ་རྣམས་རྡོ་རྗེ་སེམས་དཔའི་ཐུགས་ཀྱི་མེ་ལོང་འདི༔ ཆོས་སྐུ་དངོས་ནི་མ་ཡིན་ཏེ༔ དཔེ་འདི་ཅི་འདྲ་བར་ཤེས་པར་བྱའོ༔ དཔེ་འདི་ལ་ཕྱི་ནང་མེད་པ་ལྟར༔ རིག་པ་ཆོས་ཀྱི་སྐུ་ལ་ཕྱི་ནང་མེད་པར་ཤེས་པར་གྱིས་ཤིག༔ དཔེ་འདི་ལ་མདུན་རྒྱབ་མེད་པ་ལྟར༔ རིག་པ་ཆོས་ཀྱི་སྐུ་ལ་མདུན་རྒྱབ་མེད་པར་ཤེས་པར་གྱིས་ཤིག༔ དཔེ་འདི་དག་ལ་ཟང་ཐལ་བ་བཞིན་དུ༔ རིག་པ་ཆོས་ཀྱི་སྐུ་ལ༔ དྲི་མ་མེད་པར་ཟང་ཐལ་བར་ཤེས་པར་གྱིས་ཤིག༔ དཔེ་འདི་ལ་ཕྱི་ནང་མེད་པའི་ངང་ནས༔ རྐྱེན་མེད་པའི་འོད་ལྔ་གསལ་བ་ལྟར༔ རིག་པ་ཆོས་ཀྱི་སྐུ་ཟང་ཐལ་གྱི་ནང་ན་གཟུགས་སྐུ་ནང་གསལ་དུ་གྲུབ་སྟེ༔ རིག་པ་སྟོང་པ་ཡེ་ཤེས་ཀྱི་སྙིང་པོ་ཅན་དུ་ཤེས་པར་གྱིས་ཤིག༔ འདིའི་ནང་ནས་འོད་ལྔ་ཕྱིར་འཆར་ནུས་པ་ལྟར༔ ཆོས་སྐུ་ལས་གཟུགས་སྐུ་རྣམ་གཉིས་གདུལ་བྱ་ལ་འཆར་ནུས་པར་གྱིས་ཤིག༔ ཅེས་ངོ་སྤྲད་དོ༔ ལྔ་པ་ཉི་མའི་དཀྱིལ་འཁོར་ངོ་སྤྲོད་ཀྱིས༔ སྐུ་གསུམ་དག་པའི་ཞིང་ཁམས་ངོ་སྤྲོད་བྱ༔ ཞེས་པ་ནི༔ སྔ་དྲོ་འམ༔ དགོང་མོ༔ ནམ་མཁའ་དྭངས་ཤིང་ཉི་ཟེར་གསལ་བའི་དུས་སུ༔ སློབ་བུ་ཐམས་ཅད་ཕྱེད་སྙེས་སུ༔ ཉི་མ་ལ་མིག་གིས་ཟིམ་བུས་བལྟས་ལ༔ རིགས་ཀྱི་བུ་རྣམས༔ དཔེ་ཉི་མའི་སྙིང་པོ་འདི་དག་ཅིང་དྲི་མ་མེད་པར་གསལ་བ་བཞིན༔ ཆོས་སྐུ་དག་པ་གཉིས་ལྡན༔ ཀ་ནས་དག་ཅིང་དྲི་མ་མེད་པར་ཤེས་པར་གྱིས་ཤིག༔ ཉི་མའི་མདངས་ལ་འཇའ་འོད་ཁ་དོག་ལྔ་དང་ལྡན་པ༔ སུས་ཀྱང་མ་བྱས་པར་རང་གསལ་བ་བཞིན་དུ༔ ཆོས་སྐུ་ཀ་དག་གི་མདངས་ལ་ལོངས་སྐུ་ལྷུན་གྲུབ་ངེས་པ་ལྔ་ལྡན༔ འཇའ་འོད་ཐིག་ལེ་ལྔ་ལྡན་གྱི་སྐུ༔ མ་བྲིས་པའི་དཀྱིལ་འཁོར་རང་བཞིན་གྱིས་འོད་གསལ་བར་ཤེས་པར་གྱིས་ཤིག༔ དེ་ཡང་འཇའ་འོད་ཁ་དོག་ལྔ་དང་ལྡན་པ་འདི་ནི༔ སངས་རྒྱས་ཐམས་ཅད་རིགས་ལྔའི་རང་བཞིན་དུ་ཤེས་པར་གྱིས་ཤིག༔ དེ་ཡང་གཅིག་གིས་གཅིག་མ་བསྒྲིབས་པར་འགགས་མེད་ཟང་ཐལ་དུ་ནམ་མཁར་གནས་པ་འདི་ནི༔ སངས་རྒྱས་ཡེ་ཤེས་ལུས་ཅན་གྱི་སྐུ་སྣང་ལ་རང་བཞིན་མེད་པ༔ སྐུ་ལ་མདུན་རྒྱབ་མེད་པ༔ དབྱིངས་དང་ཡེ་ཤེས་དབྱེར་མེད་ཀྱི་སྐུར་ཤེས་པར་གྱིས་ཤིག༔ དེ་དག་ཀྱང་རྨ་བྱའི་མདོངས་ལྟ་བུ་འམ༔ ཕུབ་ཀྱི་སྦ་སྐོར་བ་ལྟ་བུ་འམ༔ འཇའ་འོད་མུ་ཁྱུད་ལྔ་ལྡན་གྱི་ནང་ན་བཞུགས་པ་ནི༔ རྣམ་དག་དབྱིངས་ཀྱི་སྒྲོན་མ༔ དག་པ་ཡེ་ཤེས་རང་གསལ་གྱི་ཞིང་ཁམས་སུ་བཞུགས་པ་ཤེས་པར་གྱིས་ཤིག༔ དེ་དག་གི་ཟེར་དང་མདངས་འོད་ཕྱོགས་ཐམས་ཅད་དུ་འཕྲོ་ཞིང་གསལ་བ་འདི་ནི༔ ལོངས་སྐུ་ངེས་པ་ལྔ་ལྡན་གྱི་རྩལ་ལས༔ སྤྲུལ་སྐུ་མ་ངེས་ལྔ་ལྡན་གང་ལ་གང་འདུལ་དུ་རྒྱུན་མ་ཆད་པར་ཤེས་པར་གྱིས་ཤིག༔ ཟེར་དེ་དག་གི་ནང་ནས་ཐིག་ཕྲན་བསམ་གྱིས་མི་ཁྱབ་པ༔ ཉ་མིག་ལྟ་བུ་དང་༔ མུ་ཏིག་གི་དྲྭ་བ་ལྟ་བུའི་བར་དུ༔ དྲྭ་བ་དང་༔ དྲྭ་ཕྱེད་དང་༔ ལུ་གུ་རྒྱུད་དུ་འབྲེལ་ཞིང་༔ འགུལ་བ་དང་༔ འཕྲིགས་པར་སྣང་བ་ནི༔ ཐུགས་རྗེ་སྤྲུལ་པའི་སྐུ་བྱེ་བ་ཕྲག་བརྒྱ་བསམ་གྱིས་མི་ཁྱབ་པས་འགྲོ་བའི་དོན་རྒྱུན་མི་ཆད་པར་ཤེས་པར་གྱིས་ཤིག༔ དེ་དག་ཀྱང་སྣང་ཚུལ་ཐ་དད་ཀྱང་༔ ཉི་མ་དང་འཇའ་འོད་དང་ཐིག་ལེ་སྟོང་ཉིད་རང་གསལ་གྱི་རང་ལ་དབྱེར་མེད་པ་ལྟར༔ དོན་ལ་སྐུ་གསུམ་སྣང་ཚུལ་ཐ་དད་ཀྱང་༔ ངོ་བོ་ཆོས་ཉིད་ཀྱི་ངང་ལ་དབྱེར་མེད་པར་ཤེས་པར་གྱིས་ཤིག༔ ཅེས་ངོ་སྤྲད་དེ༔ སྐབས་འདིར་ཡེ་ཤེས་འོད་ལམ་གྱི་སྨོན་ལམ་བཏབ་པར་བྱའོ༔ ༔ དྲུག་པ་མེ་ལོང་ཁ་སྦྱོར་ངོ་སྤྲོད་ཀྱིས༔ རང་སྣང་ཡེ་ཤེས་བཞི་སྦྱོར་ངོ་སྤྲོད་བྱ༔ ཞེས་པ་ནི༔ མེ་ལོང་ཤིན་ཏུ་གསལ་བ་བཞི་ཁ་སྤྲད་ལ༔ དཀྱིལ་དུ་རིགས་ལྔའི་སྐུ་བཞག་ལ་བལྟས་པས༔ ཕྱོགས་བཞི་ཁར་རིགས་ལྔའི་སྐུ་སྣང་སྟོང་དུ་འཆར་བ་ལ་ངོ་སྤྲོད་དེ༔ རིགས་ཀྱི་བུ༔ མེ་ལོང་འདི་ནི་དག་ཅིང་གསལ་བ་ལྟར༔ ཆོས་ཉིད་གྱི་རིག་པ་དག་ཅིང་གསལ་བའོ༔ མེ་ལོང་གི་ནང་ན་སངས་རྒྱས་ཀྱི་སྐུའི༔ གཟུགས་བརྙན་སྣང་ལ་རང་བཞིན་མེད་པར་གནས་པ་བཞིན་དུ༔ ཆོས་ཉིད་ཀློང་ནས་སྐུ་ལྔ་སྣང་ལ་རང་བཞིན་མེད་པར་གནས་པ་ཡིན་ནོ༔ ཕྱོགས་གང་དུ་བལྟས་ཀྱང་སྐུ་ལྔའི་རང་གཟུགས་གསལ་བ་ནི༔ སྣང་སྲིད་རྣམ་དག་ལྷ་དང་ལྷ་མོའི་རང་བཞིན་ཡིན་པར་ཤེས་པར་གྱིས་ཤིག༔ ད་ལྟ་བསྒོམ་ཡང་མི་གསལ་ཏེ༔ རང་འཆི་བའི་དུས་སུ་ཆོས་ཉིད་ཀྱི་བར་དོར་མ་བསྒོམ་ཡང་འཆར་བས༔ ངོ་ཤེས་པར་གྱིས་ཤིག༔ ས་རྡོ་རི་བྲག་གི་སྣང་བ་མེད་པར་ཕྱོགས་གང་དུ་ཕྱིན་ཀྱང་༔ སངས་རྒྱས་ཀྱི་སྐུའི་ཚད་གབ་བྱེད་དུ་འོང་ངོ་༔ ངོས་ཟིན་པར་གྱིས་ཤིག༔ ཅེས་ངོ་སྤྲོད་དོ༔ བདུན་པ་མེ་ལོང་དཀྱིལ་འཁོར་ངོ་སྤྲད་ཀྱིས༔ གཟུགས་སྐུའི་ཞིང་ཁམས་རྣམ་གཉིས་ངོ་སྤྲོད་བྱ༔ ཞེས་པ་ནི༔ མེ་ལོང་གཉིས་ཕན་ཚུན་ཁ་སྤྲད་དུ་བཞག་པའི་བར་དུ༔ རྡུལ་ཚོན་གྱི་དཀྱིལ་འཁོར་རམ༔ ཐང་སྐུའི་གཟུགས་མེ་ལོང་ལ་འཆར་དུ་བཅུག༔ མེ་ལོང་དེའི་གཟུགས་བརྙན་དེ༔ མེ་ལོང་ཕ་རོལ་དེ་ལ་འཆར་དུ་བཅུག་ལ༔ རིགས་ཀྱི་བུ༔ མེ་ལོང་འདི་དག་ཅིང་གསལ་བ་ལྟར༔ ཆོས་སྐུ་ཀ་དག་ཡེ་ནས་རྣམ་པར་དག་པའོ༔ མེ་ལོང་གི་ནང་ན་དཀྱིལ་འཁོར་གྱི་ཕྱག་རྒྱ་མ་བསྐྱེད་པར་སྣང་བ་བཞིན་དུ༔ ཆོས་སྐུའི་གདངས་ལ་ལོངས་སྐུའི་ཕྱག་རྒྱའི་དཀྱིལ་འཁོར་མ་བསྐྱེད་པར་རང་བཞིན་གྱིས་གསལ་བ་ཡིན་ནོ༔ མེ་ལོང་འདིའི་གཟུགས་བརྙན་མེ་ལོང་ཕ་ཀི་ལ་གསལ་བ་བཞིན་དུ༔ ལོངས་སྐུ་མ་འགགས་པའི་གདངས་ལས༔ གཞན་དོན་སྤྲུལ་པའི་སྐུ་གཟུགས་བརྙན་ལྟ་བུར་འཆར་བ་ཡིན་ནོ༔ ངོ་ཤེས་པར་གྱིས་ཤིག༔ ཅེས་ངོ་སྤྲད་དོ༔ བརྒྱད་པ་ཉི་ཟེར་ཤེལ་ཟེར་ངོ་སྤྲད་ཀྱིས༔ ཐིག་ལེ་(ཐུགས་རྗེ་)ཡེ་ཤེས་ཟེར་གྱི་ངོ་སྤྲད་བྱ༔ ཞེས་པས༔ མཐོང་ཁུང་གི་ཉི་ཟེར་ལ་ཤེལ་རྡོ་བསྒྲིལ་ལ༔ ཉི་མའི་སྙིང་པོ་ལ་ཟེར་མ་འགགས་པ་བཞིན་དུ༔ ཆོས་སྐུ་ལ་གཟུགས་སྐུ་གཉིས་ཀྱིས་བརྒྱན་ཏེ༔ སྐུ་གསུམ་ལྷུན་གྲུབ་དབྱེར་མེད་པས་འགྲོ་བའི་དོན་བྱེད་པ་ཡིན་ནོ༔ ཉི་ཟེར་ཤེལ་ལ་ཕོག་པས་འཇའ་དང་ཟེར་རང་བཞིན་དུ་འབྱུང་བ་ལྟར༔ ཆོས་སྐུའི་དགོངས་པའི་བྱིན་རླབས་ལོངས་སྐུ་ལ་ཕོག༔ ལོངས་སྐུའི་མཚན་དཔེ་བརྡ་མཚོན་སྤྲུལ་སྐུ་ལ་ཕོག་པས༔ སྤྲུལ་སྐུ་གང་ཟག་སྙན་ཁུང་བརྒྱུད་པས་སེམས་ཅན་གྱི་དོན་དངོས་སུ་བྱེད་པའོ༔ ཞེས་ངོ་སྤྲད་དོ༔ དགུ་པ་གཞལ་ཡས་ཁང་གི་ངོ་སྤྲོད་ཀྱིས༔ དག་པ་ལྷ་ཡི་ཞིང་ཁམས་ངོ་སྤྲོད་བྱ༔ ཞེས་པས༔ དཀྱིལ་འཁོར་བློས་བསླང་ངམ༔ གཙུག་ལག་ཁང་གི་སྒོ་གདོང་ན༔ རྡོ་རྗེ་སེམས་དཔའི་མེ་ལོང་མིག་ལ་བཙུགས་ནས་བལྟས་པས་འཇའ་འོད་ལས་གྲུབ་པའི་གཞལ་ཡས་ཁང་བརྩེགས་མར་འཆར་རོ༔ འོ༔ སངས་རྒྱས་ཀྱི་ཞིང་ཁམས་འདི་ལྟ་བུ༔ སྣང་ལ་རང་བཞིན་མེད་པ་འཇའ་འོད་ལས་གྲུབ་པ་བརྩེགས་མར་འཆར་བ་ཡིན་ནོ༔ ངོ་ཤེས་པར་གྱིས་ཤིག༔ ཅེས་ངོ་སྤྲོད་དོ༔ བཅུ་པ་ཆུ་ཟླ་དངས་བའི་ངོ་སྤྲོད་ཀྱིས༔ སྣང་སྟོང་རང་བཞིན་མེད་པའི་ངོ་སྤྲོད་བྱ༔ ཞེས་པས༔ མཚོ་འམ༔ ཆུ་དངས་ཤིང་འཁྱིལ་བའམ༔ ཟངས་ལ་སོགས་པའི་སྣོད་ཆུས་བཀང་ལ༔ ཚེས་བཅུ་བཞི་འམ༔ བཅོ་ལྔའི་ཟླ་བ་ཤར་བ་དང་སློབ་བུ་རྣམས་ལ་ཆུ་ཟླ་བསྟན་ཏེ༔ འོ༔ འཁོར་འདས་ཀྱི་གཟུགས་བརྙན་ཐམས་ཅད་ཆུ་ཟླ་འདི་དང་མཚུངས་ཏེ༔ དག་པ་སངས་རྒྱས་ཀྱི་སྐུ་གཟུགས་དང་མ་དག་འཁོར་བའི་སྣོད་བཅུད་ཐམས་ཅད༔ སྣང་སྟོང་དབྱེར་མེད་པའི་གཟུགས་བརྙན་ཙམ་སྟེ༔ ཆུའི་ནང་ན་ཟླ་བ་ཡོད་མ་མྱོང་བ་ལྟར༔ སྣོད་བཅུད་འཁོར་འདས་ཀྱི་གཟུགས་བརྙན་ཐམས་ཅད་ཡོད་མ་མྱོང་བ་ངོ་ཤེས་པར་གྱིས་ཤིག༔ ཆུ་ནང་ན་ཟླ་བ་མེད་བཞིན་དུ་སྣང་ཙམ་མི་འགགས་པ་ལྟར༔ འཁོར་འདས་ཀྱི་གཟུགས་བརྙན་ཐམས་ཅད་མེད་བཞིན་དུ་སྣང་ལ་མ་འགགས་པ་ཙམ་དུ་ཤེས་པར་གྱིས་ཤིག༔ ཆུ་དང་ཟླ་བ་དབྱེར་མེད་པ་ལྟར༔ ཐམས་ཅད་སྣང་སྟོང་དབྱེར་མེད་དུ་ཤེས་པར་གྱིས་ཤིག༔ ཆུ་ཟླ་རང་བཞིན་མེད་པར་ཤེས་པས་བདེན་འཛིན་རང་སར་གྲོལ་བ་ལྟར༔ འཁོར་འདས་ཐམས་ཅད་ཀྱང་བདེན་འཛིན་དབྱེར་མེད་རང་གྲོལ་དུ་ཤེས་པར་གྱིས་ཤིག༔ དེས་མཚོན་ནས༔ སྒྱུ་མའི་དཔེ་བཅུ་ཀུན་ལ་ངོ་སྤྲད་དོ༔ བཅུ་གཅིག་མར་མེ་གསལ་བའི་ངོ་སྤྲོད་ཀྱིས༔ བར་དོའི་རྟོག་མེད་གསལ་བའི་ངོ་སྤྲོད་བྱ༔ ཞེས་པས༔ དཀྱིལ་འཁོར་གྱི་མཐའ་ལ༔ མར་མེ་བརྒྱ་འམ་བཞི་བཅུ་རྩ་གཉིས་སམ༔ ཉེར་གཅིག་གམ༔ ལྔ་ལ་སོགས་ལྷ་གྲངས་དང་མཉམ་པར་བཀོད་ལ༔ ཤེལ་མིག་ལ་སྦྱར་ཏེ་བལྟས་པས་གསུམ་ཐོག་བཞི་ཐོག་ཙམ་དུ་འཆར་རོ༔ རིགས་ཀྱི་བུ་རྣམས༔ ལུས་སེམས་བྲལ་བའི་དུས་སུ༔ ཆོས་ཉིད་ཀྱི་བར་དོར༔ ཞི་ཁྲོ་འཇའ་འོད་ཀྱི་རང་བཞིན༔ ནམ་མཁའ་ཁྱབ་པར་འཆར་རོ༔ མར་མེ་འདི་དག་སྣང་ལ་རང་བཞིན་མེད་པ་བཞིན་དུ༔ ཞི་ཁྲོའི་སྐུ་དེ་དག་ཀྱང་སྣང་ལ་རང་བཞིན་མེད་པ་ཤེས་པར་གྱིས་ཤིག༔ མར་མེ་འདི་དག་འགུལ་ཞིང་འཕྲིགས་པ་བཞིན་དུ༔ སྐུ་དེ་དག་ནམ་མཁའི་དབྱིངས་སུ་འགུལ་བ༔ འཕྲིགས་པ༔ ཡོམ་ཡོམ་པ་འཆར་བས༔ ཡི་དམ་གྱི་ལྷ་ཡིན་པར་ངོ་ཤེས་པར་གྱིས་ཤིག༔ ཡང་མེ་ལོང་མཐོ་སྐོར་མ་སྟེང་ནས་མར་ཁ་སྦུབས་ནས་བལྟས་པས་འོད་ཀྱི་དཀྱིལ་འཁོར་ནམ་མཁའ་ལ་འཆར་རོ༔ ཡང་ལྷའི་བུའི་ཕྱག་སོར་ལ་ངོ་སྤྲད་པ་ཞེས་བྱ་བ༔ ཕུག་རོན་གྱི་དོང་རུ་མར་མེ་ལ་གཏད་ནས་བལྟས་པས་འཇའ་འོད་སྣ་ལྔ་འགུལ་འཕྲིགས་སུ་འཆར་རོ༔ དེ་དག་ཀྱང་བར་དོ་ཡེ་ཤེས་ཀྱི་སྣང་བ་ངོ་ཤེས་པར་གྱིས་ཤིག༔ བཅུ་གཉིས་པ་མཐོངས་ཁུང་ཉི་ཟེར་ངོ་སྤྲོད་ཀྱིས༔ ཐུགས་ཀའི་ཡེ་ཤེས་ཟེར་ཐག་ངོ་སྤྲོད་བྱ༔ ཞེས་སྔ་དྲོ་འམ༔ ཕྱི་དྲོའི་དུས་སུ་ཁྱིམ་གྱི་མཐོངས་ཁུང་ཉི་ཞུར་རང་གི་སྙིང་གར་གཏད་ལ༔ སྙིང་གར་མེ་ལོང་གསལ་བ་གཅིག་བཞག་ལ༔ དེ་ལ་ཉི་ཟེར་ཕོག་པའི་འོད་ལ་བལྟ་སྟེ༔ རིགས་ཀྱི་བུ༔ ཆོས་ཉིད་བར་དོར༔ རྡོ་རྗེ་སེམས་དཔའ་ཁོང་སེང་གི་ལམ་ཞེས་བྱ་བ༔ ཡེ་ཤེས་ལྷའི་ཐུགས་ཀ་ནས་འོད་ཟེར་གྱི་སྣམ་བུ་ཁྱེད་རང་གི་སྙིང་གར་ཟུག་ནས་འོང་སྟེ༔ དེ་ཡང་ཉི་མ་ནི༔ ཡེ་ཤེས་ཀྱི་ལྷ་ཡི་བརྡའོ༔ ཉི་ཞུར་གྱི་ཟེར་འདི་ནི༔ ཡེ་ཤེས་ཀྱི་འོད་ལམ་རྡོ་རྗེ་སེམས་དཔའ་ཁོང་སེང་གི་ལམ་གྱི་བརྡའོ༔ འདིའི་དུས་སུ་འབྱུང་འཇུག་རྣམ་པ་གཉིས་ཏེ༔ སྐལ་ལྡན་རབ་ཀྱིས་གང་ཤར་རང་སྣང་རིག་པར་ངོ་ཤེས་ཏེ༔ ལྷ་ཕྱི་ན་མེད་དེ༔ རང་གི་རིག་པའི་རྩལ་དུ་ཤེས་ནས༔ འོད་རིག་པ་ལ་ཚུར་འཇུག་སྟེ༔ རང་དཀྱིལ་འཁོར་གྱི་གཙོ་བོར་འཚང་རྒྱ་བར་འགྱུར་རོ༔ བློ་དམན་པས་རང་རྩལ་དུ་མ་ཤེས་པས༔ ལྷ་ཕྱི་ན་ཡོད་པར་ཤེས་ནས་མོས་གུས་དང་གསོལ་བ་བཏབ་པས༔ རིག་པ་འོད་ལ་ཕར་འཇུག་སྟེ༔ འཁོར་དུ་སྐྱེ་བར་འགྱུར་རོ༔ འོད་ལ་སྔངས་སྐྲག་འཇིགས་སྣང་སྐྱེས་ན་རང་སྣང་བདུད་དུ་སོང་ནས་འཁོར་བར་འཁྱམས་སོ༔ དེའི་ཕྱིར་ན་ངོ་སྤྲད་འདི་རྣམས་ལ་འདྲིས་ཤིང་དྲན་པར་གྱིས་ཤིག༔ ཅེས་ངོ་སྤྲད་དོ༔ བཅུ་གསུམ་མན་ཤེལ་བུམ་ནང་མར་མེ་ཡིས༔ རིག་པ་གཞོན་ནུ་བུམ་སྐུར་ངོ་སྤྲད་བྱ༔ ཞེས་པས༔ བུམ་སྐུ་འམ༔ བུམ་པའི་ནང་དུ་མར་མེ་བཅུག་ལ༔ བུམུ་པའི་སྟེང་དུ་རྡོ་རྗེ་སེམས་དཔའི་མེ་ལོང་བཞག་སྟེ༔ རིགས་ཀྱི་བུ༔ ད་ལྟ་སྐྱེ་གནས་བར་དོའི་དུས་འདིར་སྙིང་ག་ཆོས་ཀྱི་ཕོ་བྲང་ན་ཞི་བའི་ལྷ་ཐམས་ཅད༔ བུམ་པའི་སྐུ་ལྟ་བུ་འམ༔ བུམ་པའི་ནང་དུ་མར་མེ་བཅུག་པ་ལྟར་ཕྱི་ན་མེད་དེ༔ རིག་པ་ནང་གསལ་གྱི་སྐུ་རུ་བཞུགས་ནས་ཡོད་དོ༔ དེའི་རྩལ་ཀླད་པ་དུང་ཁང་གི་གཞལ་ཡས་ན༔ ཁྲག་འཐུང་གི་ལྷ་ཐམས་ཅད་སྐུ་ཉུངས་འབྲུ་ཙམ་ལ༔ སྤྱན་ཕུལ་ཐག་ཙམ་དུ༔ ཡེ་ཤེས་ཀྱི་སྐུ་ནང་གསལ་དུ་བཞུགས་པས༔ ཤེས་པར་གྱིས་ཤིག༔ ཅེས་ངོ་སྤྲད་དོ༔ བཅུ་བཞི༔ བཅོ་ལྔ༔ བཅུ་དྲུག༔ བཅུ་བདུན༔ བཅོ་བརྒྱད༔ བཅུ་དགུ༔ ཉི་ཤུ༔ ཉེར་གཅིག་རྣམས༔ ཆོས་ཉིད་བར་དོའི་ངོ་སྤྲོད་སྐབས་སུ༔ ལོག་ནས་ཡོད་པར་ཤེས་པར་བྱའོ༔ ཉེར་གཉིས་དར་ཡུག་མཁར་ཕོར་ངོ་སྤྲོད་ཀྱིས༔ ཡེ་ཤེས་ཐིག་ལེ་དགུ་བརྩེགས་ངོ་སྤྲོད་བྱ༔ ཞེས་པས༔ ཤང་རིང་པོ་གཅིག་ལ་དར་ཡུག་ལྔ་ལྡན་བརྐྱངས་ལ༔ མཁར་ཕོར་རམ༔ མེ་ལོང་དགུ་བརྩེགས་སྦྱར་ལ༔ ཡེ་ཤེས་ཀྱི་འོད་ལམ་ལ༔ དག་པའི་ཡེ་ཤེས་ཐིག་ལེ་དགུ་བརྩེགས་འཆར་བ་ཤེས་པར་གྱིས་ཤིག༔ ཉེར་གསུམ་དར་ཡུག་ལྔ་ལྡན་ངོ་སྤྲོད་ཀྱིས༔ དག་པ་ཡེ་ཤེས་རླུང་ལྔའི་ངོ་སྤྲོད་ནི༔ ཤང་རིང་འཕྲེད་ལ་བརྐྱངས་པ་ལ་དར་ཡུག་ཁ་དོག་ལྔ་དཔྱངས་ལ་བསྒུལ་ཞིང་བསྐྱོད་དེ༔ ཤེལ་མིག་ལ་སྦྱར་ཏེ་བསྟན་ཅིང་༔ ཡེ་ཤེས་ཀྱི་རླུང་ཁ་དོག་ལྔ་ལྡན་འཆར་བ་ངོ་ཤེས་པར་གྱིས་ཤིག༔ ཉེར་བཞི་མུ་ཁྱུད་ར་བའི་ངོ་སྤྲོད་ནི༔ ཉི་མ་ཟླ་བ་འཇའ་ཁྱིམ་གྱིས་བསྐོར་བ་ལ་བལྟས་ཏེ༔ ཞི་བའི་སྐུ༔ ཉི་མ་ཟླ་བ་ལྟ་བུ་ལ༔ མུ་ཁྱུད་འཇའ་ཚོན་སྣ་ལྔའི་ར་བས་བསྐོར་བ་འཆར་རོ༔ ངོ་ཤེས་པར་གྱིས་ཤིག༔ ཉེར་ལྔ་རྒྱ་མཚོ་ཨར་གཏད་ངོ་སྤྲོད་ནི༔ མིག་གཉིས་མཛུབ་མོས་མནན་པས་འོད་ཀོར་འོང་སྟེ༔ ད་ལྟ་སྙིང་གི་དཀྱིལ་ན་ཞི་བའི་སྐུ་འཇའ་དང་འོད་ཀྱི་ར་བར་བཞུགས་ནས་ཡོད་པའི་རྟགས་ཡིན་པས༔ ངོ་ཤེས་པར་གྱིས་ཤིག༔ ཉེར་དྲུག་རྒྱ་མཚོ་རྦ་རླབས་ངོ་སྤྲོད་ནི༔ རྣ་བ་གཉིས་མཛུབ་མོས་མནན་པས་གཏིང་ནས་འུར་ཏིང་གི་སྒྲ་འོང་སྟེ༔ ཆོས་ཉིད་ཀྱི་རང་སྒྲ་འབྲུག་སྟོང་ལྡིར་བ་ཙམ་འོང་བའི་རྟགས་ཡིན་ནོ༔ གཞན་ན་མེད་དེ་རང་སྣང་ཡིན་པས་ངོ་ཤེས་པར་གྱིས་ཤིག༔ ཉེར་བདུན་ཆོས་ཉིད་ཟེར་གྱི་ངོ་སྤྲོད་ནི༔ མིག་གཉིས་ཀ་མཛུབ་མོས་ཡུན་རིང་དུ་བཙིར་བས་ཟེར་དང་ཐིག་ལེ་ལུ་གུ་རྒྱུད་རྒྱ་ཆེ་བ་འགུལ་འཕྲིགས་འོང་ཞིང་འཕྲོ་སྟེ༔ ཆོས་ཉིད་ཀྱི་བར་དོར་ཟེར་གྱི་སྣང་བ་འཆར་བའི་རྟགས་ཡིན་པས་ངོ་ཤེས་པར་གྱིས་ཤིག༔ ཉེར་བརྒྱད་ཉི་ཟེར་བརྩིབས་ཤར་ངོ་སྤྲོད་ནི༔ ནམ་མཁའ་དྭངས་ཤིང་ཉི་ཟེར་གསལ་བའི་དུས་སུ༔ སློབ་མ་རྣམས་ཀྱིས་ཉི་ཟེར་ལ་མིག་གིས་ཟིམ་བུས་བལྟས་པས་ཉི་མའི་ཟེར་མཚོན་ཆ་གཤིབས་པ་འདྲ་བ་དང་༔ མདུང་རྩེ་གཤིབས་པ་འདྲ་བ་དང་༔ བ་དག་(ཐག་)གཟེངས་པ་འདྲ་བ་འོང་སྟེ༔ དེ་ནི་ཆོས་ཉིད་བར་དོར་འོད་ཟེར་མཚོན་ཆར་བབས་པ་འདྲ་བ༔ རང་གི་མགོ་ལ་ཟུགས་པའི་སྣང་བ་འོང་སྟེ༔ དེ་ནི་མཚོན་ཆ་མ་ཡིན་ཏེ༔ ཡེ་ཤེས་གསལ་བའི་ཟེར་ཡིན་ནོ༔ དེ་ལ་མ་སྐྲགས་པར་རང་སྣང་དུ་ངོ་ཤེས་པར་གྱིས་ཤིག༔ ཉེར་དགུ་རྒྱ་མ་སེང་རས་ངོ་སྤྲོད་ནི༔ མིག་ལ་ཐེར་མ་འམ༔ སེང་རས་ཀྱིས་བཀབ་ལ་ཉི་མ་ལ་བལྟས་པས་འཇའ་འོད་ཀྱི་ཐིག་ལེ་ཐིག་ཕྲན་ནམ་མཁའ་ཁྱབ་པར་འཆར་རོ༔ དེ་ནི་དག་པ་ཡེ་ཤེས་གྱི་སྣང་བ་ལས་གྲུབ་པའི་ཚོམ་བུའི་བརྡ་ཡིན་ཏེ༔ རང་སྣང་དག་པ་ལྷའི་ཚོམ་བུར་ངོ་ཤེས་པར་གྱིས་ཤིག༔ སུམ་ཅུ་དག་པའི་ཆོས་སྐུ་ངོ་སྤྲོད་ནི༔ བྱང་ཕྱོགས་ཀྱི་ཁྲི་སྟེང་དུ་རྡོ་རྗེ་སེམས་དཔའི་ལྷའི་སྐུ་འདྲ་འབག་གཅིག་བཞུགས༔ ལྷོ་ནས་བྱང་དུ་ཤེལ་མིག་ལ་སྦྱར་ནས་བལྟས་པས༔ ནམ་མཁའ་འཇའ་འོད་ཀྱི་སྐུར་འཆར་རོ༔ དེ་ནི་སྐུ་གསུམ་གྱི་བརྡའ་ཡིན་ཏེ༔ ཉི་མ་གསལ་ཞིང་དག་པ་ཀུན་ལ་ཁྱབ་པ་ནི་ཆོས་སྐུའི་བརྡའོ༔ འཇའ་འོད་ལས་གྲུབ་པའི་སྐུ་ནི་ལོངས་སྐུའི་བརྡའོ༔ ཤེལ་ནི་སྤྲུལ་སྐུའི་བརྡ་ཡིན་ཏེ༔ དེ་དག་ནི་དཔེའི་ངོ་སྤྲོད་དོ༔ རྡོ་རྗེ་རྦ་རླབས་དང་༔ རྒྱ་མཚོ་ཨར་གཏད་དང་༔ རྡོ་རྗེ་ལུ་གུ་རྒྱུད་ལ་སོགས་པ་ནི༔ ལུས་ལ་སངས་རྒྱས་བཞུགས་ནས་ཡོད་པའི་རྟགས་ཡིན་ཏེ༔ རྟགས་ཀྱི་ངོ་སྤྲོད་དུ་ཤེས་པར་གྱིས་ཤིག༔ སོ་གཅིག་ནམ་མཁའ་སུམ་ཕྲུག་ངོ་སྤྲོད་ནི༔ ཅིར་སྣང་ཆོས་ཀྱི་སྐུ་རུ་ངོ་སྤྲོད་དོ༔ ཞེས་པས༔ དོན་གྱི་ངོ་སྤྲོད་བསྟན་སྟེ༔ སློབ་བུ་ཐམས་ཅད་རྣམ་སྣང་ཆོས་བདུན་དང་ལྡན་པའི་ངང་ནས༔ ནམ་མཁའ་སུམ་སྤྲུག་གི་ངོ་སྤྲོད་ཅེས་བྱ་བ༔ རིག་པ་མིག་ལ་གཏད་མིག་བར་སྣང་སྟོང་པར་གཏད་ལ༔ ནམ་མཁའ་སྟོང་པ་འདི་ལ་བསྒོམ་རྒྱུ་ཅི་ཡང་མེད་པར༔ མ་ཡེངས་ཙམ་དུ་སལ་ལེ༔ ཧྲིག་གེ༔ ཡེར་རེ༔ ལྷང་ངེ་ཞོག་ལ་ཉོན་ཅིག༔ བལྟས་པས་གྲོལ་བ་ཚིག་གསུམ་པའི་རྒྱུད་ལས༔ ཀྱེ་གསང་བའི་བདག་པོ་ཉོན་ཅིག༔ ཆོས་ཀྱི་སྐུ་ཉམས་སུ་བླངས་ན་ནམ་མཁའ་སུམ་སྤྲུག་གི་གདམས་ངག་གོ༔ ཕྱིའི་ནམ་མཁའ་བར་སྣང་སྟོང་པ་འདི་ཡིན་ནོ༔ ནང་གི་ནམ་མཁའ་མིག་དང་སྙིང་གཉིས་འབྲེལ་བའི་རྩ་སྦུག་སྟོང་པ་དེ་ཡིན་ནོ༔ གསང་བའི་ནམ་མཁའ་རང་གི་སྙིང་རིན་པོ་ཆེའི་གཞལ་ཡས་ཁང་ངོ་༔ རང་གི་རིག་པ་མིག་ལ་གཏད༔ མིག་བར་སྣང་སྟོང་པ་ལ་གཏད་ནས་བཞག་པས་ཡེ་ཤེས་ལྷུག་པར་སྐྱེའོ༔ རང་གི་རིག་པ་མིག་ལ་གཏད་པའི་དུས་སུ༔ རྣམ་རྟོག་གང་གིས་ཀྱང་མ་བསྒྲིབས་པར༔ རྟོག་མེད་ཀྱི་རིག་པ་རྐྱང་པར་འཆར་རོ༔ ཞེས་གསུངས་པས༔ དེ་ལྟ་བུའི་རིག་པ་འདི་ནི༔ རྒྱུ་ལས་མ་བྱུང་༔ རྐྱེན་གྱིས་མ་བསྐྱེད༔ རང་བྱུང་གི་ཡེ་ཤེས༔ ད་ལྟའི་ཤེས་རིག་རྗེན་པ་འདི་ཀ་དག་ཆོས་ཀྱི་སྐུ་མངོན་སུམ་ཡིན་ནོ༔ འཁོར་འདས་ལམ་གསུམ་གྱི་སྣང་བ་ཅི་ཤར་ཡང་འདི་ཁོ་ན་ལས་གཞན་མེད་དོ༔ ཐག་ཆོད་པར་གྱིས་ཤིག༔ འདི་ལ་ངེས་ཤེས་ལྷང་གིས་ནམ་སྐྱེས་པ་དང་ཆོས་སྐུ་ངོ་འཕྲོད་པ་ཞེས་བྱའོ༔ ད་ནི་ཅི་བྱེད་ཀྱང་འདིའི་ངང་དང་མ་བྲལ་བར་གྱིས་ཤིག༔ དེ་ནི་དོན་གྱི་ངོ་སྤྲོད་དོ༔ དེ་ཡན་ཆད་ཀྱིས་རིག་པ་ཐོད་རྒལ་གྱི་ངོ་སྤྲོད་སོང་ངོ་༔ ས་མ་ཡ༔ རྒྱ་རྒྱ་རྒྱ༔ ད་ནི་ཆོས་ཉིད་བར་དོའི་ངོ་སྤྲོད་བསྟན་ཏེ༔ བཅུ་བཞི་གཞོན་ནུ་རྒྱན་ལྡན་ངོ་སྤྲོད་ཀྱིས༔ ཞི་བ་སྐུ་ལྔ་ལྔ་ཚོམ་ངོ་སྤྲད་བྱ༔ ཞེས་པ་ནི༔ བར་དོའི་ཞག་གྲངས་དང་མཐུན་པར་ངོ་སྤྲད་དེ༔ དེ་ཡང་གནས་ཁང་དབེན་ཞིང་༔ ནམ་མཁའ་དྭངས་ཤིང་ཉི་མ་མཐོང་བའི་སར༔ བྱང་ཕྱོགས་སུ་ཁྲི་དང་ཡོལ་བ་དཀར་པོའི་སྟེང་དུ༔ བྱིས་པ་གཞོན་ནུ་གཙང་མ༔ ཁ་དོག་དཀར་པོར་བསྒྱུར་ཞིང་རིན་པོ་ཆེ་དང་རྒྱན་དྲུག་གིས་བརྒྱན་པ༔ ཕྱག་གཡས་འཁོར་ལོ་ཐུགས་ཀར་འཛིན༔ གཡོན་པས་དྲིལ་བུ་དཀུ་ལ་བརྟེན་པའི་ཐུགས་ཀ་ནས༔ བཅུ་དགུ་དར་ཡུག་མེ་ལོང་ངོ་སྤྲོད་ཀྱིས༔ དག་པའི་ཡེ་ཤེས་འོད་ལམ་ངོ་སྤྲོད་བྱ༔ ཞེས་པས༔ དར་ཡུག་དཀར་པོ་ལ༔ མེ་ལོང་མཁར་ཕོར་རམ༔ ཐིག་ལེ་ཐིག་ཕྲན་བྲིས་པའི་འོད་ལམ་བརྐྱང་༔ ཉི་ཤུ་སྣམ་རས་ཁ་དོག་ངོ་སྤྲོད་ཀྱིས༔ མ་དག་རིགས་དྲུག་འོད་ལམ་ངོ་སྤྲོད་བྱ༔ ཞེས་པས༔ རས་སམ༔ སྣམ་བུ་དཀར་པོ་བཀྲག་མེད་ཀྱི་འོད་ལམ་བརྐྱངས༔ སེམས་དཔའ་སེམས་མ་བཅུ་དྲུག་ངོ་སྤྲོད་བྱ༔ ཞེས་པས༔ གཡས་གཡོན་དུ་གཞོན་ནུ་རྒྱན་ལྡན་སེམས་དཔའ་སེམས་མའི་ཚུལ་དུ་བཀོད་དེ༔ སློབ་བུ་རྣམས་ཤེལ་མིག་ལ་སྦྱར་ཏེ་བལྟས་པས༔ རྣམ་སྣང་གི་སྐུ་སྣང་སྟོང་འཇའི་རྣམ་པ་གཉིས་བརྩེགས་ནམ་མཁར་འཆར་རོ༔ དེའི་ཚེ༔ ཐོས་གྲོལ་ལྟར༔ ཞག་དང་པོའི་བར་དོ་འཆར་ཚུལ་རྒྱས་པར་བཤད༔ སྨོན་ལམ་བཏབ༔ འོད་ལམ་ངོ་སྤྲད་དོ༔ ངོ་སྤྲོད་གཉིས་པ༔ ཁྲི་ཡོལ་མཐིང་ག༔ གཞོན་ནུ་ཁ་དོག་མཐིང་ག་རྡོ་རྗེ་དྲིལ་བུ་འཛིན་པ༔ འོད་ལམ་མཐིང་ག་དང་དམྱལ་བའི་འོད་ལམ་ནག་པོ་བཀྲག་གཤིབས༔ ཤེལ་མིག་ལ་སྦྱར༔ ངོ་སྤྲོད༔ སྨོན་ལམ་གདབ་བོ༔ ངོ་སྤྲོད་གསུམ་པ༔ གཞི་མ་དང་རྒྱན་ཆ་ལུགས་སེར་པོ་རིན་པོ་ཆེ་དང་དྲིལ་བུ་འཛིན་པ༔ འོད་ལམ་སེར་པོ་དང་མིའི་འོད་ལམ་སྔོ་སེར་བཀྲག་མེད་གཤིབས༔ ངོ་སྤྲད༔ སྨོན་ལམ་བཏབ་པོ༔ བཞི་པ་གཞི་མ་རྒྱན་ཆ་ལུགས་དམར་པོ་པདྨ་དང་དྲིལ་བུ་འཛིན་པ༔ འོད་ལམ་དམར་པོ༔ ཡི་དྭགས་ཀྱི་འོད་ལམ་དམར་པོ་བཀྲག་མེད་གཤིབས༔ ངོ་སྤྲད༔ སྨོན་ལམ་བཏབ་བོ༔ ལྔ་པ་རྒྱན་ཆ་ལུགས་ལྗང་གུ་རྒྱ་གྲམ་དང་དྲིལ་བུ་འཛིན་ལ། འོད་ལམ་ལྗང་གུ༔ ལྷ་མ་ཡིན་གྱི་འོད་ལམ་ལྗང་གུ་བཀྲག་མེད་གཤིབས༔ ངོ་སྤྲོད༔ སྨོན་ལམ་གདབ་པོ༔ དྲུག་པ་ཁྲི་ཡོལ་ཁ་དོག་ལྔ་ལྡན༔ གཞོན་ནུ་རྒྱན་ལྡན་ཁ་དོག་ལྔ་ལྡན༔ རིགས་ལྔ་སོ་སོའི་ཕྱག་མཚན་སྤྲད༔ སོ་སོའི་འོད་ལམ་བརྐྱངས༔ དུད་འགྲོ་མ་གཏོགས་པ་ལམ་རྒྱུད་ལྔའི་འོད་ལམ་གཤིབས༔ རིགས་ལྔ་དང་༔ ཞི་ཁྲོ་སངས་རྒྱས་སྟོང་སྐུའི་ཐང་སྐུ་ལ་སོགས་བཀྲམ༔ ཉེར་གཅིག་བསེ་ཕུབ་མེ་ལོང་ངོ་སྤྲོད་ཀྱིས༔ ཞི་ཁྲོའི་དཀྱིལ་འཁོར་ཞིང་ཁམས་ངོ་སྤྲད་བྱ༔ ཞེས་པ་སྦ་ཕུབ་ལ༔ ས་ཚོན་གྱིས་འཇའ་རིས་བྲི༔ ཏིང་ཕོར་དང་༔ མེ་ལོང་མཁར་ཕོར་ལྷ་གྲངས་དང་མཉམ་པར་སྦྱར༔ བར་བར་དུ་ཐིག་ལེ་དང་ཐིག་ཕྲན་མང་པོ་བཀོད་དེ༔ གྱང་ལ་གཟར༔ ཤེལ་མིག་ལ་སྦྱར༔ ཞག་དྲུག་པ་ལ་རིགས་ལྔ་ཡོངས་རྫོགས་དང་འོད་ལམ་གྱིས་བསུ་མ་འོང་ངོ་༔ ངོ་ཤེས་པར་གྱིས་ཤིག༔ ཞེས་ཐོས་གྲོལ་ལྟར་དུ་རྒྱས་པར་བཤད༔ སྦ་ཕུབ་ཀྱིས་ཞི་བ་བཞི་བཅུ་རྩ་གཉིས་ལྷ་ངོ་སྤྲད༔ སྨོན་ལམ་བཏབ་བོ༔ བདུན་པ་བྱིས་པ་གཞོན་ནུ་ཁ་དོག་ལྔ་ལྡན་དཔའ་བོ་མཁའ་འགྲོའི་ཆ་ལུགས་བཞེངས་ཚུལ་དར་དང་རུས་པའི་རྒྱན་དྲུག་ཅན༔ དབུས་ཀྱི་གཙོ་བོའི་ཐུགས་ཀ་ནས༔ ལྷན་སྐྱེས་ཡེ་ཤེས་ཀྱི་འོད་ལམ་ཁྲ་བོ་དང་༔ དུད་འགྲོའི་འོད་ལམ་དུད་ཁ་གཤིབས༔ ཤེལ་མིག་ལ་སྦྱར༔ རིག་འཛིན་དཔའ་བོ་མཁའ་འགྲོའི་བསུ་བ་ལ་ངོ་སྤྲད་བྱ༔ སྨོན་ལམ་བཏབ་བོ༔ བརྒྱད་པ་སྤྲུལ་སྐུ་ཐུབ་པ་དྲུག་གི་ངོ་སྤྲོད་བྱ༔ ཞེས་པས༔ བཙུན་ཆུང་དྲུག་ཐུབ་པ་དྲུག་གི་ཆ་ལུགས་བཞེངས་པ་ལ་ངོ་སྤྲོད་བྱ༔ དགུ་པ་སྒོ་བ་ཡབ་ཡུམ་བརྒྱད་ཀྱི་ངོ་སྤྲོད་བྱ༔ ཞེས་པས༔ སྒོ་བ་བཞི༔ སྒོ་མ་བཞི༔ ཕྱག་མཚན་དང་ཁྲོ་ཆས་ཀྱིས་བརྒྱན་པ་ལ་ངོ་སྤྲད༔ བཅུ་པ་ཁྲི་སྟེང་འོག་གསུམ་གྱི་ཁར༔ གོང་མ་ལ་ཆོས་སྐུ་སྣང་བ་མཐའ་ཡས༔ བར་མ་ལ་ལོངས་སྐུ་ཐུགས་རྗེ་ཆེན་པོ༔ འོག་མ་ལ་སྤྲུལ་སྐུ་པདྨ་འབྱུང་གནས༔ སྐུ་གསུམ་གྱི་ཆ་ལུགས་ལ་ངོ་སྤྲོད་དོ༔ དེ་ཡན་ཆད་ནི༔ ཞི་བ་བར་དོའི་ངོ་སྤྲོད་དོ༔ ས་མ་ཡ༔ རྒྱ་རྒྱ་རྒྱ༔ ༔ དེ་ནས་ཁྲོ་བོའི་བར་དོ་ལ་ངོ་སྤྲད་པ་ནི༔ བཅོ་བརྒྱད་ཁྲོ་འབག་ཆེན་པོའི་ངོ་སྤྲོད་ཀྱིས༔ ཁྲག་འཐུང་ཁྲོ་བོའི་ལྷ་ཚོགས་ངོ་སྤྲད་བྱ༔ ཞེས་པས༔ ཁྲི་དང་ཡོལ་བ་སོ་སོའི་ཁ་དོག་ལྟར་ལ༔ དང་པོ་ཁྲོ་བོ་ཁ་དོག་སྨུག་ནག་ཞལ་གསུམ་ཕྱག་དྲུག་དུར་ཁྲོད་ཆས་དང་ཕྱག་དྲུག་མཚོན་ཆ་ཐོས་གྲོལ་ལྟར་སྤྲད༔ ཕུབ་ལས་ཚོན་གྱིས་འོད་ཟེར་འཕྲོ་བའི་ཚུལ་དུ་བྲི༔ མཁར་ཕོར་མེ་ལོང་ཁྲག་འཐུང་དྲུག་ཅུའི་གྲངས་དང་མཉམ་པ་སྦྱར་ལ་ཕྱར༔ ཕོ་ཉ་འཇིགས་གཟུགས་མགོ་བརྙན་ཅན་གྱིས་བསྐོར་ལ༔ ཤེལ་མིག་ལ་སྦྱར༔ ཆེ་མཆོག་ཡབ་ཡུམ་ངོ་སྤྲད་དོ༔ གཉིས་པ་དམར་ནག་ཞལ་གསུམ་ཕྱག་དྲུག་བུདྡྷ་ཧེ་རུ་ཀ་ངོ་སྤྲད༔ གསུམ་པ་མཐིང་ནག་ཞལ་གསུམ་ཕྱག་དྲུག་བཛྲ་ཧེ་རུ་ཀ་ངོ་སྤྲད༔ བཞི་པ་སེར་ནག་ཞལ་གསུམ་ཕྱག་དྲུག་རཏྣ་ཧེ་རུ་ཀ་ངོ་སྤྲད༔ ལྔ་པ་དམར་སྨུག་ཞལ་གསུམ་ཕྱག་དྲུག་པདྨ་ཧེ་རུ་ཀ་ངོ་སྤྲད༔ དྲུག་པ་ལྗང་ནག་ཞལ་གསུམ་ཕྱག་དྲུག་ཀརྨ་ཧེ་རུ་ཀ་ངོ་སྤྲད༔ བདུན་པ་ཀཽ་རཱི་མ་བརྒྱད་ངོ་སྤྲད༔ བརྒྱད་པ་མགོ་བརྙན་སེང་ཧ་མ་མོ་བརྒྱད་ངོ་སྤྲད༔ དགུ་པ་རྟ་གདོང་སྒོ་མ་བཞི་ངོ་སྤྲད༔ བཅུ་པ་དབང་ཕྱུག་མ་ཉི་ཤུ་རྩ་བརྒྱད་མགོ་བརྙན་སྣ་ཚོགས་ངོ་སྤྲད་དོ༔ རིགས་ཀྱི་བུ༔ འདི་དག་ནི་ཁྲོ་བོའི་བར་དོ་འཆར་ཚུལ་ཡིན་ཏེ༔ ད་ལྟ་ནི་ཀླད་པ་དུང་ཁང་གི་གཞལ་ཡས་ཁང་ན་འོད་ཀྱི་སྐུ་རུ་བཞུགས་སོ༔ རང་འཆི་བའི་ཚེ་སྐུ་དེ་དག་ཕྱིར་ཐོན་ཏེ༔ ཆེ་བ་ནི་ནམ་མཁའ་དང་མཉམ༔ འབྲིང་པོ་རི་རབ་ཙམ༔ ཆུང་བ་ཡང་རང་ལུས་བཅོ་བརྒྱད་ཙམ་གྱིས་འཇིག་རྟེན་གྱི་ཁམས་གང་བར་འཆར་དུ་འོང་ངོ་༔ དེ་དག་ཐམས་ཅད་ཀྱང་གཞན་ཞིག་ནས་འོང་བ་མ་ཡིན་ཏེ༔ རང་གི་རིག་པའི་རྩལ་ལས་འཆར་བ་ཡིན་པས་ངོ་ཤེས་པར་གྱིས་ཤིག༔ ཆོས་སྐུ་སྟོང་པའི་ཆ་ལས་ཞི་བའི་སྐུ་རུ་འཆར་རོ༔ ཆོས་སྐུ་གསལ་བའི་ཆ་ལས་ཁྲོ་བོའི་སྐུ་རུ་འཆར་རོ༔ རིག་པ་འགགས་མེད་ཀྱི་ཟེར་ལས་ཕོ་ཉ་མགོ་བརྙན་སྣ་ཚོགས་སུ་འཆར་རོ༔ ངོ་ཤེས་པར་གྱིས་ཤིག༔ སྐུ་དང་སྒྲ་འོད་ཟེར་གསུམ་ལ་མ་སྐྲག་ཅིག༔ མ་སྔངས་ཤིག༔ རང་གི་རིག་པའི་སྐུ་རུ་ངོ་ཤེས་པར་གྱིས་ཤིག༔ ངོ་ཤེས་པ་དང་གྲོལ་བ་དུས་མཉམ་དུ་འོང་ངོ་༔ ཞེས་ངོ་སྤྲད་རྒྱས་པར་ཐོས་གྲོལ་ལས་བཤད་དོ༔ བག་ཆགས་དྲག་པོས་འཁོར་བར་འཁྱམས་པའི་ཚེ༔ ཞེས་སྨོན་ལམ་བཏབ་བོ༔ ས་མ་ཡ༔ རྒྱ་རྒྱ་རྒྱ༔ དེ་ལྟར་རྒྱས་པར་མ་འབྱོར་ན་ཞག་གསུམ་ལ༔ ཉིན་གཅིག་ལ་མི་མོ་ངོ་སྤྲད་དང་རྡོ་རྗེ་རྦ་རླབས་ངོ་སྤྲད་བྱ༔ བར་མ་ལ་ཞི་བའི་ངོ་སྤྲད་ཐམས་ཅད་ཕྱོགས་གཅིག་ཏུ་རྫོགས་པར་བྱ༔ ཕྱི་མ་ལ་ཁྲོ་བོའི་ངོ་སྤྲོད་ཐམས་ཅད་ཕྱོགས་གཅིག་ཏུ་རྫོགས་པར་བྱའོ༔ རྒྱས་བསྡུས་གང་འོས་སྐབས་དང་བསྟུན་ལ་རིག་པས་འཕྲུལ་ཤེས་པར་བྱེད་པ་ཡིན་ནོ༔ ནུབ་ཐ་མ་ལ་སྲིད་པ་བར་དོའི་ངོ་སྤྲོད་རྫོགས་པར་བྱ༔ དེ་ཡང་ཁྲིད་དང་སྦྲེལ་ལ༔ ཁྲིད་ཀྱི་དམིགས་པ་དང་༔ དབང་བསྐུར་དང་༔ ངོ་སྤྲོད་གསུམ་སྦྲེལ་དུ་བྱ་ཞིང་༔ བར་དོའི་ཞག་གྲངས་དང་སྦྱར་ལ་བསྟན་པར་བྱའོ༔ ཨེ་མ་ཧོ༔ གསང་ཆེན་བླ་མེད་ཐེག་པ་ཀུན་གྱི་རྩེ༔ ཡང་གསང་བླ་མེད་རྡོ་རྗེ་ཐེག་པ་ཡི༔ བཅུ་བདུན་རྒྱུད་དང་ངོ་སྤྲོད་སྤྲས་པའི་རྒྱུད༔ མན་ངག་ལག་ལེན་དགོངས་དོན་ཀུན་དྲིལ་ནས། ཐོད་རྒལ་ངོ་སྤྲོད་མཐོང་བ་རང་གྲོལ་འདི༔ བསྒོམ་མི་དགོས་པ་མཐོང་ཆོག་ཟབ་མོའི་བཅུད༔ འཇིག་རྟེན་འདི་ན་ཤིན་ཏུ་རྙེད་དཀའི་ཆོས༔ པདྨ་བདག་གི་སྙིང་ཁྲག་དྭངས་མ་འདི༔ མ་འོངས་སྙིགས་མའི་སྐལ་ལྡན་ལས་ཅན་དོན༔ ཡི་གེར་བྲིས་ནས་རིན་ཆེན་གཏེར་དུ་སྦས༔ སྐལ་ལྡན་ལས་འཕྲོ་ཅན་དང་འཕྲད་ནས་ཀྱང་༔ འགྲོ་ཀུན་མ་ལུས་འདྲེན་པའི་དཔལ་དུ་ཤོག༔ ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ ཐོད་རྒལ་ཆོས་ཉིད་བར་དོའི་ངོ་སྤྲོད་མཐོང་བ་རང་གྲོལ་ཞེས་བྱ་བ༔ ཇི་སྲིད་འཁོར་བ་སྟོང་པར་མ་གྱུར་ཚེ༔ དེ་སྲིད་ཟབ་ཆོས་བསྟན་པ་མ་རྫོགས་སོ༔ རྒྱ་རྒྱ་རྒྱ༔ རྒྱ་རྒྱ་རྒྱ༔ འ་ཨ་ཤ་ས་མ་ཧ༔ བཀྲ་ཤིས་པར་གྱུར་ཅིག༔ ཤེལ་རྡོ་ངོ་སྤྲོད་མཐོང་བ་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་ལསཿཤེལ་རྡོ་ངོ་སྤྲོད་མཐོང་བ་རང་གྲོལ་བཞུགས་སོ༔ ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ༔ ཤེལ་རྡོ་ངོ་སྤྲོད་དུས་ཀྱི་ཆོས་བཤད་ནི༔ མུན་ཁང་ནང་གི་ཉི་ཟེར་མདུང་བཞུར་ཙམ༔ བསྟན་ནས་སློབ་བུ་ཐམས་ཅད་གྲལ་ལ་བསྒྲིགས༔ སློབ་དཔོན་གྱིས་ནི་སློབ་བུ་རེ་རེ་བཞིན༔ གཉིད་ལོག་འཕར་རྩ་དལ་བུས་མནན་པ་ཡིས༔ བར་དོ་དང་པོའི་འོད་གསལ་འཆར་བར་འགྱུར༔ དེ་ནས་བརྒྱལ་བ་སངས་ལ་ཁད་པ་དང་༔ གར་གིང་ཁྲོ་འབག་འཇིགས་གཟུགས་མང་པོ་ཡིས༔ རྔ་གླིང་རོལ་ཆ་ཧཱུྃ་ཕཊ་ཧ་སྒྲ་སྒྲོགས༔ དེ་ཚེ་སློབ་དཔོན་ཉིད་ཀྱིས་ཉི་ཞུར་ལ༔ མེ་ལོང་ཤེལ་རྡོ་སྤྲད་དེ་སྤེལ་བ་ཡིས༔ འོད་དང་ཟེར་དང་འཇའ་འོད་སྣ་ལྔ་ཡིས༔ འགུལ་འཁྲིགས་སྣ་ཚོགས་མུན་ཁང་གང་བར་འགྱུར༔ དེ་ཚེ་ཐམས་ཅད་སྔངས་སྐྲག་ངུ་འབོད་སྟོན༔ དེ་ནས་སློབ་དཔོན་ཉིད་ཀྱིས་བར་དོ་ཡི༔ ངོ་སྤྲད་ཐམས་ཅད་སྐབས་དང་སྦྱར་དེ་གསུང་༔ ཁྱད་པར་ཤེལ་རྡོའི་ངོ་སྤྲོད་ལྔ་ཚན་དུ༔ འདི་ལྟར་བླ་མས་ཚིག་གིས་ངོ་སྤྲད་དོ༔ ཨེ་མ་ཧོ༔ རྡོ་ཡི་སྙིང་པོ་རིན་ཆེན་མན་ཤེལ་འདི༔ རྡོ་རྗེ་སེམས་དཔའི་མེ་ལོང་ཞེས་བྱ་སྟེ༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས༔ འགྲོ་བའི་དོན་དུ་མི་ཡུལ་འདིར་བབས་ཏེ༔ སྐུ་ལྔ་ཡེ་ཤེས་ངོ་སྤྲད་སྟེན་དུ་བཟང་༔ ཤེལ་འདི་གཞི་མ་འགྱུར་མེད་བརྟན་པ་འདི༔ ཆོས་སྐུའི་དགོངས་པ་གཞི་ལ་ཁྱབ་པའི་བརྡ༔ དབྱིབས་དང་ཁ་དོག་ལེགས་པར་གསལ་བ་འདི༔ ལོངས་སྐུ་མཚན་དང་དཔེ་བྱད་ལྡན་པའི་བརྡ༔ འོད་ཟེར་ལྔ་ལྡན་ཕྱི་རུ་འཕྲོ་བ་འདི༔ གང་ལ་གང་འདུལ་སྤྲུལ་སྐུར་འཕྲོ་བའི་བརྡ༔ ཕྱི་ནང་མེད་པར་འགག་མེད་གསལ་བ་འདི༔ ཆོས་ཀྱི་སྐུ་ལ་མདུན་རྒྱབ་མེད་པའི་བརྡ༔ འཇའ་འོད་སྣ་ལྔ་རང་ལ་འཆར་བ་འདི༔ ཡེ་ཤེས་ལྔ་ལྡན་ཡེ་ནས་གསལ་བའི་བརྡ༔ འདི་ཉིད་ཆོས་སྐུ་དངོས་ནི་མ་ཡིན་ཏེ༔ དཔེ་འདི་ཇི་བཞིན་དེ་ལྟར་ཤེས་པར་གྱིས༔ རིགས་ཀྱི་བུ་རྣམས་རང་གི་སེམས་ལ་ལྟོ༔ རང་སེམས་རིག་པ་གཤིས་ཀྱི་འདུག་ཚུལ་ཡང་༔ རིན་ཆེན་མན་ཤེལ་འདི་ཡིས་ངོ་སྤྲད་ན༔ ཤེལ་འདི་ཕྱི་ནང་སྟེང་འོག་མེད་པ་ལྟར༔ སེམས་ལ་ཕྱི་ནང་སྟེང་འོག་མེད་པའི་བརྡ༔ ཤེལ་འདི་ཟང་ཐལ་སྒྲིབ་མེད་གསལ་བ་ལྟར༔ སེམས་ཉིད་སྒྲིབ་མེད་ཟང་ཐལ་གསལ་བའི་བརྡ༔ ཤེལ་ལ་འོད་ཟེར་ལྔ་ལྡན་འཕྲོ་བ་འདི༔ སེམས་ཀྱི་རིག་རྩལ་ཅིར་ཡང་འཕྲོ་བའི་བརྡ༔ འོད་དང་ཟེར་ལ་རང་བཞིན་མེད་པ་ལྟར༔ རྟོག་པ་རང་བཞིན་མེད་པར་འཕྲོ་བའི་བརྡ༔ ཤེལ་གྱི་འཇའ་འོད་ཁ་དོག་ལྔ་ལྡན་འདི༔ རང་བཞིན་ཤེས་ན་ཡེ་ཤེས་ལྔ་ཡིན་ཏེ༔ དེ་ཡང་མཐིང་ཀ་ཆོས་དབྱིངས་ཡེ་ཤེས་བརྡ༔ འོད་ཟེར་དཀར་པོ་མེ་ལོང་ཡེ་ཤེས་བརྡ༔ འོད་ཟེར་སེར་པོ་མཉམ་ཉིད་ཡེ་ཤེས་བརྡ༔ འོད་ཟེར་དམར་པོ་སོར་རྟོག་ཡེ་ཤེས་བརྡ༔ འོད་ཟེར་ལྗང་གུ་བྱ་གྲུབ་ཡེ་ཤེས་བརྡ༔ མ་ཤེས་འཁྲུལ་ན་ཉོན་མོང་དུག་ལྔ་སྟེ༔ དེ་ཡང་འོད་ཟེར་མཐིང་ག་ཞེ་སྡང་ལ༔ འོད་ཟེར་དཀར་པོ་ཉོན་མོངས་གཏི་མུག་བརྡ༔ འོད་ཟེར་སེར་པོ་ཉོན་མོངས་ང་རྒྱལ་བརྡ༔ འོད་ཟེར་དམར་པོ་ཉོན་མོངས་འདོད་ཆགས་བརྡ༔ འོད་ཟེར་ལྗང་ཁུ་ཉོན་མོངས་ཕྲག་དོག་གོ༔ འོད་ལྔ་ཤེས་ན་རྒྱལ་བ་རིགས་ལྔ་སྟེ༔ འོད་ཟེར་མཐིང་ག་རྡོ་རྗེ་སེམས་དཔའ་ཡིན༔ འོད་ཟེར་དཀར་པོ་རྣམ་པར་སྣང་མཛད་ཡིན༔ འོད་ཟེར་སེར་པོ་རིན་ཆེན་འབྱུང་ལྡན་ཡིན༔ འོད་ཟེར་དམར་པོ་སྣང་བ་མཐའ་ཡས་ཡིན༔ འོད་ཟེར་ལྗང་གུ་དོན་ཡོན་གྲུབ་པ་ཡིན༔ ངོ་མ་ཤེས་ན་ཉོན་མོངས་ཕུང་པོ་ལྔ༔ དེ་ཡང་མཐིང་ཀ་རྣམ་ཤེས་ཕུང་པོ་ཡིན༔ འོད་ཟེར་དཀར་པོ་གཟུགས་ཀྱི་ཕུང་པོ་ཡིན༔ འོད་ཟེར་སེར་པོ་ཚོར་བའི་ཕུང་པོ་ཡིན༔ འོད་ཟེར་དམར་པོ་འདུ་ཤེས་ཕུང་པོ་ཡིན༔ འོད་ཟེར་ལྗང་གུ་འདུ་བྱེད་ཕུང་པོ་ཡིན༔ འོད་ལྔའི་དོན་རྟོགས་ཡུམ་མཆོག་ལྔ་ཡིན་ཏེ༔ འོད་ཟེར་མཐིང་ག་ནམ་མཁའ་དབྱིངས་ཕྱུག་མ༔ འོད་ཟེར་དཀར་པོ་སངས་རྒྱས་སྤྱན་མ་ཡིན༔ འོད་ཟེར་སེར་པོ་ཡུམ་མཆོག་མཱ་མ་ཀཱི༔ འོད་ཟེར་དམར་པོ་ཡུམ་མཆོག་གོས་དཀར་མོ༔ འོད་ཟེར་ལྗང་གུ་དམ་ཚིག་སྒྲོལ་མའོ༔ ངོ་མ་ཤེས་ན་འབྱུང་བ་ལྔ་ཡིན་ཏེ༔ འོད་ཟེར་མཐིང་ཀ་འབྱུང་བ་ནམ་མཁའི་ཁམས༔ འོད་ཟེར་དཀར་པོ་འབྱུང་བ་ཆུ་ཡི་ཁམས༔ འོད་ཟེར་སེར་པོ་འབྱུང་བ་ས་ཡིན་ཏེ༔ འོད་ཟེར་དམར་པོ་འབྱུང་བ་མེ་ཡི་ཁམས༔ འོད་ཟེར་ལྗང་གུ་འབྱུང་བ་རླུང་ཡིན་ནོ༔ འོད་ལྔ་ཤེས་ན་རིགས་ལྔའི་རང་བཞིན་ཏེ༔ དེ་ཡང་འོད་ཟེར་མཐིང་ཀ་རྡོ་རྗེའི་རིགས༔ འོད་ཟེར་དཀར་པོ་བདེར་གཤེགས་རིགས་ཡིན་ནོ༔ འོད་ཟེར་སེར་པོ་རིན་པོ་ཆེ་ཡི་རིགས༔ འོད་ཟེར་དམར་པོ་པདྨའི་རིགས་ཡིན་ནོ༔ འོད་ཟེར་ལྗང་གུ་ལས་ཀྱི་རིགས་ཡིན་ནོ༔ ངོ་མ་ཤེས་ན་འབྱུང་བ་རླུང་ལྔ་སྟེ༔ འོད་ཟེར་མཐིང་ཀ་ནམ་མཁའ་གོ་འབྱེད་རླུང་༔ འོད་ཟེར་དཀར་པོ་ཆུ་རླུང་གཤེར་བྱེད་རླུང་༔ འོད་ཟེར་སེར་པོ་ས་རླུང་ལྗིད་འཐིབས་རླུང་༔ འོད་ཟེར་དམར་པོ་མེ་རླུང་སྲེག་བྱེད་རླུང་༔ འོད་ཟེར་ལྗང་གུ་སྐྱོད་བྱེད་རླུང་གི་རླུང་༔ འོད་ལྔའི་དོན་ཤེས་ཞིང་ཁམས་ལྔ་ཡིན་ཏེ༔ འོད་ཟེར་མཐིང་ག་སྡུག་པོ་བཀོད་པའི་ཞིང་༔ འོད་ཟེར་དཀར་པོ་མངོན་པར་དགའ་བའི་ཞིང་༔ འོད་ཟེར་སེར་པོ་དཔལ་དང་ལྡན་པའི་ཞིང་༔ འོད་ཟེར་དམར་པོ་བདེ་བ་ཅན་གྱི་ཞིང་༔ འོད་ཟེར་ལྗང་གུ་ལས་རབ་རྫོགས་པའི་ཞིང་༔ ངོ་མ་ཤེས་ན་འོད་ལྔ་ཕྱོགས་ལྔ་སྟེ༔ དེ་ཡང་འོད་ཟེར་མཐིང་ག་དབུས་ཀྱི་ཕྱོགས༔ འོད་ཟེར་དཀར་པོ་འདི་ནི་ཤར་ཕྱོགས་ཡིན༔ འོད་ཟེར་སེར་པོ་འདི་ནི་ལྷོ་ཡི་ཕྱོགས༔ འོད་ཟེར་དམར་པོ་འདི་ནི་ནུབ་ཕྱོགས་ཏེ༔ འོད་ཟེར་ལྗང་གུ་བྱང་གི་ཕྱོགས་ཡིན་ནོ༔ འོད་ལྔའི་དོན་ཤེས་ཁྲག་འཐུང་རིགས་ལྔའི་སྐུ༔ འོད་ཟེར་མཐིང་ག་བཛྲ་ཧེ་རུ་ཀ༔ འོད་ཟེར་དཀར་པོ་བུདྡྷ་ཧེ་རུ་ཀ༔ འོད་ཟེར་སེར་པོ་རཏྣ་ཧེ་རུ་ཀ༔ འོད་ཟེར་དམར་པོ་པདྨ་ཧེ་རུ་ཀ༔ འོད་ཟེར་ལྗང་གུ་ཀརྨ་ཧེ་རུ་ཀ༔ ངོ་མ་ཤེས་ན་ཉོན་མོངས་བདུད་ལྔ་སྟེ༔ འོད་ཟེར་དཀར་པོ་ལྷ་ཡི་བུ་ཡི་བདུད༔ འོད་ཟེར་མཐིང་ག་འཆི་བདག་བདུད་ཡིན་ནོ༔ འོད་ཟེར་སེར་པོ་ཕུང་པོའི་བདུད་ཡིན་ནོ༔ འོད་ཟེར་དམར་པོ་ཉོན་མོངས་པ་ཡི་བདུད༔ འོད་ཟེར་ལྗང་གུ་མ་རིག་འཁྲུལ་བའི་བདུད༔ འོད་ལྔའི་དོན་ཤེས་མཁའ་འགྲོ་སྡེ་ལྔ་ཡིན༔ འོད་ཟེར་མཐིང་ཀ་རྡོ་རྗེ་མཁའ་འགྲོ་ཡིན༔ འོད་ཟེར་དཀར་པོ་སངས་རྒྱས་མཁའ་འགྲོ་ཡིན༔ འོད་ཟེར་སེར་པོ་རིན་ཆེན་མཁའ་འགྲོ་ཡིན༔ འོད་ཟེར་དམར་པོ་པདྨ་མཁའ་འགྲོ་ཡིན༔ འོད་ཟེར་ལྗང་གུ་ལས་ཀྱི་མཁའ་འགྲོ་ཡིན༔ ཤེལ་རྡོ་ངོ་སྤྲོད་ཅེས་བྱ་བ༔ པདྨ་བདག་གིས་རིན་ཆེན་གཏེར་དུ་སྦས༔ ཀརྨ་གླིང་པའི་གཏེར་མའོ༔ བཀྲ་ཤིས་པར་གྱུར་ཅིག༔ སྲིད་པ་བར་དོའི་ངོ་སྤྲོད་དགེ་སྡིག་རང་གཟུགས་སྟོན་པའི་གདམས་པ།ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ སྲིད་པ་བར་དོའི་ངོ་སྤྲོད་དགེ་སྡིག་རང་གཟུགས་སྟོན་པའི་གདམས་པ་སྲིད་པ་རང་གྲོལ་བཞུགས་སོ༔ ཆོས་སྐུ་སྐྱེ་མེད་ཀུན་བཟང་ཡབ་ཡུམ་དང་༔ ལོངས་སྐུ་འགགས་མེད་རྒྱལ་བ་ཞི་ཁྲོའི་ལྷ༔ སྤྲུལ་སྐུ་རང་བྱུང་པདྨ་འབྱུང་གནས་ལ༔ གུས་པས་ཕྱག་འཚལ་བར་དོར་གྲོལ་བར་ཤོག༔ པདྨ་ཞི་ཁྲོའི་བར་དོ་ཐོས་གྲོལ་ལས༔ དབང་བསྐུར་ངོ་སྤྲོད་མཐོང་གྲོལ་ཆེན་མོ་ཡི༔ ཆོས་ཉིད་བར་དོ་ངོ་སྤྲོད་གོང་དུ་སོང་༔ ད་ནི་སྲིད་པ་བར་དོའི་ངོ་སྤྲོད་བསྟན༔ འདིར་སྲིད་པ་བར་དོའི་ངོ་སྤྲོད་བསྟན་པར་བྱ་སྟེ༔ ངོ་སྤྲོད་གོང་མ་རྣམས་ཚར་བའི་རྗེས་སུ༔ ཡང་༔ བླ་མས་གཤིན་རྗེ་ཆོས་ཀྱི་རྒྱལ་པོའི་ཆ་ལུགས་གདོང་ལ་གཤིན་རྗེའི་ཁྲོ་འབག་ཆེན་པོ་ཞིག་གོན༔ ལག་པ་གཡས་སུ་ཁྲམ་ཤིང་ཆེན་པོ་ཞིག་ཁྱེར༔ གཡོན་དུ་མཎྜལ་ལམ་མེ་ལོང་ཆེན་པོ་ཞིག་ཐོགས་ལ༔ ལུས་ལ་བེར་དམར་པོ་ཞིག་གྱོན་ཏེ་ཁྲི་མཐོན་པོ་ཞིག་གི་ཁར་བསྡད༔ དེའི་འཁོར་དུ་རཀྴ་གླང་མགོས་བེར་ནག་པོ་ཞིག་གོན༔ མགོ་ལ་གླང་མགོའི་འབག་གཅིག་གོན༔ ལག་ན་ཞག་པ་ནག་པོ་ཞིག་ཐོགས་ལ་གཡས་སུ་འཁོད༔ གཞན་ཡང་འབྱུང་པོ་སྤྲེལ་མགོ༔ སྤྲེའུའི་མགོ་ཅན་ལག་ན་ན་རག་གི་བྲེ་སྲང་ཁྱེར་བ༔ དུ་ར་ཕག་མགོ་ཕག་གི་གདོང་ཅན་ལག་ན་ཁྲམ་ཤིང་ཐོགས་པ༔ གདུག་པ་སྦྲུལ་གྱི་མགོ་ཅན་ལག་ན་མེ་ལོང་ཐོགས་པ༔ གཏུམ་པོ་དོམ་མགོ་དོམ་གྱི་མགོ་ཅན་ལག་ན་སྦུད་པ་ཐོགས་པ༔ རྔམ་པ་སེང་མགོ་སེངྒེའི་མགོ་ཅན་ལག་ན་ཐོ་བ་ཐོགས་པ༔ འདབ་ཆགས་ཁྱུང་མགོ་ཁྱུང་གི་མགོ་ཅན༔ ལག་ན་སོག་ལེ་ཐོགས་པ་ལ་སོགས་ཏེ་གཤིན་རྗེ་ཆ་ལུགས་མགོ་བརྙན་ཅན་མང་པོས་ཆོས་ཀྱི་རྒྱལ་པོའི་གཡས་གཡོན་དུ་ཁྲིམས་ར་བཅས་ཏེ་གྲལ་དུ་འཁོད་དོ༔ ལྷན་ཅིག་སྐྱེས་པའི་ལྷས་འབག་ཞི་བ་དཀར་པོ་ཞིག་གྱོན་པ༔ དར་དཀར་གྱི་གོ་ཟུ་གོན་ནས་རྡེའུ་དཀར་པོའི་སྣོད་ཁྱེར༔ ལྷན་ཅིག་སྐྱེས་པའི་འདྲེ་ཁྲོ་འབག་ནག་པོ་ཞིག་གྱོན༔ གོས་ནག་པོ་གོན་ནས་རྡེའུ་ནག་པོའི་སྣོད་ཁྱེར་ཆོས་ཀྱི་རྒྱལ་པོའི་མདུན་ནས་གཡས་ཕྱོགས་སུ་སྣམ་བུ་དཀར་པོ་གཅིག་ལམ་དཀར་པོའི་ཚུལ་དུ་བརྐྱངས་ལ༔ དེའི་སྣ་དེར་མི་གཉིས་ཀྱི་ཐུགས་རྗེ་ཆེན་པོའི་ཆ་ལུགས་ཞལ་གཅིག་ཕྱག་བཞིའི་ཚུལ་དུ་རྒྱན་གྱིས་བརྒྱན་ལ༔ ཁྲི་ཐོག་ཏུ་ཡོལ་བས་བསྒྲིབས་ལ་སྦས་ལ་བཞག༔ གཡོན་དུ་སྣམ་བུ་ནག་པོ་གཅིག་ལམ་ནག་པོའི་ཚུལ་དུ་བརྐྱངས་ལ༔ མུན་ཁང་ནག་པོ་གཅིག་གི་སྒོ་སྣ་གཏད་ལ་བཞག༔ དེ་ནས་ལོགས་གཞན་ཞིག་ཏུ་མི་གཅིག་གི་ཚེ་འདས་དད་ལྡན་དཔལ་སྐྱེས་ཞེས་བྱ་བའི་མིང་བཏགས་པ་གཅིག་སྦས་ལ་བཞག༔ ཟུར་གཅིག་ཏུ་སྡིག་ཅན་རིགས་ངན་གདོལ་པ་ཞེས་བྱ་བའི་ཚེ་འདས་སུ་མིང་བཏགས་པ་གཅིག་སྦས་ལ་བཞག་ལ༔ དེ་ནས་ཆོས་ཀྱི་རྒྱལ་པོས་ཁྲམ་ཤིང་དེ་ལ་ཁྲམ་རིས་གཅིག་བྲིས་ཏེ༔ ཀྱཻ་རཀྴ་གླང་མགོ༔ འཇིག་རྟེན་མི་ཡུལ་བྲང་ང་ཁམས་ནས་མི་གཅིག་ཚེའི་དུས་ལ་བབས་པ་འདྲའོ༔ ང་ཡི་ཁྲམ་ལ་བབས་ནས་བྱུང་ངོ༔ ཅེས་གསུངས་པ་དང་༔ རཀྴ་གླང་མགོས་གདུག་པ་སྦྲུལ་མགོ་ལ་བོས་ཏེ༔ ཀྱཻ་གདུག་པ་སྦྲུལ་མགོ༔ ཁྱོད་ཀྱི་མེ་ལོང་ལ་ལྟོས་ཤིག༔ ཚེ་ལས་འདས་པ་འདིའི་ཡུལ་ནི་གང་༔ རིགས་ནི་གང་༔ མིང་ནི་ཅི་ཟེར་ལྟོས་དང་བྱས་པས༔ གདུག་པ་སྦྲུལ་མགོས་འདི་སྐད་དོ༔ ཀྱཻ་ཚེ་ལས་འདས་པ་དུས་ལ་བབས་པ་དེ༔ ཡུལ་ནི་རྒྱ་གར་ཟངས་གླིང་དུ་འདུག༔ གྲོང་ནི་ཤན་པའི་གྲོང་ཁྱེར་ཤན་ཏི་ནག་པོར་འདུག༔ རིགས་ནི་མི་རིགས་བཞིའི་ནང་ནས་རིགས་ངན་གདོལ་པའི་རིགས་སུ་འདུག༔ མིང་ནི་སྡིག་ཅན་དམྱལ་བ་འབུམ་དུ་ཟེར༔ ཁོ་ཚེའི་གྲངས་ཐེམས་ནས་ཁྲམ་ལ་བབ་པར་འདུག་གོ༔ ད་རྒྱུགས་ཤིག་བྱས་ལ༔ རཀྴ་གླང་མགོ་དང་༔ དུ་ར་ཕག་མགོ་དང་ལྷན་གཅིག་སྐྱེས་པའི་འདྲེ་དང་གསུམ་རྒྱུགས་ནས་སོང་བའི་རྗེས་སུ་ལྷན་ཅིག་སྐྱེས་པའི་ལྷ་ཡང་སྡོང་གྲོགས་ལ་རྒྱུག་པ་དང་༔ དེ་རྣམས་ཀྱིས་མི་ཡུལ་བྲང་ང་ཁམས་ནས་སྡིག་ཅན་ཁོ་རྙེད་མ་ཐག་ཏུ་རྐེ་ལ་ཞགས་པ་ནག་པོ་བཏགས་ནས༔ གླང་མགོ་ཅན་གྱིས་ཁྲིད༔ དུ་ར་ཕག་མགོས་ལག་པ་ནས་འཇུས་ནས་དྲུད༔ ལྷན་ཅིག་སྐྱེས་པའི་འདྲེས་རྡེའུ་ནག་པོ་ཁུར་གཅིག་ཁུར་ནས་རྒྱབ་ནས་དེད༔ ལྷན་ཅིག་སྐྱེས་པའི་ལྷས་རྡེའུ་དཀར་པོའི་སྣོད་གཅིག་ཏུ་རྡེའུ་དཀར་པོ་རྡོག་མ་དྲུག་བཅུག་ནས་ངོ་ཚ་བ་བཞིན་དུ༔ རོགས་ལྡན་ལ་འབད་པའི་ཚུལ་གྱིས་ཐལ་མོ་སྦྱར་ནས་དར་དཀར་པོ་གཅིག་རཀྴ་གླང་མགོ་ལ་ཕུལ་ནས་ཞུ་བ་བྱས་ཀྱང་མ་ཐུབ་པར་སྐད་ངན་ཙི་རི་རི་ཆོས་ཀྱི་རྒྱལ་པོའི་དྲུང་དུ་ཁྲིད་ནས་དེར་འཁོད་པ་དང་༔ ཆོས་ཀྱི་རྒྱལ་པོས་འདི་སྐད་དྲིས་སོ༔ ཀཱ་ཡེ་མི་ནག་པོ་བྲེ་སྲང་ཁུར་བ་ཁྱེད་སུ་ཡིན༔ གང་ནས་འོང་༔ ངའི་མདུན་དུ་མིག་གིས་བལྟ་མི་ཕོད་པ་ཅི་ཡིན༔ ཁྱོད་མི་ལུས་གཅིག་ནི་ཐོབ་པ་འདྲ་འདུག་པ་ལ༔ དཀར་པོ་དགེ་བ་ལ་སྐལ་བ་མ་ཆད་པ་ཙམ་ཞིག་ཡོད་དམ༔ ནག་པོ་སྡིག་པ་ལ་འཛེམ་བག་བྱས་པའི་བཤད་རྒྱུ་ཅི་འདྲ་ཡོད༔ ད་ལྟ་ལ་འུར་ཤོད་ཅིག༔ ཅེས་དྲིས་པ་དང་༔ སྡིག་ཅན་དེས་འདི་སྐད་ཞུའོ༔ ཀྱི་ཧུད་ཀྱི་ཧུད༔ ཆོས་ཀྱི་རྒྱལ་པོའི་དྲུང་དུ་ཞུ་ན༔ བདག་གིས་མི་ལུས་ཙམ་པོ་བ་གཅིག་ཐོབ་སྟེ༔ ཡོ་བྱད་ནི་ཆུང་༔ ཟས་གོས་ནི་ངན༔ བུ་སྨད་ནི་མང་༔ བཟའ་བ་མེད་པས་སེམས་ཅན་མང་པོའི་སྲོག་ལ་འབག་པ་ལགས༔ འབྲས་ཟ་རྒྱུ་མེད་ནས་ལོ་མང་པོ་ལོན༔ ཟས་སུ་ཤ་དྲོན་མོ་ཟ་བ་ལས་གཞན་མེད་དོ༔ འབྲས་ཆང་དང་དཀར་ཆུ་རག་མ་མྱོང་བས་ལོ་མང་པོ་ལོན༔ སྐོམ་དུས་ཁྲག་དང་ཆུ་འཐུང་བ་ཡིན་ལགས༔ ངེད་འོང་བ་ཡུལ་བྲང་ང་ཁམས་དུ་དགེ་བའི་བཤེས་གཉེན་པ་མང་པོས་སྡིག་པ་བྱས་པའི་ཉེས་དམིགས་དང་༔ དགེ་བ་བྱས་པའི་ཕན་ཡོན་མང་པོ་གསུངས་ཤིང་འདུག་ཀྱང་བདག་ནི་དེའི་དྲུང་ན་ཡང་མ་བྱིན༔ མི་ཀུན་གྱིས་ན་རེ༔ ཁྱོད་འདི་ལྟ་བུའི་སྡིག་པ་མ་བྱེད༔ ནམ་ཞིག་འཆི་བ་ཞེས་བྱ་བ་ཞིག་འོང་གིས༔ དེ་ཙ་ན་ཁྱོད་དམྱལ་བར་འགྲོ་ངེས་པས་སྡིག་པ་སྤོངས༔ དགེ་བ་སྒྲུབས་ཤིག་ཟེར་ནས་གྲོས་འདེབས་སུ་བྱུང་ཡང་༔ བདག་གི་བསམ་པ་ལ་དམྱལ་བ་ཡོད་ཟེར་བ་རང་ཨི་བདེན་མི་ཤེས༔ དམྱལ་བར་ཕྱིན་ཟེར་ནས་ལོག་ནས་འོང་བ་སུ་མི་འདུག་སྙམ་ནས་མི་རྣམས་ལ་བདག་གིས་ལན་སྨྲས་པ༔ དམྱལ་བར་ཕྱིན་ནས་ལོགས་པ་སུ་ཡོད༔ དམྱལ་བ་ཡོད་པ་རང་ག་ན་ཡོད༔ ཁ་བདེ་ལྕེ་བདེའི་རྫུན་ཚིག་ཡིན༔ འདི་མན་ཆད་ནི་ས་བརྫོང་རྡོ་བརྫོང་ཡིན་པས༔ དམྱལ་བ་མེད༔ འདི་ཡན་ཆད་ནི་ནམ་མཁའ་སྟོང་པ་ཡིན༔ སངས་རྒྱས་མེད༔ ད་ལྟ་གསོན་པའི་དུས་སུ་གསོད་ཅིང་ཟ་བས་ཆོག༔ ཤི་ཙ་ན་ལུས་ནི་དུར་ཁྲོད་དུ་བསྐྱལ་ནས་བྱ་དང་གཅན་གཟན་གྱིས་ཟོས་ནས་མེད་པར་འགྲོ༔ སེམས་ནི་ཡལ་ནས་འགྲོ་བ་ཡིན༔ དེ་ཙ་ན་དམྱལ་བར་འགྲོ་མཁན་སུས་བྱེད༔ ཧ་ཧ་ཞེས་སྨྲས་ཤིང་༔ དམྱལ་བ་རང་མི་བདེན་སྙམ་ནས་སྡིག་པ་བྱས༔ རེས་དམྱལ་བ་བདེན་པར་གྱུར་ན་ཚེ་ཕྱི་མ་ཕ་གིར་ལུས་པ་ཡིན༔ ད་ལྟ་ལྟོ་རྒྱབ་གཉིས་པོ་སྐྱིད་པར་བྱུང་ན་ཕྱི་མ་ཅི་འདྲ་ནའང་འདྲ༔ སྙམ་པ་བྱུང་༔ དེ་ལྟར་མ་གོ་མ་རིག་བླུན་པའི་དབང་གིས་སྡིག་པ་བྱས་པ་ལགས༔ ཁྱོད་ཆོས་ཀྱི་རྒྱལ་པོ་དང་༔ རཀྴ་གླང་མགོ་ལ་སོགས་པ་རྣམས་དངོས་སུ་ཡོད་པ་འདི་ང་ལ་རྒྱུས་མེད་པས་ལན༔ ཁྱེད་རྣམས་བར་དོའི་ཡུལ་འདིར་ཡོད་པ་ཆ་ཡོད་བཞིན་དུ་ཁྱེད་རྣམས་ལ་བརྙས་པ་བྱས་ནས་སྡིག་པ་བྱས་པ་མ་ཡིན་ནོ༔ མ་གོ་མ་རིག་པས་ལན་པ་ལགས་པས༔ ད་ཁྱེད་དཔོན་གཡོག་གི་ང་ལ་ཁྲིམས་མི་གཏུག་པར་ཞུ༔ ང་མི་ཡུལ་དུ་ཡོད་དུས་འདི་འདྲ་མངོན་སུམ་ཡོད་པའི་ཆ་ཡོད་ན་སྡིག་པ་མི་བྱེད་པའི་རང་དབང་ཡོད་དེ༔ ད་ནི་ངན་པའི་བློ་སྣ་ཕྱི་ན་ལུས༔ ཁྱེད་ནི་ཆོས་ཀྱི་རྒྱལ་པོ་ཡིན་ཟེར་བས༔ ཀྱི་ཧུད་ཀྱི་ཧུད་བདག་ལ་སྙིང་རྗེ་མཛོད་དང་༔ བདག་གི་རོགས་ལྡན་མཛོད་དང་༔ འདི་ནས་མར་ལ་སྡུག་བསྔལ་ཆེན་པོ་ཡོད་ན་ཆོས་ཀྱི་རྒྱལ་པོ་ཁྱེད་ཀྱིས་ང་འདི་ནས་མར་ལ་མི་བཏང་བར་ཡར་མི་ཡུལ་དུ་གཏང་རོགས་མཛོད་དང་༔ དེ་ནས་སྡིག་པ་མི་བྱེད་ལགས༔ དགེ་བ་བྱེད་ལགས༔ ཀྱི་ཧུད་ཀྱི་ཧུད་ཅེས་ཟེར་བ་དང་༔ ཡང་ལྷན་ཅིག་སྐྱེས་པའི་ལྷས་དར་དཀར་པོ་ཞིག་ཆོས་ཀྱི་རྒྱལ་པོའི་ཕྱག་ཏུ་ཕུལ་ནས་འདི་སྐད་ཞུས་སོ༔ ཨེ་མ་ཆོས་རྒྱལ་ཐུགས་ཀྱིས་དགོངས་མཛོད་དང་༔ ཟངས་གླིང་རིགས་ངན་གདོལ་པ་ཟེར་བ་འདི༔ དགེ་སྡིག་མ་ཤེས་གཏི་མུག་རྨོངས་པ་ཡི༔ མ་རིག་དབང་གིས་སྡིག་པ་བྱས་པ་ཡིན༔ གོ་ཞིང་རིག་ནས་བྱས་པ་མ་ཡིན་པས༔ འདི་ལ་ཆད་པ་བཅད་དུ་མི་འཚལ་ཏེ༔ དགེ་བའི་ལས་ཀྱང་ཅུང་ཟད་བྱས་པ་ཡོད༔ ཆུ་ཆེན་གཅིག་ལས་མི་དྲུག་མ་ཐར་ནས༔ དགེ་བའི་སེམས་ཀྱིས་དྲུག་པོ་ཆུ་ལས་སྒྲོལ༔ དེའི་རྟགས་སུ་རྡེའུ་དཀར་པོ་དྲུག༔ གཞན་ཡང་དེ་དང་འདྲ་བའི་དགེ་བ་ཡང་༔ ཞོར་ལ་བསགས་པ་ཅི་ཡོད་ཅི་ཆ་བས༔ ཆོས་རྒྱལ་ཆེན་པོས་དགོངས་པ་ཀློད་པར་ཞུ༔ ཞེས་ཞུས་ནས་ཕྱག་འཚལ་བ་དང་༔ ཡང་འདྲེ་ནག་པོས་སྨྲས་པ༔ ཧ་ཧ༔ ལྷ་དཀར་པོ་ཁྱོད་ལ་དེ་ཙམ་བཤད་རྒྱུ་ཡོད་དམ༔ ཁྱེད་སྣོད་སྟོང་ཐོགས་པ་ངོ་མི་ཚའམ༔ ཁོ་རིགས་ངན་གདོལ་བ་ཞེས་བྱ་བ་འདིས་མི་ཚེ་སྡིག་ལ་བསྐྱལ༔ དགེ་བའི་སྐལ་བ་ཆད༔ སེམས་ཅན་མཐོང་ཚད་བསད༔ ལྟོ་ནི་ཤ་དྲོད་མོ་ལ་བྱས༔ སྐོམ་ནི་ཁྲག་དྲོན་མོ་ལ་འཐུང་༔ ཚིག་རྩུབ་རྒྱུན་དུ་སྨྲས༔ ཕུའི་རི་དྭགས་ཉེས་མེད་བསད༔ མདའ་ཡི་ཉ་མོ་ཉེས་མེད་བསད༔ བར་གྱི་སྤྲང་པོ་ཉེས་མེད་བརྡུང་༔ བཤེས་གཉེན་ཡོངས་ལ་སྐུར་པ་བཏབ༔ གཙུག་ལག་ཁང་ལ་མེ་ཆེན་བཀྱེས༔ རྒྱ་མཚོ་ཆེ་ལ་དུག་ཆེན་བཏབ༔ ནགས་རི་ཆེན་པོ་མེ་ཡིས་བསྲེགས༔ ཕ་མ་བརྡུང་ཞིང་སྐུ་གདུང་བཅོམ༔ ད་ལྟ་རྒྱ་གར་ཟངས་གླིང་ལ༔ སྡིག་པ་ཁོ་ལས་ཆེ་བ་མེད༔ རྡེའུ་ནག་པོ་སྤུངས་ལ་ལྟོས༔ ཁྱོད་ངོ་ང་ཡིས་མི་ཤེས་ཨང་༔ གླིང་ནི་རྒྱ་གར་ཟངས་གླིང་ཡིན༔ གྲོང་ནི་ཤཱནྟི་ནག་པོ་ཡིན༔ ཕ་ནི་ཤན་པ་ཁྲི་དཔོན་ཡིན༔ ལོ་བརྒྱད་གོང་ནས་འདི་རུ་སོང་༔ མ་ནི་བཤན་མོ་ཨ་སྐྱིད་ཡིན༔ ལོ་ལྔའི་གོང་ནས་འདི་རུ་སོང་༔ ཁོ་རང་ཤན་པ་གདོལ་ཕྲུག་ཡིན༔ ད་ལྟ་འདི་རུ་མ་སླེབས་སམ༔ ལོ་ནི་ཆུ་མོ་ཕག་ལོ་ཡིན༔ ད་ལོ་ཟན་གྲངས་ཐེབས་པ་ཡིན༔ རྒྱ་གར་ཤར་ཕྱོགས་པ་རྣམས་ཀྱིས༔ ཤན་པ་ལག་དམར་ཟེར་བ་ཡིན༔ རྒྱ་གར་ལྷོ་ཕྱོགས་པ་རྣམས་ཀྱིས༔ སྡིག་ཅན་དམྱལ་བ་འབུམ་ཞེས་ཟེར༔ རྒྱ་གར་ནུབ་ཕྱོགས་པ་རྣམས་ཀྱིས༔ རིགས་ངན་གདོལ་བ་ཟེར་བ་ཡིན༔ རྒྱ་གར་བྱང་ཕྱོགས་པ་རྣམས་ཀྱིས༔ ནག་པོ་ཀུན་གསོད་ཟེར་བ་ཡིན༔ རིགས་ནི་ནག་པོ་གདོལ་པའི་རིགས༔ རྒྱུ་ནི་སྡིག་ཅན་བཤན་པའི་རྒྱུ༔ ཕ་ཚེ་བུ་རྒྱུད་མ་ལུས་པ༔ དམྱལ་བའི་ལམ་རྒྱུས་མཁན་པོ་ཁྱོད༔ གསོད་པའི་དུས་སུ་དགའ་དགའ་འདྲ༔ འདི་ནས་ཁྲོ་འབག་ཡར་བཟུར་ཕྱིར་བཟུར་བྱ་ཞིང་༔ ཞིང་དབྱུག་བརྒྱབ་པའི་ཚུལ་བྱའོ༔ ངོ་སྤྲོད་པའི་དུས་སུའོ༔ ཟ་བའི་དུས་སུ་ཞིམ་ཞིམ་འདྲ༔ ད་ལྟ་ཞིམ་པོ་ཨེ་བྱུང་ངམ༔ ཁ་མཁས་ལྕེ་བདེ་ཅི་ལ་ཕན༔ སེམས་ཅན་ས་ཡའི་སྲོག་ལན་ཆགས༔ སྡུག་བསྔལ་མྱོང་རེས་ཁྱོད་ལ་བབ༔ ཁྱོད་ཀྱིས་སྡུག་བསྔལ་མ་མྱོང་ན༔ སེམས་ཅན་ས་ཡ་ཕམ་གྲགས་ཏེ༔ དམྱལ་བ་འབུམ་ཁྱོད་རྒྱལ་གྲགས་སོ༔ ཁྱོད་རང་རང་གིས་ལན་པ་ལ༔ ཆོས་ཀྱི་རྒྱལ་པོ་སྐུ་ཆེ་ཡང་༔ ཁྱོད་ཀྱི་སྡིག་པ་བཀབ་ཏུ་མེད༔ ཆེ་སྟེ་གཙུག་ལག་བསྲེགས་པ་ནས༔ ཆུང་སྟེ་སྲོ་ཤིག་བསད་པ་ཡི༔ རྡེའུ་བསགས་པ་འདི་ཡིན་ནོ༔ ཁྱོད་རང་འགྲོ་གྲབ་བྱས་པ་ཡི༔ ལམ་ནག་དེ་ལ་ད་ལྟར་འདོངས༔ ཟངས་དམག་ཁ་སྦྱོར་ཡངས་ཤིང་ཆེ༔ ཁྲོ་ཆུ་ཁོལ་མ་རྦ་ཀློང་དྲག༔ ལས་ཀྱི་མེ་དཔུང་ཚ་ངར་ཆེ༔ གཤིན་རྗེའི་ཕོ་ཉ་སྙིང་རྗེ་ཆུང་༔ ཆོས་ཀྱི་རྒྱལ་པོ་གདོང་རེ་དྲག༔ ལས་ཀྱི་མཚོན་ཆ་རྩེ་རེ་རྣོ༔ ལས་རླུང་དྲག་པོ་ངད་པ་ཚ༔ དེ་འདྲའི་ཡུལ་དུ་འགྲོ་རེ་རན༔ སྙིང་ཡང་རྗེ་སྟེ་ཚིམ་ཡང་ཚིམ༔ བྲེ་ལོག་སྲང་ལོག་བཙུགས་པ་ཡི༔ བྲེ་སྲང་རྒྱབ་ལ་ཁུར་རྒྱུ་ཡོད༔ སེམས་ཅན་མང་པོ་གསོད་པ་ཡི༔ མཚོན་ཆ་གློ་ལ་བཏགས་རྒྱུ་ཡོད༔ ཁ་རིང་སྨྱོ་བརྡོལ་ཕྱེད་ལས་མེད༔ དམྱལ་ཁམས་བཅོ་བརྒྱད་གྲོང་ཁྱེར་དུ༔ ད་ནི་འགྲོ་བའི་དུས་ལ་བབས༔ ཅེས་ཟེར་ནས་ཁྲིད་པར་བརྩམས་པ་དང་༔ ཡང་ཆོས་ཀྱི་རྒྱལ་པོའི་ཞལ་ནས༔ ཀྱཻ་མ་ཨ་ཙ་མ་ན་ང་རེ་འཇིགས༔ མི་ལུས་ཐོབ་ཚེ་དགེ་སྤྱད་དོན་ཆེ་བས༔ ངན་སོང་གནས་སྤངས་ཐར་པའི་ལམ་ལ་འགྲོ༔ བདེ་དང་སྐྱིད་པ་ནམ་ཡང་མི་འབྲལ་ཏེ༔ ཁྱོད་ཀྱི་མི་ལུས་ད་རེས་ཐོབ་དུས་འདིར༔ དགེ་བའི་ལས་རྣམས་ས་བཞིན་དོར་ནས་སུ༔ སྡིག་པའི་ལས་རྣམས་ཧབ་ཐོབ་བྱས་པས་ན༔ ཐོབ་དཀའི་མི་ལུས་དོན་མེད་ཆུད་གསན་ནས༔ སྟོང་ལོག་ཙམ་ཡང་ཁྱོད་ཀྱིས་མ་ཤེས་པས༔ སྡིག་པའི་ཁུར་པོ་ཁུར་བ་སྙིང་རེ་རྗེ༔ རང་གི་ལས་བྱས་རང་ལ་སྨིན་ཙམ་ན༔ སངས་རྒྱས་སྟོང་གི་མཐུས་ཀྱང་སྐྱོབ་པ་མེད༔ ངས་ནི་འདི་ལ་ཅི་ཡང་བྱ་ཐབས་མེད༔ རང་དབང་ཡོད་ཚེ་འདུན་མ་བོར་བ་ཡིན༔ སྡིག་པའི་འབྲས་བུ་རང་ལ་སྨིན་ཙམ་ན༔ སྨྲེ་སྔགས་འདོན་ཀྱང་སྙིང་ནི་རྗེ་མཁན་མེད༔ ད་ལྟ་ང་ལ་རེ་ཡང་བྱ་ཐབས་མེད༔ སྣང་སྲིད་གསལ་བའི་ལས་ཀྱི་མེ་ལོང་འདིས༔ དགེ་སྡིག་རང་གཟུགས་དངོས་སུ་སྟོན་ཙམ་ན༔ སྡིག་ཅན་ཚོ་ལ་ལས་གཅིག་མ་བྱུང་ངམ༔ ལྷན་གཅིག་སྐྱེས་པའི་ལྷ་དང་འདྲེ་གཉིས་ཀྱིས༔ དཀར་ནག་ལས་ཀྱི་རྡེའུ་ཤེར་ཙམ་ན༔ དགེ་བ་བསགས་པའི་མི་ནི་རེ་དགའ་ཡང་༔ སྡིག་པ་བསགས་པའི་མི་ཁྱོད་གྱོང་རེ་ཆེ༔ ཐམས་ཅད་འགྲིམ་པའི་འཕྲང་འགགས་དོག་མོ་འདིར༔ ལས་ཀྱི་གཤིན་རྗེའི་ཁྲིམས་རར་ཚུད་ཙམ་ན༔ ཁ་དྲག་བཙན་ཡང་འདི་རུ་བྱ་ཐབས་མེད༔ སྡིག་པོ་ཆེ་ཀུན་གློ་སྙིང་གས་ལ་ཁད༔ མི་དགེ་ཡོད་པའི་ལས་ཀྱི་བརྡ་དེད་འདི༔ ནམ་མཁའི་ཐོག་ལས་མགྱོགས་ཤིང་ཤུགས་དྲག་པས༔ བྲོས་པས་མ་ཐར་འགྱོད་ཀྱང་མ་ཕན་ནོ༔ འཛམ་གླིང་མི་རྣམས་ཆོས་ལ་མི་འབད་པ༔ ཨ་ཙ་མ་ན་ངས་ནི་བྱ་ཐབས་མེད༔ དཀར་ནག་ལས་ཀྱི་གྲངས་རྩིས་ཞིབ་ལུགས་འདི༔ ཕྲ་ཞིང་ཕྲ་བའི་སྡིག་ཀྱང་མི་བརྗེད་པས༔ སྡིག་པ་མི་འཛེམ་མི་རྣམས་ཅི་དྲན་ན༔ ཐར་ལམ་དཀར་པོའི་ལམ་གྱི་བདེ་ལུགས་དང་༔ ངན་སོང་ནག་པོའི་ལམ་གྱི་སྡུག་ཚོད་ལ༔ འཛམ་གླིང་མི་རྣམས་སྡིག་སྤྱད་དགེ་མི་བསྒྲུབ༔ ཡི་ཆད་འགྱོད་ཀྱང་ལས་ལ་བཅོས་སུ་མེད༔ ལས་ནི་ལུས་དང་གྲིབ་མ་བཞིན་དུ་འགྲོགས༔ དཀར་པོ་དགེ་བའི་སྟངས་མ་ང་ཡིས་འཛིན༔ ནག་པོ་སྡིག་པའི་ཆད་པ་ང་ཡིས་གཅོད༔ ཡོ་དྲང་གཟུ་ཡི་ལེགས་ཉེས་སྟངས་བཅད་པས༔ ཁྱོད་རང་འགྱོད་ཀྱང་བདག་གིས་བཅོས་སུ་མེད༔ ད་ནི་སྙིང་རེ་རྗེ་ཡང་བྱ་ཐབས་མེད༔ ནག་པོའི་ལམ་ལ་དམྱལ་ཁམས་གནས་སུ་སོང་༔ འཕགས་པའི་ཐུགས་རྗེས་བཟུང་ཡང་མི་ཟིན་ན༔ ང་ཡིས་ཁྱོད་ལ་བྱ་ཐབས་ཅི་ཡང་མེད༔ སེམས་ཅན་ལས་ལ་སྤྱོད་པ་རྒྱལ་བས་གསུངས༔ ད་ནི་གླང་མགོ་ཅན་གྱིས་ཁྲིད་ནས་སོང་༔ ཁྱོད་ཀྱི་སྡིག་པ་མྱུར་དུ་དག་ནས་སུ༔ མཐར་ཐུག་སངས་རྒྱས་གོ་འཕང་ཐོབ་པར་ཤོག༔ ཅེས་གསུངས་པ་དང་༔ རཀྴ་གླང་མགོས་ན་རེ༔ ཁྱོད་རང་གི་ལས་ཡིན་པས་འགྱོད་ཀྱང་ཅི་ལ་ཕན༔ ངེད་ཅག་ལ་ནི་ཅི་ཡང་ལན་པ་མེད༔ ངེད་ནི་བདེན་རྫུན་གཉིས་ཀྱི་ཤན་འབྱེད་ཡིན་པས་ཁྱོད་རང་ལ་ནག་མེད་ན་ངེད་ཀྱིས་ཁྱོད་ལ་གནོད་པ་བྱེད་དོན་མེད་དེ༔ ད་ཁྱེད་རང་གི་ལས་ཡིན་པས་མྱུར་དུ་འདོང་ངོ་ཟེར་ནས་ཞགས་པ་ནག་པོས་ཁྲིད༔ འདྲེ་ནག་པོས་ཕྱི་ནས་དེད་ནས་སྣམ་བུ་ནག་པོའི་ལམ་དུ་འཁྲིད་དེ༔ མུན་ཁང་ནང་དུ་རྒྱོབ་སོད་ཀྱི་སྒྲ་སྒྲོགས་སྐད་ངན་སྣ་ཚོགས་འདོན་དུ་བཅུག་གོ༔ དེ་ནས་བླ་མས༔ འོ་རིགས་ཀྱི་བུ་རྣམས་སྡིག་པ་བྱས་པ་ལ་དེ་ལྟ་བུའི་ཤན་འབྱེད་དང་སྡུག་བསྔལ་འདི་ལྟ་བུ་ཡོད་པས༔ རང་ཅག་ཚོ་ལ་ཡང་འདི་ལྟ་བུ་ཞིག་འོང་བར་ངེས་པས་དེའི་དུས་སུ་སྐྱེས་བུ་ཕོ་མོ་རང་དོན་གྱི་མདོ་དོན་ཡོད་མེད་རང་ལ་རག་ལས་པས་ད་ལྟ་ནས་དགེ་བ་ལ་འབད༔ སྡིག་པ་ལ་འཛེམ་པ་གལ་ཆེའོ༔ རིགས་ཀྱི་བུ་རྣམས་ཅེས་པ་ལ་སོགས་པ་རྒྱས་པར་དཀྲོལ་ལོ༔ དེ་ནས་ཡང་ཆོས་ཀྱི་རྒྱལ་པོས་ཁྲམ་ཤིང་དེ་ལ་ཁྲམ་རིས་གཅིག་བྲིས་ཏེ༔ ཀྱཻ་རཀྴ་གླང་མགོ༔ ཡང་འཇིག་རྟེན་མི་ཡུལ་བྲང་ང་ཁམས་ན་མི་གཅིག་ཟན་གྲངས་ཐེབས་ནས་ཡོད་པར་འདུག་ངའི་ཁྲམས་ལ་བབ་ནས་བྱུང་ངོ་གསུངས་པ་དང་༔ རཀྴ་གླང་མགོས་གདུག་པ་སྦྲུལ་མགོ་ལ་བོས་ནས༔ ཀྱཻ་གདུག་པ་སྦྲུལ་མགོ་ཁྱོད་ཀྱིས་མེ་ལོང་ལ་ལྟོས་དང་ཚེ་ལས་འདས་པ་དེ་གར་འདུག་ལྟོས་དང་བྱས་པས༔ གདུག་པ་སྦྲུལ་མགོས་འདི་སྐད་དོ༔ ཀྱཻ་ཚེ་ལས་འདས་པ་དུས་ལ་བབས་པ་དེ༔ ཡུལ་ནི་རྒྱ་གར་བྱང་ཤར་གྱི་ཡུལ་དུ་འདུག༔ གྲོང་ཁྱེར་ནི་ག་མ་རུ་པ་ཞེས་བྱ་བར་འདུག༔ རིགས་ནི་མི་རིགས་བཞིའི་ནང་ནས་རྗེའི་རིགས་སུ་འདུག༔ མིང་ནི་ཁྱིམ་བདག་དཔལ་སྐྱེས་སུ་འདུག༔ ཁོ་དུས་དོ་ནུབ་ནས་ཟན་གྲངས་ཐེབས་ནས་ཁྲམ་ལ་བབ་པར་འདུག་གོ༔ ད་རྒྱུགས་ཤིག་བྱས་པས༔ རཀྴ་གླང་མགོ་དང་དུ་ར་ཕག་མགོ་དང་ལྷན་ཅིག་སྐྱེས་པའི་འདྲེ་གསུམ་རྒྱུགས་ནས་སོང་བའི་རྗེས་སུ༔ ལྷན་ཅིག་སྐྱེས་པའི་ལྷ་ཡང་སྡོང་གྲོགས་ལ་རྒྱུགས་པ་ལས་དེ་རྣམས་ཀྱིས་མི་ཡུལ་ཀ་མ་རུ་པ་ནས་ཁྱིམ་བདག་དཔལ་སྐྱེས་རྙེད་ནས་གླང་མགོ་ཅན་གྱིས་སྔོན་ནས་ཁྲིད༔ ཕག་མགོ་ཅན་གྱིས་ལག་པ་ནས་བཟུང་༔ ལྷན་ཅིག་སྐྱེས་པའི་འདྲེས་ཕྱི་ནས་དེད༔ ལྷན་ཅིག་སྐྱེས་པའི་ལྷས་སྡོང་གྲོགས་བྱེད་ཅིང་ཆོས་ཀྱི་རྒྱལ་པོའི་དྲུང་དུ་ཁྲིད་ནས་དེར་འཁོད་པ་དང་༔ ཡང་ཆོས་ཀྱི་རྒྱལ་པོས་འདི་སྐད་འདྲིས་སོ༔ ཀྱཻ་རིགས་ཀྱི་བུ་ཚེ་ལས་འདས་པ་ཁྱོད་མི་ཡུལ་བྲང་ང་ཁམས་ནས་འོང་ངམ༔ ཐོབ་པར་དཀའ་བའི་དལ་འབྱོར་གྱི་མི་ལུས་ཐོབ༔ མཇལ་བར་དཀའ་བའི་སངས་རྒྱས་ཀྱི་བསྟན་པ་དང་མཇལ༔ སྐྱེ་བར་དཀའ་བ་འཛམ་བུའི་གླིང་དུ་སྐྱེས་པ་ཅིག་ཡིན་པར་འདུག་པས༔ དཀར་པོ་དགེ་བའི་ལས་ལ་ཁྱོད་ཀྱི་བསགས་པ་ཅི་ཡོད༔ མི་ཡུལ་བྲང་ང་ཁམས་ན་བསྡད་དུས་སེམས་དཀར་པོ་ལུས་གཙང་མས་སོ་ནམ་ཆོས་ལ་བྱས་སམ༔ འདུས་བྱས་ཀྱི་དགེ་བ་ཡོན་གྱིས་བསླུས་པ་ཅི་ཙམ་ཡོད༔ སྐུ་གསུང་ཐུགས་ཀྱི་རྟེན་བཞེངས་པ༔ གསུང་རབ་བྲི་བ༔ ཀློག་འདོན་དུ་བཅུག་པ༔ ཚ་ཚ་བཏབ་པ༔ ཆུ་གཏོར་བཏང་པ༔ ལམ་གྱི་རྡོ་འབུར་བསལ་པ༔ ལམ་གྱི་ཚེར་མ་བསལ་བ༔ ཡར་ལ་མཆོད་པ་འབུལ་བ༔ མར་ལ་སྦྱིན་པ་བཏང་བ༔ གྲོག་ཚང་དུ་ཟན་བྲུལ་གཏོར་བ་དེ་ཡན་ཆད་ཀྱི་ཕྲ་ཞིང་ཕྲ་བ་ནས་བསགས་པའི་དགེ་བ་ཅི་ཡོད༔ གཞན་ཡང་ཐོས་བསམ་སྒོམ་གསུམ་བྱས་པ༔ བསྙེན་གནས་དང་སྨྱུང་གནས་བསྲུང་བ༔ སྨིན་གྲཽལ་གྱི་དབང་ཁྲིད་ཞུས་པ་ལ་སོགས་པའི་དགེ་བ་བསགས་པ་ཅི་ཡོད་པ་ད་ལྟ་མགྱོགས་པར་ཤོད་ཅིག༔ ནག་པོ་སྡིག་པའི་ལས་ལ་ལུས་ཀྱི་སྒོ་ནས་ཆེ་སྟེ་ཕ་མ་མན་ཆད༔ ཆུང་སྟེ་ཤིག་དང་སྲོ་མ་ཡན་ཆད་ཀྱི་སྲོག་བཅད་པ༔ མ་བྱིན་པར་ལེན་པ༔ མི་ཚངས་པར་སྤྱོད་པ་ལ་སོགས་པ་ལུས་ཀྱི་སྡིག་པ་བསགས་པ་ཅི་ཡོད༔ ངག་གི་སྒོ་ནས་ངག་འཁྱལ་པ༔ ཚིག་རྩུབ་མོ༔ ཕྲ་མ༔ རྫུན་དུ་སྨྲ་བ་ལ་སོགས་པ་ངག་གི་སྒོ་ནས་སྡིག་པ་བསགས་པ་ཅི་ཡོད༔ ཡིད་ཀྱི་སྒོ་ནས་བརྣབ་སེམས་དང་༔ གནོད་སེམས་དང་ལོག་པར་ལྟ་བ་ལ་སོགས་པའི་ཡིད་ཀྱི་སྡིག་པ་བསགས་པ་ཅི་ཡོད༔ གཞན་ཡང་མཚམས་མེད་པ་ལྔ་དང་དེ་དང་ཉེ་བ་ལྔ་ལ་སོགས་པ་ལུས་ངག་ཡིད་གསུམ་གྱིས་ཀུན་ནས་བསླངས་ནས་བསགས་པའི་སྡིག་པ་མི་དགེ་བ་ཅི་ཡོད༔ ཞིབ་ལ་གསལ་བར་ད་ལྟ་མགྱོགས་པར་ཤོད་ཅིག༔ ཅེས་དྲིས་པས༔ དེ་ནས་ཚེ་འདས་དེས་ཞེད་ཅིང་འདར་བའི་ཚུལ་གྱིས་འདི་སྐད་ཞུའོ༔ ཆོས་ཀྱི་རྒྱལ་པོ་རིན་པོ་ཆེའི་དྲུང་དུ་ཞུ་ན༔ ང་རྒྱ་གར་བྱང་ཤར་ཀ་མ་རུ་པའི་གྲོང་ཁྱེར་དུ་སྡོད་པའི་ཁྱིམ་བདག་དད་འབྱོར་ཅན་ཞེས་བྱ་བ་ཡིན་ལགས༔ འཁོར་བ་ལ་ཡང་བརྟེན༔ བུད་སྨད་ཀྱང་ཡོད༔ རང་ཟས་ཟ་ཞིང་རང་ཆུ་འཐུང་བའི་ཉམས་ཆུང་ཞིག་ཡིན་ལགས༔ དད་པ་དང་ལྡན་ཡང་ལྡན༔ བླ་མ་བཟང་པོ་ཡུལ་དུ་བྱོན་པ་ཐམས་ཅད་ལ་བསོད་སྙོམས་བཟང་པོ་ཕུལ༔ གཞན་ཡང་དགེ་བ་ལ་བསྐུལ༔ རང་ཡང་དགེ་སེམས་བཟང་པོས་ཀུན་ནས་བསླངས༔ ལྷ་ཁང་བཟང་པོ་ཞིག་གསོས་བྱས༔ ཤི་ངེས་པའི་སྲོག་མང་པོ་བསླུས༔ དབང་ཁྲིད་ཟབ་མོ་ཡང་མང་པོ་ཐོབ༔ འགྲོ་ན་ལམ་འཕྲང་བསལ༔ འདུག་ན་ཡིག་དྲུག་འདྲེན༔ བསྙེན་གནས་དང་སྨྱུང་གནས་བསྲུངས༔ ཡར་དཀོན་མཆོག་ལ་མཆོད་པ་ཕུལ༔ མར་ངན་སློང་ལ་སྦྱིན་པ་བཏང་བའི་ཁྱིམ་པ་བྱང་ཆུབ་སེམས་དཔའ་ཞིག་ཡིན་ལགས༔ དེ་ལྟར་བྱས་པའི་དོན་ལ་མི་ཀུན་གྱིས་ཡང་བདག་ལ་ཁྱིམ་བདག་དད་འབྱོར་ཅན་ཡིན་ཟེར་ལགས༔ ངའི་དགེ་བའི་རྒྱུ་མཚན་དེ་ལྟར་ལགས༔ ནག་པོ་སྡིག་པའི་ལས་ལ་ནི་སེམས་ཅན་གཅིག་གི་སྲོག་ལ་མ་འབག་པ་ཅིག་བྱེད་དགོས་སྙམས་ཀྱང་༔ འཇིག་རྟེན་འཁོར་བ་རུ་སོང་བས་བུ་གཅིག་ཡོད་པ་དེ་ལ་ཆུང་མ་བླང་བའི་ཕྱིར་སེམས་ཅན་གཅིག་གི་སྲོག་ལ་འབག་ལགས༔ དེའི་སྡིག་བཤགས་ལ་རྡོ་རྗེ་གཅོད་པ་བརྒྱ་ཚར་གཅིག་བཏོན་ལགསཿ གྲོང་པ་ཁྱིམ་མཚེས་ཀྱི་ཁྲལ་ཕྱིར་སེམས་ཅན་མང་པོའི་སྲོག་ལ་འབག་དགོས་བྱུང་ལགས༔ དེ་ལ་ཡང་འགྱོད་པ་མང་པོ་སྐྱེས་ནས་བཤགས་པ་ཡང་མང་དུ་བྱས༔ གཞན་ཡང་འཇིག་རྟེན་ཁྱིམ་པ་རུ་སོང་བའི་ལས་དང་གཤིས་ཀྱིས་རྐང་འོག་ཏུ་བཅར་བ་ལག་འོག་ཏུ་འཆི་བ་ཨི་མི་ཡོད་བསམ་ནས་འགྱོད་པ་བྱུང་༔ ངའི་དགེ་སྡིག་གི་རྒྱུ་མཚན་དེ་ཙུག་ལགས་པས༔ དེ་ལུགས་ཀྱི་ཐུགས་དགོངས་བཏང་ནས་ཐུགས་རྗེས་འཛིན་པར་ཞུ་ལགས་ཞེས་ཞུའོ༔ དེ་ནས་ཆོས་ཀྱི་རྒྱལ་པོས་འདི་སྐད་བརྗོད་དོ༔ འོ་ན་ཁྱོད་ཀྱི་ཟེར་བ་དེ་ཚོ་བདེན་པར་གྱུར་ན༔ དགེ་སྡིག་རྒྱུ་འབྲས་ལ་བསམ་བློ་ཡག་པོ་བཏང་ནས་འདུག་སྟེ༔ འོན་ཀྱང་མིའི་རིགས་དེ་རྫུན་མཁས་པ་ཡིན་པས་ངས་ལས་ཀྱི་མེ་ལོང་ལ་དྲི་ཨང་གསུངས་ནས་མེ་ལོང་བསྟན་ནས༔ ཨེ་མ་ལྟོས་ཤིག་སྐལ་ལྡན་རིགས་ཀྱི་བུ༔ སྣང་སྲིད་གསལ་བའི་མེ་ལོང་འདི༔ དུས་གསུམ་མཁྱེན་པའི་སྤྱན་བས་གསལ༔ ལས་དགེ་སྡིག་གི་རང་གཟུགས་དངོས་སུ་སྟོན༔ ཁྱོད་མི་ཡུལ་གྱི་དགེ་སྡིག་ཅི་བྱས་ཀུན༔ དེ་ད་ལྟ་མངོན་སུམ་འཆར་ཙ་ན༔ ཁྱོད་ཀྱི་རྫུན་དང་གཡོ་སྒྱུས་ཅི་བྱེད་ཨང་༔ ད་ལྟོས་ཤིག་མེ་ལོང་འདི་ལ་ལྟོས༔ ཞེས་གསུངས་ནས་མེ་ལོང་ལ་བལྟས་ནས༔ འོ་ད་ལྟ་ཁྱེད་རང་གི་ཟེར་བའི་དགེ་སྡིག་གི་ལས་བྱས་ཚད་དེ་རྣམས་རྫུན་མིན་པར་འདུག་གོ༔ ཕོ་སྐྱེས་པ་ཡིན་ནོ༔ ལམ་དཀར་པོ་ལ་བཏང་གིས་ཨང་༔ ཞེས་གསུངས་པ་དང་༔ ཡང་འདྲེ་ནག་པོས་འདི་སྐད་བརྗོད་དོ༔ ཀ་ཡེ༔ ཆོས་ཀྱི་རྒྱལ་པོའི་མདུན་དུ་ཞུ་རྒྱུ་ཡོད༔ མི་ངན་ཁྱིམ་བདག་དཔལ་སྐྱེས་ཟེར་བ་འདིས་མི་ཚེ་རྫུན་ལ་བསྐྱལ་ནས་རང་འདོད་ཕུགས་སུ་བཅུག༔ ཁོའི་མིང་ནི་ཁྱིམ་བདག་དཔལ་སྐྱེས་ཟེར་བ་ཡིན༔ བླ་དག་ནི་མི་ངན་སྤྲེལ་མགོ་ཟེར་བ་ཡིན༔ དད་པ་མེད་པའི་ཁྱིམ་བདག་དད་འབྱོར་འདི༔ ཁོའི་ལོ་ནི་གླང་གི་ལོ་པ་ཡིན༔ ཡུལ་ནི་གྲོང་ཁྱེར་ཀ་མ་རུ་པ་ཡིན༔ རིགས་ནི་རྗེའུ་རིགས་ལས་ནི་སྡིག་པ་བྱས༔ གྲོང་སྟོད་རྒྱུག་ནས་ཕ་སྤུན་འཐབ་མོ་སྤྲད༔ གྲོང་སྨད་རྒྱུག་ནས་ཁྱིམ་མཚེས་འཁྲུགས་པ་སྤྲད༔ ཁྱིམ་མཚེས་ཤྲཱི་བྷ་དྲའི་རྔ་མོང་ལ༔ རྡོ་ཀུན་བརྒྱབས་ནས་བསད་ཀྱང་མིན་རྫུན་བཏབ༔ ཡིག་མཁན་པྲ་ཛྙཱ་མ་ཏི་ཡི༔ གླང་པོ་ཆེའི་ཕྲུ་གུ་གད་གཡང་ལ་བསད་ནས་མིན་བརྫུན་བཏབ༔ ད་ལྟ་ཉིད་ནས་རྡེའུ་ཤེར་བས་ཆོག༔ དཀར་པོའི་ལམ་ལ་འགྲོ་རྒྱུ་ཅི་ལ་ཡོད༔ ནག་པོའི་ལམ་ལ་མྱུར་དུ་ཁྲིད་པས་ཆོག༔ ཅེས་ཟེར་ནས༔ རྡེའུ་ནག་པོ་ཕུལ་གསུམ་ཙམ་ཅིག་བྱོས་པ་དང་༔ ཡང་ལྷ་དཀར་པོས་འདི་སྐད་ཞུའོ༔ ཆོས་ཀྱི་རྒྱལ་པོའི་དྲུང་དུ་ཞུ་བ་ལ༔ ཁྱིམ་བདག་དད་འབྱོར་ཅན་འདི་དད་པ་ཆེ༔ ཆོས་ལ་མོས་ཤིང་སྡིག་ལ་འཛེམ་པར་བྱས༔ རྒྱལ་པོ་མ་ཧཱ་རཱ་ཛའི་དྲུང་དུ་ནི༔ མི་ངན་ལྔ་བརྒྱ་ཙམ་ཞིག་ཁྲིམས་གཏུགས་པ༔ གསེར་སྲང་ལྔ་བརྒྱ་བཏང་ནས་སྲོག་བསླུས་སོ༔ རྒྱ་གར་གྲོང་ཁྱེར་ཀ་མ་རུ་པ་ལ༔ ཁྱིམ་བདག་དཔལ་སྐྱེས་ཁོ་ན་དད་པ་ཆེ༔ ད་ལྟ་རང་གཉིས་རྡེའུ་ཤེར་བས་ཆོག༔ ནག་པོའི་ལམ་ལ་འགྲོ་དོན་ཅི་ལ་ཡོད༔ དཀར་པོའི་ལམ་ལ་ད་ལྟ་ཁྲིད་ནས་འགྲོ༔ ཟེར་ནས་རྡེའུ་དཀར་པོ་བྲེ་དྲུག་ཤེར་ཙམ་ཞིག་བྱོས་པ་དང་༔ འབྱུང་པོ་སྤྲེལ་གདོང་པ་ན་རེ༔ ལྷ་དང་འདྲེ་གཉིས་མི་འཆམས་མི་དགོས་ཀྱི༔ ངའི་ན་རག་སྲང་ལ་བཏེག་ཙམ་ན༔ དགེ་སྡིག་ཆེ་ཆུང་རྒྱ་རྡོས་གཏན་ལ་ཕབ༔ ད་ལྟ་འདི་ལ་བལྟས་པས་གསལ་བ་ཡིན༔ རྡེའུ་སྲང་ལ་འཇལ་བས་སུམ་ལོག་གིས་དཀར་པོ་ལྗིད་པ་དང་༔ ཆོས་ཀྱི་རྒྱལ་པོས་འདི་སྐད་གསུངས༔ ཨེ་མ་མི་ལུས་ཐོབ་ནས་ཆོས་ལ་སྤྲོ་བ་རྣམས༔ རང་འདུན་རང་གིས་ལེགས་པར་བསྒྲུབ་པ་འདི༔ གཞན་གྱིས་རྐུ་ཞིང་འཕྲོག་ཏུ་མི་གཏུབ་པར༔ རང་གི་དགེ་བས་རང་ཉིད་བདེ་ལ་བཀོད༔ ཁྱིམ་བདག་འབྱོར་པ་ཅན་གྱི་ལས་འདི་འདྲ༔ སེམས་ཅན་ཀུན་གྱིས་བྱས་ན་ཅི་མ་རུང་༔ སྤྱན་རས་གཟིགས་ལ་གསོལ་བ་མྱུར་དུ་ཐོབ༔ དཀར་པོའི་ལམ་ལ་ད་ལྟ་ལ་འུར་དེངས༔ ཅེས་བརྗོད་ལ༔ ཤར་ཕྱོགས་རི་བོ་ཏ་ལའི་རྩེ་མོ་ནས༔ ཡི་དམ་ཐུགས་རྗེ་ཆེན་པོ་ལ་གསོལ་བ་འདེབས༔ འཁྲུལ་བ་དབྱིངས་སུ་དག་པར་བྱིན་གྱིས་རློབས༔ སེམས་ཉིད་ཆོས་སྐུ་རྟོགས་པར་བྱིན་གྱིས་རློབས༔ ཅེས་གསོལ་བ་གདབ༔ སངས་རྒྱས་དང་བྱང་ཆུབ་སེམས་དཔའ་རྣམས་ལ་ར་མདའ་སྦྲན་པའི་སྨོན་ལམ་དེ་ཡང་གདབ༔ དེ་ནས་བར་དོའི་མངལ་སྒོ་དགག་པ་དང་༔ མངལ་སྒོ་གདམ་པའི་ངོ་སྤྲོད་གདབ༔ དེ་རྗེས་དག་པ་སངས་རྒྱས་ཀྱི་ཞིང་དུ་འཕོ་བའི་ངོ་སྤྲད་བཏབ་མ་ཐག་ཏུ་ཡོལ་བ་འུབ་ཀྱིས་བསྡུས་ལ༔ ཐུགས་རྗེ་ཆེན་པོའི་སྐུ་ཁྲ་ལམ་གྱིས་བསྟན༔ སྣམ་བུ་དཀར་པོའི་ལམ་ལ་ཁྲིད༔ གོས་བཟང་པོ་བསྐོན༔ རྒྱན་བཟང་པོ་བཏགས༔ གཟེངས་བསྟོད༔ འོ་རིགས་ཀྱི་བུ་མི་ལུས་ཐོབ་པའི་དོན་འགོ་དེ༔ འདི་ལྟ་བུ་གཅིག་འོང་བ་ཡིན་ནོ༔ དགའ་བ་སྐྱེད་པར་མཛོད་ཅིག༔ ཅེས་བརྗོད་དོ༔ དེ་ནས་སྤྱན་རས་གཟིགས་ཀྱིས་སྨོན་ལམ་འདི་གསུངས་སོ༔ ཨོཾ་མ་ཎི་པདྨེ་ཧཱུྃ༔ དཔལ་སྐྱེས་ཁྱོད་ཀྱི་གཙོ་བྱས་སེམས་ཅན་རྣམས༔ འབྲུ་དྲུག་སྙིང་པོས་ལམ་སྣ་འདྲེན་པར་ཤོག༔ ཁམས་གསུམ་འཁོར་བ་དོང་ནས་སྤྲུགས་པར་ཤོག༔ ན་རག་དམྱལ་བ་ཟད་ཅིང་སྟོང་པར་ཤོག༔ ཅེས་སྨོན་ལམ་གདབ༔ ཡིག་དྲུག་བསྐུལ༔ དེ་ནས་བླ་མས༔ འོ་རིགས་ཀྱི་བུ་རྣམས་ཀྱིས་སྡིག་ཅན་ཤན་པ་ལག་དམར་དང་༔ དད་ལྡན་ཁྱིམ་བདག་དཔལ་སྐྱེས་གཉིས་ཀྱི་དགེ་སྡིག་བསགས་ལུགས་ཀྱི་སྐྱིད་སྡུག་གི་ཁྱད་པར་ལ་ལྟོས༔ རང་རེ་ཚོ་ལའང་འདི་ལྟ་བུ་ཞིག་མགྱོགས་པར་འོང་བས་དགེ་བ་ལ་འབད༔ སྡིག་པ་ལ་འཛེམ་པ་གལ་ཆེའོ༔ ཞེས་བརྗོད་ལ་ལྷ་དབང་བསྐུར༔ བཀྲ་ཤིས་བརྗོད༔ བསྔོ་བ་བྱ༔ དཀྱིལ་འཁོར་བསྡུའོ༔ ཨེ་མ་བདག་འདྲ་པདྨ་འབྱུང་གནས་ཀྱིས༔ དམྱལ་བའི་གནས་རྣམས་དངོས་སུ་མཐོང་ནས་ནི༔ མ་འོངས་སེམས་ཅན་རྣམས་ལ་ཕན་ཕྱིར་དུ༔ བར་དོ་ཐོས་གྲོལ་ཆོས་ཀྱི་ཆ་རྐྱེན་བསྡེབས༔ སྐྱེས་བུ་ལས་ཅན་གཅིག་དང་འཕྲད་པར་ཤོག༔ འཕྲད་ནས་འགྲོ་ཀུན་སྨིན་ཅིང་གྲོལ་བར་ཤོག༔ བར་དོ་ཐོས་གྲོལ་གྱི་དབང་བསྐུར་མཐོང་བ་རང་གྲོལ་ངོ་སྤྲོད་ཆེན་མོ༔ དགེ་སྡིག་རང་གཟུགས་སྟོན་པའི་གདམས་པ༔ སྲིད་པ་རང་གྲོལ་ཞེས་བྱ་བ་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ གྲུབ་ཐོབ་ཀརྨ་གླིང་པའི་གཏེར་མའོ༔ ཆོས་རྒྱལ་མཐིང༌། གླང་མགོ་དཀར། སྤྲེལ་སེར། ཕག་སྔོ། སྦྲུལ་ལྗང༌། དོམ་མཐིང༌། སེང་གེ་དཀར། ཁྱུང་སྔོ། ལྷན་ཅིག་ལྷ་དཀར་ཞི་བ། འདྲེ་མཐིང་ནག་ཁྲོ་བོ་ཡིན། དེ་རྣམས་ཀྱི་སྐུ་མདོག་ཞལ་ཤེས་ཡིན་ལགས། མཆན། དམ་ཆོས་རྫོགས་པ་ཆེན་པོའི་སྐུ་གསུམ་ངོ་སྤྲོད།དམ་ཆོས་རྫོགས་པ་ཆེན་པོའི་སྐུ་གསུམ་ངོ་སྤྲོད་བཞུགས་སོ༔ རྩ་བའི་ངོ་སྤྲོད་གསུམ་ནི། ཤེལ་དང་ཉི་མ་འདྲ་འབག་གསུམ་མོ༔ ཤེལ་ནི་རྡོ་རྗེ་སེམས་དཔའི་ཐུགས་ཀྱི་མེ་ལོང་ཡིན་ཏེ༔ རྡོ་རྗེ་སེམས་དཔའི་མེ་ལོང་ལ་རང་གིས་མིག་བཙུག་ནས་མ་ཡེངས་པར་བལྟས་པས༔ སངས་རྒྱས་ཀྱི་སྐུ་འོད་ཀྱི་ཕུང་པོ༔ ཁ་དོག་ལྔ་ལྡན༔ ཕྲ་ལ་དྭངས་པ༔ གསལ་ལ་འཚེར་བ༔ རང་བཞིན་གྱིས་བཀྲག་གསལ་ལ་ཉམས་ང་བ༔ འོད་ཁ་དོག་ལྔ་ལྡན་མངོན་སུམ་མེར་གྱིས་འཆར་བ་དེ༔ དག་པ་ཡེ་ཤེས་ཀྱི་སྣང་བ་ཡིན་ནོ༔ དེ་བཞིན་དུ་རང་གི་རིག་པ་ལ༔ འོད་ཁ་དོག་ལྔ་ལྡན་དུ་ཡོད་དོ༔ རང་གི་རིག་པའི་རང་འོད་ངོ་ཤེས་པར་བྱས་ལ༔ རང་འོད་ལ་རྟག་ཏུ་བལྟའོ༔ དེ་ནི་དག་སྣང་ལ་བལྟ་བའི་ལྟ་བ་ཡིན་ནོ༔ དེ་ཡང་༔ དང་པོ་ཆོས་སྐུ་མཚོན་པའི་ཚེ༔ སློབ་མ་ལ་ཚིག་གི་ངོ་སྤྲད་པ་ནི༔ ཀྱཻ་སྣོད་ལྡན་རིགས་ཀྱི་བུ་རྣམས༔ རྡོ་རྗེ་སེམས་དཔའི་ཐུགས་ཀྱི་མེ་ལོང་འདི༔ ཆོས་སྐུ་དངོས་ནི་མ་ཡིན་ཏེ༔ དཔེ་འདི་ཅི་འདྲ་བར་ཤེས་པར་བྱ༔ དཔེ་འདི་ལ་ཕྱི་ནང་མེད་པ་ལྟར༔ རིག་པ་ཆོས་ཀྱི་སྐུ་ལ་ཡང་༔ ཕྱི་ནང་མེད་པར་ཤེས་པར་གྱིས་ཤིག༔ དཔེ་འདི་ལ་མདུན་རྒྱབ་མེད་པ་ལྟར༔ རིག་པ་ཆོས་ཀྱི་སྐུ་ལ་མདུན་རྒྱབ་མེད་པར་ཤེས་པར་གྱིས་ཤིག༔ དཔེ་འདི་དག་པ་ཟང་ཐལ་བ་བཞིན་དུ༔ རིག་པ་ཆོས་ཀྱི་སྐུ་ལ༔ དྲི་མ་མེད་པར་ཟང་ཐལ་བར་ཤེས་པར་གྱིས་ཤིག༔ དཔེ་འདི་ལ་ཕྱི་ནང་མེད་པའི་ངང་ནས༔ རྐྱེན་མེད་པའི་འོད་ལྔ་གསལ་བ་ལྟར༔ རིག་པ་ཆོས་ཀྱི་སྐུ་ཟང་ཐལ་གྱི་ངང་ནས༔ གཟུགས་སྐུ་ནང་གསལ་དུ་གྲུབ་སྟེ༔ རིག་པ་སྟོང་པའི་ཡེ་ཤེས་ཀྱི་སྙིང་པོ་ཅན་དུ་ཤེས་པར་གྱིས་ཤིག༔ འདིའི་ནང་ནས་འོད་ལྔ་ཕྱི་རོལ་དུ་འཆར་ནུས་པ་ལྟར༔ ཆོས་སྐུ་ལས་གཟུགས་སྐུ་གཉིས་གདུལ་བྱ་ལ་འཆར་ནུས་པར་ཤེས་པར་གྱིས་ཤིག༔ དེ་ནི་ཆོས་སྐུའི་ངོ་སྤྲོད་དོ༔ ལོངས་སྐུའི་ངོ་སྤྲོད་ནི༔ ཞི་ཁྲོའི་འདྲ་འབག་ལ་མེ་ལོང་བསྟན་པའི་ཚེ༔ མེ་ལོང་འདི་དག་ཅིང་གསལ་བ་ལྟར༔ ཆོས་ཉིད་དག་ཅིང་གསལ་བ་ཤེས་པར་གྱིས་ཤིག༔ མེ་ལོང་འདིའི་ནང་ན་གཟུགས་བརྙན་སྣང་ལ་རང་བཞིན་མེད་པར་གནས་པ་བཞིན་དུ༔ ཆོས་ཉིད་ཀྱི་ཀློང་ནས་སྐུ་ལྔ་སྣང་ལ་རང་བཞིན་མེད་པར་གནས་པར་ཤེས་པར་གྱིས་ཤིག༔ དེ་ནི་ལོངས་སྐུའི་ངོ་སྤྲོད་དོ༔ སྤྲུལ་སྐུའི་ངོ་སྤྲོད་ནི༔ མན་ཤེལ་དང་མེ་ལོང་འདི་དག་ཅིང་གསལ་བ་ལྟར༔ མིག་རྒྱང་ཞགས་ཆུའི་སྒྲོན་མ་ནི༔ དབྱིངས་རྣམ་པར་དག་པའི་ཆོས་ཉིད་དོ༔ མེ་ལོང་ལ་ཕྱག་རྒྱ་ཏིང་ངེ་འཛིན་གྱིས་མ་བསྐྱེད་པར་སྣང་བའི་སྐུ་ལྔ་འོད་དུ་གསལ་བ་ནི༔ འདི་ཇི་ལྟ་བ་བཞིན་དུ་རིག་པ་འོད་གསལ་འགགས་མེད་དུ་གསལ་བ༔ སྤྲུལ་པའི་སྐུའོ༔ དེ་ནི་སྤྲུལ་སྐུའི་ངོ་སྤྲད་དོ༔ སྐུ་གསུམ་འདུ་འབྲལ་མེད་པའི་ངོ་སྤྲོད་ནིདཔེ་ཉི་མའི་སྙིང་པོ་ལ་འོད་དང་ཟེར་མ་འགགས་པ་བཞིན་དུ་ཆོས་སྐུ་སྟོང་པའི་ངང་ལས་གཟུགས་སྐུ་འགགས་པ་མེད་པའི་སྐུ་གཉིས་ཀྱིས་བརྒྱན་ཏེ༔ དཔེ་ཉི་མ་དང་འོད་དང་མན་ཤེལ་དབྱེར་མེད་པ་ལྟ་བུ༔ དོན་འདུ་འབྲལ་མེད་པར་ཤེས་པར་བྱའོ༔ དེ་ནི་སྐུ་གསུམ་འདུ་འབྲལ་མེད་པའི་ངོ་སྤྲོད་དོ༔ སྒྲོན་མ་དྲུག་གི་ངོ་སྤྲོད་ཤེས་རིག་རང་གྲོལ།ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ སྒྲོན་མ་དྲུག་གི་ངོ་སྤྲོད་ཤེས་རིག་རང་གྲོལ་བཞུགས་སོ༔ ཐོག་མའི་མགོན་པོ་ཀུན་བཟང་འོད་མི་འགྱུར༔ དེ་རྩལ་ལོངས་སྐུ་ཞི་ཁྲོ་འོད་ཀྱི་སྐུ༔ དེ་རྩལ་སྤྲུལ་སྐུ་འགགས་མེད་འོད་ཟེར་འཕྲོ༔ ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ༔ འཆི་མེད་འོད་ལུས་པདྨ་འབྱུང་གནས་ངས༔ ཞི་ཁྲོ་དགོངས་པ་རང་གྲོལ་ཆ་རྐྱེན་དུ༔ སྐྱེ་གནས་བར་དོར་ཉམས་སུ་ལེན་པ་ལ༔ སྒྲོན་མ་དྲུག་གི་ངོ་སྤྲོད་བསྟན་གྱིས་ཉོན༔ ས་མ་ཡཱ༔ དེ་ལ་སྒྲོན་མའི་ངོ་བོ་དང་༔ རང་བཞིན་དང༔ མཚན་ཉིད་དང་༔ དབྱེ་བ༔ ངེས་ཚིག༔ གནས་ཚུལ་དང་༔ དཔེ་དྲུག༔ ངོ་སྤྲོད༔ ཉམས་ལེན་དང་དགུས་བསྟན་ནོ༔ དང་པོ་སྒྲོན་མའི་ངོ་བོ་གང་ཞེ་ན༔ རང་གི་ཤེས་རིག་གི་ངོ་བོ་ཝལ་ལེར་གསལ་བ༔ དང་པོ་རྒྱུ་ཡིས་མ་བསྐྱེད་པ༔ བར་དུ་རྐྱེན་གྱིས་མི་འཇིག༔ མེད་བཞིན་དུ་སྟོང་པའི་རང་རྩལ་སྣ་ཚོགས་སུ་འཕྲོ་བ་འདི་ཁོ་ན་སྒྲོན་མའི་ངོ་བོ་ཡིན་ཏེ༔ དེ་ཡིན་པའི་རྒྱུ་མཚན་ཅིའི་ཕྱིར་ན༔ འདི་ཉིད་ད་ལྟ་སྐྱེ་གནས་བར་དོའི་སྐབས་སུ༔ རང་གི་སྙིང་གི་དཀྱིལ་ན་གནས་པའི་རང་རྩལ༔ སྐུ་ལྔ་ཡེ་ཤེས་ཀྱི་གནས་ཚུལ་དུ་ཤར་བའི་ཕྱིར༔ འདི་ཁོ་ན་སྒྲོན་མ་དྲུག་གི་ངོ་བོ་ཡིན་པས༔ བླ་མས་ངོ་སྤྲོད་ཅིང་སློབ་མས་རྟོགས་པར་བྱའོ༔ དེ་སྐད་དུའང་༔ རིག་པ་རང་ཤར་གྱི་རྒྱུད་ལས༔ རང་གིས་རིག་པ་གསལ་བ་ཡི༔ ཆོ་འཕྲུལ་ཕྱི་ཡི་སྣང་བ་སྟེ༔ རྟོག་མེད་གསལ་བའི་ངོ་བོ་ལ༔ རང་བྱུང་ཆེན་པོར་ཤེས་གྱུར་ན༔ ཆོས་ཅན་ལྟ་བའི་ལྟ་བའོ༔ ཞེས་གསུངས་པ་དང་༔ ཡང་དག་སངས་རྒྱས་དགོངས་པ་ནི༔ སེམས་ཅན་ཀུན་གྱི་རང་རྒྱུད་ལ༔ སྐུ་དང་ཡེ་ཤེས་ཚུལ་དུ་གནས༔ ཞེས་གསུངས་སོ༔ ས་མ་ཡ༔ གཉིས་པ་སྒྲོན་མའི་རང་བཞིན་གང་ཞེ་ན༔ རང་གི་ཤེས་རིག་གི་ངོ་བོ་འདི་ལ་རང་བཞིན་གྲུབ་པ་མེད་པའི་ཕྱིར་སྟོང་པ་ཉིད་དོ༔ དེ་ཡང་ཕྱོགས་ཀྱིས་སྟོང་པ་ནི༔ རང་གི་ཤེས་རིག་ངོ་བོ་འདི་ཤར་ཕྱོགས་སུ་མི་གནས་ཤིང་མ་གྲུབ༔ དེ་བཞིན་དུ༔ ལྷོ་དང་༔ ནུབ་དང་༔ བྱང་དང་༔ མཚམས་དང་༔ སྟེང་འོག་དང་༔ ཕྱོགས་འདི་ཞེས་བྱ་བའི་རང་བཞིན་དུ་གྲུབ་པ་མེད་ལ༔ དབྱིབས་ཀྱིས་སྟོང་པ་ནི༔ རང་གི་ཤེས་རིག་འདི་ལ་བལྟས་པས༔ ཟླུམ་པོའི་དབྱིབས་སུ་མ་གྲུབ༔ གྲུ་བཞི་དང་༔ ཟླ་གམ་གྲུ་གསུམ་ལ་སོགས་པ་གང་གི་དབྱིབས་སུའང་མ་མཐོང་པའི་ཕྱིར་སྟོང་པ་ཉིད་དོ༔ དེ་བཞིན་ཁ་དོག་གིས་སྟོང་པ་ནི༔ ད་ལྟའི་ཤེས་རིག་འདི་ལ༔ ཁ་དོག་དཀར་པོའི་རང་བཞིན་དུ་མི་གནས༔ དམར་པོ་དང་༔ སེར་པོ་དང་༔ མཐིང་ག་དང་༔ ལྗང་གུ་དང་༔ ཁྲ་བོ་ལ་སོགས་པ་གང་གི་ཁ་དོག་སུ་ཡང་མ་མཐོང་ཞིང་གྲུབ་པ་མི་འདུག་པའི་ཕྱིར་སྟོང་པ་ཉིད་དོ༔ དེ་བཞིན་དུ་རང་གི་ཤེས་རིག་གི་ངོ་བོ་འདི་ལ༔ ཆོས་ཅན་མཚན་མར་གྲུབ་པ་སྤུ་ཙམ་ཡང་མི་འདུག་ཅིང་མ་མཐོང་བས་ན༔ རང་བཞིན་གྱིས་སྟོང་པ་ཉིད་དང་༔ ཤེས་རབ་སྙིང་པོ་ལས༔ ཕུང་པོ་ལྔ་པོ་དེ་དག་ཀྱང་རང་བཞིན་གྱིས་སྟོང་པ་རྣམ་པར་བལྟའོ༔ ཞེས་གསུངས་པ་དང་༔ རང་ཤར་གྱི་རྒྱུད་ལས༔ ཆོས་ཉིད་རྟོགས་པར་བྱེད་པ་ནི༔ བྱར་མེད་ངང་དུ་ཤེས་པར་བྱ༔ དེ་ལྟར་སྐྱེ་མེད་དོན་རྟོགས་ན༔ ཆོས་ཉིད་ལྟ་བའི་ལྟ་བར་འདོད༔ ཅེས་གསུངས་པ་དང༔ ཡི་གེ་མེད་པའི་རྒྱུད་ལས༔ ལྟ་བ་མེད་པ་དེ་ལ་བལྟ་རྒྱུ་མེད༔ ལྟ་བའི་དོན་ལ་མི་འདའ་བལྟ་རྒྱུ་ངང་གིས་མེད༔ དེ་ཡོད་མ་ཡིན་དེ་ཡི་ངང་དུ་གནས་པར་བྱ༔ ཞེས་གསུངས་སོ༔ ས་མ་ཡ༔ གསུམ་པ་སྒྲོན་མའི་མཚན་ཉིད་གང་ཞེ་ན༔ རང་གི་ཤེས་རིག་འདི་ཉིད་གསལ་སྟོང་གཉིས་སུ་མེད་པའི་མཚན་ཉིད་དོ༔ དེ་ཡང་ཤེས་རིག་འདི་ལ་རང་བཞིན་མེད་པས་སྟོང་ལ༔ སྟོང་པ་དེ་ཀ་སྟོང་པ་ཕྱང་ཆད་དུ་མ་སོང་བར༔ སྟོང་པའི་ངོ་བོ་རིག་པ་རང་བཞིན་གྱིས་གསལ་བས་གསལ་སྟོང་གཉིས་སུ་མེད་པའི་མཚན་ཉིད་ཅན་ཏེ༔ ངོ་བོ་སྟོང་པའི་ཆ་ནས་རྟག་པ་མཐར་འཛིན་གྱི་ཕྱོགས་སུ་མ་ལྷུང་༔ རང་བཞིན་གསལ་བའི་ཆ་ནས་ཆད་པ་མཐར་འཛིན་གྱི་ཕྱོགས་སུ་མ་ལྷུང་༔ ཐུགས་རྗེ་ཀུན་ལ་ཁྱབ་ཅིང་མཚན་ཉིད་གཉིས་སུ་མེད་པའི་ཆ་ནས་རྟག་ཆད་མཐའ་ལས་འདས་པའི་མཚན་ཉིད་ཅན་ཏེ༔ སྒྲོན་མ་འབར་བའི་རྒྱུད་ལས༔ ཐོག་མའི་ཀ་དག་ཆེན་པོ་ལ༔ རང་བཞིན་ཉིད་ནི་འདི་ལྟ་བུ༔ སུས་ཀྱང་མ་བྱས་རང་གསལ་བ༔ ཡེ་ཉིད་ནས་ནི་རང་བཞིན་ནོ༔ ཞེས་པ་དང་༔ མུ་ཏིག་ཕྲེང་བའི་རྒྱུད་ལས༔ སྟོང་གསལ་རིག་ཅིང་འགྱུར་བ་མེད༔ ངོ་བོ་དེ་ཡི་མཚན་ཉིད་ཡིན༔ ཅེས་གསུངས་པ་དང་༔ རང་ཤར་གྱི་རྒྱུད་ལས༔ རྟག་ཆད་གཉིས་ཀྱི་མཐའ་ལས་འདས༔ ཞེས་གསུངས་པ་དང་༔ རང་གྲོལ་གྱི་རྒྱུད་ལས༔ མཐའ་བཞིའི་དྲི་མ་རང་སངས་ཉིད༔ ཅེས་གསུངས་པ་དང་༔ ཕ་རོལ་ཕྱིན་པ་ལས༔ སེམས་ནི་སེམས་མ་མཆིས་པ་སྟེ༔ སེམས་ཀྱི་རང་བཞིན་འོད་གསལ་བ་ལགས་སོ༔ ཞེས་པ་ལ་སོགས་པ་གསུངས་སོ༔ ས་མ་ཡཱ༔ བཞི་པ་སྒྲོན་མའི་དབྱེ་བ་དྲུག་ནི༔ གནས་ལུགས་གཞིའི་སྒྲོན་མ་དང་གཅིག༔ ཙིཏྟ་ཤ་ཡི་སྒྲོན་མ་དང་གཉིས༔ དཀར་འཇམ་རྩའི་སྒྲོན་མ་དང་གསུམ༔ རྒྱང་ཞགས་ཆུ་ཡི་སྒྲོན་མ་དང་བཞི༔ བར་དོ་དུས་ཀྱི་སྒྲོན་མ་དང་ལྔ༔ མཐར་ཐུགས་འབྲས་བུའི་སྒྲོན་མ་དང་དྲུག་གོ༔ ས་མ་ཡཱ༔ ལྔ་པ་སྒྲོན་མའི་ངེས་ཚིག་དྲུག་ནི༔ སེམས་ཅན་ཐམས་ཅད་ལ་ཆོས་སྐུའི་དགོངས་པས་ཏིལ་དང་འོ་མ་ལ་མར་གྱིས་ཁྱབ་པ་ལྟར་དུ་གནས་ཏེ༔ དེ་ལྟར་རྟོགས་ན་ཀུན་ཏུ་བཟང་པོའི་གྲོལ་གཞི་ལ༔ མ་རྟོགས་ན་མ་རིག་སེམས་ཅན་འཁྲུལ་གཞི་སྟེ༔ རྟོགས་ཏེ་སངས་རྒྱས་མ་བྱུང་༔ མ་རྟོགས་ཏེ་སེམས་ཅན་མ་བྱུང་བས༔ འཁོར་འདས་གང་གི་ཕྱོགས་སུ་མ་ལྷུང་བའི་གཞི་དེ་ལ་གནས་པ་གཞིའི་སྒྲོན་མ་ཞེས་བྱ༔ ཀུན་གཞི་ཞེས་བྱ༔ སྤྱི་གཞི་ཞེས་བྱ༔ བདེར་གཤེགས་སྙིང་པོ་ཞེས་བྱ་བ་འཁོར་འདས་ཐམས་ཅད་ལ་ཁྱབ་པར་གནས་ཏེ༔ དཔལ་ཕྲེང་སེང་གེའི་མདོ་ལས༔ བདེར་གཤེགས་སྙིང་པོས་འགྲོ་ཀུན་ཡོངས་ལ་ཁྱབ༔ ཅེས་པ་དང་༔ ནོར་བུ་ཕྲ་བཀོད་ལས༔ ཏིལ་འབྲུ་འམ་ནི་ཡུངས་འབྲུ་ལ༔ མར་ཉིད་ཡེ་ནས་ལྷུན་གྲུབ་བཞིན༔ སེམས་ཅན་ལུས་ལྟར་སྣང་བ་ལ༔ དེ་བཞིན་གཤེགས་པའི་ས་བོན་ཉིད༔ མཐུན་པའི་འོད་དང་བཅས་ཏེ་སྣང་༔ ཞེས་པ་དང་༔ སེམས་ཅན་ཐམས་ཅད་ལ་གནས་ལུགས་གཞིའི་ཆོས་ཉིད་དེས་ཁྱབ་པར་གནས་པ་ནི་གནས་པ་གཞིའི་སྒྲོན་མ་ཞེས་བྱའོ༔ གཉིས་པ་ཙིཏྟ་ཤའི་སྒྲོན་མ་ཞེས་བྱ་ནི༔ གནས་ལུགས་ཀྱི་དོན་དེ་སྤྱིར་ལུས་ལ་གནས་ཤིང་༔ ཁྱད་པར་དུ་སྙིང་གི་ནང་ན་གནས་ཏེ༔ ངོ་སྤྲོད་སྤྲོས་པའི་རྒྱུད་ལས༔ དོན་ནི་རང་གི་ལུས་དཀྱིལ་ན༔ སྙིང་ནང་ཡེ་ཤེས་ཆེན་པོར་གནས༔ ཞེས་གསུངས་པ་དང་༔ ཐིག་ལེ་འདུས་པའི་རྒྱུད་ལས༔ སེམས་ཅན་དྲན་བྱེད་ཙིཏྟའི་དཀྱིལ༔ ཆོས་གསུམ་སེམས་ཀྱི་ངོ་བོར་གནས༔ ཞེས་གསུངས་པས༔ རིག་པ་སྙིང་གི་དཀྱིལ་དུ་གནས་པ་ལ་ཙིཏྟ་ཤའི་སྒྲོན་མ་ཞེས་བྱའོ༔ གསུམ་པ་དཀར་འཇམ་རྩ་ཡི་སྒྲོན་མ་ཞེས་བྱ་བ་ནི༔ སྙིང་དང་མིག་གཉིས་འབྲེལ་བའི་རྩ་སྐྱོན་ཡོན་དབང་པོ་དྭངས་བྱེད་ཀྱི་རྩ་ཞེས་པ༔ ནང་ཁྲག་དང་ཆུ་སེར་མེད་པའི་སྟོང་གསལ་གཅིག་ཡོད་པ་སྟེ༔ རིག་པ་རྒྱུ་བར་བྱེད་པའི་ལམ་ཡིན་ནོ༔ དེ་ལ་ནི་དཀར་འཇམ་རྩའི་སྒྲོན་མ་ཞེས་བྱ་སྟེ༔ ཐིག་ལེ་འདུས་པའི་རྒྱུད་ལས༔ རྩ་ཡི་རྒྱལ་པོ་ཤེལ་གྱི་སྦུག་གུ་ཅན༔ ཉི་མ་ཟླ་བའི་ནང་ན་ཟུག་པར་གནས༔ ཞེས་པ་དང་༔ སྒྲོན་མ་འབར་བའི་རྒྱུད་ལས༔ ཀླད་པ་དུང་ཁང་དཀར་པོ་ནས༔ གཡས་སུ་འཁྱིལ་པ་གསུམ་ཡོད་པས༔ རྩ་ནི་བ་མིན་རྭ་འདྲའི་དབྱིབས༔ འབྱུང་བའི་དྭངས་མ་ཀུན་འདུས་ནས༔ དབང་པོའི་ཡུལ་ལ་འཆར་བྱེད་པ༔ རྩ་ཡི་ནང་ན་འདི་ཉིད་གནས༔ ཞེས་སོ༔ དེས་ན་རྣམ་ཤེས་འགྱུ་བའི་ལམ་ལ་དཀར་འཇམ་རྩའི་སྒྲོན་མ་ཞེ་བྱའོ༔ བཞི་པ་རྒྱང་ཞགས་ཆུ་ཡི་སྒྲོན་མ་ཞེས་བྱ་བ་ནི༔ མིག་ཆུ་ཡི་དཀྱིལ་འཁོར་གཉིས་ནས་མཐོང་བ་མ་འགགས་པར་གསལ་བ་སྟེ༔ སྒྲ་ཐལ་འགྱུར་གྱི་རྒྱུད་ལས༔ ཡེ་ཤེས་འཆར་བའི་སྒོ་ཉིད་ནི༔ ལུས་བཅུད་དྭངས་མ་ཀུན་འདུས་པ༔ ཙཀྵུ་ཞེས་པའི་སྒོ་ལ་ཐོན༔ གཉིས་ཀྱི་ཆ་འཛིན་སྣང་བ་སྟོན༔ ཅེས་པ་དང་༔ མ་སངས་རྒྱས་རང་ཆས་ཀྱི་རྒྱུད་ལས༔ ཡེ་ཤེས་ཟངས་ཐལ་ཉིད་ཀྱི་སྐུ༔ བརྟེན་པ་རང་གི་མིག་ལ་བརྟེན་ནོ༔ གནས་པ་མིག་གི་འབྲས་བུའི་སྟེང་ན་གནས་སོ༔ གསལ་བ་མཐོང་བ་མ་འགགས་པར་གསལ་ལོ༔ རང་གི་མིག་གི་འབྲས་བུའི་དཀྱིལ་ན་མ་འགགས་པར་ཟང་ཐལ་ལེ་བ་འདི་སངས་རྒྱས་ཡེ་ཤེས་ཟང་ཐལ་གྱི་སྐུ་ཡིན་ནོ༔ ཞེས་གསུངས་པས༔ མིག་གི་མཐོང་བ་མ་འགགས་པར་གསལ་བ་འདི་ལ་རྒྱང་ཞགས་ཆུའི་སྒྲོན་མ་ཞེས་བྱའོ༔ ལྔ་པ་བར་དོ་དུས་ཀྱི་སྒྲོན་མ་ཞེས་བྱ་བ་ནི༔ ཆོས་ཉིད་ཀྱི་བར་དོར་ཆོས་ཉིད་དག་པའི་སྣང་བ་འཆར་བ་དང་ངོས་ཟིན་ནས་གྲོལ་བ་སྟེ༔ རང་བྱུང་རིག་པའི་རྒྱུད་ལས༔ རང་བྱུང་ཡེ་ཤེས་ཉག་གཅིག་དོན༔ རང་ཤར་ལྷུག་པ་གཟའ་གཏད་བྲལ༔ དེ་ཡི་མཐར་འཛིན་གྲོལ་གྱུར་ན༔ འཁོར་འདས་ཆོས་རྣམས་ཐམས་ཅད་ཀུན༔ རང་བྱུང་རིག་རྩལ་ཀློང་དུ་གྲོལ༔ ཞེས་པ་དང་༔ ཆོས་ཉིད་ཞི་ཁྲོའི་སྣང་བ་ཅི་ཤར་ཡང་༔ རང་སྣང་དུ་ཤེས་ནས་གྲོལ་བ་སྟེ༔ ཐིག་ལེ་སྤུངས་པའི་རྒྱུད་ལས༔ རང་བྱུང་ཡེ་ཤེས་ཆེན་པོ་ལ༔ རང་གདངས་སྣ་ཚོགས་རིགས་ལྔར་སྣང་༔ ཞེས་པས༔ བར་དོ་རང་ངོ་ཤེས་ནས་གྲོལ་བ་ལ་བར་དོ་དུས་ཀྱི་སྒྲོན་མ་ཞེས་བྱའོ༔ དྲུག་པ་མཐར་ཐུག་འབྲས་བུའི་སྒྲོན་མ་ཞེས་བྱ་བ་ནི༔ ཆོས་ཉིད་ཟད་པའི་སྣང་བ་མཐར་ཕྱིན་ནས་ཕྱིར་མི་ལྡོག་པའི་ས་ཐོབ་སྟེ༔ རྒྱུད་ཀྱི་སྙིང་པོ་ལས༔ སྣང་སྲིད་འཁོར་བའི་ཆོས་རྣམས་ལ༔ ཡེ་ཤེས་སྤྱི་བླུགས་རྒྱས་ཐེབས་ན༔ སྐུ་དང་ཡེ་ཤེས་རང་བཞིན་ལ༔ ཁམས་གསུམ་འཁོར་བར་མི་འགྱུར་ཏེ༔ སྟོང་ཉིད་རྡོ་རྗེའི་སྐུ་ཐོབ་བོ༔ ཞེས་པ་དང་༔ འདས་རྗེས་ལས༔ འདི་ལྟར་གཞི་ལམ་མཐར་ཕྱིན་ནས༔ མྱང་འདས་གཞན་དུ་བཙལ་དུ་མེད༔ ཅེས་པས༔ མཐར་ཐུག་གི་འབྲས་བུའི་དོན་མངོན་དུ་གྱུར་ནས་ཕྱིར་མི་ལྡོག་པའི་ས་ཐོབ་པས་མཐར་ཐུག་འབྲས་བུའི་སྒྲོན་མ་ཞེས་བྱའོ༔ དེ་ནི་སྒྲོན་མ་དྲུག་གི་ངེས་ཚིག་དྲུག་བསྟན་པའོ༔ ས་མ་ཡཱ༔ དྲུག་པ་སྒྲོན་མ་དྲུག་གི་གནས་ཚུལ་དྲུག་ནི༔ དང་པོ་གནས་པ་གཞིའི་སྒྲོན་མ་ནི༔ ཐིག་ལེ་གདལ་བའི་ཚུལ་དུ་གནས་ཏེ༔ ཡི་གེ་མེད་པའི་རྒྱུད་ལས༔ དོན་དམ་ཆོས་ཉིད་སྙིང་པོ་འདི༔ ཀུན་ལ་ཏིལ་མར་བཞིན་དུ་ཁྱབ༔ ཅེས་སོ༔ གཉིས་པ་ཙིཏྟ་ཤའི་སྒྲོན་མ་ནི༔ ཐིག་ལེ་སྤུངས་པའི་ཚུལ་དུ་གནས་ཏེ༔ ནམ་མཁའ་དང་མཉམ་པའི་རྒྱུད་ལས༔ གསེར་བུམ་ཏིལ་གྱི་སྒྲོན་མེ་བཞིན༔ འགྱུར་མེད་རིག་པ་ནང་ནས་གསལ༔ ཞེས་པ་དང་༔ སྙིང་གི་མེ་ལོང་གི་རྒྱུད་ལས༔ གནས་ནི་སྙིང་གི་ནང་འོད་ལྔའི་དབུས་ན་ཞི་བའི་སྐུ་ཡུངས་འབྲུ་ཙམ་འོད་ཁྱིམ་གྱི་ཚུལ་དུ་གནས་སོ༔ དེ་ལས་བྱུང་བའི་འོད་ནི་མེ་ལོང་གི་དཀྱིལ་འཁོར་ལྟར་གསལ་ལ་དྭངས་པའམ་དཔེར་ན་ཉི་མའི་དཀྱིལ་འཁོར་གྱི་འོད་ཟེར་བཞིན་དུ་གནས་སོ༔ ཞེས་གསུངས་སོ༔ གསུམ་པ་དཀར་འཇམ་རྩའི་སྒྲོན་མ་ནི༔ ཐིག་ལེ་ཉི་ཞུར་འཆར་བའི་ཚུལ་དུ་གནས་ཏེ༔ ཐིག་ལེ་འདུས་པའི་རྒྱུད་ལས༔ རྩའི་རྒྱལ་པོ་ཤེལ་གྱི་སྦུག་གུ་ཅན༔ ཉི་མ་ཟླ་བའི་ནང་ན་ཟུག་པར་གནས༔ ཞེས་པ་དང་༔ སྒྲོན་མ་འབར་བའི་རྒྱུད་ལས༔ འབྱུང་བའི་དྭངས་མ་ཀུན་འདུས་ནས༔ དབང་པོའི་ཡུལ་ལ་འཆར་བྱེད་པ༔ རྩ་ཡི་ནང་ན་འདི་ཉིད་གནས༔ ཞེས་གསུངས་སོ༔ བཞི་པ་རྒྱང་ཞགས་ཆུའི་སྒྲོན་མ་ནི༔ ཐིག་ལེ་མདངས་སུ་ཤར་བའི་ཚུལ་དུ་གནས་ཏེ༔ ཐིག་ལེ་འདུས་པའི་རྒྱུད་ལས༔ ཆོས་ཉིད་དག་པའི་རང་མདངས་ནི༔ ནམ་ལངས་ཞོག་པ་ལྟ་བུར་གནས༔ ཡེ་ཤེས་དག་པའི་ཟེར་གདངས་ནི༔ ནམ་ལངས་ཉི་ཤར་ལྟ་བུར་གནས༔ ཅེས་པ་དང་༔ མུ་ཏིག་ཕྲེང་བ་ལས༔ འགྲོ་བའི་ལམ་ནི་མཐོང་བྱེད་སྒོ༔ དེ་ཉིད་གཡས་གཉིས་གཡོན་གཉིས་དབུས༔ སྒྲོན་མ་འབར་བའི་ཚུལ་དུ་གནས༔ ཞེས་གསུངས་སོ༔ ལྔ་པ་བར་དོ་དུས་ཀྱི་སྒྲོན་མ་ནི༔ ཐིག་ལེ་མངོན་དུ་གྱུར་པའི་རང་བཞིན་དུ་གནས་ཏེ༔ གཅིག་ཤེས་ཀུན་གྲོལ་གྱི་རྒྱུད་ལས༔ སྟོང་གསལ་ཏི་ལ་ཉག་གཅིག་འདི༔ འཁོར་འདས་ཀུན་གྱི་རྩ་བ་ཡིན༔ རང་བྱུང་ཡེ་ཤེས་དོན་རྟོགས་ན༔ གཅིག་ཤེས་ཀུན་གྲོལ་མཁས་པར་འགྱུར༔ ཞེས་པ་དང་༔ ཐིག་ལེ་སྤུངས་བའི་རྒྱུད་ལས༔ རང་བྱུང་ཡེ་ཤེས་ཆེན་པོ་ལ༔ འོད་ཟེར་འབར་བས་ཀུན་ལ་ཁྱབ༔ ཅེས་གསུངས་སོ༔ དྲུག་པ་མཐར་ཐུག་འབྲས་བུའི་སྒྲོན་མ་ནི༔ ཐིག་ལེ་བཅུད་དུ་སྨིན་པའི་ཚུལ་དུ་གནས་ཏེ༔ དེ་ལ་སྐྱེད་འདོན་རྒྱུ་མེད་པས་ཡེ་གདོད་མའི་ས་ལ་ལྷུན་གྱིས་གནས་པ་སྟེ༔ ཁུ་བྱུག་རིག་པ་ལས༔ ཟིན་པ་རྩོལ་བའི་ནད་སྤངས་ནས༔ ལྷུན་གྱིས་གནས་པས་བཞག་པ་ཡིན༔ ཅེས་པ་དང་༔ འདས་རྗེས་ལས༔ ཆོས་ཉིད་ཟད་པའི་སྣང་བ་ཡིས༔ རྫོགས་ཆེན་བྱ་བྲལ་སྣང་བ་ཐོབ༔ འདི་ལྟར་གཞི་ལམ་མཐར་ཕྱིན་ནས༔ མྱང་འདས་གཞན་དུ་བཙལ་མི་དགོས༔ ཞེས་པ་དང་༔ ཕ་རོལ་དུ་ཕྱིན་པ་ལས༔ ཕྱིན་ཅི་ལོག་ལས་ཤིན་ཏུ་འདས་ནས་མྱ་ངན་ལས་འདས་པ་ཆེན་པོའི་མཐར་ཕྱིན་ཏོ༔ ཞེས་སོ༔ དེ་ནི་སྒྲོན་མ་དྲུག་གི་གནས་ཚུལ་དྲུག་བསྟན་པའོ༔ ས་མ་ཡཱ༔ བདུན་པ་སྒྲོན་མ་དྲུག་གི་དཔེ་དྲུག་ནི༔ དང་པོ་གནས་པ་གཞིའི་སྒྲོན་མ་ནི༔ དཔེ་ཅི་དང་འདྲ་ན་འོ་མ་ལ་མར་གྱིས་ཁྱབ་པའམ་ཏིལ་ལ་ཏིལ་མར་གྱིས་ཁྱབ་པ་ལྟར་གནས་སོ༔ གཉིས་པ་ཙིཏྟ་ཤའི་སྒྲོན་མ་ནི༔ དཔེ་ཅི་དང་འདྲ་ན་འོད་ཁང་དུ་མར་མེ་བཅུག་པ་ལྟ་བུ་འམ་བུམ་སྐུ་ལྟ་བུའོ༔ གསུམ་པ་དཀར་འཇམ་རྩའི་སྒྲོན་མ་ནི༔ དཔེ་ཅི་དང་འདྲ་ན་ཤར་ཕྱོགས་ཀྱི་རྒྱ་སྐར་བུག་པ་ནས་ཉི་མ་ཤར་བ་ལྟ་བུ་སྟེ༔ སྐར་ཁུང་གི་དཔེ་བཞིན་དུ༔ སྙིང་ནས་མིག་ཏུ་རྩ་དར་དཀར་གྱི་སྐུད་པ་ཙམ་དུ་འབྲེལ་བའི་ནང་དུ༔ ཡར་ཐིག་ལེ་ཉི་ཞུར་ཙམ་དུ་འཆར་རོ༔ བཞི་པ་རྒྱང་ཞགས་ཆུའི་སྒྲོན་མ་ནི༔ དཔེ་ཅི་དང་འདྲ་ན་ཉི་མ་ཤར་ནས་འཆར་ཙམ་ན༔ འོད་ནུབ་རི་ལ་འཆར་བ་ལྟ་བུ་སྟེ༔ དཔེ་དེ་བཞིན་དུ༔ ཡེ་ཤེས་ཀྱི་གསལ་གདངས་དེ་ཤེས་པ་རྟོག་པས་མ་བསླད་པའི་སལ་ལེ༔ ཡེར་རེ༔ སེང་ངེ་བ༔ དུས་རྒྱུན་དུ་རྒྱང་ཞགས་ཉིད་དུ་གསལ་ལོ༔ ལྔ་པ་བར་དོ་དུས་ཀྱི་སྒྲོན་མ་ནི༔ དཔེ་ཅི་དང་འདྲ་ན༔ སྔར་འདྲིས་ཀྱི་མི་དང་ཕྱིས་འཕྲད་པ་ལྟ་བུའོ༔ དཔེ་དེ་བཞིན་དུ༔ འོད་གསལ་ཆོས་ཉིད་མངོན་སུམ་ལ་གོམས་འདྲིས་མཐར་ཕྱིན་ནས་ཉམས་སྣང་གོང་དུ་འཕེལ་ཞིང་༔ རིག་པ་ཚད་ལ་ཕེབས་ནས༔ ཕྱིས་ཆོས་ཉིད་བར་དོར་ཡེ་ཤེས་མངོན་དུ་གྱུར་ནས་ཡིད་ཆེས་ཏེ༔ རང་སྣང་དག་པ་སངས་རྒྱས་ཀྱི་ཞིང་ཁམས༔ འོད་གསལ་གྱི་ངང་ལས་སངས་རྒྱས་པ་ཡིན་ཏེ༔ གང་ལ་གང་འདུལ་གྱི་འགྲོ་བའི་དོན་འབྱུང་ངོ༔ དྲུག་པ་མཐར་ཐུག་འབྲས་བུའི་སྒྲོན་མ་ནི༔ དཔེ་ཅི་དང་འདྲ་ན༔ སྟོན་ཁའི་ལོ་ཐོག་སྨིན་པ་ལྟ་བུ་སྟེ༔ ཆོས་ཉིད་ཟད་པའི་སྣང་བ་མཐར་ཕྱིན་ནས་དེ་ནས་ཡར་སྐྱེད་འདོན་རྒྱུ་མེད་དེ་ས་རྫོགས་ལམ་རྫོགས་འབྲས་བུ་རྫོགས་པས༔ དེ་ནས་ཕྱིར་མི་ལྡོག་པའི་ས་ཐོབ་ནས་འབྲས་བུ་མཐར་ཕྱིན་པའོ༔ དེ་ནི་སྒྲོན་མ་དྲུག་གི་དཔེ་དྲུག་བསྟན་པའོ༔ ས་མ་ཡཱ༔ བརྒྱད་པ་སྒྲོན་མ་དྲུག་གི་ངོ་སྤྲོད་དྲུག་ནི༔ དང་པོ་གནས་པ་གཞིའ་ིསྒྲོན་མའི་ངོ་སྤྲོད་ནི༔ ཞི་གནས་དང་ལྷག་མཐོང་ངོ་སྤྲོད་དོ༔ གཉིས་པ་ཙིཏྟ་ཤའི་སྒྲོན་མའི་ངོ་སྤྲོད་ནི༔ མི་མོའི་ནང་གི་མར་མེ་ལ་ངོ་སྤྲད་པ་དང་ལྷའི་བུམ་སྐུ་ལ་ངོ་སྤྲད་པའོ༔ གསུམ་པ་དཀར་འཇམ་རྩའི་སྒྲོན་མའི་ངོ་སྤྲོད་ནི༔ གློ་སྐར་གྱི་ཉི་ཞུར་ལ་ངོ་སྤྲོད་པ་དང་༔ མན་ཤེལ་གྱི་ཟེར་ལ་ངོ་སྤྲོད་པའོ༔ བཞི་པ་རྒྱང་ཞགས་ཆུའི་སྒྲོན་མའི་ངོ་སྤྲོད་ནི༔ གློ་སྐར་ཟང་ཐལ་ལ་ངོ་སྤྲོད་པ་དང་༔ མེ་ལོང་དང་ཤེལ་མིག་ལ་སྦྱར་ནས་ངོ་སྤྲོད་པའོ༔ ལྔ་པ་བར་དོ་དྲུག་གི་སྒྲོན་མའི་ངོ་སྤྲོད་ནི༔ ཆོས་ཉིད་བར་དོའི་ངོ་སྤྲོད་དང་༔ སྲིད་པ་བར་དོའི་ངོ་སྤྲོད་རྣམས་སོ༔ དྲུག་པ་མཐར་ཐུག་འབྲས་བུའི་སྒྲོན་མའི་ངོ་སྤྲོད་ནི༔ སྐུ་གསུམ་གྱི་ངོ་སྤྲོད་རྣམས་སོ༔ དེ་ནི་སྒྲོན་མ་དྲུག་གི་ངོ་སྤྲོད་དྲུག་བསྟན་པའོ༔ ས་མ་ཡཱ༔ དགུ་པ་སྒྲོན་མ་དྲུག་གི་ཉམས་ལེན་ནི༔ དང་པོ་གནས་པ་གཞིའི་སྒྲོན་མའི་ཉམས་ལེན་ནི༔ གཞི་ཁྲེགས་ཆོད་ཀ་དག་གི་ཉམས་ལེན་ནི༔ ཉམས་ཁྲིད་ཀུན་གཞི་རང་གྲོལ་ལྟར་ཉམས་སུ་ལེན་ནོ༔ གཉིས་པ་ཙིཏྟ་ཤའི་སྒྲོན་མའི་ཉམས་ལེན་ནི༔ སྙིང་གར་འོད་གསལ་འཛིན་པའི་གདམས་པ་སྟེ༔ འོད་གསལ་གཏི་མུག་རང་གྲོལ་ལྟར་ཉམས་སུ་ལེན་ནོ༔ གསུམ་པ་དཀར་འཇམ་རྩ་ཡི་སྒྲོན་མའི་ཉམས་ལེན་ནི༔ ལུས་ཀྱི་གནས་རྣམས་སུ་རྨི་ལམ་འཛིན་པ་སྟེ༔ རྨི་ལམ་འཁྲུལ་པ་རང་གྲོལ་གྱི་གདམས་པ་དང་༔ རྩ་རླུང་ཐིག་ལེ་ལ་རྩལ་སྦྱང་སྟེ༔ འོག་སྒོ་བདེ་ཆེན་འདོད་ཆགས་རང་གྲོལ་ལྟར་ཉམས་སུ་ལེན་ནོ༔ བཞི་པ་རྒྱང་ཞགས་ཆུའི་སྒྲོན་མའི་ཉམས་ལེན་ནི༔ ཁྲེགས་ཆོད་ཀྱི་ཉམས་ལེན་ནམ་མཁའ་གསུམ་ཕྲུག་ལ་རྩལ་སྦྱང་བ་དང་༔ ཐོད་རྒལ་གྱི་ཉམས་ལེན་ཆོས་ཉིད་མངོན་སུམ་རྡོ་རྗེ་ལུ་གུ་རྒྱུད་ལ་རྩལ་སྦྱང་བ་དང་༔ རྒྱ་མཚོ་ཨར་གཏད་ཀྱི་གདམས་པ་ལ་རྩལ་སྦྱང་པའོ༔ ལྔ་པ་བར་དོ་དུས་ཀྱི་སྒྲོན་མའི་ཉམས་ལེན་ནི༔ ཐོད་རྒལ་གྱི་གདམས་པ་དང་༔ བར་དོ་ཐོས་གྲོལ་ལྟར་ཉམས་སུ་ལེན་ནོ༔ དྲུག་པ་མཐར་ཐུག་འབྲས་བུའི་སྒྲོན་མའི་ཉམས་ལེན་ནི༔ སྐུ་གསུམ་གྱི་ཁྲིད་དང་ངོ་སྤྲོད་རྣམས་ལ་རྩལ་སྦྱོང་བར་བྱའོ༔ དེ་ནི་སྒྲོན་མ་དྲུག་གི་ཉམས་ལེན་དྲུག་བསྟན་པའོ༔ ས་མ་ཡཱ༔ དེ་ལྟར་སྒྲོན་མ་དྲུག་གི་དབྱེ་བ་བསྟན་ནས༔ དེ་ནས་སྒྲོན་མ་དགུ་རུ་དབྱེ་བ་ནི༔ སྒྲོན་མ་དྲུག་གི་སྟེང་དུ༔ ཐིག་ལེ་སྟོང་པའི་སྒྲོན་མ་དང་༔ ཤེས་རབ་རང་བྱུང་གི་སྒྲོན་མ་དང་༔ དབྱིངས་རྣམ་པར་དག་པའི་སྒྲོན་མ་དང་གསུམ་བསྣན་ནས་སྒྲོན་མ་དགུ་སྟེ༔ དེ་ལ་དང་པོ་ཐིག་ལེ་སྟོང་པའི་སྒྲོན་མ་ཞེས་བྱ་བ་རྨ་བྱའི་མདོངས་ལྟ་བུར་འཆར་རོ༔ གཉིས་པ་དེའི་མདངས་ལས་དབྱིངས་རྣམ་པར་དག་པའི་སྒྲོན་མ་ཞེས་བྱ་བ་ཡི་གེའི་ན་རོ་ལྟ་བུར་འཆར་རོ༔ གསུམ་པ་དེའི་རྩལ་ལས་ཤེས་རབ་རང་བྱུང་གི་སྒྲོན་མ་ཞེས་བྱ་བ་ཤེས་པའི་རྩལ་དུ་མ་འཆར་རོ༔ དེ་ཡང་མུ་ཏིག་ཕྲེང་བ་ལས༔ སྒྲོན་མའི་ལམ་ནི་མཐོང་བྱེད་སྒོ༔ དེ་གཉིས་གཡས་གཉིས་གཡོན་གཉིས་དབུས༔ སྒྲོན་མ་འབར་བའི་ཚུལ་དུ་གནས༔ མཐོང་བྱེད་ཡུལ་དུ་སྣང་བའོ༔ རིག་པ་རྟོག་མེད་ལུ་གུ་རྒྱུད༔ ཐིག་ལེ་སྟོང་པའི་སྒྲོན་མ་དང་༔ དག་པ་དབྱིངས་ཀྱི་སྒྲོན་མ་དང་༔ ཤེས་རབ་རང་བྱུང་ཉིད་དང་ནི༔ རྒྱང་ཞགས་ཆུ་ཡི་སྒྲོན་མ་ནི༔ མཐོང་བྱེད་ཡུལ་ལ་སྣང་བའོ༔ རིག་པ་རྟོག་མེད་ལུ་གུ་རྒྱུད༔ བདེ་ཆེན་ཚངས་པའི་སྒོ་ན་གནས༔ དཔེར་ན་གསེར་གྱི་ལུ་གུ་རྒྱུད༔ བཟོ་མཁན་ལེགས་པས་བརྒྱུས་པ་ལྟར༔ ལུ་གུ་རྒྱུད་ནི་འབྲེལ་ཆགས་སོ༔ ཞེས་པ་དང་༔ སྒྲོན་མ་འབར་བ་ལས༔ ཤེས་རབ་རང་བྱུང་སྒྲོན་མ་ནི༔ འདི་ཡི་སྒྲོན་མ་ཐམས་ཅད་ཀྱི༔ ཤེས་བྱེད་ཉིད་དུ་གནས་པས་ན༔ སྤྲ་བ་ཀུན་མཆེད་མེ་བསྲེགས་བཞིན༔ ཤེས་རབ་ཀྱིས་ནི་བག་ཆགས་བསྲེགས༔ ཐིག་ལེ་སྟོང་པའི་སྒྲོན་མ་ནི༔ མི་རྟོག་སྤྲོས་བྲལ་ཟླུམ་པོར་གནས༔ དམར་པོ་རང་གསལ་ཡེ་ནས་དྭངས༔ དཔེར་ན་རྨ་བྱའི་མདོངས་དང་མཚུངས༔ རྣམ་དག་དབྱིངས་ཀྱི་སྒྲོན་མ་ནི༔ མཐིང་ག་མི་འགྱུར་རང་གསལ་བ༔ མུ་ཁྱུད་ཀྱི་ནི་ར་བར་གནས༔ དཔེར་ན་ཡི་གེའི་ན་རོ་བཞིན༔ ཞེས་སོ༔ དེ་ལྟར་སྒྲོན་མ་དྲུག་དང་དགུའི་དབྱེ་བ་འདི༔ རྫོགས་པ་ཆེན་པོའ་ིདགོངས་པའི་བཅུད་བསྡུས་པ༔ ཤེས་རིག་རང་གྲོལ་ཞེས་བྱ་བ༔ མ་འོངས་སྙིགས་མའི་སྐལ་ལྡན་ལས་འཕྲོ་ཅན༔ ཐེག་ཆེན་ཨ་ཏི་ལ་མོས་པའི་གང་ཟག་གི་དོན་དུ༔ སྒྲོན་མའི་རྣམ་པར་དབྱེ་བ་བསྟན་ཏོ༔ འདིས་ཀྱང་འགྲོ་ཀུན་སྐུ་གསུམ་མངོན་གྱུར་ཤོག༔ སྒྲོན་མ་དྲུག་གི་ངོ་སྤྲོད་ཤེས་རིག་རང་གྲོལ་ཞེས་བྱ་བ༔ འཁོར་བ་མ་སྟོངས་བར་དུ་མ་རྫོགས་སོ༔ ས་མ་ཡཱ༔ གྲུབ་ཐོབ་ཀརྨ་གླིང་པས་སྒམ་པོ་གདར་གྱི་རི་ལྷ་བྲན་གར་བྱེད་པ་འདྲ་བའི་གཏེར་ནས་གདན་དྲངས་པའོ༔ སངས་རྒྱས་བྱང་སེམས་ལ་ར་མདའ་སྦྲན་པའི་སྨོན་ལམ༔སངས་རྒྱས་བྱང་སེམས་ལ་ར་མདའ་སྦྲན་མ་བཞུགས་སོ༔ རང་འཆི་བའི་ཚེའམ་ནམ་ཡང་བྱ་སྟེ༔ སངས་རྒྱས་དང་བྱང་ཆུབ་སེམས་དཔའ་རྣམས་ལ་ར་མདའ་སྦྲན་པ་ནི༔ དཀོན་མཆོག་གསུམ་ལ་དངོས་སུ་འབྱོར་བ་དང༔ ཡིད་ཀྱིས་སྤྲུལ་པའི་མཆོད་པ་འབུལ༔ ལག་ཏུ་སྤོས་དྲི་ཞིམ་ཐོགས་ཏེ༔ གདུང་བའི་ཤུགས་དྲག་པོས་འདི་སྐད་དོ༔ ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐུགས་རྗེ་དང་ལྡན་པ༔ མཁྱེན་པ་དང་ལྡན་པ༔ སྤྱན་དང་ལྡན་པ༔ བརྩེ་བ་དང་ལྡན་པ༔ འགྲོ་བའི་སྐྱབས་སུ་གྱུར་པ་རྣམས༔ ཐུགས་རྗེ་དབང་གི་གནས་འདིར་བྱོན་ཅིག༔ དངོས་སུ་འབྱོར་བ་དང་ཡིད་ཀྱི་སྤྲུལ་པའི་མཆོད་པ་བཞེས་ཤིག༔ ཐུགས་རྗེ་ཅན་ཁྱེད་རྣམས་ལ་མཁྱེན་པའི་ཡེ་ཤེས༔ བརྩེ་བའི་ཐུགས་རྗེ༔ མཛད་པའི་ཕྲིན་ལས༔ སྐྱོབ་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས༔ ཐུགས་རྗེ་ཅན་ཁྱེད་རྣམས་ཀྱིས་ཆེ་གེ་མོ་ཞེས་བྱ་བ་འདི་ནི༔ འཇིག་རྟེན་འདི་ནས་ཕ་རོལ་དུ་ནི་འགྲོ༔ འཇིག་རྟེན་འདི་ནི་བོར༔ སྐྱས་ཆེན་པོས་ནི་འདེགས༔ གྲོགས་ནི་མེད༔ སྡུག་བསྔལ་ནི་ཆེ༔ སྐྱབས་ནི་མེད༔ མགོན་ནི་མེད༔ དཔུང་གཉེན་ནི་མེད༔ ཚེ་འདིས་སྣང་བ་ནི་ནུབ༔ འགྲོ་བ་གཞན་དུ་ནི་འགྲོ༔ མུན་ནག་མཐུག་པོར་ནི་འཇུག༔ གཡང་ས་ཆེན་པོར་ནི་ལྷུང༔ ནགས་ཁྲོད་མཐུག་པོར་ནི་འཇུག༔ ལས་ཀྱི་དབང་གིས་ནི་དེད༔ དགོན་པ་ཆེན་པོར་ནི་འགྲོ༔ རྒྱ་མཚོ་ཆེན་པོར་ནི་ཁྱེར༔ ལས་ཀྱི་རླུང་གིས་བརྡས༔ ས་ཚུགས་མེད་པའི་ཕྱོགས་སུ་ནི་འགྲོ༔ གཡུལ་ངོར་ཆེན་པོ་ནི་འཇུག༔ གདོན་ཆེན་པོས་ནི་ཟིན༔ གཤིན་རྗེ་ཕོ་ཉ་ལ་ནི་འཇིགས་ཤིང་སྐྲག༔ ལས་ཀྱི་སྲིད་པ་ན་ཡང་སྲིད་པ་ལ་ནི་འཇུག༔ དབང་ནི་མེད༔ གཅིག་པུ་གྲོགས་མེད་པ་འགྲོ་དགོས་པའི་དུས་ལ་བབ་ན༔ ཐུགས་ར་ྗེཅན་ཁྱེད་རྣམས་ཀྱིས་ཆེ་གེ་མོ་སྐྱབས་མེད་པ་འདི་ལ་སྐྱབས་མཛོད་ཅིག༔ མགོན་མཛོད་ཅིག༔ དཔུང་གཉེན་མཛོད་ཅིག༔ བར་དོའི་མུན་ནག་ཆེན་པོ་ལས་སྐྱོབས་ཤིག༔ ལས་ཀྱི་རླུང་དམར་ཆེན་པོ་ལས་བཟློག་ཤིག༔ གཤིན་རྗེའི་འཇིགས་སྐྲག་ཆེན་པོ་ལས་སྐྱོབས་ཤིག༔ བར་དོའ་ིའཕྲང་རིང་ཆེན་པོ་ལས་སྒྲོལ་ཅིག༔ ཐུགས་རྗེ་ཅན་ཁྱེད་རྣམས་ཀྱི་ཐུགས་རྗེ་མ་ཆུང་ཞིག༔ ར་མདའ་མཛོད་ཅིག༔ ངན་སོང་དུ་མ་གཏང་ཞིག༔ སྔོན་ཀྱི་དམ་བཅའ་མ་གཡེལ་བར་ཐུགས་རྗེའི་ཤུགས་མྱུར་དུ་ཕྱུངས་ཤིག༔ སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཆེ་གེ་མོ་འདི་ལ་ཐུགས་རྗེ་ཐབས་དང་ནུས་པ་མ་ཆུང་ཞིག༔ ཐུགས་རྗེས་ཟུངས་ཤིག༔ སེམས་ཅན་ལས་ངན་པའི་དབང་དུ་མ་གཏང་ཞིག༔ དཀོན་མཆོག་གསུམ་གྱིས་བར་དོའི་སྡུག་བསྔལ་ལས་བསྐྱབ་ཏུ་གསོལ༔ ཞེས་མོས་གུས་དྲག་པོའ་ིསྒོ་ནས་བདག་གཞན་ཐམས་ཅད་ཀྱིས་ལན་གསུམ་དུ་བྱའོ༔ དེ་ནས་བར་དོ་མཐོང་གྲོལ་དང༔ བར་དོ་འཕྲང་སྒྲོལ་མ་དང༔ འཇིགས་སྐྱོབས་མའི་སྨོན་ལམ་རྣམས་འདབས་པར་བྱའོ༔ སངས་རྒྱས་བར་དུ་མ་རྒྱས་དང་བྱང་ཆུབ་སེམས་དཔའ་རྣམས་ལ་ར་མདའ་སྦྲན་པའི་སྨོན་ལམ༔ འཁོར་བ་མ་སངརྗོགས་སོ༔ ས་མ་ཡ༔ ཞེས་ཨོ་རྒྱན་གྱི་མཁན་པོ་པདྨ་འབྱུང་གནས་ཀྱིས་མཛད་པ༔ མཚོ་རྒྱལ་གྱིས་ཟིན་བྲིས་སུ་བྲིས་ནས་གཏེར་ཏུ་སྦས་པ་ཀརྨ་གླིང་པས་སྒམ་པོ་གངས་ཀྱི་རི་བོ་ནས་གདན་དྲངས༔ བར་དོ་དྲུག་གི་རྩ་ཚིགབར་དོ་དྲུག་གི་རྩ་ཚིག་བཞུགས་སོ༔ ཀྱེ་མ༔ བདག་ལ་སྐྱེ་གནས་བར་དོ་འཆར་དུས་འདིར༔ ཚེ་ལ་ལོང་མེད་ལེ་ལོ་སྤངས་བྱས་ནས༔ ཐོས་བསམ་སྒོམ་གསུམ་མ་ཡེངས་ལམ་ལ་འཇུག༔ སྣང་སེམས་ལམ་བསླང་སྐུ་གསུམ་མངོན་གྱུར་བྱ༔ མི་ལུས་ལན་ཅིག་ཐོབ་པའི་དུས་ཚོད་འདིར༔ ༔ ཡེངས་མ་ལམ་ལ་སྡོད་པའི་དུས་ཚོད་མིན༔ ཀྱེ་མ༔ བདག་ལ་རྨི་ལམ་བར་དོ་འཆར་དུས་འདིར༔ གཏི་མུག་རོ་ཉལ་བག་མེད་སྤངས་བྱས་ནས༔ དྲན་མེད་ཡེངས་མེད་གནས་ལུགས་ངང་ལ་འཇོག༔ རྨི་ལམ་བཟུང་ནས་སྤྲུལ་བསྒྱུར་འོད་གསལ་སྦྱངས༔ དུད་འགྲོ་བཞིན་དུ་ཉལ་བར་མ་བྱེད་ཅིག༔ གཉིད་དང་མངོན་སུམ་འདྲེས་པའི་ཉམས་ལེན་གཙོ༔ ཀྱེ་མ༔ བདག་ལ་བསམ་གཏན་བར་དོ་འཆར་དུས་འདིར༔ རྣམ་གཡེང་འཁྲུལ་བའི་ཚོགས་རྣམས་སྤངས་བྱས་ནས༔ ཡེངས་མེད་འཛིན་མེད་མཐའ་བྲལ་ངང་ལ་འཇོག༔ བསྐྱེད་རྫོགས་གཉིས་ལ་བརྟན་པ་ཐོབ་པར་བྱ༔ བྱ་བ་སྤངས་ནས་རྩེ་གཅིག་སྒོམ་དུས་འདིར༔ ཉོན་མོངས་འཁྲུལ་བའི་དབང་དུ་མ་གཏང་ཞིག༔ ཀྱེ་མ༔ བདག་ལ་འཆི་ཁ་བར་དོ་འཆར་དུས་འདིར༔ ཀུན་ལ་ཆགས་སེམས་ཞེན་འཛིན་སྤངས་བྱས་ནས༔ གདམས་ངག་གསལ་བའི་ངང་ལ་མ་ཡེངས་འཇོག༔ རང་རིག་སྐྱེ་མེད་ནམ་མཁའི་དབྱིངས་སུ་འཕོ༔ འདུས་བྱས་ཤ་ཁྲག་ལུས་དང་བྲལ་ལ་ཁད༔ མི་རྟག་སྒྱུ་མ་ཡིན་པ་ཤེས་པར་བྱ༔ ཀྱེ་མ༔ བདག་ལ་ཆོས་ཉིད་བར་དོ༴ ཀུན་ལ་སྔངས་སྐྲག་འཇིགས་སྣང་སྤང་བྱས་ནས༔ གང་ཤར་རང་སྣང་རིག་པ་ངོ་ཤེས་འཇུག༔ བར་དོའི་སྣང་ཚུལ་ཡིན་པར་ཤེས་པར་བྱ༔ དོན་ཆེན་འགགས་ལ་ཐུག་པའི་དུས་ཚོད་འདིར༔ རང་སྣང་ཞི་ཁྲོའི་ཚོགས་ལ་མ་འཇིགས་ཤིག༔ ཀྱེ་མ༔ བདག་ལ་སྲིད་པ་བར་དོ་འཆར་དུས་འདིར༔ འདུན་པ་རྩེ་གཅིག་སེམས་ལ་བཟུང་བྱས་ནས༔ བཟང་པོ་ལས་ཀྱི་འཕྲོ་ལ་ནན་གྱིས་མཐུད༔ མངལ་ས་ྒོདགག་ནས་རུ་ལོག་དྲན་པར་བྱ༔ སྙིང་རུས་དག་སྣང་དགོས་པའི་དུས་ཤིག་ཡིན༔ མིག་སེར་སྤངས་ལ་བླ་མ་ཡབ་ཡུམ་སྒོམས༔ འཆི་བ་འོངས་སྙམ་མེད་པའི་བློ་རིང་པོ༔ དོན་མེད་ཚེ་འདིའི་བྱ་བ་བསྒྲུབ་བསྒྲུབ་ནས༔ ད་རེས་སྟོང་ལོག་བྱས་ན་ཤིན་ཏུ་འཁྲུལ༔ དགོས་ངེས་ཤེས་པ་དམ་པའི་ལྷ་ཆོས་ཡིན༔ ད་ལྟ་ཉིད་དུ་ལྷ་ཆོས་མི་བྱེད་དམ༔ གྲུབ་ཆེན་རྣམས་ཀྱི་ཞལ་ནས་འདི་སྐད་གསུངས༔ བླ་མའི་གདམས་ངག་སེམས་ལ་མ་བཞག་ན༔ རང་གི་རང་ཉིད་བསླུ་བ་མི་འགྱུར་རམ༔ ཅེས་གསུངས༔ བར་དོ་ཐོས་གྲོལ་གྱི་རྩ་བ་འདི་འཁོར་བ་མ་སྟོངས་བར་དུ་མ་རྫོགས་སོ༔ དགེའོ༔ བར་དོ་འཕྲང་སྒྲོལ་སྨོན་ལམ༔བར་དོ་འཕྲང་སྒྲོལ་གྱི་སྨོན་ལམ་བཞུགས་སོ༔ བླ་མ་ཡི་དམ་མཁའ་འགྲོའ་ིཚོགས་ལ་ཕྱག་འཚལ་ལོ༔ བརྩེ་བ་ཆེན་པོས་ལམ་སྣ་དྲང་དུ་གསོལ༔ བདག་ནི་འཁྲུལ་བ་འཁོར་བར་འཁྱམས་པའི་ཚེ༔ ཐོས་བསམ་སྒོམ་གསུམ་མ་ཡེངས་འོད་ལམ་ལ༔ བཀའ་བརྒྱུད་བླ་མ་རྣམས་ཀྱིས་ལམ་སྣ་དྲོངས༔ ཡུམ་མཆོག་མཁའ་འགྲོའི་ཚོགས་ཀྱིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་སྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ གཏི་མུག་དྲག་པོས་འཁོར་བ་འཁྱམས་པའི་ཚེ༔ ཆོས་དབྱིངས་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་རྣམ་པ་སྣང་མཛད་ལམ་སྣ་དྲོངས༔ ཡུམ་མཆོག་དབྱིངས་ཕྱུག་མ་ཡི་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་སྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ ཞེ་སྡང་དྲག་པོས་འཁོར་བ་འཁྱམས་པའི་ཚེ༔ མེ་ལོང་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་རྡོ་རྗེ་སེམས་དཔས་ལམ་སྣ་དྲོངས༔ ཡུམ་མཆོག་སངས་རྒྱས་སྤྱན་མས་རྒྱབ་ནས་སྐྱོར༔ བར་དོ་འཇིགས་པའི་འཕྲང༴ ཡང་དག་རྫོགས་པའི་སངས༴ ང་རྒྱལ་དྲག་པོས་འཁོར་བ་འཁྱམས་པའི་ཚེ༔ མཉམ་ཉིད་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་རིན་ཆེན་འབྱུང་ལྡན་ལམ་སྣ་དྲོངས༔ ཡུམ་མཆོག་མ་མ་ཀི་ཡིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་སྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ འདོད་ཆགས་དྲག་པོས་འཁོར་བ་འཁྱམས་པའི་ཚེ༔ སོར་རྟོགས་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་སྣང་བ་མཐའ་ཡས་ལམ་སྣ་དྲོངས༔ ཡུམ་མཆོག་གོས་དཀར་མོ་ཡིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་སྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ ཕྲག་དོག་དྲག་པོས་འཁོར་བ་འཁྱམས་པའི་ཚེ༔ བྱ་གྲུབ་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་དོན་ཡོད་གྲུབ་པས་ལམ་སྣ་དྲོངས༔ ཡུམ་མཆོག་དམ་ཚིག་སྒྲོལ་མས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་སྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ བག་ཆགས་དྲག་པོས་འཁོར་བ་འཁྱམས་པའི་ ཚེ༔ ལྷན་སྐྱེས་ཡེ་ཤེས་གསལ་བའི་འོད་ལམ་ལ༔ དཔའ་བོ་རིག་འཛིན་རྣམས་ཀྱིས་ལམ་སྣ་དྲོངས༔ ཡུམ་མཆོག་མཁའ་འགྲོའི་ཚོགས་ཀྱིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་སྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ འཁྲུལ་སྣང་དྲག་པོས་འཁོར་བ་འཁྱམས་པའི་ཚེ༔ སྔངས་སྐྲག་འཇིགས་སྣང་སྤངས་བའི་འོད་ལམ་ལ༔ བཅོམ་ལྡན་ཞི་ཁྲོའི་ཚོགས་ཀྱིས་ལམ་སྣ་དྲོངས༔ དབྱིངས་ཕྱུག་མཁའ་འགྲོའི་ཚོགས་ཀྱིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་སྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ ཀྱེ་མ༔ ནམ་མཁའི་ཁམས་རྣམས་དགྲ་རུ་མི་ལྡང་ཞིང༔ སངས་རྒྱས་མཐིང་ཁའི་ཞིང་ཁམས་མཐོང་བར་ཤོག༔ ཆུ་ཡི་ཁམས་རྣམས་དགྲ་རུ་མི་ལྡང་ཞིང༔ སངས་རྒྱས་དཀར་པོའི་ཞིང་ཁམས་མཐོང་བར་ཤོག༔ ས་ཡི་ཁམས་རྣམས་དགྲ་རུ་མི་ལྡང་ཞིང༔ སངས་རྒྱས་སེར་པོའི་ཞིང་ཁམས་མཐོང་བར་ཤོག༔ མེ་ཡི་ཁམས་རྣམས་དགྲ་རུ་མི་ལྡང་ཞིང༔ སངས་རྒྱས་དམར་པོའི་ཞིང་ཁམས་མཐོང་བར་ཤོག༔ རླུང་གི་ཁམས་རྣམས་དགྲ་རུ་མི་ལྡང་ཞིང༔ སངས་རྒྱས་ལྗང་གུའི་ཞིང་ཁམས་མཐོང་བར་ཤོག༔ འཇའ་ཚོན་ཁམས་རྣམས་དགྲ་རུ་མི་ལྡང་ཞིང༔ སངས་རྒྱས་སྣ་ཚོགས་ཞིང་ཁམས་མཐོང་བར་ཤོག༔ སྒྲ་འོད་ཟེར་གསུམ་དགྲ་རུ་མི་ལྡང་ཞིང༔ ཞི་ཁྲོ་རབ་འབྱམས་ཞིང་ཁམས་མཐོང་བར་ཤོག༔ སྒྲ་རྣམས་ཐམས་ཅད་རང་སྒྲ་ཤེས་པར་ཤོག༔ འོད་རྣམས་ཐམས་ཅད་རང་འོད་ཤེས་པར་ཤོག༔ ཟེར་རྣམས་ཐམས་ཅད་རང་ཟེར་ཤེས་པར་ཤོག༔ བར་དོ་རང་ངོ་རང་གིས་ཤེས་པར་ཤོག༔ སྐུ་གསུམ་ཞིང་ཁམས་མངོན་དུ་འགྱུར་བ་ཤོག༔ བར་དོ་འཕྲང་སྒྲོལ་གྱི་སྨོན་ལམ་ཞེས་བྱ་བ་ཨོ་རྒྱན་གྱི་མཁན་པོ་པདྨ་འབྱུང་གནས་ཀྱིས་མཛད་པ་འཁོར་བ་མ་སྟོངས་ཀྱི་བར་དུ་མ་རྫོགས༔ མངྒལཾ༔ བར་དོ་འཇིགས་སྐྱོབ་སྨོན་ལམ།བར་དོ་འཇིགས་སྐྱོབ་སྨོན་ལམ་བཞུགས་སོཿ ཀྱེ་མཿ བདག་ནི་ཚེ་ཡི་འཕེན་པ་ཟད་པའི་ཚེཿ འཇིག་རྟེན་འདི་ནས་ཉེ་དུས་མི་སྟུངས་ཏེཿ རང་ཉིད་གཅིག་པུ་བར་དོ་འཁྱམས་ཙ་ནཿ རྒྱལ་བ་ཞི་ཁྲོས་ཐུགས་རྗེའི་ཤུགས་ཕྱུང་ནསཿ མ་རིག་མུན་པའི་སྨག་རུམ་སེལ་བར་ཤོགཿ དགའ་བའི་གྲོགས་དང་བྲལ་ནས་གཅིག་པུར་འཁྱམསཿ རང་སྣང་སྟོང་པའི་གཟུགས་སྙན་འཆར་དུས་དེརཿསངས་རྒྱས་རྣམས་ཀྱི་ཐུགས་རྗེའི་ཤུགས་ཕྱུང་ནསཿདངངས་སྐྲག་བར་དོའ་ིའཇིགས་པ་མི་འབྱུང་ཤོགཿ ཡེ་ཤེས་གསལ་བའི་འོད་ལྔ་འཆར་དུས་དེརཿ མི་འཇིགས་མི་སྐྲག་རང་ངོ་ཤེས་པར་ཤོགཿ ཞི་དང་ཁྲོ་བོའི་སྐུ་གཟུགས་འཆར་དུས་དེརཿ མི་འཇིགས་གདེང་ཐོབ་བར་དོ་ངོ་ཤེས་ཤོགཿ ལས་ངན་དབང་གི་སྡུག་བསྔལ་མྱོང་ཙ་ནཿ རྒྱལ་བ་ཞི་ཁྲོས་སྡུག་བསྔལ་སེལ་བར་ཤོགཿ ཆོས་ཉིད་རང་སྒྲ་འབྲུག་སྟོང་ལྡིར་ཙ་ནཿ ཐེག་ཆེན་ཆོས་ཀྱི་སྒྲ་རུ་འགྱུར་བར་ཤོགཿ སྐྱབས་མེད་ལས་ཀྱི་རྗེས་སུ་འབྲང་དུས་དེརཿ རྒྱལ་བ་ཞི་ཁྲོས་བདག་སོགས་སྐྱབས་ཏུ་གསོལཿ བག་ཆགས་ལས་ཀྱི་སྡུག་བསྔལ་མྱོང་ཙ་ནཿ འོད་གསལ་བདེ་བའི་ཏིང་འཛིན་འཆར་བར་ཤོགཿ སྲིད་པ་བར་དོར་རྫུས་ཏེ་སྐྱེས་ཙ་ནཿ ཕྱིན་ལོག་བདུད་ཀྱི་ལུང་བསྟན་མི་འབྱུང་ཤོགཿ གང་དུ་བསམ་པའི་དབང་གིས་སླེབ་ཙ་ནཿ ལས་ངན་འཁྲུལ་པའི་འཇིགས་སྐྲག་མི་འབྱུང་ཤོགཿ གཅན་ཟན་ཁྲོ་བོས་ངར་སྐད་འདོན་པའི་ཚེཿ ཡི་གེ་དྲུག་མའི་ཆོས་སྒྲ་འགྱུར་བ་ཤོགཿ ཁ་ཆར་རླུང་དང་མུན་པས་དེད་པའི་ཚེཿ ཡེ་ཤེས་གསལ་བའི་ལྷ་མིག་འཐོབ་པར་ཤོགཿ རིས་མཐུན་ནང་ཚན་བར་དོའི་སེམས་ཅན་རྣམསཿ མིག་སེར་མེད་ཅིང་མཐོ་རིས་སྐྱེ་བར་ཤོགཿཤིན་ཏུ་ཉོན་མོངས་བཀྲེས་ཤིང་སྐོམ་པའི་ཚེཿ ལྟོགས་སྐོམ་ཚ་གྲང་སྡུག་བསྔལ་མི་འབྱུང་ཤོགཿ ཕྱི་མ་ཕ་མའི་འདུ་འཕྲོད་མཐོང་ཙ་ནཿ རྒྱལ་བ་ཞི་ཁྲོ་ཡབ་ཡུམ་ཉིད་མཐོང་ཤོགཿ གར་སྐྱེས་རང་དབང་ཐོབ་ནས་གཞན་དོན་དུཿ མཚན་དཔེས་བརྒྱན་པའི་ལུས་མཆོག་ཐོབ་པར་ཤོགཿ བདག་ཉིད་སྐྱེས་པའི་ལུས་མཆོག་ཐོབ་གྱུར་ནསཿ མཐོང་ཐོས་ཐམས་ཅད་མྱུར་དུ་གྲོལ་བར་ཤོགཿ ལས་ངན་ཐམས་ཅད་རྗེས་སུ་མི་འབྲང་ཞིངཿ བསོད་ནམས་གང་ཡོད་འཕེལ་ཞིང་རྗེས་འབྲང་ཤོགཿ གང་དང་གང་དུ་སྐྱེས་པ་དེ་དང་དེརཿ ཚེ་རབས་ཡི་དམ་ལྷ་དང་མཇལ་བ་ཤོགཿ སྐྱེ་མ་ཐག་ཏུ་སྨྲ་ཞིང་འགྲོ་ཤེས་ཏེཿསྐྱེ་བ་དྲན་ཞིང་མི་བརྗེད་གཟུངས་ཐོབ་ཤོགཿ ཡོན་ཏན་ཆེ་ཆུང་འབྲིང་དང་སྣ་ཚོགས་པཿ ཐོས་བསམ་མཐོང་བ་ཙམ་གྱིས་ཤེས་གྱུར་ཅིགཿ གང་དུ་སྐྱེས་པའི་ཡུལ་དེར་བཀྲ་ཤིས་ཤོགཿ སེམས་ཅན་ཐམས་ཅད་བདེ་དང་ལྡན་གྱུར་ཅིགཿ རྒྱལ་བ་ཞི་ཁྲོ་ཁྱེད་སྐུ་ཅི་འདྲ་དངཿ འཁོར་དང་སྐུ་ཚེའ་ིཚད་དང་ཞིང་ཁམས་དངཿ ཁྱེད་ཀྱི་མཚན་མཆོག་བཟང་པོ་ཅི་འདྲ་བཿ དེ་འདྲ་ཁོ་ནར་བདག་སོགས་འགྱུར་བ་ཤོགཿ ཀུན་བཟང་ཞི་ཁྲོ་རབ་འབྱམས་ཐུགས་རྗེ་དངཿ ཆོས་ཉིད་རྣམ་པར་དག་པའི་བདེན་སྟོབས་དངཿགསང་སྔགས་རྩེ་གཅིག་བསྒྲུབ་པའི་བྱིན་བརླབས་ཀྱིསཿ སྨོན་ལམ་བཏབ་པ་དེ་བཞིན་འགྲུབ་གྱུར་ཅིགཿ བར་དོའ་ིསྨོན་ལམ་འཇིགས་སྐྱོབ་མ་ཞེས་བྱ་བ་འཁོར་བ་མ་སྟོངས་བར་དུ་མ་རྫོགས་སོཿ གྲུབ་ཐོབ་ཀརྨ་གླིང་པའི་གཏེར་མའོ |