 ཁྱབ་བདག་པདྨ་སྐལ་བཟང་གི་གསུང་འབུམ་གླེགས་བམ་བརྒྱད་པ།བླ་སྒྲུབ་རིག་འཛིན་འདུས་པའི་རྣམ་བཤད་རིག་འཛིན་བརྒྱུད་པའི་ཞལ་ལུང་།རྫོགས་ཆེན་པདྨ་སྐལ་བཟང་། མུ་ར་སྤྲུལ་སྐུ་ཡིས་ཡི་གེར་ཕབ།པདྨའི་འོད་སྣང་ཚོགས་པ།ཀན་སུའུ་མི་རིགས་དཔེ་སྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཐུགས་རྗེ་ཆེ་ཞུ།༈ སྐྱེ་རྒུའི་བདེ་སྐྱིད་ཀྱི་འབྱུང་གནས་རྒྱལ་བ་མཉམ་མེད་དོན་ཀུན་གྲུབ་པ་ཆེན་པོའི་གསང་གསུམ་ཡེ་ཤེས་ཀྱི་སྒྱུ་འཕྲུལ་ངོ་མཚར་ཆོས་སྐུའི་རིང་བསྲེལ་གྱི་གཟུགས་སུ་བལྟམས་པ་གསུང་རབ་རྒྱལ་བའི་བཀའ་འགྱུར་རིན་པོ་ཆེ་དང་། ཐུབ་པའི་དགོངས་པ་རང་སྟོབས་ཀྱི་བཀྲལ་ནུས་པའི་འཕགས་ཡུལ་པཎ་གྲུབ་རྣམས་ཀྱི་མཛད་པའི་བསྟན་འགྱུར་རིན་པོ་ཆེ་སྟེ་མདོ་སྔགས་གཉིས་ལྡན་གྱི་ཡོངས་རྫོགས་བསྟན་པ་རྒྱ་མཚོ་འདི་ཉིད། དེང་གི་ཆར་གངས་རིའི་ལྗོངས་ཀྱི་ཡེ་གེ་ཁོ་ནའི་གཟུགས་སུ་བཞུགས་པ་ནི་སྤྲུལ་པའི་མཁན་སློབ་ཆོས་གསུམ་གྱི་ཐུགས་བསྐྱེད་ཉག་གཅིག་ལས་བྱུང་བ་དང་། དེ་དག་མི་ནུབ་བརྒྱུད་འཛིན་ཡུན་གནས་ཀྱི་ཆེད་དུ་གངས་ལྗོངས་ཆོས་བརྒྱུད་ཁག་ལས་བྱོན་པའི་རིས་སུ་མ་ཆད་པའི་སྐྱེས་ཆེན་རྣམས་ཀྱིས་བཀའ་བསྟན་རིན་པོ་ཆེའི་དགོངས་སྙིང་ཅན་གྱི་གསང་རབ་གླེགས་བམ་སྟོང་ཕྲག་མང་པོ་མཛད་ཅིང་། དཀའ་སྤྱད་ཐུགས་བརྩོན་སྣ་ཚོགས་གྱིས་མ་ཕྱི་གསར་བསྐྲུན་དང་བསྐྱར་བསྐྲུན་སོགས་ཀྱིས་འཇིག་རྟེན་གྱི་ཁམས་སུ་བཞུགས་པ་མཛད་མུས་བཞིན། དེང་གི་ཆར་གློག་རྡུལ་འཕྲུལ་ཆ་དང་དྲྭ་རྒྱའི་དུས་རབས་ཀྱི་འགྲོས་དང་བསྟུན་ནས་རྒྱལ་སྤྱིའི་རིག་གཞུང་སྤྱི་མཚུངས་ལྟར། རྒྱལ་བའི་གསུང་རབ་རིན་པོ་ཆེ་གཙོ་བོར་གྱུར་པའི་འཕགས་བོད་མཁས་པའི་གཞུང་ལུགས་རྣམས་དྲྭ་ཐོག་ནས་བཤེར་འཚོར་དང་འདྲ་བཤུས་སྒྲིག་གཟོ་སོགས་སྟབས་བདེའི་ལམ་ནས་བཀོལ་སྤྱོད་ཐུབ་པའི་གཞི་རྒྱ་ཆེ་བའི་འཆར་འགོད་དངོས་སུ་ལས་བཞིན་པར། མཆོག་སྤྲུལ་མུ་ར་རིན་པོ་ཆེའི་གཙོས་པདྨའི་འོད་སྣང་ཚོགས་པ་ནས་༧སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་གི་གསུང་འབུམ་མཚན་བཟང་སོ་གཉིས་ཀྱི་གྲངས་ལྡན་ཅན་འདིར་གནང་འབྱོར་བྱུང་བ་ལགས་ན། ཁོང་རྣམ་པའི་རྨད་དུ་བྱུང་བའི་མཛད་རྒྱས་ལ་སྙིང་ནས་ཐུགས་རྗེ་དང་བཀའ་དྲིན་བླ་ལྷག་ཏུ་ཆེ་ཞུ་བ་དང་ཆབ་གཅིག་སླད་ནས་ཀྱང་གསུང་རབ་རིན་པོ་ཆེ་ཅི་རིགས་དཔེ་སྐྲུན་གནང་ན་འདི་གར་འདྲ་བཤུས་གནང་སྩོལ་ཡོང་བར་ཅི་ནས་ཀྱང་བཀའ་དྲིན་མི་ཆུང་བ་ཞུ། ཞེས་དྲྭ་རྒྱའི་དཔེ་མཛོད་འགན་འཛིན་པ་རྫོགས་ཆེན་བསྟན་འཛིན་རྣམ་དག་ནས་ཕུལ།། བླ་སྒྲུབ་རིག་འཛིན་འདུས་པའི་རྣམ་བཤད་རིག་འཛིན་བརྒྱུད་པའི་ཞལ་ལུང་།ཉིན་དང་པོའི་ཆོས་ཁྲིད།བླ་སྒྲུབ་རིག་འཛིན་འདུས་པའི་རྣམ་བཤད་རིག་འཛིན་བརྒྱུད་པའི་ཞལ་ལུང་ཞེས་བྱ་བ་བཞུགས་སོ། ། ནམ་མཁའ་དང་མཉམ་པའི་སེམས་ཅན་ཐམས་ཅད་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཟུང་འཇུག་སྐུ་བཞི་ཡེ་ཤེས་ལྔ་ཡི་བདག་ཉིད། ཁྱབ་བདག་དཔལ་ཀུན་ཏུ་བཟང་པོའི་གོ་འཕང་རིན་པོ་ཆེར་འགོད་པར་བྱ། དེའི་ཆེད་དུ་བདག་གིས་དམ་པའི་ཆོས་ཟབ་མོ་ཉན་ཅིང་དེའི་དོན་ཚུལ་བཞིན་དུ་བསྒྲུབ་པར་བྱ་སྙམ་པའི་ཀུན་སློང་དང་ཀུན་སྤྱོད་རྣམ་པར་དག་པ་མདོ་སྔགས་སྤྱི་དང་མཐུན་པ་དང་། ཁྱད་པར་དུ་གསང་སྔགས་དག་སྣང་གི་ལམ་དང་བསྟུན་ཏེ། སྣོད་བཅུད་སྐུ་དང་ཞིང་ཁམས། སྣང་སྲིད་དག་པ་རབ་འབྱམས་སུ་གསལ་བཏབ་ནས་གསན་དགོས། འུ་ཅག་གིས་ཁར་སང་ནས་དབུ་བཙུགས་པའི་ད་ལོའི་གནམ་ལོ་གསར་པ་ས་མོ་གླང་གི་ལོ་འདིའི་ཆོས་སྒོ་དང་པོ་དབང་གིས་ཕྱེས་ནས། རྫོགས་པ་ཆེན་པོ་ཀློང་ཆེན་སྙིང་ཐིག་གི་ཆོས་སྡེའི་ནང་ཚན་གྱི་རྩ་བར་གྱུར་པ། རིག་འཛིན་འདུས་པའི་དབང་སྟེ། ལྷ་དབང་པདྨ་རཱ་གའི་ཕྲེང་བ་དང་བཅས་པའི་བཀའ་དབང་དེ་ཉིད། དམ་པ་གོང་མའི་ཕྱག་བཞེས་ཇི་ལྟ་བ་བཞིན་ཆ་ཚང་བར་ཕུལ་གྲུབ་ནས། དེ་ཡང་སྨིན་པར་བྱེད་པ་དབང་གིས་རྒྱུད་སྨིན་པར་བྱས་པའི་རྗེས་སུ། གང་ཞིག་གསན་པར་བྱ་བ་གྲོལ་བར་བྱེད་པའི་གདམས་ཁྲིད་དང་འབྲེལ་ནས། བསྐྱེད་རྫོགས་རིམ་གཉིས་ཀྱི་ཉམས་ལེན་གནད་དུ་བསྣུན་པ་བབས་ཐོབ་ཡིན་ཞིང་། ཟུང་འཇུག་སྐུ་བཞི་ཡེ་ཤེས་ལྔ་ལྡན་གྱི་གོ་འཕང་འཐོབ་པར་བྱེད་པ་ནི་མཐར་ཐུག་གི་དོན་དུ་གཉེར་བྱ་དངོས་ཡིན་པས། དེས་ན་རང་རེ་སྤྱིར་སྔགས་ལ་མོས་པའི་རྟེན་ཅན། ཁྱད་པར་དུ་ཐེག་རྩེ་རྫོགས་ཆེན་གྱི་ལམ་ལ་ཞུགས། དེ་ལས་ཀྱང་ཀློང་ཆེན་སྙིང་གི་ཐིག་ལེའི་སྨིན་གྲོལ་རིམ་གཉིས་ཀྱི་ལམ་ལ་ཞུགས་པ་ཡིན་ན། དེ་ཡང་རྩ་གསུམ་གཅིག་འདུས་བྱིན་རླབས་ཀྱི་རྩ་བ་ནང་སྒྲུབ་རིག་འཛིན་འདུས་པ་འདི་རྩ་བའི་ནང་གི་རྩ་བ་རེད། ལུས་རྟེན་འདིར་རིག་འཛིན་རྣམ་པ་བཞིའི་སྒོ་ནས་ས་ལམ་ཉི་ཟླའི་བགྲོད་པ་ལྟ་བུའི་མྱུར་ལམ་ལ་བསྟེན་ནས། སྐུ་ལྔ་ལྷུན་གྲུབ་རིན་པོ་ཆེའི་སྦུབས་སུ་འཚང་རྒྱ་བའི་དགོས་པ་ཁྱད་པར་ཅན་གྱི་ལམ་སྟེ། སྐྱབས་གནས་ཀུན་འདུས་ཀྱི་ངོ་བོ། བྱིན་རླབས་ཐམས་ཅད་ཀྱི་རྩ་བ། ནང་སྒྲུབ་རིག་འཛིན་བླ་མའི་སྒྲུབ་པའམ་རིག་འཛིན་འདུས་པའི་ཆོ་ག་འདི་ལ་བསྟེན་ནས། བསྙེན་སྒྲུབ་རྣམ་པ་བཞིས་ཁོག་ཕུབ་པའི་ཚོགས་སྒྲུབ་ཀྱི་ཚུལ་གྱིས། མཆེད་ལྕམ་དམ་ཚིག་དང་ལྡན་པ། ལས་དང་སྨོན་ལམ་གཅིག་ཏུ་མཐུན་ཞིང་མཉམ་དུ་འཚོགས་པ་རྣམས། ཞག་བདུན་གསུམ་ཉེར་གཅིག་གི་དུས་ཡུན་ལ་ལས་རུང་ཙམ་གྱི་གཞི་བསྙེན་ཞིག་འཇོག་རྒྱུའི་འཆར་གཞི་བྱས་པ་རེད། འོན་ཀྱང་དེའི་སྔོན་དུ་ལས་དང་པོ་པ་སོགས་ལ་གཙོ་བོར་དམིགས་ཏེ། ངས་བསྐྱེད་རྫོགས་ཀྱི་སྐོར་ནས་གསལ་འདེབས་ཀྱི་ཚུལ་དུ་སྐྱོར་སྦྱང་ཞིག་བྱེད་སྙམ་པ་ཡིན། སྤྱིར་རང་རེ་འདིར་བཞུགས་ཚང་མ་ལ་མཚོན་ན། ཆོས་དང་ལྡན་པའི་ལུས་བླངས། དམ་པའི་ཆོས་ཀྱི་སྒོར་ཞུགས། དམ་པའི་ཆོས་ཚུལ་བཞིན་དུ་སྒྲུབ་པའི་ཆོས་པའི་རྟགས་དང་མིང་འཆང་བ་འབའ་ཞིག་ཡིན་པས་ལྷག་ཏུ་ཞུ་མ་དགོས་མོད། དེ་ཡང་བཤད་པ་དེ་ལོ་རྒྱུས་དང་འབྲེལ་ནས་གཏམ་གྱིས་བཤད་པ་ཡིན་ཚེ། གཏམ་འགོ་ནས་བཤད་དེ་མཇུག་བསྐྱང་དགོས་པ་ཡིན་པས། ལར་རང་ཅག་རྣམས་ཀྱིས་དོན་གཉེར་བྱེད་བཞིན་པའི་དམ་པའི་ཆོས་ཞེས་པ་དེ་ཅི་འདྲ་ཞིག་ཡིན་པའི་དཔྱད་པ་ལ་ཞུགས་པའི་དབང་དུ་བཏང་ན། དེ་ཡང་ལྷའི་བུ་ནོར་བུ་འཛིན་གྱིས་ཞུས་པའི་མདོ་ལས། ཆོས་རྣམས་ཐམས་ཅད་བཀའ་དང་བསྟན་བཅོས་ཏེ། །ལེགས་པར་གསུང་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་འདི། །འཇིག་རྟེན་ཁམས་འདིར་ཡུན་རིང་གནས་པར་འགྱུར། ཞེས་གསུངས། སྤྱིར་ཆོས་ཞེས་པ་འདི་སྒྲ་ཙམ་འཇུག་ཡུལ་མང་ཡང་། དྷརྨ་ཞེས་པའི་སྒྲ་ལས་དྲངས་བའི་ཚེ་དམ་པའི་ཆོས་ཞེས་པ་འདི། ངན་པའི་ལམ་ལས་བཅོས་ནས་ལེགས་པའི་ལམ་དུ་འཆོས་པར་བྱེད་པའི་ཆོས་ཏེ། བཅོས་འཆོས་ཆོས་རྣམས་བྱ་བྱེད་འདས་འོངས་ཀྱི་ཁྱད་པར་ཙམ་ལས་དོན་གཅིག་ཡིན་ཞིང་། ཐར་པ་དམ་པའི་གོ་འཕང་ལ་འགོད་པར་བྱེད་པའི་ལམ་གྱི་མཆོག་དང་། ཞི་བ། བསིལ་བ། སྡུག་བསྔལ་མྱ་ངན་གྱི་ཚ་གདུང་དང་བྲལ་བའི་ཐུགས་འགོག་པ་དམ་པའི་བདག་ཉིད་ཅན་ཡིན་ཕྱིར་ལྷ་ཆོས་ཞེས་སུ་གསུངས་པ་རེད། དེ་ལྟ་བུའི་ཆོས་སམ་འཆོས་པའི་ཁྱད་ཆོས་ཅན་ཏེ། འཆོས་སྐྱོབ་ཀྱི་ཡོན་ཏན་དང་ལྡན་པ་བསྟན་བཅོས་ཀྱི་མཚན་ཉིད་ཡིན་པ་མ་ཟད། གང་གི་དགོངས་པ་འགྲེལ་བྱའི་རྒྱལ་བའི་བཀའ་ལ་དེ་བས་ཀྱང་འཆོས་སྐྱོབ་ཀྱི་ཡོན་ཏན་དང་ལྡན་པ་སྨྲོས་མ་དགོས་པ་ཞིག་རེད། དེས་ན་ཆོས་སྒྲུབ་པའི་ཐོག་མར་གང་བསྒྲུབ་བྱའི་གཞི་དང་གང་ལ་བརྟེན་ནས་སྒྲུབ་པར་བྱེད་པའི་བཀའ་དང་བསྟན་བཅོས་ཞེས་པ་དེ་གང་ནས་ཇི་ལྟར་ཡོང་བ་ཤེས་པར་བྱ་དགོས་སྙམ། སྤྱིར་འདི་ལ་བཤད་ཚུལ་མང་ཡང་། དེ་ཡང་མདོ་སྔགས་སྤྱི་དང་མཐུན་པའི་བཤད་ཚུལ་ནི། དེ་ཡང་ཐོག་མའི་སངས་རྒྱས་ཀུན་ཏུ་བཟང་པོ་དེ་ཉིད་རང་རིག་གདོད་མའི་དབྱིངས་སུ་སངས་རྒྱས་ཐམས་ཅད་ཀྱི་བྱེད་པོར་སངས་རྒྱས་ནས། སྤྲུལ་པའི་རྣམ་རོལ་བསམ་གྱིས་མི་ཁྱབ་པས་སེམས་ཅན་གྱི་ཁམས་མཐའ་ཡས་པའི་དོན་མཛད་པ་ལས། འུ་ཅག་ཡུལ་དུས་འདིའི་སེམས་ཅན་འདུལ་བའི་ངོ་སྐལ་དུ་སྣང་བ་ཅི་འདྲ་ཞིག་རེད་ཅེ་ན། བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་འདི་ཉིད་ཡིན་ཞིང་། བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་འདི་ཉིད་ཀྱིས་དང་པོ་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་བ་གྲངས་མེད་མང་པོར་ཚོགས་བསགས་དཀའ་བ་སྤྱད། མཐར་མངོན་པར་རྫོགས་པར་སངས་རྒྱས་ནས། སྟོང་གསུམ་མི་མཇེད་འཇིག་རྟེན་གྱི་ཞིང་འདི་ནས་མཆོག་གི་སྤྲུལ་པའི་སྐུའི་མཛད་པ་བཅུ་གཉིས་ཀྱིས་ཐུན་མོང་དང་ཁྱད་པར་གྱི་ཆོས་ཀྱི་འཁོར་ལོ་བསྐོར་བར་མཛད། དེ་ཡང་བདེན་པ་གཉིས་ཀྱི་མཚན་ཉིད་ཅན་གྱི་ཆོས་ཀྱི་བརྗོད་བྱ་མཐར་ཐུག་དེ་ཉིད། རྣམ་པར་མི་རྟོག་པའི་ཡེ་ཤེས་ཆོས་ཐམས་ཅད་ཀྱི་ཆོས་ཉིད་དེ་བཞིན་ཉིད་ཡིན་ཞིང་། དེ་ཉིད་སྟོན་པས་གསར་དུ་བརྩམས་པའམ་བཟོས་པ་ཞིག་རེད་དམ་ཞེ་ན་མ་ཡིན་ཏེ། རང་གནས་ཀྱི་ཡེ་ཤེས་དྲི་མའི་སྦུབས་སུ་ཡོད་པ་ཇི་ལྟར་བསལ་བའི་ཐབས་ཙམ་སྟོན་པས་གསུངས་པ་ཞིག་རེད། དེས་ན་སྟོན་པས་གདུལ་བྱ་མི་འདྲ་བ་འདུལ་བྱེད་དུ་དམ་པའི་ཆོས་ཀྱི་འཁོར་ལོ་མི་འདྲ་བ་ཇི་ལྟར་བསྐོར་བར་མཛད་སྙམ་ན། ཤཱཀྱའི་རིགས་སུ་འཁྲུངས་པའི་སངས་རྒྱས་ཆགས་བྲལ། རབ་ཏུ་བྱུང་བའི་རྣམ་པ་ཅན་གྱི་སྐུ་དངོས་དེས། ཡུལ་ཝཱ་རཱ་ཎ་སཱི་དྲང་སྲོང་ལྷུང་བ་རི་དྭགས་ཀྱི་ནགས་སུ་བཀའ་དང་པོ་བདེན་བཞིའི་ཆོས་འཁོར་དང། ཡུལ་རྒྱལ་པོའི་ཁབ་ནས་བཀའ་བར་བ་མཚན་ཉིད་མེད་པའི་ཆོས་འཁོར། ཡུལ་པདྨ་ཅན་ལ་སོགས་པ་ནས་བཀའ་ཐ་མ་ངེས་དོན་གྱི་ཆོས་འཁོར་བསྐོར། ད་དུང་ཡུལ་མཱ་གྷ་དྷ་ནས་ལྷ་དང་མི་ལ་དགེ་བཅུའི་ཆོས་འཁོར་དང་། རང་རྒྱལ་ལ་རྟེན་འབྲེལ་བཅུ་གཉིས་ཀྱི་ཆོས་འཁོར་སོགས་ཐུན་མོང་གི་ངོར་དེ་ལྟར་ཆོས་འཁོར་བསྐོར། དེ་ལས་ཐུན་མིན་ཁྱད་པར་བ་དེ་ཐེག་པ་ཆེན་པོ་ཡིན་ཞིང་། ཐེག་ཆེན་མདོ་དང་སྔགས་ཀྱི་རྒྱུ་དང་འབྲས་བུའི་ཆོས་འཁོར་ལ། དབུ་མ་དང་སེམས་ཙམ་གྱི་དགོངས་པའི་རྣམ་གཞག་བསྟན་པའི་རྒྱུ་ཕ་རོལ་ཏུ་ཕྱིན་པའི་ཐེག་པ་དང་། སྔགས་ཕྱི་ནང་གི་གཞུང་ལུགས་སུ་གཏོགས་པའི་འབྲས་བུ་གསང་སྔགས་ཀྱི་ཐེག་པ་སྟེ་གཉིས་ལས། ད་རེས་ཀྱི་སྐབས་དང་འབྲེལ་བའི་བཤད་བྱ་ནི་གསང་སྔགས་ཀྱི་རྒྱུད་དོན་ཡིན་པས་རྒྱུད་དང་འབྲེལ་ནས་བཤད་དགོས། སྟོན་པས་གསུངས་པའི་གསང་སྔགས་ཀྱི་རྒྱུད་ལ། བྱ་རྒྱུད། སྤྱོད་རྒྱུད། རྣལ་འབྱོར་གྱི་རྒྱུད་དེ་གསུམ་དུ་དབྱེ་རུ་ཡོད་ལ། དེ་ལས་བྱ་རྒྱུད་ནི་ཐུན་མོང་གི་གནས་ནེ་རཉྫ་ན་དང་ཁྱད་པར་གྱི་གནས་ལྕང་ལོ་ཅན་ལ་སོགས་པ་ནས། ལྷའི་དབང་པོ་སོགས་གསུང་སའི་གང་ཟག་ལ། གསུང་པ་པོ་སྟོན་པ་རིགས་གསུམ་མགོན་པོ་སོགས་སུ་སྤྲུལ་ནས་གསུངས་ཤིང་། དེའི་སྐབས་སུ་གསུངས་པའི་བྱ་རྒྱུད་ཀྱི་རྒྱུད་སྡེ་རྣམས་སྤྱི་རྒྱུད་དང་བྱེ་བྲག་གི་རྒྱུད་ཀྱི་དབྱེ་བ་ཅན་སྟེ། རིག་སྔགས་ཐམས་ཅད་ཀྱི་ཁོག་ཕུབ་པ་དཔུང་བཟང་གི་རྒྱུད་ལ་སོགས་པ་སྤྱི་རྒྱུད་དྲུག་དང་། འཇམ་དཔལ་དྲི་མ་མེད་པ་ལ་སོགས་པ་བྱེ་བྲག་གི་རྒྱུད་སྡེ་མང་པོ་ཡོད་པ་རྣམས་རེད། དེ་ཡང་སྤྱོད་རྒྱུད་ནི་ལྟ་སྤྱོད་གཉིས་ཀྱི་ཕྱོགས་ནས་བྱ་རྒྱུད་དང་རྣལ་འབྱོར་གྱི་རྒྱུད་དང་ཁོག་འདྲ་ཞིང་། རྒྱུད་སྡེ་ལ་རྣམ་སྣང་མངོན་བྱང་སོགས་ཅི་རིགས་པ་གསུངས་པ་ཞིག་རེད། གསུམ་པ་རྣལ་འབྱོར་གྱི་རྒྱུད་ལ། རྣལ་འབྱོར་རྒྱུད་དང་། རྣལ་འབྱོར་ཆེན་པོའི་རྒྱུད། རྣལ་འབྱོར་མཆོག་གི་རྒྱུད་དེ་གསུམ་དུ་དབྱེ་རུ་ཡོད་པའི་ནང་ནས། རྣལ་འབྱོར་རྒྱུད་ཀྱི་ཐུན་མོང་གི་གསུང་སའི་གནས་སུམ་ཅུ་རྩ་གསུམ་དང་། ཁྱད་པར་གྱི་གནས་འོག་མིན་ནས། གསུང་མཁན་གྱི་སྟོན་པ་ཀུན་རིག་རྣམ་པར་སྣང་མཛད་ཀྱི་ཚུལ་གྱིས། ཞུ་བ་པོ་གསང་བའི་བདག་པོ་སོགས་ལ་གསུངས། རྣལ་འབྱོར་གྱི་རྒྱུད་དེ་ཉིད་ལ་ཡོ་ག་གཞུང་ཆེན་པོ་བམ་པོ་སུམ་བརྒྱ་པ་དང་ལུང་ཆེན་པོའི་རྒྱུད་བཞི་ཡོད་པ་རེད། ལུང་ཆེན་པོའི་རྒྱུད་བཞི་ནི། དེ་ཉིད་བསྡུས་པ། རྡོ་རྗེ་རྩེ་མོ། དཔལ་མཆོག་དང་པོ། རྟོགས་པ་བསྡུས་པའི་རྒྱུད་བཅས་བཞི་རེད། དེ་དག་ལ་སོགས་པ་ཡོ་གའི་རྒྱུད་སྡེ་ཐམས་ཅད་སུའི་དོན་དུ་གསུངས་པ་རེད་ཅེ་ན། ལྷ་དང་མིའི་བྱང་ཆུབ་སེམས་དཔའ་མང་པོའི་དོན་དུ་གསུངས་པ་རེད། དེ་ཉིད་ཀྲི་ཡ། ཨུ་པ། ཡོ་ག་གསུམ་གྱི་ནང་ནས་ཡོ་ག་རེད། རྣལ་འབྱོར་ཆེན་པོ་དེ་ཉིད་མ་ཧཱ་ཡོ་གའི་རྒྱུད་རེད། མ་ཧཱ་ཞེས་པ་ཆེན་པོ་དང་། ཡོ་ག་ནི་རྣལ་འབྱོར་ཞེས་པའི་དོན་ཡིན་ཞིང་། མ་ཧཱ་ཡོ་གའི་རྒྱུད་སྡེ་གསུང་མཁན་གྱི་སྟོན་པ་གང་རེད་ཅེ་ན། སྟོན་པ་ཉིད་དཔལ་རྣམ་པར་སྣང་མཛད་སོགས་སུ་སྤྲུལ་ནས། ཞུ་བ་པོ་རྡོ་རྗེ་འཛིན་པ་སོགས་ལ་གསུངས། འདི་ལ་གླང་པོ་རབ་འབོག་ལ་སོགས་པ་ཏན་ཏྲ་ཆེན་པོ་སྡེ་བཅོ་བརྒྱད་ཀྱིས་མཚོན་པའི་མ་ཧཱ་ཡོ་གའི་རྒྱུད་སྡེ་མང་པོ་ཡོད་པ་རེད། དེ་ཐམས་ཅད་ཀྱང་ཚུར་ལ་བསྡུས་ན་ཐབས་དང་ཤེས་རབ་ཀྱི་རྒྱུད་གཉིས་ཀྱི་ཁོངས་སུ་འདུས། གཞན་ཡང་རྣལ་འབྱོར་མཆོག་གི་རྒྱུད་ལ་རྫོགས་པ་ཨ་ནུ་ཡོ་ག་དང་རྫོགས་ཆེན་ཨ་ཏི་ཡོ་ག་གཉིས་ཡོད་ཅིང་། དེ་ལས་རྫོགས་པ་ཨ་ནུ་ཡོ་ག་ནི་སྟོན་པ་ཉིད་དཔལ་ཀུན་ཏུ་བཟང་པོའམ་རྡོ་རྗེ་སེམས་དཔའ་རུ་སྤྲུལ་ཏེ། གསུང་སའི་གནས་རྒྱལ་མོ་པུ་རིའི་ཚལ་དུ། ཞུ་བ་པོ་ལངྐའི་བདག་པོ་ལ་མདོ་བཞི་དེམས་དང་བཅས་པ་གསུངས་པ་རེད། མདོ་བཞི་ནི། ཀུན་འདུས་རིག་པའི་མདོ། སེམས་ཀློང་ཆེན་མོའི་མདོ། ཡེ་ཤེས་རྔམ་པ་གློག་གི་འཁོར་ལོའི་མདོ། དུར་ཁྲོད་ཁུ་བྱུག་རོལ་པའི་མདོ་བཅས་རེད། མདོ་བཞི་དེམས་དང་བཅས་པ་ཞེས་གསུངས་པས་དེམས་ཞེས་པ་གང་རེད་ཅེ་ན། མདོ་དགོངས་པ་འདུས་པ་དེ་ཉིད་བཀའ་ཐམས་ཅད་ཀྱི་དེམས་སུ་བཞག་པས་ན་དེ་ལྟར་ཡིན་པ་རེད། རྫོགས་ཆེན་ཨ་ཏི་ཡོ་ག་ནི་གནས་རྒྱལ་མོ་པུ་རིའི་ཚལ་དང་ཟོ་མ་པུ་རིའི་ཚལ་ནས། སྟོན་པ་དཔལ་ཀུན་ཏུ་བཟང་པོ་ཀུན་བྱེད་རྒྱལ་པོར་སྤྲུལ་ནས། ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལ་སོགས་པ་རྫོགས་ཆེན་སེམས་ཕྱོགས་ཀྱི་མཆོག་གི་སྐོར་གསུངས། དེ་ལྟར་སྟོན་པས་ཆོས་འདྲ་དང་མི་འདྲ། ཐེག་པ་སོ་སོའི་ཆོས་གསུངས་པ་དེ་ཉིད། འཛམ་གླིང་མིའི་སྣང་ངོ་རུ་རྒྱུ་མཚན་ཉིད་ཀྱི་ཐེག་པ་སྟོན་པ་ཤཱཀྱའི་རྒྱལ་པོ་སྐུ་དངོས་ཀྱིས་ཡུལ་རྒྱ་གར་འཕགས་པའི་ཡུལ་སོགས་ནས་གསུངས་པ་དང་། སྔགས་ཕྱི་རྒྱུད་སྡེ་གསུམ་ནི་ཀུན་རིག་རྣམ་པར་སྣང་མཛད་དུ་སྤྲུལ་ནས་ལྷ་རྣམས་དང་རིགས་གསུམ་མགོན་པོ་སོགས་ལ་གསུངས་ཤིང་། ནང་རྒྱུད་སྡེ་གསུམ་ནི་དཔལ་ཀུན་ཏུ་བཟང་པོ་རུ་སྤྲུལ་ནས་རིགས་ལྔ་སྲས་དང་བཅས་པ་ལ་གསུངས། དེ་དག་གདུལ་བྱའི་བློ་རིམ་དང་མཐུན་པར་སྐུའི་རྣམ་པ་འདྲ་དང་མི་འདྲ་ཡིས་འཁོར་གདུལ་བྱ་འདྲ་དང་མི་འདྲ་ལ་དེ་ལྟར་གསུངས་པ་རེད། གསུང་སའི་གནས་ཀྱང་གོང་དུ་ཞུས་པ་ལྟར་ཐུན་མོང་གི་གནས་དྷཱ་ན་ཀོ་ཤ་དང་། བསིལ་བའི་ཚལ། རི་བོ་མེ་རི་འབར་བ་སོགས་དང་། ཁྱད་པར་གྱི་གནས་འོག་མིན་དང་། ཡུམ་གྱི་མཁའ། ཆོས་ཀྱི་དབྱིངས་ལ་སོགས་པ་ནས། ཐུན་མོང་དང་ཁྱད་པར་གྱི་སྟོན་པ་རུ་སྣང་བའི་སྒོ་ནས་འཁོར་གདུལ་བྱ་ཕལ་བ་དང་ཁྱད་པར་ཅན་ལ་རྒྱུ་འབྲས་ཀྱི་ཆོས་ཀྱི་འཁོར་ལོ་བསྐོར་བ་དེ་རྣམས་དོན་དངོས་ཀྱི་སྟེང་ནས་སྟོན་པ་གཅིག་གི་ཡེ་ཤེས་ཀྱི་སྐུ་ཉིད། གདུལ་བྱའི་བསམ་པ་སྣ་ཚོགས་དང་མཐུན་པར་སྤྲུལ་པའི་རོལ་པ་སྣ་ཚོགས་ཀྱིས་ཆོས་སྣ་ཚོགས་བསྟན། དེ་ལྟར་སྟོན་པས་ཆོས་བསྟན་པ་དེ་དག་རྒྱས་པ་ལྟར་ན་ཆོས་སྒོ་བརྒྱད་ཁྲི་བཞི་སྟོང་། འབྲིང་པོ་ལྟར་ན་གསུང་རབ་ཡན་ལག་བཅུ་གཉིས། བསྡུས་པ་ལྟར་ན་ཐེག་རིམ་དགུ་རུ་འདུས་པ་དང་། དོན་རྩ་བའི་སྟེང་ནས་བཤད་ན་རྒྱུ་དང་འབྲས་བུའི་ཐེག་པ་གཉིས་སུ་འདུས་པ་ཞིག་རེད། དེ་ཡང་རང་རེ་རྣམས་ཀྱིས་ཐོག་མ་ནས། ཆོས་རྣམས་ཐམས་ཅད་བཀའ་དང་བསྟན་བཅོས་ཏེ། ཞེས་པ་ནས་འགོ་བཟུང་སྟེ་བཤད་པར་བྱས་ན། བཀའ་དེ་ལ་གསུངས་ཚུལ་གྱི་སྒོ་ནས་དབྱེ་ན་ཞལ་ནས་གསུངས་པའི་བཀའ། བྱིན་གྱིས་བརླབས་པའི་བཀའ། རྗེས་སུ་གནང་བའི་བཀའ་བཅས་ཀྱི་དབྱེ་བ་ཡོད་ཅིང་། བཀའ་དེ་དག་ཐམས་ཅད་སྐབས་དེར་འཁོར་གྱི་ནང་དུ་ཡོད་པའི་སྡུད་པ་པོ་དག་གིས་མི་བརྗེད་པའི་གཟུངས་ཀྱིས་བཟུང་ནས་ཡི་གེར་བཀོད་དེ་རིམ་གྱིས་འཇིག་རྟེན་གྱི་ཁམས་སུ་དར་ཞིང་རྒྱས་པར་བྱས་པ་རེད། དེ་ཡང་གསལ་པོར་བྱས་ཏེ་བཤད་ན། རྒྱུ་ཕ་རོལ་ཏུ་ཕྱིན་པའི་ཐེག་པ་ཐུན་མོང་པ་རྣམས་གནས་བརྟན་འོད་སྲུང་ཆེན་པོ་ལ་སོགས་པས་བཀའ་བསྡུ་མཛད་ནས་མི་ཡུལ་དུ་དར། ཐེག་པ་ཆེན་པོ་འགའ་ཞིག་འཕགས་པ་འཇམ་དཔལ་སོགས་ཀྱིས་བཀའ་བསྡུ་མཛད་ནས་བྱང་སེམས་ཕལ་མོ་ཆེ་བརྒྱུད་དེ་མིའི་འཇིག་རྟེན་དུ་དར། འབྲས་བུ་གསང་སྔགས་ཀྱི་ཐེག་པ་རྣམས་མི་ཡུལ་གྱི་གདུལ་བྱ་ཐུན་མོང་པའི་ངོར་སྦས་ནས་ཁྱབ་བརྡལ་དུ་མ་གསུངས་པ་རེད། དེའི་རྐྱེན་གྱིས་གདུལ་བྱ་ཕལ་པ་ཚོར་གསང་སྔགས་སངས་རྒྱས་ཀྱི་བཀའ་ཡིན་མིན་གྱི་ཐེ་ཚོམ་འབྱུང་བར་དགོངས་ནས། དེ་ལྟ་བུའི་ཐེ་ཚོམ་བཟློག་པའི་ཆེད་དུ་སངས་རྒྱས་བཅོམ་ལྡན་འདས་རང་ཉིད་ཀྱིས་མ་འོངས་པར་གསང་སྔགས་ཀྱི་ཆོས་འཇིག་རྟེན་མི་ཡུལ་དུ་འབྱུང་རྒྱུ་ཡོད་པའི་ལུང་བསྟན་གནང་བ་རེད། དེ་ཡང་མདོ་སྡེ་གདམས་ངག་འབོག་པའི་རྒྱལ་པོ་ལས། ང་ནི་མྱ་ངན་འདས་འོག་ནས། །ལོ་ནི་བརྒྱད་དང་བཅུ་གཉིས་ན། །བསྟན་པའི་སྙིང་པོ་དམ་པ་ཞིག །རྒྱལ་པོ་ཛཱ་ཡི་ཁང་ཐོག་ཏུ། །ཐུགས་རྗེ་མཐུན་པའི་བྱིན་རླབས་ཀྱིས། །ལག་ན་རྡོ་རྗེས་སྟོན་པར་འགྱུར། སོགས་གསུངས་པ་ལྟར། སྟོན་པའི་ཐུགས་རྗེས་རིགས་ལྔའི་སངས་རྒྱས་དང་རྒྱལ་ཚབ་རྣམས་ལ་བསྐུལ་མ་མཛད་ནས་འབྲས་བུའི་ཆོས་འདི་ཉིད་གསེར་གྱི་གླེགས་བམ་ལ་བཻཌཱུརྱའི་ཡི་གེར་བྲིས་ནས་ཐུགས་རྗེ་མཐུན་པའི་བྱིན་རླབས་ཀྱིས་རྒྱལ་པོ་ཛཱའི་ཁང་སྟེང་དུ་ཇི་ལྟར་ལུང་བསྟན་པ་བཞིན་བབས་པ་རེད། རྒྱལ་པོ་ཛཱ་དང་སློབ་དཔོན་ཀུ་ཀུ་ར་ཛས་དེའི་དོན་རྣམས་རྡོ་རྗེ་སེམས་དཔའི་བྱིན་རླབས་ཀྱིས་རྟོགས་ནས་འཇིག་རྟེན་མི་ཡུལ་འདིར་གསང་སྔགས་ཀྱི་བསྟན་པ་འདི་དར་བར་བྱས། གཞན་ཡང་གསང་སྔགས་ཀྱི་ཆོས་འདི་ཉིད་འཇམ་དབྱངས་ཀྱིས་ལྷ་གནས་དང་། སྤྱན་རས་གཟིགས་ཀྱིས་ཀླུ་ཡུལ། ཕྱག་ན་རྡོ་རྗེས་གནོད་སྦྱིན་གྱི་གནས་སུ་ཁྱབ་ཅིང་སྣང་བར་མཛད་པ་རེད། རྒྱལ་པོ་ཛཱའི་ཁང་སྟེང་དུ་བབས་པ་དག་གཙོ་བོ་མ་ཧཱ་ཡོ་གའི་རྒྱུད་སྡེའམ་སྤྱི་རྒྱུད་དང་ཨ་ནུ་ཡོ་ག་རྣམས་ཡིན་པ་རེད། མི་ཡུལ་འཛམ་གླིང་གི་གནས་འདི་ལ་མཚོན་ན་ཨ་ཏི་ཡོ་ག་དེ་ཉིད་དྷ་ན་ཀོ་ཤཱའི་གླིང་ནས་དར་བ་རེད། དེས་ན་རྒྱལ་བའི་བཀའ་ཞེས་པ་དེ་འདྲ་ཞིག་ཡིན་པ་རེད། བསྟན་བཅོས་ཞེས་པ་དེ་ཅི་འདྲ་ཞིག་རེད་ཅེ་ན། དེ་ཡང་སྟོན་པ་སངས་རྒྱས་མྱ་ངན་ལས་འདས་ནས་ཉན་ཐོས་སྡེ་བ་བཅོ་བརྒྱད་དུ་གྱེས། སྟོན་པ་མྱ་ངན་ལས་འདས་ནས་ལོ་བརྒྱ་ཕྲག་ཙམ་གྱི་མཚམས་སུ་རྒྱལ་པོ་ཀྲྀ་ཀྲྀའི་རྨི་ལམ་དང་བསྟུན་ནས་ཉན་ཐོས་སྡེ་བ་བཅོ་བརྒྱད་རྣམས་སྟོན་པ་གཅིག་གི་རྗེས་འཇུག་ཡིན་པར་ཞལ་འཆམས་ཏེ། ཡུལ་ཡངས་པ་ཅན་དུ་ཉན་ཐོས་སྡེ་བ་སོ་སོའི་དགྲ་བཅོམ་པ་ལྔ་བརྒྱ་འདུས་ཏེ་བྱེ་བྲག་བཤད་མཛོད་ཆེན་མོ་བརྩམས་པར་གྲགས། དེ་ཉིད་བསྟན་པ་འདིའི་བསྟན་བཅོས་ཀྱི་ཐོག་མར་འཇོག་པ་རེད། དུས་དེ་ནས་བཟུང་ཟབ་དང་རྒྱ་ཆེའི་བཀའ་ཡི་དགོངས་འགྲེལ་རྣམས་ཤིང་རྟ་ཆེན་པོ་ཀླུ་ཐོགས་རྣམ་གཉིས་ཀྱིས་གཙོ་བོར་མཛད་པའི་འཛམ་གླིང་མཛེས་པའི་རྒྱན་དྲུག་མཆོག་གཉིས་སློབ་མ་དང་བཅས་པས་བརྩམས་པའི་རྒྱུ་ཕར་ཕྱིན་ཐེག་པའི་བསྟན་བཅོས་དང་། སྔགས་ལ་བྱང་ཆུབ་སེམས་དཔའི་འབྲེལ་བ་སྐོར་གསུམ་དང་གྲུབ་པ་སྡེ་བདུན་ལ་སོགས་པ་གྲུབ་ཆེན་རིག་འཛིན་སོ་སོས་མཛད་པའི་བསྟན་བཅོས་མང་པོ་བྱུང་བ་རེད། བསྟན་བཅོས་ཞེས་པ་རྒྱལ་བའི་བཀའ་ཡི་རྗེས་སུ་འབྲངས་ནས་རྩོམ་པ་པོ་མཚན་ཉིད་དང་ལྡན་པས་མཛད་པའི་ལེགས་བཤད་ལ་ངོས་འཛིན་དགོས། དེ་ཡང་ཇི་སྐད་དུ། དོན་མེད་དོན་ལོག་དོན་དང་ལྡན། །ངན་གཡོ་བརྩེ་བྲལ་སྡུག་བསྔལ་སྤོང་། །ཐོས་རྩོད་སྒྲུབ་པ་ལྷུར་ལེན་པ། །བསྟན་བཅོས་དྲུག་བྲལ་གསུམ་དུ་འདོད། ཅེས་གསུངས་པ་ལྟར། བསྟན་བཅོས་ཞེས་པ་སྐྱོན་ངན་པ་དྲུག་དང་བྲལ་ཞིང་ཡོན་ཏན་བཟང་པོ་གསུམ་དང་ལྡན་དགོས་པ་ཞིག་རེད། མཚན་གཞི་ཞིག་བཞག་པ་ཡིན་ན། མདོ་ཕར་ཕྱིན་ཐེག་པའི་སྐབས་ཀྱི་དབུ་མ་རིགས་ཚོགས་ལྔའམ་དྲུག་དང་བྱམས་ཆོས་སྡེ་ལྔ་ལྟ་བུ་དང་། སྔགས་ཀྱི་ཕྱོགས་ལ་རང་ལུགས་ཀུན་མཁྱེན་ཡབ་སྲས་ཀྱི་གསུང་ལྟ་བུ་རེད། གསང་སྔགས་ཀྱི་རྒྱུད་སྡེ་འདི་དག་རིས་ཆོད་དང་གཟུ་ལུམ་ཅན་ལ་གསང་བའི་ཆེད་དུ་རྒྱུད་དཀྲུགས། ལུང་དཀྱུས། མན་ངག་གབ་ཡོད་པ་ཡིན་ཞིང་། དེ་ཡང་འདི་འདྲའི་སྐབས་སུ་རྒྱལ་བའི་ཐུགས་རྗེའི་ཡེ་ཤེས་ཀྱི་འོད་ཟེར་འགྲེལ་བ་པོ་ལ་ཕོགས་ནས་དཀྲུགས་པ་བསྡེབས། དཀྱུས་པ་བཤིག གབ་པ་མངོན་དུ་ཕྱུང་ནས་འཆད་ཐུབ་པ་ཡིན་པ་རེད། སྡུད་པ་ལས། འཆད་དང་རིག་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། ཞེས་གསུངས་པ་བཞིན། དགོངས་འགྲེལ་ཐམས་ཅད་ཀྱང་བྱིན་གྱིས་བརླབས་པའི་བཀའ་ཡི་གྲས་སུ་བཞག་པ་རྒྱུ་མཚན་དེ་ཉིད་ཀྱིས་རེད། དེ་ལྟར་བཀའ་དང་བསྟན་བཅོས་དར་ཚུལ་གྱིས་གླེང་བསླངས་ནས་ཆོས་ཀྱི་བྱུང་བ་བརྗོད་པས་འགོ་བཟུང་ན། སྐབས་བབས་ཀྱི་བཤད་བྱ་གསང་སྔགས་ཀྱི་རྒྱུད་སྡེའི་སྐོར་ལ། སྤྱིར་གསང་སྔགས་ལ་གསང་ཞེས་བརྗོད་པའི་དོན་ཅི་ཡིན་དང་སྔགས་ཞེས་བརྗོད་པའི་དོན་ཅི་ཡིན་ཞེ་ན། དེ་ཡང་གསང་བ་ལ་གབ་པའི་གསང་བ་དང་སྦས་པའི་གསང་བ་སྟེ་གཉིས་སུ་དབྱེ་རུ་ཡོད་ལ། དེ་ལས་གབ་པའི་གསང་བ་ནི། སྐུ་གསུམ་རང་ལ་ཡོད་ཀྱང་གློ་བུར་གྱི་དྲི་མས་བསྒྲིབས་ཏེ་མ་རིག་པ་དང་། དེའི་རྒྱུ་མཚན་སྟོན་པའི་ལྟ་དགོངས་ཟབ་མོ་རྣམས་རང་སྟོབས་ཀྱིས་མ་ཤེས། གཞན་བསྟན་མཁན་མེད། བསྟན་ཀྱང་ཤེས་དཀའ་བ་ལ་གབ་པའི་གསང་བ་ཞེས་གསུངས། འོ་ན་སྦས་པའི་གསང་བའི་དོན་གང་ཡིན་ཞེ་ན། འདིའི་ལྟ་སྒོམ་སྤྱོད་པ་ཐུན་མོང་མ་ཡིན་པ་རྣམས་སྣོད་མིན་རིས་ཆོད་དང་གཟུ་ལུམ་ཅན་ལ་མ་བསྐུངས་ན། སྒྲོ་སྐུར་གྱི་གནས་སུ་འགྱུར་བ་མ་ཟད་དེ་དག་ལའང་གནོད་པར་འགྱུར་བ་ཡིན་ཕྱིར་སྦས་པ་ལས་བསྟན་དུ་མི་རུང་བས་ན་སྦས་པའི་གསང་བ་ཞེས་གསུངས། འོ་ན་སྔགས་ཞེས་པའི་ཚིག་འདིའི་དོན་ཅི་ཞེ་ན། འདི་སྤྲོས་པ་མེད་པའི་དོན་ལ་འཇུག་པ་མ་ཟད་གཉིས་སུ་མེད་པའི་ཡེ་ཤེས་ལའང་འཇུག་ཅིང་། ཚོགས་དང་སྦྱིན་སྲེག་ལ་སོགས་པ་ཐབས་ཀྱི་ཆོ་ག་ལ་འཇུག་དུས་ཀྱང་ཡོད། འོན་ཀྱང་ད་རེས་གསང་སྔགས་ཀྱི་རྒྱུད་སྡེ་འདི་ལྟ་བུ་བཤད་པའི་སྐབས་དང་བསྟུན་ན་བདེ་ཞིང་མྱུར་བར་སྐྱོད་པའི་ཐབས་ཁྱད་པར་ཅན་ཞིག་ལ་གོ་དགོས། བསྐྱེད་རྫོགས་ནི་གསང་སྔགས་ཀྱི་རྒྱུད་སྡེའི་དགོངས་དོན་རེད། འུ་ཅག་གི་སྐབས་སུ་བབས་པའི་བཤད་བྱ་དངོས་དེ་བསྐྱེད་རྫོགས་རེད། དེས་ན་དེ་ཉིད་གསང་སྔགས་ཀྱི་རྒྱུད་སྡེ་དང་འབྲེལ་ནས་བཤད་དགོས་པ་ཡིན་པས། གསང་སྔགས་ཀྱི་དོན་གོང་དུ་བཤད་མ་ཐག་པ་ལྟར་ཡིན་ལ། འོ་ན་རྒྱུད་ཅེས་པའི་དོན་ཅི་ཞེ་ན། སཾ་སྐྲྀ་ཏའི་སྐད་དུ་ཏན་ཏྲ་ཞེས་པའི་སྒྲ་ལས་དྲངས་ན་གང་དོན་དུ་གཉེར་བྱའི་མཆོག་དང་ཐུན་མོང་གི་དངོས་གྲུབ་སྒྲུབ་པའི་ཐབས་དེ་ཉིད། ལྷ་སྔགས་ཏིང་འཛིན་ལ་སོགས་པ་གཅིག་ལ་གཅིག་འབྲེལ་གྱིས་རྒྱུད་བར་མ་ཆད་པར་ཚིག་དོན་གཉིས་རྒྱུད་མར་ཡོད་པ་ཞིག་ལ་རྒྱུད་ཅེས་གསུངས། དེ་ཉིད་རྗོད་བྱེད་ཚིག་གི་སྒོ་ནས་དབྱེ་ན་སྒྲར་སྣང་བའི་རྒྱུད། སྒྲར་གྲགས་པའི་རྒྱུད། བརྡར་གྱུར་པའི་རྒྱུད་དེ་གསུམ་ཡོད་ལ། དེ་ཡང་ངེས་དོན་མཐར་ཐུག་འཕགས་པའི་ཡེ་ཤེས་ཀྱི་དབང་དུ་བྱས་པའི་གསང་བ་མཆོག་གི་རྒྱུད་དེ་ཉིད་ཚིག་སྒྲ་སྤྱིའི་རྣམ་པས་བློར་སྣང་ཆོག་པ་ལ་སྒྲར་སྣང་བའི་རྒྱུད་དང་། དེ་ཉིད་བརྗོད་འདོད་ཀྱི་རྟོག་པའི་རླུང་གཡོས་ནས་སྒྲའི་སྐྱེ་གནས་དང་བྱེད་པ་སོགས་ལ་བརྟེན་ཏེ་ངག་ཐོག་ནས་བརྗོད་པའམ་བཤད་དུ་ཡོད་པ་ལ་སྒྲར་གྲགས་པའི་རྒྱུད། དེ་ཉིད་ཡི་གེའི་རི་མོའི་གཟུགས་བརྙན་དུ་བཀོད་ནས་གླེགས་བམ་གྱི་ཚུལ་དུ་བཞུགས་པ་ལ་བརྡར་གྱུར་པའི་རྒྱུད་བཅས་ཀྱི་རྣམ་གཞག་དང་། གཞན་ཡང་བརྗོད་བྱ་དོན་གྱི་སྟེང་ནས་དབྱེ་ན་གང་རྟོགས་པར་བྱ་བ་གཞིའི་རྒྱུད། གང་གིས་རྟོགས་པར་བྱེད་པ་ལམ་གྱི་རྒྱུད། གང་དུ་མཐར་ཕྱིན་པ་འབྲས་བུའི་རྒྱུད་དེ་གཞི་ལམ་འབྲས་གསུམ་གྱི་རྣམ་གཞག་ཡོད་པ་ཞིག་རེད། དེ་ལས་གང་རྟོགས་པར་བྱ་བ་གཞིའམ་རྒྱུའི་རྒྱུད་ནི། སྣོད་བཅུད་སྣང་སྲིད་ཀྱིས་བསྡུས་པའི་ཆོས་འདི་དག་ཐམས་ཅད་ཡེ་ནས་སྐུ་གསུང་ཐུགས་ཀྱི་དཀྱིལ་འཁོར་རུ་དག་ནས་རིས་མེད་མཉམ་པ་ཆེན་པོར་སངས་རྒྱས་པ་དེ་ཉིད། གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཡིན་པ་རེད། འདི་ལ་གཞི་ཞེས་གསུངས་པའི་དོན་ནི། དེ་ཉིད་རྟོགས་ན་མྱང་འདས་ཀྱི་གཞི་དང་མ་རྟོགས་ན་འཁོར་བའི་གཞི་ཡིན་ཞིང་འཁོར་འདས་ཀྱི་ཆོས་ཐམས་ཅད་དེའི་རང་བཞིན་དུ་མ་གྱུར་པ་གཅིག་ཀྱང་མེད་པས་ན་གཞི་ཞེས་གསུངས། རྒྱུད་ཅེས་གསུངས་པའི་དོན་ནི། སེམས་ཅན་ནས་སངས་རྒྱས་ཀྱི་བར་དུ་རང་བཞིན་ལ་འགྱུར་བ་མེད་པར་རྒྱུན་ཆགས་སུ་འཇུག་པ་ཡིན་པས་ན་རྒྱུད་ཅེས་གསུངས། འདི་ལ་གཞི་རྒྱུད་དམ་ཡང་ན་རྒྱུ་རྒྱུད་ཅེས་ཀྱང་བརྗོད་ཆོག་པའི་རྒྱུ་མཚན་ཅི་ཡིན་སྙམ་ན། གཞི་དག་པ་མངོན་གྱུར་ཡིན་པའི་སྟོབས་ཀྱིས་འབྲས་བུ་མཐར་ཕྱིན་གྱི་སྐུ་དང་ཡེ་ཤེས་སྣང་བ་ཡིན་པས་སྣང་ཚུལ་ལ་བརྟེན་ནས་རྒྱུའི་རྒྱུད་ཅེས་གསུངས། གནས་ཚུལ་ལྟར་ན་དེའི་གཞི་དེ་ཉིད། སྟོང་ཉིད་ཀྱི་ཆ་ནས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་སོགས་སུ་ཆོས་ཀྱི་དབྱིངས་དང་། ཡང་དག་པའི་མཐའ། དེ་བཞིན་ཉིད་སོགས་མིང་གི་ཐ་སྙད་འདྲ་མིན་གྱི་ཐོག་ནས་བསྟན་པ་དང་། སྐུ་དང་ཡེ་ཤེས་ཀྱི་སྣང་བ་དང་བཅས་པའི་ཆ་ནས་སྙིང་པོ་བསྟན་པའི་མདོ་ལ་སོགས་པ་ནས་དེ་བཞིན་གཤེགས་པའི་སྙིང་པོ་ཞེས་སུ་བསྟན། དེ་ཡང་རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། ཞེས་གསུངས་པ་ལྟར་དང་། སངས་རྒྱས་པད་ངན་སྦྲང་རྩི་སྦྲང་མ་ལ། །སྦུན་ལ་སྙིང་པོ་མི་གཙང་ནང་ན་གསེར། །ས་ལ་གཏེར་དང་མྱུག་སོགས་འབྲས་ཆུང་དང། །གོས་ཧྲུལ་ནང་ན་རྒྱལ་བའི་སྐུ་དང་ནི། །བུད་མེད་ངན་མའི་ལྟོ་ན་མི་བདག་དང། །ས་ལ་རིན་ཆེན་གཟུགས་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡི། །སེམས་ཅན་ཀུན་ལ་དེ་བཞིན་ཁམས་འདི་གནས། ཞེས་དཔེ་དགུས་མཚོན་ཏེ་དོན་དགུ་གསུངས་པ་ལྟར་རེད། དེ་ཡང་ངེས་དོན་སྔགས་ཀྱི་སྐབས་ནས་བཤད་ན། བསྐྱེད་པ་མ་ཧཱ་ཡོ་གས་སྣང་སྟོང་བདེན་པ་དབྱེར་མེད། རྫོགས་པ་ཨ་ནུ་ཡོ་གས་དབྱིངས་དང་ཡེ་ཤེས་གཉིས་སུ་མེད་པའི་ཀུན་ཏུ་བཟང་མོའི་ཀློང་། རྫོགས་ཆེན་ཨ་ཏི་ཡོ་གས་རང་བྱུང་གི་རིག་པ་འོད་གསལ་འདུས་མ་བྱས་ཞེས་གསུངས་པ་རེད། འདིའི་དོན་ཆ་ཚང་རྟོགས་ཏེ་གནས་ལུགས་མཐར་ཐུག་པའི་བཞུགས་ཚུལ་མངོན་དུ་གྱུར་ཚེ་སངས་རྒྱས་ཞེས་ཟེར་ཞིང་། ཆ་ཚང་མ་རྟོགས་ཀྱང་ཅི་རིགས་པ་རྟོགས་ནའང་དེ་ལ་ལམ་པ་ཞེས་བརྗོད་ཆོག་པ་རེད། དེ་ལྟ་བུའི་གཞི་དེ་ཉིད་མ་རྟོགས་པར་འཁྲུལ་བ་གློ་བུར་བས་བསླད་ནས་ཕྱིན་ཅི་ལོག་ཏུ་ཞེན་པ་ལ་འཁྲུལ་བ་བཏགས་པའི་གཞི་ཞེས་ཟེར། དེ་ལ་མ་དག་འཁྲུལ་བའི་སྣང་བ་ཞེས་ཀྱང་བརྗོད་ཆོག དེ་ཡང་ཇི་ལྟར་འཁྲུལ་པ་རེད་ཅེ་ན། དཔེར་ན་ཐག་ཁྲ་ལ་སྦྲུལ་དུ་འཛིན་པའི་སྣང་བ་ཤར་བ་ལྟར་གདོད་མའི་རིག་གདངས་མ་འགག་པའི་ལྷུན་གྲུབ་ཀྱི་སྣང་བ་དེ་ཉིད་རང་ལས་ཤར་བའི་གདངས་ཡིན་པ་མ་ཤེས་པར། ཕྱི་རོལ་གྱི་ཡུལ་དུ་བཟུང་ནས་གཟུང་འཛིན་རྒྱང་ཆད་དུ་སོང་སྟེ། འཁྲུལ་བའི་ས་བོན་གྱི་འགོ་དེ་ནས་བཞག་སྟེ་སྲིད་པའི་སྣང་བ་རྒྱ་འབྱམས་སུ་མཆེད་པ་ཡིན་ལ། ཆུ་འཁྱགས་རོམ་དུ་གྱུར་པ་ལྟར་ཕྱིན་ཅི་ལོག་གི་འཁྲུལ་སྣང་ལ་ཨ་འཐས་སོང་བ་རེད། དེ་ལྟ་བུའི་འཁྲུལ་བ་དེས་གནས་ལུགས་ལ་ཇི་ལྟར་བསྒྲིབས་པ་རེད་ཅེ་ན། དེ་ཡང་སད་རྨི་གཉིད་མཐུག་སྙོམས་འཇུག་བཞིའི་གནས་སྐབས་སུ་སྒྲིབ་ཚུལ་མི་འདྲ་བ་བཞིའི་སྒོ་ནས་བསྒྲིབས་སོང་བ་རེད། སད་པའི་གནས་སྐབས་སུ་ཚོགས་དྲུག་གི་ཤེས་པ་ཡུལ་ལ་རྒྱུ་བ་རགས་སོང་བའི་སྟོབས་ཀྱིས་ཐ་མལ་མ་དག་པའི་སྣང་བ་ཁོ་ནར་བཟུང་བའི་དབང་གིས། སྣང་སྲིད་རྣམ་དག་སྤྲུལ་སྐུའི་རང་བཞིན་དེ་ཉིད་བསྒྲིབས་སོང་བ་རེད། རྨི་ལམ་གྱི་དུས་སུ་རགས་པའི་སྣང་བ་མེད་ཀྱང་རླུང་སེམས་ཙམ་གྱི་སྣང་བ་སྣ་ཚོགས་རང་སྣང་དུ་འལ་འོལ་ཙམ་ཤར་བ་དེར་ཞེན་ནས། ཡེ་ཤེས་རང་སྣང་ལོངས་སྤྱོད་རྫོགས་སྐུའི་རང་བཞིན་དེ་ཉིད་བསྒྲིབས་སོང་བ་རེད། གཉིད་མཐུག་གི་སྐབས་སུ་སེམས་སེམས་བྱུང་གི་རྒྱུ་བ་ཐམས་ཅད་ལོག་ནས་དྲན་མེད་མུན་པ་འདྲ་བ་ཞིག་གི་ནང་དུ་འཐུམ་སྟེ། མི་རྟོག་ཆོས་སྐུའི་རང་བཞིན་དེ་ཉིད་བསྒྲིབས་སོང་བ་རེད། དེ་ལྟར་བྱས་ནས་རང་གནས་སྐུ་བཞིའི་ཡེ་ཤེས་མ་མཐོང་བ་རེད། ཐུན་མོང་ཐེག་པའི་སྐབས་སུ་སེམས་བྱུང་མ་རིག་པ་དེ་འཁོར་བའི་རྩ་བ་ཡིན་ཞེས་གསུངས་ཀྱང་། སྔགས་རྒྱུད་ཀྱི་ནང་དུ་སེམས་གཟུང་འཛིན་དུ་གཡོ་བའི་རྐྱེན་ལས་རླུང་ཕྲ་མོའམ། ཕྲ་བའི་ཁུ་རྡུལ་རླུང་གསུམ་གྱི་བྱེད་ལས་སྣང་གསུམ་འཕོ་བའི་བག་ཆགས་སུ་གསུངས་པ་དང་། སྣང་གསུམ་འཕོ་བའི་བག་ཆགས་འདི་ཉིད་མདོ་ལུགས་སུ་མ་རིག་བག་ཆགས་ཀྱི་ས་ཞེས་གསུངས། དེ་ཡང་རྩ་བ་དེད་དེ་སོང་ན་གདོད་མའི་རང་སྣང་མ་འགག་པ་ཁོ་རང་གི་ངང་ལས་བྱུང་བ་ཞིག་ཡིན་པ་དང་། མདོ་ལྟར་དུ་བཤད་ན་འདི་ཉིད་གཉེན་པོ་རྡོ་རྗེ་ལྟ་བུའི་ཏིང་ངེ་འཛིན་གྱི་སྤང་བྱ་རེད། དེ་ཡང་རྫོགས་ཆེན་གྱི་སྐབས་སུ་གཞི་ལས་གཞི་སྣང་གི་འཁྲུལ་ཚུལ་ཞེས་གསུངས་པ་ཡིན་ཞིང་། འཁྲུལ་ཡང་རང་བཞིན་ལས་མ་འདས་པ་ཅི་ལྟ་བུ་ཞིག་རེད་ཅེ་ན། ནད་ཁམས་ཀྱི་དབང་གིས་དུང་དཀར་པོ་སེར་པོར་མཐོང་ཡང་དུང་རང་ཉིད་ཀྱི་ཁ་དོག་དཀར་པོ་ལས་མ་འདས་པ་ཇི་བཞིན་དུ། དེ་ཉིད་རྟོགས་ཀྱང་རུང་མ་རྟོགས་ཀྱང་རུང་གཞི་ཆོས་ཉིད་ལ་འགྱུར་བ་ཡོད་པ་མ་རེད་ཅེས་གསུངས་པ་རེད། གནས་ཚུལ་དངོས་དང་མཐུན་པའི་ཡང་དག་པའི་ཡེ་ཤེས་དངོས་ཡིན་ཀྱང་རུང་མིན་ཀྱང་རུང་། དེ་དང་རྗེས་སུ་མཐུན་པའི་ཤེས་རབ་ཁྱད་པར་ཅན་གྱི་བྱེད་པ་ལ་བརྟེན་ནས་འཁྲུལ་བ་ལྡོག་སོང་ཚེ། ཉི་མ་ཤར་ན་མུན་པ་རང་ཤུགས་ཀྱིས་མེད་འགྲོ་བ་ལྟར་དང་། འཁྱགས་རོམ་ཆུར་ཞུ་བའི་ཚེ་འཁྱགས་རོམ་ཟེར་བ་ཞིག་ལོགས་སུ་མེད་པ་ཇི་བཞིན། འཁྲུལ་བ་རང་དག་ཏུ་སོང་ནས་ཡེ་ཤེས་འབའ་ཞིག་སྟོབས་སུ་གྱུར་བའི་ཚེ་སླར་ལྡོག་ཏུ་མེད་པར་འཁྲུལ་བ་གཞི་ཐིམ་དུ་སོང་བ་རེད། དཔེར་ན་འུ་ཚོས་རྗེས་དཔག་ཚད་མ་ལ་བརྟེན་ནས་དུང་དཀར་པོར་ངེས་པའི་ངེས་ངོ་རུ་སེར་པོའི་སྣང་བ་ད་དུང་མ་འགག་ཀྱང་དེའི་ཞེན་པ་ལོག་སོང་བ་ལྟར། ཤེས་རབ་ཁྱད་པར་ཅན་གྱི་བྱེད་པ་ཡིས་ལྟ་བ་ཁྱད་པར་ཅན་རྒྱུད་ལ་སྐྱེས་ཚེ། གང་ཟག་ལས་དང་པོ་བ་ཡིན་རུང་ཐ་མལ་གྱི་ཞེན་པ་ཇེ་སྲབ་ཏུ་འགྱུར་བ་ཡིན། འོན་ཀྱང་སྣང་བ་དེ་མ་ཐག་ཏུ་ལྡོག་མི་དགོས། ལྟ་དོན་སྒོམ་པ་སྟོབས་སུ་གྱུར་བའི་རིམ་པ་དང་བསྟུན་ནས་འཁྱགས་རོམ་རིམ་གྱིས་ཆུ་རུ་འགྱུར་བ་ལྟར། རིམ་དང་གཅིག་ཆར་གང་ཟག་གི་བློ་རིམ་དང་བསྟུན་ནས་མཐར་ཐུག་འཁྲུལ་བ་གཞི་རུ་ལྡོག་དགོས་པ་རེད། དེ་ཡང་རང་རེས་རྒྱུད་ཅེས་པའི་གོ་དོན་གྱི་སྟེང་ནས་བཤད་བཞིན་པ་ཡིན་ན། གང་རྟོགས་པར་བྱ་བ་གཞིའི་རྒྱུད་ནི་དེ་ལྟ་བུ་ཞིག་ཡིན་པ་རེད། གང་གིས་རྟོགས་པར་བྱེད་པ་ལམ་རྒྱུད་ནི། གོང་དུ་བཤད་པའི་གཞི་རྒྱུད་ཀྱི་དོན་ཇི་ལྟ་བ་བཞིན་དུ་ཤེས་པར་བྱས་ནས། དེའི་དོན་ལ་ཚུལ་བཞིན་དུ་འཇུག་པའི་རྣལ་འབྱོར་ལམ་བྱེད་ཀྱི་མཐུ་ཡིས་གློ་བུར་འཁྲུལ་བའི་དྲི་མ་མཐའ་དག་བྲལ་བར་བྱས་ཏེ། གནས་ལུགས་མངོན་དུ་བྱེད་པའི་ཐབས་ལག་ལེན་དུ་འགེལ་བ་དེ་ཉིད་རེད། དེ་ཉིད་ཚིག་བསྡུས་ཏེ་བཤད་པ་ཡིན་ན་ལམ་ལྔའི་ཡེ་ཤེས་འཁོར་དང་བཅས་པ་ཡིན། འདིའི་དབྱེ་བ་ཐེག་པའི་རྣམ་གཞག་དང་འབྲེལ་བ་ཞིག་རེད། དེ་ཡང་ཐེག་པ་གཉིས་ཀྱི་རྣམ་གཞག་ལྟར་ན། ཐུན་མོང་རིང་ལམ་ཞེས་པ་ཞིག་དང་ཐུན་མིན་ཉེ་ལམ་ཞེས་པའི་ཐེག་པ་གཉིས་སུ་དབྱེ་རུ་ཡོད་ཅིང་། ཐུན་མོང་ངེས་འབྱུང་ཐེག་པའི་ལྷ་མི་ཉན་རང་བྱང་སེམས་བཞི་དང་། སྔགས་ཕྱི་རྒྱུད་གསུམ་དང་བཅས་པ་ལ་རིང་ལམ་དང་། ཐུན་མིན་གསང་སྔགས་ཀྱི་ཐེག་པའི་སྔགས་ནང་རྒྱུད་གསུམ་ལ་ཉེ་ལམ་དུ་འཇོག་པ་རེད། གཞན་ཡང་ཐེག་པ་ལྔ་རུ་ཕྱེས་ནའང་ཆོག་སྟེ། གསང་བ་སྙིང་པོ་ལས། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། ཞེས་གསུངས་པས། འཇིག་རྟེན་ཡང་དག་གི་ལྟ་ལ་དད་ནས་ལས་རྒྱུ་འབྲས་ཆུད་མི་ཟ་བའི་ཡིད་ཆེས་དང་ལྡན། དགེ་བཅུ་བསམ་གཟུགས་ཀྱི་ཏིང་ངེ་འཛིན་བསྒྲུབས་ནས་མི་དང་འདོད་གཟུགས་ཀྱི་ལྷར་སྐྱེ་ཐབས་བྱེད་པ་འཇིག་རྟེན་པའི་ཐེག་པའམ་ལྷ་མིའི་ཐེག་པ་ཞེས་སུ་གསུངས། སྔོན་ཨོ་རྒྱན་ཆེན་པོ་བོད་དུ་བྱོན་ནས་ཕར་སྲིན་ཡུལ་དུ་ཕེབས་རན་ཁར། བྲག་དམར་མཚོ་མོའི་མགུལ་ནས་བོད་ཀྱི་རྗེ་འབངས་རྣམས་ལ་མི་བརྗེད་པའི་བསྐྱུད་བྱང་དུ་གསུངས་པའི་མན་ངག་ལྟ་ཕྲེང་གི་ནང་དུ། ཕྱལ་བ་རྒྱང་འཕེན་གཉིས། མུར་ཐུག་མུ་སྟེགས་གཉིས་ཞེས་དབྱེ་བ་མཛད། ཕྱལ་བ་ཞེས་པ་ནི་མི་ཙམ་ཞིག་ཡིན་རུང་འདི་དང་ཕྱི་མའི་བདེ་སྐྱིད་ཀྱི་དོན་བསམ་བློར་ཅུང་ཟད་ཀྱང་མི་འཁོར་བར། རང་གར་ཧ་ངེ་ཧང་ངེར་འགྲོ་ཚུལ་ཙམ་བྱེད་པ་ལྟ་བུ་དང་། རྒྱང་འཕེན་ནི་མུ་སྟེགས་ཕུར་བུ་པའི་ལུགས་ལྟ་བུ་མ་ཡིན་པར་ཚེ་ཕྱི་མའི་དོན་ལ་བསམ་མི་ཤེས་ཤིང་ཚེ་འདིའི་བདེ་ཐབས་སུ་ཅི་འོས་བྱེད་པ། གཞན་ཡང་ཕྱལ་བ་དང་རྒྱང་འཕེན་གཉིས་ཀ་མ་ཡིན་ཞིང་རྟག་ཆད་དུ་ལྟ་བའི་མུར་ཐུག་དང་མུ་སྟེགས་ཀྱི་ལྟ་བ་ལས་ཀྱང་འཕགས་པའི་ལྷ་མིའི་བདེ་སྐྱིད་མངོན་མཐོ་དོན་གཉེར་བྱེད་པ་ལ་ལྷ་མིའི་ཐེག་པ་ཞེས་དང་། དེ་ལས་གཞན་འཇིག་རྟེན་ལས་འདས་པའི་ཐེག་པ་ཉན་ཐོས་རང་རྒྱལ་བྱང་སེམས་དང་། གསང་བ་སྔགས་ཀྱི་ཐེག་པ་བཅས་ལྔ་རུ་དབྱེ་བ་ཡིན། ཡང་ཐེག་པ་དགུ་རུ་དབྱེ་བའང་ཡོད། སྔ་འགྱུར་རང་ལུགས་ལ་ཐེག་རིམ་དགུ་ཡི་རྣམ་གཞག་མཛད་ནས་གསུངས་པ་ཡིན་ཏེ། ཕྱི་ཀུན་འབྱུང་འདྲེན་པའི་ཐེག་པ་གསུམ། ཉན་ཐོས་རང་རྒྱལ་བྱང་སེམས་གསུམ། ནང་དཀའ་ཐུབ་རིག་བྱེད་ཀྱི་ཐེག་པ་གསུམ། ཀྲི་ཡ་ཨུ་པ་ཡོ་ག་གསུམ། གསང་བ་དབང་བསྒྱུར་ཐབས་ཀྱི་ཐེག་པ་གསུམ། མ་ཧཱ་ཨ་ནུ་ཨ་ཏི་བཅས་དགུ་དང་། དེ་ལས་ཉན་ཐོས་ནི། བདེན་བཞིའི་དོན་ལ་ཡང་དག་པའི་ལྟ་བ་དང་རྗེས་སུ་མཐུན་པའི་སྟེང་ནས་ཚུལ་ཁྲིམས་དང་ཏིང་འཛིན་གྱི་བསླབ་པ་ལ་གཞི་བཟུང་། གང་ཟག་གི་བདག་མེད་ལ་གོམས་སུ་བཅུག་ནས། གནས་སྐབས་ཀྱི་འབྲས་བུ་རྒྱུན་ཞུགས་ལ་སོགས་པ་བདུན་དང་། མཐར་འབྲས་ཁམས་གསུམ་གྱི་ཀུན་སྦྱོར་ཟད་པའི་དགྲ་བཅོམ་གྱི་གོ་འཕང་འཐོབ་པར་བྱེད་པ་ཞིག་རེད། འདི་ལ་ནང་གསེས་སུ་བྱེ་བྲག་སྨྲ་བ་དང་མདོ་སྡེ་པ་གཉིས་ཀྱི་དབྱེ་བ་ཡོད། རང་རྒྱལ་ནི་སྔོན་ནས་གོམས་པའི་སྟོབས་དང་སྨོན་ལམ་གྱི་དབང་གིས་སྲིད་པ་ཐ་མར་པར་གྱུར་པའི་གནས་སྐབས་ན། དགེ་བའི་བཤེས་གཉེན་མི་དགོས་པར་རང་སྟོབས་ཀྱིས་ཕྱི་ནང་གི་རྟེན་འབྲེལ་ཟབ་མོའི་ལུགས་འབྱུང་ལྡོག་གི་དོན་ཤེས་ཏེ། བདེན་བཞིའི་ཚུལ་དང་མཐུན་པར་བདག་མེད་ཕྱེད་དང་གཉིས་རྟོགས་ནས་རང་སངས་རྒྱས་ཀྱི་དགྲ་བཅོམ་མངོན་དུ་བྱེད་པ་ཞིག་རེད། འདི་ལ་རྟེན་དབང་པོ་རྣོ་རྟུལ་དང་ལམ་ཚོགས་བསགས་ཀྱི་ཁྱད་པར་གྱིས་འབྲས་བུ་ཚོགས་ན་སྤྱོད་པ་དང་བསེ་རུ་ལྟ་བུ་སྟེ་གཉིས་ཡོད་པ་ཡིན། དེ་ཡང་བྱང་ཆུབ་སེམས་དཔའ་ནི། ཀུན་རྫོབ་དང་དོན་དམ་གྱི་སེམས་རྣམ་པ་གཉིས་བསྐྱེད་དེ་ཀུན་རྫོབ་སྒྱུ་མ་ལྟ་བུ་དང་དོན་དམ་དམིགས་པ་མེད་པའི་བདེན་གཉིས་ཟུང་འཇུག་གི་དོན་སྦྱངས་ནས། ལམ་ཕར་ཕྱིན་བཅུ་ལ་སྤྱོད་ཅིང་བདག་མེད་གཉིས་ཀྱི་དོན་ལ་བསྐལ་པ་གྲངས་མེད་གསུམ་སོགས་སུ་རྫོགས་སྨིན་སྦྱང་བའི་གོམས་པ་སྟོབས་སུ་གྱུར་ཚེ་རྫོགས་པའི་སངས་རྒྱས་འགྲུབ་པར་འདོད་པའི་ལམ་ཞིག་ཡིན་པ་རེད། འདི་ལ་ནང་གསེས་སུ་དབུ་སེམས་ཀྱི་ཁྱད་པར་ཕྱེས་ན། བདག་མེད་ཀྱི་ལྟ་བ་ཡོངས་སུ་རྫོགས་པ་ཞིག་དང་། གཟུང་འཛིན་གཉིས་སྟོང་གི་རང་རིག་བདེན་པར་ཁས་བླངས་ནས་ཆོས་ཀྱི་བདག་མེད་ཕྲ་བ་རྫོགས་མ་ཐུབ་པའི་དབྱེ་བ་དང་རྣམ་གྲངས་གཞུང་ནས་བཤད་པ་ལྟར་ཡིན་ལ། དེ་དག་ཐམས་ཅད་རྒྱུ་མཚན་ཉིད་ཕར་ཕྱིན་ཐེག་པའི་ཕྱོགས་སུ་གཏོགས་པའི་ཕྱི་ཀུན་འབྱུང་འདྲེན་པའི་ཐེག་པ་རེད། ཐེག་རིམ་དགུ་རུ་དབྱེ་བའི་སྐབས་སུ་དེ་དག་གསུམ་གྱི་སྟེང་དུ་ནང་དང་གསང་བའི་ཐེག་པ་དྲུག་སྟེ་སྔགས་རྒྱུད་སྡེ་དྲུག་བསྣན་པ་རེད། གསར་ཕྱོགས་ནས་སྔགས་རྒྱུད་སྡེ་བཞི་རུ་གསུངས་ན་རྙིང་ཕྱོགས་ནས་སྔགས་རྒྱུད་སྡེ་དྲུག་ཏུ་གསུངས་པ་ཅི་ལྟར་རེད་སྙམ་ན། རྒྱུད་སྡེ་དྲུག་ཏུ་དབྱེ་བའི་སྐབས་སུ་རྒྱུད་སྡེ་བཞིར་དབྱེ་བའི་སྐབས་ཀྱི་རྣལ་འབྱོར་བླ་མེད་ཀྱི་རྒྱུད་ལ་ཕ་མ་གཉིས་མེད་ཀྱི་རྒྱུད་དེ་གསུམ་དུ་ཕྱེས་ནས་དྲུག་ཏུ་བགྲངས་པ་རེད་ཅེས་བཤད་ནའང་མི་ཆོག་པ་ཆེར་མེད། དེ་ལས་ཕྱི་རྒྱུད་གསུམ་གྱི་དང་པོ་བྱ་རྒྱུད་ཡིན་ཞིང་། བྱ་བའི་རྒྱུད་འདིའི་སྐབས་སུ་བདག་དང་ལྷ་གཉིས་རྗེ་དང་ཁོལ་པོའི་ཚུལ་དུ་བཟུང་ནས། ལྷ་སྔགས་ཏིང་འཛིན་ལ་བརྟེན་ཏེ་གསེར་འགྱུར་གྱིས་ལྕགས་གསེར་དུ་བསྒྱུར་པ་ཇི་བཞིན་བདག་ཉིད་ལྷའི་ངོ་བོར་སངས་རྒྱས་པར་བྱེད་པ་ཡིན། དེ་ལྟ་བུའི་རྒྱུ་རྐྱེན་ཚོགས་པ་ཞིག་ལ་བརྟེན་ནས་འབྲས་བུ་འགྲུབ་པ་ཡིན་པ་དང་། ཕྱིའི་གཙང་སྦྲ་དང་ཆོ་གའི་ཡན་ལག་མ་ཉམས་པ་སོགས་ལུས་ངག་གི་བྱ་བ་གཙོ་བོར་བྱས་ཏེ་ལྷ་མཉེས་ཐབས་སུ་འབད་པས། གནས་སྐབས་ཀྱི་འབྲས་བུ་འདོད་གཟུགས་ཀྱི་རིག་འཛིན་ལ་སོགས་པ་ཐུན་མོང་གི་གྲུབ་པ་དང་། མཐར་ཐུག་མི་ཚེ་བཅུ་དྲུག་གིས་རིགས་གསུམ་བདེ་བར་གཤེགས་པའི་གོ་འཕང་འགྲུབ་པར་འདོད་པ་རེད། འདིའི་སྐབས་ཀྱི་རིགས་གསུམ་ཞེས་པ་ནི་དེ་བཞིན་གཤེགས་པའི་རིགས་དང་། པདྨའི་རིགས། རྡོ་རྗེའི་རིགས་ཏེ་རིགས་གསུམ་རེད། དེ་ལ་སྟོང་པ་ཡི་གེ་སྒྲ་གཟུགས་ལ་སོགས་པ་ཀྲི་ཡ་ལྷ་དྲུག་གི་བཤད་པ་ཡོད་པ་དང་། རྒྱུད་གཞུང་ནི་ཀྲི་ཡ་སྡེ་དྲུག་ཡོད་པ་སྟེ། དབུའི་གཙུག་ཏོར་ལས་འཁོར་ལོས་བསྒྱུར་བའི་རྒྱུད། ལྗགས་ལས་ཁྲོ་བོ་པདྨ་འཁྱིལ་བའི་རྒྱུད། ཐུགས་ཀ་ལས་རིག་པ་མཆོག་གི་རྒྱུད། དཔུང་པ་ལས་རྡོ་རྗེ་དཔུང་བཟང་གི་རྒྱུད། ལྟེ་བ་ལས་ལེགས་སྒྲུབ་ཀྱི་རྒྱུད་ལ་སོགས་པ་མདོར་ན་ལྷའི་སྐུ་གསུང་ཐུགས་ཀྱི་མཚན་མ་མངོན་དུ་བྱེད་པའི་ཐབས་ལ་བརྟེན་ནས། ལས་དང་ཡེ་ཤེས་ཀྱི་དངོས་གྲུབ་འགྲུབ་པའི་ཐབས་སུ་ངེས་པ་བསྟན་པ་ཞིག་རེད། སྤྱོད་རྒྱུད་ནི་ཕྱིའི་སྤྱོད་པ་བྱ་རྒྱུད་དང་མཐུན་ཞིང་ནང་ལྟ་སྒོམ་རྣལ་འབྱོར་གྱི་རྒྱུད་དང་ཉེ་བ། བདག་དང་ལྷ་གཉིས་འདྲ་མཉམ་སྤུན་གྲོགས་ཀྱི་ཚུལ་དུ་སྒྲུབ་པའི་རྣལ་འབྱོར་གཙོ་བོར་བྱས་ནས། མི་ཚེ་ལྔའམ་བདུན་གྱིས་རིགས་བཞིའི་སངས་རྒྱས་སུ་འགྲུབ་པར་འདོད་པ་ཞིག་རེད། འདིའི་རྒྱུད་གཞུང་ལ་ཨུ་པ་སྡེ་བཞི་ཡོད་པ་སྟེ། རྣམ་སྣང་མངོན་བྱང་གི་རྒྱུད། མེ་དཔུང་འབར་བའི་རྒྱུད། ཕྱག་ན་རྡོ་རྗེ་དབང་བསྐུར་གྱི་རྒྱུད། རྣམ་པར་མི་རྟོག་པའི་ཏན་ཏྲ་བཅས་བཞི། འདི་ལ་བྱ་སྤྱོད་གཉིས་ཀ་དང་འབྲེལ་བས་གཉིས་ཀའི་རྒྱུད་ཀྱང་ཟེར། ཡོ་གའི་རྣལ་འབྱོར་གྱི་རྒྱུད་ནི། བདག་དང་ལྷ་གཉིས་དམ་ཡེ་དབྱེར་མེད་ཆུ་ལ་ཆུ་བཞག་གི་ཚུལ་གྱིས། ཕྱིའི་ཀུན་སྤྱོད་ལ་མི་ལྟོས་པར་ནང་གི་ཏིང་འཛིན་ཟབ་མོ་ཕྱག་རྒྱ་བཞིའི་ཚུལ་གྱིས་བསྒྲུབས་ནས། གནས་སྐབས་སུ་ཐུན་མོང་གི་དངོས་གྲུབ་དང་། མཐར་ཐུག་མཆོག་གི་དངོས་གྲུབ་མི་ཚེ་གསུམ་གྱིས་རིགས་ལྔའི་སངས་རྒྱས་སུ་འགྲུབ་པར་འདོད་པ་ཞིག་རེད། འདིའི་རྒྱུད་གཞུང་ལ་དེ་ཉིད་བསྡུས་པ་དང་། དཔལ་མཆོག་དང་པོ་ལ་སོགས་པ་ལུང་གི་རྒྱུད་བཞི་ཡོད་པ་རེད། དེ་ཡན་ཆོད་ཀྱིས་སྔགས་ཕྱི་རྒྱུད་ཀྱི་རྒྱུད་སྡེ་གསུམ་བཤད་གྲུབ་པ་རེད། འདི་དག་ལ་ཁྱད་ཆོས་ཅི་ཞིག་ཡོད་པ་རེད་ཅེ་ན། ཡོངས་སུ་དག་པ་ལྷའི་སྐུ་གསུང་ཐུགས་ཀྱི་མཚན་མ་ལམ་དུ་བྱེད་པར་ཐབས་ཇེ་ཟབ་ཏུ་སོང་ནས་མཐར་འབྲས་ལ་ཇེ་ཉེར་སོང་ཕྱིར་རྒྱུའི་ཐེག་པ་ལས་ཁྱད་པར་དུ་འཕགས་པ་རེད། འོན་ཀྱང་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཡེ་སངས་རྒྱས་པའི་དོན་དེ་ཉིད་མ་རྟོགས་པའི་ཕྱིར་ན། སྔགས་ནང་པ་ལྟར་བདེ་ཞིང་མྱུར་བ་ཚེ་གཅིག་གིས་འཚང་རྒྱ་བའི་ལམ་མ་ཡིན་པས་ན་སྔགས་ཕྱི་བ་ཞེས་སུ་གྲགས། དེ་ལྟར་འུ་ཅག་གི་གཏམ་གྱི་འཕྲོ་གཞི་གཞི་ལམ་འབྲས་གསུམ་གྱི་རྒྱུད་ཀྱི་དབྱེ་བ་ཡོད་ཅེས་པ་ལས་གང་རྟོགས་པར་བྱ་བ་གཞི་རྒྱུད་བཤད་གྲུབ་པ་མ་ཟད། གང་གིས་རྟོགས་པར་བྱེད་པ་ལམ་རྒྱུད་ཀྱི་ནང་ནས། ལམ་དང་ཐེག་པའི་རིམ་པ་ལས་མཚན་ཉིད་ཐེག་པ་ཕྱི་རྒྱུད་དང་བཅས་པའི་རྣམ་གཞག་མདོར་བསྡུས་རགས་རིམ་ཙམ་ཞུས་དང་ཞུ་བཞིན་ཡིན་པ་ལ། སྤྱིར་ཐེག་ཆེན་མདོ་སྔགས་ཀྱི་ལམ་གང་དུ་ཞུགས་ཀྱང་དམིགས་ཡུལ་སངས་རྒྱས་ཀྱི་ཡེ་ཤེས་བརྙེས་ཐབས་བྱེད་པ་ཁོ་ན་ཡིན་པས་དམིགས་ཡུལ་གཅིག་པ་ཡིན་ཡང་། ཡེ་ཤེས་འཆར་ལུགས་ལ་མི་འདྲ་བ་ཡོད་པ་རེད། དེ་ཡང་ཡེ་ཤེས་འདི་ཉིད་འཆར་ལུགས་མི་འདྲ་བ་གསུམ་ཡོད་ཅེས་གསུངས་ཤིང་། ཡེ་ཤེས་ཆེན་པོ་རྒྱབ་ནས་འཆར་བ་ཞིག་དང་། ཡེ་ཤེས་ཆེན་པོ་མདུན་ནས་འཆར་བ་ཞིག ཡེ་ཤེས་ཆེན་པོ་ཁོང་ནས་འཆར་བ་ཞིག་སྟེ་གསུམ་ཡོད་པ་ལས། རྒྱུ་མཚན་ཉིད་ཀྱི་ཐེག་པ་གསུམ་པོའི་ཡེ་ཤེས་འཆར་ལུགས་ནི་ཡེ་ཤེས་ཆེན་པོ་རྒྱབ་ནས་འཆར་བ་ཡིན་པ་རེད། དེ་ཡིན་པའི་རྒྱུ་མཚན་ནི། དཔེར་ན་ཆུའི་རྙོག་མ་དྭངས་སུ་བཅུག་ན་གཟུགས་བརྙན་གསལ་པོར་འཆར་ཐུབ་པའི་དཔེ་བཞིན་དུ་རྣམ་པར་མི་རྟོག་པའི་ཡེ་ཤེས་ལ་ཡུན་རིང་གནས་པས། རིམ་གྱིས་ཉོན་མོངས་པའི་རྣམ་རྟོག་གི་སྙིགས་མ་དྭངས་ནས། ས་བཅུ་རིམ་བགྲོད་ཀྱིས་བསྐལ་པ་གྲངས་མེད་གསུམ་སོགས་ཀྱི་རྗེས་སུ་ད་གཟོད་འཚང་རྒྱ་དགོས་པ་ཡིན་པས་ན། རྒྱུ་མཚན་ཉིད་ཀྱི་ཐེག་པ་གསུམ་གྱི་ཡེ་ཤེས་འཆར་ལུགས་དེ་ཉིད་ཡེ་ཤེས་ཆེན་པོ་རྒྱབ་ནས་འཆར་བ་ཡིན་ཞེས་གསུངས། སྔགས་ཕྱི་རྒྱུད་སྡེ་གསུམ་ནི་ཡེ་ཤེས་ཆེན་པོ་མདུན་ནས་འཆར་བ་ཡིན་པ་རེད། དེ་ཇི་ལྟར་རེད་ཅེ་ན། འོག་མིན་དུ་བཞུགས་པའི་རྒྱལ་བ་རིགས་གསུམ་མམ་རིགས་ལྔ་གང་རུང་ད་ལྟའི་སྐབས་སུ་སྤྱན་དྲངས་ནས། བདག་དང་ལྷ་དང་རྫས་ཀྱི་རྟེན་འབྲེལ་ཟབ་མོའི་ཐབས་ཀྱིས་བསྒྲུབས་ནས། རིང་ན་མི་ཚེ་བཅུ་དྲུག འབྲིང་ན་བདུན་ནམ་ལྔ། ཐུང་བས་ཀྱང་མི་ཚེ་གསུམ་གྱིས་མཐར་འབྲས་ཐོབ་པ་ཡིན་པས། རྒྱུ་ལམ་བྱེད་མཚན་ཉིད་ཐེག་པ་དང་བསྡུར་ན་འབྲས་བུ་ཐོབ་པར་མྱུར་བས་ཡེ་ཤེས་ཆེན་པོ་མདུན་ནས་འཆར་བ་ཡིན་ཞེས་གསུངས། བླ་མེད་ཡོ་ག་རྣམ་གསུམ་མམ་སྔགས་ནང་བ་སྟེ། མ་ཧཱ་ཨ་ནུ་ཨ་ཏི་གསུམ་གྱིས་ཆོས་ཉིད་རང་བྱུང་གི་ཡེ་ཤེས་ཆེན་པོའི་ངང་ལས་མ་འདས་པའི་དོན་རྟོགས་ནས། སེམས་ཉིད་བདེ་བ་ཆེན་པོའི་དེ་ཉིད་དུ་གནས་བཞིན། སངས་རྒྱས་གཞན་ནས་འཚོལ་མི་དགོས་པར་ཚེ་འདི་ཉིད་ལ་མངོན་དུ་འཆར་བས་ན་ཡེ་ཤེས་ཆེན་པོ་ཁོང་ནས་འཆར་བ་ཡིན་ཞེས་གསུངས། དེ་ལྟ་བུའི་རང་བྱུང་གི་ཡེ་ཤེས་ལ་རིམ་དང་གཅིག་ཆར་དུ་འཇུག་པའི་ཁྱད་པར་གྱིས་བསྐྱེད་རྫོགས་རྫོགས་ཆེན་གསུམ་གྱི་རྣམ་གཞག་སྟེ། གཞི་བསྐྱེད་པ་མ་ཧཱ་ཡོ་ག ལམ་རྫོགས་པ་ཨ་ནུ་ཡོ་ག འབྲས་བུ་རྫོགས་ཆེན་ཨ་ཏི་ཡོ་ག་སྟེ་ནང་རྒྱུད་གསུམ་དུ་དེ་ལྟར་ཕྱེ་བ་རེད། ད་འོ་ན་ཐེག་རིམ་དགུ་པོ་འདིའི་ལྟ་བ་ལ་ཁྱད་པར་ཡོད་དམ་སྙམ་ན། སྤྱིར་ལྟ་བ་ཟེར་ཚད་ལྟ་བ་གཅིག་པ་མ་རེད། ལྟ་བ་ལ་ཁྱད་པར་ཡོད་པ་རེད། བལྟ་བྱའི་ཡུལ་མ་འདྲ་བར་ལྟ་བྱེད་ཀྱི་མིག་མི་འདྲ་བས་བལྟས་པའི་སྐབས་སུ་མཐོང་བའི་སྣང་བའང་མི་འདྲ་བ་འབྱུང་བ་ལྟར་ཡིན། ཐ་སྙད་དཔྱོད་བྱེད་ཀྱི་ཚད་མ་ལས་ངེས་པའི་ཆོས་ཅན་ལྟ་བའི་ལྟ་བ་དང་། མཐར་ཐུག་དཔྱོད་བྱེད་ཀྱི་ཚད་མ་ལས་ངེས་པའི་ཆོས་ཉིད་ལྟ་བའི་ལྟ་བ་སྟེ་གཉིས་ཀྱི་ཁྱད་པར་ཡོད། དེ་ཡང་ཀུན་ཏུ་ཐ་སྙད་པའི་ཚད་མ་ལ་ཚུ་རོལ་མཐོང་བ་ལ་བརྟེན་པའི་ཀུན་ཏུ་ཐ་སྙད་པའི་ཚད་མ་དང་། དག་པའི་གཟིགས་པ་ལ་བརྟེན་པའི་ཀུན་ཏུ་ཐ་སྙད་པའི་ཚད་མ་སྟེ་གཉིས་ཡོད། དེ་གཉིས་རྒྱུ་དང་། ངོ་བོ། བྱེད་ལས། འབྲས་བུ་སྟེ་དོན་བཞིའི་སྟེང་ནས་ཁྱད་པར་འབྱེད་དགོས་པ་སྟེ། དེ་ཡང་ཚུ་རོལ་མཐོང་བ་ལ་བརྟེན་པའི་ཀུན་ཏུ་ཐ་སྙད་པའི་ཚད་མ་ལྟ་བུ་ནི་རྒྱུ་རང་ཡུལ་ཉི་ཚེ་བ་ཞིག་ལ། ཁོ་རང་གི་ཚད་དང་མཐུན་པའི་ཚུལ་བཞིན་དུ་བརྟགས་པའི་བློ་དོན་མཐུན་ལས་སྐྱེས་ཤིང་། དེའི་ངོ་བོ་ནི་རང་ཡུལ་ཙམ་དུ་གནས་སྐབས་མི་བསླུ་བའི་རིགས་པ་ཞིག་ཡིན། བྱེད་ལས་ནི་ཚུར་མཐོང་གི་ཡུལ་དེར་སྒྲོ་འདོགས་སེལ་ཞིང་། དེའི་འབྲས་བུ་ནི་སྐབས་དོན་ཡོངས་སུ་བཅད་ནས་འཇུག་པ་ཞིག་ཡིན། དག་པའི་གཟིགས་པ་ལ་བརྟེན་པའི་ཀུན་ཏུ་ཐ་སྙད་པའི་ཚད་མ་ནི། རྒྱུ་ཆོས་ཉིད་ཇི་ལྟ་བར་ཚུལ་བཞིན་དུ་དམིགས་པའི་རྗེས་ལས་ཐོབ་པ། ངོ་བོ་ཇི་སྙེད་པའི་ཡུལ་ཅན་རྒྱ་ཆེ་བའི་ཤེས་རབ། བྱེད་ལས་ཐ་མལ་པའི་རྒྱུད་ཀྱི་ཚུར་མཐོང་གིས་བསམ་གྱིས་མི་ཁྱབ་པའི་སྤྱོད་ཡུལ་ལ་སྒྲོ་འདོགས་སེལ་ཐུབ་པ། འབྲས་བུ་ཇི་སྙེད་མཁྱེན་པའི་ཡེ་ཤེས་འགྲུབ་པ་དེ་ལྟ་བུ་ཞིག་རེད། འདི་གཉིས་ལ་དཔེ་ཞིག་བཞག་པ་ཡིན་ན་མི་དང་ལྷའི་མིག་ལྟ་བུ་རེད། ལྷའི་མིག་གིས་མིའི་གཟུགས་མཐོང་ཡང་མིའི་མིག་གིས་ལྷའི་གཟུགས་མི་མཐོང་བ་རེད། མིག་གིས་གོང་མའི་གཟུགས་མི་མཐོང་ཞེས་གསུངས་པ་བཞིན་ཡིན། ཚུར་མཐོང་གི་ཡུལ་དག་གཟིགས་ཀྱིས་མཁྱེན་ཀྱང་དག་གཟིགས་ཀྱི་ཡུལ་ཚུར་མཐོང་ཚད་མས་མི་ཤེས། སྤྱིར་ཚད་མའི་ངེས་པའི་སྟེང་ནས་བཤད་ན་དེ་ལྟ་བུ་རེད། འདི་ནས་ལྟ་བ་བཤད་པའི་སྐབས་རེད། དེ་ཡང་སྔ་འགྱུར་རྙིང་མའི་རང་ལུགས་ལ་མདོ་སྔགས་ཀྱི་ལྟ་བ་ལ་ཁྱད་པར་ཡོད། སྤྱིར་ལྟ་བ་ལ་ཆོས་ཅན་ལྟ་བའི་ལྟ་བ་དང་། ཆོས་ཉིད་ལྟ་བའི་ལྟ་བ། རང་རིག་ལྟ་བའི་ལྟ་བ་སྟེ་གསུམ་ཡོད་ལ། དེ་ལས་ཆོས་ཉིད་ལྟ་བའི་ལྟ་བ་ལ་མདོ་སྔགས་གཉིས་ཀར་ལྟ་བ་སྟོང་ཉིད་སྤྲོས་བྲལ་ཙམ་གྱི་ཚིག་གི་སྟེང་ནས་ཁྱད་པར་མེད་ཟེར་ཆོག སྔགས་ཀྱི་ལྟ་བ་ལའང་ངོ་བོ་སྟོང་པའི་ཆ་ནས་སྤྲོས་པའི་མཚན་པ་ཐམས་ཅད་དང་བྲལ་བའི་སྟོང་ཉིད་དམིགས་བསམ་བརྗོད་འདས་ཡིན་པ་རེད། ས་སྐྱ་པཎ་ཆེན་གྱིས། ཕ་རོལ་ཕྱིན་པའི་སྤྲོས་བྲལ་ལས། །ལྷག་པའི་ལྟ་བ་ཡོད་གྱུར་ན། །ལྟ་དེ་སྤྲོས་པ་ཅན་དུ་འགྱུར། །ཞེས་གསུངས་པ་ལྟར་ཡིན། འོན་ཀྱང་ཆོས་ཅན་ཀུན་རྫོབ་ཀྱི་ལྟ་བའི་ངོས་ནས་ཁྱད་པར་ཡོད་པ་རེད། དེ་ཡང་མཚན་ཉིད་ཐེག་པ་ཟབ་མོ་དབུ་མའི་སྐབས་སུ་ཀུན་རྫོབ་རྟེན་འབྱུང་དུ་སྣང་བའི་ཆོས་འདི་དག་སྒྱུ་མ་དང་རྨི་ལམ་གྱི་སྣང་བ་ལྟར་རང་བཞིན་བདེན་པར་མ་གྲུབ་པ་ཙམ་དུ་བལྟ་བ་མ་གཏོགས། དག་པ་ལྷའི་དཀྱིལ་འཁོར་ཆེན་པོར་བལྟ་བའི་ལྟ་བ་རྩལ་དུ་བཏོན་ནས་བཤད་ཡོད་པ་མ་རེད། ཐབས་ཀྱི་ཐེག་པ་ཆེན་པོ་སྔགས་བླ་མེད་ཀྱི་སྐབས་འདི་ནས་སྣོད་བཅུད་ཀྱིས་བསྡུས་པའི་ཆོས་འདི་དག་ཐམས་ཅད་ཀྱི་རང་བཞིན་ལྷ་དང་ལྷ་མོའི་ཚུལ་དུ་རང་ཆས་སུ་བཞུགས་པར་བལྟ་བ་ཡིན། དེས་ན་ཆོས་ཉིད་ལྟ་བའི་ལྟ་བས་འཁོར་འདས་ཀྱི་ཆོས་ཐམས་ཅད་ཀྱི་རང་བཞིན་སྟོང་ཉིད་མཉམ་པ་ཆེན་པོར་གཏན་ལ་ཕབས། ཆོས་ཅན་ལྟ་བའི་ལྟ་བས་སྣང་སྲིད་ཀྱི་ཆོས་ཐམས་ཅད་སྐུ་དང་ཡེ་ཤེས་ཀྱི་རང་བཞིན་དག་པ་ཆེན་པོར་གཏན་ལ་ཕབས། དེ་ཡང་འུ་ཅག་གིས་དཀྱིལ་འཁོར་བསྒོམ་པའི་ཚེ་གཙོ་བོ་གཅིག་ལས་ཤར་བའི་གཙོ་འཁོར་གྱི་ལྷ་ཚོགས་ཡོད་ན། དེ་ཉིད་གང་ཟག་གཅིག་གི་ཕུང་ཁམས་སྐྱེ་མཆེད་ཀྱིས་བསྡུས་པ་དག་པ་ལྷའི་རྣམ་པར་ཤར་བ་ལྟ་བུ་རེད། དེ་ཡང་རང་རིག་ལྟ་བའི་ལྟ་བ་ནི་ཆོས་ཉིད་ལྟ་བའི་ལྟ་བ་དང་ཆོས་ཅན་ལྟ་བའི་ལྟ་བ་གཉིས་དབྱེར་མེད་མཚན་ཉིད་བསམ་བརྗོད་དང་བྲལ་བར་མངོན་སུམ་རང་ཐོག་ཏུ་གཏན་ལ་ཕབས་ནས། ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་ཤེས་པར་བྱ་བ་དེ་ཉིད་གསང་ཆེན་རྡོ་རྗེ་རྩེ་མོའི་གྲུབ་མཐའི་གནད་ཡིན་པ་རེད། དེ་ཡི་ཕྱིར་ན་ལྟ་སྒོམ་འདི་གཉིས་རིག་པ་དང་རྐང་པར་ལྡན་དགོས་ཞེས་གསུངས། དེའི་དོན་ཅི་རེད་ཟེར་ན། ལྟ་བའི་ངེས་པ་དང་བྲལ་བའི་སྒོམ་པ་དང་སྒོམ་པའི་ཉམས་ལེན་དང་བྲལ་པའི་ལྟ་བ་དེ་ཁ་ཤར་དུ་ཕྱོགས་ནས་གོམ་པ་ནུབ་ཏུ་སྤོ་བ་དང་འདྲ། རིག་པ་དང་རྐང་པར་ཇི་ལྟར་ལྡན་དགོས་ཤེ་ན་མིག་གིས་ལྟ་སར་རྐང་པས་སྤོ་དགོས། ངེས་པ་རྣམ་དག་རྗེས་ནས་བསྐྱེད་དགོས་ཚེ་ལྟ་བ་རྣམ་དག་སྔོན་དུ་འགྲོ་དགོས། དེས་ན་སྔགས་ལ་ཞུགས་པའི་གང་ཟག་ཞིག་གིས་འདི་ཉིད་ཤེས་པ་གལ་གནད་ཤིན་ཏུ་ཆེ། ནང་རྒྱུད་སྡེ་གསུམ་གྱི་སྐོར་འདི་ལྟ་སྒོམ་སྤྱོད་འབྲས་དང་འབྲེལ་ཏེ་ཅུང་ཟད་རྒྱས་པར་བྱས་ནས་སྐྱོར་སྦྱང་བྱ་དགོས་སྙམ་པ་ཡིན། འོན་ཀྱང་འདིར་ཡོད་ཐམས་ཅད་ཆ་ཚད་གཅིག་མཚུངས་ཤ་སྟག་མ་ཡིན་པས། ལས་དང་པོ་བ་གསར་བུ་རྣམས་དང་རྒན་ཞུགས་མ་ཎི་ཕྲེང་བགྲང་ལས་མ་མྱོང་བ་རྣམས་ཀྱིས་འདི་ལྟར་སྙམ་ངེས། ད་ནི་ཅི་ཞིག་ཟེར་གྱིན་འདུག བཤད་ནི་བཞིན་པ་ལ་གོ་རྒྱུ་ནི་ཅུང་ཟད་ཀྱང་མི་འདུག ཁྱེད་ཀྱིས་གོའམ་ཞེས་དྲིས་བྱུང་ན་བོད་སྐད་བོད་ལ་བཤད་པ་ཡིན་པས་མི་གོ་འདུག་ཅེས་ལན་སྨྲ་མི་བཏུབ། གོ་འདུག་ཅེས་སྨྲ་ན་ཅི་ཞིག་གོ་ཡོད་ཡང་བཤད་ནི་བྱ་རྒྱུ་མེད་མོད། ད་ནི་ཅི་འདྲའི་དཀའ་བ་ལ་བསམ་མི་ཉན། གལ་སྲིད་དེ་འདྲ་བསམ་ནས་ཨ་རོ་ཤོ་༼ཁ་སྐད་དུ་ཐང་ཆད་པའི་དོན།༽སྙམ་ན་དེ་མུར་བྱིང་རྨུགས་འཐིབས་གསུམ་པོ་གཅིག་རྗེས་གཉིས་མཐུད་དུ་སླེབ་ནས་ཅུང་ཞིག་ན་གཉིད་ལོག་ཀྱང་བྱེད་ངེས། གོ་སླ་བ་དཀའ་རུ་བཏང་ནས་གོ་རྒྱུ་ཅན་ཞིག་མི་གོ་བར་བསྒྱུར་བ་མ་ཡིན་ཞིང་། རང་ཅག་གིས་དུས་རྒྱུན་བཤད་བཞིན་པའི་གོ་ཁ་ཕན་ཚུན་གྱི་ཟ་སྐད་འཐུང་སྐད་ཙམ་ཞིག་གིས་མདོ་སྔགས་གཉིས་ཀའི་གཞུང་གི་ཁོག་དགྲོལ་མི་ཐུབ་སྟེ། དེ་ཡང་། ཡུལ་གྱི་སྐད་ཀྱིས་ཆོས་གོ་ན། །བསྟན་བཅོས་སྐད་ཀྱིས་ཅི་ཞིག་བྱ། ཞེས་གསུངས་ཡོད། ཟ་སྐད་འཐུང་སྐད་དེ་དག་གི་སྟེང་ལ་སྟོང་སང་ངེ་གསལ་ལྷང་ངེ་ཞེས་པ་འགའ་ཞིག་གང་བྱུང་དུ་སྦྱར་བ་ཙམ་གྱིས། བརྡ་ཙམ་བསྟན་པས་གྲོལ་བ་ཤྲཱི་སིངྷ་དང་པདྨ་འབྱུང་གནས་ལྟ་བུ་འཕྲད་པ་བྱུང་ན་མ་གཏོགས། གཞན་ང་ལྟ་བུས་མུན་ནག་ནང་གི་མཛུབ་སྟོན་རེད་ཉེན་འདུག དེས་མ་ཚད་སྲོལ་ངན་གྱི་རྒྱུན་འབྱམས་པར་འགྱུར་བའི་དོགས་པའང་ཡོད། ཁྱད་པར་དུ་གདན་ས་འདི་དང་ཆོས་བརྒྱུད་འདིའི་དམ་པ་གོང་མ་རྣམས་ཀྱིས་བཤད་བྱའི་མདོ་སྔགས་གང་ཡིན་པ་དེའི་གཞུང་དོན་དངོས་ཀྱི་ཁོག་ཕུབ་པ་ལས་འཆད་སྲོལ་མེད། ཁྱད་པར་དུ་རྒྱུད་དོན་ལ་དེ་ལྟ་བུ་ཡིན། གནས་འདི་གང་ལྟར་བཤད་རུང་དུས་ཀྱི་ཁུག་སོ་འདིའི་རང་ལུགས་ཀྱི་གསང་སྔགས་ཀྱི་ཆོས་རྒྱུན་སྤེལ་སའི་ཆོས་ར་རེད། དེས་ན་རྒད་པོ་རྒན་མོ་ཚོས་མ་ཎི་འཚོགས་པ་ལྟར་བྱས་ནས་ཨ་མཆོད་གོ་བས་ཅི་དྲན་གང་དྲན་བྱས་ནས་བཤད་ན་མི་འགྲིག བཟོ་མ་ཤེས་ཀྱང་བཟོ་བའི་བཟོ་སྟངས། མགར་མ་ཤེས་ཀྱང་མགར་བའི་འདུག་སྟངས་ཤིག་བྱེད་དགོས་སོང་བ་རེད། འོན་ཀྱང་གསར་པ་ཚོ་ཡི་ཆད་ནས་ད་ཉན་དགོས་མི་འདུག་མ་བསམ། རྒྱུན་པར་ཉོན་དང་མི་སུ་ལྟ་བུ་ཞིག་ཡིན་རུང་ཅུང་ཟད་མི་ཕན་པ་མི་སྲིད། ཆོས་རྔ་སྒྲོག་པའི་སྒྲ་ཐོས་ཀྱི་དུད་འགྲོ་ཡང་ངན་སོང་ལས་ཐར་བར་འགྱུར་ན། སྨྲ་ཤེས་དོན་གོའི་མིས་ཆོས་སྒྲ་དངོས་ཀྱི་སྒྲ་ཚིག་ཙམ་ཐོས་པའི་ཕན་ཡོན་གྱིས་ཀྱང་བསོད་ནམས་བསམ་གྱིས་མི་ཁྱབ་པ་གསག་པར་འགྱུར། ཅི་ཙམ་གོ་ན་དེ་ཙམ་གྱིས་འབད་པ་གྱིས་དང་། གོམས་ན་སླ་བར་མི་འགྱུར་བའི། །དངོས་དེ་གང་ཡང་ཡོད་མ་ཡིན། ཞེས་གསུངས་པས། གོམ་པ་གཅིག་སྤོ་དང་གཉིས་སྤོ་ཡིས་ལེ་བར་བརྒྱ་ཡི་ས་ཐག་བཅད་པ་ཇི་བཞིན། ཐོས་པ་རིམ་གྱིས་བསགས་ན་སོག་རྒྱུ་ཡོད་པ་ཡིན། སྐྱེས་ཐོབ་ཀྱི་ཤེས་རབ་ཁོ་ནར་བརྟེན་ནས་ཀ་ཁ་ཙམ་ཡང་སྦྱོང་མི་དགོས་པར་རང་བཞིན་གྱིས་ཤེས་པ་ཤིན་ཏུ་དཀོན་པོ་རེད། དེས་ན་ཐོས་པ་བསགས་ནས་ཐོས་པའི་ཤེས་རབ་སྐྱེ། ཐོས་དོན་བསམས་པས་བསམ་པའི་ཤེས་རབ་སྐྱེ། བསམ་དོན་གོམས་པས་སྒོམ་པའི་ཤེས་རབ་སྐྱེ་བར་བྱེད་དགོས། དེ་ལྟར་མིན་པར། ཐོས་པ་མེད་པའི་སྒོམ་པ་དེ། །ལག་རྡུམ་བྲག་ལ་འཛེག་པ་ལྟར། ཞེས་མི་སྲིད་པའི་དཔེ་རུ་ཇི་ལྟར་བཀོད། དེ་ཚོ་ཀུ་རེ་བྱས་པ་ཡིན། རང་གཞན་ཚང་མས་མི་ཤེས་པ་འདུག་ཟེར་བ་མིན། སྡེ་སྣོད་འཛིན་པ་རྣམས་ཡར་ཞོག དེ་མིན་ང་འདྲ་བ་རྣམས་ཀྱིས་མི་ཤེས་པས་ཅུང་ཟད་ཤེས་ན་སྙམ་པའི་རེ་བ་བྱེད་ཁུལ་དང་། ཆེན་པོ་ཞིག་མ་ཤེས་ཀྱང་བག་ཆགས་རེ་བཞག་ན་བསོད་ནམས་ཆེན་པོ་རེད་སྙམ་སྟེ་སྐྱོར་སྦྱང་བྱེད་བཞིན་མཆིས་ན། སྐབས་འདིའི་ནང་རྒྱུད་སྡེ་གསུམ་གྱི་ལྟ་སྒོམ་སྤྱོད་འབྲས་ཀྱི་སྐོར་སྔགས་ཐེག་རྩེར་ཞུགས་པ་ཞིག་གིས་མ་ཤེས་ཐབས་མེད་ཡིན་ཕྱིར། སྤྱིའི་སྒྲོམ་གཞིའམ་སྤྱི་དོན་གྱི་ཁོག་ཕྱོགས་ཙམ་སྨོས་ན། དེ་ཡང་ནང་རྒྱུད་སྡེ་གསུམ་ནི་མ་ཧཱ། ཨ་ནུ། ཨ་ཏི་གསུམ་པོ་ཡིན་པ་གཞིར་བཞག་ལ། དེ་ལས་དང་པོ་མ་ཧཱ་ཡོ་ག་ནི་ལྟ་བ་བདེན་གཉིས་དབྱེར་མེད་ཡིན་པ་སྟེ། ཀུན་རྫོབ་ཀྱི་ཆོས་ཐམས་ཅད་དག་པ་ལྷའི་དཀྱིལ་འཁོར་དུ་ལྟ་བ་དེ་ཉིད་དོན་དམ་གདོད་མའི་ཆོས་དབྱིངས་དང་གཉིས་སུ་མེད་པར་བློའི་སྤྱོད་ཡུལ་དང་བྲལ་བར་གཏན་ལ་འབེབས་པ་རེད། དེ་ཉིད་ཡང་བཤད་བྱས་ན། འདི་པའི་ལུགས་ཀྱི་ཆོས་སྐད་ལ་སྐུ་གསུང་ཐུགས་ཡོན་ཏན་འཕྲིན་ལས་ལྔའི་འབྲས་བུ་དོན་དམ་དང་། ཡེ་ཤེས་དོན་དམ། དབྱིངས་དོན་དམ་གསུམ་པོ་དང་ཡེ་ནས་འདུ་འབྲལ་མེད་པ་ལ་དོན་དམ་དཀོར་བདུན་ཞེས་གསུངས། དེ་ཉིད་ཚིག་སྣ་བསྡུས་ཏེ་བཤད་ན། འབྲས་ཆོས་ལྔ་དང་དབྱིངས་ཡེ་གཉིས་བཅས་བདུན་པོ་དོན་དམ་དཀོར་བདུན་རེད། དེ་ལྟ་བུའི་སྐུ་དང་ཡེ་ཤེས་ཀྱིས་བརྒྱན་པའི་དབྱིངས་དེ་ཉིད། འབྲས་དུས་ཀྱི་རྣམ་ཀུན་མཆོག་ལྡན་གྱི་སྟོང་པ་ཉིད་རེད་ལ། དེ་ཉིད་ལྷག་པའི་དོན་དམ་བདེན་པ་རེད། དེའི་རྩལ་སྣང་སྣོད་བཅུད་ལ་སྣང་བཞིན་པ་འདི་ཐམས་ཅད་ཀྱང་སྐུ་དང་ཡེ་ཤེས་ཀྱི་ངོ་བོར་རང་བཞིན་གྱིས་དེ་ལྟར་གནས་ཤིང་བདེན་པར་མ་གྲུབ་པའི་ཡེ་ཤེས་སྒྱུ་མ་ལྟ་བུ་དེ་ལྷག་པའི་ཀུན་རྫོབ་བདེན་པ་རེད། དེས་ན་བདེན་གཉིས་རེ་རེའི་སྟེང་ནས་ཀྱང་སྣང་སྟོང་འདུ་འབྲལ་མེད་པར་འཇོག་ཐུབ་ཀྱིན་ཡོད། སྐུ་དང་ཡེ་ཤེས་དག་པ་ཡིན་པའི་ཆ་ནས་ཐུན་མོང་པའི་བདེན་གཉིས་ལས་ལྷག་པས་ན་ལྷག་པའི་བདེན་གཉིས་དབྱེར་མེད་ཅེས་གསུངས། དེ་ཉིད་མ་ཧཱ་ཡོ་གའི་ལྟ་བ་རེད། མ་ཧཱ་ཡོ་གའི་སྒོམ་པ་ལ་ཏིང་འཛིན་རྣམ་པ་གསུམ་སྟེ། དེ་བཞིན་ཉིད་ཀྱི་ཏིང་ངེ་འཛིན། ཀུན་སྣང་གི་ཏིང་ངེ་འཛིན། རྒྱུའི་ཏིང་ངེ་འཛིན་བཅས་ཡན་ལག་དང་བཅས་པའི་ཚུལ་གྱིས་སྣང་སྲིད་ལྷའི་དཀྱིལ་འཁོར་དུ་འཆར་བའི་བསྐྱེད་རིམ་གྱིས་གཙོ་བོར་བྱས་ནས། སྤྱོད་པ་གང་ཤར་བླང་དོར་མེད་པའི་ངང་ནས་ཐབས་མཁས་ཀྱི་སྤྱོད་པ་སྦྱོར་སྒྲོལ་ལ་སོགས་པ་དང་དུ་ལེན་པ་རེད། མ་ཧཱ་ཡོ་ག་འདི་ལ་རྒྱུད་སྡེ་དང་སྒྲུབ་སྡེ་གཉིས་ཀྱི་དབྱེ་བ་ཡོད། དེ་ལས་རྒྱུད་སྡེ་ནི་ཏན་ཏྲ་ཆེན་པོ་སྡེ་བཅོ་བརྒྱད་ཀྱི་བསྟན་དོན་དང་། དེ་ཉིད་དང་མཐུན་པའི་སྒྲུབ་སྡེ་ལ་འཇམ་དཔལ་སྐུ། པདྨ་གསུང་ལ་སོགས་པ་སྐུ་གསུང་ཐུགས་ཡོན་ཏན་འཕྲིན་ལས་དང་འབྲེལ་བའི་རྒྱུད་སྡེ་དང་། དམ་ཅན་སྲོག་གི་སྒྲུབ་པ། དྲག་སྔགས་ལས་ཀྱི་སྒྲུབ་པ། མན་ངག་མཐུ་ཡི་སྒྲུབ་པ་ལ་སོགས་པ་མང་། སྣང་བ་ཡུལ་གྱི་བློ་ཅན་གྱི་གང་ཟག་གིས་གཙོ་བོར་བསྐྱེད་རིམ་ལ་བརྟེན་ནས། བསྐྱེད་རིམ་གྱི་ཏིང་འཛིན་བརྟན་པ་དེས་གཟོད་རྫོགས་རིམ་གྱི་ངེས་པ་དྲངས་ནས་བསྐྱེད་རྫོགས་ཟུང་འཇུག་གི་ཚུལ་ལ་འཇུག་དགོས་པ་རེད། མ་ཧཱ་ཡོ་གའི་བསྐྱེད་རྫོགས་ཐམས་ཅད་ཀྱང་སྣང་བ་ལྷ་རུ་སྒྲུབ་པའི་གནད་ལ་ཐུག་ཡོད་པ་རེད། འབྲས་བུ་ཚེ་འདིར་རིག་འཛིན་རྣམ་པ་བཞིའི་ལམ་བགྲོད་ནས་ཡི་གེ་འཁོར་ལོ་ཚོགས་ཆེན་གྱི་སར་སངས་རྒྱས་པར་འདོད་པ་རེད། འོ་ན་རྫོགས་པ་ཨ་ནུ་ཡོ་གའི་ལྟ་བ་དེ་ཅི་འདྲ་ཞིག་རེད་ཅེ་ན། དཀྱིལ་འཁོར་རྣམ་གསུམ་ལ་གཞི་བཟུང་ནས་རྩ་རླུང་ཐིག་ལེའི་བྱེད་པ་ཡིས་བདེ་སྟོང་གི་ཡེ་ཤེས་ལམ་དུ་བྱེད་པ་ཞིག་རེད། དེ་ཡང་ཐབས་སྣང་བའི་ཆ་ཡེ་ནས་དག་པ་ཀུན་ཏུ་བཟང་པོ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང་། ཤེས་རབ་སྟོང་པའི་ཆ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར་ཡིན་པ་གང་ཞིག དེ་གཉིས་དབྱིངས་རིག་སོ་སོར་ཐ་མི་དད་པའི་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་བདེ་སྟོང་དབྱེར་མེད་ཀྱི་ལྟ་བ་དེ་ལ་བསྟུན་ནས། ཕྱི་སྤྲོས་པ་དང་རྩོལ་བ་ཅན་གྱི་ལམ་ལ་མི་ལྟོས་པར་ནང་རྡོ་རྗེའི་ལུས་ཀྱི་རྩ་རླུང་གནད་དུ་བསྣུན་ནས། རགས་པའི་སྣང་བ་ཐམས་ཅད་ཐོག་མར་གང་ལས་བྱུང་བའི་ཕྲ་བའི་ཕྲ་བ། རྡུལ་དང་བེམ་པོའི་ཆོས་དང་ཆ་ཡིས་བསགས་པའི་དུས་ལས་འདས་པ། འགྱུར་མེད་ཡེ་ཤེས་ཀྱི་དབུ་མའི་ལམ་དུ་བསྟིམ་པས། སེམས་ཉིད་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་དེ་ཉིད་ལུས་ཐབས་ལྡན་བརྒྱུད་དེ་ལམ་དུ་བྱེད་པས་མངོན་པར་འཆར་བར་བྱེད་པ་དེ་ཨ་ནུ་ཡོ་གའི་ལྟ་བ་རེད། འདིའི་གནད་འདི་མ་རྟོགས་པར་ལུས་ཀྱི་རྩ་རླུང་ཐིག་ལེ་ལམ་དུ་བྱེད་པ་གཅིག་པུས་འཁྲུལ་སྣང་འགགས་ནས་ཡེ་ཤེས་ཀྱི་སྣང་བ་བསྐྱེད་མི་ཐུབ་པས་ན། མཚན་བཅས་ཀྱི་རྫོགས་རིམ་ཐམས་ཅད་ཀྱི་མཐར་ཐུག་གི་གནད་འདིར་ཐུག་པ་ཡིན། ཨ་ནུའི་སྒོམ་པ་ནི་གསང་དབང་དང་ཤེར་དབང་གི་ཉམས་ལེན། རང་ལུས་དང་གཞན་ལུས་ཐབས་ལྡན་གྱིས་རྣལ་འབྱོར་ལམ་དུ་བྱེད་པ་དེ་འདྲ་ཡིན། འདིའི་ཉམས་ལེན་རྒྱུད་དང་སྒྲུབ་ཐབས་སོ་སོའི་མན་ངག་གི་དབང་གིས་སྣ་ཚོགས་པ་བྱུང་བས་མཐའ་གཅིག་ཏུ་མ་ངེས་པ་ཡིན་ཡང་། དོན་གྱི་སྟེང་ནས་ལས་རླུང་དབུ་མར་བསྟིམས་ནས་གཉུག་མ་བྱང་ཆུབ་སེམས་ཀྱི་དཀྱིལ་འཁོར་ལ་འཇུག་དགོས་པ་གཅིག་མཐུན་རེད། འདི་ལ་གཡོ་བ་རླུང་གི་རྫོགས་རིམ་རྡོ་རྗེའི་བཟླས་པ་དང་། སྦྱོར་བ་བརྒྱད་ལྡན་གྱིས་བུམ་ཅན་བསྒོམ་པ། བརྟེན་པ་རྩ་ཡི་རྫོགས་རིམ་རྩ་གཙོ་མོ་གསུམ་དང་འཁོར་ལོ་ལྔ་ཡི་དམིགས་གཏད་དང་འཕྲུལ་འཁོར་བསྒོམ་པ། བཀོད་པ་བྱང་ཆུབ་སེམས་ཀྱི་རྫོགས་རིམ་ཐིག་ལེ་འབར་འཛག་གི་རྣལ་འབྱོར་ལ་བརྟེན་ནས། ཡས་བབས་དང་མས་བརྟན་གྱི་དགའ་བ་བཞི་ཡི་ཡེ་ཤེས་ཀྱིས་འཕོ་མེད་ལྷན་ཅིག་སྐྱེས་པའི་ཡེ་ཤེས་མངོན་དུ་བྱས་ནས། འཁོར་ལོ་ལྔའི་རླུང་སེམས་ལས་སུ་རུང་ཚེ་ལམ་ལྔའི་ཡོན་ཏན་འཆར་རྒྱུ་དང་། རྩ་དབུ་མའི་རོ་རྐྱང་གི་མདུད་པ་ཉེར་གཅིག་ཞིག་དུས་ས་བཅུ་གཅིག་གི་ཡོན་ཏན་འཆར་རྒྱུ་ཡོད་པ་དེ་ལྟ་བུ་ཡིན། ཨ་ནུ་ཡོ་གའི་སྤྱོད་པ་ནི་རང་ལུས་དང་གཞན་ལུས་ལ་བརྟེན་པའི་ཞུ་བདེ་རྗེས་ཆགས་ཀྱི་བདེ་བ་ཉམས་སུ་ལེན་པ་གཙོ་བོར་བྱས་པའི་ཐབས་མཁས་ཟབ་མོ་དང་ལྡན་པར། འབྲས་བུ་སྙིགས་དུས་ཚེ་ཐུང་གི་མི་ཚེ་གཅིག་པོ་འདིའི་སྟེང་ནས་ཚོགས་ལམ་འདུན་པ་སེམས་པ་ལ་སོགས་པའི་ལམ་ལྔ་དང་། ས་དང་པོ་འགྱུར་བ་མ་ངེས་པའི་ས་ལ་སོགས་པའི་ས་བཅུ་གཅིག་པོ་ཐམས་ཅད་ནང་གི་ཐབས་མཁས་ཀྱི་སྒོ་ནས་བགྲོད་དེ། སྐུ་བཞི་ཡེ་ཤེས་ལྔ་ཡི་བདག་ཉིད་བདེ་བ་ཆེན་པོ་རྡོ་རྗེ་འཆང་གི་སྐུ་འགྲུབ་པར་བྱེད་པ་རེད། ནང་རྒྱུད་སྡེ་གསུམ་གྱི་ནང་ནས་གསུམ་པ་རྫོགས་ཆེན་ཨ་ཏི་ཡོ་ག་རེད། ཨ་ཏི་ཡོ་ག་དེ་ཉིད་ཀྱི་སྤྱིའི་ལྟ་བའི་ཆ་ནས་སེམས་ཀློང་མན་ངག་གི་རྒྱུད་སོགས་ལ་བརྟེན་ནས། སེམས་ཉིད་རང་བྱུང་གི་ཡེ་ཤེས་ངོ་བོ་སྟོང་པ་ཀ་དག་དང་། རང་བཞིན་གསལ་བ་ལྷུན་གྲུབ་ཏུ་གནས་པ། ཀ་དག་ལྷུན་གྲུབ་དབྱེར་མེད་སྐྱེ་འགག་དམིགས་མཚན་དང་བྲལ་བའི་ཆོས་ཉིད་དེའི་རྩལ་ལས་འཁོར་འདས་ཐམས་ཅད་འཆར་བས། ཐུགས་རྗེ་ཀུན་ཁྱབ་ཀྱི་བདག་ཉིད་ཡེ་ཤེས་སུམ་ལྡན་དུ་བཞུགས་པ་དེ་ཉིད་བསྐྱེད་པའི་རིམ་པ་དང་རྫོགས་རིམ་མཚན་བཅས་མཚན་མེད་ཀྱི་ཐབས་ལ་མི་ལྟོས་པར་དོན་བརྒྱུད་འཕོ་བའི་བྱིན་རླབས་དང་སེམས་ཉིད་རང་ངོ་སྤྲོད་པའི་བླ་མའི་མན་ངག་གི་ངོ་སྤྲོད་བརྒྱུད་ནས། དགག་སྒྲུབ་སྤང་བླང་མེད་པ་རིག་པ་འགྱུར་མེད་ཀྱི་ངང་ལས་ནམ་ཡང་མི་གཡོ་བ་ཉིད་ལྟ་བས་ཐག་བཅད་པ་ཡིན་ལ། ལྟ་བ་དེ་ཉིད་ཀྱི་ངང་སྐྱོང་བའི་སྒོམ་པས་ཆེད་དུ་རྩོལ་བས་མི་བསྒོམ་ཞིང་ཡེངས་སུ་སྐད་ཅིག་ཀྱང་མི་འགྲོ་བ། དེ་ཡང་ཁྱད་པར་དུ་མན་ངག་སྡེའི་སྐབས་དང་བསྟུན་ན་ཅོག་བཞག་བཞི་དང་མི་གཡོ་གསུམ་ལྡན་ལ་སོགས་པས་རང་བབ་བསམ་གཏན་གྱི་ངང་ལ་བཞག་དུས། རྣམ་རྟོག་རང་ཤར་རང་གྲོལ་དུ་སོང་ནས་རྩོལ་སྒྲུབ་མི་དགོས་པ་རེད། དེ་ཡང་ཐམས་ཅད་རིག་པས་དབང་དུ་བསྒྱུར། གང་ཤར་ཆོས་སྐུའི་ཀློང་ལས་མ་འདས་པ་ཉིད་སྒོམ་པ་རེད། སྤྱོད་པ་གང་ཤར་ཤུགས་འབྱུང་དགག་སྒྲུབ་སྤང་བླང་ལས་འདས་པ་དེ་སྤྱད་ནས། འབྲས་བུ་སྐུ་གསུམ་ཡོན་ཏན་གྱི་རྩལ་མ་བཙལ་གཞི་ལ་རྫོགས་ནས། ཁྲེགས་ཆོད་ཀྱིས་ལུས་རྡུལ་ཕྲན་དུ་དེངས། ཐོད་རྒལ་བསྒོམས་པས་དབྱིངས་དང་རིག་པའི་གདངས་མངོན་སུམ་རྩོལ་མེད་ཀྱི་སྣང་བ་གནད་དུ་གཟིར་བས་སྣང་བཞི་རྫོགས། འོད་ལུས་འཕོ་ཆེན་གྱི་སྐུ་རུ་བཞེངས་ཏེ་གདོད་མའི་དབྱིངས་སུ་འཚང་རྒྱ་བར་འགྱུར་བ་དེ་འདྲ་རེད། དེ་ལྟ་བུའི་ནང་རྒྱུད་ཡོ་ག་གསུམ་འདིའི་ལྟ་བ་སྤྱོད་པ་ཏིང་འཛིན། དཀྱིལ་འཁོར་དབང་དང་དམ་ཚིག སྒྲུབ་པ་མཆོད་པ་འཕྲིན་ལས། དེའི་སྟེང་ལ་སྔགས་དང་ཕྱག་རྒྱ་སྟེ་རྒྱུད་གསུམ་དང་བསླབ་བྱ་བཅུ་གཅིག་ཅེས་གསང་སྔགས་ཀྱི་སྐབས་སུ་ཡོངས་སུ་གྲགས་པ་དེའི་རྣམ་གཞག་རྒྱས་པ་སོ་སོའི་རང་གཞུང་ལས་ཤེས་པར་བྱ་བ་ཡིན་པ་རེད། གཞི་ལམ་འབྲས་བུའི་རྒྱུད་ཀྱི་རྣམ་གཞག་གིས་གླེང་སློང་བ་དང་འབྲེལ་ནས་ལམ་རྒྱུད་བྱེ་བྲག་ཏུ་བཤད་པའི་སྐབས་འདི་དང་མཉམ་དུ། ད་སྐབས་སུ་བབས་པ་རྫོགས་པ་ཆེན་པོ་ཀློང་ཆེན་སྙིང་ཐིག་གི་ནང་སྒྲུབ་རིག་འཛིན་འདུས་པའི་སྒྲུབ་ཆོག་གཏེར་གཞུང་གི་ཐོག་ནས། འུ་ཅག་གིས་ཚིག་གི་འབྲུ་མནན་ནས་སང་གནངས་བསྙེན་སྒྲུབ་ཀྱི་སྐབས་སུ། རབ་ཀྱིས་ཏིང་ངེ་འཛིན་གྱི་གསལ་སྣང་དང་བསྟུན་ནས་ལྷ་སྔགས་ཡེ་ཤེས་ཀྱི་རོལ་བར་འཆར་ཐུབ་པ། འབྲིང་གིས་ཀྱང་བསྐྱེད་རྫོགས་ཀྱི་དམིགས་ཤེས་ཏེ་བསྙེན་སྒྲུབ་ཡན་ལག་བཞིའི་གོ་དོན་རྙེད་པ། ཐ་མ་པ་ཡིན་རུང་ཁ་ཡེངས་མིག་ཡེངས་མི་དགོས་པར་ཚིག་རྗེས་སུ་དོན་དྲན་ཐུབ་པ། སྒྲ་དོན་འདྲེས་འཛིན་གྱི་རྟོག་ཚོགས་དག་སྣང་གི་རྗེས་འགྲོ་ཅན་རེ་འཆར་ཐུབ་རྒྱུའི་ཆེད་དུ་དམིགས་ནས་སྐྱོར་སྦྱང་ཞིག་བྱེད་འཆར་རེད། འོན་ཀྱང་རྡོ་རྗེའི་ཚིག་གི་གོ་དོན་ཆ་ཚང་འགྲོལ་ཐུབ་པར་ཆོས་ཉིད་དག་པའི་དགོངས་སྤྱོད་ལས་མི་གཡོ་བ། སོ་སོར་རྟོགས་པའི་ཡེ་ཤེས་ཀྱི་རང་རྩལ་ཆོས་རབ་རྣམ་འབྱེད་ཀྱི་ཤེས་རབ་ལ་དབང་འབྱོར་བ། རྡོ་རྗེའི་ལྗགས་དང་ལྡན་པ། མི་འཕྲོགས་པའི་རྣམ་དཔྱོད་དང་སྤོབས་པ་ཡོད་པ་ཞིག་གིས་མ་གཏོགས་འགྲོལ་མི་ཐུབ། རྟོག་གེ་ཐེ་ཚོམ་གྱི་གེགས་སེལ་མ་ཤེས་ན་མཛངས་པ་ལྕེ་རྡུམ་གྱི་སྐྱོན་འབབ། མི་མཐུན་པའི་ཚིག་དོན་སྡེབ་མ་ཤེས་ན་ལོང་བ་ལོང་ཐུག་གི་སྐྱོན་འབྱུང་། མངོན་རྟོགས་ཀྱི་གོ་རིམ་སྡེབ་མ་ཤེས་ན་བདུད་རྩི་རོ་ཉམས་ཀྱི་སྐྱོན་དང་། གོང་འོག་གི་འཁྲུགས་སྡེབ་མ་ཤེས་ན་རིན་པོ་ཆེ་རྩལ་འཆོལ་བའམ་བསྟར་འཆོལ་བའི་སྐྱོན་སོགས་འབྱུང་གསུངས་ཡོད་པ་རེད། འོན་ཀྱང་སོ་སོའི་སྐྱེ་བོའི་བློས་གང་ལྕོགས་ཀྱིས་དག་སྣང་དང་འདུན་པ་གཙོ་བོར་བྱས་ཏེ་ཚོགས་པ་སྐྱོང་བའི་ས་ཁོངས་ཤིག་འཛིན་པར་མ་བཤད་ཐབས་མེད་དུ་གྱུར་སོང་བར་བརྟེན། དེས་ན་འགལ་ཉེས་བཤད་ནོར་འདྲ་བྱུང་ན་ལྷ་དང་སྲུང་མར་བཟོད་པར་གསོལ་ཞུ་རྒྱུ་དང་། ཆོས་སྤྱན་དང་ལྡན་པས་ཚངས་པར་བསྩལ་ཏུ་གསོལ་ཞེས་ཞུ་རྒྱུ་ཡིན། དེ་ནས་འུ་ཅག་ཚང་མས་དབུའི་ཞལ་བྱང་ནས་མར་གཟིགས་དང་། ཀློང་ཆེན་སྙིང་གི་ཐིག་ལེ་ལསཿ ནང་སྒྲུབ་རིག་འཛིན་འདུས་པ་བཞུགསཿ ཞེས་གསུངས། གོང་ནས་སྤྱིར་རྒྱལ་བའི་བཀའ་དང་རྗེས་འཇུག་གི་བསྟན་བཅོས་བྱུང་ཚུལ། མདོ་སྔགས་ཀྱི་བསྟན་པའི་རྣམ་གཞག ཁྱད་པར་དུ་གསང་སྔགས་ཀྱི་རྒྱུད་ཀྱི་བྱུང་བ། དེ་ལས་ལམ་རྒྱུད་བྱེ་བྲག་གི་ཚུལ་དུ་བཤད་པ་ཡིན་ཡང་། སྐབས་དོན་དམིགས་ཀྱིས་བཀར་ནས་ཞིབ་ཀྱིས་ཞུས་ན། སྔ་འགྱུར་མདོ་སྒྱུ་སེམས་གསུམ་ཞེས་སུ་གྲགས་པའི་ནང་ནས་ཕྱི་བསྐྱེད་པ་མ་ཧཱ་ཡོ་ག་སྟེ། གསང་སྔགས་ཀྱི་ཆོས་ཐམས་ཅད་ཀྱི་གཞི་ལྟ་བུ་སྤྱི་རྒྱུད་སྒྱུ་འཕྲུལ་དྲ་བ་སོགས་ལ་རྒྱུད་སྡེ་དང་སྒྲུབ་སྡེ་གཉིས་སུ་ཡོད་ན། རྒྱུད་སྡེ་དེ་ཉིད་རྒྱལ་སྲས་རིགས་གསུམ་སེམས་དཔས་ལྷ་ཀླུ་གནོད་སྦྱིན་གྱི་གནས་ནས་བཤད་དེ། འཁོར་ཚོམ་བུ་འབུམ་དང་བཅས་པ་རིག་འཛིན་གྱི་སར་བཞག་ཚུལ་དང་། ཡང་གསང་བདག་གིས་གནས་ངེས་མེད་དང་ཁྱད་པར་དུ་རི་མ་ལ་ཡར་མི་དང་མི་མིན་གྱི་རིག་འཛིན་ལ་བཤད་ནས། སྲིན་པོ་བློ་གྲོས་ཐབས་ལྡན་གྱིས་རིན་པོ་ཆེའི་གླེགས་བམ་དུ་བཀོད་ནས་ནམ་མཁར་རྒྱས་བཏབ་པ་རྒྱལ་པོ་ཛའི་ཁང་སྟེང་དུ་བབས་ཚུལ་སོགས་གོང་ནས་བཤད་པ་ལྟར་རེད། སྒྲུབ་སྡེ་དེ་ཇི་ལྟ་བུ་ཞིག་རེད་ཅེ་ན། འོག་མིན་ནས་ཀུན་ཏུ་བཟང་པོ་ཆེ་མཆོག་ཧེ་རུ་ཀས་ཆོས་ཉིད་ཀྱི་རང་སྒྲས་གསུངས་པ་རིག་འཛིན་རྡོ་རྗེ་ཆོས་ཀྱིས་ངག་ཏུ་བསྡུས་ཤིང་གླེགས་བམ་དུ་བཀོད་ནས། མཁའ་འགྲོ་མ་ལས་ཀྱི་དབང་མོ་ཆེ་ལ་གཏད་པ་རེད། དེས་སྤྱི་རྒྱུད་སྒོས་རྒྱུད་ཐམས་ཅད་རིན་པོ་ཆེའི་སྒྲོམ་སོ་སོའི་ནང་དུ་བཅུག་ནས་མཆོད་རྟེན་བདེ་བྱེད་བརྩེགས་པར་གཏེར་དུ་སྦས། དུས་སུ་བབས་པའི་ཕྱི་མའི་གནས་སྐབས་ན་སྒྲོམ་བུ་བརྒྱད་རིག་འཛིན་བརྒྱད་དང་སྤྱི་རྒྱུད་རིན་ཆེན་ཀུན་འདུས་ཀྱི་སྒྲོམ་དེ་སློབ་དཔོན་ཆེན་པོར་ཕུལ་བ་རེད། ནང་ཀློང་ཨ་ནུ་ཡོ་ག་དེ་སངས་རྒྱས་བཅོམ་ལྡན་འདས་སྐུ་མྱ་ངན་ལས་འདས་དུས་དམ་པའི་རིགས་ཅན་དྲ་མ་ལྔས་གདུང་ཚིག་ཉེར་གསུམ་བཏོན་ནས་བསྐུལ་བའི་ཚེ། དུས་གསུམ་བདེ་བར་གཤེགས་པ་ཐམས་ཅད་ཀྱི་ཐུགས་རྗེས་བསྐུལ་ནས་གསང་བདག་དངོས་སུ་བྱོན་ནས་བསྟན་པ་རེད། མན་ངག་ཨ་ཏི་ཡོ་ག་དེ་ཉིད་སྤྲུལ་སྐུ་དགའ་རབ་རྡོ་རྗེ་ལ་གསང་བདག་དཔའ་བོས་རྒྱལ་ཐབས་སྤྱི་བླུགས་ཀྱི་དབང་བསྐུར་ནས། རྫོགས་ཆེན་སེམས་སྨད་བཅོ་བརྒྱད་དང་། ཀློང་ཆེན་བམ་པོ་ཉི་ཁྲི་ལ་སོགས་པའི་རྒྱུད་གཏད་ནས་མན་ངག་ཀུན་ཀྱི་བདག་པོར་མངའ་གསོལ་བ་རེད། དེས་ཉི་མ་སྣང་བྱེད་ཀྱི་རི་ནས་ལོ་ཉི་ཤུར་བསྒྲུབས་པས་སྐུ་ཉི་ཟེར་ལྟ་བུར་གྱུར་ཏེ་ནམ་མཁའ་ནས་གཤེགས་བཞུགས་མཛད་ནས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་བཅུ་རྩ་བཞི་དང་མ་ནས་ཐུགས་ལ་ཡོད་པ་ཞལ་འདོན་མཛད་པའི་སྐབས་སུ་མཁའ་འགྲོ་མས་བསྡུ་བ་བྱས་ཏེ་ཡི་གེར་བཀོད། དགའ་རབ་རྡོ་རྗེར་ཐུགས་སྲས་བདུན་གསུམ་ཉེར་གཅིག་ལ་སོགས་པ་བྱུང་བ་ལས་གཙོ་བོ་སློབ་དཔོན་འཇམ་དཔལ་བཤེས་གཉེན་ལ། བརྡ་ཙམ་བསྟན་པས་རྟོགས་གྲོལ་དུས་མཉམ་དུ་བྱུང་ནས་བསྟན་པ་ཡོངས་རྫོགས་ཀྱི་ཆེད་དུ་དབང་བསྐུར། རྒྱུད་དང་མན་ངག་ཐམས་ཅད་བསྟན་པ་རེད། དེ་ནས་ཆུ་བོ་དན་ཏིག་གི་འགོ་ནས་སློབ་དཔོན་འོད་ཕུང་དུ་ཡལ་དུས། འོད་ཀྱི་དཀྱིལ་ནས་ཚིག་གསུམ་གནད་དུ་བརྡེག་པའི་འདས་རྗེས་ཀྱི་གླེགས་བམ་བབ་པའི་སྐབས་སུ་འཇམ་དཔལ་བཤེས་གཉེན་རྟོགས་པ་སློབ་དཔོན་དང་མཉམ་ནས་ཁོང་གིས་རྒྱུད་འབུམ་ཕྲག་དྲུག་བཅུ་རྩ་བཞི་དེ་ཉིད་སེམས་ཀློང་མན་ངག་གི་སྡེ་གསུམ་དུ་ཕྱེས། གནད་ལས་ཟབ་པའི་སྙིང་ཐིག་གི་སྐོར་ལ་བཤད་རྒྱུད་དང་རྣ་རྒྱུད་གཉིས་སུ་ཕྱེས་པར་རྣ་རྒྱུད་དེ་མཆན་ལ་བཏབ། བཤད་རྒྱུད་དེ་རྡོ་རྗེའི་གདན་ལ་གཏེར་དུ་སྦས་པ་རེད། དུར་ཁྲོད་སོ་ས་གླིང་ལ་ལོ་བརྒྱ་དང་ཉེར་དགུར་བཞུགས་ཏེ་སློབ་མ་ཤྲཱི་སིངྷ་གཙོར་བྱས་པའི་པཎ་ཆེན་ཉེར་ལྔ་བྱུང་བ་རེད། སློབ་དཔོན་ཤྲཱི་སིངྷ་ལ་མི་ལོ་ཉེར་ལྔའི་བར་ཆོས་བསྟན་ནས་མཐར་འོད་ཕུང་དུ་ཡལ་ནས་འདས་རྗེས་བབས་ན། ཤྲཱི་སིངྷ་ཉིད་དགོངས་པ་སློབ་དཔོན་དང་མཉམ་པ་ཞིག་རེད་སོང་བ་རེད། ཤྲཱི་སིངྷས་མན་ངག་གི་དཔེ་དེ་གཏེར་ལས་ཕྱུང་ནས་ཡང་གསང་ཐིག་ལེའི་སྐོར་ལ་ཕྱི་ནང་གསང་བ་བླ་མེད་ཀྱི་སྐོར་དང་བཞི་རུ་ཕྱེས་ནས། ཕྱི་ནང་གསང་བ་གསུམ་གཏེར་དུ་སྦས། ཡང་གསང་བླ་མེད་ཀྱི་སྐོར་དེ་ཐུགས་ལ་གབ་ནས་དུར་ཁྲོད་བསིལ་སྦྱིན་ལ་བཞུགས། སློབ་དཔོན་ཤྲཱི་སིངྷ་ལ་སློབ་དཔོན་པདྨ་འབྱུང་གནས་དང་བཱི་མ་ལ་སོགས་པ་སློབ་མ་མང་པོ་བྱོན། སྙིང་ཐིག་བཀའ་མའི་ལུགས་ལྟར་བྱས་ན་དབང་རྒྱུད་མན་ངག་ཐམས་ཅད་ཛྙ་ན་སུ་ཏྲ་ལ་གཏད། ཛྙ་ན་སུ་ཏྲ་མྱ་ངན་ལས་འདའ་ཁར་ཞལ་ཆེམས་གཟེར་བུ་བདུན་པ་གསང་བ་མན་ངག་དང་བཅས་པ་བཱི་མ་ལར་གནང་། བཱི་མ་ལ་འཕོ་ཆེན་གྱི་སྐུ་བརྙེས་པ་རེད། ཡང་བརྒྱུད་ཚུལ་གཞན་ཞིག་ལ། སློབ་དཔོན་འཇམ་དཔལ་བཤེས་གཉེན་འོད་ཕུང་དུ་ཡལ་ནས་ལོ་བརྒྱ་དང་ཉེར་ལྔའི་མཚམས་སུ་སླར་ནུབ་ཕྱོགས་ཀྱི་པདྨའི་སྡོང་པོར་རྫུས་སྐྱེས་སུ་བྱོན་ནས་འཇམ་དཔལ་བཤེས་གཉེན་ཕྱི་མ་ཞེས་ཞུ་བ་དེས་སློབ་དཔོན་ཆེན་པོ་པདྨཱ་ཀ་ར་ལ་གསང་སྔགས་བསྟན་པ་ཡིན། མདོ་ཚུར་ལ་བསྡུས་ན་བཀའ་གཏེར་དགོངས་པ་གཅིག་གྱུར་གྱིས་སློབ་དཔོན་ཆེན་པོ་ཉིད་ཚེ་དབང་རིག་འཛིན་གྱི་སྐུ་བརྙེས། ལྷུན་གྲུབ་རིག་འཛིན་གྱི་སར་གཤེགས་ནས་འཕོ་བ་ཆེན་པོ་ཡེ་ཤེས་ཀྱི་སྐུ་ལ་མངའ་དབང་བརྙེས་པ་ཡིན། བཱི་མའི་གསང་བ་སྙིང་ཐིག་དང་པདྨའི་མཁའ་འགྲོ་སྙིང་ཐིག་སྟེ་སྙིང་ཐིག་མ་གཉིས་སུ་ཀུན་བཟང་དགོངས་པའི་ཐུགས་བཅུད་མ་མཁའ་འགྲོའི་སྙིང་གི་ཁྲག་བཅུད་བསྡུས་ཏེ་བསྟན་ན། འདིའི་ཆོས་བརྒྱུད་འཛིན་པ་ཕལ་ཆེ་བ་ཕུང་པོ་འོད་སྐུར་གྲོལ་བ་རྐྱང་རྐྱང་བྱོན་པ་རེད། སློབ་དཔོན་པདྨ་འབྱུང་གནས་ཀྱིས་དམ་ཆོས་མི་ནུབ་པའི་ཕྱིར་དང་གཅིག གདམས་ངག་མི་འཕྱུག་པའི་ཆེད་དང་གཉིས། བྱིན་རླབས་མི་ཡལ་པའི་དོན་དང་གསུམ། བརྒྱུད་ཐག་ཉེ་བ་བཅས་བཞི་ལ་དགོངས་ནས། རྒྱུད་ལས་སྒྲུབ་ཐབས། སྒྲུབ་ཐབས་ལས་མན་ངག མན་ངག་ལས་ལག་ལེན་ལ་བཏབ་ནས་མ་འོངས་ཕྱི་རབས་ཀྱི་དོན་ལ་གཏེར་དུ་སྦས་ན། གཏེར་ཆོས་དེ་དག་གཏེར་གནས་ལས་འདོན་པར་དབང་བའི་ལས་ཅན་གྱི་སྐྱེས་བུ་སོ་སོ་ལ་སྨོན་ལམ་དབང་བསྐུར་གཏད་རྒྱ་ལུང་བསྟན་དང་བཅས་པ། མཚོན་བྱ་དོན་གྱི་མན་ངག་སྐུ་གསུམ་གྱི་སྒྲོམ་དེ་མཚོན་བྱེད་ཚིག་གི་དཔེ་རྒྱུད་མྱོང་གྲོལ་སྐུ་གསུང་ཐུགས་ཀྱི་རྟེན་དང་བཅས་པ་ཤར་ལྷོ་ནུབ་བྱང་དབུས་དང་ལྔ་ཡི་གཏེར་གནས་ཐ་དད་དུ་འབྱུང་བ་ལྔ་ཡི་རྒྱ་ཡིས་བཏབ་ནས་སྦས་པ་ཡིན་ན། ཕྱིས་འགྲོ་དོན་དུས་ལ་བབས་པའི་གནས་སྐབས་ན་དུས་བབས་སྨོན་ལམ་གྱིས་ལས་ལྡན་གྱི་སྐྱེས་བུ་སྤྱི་དང་། ཁྱད་པར་དུ་གཏེར་རིགས་བཅོ་བརྒྱད་ལས་མཆོག་ཏུ་གྱུར་པའི་གཏེར་གང་ཡིན་པ་རེད་ཟེར་ན་ཟབ་མོ་དགོངས་པའི་གཏེར་ཡིན་ཞིང་། ཀུན་མཁྱེན་བླ་མ་དྲི་མེད་འོད་ཟེར་ལ་དེ་ལྟ་བུའི་ཟབ་མོ་དགོངས་པའི་ཆོས་གཏེར་གྱི་བཀའ་བབས་ནས། སྙིང་ཐིག་བུ་གཉིས་ཡང་ཏིག་རྣམ་གཉིས། ཀུན་ཀྱི་ཡང་ཏིག་ཟབ་མོ་ཡང་ཏིག རྒྱ་ཆེ་བའི་བཤད་པ་ཀློང་ཆེན་མཛོད་བདུན། ཤིང་རྟ་རྣམ་གསུམ་ལ་སོགས་རྫོགས་པ་ཆེན་པོའི་གསང་མཛོད་བརྟོལ་ནས་གངས་ཅན་གྱི་ལྗོངས་འདིར་དགའ་རབ་དཔའ་བོ་གཉིས་པ་རྫོགས་ཆེན་བསྟན་པའི་ཤིང་རྟ་ཆེན་པོ་རུ་བྱོན་ན། དེས་ཡེ་ཤེས་ཀྱི་སྐུས་ལན་གསུམ་རྗེས་སུ་བཟུང་ནས་ཀུན་མཁྱེན་འཇིགས་མེད་གླིང་པ་ལ་བསྟན་པ་གཏད། ད་དུང་སློབ་དཔོན་པདྨ་འབྱུང་གནས་ཀྱི་ཐུགས་རྗེས་བསྐུལ་ནས་ཆོས་སྐུ་ཡེ་ཤེས་ཀྱི་མཁའ་འགྲོ་མས་ཀློང་བྱང་ཡེ་ཤེས་ཀྱི་བརྡ་རིས་སྤྲད་དེ། རིག་འཛིན་འཇིགས་མེད་གླིང་པ་ལ་དགོངས་གཏེར་ནམ་མཁའ་མཛོད་ཀྱི་ཆོས་སྡེའི་ཀློང་བརྡོལ་པ་ལ་ཀློང་ཆེན་སྙིང་ཐིག་ཅེས་སུ་ཞུ་བ་ཡིན། དེ་ལྟ་བུའི་ཀློང་ཆེན་སྙིང་ཐིག་གི་ཆོས་སྡེ་ལས་ནང་སྒྲུབ་རིག་འཛིན་འདུས་པ་བཞུགས་ཞེས་གསུངས་ཏེ། སྔ་འགྱུར་བཀའ་བབས་ཀྱི་ཆུ་བོ་བཞི་དང་ལྡན་པའི་རྒྱུད་སྡེ་རྒྱ་མཚོ་ལྟ་བུའི་མན་ངག་ཐམས་ཅད་ཚུར་ལ་ཕྱུང་ནས་ཟབ་གནད་གཅིག་ཏུ་དྲིལ་བའི་བཀའ་གཏེར་ཟུང་འཇུག་གི་གདམས་པ་འདིའི་མན་ངག་སྣ་རེ་རེའང་། གང་ཟག་རེས་ཆོ་ག་གཞན་ལ་ལྟོས་མི་དགོས་པར་འཚང་རྒྱ་ཐུབ་པའི་ཟབ་ཆོས་ཁྱད་པར་དུ་འཕགས་པ་འཇིག་རྟེན་ལ་འབྱུང་བར་དཀོན་པའི་ཡིད་བཞིན་གྱི་ནོར་བུ་ལྟ་བུ་ཡིན་པ་རེད། དེས་ན་འདིའི་རྩ་བ་གསུམ་གྱི་སྒྲུབ་ཐབས་ཀྱི་ནང་ནས་བྱིན་རླབས་རྒྱུད་ལ་འཇུག་པའི་སྒྲུབ་ཐབས་ཀྱི་རིམ་པ་བླ་རྫོགས་ཐུགས་གསུམ་ཇི་ལྟར་བཞུགས་ཤེ་ན། བྱིན་རླབས་ཀྱི་རྩ་བ་བླ་མའི་སྐོར་ལ་ཕྱི་སྒྲུབ་བླ་མའི་རྣལ་འབྱོར་དང་། བླ་མ་མཆོད་ཆོག་དངོས་གྲུབ་རྒྱ་མཚོ། ནང་སྒྲུབ་རིག་འཛིན་འདུས་པ་དང་། དྲག་པོ་རྟ་ཁྱུང་འབར་བ། ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན་ལྟ་བུ། ཐུགས་ཆེན་གྱི་སྐོར་ལ་གསང་སྒྲུབ་སྤྱན་རས་གཟིགས་དབང་ཐུགས་རྗེ་ཆེན་པོ་སྡུག་བསྔལ་རང་གྲོལ་དང་། དེ་ཉིད་ཁྲོ་བོ་ལྟར་སྒྲུབ་པ་རྟ་མགྲིན་འདུས་པ་ལ་སོགས་པ་དང་། དངོས་གྲུབ་ཀྱི་རྩ་བ་ཡི་དམ་ལ་ཐུགས་སྒྲུབ་དྲག་པོ་དཔལ་ཆེན་འདུས་པ། དེའི་ཡན་ལག་ལ་གཤིན་རྗེ་འཆི་བདག་ཟིལ་གནོན། རྟ་མགྲིན་ཁམས་གསུམ་རོལ་པ། ཡང་དག་སངས་རྒྱས་མཉམ་སྦྱོར། ཕུར་པ་བདུད་དཔུང་ཟིལ་གནོན་ལ་སོགས་པ་དང་། འཕྲིན་ལས་ཀྱི་རྩ་བ་མཁའ་འགྲོའི་སྒྲུབ་པའི་སྐོར་ལ་ཡུམ་ཀ་བདེ་ཆེན་རྒྱལ་མོའི་རྩ་སྒྲུབ་བདེ་ཆེན་དཔལ་ཕྲེང་། ཕྱི་སྒྲུབ་སྒྲོལ་མ་ཉེར་གཅིག གསང་སྒྲུབ་སེངྒེའི་གདོང་ཅན། ད་དུང་ཞི་ཁྲོ་ངན་སོང་སྦྱོང་བ་ལ་སོགས་པ་དང་། རྒྱབ་རྟེན་རྫོགས་ཆེན་མན་ངག་སྡེའི་དངོས་གཞིའི་ཁྲིད་ཡིག་ཡེ་ཤེས་བླ་མ་ལ་སོགས་པ་ཆ་ལག་དང་བཅས་པ་དང་། མདོ་སྔགས་ཟབ་དང་རྒྱ་ཆེའི་ལམ་བཟང་གཞུང་གཅིག་ཏུ་དྲིལ་བའི་ཤིང་རྟ་རྣམ་གཉིས་ལ་སོགས་པ་བཞུགས་པའི་ནང་ནས། བྱིན་རླབས་ཀྱི་རྩ་བ་བླ་མ་དེ་ཉིད་ནང་ལྟར་སྒྲུབ་པ་རིག་འཛིན་འདུས་པ་ཡིན་པ་རེད། དེ་ལྟ་བུའི་ཆོས་ཚན་བྱིན་རླབས་ཀྱི་ཚན་ཁ་གཞན་ལས་ཆེ་བ་དེ་འདི་ན་བཞུགས་ཞེས་གསུངས་ནས་ཞལ་བྱང་བཀོད་པར་མཛད་ན། གཏེར་མ་ཐམས་ཅད་ལ་རྣམ་བཅད་དང་འདྲ་བའི་གཏེར་ཚེག་ཐབས་དང་ཤེས་རབ་མཚོན་པའི་བརྡ་རྟགས་འདི་བཀོད་པ་རེད། ད་དབུ་ཤོག་ནང་མའི་འགོ་ནས་མར་ཡིག་ཆུང་ལ་གཟིགས་དང་། བཛྲ་གུ་རུ་བིདྱཱ་དྷ་ར་ཡེཿ ཞེས་གསུངས་ན། བཛྲ་རྡོ་རྗེ། གུ་རུ་བླ་མ། བིདྱཱ་དྷ་ར་རིག་པ་འཛིན་པ། རྡོ་རྗེའི་བླ་མ་རིག་པ་འཛིན་པ་ལ་འདུད་ཅེས་གསུངས་ནས། གང་དཀྱིལ་འཁོར་གྱི་གཙོ་བོ་གསང་སྔགས་རྡོ་རྗེའི་ཐེག་པའི་རིགས་ཀུན་འདུས་པའི་ཁྱབ་བདག་དཔལ་ལྡན་བླ་མ་རིག་འཛིན་ཡོངས་ཀྱི་རྗེ་བོ་ལ་འདུད་ཅིང་གུས་པས་སྤྱི་བོར་མཆོད་ཅེས་པའི་དོན་བསྟན་པ་རེད། སཾ་ཀྲྀ་ཏའི་སྐད་དམ་གསང་སྔགས་བརྡ་ཡི་སྒྲ་སྐད་འདི་ཚོ་སྨྲོས་ཙམ་གྱིས་ཀྱང་རིགས་བཟང་ན་སྔོན་གྱི་ལས་འཕྲོ་སད་པ་དང་གསང་སྔགས་ཀྱི་བརྡ་དོན་ཁོང་ནས་འགྲོལ་ཐུབ་པ་དེ་འདྲ་ཡིན་པ་རེད། ད་ཡིག་ཆུང་གི་འབྲུ་མར་མནན་ན། ནང་སྒྲུབ་རིག་འཛིན་འདུས་པ་ནིཿ དབེན་ཞིང་ཉམས་དགའ་ས་ཕྱོགས་དམརཿ རྩི་ཤིང་ནགས་ཚལ་མེ་ཏོག་རྒྱསཿ བཀྲ་ཤིས་ཡིད་འོང་གནས་མཆོག་དེརཿ དཀྱིལ་འཁོར་མཆོད་པའི་ཡོ་བྱད་དངཿ སྤྱན་གཟིགས་ལ་སོགས་བློ་དང་སྦྱརཿ བདེ་བའི་སྟན་ལ་བག་ཕབ་ནསཿ སྦྱོར་དངོས་རྗེས་གསུམ་ཚང་བ་ཡིཿ རྟེན་འབྲེལ་ཟབ་མོས་ཉམས་སུ་བླངཿ ལ་སོགས་པ་གསུངས་ན། གོང་ནས་ཞུས་པ་ལྟར་གྱི་ཕྱི་ནང་གསང་བའི་སྒྲུབ་པའི་ནང་གསེས་ཀྱི་དབྱེ་བ་ལྟར་ན་ནང་གི་སྒྲུབ་པ། དེ་ལྟ་བུའི་ནང་སྒྲུབ་དེ་ཡང་རིག་འཛིན་ཀུན་འདུས་ཀྱི་སྤྱི་དཔལ། བྱིན་རླབས་ཀྱི་རྩ་བའི་སྒྲུབ་པ་ཡིན་ལ། དེ་ཉིད་ཇི་ལྟར་སྒྲུབ་པར་བྱེད་པའི་ཚུལ་ནི་ཞེས་གསུངས་ནས་གླེང་སློང་བའི་ཚིག་གིས་མཚམས་སྦྱར་བ་རེད། དེའི་ཚུལ་རྒྱས་པར་བཤད་ན། དབེན་ཞིང་ཉམས་དགའ་ས་ཕྱོགས་དམར་ཞེས་གསུངས་ན་འདི་ཉིད་སྒྲུབ་པའི་གནས་དེ་སྤྱིར་ན་གྲོང་དང་འདུ་འཛི་འུར་སྒྲ་ཐུག་ཆོམ། མི་དང་མི་མིན་གྱི་འཚེ་བ་དང་རྩོད་པ་ཅན་གྱི་གནས་མ་ཡིན་པས་དབེན་པ། ཁྱད་པར་དུ་དམ་པ་གོང་མས་བྱིན་གྱིས་བརླབས་པས་ཉམས་དགའ་ཞིང་། གནས་དེ་རུ་སླེབས་མ་ཐག་སྣང་བ་དགའ་ཡ་ལེ། རིག་པ་དྭངས་ཤར་རེར་འགྲོ་བའི་ཉམས་དགའ་བ་དེ་འདྲ་གསུངས་པ་རེད། འུ་ཅག་ད་ལྟ་བཞུགས་སའི་སྒྲུབ་གནས་འདི་ལྟ་བུ་ལ་མཚོན་ན། སྤྱིར་གུ་རུ་རིན་པོ་ཆེས་བྱིན་གྱིས་བརླབས་པའི་བོད་ཀྱི་གངས་ར་ཉེར་ལྔའི་ནང་ནས་ཡོན་ཏན་གནས་ཀྱི་གཙོ་བོ་རུ་དམ་ལུང་རེད། ཁྱད་པར་དུ་པདྨ་ཐང་འདི་སློབ་དཔོན་ཆེན་པོ་རྫུ་འཕྲུལ་གྱིས་བྱོན་ནས་བདུད་རྩི་སྨན་གྱི་སྒྲུབ་པ་མཛད་ས་ཡིན་པས་མ་ཚད། གསང་སྔགས་ཀྱི་ཆོས་འཁོར་བསྐོར་ས། འཇའ་ལུས་པ་མང་པོ་བྱོན་སའི་ས་ཆ་ཡིན་པས་སྒྲུབ་གནས་ཁྱད་པར་ཅན་གྱི་ཆ་ཚད་ལྡན་པ་རེད། ནང་སྒྲུབ་རིག་འཛིན་འདུས་པ་འདི་སློབ་དཔོན་ཆེན་པོའི་དཀྱིལ་འཁོར་གྱི་སྒྲུབ་པ་ཡིན་ཞིང་། དེ་ཡང་གུ་རུ་རིན་པོ་ཆེ་ཉིད་གསུང་མ་ཆགས་པདྨའི་རིགས་ཀྱི་གཙོ་བོ་ཡིན་པ་དང་། ཁྱད་པར་དུ་དབང་གི་ལས་ལས་བྱས་པའི་ས་ཕྱོགས་དམར་ཤས་ཆེ་བ། བྲག་མདོག་ས་མདོག་དམར་ཤས་ཆེ། །ཤུག་པ་འོམ་བུ་སེ་བ་སྐྱེ། །ཕུག་པ་ཐང་ཆུང་ཟླ་གམ་དབྱིབས། །དེ་རུ་དབང་གི་ལས་རྣམ་འགྲུབ། ཅེས་རང་རེའི་ད་ལྟའི་གནས་འདི་ཇི་བཞིན་གསུངས་ཡོད་པ་རེད། འདི་ནས་ཀྱང་། རྩི་ཤིང་ནགས་ཚལ་མེ་ཏོག་རྒྱསཿ བཀྲ་ཤིས་ཡིད་འོང་གནས་མཆོག་དེརཿ ཞེས་གསུངས་ན། བྱེ་ཐང་དང་ངམ་གྲོག་ལ་སོགས་པ་ཡིད་དུ་མི་འོང་བའི་གནས། ས་ལ་ཆུ་མེད་ས། རི་ལ་རྩི་ཤིང་མི་སྐྱེ་ས་ལྟ་བུ་མ་ཡིན་པར། རྩི་བཅུད་དང་ལྡན་པའི་སྐྱེ་དངོས་དང་། ལྗོན་ཤིང་སྣ་ཚོགས་ཀྱི་ནགས་ཚལ། དུས་བཞིའི་འགྱུར་བ་དང་བསྟུན་པའི་མེ་ཏོག་སྣ་ཚོགས་དྲི་བསུང་གི་ངད་དང་ལྡན་པ་རྒྱས་ཤིང་མཛེས་པ། དེ་ཡང་དཔལ་སྤྲུལ་ཚང་གིས་དབེན་པའི་གཏམ་ལྷའི་རྔ་སྒྲའི་ནང་དུ། དཀར་དམར་ཚོན་གྱིས་ལང་ཚོ་བཀྲག་འབར་བའི། །དྲི་བཟང་དབྱིབས་མཛེས་མེ་ཏོག་ཚོམ་བུའི་ཚོགས། །ཐབས་མཁས་སེམས་དཔའི་བསོད་ནམས་ཉེར་སྤྱད་དུ། །རྒྱལ་བའི་མདུན་སར་ཆས་ལ་རིངས་པ་ཡིན། ཞེས་གསུངས་པ་ལྟར་རྩི་ཤིང་ནགས་ཚལ་དང་མེ་ཏོག་སྣ་ཚོགས་ཀྱི་བཀོད་པས་བརྒྱན་པའི་བཀྲ་ཤིས་ཡིད་འོང་གི་གནས་མཆོག་དེར་ཞེས་གསུངས། སྤྱིར་སའི་དཔྱད་འདི་ལ་ཆོས་ཕྱོགས་ནས་བཤད་ན་དགོན་སྡེ་ཆོས་འཁོར་ཆེན་པོའི་ས་དཔྱད། མཐའ་འདུལ་ཡང་འདུལ་གྱི་ས་དཔྱད། མཆོད་རྟེན་དང་རྟེན་གསུམ་བཞེངས་སའི་ས་དཔྱད། འཇིག་རྟེན་གྱི་ཕྱོགས་ནས་ཡིན་ན། རྒྱལ་པོའི་ཕོ་བྲང་གི་ས་དཔྱད། དཔའ་བོའི་སྐུ་མཁར་གྱི་ས་དཔྱད། མི་ཁྱིམ་ཕལ་བའི་ས་དཔྱད་ལ་སོགས་པ་མང་པོ་ཡོད་པ་རེད། དེ་བཞིན་ས་དཔྱད་ཀྱི་བསྟན་བཅོས་ལ་ཡང་རིགས་མང་པོ་ཡོད་པ་སྟེ། སྟོན་པས་མདོ་རྒྱུད་ནས་གསུངས་པའི་ས་དཔྱད། སློབ་དཔོན་ཆེན་པོ་སོགས་ཀྱིས་གསུངས་པའི་ས་དཔྱད་གཏེར་མ། དེ་མིན་འཕགས་པ་འཇམ་དབྱངས་དང་ཀོང་ཙེ་འཕྲུལ་གྱི་རྒྱལ་པོ་ལ་སོགས་པས་གསུངས་པའི་ས་དཔྱད་ཀྱི་བསྟན་བཅོས་མང་ཞིང་། སྐབས་བབས་ཆོས་པས་སྒྲུབ་པ་ཉམས་ལེན་བྱེད་སའི་ས་དཔྱད་དེ་ས་དཔྱད་ཐུན་མོང་དང་མི་འགལ་བ། དཔེར་ན་ས་ཡི་ཀ་བ་རྣམ་བཞི་སྟེ། ཤར་ཕྱེས། ལྷོ་སྤུངས། ནུབ་མདན། བྱང་ཡོལ་བ་བྲེས་པ་ལྟ་བུ་དང་། རྒྱབ་རི་མཐོ། མདུན་རི་སྒུར། གཡས་གཡོན་གྱི་ཆུ་གཉིས་མདུན་དུ་འདུས་ནས་ཡོད་པ། མདུན་དུ་ཆུ་ཤིང་ན་བ་རྒྱས་པ་དེ་འདྲ་དགོས་ཞེས་གསུངས་ཡོད་པ་རེད། ད་དུང་འཛེམ་དགོས་རྒྱུའི་འབྱུང་བའི་སྒྲོན་བཞིའམ་དྲུག་ལ་སོགས་པ་སྟེ། ས་དཔྱད་ལྟ་མཁན་ཚོས། གནམ་སྒྲོན་གཤིན་རྗེའི་མཆེ་བ། བྲག་སྒྲོན་ཕུག་པ་སྐར་ཁུང་། ས་སྒྲོན་གད་པ་མདུང་རྩེ། ཆུ་སྒྲོན་ཉི་མའི་སྲབ་མདའ་ཞེས་མི་ཟེར་རམ། ད་དུང་རླུང་སྒྲོན་གོང་བུ་མདའ་ལྟོང་། ཤིང་སྒྲོན་རེ་བའི་གཡབ་མོ་སོགས་འཛེམ་དགོས་པ་ཡིན། ཁྱད་པར་དུ་སྒྲུབ་པ་བྱེད་པའི་ས་དཔྱད་ལ། གཙོ་ཆེར་ལས་བཞི་མཆོག་དང་ལྔའི་འཕྲིན་ལས་བསྒྲུབ་པར་མཆོག་ཏུ་བསྔགས་པའི་གནས། ཡང་སྒོས་སུ་འོད་གསལ་རྫོགས་པ་ཆེན་པོའི་ཉམས་ལེན་ལ་བོགས་འབྱིན་པའི་ས་ཆ། བག་དྲོ་བྱིན་ཆགས་བཀྲ་ཤིས་པའི་གནས་ཡིན་དགོས་པ་རེད། དེ་ཡང་ས་ཆ་དང་སྒྲུབ་ཁང་སོགས་དང་པོར་སླེབ་མ་ཐག་སྐྱིད་སྣང་ཤར་བའི་ས་དེའང་སྐྱིད་པོ་ཡིན་པ་རེད། ཡིད་དུ་འོང་བ་ཞེས་ཟེར་ཆོག་ཀྱང་། དང་པོ་སླེབ་མ་ཐག་སྐྱིད་སྣང་ཁྱད་པར་བ་ཅི་ཡང་མེད་ཀྱང་། རིམ་གྱིས་བསྡད་ཀྱིན་བསྡད་ཀྱིན་ཇེ་སྐྱིད་དུ་འགྲོ་བའི་ས་དེ་རང་ཉིད་དང་ལས་འབྲེལ་ཡོད་ས། ཉམས་རྟོགས་འཕེལ་ས་ཡིན་པ་རེད། དེ་ལྟ་བུའི་གནས་དེ་ནས། དཀྱིལ་འཁོར་མཆོད་པའི་ཡོ་བྱད་དངཿ སྤྱན་གཟིགས་ལ་སོགས་བློ་དང་སྦྱརཿ ཞེས་གསུངས་ཏེ། དཀྱིལ་འཁོར་ལ་བཤད་པ་མང་པོ་ཡོད་ཀྱང་འོག་ནས་སྐབས་སུ་བབས་དུས་བཤད་ཆོག སྐབས་འདིར་སྒྲུབ་པའི་དཀྱིལ་འཁོར་དང་ཕྱི་ནང་གསང་བའི་མཆོད་པའི་ཡོ་བྱད། དེ་བཞིན་སྤྱན་གཟིགས་འདི་ཡང་མཆོད་པའི་ཡོ་བྱད་ཀྱི་ཁོངས་སུ་གཏོགས་དགོས་འདུག མར་མེའི་མཆོད་པ་འདི་དག་རྒྱལ་བའི་སྤྱན་ལ་མཆོད་པ་ཕུལ་བས་ན་སྤྱན་གཟིགས་ཞེས་ཟེར་ཆོག་ཀྱང་། དམ་ཅན་དགྱེས་པའི་བསྐང་རྫས་སུ་སྤྱན་གྱི་དབང་པོའི་དགྱེས་པ་སྐོང་བའི་ཆེད་དུ་སྤྱན་གཟིགས་གསུངས་པ་ལྟ་བུ་དང་། ལ་སོགས་པ་ཞེས་གསུངས་པའི་སོགས་ཁོངས་སུ་མཐུན་རྫས། བརྟེན་རྫས། བསྐང་རྫས། སྒྲུབ་རྫས་སོགས་འདུས་ཤིང་། མདོར་ན་ཅི་དགོས་བློ་དང་སྦྱར་ནས་ཡོ་བྱད་ཚོགས་པར་བྱ་དགོས་ཞེས་གསུངས་པ་རེད། བདེ་བའི་སྟན་ལ་བག་ཕབ་ནསཿ སྦྱོར་དངོས་རྗེས་གསུམ་ཚང་བ་ཡིཿ རྟེན་འབྲེལ་ཟབ་མོས་ཉམས་སུ་བླངཿ ཞེས་གསུངས་ན། རྣལ་འབྱོར་པས་སྒྲུབ་པའི་ས་ཕྱོགས་བརྟགས་ནས་གང་དུ་གནས་འཆའ་བའི་སྒྲུབ་ཁང་ངམ་བྲག་ཕུག་གམ་སྤྱིལ་བུ་ལ་སོགས་པ། མདོར་ན་སྤྱོད་ལམ་བཞི་ཤོང་ལྟ་བུའི་སྟབས་བདེ་བའི་གནས་སུ་གནས་མལ་བཅའ་ཚར་དུས། སྟན་ལ་བག་ཕབ་ཅེས་གསུངས་ན། ལུས་སེམས་གཉིས་ཀར་ཟུག་རྔུ་དང་ཉེར་འཚེས་མི་གདུང་བའི་མཐུན་རྐྱེན་བསྐྲུན་ནས་བློ་བག་ཕབ་སྟེ་འདུག་དགོས་པ་རེད། དེ་ཡང་སྙིང་ཐིག་རང་གཞུང་གི་རིག་འཛིན་བསྙེན་ཡིག་དངོས་གྲུབ་ཀྱི་ཟ་མ་ཏོག་ཏུ་སྦྱོར་བ་གྲ་སྒྲིག་གི་སྐོར་ལ། མཚམས་དམ་པར་གཅོད་པའི་སྔ་རོལ་དུ་གནས་ཁང་ལ་བྱི་དོར་བྱ། སྟེགས་ཀྱི་ཁར་འབྲུ་ཚོམ་ལ་སྨན་རག་གཏོར་གསུམ་ཉེར་སྤྱོད་དང་བཅས་པ་བཤམས་ནས། ཞེས་གསུངས་ཡོད། བཀའ་གདམས་པའི་དགེ་བའི་བཤེས་གཉེན་ཚོས་གནས་ཁང་བྱི་དོར་འདི་རྩ་ཆེན་མཛད་པའི་ཕྱག་སྲོལ་ཡོད་པ་རེད། དགོན་སྡེ་དང་རི་ཁྲོད་གང་ཡིན་ཡང་། སྤྱི་ལ་དབང་བའི་གཙུག་ལག་ཁང་ངམ། སྒེར་ལ་དབང་བའི་རང་གི་གནས་ཁང་ལྟ་བུ་གང་ཡིན་ནའང་། གནས་དེ་རུ་བསྡད་ནས་ངས་གཞུང་དང་བླ་མའི་མན་ངག་ལ་བསྟེན་ནས་ལས་ཀ་གཞན་ཐམས་ཅད་བསྐྱུར་ཏེ། གཞན་དོན་དུ་རྫོགས་པའི་བྱང་ཆུབ་སྒྲུབ་པར་བྱེད་དགོས་པ་ཡིན། དེའི་ཆེད་དུ་བླ་མ་རྒྱལ་བ་སྲས་དང་བཅས་པ་ཚོགས་ཞིང་ལ་བཞུགས་པའི་གནས་འདི་གཙང་མ་ཞིག་བྱེད་པའི་ཆེད་ཕྱག་དར་ཞིག་བྱེད་སྙམ་པའི་འཕེན་པ་སྔོན་དུ་བཏང་ནས་ཕྱགས་དར་བྱེད་དགོས་པ་རེད། འདི་མི་འདོད་བཞིན་དུ་ཉི་མ་གནམ་ལ་མ་ཤར་ན་མ་གཏོགས་ལས་དགོས་རྒྱུའི་ཁྲལ་ཞིག་རེད། ཨ་རོ་ཤོ། ༼ཁ་སྐད་དུ་ཐང་ཆད་པའི་དོན།༽ དཀའ་འོ་མི་བསམ་པར། རང་རྒྱུད་ཀྱི་སྡིག་སྒྲིབ་སྦྱང་བ་དང་། རང་གཞན་གྱི་སེམས་དང་ཡིད་སྤྲོ་བའི་དགོས་པ་ལ་དམིགས་ནས། རྫབ་ངན་བྱས་ནས་མི་འདུག་པར་རྡུལ་ཕྱགས་གཙང་མ་ཞིག་བྱས་ཏེ་དྲི་ཞིམ་པོ་ཞིག་བདུགས་ནས་སུས་བལྟས་ཀྱང་ཁམས་དྭངས་སང་ངེ་ཡོད་པ་ཞིག་བྱེད་དགོས། སྔར་བཀའ་གདམས་པའི་དགེ་བའི་བཤེས་གཉེན་ཞིག་གིས་སྤང་སྤོས་སྣ་ཚ་བ་ཞིག་ཐབ་ལ་བཏབ་ནས་ཙན་དན་དུ་རུ་ཀ་དང་ཨ་ཀ་རུ་ཞེས་ཟེར་ནས་རྒྱལ་བ་སྲས་བཅས་དབུ་གཡོག་རྒྱུ་ཡོད་སྲིད་དམ་ཞེས་གསུངས་པ་ལྟར་རེད། ལུས་དང་ཁོར་ཡུག་གི་གཙང་སྦྲ་ནི་བཅོམ་ལྡན་འདས་ཀྱི་བཀའ་དགོངས་འགྲེལ་དང་བཅས་པའི་ནང་དུ་གསུངས་ཡོད་པ་རེད། གདོང་དང་སོ་ཡི་དྲི་བཀྲུས་ནས། །རྫོགས་སངས་རྒྱས་ལ་གུས་ཕྱག་འཚལ། ཞེས་གསུངས་ཡོད་པ་མ་ཡིན་ནམ། དགེ་ཚུལ་སློང་ཚོས་ལུས་པོ་བཀྲུ་བའི་དུས་ཚོད་ཀྱང་གསུངས་ཡོད་པ་རེད། དེས་མ་ཚད་གོས་བཀྲུ་དགོས་པ་དང་། གོས་བཀྲུ་བ་དེ་མི་གཞན་ལ་སྤྲད་ཚེ་མི་སུ་འདྲ་བ་ལ་འཁྲུར་འཇུག་རུང་། སུ་དང་སུ་འདྲ་ལ་འཁྲུར་འཇུག་མི་རུང་བ་སོགས་འདུལ་བའི་ནང་དུ་གསུངས་ཡོད་པ་ཡིན། དྲི་མ་ཕ་ལེ་ལྷ་ཁང་དང་མཆོད་ཁང་ཚང་མ་བཙོག་པ་གྱིས་དང་མི་སྐྱོན་ཞེས་གསུངས་ཡོད་པ་མ་རེད། ནཱ་ལེནྡྲའི་མཁན་པོ་རྒྱལ་འབྱུང་གི་རྐང་འགོ་ཕྱིན་ཅི་ལོག་ཏུ་སྐྱེས་པ་སྐྱེ་བ་སྔོན་མར་གཙུག་ལག་ཁང་གི་ནང་དུ་རྐང་པ་བཙོག་པ་དྲི་མ་ཅན་བྱས་ནས་སོང་བའི་རྣམ་སྨིན་ཡིན་ཞེས་གསུངས་མེད་དམ། དེ་ལྟ་བུ་རེད། སྤྱིར་གཙང་སྦྲ་བྱེད་དགོས་པ་རེད། གཞན་དག་གིས་ཁྱིའི་ལུས་པོ་བཀྲུ་བ་ཡིན་ན་འུ་ཅག་གིས་མི་རང་གི་ལུས་དང་གོས་མ་བཀྲུས་ན་བསོད་ནམས་ཅན་གྱི་གྲས་སུ་སུས་ཨེ་བརྩི་མི་ཤེས། ཨ་ལ་དེ་ཚོ་ཀུ་རེ་ཡིན། མདོར་ན་སྦྱོར་བ་གནས་ཁང་གཙང་སྦྲ་བྱས་ནས་མཆོད་པ་དེ་ཚོ་ཆེ་འབྱོར་ཆུང་འབྱོར་གྱིས་འབྱོར་ཚོད་དང་བསྟུན་པའི་དང་བ་འདྲེན་པ་ཞིག་བཤམ་དགོས་པ་རེད། སྤྱིར་ན་མཆོད་པ་མེད་ན་དད་པ་མེད་པའི་རྟགས་ཡིན་ཞེས་གསུངས་ཡོད། དད་པ་མེད་པའི་མི་ལ་དམ་པའི་ཆོས་ཀྱི་འབྲས་བུ་མི་འབྱུང་བ་ཡིན་པས། རང་ལ་དབང་བའི་ཡོ་བྱད་ཀྱི་སུམ་ཆ་གཅིག་མ་མཐར་བྱས་ཀྱང་མཆོད་པའི་ཕྱོགས་སུ་གཏོང་དགོས་ཞེས་གསུངས་ཡོད་པས། མདོར་ན་ཆོས་བརྒྱད་སྒྲུབ་པའི་བསམ་སྦྱོར་མ་ཡིན་པར་བླ་མ་དཀོན་མཆོག་གི་རྟེན་བཤམ། དེ་ལ་མཆོད་པ་འབུལ། ཁྱད་པར་དུ་འདིའི་སྐབས་སུ་སྒྲུབ་པ་ལ་འོས་པའི་དཀྱིལ་འཁོར་གྱི་མཆོད་པ་སྨན་གཏོར་རཀྟས་གཙོ་བོར་བྱས་པའི་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་བཤམ། འབྲུ་ཚོམ་གྱི་སྟེང་དུ་སྟེགས་ཀྱི་ཁ་ལ་སྒྲུབ་གཏོར་བུམ་པ་གསང་རྫས་ལ་སོགས་པ། ལ་སོགས་པ་ཞེས་པས་ཅི་ཞིག་བསྟན་ཞེ་ན། འཚོ་བ་ཟས་ཀྱི་ཡོ་བྱད། ནད་ཟློག་སྨན་གྱི་ཡོ་བྱད། དགྲ་ཟློག་མཚོན་གྱི་ཡོ་བྱད་ལ་སོགས་པ་རེད། མདོར་ན་དགོས་པའི་ཡོ་བྱད་མ་ཚང་བ་མེད་པར་འདུ་བྱས་ནས། གདན་གྱི་འོག་ཏུ་རྡོ་རྗེའི་རྒྱ་གྲམ་འབྲི་མི་རུང་ཕྱག་རྒྱ་ལ་སྨད་པའི་ཉེས་པ་འབྱུང་། གཡུང་དྲུང་བྲིས། རྩྭ་ཀུ་ཤ་སྟན་འོག་ཏུ་ཐིང་སོགས་གསུངས་ཡོད་པ་རེད། མདོར་ན་བདེ་བའི་མལ་ལ་བག་ཕབས་ནས་འདུག་པ་དང་། གཞི་བདག་ལ་གཏོར་མ་བཏང་ནས་འཕྲིན་བཅོལ་བྱ་རྒྱུ། བགེགས་བསྐྲད། མཚམས་ཐོ་བཅིང་། སྲུང་འཁོར་བསྒོམ་པ་ལ་སོགས་པ་སྦྱོར་བ་སྔོན་འགྲོའི་ཆོས་དང་། དངོས་གཞི་བསྐྱེད་རྫོགས་ཀྱི་གནད་ལ་བསྙེན་སྒྲུབ་ཡན་ལག་བཞི་ལྡན་གྱི་ཆོ་གའི་གཞུང་བསྲངས་ནས། རྗེས་དངོས་གྲུབ་ལེན་རྒྱུ་ལ་སོགས་པའི་རིམ་པ་མ་ནོར་མ་འཁྲུགས་པར་ཆ་ཚང་བ་རྟེན་འབྲེལ་དང་དགོས་པ་ཟབ་མོས་ཉམས་སུ་བླང་བར་བྱ་ཞེས་གསུངས། ས་མ་ཡཿ ཞེས་གསུངས་པ་འདི་ཟབ་མོ་དམ་ཚིག་གི་རྒྱ་མཚོན་བྱེད་རེད། དང་པོ་སྔོན་འགྲོ་སྦྱོར་བའི་ཆོས། ད་འདི་ནས་ཆོ་ག་དངོས་ལ་འཇུག་རན་པ་རེད། འདི་ལ་སྔོན་འགྲོ་དངོས་གཞི་རྗེས་ཀྱི་ས་བཅད་རྣམ་པ་གསུམ་བཞག་ཡོད་པ་ལས། དང་པོ་སྔོན་འགྲོའི་སྦྱོར་བ་ལཿ རྣམ་གྲངས་བདུན་ལས་དང་པོ་ནིཿ ཞེས་གསུངས་ན། འདིའི་སྔོན་འགྲོ་སྦྱོར་བའི་ཆོས་ལའང་ནང་གསེས་ཀྱི་དོན་ཚན་བདུན་ཡོད་གསུངས། རྣམ་གྲངས་བདུན་པོ་དེ་གང་རེད་ཅེ་ན། སྐྱབས་འགྲོ། སེམས་བསྐྱེད། བསགས་སྦྱང་གི་གནད་བསྡུས་པ་ཡན་ལག་བདུན་པ། དཀྱིལ་འཁོར་དུ་འདུ་བར་མི་རུང་བའི་བགེགས་ལ་བཀའ་བསྒོ་བ། སྲུང་འཁོར་བསྒོམ་པ། བྱིན་འབེབ། མཆོད་རྫས་བྱིན་བརླབ་སྟེ། འདི་དག་ཚང་མ་ཡིག་ཆུང་གི་ནང་ལ་ཡོད་པ་ཇི་བཞིན་རེད། དང་པོ་སྐྱབས་འགྲོ། དེ་དག་ལས་དང་པོ། མདུན་མཁར་ཚོགས་ཞིང་གསལ་བཏབ་སྟེཿ ཁྱེད་ཤེས་དད་པས་སྐྱབས་སུ་འགྲོཿ ཞེས་གསུངས་ན། དེ་ཡང་བསྙེན་ཡིག་གི་ནང་དུ། ཐུན་མོང་གི་སྔོན་འགྲོས་རྒྱུད་ལེགས་པར་སྦྱངས། བླ་མའི་རྣལ་འབྱོར་གྱི་མཐར་དབང་བཞི་བླང་བ་ལ་ནན་ཏན་བྱས་པས་ཉམས་ཆག་དག་ཅིང་སྒྲུབ་པ་མཐར་ཕྱིན་པ་ཡིན། ཞེས་གསུངས། འདི་དག་རང་རེའི་རྒྱུན་གྱི་ཉམས་ལེན་ཆག་མེད་དང་མཐུན་པ་རེད། དེ་ཡང་སྐྱབས་སུ་འགྲོ་ཡུལ་མདུན་གྱི་ནམ་མཁར་ཚོགས་ཞིང་བསྒོམ་པ་སྙིང་ཐིག་རང་གཞུང་དང་ཆོས་བརྒྱུད་རང་གི་དུས་རྒྱུན་གྱི་ཉམས་ལེན་ལྟར་ཚོགས་ཞིང་གསལ་འདེབས་དང་བཅས་ཏེ། ཡིད་ཁྱེད་ཤེས་ཀྱི་དད་པས་རེ་ལྟོས་ལིང་བསྐྱུར་བྱེད་པ་འདིའི་སྐྱབས་སེམས་ཀྱི་སྐབས་ལའང་དེ་བཞིན་དགོས་པ་རེད། འདིའི་སྔོན་དུ་ཚོགས་ཞིང་སད་པའི་ཚིག ས་མ་ཡའི་སྔགས་རྒྱ་དང་བཅས་པས་ཚོགས་ཞིང་གི་དམིགས་པ་གསལ་འདེབས་བྱེད་པར། རང་གི་སྙིང་ཁའི་ཧཱུྃ་གི་འོད་ཟེར་གྱིས་རང་བཞིན་གྱི་གནས་ནས་བླ་མ་དང་གཉིས་སུ་མེད་པ་རིག་འདུས་མ་ཧཱ་གུ་རུའི་དཀྱིལ་འཁོར་གྱིི་ལྷ་ཚོགས་ལ་ཕྱོགས་བཅུ་དུས་བཞིའི་སྐྱབས་ཡུལ་མ་ཚང་བ་མེད་པས་བསྐོར་བ་མདུན་གྱི་ནམ་མཁར་བཛྲ་ས་མ་ཡ་ཛཿ ཞེས་གསུངས་པ་ལྟར་ཡིན་པས། འདི་ཉིད་སྐད་ཅིག་དྲན་རྫོགས་ཀྱི་བསྐྱེད་རིམ་ཀྲོང་བསྐྱེད་དང་ཡང་སྒོ་མཐུན་པ་ཡིན། གསང་སྔགས་སྒྲུབ་ཐབས་ཀྱི་ཆོ་གའི་འགྲོས་འདི་དག་ཕར་ཕྱིན་ཐེག་པ་དང་ཆོས་མཚུངས་སྦྱར་ན། ཐོག་མར་སྐྱབས་འགྲོ་སེམས་བསྐྱེད་བྱེད་པ་འདི་བྱང་ཆུབ་མཆོག་ཏུ་སེམས་བསྐྱེད་པ་དང་ཆོས་མཚུངས། དེ་ནས་ཡག་ལག་བདུན་པ་དང་མཎྜལ་འབུལ་བ་འདི་དག་བསྐལ་བ་གྲངས་མེད་གསུམ་ལ་ཚོགས་བསགས་པ་དང་འདྲ། བགེགས་བསྐྲད་སྲུང་འཁོར་སྒོམ་པ་འདི་སྲོད་ལ་བདུད་བཏུལ་བ་སོགས་ཀྱི་ཆོས་མཚུངས་མང་པོ་སྦྱར་དུ་ཡོད་པ་རེད། དེ་ཡང་ཁྱེད་ཤེས་དད་པས་སྐྱབས་སུ་འགྲོ་ཞེས་གོང་ནས་ཞུས་པ་ལྟར་དད་པ་མོས་གུས་ཀྱི་སྒོ་ནས་སྐྱབས་སུ་འགྲོ་བ་འདི་བྱ་སྟེ། ན་མོཿ བདག་དང་མཐའ་ཡས་སེམས་ཅན་ཀུནཿ མཆོག་གསུམ་ངོ་བོ་བླ་མ་དངཿ རིག་འཛིན་རྒྱ་མཚོའི་དཀྱིལ་འཁོར་ལཿ སྙིང་ནས་དད་པས་སྐྱབས་སུ་མཆིཿ ཞེས་གསུངས་ཏེ། ན་མོ་ཞེས་པ་ཕྱག་འཚལ་བའི་ཚིག་རེད། ཕྱག་འཚལ་བའམ་གུས་པས་འདུད་པའི་ཚིག་གིས་སྐྱབས་འགྲོའི་ཚིག་གི་འགོ་བླངས་ཏེ། བདག་སྒྲུབ་པ་པོ་གསང་སྔགས་ཀྱི་དཀྱིལ་འཁོར་དུ་ཞུགས་ནས་འབྲས་བུ་རིག་འཛིན་བཞིའི་གོ་འཕང་བསྒྲུབས་ཏེ་མར་གྱུར་མཐའ་ཡས་ཀྱི་སེམས་ཅན་ཐམས་ཅད། མ་འཁྲུལ་གཞི་ཡི་གཏན་སྲིད་ཟིན་པར་བྱ་བའི་ཆེད་དུ། བདག་དང་མཐའ་ཡས་པའི་སེམས་ཅན་ཀུན་མཆོག་གསུམ་རྩ་གསུམ་ཀུན་འདུས་ཀྱི་ངོ་བོ་བླ་མ་དང་ཞེས་གསུངས་ན། བླ་མ་ནི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཏེ་མཆོག་གསུམ་འདུས་པའི་བདག་ཉིད་ཡིན་ཞིང་། ཁྱད་པར་དུ་གསང་སྔགས་ཟབ་མོའི་དངོས་གྲུབ་ཐམས་ཅད་བླ་མ་ལ་བསྟེན་ནས་འབྱུང་། ཡང་སྒོས་སུ་ལྟ་བ་ཆོས་ཉིད་ཀྱི་རྫོང་། ཚིག་དང་དཔེ་ལས་འདས་པའི་དོན་གྱི་ཡེ་ཤེས་ཏེ། དོན་དམ་ལྷན་ཅིག་སྐྱེས་པའི་ཡེ་ཤེས་ཉིད་བླ་མའི་མན་ངག་གིས་ངོ་སྤྲད་པའམ། དོན་བརྒྱུད་ཀྱི་བྱིན་རླབས་འཕོ་བ་ཁོ་ནས་མ་གཏོགས་ཐབས་གཞན་ལ་བརྟེན་ནས་འབྱུང་ཐབས་མེད་པ་ཡིན་ཏེ། དོན་དམ་ལྷན་ཅིག་སྐྱེས་པའི་ཡེ་ཤེས་ནི། །ཚོགས་བསགས་སྒྲིབ་པ་སྦྱངས་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བསྟེན་པ་རྨོངས་པར་ཤེས་པར་བྱ། ཞེས་གསུངས་པ་ལྟར་ཡིན། སྤྱིར་ཕྱོགས་དུས་ཀྱི་རྒྱལ་བ་སྲས་བཅས་བཞུགས་བཞིན་པ་རེད་ལ། སེམས་ཅན་ལ་བརྩེ་བ་ཆེན་པོའི་ཐུགས་རྗེས་ཀྱང་ཁྱབ་པ་རེད། འོན་ཀྱང་བླ་མ་མེད་ན་སློབ་མའི་རྒྱུད་ལ་བྱིན་རླབས་དང་ཟབ་མོའི་རྟོགས་པ་ཁྱད་པར་ཅན་རང་གར་འཇུག་པ་མིན་པས། དེའི་ཕྱིར་ན་བྱིན་རླབས་ཀྱི་རྩ་བ། དངོས་གྲུབ་ཀྱི་འབྱུང་གནས། འཕྲིན་ལས་ཀྱི་གཞི་མ་ཐམས་ཅད་བླ་མ་ཡིན་པས་ན་བླ་མ་དང་ཞེས་གསུངས། རིག་འཛིན་ཞེས་གསུངས་པ་བིདྱཱ་དྷ་རའི་སྒྲ་ལས་དྲངས་ན་བིདྱཱ་རིག་པ་སྟེ། ཤེས་རབ་ཡེ་ཤེས་ཀྱི་བདག་ཉིད་ཅན་སྔགས་ཀྱི་དེ་ཁོ་ན་ཉིད་ལ་གོ་དགོས། དྷ་ར་ཞེས་པ་འཛིན་པའམ་འཆང་བའི་དོན་ཅན་རེད། དེ་ལྟ་བུའི་དོན་རང་རྒྱུད་ལ་འཆང་ཞིང་ལྡན་པ་སྟེ། སྐབས་འདིར་བསྟན་རིག་འཛིན་རྣམ་པ་བཞིའི་ས་ལ་བཞུགས་པའི་སྔགས་རྒྱུད་རྒྱ་མཚོ་ལྟ་བུ་ནས་ཇི་ལྟར་བྱུང་བའི་རབ་འབྱམས་རྡུལ་སྙེད་གྲངས་འདས་ཀྱི་དཀྱིལ་འཁོར་ལ་སྙིང་ནས་དང་འདོད་ཡིད་ཆེས་དང་ཁྱད་པར་དུ་ཕྱིར་མི་ལྡོག་པའི་དད་པས་སྐྱབས་སུ་མཆི་ཞེས་གསུངས། ལན་གསུམཿ བསྐྱར་དགོས་གསུངས་པ་རེད། དེ་ལ་ཆོ་ག་ཐམས་ཅད་ཀྱི་འགོར་སྐྱབས་འགྲོ་འབྱུང་བའི་དགོས་པ་ཅི་རེད་ཅེ་ན། དཔལ་སྤྲུལ་རིན་པོ་ཆེས། ཆོས་རྣམ་ཀུན་ཀྱི་གཞི་རྟེན་སྐྱབས་འགྲོ་སྟེ། །སྐྱབས་འགྲོ་མེད་ན་ཐེག་དགུའི་ཆོས་ཤེས་ཀྱང་། །མི་སྟེགས་ཕྱི་བའི་གཞུང་དང་ཁྱད་པར་མེད། །དེ་ཕྱིར་སྐྱབས་འགྲོ་ཆོས་ཀྱི་རྟེན་གཞིར་ཟུངས། ཞེས་གསུངས་པ་བཞིན་རེད། གཉིས་པ་སེམས་བསྐྱེད། གཉིས་པ་སེམས་བསྐྱེད་ནིཿ ཞེས་གསུངས་ན། སེམས་བསྐྱེད་ཀྱང་དེ་བཞིན་དུ་ཐེག་ཆེན་མདོ་སྔགས་ཀྱི་ཆོས་ཐམས་ཅད་ཀྱི་གཞུང་རྟ་གནད་ཆེན་ཡིན་པ་སྟེ། དེ་ཡང་། རྒྱལ་དང་སྲས་བཅས་ཀུན་ཀྱི་བགྲོད་གཅིག་ལམ། །ཐེག་ཆེན་ལམ་གྱི་བློ་སྦྱང་འདི་ཡིན་ཏེ། །བྱང་ཆུབ་སེམས་མཆོག་ཡིད་བཞིན་རིན་པོ་ཆེ། །འདི་ལ་མ་བརྟེན་རྫོགས་པའི་སངས་རྒྱས་མེད། ཅེས་གསུངས་པ་ལྟར་རེད། འདི་ནས་སེམས་ཇི་ལྟར་བསྐྱེད་པ་རེད་ཅེ་ན། ཧོཿ རིག་འཛིན་དཀྱིལ་འཁོར་འདིར་ཞུགས་ནསཿ ཕ་མ་འགྲོ་དྲུག་སེམས་ཅན་ཀུནཿ ཚད་མེད་སྙིང་རྗེས་སྒྲོལ་བའི་ཕྱིརཿ སྨོན་འཇུག་དོན་དམ་བྱང་སེམས་བསྐྱེདཿ ཅེས་གསུངས་ཏེ། ཧོཿཞེས་གསུངས་པ་དེ་ངོ་མཚར་བའི་ཚིག་ཡིན་པ་རེད། ཅི་ཞིག་ལ་ངོ་མཚར་བ་རེད་ཅེ་ན། སྨོན་པ་དང་འཇུག་པའི་བདག་ཉིད་ཅན་གྱི་ཀུན་རྫོབ་བྱང་ཆུབ་མཆོག་ཏུ་སེམས་བསྐྱེད་ནས། སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཏུ་འགོད་པར་བྱེད་པའི་རླབས་ཆེན་གྱི་སྤྱོད་པ་ལ་འཇུག་པར་ངོ་མཚར་བ་དང་། གཞན་ཡང་དོན་དམ་བྱང་ཆུབ་མཆོག་ཏུ་སེམས་བསྐྱེད་དེ་རང་རིག་གདོད་ནས་དག་པའི་རང་བྱུང་གི་ཡེ་ཤེས་འོད་གསལ་བསམ་གྱིས་མི་ཁྱབ་པ་དང་རང་ཞལ་མཇལ་བ་ལ་ངོ་མཚར་ནས། རིག་འཛིན་དཀྱིལ་འཁོར་འདིར་ཞུགས་ནསཿ ཞེས་གསུངས་ན། རིག་འཛིན་སྔགས་ཀྱི་གསང་བའི་དཀྱིལ་འཁོར་ཆེན་པོ་འདིར་ཞུགས་ནས། ཕ་མ་འགྲོ་དྲུག་སེམས་ཅན་ཀུན་ཅེས་ཕ་མར་གྱུར་བའི་འགྲོ་དྲུག་ཁམས་གསུམ་ན་རྒྱུ་བའི་སེམས་ཅན་ཐམས་ཅད། ཚད་མེད་སྙིང་རྗེས་སྒྲོལ་བའི་ཕྱིར་ཞེས། དབྱེ་ན་ཚད་མེད་བཞི་དང་བསྡུས་ན་བྱམས་སྙིང་རྗེ་གཉིས། དེ་ཡང་བསྡུས་ན་ཚད་མེད་པའི་སྙིང་རྗེ་ཆེན་པོས་མཐའ་ཡས་སེམས་ཅན་འཁོར་བའི་མཚོ་ལས་མ་བསྒྲལ་བ་སྒྲོལ་བའི་ཕྱིར་ཞེས་གསུངས། སྙིང་རྗེ་དེ་ཉིད་ཐོག་མ་དང་བར་དང་ཐ་མ་ན་མེད་ཐབས་མེད་པ་སྟེ། དེ་ཡང་འཇུག་པ་ལས། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདིའི། །ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ། །ལོངས་སྤྱོད་གནས་ལ་སྨིན་པ་ལྟ་བུར་འདོད་གྱུར་བ། །དེ་ཕྱིར་བདག་གིས་ཐོག་མར་སྙིང་རྗེར་བསྟོད་པར་བགྱི། ཞེས་གསུངས་པ་ལྟར། ཐོག་མར་བྱང་ཆུབ་མཆོག་ཏུ་སེམས་བསྐྱེད་པ་ནས་རྒྱལ་བའི་མཛད་པ་མཐར་དབྱུང་བ་ལ་མེད་ཐབས་མེད་པ་ཡིན། སྨོན་འཇུག་དོན་དམ་བྱང་སེམས་བསྐྱེད་ཅེས་གསུངས་པས། དེ་ལྟ་བུའི་སྙིང་རྗེས་དྲངས་པའི་སྨོན་འཇུག་གི་ཐབས་ཁྱད་པར་ཅན་དང་ཤེས་རབ་སྟོང་པ་ཉིད་དོན་དམ་ལྷན་ཅིག་སྐྱེས་པའི་ཡེ་ཤེས། བདག་མེད་རྣམ་པ་གཉིས་མངོན་དུ་བྱས་པའི་སྤྲོས་བྲལ་བསམ་གྱིས་མི་ཁྱབ་པའི་ཡེ་ཤེས། ཟུང་འཇུག་རྡོ་རྗེ་འཆང་གི་གོ་འཕང་ལ་འགྲོ་ཀུན་འགོད་པར་དམ་བཅའ་བའི་སེམས་བསྐྱེད་དེ་ཉིད། ལན་གསུམཿ བསྐྱར་དགོས་པ་རེད། གསུམ་པ་ཚོགས་གསོག གསུམ་པ་ཚོགས་གསོག་ནིཿ ཞེས་གསུངས། འདི་ཡན་ལག་བདུན་པ་ཞིག་རེད། ཡག་ལག་བདུན་པོ་བསྡུས་ན་བསགས་སྦྱང་གཉིས་ཏེ་ཚོགས་བསགས་སྒྲིབ་སྦྱང་གཉིས་ཀྱི་ཁོངས་སུ་འདུས་པ་རེད། འདི་ནས་ཚོགས་བསགས་རྐྱང་པ་གསུངས་རྒྱུ་འདི་གཙོ་ཆེ་བ་དང་ཁྱབ་ཆེ་བའི་དབང་གིས་བརྗོད་བདེའི་ཚུལ་དུ་གསུངས་པའམ། རྣམ་པ་གཅིག་ཏུ་ན་བསགས་སྦྱང་གི་གནད་ཐམས་ཅད་ཚོགས་གཉིས་བསགས་པའི་ནང་དུ་འདུས་པས་ན་ཚོགས་བསགས་ནི་ཞེས་གསུངས་པ་ཡིན་སྙམ། ཡང་། ཧོཿ ཞེས་གསུངས་ན། ཧོ་ཞེས་པ་ངོ་མཚར་བའི་ཚིག་རེད། འདི་ལ་ཇི་ལྟར་ངོ་མཚར་བ་རེད་ཅེ་ན། འདི་ཉིད་ཡང་གསང་མན་ངག་སྡེའི་ལྷུན་གྲུབ་ཐོད་རྒལ་དང་སྦྱར་ནས་གསུངས་པ་སྟེ། སྣང་བཞི་མཐར་ཕྱིན་ཟད་པའི་སར་ཐུག་ནས་བློ་ཟད་ཆོས་ཟད་གདོད་མའི་དབྱིངས་སུ་ཀུན་ཏུ་བཟང་པོ་དང་གཉིས་སུ་མ་ཡིན་ཐ་མི་དད་པར་འཕོ་ཆེན་གྱི་སྐུར་བཞེངས་ནས། མི་འདའ་རྟག་པར་ཆོས་འཁོར་བསྐོར་ནས་མཐའ་ཡས་སེམས་ཅན་གྱི་དོན་མཛད་པར་ངོ་མཚར་བ་རེད། ཆུ་ལས་ཆུ་བུར་ཇི་བཞིན་དུཿ ཡེ་ཤེས་དབྱིངས་ལས་སྤྲུལ་པའི་ལྷརཿ མངོན་སུམ་རིག་པས་ཕྱག་འཚལ་ལོཿ ཞེས་གསུངས་ཏེ། དེ་ཡང་ལྷུན་གྲུབ་སྣང་སྟོང་གི་ཟབ་མོའི་བསྐྱེད་རིམ་དང་སྦྱར་ན། འདི་ཨ་ཏི་ཡོ་གའི་སྤྲོས་མེད་ཀྱི་བསྐྱེད་རིམ་དང་སྒོ་བསྟུན་ཏེ། རིག་པ་ཡེ་ཤེས་ཀྱི་རྩལ་སྣང་ཡེ་ནས་ལྷའི་འཁོར་ལོ་ཡིན་པ་ལ། སྐད་ཅིག་དྲན་རྫོགས་ཀྱིས་ཆུ་ལས་ཆུ་བུར་བརྡོལ་བའམ་ཆུ་ལས་ཉ་ལྡང་བ་ལྟར་རིག་པའི་རྩལ་དེ་ཉིད་དམ་ཡེ་དབྱེར་མེད་ལྷུན་གྲུབ་ཀྱི་ལྷར་སྣང་བའམ། ཡེ་ཤེས་ཀྱི་དབྱིངས་ལས་སྤྲུལ་པའི་ལྷར་སྣང་བ་ལ། དེ་ལྟར་ཡིན་པར་ཤེས་པའི་ཆོས་ཉིད་ལྟ་བའི་ལྟ་བ་མངོན་སུམ་ཡིད་དཔྱོད་དུ་མ་ལུས་པར་རབ་ལྟ་བ་མཇལ་བའི་སྒོ་ནས་ཕྱག་འཚལ་ལོ་ཞེས་གསུངས་པ་རེད། ཡེ་ཤེས་དབྱིངས་ལས་སྤྲུལ་པའི་ལྷར་ཞེས་གསུངས་པའི་ལྷ་འདི་ལ་སྤྱིར་ཆོས་ཉིད་དོན་གྱི་ལྷ། ཡེ་ཤེས་ཕྱག་རྒྱའི་ལྷ། མཚན་མ་རྟགས་ཀྱི་ལྷ་སྟེ་གསུམ་དུ་ཕྱེས་ཀྱང་ཆོག གཞན་ཡང་ཆོས་ཉིད་དོན་གྱི་ལྷ་དང་ཆོས་ཅན་རྟགས་ཀྱི་ལྷ་སྟེ་གཉིས་སུ་དབྱེར་ཡོད་པ་ལས་འདིའི་སྐབས་སུ་ཆོས་ཉིད་དོན་གྱི་ལྷ་དེ་ཉིད་ཆོས་ཅན་རྣམ་པ་རྟགས་ཀྱི་ཕྱག་རྒྱར་ཤར་བ་ལ་གོ་དགོས། མངོན་སུམ་རིག་པས་ཕྱག་འཚལ་ལོཿ ཞེས་གསུངས། ཕྱག་འཚལ་བའི་ཡན་ལག་འདི་ཆོས་ཉིད་མངོན་སུམ་དང་སྦྱར་ནས་གསུངས་པ་རེད། འདིའི་མངོན་སུམ་འདི་དཔེ་དོན་གཉིས་ཀའི་ནང་ནས་དཔེའི་ཡེ་ཤེས་ལ་གོ་དགོས། དཔེའི་ཡེ་ཤེས་དེ་ལ་ཡང་ཙམ་ཁྱད་གཉིས་ཀྱི་དབྱེ་བ་ཕྱེས་ན། དཔེར་ན་ཟླ་གཟུགས་ཤོག་ངོས་སུ་རི་མོར་བྲིས་པ་དང་ཟླ་གཟུགས་ཆུ་ནང་དུ་ཤར་བ་ལྟ་བུ་རེད། འདི་གཉིས་ཀ་དཔེའི་ཡེ་ཤེས་ཡིན་པར་འདྲ་ཡང་། ཟླ་གཟུགས་ཤོག་གུའི་སྟེང་དུ་བྲིས་པ་ལས་ཆུ་ནང་དུ་ཟླ་གཟུགས་ངོ་མ་ཤར་བ་དེ་ཉིད་དངོས་དང་ཉེ་བའི་སྟབས་ཀྱིས་ཙམ་པོ་བ་དང་ཁྱད་པར་བ་ཡི་དབྱེ་བ་ཕྱེས་པ་རེད། ཉམས་སྣང་གོང་འཕེལ་མཆོད་པ་འབུལཿ རིག་པ་ཚད་ཕེབས་ངང་དུ་བཤགསཿ ཆོས་ཉིད་ཟད་ལ་རྗེས་ཡི་རངཿ འཕོ་ཆེན་ཀློང་ནས་ཆོས་འཁོར་བསྐོརཿ འཇའ་ལུས་ཆེན་པོར་བཞུགས་གསོལ་འདེབསཿ དགེ་ཚོགས་གཞོན་ནུ་བུམ་སྐུར་བསྔོཿ ཞེས་གསུངས་ནས། ཚིག་རེར་ཡན་ལག་གཞན་པ་རྣམས་རེ་རེ་བཞིན་སྦྱར་མཛད་ནས་སྣང་བ་གོང་མ་གསུམ་བསྟན་པ་རེད། ཉམས་གོང་འཕེལ་གྱིས་ཕྱིའི་འོད་གསལ་གྱི་འཇའ་ཐིག་ཟེར་མདངས་ཀྱི་རྣམ་པ་མངོན་སུམ་དབང་པོའི་མཐོང་སྣང་དུ་འཕེལ་བ་དང་ཆབས་ཅིག རྣལ་འབྱོར་པའི་ནང་རིག་པའི་འོད་གསལ་ཏིང་ངེ་འཛིན་དང་སྤྱན་དང་མངོན་ཤེས་ཤར་བ་མཆོད་པར་འབུལ་བ་དང་། རིག་པ་ཚད་ཕེབས་སུ་མ་དག་པའི་སྣང་བ་འགག་ནས་ལོངས་སྐུའི་ཞིང་སྣང་རྫོགས་པས་ན། མ་དག་སྡིག་ལྟུང་མི་དམིགས་ཆོས་དབྱིངས་སུ་དག་ཅིང་བཤགས་ནས། ཆོས་ཉིད་ཟད་པའི་གནས་སྐབས་སུ་ཡར་གྱི་གདེང་གཉིས་དང་མར་གྱི་གདེང་གཉིས་ཏེ་གདེང་བཞི་ཐོབ་ནས། ཀ་དག་སྤྲིན་མེད་ནམ་མཁའ་ལྟ་བུའི་ངང་དུ་བྱ་རྩོལ་བློས་བྱས་ཀྱི་ཆོས་ཐམས་ཅད་ཟད་པས་ཡི་རང་དང་བཅས་ཏེ། རང་ལུས་མེ་ལོང་གི་གཟུགས་བརྙན་ལྟར་འཕོ་ཆེན་སྒྱུ་མའི་སྐུར་ལྡང་ཞིང་། བསྐལ་བ་མ་ཞིག་འཁོར་བ་མ་སྟོང་གི་བར་དུ་རྫོགས་པ་ཆེན་པོའི་ཆོས་འཁོར་བརྗོད་བྲལ་བློ་འདས་ཀྱི་ངང་ནས་བསྐོར་བཞིན། འཇའ་ལུས་འཕོ་བ་ཆེན་པོའི་སྐུར་མི་འདའ་རྟག་པར་བཞུགས་གསོལ་འདེབས་པ་དང་བཅས་ཏེ། དེ་ལྟ་བུའི་ཟག་མེད་ཀྱི་དགེ་ཚོགས་ཇི་སྙེད་མཆིས་པ་དེ་ཐམས་ཅད་ནང་གསལ་གཞོན་ནུ་བུམ་སྐུ་འབྲས་བུ་ལྷུན་གྲུབ་རིན་པོ་ཆེའི་སྦུབས་སུ་མངོན་འཚང་རྒྱ་བར། གང་བསྔོ་བྱ་བསྔོ་བྱེད་བསྔོ་ཡུལ་དང་བྲལ་བ་དམིགས་པ་མེད་པ་མི་བསྔོ་བའི་བསྔོ་བས་ཡོངས་སུ་བསྔོ་ཞེས་གསུངས་པ་རེད། འོན་ཀྱང་དབང་པོ་ཡང་རབ་རྫོགས་ཆེན་ཐོད་རྒལ་གྱི་དགོངས་པ་ཀློང་དུ་ཆུད་མཁན་ཤ་སྟག་མིན། ལྷུན་གྲུབ་སྣང་སྟོང་གི་ཟབ་མོའི་བསྐྱེད་རིམ་ལ་གོམས་ཆ་དེ་ཙམ་ཞིག་མེད་ཀྱང་། ལས་དང་པོ་པ་མོས་པས་སྤྱོད་པ་ཐམས་ཅད་ཀྱིས་ཚོགས་བསགས་སྒྲིབ་སྦྱང་སོགས་འདུན་པ་སྤྱི་ལྟར་དུ་བཟུང་ནའང་ཆོག་པ་རེད། ཚོགས་བསགས་ཀྱི་དགོས་པ་ནི། གཟུགས་སྐུའི་ཐུན་མོང་མ་ཡིན་པའི་བདག་རྐྱེན་བསོད་ནམས་ཀྱི་ཚོགས་དང་། ཡེ་ཤེས་ཆོས་སྐུའི་ཐུན་མོང་མ་ཡིན་པའི་བདག་རྐྱེན་ཡེ་ཤེས་ཀྱི་ཚོགས་ཡིན་པ་རེད། ཇི་སྲིད་ཚོགས་གཉིས་དམ་པ་དེ་ནི་མ་རྫོགས་པར། །དེ་སྲིད་སྐུ་གཉིས་དམ་པ་དེ་ནི་འཐོབ་མི་འགྱུར། ཞེས་གསུངས་པ་ལྟར་རེད། དེ་ལྟར་ཡན་ལག་བདུན་པ་སོང་ཚར་བའི་རྗེས་སུ། ཚོགས་ཞིང་མདུན་མཁར་སད་པ་རང་ལ་བསྟིམ་ཡང་རུང་སྟེ་གང་ལྟར་ཐུགས་ཡིད་དབྱེར་མེད་དུ་འདྲེས་པའི་ངང་ནས། རང་ཉིད་གཉུག་མའི་ལྷའི་ང་རྒྱལ་དང་ལྡན་པས། འདིར་རྡོར་དྲིལ་བྱིན་རླབས་དང་དཀར་བགེགས་བྱིན་རླབས་ལ་ཐུག་པ་རེད། དེ་ཡང་གསང་སྔགས་ཀྱི་བཅང་པའི་དམ་ཚིག་རྡོར་དྲིལ་འདི་དག་སྤྱིར་བཏང་གི་ཉེར་སྤྱོད་མཁོ་ཆས་ཀྱི་ཅ་ལག་ཞིག་ལ་མི་བརྩི་བར། དག་དྲན་དང་ཇི་ལྟར་མཚོན་པ་ཡིན་པ་སོགས་ཅིས་ཀྱང་མཁྱེན་དགོས་པ་རེད། འུ་ཅག་གི་རྡོར་དྲིལ་གྱི་རྡོ་རྗེ་ནི། མཚོན་བྱ་དོན་གྱི་རྡོ་རྗེ་དབྱིངས་དང་ཡེ་ཤེས་སྣང་བ་དང་སྟོང་པ་གཉིས་སུ་མེད་ཅིང་འཇིག་འདྲལ་མེད་པ། རྒྱུད་ལས། སྲ་ཞིང་སྙིང་པོ་ཁེང་སྟོང་མེད། །བསྐྱེད་དང་གཞིག་པར་བྱ་བ་མེད། །བསྲེག་པར་བྱར་མེད་འཇིག་མེད་པས། །སྟོང་ཉིད་རྡོ་རྗེས་གཅོད་པར་བྱ། ཞེས་གསུངས་པ་ལྟར། མཚོན་བྱ་དོན་གྱི་རྡོ་རྗེ་དེས་སྒྲིབ་པ་ཐམས་ཅད་ཕར་འཇོམ་པ་ཡིན་ཞིང་། ཚུར་ལ་གཅིག་གིས་ཀྱང་གནོད་པ་མིན། འུ་ཅག་སྔགས་ལ་ཞུགས་པའི་རྟེན་ཅན་གྱིས་དམ་ཚིག་གི་རྟེན་དུ་མཚོན་བྱ་དོན་གྱི་རྡོ་རྗེ་དེ་ཉིད་མཚོན་པའི་མཚོན་བྱེད་རྟགས་ཀྱི་རྡོ་རྗེ་འདི་འཆང་དགོས་པ་རེད། དེ་ལྟ་བུའི་རྒྱལ་བའི་ཐུགས་དང་གཉིས་སུ་མེད་པའི་ཡེ་ཤེས་མཚོན་པར་བྱེད་པའི་མཚོན་བྱེད་རྟགས་ཀྱི་རྡོ་རྗེ་ལ་རྡོ་རྗེ་རྩེ་གཅིག རྩེ་གསུམ། རྩེ་ལྔ། རྩེ་དགུ་ལ་སོགས་པའི་རྣམ་གྲངས་རྒྱུད་སོ་སོ་ལས་མང་དུ་འབྱུང་ཡང་། ཡོངས་གྲགས་སུ་རྩེ་ལྔ་པ་ལ་དམ་ཚིག་གི་རྡོ་རྗེ་ཞེས་ཟེར། རྩེ་མོ་དགུ་བ་འདི་ཡེ་ཤེས་ཀྱི་རྡོ་རྗེ་ཡིན་པ་རེད། རྩེ་ལྔ་བ་ཅན་གྱི་སྟེང་གི་རྭ་ལྔ་རྒྱལ་བ་རིགས་ལྔ་དང་འོག་གི་རྭ་ལྔ་དབྱིངས་ཕྱུག་ཡུམ་ལྔ་མཚོན་བྱེད་རེད། སྟེང་གི་པད་འདབ་བརྒྱད་འཕགས་ལམ་ཡན་ལག་བརྒྱད་ཀྱི་རང་བཞིན་བྱང་ཆུབ་སེམས་དཔའ་བརྒྱད་དང་། འོག་གི་པད་འདབ་བརྒྱད་བྱང་ཆུབ་སེམས་མ་བརྒྱད་ཀྱི་མཚོན་བྱེད་ཡིན་པ་རེད། རྭ་དགུ་ཡོད་པའི་རྡོ་རྗེའི་སྟེང་གི་ཕྱོགས་བཞིའི་རྭ་བཞི་རྣམ་སྣང་ལ་སོགས་པ་རིགས་ལྔ་ཡབ་བཞི་དང་། མཚམས་བཞིའི་རྭ་བཞི་ནི་སྤྱན་མ་ལ་སོགས་པ་གསང་བའི་ཡུམ་བཞི། དབུས་རྭ་དེ་ཉིད་རྡོ་རྗེ་མི་བསྐྱོད་པ། འོག་གི་རྭ་བརྒྱད་བྱང་ཆུབ་སེམས་དཔའ་བརྒྱད། དབུས་རྭ་རྡོ་རྗེ་སེམས་དཔའ་ལ་སོགས་པའི་བཤད་པ་དེ་ལྟར་ཡོད་པ་རེད། མདོར་ན་ཐབས་ཀྱི་རང་བཞིན་གྱི་རྡོ་རྗེ་འདི་གཞི་ལམ་འབྲས་གསུམ་དང་སྦྱར་ན། གཞི་ཆོས་དབྱིངས་དོན་དམ་པའི་རྡོ་རྗེ། ལམ་རིག་པ་བྱང་ཆུབ་སེམས་ཀྱི་རྡོ་རྗེ། འབྲས་བུ་དབྱིངས་རིག་དབྱེར་མེད་གཞོམ་གཞིག་དང་བྲལ་བའི་རྡོ་རྗེ་མཚོན་པ་ཡིན། དྲིལ་བུ་ནི་ཤེས་རབ་མཚོན་བྱེད་ཡིན་པ་རེད། དྲིལ་བུ་ལ་རྡོ་རྗེ་སེམས་དཔའི་ཡེ་ཤེས་ཀྱི་དྲིལ་བུ། དཔའ་བོའི་དྲིལ་བུ། རིགས་སོ་སོའི་དེ་བཞིན་གཤེགས་པའི་དྲིལ་བུ་སོགས་ཀྱི་དབྱེ་བ་མཛད་ཡོད་པ་རེད། རྡོ་རྗེ་སེམས་དཔའི་ཡེ་ཤེས་ཀྱི་དྲིལ་བུ་དེ་རིགས་ཐམས་ཅད་ཀྱི་བདག་པོའི་དྲིལ་བུ་ཡིན་ཞེས་གསུངས་ཡོད་པ་དང་། འདི་ལ་རྩེ་རྡོར་རྭ་ལྔ་བ་དང་དགུ་བ་གཉིས་ཀ་ཡོད། སྟེང་གི་པད་འདབ་བརྒྱད་ལ་ཡུམ་བརྒྱད་ཀྱི་ས་བོན་ཡོད་པ་སྟེ། ཤར་ཕྱོགས་ནས་གཡས་བསྐོར་གྱིས་ཕྱོགས་བཞི་ལ། སྒྲོལ་མ་དང་གོས་དཀར་མོ། མ་མ་ཀི། སྤྱན་མ་རྣམས་ཀྱི་སྙིང་པོ་ཏཱྃ་པཱྃ་མཱྃ་ལཱྃ་རྣམས་དང་། མཚམས་བཞི་ལའང་། ནོར་རྒྱུན་མ་དང་ཙུནྡཱ། ཁྲོ་གཉེར་ཅན། ཕྲེང་བ་མ་རྣམས་ཀྱི་སྙིང་པོ་བྃ་ཙཱུྃ་བྷྲཱུྃ་མཱྃ་རྣམས་ཡོད་པ་དང་། དྲིལ་བུའི་མགུལ་ན་ལྷའི་ཞལ་ཞིག་ཡོད་པ་ལ་ཤེས་རབ་ཞལ་ཞེས་གསུངས་པ་རེད། དྲིལ་བུའི་མགུལ་སྦྱར་བའི་སྐབས་སུ་ཤེས་རབ་ཞལ་དེ་ཤར་ཕྱོགས་ཀྱི་སྒྲོལ་མའི་ས་བོན་ཏྃ་ལ་གཏད་ནས་སྦྱར་དགོས་པ་རེད། ཤར་བལྟས་ཤེས་རབ་གདོང་པ་བྱ། ཞེས་གསུངས་པ་ལྟར་རེད། ལོགས་ཀྱི་དྲ་བ་དྲ་ཕྱེད་ཀྱི་ནང་ལ། ཕྱོགས་བཞིར་འཁོར་ལོ་རིན་ཆེན་པདྨ་རལ་གྲི་དང་། མཚམས་བཞིར་སྤྱན་དང་རྡོ་རྗེ་པདྨ་ཨུཏྤལ་རྣམས་ཡོད་པ་རེད། དཔའ་བོའི་དྲིལ་བུ་ལ་ལོགས་ཟུར་གྱི་དྲ་བ་དྲ་ཕྱེད་དང་ལྷ་མོ་བརྒྱད་ཀྱི་ས་བོན་མེད་པ་ལས་གཞན་གཅིག་མཚུངས། དེ་ཡང་འུ་ཅག་གིས་མྱ་ངན་གྱི་དྲིལ་བུ་ཟེར་བ་དེ་ཚོ་མི་འགྲུབ་བོ་ཞེས་གསུངས་ཡོད་པ་རེད། དེ་བཞིན་གཤེགས་པའི་དྲིལ་བུ་དེ་ཉིད་རིགས་སོ་སོའི་མཚན་མ་སོ་སོར་ཡོད་པ་ཞིག་དང་། དེ་ལ་རྩེ་ལྔ་མ་གཏོགས་མེད། ཡང་དྲིལ་བུའི་བྱུང་ཁུངས་ཀྱི་དབྱེ་བས་རྒྱ་དྲིལ། ཧོར་དྲིལ་ཟེར་བ་ལ་སོགས་པའི་བཤད་པ་གཞན་རེད། དྲིལ་བུའི་དག་དྲན་དེ་ནི་ཤེས་རབ་རིག་མ་མཚོན་བྱེད་མཁའ་དབྱིངས་ཆོས་འབྱུང་གི་ཕྱག་རྒྱ་དང་བཅས་པ། ནང་གི་སྟོང་ཆ་ནམ་མཁའི་རང་བཞིན་ཟབ་མོ་སྟོང་ཉིད་ཀྱི་མཚོན་བྱེད། འུ་ཅག་གིས་དུས་རྒྱུན་ལྟར་ན་དྲིལ་ལྕེ་ཞེས་བརྗོད་པའི་ནང་གི་ཡེ་ཤེས་ཀྱི་སྐུ་ཡིས་བསྐུལ་ནས་སྟོང་ཉིད་བདེ་ཆེན་ལྷན་སྐྱེས་ཀྱི་ཡེ་ཤེས་མཚོན་པའི་ཟབ་མོའི་ཆོས་སྒྲ་སྒྲོགས་ནས་དེ་བཞིན་གཤེགས་པ་ཐམས་ཅད་མཉེས་པར་བྱས། སེམས་ཅན་མ་རིག་པའི་གཉིད་མཐུག་ལས་དཀྲོགས་ནས་དེ་ཁོ་ན་ཉིད་ཀྱི་དོན་སྟོན་པར་བྱེད་པ། རྩེ་ལ་རྡོ་རྗེ་ཕྱེད་པ་སྟེ་འུ་ཅག་གི་ཁ་སྐད་དུ་རྩེ་རྡོར་ཞེས་ཞུ་བ་འདི་ཉིད་རིགས་ཀྱི་དབང་རྟགས་ཡིན། རྡོ་རྗེའི་ལྟེ་བ་ལ་གནས་པའི་རྡོ་རྗེ་སེམས་དཔའ་དང་། དྲིལ་བུ་སྙེ་མའི་ཞལ་མཉམ་པོར་སྦྱོར་རྒྱུ་དེ་ཐབས་ཤེས་ཟུང་དུ་འཇུག་པའི་མཚོན་བྱེད་རེད། དྲིལ་བུ་སྒྲོག་དུས་མཐེ་བོང་དང་མིང་མེད་གཉིས་ཀས་བཟུང་ནས། རྡོར་དྲིལ་གཉིས་ཀ་ལག་གཡས་གཡོན་གྱིས་ཟུང་དུ་འཁྱུད་པར་བྱ་དགོས། ལག་པ་གཉིས་ཀས་དྲིལ་བུ་ཞིག་བཟུང་ནས་དཀྲོལ་བ་དང་རྡོ་རྗེ་བསྐྱུར་ནས་དྲིལ་བུ་དཀྲོལ་བ་དེ་འདྲ་མི་རུང་། རྡོ་རྗེ་དང་དྲིལ་བུ་ལག་གཉིས་ཀས་ཟུང་དུ་འཁྱུད་དེ་དྲིལ་བུ་དཀྲོལ་དགོས། རྡོ་རྗེ་གསོར་ཞིང་དྲིལ་བུ་དཀྲོལ། ཞེས་གསུངས་པ་ལྟར། མདོར་ན་རྡོར་དྲིལ་ལ་རྒྱལ་བའི་སྐུ་གསུང་ཐུགས་ཀྱི་རྟེན་གསུམ་པོ་ཚང་བ་ཡིན་པས། གུས་པ་བྱེད་དགོས་པས་མ་ཚད་མི་འབྲལ་བར་འཆང་དགོས་པ་རེད། དེ་ལྟར་དུ་ཌ་མ་རུ་སྟེ་འུ་ཅག་གིས་ཁ་སྐད་ཟུར་ཆགས་པ་ལ་ཌ་རུ་ཞེས་ཟེར་བ་འདི་ཡང་བདེ་སྟོང་གཉིས་སུ་མེད་པའི་ཡེ་ཤེས་མཚོན་བྱེད་རེད། བདེ་སྟོང་གཉིས་མེད་ཀྱི་ཡེ་ཤེས་ཕྱག་རྒྱ་ཆེན་པོ་སྒྲའི་རྣམ་པར་ཤར་ནས། བླ་མ་དང་དཀྱིལ་འཁོར་གྱི་ལྷ་ཚོགས་མཉེས་ཤིང་བྱིན་རླབས་དང་དངོས་གྲུབ་སྩོལ་བ་དང་། དཔའ་བོ་དང་རྣལ་འབྱོར་མ། གནས་ཡུལ་ཞིང་སྐྱོང་ཐམས་ཅད་ཀྱང་སྒྲ་འདིས་བསྐུལ་ནས་འདི་ཡིས་མྱུར་དུ་འཕྲིན་ལས་བསྒྲུབ་པར་བསྐུལ་བ་རེད། ཅང་ཏེའུ་དང་ཌ་མ་རུ། གསང་བའི་རྔེའུ་ཆུང་འདི་དག་གི་དབྱིབས་དང་དག་དྲན་རྣམས་གཞན་དུ་ཡོད་པར་གཟིགས། དེ་ལྟར་རྡོར་དྲིལ་བྱིན་རླབས་ཀྱི་སྔགས་དང་ཕྱག་རྒྱ་དང་བཅས་པའི་རྗེས་སུ། རང་རེའི་ཆོ་གའི་འགྲོས་ལྟར་བྱས་པ་ཡིན་ན་དཀར་བགེགས་བྱིན་རླབས་བྱེད་དགོས་ཤིང་། དེ་ཡང་དཀར་གསུམ་མངར་གསུམ་དང་འབྲུ་སྣ་ཡིས་བརྫིས་པའི་དཀར་གཏོར་དང་གསེར་སྐྱེམས་ལ་ཆུ་གཙང་གི་ཆབ་ཀྱིས་བྲན་པའི་རྗེས་སུ་སྔགས་དྲུག་ཕྱག་དྲུག་གིས་བྱིན་རླབས་བྱ་རན་པ་རེད། འདི་ལ་འུ་ཅག་གིས་རང་གར་བརྗོད་བདེར་བྱས་ནས་སྔགས་དྲུག་ཕྱག་དྲུག་ཅེས་སྔགས་དང་ཕྱག་རྒྱ་ཁོ་ན་ཙམ་སྨྲོས་པ་ཡིན་ཡང་། དོན་དངོས་སུ་བཅའ་བ་ཕྱག་རྒྱ། བཟླ་བ་སྔགས། བསྐྱེད་པའི་ལྷ། ས་བོན་གྱི་ཡི་གེ། བྱིན་གྱིས་བརླབས་པའི་ཕན་ཡོན་ཏེ་ལྔ་ཡི་སྒོ་ནས་ལྔ་ཚན་དྲུག་བྱས་ནས་བཤད་དུ་ཡོད། དེ་རིང་རགས་ཙམ་ཞིག་བཤད་ན། དེའི་ནང་གི་ལྔ་ཚན་དང་པོའི་བཅའ་བ་ཕྱག་རྒྱ་ནི། ཆོས་ཉིད་སྟོང་པ་ཉིད་མཚོན་པའི་བརྡ་རུ་ཐལ་མོ་ཁོང་སྟོང་སྙིང་ཁར་སྦྱར་རྒྱུ་དེ་རེད། འདིའི་བཟླ་བྱའི་སྔགས་ནི། ཨོཾ་སྭཱ་བྷ་ཝ་ཤུདྡྷ་སརྦ་དྷརྨཱ་སྭཱ་བྷ་ཝ་ཤུདྡྷོ་ཧཾ། ཞེས་གསུངས། སྔགས་འདི་ཉིད་མཚན་མའི་དངོས་པོ་འཇིག་པར་བྱེད་པའི་སྔགས་ཏེ། སྟོང་ཉིད་ཀྱི་སྙིང་པོ་སྔགས་ཀྱི་སྒྲས་བསྟན་པ་ཞིག་རེད། སྔགས་དོན་འགྲེལ་ན། ཨོཾ་འདི་གང་དུ་ཡོད་ན་སྔགས་ཀྱི་འགོ་འདྲེན་རེད། དེ་ཡང་ཨ་ཨུ་མ་གསུམ་གཅིག་ཏུ་འདུས་པའི་ཡི་གེ་ཨོཾ་འདི་རྡོ་རྗེ་གསུམ་གྱི་ས་བོན་ཡིན་ཞེས་གསུངས་པ་མང་བས་དེ་ཉིད་སྔགས་གསར་རྙིང་ཐུན་མོང་གི་ལུགས་ལྟར་ཡིན་ཞེས་བརྗོད་ཀྱང་ཆོག་སྙམ། ཡང་འདི་ལ་དམིགས་བསལ་ཡོད་པ་རེད། དེ་ཇི་ལྟར་རེད་ཅེ་ན། སྔ་འགྱུར་ཐུན་མིན་གྱི་ལུགས་སུ་ཡེ་ཤེས་ལྔ་དང་སྐུ་ལྔ་མཚོན་པའི་ཡི་གེ་ཡིན་པའི་སྐབས་ཀྱང་ཡོད་པ་རེད། དེ་ངེས་པར་དུ་ཤེས་དགོས། དུས་ཕྱིས་སུམ་རྟགས་ཀྱི་འགྲོས་ཅུང་ཟད་ཤེས་ལ་མི་ཤེས་ལ། སྙན་ངག་གི་ལུས་སྲོག་རྒྱན་གསུམ་ཐོད་ཐུག་ལ་མི་ཐུག་ལ་ཁད་འགའ་ཡིས་མིང་ལ་རྩོམ་ཡིག་ཅེས་བཏགས་ཏེ་ཡ་འགལ་མ་འགལ་སྦྱར་ནས་བཙན་སྒྲིག་དང་ནན་བཙིར་བྱེད་པའི་སྙུག་འཛིན་པ་དག་གིས་མ་ཚད་པར། གནའ་ཡི་ལོ་ཙཱ་བ་འགའ་རེས་ཀྱང་འདིའི་ཐད་ལ་ཕྱོགས་འཛིན་གྱི་རྩོད་པ་བྱེད་མྱོང་བ་རེད། འོན་ཀྱང་གཙོ་བོ་གཏེར་ཕྱོགས་ནས་ཨཱོྃ་ལ་འ་ཆུང་དང་ན་རོ་ཉིས་བརྩེགས་སམ་ཟླ་ཚེས་ཐིག་ལེ་དང་བཅས་པ་འབྱུང་བ་འདིས་སྐུ་ལྔ་ཡེ་ཤེས་ལྔ་མཚོན་པར་བསྟན་པ་རྒྱུད་ཀྱི་ལུང་དང་འགྲིག་ཡོད། རྒྱུད་ལས་ཇི་ལྟར་གསུངས་ཡོད་པ་རེད་ཅེ་ན། ཨ་ནི་རྣམ་སྣང་འ་མི་སྐྱོད། །ན་རོ་རིན་ཆེན་འབྱུང་ལྡན་དེ། །ཟླ་ཚེས་སྣང་བ་མཐའ་ཡས་ལ། །ཐིག་ལེ་དོན་ཡོད་གྲུབ་པའོ། ཞེས་གསུངས། འདི་ལ་མཚོན་བྱེད་དཔེའི་ཡི་གེའི་བྱེད་ལས་ཚང་བས་མ་ཚད་མཚོན་བྱ་དོན་གྱི་ཡི་གེ་ཡིན་པར་ཡང་བསྟན་ཡོད་པ་རེད། འགའ་རེས་རི་ངོས་དང་རྡོ་ངོས་སུ་ཨཱོྃ་ལ་ན་རོ་ཉིས་བརྩེགས་འ་ཆུང་ཅན། ཟླ་ཚེས་དང་ཐིག་ལེ་ཡོད་པ་བརྐོས་པ་མཐོང་རྒྱུ་མེད་དམ། དེ་འདྲ་བརྐོ་སྲོལ་ཡོད་པ་དེ་རྒྱུ་མཚན་ཅན་གྱི་ཁུངས་ཡོད་ཡིན་པ་མ་ཟད་རྒྱུ་མཚན་བྱིན་རླབས་གཉིས་ལྡན་ཡང་རེད། འོན་ཀྱང་ཡིན་གཅིག་མིན་གཉིས་ཨོཾ་ཡོད་ཚད་ཚང་མ་འ་ཆུང་ཅན་དང་དེ་འདྲ་ཡིན་དགོས་པའི་ངེས་པ་མེད། འདིར་རང་གར་ཟུར་འཕྲོས་སུ་དེ་ལྟར་བཤད་པ་ལས་སྐབས་དོན་སྭཱ་བྷ་ཝའི་སྔགས་དོན་བཤད་བཞིན་པ་རེད། སྭཱ་བྷ་ཝ་ནི་རང་བཞིན་དང་། ཤུདྡྷོ་དག་པ། སརྦ་ཐམས་ཅད། དྷརྨཱ་ཆོས། སྭཱ་བྷ་ཝ་ཤུདྡྷོ྅་ཧཾ་རང་བཞིན་གྱིས་རྣམ་པར་དག་པ། ཤུདྡྷོ྅་ཧཾ་ཞེས་གསུངས་ནས་ཚིག་མཇུག་ཏུ་ཨ་ཧཾ་གི་སྒྲ་ཞིག་སྦྱར་ཡོད་པ་འདི་དེ་ལྟར་ཡིན་པའི་ངེས་ཤེས་ཀྱི་སྒོ་ནས་ང་རྒྱལ་བསྟན་པའི་དོན་རེད། འདིའི་སྔགས་འདི་གང་དུ་ཡོད་ཀྱང་འཁོར་འདས་གཉིས་སྣང་གི་ཆོས་ཐམས་ཅད་རང་བཞིན་གྱིས་རྣམ་པར་དག་པ་དང་། དག་མ་དག་རྣམ་འབྱེད་བྱེད་པའི་མཁན་པོ་རང་སེམས་དང་བཅས་པ་མི་དམིགས་སྟོང་པ་ཉིད་བསམ་བརྗོད་དང་བྲལ་བའི་གནས་ལུགས་ཀྱི་ངང་ལ་གནས་པའི་དོན་རེད། དེ་དག་གིས་ལྔ་ཚན་དང་པོའི་བཅའ་བ་ཕྱག་རྒྱ་དང་བཟླ་བ་སྔགས་གཉིས་བཤད་ཟིན་པ་རེད། གསུམ་པ་བསྐྱེད་པའི་ལྷ་ནི། འདིའི་སྐབས་སུ་སྔར་གྱི་ཕྱག་རྒྱའི་སྟེང་སངས་རྒྱས་རིན་ཆེན་མང་གསལ་དགོས་པ། སངས་རྒྱས་རིན་ཆེན་མང་སྟོན་པ་ཤཀྱ་ཐུབ་པ་སྤྱི་འགྲོས་ལྟར་གསལ་བཏབ་ནས། བཞི་པ་ས་བོན་གྱི་ཡི་གེ་ནི། སངས་རྒྱས་རིན་ཆེན་མང་གི་ཐུགས་ཀར་ཨ་ཡིག་དཀར་པོ་ཞིག་གསལ། དེ་ལས་འོད་ཟེར་འཕྲོས་ནས་རྫས་ཐམས་ཅད་ལ་ཕོག་པར་བསམ། ས་བོན་གྱི་ཡི་གེ་ལས་འོད་ཟེར་འཕྲོས་ནས་རྫས་ལ་ཕོག་པར་བསམ་པ་འོག་གི་ཐམས་ཅད་ལ་གཅིག་མཚུངས་ཡིན། ལྔ་བ་བྱིན་གྱིས་བརླབས་པའི་ཕན་ཡོན་ནི། འབག་བཙོག་གི་དྲི་མའི་ཉེས་སྐྱོན་དང་སེར་སྣའི་དྲི་མ་ལ་སོགས་པ་དག་པར་བྱེད་པ་རེད། དེ་ཡིས་ལྔ་ཚན་དང་པོ་སོང་ནས་ད་ལྔ་ཚན་གཉིས་པ་ལའང་བཅའ་བ་ཕྱག་རྒྱ། བཟླ་བ་སྔགས། བསྐྱེད་པའི་ལྷ། ས་བོན་གྱི་ཡི་གེ། བྱིན་གྱིས་བརླབས་པའི་ཕན་ཡོན་ཏེ་ལྔ་ཡིས་བཤད་དགོས། འདིར་བཅའ་བའི་ཕྱག་རྒྱ་ནི་རིན་ཆེན་སྒྲོམ་བུའི་རྒྱ་ཞེས་གསུངས། དཔྲལ་བའི་མཛོད་སྤུའི་ཐད་དུ་ལག་པའི་སྙིམ་པ་སྤྲད་པ་སྟེ། དེ་ཡང་ཇི་ལྟར་གསུངས་པ་རེད་ཅེ་ན། གུང་མོ་གཉིས་དང་སྲིན་ལག་གཉིས་སོར་རྩེ་སྤྲད་པའི་ཚིགས་པ་འོག་མ་བཅག་ཅེས་གསུངས་འདུག འོན་ཀྱང་རང་རེའི་ཕྱག་ལེན་དངོས་ལ་ཐལ་སྦྱར་ཚིགས་པ་བཅག་པ་ཙམ་ཞིག་རེད་མི་འགྲོའམ། བཤད་པ་ཐག་པའི་གོང་དེར་ད་དུང་མཐེ་མཛུབ་གཞན་པ་སྦྲེང་ཞེས་ཀྱང་གསུངས་འདུག འདིའི་སྐབས་སུ་བཟླ་བའི་སྔགས་ནི་ནམ་མཁའ་མཛོད་ཀྱི་གཟུངས། ན་མཿསརྦ་ཏ་ཐཱ་ག་ཏ་བྷྱོཿབི་ཤྭ་མུཥེ་བྷྱ། སརྦ་ཏརྑཾ་ཨུདྒ་ཏེ་སྥ་ར་ཎ་ཨེ་མཾ་ག་ག་ན་ཁཾ་སྭཱ་ཧཱ། ཞེས་པ་དེ་རེད། འདི་མན་ཆོད་ཀྱི་སྔགས་དོན་འགྲེལ་ན་དུས་ཚོད་རིང་པོ་འགོར་འགྲོ་བར་འདུག བསྐྱེད་པའི་ལྷ་ནམ་མཁའ་མཛོད་སེར་པོ་རིན་པོ་ཆེ་དང་སྒྲོམ་བུ་འཛིན་པ་ཞིག་གསལ་ནས། སྒྲོམ་བུའི་ནང་གི་ས་བོན་གྱི་ཡི་གེ་ཁཾ་སྔོན་པོ་ལས་འོད་ཟེར་འཕྲོས་པར་བསྒོམ། དེའི་བྱིན་རླབས་ཀྱི་ཕན་ཡོན་ནི་རྫས་ཐམས་ཅད་ནམ་མཁའ་མཛོད་བཞིན་ཟད་མེད་དུ་འགྱུར། ལྔ་ཚན་གསུམ་པའི་བཅའ་བའི་ཕྱག་རྒྱ་ནི་བདུད་རྩི་ཐབས་སྦྱོར་གྱི་ཕྱག་རྒྱ་རེད། མགྲིན་པའི་ཐད་ནས་ཐལ་མོ་ཁ་ཕྱེ་བ་པདྨའི་དབྱིབས་ལྟ་བུའི་ཕྱག་རྒྱ་དང་སྦྲག་དགོས་ཞེས་གསུངས་ཡོད། འདིའི་སྐབས་ཀྱི་བཟླ་བའི་སྔགས་ནི་བདུད་རྩི་ཐབས་སྦྱོར་གྱི་སྔགས་ཏེ། ཨོཾ་བཛྲ་ཨ་མྲྀ་ཏ་ཀུན་ཌ་ལི་ཧ་ན་ཧ་ན་ཧཱུྃ་ཕཊཿ ཅེས་གསུངས། བསྐྱེད་པའི་ལྷ་ནི། ཕྱག་རྒྱའི་སྟེང་དུ་བསྒྱུར་བའི་ལྷ་བདུད་རྩི་འཁྱིལ་བ་སྔོན་པོ་ཕྱག་གཉིས་ཀྱིས་བདུད་རྩིའི་བུམ་པ་འཛིན་པ་ཞིག་ཏུ་གསལ་འདེབས། ས་བོན་གྱི་ཡི་གེ་དེའི་ཐུགས་ཀའི་ཧཱུྃ་སྔོན་པོ་ལས་འོད་ཟེར་འཕྲོས། བྱིན་རླབས་ཀྱི་ཕན་ཡོན་ནི་གཏོར་མ་དེ་ཉིད་གང་འདོད་ཀྱི་དངོས་པོ་སྣ་ཚོགས་སུ་བསྒྱུར། ལྔ་ཚན་བཞི་བའི་བཅའ་བའི་ཕྱག་རྒྱ་ནི་རྒྱ་ཆེན་ཤུགས་ལྡན་གྱི་ཕྱག་རྒྱ་རེད། འདི་ཡི་གེ་ཀློག་སྟངས་ཀྱིས་སྒྲ་མ་དག་ན་རྒྱ་ཆེན་དང་རྒྱལ་ཆེན་གཉིས་ཀ་ནོར་ནས་ཕྱིན་ཅི་ལོག་ཏུ་གོ་ཉེན་ཡོད། ཀུ་རེ་ཡིན། འདིའི་རྒྱ་འདི་ལག་གཡས་མཛུབ་མོ་སྙིང་ཁར་སྦྲེངས་ཤིང་གཡོན་མཆོག་སྦྱིན་ཟུར་དུ་བསྟན་པ་ཞེས་གསུངས་ཡོད། རང་རེས་སྐྱབས་སྦྱིན་འདྲ་ཞིག་བྱེད་ཀྱང་ནོར་དང་ལོངས་སྤྱོད་ཀྱི་སྦྱིན་པ་མཆོག་སྦྱིན་གྱི་རྒྱས་གནང་སའང་མང་བ་རེད། སྤྱིར་འདིའི་རྒྱ་འདི་དག་བཅའ་ལུགས་འདྲ་མིན་སྣ་ཚོགས་ཡོད་པ་དང་། དེ་བཞིན་སོ་སོའི་ལུགས་ལའང་རྒྱུ་མཚན་རེ་ངེས་པར་ཡོད་ཀྱང་འདི་ནས་སྙིང་ཐིག་རང་གཞུང་ནས་གསུངས་པ་ལྟར་བཤད་ཀྱིན་ཡོད་པ་རེད། བཟླ་བྱའི་སྔགས་ནི་རྒྱ་ཆེན་ཤུགས་ལྡན་གྱི་གཟུངས་ཏེ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། ཞེས་པ་དེ་རེད། བསྐྱེད་པའི་ལྷ་ནི་ཕྱག་རྒྱའི་སྟེང་ཐོབ་པའི་ལྷ་སྤྱན་རས་གཟིགས་དབང་བསྒོམ། དེའི་ཐུགས་ཀའི་ས་བོན་ཡི་གེ་ཧྲཱི་དཀར་པོ་ལས་འོད་ཟེར་འཕྲོས། དེའི་བྱིན་རླབས་ཀྱི་ཕན་ཡོན་ནི་རྫས་དེ་དག་མགྲོན་རིགས་ཐམས་ཅད་ལ་དབང་ཆེ་ཆུང་དང་རྒྱལ་ཕམ་མེད་པར་གང་ལ་ཅི་འདོད་པ་ཐོབ་པར་བྱེད། ལྔ་ཚན་ལྔ་བའི་བཅའ་བའི་ཕྱག་རྒྱ་ནི་ཡེ་ཤེས་སྐར་མདའི་རྒྱ་ཞེས་གསུངས། ལག་གཡོན་པས་ཐལ་མོ་ཁ་བཟེད། གཡས་པ་ཁུ་ཚུར་ཁ་སྦུབས་པ་དེའི་སྟེང་དུ་བཞག་ནས་མཐེ་བོང་སྦྲེང་ཞེས་གསུངས་ཡོད་པ་རེད། མདོར་ན་འདི་དྲིལ་བུའི་རྒྱ་ཡིན་ཞེས་གསུངས་ཤིང་། རྒྱ་འདིའི་བཟླ་བྱའི་སྔགས་ནི་ཡེ་ཤེས་སྐར་མདའི་གཟུངས་ཏེ། ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མ་ས་མནྟ་སྥ་ར་ཎ་རསྨྲི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་དཱ་ཡ་ཛྭ་ལ་ནི་ཧཱུྃ། ཞེས་གསུངས། བསྐྱེད་པའི་ལྷ་ནི་ཕྱག་རྒྱའི་སྟེང་དུ་ཚིམ་པའི་ལྷ་དོན་ཡོད་གྲུབ་པ་ཕྱག་མཚན་རལ་གྲི་དང་དྲིལ་བུ་བསྣམས་པ་ཞིག་གསལ་འདེབས། ས་བོན་གྱི་ཡི་གེ་ཐུགས་ཀའི་ཧ་ལྗང་གུ་ལས་འོད་ཟེར་འཕྲོས། བྱིན་རླབས་ཀྱི་ཕན་ཡོན་ནི་མགྲོན་ཐམས་ཅད་གང་ལ་གང་འདོད་ཀྱི་རེ་བ་བསྐངས་ནས་ཚིམ་པར་བྱེད། ལྔ་ཚན་དྲུག་པའི་བཅའ་བའི་ཕྱག་རྒྱ་ནི་དབང་བསྒྱུར་འཁོར་ལོའི་རྒྱ་ཡིན། སོར་མོ་ཚང་མ་རྒྱབ་སྤྲད་ནས་གཅིག་ལ་གཅིག་འཁྱུད་པ་མཐེ་བོང་ལག་མཐིལ་རང་རང་གི་ནང་དུ་བཀུག་ནས་བཅའ་བ་དེ་རེད། བཟླ་བའི་སྔགས་ནི་དབང་བསྒྱུར་མཆོག་གི་གཟུངས་ཏེ། ན་མཿས་མནྟ་བུདྡྷ་ནཾ་གྲ་ཧེ་ཤྭ་རི་པྲ་བྷན་ཛ་ཏི་མ་ཧཱ་ས་མ་ཡེ་སྭཱ་ཧཱ། ཞེས་གསུངས། བསྐྱེད་པའི་ལྷ་ནི་ཕྱག་རྒྱ་དེའི་སྟེང་དུ་དབང་དུ་བྱེད་པའི་ལྷ་ཕྱག་ན་རྡོ་རྗེ་རྔམ་བརྗིད་དང་ལྡན་པ་སྐུ་མདོག་མཐིང་ནག་རྡོར་དྲིལ་འཛིན་པ། ས་བོན་གྱི་ཡི་གེ་ནི་ཐུགས་ཀའི་ཡི་གེ་ཧཱུྃ་མཐིང་ནག་ལས་འོད་ཟེར་འཕྲོས་པས་བྱིན་གྱིས་བརླབས། བྱིན་གྱིས་བརླབས་པའི་ཕན་ཡོན་ནི་མགྲོན་རིགས་མཆོག་དམན་ཐམས་ཅད་བདག་གི་དབང་དུ་འདུས་ནས་ཅི་བསྒོ་བའི་ལས་ཐམས་ཅད་སྒྲུབ་པར་བྱེད་པས་དེ་ལྟར་བསམ། འདིའི་ལྔ་ཚན་དྲུག་གི་ཕྱག་རྒྱ་དང་སྔགས་དམིགས་ལ་སོགས་པ་དེ་འདྲ་ཡིན་པ་རེད། ཞིབ་པར་བཀའ་བརྒྱད་རྣམ་བཤད་དང་དགོངས་འདུས་རྣམ་བཤད་ལ་སོགས་པ་ལས་འབྱུང་བས་དེར་གཟིགས་ན་མཁྱེན་ཐུབ། དེ་ནས་སྡེ་བརྒྱད་གསེར་སྐྱེམས་དང་མཆོད་སྦྱིན་གཏོར་མ་ལ་སོགས་པ་སྤྱི་ཁྱབ་ཀྱི་འགྲོས་དང་བསྟུན་ཏེ་ཕྱག་ལེན་མཛད་ནས། གསེར་སྐྱེམས་དང་དཀར་གཏོར་གཙང་སར་གཤེགས་པའི་དེ་མ་ཐག་ལ་བགེགས་གཏོར་བྱིན་རླབས་བྱས་པའི་མཚམས་འདི་ནས། བཞི་པ་བགེགས་ལ་བཀའ་བསྒོ་བ། བཞི་པ་བགེགས་ལ་བཀའ་བསྒོ་བཿ ཞེས་གསུངས། བགེགས་ཞེས་པ་དེ་ཉིད་བགེགས་ཀྱི་རྒྱལ་པོ་བི་ན་ཡ་ཀ་སོགས་ལ་བྱེ་བྲག་ཏུ་འཇུག་ས་ཡོད་ཀྱང་། འདི་ནས་དངོས་གྲུབ་སྒྲུབ་པ་ལ་བར་དུ་གཅོད་ཅིང་དཀྱིལ་འཁོར་གཉན་པོ་ལ་འདུ་བར་མི་རུང་བའི་ལོག་འདྲེན་འབྱུང་པོའི་རིགས་སྤྱི་དང་། ཁྱད་པར་དུ་མཚན་འཛིན་གྱི་རྟོག་པ། གཉིས་སྐྱེས་ཀྱི་འཛིན་པ། སྣོད་བཅུད་དག་མཉམ་ལྷུན་གྲུབ་ཀྱི་ལྟ་བ་ལ་བར་དུ་གཅོད་པའི་ཕྱི་ནང་གསང་པའི་བགེགས་ལ་གོ་དགོས། ཧྲཱིཿ སྣོད་བཅུད་སྤྲུལ་པའི་དཀྱིལ་འཁོར་འདིརཿ གླགས་ལྟ་བར་གཅོད་བདུད་ཀྱི་རིགསཿ གཏོར་མ་ལོངས་ལ་གཞན་དུ་དེངསཿ བཀའ་ལས་འདའ་ན་རྡོ་རྗེས་གཞོམཿ ཞེས་གསུངས་ཏེ། ཧྲཱིཿཡིག་འདི་ནུབ་སྣང་བ་མཐའ་ཡས་གསུང་མ་ཆགས་པདྨའི་རིགས་ཀྱི་ཐུགས་སྲོག་གི་སྙིང་པོ། བདེ་བ་ཆེན་པོ་སོ་སོར་རྟོགས་པའི་ཡེ་ཤེས་ཀྱི་རང་མདངས་ཡི་གེའི་གཟུགས་སུ་འཕོས་པ་དང་། དབང་སྡུད་དབང་གི་ལས་ལྷ་དབང་ཆེན་པདྨ་དྲག་པོ་ཁྲོ་བོ་རྟ་མགྲིན་གྱི་སྙིང་པོ་ཡང་ཡིན་པས་བགེགས་དཔུང་འདུལ་བ་ལ་མཆོག་ཏུ་དཔའ་བ་ཡིན་པས་ན། བཀའ་བསྒོ་དང་སྲུང་འཁོར་སྒོམ་པ། བསྟོད་པ་ལ་སོགས་པ་དབང་དང་དྲག་པོའི་ལས་ཀྱི་ཚིག་འགོར་འདི་འབྱུང་བ་ཡིན། སྣོད་བཅུད་སྤྲུལ་པའི་དཀྱིལ་འཁོར་འདིར་ཞེས་གསུངས་ན། སྣོད་རྣམ་པར་དག་པ་རྒྱལ་བའི་ཞིང་ཁམས། བཅུད་རྣམ་པར་དག་པ་དཀྱིལ་འཁོར་གྱི་ལྷ་ཚོགས། ཡེ་ནས་དག་པ་མ་གཏོགས་དོན་ལ་མ་དག་པ་ཞིག་ཡོད་པ་མ་ཡིན། སྤྱིར་དཀྱིལ་འཁོར་ཞེས་གསུངས་པ་འདི་འོག་ནས་ཀྱང་འབྱུང་བ་ཡིན་ཡང་། དེ་ཡང་མནྜལ་ཞེས་པའི་སྒྲ་ལས་དྲངས་ན་མནྜ་ནི་སྙིང་པོའམ་བཅུད། ལ་ནི་ལེན་ཅིང་འཛིན་པ་ལ་འཇུག་ཅེས་གསུངས་པ་རེད། དེས་ན་སྙིང་པོའི་ཡོན་ཏན་ལེན་ཅིང་འཛིན་པའི་གཞི་དང་། གཞན་ཡང་ཀུན་ནས་ཟླུམ་ཞིང་ཡོངས་སུ་བསྐོར་བའི་དོན་ལའང་འཇུག་ཅེས་གསུངས། འདིའི་དབྱེ་བ་མང་ཡང་སྐབས་འདིར་སྣོད་བཅུད་ཡེ་ནས་དག་པ་གནས་ལུགས་གཞི་ཡི་དཀྱིལ་འཁོར་ཡིན་པ་ལ། དེ་ལྟར་ཡིན་པའི་ངེས་ཤེས་ཀྱི་ལྟ་བས་ཐག་བཅད་པའི་དྲི་མ་འབྲལ་རུང་གི་ངེས་པ་བརྟན་པོའི་ཐོག་ནས། བློས་ཀྱང་དེ་བཞིན་དུ་རྣམ་པ་ཆ་འདྲ་བའི་དཀྱིལ་འཁོར་དུ་བཀོད་པའམ། ཡང་ན་རྩལ་ལས་རོལ་བར་ཤར་བའི་སྣོད་བཅུད། གཙོ་བོ་གཅིག་ལས་ཤར་བའི་འཁོར་དང་གཞལ་ཡས་ཁང་། ཞིང་ཁམས་དང་བཅས་པའི་སྣོད་བཅུད་ལ་སྤྲུལ་པའི་དཀྱིལ་འཁོར་དུ་གོ་དགོས་སྙམ། དེ་ལྟ་བུའི་རང་བཞིན་ཏིང་འཛིན་ལྷག་པ་གཟུགས་བརྙན་གྱི་དཀྱིལ་འཁོར་དུ་བཀོད་པའི་གནས་སམ་སྐབས་འདིར། གླགས་ལྟ་བར་གཅོད་བདུད་ཀྱི་རིགས་ཞེས་གསུངས་ཏེ། གླགས་ལྟ་བའམ་གནོད་སྐྱེལ་ཞིང་། སྒྲུབ་པ་ལ་བར་ཆད་བརྩམས་ནས་དངོས་གྲུབ་མི་འབྱུང་བར་བྱེད་པའི་ཕྱི་ནང་གསང་བའི་བདུད་ཀྱི་རིགས་སུ་གཏོགས་པ་ཐམས་ཅད་གཏོར་མ་ལོངས་ལ་གཞན་དུ་དེངས་ཞེས། རྣམ་པ་གཏོར་མ་ལ་ངོ་བོ་ཡེ་ཤེས་ཀྱི་བདུད་རྩི་གང་ལ་ཅི་འདོད་འབྱུང་བའི་རྫས་སུ་བྱིན་གྱིས་བརླབས་པ་འདི་སྦྱིན་པ་ཡིན་པས། བར་ཆད་བྱེད་པའི་བདུད་རིགས་ཁྱེད་རྣམས་ཀྱིས་གཏོར་མ་འདི་ཉིད་ལོངས་ལ་གནས་གཞན་དུ་དེངས་ཤིག་གམ་སོང་ཞིག་ཅེས་གསུངས་པ་རེད། དེ་ཞི་བའི་སྦྱོང་བ་རེད། བཀའ་ལས་འདའ་ན་རྡོ་རྗེས་གཞོམ་ཞེས་གསུངས་ཏེ། གལ་ཏེ་ད་དུང་མི་འགྲོ་བར་བདག་ཉིད་ཁྲོ་བོ་ཆེན་པོའི་བཀའ་ལས་འདའ་ཕོད་པ་ཡིན་ན་དྲག་པོའི་ཚམ་རྔམ་གྱིས་རྡོ་རྗེ་འབར་བའི་མཚོན་ཆས་ལུས་རྡུལ་ཕྲན་བཞིན་དུ་གཞོམ་པར་འགྱུར་ཏ་རེ་ཞེས་གསུངས་ནས་ཐ་ཚིག་དྲག་པོ་བསྒྲགས་པ་དང་བཅས་ཏེ། འདི་ནས་ཡིག་ཆུང་དུ། ཧཱུྃ་བཞིའི་སྔགས་དང་ཐུན་གྱིས་གཟིརཿ ཞེས་གསུངས་ན། སུམ་བྷ་ནི་སུམ་བྷ་ནི་ལ་སོགས་པ་ཧཱུྃ་བཞིའི་སྔགས་དྲག་པོར་བཟླས་ཏེ་ཕྱིར་བསྐྲད་དགོས་པ་རེད་ཅེས་གསུངས་པ་རེད། དེ་ཡང་སུམ་བྷ་ནིའི་སྔགས་དོན་ཇི་ལྟར་རེད་ཅེ་ན། སུམ་བྷ་ནི་སུམ་བྷ་ནི་ཞེས་པའི་དོན་ནི་ངེས་པར་འདུལ་ཞིང་མ་ལུས་པར་ངེས་པར་འདུལ་བ། འདུལ་ཞིང་འདུལ་བའི་བདག་ཉིད་ཅན་ཁྲོ་བོ་གནོད་མཛེས་ལ་འབོད་པ་ཡིན་ཞེས་གསུངས་པ་རེད། འདི་ལ་ཧཱུྃ་བཞིའི་སྔགས་ཅེས་བརྗོད་དོན་ནི་སུམ་བྷ་ནི་སུམ་བྷ་ནི་ཧཱུྃ་ཞེས་གསུངས་རྒྱུའི་ཧཱུྃ་དང་པོ་དེ་གསལ་བྱེད་རེད། དེ་ནས་གྷྲྀ་ཧ་ན་གྷྲྀ་ཧ་ན་ཞེས་པ་ཟུངས་ཤིག་ཟུངས་ཤིག་ཅེས་པའི་དོན། གྷྲི་ཧ་ན་གྷྲི་ཧ་ན་ཧཱུྃ་ཞེས་པའི་ཧཱུྃ་གཉིས་པ་དེ་བསྐུལ་བའི་ཚིག གྷྲྀ་ཧ་ན་པ་ཡ་གྷྲྀ་ཧ་ན་པ་ཡ་ཞེས་པ་འཛིན་དུ་ཆུག་འཁོར་ཡང་འཛིན་དུ་ཆུག་ཅེས་པའི་དོན། གྷྲྀ་ཧ་ན་པ་ཡ་གྷྲྀ་ཧ་ན་པ་ཡ་ཧཱུྃ་ཞེས་པའི་ཧཱུྃ་གསུམ་པ་འདི་ཡང་ལས་ལ་བསྐུལ་བའི་དོན། ཨ་ན་ཡ་ཞེས་པ་ཁུག ཧོ་ཞེས་པ་ཀྱེ་ཞེས་འབོད་པའི་ཚིག བྷ་ག་ཝན་ནི་འབོད་སའི་ཡུལ་བཅོམ་ལྡན་འདས་ཏེ། ཀྱེ་བཅོམ་ལྡན་འདས་ཁུག་ཅིག་ཅེས་པའི་དོན་ཡིན་སྙམ། བྷིདྱ་ར་ཛ་ཞེས་པ་རིག་པའི་རྒྱལ་པོ་རུ་གོ། ཀྲོ་ཏ་ཡ་ཞེས་པ་ཁྲོ་བོ། ཁྲོ་བོའི་རྒྱལ་པོ་གནོད་མཛེས་ལ་དབུགས་འབྱིན་པའི་དོན་ཏེ་ཆེ་བསྟོད་བྱས་ནས་བོས་པ་རེད། ཧཱུྃ་བཞི་བ་དེ་ཕཊ་དང་སྦྱར་བའི་ཧཱུྃ་ཕཊ་ཅེས་གསུངས་ནས་གསོད་པའི་ཕྱིར་དུ་ལས་ལ་བསྐུལ་བ་རེད། དེ་ལྟ་བུའི་ཧཱུྃ་བཞིའི་དྲག་པོའི་སྔགས་དང་སྔགས་ཀྱིས་བཏབ་པའི་བགེགས་འཇོམས་པར་བྱེད་པའི་ཡུངས་ཀར་རམ་རྡོ་ཐུན་གྱིས་གཟིར་ཞིང་བྲབ་པར་བྱ་ཞེས་གསུངས། ལྔ་པ་སྲུང་འཁོར་བསྒོམ་པ། ལྔ་པ་སྲུང་འཁོར་བསྒོམ་པ་ནིཿ ཞེས་གསུངས། སྲུང་འཁོར་བསྒོམ་པ་འདི་ཟབ་མོའི་དཀྱིལ་འཁོར་ལ་ལྟ་བར་མི་དབང་བའི་བགེགས་ཐམས་ཅད་ཕྱིར་བསྐྲད་ནས་སླར་ནང་དུ་མི་ཐར་བར་བྱེད་པའི་སྲུང་བྱེད་ཀྱི་འཁོར་ལོ་རེད། སྤྱིར་འཁོར་ལོ་ཞེས་པ་འདི་ཀུན་ནས་འཁོར་བས་ཕྱོགས་མཚམས་སྟེང་འོག་ཐམས་ཅད་ཁྱབ་པའམ། རྣམ་པ་གཅིག་ཏུ་ན་འཁོར་ལོ་ནི་གཅོད་པར་བྱེད་པའི་མཚོན་ཆ་ཡང་ཡིན་པས་ན། དེའི་བྱེད་ལས་མཚོན་པའི་སྒོ་ནས་སྲུང་འཁོར་བསྒོམ་དགོས་པ་རེད། སྲུང་འཁོར་ཇི་ལྟར་བསྒོམ་དགོས་ཤེ་ན། ཧྲཱིཿ སྣང་སྲིད་དག་པ་རབ་འབྱམས་ལཿ བགེགས་དང་བར་གཅོད་མིང་ཡང་མེདཿ གློ་བུར་རྣམ་རྟོག་འཁྲུལ་བའི་གདོནཿ ཆོས་དབྱིངས་ངང་དུ་མཚམས་གཅད་དོཿ ཞེས་གསུངས་ཏེ། སྣང་སྲིད་དག་པ་རབ་འབྱམས་ལ། །བགེགས་དང་བར་གཅོད་མིང་ཡང་མེད་ཅེས་སྣང་ཞིང་སྲིད་པའི་ཆོས་ཁམས་རྒྱ་མཚོ། ཡེ་ནས་དག་པ་རབ་འབྱམས་མ་དག་པའི་མིང་ཙམ་ཡང་མེད་པའི་སྣང་སྲིད་གཞིར་བཞུགས་ཀྱི་ཡེ་ཤེས་ཆེན་པོས་མ་ཁྱབ་པ་མེད་པ་སྟེ། དེ་ཡང་རྒྱུད་གསང་བ་སྙིང་པོ་ལས། སྲིད་པ་གསུམ་ཉིད་དག་པའི་ཞིང་། །སྙིགས་མ་ལྔ་ཉིད་བདེ་ལྡན་གནས། །ཕུང་པོ་ལྔ་ཉིད་རྫོགས་སངས་རྒྱས། །ཐམས་ཅད་མཆོག་གི་སྙིང་པོར་གནས། །གཞན་དུ་རྒྱལ་བས་ཆོས་མི་བཙལ། ཞེས་གསུངས་པ་བཞིན་ངེས་པ་དོན་གྱི་དབང་དུ་བྱས་ན་དེ་ལྟར་ཡིན་པ་རེད། བགེགས་དང་བར་གཅོད་ཀྱི་མིང་ཙམ་ཡང་མེད་མོད། འོན་ཀྱང་ལྟ་བས་ཡིན་པ་ལ་ཡིན་པར་ཤེས་པའི་ངེས་པ་མ་རྙེད། གཟུང་འཛིན་གཉིས་ཀ་རྒྱང་ཆད་དུ་སོང་ནས་འཁྲུལ་བ་ཡུལ་དུ་ཤར་ཏེ་གཟུང་ཡུལ་རགས་པའི་ཞེན་སྣང་སྐྱེས་པ་ནི། དབུ་མ་འཇུག་པ་ལས། དང་པོ་ང་ཞེས་བདག་ལ་ཞེན་གྱུར་ཅིང་། །བདག་གི་འདི་ཞེས་དངོས་ལ་ཆགས་བསྐྱེད་པ། །ཟོ་ཆུན་འཕྱན་ལྟར་རང་དབང་མེད་པ་ཡི། ཞེས་གསུངས་པ་ལྟར། མ་རྟོགས་འཁྲུལ་པའི་སྡུག་བསྔལ་མྱོང་བ་འདི། གློ་བུར་རྣམ་རྟོག་འཁྲུལ་བའི་གདོན་ཞེས་གསུངས་པ་བཞིན། གློ་བུར་རྣམ་རྟོག་གི་འཁྲུལ་བའི་གདོན་གྱི་དབང་དུ་སོང་བ་ཡིན་ཞིང་། དེ་ལྟ་བུའི་འཁྲུལ་བའི་གདོན་དེ་མིང་མེད་དུ་ཕྱིར་བསྐྲད་ནས། ཆོས་དབྱིངས་ངང་དུ་མཚམས་གཅད་དོ་ཞེས་ཆོས་ཀྱི་དབྱིངས་སྤྲོས་པ་དང་བྲལ་བ། མཚན་མའི་ཟུག་རྔུ་སྣ་ཚོགས་དང་བྲལ་བའི་ངང་དུ་ཕྱིན་ཆད་སླར་མི་ལྡང་ཞིང་སླར་ཡང་འཁྲུལ་བའི་གདོན་བགེགས་ཀྱིས་གླགས་ལྟ་བའི་གོ་སྐབས་མེད་པར་བྱེད་པ་ཡིན་ཞེས་གསུངས། སྤྱིར་མཚམས་ཞེས་པ་འདི་ལ་ཕྱི་མཚམས་ནང་མཚམས་གསང་མཚམས་སོགས་ཀྱི་དབྱེ་བ་མང་ཡང་། འདི་རང་བཞིན་གྱི་མཚམས་ཏེ་རྣམ་རྟོག་བགེགས་ཡིན་ན་བགེགས་དེ་ཉིད་རང་སེམས་ལས་བྱུང་བ་ཡིན་པས། སེམས་རང་བཞིན་མེད་པར་ཤེས་ཏེ་ཆོས་ཉིད་ཀྱི་ངང་དུ་མི་རྟོག་པར་བསྒོམས་པས་རྣམ་རྟོག་ཆོས་ཉིད་ཀྱི་ངང་དུ་ནུབ་ནས་བགེགས་ཞེས་བྱ་བའི་མིང་ཡང་མེད་པར་གྱུར་བ་དེ་འདྲ་ཡིན་པ་རེད། དེ་ལྟ་བུའི་ཆོས་ཉིད་གདེང་དུ་གྱུར་པའི་སྟབས་ཀྱིས་བདག་ཉིད་ཆེན་པོའི་མཚམས། ལྷའི་རྣལ་འབྱོར་དང་མ་བྲལ་བའི་ངང་ནས། འདི་ནས་ཤུགས་བསྟན་དུ་སྲུང་བའི་འཁོར་ལོའི་མཚམས་རྡོ་རྗེ་ལ་སོགས་པའི་མཚོན་ཆའི་ཚོགས་ཡེ་ཤེས་ཀྱི་འོད་བསྐལ་བའི་མེ་ལྟར་འབར་བ། ཕྱག་མཚན་ལྔ་ཡི་གུར་ཁང་རིམ་པ་ལྔ་ཡིས་བར་མཚམས་མེད་པར་ཡོངས་སུ་བསྐོར་ནས་ཅིས་ཀྱང་མི་ཆོད་མི་ཤིགས་པར་བྱེད་པའི་དོན་རེད། སྲུང་བའི་འཁོར་ལོ་ཞེས་གསུངས་པའི་འཁོར་ལོའི་དབྱིབས་ལེབ་མོ་ཞིག་མ་རེད། འདི་ཐོག་ལ་བཞག་ན་འོག་ལ་མེད། འོག་ལ་བཏིང་བ་ཡིན་ན་ཐོག་ལ་ཡང་མེད། འཁོར་ལོ་གཅིག་སྟེང་དུ་དང་གཞན་གཅིག་འོག་ཏུ་བྱས་ན་ཡང་མཐའ་སྐོར་རྣམས་སྟོང་པ་རེད་འགྲོ་སྙམ་པའི་གུ་དོག་གི་བསམ་བློ་གཏོང་མི་དགོས། འཁོར་ལོའི་ཁོང་གསེང་ཡངས་ཤིང་རྒྱ་ཆེ་བ་གཞལ་ཡས་ཁང་ཆོས་དབྱིངས་དང་མཉམ་པའི་བཀོད་པ་ཤོང་ཐུབ་པ། མཐའ་སྐོར་གྱི་རྩིབས་ཐམས་ཅད་རལ་གྲིའི་སོ་ལྟར་མཉམ་པར་སྦྱར་བའི་འཁོར་ལོའི་གུར་ཁང་དུ་བསྒོམ་དགོས། དེ་ལྟར་དུ་རིགས་ལྔའི་ཕྱག་མཚན་ཐམས་ཅད་ཀྱི་སྲུང་འཁོར་བསྒོམ་དུས་ཀྱང་དེའི་གོ་བ་ལེན་དགོས་པ་རེད། དྲུག་པ་ཡེ་ཤེས་བྱིན་འབེབས། དྲུག་པ་ཡེ་ཤེས་བྱིན་འབེབས་ནིཿ ཞེས་གསུངས་ཏེ། བྱིན་འབེབས་འདི་དབྱིངས་ནས་ཡེ་ཤེས་པ་སྤྱན་དྲངས་ནས། བདག་གནས་སྒྲུབ་རྫས་ཡོ་བྱད་དང་བཅས་པ་ཐམས་ཅད་ལ་བྱིན་ནམ་བྱིན་རླབས་ཀྱི་མཐུ་ཁྱད་པར་ཅན་འབེབས་ཤིང་ཐོབ་པར་བྱེད་པ་ཞིག་རེད། རིག་འཛིན་བླ་མའི་སྒྲུབ་པ་འདི་བྱིན་རླབས་དངོས་གྲུབ་ཀྱི་འབྱུང་གནས་ཡིན་པས་དགོངས་པ་བརྡ་དང་སྙན་བརྒྱུད་ཀྱི་བརྒྱུད་གསུམ་རིག་འཛིན་བླ་མའི་བྱིན་རླབས་བསྐུལ་ཞིང་འབེབས་པ་རེད། ཧཱུྃཿ སྤྲོས་བྲལ་ཆོས་སྐུའི་ཕོ་བྲང་ནསཿ དང་པོའི་སངས་རྒྱས་ཀུན་ཏུ་བཟངཿ རིགས་ལྔ་ཡབ་ཡུམ་སྤྲུལ་འཁོར་བཅསཿ དགོངས་བརྒྱུད་བླ་མས་བྱིན་ཆེན་ཕོབཿ ཅེས་གསུངས་ཏེ། ཧཱུྃ་ཞེས་པའི་ཡི་གེ་འདི་རྒྱལ་བ་ཐམས་ཅད་ཀྱི་ཐུགས་ཀྱི་གསང་བ་མཚོན་བྱེད་ཀྱི་ཡི་གེ་ཡིན་པ་རེད། དེའི་སྟབས་ཀྱིས་བྱིན་འབེབས་དང་སྤྱན་འདྲེན་ལ་སོགས་པའི་ཚིག་གི་འགོར་འདི་འབྱུང་བ་ཡིན། སྤྲོས་བྲལ་ཆོས་སྐུའི་ཕོ་བྲང་ནས། དང་པོའི་སངས་རྒྱས་ཀུན་ཏུ་བཟང་ཞེས་གསུངས་ན། ཐོག་མའི་ཤོ་ལོ་ཀ་གཅིག་འདིས་རྒྱལ་བ་དགོངས་བརྒྱུད་བསྟན་པ་རེད། དེ་ཡང་རྟག་ཆད་སྐྱེ་འགག་ཡོད་མེད་ཡིན་མིན་ལ་སོགས་པ་སྤྲོས་པ་མཐའ་དག་དང་བྲལ་བ་ཆོས་སྐུའི་ཕོ་བྲང་། རང་སྣང་འོག་མིན་སྟུག་པོ་བཀོད་པའི་ཞིང་ཁམས་སུ། དང་པོའི་སངས་རྒྱས་ཀུན་ཏུ་བཟང་ཞེས་ཉིད་ལས་མི་གཞན་ཐ་མི་དད་པའི་ཡེ་ཤེས་ལྔ་ཡི་ངོ་བོ། རིགས་ལྔ་ཡབ་ཡུམ་སྤྲུལ་འཁོར་དང་བཅས་པའི་སྟོན་པས་ཚིག་དང་སྒྲ་ཡིས་མི་མཚོན་ཞིང་ཡིད་དཔྱོད་བློ་ལས་འདས་པའི་རྫོགས་པ་ཆེན་པོ་བསྟན་པ་ཡིན་ན། དགོངས་བརྒྱུད་བླ་མས་བྱིན་ཆེན་ཕོབ་ཅེས་དགོངས་པས་བྱིན་གྱིས་བརླབས་པ་བརྒྱུད་ནས་ཉིད་ལས་མི་གཞན་པའི་རྡོ་རྗེ་སེམས་དཔའ་སོགས་ལ་ཡེ་ཤེས་འཕོས་པའམ་ཤར་བའི་རྒྱལ་བ་དགོངས་བརྒྱུད་ཀྱི་བླ་མས་བྱིན་རླབས་ཀྱི་ཆར་ཆེན་ཕོབ་མཛོད་ཅིག་ཅེས་གསུངས། སྒྱུ་འཕྲུལ་རྡོ་རྗེའི་ཕོ་བྲང་ནསཿ དགའ་རབ་འཇམ་དཔལ་བཤེས་གཉེན་དངཿ ཤྲཱི་སིང་ཛྙཱ་ན་སཱུ་ཏྲ་སོགསཿ བརྡ་བརྒྱུད་བླ་མས་བྱིན་ཆེན་ཕོབཿ ཅེས་གསུངས་ཏེ། སྒྱུ་འཕྲུལ་རྡོ་རྗེའི་ཕོ་བྲང་ནས་ཞེས་གསུངས་ན། ཆོས་སྐུའི་དབྱིངས་ལས་ལོངས་སྐུའི་འོད་མདངས་རིགས་ལྔའི་རྒྱལ་བར་ཤར་ནས། དེ་ཉིད་ལས་དག་པར་སྣང་བའི་སྒྱུ་འཕྲུལ་གྱི་རོལ་གར་དེ་གང་ཡིན་ན་དགོངས་པ་ཆོས་དབྱིངས་དང་དབྱེར་མི་ཕྱེད་པའམ་དེ་ལས་འདའ་བ་མེད་པ་རྡོ་རྗེ་དང་ཆོས་མཚུངས་པའི་རྣམ་རོལ་འགག་པ་མེད་པའི་ཕོ་བྲང་ནས། དགའ་རབ་འཇམ་དཔལ་བཤེས་གཉེན་དང་། ཤྲཱི་སིང་ཛྙཱ་ན་སཱུ་ཏྲ་སོགས་ཞེས་གསུངས་ན། ལྷ་དེ་བ་བཟང་སྐྱོང་གི་བུ་སེམས་ལྷག་ཅན་ལ་རྡོ་རྗེ་སེམས་དཔས་དབང་བསྐུར། མན་ངག་བྱིན་ནས་ལྷ་གནས་སུམ་ཅུ་རྩ་གསུམ་གྱི་ཡུལ་ལ་གསང་སྔགས་ཨ་ཏིའི་བསྟན་པ་སྤེལ་ནས། སླར་ཡང་འཇིག་རྟེན་མི་ཡུལ་ནས་ཨོ་རྒྱན་རྒྱལ་པོ་དྷརྨ་ཨ་ཤྭ་ཀའི་སྲས་མོ་རུ་གསེར་གྱི་བྱེ་མ་བརྡལ་བའི་མཚོ་འགྲམ་དུ་འཁྲུངས་པའི་སློབ་དཔོན་དགའ་རབ་རྡོ་རྗེ་ཞེས་ཞུ་བའི་གསང་བདག་དཔའ་བོས་རྒྱལ་ཐབ་སྤྱི་བླུགས་ཀྱི་དབང་བསྐུར་ས་དེ་ཉིད་དང་། དེའི་སློབ་མ་སིངྒ་ལའི་རྒྱལ་པོའི་སྲས་འཇམ་དཔལ་བཤེས་གཉེན། དེའི་སློབ་མ་རྒྱ་ནག་པོའི་སློབ་དཔོན་ཤྲཱི་སིངྷ། དེའི་སློབ་མ་ཛྙཱ་ན་སཱུ་ཏྲ། ལ་སོགས་པ་གསུངས་ན་སོགས་ཁོངས་ཀྱི་ནང་དུ་སློབ་དཔོན་པདྨ་དང་བཱི་མ་ལ། ནཱ་ག་རྫུ་ནའམ་འཕགས་པ་ཀླུ་སྒྲུབ་དང་། འཇམ་དཔལ་བཤེས་གཉེན་ཕྱི་མ་དང་སངས་རྒྱས་ཡེ་ཤེས་ཞབས་ལ་སོགས་པ་དང་། བརྡ་བརྒྱུད་བླ་མས་བྱིན་ཆེན་ཕོབ་ཅེས་གསུངས་ན། མཆོག་གི་དངོས་གྲུབ་བརྙེས་པའི་རིག་འཛིན་བརྡ་བརྒྱུད་ཀྱི་བླ་མ་དེ་རྣམས་ཀྱིས་བྱིན་ཆེན་ཕོབ་ཅེས་གསུངས་པ་རེད། འགྲོ་འདུལ་སྤྲུལ་པའི་ཕོ་བྲང་ནསཿ རིག་འཛིན་བརྒྱད་དང་པདྨ་འབྱུངཿ རྗེ་འབངས་ཉི་ཤུ་རྩ་ལྔ་སོགསཿ སྙན་བརྒྱུད་བླ་མས་བྱིན་ཆེན་ཕོབཿ ཅེས་གསུངས་ཏེ། འགྲོ་འདུལ་སྤྲུལ་པའི་ཕོ་བྲང་ནས་ཞེས་གསུངས་ན། དག་དང་མ་དག་གི་འགྲོ་བ་འདུལ་བ་ལ་ཆུ་སྣོད་ཟླ་གཟུགས་ཀྱི་དཔེ་བཞིན་དུ་གང་ལ་གང་འདུལ་གྱི་སྣང་ངོར་དེ་ལ་དེ་ལྟར་དུ་ཤར་ནས། རིག་འཛིན་བརྒྱད་དང་པདྨ་འབྱུང་ཞེས་གསུངས་ན། སྤྱིར་བཏང་རིག་འཛིན་མཆོག་བརྒྱད་ཀྱི་ནང་དུ་པདྨ་འབྱུང་གནས་འདུས་པ་ཡིན་ཡང་། བོད་གངས་ཅན་གྱི་ལྗོངས་འདིར་གསང་སྔགས་ཨ་ཏིའི་བསྟན་པ་སྤེལ་བའི་སྲོལ་འབྱེད་མཛད། བསྟན་ཞབས་གཏེར་གྱིས་བསྡམས་པའི་བཀའ་དྲིན་གྱི་ངོས་ནས་ཟུར་དུ་སྨོས་པའམ། དེ་མིན་གོང་ནས་ཞུས་པ་ལྟར་ཆེ་མཆོག་སྒྲུབ་པ་བཀའ་བརྒྱད་ཀྱི་ཆོས་བཀའ་ཟབ་མོ་དེ་འོག་མིན་གྱི་གནས་ནས་ཀུན་ཏུ་བཟང་པོ་དཔལ་ཧེ་རུ་ཀས་ཡོངས་སུ་དག་པའི་འཁོར་ལ་རྡོ་རྗེའི་ཚིག་གིས་གསུངས་པ་དེ་ཉིད། བཀའི་སྡུད་པ་པོ་རྡོ་རྗེ་ཆོས་ལ་སོགས་པས་བསྡུས་ནས་རྫུ་འཕྲུལ་གྱི་ཡི་གེར་སྣང་བ་ཉིད་རིན་པོ་ཆེའི་སྒྲོམ་གྱི་ནང་དུ་བཅུག་ནས་མཆོད་རྟེན་ཆེན་པོ་བདེ་བྱེད་བརྩེགས་པ་ནས་མཁའ་འགྲོ་མ་ལས་ཀྱི་དབང་མོ་ཆེ་མཁའ་འགྲོ་རྒྱ་མཚོའི་ཚོགས་དང་བཅས་པ་ལ་གཉེར་དུ་གཏད་པ་དུར་ཁྲོད་བསིལ་བའི་ཚལ་ནས་གྲུབ་རིག་གི་སློབ་དཔོན་རྣམ་བརྒྱད་དང་པྲ་བྷ་ཧསྟི་དགུ་ལ་དགོངས་པ་གཏད་པའི་ཚེ། མཁའ་འགྲོ་མ་ལས་ཀྱི་དབང་མོ་ཆེས་སྒྲོམ་བུ་བརྒྱད་རིག་འཛིན་རེ་རེའི་ཕྱག་ཏུ་བཞག་པས། དབུས་ཀྱི་རིན་ཆེན་སྣ་ལྔའི་སྒྲོམ། བཀའ་བརྒྱད་ཀྱི་དཀྱིལ་འཁོར་གཅིག་ཏུ་སྒྲུབ་པའི་ཆོས་སྐོར་དེ་པདྨ་འབྱུང་གནས་ཀྱི་ཕྱག་ཏུ་གཏད་ནས། ཆེ་མཆོག་རྣམ་དགུའི་སྤྱི་དཔལ་གྱི་བཀའ་བབས་ཡིན་པའི་རྒྱུ་མཚན་གྱིས་རིག་འཛིན་བརྒྱད་དང་པདྨ་འབྱུང་ཞེས་པད་འབྱུང་དམིགས་ཀྱིས་བཀར་ནས་ཟུར་དུ་མཚན་སྨྲོས་པ་རེད་ཅེས་འགྲེལ་ནའང་ཆོག གང་ལྟར་པད་འབྱུང་ནས་རྗེ་འབངས་ཉེར་ལྔ་སོགས་ལ་བརྒྱུད་པའི་བརྒྱུད་པ་དེ་དངོས་བསྟན་རེད། དེ་ཡང་མུ་མཐུད་དེ་གོང་གི་འཕྲོས་དོན་བཤད་ན། རིག་འཛིན་བརྒྱད་ནི། ཧཱུྃ་ཀ་ར་དང་འཇམ་དཔལ་བཤེས་གཉེན། ནཱ་ག་རྫུ་ན། པདྨ་འབྱུང་གནས། དྷ་ན་སཾ་ཀྲྀ་ཏ། བི་མ་མི་ཏྲ། རོམ་བུ་གུ་ཧྱ། ཤནྟིཾ་གརྦྷ་བཅས་རེད། བཀའ་བབས་ཀྱི་རིག་འཛིན་དགུ་བྱས་ནས་བཤད་དུས་ཀྱང་ཡོད། དགུ་བྱས་པའི་སྐབས་སུ་པྲ་བྷ་ཧསྟི་དང་དགུར་བརྩི་བ་ཡིན། རིན་པོ་ཆེའི་སྒྲོམ་དགུ་ནི། གསེར་དངུལ་ཟངས་ལྕགས་བཞི། གཟི་མཆོང་གཡུ། བསེ་སྒྲོམ་དང་བཞི། དེའི་སྟེང་ལ་རིན་ཆེན་སྣ་ལྔའི་སྒྲོམ་དང་དགུར་བརྩི་བ་རེད། ཆེ་མཆོག་སྒྲུབ་པ་བཀའ་བརྒྱད་ནི། འཇམ་དཔལ་སྐུ། པདྨ་གསུང། ཡང་དག་ཐུགས། ཆེ་མཆོག་ཡོན་ཏན། ཕུར་པ་འཕྲིན་ལས། མ་མོ་རྦོད་གཏོང་། འཇིག་རྟེན་མཆོད་བསྟོད། དམོད་པ་དྲག་སྔགས་ཏེ་བརྒྱད་རེད། ཚོམ་བུ་དགུའི་ནང་རིག་འཛིན་བླ་མའི་སྒྲུབ་པའང་འདུས་པ་རེད། རྗེ་འབངས་ཉི་ཤུ་རྩ་ལྔ་སོགས་ཞེས་གསུངས་ན། རྗེ་འབངས་ཉི་ཤུ་རྩ་ལྔ་ནི། རྗེ་རྒྱལ་པོ་ཁྲི་སྲོང་ལྡེའུ་བཙན། འབངས་ལོ་ཆེན་བེེ་རོ་ཙ་ན། གྲོགས་མཁའ་འགྲོ་ཡེ་ཤེས་མཚོ་རྒྱལ་ཏེ་རྗེ་འབངས་གྲོགས་གསུམ་གྱིས་གཙོ་བོར་མཛད་པའི་གཞན་ཉི་ཤུ་རྩ་གཉིས་ཁར་སང་དབང་བསྐུར་པའི་སྐབས་ལྷ་དབང་པདྨ་རཱ་གའི་ཕྲེང་བའི་ནང་མཚན་རེ་རེ་དང་སྦྲགས་གྲུབ་པའི་རྣམ་ཐར་དང་བཅས་པ་ཡོད་པ་ལྟར་རེད། སྙན་བརྒྱུད་བླ་མས་བྱིན་ཆེན་ཕོབ་ཅེས་གསུངས་ན། དེ་ལྟ་བུའི་ཞལ་ནས་སྙན་དུ་བརྒྱུད་པ་སྟེ། སྔོན་ནས་ད་ལྟའི་བར་གྱི་རིག་འཛིན་བརྒྱུད་པ་ཟམ་མ་ཆད་པས་བྱིན་ཆེན་ཕོབ་ཅེས་གསུངས་པ་རེད། དེ་ཡང་རིག་འཛིན་འཇིགས་གླིང་ཞལ་བཞུགས་པའི་སྐབས་སུ་འདི་ནས་ཡར་ཁམས་པ་གནས་སྐོར་བ་འགའ་རེ་སྐུ་མདུན་དུ་བཅར་ཏེ་ཁམས་རྫོགས་ཆེན་ནས་ཡིན་རབས་ཞུ་དུས། འཇིགས་གླིང་ཚང་གིས་ཞལ་རྩེད་མཛད་ནས། རྫོགས་ཆེན་ཚང་གིས་བུམ་སྒྲུབ་འཚོགས་སྐབས་ཁོང་ཡང་བྱིན་འབེབས་ཀྱི་སྐབས་སུ་བྱོན་དགོས་པ་རེད། ལྷ་ཁང་གི་རྒྱ་མཐོངས་ཁར་ཐལ་ལ་ཞིབ་པོ་ཅིག་ཡོད་ཅེས་གསུངས་རབས་ཡོད། མང་ཆེ་བས་ཁོང་རྣམ་པ་མི་མཐོང་ཞིང་གདོང་གྲལ་གྲལ་མཇུག་གི་གྲྭ་ཕྲུག་ཆབ་རིལ་མགོ་སྟ་དེས་ནམ་ཡིན་མཐོང་འགྲོ་གི་འདུག་ཅེས་གསུངས་རབས་ཡོད། དེ་ལྟ་བུའི་ཐོགས་མེད་ཀྱི་མཁྱེན་པ་དང་ལྡན་པའི་དབྱིངས་ན་བཞུགས་པའི་རིག་འཛིན་རྩ་བརྒྱུད་ཀྱི་བླ་མ་རྣམས། གདུང་པའི་བུ་ལ་མ་ཕྱིར་འབྲངས་པ་ལྟ་བུས་དད་གུས་གདུང་བའི་ཡིད་ཀྱིས་སྤྱན་དྲངས་ན་བྱོན་རྒྱུ་དང་། བྱིན་རླབས་ཞུས་ན་འབེབས་པ་ཡིན་ཏེ། གང་ཞིག་མོས་པ་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། ཞེས་གསུངས་པ་ལྟར་རེད། གཞན་ཡང་མ་ག་དྷ་བཟང་མོས་སངས་རྒྱས་འཁོར་བཅས་སྤྱན་དྲངས་པ་ལྟ་བུ་སོགས་རེད། དཀྱིལ་འཁོར་འདི་ལ་བཀྲག་ཅིག་ཐོནཿ སྒྲུབ་རྫས་འདི་ལ་ཞག་ཅིག་སྐྱིལཿ ལུས་ངག་ཡིད་ལ་བདེ་ཆེན་སྤོརཿ མཆོག་དང་ཐུན་མོང་དངོས་གྲུབ་སྩོལཿ ཞེས་གསུངས་ཏེ། འདི་བདག་དང་གནས་དང་ཡོ་བྱད་སྒྲུབ་རྫས་བྱིན་གྱིས་བརླབས་པ་དང་ཚུལ་མཚུངས་པའི་གོ་བ་རེད། དཀྱིལ་འཁོར་འདི་ལ་བཀྲག་ཅིག་ཐོན་ཞེས་གསུངས་ན། དཀྱིལ་འཁོར་ཞེས་གསུངས་པ་འདི་ལ་དབྱེ་བ་མང་བ་རེད། གོང་ནས་ཀྱང་ཞུས་མོད། དེ་ཡང་རྒྱུད་ལས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་གསུམ། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། ཞེས་གསུངས་ན། འདིས་ནི་རང་བཞིན་དཀྱིལ་འཁོར་དང་ཞེས་པ་འདིས་གཞི་རང་བཞིན་གྱི་དཀྱིལ་འཁོར་བསྟན་པ་རེད། དེ་ཡང་ཆོས་ཐམས་ཅད་ཡེ་ནས་རྣམ་པར་དག་པ་གནས་ལུགས་གཞི་ཡི་དཀྱིལ་འཁོར་དང་། གློ་བུར་གྱི་དྲི་མ་བྲལ་བས་གཞི་ཇི་བཞིན་པ་མངོན་དུ་གྱུར་པ་ལ་མཐར་ཕྱིན་འབྲས་བུའི་དཀྱིལ་འཁོར་ཞེས་པའི་དབྱེ་ཚུལ་ཡོད་ཀྱང་། དོན་དངོས་པོའི་སྟེང་ནས་བཤད་ན་དེ་གཉིས་ཀ་གཞི་འབྲས་དབྱེར་མེད་ཀྱི་དཀྱིལ་འཁོར་མ་བྱས་ལྷུན་གྱིས་གྲུབ་པའི་རང་བཞིན་གྱི་དཀྱིལ་འཁོར་ཞེས་གསུངས་པ་ཡིན། གཟུགས་བརྙན་ལྷག་པའི་གཟུགས་བརྙན་གསུམ་ཞེས་གསུངས་ན། དེ་ལྟ་བུའི་གཞིའི་གནས་ལུགས་དེ་ཉིད་ཇི་བཞིན་པ་མ་རྟོགས་པར་མ་དག་འཁོར་བའི་གནས་སུ་སྣང་བ་ལ་གཟུགས་བརྙན་གྱི་དཀྱིལ་འཁོར་ཞེས་གསུངས། འདི་ལ་གཟུགས་བརྙན་ཞེས་གསུངས་དགོས་པའི་རྒྱུ་མཚན་ནི་སྣང་ངོར་མ་དག་པ་ཙམ་གནས་ཚུལ་མ་ཡིན་པའི་ཆ་ནས་གཟུགས་བརྙན་ཞེས་སུ་གསུངས། གནས་ཚུལ་དུ་ངོ་བོ་དག་པ་ཡིན་པའི་ཆ་ནས་དཀྱིལ་འཁོར་ཞེས་གསུངས། ལྷག་པའི་གཟུགས་བརྙན་ནི་གོང་གི་བགེགས་བསྐྲད་ཀྱི་སྐབས་སུ་སྣོད་བཅུད་སྤྲུལ་པའི་དཀྱིལ་འཁོར་གྱི་དོན་དང་མི་འདྲ་སྟེ། གཟུགས་བརྙན་ལྷག་པའི་གཟུགས་བརྙན་ཞེས་གསུངས་པའི་གཟུགས་བརྙན་རྗེས་མ་དེའི་འགོར་ལྷག་པ་ཞེས་སྦྱར་དགོས་པའི་རྒྱུ་མཚན་ནི་དག་པའི་རྟེན་དང་བརྟེན་པ་མཚོན་བྱེད་དུ་རྡུལ་ཚོན་དང་། རས་བྲིས། ཚོམ་བུ་ལ་སོགས་པ་ཕྱག་རྒྱའི་མཚན་མར་བཀོད་པ་དེ་དག་མ་དག་འཁོར་བའི་མཚན་མ་ལས་ཐ་སྙད་དུ་ལྷག་པས་ན་ལྷག་པ་གཟུགས་བརྙན་གྱི་དཀྱིལ་འཁོར་ཞེས་གསུངས་པ་ཡིན། ཏིང་འཛིན་ལྷག་པའི་ཏིང་འཛིན་དང་ཞེས་གསུངས་ཏེ། བཞི་བ་ཏིང་འཛིན་གྱི་དཀྱིལ་འཁོར་ནི་ཆོས་ཐམས་ཅད་རྒྱལ་བ་ཀུན་ཀྱི་སྐུ་གསུང་ཐུགས་གསང་བ་གསུམ་ལས་མ་འདས་པ་ཡུལ་དུ་བྱས་ནས་བསྒོམ་པ་དེ་རེད། ལྔ་བ་ལྷག་པའི་ཏིང་འཛིན་ནི། དེ་ལས་ཀྱང་གང་འདུལ་ཞི་བ་དང་ཁྲོ་བོའི་དཀྱིལ་འཁོར་རྟེན་དང་བརྟེན་པའི་རྣམ་པ་མ་འདྲེས་པར་གསལ་སྣང་ཐོན་པར་བསྒོམ་པ་དེ་ཉིད་དང་། དྲུག་པ་བྱང་ཆུབ་སེམས་ཀྱི་དཀྱིལ་འཁོར་ནི། རྩ་རླུང་ཐིག་ལེ་ལམ་དུ་བྱེད་པ་ལ་བརྟེན་ནས་རང་གནས་ལྷན་སྐྱེས་བདེ་ཆེན་གྱི་ཡེ་ཤེས་མངོན་དུ་བྱ་བ་དང་། བདུན་པ་ཚོགས་མཆོག་བསྟན་པའི་དཀྱིལ་འཁོར་ནི། ལྷའི་རྣལ་འབྱོར་དང་ལྡན་པའི་མཆེད་ལྕམ་སྒྲུབ་པ་པོ་སྒྲུབ་པ་ཟབ་མོའི་ཆེད་དུ་ལྷན་ཅིག་ཏུ་འཚོགས་པ་དེ་ཉིད་རེད། འདི་ལ་ཚོམ་བུ་ཚོགས་ཀྱི་དཀྱིལ་འཁོར་ཡང་གསུངས། དེ་ལྟ་བུའི་དཀྱིལ་འཁོར་གྱི་དབྱེ་བསྡུ་ཤིན་ཏུ་མང་། གཞན་ཡང་དཀྱིལ་འཁོར་ཞེས་པ་འདིས་རྡོ་རྗེ་ཐེག་པའི་གཞི་ལམ་འབྲས་བུའི་དོན་ཐམས་ཅད་བསྡུས་ནས་བསྟན་ཡོད་པར་གསུངས། དེས་ན་དཀྱིལ་འཁོར་ཞེས་གསུངས་པ་འདི་ཉིད་མདོར་བསྡུས་ན་ཤེས་པར་བྱ་བ། བསྒྲུབ་པར་བྱ་བ། འཐོབ་པར་བྱ་བ་བཅས་ཡིན་པ་སྟེ། དེ་ཡང་གཞི་རང་བཞིན་གྱི་དཀྱིལ་འཁོར་ཤེས་པར་བྱ་དགོས་པ་དང་། ལམ་སྒོམ་པའི་དཀྱིལ་འཁོར་ཉམས་སུ་བླངས་ནས་བསྒྲུབ་པར་བྱ་བ། འབྲས་བུ་རང་བཞིན་གྱི་དཀྱིལ་འཁོར་འཐོབ་པར་བྱ་དགོས་པ་བཅས་སོ། འོན་ཀྱང་གཞིའི་གནས་ལུགས་སྨྲ་བསམ་བརྗོད་པ་ཀུན་བྲལ་བློ་འདས་ཡིན་པས་དེ་ལ་ཆེད་འཛིན་དང་དམིགས་གཏད་ཀྱིས་ཤེས་པར་བྱར་མེད་པ་དང་། དེ་ཉིད་ཡེ་ནས་གནས་པ་ཡིན་པས་ན་ལམ་གྱིས་བསྒྲུབ་མི་དགོས་པ་དང་བསྒྲུབ་ཏུ་མེད་པ། ཡེ་ནས་ལྷུན་གྱིས་གྲུབ་པར་ཡོད་པ་ལ་འབྲས་བུ་གསར་དུ་ཐོབ་པ་མེད་ཅིང་། འཐོབ་པར་བྱ་བའི་ཆོས་མ་དམིགས་པས་ན་ཐོབ་པ་མེད་པའམ་འཐོབ་པར་བྱར་མེད་པ་ཡིན། དེའི་ཕྱིར་ན་སྣང་ཚུལ་ཐ་སྙད་དུ་སྒྲུབ་པའི་མིང་ཡོད་རུང་གནས་ཚུལ་དོན་དམ་ཏུ་བསྒྲུབ་མེད་ལྷུན་གྱིས་གྲུབ་པའི་དཀྱིལ་འཁོར་ཡིན་པའི་དོན་ཤེས་དགོས་པ་རེད། དེས་ན་འདི་ནས་དཀྱིལ་འཁོར་འདི་ལ་བཀྲག་དང་གཟི་མདངས་ཐོན་གསུངས་པ་འདི། ཆོས་ཉིད་ཅི་ཡང་མ་ཡིན་པ་ལས་ཅིར་ཡང་སྣང་བའི་ཆོ་འཕྲུལ་མ་འགག་པར་ཤར་བའི་དཀྱིལ་འཁོར་བདུན་ནམ་གསུམ་གྱི་བདག་ཉིད་ཅན་གོང་དུ་བཤད་པ་འདི་ལྟ་བུ་ལ། བརྒྱུད་གསུམ་རིག་འཛིན་བླ་མའི་དགོངས་པ་ཆོས་ཉིད་ལས་མ་འདས་པའི་བྱིན་ཆེན་དེ་ཉིད་ཞི་གནས་ཏིང་འཛིན་བསྒོམས་པའི་མཐུ་དང་ལྷག་མཐོང་ཡེ་ཤེས་ཀྱི་ཆོ་འཕྲུལ་མངའ་བའི་སྟོབས་ཀྱིས་ཕོབ་ལ། དེ་ཡང་ཏིང་འཛིན་རྣམ་གསུམ་དང་སྦྱར་ན་དབང་བསྒྱུར་ཐབས་ཀྱི་ཏིང་ངེ་འཛིན་གྱིས་གནས་དང་དཀྱིལ་འཁོར་ལ་བཀྲག་མདངས་སྟོན། ཤེས་རབ་སྙིང་རྗེའི་ཏིང་ངེ་འཛིན་གྱིས་སྒྲུབ་རྫས་ལ་བཅུད་ཀྱི་ཞག་ཅིག་སྩོལ། ཕྱག་རྒྱ་ཆེན་པོའི་ཏིང་འཛིན་གྱིས་སྒྲུབ་པ་པོའི་ལུས་ངག་ཡིད་ལ་བདེ་ཆེན་མཆོག་གི་བྱིན་ཆེན་མེ་ལྟར་སྦོར་ཞེས་གསུངས་པ་རེད། སྒྲུབ་རྫས་འདི་ལ་ཞག་ཅིག་སྐྱིལ། ལུས་ངག་ཡིད་ལ་བདེ་ཆེན་སྦོར་ཞེས་གསུངས་ཏེ། སྒྲུབ་པ་རྫས་ཀྱི་ཡོ་བྱད་ཟེར་བ་འདི་དཀྱིལ་འཁོར་དབུས་ཀྱི་སྒྲུབ་རྟེན་གཙོ་བོ་རྣམས་དང་ཕྱི་ནང་གི་མཆོད་རྫས་ལ་སོགས་པ་ཐམས་ཅད་སྒྲུབ་གཞི་འདུས་མ་བྱས་པ་ཆོས་ཀྱི་དབྱིངས་ཆེན་པོའི་ངང་ལས། གང་བསྒྲུབ་པར་བྱ་བ་ལྷའི་གསང་གསུམ་གྱི་ནུས་པ་དང་བྱིན་རླབས་དེ་ཉིད་སྣོད་བཅུད་ལ་ཞུགས་ནས། ཞག་ཅིག་སྩོལ་ཞེས་གསུངས་ཏེ། རང་རེའི་ཁ་སྐད་དུ་ཁ་ལ་ཞག མཐིལ་ལ་སྙིགས་ཟེར་བ་ལྟར། ཡར་གྱི་དབུས་པ་ཚོས་དེ་ལ་ཞག་རྩི་མི་ཟེར་རམ། འོ་མའི་ནང་དུ་མར་གྱི་བཅུད་ཡོད་པ་ལྟ་བུ་རེད། ཕྱི་གསེར་དངུལ་གྱི་བུམ་པ་ཡིན་ཡང་ནང་དུ་ཆུ་རྐྱང་ལས་མེད་པ་བཅུད་མེད་སྙིང་པོ་མེད་པའི་རིགས་དེ་འདྲ་མ་ཡིན་པར་རྫས་ལ་བྱིན་རླབས་ཀྱི་བཅུད་དང་། ཞག་ཅིག་སྐྱིལ་ཞེས་སྐྱིལ་ཞེས་པ་འཁྱིལ་པའི་སྐུལ་ཚིག་རེད། ལུས་ངག་ཡིད་ལ་བདེ་ཆེན་སྦོར་ཞེས་གསུངས་ན་སྒྲུབ་པ་པོ་བདག་ཅག་སྐལ་ལྡན་རྡོ་རྗེའི་མཆེད་ལྕམ་གྱི་ལུས་ལ་སྐུ་ཡི་བྱིན་ཕོབས་ལ་སྐུ་ཟུང་འཇུག་ལྷ་སྐུའི་རང་བཞིན་དུ་བསྒྱུར། ངག་ལ་གསུང་གི་བྱིན་ཕོབས་ལ་ངག་སྔགས་ཚིག་བརྗོད་བྲལ་གྱི་དབྱངས་སུ་བསྒྱུར། ཡིད་ལ་ཐུགས་ཀྱི་བྱིན་ཆེན་ཕོབས་ལ་ཐུགས་འགྱུར་མེད་བདེ་སྟོང་གི་ངོ་བོ་ལས་མི་འདའ་བའི་བདེ་བ་མཆོག་གི་ཡེ་ཤེས་ཀྱི་མེ་ཆེན་ནང་ནས་སྦོར་ཞེས་གསུངས་པ་རེད། མཆོག་དང་ཐུན་མོང་དངོས་གྲུབ་སྩོལ་ཞེས་གསུངས་ན། མཆོག་གི་དངོས་གྲུབ་མི་སློབ་ཟུང་འཇུག་ཀུན་ཏུ་བཟང་པོའི་གོ་འཕང་དང་། ཐུན་མོང་གི་དངོས་གྲུབ་གྲུབ་པ་བརྒྱད་ལ་སོགས་པ་སྩོལ་ཞེས་གསུངས། ཨོཾ་ཨཱཿཧཱུྃཿ བིདྱཱ་དྷཱ་ར་ཨེ་ཨ་ར་ལི་ཕཻཾ་ཕཻཾཿ ཧཱུྃ་ཧཱུྃ་ཧཱུྃཿ ཧཱུྃ་ཧཱུྃ་ཧཱུྃཿ ཧཱུྃ་ཧཱུྃ་ཧཱུྃཿ ཞེས་གསུངས་ན། ཨོཾ་ཨཱཿཧཱུྃཿ ཞེས་པ་འདི་རྡོ་རྗེ་གསུམ་གྱི་སྙིང་པོ་སྟེ། གསང་བ་གསུམ་གྱི་བྱིན་རླབས་སྒྲུབ་པ་པོའི་སྒོ་གསུམ་ལ་ཐོབ་པའི་དོན་དང་། བིདྱཱ་དྷཱ་ར་ནི་གོང་ནས་ཞུས་པ་ལྟར་རིག་པ་འཛིན་པ། ཨེ་ཨ་ར་ལི་ཕཻཾ་ཕཻཾཿནི་རོལ་བས་དབང་དུ་སྡུད་པ། མཇུག་ཏུ་ཧཱུྃ་གསུམ་ཡོད་པའི་ཧཱུྃ་གསུམ་གྱིས་སྐུ་གསུང་ཐུགས་རིག་འཛིན་སྔགས་ཀྱི་དངོས་གྲུབ་དང་བཅས་པ་རོལ་བས་དབང་དུ་བསྡུས་ཏེ་བྱིན་ཕོབ་ཅིག་ཅེས་གསུངས་པའི་དོན་རེད། འདིའི་མཇུག་ཏུ་ད་དུང་ཧཱུྃ་ཡོད་པ་འདི་ཡེ་ཤེས་ཀློང་དགུའི་བྱིན་ཕོབ་ཅེས་པའི་བརྡ་གླུ་རེད་ཅེས་སྨྲས་ན་མི་ཆོག་པ་མེད། དེ་འདྲ་ཡིན་པར་གསུངས་པའང་ཡོད། འོན་ཀྱང་གཙོ་བོ་ཧཱུྃ་དང་པོ་གསུམ་གྱིས་བྱིན་རླབས་བསྐུལ། ཧཱུྃ་བར་མ་གསུམ་གྱིས་བྱིན་རླབས་བསྡུས། ཧཱུྃ་ཐ་མ་གསུམ་གྱིས་བྱིན་རླབས་ཡོངས་རྫོགས་ཐོབ་ཅེས་པའི་འགྲེལ་ལུགས་བྱས་ནའང་འབྲེལ་ཆགས་པ་ཡིན་སྙམ། གསང་སྔགས་ནི་མོས་པ་ལམ་བྱེད་དག་སྣང་གི་སྒོ་ཅན་ཡིན་པས། སེམས་ཀྱི་ཏིང་འཛིན་དང་སྦྱར་ན་སྔགས་ཀྱི་དངོས་གྲུབ་འབྱུང་བའི་ནུས་པ་ལྷག་པར་ཆེ་བ་རེད། གོང་གི་བྱིན་འབེབས་ཀྱི་ཚིག་དང་འོག་གི་སྔགས་གཉིས་བསྐྱར་ཟློས་བྱས་པའི་ཟློས་སྐྱོན་མེད་དམ་སྙམ་ན་ཟློས་སྐྱོན་མེད་དེ། གོང་གི་ཚིག་གིས་བྱིན་རླབས་བསྐུལ་བ་དང་། འོག་གི་སྔགས་ཀྱིས་གནད་ལ་འབེབས་པ་ཡིན། ཚིག སྔགས། ཏིང་འཛིན། ཕྱག་རྒྱ་བཞི་ཀ་དགོས་པ་རེད། དེ་དག་ནི་གསང་སྔགས་ལུང་གི་སྒོ་བཞི་མ་ཡིན་ནམ། དོན་རྣམ་གསལ་འདེབས་བརྗོད་པ་ཚིག་གི་སྒོ། །ཐུགས་དམ་གནད་བསྐུལ་གསང་བ་སྔགས་ཀྱི་སྒོ། །དམིགས་པ་རྩེ་གཅིག་ཏིང་འཛིན་ཡིད་ཀྱི་སྒོ། །མཚོན་པ་བརྡར་རྟགས་ཕྱག་རྒྱ་གར་གྱི་སྒོ། ཞེས་གསུངས་པས་གསང་སྔགས་ལུང་གི་སྒོ་བཞི་ཚང་དགོས་པ་རེད། དེས་ན་འདིའི་སྐབས་སུ་ལྟ་དགོངས་ཏིང་འཛིན་གྱི་ཟིལ་ཤུགས་བསྐྱེད་ནས་རྟོགས་པ་ཀློང་དུ་གྱུར་པ་འདི་བྱིན་རླབས་འདྲེན་པའི་ལྕགས་ཀྱུ་ཡིན་པ་རེད། ཡིག་ཆུང་དུ། ཞེས་བརྗོད་རོལ་མོ་དྲག་ཏུ་དཀྲོལཿ ཞེས་གསུངས་ན། བྱིན་འབེབས་ཀྱི་སྐབས་སུ་དྲི་ཞིམ་གྱི་སྤོས་བདུག རྔ་སིལ་རོལ་དབྱངས་སྒྲོག འདིའི་དུས་སུ་རང་རེས་རྒྱུད་གསུམ་རོལ་མོ་རྡུང་བ་མ་ཡིན་ནམ། རྒྱུད་གསུམ་རོལ་མོ་ཞེས་པའི་དོན་བརྒྱུད་པ་གསུམ་གྱི་རོལ་མོ་ཞེས་པའི་དོན་མིན། རྒྱུད་གསུམ་མམ་ལྷུ་གསུམ་ཅན་གྱི་རོལ་ཚིགས་ཞེས་པའི་དོན་ཡིན། གོང་དུ་སྔགས་མཇུག་ཏུ་ཧཱུྃ་གསུམ་ཅན་གསུམ་ཡོད་པ་རྣམས་དང་གོ་དོན་ཆ་འདྲ་བ་རེད་སྙམ། རྒྱུད་དང་པོས་བྱིན་རླབས་བསྐུལ། རྒྱུད་བར་མས་བྱིན་རླབས་བསྡུས། རྒྱུད་ཐ་མས་བྱིན་རླབས་ཐོབ་པར་མཚོན་པའི་བརྡ་རྟགས་ཡིན་པ་རེད། རོལ་མོའི་ཞོར་དུ་ཕོ་རྒྱུད་དཔའ་བོའི་བཤུག་གླུ་དང་མོ་རྒྱུད་དཔའ་མོའི་སྣང་གླུ་ལེན། དར་དམར་འདི་ཉིད་སོར་རྟོགས་ཡེ་ཤེས་ཀྱི་རང་མདོག་དབང་གི་ཁ་དོག་སྟེ། སྤྱན་འདྲེན་བྱིན་འབེབ་ཀྱི་འགུག་པའི་གཡབ་མོ་དང་། དར་ཁྲ་འདི་དག་ཡེ་ཤེས་ལྔ་མཚོན་གྱི་ཕྱག་རྒྱ་འབོད་པའི་བརྡ་རྟགས་ཡིན་པ་རེད། དེའི་སྟེང་ལ་མེད་ན་ཐབས་མེད་ཀྱི་བཅུ་དྲུག་ལྟག་སྤྲོད་ཀྱི་ཐོད་རྔ་སྟེ་དཔའ་བོ་མཁའ་འགྲོ་འདུ་བའི་རྫས། ཐབས་ཤེས་མཚོན་བྱེད་ཀྱི་རྡོར་དྲིལ་བཅས་འཆང་བ་རྟགས་ཀྱི་ཕྱག་རྒྱ་གསང་སྔགས་ཀྱི་རྫས་དང་ཡོ་བྱད་འདི་དག་སྔགས་པ་ཞིག་ལ་མེད་དུ་མི་རུང་བ་ཡིན། མདོར་ན་བྱིན་འབེབ་ཀྱིས་བྱིན་ཕབས་ནས། སྣོད་ལ་བྱིན་ཕབས་པས་ཡུལ་ཕྱོགས་དག་པའི་ཞིང་ཁམས་སུ་བསྒྱུར། གནས་དེར་སུ་ཞིག་སླེབ་པ་དང་སུས་མཐོང་ན། སེམས་དྭངས་རིག་པ་གསལ། མི་རྟོག་པའི་ཡེ་ཤེས་ངང་གིས་སྐྱེ་བ་དང་། སྒྲུབ་ཁང་པདྨ་འོད་ཀྱི་གཞལ་ཡས་ཁང་དང་གཉིས་སུ་མ་ཡིན་པའི་སྣང་བ་ཤར་བ། བཅུད་ལ་བྱིན་ཆེན་ཕབས་པས་རྣལ་འབྱོར་ཕོ་མོ་ཐམས་ཅད་ཀྱི་སྒོ་གསུམ་ཡེ་ཤེས་ཀྱི་རོལ་པ་ལས་མི་འདའ་བར་སྔར་མེད་ཀྱི་ཉམས་རྟོགས་སོ་མ་ན་འཕར་བའི་དབང་གིས། རྣལ་འབྱོར་པ་འགའ་རེ་རྩ་ཁམས་ཀྱི་དབང་གིས་རང་དབང་མེད་པར་ཡར་ལངས་ནས་ལུས་ཀྱི་སྟངས་སྟབས་ཀྱིས་ཕྱག་རྒྱ་དང་བྲོ་གར་འཁྲབ་བསམ་པ། ངག་གིས་ཐོལ་བྱུང་དུ་སྙན་པའི་གདུང་དབྱངས་མགུར་དབྱངས་སུ་འཐེན་སྙམ་པ། སེམས་གསལ་སྟོང་འགག་མེད་མཁའ་ལ་ཉི་ཟླ་ཤར་བ་ལྟ་བུའི་འོད་གསལ་གྱི་ཉམས་ལྷག་པར་འབར་བ་འབྱུང་། སྒྲུབ་རྫས་ལ་བྱིན་ཕབས་པས་ཡེ་ཤེས་པའི་བྱིན་རླབས་མངོན་སུམ་དུ་ཞུགས་པའི་རྟགས་སུ་གཏོར་མ་འོད་དུ་ཞུ་བའམ། བདུད་རྩིའི་རྒྱུན་རང་བབས་ཏུ་འབྱུང་བ། སྨན་རཀ་འཕྱུར་བ་སོགས་ཀྱི་རྟགས་མཚན་འབྱུང་བ་ལྟ་བུ་རེད། བདུན་པ་མཆོད་རྫས་བྱིན་རླབས། བདུན་པ་མཆོད་རྫས་བྱིན་རླབས་ནིཿ ཞེས་གསུངས་ཏེ། མཆོད་པ་ནི་པཱུ་ཛ་ཞེས་པའི་སྒྲ་ལས་དྲངས་ན་སྔོན་དུ་བསྐྱེད་པར་བྱ་བའམ་ཡང་ཡང་དགྱེས་པ་བསྐྱེད་པར་བསྐུལ་བའི་དོན་ལ་འཇུག་པ་རེད། དེ་ཡང་སྔོན་དུ་བསྐྱེད་པར་བྱེད་པ་ཡིན་ཚུལ་ནི་དགེ་བའི་ལས་ཐམས་ཅད་ཀྱི་སྔོན་ལ་མཆོད་པ་འགྲོ་དགོས་པ་ལྟ་བུ་དང། དེ་ཉིད་ལྷ་དགྱེས་པ་སྐྱེད་བྱེད་ཀྱང་ཡིན་ཏེ། མཆོད་པའི་སྐབས་སུ་གུས་པར་བཀུར་ནས་མཆོད་པ་ཐམས་ཅད་ཀྱིས་ཡང་ཡང་དགྱེས་པ་བསྐྱེད་པ་རེད། མཆོད་པའི་དབྱེ་བ་ལ་འཇིག་རྟེན་དང་འཇིག་རྟེན་ལས་འདས་པའི་མཆོད་པ་དང་། བླ་ན་ཡོད་པའི་མཆོད་པ་དང་བླ་ན་མེད་པའི་མཆོད་པ། དངོས་སུ་བཤམས་པ་དང་ཡིད་ལས་བྱུང་བ། དེ་བཞིན་ཞིང་དང་བསམ་པ་དངོས་པོའི་བྱེ་བྲག་གིས་ཐུན་མོང་དང་ཁྱད་པར་གྱི་མཆོད་པའི་དབྱེ་བ་ཡོད་པ་རེད། རྟེན་གྱི་སྒོ་ནས་དབྱེ་ན་ནང་གང་ཟག་རང་གི་སྒོ་གསུམ་གྱི་རྒྱུད་ཀྱིས་བསྡུས་པ་དང་ཕྱི་རོལ་རྫས་དང་ཡོ་བྱད་ཀྱིས་བསྡུས་པ་གཉིས་དང་། རྣམ་པའི་སྒོ་ནས་དབྱེ་ན་བཀུར་བསྟིའི་མཆོད་པ་དང་། ཟང་ཟིང་གི་མཆོད་པ། བསྒྲུབ་པའི་མཆོད་པ་ལ་སོགས་པ་མང་ཡང་འདི་ནས་ཨ་ནུ་རང་ལུགས་ཀྱི་སྐབས་དང་བསྟུན་ནས། ཐབས་དང་ཤེས་རབ་གཉིས་མེད་ཟུང་འཇུག་གི་དཀྱིལ་འཁོར་གསུམ་གྱི་སྣང་སྤྱོད་དང་མི་འབྲལ་བའི་སྒྲོམ་ལས་བཤད་པ་ཡིན་ན། དེ་ཡང་སྣང་སྲིད་བདེ་བ་ཆེན་པོའི་མཆོད་པ། ཕྱི་ནང་གསང་བ་དེ་ཁོ་ན་ཉིད་དང་བཅས་པ་འདུས་པའི་ཀུན་བཟང་མཆོད་པའི་རྣམ་རོལ་དུ་བྱིན་གྱིས་བརླབས་པ་རེད། ཨོཾ་ཨཱཿཧཱུྃཿ སྣང་སྲིད་ཐམས་ཅད་མཆོད་པའི་སྤྲིན་ལ་སོགས་པ་གསུངས་ན། ཨོཾ་ཨཱཿཧཱུྃ་གསུམ་ནི་རྡོ་རྗེ་གསུམ་གྱི་སྙིང་པོ་སྟེ། མཆོད་རྫས་སྦྱང་སྤེལ་བསྒྱུར་བའི་སྔགས་ཡིག་འབྲུ་གསུམ་གྱིས་འགོ་བླངས་ནས། སྣང་སྲིད་ཐམས་ཅད་མཆོད་པའི་སྤྲིནཿ ཡེ་ཤེས་བདུད་རྩིར་བྱིན་བརླབས་པསཿ ཕྱི་ནང་གསང་བའི་མཆོད་རྫས་ཀུནཿ ཀུན་བཟང་རྣམ་འཕྲུལ་ཆེན་པོར་གྱུརཿ ཞེས་གསུངས་པའི་མཆོད་པ་ཐམས་ཅད་ཀྱི་རིགས་ཚུར་བསྡུས་པ་ཡིན་ན་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་བཞིའི་ཁོངས་སུ་འདུས་པ་སྟེ། ཕྱི་ཉེར་སྤྱོད་ཀྱི་མཆོད་པ། ནང་དམ་རྫས་ཀྱི་མཆོད་པ། གསང་བ་སྦྱོར་སྒྲོལ་གྱི་མཆོད་པ། དེ་ཁོ་ན་ཉིད་མཉམ་པ་ཆེན་པོའི་མཆོད་པ་བཅས་སོ། སྣང་སྲིད་ཐམས་ཅད་མཆོད་པའི་སྤྲིན་ཞེས་གསུངས་ན། སྣོད་དང་བཅུད་ཀྱིས་བསྡུས་པའི་སྣང་ཞིང་སྲིད་པའི་ཆོས་ཐམས་ཅད་མཆོད་པའི་སྤྲིན་དུ་འབུལ་བ་སྟེ། སྣང་སྲིད་གཞིར་བཞེངས་ཀྱི་མཆོད་པ་འདིས་ཕྱི་མཆོད་གཙོ་བོར་བསྟན་ཅིང་། ཡེ་ཤེས་བདུད་རྩིར་བྱིན་བརླབས་པས་ཞེས་པས། དེ་ཐམས་ཅད་ཡེ་ཤེས་ཀྱི་བདུད་རྩི་ཟག་པ་མེད་པའི་མཆོད་སྤྲིན་དུ་ཡིན་གསུམ་གྲུབ་བཞིའི་བདག་ཉིད་དུ་བྱིན་གྱིས་བརླབས་པ་རེད། དེ་ཡང་ཡིན་པ་གསུམ་ནི་ངོ་བོ་ཡེ་ཤེས་ཀྱི་བདུད་རྩི་ཡིན་པ། དུག་ལྔ་སེལ་བའི་སྨན་ཡིན་པ། དངོས་གྲུབ་སྒྲུབ་པའི་རྫས་ཡིན་པ་དང་། གྲུབ་པ་བཞི་ནི་སྔགས་དང་འབྲེལ་ནས་རྗེས་ནས་བཤད་ཆོག ནང་གི་མཆོད་པ་ནི་དམ་རྫས་བདུད་རྩིའི་མཆོད་པ། དམར་ཆེན་རཀྟའི་མཆོད་པ། བཱ་ལིང་གཏོར་མའི་མཆོད་པ་སྟེ་གསུམ་དང་། རྡོ་རྗེའི་ལུས་ཀྱི་རྩ་རླུང་ཐིག་ལེའི་ཆོས་ཁམས་རྣམ་པར་དག་པའི་མཆོད་པ་རེད། གསང་མཆོད་ནི་སྦྱོར་སྒྲོལ་དང་དུག་ལྔ་ཡེ་ཤེས་ལྔ་དང་དུག་གསུམ་སྐུ་གསུང་ཐུགས་སུ་མཆོད་པ། དེ་ཁོ་ན་ཉིད་མཉམ་པ་ཆེན་པོའི་མཆོད་པ་ནི་རིག་སྟོང་མཉམ་པའི་མཆོད་པ་སྟེ་མཆོད་བྱ་དང་མཆོད་ཡུལ་ཐ་མི་དད་པའམ་ཐ་དད་དུ་མ་དམིགས་པ་སྟེ། ཕྱི་ནང་གསང་བ་ལ་སོགས་པའི་མཆོད་པ་ཐམས་ཅད་ཀུན་ཏུ་བཟང་པོའི་རྣམ་རོལ་གྱི་ཆོ་འཕྲུལ་ཆེན་པོ་མཁའ་དང་ཆོས་དབྱིངས་ཀྱི་རྒྱ་ཁྱོན་ལྟར། དུས་དང་ཕྱོགས་ཀྱི་མཐའ་ཟད་པ་མེད་པའི་མཆོད་པའི་རྣམ་འཕྲུལ་རྒྱ་ཆེན་པོར་བྱིན་གྱིས་བརླབས་ནས་མཆོད་ཅེས་གསུངས་པ་ཡིན། མཆོད་རྫས་བྱིན་རླབས་འདི་དག་ཆོ་གའི་མཆོད་པ་བྱིན་རླབས་ཀྱི་སྐབས་སུ་དགོས་པ་ཡིན་ཞིང་། སྦྱོར་བ་སྔོན་འགྲོའི་སྔོན་དུ་བཅའ་བཤམ་དང་འབྲེལ་ནས་ཆོ་ག་རང་གཞུང་གི་མཆོད་པ་བྱིན་རླབས་དང་བྱིན་འབེབས་རེ་ངེས་པར་དུ་བྱེད་དགོས་པ་རེད། མཆོད་དཔོན་གྱིས་གཏོར་མ་བཅའ་ཚར་མ་ཐག་བསྐྱུར་ནས་མི་འགྲོ་བར་མཆོད་པ་བྱིན་རླབས་དང་བྱིན་འབེབས་རེ་ངེས་པར་བྱེད་དགོས་པ་ཡིན། དེ་ལྟར་མ་བྱས་ན་མཆོད་རྫས་ལ་བགེགས་འཇུག་སྲིད་པ་རེད། ཕྱི་མཆོད་ལྟ་བུ་ལ་མཚོན་ན། ཡོན་ཆབ་ལ་དྲི་ཟ་ཉེ་བ་འཁོར། མེ་ཏོག་ལ་མེ་ཏོག་ཚེ་རྒྱལ། བདུག་སྤོས་ལ་ནག་པོ་དྲི་ལྡན། སྣང་གསལ་ལ་གྲིབ་གནོན་རྐུན་པོ། དྲི་ཆབ་ལ་བདུག་པའི་དྲི་འཕྲོག ཞལ་ཟས་ལ་ལོག་འདྲེན་གདོང་བརྒྱ་བ་ལ་སོགས་པའི་བགེགས་དེ་དག་འཇུག་པ་རེད་ཅེས་གསུངས་པ་རེད། མཆོད་པ་བྱིན་གྱིས་རླབས་པའི་སྔགས་ནི། ཨོཾ་གྱིས་འགོ་བླངས་ཏེ། བཛྲ་ཨརྒྷཾ་སོགས་མཆོད་ཡོན་ནས་ཤབྟ་རོལ་མོའི་བར་གྱི་མཆོད་ཡོན་ཞབས་བསིལ་མེ་ཏོག་བདུག་སྤོས་མར་མེ་དྲི་ཆབ་རོལ་མོའི་བར་གྱི་རྣམ་བདུན་དང་། སརྦ་པཉྩ་རཀྟ་བྷ་ལིངྟ་མ་ཧཱ་སུ་ཁ་པཱུ་ཙ་ཨཱཿཧཱུྃཿ ཞེས། སརྦ་ཐམས་ཅད། པཉྩ་སྨན། རཀྟ་ཁྲག བྷ་ལིངྟ་གཏོར་མ། མ་ཧཱ་སུ་ཁ་བདེ་བ་ཆེན་པོ། སྨན་གཏོར་རཀྟ་བདེ་བ་ཆེན་པོའི་མཆོད་པ་ཐམས་ཅད་ཨཱ་སྐྱེ་བ་མེད་པའི་ཡི་གེས་མི་དམིགས་ཏིང་འཛིན་གྱི་རོལ་པར། ཧཱུྃ་གིས་རོལ་ཤིག་གམ་གནས་སུ་བསྟབ་ཅིང་སྨིན་པར་མཛོད་ཅེས་པའི་དོན་རེད་སྙམ། མཆོད་པའི་སྐབས་འདིར་མཆོད་དཔོན་གྱིས་སྭ་བྷ་ཝ་ལ་སོགས་པས་སྟོང་པར་སྦྱངས་བའི་སྔགས་ཀྱིས་བརླབས་པའི་ཆུ་གཙང་གིས་མཆོད་པ་སྤྱི་ལ་བྲན་པ་ཡིན་ལ། དེ་དུས་དཀྱིལ་འཁོར་གྱི་ནང་གི་སྨན་རཀ་དང་བླ་མའི་མདུན་གྱི་ནང་མཆོད་ལའང་ངེས་པར་དུ་བྲན་དགོས་པ་རེད། ལན་གསུམ་བརྗོད་པས་བྱིན་གྱིས་བརླབསཿ ཞེས་གསུངས་ན། གསང་བ་རྨད་བྱུང་གི་མཆོད་པར་བྱིན་གྱིས་བརླབས་པའི་སྨན་གཏོར་རཀྟའི་སྔགས་འདི་ལན་གསུམ་ཐོན་གསུངས་པ་རེད། དེ་དག་གིས་ཆོ་གའི་སྦྱོར་དངོས་རྗེས་གསུམ་ལས་སྦྱོར་བ་སྔོན་འགྲོའི་ཆོས་ཀྱི་ལེ་ཚན་བདུན་སོང་། ཆུ་ཚོད་ཀྱང་ཡུན་རིང་ཞིག་སོང་ཟིན་པས་དེ་རིང་འདིར་བཞག་ནས་འདི་མན་ཆོད་ཀྱི་ཆོ་གའི་དངོས་གཞི་ངོ་མ་སང་ཉིན་འཆད་རྒྱུ་བྱ། དེ་རིང་ཕྱི་དྲོ་ནས་བསྙེན་མཚམས་ཀྱི་དབུ་འཛུགས་རྒྱུ་རེད། སང་ཉིན་ནས་བཟུང་དུས་རྒྱུན་ཡར་འཚོགས་མ་ཐག དང་པོ་དམ་གྲིབ་ཀྱི་ཉེས་པ་སེལ་ཆེད་དུ་རྣམ་འཇོམས་དང་སྨེ་བརྩེགས་ཀྱི་ཁྲུས་རེ་བསྒྲུབ་རྒྱུ་གྱིས། དེ་རིང་དམིགས་བསལ་ལ་བཀའ་བགེགས་མཚམས་གཅོད་ཀྱི་སྐབས་དང་བསྟུན་ནས་སྒོ་ཁའི་ཕྱོགས་བཞི་ནས་རྒྱལ་ཆེན་བཞི་ཡི་ཐོ་འཛུགས་རྒྱུའི་ཉམས་ལྟ་བུ་ཞིག་བྱས་ནས་དམིགས་པའི་སྒོ་ནས་མཚམས་གཅོད་གྱིས། འུ་ཅག་གི་མཚམས་འདིའི་ཤར་ལྷོ་ནུབ་ཀྱི་མཚམས་གསུམ་ཕྱོགས་གསུམ་གྱི་རི་རྩེ་གསུམ་དང་། བྱང་གི་མཚམས་མཆོད་རྟེན་དཀར་པོར་བཞག མཚམས་བཅད་བྱས་ཚར་རྗེས་ནང་དུ་ཡར་ཕེབས་ཏེ་བྱིན་འབེབས་ནས་དབུ་བཟུང་སྟེ་བསྙེན་སྒྲུབ་ཡན་ལག་བཞི་ལྡན་གྱི་ནང་ནས་དང་པོ་བསྙེན་པའི་དབུ་འཛིན་རྒྱུ་གྱིས། འཛབ་ཁང་ལྷག་པར་དབྱེ་མི་དགོས། རིག་འཛིན་སྲོག་སྒྲུབ་བཏགས་དགོས་པ་རེད། བསྙེན་པའི་སྐབས་ཀྱི་ཞག་དང་པོ་གཅིག་གཉིས་ལ་ལྷའི་གསལ་སྣང་བརྟན་རྒྱུ་གནད་ཆེ། བཟླས་དམིགས་ཀྱི་སྐབས་ལྟར་སེམས་དཔའ་སུམ་བརྩེགས་སུ་བསྒོམ་དགོས། དེ་ནས་ལྷའི་གསལ་སྣང་བརྟན་པོ་ཞིག་ཡོང་བའི་ཚེ་ས་བོན་དང་སྔགས་ཕྲེང་ལ་སེམས་ཟུངས། ལྷ་ཚོགས་ཐམས་ཅད་ཀྱི་ཞལ་ནས་སྔགས་སྒྲ་སྒྲོག་བཞིན་ཡོད་པར་བསམ། དེ་ནས་སྔགས་ཕྲེང་ལས་ཀྱང་རང་སྒྲ་སྒྲོག་བཞིན་དུ་འཁོར་ནས་སྔགས་ལ་འོད་ཟེར་ཡོད་པར་བསྒོམ། རེ་ཞིག་ནས་སྔགས་ཕྲེང་ཡང་ཇེ་མགྱོགས་སུ་འཁོར་ཚེ་འོད་ཟེར་ཡང་ཇེ་ཆེར་འཕྲོས་ཏེ་རང་གི་ལུས་ཀྱི་ནང་ཐམས་ཅད་གང་ནས་ནད་གདོན་སྡིག་སྒྲིབ་བག་ཆགས་ཐམས་ཅད་དག་འགྲོ་བར་བསམ། དེ་ཡང་ལྟ་བའི་རང་ངོ་སྐྱོང་བ་ནམ་ཡིན་ཡང་མེད་དུ་མི་རུང་བ་སྲོག་ལྟ་བུ་ཡིན་པ་རེད། རྗེས་བསྡུ་རིམ་གྱི་སྐབས་སུ་ལྷར་ལྡང་སོགས་བསྐྱེད་རྫོགས་དབྱེར་མེད་ཀྱི་དགོངས་པ་དང་མཐུན་དགོས། བསྙེན་སྒྲུབ་ཡན་ལག་བཞི་བོའི་སྐབས་སུ་དམིགས་བསལ་བཟླས་དམིགས་ཀྱི་རིམ་པ་ཇི་ལྟར་དགོས་པ་ངས་ཟུར་བཀོལ་བྱས་ནས་ལས་དང་པོ་པ་ལ་ཕན་ཐོགས་ཡོང་རྒྱུའི་ཆེད་དུ་མཚམས་དང་མཚམས་སུ་སྦྱང་ཤིང་གི་ངོར་བྲིས་ཏེ་རྣམ་པ་ཚོར་སྤྱན་བསྟར་ཞུ་ཆོག དེ་འཕྲོས་དགེ་འདུན་པ་རྣམ་པ་ཚང་མར་ཞུ་དགོས་པ་མི་འདུག་སྟེ། སྤྱིར་སྡོམ་གསུམ་གནང་བཀག་གི་ཉམས་བཞེས་ཀྱི་ཐད་ལ་བྱོན་བཞུགས་གང་གི་སྐབས་ཡིན་ཡང་ཐུགས་ལྷོད་ཅིས་ཀྱང་གནང་མི་རུང་ཞིང་། ཁྱད་པར་དུ་པདྨ་ཐང་ལུང་རྟོགས་པདྨའི་དགའ་ཚལ་གྱི་གནས་འདིར་བཞུགས་ཚེ། འདི་སྒེར་གྱི་བཅའ་སྒྲིག་མ་ཡིན་ཞིང་། སྟོན་པ་སངས་རྒྱས་ཀྱིས་བཅས་པའི་དམ་ཆོས་འདུལ་བའི་བཅས་ཁྲིམས་ཡིན་པས། འདུལ་ཁྲིམས་མིག་གི་འབྲས་བུ་བཞིན་དུ་སྲུང་བ་གལ་ཆེ། རྒྱུན་སྒྲིག་ལྟར་ཉིན་ཕྱོགས་ཀྱི་བཙུན་པ་བཞུགས་སའི་སྒར་ལ་བཙུན་པ་བཞུགས། སྲིབ་ཕྱོགས་ཀྱི་བཙུན་མ་བཞུགས་སའི་སྒར་ལ་བཙུན་མ་བཞུགས། ལུང་པ་ཉིན་སྲིབ་ཆུས་བཅད་ཡོད་པ་རེད། སྔགས་ཕོ་མོ་དང་གཞན་དག་དགེ་བསྙེན་གྱི་རིགས་ཐམས་ཅད་ལུང་གཞུང་དཀྱིལ་སྨད་དུ་སྡོད། དེ་ལྟར་རང་རང་གི་བབས་ཐོབ་ཀྱི་སྒར་ས་བཟུང་སྟེ་བཞུགས་པ་ལས་དགོངས་ཞུ་བྱས་ཀྱང་གནང་བ་ཐོབ་པ་མ་རེད། དམ་ཆོས་འདུལ་བའི་བཅས་ཁྲིམས་ལ་སུ་གཅིག་གིས་གནང་བ་སྦྱིན་ཐབས་མེད། ད་རེས་འདི་ན་ཆོས་གཅིག་གིས་བསྡུས་ཤིང་ཆོས་ར་གཅིག་གི་ནང་དུ་མཉམ་དུ་ཞུགས་ཏེ། དཀྱིལ་འཁོར་གཅིག་ལ་བརྟེན་ནས་ཚོགས་སྒྲུབ་ཏུ་ཞུགས་པ་ཚང་མ་སྐལ་ལྡན་རྡོ་རྗེའི་མཆེད་ལྕམ་ཡིན་པས། ནང་ཕན་ཚུན་སྙིང་ལས་ཀྱང་གཅེས་པའི་བརྩེ་སེམས་ཡོད་མཁན་རྐྱང་རྐྱང་ཡིན་དགོས་པས་ཐུགས་སེམས་བསམ་པ་ཆིག་སྒྲིལ་གྱིས། གལ་ཏེ་འདིའི་ནང་དུ་ཁ་དཀར་ཁོག་ནག ཟ་ཁ་ཡར་གཏད། སྙིང་ཁ་ཕྱིར་གཏད་ཀྱི་མ་རུངས་ཁོག་བཅུག་རྐུ་ཐབས་སུ་གནས་པ་འདྲ་ཡོད་སྲིད་ན་དོ་དགོང་ནས་དཀྱིལ་འཁོར་གཉན་པོའི་གྲལ་དུ་མ་ཡོང་མ་གཏོགས། བཀའ་ཆད་རང་ཐོག་ཏུ་ཡོང་ངེས་ཡིན་པས་དེ་དུས་འགྱོད་ཀྱང་འཕྱིས་པ་རེད། སྙིང་རྗེའི་དབང་གིས་བཟང་སེམས་ཙམ་བྱས་ནས་བཤད་པ་ཡིན། གཞན་ཡང་ཕྱོགས་སོ་སོ་ནས་ཕེབས་པའི་ཆོས་ཞུ་བ་རྣམ་པ་ཚོ་དང་ཁྱད་པར་དུ་སྦྲ་གུར་ལ་བརྟེན་ནས་བཞུགས་མཁན་རྣམས་ཀྱིས་སྐུ་བསིལ་དུ་མ་འཇུག ཆོས་ཁྲིད་དང་ཐུན་གྱི་སྐབས་སུ་ཤུལ་གྱི་སྐུ་ཆས་ཉར་ཚགས་ལེགས་པོར་གྱིས། འུ་ཅག་གི་དགོང་ཐུན་དེ་ཆུ་ཚོད་བདུན་པ་ནས་དགུ་ཕྱེད་བར་ཡིན་པར་བཤད་ཀྱང་ཅུང་ཟད་འཕྱིས་ཨེ་དྲགས་སྙམ་པས། གསུང་ཆོག་དང་བཟླས་གྲངས་ལ་དུས་ཚོད་ཀྱིས་འདང་བར་འདུག་སྙམ་ན་དགུ་པའི་སྟེང་གྲོལ་དགོས་པ་ཨེ་ཡིན་སྙམ། དེ་དང་མཉམ་དུ་གཉུག་མར་གནས་པ་དང་གློ་བུར་ལྷག་པའི་དགེ་འདུན་པ་གཞི་བྱེས་ཐམས་ཅད་ཀྱིས་རང་གཞན་བདེ་ཐང་གི་ཆེད་དུ་ཁོར་ཡུག་གཙང་སྦྲ་དང་། ལྗོན་ཤིང་ནགས་ཚལ་སྲུང་སྐྱོབ་མཛད་པ་སོགས་ཀྱི་ཐུགས་འགན་མཉམ་དུ་བཞེས་དགོས། ཐོག་མེད་ནས་ད་ལྟའི་བར་སེམས་ཀུན་རྟོག་ཆགས་སྡང་རྨོངས་གསུམ་གྱི་གཞན་དབང་དུ་ཤོར་ཏེ། ཐང་ཆད་ཉོན་མོངས་བརྒྱ་ཡིས་ངལ་ནས་ཡོད་པ་ཚང་མས་བསམ་གཏན་སྒོམ་པའི་ཡང་དབེན་འདིར། དབྱར་འགོ་མའི་སྣོད་བཅུད་ཀྱི་བཀྲག་མདངས་རྒྱས་བཞིན་ཡོད་པ་འདི་དང་མཉམ་དུ་ངལ་གསོ་ཞིག་མཛད་ནས་གུ་ཡངས་བློ་བདེ་བག་ཕེབས་ཀྱི་ངང་ནས་བཞུགས་རོགས་ཞུ་བ་དང་ཆབས་ཅིག་དེ་རིང་གི་ཆོས་མཚམས་འདི་ནས་འཇོག ། ཉིན་གཉིས་པའི་ཆོས་ཁྲིད།ནམ་མཁའི་མཐའ་དང་མཉམ་པའི་མར་གྱུར་འགྲོ་བ་སེམས་ཅན་ཐམས་ཅད་སྡུག་བསྔལ་རྣམ་གསུམ་གྱིས་མནར་བའི་འཁོར་བའི་ཁྲི་མུན་ཡ་ང་བ་འདིའི་ནང་ནས་ཐར་ཏེ། ཐར་པ་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཟུང་འཇུག་རྡོ་རྗེ་འཆང་གི་གོ་འཕང་ལ་འགོད་པའི་ཆེད་དུ། བདག་གིས་ད་རེས་བསྐྱེད་རྫོགས་རིམ་གཉིས་ཀྱི་ཉམས་ལེན་ལ་འབད་ནས། རིག་འཛིན་བཞིའི་ས་ལམ་ཉི་ཟླའི་བགྲོད་པ་ལྟ་བུའི་མྱུར་ལམ་ཚེ་འདིའི་ཐོག་ནས་རྫོགས་ཐུབ་པ་ཞིག་བྱེད་དགོས། དེའི་ཆེད་དུ་ཆོས་ཉན་པ་ཡིན་བསམ་པའི་ཀུན་སློང་དང་དེ་དང་མཐུན་པའི་ཀུན་སྤྱོད་དང་བཅས་ཏེ་གསན་དགོས་པ་རེད། གང་ཞིག་གསན་པར་བྱ་བ་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཆོས་སྡེ་ལས་བྱུང་བའི་ནང་སྒྲུབ་རིག་འཛིན་འདུས་པའི་བསྐྱེད་རྫོགས་ཀྱི་སྐོར་འཆད་བཞིན་པ་ལས། ཁར་སང་ཡན་ཆོད་ལ། སྦྱོར་དངོས་རྗེས་གསུམ་ཚང་བ་ཡིས། །རྟེན་འབྲེལ་ཟབ་མོས་ཉམས་སུ་བླང་། ཞེས་གསུངས་པ་ལས། སྔོན་འགྲོ་སྦྱོར་བའི་ཆོས་ཏེ། དེ་ལ་ཡང་ནང་གསེས་ཀྱི་རྣམ་པ་བདུན་ཡོད་པ་ཆ་ཚང་སོང་གྲུབ་ནས། དེ་རིང་རྩ་བའི་ས་བཅད་གཉིས་པ་ཆོ་གའི་དངོས་གཞི་ཡིན་པ་རེད། གཉིས་པ་དངོས་གཞི། གཉིས་པ་དངོས་གཞིར་རྣམ་གྲངས་བདུནཿ ཞེས་གསུངས་ཏེ། དངོས་གཞི་དེ་ལའང་རྣམ་གྲངས་བདུན་ཡོད་པ་བསྐྱེད་ཆོག སྤྱན་འདྲེན། བཞུགས་གསོལ། ཕྱག་འཚལ་ལ་སོགས་པ་འོག་ནས་འབྱུང་མ་རག་པ་རྣམས་རེད། དང་པོ་རྟེན་དང་བརྟེན་པ་བསྐྱེད་པ། དང་པོ་རྟེན་དང་བརྟེན་པར་བཅསཿ སྤྲོས་བྲལ་ངང་ནས་བསྐྱེད་པ་ནིཿ ཞེས་གསུངས་ཏེ། རྟེན་ཞིང་དང་བརྟེན་པ་དཀྱིལ་འཁོར་གྱི་ལྷ་ཚོགས་གཙོ་འཁོར་དང་བཅས་པ། སྤྲོས་བྲལ་ངང་ནས་བསྐྱེད་པ་ནི་ཞེས་གསུངས་ན། སྤྱིར་ན་སྤྲོས་མེད་སྤྲོས་པ་དང་བྲལ་བ་ཐེག་ཆེན་མདོ་སྔགས་ཀྱི་ལྟ་བའི་སྐྱེལ་སོ་མཐར་ཐུག་ཆོས་ཉིད་ཀྱི་ངོས་ནས་གཅིག་ཡིན་ཡང་། འདིར་ཨ་ནུ་རང་ལུགས་ཀྱི་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་ལ་གཞི་བཟུང་ན། སྤྱིར་ཡོ་ག་རྣམ་པ་གསུམ་པོ་རེ་རེ་ལའང་གསུམ་གསུམ་དུ་ཕྱེས་ནས་དགུའི་དབང་དུ་བཏང་དུས། འདི་ལ་ཨ་ནུའི་ཨ་ཏི་ཞེས་སུ་བརྗོད་ཆོག་པ་རེད་ལ། ཡང་ཨ་ཏིའི་ཨ་ནུ་ཞེས་བརྗོད་ཆོག་ཅིང་གཉིས་ཀ་དོན་གཅིག་ལ་བབས་པ་ཡིན། སྤྲོས་བྲལ་གསུངས་པ་འདི་རང་བཞིན་གདོད་མའི་དཀྱིལ་འཁོར་རྩོལ་མེད་ལམ་དུ་བྱེད་པ་ལ་གོ་དགོས་པར་སྙམ། གང་ལྟར་བསྐྱེད་རིམ་བཤད་པའི་སྐབས་སུ་ཀུན་མཁྱེན་འཇིགས་མེད་གླིང་པའི་བསྐྱེད་རིམ་འོག་མིན་བགྲོད་པའི་ཐེམ་སྐས་ཀྱི་ནང་དུ་སྤྱི་དོན་རྣམ་པ་གསུམ་གྱི་ཆིངས་སུ་བཅིངས་ནས། རྒྱུ་མ་ནོར་བ་བསྐྱེད་རིམ་ལ་འཇུག་པའི་གཞི། རྐྱེན་མ་འཁྲུལ་བ་ཇི་ལྟར་བསྒོམ་པའི་ལམ། འབྲས་བུ་རྣམ་པར་དག་པ་ཟུང་འཇུག་གི་ལམ་ལ་སྦྱོར་ཚུལ་བཅས་གསུངས་ཡོད་པས། འུ་ཅག་གིས་ཀྱང་དེ་དག་གི་སྟེང་ནས་བཤད་དགོས། དེ་ཡང་ཐོག་མར་ཀུན་ཁྱབ་ཀྱི་ཚད་མ་གསུམ་གྱིས་གཏན་ལ་ཕབ་དགོས་པ་རེད། རྒྱལ་བའི་བཀའ་དྲི་མ་མེད་པའི་ལུང་ཚད་མ་དང་། དེ་ཉིད་མཁས་པས་ཉམས་སུ་བླངས་ནས་གྲོལ་བ་ཐོབ་པའི་དཔང་པོ་དངོས་ཡོད་པའི་མན་ངག་ཚད་མ། དེ་གཉིས་ཀ་དང་རྗེས་སུ་མཐུན་པའི་རིགས་པ་ཚད་མ་སྟེ། དེ་གསུམ་ལ་བརྟེན་ནས་ཡིད་ཆེས་རྣམ་པ་གསུམ་ཐོབ་པའི་ཐོག་ནས་རྒྱུད་དོན་ཁོང་དུ་ཆུད་དགོས་པ་ཡིན། ཡིད་ཆེས་རྣམ་པ་གསུམ་གང་རེད་ཅེ་ན། དུས་འཁོར་གྱི་ནང་དུ། དང་པོ་བླ་མ་ལ་ཡིད་ཆེས་པར་བྱ། དེའི་རྗེས་སུ་རང་ལ་ཡིད་ཆེས་པར་བྱ། དེའི་རྗེས་སུ་རྒྱུད་ཀྱི་རྒྱལ་པོ་ལ་ཡིད་ཆེས་པར་བྱ་ཞེས་གསུངས། ཀུན་མཁྱེན་འཇིགས་གླིང་གིས་ཀྱང་རང་བཞིན་བརྒྱད་དང་ལྡན་པའི་རྡོ་རྗེ་སློབ་དཔོན་མཉེས་པ་གསུམ་གྱིས་བསྟེན་ནས་ཕྱི་ཕན་པའི་དབང་། ནང་ནུས་པའི་དབང་། གསང་བ་ཟབ་མོའི་དབང་གི་རིམ་པ་དག་བརྒྱུད་ནས་རྒྱུད་ལེགས་པར་སྨིན་ཅིང་དམ་ཚིག་དང་སྡོམ་པར་གནས་པའི་གང་ཟག་གིས་བསྐྱེད་རིམ་ལྷའི་རྣལ་འབྱོར་ལ་འཇུག་དགོས་ཞེས་འཇམ་དཔལ་སྒྱུ་འཕྲུལ་དྲྭ་བའི་ལུང་དྲངས་ནས་གསུངས་པ་སྟེ། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་ཅན་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། ཞེས་གསུངས། གཞི་རྒྱུད་དྲི་བཅས་ཀྱི་དེ་བཞིན་ཉིད་བདེ་གཤེགས་སྙིང་པོ་ལ་གློ་བུར་མ་རྟོགས་པའི་འཁྲུལ་བའི་དྲི་མས་གོས་པ་ཉིད་ཐབས་སམ་ལམ་གྱི་རྒྱུད་སྨིན་གྲོལ་གཉིས་ཀས་སྦྱང་དགོས་པ་རེད། སྦྱང་བྱ་འཁྲུལ་པའི་རང་བཞིན་གློ་བུར་བ་ཀུན་བརྟགས་དང་དེའི་ས་བོན་གྱི་ཆ་གཉིས་ཀར་ལྟོས་ནས་སྦྱོང་བྱེད་བསྐྱེད་རྫོགས་གཉིས་གསུངས། དེ་ལས་བསྐྱེད་རིམ་གྱི་དགོས་པ་ནི། དྲི་བཅས་དེ་བཞིན་ཉིད་ཀྱི་སྣང་བ་ཀུན་བརྟགས་ཀྱིས་གློ་བུར་དུ་བཟོས་པའི་སྣོད་བཅུད་ཐ་མལ་དུ་འཛིན་པ་དེ་ཉིད་བསྐྱེད་རིམ་གྱིས་སྦྱོང་ཞིང་། དེའི་ཞོར་དུ་སྟོང་རྐྱང་གི་ལྟ་བ་དེ་ཡང་བཟློག ལམ་གྱི་ཆ་ནས་མ་དག་ས་བདུན་བགྲོད། འབྲས་བུ་གཟུགས་སྐུའི་རྟེན་འབྲེལ་སྒྲིག་པ་རེད། དེ་ཉིད་རྫོགས་རིམ་གྱི་རྟེན་ཡང་ཡིན་པ་སློབ་དཔོན་འཕགས་པས། བསྐྱེད་པའི་རིམ་པར་ལེགས་གནས་ཏེ། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་བཞིན་དུ་གསུངས། ཞེས་གསུངས་པ་ལྟར་རོ། རྫོགས་རིམ་གྱི་དགོས་པ་ནི་འོག་ནས་སྐབས་སུ་བབས་དུས་འཆད་ཆོག་ཀྱང་། དེ་ཡང་ཨ་ནུའི་སྐབས་འདིར་སྦྱོང་བྱེད་བཞིན་ལག་གི་རྣམ་པ་ཅན་གྱི་བཅོས་མ་མིན་པའི་མངོན་སུམ་ལྷའི་རྣལ་འབྱོར། ཞུ་བདེ་མཚུངས་ལྡན་གྱི་ལྷ་སྐུ་ཁ་སྦྱོར་གོང་བུའི་བདག་ཉིད་ཅན་དེས། སྦྱང་བྱ་འཕོ་བའི་བག་ཆགས་ཀྱི་དྲི་མ་སྦྱང་། ལམ་གྱི་ཆ་ནས་དག་པ་ས་གསུམ་བགྲོད་པ་དང་། སྦྱངས་འབྲས་ལྷན་སྐྱེས་བདེ་བ་ཆེན་པོའི་སྐུ་མཆོག་གི་དངོས་གྲུབ་ཐོབ་པ་རེད། དེས་ན་བསྐྱེད་རྫོགས་སོ་སོའི་སྦྱང་གཞི་ལ་དང་པོའི་སྦྱང་གཞི་སྲིད་པ་བསྐྱེད་རིམ་དང་། གཉིས་པའི་སྦྱང་གཞི་ཆོས་ཉིད་བསྡུ་རིམ་ཡིན། དེ་དག་སྐྱེ་འཕགས་ཀྱི་ལམ་གཉིས་སུ་ཕྱེས་ནས་རང་རང་དང་རྗེས་སུ་མཐུན་པའི་དངོས་གྲུབ་འཇིག་རྟེན་དང་འཇིག་རྟེན་ལས་འདས་པ་གཉིས་ལ་སྦྱར་ཆོག་པ་སྟེ། སོ་སོའི་སྐྱེ་བོའི་ལམ་ལས་བསྐྱེད་རིམ་གྱིས་འཇིག་རྟེན་པའི་དངོས་གྲུབ་ཐོབ་པ་དང་། འཕགས་པའི་ལམ་ལས་རྫོགས་རིམ་གྱིས་འཇིག་རྟེན་ལས་འདས་པའི་དངོས་གྲུབ་ཐོབ་པར་བྱེད་པ་རེད། དེས་ན་རྫོགས་རིམ་གྱི་རྟོགས་པ་ཁྱད་པར་ཅན་ཞིག་མ་སྐྱེས་ཀྱི་བར་དུ་བསྐྱེད་རིམ་ལ་བརྟེན་ནས་རྟོག་པས་རྟོག་པ་འདུལ་བར་བྱེད་པ་རྣལ་འབྱོར་ཆེན་པོའི་རྒྱུད་ཀྱི་དགོངས་པ་སྟེ། བློ་སྔ་མ་སྔ་མས་ཕྱི་མ་ཕྱི་མར་ནུས་པ་མཐུན་རྐྱེན་དུ་བྱེད་པ་རེད། བློའི་རང་བཞིན་ཟེར་བ་དེའི་ནུས་པ་ནམ་མཁའ་དང་འདྲ་བར་ཚད་མེད་པ་མཐའ་ཡས་པ་ཡིན་པའི་རྒྱུ་མཚན་གྱིས་སྣང་བའང་མཐའ་ཡས་པ་འགྲུབ་པ་ཡིན། དེ་ཡང་ཐེག་ཆེན་ཐུན་མོང་གི་ལུགས་ལྟར་ན། བློའི་ནུས་པ་མཐུན་རྐྱེན་དུ་གྲུབ་ནས་རྣམ་པ་འགྱུར་བ་དེ་ཇི་ལྟ་བུ་ཞིག་རེད་ཅེ་ན། སྒྲིབ་པ་མ་ལུས་པ་ཡོངས་སུ་སྲབ་པ་དང་། སྒྲིབ་པ་མ་ལུས་པ་རབ་ཏུ་བྱང་བ། སྒྲིབ་པ་མ་ལུས་པ་ཤིན་ཏུ་ཟད་པའི་མཐར་ཐུག་པ་དག་གི་དབང་གིས། སྒྲིབ་པ་སྲབ་པའི་གནས་སྐབས་ན་མཁྱེན་པ་ཐོག་མར་གོམས་པའི་ཚོགས་སྦྱོར་གྱི་ལམ་དང་། སྒྲིབ་པ་བྱང་བའི་གནས་སྐབས་སུ་བར་དུ་གསལ་སྣང་ཐོན་པ་འཕགས་པའི་སློབ་ལམ། སྒྲིབ་པ་ཤིན་ཏུ་ཟད་པའི་མཐར་ཐུག་ཏུ་མཐར་ཕྱིན་པ་ཐམས་ཅད་མཁྱེན་པའི་བར་གྱི་འགྱུར་བ་དང་བློ་བསྐྱེད་ཡོང་རྒྱུ་ཡོད་པ་རེད། དེ་ཉིད་རྒྱུད་བླ་མའི་སྐབས་ཀྱི་མ་དག་མ་དག་དག་པ་སོགས་དང་སྦྱར་ནའང་ཆོག འཁོར་བའི་རང་བཞིན་སྐྱེ་འཆི་གཉིས་ཀྱིས་བསྡུས་པས། སྐྱེ་བའི་སྲིད་པ་སྦྱོང་བྱེད་དུ་བསྐྱེད་རིམ་དང་། འཆི་བའི་རིམ་པ་སྦྱོང་བྱེད་དུ་བསྡུ་རིམ་མམ་རྫོགས་རིམ་བསྟན་པ་རེད། སྲིད་པ་ཁམས་གསུམ་འཁོར་བའི་གནས་སུ་སྐྱེ་བ་ལེན་དགོས་ཚེ་སྒོང་སྐྱེས། མངལ་སྐྱེས། དྲོད་སྐྱེས། རྫུས་སྐྱེས་ཏེ་སྐྱེ་བ་རྣམ་པ་བཞི་ལས་གཞན་པའི་སྐྱེ་ཐབས་མེད་པས་གོང་དུ་སྒྱུ་འཕྲུལ་གྱི་ལུང་དྲངས་པ་ལྟར་དེ་དག་དང་བསྟུན་པའི་བསྐྱེད་པའི་རིམ་པ་ལ། དབང་པོ་རྟུལ་པོ་དང་དབང་པོ་འབྲིང་། དབང་པོ་རབ་དང་དབང་པོ་ཡང་རབ་རྣམས་ལ་སྤྲོས་ཅན། སྤྲོས་པ། སྤྲོས་མེད། ཤིན་ཏུ་སྤྲོས་མེད་དེ་བཞིའི་སྒོ་ནས། དབང་པོ་རྟུལ་པོ་སྤྲོས་པ་རྟོག་བཅས་ཅན་ལ་སྒོང་སྐྱེས་སྦྱོང་བ་རྒྱས་པ་ཆེན་པོའི་བསྐྱེད་རིམ་བསྟན། དེ་ཡང་སྒོང་སྐྱེས་དེ་ཉིད་ཐོག་མར་སྒོ་ང་དང་། དེ་རྗེས་སྒོ་ང་བརྡོལ་ནས་གཟུགས་སུ་སྨིན་དགོས་པ་ལྟར་མ་ཧཱ་ཡོ་གའི་རྒྱུད་སྡེ་བཀའ་བརྒྱད་དང་སྒྱུ་འཕྲུལ་དྲྭ་བ་ཆེན་པོ་སོགས་སུ་གཉིས་སྐྱེས་ཀྱི་སྲིད་པ་སྦྱོང་བའི་གཉེན་པོ་རུ་བདག་སྲས་དང་གཞན་སྲས་ཀྱི་རྣམ་པས་བསྟན། འདིའི་ཐོག་མའི་འཇུག་སྒོ་ཏིང་འཛིན་རྣམ་པ་གསུམ་ཡིན་པ་སྟེ། དེ་བཞིན་ཉིད་ཀྱི་ཏིང་ངེ་འཛིན། ཀུན་སྣང་གི་ཏིང་ངེ་འཛིན། རྒྱུའི་ཏིང་ངེ་འཛིན་བཅས་ལས། དེ་བཞིན་ཉིད་ཀྱི་ཏིང་འཛིན་ནི། གཞི་དང་རྩ་བ་མེད་པའི་སེམས་ཉིད་རང་བཞིན་འོད་གསལ་གྱི་ཆོས་ཉིད་ཇི་ལྟ་བའི་ཡེ་ཤེས་དྲན་པར་བྱས་ནས། འཆི་སྲིད་ཆོས་སྐུར་སྦྱང་ནས་རྟག་པར་ལྟ་བ་དང་གཟུགས་མེད་ཁམས་དག་པར་བྱེད་པ་དེ་ཉིད་རེད། ཀུན་སྣང་གི་ཏིང་ངེ་འཛིན་ནི་འོད་གསལ་སྟོང་པ་ཆེན་པོ་དེའི་རང་གདངས་འགྲོ་བ་ཡོངས་ལ་སྙོམས་པའི་སྙིང་རྗེ་སྟེ། སྟོང་ཉིད་སྙིང་རྗེ་ཟུང་འཇུག་ཏུ་ཤར་བས་ཆད་པར་ལྟ་བ་དང་གཟུགས་ཁམས་ལས་གྲོལ་ཞིང་། མཆེད་པའི་ཡེ་ཤེས་བསམ་གྱིས་མི་ཁྱབ་པའི་རོལ་རྩལ་ལས་བར་དོའི་སྲིད་པ་ལོངས་སྐུར་རྫོགས་པའི་གཞི་གཏིང་། རྒྱུའི་ཏིང་ངེ་འཛིན་ནི་སྟོང་དང་སྙིང་རྗེ་ཟུང་དུ་འབྲེལ་བ་དེ་ལས་ཡིག་འབྲུ་ཨ་དང་ཧཱུྃ་དང་ཧྲཱི་ལ་སོགས་པ་རིག་པ་ཡི་གེ་རུ་སྣང་བས་ཐབས་བྱས་ནས། སྲིད་བཅས་ཀྱི་ཤེས་པ་དང་འདོད་ཁམས་སྦྱངས་ནས་སྐྱེ་བ་སྤྲུལ་པའི་ལྷ་སྐུར་སྨིན་པ་རེད། ཡིན་ན་ཡང་སོ་སོའི་སྐྱེ་བོའི་ས་ཡི་བསྐྱེད་གཞི་དེ་བཞིན་ཉིད་ཀྱི་ཤེས་རབ་དེ་རྗེས་དཔག་ཙམ་ཞིག་ཡིན་པས་གཟུགས་བརྙན་ཙམ་དུ་གྱུར་པའི་དེ་བཞིན་ཉིད་ཅེས་གདངས་སྙིང་རྗེ་ཆེན་པོར་ལང་བ་དེ་ཉིད་མོས་པས་སྤྱོད་པའི་སེམས་བསྐྱེད་དང་། ཀུན་སྣང་གི་ཏིང་ངེ་འཛིན་ཞེས་བཏགས་པ་ཙམ་ཡིན་ཡང་། འཕེན་པ་དེའི་ཐོག་ནས་ལམ་མ་ནོར་བའི་རྒྱུ་ཚོགས་བསྒྲུབ་དགོས་པ་རེད། བཀའ་སྡེ་ཟུར་བའི་ལུགས་བཞིན་ཀུན་མཁྱེན་རོང་ཟོམ་པའི་བཞེད་པ་ལྟར་བྱས་ན། དེ་བཞིན་ཉིད་ཀྱི་ཏིང་ངེ་འཛིན་དེ་རྣམ་པར་མི་རྟོག་པ་བསྒོམ་པ་ཀུན་ཏུ་འོད་ཀྱི་ས་ལ་བློ་སྦྱང་བའི་ཕྱིར་ན་ཆོས་སྐུའི་ས་ཡིན། ཀུན་སྣང་གི་ཏིང་ངེ་འཛིན་དེ་ཤེས་རབ་སྙིང་རྗེ་དང་འབྲེལ་བ་མ་ཆགས་པདྨ་ཅན་དུ་བློ་སྦྱང་བའི་ཕྱིར་ན་ལོངས་སྐུའི་ས་ཡིན། རྒྱུའི་ཏིང་ངེ་འཛིན་དེ་ཡིག་འབྲུ་བསྒོམ་པ་འཁོར་ལོ་ཚོགས་ཆེན་གྱི་ས་ལ་གོམས་པར་བྱ་བའི་ཕྱིར་ན་སྤྲུལ་སྐུའི་ས་ཡིན་ཞེས་གསུངས་ཡོད་པ་རེད། མ་ཧཱ་ཡོ་གའི་སྐབས་སུ་ཁྱད་པར་དུ་བརྟེན་པ་ལུས་ཀྱི་བསྐྱེད་རིམ་གྱི་སྐོར་ལ། ཧེ་རུ་ཀ་གལ་པོའི་ལུགས་ཀྱི་མངོན་བྱང་བཞི་དང་། ཕ་རྒྱུད་ལྟར་རྡོ་རྗེའི་ཆོ་ག་གསུམ་གྱིས་བསྐྱེད་པ། མ་རྒྱུད་ལྟར་མངོན་བྱང་ལྔ་ཡིས་བསྐྱེད་པ། གཉིས་ཀ་ལྟར་སྦྱང་གཞི་སྦྱོང་བྱེད་ཀྱིས་བསྐྱེད་པའི་དག་པ་སྦྱར་བ་སོགས་བཤད་ཚུལ་མང་བ་རེད། དེ་ལྟ་བུའི་རྒྱས་པ་ཆེན་པོའི་བསྐྱེད་རིམ་གྱི་ཆོས་ངེས་པར་བྱས་ནས། ཐུན་མོང་དུ་རྒྱས་པ་འབྲིང་གི་བསྐྱེད་རིམ་མངལ་སྐྱེས་སྦྱོང་བའི་ཐབས་བསྐྱེད་པའི་རིམ་པ་ནི། གླང་ཆེན་སྨྱོན་པ་རྒུན་ཆང་གིས་སྨྱོས་པ་དེ་ཉིད་འདུལ་ཐབས་རྒྱན་འདུལ་དང་ཁྲོམ་འདུལ་གཉིས་ཀྱི་དཔེར་བཀོད་ནས་གསུངས་པ་ལྟར། རྟེན་སྣོད་ཀྱི་འཇིག་རྟེན་དང་བརྟེན་པ་ལུས་ཀྱི་མངོན་ཞེན་བག་ཆགས་སྣ་ཚོགས་ལས་གྲུབ་པ་འདི། ལྷ་ཡི་རྣམ་པས་སྦྱང་བ་དང་སེམས་ཡུལ་དུ་འཕྲོ་བ་བཞག་ཐབས་ཏིང་འཛིན་ཟབ་མོའི་རྟོད་ཕུར་གྱིས་བཏགས་ནས་སྦྱང་ཚུལ་ཏེ་གཉིས་སུ་བསྟན་ཡོད་པ་རེད། ཕ་མའི་འདུ་འཕྲོད་ལ་བརྟེན་པའི་སྐྱེ་གནས་རགས་པ་སྒོང་སྐྱེས་དང་མངལ་སྐྱེས་གཉིས་ཀའི་སྦྱང་གཞི་སྦྱོང་བྱེད་སྤྲོས་པ་ཅན་མ་ཧཱ་ཡོ་ག་ལྟར་བཤད་ནས། ཕྲ་བ་ཁུ་རྡུལ་གྱི་རྒྱུ་ལ་མ་བརྟེན་པའི་རྫུས་སྐྱེས་དང་དྲོད་སྐྱེས་གཉིས་ཀ་ནི་སྐྱེ་བ་འགྲུབ་སླ་བ་ཡིན་པས་བསྐྱེད་རིམ་ལ་སྤྲོས་པ་ཆུང་བ་རེད། དེས་ན་དབང་པོ་རབ་སྤྲོས་མེད་རིམ་གྱིས་འཇུག་པ་ཅན་གྱིས་དྲོད་གཤེར་སྐྱེས་སྦྱོང་བ་ལ་ཨ་ནུ་ཡོ་གའི་བསྐྱེད་རིམ་གྱི་གྲུབ་མཐའ་བསྟན་ཏེ། དེ་ཡང་དབྱིངས་དང་ཡེ་ཤེས་ཟུང་དུ་འཇུག་པའི་རྩལ་སྣང་གི་འཕེན་པ་དེས། དབྱིངས་སྟོང་ཆེན་ཀུན་ཏུ་བཟང་མོའི་ཀློང་དུ་སྣང་བ་ལྷ་ཡི་ཕྱག་རྒྱར་རང་ཤར་བ་གཉིས་མེད་ཟུང་འཇུག་སྒྱུ་མ་ལྟ་བུའི་ལྷ་སྐུར་ལྡང་ནས་གནས་ལུས་ལ་སྲེད་པ་དང་ལེན་པའི་བག་ཆགས་སྦྱང་ཞིང་། མངོན་བྱང་ལྔ་ལ་སོགས་པའི་རྣམ་པ་དང་ཚིག་གི་སྤྲོས་པ་ལ་མི་བརྟེན་པར་ལྷ་སོ་སོའི་བསྐྱེད་རིམ་བདེ་སྟོང་དབྱེར་མེད་ཡིན་པ་རེད། དབང་པོ་ཡང་རབ་ཅན་གྱིས། ཀུན་མཁྱེན་འཇིགས་གླིང་གིས། བརྫུས་ཏེ་སྐྱེ་བ་སྐད་ཅིག་དྲན་རྫོགས་ཏེ། །མིང་དང་གཟུགས་ལ་མ་བརྟེན་ཝལ་གྱིས་གསལ། ཞེས་གསུངས་པ་ལྟར། ཆོ་ག་དང་ཚིག་གི་བྱ་བ་ལ་མ་ལྟོས་པར་སེམས་ཀྱི་རང་བཞིན་གདོད་ནས་ལྷའི་ཕྱག་རྒྱར་གསལ་ཞིང་རྫོགས་པ་ཤིན་ཏུ་སྤྲོས་མེད་ཀྱི་བསྐྱེད་རིམ་བསྐྱེད་རྫོགས་དབྱེར་མེད་དུ་བསྒོམ་པ་དེ་ཉིད་རེད། ངོ་མ་བཤད་ན་རྫུས་སྐྱེས་སྦྱང་བ་འདི་ཤིན་ཏུ་རྣལ་འབྱོར་གྱི་བསྐྱེད་རིམ་རེད་ཅེས་ཟེར་རྒྱུ་མེད། འཕགས་ལམ་གྱི་རྫོགས་རིམ་སྟེ་མོས་སྤྱོད་ཀྱི་ས་ལས་འཕགས་པ་ཞིག་ཡིན་པས་བསྐྱེད་རིམ་གྱི་རྣམ་གཞག་དང་འགལ་བ་རེད། འོ་ན་བསྐྱེད་རིམ་གྱི་གྲས་སུ་འཇོག་པ་ཅིའི་ཕྱིར་ཞེ་ན། སྣང་བའི་ཆ་ཐབས་སུ་བྱས་པ་ཙམ་མ་གཏོགས་དོན་ལ་བསྐྱེད་རྫོགས་ཡ་མ་བྲལ་བར་ཉམས་སུ་ལེན་ཚུལ་ཡིན། དེ་ཡང་ཀུན་མཁྱེན་འཇིགས་གླིང་གིས་བསྐྱེད་རིམ་སྤྱིའི་ཆིངས་སུ། དང་པོ་བསྐྱེད་རིམ་སྐྱེ་གནས་རྣམ་པ་བཞིའི། །བག་ཆགས་སྦྱང་ཕྱིར་དེ་དང་མཐུན་པར་སྟོན། །བསྐྱེད་ཚུལ་འཁོར་བའི་རྣམ་པ་དང་མཐུན་པས། །སྲིད་པ་གསུམ་པོ་མ་ལུས་སྦྱོང་ཞིང་དག །མྱ་ངན་འདས་དང་བཞུགས་ཚུལ་མཐུན་པ་ཡི། །ལྷ་ཡི་རྣམ་པས་འབྲས་བུ་གཞི་ལ་རྫོགས། །གཉིས་ཀའང་རྫོགས་པའི་རིམ་པའི་སྨིན་བྱེད་དུ། །འགྲོ་བའི་དག་རྫོགས་སྨིན་གསུམ་སྤྱི་ལ་གཅེས། ཞེས་གསུངས་ནས། འཁོར་བ་དང་རྣམ་པ་མཐུན་པ་ཡིན་པས་ན་སྲིད་པ་སྦྱོང་ཞིང་དག མྱང་འདས་དང་བཞུགས་ཚུལ་མཐུན་པ་ཡིན་པས་ན་འབྲས་བུ་གཞི་ལ་རྫོགས། དེ་གཉིས་ཀ་རྫོགས་རིམ་གྱི་སྨིན་བྱེད་དུ་འགྲོ་བ་སྤྱིའི་གོ་དོན་སློང་བ་ལ་མེད་ཐབས་མེད་ཅེས་གསུངས་པ་རེད། དེའི་ཕྱིར་ན་སྟོང་ཉིད་སྙིང་རྗེ་ཐབས་དང་ཤེས་རབ་ཟུང་དུ་འཇུག་པའི་གསལ་སྣང་ལྷའི་མཚན་དཔེར་ཤར་བ་ཡིན་ཡང་། སྣང་དུས་ཉིད་ནས་རང་བཞིན་གྱིས་མ་གྲུབ་པའི་སྣང་སྟོང་གི་རང་བཞིན། མེ་ཏོག་དང་དྲི་བསུང་ལྟར་ཐབས་དང་ཤེས་རབ་གཉིས་འབྲེལ་བ་བསྐྱེད་རྫོགས་ཟུང་འཇུག་གི་དོན་མ་ནོར་མ་འཁྲུལ་བ་ཡིན་པ་རེད། དེས་ན་རྟེན་གཟུགས་སྐུ་རྣམ་པ་གཉིས་ཐོབ་བྱེད་ཀྱི་རྒྱུ་བསྐྱེད་རིམ་གྱིས་བྱེད། བརྟེན་པ་ཐུགས་དེ་ཁོ་ན་ཉིད་ཀྱི་ཡེ་ཤེས་ཐོབ་བྱེད་ཀྱི་རྒྱུ་བསྐྱེད་རིམ་ལ་རྫོགས་རིམ་གྱི་ལྟ་བས་ཐེབས་པས་བྱེད་པ་ཡིན། དེ་ལྟར་རྒྱུ་མ་ནོར་བ་བསྐྱེད་རིམ་ལ་འཇུག་པའི་གཞི་ངེས་པར་བྱས་ནས། རྐྱེན་མ་འཁྲུལ་བ་ཇི་ལྟར་བསྒོམ་པའི་ལམ་གསུངས་པ་འདི་ལྟར་ཏེ། ཧཱུྃཿ མ་བཅོས་རིག་པ་སྟོང་གསལ་ངངཿ ལྷག་མཐོང་སྣང་ཆའི་རྟེན་འབྲེལ་ཀུནཿ ལྷུན་གྲུབ་དག་པ་རབ་འབྱམས་ཀྱིཿ དཀྱིལ་འཁོར་ཆེན་པོར་ལྷུན་རྫོགས་པའིཿ ཞེས་གསུངས་ཏེ། མ་བཅོས་རིག་པ་སྟོང་གསལ་ངང་ཞེས་གསུངས་པ་དེ་དབྱིངས་ལམ་བྱེད་རེད། སེམས་ཉིད་མ་བཅོས་གདོད་མའི་རིག་པ། དབྱིངས་དང་ཡེ་ཤེས་ཟུང་དུ་འཇུག་པ། སྟོང་ཞིང་གསལ་ལ་གསལ་ཞིང་སྟོང་པ། གསལ་སྟོང་དབྱེར་མེད་ཡེ་ཤེས་ཀྱི་རང་གདངས་ལས། ལྷག་མཐོང་སྣང་ཆའི་རྟེན་འབྲེལ་ཀུན་ཅེས་གསུངས་པ་དེ་ཡེ་ཤེས་ལམ་བྱེད་རེད། མ་བཅོས་སྟོང་གསལ་གྱི་རིག་པ་གསལ་གདངས་ངར་དང་བཅས་པ་ཞིག་ཁོང་ནས་འཆར་བའི་ལྷག་མཐོང་རྣམ་པར་མི་རྟོག་པའི་ཡེ་ཤེས་དེ་ཉིད། བཅོས་མའི་བསྐྱེད་ཆོག་ལ་མི་ལྟོས་པར་གཞི་ཀ་དག་དང་ལྷུན་གྲུབ། ལམ་ཁྲེགས་ཆོད་དང་ཐོད་རྒལ་གཉིས་ལ་བརྟེན་པ་ཞིག་ཡིན་པ་དང་། ལྷག་མཐོང་སྣང་ཆའི་རྟེན་འབྲེལ་དུ་ཤར་བའི་སྣོད་བཅུད་ཐམས་ཅད་ལྷུན་གྲུབ་དག་པ་རབ་འབྱམས། མ་དག་པ་བཙལ་ཀྱང་མི་རྙེད་པའི། དཀྱིལ་འཁོར་ཆེན་པོར་ལྷུན་རྫོགས་པའི། ཞེས་གསུངས་ན། དཀྱིལ་འཁོར་ཞེས་པ་འདི་གང་གཙོ་བོ་ལ་འཁོར་གྱིས་བསྐོར་བའམ་བརྟེན་པ་ལྷའི་ཚོགས་རྟེན་གཞལ་ཡས་ཁང་དང་བཅས་པ་ལ་འཇུག་ཅེས་གསུངས་ཤིང་། འདི་ལ་གཞི་ལམ་འབྲས་གསུམ་གྱི་དཀྱིལ་འཁོར་ཡོད། འདིར་ལམ་བཤད་པའི་སྐབས་ཡིན་པས་མཚོན་བྱེད་དཔེའི་གཟུགས་བརྙན་གྱི་དཀྱིལ་འཁོར་དང་མཚོན་བྱ་དོན་གྱི་སྐུ་གསུང་ཐུགས་ཀྱི་དཀྱིལ་འཁོར་ཏེ་གཉིས་ཡོད་པའི་ནང་ནས་མཚོན་བྱ་དོན་གྱི་དཀྱིལ་འཁོར་དེ། ལུས་དཀྱིལ་ལྷ་རུ་གསལ། ངག་དཀྱིལ་སྔགས་སུ་གསལ། ཐུགས་དཀྱིལ་དུག་ལྔ་ཡེ་ཤེས་ལྔར་ལམ་དུ་བྱས་ནས། འཁོར་བ་མ་སྤང་གནས་སུ་དག་པའི་ལྟ་དགོངས་ཁྱད་པར་ཅན་བསྐྱེད་རིམ་སྣང་ཆའི་གསལ་སྣང་དང་སྦྲེལ་བ་ཞིག་ཡིན་དགོས་པ་རེད། འདི་ལ་རྟེན་གཞལ་ཡས་ཁང་། བརྟེན་པ་ལྷ། གཉིས་མེད་ཡེ་ཤེས་ཆེན་པོ་སྟེ་དབྱེ་སྒོ་གསུམ་ལས། རྟེན་གཞལ་ཡས་ཁང་ནི་དཀྱིལ་འཁོར་གྱི་དབུས་ཀྱི་ལྟེ་བ་ནས་ཕྱོགས་ཀྱི་བཀོད་པ་ཕོ་བྲང་གྲུ་བཞི་སྒོ་བཞི་བ། མཚན་ཉིད་ཚང་བའི་བཀོད་པས་ཀུན་ནས་བསྐོར་བའི་དལ་དེ་གནས་ཕུན་སུམ་ཚོགས་པ། བརྟེན་པ་ལྷ་ཡི་དཀྱིལ་འཁོར་ནི་གཙོ་བོ་ལ་འཁོར་གྱིས་བསྐོར་བའི་ལྷ་ཚོགས་ཏེ་སྟོན་པ་དང་འཁོར་ཕུན་སུམ་ཚོགས་པ། གཉིས་མེད་ཡེ་ཤེས་ཆེན་པོའི་དཀྱིལ་འཁོར་ནི་མ་བཅོས་རང་བྱུང་གི་རིག་པའི་ཡེ་ཤེས་ལ་རང་རྩལ་རང་གདངས་འགག་མེད་དྲན་རིག་ཤེས་པས་བསྐོར་བ། སྤྲོས་བྲལ་ནང་གི་ཡེ་ཤེས་གཞི་ལས་མ་གཡོས་བཞིན་དུ་རྟོག་ཚོགས་རང་སར་དག་པའི་ཡེ་ཤེས་ལྔ་རང་ཆས་སུ་ཡོད་པ་ཆོས་དང་དུས་ཕུན་སུམ་ཚོགས་པ་སྟེ། དབྱེ་སྒོ་གསུམ་དང་ལྡན་པའི་དཀྱིལ་འཁོར་ཕུན་སུམ་ཚོགས་པ་ལྔ་དང་སྦྲེལ་ནས་གསལ་འདེབས་བྱེད་ཆོག་པ་རེད། ཕོ་བྲང་གཞལ་མེད་ཉམས་དགའ་བཿ གྲུ་བཞི་སྒོ་བཞི་མཚན་ཉིད་ལྡནཿ བརྡ་དོན་རྟགས་གསུམ་ཡོངས་རྫོགས་པའིཿ ཕྱི་ནང་ཟང་ཐལ་ཆེན་པོའི་དབུསཿ ཞེས་གསུངས་ཏེ། གནས་རྣམ་པར་དག་པ་ཡེ་ཤེས་རང་སྣང་ལྷུན་གྱིས་གྲུབ་པའི་འོག་མིན་དག་པའི་ཞིང་ཁམས་རྒྱ་ཁྱོན་ཚད་ཀྱིས་མི་ལང་པ། ལྷུན་གྲུབ་དག་པ་རབ་འབྱམས་ཀྱི་དཀྱིལ་འཁོར་དུ་ལྷུན་གྱིས་རྫོགས་པའི་རྔ་ཡབ་ཟངས་མདོག་དཔལ་གྱི་རི་བོའི་རྩེ་མོའི་དབུས་ན། ཕོ་བྲང་གཞལ་མེད་ཉམས་དགའ་བ་ཞེས་གསུངས་ན། ཡོན་ཏན་གྱི་ཚོགས་མ་འདྲེས་པ་མང་པོ་དཔག་ཏུ་མེད་པ་ཚོགས་ཤིང་རྒྱས་པའི་ཕོ་བྲང་ཆེན་པོ། དབྱིབས་གྲུ་བཞི་བ། སྐུ་གསུམ་སྟེ་ཆོས་ལོངས་སྤྲུལ་གསུམ་གྱི་གཞལ་ཡས་ཁང་སྟེང་འོག་བར་གསུམ་ཅན། ཕོ་བྲང་ཆེན་པོ་དེ་ཉིད་ཀྱི་ཤར་དཀར། ལྷོ་མཐིང་། ནུབ་དམར། བྱང་ལྗང་ཁུའི་མདོག་ཅན། དེ་ཡང་ཤར་མེ་ལོང་ལྟ་བུའི་ཡེ་ཤེས་མཚོན་པའི་ཁ་དོག་ཆུ་ཤེལ་དཀར་པོ་ལས་གྲུབ་པ། ལྷོ་ཆོས་དབྱིངས་ཡེ་ཤེས་མཚོན་པའི་ཁ་དོག་བཻཌཱུརྱ་མཐིང་ག་ལས་གྲུབ་པ། ནུབ་སོར་རྟོགས་ཡེ་ཤེས་མཚོན་པའི་ཁ་དོག་པདྨ་རཱ་ག་དམར་པོ་ལས་གྲུབ་པ། བྱང་བྱ་གྲུབ་ཡེ་ཤེས་མཚོན་པའི་ཁ་དོག་ཨིནྡྲ་ནཱི་ལ་ལྗང་གུ་ལས་གྲུབ་པ། སྟེང་མཉམ་ཉིད་ཡེ་ཤེས་མཚོན་པའི་ཁ་དོག་སེར་པོ་གསེར་ལས་གྲུབ་པ་དང་། ཕྱོགས་བཞི་ན་སྒོ་བཞི་ཡོད་པ་དེས་དངོས་པོ་དང་མཚན་མར་འཛིན་པའི་སྒྲིབ་པ་ལས་གྲོལ་བའི་རྣམ་ཐར་སྒོ་བཞི་མཚོན། དེ་ཡང་མཚན་ཉིད་ཐེག་པའི་སྐབས་དང་མི་འདྲ་བར་སྔགས་ཀྱི་སྐབས་སུ་རྣམ་ཐར་སྒོ་བཞི་ཞེས། སྟོང་ཉིད་མཚན་མེད་སྨོན་མེད་གསུམ་གྱི་སྟེང་ལ་མངོན་པར་འདུས་མ་བྱས་པའི་སྒོ་བསྣན་པས་བཞིར་གསུངས་ཏེ། ཤར་ན་ཆོས་ཐམས་ཅད་ཡེ་ནས་ངོ་བོ་ཉིད་མེད་པར་མཚོན་པའི་སྟོང་པ་ཉིད་ཀྱི་སྒོ། ལྷོ་ན་སྣང་དུས་ཉིད་ནས་རང་བཞིན་མེད་པ་མཚན་མ་མེད་པའི་སྒོ། ནུབ་ན་དགག་སྒྲུབ་བླང་དོར་མེད་པ་སྨོན་པ་མེད་པའི་སྒོ། བྱང་ན་དེ་དག་གི་རང་བཞིན་རྟོགས་པས་སེམས་ཉིད་བྱ་རྩོལ་མེད་པ་མངོན་པར་འདུས་མ་བྱས་པའི་སྒོ་སྟེ་རྣམ་ཐར་སྒོ་བཞི་དང་ལྡན་པ། གཞན་གཞལ་ཡས་ཁང་གི་རྩིག་པ་ལ་ཡེ་ཤེས་འགྱུར་བ་མེད་པའི་རིན་པོ་ཆེའི་ཕ་གུ་ཕྱོགས་མདོག་ཅན། དེ་དག་གི་སྟེང་ལ་ཐུགས་རྗེས་འགྲོ་བ་སྐྱོབ་པའི་བརྡ་རུ་མདའ་ཡབ་ཕྱིར་ལ་འཕྱང་བ། ཁ་བད་ཀྱི་གདུང་སྣེ་ཐམས་ཅད་ལ་སྐུ་གསུམ་འདུ་འབྲལ་མེད་པར་འགྲོ་དོན་འབྱུང་བའི་མཚོན་བྱེད་དུ་རིན་པོ་ཆེའི་དྲ་བ་དང་དྲ་བ་ཕྱེད་པ་འཆང་བ་དང་དེ་དག་གི་ཕྲེང་བས་བརྒྱན་པ། ཉི་ཟླའི་ཟ་ར་ཚགས། དར་གྱི་ལྡ་ལྡི། རྔ་ཡབ་ནོར་བུའི་ཡུ་བ་ཅན་གྱི་ཆུན་འཕྱང་། ཤར་བུ་དང་པུ་ཤུའི་རྒྱན་དང་། རྡོ་རྗེ་ནོར་བུའི་ཏོག་གིས་མཛེས་པ་སོགས་གཞལ་ཡས་ཁང་གི་བཀོད་པ་སྣ་ཚོགས་མ་ཚང་བ་མེད་པ། དབྱིངས་དང་ཡེ་ཤེས་གཉིས་མེད་ཀྱི་ཡེ་ཤེས་འོད་གསལ་སྒྲིབ་གཡོག་དང་བྲལ་བའི་མཚོན་བྱེད་དུ་གཞལ་ཡས་ཁང་དང་ཕྱི་ནང་གི་རྒྱན་ཐམས་ཅད་རགས་པར་མ་གྲུབ་པར་དྭངས་མ་འཇའ་འོད་ཀྱི་རྣམ་པར་གསལ་འདེབས་དགོས་པ་རེད། ཡེ་ཤེས་རང་སྣང་ལས་མ་འདས་པ་ཡིན་པའི་ཕྱིར་ན་གཅིག་གིས་གཅིག་མི་སྒྲིབ་པར་ཕྱི་ནང་ཟང་ཐལ་བ་ཀུན་ཏུ་ཡང་ནང་དུ་གྱུར་བ། འདོད་ཡོན་གྱི་སྣམ་བུའི་སྟེང་དག་དང་གཞལ་ཡས་ཁང་གི་ཕྱོགས་བཅུ་ཐམས་ཅད་ན་འདོད་ཡོན་གྱི་ལྷ་མོ་མང་པོ་འཕྲོས་པས་མཆོད་པའི་སྤྲིན་སྤྲོ་བཞིན་ཡོད་པ། དེ་ཡང་གཟུགས་དང་སྒྲ་དང་དྲི་དང་རོ་དང་རེག་བྱ་ཡིས་ཕྱོགས་ཐམས་ཅད་ཁེངས་ནས་མཆོད་པའི་སྤྲིན་ཕུང་འཁྲིགས་པ་ཉིད་འདོད་ཡོན་ཐམས་ཅད་རྒྱན་དུ་རོལ་པའི་མཚོན་བྱེད་ལ་སོགས་ཡིན་པ་རེད། བརྡ་དོན་རྟགས་གསུམ་ཡོངས་རྫོགས་པའི། ཕྱི་ནང་ཟང་ཐལ་ཆེན་པོའི་དབུས་ཞེས་གསུངས་ན། བརྡ་དོན་རྟགས་གསུམ་སྟེ་བརྡ་ཡོན་ཏན་གྱི་ཚོགས་ཕུན་སུམ་ཚོགས་པ་འཛོམས་ཤིང་རྒྱས་པའི་བརྡ་རུ་ཕོ་བྲང་གྲུ་བཞི་བ་ཡིན་པ་དང་། དོན་ཆོས་དབྱིངས་འགྱུར་བ་མེད་པ་སྣང་སྲིད་གཞིར་བཞུགས་ཀྱི་དཀྱིལ་འཁོར་མཚོན་པ། རྟགས་ཆོས་ལོངས་སྤྲུལ་གསུམ་མཚོན་བྱེད་དུ་སྟེང་འོག་བར་གསུམ་གྱི་གཞལ་ཡས་ཁང་དང་། ཡེ་ཤེས་ལྔ་ཡི་མཚོན་རྟགས་སུ་ཕྱོགས་བཞིའི་ཕྱོགས་མདོག་དང་སྟེང་གི་ནམ་མཁའ་མཚམས་བཞི་དང་བཅས་པ་མཐིང་མདོག་ཏུ་ཡོད་པ་ལྟ་བུ་བཅས་རེད། དེ་ལྟ་བུའི་མཚན་ཉིད་ཐམས་ཅད་དང་ལྡན་པའི་ཕོ་བྲང་ཆེན་པོ། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་མཚོན་པ་དང་གཞི་ལམ་འབྲས་བུའི་བརྡ་དོན་རྟགས་གསུམ་ཡོངས་སུ་རྫོགས་པའི་ཕྱི་ནང་ཟང་ཐལ་ཆེན་པོའི་དབུས་སུ། སྣ་ཚོགས་པདྨ་ཉི་ཟླའི་སྟེངཿ ཧཱུྃ་ལས་སྐད་ཅིག་དྲན་རྫོགས་སུཿ བདག་ཉིད་སངས་རྒྱས་ཀུན་ཀྱི་དངོསཿ ཞེས་སྣ་ཚོགས་པདྨ་ཉི་ཟླའི་སྟེང་ཞེས་པ་མེ་ཏོག་པདྨ་འདམ་ལས་སྐྱེས་ཀྱང་འདམ་གྱི་དྲི་མས་མ་གོས་པ་བཞིན་དུ་ཉེས་པའི་སྐྱོན་ཐམས་ཅད་ཀྱིས་གོས་པ་མེད་པའི་བརྡ་དང་། སྣ་ཚོགས་པདྨ་ཞེས་པ་ཁ་དོག་སྣ་ཚོགས་པའི་པདྨའི་སྟེང་ན། སེམས་ཉིད་ཡེ་ནས་རང་བཞིན་གྱིས་འོད་གསལ་ཞིང་ཐབས་དང་ཤེས་རབ་གཉིས་སུ་མེད་པའི་བརྡ་རྟགས་སུ་ཉི་ཟླའི་དཀྱིལ་འཁོར་གྱི་གདན་གྱི་སྟེང་ན། ཧཱུྃ་ལས་སྐད་ཅིག་དྲན་རྫོགས་སུ་ཞེས་ཧཱུྃ་འདི་ལྷའི་ས་བོན་ཡིན་པ་རེད། འདི་ཨ་ནུ་ཡོ་གའི་བསྐྱེད་རིམ་གྱི་སྙིང་པོ་དྲན་པའམ་མཚན་བརྗོད་པ་ཙམ་གྱིས་སྣང་བ་ལྷའི་ཕྱག་རྒྱར་ཤར་བ་དང་། ཨ་ཏིའི་ཨ་ནུའམ། ཨ་ནུའི་ཨ་ཏི་ཡིན་པས་སྐད་ཅིག་དྲན་རྫོགས་ཏེ་སྙིང་པོ་དྲན་པ་ཙམ་གྱིས་རྫོགས་པ་ཡིན་ཞིང་། བདག་ཉིད་སངས་རྒྱས་ཀུན་ཀྱི་དངོས་ཞེས་གསུངས་པ་བདག་ཉིད་མ་བཅོས་ཐ་མལ་དུ་གནས་པར། སྐད་ཅིག་དྲན་རྫོགས་སུ་ཞེས་པའི་སྐད་ཅིག་དེ་ཉིད་དབང་པོ་རྣོ་རྟུལ་དང་གོམས་པ་བཟང་ངན་གྱིས་དུས་མཐའི་སྐད་ཅིག་དང་བྱ་རྫོགས་སྐད་ཅིག་གཉིས་ཀར་གོ་བའི་སྐབས་ཡོད་པ་རེད་སྙམ། བསྐྱེད་རིམ་དེ་ཉིད་དོན་གྱི་སྟེང་ནས་བཤད་ན་གཅིག་ཆར་ཡིན་ཡང་ཚིག་གི་སྟེང་ནས་རིམ་ཅན་དུ་བཤད་དགོས་པས་ན། སངས་རྒྱས་ཀུན་ཀྱི་དངོས་ཞེས་གསུངས་ན། དེ་ཡང་གུ་རུ་རིན་པོ་ཆེ་ཁོང་རང་ཉིད་ཀྱིས། ང་བསྒྲུབས་སངས་རྒྱས་ཐམས་ཅད་འགྲུབ། ཅེས་གསུངས་པ་ལྟར། དུས་གསུམ་གྱི་སངས་རྒྱས་ཐམས་ཅད་ངོ་བོ་གཅིག་ཡིན་པ་དང་། གུ་རུ་རིན་པོ་ཆེ་སངས་རྒྱས་ཀུན་ཀྱི་ཞལ་སྐྱིན་ཡིན་པས་སངས་རྒྱས་དངོས་ཞེས་གསུངས་ཏེ། དེ་ཡང་གུ་རུ་རིན་པོ་ཆེ་ལ། དུས་གསུམ་སངས་རྒྱས་གུ་རུ་རིན་པོ་ཆེ་ཞེས་གསོལ་བ་བཏབ་པ་ལྟར་དུ་གུ་རུ་རིན་པོ་ཆེ་ནི་འདས་པའི་སངས་རྒྱས་ཀྱི་རྒྱལ་ཚབས། ད་ལྟའི་སངས་རྒྱས་ཀྱི་སྤྲུལ་བ། མ་འོངས་སངས་རྒྱས་ཀྱི་འབྱུང་ཁུང་ཡིན་པས། ཐུགས་རྗེས་འགྲོ་བ་འདུལ་བའི་དོན་དུ་སྐུ་གཅིག་ལ་མཚན་གྱི་རྣམ་གྲངས་མང་པོ་བསམ་གྱིས་མི་ཁྱབ་པར་མཐའ་ཀླས་ནས་ཞིང་ཁམས་རྒྱ་མཚོའི་འགྲོ་བ་འདུལ་བཞིན་ཡོད་པ་དང་། དམུ་རྒོད་ཀྱི་འགྲོ་བ་འདུལ་བའི་ཆེད་དུ་ཞི་རྒྱས་དབང་དང་དྲག་པོའི་རྣམ་རོལ་མང་པོའི་སྐུར་སྣང་བཞིན་ཡོད་པ་ལས། སྐབས་འདིར་བསྟན་ལ། སྣང་སྲིད་ཟིལ་གནོན་པདྨ་འབྱུངཿ ཞལ་གཅིག་ཕྱག་གཉིས་དཀར་དམར་མདངསཿ ཐེག་གསུམ་རྫོགས་པའི་བརྡ་རྟགས་སུཿ ཕོད་ཁ་ཆོས་གོས་བེར་འདུང་མནབསཿ ཞེས་གསུངས་ཏེ། སྣང་སྲིད་ཟིལ་གྱིས་གནོན་པའི་ཆ་ལུགས་སུ་སྣང་བའི་སྤྲུལ་སྐུ་པདྨ་འབྱུང་གནས་དེ་ཉིད་ཞལ་གཅིག་ཕྱག་གཉིས་དཀར་དམར་མདངས་ཞེས་ཆོས་སྐུ་ཐིག་ལེ་ཉག་གཅིག་མཚོན་བྱེད་དུ་ཞལ་གཅིག ཐབས་དང་ཤེས་རབ་མཚོན་བྱེད་དུ་ཕྱག་གཉིས། དབྱིངས་བདེ་སྟོང་ཟུང་དུ་འཇུག་པའི་བརྡ་རུ་སྐུ་མདོག་དཀར་ལ་དམར་བའི་མདངས་ཅན་དུང་ལ་ཕོ་ཚོས་བཀུས་པ་ལྟ་བུ། ཞལ་འཛུམ་མདངས་ཞི་བའི་རྣམ་པ་དང་། སྤྱན་རྗེས་ཆགས་དབང་དྲག་གཉིས་ཀ་འཛོམས་པའི་ཁྲོ་འཛུམ་གྱི་ཉམས་ཅན། མཚན་དང་དཔེ་བྱད་ཀྱིས་བརྒྱན་པ། ལྷ་ལྕམ་མནྡ་ར་བའི་གུ་རུའི་བརྡ་བསྟོད་ནང་དུ། རི་རབ་ལྟ་བུར་སྐུ་ནི་ལྷུན་མདངས་མཐོ། །རི་རྒྱལ་བུམ་པ་ལྟ་བུར་དབུ་ནི་ཟླུམ། །བུང་བ་ཨུཏྤལ་ལྟ་བུར་དབུ་སྐྲ་མཛེས། །ཟླ་བ་རྒྱས་པ་ལྟ་བུར་དཔྲལ་བའི་དབྱེས། །སྐར་ཆེན་ཤར་འདྲ་སྤྱན་གཉིས་གནག་ལ་རིང་། །འདི་ཡི་སྨིན་མ་ཁྱུང་ཆེན་ལྡིང་བ་འདྲ། ལ་སོགས་པ་གསུངས་པ་ལྟར་མཚན་དཔེས་བརྒྱན་པ། དབུ་སྐྲ་ལྕང་ལོས་སྐུ་རྒྱབ་ཁེབས་པ། ཐེག་གསུམ་རྫོགས་པའི་བརྡ་རྟགས་སུ་ཕོད་ཁ་ཆོས་གོས་བེར་འདུང་མནབས་ཞེས་གསུངས་ཏེ། སོ་བྱང་སྔགས་གསུམ་གྱི་ཐེག་པ་རྫོགས་པའི་བརྡ་རྟགས་སུ། ཕོད་ཁ་ཞེས་པ་བེར་གྱི་རིགས་ཤིག་སྟེ། གསང་སྔགས་ཀྱི་ཐེག་པ་རྫོགས་པའི་བརྡ་རྟགས་སུ་རྒྱུ་ཟ་འོག་ལས་གྲུབ་པའི་ཕོད་ཁ་མཐིང་ནག་མནབས་པ་དང་། དེའི་སྟེང་དུ་སོ་ཐར་གྱི་ཐེག་པ་རྫོགས་པའི་བརྡ་རུ་ཆོས་གོས་དམར་པོ་གསེར་གྱི་ཧ་རིས་ཅན་གསོལ་བ། བེར་འདུང་ཞེས་གསུངས་ན་གོང་གི་ཟ་འོག་གི་ཕོད་ཁ་བེར་ཆེན་མཐིང་ནག་གི་ནང་ལ་བྱང་སེམས་ཀྱི་ཐེག་པ་རྫོགས་པའི་བརྡ་རྟགས་སུ་བེར་གྱི་རིགས་གཞན་འདུང་མ་དམར་པོ་དང་། ཐམས་ཅད་ཀྱི་ནང་ལ་རྡོ་རྗེའི་གསང་གོས་དཀར་པོ་མནབས་ཡོད་པ་རེད། ན་བཟའ་འདི་ཚོ་ཟ་ཧོར་རྒྱལ་པོའི་ཆས་རེད། ཟ་ཧོར་རྒྱལ་པོས་ཙན་དན་གྱི་ཤིང་ལ་ཏིལ་མར་གྱིས་ངར་བཏགས་ནས་གུ་རུ་རིན་པོ་ཆེ་གསོན་སྲེག་བྱེད་སྐབས། སྔོན་ཆད་བསྲེགས་ཚད་ཚང་མ་ཞག་མ་གསུམ་གྱིས་དུ་བ་ཆད། གུ་རུ་རིན་པོ་ཆེ་བསྲེགས་སྐབས་ཉིན་ཞག་བདུན་ལ་དུ་བ་མ་ཆད་པས། ཟ་ཧོར་རྒྱལ་པོ་ཡིད་མ་ཆེས་ཏེ་རྒྱལ་བློན་ཐམས་ཅད་བལྟ་བར་ཡོང་ཚེ། ས་ཕྱོགས་དེ་ཉིད་ཆུའི་རྒྱ་མཚོར་གྱུར། རྒྱ་མཚོའི་མཐར་མེ་འོབས་ཆེན་པོ་ཞིག་གིས་བསྐོར། མེ་ལྕེ་ཐམས་ཅད་ཕྱིར་འབར་བཞིན་ཡོད་པ་དང་། རྒྱ་མཚོའི་དཀྱིལ་ལ་མེ་ཏོག་པདྨའི་སྡོང་པོ་ཆེན་པོ་ཞིག་སྐྱེས་ནས་པད་སྡོང་གི་སྟེང་ན་གུ་རུ་རིན་པོ་ཆེ་སྔར་ལས་མཛེས་མདངས་འབར་བའི་གཟི་བྱིན་ཐིབས་སེར་བཞུགས། སྐུ་གྲང་གྲང་བསིལ་བསིལ་ལྟར་བཞུགས་པའི་མཐའ་བསྐོར་ཐམས་ཅད་འཇའ་དང་འོད་ཀྱིས་ཁེངས་ནས། ལྷ་ལྕམ་མནྡ་ར་བ་འདྲ་བའི་མཁའ་འགྲོ་མ་བརྒྱ་ཡིས་བསྟོད་པ་འབུལ་བཞིན་ཡོད་པ་མཇལ་ཏེ། རྒྱལ་པོ་རང་གི་མིག་ལ་རང་ཡིད་མ་ཆེས་པས་མིག་ཕྱིས་ནས་ཡང་ལྟ་བྱས་ཚེ་ད་དུང་དེ་བཞིན་དུ་ཡོད་པར་མཇལ། དེ་ནས་རྒྱལ་པོ་ངོ་མཚར་ཏེ་འགྱོད་པ་དྲག་པོ་སྐྱེས། མགོ་ལུས་ས་ལ་བརྡབས། ངས་འདི་འདྲའི་ལས་ཉེས་ཤིག་བྱས་འདུག་ཟེར་ནས་བཤགས་པ་བྱས་ཏེ། རྒྱལ་སྲིད་ཡུལ་འཁོར་དང་བཅས་པ་གུ་རུ་རིན་པོ་ཆེར་ཕུལ། དེ་ཡང་ཟ་ཧོར་རྒྱལ་པོས། ང་ཡི་ཞྭ་གོས་ཐམས་ཅད་ཁྱེར་ལ་ཤོག །ཤིང་རྟ་གདུགས་དང་རྒྱལ་མཚན་ལོངས་ལ་ཤོག ཅེས་ཟ་འོག་བེར་མཛོད་གསར་པའི་ནང་ནས་སྣང་སྲིད་ཟིལ་གནོན་གྱི་སྐུ་ཆས་ཟ་ཧོར་རྒྱལ་པོའི་ཆ་ལུགས་དེ་ཉིད་དེ་དུས་ཕུལ་བ་རེད། པདྨ་བཀའ་ཐང་དུ། སྐུ་ལ་རྒྱལ་པོའི་ཟ་བེར་སྔོ་བཀྲ་གསོལ། །དེ་ནས་ལེ་རྒན་དམར་དང་ཟ་འོག་དང་། །དེ་ནས་བེར་ཆེན་སྣ་ལྔ་ལྔ་བརྩེགས་གསོལ། ཞེས་སོགས་གསུངས། བཅོམ་ལྡན་འདས་དཔལ་ཆེན་པོས་རུ་ཏྲ་བཏུལ་ནས། རུ་ཏྲའི་ཆས་མང་ལ་ཡང་བ་དཔའ་རྟགས་ཀྱི་ཚུལ་དུ་བཞེས་ནས་ཁྲོ་བོའི་ཆས། དཔལ་གྱི་ཆས་དགུ། དུར་ཁྲོད་ཀྱི་ཆས་བརྒྱད་སོགས་སུ་གྱུར་བ་ལྟར་ཟ་ཧོར་རྒྱལ་ཁམས་དབང་དུ་བསྡུས་ནས་དཔའ་རྟགས་མངའ་གསོལ་གྱི་ཚུལ་དུ་བཞེས་པའི་ཆས་ཡིན་པ་རེད། དེ་བཞིན་དུ་སྙན་རྒྱན། དར་དཔྱང་། ཕྱག་གདུབ། མགུལ་རྒྱན། ཐུགས་རྒྱན་ལ་སོགས་པ་ཤུགས་བསྟན་ཞོར་འབྱུང་དུ་གོ་དགོས། གུ་རུ་རིན་པོ་ཆེས་ཟ་ཧོར་རྒྱལ་པོ་འཁོར་བཅས་ཀྱི་ཚོགས་རྫོགས་པའི་ཆེད་དུ། ཟ་ཧོར་རྒྱལ་པོས་ཕུལ་བའི་ཆས་ཆ་ལུགས་ཐམས་ཅད་བཞེས་ནས། སྔགས་ཀྱི་ཆོས་འཁོར་དེ་ཉིད་ཁྱབ་བརྡལ་དུ་དེ་དུས་བསྐོར་མཛད་པ་རེད། དེའི་སྐབས་སུ་སྐལ་ལྡན་གྱི་སློབ་མ་སྨིན་གྲོལ་གྱི་ལམ་ལ་བཀོད་པ་ལྔ་དང་བཅུ། བརྒྱ་ཚོ་དང་སྟོང་ཚོ་ཙམ་མ་ཡིན་པར། ཟ་ཧོར་མ་སྨིན་བར་དུ་བསྡད་ཅེས་གསུངས། ཞེས་དང་། སེམས་ཅན་མ་སྨིན་པ་ནི་གཅིག་ཀྱང་མེད། ཅེས་གསུངས་པ་ལྟར་ཡུལ་འཁོར་ཆེན་པོ་དེའི་ལས་བཟང་ངན་ལ་མ་ལྟོས་པའི་མི་ཚོགས་ཐམས་ཅད་སངས་རྒྱས་ཀྱི་སར་ཁྱུ་དེད་བཏང་བའི་དེ་འདྲའི་མཛད་ཆེན་བསྐྱངས་པས། གུ་རུའི་རྣམ་ཐར་གྱི་ནང་དུ་ཐུན་མོང་པའི་སྣང་ངོ་རུ་འགྲོ་འདུལ་འཕྲིན་ལས་ཀྱི་ཐོག་མ་དེ་ནས་རྒྱས་པ་རེད། སྐུ་ཆས་དེ་དག་དེ་ཚུན་ཆད་ལས་མེད་པས། རྡོ་རྗེ་ཐེག་པའི་ཆོས་ཀྱི་འཕྲིན་ལས་ཐུན་མོང་མ་ཡིན་པས་རྗེས་སུ་འཛིན་པར་འདོད་ན་འདི་གཙོ་བོ་བྱེད་དགོས་པ་རེད། གཞན་ཡང་སྣང་སྲིད་ཟིལ་གནོན་ཞེས་ཆ་བྱད་སྣ་ཚོགས་བསྲེས་པ་འདིས་འདོད་དགུར་བསྒྱུར་བའི་འཕྲུལ་མཚན་དང་མཛད་པ་སྣ་ཚོགས་ཅན་དུ་ཡང་མཚོན་ཐུབ། ཕྱག་གཡས་རྡོ་རྗེ་རྩེ་ལྔ་བསྡིགསཿ གཡོན་པས་བྷནྡྷ་ཚེ་བུམ་བསྣམསཿ མཆན་ཁུང་གཡོན་ན་ལྷ་ལྕམ་མཛེསཿ དབུ་ལ་པདྨའི་མཉེན་ཞུ་གསོལཿ རྒྱལ་པོ་རོལ་པའི་སྟབས་སུ་བཞུགསཿ ཞེས་གསུངས་ཏེ། ཕྱག་གཡས་རྡོ་རྗེ་རྩེ་ལྔ་བསྡིགས་ཞེས་ཕྱག་གཡས་པས་སྐུ་ལྔ་ཡེ་ཤེས་ལྔ་མཚོན་པའི་གསེར་གྱི་རྡོ་རྗེ་རྩེ་ལྔ་པ་བསྡིགས་ཤིང་རྡེག་པའི་ཚུལ་གྱིས་བར་སྣང་ལ་གདེངས་ཡོད་པ། སྤྱིར་གུ་རུ་སྣང་སྲིད་ཟིལ་གནོན་རྐྱང་པ་གསུངས་པའི་སྐབས་སུ་ཕྱག་གཡས་ཞབས་པུས་གཡས་པའི་སྟེང་ནས་རྡོ་རྗེ་གདེངས་བའི་ཚུལ་ཅན་ཞིག་ཀྱང་ཡོད་པ་རེད་མོད། འདི་ནས་སྣང་སྲིད་ཟིལ་གནོན་པདྨ་འབྱུང་ཞེས་གསུངས་ནས་རིག་འཛིན་འདུས་པའི་སྐུར་བསྒོམ་དགོས་དུས་ཕྱག་གཡས་པས་བར་སྣང་དུ་རྡོ་རྗེ་བསྡིགས་པའི་ཚུལ་གྱིས་བསྣམས་པ་ཞིག་ཏུ་གསལ། རྡོ་རྗེ་དེ་ཉིད་སུ་ལ་བསྡིགས་པ་རེད་ཅེ་ན། ཕྱི་སྣང་སྲིད་ཀྱི་ལྷ་འདྲེ་མ་རུངས་བ། ནང་ཉོན་མོངས་དུག་ལྔ་དུག་གསུམ། གསང་བ་གཟུང་འཛིན་གྱི་རྟོག་ཚོགས་ལ་བསྡིགས་པ་དེ་འདྲ་ཞིག་ཏུ་གསལ་དགོས་པ་རེད། གཡོན་པས་བྷནྡྷ་ཚེ་བུམ་བསྣམས་ཞེས་ཕྱག་གཡོན་པས་བྷནྡྷ་སྟེ་ཀ་པ་ལ་བདུད་རྩིས་གང་བ་ཚེ་བུམ་དང་ཟུང་འབྲེལ་དུ་བསྣམས་པ། ཟག་མེད་ཀྱི་བདུད་རྩི་བདེ་བ་ཆེན་པོའི་ཡེ་ཤེས་ཀྱི་དངོས་གྲུབ་ཀྱིས་གདུལ་བྱ་རྗེས་སུ་འཛིན་པའི་བརྡ་དང་། འཆི་མེད་ཚེ་ཡི་རིག་འཛིན་ལ་མངའ་བརྙེས་ནས་རིག་འཛིན་རྣམ་པ་བཞིའི་ས་ལམ་ལ་བགྲོད་པའི་རྟགས་སུ་ཕྱག་མཚན་ཟུང་འབྲེལ་ལ་བསྣམས་པ། མཆན་ཁུང་གཡོན་ན་ལྷ་ལྕམ་མཛེས། ཞེས་སྲིད་དང་ཞི་བར་མི་གནས་ཤིང་མ་ཆགས་ཐབས་ཀྱི་རོལ་རྩེད་ཀྱིས་མཁའ་འགྲོ་མ་ཚོགས་དབང་དུ་སྡུད་ཅིང་། ཁ་སྦྱོར་ཡན་ལག་བདུན་ལྡན་གྱི་ངེས་པ་འཆང་བའི་རྟགས་སུ། མཆན་ཁུང་གཡོན་ཕྱོགས་སུ་ལྷ་ལྕམ་མནྡ་ར་བ་མཛེས་འཛུམ་སྒེགས་པའི་ཉམས་ཅན་གྱིས་འཁྲིལ་ཡོད་པ། དབུ་ལ་པདྨའི་མཉེན་ཞུ་གསོལ་ཞེས་གསུངས་ན། པདྨའི་མཉེན་ཞུ་འདི་མཚམས་རེར་པདྨ་མཐོང་གྲོལ་ལ་ངོས་འཛིན་དུས་ཡོད་པ་ཨེ་ཡིན་ནམ། ཤ་བའི་མཉེན་ཞུ་གསུངས་པའི་སྐབས་སུ་པདྨ་མཐོང་གྲོལ་དང་པདྨ་ཁ་འབུས་གཉིས་ཀ་མ་ཡིན་པ་དེར་གོ་དགོས་པ་རེད་སྙམ། གང་ལྟར་གོང་དུ་ཞུས་པ་ལྟར་ཟ་ཧོར་རྒྱལ་པོས། ང་ཡི་ཞྭ་གོས་ཐམས་ཅད་ཁྱེར་ལ་ཤོག་ཅེས་གསུངས་པའི་དབུ་ཞྭ་དེ། དབུ་ལ་རྒྱལ་པོའི་དབུ་ཞྭ་པད་འདབ་ཅན། །ནོར་བུ་ཁ་དོག་མི་གཅིག་ལྔ་བརྩེགས་ལ། །གསེར་གྱི་རྡོ་རྗེ་རྩེ་དགུ་བཙུགས་པ་ཡི། །རྩེ་མོར་རྒོད་ཀྱི་རྩེ་རྒྱས་མཛེས་པ་དང་། །དར་སྣ་མང་པོའི་ཅོད་པན་དག་གིས་བརྒྱན། །རིན་ཆེན་གསེར་གྱི་ཉི་ཟླ་གསལ་བའི་ཞྭ། ཞེས་གསུངས་པ་དེ་ཉིད་ཡིན་དགོས་འདུག བྲིས་ཆ་ཕྱག་ལེན་ཚང་མ་དེ་ཉིད་དང་མཐུན་པ་རེད། ལྟ་བ་ཡས་འབུབས་ཀྱི་རྟགས་སུ་རྒོད་ཀྱི་ལྡེམ་འཕྲུའི་རྩེ་རྒྱལ། ཡེ་ཤེས་ཀློང་དགུའི་རང་རྟགས་སུ་རྡོ་རྗེ་རྩེ་དགུའམ་སྐུ་ལྔའི་དབང་རྫོགས་ཀྱི་རྟགས་སུ་རྡོ་རྗེ་རྩེ་ལྔའི་ཏོག་གིས་མཛེས་པ། འཕྲིན་ལས་འགྲོ་དོན་སྣ་ཚོགས་ཀྱི་བརྡ་རུ་དར་སྣ་ཚོགས་ཀྱི་ཅོད་པན་ནམ་དར་དཔྱངས་ཀྱིས་བརྒྱན་པ། མདོ་སྔགས་བསྟན་གཉིས་ཟུང་འབྲེལ་གྱི་བརྡ་རུ་གསེར་གྱི་ཉི་ཟླས་བརྒྱན་པ། དབང་རྟགས་རིགས་ལྔའི་ཅོད་པན་གྱི་རྟགས་སུ་དབུ་ཞྭའི་པད་འདབ་འདབ་མ་ལྔ་པ་ཅན། རྒྱལ་པོ་རོལ་བའི་སྟབས་སུ་བཞུགས། ཞེས་གསུངས་ན། གུ་རུ་རིན་པོ་ཆེ་སྣང་སྲིད་ཟིལ་གནོན་བཞུགས་སྟངས་ལ་ཞབས་གཉིས་རྒྱལ་པོ་རོལ་སྟབས་ཏེ། ཞབས་གཡོན་བསྐུམས་པའི་སྐྱིལ་ཀྲུང་ལ། གཡས་པ་ཕྱི་ལ་ཅུང་ཟད་གྱེད་པ། དེ་ལ་དག་དྲན་གྱི་དགོས་པ་ཅི་འདྲ་ཡོད་པ་རེད་ཅེ་ན། འབྱོན་ལ་རིངས་བའི་སྟངས་སྟབས་ཡིན་པ་རེད། འདིས་རང་དོན་སྤང་རྟོགས་མཐར་ཕྱིན་ཀྱང་གཞན་དོན་འཕྲིན་ལས་ཀྱི་འཇུག་པ་རྒྱུན་མི་ཆད་པ་མཚོན་པ་རེད། སྐུ་ཡོངས་རྫོགས་འགྱིང་བག་གི་ཉམས་ཀྱིས་བཞུགས་པ་བདེ་སྟོང་གར་གྱི་ཉམས་དགུས་སྒེགས་པས་མ་ཚད། ལྷག་པར་སྙིགས་མའི་དུས་ཀྱི་གདུལ་དཀའི་འགྲོ་བ་འདུལ་བ་ལ་འཇིགས་པ་མེད་པ་དཔའ་བའི་ཆེ་རྟགས་ཀྱང་མཚོན་པ་རེད། དབུ་གཙུག་འཇའ་ཟེར་ཐིག་ལེའི་ཀློངཿ དགའ་རབ་རྡོ་རྗེ་ལོངས་སྐུའི་ཆསཿ དཀར་གསལ་རྡོར་དྲིལ་ཐུགས་ཀར་བསྣོལཿ དེ་ཡི་དབུ་གཙུག་ཐོག་མའི་མགོནཿ ཀུན་བཟང་ཡབ་ཡུམ་ནམ་མཁའི་མདོགཿ ཅེས་གསུངས་ཏེ། ཚོམ་བུའི་དཀྱིལ་འཁོར་ཚོགས་ཞིང་དང་བཅས་པ་གསལ་འདེབས་པར། དབུ་གཙུག་འཇའ་ཟེར་ཐིག་ལེའི་ཀློང་། །དགའ་རབ་རྡོ་རྗེ་ལོངས་སྐུའི་ཆས། ཞེས་དབུ་གཙུག་ན་ཆོས་ཉིད་མངོན་སུམ་དང་ཉམས་གོང་འཕེལ་གྱི་འཇའ་ཟེར་འོད་ལྔའི་ཐིག་ལེ་དཀྱིལ་དབུས་མཐིང་ག་ཅན་གྱི་ཀློང་ན། ལུག་རྒྱུད་སྐུ་རུ་འཕོས་པའི་རིག་པ་ཚད་ཕེབས་ཀྱི་བརྡ་རྟགས་སུ་རིག་འཛིན་དགའ་རབ་རྡོ་རྗེ་ལོངས་སྐུའི་རྒྱན་ཆས་ཀྱིས་མཛེས་པ། དེའི་དབུ་གཙུག་ཏུ་སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས་པའི་ནང་གསལ་གཞོན་ནུ་བུམ་སྐུ་འབྲས་བུ་ལྷུན་གྲུབ་རིན་པོ་ཆེའི་སྦུབས་མཚོན་བྱེད་དུ་ཐོག་མའི་མགོན་པོ་ཆོས་སྐུ་ཀུན་ཏུ་བཟང་པོ། སྐུ་མདོག་ནམ་མཁའི་མདོག་ཅན་མཐིང་ག དབྱིངས་དང་ཡེ་ཤེས་གཉིས་མེད་ཐབས་དང་ཤེས་རབ་ཟུང་འབྲེལ་མཚོན་བྱེད་དུ་ཡུམ་ཀུན་ཏུ་བཟང་མོ་དང་། མ་བཅོས་སྤྲོས་པ་བྲལ་བའི་བརྡ་རུ་རྒྱན་མེད་དུ་འཁྲིལ་སྦྱོར་རོལ་བར་གསལ་བཏབ། ཕྱི་འཁོར་པདྨ་འདབ་བརྒྱད་སྟེངཿ འོད་ལྔའི་ཐིག་ལེ་ཟླུམ་སྐོར་དབུསཿ དཔལ་ཆེན་གྲུབ་པའི་རིག་འཛིན་བརྒྱདཿ ཀུན་ཀྱང་ཧེ་རུ་ཀ་པའི་ཆསཿ ཕྱག་གཉིས་ཌ་རུ་དྲིལ་བུ་འཁྲོལཿ སྟངས་སྟབས་ཕྱག་རྒྱ་གར་གྱིས་རོལཿ ཞེས་གསུངས་ཏེ། ཕྱི་འཁོར་པདྨ་འདབ་བརྒྱད་སྟེང་། །འོད་ལྔའི་ཐིག་ལེ་ཟླུམ་སྐོར་དབུས། ཞེས་གཙོ་བོའི་ཕྱིའི་འཁོར་ཡུག་གི་པདྨ་འདབ་བརྒྱད་ཀྱི་སྟེང་ན། ཡེ་ཤེས་ལྔ་མཚོན་བྱེད་ཀྱི་འོད་ལྔའི་ཐིག་ལེ་ཟླུམ་སྐོར་གྱི་དབུས་སུ། དཔལ་ཆེན་གྲུབ་པའི་རིག་འཛིན་བརྒྱད་ཅེས་དཔལ་ཆེན་གྲུབ་པའི་བཀའ་བབས་ཀྱི་རིག་འཛིན་ཆེན་པོ་བརྒྱད་བཞུགས་པ། རིག་འཛིན་བརྒྱད་ནི་འཇམ་དཔལ་བཤེས་གཉེན། ཀླུ་སྒྲུབ་སྙིང་པོ། ཧཱུྃ་ཆེན་ཀ་ར། པྲ་བྷ་ཧསྟི། རོམ་བུ་གུ་ཧྱ། ཤནྟིཾ་གརྦྷ། དྷ་ན་སཾ་ཀྲྀ་སོགས་དང་། སྒྲུབ་པ་བཀའ་བརྒྱད་ནི་སྐུ་གསུང་ཐུགས་ཡོན་ཏན་འཕྲིན་ལས་ལྔ་དང་། འཇིག་རྟེན་མཆོད་བསྟོད། མ་མོ་རྦོད་གཏོང་། དམོད་པ་དྲག་སྔགས་གསུམ་བསྣན་པས་བརྒྱད་དང་། དེ་དག་ལ་བཀའ་བབས་ཚུལ་ནི། འཇམ་དཔལ་སྐུ་འཁོར་ལོ་རྣམ་པ་བཞིའི་དགོངས་པའི་བཀའ་བབས་སློབ་དཔོན་འཇམ་དཔལ་བཤེས་གཉེན། པདྨ་གསུང་རྟ་སྐད་ཐེངས་གསུམ་གྱི་དགོངས་པའི་བཀའ་བབས་སློབ་དཔོན་ཀླུ་སྒྲུབ་སྙིང་པོ། ཡང་དག་ཐུགས་རུ་ལུ་འབྲུ་བརྒྱད་ཀྱི་དགོངས་པའི་བཀའ་བབས་སློབ་དཔོན་ཆེན་པོ་ཧཱུྃ་ཆེན་ཀ་ར། ཕུར་པ་འཕྲིན་ལས་ཐལ་འགྱུར་རྣམ་པ་བཞིའི་དགོངས་པའི་བཀའ་བབས་སློབ་དཔོན་པྲ་བྷ་ཧསྟི། འཇིག་རྟེན་མཆོད་བསྟོད་མཆོད་སྒྲུབ་རྟེན་གསུམ་གྱི་དགོངས་པའི་བཀའ་བབས་སློབ་དཔོན་རོམ་བུ་གུ་ཧྱ། མ་མོ་རྦོད་གཏོང་རྩ་རླུང་ཐིག་ལེའི་དགོངས་པའི་བཀའ་བབས་སློབ་དཔོན་ཤནྟིཾ་གརྦྷ། དམོད་པ་དྲག་སྔགས་འབོད་རྦད་བསད་གསུམ་གྱི་དགོངས་པའི་བཀའ་བབས་སློབ་དཔོན་དྷ་ན་སཾ་ཀྲྀ་སོགས་ཏེ། ཀུན་ཀྱང་ཧེ་རུ་ཀ་པའི་ཆས། ཕྱག་གཉིས་ཌ་རུ་དྲིལ་བུ་འཁྲོལ། ཞེས་གསུངས་ན། ཧེ་རུ་ཀ་ཞེས་པའི་སྒྲ་འདི། ཧེ་ལ་གཅོད་ཅིང་བཙན་པ། རུ་དྷི་ཁྲག ཀ་ཟེར་བ་འདི་ལེགས་སྦྱར་གྱི་སྐད་ཀྱི་བདག་པོའི་སྒྲ་ཡིན་ཞེས་གསུངས་འདུག ཁྲག་ལ་རོལ་བའི་དོན་གྱིས་ཁྲག་འཐུང་སྟེ། ཧེ་རུ་ཀ་འདི་ཁྲག་འཐུང་དཔལ་ཆེན་པོར་གོ་དགོས་པ་རེད། མཚོན་བྱེད་རྟགས་ཀྱི་ཧེ་རུ་ཀ་རྒྱལ་བ་ཀུན་ཀྱི་ཐུགས་མཆོག་གི་ཡེ་ཤེས། འབར་བ་ཁྲོ་བོའི་རྣམ་པ་ཅན་དུ་ཤར་བ་དངོས་གྲུབ་གཉིས་ཀའི་རྟེན་དུ་གྱུར་བ་དེ་ཉིད་དང་། མཚོན་བྱ་དོན་གྱི་ཧེ་རུ་ཀ་ཆོས་ཐམས་ཅད་ཀྱི་དེ་ཁོ་ན་ཉིད། དབྱིངས་དང་ཡེ་ཤེས་གཉིས་སུ་མེད་པའི་བདེ་བ་ཆེན་པོ། ཡང་དག་པའི་བདག་ཉིད་ཅན་དེ་ཉིད་རེད། ཧེ་རུ་ཀ་པའི་ཆས་ནི་དུར་ཁྲོད་རོལ་བའི་ཆས་ཏེ་རུས་རྒྱན་དང་སྟག་ཤམ་ལ་སོགས་པ་རེད། གྲུབ་པའི་རིག་འཛིན་ཆེན་པོ་རྣམས་ཀྱིས་བརྟུལ་ཞུགས་ཀྱི་སྤྱོད་པ་བསྐྱངས་ནས། མ་ངེས་སྦྱོར་སྒྲོལ་རྨད་བྱུང་གི་སྤྱོད་པ་ཤུགས་འབྱུང་གིས་མཛད་པའི་རྟགས་སུ་ཧེ་རུ་ཀའི་ཆས་མཛད། རལ་པ་ཐོར་ཚུགས་སུ་བཅིངས། ཕྱག་གཡས་ན་འཛིན་པའི་དམ་ཚིག་ཐེག་ཆེན་དཔའ་བོའི་རྔེའུ་ཆུང་ཐོད་པའི་ཌ་མ་རུ་འཁྲོལ་ཞིང་། ཕྱག་གཡོན་པས་འཆང་བའི་དམ་ཚིག་བདེ་ཆེན་ཤེས་རབ་མཚོན་པའི་ཅང་ཏེའུ་དྲིལ་བུ་འཁྲོལ་བ། སྟངས་སྟབས་ཕྱག་རྒྱ་གར་གྱིས་རོལ་ཞེས་གསུངས་ན། ཕྱག་ཞབས་རྡོ་རྗེའི་སྟངས་སྟབས་ཀྱིས་ཕྱག་རྒྱ་དང་བཅས་ཏེ་འདོད་དགུའི་གར་ལ་རོལ་བ། ཕྱོགས་བཞི་ཕྱོགས་མདོག་མཚམས་བཞི་མཐིངཿ སྒྲུབ་སྡེ་བརྒྱད་ཀྱི་ངོ་བོར་གསལཿ བར་མཚམས་རྒྱ་བོད་རིག་འཛིན་དངཿ སྤྲུལ་པའི་རྗེ་འབངས་ཉི་ཤུ་ལྔཿ ཞེས་གསུངས་ཏེ། ཕྱོགས་བཞི་ཕྱོགས་མདོག་མཚམས་བཞི་མཐིང་། ཞེས་གསུངས་ན། དེ་ལྟ་བུའི་དཔལ་ཆེན་སྒྲུབ་སྡེ་བརྒྱད་ཀྱི་དཀྱིལ་འཁོར་གྱི་ཕྱོགས་བཞི་ཕྱོགས་མདོག་དང་། མཚམས་བཞི་མཐིང་ག སྒྲུབ་སྡེ་བརྒྱད་ཀྱི་ངོ་བོར་གསལ། ཞེས་འཁོར་བའི་རང་བཞིན་ཚོགས་བརྒྱད་གནས་སུ་དག་པའི་བརྡ་རྟགས་སུ་ཕྱི་ལྟར་བྱང་སེམས་བརྒྱད། ནང་ལྟར་སྒྲུབ་སྡེ་བརྒྱད། གསང་བ་ལྟར་རིག་འཛིན་བརྒྱད་ཀྱི་ངོ་བོར་མ་འདྲེས་ལྷུན་གྱིས་གྲུབ་པར་བསྐོར་བ་ཞིག་ཏུ་གསལ་འདེབས་དགོས་པ་རེད། བར་མཚམས་རྒྱ་བོད་རིག་འཛིན་དང་། ཞེས་དེ་དག་གི་བར་མཚམས་ཐམས་ཅད་ན་སྔགས་ཕྱི་བ་གསུམ་དང་། ནང་རྒྱུད་ཡོ་ག་གསུམ་སྟེ་རྒྱུད་སྡེ་དྲུག་གི་དཀྱིལ་འཁོར་གྱི་ལྷ་ཚོགས་ཐམས་ཅད་བསྙེན་ཅིང་བསྒྲུབས་ནས་གྲུབ་པ་ཐོབ་པའི་གྲུབ་བརྙེས་རྒྱ་བོད་ཀྱི་རིག་འཛིན་སྤྲུལ་པའི་རྗེ་འབངས་ཉི་ཤུ་ལྔ་ལ་སོགས་པ་ཐམས་ཅད་དང་། དེ་ཡང་སྤྱིར་རིག་འཛིན་ཞེས་པ་ལ་སར་ཆུད་པའི་རིག་འཛིན་དང་། ས་ལ་གནས་པའི་རིག་འཛིན། སར་སྨིན་པའི་རིག་འཛིན་ཏེ་དབྱེ་བ་རྣམ་པ་གསུམ་ཡོད་ཅིང་། སར་ཆུད་པའི་རིག་འཛིན་ནི་དཀྱིལ་འཁོར་ལ་ཞུགས་ནས་བསྐྱེད་རྫོགས་དང་པོར་མནོས་པ་ཐམས་ཅད་ལ་གོ་ཆོག་པ་དང་། ས་ལ་གནས་པའི་རིག་འཛིན་ནི་རྟོགས་པ་དང་ཏིང་ངེ་འཛིན་ཐོབ་ནས་དེར་རྒྱུན་དུ་གནས་པ། སར་སྨིན་པའི་རིག་འཛིན་ནི་ཐོབ་པ་དེ་ལས་ཀྱང་སྟོབས་ཇེ་ཆེར་གྱུར་ནས་རྣམ་སྨིན་ཚེ་དབང་ཕྱག་ཆེན་སོགས་ཐོབ་སྟེ་ལྷུན་གྲུབ་རིག་འཛིན་ལ་སྦྱོར་བ་དེ་ཉིད་ཡིན་པ་རེད། སྐབས་འདིར་བསྟན་གྱི་རིག་འཛིན་དེ་ཉིད་གང་ལ་གོ་དགོས་པ་རེད་ཅེ་ན། ཕྱི་མ་གཉིས་ཀར་གོ་དགོས། རྣམ་འགྱུར་ཆ་ལུགས་མ་ངེས་ཤིངཿ རྡོ་རྗེའི་གར་སྟབས་ཅིར་ཡང་བསྒྱུརཿ ཞེས་གསུངས་ན། ཞི་རྒྱས་དབང་དྲག་གི་རྣམ་འགྱུར་འདྲ་དང་མི་འདྲ་རུ་སྣང་བས་མཐའ་གཅིག་ཏུ་མ་ངེས་ཤིང་། ཆ་ལུགས་ཀྱང་འགའ་ཞིག་རབ་བྱུང་གི་ཆས་ངུར་སྨྲིག་འཆང་བ། འགའ་ཞིག་སྔགས་འཆང་གི་ཆས་གོས་དཀར་ལྕང་ལོ་འཆང་བ། འགའ་ཞིག་ཧེ་རུ་ཀའི་ཆས་བརྟུལ་ཞུགས་ཀྱི་སྤྱོད་པ་བསྐྱངས་བའི་ཆས་ཅན་ཏེ། རྣམ་འགྱུར་དང་ཆ་ལུགས་མཐའ་གཅིག་ཏུ་མ་ངེས་ཤིང་རྡོ་རྗེའི་འགྲོས་དང་གར་སྟབས་ཅིར་ཡང་བསྒྱུར་གྱིན་ཡོད་པ། སྟེང་ཕྱོགས་རྒྱུད་སྡེ་བཞི་དྲུག་གིཿ ཡི་དམ་དཔའ་བོ་མཁའ་འགྲོའི་ཚོགསཿ ཏིལ་གྱི་གོང་བུ་ལྟ་བུར་བཞུགསཿ ཞེས་གསུངས་ན། སྟེང་གི་ཕྱོགས་སུ་དེ་ལྟ་བུའི་ཡི་དམ་རྒྱུད་སྡེ་བཞིའམ་དྲུག་གི་ལྷ་ཚོགས། ཕོ་རྒྱུད་དཔའ་བོ་དང་མོ་རྒྱུད་མཁའ་འགྲོ་མའི་ཚོགས་དཔག་མེད་བསམ་གྱིས་མི་ཁྱབ་པ་ཏིལ་གྱི་གོང་བུ་ཁ་ཕྱེས་པ་ལྟ་བུའི་གྲངས་མང་པོ་བསམ་ཡུལ་ལས་འདས་པར་བཞུགས་ཡོད་པ། ཕྱི་ཁྱམས་དཔལ་མགོན་བདུན་ཅུ་དངཿ དབང་ཕྱུག་ཉི་ཤུ་རྩ་བརྒྱད་སོགསཿ བཀའ་སྡོད་དམ་ཅན་རླུང་ལྟར་འཚུབསཿ སྒོ་བཞིར་གིང་ཆེན་སྡེ་བཞི་གསལཿ ཞེས་གསུངས་ཏེ། དཀྱིལ་འཁོར་ཆེན་པོ་དེ་ཉིད་ཀྱི་ཕྱིའི་ཁྱམས་འདི་གཞལ་ཡས་ཁང་གི་ཕྱིའི་བཀའ་སྡོད་ཀྱི་སྣམ་བུ་ཡིན་ཞེས་གསུངས་ཡོད་པ་རེད། རྩིག་པའི་ཁྱམས་མིན་ཞེས་དོགས་པ་བསལ་མཛད་སའང་ཡོད། དེ་ལྟ་བུའི་ཕྱི་ཁྱམས་སུ་གཙང་རིས་ལྷའི་མགོན་པོ་ལ་སོགས་པ་དཔལ་མགོན་བདུན་རྩ་ལྔ་དང་། སྲིན་མོ་ཆེན་མོ་མིའི་སྲིན་མོ་དང་། ཚངས་མ་དང་འཁྲུགས་མོ་ལ་སོགས་པ་དབང་ཕྱུག་མ་ཉི་ཤུ་རྩ་བརྒྱད་དང་། དེ་ལ་སོགས་པའི་བཀའ་སྡོད་དམ་ཅན་རླུང་ལྟར་འཚུབས་ཞེས་བཀའ་ལ་གནས་ཤིང་དམ་ལ་འཁྲེང་བའི་བཀའ་སྡོད་དམ་ཅན་རྒྱ་མཚོ། དྲག་རྩལ་དང་འཕྲིན་ལས་གློག་ལྟར་མྱུར་ཤིང་རླུང་ལྟར་འཚུབ་པའི་མྱུར་མགྱོགས་ཅན་ཐམས་ཅད་དང་། སྒོ་བཞིར་གིང་ཆེན་སྡེ་བཞི་གསལ་ཞེས་ཕོ་བྲང་གཞལ་མེད་ཁང་ཆེན་པོ་དེའི་སྒོ་བཞི་ན་སྤྲུལ་པའི་གིང་ཆེན་སྡེ་བཞི་ཡུལ་འཁོར་དང་བཅས་པ། ཀུན་ཀྱང་སྣང་སྟོང་རོལ་བའི་ངངཿ གསལ་ལ་མ་འདྲེས་ལྷུན་གྱིས་གྲུབཿ ཅེས་གསུངས་ཏེ། དེ་ལྟ་བུའི་དཀྱིལ་འཁོར་གྱི་འཁོར་ལོའམ། ཡིད་དང་ཆོས་སུ་སྣང་བའི་གཉིས་སྣང་གི་སྣང་བ་བསྐྱེད་པའི་གཞི། ཕྲ་རགས་ཀྱི་ཐིག་ལེ་ཐམས་ཅད་ཀྱི་རྩ་བ་ཁམས་དྲུག་གི་ནུས་པ་སྔགས་ཀྱི་ཐབས་ལམ་ཟབ་མོས་བཅོམ་པའི་ཡེ་ཤེས་ཀྱི་ཐིག་ལེའི་བདག་ཉིད། སྤྲོ་དང་བསྡུ་བའི་བྱེད་པོ་དཀྱིལ་འཁོར་གྱི་གཙོ་བོ་སློབ་དཔོན་ཆེན་པོ་གཅིག་གི་གསང་གསུམ་སྣང་སྟོང་གི་རོལ་པའི་ངང་ནས། གསལ་ལ་མ་འདྲེས་ལྷུན་གྱིས་གྲུབ་ཅེས་གསུངས་པ་དེ་ཉིད་ལྷུན་རྫོགས་དང་དོན་གཅིག་པ་སྟེ། སྐྱེ་མེད་ཀྱི་ཀློང་ནས་འགག་མེད་དུ་ཤར་བ་ལ་ལྷུན་རྫོགས་ཞེས་གསུངས་པ་རེད། གསལ་ལ་མ་འདྲེས་ཞེས་པ་འདིས་ཅི་ཞིག་བསྟན་པ་རེད་ཅེ་ན། བསྐྱེད་རིམ་གྱི་སྐབས་སུ་རྣམ་པ་གསལ་བ་དང་རྣམ་དག་དྲན་པ་མི་འབྲལ་བར་བྱེད་རྒྱུ་དེ་ཉིད་བསྟན་པ་རེད། དེ་ཡང་རྣམ་པ་གསལ་ཞེས་པའི་སྐབས་སུ་གསལ་བརྟན་གྱི་ཚད་བརྒྱད་དང་ལྡན་པ་ཞིག་ཡིན་དགོས། གསལ་བརྟན་གྱི་ཚད་བརྒྱད་ནི། གསལ་བའི་ཚད་བཞི་དང་བརྟན་པའི་ཚད་བཞི་དང་བཅས་བརྒྱད་དེ། གསལ་བའི་ཚད་བཞི་ནི། སལ་ལེ། སང་ངེ། ལྷག་གེ། ལྷང་ངེ་བ་བཅས་བཞི་རེད། སལ་ལེ་ཞེས་པ་ནི་ལྷ་སྐུ་གང་བསྒོམས་ཀྱང་དེའི་སྐུའི་སྣང་ཆ། སྤྱན་གྱི་དཀར་ནག་ཚུན་ཆད་མ་འདྲེས་པར་གསལ་བ་ལ་སལ་ལེ་ཞེས་གསུངས་པ་རེད། སང་ངེ་ཞེས་པ་ནི་གང་གསལ་བ་དེ་ཉིད་རིག་པའི་གསལ་གདངས་ངར་ཆ་དང་བྲལ་བ་བྱིང་པའི་ཉམས་ཅན་དེ་འདྲ་མ་ཡིན་པར་རིག་པ་ངར་དང་ལྡན་པའི་གསལ་སྟོང་སེང་བག་ཅན་ཞེས་གསུངས་ཡོད་པ་རེད། ལྷག་གེ་བ་ནི་གང་བསྒོམ་པའི་ལྷ་དེ་ཉིད་སེམས་མེད་བེམ་པོ་ས་རྡོ་ལྟ་བུའི་གདོས་ཅན་དང་། སྟོང་གཟུགས་ནམ་མཁའི་འཇའ་ལྟ་བུ་སེམས་མེད་མ་ཡིན་པར། སྐུའི་བ་སྤུའི་ཁུང་བུ་དང་དབུ་སྐྲའི་ཉག་མ་རེ་རེ་ཚུན་ཆད་ཀྱང་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་ཟིན་པ། དབང་ཤེས་དྭངས་བའི་ཡོན་ཏན་བརྒྱ་ཕྲག་འཆར་བ་ཞིག་ལ་ལྷག་གེ་གསུངས་པ་རེད། ལྷང་ངེ་ནི་གནས་གང་ཞིག་ན་ལྷ་སྐུ་དེ་འདྲ་ཞིག་ཡོད་པ་རེད། ཡོད་དགོས་པ་རེད་སྙམ་པའི་རྗེས་དཔག་གི་བློ་རྟོག་ཙམ་ཞིག་མ་ཡིན་པར། ཡིད་ངོ་རུ་མངོན་སུམ་ལྟ་བུ་བཀྲ་ལམ་མེར་ལྷང་ངེར་འཆར་བ་ཞིག་ལ་ལྷང་ངེར་ཞེས་གསུངས། དེ་དག་ནི་གསལ་བའི་ཚད་བཞི་རེད། དེའི་སྟེང་ལ་བརྟན་པའི་ཚད་བཞི་ཡོད་པ་སྟེ། དེ་ནི་མི་གཡོ། མི་འགྱུར། མངོན་པར་མི་འགྱུར། ཅིར་ཡང་བསྒྱུར་དུ་བཏུབ་པ་བཅས་རེད། མི་གཡོ་ནི་བརྗེད་ངས་དང་ལེ་ལོའི་དབང་དུ་འགྲོར་མི་འཇུག་པར་གསལ་སྣང་བརྟན་པ་དེ་རེད། དེའི་སྟེང་དུ་རབ་རིབ་དང་མག་མོག་ལ་སོགས་པའི་སྐྱོན་སྣ་ཚོགས་ཀྱིས་མི་འགྱུར་བ་ལ་མི་འགྱུར་ཞེས་གསུངས། དེ་ཡང་མཚམས་རེར་གསལ་སྣང་བརྟན་པ་དང་མཚམས་རེར་གསལ་སྣང་མི་བརྟན་པ་དེ་འདྲ་མ་ཡིན་པར་དུས་ནམ་མཉམ་པར་བཞག་ཀྱང་རྣམ་རྟོག་གིས་མི་བརྫི་བར་གསལ་ཐུབ་པ་ནི་མངོན་པར་མི་འགྱུར་བ། དེ་ནས་སྐུ་མདོག་དང་ཞལ་ཕྱག་བྱོན་བཞུགས་ལ་སོགས་པ་ཇི་ལྟར་བསྒོམས་ཀྱང་དེ་ལྟར་ལས་སུ་རུང་བ་དེ་ཉིད་ཅིར་ཡང་བསྒྱུར་དུ་ཐུབ་པ། དེ་ལྟ་བུའི་གསལ་བརྟན་གྱི་ཚད་བརྒྱད་དང་ལྡན་དགོས་ཞེས་གསུངས་པ་རེད། དེ་ནི་རྣམ་པ་གསལ་བ་དང་རྣམ་དག་དྲན་པ་གཉིས་ཀའི་ནང་ནས་རྣམ་པ་གསལ་བ་ཡིན་པ་རེད། རྣམ་དག་དྲན་པ་ནི། གཞི་ལྷུན་གྱིས་གྲུབ་པའི་དཀྱིལ་འཁོར་ཡེ་ནས་ཡིན་པ་ལ་ལམ་ཏིང་ངེ་འཛིན་གྱི་དཀྱིལ་འཁོར་ཟབ་མོས་གསལ་བཏབ་པས་འབྲས་བུ་གདོད་མའི་གནས་ལུགས་དང་དབྱེར་མེད་པ། གཞི་ལམ་འབྲས་གསུམ་རང་བཞིན་མཐུན་པའི་ཡེ་ཤེས། གཞི་དག་མཉམ་ཡིན་པ་ལ་ལམ་གྱིས་ཡིན་པར་ཤེས་ནས་འབྲས་བུ་ཡིན་ཐོག་ཏུ་སླེབས་པ་དེ་ཉིད་ཡིན། བཤད་སྟངས་གཞན་ཆོས་ཉིད་དོན་གྱི་ལྷ་དང་ཆོས་ཅན་རྟགས་ཀྱི་ལྷའི་དབྱེ་བའི་སྟེང་ནས་བཤད་ན། ཆོས་ཉིད་དོན་གྱི་ལྷ་ནི་སྣང་སྟོང་གཉིས་མེད་ཀྱི་ཡེ་ཤེས། འཕོ་བའི་སྒྲིབ་པ་དང་བྲལ་བའི་རྡོ་རྗེའི་སྐུ། ཆོས་ཉིད་དེ་བཞིན་ཉིད་སྒྲིབ་པ་བག་ཆགས་ཕྲ་མོ་ཙམ་ཡང་ཟད་ནས་རོ་མཉམ་དུ་སངས་རྒྱས་པ། གཅིག་དང་དུ་མའི་མཐའ་ལས་གྲོལ་བའི་བསམ་གྱིས་མི་ཁྱབ་པའི་ཡེ་ཤེས། མཚན་མའི་སྤྱོད་ཡུལ་ཐམས་ཅད་དང་བྲལ་ཡང་ཤེས་བྱའི་རྣམ་པ་ཐམས་ཅད་འཆར་བའི་བདག་ཉིད་ཅན། དུས་གསུམ་གྱི་བདེ་བར་གཤེགས་པ་ཐམས་ཅད་དང་སོ་སོ་མ་ཡིན་ཐ་མི་དད་པའི་རང་བྱུང་ཡེ་ཤེས་ཀྱི་སྐུ་དེ་ཉིད་ཡིན་པ་དང་། ཆོས་ཅན་རྟགས་ཀྱི་ལྷ་ནི། ཡེ་ཤེས་ཀྱི་སྐུ་མཚན་མའི་དཔྱོད་ཡུལ་ལས་འདས་པ་དེ་ཉིད། རྣམ་པ་རྟགས་ཀྱི་ཕྱག་རྒྱར་ཤར་ཏེ་ཞལ་ཕྱག་མཚན་མའི་རྣམ་པར་སྣང་བ་དེ་ཡིན་པ་རེད། དེ་ཡང་བསྐྱེད་རིམ་གྱི་ལྷ་བསྒོམ་དུས་སྤྱིར་བཏང་དམིགས་པ་རྣོན་པོ་རྣལ་འབྱོར་བའི་མཚོན་ཆ་ཡིན་པས་ཅི་འདྲ་གསལ་ན་དེ་འདྲ་བཟང་བ་ཡིན། འོན་ཀྱང་ཐ་མལ་རྣམ་རྟོག་གི་འཁྲུལ་རྗེས་སུ་འབྲངས་ན་དེས་བསྐྱེད་རྫོགས་གཉིས་ཀའི་གོ་ཆོད་ནི་མ་རེད། དེས་ན་སྔ་འགྱུར་རང་ལུགས་ལ་ལྷ་བསྒོམ་པ་དང་རང་སེམས་མ་བཅོས་གནས་ལུགས་སྐྱོང་བ་གཉིས་ཁྱད་མེད་དུ་འཛིན་དགོས། ལྷ་ཡེ་ཤེས་སེམས་དཔའ་དངོས་དེ་ཆོས་སྐུའི་ངོ་བོ་ཡིན་པས་ན། བཤད་ལུགས་གཞན་ལྟར་བྱས་ན་ཨ་འཐས་འཁྲུལ་པའི་དབང་དུ་མ་ཤོར་བར་རིག་པ་ངོས་ཟིན་ན་ལྷའི་སྐུ་མདོག་ཕྱག་མཚན་ཞིབ་ཅིང་ཕྲ་བ་གསལ་ཡང་ཆོག་ལ་མ་གསལ་ཡང་ཆོག གནས་ལུགས་ཀྱི་རང་ངོ་བསྐྱང་རྒྱུའི་ནང་དུ་བསྐྱེད་རྫོགས་གཉིས་ཀའི་གནད་འདུས་པས་མ་ཚད། བསྐྱེད་རྫོགས་གཉིས་ཀ་ཡེ་ནས་ཟུང་འཇུག་ཏུ་ལྷུན་གྱིས་གྲུབ་པ་རེད། ལར་འགྲོ་བའི་སྒོ་གསུམ་ཕུང་ཁམས་སྐྱེ་མཆེད་དང་བཅས་པ་ལྷ་དང་སྔགས་ཀྱི་རང་བཞིན་དུ་གདོད་མ་ནས་ཡིན་པར་མ་ཤེས་པས་འཁྲུལ་ནས་འཁོར་བར་འཁྱམས་པ་ཡིན་པས། དེ་ཉིད་དེ་ལྟར་ཡིན་པའི་ཡིན་ལུགས་ཤེས་ཐབས་སུ་སྨིན་བྱེད་ཀྱི་དབང་བསྐུར། གྲོལ་བྱེད་ཀྱི་ཁྲིད་བཤད་པ་ཡིན་པས། དེ་ལས་གཞན་མ་ཡིན་པ་ཞིག་ཡིན་པར་བསྒོམས་ཀྱང་དོན་འགྲུབ་ནི་མ་རེད། དཔེར་ན་གསེར་གསེར་ཡིན་པར་ཤེས་ན་གསེར་གོ་ཆོད་པ་ཡིན་ཞིང་། རྡོ་ལོག་ཞིག་གསེར་ཡིན་བསམ་ནས་བསྒོམས་ཀྱང་གསེར་གོ་མི་ཆོད་པ་ལྟར་རེད། ལྷ་སྐུ་མ་གསལ་ན་བཙན་གྱིས་གསལ་དགོས་སྙམ་པའི་ཞེ་འདོད་དང་འཛིན་རྟོག་ཡོད་མི་ཉན། ལྷའི་དབྱིབས་དང་རྣམ་འགྱུར་ཡིད་ལ་ཤར་བའི་སྐབས་སུ་སེམས་མ་ཡེངས་པར་རིག་ཐོག་ཏུ་འདུག་པ་གནད་ཆེ། ལྷ་དམ་ཚིག་པའམ་ཡེ་ཤེས་སེམས་དཔའ། ཆོས་སྐུ་དང་གཟུགས་སྐུའི་མིང་གང་ཞིག་བཏགས་ཀྱང་དོན་དུ་ངོ་བོ་རང་རིག་འདི་ལས་གཞན་དུ་གྱུར་པ་ཞིག་ཡོད་པ་མ་རེད། དེའི་ཕྱིར་ན་ཨོ་རྒྱན་ཆེན་པོས། རྟགས་ཀྱི་སངས་རྒྱས་ལོངས་སྤྱོད་རྫོགས་སྐུ་དང་། །དོན་གྱི་སངས་རྒྱས་ཆོས་སྐུ་གང་ཡིན་པ། །ཆོས་ཉིད་རིག་པ་མངོན་སུམ་འདི་ཡིན་པས། །སངས་རྒྱས་གཞན་ནས་མ་ཚོལ་རྗེ་འབངས་རྣམས། ཞེས་གསུངས་པ་དེ་དྲན་རན་པ་རེད། གནས་གསུམ་ཡི་གེ་གསུམ་གྱིས་མཚནཿ རྡོ་རྗེ་གསུམ་གྱི་ངོ་བོར་གྲུབཿ དེ་ལས་འོད་ཟེར་རབ་འཕྲོས་པསཿ རང་བཞིན་ཆོས་དབྱིངས་གནས་མཆོག་དངཿ ནུབ་ཕྱོགས་ཨོ་རྒྱན་སྤྲུལ་པའི་ཞིངཿ ཞེས་གསུངས་ཏེ། གནས་གསུམ་ཡི་གེ་གསུམ་གྱིས་མཚན། །རྡོ་རྗེ་གསུམ་གྱི་ངོ་བོར་གྲུབ། ཅེས་གསུངས་ན། བདག་དམ་ཚིག་སེམས་དཔར་གསལ་བའི་གནས་གསུམ་སྟེ། སྤྱི་མགྲིན་སྙིང་ག་གསུམ་ནས་རྡོ་རྗེ་གསུམ་གྱི་ངོ་བོར་གྲུབ་པའི་སྐུ་གསུམ་གྱི་ས་བོན། ཨོཾ་ཨཱ་ཧཱུྃཿ དཀར་དམར་མཐིང་གསུམ་གྱི་ཡིག་འབྲུ་གསུམ་གྱིས་མཚན་པར་གསལ་འདེབས་དགོས་ཤིང་། ཡི་གེ་ཞེས་གསུངས་པའི་སྐབས་ཀྱི་ཡི་གེའི་རྣམ་གྲངས་སམ་དབྱེ་བ་ལ། ལུས་གནས་རྩ་ཡི་ཡི་གེ། ཕོ་བྲང་ལྷ་ཡི་ཡི་གེ། ཆོ་འཕྲུལ་སྤྲུལ་བའི་ཡི་གེ། མཚོན་བྱེད་སྒྲ་ཡི་ཡི་གེ་བཅས་བཞིའི་དབྱེ་བ་ཡོད། སྤྱིར་ན་རྩ་གནས་ཀྱི་ཡི་གེ་ཐམས་ཅད་གཡོ་བྱེད་རླུང་གིས་བཅོས་པས་སྒྲ་འབྱུང་བ་ཡིན། འཆི་བའི་གནས་སྐབས་སུ་ཡི་གེ་དང་རྩ་རླུང་ཐིག་ལེ་ཐམས་ཅད་ཀ་དག་གི་དབྱིངས་སུ་ནུབ་འགྲོ། ལུས་གནས་རྩ་ཡི་ཡི་གེ་ནི་སྦྱང་གཞི་སྦྱོང་བྱེད་ཀྱི་ཚུལ་དུ་གནས་ཤིང་། འདིས་སྐུ་དང་ཡེ་ཤེས་འདུ་འབྲལ་མེད་པའི་རྟེན་བྱེད། ཕོ་བྲང་ལྷའི་ཡི་གེ་ནི་ལྷ་བསྒོམ་པའི་སྐབས་སུ་དཀྱིལ་འཁོར་གྱི་གནས་སོ་སོར་བསྐྱེད་པ་དེ་ཉིད་དེ། འདིས་ལྷ་སོ་སོའི་འཕྲོ་གཞི་བྱེད་དགོས་པ་རེད། ཆོ་འཕྲུལ་སྤྲུལ་པའི་ཡི་གེ་ནི་སངས་རྒྱས་ལོངས་སྤྱོད་རྫོགས་སྐུའི་སྐུ་གསུང་ཐུགས་རྡོ་རྗེ་ལས་ཡི་གེའི་སྤྲིན་ཆད་ནས་སྤྲུལ་པ་འཕྲོས་པས་འགྲོ་བའི་དོན་མཛད། འདིས་སེམས་ཅན་ཚད་མེད་པའི་དོན་བྱེད་པ་ཡིན། མཚོན་བྱེད་སྒྲའི་ཡི་གེ་དེ་ཉིད་སྔགས་སུ་བསྡུས་ནས་སྒྲ་སོ་སོར་བརྗོད་པའི་ཚེ་དགོས་པ་སོ་སོའི་དོན་སྒྲུབ་པ་རེད། འདིས་གསང་སྔགས་འགྲུབ་པའི་རྒྱུ་བྱེད། སྐབས་འདིའི་ཡི་གེ་གསུམ་ནི་ལུས་གནས་རྩ་ཡི་ཡི་གེ་སྐུ་དང་ཡེ་ཤེས་འདུ་འབྲལ་མེད་པའི་རྟེན་བྱེད་པ་དེ་ཉིད་ལས་འོད་ཟེར་འཕྲོས་ཏེ་ཡེ་ཤེས་པ་སྤྱན་འདྲེན་དགོས་པས་ན། དེ་ལས་འོད་ཟེར་རབ་འཕྲོས་པས། ཞེས་སྐུ་གསུང་ཐུགས་རྡོ་རྗེ་གསུམ་གྱི་ངོ་བོར་གྲུབ་པའི་ཡིག་འབྲུ་དེ་གསུམ་ལས་རང་མདོག་གི་འོད་ཟེར་རབ་ཏུ་འཕྲོས་པས། རང་བཞིན་ཆོས་དབྱིངས་གནས་མཆོག་དང་། ཞེས་རང་བཞིན་ཆོས་ཀྱི་དབྱིངས་ནང་གསལ་གསང་བའི་སྦུབས། ཕྱི་གསལ་གཟུགས་སྐུ་རྣམ་གཉིས་ཀྱི་འཕྲོ་གཞིའི་གནས་དེ་དང་། ནུབ་ཕྱོགས་ཨོ་རྒྱན་སྤྲུལ་པའི་ཞིང་། ཞེས་ས་སྤྱོད་ཀྱི་ཞིང་ཁམས། གསང་སྔགས་དར་བའི་གནས། ནུབ་ཕྱོགས་སུ་ཡོད་པའི་ཨོ་རྒྱན་སྤྲུལ་བའི་ཞིང་། གནས་ཡུལ་དུར་ཁྲོད་བརྒྱད་སོགས་དངཿ ཁྱད་པར་རྔ་ཡབ་ལངྐའི་གླིངཿ ཟངས་མདོག་དཔལ་གྱི་རི་བོ་ནསཿ རིག་འཛིན་འདུས་པའི་དཀྱིལ་འཁོར་ལྷཿ སྤྱན་འདྲེན་གནས་འདིར་ས་མཱ་ཛཿ ཞེས་གསུངས་ཏེ། གནས་ཡུལ་དུར་ཁྲོད་བརྒྱད་སོགས་དང་། ཞེས་གསུངས་ན། གནས་ཉེར་བཞི། ཡུལ་སོ་གཉིས། དུར་ཁྲོད་ཆེན་པོ་བརྒྱད། སོགས་ཁོངས་སུ་ཞིང་ཁམས་བྱེ་བ་ཕྲག་བརྒྱ། མ་ངེས་གནས་ཡུལ་དུར་ཁྲོད་རྣམས་དང་། འུ་ཅག་བོད་གངས་ཅན་གྱི་ས་ཆར་མཚོན་ན། སློབ་དཔོན་ཆེན་པོས་ཞབས་ཀྱིས་བཅགས་བྱིན་གྱིས་བརླབས་པའི་གནས། སྟོད་མངའ་རིས་སུ་གངས་བྲག་ཉི་ཤུ། བར་དབུས་གཙང་ན་སྒྲུབ་གནས་ཉེར་གཅིག སྨད་མདོ་ཁམས་ན་གནས་ཆེན་ཉེར་གཅིག ཕྱོགས་བཞིའི་གངས་ཆེན་བཞི། གྲགས་པའི་མཚོ་ཆེན་བཞི། སྦས་ཡུལ་རྒྱལ་པོ་གསུམ། ལྗོངས་ལྔ་གླིང་དྲུག་ལ་སོགས་པའི་རང་བཞིན་སྤྲུལ་པའི་གནས་མཆོག་རྣམས་དང་། ཁྱད་པར་རྔ་ཡབ་ལངྐའི་གླིང་། ཟངས་མདོག་དཔལ་གྱི་རི་བོ་ནས། ཞེས་ཁྱད་པར་དུ་གུ་རུ་རིན་པོ་ཆེ་ཉིད་ད་ལྟ་ལྷོ་ནུབ་སྲིན་པོའི་ཡུལ་དུ་སྲིན་པོ་འདུལ་བའི་ཁ་གནོན་དུ་བཞུགས་ཡོད་པས། རྔ་ཡབ་ལངྐའི་གླིང་གི་ཟངས་མདོག་དཔལ་གྱི་རི་བོ་པདྨ་འོད་ཀྱི་ཞིང་ཁམས་ནས། རིག་འཛིན་འདུས་པའི་དཀྱིལ་འཁོར་ལྷ། །སྤྱན་འདྲེན་གནས་འདིར་ས་མཱ་ཛ། ཞེས་རིག་འཛིན་འདུས་པ་བླ་མའི་དཀྱིལ་འཁོར་གྱི་ལྷ་ཚོགས་ཀྱི་ཐུགས་རྒྱུད་བསྐུལ་ནས་སྤྱན་འདྲེན་པའི་ཚེ་ན། གནས་འདིར་ས་མཱ་ཛ། ཞེས་གསུངས་ན། ས་མཱ་ཛ་ནི་བཀུག་ཅིང་སྤྱན་དྲངས་ནས་གཉིས་མེད་དུ་བསྟིམ་པའི་ཚིག་ཞིག་རེད། ཇི་ལྟར་བསྟིམ་དགོས་པ་རེད་ཅེ་ན། བསྐྱེད་པ་ཏིང་ངེ་འཛིན་གྱི་དཀྱིལ་འཁོར་དང་གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གཉིས་རང་སྣང་གི་ངོ་བོར་གཉིས་མེད་དུ་གནས་པ་ཡིན་ན། རང་བཞིན་དམ་ཚིག་གི་དཀྱིལ་འཁོར་དུ་བསྐྱེད་པ་ཡེ་ཤེས་སེམས་དཔའི་དཀྱིལ་འཁོར་སྤྱན་དྲངས་པ་འཇུག་ཅིང་བསྟིམ་པའི་མཚན་ཉིད་ཀྱིས་དཀྱིལ་འཁོར་དེ་གཉིས་ཆུ་ལ་ཆུ་བཞག་པ་བཞིན་དུ་མཉམ་པོར་སྦྱོར་བའི་ཚུལ་ལ་བསྟིམ་ཞེས་གསུངས། ཁྱད་པར་དུ་གུ་རུ་རིན་པོ་ཆེ་བོད་ཀྱི་ལྷ་སྐལ་ཡིན་ནི་རེད། ནང་རེ་དགོང་རེ་བོད་ཀྱི་དོན་ལ་བྱོན། །ཉི་ཟེར་འཆར་བསྡུད་མདངས་ལ་ཆིབས་ཏེ་བྱོན། ཞེས་གསུངས་པ་དང་། དད་པ་ཅན་ལ་པད་འབྱུང་སྒོ་ཉལ་ཡོད། ཅེས་གསུངས་པས། གདུལ་བྱ་འདུལ་བྱེད་ཀྱི་འཕྲིན་ལས་ནང་འཛོམས་ན་སྤྱན་འདྲེན་བསྐྱེད་བསྟིམ་རང་ཤུགས་ཀྱིས་འབྱུང་བ་ཡིན། དེ་ཡིས་འུ་ཅག་གིས་བསྐྱེད་ཆོག་གི་སྐབས་འདི་དང་བསྟུན་ནས་བསྐྱེད་རིམ་གྱི་སྐོར་རགས་ཙམ་རགས་ཙམ་ཞུས་པ་རེད། འདིའི་ནང་རྒྱུད་སྡེ་གསུམ་གྱི་བསྐྱེད་རིམ་འདི་སྤྲོས་ཅན། སྤྲོས་པ། སྤྲོས་མེད། ཤིན་ཏུ་སྤྲོས་མེད་དེ་བསྡུས་འབྲིང་རྒྱས་པ། རྒྱས་པ་ཆེན་པོའི་སྐབས་དང་བཞི་གང་ཟག་བཞིའི་ངོ་ཁར་གསུངས་པ་ཡིན་ན། འཁོར་བའི་རང་བཞིན་སྡུག་ཀུན་ཀྱི་བདེན་པ་གཉིས་པོ་སྦྱངས་ནས་འབྲས་བུ་སངས་རྒྱས་ཀྱི་གོ་འཕང་ལམ་དུ་བྱེད་པ་ཐེག་པ་ཆེན་པོའི་ལམ་གྱི་བསྟན་དོན་རེད། དེས་ན་སྡུག་བདེན་གྱི་རྩ་བ་སྐྱེ་ཤི་གཉིས་ལ་ཐུག་པ་ཡིན། དེ་ཡང་སྐྱེ་བ་མེད་ན་འཆི་བ་ཡོད་དོན་མེད་ལ། དེའི་ཕྱིར་ན་རྩ་བ་དངོས་དེ་སྐྱེ་བ་ལ་ཐུག་པ་ཡིན་པས། སྐྱེ་བའི་རིམ་པ་སྦྱོང་བྱེད་ལ་བསྐྱེད་རིམ་དང་། འཆི་བའི་རིམ་པ་སྦྱོང་བྱེད་དུ་རྫོགས་རིམ་གསུངས་པ་རེད། དེ་ལྟ་བུའི་བསྐྱེད་རྫོགས་ཀྱི་ལམ་རིམ་པ་གཉིས་སུ་གསང་སྔགས་ཀྱི་གཞུང་ཐམས་ཅད་འདུས་པ་ཡིན། དེས་ན་རྒྱས་པ་ཆེན་པོའི་ལུགས་ཀྱི་བདག་སྲས་དང་གཞན་སྲས་ཞེས་གསུངས་པ་དེ་ཉིད་སྒོང་སྐྱེས་སྦྱོང་བར་གསུངས་པ་ཡིན་པ་དང་། རྒྱས་པ་འབྲིང་གི་བསྐྱེད་རིམ་གྱི་སྐབས་ཀྱི་མངལ་སྐྱེས་སྦྱོང་བ་དང་བསྟུན་ནས་མངོན་བྱང་ལྔ་བསྐྱེད་དང་ཏིང་འཛིན་གསུམ་བསྐྱེད་སོགས་གསུངས་པ་འདིས་མངལ་སྐྱེས་ཀྱང་དག་ཅེས་གསུངས་པ་རེད། མངོན་བྱང་ལའང་མངོན་བྱང་བཞི་དང་མངོན་བྱང་ལྔ་ཡི་གསུང་སྲོལ་འདྲ་མིན་ཡོད་པ་དག་རྒྱུད་སྡེའི་ཁྱད་པར་གྱིས་ཡིན། གཞན་ཡང་ཕྱིའི་མངོན་བྱང་དང་ནང་གི་མངོན་བྱང་། དེ་ལའང་གཞི་ལམ་འབྲས་བུའི་མངོན་བྱང་གསུངས་པ་ལྟ་བུ་དང་། སྤྱིར་མངོན་བྱང་ལྔ་ལ་མཚོན་ནའང་གསར་རྙིང་གི་ལུགས་ལ་ཁྱད་པར་ཆེན་པོ་ཡོད་པ་རེད། གསར་ལུགས་ཀྱི་མངོན་བྱང་ལྔ་བགྲང་བའི་སྐབས་སུ་གདན་པད་ཟླ་ལ་བྱང་ཆུབ་པ། གསུང་ཡིག་འབྲུ་ལ་བྱང་ཆུབ་པ། ཐུགས་ཕྱག་མཚན་ལ་བྱང་ཆུབ་པ། སྐུ་ཡོངས་རྫོགས་ལ་བྱང་ཆུབ་པ། ཡེ་ཤེས་སེམས་དཔའ་ལ་བྱང་ཆུབ་པ་གསུངས་པ་ལྟ་བུ་དང་། རྙིང་ལུགས་ལ་མངོན་བྱང་དང་པོ་ཟླ་བའི་དཀྱིལ་འཁོར། གཉིས་པ་ཉི་མའི་དཀྱིལ་འཁོར། གསུམ་པ་ས་བོན་ཕྱག་མཚན། བཞི་བ་འོད་ཀྱི་གོང་བུར་གྱུར་བ། ལྔ་པ་སྐུ་ཡོངས་སུ་རྫོགས་པ་ལ་སོགས་པ་ཞིབ་ཆ་བྱས་ན་ཤིན་ཏུ་མང་བས། གཙོ་ཆེར་རྒྱུད་སྡེ་སོ་སོའི་རང་གཞུང་གི་སྒྲུབ་སྡེ་སོ་སོའི་ནང་ནས་ཤེས་དགོས་པ་རེད། འདི་ནས་སྐབས་ཐོབ་ཀྱི་རྒྱས་པ་ཆེན་པོ་དང་། རྒྱས་པའི་བསྐྱེད་རིམ་གྱིས་སྒོང་སྐྱེས་མངལ་སྐྱེས་གཉིས་ཀ་སྦྱང་བ་དང་། འབྲིང་དང་བསྡུས་པ་གཉིས་ཀས་དྲོད་སྐྱེས་དང་རྫུས་སྐྱེས་གཉིས་ཀ་སྦྱང་བ། བསྐྱེད་རིམ་འབྲིང་པོ་དང་བསྡུས་པའི་ལུགས་ཀྱི་དྲོད་སྐྱེས་དང་རྫུས་སྐྱེས་སྦྱང་བའི་སྐབས་སུ་ས་བོན་ཙམ་གྱིས་སྐད་ཅིག་དྲན་རྫོགས་སུ་བསྐྱེད་ནི་རེད། འོན་ཀྱང་ཏིང་འཛིན་གསུམ་བསྐྱེད་ཟེར་བ་དེ་སྔ་འགྱུར་བའི་ཐུན་མིན་གྱི་འཆད་སྲོལ་ཡིན་པས་མ་ཚད། བསྐྱེད་རིམ་སྤྱིའི་ཁྱབ་བྱེད་ཀྱི་སྲོག་གམ་སྙིང་པོ་ལྟ་བུར་གྱུར་འདུག་སྙམ། ཏིང་འཛིན་གསུམ་པོ་དེ་ཡང་རེས་འཇོག་ལྟ་བུ་དང་། འགོ་ཞིག་ནས་བསྒོམས་ཟིན་སྙམ་པ་ལྟ་བུ་མ་ཡིན་པར། གྱང་དང་ཞལ་བ་རི་མོ་གསུམ་ལྟར་འབྲལ་མི་རུང་པའི་དཔེར་བཞག་ནས་གསུངས་པས། རྒྱུའི་ཏིང་ངེ་འཛིན་གྱི་དཀྱིལ་འཁོར་གྱི་འཁོར་ལོ་རྫོགས་པར་བསྒོམ་པའི་སྐབས་སུ་སྟོང་ཉིད་སྙིང་རྗེའི་རྩལ་སྣང་ལྷར་ཤར་བ། དེ་བཞིན་ཉིད་སྤྲོས་པ་དང་བྲལ་བའི་སྟོང་པ་དང་། དེའི་རང་གདངས་སྙིང་རྗེར་ཤར་བ་བཅས་སུམ་འཛོམས་ཡོང་བ་དེ་ཉིད། ལམ་མོས་སྒོམ་དང་ངེས་རྫོགས། མཐོང་བའི་རྗེས་ལ་འཇོག་པ་དང་རིག་པ་སྤྱི་ལུགས་སུ་འཇོག་པའི་གང་ཟག་སུ་ལྟ་བུ་ཞིག་ཡིན་ཡང་དགོས་པ་རེད། དེ་དག་མ་འཛོམས་ཚེ་འགྲིགས་ཡོད་པ་མ་རེད། ཤེས་པས་སྲིད་ལ་མི་གནས། སྙིང་རྗེས་ཞི་ལ་མི་གནས་པའི་རྒྱལ་སྲས་སྤྱི་ཡི་ལམ་ཆེན་ལས་རྡོག་འཁྱལ་སོང་ཚེ། སྟོང་ཉིད་གོ་ཡུལ་དུ་ཡོད་མཁན། བསྐྱེད་རིམ་གྱི་གསལ་སྣང་ཐོན། བཟླས་པའི་གྲངས་འཁྱོལ་བ་མང་པོ་ཞིག་རྒྱལ་འགོང་དང་གདུག་འདྲེ་རུ་སྐྱེས་པའང་རྒྱུ་མཚན་འདིས་ཡིན་པ་རེད། དེས་ན་རིག་འཛིན་ཆེན་པོས། སྣང་གྲག་གསལ་ཆའི་གདངས་ཀུན་བསྐྱེད་རིམ་སྟེ། །ཨ་འཐས་འཛིན་ཞེན་སྟོང་པ་རྫོགས་རིམ་ཉིད། །ཡེ་ནས་དབྱེར་མེད་ཡིན་ལ་ཡིན་བཞིན་བློས། །བསྐྱེད་རྫོགས་ཟུང་འཇུག་ཉམས་ལེན་ཡེངས་མེད་འབུངས། ཞེས་གསུངས་པ་མན་ངག་གི་ཞལ་གདམས་ཡིན་པ་རེད། གཉིས་པ་སྤྱན་འདྲེན། གཉིས་པ་སྤྱན་འདྲེན་སྤོས་རོལ་དངཿ གདུང་བ་དྲག་པོའི་དབྱངས་ཀྱིས་འབོདཿ ཅེས་གསུངས་ཏེ། དངོས་གཞི་ས་བཅད་བདུན་གྱི་དང་པོ་བསྐྱེད་ཆོག་བསྟན་ཟིན་ནས། གཉིས་པ་སྤྱན་འདྲེན་རེད། འདི་ཡང་རྫས་སྔགས་ཏིང་འཛིན་གསུམ་དང་སྦྲེལ་བ་ཞིག་སྟེ། དེ་ཡང་སྒྲུབ་པ་རྫས་ཀྱི་ཡོ་བྱད་ཀྱི་ནང་ནས་འདིར་དངོས་སུ་བསྟན་པའི་ལྷན་སྐྱེས་དང་སྦྱར་བྱུང་གི་དྲི་ཞིམ་སྤྱན་འདྲེན་བྱིན་འབེབས་ལ་ཆེད་དུ་བདུག་དགོས། དྲི་ཞིམ་པ་རྐྱང་པས་མི་ཚད་པར་རྫས་ལ་ནུས་པ་ཁྱད་པར་ཅན་གཞན་དག་ཡོད་དེ། དཔེར་ན་ཆང་འཐུང་ན་བཟི་བ་དང་། བོང་ང་ཟོས་ན་བརྒྱལ་བ། ཐང་ཕྲོམ་ཟོས་ན་མིག་འཁྲུལ་འགྲོ་བ་བཞིན་རྩ་ཁམས་དང་རླུང་སེམས་རང་དབང་མེད་པར་བྱིན་གྱིས་བརླབས་ནས་དངོས་གྲུབ་ཀྱི་སྐལ་བ་མཆོག་དང་ལྡན་པར་བྱེད་པའི་གསང་སྔགས་ཐབས་མཁས་ཀྱི་ཆེ་བ་བསམ་གྱིས་མི་ཁྱབ་པ་དང་། ཁྱད་པར་དུ་རུ་ཏྲ་བསྒྲལ་བའི་ཁོག་པ་དོན་སྣོད་དང་བཅས་པ་ཚང་བའི། འཇིག་རྟེན་ཁམས་ཀྱི་རྩྭ་རྩི་ཤིང་ཐམས་ཅད་རྩ་བརྒྱད་ཡན་ལག་སྟོང་སྦྱར་གྱི་སྨན་དུ་བྱིན་གྱིས་བརླབས་པའི་ནུས་པ་བསམ་གྱིས་མི་ཁྱབ། དཔའ་བོ་དང་མཁའ་འགྲོ་ཐམས་ཅད་རང་བཞིན་གྱིས་འདུ་ཞིང་རྒྱལ་བ་དགྱེས་པའི་རོལ་མོའི་རིགས་ཀྱི་དབྱངས་སྙན་དང་། འདི་ནས་དངོས་སུ་མ་བསྟན་ཡང་དར་གྱི་གཡབ་མོ་ལ་སོགས་པ་དང་བཅས་ཏེ་དད་གུས་གདུང་བ་དྲག་པོའི་དབྱངས་རྟར་བསྐྱོན་ཏེ་འབོད་པ་ནི། ཧཱུྃཿ སྔོན་གྱི་བསྐལ་པའི་དང་པོ་ལ་སོགས་པ་གསུངས་ཏེ། ཧཱུྃཿཞེས་པ་རྒྱལ་བ་ཐམས་ཅད་ཀྱི་ཐུགས་གསང་བ་བསམ་གྱིས་མི་ཁྱབ་པའི་སྙིང་པོ། རང་བྱུང་གི་ས་བོན་རྒྱུའི་ཡི་གེ་དེས་བསྐུལ་ནས། སྔོན་གྱི་བསྐལ་པའི་དང་པོ་ལཿ ཨོ་རྒྱན་ཡུལ་གྱི་ནུབ་བྱང་མཚམསཿ པདྨ་གེ་སར་སྡོང་པོ་ལཿ ཡ་མཚན་མཆོག་གི་དངོས་གྲུབ་བརྙེསཿ ཞེས་གསུངས་ཏེ། སྔོན་ཞེས་པས་དུས་ཕུན་སུམ་ཚོགས་པ་བསྟན་པ་རེད། དེ་ཡང་རྫོགས་པ་ཆེན་པོའི་དགོངས་དོན་དང་སྦྱར་ན་དུས་གསུམ་དུས་ལས་འདས་པའི་ཀ་དག་ཆོས་ཉིད་ཀྱི་དུས་ལ་གོ་དགོས་ཤིང་། གཞན་དུས་བཞི་མཉམ་པ་ཉིད་ཅེས་གསུངས་པ་མ་ཧཱ་ཡོ་གའི་རྒྱུད་རང་གཞུང་ལྟར་འགྲེལ་ཚེ། བཀའ་སྡེ་ཟུར་པ་དག་གིས་འདས་མ་འོངས་ད་ལྟའི་དུས་གསུམ་དང་འབྱུང་བར་མ་ངེས་པའི་དུས་དག་ཏུ་གསུངས་མི་འདུག་གམ། རྫོགས་ཆེན་གྱི་སྐབས་དང་ཁྱད་པར་རང་ལུགས་ཀློང་ཆེན་པའི་བཞེད་པ་ལ། དུས་གསུམ་དུས་མེད་ཀ་དག་གི་དུས་སུ་གོ་དགོས་པ་རེད། བསྐལ་བ་རྣམ་པར་བཀོད་པའི་འཇིག་རྟེན་ཞེས་པ་ཞིག་མེད་པས་འཁྲུལ་བ་གཞི་ལ་དག་པའི་ངོ་ཁ་རུ་བསྐལ་བའི་དང་པོ་ཞེས་གསུངས་པ་རེད། ཨོ་རྒྱན་ཡུལ་གྱི་ནུབ་བྱང་མཚམས་ཞེས་པས་གནས་ཕུན་སུམ་ཚོགས་པ་བསྟན། བདག་ཅག་གི་སྟོན་པ་ཡང་ངེས་པ་དོན་དུ་སྔར་ནས་སངས་རྒྱས་ཀྱང་གདུལ་བྱ་ཐུན་མོང་བའི་ངོར་རྣམ་པ་ཙམ་དུ་ཞིང་འདི་ནས་གླང་ཆེན་ཐལ་དཀར་མཆེ་བ་དྲུག་ལྡན་གྱི་ཚུལ་གྱིས་ཡུམ་གྱི་ལྷུམས་སུ་ཞུགས་ཚུལ་བསྟན་པ་ལ་སོགས་པ་མཛད་པ་བཅུ་གཉིས་ཀྱི་མཛད་པ་བསྟན་པའི་རྣམ་ཐར་སྐྱེས་རབས་བཞིན་དུ། སློབ་དཔོན་ཆེན་པོ་པདྨ་འབྱུང་གནས་ཀྱང་ངེས་དོན་དུ་རྒྱལ་བ་ཀུན་དང་དབྱེར་མེད་དུ་སྔར་ནས་སངས་རྒྱས་སུ་ཟིན་ཅིང་གསུང་མ་ཆགས་པདྨའི་རིགས་ཀྱི་དཀྱིལ་འཁོར་གྱི་གཙོ་བོར་བཞུགས་པ་ཡིན་ཡང་། རྣམ་པ་ཙམ་དུ་ཨོ་རྒྱན་ཡུལ་གྱི་ནུབ་བྱང་། རྒྱ་མཚོ་དྲི་མེད་མདངས་ལྡན་དུ་སངས་རྒྱས་འོད་དཔག་མེད་ཀྱི་ཐུགས་ཀའི་ཧྲཱིཿཡིག་འཕོས་པའི་ཚུལ་གྱིས་མ་ཆགས་པདྨའི་སྡོང་པོ་ལས་བརྫུས་ཏེ་འཁྲུངས་པ་ཡིན་པས། ཨོ་རྒྱན་ཡུལ་གྱི་ནུབ་བྱང་མཚམས་ཞེས་པས་གནས་ཕུན་སུམ་ཚོགས་པ་བསྟན་པ་རེད། པདྨ་གེ་སར་སྡོང་པོ་ལ་ཞེས་པའི་ཚིག་འདིས་སྐུ་ཆེ་བའི་ཡོན་ཏན་རིགས་བསྡུས་ཏེ་བསྟན། པདྨ་ནི་ཆུ་དང་རླན་ལས་སྐྱེས་པའི་མེ་ཏོག་ཞིག་རེད། མེ་ཏོག་པདྨ་ཆུ་དང་འདམ་ལས་སྐྱེས་ཀྱང་ཆུ་འདམ་གྱི་དྲི་མས་མ་གོས་པ་བཞིན་དུ། ཐེག་མཆོག་བསོད་ནམས་ཀྱི་ཚོགས་ཐམས་ཅད་འཁོར་བའི་རྙོག་པ་ཐམས་ཅད་ཀྱི་ནང་དུ་བསྐྱོད་ཀྱང་། དེ་དག་གིས་མི་གོས་པར་མ་ཚད་སླར་ཀུན་ཏུ་བཟང་པོའི་གཟི་མདངས་འབར་བའི་ཐབས་མཁས་ཀྱི་ཆེ་བ་ཡང་བསྟན་པ་རེད། གདུང་ཤཱཀྱ་ཡིན་པས་རང་ཉིད་ཤཱཀྱ་ཡིན་པར་མཚོན་པ་བཞིན་དུ། པདྨའི་ནང་ནས་འཁྲུངས་པས་གསུང་མ་ཆགས་པདྨའི་རིགས་སུ་ངེས་པ་ལྟ་བུ་དང་། ཡ་མཚན་མཆོག་གི་དངོས་གྲུབ་བརྙེས་ཞེས་པས་ཆོས་ཕུན་སུམ་ཚོགས་པ་བསྟན་པ་རེད། གསང་སྔགས་རྫོགས་པ་ཆེན་པོ་བརྡ་ཡི་དབང་རིག་འཛིན་ཤྲཱི་སིངྷ་ནས་བརྡ་བརྒྱུད་དུ་བརྒྱུད་པའི་སྟེང་། མཁའ་འགྲོ་མ་གསང་བ་ཡེ་ཤེས་ཀྱིས་ཕྱི་ནང་གསང་བ་སྦས་པ་དང་བཅས་པའི་དབང་མཆོག་སུམ་ཅུ་རྩ་དྲུག་བསྐུར་ནས་རྣམ་སྨིན་རིག་འཛིན་གྱི་ས་ནས་ཚེ་དབང་རིག་འཛིན་བརྙེས་ཏེ་སྐྱེ་འཆི་མེད་པ་རྡོ་རྗེའི་སྐུ་ཐོབ། སླར་ཡང་བལ་ཡུལ་ཡང་ལེ་ཤོད་ཀྱི་བྲག་ཕུག་ནས་ཡང་དག་ཧེ་རུ་ཀའི་དཀྱིལ་འཁོར་ལ་བསྟེན་ནས་ཕྱག་རྒྱ་ཆེན་པོའི་རིག་འཛིན་བརྙེས་ཏེ་མཐར་ལྷུན་གྲུབ་རིག་འཛིན་གྱི་སར་གཤེགས་པའི་ཡ་མཚན་མཆོག་གི་དངོས་གྲུབ་བརྙེས་པ་གང་ཞིག་ལ། པདྨ་འབྱུང་གནས་ཞེས་སུ་གྲགསཿ ཞེས་གསུངས་ཏེ། འདིས་སྟོན་པ་ཕུན་སུམ་ཚོགས་པ་བསྟན་པ་རེད། སྐུ་གཅིག་ལ་མཚན་གྱི་རྣམ་གྲངས་ཆེན་པོ་བརྒྱད། འཕྲུལ་མཚན་ཉི་ཤུ་རྩ་ལྔ། སྤྲུལ་བ་བྱེ་བ་ཕྲག་བརྒྱ་མཐའ་ཡས་རྡུལ་སྙེད་ཀྱི་གྲངས་དང་མཉམ་པའི་མཚན་དང་སྐུ་ཡི་བཀོད་པ་ཐམས་ཅད་འདིའི་ཤུགས་སུ་བསྟན་པ་རེད། འཁོར་དུ་མཁའ་འགྲོ་མང་པོ་དངཿ རིག་འཛིན་གྲུབ་ཐོབ་རྒྱ་མཚོས་བསྐོརཿ ཞེས་གསུངས་པ་འདིས་འཁོར་ཕུན་སུམ་ཚོགས་པ་བསྟན་པ་རེད། དེ་ཡང་མཁའ་འགྲོ་ཞེས་པའི་ངེས་ཚིག་འགྲེལ་ན། ཆོས་དབྱིངས་དེ་བཞིན་ཉིད་ཀྱི་མཁའ་ལ་ཤུགས་འཆང་འབད་མེད་དུ་འགྲོ་བ་རིག་པ་འཛིན་པ་དགེ་འདུན་སྤྱིའི་མཚན་རེད། བྱེ་བྲག་ཏུ་དཀྱིལ་འཁོར་འདི་དང་སྐབས་འདི་ལ་བསྟུན་ན་དཔའ་བོ་དང་མཁའ་འགྲོ་རིག་པ་འཛིན་པའི་ཚོགས་ཀྱིས་བསྐོར་བ། ཐབས་ཆེན་གསང་བའི་སྤྱོད་པས་མ་ཚོགས་དབང་དུ་སྡུད་པའི་འཕྲིན་ལས་ལ་སྦྱར་ཡང་ཆོག་པ་རེད། རིག་པ་འཛིན་པ་དང་རྣལ་འབྱོར་སྔགས་འཆང་ཞེས་ཟེར་དུས་མཐའ་གཅིག་ཏུ་རབ་ཏུ་བྱུང་བ་མ་ཡིན་པ་ཞིག་ལ་གོ་དགོས་པ་མ་རེད། མཁའ་འགྲོ་མ་ཡང་དེ་བཞིན་རེད། ཁྱེད་ཀྱི་རྗེས་སུ་བདག་བསྒྲུབ་ཀྱིཿ ཞེས་གསུངས་པ་འདིའི་ནང་དུ་རྡོ་རྗེ་ཐེག་པའི་སྐྱབས་འགྲོ་སེམས་བསྐྱེད་ཡན་ལག་བདུན་པ་ཐམས་ཅད་འདུས་པར་འདུག་སྙམ། ཁྱེད་ཀྱི་རྣམ་ཐར་གྱི་རྗེས་སུ་བསྙེགས་ཏེ་ཁྱེད་ཀྱིས་བསྟན་པའི་གསང་སྔགས་ཐུན་མིན་གྱི་ལམ་དུ་ཞུགས་ནས། ཁྱེད་དང་འདྲ་བར་འཕོ་ཆེན་རྡོ་རྗེའི་སྐུར་བཞེངས་ནས། འཕོ་མེད་རྟག་པ་དམ་པར་གདུལ་བྱའི་དོན་བྱེད། གསང་སྔགས་ཀྱི་ཆོས་འཁོར་བསྐོར་རྒྱུའི་དམ་བཅའ་འམ། ཡང་ན་བདག་ཁྱེད་ལ་སྐྱབས་སུ་མཆི་ཞིང་། མཐའ་ཡས་སེམས་ཅན་སྡུག་བསྔལ་ལས་སྒྲོལ་བའི་ཆེད་དུ་ཁྱེད་ཀྱི་རྗེས་སུ་འབྲང་བ་ཡིན་པས་ཁྱེད་ཀྱིས་རྗེས་སུ་བཟུང་དུ་གསོལ་ཞེས་དམ་བཅའ་བརྟན་པོ་སྔོན་དུ་བཏང་ནས། རང་རྒྱུད་ཀྱི་ཞིང་ས་གཤིན་པོ་དེ་ཉིད་ཡོངས་སུ་དག་པར་གཙང་མ་བྱས་ཏེ། གུ་རུ་རིན་པོ་ཆེས་བྱིན་རླབས་ཀྱི་ཆར་འབེབས་ནས་དངོས་གྲུབ་ཀྱི་འབྲས་བུ་ཐོབ་པའི་རྒྱུ་ཚོགས་ཚང་ངེས་བྱས་ཏེ། བྱིན་གྱིས་བརླབ་ཕྱིར་གཤེགས་སུ་གསོལཿ ཞེས་གུ་རུའི་ཐུགས་རྒྱུད་བསྐུལ་ཏེ་བདག་དང་སྒྲུབ་པ་པོས་ཇི་ལྟར་གསོལ་བ་བཏབ་པ་བཞིན་དུ་བདག་སོགས་མོས་པའི་བུ་ལ་བྱིན་གྱིས་བརླབ་པའི་ཕྱིར་གཤེགས་སུ་གསོལ་ཞེས་གསུངས་པ་རེད། གནས་མཆོག་འདི་རུ་བྱིན་ཕོབ་ལཿ སྒྲུབ་མཆོག་བདག་ལ་དབང་བཞི་བསྐུརཿ བགེགས་དང་ལོག་འདྲེན་བར་ཆད་སོལཿ མཆོག་དང་ཐུན་མོང་དངོས་གྲུབ་སྩོལཿ ཞེས་གསུངས་ཏེ། སྤྱིར་ན་བྱིན་རླབས་ཞེས་པའི་བྱིན་དེ་ཅི་འདྲ་ཞིག་གི་དོན་རེད་ཅེ་ན། ཁྱད་པར་ཅན་དུ་གནས་བསྒྱུར་ཐུབ་པའི་ནུས་པ་ཞིག་ལ་གོ་དགོས་པ་རེད། ལྕགས་འཁྱགས་པ་སོལ་བའི་མེ་ཤིན་ཏུ་ངར་བ་ཞིག་ཏུ་བཅུག་པ་ཡིན་ན་ལྕགས་བསྲེགས་དམར་པོར་འགྱུར་འགྲོ་བ་དང་། ཆུ་སྣོད་གང་བའི་ནང་དུ་ཚྭ་ཅུང་ཟད་ཅིག་བཏབ་པ་ཡིན་ན། དེའི་ནུས་པས་སྣོད་གང་པོའི་ཆུ་ལ་ལན་ཚྭའི་རོ་ཡིས་ཁྱབ་པ་ཇི་བཞིན། སྐུ་གསུང་ཐུགས་གསང་བ་བསམ་གྱིས་མི་ཁྱབ་པའི་བྱིན་རླབས་ལས་ཅན་སྐལ་བ་ལྡན་པའི་སྐྱེས་བུ་དང་འཕྲད་པ་ཡིན་ན། བྱིན་བརྒྱུད་ཀྱི་རྟོགས་པའི་ཕ་ཕོགས་ཐོབ་སྟེ་སྔར་མེད་ནང་གི་ཡོན་ཏན་དང་བྱིན་ནུས་ཁྱད་པར་ཅན་དང་ལྡན་པར་བསྒྱུར་འགྲོ་བ་རེད། ཡེ་ནས་རྒྱལ་བའི་ཡེ་ཤེས་མཁའ་དང་མཉམ་པའི་ཆོས་ཉིད་ཀྱིས་མ་ཁྱབ་པ་མེད་པས་ཡེ་ཤེས་ནང་འཕྲད་ཚེ་བྱིན་ཕེབས་སླ་བ་ཡིན། དཔེར་ན་ནམ་མཁའི་གློག་སའི་གློག་ལ་འཁྲི་སླ་བ་ངོ་བོ་དང་བྱེད་པ་གཅིག་པའི་དབང་གིས་ཡིན་པ་ལྟར་ཏེ། འུ་ཅག་གིས་འཕོ་ལུང་བཏོན་པའི་ཚེ་འཆི་སྲིད་ཆོས་སྐུའི་བར་དོ་རུ་གནས་པའི་སེམས་ཅན་གྱི་རིག་པ། བདེ་བར་གཤེགས་པའི་སྲས་སམ་གདོད་མའི་མགོན་པོའི་ཐུགས་ཀློང་དུ་འཕོ་རུ་འཇུག་ཐུབ་པ་ཆོས་ཉིད་ནང་འཕྲད་པས་རེད་ཅེས་ཟེར་མ་མྱོང་ངམ། འོ་ན་གང་ཟག་གི་རྒྱུད་ལ་ཡེ་ཤེས་པའི་བྱིན་ཕེབས་སུ་རུང་ཡང་། གནས་མཆོག་འདི་རུ་ཞེས་པའི་ཚེ་ས་རྡོ་རི་བྲག མཁར་ཁང་པ་བེམ་པོའི་རིགས་འདི་དག་ལ་ཇི་ལྟར་རུང་སྟེ་མི་རུང་སྙམ་ན། མཁའ་ཁྱབ་མཁའ་དང་མཉམ་པའི་ཡེ་ཤེས་ཀྱི་ལུས་ཅན་དེས་སྣོད་བཅུད་ཐམས་ཅད་ལ་མ་ཁྱབ་པ་མེད་པ་རེད། དུས་འཁོར་དུའང་རྡུལ་དང་སེམས་ལས་འདས་པའི་མཁའ་ཁྱབ་མཁའ་ཡི་རྡོ་རྗེ་ཞེས་གསུངས་ལྟ་བུ་དང་། ཐམས་ཅད་སྟོང་ཉིད་ནམ་མཁའི་ངང་སོགས་གསུངས་ཚེ་སྟོང་ཉིད་ཅེས་པ་རྫ་སྣོད་སྟོང་པ་ལྟ་བུ་ལ་གསུངས་པ་མ་ཡིན་པར། སྣང་མཉམ་སྟོང་མཉམ་བདེན་མཉམ་རྫུན་མཉམ་སྟེ། རྒྱལ་བའི་ཡེ་ཤེས་ཀྱི་ངོར་སྣོད་བཅུད་ཐམས་ཅད་ཆོས་ཉིད་ཀྱི་རོལ་བ་གཅིག་ལས་མ་འདས་པ་ཡིན་པ་རེད། རྒྱུ་མཚན་དེའི་ཕྱིར་ན་བདེ་བ་ཅན་གྱི་ཞིང་ཁམས་ཀྱི་གསེར་གྱི་བྱེ་མ་འབྲུ་གཅིག་གམ། མེ་ཏོག་པདྨ་རྐང་གཅིག་ཁོ་ནའི་ཡོན་ཏན་བརྗོད་དགོས་ཀྱང་རྒྱལ་བས་བརྗོད་མི་ནུས་གསུངས་པ་རྒྱལ་བའི་ཡེ་ཤེས་ཀྱིས་དེའི་སྣོད་བཅུད་ཐམས་ཅད་ལ་མ་ཁྱབ་པ་མེད་པས་བསམ་གྱིས་མི་ཁྱབ་པའི་ཡེ་ཤེས་རྒྱལ་བ་ཉིད་ཀྱི་སྤྱོད་ཡུལ་དུ་གྱུར་པ་ཁོ་ན་ལས། སོ་སོའི་སྐྱེ་བོའི་མིག་རྣ་སྣ་ལྕེའི་ཡུལ་དུ་མ་གྱུར་པ་རེད་གསུངས་པ་ལས། གཞན་རྒྱལ་བ་ཞལ་མ་བདེ་བས་གསུངས་མ་ཤེས་པ་རེད་ཅེས་པའི་དོན་ག་ལ་ཡིན། དེས་ན་འདི་ནས་བདག་གནས་ཡོ་བྱད་ཐམས་ཅད་བྱིན་གྱིས་རློབས་ཞེས་བསྐུལ་བའི་ཚིག་རེད། དེ་ཡང་རྟོགས་པ་སྐྱེ་བ་བླ་མའི་བྱིན་རླབས་དང་བྱིན་རླབས་འཇུག་པ་དེ་མོས་གུས་ཀྱི་རྟེན་འབྲེལ་ལ་རག་ལས་པ་རེད། སངས་རྒྱས་ཀྱི་བྱིན་རླབས་སེམས་ཅན་ལ་འཇུག་པ་དེ་ཉིད་སངས་རྒྱས་ཀྱི་འཕྲིན་ལས་ཀྱི་བྱེད་པ་རེད། འོན་ཀྱང་དེ་ལ་ཡང་བྱ་བ་ཡུལ་ལ་ཡོད་པའི་འཕྲིན་ལས་ཤིག་དང་། བྱེད་པོ་ཡུལ་ཅན་ལ་ཡོད་པའི་འཕྲིན་ལས་ཤིག་སྟེ་གཉིས་ཀྱི་དབྱེ་བ་ཕྱེད་དགོས། བྱེད་པོ་ཡུལ་ཅན་ལ་ཡོད་པའི་འཕྲིན་ལས་ནི་དེ་ལྟར་མཛད་པའི་ཐབས་སམ་ནུས་པ་དེ་ཡིན་ཞིང་། དེ་ཉིད་སངས་རྒྱས་ཀྱི་ཐུགས་རྒྱུད་ཀྱིས་བསྡུས་པ་ཡིན་ཡང་། བྱ་བ་ཡུལ་ལ་ཡོད་པའི་འཕྲིན་ལས་ནི་གདུལ་བྱའི་སེམས་ཅན་མཐོ་རིས་དང་ཐར་བ་ཐོབ་པའི་ལམ་རྒྱུད་ལ་སྐྱེས་པ་གདུལ་བྱའི་རྒྱུད་ཀྱི་དད་པས་བསྡུས་པ་ཞིག་རེད། དེས་ན་གནས་མཆོག་འདི་རུ་བྱིན་ཕོབ་ལ། ཞེས་གསུངས་ན། བདག་སྒྲུབ་པ་པོ་ཡོད་པའི་གནས་མཆོག་འདི་རུ་བྱིན་ཕོབ། གནས་འདི་འོག་མིན་ཆོས་དབྱིངས་ཀྱི་ཕོ་བྲང་དཔལ་རི་པདྨ་འོད་གླིང་དུ་སྒྱུར། གནས་འདི་རུ་འབྲེལ་བ་བཞག་ཚད་མ་བསྒོམ་པར་ཡང་འཚང་རྒྱ་བའི་ནུས་པ་བྱིན། མ་བསྒོམ་པར་སངས་རྒྱས་པ་ཅི་འདྲ་ཡིན་ན་སྙམ་པའི་ཐེ་ཚོམ་མི་དགོས། རྒན་མོ་ལ་ཁྱི་སོ་བརྒྱུད་ནས་མོས་གུས་ཀྱི་སྟོབས་ཀྱིས་སངས་རྒྱས་ཀྱི་བྱིན་རླབས་དྲངས་པའི་དཔེ་ཡོད་པ་མ་ཡིན་ནམ། མོས་གུས་ཅན་ལ་གནས་འདི་དག་ཟངས་མདོག་དཔལ་རི་དང་བདེ་བ་ཅན་དངོས་ཡིན་ཞིང་། དངོས་ཀྱི་བྱིན་རླབས་འཇུག་ཐག་ཆོད་ཡིན་པ་རེད། གལ་སྲིད་མ་དད་ན་རྔ་ཡབ་གླིང་གི་སྲིན་པོ་རྣམས་ཀྱིས་གུ་རུ་རིན་པོ་ཆེའང་རྒྱལ་པོ་ཡིན་པའི་འདུ་ཤེས་མ་གཏོགས་བླ་མ་ཡིན་པའི་དད་པ་མ་ཡོད་པས། སྲིན་རྒྱལ་རཀྴ་ཐོད་ཕྲེང་གི་སྐུར་བཞེངས་པ་མ་ཡིན་ནམ། དད་པ་མེད་ན་བྱིན་ཕོབ་ཅེས་ཐེངས་བརྒྱར་བོས་ཀྱང་བྱིན་རླབས་འཇུག་ནི་མ་རེད། དད་པ་དང་དམ་ཚིག་སྔར་ཡོད་ཀྱང་ད་ལྟར་ཉམས་པ་ཡིན་ན་བྱིན་རླབས་ཞུད་ནས་འདྲེད་འགྲོ་རྒྱུ་ཡོད་པ་རེད། བྱིན་རླབས་ཞུད་སོང་དུས་དར་ཐོག་ཏུ་རྡོག་མ་ཆགས་མ་བརྟན་པ་ཇི་བཞིན་བྱིན་རླབས་ཆགས་མི་ཐུབ་པ་རེད། དེ་ལ་ཅི་དགོས་པ་རེད་ཅེ་ན། རས་གཞི་ལ་འབྱར་རྩི་བྱུགས་ནས་ཚོན་འབྱར་ཐབས་བྱེད་པ་ཇི་བཞིན། དམ་སྐོང་དོང་སྤྲུགས་ཚོགས་བསགས་སྒྲིབ་སྦྱང་ལ་སོགས་པ་དགོས་པ་རེད། སྒྲུབ་མཆོག་བདག་ལ་དབང་བཞི་བསྐུར་ཞེས་སྒྲུབ་པ་པོའི་གང་ཟག་མཆོག་དབང་རྣོན་ལས་སྐལ་དང་ལྡན་པ་བདག་ལ་དབང་བཞི་བསྐུར། སྐུ་དབང་ལུས་ལ་བསྐུར་བུམ་པའི་དབང་གིས་རྩ་སྤྲུལ་སྐུར་དག སྤྲུལ་སྐུའི་གོ་འཕང་ཐོབ་པའི་སྐལ་བ་རྒྱུད་ལ་བཞག དེ་བཞིན་དུ་ངག་དང་ཡིད་ལ་གསང་བ་ཤེས་རབ་ཚིག་དབང་དང་བཅས་པ་ཐོབ་ནས། རླུང་དང་ཐིག་ལེ་ཀུན་གཞིའི་སྒྲིབ་པ་རྣམས་དག་ནས་སྐུ་བཞིའི་གོ་འཕང་ཐོབ་པའི་སྐལ་བ་རྒྱུད་ལ་བཞག བགེགས་དང་ལོག་འདྲེན་བར་ཆད་སོལ། ཞེས་ཕྱི་ནང་གསང་བའི་བགེགས་ཏེ་ཕྱི་རྐྱེན་དགྲ་འདྲེ་འབྱུང་པོ། ནང་རྐྱེན་ཉོན་མོངས་དུག་ལྔ། གསང་བ་འཁྲུལ་རྟོག་གཉིས་འཛིན་གྱི་གདོན། མདོར་ན་བདག་གཉིས་ཀྱིས་བསྡུས་པའི་འཛིན་པ་ཕྲ་རགས་སྣང་གསུམ་འཕོ་བའི་བག་ཆགས་དང་བཅས་པའི་བགེགས་དང་ལོག་པར་འདྲེན་པའི་བར་ཆད་ཐམས་ཅད་སོལ་ལ། མཆོག་དང་ཐུན་མོང་གི་དངོས་གྲུབ་སྩོལ་ཞེས་མཆོག་གི་དངོས་གྲུབ་ཟུང་འཇུག་རྡོ་རྗེ་འཆང་གི་སྐུ་ཐོབ། ཟག་མེད་ཁ་སྦྱོར་ཡན་ལག་བདུན་ལྡན་དུ་མངའ་བརྙེས། ལས་ཀྱི་རླུང་དབུ་མར་ཚུད་ནས་མ་དག་པའི་རྩ་རླུང་ཐིག་ལེ་ཐམས་ཅད་དག་པའི་སྟོབས་ཀྱིས། རྫུ་འཕྲུལ་གྱིས་ནམ་མཁར་འགྲོ་ནུས་པ་དང་བསད་པ་གསོ་ནུས་པ། སེམས་གསལ་སྟོང་གི་ཡེ་ཤེས་མངོན་དུ་གྱུར་བའི་སྟོབས་ཀྱིས་མངོན་པར་ཤེས་པས་ཆོས་ཐམས་ཅད་ཨ་རུ་ར་རློན་པ་ལག་མཐིལ་དུ་བཞག་པ་ལྟར་གསལ་བར་རྟོགས་པ། ཏིང་ངེ་འཛིན་དང་ཡེ་ཤེས་ཀྱི་སྟོབས་ཀྱིས་ས་ལམ་གོང་མར་བགྲོད་ཐུབ་པ། ཚེ་ཉི་ཟླ་དང་མཉམ་པས་རང་གཞན་གྱི་དོན་སྒྲུབ་ཐུབ་པའི་རྡོ་རྗེའི་སྐུ་བརྙེས་པ་དེ་དག་མཆོག་གི་དངོས་གྲུབ་ཡིན་པ་རེད། ཐུན་མོང་གི་དངོས་གྲུབ་གྲུབ་པ་བརྒྱད་དེ། རལ་གྲི་མིག་སྨན་རིལ་བུ་གསེར་འགྱུར་རྐང་མགྱོགས་ལ་སོགས་པ་རེད། མདོར་ན་མཆོག་དང་ཐུན་མོང་གི་དངོས་གྲུབ་མ་ལུས་པ་བསྩལ་དུ་གསོལ་ཞེས་དབྱངས་རྟ་སྙན་མོས་དངོས་གྲུབ་བསྐུལ་བ་དང་མཉམ་དུ། སྔགས་ཀྱིས་སྤྱན་འདྲེན་པ། ཨོཾཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལཿ བཛྲ་ས་མ་ཡ་ཛཿཛཿ ཞེས་གསུངས་ཏེ། ཨོཾ་ཨཱཿཧཱུྃ་ནི་ཆོས་སྐུ་ལོངས་སྐུ་སྤྲུལ་སྐུ་དང་། སྐུ་གསུང་ཐུགས་གསང་བ་གསུམ་གྱི་བདག་ཉིད། བཛྲ་ནི་འགྱུར་བ་མེད་པ་གསང་སྔགས་ཀྱི་རྡོ་རྗེ། རིག་པའི་ཡེ་ཤེས་དེ་བཞིན་ཉིད་རྒྱལ་བ་ཐམས་ཅད་ཀྱི་ཐུགས་དང་གཉིས་སུ་མེད་པ། རྣམ་པ་གུ་རུའམ་བླ་མ་ཞེས་སུ་གསུངས་པ་དང་། པདྨ་ནི་པདྨ་འབྱུང་གནས་ཞེས་པའི་དོན། ད་ལྟ་རྔ་ཡབ་ལང་ཀའི་གླིང་ན་རཀྴ་ཐོད་ཕྲེང་རྩལ་གྱི་སྐུར་བཞེངས་པས་ཐོད་ཕྲེང་རྩལ་ཞེས་མཚན་ཐད་འགྱུར་ཏེ། སྤྱིར་སྔགས་འདི་ལ་འགྱུར་སྐད་ཐུན་མོང་དང་ཐུན་མོང་མ་ཡིན་པ་ཡོད་པ་རེད། ཚིག་འགྱུར་དང་། དོན་འགྱུར། སྲོག་འགྱུར། མཚན་འགྱུར་ཞེས་པ་དང་། ད་དུང་མན་ངག་གི་འགྱུར་ལ་སོགས་པ་མང་པོ་ཡོད་པར་གསུངས་པ་རེད། ཐོད་ཕྲེང་རྩལ་བོད་སྐད་ཡིན་ན། འདི་ཐད་ཀ་རུ་མཚན་ཐད་འགྱུར་བྱས་པ་རེད། འོ་ན་བོད་སྐད་ཡིན་པས་སྔགས་མིན་སྙམ་མི་དགོས། སྔགས་ལ་མི་མ་ཡིན་དང་འགྲོ་ལྡིང་བའི་སྐད་ལ་སོགས་པ་མང་བས་མཐའ་གཅིག་ཏུ་སཾ་ཀྲྀ་ཏའི་སྐད་དང་མཐུན་དགོས་པའི་ངེས་པ་མེད། རིག་འཛིན་བརྒྱུད་པའི་ཞལ་ལུང་ལ་ལྟོས་པ་མ་གཏོགས། རྣམ་པ་ཀུན་ཏུ་བྱིངས་དང་རྣམ་འགྱུར་རྐྱེན་ལ་སོགས་པས་སྒྲ་སྒྲུབ་པ་ལྟར་བྱེད་དགོས་པ་མ་རེད། བྱིན་གྱིས་བརླབས་པའི་སྔགས་མིན་ཚེ་རྒྱ་གར་གྱི་གནའ་སྐད་ཡིན་པ་ཙམ་གྱིས་བྱིན་རླབས་ཡོད་པའི་ངེས་པ་མེད་དེ། སཾ་ཀྲྀ་ཏའི་སྐད་ཀྱི་མུ་སྟེགས་པའི་གཞུང་ལུགས་ཇི་འདྲའི་མང་པོ་ཡོད་སྲིད། དེ་ལྟ་བུའི་གུ་རུ་དེ་ཉིད་དཀྱིལ་འཁོར་གྱི་འཁོར་ལོ་དང་བཅས་པ་བསྐྱེད་ཅིང་སྤྱན་དྲངས་པའི་གནས་འདིར་དམ་ཡེ་ཐ་མི་དད་པར་ཡེ་ནས་རྣམ་པར་དག་པར་བཛྲ་རམ་འགྱུར་བ་མེད་པའི་རྡོ་རྗེར་ས་མ་ཡ་ཞེས་དམ་ཚིག་པ་དང་གཉིས་སུ་མེད་པར་གྱུར། ཛཿཛཿཞེས་གསུངས་ཏེ། ཛ་སྔ་མ་དེས་སྤྱན་འདྲེན་ཅིང་། རྗེས་མ་དེས་གཉིས་མེད་དུ་བསྟིམ་པའི་གོ་བ་ལེན་དགོས་པ་རེད། བསྐྱེད་རིམ་གྱི་སྐབས་སུ་དག་རྫོགས་སྨིན་གསུམ་གྱི་གོ་དོན་སློང་རྒྱུ་དེ་ཉིད་སྐྱེ་བ་རྣམ་བཞི་སྦྱོང་བ་གང་གི་སྐབས་སུ་ཡིན་ཡང་གནད་ཆེན་པོ་ཡིན། དག་རྫོགས་སྨིན་གསུམ་ནི་འཁོར་བ་དང་རྣམ་པ་མཐུན་པས་སྲིད་པ་སྦྱོང་ཞིང་དག མྱང་འདས་དང་བཞུགས་ཚུལ་མཐུན་པས་འབྲས་བུ་གཞི་ལ་རྫོགས། གཉིས་ཀ་རྫོགས་རིམ་གྱི་སྨིན་བྱེད་དུ་འགྲོ་བས་དག་རྫོགས་སྨིན་གསུམ་ཚང་བས་མ་ཚད། ཟབ་གསལ་གཉིས་མེད་ཀྱི་རྫོགས་རིམ་བསྐྱེད་རྫོགས་ཟུང་འཇུག་ཏུའང་འགྲོ་བ་ཡིན། བསྐྱེད་པ་ཏིང་ངེ་འཛིན་གྱི་དཀྱིལ་འཁོར་དང་། གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གཉིས་རང་སྣང་གི་ངོར་དབྱེར་མེད་དུ་གནས་པ་ཡིན་ཞིང་། རང་བཞིན་དམ་ཚིག་གི་དཀྱིལ་འཁོར་དུ་བསྐྱེད་པ་ཡེ་ཤེས་སེམས་དཔའི་དཀྱིལ་འཁོར་སྤྱན་དྲངས་པ་འཇུག་ཅིང་བསྟིམ་པའི་མཚན་ཉིད་ཅན། ཆུ་ལ་ཆུ་བཞག་པ་ཇི་བཞིན་མཉམ་པོར་སྦྱོར་བའི་ཚུལ་གྱིས་བསྟིམས་པ་རེད། གསུམ་པ་བཞུགས་སུ་གསོལ་བ། གསུམ་པ་བཞུགས་སུ་གསོལ་བ་ནིཿ ཞེས་གསུངས་ཏེ། འུ་ཅག་གིས་མགྲོན་པོ་གལ་ཆེན་ཞིག་མགྲོན་དུ་བོས་ན། དང་པོ་ཕེབས་བསུ་ཞུ། དེ་ནས་གདན་དུ་བཞུགས་སུ་གསོལ་དགོས་པ་སོགས་ལྟར། དེ་དང་རྣམ་པ་མཐུན་པའི་ཐོག་ནས། སྤྱན་འདྲེན་བྱས་པའི་དེ་མ་ཐག་ཏུ་བཞུགས་གསོལ། དེའི་མཚམས་སུ་རིམ་པ་བཞིན་དུ་ཕྱག་འཚལ་དང་མཆོད་པ་དེ་དག་ཡོང་བ་ཡིན། སྤྱིར་ཆོ་ག་ལ་ཐོག་མཐའ་བར་གསུམ་སྦྱོར་དངོས་རྗེས་ཀྱི་འགྲོས་ཚང་དགོས་པ་གཅིག་པ་རེད། དཔེར་ན་གང་ཟག་མི་ཞིག་ལ་ཡན་ལག་གི་དང་མ་མགོ། མགོ་དེ་ལ་དབང་པོ་མིག་རྣ་སྣ་ལྕེ། ལུས་གཅིག་ལ་རྐང་ལག་བཞི། ཉིང་ལག་གི་སོར་མོ། ཁོག་པ་སྒལ་ཚིགས་དང་དོན་ལྔ་སྣོད་དྲུག་སོགས་ཚང་ན་མི་ལུས་ཆ་ཚང་ཞིག་ཏུ་བརྗོད་པ་ཇི་བཞིན་ཆོ་གའི་ཡན་ལག་ཐམས་ཅད་ཚང་བ་ཞིག་ལ་ཆོ་ག་ཆ་ཚང་ཟེར་བ་ཡིན། མི་ཡིན་པ་འདྲ་ཡང་མི་ཐམས་ཅད་གཅིག་མ་ཡིན་པ་བཞིན་དུ་ཆོ་ག་ལ་ཡང་མདོ་དང་སྔགས། སྔགས་ལའང་གསར་རྙིང་རྒྱུད་སྡེ་བཞི་དྲུག་གི་ལྷ་དང་དཀྱིལ་འཁོར་སོ་སོར་ཆོ་ག་སོ་སོ་ཡོད་པ་བྱེ་བྲག་པ་རེད། དེ་བཞིན་དུ་ཆོ་གའི་ཡན་ལག་འགའ་ཞིག་མི་འདྲ་བ་དང་། རྒྱས་བསྡུས་མང་ཉུང་གི་ཁྱད་པར་ཡང་འབྱུང་བ་རེད། ཧཱུྃ། ཞེས། ཧཱུྃ་ཐུགས་ཀྱི་ཡི་གེས་འགོ་བླངས་ཏེ། ཐབས་ཀྱིས་བསྐྱེད་པའི་དཀྱིལ་འཁོར་འདིརཿ ཤེས་རབ་དབྱིངས་ནས་དྲངས་པའི་ལྷཿ རིག་འཛིན་བླ་མའི་དཀྱིལ་འཁོར་རྣམསཿ གཉིས་མེད་ངང་དུ་དགྱེས་པར་བཞུགསཿ ཞེས་གསུངས་ཏེ། ཐབས་ཀྱིས་བསྐྱེད་པའི་དཀྱིལ་འཁོར་འདིར། ཞེས་པ་ཐབས་བསྐྱེད་པའི་རིམ་པ་ཆོས་སྐུ་དེ་བཞིན་ཉིད་ཀ་དག་སྟོང་པ། སྒྱུ་འཕྲུལ་ཡེ་ཤེས་ལྔ་ལྡན་གྱི་བདག་ཉིད་ཅན་ཞིག་ལ་གོ་དགོས་པ་རེད། ཡེ་ཤེས་ལྔ་ལྡན་གྱི་བདག་ཉིད་ལ་ཇི་ལྟར་གོ་དགོས་པ་རེད་སྙམ་ན། རྒྱ་མཚོ་རུ་གཟའ་སྐར་ཤར་བ་ལྟར་ཕྱི་ཡུལ་གྱི་རྣམ་པ་མ་འགག་པར་སྣང་བ་དེ་ཉིད་མེ་ལོང་ལྟ་བུའི་ཡེ་ཤེས་དང་། དེའི་ངོ་བོ་སྟོང་པ་གནས་ལུགས་རང་གི་ངོ་བོ་ལས་མ་གཡོས་པ་དེ་ཉིད་ཆོས་དབྱིངས་ཡེ་ཤེས། དེར་འཛིན་པ་མ་ཞུགས་པ་མཉམ་ཉིད་ཡེ་ཤེས། གཟུགས་དང་སྒྲ་ལ་སོགས་པའི་རྣམ་པ་མ་འདྲེས་པར་སོ་སོར་སྣང་བ་ཉིད་སོ་སོར་རྟོགས་པའི་ཡེ་ཤེས། དགག་སྒྲུབ་སྤང་བླང་འདོར་ལེན་གྱི་འཛིན་རྟོག་ཡུལ་མེད་དུ་གྲོལ་བ་ཉིད་བྱ་བ་གྲུབ་པའི་ཡེ་ཤེས་ཡིན་པ་རེད། ཤེས་རབ་དབྱིངས་ནས་དྲངས་པའི་ལྷ། ཞེས་གསུངས་ན། དེ་ལྟ་བུའི་བསྐྱེད་པ་ཐབས་ཀྱི་དཀྱིལ་འཁོར་ལ་ལྷུན་གྲུབ་ལོངས་སྐུའི་དཀྱིལ་འཁོར་ཁ་སྦྱོར་བདུན་ལྡན་བདེ་བ་ཆེན་པོའི་རོལ་རྩལ་ཚོགས་པ་ཤེས་རབ་དབྱིངས་ནས་སྤྱན་དྲངས་ཤིང་། འཛིན་མེད་ཀྱི་ངང་ནས་འགག་མེད་དུ་ཤར་བའི་ཀུན་འདུས་རིག་འཛིན་བླ་མའི་ལྷ་ཚོགས་ཀྱི་དཀྱིལ་འཁོར་རྣམས་ཞེས་མང་ཚིག་གིས་དཀྱིལ་འཁོར་ཆེན་པོ་གཅིག་གི་སྤྲོ་བསྡུ་རུ་དཀྱིལ་འཁོར་བསམ་ཡས་སྣང་བ་དེ་དག་གདན་གསུམ་ལྷ་ཡི་དཀྱིལ་འཁོར་དུ་ཡེ་ནས་གྲུབ་པ་ལ། ཇི་བཞིན་ཤེས་པའི་ཐབས་ཤེས་གཉིས་མེད་ཀྱི་ངང་དུ་བཞུགས་ཞེས་གསུངས། བཛྲ་ས་མ་ཡ་ཏིཥྛ་ལྷནཿ ཞེས་པ་ནི་དམ་ཚིག་གི་རྡོ་རྗེར་བརྟན་པར་བཞུགས་ཞེས་པའི་དོན་རེད། ལྷན་ཞེས་པ་བོད་སྐད་ཡིན་ཞིང་སྔགས་ཚིག་ཏུ་བྱིན་གྱིས་བརླབས་པའི་སྔགས་ཏེ། འདིའི་གོ་དོན་ནི་ཆུ་ལ་ཆུ་བཞག་པའམ། མར་ལ་མར་ལྷན་པ་ལྟར་གཉིས་མེད་དུ་བསྲེ་བའི་དོན་རེད། བཞི་བ་ཕྱག་འཚལ་བ། བཞི་བ་བརྡ་ཕྱག་འཚལ་བ་ནིཿ ཞེས་གསུངས་ཏེ། ཕྱག་འཚལ་བ་འདི་ལ་འུ་ཅག་གིས་དུས་རྒྱུན་བཤད་པ་ལྟར་རབ་ལྟ་བ་མཇལ་བའི་ཕྱག འབྲིང་སྒོམ་པ་གོམས་པའི་ཕྱག ཐ་མ་སྤྱོད་པ་མོས་གུས་ཀྱི་ཕྱག་ཅེས་བརྗོད་པའམ། གཞན་ཡང་གུས་ཤིང་འདུད་པ་ལུས་ཀྱི་ཕྱག བསྟོད་ཅིང་བསྙེན་པ་ངག་གི་ཕྱག མོས་ཤིང་འདུད་པ་ཡིད་ཀྱི་ཕྱག་ཅེས་བརྗོད་ནའང་ཆོག་པ་ཡིན། དེ་མིན་སྣང་བ་བརྡ་ཡི་ཕྱག རྟོགས་སྒོམ་ཏིང་འཛིན་གྱི་ཕྱག རོ་གཅིག་གཉིས་མེད་ཀྱི་ཕྱག་ཅེས་སྤྲོས་ནའང་ཆོག་པ་རེད། ད་ཡིན་པ་བྱས་ན་ཐམས་ཅད་ཡིན་པ་རེད། མིན་པ་བྱས་ན་ཐམས་ཅད་མིན་པ་རེད། རྣལ་འབྱོར་སེམས་ཉིད་ཀྱི་རོལ་བ་ལས་སྣང་བ་བརྡ་དང་ཡི་གེའི་གཟུགས་བརྙན་ལ་ཟད་རྒྱུ་ཅི་ཡོད། དེ་ཡང་དོན་ངོ་མ་ལྟར་ན། ཧཱུྃཿ ལྷ་ཉིད་རང་ལ་རང་ཉིད་ལྷཿ རང་བྱུང་སྤྲུལ་པའི་དཀྱིལ་འཁོར་ལཿ བཟང་ངན་བླང་དོར་མ་མཆིས་ཀྱངཿ རྟེན་འབྲེལ་བརྡ་ཡི་ཕྱག་འཚལ་ལོཿ ཞེས་གསུངས། རང་བྱུང་སྤྲུལ་བའི་དཀྱིལ་འཁོར་ཏེ། སྙིང་ཐིག་རང་གཞུང་གི་དཔལ་ཆེན་བཀའ་བརྒྱད་ཀྱི་ནང་ནས། རང་ལས་ཤར་བའི་དཔལ་ཆེན་ཚོགས། ཞེས་གསུངས་པ་ལྟར་དང་། ལྷ་ཉིད་རང་ལ་རང་ཉིད་ལྷ། ཞེས་དམ་ཚིག་ཡེ་ཤེས་གཉིས་སུ་མེད་པ་གཉིས་མེད་སྤྲུལ་བའི་ལྷ་ཚོགས། ལྷ་ཉིད་རང་དང་རང་ཉིད་ལྷར་དབྱེར་མི་ཕྱེད་ཅིང་། བཟང་ངན་བླང་དོར་མ་མཆིས་ཀྱང་། ཞེས་བཟང་ངན་བླང་དོར་གྱི་སྟེང་ནས་ཕྱག་འཚལ་ཡུལ་དང་འཚལ་མཁན་ཞེས་པ་ལོགས་སུ་མ་མཆིས་པར། རྟེན་འབྲེལ་བརྡ་ཡི་ཕྱག་འཚལ་ལོ། ཞེས་ཆོས་ཐམས་ཅད་རྟེན་ཅིང་འབྲེལ་འབྱུང་གི་དབང་གིས་བྱུང་ཞིང་སྣང་བ་ཡིན་པ་ནི། རྟེན་ཅིང་འབྲེལ་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། ཞེས་གསུངས་པ་ལྟར་དང་། དེ་ཉིད་ཀྱང་སྟོང་ཉིད་ལས་མ་འདས་པ་ཞིག་ཡིན་པས། དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། ཞེས་གསུངས་པ་དང་། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཡིན། ཞེས་གསུངས་པ་ལྟར། སྟོང་པ་རྟེན་འབྱུང་དུ་ཤར་བའི་སྣང་ཆ་གང་དུའང་བསྒྱུར་ཆོག་པས་ན། རྟེན་འབྲེལ་བརྡ་ཡི་ཕྱག་འཚལ་ལོ་ཞེས་གསུངས། འདི་ལ་གནས་ལུགས་ལྟ་བའི་རང་ཞལ་མཇལ་ཏེ་མངོན་སུམ་ལྟ་བ་མཇལ་བའི་ཕྱག་ཅེས་བརྗོད་དགོས་པ་རེད། ཨ་ཏི་པཱུ་ཧོཿ ཞེས་ཕྱག་འཚལ་བ་དང་། པྲ་ཏཱིཙྪ་ཧོཿ ཞེས་ཕྱག་ལན་གནང་བའི་ཚིག་རེད་ཅེས་གསུངས་འདུག ལྔ་པ་མཆོད་པ། ལྔ་པ་མཆོད་པའི་བྱེ་བྲག་ནིཿ ཞེས་གསུངས་ཏེ། བྱེ་བྲག་ཅེས་གསུངས་པ་འདིས་མཆོད་པ་ལ་ནང་གསེས་ཀྱི་བྱེ་བྲག་མང་པོ་ཡོད་པའི་ནང་ནས་འདི་མཆོད་པ་བྱེ་བྲག་པ་ཞིག་ཡིན་ཞེས་པའི་དོན་མིན་པར་སྙམ། ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་དང་བཅས་པའི་མཆོད་པའི་བྱེ་བྲག་ནི་ཞེས་མཚམས་སྦྱར་ཏེ་མཆོད་པའི་རྣམ་གྲངས་མང་པོ་མཚོན་པ་ཚིག་གིས་མཚམས་སྦྱར་བ་ཡིན། དེ་ཡང་འདོན་ཆོག་དངོས་ནི། ཨོཾ་ཨཱཿཧཱུྃཿ ཞེས་གསུངས་ཏེ། ཨོཾ་ཨཱཿཧཱུྃ་གིས་མཆོད་རྫས་ཟག་མེད་ཀྱི་འདོད་ཡོན་ཀུན་བཟང་མཆོད་པའི་རྣམ་རོལ་དུ་སྦྱང་སྤེལ་བསྒྱུར་ནས། ཕྱི་ནང་སྣོད་བཅུད་མཆོད་པའི་སྤྲིནཿ ཉེར་སྤྱོད་འདོད་ཡོན་སྣ་ལྔ་དངཿ བཀྲ་ཤིས་རྫས་རྟགས་རྒྱལ་སྲིད་བདུནཿ སྨན་གཏོར་རཀྟ་དང་རེ་སྤྲོཿ ཞེས་གསུངས་ཏེ། ཕྱི་ནང་སྣོད་བཅུད་མཆོད་པའི་སྤྲིན། ཞེས་གསུངས་པ་འདིས་ཕྱི་ཉེར་སྤྱོད་ཀྱི་མཆོད་པ། ནང་དམ་རྫས་ཀྱི་མཆོད་པ་གཉིས་ཀ་དངོས་སུ་བསྟན་ནས། གསང་བ་སྦྱོར་སྒྲོལ་གྱི་མཆོད་པ་དང་། དེ་ཁོ་ན་ཉིད་མཉམ་པ་ཆེན་པོའི་མཆོད་པ་ཤུགས་ལ་བསྟན་པ་དང་བཅས་པས། མཆོད་པའི་སྤྲིན་ཞེས་སྙན་གསན་དབབ་པའམ། མཚམས་སྦྱར་བའི་ཚིག་གིས་སྤྱིར་བསྟན་ནས། དེ་རེ་རེ་བཞིན་དུ་ངོ་བོའི་རིགས་བསྡུས་ན། ཉེར་སྤྱོད་འདོད་ཡོན་སྣ་ལྔ་དང་། ཞེས་ཕྱི་མཆོད་འདོད་ཡོན་སྣ་ལྔ། དབང་ལྔའི་ཡུལ་དུ་གྱུར་བའི་གཟུགས་མཛེས་སྒྲ་སྙན་དྲི་ཞིམ་རོ་མངར་ལ་སོགས་པ། དེ་ལ་ཡང་ནང་གསེས་ཀྱི་ཕྱག་རྒྱ་གར་གྱི་མཆོད་པ་ལ། རྐང་བའི་བྲོ། ལག་པའི་གར། མིག་གི་བལྟ་སྟངས། ལུས་ཀྱི་འགྱིང་སྟབས་སྣ་ཚོགས་སུ་བསྒྱུར་བའི་ཕྱག་རྒྱ་དང་། བསྟོད་པ་གླུ་ཡི་མཆོད་པ་ལ་ཚིག་དང་དབྱངས་སྙན་མོས་བསྟོད་པ་དབྱངས་སུ་འགུག་པ་དང་། ཏིང་འཛིན་ཡིད་ཀྱི་མཆོད་པ་མཆོད་པའི་སྤྲིན་རབ་འབྱམས་ཡིད་ཀྱིས་སྤྲུལ་ནས་ཞེན་མེད་དུ་འབུལ་བ། སྣ་ཚོགས་འདོད་ཡོན་གྱི་མཆོད་པ་ལ་ཉེར་སྤྱོད་བདུན་དང་འདོད་ཡོན་དྲུག བྱེ་བྲག་ཏུ་གོས་རྒྱན་ཡོ་བྱད་དང་། བཟའ་བཏུང་གནས་ཁང་། ཡུལ་ཕྱོགས་འབྱོར་བ་སོགས་དང་། བཀྲ་ཤིས་རྫས་རྟགས་རྒྱལ་སྲིད་བདུན། ཞེས་གསུངས་ན། གདུགས་དང་། གསེར་ཉ། བུམ་པ་ལ་སོགས་པའི་བཀྲ་ཤིས་པའི་རྟགས་བརྒྱད། དུར་བ། ཡུངས་དཀར། བིལ་བ་ལ་སོགས་པ་བཀྲ་ཤིས་པའི་རྫས་བརྒྱད། འཁོར་ལོ། ནོར་བུ། བཙུན་མོ། དམག་དཔོན་ལ་སོགས་པའི་རྒྱལ་སྲིད་རིན་པོ་ཆེ་སྣ་བདུན། དེ་དག་གིས་ཞི་མཆོད་བསྟན་པ་རེད། སྨན་གཏོར་རཀྟ་དང་རེ་སྤྲོ། ཞེས་གསུངས་པ་འདིས་ནང་མཆོད་བསྟན་པ་སྟེ། དམ་རྫས་བདུད་རྩིའི་མཆོད་པ། དམར་ཆེན་རཀྟའི་མཆོད་པ། བཱ་ལིང་གཏོར་མའི་མཆོད་པ་བཅས་བསྟན་པ་དང་། སྒེགས་བཞད་གཡོ་བའི་གར་མ་དངཿ བདེ་ཆེན་སྦྱོར་བའི་རིག་མ་འབུམཿ ཞེས་གསུངས་པ་འདིས་གསང་བ་སྦྱོར་སྒྲོལ་གྱི་མཆོད་པ་ཚིག་གི་ཟུར་ཙམ་གྱིས་བསྟན་པ་རེད། མཆོད་བྱ་མཆོད་བྱེད་མཆོད་ཡུལ་ཀུནཿ ཡེ་ཤེས་དབྱིངས་སུ་རྣམ་དག་པའིཿ མཆོད་པའི་ཕྱག་རྒྱ་ཆེན་པོ་སོགསཿ ཞེས་གསུངས་ཏེ། འདིས་དེ་ཁོ་ན་ཉིད་ཀྱི་མཆོད་པ་སྟེ། དུག་ལྔ་ཡེ་ཤེས་ལྔ་དུག་གསུམ་སྐུ་གསུང་ཐུགས་སུ་མཆོད་པ་དང་། ཆོས་སྐུ་ཐིག་ལེ་ཉག་གཅིག་ལ་མཆོད་བྱ་དང་མཆོད་ཡུལ་གཉིས་སུ་མེད་པར་ཡེ་ཤེས་ཀྱི་དབྱིངས་སུ་དུ་མ་རོ་གཅིག་རྣམ་པར་དག་པའི་མཆོད་པའི་ཕྱག་རྒྱ་ཆེན་པོ་སོགས་ཏེ། སོགས་ཁོངས་ཀྱི་ནང་དུ་ཅི་ཡོད་པ་རེད་ཅེ་ན། ཀུན་བཟང་ཞབས་བསིལ་བཞི་བསྣོལ་ཟེར་བ་ལྟ་བུ་དང་། ཞི་བ་ལ་བདུད་རྩིའི་གསང་ནན་དང་། ཁྲོ་བོ་ལ་རཀྟ་ཚར་གསུམ་སོགས་དང་། ད་དུང་ཚོགས་ཀྱི་མཆོད་པ་ལ་སོགས་པ་ཡོད་པ་རེད། དེ་ལྟ་བུའི་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་རྣམས། རིག་འཛིན་འདུས་པའི་ལྷ་ལ་འབུལཿ བཞེས་ནས་དབང་དང་དངོས་གྲུབ་སྩོལཿ ཞེས་གསུངས་ཏེ། རིག་འཛིན་འདུས་པའི་ལྷ་ལ་ཕུལ་བ་ཡིན་པས། བཞེས་ནས་མཆོག་གི་མཐུ་དང་། བྱིན་རླབས་ཀྱི་དབང་། ཐུན་མོང་ཐུན་མིན་གྱི་དངོས་གྲུབ་སྩོལ་ཞེས་གསུངས་ནས་མཆོད་པ་འབུལ་བའི་སྔགས། ཨོཾ་བཛྲ་ཨརྒྷཾ་ནསཿ ཤབྟ་རཱུ་པ་ཤབྟ་གྷནྡྷེ་རཱ་ས་པརྴེ་ཨཱཿཧཱུྃཿ ཞེས་གསུངས་ཏེ། ཨོྃ་ཞེས་འགོ་ལེན་གྱི་སྔགས་ཀྱིས་ཐོག་མའི་ཚིག་སྣེ་དྲངས་ཏེ། བཛྲ་ཨརྒྷཾ་ཞེས་གསུངས་ན། བཛྲ་མཆོད་རྫས་ཐོགས་པའི་རྡོ་རྗེའི་ལྷ་མོའི་རིགས་ཀྱི་མཚན་དང་སྦྲེལ་ནས། ཨརྒྷཾ་མཆོད་ཡོན། པ་ཏྱཾ་ཞབས་བསིལ། པུཥྤེ་མེ་ཏོག དྷུ་པེ་བདུག་སྤོས། ཨཱ་ལོ་ཀེ་མར་མེ། གནྡྷེ་དྲི་ཆབ། ནཻཝིདྱ་ཞལ་ཟས། ཤབྟ་རོལ་མོ་སྟེ་རྣམ་བརྒྱད་དང་། ད་དུང་རཱུ་པ་ཤབྟ་གྷནྡྷེ་སོགས་གསུངས་ན། རཱུ་པ་གཟུགས། ཤབྟ་སྒྲ། གནྡྷེ་དྲི། རཱ་ས་རོ། པརྴེ་རེག་བྱ་སྟེ་འདོད་པའི་ཡོན་ཏན་ཉེར་སྤྱོད་རྣམ་ལྔ་དང་། ཨཱཿཧཱུྃྃ་ཞེས་གསུངས་པ་དབྱིངས་སུ་མཆོད་ཅིང་དགྱེས་པར་བཞེས་གསུངས་པའི་དོན་ཏེ། དེ་དག་ཕྱི་མཆོད་རེད། སརྦ་པཉྩ་བྷ་ལིང་ཏ་རཀྟ་མ་ཧཱ་སུ་ཁ་དྷརྨ་དྷཱརྟུ་ཨཱཿཧཱུྃཿ ཞེས་གསུངས་ན། འདི་ཉིད་ནང་དང་གསང་བ་དེ་ཁོ་ན་ཉིད་ཀྱི་མཆོད་པ་ཡིན། ཕྱག་ལེན་དུ་འདིའི་སྔགས་འདི་ཚར་གསུམ་འདོན་པ་དང་། སྔགས་དོན་ནི་སྨན་གཏོར་རཀྟའི་མཆོད་པ་ཆེན་པོ་ཆོས་དབྱིངས་བདེ་བ་ཆེན་པོའི་མཁའ་ཀློང་དུ་བཞེས་ཤིག་ཅེས་པའི་དོན་རེད། མཆོད་པ་འབུལ་བ་འདི་ཚོགས་བསགས་ཀྱི་ཆེད་དུ་སྟེ། ཚོགས་ལ་བསོད་ནམས་དང་ཡེ་ཤེས་ཀྱི་ཚོགས་གཉིས་ཡོད་པ་དང་། རྒྱུ་བསོད་ནམས་ཀྱི་ཚོགས་སྔོན་དུ་བསགས་པ་ལ་བརྟེན་ཏེ་འབྲས་བུ་ཡེ་ཤེས་ཀྱི་ཚོགས་རྗེས་ནས་བརྙེས་དགོས་པ་རེད། དེས་ན་ད་ལྟའི་ཚོར་བ་དང་འདུ་ཤེས་མ་ཞིག་གི་བར་དུ་ཟག་བཅས་ཀྱི་ཚོགས་སམ་བསོད་ནམས་ཀྱི་ཚོགས་བསགས་དགོས་པ་དང་། སྣང་བ་འདི་འགྱུར་ནས་བདེ་སྡུག་གི་ཚོར་བས་ཕན་གནོད་མེད་པའི་དུས་སུ་སླེབས་ཚེ་ཟག་མེད་ཡེ་ཤེས་ཀྱི་ཚོགས་བསགས་ནས། དེ་དུས་དམིགས་བཅས་ཀྱི་ཚོགས་འདི་བསྐྱུར་ན་ཆོག་པ་རེད། དྲུག་པ་བསྟོད་པ། དྲུག་པ་བསྟོད་པ་བྱ་བ་ནིཿ ཞེས་གསུངས་ཏེ། འདི་བརྒྱུད་གསུམ་རིག་འཛིན་བླ་མ་དཀྱིལ་འཁོར་ཆེན་པོའི་ལྷ་ཚོགས་ཡོངས་རྫོགས་དང་བཅས་པའི་བསྟོད་པ་རེད། བསྟོད་པ་འདི་ཡང་བློའི་མཆོད་པའི་དྲ་བ་གཞན་ཞིག་ཀྱང་ཡིན་ཆོག་པ་མ་ཟད། འདི་ནས་ཕྱག་འཚལ་བའི་སྒོ་ནས་བསྟོད་པ་སྟེ། ལག་པའི་གར་རིགས་ལྔ་སྤྱིའི་ཕྱག་རྒྱ་དང་སྦྲེལ་བ་ཡིན་པས་བསྟོད་པ་ཕྱག་རྒྱ་དང་སྦྲེལ་བ་ཞིག་ཡིན་པ་རེད། འདི་ལ་ཕྱག་རྒྱ་བཞི་ཀ་ཚང་འདུག་སྙམ། ཕྱག་རྒྱ་བཞི་ནི། ཆོས་ཀྱི་ཕྱག་རྒྱ། ལས་ཀྱི་ཕྱག་རྒྱ། དམ་ཚིག་གི་ཕྱག་རྒྱ། ཕྱག་རྒྱ་ཆེན་པོ་དང་བཅས་བཞི་སྟེ། རང་ཉིད་ལྷ་རུ་བསྒོམས་ནས་སྒྱུ་མ་དང་འཇའ་ཚོན་ལྟ་བུར་དམིགས་པ་ཕྱག་རྒྱ་ཆེན་པོ། ལག་པ་གཡས་ཀྱི་སོར་མོ་ལྔར་དཔའ་བོ་འབྲུ་ལྔའི་ས་བོན་དུ་གསལ། ལག་པ་གཡོན་གྱི་སོར་མོ་ལྔར་ཡུམ་ལྔའི་ས་བོན་བཀོད་དེ་ཕྱག་རྒྱའི་གར་བསྒྱུར་དགོས་པ་ཡིན་པས། སོར་མོར་ཡིག་འབྲུ་བསྒོམ་པ་ཆོས་ཀྱི་ཕྱག་རྒྱ། རྡོ་རྗེ་ལ་སོགས་པ་རིགས་ལྔའི་ཕྱག་མཚན་དུ་བསྒོམ་པ་དམ་ཚིག་གི་ཕྱག་རྒྱ། དེ་བཞིན་ཕྱག་གཡས་གཡོན་དུ་བསྒྱུར་བ་དང་འཁྱུད་སྟབས་དང་པད་བསྐོར་བྱེད་པ་དག་ལས་ཀྱི་ཕྱག་རྒྱ་སྟེ་ཕྱག་རྒྱ་བཞི་ཀ་འདིར་ཚང་བར་སྙམ། འདིར་དངོས་བསྟན་གྱི་བསྟོད་པའི་ཚིག་ནི། ཧྲཱིཿ མ་བཅོས་སྤྲོས་བྲལ་བླ་མ་ཆོས་ཀྱི་སྐུཿ བདེ་ཆེན་ལོངས་སྤྱོད་བླ་མ་ཆོས་ཀྱི་རྗེཿ པད་སྡོང་ལས་འཁྲུངས་བླ་མ་སྤྲུལ་པའི་སྐུཿ སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོདཿ ཅེས་གསུངས་ན། ཤོ་ལོ་ཀ་ཐོག་མ་འདིས་སྐུ་གསུམ་འདུས་པའི་བདག་ཉིད་རྒྱལ་བ་རྡོ་རྗེ་འཆང་གི་ངོ་བོར་བཞེངས་པའི་རིག་འཛིན་བླ་མར་བསྟོད་པ་སྟེ། མ་བཅོས་སྤྲོས་བྲལ་བླ་མ་ཆོས་ཀྱི་སྐུ། ཞེས་པ་འདིས་རྒྱལ་བ་དགོངས་བརྒྱུད་བསྟན། ཆོས་དབྱིངས་མ་བཅོས་སྤྲོས་པ་བྲལ་བའི་ནང་གསལ་སྟོང་པའི་ཆ་ནས་ཡེ་ཤེས་ཆོས་སྐུ་དང་། སྐུ་གསུམ་གྱི་སྣང་གཞི་བྱེད་པའི་ཆ་ནས་ངོ་བོ་ཉིད་སྐུ། བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ། ཞེས་གསུངས་ན། གདངས་ཕྱིར་གསལ་བདེ་ཆེན་ཟག་མེད་ཀྱི་ཡེ་ཤེས་ཉིད་ལས་མི་གཞན་པའི་རིགས་ལྔའི་སངས་རྒྱས། དེ་ལས་ཀྱང་དག་པའི་གདུལ་བྱ་ས་བཅུའི་བྱང་སེམས་ཀྱི་ངོར་སྣང་བའི་ཕྱེད་སྤྲུལ་ལོངས་སྐུ། ཆོས་ཀྱི་སྐུ་ལས་གདུལ་བྱའི་མགོན་དུ་ཆོས་ཀྱི་རྗེ་བོར་ལས་དག་པར་དངོས་སུ་སྣང་བའམ། ཡང་ན་པད་སྡོང་ལས་འཁྲུངས་བླ་མ་སྤྲུལ་པའི་སྐུ། ཞེས་གསུངས་ན། ལོངས་སྐུའི་རྣམ་རོལ་ལས་མ་འདས་པའི་བླ་མ་ཆོས་ཀྱི་རྗེར་ཤར་བའི་གང་འདུལ་སྤྲུལ་སྐུའི་རོལ་པ། དེ་ཡང་ལྷོ་ནུབ་འོ་མ་ཅན་གྱི་རྒྱ་མཚོར་ངོ་མཚར་པདྨའི་སྡོང་པོ་ལས་འཁྲུངས་པའི་བླ་མ་སྤྲུལ་པའི་སྐུ་པདྨ་འབྱུང་གནས། སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད། ཅེས་གསུངས་ན། དེ་ལྟ་བུའི་སྐུ་གསུམ་མམ་སྐུ་བཞིའི་བདག་ཉིད། རིགས་ལྔ་འདུས་པའི་ངོ་བོ། རྒྱལ་བ་རིགས་དྲུག་པ་ཁྱབ་བདག་རྡོ་རྗེ་འཆང་ལ་ཕྱག་འཚལ་བསྟོད་ཅེས་འདིས་རྒྱལ་བ་དགོངས་པའི་བརྒྱུད་པ་བསྟན་པ་རེད། བདེ་བྱེད་བརྩེགས་པར་ཟབ་བརྒྱའི་དངོས་གྲུབ་བརྙེསཿ དུར་ཁྲོད་བརྒྱད་དུ་དགོངས་པའི་བཙན་ས་ཟིནཿ རབ་འབྱམས་དཀྱིལ་འཁོར་རྒྱ་མཚོར་མངའ་དབང་བསྒྱུརཿ མཆོག་གི་རིག་འཛིན་བརྒྱད་ལ་ཕྱག་འཚལ་བསྟོདཿ ཅེས་གསུངས་ཏེ། བདེ་བྱེད་བརྩེགས་པར་ཟབ་བརྒྱའི་དངོས་གྲུབ་བརྙེས། ཞེས་གསུངས་ན། དཔལ་ཀུན་ཏུ་བཟང་པོ་ཆེ་མཆོག་ཧེ་རུ་ཀ་ཡིས་འོག་མིན་གྱི་གནས་ནས་ཆེ་མཆོག་སྒྲུབ་སྡེ་བཀའ་བརྒྱད་ཀྱི་དཀྱིལ་འཁོར་གྱི་ཆོས་སྐོར་དེ་རྡོ་རྗེའི་ཚིག་གིས་གསུངས་ནས་རྡོ་རྗེ་ཆོས་ལ་སོགས་པས་བསྡུས་ཏེ་རྫུ་འཕྲུལ་གྱི་ཡེ་གེར་བཀོད། དེ་ཉིད་རིན་པོ་ཆེའི་སྒྲོམ་སོ་སོར་བཅུག་སྟེ་མཆོད་རྟེན་ཆེན་པོ་བདེ་བྱེད་བརྩེགས་པ་ནས་མཁའ་འགྲོ་མ་ལས་ཀྱི་དབང་མོ་ཆེ་ཡིས་བཀའ་བབས་ཀྱི་སློབ་དཔོན་ཆེན་པོ་སོ་སོར་སྒྲོམ་བུ་གཏད། དེ་གཏད་པས་ཟབ་པ་བརྒྱ་ཡི་དངོས་གྲུབ་བརྙེས་གསུངས་པས་ཟབ་པ་བརྒྱ་ཞེས་པ་མང་ཚིག་རེད། བརྒྱ་ཁོ་ན་གསུངས་པ་མ་ཡིན། ཟད་མེད་ཟད་མཐའ་མེད་པའི་དངོས་གྲུབ་ཅེས་པའི་དོན་རེད། དུར་ཁྲོད་བརྒྱད་དུ་དགོངས་པའི་བཙན་ས་ཟིན། ཞེས་དེ་ལྟ་བུའི་དངོས་གྲུབ་བརྙེས་པའི་རིག་འཛིན་མཆོག་བརྒྱད་དེས་རོ་གླིང་བསིལ་བའི་ཚལ་ལ་སོགས་པ་དུར་ཁྲོད་བརྒྱད་ནས་སྒྲུབ་པ་མཛད་དེ་དགོངས་པའི་བཙན་ས་ཟིན་ནས་གྲུབ་པ་བརྙེས། རབ་འབྱམས་དཀྱིལ་འཁོར་རྒྱ་མཚོར་མངའ་དབང་བསྒྱུར། ཞེས་འཁོར་འདས་ཀྱི་སྟོང་སྲོག་ཆོད་དེ་རབ་འབྱམས་དཀྱིལ་འཁོར་རྒྱ་མཚོའི་གཙོ་བོར་བཞེངས་པའི་མངའ་དབང་སྒྱུར་པ་པོ་མཆོག་གི་རིག་འཛིན་བརྒྱད་ལ་ཕྱག་འཚལ་བསྟོད་ཅེས་གསུངས། འཇམ་དཔལ་བཤེས་གཉེན་དང་། ཤྲཱི་སིངྷ། ན་ག་རྫུ་ན། ཧཱུྃ་ཆེན་ཀ་ར་ལ་སོགས་པའི་མཆོག་གི་རིག་འཛིན་བརྒྱད་ལ་ཕྱག་འཚལ་བསྟོད་གསུངས་ནས་འདིས་རིག་འཛིན་བརྡ་བརྒྱུད་བསྟན་པ་རེད། དགོངས་པ་ཀློང་ཆེན་ཡངས་པའི་མཁའ་ལ་འཕྱོཿ རྣམ་འགྱུར་བརྟུལ་ཞུགས་སྤྱོད་པས་འགྲོ་བ་འདྲེནཿ རྨད་བྱུང་རྡོ་རྗེ་སྙིང་པོའི་དགོངས་སྲོག་འཛིནཿ ཐུགས་སྲས་རྗེ་འབངས་ཉེར་ལྔར་ཕྱག་འཚལ་བསྟོདཿ ཅེས་གསུངས། དགོངས་པ་ཀློང་ཆེན་ཡངས་པའི་མཁའ་ལ་འཕྱོ། ཞེས་གསུངས་ན། ཐུགས་ལྟ་བ་ཟབ་མོའི་དགོངས་པ། ཀུན་བཟང་དགོངས་པའི་ཀློང་ཆེན་ཡངས་པ་རྒྱ་ཆད་ཕྱོགས་ལྷུང་དང་བྲལ་བའི་ནམ་མཁའ་ལྟ་བུ་ལ་འཕྱོ་བའམ་དགོངས་པའི་རྩལ་རྫོགས་ཀྱང་། རྣམ་འགྱུར་བརྟུལ་ཞུགས་སྤྱོད་པས་འགྲོ་བ་འདྲེན། ཞེས་འགྲོ་བའི་དོན་དུ་རྣམ་འགྱུར་མ་ངེས་སྣ་ཚོགས། བརྟུལ་ཞུགས་ཀྱི་སྤྱོད་པ་དང་རྫུ་འཕྲུལ་ཡ་མ་ཟུང་སྣ་ཚོགས་བསྟན་ནས་འགྲོ་བ་འདྲེན་པ། རྨད་བྱུང་རྡོ་རྗེ་སྙིང་པོའི་དགོངས་སྲོག་འཛིན། ཞེས་ཆེས་ཁྱད་པར་དུ་འཕགས་ཤིང་རྨད་དུ་བྱུང་བའི་གསང་ཆེན་རྡོ་རྗེ་སྙིང་པོའི་བསྟན་པའི་བཅུད་དམ་དགོངས་པའི་སྲོག་འཛིན་པ། ཐུགས་སྲས་རྗེ་འབངས་ཉེར་ལྔར་ཕྱག་འཚལ་བསྟོད། ཅེས་སྐུའི་སྲས་ལས་ཀྱང་མཆོག་ཏུ་འཕགས་པའི་ཐུགས་ཀྱི་སྲས་རྗེ་འབངས་ཉེར་ལྔར་ཕྱག་འཚལ་བསྟོད་ཅེས་གསུངས། དགོངས་པའི་སྲོག་ཇི་ལྟར་བཟུང་བ་རེད་ཅེ་ན། རྗེ་རྒྱལ་པོ་ཁྲི་སྲོང་ལྡེའུ་བཙན་གྱིས་རྒྱ་ཆོས་བོད་དུ་བསྒྱུར། སློབ་དཔོན་རྣམ་གཉིས་སྤྱན་དྲངས། མདོ་སྔགས་ཀྱི་ཆོས་བསྒྱུར། བོད་གངས་ཅན་གྱི་ལྗོངས་སུ་བསྟན་པ་དཀར་འཇམ་ཡུག་གཅིག་ཏུ་བརྡལ་བའི་བདག་རྐྱེན་མཛད་པ་རེད། འབངས་ལོ་ཆེན་བཻ་རོ་ཙ་ནས་ལོ་བརྒྱད་ལོན་ནས་ལོ་ཙཱ་བསླབས་ཏེ། བཅུ་གཉིས་ལོ་ནས་ལྔ་བཅུ་རྩ་བཞིའི་བར། ཞེས་ཁོང་རང་ཉིད་ཀྱིས་དཀའ་བ་སྤྱད་པའི་ལོ་རྒྱུས་གསུངས་ཡོད་པ་ལྟར་གསང་སྔགས་ཀྱི་ཆོས་བསྒྱུར། ལོ་ཙཱ་ཞེས་བརྗོད་ཀྱང་དོན་དུ་པཎྜི་ཏ་ཡིན་པའི་སྤྲུལ་བའི་སྐྱེས་ཆེན། བཅོམ་ལྡན་འོད་སྲུང་གི་དུས་སུ་ཀྲྀ་ཀྲྀའི་ཞབས་དང་། སངས་རྒྱས་ཤཱཀྱ་ཐུབ་པའི་སྐབས་སུ་ཀུན་དགའ་བོའི་ཚུལ་མཛད་པ། རྒྱ་ནག་གི་སློབ་དཔོན་ཚོས། བཻ་རོ་ཙ་ན་འདྲ་བའི་ལོ་ཙཱ་བ། །སྔར་ཡང་མ་བྱོན་ཕྱིས་ཀྱང་འབྱོན་རེ་ཀན། །ལོ་ཙཱ་ཞེས་བརྗོད་དོན་ལ་པཎྜི་ཏ། ཞེས་བསྔགས་བརྗོད་བྱ་ཡུལ་ཉིད་དང་། གྲོགས་མཁའ་འགྲོ་ཡེ་ཤེས་མཚོ་རྒྱལ་དེ་ཉིད་གུ་རུའི་གཟུང་མ། རྫོགས་ཆེན་མཁའ་འགྲོ་སྙིང་ཐིག་གི་ཆིག་བརྒྱུད་ཀྱི་བརྒྱུད་པ་གཏད་ཡུལ། ཕུར་པ་གྲུབ་པའི་རྣལ་འབྱོར་མ། རོ་ལང་གསེར་དུ་བསྒྱུར་བའི་རྫུ་འཕྲུལ་ཅན། དོན་དུ་དབྱིངས་ཕྱུག་བདེ་ཆེན་རྒྱལ་མོ། ད་ལྟ་ལྷོ་ནུབ་དཔལ་རིར་སྲིན་པོའི་རྒྱལ་མོ་མཐིང་འོད་འབར་མའི་སྐུར་དངོས་སུ་བཞུགས་ཡོད་ན། དེས་བསྟན་ཞབས་གཏེར་གྱིས་བསྡམས་པའི་བཀའ་དྲིན་གྱིས་ཉེ་བརྒྱུད་གཏེར་མ་ཟབ་མོ་དག་སྣང་དང་བཅས་པ་དེ་རིང་ཁར་སང་འཇིག་རྟེན་གྱི་ཁམས་སུ་བཞུགས་པ་མཁའ་འགྲོ་ཡེ་ཤེས་མཚོ་རྒྱལ་གྱི་བཀའ་དྲིན་ཡིན་པ་རེད། དེ་དང་འདྲ་བའི་སྐལ་ལྡན་སྙིང་གི་བུ་དགུ་སོགས་སྤྲུལ་པའི་རྗེ་འབངས་ཉེར་ལྔ་དང་། དེ་དག་གི་སྤྲུལ་པ་གཏེར་སྟོན་བརྒྱ་རྩ། ཡང་སྤྲུལ་གཏེར་ཕྲན་སྟོང་དང་རྩ་གཉིས་འདི་ཐམས་ཅད་ཀྱིས་རྨད་བྱུང་རྡོ་རྗེ་སྙིང་པོའི་དགོངས་སྲོག་དེ་ལྟར་བཟུང་བ་རེད། འདིས་གང་ཟག་སྙན་བརྒྱུད་བསྟན་པས་མ་ཚད་སྔ་འགྱུར་བརྒྱུད་པ་དྲུག་ལྡན་གྱི་ནང་གི་མཁའ་འགྲོ་གཏད་རྒྱའི་བརྒྱུད་པ་དང་། སྨོན་ལམ་དབང་བསྐུར་གྱི་བརྒྱུད་པ། ཤོག་སེར་ཚིག་གི་བརྒྱུད་པ་སོགས་བསྟན་པ་རེད། གཞན་ཡང་རིག་འཛིན་སྤྲུལ་པའི་དཀྱིལ་འཁོར་དུཿ དམ་ཚིག་ཐུགས་རྗེས་འཁོད་པའི་རྩ་གསུམ་ལྷཿ ཡེ་ཤེས་དབྱིངས་ལས་སྤྲུལ་པའི་ཕོ་ཉ་བཿ དཀྱིལ་འཁོར་ཡོངས་རྫོགས་ལྷ་ལ་ཕྱག་འཚལ་བསྟོདཿ ཅེས་གསུངས་ཏེ། གཞན་ཡང་རིག་འཛིན་སྤྲུལ་པའི་དཀྱིལ་འཁོར་དུ། ཞེས་གསུངས་ན། དེ་ལྟར་བརྒྱུད་གསུམ་བླ་མ་དཀྱིལ་འཁོར་གྱི་གཙོ་བོར་སྨྲོས་པ་དེ་ལས་གཞན་དུ་གྱུར་པ་ཡང་། རིག་འཛིན་སྤྲུལ་པའི་དཀྱིལ་འཁོར་གཙོ་བོ་གཅིག་གི་རྣམ་རོལ་ལས་མ་འདས་ཀྱང་། སྤྲུལ་བའི་རྣམ་རོལ་དུ་གཙོ་དང་འཁོར་དུ་སྣང་བ་རྣམས་གསུངས་པ་རེད། སྤྱིར་རིག་འཛིན་ཞེས་གསུངས་པའི་དོན་སྔར་ཡང་ཞུས་པ་ཡིན་མོད། རིག་པ་ཤེས་རབ་ཡེ་ཤེས་ཀྱི་བདག་ཉིད་ཅན་སྔགས་ཀྱི་དེ་ཁོ་ན་ཉིད་ཀྱི་དོན་རང་རྒྱུད་དུ་འཆང་ཞིང་ལྡན་པའི་ལམ་པའམ། མཐར་ལམ་ལྷུན་གྲུབ་རིག་འཛིན་གྱི་སར་གཤེགས་ནས་རྡོ་རྗེ་འཆང་གི་རྣམ་པར་བཞུགས་པ་དེར་གོ་ཆོག རིག་འཛིན་རྣམ་བཞིའི་ས་ལམ་བགྲོད་ཚུལ་ལ་བཀའ་སྡེ་ཟུར་པ་དང་ཀུན་མཁྱེན་ཆེན་པོའི་བཞེད་ཚུལ་ལ་ཅུང་ཟད་འདྲ་མིན་ཡོད་ཀྱང་། མཐར་ཐུག་གི་དགོངས་པའི་གནད་གཅིག་ཏུ་འབབ་པ་ཡིན། རང་ལུགས་ཀུན་མཁྱེན་ཆེན་པོའི་དགོངས་པ་ལྟར་ན། སྤང་རྟོགས་མཐར་ཕྱིན་ཏེ་མི་སློབ་པ་མངོན་དུ་མཛད་པ་ལ་ལྷུན་གྲུབ་རིག་འཛིན་ཞེས་གསུངས་པ་རེད། སྤྱིར་རིག་འཛིན་ཞེས་པའི་སྒྲ་ཙམ་ཞིག་འདོད་གཟུགས་ཀྱི་རིག་འཛིན་ལ་སོགས་པ་སྒྲ་འཇུག་ཡུལ་མང་ཡང་། སྒྲ་མཐུན་དོན་འཕགས་ཀྱི་ཁྱད་པར་ཆེན་པོ་ཡོད་པར་ཤེས་པའི་ཐོག་ནས། རིག་འཛིན་འདུས་པའི་དཀྱིལ་འཁོར་གྱི་གཙོ་འཁོར་ཐམས་ཅད་རིག་འཛིན་མ་ཧཱ་གུ་རུ་གཅིག་གི་རྣམ་རོལ་ཡིན་པ་གཞིར་བཞག་གིས། དམ་ཚིག་ཐུགས་རྗེས་འཁོད་པའི་ཞེས་གསུངས་པས། རྔ་ཡབ་དཔལ་རི་ན་རྒྱུད་ཐ་དད་པའི་འཁོར་ཡོད་མི་ཆོག་པ་མ་རེད་ཀྱང་། དཀྱིལ་འཁོར་བསྐྱེད་རིམ་གྱི་སྐབས་སུ། དམ་ཚིག་ཐུགས་རྗེས་འཁོད་པའི་རྩ་གསུམ་ལྷ། ཞེས་གསུངས་ན། དམ་ཚིག་གཉན་པོས་བཀའ་བསྒོས་པའི་བཀའ་སྡོད་ཀྱི་ཚུལ་ཅན་དང་། ཐུགས་རྗེའི་ནུས་པས་བྱིན་གྱིས་བརླབས་པའི་རིག་འཛིན་གྱི་འཁོར་ཚོགས། ཐམས་ཅད་ཀྱང་བྱིན་རླབས་ཀྱི་རྩ་བ་བླ་མ། དངོས་གྲུབ་ཀྱི་རྩ་བ་ཡི་དམ། འཕྲིན་ལས་ཀྱི་རྩ་བ་མཁའ་འགྲོ་སྟེ་རྩ་བ་གསུམ་གྱི་ལྷའི་ངོ་བོར་གཅིག་པའི། ཡེ་ཤེས་དབྱིངས་ལས་སྤྲུལ་པའི་ཕོ་ཉ་བ། དཀྱིལ་འཁོར་ཡོངས་རྫོགས་ལྷ་ལ་ཕྱག་འཚལ་བསྟོད། ཅེས་དེ་ཐམས་ཅད་ཡེ་ཤེས་ཀྱི་དབྱིངས་གཅིག་ལས་སྤྲུལ་པའི་རོལ་བར་ཤར་བ་ཡིན་པས་ན། ཕྱི་ཁྱམས་དཔལ་མགོན་བདུན་ཅུའི་ཚོགས་ལ་སོགས་པ་མདོར་ན་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པའི་ལྷ་ལ་ཕྱག་འཚལ་བསྟོད་ཅེས་གསུངས། ལྷ་ཞེས་པ་འདི་ལ་ཆོས་ཉིད་དོན་གྱི་ལྷ་དང་ཆོས་ཅན་རྟགས་ཀྱི་ལྷ་སྟེ་རྣམ་པ་གཉིས་སུ་དབྱེར་ཡོད་པ་ལས། འདི་རྣམ་པ་རྟགས་ཀྱི་ལྷ་དོན་ཆོས་ཉིད་ཡེ་ཤེས་ཀྱི་ལྷ་དང་གཉིས་སུ་མེད་པ་དེ་ཉིད་ལ་བསྟོད་ཅེས་གསུངས་པ་རེད། དེ་ཡན་ཆོད་ཀྱིས་དངོས་གཞིའི་ལས་རིམ་བདུན་ལས་དྲུག་སོང་ཟིན་ནས། བདུན་པ་འཛབ་དགོངས་གསལ་བ། བདུན་པ་འཛབ་དགོངས་གསལ་བ་ནིཿ ཞེས་གསུངས་ཏེ། འཛབ་གསུངས་པ་དེ་བཟླས་པའི་དོན་ཞིག་ལ་གོ་དགོས་པ་རེད། འཛབ་བམ་བཟླས་པ་བྱེད་པའི་སྐབས་སུ་ཏིང་འཛིན་གྱི་དགོངས་པའི་དམིགས་པ་གསལ་ཚུལ་ཇི་ལྟར་རེད་ཅེ་ན། ཐུགས་ཀར་པདྨ་ཉི་ཟླའི་སྟེངཿ ཧཱུྃ་ཡིག་མཐིང་གའི་མཐའ་སྐོར་དུཿ སྔགས་ཕྲེང་སྤུ་ཤད་ལྟ་བུས་བསྐོརཿ འོད་ཟེར་འཕྲོས་པས་སྣོད་བཅུད་སྦྱངསཿ རྣམ་དག་ལྷ་ཡི་དལ་དུ་བསྒོམཿ མ་གྲུབ་བར་དུ་མི་བཏང་ངོཿ ཞེས་གསུངས་ཏེ། སྤྱིར་བཟླས་པའམ་བསྙེན་པ་ཞེས་གསུངས་པ་འདི་ལ་གཞི་བསྙེན་དང་ལས་བསྙེན་གཉིས་ཡོད་པ་དང་། དེ་ལས་གཞི་བསྙེན་ལ་གྲངས་ཀྱི་བསྙེན་པ། དུས་ཀྱི་བསྙེན་པ། མཚན་མའི་བསྙེན་པ་སྟེ་གསུམ་ཡོད་པ་རེད། གྲངས་ཀྱི་བསྙེན་པ་ནི་འབྲུ་འབུམ་ལྟ་བུའི་ཁ་གྲངས་གསོག་རྒྱུ་དང་། དུས་ཀྱི་བསྙེན་པ་ནི་ཞག་བདུན་གསུམ་ཉེར་གཅིག་ལྟ་བུ་དང་། ཟླ་གྲངས་དང་ལོ་གྲངས། མི་ཚེའི་ཚད་ལ་སོགས་པའི་དུས་ཀྱི་ཚད་བཞག་པ་དང་། མཚན་མའི་བསྙེན་པ་ནི་ཡི་དམ་གྱི་ལྷ་འགྲུབ་པའི་རྟགས་དང་མཚན་མ་མཐོང་བའི་བར་དུ་བསྒྲུབ་རྒྱུ། དངོས་གྲུབ་ཐོབ་པའི་མཚན་མ་ཁྱད་པར་ཅན་མ་མཐོང་གི་བར་དུ་སྒྲུབ་མཚམས་མི་འཇོག་པ་དེ་དག་གཞི་བསྙེན་རེད། ལས་ཀྱི་བསྙེན་པ་ཞེས་པ་ནི་སྔར་བསྙེན་ཚད་སོང་ནས་གྲུབ་པའི་མཚན་མ་མཐོང་མཁན་ཞིག་ཡིན་རུང་སློབ་མ་ལ་དབང་བསྐུར་བ་ལ་སོགས་པ་ཞི་རྒྱས་དབང་དྲག་གི་ལས་རབ་འབྱམས་གང་སྒྲུབ་ཀྱི་སྐབས་སུ། སླར་ཡང་བསྙེན་པའི་ཁ་གསོ་ཞིག་བྱེད་པ་དེ་ཉིད་རེད། འདི་གཉིས་ཀ་གང་ཡིན་ཡང་རྒྱས་བསྡུས་ཀྱི་དབྱེ་བསྡུ་ལ་མ་ལྟོས་པར་བསྙེན་པ། ཉེ་བསྙེན། སྒྲུབ་པ། སྒྲུབ་ཆེན་ཏེ་བསྙེན་སྒྲུབ་ཡན་ལག་བཞི་ངེས་པར་དུ་ཚང་བའི་སྒོ་ནས་ཉམས་སུ་ལེན་དགོས་པ་རེད། དཔེར་ན་སྒྲུབ་པ་ཞག་བདུན་ལྟ་བུ་ལ་མཚོན་ན། སྒྲུབ་རྫས་ཡོ་བྱད་ཆ་ཚང་སྟ་གོན་བྱས་ཚར་ནས་ཞག་དང་པོའི་ཆོ་གའི་ལས་བྱང་ཚར་གཅིག་ཡན་ཆོད་བསྙེན་པ། དེའི་མཚམས་སུ་སྒྲུབ་པའི་ཞག་དུས་ཀྱི་བདུན་སྒྲུབ་ལྟ་བུ་ལ་མཚོན་ན་ཕྱེད་སྔ་མ་གསུམ་ལ་འོད་ཟེར་དཀར་པོའི་སྤྲོ་བསྡུ་སྡིག་སྒྲིབ་སྦྱོང་བའི་དམིགས་པ་གཙོ་བོར་བྱེད་པ་ཉེ་བསྙེན། དེའི་རྗེས་ཀྱི་ཞག་ཕྱེད་ཕྱི་མ་རྣམས་སུ་འོད་ཟེར་དམར་པོའི་སྤྲོ་བསྡུ་མཆོག་དང་ཐུན་མོང་གི་དངོས་གྲུབ་རང་ལ་སྡུད་པའི་དམིགས་པ་གཙོ་བོར་བྱེད་པ་སྒྲུབ་པ། ཞག་ཐ་མར་དངོས་གྲུབ་ལེན་པ་དེ་ཉིད་སྒྲུབ་ཆེན་དུ་སྦྱར་བ་དེ་འདྲ་ཡིན་གསུངས་ཡོད་པ་རེད། དེ་ལས་གཞན་ཆོ་ག་ཐུན་གཅིག་ལ་སྦྱར་ནའང་ཆོག་ཅིང་རིག་འཛིན་བཞིའི་ས་ལམ་བགྲོད་ཚུལ་ལ་སྦྱར་ནའང་ཆོག་པ་མ་ཟད། མི་གཅིག་གི་མི་ཚེའི་སྒྲུབ་པ་ལ་སྦྱར་ནའང་ཆོག་པ་རེད། བསྙེན་སྒྲུབ་ཡན་ལག་བཞིའི་སྤྱིར་བཏང་གི་འགྲོས་མཐའ་གཅིག་ཏུ་མ་ངེས་པ་དེ་འདྲ་ཡིན་པ་རེད། ཐབས་ལམ་པ་དག་གིས་བདེ་བ་ཆེན་པོའི་ཡེ་ཤེས་ལམ་དུ་བྱེད་པའི་དགའ་བཞིའི་འགྲོས་དང་བསྙེན་སྒྲུབ་ཡན་ལག་བཞིར་སྦྱར་ཚུལ་སོགས་མང་པོ་ཡོད་པ་རེད། ལས་གཞན་དག་གི་དོན་དུ་བདག་མདུན་བུམ་གསུམ་སོ་སོར་བསྐྱེད་ན་འཛབ་ཁང་དབྱེ་དགོས། འཛབ་ཁང་དབྱེ་བའི་ལུགས་ལྟར་བྱས་ན་འདི་ནས་བྷྲུྃ་བི་ཤ་བི་ཤུདྡྷེ་ལ་སོགས་པའི་སྔགས་ཚིག་དང་བསྟུན་ནས། དབྱེ་གཞི་བདག་བསྐྱེད་ལས་རང་འདྲ་གཉིས་པ་རྟེན་དང་བརྟེན་པར་བཅས་པ་མེ་རི་འདབ་འབྱར་གྱི་ཚུལ་དུ་བཞུགས་པ་ལོགས་སུ་ཕྱེས་ནས་བསྒོམ་རྒྱུ་དང་། བསྙེན་པའི་མཇུག་ཏུ་བདག་ཉིད་དཀྱིལ་འཁོར་བའི་ལྷ་དང་རང་བཞིན་དབྱེར་མེད་ཏུ་བསྒོམས་ནས། ཨོཾ་བཛྲ་སཱ་མ་ཡ་ཨོྃ་ལ་སོགས་པས་རིག་པའི་མེ་ཏོག་དོར་ནས་དོན་གྱི་དཀྱིལ་འཁོར་ཏུ་ཞུགས། བདག་དང་དཀྱིལ་འཁོར་པའི་སྐུ་གསུང་ཐུགས་ཡོན་ཏན་འཕྲིན་ལས་བཅས་གཉིས་སུ་མེད་པར་བསམ་པ་དང་། འཇུག་བྱའི་དཀྱིལ་འཁོར་གྱི་ལྷ་ཚོགས་དང་བདག་གི་སྐུ་གསུང་ཐུགས་ཡོན་ཏན་འཕྲིན་ལས་ཏེ་འབྲས་ཆོས་ལྔ་དང་དབྱེར་མེད་དུ་གྱུར་བར་བསམ་ནས། འུ་ཅག་གིས་དུས་རྒྱུན་འདོན་རྒྱུའི་ཨོཾ་ཡེ་ཤེས་རྒྱལ་པོ་སོགས་ཀྱིས་དངོས་གྲུབ་བསྐུལ། ཨོཾ་བཛྲ་སཱ་མ་ཡ་སོགས་ཀྱིས་དངོས་གྲུབ་བསྟིམ། སླར་ཡང་དབང་བསྐུར་རྒྱུའི་དོན་ལྟ་བུ་ཡིན་ན། ཨོཾ་རྡོ་རྗེ་ཡེ་ཤེས་སོགས་ཀྱིས་སློབ་བུ་དཀྱིལ་འཁོར་དུ་ཞུགས་ནས་དབང་བསྐུར་བར་གནང་བ་ཞུ་བ་དེ་འདྲ་ཡིན་པ་རེད། སྤྱིར་བཤད་ན་བདག་མདུན་ཐ་དད་འཇུག་པ་གཅིག་པ་ཞེས་པ་ཞིག་ཡོད་པ་རེད། བདག་བསྐྱེད་དང་མདུན་བསྐྱེད་གཉིས་དབྱེར་མེད་དུ་སྟོང་པར་སྦྱོང་བའི་ངང་ལས་བདག་མདུན་གཉིས་ཀ་མེ་ལོང་གཅིག་ལས་གཉིས་ཤར་གྱི་ཚུལ་དུ་ཆོ་ག་གཅིག་གིས་དུས་གཅིག་ལ་བསྐྱེད་པ་དེ་རེད། བདག་མདུན་ཐ་མི་དད་འཇུག་པ་གཅིག་པ་ཞེས་པ་ཞིག་ཡོད། དེ་ཐོག་མར་བདག་མདུན་གཉིས་ཀ་དབྱེར་མེད་སྟོང་པར་སྦྱོང་བའི་ངང་དེ་ལས། རྟེན་དང་བརྟེན་པའི་དཀྱིལ་འཁོར་ལོགས་སུ་གསལ་བཏབ་ནས་བསྟོད་པའི་མཇུག་གི་རྩ་སྔགས་ཏུ་ཕཊ་ཛ་བཏགས་པའི་རྐྱེན་གྱིས་དམ་ཚིག་གི་དཀྱིལ་འཁོར་ལས་ཡེ་ཤེས་ཀྱི་དཀྱིལ་འཁོར་ལོགས་སུ་ཕྱེ་བ་ད་ལྟ་གོང་དུ་བཤད་པ་ལྟར་རེད། དེ་གཉིས་ཀ་ཐ་དད་དང་ཐ་མི་དད་གསུངས་པ་ནི་རྣམ་པ་ཐ་དད་དང་ཐ་མི་དད་པ་ལ་གསུངས་པ་ལས། ངོ་བོ་ཐ་དད་དང་ཐ་མི་དད་པ་ལ་གསུངས་ནི་མ་རེད། གང་ལྟར་ཡང་ངོ་བོ་དབྱེར་མེད་དུ་བསྒོམ་དགོས། འཇུག་པ་གཅིག་ཅེས་གསུངས་པ་ནི་ཆོ་ག་གཅིག་གིས་བསྐྱེད་པ་ལ་གསུངས་པ་རེད། གཞན་བདག་མདུན་ཐ་དད་འཇུག་པ་ཐ་དད་པ་ཞིག་ཀྱང་ཡོད། དེ་ནི་ཐོག་མར་བདག་བསྐྱེད་ཀྱི་ཆོ་ག་ཆ་ཚང་ཞིག་བཏོན་ནས། དེའི་རྗེས་སུ་སླར་ཡང་མདུན་བསྐྱེད་ཀྱི་ཆོ་ག་ཆ་ཚང་ཞིག་འགོ་ནས་ཚར་གཅིག་བཏོན་ཏེ་བསྐྱར་ནས་བསྒོམ་པ་དེ་ལ་བདག་མདུན་ཐ་དད་འཇུག་པ་ཐ་དད་ཅེས་གསུངས་པ་རེད། གང་ལྟར་ཡང་མདོར་ན་འཛབ་དགོངས་འདི་ལ་ཐུགས་འོད་གསལ་རྫོགས་རིམ་གྱི་རྣལ་འབྱོར། སྐུ་བསྐྱེད་རིམ་ཕྱག་རྒྱའི་རྣལ་འབྱོར། གསུང་བཟླས་པ་སྔགས་ཀྱི་རྣལ་འབྱོར་ཏེ་རྣལ་འབྱོར་གསུམ་དང་མ་བྲལ་བའི་ངང་ནས། འདི་ནས་བསྙེན་རྐྱང་གྱི་དབང་དུ་བྱས་ཚེ། ཐུགས་ཀར་པདྨ་ཉི་ཟླའི་སྟེང་ཞེས་གསུངས་ན། བདག་དམ་ཚིག་པ་དང་སྤྱན་དྲངས་བའི་སེམས་དཔའ་གཉིས་མེད་ཀྱི་ཐུགས་ཀར། མ་ཆགས་པདྨ་དང་ཐབས་ཤེས་ཉི་མའི་གདན་གྱི་སྟེང་དུ། ཧཱུྃ་ཡིག་མཐིང་གའི་མཐའ་སྐོར་དུ་ཞེས་ཐུགས་སྲོག་གི་སྙིང་པོ་ཧཱུྃ་ཡིག་མཐིང་ག ཧཱུྃ་ཡིག་དེ་ཡང་ཞལ་མདུན་ཕྱོགས་སུ་འཁོར་ཡོད་པ་ཞིག་བསྒོམ་དགོས། དེའི་མཐའ་སྐོར་དུ། སྔགས་ཕྲེང་སྤུ་ཤད་ལྟ་བུས་བསྐོར། ཞེས་གསུངས་ན། སྔགས་ཕྲེང་སྤུ་རྩེས་བྲིས་པའི་སྤུ་ཤད་ལྟ་བུའི་ཕྲ་ལ་གསལ་བ། ཡིག་འབྲུ་རྣམས་ཀྱི་དབུ་གྱེན་དུ་བསྟན་པ་ཞིག་བསྒོམས་ནས། འོད་ཟེར་འཕྲོས་པས་སྣོད་བཅུད་སྦྱངས་ཞེས་སྔགས་ཕྲེང་དེ་ལས་འོད་ཟེར་འཕྲོས་ནས་མ་དག་པའི་སྣོད་བཅུད་ཐམས་ཅད་སྦྱངས་ཏེ། རྣམ་དག་ལྷ་ཡི་དལ་དུ་བསྒོམ་ཞེས་ཐམས་ཅད་རྣམ་པར་དག་པ་ལྷ་ཡི་དལ་ལམ་ལྷ་ཡི་དཀྱིལ་འཁོར་དུ་གྱུར་བར་བསྒོམ། དེ་ལྟ་བུའི་ལྷ་བསྒོམ་པ། སྔགས་བཟླ་བ། ཏིང་འཛིན་གསལ་འདེབས་པ་དང་བཅས་པས། མ་གྲུབ་བར་དུ་མི་བཏང་ངོ། ཞེས་མཆོག་དང་ཐུན་མོང་གི་དངོས་གྲུབ་མ་ཐོབ་ཀྱི་བར་དུ་ལས་འདི་ལ་ཞུགས་ནས་ཕྱི་བཤོལ་ལེ་ལོ། གཉིད་དང་འགྱོད་པ་སོགས་ཀྱི་གཞན་དབང་དུ་མི་བཏང་ངོ་ཞེས་དམ་བཅའ་ལེན་པ་རེད། ཐད་ཀར་ཚིག་འགྲེལ་ལྟ་བུ་བྱས་ན་དེ་འདྲ་ཞིག་མ་རེད་དམ། དེ་ཡང་བསྙེན་པ་དངོས་ནི། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃཿ ཞེས་གསུངས། ཨོཾ་ཨཱཿཧཱུྃ་ནི་གོང་དུ་ཞུས་པ་ལྟར་སྐུ་གསུམ་གྱི་ས་བོན། བཛྲ་རྡོ་རྗེ་སྟེ་ཆོས་སྐུ་འགྱུར་བ་མེད་པའི་དོན། གུ་རུ་བླ་མ་སྟེ་ལོངས་སྐུ་ཡོན་ཏན་རྒྱ་མཚོའི་མངའ་བདག པདྨ་མ་ཆགས་པདྨའི་རིགས་ཀྱི་སྤྲུལ་སྐུ་པདྨ་འབྱུང་གནས་སམ་ཨོ་རྒྱན་པད་འབྱུང་། སིདྡྷི་ནི་དངོས་གྲུབ། མཇུག་གི་ཧཱུྃ་གིས་དེ་ལྟ་བུའི་སྐུ་གསུམ་རྩ་གསུམ་མཆོག་གསུམ་ཀུན་འདུས་པའི་དངོས་གྲུབ་དང་བྱིན་རླབས་ཐམས་ཅད་བདག་ལ་སྩོལ་ཅིག་ཅེས་པའི་དོན་ཏེ། ཚིག་ཉུང་ངུས་གོ་སླ་མོར་བྱས་ནས་བཤད་ན་དེ་ལྟར་རེད་མོད། འོན་ཀྱང་། འོ། སྔགས་འདི་དག་གི་དོན་ནི་དེ་འདྲ་ཙམ་དུ་ཟད། སྐད་ཆ་བཤད་པའི་ཚུལ་ཙམ་མ་ཡིན་ནམ། བོད་སྐད་བྱས་ན་ང་ལ་དངོས་གྲུབ་ཞིག་བྱིན་ཟེར་བ་དང་གཅིག་མཚུངས་རེད། དེས་ན་དེ་ལྟར་བརྗོད་ཀྱང་ཆོག་པ་མ་ཡིན་ནམ་སྙམ་ན། འདིའི་དོན་འུ་ཅག་སོ་སྐྱེ་བྱིས་པའི་རྟོག་ཚོགས་དང་བསྟུན་ཏེ་བརྡ་འཕྲོད་ཚོད་ཀྱི་ཕྱོགས་ཙམ་ཞིག་བཤད་པ་ལས། འདིའི་སྔགས་ཀྱི་ཡིག་འབྲུ་རེ་རེའི་དོན་གསང་ཆེན་རྡོ་རྗེ་ཐེག་པའི་གཞི་ལམ་འབྲས་གསུམ་དང་སྦྱར་ནས་བཤད་ན་ཅི་འདྲའི་རྒྱ་ཞིག་མི་ཆེའམ། དེ་འདྲ་ཞིག་མིན་ཚེ་འུ་ཅག་གི་མ་ཎི་ཡིག་དྲུག་གི་ནང་དུ་ཆོས་ཕུང་བརྒྱད་ཁྲི་བཞི་སྟོང་གི་སྙིང་དོན་འདུས་ཞེས་བརྗོད་ཀྱང་ཇི་ལྟར་འདུས་པ་ཡིན། འདིའི་ཨོཾ་ཨ་ཧཱུྃ་ཞེས་པའི་སྔགས་ཡིག་འབྲུ་རྡོག་མ་འདི་དག་ལ་མཚོན་ན། གཟུངས་སྔགས། རིག་སྔགས། གསང་སྔགས་ཚང་མ་འདུས་པའི་སྙིང་པོ་ཡིན་པ་རེད། གྲུབ་པ་བཞི་ལྡན་སྔགས་ཀྱི་ཁྱད་ཆོས་ཚང་བའི་རྡོ་རྗེའི་ཚིག་རེད། དེ་ཡང་གཟུངས་སྔགས་རིག་སྔགས་གསང་སྔགས་འདི་དག་འགྲེལ་ཚུལ་མང་ཡང་། ཕྱོགས་ཙམ་བཤད་ན། རྒྱུ་གཟུངས་ཐོབ་པ་ལས་སྔགས་སུ་བྱིན་གྱིས་བརླབས་པ་ལ་གཟུངས་སྔགས་དང་། ངོ་བོ་རིག་པ་ཡེ་ཤེས་ཀྱི་བདག་ཉིད་ཅན་ཡིན་པས་ན་རིག་སྔགས་ཅེས་དང་། ཐབས་གསང་བའི་སྒོ་ནས་བཟླ་བར་བྱ་བ་ཡིན་པས་ན་གསང་སྔགས་ཞེས་གསུངས་པ་རེད། འདིའི་ངོ་བོ་གྲུབ་པ་བཞི་ལྡན་ཡིན་ཚུལ་ནི། ཆོས་ཉིད་ངོ་བོས་གྲུབ་པ་དང་གཅིག ཆོས་ཅན་རང་བཞིན་གྱིས་གྲུབ་པ་དང་གཉིས། བྱིན་གྱིས་བརླབས་ཀྱིས་གྲུབ་པ་དང་གསུམ། ནུས་པ་མཐུ་ཡིས་གྲུབ་པ་དང་བཞི་ཚང་བ་རེད། དེ་དག་ཇི་ལྟར་ཚང་བ་རེད་ཅེ་ན། སྔགས་ཡི་གེ་ལས་གྲུབ་པ་ཡིན་ཞིང་། ཡི་གེ་ཐམས་ཅད་སྟོང་པ་ཆེན་པོ་ཆོས་དབྱིངས་མཉམ་པ་ཉིད་ཀྱི་ངོ་བོར་ཡེ་ནས་གྲུབ་པ་ཡིན་པས་ན་ཆོས་ཉིད་ངོ་བོས་གྲུབ་པ་དང་། ཐུན་མིན་སྔགས་ཀྱི་ནུས་པ་དེ་ཐོགས་མེད་དུ་འབྱུང་རུང་དུ་ཡོད་པ་དེ་ཉིད་ཆོས་ཅན་རང་བཞིན་གྱིས་གྲུབ་པ། སངས་རྒྱས་ཀྱི་ཡེ་ཤེས་སྔགས་སུ་ཤར་བ་ཡིན་པས་ན་བྱིན་གྱིས་བརླབས་ཀྱིས་གྲུབ་པ་དང་། སྔགས་འདི་ཉིད་སྨན་དང་ནོར་བུ་སོགས་དང་འདྲ་བར་ནུས་པ་ཐོགས་མེད་དུ་ཡོད་པ་མི་བསླུ་བ་ཡིན་པས་ན་ནུས་པ་མཐུ་ཡིས་གྲུབ་པ་བཅས་རེད། དེ་ལྟར་གསུངས་པའི་སྔགས་དང་ཕྱག་རྒྱ་ལ་ཡིད་མི་ཆེས་ཞེས་བརྗོད་པ་མིན་ཡང་། དག་སྣང་གིས་དེ་ཙམ་མ་འདང་བ་རང་གཞན་གཉིས་ཀའི་ནང་དུ་ཡོད་སྲིད། སྤྱིར་རིགས་པ་སྨྲ་བ་ཞིག་ལ་མཚོན་ན། དང་པོའི་སྐབས་སུ་དོན་གང་ལའང་ཐེ་ཚོམ་ཞིག་འབྱུང་སྲིད་པ་རེད། དེ་ལ་ལོག་ལྟ་ཟེར་བ་མ་རེད། དེ་དཔྱད་པ་རྣོན་པོའི་སྔོན་རྟགས་ཡིན་པ་རེད། ཐེ་ཚོམ་དེ་ལ་དྲི་བ་ཞིག་འབྱུང་རྒྱུ་དང་། དྲི་བ་དེ་ལ་ལན་ཞིག་རྙེད་རྒྱུ་ཆོས་ཉིད་ཡིན་པ་རེད། དེའི་ཐོག་ནས་གོ་བ་ངེས་ཤེས་ཤིག་འཁྲུངས་ནས་ཡིད་ཆེས་ཀྱི་དད་པ་སྐྱེ་བ་སྟེ། དབང་རྣོན་ཆོས་རྗེས་སུ་འབྲང་བའི་ངེས་པ་དེ་ལྟར་བྱས་ནས་རྙེད་དགོས། དེའི་རྗེས་སུ་སླར་ཡང་ཐེ་ཚོམ་བྱས་ན་ལོག་ལྟའི་ཕྱོགས་སུ་འགྲོ་གྲབ་རེད། དེས་ན་སྔགས་དང་ཕྱག་རྒྱ་འདི་གཉིས་ཀ་བརྟགས་པ་རྣམ་པ་དྲུག་གིས་བརྟགས་ནས་གཏན་ལ་ཕབ་དགོས་ཞེས་གཞུང་གི་ནང་དུ་གསུངས་ཡོད། བརྟགས་པ་རྣམ་པ་དྲུག་གིས་ཇི་ལྟར་བརྟགས་དགོས་པ་རེད་སྙམ་ན། དེ་ཡང་འགའ་ཞིག་གི་སེམས་སུ་སྔགས་ཟེར་བ་ཁ་ནས་བཏོན་པའི་སྒྲ་སྐད་ཕལ་བ་ཙམ་ཞིག་དང་། ཕྱག་རྒྱ་ཟེར་བ་ལུས་ཀྱི་སྟངས་སྟབས་ཙམ་ཞིག་རེད་སྙམ་པ་འདིས་ཀྱང་སྔགས་ཕྱག་རྒྱ་ཞེས་པ་དེ་ཅི་འདྲ་ཞིག་རེད་སྙམ་ནས་བརྟགས་པ་ཞིག་བྱས་པ་རེད། དེ་བརྟགས་པ་དང་པོ་རེད། གང་ཟག་གཉིས་པས་བརྟགས་པ་གཉིས་པ་བྱས་ཚེ། སྔགས་དང་ཕྱག་རྒྱ་ཁ་དང་ལག་པའི་བྱེད་པ་ཞིག་རེད་ཀྱང་། དེ་ཉིད་རང་ག་བ་ཞིག་དང་འདྲ་བར་མི་འདུག རྒྱལ་བའི་སྐུ་གསུང་ཐུགས་ཀྱི་མཚོན་རྟགས་རེད་འདུག བརྡ་བྱས་ན་གོ་བརྡ་འཕྲོད་པ་དང་མིང་ནས་བོས་ཚེ་ཕ་རོལ་པོས་གོ་བ་ལྟ་བུའི་ཕྱོགས་མཚུངས་ཀྱི་ནུས་པ་ཐོན་པ་ཞིག་ཏུ་སྙམ། གང་ཟག་གསུམ་པ་དེས། སྔགས་དང་ཕྱག་རྒྱའི་མཚན་མ་སྣ་ཚོགས་ལ་བརྟེན་ནས་ལས་དང་ཡེ་ཤེས་ཀྱི་དངོས་གྲུབ་ཐོབ་པའི་ནུས་པ་འདི་རྟེན་འབྲེལ་བསླུ་མེད་ཀྱི་དབང་ལས་བྱུང་བ་ཞིག་རེད་འདུག་བསམ། གང་ཟག་བཞི་བ་དེས། སྔགས་དང་ཕྱག་རྒྱ་འདི་དག་ལས་ཀྱིས་སྣང་བའི་ལུས་ངག་གི་བཟླས་པ་ཞིག་རེད། འོན་ཀྱང་སྣང་བ་དེ་དག་སངས་རྒྱས་ཀྱི་བྱིན་རླབས་ཀྱི་སྟོབས་ཀྱིས་ཡོང་བ་ཞིག་རེད་འདུག དེ་བཞིན་གཤེགས་པའི་བྱིན་རླབས་ཀྱི་རྣམ་འཕྲུལ་དང་རང་གི་སྣང་བ་འདྲེས་ནས་སྣང་བ་ཞིག་རེད་བསམ། གང་ཟག་ལྔ་པས་བསམ་པར། ཆུ་སྣོད་ཀྱི་ནང་དུ་ཟླ་གཟུགས་སྣང་བའི་སྐབས་སུ། གཟུགས་བརྙན་ཆུ་ནང་དུ་ཡོད་པ་ཡིན་ཡང་། སྣང་གཞི་ནམ་མཁའི་ཟླ་བ་སྣང་བ་རེད། དངོས་ལ་ཡོད་པ་ཇི་བཞིན་སྣང་བ་མ་གཏོགས་དེ་ལས་གཞན་ཞིག་སྣང་བ་མ་རེད། དེ་བཞིན་གཤེགས་པའི་བྱིན་རླབས་ཀྱི་མཐུ་ཡིས་གྲུབ་པའི་ནུས་པ་ཅན་གྱི་སྔགས་དང་ཕྱག་རྒྱ་འདི་དག དམ་ཚིག་ཅན་གྱི་གང་ཟག་གིས་ལྷ་དངོས་ཡིན་པར་བསམ་ནས་བསྒྲུབས་པ་བྱས་ཚེ། ཞེན་པས་གང་ལ་ཞུགས་ན་དེའི་དོན་དང་འབྲེལ་ནས་ཡོད་པ་ཡིན་པས། དཔེར་ན་དོན་སྤྱི་ལ་ཡུལ་དུ་ཞེན་པས་དོན་རང་མཚན་ཐོབ་ཏུ་ཡོད་པ་ལྟར། སྔགས་དང་ཕྱག་རྒྱའི་མཚན་མ་འདི་དག་བརྒྱུད་ནས་ལྷ་འགྲུབ་ཏུ་ཡོད་པ་རེད་སྙམ། བརྟགས་པ་དྲུག་པ་དེས་དཔྱད་པ་ཡོངས་སུ་རྫོགས་སྟེ། རྒྱལ་བ་ཐམས་ཅད་ཀྱི་སྐུ་མཐར་ཐུག་པའི་རྣམ་མཁྱེན་གྱི་ཡེ་ཤེས་དེ་ཉིད་ཐུགས་རྗེ་དང་སྨོན་ལམ་གྱི་དབང་གིས་སྔགས་དང་ཕྱག་རྒྱའི་མཚན་མར་བྱིན་གྱིས་བརླབས་ནས་སྣང་བ་ཞིག་རེད། དཔེར་ན་བག་ཆགས་ཀྱི་དབང་གིས་སེམས་ཉིད་ལུས་དང་ཡུལ་དུ་སྣང་བ་ཇི་བཞིན། དོན་དུ་སྔགས་དང་ཕྱག་རྒྱ་ནི་ཡེ་ཤེས་ཀྱི་སྐུ་བརྙེས་པའི་ལྷ་དང་ཁྱད་པར་མེད་པ་སྔགས་དང་ཕྱག་རྒྱ་ལྷའི་ངོ་བོ་ཡིན་པར་ཤེས་པ་རེད། དེ་ལྟར་བརྟགས་པ་དྲུག་གི་རིམ་པ་བརྒྱུད་ནས་གང་ཟག་གཅིག་ཡིན་རུང་རང་གི་བློའི་ནུས་མཐུ་དང་བསྟུན་ནས་རིམ་པས་ངེས་ཤེས་རྙེད་དགོས་པ་རེད། བརྟགས་པའི་རིམ་པ་དྲུག་པོ་འདི་དག་སྔ་མ་སྔ་མ་ལས་ཕྱི་མ་ཕྱི་མ་ཁྱད་དུ་འཕགས་པ་དང་། མཆོག་ཏུ་གྱུར་པ་དེ་ཉིད་ཆེས་རྗེས་མའི་དྲུག་པ་རེད། སྔགས་དང་ཏིང་འཛིན་འདི་དག་དེ་འདྲ་ཞིག་ཡིན་ནམ་མིན། འབྲས་བུ་འབྱུང་ངམ་མི་འབྱུང་སྙམ་པའི་ཐེ་ཚོམ་དང་ཡིད་གཉིས་མེད་པར་བརྟགས་ཤིང་དཔྱད་པ་སྔོན་དུ་འགྲོ་བ་བརྒྱུད། དེ་ལྟར་ཡིན་ངེས་རེད་སྙམ་པའི་གཏིང་ཚུགས་པའི་བློས་སྒྲུབ་པ་བྱས་ན། གང་བསྒྲུབ་ཀྱི་དཀྱིལ་འཁོར་ཐམས་ཅད་འགྲུབ་པར་ཐེ་ཚོམ་མི་དགོས་པ་རེད། དེས་ན་ལྷ་ཉེ་བར་སྒྲུབ་པའི་སྒོ་གསང་སྔགས་ཡིན་པས་མ་ཚད། ལྷ་སྔགས་ཏིང་འཛིན་དབྱེར་མེད་ཀྱི་ངང་ལས་ཇི་ལྟར་འདི་ནས་ཡིག་ཆུང་དུ། བསྙེན་པ་ཆུ་བོའི་གཞུང་བཞིན་བསྐྱལཿ ཞེས་གསུངས་པ་ལྟར། བསྙེན་པ་བཟླ་བའི་སྐབས་སུ་ཆུ་བོའི་གཞུང་ཆད་མེད་དུ་ཉིན་མཚན་རྒྱུན་པར་བཞུར་བ་བཞིན་བཟླས་པའི་རྒྱུན་མ་བཅད་གསུངས་པ་རེད། ཚོམ་བུ་ཚོགས་སྒྲུབ་ཀྱི་སྐབས་སུ་བསྙེན་རྒྱུན་བཟུང་དགོས་པའི་རྒྱུ་མཚན་དེ་ཡིས་རེད། འོ་ན་འུ་ཅག་གིས་ད་རེས་མི་དགོས་པ་ཅི་རེད་སྙམ་ན། སྤྱིར་སྔགས་འདི་ལ་བཟླ་ལུགས་དྲུག་ཏུ་གསུངས་ཡོད། ཕྱི་མདོ་སྡེ་ལྟར་གཞན་དོན་དུ་བཟླ་བ། ནང་གསང་སྔགས་ལྟར་བསྙེན་སྒྲུབ་ཏུ་བཟླ་བ། གསང་བ་མཁའ་འགྲོ་མའི་བྱིན་རླབས་བརྡ་ཡི་ཚུལ་དུ་བཟླ་བ། སྒྲིབ་སྦྱོང་ཆོས་སྤྱོད་ཀྱི་ཚུལ་དུ་བཟླ་བ། རྡོ་རྗེའི་བཟླས་པས་བཟླ་བ། མཉམ་བཞག་བསམ་གཏན་གྱི་ཚུལ་དུ་བཟླ་བ་སྟེ་དྲུག་ཡོད་པར་གསུངས་པ་ལས། འདི་ཉིད་ནང་གསང་སྔགས་ལྟར་བསྙེན་སྒྲུབ་ཏུ་བཟླ་བའི་ཚུལ་ཡིན་པ་ལ། སྤོང་བ་བསམ་གཏན་པ་རྫོགས་ཆེན་བསྒོམ་པའི་རྣལ་འབྱོར་པས་མཉམ་བཞག་བསམ་གཏན་གྱི་བཟླས་པ་ཡིན་པའི་དབང་དུ་བྱས་ཏེ། ཉིན་མཚན་ཆུ་བོ་རྒྱུན་གྱི་རྣལ་འབྱོར་སྣང་ཤེས་ཐ་མལ་གྱི་འཁྲུལ་རྟོག་མཉམ་རྗེས་གཉིས་ཀར་དབེན་ཞིང་། ཁྲེགས་ཆོད་ཐོད་རྒལ་ཟུང་འབྲེལ་གྱི་ཉམས་ལེན་དང་། ཁྱད་པར་དུ་མཚན་མོའི་འོད་གསལ་གྱི་རྣལ་འབྱོར་ཉམས་ལེན་བྱེད་པ་དང་བསྟུན་ནས་བསྙེན་རྒྱུན་ཟུར་དུ་མ་དགོས་པར་བྱས། རེས་འགའ་ཧཱུྃ་གི་སྣང་གླུ་ལེནཿ ཞེས་གསུངས་ན། སྐབས་རེས་འགར་རྣལ་འབྱོར་ཉམས་དང་རྟོགས་པ་འཕེལ་བའི་ཆེད་དུ་ཧཱུྃ་གི་སྣང་གླུ་ལོངས་དང་ཐ་མལ་པའི་སྣང་བ་གཏད་མེད་དུ་ཞིག འཁྲུལ་བ་ཐད་ཀར་ཆོད་པའི་དགོས་པ་ཡོད་གསུངས་པ་རེད། དེ་ཡང་ཇི་སྐད་དུ། ཟང་མ་ཐལ་བྱུང་རིག་པའི་རྣམ་རོལ་བཞིན། །ཆོས་ཅན་སྣང་བ་དུམ་བུར་གཞིག་པའི་མཚོན། །དྲག་པོའི་ཧཱུྃ་སྒྲས་གནམ་ས་འགེང་བ་ཡང་། །དབེན་པའི་གནས་སུ་ཐོགས་པ་མེད་པར་སྒྲོག ཅེས་རང་རེའི་རུ་ཤན་དང་འབྲེལ་བའི་དབེན་གནས་ཀྱི་སྔགས་བརྗོད་ཀྱི་ནང་དུ་དེ་འདྲ་གསུངས་ཡོད་པ་མ་ཡིན་ནམ། དེ་ལྟར་གསུངས་པ་བཞིན་རེས་འགའ་ཧཱུྃ་གི་སྣང་གླུ་བླངས་ན་ཟང་ཐལ་རིག་པའི་རྩལ་སྦྱོང་དུ་འགྲོ། ཤེས་པ་གཏད་མེད་ངང་ལ་བཏངཿ ཞེས་གསུངས་ན། བཟླས་པ་བྱེད་པའི་སྐབས་སུ་རང་བབས་སུ་བཞག་པ་དང་རང་ངོ་ཤེས་པའི་གནད་དང་མི་འབྲལ་བར་ཁྲེགས་ཆོད་ཡེ་བབས་སོར་བཞག ཀ་དག་རིག་པའི་ངོ་བོ་གཟའ་གཏད་མེད་པ་མ་བཅོས་སྟོང་གསལ་སྤྲོས་པ་དང་བྲལ་བའི་ངང་ལ་བཞག་ནས། དེ་ཡང་ཀུན་མཁྱེན་ཆེན་པོས། འདིར་གཏད་མེད་པའི་སྣང་བ་རྗེས་མེད་ཡལ། ཞེས་གསུངས་པ་ལྟར་ཤེས་པ་གཏད་མེད་དུ་ཐོངས་ཞེས་གསུངས་པ་རེད། རྗེས་ཐོབ་ལུ་གུ་རྒྱུད་ལ་གཟིརཿ ཞེས་གསུངས་ན། མཉམ་བཞག་ལས་ལྡང་པའི་རྗེས་ཐོབ་བམ། ཐུན་ལས་གྲོལ་བའི་ཐུན་མཚམས་སུ། བཞུགས་སྟངས་གསུམ་དང་གཟིགས་སྟངས་རྣམ་གསུམ་གྱིས་སྒོ་རྒྱང་ཞགས་ཆུ་ཡི་སྒྲོན་མ་བརྒྱུད་ནས་དབྱིངས་རྣམ་དག་སྒྲོན་མའི་ཞིང་ཁམས་སུ། ཐིག་ལེ་སྟོང་བའི་སྒྲོན་མའི་ཕོ་བྲང་གི་ནང་དུ་རིག་གདངས་ཕྱི་རུ་ཤར་བའི་སྣང་ཆ་རྡོ་རྗེ་ལུ་གུ་རྒྱུད་ཀྱི་སྐུ་ལ་གཟིར་བའམ། ལུགས་རྒྱུད་བཙོན་དུ་བཟུང་ནས་རྫོགས་ཆེན་མན་ངག་སྡེའི་སྣང་བཞི་བགྲོད་པའི་མྱུར་ལམ་གྱི་རྩལ་སྦྱང་བའི་ཉམས་ལེན་གྱི་གནད་དང་མ་བྲལ་ཞེས་གསུངས། སྤྱིར་སྐུ་བསྒོམ་པ་འདི་བསྐྱེད་རིམ་གྱི་མདོ་ཆིངས་དང་། རིག་པའི་ངོ་བོ་བསྒོམ་པ་རྫོགས་རིམ་གྱི་སྤྱི་ཆིངས་ཡིན་པ་རེད། བསྐྱེད་རིམ་བསྒོམ་དུས་བློས་བྱས་ཀུན་རྟོག་གི་བསྐྱེད་རིམ་རྐྱང་པ་ཞིག་ཏུ་གྱུར་མི་རུང་། བསྐྱེད་རྫོགས་དབྱེར་མེད་དུ་བློ་སྦྱང་དགོས། ལྷ་དང་དཀྱིལ་འཁོར་སྔགས་དང་འོད་ཟེར་སྤྲོ་བསྡུ་ལ་སོགས་པ་ཐམས་ཅད་ཀྱང་དོན་དུ་བསྒོམ་བྱ་སྒོམ་མཁན་ཚང་མ་སེམས་ལ་ཐུག་པ་ཡིན་ཞིང་། སེམས་ཀྱི་ངོ་བོ་སྟོང་པར་རིག་པ་རྫོགས་རིམ་དང་། གསལ་ཆ་ལྷ་རུ་སྣང་བ་བསྐྱེད་རིམ་ཡིན་པ་རེད། དེ་གཉིས་ཀ་གཅིག་ཏུ་ཚང་བ་བསྐྱེད་རྫོགས་དབྱེར་མེད་རེད། དེ་ལྟ་མིན་པར། གཞན་དུ་གཡེང་བའི་སེམས་ཀྱིས་ནི། །བསྐལ་པར་བཟླས་ཀྱང་འབྲས་མི་འབྱིན། ཞེས་གསུངས། འདི་ཉིད་བསྒྲུབས་པའི་རྣལ་འབྱོར་ལཿ ཞེས་གསུངས་ན། མཉམ་བཞག་གི་སྐབས་སུ་ས་གཞིའི་ཆུ་ཕྲན་ཐམས་ཅད་རྒྱ་མཚོའི་ཀློང་དུ་ཐིམ་པ་ལྟར། ཆོས་ཅན་གྱི་སྣང་བ་ཐམས་ཅད་རིག་སྟོང་གི་ཀློང་དུ་མ་སྤངས་ཡེ་གྲོལ་དུ་གཟིགས་པ་རེད། གནད་དེ་ཤེས་ན་ཆུ་བརྒྱ་ཟམ་འོག་གཅིག་ཏུ་འདུས་པ་ལྟ་བུ་ཡིན་པ་རེད། མཉམ་བཞག་དེ་ལས་ལངས་པའི་རྗེས་ཐོབ་ཀྱི་སྐབས་སུ་དཔེར་ན་རྒྱ་མཚོའི་ཀློང་ནས་ཆུ་ཕྲན་ཐམས་ཅད་མཆེད་པ་ལྟར། རིག་སྟོང་ཟུང་འཇུག་གི་ངང་ལས་རིག་རྩལ་བདག་མེད་རྟོགས་པའི་ཤེས་རབ་ཀྱིས་ཆོས་ཅན་དངོས་པོར་སྣང་བ་ཐམས་ཅད་ཀྱི་མཚང་དང་མཚན་ཉིད་ཤེས་ནས་གནས་ལུགས་ཇི་བཞིན་པ་རྟོགས་པ་ཡིན་པ་རེད། དེ་ལྟ་བུའི་ཉམས་ལེན་གྱི་གནད་དང་མ་བྲལ་བའི་ཐོག་ནས། བསྙེན་སྒྲུབ་འདི་ཉིད་དེ་ལྟར་ཚུལ་བཞིན་སྒྲུབ་པའི་རྣལ་འབྱོར་པ་ལ། རིག་འཛིན་རྒྱ་མཚོས་བྱིན་གྱིས་བརླབཿ མ་དང་ཌཱཀྐིས་ལུང་ཡང་བསྟནཿ ཕྱི་མ་རྔ་ཡབ་དཔལ་གྱི་རིརཿ ཐེ་ཚོམ་མེད་དོ་ས་མ་ཡཿ ཞེས་གསུངས། དེ་ཡང་གུ་རུ་རིན་པོ་ཆེས། ཤ་མེད་འོད་ཀྱི་གཟུགས་ཅན་ནི། །པདྨ་འབྱུང་གནས་སྐུ་རུ་བསྒོམ། །དེ་དུས་ཆེ་བའི་ང་རྒྱལ་གྱིས། །སྲོག་གི་སྙིང་པོ་ཐོད་ཕྲེང་རྩལ། །བྲག་ཀ་ཐོག་ནས་ཆུ་འབབ་བཞིན། །དྲག་པོ་བར་མཚམས་མེད་པར་བགྲངས། །ང་ཉིད་དེ་ཡི་དྲུང་དུ་འོང་། ཞེས་གསུངས་པ་ལྟར། རིག་འཛིན་རྒྱ་མཚོས་བྱིན་གྱིས་རླབས་ཞེས་པའི་འདིའི་སྐབས་ཀྱི་རིག་འཛིན་ཞེས་པ་རྒྱལ་བ་སྲས་དང་སློབ་མར་བཅས་པ་དང་དཀྱིལ་འཁོར་གྱི་དབང་ཕྱུག་འཁོར་དང་བཅས་པ་ལ་གོ་དགོས་པ་རེད། དེ་དག་གིས་ཚུལ་བཞིན་སྒྲུབ་པའི་རྣལ་འབྱོར་པ་ལ་བྱིན་གྱིས་བརླབས་པས་མ་ཚད། མ་དང་ཌཱཀྐིས་ལུང་ཡང་སྟོན་ཞེས་ཡེ་ཤེས་དང་འཇིག་རྟེན་གྱི་མ་དང་མཁའ་འགྲོ། ཁྱད་པར་དུ་འཕྲིན་ལས་ཀྱི་རྩ་བ་མཁའ་འགྲོ། དབྱིངས་ཕྱུག་མ་བརྒྱའི་གཙོ་མོ་མཁར་ཆེན་བཟའ་འམ་ཡེ་ཤེས་མཚོ་རྒྱལ་ལ་སོགས་པས་ལུང་གིས་སྟོན་ཅིང་དབུགས་དབྱུང་བར་མཛད། ཕྱི་མ་རྔ་ཡབ་དཔལ་གྱི་རིར། །ཐེ་ཚོམ་མེད་དོ་ས་མ་ཡ། ཞེས་ཚེ་འདིའི་སྣང་བ་ནུབ་ནས་ཕྱི་མའི་སྣང་བ་མཐོང་མ་ཐག རྔ་ཡབ་དཔལ་རི་རིག་འཛིན་བླ་མ་བཞུགས་པའི་གནས་མཆོག རིག་འཛིན་མཁའ་འགྲོ་འདུས་པའི་ཚོགས་གྲལ་དུ་སྐྱེ་བར་ཐེ་ཚོམ་མེད་ཅེས་གསུངས་པ་རེད། ས་མ་ཡ་ཞེས་གསུངས་ན། ས་མ་ཡ་ནི་འདའ་བ་མེད་པ་དམ་ཚིག་གི་རྒྱ་ཡིས་མནན་པའི་བཀའ་རྟགས་ཀྱི་ཕྱག་རྒྱ་རེད། དེས་ན་འདི་ལྟ་བུའི་ཚོགས་ཀྱི་སྒྲུབ་པའི་སྐབས་སུ་དེའི་གྲལ་དུ་ཞུགས། བསྙེན་སྒྲུབ་ཚུལ་བཞིན་དུ་མཛད། སྨོན་ལམ་རྣམ་པར་དག་པས་མཚམས་སྦྱར་ཐུབ་ན། གོང་གི་ལུང་དོན་སྒྲ་ཇི་བཞིན་དུ་འཛིན་ཆོག་རྒྱུར་ཐེ་ཚོམ་དགོས་པ་མ་རེད། མངོན་སུམ་ལག་པའི་ཁུ་ཚུར་ནས་བཟུང་ནས། །མཁར་ཆེན་བཟའ་དང་གུ་ཎ་ན་ཐ་ལྟར། །བདག་ཀྱང་པདྨ་འོད་དུ་ཁྲིད་པར་ཤོག ཅེས་ད་ནང་རང་རེས་སྨོན་ལམ་བཏོན་པ་ལྟར་རིག་འཛིན་དཔའ་བོ་མཁའ་འགྲོའི་བསུ་མ་དང་བཅས་ཏེ་ཕེབས་ཆོག་པ་རེད། འདི་དག་ཕན་ཡོན་སྐོར་རེད། འདིའི་འབྲས་བུའི་སྐོར་རྗེས་ནས་བཤད་ཆོག སྤྱིར་རང་གི་ཤེས་རྒྱུད་འདིའི་སྟེང་ནས་འཁོར་འདས་གཉིས་ཀའི་ཕྱིན་ཆད་ཀྱི་གདན་གཞི་འཇོག་གིན་ཡོད་པ་རེད། དེ་ཡང་རྩ་བ་ཏིང་ངེ་འཛིན་བསྒོམ་པ་འདི་ལ་ཐུག་པ་ཡིན་ཞིང་། སྒོམ་ཏིང་འཛིན་གྱི་རིགས་འདི་ལ་གོལ་ཤོར་ནོར་བའི་འཕྲང་མང་བ་རེད། བདེ་གསལ་མི་རྟོག་པའི་ཉམས་རང་ཤུགས་སུ་ཡོད་དགོས་པ་ཡིན་ཡང་། གོལ་ཤོར་ནོར་བའི་འཕྲང་དང་འཕྲད་པ་ཡིན་ན་བདེ་ཉམས་ལ་ཞེན་པའི་བསྒོམ་གྱིས་འདོད་ལྷ་རིགས་དྲུག་ཏུ་འཕེན་པ་དང་། གསལ་ཉམས་ཀྱིས་གཟུགས་ཁམས་སུ་འཕེན་པ། སྟོང་ཉམས་དང་མི་རྟོག་པའི་ཉམས་ལ་ཞེན་པས་གཟུགས་མེད་སྐྱེ་མཆེད་མུ་བཞི་ལ་འཕེན་པ། བསྐྱེད་རིམ་རང་རྒྱུད་པར་ཞེན་པས་བདུད་དང་རུ་ཏྲར་གོལ་བ་ལྟ་བུ་དང་། གཞན་ཡང་བྱིང་རྨུགས་འཐིབས་གསུམ་དང་འདྲེས་པར་བསྒོམས་ན་འཕྱི་བ་དང་རི་བོང་དུ་སྐྱེ་བ་ལྟ་བུ་ཡིན་པ་རེད། ལར་དགེ་བ་ཡིན་རུང་བྱང་ཆུབ་ཀྱི་སེམས་ཀྱིས་མ་ཟིན། དངོས་གཞིའི་ལྟ་བས་མ་ཟིན། རྗེས་བསྔོ་བས་མ་ཟིན་པའི་སྦྱིན་སོགས་ཀྱི་དགེ་རྩ་དེ་ཉིད་ལོག་ལྟས་མ་བཅོམ། ཁོང་ཁྲོས་མ་བསྲེག མ་བསྔོས་པ་དང་ལོག་པར་བསྔོས་པ་ལ་སོགས་པ་དགེ་རྩ་འཇོམས་པར་བྱེད་པའི་རྒྱུ་བཞིས་མ་བཤིག་པར་ཡོད་ན། དེ་དག་གི་འབྲས་བུ་ནི། སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་གཟུགས་བཟང་ལ་སོགས་པ་འབྱུང་བ་རེད། དེའི་སྟེང་དུ་རྣལ་འབྱོར་པའི་རིག་ངོ་སད་པས་གཟུགས་གཟུགས་མེད་དུ་སྐྱེ་བའི་རྒྱུ་ཉམས་ཞེན་གྱི་ཤུན་པ་གཏོར་བ་དང་། འདོད་ཁམས་སུ་སྐྱེ་བའི་རྒྱུ་དུག་གསུམ་གྱི་འཁྲུལ་རྟོག་དག་ནས་རིག་པ་རྐྱང་འདེད་དང་ཡེ་ཤེས་རྗེན་འདེད་བྱས་ནས་ཉམས་སུ་བླངས་ན། དེ་ལྟར་མ་རྟོགས་པའི་སེམས་ཅན་ལ་སྙིང་རྗེ་དང་། དེ་དང་མཉམ་དུ་འཁོར་བའི་གནས་ལ་ཞེན་ལོག་གི་ངེས་འབྱུང་། གཞན་ཕན་དོན་གཉེར་གྱི་ལྷག་བསམ་དག་པའི་བྱང་སེམས། སྣང་སྲིད་ཡེ་ནས་རྣམ་དག་གི་དག་སྣང་ལ་སོགས་པ་རང་ཤུགས་སུ་འཆར་ནས་རྣམ་བྱང་མྱང་འདས་ཀྱི་རྒྱུ་རང་རྒྱུད་དུ་འཇོག་པ་མཁས་པའི་བསྟན་བཅོས་དང་། རྟོགས་ལྡན་གྱི་མྱོང་ཁྲིད་གཉིས་ཀ་ཞལ་མཐུན་པ་རེད། དེས་ན་བསྐྱེད་རྫོགས་ཀྱི་ཉམས་ལེན་བྱེད་པར་སྒོམ་ཏིང་ངེ་འཛིན་གྱི་རྣམ་གཞག་ཤིན་ཏུ་གལ་ཆེ་བ་ཡིན་པ་རེད། སྤྱིར་ནང་བ་སངས་རྒྱས་པའི་བསྒོམ་བྱ་མཁན་ཞིག་ཡིན་ཚེ་མདོ་སྔགས་གཉིས་ལས་གང་ཡང་རུང་བའི་ལུགས་ཤིག་ཡིན་དགོས། མདོ་ཕར་ཕྱིན་ཐེག་པའི་ལུགས་ཀྱི་སྒོམ་བྱེད་མཁན་ཞིག་ཡིན་ན། ཕ་རོལ་ཏུ་ཕྱིན་པ་དྲུག་དང་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པ་ཟབ་དང་རྒྱ་ཆེ་བའི་དོན་ཤེས། ཐོས་བསམ་གྱི་སྒོ་ནས་ཡུལ་དང་ཡུལ་ཅན་རང་བཞིན་མེད་པར་སྒྲོ་འདོགས་བཅད། གང་ཟག་དང་ཆོས་ཀྱི་བདག་མེད་ཀྱི་དོན་རྟོགས། བསྐལ་པ་གྲངས་མེད་གསུམ་ལ་སོགས་པར་མགོ་དང་ཡན་ལག་གཏོང་བ་ལ་སོགས་པའི་གོ་ཆ་གྱོན། བྱམས་པའི་ཆོས་སྡེ་ལྔ་ལ་སོགས་པའི་ལུགས་བཞིན་དུ་བྱས་ན་ཕར་ཕྱིན་ཐེག་པའི་སྒོམ་དུ་གཏོགས་པ་ཡིན། སྒོམ་བྱེད་པ་དེ་ཉིད་སྒྲིབ་པ་བྱང་བའི་ཐབས་རེད། སྒྲིབ་པ་ལ་ཉོན་ཤེས་ཀྱི་སྒྲིབ་པ་གཉིས་ཡོད་པ་དང་། ཉོན་སྒྲིབ་སྤང་བའི་སྤངས་པ་དེ་ཐར་པ་ཡིན་པ་རེད། འབྲས་བུ་དགྲ་བཅོམ་གྱི་གོ་འཕང་ཐོབ་པ་དང་། ཤེས་སྒྲིབ་སྤང་བའི་སྤངས་པ་མཐར་ཐུག་རྣམ་མཁྱེན་གྱི་ཡེ་ཤེས་ཡིན་ཞིང་། སྒྲིབ་གཉིས་སྤངས་པའི་ཕ་རོལ་ནས་སངས་རྒྱས་ཞེས་པ་ཞིག་ལོགས་ནས་འཚོལ་དགོས་པ་མ་ཡིན། གསང་སྔགས་ལྟར་ན་ཐོག་མར་རྒྱུད་སྡེ་སོ་སོ་དང་མཐུན་པའི་སྨིན་པར་བྱེད་པའི་དབང་ཐོབ་དགོས། དེ་མ་ཐོབ་ན་རྒྱུད་སྡེ་དང་མཐུན་པའི་ལམ་རིམ་གཉིས་བསྒོམ་ཐབས་ཡོད་པ་མ་རེད། དེ་མེད་པས་རིམ་པ་གཉིས་ལས་བྱུང་བའི་ཕྱག་རྫོགས་ལ་སོགས་པའི་དོན་རྟོགས་མི་ཐུབ། དེས་ན་རིམ་གཉིས་ཀྱི་ལམ་བརྟན་པར་བྱེད་པའི་སྤྲོས་བཅས་སྤྲོས་མེད་ཤིན་ཏུ་སྤྲོས་མེད་སོགས་དབང་དོན་གྱི་ཡེ་ཤེས་རྒྱུད་ལ་བསྐྱེད་པའི་ཐབས་དང་ལྟ་སྤྱོད་ལ་རྨོངས་ན། ནང་རྟེན་འབྲེལ་གྱི་ས་ལམ་བགྲོད་ཐབས་མེད་པས། མདོ་སྔགས་གཉིས་ཀ་གང་གི་ནང་དུའང་མི་གཏོགས་པའི་ཅི་ཡིན་འདི་ཡིན་མེད་པའི་ཡིད་ལ་མི་བྱེད་པ་ཙམ་བསྒོམ་དུ་བཅུག་ན་ཧ་ཤང་གི་རྗེས་སུ་འདེད་པ་ཡིན། ཕུར་བུ་པ་ལའང་སྒོམ་བྱེད་པ་དང་བསྒོམ་ལུགས་མང་པོ་ཡོད་པ་རེད། མུ་སྟེགས་པའི་སྒོམ་ཅི་འདྲའི་བཟང་ཡང་སངས་རྒྱས་མི་ཐུབ་པ་དང་། ཉན་ཐོས་ཀྱི་སྒོམ་ཅི་འདྲའི་བཟང་ཡང་ཐེག་པ་ཆེན་པོ་རུ་འགྱུར་མི་ཐུབ་པ་རེད། སྤྱིར་འོག་མའི་ལུང་གོང་མར་འཐེན་ཆོག་པ་དང་། ཐུབ་པའི་བསྟན་པ་འགལ་མེད་དུ་ཉམས་སུ་ལེན་དགོས་པ་ཡིན་ཡང་། ཅི་ཡང་མི་ཤེས་པའི་གང་ཟག་ང་ལྟ་བུས་འདི་ལྟར་བཤད་ཁུལ་བྱེད་དུས། ཕར་ཕྱིན་ཐེག་པ་བཤད་པའི་སྐབས་སུ་སྔགས་ཀྱི་ཆོས་སྐད་རྣམས་མར་ལ་དྲུད། གསང་སྔགས་བཤད་པའི་སྐབས་སུ་མདོའི་ལྟ་སྤྱོད་རྣམས་ཡར་ལ་སྦྱར། ནང་རྒྱུད་སྡེ་གསུམ་དེ་ཕྱི་རྒྱུད་སྡེ་གསུམ་དང་བསྲེས། ཨ་ཏི་ཡོ་ག་དེ་ཉིད་མ་ཧཱ་ཡོ་ག་རུ་བསྒྱུར། རྫོགས་པ་ཆེན་པོའི་ལྟ་སྒོམ་མཐོ་བཤད་བྱེད་ས་ནས་ཧ་ཤང་གི་ལྟ་བ་རུ་ལོག ར་དང་ལུག་འདྲེས། རྩམ་པ་དང་ཆུར་བ་བསྲེས། ཐ་མ་ལྟ་གྲུབ་ཀྱི་འཇོག་མཚམས་འདི་རེད་ཅེས་པའི་མཛུབ་མོ་འཛུག་ས་མེད་པར་གྱུར་ཚེ་བསྟན་པ་ལ་དཀྲུགས་གཞི་དེ་ལས་ཐུ་བ་མེད་སོང་བ་རེད། འགོ་ཐོས་པ་ནས་འཆུགས་ཚེ་བསམ་སྒོམ་གཉིས་ཀ་དེའི་ཕྱོགས་སུ་འགྲོ་བ་ཡིན། ལྟ་བ་ནོར་ན་སྒོམ་པ་སྤྱོད་པ་དེ་དང་མཚུངས་པ་ཞིག་ལས་འབྱུང་དོན་མེད། དེ་ལ་འབྲས་བུ་ལེགས་པོ་ཞིག་འབྱུང་རེ་བྱས་པ་ཡོངས་རེ་འཁྲུལ་དང་། ཉོན་རེ་མོངས། ཐང་རེ་ཆད་ཅེས་གསུངས་ས་ལྟ་བུ་ཡིན་པ་རེད། སྟོང་ཉིད་སྟོང་བཤད་སྟོང་སྒོམ་དུ་གྱུར་ཚེ་སྡུག་ནི་རེད། མདོ་སྡེ་རྒྱན་ལས། གང་ཞིག་ཡོད་པ་མི་མཐོང་མེད་མཐོང་བ། །དེ་འདྲའི་མུན་ནག་རྣམ་པ་འདི་ཅི་ཞིག ཅེས་གསུངས་པ་འདིའི་རིགས་ཅན་ལ་གསུངས་པ་རེད། གནའ་སྔོན་མ་རྒྱལ་པོ་ཁྲི་སྲོང་ལྡེའུ་བཙན་གྱི་སྐུ་དུས་སུ། རྒྱ་ནག་གི་དགེ་སློང་ཞིག་གིས་ཚིག་ལ་སྙིང་པོ་མེད། ཐ་སྙད་ཀྱི་ཆོས་ཀྱིས་འཚང་མི་རྒྱ། སེམས་རྟོགས་ན་དཀར་པོ་གཅིག་ཐུབ་ཡིན་ཞེས་བཤད་པ་རེད་ཅེས་དང་། ཁོང་རང་ཉིད་ཀྱིས་བརྩམས་པའི་བསྟན་བཅོས་བསམ་གཏན་ཉལ་བའི་འཁོར་ལོ་ཞེས་པ་དང་། བསམ་གཏན་གྱི་ལོན། ཡང་ལོན། ལྟ་བའི་རྒྱབ་ཤ་ཞེས་པ་དང་། རང་ཉིད་ཀྱི་ལྟ་བ་ཡང་དག་ཏུ་སྒྲུབ་བྱེད་དུ་མདོ་ལུང་བརྒྱད་ཅུ་དྲངས་པའི་མདོ་སྡེ་བརྒྱད་ཅུ་ཁུངས་ཞེས་པ་སོགས་བརྩམས་མྱོང་བ་རེད་ཅེས་དང་། དཀར་པོ་གཅིག་ཐུབ་ཟེར་བ་དེ་བོད་ཁམས་སུ་དགའ་རབ་ཅིག་དར་སོང་བ་རེད་ཟེར་བའི་ལོ་རྒྱུས་ཡོད་པར་གྲགས་པ་རེད། རྒྱལ་པོས་སྦ་ཡེ་ཤེས་དབང་པོ་སྤྱན་དྲངས་ནས་རྒྱ་དཀར་ནག་གཉིས་ཀའི་ཆོས་འདི་གཉིས་ལས་གང་བདེན་པ་རེད་ཅེས་དྲིས་པའི་ཚེ། ཡེ་ཤེས་དབང་པོས་གསུངས་པར། མཁན་ཆེན་ཞི་བ་འཚོའི་གསུང་ཞིག་ཡོད། བོད་འདིར་སློབ་དཔོན་པདྨ་འབྱུང་གནས་ཀྱིས་བསྟན་མ་བཅུ་གཉིས་ལ་བཀའ་བསྒོས་མཛད་པའི་བཀའ་དྲིན་གྱིས་མུ་སྟེགས་པ་མི་འབྱུང་ཡང་། སྤྱིར་ན་ཉིན་དང་མཚན། གཡས་དང་གཡོན། ཡར་ངོ་དང་མར་ངོ་གཅིག་ཡོད་ན་གཞན་གཅིག་པོའང་ཡོད་པ་ལྟར། ཆོས་དག་དང་མི་དག་གཉིས་རེ་འབྱུང་རྒྱུ་རྟེན་འབྲེལ་གྱི་ཆོས་རེད། ཁོང་བྱོན་པའི་རྗེས་སུ་རྒྱ་ནག་གི་མཁན་པོ་ཞིག་འོངས་ནས་ཐབས་དང་ཤེས་རབ་ལ་སྐུར་བ་འདེབས་པའི་དཀར་པོ་གཅིག་ཐུབ་ཅེས་པ་སེམས་རྟོགས་པ་གཅིག་པུས་སངས་རྒྱས་པ་རེད་ཟེར་མཁན་ཞིག་འབྱུང་རྒྱུ་ཡོད། བཅོམ་ལྡན་འདས་ཀྱིས། ལྟ་བའི་སྙིགས་མ་ནི་སྟོང་པ་ཉིད་ཕྱོགས་གཅིག་པ་ལ་དགའ་བ་དེ་ཡིན་ཞེས་གསུངས་ཡོད་པ་རེད། སྙིགས་མའི་གང་ཟག་ཐམས་ཅད་དེ་འདྲ་བ་ལ་དགའ་བ་ཡིན། ཧ་ཤང་གི་ལྟ་བ་འདི་འཕེལ་བ་ཡིན་ན་སངས་རྒྱས་ཀྱི་བསྟན་པ་སྤྱི་ལ་གནོད་པ་ཡིན་པས་དེ་དུས་ཁོང་གི་སློབ་མ་ཀ་མ་ལ་ཤི་ལ་ཞེས་པའི་མཁས་པ་ཆེན་པོ་ཞིག་ཡོད་པས། མཁས་པ་ཆེན་པོ་དེ་ཉིད་སྤྱན་དྲངས་ནས་རྒྱ་ནག་གི་མཁན་པོ་དང་རྩོད་ཆུགས། སུ་རྒྱལ་ན་ཐམས་ཅད་ཀྱིས་དེའི་ལུགས་ལྟར་འཛིན་རྒྱུ་གྱིས་ཞེས་གསུངས་ཡོད་པས། ད་དེ་མཛད་རན་པ་རེད་ཅེས་རྒྱལ་པོ་ལ་ཞུས་པས། རྒྱལ་པོས་སློབ་དཔོན་ཀ་མ་ལ་ཤི་ལ་སྤྱན་དྲངས་ནས་བསམ་ཡས་སུ་རྩོད་པ་བྱེད་བཅུག་པ་རེད། དེ་དུས་རྒྱ་ནག་ཧ་ཤང་གི་ཕྱོགས་སུ་ལངས་པའི་བོད་ཀྱི་བཙུན་བློན་མང་པོ་ཞིག་ཡོད་རབས་ཡོད། སློབ་དཔོན་ཀ་མ་ལ་ཤི་ལས་རྒྱ་ནག་གི་ཆོས་ལུགས་ཇི་ལྟར་ཡིན་ཞེས་ཕྱོགས་སྔའི་འདོད་པ་དྲིས་ཚེ། ཧ་ཤང་གིས། སྐྱབས་འགྲོ་དང་སེམས་བསྐྱེད་ནས་བརྩམས་ཏེ་ཉམས་སུ་ལེན་པ་སྤྲེའུ་ཤིང་རྩེར་འཛེགས་པ་ལྟར་བྱེད་པ་ནི་མས་འཛེགས་རེད། ཁོང་གི་ཆོས་ལུགས་ནི། བྱ་བྱེད་ཀྱི་ཆོས་ཀྱིས་འཚང་མི་རྒྱ་བས་རྣམ་པར་མི་རྟོག་པའི་སེམས་དེ་ཉིད་བསྒོམས་ནས་སེམས་རྟོགས་པ་དེ་ཁོ་ནས་འཚང་རྒྱ་བ་ཡིན། དེ་ཉིད་ཁྱུང་ནམ་མཁའ་ནས་ཤིང་རྩེར་བབས་པ་ལྟར་ཡས་འབུབས་ཀྱི་ཆོས་ཡིན་པས། དེའི་མིང་ལ་དཀར་པོ་ཆིག་ཐུབ་ཅེས་ཟེར་བ་ཡིན་ཞེས་གསུངས་པར། སློབ་དཔོན་ཀ་མ་ལ་ཤི་ལས་དེ་ཉིད་དཔེ་དོན་གཉིས་ཀའི་ཐད་ནས་མི་འཐད་ཅེས་གསུངས་ཏེ། དཔེ་མི་འཐད་པ་ནི་ཁྱུང་ནམ་མཁའ་ནས་གློ་བུར་དུ་འདབ་གཤོག་རྫོགས་པ་ཞིག་སྐྱེས་ཤིང་ཤིང་རྩེར་བབས་པ་ཞིག་ཅི་ལ་སྲིད། དེ་ལྟ་མ་ཡིན་པར་དང་པོ་ནམ་མཁར་འཕུར་བ་ཞིག་ཡིན་ན་རིམ་གྱིས་པའི་དཔེ་ལས་གཅིག་ཆར་བའི་དཔེར་མི་འགྲོ། དོན་ནོར་བས་མི་འཐད་པ་ནི་རྣམ་པར་མི་རྟོག་པའི་བསྒོམ་དེས་རྣམ་རྟོག་ཕྱོགས་གཅིག་བཀག་པ་ཡིན་ན་གཉིད་དང་བརྒྱལ་བ་སོགས་ཀྱི་སྐབས་སུ་རྣམ་པར་མི་རྟོག་པ་ཡིན་དགོས་པ་དང་། རྣམ་རྟོག་མཐའ་དག་བཀག་པ་ཡིན་ན་ཁྱེད་ཀྱིས་མི་རྟོག་པ་བསྒོམ་ཚེ་བསྒོམ་དགོས་བསམ་རྒྱུའི་རྣམ་རྟོག་སྔོན་དུ་འགྲོ་ཨེ་དགོས། དེ་མ་དགོས་ན་ཁམས་གསུམ་སེམས་ཅན་ཐམས་ཅད་ལ་སྒོམ་སྐྱེས་ཡོད་པ་འདྲ་འདྲ་རེད། མི་རྟོག་པ་བསྒོམ་དགོས་བསམ་པའི་རྟོག་པ་སྔོན་དུ་འགྲོ་དགོས་ན་དེ་ཁོ་རང་རྟོག་པ་ཡིན་པས་མི་རྟོག་པ་བསྒོམ་པའི་དམ་བཅའ་ཉམས་པ་རེད། དཔེར་ན་ངས་ངག་བཅད་ཡིན་ཞེས་ངག་ཤོར་བ་དང་། འུར་མ་རྒྱག་ཅེས་འུར་བརྒྱབ་པ་དང་གཅིག་རེད་ཅེས་གསུངས་པ་རེད། དེ་ལྟར་ལུང་དང་རིགས་པ་མང་པོས་བཀག་རྗེས་རྒྱ་ནག་གི་མཁན་པོ་ལ་སྨྲ་བའི་སྤོབས་པ་མེད་པར་གྱུར། དེ་ནས་རྒྱ་ནག་གི་མཁན་པོ་ཡི་མུག་སྟེ་རང་གནས་སུ་སོང་བ་རེད། དེའི་སྐབས་སུ་རྒྱ་ནག་གི་མཁན་པོའི་ལྷམ་ཞིག་ཤུལ་དུ་ལུས་སོང་བས་ལྟས་དེ་ལ་དཔགས་ནས་སངས་རྒྱས་ཀྱི་བསྟན་པ་འཇིག་རན་པའི་དུས་ཁོའི་བསྟན་པ་ལྷམ་ཙམ་ཞིག་ལུས་འགྲོ་ཞེས་བཤད་པ་རེད་ཅེས་ཟེར་སྲོལ་ཡོད་པ་རེད། དེས་ན་སྤྱོད་པ་འདུལ་བ་དང་མཐུན། སྒོམ་པ་མདོ་སྡེ་དང་མཐུན། བཤད་པ་མངོན་པ་དང་མཐུན། གསང་སྔགས་རྒྱུད་སྡེ་དང་མཐུན་པ་ཞིག་ངེས་པར་དགོས། སྔགས་བཤད་པའི་སྐབས་སུ་རྒྱུད་སྡེའི་ཁོག་ཁྲོལ་ནས་དེའི་དགོངས་གནད་ལོན་རྒྱུ་གལ་ཆེ། མཉམ་བཞག་གི་སྐབས་ཀྱི་རྟོགས་པའི་ཡེ་ཤེས་ཡང་དག་པ་ཡིན་དང་མིན་རྗེས་ཤེས་རབ་དང་སྙིང་རྗེའི་རྩལ་འབར་དང་མི་འབར་གཅིག་པུས་དབྱེ་བ་འབྱེད་པ་རེད། གནས་ལུགས་ཀྱི་དགོངས་པ་ཕྱིན་ཅི་མ་ལོག་པ་ཞིག་རྟོགས་ཡོད་ན། མཉམ་རྗེས་སྟོང་དང་སྙིང་རྗེ་གཉིས་ཀ་གཅིག་གྲོགས་གཅིག་གིས་བྱས་ཏེ་གོང་ནས་གོང་དུ་འཕེལ་ནས་ཚོགས་གཉིས་འབད་མེད་དུ་རྫོགས་པ་ཡིན། འགའ་རེས་སྟོང་པ་ཉིད་གོ་སོང་བསམ་ནས་ལས་འབྲས་གནད་ཆུང་དུ་འཛིན་པ་ནི་སྟོང་པ་ཉིད་ཕྱིན་ཅི་ལོག་ཏུ་གོ་སོང་བ་རེད། སྟོང་པ་ཉིད་ངོ་མ་གོ་ཡོད་ན། དེ་ཉིད་རྟེན་འབྲེལ་གྱི་དོན་དུ་རིག་ནས་ལས་འབྲས་ལ་ངེས་པ་ཇེ་ཆེར་འགྲོ་བ་ཡིན། དེས་ན་ངན་སོང་གི་གནས་སུ་སྐྱེ་རྒྱུར་སྐྲག་མཁན་ཞིག་ཡིན་ཚེ་བསྐྱེད་དང་རྫོགས་པ། མཉམ་བཞག་དང་རྗེས་ཐོབ་གང་གི་སྐབས་སུའང་ལས་འབྲས་བསླུ་མེད་ལ་ངེས་ཤེས་བསྐྱེད་ནས། ཉིན་མཚན་ཐམས་ཅད་དུ་རང་གི་སྒོ་གསུམ་ལ་རྟོག་མཁས་པ་ཞིག་དགོས་པ་ནི་གདམས་ངག་གནད་བསྡུས་ཚིག་ནག་གི་ཐོག་ནས་བཤད་པ་ཡིན། ད་འདི་ནས། གབ་བྱང་ལསཿ ཞེས་རིག་འཛིན་གབ་བྱང་གནད་ཀྱི་མིག་ཚགས་སུ་གསུངས་ཡོད་པ་རེད་ཅེས་དགོས་པ་དང་ལྡན་པའི་སྐབས་སུ་གབ་པ་ཐམས་ཅད་མངོན་དུ་ཕྱུང་དགོས་པའི་བརྡ་བསྟན་པ་རེད། ལས་བྱང་གི་ནང་དུ་དངོས་བསྟན་རིག་འཛིན་སྲོག་སྒྲུབ་ལས་བུད་ཡོད་པ་མ་རེད། དེ་ཡང་སྣོད་མིན་གྱི་གང་ཟག་ལ་གསང་བའི་ཆེད་དུ་རྒྱུད་དཀྲུགས། ལུང་དཀྱུས། མན་ངག་གབ་སྟེ་ཡོད་པས། སློབ་དཔོན་མཁས་པས་རྒྱུད་དོན་མན་ངག་གིས་དཀྲལ་ཚེ། གབ་པ་ཕྱུང་། སྦས་པ་འབྱིན། དཀྱུས་པ་སྲོང་། འཐོར་བ་སྡུད་པ་ལ་སོགས་པའི་མན་ངག་གི་ཞལ་ཤེས། ལག་ལེན་གྱི་ཉམས་མྱོང་། རྣམ་དཔྱོད་ཀྱི་སྤོབས་པ་དག་ཡོད་དགོས་པས་ན། གསང་སྔགས་འཆད་པའི་སློབ་དཔོན་ལ་མཚན་ཉིད་མང་པོ་ཚང་དགོས་པ་དེ་ཡིས་རེད། འདིའི་དོན་རིག་འཛིན་གབ་བྱང་གནད་ཀྱི་མིག་ཚགས་ལས་ཇི་ལྟར་གསུངས་ཡོད་པ་རེད་ཅེ་ན། ལྷ་ལ་ཡེ་ཤེས་སེམས་དཔའ་གབ། །སྔགས་ལ་རིག་འཛིན་སྲོག་སྒྲུབ་གབ། །ཏིང་འཛིན་དོ་ལིའི་བཟླས་པ་གབ། །འབྲས་བུ་ས་ཆོད་མན་ངག་གབ། ཅེས་གསུངས་པས་གབ་པ་བཞི་དེ་མངོན་དུ་ཕྱུང་དགོས་པ་རེད། དེ་ལས་ལྷ་ལ་ཡེ་ཤེས་སེམས་དཔའ་གབ་ཅེས་པ་ཇི་ལྟར་གབ་པ་མངོན་དུ་ཕྱུང་སྟེ་གསུངས་པ་རེད་ཅེ་ན། སྣང་སྲིད་ཟིལ་གནོན་ཐུགས་ཀ་རུཿ རིག་འཛིན་རྒྱལ་པོ་རྡོ་རྗེ་ཆོསཿ སྐུ་མདོག་བྱི་རུ་སྣུམ་བསྐུས་ལྟརཿ གསལ་འཚེར་བཀྲག་མདངས་ལྡན་པ་ལཿ ཞལ་གཅིག་ཕྱག་གཉིས་ཞི་མ་ཁྲོཿ གཅེར་བུ་རུས་རྒྱན་ཐོར་ཚུགས་ཅནཿ རྡོ་རྗེ་དྲིལ་བུ་བསྣོལ་བའི་པངཿ རྣལ་འབྱོར་སྔོན་མོ་གྲི་ཐོད་ཅནཿ ཆ་ལུགས་ཡབ་འདྲ་གཉིས་ཀ་ཡངཿ ཤིན་ཏུ་ཆགས་པའི་རྣམ་འགྱུར་ཅནཿ ཟག་མེད་བདེ་བ་ཆེན་པོར་སྦྱོརཿ ཞེས་གསུངས་ཏེ། ཚིག་རྐང་འདི་དག་གསལ་འདེབས་ཀྱི་ཆེད་དུ་བསྙེན་མཚམས་ཀྱི་སྐབས་སུ་འདོན་དགོས་པ་རེད། དེའི་ཚིག་དོན་རེ་རེ་ནས་ཉིས་ཟེར་བྱས་མ་བྱས་མི་འདུག ཆུ་ཚོད་ཀྱང་མང་ཙམ་སོང་ཚར་འདུག ལྷ་སྔགས་ཏིང་འཛིན་དབྱེར་མེད་ཀྱིས་བསྙེན་པ་བཟླ་ཚེ་སེམས་དཔའ་སུམ་བརྩེགས་སུ་བསྒོམས་ནས་བསྙེན་པ་བཟླ་དགོས་པ་རེད། བདག་དམ་ཚིག་སེམས་དཔའ་རིག་འདུས་མ་ཧཱ་གུ་རུ་རུ་བསྒོམས་ཡོད་ན། ཡེ་ཤེས་སེམས་དཔའ་དང་དབྱེར་མེད་དུ་བསྟིམ་པའི་དབང་གིས་ཐུགས་ཀར་ཡེ་ཤེས་སེམས་དཔའ་རིག་འཛིན་གྱི་རྒྱལ་པོ་རྡོ་རྗེ་ཆོས་སྐུ་མདོག་དམར་པོ་གོང་གི་གབ་བྱང་གི་ངག་འདོན་ལྟར་བསྒོམ། དེའི་ཐུགས་ཀར་ཐུགས་སྲོག་ཏིང་འཛིན་སེམས་དཔའ་ཐུགས་ཀར་པདྨ་ཉི་ཟླའི་སྟེང་སོགས་ཀྱི་བཟླས་དམིགས་ལྟར་སྔགས་ཕྲེང་གསལ་འདེབས་དགོས། གབ་བྱང་དུ། མི་ལ་རྣམ་ཤེས་སྐྱེས་པ་ལྟརཿ ཕྱག་རྒྱ་རྟགས་ཀྱི་ལྷ་སྐུར་དྲནཿ ཟིལ་གནོན་ཡེ་ཤེས་སེམས་དཔའ་ནིཿ ཤིན་ཏུ་གསལ་བརྟན་ཐོན་པ་གནདཿ ས་མ་ཡཿ ཞེས་གསུངས་པ་ལྟར་འདིའི་སྐབས་སུ་སྲོག་སྡོམ་གཟེར་བཞིའི་དམིགས་གནད་ཀྱི་གོ་བ་ལོན་པ་གནད་ཆེན་ཡིན་པ་རེད། སྤྱིར་གསང་སྔགས་རྡོ་རྗེའི་ཐེག་པའི་ལམ་འདི་ཟུང་འཇུག་རྡོ་རྗེའི་ལམ་ཡིན་ཞེས་གསུངས་པ་དེ་ཅི་འདྲ་ཞིག་ཡིན་པ་རེད་ཅེ་ན། ངོ་བོ་ཐབས་དང་ཤེས་རབ་ཀྱི་རང་བཞིན། རྣམ་པ་བསྐྱེད་དང་རྫོགས་པ་ལམ་བྱེད། དོན་རིམ་གཉིས་སྨིན་གྲོལ་གྱི་ལམ་དུ་འདུས་པ་རེད། དེས་ན་བསྐྱེད་རིམ་ཐམས་ཅད་ཀྱི་སྲོག་གཟེར་བཞིས་བསྡམ་དགོས་པ་རེད། ཡིག་སྐད་དུ་གཟེར་ཞེས་པ་ཁ་སྐད་ལྟར་བྱས་ན་མཛེར་རུ་རེད། མཛེར་རུ་བཏབ་ནས་མནན་པ་ཡིན་ན་འགྱུར་བ་མེད་པ་ལྟར་སྲོག་སྡོམ་གཟེར་བཞིའི་གནད་མ་ཤེས་ན་བསྐྱེད་རིམ་རྩ་བ་ནས་མ་ཤེས་པ་རེད། གཟེར་བཞིའི་བསྡམ་བྱའི་སྲོག་དེ་གང་རེད། ཇི་ལྟར་བསྡམ་དགོས་པ་རེད་ཅེ་ན། གཞི་ལྟ་བས་འཁོར་འདས་མཉམ་ཉིད་དུ་རྟོགས་ནས་སྲིད་ཞི་གཉིས་ཀའི་སྲོག་ལ་དབང་བསྒྱུར། ལམ་སྒོམ་པས་ལྷ་སྔགས་ཏིང་འཛིན་གྱི་གནད་ལ་དབང་འབྱོར་ཏེ་བསྐྱེད་རྫོགས་གཉིས་ཀའི་སྲོག་ལ་དབང་ཐོབ། དོན་གཉིས་ལྷུན་གྲུབ་ཀྱི་སྤྱོད་པས་ཐབས་ཆེན་བསམ་གྱིས་མི་ཁྱབ་པའི་སྲོག་ལ་དབང་བསྒྱུར་ནས། དཔེ་བཞག་ན་ནམ་མཁའི་ཟླ་བ་གཅིག་པུ་དེ་སྒྲ་གཅན་གྱི་ཁར་ཚུད་སོང་ཚེ་ཆུ་ནང་དུ་ཤར་བའི་ཟླ་བའི་གཟུགས་བརྙན་ཐམས་ཅད་མཉམ་གཅིག་ཏུ་ཟིན་སོང་བ་ལྟར། མདོ་རྒྱུད་མང་པོའི་དགོངས་པའི་གནད་འདིས་ཟིན་ཏེ་ཁོག་ཁྲོལ་སོང་བ་ཡིན་པ་རེད། དག་རྫོགས་སྨིན་གསུམ་ཡང་འདིའི་ནང་དུ་འདུས། བསྐྱེད་རིམ་གྱི་ལམ་ཐམས་ཅད་མར་གྱི་འཁོར་བ་དང་རྣམ་པ་མཐུན། དེ་ཡང་སྐྱེ་གནས་བཞི་ཡི་བག་ཆགས་སྦྱོང་བྱེད་དུ་དེ་དང་ཚུལ་མཐུན་པའི་བསྐྱེད་རིམ་བསྒོམ་པ་རེད། སྐྱེ་བ་མེད་པའི་སེམས་ཅན་ཞིག་མེད་ཅིང་། སྐྱེས་ཚད་ཀྱང་ཤི་དགོས་པས་ན། དེ་དང་བསྟུན་པའི་རྫོགས་རིམ་བསྡུ་རྒྱུར་གསུངས་ཡོད་པ་རེད། དེའི་སྐབས་ཀྱི་དག་རྫོགས་སྨིན་གསུམ་ཇི་ལྟར་ཡིན་པ་རེད་ཅེ་ན། མར་འཁོར་བ་དང་རྣམ་པ་མཐུན་པས་དེའི་བག་ཆགས་སྦྱོང་ཞིང་དག་པ་ཡིན་པས་ན་དག་པ་ཚང་། ཡར་མྱང་འདས་དང་བཞུགས་ཚུལ་མཐུན་པ་རེད། སྐུ་ཞི་བ་ཁྲོ་བོ་གང་ཞིག་བསྒོམས་ནས་སྔགས་ཏིང་འཛིན་གང་དང་སྦྲེལ་ཡང་སངས་རྒྱས་ཀྱི་མཛད་པ་ལམ་དུ་བྱེད་པ་ཡིན་པས། ཐོབ་བྱ་གཞན་ནས་འཚོལ་མི་དགོས་པར་འབྲས་བུ་གཞི་ལ་རྫོགས་པས་ན་རྫོགས་པ་ཚང་། དེ་ལྟའི་བསྐྱེད་རིམ་དེ་ཉིད་རྫོགས་རིམ་དང་ཡ་མ་བྲལ་བ་བསྐྱེད་རིམ་རྫོགས་རིམ་གྱི་སྨིན་བྱེད་དུ་འགྲོ་བས་ན་དག་རྫོགས་སྨིན་གསུམ་དེ་ལྟར་ཚང་བ་རེད། དེ་ལྟ་བུའི་བསྐྱེད་རྫོགས་ཀྱི་དམིགས་གནད་ལ་མེད་དུ་མི་རུང་བའི་གཟེར་བཞི་ནི། ཏིང་འཛིན་ལྷ་ཡི་གཟེར། སྙིང་པོ་སྔགས་ཀྱི་གཟེར། དགོངས་པ་ཆོས་ཉིད་ཀྱི་གཟེར། འཕྲོ་འདུ་འཕྲིན་ལས་ཀྱི་གཟེར་ཏེ་བཞི་རེད། འདིའི་སྐོར་ཚིག་གཅིག་གཉིས་ཙམ་གྱིས་གོ་བརྡ་མི་འཕྲོད་པས། གང་ལྟར་བྱས་ཀྱང་སང་ཉིན་ཆོས་ཁྲིད་ཅིག་འདོན་དགོས་པ་རེད། བཟླས་པ་འདི་ཆོ་གའི་སྲོག་ལྟ་བུ་ཡིན་ཞིང་། བསྐྱེད་རྫོགས་གཉིས་ཀའི་གནད་ཆེ་ས་ཡིན་པས་ན་ཞིབ་ཆ་བྱས་ཏེ་ཞུ་དགོས་བསམ་པ་ཡིན་མོད། འོན་ཀྱང་། ཅོལ་ཆུང་དབུལ་བོའི་ལག་གི་རིན་ཆེན་དང་། །ཐོས་ཆུང་བླུན་པོའི་ཁ་ཡི་མན་ངག་གཉིས། །མནན་ཀྱང་མི་ནོན་ཟངས་ཁའི་གློ་བ་བཞིན། །གཞན་ལ་ཟེར་འདོད་བྲེལ་བ་ལང་ལ་ལྟོས། ཞེས་གསུངས་པ་རེད། གློ་བ་སྟོང་པ་ཟངས་དཀར་གྱི་ནང་དུ་འཕངས་པ་ཡིན་ན་ཁར་གཡེང་བ་ལས་མཐིལ་དུ་མེད་པ་ལྟར་ངས་བཤད་པ་དེ་འདྲ་ཡིན་པ་རེད། འོན་ཀྱང་སྙིགས་དུས་བསྟན་པ་ཉམས་པའི་སྐབས་འདིར་བརྒྱུད་པ་རིན་པོ་ཆེའི་གདམས་པ་ཕ་ནོར་བུ་སྐལ་དུ་འཕྲོད་རྒྱུའི་རེ་བ་ལས་ཅི་ཡང་མེད། ཡང་། དོན་ལ་མི་རྟོན་ཚིག་འཆེལ་བླུན་པོ་ཡིས། །མན་ངག་ཟབ་མོའི་རིན་ཐང་མི་ཤེས་པས། །གདམས་ཟབ་བརྒྱ་ཕྲག་ཅི་དགར་བྱིན་པ་ལས། །ཟང་ཟིང་ངན་ངོན་ཙམ་ལ་ཅི་དགར་སྤྱད། ཅེས་གསུངས་པ་ལྟར། གདམས་པའི་གནད་བྱིན་པ་ལས་རྒྱུ་ཟང་ཟིང་ཆུང་ཆུང་ཞིག་བྱིན་པས་དགའ་སྣང་ཤར་ཏེ་ཐུགས་རྗེ་མ་ཆུང་ཟེར་མཁན་ཡང་ཡོད་སྲིད་པ་རེད། ཨ་ལ་དེ་དག་ཀུ་རེ་ཡིན། ཚང་མས་དོན་གཉེར་མཛད་པ་ལ་བཀའ་དྲིན་ཆེ་ཞུ་བ་ཡིན། ད་རེས་མཚམས་སུ་བཞུགས་མཁན་མང་ཆེ་བ་གཞོན་སྐྱེས་ལོ་ཆུང་གྲྭ་སར་རྐྱང་རྐྱང་རེད། སྤྱིར་རིག་འདུས་ཀྱི་བསྙེན་མཚམས་ཤིག་བཅད་རྒྱུ་འདི་པདྨ་ཐང་གི་སྒྲུབ་པ་བསམ་གཏན་པ་དག་གི་དགོས་མཁོར་བསམ་བློ་བཏང་བ་ཡིན། དེའི་སྟེང་ལ་ད་བཞུགས་རྫོགས་ཆེན་ཚང་གི་བསྟན་བདག་རྣམ་པ། དེའི་ནང་གི་འབྲུག་ཆེན་རིན་པོ་ཆེས་བསྟན་ལ་སྨན་པའི་ཐུགས་བསམ་ཟླ་མེད་ཀྱི་ཐོག་ནས་གཞུང་གྲྭ་མང་པོ་ཞིག་འདིའི་ནང་དུ་ཞུགས་རྒྱུའི་འཆར་འགོད་གནང་འདུག དོན་གྱི་བསྟན་པ་ཇི་ལྟར་འཛིན་དགོས་པའི་གནད་དགོངས་པའི་མཛད་སྤྱོད་དེ་དག་ལ་སྙིང་ནས་རྗེས་སུ་ཡི་རང་ཡོད། ང་ནི་དབང་པོ་སྐྱོན་ཅན་གྱི་མི་ཞིག་ཡིན་པ་རེད། སྔོན་ཆད་བརྡབས་རྡུང་ཕོགས་པས་དབང་པོ་སྐྱོན་ཅན་དུ་གྱུར་པའི་མི་ལུས་ཕྱེད་པོ་ཞིག་ཡིན་སྟབས་ལུས་ཁམས་ས་ཁ་དམའ་སར་འཕྲོད་པ་རེད་མོད། འོན་ཀྱང་དེ་ལྟ་བུའི་ཐུགས་བསམ་བཞེས་ཡོད་པ་གོ་དུས་སྒྲུབ་མཆོད་ཀྱི་སྔོན་དུ་ཞག་གྲངས་དུས་བསྙེན་ལས་རུང་ཞིག་ཚང་བའི་ཆེད་དུ་དེ་མ་ཐག་སྔ་ཡོང་ཅི་ལ་མི་བྱེད་དེ། སྤྲོ་བཞིན་དུ་ཡོང་བ་ཡིན། འདི་ལྟར་ཆོས་ར་གཅིག་གི་ནང་དུ་ཤྲཱི་སེང་ཆོས་གྲྭའི་ཐོས་བསམ་པ་རྣམ་པ་དང་བཅས་ཏེ་མཉམ་དུ་འཚོགས་ཐུབ་པ་འདི་རང་ངོས་ནས་བཤད་ནའང་སྐལ་བ་བཟང་པོ་རེད། བསྟན་སྲོག་གཉིས་པ་མཐུད་རྒྱུའི་དོན་ཆེན་ཞིག་རེད། རྒྱལ་བའི་བསྟན་པ་སྤྱིའི་ངོས་ནས་ཀྱང་བསྟན་པའི་སྙིང་པོ་ལུང་རྟོགས་གཉིས་ཡིན་ཞིང་། དེ་ཉིད་བཤད་དང་སྒྲུབ་པས་འཛིན་རྒྱུ་ལས་གཞན་བསྟན་པ་འཛིན་ཟེར་རྒྱུ་ཞིག་ཇི་ལྟར་ཡོད། མདོར་ན་རྫོགས་ཆེན་རུ་དམ་ལུང་འདིར་དུས་ཀྱི་ཐ་མའི་སྐབས་འདིར་བསྟན་པའི་རྒྱལ་མཚན་མཐོན་པོ་ཞིག་བསྒྲེངས་ཡོད་ན། འདི་ཉིད་རྣམ་པ་ཚང་མ་དང་འབྲལ་ཐབས་མེད་པའི་མཛད་རྗེས་དང་། སྔོན་སྨོན་ཐུགས་བསྐྱེད་དུས་བབས་ཡིན་པ་སྨྲོས་ཅི་དགོས། དེང་སང་ནམ་ཟླ་སྐྱིད་ནི་རེད། དེའི་སྟེང་ས་ཆ་འདི་ལྟ་བུའི་གདན་ས་ཁྱད་པར་ཅན། གནས་ཀྱིས་གང་ཟག་བྱིན་གྱིས་བརླབས་ས། ཏིང་འཛིན་རང་ཤུགས་ཀྱིས་སྐྱེ་བའི་ས་ཡིན་མོད། འོན་ཀྱང་ལོ་ན་མ་སྨིན་པའི་གཞོན་ཆུང་འགའ་རེ་དེ་སྔོན་བདུན་ཕྲག་མང་པོར་ཐུན་བཅད་ནས་འཚོགས་མ་མྱོང་བ་ཚོར་འདི་ལྟར་ཡུན་རིང་འཚོགས་རྒྱུ་ལ་འཚེར་སྣང་སྐྱེ་སྲིད་ཀྱང་ཐུགས་བསམ་ལེགས་པོར་བཞེས་ན། འདི་ལས་དང་སྐལ་བ་ལྡན་པ་ཞིག་རེད། གྲོང་བའི་ནང་དང་འབྲོག་པའི་ནང་དུ་ཡོད་པའི་མི་ཚང་མས་ཚེ་གཅིག་ལ་རྣམ་གཡེང་བྱེད་བཞིན་ཡོད་ཅིང་། མི་ཚེ་གང་པོ་སྒྲིག་མེད་ཁྲིམས་མེད་རེད། རྐང་ལག་བཞི་ཀ་སར་བཙུགས་དང་མི་བཙུགས་ཀྱི་ཁྱད་པར་ཙམ་ལས་ཟ་ཉལ་རྣམ་གཡེང་ཙམ་ལས་མི་ཤེས་པ་བྱོལ་སོང་དུད་འགྲོ་དག་དང་མཚུངས་པ་རེད། ཟ་རྒྱུ་དང་ཉལ་རྒྱུ་འཐུང་རྒྱུ་གསུམ་པོ་དུད་འགྲོ་དག་གིས་ཀྱང་ཤེས། དེ་དང་དེ་འདྲ་བ་ལ་སྐྱིད་དགའ་ཞིག་ཡོད་པ་མ་རེད། འུ་ཅག་སྔར་བསགས་བསོད་ནམས་ཀྱི་དབང་གིས་རྟེན་འདིར་གོས་སྣེ་གསུམ་ལུས་ལ་གྱོན། གཟན་གྲུ་བཞི་ཕྲག་ལ་འཕངས་ནས་དགེ་འདུན་འདུས་པའི་བཞུགས་གྲལ་དུ་བསྙེགས་པ་ཡིན་ན། འདི་གཞན་ངོས་ནས་བཤད་ན་མཆོད་ཡུལ་གྱི་ཞིང་ས་དགེ་འདུན་དཀོན་མཆོག་གི་རྟེན། རང་ངོས་ནས་ཐར་ལམ་འཚོལ་བའི་ཕྱོགས་རྙེད་ཡོད་པའི་བཞུགས་གྲལ་དུ་སླེབས་པ་ཡིན་པས། རང་སྐལ་དུ་བབས་པའི་ལས་དེ་འགྲུབ་པར་བྱེད་དགོས་པ་རེད། རྟགས་ཆ་ལུགས་ཀྱི་སྟེང་ནས་ཀྱང་ལས་རིགས་མི་གཅིག་པ་ལ་ལས་གོས་དང་ལས་རྟགས་མི་འདྲ་བ་ཡོད་པ་ལྟར། སློབ་གྲྭ་བས་སློབ་གྲྭ་བའི་ལས་གོས་གྱོན་ཡོད་པ་རེད། ལས་ཀ་སློབ་སྦྱོང་རེད། གང་སྦྱང་བྱའི་རྒྱུགས་ཀྱང་འཕྲོད་དགོས་པ་རེད། དམག་མིས་དམག་གོས་གྱོན་ཡོད་ན། དེ་ཁོ་རང་གི་ལས་ཀ་མདའ་བོག་མཚོན་ཆའི་ལས་ཐབས་དང་། དམག་འཐབ་ལ་བྱང་ཆུབ་དགོས་པ་རེད། སྐྱེས་པ་ཞིག་ཡིན་ན་སྐྱ་ཆས། བུད་མེད་ཅིག་ཡིན་ན་མོ་ཆས། དེ་དང་མཐུན་པའི་རང་རང་གི་ལས་སྒོར་འཇུག་དགོས་པ་ཡིན་པས། འུ་ཅག་གིས་གྱོན་ཡོད་པའི་གོས་དམར་པོ་འདི་སྟོན་པ་སངས་རྒྱས་ཀྱི་ན་བཟའ། ངུར་སྨྲིག་གསར་བའི་རྒྱལ་མཚན། འདི་སྟོན་པ་ཁོང་རང་ཉིད་ཀྱིས་རྗེས་འཇུག་རྣམས་ལ་རང་གི་སྡེ་ཚན་གྱི་རྟགས། དྲན་ཤེས་བག་ཡོད་ཀྱི་རྟེན་དུ་གནང་བ་རེད། འུ་ཅག་གིས་འདི་གྱོན་ནས་ཅི་ཞིག་བྱེད་དགོས་པ་རེད་ཅེ་ན། དམ་པའི་ཆོས་འཛིན་དགོས་པ་རེད། དམ་པའི་ཆོས་གང་རེད་ཅེ་ན། སློབ་དཔོན་དབྱིག་གཉེན་གྱིས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པོ་སྨྲ་བྱེད་དང་། །སྒྲུབ་པ་བྱེད་པ་ཁོ་ནའོ། ཞེས་གསུངས་ཏེ། ཁོ་ན་ཞེས་པའི་རྣམ་གཅོད་ཀྱི་སྒྲས་ལུང་རྟོགས་གཉིས་ཀ་ལས་གཞན་པའི་སངས་རྒྱས་ཀྱི་བསྟན་པ་ཞིག་མེད་པ་དང་། ཐུབ་པའི་བསྟན་པ་དངོས་ལུང་རྟོགས་གཉིས་ཀ་ཡིན། དེ་བཤད་སྒྲུབ་གཉིས་ཀས་འཛིན་དགོས་པ་ཡོངས་གཅོད་ཀྱིས་ཤུགས་ལ་བསྒྲུབས་ཡོད་པ་རེད། དེས་ན་འུ་ཅག་གི་ལས་ཀ་ནི་དམ་པའི་ཆོས་འཛིན་རྒྱུ་དེ་ཁོ་ན་རེད། གཞན་རྫུན་དང་རྐུ་ཇག ཚོང་དང་སོ་ནམ། ཁྱིམ་ཚང་ཁ་གསོ་རྒྱབ་འགེབ་སོགས་འུ་ཅག་གི་ལས་ཀ་མ་རེད། ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཡིན་པས་ཆོས་རང་གིས་འཛིན་ཅིང་གཞན་ལ་ཆོས་ཀྱིས་ཕན་འདོགས་དགོས་པ་རེད། རབ་ཏུ་བྱུང་བས་ཟང་ཟིང་གི་སྦྱིན་པ་གཏོང་རྒྱུ་བཀག་ཡོད། དེ་ཉིད་ཁྱིམ་པའི་ལས་ཀ་རེད། རབ་ཏུ་བྱུང་བས་ཆོས་ཀྱི་སྦྱིན་པ་བྱེད་དགོས་པ་རེད། དེས་ན་གཞན་ལ་ཕན་འདོགས་པའི་ཐོག་མར་ཕན་འདོགས་པའི་ནུས་པ་རང་ལ་ཡོད་དགོས། འཛམ་གླིང་སྲིད་པའི་ཁམས་འདིར་རྒྱུ་ནོར་རིན་ཐང་ཆེ་ཤོས་དེ་གང་རེད་ཅེས་ཁེད་འཇོག་པ་ལྟར་དྲི་བ་ཞིག་བྱས་ན། འགའ་རེས་དུས་ཚོད་རེད་ཟེར་བ་དང་། འགའ་རེས་ཚེ་སྲོག་རེད་ཟེར་སྲིད། དེ་གཉིས་ཀ་ཡིན་ནི་མ་རེད། ཚེ་སྲོག་ནི་ས་འོག་གི་འབུ་ས་འཇོང་ལའང་ཡོད་པ་དང་། དུས་ཚོད་ནི་སེ་རྒན་གོ་བོ་ཡི་རིང་ཞིག་སུ་ལ་ཡོད། སངས་རྒྱས་འོད་སྲུང་གི་དུས་སུ་ཡོད་པ་ད་དུང་མ་ཤི་བར་ཡོད་པ་རེད་ཅེས་ཟེར་སྲོལ་མེད་དམ། མཛོད་ཀྱི་ནང་དུ་མཆོག་རིང་བསྐལ་པའོ་ཞེས་ཀླུ་ལ་སོགས་པར་གསུངས་མི་འདུག་གམ། དེས་ན་རིན་ཐང་ཆེ་ཤོས་དེ་ནི་དམ་པའི་ཆོས་ཀྱི་སྒོ་ནས་རང་གཞན་ཚེ་འདི་དང་ཕྱི་མར་ཕན་འདོགས་པའི་ཤེས་རིག་ཡོན་ཏན་ཉམས་མྱོང་ལག་ལེན་དང་བཅས་ཡོད་རྒྱུ་དེ་རེད། དེ་འདྲའི་རིན་ཐང་ཅན་གྱི་དངོས་པོ་དེ་རྒྱུ་ཕྱུག་པ་ཙམ་གྱིས་ཡོད་པ་མ་རེད། དབང་ཆེ་བ་ཙམ་གྱིས་ལོན་པ་མ་རེད། གཅིག་ན་སྔོན་བསགས་ཀྱི་བསོད་ནམས། གཉིས་སུ་རང་ཉིད་ཀྱི་སྙིང་སྟོབས་དང་འབད་པ་ལ་ཐུག་ཡོད། དེས་ན་གཞི་ཚུལ་ཁྲིམས་རྣམ་དག་གི་ཐོག་ནས་ཐོས་པ་བསགས། ཐོས་དོན་བསམས། སྒོམ་པས་རང་རྒྱུད་བཏུལ་ནས་སྔར་མེད་ནང་གི་ཡོན་ཏན་གསར་པ་ཞིག་རང་གིས་རྙེད་དགོས་པ་རེད། གྲྭ་ཆུང་རྣམ་པ་ཚོས་ཐུན་བཅད་པ་དང་བསྒོམ་བྱ་བ་འདི་དག་རང་ཉིད་གྲྭ་བ་ཡིན་པའི་ལས་སྐལ་རེད་བསམ་དགོས། ནངས་དུས་སྔ་ལང་དགོས་ཚེ་དང་པོའི་སྐབས་སུ་འཚེར་སྣང་ཅུང་ཟད་ཡོད་སྲིད་ཀྱང་། ཉིན་གཅིག་ཉིན་གཉིས་ཀྱིས་བཟང་ལོབ་འགྲོ་བ་ཡིན། ནུབ་མོ་འུར་རྒྱབ་ནས་ཡུན་རིང་འདུག་ལོབ་མ་བྱེད། ནངས་དུས་སྔ་མོ་ལོངས་དང་ཐོས་བསམ་སྒྲུབ་པ་ཉམས་ལེན་གང་ཞིག་བྱས་ཀྱང་ནངས་དུས་རིག་པ་གསལ་བ་རེད། རྒྱའི་ལས་བྱེད་སྡུག་ག་མ་ཚོའི་བྱེད་སྟངས་ལྟར་ཉལ་འདུག་མི་ཉན། ཐོས་རྟགས་ཞི་ཞིང་དུལ་བ། བསྒོམས་རྟགས་ཉོན་མོངས་མེད་པ་ཞེས་ཟེར་བ་རེད། སྤྱིར་མི་རྒྱུས་མིས་ལོན་པ་ཚེ་ཕྱེད། ཁྱི་རྒྱུས་རྐུན་མས་ལོན་པ་ནམ་ཕྱེད་ཟེར་བ་རེད་མོད། འོན་ཀྱང་ཚིག་གཅིག་གི་ཚིག་འགོ་བླངས་མ་ཐག མི་ཡ་རབས་ཤིག་རེད་དམ་མ་རབས་ཤིག་རེད། ཡོན་ཏན་ཅན་ཞིག་རེད་དམ་བླུན་པོ་ཞིག་རེད་ཕྱོགས་ཙམ་ཤེས་འགྲོ་བ་རེད། དེས་ན་རང་ཉིད་རང་ལ་སེམས་མི་དཀར་བ་ཡོད་མི་སྲིད་པས་རང་ལེགས་པོ་ཞིག་ཡོང་བར་འདོད་ན་ཡ་རབས་སྤྱོད་བཟང་བསླབ་ནས། བཟང་གྱེན་འགྲོའི་ཕྱོགས་སུ་ཡར་ལ་བལྟ་བ་ལས་ངན་ཐུར་འགྲོའི་ཕྱོགས་སུ་མར་ལ་མ་བལྟ། ཁྱིམ་ཕ་མ་བསམ་པ་དཀར་བ་ཡིན་ཡང་ཡ་རབས་ཀྱི་ཡོན་ཏན་བསླབ་ཤེས་ནི་མ་རེད། མདོར་བསྡུས་ན། རིག་པ་གཞོན་པའི་དུས་ན་སློབ། །བ་ནི་དགུན་གྱི་དུས་སུ་གསོས། །ཞེས་གསུངས་པ་ལྟར། དམ་པའི་བཤེས་གཉེན་ལ་བསྟེན། རང་རྒྱུད་ཡོན་ཏན་གྱིས་ཕྱུག་པ་ཞིག་གྱིས་དང་། ཁྱིམ་ཕ་མ་ལ་སོགས་པ་རང་གཞན་ཐམས་ཅད་ལ་ཕན་ཐོགས་དེ་ལས་ཆེ་ཞིག་ཡོད་ནི་མ་རེད། འགའ་རེའི་བསམ་པར། འུ་ཅག་གི་མཚམས་འདི་དགོན་པའི་ཚོམ་བུ་ཚོགས་སྒྲུབ་དང་འདི་མི་འདྲ་འདུག རྒྱལ་ཐོའི་ནང་དུ་མ་བསྡད་ཚེ་ཕྱི་མི་ནང་དུ་འོང་མི་ཆོག་པ་དེ་འདྲ་རེད་མི་འདུག འདི་རི་ཁྲོད་མཚམས་པའི་མཚམས་དང་ཡང་མི་འདྲ་འདུག མཚམས་ནག་སྒོ་བཅད་བུག་སྒོ་འདག་སྦྱར་བྱས་ན་ཕྱི་ནང་གི་རྒྱུ་འགྲུལ་ཅི་ལ་ཆོག འདི་འདྲའི་མཚམས་ཅི་ཡིན་སྙམ་པ་སྲིད་ཀྱང་། འདི་ནི་རྒྱུན་གྱི་ཉམས་ལེན་གནད་ཀྱི་སྲང་ལ་གཅུན་ནས་ཉིན་མཚན་ཆུ་བོ་རྒྱུན་གྱི་རྣལ་འབྱོར་ལ་གོམས་པ་བསྐྱེད་ཐབས་ཤིག་རེད། ཚེ་གཅིག་ལ་འདི་ལྟ་བུའི་ཉམས་ལེན་ལ་འབད་ཐབས་བྱེད་པ་ཞིག་རེད། ལོ་གསུམ་ཕྱོགས་གསུམ་གྱི་མཚམས་པ་དག་གིས་དོན་ངོ་མར་མཚམས་གཡོག་ལས་གཞན་མི་དང་མི་ཐུག་པར་བྱེད་དགོས་པའི་སྲོལ་ཡོད་པ་ཡིན་ཡང་། གདུལ་བྱའི་ཁམས་དབང་མོས་པ་དང་བསྟུན་ནས་རིམ་གྱིས་རིམ་གྱིས་ལམ་ལ་འཇོག་དགོས། ཇི་ལྟར་སྟོན་པ་ཐུགས་རྗེ་ཅན་གྱིས་ཀྱང་གདུལ་བྱ་དང་བསྟུན་ནས་ཐེག་རིམ་མང་པོ་ཞིག་གསུངས་པ་ལྟར་རེད། དེ་ཡང་མཚམས་པ་བཟང་ཤོས་མི་ལ་རས་པར་བརྩི་བ་མ་ཡིན་ནམ། དེ་ཡི་ཡན་ལ་སུ་ཞིག་ཡོད། དེ་ལ་ཡང་ནང་དང་གསང་བའི་མཚམས་མ་གཏོགས་ཕྱི་ན་མཚམས་ཐོ་ཞིག་མེད་པས་རྔོན་པ་མང་པོ་ཞིག་བྲོ་ཁ་འཕྲོག་རྒྱུ་ཡོད་སྙམ་གྱིས་འཛུལ་ཡོང་རབས་སོགས་བཤད་རྒྱུ་ཡོད་པ་མ་ཡིན་ནམ། ཕྱི་ལ་མཚམས་ཐོ་བཅིངས། ནང་ལ་ཕྲག་དོག་ཞེ་སྡང་གི་མེ་འབར་ནས་ཨིན་ཐི་རེ་ཡོད་པ་ལས་རྒན་མོ་བསམ་བཟང་ཞིག་གིས་དགའ་བ་རེད། འདི་འདྲའི་མཚམས་ཤིག་བླ་རབས་སྐུ་རབས་སུ་དང་སུའི་སྐབས་སུ་དར་མྱོང་བ་མ་རེད་ཟེར་རྒྱུ་ཡོད་ནི་མ་རེད། གྲུབ་ཐོབ་པདྨ་རིག་འཛིན་ཚུན་རྫོགས་ཆེན་ཨོ་རྒྱན་བསམ་གཏན་ཆོས་གླིང་ཞེས་མཚན་དང་དོན་མཐུན་པར། རྫོགས་ཆེན་མཁའ་འགྲོ་སྙིང་ཐིག་གི་ཉམས་ལེན་བྱེད་མཁན་རྐྱང་རྐྱང་བྱོན་ནས། དུས་ཕྱིས་སུའང་དགུན་སྐྱ་བསྡམས་ཟེར་དུས། ལྷ་ཆོས་བཅོ་བརྒྱད་ཀྱིས་གླིང་བསྐོར་ཞིབ་བཤེར་བརྒྱུད། བླ་ཁག་ཆེ་བ་གསུམ་ཙམ་ཞིག་ལས་དུ་བ་གནམ་ལ་འཕྱུར་མི་ཆོག་པ་མཁའ་འགྲོ་སྙིང་ཐིག་གི་ཉམས་ལེན་གྱི་ཐུན་བཅད་ནས་མཚམས་འདི་དང་འདྲ་བར་རྒྱུན་གྱི་ཉམས་ལེན་སྲང་ལ་ཚུད་ཐབས་མཛད་པའི་ཕྱག་སྲོལ་ཡོད་པ་རེད། དྲི་བ་དེ་འདྲ་བ་ལ་དྲིས་ལན་དེ་འདྲ་སློགས། དེ་དག་འུ་ཅག་ཁོ་ནའི་དགོས་མཁོ་ཙམ་དང་བསྟུན་ཆེད་བཤད་པ་མིན། དེང་སང་རྟེན་བཞེངས་ཀྱི་སྐབས་སུ་མིའི་རྒྱུ་འགྲུལ་གཅོད་ཐབས་མེད་པ་ཡིན་ཡང་། ནང་སོ་བྱང་སྔགས་གསུམ་གྱི་བཅས་ཁྲིམས་ལས་མ་འདས། ཕྱི་ལས་ལོག་ལམ་ལོག་ངན་ལང་དུ་མ་ཤོར་ན་མཚམས་དེ་རེད། དེའི་སྟེང་དུ་གཞན་ཕན་བྱང་ཆུབ་ཀྱི་སེམས་དང་ལྡན་ཚེ་དགེ་བའི་བཤེས་གཉེན་ཟེར་ནའང་དེ་རེད། ཆོས་པ་རྣམ་དག་ཟེར་ནའང་དེ་རེད། དེས་ན་རྣམ་པ་ཚོས་བསྐྱེད་རྫོགས་རིམ་གཉིས་ཀྱི་ཉམས་ལེན་འདི་དག་གི་གནད་གསང་རེ་མཁྱེན་ན། ཆོ་ག་ཚིག་བཞི་རེ་ལས་མ་བཏོན་ཡང་དེ་ཉིད་གནད་དུ་སྨིན་པ་རྣམ་པར་དག་པ་ཞིག་རེད་འགྲོ་བ་རེད། བསྐྱེད་རིམ་ཐམས་ཅད་ཀྱི་རྨང་གཞི་ནི་སྣང་བ་ལྷ་རུ་ཤེས་རྒྱུ་དེ་ཉིད་ཡིན། རྫོགས་རིམ་ཐམས་ཅད་ཀྱི་མཐར་ཐུག་རྫོགས་ཆེན་གྱི་ཉམས་ལེན་བྱེད་རྒྱུ་དེ་རེད། དངོས་གཞིའི་འོད་གསལ་གྱི་རིག་པའི་རང་ངོ་འཕྲོད་དུས་དེ་ལས་མི་འདའ་བའི་བསྒོམ་པ་དང་། བླང་དོར་བྲལ་བའི་སྤྱོད་པ། རེ་དོགས་མེད་པའི་འབྲས་བུ་ཐོབ་ཚེ། དེའི་ཡན་གྱི་འདི་འགྲུབ་མ་སོང་སྙམ་པའི་བློ་ཟོན་ཞིག་དགོས་དོན་མེད། གུ་ཡངས་བློ་བདེ་ཡིན་པ་རེད། གྲྭ་ཆུང་རྣམ་པ། ཁྱེད་རྣམ་པ་གང་ལྟར་བཤད་རུང་མི་རེད། ཁྱིམ་ཚང་གི་གོ་ཁ་བསྐྱུར། མ་ཨ་མའི་ནུ་ཞོ་བཞག་ནས་ཡུན་རིང་མ་རེད། རིག་རྒྱུ་གོ་རྒྱུ་ད་དུང་མང་བ་རེད། འཇིག་རྟེན་ཁམས་ཀྱི་སྐྱིད་སྡུག་དེ་དགོ་བའི་ར་རིས་འདྲ་ཡིན་ནི་རེད། སྐྱིད་རེའི་ཕག་ན་སྡུག་རེ། ལ་རེའི་ཕག་ན་ཐུར་རེ་ཡོད་ན། རྟག་བརྟན་ངེས་པ་ཅན་ཞིག་མིན་ཡང་། སྐྱེས་པ་བུ་ཡི་སེམས་ཁོག་དེ་ཡངས་དགོས། སེམས་རྒྱ་དེ་ཆེ་དགོས། དགའ་སླ་སྡུག་མགྱོགས་ཉན་ནི་མ་རེད། བྱ་བ་གང་ཡིན་ཡང་བརྟགས་དཔྱད་རང་གིས་གཏོང་དགོས། དང་ཐོག་མི་ཞིག་བྱེད་དགོས་སོང་པ་རེད། མི་ཟས་བཟའ་ཞིང་མི་གྲལ་དུ་འགྲོ་བཞིན་མ་ཡིན་ནམ། མིའི་ནང་གི་མི་རབ་ཞིག་བྱེད་ཨེ་ཐུབ་ལྟོས། མི་རབ་དེ་ཅི་འདྲ་ཞིག་ཡིན་པ་རེད་ཅེ་ན། རང་འདོད་མི་ཆེ་བ། གཞན་ཕན་ཅན། སྤྱི་དོན་རྐྱང་རྐྱང་ལ་བསམ་བློ་གཏོང་མཁན་ཞིག་ཡིན་ནི་རེད། དེ་ནས་གཟོད་ཆོས་པ་བྱེད་དགོས། ཆོས་པ་བྱེད་པ་ལ་ཆོས་པ་སྡུག་ཐུག་སྐྱ་མིན་སེར་མིན་ནམ། ཡང་ན་སྐྱ་སེར་གཉིས་གོ་ཆོད་པ་དེ་འདྲ་མ་ཡིན་པར། ཆོས་པ་རབ། ཆོས་མ་གཏོགས་བསམ་རྒྱུ་མེད་པ། ཚེ་འདི་ཕྱི་གཉིས་ཀར་རང་འགོ་ཐོན་པས་མ་ཚད། གཞན་སེམས་ཅན་ལ་ཕན་ཐོགས་མཁན། དད་ལྡན་དང་བ་འདྲེན་པའི་མིག་རྒྱན། འབྱོར་ལྡན་བསོད་ནམས་བསགས་པའི་ཞིང་ས་ཉན་ཐག་ཆོད་ཅིག་བྱེད་དགོས་པ་རེད། སྤྱིར་ཚེ་ཆོས་མཐའ་རུ་ཕྱིན་པ་ལ་བདུད་དང་བར་ཆད་མང་བ་ཡིན། ཆོས་ཟབ་ཙ་ན་ནག་པོའི་བདུད་ཀྱང་ཟབ། ཅེས་གསུངས་པ་རེད། དེ་ཆོས་པ་རྣམ་དག་ཞིག་རེད་འགྲོ་ཉེན་འདུག དཀོན་མཆོག་གསུམ་གྱི་གདུང་དེ་ཡིས་འཛིན་འགྲོ་བར་འདུག དེ་སངས་རྒྱས་བསྟན་པ་འཇིག་རྟེན་ནས་ནུབ་མི་འཇུག་མཁན་ཞིག་ཏུ་འགྱུར་འགྲོ་བར་ངེས་བསམ་དུས། བདུད་དགའ་རབ་དབང་ཕྱུག་ཕྲག་དོག་ལངས་ནས་དགའ་རབ་དབང་ཕྱུག་འཁོར་དང་བཅས་པས་ལྷག་པར་དེ་ལ་གཟས་ཏེ་གནོད་སྐྱེལ་བ་རེད། བདུད་ཅེས་པ་ནག་པོ་རྭ་ཅོ་ཅན་མགོ་དགུ་ལག་པ་བཅོ་བརྒྱད་ཁ་གདང་མིག་ཅེར་སོང་བ་ཞིག་ཡིན་པའི་ངེས་པ་ཡོད་ནི་མ་རེད། སློབ་དཔོན་ཆེན་པོས། བར་ཆད་བདུད་ནི་ཅིར་ཡང་བརྫུས་ཡོང་བས། ཞེས་གསུངས་པས། མཚམས་རེ་དགྲ་དང་མཚམས་རེ་གཉེན། མཚམས་རེ་ཕ་མ་སྤུན་ཟླའི་བློ་ཁ་བདུད་ཀྱིས་བསྒྱུར་ནས་ངན་བསླབ་ཡོང་བ་རེད། ཁྱད་པར་དུ་ཕྱིན་ཅི་ལོག་གི་ཁ་ཕོ་རུས་དང་། ཕྱིན་ཅི་ལོག་གི་མགོ་རྣ་བ། གཡོ་སྒྱུ་ཕྲག་དོག་ངན་སེམས་སོགས་ལོབ་ཡོང་བར་འདུག བསླབ་ཡོང་བར་འདུག་བསམ་དུས་མི་དེའི་ཤེས་རྒྱུད་བདུད་ཀྱིས་བརླམ་ཡོད་པའི་རྟགས་ཡིན་པས། དེ་དུས་བྲོས་དགོས་པ་རེད། ལོག་པའི་བཤེས་གཉེན་དེ་རྒྱབ་ལ་ཆོས་གོས་གྱོན་ཡོད་པས་མ་ཚད་མགོ་ལ་གསེར་ཞྭ་གྱོན་མཁན་ཞིག་ཡིན་རུང་སྤང་དགོས་པ་རེད། ལེགས་པའི་ལམ་སྟོན་གྱི་མི་དེ་ཨ་ཅོ་དབྱུག་བཟུང་ཞིག་ཡིན་རུང་འབྲེལ་འདྲིས་གྱིས་དང་རང་ཉིད་ལ་ཕན་ཐོགས་ཡོད། ཇི་ལྟར་མ་ལ་ཡ་ཡི་ནགས་ཀླུང་དུ། །རྣམ་པར་འཁྱམས་པའི་སྡོང་དུམ་ཕལ་བ་ཡང་། །ཡལ་འདབ་བརླན་པའི་ཙནྡན་དྲིས་བསུང་ལྟར། །གང་ལ་བརྟེན་པ་དེ་ཡི་རྗེས་སུ་འགྲོ། ཞེས་གསུངས་པ་ལྟར། བཟང་པོའི་རྒྱུད་ནས་བཟང་འགོ། ངན་པའི་རྒྱུད་ནས་ངན་འགོ་བ་རེད། ད་དེ་དག་རང་གར་ཆོས་ཁྲིད་ཀྱི་ཞོར་དུ་གཏམ་ཉོག་བཤད་པ་རེད། ཉོག་ལ་གཏམ་གཞུང་རིང་བ་དེ། །རྒན་པོ་ཨུ་ཚུགས་ཅན་ལ་འབྱུང་ཉེ། ཞེས་གསུངས་པ་ཅི་མ་བདེན། ད་དགོས་མི་འདུག འུ་ཅག་གིས་དྲོས་ཇ་རག་འཇུག་ན་དགའ། དྲོས་ཇ་བསྐོལ། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་སོགས། ཉིན་གསུམ་པའི་ཆོས་ཁྲིད།ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཟུང་འཇུག་སྐུ་བཞི་ཡེ་ཤེས་ལྔ་ཡི་བདག་ཉིད་ཁྱབ་བདག་དཔལ་ཀུན་ཏུ་བཟང་པོའི་གོ་འཕང་ལ་འགོད་པར་བགྱི། དེའི་ཆེད་དུ་བདག་གིས་དམ་པའི་ཆོས་ཟབ་མོ་བསྐྱེད་རྫོགས་ཀྱི་རིམ་པ་ཉན་ཏེ། དེའི་དོན་ཚུལ་བཞིན་དུ་བསྒྲུབ་དགོས་བསམ་པའི་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དོན་གཉིས་སམ་ཟུར་གཉིས་དང་ལྡན་པ་དང་། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་། སྣང་ཞེན་ལྷ་སྐུའི་ཕྱག་རྒྱ། སྒྲ་གྲག་བདེ་ཆེན་གྱི་སྔགས། དྲན་རྟོག་འོད་གསལ་ཆོས་སྐུའི་ངང་ལས་མི་འདའ་བའི་རྫོགས་རིམ་གྱི་མདོ་ཆིངས་སམ། སྣང་སྲིད་དག་པ་རབ་འབྱམས་སུ་ཤར་བའི་ལྟ་སྒོམ་ཏིང་འཛིན་ཡ་མ་བྲལ་བའི་ངང་ནས་གསན་འཚལ། སྐབས་སུ་བབས་པ་གང་ཞིག་འཆད་པར་བྱ་བ་ནི། རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཆོས་ཚན་ལས། རྩ་གསུམ་ཀུན་ཀྱི་གཙོ་བོ་ནང་སྒྲུབ་རིག་འཛིན་འདུས་པའི་བསྐྱེད་རྫོགས་ཀྱི་སྐོར་འདི་ཉིད་འཆད་བཞིན་པའི་སྐབས་ཡིན་ཞིང་། འདི་ལ་སྦྱོར་དངོས་རྗེས་གསུམ་ཡོད་པའི་ནང་ནས་སྦྱོར་བ་སྔོན་འགྲོའི་སྐོར་སོང་ཟིན་ཏེ་དངོས་གཞི་ལ་ཐུག དངོས་གཞི་དེ་ལའང་རྣམ་གྲངས་བདུན་ཡོད་པའི་ནང་ནས་བསྐྱེད་ཆོག་དང་སྤྱན་འདྲེན། བཞུགས་གསོལ། ཕྱག་འཚལ། མཆོད་པ། བསྟོད་པ་སྟེ་དྲུག་སོང་ཟིན་ནས། བདུན་པ་འཛབ་བཟླས་ཀྱི་སྐབས་ལ་ཁེལ། དེ་ལས་ཀྱང་གང་འཚམ་ཞིག་སོང་སྟེ། འཕྲོས་དོན་ཁར་སང་སྲོག་སྡོམ་གཟེར་བཞིའི་སྐོར་ནས་འགོ་ཞིག་གླེང་བ་རེད་མོད། དེ་རིང་ཐོག་མར་དེའི་སྐོར་ནས་ཅུང་ཟད་ཞུས་ན་བསམ་པ་ཡིན། གཟེར་བཞི་ཞེས་པ་ནི། ཏིང་འཛིན་ལྷ་ཡི་གཟེར། སྙིང་པོ་སྔགས་ཀྱི་གཟེར། དགོངས་པ་ཆོས་ཉིད་ཀྱི་གཟེར། འཕྲོ་འདུ་འཕྲིན་ལས་ཀྱི་གཟེར་བཅས་ཡིན་པ་རེད་ཅེས་ཞུས་པ་ཡིན་ན། དེའི་ནང་གི་ཏིང་འཛིན་ལྷ་ཡི་གཟེར་ཞེས་པ་ནི། དེ་ཡང་རྣལ་འབྱོར་ཆེན་པོའི་རྒྱུད་སྡེ་མ་ཧཱ་ཡོ་ག་དང་བསྟུན་ན། ཏིང་འཛིན་རྣམ་གསུམ་གྱིས་ཁོག་ཕུབ་དགོས་པ་རེད། ཏིང་འཛིན་རྣམ་གསུམ་ནི་དེ་བཞིན་ཉིད་ཀྱི་ཏིང་ངེ་འཛིན། ཀུན་སྣང་གི་ཏིང་ངེ་འཛིན། རྒྱུའི་ཏིང་ངེ་འཛིན་ཏེ་གསུམ་རེད། དེ་ལས་དེ་བཞིན་ཉིད་རྡོ་རྗེ་ལྟ་བུའི་ཏིང་ངེ་འཛིན་ནི་དབྱིངས་སྟོང་པ་སྤྲོས་བྲལ་གྱི་ངང་དུ་མཉམ་པར་འཇོག་རྒྱུ་དེ་ཉིད་དང་། ཀུན་སྣང་སྒྱུ་མ་ལྟ་བུའི་ཏིང་ངེ་འཛིན་ནི་དེ་ལྟར་མ་རྟོགས་པའི་འགྲོ་བ་ཡོངས་ལ་སྙིང་རྗེ་སྒྱུ་མ་ལྟ་བུར་བསྒོམ་པ་དེ་ཡིན་པ་དང་། རྒྱུ་དཔའ་བར་འགྲོ་བའི་ཏིང་ངེ་འཛིན་ནི་སྟོང་ཉིད་སྙིང་རྗེ་དབྱེར་མེད་ཀྱི་རྩལ། བསྒོམ་བྱ་ལྷ་གང་ཡིན་པ་དེའི་ཐུགས་སྲོག་གི་ཡི་གེ་བསྐྱེད་གཞི་དེ་ལ་བརྟེན་ནས་བསྒོམ་པ་བཅས་ཡིན་པ་རེད། ད་རེས་རིག་འཛིན་འདུས་པ་ཨ་ནུའི་བསྐྱེད་ཆོག་ལྟར་སྙིང་པོ་དྲན་པ་ཙམ་གྱིས་སྐད་ཅིག་དྲན་རྫོགས། ཨ་ནུའི་ཨ་ཏི་ལྟར་བསྒོམ་པ་ཡིན་མོད། འོན་ཀྱང་ཏིང་འཛིན་རྣམ་གསུམ་གྱིས་ཁོག་འབུབ་པ་ནང་རྒྱུད་སྡེ་གསུམ་གྱི་ཁྱབ་བྱེད་ཡིན་པ་ལུང་གིས་གསལ་ཡོད་པ་རེད། དེ་ཡང་ཇི་ལྟར་ལུང་གིས་གསལ་ཡོད་པ་རེད་ཅེ་ན། རྡོ་རྗེ་སེམས་པ་སྙིང་གི་མེ་ལོང་གི་ནང་དུ། བསྐྱེད་པ་མ་ཧཱ་ཡོ་ག་ནི་ཆོས་ཐམས་ཅད་ཀྱི་གཞི་ལྟ་བུའོ། །རྫོགས་པ་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུའོ། །རྫོགས་ཆེན་ཨ་ཏི་ཡོ་ག་ནི་ཆོས་ཐམས་ཅད་ཀྱི་འབྲས་བུ་ལྟ་བུའོ། །ཞེས་གསུངས། མ་ཧཱ་ཡོ་གར་སྔགས་ཀྱི་ཐེག་པ་ཐམས་ཅད་ཀྱི་གཞི་ལམ་འབྲས་བུའི་དོན་མཐའ་དག་བསྟན་ཡོད་པས་ན། དེ་ཉིད་གཞིར་བཞག་གི་སྟེང་ནས་སྔགས་ཀྱི་ཉམས་ལེན་མཐའ་དག་གི་ངེས་པ་བསྐྱེད་དགོས་པ་རེད། དེས་ན་གཞི་དངོས་པོ་གཤིས་ཀྱི་བཞུགས་ཚུལ་ལ་རང་བྱན་ཚུད་པའི་ཐོག་ནས་ལྟ་བ་གཏན་ལ་ཕབས་པ་དེ་ལ་དེ་བཞིན་ཉིད་ཀྱི་ཏིང་ངེ་འཛིན་ཟེར་བ་ཡིན་པས། དོན་ངོ་མར་དེའི་ངོ་བོའི་ཆ་ནས་ཤེས་རབ་ཡིན་པ་རེད་མོད། འོན་ཀྱང་མོས་པས་སྤྱོད་པའི་ལམ་པ་ཞིག་ལ་མཚོན་ན་བསམ་གཏན་ལྟར་སྣང་བས་དེ་ལ་ཏིང་ངེ་འཛིན་གྱི་སྒྲ་ཞུགས་པ་རེད། དེས་ན་གནས་ལུགས་དེ་ཉིད་སྒྲ་ཇི་བཞིན་པར་རྟོགས་ཡོད་པ་ཡིན་ན་དེ་ཉིད་འཕགས་པའི་བདེན་མཐོང་ཡིན་པས། ས་དང་པོ་ནས་ཡོད་པའི་ལྷག་བསམ་རྣམ་དག་གི་སེམས་དེ་དེའི་རྒྱུད་ལ་རང་ཤུགས་སུ་སྐྱེ་བ་རེད། དེས་ན་དེ་འདྲ་བ་ལ་ལྷག་ཏུ་བསྐྱེད་རིམ་གནད་ཆེན་བྱེད་དགོས་པ་མ་ཡིན་ཞིང་། དེ་མ་ཡིན་པར་ལས་དང་པོ་བའི་རིགས་ཅན་ལ་རྫོགས་རིམ་འགྲུབ་པའི་རྒྱུ་རུ་བསྐྱེད་རིམ་མེད་ཐབས་མེད་པའི་གནད་ཆེན་ཡིན། དེ་ལྟར་སྨྲས་ཚེ་འོ་ན་བསྐྱེད་རིམ་ལས་དང་པོ་བ་ལས་མ་དགོས་པ་རེད། ལས་དང་པོ་བའི་ཚད་དེ་ཅི་འདྲ་ཞིག་ལ་འཇོག་པ་རེད་ཟེར་ན། ལས་དང་པོ་བའི་ཚད་དེ་བསྐྱེད་རིམ་རྐྱང་པའི་ཕྱོགས་ནས་བཤད་ན་རགས་པའི་དཀྱིལ་འཁོར་ཡུད་ཙམ་གྱིས་མངོན་དུ་བྱེད་ནུས་པ་ཚུན་ཆད་ལ་འཇོག་པའང་ཡོད་པ་དང་། ཡང་བསྐྱེད་རྫོགས་གཉིས་ཀའི་ཆ་ནས་བཞག་པའི་སྐབས་སུ་བསྐྱེད་རིམ་པ་ཐམས་ཅད་ལས་དང་པོ་བ་རུ་འཇོག་པའང་ཡོད་པ་རེད། སྤྱིར་བསྐྱེད་གཞི་དེ་བཞིན་ཉིད་ཀྱི་ཏིང་ངེ་འཛིན་དེ་སོ་སོའི་སྐྱེ་བོའི་སར་རྗེས་དཔག་ཙམ་ཞིག་ཡིན་པ་དེའི་ཕྱིར། ཆོས་ཐམས་ཅད་བསམ་དུ་མེད་པའི་དེ་ཁོ་ན་ཉིད་ཀྱི་གཟུགས་བརྙན་ཙམ་དུ་སྣང་བའི་ཏིང་ངེ་འཛིན་ལྟར་གྱུར་བའི་དེ་བཞིན་ཉིད་དེའི་གདངས་སྙིང་རྗེ་ཆེན་པོར་ལངས་པ་མོས་པས་སྤྱོད་པའི་སེམས་བསྐྱེད་ཡིན་དགོས་པས། དེ་ལ་ཀུན་སྣང་གི་ཏིང་ངེ་འཛིན་ཞེས་བཏགས་ནས། དེའི་འཕེན་པ་དེའི་སྟེང་ནས་བསྐྱེད་རིམ་གྱི་རྒྱུ་ཚོགས་བསྒྲུབ་པ་དེ་ཉིད་ཐབས་དང་ལམ་མ་ནོར་བ། རང་ལུགས་སྙིང་ཐིག་གི་གྲུབ་མཐའི་ཐུན་མིན་གྱི་མན་ངག་ཡིན་པ་རེད། དེའི་ཕྱིར་ན་སྟོང་ཉིད་སྙིང་རྗེ་ཟུང་དུ་འཇུག་པའི་གསལ་སྣང་ལྷའི་མཚན་མར་ཤར་ནའང་། སྣང་དུས་ཉིད་ནས་རང་བཞིན་གྱིས་མ་གྲུབ་པར་སྣང་སྟོང་གཉིས་མེད་ཀྱི་རང་བཞིན། མེ་ཏོག་དང་དྲི་བསུང་ལྟར་ཐབས་ཤེས་འབྲེལ་བ་བསྐྱེད་རྫོགས་ཟུང་འཇུག་གི་དོན་མ་འཁྲུལ་བ་ཡིན། དེས་ན་རྟེན་གཟུགས་སྐུ་རྣམ་པ་གཉིས་ཐོབ་པའི་རྒྱུ་བསྐྱེད་རིམ་གྱིས་བྱེད། བརྟེན་པ་ཐུགས་དེ་ཁོ་ན་ཉིད་ཀྱི་ཡེ་ཤེས་ཐོབ་པ་བསྐྱེད་རིམ་དེ་ལ་རྫོགས་རིམ་གྱི་ལྟ་བས་རྗེས་ཐེབས་པ་དེས་བྱེད། མདོར་ན་ཏིང་འཛིན་ལྷ་ཡི་གཟེར་ཞེས་གསུངས་པ་དེ་ཕྱི་སྣོད་གཞལ་ཡས་ཁང་ནང་བཅུད་ལྷ་དང་ལྷ་མོར་གསལ་བ་གཞིར་བཞག་གི་ཐོག རང་ལུས་ལྷ་སྐུར་གསལ་བ་དེ་ཉིད་ཏིང་འཛིན་ལྷ་ཡི་གཟེར་ཡིན། འདི་ལ་དག་རྫོགས་སྨིན་གསུམ་ཇི་ལྟར་ཚང་བ་རེད་ཅེ་ན། མར་འཁོར་བའི་གནས་སྐབས་ཀྱི་སྐྱེ་བ་ལུས་ཀྱི་བག་ཆགས་དག ཡར་སངས་རྒྱས་ཀྱི་སྐུར་གང་ལ་གང་འདུལ་གྱི་འཕྲིན་ལས་རྫོགས་ཏེ། བར་ཉམས་ལེན་གྱི་སྐབས་སུ་ལུས་བསྐྱེད་བྱེད་ཀྱི་རྩ་ཡི་དྲ་བ་དག་ནས་རྡོ་རྗེའི་ལུས་སུ་གནད་དུ་སྨིན་པའི་སྨིན་བྱེད་དུ་འགྲོ་བ་ཡིན་པ་རེད། སྙིང་པོ་སྔགས་ཀྱི་གཟེར་ནི། སེམས་དཔའ་སུམ་བརྩེགས་ཀྱི་ཐུགས་ཀར་སྔགས་ཕྲེང་འཁོར་བཞིན་ཡོད་པར་སེམས་རྩེ་གཅིག་གཏད་དེ་བཟླས་པ་བྱས་ནས་བསྙེན་པ་བཏོན་ཚེ། རླུང་འབྱིན་འཇུག་གནས་གསུམ་སྔགས་སུ་ཤེས་པའི་རྡོ་རྗེའི་བཟླས་པ་བྱེད་པ་དེ་ཉིད་རེད། འདི་ལ་དག་རྫོགས་སྨིན་གསུམ་ཅི་ལྟར་སྦྱར་བ་རེད་ཅེ་ན། མར་འཁོར་བའི་གནས་ཀྱི་བརྗོད་པའི་སྒྲ་སྐད་ཐམས་ཅད་སྔགས་སུ་དག ཡར་དག་པ་སངས་རྒྱས་ཀྱི་གསུང་གི་འབྲས་བུ་རྫོགས། བར་ཉམས་ལེན་གྱི་སྐབས་ཀྱི་ངག་རླུང་གི་རང་བཞིན་ཐམས་ཅད་སྙིང་པོ་སྔགས་ཀྱི་རང་བཞིན་དུ་གྱུར། འདི་ཕ་རྒྱུད་ལྟར་བྱས་པ་ཡིན་ན་རླུང་གི་རྫོགས་རིམ་ཐམས་ཅད་ཀྱི་སྨིན་བྱེད་དུ་འགྲོ་བ་ཡིན། གསུམ་པ་དགོངས་པ་མི་འགྱུར་བའི་གཟེར་ནི། ཆོས་ཉིད་ཀྱི་ལྟ་བས་རྩིས་ཟིན་པ་ལ་གསུངས་པ་རེད། ཁར་སང་གོང་དུ་ཡང་ཤེས་པ་གཏད་མེད་ངང་ལ་ཐོངས། ཞེས་གསུངས་པ་དང་དོན་གཅིག་རེད། སྤྱིར་ན་ལྟ་བས་གཞི་བཟུང་། སྒོམ་པས་ཉམས་སུ་བླངས། སྤྱོད་པས་བོགས་དབྱུངས་ཏེ། མཐར་ཐུག་གི་འབྲས་བུར་སྦྱོར་བ་རྒྱུད་སྡེ་སྤྱིའི་ཆོས་སྐད་ཡིན་པ་རེད་མོད། འོན་ཀྱང་རང་བཞིན་རྫོགས་པ་ཆེན་པོའི་ལམ་འདི་ནས། ཟང་ཐལ་རིག་སྟོང་གི་ལྟ་བ་མངོན་སུམ་དུ་མཐོང་བ་དེའི་རང་ངོར་གནས་པ་སྒོམ་པ་དང་། ལྟ་བ་དེས་ཟིན་པའི་སྤྱོད་པའི་ཆ་ཐམས་ཅད་བླང་དོར་འཛིན་ཞེན་དག་པ་སྤྱོད་པ། གཞི་ལྟ་བའི་ངོ་བོ་དེ་ཉིད་ཡེ་གྲོལ་གྱི་ཆོས་ཉིད་དུ་གནས་པ་འབྲས་བུ་ཡིན་པ་རེད། མ་བཅོས་རང་བཞག་གི་ཆོས་ཉིད་གཅིག་གི་ཀློང་དུ་ལྟ་སྒོམ་སྤྱོད་འབྲས་ཐམས་ཅད་ཡེ་ཤེས་སུ་རོ་གཅིག་པ་རྫོགས་ཆེན་གྱི་ལམ་ཡིན་པ་རེད། དེ་ཡང་། ཞི་གནས་མི་རྟོག་དངོས་པོ་མཁའ་དང་འདྲ། །ལྷག་མཐོང་མ་རྨོངས་མཁའ་ལ་གཟའ་སྐར་འདྲ། །འོད་གསལ་མི་རྟོག་མཁའ་ལ་ཉི་ལྟར་གསལ། །ཟུང་འཇུག་གཉིས་མེད་ཉི་མ་འོད་ཀྱི་ཚུལ། ཞེས་གསུངས་པ་ལྟར་རེད། དགོངས་པ་མི་འགྱུར་བའི་གཟེར་འདི་ལ་དག་རྫོགས་སྨིན་གསུམ་ཇི་ལྟར་འཇོག་པ་རེད་ཅེ་ན། འདིས་མར་འཁོར་བའི་གནས་སྐབས་ཀྱི་སེམས་ཀྱི་ཆ་དག ཡར་སངས་རྒྱས་ཀྱི་ཐུགས་གསང་བ་བསམ་གྱིས་མི་ཁྱབ་པའི་འབྲས་བུ་གཞི་ལ་རྫོགས། བར་ཉམས་ལེན་གྱི་གནས་སྐབས་སུ་སྟོང་ཉིད་ཀྱི་རྫོགས་རིམ་བསྒོམ་པའི་སྨིན་བྱེད་དུ་འགྲོ་བ་ཡིན་པ་རེད། དེ་ཡིས་ཏིང་འཛིན་ལྷ་ཡི་གཟེར་དང་སྙིང་པོ་སྔགས་ཀྱི་གཟེར། དགོངས་པ་མི་འགྱུར་བའི་གཟེར་གསུམ་སོང་ནས། བཞི་བ་འཕྲོ་འདུ་འཕྲིན་ལས་ཀྱི་གཟེར་ནི། འདི་ཉིད་མཆོག་ཐུན་མོང་གི་ཞི་རྒྱས་དབང་དང་དྲག་པོའི་ལས་བཞི་རང་རང་དུ་མདེལ་ཁ་བསྒྱུར་བ་དེ་ཡིན་ཞེས་གསུངས་ཡོད་པ་རེད། མདེལ་ཁ་ཞེས་པ་ཅི་ལ་ཟེར་བ་རེད་ཅེ་ན། བོའུ་ཁ་གང་ལ་བསྐོར་ཏེ་འཕངས་ན་མདའ་ཡིས་དེར་ཕོག་པ་ལྟར། ལས་བཞི་གང་བསྒྲུབ་དགོས་ན་དེ་རུ་དམིགས་པའི་ཁ་བསྒྱུར་བ་དེ་ཉིད་རེད། འདི་ལ་དག་རྫོགས་སྨིན་གསུམ་ཇི་ལྟར་ཚང་བ་རེད་ཅེ་ན། མར་འཁོར་བའི་སྒོ་གསུམ་གྱི་བྱ་བ་ཐམས་ཅད་སྦྱོང་ཞིང་དག ཡར་སངས་རྒྱས་ཀྱི་འཕྲིན་ལས་ཀྱི་འབྲས་བུ་གཞི་ལ་རྫོགས། བར་ཉམས་ལེན་གྱི་གནས་སྐབས་སུ་དམིགས་མེད་ཡེ་ཤེས་ཀྱི་དགོངས་པ་མངོན་སུམ་འོད་གསལ་རྣལ་འབྱོར་གྱི་སྨིན་བྱེད་དུ་འགྲོ་བ་རེད། འདིའི་གཟེར་བཞི་ལྟ་སྒོམ་སྤྱོད་འབྲས་དང་སྦྱར་ན། དགོངས་པ་མི་འགྱུར་བའི་གཟེར་དེ་ལྟ་བ་ཡིན་པ་དང་། ཏིང་འཛིན་ལྷའི་གཟེར་དེ་སྒོམ་པ། སྙིང་པོ་སྔགས་ཀྱི་གཟེར་སྒོམ་པ་རེད་ལ་སྤྱོད་པའང་ཡིན་པ་རེད། འཕྲོ་འདུ་འཕྲིན་ལས་ཀྱི་གཟེར་སངས་རྒྱས་ཀྱི་འཕྲིན་ལས་ཡིན་པས་ན་འབྲས་བུ་རུ་འཇོག་དགོས། དེ་ལྟར་འདི་ཉིད་ལ་གཞི་ལམ་འབྲས་གསུམ་ཚང་བ་རེད། འོ་ན་སྲོག་སྡོམ་གཟེར་བཞི་ཞེས་པ་དེ་དག་ཡིན་ཞིང་དེ་རེ་རེ་ལའང་དག་རྫོགས་སྨིན་གསུམ་ཚང་བ་ཡིན་ན། དེ་དག་གིས་བསྡམ་བྱའི་སྲོག་གང་རེད་ཟེར་ན། དེའི་སྐོར་འུ་ཅག་གིས་ཁར་སང་བཤད་པ་ཡིན་ཡང་ཡང་བསྐྱར་བཤད་ན། འདི་ལྟ་སྒོམ་སྤྱོད་གསུམ་དང་སྦྱར་ནས་བཤད་ཆོག་པ་རེད། དེ་ཡང་གཞི་ལྟ་བ་ཡེ་ཤེས་ཀྱི་འཁོར་ལོ་སྟེ། འཁོར་འདས་མཉམ་ཉིད་དུ་རྟོགས་ཚེ་སྲིད་པ་ཁམས་གསུམ་འཁོར་བ་ཟེར་བའི་ངན་པ་ཞིག་དང་། ཞི་བ་མྱ་ངན་ལས་འདས་པ་ཟེར་བའི་བཟང་པོ་ཞིག་སོ་སོར་མེད་པར་འཁོར་འདས་རོ་མཉམ་དུ་རྟོགས་ཚེ། སྲིད་དང་ཞི་བའི་སྲོག་ལ་དབང་ཐོབ་སྟེ་རང་དབང་བསྒྱུར་ཐུབ་སོང་བ་རེད། ལམ་སྒོམ་པ་ལྷ་དང་སྔགས་ཀྱི་འཁོར་ལོ་སྟེ། ལྷ་སྔགས་ངོ་བོ་དབྱེར་མེད་དུ་རྟོགས་ནས་ལྷ་སྔགས་སུ་ཤར། སྔགས་སྐྱེ་མེད་ཡེ་ཤེས་ལྔ་ཡི་ངོ་བོར་རྫོགས་པའི་ཚེ། བསྐྱེད་རྫོགས་གཉིས་ཀའི་སྙིང་པོའི་སྲོག་ལ་དབང་ཐོབ་སྟེ་བསྐྱེད་རྫོགས་དབྱེར་མེད་ཉམས་ལེན་ལ་རང་བྱན་ཚུད་སོང་བ་རེད། སྤྱོད་པ་དོན་གཉིས་ལྷུན་གྲུབ་ཆགས་མེད་ཤུགས་འབྱུང་དུ་བསྐྱངས་ནས་ཆགས་སྡང་དགའ་སྡུག་རེ་དོགས་ཐམས་ཅད་ལས་གྲོལ་བའི་ཚེ། ཐབས་ཆེན་བསམ་གྱིས་མི་ཁྱབ་པའི་སྲོག་ལ་དབང་ཐོབ་སྟེ། དཔེ་གཟའ་སྒྲ་གཅན་གྱིས་ནམ་མཁའི་ཟླ་བ་གཅིག་ཁར་བཟུང་བའི་ཚེ་ས་སྟེང་གི་ཆུ་མཚོ་ཡོད་ཚད་ཀྱི་ཟླ་གཟུགས་ཡོད་ཚད་དུས་གཅིག་ལ་རང་ཤུགས་སུ་ཟིན་སོང་བའི་གནད་དང་འདྲ་བར། བསྐྱེད་རྫོགས་ཀྱི་ཉམས་ལེན་བྱེད་མཁན་ཞིག་གིས་གཟེར་བཞིའི་མན་ངག་གི་གནད་ཤེས་པས་མདོ་རྒྱུད་མང་པོའི་བསམ་གྱིས་མི་ཁྱབ་པའི་དགོངས་གནད་ཐམས་ཅད་དུས་གཅིག་ལ་ཤེས་ནས། མདུད་པ་གཅིག་བཤིགས་པས་འགག་བརྒྱ་དུས་གཅིག་ལ་གྲོལ་བ་ལྟར། འཁོར་འདས་ཀྱིས་བསྡུས་པའི་ཆོས་ཐམས་ཅད་ཀྱི་གནད་གསང་ཤེས་ནས་རིག་སྔགས་ཀྱི་བདེན་ཚིག་གྲུབ། གདུལ་བྱ་སྨིན་ཅིང་གྲོལ། གྲུབ་མཐའི་འཛིན་པ་དག སྐུ་གསུམ་ལྷུན་གྱིས་གྲུབ་སྟེ། གང་ལ་ཡང་རེ་དོགས་དང་ཉམ་ང་མེད་པ་སེང་གེས་གངས་ཟིན་པ་ལྟ་བུ་ཞིག་རེད་རྒྱུ་ཡོད་པ་རེད། དེས་ན་གསང་སྔགས་རྡོ་རྗེའི་ཐེག་པའི་ལམ་གནད་ཐམས་ཅད་སྲོག་སྡོམ་གཟེར་བཞིའི་མན་ངག་གི་ནང་དུ་འདུས་པ་རེད་ཅེས་བཤད་ཆོག འདིར་གསུངས་པ་དག་དང་མི་ལྡན་པའི་ལམ་དག་ནི་ཤི་བའི་རོ་དང་འདྲ་བ་ཡིན་ཞེས་གསུངས་པ་རེད། འདིའི་དཀའ་གནད་ཚང་མ་ཞིབ་པར་རྒྱུད་སྡེ་སྒྱུ་འཕྲུལ་དང་སྒྲུབ་སྡེ་བཀའ་བརྒྱད་སོགས་ཀྱི་ནང་དུ་གཟིགས་དང་མཁྱེན་པ་ཡོང་། དེས་ན་འུ་ཅག་གི་སྐབས་བབས་ཀྱི་དོན་གནད་བསྙེན་སྒྲུབ་ཡན་ལག་བཞི་དང་སྦྱར་ཚེ་འདིའི་བསྙེན་ཡིག་གི་ནང་དུ། ཐོག་མར་བསྙེན་པའི་སྐབས་སུ་ལྷ་ལ་གསལ་སྣང་ཐོན་རྒྱུ་གནད་ཆེ། དེ་མ་ཐོན་གྱི་བར་དུ་འོད་ཟེར་སྤྲོ་བསྡུ་བྱེད་མི་དགོས་ཅེས་གསུངས་ཡོད་པ་རེད། རྟེན་དང་བརྟེན་པའི་ལྷའི་གསལ་སྣང་དེ་ཡང་རྣམ་པ་གསལ། རྣམ་དག་དྲན་པའི་ཐོག་ནས། མདོར་ན་སྣང་གྲག་རིག་གསུམ་ལྷ་སྔགས་ཆོས་ཉིད་དུ་མ་སོང་ཚེ་བསྙེན་པའི་ས་མི་ཆོད་ཅེས་གསུངས་ཡོད། སྣང་ཞེན་ལྷ་སྐུའི་ཕྱག་རྒྱར་རྫོགས། །སྒྲ་གྲག་བདེ་ཆེན་སྔགས་སུ་དག །དྲན་རྟོག་འོད་གསལ་ཆོས་སྐུར་སྨིན། ཞེས་འདིའི་ཆོ་གའི་མཇུག་གི་བཀྲ་ཤིས་ཀྱི་ནང་དུ་ཡོད་པ་རང་ལུགས་ཀྱི་དག་རྫོགས་སྨིན་གསུམ་གྱི་མདོ་ཆིངས་ཡིན་གསུངས་ཡོད་པ་རེད། ད་རེས་ཀྱི་བདུན་ཕྲག་གསུམ་གྱི་ནང་གི་བདུན་ཕྲག་སྔོན་མ་བསྙེན་པ། གཉིས་པ་ཉེ་བསྙེན། གསུམ་པ་སྒྲུབ་པ། དེ་ལྟར་བདུན་གསུམ་ཉེར་གཅིག་ཚང་བར་ཉེ་ཚེ་མཇུག་གི་དངོས་གྲུབ་ལེན་པ་སྒྲུབ་ཆེན་དང་སྦྱར་ན། བསྙེན་པ་འདིའི་སྐབས་ཀྱི་དམིགས་གནད་གཙོ་བོ་ལྷའི་གསལ་སྣང་ཡིན་པ་ཞུས་མ་ཐག་པ་ལྟར་རེད། འདི་ཐམས་ཅད་ཀྱི་སྐབས་སུ་རྫོང་འཕྲང་སྲོག་གསུམ་ལྷག་པར་གལ་ཆེ། ལྟ་བའི་རྫོང་། སྒོམ་པའི་འཕྲང་། སྤྱོད་པའི་སྲོག་སྟེ། ལྟ་བའི་རྫོང་ཟིན་དགོས་པ་ཡིན་ན་སྒོམ་པའི་འཕྲང་ནས་བརྒྱུད་དགོས་པ་རེད། མ་བསྒོམ་པར་སངས་རྒྱས་པ་ཞིག་རྡོ་རྗེ་སེམས་དཔས་ཀྱང་གསུངས་ཡོད་ནི་མ་རེད། སྒོམ་པའི་འཕྲང་བརྒྱུད་ནས་ལྟ་བའི་རྫོང་ཟིན། དེ་ནས་སྤྱོད་པའི་སྒོ་ནས་སྲོག་འཕྲོག་སྟེ་འཁོར་འདས་ཀྱི་སྟོང་སྲོག་རང་གི་ལག་ཏུ་ཟིན་དུས་གང་ལ་ཡང་འཇིགས་པ་མི་དགོས་པའི་གཏན་སྲིད་རྒྱལ་ས་ལྟ་བུ་དེ་ཟིན་སོང་བ་རེད། དེའི་མིང་ལ་རྣལ་འབྱོར་དབང་ཕྱུག་ཆེན་པོའི་དགོངས་པ་ཟེར་བ་རེད། འོན་ཀྱང་སྒོམ་པའི་འཕྲང་ལས་བརྒྱུད་དགོས་ན་བསྒོམ་རྒྱུ་ཅི་ཞིག་ཡིན་པ་ལྟ་བ་མིག་ལྟ་བུ་དེས་རིག་ནས་ཤེས་ཏེ། རིག་པ་དང་རྐང་པར་ལྡན་པ། མིག་གིས་བལྟས་ནས་ལྟ་སར་རྐང་པས་བརྫིས་ན་མི་འཕྱུགས་པའི་སྟབས་ཀྱིས། ལྟ་བའི་རྫོང་སྔོན་དུ་བཞག་ནས་རྫོང་འཕྲང་སྲོག་གསུམ་གྱི་གོ་རིམ་དེ་ལྟར་སྒྲིག་པ་རེད། དེས་ནས་སྒོམ་པ་ཏིང་འཛིན་གྱི་ལྷ་བསྒོམ་པའི་སྐབས་སུ་ཡུལ་གསུམ་གྱད་དུ་གྱུར་བའི་ལྷ་ཞེས་པ་སྟེ། ཡུལ་གསུམ་གྱད་དུ་གྱུར་བའི་དོན་ནི་ཡུལ་གསུམ་སྟོབས་སུ་གྱུར་པ་ཞེས་པའི་དོན་དང་མཚུངས་པ་ཡིན། དང་པོ་ཡིད་ཀྱི་ཡུལ་དུ་གསལ་དགོས་པ་རེད། ལྷ་རྩ་བ་ནས་བསྒོམ་མ་མྱོང་པ་དག་གིས་ཐང་ཀ་དང་རས་བྲིས་སོགས་ལ་བལྟས་ཏེ་ཡིད་ཡུལ་དུ་གསལ་བདེ་བའི་ཐབས་ལ་བརྟེན་ནས་ཁོང་དུ་ཆུད་པར་བྱས་ནས་བསྒོམ། དེའི་ཚེ་ཡུལ་གསུམ་གྱད་དུ་གྱུར་པ་ཞེས་གསལ་བ་གསུམ་གྱི་དང་པོ་ཡིད་ཡུལ་དུ་བཀྲ་ལམ་མེར་ནམ་བསྒོམ་ན་ནམ་གསལ་ཐུབ་པ་ཞིག་བྱེད། གཉིས་པ་དབང་པོའི་ཡུལ་དུ་གསལ་དགོས། མིག་གིས་བལྟས་ན་མཐོང་དུ་ཡོད་པའི་ཚད་ཙམ་གྱི་གསལ་སྣང་ཡོད་པ། གསུམ་པ་ལ་ལུས་ཀྱི་ཡུལ་དུ་ཐུག་རེག་ཡོད་པ། བསྙབས་ན་འཛིན་རྒྱུ་ཡོད་པ་ལྟ་བུའི་གོམས་ཆ་མ་བརྟན་གྱི་བར་དུ་བསྒོམ་དགོས་པ་རེད། དེ་ཡང་གཟེར་བཞིའི་མན་ངག་དང་ལྡན་དགོས་པ་ཡིན་པས། ལྟ་བའི་རང་ངོ་འཕྲོད་པ་གཞིར་བཞག་གི་ཐོག་ནས་བསྒོམ་དགོས། དེ་ཡང་རིམ་པ་དབང་གིས་བགྲོད། གཞི་དམ་ཚིག་གིས་བཟུང་། ཐག་ལྟ་བས་བཅད། ཉམས་སུ་ཏིང་ངེ་འཛིན་གྱིས་ལོངས། ལ་སྤྱོད་པས་དོར། དོན་མན་ངག་གིས་སྒྲུབས་གསུངས་པའི་གསང་སྔགས་ཀྱི་བསླབ་པའི་མཐའ་དྲུག་ཚང་དགོས་པ་རེད། དེ་འདྲའི་རྣལ་འབྱོར་བས་གསང་བའི་དགྲ་གསུམ་སོད། འཇིགས་པའི་བདུད་བཞི་ཆོམས། འགྲོ་དྲུག་གི་གཡང་ས་ཆོད་པ་རེད། དེ་ཡན་ཆོད་ཀྱིས་བསྙེན་སྒྲུབ་ཡན་ལག་བཞིིའི་ནང་གི་བསྙེན་པ་བཤད་པའི་ས་ཁོངས་སོང་བ་རེད། གཉིས་པ་ཉེ་བསྙེན་ནི། ད་རེས་ཀྱི་སྐབས་ལྟ་བུ་ལ་ཞག་བདུན་ཕྲག་གཉིས་པའི་སྐབས་སུ་རེད། འདིའི་སྐབས་སུ་འོད་ཟེར་སྤྲོ་བསྡུ་བྱེད་དགོས་པ་ཡིན། འདི་དུས་ལྷ་ལ་གསལ་སྣང་གང་ལ་གང་འཚམ་ཐོབ་ཡོད་དགོས། ཐུགས་ཀའི་སྔགས་ཕྲེང་ཤིན་ཏུ་ཕྲ་བ་ལས་འོད་ཟེར་འཕྲོས། ཞིང་ཁམས་རབ་འབྱམས་ན་བཞུགས་པའི་རྒྱལ་བ་སྲས་དང་བཅས་པ་མཆོད། དེ་ཡིས་བསོད་ནམས་ཀྱི་ཚོགས་རྫོགས། ཡང་འོད་ཟེར་ཚུར་འདུས། རང་ཉིད་ལ་ཐིམ་པས་ལུས་ངག་ཡིད་གསུམ་ཀུན་གཞིའི་སྒྲིབ་པ་དང་བཅས་པའི་སྒྲིབ་པ་བཞི་དག ཆོས་ལོངས་སྤྲུལ་སྐུ་ངོ་བོ་ཉིད་སྐུ་དང་བཅས་པའི་སྐུ་བཞི་མངོན་དུ་བྱས་པར་བསམ་ཏེ་ཆོས་ཉིད་ཀྱི་དོན་ལ་མཉམ་པར་བཞག་ན་ཡེ་ཤེས་ཀྱི་ཚོགས་རྫོགས་པ་རེད། དེ་ལྟ་བུའི་ཚོགས་གཉིས་རྫོགས་པ་ལ་བརྟེན་ན་ལྷ་དང་ཉེ་བའི་བསྙེན་པ་རེད་ཐུབ་པ་རེད། བདག་བྱིན་གྱིས་བརླབས་པ་དེ་ཡིས་རང་དོན་སྔོན་དུ་སོང་བ་རེད། ཡང་འོད་ཟེར་འཕྲོས་སེམས་ཅན་ལ་ཕོག་ནས་འགྲོ་བ་རིགས་དྲུག་ལམ་རྒྱུད་ལྔ་ན་ཡོད་པའི་སེམས་ཅན་ཐམས་ཅད་ཀྱི་ལས་དང་བག་ཆགས་སྦྱངས། འཁོར་བའི་སྣོད་བཅུད་རང་རྒྱུད་དུ་སྣང་བའི་ཞེན་རྟོག་ཐམས་ཅད་ཉི་མས་བ་མོ་བཞུས་པ་ལྟར་སྦྱངས་ནས། སྣོད་གཞལ་ཡང་ཁང་དང་། བཅུད་རིག་འཛིན་གྱི་ལྷ་ཚོགས་སུ་དག་པར་བསྒོམ་དགོས། དེས་གཞན་དོན་འཕྲིན་ལས་ཀྱི་རྟེན་འབྲེལ་བསྒྲིགས་ཏེ། དེ་ལྟར་དོན་གཉིས་ལྷུན་གྲུབ་ཀྱི་སར་སྦྱོར་བ་ཡིན་ཞེས་གསུངས། ལྷ་སྔགས་ཆོས་ཉིད་གསུམ་པོ་དབྱེར་མེད་ཡིན་པས་སྔགས་ལ་བརྟེན་ནས་གཞན་གཉིས་སྒྲུབ་ཀྱིན་ཡོད་པ་རེད། བཟླ་རྒྱུའི་སྔགས་དེ་ཅི་འདྲ་ཞིག་ཡིན་པ་རེད་ཅེ་ན། སྐྱེ་མེད་ཀྱི་ངང་ལས་འགག་མེད་དུ་ཤར་བའི་རང་སྒྲ་ཡིན་དགོས། སྔགས་བཟླ་ལུགས་ལ་དབྱེ་བ་རྣམ་གྲངས་མང་པོ་ཡོད། རིགས་བསྡུས་ཏེ་བཤད་ན་ཡིད་བཟླས་ཞེས་པ་དང་། ཤུབ་བུར་བཟླ་བ། དབྱངས་སུ་བཟླ་བ་སྟེ་གསུམ། དེ་ལས་ཡིད་བཟླས་ནི་སྤྱིར་བཏང་སྙིང་ཁའི་ས་བོན་དང་སྔགས་ཕྲེང་ལ་དམིགས་པ་གཏད་ནས་རང་སྒྲ་སྒྲོག་པའི་ཚུལ་གྱིས་ཡིད་ཀྱིས་ཡང་ནས་ཡང་དུ་བཟླ་བ་ལས། མཆུ་འགུལ་བ་ལ་སོགས་པའི་རྩོལ་བ་དང་བྱེད་པ་དགོས་པ་མ་རེད། ཡིད་བཟླས་ལ་དེ་ལྟ་བུའི་ཡིད་བཟླས་ཙམ་དང་། རླུང་དང་སྦྱར་ན་འགོག་བཟླས། རྡོར་བཟླས། བུམ་ཅན་གྱི་བཟླས་པ་ཞེས་པ་དང་། རླུང་བཟླས་ལ་ཡང་ནང་གསེས་སུ་རྣམ་པ་གསུམ་ཡོད། འགོག་བཟླས་ཞེས་པ་དེ་སྲོག་རྩོལ་འགོག་པའམ་བསྡམས་པ་ལ་འགོག་བཟླས་ཞེས་ཟེར། སྲོག་རྩོལ་ཞེས་པ་ཅི་རེད་ཅེ་ན། སྲོག་ནི་རླུང་དང་རྩོལ་བ་ནི་དྲན་པའམ་ཡིད་ཀྱི་རྒྱུ་བ་ཡིན་པ་རེད། རླུང་གི་རྒྱུ་བ་དང་དྲན་རྩོལ་རྣམས་ནང་དུ་བསྡམས་ནས་ཡིད་ཀྱིས་བཟླས་པ་བྱས་ཚེ་ལུས་ངག་གི་རྩོལ་བ་རང་ཤུགས་ཀྱིས་ཁེགས་ནས་ཡོན་ཏན་ཁྱད་པར་ཅན་འགྲུབ་པ་དེ་འདྲ་ཡིན་པ་རེད། རྡོར་བཟླས་ནི་རླུང་འབྱིན་འཇུག་གནས་གསུམ་སྔགས་དང་སྦྱར་ནས་དམིགས་པ་མ་ཡེངས་པར་བྱེད་པ་དེ་དང་། དེ་ནས་བུམ་ཅན་གྱི་བཟླས་པ་ནི། རླུང་སྦྱོར་བ་བཞི་ལྡན་བུམ་ཅན་དང་སྦྲགས་ནས་ཡིད་བཟླས་བྱེད་རྒྱུ་དེ་རེད། རླུང་སྦྱོར་བ་བཞི་ལྡན་ཞེས་པ་ནི། དགུག་ལྒང་གཞིལ་བཏང་རྣམས་ཏེ། མདའ་ལྟར་འཕེན་པ། གཞུ་ལྟར་དགུག་པ་ལ་སོགས་པ་རླུང་སྦྱོར་གྱི་ནང་དུ་བཤད་ཡོད་པ་དེ་དག་རེད། དེ་ཡན་ཆོད་ཡིད་བཟླས་ཀྱི་རྣམ་གྲངས་རེད། ཤུབ་བུར་བཟླས་པ་ནི། དབྱངས་མཐོན་པོ་ཡོད་པའི་བཟླས་པ་སྒྲ་གདངས་ཐོན་པ་ཅན་མིན་ཡང་། མཆུ་དང་མགྲིན་པ་སོགས་ཀྱི་བྱེད་པ་དང་རྩོལ་བ་ཅུང་ཟད་ཡོད་པར་བྱས་ཏེ་སྒྲ་ཤུབ་བུར་བཟླ་བ་དེ་ཉིད་རེད། གསུམ་པ་དབྱངས་བཟླས་རེད། དབྱངས་བཟླས་འདི་ལ་ནང་གསེས་ཀྱི་དབྱེ་བ་མང་པོ་ཡོད། སྔགས་ཀྱི་ཡི་གེ་སྒྲ་སྒྲོགས་པའི་དབྱངས་དང་། འཁུར་བ་དབུགས་ཀྱི་རླུང་འབྱིན་པའི་དབྱངས་དང་། འཁུན་ཞིང་སྡང་པའི་སྒྲ་འབྱིན་པའི་དབྱངས། ཚངས་པའི་དབྱངས་ཀྱི་འདྲེན་ཚུལ་གྱི་དབྱངས་ལ་སོགས་པ་རྒྱུད་ཀྱི་ནང་དུ་མང་པོ་གསུངས་ཡོད་པ་རེད་མོད། དེ་དག་ལས་གཙོ་ཆེ་བའི་དབང་དུ་བྱས་ན་སྔགས་ཀྱི་ཡི་གེ་སྒྲ་སྒྲོགས་པའི་དབྱངས་ཞེས་པ་དེ་ཅི་འདྲ་ཞིག་ཡིན་པ་རེད་ཅེ་ན། འདི་ལ་ཡང་ནང་གསེས་ཀྱི་ཡོན་ཏན་བཅུ་དང་ལྡན་པར་བཟླ་དགོས་ཞེས་གསུངས་ཡོད། ཡོན་ཏན་བཅུ་ནི། སྒྲ་ཧ་ཅང་མི་ཆེ། ཧ་ཅང་མི་ཆུང་། ཧ་ཅང་མི་དལ། ཧ་ཅང་མི་མགྱོགས། སྔགས་ཀྱི་ཚིག་འབྲུ་ལ་ཆད་པ་དང་ལྷག་པ་མེད་པ། སྒྲ་དག་པ། ཚིག་གསལ་མོ། ཡན་ལག་མ་ཉམས་པ་དེ་དག་རེད། གཞན་ཡང་འཁུར་བ་དབུགས་ཀྱི་རླུང་འབྱིན་པའི་དབྱངས་ཞེས་པ་ཞིག་ཡོད། དཔེ་བུང་བའི་སྐད་ལྟར་ཁོང་དལ་ཞིང་རྒྱུན་རིང་པོར་བཟླ་དགོས་ཞེས་གསུངས་ཡོད་པ་རེད། ཚངས་པའི་དབྱངས་ཀྱི་འདྲེན་ཚུལ་གྱི་དབྱངས་ནི་ཚངས་པའི་དབྱངས་ལྟ་བུ་ཡིད་འཕྲོག་གི་ཉམས་དང་ལྡན་པའི་བཟླ་ཚུལ་ཡིན་ཞེས་གསུངས་པ་རེད། འཁུན་ཞིང་སྡང་བའི་སྒྲ་འབྱིན་པའི་དབྱངས་ཞེས་པ། དཔེ་རྔ་མོང་གིས་བུ་སྟོར་བའི་དུས་ཀྱི་སྐད་ལྟ་བུ་གསུངས་ཡོད་པ་དང་། ཟབ་ཅིང་སྒྲོག་པའི་དབྱངས་ཞེས་པ་དཔེ་འབྲུག་གི་སྒྲ་དང་བྲག་མཐོན་པོའི་སྟེང་ནས་ཆུ་དྲག་བབས་པ་ལྟ་བུའི་བཟླ་ཚུལ། གུ་རུ་རིན་པོ་ཆེས། སྲོག་གི་སྙིང་པོ་ཐོད་ཕྲེང་རྩལ། བྲག་ཀ་ཐོག་ལས་ཆུ་བབས་བཞིན། །དྲག་པོ་བར་མཚམས་མེད་པར་བགྲངས། །ང་ཉིད་དེ་ཡི་དྲུང་དུ་འོང་། ཞེས་གསུངས་པ་ལྟ་བུ་རེད། རྡོ་རྗེ་སྲིན་པོའི་རྔ་སྐད་ཀྱི་དབྱངས་ཟེར་བ་དཔེ་སྲིན་པོ་ཁྲོས་པའི་ངར་སྒྲའི་ཚུལ་དུ་བཟླ་ཚུལ་ལ་སོགས་པ་རྒྱུད་ཀྱི་ནང་དུ་མང་བ་རེད། མདོར་ན་བཟླས་པ་གང་གི་སྐབས་སུའང་གཙོ་བོ་ལྟ་དགོངས་དང་མི་འབྲལ་བ་གནད་ཆེན་པོ་རེད། བསྙེན་པའི་མཚམས་སུ་སླེབ་དུས་བློ་ལྷོད་ལ་ཕབས་ནས་གུ་ཡངས་ཐོབ་སོང་པ་ལྟར་ཅི་བྱས་ཀྱང་ཆོག་པ། ཁ་བརྡ་བཤད་སའི་མཚམས་སུ་སླེབས་སོང་བ་ལྟ་བུ་བྱེད་ཉན་ནི་མ་རེད། ཆེས་གལ་འགག་ཆེ་བ་ཆོ་གའི་སྲོག་གམ་སྙིང་པོ། གཟབ་གཟབ་བྱེད་དགོས་ས་ངོ་མ་ལ་ཐུག་པ་ཡིན་པ་མཁྱེན་དགོས། དེ་ཡན་ཆོད་ཀྱིས་བསྙེན་པ་དང་ཉེ་བསྙེན་གཉིས་ཀ་སོང་བ་རེད། རང་རེའི་དུས་རྒྱུན་གྱི་བཤད་ལུགས་ལྟར་བྱས་པ་ཡིན་ན། ཟླ་བ་སྐར་ཕྲེང་ལྟར་བཟླས་པས་ཏིང་ངེ་འཛིན་ལ་གནས་པར་བྱེད་པའི་གནད་ཡོད་པ་དང་། རྒྱལ་པོའི་ཕོ་ཉ་ལྟར་བཟླས་པས་རང་གཞན་གྱི་དོན་གཉིས་འགྲུབ་པ། མགལ་མེའི་འཁོར་ལོ་ལྟར་བཟླས་པས་བདེ་སྟོང་གི་ཡེ་ཤེས་བསྐྱེད་པ། བུང་བ་ཚང་ཞིག་ལྟར་བཟླས་པས་སྒྲ་གྲག་སྔགས་སུ་འགྲོ་བའི་གནད་ཡོད་པ་དེ་དག་བསྙེན་སྒྲུབ་ཡན་ལག་བཞི་ཀའི་སྐབས་ཀྱི་སྔགས་བཟླ་ལུགས་ཀྱི་ཁྱབ་བྱེད་དུ་འགྲོ་བ་རེད་སྙམ། ད་རེས་ཀྱི་དུས་གྲངས་ཀྱི་སྐབས་དང་བསྟུན་ན་དེ་ཡིས་ཞག་བདུན་གཉིས་བཅུ་བཞི་སོང་བ་རེད། བདུན་ཕྲག་རྗེས་མ་སྒྲུབ་པ་རེད། འདི་ལ་གབ་བྱང་གནད་ཀྱི་མིག་ཚག་ཏུ་ཅི་ཞིག་གི་གབ་པ་ཕྱུང་ཡོད་པ་རེད་ཅེ་ན། སྔགས་ལ་རིག་འཛིན་སྲོག་སྒྲུབ་གབ་ཅེས་གསུངས་ཡོད་པ་རེད། དེ་ཉིད་རང་རེའི་ཡིག་ཆའི་ནང་དུ་རྩལ་འདོན་མཛད་ནས་གསུངས་ཡོད་པ་འདི་ལྟར་ཏེ། བསྙེན་པ་འབྲུ་འབུམ་སྔོན་སོང་ནསཿ རིག་འཛིན་སྲོག་སྒྲུབ་སྙིང་པོ་ནིཿ ཐོག་མཐའ་ཨོཾ་དང་ཧཱུྃ་བཞག་ནསཿ བར་ན་བཅུ་གཉིས་གྲངས་མཛེས་པཿ རིག་འཛིན་སྲོག་གི་ཡང་སྙིང་ཡིནཿ ཨོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་སིདྡྷི་ཧཱུྃཿ འབུམ་ཕྲག་བཅུ་གཉིས་དངོས་གྲུབ་ཐོབཿ ཅེས་གསུངས་སོཿ ཞེས་རྒྱུད་ཚིག་དངོས་སུ་དྲངས་ཡོད་པ་རེད། འོན་ཀྱང་འདིར་གབ་རྒྱུ་གཙོ་བོ་ཅི་ཞིག་གབ་ཡོད་པ་རེད་ཅེ་ན། ཏིང་འཛིན་དོ་ལིའི་བཟླས་པ་གབ། །ལྷ་ལ་གསལ་སྣང་ཐོན་པའི་ཚེ། །ཐུགས་ཀའི་སྔགས་ཕྲེང་གཡས་བསྐོར་ལས། །སྔགས་ཕྲེང་ལུ་གུ་རྒྱུད་དུ་འཕྲོས། །ཡེ་ཤེས་སེམས་དཔའི་ཞལ་ནས་ཐོན། །ཡུམ་གྱི་ཞལ་ཞུགས་སྐུའི་དབྱིབས་རྒྱུད། །ཐུགས་ཀའི་བཾ་ལ་གཡོན་དུ་འཁོར། །མཁའ་གསང་ནོར་བུའི་ལམ་རྒྱུད་དེ། །མགལ་མེ་ལྟ་བུར་འཁོར་བ་ལས། །ཡབ་ཡུམ་བདེ་བ་ཆེན་པོའི་ཉམས། །བཟོད་དུ་མེད་པར་འབར་བ་ལས། །ཐུགས་རྗེའི་འོད་ཟེར་ཀུན་ཏུ་འཕྲོས། །གཙོ་དང་འཁོར་བཅས་ཐམས་ཅད་ཀྱང་། །བདེ་སྟོང་ཡེ་ཤེས་ཉམས་འུར་བས། །ཅང་ཏེ་དྲིལ་བུ་ཁྲོ་ལོ་ལོ། །ཞལ་ནས་ཧཱུྃ་གླུ་ཀྱུ་རུ་རུ། །དབྱིངས་རིག་གཉིས་མེད་བྱང་ཆུབ་སེམས། །རྩལ་སྣང་དག་པ་རབ་འབྱམས་ཀྱི། །དཀྱིལ་འཁོར་གཅིག་ཏུ་རྫོགས་པ་ལ། །རིག་པ་གཏད་མེད་གཡོ་མེད་བཞག ཅེས་གསུངས་པ་འདིའི་ངག་འདོན་དང་སྦྲགས་ཚིག་རྗེས་སུ་དོན་དྲན་ནས། དམིགས་པ་སྒྲ་ཇི་མ་ཇི་བཞིན་དུ་བསྒོམ་དགོས་པ་རེད། དེ་ཉིད་སྒྲུབ་པ་རེད། བཞི་བ་སྒྲུབ་པ་ཆེན་པོ་ནི། ཞག་ཐ་མའི་ཐོ་རངས་ཚེས་མ་ཚེས་ཀྱི་དུས་སུ་དངོས་གྲུབ་ལེན་རྒྱུ་རེད། དེའི་སྐོར་དངོས་གྲུབ་ལེན་ཆོག་གི་སྐབས་སུ་བཤད་པས་འཐུས། འདི་ནས་ལྷག་ཏུ་མ་བཤད་ན་ཆོག་པ་ཞིག་རེད། བསྙེན་སྒྲུབ་ཀྱི་སྐོར་འདི་ཤིན་ཏུ་ནས་ཀྱང་གལ་གནད་ཆེ་བས། འདིའི་སྐོར་ད་དུང་ཡང་བཤད་ཅིག་བྱས་ན། འཛབ་དགོངས་བཞི་འདི་དཔེ་བཞི་ཡི་སྟེང་ནས་བཟླས་དམིགས་ཀྱི་གོ་བ་སོ་སོར་སྦྱར་ན་ཆོག དཔེ་བཞི་ནི་གོང་དུ་བཤད་པ་ལྟར་ཏེ། ཟླ་བ་སྐར་ཕྲེང་གི་བཟླས་པ་དང་གཅིག རྒྱལ་པོའི་ཕོ་ཉ་ལྟ་བུའི་བཟླས་པ་དང་གཉིས། མགལ་མེའི་འཁོར་ལོ་ལྟ་བུའི་བཟླས་པ་དང་གསུམ། བུང་བ་ཚང་ཞིག་གི་བཟླས་པ་ལྟ་བུ་བཅས་བཞི་བོ་དེའི་དཔེའི་སྟེང་ནས་བཤད་ཆོག་ནི་རེད། དེ་ལས་དང་པོ་བསྙེན་པའི་ཡན་ལག་ཟླ་བ་སྐར་ཕྲེང་གི་བཟླས་པ་ནི། ཐོག་མར་ས་བོན་དང་སྔགས་ཕྲེང་ལ་འོད་ཟེར་འཕྲོ་བ་ལ་ཡང་ནས་ཡང་དུ་སེམས་བཟུང་། དེ་ནས་རིམ་པ་བཞིན་ལྷ་ཐམས་ཅད་ཀྱི་ཞལ་ནས་སྔགས་སྒྲ་སྒྲོག་གིན་ཡོད་པར་བསྒོམ། དེ་དང་མཉམ་དུ་སྔགས་ཀྱི་ཡིག་འབྲུ་ཐམས་ཅད་ལས་ཀྱང་རང་སྒྲ་གྲགས་ནས་གདན་གྱི་སྟེང་ནས་ཅུང་ཟད་འཕར་གྱིན་ཡོད་པ། འཕར་གྱིན་ཡོད་པའི་སྐབས་སུ་སྔགས་ཡིག་ལ་འོད་ཟེར་རེ་འཁྲི་ཞིང་འཁོར་གྱིན་ཡོད་པ། བར་ཞིག་ནས་སྔགས་ཕྲེང་རྣམས་ཇེ་མགྱོགས་ཇེ་མགྱོགས་ཀྱིས་འཁོར་བ་དང་བསྟུན་ནས་སྔགས་ཕྲེང་ལས་འོད་ཟེར་འཕྲོས། ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་བག་ཆགས་དང་བཅས་པ་སངས་ཀྱིས་དག་ནས་ནད་གདོན་སྡིག་སྒྲིབ་ཐམས་ཅད་བསལ་སོང་བར་བསྒོམ་དགོས། དེ་ཟླ་བ་སྐར་ཕྲེང་གི་བཟླས་པ་རེད། འདིའི་མིང་ལ་བཀོད་པའི་བཟླས་པ་ཟེར་ནའང་ཆོག་ནི་རེད། བསྙེན་པ་ཉེ་བསྙེན། སྒྲུབ་པ་སྒྲུབ་ཆེན་བཞིའི་ནང་ནས་འདི་བསྙེན་པའི་ཡན་ལག་ཏུ་འགྲོ་བ་ཡིན། ད་རེས་ཀྱི་སྐབས་ལྟར་ན། བདུན་ཕྲག་དང་པོའི་སྐབས་རེད། གཉིས་པ་ཉེ་བར་བསྙེན་པ་སྟེ། ཉེ་བར་བསྙེན་པ་དེ་ཉིད་ལ་དཔེ་རྒྱལ་པོའི་ཕོ་ཉ་ལྟ་བུས་བཟླས་པ་ཞེས་ཟེར། འདིའི་སྐབས་སུ་སྤྲོ་བསྡུའི་བཟླས་པ་ལ་ཉེ་བ་ཡིན་པས་མིང་ལ་སྤྲོ་བསྡུའི་བཟླས་པའང་ཟེར་ཆོག འདིའི་སྐབས་སུ་འོད་ཟེར་སྤྲོ་བསྡུ་བྱེད་དགོས། སྔགས་བཟླས་པའི་རྐྱེན་གྱིས་ཐུགས་སྲོག་སྔགས་ཕྲེང་དང་བཅས་པ་ལས་འོད་ཟེར་ཁ་དོག་ལྔ་ལྡན་ནམ་མཁའ་གང་བར་འཕྲོས་པའི་རྩེ་ལས། མཆོད་པའི་ལྷ་མོ་མཆོད་རྫས་ཐོགས་པ་མང་པོ་གྲངས་མེད་པ་འཕྲོས་ནས། མཁའ་ཁྱབ་ཀྱི་རྒྱལ་བ་སྲས་དང་བཅས་པར་ཐུགས་མཉེས་པའི་མཆོད་པ་བསམ་གྱིས་མི་ཁྱབ་པ་ཕུལ་བས་ལྷ་ཐམས་ཅད་ཀྱི་ཐུགས་བདེ་བ་ཆེན་པོས་མཉེས་པར་བྱས། དེའི་ཐོག་ནས་རྒྱལ་བ་སྲས་དང་བཅས་པའི་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད། སྐུ་ཕྱག་རྒྱ། གསུང་ཡིག་འབྲུ། ཐུགས་བྱང་སེམས་ཀྱི་རྣམ་པ་འོད་ཟེར་དཀར་དམར་མཐིང་གསུམ་གྱི་ཚུལ་གྱིས་ཆར་བབས་པ་ལྟར་བྱོན་ནས། རང་ཉིད་ཀྱི་ལུས་ངག་ཡིད་གསུམ་སྒོ་གསུམ་ལ་ཐིམ་པས། སྒྲིབ་གཉིས་བག་ཆགས་དང་བཅས་པ་ཐམས་ཅད་དག ཚོགས་གཉིས་ཡོངས་སུ་རྫོགས། དབང་བཞི་ཆིག་རྫོགས་སུ་ཐོབ་པར་བསམ། དེ་ཉིད་བདག་དོན་བྱིན་རླབས་ཀྱི་དམིགས་པ་ཡིན་པ་རེད། ཡང་འོད་ཟེར་འཕྲོས་ཏེ་ཁམས་གསུམ་རིགས་དྲུག་གི་སེམས་ཅན་ཐམས་ཅད་ལ་ཕོག ལས་ཉོན་སྡིག་སྒྲིབ་སྤྱི་དང་། བྱེ་བྲག་འགྲོ་དྲུག་སོ་སོའི་སྡུག་བསྔལ་ཐམས་ཅད་སྐད་ཅིག་དེ་ཉིད་ལ་སྦྱངས་ནས་ཉན་རང་བྱང་སེམས་ཀྱང་ཤེས་སྒྲིབ་ལས་གྲོལ་བར་བྱས་ནས་ཐམས་ཅད་ཀྱི་ལུས་ངག་ཡིད་གསུམ་རྡོ་རྗེ་གསུམ་གྱི་ངོ་བོར་གནས་འགྱུར་བར་བསམ། དེ་ཉིད་གཞན་དོན་འཕྲིན་ལས་ཀྱི་བཟླས་པ་རེད། འདིའི་སྐབས་སུ་ལས་བཞི་གང་འདོད་ཀྱི་དམིགས་པ་འཕྲུལ་ཆོག་པ་རེད། དེ་ཉེ་བསྙེན་གྱི་སྐབས་རེད། འུ་ཅག་གི་བདུན་ཕྲག་གཉིས་པའི་སྐབས་རེད། གསུམ་པ་སྒྲུབ་པའི་ཡན་ལག་ལ་དཔེ་མགལ་མེའི་འཁོར་ལོ་ལྟ་བུའི་བཟླས་པ་ཞེས་གསུངས། འདི་ལ་མཚན་གཞན་གྱི་སྟེང་ནས་བཤད་ན་ཁྱོགས་ཀྱི་བཟླས་པ་དང་། དོ་ལིའི་བཟླས་པ་ཞེས་གསུངས་སའང་ཡོད་པ་རེད། འདིའི་སྐབས་སུ་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཞིག་འཕྲོས། དེ་ཡང་ཡིག་འབྲུ་རྣམས་གཅིག་རྗེས་སུ་གཅིག་གིས་གནོན་པ། བར་མ་ཆད་པ་འབྱར་ལ་མ་རེག་པ་སྔགས་ཀྱི་རང་སྒྲ་དང་བཅས་པ། མགལ་མེའི་འཁོར་ལོ་བསྐོར་བ་ལྟར་འཁོར། འཁོར་ཚུལ་ཇི་ལྟར་འཁོར་བ་རེད་ཅེ་ན། ཡེ་ཤེས་སེམས་དཔའ་དང་དམ་ཚིག་སེམས་དཔའི་ཞལ་ནས་སྔགས་ཕྲེང་ཐོན་ནས། ཡུམ་གྱི་ཞལ་དུ་ཞུགས། ཐུགས་རྒྱུད་བསྐུལ། སྐུ་ཡི་དབྱིབས་བརྒྱུད་པདྨ་ནས་ཐོན་ཏེ་ཡབ་དང་ཡེ་ཤེས་སེམས་དཔའི་རྡོ་རྗེའི་ལམ་ནས་ཡར་བྱང་ཆུབ་ཀྱི་སེམས་བདེ་བ་ཆེན་པོའི་ངོ་བོར་བདེ་ཁྲིལ་ཁྲིལ་བྱུང་བ་ཐུགས་ཀའི་ས་བོན་ལ་ཐིམ་ནས་མཆོག་གི་དངོས་གྲུབ་ཐོབ་པར་བསམ། དེ་ལ་ཡེ་ཤེས་ཀྱི་བཟླས་པ་ཟེར། དེ་ཡིས་བསྙེན་པ་ཉེ་བསྙེན་སྒྲུབ་པ་གསུམ་སོང་ནི་རེད། དེ་འུ་ཅག་གི་བདུན་ཕྲག་གསུམ་པའི་སྐབས་རེད། བཞི་བ་སྒྲུབ་པ་ཆེན་པོ་སྟེ། སྒྲུབ་པ་ཆེན་པོའི་ཡན་ལག་བུང་བ་ཚང་ཞིག་ལྟ་བུའི་བཟླས་པ་གསུངས། ལྷ་དང་སྔགས་ལས་སྤྲོས་པའི་འོད་ཟེར་གྱིས་སྣོད་གཞལ་ཡས་ཁང་དང་བཅུད་ལྷ་ཡི་འཁོར་ལོ་ཐམས་ཅད། སྒྲ་གྲག་སྔགས་ཀྱི་རང་བཞིན། དྲན་རྟོག་ཡེ་ཤེས་ཀྱི་རོལ་བར་གྱུར་པར་བསམ་ནས་འཛིན་ཞེན་མེད་པའི་ངང་ནས་བཟླ་བ། བདག་གཞན་གཉིས་མེད་ཀྱི་བཟླས་པ་ཡིན་པ་རེད། དེ་ཉིད་ཞག་ཐ་མ་དངོས་གྲུབ་ལེན་པའི་སྐབས་རེད། ད་དུང་གབ་པ་བཞི་བ་བཤད་རྒྱུ་ཡོད་ནི་རེད། གབ་པ་བཞི་བ་འབྲས་བུ་ས་ཆོད་ཀྱི་མན་ངག་རེད། འབྲས་བུ་ས་ཆོད་ཀྱི་མན་ངག་འདི་འོག་ནས་གསུམ་པ་འབྲས་བུ་རྣམ་པར་དག་པ་ཟུང་འཇུག་གི་གོ་འཕང་ལ་སྦྱོར་ཚུལ་དང་མཉམ་དུ་བཤད་ན་བདེ་བ་ཞིག་ཡིན། འདི་ནས་ལྷག་ཏུ་བཤད་དགོས་པ་མི་འདུག་སྙམ། དེ་ཡིས་ཆོ་གའི་དངོས་གཞི་སོང་ཟིན་ནས། སྦྱོར་དངོས་རྗེས་གསུམ་གྱི་ནང་ནས་རྗེས་ལ་ཐུག་པ་རེད། འདི་དག་གི་སྐབས་སུ་འདྲི་བ་ཞིག་ཡོང་བའི་དབང་དུ་བྱས་ན། དཔེར་ན་རིག་ངོ་བསྐྱངས་ནས་བསྡད་ན་དེས་བླ་མ་ཡི་དམ་གྱི་སྒྲུབ་པའི་གོ་ཆོད་ནི་ཨེ་རེད་ཅེ་ན། རྩ་གསུམ་གྱི་སྒྲུབ་པའི་བསྐྱེད་རྫོགས་དང་མ་འབྲེལ་བར་རིག་ངོ་རྐྱང་པ་བསྐྱངས་པ་ཡིས་གོ་ཆོད་ནི་རེད་ཟེར་དཀའ་བ་ཡིན་མོད། འོན་ཀྱང་རིག་ངོ་མ་བསྐྱང་ན་དེ་ལས་ཀྱང་རུང་བ་མ་ཡིན་ཏེ། དགོངས་པ་མི་འགྱུར་བའི་གཟེར་མེད་ན་སྲོག་ལྟ་བུ་དེ་མ་ཚང་བ་ཡིན། དེས་ན་ཅི་དགོས་པ་རེད་ཅེ་ན། དང་པོ་རང་གི་རིག་པ་སྐད་ཅིག་མ་འདི། བླ་མ་ཡི་དམ་གང་སྒྲུབ་བཞིན་ཡོད་པ་དེ་དང་དེའི་རང་བཞིན་དུ་སེམས་ཐོག་ནས་གཏན་ལ་ཕབས་ནས། རྩ་བ་གསུམ་དང་དེའི་བྱིན་རླབས་དངོས་གྲུབ་ཐམས་ཅད་རིག་ཐོག་ལ་སེམས་ཀྱིས་ཁྲིད་ནས། གཟོད་དེ་དང་བར་མ་ཆད་དུ་དེའི་ཐོག་ནས་རིག་ངོ་བསྐྱངས་ན། རྩ་གསུམ་སྒྲུབ་པའི་རྒྱལ་པོ་ཡིན་པ་རེད། གསུམ་པ་རྗེས་ཀྱི་རིམ་པ། རྗེས་ལ་ཚོགས་ཀྱི་རིམ་པ་ནིཿ སྲིད་པའི་འདོད་ཡོན་མཆོད་པར་བཤམསཿ ཁྱད་པར་ཤ་ཆང་མེད་མི་རུངཿ དང་པོ་བྱིན་གྱིས་རློབ་པ་ནིཿ ཞེས་གསུངས་ཏེ། འདི་ཚོ་ཡང་འདོན་བྱས་ནས་ཉིས་བཤད་བྱས་མ་བྱས་མི་འདུག ཧཱུྃཿ བདག་ཉིད་ཐུགས་ལས་རཾ་ཡཾ་ཁཾཿ འཕྲོས་པས་ཚོགས་ཀྱི་ཉེས་སྐྱོན་སྦྱངསཿ ཨོཾ་ཨཱཿཧཱུྃ་གིས་བདུད་རྩིར་བསྒྱུརཿ འདོད་ཡོན་ནམ་མཁའ་མཉམ་པར་སྤེལཿ རཾ་ཡཾ་ཁཾཿ ཨོཾ་ཨཱཿཧཱུྃཿ ཞེས་གསུངས་ན། གཱ་ན་ཙཀ་ཏྲ་ཞེས་པའི་སྒྲ་ལས་དྲངས་ན་ཚོགས་ཀྱི་འཁོར་ལོ་ཞེས་པའི་དོན་ཏེ། ཚོགས་ཀྱི་འཁོར་ལོ་བསྐོར་བ་འདི་གསང་སྔགས་ཀྱི་ལྷ་ཉེ་བར་མཉེས་པར་བྱེད་པའི་ཐབས་ཁྱད་པར་ཅན་ཞིག་རེད། ཐབས་ཁྱད་པར་ཅན་འདིའི་སྒོ་ནས་ལས་དང་ཡེ་ཤེས་ཀྱི་དངོས་གྲུབ་འབད་མེད་དུ་འགྲུབ་པ་དང་། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་པར་བྱེད་པས་ན་ཚོགས་གཉིས་རྫོགས་པའི་སྒོ་ཡིན་པས་འདི་ཤིན་ཏུ་གལ་ཆེ་བ་ཡིན། མདོར་བསྡུས་ན། མཆོད་པ་ནི་ཡེ་ཤེས་ཀྱི་ལྷ་མཉེས་ཐབས་དང་། མཉེས་པར་བྱེད་པའི་ཐབས་ཀྱི་མཐར་ཐུག་སྔགས་ལ་ཞུགས་པ་དེ་ཉིད་ཡིན་པ་རེད། དེས་ན་ཚོགས་ཀྱི་ཆོ་གའི་སྐབས་སུ་འདི་ལ་ནང་གསེས་སུ་ཚོགས་རྫས་བྱིན་རླབས། ཚོགས་ཞིང་སྤྱན་འདྲེན། དེའི་རྗེས་སུ་ཕུད་བཤགས་བསྒྲལ་གསུམ་ལ་སོགས་པ་ཚོགས་ཀྱིས་གཙོ་བོར་བྱས་པའི་ཆོ་གའི་སྨད་ལས་ལེ་ཚན་བཅོ་ལྔ་ལྟ་བུར་གསུངས་ཡོད་པ་མིན་ནམ། དང་པོ་ཚོགས་བྱིན་རླབས། དེ་དག་ལས་དང་པོ་ཚོགས་བྱིན་རླབས་ཡིན་ཞིང་། ས་བཅད་རྣམས་རིམ་གྱིས་ཡིག་ཆུང་གི་ནང་ནས་ཡོང་བ་ཡིན། ཚོགས་ལ་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་ཐམས་ཅད་ཚང་བས་ན། འདི་ལ་ཐུན་མོང་གི་མཆོད་པ་ཞེས་སྨྲས་ཀྱང་ཆོག་པ་ཞིག་རེད། ཡང་འདི་མཆོད་པ་ཉི་ཚེ་བ་ལ་སོགས་པ་མ་ཡིན་པས་ན་ཁྱད་པར་མཆོག་གི་མཆོད་པར་ཡང་བརྗོད་ཆོག བསོད་ནམས་ནང་ནས་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང་། །བགེགས་དང་བར་ཆད་ཞི་བ་དང་། །ཕྱི་མ་རིག་འཛིན་རྒྱལ་བའི་ཞིང་། །ཀུན་ཏུ་བཟང་པོ་ཐོབ་པར་འགྱུར། ཞེས་རྒྱུད་རྡོ་རྗེ་དྲ་བའི་ལུང་དོན་ལྟར། ཚོགས་བསགས་པའི་ཐབས་ཐམས་ཅད་ཀྱི་ནང་ནས་ཚོགས་འཁོར་མཆོག་ཡིན་པ་རེད། ཚོགས་ཞེས་པ་འདིའི་ངེས་ཚིག་ཇི་ལྟར་འགྲེལ་དགོས་པ་རེད་ཅེ་ན། སྐལ་ལྡན་འདུས་པའི་ཚོགས་ཀྱིས། འབྱོར་ལྡན་ཡོ་བྱད་ཀྱི་ཚོགས་འདུ་བྱས་པ་དེ་ཉིད། དངོས་གྲུབ་ལྷའི་ཚོགས་སུ་ཕུལ་བས། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་པར་བྱེད་པ་ལ་ཚོགས་ཞེས་གསུངས། སྐལ་ལྡན་འདུས་པའི་ཚོགས་ལ་ཡང་། ཚོགས་པ་ཆུང་ངུ་དང་། འབྲིང་དང་། ཆེན་པོའི་རྣམ་གཞག་ཡོད་པ་རེད། འདུས་པ་ཆུང་ངུ་ལ་གཙོ་བོ་ཡབ་ཡུམ་ཟུང་དང་། སྐུ་གསུང་ཐུགས་ཀྱི་རང་བཞིན་ཟུང་གསུམ། རིགས་ལྔའི་མཚོན་བྱེད་དུ་ཟུང་ལྔ་ཚོགས་པ། འདུས་པ་འབྲིང་པོ་ལ། དཀྱིལ་འཁོར་གྱི་ལྷ་གྲངས་དང་མཉམ་པའི་འདུས་པ། འདུས་པ་ཆེན་པོ་ལ་དེ་ལས་མང་བ། མདོར་ན་ཐབས་ཤེས་ཟུང་འབྲེལ་ལ་ཚོགས་ཀྱི་མིང་ཡོད་པ་རེད། ཡང་རྣལ་འབྱོར་ཕོ་མོའི་ཚོགས་མང་ཉུང་གི་དབང་གིས། དཔའ་བོའི་དགའ་སྟོན་དང་། དཔའ་མོའི་དགའ་སྟོན་གྱི་ཐ་སྙད་འདོགས་པ་དེ་འདྲ་ཡང་རྒྱུད་ཀྱི་ནང་དུ་གསུངས་ཡོད། འབྱོར་ལྡན་ཡོ་བྱད་ཀྱི་ཚོགས་ལ་མཚོན་ན། ཕྱི་ནང་གསང་བའི་ཡོ་བྱད་ཐམས་ཅད་ཚོགས་དགོས་པ་སྟེ། ཕྱི་ཉེར་སྤྱོད་འདོད་ཡོན། ནང་སྨན་རཀ་གཏོར་མ། གསང་བ་ཕྱག་རྒྱའི་ཡོ་བྱད་དང་། ཁྱད་པར་དུ་ཤ་ཆང་མེད་དུ་མི་རུང་བའི་ཐབས་ཤེས་ཀྱི་རྫས་ཡིན་པ་རེད། རྒྱུད་ལས་ཀྱང་། མ་ཧཱ་མཾ་ས་བདུད་རྩིར་བཅས། །མེད་མི་རུང་བའི་དངོས་གྲུབ་རྫས། ཞེས་གསུངས་ཏེ། མ་ཧཱ་མཾ་ས་ཞེས་པ་ཤ་ཆེན་ལ་གསུངས་པ་རེད། ཟོག་ལུག་གི་ཤ་ལེགས་པོ་མེད་ན་མི་རུང་གསུངས་པ་ཞིག་མ་རེད་མོད། གང་ལྟར་མཚོན་བྱེད་ཙམ་དུ་གསང་སྔགས་ཀྱི་རྫས་རེ་ཚོགས་དགོས་པ་ཡིན་པ་རེད་སྙམ། ཚོགས་ཤ་ཚོགས་ཆང་མི་དགོས་ཞེས་ཟེར་ཐག་མི་ཆོད་ཀྱང་། སྤྱིར་གསང་སྔགས་ཀྱི་སྐབས་སུ་ཤ་ཆང་འདོད་ཡོན་མི་སྤང་བ་རྣལ་འབྱོར་རྟོགས་པ་མངོན་གྱུར། ཕྱོགས་ལས་རྣམ་རྒྱལ་གྱི་སྤྱོད་པ་ལམ་དུ་ལྷོང་ཐུབ་པ་དག་ལ་དགོངས་ཏེ་གསུངས་པ་ཞིག་རེད། སློབ་དཔོན་པདྨ་དང་། ཏེ་ལོ་པ། བིརྦ་པ་སོགས་ལྟ་བུ། ཉི་མ་གཅིག་ལ་ཆང་ཁལ་ལྔ་བརྒྱའི་ཆང་ཐམས་ཅད་བཞེས་ནས། ཆང་རིན་གྱི་དོན་དུ་ཉི་མ་བཙོན་དུ་བཟུང་རབས་ཀྱི་ལོ་རྒྱུས་ལྟ་བུ་དང་། ཆང་གི་ནུས་པས་བཟི་བ་ལ་སོགས་པའི་སྐྱོན་ཐམས་ཅད་ཟིལ་གྱིས་གནོན་ཐུབ་པའི་གྲུབ་ཐོབ་རྣམ་པ་མ་གཏོགས། གང་ཟག་ལས་དང་པོ་བས་ཤ་ཆང་བག་མེད་སྤྱད་ན་སྔགས་ཀྱི་ལྟུང་བ་ཕོག་པ་ཡིན་ཞེས་གསུངས་ཡོད་པ་རེད། དེ་ཡང་རྒྱུད་ཀྱི་དགོངས་པ་ལེན་དུས་མཐའ་དྲུག་ཚུལ་བཞིའི་སྒོ་ནས་གཏན་ལ་འབེབ་པ་མ་གཏོགས། ཐད་ཀར་སྒྲ་ཇི་བཞིན་དུ་བཟུང་ནས་གཡག་སྣ་ཁུ་ཚུར་བྱེད་སར་མི་འགྲོ། ཚོགས་ཀྱི་འཁོར་ལོ་དངོས་གཙང་ཚུལ་ལྡན་ཞེས་པ་དེ་ཡང་། ལྟ་དགོངས་ཏིང་འཛིན་དང་མ་ལྡན་ཚེ་ཅུང་དཀའ་བ་རེད་མོད། འོན་ཀྱང་རང་རེའི་ཡར་མར་གྱི་ཚེས་བཅུ་དང་དབང་བསྐུར་སྒྲུབ་པ་ལ་སོགས་པའི་སྐབས་སུ་ཚོགས་འཁོར་བསྐོར་བ་འདི་ཡང་མེད་ཐབས་མེད་པའི་རྡོ་རྗེ་ཐེག་པའི་དཀྱིལ་འཁོར་ཟབ་མོའི་ཆོ་གའི་ཡན་ལག་ཅིག་རེད། ཚོགས་ཀྱི་འཁོར་ལོའི་སྒྲ་དོན་ཐོག་ནས་མ་འཇུག་ཀྱང་། ཚོགས་ཀྱི་མཆོད་པ་རེད་འགྲོ་བར་འདུག་སྙམ་བཞིན་ཡོད། དེས་ན་ཤ་ཆང་དེ་ཚོ་རྫས་ཚོགས་ཙམ་རེ་དང་མཚོན་བྱེད་ཙམ་བྱས་ན་ལེགས་པ་ཨེ་ཡིན་སྙམ། ད་དུང་། བཟང་བཏུང་འབྲུ་བཅུད་ཤིང་འབྲས་དང་། །འདོད་པའི་ཡོན་ཏན་ཐམས་ཅད་དོ། ཞེས་གསུངས་པས། གཟུགས་སོགས་འདོད་པའི་ཡོན་ཏན་དང་། རོལ་མོའི་སྤྲིན་ཕུང་དང་བཅས་པ་ཚོགས་དགོས་པ་རེད། ཚོགས་ཀྱི་ཡོ་བྱད་དེ་དག་ལ་དམ་ཚིག་གི་སྐད་ཀྱིས། ཚོགས་གཏོར། ཚོགས་ཆང་། ཚོགས་ཐུད། ཚོགས་ཤ། ཚོགས་རྫས་ཞེས་བརྗོད་པ་མ་གཏོགས། ཐ་མལ་གྱི་བརྡ་ཁྱད་ཀྱིས་ཤ་དང་། གྲོ་གཅུས། ཆང་ཞེས་འབོད་མི་རུང་བ་རེད། དེ་འདྲ་བྱས་ནས་བོས་ན་དམ་ཚིག་ཉམས་འགྲོ་ཞེས་གསུངས། ཚོགས་རྫས་བཤམས་པའི་དུས་སུ་བཟའ་བ་གཡས་དང་བཏུང་བ་གཡོན་དུ་བཤམས་དགོས་ཤིང་། ཞིང་ལྤགས་སམ་ཡང་ན་གཅན་གཟན་གྱི་ལྤགས་པའི་སྟེང་ལ་ཤོམས་ཞེས་རྒྱུད་ཀྱི་ནང་དུ་གསུངས་ཡོད། དེ་དག་འབྱོར་ལྡན་ཡོ་བྱད་ཀྱི་ཚོགས་རེད། དངོས་གྲུབ་ལྷ་ཡི་ཚོགས་ཞེས་པ་རྟེན་དང་བརྟེན་པར་བཅས་པའི་དཀྱིལ་འཁོར་གྱི་ལྷ་ཚོགས་དམ་ཅན་རྒྱ་མཚོ་དང་བཅས་པ་རེད། བསོད་ནམས་དང་ཡེ་ཤེས་ཀྱི་ཚོགས་ཞེས་པ་ཚོགས་ཀྱི་འཁོར་ལོའི་སྐབས་སུ་ཐབས་བསྐྱེད་རིམ་དང་འབྲེལ་བའི་ཀུན་སྤྱོད་ཐམས་ཅད་སྣང་བཅས་བསོད་ནམས་ཀྱི་ཚོགས་དང་། ཤེས་རབ་རྫོགས་རིམ་གྱིས་བསྡུས་པའི་ཉམས་རྟོགས་དང་སྒོམ་པ་ཐམས་ཅད་ཡེ་ཤེས་ཀྱི་ཚོགས་ཡིན་པ་རེད། གསང་སྔགས་བླ་མེད་ཀྱི་ཚོགས་མཆོད་ལ་སོགས་པའི་མཆོད་པ་འབུལ་བ་འདི་དག་འོག་མའི་མཆོད་སྦྱིན་ལས་ཁྱད་པར་འཕགས་དོན་ཅི་རེད་ཅེ་ན། ཡུལ་དང་བསམ་པ་དངོས་པོ་རྣམས་མཆོག་ཏུ་གྱུར་བས་ཡིན་པ་རེད། ཡུལ་བསོད་ནམས་ཀྱི་ཞིང་མཐར་ཐུག་སངས་རྒྱས་ཡིན་ན། སྣང་སྲིད་སྣོད་བཅུད་ཀྱིས་བསྡུས་པའི་ཆོས་ཐམས་ཅད་ཡེ་ནས་དག་པའི་དཀྱིལ་འཁོར་ཆེན་པོར་ལྷུན་གྱིས་གྲུབ་པར་ཤེས་པས། ལྷ་གཅིག་མཆོད་ཀྱང་སྲིད་ཞི་མཉམ་ཉིད་ཀྱི་ངོ་བོར་ཡོངས་སུ་རྫོགས་པ་ཐམས་ཅད་དགྱེས་ཤིང་ཚིམ་པ་དང་། སྒོ་གསུམ་རྡོ་རྗེ་གསུམ་གྱི་རྣམ་པས་ཡུལ་ལ་རོལ་བའམ་གདན་གསུམ་ཚང་བའི་དཀྱིལ་འཁོར་དུ་མཆོད་པ་ཕུལ་བས་སངས་རྒྱས་དངོས་ལ་མཆོད་པ་དང་ཁྱད་པར་མེད་པ་རེད། བསམ་པ་གཉིས་མེད་མཉམ་པ་ཆེན་པོའི་ངང་ནས་འཛིན་ཞེན་མེད་པར་རོལ་བ་སྦྱིན་པ་ལ་སོགས་པའི་ཕར་ཕྱིན་དང་། དད་དང་སྙིང་རྗེ་ལ་སོགས་པ་བྱང་ཆུབ་ཆེན་པོའི་རྒྱུའི་ཆོས་ཐམས་ཅད་ཚང་བས་རྣམ་ཀུན་མཆོག་ལྡན་གྱི་སྟོང་ཉིད་དང་བདེ་བ་ཆེན་པོ་རོ་གཅིག་པའི་བདག་ཉིད་དུ་འགྱུར་ཞིང་། དངོས་པོའི་ཕྱོགས་ནས་ཀྱང་ཚོགས་རྫས་ལ་སོགས་པའི་མཆོད་པའི་རྫས་ཐམས་ཅད་ཡེ་ཤེས་ཀྱི་བདུད་རྩིར་བསྒྱུར་བས་ཐ་མལ་བའི་དངོས་པོ་དང་མི་འདྲ་ཞིང་། དམིགས་པ་དང་སྔགས་དང་ཕྱག་རྒྱ་ཡིས་བསྒྱུར་བ་ལྟར་རྡུལ་གཅིག་གི་ས་ཁྱོན་ལ་མཁའ་ཁྱབ་ཞིང་གི་བཀོད་པ་རྫོགས་ཏེ། ཀུན་ཏུ་བཟང་པོའི་མཆོད་སྤྲིན་བདེ་བ་ཆེན་པོ་ཟད་མི་ཤེས་པའི་གཏེར་དུ་གྱུར་པ་ཡིན་པ་རེད། ཚོགས་ཀྱི་འཁོར་ལོ་ཞེས་གསུངས་པ་ནི་བདེ་སྟོང་ཟུང་འཇུག་ཡེ་ཤེས་ཀྱི་འཁོར་ལོས་ཉོན་མོངས་པའི་དྲ་བ་གཅོད་པ་མཚོན་པས་ན་དེ་ལྟར་དུ་གསུངས་པ་རེད། ཚོགས་བྱིན་རླབས་ནི། ཧཱུྃཿ བདག་ཉིད་ཐུགས་ལས་རཾ་ཡཾ་ཁཾ། །འཕྲོས་པས་ཚོགས་ཀྱི་ཉེས་སྐྱོན་སྦྱངས་ལ་སོགས་པ་གསུངས་ཏེ། བདག་ཉིད་ཐུགས་ལས་རཾ་ཡཾ་ཁཾ། ཞེས་པ་བདག་ཉིད་ལྷ་རུ་གསལ་བཞིན་པའི་ཐུགས་ཀ་ནས། མེ་རླུང་ཆུ་གསུམ་གྱི་སྙིང་པོ་རཾ་ཡཾ་ཁཾ་གསུམ་འཕྲོས། འཕྲོས་པས་ཚོགས་ཀྱི་ཉེས་སྐྱོན་སྦྱངས། ཞེས་དེ་ལྟ་བུའི་ཡི་གེ་རཾ་ཡཾ་ཁཾ་གསུམ་འཕྲོས་པས་བྱེད་ལས་ཅི་ཞིག་བྱས་པ་རེད་ཅེ་ན། ཡི་གེ་རཾ་ནི་མེ་ཡི་སྙིང་པོ་འབར་ཞིང་བསྲེགས་པའི་བྱེད་ལས་ཅན་ཡིན་པས་རཾ་ལས་མེ་འབར་ཏེ་དངོས་པོར་འཛིན་པའི་རྣམ་རྟོག་བག་ཆགས་ཐམས་ཅད་བསྲེགས། ཡཾ་ནི་རླུང་གི་སྙིང་པོ་གཡོ་ཞིང་གཏོར་བའི་བྱེད་ལས་ཅན་ཡིན་པས་ཡཾ་ལས་རླུང་གཡོས་ཏེ་མ་དག་འབག་བཙོག་གི་དྲི་མ་ཐམས་ཅད་གཏོར། ཁཾ་ནི་ཆུ་ཡི་སྙིང་པོ་སྦྱངས་ཤིང་བཀྲུ་བའི་བྱེད་ལས་ཅན་ཡིན་པས་ཁཾ་ལས་ཆུ་བྱུང་བས་ཉེས་སྐྱོན་རྟོག་གྲིབ་ཀྱི་དྲི་མ་ཐམས་ཅད་བཀྲུས་ཤིང་སྦྱངས། དེ་ནས་ཨོཾ་ཨཱཿཧཱུྃཿ ཞེས་གསུངས་ན། ཡི་གེ་ཨོཾ་གྱིས་སླར་ཡང་མཚན་འཛིན་གྱི་དྲི་མ་སྦྱངས། ཨཱཿཡིས་བཟང་ལ་གྱ་ནོམ་པ་མི་ཟད་ནམ་མཁའ་མཛོད་ཀྱི་འཁོར་ལོར་སྤེལ། ཧཱུྃ་གིས་ཐབས་ཤེས་ཀྱི་བཟའ་བཏུང་། ཉེར་སྤྱོད་ཀྱི་འདོད་ཡོན། ཟག་མེད་ཡེ་ཤེས་ཀྱི་བདུད་རྩིར་བསྒྱུར་ཏེ། མདོར་ན་ཚོགས་རྫས་འདོད་པའི་ཡོན་ཏན་སྣ་ཚོགས་ནམ་མཁའ་དང་མཉམ་པར་སྦྱངས་སྤེལ་བསྒྱུར་བའི་དམིགས་པ་དང་སྦྲགས་ཏེ། རཾ་ཡཾ་ཁཾཿ ལན་གསུམ་དང་། ཨོཾ་ཨཱཿཧཱུྃཿ ལན་གསུམ་བརྗོད་ཅེས་གསུངས་པ་རེད། ཚོགས་ཀྱི་སྐབས་འདིར་ད་དུང་སྦྱང་བ་གསུམ་དང་། བརླབ་པ་གསུམ། བསྐྱེད་པ་གསུམ་སོགས་གསུངས་ཤིང་། སྦྱང་བ་གསུམ་ནི་རཾ་ཡཾ་ཁཾཿ ལས་མེ་རླུང་ཆུ་གསུམ་བྱུང་ནས་དམེ་བ་དང་བཙོག་པ་སྦྱངས། བརླབ་པ་གསུམ་ནི་འབྲུ་གསུམ་གྱིས་བདུད་རྩིའི་རང་བཞིན་དུ་བྱིན་གྱིས་བརླབས། བསྐྱེད་པ་གསུམ་ནི་མཆོད་པའི་དུས་སུ་འདོད་ཡོན་དུ་བསྐྱེད། བཤགས་པའི་དུས་སུ་ཡེ་ཤེས་ལྔར་བསྐྱེད། བསྟབ་པའི་དུས་སུ་དགྲ་བགེགས་ཀྱི་ཤ་ཁྲག་ཏུ་བསྐྱེད་པ་དེ་འདྲར་གསུངས། གཉིས་པ་ཚོགས་ཞིང་སྤྱན་འདྲེན། གཉིས་པ་ཚོགས་ཞིང་སྤྱན་འདྲེན་ནིཿ ཞེས་གསུངས་ཏེ། ཧཱུྃཿ འོག་མིན་བདེ་ཆེན་ཞིང་ཁམས་དངཿ ནུབ་ཕྱོགས་ཨོ་རྒྱན་སྤྲུལ་པའི་གླིངཿ ཁྱད་པར་རྔ་ཡབ་དཔལ་གྱི་རིཿ གནས་ཡུལ་དུར་ཁྲོད་བརྒྱད་སོགས་ནསཿ རིག་འཛིན་འདུས་པའི་ལྷ་ཚོགས་རྣམསཿ ཚོགས་ལ་སྤྱན་འདྲེན་གཤེགས་སུ་གསོལཿ ཞེས་གསུངས་ན། འོག་མིན་བདེ་ཆེན་ཞིང་ཁམས་དང་། ཞེས་གསུངས་པའི་འོག་མིན་དེ་ཆོས་དབྱིངས་དོན་གྱི་འོག་མིན་ལ་གསུངས་པ་རེད། ནུབ་ཕྱོགས་ཨོ་རྒྱན་སྤྲུལ་པའི་གླིང་། ཞེས་གསུངས་པ་གསང་སྔགས་ཀྱི་བསྟན་པ་དར་བའི་གནས་ནུབ་ཕྱོགས་ཨོ་རྒྱན་སྤྲུལ་པའི་གླིང་དང་། ཁྱད་པར་རྔ་ཡབ་དཔལ་གྱི་རི། ཞེས་གསུངས་ན། གུ་རུ་རིན་པོ་ཆེ་སྐུ་དངོས་ད་ལྟ་ལྷོ་ནུབ་སྲིན་པོའི་ཡུལ་དུ་བཞུགས་ཡོད་པས་ན་ཁྱད་པར་གྱི་གནས། ས་སྤྱོད་ཀྱི་ཞིང་ཁམས། རྔ་ཡབ་གླིང་གི་ཟངས་མདོག་དཔལ་གྱི་རི་བོ་ན། གནས་ཡུལ་དུར་ཁྲོད་བརྒྱད་སོགས་ནས། ཞེས་གསུངས་ན། ཕྱི་ནང་གསང་བའི་གནས་ཡུལ་དུར་ཁྲོད་བརྒྱད་ལ་སོགས་པ་ནས། རིག་འཛིན་འདུས་པའི་ལྷ་ཚོགས་རྣམས། ཚོགས་ལ་སྤྱན་འདྲེན་གཤེགས་སུ་གསོལ། ཞེས་གསུངས་ན། རིག་འཛིན་འདུས་པ་བླ་མའི་དཀྱིལ་འཁོར་གྱི་ལྷ་ཚོགས་རྣམས། བདག་སྒྲུབ་པ་པོས་གནས་འདིར་སྤྱན་འདྲེན་པ་ཡིན་པས་གཤེགས་སུ་གསོལ་ཞེས་གསུངས་ནས་ཚོགས་ཞིང་དུ་སྤྱན་འདྲེན་པ་རེད། འདིའི་མཚམས་སུ་དག་པ་རབ་འབྱམས་ཀུན་ཏུ་བཟང་པོའི་ཞིང་ཁམས། རྒྱ་ཆད་ཕྱོགས་ལྷུང་བྲལ་བ་འཁོར་འདས་ཀུན་ལ་ཁྱབ་པའི་ཆོས་ཉིད་དོན་གྱི་དཀྱིལ་འཁོར་ལ་དབང་ཐོབ་པའི་བྱིན་དང་དངོས་གྲུབ་བསྐུལ་བའི་ཚིག་ནི། དུར་ཁྲོད་ཚོགས་ཁང་ཉམས་རེ་དགའཿ མཁའ་འགྲོའི་འདུ་བ་བག་རེ་དྲོཿ རྣལ་འབྱོར་ཕོ་མོ་དམ་རེ་གཙངཿ འདོད་ཡོན་ཚོགས་མཆོད་མདངས་དང་ལྡནཿ འདིར་གཤེགས་ཚོགས་ལ་བྱིན་ཆེན་ཕོབཿ མཆོག་དང་ཐུན་མོང་དངོས་གྲུབ་སྩོལཿ ཞེས་གསུངས་ཏེ། དུར་ཁྲོད་ཚོགས་ཁང་ཉམས་རེ་དགའ། ཞེས་གསུངས་ན། སྤྱིར་དུར་ཁྲོད་ཅེས་པ་ལ། ལྟ་བའི་དུར་ཁྲོད། ལུང་གི་དུར་ཁྲོད། སྒྲུབ་པའི་དུར་ཁྲོད། གནས་ཀྱི་དུར་ཁྲོད་བཅས་དབྱེ་བའི་སྟེང་ནས་གསུངས་ཡོད། དབྱིངས་དང་ཡེ་ཤེས་གཉིས་མེད་ཀྱི་ཆོས་སྐུ་ཆེན་པོའི་ཀློང་དུ་འཁོར་འདས་ཀྱི་ཆོས་ཐམས་ཅད་མ་འདུས་པ་མེད་པ་ལྟ་བའི་དུར་ཁྲོད་དང་། ཀུན་གཞི་ཆོས་དབྱིངས་ཀྱི་དུར་ལ་རྣམ་ཤེས་ཡེ་ཤེས་སུ་དག་པའི་ཁྲོད་དེ་ལུང་གི་དུར་ཁྲོད། མ་ཏྲཾ་རུ་ཏྲ་བསྒྲལ་བའི་ཁོག་པ་དུར་ཁྲོད་ཀྱི་གནས་བརྒྱད་དུ་གྱུར་པ་སྒྲུབ་པའི་དུར་ཁྲོད་དེ། དེ་ཡང་ཁམས་གསུམ་འདི་ན་དབང་ཆེ་བའི་བདུད་རུ་ཏྲ་འདུལ་བའི་གནས་ཁམས་གསུམ་པོ་ཡིན་ན། སྔོན་ཚེ་དཔལ་ཆེན་པོ་ཀུན་བཟང་ཧེ་རུ་ཀས་བདག་འཛིན་རུ་ཏྲ་བསྒྲལ་བའི་གནས་དང་ཆོས་མཚུངས་པའི་གསང་བ་སྔགས་ཀྱི་དུར་ཁྲོད་དཔའ་བོ་མཁའ་འགྲོའི་ཚོགས་ཁང་འདི་ཉིད་ཉམས་རེ་དགའ་ཞེས་གསུངས་པ་རེད། མཁའ་འགྲོའི་འདུ་བ་བག་རེ་དྲོ། ཞེས་གསུངས་ན། གནས་འདི་ན་སྤྱན་དྲངས་པའི་དཔའ་བོ་མཁའ་འགྲོའི་འདུ་བ་བག་རེ་དྲོ་ཞིང་། རྣལ་འབྱོར་ཕོ་མོ་དམ་རེ་གཙང་། ཞེས་གསུངས་ཏེ། དམ་ཚིག་ཅེས་པ་འདི་ཅི་ལྟ་བུ་ཡིན་སྔར་ཡང་ཞུས་མོད་ད་དུང་ཞུས་ན། བསྲུང་བྱའི་དོན་དེ་ལས་ནམ་ཡང་མི་འདའ་བར་བསྡོམས་པའི་སེམས་པ་ས་བོན་དང་བཅས་པ་ལ་དམ་ཚིག་ཅེས་གསུངས་པ་རེད། དེའི་དབྱེ་བ་ལ་རྩ་བ་དང་ཡན་ལག་གི་དམ་ཚིག་ས་མ་ཡ་འབུམ་སྡེ་ལ་སོགས་པ་ཇི་སྙེད་པ་ཐམས་ཅད་དང་། བསྡུས་ན་སྐུ་གསུང་ཐུགས་ཀྱི་དམ་ཚིག་ལས་འདའ་མི་རུང་བ་ཡིན་པ་རེད། དེ་ཡང་བསྡུས་ན་བསྲུང་བྱའི་ཁ་གྲངས་སོགས་དམིགས་སུ་མ་གྲུབ་པ། ཡེ་སྲུང་བཅིང་སྡོམ་མེད་པ། ཡང་གསང་མན་ངག་སྡེའི་ལུགས་ཀྱི་མེད་པ། ཕྱལ་བ། ལྷུན་གྲུབ། གཅིག་པུའི་བདག་ཉིད་ཅན་གྱི་ལྟ་སྒོམ་ལས་མི་གཡོ་བར་ཤུགས་འབྱུང་གི་སྤྱོད་པ་བསྐྱངས་བ་ཡིན། དེ་ལྟ་བུའི་ལྟ་སྤྱོད་དང་ལྡན་པའམ། ལམ་དེ་ལ་སློབ་ནས་དཀྱིལ་འཁོར་གཅིག་ལ་འཚོགས་པའི་འདིར་འདུས་ཀྱི་རྣལ་འབྱོར་ཕོ་མོ་དམ་ཚིག་རེ་གཙང་། ཞེས་གསུངས། འདོད་ཡོན་ཚོགས་མཆོད་མདངས་དང་ལྡན། ཞེས་གསུངས་ན། འདོད་ཡོན་སྣ་ཚོགས་ཟད་པ་མེད་པའི་ཚོགས་མཆོད་ཡེ་ཤེས་ཀྱི་བདུད་རྩི། ཟག་མེད་བདེ་ཆེན་གྱི་ཡེ་ཤེས་ནང་ནས་བརྙེས་པའི་མདངས་དང་ལྡན། འདིར་གཤེགས་ཚོགས་ལ་བྱིན་ཆེན་ཕོབ། ཅེས་གསུངས་ན། ཚོགས་ཞིང་མགྲོན་གྱི་ལྷ་ཚོགས་ཐམས་ཅད་དུར་ཁྲོད་ཚོགས་ཁང་གི་གནས་འདིར་གཤེགས་ཏེ་ཚོགས་ལ་བྱིན་ཆེན་ཕོབ་ཅེས་གསུངས་པ་རེད། མཆོག་དང་ཐུན་མོང་དངོས་གྲུབ་སྩོལ། ཞེས་གསུངས་ན། བདག་ཅག་སྒྲུབ་པ་པོ་ལ་བདེ་ཆེན་ཁ་སྦྱོར་ཡན་ལག་བདུན་ལྡན་གྱི་མཆོག་གི་དངོས་གྲུབ་དང་ཐུན་མོང་གྲུབ་པ་བརྒྱད་ཀྱི་དངོས་གྲུབ་སོགས་དངོས་གྲུབ་རྣམ་པ་གཉིས་སྩོལ་ཅིག་གསུངས་ནས། ཚོགས་ཞིང་སྤྱན་འདྲེན་པ་དང་ཆབས་ཅིག་ཏུ་བྱིན་ཆེན་དང་དངོས་གྲུབ་བསྐུལ་ནི་རེད། གསུམ་པ་ཚོགས་ཕུད་འབུལ་བ། གསུམ་པ་ཚོགས་ཕུད་འབུལ་བ་ནིཿ ཞེས་མཚམས་སྦྱར་ནས། ཧཱུྃཿ རྩ་གསུམ་རིག་འཛིན་རྒྱ་མཚོ་དངཿ ཌཱཀྐི་ཆོས་སྲུང་དམ་ཅན་ལཿ འདོད་ཡོན་ལོངས་སྤྱོད་ཚོགས་མཆོད་འབུལཿ མཆོག་དང་ཐུན་མོང་དངོས་གྲུབ་སྩོལཿ ཞེས་གསུངས་ཏེ། ཚོགས་མཆོད་འབུལ་བའི་ཡུལ་བླ་མ་ཡི་དམ་མཁའ་འགྲོ་རྒྱ་མཚོ། མ་ཚང་མ་འདུས་པ་མེད་པའི་རྩ་གསུམ་རིག་འཛིན་འདུས་པའི་དཀྱིལ་འཁོར་གྱི་གཙོ་བོ་དང་། ཌཱཀྐི་ཆོས་སྲུང་བཀའ་སྡོད་དམ་ཅན་དང་བཅས་པའི་དཀྱིལ་འཁོར་གྱི་ལྷ་ཚོགས་ཡོངས་རྫོགས་ལ་འདོད་ཡོན་ལོངས་སྤྱོད་ཀྱི་ཚོགས་རྫས་ཟག་མེད་བདེ་ཆེན་གྱི་མཆོད་པ་འདི་འབུལ་བ་ཡིན་པས། བཞེས་ནས་གོང་བཞིན་དུ་མཆོག་དང་ཐུན་མོང་གི་དངོས་གྲུབ་སྩོལ་ཞེས་གསུངས། ག་ན་ཙཀྲ་པཱུ་ཙ་ཁཱ་ཧིཿ ཞེས་གསུངས་ན། ག་ན་ཚོགས། ཙཀྲ་འཁོར་ལོ། པཱུ་ཛ་མཆོད་པ། ཁཱ་ཧི་ནི་བཞེས་ཤིག་ཅེས་པའི་དོན། བཞི་བ་བཤགས་པ། བཞི་བ་བཤགས་པ་ནིཿ ཞེས་གསུངས་ནས། ཧཱུྃཿ བདག་གི་ཚེ་རབས་ཐོག་མེད་ནསཿ གསང་སྔགས་ཐེག་ཆེན་སྒོར་ཞུགས་ཏེཿ རྩ་བ་ཡན་ལག་དམ་ཉམས་པཿ འདོད་ཡོན་ཚོགས་ཀྱི་མཆོད་པས་བཤགསཿ ཞེས་གསུངས་ཏེ། རྣལ་འབྱོར་སྒྲུབ་པ་པོ་བདག་གིས་ཚེ་རབས་ཐོག་མེད་ནས་ད་ལྟར་མ་ཐུག་གི་བར་དུ། ཐེག་པ་ཆེན་པོ་སྤྱི་དང་། གསང་སྔགས་ཀྱི་ཆོས་སྒོ་དང་། དབང་གི་དཀྱིལ་འཁོར་ཆེན་པོ་རུ་ཞུགས་ནས་རྩ་བ་དང་ཡན་ལག་གི་དམ་ཚིག་བསྲུང་བར་ཁས་བླངས་པ་དེ་ཉིད། མི་ཤེས་མ་མཁས་བག་མེད་ཀྱི་དབང་གིས་འགལ་ཉམས་འདས་རལ་དུ་གྱུར་པ་ཅི་མཆིས་པ་ཐམས་ཅད་འདོད་ཡོན་ཚོགས་ཀྱི་མཆོད་པ་ཕུལ་བ་འདིས་འགྱོད་པ་དང་བཅས་པས་བཤགས་པ་ཡིན་པས། བཟོད་ཅིང་ཚངས་པར་སྩལ་དུ་གསོལ་ཞེས་གསུངས་པ་རེད། ཚངས་པ་ཞེས་གསུངས་ན་ཟླ་བ་གཟའ་བྲལ་བཞིན་ཉེས་སྐྱོན་གྱིས་མི་གོས་པ་གཙང་མར་གྱུར་པ་ཞིག་ལ་གསུངས་པ་རེད། ཚངས་པ་སྩོལ་ཞེས་གསུངས་ན་གཙང་མ་རེད་ཚར་ཞེས་པའི་གསུང་གི་གནང་བ་སྦྱིན་རོགས་ཞུ་ཞེས་པའི་དོན་རེད། འདི་ཉིད་ལྟ་བའི་གདེང་དང་ལྡན་པས་བཤགས་ན་དོན་གྱི་བཤགས་པ་རུ་འགྱུར་བ་ཡིན། ཉམས་ཆག་བཤགས་ཤིང་དམ་ཚིག་བསྐང་བའི་རྒྱལ་པོའང་ཚོགས་འཁོར་འདི་ཡིན་པ་རེད། དམ་ཚིག་ཅེས་པ་གོང་ནས་ཀྱང་ཞུས་པ་བཞིན། སྟོན་པ་རྡོ་རྗེ་འཆང་གིས་ཁྲིམས་སུ་བཅས་ཤིང་། སྔགས་པ་ཐམས་ཅད་ཀྱི་བླང་བྱར་གྱུར་པའི་བསླབ་གཞི་ཁྱད་པར་ཅན་ལས་མི་འདའ་བའི་སེམས་པ་ས་བོན་དང་བཅས་པ་ཡིན་ན། འདི་ཉིད་རྡོ་རྗེ་གསུམ་གྱི་བརྟུལ་ཞུགས་སུ་གནས་པའི་ཆ་ནས་དམ་ཚིག་དང་། རྒྱུད་མི་མཐུན་ཕྱོགས་ལས་བསྡམས་པའི་ཆ་ནས་སྡོམ་པའང་ཡིན། སྤྱིར་སྔགས་སྡོམ་དེ་ཉིད་དབང་གི་སྐབས་སུ་ཐོབ་པ་རེད། དཀྱིལ་འཁོར་དུ་འཇུག་པའི་སྐུ་གསུང་ཐུགས་ཀྱི་དམ་ཚིག་སྦྱིན་པ་དེ་སྡོམ་བཟུང་ཡིན་པས། སྡོམ་བཟུང་གི་མཇུག་ཏུ་སྔགས་སྡོམ་ཙམ་སྤྱིར་བཏང་གིས་ཐོབ་པ་རེད། འོན་ཀྱང་དབང་སོ་སོའི་ངོ་སྐལ་གྱི་སྡོམ་པ་འགའ་རེ་དེའི་ནང་དུ་མ་གཏོགས་པའང་ཡོད་པར་གསུངས་ཡོད། བཛྲ་ས་མ་ཡ་ཨཱཿཞེས་གསུངས་ན། བཛྲ་རྡོ་རྗེ། ས་མ་ཡ་དམ་ཚིག ཨ་སྐྱེ་བ་མེད་པའི་དོན། དམ་ཚིག་ཉམས་པ་ཐམས་ཅད་སྐྱེ་མེད་ཆོས་དབྱིངས་འགྱུར་མེད་ཀྱི་ཀློང་དུ་བཤགས་པའི་དོན་ཅན་གྱི་སྔགས་རེད། ལྔ་པ་བསྒྲལ་བ། ལྔ་པ་བསྒྲལ་ཞིང་བསྟབ་པ་ནིཿ ཞེས་གསུངས་ནས། ཧཱུྃཿ མ་རིག་ལས་ཉོན་གཟུང་འཛིན་གྱིསཿ བསྐྱེད་པའི་བདག་འཛིན་རཱུ་ཏྲ་ཀུནཿ གཟུགས་ལ་ཕོབ་ཅིག་ནྲྀ་ཏྲི་ཛཿ རྣམ་ཤེས་ཆོས་དབྱིངས་ཀློང་དུ་ཕཊཿ གཟུགས་ཕུང་ཚོགས་ཀྱི་འཁོར་ལོར་རོལཿ ཞེས་གསུངས་ཏེ། འདི་ཉིད་ཞི་རྒྱས་དབང་དྲག་གི་ལས་བཞིའི་ནང་ནས་དྲག་པོའི་ལས་རེད། དྲག་པོའི་ལས་འདི་ལ་དགུག་ཅིང་དབྱེ་བ། བཅིངས་ཤིང་མནན་པ། བཟློག་ཅིང་བསད་པ་དང་གཟིར་ཞིང་བསྐྲད་པ་ལ་སོགས་པ་མང་ནི་རེད། འདི་ལ་ཡང་བསྲེག་པ་མེ་ཡི་ལས། གདབ་པ་ཕུར་པའི་ལས། འཕེན་པ་ཟོར་གྱི་ལས། མནན་པ་བྲོ་ཡི་ལས་ལ་སོགས་པ་ནང་གསེས་ཀྱི་དབྱེ་བ་མང་པོ་ཡོད་པ་ལས། འདི་ནས་ལས་ལ་སྦྱོར་བ་ནི་ཞིང་བཅུ་ཚང་བའི་དགྲ་བོ་བླ་སྲོག་དང་ཕྲལ་ནས་རྣམ་ཤེས་བདེ་ཆེན་གྱི་ཞིང་དུ་དྲངས། ལས་ངན་གྱི་རྒྱུན་བཅད་པའི་སྙིང་རྗེ་ཁྲོས་པའི་དྲག་ལས་ཚོགས་བསྒྲལ་དང་སྦྱར་བ་ཞིག་རེད། མ་རིག་ལས་ཉོན་གཟུང་འཛིན་གྱིས། བསྐྱེད་པའི་བདག་འཛིན་རཱུ་ཏྲ་ཀུན། ཅེས་གསུངས་ན། རུ་ཏྲ་འདི་ལ་རྒྱུད་ཀྱི་ནང་དུ་དབྱེ་བ་མང་པོ་གསུངས་ཡོད་པ་སྟེ། མ་ཏྲཾ་ཀ་རུ་ཏྲ། ཁ་ཏྲཾ་ཀ་རུ་ཏྲ། ཨ་ཀར་ཤ་རུ་ཏྲ་བཅས་ཀྱི་དབྱེ་བ་ཕྱེས་ནས་གསུངས་ཡོད། མ་རིག་པས་རྒྱུ་བྱས་ནས་ལས་ཉོན་གྱིས་བསྐྱེད་པའི་ཕྱི་ཡུལ་ལ་དངོས་པོར་བཟུང་བ་མ་ཏྲཾ་ཀ་རུ་ཏྲ་དང་། ནང་སེམས་སུ་ང་རུ་འཛིན་ཏེ་ཞེན་པ་ཁ་ཏྲཾ་ཀ་རུ་ཏྲ། ལས་འབྲས་མེད་པར་ལྟ་བ་ཨ་ཀར་ཤ་རུ་ཏྲ་སྟེ། མདོར་ན་ཕྱིན་ཅི་ལོག་གི་རྟོག་པ་ལས་ཁམས་གསུམ་གྱི་བགེགས་ཐམས་ཅད་སྐྱེས་པ་དང་། མྱང་འདས་ལ་བར་དུ་གཅོད་བྱེད་ཀྱི་བདུད་ཆེན་པོ་དེ་དག་བསྒྲལ་བྱ་དངོས་རེད། རུ་ཏྲ་རྣམ་གསུམ་གྱི་བྱེད་ལས་དང་མཚུངས་པའི་བགེགས་ཐམས་ཅད་ཀྱང་དེ་བཞིན་དུ་བསྒྲལ་བྱ་ཡིན་པར་གསུངས། བསྒྲལ་བའི་སྐབས་འདིར་གོང་དུ་ཇི་ལྟར་བཤད་པ་ལྟར། རྫོང་འཕྲང་སྲོག་གསུམ་གྱི་ལྟ་སྒོམ་སྤྱོད་པའི་གདེང་དང་ལྡན་དགོས་པ་རེད། དེ་ཇི་ལྟར་ཡིན་པ་རེད་ཅེ་ན། ལྟ་བ་བློ་འདས་ཀྱི་རྫོང་། སྒོམ་པ་ཡེངས་མེད་ཀྱི་འཕྲང་། སྤྱོད་པ་ངེས་མེད་ཀྱི་སྲོག་སྟེ་རྫོང་འཕྲང་སྲོག་གསུམ་གྱིས་གཞི་བཟུང་ནས། ལྟ་བའི་གདེང་གིས་ཟིན་པའི་སྟོང་ཉིད་གྱད་ཀྱི་ལྷ། བསྐྱེད་རིམ་ངར་དང་ལྡན་པའི་གཉེན་པོ་ཡེ་ཤེས་ཀྱི་ལྷ། ཟུང་འཇུག་ལས་ཀྱི་ཕོ་ཉ་འགྱེད་པའི་སྤྱོད་པ་ལས་ཀྱི་ལྷ་སྟེ་ལྷ་གསུམ་གྱི་དམིགས་གནད་དང་ལྡན་པ་ཞིག་ངེས་པར་བྱེད་དགོས། དེ་ལས་གཞན་དུ་ཅི་བསམ་འདི་དྲན་དང་། ཅི་སྙམ་འདི་བསྒོམ་མེད་པར་དམིགས་གཏད་འདུན་པ་ཅི་ཡང་མེད་པའི་བསྒྲལ་བ་ལ་སྙིང་པོ་མེད་པ་ཆོ་གའི་གཟུགས་བརྙན་ཙམ་ཞིག་རེད་འགྲོ་བ་རེད། ད་དུང་ཚིག་རྗེས་དོན་དྲན་ཙམ་ཡང་མེད་ན་གཟུགས་བརྙན་ནང་གི་ཡང་བརྙན་ཡིན། སྣང་སེམས་དབྱེར་མེད་རྟོགས་པའི་ཉམས་མྱོང་ཞིག་མེད་ན། །སོད་སོད་ཁུག་ཁུག་ཙམ་གྱིས་དགྲ་བགེགས་ནི་མི་སྒྲོལ། །བསམ་ངན་ཞེ་སྡང་འབར་བའི་ཚིག་རྩུབ་ཀྱི་བྷྱོ་ཟློག །ཟན་གོང་གྲིས་གཏུབ་བྱེད་པའི་བསྒྲལ་ལས་དེས་ཅི་བྱ། ཞེས་གསུངས་པ་ལྟ་བུ་རེད། འདིའི་སྐབས་སུ་གསལ་བ་གསུམ་གྱི་གནད་དང་ལྡན་དགོས། གསལ་བ་གསུམ་ཇི་ལྟར་ཡིན་པ་རེད་ཅེ་ན། ཕྱི་ཡུལ་མཚན་མའི་སྣང་ཆ་རུ་ཏྲ་རུ་གསལ་ནས། ཞིང་བཅུ་ཚང་བའི་དགྲ་གང་ཡིན་དངོས་སུ་གསལ་ན་མི་འབྱམས་པའི་དགོས་པ་ཡོད་པ་དང་། ནང་ཡུལ་རྟགས་ཀྱི་མཚོན་ཆ་སྲས་མཆོག་ཏུ་གསལ་ནས་སྲས་མཆོག་གི་ཕུར་བུས་བསྒྲལ་ན་མི་རྡུགས་པའི་དགོས་པ་ཡོད་པ། གསང་ཡུལ་རྟོག་པའི་འཕྲུལ་འཁོར་ལྷ་སྣང་དུ་གསལ་ནས་བདག་ཉིད་དཔལ་ཆེན་པོར་གསལ་ན་མི་ལྡོག་པའི་དགོས་པ་ཡོད་པ་རེད། དཔེར་ན་དམག་བརྒྱབས་ན་ཕྱིར་ལ་མི་ལྡོག མཚོན་དབྱུགས་ན་རྣོ་སོ་མི་རྡུགས། དགྲ་བསད་ན་གནད་ལ་ཁེལ་བས་སྟོང་འབྱམས་མི་རེད་པ་སྟེ། དེ་ཡང་མི་ལྡོག་མི་རྡུགས་མི་འབྱམས་པ་བཅས་ཀྱི་ཆེད་དུ་བདག་དཔལ་ཆེན། ཕུར་པ་སྲས་མཆོག བསྒྲལ་བྱ་རུ་ཏྲ་རུ་གསལ་ནས་བསྒྲལ་བ་བྱེད་དགོས་ཤིང་། དེ་ལ་ད་དུང་ལྟ་སྒོམ་སྤྱོད་གསུམ་གྱི་རྒྱབ་རྟེན་ཡོད་དགོས་པ་རེད། རང་བཞིན་གྱིས་སྒྲོལ་བའི་ལྟ་བ་དང་། སྙིང་རྗེས་སྒྲོལ་བའི་སྒོམ་པ། དབང་པོ་ཡུལ་དུས་ཀྱི་སྤྱོད་པ་རྣམས་ཚང་དགོས། དེ་ལྟ་བུའི་སྒོ་ནས། གཟུགས་ལ་ཕོབ་ཅིག་ནྲྀ་ཏྲི་ཛཿ ཞེས་གསུངས་ན། འདི་འགུག་འཆིང་སྡོམ་སྨྱོས་ཀྱི་ཚད་མེད་བཞི་ཡི་ཕྱག་རྒྱ་ཡིས་བཅིངས་པ་ཞིག་སྟེ། སྙིང་རྗེ་ཁྲོས་པའི་ཚུལ་གྱིས་གདུག་པ་ཅན་རྗེས་སུ་འཛིན་པས་འགུག་པ་བྱམས་པ། ཤིན་ཏུ་བརྩེ་བ་ཆེན་པོས་བསྡམས་ནས་མྱུར་དུ་སྒྲོལ་བ་སྙིང་རྗེ། ཤེས་པ་འཆོར་མེད་བཅིངས་ཏེ་གནས་ནས་སྤར་ཞིང་ཕུང་པོ་ཚོགས་སུ་བཏབ་པ་དགའ་བ། གདུལ་བྱ་ཡལ་བར་མི་འདོར་བདེ་བས་མྱོས་པའི་བཏང་སྙོམས་སྟེ་ལས་འདི་དག་སྔགས་པའི་ཐུན་མོང་མ་ཡིན་པའི་ཚད་མེད་བཞི་རེད། དེ་ལྟ་བུའི་ཚད་མེད་བཞིའི་ཕྱག་རྒྱ་ཡིས་བཅིངས་ཏེ། བསྒྲལ་བའི་སྔོན་དུ་ནྲི་ཏྲི་བཛྲ་ཨང་ཀུ་ཤ་ཡ་ཛ་ཞེས་གསུངས་ན། དགྲ་བོའི་རྣམ་ཤེས་དང་བླ་སྲོག་ཡི་གེ་ནྲི་ཡིག་དང་ཏྲི་ཡིག་གི་རྣམ་པར་རྟེན་གཟུགས་ཕུང་དུ་ཛ་ཡིག་གིས་བཀུག་ནས་སྙིང་གི་དཀྱིལ་དུ་སྲས་མཆོག་གི་ཕུར་པ་བཏབ་པས། ཚེ་བསོད་བཀྲག་མདངས་ཨ་དཀར་པོའི་རྣམ་པར་ཕུར་རྩེའི་ཧཱུྃ་ཡིག་དམར་པོ་རུ་བསྡུས་ནས། རང་གི་ཐུགས་སྲོག་ཏུ་བསྟིམ་སྟེ་རྣལ་འབྱོར་ཚེ་སྲོག་གི་བཅུད་དུ་བླངས། རྣམ་ཤེས་ཆོས་དབྱིངས་ཀློང་དུ་ཕཊ། ཅེས་གསུངས་ན། དེའི་མཚམས་སུ་རྣམ་ཤེས་ཕུར་རྩེའི་ཧཱུྃ་གིས་བསྡུས་ནས་ཆོས་དབྱིངས་ཀྱི་ཀློང་དུ་ཕཊ་གཅིག་གིས་འཕངས་ཏེ། དེ་རྗེས་གཟས་པོའི་གནས་ལྔ་དང་ཁྱད་པར་དུ་སྙིང་ཁའི་བླ་སྲོག་རྣམ་ཤེས་ཀྱི་རྟེན་དུ་ཕུར་པ་བཏབ་པའི་རྐྱེན་གྱིས། འཁོར་བའི་ལས་རྒྱུན་ཐམས་ཅད་བཅད་ནས། གཟུགས་ཕུང་ཚོགས་ཀྱི་འཁོར་ལོར་རོལ། ཞེས་གསུངས་ན། གཟུགས་ཕུང་ཚོགས་ཀྱི་འཁོར་ལོའི་རྫས་སུ་རོལ་ལ། དཔའ་རྟགས་ཀྱི་ཚུལ་གྱིས་བཞེས་ཤིག་གསུངས་པ་རེད། རཱུ་ཏྲ་སརྦ་ཧ་ལ་པཉྩ་པཱུ་ཙ་ཁཱ་ཧིཿ ཞེས་གསུངས་པའི་སྔགས་དོན་ནི། བདུད་བགེགས་ཐམས་ཅད་བསྟབ་བོ་བཞེས་ཤིག་རོལ་ཅིག་གསུངས་པའི་ཞལ་བསྟབ་ཀྱི་སྔགས་ཡིན་པ་རེད། བསྒྲལ་བ་འདི་ཚང་མས་ཞིབ་ཀྱིས་མཁྱེན་ན་ལེགས་པ་ཡིན། བསྒྲལ་བ་འདི་ལ་ཚེ་ཁྲུས་གནས་གསུམ་ཚང་བ་ངེས་པར་དུ་ཤེས་དགོས། ཚེ་ཁྲུས་གནས་གསུམ་ཞེས་པ་དེ་གང་རེད་ཅེ་ན། ཚེ་ལུང་ཁྲུས་ལུང་གནས་ལུང་གསུམ་པོ་རེད། དེ་གསུམ་ངེས་པར་ཚང་དགོས། ཚེ་ཁྲུས་གནས་གསུམ་གྱི་དགོངས་པ་རང་ལུགས་སུ་ཀུན་མཁྱེན་འཇིགས་གླིང་གིས་རྒྱུད་དོན་གྱི་གབ་དཀྲུགས་བསལ་ནས་ཇི་ལྟར་གསུངས་ཡོད་པ་རེད་ཅེ་ན། བསྒྲལ་བྱ་གཟས་པོའི་སྙིང་ནང་དུ་སྲོག་གི་དངོས་པོ་ཁྲག་གི་དང་མ་བྱེའུ་ལེབ་མོའི་མགོ་ཙམ་ཞིག་གི་དབུས་སུ། ཚེའི་རང་བཞིན་འོད་ཀྱི་ཨ་དཀར་པོ་ཞིག་དང་དེའི་དཀྱིལ་དུ་རྣམ་ཤེས་ཀྱི་ངོ་བོ་ཡི་གེ་ཎི་ཡིག་ལྗང་གུ་ཞིག་གསལ་འདེབས་དགོས་གསུངས་ཡོད་པ་རེད། སྒྲོལ་བྱེད་ཕུར་བུའི་དབལ་གྱི་སྣེ་མོའི་ཟུར་གསུམ་གྱི་རྩེ་ལ་ཧཱུྃ་གསུམ་དང་། རྩེ་མོ་དང་ཉེ་བའི་ཟུར་གསུམ་པོར་ཕཊ་རེ་རེ་བཀོད་དེ། བསྒྲལ་བ་དངོས་ཀྱི་སྐབས་སུ་ཕུར་བུ་གཟས་པོའི་སྙིང་ཁར་བསྣུན་པའི་ཚེ། ཚེའི་རང་བཞིན་འོད་ཀྱི་ཨ་དཀར་པོ་དེ་ཉིད་ཕུར་རྩེའི་ཧཱུྃ་གསུམ་གྱིས་ཁབ་ལེན་གྱིས་ལྕགས་བླངས་པ་ལྟར་ཙེན་གྱིས་བླངས་ཏེ་རང་གི་སྙིང་ཁར་བསྟིམ་པས་རང་གི་ཐུགས་སྲོག་དང་འདྲེས། རང་ཉིད་བཀྲག་མདངས་དང་གཟི་བརྗིད་འབར་བར་གྱུར་ཅིང་ཚེ་བསོད་རྣལ་འབྱོར་པའི་བཅུད་དུ་ལེན་པ་ལ་ཚེ་ལུང་ཞེས་ཟེར། དེའི་མཚམས་སུ་གཟས་པོའི་སྙིང་ཁའི་ཎི་ཡིག་གི་སྟེང་དུ་ཕུར་པ་སྒྲིལ་དུས་དེ་ཉིད་ནག་ཐུམ་མེར་དྲན་པ་ཉམས། བྱུང་ཚོར་གྱི་སྒོ་འགག ཉོན་མོངས་པའི་བག་ཆགས་རྩད་ནས་ཆོད་དེ་སྐུ་གསུམ་གྱི་རང་བཞིན་དུ་གོ་འཕོས་ཤིང་། ཕུར་རྩེའི་ཧཱུྃ་ཡིག་གསུམ་དང་དབྱེར་མེད་དུ་འདྲེས་པ་ལ་ཁྲུས་ལུང་ཞེས་ཟེར། ༼མཆན། སྐུ་གསུམ་མཚོན་པའི་ཧཱུྃ་གསུམ་འདི་སྐུ་གཅིག་ཐིག་ལེ་ཉག་གཅིག་གི་ངོ་བོར་གཅིག་ཏུ་དམིགས་ཀྱང་མི་འགལ་ཞེས་གསུངས།༽ དེའི་མཚམས་སུ་ཕུར་རྩེ་ནམ་མཁའ་ལ་དེངས་ཙམ་ཞིག་བྱས་ནས། དེ་ཡང་རིག་འདུས་ཀྱི་སྐབས་ལྟར་ན། རྣམ་ཤེས་ཆོས་དབྱིངས་ཀློང་དུ་ཕཊ་ཅེས་ཕཊ་སྒྲ་དྲག་པོས་བསྐུལ་བའི་རྐྱེན་གྱིས། ཧཱུྃ་གསུམ་པོ་དེ་ཟུར་གྱི་ཕཊ་གསུམ་གྱིས་འཕངས་ཏེ་མེ་སྟག་ཡལ་བ་ལྟར་སྐད་ཅིག་གིས་འོག་མིན་དག་པའི་ཞིང་ལ་སྤྲོས་ཚེ། དེ་རུ་བཞུགས་པའི་བཅོམ་ལྡན་འདས་ཀྱི་ཐུགས་ཀའི་ཧཱུྃ་ལ་ཞུགས། ཐུགས་ཀའི་ཧཱུྃ་དེ་ཉིད་ཀྱང་བདེ་བ་ཆེན་པོའི་རྗེས་ཆགས་ཀྱིས་བཞུས་ནས་མགྲིན་པར་བབས། མགྲིན་པའི་ཨ་ཡིག་ལ་ཐིམ། ཨ་དེ་ཉིད་ཞུ་ནས་སྤྱི་བོའི་ཨོཾ་ལ་ཐིམ། ཨོཾ་དེ་ཡང་ཞུ་ནས་བདུད་རྩིའི་ལམ་བརྒྱུད་དེ་དགའ་བཞིའི་འགྲོས་ཀྱིས་བབས་པས་ཡུམ་མཁར་རྒྱལ་བའི་སྲས་སུ་བསྐྲུན་པར་བསམ་པ་གནས་ལུང་ཡིན་པ་རེད། ཚེ་ལུང་ཁྲུས་ལུང་གནས་ལུང་གསུམ་དེ་ལྟར་ཚང་བ་ཡིན། སྙིང་ཁའི་རྣམ་ཤེས་དེ་ཉིད་ཕུར་རྩེས་ནམ་མཁར་དེངས་ཙམ་ཞིག་བྱས་ནས་བདེ་བར་གཤེགས་པའི་སྲས་སུ་བསྐྲུན་པའི་མཚམས་སུ་སླར་ཡང་གནས་ལྔ་རུ་ཕུར་བརྡབ་བྱེད་དགོས་པ་རེད། ཕུར་བརྡབ་བྱེད་དུས་བསྒྲལ་ལས་ཆ་ཚང་མཛད་དགོས། འདི་ལ་འགའ་རེས་དེ་ལྟར་བྱེད་པ་མི་འཐད། གནས་སྤར་ཚར་དུས་ད་དུང་ཕུར་བརྡབ་བྱེད་པ་རོ་ཐོག་ལ་མཚོན་གཡུག་པ་ལྟ་བུ་སྟེ། དེ་ལ་དགོས་པ་མི་འདུག་ཟེར་མཁན་ཡོད་མྱོང་བ་རེད། འོན་ཀྱང་འདི་རྒྱུད་ཀྱི་དགོངས་པ་མ་ལོན་པའི་རྨོངས་གཏམ་ཡིན་ཞེས་གསུངས་ཡོད། སྒྲུབ་འབུམ་དང་གསང་རྫོགས་ཀྱི་རྒྱུད་རྣམས་སུ་ཚེ་ཁྲུས་གནས་གསུམ་རྫོགས་རྗེས་སུ། ཕུར་བརྡབ་རྒྱས་པ་བྱེད་དགོས་ཞེས་དངོས་སུ་གསུངས་ཡོད། དེས་ན་དེ་ལྟར་མ་བྱས་ན་རྒྱུད་དང་དངོས་འགལ་ཡིན་པ་རེད། འདིའི་དགོས་པ་གཙོ་བོ་ཅི་རེད་ཅེ་ན། གནས་སྤར་བའི་རྣམ་ཤེས་དེ་ཉིད་ཕུང་པོ་ལ་ཕྱིར་ལྡོག་དུ་མི་རུང་བར་བྱ་བའི་ཆེད་དང་། ཕུར་བུའི་རྗེས་གདབ་ཀྱིས་ཕྱིན་ཆད་འཁོར་བའི་སྐྱེ་སྒོ་གཅོད་པའི་དོན་ཡིན་གསུངས་ཡོད། འདི་ལ་བག་ཆགས་ཀྱི་རྟེན་གཞི་བསྒྲལ་བའི་བསྒྲལ་བའང་ཟེར། སློབ་དཔོན་གྱིས་ཕུར་བརྡབ་དང་ཐུན་ཆར་ཕབས་པའི་རྗེས་སུ་ཕུར་པ་མཆེད་ལྕམ་ཐམས་ཅད་ཀྱིས་བསྐོར་ནས་རིམ་པར་རྡེབ་པ་དྲག་པོའི་ལས་ལ་དཔུང་ཚན་བསྐྱེད་པ་ཡིན་ཞེས་གསུངས་པ་ཡང་ཡོད། མདོར་ན་འདིའི་སྐབས་སུ་བསྒྲལ་བའི་ཞིང་བཅུ་ཚང་བའི་དགྲ་བོ་ཞེས་པའི་ཞིང་བཅུ་གང་ཞེ་ན། མཆོག་བདུན་དང་མཆོག་ཕྲན་གསུམ་གྱིས་བཅུ་སྟེ། དམ་ལས་ལོག་དང་འཁུ་བ་དང་། །འདུ་བར་འོང་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་བོ་ནི། །རྣལ་འབྱོར་ཀུན་ཀྱིས་དང་དུ་ལོངས། ཞེས་གསུངས་པ་རེད། ངན་སོང་གསུམ་མཆོག་ཕྲན་གསུམ་ཡིན་པ་དང་། གཞན་བདུན་པོ་མཆོག་བདུན་རེད། དེ་ཡན་ཆོད་བསྒྲལ་བ་རེད། འདིའི་མཚམས་སུ་བསྐང་བཤགས་དང་ཚོགས་གསོག་རྒྱུ་ཡིན་པ་རྒྱུན་གྱི་ཕྱག་སྲོལ་བཞིན་ཏེ། ལས་རྡོར་གྱིས་ཕྱག་འཚལ་ནས་ཚོགས་དྲངས་དུས། ཐབས་ཤེས་ཀྱི་རྫས་པདྨའི་ཕྱག་རྒྱ་ཡིས་འགྲིམ་དགོས་པ་རེད། ཚོགས་དྲངས་པའི་གནས་སྐབས་སུ་བརྡ་དང་བརྡ་ལན་གྱི་ཚུལ་གྱིས་རོལ་ཚེ། ཕུང་ཁམས་སྐྱེ་མཆེད་ཀྱི་ལྷ་ཐམས་ཅད་ཟག་མེད་བདེ་བ་ཆེན་པོས་ཚིམས་པར་བསམ་ནས་ནང་གི་བསྲེག་བླུགས་ཀྱི་ཚུལ་གྱིས་རོལ་དགོས། རྣལ་འབྱོར་ཕོ་མོ་གཡས་གྲལ་གཡོན་གྲལ་དུ་བྱས་ནས་བཞུགས་ཚེ་བཟའ་བ་གཡས་གྲལ་གྱི་འགོ་བཟུང་ནས་འགྱེད་རྒྱུ་དང་། བཏུང་བ་གཡོན་གྲལ་གྱི་འགོ་བཟུང་ཏེ་འགྱེད་དགོས་གསུངས་ཡོད། ཚོགས་འཁོར་གྱི་དུས་སུ་ཐ་མལ་བའི་སྣང་ཞེན་སྤངས་ནས་ལྷ་སྔགས་ཏིང་འཛིན་གྱི་རོལ་བ་འབའ་ཞིག་གི་ངང་དུ་གནས་པ་ལས། ཐ་མལ་གྱི་རྩེད་མོ་དང་། འཕྱ་སེམས་དང་ཟུར་ཟ། འཐབ་རྩོད་ཀུ་ཅོ་ལ་སོགས་པ་བྱེད་མི་རུང་། གཙང་དམེ་དང་བྲལ་བའི་ངང་ནས་ཚོགས་རྫས་ལ་རོལ་ནས། རྡོ་རྗེའི་གླུ་གར་བདེ་སྟོང་གི་སྦྱོར་མཆོད་ལ་སོགས་པ་རྣལ་འབྱོར་བའི་ཉམས་རྟོགས་ཀྱི་ཚོད་དང་སྦྱར་དགོས་གསུངས་ཡོད་པ་རེད། དངོས་སུ་ཕྱག་ལེན་དུ་འདེབས་པ་ནི་ཁྱད་པར་དུ་ཚོགས་རྫས་བཞེས་དུས་དཀྱིལ་འཁོར་རྣམ་པ་ལྔ་ཡི་རང་བཞིན་དུ་དག་དྲན་མཛད་དགོས་པ་སྟེ། རྣལ་འབྱོར་པ་རང་ཉིད་ཀྱི་ལུས་རྩ་ཡི་དཀྱིལ་འཁོར། རྩ་ཡི་གེའི་དཀྱིལ་འཁོར། ཁམས་བདུད་རྩིའི་དཀྱིལ་འཁོར། རིག་པ་བྱང་ཆུབ་སེམས་ཀྱི་དཀྱིལ་འཁོར་ལ་སོགས་པ་དཀྱིལ་འཁོར་རྣམ་པ་ལྔའི་རང་བཞིན་ཡེ་ནས་ལྷུན་གྲུབ་ཏུ་ཡོད་པ་ལ། ལག་པའི་སོར་མོ་ལྔ་འདོད་ཡོན་གྱི་ལྷ་མོ་ལྔ་ཡིན་པར་བསམ་སྟེ། བཟའ་བཏུང་གི་ཚོགས་རྫས་རྣམས་བླངས་བར་བྱ་ཞིང་། ལེན་ལུགས་ལའང་བཟའ་བ་གཡས་བཏུང་བ་གཡོན་གྱིས་བླངས་ནས་དབང་བཞིའི་དམ་ཚིག་དང་བསྟུན་ཏེ་རོལ། གཞན་ཡང་ཐབས་ལམ་པ་ཡིན་ན་བདེ་སྟོང་གི་བདུད་རྩི། གྲོལ་ལམ་པ་ཡིན་ན་ཟག་མེད་ཀྱི་བདུད་རྩིར་བསམ་ནས་གདན་གསུམ་ཚང་པའི་ལྷའི་དཀྱིལ་འཁོར་དུ་མཆོད་པ་འབུལ་བའི་ཚུལ་གྱིས་ལོངས་སྤྱད་དགོས་པ་རེད། འདིའི་སྐབས་སུ་ཤགས་དང་རྩོད་པ་ཀུ་ཅོ་མེད། ཅེས་གསུངས་པས། རང་སེམས་འཁྲུགས་པའི་རྩོད་པ་དང་། གཟུང་འཛིན་སྐྱེ་བའི་འཁྲུལ་གཏམ། ཐེག་པ་འོག་མའི་འབག་བཙོག་གི་རྟོག་པ་དག་ཡོད་མི་རུང་བ་རེད། ད་དུང་མི་བསམ་པ་གསུམ་དང་མི་སྨྲ་བ་གསུམ་སོགས་ཏེ། ཚོགས་རྫས་ཀྱི་དངོས་པོ་མཐོང་ཚེ་ཟ་སྙམ་འཐུང་སྙམ་ཞིམ་སྙམ་དག་མི་རུང་བ་དང་། གཞན་ལ་ཚོགས་རྫས་ཆེ་སོང་ང་ལ་ཆུང་སོང་སྙམ་པ། ན་ནིང་གིས་བཟང་འདུག་ད་ལོའི་ཅུང་ཞན་འདུག ཁར་སང་སྔོན་མ་མང་ངོ། ད་རེས་ཉུང་འདུག་བསམ་པ་དང་ཟེར་བ་མི་ཉན་གསུངས། མདོར་ན་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་ཡོངས་སུ་རྫོགས་པར་བྱ་དགོས་པ་རེད། དྲུག་པ་ལྷག་མ་བསྔོ་བ། དྲུག་པ་ལྷག་མ་བསྔོ་བ་ནིཿ ཞེས་གསུངས་ནས། ཧཱུྃཿ དཀྱིལ་འཁོར་ཆེན་པོའི་མུ་རན་ལཿ གནས་པའི་དབང་ཕྱུག་གིང་ལངྐཿ ལྷག་མའི་གཏོར་མ་འདི་བཞེས་ལཿ རྣལ་འབྱོར་སྒྲུབ་པའི་བར་ཆད་སྲུངསཿ ཞེས་གསུངས་ཏེ། དཀྱིལ་འཁོར་ཆེན་པོའི་མུ་རན་ལ་ཞེས་གསུངས་ན། དཀྱིལ་འཁོར་ཆེན་པོའི་རྟེན་དང་བརྟེན་པ་གཙོ་བོ་གཅིག་གི་ཀློང་ནས་ཤར་བ་ཡིན་པས་དོན་ལ་གཙོ་འཁོར་ཐ་དད་ཡོད་པ་མིན་ཡང་། རྣམ་པ་ཡི་སྣང་ཚུལ་དུ་སྔོན་ཚེ་དཔལ་ཆེན་པོས་རུ་ཏྲ་བསྒྲལ་བའི་གནས་སྐབས་སུ་བྲན་དུ་ཁས་བླངས་ཤིང་ཅི་བགྱིས་བཀའ་ཉན་ལ་གནས་ཡོད་པའི་ཁྱམས་ཀྱི་མུ་རན་དུ་གནས་པའི་འཁོར་ཡོད་པ་རེད། སྤྱིར་འཁོར་ལ་རིག་པ་ཁྱད་པར་ཅན་གྱི་འཁོར་དང་། དད་པས་ཉན་པའི་འཁོར་ཞེས་སོགས་ཀྱི་དབྱེ་བ་ཕྱེ་དུས་ཡོད། སྒོ་སྐྱོང་ཁྲོ་བོ་ཡབ་ཡུམ་ཡན་ཆད་རིག་པ་ཁྱད་པར་ཅན་གྱི་འཁོར་དང་། ལེགས་ལྡན་མ་ཧཱ་དེ་ཝ་ལ་སོགས་པ་སྟོན་པ་ལས་རྒྱུད་ཐ་དད་པ་དད་པས་ཉན་པའི་འཁོར་ཡིན་ཞེས་གསུངས་པ་ཡོད་མོད། འོན་ཀྱང་སྐབས་ཐོབ་ཀྱི་གོ་བའི་འགྲོས་དེད་པ་ལས་ཞྭ་དཔེ་ལྷམ་འགེབ་མང་པོ་མི་དགོས་པར་སེམས། གནས་པའི་དབང་ཕྱུག་གིང་ལངྐ། ཞེས་གསུངས་ན། དེ་ལྟ་བུའི་དཀྱིལ་འཁོར་ཆེན་པོའི་མུ་རན་ལ་གནས་པའི་དབང་ཕྱུག་མ་ཧཱ་དེ་ཝ་དང་། གིང་ཕོ་གིང་མོ་ལངྐའི་བདག་པོ། གིང་ཟེར་བ་འདི་ལས་བྱེད་པའི་ཐ་སྙད་ལྟ་བུ་ཞིག་མིན་ནམ། མཁའ་འགྲོ་སུམ་ཅུ་རྩ་གཉིས་དང་། ཕོ་ཉ་སུམ་བརྒྱ་དྲུག་ཅུ་ལ་སོགས་པ་རྣམས་ཀྱིས། ལྷག་མའི་གཏོར་མ་འདི་བཞེས་ལ། ཞེས་གསུངས་ན། ཕུད་ཀྱི་མཆོད་པ་ལ་མི་དབང་བས་ལྷག་མའི་ཞལ་ཆབ་གནང་བར་བཀའ་གནང་ཞིང་། ཅི་བཅོལ་འཕྲིན་ལས་བསྒྲུབ་པར་ཁས་བླངས་པའི་མ་སྲིང་ལྷག་མགྲོན་ཐམས་ཅད་ཀྱིས་ལྷག་མའི་གཏོར་མ་འདོད་ཡོན་ལྔ་ལྡན་གང་འདོད་ཟད་མེད་ཀྱི་བདུད་རྩི་འདི་བཞེས་ལ། རྣལ་འབྱོར་སྒྲུབ་པའི་བར་ཆད་སྲུངས་ཤིག་ཅེས་གསུངས། ཨུཤྩི་ཊ་བྷ་ལིངྟ་ཁཱ་ཧིཿ ཞེས་གསུངས་ཏེ། ཨུཤྩི་ཊ་ལྷག་མ། བྷ་ལིངྟ་གཏོར་མ། ཁཱ་ཧིཿབཞེས་ཤིག་ཅེས་པའི་དོན། ལྷག་གཏོར་བཞེས་ཞེས་པའི་སྔགས་ཚིག་འདིའི་ཤུགས་བསྟན་དུ་གང་བཅོལ་བའི་ལས་བསྒྲུབ་ལ་དམ་ལས་མ་འདའ་ཤིག་ཅེས་པ་བསྟན། ལྷག་གཏོར་མཆོད་ཚེ་དུས་མཚན་དང་གདོང་ཐུག་སྲུང་བའི་ཆེད་དུ་ལྷག་གཏོར་གྱི་སྟེང་དུ་ཉིན་དཀར་སྤོས་མེ་དང་མཚན་མོ་དང་དགོང་མོར་ཉེ་ན་དཔལ་འབར་གྱི་མེ་སྒྲོན་འཛུགས་དགོས་པ་རེད། ལས་རྡོར་གྱིས་པད་བསྐོར་སྔོན་དུ་སོང་བའི་མཁའ་ལྡིང་གི་རྒྱ་ཡིས་བླངས་ནས་སྒྲུབ་ཁང་གི་སྒོ་དྲུང་བར་དུ་ཕྱི་གྱེད་ཀྱིས་སོང་ཏེ། ཕྱི་རོལ་གྱི་གོམ་པ་བདུན་ཅུའི་མཚམས་སུ་སྲིན་མོའི་ཟ་ལམ་ཡིན་པས་དེ་རུ་སྤུངས་དགོས་པ་རེད། ལྷག་གཏོར་ལ་ཁ་ཕྲུ་འདེབས་དུས་ཡ་རྐན་དཔའ་བོ་དང་མ་རྐན་དཔའ་མོར་བསམས་བཞིན་དེ་གཉིས་མཉམ་པོར་སྦྱོར་བའི་བྱང་སེམས། ཛ་གད་ཀྱི་ཁ་ཕྲུ་དང་རོ་གཅིག་དུ་འདེབས་པར་བསམ་ནས། མཁའ་དབྱིངས་ཀྱི་ཕྱག་རྒྱས་བདུད་རྩིའི་ཁ་ཆུས་བྲན་དགོས་གསུངས་ཡོད་པ་རེད། རང་ལུགས་སུ་ལྷག་མའི་རྗེས་ལ་གཏོར་འབུལ་རེ་བཏང་བ་སྤྱི་འགྲོས་ལྟར་ཏེ། བདུན་པ་ཐུགས་དམ་བསྐུལ་བ། བདུན་པ་ཐུགས་དམ་བསྐུལ་བ་ནིཿ ཞེས་མཚམས་སྦྱར་ནས། ཧཱུྃཿ བཞེངས་ཤིག་རིག་འཛིན་འདུས་པའི་ལྷཿ ཆོས་ཀྱི་དབྱིངས་ནས་སྐུར་བཞེངས་ལཿ བྱང་ཆུབ་བསྒྲུབ་པའི་བར་ཆད་ཐུལཿ སྣོད་བཅུད་འབྱུང་བའི་རྒུད་པ་སོལཿ རྩ་རླུང་དབང་ཐང་ཉམས་པ་གསོསཿ སྒྲུབ་པའི་འབྲས་བུ་མཆིས་པར་མཛོདཿ ཅེས་གསུངས་ཏེ། བཞེངས་བསྐུལ་འདི་རིགས་འདིའི་སྐབས་སུ་མིན་ཡང་ཞི་རྒྱས་དབང་དྲག་གི་ལས་དང་མཆོག་དང་ཐུན་མོང་གི་དངོས་གྲུབ་བསྒྲུབ་པར་ནམ་ཡང་ཐུགས་རྒྱུད་བསྐུལ་ནི་རེད། ཀ་དག་སྐྱེ་མེད་རྡོ་རྗེའི་ཕོ་བྲང་ནས། །ལྷུན་གྲུབ་བདེ་བའི་སྐུ་ཅན་པདྨ་འབྱུང་། །རྩ་གསུམ་ཆོས་སྐྱོང་རྒྱ་མཚོའི་སྤྱི་དཔལ་ཆེ། །གངས་ཅན་བསྟན་འགྲོའི་མགོན་པོར་ད་བཞེངས་ཤིག ཅེས་དབྱིངས་ནས་བཞེངས་བསྐུལ་བྱེད་པ་དང་། གཞན་ཡང་། མཐའ་དམག་དམ་སྲིའི་རུ་མཚོན་གཟེང་བའི་ཚེ། །རིག་འཛིན་མཁའ་འགྲོའི་གཙོ་མཆོག་པདྨ་འབྱུང་། །ཐུགས་རྗེའི་ཐུགས་དམ་མ་གཡེལ་དུས་ལ་བབས། བདུད་འདུལ་གར་དགུའི་མཐུ་བྱིན་ད་སྐྱེད་ཅིག ཅེས་གསུངས་ཏེ་བདུད་འདུལ་དཔའ་བོའི་གཟུ་དཔུང་དུ་བསྐུལ་བ་ལྟ་བུ་རེད། ད་རེས་ཀྱི་སྐབས་འདིར་ཡིན་ཡང་། བཞེངས་ཤིག་རིག་འཛིན་འདུས་པའི་ལྷ། ཞེས་གསུངས་ན། གང་བཞེངས་པར་བསྐུལ་བའི་ཡུལ་དེ་རིག་འཛིན་འདུས་པའི་དཀྱིལ་འཁོར་གྱི་ལྷ་ཚོགས། གང་ལས་བཞེངས་པར་བསྐུལ་བ་ནི་ཆོས་ཀྱི་དབྱིངས་ལས་སྐུར་བཞེངས་ལ་ཞེས་ཆོས་ཀྱི་དབྱིངས་རྒྱ་ཆད་ཕྱོགས་ལྷུང་དང་བྲལ་བ། ནང་གསལ་གསང་བའི་སྦུབས་ནས། ཇི་ལྟར་བཞེངས་པར་བསྐུལ་བ་ནི། གཟུགས་སྐུ་རྣམ་པ་གཉིས་དང་ཁྱད་པར་དུ་གང་འདུལ་སྤྲུལ་པའི་རོལ་གར་རིག་འཛིན་འདུས་པའི་སྐུར་བཞེངས་ལ། བཞེངས་ནས་འཕྲིན་ལས་གང་ཞིག་སྒྲུབ་པར་བསྐུལ་བ་ནི། བྱང་ཆུབ་སྒྲུབ་པའི་བར་ཆད་ཐུལ། །རྩ་རླུང་དབང་ཐང་ཉམས་པ་གསོས། །སྒྲུབ་པའི་འབྲས་བུ་མཆིས་པར་མཛོད། ཅེས་གསུངས་ཏེ། བདག་ཅག་རྣལ་འབྱོར་མཆེད་ལྕམ་གྱི་བྱང་ཆུབ་སྒྲུབ་པའི་ལམ་གྱི་འགལ་རྐྱེན་བར་ཆད་ཐམས་ཅད་སོལ། རྩ་རླུང་གི་བྱེད་པ་འཁྲུགས་པས་དབང་ཐང་གི་དཔལ་ཡོན་ཉམས་ནས་མི་འདོད་སྣ་དགུ་ཞོར་ལ་འབྱུང་བའི་རྐྱེན་ཕྱི་ནང་གི་བར་ཆད་ཐམས་ཅད་སོལ་ལ། བསྒྲུབས་པའི་འབྲས་བུ་མྱུར་བ་ཉིད་དུ་ཐོབ་ཅིང་མཆིས་པར་མཛད་དུ་གསོལ་ཞེས་གསུངས། བཞེངས་བསྐུལ་འདི་དང་སྦྲེལ་ནས་ཞི་རྒྱས་དབང་དྲག་གི་ལས་བཞིའི་འཕྲིན་ལས་ཀྱི་ཁ་བསྒྱུར་འདོགས་ཆོག་གསུངས་ས་ཡང་ཡོད་པ་རེད། བརྒྱད་པ་ཆད་ཐོ་བྱ་བ། བརྒྱད་པ་ཆད་ཐོ་བྱ་བ་ནིཿ ཞེས་གསུངས་ན། ཆད་ཐོའི་ཆད་ཅེས་པ་ཁས་བླངས་བའི་དོན་ལ་གོ་བ་ཡིན། རང་རེས་ཁ་ཆད་ཟེར་སྲོལ་མེད་དམ། དེའི་ཆད་དང་གཅིག་པ་རེད། ཐོ་ཞེས་པ་ལས་འདི་དག་བྱེད་རུང་འདི་དག་བྱེད་མི་རུང་ཞེས་བླང་དོར་གྱི་མཚམས་འཛིན་བྱེད་ཀྱི་ཐོའམ་ཐ་ཚིག་བསྒྲགས་པའི་མདོ་བྱང་། མཚམས་མཚམས་སུ་ཆད་མདོ་གསུངས་ས་ཡང་ཡོད་པ་ལྟར་རེད། སྔོན་ཚེ་དཔལ་ཆེན་པོ་ནས་རིམ་བྱོན་རིག་འཛིན་བརྒྱུད་པའི་སྤྱན་སྔར་ཁས་བླངས་པའི་གཡར་དམ་རྣམས་དྲན་གསོས་བྱས་ནས་བསྒྲགས་པ་ཞིག་རེད། ཧཱུྃཿ སྔོན་ཚེ་འོག་མིན་བདེ་ཆེན་ཞིངཿ ལྷ་གནས་གསུམ་སོགས་ཉམས་དགའ་བརཿ གསང་ཆེན་རྒྱུད་སྡེའི་གནས་བསྟན་ཚེཿ རྡོ་རྗེ་ཐེག་པའི་བཀའ་སྲུང་རྣམསཿ དམ་ཚིག་གཉན་པོའི་གྲལ་དུ་བཞགཿ ཅེས་གསུངས་ཏེ། སྔོན་ཚེ་འོག་མིན་བདེ་ཆེན་ཞིང་། ཞེས་གསུངས་ན། འདིའི་སྔོན་ཚེ་འདི་དུས་གསུམ་དུས་ཀྱི་རྣམ་གཞག་དང་བྲལ་བའི་ཀ་དག་གཞིའི་དུས་ལ་གསུངས་པ་རེད། ཀ་དག་སྟོང་པ་ཆེན་པོ་ཆོས་སྐུའི་ངང་ལས་རིག་གདངས་ལྷུན་གྲུབ་ཀྱི་སྣང་བ་འགག་མེད་བདེ་ཆེན་གྱི་རྒྱན་དུ་ཤར་བའི་འོག་མིན་བདེ་ཆེན་གྱི་ཞིང་དང་། ལྷ་གནས་གསུམ་སོགས་ཉམས་དགའ་བར། །གསང་ཆེན་རྒྱུད་སྡེའི་གནས་བསྟན་ཚེ། ཞེས་གསུངས་ན། སུམ་ཅུ་རྩ་གསུམ་ལ་སོགས་པའི་ལྷ་གནས་གསུམ་མམ། ཡང་ན་ལྷ་ཀླུ་གནོད་སྦྱིན་གྱི་གནས་གསུམ་སོགས་ཉམས་དགའ་བར། ཀུན་བཟང་རྡོ་རྗེ་འཆང་ཆེན་རྡོ་རྗེ་སེམས་དཔའ་དང་གསང་བདག་དཔའ་བོའི་སྐུར་བཞེངས་ནས། གསང་ཆེན་འབྲས་བུའི་ཐེག་པའི་རྒྱུད་སྡེའི་གནས་རྣམས་བསྟན་ཅིང་། གསང་སྔགས་ཀྱི་ཆོས་འཁོར་བསྐོར་བའི་ཚེ། རྡོ་རྗེ་ཐེག་པའི་བཀའ་སྲུང་རྣམས། དམ་ཚིག་གཉན་པོའི་གྲལ་དུ་བཞག ཅེས་གསུངས་ན། གསང་ཆེན་རྡོ་རྗེ་ཐེག་པའི་བཀའ་ཡི་སྲུང་མ་ཐམས་ཅད། དཀྱིལ་འཁོར་གཉན་པོའི་བཀའ་སྡོད་དུ་བཞག་ཅིང་དམ་ཚིག་གཉན་པོ་སྲུང་ཞིང་དེ་ལས་མི་འདའ་བའི་དམ་ཅན་གྱི་གྲལ་དུ་བཞག་པ་དང་། བར་དུ་གངས་ཅན་བོད་ཀྱི་ཡུལཿ སློབ་དཔོན་པདྨ་ཐོད་ཕྲེང་གིསཿ གསང་སྔགས་ཆོས་འཁོར་བསྐོར་བའི་ཚེཿ སྲིད་པའི་ལྷ་སྲིན་ཆེ་དགུ་ཡིཿ སྲོག་སྙིང་ཕྲོགས་ཏེ་རྩིས་སུ་ཕབཿ ཅེས་གསུངས་ན། བར་དུ་གངས་ཅན་བོད་ཀྱི་ཡུལ། ཞེས་གསུངས་ན། སྔོན་ཚེ་དཔལ་ཆེན་པོས་དམ་ལ་བཞག་ཅིང་། བར་དུ་བོད་གངས་ཅན་བསིལ་བའི་ལྗོངས་སུ་གསང་སྔགས་ཀྱི་བསྟན་པ་སྤེལ་བའི་སྐབས་སུ། སློབ་དཔོན་པདྨ་ཐོད་ཕྲེང་གིས། ཞེས་གསུངས་ན། འཇིག་རྟེན་འདི་ན་ཆེ་བའི་རིག་སྔགས་འཆང་བ་ཆེན་པོ་སློབ་དཔོན་པདྨ་ཐོད་ཕྲེང་རྩལ་གྱིས། བསམ་ཡས་གཙུག་ལག་ཁང་གི་ས་འདུལ་མཛད། གསང་སྔགས་ཆོས་འཁོར་བསྐོར་བའི་ཚེ། ཞེས་གསུངས་ན། གསང་སྔགས་རྒྱུད་སྡེ་གསུམ་གྱི་ཆོས་འཁོར་བསྐོར་བའི་ཚེ། ཧས་པོ་རི་ཡི་ཡང་རྩེ་ནས་ལྷ་སྲིན་དམ་བསྒྲགས་མཛད། དྲག་པོ་ཧཱུྃ་གི་སྣང་གླུ་དང་བཅས་ཏེ་རྡོ་རྗེའི་གར་སྟབས་ཀྱི་འགྲོས་ཀྱིས། དབང་སྡུད་ཟིལ་གྱིས་མནན་པའི་གཟིགས་སྟངས་མཛད་དུས། སྲིད་པའི་ལྷ་སྲིན་ཆེ་དགུ་ཡི། །སྲོག་སྙིང་ཕྲོགས་ཏེ་རྩིས་སུ་ཕབ། ཞེས་གསུངས་ན། སྲིད་པའི་ལྷ་སྲིན་ཆེ་དགུ་གཉན་དགུ་ཐམས་ཅད་ཀྱི་སྲོག་གི་སྙིང་པོ་ཕྲོགས་ཏེ་རྡོ་རྗེ་ཐེག་པའི་བཀའ་སྲུང་གི་རྩིས་གྲངས་སུ་ཕབས་པ་རེད། དེ་ཡང་སྲིད་པའི་ལྷ་འདྲེ་ཟེར་ན་མང་པོ་ཞིག་ཡིན་ཡང་། དེ་ཐམས་ཅད་རིགས་ཚུར་བསྡུས་པ་ཡིན་ན་སྡེ་བརྒྱད་ཀྱི་ནང་དུ་འདུས་པ་ཡིན་ཏེ། དཀར་པོ་ཐམས་ཅད་གིང་གི་ནང་དུ་འདུས། དམར་པོ་ཐམས་ཅད་བཙན་གྱི་ནང་དུ་འདུས། ནག་པོ་ཐམས་ཅད་བདུད་ཀྱི་ནང་དུ་དང་། སྨུག་པོ་ཐམས་ཅད་སྲིན་པོའི་ནང་དུ་འདུས་པ་རེད། སྟེང་ཕྱོགས་ཀྱི་དབང་ཆེན་ཐམས་ཅད་གཟའ་དང་། འོག་ཕྱོགས་ཀྱི་དབང་ཆེན་ཐམས་ཅད་ཀླུ། མོ་རྒྱུད་ཐམས་ཅད་མ་མོ་རུ་འདུས་པ་དེ་འདྲ་ཡིན་པ་རེད། སློབ་དཔོན་པདྨ་ཐོད་ཕྲེང་རྡོ་རྗེ་གྲོ་ལོད་ཀྱི་སྐུ་རུ་བཞེངས་ནས་དེ་ཐམས་ཅད་དབང་དུ་བསྡུས་ན། དེ་དག་ཐམས་ཅད་ཀྱིས་རང་རང་གི་སྲོག་གི་སྙིང་པོ་ཕུལ་བ་རེད། གུ་རུ་རིན་པོ་ཆེ་ནི་རྫོང་འཕྲང་སྲོག་གསུམ་གྱི་གནད་ལ་དབང་འབྱོར་བའི་བརྟུལ་ཞུགས་གྲུབ་པའི་ཧེ་རུ་ཀ་ཡིན་པས། གསང་བའི་དགྲ་གསུམ་བསད། འཇིགས་པའི་དགྲ་བཞི་བཅོམ། འགྲོ་དྲུག་གི་གཡང་ས་བཅད་དེ་རྟོགས་པས་བདག་རྒྱུད་གྲོལ་བའི་སྟབས་ཀྱིས། ཐུགས་རྗེས་གཞན་རྒྱུད་སྒྲོལ་བའི་འཕྲིན་ལས་ལ་ཐོགས་པ་མེད་པའི་བཀའ་བབས་པས་སྡེ་བརྒྱད་ཀྱི་སྲོག་གི་སྙིང་པོ་བླངས་པ་རེད། སྲོག་ཅེས་པ་ཅི་འདྲ་ཞིག་རེད་ཅེ་ན། ཀུན་ལ་ཁྱབ་པ་གཉུག་མ་རྡོ་རྗེའི་སྲོག འཁོར་འདས་ཐམས་ཅད་ལ་ཁྱབ་པའི་ཆོས་དབྱིངས་ཆེན་པོ་དེ་ཉིད་རེད། དེ་ལ་འཕྲོག་བྱ་འཕྲོག་བྱེད་ཡོད་པ་མིན་ཡང་། ཆོས་ཅན་འཁོར་འདས་ཀྱི་སྣང་བ་སྣ་ཚོགས་ཤར་ཡོང་ཚེ། རྒྱུད་དེའི་ཐོག་གི་སྒོ་གསུམ་དབང་པོ་དང་བཅས་པ་གང་ལ་བརྟེན་པར་བྱེད་པའི་རྩ་བ། དཔེ་ལྗོན་ཤིང་ཞིག་ལ་བཞག་ན་རྩ་རྟིང་ལྟ་བུ་དེ་ལ་སྲོག་ཅེས་ཟེར་བ་རེད། སྐབས་སུ་བབས་པའི་བཤད་དོན་སྡེ་བརྒྱད་ཀྱི་སྲོག་རྟེན་དེ་ཅི་འདྲ་ཞིག་ཡིན་པ་རེད་ཅེ་ན། ཞེ་སྡང་གི་དབང་གིས་བྱུང་བའི་བདུད་དང་གཤིན་རྗེའི་སྲོག་ལྕགས་ཀྱི་སྤྱང་ཀི་བོང་བ་ཙམ་དེ་རིའི་རྒྱལ་པོའི་རི་རབ་ཀྱི་མར་ཞབས་དཔག་ཚད་བརྒྱད་ཁྲིའི་འོག་རོལ་ན། ལྕགས་མཁར་སྒོ་མེད་ཅིག་གི་ནང་དུ་བསེ་སྒྲོམ་ནག་པོའི་ནང་དུ་བཅུག་སྟེ་ལྕགས་ཀྱི་ཐམ་ཀ་རྒྱབ་ནས་ཡོད་གསུངས་པ་ལྟ་བུ་དང་། འདོད་ཆགས་ཀྱི་དབང་གིས་བྱུང་བའི་དྲེགས་པ་མ་མོ་དང་གནོད་སྦྱིན་གྱི་རིགས་ཀྱི་སྲོག ཟངས་ལས་གྲུབ་པའི་ཕྱེ་མ་ལེབ་བྱེའུ་སྐྱིག་མོའི་མགོ་ལྟ་བུ་དེ་རྒྱ་མཚོའི་ཆེན་མོའི་གཏིང་རུམ་ན་གཡུའི་གུར་ཕུབ་པའི་ནང་དུ་གཡུ་སྒྲོམ་གྱི་ནང་དུ་བཅུག་སྟེ། ཡང་ལྕགས་ཀྱི་ཐམ་ཀ་རྒྱབ་ནས་ཡོད་གསུངས་པ་ལྟ་བུ་དང་། གཏི་མུག་གི་དབང་གིས་དྲེགས་པ་ཅན་དུ་གྱུར་སོང་བའི་ཀླུ་བ་སུ་རིགས་བཞིའི་སྲོག དུག་སྦྲུལ་ནག་པོ་གཤོག་པ་ཅན་ལྟ་བུ་དེ་རུས་སྦལ་གྱི་ཁོག་པའི་སྒྲོམ་དུ་བཅུག་སྟེ། མཐིང་གི་འཛེར་མ་བཏབ་ནས་སྤོས་ངད་ལྡན་པའི་རྒྱ་མཚོའི་ནང་དུ་ཡོད་གསུངས་པ་དང་། དེ་དག་དང་མཚུངས་པར་ང་རྒྱལ་གྱི་དབང་གིས་བྱུང་བའི་དྲེགས་པ་གཟའ་དང་རྒྱལ་པོ། ཕྲག་དོག་གི་དབང་གིས་བྱུང་བའི་དམུ་དང་བཙན་ལ་སོགས་པ་ལྷ་སྲིན་སྡེ་བརྒྱད་ཀྱི་སྲོག རང་རང་གི་གནས་ས་སོ་སོར་དེ་བཞིན་ཡོད་པ་རེད། སྡེ་བརྒྱད་དེ་དག་གི་སྟོབས་རྩལ་ནུས་པ་ནི། འཆི་བདག་གཤིན་རྗེའི་ཁྲོམ་ཀ་དེ་རི་དྭགས་ལ་རྒྱ་བཙུགས་པ་ལྟ་བུ་བཟུང་ན་ཐར་རྒྱུ་མེད་པ། འདོད་ཁམས་མ་མོའི་ནད་རྐྱལ་ནི། རིམས་ནད་ཁོང་དུ་སོང་བ་ལྟ་བུ་ཐེབས་ན་དྲག་རྒྱུ་མེད་པ། ཀུན་ཁྱབ་གཟའ་ཡི་དུག་གྲིབ་དེ་ཐོག་དམར་པོ་དགུང་ནས་བབས་པ་ལྟ་བུ་ཕོགས་ཚར་ནས་གཟུར་ཐབས་མེད་པ། གདུག་རྩུབ་གནོད་སྦྱིན་གྱི་སྦྱོར་བ་ནི་བཙན་དུག་ངར་མ་ཁོག་པའི་ནང་དུ་སོང་བ་ལྟ་བུ་དེས་ཟིན་ནས་ཐར་ཐབས་མེད་པ་དེ་འདྲ་ཡིན་པ་རེད། དེ་དག་བཀའ་བསྒོས་དམ་འོག་ཏུ་བཅུག་ཚར་རྗེས། སྒྲུབ་ན་དངོས་གྲུབ་ཐོབ་པའི་གྲོགས་ཡིན་པ་ལས་གཞན། དེ་དག་སྒྲུབ་ལུགས་ཀྱི་རིམ་པ་སོ་སོར་ཡོད། དཔེར་ན་མ་མོ་དབང་སྡུད་ཀྱིས་སྒྲུབ་པ་དང་། སྲིན་པོ་ཨར་གཏད་ཀྱིས་སྒྲུབ་པ། ཀླུ་ལོག་གནོན་གྱིས་སྒྲུབ་པ། གཟའ་རྒོད་ལྟོ་དཀྲུགས་ཀྱིས་སྒྲུབ་པ། བཙན་སེ་ལོང་གིས་སྒྲུབ་པ་ལ་སོགས་པའི་མན་ངག་སོ་སོར་ཡོད་པ་རེད། ད་དུང་སྡེ་བརྒྱད་སོ་སོའི་སྔགས་ཀྱི་རྣོ་སོའི་སྐོར་ལ། འཆི་བདག་གཤིན་རྗེའི་སྔགས་ནི་མཚོན་ཆའི་འཁོར་ལོ་བསྐོར་བ་ལྟ་བུ་འཁོར་ཏེ་བསྐྱོད་པ། འདོད་ཁམས་མ་མོའི་སྔགས་ནི་རྩལ་ཆེན་གྱིས་མདའ་འཕང་བ་ལྟ་བུ་མཐུ་རྩལ་ཆེ་བ། ཁྱབ་འཇུག་གཟའ་ཡི་སྔགས་ནི་སྟོབས་ཆེན་གྱི་སྒྱོགས་རྡོ་ལྟ་བུ་དྲག་ལ་མྱུར་བ། གླེན་པ་ཀླུ་ཡི་སྔགས་ནི་ས་འོག་གི་རལ་གྲི་ལྟ་བུ་མི་ཚོར་བར་བསྐྱོད་པ་ལ་སོགས་པ། སྡེ་བརྒྱད་ལ་མཚོན་ཆ་བརྒྱད་ཀྱི་སྔགས་ཡོད་པའི་སྒྲུབ་པ་ལོག་གནོན་གབ་བྱང་དང་བཅས་པ་མཛད་ཡོད་པ་རེད། དེ་ཡང་འཆི་བདག་གཤིན་རྗེའི་དྲག་སྔགས་དེ་ཉིད་སྐྱེས་པ་དར་མའི་སྙིང་ཤུན་དུ་སྒྲུབ་ལུགས་ལྟ་བུ་དང་། ནད་བདག་མ་མོའི་དྲག་སྔགས་དེ་དག་སྣེལ་གྲི་མོ་ཡི་སྙིང་ཤུན་ལ་བསྒྲུབ་དགོས་གསུངས་པ་ལྟ་བུ། གདུག་རྩུབ་གནོད་སྦྱིན་གྱི་དྲག་སྔགས་དེ་དག་ར་ཁམ་པ་གདན་དམར་གྱི་སྙིང་ཤུན་ཏུ་སྒྲུབ་པ་ལ་སོགས་པ་མདོར་ན་སྒྲུབ་ཐབས་གནད་ཀྱི་ཡིག་ཆུང་དང་བཅས་པ་མཛད་དེ་གཏེར་དུ་སྦས། སློབ་དཔོན་པདྨ་ཐོད་ཕྲེང་གིས་སྲིད་པའི་ལྷ་སྲིན་ཆེ་དགུའི་སྲོག་སྙིང་འཕྲོག་སྟེ་རྩིས་སུ་དེ་ལྟར་ཕབས་པ་ཡིན་ཞིང་། ཐ་མ་འོད་གསལ་དག་པའི་ཞིངཿ བདེ་བ་ཆེན་པོའི་ཕོ་བྲང་དུཿ རིག་འཛིན་པདྨ་དབང་ཆེན་ལཿ པད་འབྱུང་དྲི་མེད་འོད་ཟེར་གྱིསཿ ཀློང་ཆེན་ཟབ་བརྒྱའི་དབུགས་དབྱུང་ཞིངཿ ཞེས་གསུངས་ཏེ། ཐ་མ་འོད་གསལ་དག་པའི་ཞིང་། ཞེས་གསུངས་ན། དང་པོ་ཀུན་བཟང་དཔལ་ཆེན་ཧེ་རུ་ཀས་དམ་ཚིག་གཉན་པོའི་གྲལ་དུ་བཞག བར་དུ་པདྨ་འབྱུང་གནས་ཀྱིས་སྲོག་སྙིང་འཕྲོག་སྟེ་རྩིས་སུ་ཕབས། ཐ་མ་འོད་གསལ་དག་པ་རབ་འབྱམས་ཀྱི་སྣང་ཆ་རུ་ཤར་བའི། བདེ་བ་ཆེན་པོའི་ཕོ་བྲང་དུ་ཞེས་གསུངས་ན། བདེ་ཆེན་དག་པའི་ཞིང་བདེ་བ་ཆེན་པོའི་ཕོ་བྲང་དུ། རིག་འཛིན་པདྨ་དབང་ཆེན་ལ། ཞེས་གསུངས་ན། ཀུན་མཁྱེན་འཇིགས་མེད་གླིང་པའམ། མཚན་གཞན་རིག་འཛིན་པདྨ་དབང་ཆེན་ལ། པད་འབྱུང་དྲི་མེད་འོད་ཟེར་གྱིས། ཀློང་ཆེན་ཟབ་བརྒྱའི་དབུགས་དབྱུང་ཞིང་། ཞེས་གསུངས་ན། གསང་བ་ཆེན་པོའི་ཉམས་སྣང་རྟོགས་བརྗོད་ཆུ་ཟླའི་གར་མཁན་གྱི་ནང་དུ་གསུངས་པ་ལྟར། ཡབ་རིག་འཛིན་པདྨ་འབྱུང་གནས་ཏེ། །སྐུ་གསུམ་རིག་འདུས་ཀྱི་རྣམ་རོལ་ཅན། །རྟེན་མེད་དུ་བར་སྣང་དབྱིངས་ལ་བཞུགས། །དེའི་གཡས་གཡོན་ན་བཱི་མ་པ་གོར་ཞབས། །འཁོར་དཔའ་བོ་ཌཀྐིའི་ཚོམ་བུས་མཛེས། ཞེས་པད་འབྱུང་བཱི་མ་བཻ་རོ་གསུམ་གྱིས་ཞལ་གཟིགས་པའི་སྐབས་སུ། དེ་ཡང་ཀུན་མཁྱེན་འཇིགས་གླིང་རང་ཉིད་ཀྱིས། མོས་གུས་ཀྱི་དྲན་པ་དབང་མེད་སྟོར། །རིག་པ་སྐར་མདའ་འཕངས་བ་བཞིན། །རྗེ་བཙུན་གུ་རུའི་ཐུགས་ཀར་ཐིམ། །དེར་རིག་པ་རྩལ་གྱི་དབང་ཆེན་ཐོབ། ཅེས་གསུངས་པ་དང་། གཞན་ཡང་། རྒྱལ་སྲས་པདྨ་དགེ་བའི་བཤེས་གཉེན་གྱི། །རྫུ་ལ་ཞུགས་པ་ཀློང་ཆེན་དྲི་མེད་ཀྱི། །ཞལ་མཐོང་ཙམ་གྱིས་བག་ཆགས་སྡིག་སྒྲིབ་ཟད། །གསུང་ཐོས་ཙམ་གྱིས་རྟོགས་པའི་ཀློང་ཆེན་རྡོལ། ཞེས་གསུངས་པ་དང་། ཡང་དངོས་སམ་ཉམས་སྣང་དུ་རྔ་ཡབ་དཔལ་རིར་གུ་རུའི་དྲུང་དུ་ཕེབས་ནས་བྱིན་རླབས་ཀྱི་དབང་ཆེན་ཐོབ་པའི་རྣམ་ཐར་ལྟར། པདྨ་འབྱུང་གནས་ཀྱིས་ཀློང་ཆེན་ཟབ་བརྒྱའི་དབུགས་དབྱུང་མཛད་པ་དང་། ཡང་ན་པད་འབྱུང་དྲི་མེད་འོད་ཟེར་གྱིས། ཞེས་གསུངས་པ་པད་འབྱུང་དངོས་སུ་བྱོན་ནས་སླར་ཡང་གསང་སྔགས་ཀྱི་དམ་ཆོས་བསྟན་པ་དང་གཉིས་སུ་མ་མཆིས་པ་པད་འབྱུང་དྲི་མེད་འོད་ཟེར་ཀུན་མཁྱེན་ཀློང་ཆེན་རབ་འབྱམས་རྫོགས་ཆེན་བསྟན་པའི་ཤིང་རྟ་བ་གཅིག་པུ་དེས་ཞེས་གོ་བ་བླངས་ནའང་ཆོག་པ་རེད། ཕྱི་ལྟར་འགྲོ་འདུལ་དྲི་མེད་ཧཱུྃ་ཆེན་རྗེ། །ནང་ལྟར་སེངྒེའི་སློབ་དཔོན་མཉྫུ་ཤྲི། །གསང་བ་ཡེ་ཤེས་སྐུ་ཅན་ཀློང་ཆེན་པས། །བརྡ་ཐབས་རྟེན་འབྲེལ་དུ་མས་དོན་བརྒྱུད་བྱིན། ཞེས་གསུངས་པ་ལྟར། ཀུན་མཁྱེན་འཇིགས་མེད་གླིང་པ་ལ་རྒྱལ་བ་ཀློང་ཆེན་པའི་ཡེ་ཤེས་ཀྱི་སྐུས་རྗེས་སུ་བཟུང་སྟེ། ཡེ་ཤེས་དབྱིངས་ཀྱི་བརྡ་ཚིག་གི་སྒོ་ནས་བརྗོད་བྱ་དོན་གྱི་དགོངས་བརྒྱུད་འཕོ་བར་གྱུར་ཅིག འཕོ་བར་གྱུར་ཅིག རྗོད་བྱེད་ཚིག་གི་བརྒྱུད་པ་རྫོགས་པར་གྱུར་ཅིག རྫོགས་པར་གྱུར་ཅིག ཅེས་གསུངས་ནས་ཀློང་ཆེན་ཟབ་བརྒྱའི་དབུགས་དབྱུང་མཛད་དེ། ཡེ་ཤེས་དབྱིངས་ཀྱི་མཁའ་འགྲོ་མསཿ ཀློང་གསལ་བརྡ་རིས་སྤྲད་པའི་ཚེཿ ཞེས་གསུངས་ན། ཡེ་ཤེས་ཀྱི་མཁའ་འགྲོ་མ་སྔགས་ཀྱི་སྲུང་མས་སྙོམས་འཇུག་གི་བདེ་ཆེན་བསྟབ། ཚེ་རིང་མཆེད་ལྔས་ལམ་གྲོགས་མཛད་དེ། ཀློང་གསལ་དགོངས་པའི་བརྡ་རིས་སྤྲད་པའི་སྐབས་སུ། མགྲིན་པ་ལོངས་སྤྱོད་ཀྱི་འཁོར་ལོའི་རྩ་འདབ་གྲོལ་ཏེ་དགོངས་པའི་གཏེར་ཆེན་བརྡོལ། གང་སྣང་བརྡ་དང་དཔེ་ཆར་ཤར་བའི་ཚེ་ན། གཟའ་རྒོད་སྲོག་གི་སྤུ་གྲི་སོགསཿ བཀའ་སྲུང་གཉན་པོས་ཁས་བླངས་བཞིནཿ མཆོད་གཏོར་རྒྱན་ལྡན་འདི་བཞེས་ལཿ ལས་བཞིའི་ཕྲིན་ལས་བསྒྲུབ་པར་མཛོདཿ ཅེས་གསུངས་ཏེ། བརྡ་བསྒྱུར་ནམ་མཁའ་མཛོད་ཀྱི་ཆོས་སྡེ་དེ་ཉིད་དགོངས་པའི་ཀློང་ནས་ཕྱུངས་པའི་སྐབས་སུ། གཟའ་རྒོད་སྲོག་གི་སྤུ་གྲི་དང་བཀའ་སྲུང་མ་མགོན་ལྕམ་དྲལ། དམ་ཅན་རྡོ་རྗེ་ལེགས་པ་ལ་སོགས་པས་བཀའ་སྲུང་བར་དམ་ཚིག་གཉན་པོ་བར་ལ་བཞག་ནས་ཁས་བླངས་པའི་ཆད་ཐོ་བཞིན་དུ། མཆོད་གཏོར་རྒྱན་ལྡན་འདི་བཞེས་ལ། །བཅོལ་བའི་འཕྲིན་ལས་འགྲུབ་པར་མཛོད། ཅེས་གསུངས་ན། བཀའ་སྲུང་མཆོད་པའི་གཏོར་མ་འདོད་དགུ་འབྱུང་བའི་གཏེར་ཆེན། མཐུན་རྫས་སྤྱན་གཟིགས་ཀྱི་རྒྱན་དང་ལྡན་པ་འདི་དང་འདི་དག་བཞེས་ལ། ཞི་རྒྱས་དབང་དྲག་ལ་སོགས་པའི་ལས་ཀྱི་འཕྲིན་ལས་གང་བཅོལ་བ་དེ་འགྲུབ་པར་མཛོད་ཅེས་འཕྲིན་ལས་བཅོལ་བ་རེད། ཆོས་བྱེད་སྒྲུབ་ལ་བར་གཅོད་ཡོང་བའི་སྐབས་སུ་མངོན་སྤྱོད་གློ་བུར་བ་བྱེད་པ་ལས་ཚོགས་ཐ་མ་དང་སྦྲེལ་ནས་ཆད་ཐོ་ཟོར་དུ་འཕེན་པའི་ལུགས་ཀྱང་ཡོད་པས་དེ་ལྟར་བྱས་ནའང་ཆོག་པ་རེད། སྔར་གཏོར་འགུག་སྐབས་ཀྱི་དམིགས་བྱའི་དགྲ་བོ་མདུན་དུ་བཀུག་སྟེ་གཏོར་འབུལ་གཟུ་དཔུང་གི་ཚུལ་དུ་བྱས་ནས། བཞེངས་བསྐུལ་གྱིས་ཐུགས་རྒྱུད་བསྐུལ། ཆད་ཐོ་ཟོར་དུ་འཕེན་པ་དྲག་པོའི་ལས་ལྟར་སྦྱར་ནའང་ཆོག་པ་རེད། དགུ་བ་བསྟན་མ་སྐྱོང་བ། དགུ་བ་བསྟན་མ་སྐྱོང་བ་ནིཿ ཞེས་གསུངས་ན། བོད་སྐྱོང་བསྟན་མ་བཅུ་གཉིས་འདི་སློབ་དཔོན་ཆེན་པོའི་ཐུན་མོང་མ་ཡིན་པའི་བཀའ་ཡི་ཕོ་ཉ་ཡིན་ཞིང་། དེའི་སྟབས་ཀྱིས་གསང་སྔགས་སྔ་འགྱུར་པའི་ཆོ་ག་ཐམས་ཅད་ལ་བསྟན་མ་སྐྱོང་བའི་རྣམ་གཞག་འདི་འབྱུང་བ་རེད། བསྟན་མ་བཅུ་གཉིས་བོད་གངས་ཅན་སྤྱིའི་ཡུལ་ལྷ་རུ་མངའ་གསོལ་མཛད་དེ། མུ་སྟེགས་ཀྱི་རྒོལ་བ་སྲུང་བའི་བཀའ་བསྒོས་མཛད་ཡོད་པས། དེའི་གཡར་དམ་ལས་ནམ་ཡང་མི་འདའ་བ་ཡིན་པ་རེད། འཕྲོག་བྱེད་དགའ་བོ་མ་ཐར་བར་ས་མཚམས་ཤིག་ནས་ཤི་བའི་ལོ་རྒྱུས་ལྟ་བུ་རེད། བསྟན་མ་སྐྱོང་བའི་སྐབས་འདིར་འབྲུ་གསུམ་ཨོཾ་ཨཱ་ཧཱུྃ་གིས་བསྟན་མའི་གཏོར་མ་བདུད་རྩིའི་རྒྱ་མཚོར་ཆེན་པོར་བྱིན་གྱིས་རླབས་ནས། ཧཱུྃཿ དཔལ་གྱི་བཀའ་ཉན་བོད་ཁམས་སྐྱོངཿ མ་སྲིང་བསྟན་མ་བཅུ་གཉིས་རྣམསཿ འདིར་བྱོན་གཏོར་མའི་བཤལ་ཆུ་བཞེསཿ བཅོལ་བའི་ཕྲིན་ལས་འགྲུབ་པར་མཛོདཿ ཅེས་གསུངས་ཏེ། དཔལ་གྱི་བཀའ་ཉན་བོད་ཁམས་སྐྱོང། །མ་སྲིང་བསྟན་མ་བཅུ་གཉིས་རྣམས། ཞེས་གསུངས་ན། གོང་དུ་ཞུས་པ་ལྟར་སློབ་དཔོན་པདྨ་འབྱུང་གནས་ཀྱིས། སྣང་སྲིད་དབང་དུ་སྡུད་པའི་བརྟུལ་ཞུགས་ཀྱི་སྤྱོད་པ་བསྐྱངས་བའི་སྐབས་སུ། དབང་དང་དྲག་པོ་གཉིས་ཀ། ཁྱད་པར་དུ་དྲག་པོའི་དཔལ་གྱི་ཚམ་རྔམ་གྱིས་གཟིར་བའི་སྐབས། སློབ་དཔོན་ཆེན་པོའི་བཀའ་བསྒོས་དམ་འོག་ནས་བཀའ་ཉན་བྲན་དུ་ཁས་བླངས་ཤིང་བོད་ཁམས་སྐྱོང་བར་ཞལ་གྱིས་བཞེས་པའི་མ་སྲིང་བསྟན་མ་བཅུ་གཉིས་ནི། བདུད་མོ་བཞི་དང་། གནོད་སྦྱིན་མོ་བཞི། སྨན་མོ་བཞི་བཅས་བཅུ་གཉིས་ཏེ། བདུད་མོ་བཞི་ནི། བྱང་གི་གནམ་མཚོ་ཕྱུག་མོའི་འགོ་ཡུལ་ཇོ་མོ་ལྷ་རི་གསང་མཚན་དུ་རྡོ་རྗེ་ཀུན་གྲགས། ལ་སྟོད་བྱང་གི་དཔལ་ལྡན་ཧ་རི་གསང་མཚན་དུ་རྡོ་རྗེ་གཡའ་མ་སྐྱོང་། གཙང་ཉང་སྟོད་ཀྱི་གནོད་སྦྱིན་གང་བཟང་གི་ཡུམ་གསང་མཚན་དུ་རྡོ་རྗེ་ཀུན་བཟང་མ། ཡར་འབྲོག་གི་འབྲོག་ཆེན་འཁོར་འདུལ། འབྲོག་ཆེན་འཁོར་འདུལ་རྡོ་རྗེ་བགེགས་ཀྱི་གཙོ། ཞེས་གསུངས་ཡོད་པ་དེ་བཅས་བདུད་མོ་བཞི་དང་། གནོད་སྦྱིན་མོ་བཞི་ནི། གངས་དཀར་ཤ་མེད། ཁ་རག་ཁྱུང་བཙུན། མཁའ་ལྡིང་ཀླུ་མོ་རྒྱལ། རྨ་རི་རབ་འབྱམས་རྡོ་རྗེ་དྲག་མོ་རྒྱལ་དང་བཅས་བཞི། སྨན་མོ་བཞི་ནི། ཀོང་བཙུན་དེ་མོ། བཙན་ལ་ལ་རོ། གཙང་གི་ཇོ་མོ་ནགས་རྒྱལ། གཡུ་དྲིལ་ས་ལེ་སྨན་བཅས་བཞི་རེད། འདི་དག་གི་རྟེན་པའི་གནས་གསང་བའི་ཡུལ་ཇི་ལྟར་དམ་ལ་བཏགས་པ་ཞིབ་པར་ཐང་ཡིག་སྡེ་ལྔ་སོགས་སུ་ཡོད་པ་རེད། བསྟན་མ་བཅུ་གཉིས་འདི་ངེས་དོན་གྱི་དབང་དུ་བཏང་ན་ཡེ་ཤེས་ཀྱི་དབྱིངས་ན་བཞུགས་པའི་མཁའ་འགྲོ་མ་རྐྱང་རྐྱང་ཡིན་པས། གཞིའི་དུས་ན་རྟེན་འབྲེལ་བཅུ་གཉིས་དང་དུས་སྦྱོར་བཅུ་གཉིས་དག་པའི་སྣང་ཆ། ལམ་གྱི་དུས་སུ་དགའ་བ་བཅུ་གཉིས་ཀྱི་འགྲོས་དག་པ་དང་སྦྱར་ཏེ་གསུངས་ཡོད་པ་རེད། འདིར་བྱོན་གཏོར་མའི་བཤལ་ཆུ་བཞེས། །བཅོལ་བའི་འཕྲིན་ལས་འགྲུབ་པར་མཛོད། ཅེས་གསུངས་ན། དེ་ལྟ་བུའི་བསྟན་མའམ་བསྟན་སྐྱོང་ཆེན་མོ་རྣམས་སྒྲུབ་པའི་གནས་འདིར་བྱོན་ནས་གཏོར་མའི་བཤལ་ཆུ་བཞེས་ལ། ཅི་བཅོལ་བའི་འཕྲིན་ལས་འགྲུབ་པར་མཛོད་ཅེས་གསུངས། མ་མ་ཧྲཱིཾ་ཧྲཱིཾ་བྷ་ལིངྟ་ཁཱ་ཧིཿ ཞེས་གསུངས་པའི་སྔགས་དོན་ནི། མ་མོ་བཅུ་གཉིས་འདིར་འདུས་ཏེ་གཏོར་མ་བཞེས་གསུངས་པའི་དོན་རེད། བཤལ་ཆུ་ཞེས་གསུངས་པ་ནི་འདིའི་སྔོན་དུ་ཆད་ཐོའི་གཏོར་མ་ལ་བྲན་པའི་བདུད་རྩིའི་ཆབ་གཙང་དེ་རེད། སྤྱིར་གཏོར་མ་ཞེས་པ་འགའ་ཞིག་སྒྲུབ་རྟེན་ཡིན་པ་དང་། མཚམས་རེ་མཆོད་རྫས་ཡིན་པ། ཡང་སྐབས་རེ་འགར་བགེགས་དང་འཕྲོག་མ་ལ་གཏོར་མ་སྦྱིན་དགོས་པས་འདི་དག་ཇི་ལྟར་རེད་སྙམ་ན། གཏོར་མ་ཟེར་ཚད་ཐམས་ཅད་གཅིག་མཚུངས་མ་རེད། གཏོར་མའི་དབྱིབས་དང་ཁ་དོག རྒྱན། ཏིང་ངེ་འཛིན་གྱིས་བྱིན་གྱིས་རླབས་ཚུལ་ཡང་མི་འདྲ་བས། བསྒྲུབ་པའི་གཏོར་མ། མཆོད་པའི་གཏོར་མ། འཕྲིན་བཅོལ་གྱི་གཏོར་མ། ཐ་ན་ཟག་པ་རྒྱུན་གྱི་གཏོར་མ་ལའང་གཏོར་མའི་སྒྲ་འཇུག་པ་རེད། དེ་ལ་སོགས་པ་གཏོར་མའི་མིང་ཐོག་ས་མང་ཡང་། དོན་གྱི་ཁྱད་པར་གྱི་རྣམ་དབྱེ་ཤེས་དགོས་པ་རེད། ཡང་སྒོས་སུ་སྐབས་དང་བསྟུན་ནས་ཏིང་ངེ་འཛིན་གྱིས་འཕྲལ་དང་འཕྲལ་དུ་ཁ་བསྒྱུར་དགོས་པ་ཤིན་ཏུ་མང་། འདིའི་ལག་ལེན་གཙོ་ཆེ་བ་ཤེས་པ་བཞིའི་སྟེང་ནས་ངེས་པ་བསྟན་ཡོད། མཆོད་པར་ཤེས་དགོས་པའི་དུས་དང་། ལྷར་ཤེས་དགོས་པའི་དུས། དམག་དཔུང་དང་ཟོར་དུ་ཤེས་དགོས་པའི་དུས། དེ་བཞིན་མཆོད་པ་སྦྱིན་པ་སོ་སོར་ཤེས་དགོས་པ་ལ་སོགས་སྐབས་བབས་ཀྱི་དགོས་པ་དང་དགོངས་གནད་ཀྱི་འགྲོས་དེད་ན་མཁྱེན་ངེས་རེད། གཏོར་མ་འདི་ལ་མི་བཟུང་བར་གཏོང་དགོས་པའི་གཏོར་མའི་རིགས་ཤིག་དང་། མི་གཏོང་བར་བཟུང་དགོས་པའི་གཏོར་མའི་རིགས་ཏེ་གཉིས་ཡོད་པ་རེད། བསྒྲུབ་པ་བྱེད་པའི་དུས་སུ་དཔལ་གྱི་གཏོར་མ་བཟུང་དགོས་པ་དང་། རྒྱུན་གཏོར་དང་འབྱུང་པོའི་གཏོར་མ་ནང་ནུབ་བཞིན་བཏང་དགོས་པ་ལྟ་བུ་རེད། གཏོང་དགོས་རྒྱུའི་གཏོར་མ་བཟུང་ན་བགེགས་འདུས་པ་དང་། བཟུང་དགོས་རྒྱུའི་གཏོར་མ་བཏང་ན་དངོས་གྲུབ་ཡལ་བ་སོགས་དེ་འདྲའི་རྣམ་གཞག་དང་དབྱེ་བ་ཡོད། བཅུ་པ་རྟ་བྲོ་བྱ་བ། བཅུ་པ་རྟ་བྲོ་བྱ་བ་ནིཿ ཞེས་གསུངས་ཏེ། འདིའི་སྐབས་ཀྱི་དམིགས་གནད་གཏོར་གཞུང་རི་རབ་ཏུ་གསལ་ནས་དེའི་འོག་ཏུ་རྡོ་རྗེའི་རྒྱ་གྲམ་ཞིག་ཡོད་པར་བསམ་སྟེ། སྲིད་པ་སྤྱི་ནོན་གྱི་དགོངས་པ་དང་ལྡན་པའི་ངང་ནས་རྟ་བྲོ་འདི་བརྡུང་དགོས་པ་རེད། ཧཱུྃཿ རིག་འཛིན་རྒྱལ་བའི་དཀྱིལ་འཁོར་འདིརཿ ལོག་པར་འདྲེན་པའི་དམ་སྲི་ཀུནཿ མནན་ནོ་ཐེག་པ་རིམ་དགུའི་རྒྱཿ ནམ་ཡང་ལྡང་བར་མ་གྱུར་ཅིགཿ ཅེས་གསུངས་ཏེ། རིག་འཛིན་རྒྱལ་བའི་དཀྱིལ་འཁོར་ཆེན་པོ་ཞལ་ཕྱེས་ཏེ། དཀྱིལ་འཁོར་ཆེན་པོ་དེ་ལ་ཞུགས་པའི་སྐབས་འདིར། བདག་ཅག་རྣལ་འབྱོར་པ་ལ་དམ་ལས་འགལ་ཞིང་ཉམས་པར་གྱུར་པའི་ལོག་པར་འདྲེན་པའི་འདྲེ་གདོན། སྔར་དབང་གི་དཀྱིལ་འཁོར་གཅིག་ཏུ་ཞུགས་ནས། རྗེས་སུ་དམ་ལས་ཉམས་ཤིང་དམ་འདྲེ་རུ་གྱུར་སོང་བའི་སྟབས་ཀྱིས། ད་ཡང་ནང་འདི་ཞིག་ན་འཚང་ནས་སྲུང་བའི་གུར་ཁང་གི་ནང་དུ་གབ་ཡོད་པའི་དམ་སྲི་ཀུན། སྟོང་ཆེན་སྲིད་པའི་མར་ཞབས་ས་འོག་རིམ་པ་དགུའི་མ་མཐའ་རུ་མནན་ནས། ཐེག་པ་རིམ་པ་དགུའི་རྒྱ་རིམ་པ་དགུ་བརྩེགས་ཤིག་བཏབ་སྟེ། ནམ་ཡང་ཐར་མེད་གྲུ་གསུམ་ཨེ་ཡི་བཙོན་ཁང་དུ་བཙུད་པ་ཡིན་པས་ལྡང་བར་མ་གྱུར་ཅིག་ཅེས་གསུངས་པ་རེད། དམ་སྲིའི་མནན་པ་འདི་སྒོ་ཕྱི་ནང་གཉིས་ཀའི་མཚམས་སུ་བྱེད་དགོས་པ་ནི། ཕྱི་ནང་གཉིས་ཀའི་མཚམས་འདི་ན་མ་རུངས་པ་ཞིག་ཡོད་པས་ན། ཕྱི་ནང་གཉིས་ཀའི་མཚམས་སུ་དམ་སྲི་མནན་དགོས་པ་རེད། འདི་འདྲ་བ་ཤོར་སོང་བའམ་མནན་པའི་འོག་ཏུ་མ་ཆུད་པ་མིའི་ཁོག་ཏུ་ཞུགས། ཁྱད་པར་དུ་སྒྲུབ་པའི་གྲལ་དཀྱིལ་འཁོར་གྱི་ནང་དུ་ཞུགས་ནས་བསྟན་པའི་སེལ་ཆེན་པོ་བྱེད་པ་རེད། རྗེ་མི་ལ་རས་པས། ཕྱི་ཙནྡན་ནགས་ཀྱི་ལྗོན་ཤིང་ལ། །ཤིང་སྟར་ཡུ་ནང་ནས་མ་ཤོར་ན། །ཕྱི་མོན་པ་སྟར་ཐོགས་ཡོང་དོན་མེད། །ཤིང་ནང་སྲིད་སྡོམ་ཤིག་རྗེ་འབངས་རྣམས། ཞེས་གསུངས་པ་ཡང་དེ་ལྟ་བུར་དགོངས་པ་སྟེ། ཁྱད་པར་དུ་དབང་ཡོད་ཁས་དྲག་མིང་ཆེན་འཛིན་པའི་མིའི་ཁོག་ཏུ་དམ་སྲི་ཞུགས་ན་གནོད་ཚབས་དེ་བས་ཀྱང་ཆེ་བ་རེད། སྟྭཾ་བྷ་ཡ་ནནཿ ཞེས་གསུངས་ཏེ། སྟྭཾ་བྷ་ཡ་ཤོར་མེད་དུ་གནོན་པའི་ཚིག་ཏེ། ནན་ཞེས་པ་བོད་སྐད་རེད། ནན་གྱིས་གནོན་པའི་དོན་ཅན་གྱི་ནན་འདི་སྔགས་ཚིག་ཏུ་བྱིན་གྱིས་བརླབས་པ་ཞིག་རེད། མདོར་ན་རྟ་བྲོ་འདི་གཉིས་འཛིན་ལས་ཤར་བའི་དགྲ་བགེགས་ཐམས་ཅད་ཡེ་ཤེས་ལྔ་ཡི་ཀློང་ལས་ནམ་ཡང་ལྡང་མེད་དུ་རྒྱས་འདེབས་པའི་དོན་ཅན་ཞིག་རེད། སྤྲོས་བཅས་ཀྱི་སྐབས་སུ་མཆེད་ལྕམ་ཐམས་ཅད་ཀྱིས་ཞི་རྒྱས་དབང་དྲག་གི་བྲོ་བརྡུང་བ་ཡང་ཡོད། དུས་རྒྱུན་དམིགས་པ་ཙམ་གྱིས་འགྲུབ། འདི་མངོན་སྤྱོད་ཀྱི་ལས་ཐམས་ཅད་ཀྱི་མཇུག་སྡོམ་ལྟ་བུའང་ཡིན། དེ་ཡན་གྱིས་ཚོགས་ཀྱི་འཁོར་ལོའི་རིམ་པ་ཡོངས་རྫོགས་སོང་ཟིན་ནས། ཚོགས་ཞིང་གི་ལྷ་ཚོགས་མཆོད་པས་ཚིམས། རྣལ་འབྱོར་བ་རྡོ་རྗེའི་བཟའ་ལྟུང་གིས་ཚིམས། ཡེ་ཤེས་ཀྱི་འཁོར་ལོ་བདུད་རྩིའི་དྭངས་མས་ཚིམས། ལུས་དཀྱིལ་གྱི་ལྷ་ཐམས་ཅད་བདེ་སྟོང་གི་ཡེ་ཤེས་ཀྱིས་ཚིམས། ཕྱི་ནང་གི་མཁའ་འགྲོ་རྡོ་རྗེའི་གླུ་ཡིས་ཚིམས། དྲེག་པ་ལས་བྱེད་ཀྱི་འབྱུང་པོ་རྣམས་གཏོར་མས་ཚིམས་ཏེ་ཚིམས་པ་དྲུག་དང་ལྡན་པའི་རྗེས་སུ། བཅུ་གཅིག་དངོས་གྲུབ་བླང་བ། བཅུ་གཅིག་དངོས་གྲུབ་བླང་བ་ནིཿ ཞེས་གསུངས། རང་རེའི་འདི་འདྲའི་བསྙེན་སྒྲུབ་ལ་མཚོན་ལ་ཞག་ཐ་མ་སྒྲུབ་པ་ཆེན་པོའི་དངོས་གྲུབ་ལེན་ཚེ། དེའི་སྔ་ནུབ་ལྟ་བུ་ལ་དངོས་གྲུབ་བསྐུལ་བའི་སྔགས་ཀ་ཡ་ཝཱཀྐ་ཙིཏྟ་ཤམ་བུ་རུ་སྦྱར་ནས་ལྡེའུ་གདག་པའི་ཚུལ་གྱིས་གསོག་པ་མན་ངག་གི་དགོངས་པ་རེད། དངོས་གྲུབ་ལེན་ཁར་བྱིན་འབེབ་ཅུང་རྒྱས་པ་རེ་བྱས་ན་ཆོག གཞན་ཧཱུྃ་ཧཱུྃ་ཧཱུྃ་རྗེ་བཙུན་ཆེན་པོ་ཐོད་ཕྲེང་རྩལ་ལ་སོགས་པ་དང་། བཞེངས་ཤིག་པདྨ་སོགས་ཀྱིས་དངོས་གྲུབ་བསྐུལ་ཏེ། དངོས་གྲུབ་ཀྱི་རྫས་སྤྱི་དང་། ཁྱད་པར་དུ་ཤེས་པ་རྣམ་གསུམ་གྱི་ནང་ནས་གཏོར་མ་ལྷར་ཤེས་པའི་ངང་ནས་དབང་དང་དངོས་གྲུབ་ལེན་བྱའི་ཡུལ་དུ་བྱས་ནས། ཡེ་ཤེས་ཀྱི་འཁོར་ལོ་ལོགས་སུ་ཕྱེས་ནས་གཏོར་མ་དང་གཉིས་མེད་དུ་གྱུར་པ་དེ་ལས། རང་ཉིད་དམ་ཚིག་གི་འཁོར་ལོས་དབང་ལེན་དགོས་པ་རེད། དུས་རྒྱུན་ལྟར་ན་ཚིག་དང་མཐུན་པའི་དོན་དྲན་བཞིན་དུ། ཧོཿ རིག་འཛིན་དཀྱིལ་འཁོར་ལྷ་ཚོགས་རྣམསཿ བསྙེན་ཅིང་སྒྲུབ་པའི་དམ་ཚིག་ཐེམསཿ རྡོ་རྗེ་སེམས་དཔའི་ནམ་ཡང་ལངསཿ དངོས་གྲུབ་སྩོལ་བའི་དུས་ལ་བབཿ ཅེས་གསུངས་ཏེ། རིག་འཛིན་དཀྱིལ་འཁོར་ལྷ་ཚོགས་རྣམས་ཞེས་པ་སོགས་ཀྱིས་དངོས་གྲུབ་བསྐུལ་བའི་སྙན་གསན་དབབ་པ་རེད། བསྙེན་ཅིང་སྒྲུབ་པའི་དམ་ཚིག་ཐེམས། ཞེས་གསུངས་ན། རིག་འཛིན་སྒྲུབ་པའི་དཀྱིལ་འཁོར་གྱི་དལ་ཞལ་ཕྱེས། བསྙེན་ཅིང་བསྒྲུབ་པར་དམ་བཅས་པའི་དམ་ཚིག་གི་ཞག་གྲངས་ཚང་བའམ་ཐེམས་པ། ཡང་ན་འགྲུབ་པའི་མཚན་མ་མཐོང་ཞིང་། རྡོ་རྗེ་སེམས་དཔའི་ནམ་ཡང་ལངས། ཞེས་གསུངས་ན། རྒྱུད་ཀྱི་ནང་དུ། མཚན་མ་བརྟན་པོར་བྱུང་བ་ན། །སྒྲུབ་པ་ཆེན་པོ་རྩམ་པར་བྱ། །རྡོ་རྗེའི་ཉི་མ་ནུབ་ནས་ནི། །སྐྱ་རེངས་འཆར་བའི་བར་དུ་བསྒྲུབ། ཅེས་གསུངས། སྒྲུབ་པའི་ཞག་གྲངས་ཚང་བའམ། འགྲུབ་པའི་རྟགས་བྱུང་སྟེ་དངོས་གྲུབ་ལེན་པར་འོས་པའི་ཐ་མའི་ཞག་དེ་རྡོ་རྗེ་དངོས་གྲུབ་སྒྲུབ་པའི་ཞག་ཡིན་པ་རེད། རྡོ་རྗེ་སེམས་དཔའི་ནམ་ཡང་ལངས་ཞེས་གསུངས་པ་སྐྱ་རེངས་འཆར་བའི་དུས་ལ་གསུངས་པ་རེད། འདི་ལ་ཕྱི་ནང་གསང་གསུམ་གྱི་དབྱེ་བ་ཡོད་པ་ནི། ཕྱི་ལྟར་ན་ཞག་དེའི་མཚན་མོར་དངོས་གྲུབ་བསྒྲུབས་ནས་ཕྱི་ཉིན་མ་ཚེས་ཙམ་གྱི་སྐྱ་རེངས་ཐོག་མར་འཆར་བའི་སྐབས་དང་། ནང་ལྟར་ན་ཤེས་རབ་མའི་དམར་ཆ་ནུབ་ཅིང་ཐབས་ཀྱི་ཐིག་ལེ་སྟོབས་སུ་གྱུར་བའི་སྐྱ་རེངས་འཆར་བ་དང་། གསང་བ་ལྟར་ན་རྣལ་འབྱོར་པའི་རྒྱུད་ཀྱི་ཉོན་མོངས་ནུབ་སྟེ་སྐུ་དང་ཡེ་ཤེས་ཏིང་འཛིན་གྱི་ཉམས་རྙེད་པའི་སྐྱ་རེངས་འཆར་བ་གསུམ་པོ་དང་སྦྱར་ནས་གོ་བ་ལེན་པ་དང་། གཞུང་གཞན་དུ། སྲོད་ལ་འཕྲོ་འདུ་ལམ་དུ་བྱས་ཏེ་ལྷ་ལས་དངོས་གྲུབ་ལེན་པ་དང་། ནམ་གུང་སྒྲོལ་བ་ལམ་དུ་བྱས་ཏེ་དགྲ་ལས་དངོས་གྲུབ་ལེན་པ། ཐོ་རངས་སྦྱོར་བ་ལམ་དུ་བྱས་ཏེ་ལས་རྒྱ་ལས་དངོས་གྲུབ་ལེན་པ་ལ་སོགས་པ་གཙོ་བོ་སྦྱོར་སྒྲོལ་དང་སྦྱར་ནས་གསུངས་པ་དེའང་འདིའི་ནང་དུ་འཐུས་པ་ཞིག་རེད། དེ་ལྟ་བུའི་ཚུལ་དང་སྦྱར་ན། གནས་ཡུལ་ཉེར་བཞི་རུ་བཞུགས་པའི་མཁའ་འགྲོའི་གཙོ་མོ་རྣམས་རྩ་ཁམས་རླུང་གསུམ་དུ་ཞུགས་ཏེ་བྱིན་གྱིས་བརླབས་ཚེ། ལུས་ལ་བདེ་བ་འབར། ངག་ལ་ནུས་པ་འབར། སེམས་ལ་རྟོགས་པ་འབར་ཏེ། འབར་བ་གསུམ་གྱི་དངོས་གྲུབ་འབྱུང་བ་རེད། ནང་ལ་འབར་བ་གསུམ་ཐོབ་ན་ཕྱི་རོལ་དུ་འདུ་བ་རྣམ་གསུམ་རང་ཤུགས་ཀྱིས་ཡོང་བ་སྟེ། འདུ་བ་གསུམ་ནི་ཉིན་པར་མི། ནུབ་མོར་མཁའ་འགྲོ། ནང་ནུབ་ཟས་ནོར་འདུ་བ། འདུ་བ་རྣམ་གསུམ་དབྱར་གྱི་མཚོ་ལྟར་སྐྱིལ། །འབར་བ་རྣམ་གསུམ་དུས་མཐའི་མེ་ལྟར་སྦོར། ཞེས་གསུངས་པའི་འཕྲིན་བཅོལ་དངོས་སུ་འགྲུབ་ཡོང་བ་རེད། མདོར་ན་དངོས་གྲུབ་སྩོལ་བའི་དུས་ལ་བབས་པས། སྐུ་གསུང་ཐུགས་ཀྱི་དཀྱིལ་འཁོར་ནསཿ མི་གནས་ཡེ་ཤེས་གསང་བ་མཆོགཿ རྡོ་རྗེ་གསུམ་གྱིས་བྱིན་རློབས་ལཿ མཆོག་དང་ཐུན་མོང་དངོས་གྲུབ་ཀུནཿ ད་ལྟ་ཉིད་དུ་ཐོབ་པར་སྩོལཿ ཞེས་གསུངས་ཏེ། སྐུ་གསུང་ཐུགས་ཀྱི་དཀྱིལ་འཁོར་ནས། ཞེས་གསུངས་ན། སྐུ་རྡོ་རྗེ། གསུང་རྡོ་རྗེ། ཐུགས་རྡོ་རྗེ་གསུམ་སྟེ། གསང་བ་གསུམ་གྱི་དཀྱིལ་འཁོར་ནས་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པ་དང་། མི་གནས་ཡེ་ཤེས་གསང་བ་མཆོག ཅེས་གསུངས་ན། ཟག་མེད་བདེ་བ་ཆེན་པོའི་རང་བཞིན། སྲིད་ཞི་གཉིས་ཀྱི་མཐར་མ་ལྷུང་ཞིང་། མི་གནས་ཀྱི་ཡེ་ཤེས་གསང་བ་བྱང་ཆུབ་ཀྱི་སེམས་གང་ཐོབ་པར་བྱ་བའི་དངོས་གྲུབ་མཆོག རྡོ་རྗེ་གསུམ་གྱིས་བྱིན་རློབས་ལ། ཞེས་གསུངས་ན། བདག་གི་གནས་བཞིར་ཐིམ་པས་མཆོག་དང་ཐུན་མོང་གི་དངོས་གྲུབ་ཀུན་ད་ལྟ་ཉིད་དུ་སྟན་ཐོག་འདི་ནས་ཐོབ་པ་སྟེ། ད་ལྟ་ཉིད་དུ་ཐོབ་པར་སྩོལ། ཞེས་བསྒྲུབ་བྱ་དང་སྒྲུབ་བྱེད་དབྱེར་མེད་པའི་དངོས་གྲུབ་ཐོབ་པར་མཛད་དུ་གསོལ་ཞེས་གསུངས། ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿ ཀཱ་ཡ་ཝཱཀྐ་ཙིཏྟ་ཨ་ལ་ལ་སིདྡྷི་ཕ་ལ་ཧཱུྃཿ ཞེས་གསུངས་ན། ཨོཾ་ཨཱཿཧཱུྃ་ནི་རྒྱལ་བའི་སྐུ་གསུང་ཐུགས་ཀྱི་བྱིན་རླབས། བཛྲ་གུ་རུ་པདྨ་ཐོད་ཕྲེང་རྩལ་ནི་རྡོ་རྗེའི་བླ་མ་པདྨ་ཐོད་ཕྲེང་རྩལ། བཛྲ་ས་མ་ཡ་ཛཿནི་རྡོ་རྗེའི་དམ་ཚིག་པ་དང་གཉིས་མེད་དུ་གྱུར་པ། ཀཱ་ཡ་ནི་ལུས་སྤྲུལ་སྐུ། ཝཱཀྐ་ནི་ངག་ལོངས་སྐུ། ཙིཏྟ་ནི་སེམས་ཆོས་སྐུ ཨ་ལ་ལ་ནི་ངོ་མཚར་བའི་ཚིག སིདྡྷི་ནི་དངོས་གྲུབ། ཕ་ལ་ནི་བཟང་པོ། ཧཱུྃཿནི་བདག་ལ་རྩོལ་ཅིག་ཅེས་སྔགས་དོན་དེ་ལྟར་ཡིན་པ་རེད། དེ་ཡང་དངོས་གྲུབ་བསྐུལ་བའི་ཚིག་དང་སྔགས་འཕྲོའི་འཕྲོར་འབྱུང་བ་འདི། ཚིག་གིས་དངོས་གྲུབ་བསྐུལ་བ་ཙམ་དང་། སྔགས་ཀྱིས་གནད་ལ་ཕབས་པ་ཡིན་ཞེས་གསུངས་པ་རེད། གཞན་ཡང་། དོན་རྣམ་གསལ་འདེབས་བརྗོད་པ་ཚིག་གི་སྒོ། །ཐུགས་དམ་གནད་བསྐུལ་གསང་བ་སྔགས་ཀྱི་སྒོ། །དམིགས་པ་རྩེ་གཅིག་ཏིང་འཛིན་ཡིད་ཀྱི་སྒོ། །མཚོན་པ་བརྡར་རྟགས་ཕྱག་རྒྱ་སྔགས་ཀྱི་སྒོ། ཞེས་གསུངས་པ་ལྟར། གསང་སྔགས་ལུང་གི་སྒོ་བཞིའི་ནང་གི་ཚིག སྔགས། ཏིང་འཛིན་གསུམ་གྱིས་བསྐུལ་བ་དང་ཕྱག་རྒྱའི་སྟབས་ཀྱིས་བསྡུ་བ་ཡིན་པས་ན་གོང་གི་ཚིག་དང་སྔགས་གཉིས་ལ་ཟློས་སྐྱོན་ཡོད་པ་མ་རེད། སྐབས་འདི་ལྟ་བུ་དང་བསྟུན་ནས། ཨ་ནུའི་བདེ་ཆེན་བྱང་ཆུབ་མཆོག་གི་དཀྱིལ་འཁོར་ལ་མངའ་བརྙེས་ན། རྫུ་འཕྲུལ་གྱིས་ནམ་མཁར་འགྲོ་ནུས་པ་དང་། སེམས་གསལ་སྟོང་ཡེ་ཤེས་ཀྱི་ངོ་བོར་གྱུར་བའི་སྟོབས་ཀྱིས་མངོན་ཤེས་ཀྱིས་ཆོས་ཐམས་ཅད་མངོན་སུམ་དུ་རྟོགས་པ། ལས་རླུང་དག་པའི་རྐྱེན་གྱིས་ཚེ་ཉི་ཟླ་དང་མཉམ་པའི་རྡོ་རྗེའི་སྐུ་བརྙེས་ཏེ། རང་གཞན་གྱི་དོན་སྒྲུབ་པའི་ས་དང་ལམ་གྱི་མངོན་རྟོགས་བརྙེས་རྒྱུ་ཡོད་པ་རེད། གཞན་ཡང་གནས་སྐབས་ཙམ་དུའང་རལ་གྲི་དང་། མིག་སྨན། རིལ་བུ། རྐང་མགྱོགས་ལ་སོགས་པ་ཐུན་མོང་གི་གྲུབ་པ་ཐོབ་རྒྱུ་ཡོད་པ་ཡིན། དེ་ཡང་ད་ལྟ་ཉིད་ནས་ཀུན་ཏུ་བཟང་པོའི་ས་མཆོག་ཐོབ་སྟེ་སྐུ་དང་ཡེ་ཤེས་འདུ་འབྲལ་མེད་པར་འགྲོ་དོན་བྱེད་རྒྱུ་ཅུང་དཀའ་བ་ཡིན་ཡང་། དད་དང་དག་སྣང་རྣམ་པར་དག དབང་ཐོབ་དམ་ཚིག་ལ་གནས་ནས་བསྙེན་སྒྲུབ་ཚུལ་བཞིན་དུ་བགྱིས་ན། མོས་པས་སློབ་པའི་ལམ་འདི་བརྒྱུད་དེ་ངེས་རྫོགས་ཀྱི་ཐོག་ནས་དུས་མི་རིང་བར་དངོས་གྲུབ་ཐོབ་རྒྱུའི་ཡིད་ཆེས་མཛད་ཆོག་པ་རེད། དེ་ལྟར་སྐབས་འདི་དང་བསྟུན་ཏེ་དབུ་ནས་ས་བཅད་བཞག་པའི། རྒྱུ་མ་ནོར་བ་བསྐྱེད་རིམ་ལ་འཇུག་པའི་གཞི་དང་། རྐྱེན་མ་འཁྲུལ་བ་ཇི་ལྟར་བསྒོམ་པའི་ལམ་གཉིས་ཆེ་ལོང་ཙམ་གྱིས་བཤད་པར་བྱས་ནས། གསུམ་པ་འབྲས་བུ་རྣམ་པར་དག་པ་ཟུང་འཇུག་གི་སྦྱོར་ཚུལ་འདི་དང་སྦྲགས་ཏེ་མཚོན་བྱེད་ཙམ་ཞིག་ཞུས་ན། དེ་ཡང་འདིའི་ནང་གི་གབ་པ་བཞི་བ་དེ་གང་ཡིན་པ་རེད་ཅེ་ན། ཐ་མལ་ལུས་ལ་ཡེ་ཤེས་གབ། ཅེསགསུངས་པས། དེས་ཅི་བསྟན་པ་རེད་ཅེ་ན། འབྲས་བུ་རིག་འཛིན་རྣམ་བཞིའི་ས་རང་རྒྱུད་ནས་ཇི་ལྟར་བརྙེས་པ་བསྟན་པ་ཡིན། འདི་གཡོ་ཐོབ་གོམས་བརྟན་མཐར་ཕྱིན་པའི་ཉམས་ལྔ་ཚོགས་སྦྱོར་མཐོང་སྒོམ་མི་སློབ་ལམ་ལྔ་དང་སྦྱར་ནས། ས་བཅུ་དོན་གྱིས་བགྲོད་པ་རིག་འཛིན་རྣམ་པ་བཞིའི་སྒྲོམ་ནས་བཤད་དགོས་པ་རེད། དེས་ན་སྐྱེ་འཆི་ལ་རང་དབང་མ་ཐོབ་པ་རྣམ་པར་སྨིན་པའི་རིག་འཛིན་གྱི་སྐབས་སུ་བཞག་ན། ཚོགས་སྦྱོར་གཉིས་ལ་བསྐྱེད་རྫོགས་ཀྱི་ལམ་ནས་གོམས་པ་བསྐྱེད་དེ་བར་དོའི་གནས་སྐབས་སུ་ཕྱག་རྒྱ་ཆེན་པོའི་དངོས་གྲུབ་ཐོབ་པ་རྣམ་སྨིན་རིག་འཛིན་དང་། ཆོས་མཆོག་ཆེན་པོ་མཐར་ཕྱིན་མཐོང་ལམ་བསྒོམས་ཏེ་སྐྱེ་འཆི་ལ་རང་དབང་ཐོབ་པ་སྐྱེ་ཤིའི་མིང་ཡང་མེད་པ་ཚེ་དབང་རིག་འཛིན། ས་གཉིས་པ་ནས་བཅུ་བའི་བར་གྱི་སྒོམ་ལམ་ཕྱག་རྒྱ་ཆེན་པོའི་རིག་འཛིན་གྱི་དུས་སྟེ། རྟེན་དེས་ལུས་དཀྱིལ་ཉམས་སུ་བླངས་ནས་དྲི་མ་ཕྲ་མོ་སྦྱངས་ན། མཐར་ཕྱིན་ལྷུན་གྲུབ་རིག་འཛིན་སངས་རྒྱས་ཀྱི་ས་ཁོ་ནར་གནས་པ་བཅས་རང་ལུགས་ཀློང་ཆེན་བརྒྱུད་པའི་བཞེད་པ་དེ་འདྲ་ཡིན་པ་རེད། དེའི་སྐབས་སུ་སྐུ་ལྔ་ཡང་རྫོགས་པར་ཐོབ་པ་ཡིན་དགོས། དེ་ཡང་འབྲས་བུའི་ས་དང་སྐུ་དང་ཡེ་ཤེས་དག རྣམ་པའི་ཆ་ནས་དབྱེ་བ་ཙམ་ཡིན་པ་སྟེ། ཡོན་ཏན་གྱི་གཏེར་དུ་གྱུར་བས་ན་ས་ཞེས་གསུངས་ཤིང་། སངས་རྒྱས་ཀྱི་ལུས་སུ་གྱུར་པས་ན་སྐུ་ཞེས་དང་། རང་བྱུང་གི་རིག་པར་གནས་པས་ཡེ་ཤེས། འགྲོ་བའི་དོན་མཛད་པས་ན་འཕྲིན་ལས་ཞེས་གསུངས་པ་དག མིང་སོ་སོར་བཏགས་པ་ཙམ་ལས་དོན་ངོ་བོ་གཅིག་ཡིན། དཔེར་ན། རྒྱུ་རྐྱེན་ལས་སྐྱེས་པས་དངོས་པོ། འཇིག་པའི་ཕྱིར་ན་མི་རྟག་པ། ཆུ་སྐྱོར་བའི་ནུས་པ་དང་ལྡན་པས་ན་བུམ་པ་ཞེས་བཏགས་པ་ཙམ་ལས་ངོ་བོ་གཅིག་པ་ཡིན་པ་ལྟ་བུ་རེད། ཐོག་མར་རྒྱུད་གསུམ་གྱི་ས་བཅད་བཞག་པའི་ནང་ནས་གང་དུ་མཐར་ཕྱིན་པའི་འབྲས་བུའི་རྒྱུད་དེ་སྐབས་འདིར་བསྟན་ལ་བདེ་ཆེན་བྱང་ཆུབ་མཆོག་གི་དཀྱིལ་འཁོར་མངའ་བརྙེས། རང་བྱུང་གི་ཡེ་ཤེས་ཉག་གཅིག་གི་ངོ་བོར་གྱུར་བ་རྡོ་རྗེ་ལྟ་བུའི་སྐུ། བདེ་བ་ཆེན་པོ་ཉག་གཅིག་གི་རང་བཞིན། ཡོན་ཏན་བསམ་གྱིས་མི་ཁྱབ་པའི་མངའ་བདག སྐུ་གསུང་ཐུགས་ཡོན་ཏན་འཕྲིན་ལས་ལྔའི་འབྲས་ཆོས་ཉེར་ལྔའི་རང་བཞིན་ཅན། དེ་ཡང་ཚུར་བསྡུས་ན། རྟེན་སྐུ། བརྟེན་པ་ཡེ་ཤེས། མཛད་པ་འཕྲིན་ལས་གསུམ་གྱི་བདག་ཉིད་ཅན། ཕར་ཕྱེས་ན། ཆོས་ཀྱི་དབྱིངས་ཀུན་ནས་འགེང་བའི་ཤེས་བྱའི་རྣམ་པ་ཐམས་ཅད་ལ་ཁྱབ་ཡོད་པ། ཡོན་ཏན་གྱི་ཁྱད་པར་ཚད་དཔག་ཏུ་མེད་པ་དེ་འདྲ་ཞིག་ཡིན་པ་རེད། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་གྲོལ་བར་དུ་འཇིག་རྟེན་འབྱོར་སླད་རྟག ཅེས་གསུངས་པ་ལྟར། མཐའ་ཡས་པའི་སེམས་ཅན་ཐམས་ཅད་ལ་ཕན་དང་བདེ་བའི་མཛད་པ་ནམ་མཁའ་ཇི་སྲིད་འཁོར་བ་མ་ཞིག་གི་བར་དུ་རྟག་ཁྱབ་ལྷུན་གྲུབ་ཀྱིས་འཇུག་པ་རེད། འདི་ལ་འབྲས་བུའི་རྒྱུད་གསུངས་པའི་རྒྱུ་མཚན་ནི། དོན་དུ་གཉེར་བྱ་མཐར་ཐུག་ཡིན་པ་དང་། སྣང་ཚུལ་ལ་གློ་བུར་བའི་དྲི་མ་བསལ་སྟོབས་ཀྱིས་མངོན་དུ་འགྱུར་པ་ཡིན་པས་ན་འབྲས་བུ་དང་། ནམ་ཡང་རྒྱུན་མི་ཆད་པས་ན་རྒྱུད་ཅེས་གསུངས། འབྲས་བུ་ཟུང་འཇུག་གི་གོ་འཕང་ཐོབ་ཚུལ་གྱི་རྣམ་གཞག་ལ་སྔགས་ཀྱི་ཁྱད་ཆོས་ཅི་ཡོད་སྙམ་ན། འདི་ལ་བཞེད་པ་མི་འདྲ་བ་གསུམ་ཡོད་ཅིང་། དེ་དག་གང་རེད་ཅེ་ན། སྤྱིར་མདོ་སྔགས་གཉིས་ཀ་ལམ་གྱི་ཉེ་རིང་ཙམ་ཞིག་མ་གཏོགས་འབྲས་བུ་སངས་རྒྱས་ཀྱི་གོ་འཕང་འཐོབ་པར་ཁྱད་པར་མེད་པའི་བཞེད་པ་ཞིག་དང་། གསང་སྔགས་རྡོ་རྗེའི་ཐེག་པའི་ལམ་ལ་མ་བསྟེན་པར་མཐར་ཐུག་རྫོགས་པའི་བྱང་ཆུབ་ཀྱི་གོ་འཕང་མངོན་དུ་བྱེད་མི་ནུས་པར་འདོད་པ་ཞིག ཡང་མདོ་ལམ་ནས་རང་ལམ་གྱི་ས་བཅུ་གཅིག་པ་ཀུན་ཏུ་འོད་ཀྱི་སའི་བར་འགྲོ་ནུས་པ་ཡིན་ཡང་མདོ་ལམ་གྱི་སངས་རྒྱས་བཏགས་པ་བ་དེས་སྔགས་ཀྱི་སྐབས་སུ་བསྟན་པའི་སྐུ་དང་ཡེ་ཤེས་རྒྱ་མཚོའི་བདག་ཉིད་ཟུང་འཇུག་རྡོ་རྗེ་འཆང་གི་གོ་འཕང་མཚན་ཉིད་པ་དེའི་དོད་ཐུབ་ཡོང་བ་མིན་པས། མདོ་སྔགས་ཀྱི་སངས་རྒྱས་ལ་ཁྱད་པར་ཕྱེ་དགོས་གསུངས་པའི་ལུགས་ཤིག་སྟེ་ལུགས་གསུམ་ཡོད་པ་རེད། དེས་ན་གསང་སྔགས་ཀྱི་ལམ་ལ་མ་བསྟེན་པར་རྫོགས་པའི་བྱང་ཆུབ་མངོན་དུ་བྱེད་མི་ནུས་པའི་བཞེད་ཚུལ་དང་། མདོ་ལམ་གྱི་སངས་རྒྱས་བཏགས་པ་བ་དེས་སྔགས་ཀྱི་ཟུང་འཇུག་རྡོ་རྗེ་འཆང་གི་གོ་འཕང་མཚན་ཉིད་པའི་དོད་ཐུབ་མི་ཡོང་གསུངས་པའི་བཞེད་ཚུལ་རྗེས་མ་གཉིས་དེ་ལ་ཞིབ་ཀྱིས་བརྟགས་ན་སྒྲ་ཡངས་དོག་གི་ཁྱད་པར་ཙམ་མ་གཏོགས་དགོངས་པའི་ཞེ་ཕུག་གི་གནད་གཅིག་ལ་བབས་པ་རེད། དེས་ན་འདི་རྣམས་ཀྱི་དགོངས་པ་འགལ་མེད་དུ་ཇི་ལྟར་ལེན་དགོས་པ་རེད་ཅེ་ན། སྔོན་མའི་བཞེད་པ་ལྟར་གྱི་མདོ་ལམ་ནས་མི་སློབ་པའི་ལམ་སྟེ། བཅུ་གཅིག་ཀུན་ཏུ་འོད་སངས་རྒྱས་ཀྱི་གོ་འཕང་མཐར་ཐུག་གི་བསྒྲུབ་བྱར་བསྟན་པ་དེ་སུས་ཀྱང་ཁས་ལེན་དགོས་པ་རེད། དེ་ཉིད་ཁས་མ་བླངས་ཚེ་མཚན་ཉིད་ཐེག་པ་ལ་སྐུར་བ་བཏབ་པ་རེད། མདོ་རང་ལམ་ནས་བཤད་པའི་ལམ་དེར་འབྲས་བུ་ཐོབ་པ་མེད་ན་ལམ་དང་འབྲས་བུ་ཡ་བྲལ་དུ་སོང་སྟེ་མུ་སྟེགས་པའི་ཐར་ལམ་ལྟ་བུར་གྱུར་སོང་བ་རེད། སངས་རྒྱས་ཀྱི་བཀའ་ལ་ལོག་ལྟ་བྱས་པར་འགྱུར་བས། དེ་ལས་ཆེ་བའི་སྐུར་འདེབས་ཤིག་མེད་པ་རེད། དེས་ན་སྔ་མའི་མདོ་ལམ་གྱི་དགོངས་པ་དོན་ལ་གནས་པ་ཡིན་པ་རེད། འོ་ན་བཞེད་པ་ཕྱི་མ་གཉིས་ཀྱིས་སྐུར་བ་བཏབ་པར་འགྱུར་རམ་ཞེ་ན། དེ་ལྟར་མ་ཡིན། འོ་ན་མདོ་ལ་སངས་རྒྱས་གཅིག་དང་སྔགས་ལའང་སངས་རྒྱས་གཅིག་ཡོད་པ་ཨེ་རེད་ཅེ་ན། དེ་ལྟར་ཡང་མ་ཡིན། མཐར་ཐུག་ཐེག་པ་གཅིག་ཏུ་བསྒྲུབ་དགོས་ཤིང་། མཐར་ཐུག་ཐེག་པ་གཅིག་ཏུ་གྲུབ་པ་མ་ཟད་མདོ་ལམ་གྱི་གབ་པ་སྔགས་ནས་ཕྱུང་བའི་ཁྱད་ཆོས་དང་ཁྱད་གཞིར་དཔགས་ན་ཁྱད་འབྲས་རང་བཞིན་གྱིས་གསལ་བས། མདོ་ལམ་གྱི་སངས་རྒྱས་དེ་ཉིད་རང་ལམ་གྱི་མཐར་ཐུག་པ་ཡིན་ཡང་། དེ་ཉིད་སྔགས་ལམ་དུ་ཞུགས་པའམ་སྔགས་ཀྱི་དགོངས་པ་དང་འབྲེལ་བའི་དབང་དོན་གྱི་ཡེ་ཤེས་ཁྱད་པར་ཅན་བརྙེས་པ་བརྒྱུད་དེ་རྡོ་རྗེ་ལྟ་བུའི་ཏིང་འཛིན་གྱིས་སྒྲིབ་གཉིས་བག་ཆགས་དང་བཅས་པ་བཅོམ་ནས་མཐར་ལམ་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པའི་གོ་བ་ལེན་དགོས་པ་རེད། དེས་ན་བཞེད་པ་ཕྱི་མ་དེ་གཉིས་སྔོན་བྱོན་མཁས་གྲུབ་མང་པོའི་བཞེད་པ་ཡིན་པར་མ་ཟད། མདོ་སྔགས་ཀྱི་སངས་རྒྱས་ལ་ཁྱད་པར་ཡོད་པར་བཤད་ཆོག་པའང་ཚད་མའི་ལུང་གིས་མ་གྲུབ་པ་ཞིག་མིན་པ་རེད། དངོས་གྲུབ་ལེན་པ་འདིའི་མཚམས་སུ་སྐུ་དྲིན་གསོ་བའི་གཏང་རག་གི་མཆོད་པ་དང་བསྟོད་པ་དགོས། བཅུ་གཉིས་ནོངས་པ་བཤགས་པ། བཅུ་གཉིས་ནོངས་པ་བཤགས་པ་ནིཿ ཞེས་གསུངས་ཏེ། ནོངས་པ་ནི་འགལ་ཉེས་ཤོར་བ་ལ་གསུངས། ནོངས་བཤགས་ནི་ཆོ་ག་ལྷག་ཆད། ཏིང་འཛིན་མ་གསལ། སྒྲུབ་རྫས་མ་ཚང་བ་ལ་སོགས་པའི་ཉེས་པ་བཤགས་བྱེད་ཅིག་རེད། རྫོགས་པ་ཆེན་པོའི་ལུགས་སུ་རུ་བཞིའི་བཤགས་པ་གསུངས་པའང་ཡོད། རུ་བཞིའི་བཤགས་པ་ཞེས་པ་འདི་ལ་ངོས་འཛིན་ཚུལ་ཅུང་ཟད་འདྲ་མིན་ཡོད་ཀྱང་། གཙོ་ཆེ་བའི་དབང་དུ་བྱས་ན་ལུས་ཀྱི་ཕྱག ངག་གི་ཡིག་བརྒྱ། ཡིད་ཀྱི་ཀློང་བཤགས། སྒོ་གསུམ་ཐ་མི་དད་པའི་དམ་ཚིག་ཉམས་ཆགས་གསོ་བའི་ཆེད་དུ་རྫོགས་པ་ཆེན་པོའི་ལྟ་བའི་ངང་སྐྱོང་བ་དེ་བཞི་ལ་རུ་བཞིའི་བཤགས་པ་ཞེས་གསུངས་པ་རེད། གཞན་རུ་ཟུང་བཞི་ཞེས་གསུངས་པའི་སྐབས་ཀྱང་ཡོད་པ་རེད། དེའི་སྐབས་སུ་བཤགས་པ་རུ་བཞི་དང་། དེའི་ཁ་བསྐང་དུ་སྨན་གཏོར་རཀྟ་མར་མེའི་བསྐང་བ་དང་བཅས་བཞི་བསྣན་ནས་རུ་ཟུང་བཞིར་བགྲང་། དེ་ཉིད་ཡ་རུ་རྩིས་ན་ཡ་བརྒྱད་དུ་འགྱུར། དེ་ཚོ་ཟུར་འཕྲོས་ཙམ་ཞོར་དུ་ཞུས་པ་ཡིན། ཧཱུྃཿ རིག་འཛིན་འདུས་པའི་དཀྱིལ་འཁོར་དུཿ མཆོད་རྫས་མ་ཚང་སྒྲུབ་པ་གཡེལཿ ཏིང་འཛིན་བྱིང་རྨུགས་འཐིབས་ལ་སོགསཿ འགལ་འཁྲུལ་ནོངས་པ་བཟོད་པར་གསོལཿ ཞེས་གསུངས་ཏེ། དེ་ཡང་རིག་འཛིན་འདུས་པའི་དཀྱིལ་འཁོར་ལ་ཞུགས་ཏེ། སྔོན་འགྲོ་སྦྱོར་བའི་སྐབས་སུ་ཕྱི་ནང་གསང་བའི་མཆོད་རྫས་མ་ཚང་། དངོས་གཞིའི་སྒྲུབ་པའི་དུས་སུ་བསྙེན་སྒྲུབ་ཡན་ལག་བཞི་གཞུང་བཞིན་དུ་མ་བསྲངས་པས་སྒྲུབ་པ་གཡེལ་བ། ཏིང་འཛིན་བསྒོམ་པའི་སྐབས་སུ་བྱིང་རྨུགས་འཐིབ་གསུམ་ལ་སོགས་པའི་དབང་དུ་སོང་བ་སྟེ། དེ་ཡང་བྱིང་བ་ནི་རིག་པའི་གསལ་ངར་གྱི་ཆ་ལྷོད་པ་དང་། རྒོད་པ་ནི་འདོད་པའི་ཕྱོགས་སུ་གཏོགས་པའི་འཕྲོ་བའི་ཆ། རྨུགས་པ་ནི་སེམས་ལ་མུན་པས་བཏུམས་ཏེ་འཐིབས་པའི་རྣམ་པ་ཅན་ནམ། མ་དང་བའི་ཆ་དེ་ཡིན་པ་རེད། དེ་ལྟ་བུའི་བྱིང་རྨུགས་འཐིབས་པའི་ཕྱོགས་སུ་མི་ཤོར་བར་བྱས་ཏེ་ཞི་ལྷག་ཟུང་འབྲེལ་གྱི་ཏིང་འཛིན་གསལ་འདེབས་དགོས་པ་རེད། རིག་པ་སྡུག་པའི་དགེ་སྦྱོར་ཡུན་རིང་ལས། །རིག་པ་དང་བའི་དགེ་སྦྱོར་ཞག་གཅིག་དགའ། ཞེས་གསུངས། བཟླས་བརྗོད་ལའང་། གཞན་དུ་གཡེང་བའི་སེམས་ཀྱིས་ནི། །བསྐལ་བར་བཟླས་ཀྱང་འབྲས་མི་འབྱིན། ཞེས་གསུངས་པ་ལྟར་རེད། སེམས་ཏིང་ངེ་འཛིན་ལ་རྩེ་གཅིག་གཏད་དགོས་པ་ལས། ཡ་ངེ་ཡེངས་ངེ་བྱས་ཏེ་ཁ་ཡིས་བཏོན་པས་ཕན་ཐོགས་ཆེན་པོ་ཡོད་པ་མ་རེད་ཅེས་གསུངས། དེ་ལྟ་བུའི་བྱིང་རྨུགས་འཐིབས་གསུམ་གྱི་དབང་དུ་ཤོར་བ་ལ་སོགས་པའི་འགལ་ཉེས་ནོར་འཁྲུལ་གྱི་དབང་དུ་སོང་བའི་ནོངས་པའམ་ཉེས་པ་དང་སྒྲིབ་པ་ཅི་མཆིས་པ་ཐམས་ཅད་ཡུན་དུ་མི་འཇོག་པར་སྟོབས་བཞི་ཚང་བའི་སྒོ་ནས་དུས་ད་ལྟ་ཉིད་དུ་བཤགས་པ་བྱེད་པ་ཡིན་པས། བཟོད་ཅིང་ཚངས་པར་བསྩལ་དུ་གསོལ། བཛྲ་ས་ཏྭ་སོགས་བརྗོདཿ ཅེས་ཡི་གེ་བརྒྱ་བས་བཤགས། བཅུ་གསུམ་རྫོགས་རིམ་བསྡུ་བ། བཅུ་གསུམ་རྫོགས་རིམ་བསྡུ་བ་ནིཿ ཞེས་གསུངས་ཏེ། དེ་ཡང་ཀུན་མཁྱེན་འཇིགས་གླིང་གིས། བསྐྱེད་རིམ་གྱིས་ནི་སྣང་བའི་བདེན་ཞེན་འགོག །རྫོགས་རིམ་གྱིས་ནི་སྒྱུ་མའི་བདེན་ཞེན་སྤོང་། །བདེ་གསལ་མི་རྟོག་ལྷན་སྐྱེས་ཡེ་ཤེས་འཆར། ཞེས་གསུངས་པ་ལྟར། བསྐྱེད་རིམ་གྱི་སྐབས་སུ་བཞིན་ལག་གི་རྣམ་པར་ཤར་བའི་བསྐྱེད་རིམ་དང་། སྣང་བཅས་མཚན་མ་དང་བཅས་པའི་རྫོགས་རིམ་དམིགས་པ་ཅན་ཐམས་ཅད་མཐར་བསམ་གྱིས་མི་ཁྱབ་པའི་རྫོགས་རིམ་དུ་བསྡུ་དགོས་པ་རེད། དཔེར་ན་བསྐྱེད་རིམ་གྱི་སྐབས་སུ་ལྷ་དང་གཞལ་ཡས་ཁང་དུ་ཤར་བའི་སྣོད་བཅུད་འོད་དུ་ཞུ་ནས་སྙིང་ཁའི་ས་བོན་ལ་བསྟིམ། དེ་ཡང་ན་དཱ་ལ་བསྡུ་བའི་ཚུལ་ལྟར། རྫོགས་རིམ་གྱི་ལྷན་སྐྱེས་བདེ་བ་ཆེན་པོའི་ལྷ་སྐུ་དེ་ཡང་དམིགས་པ་དང་བཅས་པ་ཡིན་པས། ནམ་མཁའི་ཁམས་སུ་འཇའ་ཚོན་སྟོངས་པ་བཞིན་དུ་བསམ་གྱིས་མི་ཁྱབ་པའི་ངང་དུ་འཇོག་པ་རྫོགས་རིམ་ཐམས་ཅད་ཀྱི་རྒྱལ་པོ་ཡིན་པ་རེད། ཧོཿ ཆུ་ལས་ཆུ་བུར་རྡོལ་བ་བཞིནཿ རང་ལས་སྤྲུལ་པའི་དཀྱིལ་འཁོར་ལྷཿ ཡེ་ཤེས་དབྱིངས་སུ་བཛྲ་མུཿ རྗེས་ཐོབ་སྒྱུ་མའི་ལྷ་སྐུར་ལྡངཿ ཞེས་གསུངས་ཏེ། ཆུ་ལས་ཆུ་བུར་རྡོལ་བ་བཞིན་དུ་རང་ལས་སྤྲུལ་པའི་དཀྱིལ་འཁོར་གྱི་ལྷ་ཚོགས་ཐམས་ཅད། དེ་ཡང་ཏིང་འཛིན་རྣམ་གསུམ་དང་བསྟུན་ན། བསྐྱེད་གཞི་དེ་བཞིན་ཉིད་ཀྱི་ཏིང་ངེ་འཛིན་སྤྲོས་མཐའ་བཞིའམ་བརྒྱད་དང་བྲལ་བའི་སྤྲོས་བྲལ་གྱི་གནས་ལུགས། མ་བཅོས་རྫོགས་པ་ཆེན་པོའི་ཡེ་ཤེས་ཀྱི་དབྱིངས་སུ། བཛྲ་མུཿཞེས་རྟག་མཐའ་གཞིགས་པའི་ཆེད་དུ་རྫོགས་རིམ་དུ་བསྡུས་ནས། ཆད་མཐའ་བསལ་བའི་ཆེད་དུ་རྗེས་ཐོབ་སྟོང་གཟུགས་སྒྱུ་མའི་ལྷ་སྐུར་ལྡང་སྟེ། སྣང་གྲག་རིག་གསུམ་ལྷ་སྔགས་ཆོས་སྐུའི་ངང་དུ་འབྱམས་ཀླས་བཞིན་དུ། བཅུ་བཞི་བསྔོ་སྨོན་མཚམས་སྦྱོར། བཅུ་བཞི་བསྔོ་སྨོན་མཚམས་སྦྱོར་ནིཿ ཞེས་གསུངས་ན། བསྔོ་བ་དང་སྨོན་ལམ་གཉིས་ཀའི་ཁྱད་པར་རྒྱུན་དུ་ཞུས་མྱོང་མོད། བསྔོ་བ་ལ་གང་བསྔོ་བར་བྱ་བའི་ཁྱད་པར་གྱི་ཆོས་དེ་ཉིད་གཞིར་བཟུང་སྟེ། དེའི་སྟོབས་ཀྱིས་འདི་དང་འདི་ལྟ་བུར་གྱུར་ཅིག་ཅེས་སྨོན་པ་ཞིག་རེད། བུ་སྟོན་གྱིས། རྒྱུ་སྔོན་དུ་བྱས་ནས་འབྲས་བུ་ལ་སྨོན་པ་དེ་བསྔོ་བ་ཡིན། རྒྱུ་སྔོན་དུ་བྱས་མིན་ལ་མ་ལྟོས་པར་འབྲས་བུ་ལ་སྨོན་པ་དེ་སྨོན་ལམ་ཡིན། ཞེས་གསུངས་པ་རེད། བསྔོ་བ་ཡིན་ཚད་སྨོན་ལམ་དང་སྨོན་ལམ་ཡིན་ཚད་བསྔོ་བ་ཡིན་པས་མ་ཁྱབ་ཀྱང་གསུངས་པ་རེད། རྒྱལ་བ་ཀློང་ཆེན་པས་ཀྱང་རྒྱུ་དགེ་བ་སྔོན་སོང་ཡོད་མེད་ཀྱིས་བསྔོ་བ་དང་སྨོན་ལམ་གྱི་ཁྱད་པར་དབྱེ་མཛད་པ་རེད། ཧོཿ དུས་གསུམ་བསགས་པའི་དགེ་རྩ་ཀུནཿ རྣམ་མཁྱེན་གདོད་མའི་རྒྱུ་རུ་བསྔོཿ བདག་སོགས་འདུས་པར་བཅས་པ་རྣམསཿ ཚོམ་བུ་གཅིག་ཏུ་སངས་རྒྱས་ཤོགཿ ཅེས་གསུངས་ཏེ། ཚིག་རྐང་སྔ་མ་གཉིས་ཀྱིས་བསྔོ་བ་དང་། ཕྱི་མ་གཉིས་ཀྱིས་སྨོན་ལམ་བསྟན་པ་རེད། རང་གཞན་སྒོ་གསུམ་གྱིས་དགེ་རྩ་བསགས་པ་དེ་དག་གང་ལ་བསྔོ་དགོས་པ་རེད་ཅེ་ན། བཅོམ་ལྡན་འདས་ཀྱིས་ཡུམ་བར་མ་ལས་འདི་ལྟར་གསུངས། རབ་འབྱོར་དགེ་བའི་རྩ་བ་འདི་ནི་སངས་རྒྱས་ཀྱི་ས་ཁོ་ནར་བསྔོ་བར་བྱའོ། ཉན་ཐོས་དང་རང་སངས་རྒྱས་དང་། དེ་བཞིན་དུ་འདི་གཞན་གྱི་སར་བསྔོ་བར་མི་བྱ། ཞེས་གསུངས། འོ་ན་ཇི་ལྟར་བསྔོ་དགོས་པ་རེད་ཅེ་ན། རབ་འབྱོར་ཆོས་ཐམས་ཅད་རྨི་ལམ་ལྟ་བུ། སྒྱུ་མ་ལྟ་བུ། དགེ་བ་ཡང་རྨི་ལམ་ལྟ་བུ་སྒྱུ་མ་ལྟ་བུའི་ཚུལ་གྱིས་ཡོངས་སུ་བསྔོ་བར་བྱ་སྟེ། ཞེས་གསུངས་པ་ལྟར། དགེ་བ་རྨི་ལམ་ལྟ་བུ། གསོག་པ་པོ་རྨི་ལམ་ལྟ་བུ། སྣང་ཚུལ་མ་འགག་པ། དོན་དུ་བདེན་པར་མི་འཛིན་པ་ཞིག་ལ་འཁོར་གསུམ་ཡོངས་དག་གི་བསྔོ་བ་ཞེས་གསུངས་པ་རེད། དུས་གསུམ་བསགས་པའི་དགེ་རྩ་ཀུན། ཅེས་གསུངས་ན། སྒྲུབ་པའི་དཀྱིལ་འཁོར་ཆེན་པོ་འདིར་ཞུགས་པའི་དགེ་རྩས་མཚོན་ཏེ། རང་གཞན་གྱི་དུས་གསུམ་བསགས་དང་ཡོད་པའི་དགེ་རྩ་ཀུན། རྣམ་མཁྱེན་གདོད་མའི་རྒྱུ་རུ་བསྔོ། ཞེས་གསུངས་ན། རྣམ་མཁྱེན་རྫོགས་པའི་སངས་རྒྱས་གཞི་མ་འཁྲུལ་བ་གདོད་མའི་ས། གཞི་འབྲས་དབྱེར་མེད་ཀུན་ཏུ་བཟང་པོའི་གོ་འཕང་དུ་འགྲོ་ཀུན་འགོད་པའི་ཕྱིར་དུ་བསྔོ་བ་ཡིན། དེའི་མཐུས། བདག་སོགས་འདུས་པར་བཅས་པ་རྣམས། ཚོམ་བུ་གཅིག་ཏུ་སངས་རྒྱས་ཤོག ཅེས་གསུངས་ཏེ། བདག་སོགས་འདུས་པར་བཅས་པའི་སྐལ་ལྡན་དཀྱིལ་འཁོར་གཅིག་དང་དབང་གྲལ་གཅིག་ཏུ་འཚོགས་པ་ཐམས་ཅད་ཚོམ་བུ་གཅིག་ཏུ་མངོན་པར་རྫོགས་པར་འཚང་རྒྱ་བར་ཤོག་ཅེས་སྨོན་ལམ་བཏབ་པ་སྟེ། རྒྱལ་པོ་ཨིནྡྲ་བོ་དྷི་འཁོར་ཚོམ་བུ་འབུམ་དང་བཅས་ཏེ་བྱ་ཁྱུ་འུར་རྡོས་དཀྲོགས་པ་བཞིན་དུ་རིག་འཛིན་གྱི་དཀྱིལ་འཁོར་གཅིག་ཏུ་སངས་རྒྱས་སོང་བ་ལྟ་བུར་གསུངས་པ་རེད། དེས་མཚོན་ནས་མཐའ་ཡས་སེམས་ཅན་ཐམས་ཅད་བྱང་ཆེན་ཐོབ་པའི་རྒྱུ་རུ་མོས་པ་ཐེག་ཆེན་སྤྱི་འགྲོས་ལྟར་ཏེ། སྨོན་ལམ་བཏབ་པའི་ཕན་ཡོན་དེ་ཅི་འདྲ་ཞིག་ཡིན་པ་རེད་ཅེ་ན། འཇམ་དཔལ་ཞིང་གི་ཡོན་ཏན་བཀོད་པའི་མདོར། ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་འདྲའི་འབྲས་བུ་སྨིན་པར་འགྱུར། ཞེས་གསུངས་པ་ལྟར་རེད། དེ་ལྟ་བུའི་སྨོན་ལམ་ཇི་བཞིན་འགྲུབ་པར་ནན་གྱིས་བསྐྱར་ནས། ལན་གསུམཿ བརྗོད་པའི་མཐར། བཅོ་ལྔ་བཀྲ་ཤིས་བརྗོད་པ། བཅོ་ལྔ་བཀྲ་ཤིས་བརྗོད་པ་ནིཿ ཞེས་གསུངས། འདིའི་སྐབས་སུ་རིག་འཛིན་བླ་མ་རྒྱལ་བ་རྒྱ་མཚོའི་ཚོགས་དང་བཅས་པ་ནམ་མཁའི་དབྱིངས་ཐམས་ཅད་གང་བར་བྱོན་ནས་ཞལ་ནས་བཀྲ་ཤིས་པའི་བདེན་ཚིག་གི་སྒྲ་དབྱངས་སྙན་མོ་སྒྲོག དེ་དང་ཆབས་ཅིག་ཏུ་ཕྱག་ནས་ཕུན་སུམ་ཚོགས་པའི་ལྷའི་མནྡ་ར་བའི་མེ་ཏོག་གི་ཆར་ཆེན་པོ་གནམ་ས་གང་བར་ཕབས་པས་སྣོད་བཅུད་ཀྱི་བཀྲག་མདངས་ཉམས་པ་ཐམས་ཅད་སྐད་ཅིག་གིས་གསོས་ནས། དགེ་ལེགས་ཡོན་ཏན་གྱི་གཟི་བྱིན་མཆོག་ཏུ་འབར་བར་བསམ་བཞིན་དུ། ཧོཿ རིག་འཛིན་བརྒྱུད་པའི་བྱིན་རླབས་དངཿ དཀོན་མཆོག་གསུམ་གྱི་བདེན་པ་དངཿ གསང་སྔགས་ཟབ་མོའི་རྟེན་འབྲེལ་གྱིསཿ ཞེས་གསུངས་ན། བརྒྱུད་གསུམ་རིག་འཛིན་བླ་མའི་བརྒྱུད་པའི་བྱིན་རླབས་དང་། མཆོག་གསུམ་རྩ་གསུམ་དབྱེར་མི་ཕྱེད་པ་རང་རྒྱུད་དུ་བསྒྲུབ་བྱར་བྱས་པའི་དཀོན་མཆོག་གསུམ་གྱི་བདེན་པ་དང་། གསང་སྔགས་ཟབ་མོའི་ཆོ་ག་བསྙེན་སྒྲུབ་མཐར་ཕྱིན་བགྱིས་པའི་རྟེན་འབྲེལ་བསླུ་བ་མེད་པའི་བདེན་སྟོབས་ཀྱིས། ཞི་རྒྱས་དབང་དྲག་མཆོག་ཐུན་གྱི་ལས་རབ་འབྱམས་དང་བསྟུན་ནས། འཇིགས་བརྒྱད་ཞི་བའི་བཀྲ་ཤིས་ཤོགཿ ཚེ་བསོད་རྒྱས་པའི་བཀྲ་ཤིས་ཤོགཿ སྣང་བ་དབང་འདུས་བཀྲ་ཤིས་ཤོགཿ ལོག་འདྲེན་ཚར་གཅོད་བཀྲ་ཤིས་ཤོགཿ ཅེས་གསུངས་ཏེ། དེ་ཡང་སེང་གེ་གླང་ཆེན་མེ་སྦྲུལ་ཆོམ་རྐུན་དགྲ་ཇག་ལ་སོགས་པ་ཕྱིའི་འཇིགས་པ། འབྱུང་བཞིའི་འདུ་བ་འཁྲུགས་པ་ལ་སོགས་པ་ནང་གི་འཇིགས་པ། རྣམ་རྟོག་རང་ག་མ་དང་ཉོན་མོངས་པའི་དབང་གིས་འཁྲུལ་བར་འཕྱན་པ་གསང་བའི་འཇིགས་པ་སྟེ། འཇིགས་པ་དེ་དག་གིས་གཙོ་བོར་བྱས་པའི་མི་འདོད་མི་མཐུན་པའི་ཕྱོགས་ཐམས་ཅད་ཞི་བའི་ལས་ཀྱིས་ཞི་བར་བྱེད་པའི་བཀྲ་ཤིས་སམ་དགེ་ལེགས་དེང་འདིར་མངོན་དུ་འགྱུར་བར་ཤོག ཚེ་དང་བསོད་ནམས་དབང་ཐང་རླུང་རྟ་ཡོན་ཏན་ཡེ་ཤེས་རྒྱས་པའི་ལས་རྣམས་རྒྱས་པའི་ལས་ཀྱིས་འགྲུབ་པའི་བཀྲ་ཤིས་ཤོག བརྟན་དང་གཡོ་བའི་དྭངས་བཅུད་མི་ཤིགས་གཉུག་མའི་བཅུད་དུ་དྲིལ་ནས་གཞན་སྣང་ཐམས་ཅད་དབང་དུ་འདུས་པའི་དབང་གི་ལས་རྣམས་དབང་གི་ལས་ཀྱིས་འགྲུབ་པའི་བཀྲ་ཤིས་ཤོག ཕྱི་ནང་གསང་བའི་ལོག་འདྲེན་དགྲ་འདྲེ་གདོན་བགེགས་ཐམས་ཅད་ཚར་གཅོད་དྲག་པོའི་ལས་རྣམས་དྲག་པོའི་ལས་ཀྱིས་འགྲུབ་པའི་བཀྲ་ཤིས་ཤོག སྣང་ཞེན་ལྷ་སྐུའི་ཕྱག་རྒྱར་རྫོགསཿ སྒྲ་གྲག་བདེ་ཆེན་སྔགས་སུ་དགཿ དྲན་རྟོག་འོད་གསལ་ཆོས་སྐུར་སྨིནཿ འཇའ་ལུས་ཟང་ཐལ་བཀྲ་ཤིས་ཤོགཿ ཅེས་གསུངས་ན། སྣང་བ་སྐུ། གྲགས་པ་གསུང་། དྲན་རྟོག་ཐུགས་ཀྱི་ངོ་བོར་གྱུར་ཏེ། ཨོ་རྒྱན་ཆེན་པོས། འདི་ལྟར་མིག་གི་ཡུལ་དུ་སྣང་བ་ཡི། །ཕྱི་ནང་སྣོད་བཅུད་དངོས་པོ་ཐམས་ཅད་ཀུན། །སྣང་ཡང་བདག་འཛིན་མེད་པའི་ངང་ལ་ཞོག །གཟུགས་སྣང་དག་པ་གསལ་སྟོང་ལྷ་ཡི་སྐུ། །འདོད་ཆགས་རང་གྲོལ་གྱི་བླ་མ་ལ་གསོལ་བ་འདེབས། །འདི་ལྟར་རྣ་བའི་ཡུལ་དུ་གྲགས་པ་ཡི། །སྙན་དང་མི་སྙན་འཛིན་པའི་སྒྲ་རྣམས་ཀུན། །གྲགས་སྟོང་བསམ་མནོ་བྲལ་བའི་ངང་ལ་ཞོག །གྲགས་སྟོང་སྐྱེ་འགག་མེད་པ་རྒྱལ་བའི་གསུང། །གྲགས་སྟོང་རྒྱལ་བའི་གསུང་ལ་གསོལ་བ་འདེབས། །འདི་ལྟར་ཡིད་ཀྱི་ཡུལ་དུ་འགྱུ་བ་ཡི། །ཉོན་མོངས་དུག་ལྔའི་རྟོག་པ་ཅི་ཤར་ཡང་། །སྔོན་བསུ་རྗེས་དཔྱོད་བློ་ཡིས་བཅོས་མི་ཞུགས། །འགྱུ་བ་རང་སར་བཞག་པས་ཆོས་སྐུར་གྲོལ། །རིག་པ་རང་གྲོལ་གྱི་བླ་མ་ལ་གསོལ་བ་འདེབས། ཞེས་པ་ལྟར། དྲན་རྟོག་འཕྲོ་འདུའི་གཟུང་འཛིན་སེམས་ཀྱི་ཆོ་འཕྲུལ་དུ་ཅི་ཤར་ཐམས་ཅད་འོད་གསལ་ཆོས་སྐུའི་དགོངས་པ། དབྱིངས་དང་ཡེ་ཤེས་གཉིས་སུ་མེད་པར་སྨིན་ནས། ཀ་དག་སྤྲོས་བྲལ་ཁྲེགས་ཆོད་ཀྱི་ལམ་ནས་རང་ལུས་རྡུལ་ཕྲན་དུ་དེངས། ལྷུན་གྲུབ་འོད་གསལ་ཐོད་རྒལ་ལ་གོམས་པས་འཕོ་བ་ཆེན་པོའི་སྐུར་བཞེངས་ནས། འཇའ་ལུས་ཟང་ཐལ་ཆེན་པོ་རྨད་བྱུང་ཆོས་སྐུའི་ངོ་བོར་དག་པ་གཉིས་ལྡན་དུ་བྱང་ཆུབ་སྟེ། གཟུགས་སྐུ་གཉིས་ཀྱིས་ནམ་མཁའ་མ་ཞིག་འཁོར་བ་མ་སྟོངས་ཀྱི་བར་འགྲོ་དོན་རྒྱུན་ཆད་མེད་པ་རྟག་ཁྱབ་ལྷུན་གྲུབ་ཏུ་བྱེད་པའི་བཀྲ་ཤིས་ཤོག་ཅེས་གསུངས་ཏེ་ཤིས་སྨོན་གྱིས་མཐའ་བརྒྱན་ནས། གཏེར་གཞུང་གི་རྩ་བའི་མཇུག་ཏུ། ཨེ་མཿ འདི་ལྟར་ཤིན་ཏུ་ཟབ་པའི་གནདཿ གཏེར་བཅུད་འདུས་པ་དགོངས་པའི་གཏེརཿ ཀློང་གསལ་དབྱིངས་ཀྱི་ཕོ་བྲང་དུཿ བརྡ་ཚིག་རྡོ་རྗེའི་རོལ་མོར་འཁྲོལཿ སྙིང་ལ་རྒྱས་བཏབ་སྦ་སྙམ་ཡངཿ རིག་འཛིན་མཁའ་འགྲོའི་བརྡས་བསྐུལ་ནསཿ ལས་ཅན་རྗེས་འཇུག་དོན་དུ་བཀོདཿ སྙིང་ལ་སྦོས་ཤིག་ས་མ་ཡཿ ཞེས་གསུངས་ཏེ། ས་མ་ཡ་ཞེས་དམ་ཚིག་གི་རྒྱ་ཡིས་མནན་ནས་གསང་བར་གདམས་པ་རེད། དེ་ཡིས་ཆོས་ཚན་འདི་ཉིད་མཇུག་ཡོངས་སུ་རྫོགས་པར་འཆད་ཉན་བཤད་ཁྲིད་ཀྱི་ཚུལ་གྱིས་སྐྱོར་སྦྱང་ཚར་གཅིག་བྱས་གྲུབ་པ་རེད། དགོངས་གཏེར་གྱི་ཆོས་སྡེའི་སྒྲུབ་གཞུང་འདི་དག་མཚན་ཉིད་ཐེག་པའི་གཞུང་བཤད་ཀྱི་དཔེ་ཁྲིད་ལྟར་བཤད་རྒྱ་གནར་རྒྱུ་ཞིག་ཅི་ལ་ཡིན། ཡང་མན་ངག་གི་ལག་ཁྲིད་ལྟར་ཁྲིད་རྐང་སོ་སོའི་དམིགས་ཕྱེས་ནས་ཁྲིད་སྦྱང་བྱེད་རྒྱུའི་ཕྱག་སྲོལ་ངོ་མ་ཞིག་ཀྱང་ཡོད་རབས་མི་འདུག་མོད། དགོངས་འདུས་ཀྱི་ལུང་བསྟན་བཀའ་རྒྱ་མར། ཆོ་ག་དབྱངས་དང་རོལ་མོའི་སྒྲ་ལ་རེ། །མཁས་གྲུབ་ཡི་ཆད་ཉན་བཤད་བསྟན་པ་ནུབ། ཅེས་གསུངས་པ་དང་། དཔལ་སྤྲུལ་རིན་པོ་ཆེས། བསྐྱེད་རྫོགས་གནད་དང་ལྡན་པའི་རྣལ་འབྱོར་ཞིག་མེད་ན། །བོན་གྱེར་སྐད་གསེང་མཐོན་པོས་ཁྱི་ནག་གི་ཟུག་ཟུག །མཆོད་མཆོད་འུར་སྒྲ་ཙམ་གྱིས་ལྷ་ཚོགས་ནི་མི་དགྱེས། །བསྐང་བསྐང་ཁ་གྲངས་བསགས་པའི་བསྐང་གསོ་དེས་ཅི་བྱ། ཞེས་གསུངས་པ་ལྟ་བུ་རེད་ཟེར་བ་མིན་ཡང་། གང་ལྟར་རྒྱུད་སྒྲུབ་ཐབས་དང་འབྲེལ། སྒྲུབ་ཐབས་མན་ངག་དང་འབྲེལ་དགོས་པས་ན། རྒྱུད་ཀྱི་དགོངས་པ་དེ་རྒྱུད་ཀྱིས་འགྲེལ་ནས་བཀྲལ་དགོས་པ་ཡིན་པས། ཆོ་གའི་ཚིག་གི་དོན་འགྲེལ་ནས་དོན་ལ་མ་སྦྱར་ཐབས་མེད་དུ་མཐོང་གི་ཡོད། གང་ལྟར་དུས་འདིར། སྤྱིར་བསྟན་པ་ངོ་མ་ཉམས་དམའ། ཁྱད་པར་དུ་གསང་སྔགས་དོན་གྱི་བསྟན་པ་ཉག་ཕྲ། ཡང་དགོས་རྫོགས་ཆེན་ཀློང་ཆེན་སྙིང་ཐིག་གི་རྩ་བའི་བརྒྱུད་པ། ཆོས་བརྒྱུད་སྡོང་པོ་ངོ་མའི་བརྒྱུད་པ་མ་ཆད་པའི་གདན་ས་འདིའི་བསྟན་པ་རྨ་མེད་ཅིག་གཞིར་བཞེངས་སུ་བསླང་རྒྱུའི་ཆེད་དུ་དམིགས་ནས། སྨིན་བྱེད་ཀྱི་དབང་། གྲོལ་བྱེད་ཀྱི་ཁྲིད། རྒྱབ་རྟེན་ཀྱི་ལུང་དང་བཅས་པ་དམ་པ་གོང་མའི་ཐུགས་བསྐྱེད་ཀྱི་སྟོབས་དུས་སུ་བདོ་ནས། ཕ་ནོར་བུ་ཡི་ལག་ལ་སྤྲད་རྒྱུའི་སྐལ་བ་ཞིག་ལྡན་སོང་བ་རེད། དམ་པ་གོང་མས་མངགས་བཅོལ་ཞིག་མཛད་པ་བཀའ་ལུང་ཡལ་བར་མ་དོར་ཙམ་གྱི་དོན་རེ་འགྲུབ་པ་ཡིན་ན། དཔེར་ན་ནམ་མཁའི་ཉི་མ་ལ་ཚ་ཤུགས་ཡོད་པ་ཡིན་ཡང་། ས་ཐོག་གི་རྩྭ་སྐམ་རང་གར་འབར་མི་ཐུབ། དེའི་བར་ལ་མེ་ཤེལ་ཞིག་ཚད་ན། ཉི་མའི་ཚ་དྲོད་རྩྭ་ལ་ཞུགས་ཏེ་རྩྭ་སྐམ་པོ་མེ་ཡི་ཕུང་པོར་འགྱུར་ཐུབ་པ་ལྟ་བུ། དམ་པ་གོང་མའི་ཆོས་བརྒྱུད་དེ་མི་རབས་རྗེས་མའི་ལག་ལ་འཕྲོད་དགོས་ཚེ། བར་དེ་ན་དུས་རབས་བར་གྱི་བརྒྱུད་སྤྲོད་བྱེད་མཁན་ཞིག་མེད་ཚེ་མཐུད་ཐབས་མེད་པ་ཡིན་པས། དེ་ལྟ་བུའི་བར་མི་བང་ཆེན་པ་ཞིག་གི་གོ་ཆོད་སོང་བའི་ངོས་ནས། སྤྱིར་ང་ལྟ་བུ་ཞིག་ལ་མཚོན་པ་ཡིན་ན། ཞེ་བློ་བདེ་བ་ལས་ཀྱང་ཡང་བདེ། མི་ཞིག་བྱས་ཏེ་ས་སྟེང་ལ་ཡོང་ནས་མིང་ཞིག་བཟུང་ནས་རང་འཁྲིའི་ལས་ཀ་ལ་འཐམས་ན། ད་ནི་མི་ཚེའི་དོན་གོ་ཆོད་ཚར་བསམ་པའི་མི་ཞིག་ཡིན་པ་རེད། དེ་ཅིའི་དོན་དུ་བཤད་པ་ཡིན་ཞེ་ན། དབང་ལུང་ཞིག་ཐོབ་པ་ཙམ་ཁོ་ན་ལས། དོན་ཅི་ཡིན་པ་གོ་ཙམ་མ་གོ་ཙམ་རྩེད་མོ་ཧ་དགོད་དང་འདྲེས་མའི་ཆོ་ག་ཞིག་བཏོན་ན། དེ་ལ་བསྙེན་སྒྲུབ་ཀྱི་མིང་མེད་ཅིང་སྒྲུབ་འབྲས་ཀྱི་དོན་སྟོངས། བརྗོད་པ་ཚིག་གི་སྒོ་དེ་ཏིང་འཛིན་བསྒོམ་པའི་གསལ་འདེབས་ཀྱི་ཆེད་རེད། དེ་གསང་སྔགས་ལུང་གི་སྒོ་བཞིིའི་ནང་གི་གཅིག་རེད་མ་གཏོགས་དེ་ལ་གསང་སྔགས་ལུང་གི་སྒོ་བཞི་ཀ་ཚང་ནི་མ་རེད། འབྱུང་འགྱུར་ཕྱི་རབས་པས་གསང་སྔགས་ཀྱི་ཆོ་ག་གཟུགས་བརྙན་ཙམ་དང་ཡང་བརྙན་ཙམ་དུ་མི་འགྲོ་བའི་ཆེད་དུ་བསམས་ནས་དབང་ཁྲིད་སྦྲགས་མ་ཆོ་ག་དངོས་དང་སྦྲེལ་ཞིང་། ཚིག་གི་འབྲུ་གཉེར་བའི་འདི་འདྲའི་རྒྱུན་སྲོལ་ཞིག་ཚུགས་སོང་ན། སྙིང་ཐིག་གི་བསྟན་པ་མོས་པས་སྤྱོད་པ་ཙམ་གྱི་དུས་ལ་སླེབ་པའི་སྐབས་འདིར། ཅུང་ཟད་རེ་ཡིན་ཡང་མཐོངས་སྐར་ནང་གི་ཉི་ཞུར་ཙམ་རེར་བསྒྱུར་ཨེ་ཐུབ་སྙམ་ནས་བཤད་ཁུལ་བྱས་པ་རེད། ད་རེས་གཙོ་ཆེར་པདྨ་ཐང་གི་ཉམས་ལེན་མཚམས་པ་བ་དག་གི་དགོས་མཁོའི་ཆེད་དུ་བྱིན་རླབས་ཀྱི་རྩ་བ་རིག་འཛིན་བླ་མའི་སྒྲུབ་པའི་བསྙེན་ཚད་རེ་མཉམ་དུ་ཞོག་ན། གཅིག་ན་འདུས་པའི་བྱིན་རླབས། གཉིས་ན་སྒྲུབ་པའི་མཐུན་རྐྱེན། དེའི་སྟེང་དུ་ཕྱག་བཞེས་ལ་སོགས་པ་སེལ་མེད་གཅིག་གྱུར་ཡོང་བར་དམིགས་ཏེ་འདིའི་འཆར་འགོད་བྱས་པ་ཡིན། དུས་འདིའི་རྫོགས་ཆེན་ཚང་གི་བསྟན་པའི་བདག་པོ་རྣམས་ཀྱི་ཐུགས་བཀོད་ཀྱི་འོག་ནས། དབུ་མཆོད་བརྒྱད་ཅུའི་ནང་གི་མང་ཆེ་བས་གཙོ་བོར་བྱས་པའི་མཁན་སྤྲུལ་གྲྭ་ཚང་བརྒྱ་ཕྲག་ཁ་ཤས་འདི་ལྟར་མཉམ་དུ་ཞུགས་མཛད་པ་ཡིན་ན། འདི་དག་ལ་རྗེས་སུ་ཡི་རང་གི་སྔགས་བརྗོད་ཀྱི་མེ་ཏོག་འཐོར་ནི་ཡིན་ཞེས་ཁར་སང་ནས་ཞུས་པ་ལྟར་རེད། དེ་རིང་ཁར་སང་ས་གང་དུ་སོང་ན། དགེ་འདུན་པའི་རྟགས་ཆ་ལུགས་འཆང་བའི་སེར་གཟུགས་ཅན་མང་པོ་མཐོང་རྒྱུ་ཡོད་དུས་རེད། ཐ་ན་ཚོང་ར། གྱོད་ར། རྒྱན་པོ་འགྱེད་ས། གཉེན་སྟོན་བྱེད་ས་ཡན་ཆོད་ལ་མང་པོ་མཐོང་རྒྱུ་ཡོད་ནི་རེད། དེའི་ནང་གི་འགའ་རེ་རྟགས་ཙམ་འཛིན་པ་རེད་ཟེར་དགོས་ན་ཟེར་ཅི་ཤེས། གང་ཟག་གི་ཚོད་གང་ཟག་གིས་སུས་ཟིན་ཏེ་མི་ཟིན་མོད། འོན་ཀྱང་ཉུང་ཤས་རེ་རྐུ་ཐབས་སུ་གནས་པ་ཡོད་མི་སྲིད་པ་མ་རེད། ཐར་བའི་གྲོང་ན་ཐུབ་པའི་རྗེས་འབྲང་སྟེ། །འགྲོ་བའི་མགོན་དུ་གཤེགས་ལ་དགའ་མིན་པར། །འཁོར་བའི་གྲོང་ན་ཁྱིམ་པའི་གཡོག་བགྱིད་པའི། །དམར་སེར་ཅན་དེ་བདུད་ཀྱིས་བསླུས་པ་ལགས། ཞེས་གསུངས་པ་ལྟ་བུ་དང་། བསྐྱེད་རྫོགས་ཕར་ཞོག་མ་ཎི་རྡོག་པོ་གཅིག །མེད་པར་གཤིན་གསོན་རྫས་ལ་ཧབ་ཤ་བྱེད། །ཉིན་མོ་སེར་གོས་གྱོན་ནས་དཀོར་ལ་ཟ། །མཚན་མོ་ཆང་འཐུང་བུད་མེད་སྟེང་དུ་རྩོད། །ངན་སྤྱོད་སྣ་དགུ་བྱེད་ཀྱིན་ངོ་སོ་མཐོ། །ད་དུང་འུ་བུའི་བསྟན་པ་དར་ཞེས་གླེང་། ཞེས་གསུངས་པ་ལྟ་བུའི་མཚན་གཞི་མང་པོ་འཇོག་དགོས་ན་འཇོག་རྒྱུ་ལོན་པའི་དུས་ཚོད་ཡིན་ནི་རེད། སྤྱིར་བསྟན་པའི་གནས་ཚད་ལ་ཟབ་མོ་གཏེར་ཕྱོགས་ནས་བཤད་ན། ཟབ་གཏེར་ཆེན་པོའི་སྒྲུབ་པའི་འབྲས་བུ་མཐོང་ཆོས་སུ་འབྱིན་པ་འབྲས་བུའི་དུས་ཡིན་པ་དང་། ཉམས་ལེན་ཚད་ལྡན་བྱེད་མཁན་མང་པོ་ཡོད་དུས་སྒྲུབ་པའི་དུས་ཡིན་ཞེས་གསུངས་པ་རེད་ཀྱང་། འབྲས་བུའི་དུས་དེ་རིང་ཁར་སང་ཅི་ལ་ཡིན། སྒྲུབ་པའི་དུས་རེ་ཨེ་མི་ཡིན་སྙམ་མོད། སྤྱིར་བཏང་གི་ངོས་ནས་བཤད་ན་དེ་ཡང་ཅིག་དཀའ་ན་ཡང་དབང་ལུང་ཁྲིད་ཀྱི་རྒྱུན་རྣལ་མ་རེ་ཡོད་དུས་ལུང་གི་དུས་ཡིན་ཞེས་གསུངས་ན། མ་མཐར་དེ་ཡིན་དགོས་པ་རེད་སྙམ། དེས་ན་བསྟན་པའི་གནས་ཚད་ད་དུང་རྫོགས་ཡོད་ནི་མ་རེད། ཀུན་བཟང་ཐུགས་ཀྱི་བསྟན་པའི་གནས་ཚད་ད་དུང་ཅི་ལ་རྫོགས་ཏེ། དམ་ཆོས་འདུལ་བའི་བསྟན་པའི་གནས་ཚད་ཀྱང་ད་དུང་རྫོགས་ཡོད་ནི་མ་རེད་བསམས་ནས། མཚམས་རེ་གློ་བ་དགའ་ཚུལ་བྱེད་པ་རེད། དབང་ལུང་གི་རྒྱུན་ཙམ་ཡོད་པ་དེ་ཡང་མེད་པར་གྱུར་ཚེ་རྟགས་ཙམ་འཛིན་པ་ཡིན་ཞེས་གསུངས་པ་ཡིན་ན། རྟགས་ཙམ་འཛིན་པའི་བསྟན་པ་དེ་བསྟན་པ་སྤྱི་ངོས་ནས་ད་དུང་ཚེས་མེད་པར་སྙམ། གང་ཟག་སྒེར་ངོས་ནས་བཤད་ན་དེང་སང་གིས་མི་ཚད། དུས་བཟང་པོ་སྟོན་པ་ཞལ་བཞུགས་དུས་སུའང་ལྷས་བྱིན་ལ་སོགས་པ་ངན་པ་འགའ་རེ་ཡོད་མྱོང་བ་རེད། དེ་ལ་ཅི་ལྟ་བསམ་ནས་སེམས་གསོ་རེ་བྱས་ན། མང་པོ་བལྟས་ན་གོ་རྒྱུ་དང་ཤེས་རྒྱུ་མང་པོ་ཡོད་ནི་རེད། ངན་པ་མ་རིག་ན་བཟང་པོ་མི་ཤེས་གི། རྫོགས་ཆེན་ཚང་གི་བླ་སྤྲུལ་མཁན་གསུམ་གྲྭ་ཚང་དང་བཅས་པ་དུས་རབས་འདིའི་གཞོན་སྐྱེས་པ་ཁྱེད་རྣམ་པ་ལ་བལྟས་ན་འདི་འདྲའི་ཐུགས་མཐུན་བསམ་པ་གཅིག་སྒྲིལ། བསླབ་པ་སློབ་གཉེར་དང་། ཆོས་ཕྱོགས་ལ་དོན་གཉེར་ཅན། གཞོན་ཡང་རྒན་པའི་ཉེ་བར་ཞི་ལ་དགའ། །གཟི་བརྗིད་ཆེ་ཡང་བཟོད་ཅིང་དེས་པའི་ངང༌། །མཁས་པར་གྱུར་ཀྱང་ཤེས་པའི་ང་རྒྱལ་མེད། །དཔལ་དང་ལྡན་ཞིང་འབྱོར་ཡང་དྲེགས་པ་མེད། ཅེས་གསུངས་པ་ལྟར། དམ་པའི་རང་རྟགས་ཅན་རྐྱང་རྐྱང་ཡོད་པ་འདི་ལ་ངས་འདི་ལྟར་བསམ་བློ་བཏང་ན། ལྔ་བཅུ་ང་དགུ་ལོའི་ཡར་སྔོན་དུ་བྱོན་པའི་མཁས་གྲུབ་རྒྱལ་བ་ཡབ་སྲས་རྣམས་ཀྱི་ཐུགས་བསྐྱེད་དང་། དེའི་རྗེས་སུ་མུན་པའི་བསྐལ་བ་མི་ལོ་བཅུ་ཕྲག་གཉིས་གསུམ་ཞིག་ཚེས་པ་ཡིན་ཞིང་། དེའི་སྐབས་སུ་འོ་བརྒྱལ་མྱངས་པའི་ལྷག་བསམ་ཅན་དག་གིས་སྨོན་ལམ་བཏབ། སྨོན་ལམ་ཐེབས་ནས་ད་ལྟ་ཚང་མ་ཚུར་དཀྱིལ་འཁོར་གཅིག་ཏུ་འཚོགས་པ་ཨེ་ཡིན་སྙམ་གིན་ཡོད། འབྱུང་འགྱུར་ཕྱི་རབས་ཀྱི་བསྟན་འགྲོའི་རྒུད་མུན་སེལ་བའི་ཆེད་དུ། འཐབ་རྩོད་དགག་པ། རྡུང་ངན་བརྒྱག་བཙོག་ཚང་མ་སྐུ་ལུས་ཀྱི་ཐོག་ལ་བཞེས་པས་མ་ཚད། བསྟན་དོན་དུ་སྐུ་སྲོག་གཏོང་མཁན་གང་མང་མང་ཡོད་པས། དེ་དག་དུས་འདིར་བསྟན་པ་ཡང་དར་གྱི་སྲོག་འཛིན་པར་བསམ་བཞིན་དུ་ཚུར་ལ་ལས་དང་སྨོན་ལམ་སྣ་ཚོགས་ཀྱི་དབང་གིས་སྐྱེ་བ་བཞེས་ནས་ཕེབས་པ་ཡིན་ན་ཆོག་ནི་རེད། ད་རེས་ནི་བར་ཆད་ཀྱིས་མི་ཚུགས་པའི་ལས་འཕྲོའི་ལྷག་མ་སྔོན་ཆད་སྦྱངས་སྟོབས་ཀྱིས་ཅུང་དྲག་རྒྱུ་རེད་བསམ་གི་ཡོད། ཡིན་ཡང་སྲི་ཟེར་བ་ཞིག་ཞུགས་རྒྱུ་ཡོད་པ་རེད། མཚམས་མཚམས་སུ། ཨེ། དེ་ཚོ་སྔོན་མ་དང་འདྲ་བ་ལ། འོན་ཀྱང་དེ་ཙམ་དྲགས་ཐལ་དྲགས་ཐལ་བསམ་རྒྱུ་དེ་འདྲ་ཡོད་ཐལ་མོ། དེས་ན་ད་རེས་བསྙེན་མཚམས་འདི་ཚད་ལྡན་ཞིག་བྱས་ནས་འཇོག་དགོས། བྱ་བའི་འགོ་རེད། གཏོར་མའི་རྩེ་རེད། ལས་འགོ་མ་ལེགས་ན་མཇུག་མའང་ལེགས་ངེས་རེད། ད་ཕན་ཆད་ཀྱང་ཐམས་ཅད་ཀྱིས་ཡི་དམ་གྱི་བསྙེན་སྒྲུབ་རེ་མཛད་དེ། ཞི་ཁྲོའི་བསྙེན་ཚད་དང་འབུམ་ལྔའི་བསགས་སྦྱང་སྔོན་སོང་ཅན་ཞིག་མིན་ཚེ་རྫོགས་ཆེན་ཚང་གི་བླ་གྲྭ་རང་དགར་གྲོང་ཆོག་ལ་ཕེབས་ནི་མ་རེད་ཟེར་བ་ཞིག་དང་། སྒྲུབ་ཆེན་གྱི་འཚོགས་པ་དེ་ཚོ་ཡང་། བསྙེན་ཚད་ཅན་རྐྱང་རྐྱང་ལས་འཚོགས་ནི་མ་རེད་ཟེར་རྒྱུ་ཅན་ཞིག་རེད་ན་ཅི་འདྲའི་མི་ལེགས་སམ། བསྟན་པའི་མིག་རྒྱན། སེམས་ཅན་གྱི་འགྲོ་དོན་ལ་དེ་བས་ཡན་ཞིག་དགོས་ནི་མ་རེད། བསྟན་པ་འདི་ལ་ཞུགས། དགེ་འདུན་པའི་བཞུགས་གྲལ་བསྙེགས་པ་ཞིག་ཡིན་ཚེ། དམ་པའི་ཆོས་འཛིན་པ་དེ་བྱ་བའི་དོན་པོ་རེད་ཅེས་ཁར་སང་ཡང་ཞུས་པ་ཡིན། སྨོན་ལམ་ཐམས་ཅད་ཀྱི་མཆོག སྨོན་ལམ་ཚིག་གཅིག་གི་ནང་དུ་དོན་ཐམས་ཅད་འདུས་པ་དེ་དམ་པའི་ཆོས་འཛིན་པར་སྨོན་ལམ་འདེབས་རྒྱུ་དེ་རེད། དེ་ཡིན་པ་དཔལ་ཕྲེང་སེང་གེའི་སྒྲའི་མདོའི་ནང་དུ་གསུངས་ཡོད་པ་རེད། དམ་ཆོས་ཞེས་པའི་ངོས་གཟུང་ཡུལ་མཛུབ་མོ་བཙུགས་ས་དེ་ལུང་རྟོགས་གཉིས་ཡིན་ཞིང་། ལུང་གི་ཆོས་བཤད་པ་དང་། རྟོགས་པའི་ཆོས་སྒྲུབ་པས་འཛིན་དགོས། དེ་འཛིན་པའི་ཐབས་ལ་བཤད་སྒྲུབ་ལས་གསུམ་རྒྱལ་བསྟན་འཁོར་ལོ་གསུམ་གྱི་མཛད་བཟང་སྐྱོང་བ་འདི་ལས་ལྷག་པ་མེད་ཕྱིར། སྟོན་པ་སངས་རྒྱས་དངོས་བྱོན་ཡང་རྒྱུགས་འཕྲོད་ནི་ཅན་པོ་ཡིན་ནི་རེད། ལྷ་དང་བླ་མ་དབྱིངས་ནས་མི་ཁྲེལ་བའི་ཐུགས་དགྱེས་བྱེད་དེ་འགྲུབ་བཞིན་ཡོད་ན། རྨི་ལམ་ལྟ་བུའི་མི་ཚེ་འདིར་གཞན་དག་སུ་མ་མགུ་ཡང་ཞེ་བློ་བདེ་ནི་རེད། དམུ་རྒོད་སྐྱེ་བོ་མགུ་རུང་མ་མགུ་རུང་། །བླུན་པོ་རྣམས་ཀྱིས་བསྟོད་དམ་སྨད་ཀྱང་རུང་། །ཤི་ཚེ་རང་ལ་འགྱོད་པ་མེད་པ་ཞིག །བྱུང་ཚེ་དེ་ལས་ལྷག་པའི་ཆོས་མི་དགོས། ཞེས་གསུངས་པའི་འདོན་པ་དེའི་ཁ་བསྒྱུར་ཏེ། དམུ་རྒོད་སྐྱེ་བོ་མགུ་རུང་མ་མགུ་རུང་། །བླུན་པོ་རྣམས་ཀྱིས་བསྟོད་དམ་སྨད་ཀྱང་རུང་། །བསྟན་པ་སྤྱི་ལ་སྨན་པའི་ལག་རྗེས་ཤིག །ཞོག་ཚེ་དེ་ལས་ལྷག་པའི་ཆོས་མི་དགོས་བསམ་འདུག་གི། ཁྱེད་རྣམ་པས་ཀྱང་དེ་བཞིན་དུ་དམ་པའི་ཆོས་བཟུང་སྟེ་རྒྱལ་བའི་དགོངས་པ་སྒྲུབ་རྒྱུར་ཐུགས་སྟོབས་བསྐྱེད། མཐའ་ཡས་སེམས་ཅན་ལ་ཕན་རེ་འདོགས་རྒྱུ་ཐུགས་ལ་འཆང་རྒྱུ་གཙོ་བོ་ཡིན་དགོས་པ་རེད། དེས་ན་འགའ་རེས་ཐོས་བསམ་འཆད་ཉན་གྱིས་མདོ་སྔགས་ཀྱི་ཆོས་ལ་སྦྱང་པ་ངོམས་མེད་མཛད། འགའ་རེས་རྒྱུད་དོན་ལག་ལེན་ལ་འདེབས་རྒྱུའི་མཐོང་བརྒྱུད་ཀྱི་ཕྱག་བཞེས་ཕྱག་ལེན་ལ་བསྟར། འགའ་རེས་དེ་དང་འབྲེལ་བའི་བྱ་བ་ལས་ཀྱི་འཁོར་ལོའི་རྟེན་གཞི་བཞེངས་བསྐྲུན་ལ་སོགས་པའི་བཀའ་དྲིན་བསྐྱང་། ཐམས་ཅད་ཀྱིས་ཀྱང་སྒྲུབ་པ་ཉམས་ལེན་ལ་ཐུགས་གཞོལ་ཏེ། བསྐྱེད་རྫོགས་རིམ་གཉིས་ཀྱི་ཕྱག་ལེན་མཛད་ན། དེའི་ཡན་གྱི་རྒྱལ་བ་དགྱེས་པའི་མཆོད་པ། ཕ་མ་དགའ་བའི་དྲིན་ལན་ཅི་ཞིག་དགོས། བུ་སྐྱེས་ནས་བསང་དུད་ཅིག་བདུག་པའི་དོན་གོ་ཆོད་སོང་ནི་རེད། ད་རེས་ཀྱི་བསྙེན་མཚམས་ཞག་མ་བདུན་གསུམ་ཉེར་གཅིག་གི་དུས་ཡུན་རེད། གཙོ་བོ་བསྙེན་རྐྱང་ལས་རུང་ཞིག་ཚོགས་སྒྲུབ་དང་ཚུལ་འདྲ་བར་བྱས་པ་ཡིན་ཞིང་། སིདྡྷི་འབྲུ་འབུམ་ཁ་སྐོང་དང་བཅས་པ་ཐུན་གྱི་ནང་ཁོ་ནར་ཆེ་འགྲོ་ཆུང་འགྲོ་གྱིས། རིག་འཛིན་སྲོག་སྒྲུབ་ཀྱི་སྙིང་པོ་ཡང་སྒྲུབ་པ་སྒྲུབ་ཆེན་གཉིས་ཀ་དང་འབྲེལ་ནས་གང་འཚམ་རེ་གསོག་དགོས། གཙོ་བོ་སིདྡྷི་སོག ཐུན་བཞི་ཀ་ཆག་མེད་གྱིས། ཐོ་རངས་ཀྱི་ཐུན་དེ་རང་རེས་འདི་ནས་མཉམ་དུ་བསྡམ་དགོས། གཙོ་བོ་སྔོན་འགྲོའི་ངག་འདོན་དང་སྦྲེལ་ནས་བླ་མའི་རྣལ་འབྱོར་ལ་འབད་དགོས་པ་ཡིན། དགོང་ཐུན་གྱི་མཇུག་ཏུ་མཉམ་དུ་ལུས་སྦྱིན་རེ་གཏོང་གིན་ཡོད་ན། སྔགས་ཀྱི་ནུས་པ་ཡུན་རིང་བསྒྲུབས་ཀྱང་འགྲུབ་རྒྱུ་མེད་ན་སྐོང་བ་དང་ཚོགས་བསགས་ཀྱི་དཔུང་བསྐྱེད་དགོས་པའི་རྟགས་རེད། བསོད་ནམས་ཀྱི་དཔུང་བསྐྱེད་དུས་སྦྱིན་པ་གཏོང་བ། རང་རྒྱུད་སྦྱོང་བ། མདོ་སྡེ་ཀློག་པ། གཏོར་མ་བསྔོ་བ། ལུས་སྦྱིན་གཏོང་བ་སོགས་གནད་ཆེ། སྒྱུ་མ་ལྟ་བུའི་རྣལ་འབྱོར་གྱིས་སྒྱུ་མ་ལྟ་བུའི་སྦྱིན་པ་བྱས་ན་སྒྱུ་མ་ལྟ་བུའི་ཚོགས་རྫོགས་པར་འགྱུར་བ་ཡིན། རྒྱུ་བསོད་ནམས་ཀྱི་ཚོགས་ལ་བརྟེན་ནས་འབྲས་བུ་ཡེ་ཤེས་ཀྱི་ཚོགས་སོག་པའི་ཐབས་བྱེད་དགོས་པ་རེད། ཚེགས་ཆུང་ལ་དོན་ཆེ་བ། བསང་། ཆུ་གཏོར། གསུར། ལུས་སྦྱིན་སྟེ་ཆོས་སྤྱོད་སྦྱིན་པ་རྣམ་བཞི་འདི་ལ་བརྩོན་ན་ཁྱད་པར་དུ་འགྱུར་ཁྱད་ཆེ་བ་རེད། མཁའ་འགྲོའི་གད་རྒྱངས་འདི་ཚོ་རྫོགས་ཆེན་མན་ངག་སྡེའི་ཉམས་ལེན་དང་སྦྱར་བའི་ཟབ་ཆོས། ཀློང་ཆེན་སྙིང་ཐིག་གི་ཆོས་ཚན་རེད། དེས་ན་གཅོད་ཡུལ་མཁའ་འགྲོའི་གད་རྒྱངས་ཀྱི་བསྙེན་ཚད་ཡོད་པ་དག་གིས་གཙོ་བོར་མཛད་ནས་གསུངས་བཞིན་པ་ཡིན་ན་ཐམས་ཅད་ཀྱིས་ཀྱང་དེ་ལྟར་གནང་རོགས། ཐུན་གྱི་སྐབས་སུ་ཀུན་ཀྱིས་ངག་བཅད་མཛད་དགོས། གཙུག་ལག་ཁང་གི་ནང་འདིར་ཡར་ལ་ཞུགས་པ་ནས་ཐུན་གྲོལ་ཏེ་གཙུག་ལག་ཁང་གི་ཕྱི་རོལ་དུ་མར་བྱོན་མ་ཚར་བར་ཞལ་གྲག་མི་ཉན། གུ་རུ་རིན་པོ་ཆེས། ལོ་གཅིག་འབག་བསྙེན་བྱེད་པ་བས། །ཟླ་གཅིག་སྨྲ་བཅད་བྱས་པ་དགའ། ཞེས་གསུངས། ཐུན་གྱི་ནང་དུ་དཔེ་བལྟས་མཛད་རྒྱུ། ཡི་གེ་འབྲི་རྒྱུ། ཡི་གེ་འཕེན་རེས་བྱེད་རྒྱུ་སོགས་ཅི་ལ་མཛད་དེ་མཛད་མི་རུང་། བྱིང་རྨུགས་འཐིབས་གསུམ་བྱུང་ན་གཉེན་པོར་བསྟེན་ནས་རང་བློ་དག་པའི་ཐུན་སྤུས་དག་ཞིག་བསྡོམ་མཛོད། མཚམས་ཀྱི་ནང་དུ་ཞུགས་འདོད་མེད་ན་དང་པོ་ནས་མ་ཞུགས་ན་དགའ་ནི་རེད། ཞུགས་ཚར་ནས་བཟུང་ཞུགས་གོ་ཆོད་ནི་ཞིག་གྱིས། ཐུན་མཚམས་དང་སེམས་ཡེངས་བཞིན་དུ་བསྙེན་པ་བཟླས་པས་བསྙེན་པའི་གོ་མི་ཆོད་ཅེས་གསུངས་ཡོད་པ་ཡིན་ཡང་། ཐུན་མཚམས་ཀྱི་སྐབས་སུའང་ངག་འཆལ་སྨྲ་བ་དང་ཁ་བཙུམ་ནས་མི་སྡོད་པར་ཅི་ནུས་ཀྱིས་བསྙེན་པ་སོག་དང་བསྙེན་པ་ངོ་མའི་བཟླས་པའི་གྲངས་སུ་མ་སོང་ཡང་། གྲོག་མཁར་དང་སྦྲང་རྩི་ལྟར་གྲངས་སོག་རྒྱུ་དང་ནུས་པ་སྨིན་རྒྱུ་གཉིས་ཀ་ཡོད་ནི་རེད། དེས་མི་ཚད་པར་བར་ཆད་སེལ་བ། སྒྲིབ་པ་དག་པ། སྔགས་ཀྱི་ཆད་ལྷག་བསྐང་བ། ལྷའི་ཐུགས་རྒྱུད་བསྐུལ་བ་ལ་སོགས་པའི་ཕན་ཡོན་མང་པོ་ཡོད་པས་བབས་ས་གཅིག་ཏུ་འབབ་པ་རེད། ངོ་མ་བཤད་ན་མཚམས་དམ་པོ་ཞིག་སྡོད་པའི་སྐབས་སུ་སྒྲུབ་པའི་མལ་མི་སྤོ་བ། སྒྲུབ་ཕྲེང་མི་ལག་ལ་ཤོར་མི་ཉན་པ། སྐྲ་སེན་ཁ་སྤུ་མི་འབྲེག་པ། དེས་མ་ཚད་སྟན་གྱི་དྲོད་ཀྱང་ཡལ་མི་ཉན་པ་རེད། ཆབ་གསང་ལ་ཕེབས་དུས་སྒྲུབ་ཕྲེང་ཁྲོ་ཞལ་དུ་བསམས་ནས་སྟན་སྲུང་དུ་བཞག་དགོས་པ་དེ་འདྲ་གསུངས་ཡོད། གནའ་ངེད་ཚོའི་བླ་མ་འཇིགས་མེད་ཡོན་ཏན་མགོན་པོ་ཚང་དང་འཇིགས་བྲལ་ཚང་བཅས་ངེད་དཔོན་གཡོག་ཕོ་བྲང་གི་ཡང་སྟེང་དུ་སྐུ་མཚམས་སུ་བཞུགས་དུས། མཁན་པོ་ཚང་ཉིན་གུང་གི་ཐུན་སེང་སྐབས་ཚོམས་ཆེན་དུ་སྐར་མ་བཅོ་ལྔ་ཉི་ཤུ་ཙམ་ལ་བྱོན་བཞུགས་དགོས་དུས། བཞུགས་གདན་གྱི་སྟེང་དུ་སྐུ་དྲོད་སྲུང་ཕྱིར་ང་ཐེངས་མང་འདུག་མྱོང་། གཟིམས་ཁྲི་གྲུ་བཞི་མ་ཞིག་ཡོད། དེའི་ནང་དུ་ཉིན་མཚན་གཉིས་ཀར་མཉམ་བཞག་རེད། སྐུ་ཆིངས་རྩ་བ་ནས་བཤིགས་མི་སྲིད། ཁོང་བཞུགས་ཤུལ་དུ་སྡོད་གསུངས་དུས་ཡ་ཞུས་ནས་འདུག་འཇོག་ནི་ཡིན། དེ་དུས་བྱིས་པ་རེད། བླ་མའི་བཞུགས་གདན་གྱི་སྟེང་དུ་འདུག་མི་ཉན་པ་མི་ཤེས་པས། འདུག་ཨེ་རུང་ཙམ་ཡང་ཞུ་མ་མྱོང་། མཉམ་འགྲོགས་ཀྱི་བདུད་ཟེར་བ་དེ་འདྲ་ཞིག་ཡིན་པ་རེད། མཚམས་དམ་པོ་ཞིག་ལ་བསྡད་དུས་མིས་ཚུར་ལ་མཐོང་མི་ཉན་པས་མ་ཚད་རང་གིས་ཕར་ལའང་བལྟ་ཉན་ནི་མ་རེད། ཕར་ལ་བལྟས་པས་མཚམས་བུག་ནི་ཡིན། ཚུར་ལ་བལྟས་པས་མཚམས་རལ་ནི་ཡིན་ཞེས་གསུངས་ཡོད། འོན་ཀྱང་མཚམས་འདི་ལ་རྒྱུད་སྡེ་གོང་འོག་གི་ཁྱད་པར་དང་། དང་པོ་ནས་དམ་བཅའ་བྱེད་ལུགས་ཀྱི་ཁྱད་པར་ཡང་ཡོད་པ་རེད། ཚོགས་ཀྱི་སྒྲུབ་པ་དང་སྦྲེལ་བ་འདི་རིགས་མང་པོ་ཚོགས་པའི་སྒྲུབ་པ་ཡིན་པས་ལྷག་པར་གུ་ཡངས་པ་རེད་ཅེས་ཟེར་བ་མིན་ཡང་། གཅིག་པུར་མཚམས་ལ་སྡོད་པ་ཞིག་དང་མི་འདྲ། དེ་ལ་མཐུན་རྐྱེན་ཡང་གང་འཚམ་ཞིག་ཚོགས་དགོས་པ། རྒྱུད་རང་གཞུང་ལས་ཀྱང་། འཚོ་བ་ཟས་ཀྱི་ཡོ་བྱད། བགོ་བ་གོས་ཀྱི་ཡོ་བྱད། ནད་བཟློག་སྨན་གྱི་ཡོ་བྱད། དགྲ་བཟློག་མཚོན་གྱི་ཡོ་བྱད་དང་། དུས་འཛིན་པ་ཟེར་བའི་ནམ་ཚོད་འཛིན་མཁན། དྲོད་ཉུལ་པ་དང་། མ་བྱན་ལ་སོགས་པ་མང་པོ་ཞིག་དགོས་པ་ཡིན་པས། དེ་དག་དང་འབྲེལ་སྦྱར། འུ་ཅག་གི་ཡུལ་དུས་གནས་དབང་དང་བསྟུན་ན་མཚམས་ཀྱི་རྟགས་དེ་ཚོ་རང་རེས་ཕྱོགས་གསུམ་གྱི་རི་འགོར་སྦྱར། ཏིང་ངེ་འཛིན་གྱི་སྟོབས་ཀྱིས་མཚམས་ཆེན་པོ་ཞིག་བཅད་བཏང་ཟེར་བ་མིན་ཡང་། མདོར་ན་མཆོད་རྟེན་དཀར་པོ་ཡན་ཆོད་མཚམས་ཀྱི་ཚད་དུ་བཟུང་ན་སྤྱོད་ལམ་ཐམས་ཅད་སྟབས་བདེ་བ་ཞིག་རེད་བསམ་ནི་ཡིན། འདི་རྒྱུན་གྱི་ཉམས་ལེན་གནད་ཀྱི་སྲང་ལ་གཅུན་ནས་ཉིན་མཚན་ཆུ་བོ་རྒྱུན་གྱི་རྣལ་འབྱོར་ལ་གོམས་པ་བསྐྱེད་ཐབས་ཡིན་ཞེས་ཁར་སང་གོང་དུ་བཤད་པ་ལྟར་རེད། གང་ལྟར་ཐུན་གྱི་ནང་གི་ཐུགས་དམ་དེ་ཤིན་ཏུ་ལེགས་པོ་ཞིག་རེད་རྒྱུ་དེ་མཚམས་ཀྱི་གཙོ་བོའི་དམིགས་བྱ་ཡིན། དེ་ནི་རང་ལག་ཡིན་པས། ཚེ་གང་དུས་བརྒྱའི་ཟ་མ་ལན་གཅིག་གི་བསམ་གཞིགས་བཏང་སྟེ་རང་ངོས་ནས་འཕྱུག་མི་ཉན། ཡང་ཆེས་སྒྲིམ་ཆེ་བ་ཡིན་ན་གེགས་འབྱུང་ནི་རེད། དེས་ན་ཧ་ཅང་གྲིམ་མི་ཆེ། ཧ་ཅང་ལྷོད་མི་ཆེ་བའི་ཐང་ལྷོད་རན་པོ། པི་ཝང་དང་གཞུ་ཡི་རྒྱུད་ལྟར་དམ་ལྷོད་རན་པོ་མཛད་རྒྱུ་སྒོམ་སྒྲུབ་ཐོས་བསམ་ཉམས་ལེན་གང་གི་སྐབས་སུའང་དགོས་རྒྱུའི་མན་ངག་ཡིན་པ་ཞུ་མི་དགོས་གི། གཞན་ཡང་སྒྲུབ་ཐབས་རང་གཞུང་གི་སྐབས་སུ་ཞུས་པ་བཞིན། རིག་འཛིན་འདུས་པ་ནི་མཆོག་གསུམ་རྩ་གསུམ་ཀུན་འདུས་ཀྱི་ངོ་བོ། བྱིན་རླབས་དངོས་གྲུབ་ཐམས་ཅད་ཀྱི་རྩ་བ་ཡིན་པས། ཐམས་ཅད་ཀྱིས་སྔོན་དུ་བླ་མའི་སྒྲུབ་པ་བྱེད་རྒྱུ་འདི་ལ་དགོས་པ་རྒྱུ་མཚན་ཆེན་པོ་ཡོད་པ་རེད། དུས་ནམ་དུ་ཡང་སྔགས་བགྲང་པའི་སྐབས་སུ། རང་གཅིག་པུས་སྔགས་ཚིག་རེའི་ཕྲེང་སྐེ་དཀྱུ་བ་ཙམ་ཡིན་པར་མི་བསམ་ནས། སྤྱི་བོའི་རིགས་བདག་གི་ལྷ་ཚོགས། དཔག་ཡས་ཞིང་ཁམས་ཀྱི་རྡུལ་སྙེད། དེ་བཞིན་དུ་མཐའ་ཡས་ཀྱི་སེམས་ཅན། རང་ལུས་རྒྱལ་བའི་ཞིང་ཁམས་ཀྱི་གནས་ཡུལ་སོ་སོ་ན་བཞུགས་པའི་གཙོ་དང་འཁོར་གྱི་ལྷ་ཚོགས་གྲངས་མེད་མང་པོ་ཞིག་གིས་བཟླས་པ་དེའི་གྲོགས་བྱས་ཏེ། ཆོས་ཉིད་ཀྱི་རང་སྒྲ་སྒྲོག་བཞིན་ཡོད་པར་བསམ་ན་འགྱུར་ཁྱད་ལྷག་པར་ཆེ་བ་རེད། གསང་སྔགས་ཟེར་རྒྱུ་དེ་མོས་པ་ལམ་བྱེད་ཡིན་པས་དད་པ་དང་འདུན་པའི་ཕྱོགས་སུ་འགྲོ་བ་ཡིན། ལུས་ངག་གཉིས་ལས་ད་དུང་ཡིད་ཀྱི་ནུས་པ་རྒྱ་ཆེ་བ་རེད། འདི་ལྟ་བུའི་བསྙེན་མཚམས་སུ་བཞུགས་ནས་བསྙེན་པ་བཏང་ཚར་དུས། གོང་ནས་ཞུས་པ་ལྟར་ཐུན་བར་དང་མཚམས་གྲོལ་ཚར་རྗེས་སུ་ཡང་དུས་རྒྱུན་བསྙེན་པ་གསོག་དང་རིམ་གྱིས་མང་པོ་སོག་རྒྱུ་ཡོད་པ་རེད། བྱིས་པ་འཚར་ལོངས་ཡོང་བ་དང་ལྗོན་ཤིང་སྐྱེ་འཕེལ་གྱི་ཚུལ་ལ་ལྟོས་དང་འཕེལ་མཚམས་མ་བཞག་ཚེ་རྒྱུན་ཆད་མེད་པར་འཕེལ་ནི་རེད། ཆུ་ཐིགས་བསགས་པས་རྒྱ་མཚོ་ལྟར་མཐོང་རྒྱུ་ཅན་ཞིག་ཡོང་བ་ཡིན། མ་བསྡད་ན་ཞ་ནུད་བྱས་པས་ཀྱང་རི་རྩེ་རུ་སླེབ་འགྲོ་རྒྱུ་ཡོད་པ་དང་། ཉལ་ནས་བསྡད་ན་རྒྱུག་རྒྱུ་ཡོད་རུང་སླེབ་རྒྱུ་མེད་པ་ལྟར། དེས་ན་ཆེ་ལ་མ་རྔམ་ཆུང་ལ་མ་བརྙས་ཟེར་བ་ཡིན་པས། ཚང་མས་ཅི་ཞིག་གི་ཕྱོགས་སུ་ཡིན་ཡང་གོམ་པ་རིམ་བགྲོད་ཀྱིས་གསོག་དགོས་པ་རེད། ཐག་རིང་རྒྱ་གར་རྡོ་རྗེ་གདན་ལ་གོམ་པ་སྤོས་ནས་འགྲོ་དགོས་པ་ཡིན་ན། མིག་གིས་རྡོག་སྣེ་ལ་བལྟས་ནས་སོང་སྟེ་སླེབ་དགོས་པ་ཡིན་ཚུལ་དང་གཅིག་པ་རེད། འདི་ལྟ་བུའི་གཞི་བསྙེན་བསྙེན་རྐྱང་ལས་རུང་ཞིག་སོག་སོང་རྗེས། རྒྱུན་ཁྱེར་རེ་ཆག་མེད་བྱས་ནས་ཁ་ཞོར་ལག་ཞོར་གྱིས་རྒྱུན་དུ་བསྙེན་པ་རེ་གསོག་ཐུབ་ན་རྒྱུན་ཁྱེར་གྱིས་གཞི་བསྙེན་གྱི་ནུས་པ་ཁ་གསོས་ཏེ་གོང་འཕེལ་དུ་འགྲོ་བ་རེད། དེ་གོང་འཕེལ་དུ་འགྲོ་བའི་དཔེ་ཅི་འདྲ་ཞིག་བཞག་ཡོད་པ་རེད་ཅེ་ན། མེ་ཏོག་གི་ལྡུམ་རའི་ནང་དུ་དུས་རྒྱུན་ཆུ་བཀྲམ་པ་ལྟ་བུ་ཡིན་ཞེས་གསུངས་ཡོད་ནི་རེད། ཡང་གཞི་བསྙེན་གྱིས་ཚུར་རྒྱུན་ཁྱེར་གྱི་ནུས་པ་ཇེ་ཆེར་སྦར་ནི་རེད། དེའི་དཔེ་ཉི་ཟེར་ལ་མེ་ཤེལ་ཚད་པ་ལྟར་ཡིན་ཞེས་གསུངས་ཡོད། གང་ལྟར་སྔ་ཕྱི་གཉིས་ཀ་གདིང་གིས་འདྲེ་འགྲོ་ནི་རེད། དེ་ལ་དཔེ་ཇི་ལྟ་བུ་ཞིག་བཞག་ཡོད་པ་རེད་ཅེ་ན། ས་རློན་པའི་སྟེང་དུ་ཆུ་གཤོས་པ་ལྟ་བུ་ཡིན་ཞེས་གསུངས་ཡོད། ཕྱི་མའི་ནུས་པས་སྔ་མའི་རྣོ་སོ་འདོན་ནི་རེད། དེའི་དཔེ་བཞག་ན་སེག་རྡར་གྱིས་རལ་གྲིའི་ཁ་བླངས་པ་ལྟ་བུ་ཡིན་ཞེས་གསུངས། བསྙེན་པ་གསོག་མ་མྱོང་བ་ཞིག་གིས་མང་པོ་འདོན་པ་ལས། བསྙེན་པ་སྔོན་སོང་ཅན་གྱིས་ཉུང་ཉུང་བཏོན་པའི་ནུས་པ་ཆེ་བ་རེད། དེའི་དཔེ་རྩལ་མེད་ཅིག་གིས་མདའ་བརྒྱ་འཕངས་བ་ལས། རྩལ་ཆེན་ཞིག་གི་མདའ་གཅིག་གི་ཕོགས་ཚད་དང་གཅོད་ཚབས་ཆེ་བ་ལྟར་དང་། ཤིང་ཐུར་བརྒྱ་ཡིས་འབིགས་མི་ཐུབ་པ་ཁབ་གཅིག་གིས་སླ་མོར་ཕུག་འགྲོ་བ་ལྟ་བུ་ཡིན་ཞེས་གསུངས་ཡོད་པ་རེད། དེ་བཞིན་དུ་ད་དུང་། དག་དང་མ་དག་བརྒྱ་འགྱུར། །ཏིང་འཛིན་ཡོད་མེད་འབུམ་འགྱུར་ལ་སོགས་པ་དུས་རྒྱུན་གྱི་བཤད་སྲོལ་ལྟར་རེད། གཞན་ཡང་དབང་ལུང་ཐོབ་དང་མ་ཐོབ་ལ་ཁྱད་པར་ཡོད་རྒྱུ་དང་། བསྐྱེད་རྫོགས་ཀྱི་གདེང་ཡོད་མེད་ལ་ཁྱད་པར་ཆེ་བ་ཞུ་མི་དགོས་གི། མདོར་ན་ཁྱེད་འདིར་བཞུགས་ཀྱི་བླ་གྲྭ་གཞོན་རབས་པ་རྣམ་པ་ནི། འདས་པའི་བསྟན་རྒྱུན་མཐུད་མཁན། ད་ལྟའི་བསྟན་སྲོག་འཛིན་མཁན། མ་འོངས་པའི་བསྟན་རྒྱུན་སྤེལ་མཁན། སྔར་གྱི་དུས་རབས་སོ་སོའི་མི་རབས་གང་དང་ཡང་མི་འདྲ་བའི་གལ་ཆེན་འགག་ལ་ཁེལ། བསྟན་སྲོག་ཆགས་འཇིག་གི་གནད་འགག་ལ་ཐུག་པའི་ལས་འགན་ལྗིད་མོ་ཕྲག་ཐོག་ལ་ལེན་དགོས་པའི་དུས་རབས་སུ་ཁེལ་བ་ཡིན་ན། གང་བྱུང་དེས་ཆོག་གིས་ཐུགས་ལྷོད་གནང་རུང་བ་མ་ཡིན། སྒྱིད་ལུག་དང་རང་བརྙས་མཛད་རྒྱུ་མེད། འགན་ང་ལ་མི་བབས་ཁོང་ལ་བབས་བསམ་རྒྱུ་ཡོད་ནི་མ་རེད། རྒྱ་ཚ་སྐྱེས་ན་གླིང་གི་བུ། ཇོ་རུ་སྐྱེས་ན་གླིང་གི་བུ་ཡིན་པ་རེད། ཐམས་ཅད་མ་བགོས་ཐུན་མོང་གི་ལས་དེ་གང་ནས་འཐུས་ཤོར་སོང་ན་ཚང་མས་མ་འཇོན་པ་རེད། སུ་ཞིག་བཟང་ཡང་གཞན་དེ་ཤིན་ཏུ་ངན་པས་དེ་འདྲར་གྱུར་སོང་ཟེར་རྒྱུའི་མིང་གི་བྱེ་བྲག་དང་དོན་གྱི་རྣམ་དབྱེ་ཡོད་ནི་མ་རེད། ལ་ཞིག་གི་ཕར་རྒྱབ་ལ་སོང་ཚེ་དེ་ཚང་གིས་འཇོན་མ་སོང་ཟེར་ནི་རེད། མི་རིགས་ཀྱི་ཐད་ནས་བཤད་ནའང་དཔེ་དེ་བཞིན་མཚུངས་པ་རེད། ཁྱད་པར་དུ་གདན་ས་འདི་སྔ་འགྱུར་པའི་བསྟན་སྲོག་དང་འབྲེལ་བས་ལེགས་ཉེས་གང་བྱུང་ཡང་ཚོར་བ་རྣོ་ས་ཞིག་རེད། དེས་ན་ཁྱེད་རྣམ་པ་གར་སྟེགས་མཐོན་པོ་ཞིག་གི་སྟེང་ལ་བུད་ཡོད་པའི་མི་སྣ་རྐྱང་རྐྱང་ཡིན་པས། མིག་ལྟོས་འོས་པའི་འཁྲབ་སྟོན་ལྟད་མོ་ཅི་ཞིག་སྟོན་དང་། རྒྱལ་ཁམས་ཀྱི་མིག་ལ་བཟང་ངན་ཅི་ཞིག་བཀོད་ཁྱེད་རྣམ་པའི་ཐུགས་སྟོབས་དང་འཆར་འགོད་ལ་རགས་ལས་པ་ཞིག་རེད། འདི་ནས་ངས་ཁྱེད་རྣམ་པ་ཟེར་ནས་ཞུ་ས་ནི་གཞི་བྱེས་གཉིས་ཀའི་དགེ་འདུན་པ་ལ་ཞུ་བ་ཡིན། རྫོགས་ཆེན་ཚང་གི་བསྟན་པ་ལ་མཚོན་ན། གཞི་གྲྭ་གཙོ་ཆེ་བ་ཡིན་ཡང་། བྱེས་གྲྭ་དེ་བས་ཀྱང་གཙོ་ཆེ་བ་རེད། བླ་མ་བཀྱག་བྱེད་གྲྭ་བ་རེད། གུར་དཀར་ཆུང་བཀྱག་བྱེད་ཀ་བ་རེད། དགོན་ལག་སུམ་བརྒྱའི་བྱེས་གྲྭ་མེད་ན་འབྲོག་རུའི་གྲྭ་བ་རྐྱང་པ་ལ་མདོ་ཁམས་སྨད་ཀྱི་གསང་སྔགས་སྔ་འགྱུར་རྙིང་མའི་ཆ་ཤས་གལ་ཆེན་བཟུང་བའི་མྱིང་ཡོད་ནི་མ་རེད། ལར་གདན་ས་ཡར་རྒྱས་སུ་འགྲོ་དགོས་ན་བྱེས་གྲྭས་ལུང་པ་གང་དགོས། དབང་བྱེས་གྲྭས་བཟུང་དུས་བཟང་བ་ཡིན། དཔེ་དབུས་ཀྱི་གྲྭ་ས་ཁག་གསུམ་ལ་ལྟོས། ཕྱོགས་རིས་འཐེན་ཁྱེར་སྔར་ནས་ད་ཡི་བར་དུ་བོད་ཕུང་བྱེད་ཀྱི་གཞི་མ་ཡིན་པ་རེད། ལོ་ཉི་ཤུའི་ཡར་སྔོན་ངས་ཤྲཱི་སེང་ཆོས་གྲྭ་དབུ་བཙུགས་ཏེ། གླིང་ཕྱོགས་བཞིའི་གྲྭ་རྒྱུན་གྱི་ཁང་ཚན་བགོ་དུས་གཞི་བྱེས་བསྲེ་མ་བྱེད་དོན་རྒྱུ་མཚན་དེ་ཡིས་ཡིན། ལུགས་གཉིས་ལེགས་པའི་འདུན་མ་ཡང་རྩེར་སོན་རྒྱུ་དེ། བཤད་ན་བདེ་ཡང་ལས་ན་དེ་འདྲའི་སྟབས་བདེ་ཞིག་ག་ལ་ཡིན། དེ་འདྲའི་བསྟན་སྲིད་ཆེན་པོའི་ལ་རྒྱའི་མཐོང་རྒྱ་ཤེས་རྒྱའི་རྒྱང་ཐག་མཐོང་བ་ལ། ཡང་ན་སྐྱེ་བས་ཐོབ་པའི་རང་བཞིན་གྱི་རྣམ་དཔྱོད་ཡོད་པ་ཞིག་དང་། དེ་མིན་སྦྱང་སྟོབས་ཉམས་མྱོང་གི་ཐོག་ནས་ཡང་རྩེར་བསྙེགས་མཁན་ཞིག་མིན་ན། ཐད་ནས་བལྟས་ན་གླེན་པ་མཁས་ཀྱང་། ལག་ཏུ་བཞག་ན་ཐོན་དཀའ་བས། ཁ་གྲགས་ཚད་ཀྱིས་ཤེས་རྒྱུ་ཐོན་རྒྱུ་ཞིག་ཡིན་པ་མ་རེད། བུ་ཐམས་ཅད་འདྲ་ན་ཚང་མ་གེ་སར་ལོས་ཡིན། རྟ་ཐམས་ཅད་འདྲ་ན་ཚང་མ་རྐྱང་ལུ་ལོས་ཡིན། བྱིས་པ་ཚོའི་མིག་མ་ཕྱེས་གོང་རྒན་པ་རེ་གཉིས་ཀྱིས་བསྟན་པ་སྲོག་གིས་བསྲུངས་བའི་ལག་རྗེས་བཞག་ཚར་བ་རེད། དེའི་རྡོག་ལམ་དེད་རྒྱུ་མི་རབས་རྗེས་མའི་ལས་སྐལ་རེད། བན་སེར་མོ་ཞིག་གི་གྲལ་དུ་བསྡད་ནས་བཟུང་སྟེ་ཆོས་ལམ་ངོ་མ་ཞིག་ཨེ་ལོན་བལྟ་དགོས་པ་རེད། རང་གི་རྡོག་ལམ་ལེགས་པོ་ཞིག་འཚོས་ནས་སྣ་ཚུགས་ཁུར་དུ་མ་འཇོག་དང་གཞན་འགྲིག་མིན་གྱི་དོ་སྣང་གནས་སྐབས་ཉམས་འོག་མ་ཚུད་ན་ཡང་དྲགས་ནི་རེད། དེ་ལྟར་རྣམ་པ་ཐམས་ཅད་ཀྱིས་མ་འོངས་འབྱུང་འགྱུར་འཇིག་རྟེན་གྱི་ཁམས་སུ་སྤྱིར་རྒྱལ་བའི་བསྟན་པ། ཁྱད་པར་དུ་གསང་ཆེན་རྫོགས་པ་ཆེན་པོ་ཀློང་ཆེན་སྙིང་ཐིག་གི་རྩ་བའི་བརྒྱུད་པ་འདི་མི་ཉམས་ཡུན་དུ་གནས་རྒྱུའི་མཛད་རྒྱུན་སྐྱོང་རྒྱུ་འཕྱུག་མི་ཉན། འདི་རྩ་བའི་བརྒྱུད་པ་རེད། ང་སློབ་མའི་སློབ་མ་མ་རེད། བླ་མའི་སློབ་མ་རེད་ཟེར་ནས་ངས་དུས་རྒྱུན་མཐོ་བཤད་བྱེད་ཀྱིན་ཡོད། འདིའི་བརྒྱུད་གསུམ་དགོངས་པའི་བྱིན་རླབས་ཀྱི་བརྒྱུད་པ་ང་ལ་འཕོས་ཡོད་ཟེར་མི་ཕོད་ཀྱང་། ངའི་བླ་མ་འཇིགས་མེད་ཡོན་ཏན་མགོན་པོ་ནི། ཀུན་མཁྱེན་འཇིགས་གླིང་དང་འདྲ་བར་བརྒྱུད་གསུམ་གཅིག་ལ་རྫོགས་པའི་བླ་མ་སངས་རྒྱས་དངོས་བྱོན་ཡིན། འཇིགས་མེད་གླིང་པ་སླར་བྱོན་པ་དང་འདྲ་འདྲ་ཡིན་ནི་རེད། སྐྱེ་བཙུན་སེངྒེ་དབང་ཕྱུག་དང་འཇིགས་མེད་གླིང་པ་རྣམ་གཉིས་ཀྱི་སྤྲུལ་པ་ཡིན་པར་ཁོང་རང་ཉིད་ཀྱིས་ཀྱང་ཞལ་བཞེས་གནང་བ་རེད། ཁོང་གི་གསུང་གི་ནང་དུ། བརྒྱུད་པ་གསུམ་གྱི་བྱིན་རླབས་ཀུན། །ད་ལྟ་བདག་དང་གཉིས་སུ་མེད། །བརྒྱུད་གསུམ་གུ་རུའི་རྒྱལ་ཚབ་ནི། །ཡོན་ཏན་མགོན་པོ་ཞེས་སུ་གྲགས། ཞེས་གསུངས་ཡོད་པ་དང་། དེའི་འཕྲོ་ཞིག་ཏུ། ང་རང་ཐོག་མའི་སངས་རྒྱས་དང་། །སྐལ་བ་མཉམ་ཞེས་ཁོ་བོས་རྟོགས། །སངས་རྒྱས་ཡོན་ཏན་མགོན་པོ་ཞེས། །ཕྱོགས་བཅུ་ཀུན་ན་རབ་ཏུ་གྲགས། ཞེས་གསུངས་ཡོད། དེ་འདྲའི་བླ་མ་རྫོགས་པའི་སངས་རྒྱས་ཀྱི་ཞལ་ཆབ་གསུང་གི་བདུད་རྩི། མ་ཟག་མ་འཐོར་བར་བྱིན་རླབས་ཀྱི་བརྒྱུད་པ་སྤྲད་ས་ཁྱེད་རྣམ་པ་ཡིན་ན། ཁྱེད་རྣམ་པས་ཀྱང་དེ་བཞིན་དུ་ཐུགས་སྟོབས་བསྐྱེད་པ་ལ་དཔའ་མ་ཞུམ་དང་། གངས་སེང་གེ་དཀར་མོའི་རྒྱུད་པ་རེད། གང་ལྟར་བཤད་ཀྱང་རྡ་ལིའི་རྫིག་རྔམ་རེ་དང་བསྡུར་ཐབས་མེད། རང་ཆེ་བཤད་ནི་མིན། ཆོས་བརྒྱུད་ཀྱི་བསྔགས་པ་དོན་མཐུན་རང་བཞིན་བརྗོད་པའི་ངག་གིས་བཤད་ནི་ཡིན། ད་མ་བཤད་ན་གོ་ནི་མ་རེད། དོན་གནད་འགའ་རེའི་ཐད་ནས་མཚམས་མཚམས་སུ་དམན་ས་བཟུང་ཆེ་རང་ཚུལ་སྦས་ཆེ་བས། དུས་ངན་གྱི་སྐབས་སུ་ཧམ་པ་སུ་ཆེ་འགོ་འཕང་མཐོ་ནས། བཟང་པོ་མིང་མེད་དུ་འགྲོ་བའི་ཉེན་ཁ་མེད་པ་ཞིག་མ་རེད། ང་ནི་ཐ་མལ་ནང་གི་ཐ་མལ་ཞིག་རེད། སོ་སྐྱེ་འཆིང་བ་ཀུན་ལྡན། ལས་ཉོན་གཉིས་ཀྱི་གཞན་དབང་ཅན་ཞིག་རེད་མོད། ལམ་ཞུགས་ཀྱི་ཆོས་པ་ཞིག་མ་རེད་ཅེས་ཟེར་མི་བཏུབ། བདེ་མཆོག་རྡོ་རྗེ་མཁན་པོ་པད་རྡོར་གྱི་དེ་མ་ཐག་པ་མ་རེད་མི་བསམ་གི། ང་བདེ་མཆོག་རྡོ་རྗེའི་ཡང་ཚ་རེད་མ་གཏོགས་སྐྱེ་བ་མིན་ལས་ཆེ་བསམ་གིན་མེད། སྐྱེ་བ་སྔ་ཕྱི་ཁས་ལེན། ལས་རྒྱུ་འབྲས་ལ་ཡིད་ཆེས་ཀྱི་དད་པ་ཡོད། བླ་མ་གོང་མ་ཚོའི་གསུང་ཚད་མར་འཛིན་ནི་རེད། སྐྱེ་བ་འདྲ་དང་མི་འདྲ་ཅི་འདྲ་བླངས་མྱོང་མེད། ཚངས་དང་དབང་པོ་བརྒྱ་བྱིན་གྱི་ལུས་ཀྱང་གྲངས་མེད་བླངས་ཡོད་རྒྱུ་རེད། ཟུར་ཆོས་དབྱིངས་རང་གྲོལ་ཚུན་ཆད་སྔགས་ལ་མོས་པའི་རྟེན་ཅན་གྱི་ཆོས་སྨྲ་བའི་སྐྱེ་བ་འགའ་རེ་བླངས་ཡོད་སྲིད་བསམ་གི། སྐྱེ་སྤྲུལ་འདི་ཚོའི་ཐད་ལ་བསམ་བློ་བཏང་ན། ང་ནི། སྤྲུལ་རྫུན་ལ་དགག་པ་བརྒྱག་མཁན། རང་དགྲ་རང་གཤེད་བྱེད་པའིི་ཕུགས་པོ་གཅིག་རེད། ཙིའུ་དམར་གྱི་སྐྱེ་རྒྱུད་གསུངས་པའི་སྐབས་སུ། ཁྱོད་ནི་སྔོན་གྱི་ལས་དང་བག་ཆགས་མཐུས། །རྒྱལ་རིགས་བསྟན་གཤིགས་ཡོངས་ཀྱི་བདུད་དུ་ཆེ། ཞེས་གསུངས་པ་དེ་ཉིད་ཚིག་བསྒྱུར་བ་ཇི་བཞིན། ང་ནི་སྔོན་གྱི་དམུས་༼ཡིད་སུན་པའི་དོན་༽པའི་བག་ཆགས་ཀྱིས། །སྤྲུལ་རིགས་བསྟན་བཤིགས་ཡོངས་ཀྱི་བདུད་དུ་ཆེ། ཞེས་ཟེར་བ་ལྟ་བུ་རུ་གྱུར་ཡོད་པ་རེད། འོན་ཀྱང་ཐམས་ཅད་སྤྲུལ་རྫུན་ཡིན་པའི་ཁྱབ་མཐའ་ངས་ཀྱང་ཁས་མི་ལེན། འདིའི་ཐད་ལ་ཚད་མར་གྱུར་བའི་བསྟན་བཅོས་ཀྱི་ནང་དུ་ཇི་ལྟར་གསུངས་ཡོད་པ་རེད་ཅེ་ན། རྒྱུད་བླ་མའི་ནང་དུ། འཕགས་པས་འཆི་དང་ན་བ་དང་། །དགའ་བའི་སྡུག་བསྔལ་རྩད་ནས་སྤངས། །ལས་དང་ཉོན་མོངས་དབང་གིས་སྐྱེ། །དེ་ལ་དེ་མེད་ཕྱིར་དེ་མེད། ཅེས་གསུངས་པ་རེད། འཕགས་པ་རྣམས་ལ་སྐྱེ་འཆི་རང་མཚན་པ་ཡོད་པ་མ་རེད། འོན་ཀྱང་མདོ་སྡེ་རྒྱན་ལས། བློ་ལྡན་རྣམས་ཀྱི་ལས་དང་ནི། །གཞན་དོན་སྨོན་ལམ་དབང་དག་དང་། །ཏིང་ངེ་འཛིན་དང་དབང་འབྱོར་བའི། །དབང་གི་སྐྱེ་བར་འདོད་པ་ཡིན། ཞེས་གསུངས་པས། བྱང་ཆུབ་སེམས་དཔའ་རྣམས་ཀྱི་སྐྱེ་བ་བཞེས་པའི་རྒྱུ་བཞི་བཤད་པའི་སྐབས་སུ། མོས་སྤྱོད་ཀྱི་ས་ལ་གནས་པའི་བྱང་སེམས་ཀྱི་སྐྱེ་བ་ཕལ་ཆེར་ལས་ཀྱི་རྒྱུ་ལས་སྐྱེ་བ་རེད། དེ་ཇི་ལྟར་རེད་ཅེ་ན། དེ་དག་ད་དུང་སེམས་ལ་དབང་མ་ཐོབ་པས་ན་གང་དུ་བསམ་ཞིང་སྨོན་ལམ་བཏབ་པ་དེར་གདོན་མི་ཟ་བར་སྐྱེ་བའི་ངེས་པ་ཡོད་པ་མ་རེད། སྐབས་རེ་འགར་སྨོན་པ་ལྟར་དུ་སྐྱེ་བ་ཡིན་ཡང་། གཙོ་ཆེར་བསོད་ནམས་ཀྱི་ཚོགས་བསགས་པའི་ལས་ཀྱིས་བདག་གཞན་ལ་ཕན་པར་འགྱུར་བའི་གནས་ལ་སྐྱེ་བ་ཡིན་པ་རེད། ས་དང་པོ་དང་གཉིས་པ་ལ་ཏིང་འཛིན་གྱིས་སྐྱེ་བ་ཡོད་ཀྱང་། ཕལ་ཆེ་བ་སྨོན་ལམ་གྱི་དབང་གིས་སྐྱེ་གསུངས་ཡོད། ས་གསུམ་པ་ནས་བདུན་པའི་བར་ཏིང་ངེ་འཛིན་གྱིས་སྐྱེ་བ་དང་། དག་པ་ས་གསུམ་ལ་དབང་འབྱོར་གྱི་སྐྱེ་བ་ལེན་པ་ཡིན། སངས་རྒྱས་ཀྱི་ས་ལ་ལྷུན་གྱིས་གྲུབ་པའི་སྤྲུལ་བས་དབང་འབྱོར་བ་ཆེན་པོའི་ཚུལ་གྱིས་སྤྲུལ་བའི་མཛད་པ་སྟོན་པ་ཡིན་པར་གསུངས་ཡོད་པས། ང་ལྟ་བུར་མཚོན་ན་བསོད་ནམས་དང་སྨོན་ལམ་གྱི་དབང་གིས་རེད་ཅེས་མ་བཤད་ན་གོང་མ་རྣམས་ལ་སྐུར་འདེབས་སུ་འགྱུར་བ་ཨེ་ཡིན་ནམ། འཕགས་ས་ལ་གནས་པའི་སྤྲུལ་བ་ཡིན་ཞེས་སྨྲས་ན་ནི་ཁྱད་ཆོས་མེད་པའི་ཁྱད་གཞི། ཡོན་ཏན་བརྒྱ་ཕྲག་བཅུ་གཉིས་ལ་སོགས་པ་སྟོན་རྒྱུ་མེད་ཚེ་སྒྲོ་འདོགས་ཀྱིས་མི་ཚད་མི་ཆོས་བླ་མའི་རྫུན་བླ་མའི་ཁ་ནས་བཤད་པ་ཞིག་དང་མཚུངས་པས་མ་ཚད་དོན་ངོ་མ་ཡང་དེ་འདྲ་རེད། གང་ལྟ་བུ་ཞིག་ཡིན་ཀྱང་། སྤྱིར་བསྟན་འགྲོའི་རྒུད་པ། ཁྱད་པར་དུ་དམ་སྲིའི་འཚེ་བ་སྣ་ཚོགས་ཀྱི་དབང་གིས། ང་ལ་མཚོན་ན་སྐྱེ་བ་སྔོན་མར་ཚེའི་བར་ཆད་ཡོང་བ་དང་། རྟེན་འདིར་སྐྱིད་སྡུག་སྣ་ཚོགས་ཤིག་ལུས་ཐོག་ཏུ་ཡོང་བས། འདི་དགོས་དབང་གིས་དེའི་ཚུལ་བསྟན་པ་ཞིག་མ་རེད། ལས་ཀྱི་རྣམ་པར་སྨིན་པ་ཐོག་ཏུ་བབས་པ་ཞིག་རེད། འོན་ཀྱང་དེ་ཚོས་བསྟན་པ་འདི་ལ་གོ་ཆེ་བ་རེ་བཅད་ཡོད་པ་དང་། གེགས་ཆེ་བ་རེ་ལྡོག་ཡོད་རྒྱུ་རེད་བསམ་གྱིན་ཡོད། དེ་ལྟར་སྨོན་ལམ་ཡང་འདེབས་བཞིན་ཡོད། གང་ལྟར་མི་ཚེ་བར་མ་མདོ་ནས་ཤོར་ཡོད་ན། དབང་པོ་སྐྱོན་ཅན་གྱི་ཚེ་མཇུག་ལས་མཇུག་ཞིག་ལ་འུ་ཅག་མཉམ་དུ་འཛོམས་ཏེ། སྔོན་སྨོན་གྱི་ལས་འཕྲོ་ལ་མཉམ་དུ་འཇུས་ན། འདི་བཞིན་སྐྱེ་བ་ཚེ་རབས་སུ་བསྟན་དང་འགྲོ་བར་སྨན་པའི་སྨོན་ལམ་མཉམ་དུ་ལོས་འདེབས། ཐ་ན་མིང་ཙམ་ཐོས་པ་དང་རླུང་ཕྱོགས་ཕོགས་ཚད་དང་བཟང་ངན་ལས་ཀྱིས་འབྲེལ་ཚད་ལ། བདེ་བ་རེ་ཐོབ་རྒྱུའི་སྨོན་འདུན་བྱས་དང་བྱེད་བཞིན་ཡིན་ན་ཡང་། བྱང་ཆུབ་སེམས་བསྐྱེད་བླངས་པའི་མི་ཞིག་ལ་མཚོན་ན་དེ་ལ་ཡ་མཚན་རྒྱུ་ཅི་ཡང་མེད། འདུས་བྱས་ཀྱི་ཆོས་ལ་རྟག་བརྟན་ཡོད་པ་མིན་པས། སྐད་ཅིག་སྐད་ཅིག་གིས་འགྱུར་བའི་རང་བཞིན་ཅན་ཏེ། གཞོན་དང་དར་མ་རྒན་པོའི་བརྒྱུད་རིམ་གྱི་ཐོག་ནས་ཐམས་ཅད་འགྱུར་བའི་ཕྱོགས་སུ་འགྲོ་བཞིན་ཡོད་པས་མི་རྟག་མཐའ་བཞིས་བསྡུས་པའི་ཆོས་སྤྱི་དང་ཁྱད་པར་ལུས་འདི་ལ་སྙིང་པོ་ཡོད་པ་མ་རེད། མི་ཚེ་དབ་མ་ཡུག་རེད། དེས་ན་ན་ཚོད་གཞོན་པའི་དུས་སུ་དམ་པའི་ལྷ་ཆོས་ཤིག་མ་འགྲུབ་ན། རྒས་རྒྱུ་ལ་བསྒུག་ལོང་ཨེ་ཡོད་ཅི་ཤེས། བསྒུག་ལོང་ཡོད་ཀྱང་རྒ་བའི་སྡུག་བསྔལ་གྱིས་མནར་བའི་ཉི་མ་ཤར་ན། ངས་སྔར་ནས་དམ་པའི་ཆོས་ཤིག་བསྒྲུབས་ཡོད་ན་ད་ཚོད་སྐྱིད་པའི་ཉི་མ་མགོ་ལ་ཤར་ཡོད་རྒྱུ་རེད་བསམ་རྒྱུའི་འགྱོད་པ་སྐྱེ་ངེས་ཡིན། འོན་ཀྱང་དེ་དུས་བྱ་བ་སྔོན་སོང་བྱ་རྒྱལ་རྒོད་པོས་ཀྱང་རྗེས་སླེབས་ནི་མ་རེད། ད་སྔོན་འདས་པའི་དུས་ཚོད་ཕྱིར་འཐེན་བྱ་ཐབས་མེད། མི་ཚེར་བསགས་བསགས་ཀྱི་བུ་ལོན་རང་གཅིག་པུའི་སྐེ་ཐོག་ལ་བབས་དུས། མ་ཤི་སྔོན་གྱི་ཤི་སྡུག་དེ་ངན་སོང་མིན་ཡང་ངན་སོང་འདྲ། སྤྱིར་མི་ཚེའི་སྡུག་བསྔལ་མང་། དེའི་སྟེང་ལ་ནད་པ་རྒས་པ་རེད་དུས་སྔོན་ན་རྟེན་ས་མེད། ཆོས་སྔོན་སོང་མེད། རྒྱབ་ན་སྐྱོར་མ་མེད། ཉམས་ལེན་དྲོད་རྟགས་ཀྱི་གདེང་རང་ལ་འདི་ཡོད་བསམ་པ་ཞིག་མེད་ཚེ་འདི་ཕྱི་གཉིས་ཀ་གཅེར་བུ་ལག་སྟོང་ཡིན་པ་རེད། དེས་ན་གྲྭ་གཞོན་རྣམས་ཀྱིས་ཐོག་མར་དགེ་བ་འདུལ་ཁྲིམས་མིག་ལྟར་དུ་སྲུང་དགོས། ཡོན་ཏན་ཀུན་ཀྱི་གཞི་རྟེན་ཚུལ་ཁྲིམས་ཡིན་པ་རེད། སྲིད་གསུམ་བདག་པོར་སྔར་ཡང་ལན་བརྒྱར་སྐྱེས། །ངུར་སྨྲིག་རྒྱལ་མཚན་འཛིན་པ་ད་རེས་ཙམ། ཞེས་གསུངས་པ་རེད། བསོད་ནམས་བསགས་པ་སྔོན་སོང་ཞིག་མེད་ན་རབ་ཏུ་བྱུང་བའི་རྟེན་ཐོབ་དཀའ། ཐོབ་ཀྱང་དམ་པ་སྔོན་སྦྱང་ཅན་ཐུགས་བསྐྱེད་སྨོན་ལམ་རྣམ་པར་དག་པ་ཞིག་མིན་ན་སྲུང་དཀའ། དམ་པ་མིན་པས་སྲུང་དཀའ་བའི་རྒྱུ་མཚན་ནི་བསླབ་པ་འགངས་ཆེ་བས་རེད། དམ་པ་མིན་པས་ཤིན་ཏུ་སྲུང་དཀའ་དང་། །དམ་པར་གྱུར་པས་ནན་གྱིས་སློབ་དགོས་པ། །བསླབ་པ་འགངས་སུ་ཆེ་བའི་རྟགས་ཡིན་པས། །རང་གི་རིན་ཆེན་ཆུད་ཟོས་མ་བྱེད་ཨང་། ཞེས་གསུངས་ཏེ་གདམས་ཡོད། ཚུལ་ཁྲིམས་ཡོད་ན་ཐོས་ཉུང་བློ་དམན་ཡང༌། །ཏིང་འཛིན་ཤེས་རབ་སྐྱེད་ལ་དཀའ་བ་མེད། །རྩ་བ་མེད་ལ་ལོ་མེད་འབྲས་བུ་མེད། །དེ་སླད་ལམ་གྱི་རྟེན་འབྲེལ་འགོ་ནས་སྒྲིགས། ཞེས་གསུངས་པ་རེད། བར་དུ་དགེ་བ་ཐོས་པ་སློབ་གཉེར་ལ་བརྟེན་དགོས། ཚེ་འདི་ཕྱི་རང་གཞན་གཉིས་ཕན་གྱི་ཤེས་རབ་ཀྱི་མིག་ཞིག་དེ་རུ་འཚོལ་དུ་ཡོད། ཤེས་རབ་ཀྱི་མི་མཐུན་ཕྱོགས་དེ་འཆལ་བའི་ཤེས་རབ་ཡིན། འཆལ་བའི་ཤེས་རབ་གང་རེད་ཅེ་ན། འཆལ་བའི་ཤེས་རབ་དོན་ཚན་གསུམ་དུ་བསྡུ་ཆོག ཤེས་རབ་ཀྱིས་ཡོན་ཏན་མི་འཚོལ་བ་དང་གཅིག ཤེས་རབ་ཀྱིས་ཡོན་ཏན་འཚོལ་ཡང་ཕྱིན་ཅི་ལོག་ཏུ་འབད་སོང་བ་དང་གཉིས། ཕྱིན་ཅི་ལོག་མིན་ཡང་སངས་རྒྱས་ཀྱི་རྒྱུ་རུ་མི་འགྱུར་བ་དང་གསུམ་བཅས་འཆལ་བའི་ཤེས་རབ་སྟེ། དེ་གསུམ་གྱི་མཚན་གཞིའི་སྟེང་ནས་བཤད་ན། བླུན་པོ་ལྟར་དུ་ཤེས་རབ་ཀྱིས་ཡོན་ཏན་འཚོལ་མི་ཤེས་པ་དང་གཅིག མུ་སྟེགས་པ་ལྟ་བུ་འཚོལ་ཡང་ཕྱིན་ཅི་ལོག་ཏུ་འབད་སོང་བ་དང་གཉིས། ཉན་ཐོས་ལྟ་བུ་ཕྱིན་ཅི་མ་ལོག་ཀྱང་རྫོགས་པའི་སངས་རྒྱས་ཀྱི་རྒྱུ་རུ་མི་འགྱུར་བ་དང་བཅས་གསུམ་རེད། དེ་ལྟ་བུའི་ཤེས་རབ་མེད་པའམ་ཤེས་རབ་འཆལ་བ་དེ་ལ་སྐྱོན་ཅི་ཞིག་ཡོད་པ་རེད་ཅེ་ན། མི་མཁས་པའི་སྟབས་ཀྱིས་རང་ཉིད་ཀྱི་སེམས་ཞུམ་ཞིང་དཔའ་འཁུམ་སྟེ་གནས་པ་དང་། བྱ་བ་དང་བྱ་བ་མ་ཡིན་པའི་ཆ་སོ་སོར་རྣམ་དཔྱོད་ཀྱིས་འབྱེད་མི་ནུས། དེའི་སྟབས་ཀྱིས་ལྷ་དང་བཅས་པའི་འཇིག་རྟེན་ཐམས་ཅད་ཀྱི་བརྙས་བཅོས་ཀྱི་ཡུལ་དུ་འགྱུར། དཔེར་ན་སེང་གེའི་ནང་དུ་ཝ་སྐྱེས་སླེབ་སོང་བ་ལྟ་བུ། མཁས་པའི་གྲལ་དུ་མི་ཆུད་ཅིང་ཆུད་ཀྱང་ཉམས་དམའ་བ་ལ་སོགས་པའི་ཉེས་པ་མང་བ་རེད། རྐང་གཉིས་པ་ལ་མངོན་སུམ་ཕྱུགས། །བླུན་པོ་ཡོངས་སུ་སྤང་བར་བྱ། ཞེས་གསུངས། ཐོས་པའི་ནོར་མེད་ས་སྟེང་འདི། །ལོང་བ་ཡིན་སྙམ་བསམ་སྟེ་བྱ། ཞེས་གསུངས་པ་རེད། ས་སྐྱ་པཎ་ཆེན་གྱིས་ཀྱང་། བླུན་པོའི་དབུས་ན་དགའ་ཞིང་རྩེ། །མཁས་པའི་འདུན་ན་ཞུམ་ཞིང་འཛུར། །ནོག་དང་ལྐོག་ཤལ་མེད་ན་ཡང་། །ཡ་སོ་ཅན་གྱི་བ་ལང་ཡིན། ཞེས་གསུངས་པ་ལྟ་བུ་རེད། ཤེས་རབ་མེད་ན་ཚེ་འདིས་མ་ཚད་སྐྱེ་བ་ཐམས་ཅད་དུ་དབང་པོ་རྟུལ་བོ་རུ་འགྱུར། དབང་པོ་རྟུལ་བའི་སྟབས་ཀྱིས་ཆོས་བྱས་པ་ཡིན་ཡང་ནོར་སོང་བ་ཞིག་ལས་རྙེད་པ་མིན། བསྒོམ་བྱས་པ་ཡིན་ཡང་བདག་འཛིན་གྱི་རྩ་བ་མི་ཆོད། གལ་ཏེ་ཆོད་ཁུལ་བྱས་ཀྱང་ཐབས་ལ་མི་མཁས། དེ་མ་མཁས་པས་ཉན་ཐོས་དང་རང་སངས་རྒྱས་ཀྱི་འགོག་པ་ལ་ལྷུང་བ་ལ་སོགས་པའི་སྐྱོན་མང་བ་རེད། དེས་ན་ཤེས་རབ་འཆལ་འགྲོ་བའི་རྒྱུ་རྐྱེན་ཅི་རེད་ཅེ་ན། ཤེས་རབ་འཆལ་བའི་རྒྱུ་མ་རིག་པ་དང་རྐྱེན་དགེ་བའི་བཤེས་གཉེན་ངན་པ་ལ་གུས་པའི་དབང་གིས་བྱུང་བ་རེད། དེས་ན་དེ་སྤོང་ཐབས་སུ་ཐོས་བསམ་ལ་འབད་དགོས་པ་གནད་ཆེན་པོ་ཡིན། ཐ་མར་དགེ་བ་ཉམས་ལེན་གནད་ཐོག་ཏུ་དྲིལ་དགོས། ཐེག་པ་ཆེ་ཆུང་གི་ཆོས་ཐམས་ཅད་ཀྱི་དགོས་པ་དངོས་བདག་འཛིན་འདུལ་བའི་ནང་དུ་འདུས་ནི་རེད། བདག་འཛིན་དེ་ཅི་ཞིག་རེད་ཟེར་ན། དངོས་པོ་ལ་ཞེན་པ་གང་ཟག་གི་བདག་འཛིན་དང་། འཇིག་ཚོགས་ལ་ལྟ་བ་ཆོས་ཀྱི་བདག་འཛིན་མ་ཡིན་ནམ། བདག་འཛིན་གྱི་གཉེན་པོར་མ་སོང་ཚེ་ཆོས་བྱས་ཚད་དོན་མེད་རེད་སོང་ནི་རེད། བུག་པ་འདག་ཞལ་བྱས་ནས་ཀུན་འབྱུང་སྒོམ། །ཐུགས་དམ་གཙིགས་སུ་མཛད་པའི་རྟོགས་ལྡན་པ། །ཐུགས་རྒྱ་ཆེ་རུ་སོང་བའི་འདུག་ཆིས་འདི། །འཆི་བ་ཐུགས་ལ་མ་བཞག་བཀའ་དྲིན་ཡིན། ཅེས་གསུངས་པ་ལྟ་བུ་རེད། ཆོས་བྱས་ཚད་བདག་འཛིན་གྱི་གཉེན་པོར་སོང་ན་བློ་སྦྱོང་རྒྱུད་ལ་སྐྱེས་པའི་རྟགས་ཡིན་པ་རེད། ཆོས་ཆོས་སུ་སོང་དང་མ་སོང་གི་ཚད་གཞི་འཇོག་ས་དངོས་འདི་ཡིན་པས། འདི་ཆོས་པ་ཡང་ལྗིད་བཀྱག་བྱེད་ཀྱི་རྒྱ་མ་ཡིན་ཞེས་གསུངས། དེ་བཞིན་མཉམ་བཞག་གི་རྟོགས་པའི་ཡེ་ཤེས་དེ་ཡང་དག་པ་རེད་ཡོད་མེད་རྗེས་ཤེས་རབ་དང་སྙིང་རྗེའི་རྩལ་འབར་མིན་གྱིས་དབྱེ་བ་འབྱེད་ཐུབ་པ་རེད། གནས་ལུགས་ཀྱི་དགོངས་པ་ཟབ་མོ་ཕྱིན་ཅི་མ་ལོག་པ་ཞིག་རྟོགས་ཡོད་ན། མཉམ་རྗེས་སྟོང་དང་སྙིང་རྗེ་གཉིས་ཀ་གཅིག་གྲོགས་གཅིག་གིས་བྱས་ཏེ་གོང་ནས་གོང་འཕེལ་གྱིས་ཚོགས་གཉིས་འབད་མེད་དུ་རྫོགས་པ་རེད། ལར་ཆོས་པ་བཟང་པོ་ཡིན་མིན་གཞན་གྱིས་མི་ཁྲེལ་བ་དཔང་པོ་ཡིན་མོད། འོན་ཀྱང་འཇིག་རྟེན་པ་ཕལ་བ་རྣམས་ཀྱིས་གཞན་སེམས་མི་ཤེས། དེ་མ་ཤེས་པས་སྤྱོད་ལམ་ལེགས་པ་སྣ་རེ་ཙམ་གྱིས་མགུ་སླ་བ་རེད། དེ་ཉིད་གཙོ་བོར་མི་བཟུང་པར་གཙོ་བོ་རང་གི་སེམས་ཀྱིས་མི་ཁྲེལ་བ་དེར་འཛིན་དགོས་པ་ཡིན་པས། རང་གི་སེམས་ཀྱིས་རང་ལ་མི་ཁྲེལ་བའི་རང་སེམས་གཙང་མ་དཔང་པོར་འཇོག་ཆོག་པ། ད་ལྟ་ཤི་ཡང་མི་འཚེར་བའི་དཔའ་གདེང་ཞིག་ཡོད་ཆུགས་དང་། བླ་རབ་གྲྭ་རབ་ཚང་མ་དེ་ཡིན་པ་རེད། ཁྱིམ་ཕ་མ་ལ་དེས་མ་ཕན་ན་ལོག་འཚོའི་ཟས་ནོར་གྱིས་ཕན་ཐོགས་མི་ཆེ། བོད་སྤྱི་ལ་བསམ་མནོ་བཏང་ན། ཆོས་ཚུལ་བཞིན་བྱེད་པའི་དགེ་འདུན་པ་དགོས་པ་རེད། འཛམ་གླིང་བསྐོར་ནས་སོང་ཡང་རྙེད་རྒྱུ་མེད་པའི་རིན་ཐང་ཅན་དེ་ནང་པའི་ཆོས་དང་རིག་གཞུང་འདི་ཡིན་ཞིང་། འདི་གང་ཟག་གི་རྒྱུད་དུ་ཡོད་པ་རེད། ངས་འཛམ་གླིང་གཡས་སྐོར་གཡོན་སྐོར་འགའ་རེ་བྱས་ཟིན། སོང་སོང་སོང་ཚར། བཤད་ན་སྙན་པ་ལྟ་བུ་དེ་བལྟས་ན་དེ་འདྲ་མ་རེད། གཏུགས་གཏུགས་གཏུགས་ཟིན། ད་མི་དང་གཏུགས་ནས་ལབ་གླེང་བསམ་གིན་མེད། སྐྱོན་མེད་ཀྱི་མི་དཀོན་པས་ན་ཉོན་མོངས་ཀྱི་མཁྲིས་ནད་ཅན་ལ་དུང་དཀར་པོ་ཡིན་ཡང་རང་མདོག་སྣང་མི་སྲིད་པ་རེད་འདུག དེ་ལ་འཁང་ར་བྱེད་རྒྱུ་མེད། སྦྲུལ་ཚང་ནང་དུ་སྦྲུལ་ཞི་འཇམ་ཅན་མི་འདུག་ཅེས་བཤད་པ་དང་འདྲ་འདྲ་རེད། ད་བཤད་བཤད་བཤད་སོང་། བཤད་ནས་ཚར་རྒྱུ་མི་འདུག ལས་ལས་ལས་སོང་། ལས་ནས་ཟད་རྒྱུ་མེད་པའི་འཁྲུལ་བའི་བྱ་གཞག་ལ་སྙིང་པོ་མེད་པ་མཐོང་སོང་ནི་རེད། འཁོར་བའི་བྱ་གཞག་དེ་ནམ་བཞག་ན་དེ་དུས་ཚར་བ་རེད། ཚར་བསྒུག་བྱས་ན་ཤི་ཁ་ཡིན་ཡང་ཚར་མི་སྲིད། དེ་བཟང་གི་ངེས་འབྱུང་སྐྱེས་པ་ཞིག་མ་ཡིན་ཞིང་། ངན་གྱི་བློ་སྣ་ཐུང་བས་དམུས་པ་མིན་ནམ། གྲོགས་བྱ་དང་རི་དྭགས་བྱས་ནས་རི་ཁྲོད་ལ་འདུག་རྒྱུའི་འདུན་པ་བྱས་ན། མི་དང་གཏུགས་ནས་སྐད་ཆ་བཤད་སྙིང་སྤྲོ་གི་མེད། ཕྱིན་ཆད་དེ་བས་ཀྱང་གཏུག་འབྲེལ་ཇེ་ཉུང་བྱེད་འཆར་ཡོད། གཏུགས་ནས་བཤད་པས་འུ་ཅག་རང་རོགས་ཚང་མ་ལ་ཕན་ཐོགས་མི་འདུག རང་རོགས་གཉིས་ཀའི་མི་ཚེའི་དུས་ཚོད་རིན་ཐང་ཅན་འཕྲོ་བརླག་རེད། གོང་དུ་བཤད་པ་ལྟར། གཏུགས་ཚར་བ་རེད། བཤད་ཚར་བ་རེད། རང་བསྟོད་བྱས་ན་རང་ལེགས་སྤྱད་མི་འདུག རང་སྨ་རང་གིས་ཕབས་པ་ལྟ་བུ་རེད། གཞན་སྨོད་བྱས་ན་གཞན་ཐུབ་པ་མ་ཡིན། ཐ་མའི་ལ་ཡོག་རང་ལ་འཁོར་རྒྱུ་རེད། ལར་དགྲ་གྲོགས་དགའ་སྡུག་ཟེར་བ་བྱིས་པའི་རྩེད་མོ་རེད། ཆགས་སྡང་དགའ་སྡུག་གི་རྩ་བ་རང་ཁུངས་ནས་ཡོང་བ་ཞིག་རེད། ལེ་ལན་ཐམས་ཅད་རང་ལ་གདའ་ཞེས་གསུངས་པ་ཐུགས་མད། ང་ལྟ་བུ་ལ་བཀའ་གདམས་པའི་དགེ་བའི་བཤེས་གཉེན་རྣམ་པས་གསུངས་པའི་བུད་བསྙེགས་ཐོབ་གསུམ་སྟེ། མི་གྲལ་ནས་བུད། ཁྱི་གྲལ་དུ་བསྙེགས་ན། ལྷ་གྲལ་ཐོབ་རྒྱུ་ཅན་པོ་དཀའ་ཡང་། འོན་ཀྱང་མི་གྲལ་ལ་བསྡད་པའི་དུས་ཚོད་རིང་ཆེ་སྟབས་ཀྱིས། ད་ཆོག་ཐལ་བསམ་པའི་ས་ཚོད་དུ་ཐོན་པ་རེད། བླ་མ་རེད་སྙམ་མཁན་དག་གིས་ཀ་དག་ཁྲེགས་ཆོད་ཀྱི་དགོངས་པ་དང་བསྟུན་ནས་ཐུགས་ཡིད་དབྱེར་མེད་དུ་བསྲེས་དང་། ང་མ་བཟང་རུང་ཆོས་བརྒྱུད་བཟང་སྟོབས་ཀྱིས་དད་པ་དང་མོས་པའི་སྟོབས་ཀྱིས་བྱིན་རླབས་ཐོབ་རྒྱུ་རེད། གྲོགས་པོ་ངོ་ཤེས་ཡིན་བསམ་པ་དག་གིས་ལྷག་བསམ་ལྷད་མེད་ཀྱི་གཏམ་ལ་ཉོན་དང་ལུགས་གཉིས་ལེགས་པའི་འདུན་མའི་ཁ་ཕྱོགས་རེ་རྙེད་སྲིད། གཞན་ཡང་བཟང་ལན་ངན་གྱིས་འཇལ་ཟེར་བ་མིན་ཡང་། རྐྱེན་སྣ་ཚོགས་པའི་དབང་གིས་ཐུགས་འཁོན་འཛིན། ཕྲག་དོག ངན་སེམས་འཆང་དགོས་ཀྱི་གཞི་རུ་ང་གྱུར་སོང་བ། སྤྱིར་ཚད་པའི་ནད་ལ་ག་བུར་བཟང་བ་ཡིན་ཡང་། ཚད་པ་མ་སྨིན་པ་ལ་དུག་ཏུ་འགྱུར་བའང་སྲིད་པས། དེ་འདྲའི་རིགས་ལ་མས་བུ་ལ་ཁྱད་པར་མེད་ཀྱང་ན་བའི་བུ་ལ་ལྷག་པར་བརྩེ་བ་བཞིན། བཀྲེན་ལ་བརྩེ་དང་མ་རུངས་པ་ལ་བརྩེ། །ཀུན་འཁྲུགས་ལ་བརྩེ་བག་མེད་པ་ལ་བརྩེ། །ཡུལ་གྱི་གཞན་དབང་ཅན་ལ་སྙིང་རྗེ་དང༌། །ལོག་པར་མངོན་པར་ཞེན་ལ་སྙིང་རྗེའོ། ཞེས་གསུངས་པ་ལྟར། བཟང་ངན་ལས་ཀྱིས་འབྲེལ་ཚད་ལ་སྨོན་ལམ་བཟང་པོ་རེ་བརྒྱག་བཞིན་ཡོད། ཚང་མས་ཐུགས་སེམས་བདེ་མོ་གྱིས། ཆོས་པ་ཞིག་ཡིན་དུས་གུ་ཡངས་བློ་བདེ་ཡིན་དགོས་པ་རེད། རི་ཁྲོད་འདི་ལ་ཕེབས་ནས། དམ་པའི་ལྷ་ཆོས་ལ་ཐུགས་གཞོལ་ན། དང་པོ་ཕྱི་དབེན་པས་མ་ཚད་ནང་དབེན་པ་ཞིག་བྱས་པའི་ཐོག་ལ། གསང་བའི་དབེན་པ་རང་རྒྱུད་ནས་བཙལ་ཏེ། ད་སྔོན་ཐོག་མེད་ནས་དཀའ་ཞིང་ངལ་ནས་ཐང་ཆད་ཡོད་པའི་སེམས་དེ་ལ་ངལ་ཞིག་གསོ་རུ་ཆུགས། འདུ་འཛི་བྲེལ་ཟིང་གི་ནང་ནས་བསླད་སྐྱོན་ཕོགས་པའི་དུག་རོ་ཁོག་ཏུ་ཡོད་པ་ཚང་མ་སྔོན་འགྲོ་རང་རྒྱུད་སྦྱོང་བའི་ཆོས་ཀྱིས་གཙང་མར་བྱས་པའི་རྗེས་སུ། ཀུན་མཁྱེན་ཡབ་སྲས་ཀྱི་གདམས་ཟབ་གསུང་གི་བདུད་རྩི། སྙིང་ཐིག་སྙིང་གི་ཐིག་ལེའི་གསོལ་སྨན་ཞིག་བཞེས་དང་། ལང་ཚོ་གསར་བའི་གཟི་མདངས་ཤིག་གཞི་ནས་རྙེད་དེ། མཐོང་སྣང་གཟིགས་ཕྱོགས་གསར་པ། རང་གཞན་གཉིས་ཕན་གྱི་རང་གཞན་གཉིས་དོན་ལ་ཐུགས་རྒྱ་མདུན་ལམ་སྔར་ལས་ཡངས་བ་ཞིག་འཆར་རྒྱུ་ཡོད་པ་ཡིན་པས། ཚང་མས་དེ་བཞིན་ཐུགས་སེམས་སྐྱིད་པོ་བག་ཕེབས་མོ་ཞིག་གི་སྟེང་ནས་ཚེ་ཆོས་གཉིས་ཀ་མཐར་ཕྱིན་ཡོང་རྒྱུའི་སྨོན་འདུན། ད་སྐྱིད་ལ་ཆོས་འཕེལ་གྱི་ཚིག་མཚམས་འདིའི་ཐོག་ནས། ཐེངས་འདིའི་ཆོས་ཁྲིད་ཀྱི་མཚམས་རེ་ཞིག་འདི་ནས་བཞག དེ་རིང་དགོང་མོ་ནས་ང་ཡང་མཚམས་ལ་བསྡད་འགྲོ་བ་ཡིན། ཆོས་ཁྲིད་རེ་རན་པའི་སྐབས་སུ་གཙུག་ལག་ཁང་གི་ནང་འདི་ནས་ཡང་ཕལ་ཆེ་བ་དང་མཉམ་འཛོམས་རེ་ཡོང་གི། ངོ་རེ་མཐོང་ནི་རེད། ཆོས་ཕྱོགས་ཀྱི་གླེང་མོལ་རེ་ཞོར་གྱིས་རེད་རྒྱུ་རེད། དེས་ན་ཚང་མ་སྐུ་ཚེ་རིང་། ཚེ་ཆོས་མཐར་ཕྱིན་སྒྲུབ་ལ་བར་ཆད་མེད་པའི་སྨོན་ལམ་འདེབས། |