 ཁྱབ་བདག་པདྨ་སྐལ་བཟང་གི་གསུང་འབུམ་གླེགས་བམ་བཅུ་བདུན་པ།ཆགས་མེད་བདེ་སྨོན་གྱི་ཚིག་དོན་རྣམ་བཤད་རིན་ཆེན་པདྨ་རཱ་གའི་ཕྲ་ཚོམ།རྫོགས་ཆེན་པདྨ་སྐལ་བཟང་། སྤྲུལ་ཟླ་བའི་འོད་ཟེར་གྱིས་ཡི་གེར་ཕབ།པདྨའི་འོད་སྣང་ཚོགས་པ།ཀན་སུའུ་མི་རིགས་དཔེ་སྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཐུགས་རྗེ་ཆེ་ཞུ།༈ སྐྱེ་རྒུའི་བདེ་སྐྱིད་ཀྱི་འབྱུང་གནས་རྒྱལ་བ་མཉམ་མེད་དོན་ཀུན་གྲུབ་པ་ཆེན་པོའི་གསང་གསུམ་ཡེ་ཤེས་ཀྱི་སྒྱུ་འཕྲུལ་ངོ་མཚར་ཆོས་སྐུའི་རིང་བསྲེལ་གྱི་གཟུགས་སུ་བལྟམས་པ་གསུང་རབ་རྒྱལ་བའི་བཀའ་འགྱུར་རིན་པོ་ཆེ་དང་། ཐུབ་པའི་དགོངས་པ་རང་སྟོབས་ཀྱི་བཀྲལ་ནུས་པའི་འཕགས་ཡུལ་པཎ་གྲུབ་རྣམས་ཀྱི་མཛད་པའི་བསྟན་འགྱུར་རིན་པོ་ཆེ་སྟེ་མདོ་སྔགས་གཉིས་ལྡན་གྱི་ཡོངས་རྫོགས་བསྟན་པ་རྒྱ་མཚོ་འདི་ཉིད། དེང་གི་ཆར་གངས་རིའི་ལྗོངས་ཀྱི་ཡེ་གེ་ཁོ་ནའི་གཟུགས་སུ་བཞུགས་པ་ནི་སྤྲུལ་པའི་མཁན་སློབ་ཆོས་གསུམ་གྱི་ཐུགས་བསྐྱེད་ཉག་གཅིག་ལས་བྱུང་བ་དང་། དེ་དག་མི་ནུབ་བརྒྱུད་འཛིན་ཡུན་གནས་ཀྱི་ཆེད་དུ་གངས་ལྗོངས་ཆོས་བརྒྱུད་ཁག་ལས་བྱོན་པའི་རིས་སུ་མ་ཆད་པའི་སྐྱེས་ཆེན་རྣམས་ཀྱིས་བཀའ་བསྟན་རིན་པོ་ཆེའི་དགོངས་སྙིང་ཅན་གྱི་གསང་རབ་གླེགས་བམ་སྟོང་ཕྲག་མང་པོ་མཛད་ཅིང་། དཀའ་སྤྱད་ཐུགས་བརྩོན་སྣ་ཚོགས་གྱིས་མ་ཕྱི་གསར་བསྐྲུན་དང་བསྐྱར་བསྐྲུན་སོགས་ཀྱིས་འཇིག་རྟེན་གྱི་ཁམས་སུ་བཞུགས་པ་མཛད་མུས་བཞིན། དེང་གི་ཆར་གློག་རྡུལ་འཕྲུལ་ཆ་དང་དྲྭ་རྒྱའི་དུས་རབས་ཀྱི་འགྲོས་དང་བསྟུན་ནས་རྒྱལ་སྤྱིའི་རིག་གཞུང་སྤྱི་མཚུངས་ལྟར། རྒྱལ་བའི་གསུང་རབ་རིན་པོ་ཆེ་གཙོ་བོར་གྱུར་པའི་འཕགས་བོད་མཁས་པའི་གཞུང་ལུགས་རྣམས་དྲྭ་ཐོག་ནས་བཤེར་འཚོར་དང་འདྲ་བཤུས་སྒྲིག་གཟོ་སོགས་སྟབས་བདེའི་ལམ་ནས་བཀོལ་སྤྱོད་ཐུབ་པའི་གཞི་རྒྱ་ཆེ་བའི་འཆར་འགོད་དངོས་སུ་ལས་བཞིན་པར། མཆོག་སྤྲུལ་མུ་ར་རིན་པོ་ཆེའི་གཙོས་པདྨའི་འོད་སྣང་ཚོགས་པ་ནས་༧སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་གི་གསུང་འབུམ་མཚན་བཟང་སོ་གཉིས་ཀྱི་གྲངས་ལྡན་ཅན་འདིར་གནང་འབྱོར་བྱུང་བ་ལགས་ན། ཁོང་རྣམ་པའི་རྨད་དུ་བྱུང་བའི་མཛད་རྒྱས་ལ་སྙིང་ནས་ཐུགས་རྗེ་དང་བཀའ་དྲིན་བླ་ལྷག་ཏུ་ཆེ་ཞུ་བ་དང་ཆབ་གཅིག་སླད་ནས་ཀྱང་གསུང་རབ་རིན་པོ་ཆེ་ཅི་རིགས་དཔེ་སྐྲུན་གནང་ན་འདི་གར་འདྲ་བཤུས་གནང་སྩོལ་ཡོང་བར་ཅི་ནས་ཀྱང་བཀའ་དྲིན་མི་ཆུང་བ་ཞུ། ཞེས་དྲྭ་རྒྱའི་དཔེ་མཛོད་འགན་འཛིན་པ་རྫོགས་ཆེན་བསྟན་འཛིན་རྣམ་དག་ནས་ཕུལ།། ཆགས་མེད་བདེ་སྨོན་གྱི་ཚིག་དོན་རྣམ་བཤད་རིན་ཆེན་པདྨ་རཱ་གའི་ཕྲ་ཚོམ།ཆགས་མེད་བདེ་སྨོན་གྱི་ཚིག་དོན་རྣམ་བཤད་རིན་ཆེན་པདྨ་རཱ་གའི་ཕྲ་ཚོམ་ཞེས་བྱ་བ་བཞུགས་སོ།། འགོ་བརྗོད།ཚོགས་གཉིས་ཆུ་གཏེར་བསྲུབས་པ་ལས་འཁྲུངས་ཤིང་།། སྤངས་རྟོགས་དཀྱིལ་འཁོར་ཆ་ཤས་ཡོངས་སུ་རྫོགས།། མཁྱེན་བརྩེ་འོད་ཟེར་འབུམ་གྱི་དྲྭ་བ་ཅན།། ཐུབ་དབང་ལྷ་མིའི་བླ་མར་གུས་ཕྱག་འཚལ།། གྲངས་མེད་བསྐལ་བར་གོམས་པའི་ཐུགས་བསྐྱེད་ལས།། དཔག་མེད་འགྲོ་ལ་མཚན་དཔེའི་སྐུར་སྣང་བ།། མཚུངས་མེད་འོད་སྣང་མཐའ་ཡས་གང་དེ་ལ།། ཟོལ་མེད་སྒོ་གསུམ་གུས་པས་ཕྱག་འཚལ་ལོ།། མཁྱེན་པས་ཤེས་བྱའི་ཆོས་ཀུན་ཇི་བཞིན་གཟིགས།། བརྩེ་བས་འགྲོ་ཚོགས་ཀུན་ལ་བུ་ལྟར་དགོངས།། ནུས་པས་ངན་འགྲོའི་གཡང་ལས་སྐྱོབ་མཛད་པ།། གངས་རིའི་མགོན་པོ་སྤྱན་རས་གཟིགས་ལ་འདུད།། བདེ་ལྡན་ཞིང་དུ་བྱང་སེམས་མཐུ་ཆེན་ཐོབ།། གསང་སྔགས་བཀའ་ཡི་སྡུད་པོ་རྡོ་རྗེ་འཛིན།། རབ་འབྱམས་ཞིང་དུ་མཚན་གྱི་གྲགས་འབར་བ།། གསང་བའི་བདག་པོས་ཤིས་པའི་སྣང་བ་སྩོལ།། སྣང་བ་མཐའ་ཡས་ཐུགས་ཀའི་ཧྲཱིཿཡིག་ལས།། སིནྡྷུའི་དྭངས་མཚོར་པདྨའི་སྡོང་པོའི་རྩེར།། ཐོལ་བྱུང་བརྫུས་སྐྱེས་ངོ་མཚར་སྤྲུལ་བའི་སྐུ།། རྩ་གསུམ་ཀུན་འདུས་པདྨ་ཀཱ་རས་སྐྱོངས།། སྤྱན་རས་གཟིགས་དངོས་ཀརྨ་ཆགས་མེད་ཞབས།། སེམས་དཔའ་ཆེན་པོ་ཆོས་ཀྱི་དབང་པོ་སོགས།། བརྒྱུད་པའི་བླ་མ་རྣམས་དང་ཡི་དམ་ལྷ།། མཁའ་འགྲོ་ཆོས་སྐྱོང་བཅས་ལ་གུས་པས་འདུད།། རྒྱལ་ཀུན་མཁྱེན་རབ་ཕུང་པོ་གཅིག་གྱུར་མེ་འབར་རལ་གྲིའི་འཕྲུལ་འཁོར་ཅན།། གང་ཐུགས་པདྨའི་ཟེའུ་འབྲུར་སྨིན་པས་མི་འཇིགས་སྤོབས་པའི་གཏེར་བརྒྱད་གྲོལ།། འཆད་རྩོད་རྩོམ་པའི་སྤོབས་པ་ཐོགས་མེད་ཡང་དར་བསྟན་པའི་སྒྲོན་མེ་སྦར།། ཁྱབ་བདག་བླ་མ་༧པདྨ་སྐལ་བཟང་བདེ་ཆེན་འཁོར་ལོའི་རྒྱན་དུ་རོལ།། ཐར་མེད་འཁོར་བའི་བཙོན་ར་འདི་ལས་རྣམ་དག་བདེ་ཆེན་ཞིང་ཁམས་སུ།། སྐྱེ་བའི་རྒྱུ་དང་མི་སྐྱེའི་གེགས་སོགས་རབ་གསལ་མན་ངག་འབུམ་གྱི་བཅུད།། མཚུངས་མེད་བླ་མའི་ལྗགས་ཁྲིད་ཟབ་མོ་དོན་བཟང་གསུང་གི་སྙིང་པོ་ཞིག། ཕྱི་རབས་གདུལ་བྱའི་ཆེད་དུ་བསམ་སྟེ་ངས་འདི་སྤེལ་གྱིས་གུས་པས་ལོངས།། དེ་ལྟར་ཤིས་པར་བརྗོད་པའི་ཚིག་གིས་མདུན་བསུས་ཏེ་གང་གླེང་བར་བྱ་བ་ནི། རབ་འབྱམས་ཕྱོགས་བཅུའི་ཞིང་ན་བཞུགས་པའི་དུས་གསུམ་གྱི་རྒྱལ་བ་སྲས་དང་བཅས་པ་ཡོངས་ཀྱི་གསང་བ་གསུམ་གྱི་ཕུང་པོ་ཐམས་ཅད་གཅིག་ཏུ་འདུས་པའི་བདག་ཉིད། རྒྱུད་དོན་འཆད་ལ་གསང་བའི་བདག་པོ། མན་ངག་བཀྲལ་ལ་དགའ་རབ་དཔའ་བོ། རིག་པའི་གནས་མཐའ་དག་ལ་མཁས་པ་འཛམ་གླིང་མཛེས་པའི་རྒྱན་དྲུག་མཆོག་གཉིས་ཀྱི་བློ་ཡི་སྤོབས་པ་ཕྱོགས་གཅིག་ཏུ་དྲིལ་བ་ལྟ་བུ། ཁྱད་ཆོས་ཆེ་བ་དྲུག་ལྡན་གསང་ཆེན་སྔ་འགྱུར་རྙིང་མ་པའི་བསྟན་པའི་སྲོག་ཤིང་ཆེན་མོ་བཀའ་དྲིན་མཚུངས་ཟླ་དང་བྲལ་བ་དོན་གྱི་སླད་དུ་མཚན་ནས་སྨོས་ན་རིས་སུ་མ་ཆད་པའི་འགྲོ་བ་ལྷ་དང་བཅས་པའི་གཙུག་རྒྱན་དམ་པ་༧ཐུབ་བསྟན་ལུང་རྟོགས་བསྟན་པའི་རྒྱལ་མཚན་ནམ་༧སྐྱབས་རྗེ་ཡིད་བཞིན་ནོར་བུ་རྫོགས་ཆེན་པདྨ་སྐལ་བཟང་རིན་པོ་ཆེ་མཆོག་ཉིད་ཀྱིས་ཕྱོགས་མེད་ནས་འདུས་པའི་སྐལ་བཟང་སློབ་ཚོགས་ཡོངས་ལ་རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་གྱི་ཡང་དབེན་ནས། བདེ་ཆེན་ཞིང་ཁྲིད་ཆེན་མོའི་བཀའ་ཆོས་གནང་བའི་གདམས་ཟབ་འདི་ཟེར་སྡེར་ལས་བཤུས་ཏེ་ཡིག་འཇོག་བགྱིད་པ་ལ་རྩ་གསུམ་སྲུང་མས་གནང་བ་བསྩལ་དུ་གསོལ།། ཉིན་དང་པོའི་བཀའ་ཆོས།ད་དེ་རིང་གྲུབ་བརྙེས་རིག་འཛིན་གོང་མའི་གདན་ས། འཇའ་ལུས་འོད་སྐུར་གྲོལ་བའི་རྗེས་ཤུལ། རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་གྱི་གཙུག་ལག་ཁང་དུ། འུ་ཅག་ཆོས་གཅིག་ལ་དམིགས་ཡུལ་གཏད་པའི་སྒོ་ནས་ཆོས་ར་གཅིག་གི་ནང་ལ་མཉམ་དུ་འདུས་ཏེ། དུས་བསྐལ་བའི་ཁུག་སོ་འདིར། ཐེག་ཆེན་མདོ་དང་སྔགས་ཀྱི་ཆོས་ལ་མཉམ་དུ་སྤྱོད་རྒྱུའི་སྐལ་བ་དང་ལྡན་རྒྱུ་འདི། རྒྱུ་མེད་རྐྱེན་མེད་སྟབས་ལེགས་སྟེས་དབང་གིས་བྱུང་བ་ཞིག་ག་ལ་ཡིན། འདི་སྔར་བསགས་བསོད་ནམས་ཀྱི་དབང་གིས་མཉམ་པོར་འཛོམས་ནས་ཆོས་འཆད་ཉན་བྱེད་པའི་སྨོན་ལམ་ཞིག་མཉམ་དུ་ཐེབས་སོང་བའི་རྟགས་ཡིན་པ་ནི་སྨོས་མ་དགོས་ལ། འདིའི་ནང་དུ་ཐུགས་རྗེ་ཡས་སྤྲུལ་གྱི་བསྟན་འཛིན་གྱི་སྐྱེས་ཆེན་དམ་པ་རྣམས་དང་། མཁས་བཙུན་གཉིས་ལྡན་གྱི་མཁན་སྤྲུལ་སྡེ་སྣོད་འཛིན་པ་མང་རབ་བཞུགས་པ་མ་ཟད། དེ་དང་མཉམ་དུ་མཆོག་གསུམ་སྐྱབས་ཀྱི་དྭངས་མར་བཟུང་ནས་འཇིག་རྟེན་ཡང་དག་གི་ལྟ་བ་ལ་དད་པའི་མི་སྐྱ་ཕོ་མོ་ཆོས་དད་པ་ཡང་ད་ལྟའི་བདེ་ཆེན་ཞིང་ཁྲིད་ཀྱི་ཆོས་ཚོགས་འདིར་མཉམ་དུ་ཞུགས་ཡོད་ཅིང་། འདིར་ཡོད་མང་ཆེ་བ་ནི་ས་ཆ་འདིའི་ཐོག་གི་མི། མདོ་ཁམས་གྲུབ་དབང་རྫོགས་ཆེན་པའི་གདན་ས་ཆོས་འཁོར་ཆེན་པོའི་ཉེ་འདབས་སུ་ཡོད་པ་དང་། དེ་དང་འབྲེལ་བའི་ཆོས་བརྒྱུད་གཅིག་པའི་མི་ཤ་སྟག་ཡིན་པས། ས་ཆ་ཆོས་ས་ཆོས་ཡུལ་གྱི་མི་དང་། ས་ཡག་སའི་གྲོ་མ་དེ་གཞན་གཅིག་དང་འདྲ་རྒྱུ་མ་རེད་སྙམ་པའི་འདུན་ཐང་ཡོད་པའི་ཐོག་ནས། ཁྱེད་མི་སྐྱ་ཕོ་མོ་ཚོས་ཆོས་ཉན་པའི་དུས་ཀྱི་ཆུ་ཚོད་གཅིག་གཉིས་པོའི་ཚེ་ཆོས་ཁྲིད་མ་གྲོལ་བར་འདུག་གཅིག་བྱས་ཏེ་ཁ་བརྡ་མི་བྱེད་པར་རྣ་བས་ཆོས་ཀྱི་སྒྲ་ཉན། སེམས་ཀྱིས་ཆོས་ཀྱི་དོན་སེམས་ནས། འཁོར་ལོ་སྐོར་རྒྱུ་དང་། ཕྲེང་བ་བགྲང་རྒྱུ་ཡང་བསྐྱུར་ནས་ཉན་དགོས་པ་ཡིན། ད་རེས་ཆོས་ར་འདིའི་ནང་དུ་ལོ་བཅོ་བརྒྱད་མན་ཆད་ཁྲིད་མ་ཡོང་ཞེས་བཤད་པ་དེ་ཅི་ཞིག་གི་དོན་ཡིན་ཞེ་ན། ལོ་བཅོ་བརྒྱད་མན་ཆད་ནི་བྱིས་པ་ཡིན་པས་ཆུང་སྐྱོན་ཡོད་ཕྱིར། རང་གིས་ཆོས་ཉན་མི་ཤེས་ཤིང་གཞན་ལའང་ཉན་མ་བཅུག་ན། དེའི་བར་ནས་རང་གཞན་གཉིས་ཀས་དོན་མེད་ཀྱི་སྡིག་གསོག་པར་དོགས་ནས་མ་ཡོང་ཞེས་པ་ཡིན། སྤྱིར་ན་བདེ་ཆེན་ཞིང་སྒྲུབ་དང་། བདེ་ཆེན་ཞིང་ཁྲིད་གཉིས་ལ་ཁྱད་པར་ཡོད། ཆོ་ག་ཞིག་ལ་བརྟེན་ནས་འོད་མཚན་དང་བསྙེན་པ་བགྲང་རྒྱུ་གཙོར་བཟུང་གིས་སྒྲུབ་པ་ཞག་བདུན་གྱི་སྦྱོར་དངོས་རྗེས་གསུམ་བསྙེན་སྒྲུབ་ཀྱི་རྣམ་པ་ཅན་དེ་ཞིང་སྒྲུབ་ཡིན་པ་དང་། འཆད་ཁྲིད་ཀྱི་ཐོག་ནས་ཚིག་རེ་དང་དོན་རེ་སྦྲགས་ཏེ་ཁྲིད་པ་དང་། ཁྲིད་པའི་དོན་དེ་ཁྲིད་སྦྱང་གི་སྒོ་ནས་ཐུན་བཞི་ཆག་མེད་ཀྱིས་ཉམས་ལེན་བྱེད་པ་དེ་ཞིང་ཁྲིད་ཡིན། ད་རེས་ང་ཚོས་མཁས་གྲུབ་རཱ་ག་ཨ་སྱའམ་གྲུབ་ཐོབ་ཀརྨ་ཆགས་མེད་ཚང་གིས་མཛད་པའི་བདེ་སྨོན་ཁྲིད་ཀྱི་ལུགས་ལྟར་བྱས་ནས་འཆད་བཞིན་ཡོད་པས་ན་ཞིང་ཁྲིད་རེད། དེས་ན་རབ་ཆོས་ཁྲིད་འདིའི་མགོ་རྔ་གཉིས་ཀ་ཚང་ཞིང་ཐུན་བཞིའི་ཁྲིད་སྦྱང་ལ་ཆག་མེད་ཀྱིས་ཞུགས་ཐུབ་པ་དང་། འབྲིང་ཡིན་ན་རང་རང་གི་ཁམས་དང་མོས་པ་ལ་བསྟུན་ནས་དང་ཞིང་དད་པའི་ཐོག་ནས་ཆོས་ར་རྡོག་པས་བརྫིས་ནས་བཟང་འབྲེལ་འཇོག་པ་དང་། ཐ་མ་ཡིན་ཡང་རང་གིས་ཆོས་ཞེས་པ་ཆེན་པོ་ཞིག་བསྒྲུབ་མ་ཤེས་ཤིང་མ་འགྲུབ་ན་ཡང་། གཞན་གྱིས་སྒྲུབ་པ་ཉམས་ལེན་བྱེད་སའི་དབེན་པའི་རི་ཁྲོད་ནས་བསམ་གཏན་གྱི་ཚེར་མ་དང་མིག་ལྟོས་ངན་པ་མི་འཇོག་པ་གནད་ཆེ་ཚུལ་གསལ་བཤད་མ་བྱས་ཀྱང་ཚང་མས་མཁྱེན་གསལ་ཡིན་པས་དེ་ལ་བསྐྱར་ཟློས་མི་དགོས་ཤིང་། ཐམས་ཅད་ཀྱིས་ཆོས་ཁྲིད་ཀྱི་སྐབས་སུ་བདེ་སྨོན་གྱི་དཔེ་ཆ་ལ་བལྟས་ནས་ཡི་གེའི་འབྲུ་མནན་ནས་ཉན་དགོས། ད་དེ་ནས་ཆོས་ཁྲིད་དངོས་ཀྱི་དབུ་གཟུང་རྒྱུ་ཡིན། དུས་གསུམ་སངས་རྒྱས་ཐམས་ཅད་ཀྱི་ངོ་བོ། རིགས་དང་དཀྱིལ་འཁོར་རྒྱ་མཚོའི་ཁྱབ་བདག བཀའ་དྲིན་མཚུངས་ཟླ་མ་མཆིས་པ། དཔལ་མགོན་བླ་མ་དམ་པའི་ཞབས་ཀྱི་པདྨོའི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་པར་མཛད་དུ་གསོལ།། ༈ གང་གི་ཞལ་བཟང་བལྟ་བས་མི་ངོམས་གེ་སར་འཛུམ་པའི་མདངས་བཀྲ་ཞིང་། །མཚན་དཔེའི་གཟི་འོད་ཟེའུ་འབྲུ་གསར་བས་འགྲོ་ཀུན་མིག་གི་བདུད་རྩིར་གྱུར། །ཐུགས་རྗེའི་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་པའི། །ཐུབ་དབང་པདྨ་དཀར་པོའི་ཞབས་པད་དེ་རིང་བདག་བློའི་ཡིད་མཚོར་སྐྱོངས།། ༈ བདེ་བ་ཅན་ན་འོད་དཔག་མེད་དེ་རི་བོ་ཏ་ལར་སྤྱན་རས་གཟིགས། །འཛམ་བུའི་གླིང་དུ་པདྨ་རྒྱལ་པོ་འགྲོ་ལ་ཐ་དད་སྣང་གྱུར་ཀྱང་། །སྐུ་གསུམ་མཛད་པའི་ངོ་བོ་གཅིག་བསྡུས་དཔལ་ལྡན་སངས་རྒྱས་པདྨ་སྐྱེས། །གངས་ལྗོངས་འགྲོ་ལ་ལྷག་པར་བརྩེ་བའི་ཐུགས་བརྩེའི་འོད་ཟེར་ཅན་ལ་འདུད།། ༈ ཆོས་ཟད་ཀློང་དུ་ཆོས་སྐུའི་དགོངས་པ་བརྙེས། །འོད་གསལ་དབྱིངས་སུ་ལོངས་སྐུའི་ཞིང་སྣང་གཟིགས། །གདུལ་བྱའི་སྣང་ངོར་སྤྲུལ་སྐུས་འགྲོ་དོན་མཛད། །ཀུན་མཁྱེན་ཆོས་ཀྱི་རྒྱལ་པོ་ལ་ཕྱག་འཚལ།། ༈ མཁྱེན་པས་ཤེས་བྱ་ཀུན་ཀྱི་དེ་ཉིད་གཟིགས། །ཐུགས་བརྩེའི་འོད་ཟེར་གདུལ་བྱའི་དཔལ་དུ་ཤར། །ཟབ་ལམ་ཐེག་རྩེའི་བསྟན་པ་གསལ་མཛད་པ། །རིག་འཛིན་འཇིགས་མེད་གླིང་པ་ལ་ཕྱག་འཚལ།། ༈ དུས་གསུམ་ཀུན་མཁྱེན་པདྨ་འབྱུང་གནས་ཀྱི། །ཟབ་གཏེར་བདག་པོར་མངའ་གསོལ་འཁོར་ལོས་སྒྱུར། །སངས་རྒྱས་གླིང་པའི་ཡང་སྤྲུལ་སྦས་ཚུལ་འཆང་། །ཀུན་བཟང་གཞན་ཕན་ཞབས་ལ་གསོལ་བ་འདེབས།། ༈ འཕགས་པ་འཇིག་རྟེན་དབང་ཕྱུག་ཐུགས་རྗེའི་འཕྲུལ། །འགྲོ་བ་ཐར་ལམ་བགྲོད་པའི་དེད་དཔོན་མཆོག །འབྲེལ་ཚད་དོན་ལྡན་ཀློང་ཆེན་རྣལ་འབྱོར་པ། །འཇིགས་མེད་རྒྱལ་བའི་མྱུ་གུར་གསོལ་བ་འདེབས།། ༈ དུས་གསུམ་རྒྱལ་བའི་སྤྱི་གཟུགས་པདྨ་འབྱུང་། །འཇའ་ལུས་རྡོ་རྗེའི་སྐུ་བརྙེས་བི་མ་ལ། །དབྱེར་མེད་ཐུགས་རྗེ་གཅིག་བསྡུས་སྤྲུལ་བའི་སྐུ། །མི་འགྱུར་ནམ་མཁའི་རྡོ་རྗེར་གསོལ་བ་འདེབས།། ༈ ཨོ་རྒྱན་རིག་འཛིན་ཆེན་པོའི་རིང་ལུགས་ཀྱི། །བཤད་སྒྲུབ་བསྟན་པའི་རྒྱལ་མཚན་འཛིན་མཛད་ཅིང་། །ཡོན་ཏན་ནོར་བུའི་མཛོད་མངའ་ཆོས་ཀྱི་རྗེ། །དཔལ་ལྡན་བླ་མའི་ཞབས་ལ་གསོལ་བ་འདེབས།། ༈ འཕགས་ཡུལ་མཁས་པའི་དབང་ཕྱུག་ཟླ་བ་གྲགས། །གངས་ལྗོངས་འཇམ་པའི་དབྱངས་དངོས་ཀུན་མཁྱེན་རྗེ། །དབྱེར་མེད་ཐུགས་རྗེའི་ཡས་སྤྲུལ་དགེ་བའི་བཤེས། །གཞན་ཕན་ཆོས་ཀྱི་སྣང་བར་གསོལ་བ་འདེབས།། ༈ བརྒྱུད་གསུམ་བྱིན་ཐོབ་དགོངས་པའི་རྩལ་ཆེན་རྫོགས། །སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས། །གདོད་མའི་མགོན་པོ་མི་ཡི་བརྫུར་ཞུགས་པ། །འཇིགས་མེད་ཡོན་ཏན་མགོན་པོར་གསོལ་བ་འདེབས། །དགོངས་བརྒྱུད་རྟོགས་པ་འཕོ་བར་བྱིན་གྱིས་རློབས།། ༈ ཧྲཱིཿའོག་མིན་ཆོས་ཀྱི་དབྱིངས་ཀྱི་ཕོ་བྲང་ན། །དུས་གསུམ་སངས་རྒྱས་ཀུན་ཀྱི་ངོ་བོ་ཉིད། །རང་སེམས་ཆོས་སྐུར་མངོན་གསུམ་སྟོན་མཛད་པའི། །རྩ་བའི་བླ་མ་མཆོག་ལ་གསོལ་བ་འདེབས། །བདག་གཞན་འགྲོ་བའི་བློ་སྣ་ཆོས་ལ་སྒྱུར།། ༈ གང་ཞིག་གསེར་མཆོག་རང་བཞིན་རི་རབ་ལ་གནས་མནྡཱ་ར་དང་ལྷར་བཅས་གནོད་སྦྱིན་དང་། །ལྡེང་ཀ་ནོར་བུའི་འོད་ཀྱིས་མུན་པ་སེལ་མཛད་ས་འོག་གནས་པའི་ཀླུ་རྣམས་གང་ཡིན་དང་། །གངས་ཅན་རིར་ནི་དཔལ་གྱིས་རོལ་ཞིང་རབ་ཏུ་དགའ་བའི་རིག་པ་འཛིན་པ་གང་ཡིན་པ། །དེ་དག་ཐམས་ཅད་ཐར་བ་དམ་པའི་སྒོར་གྱུར་ཐུབ་པའི་གསུང་ཉན་ཕྱིར་ན་འདིར་གཤེགས་ཤིག། ༈ གང་དག་ཕྱོགས་བཅུའི་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་དམ་པའི་ཆོས་ཀྱི་ཆར་འབེབས་ཀྱིས། །གསན་པར་འདོད་པ་ཐམས་ཅད་འདིར་གཤེགས་ཤིག། ༈ ནམ་མཁའི་མཐས་གཏུགས་འཇིག་རྟེན་ཐམས་ཅད་ན། །ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན། །གྲུལ་བུམ་མིའམ་ཅི་དང་ལྟོ་འཕྱེ་སོགས། །རྫུ་འཕྲུལ་ཡིད་ལྡན་ཐམས་ཅད་འདིར་ཤོག་ཅིག། ༈ བསྐལ་བ་སྟོང་དུ་ཐོས་པར་རབ་དཀའ་ཞིང་། །གང་ཞིག་ཐོས་ན་གཏན་དུ་བདེ་བྱེད་པ། །བདེ་གཤེགས་གསུང་སྙན་བདུད་རྩི་ཆོས་ཀྱི་སྒྲ། །བདག་གིས་སྦྱིན་གྱིས་དད་ཅིང་གུས་པས་ཉོན།། ༈ གང་ཞིག་གཏན་གྱི་སྐྱབས་གནས་མཆོག་གྱུར་པ། །དཀོན་མཆོག་གསུམ་གྱི་ཡོན་ཏན་བསམ་མི་ཁྱབ། །དེ་ལ་དད་བྱས་རྣམ་སྨིན་ཡང་དེ་བཞིན་ཏེ། །བསྐལ་བ་བྱེ་བ་ཁྲག་ཁྲིག་བགྲང་ན་ཡང་། །དཀོན་མཆོག་མཚན་ཐོས་ཙམ་ཡང་རྙེད་དཀའ་ཞིང་། །རྣམ་པར་གྲོལ་བ་རིན་ཆེན་སྣ་ཚོགས་དང་། །ཟབ་མོ་རྒྱལ་བའི་བཀའ་འདི་གུས་པས་ཉོན།། ༈ ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་ཀྱི་སྒྲ་རྣམས་ཇི་ཙམ་པ། །ཐམས་ཅད་སྐད་དུ་ཆོས་འདི་འགྱུར་བར་ཤོག། ༈ འོ་ན་ནམ་མཁའི་མཐའ་དང་མཉམ་པའི་མ་རྒན་རིགས་དྲུག་གི་སེམས་ཅན་ཐོག་མེད་ནས་མཐའ་མེད་བར་ལ་དུས་རྟག་ཏུ་འཁོར་བར་འཁྱམས་པའི་སེམས་ཅན། སྡུག་བསྔལ་གསུམ་གྱིས་ཉམ་ཐག་པ་འདི་དག་ཐམས་ཅད། དཔལ་གདོད་མའི་མགོན་པོའི་གོ་འཕང་རིན་པོ་ཆེ་མཆོག་ལ་འགོད་པར་བྱ། དེའི་ཆེད་དུ་དམ་པའི་ཆོས་ཟབ་མོ་ཉན་པས་མ་ཚད། དེའི་དོན་ཚུལ་བཞིན་བསྒྲུབ་པར་བགྱིའོ་སྙམ་པའི་བསམ་པ་བྱང་ཆུབ་སེམས་ཀྱི་ཀུན་སློང་དང་མ་བྲལ་བ་འདིའི་ཐོག་ནས་ཆོས་ཉན་དགོས་པ་ཡིན། བླ་མས་དེ་ལྟར་དུ་ཆོས་བཤད་བྱེད་ཡོང་དུས་འདིའི་ནང་གི་ཕལ་ཆེ་བས། འོ་དེ་འདྲ་ཞིག་ཟེར་དར་སྙམ་པ་ཞིག་ནི་བོད་མགོ་ནག་ཁ་མ་ཎི། ལག་ཕྲེང་བ་ཅན་ཞིག་ཡིན་ནས་བཟུང་སྟེ་ཤེས་པས་མ་ཚད། འགྲོ་བ་སེམས་ཅན་ཐམས་ཅད་ཀྱི་ཆེད་དུ་ཞེས་པ་ཙམ་དང་། སེམས་ཅན་ཐམས་ཅད་ཀྱི་དོན་དུ་བསྔོ་ཟེར་བ་ཙམ་ཞིག་ནི་ཤིན་ཏུ་ནག་ཕྱོགས་ཚང་ཞིག་དང་། གླེན་ལྐུགས་ཚང་ཞིག་མིན་ན་ཕ་མ་རྒན་གསུམ་གྱི་ཁ་དང་། བླ་སེར་ཚོའི་ཞལ་ནས་གོ་མྱོང་ཡོད་ངེས་ཤིང་། འདིའི་ནང་གི་ཕལ་ཆེ་བས་སངས་རྒྱས་ཆོས་ཚོགས་མ་དང་། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་ཅེས་པའི་ཚད་མེད་བཞི་སྐོར་མའི་སེམས་བསྐྱེད་འདོན་མཁན་ཡིན་ན་ཡང་། འགྲོ་བ་སེམས་ཅན་ཐམས་ཅད་ཕ་མ་ཡིན་ལུགས་དང་། དེའི་ཆེད་དུ་སྙིང་ཐག་པ་ནས་ཆོས་བསྒྲུབ་དགོས་བསམ་ཤེས་རྒྱུ་ནི་སུ་ཡིན་ཡང་ཁ་བཤད་དོན་ལ་ཁེལ་བ་ཅིག་དཀའ་མོ་དཀོན་པོ་ཡིན་ན་ཡང་། ཐེག་པ་ཆེན་པོའི་ཆོས་སྒོ་ལ་ཞུགས་ནས་དམ་པའི་ཆོས་རྣམ་པར་དག་པ་ཞིག་སྒྲུབ་པར་བྱེད་པ་ལ། ཐོག་མར་རྣམ་དག་བྱང་ཆུབ་མཆོག་ཏུ་སེམས་བསྐྱེད་པ་འདི་ནི་མེད་ན་ཐབས་མེད། ཡོད་ན་སངས་རྒྱས་སྒྲུབ་ལ་དེས་ཆོག མེད་ན་སངས་རྒྱས་སྒྲུབ་ལ་ཐབས་ཆག་པ་ཞིག་ཡིན། འོན་ཀྱང་ཆོས་རའི་ནང་ལ་གསར་དུ་འཛུལ་བའི་ལས་དང་པོ་བ་ཚོས། དེ་རིང་ཆོས་ཞུ་བར་ཡོང་ན། ཆོས་ཞེས་པ་དང་པོ་གཅིག་གིས་བཤད་དེ་གནང་། གཞན་པ་ཚོས་ཞུས་ནས་ཉན་པའི་ཐ་མར་ཐོབ་འགྲོ་རྒྱུ་དེ་དོན་ངོ་མར་བཤད་ན་ཅི་ཞིག་རེད། ཆོས་ཟེར་བ་དེ་ཟ་རྒྱུ་ཞིག་གམ་ལྡག་རྒྱུ་ཞིག གྱོན་རྒྱུ་ཞིག་གམ་འདོགས་རྒྱུ་ཞིག ཡང་ན་དེ་བས་བཟང་བའི་གོ་ཆོད་པའི་སྤྱད་དངོས་ཤིག་གམ་ཅི་ཡིན་གསལ་བོར་ཐོག་མར་ཤེས་དགོས་པས། ཆོས་ཞེས་པ་འདི་ནི་ཟ་རྒྱུ་བས་ལྷག་ཅིག གྱོན་རྒྱུ་བས་བཟང་ཞིག འཛམ་བུའི་གླིང་གི་རྒྱུ་ནོར་ཡོད་ཚད་ཕྱོགས་གཅིག་ཏུ་སྤུངས་ནས་དེ་དང་ཆོས་གཉིས་བདམ་དུ་འཇུག་ནའང་རྒྱུ་ནོར་ལ་མིག་གིས་ཤར་བལྟས་ཙམ་ཞིག་མི་བྱེད་པར་བདམ་ཆོག་པའི་རྩ་ཆེན་གལ་ཆེན་ཞིག་ཡིན། དེ་ལྟར་བཤད་དུས་འགའ་རེས་འཛམ་གླིང་གི་རྒྱུ་ནོར་ཡོད་ན་ཆོས་མེད་ཀྱང་ཆོག་བསམ་ན་ཐང་མོད། འཛམ་གླིང་གི་རྒྱུ་ནོར་མི་གཅིག་ལ་དབང་བའི་དབང་དུ་བཏངས་ཀྱང་། དེས་མི་དེའི་སྡུག་བསྔལ་སེལ་མི་ཐུབ་པ་མ་ཚད་སྡུག་བསྔལ་ཇེ་ཆེར་འགྲོ་བ་སྟེ། འཛམ་བུའི་གླིང་གི་མི་ཚད་གླིང་བཞི་དང་སུམ་ཅུ་རྩ་གསུམ་གྱི་ལྷའི་དབང་པོ་བརྒྱ་བྱིན་དང་གདན་གཅིག་བྱས་ཏེ་འདུག་མྱོང་བའི་མི་ང་ཚོ་འཛམ་བུ་གླིང་གི་མིའི་ནང་ནས་བྱུང་མྱོང་ཡང་། ད་དུང་འདོད་པ་ཇེ་ཆེར་སོང་ནས་ཡིད་མ་ཚིམས་བཞིན་དུ་ཐ་མར་སྡུག་བསྔལ་གྱིས་མནར་ནས་ཤི་སོང་བའི་དཔེ་ཡོད་པ་ཡིན། ད་ལྟའི་སྐབས་སུའང་ནོར་ལོངས་སྤྱོད་འཛོམས་པའི་མི་མང་པོ་ཞིག་སེམས་མི་བདེ་བའི་སྙིང་གི་ན་ཚ་ཕོག་པ་དང་། རང་སྲོག་རང་གིས་གཅོད་མཁན་ཡང་འཛམ་གླིང་གི་ས་ཆ་སོ་སོ་ན་གང་མང་མང་ཡོད་པ་ཡིན། འོ་ན་དེ་དག་ལ་ཅི་ཞིག་གིས་ལན་པ་ཡིན་ཞེ་ན། ནང་གི་བདེ་སྐྱིད་སྐྲུན་ཐབས་ཀྱི་དམ་པའི་ཆོས་མེད་པས་ལན་པ་ཡིན། ཆོས་བསྒྲུབ་རྒྱུ་མེད་དུས་མིའི་འཚོ་བའི་ནང་གི་དོན་ཆེན་ངོ་མ་དེ་ཚང་མེད་པ་རེད། སྤྱིར་འདང་བརྒྱབ་ན། རང་གཞན་ས་སྟེང་ནས་རྒྱུ་བའི་སེམས་ཅན་ནམ་མཁའི་བྱ། ས་འོག་གི་འབུ་སྲིན་ཡན་ཆད་ཀྱི་སྲོག་ལྡན་ཐམས་ཅད་ཉིན་མི་དལ། མཚན་མི་ཁོམ་པར་བྱ་བ་སྣ་ཚོགས་ཀྱིས་བྲེལ་ནས་རྒྱུག་པའི་དོན་ནི་བདེ་བ་ཞིག་ཨེ་ཐོབ་བསམ་པ་ལས། སྡུག་བསྔལ་དོན་གཉེར་གྱི་ཆེད་དུ་ག་ལ་ཡིན། དེས་ན་ཆོས་པས་ཆོས་བསྒྲུབ་རྒྱུ་དེ་ཡང་བདེ་བ་དོན་གཉེར་ལས་མ་འདས་པས། ང་ཚོས་དམིགས་ཡུལ་ངོ་མ་ནི་བདེ་བ་ཞིག་ཐོབ་པའི་དོན་དུ་ཡིན་ཕྱིར་དང་པོར་ཨེ་ཐོབ་བལྟ་རྒྱུའི་བདེ་བ་དེ་ཉིད་ཇི་ལྟར་ཡིན་པའི་ཚུལ་ལ་ཞིབ་འཇུག་ཅིག་དགོས་པ་ཡིན། བདེ་བ་དེའི་ལྡོག་ཟླ་གང་ཡིན་ན་མི་བདེ་བ་ཡིན་ཞིང་། མི་བདེ་བ་ཟེར་ན་སྡུག་བསྔལ་ལས་མ་འདས། འུ་ཅག་འཁོར་བའི་སེམས་ཅན་འདི་དག་ནི་བདེ་བ་དེ་ཙམ་མ་མྱོང་བའི་སྡུག་བསྔལ་ཏག་ཏག་མྱོང་ལོབས་སུ་སོང་བ་ཡིན་པས། ང་ཚོས་ཉམས་མྱོང་གི་ཐོག་ནས་དང་པོར་སྡུག་བསྔལ་ལ་ཞིབ་འཇུག་ཅིག་བྱས་ཚེ། དེའི་ཞོར་དུ་བདེ་བ་ཞེས་པ་དེ་ཅི་འདྲ་ཞིག་ཡིན་པ་ཤེས་ཡོང་བ་ཡིན་སྙམ། འུ་ཚོ་ལ་མཚོན་ན། འཁྱགས་ན་སྡུག་བསྔལ་རེད། ཚ་ཆེ་ན་ཡང་སྡུག་བསྔལ་རེད། ལྟོགས་ནའང་སྡུག་བསྔལ་རེད། བརྒྱགས་ཆེ་ན་ཡང་སྡུག་བསྔལ་རེད། བསྡད་ན་སྡུག་བསྔལ་རེད་འདུག་ཚོད་མི་འདུག སོང་ན་སྡུག་བསྔལ་རེད་དཀའ་ནས་ཐང་ཆད་འགྲོ། སྐྱེ་རྒ་ན་འཆིའི་སྡུག་བསྔལ་རྣམས་སྨྲོས་ཅི་དགོས། དེ་ལས་གཞན་དག་ཀྱང་སྡུག་བསྔལ་ཏག་ཏག་རེད། སྐྱེ་རྒ་ན་འཆིའི་སྡུག་བསྔལ་ལ་གདོང་ལེན་བྱེད་ཐབས་མི་འདུག མི་ན། མི་རྒས། མི་ཤི་བའི་ཐབས་མི་ཐོན་པ་ཡིན། དེ་ལས་གཞན་པ་འགའ་རེ་ལ་ཕྱི་དངོས་པོའི་འབྱོར་བས་ཅུང་ཟད་ཙམ་རེ་སེལ་ཐུབ་པས། ལུས་ཚོར་བདེ་བ་རེ་དང་། བཏང་སྙོམས་ཙམ་རེ་སྐབས་འགར་ཐོབ་ཐབས་ཐོན་ན་ཡང་། ཕྱིའི་འབྱོར་བའི་མཐུན་རྐྱེན་གྱི་ཐོག་ནས་ཅི་འདྲའི་སྐྱིད་དགའ་ལོངས་སྤྱོད་འཛོམས་ཀྱང་། ད་དུང་མི་སྐྱིད་པར་སྡུག་ཆེན་ཚོས་རང་སྲོག་གཅོད་པ་ཡང་བྱེད་པའི་རྒྱུ་རྐྱེན་གཙོ་བོ་ནི་སེམས་ཀྱི་སྡུག་བསྔལ་གྱི་རྩ་བ་མ་ཆོད་པས་ཡིན་ལ། སེམས་ཀྱི་སྡུག་བསྔལ་ལ་ཐག་གཅོད་བཏང་ནས་སེམས་སྐྱིད་ཐབས་ཤིག་མ་ཐོན་ཚེ། ལུས་ཁོ་རང་ཅི་འདྲ་སྐྱིད་རུང་སྐྱིད་པའི་སྣང་བ་ཞིག་ཡོད་པ་མིན། སེམས་མི་བདེ་བའི་ཉི་མ་ཡིད་མི་བདེ་བའི་ཟས་ཤིག་རྙེད་ཡོད་པའི་དུས་ཤིག་ལ། ལྷའི་གཞལ་ཡས་ཁང་ལྟ་བུའི་ནང་དུ་བཞག་ནས་འདོད་ཡོན་ལོངས་སྤྱོད་ཀྱིས་བསྙེན་བཀུར་ཅི་ལྟ་བུ་བྱས་ཀྱང་སྐྱིད་འོང་རྒྱུ་ཞིག་ཡོད་པ་མ་ཡིན། སེམས་སྐྱིད་པའི་གནས་སྐབས་ཤིག་ལ་རྟ་རྡང་ར་རྡང་ཞིག་གི་ནང་འདུག་ཏུ་བཅུག་ཀྱང་སྐྱིད་འདུག་པ་རེད། དེས་ན་འུ་ཅག་གི་སྡུག་བསྔལ་འདི་ལུས་ཀྱི་སྡུག་བསྔལ་ཞིག་དང་། སེམས་ཀྱི་སྡུག་བསྔལ་ཏེ་གཉིས་ཀྱི་ཁོངས་སུ་འདུ་བ་ཤེས་སོང་བ་ཡིན་པས། ཐོབ་དགོས་རྒྱུའི་བདེ་བ་དེ་ལའང་ལུས་དང་སེམས་ཀྱི་བདེ་བ་གཉིས་ཡོད་པ་དེའི་ཞོར་ལ་ཧ་གོ་སོང་བ་ཡིན། དེ་ལྟར་ཞིབ་ཀྱིས་བརྟག་དཔྱད་ཅིག་བཏང་ན་ད་སྔ་ཡན་ཆད་ལ་ཕྱིའི་འབྱོར་བའི་ལོངས་སྤྱོད་ཅིག་ཡོད་ན་སྐྱིད་སྣང་ཤར་ནའང་། ཞིབ་ཀྱིས་ལྟ་དུས་ལོངས་སྤྱོད་ཡོད་པ་ཙམ་ནི་བདེ་བའི་རྒྱུ་མ་ཡིན་པས་མ་ཚད་སྡུག་བསྔལ་འབྱུང་བའི་རྒྱུ་ཡང་དེ་ཡིན་པས། ནང་སེམས་ཀྱི་བདེ་བ་ནི་རྒྱུ་ནོར་གྱིས་ཉོ་རྒྱུ་བསྒྲུབ་རྒྱུ་མེད་པའི་སྟབས་ཀྱིས་རྒྱུ་ཡོད་ཐམས་ཅད་སྡུག་བསྔལ་ཆེ་བའི་རྒྱུ་མཚན་ནི་དེ་ཡིན་ངེས། དེས་ན་དགོས་རྒྱུ་ངོ་མ་ནི་ནང་སེམས་ཀྱི་བདེ་བ་རྙེད་དགོས་པ་ཡིན་ཏེ། སེམས་ཀྱི་བདེ་བ་ནང་ནས་རྒྱས་ན། ཕྱིའི་མཐུན་རྐྱེན་ཚོགས་དང་མ་ཚོགས་ལ་མ་ལྟོས་པའི་སྐྱིད་པོ་ཞེས་པ་དེ་དེ་ཡིན་འདུག་སྙམ་པའི་ར་འཕྲོད་ཡོང་རྒྱུ་ཡོད་པ་ཡིན། ད་དུང་ཞིབ་ཀྱིས་བཤད་ན་ང་ཞེས་གཅེས་འཛིན་བྱེད་འདུག་ས་དེ་གང་ཞེ་ན། ལུས་ངག་ཡིད་གསུམ་གྱི་ཚོགས་པ་འདི་ལ་ཟེར་དགོས་ཤིང་། དེ་གསུམ་པོ་མ་འཛོམས་ན་ང་ཟེར་ཐབས་མེད་པ་ཡིན། ལུས་འདི་རྐྱང་པ་ང་ཡིན་ན། ཤི་བའི་རོ་ལ་ཡང་ང་ཟེར་དགོས་པ་ཡིན་ན་རོ་ནི་ང་ག་ལ་ཡིན། ངའི་ཅ་ལག་ཟེར་དུས་ང་མ་ཡིན་པ་ཞིག་ལ་གོ་དགོས་པ་བཞིན་དུ། ངའི་རོ་ཟེར་དུས་ཀྱང་ལོགས་སུ་ང་ཡོད་པར་འདོད་པ་ཡིན། དེ་བཞིན་དུ་ངག་གི་སྒྲ་སྐད་ཚིག་ཏུ་བཤད་འདུག་པ་འདི་ཡང་། ལུས་སེམས་གཉིས་ལ་བརྟེན་པའི་རྩ་གནས་ཀྱི་ཡི་གེ་གཡོ་བྱེད་རླུང་གིས་བསྐུལ་བའི་རྩ་རླུང་གི་འདུ་བ་དམིགས་བསལ་བ་ཞིག་ལ་བརྟེན་ནས་ཡོང་བ་ཞིག་ཡིན། དེས་ན་ལུས་སེམས་གཉིས་ཀ་མེད་པའི་ངག་ཅེས་པ་ཡན་གར་བ་ཞིག་ག་ལ་ཡོད། དེ་ལས་གཞན་དུ་སེམས་ཟེར་རྒྱུའི་རྣམ་པར་རྟོག་པ་རླུང་འདྲ་བ་འདི་ཉིད་ལུས་ངག་གཉིས་ཀ་དབང་དུ་བསྒྱུར་བའི་རྒྱལ་པོ་དང་འདྲ་ཞིང་། སེམས་རྣམ་རྟོག་ཅེས་པ་བསད་ན་སོད་རྒྱུ་དང་། བདས་ན་ཟིན་རྒྱུ་དང་། བཟུང་ན་འཛིན་རྒྱུ་མེད་པ། བཀག་ན་མི་ཁོགས་པར་གླིང་བཞི་རི་རབ་རྒྱ་དབུས་གཉིས་ཀ་ད་ལྟ་ད་སྐོར་འགྲོ་བ། མི་དྲན་དགུ་དྲན་གྱི་དྲན་རྒྱ་བློ་སྣ་ལ་ཟད་རྒྱུ་མེད་པ། སྐྱིད་ན་སྐྱིད་པ་རང་ག་པ་ཞིག་མ་ཡིན་པ་མགོ་རྒོད་པོ་ཞྭ་ནང་ལ་མི་ཆུད་པར་རལ་བ་ནག་ཟིང་ངེ་དང་། རྐང་རྒོད་པོ་ལྷམ་ནང་ལ་མི་ཆུད་པར་སེན་མོ་སྔོ་ཤར་རེ་ཡོད་པ། སྡུག་པའི་དུས་སུ་སྡུག་པ་རང་ག་པ་མ་ཡིན་པ་རྔ་མ་སྒྱིད་ཁུང་ལ་དྲངས་ནས་མ་སྒྱེད་ཀྱི་སྒྱེད་ཁུང་ནང་དུ་འཛུལ་འགྲོ་ས་འདུག་སྙམ་པ་དེ་འདྲའི་ཅོལ་ཆུང་ཞིག་ཡིན་ལ། དེའི་ཝ་ལུ་མ་ལྟ་བུ་དེས་བཀོད་འདོམས་ཀྱི་འོག་གི་ལུས་ངག་གཉིས་ཀས་རྗེས་མ་ཆོད། ཞབས་ཕྱི་མ་འགྲུབ་པར་ལུས་འབྱུང་བཞི་གསོར་ལོ་བསྐོར་བསྐོར་འཕང་ལོ་སྒྲིལ་སྒྲིལ་གྱིས་ཆུང་ནས་ཆེ། གཞོན་ནས་རྒས་ཀྱི་བར་དུ་མནར་བས་མ་ཚད་པར། སྐྱེ་བ་ཚེ་རབས་མང་པོའི་བར་དུ་སྡུག་བསྔལ་ཟད་དུ་མེད་པའི་ནང་དུ་ཚུད་པར་བྱས་ཤིང་། དེའི་གྱོད་རྩ་བཟུང་ནས་མ་གོས་ལན་ཆགས་དེ་དེད་ནས་འགྲོ་རྒྱུ་ཞིག་ཡིན་ན། དམར་ནག་གྱོད་ཀྱི་རྩ་བ། བཞི་བརྒྱ་ནད་ཀྱི་ས་བོན། ངར་འཛིན་གྱི་འགོང་པོ་ང་མེད་ལ་ང་། བདག་མེད་ལ་བདག་ཏུ་འཛིན་པའི་འདྲེ་རྒན་དེ་ལ་ཐུག་ཡོད་པ་ཡིན། ལུས་ངག་གཉིས་ཀ་ལ་སེམས་ཀྱིས་དབང་ཇི་ཙམ་ཞིག་བསྒྱུར་ཡོད་ས་འདུག་བལྟས་ན་ཤེས་ཏེ། སེམས་དགའ་དུས་ལུས་དགོད་དགོས་ཐུག་པ་དང་དང་། སེམས་སྡུག་དུས་ལུས་ངུ་དགོས་ཐུག་པ་རེད། དེ་སེམས་ཀྱིས་དབང་བསྒྱུར་བའི་དབང་གིས་རེད་མ་གཏོགས། མི་མགོ་སྐམ་པོའི་ནང་ནས་མཆི་མ་རློན་པ་ཞིག་ཡོང་དོན་ག་ལ་ཡོད། སེམས་མེད་ཀྱི་བེམ་པོ་རྡོ་ཞིག་ལ་ཁྱོད་ད་ལྟ་འཆི་དགོས་ཞེས་སྡིགས་ན་སྡུག་རྒྱུ་ཞིག་དང་། ཁྱེད་ཚེ་རིང་ཞེས་བསྟོད་ན་དགའ་རྒྱུ་མེད་པ་ལྟ་བུ་རེད། དེས་ན་འུ་ཅག་གིས་དོན་གཉེར་བྱེད་རྒྱུའི་བདེ་བ་དེ་ལ་རིགས་གཉིས་ཡོད་པའི་ནང་གི་གཙོ་བོ་ནང་སེམས་ཀྱི་བདེ་བ་དེ་བཙལ་མ་ཤེས་པ་དང་སྒྲུབ་མ་ཤེས་པར། ཕྱིའི་མཐུན་རྐྱེན་ཆུང་ཆུང་ཞིག་གིས་བདེ་བ་ཐོབ་སྣང་ཤར་ནས་མགོ་འཁོར་སོང་བའི་འཕྲིགས་ཤིག་ཟ་བ་ལ་ཕྱོགས་པ་ཡིན། ང་སྐྱིད་པོ་དང་བདེ་མོ་ཡིན་དགོས་ཀྱང་ང་ཟེར་ས་ནི་ལུས་འདི་ཡིན་སྣང་ཤར་ནས། དེ་ལ་ཕན་ཞིག་འདོག་པའི་དོན་དུ་རྒྱུག་པ་ནི། ཕན་ཐབས་མ་དགོས་གནོད་རྐྱེན། སྐྱིད་ཐབས་མ་དགོས་སྡུག་རྐྱེན་དུ་སོང་ནས་དེ་སྔོན་རང་ཨེ་སྐྱིད་བལྟ་བ་དེ་ཨེ་སྡུག་བལྟས་པ་ལྟ་བུར་སོང་བ་ཡིན། ལར་མ་གཞི་ལུས་ཞེས་པའི་མིང་འདི་ཇི་ལྟར་བཏགས་པ་ཁྱེད་ཚོས་ཤེས་སམ། འདུས་པ་ཤུལ་དུ་བསྐྱུར་ནས་ལུས་རྒྱུ་ཞིག་ཡིན་པས་དེ་ལྟར་བཏགས་པ་རེད། ལོ་ཁ་ཤས་ཀྱི་རྗེས་སུ་བསྐྱུར་རྒྱུ་ཡིན་ནམ། དོ་དགོང་སང་ཉིན་ཞིག་ལ་བསྐྱུར་རྒྱུ་ཡིན་ངེས་པ་མེད་ཀྱང་གང་ལྟར་བསྐྱུར་རྒྱུ་ཡིན་པ་གཡར་པོའི་རྒྱུ་རྫས་དང་འདྲ་བ་འདི་ཉིད་བྱུང་ཡང་འབྱུང་བའི་ཁོངས་ནས་བྱུང་ལ། ཐིམ་ཡང་འབྱུང་བའི་ཀློང་དུ་ཐིམ་འགྲོ་བ་ཡིན། མིའི་སྲོག་དང་ཚེ་ཡིས་ཐུབ་ཀྱང་ལུས་ཀྱིས་ཡུན་རིང་མི་འདང་ཞིང་རིམ་གྱིས་ཟད་པ་དང་། རྙིང་པ་དང་། མཐར་འཐོར་འགྲོ་བ་ནི། ཅ་ལག་རྙིང་པ་གཞན་དང་གཅིག་མཚུངས་ཏེ། དཔེར་ན། རླངས་འཁོར་རྙིང་པ་ཆག་པོ་དང་ཁྱད་མེད་པ་སྟེ་དང་པོར་བསྣད་དུས་ལྷུ་ལག་ལ་ལ་བརྗེ་ཁུལ་བྱེད་ཀྱང་ནམ་ཞིག་ཐམས་ཅད་རྙིང་ཧྲིལ་དུ་སོང་ནས་ལྕགས་ཆག་ས་རྫོད་བྱེད་ཅིག་ཏུ་འགྱུར་འགྲོ་བ་དང་གཅིག་མཚུངས་རེད། དེས་ན་ང་ལ་གཅེས་འཛིན་བྱེད་བསམ་ན། ང་ངོ་མ་ང་ཡིར་འཛིན་མཁན་གྱི་སེམས་ལ་ཕན་ཞིག་ཐོག་ན་བདེ་བ་དེས་ཆེ་བ་ཡིན། ཚེ་འདིའི་ང་ཙམ་གྱིས་མ་ཚད་པར་ཚེ་རབས་མང་པོའི་ང་དེ་སྐྱིད་པོ་ཡོང་ཐབས་ཀྱི་བདེ་བ་ཞིག་སྒྲུབ་ཤེས་ན། དེ་ནི་ཅུང་ཟད་ཡུན་རིང་གི་འདུན་མ་ཞིག་ཡིན་པས། དེ་ལྟར་གོམ་པ་རིམ་བགྲོད་ཀྱིས་ཤེས་རབ་འཕེལ་ནས། ནམ་ཞིག་ང་ཟེར་རྒྱུ་དེ་ཡང་གཞི་མེད་འཁྲུལ་བས་བཏགས་པ་ཞིག་ཡིན་པ་ཤེས་ཏེ་གཏན་ལ་ཕབས་ཚེ་བདག་མེད་ཀྱི་ལྟ་བས་གཉིས་འཛིན་གྱི་འཁྲུལ་བ་བཤིག་ནས་མཁའ་མཉམ་བདེ་ཆེན་གྱི་རྒྱལ་ས་ཞིག་ཟིན་རྒྱུ་ཡོད་པ་ཡིན། འོན་ཀྱང་འུ་ཅག་གིས་བྱིས་པ་ལ་གོམ་ལུ་སྤོ་ལོབ་སློབ་པ་བཞིན་དུ་ལས་དང་པོ་བའི་སྐད་ཆ་མུ་མཐུད་ནས་འུ་ཚོས་དེ་ལྟར་སེམས་ཀྱི་བདེ་བ་བཙལ་ཚེ། ལུས་སེམས་གཉིས་ཀའི་བདེ་བ་མཉམ་དུ་ཐོབ་རྒྱུ་ཡོད་པའི་བློ་སྣ་ཆེན་པོ་ཞིག་གི་བློ་སྒོ་ཕྱེ་ཐུབ་སོང་བ་རེད། འཇིག་རྟེན་གཏམ་གྱི་ཁ་དཔེར། སྐྱེས་ཕོ་རབ་ཕོ་འབྲིང་ཕོ་མཐའ་གསུམ། །དྲན་སྔ་ཕྱི་མ་གཏོགས་འདྲ་འདྲ་ཡིན། །ཞེས་པ་ལྟར་དུ་ཤེས་རབ་ཡོད་མེད་དང་། དྲན་ཐུབ་མ་ཐུབ་དང་། དྲན་སྔ་ཕྱི་ཡིས་ཚེ་འདིར་བུ་བཟང་ངན་ཤོར་སོང་བ་བཞིན་དུ་ཚེ་ཕྱི་མ་ལའང་དེ་ལས་ཐུ་བའི་ཁེ་ཉེན་ཐོབ་ཤོར་གྱི་ཧེ་བག་ཆེན་པོ་ཞིག་རྒྱུག་པ་ཡིན། དེས་ན་ང་ཚོས་ཕྱོགས་བསྡོམས་ཤིག་བརྒྱབ་ན། ལུས་ཀྱི་བདེ་བ་དེ་བདེ་བ་ངོ་མ་དངོས་ཡིན་སྣང་ཤར་ནས་དེའི་དོན་ལ་རྒྱུག་ས་ནས་དེ་སྔོན་ཉི་མ་ཡན་ཆད་ལ། ཟན་རྒུམ་ཐུ་ས་ནས། ཟན་ལོག་རྦབ་ལ་འགྲིལ་ཤོར་ནས། ཕུ་ནས་ཤྭ་ཤོར། མདའ་ནས་ཤེའུ་ཤོར། ཁ་ཤ་རི་རྒྱལ་གྱི་རྩེ་ནས་ཤོར། ཉ་ཤ་རྒྱ་མཚོའི་འགྲམ་ནས་ཤོར་ཏེ། ཐ་མར་གཅེར་བུ་ལག་སྟོང་དུ་འཆི་བདག་ཚང་གི་སྒོ་ཁར་སྐྱབས་མེད་མགོན་བྲལ་དུ་ལྷུང་བ་ལ་ཕྱོགས་པ་ཡིན་ནའང་། ད་དུང་མ་སྔ་མ་ཕྱི་བའི་སྐྱ་རིང་མདུང་མོ་གར་གཡུགས་རེད། མདུང་སོ་གར་གཏད་རང་ལག་ཡིན་པའི་དུས་འདིར། ནང་སེམས་ཀྱི་བདེ་བ་དེ་ཇི་ལྟར་བསྒྲུབ་དགོས་སྙམ་ན། ནང་སེམས་ཀྱི་བདེ་བ་དེ་དམ་པའི་ལྷ་ཆོས་ཀྱིས་སྒྲུབ་པ་ལས་ལམ་གཞན་ནས་རྙེད་པའི་ཐབས་མེད། མིའི་བདེ་སྡུག་གཉིས་ཀ་ཡོང་སའི་གཞི་རྟེན་དེ་ལུས་སེམས་གཉིས་མ་གཏོགས་མེད་ལ། ནང་པ་སངས་རྒྱས་པའི་ཆོས་ཀྱིས་མིའི་སེམས་ཀྱི་ནད་དང་སྡུག་བསྔལ་འཆོས་ཐུབ་པ་ཡིན། སེམས་རྒྱུད་དུལ་བའི་ཡོན་ཏན་ནང་ལ་མེད་ན་རེ་དོགས་ཏག་ཏག་གི་ངང་ནས་མི་ཚེ་སྡུག་བསྔལ་གྱིས་སྐྱེལ་དགོས་པ་ཞིག་ཡོང་བ་ཡིན། འདི་བདེ་ཕྱི་མར་སྐྱིད་པ་དེ་དམ་པའི་ལྷ་ཆོས་བསྒྲུབས་པའི་འབྲས་བུ་དང་། འདིར་མི་བདེ་ཕྱི་མར་མི་སྐྱིད་པ་ནི་མི་དགེ་སྡིག་པ་བསགས་པའི་རྣམ་སྨིན་ཡིན་པ་ནི། དཔེར་ན། དུག་ཤིང་གི་ས་བོན་བཏབ་ན་དུག་ཤིང་སྐྱེ་བ་དང་། སྨན་ཤིང་གི་ས་བོན་བཏབ་ན་སྨན་སྐྱེ་བ་ལྟ་བུ་དང་། དཔྱིད་ཟླ་གསུམ་རོང་པས་རྨོ་བཀོལ་བྱས་པས། སྟོན་ཟླ་གསུམ་ཞིང་ལ་ལོ་ཐོག་ལེན་རྒྱུ་ཡོད་པ་དང་། དགུན་ཟླ་གསུམ་འབྲོག་པས་ཕྱུགས་ལུག་འཚོ་སྐྱོང་བྱས་ན། དབྱར་ཟླ་གསུམ་བེའུ་ལུག་འོ་ཞོ་འཕེལ་བ་ལྟ་བུ་ལས་རྒྱུ་མེད་རྐྱེན་མེད་ཀྱི་འབྲས་བུ་ཞིག་སྲིད་པ་མ་ཡིན། སྐད་ཆའི་སྙིང་དོན་དངོས་ནི་ནང་གི་བདེ་སྐྱིད་འདི་ལ་ཡང་སྐྱར་ཞིབ་འཇུག་ཅིག་བྱེད་ན། འདི་ལ་དབྱེ་བ་ཡོད་པ་ཞིག་ཡིན། གྲུབ་མཐས་བློ་བསྒྱུར་བའི་མིས་བཤད་ན། ཟག་བཅས་ཀྱི་བདེ་བ་དང་ཟག་མེད་ཀྱི་བདེ་བ་ཞེས་སུ་སྨྲ་བ་ཡིན། ང་དང་ང་ཡིར་འཛིན་པའི་སེམས་དེ་ཡོད་ནས་བཟུང་སྟེ་དེ་ཉོན་མོངས་པ་དང་འདྲེས་སོང་བ་ཞིག་ཡིན་ཕྱིར། དགེ་བ་བསྒྲུབས་ནའང་ཟག་བཅས་ཀྱི་དགེ་བ་དང་། དེའི་འབྲས་བུ་བདེ་བ་མྱོང་ནའང་ཟག་བཅས་ཀྱི་བདེ་བ་ཡིན། འོ་ན་ཟག་བཅས་ཞེས་པ་དེ་ཅི་ཞིག་སྙམ་ན། འཁོར་བའི་གནས་སུ་ཟག་པའམ་ལྟུང་བར་བྱེད་པས་ན་ཟག་བཅས་ཞེས་པ་སྟེ། ཟག་བཅས་ལས་དང་ཉོན་མོངས་ཀྱིས་འཕངས་བ་ཞིག་ཡིན་ལ། ངར་འཛིན་གྱི་རྩ་བ་མ་རིག་པ་དང་། མ་རིག་པ་ནི་ཉོན་མོངས་པ་ཐམས་ཅད་ལ་ཁྱབ་བྱེད་དུ་ཡོད་པ་ཡིན། དེས་ན་གོ་སླ་ཉན་བདེའི་ཐོག་ནས་བཤད་ན། ང་ཚོས་བདེ་བའོ་སྙམ་པའི་ལུས་སེམས་ཀྱི་བདེ་བ་གང་ཡིན་ཡང་དོན་དངོས་སུ་དེ་བདེ་བ་མ་ཡིན་པ་སྡུག་བསྔལ་ཡིན། དེ་འདྲའི་བདེ་བ་དེའི་རྒྱུ་དགེ་བ་ཞིག་གསོག་ཁུལ་བྱེད་པ་དེ་ཡང་ཟག་བཅས་ཀྱི་དགེ་བ་ཡིན་པས་འདིས་བསོད་ནམས་ཀྱི་ཚོགས་ཙམ་རྫོགས་ན་མ་གཏོགས་ཡེ་ཤེས་ཀྱི་ཚོགས་མི་རྫོགས། ཟག་བཅས་ཀྱི་བདེ་བ་འདི་བདེ་བ་དངོས་མ་ཡིན། ང་ཚོས་བདེ་བ་གཏན་ནས་མ་མྱོང་བའི་དབང་གིས་དམྱལ་བའི་སེམས་ཅན་རྣམས་ཀྱིས་བསད་ན་བདེ་སྣང་ཤར་བ་བཞིན་དུ་སྡུག་བསྔལ་རགས་པ་མངོན་གྱུར་བ་ཅུང་ཟད་ཆུང་བའི་གནས་སྐབས་ལ་བདེ་བར་རློམ་པ་ལས་དོན་དུ་སྡུག་བསྔལ་ཤ་སྟག་ཡིན། དེས་ན་འགྱུར་བའི་སྡུག་བསྔལ་དང་། སྡུག་བསྔལ་གྱི་སྡུག་བསྔལ་དང་། ཁྱབ་པ་འདུ་བྱེད་ཀྱི་སྡུག་བསྔལ་གསུམ་ལས་མ་འདས་པ་ཡིན། འཁོར་བ་གང་དུ་སྐྱེས་ཀྱང་སྡུག་མི་བསྔལ་ས་ཞིག་མེད་ཅིང་། ཅུང་བཟང་ཤོས་དེ་ལྷ་མི་གཉིས་ཡིན་ཡང་དེ་གཉིས་ལའང་སྡུག་བསྔལ་མེད་ས་ཞིག་ག་ལ་ཡོད། དེ་མི་འཐད་དེ་ལྷ་ཡུལ་ན་ལྷ་ཡི་བདེ་བ་ཅི་འདྲའི་སྐྱིད་རབས་ཡོད་འདུག་དེ་སྡུག་སྔལ་ཅན་ཡིན་པ་མི་རིགས་སོ་སྙམ་ན། དེ་ཡང་འཁོར་བས་བསྡུས་པ་ཡིན་ཕྱིར་སྐྱིད་མཐར་ཐུག་ཅིག་ཡིན་ཐབས་མེད་པས། མགོན་པོ་ཀླུ་སྒྲུབ་ཀྱིས། ཚངས་ཉིད་ཆགས་བྲལ་བདེ་བ་ཐོབ་ནས་སླར། །མནར་མེད་མེ་ཡི་བུད་ཤིང་གྱུར་པ་ཡི། །སྡུག་བསྔལ་རྒྱུན་མི་ཆད་པར་བསྟེན་འཚལ་ལོ། །ཞེས་གསུངས་པ་ལྟར། ལྷའི་བདེ་བ་མྱོང་ཚར་ནས་ལས་ཟད་དེ་དམྱལ་བའི་བུད་ཤིང་དུ་འགྲོ་བ་ཡིན་མོད། འོན་ཀྱང་སྐྱེས་བུ་བློ་ཆུང་མངོན་མཐོ་ལྷ་མིའི་གོ་འཕང་དོན་གཉེར་ཅན་ལ། བདག་ཅག་གི་སྟོན་པ་བཅོམ་ལྡན་འདས་ཀྱིས་མངོན་མཐོ་སྒྲུབ་བྱེད་སྐྱེས་བུ་ཆུང་ངུའི་ལམ་ཡང་བསྟན་པ་ཡིན་པས། འཇིག་རྟེན་ཡང་དག་གི་ལྟ་བ་ལ་དད་ནས་དགེ་སྡིག་རྒྱུ་འབྲས་ཚུལ་བཞིན་བསྲུངས་ན། ཕྱི་མར་ལྷ་དང་མིའི་གོང་འཕང་ཐོབ་པའི་ཞོར་ལ་ཚེ་འདིའི་བདེ་སྐྱིད་རང་ཤུགས་ཀྱིས་ཡོང་བ་ཡིན་པས། མ་སེམས་ཅན་ཐམས་ཅད་བདེ་ཐབས་ཀྱི་བློ་སྟོབས་མེད་པ་དག་གིས་དང་པོར་ང་རང་ཉིད་ཚེ་འདིའི་མ་ཚད་ཕྱི་མ་དང་། དེའི་མ་ཚད་ཕྱི་མའི་ཕྱི་མར་བདེ་ཞིང་སྐྱིད་པའི་ཐབས་དང་། ཚེ་འདི་ལའང་ལུས་སེམས་གཉིས་ཀ་བདེ་ཐབས་ཀྱི་རྒྱུ་དེ་བཙལ་ན་འཇིག་རྟེན་ཡང་དག་གི་ལྟ་བ་ལ་དད་པའི་དགེ་བ་བཅུ་བསྒྲུབས་ཤིང་མི་དགེ་བཅུ་སྤངས་ཏེ་བསམ་གཟུགས་ཀྱི་ཏིང་ངེ་འཛིན་བསྒོམས་ན། མི་དང་ལྷ་ཡི་ལུས་ཐོབ་ནས་འདི་ཕྱིའི་བདེ་སྐྱིད་རང་བཞིན་ཤུགས་ཀྱིས་འབྱུང་བ་ཡིན། འོན་ཀྱང་འདང་རྒྱག་ཤེས་མཁན་ཞིག་གིས་བསམ་བློ་བཏང་ན། དེ་ལ་ཡང་ཕན་ཐོགས་ཆེ་ཞིག་མི་འདུག་སྟེ། སྐྱེ་བ་གཅིག་དང་གཉིས་བདེ་བའི་རྗེས་སུ་དེའི་ས་བོན་ཟད་ཚར་དུས། མཐར་ལྷུང་ས་གཅིག་མ་གཏོགས་མེད་པ་ནི་གནམ་མདའ་གྱེན་ལ་འཕངས་ན་ཤུགས་ཟད་དུས་ཐུར་ལ་ལྷུང་རྒྱུ་ལས་མེད་པ་ལྟ་བུ་ཞིག་ཡིན་པས། དེ་ཡང་བྱ་བ་མཐའ་ཐུབ་པ་ཞིག་དང་། ཕྱིང་བ་ཆུ་ཐུབ་པ་ཞིག་མིན་པར་རྟོགས་ནས། ཕུ་གཡའ་མ་ཆགས་ཆགས་རྫ་ནས་ཆགས་འདུག །རྫ་མེད་ན་གཡའ་མ་ཆགས་དོན་མི་འདུག །མདའ་སྨུག་པ་ལང་ལང་མཚོ་ནས་ལངས་འདུག །མཚོ་མེད་ན་སྨུག་པ་ལང་དོན་མེད་པ་བཞིན་དུ་བདག་འཛིན་གྱི་ཞེན་པ་འདིའི་མ་ཉན་པ་དེ་ཤེས་ནས། བདག་མེད་གཏན་ལ་ཕབ་སྟོང་ཉིད་ཀྱི་དོན་ལ་བསམ་བློ་རེ་བཏང་དུས་འདི་ལྟར་སྣང་བའི་ཆོས་ཐམས་ཅད་མེད་བཞིན་དུ་སྣང་བ་མདང་དགོང་གི་རྨི་ལམ་དང་། སྒྱུ་མ་མཁན་གྱི་མིག་འཕྲུལ་ལྟ་བུ་ལས་མ་འདས་པས་བདེན་པར་གྲུབ་པ་སྲ་ཞིང་བརྟན་པར་རློམ་པའི་བསྐལ་བ་ཆགས་ནས་བཟུང་ཡོད་ཅིང་། ཕ་ཨ་མྱེའི་རིང་ནས་ད་བར་འགྱུར་མ་མྱོང་བའི་རི་གླིང་རྒྱ་མཚོ་འདི་ཚོ་ལ་མཚོན་ན། ངོ་མ་སྲ་འཐས་བརྟན་པ་རུ་སྣང་ན་ཡང་། དོན་དུ་དེ་ལྟར་མིན་པ་ནི་དཔེར་ན། འུ་ཅག་གི་རྒྱབ་ལོགས་སུ་ཡོད་པའི་ཟིལ་ཁྲོམ་གངས་རི་འདི་ལྟ་བུ་ལ་མཚོན་ན་སྲིད་པ་ཆགས་པའི་གངས་རྒན་རེད། སྲ་ཞིང་འཐས་པ་ཞིག་ཡིན་སྙམ་ན་ཡང་། འུ་ཅག་ལས་མཐུན་པར་བསགས་པའི་སེམས་ཅན་མིའི་མཐོང་སྣང་ལ་འདི་རི་ཞིག་ཡིན་པ་མ་གཏོགས་འགྲོ་བ་གཞན་གྱི་མཐོང་སྣང་ལ་དེ་ལྟར་ཡིན་པར་བཤད་དཀའ་ཚུལ་ཆུ་ཕོར་པ་གང་ལ་འགྲོ་བ་རིགས་དྲུག་གིས་ལྟ་ཡོང་དུས། མིའི་མིག་སྔར་ཡོད་པའི་ཆུ་དེ། ལྷའི་མིག་སྔར་བདུད་རྩི་དང་། ཡི་དྭགས་ཀྱི་མིག་སྔར་རྣག་ཁྲག དམྱལ་བའི་སེམས་ཅན་གྱི་མིག་སྔར་ཁྲོ་ཆུ་ཁོལ་མ་ཡིན་པའི་སྣང་བ་འཆར་བར་གསུངས་པས། རང་ཅག་གི་གཡོན་ཟུར་གྱི་རྫ་རི་སྨུག་པོ་འདི་ང་ཚོས་བལྟས་ན་རི་མགོ་ཞིག་ཡིན་པར་འཛིན་ཡང་། གནས་བདག་ནོར་བུ་གཡུལ་རྒྱལ་གྱི་མཐོང་སྣང་ལ་རིན་ཆེན་མཆོང་སྨུག་ལས་གྲུབ་པའི་སྐུ་མཁར་ཞིག་ཡིན་པ་དང་། གཞན་ཡང་རི་ཞེས་པ་འདི་རྡུལ་ཕྲན་མང་པོ་ཞིག་ཕུང་པོར་སྤུངས་ནས། བྲག་རི། གངས་རི། ནགས་རི་སོགས་སུ་བཏགས་པ་ལས་རྡུལ་ཕྲན་ཕྲ་མོ་མིག་གིས་མི་ཐེབས་པ་ཏག་ཏག་ཏུ་ཕྱེས་བཞག་ན་རི་ཟེར་བ་ཞིག་ལོགས་སུ་ཡོད་པ་མ་ཡིན་པ་དང་། གཡས་གཡོན་གྱི་ནགས་རི་འདི་དག་ལ་མཚོན་ན། ཤིང་སྡོང་རེ་རེ་བཞིན་དུ་སོ་སོར་ཕྱེས་ན་ནགས་ཞེས་པའི་ཚོགས་པ་ཞིག་མེད་པ་ཡིན་པ་དེས་ན། དམག་དང་། ཕྲེང་བ། གཡག་རྔ། ནེའུ་གསེང་ལ་སོགས་པ་དང་གཅིག་མཚུངས་ཡིན། མང་པོ་སྤུངས་པའི་གཞི་རྫུན་མ་ཞིག་ལ་མིང་རྫུན་མ་ཞིག་བཏགས་པ་ཡིན་པས་ཐམས་ཅད་རྫུན་མ་ལས་མ་འདས་པས་དོན་དུ་བདེན་པར་གྲུབ་པ་ཞིག་ག་ལ་ཡོད། ནང་གི་རྣམ་པར་ཤེས་པ་ཞེས་པའི་རྣམ་རྟོག་གཟུགས་བསྟན་དུ་མེད་པའི་དྲན་རྟོག་འདི་ཡང་། སྐད་ཅིག་སྔ་ཕྱིའི་རྒྱུན་གྱི་ཐོག་ནས་དཔྱད་ན་དོན་ལ་མ་གྲུབ་པ་གཞི་མེད་འཁྲུལ་བའི་རང་གཟུགས་ཨ་འཐས་བློ་ཡི་ཞེན་པ་ཙམ་ཞིག་ལས་མ་འདས། འོ་ན་འདི་མེད་པ་ཡིན་ནམ། གལ་ཏེ་འདི་མེད་ཟེར་ན་ལག་པ་མེ་ལ་ཐུག་ན་ཚ་བ་དང་། རྐང་པ་རྡོ་ལ་ཐུག་ན་ན་བ་འདི་ཅི་ལས་བྱུང་བ་ཡིན་ཞེ་ན། འདི་ནི་མེད་ལ་ཡོད་པར་སྣང་བའི་འཁྲུལ་སྣང་ཞེས་པ་སྟེ། སྣང་བཞིན་དུ་སྟོང་ལ་སྟོང་བཞིན་དུ་སྣང་བའི་རྟེན་འབྲེལ། གལ་སྲིད་རྟེན་འབྲེལ་མིན་ན་སྟོང་ཉིད་ཀྱི་འཐད་པ་འགྲུབ་པ་མ་ཡིན། དེས་ན་མདང་གི་རྨི་ལམ་རྨིས་པ་ལྟ་བུ་ལས་མ་འདས་པ་ཡིན། འོ་ན་དེ་བདེན་པར་འདོད་དམ་རྫུན་པར་འདོད་ཅེ་ན། འདི་གཉིད་སད་པའི་དུས་ཀྱི་སྣང་ངོར་རྫུན་པ་ཡིན་ཏེ། མདང་རྨི་ལམ་ནང་དུ་བུ་ཤི་བའི་སྡུག་བསྔལ་དེ་དེ་རིང་མྱོང་མི་དགོས་པ་དང་། མདང་རྨི་ལམ་ནང་དུ་རྒྱུ་རྙེད་པ་དེ་དེ་རིང་བེད་སྤྱོད་དུ་མེད་པའི་རྫུན་པ་ཞིག་ཡིན་ཡང་། རྨི་ལམ་དེ་རྨི་ལམ་རང་གི་ངོས་ན་བདེན་པ་རེད་དགའ་རྒྱུ་སྡུག་རྒྱུ་གཉིས་ཀ་ཡོད་པ་ཡིན། འོན་ཀྱང་མ་འཁྲུལ་བ་ཞིག་གི་ངོས་ནས་དེ་གཉིས་ཀ་འཁྲུལ་བ་ཡིན་མཉམ་སྟེ། དེ་རིང་ཉིན་དཀར་གི་སྣང་བ་འདི་དང་། མདང་དགོང་གི་མཚན་གྱི་རྨི་ལམ་གཉིས་ཀ་འཁྲུལ་བ་ཡིན། མངོན་ཤེས་ཅན་གཉིད་ཀྱིས་ནོན་མེད་པ་ཞིག་གིས། གཞན་གཉིད་ནས་རྨི་ལམ་རྨིས་པ་དེ་ལ་བལྟས་པ་འདྲ་ཞིག་ཡིན། འཁྲུལ་བ་འཁྲུལ་བའི་ངོས་ནས་བདེན་པས་ན་ཀུན་རྫོབ་བདེན་པ་ཟེར་བ་ཡིན། དེ་ལྟ་བུའི་དོན་ལ་གོམས་ཆ་སྐྱེས་ནས་བདག་མེད་གང་འཚམས་རེ་རྟོགས་ཀྱང་རང་ཉིད་ཁོ་ན་བདེ་དགོས་སྙམ་པའི་ཞི་བདེ་དོན་གཉེར་གྱི་བློ་དོར་མེད་ན། འཁོར་བ་ལས་ཐར་པའི་ཐར་བ་ཐོབ་ཀྱང་། གཏན་བདེ་རྫོགས་པའི་སངས་རྒྱས་ཀྱི་གོ་འཕང་ཐོབ་ཐབས་མེད་པས། བདག་ཅག་གི་སྟོན་པ་བཅོམ་ལྡན་འདས་ཀྱིས་དེ་འདྲ་བའི་རིགས་ཅན་སྐྱེས་བུ་འབྲིང་གི་ངོ་སྐལ་ལ་བཀའ་དང་པོ་བདེན་པ་བཞི་ལས་བརྩམས་པའི་ཆོས་ཀྱི་འཁོར་ལོ་ཁོ་ཚོའི་བློ་དང་འཚམས་པར་བསྐོར་བ་ཡིན། ང་ཚོས་ཀྱང་ཚེ་འདིའི་མི་ཚད་ཕྱི་མ་བདེ་དགོས་པ་དང་། ཚེ་རབས་གཏན་དུ་ང་འཁོར་བ་འདིའི་ནང་ནས་ཐར་དགོས་མ་གཏོགས། སྐབས་ཤིག་བདེ་ཡང་སྐབས་ཤིག་ལ་སྡུག་བསྔལ་བ་ཡིན། གནས་སྐབས་བདེ་བ་ལྷ་མིའི་གོ་འཕང་ཐོབ་ཀྱང་ཉིན་ཞིག་ལ་དམྱལ་བའི་ནང་ལ་ལྷུང་དུས་སྡུག་བསྔལ་ཆེ་བ་ཡིན། དེ་སྔོན་ཡང་ལྷ་ལུས་མི་ལུས་ཅི་འདྲ་བླངས་མེད། རྒྱལ་པོའི་ཁྲིམས་ཀྱིས་སྲོག་ཆད་གཅོད་རྒྱུ་ཞིག ཉི་མ་གཅིག་གཉིས་ཙམ་ལ་ཕྱིར་འཐེན་བྱེད་རྒྱུ་དེ་ཤི་སྡུག་གསོག་པའི་རིང་རྐྱེན་ཞིག་ལས་ཅུང་མི་འདུག་པས། འཁོར་བ་འདིའི་མཐོ་དམན་གང་ལ་སྐྱེས་ཀྱང་སྡུག་བསྔལ་གྱི་རང་བཞིན། མེ་ཡི་འོབས་དང་སྲིན་མོའི་གླིང་ནང་ཚུད་པ་ལྟ་བུ་ཞིག་ཡིན་འདུག་སྙམ་པའི་ངེས་པར་འབྱུང་བའི་བློས་ཀུན་ནས་བསླངས་ཏེ། ལུང་སྡེ་སྣོད་གསུམ་ལ་འཆད་ཉན་དང་། ལམ་བསླབ་པ་གསུམ་ལ་ཉམས་ལེན་བྱས་ནས། འདོད་ཆགས་ཀྱི་གཉེན་པོར་མི་སྡུག་པ་དང་། ཞེ་སྡང་གི་གཉེན་པོར་བྱམས་པ་དང་། གཏི་མུག་གི་གཉེན་པོར་རྟེན་འབྲེལ་བསྒོམས་ནས་འགོག་པའི་སྙོམས་འཇུག་དང་འབྲེལ་བའི་བདག་མེད་ཀྱི་དོན་བསྒོམ་ན་ཞི་བ་ཉན་རང་གི་གོ་འཕང་ཐོབ་ཐུབ་པ་ཡིན། འོན་ཀྱང་དེས་འཚེངས་ནས་མི་འདུག་སྟེ། ང་རང་ཉིད་སྡུག་བསྔལ་གྱི་ནང་ནས་ཐར་དུ་ཡོད་ཀྱང་། ངའི་ཕ་དང་མ། ཁྱིམ་གཟའ་ཚང་། པང་བུ་རྒྱུད། ཕུ་ནུ་མིང་སྲིང་། དགའ་ཉེ་མཐུན་གསུམ་ཚང་མ་ལ་བསམ་བློ་མི་གཏོང་བར་ཤུལ་ལ་བསྐྱུར་ནས་རང་མགོ་གང་ཐོན་བྱེད་ན་བུའི་ཐ་མ་རེད། དེའི་མ་ཚད་ཡུལ་སྡེ་དང་ཚོ་བ་ཚང་མ་ཡང་རང་ཅི་འདྲ་རོགས་དང་། བདེ་བ་འདོད་པའི་སེམས་ཅན་སྲོག་ཆགས་ཚད་ཐམས་ཅད་དང་། ད་ལྟའི་དགྲ་འདི་དག་གི་ཕྱོགས་ལ་བསམ་བློ་རེ་གཏོང་ན། སྐྱེ་བ་སྔ་མ་འགའ་རེ་ལ་གྲོགས་ཡིན་པས་མི་ཚད་ཕ་མ་ཡིན་པ་དང་། དེ་ཚེ་སྟོད་གཉེན་ཡིན་ན་ཡང་། ཚེ་སྨད་ཀྱི་སྐབས་སུ་དགྲར་གྱུར་པའང་ཅི་འདྲ་མང་པོ་འདུག ད་ངོ་མས་ངོ་མ་དྲང་པོ་བྱས་ནས་བཤད་ན། ད་ལྟའི་པང་དུ་བུ་རྒྱུད། ཚ་བོ་ཚ་མོ་གཅེས་གཅེས་བྱེད་འདུག་ས་འདི་ཚོ་སྐྱེ་བ་སྔོན་མར་དགྲ་ཡིན་པའང་མང་རབ་རེད། དེ་དུས་ཕར་ལ་སྡུག་བཀོལ་བའི་ལན་པོར་ད་ཚུར་སྡུག་བཀོལ་བའི་ཆེད་དུ་ལས་ཀྱི་ལན་ཆགས་ཀྱིས་བུ་རུ་སྐྱེས་ཤས་ཆེ་བ་ཡིན། འཁོར་བའི་གནས་འདིར་རྩི་ཚོད་མེད་པའི་དུས་ཡུན་རིང་པོ་ཞིག་ནས་འཁྱམས་ཚེ། མངལ་སྐྱེས་ཤིག་ཡིན་ཚད་པོ་ལ་སྐྱེ་བ་རེ་ལ་ཕ་མ་རེ་ཡོད་ངེས་པས། ཚེ་སྔོན་མའི་ཕ་མ་གཉེན་ཉེ་ཚོ་ད་ལྟ་ངོ་མ་ཤེས་པ་ལྟར་དུ་སྐྱེ་བ་གཅིག་བརྗེ་དུས་ད་ལྟའི་ཕ་མ་འདི་ཚོས་ང་ཁྱོད་ཀྱི་ཕ་མ་ཡིན་པར་སྨྲས་ཀྱང་ཤེས་པ་དང་དྲན་པ་མ་ཡིན། དེས་ན་དགྲ་གཉེན་མཉམ་པ་ཉིད། བཏང་སྙོམ་ཚད་མེད་མ་བསྒོམས་ཀྱང་བསྒོམས་པ་དང་འདྲ་འདྲ་རེད། མ་སེམས་ཅན་ཐམས་ཅད་ཅེས་པའི་སངས་རྒྱས་ཀྱི་གསུང་འདི་ཅི་མ་བདེན་སྙམ་པའི་ངེས་ཤེས་སྐྱེ་བའི་ཐོག་ཏུ། སྙིང་རྗེ་ཚད་མེད་སེམས་ཅན་མིག་གིས་རིག་དུས་ཤ་ཚ་ནས་མིག་ནས་མཆི་མ་ཡོང་བ་ཞིག་བྱུང་ན་སྙིང་རྗེའི་བློ་འབྱོངས་བ་ཡིན། ང་ཚོས་ཀྱང་དེ་ལྟ་བུའི་འདང་ཞིབ་ཀྱིས་རྒྱག་དུས་སྙིང་མི་རྗེ་རང་དབང་མེད་པ་ཞིག་ཡིན་པས། ད་ནི་མ་རྒན་སེམས་ཅན་ཐམས་ཅད་འདི་ལྟ་བུའི་སྡུག་བསྔལ་གྱི་ནང་དུ་བསྐྱུར་བཞག་ཐབས་མི་འདུག འོན་ཀྱང་སྐྱོབ་ཐུབ་པའི་ནུས་པ་བདག་ལ་མེད་པ་ནི། འགྲོ་བསམས་ཀྱང་ཨོ་ཡོས་བང་མ་ཁྱག །བལྟ་བསམས་ཀྱང་ཨོ་ཡོས་མིག་མ་བྱེ་བ། དཔེ་ཆུས་ཁྱེར་གྱི་མི་གཉིས་གཅིག་གིས་གཅིག་སྐྱོབ་མི་ཐུབ་པ་བཞིན་དུ་སྐྱོབ་འདོད་ཡོད་ཀྱང་སྐྱོབ་ཐབས་མེད་པའི་གནས་ཚུལ་ཏེ། སེམས་ཅན་ཐར་ལམ་ལ་འགོད་དགོས་ན་རང་ཉིད་ཐར་པའི་སྐམ་སར་ཕྱིན་ཟིན་པ་ཞིག་ཡིན་དགོས་པས། ད་རེས་དམ་པའི་ཆོས་དང་མཇལ་ནས་ཐར་བར་བགྲོད་པའི་ལམ་སྣེ་ཞིག་རྙེད་ཡོད་པའི་སྐབས་འདིར། སྙིང་ནས་སྙིང་པོའི་ལྷ་ཆོས་ཤིག་བསྒྲུབས་ནས། མ་རྒན་འགྲོ་དྲུག་གི་སེམས་ཅན་གཅིག་ཀྱང་ལྷག་ཏུ་མི་འཇུག་པར་སངས་རྒྱས་ཀྱི་གོ་འཕང་ལ་འགོད་པར་བྱ། དེའི་ཆེད་དུ་ཆོས་ཞུ་དགོས་སྙམ་པ་དང་། ཞུ་བ་ཡིན་སྙམ་པའི་བསམ་པ་དོན་གཉིས་ཚང་བ་ཟེར་བ་དེ་ཡོད་དགོས་པ་ཡིན། དེ་ལྟ་བུའི་ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་པ་ཞེས་པ་དེ་ཇི་ལྟ་བུ་ཞིག་ཡིན་ན། དོན་གཉིས་ཚང་ཞིང་ཟུར་གཉིས་དང་ལྡན་པ་སྟེ། དེ་ལྟ་བུའི་བསམ་པ་རྣམ་དག་སྔོན་དུ་མ་སོང་ན་ཐེག་ཆེན་གྱི་ཆོས་གྲལ་དུ་མི་ཐེ་བ་ཡིན། དེས་ན་ང་ཚོས་ཆོས་བསྒྲུབ་རྒྱུ་འདི་བདེ་བ་ཞིག་གི་དོན་དང་། བདེ་བ་དེ་ལའང་ཕྱི་མ་ལྷ་མིའི་ལུས་ལེན་པའི་བདེ་བ་དོན་གཉེར་ནི་སྐྱེས་བུ་ཆུང་ངུའི་ལམ་དང་། རང་གཅིག་པུ་ཐར་བ་འཐོབ་རྒྱུ་ལ་བརྩོན་པ་སྐྱེས་བུ་འབྲིང་གི་ལམ་དང་། རང་གཞན་སེམས་ཅན་ཐམས་ཅད་འཁོར་བའི་མཚོ་ལས་བསྒྲལ་ཏེ་གཏན་གྱི་བདེ་བ་ཐོབ་ཐབས་ཀྱི་སྐྱེས་བུ་ཆེན་པོའི་ལམ་སྟེ། དམིགས་ཡུལ་ཆུང་འབྲིང་ཆེ་གསུམ་ཡོད་པའི་ནང་ནས་དམིགས་ཡུལ་ཆུང་འབྲིང་གཉིས་ཀ་ཡར་ལྡན་དུ་རྫོགས་པའི་དམིགས་ཡུལ་ཆེ་བ། སེམས་ཅན་གྱི་དོན་བསྒྲུབས་ན་རང་དོན་ཚེ་འདིའི་བདེ་སྐྱིད་ལ་སོགས་པ་ཞོར་འབྱུང་ལ་འགྲུབ་པ་ཡིན་པའི་ང་ཚོས་ཞིབ་འཇུག་བྱས་པའི་འབྲས་བུ་དེ་འདྲ་ཞིག་ཤེས་ཐུབ་ཡོད་པ་ཡིན། སངས་རྒྱས་ཀྱི་གོ་འཕང་ལ་དམིགས་པའི་དགེ་བ་ཞིག་བསྒྲུབས་ཡོད་ན། གནས་སྐབས་ལྷ་དང་མིའི་ལུས་རྟེན་ཁྱད་པར་ཅན་ཐོབ་པ་ནི་རང་བཞིན་ཤུགས་ལ་འགྲུབ་པ་ཡིན། དེས་ན་དམ་པའི་ཆོས་བསྒྲུབ་པ་འདི་ནི་རང་གཞན་ཐམས་ཅད་ཀྱིས་ཚེ་འདིའི་བདེ་བ་རྙེད་ཐབས་ཡིན་པར་ཤེས་ཐུབ་ཡོད་པ་ཡིན། དེ་ལས་ཤེས་རྒྱུ་བོ་གཙོ་ཆེ་ཡང་ལག་ལེན་ལ་འདེབས་ཐུབ་པ་ནི་དེ་བས་ཀྱང་གཙོ་ཆེ་བ་ཡིན། འོ་ན་དགེ་བ་བསྒྲུབས་སྡིག་པ་སྤངས། རང་གཞན་སེམས་ཅན་ཐམས་ཅད་བདེ་བའི་ས་ལ་འགོད་པའི་བྱ་བ་རླབས་ཆེན་སྒྲུབ་པ་འདི་ལ་ཆོས་ཟེར་དགོས་དོན་ཅི་ཞེ་ན། ཆོས་ཞེས་པ་འདི་ལ་རྒྱ་གར་གྱི་སྐད་དུ་དྷརྨ་ཟེར་ཞིང་། དེ་ཚུར་བོད་སྐད་ལ་བསྒྱུར་ཡོང་དུས་ཆོས་ཞེས་ཟེར་བ་ཡིན། དེ་ཡང་། ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །བསོད་ནམས་ཚེ་དང་གསུང་རབ་དང་། །འབྱུང་འགྱུར་ངེས་དང་ཆོས་ལུགས་ལའོ། །ཞེས་སྤྱིར་ན་དོན་བཅུ་ཐམ་པ་ལ་སྒྲ་འཇུག་པར་གསུངས་ཤིང་། སྐབས་འདིར་དམ་པའི་ཆོས་ལ་འཇུག་པའི་ཐད་ཀྱི་ལམ་དང་། མྱང་འདས་དང་། བསོད་ནམས་དང་། གསུང་རབ་བཅས་དོན་བཞི་ལ་འཇུག་པ་ཡིན། སྒྲ་འཇུག་ཕྱོགས་ཀྱི་ཆོས་ཞེས་པ་ནི་བཅོས་པའམ་འཆོས་པའི་དོན་ལ་འཇུག་པས་རང་གི་སེམས་ཀྱི་ནད་བཅོས་པས་ན་དམ་པའི་ཆོས་ཞེས་དམ་པའི་སྒྲ་ཐོགས་ས་ཡང་དེ་ཡིན་ལ། དེ་ལྟ་བུའི་དམ་པའི་ཆོས་དེ་ནི་སངས་རྒྱས་བཅོམ་ལྡན་འདས་ཀྱིས་གདུལ་བྱ་སྐྱེས་བུ་ཆུང་འབྲིང་ཆེ་གསུམ་གྱི་བློ་དང་འཚམས་པའི་ཆོས་ཀྱི་འཁོར་ལོ་གསུམ་མམ་བཞི་རུ་བསྐོར་བ་སྟེ། དེ་ཡང་ཇི་སྐད་དུ། ཉོན་མོངས་འདོད་ཆགས་འདུལ་བའི་གཉེན་པོ་རུ། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་ཞེ་སྡང་འདུལ་བའི་གཉེན་པོ་རུ། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་གཏི་མུག་འདུལ་བའི་གཉེན་པོ་རུ། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །དུག་གསུམ་ཆ་མཉམ་འདུལ་བའི་གཉེན་པོ་རུ། །སྡེ་སྣོད་བཞི་བ་ཉི་ཁྲི་ཆིག་སྟོང་གསུངས། །ཞེས་གསུངས་པ་ལྟར་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་ཤིང་། སངས་རྒྱས་ཀྱིས་གསུངས་པའི་ཆོས་ལྷ་ཀླུ་འཇིག་རྟེན་ནམ། མཁའ་འགྲོ་མའི་གནས་སུ་བཞུགས་པ་ཐམས་ཅད་གཅིག་ཏུ་བསྡོམས་ན་ཚད་བཟུང་ཐབས་མེད་ཅིང་བརྗོད་ཀྱིས་མི་ལང་བ་ཡིན་པས་མ་ཚད། གང་ཟག་ཐུན་མོང་གི་ངོ་སྐལ་དུའང་སྤྲུལ་སྐུའི་སྟོན་པ་གཅིག་གི་གསུང་ཆོས་ཀྱང་གླང་པོ་ཆེའི་རྒྱབ་ཁལ་མང་པོ། མི་གཅིག་གིས་ཚེ་གང་བོར་མཇལ་མི་ཐུབ་པ་དེ་འདྲའི་རྗོད་བྱེད་རྒྱ་ཆེ་ལ་བརྗོད་བྱ་གཏིང་ཟབ་པ་དེ་དག་ཚུར་བསྡུ་ན་གསུང་རབ་ཡན་ལག་བཅུ་གཉིས་དང་། དེ་ཡང་ཚུར་བསྡུ་ན། སྡེ་སྣོད་རྣམ་པ་གསུམ། དེ་ཡང་བསྡུ་ན་ལུང་རྟོགས་གཉིས་ཏེ། རྗོད་བྱེད་སྡེ་སྣོད་གསུམ་ལ་འཆད་ཉན་བྱེད་པ་ནི་ལུང་གི་ཆོས་དང་། བརྗོད་བྱ་བསླབ་པ་གསུམ་ལ་ཉམས་ལེན་བྱེད་པ་ནི་རྟོགས་པའི་ཆོས་ཏེ། དེ་ལྟ་བུའི་ཐུབ་པའི་ལུང་རྟོགས་ཀྱི་བསྟན་པའི་ནང་ལ་འདུས་པ་ཡིན། དེ་ལས་ད་རེས་ཀྱི་སྐབས་སུ་བབ་པའི་འཆད་ཉན་བྱ་ཡུལ་གྱི་དམ་པའི་ཆོས་ནི་མདོ་དང་རྒྱུད་སྡེ་ཐམས་ཅད་ཕྱོགས་མཐུན་པའི་ཞིང་ཁམས་བདེ་བ་ཅན་དུ་སྐྱེ་བའི་སྨོན་ལམ་འདི་ཉིད་འཆད་པའི་སྐབས་རེད། དེས་ན་ང་ཚོས་ཆོས་ཞུ་རྒྱུའི་དམིགས་ཡུལ་ནི་རང་གཞན་གཏན་གྱི་བདེ་བ་ལ་འགོད་པའི་དོན་དུ་ཡིན་པ་དང་། ཆོས་ཞེས་པ་དེ་ཅི་ཞིག་ཡིན་རགས་རིམ་ཙམ་ཞིག་ཤེས་པར་བྱས་ནས། ཆོས་ཞུས་ནས་ཐོབ་འགྲོ་རྒྱུ་དེ་ཅི་ཞིག་ཡིན་ཞེ་ན། ཆོས་སྨྲ་བའི་སློབ་དཔོན་དེས། རང་ཉིད་ཀྱི་ཡོངས་འཛིན་དགེ་བའི་བཤེས་གཉེན་ལས་ཐོས་པའི་ཆོས་གང་ཡིན་པ་དེ་ཉིད། གཞན་ལ་དེ་བཞིན་དུ་ལེགས་པར་གདམས་ནས། ཚིག་གི་སྒོ་ནས་དོན་གོ་བར་བྱེད་པ་དང་། བྱིན་རླབས་ཀྱི་བརྒྱུད་པའི་ཕ་ཕོག་སྤྲད་པ་དེ་ལ་ཆོས་ཞུས་ནས་ཐོབ་ཅེས་པ་ཡིན། དེ་ཡིས་ཆོས་ཞུས་ནས་འཐོབ་ཏུ་ཡོད་པ་དེའང་ཤེས་པ་ཡིན། དེས་མ་ཚད་པར་ཤེས་དགོས་པ་མ་ཤེས་ཐབས་མེད་ཅིག་ནི། ཆོས་ཞུ་བ་ལས་ཀྱང་དང་པོར་ཞུ་ལུགས་ཤེས་དགོས་པ་ཡིན། ཆོས་ཞེས་པ་རྫོགས་པའི་སངས་རྒྱས་ཀྱི་གསུང་། བདེན་པར་སྨྲ་བའི་ཚིག དོན་གྱི་དམ་པ་བསླུ་བ་མེད་པ། ཐོས་པར་དཀའ་བ། ཐོས་ན་དོན་ཆེན་པོར་ལྡན་པ་ཞིག་ཡིན་པར་ཐོག་མར་ཤེས་དགོས་ཤིང་། ད་རེས་མིའི་ལུས་རྟེན་ཞིག་བླངས་པ་དང་། དེའི་ནང་ནས་ཆོས་ཐོས་པའི་ས་ཆ་རུ་སྐྱེས་པའི་དབང་གིས་ཆོས་སྒྲ་ཞིག་གོ་ཐུབ་པའི་སྐལ་བ་ལྡན་པ་རེད་མ་གཏོགས། ངན་སོང་ངན་འགྲོའི་གནས་ཤིག་ལ་སྐྱེས་ན་སྨྲོས་ཅི་དགོས། མཐའ་འཁོབ་ཀླ་ཀློའི་ལུས་རྟེན་ལྟ་བུ་ཞིག་བླངས་ཡོད་ན། ཆོས་སྒྲ་ཙམ་ཞིག་ཀྱང་གོ་མི་མྱོང་ན་ཉན་འདོད་ཅིག་དེ་བས་སྐྱེ་རྒྱུ་ག་ལ་ཡོད། དེས་ན་ཆོས་དར་བའི་ས་ཆ་རུ་སྐྱེས་ཤིང་། ཆོས་ཉན་པའི་སྐལ་བ་དང་ལྡན་པ་འདི་སྔར་བསགས་བསོད་ནམས་ཀྱི་འབྲས་བུ་ཞིག་ཡིན་པས། འདིའི་གོ་སྐབས་འདི་ཆུད་ཟོས་སུ་ཤོར་མི་རུང་སྙམ་ནས་དྲན་ཤེས་དགོས་པ་ཡིན་ཏེ། སྔར་བདག་ཅག་གི་སྟོན་པ་བཅོམ་ལྡན་འདས་སློབ་པ་ལམ་ལ་གནས་པའི་སྐབས་ན། ཆོས་ཚིགས་སུ་བཅད་པའི་ཤོ་ལོ་ཀ་རེ་རེའི་དོན་དུ་སྐུ་ལུས་ལ་ཤ་ཡི་ཀོང་བུ་དྲུས་པ་རེ་རེ་བཞིན་དུ་བརྩིས་ན་སྟོང་ཕྲག་ཙམ་གྱི་ནང་སྡོང་བུ་བཙུགས་ཤིང་། མར་ཁུ་བླུགས་ནས་མར་མེ་སྦར་བའི་དཀའ་སྤྱད་དང་། མེའི་འོབས་དོང་ལ་མཆོངས་ཏེ་ཆོས་ཕྱིར་དཀའ་སྤྱད་མཛད་པའི་ལོ་རྒྱུས་དང་། སྐུ་ལུས་ལ་ལྕགས་ཀྱི་འཛེར་མ་སྟོང་བཏབ་ནས་དཀའ་སྤྱད་མཛད་པའི་ལོ་རྒྱུས་དང་། པགས་པས་ཤོག་བུ། རུས་པས་སྨྱུ་གུ། ཁྲག་གིས་སྣག་ཚ་བྱས་ནས་ཆོས་བླངས་པ་ལ་སོགས་པའི་དཀའ་སྤྱད་དེ་འདྲ་མཛད་ཡོད་པ་དང་། བྱང་ཆུབ་སེམས་དཔའ་རྟག་ཏུ་ངུས་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ཞུ་བའི་དོན་དུ་བྱང་ཆུབ་སེམས་དཔའ་ཆོས་འཕགས་བསྟེན་དུས་ཅི་འདྲའི་དཀའ་སྤྱད་མཛད་འདུག རང་གི་ལུས་ཀྱི་ཤ་ཁྲག་བཙོངས་ནས་དེའི་རིན་པས་བསྙེན་བཀུར་མཛད། རང་གི་ལུས་ནས་ཁྲག་གཏར་ནས་ཆོས་གསུང་སའི་ས་ཡི་རྡུལ་མི་ལྡང་བའི་ཆེད་དུ་ཁྲག་གིས་ཆག་ཆག་བཏབ་པའི་ལོ་རྒྱུས་ཡོད་པ་དང་། འུ་ཚོ་འདི་ན་བདེ་བདེ་ཁོད་ཁོད་ལ་བསྡད་ནས་རང་སྒོ་རང་རྩིབ་ནས་ཆོས་ཉན་ཆོག་པའི་སྐལ་བ་ཐོབ་རྒྱུ་དེ། རྩ་ཆེན་ཡིན་པའི་གནད་དེ་དང་པོར་ཤེས་པ་བྱས་ནས། རང་གིས་རང་ལ་ཁ་ནང་ལ་འཁོར་ནས། ད་རེས་ངས་ཆོས་ཞུ་བའི་དམིགས་ཡུལ་དང་ཀུན་སློང་གི་ཐད་ལ་འདང་ཞིག་རང་གིས་རང་ལ་བརྒྱབ་ནས་རྩིས་ཤིག་བླངས་ཏེ། ཆེ་འདོད་གྲགས་འདོད། སྙན་གྲགས་ཀྱི་དོན་དུ་ཆོས་ཞུ་བར་འདུག་གམ། གཞན་དག་ལ་འགྲན་སེམས་ཀྱི་ཐོག་ནས་ཀན་གྱིས་ཆོས་ཞུ་ན་ངས་ཅིས་ཀྱང་ཞུ་དགོས་སྙམ་ནས་འགྲན་སེམས་ཀྱིས་ཆོས་ཞུ་བར་འདུག་གམ། དེ་མིན་གཞན་ཨ་མཚར་གྱིས་རྩེད་ཞོར་དགོད་ཞོར་དུ་ཆོས་གྲལ་ལ་བསྡད་པ་ཙམ་དུ་འདུག་གམ་ལ་སོགས་པ་བརྟགས་ནས་ཉོན་མོངས་དང་འདྲེས་པའི་ཀུན་སློང་སྤངས་ནས་ཆོས་ཞུ་དགོས་པ་ཡིན། དེ་མ་སྤངས་ན་ཆོས་ཞུས་ཀྱང་ཕན་མི་ཐོགས་པར་མ་ཚད། སྨན་མ་ཞུ་བ་དུག་ཏུ་འགྱུར་སོང་བ་ལྟ་བུའི་ཕན་མ་དགོས་གནོད་པའི་གཞི་མར་འགྲོ་བ་ཡང་ཡོད་པ་ཡིན། ཆོས་ཆོས་བཞིན་མ་སྤྱད་ན། ཆོས་ཀྱིས་སླར་ངན་སོང་དུ་འགྲོ་བའི་རྒྱུ་བྱེད་ཅེས་གསུངས་པ་ཡིན། དེའི་ཐོག་ལ་ཆོས་དང་སྟོན་པ་ལ་དད་པའི་འདུ་ཤེས་ཡོད་དགོས་ཏེ། དད་པ་མེད་ན་ཆོས་ཀྱི་རྩ་བ་རུལ་ཞེས་གསུངས་པས། སྟོན་པས་གསུངས་པའི་ཆོས་ལ་དད་པ་མེད་པའི་མིའི་སྔུན་དུ་སྟོན་པ་དངོས་སུ་བྱོན་ཀྱང་ཕན་ཐོགས་མེད་པ་དེས་ན་ཚེ་རབས་གཏན་གྱི་བདེ་བ་རྙེད་དགོས་ན། ཆོས་ཉན་པ་དེའི་དོན་བསྒྲུབས་ནས་སྡུག་བསྔལ་ཆེ་ཆུང་ཐམས་ཅད་དང་བྲལ་བའི་གཏན་དུ་བདེ་བའི་གོ་འཕང་ཐོབ་དགོས་པ་སྟེ། ད་སྔ་ཡན་ཆད་ཀྱི་བྱ་བ་ཐམས་ཅད་ཡང་ན་དོན་མེད་སྡིག་པའི་རྩ་བ་ངན་སོང་གི་རྒྱུ། ཡང་མིན་ན་དོན་ཆུང་ཚེ་འདིའི་བྱ་བཞག་ཙ་གེ་ཙིག་གེ་ཙམ་མ་གཏོགས་མེད་པས། ད་རེས་དོན་ཆེན་སྙིང་པོའི་བྱ་བཞག་རང་གཞན་འདི་ཕྱིའི་བདེ་སྐྱིད་ཀྱི་རྩ་བ་དམ་པའི་ཆོས་བསྒྲུབ་རྒྱུ་འདི་ལ་བབ་ཡོད་པ་འདི་ལ་ལེ་ལོ་ཞིག་ཤོར་ན་གྲལ་འདྲ་འདྲའི་ནང་ནས་སྐལ་བ་སྒེར་ལ་ཆད་པ་རེད་སྙམ་པའི་ཆོད་སེམས་ཀྱི་གོ་ཆ་ཞིག་རང་གིས་རང་ལ་བསྐོན་དགོས་པ་ཡིན། ཆོས་ཞུས་པའི་ཕན་ཡོན་ལ་བསམ་ན། གཎྜིའི་མདོ་ལས། དམ་ཆོས་བཤད་པའི་དུས་བསྟན་ཕྱིར། །རྔ་འམ་གཎྜི་བརྡུངས་པའི་སྒྲ། །ཐོས་པས་བྱང་ཆུབ་ཐོབ་འགྱུར་ན། །ཉན་ཕྱིར་ལྷགས་པ་སྨོས་ཅི་དགོས། །ཞེས་གསུངས་པ་ལྟར། ཆོས་ལ་བསྐུལ་བའི་ཆོས་དུང་དང་། ཆོས་རྔ་དང་། དགེ་འདུན་བསྡུ་བའི་གཎྜིའི་སྒྲ་རྣ་བས་གོ་ན་དེའི་ཕན་ཡོན་གྱིས་ཐར་བ་ཐོབ་པར་གསུངས་པས། བསམ་བཞིན་དུ་ཆོས་ཉན་པར་ཡོང་ན་བསོད་ནམས་ཆེན་པོ་ཐོབ་པ་ནི་སྨོས་མ་དགོས་ཤིང་། ཐ་ན་དུད་འགྲོ་དག་གི་རྣ་ལམ་དུ་ཆོས་སྒྲ་གོ་བས་སྐྱེ་བ་རྗེས་ནས་མཐོ་རིས་སུ་སྐྱེས་ཏེ་རིམ་གྱིས་ཐར་བ་ཐོབ་པའང་མང་བ་ཡིན། གཞན་ཡང་ཐོས་པས་བློ་གྲོས་ཀྱི་མིག་རྙེད། བསམས་པས་ཤེས་རབ་ཀྱི་གཏེར་ཆེན་བརྡོལ། བསྒོམས་པས་ཉམས་མྱོང་གི་བོགས་ཐོན་ནས་མྱུར་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ཡིན། གལ་ཏེ་ཐོས་པས་ཚིག་མི་གོ། བསམས་པས་དོན་མི་ཤེས། བསྒོམས་པས་གནས་ལུགས་ཀྱི་རྟོགས་པ་མི་སྐྱེ་བ་རྣམས་ནི་སྔོན་གྱི་སྡིག་སྒྲིབ་ཀྱི་དབང་གིས་ཡིན་པས། ཆོས་དང་བླ་མར་གསོལ་བ་རྩེ་གཅིག་ཏུ་བཏབ་ནས་སྡིག་བཤགས་རེ་གྱིས་དང་། བཟང་འབྲེལ་ཚེ་གཅིག་སངས་རྒྱས། །ངན་འབྲེལ་འཁོར་བ་མཐའ་ཅན། །ཞེས་པ་ཡིན་པས་སྒྲིབ་པ་སྲབ་ཏུ་འགྲོ་བ་ཡིན། གཞན་ཡང་ཆོས་ཀྱི་ཚིག་དོན་གོ་བ་མི་ལོན་པའི་གནད་ནི་ཚེ་སྔོན་དེའི་ཕྱོགས་ལ་སྦྱོང་བ་དམན་པའི་སྟབས་ཀྱིས་ཡིན་པ་དང་ད་རེས་འབད་དེ་བསླབ་དགོས་པའི་ཚུལ། ས་སྐྱ་པཎ་ཆེན་གྱིས། སྐྱེ་བ་སྔོན་མར་མ་བསླབས་པས། །ཚེ་འདིར་བླུན་པོར་གྱུར་ལ་ལྟོས། །ཞེས་དང་། ཕྱི་མར་བླུན་པོར་སྐྱེ་དོགས་པས། །ཚེ་འདིར་དཀའ་ཡང་འབད་དེ་ཉན། །ཞེས་པ་ལྟར་དུ་སང་ཉིན་འཆི་རྒྱུ་ཡིན་ཡང་དེ་རིང་ཚིག་རེ་ཨེ་ཤེས་ཀྱི་འབད་དགོས་པ་ཡང་དེ་ལས། རིག་པ་ནངས་པར་འཆི་ཡང་བསླབས། །ཚེ་འདིར་མཁས་པར་མ་གྱུར་ཀྱང་། །སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་དང་མཚུངས། །ཞེས་གསུངས་པ་ཡིན། གཞན་ཡང་བླུན་རྨོངས་དུད་འགྲོའི་གནས་སུ་མི་ལྟུང་པ་ལ་སོགས་པའི་ཕན་ཡོན་ཆེ་བ་ཡིན། ད་དེ་ཡན་གྱིས་ཆོས་ཐོས་པར་དཀའ་ཚུལ། ཐོས་ན་ཕན་པ་ཆེ་ཚུལ། མ་ཐོས་ན་ཉེས་དམིགས་ཡོད་ལུགས། ཆོས་ཐོས་པའི་དོན་གཉེར་བྱེད་དགོས་ཚུལ་སོགས་ཤེས་པར་བྱས་པ་ཡིན། དེ་ལྟ་བུའི་གནད་དེ་དག་ངེས་ནས་ཆོས་རའི་ནང་ལ་བསྡད་པ་ཙམ་གྱིས་མི་ཆོག་པར་ཀུན་སློང་དང་། ཀུན་སྤྱོད་གཉིས་ཀ་བཅོས་པའང་ཤིན་ཏུ་གལ་ཆེ་བ་ཡིན། དེ་ལ་ཀུན་སློང་ཞེས་པའི་ཀུན་ནི་མང་པོའི་དོན་གྱི་ཚིག་དང་། སློང་ནི་འཆར་དུ་བཅུག་པའི་དོན་ཡིན་པས། རྣམ་རྟོག་མང་པོ་ཞིག་གི་ནང་ནས་དམིགས་ཀྱིས་བཀར་བའི་རྟོག་པ་ཞིག་ཡར་སློང་ནས་འཆར་དུ་བཅུག་པ་ལ་གོ་དགོས་པ་ཡིན་པས་ཀུན་སློང་ངན་པ་དག་བཟང་པོར་བསྒྱུར་ཏེ་བཅོས་པ་ལ་ཀུན་སློང་བཅོས་ཞེས་པ་དང་། ཀུན་སྤྱོད་ཞེས་པ་ནི་ཆོས་ཉན་པའི་སྐབས་ཀྱི་ལུས་ངག་གི་བྱ་སྤྱོད་དང་སྨྲ་བརྗོད་ལ་ཟེར་བ་ཡིན། དེ་ལས་དང་པོ་ཀུན་སློང་ནི། ཅི་ཞིག་གི་ཆེད་དུ་ཆོས་ཞུ་བའི་དམིགས་ཡུལ་ལ་གསུངས་པ་ཡིན་པས། ཆོས་ཉན་བཤད་སྒོམ་སྒྲུབ་གང་གི་སྐབས་ཡིན་ཡང་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་གོང་ནས་བཤད་པ་ལྟར་དུ། ནམ་མཁའ་དང་མཉམ་པའི་སེམས་ཅན་ཐམས་ཅད་རྟག་ཏུ་སྡུག་བསྔལ་གསུམ་གྱིས་མནར་ཞིང་གདུངས་པ་འདི་དག་ཐམས་ཅད་སྙིང་རེ་རྗེ་སྙམ་པའི་སྙིང་རྗེས་སེམས་ཅན་ལ་དམིགས་པའི་ཟུར་ཞིག་དང་། སྙིང་རྗེ་བ་གཅིག་པུས་མི་ཕན་པར་ཕ་མར་གྱུར་པའི་སེམས་ཅན་འདི་དག་ཐམས་ཅད་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་ལ་དགོད་པར་བྱ་སྙམ་པའི་ཤེས་རབ་ཀྱིས་རྫོགས་བྱང་ལ་དམིགས་པའི་ཟུར་ཏེ། དེ་ལྟ་བུའི་ཟུར་གཉིས་སམ་དོན་གཉིས་དང་ལྡན་པ་ཞིག་ངེས་པར་དུ་དགོས་པ་ཡིན། ཆོས་ཞུ་དུས་ཀུན་སློང་མི་དགེ་བ་དང་། ལུང་མ་བསྟན་གྱི་ཀུན་སློང་དགེ་སྡིག་གང་གི་ཕྱོགས་ལའང་མི་ཐེ་བ་ཐོམ་ཡོར་རེ་བའི་ངང་ནས་ཞུ་མི་ཉན་པ་ཡིན། དེ་ཡིས་ཀུན་སློང་བཤད་ཟིན་པ་ཡིན། ཀུན་སྤྱོད་ལ་སྤང་བྱའི་ཀུན་སྤྱོད་དང་བླང་བྱའི་ཀུན་སྤྱོད་གཉིས་སུ་གསུངས་ཤིང་། སྤང་བྱ་ཞེས་པ་ནི་འདོར་བྱ་དང་། བླང་བྱ་ཞེས་པ་ནི་དང་དུ་ལེན་བྱ་ལ་བཤད་པས། སྤང་བྱའི་ཀུན་སྤྱོད་དེ་ལའང་སྣོད་ཀྱི་སྐྱོན་གསུམ། དྲི་མ་དྲུག མི་འཛིན་པ་ལྔ་བཅས་ཡོད་པ་ལས། སྣོད་ཀྱི་སྐྱོན་གསུམ་ནི། རྣ་བ་མི་གཏད་ཁ་སྦུབས་ལྟ་བུའི་སྐྱོན། །ཡིད་ལ་མི་འཛིན་ཞབས་རྡོལ་ལྟ་བུའི་སྐྱོན། །ཉོན་མོངས་དང་འདྲེས་དུག་ཅན་ལྟ་བུའི་སྐྱོན། །ཞེས་གསུངས་པ་ཡིན། དེ་ཡང་ཆོས་ཞུ་དུས་རྣ་བའི་རྣམ་ཤེས་ཆོས་བཤད་པའི་སྒྲ་ལ་གཏད་ནས་དེ་ལས་གཞན་དུ་མ་ཡེངས་པ་ཞིག་བྱེད་དགོས་པ་ལས། ལུས་ཆོས་གྲལ་ན་ཡོད་ཀྱང་སེམས་བྱང་ཁོག་ནང་དུ་མ་བསྡད་པར་ཡུལ་གཞན་ལ་གཡེངས་ནས་ཆོས་བཤད་པའི་སྒྲ་ལ་མ་ཉན་ན། སྣོད་ཁ་སྦུབས་ཀྱི་སྟེང་དུ་ཆུ་ཇི་ཙམ་བླུགས་ཀྱང་སྣོད་ཀྱི་ནང་ལ་འབབ་ཏུ་མེད་པ་ལྟར། ཆོས་ཀྱི་ཚིག་དོན་གང་ཡང་མི་ཐོས་ཤིང་མི་ཐོབ་པས་ཆོས་ཀྱི་སྒྲ་ལ་རྣ་བ་གཏད་དགོས་པ་ཡིན། ཡིད་ལ་མི་འཛིན་ཞབས་རྡོལ་ལྟ་བུའི་སྐྱོན་ནི། ཆོས་སྒྲ་རྣ་བས་ཉན་པ་དེ་སེམས་ལ་འཇོག་དགོས་པ་ལས། དོན་ཡིད་ལ་མ་བཟུང་བའི་རྣ་རྒྱབ་ཀྱི་རླུང་སྒྲ་གོ་ལོ་ཐོས་ལོ་ཐོབ་ཡིག་གསོག་བྱེད་འདྲ་ཞིག་གིས་ཆོས་ཞུས་གོ་མི་ཆོད་པ་ཡིན། ཉོན་མོངས་དང་འདྲེས་དུག་ཅན་ལྟ་བུའི་སྐྱོན་ནི། ཆགས་སྡང་རྨོངས་གསུམ་ང་རྒྱལ་ཕྲག་དོག་སོགས་དང་འདྲེས་ཞོར་དུ་ཆོས་ཉན་ན། ཆོས་ཉན་པ་དེས་སེམས་ལ་མི་ཕན་པས་མ་ཚད། ཆོས་ཞུས་པ་ཆོས་མིན་དུ་འགྲོ་བ་ནི་དཔེར་ན། དུག་ཅན་སྣོད་ཀྱི་ནང་ལ་ཟས་བཟང་པོ་ཞིག་བླུགས་ན་ཟས་དེ་ཡང་དུག་ཅན་དུ་གྱུར་ནས་གནོད་པ་ཅན་དུ་ལོག་པ་དང་ཁྱད་མེད་པ་ཡིན། དྲི་མ་དྲུག་ནི། །རྣམ་བཤད་རིག་པ་ལས། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ནང་དུ་སྡུད། །སྐྱོ་བས་ཉན་པ་དྲི་མ་ཡིན། །ཞེས་གསུངས་པ་ལྟར། གཞན་བས་ང་ལྷག་པས་ཁོང་བླ་མ་ཡིན་ཡང་ངས་བཟང་སྙམ་པའི་ང་རྒྱལ་དང་། ཆོས་དང་བླ་མ་ལ་མ་དད་བཞིན་དུ་ཉན་པ་དང་། ཆོས་ལ་དོན་གཉེར་མེད་པ་དང་། ལུས་ཆོས་གྲལ་དུ་ཡོད་ཀྱང་སེམས་ཕྱི་རོལ་དུ་གཡེངས་ནས་འབྲོག་ཐོག་ན་ཡོད་པ་དག་གིས་ལ་ཁའི་རྟ་ཟོག། ལུང་ཁོང་གི་ཁྱིམ་སྒོ་ཕྱིའི་དངོས་ཟོག ལས་ཀ་ཙ་གེ་ཙིག་གེ་སོགས་ལ་སེམས་པ་དང་། དགོན་དང་གྲོང་གི་ནང་དུ་ཡོད་པ་ཞིག་ཡིན་ནའང་། མེ་འབུད་ཆུ་ལེན། མི་དང་འབྲེལ་གཏུག ཚོང་དོན་བྱ་གཞག དེ་མིན་དཀོར་ཁ་གྲོང་ཆོག་རྩེད་མོས་ཧ་དགོད་རྣམས་ལ་སེམས་ཤོར་ནས་གཡེངས་བ་དང་། ཡང་ནང་དུ་སྡུད་ཆེ་སོང་བའི་བྱིང་རྨུགས་འཐིབ་གསུམ་ཡོང་བ་དང་། སྐྱོ་བས་ཉན་པ་སྟེ། ཨ་རོ་ཤུ་ཉན་ཚད་སྡོད་ཚད་གཉིས་ཀ་མི་འདུག་སྙམ་ནས་ཆོས་ཐུན་གྱིས་རྨུས་འགྲོ་བ་སྟེ། དེ་དྲུག་པོ་ནི་དྲི་མ་དྲུག་ཡིན་པས་སྤོང་དགོས་པ་ཡིན། མི་འཛིན་པ་ལྔ་ནི། ཚིག་འཛིན་ལ་དོན་མི་འཛིན་པ། དོན་འཛིན་ལ་ཚིག་མི་འཛིན་པ། བརྡ་མ་འཕྲོད་པར་འཛིན་པ། གོང་འོག་ནོར་ནས་འཛིན་པ། ལོག་པར་འཛིན་པ་སྟེ་དེ་ལྔ་པོ་ཡིན། ཚིག་འཛིན་ལ་དོན་མི་འཛིན་པ་ནི། ཚིག་སྙན་མོ་རེ་དང་ཐུག་ན་དེ་བློ་ལ་བཟུང་བ་ཙམ་ལས་དོན་ཟབ་མོ་ཞེ་ལ་འཛིན་མི་ཐུབ་པ་དང་། དོན་འཛིན་ལ་ཚིག་མི་འཛིན་པ་ནི། ཚིག་ལ་དགོས་པ་མེད་པས་དོན་གོ་ནས་ཤེས་དགོས་སྙམ་པ་སྟེ། ཚིག་ལ་མ་ལྟོས་པའི་དོན་གོ་ཐབས་མེད་ཕྱིར་ཚིག་དོན་གཉིས་ཀ་ཤོར་སོང་བ་དང་། བརྡ་མ་འཕྲོད་པར་འཛིན་པ་ནི། དྲང་ངེས་ལྡེམ་དགོངས་ལ་སོགས་པའི་གསུང་ལ་གོ་བ་ཟབ་མོ་མ་ལོན་ནས་གོ་ནོར་དུ་སོང་བ་དང་། གོང་འོག་ནོར་ནས་འཛིན་པ་ནི། བསྟན་པའི་བབས་དང་འགལ་བ་སྟེ། དཔེར་ན། ཐོས་བསམ་སྒོམ་གསུམ་ལ་ཆ་མཚོན་ན། དང་པོ་ཐོས། དེ་ནས་བསམ། དེ་ནས་སྒོམ་དགོས་པ་ཡིན་མོད། འོན་ཀྱང་དེ་ཕྱིན་ཅི་ལོག་ཏུ་སོང་ནས་དང་པོར་བསྒོམས། དེ་ནས་བསམས། དེ་ནས་ཐོས་པ་བཙལ་རྒྱུའི་ཕྱོགས་ལ་འདེང་བརྒྱབ་པའི་རིམ་པ་ནོར་སོང་བ་དང་། ལོག་པར་འཛིན་པ་ནི། དོན་ཕྱིན་ཅི་ལོག་ཏུ་གོ་ནོར་ཐེབས་ནས་ལོག་རྟོག་རྒྱུན་འབྱམས་ཏེ་རང་རྒྱུད་ཆུད་ཟོས་སུ་སོང་བ་སྟེ། དེ་དག་ནི་སྤང་བར་བྱ་བའི་ཀུན་སྤྱོད་ཡིན། བླང་བྱའི་ཀུན་སྤྱོད་ནི། འདུ་ཤེས་བཞི་བསྟེན་པ། ཕ་རོལ་ཏུ་ཕྱིན་པ་དྲུག་དང་ལྡན་པ། སྤྱོད་ལམ་གཞན་བསྟེན་པ་སྟེ་གསུམ་ལས། དང་པོ་འདུ་ཤེས་བཞི་བརྟེན་པ་ནི། མདོ་སྡོང་པོ་བཀོད་པ་ལས། རིགས་ཀྱི་བུ། ཁྱོད་ཀྱིས་བདག་ཉིད་ལ་ནད་པའི་འདུ་ཤེས་བསྐྱེད་པར་བྱའོ། ཆོས་ལ་སྨན་གྱི་འདུ་ཤེས་བསྐྱེད་པར་བྱའོ། དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས་བསྐྱེད་པར་བྱའོ། ནན་ཏན་ཉམས་སུ་ལེན་པ་ལ་ནད་ཉེ་བར་འཚོ་བའི་འདུ་ཤེས་བསྐྱེད་པར་བྱའོ། །ཞེས་གསུངས་པ་ལྟར། རང་ཉིད་ཐོག་མེད་ནས་ད་ལྟའི་བར་རྒྱུ་དུག་གསུམ་གྱིས་བསྐྱེད་པའི་འབྲས་བུ་སྡུག་བསྔལ་གསུམ་གྱི་ཟུག་རྔུས་མནར་ནས་ཡོད་པའི་ནད་པ་སྡུག་པོ་ཞིག་ཡིན་པའི་འདུ་ཤེས་དང་། དམ་པའི་ཆོས་དེ་ཉོན་མོངས་ནད་ཀྱི་གདུང་བ་སེལ་བའི་སྨན་ཞིག་ཡིན་པའི་འདུ་ཤེས་དང་། དགེ་བའི་བཤེས་གཉེན་ནི་ཉོན་མོངས་རྒྱུ་འབྲས་དང་བཅས་པའི་ནད་སེལ་བ་ལ་མཁས་པའི་སྨན་པ་བཟང་པོ་ཞིག་ཡིན་པའི་འདུ་ཤེས་དང་། ནན་ཏན་ཉམས་སུ་ལེན་པ་ནི་སྨན་ནད་པས་ཇི་ལྟར་བསྟེན་དགོས་པ་སྨན་པ་མཁས་པའི་ལག་ལེན་ལ་ཐུག་པ་ལྟར། བླ་མའི་ཞལ་ནས་གསུངས་པའི་དམ་ཆོས་བདུད་རྩི་དེ་རང་ཉིད་ཀྱིས་ཉམས་སུ་བླངས་ཏེ་རང་རྒྱུད་ཉོན་མོངས་ཀྱི་ནད་ལས་གྲོལ་ཐབས་བྱེད་པ་ནི་ནད་ཉེ་བ་འཚོ་བ་ལྟ་བུའི་འདུ་ཤེས་ཏེ། དེ་བཞི་པོ་དང་མ་བྲལ་བ་ཞིག་བྱེད་དགོས་པ་ཡིན། ཕ་རོལ་ཏུ་ཕྱིན་པ་དྲུག་དང་ལྡན་པ་ནི། །ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོགས་པའི་རྒྱུད་ལས། མེ་ཏོག་སྟན་སོགས་རབ་འབུལ་ཞིང་། །ས་ཕྱོགས་སྤྱོད་ལམ་སྡོམ་པ་དང་། །སྲོག་ཆགས་ཀུན་ལ་འཚེ་མི་བྱ། །བླ་མ་ལ་ནི་ཡང་དག་དད། །མ་ཡེངས་བླ་མའི་གདམས་ངག་ཉན། །དོགས་སེལ་ཕྱིར་ན་སྐྱོན་ཚིག་དྲི། །ཉན་པོ་ཡན་ལག་དྲུག་དང་ལྡན། །ཞེས་གསུངས་པ་ལྟར། ཆོས་འཆད་པ་པོ་བཞུགས་སའི་ཁྲི་གདན་གཤོམ་པ་དང་། མེ་ཏོག་འབུལ་བ་དང་། མཇལ་དར་ལ་སོགས་པ་འབུལ་བ་སྦྱིན་པ་དང་། སྤྱོད་ལམ་མ་གུས་པ་མི་བྱེད་པར་སྡོམ་པ་དང་། ཆོས་འཆད་སའི་ས་ཕྱོགས་གཙང་སྦྲ་བྱེད་པ་ཚུལ་ཁྲིམས་དང་། དཀའ་ཚེགས་ངལ་དུབ་ཡོད་མེད་ལ་མི་བལྟ་བར་ཆོས་ཞུ་བ་བཟོད་པ་དང་། བརྩོན་གང་དགེ་ལ་སྤྲོ་བའོ། །ཞེས་པ་ལྟར་དུ་ཆོས་དང་བླ་མ་ལ་ལོག་ལྟ་སྤངས་ནས་དད་པས་སྤྲོ་བཞིན་དུ་ཉན་པ་བརྩོན་འགྲུས་དང་། བླ་མའི་གདམས་ངག་ལས་སེམས་གཞན་དུ་མི་གཡེངས་བར་ཉན་པ་བསམ་གཏན་དང་། ཆོས་ལ་སྒྲོ་འདོགས་བཅད་ནས་ཐེ་ཚོམ་ཆོད་པ་ཤེས་རབ་སྟེ་དྲུག་པོ་ནི། ཆོས་ཞུ་བའི་སྐབས་ཀྱི་བླང་བྱའི་ཀུན་སྤྱོད་ཕ་རོལ་ཏུ་ཕྱིན་པ་དྲུག་དང་ལྡན་པ་ཞེས་པ་དང་། སྤྱོད་ལམ་གཞན་བསྟེན་པ་ནི། །འདུལ་བ་ལས། མ་གུས་པ་ལ་ཆོས་མི་བཤད། །མི་ན་བཞིན་དུ་མགོ་གཡོགས་དང་། །གདུགས་དང་འཁར་བ་མཚོན་ཐོགས་དང་། །མགོ་བོ་དཀྲིས་པ་དག་ལ་མིན། །ཞེས་གསུངས་པ་ལྟར། ཆོས་ཞུ་དུས་མ་གུས་པའི་སྤྱོད་ལམ་མགོ་དཀྲིས་ལ་སོགས་པས་མགོ་བཏུམ་པ་དང་། ཞྭ་གོན་ནས་ཆོས་ཉན་པ་དང་། གདུགས་ཕུབ་ནས་ཆོས་ཉན་པ་དང་། ལག་རྟེན་དང་མཚོན་ཆ་ལ་སོགས་རྫིག་རྫིག་གི་ཉམས་ཀྱིས་བཟུང་སྟེ་ཆོས་ཉན་པ་སོགས་མ་གུས་པའི་སྤྱོད་ལམ་ཡིན་པས་ཉན་པ་པོས་དེ་ལྟར་མི་བྱེད་པ་དང་། འཆད་པ་པོས་ཀྱང་དེ་འདྲ་བ་ལ་ཆོས་བཤད་མི་རུང་བར་གསུངས་ཤིང་། དེ་ལས་ལྡོག་སྟེ་གུས་པའི་ཚུལ་ནི། རབ་ཏུ་དམའ་བའི་ས་ལ་འདུག །དུལ་བའི་དཔལ་ནི་རྣམ་པར་བསྐྱེད། །དགའ་དང་ལྡན་པའི་མིག་གིས་བལྟ། །ཚིག་གི་བདུད་རྩི་འཐུང་བ་བཞིན། །རབ་ཏུ་བསྒྲིམས་ཏེ་ཆོས་ཉོན་ཅིག །ཅེས་གསུངས་པ་ལྟར། དགའ་ཞིང་སྤྲོ་བ་དང་ལྡན་པའི་སྒོ་ནས་སྦྱོར་བ་སེམས་བསྐྱེད། དངོས་གཞི་དམིགས་མེད། རྗེས་བསྔོ་བ་སྟེ་དམ་པ་གསུམ་གྱིས་ཟིན་པའི་སྒོ་ནས་ཆོས་ཉན་དགོས་པ་ཡིན། ད་རེས་སྐབས་སུ་བབ་པ་གང་ཞིག་བཤད་པར་བྱ་བའི་ཆོས་ཀྱི་རིམ་པ་ནི། རྣམ་དག་བདེ་ཆེན་ཞིང་གི་སྨོན་ལམ་རཱ་ག་ཨ་སྱས་མཛད་པ་འདི་ཉིད་ཡིན་ལ། འདིའི་མཛད་པ་པོ་མཁས་གྲུབ་རཱ་ག་ཨ་སྱ་འམ་མཁས་གྲུབ་ཀརྨ་ཆགས་མེད་ནི། མཁས་ཤིང་གྲུབ་པའི་ཁྱུ་མཆོག་བཀའ་རྙིང་རིས་སུ་མ་ཆད་པའི་བསྟན་འཛིན་གྱི་སྐྱེས་བུ་ཆེན་པོ་ཞིག་ཡིན་པ་མ་ཟད། ཁོང་གིས་ཐུགས་བརྩེ་བ་ཆེན་པོས་ཕྱི་རབས་རྗེས་འཇུག་གི་དོན་དུ་བཞག་པའི་རྣམ་དག་བདེ་ཆེན་ཞིང་གི་སྨོན་ལམ་འདི་ཉིད། བརྗོད་བྱ་གཏིང་ཟབ་ལ་རྗོད་བྱེད་གོ་བདེ་བས་གཞུང་ལུགས་མང་པོ་ལ་མ་སྦྱངས་པའི་ཕལ་བས་ཉན་ན་ཡང་གོ་བདེ་བ་དང་། མཁས་པ་ཆེན་པོ་གང་འདྲ་ཞིག་གིས་བརྟགས་དཔྱད་བྱས་ཀྱང་གཏིང་ཟབ་ཅིང་མདོ་རྒྱུད་ཀུན་དང་མཐུན་པའི་སྨོན་ལམ་འདི་ཉིད་མཛད་པ་ཡིན། འདི་ཐུགས་བསྐྱེད་ཀྱི་དབང་གིས་འགྲོ་དོན་ཁྱབ་རྒྱ་ཆེ་ཞིང་བྱིན་རླབས་ཀྱི་ཚན་ཁ་ལྷག་པར་མྱུར་བ་ཡིན། དབུ་ནས་མར་ཡི་གེའི་ངོ་ལ་བལྟས་ཏེ་ཚིག་རེ་དང་འབྲུ་རེ་གནོན་ཞོར་གཞུང་འདིའི་ནང་དོན་ཤེས་དགོས་པ་ཡིན་པས་ཚང་མས་ཡི་གེ་ལ་བལྟ་དགོས། འདི་ལ་བསྟན་བཅོས་ཀྱི་མཚན་བསྟན་པ་དང་། མཚན་དེ་ལྡན་གྱི་གཞུང་བཤད་པ་དང་གཉིས་ཡོད་པ་ལས། དང་པོ་ནི། བསྟན་བཅོས་ཀྱི་མཚན་བསྟན་པ། འདིའི་མཚན་ཡང་བཟང་འདོགས་སྙན་མིང་གི་སྤྲོས་པ་བསྐྱུངས་ནས་སྨོན་ལམ་གྱི་བརྗོད་བྱའི་ནང་དོན་ཐད་ཀར་གསལ་བའི་རང་བཞིན་བརྗོད་པའི་རྒྱན་གྱི་དབང་དུ་བྱས་ཏེ། རྣམ་དག་བདེ་ཆེན་ཞིང་གི་སྨོན་ལམ་བཞུགས་སོ།། ཞེས་གསུངས་པ་སྟེ། དེ་ཡང་སྤྱིར་ན་དག་དང་མ་དག་གི་ཞིང་ཁམས་ཞེས་པ་དེ་ལས་དག་དང་མ་དག་གི་སྣང་ངོར་ཤར་བའི་ཁྱད་པར་ཞིག་ཡིན་པས། བདེ་བ་ཅན་གྱི་ཞིང་ཁམས་དེ་ནི་འདུལ་བྱེད་སྟོན་པ་གཅིག་གི་གདུལ་བྱར་གྱུར་པའི་ཞིང་ཁམས་བྱེ་བ་ཕྲག་བརྒྱ་ལ་སོགས་ཐ་མལ་བའི་མཐུན་སྣང་དུ་གྱུར་པའི་མ་དག་པའི་ཞིང་ཁམས་དེ་ལྟ་བུ་མ་ཡིན་པར། སྔོན་གྱི་སྨོན་ལམ་གྱི་དབང་གིས་སྟོན་པ་འཁོར་དང་གདུལ་བྱ་ཕྲིན་ལས་སྤྱོད་ཡུལ་དང་བཅས་པ་ཤིན་ཏུ་གཙང་ཞིང་རྣམ་པར་དག་ཅིང་མ་དག་པའི་མིང་ཙམ་ཡང་མེད་པས་ན་རྣམ་དག་ཅེས་པ་དང་། ཞིང་དེར་སྐྱེ་བ་བླངས་ཙམ་གྱིས་སྡུག་བསྔལ་གྱི་ཚོར་བ་རྒྱུན་ཆད་ནས་བདེ་བ་མ་གཏོགས་སྡུག་བསྔལ་མེད་པས་མ་ཚད། བདེ་བ་དེ་ཡང་ཟག་བཅས་ཀྱི་བདེ་བས་མཚོན་ཐབས་མེད་པའི་ཟག་མེད་ཀྱི་བདེ་བ་ཆེན་པོ་ཡིན་པ་དེའི་ཕྱིར་ན་བདེ་བ་ཅན་ཞེས་པ་དང་། སྤྱིར་ན་རྒྱལ་བའི་ཞིང་ཁམས་མཐའ་ཡས་པ་ཞིག་ཡོད་ཀྱང་འདི་ནི་ཞིང་ཁམས་དེ་དག་ཐམས་ཅད་ལས་ཁྱད་དུ་འཕགས་པ་སྟེ། དེ་ཡང་ཇི་ལྟར་ཁྱད་དུ་འཕགས་ཤེ་ན། སྔོན་གྱི་ཐུགས་བསྐྱེད་དང་། ཞིང་ཁམས་ཀྱི་ཡོན་ཏན་དང་། ཞིང་ཁམས་དེར་སྐྱེ་བའི་སྨོན་ལམ་འགྲུབ་སླ་བའི་དབང་གིས་འཕགས་པ་ཡིན། ཞིང་ཁམས་དག་པ་གཞན་ལ་བདེ་བ་མེད་པ་མིན་ཡང་། བདེ་བ་ཅན་གྱི་ཞིང་འདི་ཉིད་སྔོན་སངས་རྒྱས་འཇིག་རྟེན་དབང་ཕྱུག་རྒྱལ་པོའི་ཞབས་དྲུང་དེར་འོད་དཔག་མེད་འཚང་རྒྱ་བའི་སྔོན་རོལ་དུ་དགེ་སློང་ཆོས་ཀྱི་འབྱུང་གནས་ཞེས་པར་གྱུར་བའི་ཚེ། བྱང་ཆུབ་མཆོག་ཏུ་ཐུགས་བསྐྱེད་ནས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་ཁམས་རྣམས་ཀྱི་རྒྱན་དང་བཀོད་པ་ཐམས་ཅད་ཕྱོགས་གཅིག་ཏུ་བསྡམས་པའི་ཞིང་ཁམས་ཤིག་འཛིན་པའི་སྨོན་ལམ་བཏབ་ཅིང་། རྫོགས་སྨིན་སྦྱངས་གསུམ་གཞན་ལས་ཁྱད་དུ་འཕགས་པ་མཐར་ཕྱིན་པའི་དབང་གིས། ཞིང་ཁམས་འདིའི་བདེ་བའི་ཡོན་ཏན་གཞན་ལས་ཆེས་ཆེར་འཕགས་ཕྱིར་བདེ་བ་ཆེན་པོའི་ཞིང་ཁམས་ཞེས་སུ་གྲགས་པ་སྟེ། དེ་ལྟ་བུའི་སྨོན་ལམ་ར་ག་ཨ་སྱེས་མཛད་པ་དེ་འདི་ན་བཞུགས་སོ་ཞེས་པས་དབང་པོ་རབ་ཀྱིས་དབུ་མཚན་མཐོང་བས་དབུ་ཞབས་ཀྱི་དོན་ཁོང་དུ་ཆུད་པ་དང་། དབང་པོ་འབྲིང་གིས་ཕྱོགས་གང་དུ་གཏོགས་པ་དང་ནང་དོན་གྱི་བརྗོད་བྱ་རགས་རིམ་ཤེས་པ་དང་། དབང་པོ་ཐ་མ་ཞིག་ཡིན་རུང་དབུ་ཡི་ཞལ་བྱང་མཐོང་དུས་འདི་བདེ་སྨོན་ཡིན་པ་དང་བདེ་སྨོན་ལ་ཡང་བཀའ་གཏེར་དག་སྣང་གི་ཆོས་བཀའ་རྒྱས་བསྡུས་མི་འདྲ་བ་མང་པོ་ཡོད་པ་ལས། འདི་ཆགས་མེད་ཚང་གིས་གསུངས་པ་ཡིན་པར་ཤེས་པ་སོགས་གླེགས་བམ་འཚོལ་སླ་བའི་དགོས་པ་དང་ལྡན་པའོ། །དེ་ལྟ་བུའི་སྒོ་ནས་མཚན་གྱི་དོན་བཤད་དེ། གཉིས་པ་མཚན་དེ་ལྡན་གྱི་གཞུང་ལ། གཞུང་དོན་ལ་འཇུག་པའི་ཡན་ལག་དང་། གཞུང་དོན་དངོས་བསྟན་པ་གཉིས་ལས། དང་པོ་གཞུང་དོན་ལ་འཇུག་པའི་ཡན་ལག་དབང་པོ་རྣོ་རྟུལ་ཐམས་ཅད་འདིར་འཇུག་བདེ་བའི་ཆེད་དུ་གབ་སྦས་ཀྱི་ཚུལ་མ་ཡིན་པར་ཤིན་ཏུ་གསལ་བའི་ཚིག་གིས་འདི་ཉིད་ཇི་ལྟར་འཆང་ཞིང་ཐུགས་དམ་དུ་བྱ་བའི་ཚུལ་དང་། འདིའི་ཕན་ཡོན་བསྟན་པ་གཉིས་ཡོད་པ་ལས། དང་པོ་ནི། འདི་ཉིད་ཇི་ལྟར་འཆང་ཞིང་ཐུགས་དམ་དུ་བྱ་བའི་ཚུལ། འདི་ཉིད་ཆག་མེད་ཐུགས་དམ་མཛོད།། ལག་པ་ན་ཡང་འབད་ནས་བྲིས།། མང་པོ་འགའ་ལ་ཨེ་ཕན་བསམས།། དཔེ་གཅོད་འདོད་མི་གདའ་ན་གཡོར།། ཞེས་གསུངས་ཏེ། ཕྱི་མར་རང་གཞན་བདེ་བ་ཆེན་པོའི་ཞིང་ཁམས་སུ་སྐྱེ་བར་འདོད་པའི་གང་ཟག་དག་གིས་བདེ་བ་ཅན་དུ་སྐྱེ་བའི་སྨོན་ལམ་འདི་ཉིད་ཉིན་རེ་བཞིན་དུ་ཆག་མེད་རྒྱུན་ཆད་མེད་པར་ཐུགས་ལ་འཆང་བའི་བཅུད་ཀྱི་དམ་པ་རུ་ཚིག་ངག་གིས་བཏོན་པ་དང་། དོན་ཡིད་ལ་བསྒོམས་པའི་མངོན་རྟོགས་དང་བཅས་ཏེ་འབྲལ་མེད་དུ་བསྟེན་པར་མཛོད་ཅིག ཟབ་མོའི་མདོ་འཆང་བ་དང་ཀློག་ཅིང་བྲིས་ན་ཕན་ཡོན་ཆེན་པོ་ཡོད་པས་ན། འདིའི་ཡི་གེ་མང་པོ་སྤེལ་བའི་ཕྱིར་དུ་ལག་པ་ན་ཡང་འབད་ནས་བརྩོན་པ་བསྐྱེད་དེ་བྲིས་ཤིག སྤྱིར་ན་འགྲོ་བ་སེམས་ཅན་གྱི་རིགས་སུ་གྱུར་པ་ཤིན་དུ་མང་པོ་དང་། ཁྱད་པར་དུ་དེ་ལས་སྡེ་ཚན་དང་སྡེ་རིས་སུ་གཏོགས་པ་མི་ལ་སོགས་པ་འགའ་ལ་ཨེ་ཕན་བསམས་པའི་གཞན་ཕན་རྒྱ་ཆེན་པོའི་ཀུན་སློང་གིས། གཞན་དང་གཞན་གྱིས་མང་པོར་སྤེལ་བའམ་འཆང་ཞིང་ཀློག་པའི་ཆེད་དུ་དཔེ་གཅོད་དམ་དཔེ་བཤུ་བྱེད་མི་ཡོད་ན་དཔེ་མཁྱུད་མེད་པར་གཡོར་ཞིག་ཅེས་པ་སྟེ། འདིའི་ཤུགས་ལ་གཞན་ཕན་གྱི་བསམ་པས་འདི་ཉིད་འཆད་སྤེལ་སྒོམ་སྒྲུབ་ཀྱི་སྐུལ་མ་བྱེད་དགོས་པའང་གདམས་པ་ཡིན་ནོ། །གཉིས་པ་ནི། གཉིས་པ་འདིའི་ཕན་ཡོན་བསྟན་པ། འདི་ལས་ཕན་ཡོན་ཆེ་བ་མེད།། འདི་བས་ཟབ་པའི་གདམས་ངག་མེད།། ང་ཡི་ཆོས་ཀྱི་རྩ་བ་ཡིན།། རང་གར་མ་བསྐྱུར་ཉམས་ལེན་འབུངས།། འདི་ནི་མདོ་ལུགས་ཡིན་པའི་ཕྱིར།། ལུང་མ་ཐོབ་ཀྱང་འདོན་ནི་རུང་།། ཞེས་གསུངས་ཏེ། འདི་ནི་ཐེག་ཆེན་མདོ་སྡེ་འོད་དཔག་མེད་ཀྱི་ཞིང་གི་ཡོན་ཏན་བཀོད་པའི་མདོ་དང་སྙིང་རྗེ་པདྨ་དཀར་པོའི་མདོ། འཆི་མེད་རྔ་སྒྲའི་མདོ། ཚངས་པ་བརྒྱ་བྱིན་གྱིས་ཞུས་པའི་མདོ། བཟང་པོ་སྤྱོད་པའི་སྨོན་ལམ་གྱི་མདོ། ཡེ་ཤེས་ཕྱག་རྒྱའི་ཏིང་ངེ་འཛིན་གྱི་མདོ། ད་དུང་ཡོངས་སུ་བསྔོ་བའི་རྒྱལ་པོའི་མདོ། སྡོང་པོ་བཀོད་པ་ལ་སོགས་པ་མདོ་མང་པོ་ཞིག་དང་། རྒྱུད་བླ་མ་སོགས་བསྟན་བཅོས་མང་པོ་ཞིག་གི་དགོངས་དོན་བདེ་བླག་ཏུ་བསྡུས་ཏེ་བདེ་བ་ཅན་གྱི་རྒྱུ་གསལ་པོར་བསྟན་པ་ཡིན་པས་ན་འདི་ཉིད་ཀྱི་སྒོ་ནས་བདེ་བ་ཅན་དུ་སྐྱེ་བའི་རྒྱུ་བསྒྲུབས་ན་མདོ་དང་བསྟན་བཅོས་དེ་དག་གི་སྒོ་ནས་བསྒྲུབས་པ་དང་ཁྱད་པར་མེད་པས་ན་འདི་ལས་ལྷག་པའམ་མཆོག་ཏུ་གྱུར་པའི་ཕན་ཡོན་ཆེ་བ་ཞིག་གཞན་ཟུར་ནས་རྙེད་དུ་མེད་པ་དང་། འདི་ནི་ཤིན་ཏུ་མྱུར་བའི་ལམ་སོ་སོའི་སྐྱེ་བོ་ཡིན་ཡང་བདེ་བ་ཅན་དུ་བགྲོད་ཐུབ་པའི་ལམ་མཆོག་རྒྱུ་སྒྲུབ་སླ་ཞིང་འབྲས་བུ་འགྲུབ་སླ་བ་ཡིན་པས་ན་འདི་ལས་ཟབ་པའི་གདམས་པ་ཁྱད་པར་ཅན་མདོ་ལམ་གཞན་ནས་འཚོལ་དུ་མེད་པ་དང་། མཁས་གྲུབ་ཀརྨ་ཆགས་མེད་ང་ཡི་ཐུགས་དམ་ཉམས་བཞེས་ཀྱི་ཆོས་ཀྱི་རྩ་བའང་འདི་ཡིན་ཞིང་། སྐལ་ལྡན་གཞན་ལ་འདོམས་པའི་གནད་ཀྱི་གདམས་པའང་འདི་ཡིན་པས་ན། རང་གར་མ་བསྐྱུར་བར་རྒྱུན་དུ་ཉམས་ལེན་གྱི་འབད་འབུང་རྩལ་དུ་བཏོན་པར་གྱིས་ཤིག འདི་ནི་འོད་མདོ་དང་། སྙིང་རྗེ་པདྨ་དཀར་པོའི་མདོ་ལ་སོགས་པའི་དགོངས་དོན་ཕྱོགས་གཅིག་ཏུ་བསྡུས་པའི་མདོ་ལུགས་ཡིན་པའི་ཕྱིར་ན། ཆིག་བརྒྱུད་མ་གཏོགས་མི་ཐོབ་པའི་སྔགས་ཀྱི་ཟབ་ཁྲིད་མན་ངག་གདམས་པ་སོགས་དང་འདྲ་བ་མ་ཡིན་པར། ཁྲིད་དང་ལུང་ལ་སོགས་པ་མ་ཐོབ་པའི་གང་ཟག་ཡིན་ཡང་སྔགས་དང་རྒྱུད་སྡེ་ལྟར་འདོན་མི་རུང་བའི་བཀག་རྒྱ་མེད་པར་འདོན་རུང་བར་བསྟན་ནས། ཤུགས་ལ་ཁྲིད་དང་ལུང་དང་། སྔགས་ལུགས་ཀྱི་དབང་ལ་སོགས་པ་ཐོབ་ན་དེ་བས་ཀྱང་མཆོག་ཏུ་གྱུར་པ་ཕུན་སུམ་ཚོགས་པའི་ཡན་ལག་ཏུ་འགྱུར་བར་བསྟན་པ་ཡིན། དེ་དག་གིས་གཞུང་དོན་དངོས་ལ་འཇུག་པའི་ཡན་ལག་སོང་ནས། ད་ནི་གཉིས་པ་སྨོན་ལམ་འདིའི་གཞུང་དོན་དངོས་ལ་གསུམ་སྟེ། མདོའི་དགོངས་དོན་ལྟར་བདེ་བ་ཅན་དུ་སྐྱེ་བའི་རྒྱུ་བཞི་ལ་སྨོན་ཞིང་སྒྲུབ་པའི་སྒོ་ནས་རྒྱས་པར་བཤད་པ་དང་། སངས་རྒྱས་ཀྱི་མཚན་བཟུང་བའི་ཕན་ཡོན་དང་བྱིན་རླབས་ཚེ་འདིར་འབྱུང་བར་གསོལ་བ་འདེབས་པའི་སྒོ་ནས་མཇུག་བསྡུ་བ་དང་། སྨོན་ལམ་འགྲུབ་པའི་རྒྱུ་མཐུན་འགྱུར་བདེན་ཚིག་གཟུངས་སྔགས་དང་བཅས་པས་བྱིན་གྱིས་བརླབས་པ་སྟེ། གཞུང་དོན་གྱི་ལུས་ཡོངས་སུ་རྫོགས་པ་དེ་ལྟ་བུའི་ཆིངས་རྣམ་པ་གསུམ་གྱིས་འཆད་པ་ཡིན། དེ་ལས་དང་པོ་བདེ་བ་ཅན་དུ་སྐྱེ་བའི་རྒྱུ་བཞི་ལ་སྨོན་པ་དེ་ལ་ཡང་ནང་གསེས་རྣམ་པ་བཞི་སྟེ། རྟེན་ཞིང་ཁམས་ཀྱི་བཀོད་པ་ཡང་ཡང་ཡིད་ལ་བྱེད་པ་དང་གཅིག རྒྱུ་དགེ་བའི་རྩ་བ་དཔག་ཏུ་མེད་པ་སྒོ་དུ་མ་ནས་བསགས་པ་དང་གཉིས། གྲོགས་བྱང་ཆུབ་མཆོག་ཏུ་སེམས་བསྐྱེད་པ་དང་གསུམ། རྐྱེན་དགེ་བའི་རྩ་བ་རྣམས་བདེ་བ་ཅན་དུ་སྐྱེ་བའི་རྒྱུར་བསྔོ་ཞིང་སྨོན་ལམ་འདེབས་པ་དང་བཞི་སྟེ། འདི་བློར་འཛིན་བདེ་བའི་ཆེད་དུ་སྡོམ་ཚིག་བྱེད་ན། རྟེན་རྒྱུ་གྲོགས་རྐྱེན་བཞི། ཟེར་ཆོག་པ་ཡིན་ད་རེས་ཁྱེད་ཚོ་འདིར་ཡོང་ནས་མ་མཐའ་ཡང་། བདེ་བ་ཅན་དུ་སྐྱེ་བའི་རྒྱུ་བཞི་པོ་གང་དག་ཡིན་ཞེས་འདྲི་ན། འདི་དང་འདི་དག་རེད་ཅེས་མིང་གཟུང་རྒྱུ་ཡོད་པ་ཞིག་བྱེད་དགོས་པ་ཡིན། རྒྱུ་བཞི་བོ་དེ་ལས་དང་པོ་ཚོགས་ཞིང་གསལ་འདེབས་པ་དེ་ལ་ཡང་། རྟེན་དང་བརྟེན་པའི་སྒོ་ནས་གཉིས་སུ་དབྱེ་བ་ལས། དང་པོ་རྟེན་ཞིང་ཁམས་གསལ་འདེབས་པ་ནི། རྟེན་ཞིང་ཁམས་གསལ་འདེབས་པ། ཨེ་མ་ཧོ། ཞེས་གསུངས་ཏེ། དེ་ཡང་བདེ་བ་ཅན་གྱི་ཞིང་གི་བཀོད་པ་དང་། ཞིང་ཁམས་དེའི་མགོན་ནམ་གཙོ་བོ་སངས་རྒྱས་འོད་དཔག་མེད་ཀྱི་ཡེ་ཤེས་ཡོན་ཏན་གཟི་བརྗིད་ཕྲིན་ལས་ཚད་མེད་པ་དེ་དག་ཐམས་ཅད་མངོན་སུམ་དུ་མཇལ་ཞིང་མཐོང་བ་ལྟ་བུའི་ངོ་མཚར་དཔག་ཏུ་མེད་པའི་གསལ་སྣང་ལ། དད་སྤྲོ་ཟོལ་མེད་ཀྱིས་དུང་བ་སྐྱེས་ནས་བརྗོད་པའི་ཚིག་གིས་འགོ་འདྲེན་པ་སྟེ། དེ་ཞིབ་ཏུ་བཤད་ན་སྔོན་བསྐལ་བ་དཔག་ཏུ་མེད་པའི་གོང་རོལ་ཏུ་སངས་རྒྱས་འཇིག་རྟེན་དབང་ཕྱུག་རྒྱལ་པོ་འཇིག་རྟེན་དུ་བྱོན་པའི་སྐབས་སུ། བྱང་ཆུབ་སེམས་དཔའ་དགེ་སློང་ཆོས་ཀྱི་འབྱུང་གནས་ཞེས་བྱ་བ་ཤས་ཆེར་དྲན་པ་དང་ལྡན་པ། བློ་གྲོས་དང་ལྡན་པ། རྟོགས་པ་དང་ལྡན་པ། ཤེས་རབ་དང་ལྡན་པ། བརྩོན་འགྲུས་དང་ལྡན་པ། རྒྱ་ཆེན་པོ་ལ་མོས་པ་ཞིག་བྱུང་ངོ། །དགེ་སློང་ཆོས་ཀྱི་འབྱུང་གནས་ཀྱིས་བྱང་ཆུབ་མཆོག་ཏུ་སེམས་བསྐྱེད་ནས་ལོ་བྱེ་བ་གཅིག་གི་རིང་སངས་རྒྱས་དེའི་ཞབས་འབྲིང་མཛད་པའི་ཚེ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་དྲུང་ནས་དང་པོ་བྱང་ཆུབ་མཆོག་ཏུ་ཐུགས་བསྐྱེད་པ་ནས་བཟུང་སྟེ། མཐར་མངོན་པར་རྫོགས་པར་སངས་མ་རྒྱས་ཀྱི་བར་དུ་ཞིང་ཁམས་ཀྱི་རྒྱན་བཀོད་དང་ཡོན་ཏན། སངས་རྒྱས་ཀྱི་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། ཐམས་ཅད་མ་ནོར་མ་འདྲེས་པར་གསན་ཞིང་ཐུགས་སུ་ཆུད་པར་མཛད་པ་ཡིན། དེ་སྐབས་སུ་ས་བརྒྱད་པ་ལ་གནས་པའི་བྱང་ཆུབ་སེམས་དཔའ་དེས་སངས་རྒྱས་གཞན་ལས་ཀྱང་ཁྱད་པར་དུ་འཕགས་པའི་སྨོན་ལམ་ཆེན་པོ་ལྔ་བརྒྱ་བཏབ་པ་སྟེ། ཞིང་ཁམས་བདེ་བ་ཅན་དེར་སངས་རྒྱས་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་ཁམས་ཀྱི་བཀོད་པ་དང་ཡོན་ཏན་ཐམས་ཅད་གཅིག་ཏུ་བསྡམས་པ་ལས་ཀྱང་ལྷག་པའི་ཡོན་ཏན་གྱི་ཁྱད་པར་དང་ལྡན་པར་གྱུར་ཅིག་ཅེས་པ་དང་། ཞིང་ཁམས་གཞན་ལ་ལར་སྐྱེ་དགོས་ན་སྒྲིབ་གཉིས་རགས་པ་སྤངས་དགོས་པ་དང་། ལ་ལར་ཉོན་སྒྲིབ་མ་ལུས་པ་སྤངས་དགོས་པ་དང་། མ་མཐའ་ཡང་བདག་མེད་ཀྱི་དོན་རྟོགས་ཏེ་མཐོང་ལམ་ཆོས་ཉིད་ཀྱི་བདེན་པ་མ་མཐོང་ན་ཞིང་ཁམས་དེ་དག་ལ་སྐྱེ་བ་འཛིན་མི་ཐུབ་པ་ཡིན་ཡང་བདག་གི་ཞིང་ཁམས་དེར་མཚམས་མེད་དང་ཆོས་སྤངས་ཀྱི་ལས་བསགས་པ་མ་གཏོགས་སོ་སོའི་སྐྱེ་བོ་ཡང་སྐྱེ་བར་ཤོག་ཅེས་སྨོན་པ་དང་། སེམས་ཅན་གང་ཞིག་གིས་བདག་གི་མཚན་རྣ་ལམ་ལ་ཐོས་པ་ཙམ་གྱིས་ཞིང་ཁམས་བདེ་བ་ཅན་ལ་དབུགས་འབྱིན་པར་ཤོག་ཅིག་ཅེས་པ་ལ་སོགས་པའི་སྨོན་ལམ་ཆེན་པོ་ལྔ་བརྒྱ་བཏབ་ཅིང་། དེ་ལྟ་བུའི་སྨོན་ལམ་ཆེན་པོ་ལྔ་བརྒྱ་དེ་མ་འགྲུབ་ཀྱི་བར་དེ་སྲིད་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པ་འཚང་རྒྱ་བར་མི་བགྱིའོ་ཞེས་དམ་བཅས་ནས་སྨོན་ལམ་དེ་དག་ཐམས་ཅད་འགྲུབ་པའི་ཆེད་དུ་དུས་ཀྱི་ཁྱད་པར་བསྐལ་བ་གངྒཱའི་ཀླུང་གི་བྱེ་མ་སྙེད་གཉིས་ཀྱི་བར་དུ་བྱ་དཀའ་བའི་སྤྱོད་པ་རྟག་ཏུ་བྱང་ཆུབ་སེམས་དཔའི་སྤྱོད་པ་འབའ་ཞིག་གི་རྗེས་སུ་འབྲངས་ནས་ལུས་ངག་ཡིད་གསུམ་གྱི་ཉེས་སྤྱོད་ཕྱོགས་རེ་ཙམ་མ་ཡིན་པར་བསྡོམས། ཚུལ་ཁྲིམས་དང་ཏིང་ངེ་འཛིན་གྱི་སྤྱོད་པ་ཕྱོགས་རེ་ཙམ་མ་ཡིན་པར་བསྒྲུབས། ཁྱད་པར་དུ་དེ་ཁོ་ན་ཉིད་རྟོགས་པའི་ཤེས་རབ་ཚད་བཟུང་དང་བྲལ་བས། མཐར་འཛིན་གྱི་འཆིང་བ་བཅད་ནས་སྦྱིན་པ་ལ་སོགས་པའི་བྱང་ཆུབ་ཀྱི་སྤྱོད་པ་ཐམས་ཅད་ཤེས་རབ་ཀྱིས་རྒྱས་བཏབ་ནས་གོམས་པར་བྱས་ཤིང་། དགེ་བའི་ཆོས་དེ་དག་ཁྱད་པར་དུ་འགྲོ་བའི་ཕྱིར་དུ་སངས་རྒྱས་དང་བྱང་སེམས་དགེ་བའི་བཤེས་གཉེན་གྲངས་བགྲང་ན་མཐའ་མི་དཔོག་པ་མང་པོ་ཞིག་ལ་སྒོ་ཀུན་ནས་མཉེས་པའི་ཐབས་ལ་འབད་པ་དང་། རང་ཉིད་གང་ལ་གནས་པའི་ལམ་དེ་མཐའ་ཡས་པའི་སེམས་ཅན་ཐམས་ཅད་ལ་དངོས་དང་བརྒྱུད་ནས་རྟོགས་པའི་ཐབས་མཁས་ཀྱི་མཛད་པ་དང་རྣམ་གྲངས་བསམ་གྱིས་མི་ཁྱབ་པའི་སྒོ་ནས་བསྟན་པ་ཐམས་ཅད་ཀུན་ཏུ་བཟང་པོའི་སྨོན་ལམ་གྱིས་བསྔོས་ཤིང་ཡོངས་སུ་སྤེལ་བ་ལ་སོགས་པ་སྟེ། མདོར་ན་དགེ་བའི་རྩ་བ་སྒྲུབ་པའི་ཚུལ་དེ་སྦྱོང་པ་དམན་པའི་གང་ཟག་ཅིག་གིས་ཉན་ན་ཡིད་ཆེས་པར་དཀའ་བར་སྣང་བའི་མཛད་པ་རྨད་དུ་བྱུང་དང་རྫོགས་སྨིན་སྦྱངས་གསུམ་མཛད་པའི་མཐར་བྱང་ཆུབ་སེམས་དཔའ་དགེ་སློང་ཆོས་ཀྱི་འབྱུང་གནས་དེ་སངས་རྒྱས་ནས་སྨོན་ལམ་ཆེན་པོ་ལྔ་བརྒྱ་གྲུབ་སྟེ་མགོན་པོ་འོད་དཔག་མེད་ཅེས་མཚན་ཕྱོགས་བཅུར་གྲགས་སོང་བའི་ལོ་རྒྱུས་དང་། གཞན་ཡང་སྙིང་རྗེ་པད་དཀར་ལས། ཡང་བསྐལ་བ་གང་གཱའི་ཀླུང་གཅིག་གི་བྱེ་མ་སྙེད་འདས་པ་ན་སངས་རྒྱས་ཀྱི་ཞིང་བསྐལ་བ་ཆེན་པོ་འཛིན་པ་ཞེས་བྱ་བ་ལ་གླིང་བཞི་ལ་དབང་བའི་འཁོར་ལོའི་སྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་དང་། དེ་ལ་བློན་པོ་རྒྱ་མཚོའི་རྡུལ་ཞེས་བྱ་བ་ལ་བུ་མཚན་དང་ལྡན་པ་ཞིག་འཁྲུངས་པའི་མིང་ཡང་རྒྱ་མཚོའི་སྙིང་པོར་བཏགས་སོ། །དེ་རབ་ཏུ་བྱུང་སྟེ་མངོན་པར་རྫོགས་པར་སངས་རྒྱས་ནས་སངས་རྒྱས་རིན་ཆེན་སྙིང་པོ་ཞེས་བྱ་བར་གྱུར་ཏོ། །སངས་རྒྱས་དེ་ལ་རྒྱལ་བློན་འཁོར་ཚོགས་དང་བཅས་པས་བསྙེན་བཀུར་བྱས། བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་རྩིབས་ཀྱི་མུ་ཁྱུད་ལ་བསྐུལ་ཏེ། རྒྱལ་པོས་སངས་རྒྱས་དེའི་མདུན་དུ་ཞིང་ཁམས་བཟུང་ཞིང་སྨོན་ལམ་ཆེན་པོ་བཏབ་བོ། །སངས་རྒྱས་ཀྱིས་ལེགས་སོ་ཞེས་བྱིན་ནས་རྒྱལ་པོ་ལྟོས་དང་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཁྲག་འབུམ་འདས་པ་ན་འཇིག་རྟེན་གྱི་ཁམས་དབང་པོ་ལྟར་ཤིན་ཏུ་མཛེས་པ་ཞེས་བྱ་བ་དེ་མ་འོངས་པའི་དུས་བསྐལ་བ་གྲངས་མེད་གང་གཱའི་ཀླུང་གཅིག་གི་བྱེ་མ་འདས་པ་ན་བདེ་བ་ཅན་ཞེས་བྱ་བར་གྱུར་ཏེ། ཁྱོད་དེར་དེ་བཞིན་གཤེགས་པ་ཚེ་དཔག་མེད་ཅེས་བྱ་བ་འགྱུར་རོ་ཞེས་མངོན་སུམ་དུ་ལུང་བསྟན་ཏོ། །ཞེས་གསུངས་པའི་འཁོར་སྒྱུར་རྩིབས་ཀྱི་མུ་ཁྱུད་ནི་རྒྱལ་བ་འོད་དཔག་མེད་སློབ་པ་ལམ་གྱི་གནས་སྐབས་དང་། རྒྱ་མཚོའི་སྙིང་པོ་དཔལ་རྒྱལ་བ་ཤཱཀྱ་ཐུབ་པ་སྟེ་དེའི་མདུན་ནས་བྱང་ཆུབ་ཀྱི་ཐུགས་དང་པོར་འཛིན་པའི་ཚུལ་གྱི་ལོ་རྒྱུས་ཡང་དེ་ལྟར་ཡོད་པ་ཡིན། དེ་ལྟ་བུའི་སྨོན་ལམ་གྲུབ་ནས་ཞིང་ཁམས་བདེ་བ་ཅན་ན་མགོན་པོ་འོད་དཔག་མེད་སངས་རྒྱས་ནས་ད་ལྟའི་བར་འཇིག་རྟེན་འདིའི་བསྐལ་བ་ཆེན་པོ་བཅུ་སོང་བ་དང་། འཇིག་རྟེན་འདིའི་བསྐལ་བ་ཆེན་པོ་བཅུ་ནི་བདེ་བ་ཅན་གྱི་ཞག་མ་བཅུ་སྟེ་ད་ལྟའི་བསྐལ་བ་འདི་ནི་བདེ་བ་ཅན་གྱི་ཞག་བཅུ་པ་དེ་ཡིན་པས་མགོན་པོ་འོད་དཔག་མེད་ད་ལྟ་ཡང་གཟུགས་སྐུ་མངོན་སུམ་དུ་བཞུགས་ནས་ཆོས་སྟོན་པ་དང་། ཞིང་ཁམས་དེའི་ཡོན་ཏན་དང་བཀོད་པ་སོགས་ཞིང་ཁམས་གཞན་ལས་ཁྱད་པར་དུ་འཕགས་པའི་ཚུལ་དེ་དག་ལ་ངོ་མཚར་བའི་ཚིག་ཨེ་མ་ཧོ་ཞེས་བརྗོད་པའོ། །དེ་ནས་རྟེན་ཞིང་ཁམས་གསལ་འདེབས་པ་དངོས་ཤོ་ལོ་ཀ་གཅིག་དང་ཕྱེད་ཀྱིས་བསྟན་པ་ནི། འདི་ནས་ཉི་མ་ནུབ་ཀྱི་ཕྱོགས་རོལ་ན།། གྲངས་མེད་འཇིག་རྟེན་མང་པོའི་ཕ་རོལ་ན།། ཅུང་ཟད་སྟེང་དུ་འཕགས་པའི་ཡུལ་ས་ན།། རྣམ་པར་དག་པའི་ཞིང་ཁམས་བདེ་བ་ཅན།། ཞེས་གསུངས་ཏེ། དེ་ཡང་ངོ་མཚར་བའི་ཞིང་ཁམས་ཁྱད་འཕགས་བདེ་བ་ཅན་དེ་གང་ན་ཡོད་པ་ཡིན་ཞེ་ན། ད་ལྟ་རང་རེ་ཡོད་སའི་སངས་རྒྱས་ཤཱཀྱ་ཐུབ་པའི་ཞིང་མི་མཇེད་འཇིག་རྟེན་གྱི་ཁམས་འདི་ནས་ཚད་འཇལ་ན། ཉི་མ་ནུབ་ཀྱི་ཕྱོགས་རོལ་ན་ཡོད་པར་བསྟན་པ་སྟེ། དེ་ཡང་སྔགས་ཀྱི་སྐབས་ན་རིགས་ལྔའི་ཞིང་ཁམས་སམ་རྣམ་གྲོལ་དབུགས་ཆེན་འབྱིན་པའི་ཞིང་ལྔ་ལས་ནུབ་ཕྱོགས་བདེ་བ་ཅན་གྱི་ཞིང་ན་མགོན་པོ་འོད་སྣང་མཐའ་ཡས་བཞུགས་པར་གསུངས་པ་དང་གཅིག་པ་ཡིན། འདི་དཔག་ཚད་དང་རྒྱང་གྲགས་ཀྱིས་འཇལ་བའི་ག་ཤེད་ཅིག་ཏུ་ཡོད་པར་མི་སེམས་པར། རྣལ་འབྱོར་བ་གང་དུ་སངས་རྒྱས་པའམ་གདོས་བཅས་ཀྱི་ལུས་རྒྱ་བོར་ནས་འདི་སྣང་འགགས་པའི་དེ་མ་ཐག་རང་སྣང་མངོན་དུ་གྱུར་བ་དེ་འདྲ་ལ་དོན་གྱིས་གོ་བ་བླངས་ན་ཆོག་ཅིང་། འདི་སྒྲིབ་པ་མ་སྤངས་པའི་སོ་སྐྱེ་ཡང་ཞིང་དེར་སྐྱེ་བའི་སྨོན་ལམ་འགྲུབ་པ་ཡིན་པས་ན་མཚན་མའི་རྟོག་པ་དང་བཅས་པའི་ལས་དང་པོ་བ་དང་སྒོ་བསྟུན་ནས་གཙོ་ཆེར་གསུངས་པ་ཡིན། འོ་ན་བདེ་བ་ཅན་གྱི་ཞིང་ཁམས་དེ་འདི་ནས་ནུབ་ཕྱོགས་ན་ཐག་རིང་ཐུང་ཇི་ཙམ་ཞིག་གི་མཚམས་ན་ཡོད་པ་ཡིན་ཞེ་ན། གྲངས་མེད་འཇིག་རྟེན་མང་པོའི་ཕ་རོལ་ན་ཡོད་ཅིང་། དེ་ཡང་སོ་སོའི་སྐྱེ་བོའི་བློ་ཡུལ་ལས་འདས་པའི་ཕྱོགས་སུ་གྱུར་པས་ན་གྲངས་ལས་འདས་པའི་ཕ་རོལ་ན་ཡོད་པའི་དོན་དང་། ཡང་ན་གྲངས་ཀྱིས་བགྲང་བའི་གྲངས་མེད་ལ་གོ་བ་སྟེ་འུ་ཚོ་བོད་ཀྱི་གྲངས་རྩིས་ནང་། གཅིག་བཅུ་བརྒྱ་སྟོང་ཁྲི་འབུམ་དང་། །ས་ཡ་བྱེ་བ་དུང་ཕྱུར་ཏེ། །དགུ་པོ་རྐྱང་པའི་གྲངས་སུ་འདོད། །ཅེས་རྩིས་ཀྱི་རྨང་གཞིའི་གྲངས་རྐྱང་གི་ཐོག་ཏུ། ཐེར་འབུམ་ཁྲག་ཁྲིག་རབ་བཀྲམ་དང་། །གཏམས་དཀྲིགས་མི་འཁྲུག་ཁྱད་འབྱིན་དང་། །ལ་སོགས་པ་ནས། གྲངས་མེད་པ་ནི་ཐ་མའོ། །ཞེས་པའི་གྲངས་ཀྱི་གྲངས་མེད་ལ་གོ་ནའང་ཆོག་པ་ཡིན། དེ་ཡང་ཆེ་ས་ནས་བཤད་ན་མཐའ་མེད་པའི་ཕ་རོལ་གྱི་ནུབ་ཕྱོགས་དང་། ཆུང་ས་ནས་བཤད་ན་རྡུལ་ཕྲ་རབ་གཅིག་གི་སྟེང་ན་རྡུལ་སྙེད་ཀྱི་ཞིང་ཁམས་ཡོད་པས། རྡུལ་ཕྲ་རབ་གཅིག་གི་ནུབ་ཕྱོགས་ལ་གོ་ན་ཆོག་པ་ཡིན། དེ་ལྟ་བུའི་ཞིབ་ཕྲའི་རིགས་པ་དང་ཡང་དག་དོན་དཔྱོད་ཚད་མས་བརྟགས་ན། དངོས་མཐའ་ཆོས་ཉིད་དང་། རྟོག་མཐའ་མི་རྟོག་པ་ལས་འགྲོ་ས་ག་ལ་ཡོད། ཁོད་སྙོམས་པའི་གཞི་ཁྱོན་ལས་གཞལ་ཡོང་ན་ཅུང་ཟད་སྟེང་གི་ཕྱོགས་ལ་ཡར་མཐོ་ཞིང་འཕགས་པའི་ཡུལ་ས་ན་ཡོད་པར་གསུངས་པ་སྟེ། འདིས་དོན་ལ་འཇིག་རྟེན་ལས་འདས་ཤིང་འཕགས་པའི་མངོན་རྟོགས་དང་ལྡན་པའི་ཞིང་ཁམས་ཡིན་པར་ཡང་མཚོན་པ་ཡིན་ནོ། །དེ་ལྟ་བུའི་གྲངས་མེད་འཇིག་རྟེན་མང་པོའི་ཕ་རོལ། ཅུང་ཟད་སྟེང་དུ་འཕགས་པའི་ཡུལ་ས་ན་གང་ཆགས་ཡོད་པ་ཡིན་ན། རྣམ་པར་དག་པའི་ཞིང་ཁམས་བདེ་བ་ཅན་དེ་ཆགས་ཡོད་པར་བསྟན་པ་སྟེ། སྤྱིར་ན་རྒྱལ་བའི་དགོངས་པ་ཚད་མེད་པ་བཞིན་དུ་ཞིང་ཁམས་རབ་འབྱམས་ཀྱང་ཚད་མེད་པ་མཐའ་ཡས་པ་ཞིག་ཡོད་ཅིང་། དེ་ལའང་དག་དང་མ་དག་གི་ཞིང་ཁམས་འདྲ་དང་མི་འདྲ་གཅིག་ཏུ་མ་ངེས་པ་སྟེ། དཔེར་ན། སངས་རྒྱས་ཤཱཀྱ་ཐུབ་པའི་ཞིང་ཁམས་ད་ལྟ་རང་ཅག་ཡོད་ས་འདི་ལྟ་བུ་ལ་མཚོན་ན། ཐ་མལ་མི་ཡི་སྣང་ངོར་མ་དག་པ་སྙིགས་མ་ལྔ་ཡིས་སྦགས་སོང་བའི་ཞིང་ཁམས་འདི་ལྟ་བུའང་ཡོད་ཅིང་། བདེ་བ་ཅན་ནི་ད་ལྟ་རང་རེའི་མཐོང་ཚུལ་དུ་ཡོད་པའི་ཞིང་ཁམས་མ་དག་པ་འདི་ལྟ་བུ་མ་ཡིན་པ་ནི། མགོན་པོ་ཀླུ་སྒྲུབ་ཀྱིས། རིན་ཆེན་ས་གཞི་ཁོད་སྙོམས་མཐའ་བྲལ་བ། །རྒྱ་མཚོ་རི་ཀླུང་གླིང་གཞན་ཐ་དད་མེད། །གསལ་ཞིང་འོད་འབར་བདེ་ཞིང་ཉམས་དགའ་བ། །རྣམ་དག་རྒྱལ་བའི་ཞིང་དེར་སྐྱེ་བར་ཤོག །ཅེས་གསུངས་པ་ལྟར་དུ་ཀུན་ནས་ཀུན་ཏུ་གཙང་ཞིང་སྣོད་བཅུད་གཉིས་ཀ་རྣམ་པར་དག་པས། སྣོད་མ་དག་པ་ས་རྡོ་དང་གསེག་མ། མཐོ་དམན་དང་གཡང་ས། ངམ་གྲོག་དང་ཚེར་མ། འབྱུང་བཞིས་གནོད་པ་ལ་སོགས་པ་ཡིད་དུ་མི་འོང་པའི་དངོས་པོའི་ཡུལ་སྣང་ཞིག་གཏན་ནས་མེད་ཅིང༌། ས་གཞི་ཁོད་སྙོམས་ཤིང་དག་ཅིང་གཙང་བ། མེ་ལོང་གི་ངོས་བཞིན་དུ་ཤིན་ཏུ་མཛེས་པའི་འོད་ཟེར་གྱི་རི་མོ་ཅན། གསེར་གྱི་དྲ་བས་ཁེབས་ནས་ཡོད་པ། འཇམ་ཞིང་སྙི་ལ་རེག་ན་བདེ་བ་སྦྱིན་པ། ཀུན་དགའ་ར་བ་དང་། ནགས་ཚལ་ཡིད་དུ་འོང་བ་དང་། སྐྱེད་མོའི་ཚལ་དག་གིས་གང་བ། རིན་པོ་ཆེ་སྣ་ཚོགས་ལས་གྲུབ་པའི་མེ་ཏོག་པདྨ་མཚོན་མདོག་སྣ་ཚོགས་པ་ཅན། དེ་དག་ཀྱང་འདབ་ལོ་རྒྱ་ཆེ་ཞིང་འོད་ཟེར་དང་ལྡན་པ་སྟེ། དེ་ཡང་ཀུན་མཁྱེན་ཀློང་ཆེན་པས། མཛེས་ལྡན་པད་མོ་རེ་རེ་དག་ལ་འོད་ཟེར་སྟོང་ཕྲག་སོ་དྲུག་འབྱུང་བས་ཉི་ཟླའི་འོད་ལས་ལྷག་པའི་ཞིང་ཁམས་བདེ་བ་ཅན་ལ་གུས་ཕྱག་འཚལ། །ཞེས་གསུངས་པ་ལྟར་དང་། འབབ་སྟེགས་མཆོག་ཏུ་བདེ་བའི་ཆུ་ཀླུང་ཡན་ལག་བརྒྱད་ལྡན་ལ་གསེར་གྱི་བྱེ་མ་བརྡལ་བ། དྲི་རབ་ཏུ་ཞིམ་པའི་རྫས་དང་སྤོས་ཀྱིས་བསྒོས་པའི་ལྷའི་མེ་ཏོག་མནྡཱ་ར་བའི་ཚོགས་ཀྱིས་ཁེབས་ནས་ཡོད་པའི་ཆུ་ཀླུང་འཇམ་པོ་དེ་དག་ལས་ཟབ་དང་རྒྱ་ཆེ་བའི་ཆོས་ཀྱི་སྒྲ་དབྱངས་སུ་ཇི་ལྟར་འདོད་པ་བཞིན་དུ་གྲགས་པ། ཡིད་འོང་ཁྲུས་ཀྱི་རྫིང་བུ་དག་དྲོ་གྲང་གང་ལ་གང་འདོད་ཀྱི་རྗེས་སུ་འབྲངས་པའི་རེག་བྱ་ཅན། དྲི་ཞིམ་སྤོས་ཀྱི་ངད་དང་ལྡན་པ། དཔག་བསམ་གྱི་ལྗོན་ཤིང་རིན་པོ་ཆེ་སྣ་ཚོགས་ལས་གྲུབ་པ། ཀུན་མཁྱེན་འཇིགས་གླིང་གིས། ལྟ་ན་སྡུག་པའི་སྐྱེད་ཚལ་ལྗོན་པ་ལས། །འདོད་པའི་ཡོན་ཏན་རྒྱ་ཕྲག་མོད་ལ་འབྱུང༌། །བར་སྣང་ལ་སྤྲུལ་གཞལ་མེད་ཁང་ལ་སོགས། །གཞན་འཕྲུལ་དབང་བྱེད་ཀྱིས་ཀྱང་དོ་ཟླ་མིན། །བདེ་བ་ཅན་གྱི་ཞིང་དེར་སྐྱེ་བར་ཤོག །ཅེས་གསུངས་པ་ལྟ་བུ་དང་། གང་འདོད་འབྱུང་བའི་ལྗོན་ཤིང་དང་། སྤྲུལ་བའི་བྱ་རིགས་སྣ་ཚོགས་པས་སྐད་སྙན་མོའི་སྒྲ་དབྱངས་འབྱིན་པས་མི་རྟག་ཞི་དང་བདག་མེད་ཀྱི་དོན་སྟོན་པ་སོགས་ཞིང་ཁམས་ཀྱི་བཀོད་པ་རྒྱས་པ་འདིའི་སྨོན་ལམ་གྱི་སྨད་ནས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་གསུངས་པའི་སྐབས་ནས་བདེ་བ་ཅན་གྱི་སྣོད་བཅུད་ཀྱི་བཀོད་པ་དང་ཡོན་ཏན་ཐམས་ཅད་གསུངས་ཡོད་ཀྱང་གང་ཞིག་དད་པས་མོས་པའི་ཡུལ་མངོན་དུ་བྱེད་པའི་ཕྱིར་ངས་འདི་ནས་ཧ་ལམ་ཕྱོགས་མགོ་ཙམ་ཞིག་བཤད་པ་ཡིན། སྣོད་ཀྱི་བཀོད་པ་དེ་ལྟ་བུ་ཞིག་ལ་བརྟེན་པའི་བཅུད་ཀྱི་དབང་དུ་བཏང་ནའང་ངན་སོང་གསུམ་དང་སྐྱེ་རྒ་ན་འཆི་སོགས་སྡུག་བསྔལ་གྱི་མིང་ཙམ་ཡང་མི་གྲག་པར་སྣོད་བཅུད་ཐམས་ཅད་བདེ་བའི་རང་བཞིན་ཡིན་པས་ན་བདེ་བ་ཅན་གྱི་ཞིང་ཁམས་ཞེས་གསུངས་པ་ཡིན། བདག་གི་ཆུ་བུར་མིག་གིས་མ་མཐོང་ཡང་།། རང་སེམས་གསལ་བའི་ཡིད་ལ་ལམ་མེར་གསལ།། ཞེས་གསུངས་ཏེ། འུ་ཚོ་མ་དག་ཟག་བཅས་སྡུག་བདེན་གྱི་ཕུང་པོའི་ལུས་རྒྱ་དང་མ་བྲལ་ཞིང་། ལྷའི་མིག་དང་། ལྷའི་རྣ་བའི་མངོན་ཤེས་ལ་སོགས་པའང་མ་ཐོབ་ལ། ཤའི་སྤྱན་དང་། ལྷའི་སྤྱན་སོགས་ཀྱིས་དེ་བས་ཀྱང་དབེན་པའི་མ་དག་ཆུ་བུར་གྱི་མིག་ཐབས་རྡུགས་འདིས། དག་པ་སངས་རྒྱས་ཀྱི་ཞིང་ཁམས་བདེ་བ་ཅན་མངོན་སུམ་དུ་མ་མཐོང་ཡང༌། རང་གི་སེམས་ཉིད་ནི་ཀུན་ཏུ་ཐོགས་མེད་ཡིན་ཕྱིར། ཞིང་ཁམས་སྦྱོང་བའི་བསམ་པ་རྣམ་པར་དག་པ་དང་ལྡན་པས། བདེ་བ་ཆེན་པོའི་ཞིང་ཁམས་ཀྱི་བཀོད་པ་དེ་མདོ་ལས་ཇི་ལྟར་འབྱུང་བ་བཞིན་དུ་མིག་ལམ་ལ་ཡོད་པ་ལྟར་གསལ་འདེབས་ཆོག་པ་སྟེ། དེ་ཡང་མིག་དང་རྣ་བའི་ནུས་པ་བས་སེམས་ཀྱི་ནུས་པ་རྒྱ་ཆེ་བ་དཔེར་ན། རང་ཅག་གི་མིག་གིས་རྒྱང་རིང་པོར་མི་ཆོད་ཀྱང་། སེམས་ཀྱིས་སྟོང་གསུམ་འཇིག་རྟེན་རབ་འབྱམས་སྐད་ཅིག་མ་གཅིག་ལ་དྲན་ཆོག་པ་བཞིན་དུ། ཏིང་ངེ་འཛིན་གྱི་ནུས་པ་ནི་དེ་ལས་ཀྱང་རྒྱ་ཆེ་བ་ཡིན་པས་མིག་སྔར་མེད་ཀྱང་ཡིད་ལ་ལམ་མེར་གསལ་ཆོག་པ་ཡིན། ཀུན་མཁྱེན་འཇིགས་གླིང་གིས། བུ་རམ་ཤིང་པའི་ཞལ་ནས་ཀུན་དགའ་བོ། །ཁྱོད་ལོངས་ནུབ་ཀྱི་ཕྱོགས་སུ་ཁ་སྟོན་ལ། །མེ་ཏོག་གཏོར་ནས་ཐལ་མོ་སྦྱར་བྱས་ཏེ། །རྫོགས་པའི་སངས་རྒྱས་འོད་སྣང་དཔག་ཏུ་མེད། །རྡུལ་བྲལ་ཤིན་ཏུ་རྣམ་པར་དག་པ་ལ། །ཕྱག་འཚོལ་དེ་མཚན་སྒྲིབ་པ་མེད་པ་ནི། །ཞེས་གསུངས་པ་ལྟར། སྔོན་སངས་རྒྱས་བཅོམ་ལྡན་འདས་ཤཱཀྱ་ཐུབ་པས། ཀུན་དགའ་བོ་ལ་ཁྱེད་ཀྱིས་བདེ་བ་ཅན་གྱི་ཞིང་ཁམས་བལྟ་བར་འདོད་དམ་གསུངས་དུས། ཤིན་ཏུ་འདོད་དོ་ཞུས་པས། འོ་ན་ཁྱོད་ལོངས་ལ་ནུབ་ཀྱི་ཕྱོགས་སུ་ཁ་འཁོར་ནས་ཐལ་མོ་སྦྱོར་གསུངས་ཏེ། སངས་རྒྱས་ཀྱི་རྫུ་འཕྲུལ་གྱི་མཐུ་ལ་བརྟེན་ནས། ཀུན་དགའ་བོས་སངས་རྒྱས་ཀྱི་ཞིང་ཁམས་བདེ་བ་ཅན་མངོན་སུམ་དུ་མཇལ་བ་ཡིན། འུ་ཅག་གིས་མཐོང་བ་མངོན་གྱུར་གྱི་ཆོས་ལ་མངོན་སུམ་དངོས་སྟོབས་ཀྱིས་གཞལ་ཆོག་ནའང་། མ་མཐོང་ཤིན་ཏུ་ལྐོག་གྱུར་གྱི་རིགས་དེ་དག་དེ་བཞིན་གཤེགས་པའི་བཀའ་ཡི་རྗེས་སུ་འབྲངས་ཏེ། ཡིད་ཆེས་རྗེས་སུ་དཔག་གི་ཚད་མའི་བློས་མོས་པ་ཡིད་བྱེད་བྱེད་དགོས་པ་ཡིན། དེ་ཡིས་རྟེན་དང་བརྟེན་པའི་ཚོགས་ཞིང་གསལ་འདེབས་པ་གཉིས་ལས། རྟེན་ཞིང་ཁམས་ཀྱི་བཀོད་པ་གསལ་བཏབ་ཚུལ་བཤད་ཟིན་ནས། གཉིས་པ་བརྟེན་པ་ཚོགས་ཞིང་གསལ་འདེབས་པ་ནི། དེ་ན་བཅོམ་ལྡན་རྒྱལ་བ་འོད་དཔག་མེད།། པདྨ་རཱ་གའི་མདོག་ཅན་གཟི་བརྗིད་འབར།། དབུ་ལ་གཙུག་ཏོར་ཞབས་ལ་འཁོར་ལོ་སོགས།། མཚན་བཟང་སོ་གཉིས་དཔེ་བྱད་བརྒྱད་ཅུས་སྤྲས།། ཞལ་གཅིག་ཕྱག་གཉིས་མཉམ་བཞག་ལྷུང་བཟེད་འཛིན།། ཆོས་གོས་རྣམ་གསུམ་གསོལ་ཞིང་སྐྱིལ་ཀྲུང་གིས།། པདྨ་སྟོང་ལྡན་ཟླ་བའི་གདན་སྟེང་དུ།། བྱང་ཆུབ་ཤིང་ལ་སྐུ་རྒྱབ་བརྟེན་མཛད་དེ།། ཐུགས་རྗེའི་སྤྱན་གྱིས་རྒྱང་ནས་བདག་ལ་གཟིགས།། ཞེས་གསུངས་པ་སྟེ། བདེ་བ་ཅན་གྱི་ཞིང་ཁམས་དབྱིབས་དང་རྒྱན་དང་བཀོད་པ་ཕུན་སུམ་ཚོགས་ཤིང་རྒྱ་ཁྱོན་ཚད་ལས་འདས་པ། འོད་དང་འོད་ཟེར་མཐའ་མེད་པ་འཕྲོ་བའི་དབུས་དེ་ན། ཆགས་སོགས་ཉོན་མོངས་པ་ཐམས་ཅད་བཅོམ་ཞིང༌ཡེ་ཤེས་ལྔ་དང་ལྡན་པས་ན་བཅོམ་ལྡན་ནམ། ཡང་ན་བདུད་བཞི་བཅོམ་ཞིང་ལེགས་པའི་ཡོན་ཏན་དྲུག་དང་ལྡན་ཞིང་སྲིད་ཞི་གཉིས་ཀྱི་མཐའ་ལས་འདས་པས་ན་བཅོམ་ལྡན་འདས་དང་། བདུད་ཀྱི་དཔུང་ཚོགས་ལས་རྒྱལ་བས་ན་རྒྱལ་བ། སེམས་ཅན་སྐྱབས་མེད་ཀྱི་སྐྱབས་དང་མགོན་མེད་ཀྱི་མགོན་དུ་གྱུར་པས་ན་མགོན་པོ། ཕྱོགས་བཅུའི་ཞིང་ཁམས་རབ་འབྱམས་ཐམས་ཅད་ན་སངས་རྒྱས་དེའི་སྐུའི་འོད་ཟེར་གྱིས་ཁྱབ་ཅིང༌སྣང་བར་མཛད་པ་དང་སྣང་བ་དཔག་མེད་ཟད་པ་མེད་པས་ན་འོད་དཔག་མེད་ཅེས་མཚན་ནས་སྨོས་ཏེ་སྐུའི་ངོ་བོའི་ཡོན་ཏན་བསྟན་པ་དང་། སྐུའི་རྣམ་པའང་གསུང་མ་ཆགས་པདྨའི་རིགས་དང་འགྲོ་ལ་བརྩེ་བས་རྗེས་སུ་ཆགས་པའི་རྟགས་སུ་སྐུ་མདོག་དམར་པོ་དབང་གི་མདོག་རིན་པོ་ཆེ་པད་མ་རཱ་གའི་ལྷུན་པོ་ལ་ཉི་གཞོན་འབུམ་ཕྲག་གི་འོད་ཟེར་ཕོག་པ་ལྟ་བུའི་མདོག་ཅན་འོད་དང་འོད་ཟེར་འབུམ་ཕྲག་འཕྲོ་བའི་གཟི་བརྗིད་རབ་ཏུ་འབར་བ་དང་། དབུ་ལ་གཙུག་ཏོར་བལྟར་མི་མངོན་པ་ནས། ཞབས་གཉིས་ཀྱི་མཐིལ་དུ་འཁོར་ལོ་རྩིབས་བརྒྱད་ཀྱི་རི་མོ་འབུར་དུ་དོད་པ་ལ་སོགས་པ་མངོན་རྟོགས་རྒྱན་ལས། ཕྱག་ཞབས་འཁོར་ལོའི་མཚན་དང་རུས་སྦལ་ཞབས། །ཕྱག་དང་ཞབས་སོར་དྲ་བས་འབྲེལ་བ་དང་། །ཕྱག་ནི་ཞབས་བཅས་འཇམ་ཞིང་གཞོན་ཤ་ཆགས། །འདི་ཡི་སྐུ་ནི་བདུན་དག་མཐོ་བ་དང་། །སོགས་ནས། སྤྱན་ནི་མཐོན་མཐིང་སྤྱན་རྫི་བ་མཆོག་གི། །འདྲ་བ་འདི་དག་སུམ་ཅུ་རྩ་གཉིས་མཚན། །ཞེས་པས་མཚན་རྟགས་བཟང་པོ་སུམ་བཅུ་རྩ་གཉིས་བསྟན་པ་དང་། དཔེ་བྱད་བཟང་པོ་བརྒྱད་ཅུ་ནི། ཐུབ་པའི་སེན་མོ་ཟངས་མདོག་དང་། །མདོག་སྣུམ་མཐོ་དང་སོར་མོ་རྣམས། །ཟླུམ་རྒྱས་བྱིན་གྱིས་ཕྲ་བ་དང་། །རྩ་མི་མངོན་དང་མདུད་པ་མེད། །ཅེས་པ་ལ་སོགས་པ་ནས། དཔལ་གྱི་བེའུ་བཀྲ་ཤིས་ནི། །གཡུང་དྲུང་འཁྱིལ་བས་བརྒྱན་པ་སྟེ། །སངས་རྒྱས་དཔེ་བྱད་བཟང་པོར་བཞེད། །ཅེས་པ་སྟེ། དེ་ལྟ་བུའི་མཚན་བཟང་སོ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པའོ། །འདི་མཚར་གཏམ་ཞིག་བཤད་རྒྱུ་ཡོད་རོང་སྐད་བཤད་མཁན་འགའ་རེས་མཚན་བཟང་དང་ཚེམས་བཟང་གཉིས་སྒྲ་འདྲེས་པས། མཚན་བཟང་ལ་ཚེམས་བཟང་དུ་རློམ་པའི་དོན་གོ་ནོར་དུ་ཤོར་ནས་སངས་རྒྱས་ལ་ཚེམས་སུམ་ཅུ་རྩ་གཉིས་ཡོད་ཅེས་མཁས་མདོག་གིས་བླུན་གཏམ་བཤད་མཁན་ཡང་ཡོད་རབས་གྲག་པ་དང་། ཡང་ཡུལ་སྐད་འགའ་རེར་སྒྲ་མ་དག་པའི་དབང་གིས། མི་ཞིག་གིས་མཚན་བརྗོད་ཀྱི་ལུང་དྲངས་ནས། འཕགས་ལམ་ཤིན་ཏུ་མཐོ་ལ་གནས། །ཟེར་བ་ཅིས་མ་བདེན་ཕ་གི་ཀན་ན་ལྟོས་དང་ཕག་རྣམས་ཇེ་མཐོ་ཇེ་མཐོར་འགྲོ་བར་འདུག་ཅེས་བཞད་གད་ཀྱི་རྒྱུ་རུ་འགྱུར་བའི་གཏམ་སྨྲས་ཚུལ་ཡོད་པར་གྲགས་པས་སྒྲ་དག་པར་བརྗོད་ཅིང་དོན་ལ་སེམས་པར་གལ་ཆེ་བ་ཡིན། ཆོས་སྐུ་སྤྲོས་བྲལ་ཉག་གཅིག་མཚོན་པའི་ཞལ་གཅིག ཐབས་དང་ཤེས་རབ་མཚོན་པའི་ཕྱག་གཉིས། ཐབས་ཤེས་དབྱེར་མེད་མཚོན་པའི་མཉམ་བཞག་གི་ཕྱག་རྒྱ། འགྲོ་བ་སེམས་ཅན་ཐམས་ཅད་ལ་ཟབ་དང་རྒྱ་ཆེ་བའི་ཆོས་ཀྱིས་ཚིམས་པར་མཛད་པའི་བརྡར་ཕྱག་མཉམ་བཞག་གི་སྟེང་དུ་ལྷུང་བཟེད་བདུད་རྩིས་གང་བ་བསྣམས་པ་དང་། ན་བཟའ་ཆོས་གོས་རྣམ་གསུམ་སྐུ་ལ་གསོལ་བ་སྟེ། དེ་ཡང་རབ་ཏུ་བྱུང་བའི་རྟགས་ཁྱད་པར་ཅན་ཆོས་གོས་བླ་གོས་ནི་ང་ཚོས་རྒྱུན་པར་ཆོས་གོས་ཞེས་པ་འདི་དང་། ཆོས་གོས་མཐང་གོས་ནི་ང་ཚོས་རྒྱུན་དུ་ཤམ་ཐབས་ཞེས་པའི་གླེགས་བུ་ཅན་འདི་སྟེ་གླེགས་བུ་མེད་པ་ནི་སྨད་ཤམ་ཡིན། བསྙེན་པར་རྫོགས་པའི་དགེ་སློང་གི་དངོས་པོར་གྱུར་པའི་ན་བཟའ་སྣམ་སྦྱར་དང་བཅས་ལ་ཆོས་གོས་རྣམ་གསུམ་ཟེར་ཞིང་། དེ་ཡང་ཁ་དོག་གི་ཐོག་ནས་བཤད་ན་བཙོད་དང་ངུར་སྨྲིག་སྟེ། སྐུ་སྟོད་ལ་མནབ་པའི་ན་བཟའ་བླ་གོས་དེ་བཙོད་ཀྱི་མདོག་ཅན། དེའི་ཐོག་ལ་སྣམ་སྦྱར་དམར་པོ་དང། སྐུ་སྨད་ལ་མཐང་གོས་དམར་སེར་མནབས་ཤིང་། རྨ་བྱ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲིའི་སྟེང་ན། འཁོར་བའི་སྐྱོན་གྱིས་མ་གོས་པའི་པདྨ་དང་། དཀར་གསལ་དྲི་མས་མ་གོས་པའི་ཟླ་བའི་གདན་དུ། འཁོར་འདས་མཉམ་ཉིད་ཀྱི་དོན་ལས་མི་གཡོ་བའི་རྟགས་སུ་ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བྱང་ཆུབ་ཀྱི་ཤིང་རིན་པོ་ཆེ་པདྨོ་རྣམ་པར་སྣང་བ་ཞེས་པ་མཐོ་ཁྱད་ལ་དཔག་ཚད་སྟོང་དང་དྲུག་བརྒྱ་དང་། རྩ་བའི་སྦོམ་ཕྲ་ལ་དཔག་ཚད་ལྔ་བརྒྱ་ཡོད་པ། ཡལ་ག་དང་ལོ་མས་དཔག་ཚད་བརྒྱད་བརྒྱ་ཚུན་ཆད་ཁེབས་པ། ཡལ་ག་ཚང་མ་ལ་ནོར་བུ་དང་དྲིལ་གཡེར་གསེར་གཡུ་མུ་ཏིག་རྒྱན་ཕྲེང་སོགས་ཀྱིས་བརྒྱན་པ། ལྗོན་ཤིང་དེ་ཉིད་མཐོང་ཐོས་དྲན་རེག་གི་སེམས་ཅན་ཐམས་ཅད་བདེ་བ་ལས་ཕྱིར་མི་ལྡོག་པ་ལ་སོགས་པའི་ཡོན་ཏན་མཐའ་མེད་པ་དང་ལྡན་པའི་ཤིང་དེ་ལ་སྐུ་རྒྱབ་བརྟེན་ནས་བཞུགས་ཡོད་པ་གསལ་བ་ནི་སྐུའི་རྣམ་པ་ཡིད་ལ་བྱེད་པའོ། །དེ་ནས་ཐུགས་ཀྱི་ཡོན་ཏན་ཡིད་ལ་བྱེད་པ་ནི། འོད་དཔག་མེད་ཀྱི་ཐུགས་རྗེ་ཡེ་ཤེས་ཆེན་པོའི་སྤྱན་གྱིས་དུས་གསུམ་ཀུན་ཏུ་གསལ་འགྲིབ་མེད་པར་རྒྱང་རིང་པོ་བདེ་བ་ཅན་གྱི་ཞིང་ཁམས་ནས། དད་པས་མོས་པ་ཅན་གྱི་གང་ཟག་བདག་ལ་སོགས་པ་ལ་ངེས་པར་དུ་བརྩེ་བའི་ཞལ་གྱིས་ཕྱོགས། འཛུམ་པའི་སྤྱན་གྱིས་གཟིགས། དགྱེས་པའི་ཐུགས་གྱིས་དགོངས་ནས། འདྲེན་པའི་དེད་དཔོན་ཆེན་པོ་རུ་བཞུགས་ཡོད་པར་བསམས་ན་རང་ལ་དད་པ་ཡོད་ན་སངས་རྒྱས་གཟིགས་པ་ལ་ཉེ་རིང་མེད་པ་ནི་ཉི་མ་ནམ་མཁའི་མཐོངས་ན་ཡོད་ཀྱང་འོད་འདི་ན་ཤར་བ་ལྟ་བུ་ཡིན་ནོ། །སྤྱིར་རྫོགས་པའི་སངས་རྒྱས་ལ་རྟག་པ་རྒྱུན་གྱི་ཐུགས་རྗེ་དུས་ལས་མི་ཡོལ་བར་ཆུ་བོའི་རྒྱུན་ལྟ་བུ་དང་། རང་བཞིན་ཤུགས་ཀྱི་ཐུགས་རྗེ་རྩོལ་རྟོག་མེད་པར་ངང་གིས་འབྱུང་བ་ཉི་མའི་འོད་ཟེར་ལྟ་བུ་ཡོད་པས་གཟིགས་པ་ལ་ཉེ་རིང་མེད་ཀྱང་། བསྐུལ་ཞིང་གསོལ་བ་འདེབས་པའི་ཐུགས་རྗེ་སྙིང་རྗེ་ཅན་ལ་དབུལ་པོས་ནོར་སློང་བ་ལྟ་བུ་སྟེ། དད་པ་དང་གསོལ་འདེབས་ཀྱིས་སྒོ་མ་ཕྱེས་ན་བྱིན་རླབས་ཀྱི་སྣང་བ་མཐོང་དུ་མེད་པ་དཔེར་ན་ཁང་པའི་ཕྱི་རྒྱབ་ཏུ་ཉི་མ་རྟག་ཏུ་ཤར་ཡང་སྒོ་དང་སྐར་ཁུང་མེད་ན་ཁང་པའི་ནང་ལ་ཉི་འོད་མི་འཕོག་པ་ལྟ་བུ་ཡིན་པ་དང་། གདུལ་བྱ་ཡུལ་དང་འཕྲད་པའི་ཐུགས་རྗེ་བུ་ཆུང་གཡང་ཁར་རྒྱུག་པར་ཕ་མས་མཐོང་བ་ལྟ་བུ་ཡོད་ཀྱང་ཚོགས་བསགས་སྒྲིབ་སྦྱོང་གིས་རྒྱུད་དག་པར་མ་བྱས་ན་སངས་རྒྱས་དངོས་སུ་མི་མཐོང་བ་དཔེར་ན་མེ་ལོང་དག་པར་མ་ཕྱིས་ན་གཟུགས་བརྙན་མི་འཆར་བ་ལྟ་བུ་ཡིན་ནོ། །རྒྱང་རིང་ཟེར་བ་དེའང་། མཁའ་དང་ས་གཞིའི་བར་ཐག་རྒྱང་རིང་ཞིང་། །རྒྱ་མཚོའི་ཕ་རོལ་ཚུ་རོལ་འགྲམ་ཡང་རིང་། །ཞེས་གསུངས་པ་དང་མཚུངས་པར་འཕགས་དང་སོ་སྐྱེའི་བར་གྱི་ཡོན་ཏན་དང་སྐྱོན་གྱི་ཁྱད་པར་དེ་ཤིན་ཏུ་ནས་ཀྱང་ཆེན་པོ་ཡིན་པས་མ་ཚད་རྒྱང་ཐག་ཀྱང་རིང་པོ་ཡིན་པས་རྒྱུ་ཚོགས་མ་བསགས་ན་བདེ་བ་ཅན་ཡང་ཐག་རིང་པོའོ་ཞེས་པའོ། །དེ་ཡན་གྱིས་གཙོ་བོ་འོད་དཔག་མེད་དེ་བསྟན་ནས། གཉིས་པ་འཁོར་གཉིས་གསལ་བ་ནི། གཉིས་པ་འཁོར་གཉིས་གསལ་བ། གཡས་སུ་བྱང་ཆུབ་སེམས་དཔའ་སྤྱན་རས་གཟིགས།། སྐུ་མདོག་དཀར་པོ་ཕྱག་གཡོན་པད་དཀར་འཛིན།། གཡོན་དུ་བྱང་ཆུབ་སེམས་དཔའ་མཐུ་ཆེན་ཐོབ།། སྔོན་པོ་རྡོ་རྗེས་མཚན་པའི་པད་མ་གཡོན།། གཡས་གཉིས་སྐྱབས་སྦྱིན་ཕྱག་རྒྱ་བདག་ལ་བསྟན།། ཞེས་གསུངས་པ་སྟེ། གཙོ་བོ་འོད་དཔག་མེད་པ་དེ་དཀྱིལ་ལ་བཞུགས་པའི་གཡས་ཕྱོགས་སུ་རྒྱལ་བ་ཀུན་གྱི་སྙིང་རྗེའི་རང་གཟུགས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དེ་འཁོར་བའི་སྐྱོན་གྱིས་མ་གོས་པའི་བརྡར་སྐུ་མདོག་དཀར་པོ་གངས་རི་ལ་ཉི་མའི་ཟེར་གྱིས་འཁྱུད་པ་ལྟ་བུ། ཞལ་གཅིག་ཕྱག་གཉིས་ལོངས་སྤྱོད་རྫོགས་པའི་རྒྱན་ཆས་སྣ་ཚོགས་ཀྱིས་བརྒྱན་པ། ཕྱག་གཡོན་པའི་དཀོན་མཆོག་གསུམ་མཚོན་གྱི་ཕྱག་རྒྱས་སྙིང་རྗེ་པད་མ་དཀར་པོ་ལྟ་བུས་འགྲོ་ལ་རྗེས་སུ་བརྩེ་བའི་རྟགས་སུ་འདབ་དྲུག་པད་མ་དཀར་པོའི་ཡུ་བ་ཐུགས་ཀའི་ཐད་ལ་འཛིན་པ་དང་། ཐོས་དོན་རྒྱུད་ལ་འབྱོངས་ཤིང་མཁྱེན་བརྩེའི་ནུས་པ་རྒྱས་པའི་རྟགས་ལ་སྙན་གྱི་ཐད་ཀར་ཁ་བྱེ་བ་དང་། སངས་རྒྱས་འོད་དཔག་མེད་ཀྱི་སྐུའི་གཡོན་ཕྱོགས་སུ་རྒྱལ་བ་ཀུན་ཀྱི་མཐུ་སྟོབས་ནུས་པའི་རང་གཟུགས་བྱང་ཆུབ་སེམས་དཔའ་མཐུ་ཆེན་ཐོབ་བམ་ཕྱག་ན་རྡོ་རྗེ་དེ་ཉིད། ཆོས་ཉིད་མི་འགྱུར་བའི་རྟགས་སུ་སྐུ་མདོག་སྔོན་པོ་བེེ་ཌཱུརྱའི་རི་བོར་ཉིན་བྱེད་ཀྱི་འོད་ཀྱིས་བརྒྱན་པ་ལྟ་བུ། ཞལ་གཅིག་ཕྱག་གཉིས་ལོངས་སྐུའི་ཆས་ཅན། ཕྱག་གཡོན་པ་དཀོན་མཆོག་གསུམ་མཚོན་གྱི་ཕྱག་རྒྱས་རྒྱལ་བ་ཀུན་ཀྱི་གསང་གསུམ་ནུས་པའི་དབང་རྟགས་ཀྱི་གསེར་གྱི་རྡོ་རྗེས་མཚོན་པའི་པདྨའི་ཡུ་བ་ཐུགས་ཀར་འཛིན་ཅིང་། འཁོར་བྱང་ཆུབ་སེམས་དཔའ་ཆེན་པོ་དེ་གཉིས་ཀའི་ཕྱག་གཡས་པས་སྐུའི་སྟ་ཟུར་ནས་མར་སྐྱབས་སྦྱིན་གྱི་ཕྱག་རྒྱ་མཛད་ནས་བདག་སོགས་སེམས་ཅན་ཐམས་ཅད་སྐྱོབ་པའི་ཚུལ་མཛད་པ་སྟེ། སེམས་ཅན་ཐམས་ཅད་ལ་འཁོར་བ་དང་ངན་སོང་གི་སྡུག་བསྔལ་ལ་སྐྲག་སྣང་ཙམ་ཁོ་ནས་ཕན་པ་མེད་པས། ཁྱེད་ཚོས་དད་པ་གྱིས་ལ་གསོལ་བ་ཐོབས་དང་ཁོ་བོ་གཉིས་ཀྱིས་མི་འཇིགས་པ་སྐྱབས་ཀྱི་སྦྱིན་པས་འཇིགས་དང་སྡུག་བསྔལ་ཀུན་ལས་སྐྱོབ་པར་བྱེད་དོ་ཞེས་པའི་བརྡ་དང་། འགྲོ་བའི་དོན་ལ་སྐྱོ་བ་མེད་པའི་བརྡར་སྐུ་བཞེངས་སྟབས་སུ་འགྲེང་བའི་ཚུལ་གྱིས་བཞུགས་པའོ།། གཙོ་བོ་གསུམ་པོ་རི་རྒྱལ་ལྷུན་པོ་བཞིན།། ལྷང་ངེ་ལྷན་ནེ་ལྷམ་མེར་བཞུགས་པའི་འཁོར།། བྱང་ཆུབ་སེམས་དཔའི་དགེ་སློང་བྱེ་བ་འབུམ།། ཀུན་ཀྱང་གསེར་མདོག་མཚན་དང་དཔེ་བྱད་བརྒྱན།། ཆོས་གོས་རྣམ་གསུམ་གསོལ་ཞིང་སེར་ལྟེམ་མེ།། ཞེས་གསུངས་ཏེ། བདེ་ལྡན་ཞིང་གི་མགོན་པོ་གཙོ་བོ་འོད་དཔག་མེད་དང་། འཁོར་སེམས་དཔའ་ཆེན་པོ་གཉིས་དང་བཅས་པའི་གཙོ་བོ་གསུམ་པོ་རི་རྒྱལ་ལྷུན་པོ་གསེར་རི་རོལ་མཚོའི་དབུས་ན་མངོན་པར་མཐོ་བ་བཞིན་དུ་བྱང་ཆུབ་སེམས་དཔའི་དགེ་སློང་བྱེ་བ་འབུམ་སྡེའི་ནང་ནས་སྐུ་མཚན་དཔེ་གསལ་རྫོགས་ཀྱི་རང་བཞིན་ལྷང་ངེ། གསུང་ཚངས་དབྱངས་ཡན་ལག་དྲུག་ཅུའི་རང་བཞིན་ལྷན་ནེ། ཐུགས་བྱམས་དང་སྙིང་རྗེའི་ཡེ་ཤེས་འོད་གསལ་ཆེན་པོའི་རང་བཞིན་ལྷམ་མེར་བཞུགས་པ་སྟེ། ནམ་མཁའ་མ་ཟད་ཀྱི་བར་སེམས་ཅན་ཀྱི་གྲངས་མི་ཟད། དེ་མ་ཟད་ཀྱི་བར་དུ་ལས་དང་ཉོན་མོངས་པའི་རྒྱུན་མི་ཟད། དེ་མ་ཟད་ཀྱི་བར་སངས་རྒྱས་བྱང་སེམས་ཀྱི་འགྲོ་དོན་གྱི་སྤྱོད་པ་མི་ཟད་པར་བཞུགས་པ་ནི། མགོན་པོ་ཀླུ་སྒྲུབ་ཀྱིས། དེ་སྟེང་རྒྱལ་བ་མགོན་པོ་འོད་དཔག་མེད། །གཡས་སུ་བྱང་ཆུབ་སེམས་དཔའ་སྤྱན་རས་གཟིགས། །གཡོན་དུ་བྱང་ཆུབ་སེམས་དཔའ་མཐུ་ཆེན་ཐོབ། །གྲངས་མེད་སེམས་དཔའི་བསྐོར་བ་མཐོང་བར་ཤོག །ཅེས་གསུངས་པ་ལྟར་གཙོ་བོ་གསུམ་པོ་དེ་ནམ་མཁའ་ལ་ཉི་ཟླ་སྐར་གསུམ་གྱིས་མཛེས་པ་བཞིན་དུ་བཞུགས་པའི་ཕྱི་རོལ་གྱི་འཁོར་ཕྱིར་མི་ལྡོག་པ་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའི་དགེ་སློང་དང་། བྱང་ཆུབ་ཆེན་པོར་ཞུགས་པའི་ཉན་ཐོས་དགྲ་བཅོམ་གྱི་འཁོར་བྱེ་བ་འབུམ་ཞེས་པ་ནི་ཤིན་ཏུ་མང་པོ་བསམ་གྱིས་མི་ཁྱབ་ཅིང་གཞལ་གྱིས་མི་ལང་བ་མང་པོའི་དོན་ལས་བྱེ་བ་འབུམ་ཁེ་རུ་མ་ཞིག་གི་དོན་མ་ཡིན་ལ། འཁོར་མང་པོ་དཔག་གིས་མི་ལང་བསམ་གྱིས་མི་ཁྱབ་པ་དེ་དག་ཐམས་ཅད་ཀུན་ཀྱང་སྐུ་གསེར་གྱི་མདོག་ལྟར་དག་ཅིང་གསལ་ལ་དྲི་མ་མེད་པའི་ཆ་ནས་མཛེས་པར་བསྟན་པ་ལས་སྐུ་ལུས་གསེར་གྱི་མདོག་ལྟར་སེར་པོ་ཡིན་ཞེས་པའི་དོན་མ་ཡིན་ནོ། །གོང་དུ་བཤད་པའི་འཁོར་མང་པོ་དེ་དག་ཐམས་ཅད་ཀྱང་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པ། མཛེས་མི་མཛེས་སོགས་ཀྱི་ཁྱད་པར་མེད་པ་སྐུ་ལ་ཆོས་གོས་རྣམ་གསུམ་གསོལ་ཞིང་ནངས་སྔ་མོར་རྒྱ་མཚོ་ལ་ཉི་འོད་ཕོག་པའི་དུས་ཀྱི་ཞོགས་པའི་མཚམས་སྤྲིན་གྱིས་རྒྱ་མཚོའི་མདོག་དམར་སེར་ལ་སྒྱུར་བ་ལྟར་དུ་ན་བཟའ་ཆོས་གོས་རྣམ་གསུམ་གྱིས་མཛེས་ཤིང་སེར་ལྟེམ་མེར་མཛེས་པའི་སྐུ་གཟི་བྱིན་ལམ་མེ། གསུང་ཆོས་སྒྲ་དི་རེ། ཐུགས་ཏིང་འཛིན་ལས་མི་གཡོ་བར་བཞུགས་པ་དེ་ལྟ་བུ་ཞིག་གསལ་བཏབ་ནས། ཚེ་འདིའི་ཕ་མ་གཉིས་ཀྱིས་གཙོར་བྱས་པའི་རང་གཞན་སེམས་ཅན་ཐམས་ཅད་ནམ་ཞིག་བྱང་ཆུབ་སྙིང་པོའི་གོ་འཕང་མ་ཐོབ་གྱི་བར་དུ། སྐྱབས་དང་སྐྱོབ་པ་མགོན་དང་དཔུང་གཉེན་ཁྱེད་ལས་གཞན་ན་མེད་པས་སྐྱིད་སྡུག་ལེགས་ཉེས་གང་བྱུང་ཁྱེད་མཁྱེན་སྙམ་པའི་ཡིད་ཁྱེད་ཤེས་ཀྱི་དད་པ་བཅོས་མིན་ཞིག་ཡོད་པ་ནི་གལ་ཆེ་བ་ཡིན་ནོ། །དེ་ཡིས་བདེ་བ་ཅན་དུ་སྐྱེ་བའི་རྒྱུ་བཞིའི་ནང་གི་རྩ་བའི་ས་བཅད་དང་པོ་རྟེན་ཚོགས་ཞིང་གསལ་འདེབས་པ་དེ་བཤད་པ་སྟེ། དེ་འུ་ཚོས་ཡང་བསྐྱར་རྗེས་དྲན་ཞིག་བྱེད་ན། དེས་ནི་རྟེན་ཞིང་ཁམས་ཀྱི་བཀོད་པ་དང་། བརྟེན་པ་སངས་རྒྱས་གཙོ་འཁོར་གྱི་རྣམ་པ་ཡིད་ལ་བྱེད་པའི་སྐོར་དེ་བསྟན་པ་ཡིན་ཞིང་། དེ་ཚིག་བསྡུས་ནས་བཤད་ན། ཞིང་ཁམས་གསལ་འདེབས་དང་། སངས་རྒྱས་ཡིད་བྱེད་གཉིས་ཀྱི་ནང་ལ་འདུས་པ་ཡིན། དེ་ལྟ་བུའི་མདོ་རྩ་དེ་མི་བརྗེད་པར་བྱས་ནས། རྒྱུན་དུ་སྨོན་ལམ་འདོན་དུས་དོན་ཡིད་ལ་དྲན་བཞིན་ཚིག་རྗེས་དོན་དྲན་གྱི་སྒོ་ནས་དད་དང་མོས་པས་ཡིད་ལ་བྱེད་ནས་འདོན་དགོས་པ་ཡིན། འདི་ནི་དཀོན་མཆོག་གསུམ་རྗེས་སུ་དྲན་པ་དང་། ཁ་ནུབ་ཕྱོགས་ལ་འཁོར་ནས་བདེ་བ་ཅན་གྱི་ཞིང་ཁམས་རྟེན་བརྟེན་པ་དང་བཅས་པ་བསྒོམས་ན་བསྐྱེད་རིམ་ཡང་ཡིན་པས། སྐུ་མདོག་ཕྱག་མཚན་རྒྱན་ཆ་ལུགས་བཅས་པ་གསལ་ལ་མ་འདྲེས་པར་བསྒོམ་ཐུབ་ན་སྨོས་མ་དགོས་ཤིང་། གལ་ཏེ་དེ་ཙམ་ཞིག་མ་ཐུབ་ཀྱང་བདེ་བ་ཅན་ནི་མ་བཀོད་རང་བྱུང་གི་དཀྱིལ་འཁོར་དང་། སངས་རྒྱས་འོད་དཔག་མེད་ནི་གཟུགས་སྐུ་མངོན་སུམ་དུ་བཞུགས་པ་ཡིན་པའི་སྟབས་ཀྱིས་ཉིན་མཚན་ཀུན་ཏུ་མ་བརྗེད་ནའང་ཆོག་པ་ཡིན། ཁྱིམ་པ་ཕོ་མོ་བློ་མ་སྦྱངས་བ་ཁྱེད་ཅག་གིས་དེ་ལྟར་བཤད་དུས་ཚིག་གི་ཐོག་ནས་གོ་བ་རེ་ལེན་ཨེ་ཐལ། གལ་སྲིད་གོ་ཡག་རེད་མེད་ན་བདེ་ཆེན་ཞིང་བཀོད་ཀྱི་ཞལ་ཐང་ལ་ཞིབ་ཀྱིས་མཇོལ་དང་ཡིད་ཡུལ་ལ་ཤར་རྒྱུ་ཞིག་དང་མིག་སྔར་ལ་འབབ་རྒྱུའི་ཕན་ཐོགས་ཡོད་པ་ཡིན། དེ་སྔོན་ཅུང་ཟད་མཇལ་མྱོང་བ་དག་གིས་དེའི་རྣམ་པ་མིག་བཙུམ་ན་ཡིད་ཡུལ་དུ་ཨེ་ཤར་དང་། མིག་སྔ་རུ་བབས་ཨེ་འདུག་ལྟ་དགོས། དེ་ལྟར་གོམས་འདྲིས་བྱས་ན་བར་ཞིག་ལ་རང་ཤུགས་ཀྱིས་སེམས་ལ་འཆར་ཡོང་རྒྱུ་ཡོད་པ་ཡིན། བདེ་བ་ཅན་རྟེན་བརྟེན་པ་དང་བཅས་པ་ལས་དང་པོ་བ་དག་ལ་གོ་བརྡ་འཕྲོད་པའི་ཆེད་དུ་ཡིག་ཐོག་ལ་བཀོད་ཅིང་ཚིག་ཐོག་ནས་བཤད་པ་ཙམ་རེད་མ་གཏོགས། རྒྱལ་བའི་ཡོན་ཏན་དང་ཞིང་གི་བཀོད་པ་ཐམས་ཅད་ཇི་མ་ཇི་བཞིན་དུ་འཆད་དགོས་ན་བཤད་ག་ལ་ཐུབ། རི་མོ་འབྲི་དགོས་ན་ལྷ་བཟོས་དེ་བས་ཀྱང་འབྲི་མི་ནུས་པ་ནི། གཞན་ཕར་ཞོག་མེ་ཏོག་རྐང་གཅིག་གི་ཡོན་ཏན་ས་ཐོབ་ཀྱི་སེམས་དཔས་ཀྱང་བརྗོད་དཀའ་བ་ཡིན་པས། འུ་ཚོ་ལྷ་བཟོའི་ལག་པས་འབྲི་ཁུལ་བྱེད་པ་ནི་མཚོན་བྱེད་ཀྱི་གོ་བརྡ་སྤྲོད་བྱེད་ཙམ་དང་། བཤད་པ་ཡང་དེ་ལས་མ་འདས་པ་ཞིག་ཡིན། ཞིང་ཁམས་བདེ་བ་ཅན་གྱི་སངས་རྒྱས་འོད་དཔག་མེད་ཉིན་མོར་མ་བརྗེད་ན་མཚན་མོར་རྨི་ལམ་དུ་རྨི་བར་འགྱུར་ཞིང་། རྨི་ལམ་གྱི་ནང་ནས་སྐྲག་སྔངས་ཤར་ཡོང་དུས་སངས་རྒྱས་འོད་དཔག་མེད་ལ་གསོལ་འདེབས་བྱེད་པར་དྲན་པ་དང་། དེ་དྲན་ན་འཆི་ཁ་བར་དོའི་འཇིགས་སྐྲག་གི་སྐབས་སུ་དྲན་ནས་གསོལ་འདེབས་ཡིད་ལ་འཆར་ཐུབ་པ་ཡིན། དེ་ལྟ་བུའི་གསོལ་འདེབས་ཐུབ་པའི་དད་མོས་དྲག་པོའི་ཐོག་ནས་འཆི་ཁའི་མཚམས་སྦྱོར་གྱི་སྨོན་ལམ་བཟང་པོ་ཞིག་འདེབས་ཐུབ་དུས། སངས་རྒྱས་འོད་དཔག་མེད་འཁོར་དང་བཅས་པ་མིག་སྔར་མཇལ་ནས་དབུགས་ཆད་མ་ཐག་བདེ་བ་ཅན་དུ་སྐྱེ་བ་ཡིན། འདི་ལྟ་བུའི་སྒོ་ནས་ཇི་ལྟར་གོ་བརྡ་སྤྲད་ཀྱང་ཞིང་བཀོད་ལ་སོགས་པ་གཏན་ནས་ཡིད་ལ་འཆར་དུ་མི་གཏུབ་པ་དག་ལ་ཇི་ལྟར་བྱེད་དགོས་ཟེར་ན། རྗེ་རིན་པོ་ཆེས། ཉན་ན་ཚིག་མི་ཟིན། བསམས་ན་དོན་མི་གོ། བསྒོམས་ན་རྒྱུད་ལ་མི་སྐྱེ་བའི་བློའི་མཐུ་ཤིན་ཏུ་ཆུང་བའི་དུས་སུ་ཞིང་གི་མཐུ་ལ་བརྟེན་པ་མན་ངག་ཡིན་པར་གསུངས་ཡོད་པས། དད་པས་ཕྱག་འཚལ་བ་དང་། མཆོད་པ་འབུལ་བ་དང་། གསོལ་བ་འདེབས་རྒྱུ་གལ་ཆེ་ཞིང་། བདེ་བ་ཅན་གྱི་ཞིང་ཁམས་ནི་ནུབ་ཕྱོགས་སུ་ཡོད་ལ། མགོན་པོ་འོད་དཔག་མེད་འཁོར་དང་བཅས་པ་དེར་བཞུགས་ཡོད་པས་མི་ཚད། ང་ལ་གཟིགས་བཞིན་ཡོད་པས། ངས་ད་ལྟ་གསོལ་བ་བཏབ། ཕྱག་འཚལ། མཆོད་པ་ཕུལ་ནས་ཤི་དུས་དེར་འགྲོ་ཆོག་པ་ཞིག་བྱེད་དགོས་སྙམ་ནས་འོད་དཔག་མེད་པའི་མཚན་དང་བདེ་སྨོན་ཆག་མེད་དུ་ཐོན། ནུབ་ཕྱོགས་ལ་ཁ་འཁོར་ནས་ཕྱག་རེ་འཚལ་རྒྱུ་མ་བརྗེད་པར་གྱིས་དང་བདེ་བ་ཅན་དུ་སྐྱེ་བའི་རྒྱུ་དང་པོའི་གོ་དེས་ཆོད་པ་ཡིན་གསུངས་པ་དང་། གནའ་རྫ་མུ་ར་པདྨ་བདེ་ཆེན་བཟང་པོས་རྫ་ཆུ་ཁ་དང་མགོ་ལོག་གི་བྱང་སའི་འབྲོག་སྡེ་འགའ་རེར། བདེ་ཆེན་ཞིང་ཐང་དང་འོད་དཔག་མེད་ཀྱི་སྐུ་བརྙན་མ་འཛོམས་དུས། འོད་དཔག་མེད་ཀྱི་སྐུ་མདོག་དང་གསུང་པདྨའི་རིགས་ཀྱི་ཁ་དོག་མཚོན་བྱེད་ལ་རས་ཡུག་དམར་པོ་རེ་ནུབ་ཕྱོགས་སུ་བཏགས་ནས། མགོན་པོ་འོད་དཔག་མེད་འཁོར་བཅས་ཡིད་ལ་བྱེད་པའི་རྟེན་དང་མཚན་མ་གྱིས་ཞེས་གསུང་རབས་གནའ་མི་ཚོར་བཤད་རྒྱུ་ཡོད་པ་དེ་ཚོ་ལ་རྒྱུ་མཚན་ཆེན་པོ་ཡོད་ངེས། དེང་སང་ཞིང་ཐང་རེ་ལོན་རྒྱུ་དཀའ་མོ་མ་རེད་ཨེ་ལོན་ལྟོས། གནའ་རྫ་སྟོད་ཀྱི་རྒད་པོ་དད་པ་ཅན་བློ་རིག་མི་གསལ་བ་ཞིག་གིས་འོད་དཔག་མེད་ལ་གསོལ་བ་རྒྱུན་ཏུ་བཏབ་ནས་བདེ་སྨོན་མང་པོ་བཏོན་པ་ཡིན། འོན་ཀྱང་ཁོའི་སྐུ་མདོག་ནོར་ནས་སྔོ་སྐྱ་ཞིག་ཡིན་པར་སྙམ་ན་ཡང་། རྒད་པོ་འཆི་ཁར་འོད་དཔག་མེད་འཁོར་དང་བཅས་པ་ཕེབས་ཏེ་ལམ་སྣ་དྲངས་ནས་མངོན་སུམ་དུ་བདེ་བ་ཅན་ལ་ཁྲིད་སོང་བའི་ལོ་རྒྱུས་ཡོད་པས། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །ཞེས་པ་དང་། རྗེ་ཙོང་ཁ་པས། ནམ་ཞིག་ཚེ་ཡི་འདུ་བྱེད་གཏོང་བ་ན། །འཁོར་ཚོགས་རྒྱ་མཚོས་བསྐོར་བའི་འོད་དཔག་མེད། །མིག་གི་ལམ་དུ་གསལ་བར་མཐོང་གྱུར་ནས། །དད་དང་སྙིང་རྗེས་བདག་རྒྱུད་གང་བར་ཤོག །ཅེས་གསུངས་པ་ལྟར་ཡིན་པས། དད་པའི་ཨ་ལུང་ཡོད་ན་ཐུགས་རྗེའི་ལྕགས་ཀྱུས་བཟུང་སླ་བ་སྟེ། གུ་རུ་རིན་པོ་ཆེས། དད་པ་ཅན་ལ་པད་འབྱུང་སྒོ་ཉལ་ཡོད། །ཅེས་གསུངས་པ་ཡིན། དད་པ་མེད་ན་སངས་རྒྱས་དངོས་སུ་བྱོན་ཀྱང་འདྲེན་ཐབས་མེད་ཅིང་། དད་པས་གསོལ་བ་བཏབ་ན་སངས་རྒྱས་འོད་དཔག་མེད་ཀྱི་ཡེ་ཤེས་ཀྱི་སྤྱན་གྱིས་གཟིགས། ལྷའི་སྙན་གྱིས་གསན། མངོན་ཤེས་ཀྱི་ཐུགས་ཀྱིས་དགོངས། རྫུ་འཕྲུལ་གྱི་ཞབས་ཀྱིས་བཅགས་པས་མདུན་དུ་བྱོན་ནས་བྱིན་གྱིས་བརླབས་པ་ནི། མི་ལོང་བ་ཞིག་གི་སྔུན་ནས་མིག་ལྡན་ཞིག་གིས་བལྟས་ཡོད་པ་དང་འདྲ་བར་རང་ཉིད་ཀྱིས་མ་མཇལ་ན་ཡང་སངས་རྒྱས་ཀྱིས་གཟིགས་ནས་ཡོད་པ་སྟེ། གནའ་སངས་རྒྱས་ཞལ་བཞུགས་པའི་དུས་སུ་ཁྱིམ་བདག་མགོན་མེད་ཟས་སྦྱིན་ཟེར་བའི་རྒྱ་གར་ན་སྟོན་པའི་སྦྱིན་བདག་ཆེན་པོ་ཞིག་ཡོད་ལ། དེ་ཚང་གི་བུ་མོ་མ་གཱ་དྷ་བཟང་མོ་ཞེས་པ་ནི་སངས་རྒྱས་ལ་དད་པ་ཅན་ཞིག་ཡོད་པ་དེ་ཡུལ་ཐག་རིང་མཐའ་འཁོབ་ཀྱི་རྒྱལ་པོ་ཞིག་གཉེན་སྦྲེལ་ནས་འགྲོ་དགོས་ཐུག་ཚེ། དེ་ཚང་ལ་མཆོད་གནས་མུ་སྟེགས་པ་མ་གཏོགས་མེད་པས། བུ་མོ་མཆོད་གནས་དེ་དག་ལ་མ་མགུ་ནས་ཉིན་ཞིག་བུ་མོ་མ་གཱ་དྷ་བཟང་མོས་དེ་ཚང་གི་སྒྱུག་མོ་སོགས་ལ་བཤད་རྒྱུར། འདི་ལྟ་བུའི་ཐ་ཆད་ཁྱི་ཕག་འདྲ་བའི་སྐྱུག་བྲོ་བ་འདི་དག་མཆོད་གནས་སུ་བཀུར་ནས་ཅི་བྱེད་པ་ཡིན་ཞེས་སྨྲས་པས། འོ་ན་ཁྱོད་ཀྱི་ཕ་ཡུལ་ནས་མཆོད་གནས་གདན་འདྲེན་རྒྱུ་ཡོད་དམ་ཞེས་བྲིས་པས། ཁོ་མོའི་ཕ་ཡུལ་ན་སངས་རྒྱས་བཅོམ་ལྡན་འདས་དགྲ་བཅོམ་པ་འཁོར་དང་བཅས་པ་བཞུགས་ཡོད། གདན་འདྲེན་ཐུབ་ཅེས་ཟེར་བ་ལ། དེ་དག་གིས་སྟོན་པ་འཁོར་བཅས་གདན་འདྲེན་ཐུབ་ན་བཟང་ཞིང་ལེགས་མོད། འདི་འདྲའི་ཉིན་ལམ་མང་པོའི་ལམ་ཐག་ལ་བྱོན་དགོས་པས་དུས་ཚོད་ཡུན་རིང་བ་དང་། སྤྱན་འདྲེན་པའི་ཕོ་ཉ་ཡང་ཕར་ལ་མགྱོགས་པོར་ཐོན་ཐབས་མེད་ཚུལ་སྨྲས་ཚེ། བུ་མོས་བཤད་རྒྱུར་དེ་འདྲའི་དཀའ་ཚེགས་ག་ལ་དགོས། ཁྱོད་ཅག་གིས་སངས་རྒྱས་བཅོམ་ལྡན་འདས་འཁོར་བཅས་ལ་མཆོད་པའི་ཡོ་བྱད་གསར་པ་སྟ་གོན་གྱིས་དང་། མཆོད་གནས་ངས་སྤྱན་འདྲེན་ཡོང་ཞེས་སྨྲས་ནས། དེའི་ཕྱི་ཉིན་ཚེས་བཅོ་ལྔའི་ཉིན་དེའི་སྔ་དྲོར་བུ་མོ་མ་གཱ་དྷ་བཟང་མོས། ཁང་པའི་སྟེང་ནས་དྲི་བཟང་པོའི་དུད་པ་བདུགས་ཤིང་སྤོས་རིང་པོ་ལག་ཏུ་ཐོགས་ཏེ། སངས་རྒྱས་འཁོར་བཅས་བཞུགས་ཡོད་པའི་གནས་གྲོང་ཁྱེར་མཉན་ཡོད་ཀྱི་ཕྱོགས་ལ་ཁ་འཁོར་ནས། མ་ལུས་སེམས་ཅན་ཀུན་ཀྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཞེས་དད་པའི་ཤུགས་ཀྱིས་སྤྱན་འདྲེན་ཞུས་པས། སངས་རྒྱས་འཁོར་དང་བཅས་པ་རྫུ་འཕྲུལ་རྣམ་པ་མི་འདྲ་བ་སྣ་ཚོགས་དང་བཅས། སྐད་ཅིག་གིས་ནམ་མཁའ་ནས་བྱོན་ཏེ་ས་དེའི་སེམས་ཅན་མང་པོ་དད་པའི་གནས་ལ་བཀོད་པའི་ལོ་རྒྱུས་ཡོད་པ་ཡིན་པས་སངས་རྒྱས་ཡིད་ལ་བྱེད་པ་འདི་ཤིན་ཏུ་གལ་ཆེན་བ་ཡིན་ནོ། །གཞན་ཡང་ཇི་སྐད་དུ། རྒྱ་མཚོ་ཆུ་སྲིན་གནས་ཀྱི་རླབས། །དུས་ལས་ཡོལ་བར་འགྱུར་སྲིད་ཀྱང་། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་སྲིད། །ཅེས་གསུངས་པས། རང་ཉིད་ལ་དད་པ་ཡོད་ན་སངས་རྒྱས་ཀྱིས་བསླུ་མི་སྲིད་དོ། །རྟེན་ཚོགས་ཞིང་གསལ་འདེབས་པ་འདི། རྒྱུ་གཉིས་པ་ཚོགས་བསགས་སྒྲིབ་སྦྱོང་གི་རྟེན་དང་། རྒྱུ་གསུམ་པ་སེམས་བསྐྱེད་དང་། རྒྱུ་བཞི་བ་སྨོན་ལམ་འགྲུབ་པའི་དཔང་པོ་ཡང་ཡིན་པས་ཤིན་ཏུ་གནད་ཆེ་ཚུལ་གོང་དུ་ཞུས་པ་ལྟར་རོ། །དེ་རིང་གི་ཐོག་མའི་ཆོས་མཚམས། ཆོས་གོས་རྣམ་གསུམ་གསོལ་ཞིང་སེར་ལྟེམ་མེ། །ཞེས་པ་འདི་ནས་འཇོག་རྒྱུ་བྱེད། སང་ཉིན་མོས་གུས་ཕྱག་ལ་ཉེ་རིང་ཁྱད་མེད་ཕྱིར། །བདག་གིས་སྒོ་གསུམ་གུས་པས་ཕྱག་འཚལ་ལོ། །ཞེས་པ་ནས་དབུ་བཙུགས་ནས་བཤད་རྒྱུ་རེད། དེ་རིང་གི་ཆོས་ཁྲིད་དེ་ཙམ་ཡིན། སྤྱིར་ན་རྫོགས་ཆེན་པདྨ་ཐང་འདི་རྫོགས་པ་ཆེན་པོ་ཀློང་ཆེན་སྙིང་ཐིག་གི་བླ་མ་བརྒྱུད་པ་དམ་པ་གོང་མ་མང་པོ་བྱོན་ནས། དམ་ཆོས་རྫོགས་པ་ཆེན་པོ་འཆད་ཉན་དང་སྒྲུབ་པ་ཉམས་ལེན་བྱེད་སའི་ས་ཆ་ཞིག་རེད། ཡིན་ནའང་དུས་ཀྱི་འཕོ་འགྱུར་ཀྱི་དབང་གིས་མཚམས་རེར་གྱང་རལ་གྱིས་གང་། མཚམས་རེར་ས་སྟོང་ལ་ལུས། ཡང་མཚམས་རེར་ཆོས་དུང་དཀར་མོའི་རང་སྒྲས་འཁོར་ཡུག་གི་སྐྱེ་འགྲོ་གཉིད་ལས་སློང་བ་སོགས། འགྱུར་བ་སྣ་ཚོགས་ལོ་རྒྱུས་ཀྱི་འགྲོས་དང་བསྟུན་ནས་བྱུང་བ་ཡིན་པས། དེ་རིང་ཁ་སང་གི་མི་ལོ་ལྔ་དྲུག་ཚུན་ཆད་ལ། དབྱར་གྱི་དུས་ཚོད་ནམ་ཚེས་ལ། ས་ཕྱོགས་དང་ཆོས་བརྒྱུད་རིས་སུ་མ་ཆད་པའི་དགོན་སྡེ་བརྒྱ་ཕྲག་མང་པོའི་ཆོས་འདོད་དོན་གཉེར་ཅན་གྱི་དགེ་འདུན་པ་བརྒྱ་ཚོ་མང་པོ་འདུས་ནས། དམ་ཆོས་རྫོགས་པ་ཆེན་པོའི་འཆད་ཉན་སྒོམ་སྒྲུབ་མཛད་བཞིན་ཡོད་ཅིང་། གྲུབ་དབང་རྫོགས་ཆེན་པ་རང་གི་ཆོས་བརྒྱུད་འཆུག་མེད་བསྟན་པའི་སྲོག་དེ་སྒྲུབ་པའི་སྒོ་ནས་གསོ་ཐུབ་པར་ཡོད་ལ། དེ་སྔོན་ལོ་ལྔ་ཡི་རིང་ལ་འདི་ནས་ཡེ་ཤེས་བླ་མ་ཁྲིད་ཁ་བཞག་པའི་ཞལ་གྲངས་དང་ཐེངས་གྲངས་གཉིས་ཀ་བརྩིས་ཡོང་ན། དགེ་འདུན་པ་ཉིས་སྟོང་ལ་ཉེ་ཡོད་པ་ཡིན། དེ་ཡང་འུ་བུའི་ཆོས་སྒོ་དམ་པོ་ཡིན་སྟབས་ཀྱིས་མཐུན་རྐྱེན་ངེས་ཅན་ཞིག་མ་ཚང་ན་མི་ཚུད་པ་རེད། ངའི་ངོས་ནས་བསམ་བློ་གཏོང་ན། ང་པདྨ་སྐལ་བཟང་ལ་དམ་པ་གོང་མས་མཚན་གྱི་ཅོད་པཎ་ཞིག་གནང་བས་མ་ཚད། འཇིགས་བྲལ་བྱང་ཆུབ་རྡོ་རྗེས་འདའ་ཁའི་ཞལ་ཆེམས་ཀྱང་བསྩལ་ཕྱིར། དོན་གྱི་བསྟན་པ་ཉམ་དམའ་ཉག་ཕྲའི་སྐབས་འདིར། རྒྱལ་བསྟན་སྤྱི་དང་བྱེ་བྲག་ལ་ཐད་ཀར་འབྲེལ་བའི་བླ་མ་རྫོགས་ཆེན་ཚང་གི་ལུང་རྟོགས་བཤད་སྒྲུབ་ཀྱི་བསྟན་པ་ཡར་ལ་གསོས་ནས། བསྟན་རྒྱུན་སྤེལ་རྒྱུ་དེ་ཉིད་ནི་ཕྲག་ཐོག་ལ་བབ་པའི་འོས་འགན་གཟུར་ཐབས་མེད་པ་ཞིག་ཡིན་པ་དེ་བཤད་མ་དགོས་པ་ཞིག་ཡིན་པས། བསྟན་པ་དེ་མི་ཉམས་དར་སྤེལ་གཏོང་རྒྱུའི་ཆོད་སེམས་མི་འགྱུར་བའི་འདང་འདུན་ཐང་ཡོད་པའི་ཐོག་ནས་དམ་པ་གོང་མའི་ཐུགས་དགོངས་རྫོགས་བྱེད་ལ་རབ་སྒྲུབ་པའི་མཆོད་པ་དུས་འདི་དང་བསྟུན་ན་འགྲུབ་ནས་ཡོད་སྙམ་པའི་སེམས་ཁ་གང་ནས་བསྡད་ཡོད། རྫ་ལུང་གངས་འདབས་ཀྱི་ནགས་གསེང་འདི་ནས་སངས་རྒྱས་ཀྱི་བསྟན་པ་མགོ་གང་མ་ཞིག་བཟུང་ནས། སྤྲིན་བར་གྱི་ཉི་མ་ཅུང་ཞིག་ལྡེ་བཞིན་ཡོད་སྙམ་ནས་ཡོད། ཡིན་ན་ཡང་ས་འདིའི་ཐོག་ཏུ་ཡོད་པའི་སྡེ་བ་མི་སེར་རྣམས་ལ་མཚོན་ན། ཕྱི་ནས་བལྟས་ན་གདན་ས་ཆོས་འཁོར་ཆེན་པོའི་ཉེ་འདབས་ལ་ཡོད་པའི་སྡེ་བ་ཡིན་ཕྱིར། ཕྱི་ཡི་བླ་མས་ནི་ཐེ་གཏོགས་མི་བྱེད་ཅིང་ཆོས་གསུང་སར་མི་བྱོན་ཞིང་། ནང་གི་རང་དགོན་གྱི་བཤད་སྒྲུབ་ལས་གསུམ་གྱི་དབུ་རྣ་མཚན་དོན་མཐོ་བའི་དབང་གིས་བླ་སྤྲུལ་རྣམ་པ་ཐུགས་བྲེལ་ཆེ་ནས་སྡེ་མི་སེར་ལ་ཆོས་ངོ་མ་ཞིག་གསུང་རྒྱུའི་གོ་སྐབས་མ་མང་ཚེ། རི་རྒྱལ་མགོ་ཡི་རྩྭ་རྒྱལ་དེ། རྟ་བྱང་མའི་ཉམས་ལ་མ་རན་པར་མི་སྐྱ་ཕོ་མོའི་ཆོས་སྐལ་དེ་དབྱུག་པ་ཞིག་དང་སྦྲགས་ནས་ཆུ་ཐིགས་གཅིག་མགོ་ལ་བླུག་རྒྱུ་ཙམ་ལས་མེད་ན། རྒྱ་མཚོའི་འགྲམ་དུ་སྐོམ་ནས་ཤི་བ་བྱུང་ན་སྡུག་ཐུག་རེད་བསམས་ནས། ད་རེའི་ཞིང་ཁྲིད་འདི་ས་འདིའི་ཐོག་གི་མང་ཚོགས་ཀྱི་ཆོས་སྐལ་ལ་བསམས་ནས་བཀོད་སྒྲིག་བྱས་པ་ཡིན། རྫོགས་ཆེན་འབྲོག་རུ་སྡེ་བ་མི་གྲངས་སྟོང་ཕྲག་དྲུག་བདུན། སྡེ་མི་དུད་སྟོང་རུའི་བདག་པོ་ཡིན་པས། མི་མང་འདུག་སའི་ཚོགས་ར་དྲོ་བ་ཞིག་ནི་རི་ཁྲོད་པ་ཡིན་རུང་ངེད་ཚོས་འཛོམས་དགོས་རྒྱུ་རེད་སྙམ་ནས་འདིའི་གཙུག་ལག་ཁང་གི་ར་སྐོར་བཀབ་ནས། པདྨ་ཐང་གི་བརྒྱད་སྡེ་གྲྭ་ཚང་གཞུང་སྒེར་གཉིས་ཀ་ཁོར་ཡུག་གི་ཇོ་སེར་ཚང་མ་དང་བཅས་པས་དུས་ངེས་ཅན་ཞིག་གི་རིང་ལ་ཉིན་མཚན་གཉིས་ཀར་རྒྱུ་ཚེགས་གཉིས་ཀའི་འགྲོ་སྒོ་མི་ཉུང་བ་ཞིག་བཏང་ཡོད་པ་རེད། འདིའི་འཆར་གཞི་མཆོད་འབུལ་ཉི་མ་གཅིག་དང་། ཞིང་ཁྲིད་དངོས་གཞི་འཕོ་ལུང་བཅས་པ་ཉིན་བདུན་བསྣན་པས་ཉིན་བརྒྱད། བདེ་ཆེན་ཞིང་དབང་ཉིན་གཅིག་བཅས་ཉིན་དགུའི་བར་འཚོགས་འཆར་ལས། དེ་རིང་ནི་ཉི་མ་དགུ་པོའི་ནང་གི་ཉིན་གཉིས་པ་རེད། སྐབས་འདིར་འགའ་རེས་ནུས་ཚོད་ལྕོགས་ཚོད་ཀྱིས་གཙུག་ལག་ཁང་ལ་སྐོར་བ་བྱེད་པ་དང་། བརྐྱངས་ཕྱག་འཚལ་ནས་སྐོར་བ་བྱེད་པ་དང་། ཡང་འགའ་རེས། ཁ་སེམས་དཀར་པོའི་རྒྱས་འདེབས། །ཁ་ལག་གཙང་མའི་མཆོད་པ། །ཟེར་བ་བཞིན་དུ་མཛུབ་མགོའི་མཆོད་པ་མར་མེ་ཁ་གསབ་བྱེད་ཤེས་པ་དེ་ཡང་རྒྱ་མཚོ་ཆུ་ཐིགས་ཀྱི་འབྲེལ་བ་ཡིན་པས། གོ་སྐབས་འདི་ལྟ་བུ་མི་ཤོར་བར་བྱེད་པ་ནི་རྒྱུ་མཚན་ཅུང་ཟད་ཤེས་པའི་རྟགས་རེད། རང་རོགས་ཚང་མས་འདེང་བརྒྱབ་ན་དུས་ངན་གྱི་བསྐལ་བ་ཚེས་པའི་ཚུན་ཆོད་ལ། ཤི་བོ་ཆོས་མེད་ཅི་འདྲའི་མང་པོ་ཞིག་མེད། དེ་ཚོའི་དགེ་རྩ་ལ་བསམ་བློ་རེ་འཁོར་ན་གསོན་གྲང་ང་ཁམས་ན་ཡོད་པའི་དོན་པོ་རེད། དེའི་ནང་གི་འགའ་རེས་རི་ཁྲོད་ཀྱི་མཚམས་པ་རྫོགས་པ་ཆེན་པོའི་ཆོས་ཉམས་ལེན་བྱེད་མཁན་ཚོར་འཚོ་བའི་ཁ་སྣོན་རེ་ཕུལ་མཁན་ཡོད་པ་སྟེ། དཔེར་ན་འབྲོག་རུ་སྡེ་བའི་ལྔ་བ་ཚང་གི་པད་དར་དང་། སེར་ཅོད་གཉིས་ཀས་ཟླ་བ་རེར་སྒོར་ལྔ་བཅུ་རེ་སྟེ་སྒོར་བརྒྱ་རེ་གཤིན་རྗེའི་སྒྲུབ་ཕུག་ལ་ལོ་གསུམ་མཚམས་ལ་བཞུགས་པའི་བསྟན་འཛིན་ཆོས་འཕེལ་ལ་ཕུལ་ནས་ལོ་གཅིག་སོང་ཡོད་པ་དང་། ལྔ་བའི་སྐལ་བཟང་གིས་ཚེ་རིང་སྒྲུབ་ཕུག་ལ་བཞུགས་པའི་ཨ་ཁུ་དམ་ཅན་ལ་ཟླ་རེར་སྒོར་མོ་བརྒྱ་རེ་འབུལ་འཆར་ཡིན་འདུག དེ་ཚོ་དཔེ་མེད་པའི་བསོད་ནམས་ཆེན་པོ་སྟེ། རི་ལ་སྒོམ་པའི་སྒོམ་ཆེན་དང་། །འཚོ་བ་སྦྱོར་བའི་ཡོན་བདག་གཉིས། །འཚང་མཉམ་པོར་རྒྱ་བའི་རྟེན་འབྲེལ་ཡོད། །རྟེན་འབྲེལ་གྱི་སྙིང་པོ་བསྔོ་བ་ཡིན། །ཞེས་གསུངས་པ་ལྟར་ཡིན་ལ། ངས་ཀྱང་རྗེས་སུ་ཡི་རང་དང་སྦྲགས་ཏེ་བསྔོ་བ་བྱེད་བཞིན་ཡོད། ད་དུང་ཁྱེད་ཚོས་འདི་རྣམ་པ་ཚོར་རྩམ་པ་རེ་འཐག་རྒྱུ་དང་། མར་རེ་ཉོ་རོགས་བྱེད་རྒྱུ་དང་། བྲོ་ཁ་རེ་བསྐྱལ་བ་ལ་སོགས་པའི་དཀའ་ལས་རེ་རྒྱག་ཨེ་ཐུབ་ལྟོས་ཟེར་བསམ་པ་ཡིན། དེ་མིན་འགའ་རེས་ང་རང་ལ་རྒྱུ་འབུལ་རྒྱུ་མེད་རུང་། མཚམས་པ་དེ་དག་ལ་རྩམ་པ་རེ་འཐག་རྒྱུ་དང་། བྲོ་སྐྱེལ་རེ་འགྲོ་དགོས་ན་འགྲོ་ཆོག་ཟེར་མཁན་ཡོད་ན་དེ་ལྟར་སྨྲོས་དང་དགེ་རྩ་དང་བསོད་ནམས་ཆེན་པོ་གསོག་པ་ཡིན། ང་དང་འདྲ་བའི་རྟ་ཐོག་གི་བླ་མ་ལ། རྟ་མགོ་ལ་དར་དཀར་བཏགས་པ་ཕུལ་ནས་རྒྱགས་པའི་ཁ་ལ་ཚིལ་སྲེག་སྦྱིན་པ་ལས། སྦས་པའི་རྣལ་འབྱོར་བྱ་བཏང་བ་རེ་ལ་ཟ་མ་དུས་གཅིག་འཕྲོད་ན་བསོད་ནམས་དེས་ཆེ་བ་ཡིན། བསོད་ནམས་གསོག་དུས་གནད་གང་ཆེ་བལྟ་དགོས། བསྟན་པ་མི་ནུབ་པའི་སྲོག་རྩར་སྨིན་ཐབས་ཐོན་ན་དེའི་བསོད་ནམས་ཆེ་བ་ཡིན། ད་རེས་ཞིང་ཁྲིད་འདི་ཚོའི་ཐོག་ནས་ལུས་ངག་གི་དགེ་སྦྱོར་འགྲུབ་ཤག་ཤག་གི་དགེ་སྒྲུབ་སྡིག་སྤང་གི་ཁས་ལེན་རེ་བྱེད་མཁན་ཡོད་ན། ཚང་མས་ལས་འཛིན་པའི་སར་ཡི་གེ་རྒྱོབས་ཤོག་དང་། ངས་ཉིན་རེའི་ཆོས་ཁྲིད་ཀྱི་སྐབས་སུ་གོ་སྒྲོག་བྱེད། གོ་སྒྲོག་བྱེད་རྒྱུ་དེ་ངོམ་ཆོས་སུ་འགྲོ་བ་མ་རེད། མི་འགྲོ་བར་མ་ཚད་མང་བོ་ཞིག་གིས་དེ་ལ་རྗེས་སུ་ཡི་རང་བྱས་ཏེ་དགེ་རྩ་རྒྱ་ཆེན་ཐོབ་པའི་རྒྱུ་རུ་འགྲོ་བ་ཡིན། དགེ་འདུན་པས་ཀྱང་དེ་ལྟར་དུ་བསྔོ་བ་དང་ཐུགས་སྨོན་མཛད་འགྲོ་བ་རེད། འདི་ནས་དགེ་འདུན་པས་ནུབ་རྟག་པར་གསུར་གསུང་བཞིན་ཡོད་པ་རེད། རྒྱུན་དུ་གསུར་རྩམ་ཉུང་ཉུང་རེ་ཁྱེར་ཤོག་དང་། ཆེ་གེ་མོ་ཞིག་གིས་གསུར་ཆུ་གཏོར་ཞིག་མོ་ནང་ལ་བབ་ནས་དེ་མི་འཛོམས་འདུག་པ་ལས་འདིས་དགའ་ངེས་ཡིན། ཉི་མ་བརྒྱད་པ་འཕོ་ལུང་འདོན་པའི་ཉིན་མོའི་ཕྱི་དྲོ་གསུར་ཆེན་ཞིག་ཕུད་འཆར་ཡིན། དེ་དུས་མི་ལ་ན་ཚ་ཡོད་པ། ཕྱུགས་ལ་གོད་ཁ་ཡོད་པ། ལམ་འགྲོ་མི་རྒྱུག་པ། བྱིས་པ་མི་འཚམས་པ། བསེ་རག་འགོང་པོ་འཁྲི་ནས་འདུག་སྙམ་པ་དག་དང་། ཁྱད་པར་དུ་རྒྱལ་འགོང་གི་གནོད་པ་ཅན་དེ་ཚོ་ཚང་མས་གསུར་རྫས་ཁྱེར་ཡོང་བ་འདི་ནས་བྱིན་རླབས་བརྒྱབ་སྟེ་གསུར་ཆེན་ནང་ཐོབ་དང་ཕན་ཐོགས་ཆེ་བ་རེད། འདི་ལྟ་བུའི་བླ་སེར་དགེ་འདུན་པ་འདུས་ཤིང་ཆོས་ཁྱད་པར་ཅན་གྱི་ཆོས་སྒོ་འདི་འདྲ་ཕྱེ་བའི་ཚེ་ན། དགེ་འདུན་པར་གུང་ཚིགས་ཤིག་མ་འཛོམས་རུང་མང་ཇ་ཞིག་དྲངས་ན་ཅི་མ་རུང་། དེ་རིང་ཁར་སང་འོ་ཐིགས་ཤིག་དང་ཇ་ཐེབ་ཅིག་ལ་དཀའ་ཚེགས་ཆེན་པོ་ཡོད་པ་མིན། ས་སྟོང་ནས་རང་གིས་མཆོད་མེ་སྦར་བ་དང་། ཇོ་དར་འཛུགས་པ་སོགས་བྱས་ན་བསོད་ནམས་ལོས་ཡོད་ཀྱང་ཞིང་གི་ཁྱད་པར་གྱིས་གནམ་ས་ལྟ་བུའི་བསོད་ནམས་ཀྱི་ཁྱད་པར་ཆེན་པོར་འབྱུང་བ་ཡིན། རྟེན་རྩ་ཆེན་བཞུགས་པ་དང་། དགེ་འདུན་པའི་འདུས་པ་ཡོད་པ་དང་། དཀྱིལ་འཁོར་གཉེན་པོའི་ཞལ་ཕྱེས་ནས་དམ་པའི་ཆོས་ཀྱི་སྒྲ་སྒྲོག་པའི་དུས་སུ་བཟང་འབྲེལ་བཞག་ན་བསོད་ནམས་ལྷག་པར་ཆེ་བ་ནི། མཛོད་ལས། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པར་གསུངས། །ཞེས་པ་ལྟ་བུ་ཡིན་ལ། འོན་ཀྱང་། ལྷ་ཡི་རྒྱལ་པོས་ཆར་ཕབ་ཀྱང་། །ས་བོན་མི་རུང་མི་འཁྲུངས་ལྟར། །སངས་རྒྱས་རྣམས་ནི་བྱོན་གྱུར་ཀྱང་། །སྐལ་བ་མེད་པས་བཟང་མི་མྱོང་། །ཞེས་གསུངས་པ་བཞིན་དུ་ཁ་བྱང་བསྟན་གྱི་ཕུག་པར་ཉི་མ་ཤར་ཐབས་མེད་པ་ལྟར་དུ་སོང་ནས་ངན་སོང་གསུམ་གྱི་རྒྱུན་ཆོད་ཐབས་མེད་པ་ཡིན། དེས་ན་རྒྱུ་འབྲས་ཡིད་ཆེས་ཀྱི་དད་པ་ཡོད་པ་ཚང་མས་ཞིང་ཁྲིད་འདི་དང་། འདི་ལྟ་བུའི་ཆོས་སྒྲ་རེ་གོ་བར་བྱེད་པ་དང་། གོ་བ་རང་གི་རྒྱུད་ལ་སྦྱར་ནས་ཉམས་ལེན་གྱི་གནད་རེ་ཨེ་ཤེས་བལྟས་ན། ད་རེས་ཆོས་གྲྭ་འདིའི་ནང་ཡོང་བར་སྟོང་ལོག་མིན་པར། ཆུ་ལེན་དུ་ཡོང་ནས་ཟོམ་སྟོང་ཁུར་མི་དགོས་པ་བཞིན་དུ་རང་དྲིན་རང་ལ་ཆེ་བ་ཡིན་པས། ཚང་མས་འདང་རེ་རྒྱོབས་ཟེར་རྒྱུ་དེ་ལྟར་ཡིན། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་བཤད་སྒྲུབ་འཁོར་ལོ་གཉིས་ལྡན་གྱི་སྒོ་ནས་གོང་དུ་འཕེལ་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་དགོངས་པ་ཡོངས་སུ་རྫོགས། ད་ལྟ་བཞུགས་པ་རྣམས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་འཁྲུག་རྩོད་ཐམས་ཅད་རྒྱུན་ཆད། བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པའི་ཕྱིར་དང་། བདག་ཅག་རྣམས་ཀྱི་ཚེ་འདིའི་ཕ་མ་གཉིས་དང་། དགྲ་བགེགས་གཉིས་ཀྱི་གཙོས་བྱས་པའི་བཟང་འབྲེལ་ངན་འབྲེལ་ཐོགས་པའི་མཐའ་ཡས་པའི་སེམས་ཅན་ཐམས་ཅད་མཐར་ཐུག་རྣམ་པ་ཐམས་ཅད་མཁྱེན་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕོང་ཐོབ་པ་དང་། དེ་མ་ཐོབ་ཀྱི་བར་དུ་ཡིན་ན་ཡང་མཐོ་རིས་ཡོན་ཏན་བདུན་དང་ལྡན་པའི་ལུས་རྟེན་ཁྱད་པར་ཅན་ཞིག་རྙེད་ནས་ཐེག་པ་ཆེན་པོའི་ཆོས་ལ་ཚུལ་བཞིན་དུ་སྤྱོད་པའི་སྐལ་བ་དང་ལྡན་པའི་ཕྱིར་དུ་རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་གནང་བར་ཞུ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆི་རྦ་རླབས་འཁྲུག་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག། ཉིན་གཉིས་པའི་བཀའ་ཆོས།རང་རེ་སེར་སྐྱ་ཕོ་མོ་རྒན་གཞོན་མང་པོ་ཞིག་ད་རེས་ཆོས་ར་འདིའི་ནང་མཉམ་དུ་འཛོམས་ནས་དམ་པའི་ཆོས་འཆད་ཉན་བྱེད་པའི་སྐབས་ཡིན་ལ། དམ་པའི་ཆོས་ཞེས་པ་འདི་ནི་རྫོགས་པའི་སངས་རྒྱས་ཀྱི་བཀའ་དྲི་མ་མེད་པ། རྗེས་སུ་བསྟན་པའི་དོན་དང་འབྲེལ་བའི་ཚིག་བཟང་པོ། དོན་བཟང་པོ། སེམས་ཅན་ཐམས་ཅད་བདེ་བ་ནས་བདེ་བར་འགོད་པའི་ལམ་དང་འབྲེལ་བ། བདུད་རྩི་ཞི་བ་འདུས་མ་བྱས་པ། ན་བའི་སྨན་དང་། འཆི་སོས་ཀྱི་བདུད་རྩི། ངལ་འཚོའི་འབབ་སྟེགས། སྡུག་བསྔལ་ཐམས་ཅད་སེལ་བར་བྱེད་པའི་མགོན་དང་། སྐྱབས་དང་། དཔུང་གཉེན་གཅིག་པུ་ཡིན་ལ། དམ་པའི་ཆོས་ཀྱི་ཉི་མ་དེ་རྒྱལ་ཁམས་ལ་ཤར་ཚེ། ཉི་མ་ཀུན་ཀྱི་ཉི་མ་ཡིན་པས། ཉི་མ་འཛམ་གླིང་ལ་ཤར་དུས། ང་དང་ཁོ་ཟེར་རྒྱུའི་ཕྱོགས་རིས་ཡོད་པ་མིན་པས་གསལ་ཉི་མའི་དྲོད་བཅུད་དེ་ཐམས་ཅད་ཀུན་ཀྱིས་ལོངས་སྤྱོད་ཆོག་པ་ཡིན་ལ། འོན་ཀྱང་དམུས་ལོང་མུན་པའི་སྣང་བ་ལས་མེད་པའི་གང་ཟག་དང་། ཁ་བྱང་བསྟན་གྱི་བྲག་ཕུག་གི་ནང་དུ་ཉི་མའི་འོད་ཟེར་ཕོག་དཀའ་བ་བཞིན་དུ་མ་རིག་རྨོངས་པའི་ལས་སྒྲིབ་དེ་ཤིན་ཏུ་མཐུག་ཆེ་བའི་སྟོབས་ཀྱིས་ཆོས་སྣང་བའི་འོད་ཟེར་མཐོང་ཐབས་མེད་པའི་མི་དང་། ལོག་ལྟ་ཐེ་ཚོམ་གྱི་ལྟ་བའི་བྲག་རི་དེ་ཤིན་ཏུ་མཐོ་ཆེ་བའི་དབང་གིས། སེམས་ཅན་རྒྱུ་མ་དྲུད་ན་སྙིང་མི་རྗེ། སངས་རྒྱས་ནམ་མཁར་འཕུར་ཡང་དད་པ་མེད་པ། ཤཱཀྱ་ཐུབ་པའི་སྔུན་ནས་ཞྭ་མི་ཕུད། གླང་ཆེན་སྨྱོན་པར་ཐུག་ན་ལམ་མི་གཟུར་ཟེར་མཁན་འགའ་རེ་ཡོད་སྲིད་ན་ངན་འབྲེལ་འཁོར་བ་མཐའ་ཅན་ཙམ་ལས་བྱ་ཐབས་མེད་སོང་བ་རེད། དེ་ལྟར་མིན་པར་རང་གིས་རང་ལ་ཤ་ཞིག་ཚ། རང་གིས་རང་ལ་སྙིང་ཞིག་རྗེ། བཀའ་མདོ་རྒྱུད་ལུང་མན་ངག་གི་སྦྱོང་པ་ནི་ཅུང་མ་མྱོང་ན་ཡང་། ཚེ་འདི་བས་ཕྱི་མའི་ལམ་ཐག་རིང་འདུག དཔོན་འདི་བས་ཆོས་རྒྱལ་གྱིས་རྔམ་ཟིལ་ཆེ་འདུག འདི་སྣང་འཁོར་བའི་ལས་ལ་མ་འཁྲུལ་ཅི་འཁྲུལ། མ་འཁྱར་ཅི་འཁྱར། མི་དགེ་སྡིག་པའི་ལས་ཞེས་པ་དེ་ཚོ་མ་བསགས་པ་ཞིག་ཅི་ཡོད། མ་ལས་རྒྱུ་དེ་གང་རེད། ཚེ་འདི་ལ་ནི་མ་ཡིན་ཡིན་མདོག་བྱེད་ཆོག་འདུག མེད་རྒྱུ་ཡོད་ཁུལ་བྱེད་ཆོག་འདུག མིན་ན་ཡིན་མདོག་སྟོན་ཆོག་འདུག་མོད། དོན་དངོས་སུ་ཉིན་རེ་སོང་བཞིན་ཚེ་ཇེ་ཟད་རེད། ལུས་འབྱུང་བཞི་འདི་ལ་རྟག་བརྟན་མི་འདུག ཁ་ཐོག་ནས། སྐྱེ་འཆི་ཉི་ཟླ་གཉིས་ལ་ཡོད། །གྲ་རྒུད་དམར་ཡག་སྟག་ལ་ཡོད། །ཉིན་ཞིག་ཤི་ལོས་འགྲོ། མི་མ་ཤི་ན་ས་སྟེང་ལ་ཆུད་རྒྱུ་མ་རེད། གང་ལྟར་ཡང་མགོ་ཐོན་ལོས་འགྲོ་ཟེར་ཁུལ་བྱེད་ན་ཡང་། ཁ་དེ་ན་དཔའ་ཞིག་ཡོད་ཀྱང་། ཁོག་དེ་ན་སྡར་ཞིག་ལང་ནས། ངོ་མ་འཆི་སའི་ཉི་མ་དང་ཐག་ཇེ་ཉེ་རེད་དེ། འཆི་བདག་གཤིན་རྗེའི་ཕོ་ཉའི་གདོང་དང་གདོང་གཏུག་ནས་ངོ་འགྲམ་གཅར་ས་ལ་ཐོན་དུས་བྲང་སེན་རྗེས་ཀྱིས་བཀང་། མིག་མཆི་མ་ཙ་རེ་བྱེད་དུས། ད་གཟོད་འགྱོད་པ་རྟས་མི་སླེབ་པ་ཞིག་སྐྱེ་བ་ཡིན་ཡང་དེ་དུས་ངེས་པར་དུ་འཕྱི་ཚར་བ་རེད། ང་ཕྱིར་ལ་ཐེངས་གཅིག་མངོགས་དང་། ངས་བཅོ་བརྒྱད་ཀྱི་སྣེར་བཅུ་དགུ་མཐུད་ཡོང་ཟེར་ས་ག་ལ་ཡོད། དེའི་དུས་སུ་རྣོན་པོའི་སོ། མགྱོགས་པའི་བང་། ཤེད་ཆེན་གྱི་ཤེད། རྒྱུ་ཆེན་གྱི་རྒྱུ། ངོ་ཆེན་གྱི་ངོ་གཅིག་གིས་ཀྱང་འགོག་རྒྱུ་མི་ལོན་པར། དབུགས་མ་ཆད་གོང་ནས་མ་དག་འཁྲུལ་སྣང་གི་བསུ་མ་སྔོན་ལ་ཐོན་དུས། རྒྱལ་སྲས་ཞི་བ་ལྷས། བྲེད་ཤ་ཐོན་པའི་མིག་བགྲད་ནས། །ཕྱོགས་བཞིར་སྐྱབས་དག་འཚོལ་བར་བྱེད། །ཕྱོགས་བཞིར་སྐྱབས་མེད་མཐོང་ནས་ནི། །དེ་ནས་ཀུན་ཏུ་ཡི་མུག་འགྱུར། །ཞེས་གསུངས་པ་ལས་མི་འདའ་ཞིང་། དེའི་སྐབས་སུ་སྐྲག་སྔངས་སྡུག་གསུམ་གྱིས་སྙིང་གས་འགྲོ་བའི་སྐབས་སུ་འགྲོ་མཁན་ཤི་བོ་སྡུག་ལོས་བསྔལ། ངན་སོང་དམྱལ་བའི་ཚ་གྲང་ད་མྱོང་རན་པ་དང་། ཤུལ་ལུས་ཀྱི་གསོན་པོ་ཡིན་ནའང་བག་གྲང་མོ། ཡི་མུག་པོར་འགྱུར་བ་ཡིན་ཏེ། གཏམ་པདྨའི་ཚལ་གྱི་ཟློས་གར་ལས། གཡུ་སྦྲང་ངག་སྙན་པདྨའི་སྦུབས་ལ་འཐུམས་ནས་སྐད་ཀྱང་མི་ཐོན་པའི་དུས་སུ་འདི་ལྟར་སྨྲས་པ་ཡིན། དལ་འབྱོར་མི་ལུས་ཐོབ་ན་ཡང་། །སྙིང་པོ་མ་ལོན་ང་རེ་འགྱོད། །མི་རྟག་འཆི་བ་ཤེས་ན་ཡང་། །འཆི་ཆོས་མ་འགྲུབ་ང་རེ་འགྱོད། །ཅེས་པ་དང་། འཇིགས་རུང་མུན་པས་མདུན་ནས་བསུ། །རང་ལམ་མི་མཐོང་ང་རེ་འཇིགས། །ལས་ཀྱི་རླུང་དམར་རྒྱབ་ནས་དེད། །རང་དབང་མི་ཐོབ་ང་རེ་འཇིགས། །ཞེས་སྡུག་སྨྲེ་འདོན་པའི་སྐད་ཆ་དེ་འདྲ། གྲོགས་གསེར་སྦྲང་འདབ་ཡངས་ལ་གཏམ་གྱི་མཇུག་མཐའི་གླུ་དེ་ལྟར་ཤོར་བ་རེད། མི་ཐམས་ཅད་ཤི་བའི་ཐད་ནས་འདྲ་ན་ཡང་། འཆི་ལུགས་ཤི་སྟངས་ཀྱི་ཐད་ནས་མི་འདྲ་སྟེ། འགའ་རེ་འཆི་ཁར་གནད་གཅོད་ཀྱི་སྡུག་བསྔལ་མེད་པ་དང་། ཤི་དུས་འཁྲུལ་སྣང་གི་འཇིགས་སྐྲག་ཆུང་འདུག་ཟེར་རྒྱུ་དེ་འདྲ་དང་། གསོན་ཚེ་དམ་པའི་ཆོས་ཕྱོགས་ལ་སྒོ་གསུམ་དགེ་བའི་ལས་ལ་དྲིལ་བས། འཆི་རན་ཁར་མཉམ་བཞག་དང་ལྟ་སྟངས་གཟིགས་སྟངས་ཀྱི་ཐོག་ནས་དབྱིངས་དང་རིག་པ་སྲེ་བའི་ཉམས་ལེན་མེད་རུང་། ཕྱག་རྒྱ་ཐལ་མོ་གདོང་བཙུགས་ཀྱི་སྒོ་ནས། བླ་མ་སྤྱི་བོར་བསྒོམས་ཏེ་གསོལ་འདེབས་སྨོན་ལམ་དང་སྦྲགས་ནས་དབུགས་རྔ་བསྡུས་སོང་ན། འགྲོ་བའི་མི་ལ་ཞེ་གདེང་དང་དཔའ་ཚོད་ཅིག་ཡོད་པས་མ་ཚད། ཤུལ་ལུས་ཀྱི་མི་ཡིན་ནའང་གསོན་འདི་གང་ནས་མིག་གིས་ཅི་མཐོང་གི་གཅེས་དམར་ཅན་ཞིག་ཡིན་པས་ཤ་ཚ་སྙིང་རྗེ་ལོས་ཡོད་མ་གཏོགས། དེ་ཚེ་ཕྱི་མ་ལ་ཐོན་དུས་སོག་ལེས་ཇི་ལྟར་བྱས་ནས་དྲ་འགྲོ་བ་དང་། ཐོ་བས་ཇི་ལྟར་བྱས་ནས་བརྡུང་འགྲོ་བ་དང་། དམྱལ་ཟངས་ཁྲོ་ཆུ་ཁོལ་མའི་ནང་ནས་ཉམ་ཐག་སྡུག་གི་འོ་དོད་འབོད་བཞིན་ཨེ་ཡོད་ན་སྙམ་པའི་སེམས་ཁྲལ་མ་དགོས་ཚེ་བག་དྲོ་བ་ཞིག་ལོས་ཡིན། སེམས་སྡུག་གཉིས་མཉམ་དུ་འཚག་མ་དགོས་པ་རེད། དེ་ལྟ་བུའི་སྒོ་ནས་བསམ་བློ་གཏོང་ན། རོགས་ཐོག་ལ་ཡོང་རྒྱུ་དེ་རང་ཐོག་ལ་ཡོང་ཤག་ཤག་ཡིན་ཏེ། རྒྱ་ར་ར་སྐོར་གཅིག་གི་ནང་དུ་བཤའ་ལུག་དེའི་གང་བཙུད་ཡོད་ན། གསོད་སྔ་ཕྱི་ཅུང་ཟད་ཙམ་ལས་ནམ་ཞིག་མཐའ་འབྲས་གཅིག་མ་གཏོགས་མེད་པ་ནི། བྱ་སྔོན་མ་ཤི་བའི་རོ་ལ་བལྟས་ན། རྗེས་མ་མི་རྟག་དེ་དང་འདྲ་བ་ཡིན་པས། ད་ལྟ་རང་དབང་རང་ལག་ལ་ཡོད་དུས་འདིར་སྔ་དྲོ་ཕྱི་དྲོ་ཙམ་རེ་ལ་ཡང་ཁོམ་པ་མི་འདུག་པར་སྨྲ་ན་ཡང་། མི་ཁོམ་སའི་དོན་ནི་ཤིན་ཏུ་ཆུང་བའི་དབང་གིས་ཁོམ་པ་མི་འདུག་ཅེས་སྨྲོས་རིན་མེད་པ་ཞིག་ཡིན་མོད། འོན་ཀྱང་དོན་ཆུང་ཡང་ཁམས་ཁ་རྗེ་དེ་ལས་མེད་དུས་ཐབས་མེད་དོ་ཞེ་ན། དེ་ནི་དོན་ཆུང་ཆུང་ཙམ་གྱིས་མ་ཚད་པར་ཉེན་ཁ་ཆེན་པོར་ཆགས་ཡོད་པ་སྟེ། སྡུག་སྡིག་པའི་ས་བོན་བྲེ་གསོག་ཕུལ་གསོག་བྱེད་པ་ལས་དོན་ཆེན་པོ་གཞན་ཞིག་སྒྲུབ་ཏུ་མེད་པས། འཆི་བདག་གཤིན་རྗེའི་ཞགས་པ་དེ་སྐེ་ལ་སྐོན་པའི་སྐབས་སུ་ཁྱོད་ལ་སྔོན་གྱི་མི་ཁོམ་འདུག་རྒྱུའི་སྡིག་ལས་ཙ་གེ་ཙིག་གེས་ཕན་ཐོགས་ག་ལ་ཡོད། དེས་ན་ཡུན་རིང་པོའི་ཕྱི་ཚིས་མི་བྱེད་པར། ལ་འུར་ད་ལྟ་ཉིད་དུ་སེམས་ཐག་བཅད་ནས། དམ་པའི་ལྷ་ཆོས་ཤིག་བསྒྲུབ་མ་ཐུབ་དུས། གཅིག་བྱེད་ཚར་དུས་གཉིས་པ་དེ་བསྒྲུབ་དགོས་བསམ་ཁུལ་བྱེད་པ་དེས་ད་ལྟའི་བར་དུ་བསླུས་པ་ཡིན་པས། སེམས་ཐག་མ་ཆོད་པའི་བུ་དེ་ཡིས་ཇི་ལྟར་བྱས་ཀྱང་ཆོས་འཇིག་རྟེན་གཉིས་ཀ་འགྲུབ་པའི་ལོ་རྒྱུས་མེད་པ་རེད། བླ་མ་སེར་མོ་དགེ་འདུན་རྣམ་པ་ཚོར་ཅི་བཤད། དུས་རྟག་ཏུ་ཆོས་སྤྱོད་བཅུ་ཡི་མཛད་པར་འབད་བཞིན་ཡོད་པ་རེད། མི་ཞིག་གིས་ཁྱིམ་འཁོར་བ་དང་བྲལ་བས་ན་གྲྭ་བ་ཟེར་བ་རེད་ཅེསབཤད་རབས་ཡོད། དེས་ཡི་གེའི་མིང་གཞི་ག་དང་བ་ནོར་བས་མ་ཚད་རྗེས་འཇུག་ལ་ཞིག་ཀྱང་བསྣན་པར་བྱས་འདུག ཨ་ལ་དེ་ཚོ་སྐད་ལུགས་ཀྱིས་ཚིག་གི་སྐྱེ་འབྲས་མ་དག་ནས་གོ་བ་ཕྱིན་ཅི་ལོག་ཏུ་བླངས་སོང་བ་ཡིན་ན་ཡང་། དོན་གྱི་ཆ་ནས་ཁོས་བཤད་པ་དེ་མིན་རྒྱུ་མེད་པ་སྟེ། ངོ་མས་ཁྱིམ་འཁོར་བ་དང་བྲལ་བས་བྲལ་བ་ཞེས་པ་བཞིན་དུ་ཁྱིམ་ནས་ཁྱིམ་མེད་པར་ཤཱཀྱའི་བསྟན་ལ་རབ་ཏུ་བྱུང་ནས་གྲོང་ལས་རྒྱང་གྲགས་འཕགས་པའི་དགོན་པར་བཞུགས་ཡོད་པས་ན་གྲྭ་པ་ཟེར་དུས་ཁྱིམ་དང་བྲལ་བ་ཞིག་མིན་ན་ཅི་ཡིན། གང་ལྟར་བཤད་རུང་གྲྭ་ས་ཆེན་པོའི་དགེ་འདུན་པ་མཆོད་འོས་ཀྱི་ཞིང་ས་སྟེ། བླ་མ་བཟང་པོའི་སློབ་མ། གྲྭ་ས་བཟང་པོའི་གྲྭ་པ་འདྲ་རྒྱུ་མ་རེད། ང་ཡི་རྗེས་འཇུག་ཇི་ལྟར་ཞན་གྱུར་ཀྱང་། །སྐྱེ་བོ་ཕལ་བ་བརྒྱ་ཡིས་དོ་ཟླ་མེད། །ཅེས་གསུངས་པ་ལྟར། མི་སྐྱ་ཕོ་མོ་ཐམས་ཅད་ཡིན་ནའང་རང་ལ་རང་དབང་ཡོད་པའི་སྐབས་འདིར། ཤི་དུས་འགྱོད་མེད་ཀྱི་དམ་པའི་ལྷ་ཆོས་བློ་ཁེལ་ཤག་ཤག་ཅིག་ཨེ་འགྲུབ་ལྟ་རྒྱུ་དེ་རང་དོན་ཡིན་པས། རང་དོན་ལ་དོན་གཉེར་བྱེད་ལུགས་ནོར་མི་ཤོར་བར་གཙོ་བོ་རང་དོན་སྒྲུབ་དུས་ཁེ་གང་གིས་ཆེ་བལྟ་དགོས། འཇིག་རྟེན་མི་རྣམས་ཆགས་སྲེད་དང་ཞེན་པ་ཆེ་བས་ཡིན་གཅིག་མིན་གཉིས་གཅིག་ལོན་ཡོད་པ་དང་ཐོབ་ཡོད་པ་ཞིག་དགོས་པ་ཡིན་པ་བཞིན་དུ། གལ་ཏེ་དམ་པའི་ཆོས་ཞུས་ནས་ཆོས་ཡང་དག་ཅིག་གོ་ཡོད་ན། དེ་རིང་ཆོས་རའི་ནང་ལ་བསྡད་པའི་རིན་ཐང་གི་ཐད་ནས་བསམ་བློ་བཏང་ན། ཚེ་འདི་ཕྱི་རང་གཞན་གཉིས་ཕན་གྱི་བྱ་བ་གནད་ཆེན་གྱི་ལམ་སྣེ་ཟིན་པའི་ཡོང་སྒོ་ཆེན་པོ་ཞིག་རྙེད་ཡོད་པས། འདི་འཇིག་རྟེན་སྒྱུ་མའི་ནོར་རྫས་ཀྱིས་ས་སྟེང་བཀང་ནས་བྱིན་ན་ཡང་བསྒྲུན་དུ་མེད་པ་ཞིག་ཡིན་ལ། ལུས་ཆོས་གྲལ་ལ་བསྡད་པས་མ་ཚད་པར། སེམས་ཆོས་དང་འདྲེས་ཐབས་ལ་རང་གིས་འབད་བརྩོན་བྱེད་རྒྱུ་དེ་གནད་ཆེན་ནང་གི་གལ་ཆེན་ཡིན། ཆོས་ཞུ་བའི་སྐབས་སུ་ཆོས་ཞུ་བའི་སྔོན་ལ་ཞུ་ལུགས་ཤེས་རྒྱུ་དེ་གནད་ཆེ་བ་ཁར་སང་བཤད་མ་ཐག་པ་ལྟར་ཡིན་པས། ཀུན་སློང་དང་ཀུན་སྤྱོད་བཅོས་རྒྱུ་དེ་ནམ་དང་ནམ་དུ་ཡང་གལ་ཆེ་བ་ཡིན། ཀུན་སློང་ཞེས་པ་ནི་བསམ་བློ་གཏོང་ཚུལ་ཞིག་རེད། བསམ་པ་བཟང་ན་ས་དང་ལམ་ཡང་བཟང་། །བསམ་པ་ངན་ན་ས་དང་ལམ་ཡང་ངན། །ཐམས་ཅད་བསམ་པ་དག་ལ་རག་ལས་པས། །རྟག་པར་བསམ་པ་བཟང་ལ་ནན་ཏན་བྱ། །ཞེས་གསུངས་པ་ལྟར་དུ། ཆོས་ཞུ་དུས་བསམ་པའི་ཀུན་སློང་བཟང་པོ་བྱང་ཆུབ་སེམས་ཀྱི་ཀུན་སློང་ལྡན་དགོས་པ་དང་། ཀུན་སློང་ཡག་པས་མི་ཚད་ཀུན་སྤྱོད་ཡག་དགོས་པས། ཀུན་སྤྱོད་ཅེས་པ་ནི་ལུས་ངག་གི་བྱ་སྤྱོད་ཅིག་སྟེ། སྤང་བྱའི་ཀུན་སྤྱོད་ཐམས་ཅད་སྤངས་པ་དང་། བླང་བྱའི་ཀུན་སྤྱོད་མཐའ་དག་ཚུར་བླངས་ནས་ཆོས་ཉན་དགོས་ཚུལ་ཁར་རྩང་བཤད་པ་བཞིན་དུ་ཡིན་པ་གཞིར་བཞག་གི་ཐོག་ནས། ཀུན་མཁྱེན་ཆོས་ཀྱི་རྒྱལ་པོ་རྒྱལ་བ་ཀློང་ཆེན་རབ་འབྱམས་པས། ཁྱད་པར་ཐེག་ཆེན་དགེ་བ་རླབས་པོ་ཆེ། །སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་བསྔོ་བས་ཡོངས་སུ་ཟིན་པ་དེ། །ཐར་ལམ་སྒྲུབ་པའི་གཅེས་པ་རྣམ་གསུམ་ཡིན། །ཞེས་གསུངས་པ་ལྟར། ཐེག་ཆེན་གྱི་ཆོས་སྒོ་ལ་ཞུགས། མདོ་སྔགས་གཉིས་ཀྱི་ཉམས་ལེན་ཞིག་བྱེད་བསམ་ན་དམ་པ་གསུམ་གྱིས་རྩིས་ཟིན་པ་ཞིག་བྱེད་རྒྱུ་དེ་ཐོག་མཐའ་བར་གསུམ་དུ་མེད་ཐབས་མེད་པ་ཡིན། འོ་ན་དེ་ཇི་ལྟ་བུ་ཞིག་ཡིན་ཞེ་ན། དགེ་རྩ་ཐབས་ཀྱིས་ཟིན་པ་སྦྱོར་བ་སེམས་བསྐྱེད་དམ་པ། དགེ་རྩ་རྐྱེན་གྱིས་མི་ཤིགས་པར་བྱེད་པ་དངོས་གཞི་དམིགས་མེད་དམ་པ། དགེ་བ་གོང་ནས་གོང་དུ་འཕེལ་བར་བྱེད་པ་རྗེས་བསྔོ་བ་དམ་པ་སྟེ། དེ་ལས་སྦྱོར་བ་སེམས་སྐྱེད་ལ་མཚོན་ན། སྤྱིར་སེམས་བསྐྱེད་རྒྱ་ཆེ་ན་དགེ་བ་རྒྱ་ཆེ་བ་དང་། སེམས་བསྐྱེད་རྒྱ་ཆུང་ན་དགེ་བ་དེ་ཡང་རྒྱ་ཆུང་ཆུང་ཞིག་མ་གཏོགས་ཡོད་པ་མིན་པས། བསམ་པ་དགེ་དང་མི་དགེའི་བྱེ་བྲག་ལས། །ཞེས་ད་ལྟ་ལུང་དྲངས་བ་ལྟར་ཡིན་པས། དཔེར་ན་ཆོས་ཉན་པའི་དགེ་རྩ་འདི་ལྟ་བུ་ལ་མཚོན་ནའང་ང་གཅིག་པུའི་བདེ་ཐབས་སྐྱིད་ཐབས་དང་། ང་ངན་སོང་ལ་མི་ལྷུང་བའི་ཆེད་དུ་ཆོས་འདི་ཉན་ནས་བསྒྲུབ་ཨེ་ཤེས་བལྟ་དགོས་སྙམ་ན་སེམས་བསྐྱེད་རྒྱ་ཆུང་སོང་བ་ཡིན། སེམས་བསྐྱེད་རྒྱ་ལོས་ཆུང་ང་མི་གཅིག་ཁོ་ནའི་ཆེད་ཙམ་ལས་མ་འདས། སེམས་ཅན་ཐམས་ཅད་སྡུག་བསྔལ་མྱོང་བ་ལ་གཅིག་མཚུངས་ཡིན། འདི་རྣམས་ཀྱི་དོན་དུ་ཆོས་ཉན་པ་དང་སྒྲུབ་པར་བྱས་ཏེ་ང་ལ་ནུས་པ་ཡོད་པ་ཞིག་བྱས་ནས་སེམས་ཅན་ཡོད་ཚད་སྡུག་བསྔལ་ལས་སྐྱོབ་དགོས་སྙམ་ན་སེམས་བསྐྱེད་རྒྱ་ཆེན་པོ་དང་ཐེག་ཆེན་སེམས་བསྐྱེད་ཡིན། འོན་ཀྱང་ལས་དང་པོ་བ་དག་ལ་མཚོན་ན་རང་དོན་དང་མ་འདྲེས་པའི་སེམས་བསྐྱེད་ཅིག་དང་པོ་ཉིད་ནས་ཡོད་དཀའ་ཡང་བསམ་བློ་བཏང་ནས་སྦྱོང་དགོས། དེ་སྔོན་ཉི་མ་ཡན་ཆད་ལ་སྐྱེ་ལུས་བླངས་ཚད་པོ་བརྩི་ཐབས་མེད་པ་ཚེ་འཁོར་བ་ཐོག་མེད་ནས་ད་ལྟ་ལ་མ་ཐུག་གི་བར་དུ་བདག་འཛིན་འདིའི་དབང་གིས་རང་དོན་མ་བསྒྲུབས་པ་ཞིག་ག་ལ་ཡོད། རང་གཅིག་པུ་བདེ་ཐབས་ལ་ཅི་འདྲའི་འབད་བརྩོན་ཞིག་བྱས་མེད་ཀྱང་། རང་དོན་མ་འགྲུབ་ནས་ད་ལྟའི་བར་དུ་འཁོར་བར་འཁྱམས་པ་འདི་ལས་མ་འདས་པ་ཡིན་པས། ད་ནི་གཞན་དོན་ཞིག་བསྒྲུབ་དགོས་པར་འདུག་ཏེ། རྫོགས་པའི་སངས་རྒྱས་བཅོམ་ལྡན་འདས་ཀྱིས་གཞན་དོན་འབའ་ཞིག་བསྒྲུབས་ནས་རང་དོན་ཞོར་འབྱུང་དུ་འགྲུབ་སྟེ་སྟོབས་བཅུའི་སྟོབས་རྫོགས། དབང་བཅུའི་དབང་དང་ལྡན་སོང་བ་ཡིན་འདུག དཔེ་དེ་བཞིན་དུ་འཇིག་རྟེན་མིའི་ནང་ནས་ཀྱང་རང་དོན་ཕུགས་བཅུག་ཏག་ཏག་གིས་ང་ཁེ་རུ་མ་བདེ་སར་འདུག་དགོས། ཁྱོད་གཟར་ས་ལ་སྡོད་ཟེར་མཁན་ཞིག་ལ་གང་སུ་ཞིག་གིས་ཀྱང་བཟང་པོར་མི་བརྩི། དེའདྲ་དེ་བདེ་སར་འདུག་བསམ་ན་ཡང་དེའི་སར་ཐོན་དཀའ་བ་ཡིན། རང་འདོད་མི་ཆེ་བའི་མི་སྤྱི་དོན་ཁོ་ན་ལ་བསམ་བློ་གཏོང་བའི་མི་དེ། མི་བཟང་ཡ་རབས་ལ་བརྩི་བས་མ་ཚད་དེ་འདྲ་དེས་སྤྱི་དོན་གྱི་ཞོར་ལ་རང་དོན་འགྲུབ་པ་ལས་ཟུར་དུ་ལྷག་འགྲོ་བ་མ་རེད། དེས་ན་སྦྱོར་བ་སེམས་བསྐྱེད་དམ་པ་ནི་སྙིང་རྗེས་དྲངས་པའི་བྱང་ཆུབ་ཀྱི་སེམས་རིན་པོ་ཆེ་ལ་བློ་སྦྱོང་བ་དེ་ཡིན་ཕྱིར། སེམས་བསྐྱེད་ཀྱི་རྩ་བ་སྙིང་རྗེ་ལ་ཐུག་པ་དང་། སྙིང་རྗེ་དེའང་སེམས་ཅན་ལ་དམིགས་ནས་སྐྱེ་དགོས་པ་རེད། དེ་ཡང་ནམ་མཁའ་འདི་ལ་ཚད་མེད་པ་སྟེ། ནམ་མཁའ་འདི་ལ་ཚད་ཅིག་ཞོག་ཟེར་ན་མཐའ་མེད་རེད་ཅེས་པ་ལས་གཞན་བསྙད་དུ་མེད། ནམ་མཁས་གར་ཁྱབ་ལ་སེམས་ཅན་གྱིས་ཁྱབ་ཡོད་པས། སེམས་ཅན་ལ་ཡང་དེ་བཞིན་དུ་མཐའ་དང་བྲལ་ཞིང་། དེ་ལྟ་བུའི་མཐའ་མེད་ཀྱི་སེམས་ཅན་འདི་དག་ཐམས་ཅད་ང་ཚོ་མི་གཅིག་ལ་མཚོན་ནའང་སེམས་ཅན་རེ་རེ་བཞིན་དུ་ཕ་མ་བྱས་མ་མྱོང་པ་གཅིག་ཀྱང་མེད་ལ། ཕ་མ་བྱེད་རྒྱུ་དེ་ཡང་ལན་གྲངས་གཅིག་དང་གཉིས་ཀྱིས་མི་ཚད་པར་ལན་གྲངས་བརྩི་བརྩི་གྲངས་མེད་ས་ཆེན་པོའི་རྡུལ་ཕྲན་གྱི་གྲངས་ལས་མང་བ་ཞིག་བྱེད་མྱོང་ལ། ཕ་མ་བྱེད་པའི་གནས་སྐབས་སུའང་ད་ལྟའི་ཚེ་ལུས་འདིའི་ཕ་མ་ཨ་ན་མ་ན་བཞིན་དུ་གཅེས་པའི་སེམས་ཀྱིས་བསྐྱངས། འཛུམ་པའི་མིག་གིས་བལྟས། བྱམས་པས་བསྐྱེད་བསྲིངས་བ་ཤ་སྟག་ཡིན་པས། ཚེ་འདིའི་ཕ་མ་དང་ཁྱད་པར་ག་ལ་ཡོད། འོན་ཀྱང་འདི་ལྟ་བུའི་ཕ་མར་གྱུར་པའི་སེམས་ཅན་འདི་དག་གིས་འདོད་པ་བདེ་བ་འདོད་ན་ཡང་། རྨོངས་པ་མ་རིག་གཞན་དབང་དུ་གྱུར་བའི་སྟོབས་ཀྱིས་བདེ་བའི་རྒྱུ་དགེ་བ་བསྒྲུབ་མི་ཤེས། མི་འདོད་པ་སྡུག་བསྔལ་མ་འདོད་ན་ཡང་། སྡུག་བསྔལ་གྱི་རྒྱུ་སྡིག་པ་མི་དགེ་བ་སྤང་མི་ཤེས། ཞེ་འདོད་དང་ལག་ལེན་གཉིས་ཕྱིན་ཅི་ལོག་ཏུ་སོང་ནས། འགྲོ་བ་རིགས་དྲུག་གི་སྡུག་བསྔལ་འདི་དག་མྱོང་བ་ཡིན་པས། འདི་ཐམས་ཅད་སྙིང་རེ་རྗེ་བསམ་རྒྱུའི་སྙིང་རྗེ་ཞིག་ཡོང་དགོས་ལ། དེ་ཡང་སྙིང་རྗེ་ཆུང་ཆུང་ཕྱོགས་རེ་བ་རང་ཉིད་ཀྱི་བུ་ཚ་རྒྱུད་ལ་གཅེས་པ་དེ་འདྲ་ནི་ལ་ཁའི་རི་སྤྱང་དང་གཅན་གཟན་སྟག་གཟིག་དོམ་དྲེད་ཚོ་ལ་ཡང་ཡོད་ནའང་། དེ་ལྟ་བུའི་འགའ་རེ་ལ་ཆགས་ཤིང་། འགའ་རེ་ལ་སྡང་བ་དེ་འདྲ་མ་ཡིན་པར་སེམས་ཅན་ཡོངས་རྫོགས་ལ་མ་གཅིག་པུས་བུ་ལ་བརྩེ་བ་ལྟར་དུ་སེམས་ཅན་གྱི་སྡུག་བསྔལ་དྲན་ན་མིག་ནས་མཆི་མ་རང་ཤུགས་ཀྱིས་འོང་བ་ཞིག་བྱུང་ན་སྙིང་རྗེ་ཚད་མེད་འབྱུང་རྒྱུའི་ས་ཚོད་ལ་ཐོན་པ་ཡིན་ལ། དེ་ལྟ་བུའི་སྙིང་རྗེ་དེས་དྲངས་ནས་བྱང་ཆུབ་ཀྱི་སེམས་བསྐྱེད་དགོས་པ་རེད། སྙིང་རྗེ་བ་གཅིག་པུས་སེམས་ཅན་ལ་ཕན་ཐོགས་མེད་པ་ནི། དཔེར་ན་ཆུས་ཁྱེར་གྱི་མི་གཉིས་གཅིག་གིས་གཅིག་སྐྱོབ་ཐབས་མེད་པ་ལྟ་བུ་ཡིན་པས། སེམས་ཅན་ཐམས་ཅད་སྡུག་བསྔལ་གྱི་ནང་ནས་སྐྱོབ་ནུས་པ་ནི་རྫོགས་པའི་སངས་རྒྱས་གཅིག་པུ་ཡིན་པས། ངས་ད་རེས་ཆོས་ལ་ཐོས་བསམ་ཉམས་ལེན་གྱི་ཐོག་ནས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱས་ཏེ། ཕ་མ་སེམས་ཅན་ཐམས་ཅད་གཏན་བདེ་སངས་རྒྱས་ཀྱི་ས་ལ་འགོད་དགོས་སྙམ་པའི་བསམ་པ་དེ་དོན་གཉིས་ལྡན་པའི་སེམས་བསྐྱེད་ཡིན་པ་དང་། བྱང་ཆུབ་སེམས་ཀྱིས་ཟིན་མ་ཟིན་གྱི་དགེ་རྩ་ལ་ཁྱད་པར་གནམ་ས་ལྟ་བུ་ཞིག་ཡོད་པ་ནི། རྒྱལ་སྲས་ཞི་བ་ལྷས། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །ཞེས་གསུངས་པ་ལྟར་ཡིན་པས། དེ་ལྟ་བུའི་བསམ་པ་དེ་ཆོས་ཉན་དུས་སྒྲུབ་དུས། མ་ཎི་ཨོཾ་ཞིག་ལས་མ་བཏོན་ཡང་བསམ་པའི་ཀུན་སློང་དེ་དང་མ་བྲལ་བ་ནི་དགེ་རྩ་ཐབས་ཀྱི་ཟིན་པ་སྦྱོར་བ་སེམས་བསྐྱེད་དམ་པ་ཡིན་ནོ། །དངོས་གཞི་དམིགས་མེད་དམ་པ་ཞེས་པ་དེ་ཇི་ལྟ་བུ་ཞིག་ཡིན་པ་རེད་ཟེར་ན། འདི་ལ་ཐུན་མོང་དང་ཐུན་མིན་གྱི་བཤད་ཚུལ་རྣམ་པ་གཉིས་ཏེ། དེ་ལས་ཐུན་མོང་མ་ཡིན་པ་དེ་ཅི་འདྲ་ཞིག་ཡིན་ཞེ་ན། སྔོན་འགྲོས་རྒྱུད་སྦྱངས་ཏེ་རིམ་གཉིས་ཀྱི་ལམ་ལ་ཞུགས་ནས། གཞི་དབུ་མ་ཆེན་པོ། ལམ་ཕྱག་རྒྱ་ཆེན་པོ། འབྲས་བུ་རྫོགས་པ་ཆེན་པོ་གསུམ་གང་ཡང་རུང་བའི་ལྟ་བའི་གདེང་རྙེད་པ་དེའི་ཐོག་ཏུ་བཞག་ནས་རྟག་ཆད་སྐྱེ་འགག་ཡོད་མེད་ཡིན་མིན་ལ་སོགས་པ་སྤྲོས་མཐའ་ཐམས་ཅད་དང་བྲལ་བའི་མཉམ་བཞག་གཡོ་མེད་རྩེ་གཅིག་པའི་ཏིང་ངེ་འཛིན་དེའི་ཐོག་ནས་མི་གཡོ་ཞིང་དེའི་དགོངས་པ་དེ་དང་མི་འབྲལ་བ་ནི་དངོས་གཞི་དམིགས་མེད་དམ་པ་མཚན་ཉིད་པ་ཞི་ལྷག་ཟུང་དུ་འབྲེལ་སྟེ། ཞི་ལྷག་ཟུང་འབྲེལ་གྱི་དོན་དེའི་ཐོག་ནས་མཉམ་པར་བཞག་པ་ཞིག་ཡིན་ནོ། །འོན་ཀྱང་ལས་དང་པོ་བ་ཞིག་གིས་ཐུན་མོང་མ་ཡིན་པའི་ལྟ་དགོངས་ཏིང་ངེ་འཛིན་དམིགས་མེད་སྤྲོས་པའི་མཚན་མས་དབེན་པ་ཞིག་དཀའ་བ་ཡིན་པས། དེ་དང་རྗེས་མཐུན་ཐུན་མོང་གི་ལམ་འདི་ལྟར་སྣང་བའི་ཆོས་ཐམས་ཅད། སྒྱུ་མ་དང་རྨི་ལམ་ལ་སོགས་པ་སྒྱུ་མའི་དཔེ་བརྒྱད་དང་འདྲ་བའི་རང་བཞིན་ལ་ངེས་པ་བསྐྱེད་ནས། ཆོས་ཞུ་བའི་དུས་དང་དགེ་རྩ་སྒྲུབ་པའི་སྐབས་སྒོ་ལུས་ངག་ཡིད་གསུམ་པོ་ཆུན་གཅིག་ཏུ་དྲིལ་ནས་གང་བསྒྲུབ་རྒྱུའི་དགེ་བ་དེ་ལས་དམིགས་པ་ཁ་ཕྱིར་ལ་མ་ཤོར་བ་ཞིག་དགོས་པ་ཡིན། ཆོས་ཉན་པའི་སྐབས་སུ་རི་དྭགས་པི་ཝང་གི་སྒྲ་ལ་ཉན་པ་ལྟ་བུ་རྣ་བ་དེ་ལས་གཞན་དུ་མི་གཡེང་བ་དང་། ཆོས་སྒྲུབ་པའི་དུས་སུ་གཡག་ལྟོགས་ཀྱིས་རྩྭ་ཟ་བ་ལྟ་བུའི་གཅིག་བསྒྲུབ་ཚར་དུས་གཅིག་བསྒྲུབ་དགོས་སྙམ་པའི་ངོམ་པ་མེད་པ་དང་། མཐར་ཕྱིན་པའི་དུས་ན་ཉི་མ་སྤྲིན་ལས་གྲོལ་བ་ལྟ་བུའི་རེ་དོགས་མེད་པའི་ས་ལ་ཕྱིན་པའི་དམིགས་ཡུལ་དེ་འདྲ་ཞིག་འཛིན་དགོས་པ་ཡིན་ལ། ཆོས་ཞུ་དུས་རྣ་བ་མ་གཏད་པ་དང་། ཡིད་ལ་མ་བཞག་པ་དང་། ཉོན་མོངས་དང་འདྲེས་པར་གྱུར་ཚེ་ཁ་སང་བཤད་པ་ལྟར། སྣོད་ཁ་སྦུབ་དང་། ཞབས་རྡོལ་དང་། དུག་ཅན་ལྟ་བུའི་སྐྱོན་འབྱུང་ཞིང་། ཆོས་ཞུ་དུས་ལུས་འདུག་སྟངས་དྲང་པོར་བྱས་ནས་གུས་པའི་ཚུལ་གྱིས་མིག་གིས་ཆོས་སྨྲ་བ་པོའི་ཞལ་ལ་བལྟས་ནས་རྣ་བས་ཆོས་སྒྲར་ཉན་དགོས་པ་ཡིན། ཆོས་རང་གིས་མི་ཉན་ཞིང་གཞན་ལའང་ཉན་དུ་མི་འཇུག་པར་ངག་འཁྱལ་བཤད་པར་བྱས་ན། བྱ་ནེ་ཙོ་ལ་སོགས་པ་སྨྲ་ལ་འབྱམས་པའི་དུད་འགྲོའི་ལུས་ལེན་པར་གསུངས་པས་སེམས་རྣམ་ཤེས་བློ་རིག་བསྒྲིམས་ནས་ཉན་དགོས་པ་ཡིན། སངས་རྒྱས་བཅོམ་ལྡན་འདས་ཀྱིས་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་གསུངས་པ་ལྟར། དམ་པའི་ཆོས་ཟབ་དང་རྒྱ་ཆེ་བའི་བདག་ཉིད་དེ་གཟབ་གཟབ་བྱས་ནས་མ་ཉན་ན་གོ་མི་ནུས་པ་དང་། ཆོས་ཡང་དག་རྣ་བས་གོ་རྒྱུ་དེ་ཡང་ཉིན་མོའི་སྐར་མ་འདྲ་ཞིག་ཡིན་ཕྱིར་མཚམས་རེ་ལན་རེ་མ་གཏོགས་མི་ཐོབ་པའི་ཆོས་དེ་ཡང་ཡག་པོ་ཞིག་མ་ཉན་པའི་དབང་གིས་གོ་མེད་ན་ཆོས་རའི་ནང་ལ་ཡོང་ནས་ཆོས་ཞུའི་གྲལ་ལ་བསྡད་པ་དོན་མེད་དུ་འགྲོ་བ་སྟེ། དཔེར་ན། ཉི་མ་གཉིས་གསུམ་གྱི་ནང་དུ་ཟ་མ་ཐེངས་རེ་ཙམ་མ་གཏོགས་བཟའ་རྒྱུ་མེད་ན་ཐེངས་གཅིག་གི་ཟ་མ་དེ་ཡག་པོ་མ་ཟོས་ན་ཅི་ལྟར་འགྱུར་ངེས། ཟས་མེད་ན་མི་འཚོ་ཐབས་མེད་པ་དང་འདྲ་བར་དམ་པའི་ཆོས་བསྒྲུབ་ཏུ་མེད་ན་འདི་དང་ཕྱི་མའི་བདེ་སྐྱིད་སྐྲུན་ཐབས་མེད་ཅིང་། སངས་རྒྱས་བཅོམ་ལྡན་འདས་ཀྱིས་འདུལ་བ་ལུང་ལས། དགེ་སློང་རྣམས་ཞེས་འཁོར་རྣམས་ལ་བོས་ནས། ཉི་མ་ནི་ཤར། བྱ་རོག་རྣམས་ནི་སྐད་འབྱིན། ཞིང་པ་རྣམས་ནི་ཞིང་རྨོ། མི་རྒོད་རྣམས་ནི་ངུ་། དེའི་ཕྱིར་བརྩོན་པར་བྱའོ། །དེ་ལྟར་གསུངས་ཤིང་། དེའི་དོན་ཇི་ལྟར་ཡིན་ཞེ་ན། ཉི་མ་ནི་ཤར་ཞེས་པ་ནི། སངས་རྒྱས་འཇིག་རྟེན་དུ་བྱོན་ནས་དེའི་ཆོས་ད་དུང་ནུབ་མེད་པ་དང་། བྱ་རོག་རྣམས་ནི་སྐད་འབྱིན་ཞེས་པ་ནི། བླ་མ་དགེ་བའི་བཤེས་གཉེན་རེ་རེ་གཉིས་རེས་ཆོས་གསུང་བཞིན་ཡོད་པ་དང་། ཞིང་པ་རྣམས་ཀྱིས་ཞིང་རྨོ་ཞེས་པ་ནི། སྦྱིན་བདག་བསོད་ནམས་ཅན་འགའ་རེས་དགེ་བའི་ས་བོན་ཚེ་འདིར་བཏབ་ནས་བདེ་བའི་འབྲས་བུ་ཚེ་ཕྱི་མར་ལེན་རྒྱུའི་ཚོགས་གསོག་པ་དང་། མི་རྒོད་རྣམས་ནི་ངུའོ་ཞེས་པ་ནི། ལོག་པར་ལྟ་བའི་བདུད་རིགས་བྱ་འུག་པ་དང་འདྲ་བ་ཐམས་ཅད་ཀྱཻ་མ་སྡུག་བསྔལ་ལོ་ཞེས་ངུ་བ་ལྟར་བྱེད་པ་ནི་ཆོས་ཉིད་དོ་ཞེས་པ་དང་། དེའི་ཕྱིར་བརྩོན་པར་བྱ་ཞེས་པ་ནི། བློ་གྲོས་དང་ལྡན་པ་ཡོད་ན་སངས་རྒྱས་བསྟན་པའི་ཉི་མ་ཡོད་པའི་ཚེ་འདི་ལ་ཆོས་ལ་བརྩོན་འགྲུས་བྱེད་རན་པ་ཡིན་ནོ་ཞེས་པའོ། །དུས་ཕྱི་མའི་སྐབས་འདིར་སངས་རྒྱས་དངོས་སུ་མཇལ་བའི་སྐལ་བ་དང་མ་ལྡན་རུང་། སངས་རྒྱས་བྱང་སེམས་ཀྱི་སྤྲུལ་བ་བླ་མ་དགེ་བའི་བཤེས་གཉེན་གྱི་མདུན་ནས་ཆོས་ཐོབ་རྒྱུ་དེ་ཡང་སྐལ་བ་བཟང་པོ་སྟེ། སངས་རྒྱས་བཅོམ་ལྡན་འདས་ཀྱིས། མྱ་ངན་མ་བྱེད་ཀུན་དགའ་བོ། །སྨྲེ་སྔགས་མ་འདོན་ཀུན་དགའ་བོ། །ང་ཉིད་ཕྱི་མའི་དུས་ཀྱི་ཚེ། །དགེ་བའི་བཤེས་ཀྱི་གཟུགས་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་གསུངས་པ་ལྟར་ཡིན་ཞིང་། དཀའ་བའི་ཚེགས་མ་དགོས། དཀོན་པའི་རྒྱུ་མ་དགོས་པར་དབང་ཆོས་སྒོ་འགྲིམ་བྱེད་པའི་དུས་ཚོད་ལ། ལྷ་ཁང་ནང་དུ་ཁ་མ་ཞ། །ཚ་ཆུའི་ནང་དུ་ལག་མ་ཞ། །ཞེས་པ་དང་། རྒྱ་མཚོ་ཆུ་ཡིས་མི་ངོམས། །མཁས་པ་ཆོས་ཀྱིས་མི་ངོམས་པའི་དཔེ་བཞིན། ང་ཚོས་འཇིག་རྟེན་ཚེ་འདིའི་རྒྱུ་རྫས། སྡུག་དཀའ་ལས་གཉིས་ཀྱི་གཞི་མ། ཚེ་ཕྱི་མའི་ཡུལ་ལ་ཁུར་མི་ཐུབ་པ་འདི་དག་ཅི་འདྲ་འདྲའི་གསོག་གྲུན་ཞིག་བྱེད་ན། དམ་པའི་ཆོས་ཚེ་འདི་ཕྱི་རང་གཞན་གཉིས་ཕན་དེ་ལ་ངོམས་ཤིང་ཚིམས་ནས་ཆོག་འདུག་བསམ་པ་ཞིག་ཡོད་ག་ལ་རུང་། དཔེར་ན་ས་སྐམ་རྡོ་གྱོང་གི་ཐོག་ལ་ཆར་ཐེངས་རེར་བབ་པས་ནེམ་མི་ཕོག་པ་བཞིན་དུ་རང་རྒྱུད་གྱོང་པོ་འདི་ཆོས་ལན་རེ་ལན་གཉིས་ཐོས་པ་ཙམ་གྱིས་ཐུལ་དཀའ་བ་ཡིན། དེས་ན་ཆོས་མང་པོ་ཉན་དགོས་པ་ཡིན། ཆོས་མང་པོ་ཉན་པས་མ་ཚད་ཆོས་ཐོས་པ་རང་རྒྱུད་ལ་སྦྱར་ནས་ཉམས་སུ་བླངས་ན་ཕན་ཐོགས་རིམ་གྱིས་ཡོད་པ་ནི། ཉམས་སུ་བླངས་ན་བ་གླང་རྫི་ཡང་གྲོལ། །ཉམས་སུ་མ་བླངས་པཎྚི་ཏ་ཡང་འཁྲུལ། །ཞེས་གསུངས་པ་ལྟར་ཡིན་པ་དེས་ན་ཆོས་ཚིག་གཅིག་ཙམ་གོ་ནའང་ཚིག་གཅིག་པོ་དེ་ཉམས་སུ་བླངས་ནས་དུས་རྒྱུན་དུ་འཚོ་བའི་ཐོག་ཏུ་བེད་སྤྱོད་ཐུབ་དགོས་པ་སྟེ། སྤྱོད་དུ་མེད་པའི་ཅ་ལག་འཚོ་བའི་ཐོག་བེད་མི་ཆོད་པ་ཞིག་ཡོད་མ་ཡོད་མེད་པ་དང་འདྲ་མཚུངས་ཡིན། ཆོས་སྒྲུབ་ཅེས་པ་དེའང་ལྷ་ཁང་ནང་དང་དགོན་པའི་ནང་། དུང་འཁོར་མ་ཎི་སྐོར་ས་ནས་མ་གཏོགས་བསྐྱུར་ན་ཆོག་པ་ཞིག་མ་ཡིན་ཏེ། དཔེར་ན། ཞེ་སྡང་མ་བསྐྱེད་བཟོད་པ་སྒོམས་ཞེས་པ་འདི་གཅིག་གིས་ཐད་ན་བསམ་བློ་གཏོང་ན། ཆོས་རའི་ནང་ནས་བཟོད་པ་བསྒོམ་དགོས་པས་མི་ཚད། ཆོས་རའི་ཕྱི་སོ་ལ་བུད་ཚར་དུས་ལྷག་པར་བཟོད་པ་བསྒོམ་དགོས་པ་དང་། ཁྱད་པར་དུ་ཁྱོད་ལ་གཞན་ཞིག་གིས་བརྙས་བཅོས་དང་མཚང་འབྲུ་བྱེད་དུས་བཟོད་པ་བསྒོམ་དགོས་པ་ཡིན། ཁོང་ཁྲོའི་ཡུལ་མེད་ན་བཟོད་པ་གང་ལ་བསྒོམ། ཁྱོད་ཀྱིས་ཕར་ལ་བཟོད་པ་བསྒོམས་ཤིང་བྱང་སེམས་ཟུང་དང་། ཁྱོད་ལ་ཚུར་དགྲ་མེད་པས་མི་ཚད་གཉེན་ཇེ་མང་ལ་འགྲོ་བ་ཡིན། དེ་སོང་ན་ཁྱོད་ཀྱིས་ཐུབ་དགོས་པའི་དགྲ་བོ་མེད་པར་བྱས་ནས། དགྲ་གཉེན་ལ་བསྒྱུར། དུག་སྨན་ལ་བསྒྱུར་བ་ཡིན། དགྲ་ཐབས་ཀྱིས་འདུལ་བ་དཔའ་བོ་མཁས་པའི་ལུགས་ཡིན་པར་གསུངས་ཤིང་། དགྲ་ཞེས་པའི་འགོག་རྐྱེན་བྱེད་མཁན་དེ་མེད་སོང་ན་བྱ་བ་གང་སྒྲུབ་ན་སྟབས་བདེ་བ་དང་། ཁོང་ཁྲོ་ཞེ་སྡང་གིས་རྒྱུད་ཚིག་སྟེ་ནམ་ཡིན་ཡང་སེམས་འཁྲུག་བཞིན་མེད་ཚེ། བསྡད་ན་སེམས་བདེ་བ་དང་། སོང་ན་ལམ་བདེ་བ་ཡིན། ཁོང་ཁྲོ་ཞེ་སྡང་ཆུང་ན་ཁྱིམ་བཟའ་ཚང་ཡང་སྐྱིད་པ་དང་། སྐྱེ་བོ་མི་ནག་པ་མ་དགོས་བླ་མ་སེར་མོ་ཡིན་རུང་ཐུགས་མཐུན་ཁྲིམས་གཙང་འདི་བསྟན་པ་དར་བའི་གཞི་མ་ཡིན་པས་ཆོས་གོ་བ་འདི་རང་རྒྱུད་ལ་སྦྱར་དགོས་པ་ལས་ཐོས་པ་གོ་ཡུལ་ལ་ལུས། གོ་བ་དཔེ་ཐོག་ལ་ལྷག རང་སེམས་ཐ་མལ་དུ་ལུས། དགྲ་ལ་ཐུག་ནས་འུ་ཐུག་དུས་ལག་ཆ་བོར་སོང་བ་འདྲ་ཞིག་ཏུ་འགྲོ་བ་ཡིན། དེས་ན་མདོ་དོན་ཚིག་གི་སྙིང་པོ་ནི། ཆོས་ཞུ་དུས་སྒོ་གསུམ་ཆུན་གཅིག་ལ་དྲིལ་ནས་རྩེ་གཅིག་ལ་ཉན་པ་དང་། སྒྲུབ་པའི་དུས་སུ་ལྟ་བའི་ཏིང་ངེ་འཛིན་ལས་མ་གཡེངས་ན་དངོས་གཞི་དམིགས་མེད་དམ་པ་ཞེས་པ་དེ་ཡིན་ནོ། །དགེ་རྩ་གོང་ནས་གོང་དུ་འཕེལ་བར་བྱེད་པ་རྗེས་བསྔོ་བ་དམ་པ་ནི། དགེ་རྩ་ཆེ་ཆུང་གང་བསྒྲུབས་ཀྱང་བསྔོ་བ་ཡོད་དགོས་ཤིང་། དེ་མ་ཐག་ཏུ་སྔོ་བ་མ་བྱས་ན། ལས་དང་པོ་པའི་དགེ་བ་དེ། རྩྭ་སྐམ་པོ་ཞིག་དང་། ཆུ་ཐིགས་པ་ཞིག་འདྲ་བར་འཇིག་ཅིང་ཟད་སླ་བ་དང་། ཁོང་ཁྲོ་དང་ང་རྒྱལ་ལ་སོགས་མི་དགེ་བའི་ཚོགས་རྣམས་མེ་དང་ཉི་མ་འདྲ་བའི་ཤུགས་ཆེན་པོ་ཡིན་ཕྱིར། རྩྭ་སྐམ་པོ་དེ་མེ་དང་ཐུག་ན་ཚིག་འགྲོ་བ་དང་། ཆུ་ཐིགས་པ་ཞིག་ཉི་ཚན་ལ་བཞག་ན་མྱུར་དུ་སྐམ་ལོས་འགྲོ། དེ་དང་གཅིག་མཚུངས་རེད། ཉོན་མོངས་པ་ཁོང་ཁྲོའི་རྣམ་རྟོག་ལ་མཚོན་ན། ཁོང་ཁྲོ་སྐད་ཅིག་མ་གཅིག་སྐྱེས་ན་དགེ་རྩ་ཆེན་པོ་ཇི་ཙམ་ཡོད་ཀྱང་འཇོམས་འགྲོ་བ་སྟེ། ཇི་སྐད་དུ། བསྐལ་བ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང་། །ཁོང་ཁྲོ་གཅིག་གིས་འཇོམས་པར་བྱེད། །ཅེས་གསུངས་པ་ཡིན། དགེ་རྩ་ཆེ་ཆུང་གང་ཡིན་ཡང་དེ་མ་ཐག་ཏུ་བསྔོ་བ་བྱས་ན། དགེ་རྩ་ཟད་ནས་མེད་འགྲོ་རྒྱུ་དང་། འབྲས་བུ་སྨིན་ནས་རྫོགས་འགྲོ་རྒྱུ་མེད་པ། དཔེར་ན་རྒྱ་མཚོ་ཆེན་པོ་ཞིག་གི་ནང་དུ་ཆུ་ཐིགས་གཅིག་བསྲེས་ན་རྒྱ་མཚོ་ཆེན་པོ་མ་ཟད་ཀྱི་བར་དུ་ཆུ་ཐིགས་ཁེ་རུ་མ་དེ་ཟད་དུ་མེད་པ་ཡིན། དཔེ་དེ་བཞིན་དུ་ཆོས་ཚིག་གཅིག་ཉན་པ་དང་། དགེ་སེམས་སྐད་ཅིག་མ་གཅིག་སྐྱེས་པ་དང་། དགེ་སྡིག་གི་བླང་དོར་སྣ་གཅིག་བྱས་པ་ལ་སོགས་པ། མདོར་ན་དགེ་རྩ་ཆེ་ཆུང་ལ་མ་ལྟོས་པའི་དགེ་བ་ཅི་ཞིག་བསགས་ཚད་འདི་དག རྒྱལ་བ་སྲས་དང་བཅས་པས་ཇི་ལྟར་བསྔོས་པ་བཞིན་དུ་རང་གཞན་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་ཆེད་དུ་བསྔོ་བ་ཡིན་སྙམ་ནས་བསྔོ་ཞིང་། ཕྱོགས་བཅུའི་སངས་རྒྱས་སྲས་བཅས་ཀྱི་མཐུ་ཡིས་དེ་བཞིན་དུ་འགྲུབ་པར་གྱུར་ཅིག ཅེས་བསྔོ་བ་ལ་སྨོན་ལམ་གྱིས་རྒྱས་འདེབས་བྱེད་དགོས་པ་ཡིན། དེ་ཡང་། ཇི་ལྟར་ཆུ་ཐིགས་རྒྱ་མཚོ་ཆེར་ལྷུང་བ། །རྒྱ་མཚོ་མ་ཟད་བར་དུ་དེ་མི་ཟད། །དེ་བཞིན་བྱང་ཆུབ་ཡོངས་བསྔོའི་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་ཟད། །ཞེས་གསུངས་པ་ཡིན། སྤྱིར་ན་དགེ་བའི་རྩ་བ་ཟད་འགྲོ་རྒྱུ་དེ་ལ་རྒྱུ་བཞི་ཡོད་པ་སྟེ། ཇི་སྐད་དུ། དགེ་བའི་རྩ་བ་བསགས་ནས་ནི། །མ་བསྔོས་པ་དང་ལོག་པར་བསྔོས། །གཞན་ལ་བསྒྲགས་དང་འགྱོད་པ་སྐྱེས། །དེ་ནི་ཟད་པའི་རྒྱུ་བཞི་ཡིན། །ཞེས་གསུངས་པ་ལྟར་དུ། དགེ་རྩ་བསྒྲུབས་ནས་མ་བསྔོས་པ་དང་གཅིག བསྔོས་ན་ཡང་ཕྱིན་ཅི་ལོག་ཏུ་བསྔོས་ནས་ཡང་དག་པར་མ་སོང་བ་དང་གཉིས། དགེ་རྩ་ཅུང་ཟད་སྒྲུབ་ཁུལ་བྱས་ཀྱང་གཞན་ལ་ངོམ་ཆོས་བྱས་ཏེ་བསྒྲགས་པ་དང་གསུམ། དགེ་རྩ་མཆོད་སྦྱིན་ལྟ་བུ་ཞིག་བྱས་ཡོད་ཀྱང་རྗེས་ནས་འགྱོད་པ་སྐྱེས་ཏེ། དེ་ནི་འཕྲོ་བརླག་རེད་སོང་འདུག་སྙམ་པ་སྟེ་དེ་བཞི་བོ་ནི་དགེ་རྩ་ཟད་པའི་རྒྱུ་བཞི་ཡིན་པར་གསུངས་ཤིང་། དེ་དག་ལས་མ་བསྔོས་པ་དང་། གཞན་ལ་བསྒྲགས་པ་དང་། འགྱོད་པ་སྐྱེས་པ་རྣམས་གོ་སླ་མོད། བསྔོ་བ་ཡང་དག་པ་མ་ཡིན་པར་བསྔོས་པ་ཟེར་བ་དེ་གང་ཡིན་ཟེར་ན། བསྔོ་བ་ཆུང་ཆུང་ལྷ་དང་མིའི་གོ་འཕང་ཐོབ་པའི་ཆེད་དུ་བསྔོས་ན་བསྔོ་བའི་ཚུལ་མ་ཡིན་པ་སྟེ། དེ་ནི་དཔེར་ན་ལྕང་སྡོང་སྐམ་པོ་ལྟ་བུ་ཞིག་ཡིན་པས་དེ་ཡུན་རིང་ལ་མི་བརྟན་པར་མཐར་དངོས་མེད་དུ་ཟད་འགྲོ་བ་ཡིན་པས། རང་གཞན་གཉིས་ཀྱི་བྱ་བ་དེས་འགྲུབ་ཐབས་མེད་པ་ཡིན། དེས་ན་དེ་འདྲའི་བསྔོ་བ་ཆུང་ཆུང་བྱེད་ན་ཚུལ་མ་ཡིན་པར་བསྔོས་པ་ཡིན། གཞན་ཡང་བསྔོ་བ་འབྲིང་པོ་ཉན་ཐོས་རང་རྒྱལ་གྱི་གོ་འཕང་ཐོབ་ཆེད་དུ་བསྔོས་ན། རང་དོན་ཞི་བདེ་ཙམ་མ་གཏོགས་གཞན་དོན་རྒྱ་ཆུང་བའི་སྟབས་ཀྱིས། དང་པོར་སེམས་བསྐྱེད་ཀྱི་དུས་སུ་སེམས་ཅན་ཐམས་ཅད་ཀྱི་དོན་བསྒྲུབ་པར་ཁས་ལེན་དམ་བཅའ་བྱས་པ་དེ་རྫུན་དུ་འགྲོ་བ་ཡིན་པས། གོང་དུ་བཤད་པ་ལྟར་དུ་ངས་དགེ་རྩ་ཞིག་བསགས་ཡོད་པ་འདི་དག ཕྱོགས་བཅུ་དུས་གསུམ་གྱི་སངས་རྒྱས་སྲས་བཅས་དང་། སེམས་ཅན་ཐམས་ཅད་ཀྱིས་བསགས་པའི་ཟག་བཅས་ཟག་མེད་ཀྱི་དགེ་རྩ་ཡོད་ཚད་ཕྱོགས་གཅིག་ལ་བསྡོམས་ནས། རྒྱལ་བ་སྲས་བཅས་ཀྱིས་ཇི་ལྟར་བསྔོས་པ་བཞིན་དུ་འགྲོ་ཀུན་བྱང་ཆུབ་སྙིང་པོ་ཐོབ་པའི་ཆེད་དུ་བསྔོ་བ་ཡིན། སེམས་ཅན་ཐམས་ཅད་སངས་རྒྱས་ཐོབ་པའི་རྒྱུ་རུ་འགྲོ་བར་ཤོག སེམས་ཅན་ཐམས་ཅད་སངས་རྒྱས་མ་ཐོབ་ཀྱི་བར་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་མགོན་པོ་འོད་དཔག་མེད་པའི་ཞབས་དྲུང་དུ་སྐྱེ་བར་ཤོག་ཅེས་བསྔོ་བ་དང་སྨོན་ལམ་ཟུང་དུ་སྦྲེལ་དགོས་པ་ཡིན། མདོ་དོན་ཚུར་ལ་བསྡུས་ན། དང་པོར་ཆོས་ཞུ་བའི་དུས་སུ་སེམས་ཅན་གྱི་དོན་དུ་ངས་ཆོས་ཞུ་བ་ཡིན་སྙམ་པ་དང་། བར་དུ་ཆོས་ཉན་པའི་གནས་སྐབས་སུ་མི་ཡེངས་བའི་སེམས་ཀྱིས་ཉན་པ་དང་། ཐ་མར་ཆོས་ཉན་པའི་དགེ་བའི་རྩ་བ་དེ་སེམས་ཅན་ཐམས་ཅད་སངས་རྒྱས་ཐོབ་པའི་ཆེད་དུ་བསྔོ་བ་ཡིན་སྙམ་ན་དེ་དག་ནི་རིམ་པ་ལྟར་དུ་དམ་པ་གསུམ་སྟེ། སྦྱོར་དངོས་རྗེས་གསུམ་ཚང་པ་ཡིན། གལ་ཏེ་དེ་གསུམ་པོས་མ་ཟིན་དུས། དགེ་བ་ཆེ་ཆུང་ཅི་ཞིག་བསྒྲུབས་ཀྱང་ཐེག་ཆེན་གྱི་ལམ་དུ་མི་འགྲོ་ཞིང་སངས་རྒྱས་ཐོབ་པའི་དངོས་རྒྱུ་ཡང་མ་ཡིན་ལ། ཀུན་སློང་བྱང་ཆུབ་སེམས་ཀྱིས་ཟིན་པ་དེ་བདེ་བ་ཅན་ལ་སྐྱེ་བའི་རྒྱུ་གསུམ་པ་ཡང་ཡིན་ནོ། །དེ་དག་གིས་ཐེག་ཆེན་ལམ་གྱི་རྩ་བ་མེད་ཐབས་མེད་པའི་དམ་པ་གསུམ་བཤད་ཟིན་ཅིང་། དམ་པ་གསུམ་པོ་དེ་ཡིད་ལ་བཞག་ནས་དུས་རྒྱུན་དགེ་རྩ་ཆེ་ཆུང་གང་སྒྲུབ་ན་དེ་དང་མི་འབྲལ་བར་གནད་ཆེ་བ་ཡིན། ད་ནི་གང་ཞིག་འཆད་ཉན་བྱ་བའི་ཆོས་ཀྱི་རིམ་པ་དངོས། རྣམ་དག་བདེ་ཆེན་ཞིང་གི་སྨོན་ལམ་རཱ་ག་ཨ་སྱས་མཛད་པ་དེ་ཉིད་འཆད་པའི་སྐབས་སུ་བབ་པ་སྟེ། འདི་ཉིད་ལ་ས་བཅད་རྣམ་པ་གསུམ་གྱི་ཐོག་ནས་བཤད་པ་ལ། ས་བཅད་དང་པོ་བདེ་བ་ཅན་དུ་སྐྱེ་བའི་རྒྱུ་བཞི་ལ་སྨོན་པ། ས་བཅད་གཉིས་པ་མཚན་བཟུང་བའི་བྱིན་རླབས་ཚེ་འདིར་འབྱུང་བར་གསོལ་བ་འདེབས་པ། ས་བཅད་གསུམ་པ་སྨོན་ལམ་འགྲུབ་པའི་རྒྱུ་བདེན་ཚིག་གཟུངས་སྔགས་དང་བཅས་པ་བརྗོད་པ་སྟེ་གསུམ་ལས། དང་པོ་བདེ་བ་ཅན་དུ་སྐྱེ་བའི་རྒྱུ་བཞི་དེ་ལ་ཡང་། རྟེན་ཚོགས་ཞིང་གསལ་འདེབས་པ་དང་གཅིག རྒྱུ་ཚོགས་བསགས་སྒྲིབ་པ་སྦྱང་བ་དང་གཉིས། གྲོགས་བྱང་ཆུབ་མཆོག་ཏུ་སེམས་བསྐྱེད་པ་དང་གསུམ། རྐྱེན་སྨོན་ལམ་དག་པས་མཚམས་སྦྱར་བ་དང་བཞི་རུ་ཡོད་པ་ཡིན། དེ་བཞི་བློར་འཛིན་བདེ་བའི་ཆེད་དུ་འུ་ཚོས་སྡོམ་ཚིག་ཏུ་བྱས་པ་ནི། རྟེན་རྒྱུ་གྲོགས་རྐྱེན་བཞི་ལས། དང་པོ་རྟེན་ཚོགས་ཞིང་གསལ་འདེབས་པ་ཁར་རྩང་བཤད་ཟིན་པ་སྟེ། ཀུན་ཀྱང་གསེར་མདོག་མཚན་དང་དཔེ་བྱད་བརྒྱན། །ཆོས་གོས་རྣམ་གསུམ་གསོལ་ཞིང་སེར་ལྟེམ་མེ། །ཞེས་པ་ཡན་ཆད་ཀྱིས་བསྟན་པ་དང་། དེ་རིང་འཆད་རྒྱུའི་བདེ་བ་ཅན་ལ་སྐྱེ་བའི་རྒྱུ་གཉིས་པ་ཚོགས་བསགས་སྒྲིབ་སྦྱོང་འདི་ཉིད་ནི། རྒྱུ་གསུམ་པ་སྨོན་འཇུག་གི་སེམས་བསྐྱེད་རྒྱུད་ལ་སྐྱེ་མི་སྐྱེ་དང་། རྒྱུ་བཞི་བ་སྨོན་ལམ་ཁྱད་པར་ཅན་འགྲུབ་དང་མི་འགྲུབ་ནི་རྒྱུ་བསོད་ནམས་བསགས་པ་སྔོན་སོང་ཡོད་མེད་ལ་ཐུག་ཡོད་པ་སྟེ། སངས་རྒྱས་བཅོམ་ལྡན་འདས་ཀྱིས་མདོ་རྒྱ་ཆེར་རོལ་བ་ལས། བསོད་ནམས་ལྡན་པའི་མི་ཡིས་བསམ་པ་ཐམས་ཅད་འགྲུབ་ཅེས་གསུངས་པ་དང་། གཞན་ལས་ཀྱང་། བསོད་ནམས་ཤུགས་ཀྱིས་དོན་འགྲུབ་པ། །ཉི་མའི་འོད་བཞིན་ལྟོས་པ་མེད། །འབད་པའི་ཤུགས་ཀྱིས་དོན་འགྲུབ་པ། །མར་མེའི་འོད་བཞིན་ཀུན་ལ་ལྟོས། །ཞེས་བསོད་ནམས་བསགས་པ་སྔོན་སོང་ཅན་གྱིས་བསམ་པ་འགྲུབ་པ་དེ་ཉི་མ་ཤར་བ་ལྟ་བུ་སྟེ། ཉི་མ་རྒྱལ་ཁམས་ལ་ཤར་ན། དེ་ལ་མི་ཤར་བའི་ཐབས་ཀྱི་འགོག་རྐྱེན་ཅི་ཞིག་བྱས་ཀྱང་འགོག་ཐབས་མེད་པ་ལྟ་བུ་དང་། བསོད་ནམས་མེད་པར་འབད་བརྩོན་རྐྱང་པས་དོན་ཞིག་ཨེ་འགྲུབ་བལྟ་བ་ནི་མར་མེའི་འོད་དང་འདྲ་བ་སྟེ། མར་མེ་ནི་རླུང་ཆུང་ཆུང་ཞིག་གིས་གསོད་འགྲོ་བ་བཞིན་དུ་བར་ཆད་ཆེ་བས་འགྲུབ་དཀའ་བ་ཡིན། དེས་ན་ཚོགས་གསོག་པ་ནི་ཤིན་ཏུ་གལ་ཆེ་ཞིང་། ཚོགས་བསགས་བྱེད་ཚུལ་ལ་རྣམ་གྲངས་མང་པོ་ཡོད་དེ་ཐམས་ཅད་ཀྱི་སྒོ་ཚུར་ལ་བསྡུ་ན་ཡན་ལག་བདུན་གྱི་ནང་དུ་མ་འདུས་པ་མེད་པས་འདིར་ཡན་ལག་བདུན་དང་སྦྲེལ་ནས་གསུངས་པ་ཡིན། འོ་ན་ཡན་ལག་བདུན་དེ་གང་ཡིན་ཞེ་ན། ཕྱག་འཚལ་བའི་ཡན་ལག་དང་གཅིག མཆོད་པའི་ཡན་ལག་དང་གཉིས། བཤགས་པའི་ཡན་ལག་དང་གསུམ། རྗེས་སུ་ཡི་རང་བའི་ཡན་ལག་དང་བཞི། ཆོས་འཁོར་བསྐོར་བར་སྐུལ་བའི་ཡན་ལག་དང་ལྔ། མྱ་ངན་ལས་མི་འདའ་བར་བཞུགས་པར་གསོལ་བ་འདེབས་པའི་ཡན་ལག་དང་དྲུག བསྔོ་བའི་ཡན་ལག་དང་བཅས་བདུན་ལས། དང་པོ་ཕྱག་འཚལ་བའི་ཡན་ལག་ནི། གཙོ་ཆེར་ང་རྒྱལ་གྱི་གཉེན་པོར་གསུངས་པ་སྟེ། ང་རྒྱལ་ལྕགས་ཀྱི་གོང་བུ་ལ་ཡོན་ཏན་གྱི་ཆུ་མི་ཆགས་གསུངས་པས། ང་རྒྱལ་ཅན་བདེ་བ་ཅན་ལ་སྐྱེ་མི་ཐུབ་པས་མ་ཚད་ངན་འགྲོའི་གནས་ལ་ང་རྒྱལ་གྱིས་ཁྲིད་འགྲོ་བ་དེས་ན་ང་རྒྱལ་བཅོམ་པའི་ཕྱིར་དུ་ཕྱག་འཚལ་བ་དེ་ལ། མདོར་བསྟན་པ་དང་། རྒྱས་པར་བཤད་པ་གཉིས་ལས། དང་པོ་མདོར་བསྟན་པ་ནི། ཕྱག་འཚལ་བ་མདོར་བསྟན་པ། མོས་གུས་ཕྱག་ལ་ཉེ་རིང་ཁྱད་མེད་ཕྱིར།། བདག་གིས་སྒོ་གསུམ་གུས་པས་ཕྱག་འཚལ་ལོ།། ཞེས་གསུངས་ཏེ། རང་ཉིད་ལ་མོས་གུས་ཡོད་ན་ཕྱག་འཚལ་བའི་ཡུལ་དེ་ཐག་ཉེ་ས་ལ་ཡོད་པ་དང་རིང་ས་ལ་ཡོད་པའི་ཁྱད་པར་མེད་པས་སངས་རྒྱས་ཤིག་ཐག་ཉེ་ས་མདུན་ངོ་མ་འདི་ན་བཞུགས་ཡོད་པ་དེ་ལ་ཕྱག་འཚལ་བ་དང་། ཐག་རིང་ས་གྲངས་མེད་འཇིག་རྟེན་མང་པོའི་ཕ་རོལ་ན་བཞུགས་པའི་སངས་རྒྱས་གཟུགས་ཀྱི་སྐུ་མགོན་པོ་འོད་དཔག་མེད་ལ་ཕྱག་འཚལ་བ་གཉིས་ཕན་ཡོན་ཡོད་མེད་དང་། ཐུགས་རྗེ་ཉེ་རིང་དང་། བྱིན་རླབས་འཇུག་མི་འཇུག་ལ་ཁྱད་པར་སྤུའི་རྩེ་མོ་ཙམ་ཡང་མེད་པ་སྟེ། དད་པ་ཡོད་ན་སངས་རྒྱས་ཐག་རིང་ན་ཡོད་ཀྱང་ཐུགས་རྗེ་ཐག་ཉེར་བཞུགས་པ་དང་འདྲ་འདྲ་ཡིན་པ་དང་། དད་པ་མེད་ན་སངས་རྒྱས་མདུན་ངོ་མ་འདིར་བཞུགས་ཡོད་ཀྱང་ཐུགས་རྗེ་ཐག་རིང་ལ་ཡོད་པ་བཞིན་དུ་འགྱངས་ནས་ཡོད་པ་ནི། དཔེར་ན། ཆུ་དྭངས་མོ་ཞིག་དང་། མེ་ལོང་དྭངས་མོ་ཞིག་གི་ངོས་ལ་ཐག་རིང་གི་ཉི་ཟླ་སྐར་གསུམ་ལ་སོགས་པ་ཐག་རིང་ན་ཡང་ཐག་ཉེ་ལ་ཡོད་པ་བཞིན་དུ་འཆར་ཐུབ་པ་དང་། ཆུ་དང་མེ་ལོང་གཉིས་ཀ་མི་གསལ་མི་དྭངས་བ་ཞིག་གི་ནང་དུ་ཐག་རིང་མ་དགོས་ཐག་ཉེ་ཞིག་ཀྱང་འཆར་མི་ཐུབ་པ་ལྟ་བུ་ཡིན་པར་གསུངས་ཤིང་། མདོ་སྡེ་ཏིང་འཛིན་རྒྱལ་པོ་ལས་ཀྱང་། གང་ཞིག་ཐུབ་པའི་དབང་པོ་དྲན་བྱེད་པ། །དེ་ཡི་མདུན་ན་རྟག་ཏུ་ཐུབ་པ་བཞུགས། །ཞེས་གསུངས་པ་ཡིན། དེའི་ཕྱིར་ན་བདག་གིས་མགོན་པོ་འོད་དཔག་མེད་གཙོ་འཁོར་ལ་སོགས་པ་ཕྱོགས་བཅུའི་རྒྱལ་བ་སྲས་བཅས་ལ་སྒོ་ལུས་ངག་ཡིད་གསུམ་གྱི་མ་གུས་པའི་སྤྱོད་ལམ་ཐམས་ཅད་སྤངས་ནས་གུས་པ་ཆེན་པོས་ཕྱག་འཚལ་ལོ་ཞེས་པ་སྟེ། ལུས་ངག་ཡིད་གསུམ་ནི་དགེ་མི་དགེ་ཐམས་ཅད་འབྱུང་བའི་སྒོ་ཡིན་པས་ན་སྒོ་གསུམ་ཞེས་པ་དང་། གུས་པས་ཕྱག་ཇི་ལྟར་འཚལ་དགོས་སྙམ་ན། ཕྱག་འདི་ལ་རྒྱ་གར་གྱི་ལུགས་ལྟར་ན་རྐང་པ་ལ་མགོ་བོས་གཏུག་པའི་ཕྱག་དང་། ལུས་ཀྱི་མ་ལྔ་ས་ལ་གཏུག་པའི་ཕྱག་འདི་གཉིས་སུ་ཡོད་པར་གྲགས་ཤིང་། བོད་ལ་དར་བ་ནི། སྒུར་ཕྱག་དང་། བརྐྱངས་ཕྱག་གཉིས་ཡོད་པ་ལས། བརྐྱངས་ཕྱག་དེ་སྔགས་ལུགས་ཀྱི་ཕྱག་སྟེ། དད་པས་བརྐྱངས་ཕྱག་བརྡབས་ཏེ་བཙལ། །ཞེས་པ་དེ་ཡིན། སྒུར་ཕྱག་འདི་ལ་ཡང་མ་ལྔ་སར་ཕབ་པའི་གུས་ཚུལ་ཚང་བ་སྟེ། ལག་པའི་ཐལ་མོ་གཉིས། རྐང་པའི་པུས་མོ་གཉིས། དཔྲལ་བ་དང་བཅས་པའི་ལྔ་བོ་ས་ལ་གཏུག་ནས་གུས་པས་ཕྱག་བྱས་པ་ཡིན། ཕྱག་འཚལ་དུས་སུ་ཧ་ཅང་དགྱེ་མི་ཆེ། ཧ་ཅང་སྒུར་མི་ཆེ། གཡས་ལྟ་གཡོན་ལྟ་ལ་སོགས་མི་བྱེད་པར་དྲང་ཞིང་ཞི་དུལ་ལྡན་པ་ནི་ལུས་གུས་པ་དང་། ངག་འཁྱལ་ལ་སོགས་པ་སྤངས་ནས་བསྟོད་པ་དང་ཕྱག་འཚལ་གྱི་ཚིག་སྦྲགས་པ་ནི་ངག་གུས་པ་དང་། ཡིད་ཀྱིས་མི་དགེ་བའི་རྣམ་རྟོག་སྤངས་ནས་སངས་རྒྱས་ཀྱི་ཡོན་ཏན་ལ་དྭངས་ཤིང་དད་པ་བྱེད་པ་ནི་ཡིད་གུས་པ་ཡིན་ལ། གལ་ཏེ་མ་གུས་པའི་སྤྱོད་ལམ་བསྲེས་ཏེ་ཕྱག་འཚལ་ན་རང་ཉིད་ཀྱི་བསོད་ནམས་ཟད་པའི་རྒྱུ་རུ་འགྲོ་བ་ཡིན། སྤྱིར་ན་ཆོས་བརྒྱུད་སོ་སོར་ཕྱག་འཚལ་ལུགས་ཀྱི་ཁྱད་པར་ཅུང་ཟད་ཡོད་པ་ཡིན། ང་ཚོའི་ཆོས་བརྒྱུད་འདིའི་ཕྱག་འཚལ་ལུགས་ནི། དང་པོ་ཕྱག་འཚལ་བའི་ས་ནས་ལུས་དྲང་པོར་ལངས་ཏེ་རྟེན་ཡོད་ན་མིག་གིས་མཇལ་བ་དང་མེད་ན་ཡིད་ཀྱིས་བསྒོམས་ནས། རང་གི་མདུན་གྱི་ནམ་མཁའ་ལ་ངོ་བོ་རྩ་བའི་བླ་མ་ལ་རྣམ་པ་མགོན་པོ་འོད་དཔག་མེད་གཙོ་འཁོར་བཞུགས་པ་ལ་ཕྱོགས་བཅུ་དུས་གསུམ་གྱི་སྐྱབས་གནས་ཐམས་ཅད་ཀྱིས་བསྐོར་ནས་ཡོད་པའི་མདུན་དེར། རིགས་དྲུག་སེམས་ཅན་ཐམས་ཅད་འཚོགས་ནས་ཕྱག་འཚལ་བ་དང་གསོལ་བ་འདེབས་བཞིན་ཡོད་པའི་མོས་པ་དང་མ་བྲལ་བའི་སྒོ་ནས་སྙིང་ཁར་ཐལ་མོ་སྦྱར་བཞིན་ཕྱག་འཚལ་ཡུལ་དཀོན་མཆོག་གི་ཡོན་ཏན་དེ་དང་པོར་དྲན་དགོས་པ་ཡིན། ཐལ་མོ་དེ་ཡང་། ཀུན་མཁྱེན་འཇིགས་གླིང་གིས། མེ་ཏོག་དོག་པས་རབ་བཟུང་སྙིམ་པའི་སྣོད། །ག་བུ་ཆུང་གི་བརྟུལ་ཞུགས་འཛིན་པ་ཡིན། །ཞེས་གསུངས་པ་ལྟར་དུ། ཐལ་མོ་ཁོག་སྟོང་ཁ་བྱེ་བ་ལ་ཕྱོགས་པའི་མེ་ཏོག་ལྟ་བུ་ཞིག་སྦྱར་དགོས་ཤིང་། དེ་ནས་ཐལ་མོ་སྤྱི་བོར་སྦྱར་དུས་རྒྱལ་བ་སྲས་བཅས་ཀྱི་སྐུ་ལ་ཕྱག་འཚལ་བས། བདག་དང་སེམས་ཅན་ཐམས་ཅད་ཀྱི་ལུས་ཀྱི་སྡིག་སྒྲིབ་དག་ཅིང་། སྐུའི་བྱིན་རླབས་ཞུགས་པར་བསམ། དེ་ནས་ཐལ་མོ་མགྲིན་པར་སྦྱར་ཏེ་རྒྱལ་བ་སྲས་དང་བཅས་པའི་གསུང་ལ་ཕྱག་འཚལ་བས། ངག་གི་སྡིག་སྒྲིབ་དག་ཅིང་། གསུང་གི་བྱིན་རླབས་ཐོབ་པར་བསམ། དེ་ནས་ཐལ་མོ་སྙིང་གར་སྦྱར་ཏེ་རྒྱལ་བ་སྲས་བཅས་ཀྱི་ཐུགས་ལ་ཕྱག་འཚལ་བས། ཡིད་ཀྱི་སྡིག་སྒྲིབ་དག་ཅིང་། ཐུགས་ཀྱི་བྱིན་རླབས་ཐོབ་པར་བསམ། ལུས་ཀྱི་མ་ལྔ་ས་ལ་ཕབ་དུས་མགོན་པོ་འོད་དཔག་མེད་པ་ལ་སོགས་པ་རྒྱལ་བ་སྲས་དང་བཅས་པའི་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལ་ཕྱག་འཚལ་བས། ཉོན་མོངས་པ་དུག་ལྔ་དང་སྒོ་གསུམ་ཆ་མཉམ་གྱི་སྒྲིབ་པ་དག་ཅིང་། མཐར་ཐུག་སྐུ་ལྔ་ཡེ་ཤེས་ལྔ་ཐོབ་པར་ཤོག་ཅིག་སྙམ་ནས། རང་གི་ལུས་ཀྱིས་ནོན་པའི་ས་གཞིའི་རྡུལ་གྲངས་དང་མཉམ་པ་དེ་སྙེད་ཅིག་སྤྲུལ་ནས་སེམས་ཅན་ཐམས་ཅད་དང་ལྷན་ཅིག་ཏུ་ཕྱག་འཚལ་བཞིན་ཡོད་པར་བསྒོམ་པར་བྱ་དགོས་སོ། །དེས་ཕྱག་འཚལ་བའི་ཡན་ལག་མདོར་བསྟན་ནས། གཉིས་པ་རྒྱས་པར་བཤད་པ་འདི་ལ། སྐུ་རྫུ་འཕྲུལ་གྱི་ཡོན་ཏན་དྲན་ནས་ཕྱག་འཚལ་བ་དང་། ཐུགས་མཁྱེན་བརྩེའི་ཡོན་ཏན་དྲན་ནས་ཕྱག་འཚལ་བ་དང་། སྟོབས་དང་ནུས་པའི་ཡོན་ཏན་དྲན་ནས་ཕྱག་འཚལ་བ་དང་། སེམས་ཅན་གྱི་ཚེ་བསྲིངས་སྲུང་སྐྱོབ་ཀྱི་ཡོན་ཏན་དྲན་ནས་ཕྱག་འཚལ་བ་དང་། ཕྱག་འཚལ་བའི་ཕན་ཡོན་ལ་བསམས་ཏེ་ཕྱག་འཚལ་བ་དང་། དད་པའི་ཕན་ཡོན་དྲན་ནས་ཕྱག་འཚལ་བ་དང་། མཚན་ཐོས་པའི་ཕན་ཡོན་ལ་བསམས་ནས་ཕྱག་འཚལ་བ་སྟེ་ནང་གསེས་དབྱེ་བ་བདུན་ལས། དང་པོ་སྐུ་རྫུ་འཕྲུལ་གྱི་ཡོན་ཏན་དྲན་ནས་ཕྱག་འཚལ་བ་ནི། དང་པོ་སྐུ་རྫུ་འཕྲུལ་གྱི་ཡོན་ཏན་དྲན་ནས་ཕྱག་འཚལ་བ། ཆོས་སྐུ་སྣང་བ་མཐའ་ཡས་རིགས་ཀྱི་བདག། ཕྱག་གཡས་འོད་ཟེར་ལས་སྤྲུལ་སྤྱན་རས་གཟིགས།། ཡང་སྤྲུལ་སྤྱན་རས་གཟིགས་དབང་བྱེ་བ་བརྒྱ།། ཕྱག་གཡོན་འོད་ཟེར་ལས་སྤྲུལ་སྒྲོལ་མ་སྟེ།། ཡང་སྤྲུལ་སྒྲོལ་མ་བྱེ་བ་ཕྲག་བརྒྱ་འགྱེད།། ཐུགས་ཀྱི་འོད་ཟེར་ལས་སྤྲུལ་བདྨ་འབྱུང་།། ཡང་སྤྲུལ་ཨོ་རྒྱན་བྱེ་བ་ཕྲག་བརྒྱ་འགྱེད།། ཆོས་སྐུ་འོད་དཔག་མེད་ལ་ཕྱག་འཚལ་ལོ།། ཞེས་གསུངས་ཏེ། སྐུ་རྫུ་འཕྲུལ་གྱི་ཡོན་ཏན་སྤྲུལ་བ་དང་ཡང་སྤྲུལ་བསམ་གྱིས་མི་ཁྱབ་པ་འགྱེད་ནས་འགྲོ་དོན་མཛད་པའི་ཚུལ་ནི། རྒྱལ་བའི་སྐུ་གཉིས་ཀྱི་དབྱེ་བ་ཕྱེ་དུས་ཆོས་སྐུའི་སྣང་ཆ་དེ་གཟུགས་སྐུ་དང་། གཟུགས་སྐུའི་ངོ་བོའམ་འཆར་གཞི་དེ་ཆོས་སྐུ་ཡིན་པས། ཆོས་སྐུ་འོད་དཔག་མེད་ཀྱི་ཐུགས་ཆོས་དབྱིངས་ཁྱབ་བརྡལ་ཆེན་པོ་རྒྱལ་བ་ཀུན་དང་དབྱེར་མེད་པ་ཆོས་སྐུའི་ངོ་བོར་རྟག་ཏུ་བཞུགས་ཀྱང་གདུལ་བྱའི་སྣང་ངོར་གཟུགས་སྐུར་ཤར་བ་ནི། སྤྱིར་ན་རིགས་ཀུན་དང་ཁྱད་པར་དུ་ནུབ་སྣང་བ་མཐའ་ཡས་པདྨའི་རིགས་ཀྱི་བདག་པོར་གྱུར་པའི་ཆོས་སྐུ་འོད་དཔག་མེད་པ་དེ་ཡི། ཕྱག་གཡས་པ་ནས་འོད་ཟེར་དཀར་པོ་སྤྲོས་ནས་སྐྱེས་པ་ཕོ་རྒྱུད་ཐམས་ཅད་འདུལ་བའི་ཕྱིར་དུ་འཕགས་པ་སྤྱན་རས་གཟིགས་དབང་ཕྱུག་ཏུ་སྤྲུལ་བ་དང་། སྤྱན་རས་གཟིགས་དེས་ཀྱང་ཡང་སྤྲུལ་སྤྱན་རས་གཟིགས་དབང་བྱེ་བ་ཕྲག་བརྒྱ་འགྱེད་པ་སྟེ། བྱེ་བ་ཕྲག་བརྒྱ་ཞེས་པ་ནི་སྤྲུལ་སྐུ་སྟོན་པ་རེ་རེའི་གདུལ་ཞིང་ལ་སྤྲུལ་སྐུའི་ཞིང་ཁམས་བྱེ་བ་ཕྲག་བརྒྱ་ཡོད་པ་དེ་འདུལ་བྱེད་བྱེ་བ་ཕྲག་བརྒྱ་ཡོད་པ་དེ་དང་སྒོ་བསྟུན་ནས་གཙོ་བོའི་ཆ་ནས་གསུངས་པ་ཙམ་ལས། སྤྱིར་ན་དགེ་བའི་བཤེས་གཉེན་དང་ཆོས་ཀྱི་རྒྱལ་པོ་དང་ཐ་ན་དུད་འགྲོ་ཡན་ཆད་ཀྱི་ཚུལ་གྱིས་སེམས་ཅན་གྱི་འགྲོ་དོན་གང་ལ་གང་འདུལ་གྱི་མཛད་པའི་སྤྲུལ་བ་ཚད་བཟུང་རིས་ཀྱིས་གཅོད་དུ་ཤེས་སུ་མེད་ཅིང་། གདུལ་བྱའི་ཞིང་ཁམས་ཡང་དེ་བཞིན་དུ་ཆོས་ཀྱི་དབྱིངས་དང་ནམ་མཁའི་མཐའ་དང་མཉམ་པ་ཚད་བཟུང་རིས་ཀྱིས་གཞལ་དུ་མེད་པ་ཡིན་ནོ། །དེ་བཞིན་དུ་འོད་དཔག་མེད་ཀྱིས་ཕྱག་གཡོན་པ་ནས་འོད་ཟེར་ལྗང་ཁུ་ཞིག་སྤྲོས་ནས་སྤྲུལ་བ་ནི། ཟ་མ་མོ་རྒྱུད་ཐམས་ཅད་འདུལ་བའི་ཕྱིར་རྗེ་བཙུན་སྒྲོལ་མ་བྱེ་བ་ཕྲག་བརྒྱ་འགྱེད་པ་དང་། རྗེ་བཙུན་སྒྲོལ་མ་དེས་ཀྱང་ཡང་སྤྲུལ་སྒྲོལ་མ་བྱེ་བ་ཕྲག་བརྒྱའམ་སྤྲུལ་བ་བསམ་གྱིས་མི་ཁྱབ་པ་འགྱེད་པ་དང་། དེ་བཞིན་དུ་སངས་རྒྱས་འོད་དཔག་མེད་ཀྱི་ཐུགས་ཀ་ནས་ཧྲཱི༔ཡིག་དམར་པོ་འོད་ཟེར་ཁ་དོག་ལྔ་ལྡན་ཞིག་ལྷོ་ནུབ་འོ་མ་ཅན་གྱི་རྒྱ་མཚོ་ལ་འཕྲོས་ཏེ། ཞི་བས་མི་ཐུལ་བར་དྲག་པོས་འདུལ་དགོས་པའི་ལྷ་འདྲེ་གདུག་པ་ཅན་རྣམས་འདུལ་བའི་ཆེད་དང་། བོད་གངས་ཅན་གྱི་ལྗོངས་འདིར་མདོ་སྔགས་ཟུང་འབྲེལ་གྱི་བསྟན་པ་སྤེལ་བའི་ཆེད་དུ་གུ་རུ་པདྨ་འབྱུང་གནས་སུ་སྤྲུལ་ནས་དྲི་མེད་མདངས་ལྡན་ལྷོ་ནུབ་འོ་མ་ཅན་གྱི་རྒྱ་མཚོའི་མེ་ཏོག་པདྨའི་སྡོང་པོའི་རྩེ་ནས་འཁྲུངས་པ་དང་། དེས་ཀྱང་ཡང་སྤྲུལ་ཨོ་རྒྱན་པད་འབྱུང་བྱེ་བ་ཕྲག་བརྒྱ་དང་ཁྱད་པར་དུས་སྙིགས་མའི་སྐབས་སུ་གང་ལ་གང་འདུལ་གྱིས་སྤྲུལ་བ་སྣ་ཚོགས་བསམ་གྱིས་མི་ཁྱབ་པ་བསྟན་པ་ཡིན་ནོ། །དེས་ན་སྤྱན་རས་གཟིགས་དང་གཅིག རྗེ་བཙུན་སྒྲོལ་མ་དང་གཉིས། གུ་རུ་པད་འབྱུང་སྟེ་ལྷ་གསུམ་པོ་འདི་དུས་སྙིགས་མ་ལྔ་བདོ་བའི་གནས་སྐབས་ན། ཐུགས་རྗེ་དང་ཕྲིན་ལས་ལྷག་པར་མྱུར་བ་ནི་སྔོན་གྱི་ཐུགས་བསྐྱེད་དང་དམ་བཅའི་དབང་གིས་ཡིན་པས། བསམ་པ་འགྲུབ་དགོས་པའི་དུས་སུ་གུ་རུ་རིན་པོ་ཆེར་གསོལ་བ་བཏབ་ན་བསམ་པ་ཐམས་ཅད་འགྲུབ་པ་དང་། བར་ཆད་སེལ་དགོས་པའི་དུས་སུ་རྗེ་བཙུན་སྒྲོལ་མར་གསོལ་བ་ཐོབ་དང་བར་ཆད་སེལ་བ་ཡིན། རང་གཞན་ཐམས་ཅད་ངན་སོང་གི་གནས་ལས་གྲོལ་བར་འདོད་ན་ཐུགས་རྗེ་ཆེན་པོའི་གཟུངས་སྔགས་བཟླས་ཏེ་ཐུགས་རྗེ་ཆེན་པོར་གསོལ་བ་བཏབ་ན་ངན་སོང་གི་གནས་ལས་སྒྲོལ་ཐུབ་པ་ཡིན། མ་ཚད་ལྷ་རེ་རེ་ལ་ཡང་དེ་དག་གི་ནུས་པ་ཆ་ཚང་ལྡན་པ་ཡིན་ནོ། །གང་འདུལ་དེར་སྟོན་གྱི་སྤྲུལ་བ་དེ་ཆུ་སྣོད་ཟླ་གཟུགས་ཀྱི་དཔེས་མཚོན་པ་ཡིན་པས། དེ་ཐམས་ཅད་ཀྱི་སྤྲུལ་གཞི་ནམ་མཁའི་ཟླ་བ་ལྟ་བུ་ཆོས་དབྱིངས་ཀུན་ལ་ཁྱབ་པ་ཕྱོགས་དུས་མུ་མཐའ་མེད་པའི་བདག་ཉིད་ཆོས་སྐུ་འོད་དཔག་མེད་ལ་སྒོ་གསུམ་གུས་པ་ཆེན་པོས་ཕྱག་འཚལ་ལོ་ཞེས་པའོ། །དེ་ཡང་། རྒྱལ་བ་གཅིག་བསྒྲུབས་ཐམས་ཅད་མ་བསྒྲུབས་འགྲུབ། །ཅེས་གསུངས་པ་ལྟར་དུ། བླ་མ་ཡི་དམ་སངས་རྒྱས་བྱང་སེམས་ཐམས་ཅད་མགོན་པོ་འོད་དཔག་མེད་དང་འདྲེས་ཡོད་བསམས་ནས། འོད་དཔག་མེད་ལ་ཕྱག་འཚལ་མཆོད་པ་ཕུལ་ན་བླ་མ་དང་དཀོན་མཆོག་གསུམ་གྱི་ཡོན་ཏན་དང་བྱིན་རླབས་ཐམས་ཅད་རང་གིས་ཐོབ་པའི་ཐབས་ཁྱད་པར་ཅན་ཡིན་པ་སྟེ། དཔེར་ན། ལུང་པ་བརྒྱ་ཐམ་པའི་ཆུ་དེ་ལུང་པ་རེ་རེར་བཞིན་སོང་ནས་འཐུང་དགོས་ན་དཀའ་ཚེགས་ཆེ་ཡང་། ཆུ་ཐམས་ཅད་མཉམ་པོར་འདུས་པའི་ས་མདོ་ནས་འཐུང་ན་ལུང་པ་བརྒྱ་ཐམ་པའི་ཆུ་འཐུང་དང་འདྲ་བ་ལྟ་བུ་ཡིན་པས། རྒྱལ་བ་གཅིག་བསྒྲུབས་ཐམས་ཅད་ཀྱི་བྱིན་རླབས་འབྱུང་བ་ཡིན་ནོ། །དེས་སྐུ་རྫུ་འཕྲུལ་གྱི་ཡོན་ཏན་དྲན་ནས་ཕྱག་འཚལ་བ་སོང་ཟིན་ཏོ། །གཉིས་པ་ཐུགས་མཁྱེན་བརྩེའི་ཡོན་ཏན་དྲན་ནས་ཕྱག་འཚལ་བ་ནི། གཉིས་པ་ཐུགས་མཁྱེན་བརྩེའི་ཡོན་ཏན་དྲན་ནས་ཕྱག་འཚལ་བ། སངས་རྒྱས་སྤྱན་གྱིས་ཉིན་མཚན་དུས་དྲུག་ཏུ།། སེམས་ཅན་ཀུན་ལ་བརྩེ་བས་རྟག་ཏུ་གཟིགས།། སེམས་ཅན་ཀུན་ཀྱིས་ཡིད་ལ་གང་དྲན་པའི།། རྣམ་རྟོག་གང་འགྱུ་རྟག་ཏུ་ཐུགས་ཀྱིས་མཁྱེན།། སེམས་ཅན་ཀུན་ཀྱིས་ངག་ཏུ་གང་སྨྲས་ཚིག། རྟག་ཏུ་མ་འདྲེས་སོ་སོར་སྙན་ལ་གསན།། ཀུན་མཁྱེན་འོད་དཔག་མེད་ལ་ཕྱག་འཚལ་ལོ།། ཞེས་གསུངས་ཏེ། སངས་རྒྱས་འོད་དཔག་མེད་ཀྱི་སྒྲིབ་མེད་ཡེ་ཤེས་ཀྱི་སྤྱན་དེས་ཉིན་ལན་གསུམ་མཚན་ལན་གསུམ་སྟེ། ཉིན་མཚན་དུས་དྲུག་ལ་སེམས་ཅན་ཐམས་ཅད་ལ་ཐུགས་བརྩེ་བ་ཆེན་པོའི་སྒོ་ནས་གཟིགས་ཏེ། སེམས་ཅན་སུ་ཞིག་ནི་དར། སུ་ཞིག་ནི་རྒུད། གང་ཟག་སུ་ཞིག་མཐོ་རིས་ནས་ངན་སོང་ལ་ལྷུང་བ་དང་། སུ་ཞིག་ངན་སོང་ནས་ཡར་མཐོ་རིས་ལ་སོང་བ་ལ་སོགས་པ་སེམས་ཅན་ཐམས་ཅད་ཀྱི་སྐྱིད་སྡུག་ལ་ནམ་ཡང་གཡེལ་བ་མེད་པར་དུས་རྟག་ཏུ་གཟིགས་པ་ནི་ཇི་ལྟ་བུ་ཞིག་ཡིན་ན། ཐ་ན་འབུ་སྲིན་ཕྲ་མོ་ཞིག་གི་གནས་ཚུལ་ཡན་ཆད་སྐྱུ་རུ་ར་རློན་པ་ལག་མཐིལ་ལ་བཞག་ནས་བལྟས་པ་བཞིན་དུ་མ་འདྲེས་པར་ས་ལེར་གཟིགས་ཏེ། མི་མཁྱེན་པ་དང་མི་གཟིགས་པ་གཅིག་ཀྱང་ཡོད་པ་མ་ཡིན་ལ། ཉིན་མཚན་དུས་དྲུག་ལ་གཟིགས་ཞེས་པ་དེའང་ཞག་གཅིག་ལ་ཐེངས་མ་བཅུ་གཉིས་ཙམ་མ་གཏོགས་མི་གཟིགས་པའི་དོན་མིན་པར་དུས་རྒྱུན་དུ་སྒྲིབ་མེད་ས་ལེར་གཟིགས་ཏེ་མི་གཟིགས་པའི་དུས་མེད་ཅེས་པའི་བརྡ་ཆད་དོ། །གཞན་ཡང་སེམས་ཅན་ཀུན་ཀྱི་ཡིད་ལ་དགེ་མི་དགེ་ལུང་མ་བསྟན་གང་དང་གང་དྲན་པའི་རྣམ་པར་རྟོག་པ་ཕྲ་མོ་ཞིག་འགྱུ་བ་ཙམ་ཚུན་ཆད། དུས་རྟག་ཏུ་སངས་རྒྱས་ཀྱི་ཐུགས་ཀྱིས་མ་འདྲེས་པར་ས་ལེར་མཁྱེན་པ་དང་། སེམས་ཅན་ཀུན་ཀྱི་ངག་དགེ་མི་དགེ་དག་མ་དག་སྙན་མི་སྙན་ལ་སོགས་པ་གང་སྨྲས་པའི་ཚིག་ཐམས་ཅད་ཀྱང་རྟག་ཏུ་མ་འདྲེས་པར་སོ་སོར་སྙན་ལ་གསན་པ་སྟེ། དུས་གསུམ་གྱི་ཤེས་བྱ་ཐམས་ཅད་ཅིག་ཆར་མ་འདྲེས་པར་མཁྱེན་པའི་རྣམ་མཁྱེན་གྱིས་དགོངས་ཤིང་མཁྱེན་པ་དེས་ན་ཀུན་མཁྱེན་འོད་དཔག་མེད་ལ་ཕྱག་འཚལ་ལོ་ཞེས་ཐུགས་མཁྱེན་བརྩེའི་ཡོན་ཏན་དྲན་ནས་ཕྱག་འཚལ་བའོ། །གསུམ་པ་སྟོབས་དང་ནུས་པའི་ཡོན་ཏན་དྲན་ནས་ཕྱག་འཚལ་བ་ནི། གསུམ་པ་སྟོབས་དང་ནུས་པའི་ཡོན་ཏན་དྲན་ནས་ཕྱག་འཚལ་བ། ཆོས་སྤངས་མཚམས་མེད་བྱས་པ་མ་གཏོགས་པ།། ཁྱེད་ལ་དད་ཅིང་སྨོན་ལམ་བཏབ་ཚད་ཀུན།། བདེ་བ་ཅན་དེར་སྐྱེ་བའི་སྨོན་ལམ་འགྲུབ།། བར་དོར་བྱོན་ནས་ཞིང་དེར་འདྲེན་པར་གསུངས།། འདྲེན་པ་འོད་དཔག་མེད་ལ་ཕྱག་འཚལ་ལོ།། ཞེས་གསུངས་ཏེ། ཆོས་སྤངས་ཀྱི་ལས་ཞེས་པ་ནི། གང་ཞིག་ཡིད་ནི་ཆོས་ལ་སྡང་། །དེ་ལ་ཐར་བ་ག་ལ་ཡོད། །ཅེས་གསུངས་པ་ལྟར། དམ་པའི་ཆོས་སྤངས་པའི་ལས་ངན་བསགས་པ་ལ་ཆོས་སྤངས་གསུངས་པ་སྟེ། ཚེ་འདི་ཕྱི་མེད། ལས་རྒྱུ་འབྲས་མེད། དཀོན་མཆོག་ལ་བདེན་མཐུ་མེད་སྙམ་པའི་ལོག་པའི་ལྟ་བས་ཀུན་ནས་བསླངས་ཏེ་ཆོས་སྤངས་པ་དང་། ཡང་འགའ་རེས་གནད་མ་ཤེས་པའི་དབང་གིས་བསྟན་པ་འགལ་འདུ་ཅན་དུ་བཟུང་ནས། ཆོས་ལ་ལ་ལ་བཟང་པོའི་འདུ་ཤེས། ལ་ལ་ལ་ངན་པའི་འདུ་ཤེས། རང་ཕྱོགས་ཀྱི་ཆོས་ལུགས་ལ་བསྟོད་ཁུལ་གྱིས་གཞན་ཕྱོགས་ཀྱི་ཆོས་ལུགས་ལ་སྨོད་པ་དང་། གང་ཟག་གི་ཉམས་ཚོད་བཟུང་ནས་གང་ཟག་ལ་དངོས་སུ་སྨོད་པ་དང་། ཆོས་ལ་ཤུགས་ཀྱིས་སྨོད་པ་དེ་དག་ནི་ཆོས་སྤོངས་ཀྱི་ལས་བསགས་པ་ཡིན། མཚམས་མེད་བྱས་པ་ནི། ཕ་མ་བསད་པ། དགྲ་བཅོམ་བསད་པ། སངས་རྒྱས་འཁོར་དང་བཅས་པ་ཕྱེ་བ་ལྟ་བུ་དགེ་འདུན་འཁོར་ལོའི་དབྱེན་བྱས་པ། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུང་བ་སྟེ་ལྔའོ། །དེའི་ནང་གི་ཕྱི་མ་གསུམ་པོ་དེ་ད་ལྟའི་སྐབས་ལ་དངོས་སུ་མི་འབྱུང་ཡང་ཕྱོགས་མཚུངས་ནི་ཡོད་ཆོག་པ་སྟེ། དཔལ་ལྡན་བླ་མར་མངོན་ལྐོག་བརྒྱུད་གསུམ་ནས་སྡོ་བ་ནི་སྔགས་ལུགས་ལྟར་ན་དམ་ཉམས་དང་། མདོ་ལུགས་ཀྱི་མཚམས་མེད་དང་འདྲ་བའམ་དེ་ལས་ཀྱང་ཉེས་པ་ཆེ་བར་གསུངས་པ་ཡིན། དེ་ལྟ་བུའི་ཆོས་སྤངས་དང་མཚམས་མེད་བྱས་པ་མ་གཏོགས་པ། འོད་དཔག་མེད་ཁྱེད་ལ་སྙིང་ནས་དད་ཅིང་། ཁྱེད་ཀྱི་ཞབས་དྲུང་དེར་སྐྱེ་བའི་སྨོན་ལམ་བཏབ་ཚད་ཀྱི་སེམས་ཅན་ཀུན། འདི་ནས་འཆི་བའི་དུས་བྱུང་ནས་ཤི་མ་ཐག་དང་། ཡང་ན་བར་དོ་གང་རུང་ན་བདེ་བ་ཅན་གྱི་ཞིང་ཁམས་དེར་སྐྱེ་བར་ངེས་ཏེ། སངས་རྒྱས་འོད་དཔག་མེད་ཀྱིས་སྔོན་སྨོན་ལམ་བཏབ་ཚད་ཐམས་ཅད་ད་ལྟ་མངོན་སུམ་དུ་གྲུབ་པ་ཡིན་ཕྱིར་བདེ་བ་ཅན་དུ་མི་སྐྱེ་བ་ནི་མི་སྲིད་དོ། །དེ་ཡང་འོད་དཔག་མེད་ཀྱི་སྨོན་ལམ་གྲུབ་པའི་ཐུགས་རྗེའི་ནུས་པ་དེ་དང་། རང་ཉིད་ཀྱི་དད་པ་དང་འདུན་པ་གཉིས་བསྡོངས་ན་སྨོན་ལམ་བཏབ་པ་བཞིན་དུ་འགྲུབ་པ་ཡིན་ནོ། །སངས་རྒྱས་འོད་དཔག་མེད་སངས་མ་རྒྱས་པའི་སྔོན་རོལ། སློབ་པ་ལམ་གྱི་གནས་སྐབས་བྱང་ཆུབ་སེམས་དཔའ་དགེ་སློང་ཆོས་ཀྱི་འབྱུང་གནས་ཀྱི་སྐྱེ་བ་བཞེས་པའི་གནས་སྐབས་སུ། བདག་རྗེས་སུ་དྲན་པ་དེ་དག་འཆི་བའི་དུས་སུ་བདག་དགེ་སློང་གི་དགེ་འདུན་གྱི་འཁོར་གྱིས་ཡོངས་སུ་བསྐོར་ཞིང་ལམ་སྣ་དྲངས་ཏེ་བདེ་བ་ཅན་གྱི་ཞིང་ཁམས་ལ་དྲངས་ཐུབ་པ་ཞིག་མ་རེད་བར་དུ་བདག་འཚང་མི་རྒྱ་བར་ཤོག་ཅིག་ཅེས་སྨོན་ལམ་བཏབ་པ་ཡིན་ལ། ད་ལྟ་ནི་སྨོན་ལམ་ཡོངས་སུ་གྲུབ་ནས་སངས་རྒྱས་སོང་བས། ཚེ་འདིར་བདེ་བ་ཅན་དུ་སྐྱེ་བའི་རྒྱུ་ཚོགས་བསགས་སྒྲིབ་སྦྱོང་ལ་སོགས་པ་ཡག་པོ་ཞིག་རང་གིས་བསྒྲུབས་ཡོད་ན། ཤི་རན་དུས་འབྱུང་བ་ཐིམ་རིམ་གྱི་སྣང་བ་སྣ་ཚོགས་ཤར་ཡོང་དུས་འོད་དཔག་མེད་ལ་གསོལ་བ་འདེབས་ཐུབ་ན་སྨོས་ཅི་དགོས། གསོལ་བ་འདེབས་མ་ཐུབ་ནའང་སེམས་ཀྱིས་དྲན་པ་ཙམ་གྱིས་སངས་རྒྱས་འོད་དཔག་མེད་འཁོར་དང་བཅས་པ་མངོན་སུམ་དུ་མིག་གི་ལམ་ལ་བྱོན་ནས་བར་དོ་མེད་པར་བདེ་བ་ཅན་ལ་འདྲེན་འགྲོ་བ་ནི། བཟང་སྤྱོད་སྨོན་ལམ་ལས། བདག་ནི་འཆི་བར་གྱུར་པའི་དུས་ཀྱི་ཚེ། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །ཞེས་གསུངས་པ་ལྟར་ཡིན་པས། སངས་རྒྱས་ཀྱི་ཐུགས་རྗེས་བསླུ་བ་མི་སྲིད་དེ། རྒྱ་མཚོར་ཆུ་སྲིན་གནས་ཀྱི་རླབས། །དུས་ལས་ཡོལ་བར་འགྱུར་སྲིད་ཀྱང་། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་སྲིད། །ཅེས་གསུངས་པ་ཡིན། རང་གི་ཚོགས་བསགས་སྒྲིབ་སྦྱོང་ཀྱི་ནུས་པས་འཆི་ཁར་ཙམ་ཞིག་ལ་གྲོལ་མ་ཐུབ་རུང་། ཤི་ནས་བར་དོའི་སྣང་བ་ཤར་ཚེ་འཇིགས་པའི་སྒྲ་བཞི། ཡ་ང་བའི་གཡང་ས་གསུམ་ལ་སོགས་པ་ཤར་འོང་དུས། མགོན་པོ་འོད་དཔག་མེད་དྲན་ཐུབ་ན། སངས་རྒྱས་འོད་དཔག་མེད་འཁོར་དང་བཅས་པ་བར་དོ་དེར་བྱོན་ནས་ཞིང་ཁམས་བདེ་བ་ཅན་དུ་འདྲེན་པའི་ཚུལ་སངས་རྒྱས་ཤཱཀྱ་ཐུབ་པས་མདོ་རྒྱུད་མང་པོ་ནས་གསུངས་ཡོད་པ་དེས་ན། ད་ལྟ་གསོན་པོའི་སྐབས་སུ་འོད་དཔག་མེད་པའི་སྐུ་དང་ཞིང་ཁམས་ཡིད་ལ་གོམས་པར་བྱས་ན། དོན་ཆེན་འགག་ལ་ཐུག་དུས་སྔར་འདྲིས་ཀྱི་ངོ་ཤེས་ཐུག་པ་བཞིན་དུ་བར་དོར་བྱོན་ནས་འདྲེན་འགྲོ་བ་ཡིན། གལ་ཏེ་དེ་དུས་མ་དྲན་ཞིང་ཞལ་མཇལ་ཡང་ངོ་མ་ཤེས་ནའང་ཚོགས་བསགས་སྒྲིབ་སྦྱོང་དང་སྨོན་ལམ་གྱི་མཚམས་སྦྱོར་ཡག་པོ་བྱས་ཡོད་ན། སངས་རྒྱས་འོད་དཔག་མེད་ཀྱི་ཐུགས་རྗེས་འདྲེན་འགྲོ་བ་ལ་ཐེ་ཚོམ་དགོས་པ་མ་ཡིན་པ་དེའི་ཕྱིར་ན། འདྲེན་པ་ཀུན་ཀྱི་མཆོག་བྱིན་རླབས་དང་ཐུགས་རྗེ་མྱུར་བ་འདྲེན་པ་འོད་དཔག་མེད་དེ་ལ་ཕྱག་འཚལ་ལོ་ཞེས་པའོ། །དེ་ཡན་ཆད་ཀྱིས་སྟོབས་ནུས་པའི་ཡོན་ཏན་དྲན་ནས་ཕྱག་འཚལ་བ་སོང་བའོ། །བཞི་བ་སེམས་ཅན་གྱི་སྲོག་བསྐྱབས་ནས་དུས་མིན་འཆི་བའི་རྐྱེན་ངན་སེལ་བའི་ཡོན་ཏན་ལ་བསམ་ནས་ཕྱག་འཚལ་བ་ནི། བཞི་བ་སེམས་ཅན་གྱི་སྲོག་བསྐྱབས་ནས་དུས་མིན་འཆི་བའི་རྐྱེན་ངན་སེལ་བའི་ཡོན་ཏན་ལ་བསམ་ནས་ཕྱག་འཚལ་བ། ཁྱེད་ཀྱི་སྐུ་ཚེ་བསྐལ་བ་གྲངས་མེད་དུ།། མྱ་ངན་མི་འདའ་ད་ལྟ་མངོན་སུམ་བཞུགས།། ཁྱེད་ལ་རྩེ་གཅིག་གུས་པས་གསོལ་བཏབ་ན།། ལས་ཀྱི་རྣམ་པར་སྨིན་པ་མ་གཏོགས་པའི།། ཚེ་ཟད་པ་ཡང་ལོ་བརྒྱ་ཐུབ་པ་དང་།། དུས་མིན་འཆི་བ་མ་ལུས་བཟློག་པར་གསུངས།། མགོན་པོ་ཚེ་དཔག་མེད་ལ་ཕྱག་འཚལ་ལོ།། ཞེས་གསུངས་ཏེ། མགོན་པོ་འོད་དཔག་མེད་ཁྱེད་ཀྱི་སྐུ་ཚེའི་ཚད་ནི་བསྐལ་བ་གྲངས་མེད་ཅིང་དཔག་ཏུ་མེད་པ་མཐའ་ཡས་པ་ཡིན་པས་མ་ཚད། མྱ་ངན་ལས་མི་འདའ་བར་ད་ལྟ་བདེ་བ་ཅན་ན་གཟུགས་སྐུ་མངོན་སུམ་དུ་བཞུགས་པ་ཡིན་པ་ལ། གུ་རུ་རིན་པོ་ཆེས། ཡིད་ཁྱེད་ཤེས་ཀྱི་དད་པས་བྱིན་རླབས་འཇུག །བློ་ཐེ་ཚོམ་དང་བྲལ་ན་ཅི་བསམ་འགྲུབ། །ཅེས་གསུངས་པ་ཡིན་པས། སྒོ་གསུམ་རྩེ་གཅིག་གུས་པས་ཡིད་ཁྱེད་ཤེས་ཀྱིས་བློ་ཕུགས་གཏད་ནས། ཐེ་ཚོམ་མེད་པར་ཁྱེད་མ་གཏོགས་རེ་ས་སྐྱབས་གནས་གཞན་མེད་སྙམ་ནས་གསོལ་བ་བཏབ་ན། ཚེ་ཟད་པ། ལས་ཟད་པ། བསོད་ནམས་ཟད་པ་སྟེ་ཟད་པ་གསུམ་གྱི་མཐའ་ལ་སོང་བའི་ལས་གྱི་རྣམ་པར་སྨིན་པ་ཟློག་པ་མེད་པ་ནི། སྨན་པའི་རྒྱལ་པོ་དངོས་སུ་བྱོན་གྱུར་ཀྱང་། །ཚེ་ཡི་འཕེན་ཟད་སྲོག་ལ་མཐུད་མི་ཤེས། །ཞེས་གསུངས་པ་ལྟ་བུའི་ལས་ཀྱི་རྣམ་སྨིན་ཟློག་མེད་ཡིན་ན་མ་གཏོགས། བར་ཆད་རྐྱེན་དབང་གིས་ཚེ་ཟད་ནས་འཕྲལ་དུ་འཆི་རྒྱུ་ཅན་ཡིན་ན་ཡང་། མགོན་པོ་འོད་དཔག་མེད་དང་། ཚེ་དཔག་མེད་ཀྱི་ཐུགས་རྗེས་ལོ་བརྒྱ་རེ་ཙམ་ཡང་འཚོ་ཐུབ་པའི་བྱིན་རླབས་འཇུག་པ་དང་། ཐོག་གིས་བརྒྱབ་པ་དང་། ཆུས་ཁྱེར་བ་དང་། གཞན་གྱི་བྱད་ཁ་དང་། མཚོན་གྲིར་འགག་གྲིར་ལ་སོགས་པ་གློ་བུར་ཡེ་འདྲོག་གིས་ཤི་བའི་དུས་མིན་འཆི་བ་བཅོ་བརྒྱད་ལ་སོགས་པའི་འཕྲལ་རྐྱེན་བར་ཆད་ཀྱི་རིགས་མ་ལུས་པ་ཐམས་ཅད་འཕྲལ་དུ་མགོན་པོ་འོད་དཔག་མེད་ཀྱི་ཐུགས་རྗེས་ཟློག་པ་ནི། སངས་རྒྱས་བཅོམ་ལྡན་འདས་ཀྱིས་མདོ་ལས་གསུངས་པ་ཡིན་པས། དེ་ལྟ་བུའི་འཆི་མེད་ཚེ་ཡི་དངོས་གྲུབ་སྩོལ་བའི་མགོན་པོ་སྐུ་ཚེ་དཔག་ཏུ་མེད་པ་ཁྱེད་ལ་ཕྱག་འཚལ་ལོ་ཞེས་པའོ། །དེས་ན་ལོགས་ཤིག་ནས་སྐུ་རིམ་རེ་སྒྲུབ་ཁུལ་བྱས་ཏེ། བླ་མའི་མིང་ཐོགས་ཀྱང་ལྟ་དགོངས་ཏིང་འཛིན་བསྙེན་སྒྲུབ་ལས་སྦྱོར་གཅིག་ཀྱང་མེད་པ་མ་ཟད། རང་གིས་ཀྱང་དབང་ཡག་པོ་ཞིག་ཐོབ་མྱོང་ལ་མ་མྱོང་བ་ཞིག་གི་སྔུན་ནས་ཚེ་དབང་བརྒྱ་ཐམ་པ་ཞུས་པ་བས། རང་གིས་བདེ་སྨོན་ཚར་གཅིག་བཏོན་ན་ཚེ་རིང་རྒྱུ་ལ་ཕན་ཐོགས་པ་ནི་དེས་དགའ་ཤག་ཤག་ཡིན་ངེས། ཁྲིམས་ལྡན་ཡུན་རིང་འཚོ་བ་ན། །དེ་ལ་བསོད་ནམས་ཆེན་པོ་འབྱུང་། །ཞེས་གསུངས་པ་ཡིན་པས། སྡིག་རྒན་ཞིག་ལ་མཚོན་ན་ཡུན་རིང་མ་བསྡད་ན་བསགས་སྟོབས་དེའི་ཚོད་ཀྱིས་ཆུང་བ་ཡིན་ཡང་། བདེ་བ་ཅན་དུ་སྐྱེ་བའི་རྒྱུ་སྒྲུབ་པ་ཞིག་ཡིན་ན་ཚེ་ཡུན་རིང་བརྟན་ན་དེའི་ཚོད་ཀྱིས་བསོད་ནམས་ཤིག་གསོག་ཐུབ་པ་ཡིན་ནོ། །དེ་དག་ནི་འོད་དཔག་མེད་གཅིག་ལ་མཚན་གྱི་རྣམ་གྲངས་མི་འདྲ་བ་ཡོད་པ་དེ་དག་ཡིད་ལ་བྱས་ནས་ཕྱག་འཚལ་བ་སྟེ། འོད་དཔག་མེད་སྤྲུལ་སྐུའི་ཆ་བྱད་ཅན་དང་། ཚེ་དཔག་མེད་ལོངས་སྐུའི་ཚུལ་ཅན་དང་། དེ་བཞིན་དུ་འོད་སྣང་མཐའ་ཡས་དང་། འོད་དཔག་མེད་དང་། སྐུ་ཚེ་དཔག་མེད་དང་། ཚེ་དཔག་མེད་ལ་སོགས་པ་ནི་མཚན་གྱི་རྣམ་དྲངས་མི་འདྲ་བ་ཙམ་ལས་ངོ་བོ་གཅིག་ཡིན་ནོ། །དེ་ཡན་ཆད་ཀྱིས་སེམས་ཅན་གྱི་ཚེ་བསྲིངས་སྲུང་སྐྱོབ་ཀྱི་ཡོན་ཏན་དྲན་ནས་ཕྱག་འཚལ་བ་སོང་བའོ། །ལྔ་བ་ཕྱག་འཚལ་བའི་ཕན་ཡོན་ལ་བསམས་ཏེ་ཕྱག་འཚལ་བ་ནི། ལྔ་བ་ཕྱག་འཚལ་བའི་ཕན་ཡོན་ལ་བསམས་ཏེ་ཕྱག་འཚལ་བ། སྟོང་གསུམ་འཇིག་རྟེན་རབ་འབྱམས་གྲངས་མེད་པ།། རིན་ཆེན་གྱིས་བཀང་སྦྱིན་པ་བྱིན་པ་བས།། འོད་དཔག་མེད་པའི་མཚན་དང་བདེ་བ་ཅན།། ཐོས་ནས་དད་པས་ཐལ་མོ་སྦྱར་བྱས་ན།། དེ་ནི་དེ་བས་བསོད་ནམས་ཆེ་བར་གསུངས།། དེ་ཕྱིར་འོད་དཔག་མེད་ལ་གུས་ཕྱག་འཚལ།། ཞེས་གསུངས་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་པ་ནི། གླིང་བཞི་རི་རབ་ཉི་ཟླ་ལྷ་གནས་དང་བཅས་པ་སྟོང་ཕྲག་གཅིག་ལ་སྟོང་དང་པོ་སྤྱི་ཕུད་ཀྱི་འཇིག་རྟེན་དང་། དེ་གཅིག་ལ་བརྩིས་པའི་སྟོང་གཅིག་ལ་སྟོང་གཉིས་པ་བར་མའི་འཇིག་རྟེན་དང་། དེ་གཅིག་ལ་བརྩིས་པའི་སྟོང་གཅིག་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བྱ་ལ། དེ་ནི་སངས་རྒྱས་སྤྲུལ་བའི་སྐུ་གཅིག་གི་གདུལ་ཞིང་བྱེ་བ་ཕྲག་བརྒྱའི་འཇིག་རྟེན་གྱི་ཁམས་གཅིག་ཡིན་ལ། རབ་འབྱམས་གྲངས་མེད་པ་ཞེས་པ་ནི། དེ་ལྟ་བུའི་སྟོང་ཁམས་མང་པོ་རབ་ཏུ་འབྱམས་ཀླས་པ་ཤིན་ཏུ་མང་པོ་གྲངས་དང་ཚད་གཅིག་བཟུང་དུ་མེད་པའི་ཞིང་ཁམས་ཡོད་ཚད་པོ་ཀུན་ཏུ། རིན་པོ་ཆེ་སྣ་ཚོགས་པ་ཐམས་ཅད་ཀྱིས་ཕྱུར་བུར་བཀང་ནས། ཡར་དཀོན་མཆོག་ལ་མཆོད་པ་དང་མར་སེམས་ཅན་ལ་སྦྱིན་པ་བཏང་བའི་དགེ་བ་བས་གང་ཟག་གང་ཞིག་གིས་འོད་དཔག་མེད་པའི་མཚན་དང་བདེ་བ་ཅན་གྱི་ཞིང་ཁམས་ཀྱི་ཡོན་ཏན་བཤད་པ་རྣ་ལམ་དུ་ཐོས་ནས་དད་པའི་སྟོབས་ཀྱིས་ལག་པས་ཐལ་མོ་སྦྱར་བ་ཙམ་ཞིག་བྱས་ན། དེ་ལས་བྱུང་བའི་དགེ་བ་དེ་ནི་སྟོང་གསུམ་རིན་ཆེན་གྱིས་བཀང་ནས་སྦྱིན་པ་བྱིན་པ་བས་བརྒྱ་འགྱུར་སྟོང་འགྱུར་གྱིས་བསོད་ནམས་ཆེ་བ་ཡིན་ཞེས་བཅོམ་ལྡན་འདས་ཀྱིས་མདོ་ལས་གསུངས་ཡོད་པ་དེའི་ཕྱིར་མགོན་པོ་འོད་དཔག་མེད་ཁྱེད་ལ་སྒོ་གསུམ་གུས་པ་ཆེན་པོས་ཕྱག་འཚལ་ལོ་ཞེས་པའོ། །དྲུག་པ་དད་པའི་ཕན་ཡོན་དྲན་ནས་ཕྱག་འཚལ་བ་ནི། དྲུག་པ་དད་པའི་ཕན་ཡོན་དྲན་ནས་ཕྱག་འཚལ་བ། གང་ཞིག་འོད་དཔག་མེད་པའི་མཚན་ཐོས་ནས།། ཁ་ཞེ་མེད་པར་སྙིང་ཁོང་རུས་པའི་གཏིང་།། ལན་ཅིག་ཙམ་ཞིག་དད་པ་སྐྱེས་པ་ན།། དེ་ནི་བྱང་ཆུབ་ལམ་ནས་ཕྱིར་མི་ལྡོག། མགོན་པོ་འོད་དཔག་མེད་ལ་ཕྱག་འཚལ་ལོ།། ཞེས་གསུངས་ཏེ། མགོན་པོ་འོད་དཔག་མེད་ལ་སྙིང་ནས་དད་པའི་ཕན་ཡོན་ནི། སེམས་ཅན་གང་ཞིག་གིས་མགོན་པོ་འོད་དཔག་མེད་པའི་མཚན་རྣ་ལམ་ལ་ཐོས་ནས། ཁ་ཞེ་མེད་པར་སྟེ་ཁ་བཤད་དོན་གནས་མིན་པའི་ཁ་མིད་པ་ཡན་ཆད་ཀྱི་དད་པ་ཡོད་མདོག་བྱས་པ་མ་ཡིན་པར་སྙིང་ཁོང་རུས་པའི་གཏིང་ཞེ་གདིང་ནས། ཐེངས་གྲངས་མང་པོ་སྐྱེས་ན་སྨྲོས་ཅི་དགོས། ལན་གཅིག་ཁོ་ན་ཙམ་ཞིག་ལ་དད་པ་སྐྱེས་ནའང་གང་ཟག་དེ་ལ་དེ་མ་ཐག་ཏུ་བྱང་ཆུབ་ཀྱི་ས་བོན་ཐེབས་ནས། དེའི་སྟོབས་ཀྱིས་རིམ་གྱིས་བྱང་ཆུབ་ཆེན་པོའི་ལམ་ལས་ཕྱིར་མི་ལྡོག་པར། ལས་ངན་གྱི་རྒྱུས་ལུས་ངན་ལེན་པའི་མཚམས་འཇོག་པ་ཡིན་ནོ་ཞེས་པ་སྟེ། འདི་བདེ་བ་ཅན་ལ་སྐྱེ་འགྱུར་གྱི་བྱང་སེམས་ལམ་ཞུགས་པ་ཞིག་ཡིན་ན་སྒྲ་ཇི་བཞིན་པ་དང་། བདེ་བ་ཅན་ལ་སྐྱེ་རུང་ལམ་མ་ཞུགས་པའི་གང་ཟག་ཡིན་ན་མཐར་ཐུག་ཕྱིར་མི་ལྡོག་པར་འཇུག་པའི་བག་ཆགས་ཐེབས་པ་ལ་དགོངས་ནས་གསུངས་པ་ཡིན་པས་མཚན་ཙམ་ཐོས་པས་ཀྱང་དེ་ལྟ་བུའི་དོན་ཆེན་པོ་ཐོབ་པའི་འོད་དཔག་མེད་ལ་སྙིང་ཁོང་རུས་པའི་གཏིང་ནས་ཕྱག་འཚལ་ལོ་ཞེས་པའོ། །བདུན་པ་མཚན་ཐོས་པའི་ཕན་ཡོན་ལ་བསམས་ནས་ཕྱག་འཚལ་བ་ནི། བདུན་པ་མཚན་ཐོས་པའི་ཕན་ཡོན་ལ་བསམས་ནས་ཕྱག་འཚལ་བ། སངས་རྒྱས་འོད་དཔག་མེད་པའི་མཚན་ཐོས་ནས།། དེ་ནི་བྱང་ཆུབ་སྙིང་པོ་མ་ཐོབ་བར།། བུད་མེད་མི་སྐྱེ་རིགས་ནི་བཟང་པོར་སྐྱེ།། ཚེ་རབས་ཀུན་ཏུ་ཚུལ་ཁྲིམས་རྣམ་དག་འགྱུར།། བདེ་གཤེགས་འོད་དཔག་མེད་ལ་ཕྱག་འཚལ་ལོ།། ཞེས་གསུངས་ཏེ། དེ་ཡང་སྐྱེས་པ་བུད་མེད་ལ་སོགས་པ་གང་ཞིག་གིས་སངས་རྒྱས་འོད་དཔག་མེད་པའི་མཚན་ལན་གཅིག་ཐོས་ཤིང་ཡིད་ལ་བཟུང་ན། གང་ཟག་དེ་ནི་བྱང་ཆུབ་སྙིང་པོ་སངས་རྒྱས་ཀྱི་གོ་འཕང་མ་ཐོབ་བར་དུ། རྟེན་དམན་པ་བུད་མེད་ཀྱི་རིགས་སུ་ནམ་ཡང་མི་སྐྱེ་ཞེས་པ་སྟེ། སྤྱིར་ན་ཕོ་མོ་ཐམས་ཅད་མི་ཡིན་པའི་ཆ་ནས་གཅིག་པ་དང་། བུད་མེད་ཀྱི་ནང་ལ་བཟང་ངན་མང་པོ་ཡོད་པ་དང་། སྐྱེས་པའི་ནང་ལ་ཡང་དེ་བཞིན་དུ་བཟང་ངན་འདྲ་དང་མི་འདྲ་ཡོད་པས་ཐམས་ཅད་གཅིག་འདྲ་ཏག་ཏག་མིན་ཡང་སྤྱིར་བཏང་སྐྱེས་པ་དང་བསྡུར་ན། སྟོབས་ཞན་པ། ཁས་དམན་པ། ཆོས་བྱེད་པའི་དབང་ཆུང་བ་འདི་ཚོ་ལ་དགོངས་ནས་གསུངས་པ་དང་། ཁྱད་པར་དུ་རྫོགས་པའི་སངས་རྒྱས་སྟོང་སྐྱེས་པའི་རྟེན་ལ་སངས་རྒྱས་པ་དང་། སྐྱེ་རྒུའི་བདག་མོ་རབ་ཏུ་བྱུང་བས་བསྟན་པའི་གནས་ཚད་ཇེ་ཐུང་ལ་སོང་བའི་རྒྱུ་མཚན་ལ་སོགས་པས་བུད་མེད་རྟེན་དམན་པ་ཡིན་ཕྱིར། སྐྱེ་བ་དམན་པའི་བུད་མེད་ལ་མི་སྐྱེ་ཞེས་པ་དང་། སྐྱེས་པ་ཕོ་ལུས་ཡིན་ཡང་མ་རབས་སྡིག་སྤྱོད་ཀྱི་རིགས་ནི་རིགས་ཐ་ཆད་ཡིན་པས། དེ་ལྟར་མ་ཡིན་པར་རིགས་བཟང་པོ་ཡ་རབས་དཔྱོད་ལྡན་གྱི་རིགས་སུ་རྟག་པར་སྐྱེ་བ་དང་། རིགས་བཟང་པོར་སྐྱེས་པས་མ་ཚད་སྐྱེ་བ་དང་ཚེ་རབས་ཀུན་ཏུ་ཆོས་འདུལ་བ་རིན་པོ་ཆེའི་སྒོར་ཞུགས་ཏེ། ཚུལ་ཁྲིམས་སྲོག་ལྟར་བསྲུངས་ནས་ཚངས་སྤྱོད་ཀྱི་སྡོམ་པ་མ་ཉམས་ཤིང་ཉེས་ལྟུང་ཕྲ་མོས་ཀྱང་མ་གོས་པ་རྣམ་པར་དག་པར་འགྱུར་བས་ན་བདེ་གཤེགས་འོད་དཔག་མེད་ལ་གུས་པས་ཕྱག་འཚལ་ལོ་ཞེས་པའོ། །དེའི་ཡན་ཆད་ཀྱི་ཚོགས་བསགས་པའི་སྒོ་ཡན་ལག་བདུན་གྱི་ནང་ནས་ཕྱག་འཚལ་བའི་ཡན་ལག་བཤད་པ་སོང་བ་ཡིན། འདི་ལྟ་བུའི་རྒྱུ་མཚན་ཤེས་པའི་ཐོག་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ། །ཞེས་པ་དང་། དེ་བཞིན་དུ་བདེ་གཤེགས་སྨན་བླ་བརྒྱད། བྱང་ཆུབ་སེམས་དཔའ་བརྒྱད། བདེ་གཤེགས་སོ་ལྔ་ལ་ཕྱག་འཚལ་བ་ཕུང་པོ་གསུམ་པའི་མདོ་ལ་སོགས་པ་ངག་གིས་འདོན་པ་དང་སྦྲགས་ནས་ཕྱག་འཚལ་བ་དང་། ཡང་ན་བདེ་སྨོན་འདི་ཉིད་བཞི་ཆོད་ཀྱི་དབྱངས་རྟ་སྙན་པོས་འདོན་བཞིན་དུ་ཕྱག་འཚལ་ན་ཕན་ཡོན་ལྷག་པར་ཆེ་བ་ཡིན། ད་རེས་ཞིང་ཁྲིད་འདིའི་ནང་དུ་ཞུགས་པ་ཐམས་ཅད་ཀྱིས་རབ་ན་འོད་མཚན་བྱེ་ཆུང་རེ་དང་། ཐ་ན་འོད་མཚན་འབུམ་རེ་ཡིན་ན་མིན་ན་འདོན་ཐུབ་ཤག་ཤག་བྱེད་དགོས། ཕྱག་འཚལ་བའི་དམིགས་པ་དེ་དག་རྒྱ་ཆེར་རྒྱས་པར་མ་ཤེས་ཀྱང་། མགོན་པོ་འོད་དཔག་མེད་ཁྱེད་མཁྱེན། ཁྱེད་ལ་སྒོ་གསུམ་གུས་པས་ཕྱག་འཚལ་བ་ཡིན། བདག་གཞན་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་ཐམས་ཅད་དག་ནས་ནུབ་ཕྱོགས་བདེ་བ་ཅན་དུ་སྐྱེ་བར་ཤོག་སྙམ་ནས། དད་པ་དང་གུས་པས་ཕྱག་འཚལ་ན་དེས་ཆོག་པ་ཡིན། དེའི་ཡན་ཆད་ཕྱག་འཚལ་བའི་ཡན་ལག་རྒྱས་པར་བཤད་པ་ནང་གསེས་ཀྱི་དབྱེ་བ་བདུན་གྱི་ཐོག་ནས་ཞིབ་ཅིང་རྒྱས་པར་བསྟན་པའོ། །གཉིས་པ་མཆོད་པའི་ཡན་ལག་ལ་དངོས་འབྱོར་ཡིད་སྤྲུལ་གྱི་མཆོད་པ་གཉིས་ལས། དང་པོ་དངོས་འབྱོར་གྱི་མཆོད་པ་ནི། གཉིས་པ་མཆོད་པའི་ཡན་ལག དང་པོ་དངོས་འབྱོར་གྱི་མཆོད་པ། བདག་གི་ལུས་དང་ལོངས་སྤྱོད་དགེ་རྩར་བཅས།། དངོས་སུ་འབྱོར་བའི་མཆོད་པ་ཅི་མཆིས་པ།། ཞེས་གསུངས་ཏེ། མཆོད་པ་འབུལ་བ་འདི་སེར་སྣ་དང་ཆགས་ཞེན་གྱི་གཉེན་པོ་ཡིན་ཞིང་། བདག་གིར་འཛིན་རྒྱུའམ་ཡོངས་སུ་བཟུང་བའི་གཞི་ལུས་དང་ལོངས་སྤྱོད་དགེ་རྩ་གསུམ་སྟེ། དེ་ཡང་བདག་གི་གཅེས་པའི་ལུས་དབང་པོ་སྐྱེ་མཆེད་ཚང་བ་དང་། དེ་ལ་མཁོ་བའི་རྒྱུ་ནོར་ཟས་གསུམ་ཡུལ་འཁོར་དང་བཅས་པའི་ལོངས་སྤྱོད་དང་། དུས་གསུམ་དུ་བསགས་པའི་དགེ་བའི་རྩ་བ་ཅི་མཆིས་པ་ཐམས་ཅད་མཆོད་པའི་སྤྲིན་དུ་མཆོད་དགོས་པ་མ་ཟད། ད་དུང་དངོས་སུ་འབྱོར་བའི་མཆོད་པ། མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ་ལ་སོགས་པ་བཟང་ཞིང་གྱ་ནོམ་པའི་དངོས་པོ་ཅི་དང་ཅི་མཆིས་པ་ཐམས་ཅད། རང་རང་གི་འབྱོར་འཁོས་དང་བསྟུན་པ་སྟེ་ཡོད་པོས་ཡོད་ཚོད་དང་བསྟུན་ནས་མཆོད་པ་དང་། མེད་པོས་མེད་ཚོད་དང་བསྟུན་ནས་མཆོད་དགོས་ཏེ། ཡོད་པོའི་ཡོད་ཚོད་དང་བསྟུན་ནས་མ་མཆོད་ན་སྔར་བསོད་ནམས་བསགས་པའི་འབྲས་བུ་ད་རེས་ལོངས་སྤྱོད་ཀྱི་འབྱོར་བས་མ་དབུལ་ན་ཡང་། མཆོད་པ་མ་ཕུལ་ན་སྔར་བསགས་ཀྱི་སྦྱིན་འབྲས་ཟད་ནས་མེད་པར་འགྱུར་བ་ཡིན། མ་ཚད་མེད་པོའི་མེད་ཚོད་དང་བསྟུན་ཏེ་མཆོད་པ་བྱེད་དགོས་ཏེ། སྔར་མཆོད་སྦྱིན་མ་ནུས་ནས་དབུལ་པོའི་ལུས་བླངས་པ་ཡིན་པས་ད་དུང་ཡང་བསོད་ནམས་མ་བསགས་ན་དེ་བས་ཐ་ཆད་པར་འགྱུར་བ་ཁོ་ན་ཡིན། རྒྱལ་བ་སྲས་བཅས་ལ་མཆོད་རྫས་ཀྱི་མཁོ་ཉག་ཆེ་བ་མིན་ཡང་རང་གི་བསོད་ནམས་གསོག་པའི་ཆེད་དུ་རང་གང་ལ་དགའ་བའི་དངོས་པོ་གང་བཟང་གི་མཆོད་པ་ཕུལ་བ་རེད། མཆོད་པའི་ཡུལ་ཞིང་ས་ཁྱད་པར་ཅན་སངས་རྒྱས་འོད་དཔག་མེད་འཁོར་ཕྱོགས་བཅུའི་རྒྱལ་བ་སྲས་དང་བཅས་པ་ལ། བསམ་པ་རྣམ་པར་དག་པ་སེར་སྣ་དང་། ང་རྒྱལ་དང་། ངོམ་ཆོས་སོགས་ཀྱིས་མ་བསླད་པའི་གཏོང་སེམས་ཁྱད་པར་ཅན་གྱིས། དངོས་པོ་རྣམ་པར་དག་པ་མཆོད་མེ་ཀོང་བུ་གང་དང་། ཡོན་ཆབ་བདུན་ཚར་ཆ་གཅིག་ཙམ་ལས་མེད་ཀྱང་རང་གི་འབྱོར་འཁོས་དང་བསྟུན་པའི་ཡག་ས་མཛེས་ས་བཟང་ས་ནས་འབུལ་བ་ལས། ཐུད་ཀྱི་སྔོ་ས། མར་གྱི་ཁ་ས་ཞེས་པ་ལྟ་བུ་ལ་མ་སོང་བ་ཞིག་དགོས་པ་ཡིན། གལ་ཏེ་ཅི་ཡང་མེད་པ་ཞིག་ཡིན་ཚེ་ས་རྡོ་ཡན་ཆད་ཀྱིས་བསམ་པ་དག་ན་མཆོད་ཆོག་པ་སྟེ། གནའ་སྔོན་མར་བྱིས་པ་གཉིས་ཀྱིས་ས་རྡུལ་སྤུངས་ནས་རྩེད་མོ་རྩེ་བའི་སྐབས་ཤིག་ན། སངས་རྒྱས་འཁོར་དང་བཅས་པ་བྱོན་པ་དང་ཁེལ་བར་བྱིས་པ་གཉིས་ཀྱིས་མཇལ་ནས་དགའ་ཞིང་དྭངས་པའི་སེམས་ཀྱིས་ས་རྡུལ་སྙིམ་པ་གང་རེ་སངས་རྒྱས་ཀྱི་ལྷུང་བཟེད་དུ་ཕུལ་བའི་བསོད་ནམས་ཀྱིས་གཅིག་ཆོས་རྒྱལ་མྱ་ངན་མེད་དང་། གཅིག་དེའི་བློན་པོ་མདུན་ན་འདོན་དུ་སྐྱེས་ནས། འཛམ་བུའི་གླིང་གི་ས་གནས་བྱེ་བ་རུ་མཆོད་རྟེན་བྱེ་བ་ཞག་གཅིག་གིས་འགྲུབ་པའི་ལོ་རྒྱུས་ཡོད་པས་ཡུལ་ཁྱད་པར་ཅན་ལ་བསམ་པ་རྣམ་པར་དག་པས་མཆོད་པ་ཕུལ་ན་དེ་ལྟ་བུའི་བསོད་ནམས་ཆེ་བ་ཡིན། རང་ཉིད་ཀྱིས་ཅི་འབྱོར་བའི་མཆོད་པ་ཕུལ་བ་དེ་དག་ཀྱང་རང་ངོས་ནས་གཙང་མ་རང་ཉིད་མགུ་བ་ཞིག་དགོས་པ་ཡིན། འོ་ན་མཆོད་པའི་ཡོ་བྱད་ལ་གཙང་མ་དགོས་པ་བདེན་ཡང་རང་ཉིད་ཀྱི་ལུས་ལོངས་སྤྱོད་ཐམས་ཅད་དབུལ་དགོས་པར་གསུངས་པས་རང་ཉིད་ཀྱི་ལུས་འདི་ནི་མི་གཙང་བ་ཡིན་པས་ཇི་ལྟར་འབུལ་དུ་རུང་ཞེ་ན། ལུས་ལས་གཞན་དུ་གྱུར་པའི་མཆོད་རྫས་གསེར་དངུལ་སོགས་རིན་པོ་ཆེ་ཤ་སྟག་ཕུལ་ཡང་རྒྱལ་བ་སྲས་བཅས་ལ་བཟང་ངན་དང་དངོས་འཛིན་གྱི་ཞེན་པ་དང་བྲལ་ཕྱིར། འོད་དཔག་མེད་འཁོར་བཅས་ཀྱིས་རྒྱུ་བཟང་ངན་དུ་རྟོག་ཅིང་བདག་གིར་བཞེས་པ་ནི་མེད་པས་སེམས་ཅན་རང་རང་གི་ཚོགས་རྫོགས་པའི་ཆེད་དུ་རང་ངོས་ནས་རྩ་ཆེན་བརྩི་བའི་དངོས་པོ་ཕུལ་ན་བསོད་ནམས་ཀྱི་ཚོགས་རྫོགས་སྟོབས་ཆེ་བ་ཡིན་པས། ལུས་འདི་ནི་ལོངས་སྤྱོད་བས་ཀྱང་གཅེས་པའི་བདག་འཛིན་གྱི་གཞི་ཡིན་པས་དེ་ཕུལ་ན་ཚོགས་རྫོགས་ཤིང་སྒྲིབ་པ་དག་པའི་དགོས་པ་ཁྱད་པར་ཅན་ཡོད་པ་ཡིན། དེས་ན། བདག་ལུས་ལོངས་སྤྱོད་བཅས་པ་ཡོངས་འབུལ་གྱིས། །ཆོས་ཀྱི་འཁོར་ལོས་སྒྱུར་བའི་སྲིད་ཐོབ་ཤོག །ཅེས་པ་དང་། སྤྱོད་འཇུག་ལས་ཀྱང་། བདག་ནི་བསོད་ནམས་མི་ལྡན་བཀྲེན་ཆེན་ཏེ། །མཆོད་པའི་ནོར་གཞན་བདག་ལ་ཅང་མ་མཆིས། །དེས་ན་གཞན་དོན་དགོངས་པའི་མགོན་གྱིས་ནི། །བདག་གི་དོན་སླད་ཉིད་ཀྱིས་མཐུས་བཞེས་ཤིག །ཅེས་གསུངས་པ་ལྟ་བུའོ། །དེ་བཞིན་དུ་རང་ཉིད་ཀྱི་དུས་གསུམ་དུ་བསགས་པའི་དགེ་རྩ་རྣམས་ཟད་པའི་རྒྱུ་བཞི་དང་མ་ཕྲད་གོང་དུ་མཆོད་པར་ཕུལ་ན། མི་དོ་དོ་ཏན་ཏན་ཞིག་ལ་རྒྱུ་ནོར་བཅོལ་བ་བཞིན་དུ་ཆུད་མི་འཛའ་བས་མ་ཚད་དགེ་རྩ་གོང་ནས་གོང་དུ་འཕེལ་བའི་དགོས་པ་ཁྱད་པར་ཅན་ཡོད་པ་ཡིན་ནོ། །དེའི་ཡན་ཆད་ཀྱིས་དངོས་སུ་འབྱོར་བའི་མཆོད་པ་བཤད་ནས། གཉིས་པ་ཡིད་ཀྱིས་སྤྲུལ་བའི་མཆོད་པ་ནི། གཉིས་པ་ཡིད་ཀྱིས་སྤྲུལ་བའི་མཆོད་པ། ཡིད་སྤྲུལ་བཀྲ་ཤིས་རྫས་རྟགས་རིན་ཆེན་བདུན།། གདོད་ནས་གྲུབ་པ་སྟོང་གསུམ་འཇིག་རྟེན་གྱི།། གླིང་བཞི་རི་རབ་ཉི་ཟླ་བྱེ་བ་བརྒྱ།། ལྷ་ཀླུ་མི་ཡི་ལོངས་སྤྱོད་ཐམས་ཅད་ཀུན།། བློ་ཡིས་བླངས་ཏེ་འོད་དཔག་མེད་ལ་འབུལ།། བདག་ལ་ཕན་ཕྱིར་ཐུགས་རྗེའི་སྟོབས་ཀྱིས་བཞེས།། ཞེས་གསུངས་ཏེ། ཡིད་ཀྱིས་སྤྲུལ་བའི་མཆོད་པ་སྲིད་ཞིའི་གཟུགས་བརྙན་འཆར་བ་མེ་ལོང་། སྣང་བ་དབང་དུ་སྡུད་པ་ལི་ཁྲི། ཚེ་ཡི་དཔལ་སྐྱེད་ཚེ་འཛིན་དུལ་བ་ལ་སོགས་པ་བཀྲ་ཤིས་རྫས་བརྒྱད་དང་། འཁོར་བའི་ཚ་གདུང་སྐྱོབ་པའི་གདུགས་དཀར། དྲི་མེད་རྡུལ་བྲལ་གྱི་སྤྱན་ལྡན་གསེར་ཉ། འཁོར་བའི་སྐྱོན་གྱིས་མ་གོས་པའི་པདྨ། ཐེག་གསུམ་ཆོས་ཀྱི་སྒྲ་ལྡན་གཡས་འཁྱིལ་དུང་དཀར་ལ་སོགས་པ་བཀྲ་ཤིས་རྟགས་བརྒྱད་དང་། སྲིད་པའི་དྲ་བ་གཅོད་པའི་འཁོར་ལོ། དགོས་འདོད་དཔལ་གྱི་འབྱུང་གནས་ནོར་བུ། དགེ་བཅུའི་ནོར་དང་ལྡན་པའི་ཁྱིམ་བདག་ལ་སོགས་པ་རྒྱལ་སྲིད་རིན་པོ་ཆེ་སྣ་བདུན་དང་། སྲིད་ཞིའི་དཔལ་འབྱོར་ཕུན་སུམ་ཚོགས་པ་ཐམས་ཅད་བློས་བླངས་ནས་ཟད་པ་མེད་པ་ནམ་མཁའ་མཛོད་ཀྱི་ཡོ་བྱད་དང་། ཀུན་ཏུ་བཟང་པོའི་མཆོད་སྤྲིན་གྱི་རྣམ་རོལ་བཞིན་དུ་ཡིད་ཀྱིས་འབུལ་བ་དང་། ཡེ་གདོད་མའམ་འཇིག་རྟེན་ཆགས་པའི་དང་པོ་ནས་ཡོད་པའི་སེམས་ཅན་སྤྱི་མཐུན་གྱི་ལས་ཀྱིས་གྲུབ་པའི་སྟོང་གསུམ་འཇིག་རྟེན་གྱི་ཁམས། གླིང་བཞི་བྱེ་བ་ཕྲག་བརྒྱ་དང་། རི་རབ་ཉི་ཟླ་བྱེ་བ་ཕྲག་བརྒྱ་ལ་སོགས་པ་དང་། ཤར་གསལ་བྱེད་ཉི་ཟླའི་སྒྲོན་མེ། ལྷོ་ཙན་དན་ནགས་ཀྱི་བདུག་སྤོས། ནུབ་གངས་དཀར་མར་གྱི་ལྷ་བཤོས། བྱང་ཟླ་ཀླུང་སྔོན་མོའི་དྲི་ཆབ། སྟེང་གཡུ་འབྲུག་སྒྲ་ཡི་རོལ་མོ། འོག་ས་གཞི་མཛེས་པའི་མེ་ཏོག་སྟེ་མ་བཀོད་རང་བྱུང་གི་རྣམ་ལྔ་དང་། སྟེང་ལྷ་ཡུལ་གྱི་འདོད་ཡོན། འོག་ཀླུ་ཡུལ་གྱི་འབྱོར་བ། བར་མི་ཡུལ་གྱི་ལོངས་སྤྱོད་ཇི་སྙེད་ཡོད་པ་དེ་དག་ཐམས་ཅད་ཀུན་ཀྱང་བློ་ཡིས་བླངས་ཏེ། མགོན་པོ་འོད་དཔག་མེད་འཁོར་དང་བཅས་པ་རྣམས་ལ་ཕུལ་བ་ལགས་པས། ཁྱེད་རྣམ་པ་ལ་དངོས་འཛིན་གྱི་ཉེར་ལེན་ཡོད་པ་མ་ཡིན་ཡང་བདག་དང་སེམས་ཅན་ཐམས་ཅད་མཐར་ཐུག་སངས་རྒྱས་ཐོབ་པ་དང་གནས་སྐབས་བདེ་བ་ཅན་དུ་སྐྱེ་རྒྱུར་ཕན་པའི་ཕྱིར་དུ་ཐུགས་རྗེ་ཆེན་པོའི་སྟོབས་ཀྱིས་བཞེས་པར་མཛོད་ཅེས་བསྐུལ་ནས། ཐུགས་དགྱེས་པ་ཆེན་པོས་བཞེས་སོང་སྙམ་ནས་ཕུལ་ན། རང་ཉིད་ལ་ཕུལ་བའི་སེམས་སྟོབས་ཡོད་ན་རྒྱལ་བ་སྲས་བཅས་ལ་བཞེས་པའི་ནུས་པ་ཡོད་པ་ཡིན། སྤྱིར་དངོས་འབྱོར་ཡིད་སྤྲུལ་གྱི་མཆོད་པ་གང་ཡིན་ཡང་ཀུན་རྫོབ་རྟེན་འབྲེལ་གྱི་རོལ་བ་དོན་ལ་དངོས་པོ་དང་མཚན་མར་མ་གྲུབ་པའི་རྒྱུ་མཚན་ཤེས་རྒྱུ་གནད་ཆེ་བ་དང་། ལས་དང་པོ་བ་དག་གིས་མང་པོའི་སྤྲོས་པ་མ་ཤེས་ཀྱང་། ཆུ་གཙང་མ་དང་མེ་ཏོག་ཡག་པ་སོགས་རང་བཞིན་གྱིས་ཡིད་དུ་འོང་བའི་དངོས་པོ་ཅི་ཞིག་མཐོང་ཐོས་མྱོང་ཚོར་བྱུང་ཡང་དེ་རྒྱལ་བ་འོད་དཔག་མེད་འཁོར་དང་བཅས་པ་ལ་ཡིད་ཀྱིས་ཕུལ་ཞིང་། རང་གཞན་ཐམས་ཅད་བདེ་བ་ཅན་ལ་སྐྱེ་བར་ཤོག་ཅིག་བསམས་ན་ཚོགས་ཞར་དང་ཞོར་ལ་རྫོགས་པ་ཡིན། ཡིན་ནའང་ང་ཚོས་དགེ་བ་ཆེན་པོ་ཞིག་བསྒྲུབ་རྒྱུ་ལ་ནི་སེམས་དཔའ་ཞུམ་ནས་སྒྲུབ་མི་ཐུབ་ཅིང་། ཆུང་ཆུང་ཞིག་གིས་བློ་མ་ཚིམ་ནས་བརྙས་པའི་དབང་གིས་དགེ་རྩ་ཆེ་ཆུང་གཉིས་ཀ་མི་འགྲུབ་པར་ལྷག་པ་ཡོད་པས། ཚོགས་བསག་ནི་ནོར་གྱིས་ཕྱུག་མིན་ལ་ཐུག་མེད་པ་ནི། ཡོད་པོའི་རྟ་ཕོ་རྟ་ཕོ་ཡིན་ཡང་། མེད་པོའི་ར་ཕོའང་རྟ་ཕོ་ཡིན་ཞེས་པའི་དཔེ་ལྟར་ཡིན། དེ་རིང་ཁར་སང་དུས་མགོ་མཇུག་ལོག་པའི་དུས་རེད་རྟ་དང་ར་གཉིས་གང་གིས་དགའ་མི་ཤེས་ཀྱང་། མདོར་ན་རྒྱུ་ཡོད་མེད་དང་དངོས་པོའི་ཆེ་ཆུང་ལ་རག་མི་ལུས་པར་སེམས་དང་དངོས་པོ་རྣམ་པར་དག་མི་དག་ཡིན་པས། ཞིང་བསྒྲུབས་དང་ཞིང་ཁྲིད་ཆེན་མོ་འདི་འདྲའི་སྐབས་སུ་མཆོད་པ་ཆེ་འབྱོར་ཆུང་འབྱོར་རེ་འབུལ་ཐུབ་ན་བསོད་ནམས་ལྷག་པར་ཆེ་བ་ཡིན་ཏེ། སྔགས་ཀྱི་ཆོ་ག་དང་འབྲེལ་བས་མ་ཚད་བླ་སེར་དམ་པ་མང་པོ་དང་། རྟེན་གསུམ་ཁྱད་པར་ཅན་མང་པོའང་བཞུགས་པས་ན། རྟེན་གྱི་ཁྱད་པར་འཕགས་པ་དང་། སྦྱོར་དངོས་རྗེས་གསུམ་ཚང་བ་ལ་སོགས་པ་དམིགས་པའི་ཐད་ཀྱི་འགྱུར་ཁྱད་ཆེན་པོ་ཡོད་པའི་ཕྱིར། དེས་ན་མཆོད་འབུལ་ལ་གཟོབས་དང་རང་གི་བསོད་ནམས་ལོངས་སྤྱོད་དང་ཁ་རྗེ་དབང་ཐང་ལ་ཕན་ཐོགས་ཡོད་པ་ཡིན། རྒྱུ་ཆོས་ཕྱོགས་ལ་བཏང་ནས་ནོར་ལས་ནོར་གྱི་སྙིང་པོ་ལེན་པ་ནི་ཚོང་པ་ཞིག་གིས་ནོར་རྫས་ཀྱི་སྐྱེད་སྤེལ་བ་དང་། སོ་ནམ་པས་ཞིང་ས་བཟང་པོ་ལ་ས་བོན་བཏབ་པ་དང་འདྲ་བར་ཚེ་འདི་དང་ཕྱི་མར་ལོངས་སྤྱོད་བརྒྱ་འགྱུར་སྟོང་འགྱུར་དུ་འཕེལ་བའི་ཐབས་དང་ལམ་ཞིག་ཡིན་པས། ནོར་ལོངས་སྤྱོད་སྒྱུ་མའི་དངོས་རྫས་དེ་འཆི་རན་དུས་ངེས་པར་དུ་སྐྱུར་རྒྱུ་ཡིན་ཕྱིར་ནོར་ལས་ནོར་གྱི་སྙིང་པོ་ཞིག་བླངས་ཏེ། ཚེ་ཕྱི་མའི་ཡུལ་ལ་ཁུར་ན་མི་ལོ། དེད་ན་མི་འགྲོ་བའི་དངོས་པོ་འདི་ཐམས་ཅད་བསོད་ནམས་གྱི་ཚོང་རྫས་ཤིག་དང་བརྗེས་ནས། ཕྱི་མའི་ཡུལ་དུ་དེ་བས་མང་ཞིག་ཡོད་པ་ཞིག་བྱེད་དགོས་པ་ཡིན། བེད་མེད་ཀྱི་རྒྱུ་རྫས་འདི་དག་བེད་སྤྱོད་ཤེས་ན་ཕན་ཐོགས་ཡོད་པའི་དངོས་པོ་ལ་དེ་ལྟར་སྒྱུར་ཆོག་པ་ཡིན། རྒྱུ་དང་པོར་གསོག་ཤེས་པས་མི་ཕན་པར་ཐ་མ་སྤྱོད་ཤེས་དགོས། དེ་མ་ཤེས་ན་ཚེ་འདི་ཕྱི་གཉིས་ཀར་གནོད་པའི་གཞི་མ་རུ་འགྲོ་བ་ཡིན། རྒྱལ་སྲས་ཞི་བ་ལྷས། བསགས་དང་བསྲུང་དང་བརླག་པའི་གདུང་བ་ཡིས། །ནོར་ནི་ཕུང་ཁྲོལ་མཐའ་ཡས་ཤེས་པར་བྱ། །ཞེས་གསུངས་པ་ལྟར་དུ་ཚེ་འདིར་དེའི་དོན་དུ་དཀའ་ཚེགས་སྡུག་བསྔལ་མྱོང་བས་མ་ཚད་ཕྱི་མར་ཡང་དེ་ལ་ཆགས་ཞེན་སྐྱེས་ནས་དེ་བས་ཐུ་བའི་སྡུག་བསྔལ་མྱོང་བའི་རྒྱུ་བྱེད་པ་ཡིན། ལར་མ་གཞི་མཆོད་སྦྱིན་ཞིག་མ་ཐུབ་ན། རྒྱུ་བསགས་པས་མི་སོག་བསོད་ནམས་བསགས་པས་སོག །ནོར་སྤྱད་པས་མི་ཟད་བསོད་ནམས་ཟད་དུས་འཛད། །ཅེས་པ་དང་། འབད་རྩོལ་རི་བོ་ཙམ་ཞིག་བྱེད་པ་ལས། །བསོད་ནམས་མེ་སྟག་ཙམ་ཞིག་བསགས་ན་དགའ། །ཞེས་གསུངས་ཡོད། ཕོ་ཐ་མའིརྒྱུ་རྫས་དེ་ཇི་ལྟར་ཟད་ན། གྱོད་ཁ་མཆུ་དང་། རྒྱལ་ཆང་རག་ལ་ཤོར་བ་ཡིན། དེ་འདི་མེད་ཕྱི་མེད་གཉིས་ཀ་རེད། ཕོ་འབྲིང་པོ་ཞིག་གི་ལོངས་སྤྱོད་དེ་གཉེན་དང་སྟོན་མོ་ལ་ཟད་པ་ཡིན། ཚེ་འདིའི་གཏམ་དང་མགོ་རྣ་ཙམ་མ་གཏོགས་ཚེ་ཕྱི་མའི་ལམ་ལ་ཕན་ཐོགས་མ་ཡོད་པ་རེད། སྐྱེས་ཕོ་རབ་ཀྱི་གསོག་པ་དེ་ཆོས་ཕྱོགས་ལ་ཟད་པ་ཡིན། དེ་ནི་རང་དོན་གཞན་དོན་གཉིས་ཀ་དང་། རང་སྐྱིད་གཞན་སྨོན་གཉིས་ཀ་རེད། ཚེ་འདིར་སྐྱིད་ལ་ཕྱི་མ་ཡང་བདེ་བ་ཡིན། བསོད་ནམས་རྣམ་པར་དག་པ་ཞིག་བསག་ཐུབ་ན། དེ་ལ་རྒྱུ་མ་རྩ་ཆེན་པོ་ཞིག་དགོས་པ་མ་རེད། དཔེར་ན་འཁོར་ལོས་སྒྱུར་བའི་རྒྱལ་པོ་ང་ལས་ནུ་ཟེར་བ་དེས་མི་ཡུལ་གླིང་བཞི་ལ་དབང་བསྒྱུར་བས་མ་ཚད། ལྷ་ཡུལ་སུམ་ཅུ་རྩ་གསུམ་གྱི་ལྷའི་དབང་པོ་བརྒྱ་བྱིན་དང་གདན་གཅིག་ལ་འདུག་ཐུབ་པའི་དབང་ཐང་དང་བསོད་ནམས་ཡོད་པ་དེ་ཡང་སྔོན་སངས་རྒྱས་བསོད་སྐྱབས་འཇིག་རྟེན་དུ་བྱོན་དུས་དེར་སྲན་རྡོག་བདུན་གྱིས་མཆོད་པ་ཕུལ་བའི་འབྲས་བུ་ཡིན་པར་གསུངས་ཤིང་། དང་པོར་རྒྱུ་ཞིག་ཡོད་པར་བྱས་ཏེ། དེ་ནས་བསོད་ནམས་བསག་དགོས་སྙམ་ན་དེ་ལྟར་མ་ཡིན་ཏེ། རྒྱུ་ཡོད་དུས་བསོད་ནམས་གསོག་པ་སྨྲོས་མ་དགོས་ཀྱང་། རྒྱུ་ཡོད་པའི་ཆེད་དུའང་བསོད་ནམས་བསག་དགོས་པ་ཡིན། བསོད་ནམས་གསོག་བྱེད་ལ་རྒྱུ་ཆེ་ཆུང་མེད་ཚུལ་གོང་དུ་བཤད་པ་ལྟར་ཡིན། རྒྱུ་བསགས་ནས་སེམས་ཁ་གང་བ་དཀོན་ཏེ། སྟོང་གསུམ་ཁམས་ཀྱི་རྒྱུ་རྫས་ལོངས་སྤྱོད་ཐམས་ཅད་མི་གཅིག་ལ་དབང་ནའང་ཚིམ་དཀའ་སྟེ། མི་རྒྱུ་ཡོད་སྨྱོ། ཟོག་རྩྭ་ཡོད་སྨྱོ། ཞེས་པ་ལས་མ་འདས། སེམས་ལ་ཆོག་ཤེས་མ་སྐྱེས་བར་དུ་རྒྱུ་ལ་སོག་དུས་ཤིག་ག་ལ་ཡོད། རྒྱུ་མེད་པས་མི་ཕོངས་ཡོད་པས་ཕོངས། ཞེས་པ་ལྟ་བུ་རེད། རི་རབ་འདྲ་ཞིག་ཡོད་ཀྱང་མ་ཆོག་པར་ཏིལ་འབྲུ་ཙམ་ཞིག་ལ་ཞེན་ཆགས་ཏེ་བཙལ་བས་སྲོག་ཀྱང་ཕུང་རབས་ཡོད། དེ་ཡང་གཏམ་རྒྱུད་ཅིག་དང་སྦྱར་ནས་བཤད་ན། གནའ་སྔ་མོ་མི་ཞིག་གིས་སྲན་མའི་སྟོན་ཐོག་བླངས་རྗེས་སྲན་མ་ཁུར་པོ་ཞིག་ཁྱེར་ཡོང་བ་ཤིང་སྡོང་ཞིག་གི་རྩར་ཐོན་ཚེ་སྲན་མའི་ཁུར་པོ་བཞག་ནས་ཕར་བཤང་གཅི་འདོར་དུ་སོང་བའི་ཤུལ་ནས། སྡོང་པོའི་རྩེ་ནས་ཨ་དགེ་སྤྲེའུ་ཞིག་མར་བབ་ནས་སྲན་མ་སྤར་གང་བླངས་ཏེ། ཡར་ཤིང་སྡོང་རྩེར་འཛེགས་ནས་འགྲོ་སྐབས་སྲན་རྡོག་གཅིག་ས་ཐོག་ལ་ལྷུང་ཤོར་བས། སྤྲེལ་རྒན་སེར་སྣ་ཤོར་ཏེ་སྤར་བ་གང་པོའང་བོར་ནས། མར་བབ་སྟེ་སྲན་རྡོག་གཅིག་པོ་དེ་བཙལ་སྐབས་མི་དེ་ཕྱིར་ཡོང་ནས་རྡོ་ལོག་གཅིག་བརྒྱབ་ནས་སྤྲེལ་རྒན་བསད་པ་རེད། དེ་ལྟར་སྲན་རྡོག་གཅིག་གི་དོན་དུ་སྤྲེལ་རྒན་གྱི་སྲོག་ཤོར་བ་ཡིན་ལ། སྤར་བ་གང་པོ་དེ་ཁྱེར་ནས་སོང་ཡོད་ན་སྲན་མ་མང་པོ་ཐོབ་ཡོད་ཀྱང་། དེས་མ་འཚེངས་པར་ད་དུང་སྲན་རྡོག་ཁེ་རུ་ཞིག་ཨེ་ལོན་བལྟ་ས་ནས་མཇུག་འབྲས་དེ་ལྟར་བྱུང་བ་ཡིན། དེ་ན་ལྷ་ཞིག་ཡོད་པ་དེས་སྨྲས་པ། སྲན་མ་སྤར་གང་བོར་ནས་སུ། །གང་ཞིག་འབྲུ་མ་གཅིག་འཚོལ་བ། །ཤིན་ཏུ་ཚེགས་མང་ལྡན་པ་ཡི། །ཀྱཻ་མ་སྤྲེའུ་འདི་རེ་རྨོངས། །ཞེས་དཔེ་བལྟ་ས་ཞིག་ཏུ་གྱུར་པ་ཡིན། ཡང་ཆགས་ཞེན་དང་སེར་སྣ་ཅན་དག་གིས་ནོར་གང་བཟང་ཐམས་ཅད་བཞག་ནས་ངན་པ་དག་དང་པོར་བེད་སྤྱོད་བྱེད་ས་ནས་ཕུང་བའི་དཔེ་ཡང་ཡོད་དེ། གནའ་མུ་གེ་ཚེས་པའི་དུས་ཤིག་ལ། གླང་པོ་ཆེ་མང་པོ་ཡོད་པའི་ནགས་ཆེན་པོ་ཞིག་གི་གསེང་ལ་རྔོན་པ་ཞིག་སོང་ནས། གླང་པོ་ཆེ་ཞིག་ལ་དུག་མདའ་བརྒྱབ་སྐབས། གླང་པོ་ཆེས་རྔོན་པ་མཐོང་ནས་རྔོན་པའི་ཐོག་ཏུ་བརྒྱུགས་ཏེ་རྫི་བསྣོས་བྱས་པས་མཐར་གཉིས་ཀ་ཤི་བ་དང་། རྐུན་མའི་ཚོགས་པ་ལྔ་བརྒྱ་ཡོད་པ་ཞིག་དེར་ཐོན་ནས་གླང་ཆེན་གྱི་རོ་མཐོང་དུས། མི་ཕྱེད་ཀྱིས་གླང་ཆེན་གྱི་ཤ་འཚོད་པ་དང་། མི་ཕྱེད་དེ་ཐག་རིང་གི་གནས་སུ་ཆུ་ལེན་དུ་སོང་བས། དེ་དག་སྤྱི་ལ་བགོ་རྒྱུའི་རྐུས་རྫས་ཤིག་ཡོད་ཕྱིར། ཤ་འཚོད་མཁན་ཚོས་སེམས་ངན་ཞིག་དྲན་ནས་ཆུ་ལེན་ཚོ་མ་ཐོན་གོང་དུ་ང་ཚོས་ཤ་བརྒྱགས་ཚད་ཟོས་ཏེ་ལྷག་མའི་ནང་དུ་དུག་བཏབ་ན་ཆུ་ལེན་མཁན་དག་ཤི་རྗེས་རྐུས་རྫས་བདག་པོ་ང་ཚོ་མ་གཏོགས་མེད་ཅེས་དེ་ལྟར་བསྒྲུབས་པ་དང་། ཆུ་ལེན་ཚོས་ཀྱང་དེ་བཞིན་དུ་སེམས་ངན་ཞིག་དྲན་ནས། ང་ཚོས་ཆུ་བརྒྱགས་ཚད་འཐུང་ཚར་རྗེས་ཆུ་སྣོད་ནང་དུག་བཏབ་ནས་རོགས་པ་ཚོར་བླུད་ན་ཁོ་ཚོ་ཤི་རྗེས་རྐུས་རྫས་ཀྱི་བདག་པོ་ང་ཚོ་ཡིན་ཞེས་བགྲོས་ནས་དེ་ལྟར་བྱས་པས། མཐར་ཐམས་ཅད་ཤི་སོང་བའི་མཚམས་དེར་ལས་དབང་གིས་དེད་པའི་ཝ་ལྟོགས་རྒས་པ་མིག་ཞར་ཞིག་དེར་ཐོན་པ་དང་། ཝ་རྒན་གྱིས་རོ་ཚང་མ་མཐོང་དུས། ད་ནི་ཟླ་བས་མི་ཚད་ལོ་མང་པོར་ཟ་རྒྱུ་ཡོད་འདུག་སྙམ་ནས་ཆགས་སེམས་ཀྱིས་བདག་བཟུང་བྱས་ཏེ། སེར་སྣ་ཅན་གྱི་ཆོས་ལུགས་ནི་བཟང་པོ་དེ་རྗེས་ལ་བཞག་ཅིང་མནན་ནས། ངན་པ་དེ་སྔོན་ལ་བེད་སྤྱོད་གཏོང་བ་ཞིག་ཡིན་ཕྱིར། ཝ་རྒན་གྱིས་སེམས་ལ་གྲོག་ཆེན་པོ་ཞིག་དང་ད་རེས་འཕྲད་ཐལ། རྙེད་པ་ཆེན་པོ་ཞིག་ང་ལ་དེ་རིང་ཐོབ་པ་རེད། འདི་རིམ་གྱིས་རིམ་གྱིས་ག་ལེར་ཟ་དགོས་པས། དང་པོར་གཞུ་རྒྱུན་གྱོང་པོ་འདི་དག་ཟ་དགོས་སྙམ་ནས་གཞུ་རྒྱུན་འཆོས་པས། གཞུན་རྒྱུན་ཆད་པ་དང་གཞུ་མཆོག་རྐན་ལ་ཕོག་ནས་ཝ་རྒན་དེ་རུ་ཤི་བ་ཡིན། ཡང་དེ་ན་ཡོད་པའི་ལྷ་ཞིག་གིས་སྨྲས་པ། བསགས་པར་ཡང་ནི་བྱ་བ་དེ། །ལྷག་པར་བསགས་པ་མི་བྱའོ། །བསགས་ལ་ཆགས་པས་ཝ་ལོང་བ། །གཞུ་ཡིས་བསད་པར་གྱུར་ལ་ལྟོས། །ཞེས་དཔེ་ལེན་ས་གཅིག་ཏུ་གྱུར་པ་ཡིན། ནོར་རྫས་ཞེས་པ་དེ་རྩྭ་མགོའི་ཟིལ་བ་ལྟ་བུ་ད་ནང་ཡོད་ཀྱང་དོ་དགོང་ཨེ་ཡོད་མི་ཤེས་པ་དང་། འདི་ནི་དགྲ་རྐུན་ལག་གཡུག་བྱས་ནས་འབོད་པའི་གཡབ་མོ་ལྟ་བུ་དང་། རྒྱུ་ར་ཞིག་ཡོད་པ་ལ་སྡུག་རེའུ་ཞིག་ཡོད་པ་ནི་ཆོས་ཉིད་ལྟ་བུ་ཞིག་དང་། རྒྱུ་ནོར་རྫས་འདིའི་དོན་དུ་རྒྱུ་འབྲས་བསྣོགས་ནས་ངན་སོང་དམྱལ་བའི་གཏིང་རྡོ་བྱེད་པའི་ཁེ་ཆུང་ལ་ཉེན་ཁ་ཆེན་པོ་ཅན་གྱི་བྱ་བ་མི་བྱེད་པར་དལ་འབྱོར་གྱི་ལུས་རྟེན་ཞིག་ཐོབ་པའི་དུས་འདིར་བསོད་ནམས་བསགས་པའི་ལོངས་སྤྱོད་ཀྱིས་ཁ་གསོ་དགོས་པ་ལས་སྡིག་དང་འབགས་ནས་ཁ་གསོ་བ་ནི་ཁྲ་དང་སྤྱང་ཀི་ལ་སོགས་པ་དུད་འགྲོ་གཏུམ་པོ་དག་དང༌། གཡོ་སྒྱུའི་སྒོ་ནས་ལོག་འཚོ་བྱེད་པ་ནི་དུར་ཁྲོད་ཀྱི་ཝ་མོ་ཁྲམ་པའི་འགྲོ་ལུགས་ལས་མ་འདས་པ་ཞིག་ཡིན། གཞན་ཡང་། ཡོན་ཏན་མེད་པའི་དཀོར་ནོར་དང༌། །སྡིག་ཟས་ཁྲམ་པའི་ལོངས་སྤྱོད་གཉིས། །རྙེད་དུས་ཡོད་ཀྱང་སོག་དུས་མེད། །བསོག་པ་ལ་སྙིང་པོ་མི་འདུག་ཨཾ། །ཞེས་གསུངས་པ་ལྟ་བུ་ཡིན་པས་རྒྱུ་ནོར་རྫས་ཤིག་གི་དོན་དུ་ལོ་བརྒྱ་ཡི་བར་དུ་རྒྱུ་མས་སྐ་རགས་དང་མཆི་མས་སྐོམ་རྩི་བྱས་ནས་སྡུག་འབད་བྱེད་པ་ལས་ཞིང་ཁྲིད་འདི་ལྟ་བུའི་སྐབས་སུ་ཇ་ཡུན་ཙམ་རེ་ལ་ཕྱག་སྐོར་བ་རེ་དང༌། ནས་འབྲུ་རྡོག་མ་རེ་དང་། མེ་ཏོག་རྐང་གཅིག་ལས་མེད་རུང༌། སངས་རྒྱས་འོད་དཔག་མེད་ལ་མཆོད་སྙམ་ནས་ཕུལ་ན་བསོད་ནམས་སོག་སྟོབས་ཆེ་ཞིང་འབྲས་བུ་མནོག་པ་སྟེ། གནའ་སྔ་མོ་རྒྱ་གར་གྱི་གྲོང་ཁྱེར་རྒྱལ་པོའི་ཁབ་ཏུ་བྲམ་ཟེ་བཟའ་མི་གཉིས་ཡོད་པ་དེས་ཁ་རྒྱབ་གཉིས་ཀྱི་དོན་དུ་འབད་རྩོལ་འདི་མ་བྱས་བསམ་པ་ཞིག་མེད་ཀྱང༌། ཁ་བརྒྱགས་ལྟོ་བརྒྱགས་ཉི་མ་གཅིག་ཙམ་ལའང་ཡོང་རྒྱུ་མེད་པར་སྤྲང་པོ་ཁོ་ན་ལས་མ་འདས། དེ་གཉིས་ཀྱིས་དགེ་འདུན་པ་ལ་བསོད་སྙོམས་ཕུལ་ན་ཕྱུག་པོར་འགྱུར་བ་ཐོས་པས། བཟའ་ཚང་གཉིས་ཀྱིས་སློང་མོ་དང་གླ་བྱས་པའི་སྤྲང་ཟས་དང་གླ་ཟས་ལོན་ཚད་པོ་ཁར་ཟ་ལྟོར་འགྲོ་བྱེད་མ་བྲ་བར་བསགས་བསགས་པའི་མཐར་དགེ་འདུན་ལ་བསོད་སྙོམས་ཉིན་གཅིག་ཕུལ་བ་དང་། བྲམ་ཟེའི་ཆུང་མས་བསྙེན་གནས་ཀྱི་སྡོམ་པ་ཞིག་ཀྱང་བླངས་སོ། །དེའི་སྐབས་སུ་ཡུལ་དེའི་རྒྱལ་པོ་གསལ་རྒྱལ་ཡིན་ལ། རྒྱལ་པོ་གསལ་རྒྱལ་ཉིན་དེར་ཁམས་བསང་གི་ཆེད་དུ་ཕྱི་རོལ་ལ་སོང་ནས་ཕྱིར་ཡོང་བའི་ལམ་ཁར་བཙོན་པ་ཞིག་ཤིང་སྡོང་ལ་བཀྱིགས་ནས་བཅིངས་ཏེ་ཉམ་ཐག་པ་འཆི་ལ་ཐུག་པ་ཞིག་དང་ཐུག་པ་དང་། དེས་རྒྱལ་པོ་ལ་ཟ་རྒྱུ་ཞིག་སྦྱིན་པར་ཞུས་པས། རྒྱལ་པོས་བསྐུར་བར་ཞལ་གྱིས་བཞེས་སོ། །རྒྱལ་པོ་ཕོ་བྲང་ནང་འབྱོར་དུས་རྒྱལ་སྲིད་ཀྱི་བྲེལ་ཏེ་བརྗེད་སོང་བ། ནམ་ཕྱེད་ཙམ་ལ་དྲན་པས་རྒྱལ་པོའི་སྨྲ་བ་ལན་གཅིག་བཤད་ཚར་ནས་མ་བསྒྲུབས་ཐབས་མེད་ཡིན་པས་འཁོར་གཡོག་ཐམས་ཅད་ལ་བཙོན་ཟས་སྐྱེལ་དུ་འགྲོ་དགོས་པས་སུ་འགྲོ་དྲིས་པར། གྲོང་ཁྱེར་གྱི་ཕྱི་རོལ་ན་འདྲེ་གདོན་མང་པོ་ཡོད་ཅིང་། ནམ་གུང་མི་སུ་ཞིག་ཕྱི་ལ་སོང་ཡང་གསོན་ཟ་མ་གཏོགས་མི་ཐར་བ་ཤེས་པས་གཅིག་གིས་ཀྱང་ཟ་མ་སྐྱེལ་དུ་ང་འགྲོ་ཟེར་མཁན་མ་བྱུང་། རྒྱལ་པོའི་སྨྲ་བ་ལན་གཅིག་པོ་དེའི་ཐོག་ལ་མ་བསྡད་ན་ཁྲེལ་ཁ་ཆེན་པོ་རྒྱལ་སྲིད་ཉམས་པའི་རྒྱུ་ཡིན་པས། རྒྱལ་པོས་ཡང་བསྐྱར་གསུངས་རྒྱུར། བཙོན་པར་ཁ་ཟས་སྐྱེལ་བར་འགྲོ་ཕོད་མཁན་ཡོད་ན་དེ་ལ་དཔའ་དར་གསེར་སྲང་སྟོང་ཕྲག་ཅིག་སྦྱིན་པ་ཡིན་ཞེས་ཕོ་བྲང་གི་ཁོར་ཡུག་གྲོང་ཁྱེར་ཐམས་ཅད་ལ་ཁྱབ་བསྒྲགས་བྱས་པས། ཁྱབ་བསྒྲགས་བྱས་དུས་མི་སུ་གཅིག་ཀྱང་འགྲོ་མ་ཕོད་ཅིང་། ཁས་ལེན་མཁན་སུ་ཡང་མ་ཡོད་པའི་སྐབས་དེར། བྲམ་ཟེའི་ཆུང་མ་དེས་བསམ་པར་ངས་དེ་རིང་བསྙེན་གནས་ཡན་ལག་བརྒྱད་པའི་སྡོམ་པ་བླངས་ཡོད་པས། འདྲེས་གནོད་མི་ཐུབ་པས་འགྲོ་བར་བྱའོ་སྙམ་ནས། རྒྱལ་པོའི་ཕྱག་གི་ཟ་མ་དེ་བླངས་ཏེ་ཐེ་ཚོམ་ཙམ་ཡང་མ་བྱས་པར་གྲོང་ཁྱེར་གྱི་ཕྱི་རོལ་ལ་བུད་པ་དང་། སྲིན་མོ་བུ་ལྔ་བརྒྱ་སྐྱེས་ཏེ་ལྟོགས་ནས་ཅི་ཟ་འདི་ཟ་མེད་པར་བསྡད་ཡོད་པ་ཞིག་དང་ཐུག་པས། དེས་དེ་མ་ཐག་ཏུ་ཟ་རྒྱུ་ཞིག་ལོན་ཐལ་སྙམ་ནས་ཐོག་ཏུ་མཆོངས་པས་ཟུར་ལ་ཐོན་པ་ན་དེས་བསྙེན་གནས་ཀྱི་སྡོམ་པ་བླངས་ཡོད་པར་ཤེས་ནས་ཟ་མ་ཕོད་དེ། སྲིན་མོས་བཤད་རྒྱུར་དགེ་བསྙེན་མ་ཁྱེད་ཀྱིས་ཁྱེར་ཡོད་པའི་ཟ་མ་དེ་ལས་ཅུང་ཟད་ཅིག་ཨེ་སྦྱིན་ཞེས་བསླངས་པས། དགེ་བསྙེན་མས་ཏོག་ཙམ་བྱིན་པ་དེ་དགེ་བསྙེན་མའི་སྡོམ་པའི་ཚུལ་ཁྲིམས་ཀྱི་བྱིན་རླབས་ཀྱིས་མང་དུ་འཕེལ་ནས། སྲིན་མོ་མ་སྨད་ལྔ་བརྒྱ་པོ་ཚང་མ་ཚིམས་པར་གྱུར། སྲིན་མོ་དགའ་ནས་འདིར་གསེར་བུམ་པ་གང་ཡོད་པ་འདི་ཁྱེད་ལ་འབུལ་བ་ཡིན་པས་ཁྱེད་ཀྱིས་ཁྱེར་སོང་ཞེས་གསེར་བུམ་པ་གང་རྙེད་པར་གྱུར། དེ་ནས་ཕར་ལ་སོང་དུས་དེ་དང་འདྲ་བའི་ལྷ་འདྲེ་མི་མ་ཡིན་ཤ་ཟའི་རིགས་སུ་གྱུར་པ་འདྲ་མི་འདྲ་མང་པོ་དང་ཕྲད་པ་དེ་ཐམས་ཅད་ལ་རང་རང་གིས་འདོད་པ་ལྟར་ཕན་བཏགས་པས་གནོད་པ་སྐྱེལ་མཁན་སུ་ཡང་མེད་པས་མ་ཚད་དེ་དག་གིས་དྲིན་དུ་ཕུལ་བའི་གསེར་བུམ་པ་གསུམ་ཐོབ་པར་གྱུར། དེ་ནས་ཕར་སོང་དུས་བཙོན་པ་དེ་ལ་ཐུག་ནས་ཁ་ཟས་བྱིན་ཏེ་ཚུར་ལ་འོང་བས། རྒྱལ་པོ་གསལ་རྒྱལ་གྱིས་ཀྱང་གསེར་སྲང་སྟོང་བྱིན་པས། བྲམ་ཟེ་བཟའ་མི་གཉིས་ནི་ཉིན་དེ་ནས་བཟུང་ཕྱུག་པོར་གྱུར། དེ་གཉིས་ཀྱིས་དེ་ནི་དགེ་འདུན་པ་ལ་བསོད་སྙོམས་ཕུལ་བའི་འབྲས་བུ་ཡིན་པར་ཤེས་ནས་ལྷག་པར་དུ་དགེ་འདུན་པ་ལ་བསོད་སྙོམས་ཕུལ་བས། ཇེ་ཕྱུག་དང་ཇེ་དར་ལ་སོང་ནས་བྲམ་ཟེ་དེའང་རྒྱལ་པོ་གསལ་རྒྱལ་གྱི་བློན་པོར་གྱུར་ཏོ། །དེ་ལྟར་ཞིང་དག་པ་ཞིག་ལ་ཚོགས་བསགས་ན་རྒྱུ་ཆུང་ཡང་བསོད་ནམས་ཀྱི་འབྲས་བུ་དེ་འདྲའི་ཆེན་པོ་ཐོབ་ཏུ་ཡོད་པས་མི་ཚད། འཛམ་གླིང་ལས་ཀྱི་ས་པ་འདིར་ལས་སྔ་དྲོ་བསགས་ན་ཕྱི་དྲོར་སྨིན་ཏེ་འབྲས་བུ་འབྱིན་སླ་བ་ཡིན། ལར་མཆོད་སྦྱིན་ཞིག་བྱེད་འདོད་ཀྱང་སེམས་ཤེད་ཡོད་དུས་རྒྱུ་ཤེད་མེད་པ་དང་། རྒྱུ་ཤེད་ཡོད་རུང་སེམས་ཤེད་མེད་པར་ཆགས་ནས་གཉིས་ཀ་འཛོམས་པ་དཀའ་མོ་དང་དཀོན་པོ་ཡིན་ན་ཡང་། དངོས་པོ་ཆེ་ཆུང་ལ་མ་ལྟོས་པར་ཐ་ན་སྤྲང་ཟས་ཡན་ཆད་ཕུལ་ནས་བསྙེན་གནས་ཀྱི་སྡོམ་པ་ཙམ་རེ་སྲུང་ཐུབ་ན་ཚེ་འདིར་རིག་རིག་ལྟས་ལྟས་ལ་མཐོང་ཆོས་མྱོང་འགྱུར་གྱི་འབྲས་བུ་དེ་ལྟར་སྨིན་དུ་ཡོད་པ་ཡིན་ན་ཚེ་ཕྱི་མ་ལ་ཅིའི་ཕྱིར་མེད་དེ་ངེས་པར་ཡོད་པ་ཡིན། འདུལ་བ་ལས་ཀྱང་། དགེ་བ་ཆུང་ཡང་བརྙས་མི་བྱ། །དེ་ནི་བདག་ལ་མི་ཕན་མིན། །ཆུ་ཡི་ཐིགས་པ་བསགས་པ་ཡིས། །སྣོད་ཆེན་གང་བར་འགྱུར་བ་བཞིན། །དམ་པ་མཆོག་གི་བསོད་ནམས་ནི། །ཉུང་ངུ་ཉུང་ངུ་བསགས་ནས་རྫོགས། །ཞེས་གསུངས་པ་ལྟར། ཆུ་ཐིགས་པ་རེ་རེ་ལ་བརྙས་རྒྱུ་མེད་པར་བསགས་ན་ཐ་མར་སྣོད་ཆེན་གང་བའི་དཔེ་བཞིན་དུ་དགེ་བ་ཆུང་ཆུང་རེད་སྙམ་ནས་མ་བརྙས་དང་དགེ་རྩ་ཆུང་ཆུང་གིས་འབྲས་བུ་ཆེན་པོ་འབྱིན་པ་ཡིན། གཙོ་ཆེ་བ་ཞིང་དང་བསམ་པ་དངོས་པོ་གསུམ་ཀ་དག་དགོས་པ་ཡིན། གནའ་སྔ་མོ་སངས་རྒྱས་བཅོམ་ལྡན་འདས་ཞལ་བཞུགས་ཡོད་པའི་གནས་སྐབས་སུ་རྒྱ་གར་མཉན་ཡོད་དུ་བསྙེན་དགའ་མོ་ཞེས་པ་ཡུལ་ཁམས་དེར་ཉུལ་ནས་སྤྲང་ཟས་ཀྱིས་ཁ་གསོ་བའི་དབུལ་མོ་ཞིག་ཡོད་པ་དེ་འཁྱམས་ནས་འགྲོ་བའི་སྐབས་ཤིག་ལ། མོས་རྒྱལ་པོ་དང་ཁྱིམ་བདག་ཕྱུག་པོ་དག་གིས་སངས་རྒྱས་འཁོར་བཅས་ལ་མཆོད་སྟོན་དང་མར་མེ་མང་པོ་ཕུལ་ནས་བསོད་ནམས་ཆེན་པོ་གསོག་བཞིན་ཡོད་པར་མཐོང་བས། མོས་བསམ་པར། ངས་སྔོན་ཆད་ལས་ངན་ཅི་ཞིག་བསགས་པས་འདི་འདྲའི་རིགས་ངན་ཞིག་ལ་སྐྱེས་པ་དང་། འདི་ལྟར་དུ་དཀོན་མཆོག་གསུམ་ལ་འཕྲད་ཀྱང༌། བསོད་ནམས་གསོག་པའི་རྒྱུ་རྫས་ནི་ང་ལ་མེད་སྙམ་ནས་ཡི་ཆད་བྱས། ཉིན་གང་པོར་སྤྲང་དུ་སོང་ཡང་དོང་ཙེ་ཁེ་རུ་མ་གཅིག་ལས་མ་རྙེད། དེས་མར་ལིང་ཆུང་ཆུང་ཞིག་ཁུག་པས་དེ་དང་བརྗེས་ནས། ཤིན་ཏུ་དགའ་བཞིན་གཙུག་ལག་ཁང་ཏུ་སོང་སྟེ་མར་མེ་ཀོང་ཕྲུག་ཆུང་ཆུང་ཞིག་བཅས་ཏེ་སངས་རྒྱས་ཀྱི་སྤྱན་སྔར་ཕུལ་ནས། བདག་ད་ལྟ་སྤྲང་པོ་ཡིན་པས་མར་མེ་ཆུང་ཆུང་འདི་མ་གཏོགས་འབུལ་རྒྱུ་མེད་རུང་། མར་མེ་ཆུང་ཆུང་འདི་བསམ་པ་རྣམ་པར་དག་པས་ཕུལ་བའི་བསོད་ནམས་ཀྱིས་མ་འོངས་པ་ན་བདག་ཤེས་རབ་ཀྱི་མར་མེ་དང་ལྡན་ཏེ་སེམས་ཅན་ཐམས་ཅད་ཀྱི་རྨོངས་མུན་ཀྱི་དྲི་མ་བསལ་བར་ཤོག་ཅེས་སྨོན་ལམ་བཏབ་ནས་སོང་ངོ། །དེའི་ཕྱི་ཉིན་གྱི་ནངས་མོར་མོའུ་འགལ་གྱི་བུས་ཀོང་བུ་རྣམས་སྡུད་པའི་སྐབས་མར་མེ་ཆེན་པོ་གཞན་ཐམས་ཅད་ནི་ཟད་ལ། བསྙེན་དགའ་མོའི་མར་མེ་ཆུང་ཆུང་དེ་ད་ལྟ་སྦར་མ་ཐག་པ་ཞིག་དང་མཚུངས་པར་འབར་ཞིང་མར་ཁུ་ཁ་མ་དམའ་བར་འདུག་པས། མོའུ་འགལ་གྱི་བུས་མར་མེ་ཉིན་དཀར་སྦར་བ་ལ་དོན་མེད་པས་མཚན་མོར་སངས་རྒྱས་ཀྱི་ཆོས་གསུང་སྐབས་སྦར་དགོས་སྙམ་ནས། མར་མེ་གསོད་པར་བརྩམས་ཀྱང་མ་སོད། དེ་བཅོམ་ལྡན་འདས་ཀྱིས་གཟིགས་ནས། མོའུ་འགལ་གྱི་བུ་ཞོག་ཅིག་མར་མེ་འདི་ཁྱེད་ཉན་ཐོས་ཤིག་གིས་གསོད་མི་ཐུབ་སྟེ། མར་མེ་འདི་སེམས་ཅན་མང་པོའི་དོན་དུ་བསམ་པ་རྒྱ་ཆེན་པོ་བསྐྱེད་པས་ཕུལ་བ་ཡིན་ཞེས་གསུངས། བསྙེན་དགའ་མོ་དེ་མ་འོངས་པ་ན་སངས་རྒྱས་མར་མེའི་འོད་ཅེས་བྱ་བར་ལུང་བསྟན་པ་ཡིན། སྤྱིར་ན་མཆོད་པ་གང་ཕུལ་ན་བསོད་ནམས་ཆེ་མོད། ཁྱད་པར་དུ་མར་མེ་ཕུལ་ན་བསོད་ནམས་ལྷག་པར་ཆེ་བ་ཡིན། སྤྱིར་འཇིག་རྟེན་པ་དག་གིས་ཅུང་ཟད་ཙམ་ཡིན་རུང་ཨེ་ཕན་ན། ཨེ་སྐྱིད་ན་སྙམ་པས་བླ་རྒན་རེའི་ཁ་བཙལ་ནས། འདུལ། གོད་མནན། འགོང་བཀར། སྦྱིན་སྲེག་ལ་སོགས་པ་ཅི་མང་མང་བྱེད་ཀྱང་སྔར་བསགས་བསོད་ནམས་མེད་པའི་བསེ་རག་རང་འཁོར་ལ་བསྒྱུར་དུ་མེད་པ་ཡིན། དེས་ན་ལྷ་འབོད་ཀླུ་འགུགས་བརྒྱ་ཐམ་པ་བྱེད་པ་ལས་ཞིང་ས་ཁྱད་པར་ཅན་ལ་མཆོད་མེ་གཙང་མ་ཀོང་བུ་གང་ལྟ་བུའི་བསོད་ནམས་ཤིག་བསགས་ན་དེས་དགའ་བ་ཡིན། ཚོགས་བསགས་པའི་ཐབས་ལ་ད་དུང་མཎྜལ་འབུལ་རྒྱུ་ཡོད་པ་རེད། དེ་ཡང་མཎྜལ་འབུལ་སྐབས་ཀྱི་ཚོགས་ཞིང་གི་དམིགས་པ་ཕྱག་གི་སྐབས་ལྟར་གསལ་བཏབ་ནས། མཎྜལ་སོ་བདུན་མ་ལྟ་བུ་ཞིག་འབུལ་ན་ལག་པ་གཡོན་པས་མཎྜལ་གྱི་གཞི་བཟུང་ནས་གཡས་པས་བ་བྱུང་དང་དྲི་བཟང་གི་ཆུས་ཆག་ཆག་གདབ། དེའི་འཕྲོར་ལག་པ་གཡས་པའི་མཐེབ་སྲིན་གྱིས་མེ་ཏོག་གི་ཚོམ་བུ་ཞིག་བཟུང་ནས་མཎྜལ་གྱི་གཞི་དེའི་ཐོག་ནས་གཡས་སུ་བསྐོར་མཐར་དབུས་སུ་འཇོག དེའི་འཕྲོར་ལྕགས་རི་བཀོད་ནས། རིའི་རྒྱལ་པོ་རི་རབ་ཟེར་དུས་དབུས་སུ་ཚོམ་བུ་ཆེ་བ་གཅིག་བཀོད། དེའི་འཕྲོར་ཤར་ལུས་འཕགས་པོ་ལ་སོགས་པ་གླིང་བཞི་གཡས་སྐོར་དང་། གླིང་རེ་རེས་ནུབ་དང་ཤར་ལ་གླིང་གཡོག་གཉིས་རེ་རིམ་པས་བཀོད། འདིའི་སྐབས་ཀྱི་ཤར་ནི་འབུལ་ཡུལ་དང་རང་ཕྱོགས་ལ་གོ་ཆོག་པར་གསུངས་ཤིང་། དེ་ནས་རིན་པོ་ཆེའི་རི་བོ་ཤར་ཕྱོགས། དཔག་བསམ་གྱི་ཤིང་ལྷོ་ཕྱོགས། འདོད་འཇོའི་བ་ནུབ་ཕྱོགས། མ་རྨོས་པའི་ལོ་ཏོག་བྱང་ཕྱོགས། དེ་ནས་རྒྱལ་སྲིད་སྣ་བདུན་དང་གཏེར་ཆེན་པོའི་བུམ་པ་བརྒྱད་རིམ་པས་ཕྱོགས་བཞི་དང་མཚམས་བཞི་ལ་བཀོད། སྒེག་མོ་ལ་སོགས་པའི་ཕྱི་སྒེག་བཞི་ཕྱོགས་བཞི་དང་། མེ་ཏོག་མ་ལ་སོགས་པའི་ནང་སྒེག་བཞི་མཚམས་བཞིར་བཀོད། དེ་ནས་ཉི་མ་ཤར། ཟླ་བ་ནུབ། རིན་པོ་ཆེའི་གདུགས་ལྷོ། ཕྱོགས་ལས་རྣམ་པར་རྒྱལ་བའི་རྒྱལ་མཚན་བྱང་ལ་བཀོད། དེ་ནས་ལྷ་དང་མི་ཡི་ལོངས་སྤྱོད་མ་ཚང་བ་མེད་པ་ཟེར་དུས་གོ་མཚམས་མེད་པར་རང་གིས་ཆེ་འབྱོར་ཆུང་འབྱོར་གྱི་དངོས་པོ་རིན་པོ་ཆེ་འབྲུ་སྣ་ལ་སོགས་པ་སྤུངས་ནས་ཏོག་དང་མཛེས་རྒྱན་གཞན་དག་ཡོད་ན་བརྒྱན་པར་བྱའོ། །དེ་ནས་འདི་ཉིད་མགོན་པོ་འོད་དཔག་ཏུ་མེད་པ་དང་ཕྱོགས་བཅུའི་རྒྱལ་བ་སྲས་དང་བཅས་པ་རྣམས་ལ། རང་གཞན་སེམས་ཅན་ཐམས་ཅད་ནུབ་ཕྱོགས་བདེ་བ་ཅན་ལ་འདྲེན་པའི་དོན་དུ་དབུལ་བར་བགྱིའོ། །ཞེས་པ་དང་། ཐུགས་རྗེས་འགྲོ་བའི་དོན་དུ་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །ཞེས་དང་། ཨོཾ་ཨཱ༔ཧཱུྃ། སྟོང་གསུམ་འཇིག་རྟེན་བྱེ་བ་ཕྲག་བརྒྱའི་ཞིང༔ རིན་ཆེན་སྣ་བདུན་ལྷ་མིའི་འབྱོར་པས་གཏམས༔ བདག་ལུས་ལོངས་སྤྱོད་བཅས་པ་ཡོངས་འབུལ་གྱིས༔ ཆོས་ཀྱི་འཁོར་ལོས་སྒྱུར་བའི་སྲིད་ཐོབ་ཤོག༔ འོག་མིན་བདེ་ཆེན་སྟུག་པོ་བཀོད་པའི་ཞིང༔ ངེས་པ་ལྔ་ལྡན་རིགས་ལྔའི་ཚོམ་བུ་ཅན༔ འདོད་ཡོན་མཆོད་པའི་སྤྲིན་ཕུང་བསམ་ཡས་པ༔ ཕུལ་བས་ལོངས་སྐུའི་ཞིང་ལ་སྤྱོད་པར་ཤོག༔ སྣང་སྲིད་རྣམ་དག་གཞོན་ནུ་བུམ་པའི་སྐུ༔ ཐུགས་རྗེ་མ་འགགས་ཆོས་ཉིད་རོལ་བའི་རྒྱན༔ སྐུ་དང་ཐིག་ལེའི་འཛིན་པ་རྣམ་དག་ཞིང་༔ ཕུལ་བས་ཆོས་སྐུའི་ཞིང་ལ་སྤྱོད་པར་ཤོག༔ ཅེས་དང་། ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་དུ་སྤྱོད་པར་ཤོག །ཅེས་དང་། མཉེས་བྱེད་མཎྜལ་བཟང་པོ་འདི་ཕུལ་བས། །བྱང་ཆུབ་ལམ་ལ་བར་ཆད་མི་འབྱུང་ཞིང༌། །དུས་གསུམ་བདེར་གཤེགས་དགོངས་པ་རྟོགས་པ་དང༌། །སྲིད་པར་མི་འཁྲུལ་ཞི་བར་མི་གནས་ཤིང༌། །ནམ་མཁའ་མཉམ་པའི་འགྲོ་བ་སྒྲོལ་བར་ཤོག །ཅེས་སོགས་བརྗོད་ནའང་ཆོག དེ་སྐུ་གསུམ་གྱི་མཎྜལ་དང་སྦྱར་ན། སྟོང་གསུམ་འཇིག་རྟེན་བྱེ་བ་ཕྲག་བརྒྱ་གྲངས་མེད་བསམ་གྱིས་མི་ཁྱབ་པའི་ཞིང་ཁམས་ན་ལྷ་མིའི་ཡོ་བྱད་དང་རིན་པོ་ཆེ་སྣ་ཚོགས་པ་བདག་པོས་ཡོངས་སུ་བཟུང་བ་དང་མ་བཟུང་བ་ཐམས་ཅད་དང་། དེའི་སྟེང་དུ་རང་གི་ལུས་ལོངས་སྤྱོད་ཁ་རྗེ་དབང་ཐང་ཚེ་བསོད་ནམས་དུས་གསུམ་བསགས་པའི་དགེ་རྩ། བདེ་སྐྱིད་བདེ་བའི་དངོས་པོ་ཐམས་ཅད་བློས་བླངས་ནས་ཆགས་ཞེན་མེད་པར་བླ་མ་སྤྲུལ་སྐུའི་ལྷ་ཚོགས་ལ་འབུལ་བ་དེ་ཐུན་མོང་སྤྲུལ་སྐུའི་མཎྜལ་ཡིན། དེའི་སྟེང་དུ་བཀོད་པ་ཆེན་པོའི་ཞིང་ཁམས་དང་གཞལ་མེད་ཁང་ཕུན་སུམ་ཚོགས་པ་བསམ་གྱིས་མི་ཁྱབ་པའི་དབུས་ན་སྒེག་སོགས་འདོད་ཡོན་གྱི་ལྷ་མོ་གྲངས་མེད་པས་བརྒྱན་པ། དེ་ཡང་བློས་དཔག་ཏུ་མེད་པར་སྤྲུལ་ནས་བླ་མ་ལོངས་སྐུའི་ལྷ་ཚོགས་ལ་འབུལ་བ་དེ་ཐུན་མིན་ལོངས་སྐུའི་མཎྜལ་ཡིན། ཆོས་དབྱིངས་སྐྱེ་བ་མེད་པ་མཎྜལ་གྱི་གཞི་བྱས་ནས་སྣང་བཞི་མཎྜལ་གྱི་ཚོམ་བུ་བཙུགས་ཏེ་བླ་མ་ཆོས་སྐུའི་ལྷ་ཚོགས་ལ་འབུལ་བ་དེ་ཁྱད་པར་ཆོས་སྐུའི་མཎྜལ་ཡིན། མཆོད་པའི་ཆོ་གའི་སྐབས་སུ་མཆོད་སྤྲིན་གྱི་གཟུངས་དང་། མཆོད་རོལ་ལ་སོགས་པ་མདོར་ན་ཡིད་དུ་འོང་བའི་དངོས་པོ་དང་ཏིང་ངེ་འཛིན་གྱི་རོལ་བ་བྱང་ཆུབ་སེམས་དཔའ་ཀུན་ཏུ་བཟང་པོའི་མཆོད་སྤྲིན་དུ་འབུལ་དགོས་སོ། །དེའི་ཡན་གྱིས་མཆོད་པའི་ཡན་ལག་འཕྲོས་དོན་དང་བཅས་པ་བཤད་པ་ཡིན། དེ་རིང་གི་ཆོས་མཚམས་བདག་ལ་ཕན་ཕྱིར་ཐུག་རྗེས་སྟོབས་ཀྱིས་བཞེས། །ཞེས་པ་འདིར་འཇོག སང་ཉིན་བཤགས་པའི་ཡན་ལག ཕ་མས་ཐོག་དྲངས་བདག་སོགས་འགྲོ་ཀུན་ཀྱིས། །ཞེས་པ་ནས་བཤད་རྒྱུ་ཡིན། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་བཤད་སྒྲུབ་འཁོར་ལོ་གཉིས་ལྡན་གྱི་སྒོ་ནས་གོང་དུ་འཕེལ་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་རྣམས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་འཁྲུག་རྩོད་ཐམས་ཅད་རྒྱུན་ཆད། བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པའི་ཕྱིར་དང་། བདག་ཅག་རྣམས་ཀྱི་ཚེ་འདིའི་ཕ་མ་གཉིས་དང་། དགྲ་བགེགས་གཉིས་ཀྱི་གཙོས་བྱས་པའི་བཟང་འབྲེལ་ངན་འབྲེལ་ཐོགས་པའི་མཐའ་ཡས་པའི་སེམས་ཅན་ཐམས་ཅད་མཐར་ཐུག་རྣམ་པ་ཐམས་ཅད་མཁྱེན་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕོང་ཐོབ་པ་དང་། དེ་མ་ཐོབ་ཀྱི་བར་དུ་ཡིན་ན་ཡང་མཐོ་རིས་ཡོན་ཏན་བདུན་དང་ལྡན་པའི་ལུས་རྟེན་ཁྱད་པར་ཅན་ཞིག་རྙེད་ནས་ཐེག་པ་ཆེན་པོའི་ཆོས་ལ་ཚུལ་བཞིན་དུ་སྤྱོད་པའི་སྐལ་བ་དང་ལྡན་པའི་ཕྱིར་དུ་རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་གནང་བར་ཞུ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆི་རྦ་རླབས་འཁྲུག་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག། ཉིན་གསུམ་པའི་བཀའ་ཆོས།རང་རེ་འདི་ན་ཡོད་པ་ཚང་མ་ཚེ་འདི་ཕྱི་ལས་རྒྱུ་འབྲས་ཁས་ལེན་པའི་མི། སྐྱབས་ཀྱི་དྭངས་མར་དཀོན་མཆོག་གསུམ་འཛིན་ཅིང་ནང་པ་སངས་རྒྱས་པའི་ཆོས་སྒོར་ཞུགས་པའི་ཉམས་སྟོན་པ་ཏག་ཏག་ཡིན་པས། སྟོན་པ་སངས་རྒྱས་ཀྱི་ཞལ་དངོས་སུ་མ་མཇལ་རུང་སངས་རྒྱས་ཀྱི་བསྟན་པ་ད་དུང་མ་ཉམས་པར་ཡོད་པ་ཡིན་ཕྱིར། དང་པོར་བསྟན་པའི་སྒོར་ཞུགས་པའི་བསྟན་པ་ཞེས་པ་དེ་གང་ཡིན་པར་ཤེས་དགོས་པ་ཡིན་ལ། དེ་ཡང་སངས་རྒྱས་བཅོམ་ལྡན་འདས་ཉིད་ཀྱིས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཞེས་ཚིགས་རྐང་བཞིའི་ནང་དུ་བསྟན་པ་དེ་ཇི་ལྟར་ཡིན་པའི་ཚུལ་བསྡུས་ནས་སྡིག་པ་མི་དགེ་བའི་ཕྱོགས་ཐམས་ཅད་སྤངས་ཤིང་། ཕྱིན་ཆད་མི་བྱེད་པར་བསྡམས་ཏེ། ལུས་ངག་གི་དགེ་བ་ཕུན་སུམ་ཚོགས་པར་སྤྱད་པས་མ་ཚད། གཙོ་བོ་རང་གི་སེམས་འདི་གདུལ་ཐུབ་ན་སངས་རྒྱས་ཀྱི་བསྟན་པ་ཞེས་པ་ནི་དེ་ཡིན་ཞེས་གསུངས་པ་ཡིན། དེས་ན་རང་ཐད་ལ་ཁ་བསྐོར་ན། མཆོད་ཡོན་སེར་སྐྱ། བླ་མ་སློབ་མ་སུ་ཡིན་ཡང་གཙོ་བོ་རང་ཉིད་ཀྱི་སྒོ་ལུས་ངག་ཡིད་གསུམ་སྟེ་དེ་ལས་ཀྱང་རང་གི་སེམས་རྒྱུད་འདུལ་ཐུབ་རྒྱུ་དེ་གནད་ཆེ་བར་གསུངས་པ་ལས་རང་གར་ཡིན་མདོག་གི་ཚུལ་སྟོན་པ་ཙམ་ཞིག་གིས་གོ་མི་ཆོད་པའང་། ཆེད་དུ་བརྗོད་པའི་ཚོམ་ལས། རལ་བས་མ་ཡིན་དབྱུག་པས་མིན། །ཞེས་ལུས་ངག་གི་སྤྱོད་པ་བཅོས་མ་ཞིག་དང་། ཆས་ཆ་ལུགས་ཤིག་གི་ཐོག་ནས་ཚུལ་སྟོན་པས་མི་ཡོང་བར་གསུངས་པ་ཡིན། དེས་ན་སེམས་ཅན་གྱི་སེམས་རྒྱུད་ཀྱི་ཉོན་མོངས་པ་འདུལ་བར་བྱེད་པ་ལ་དགོངས་ནས། བཅོམ་ལྡན་འདས་ཀྱིས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པ་སྟེ། ཉོན་མོངས་འདོད་ཆགས་འདུལ་བའི་གཉེན་པོ་རུ། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་ཞེ་སྡང་འདུལ་བའི་གཉེན་པོ་རུ། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་གཏི་མུག་འདུལ་བའི་གཉེན་པོ་རུ། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །དུག་གསུམ་ཆ་མཉམ་འདུལ་བའི་གཉེན་པོ་རུ། །སྡེ་སྣོད་བཞི་བ་ཉི་ཁྲི་ཆིག་སྟོང་གསུངས། །ཞེས་གསུངས་པ་ཡིན། དེས་ན་སེམས་རྒྱུད་འདུལ་བྱེད་ནི་དམ་པའི་ཆོས་འདི་ལས་གཞན་དུ་མེད་པ་ཡིན། ཆོས་ཞེས་པའི་ངེས་ཚིག་འགྲེལ་སྐབས། སྨན་གྱིས་ནད་འཆོས་པ་བཞིན་དུ་སེམས་མི་དགེ་བའི་ལོག་ལམ་ནས་འཆོས་པའི་དོན་གྱིས། ཆོས། བཅོས། འཆོས་རྣམས་དོན་གཅིག་མིང་གི་རྣམ་གྲངས་སུ་གྲུབ་པ་ཡིན། སྨན་གྱིས་ནད་འཆོས་པ་ལ་སྨན་པས་ནད་ལ་དམིགས་པའི་སྨན་སྦྱིན་དགོས་པས་མ་ཚད་ནད་པས་ཀྱང་དེ་ལ་ཡིད་ཆེས་ཀྱི་ཐོག་ནས་སྨན་འཐུང་དགོས་པ་སྟེ། དེ་གཉིས་ཀ་འཛོམས་ན་ནད་པའི་ནད་དེ་དྲག་ཏུ་ཡོད་པ་ཡིན། དེ་བཞིན་དུ་སེམས་རྒྱུད་ཡང་དག་པར་འཆོས་བྱེད་ཀྱི་ཆོས་དེ་ལ་ཡིད་ཆེས་པའི་དད་པ་ཞིག་ཡོད་དགོས་པ་ནི། དད་པའི་འཁོར་ལོ་རིན་པོ་ཆེ། །ཉིན་མཚན་དགེ་བའི་ལམ་ལ་སྦྱོར། །ཞེས་གསུངས་པ་ཡིན། དེའང་དམ་པའི་ཆོས་དེ་དང་པོར་གསུང་བ་པོ་དང་། དེ་ཐུགས་རྒྱུད་དུ་བཞུགས་པ་ལ་དེ་ལས་ལྷག་པའི་དད་པ་ཞོག་དགོས་པས་སྐྱབས་གནས་མཐར་ཐུག་དེ་སངས་རྒྱས་དཀོན་མཆོག་ལ་ཐུག་པ་ཡིན། དེས་ན་ནང་པ་སངས་རྒྱས་པའི་ཆོས་སྒོ་ལ་ཞུགས་པའི་ཆོས་པ་ཞིག་ཡིན་ནས་བཟུང་སྟེ་དཀོན་མཆོག་གསུམ་པོ་ཤེས་དགོས་པས་དེ་ནི། སངས་རྒྱས་དཀོན་མཆོག ཆོས་དཀོན་མཆོག དགེ་འདུན་དཀོན་མཆོག་དང་གསུམ་སྟེ། དེ་རྣམ་པ་གསུམ་པོ་ལ་དཀོན་མཆོག་ཟེར་དོན་ཅི་ཡིན་ཞེ་ན། འཇིག་རྟེན་ན་དཀོན་པ་ཐམས་ཅད་ཀྱི་ནང་ནས་མཆོག་ཏུ་གྱུར་པ་ཡིན་པས་ན་དཀོན་མཆོག་ཅེས་བྱ་ལ། དེ་ལས་སངས་རྒྱས་དཀོན་མཆོག་དེ་གང་ཡིན་ཞེ་ན། མཉམ་མེད་ཤཱཀྱའི་རྒྱལ་པོའམ་ཤཱཀྱ་སེང་གེ་སྟེ། དེ་ཡང་ཆོས་སྐུའི་དུས་ན་ཆོས་སྐུ་ཀུན་ཏུ་བཟང་པོ། ལོངས་སྐུའི་དུས་ན་ལོངས་སྐུ་རྡོ་རྗེ་འཆང་ཆེན། སྤྲུལ་སྐུའི་དུས་ན་སྤྲུལ་སྐུ་ཤཱཀྱ་ཐུབ་པ་རུ་སྣང་བ་དེ་ཡིན། ཆོས་དཀོན་མཆོག་ནི། འགོག་ལམ་གྱིས་བསྡུས་པའི་ལུང་རྟོགས་ཀྱི་ཆོས། གཙོ་བོ་སངས་རྒྱས་ཀྱི་ཐུགས་རྒྱུད་ན་བཞུགས་པའི་ཡོན་ཏན་དེ་ཡིན། དགེ་འདུན་དཀོན་མཆོག་ནི། སྟོན་པའི་ལུང་རྟོགས་ཀྱི་དམ་ཆོས་འཛིན་པ་པོ་སྟེ། གཙོ་བོ་ཐེག་ཆེན་འཕགས་པའི་དགེ་འདུན་ལ་མཚོན་ན། ས་དང་པོ་ཡན་ཆད་ན་བཞུགས་པའི་འཕགས་པའི་ཚོགས་རྣམས་ཡིན། དེ་ནི་མཚོན་བྱ་དོན་གྱི་དཀོན་མཆོག་གསུམ་ཞེས་པ་དེ་ཡིན། མཚོན་བྱེད་རྟགས་ཀྱི་དཀོན་མཆོག་གསུམ་མམ་དཀོན་མཆོག་གསུམ་གྱི་རྟེན་དེ་གང་ཡིན་ཞེ་ན། སངས་རྒྱས་དཀོན་མཆོག་གི་རྟེན་སངས་རྒྱས་ཀྱི་སྐུ་གཟུགས་བྲིས་འབུར་ལུགས་བླུགས་སུ་གྱུར་པ་དང་། ཆོས་དཀོན་མཆོག་གི་རྟེན་གསུང་རབ་ཡི་གེའི་གཟུགས་སུ་བྱོན་པ་དང་། དགེ་འདུན་དཀོན་མཆོག་གི་རྟེན་དད་པའི་དགེ་འདུན་གྲངས་ཚང་བ། དགེ་སློང་བཞི་སྡེ་ཡན་ཆད་དག་སྟེ། དེ་རྣམས་ལ་དད་པ་བྱས་ན་སངས་རྒྱས་དངོས་སམ་དཀོན་མཆོག་གསུམ་དངོས་ལ་དད་པ་བྱས་པ་དང་ཁྱད་མེད་ཅིང་། ཁྱད་པར་དུ་དུས་སྙིགས་མའི་སྐབས་ན་བླང་དོར་གྱི་གནས་སྟོན་པའི་བླ་མ་དགེ་བའི་བཤེས་གཉེན་ནི། སངས་རྒྱས་ཀྱི་རྒྱལ་ཚབ་ཡིན་པས་མ་ཚད་སངས་རྒྱས་དངོས་བྱོན་ཀྱང་ཡིན། དེ་ཇི་ལྟར་ཞེ་ན། འདས་པའི་སངས་རྒྱས་ཀྱི་གདུང་འཛིན། ད་ལྟའི་སངས་རྒྱས་ཀྱི་རྒྱལ་ཚབ། མ་འོངས་སངས་རྒྱས་ཀྱི་འབྱུང་ཁུངས་ཡིན་པས། བླ་མ་ནི་མཆོག་གསུམ་ཀུན་འདུས་ཀྱི་ངོ་བོ། སྐྱབས་གནས་གཅིག་ཆོག་གི་བདག་ཉིད་ཡིན། དེ་ཡིན་པའི་རྒྱུ་མཚན་གང་ཞེ་ན། སངས་རྒྱས་སྤྲུལ་བའི་སྐུ་ཤཱཀྱ་ཐུབ་པ་དེ་སེམས་ཅན་རྟག་འཛིན་ཅན་གྱི་ངོར་སྐུ་མྱ་ངན་ལས་འདས་པའི་ཚུལ་བསྟན་ཏེ། འཇིག་རྟེན་འདི་ན་མི་སྣང་བས་ང་ཚོས་གཟུགས་སྐུ་དངོས་སུ་མཇལ་མི་ཐུབ་པ་དང་། སངས་རྒྱས་ཆོས་ཀྱི་སྐུ་དག་པ་གཉིས་ལྡན་གྱི་ཡང་དག་མཐའ་དེ་ནི་སྒྲིབ་གཉིས་མ་སྤངས་པའི་སོ་སྐྱེའི་བློ་ཡུལ་ལས་འདས་པ་དང་། སངས་རྒྱས་དཀོན་མཆོག་གི་རྟེན་སངས་རྒྱས་ཀྱི་སྐུ་བརྙན་བཞུགས་ཤིང་དེས་བརྗོད་དུ་མེད་པའི་ཆོས་གསུངས་པ་ཡིན་ན་ཡང་དེ་རང་རེས་ཉན་མ་ཤེས་པའི་དབང་གིས་ལི་མ་གཏེར་མ་རྒྱུ་རྩ་ཆེན་གྱི་གྲལ་དུ་འཇོག་རྒྱུ་ཙམ་ལས་མི་ཤེས་པ་གང་མང་མང་ཡོད་པ་དང་། ཆོས་དཀོན་མཆོག་གི་རྟེན་གསུང་རབ་པོ་ཏི་བརྒྱ་ཕྲག་མི་ཚེའི་རིང་དུ་བཏོན་ནའང་མི་ཚར་བ་ཡོད་ཀྱང་གཅིག་ན་དེའི་དགོངས་པ་ཕྱིན་ཅི་མ་ལོག་པ་ཞིག་ལེན་མི་ཤེས་ཤིང་། གཉིས་སུ་ཁྲིད་ལུང་མན་ངག་གི་བརྒྱུད་པ་ཞིག་མེད་ན་བྱིན་རླབས་འཇུག་རྒྱུ་དེ་ཡང་དཀའ་མོ་དཀོན་པོ་ཡིན་ཕྱིར། བླ་མས་ནི་བླང་དོར་གྱི་གནས་སྟོན། གསུང་རབ་ཀྱི་དགོངས་དོན་བཀྲལ། རང་ཡང་དོན་དེ་དང་མི་འབྲལ་བར་དམ་པའི་ཚུལ་དགུའི་ཡོན་ཏན་དང་ལྡན་པས་ན་དགེ་བ་ལ་འདུན་པ་ཡིན་པས་དཀོན་མཆོག་གསུམ་པོ་བླ་མ་གཅིག་ལ་ཚང་པ་འདི་དཀོན་མཆོག་གསུམ་དངོས་ལྷ་མངོན་སུམ་འཚོ་བཞུགས་ཀྱི་སངས་རྒྱས་གསོན་པོ་དེ་མཐུན་པས་མཐུན་པ་འདུལ་བའི་ཆེད་དུ་མིའི་སྣང་ངོ་ལ་མིའི་གཟུགས་སུ་བསམ་བཞིན་བྱོན་པ། དེ་ཡང་ཆ་ཡོད་རྒྱུས་ཡོད་གོ་བརྡ་འཇགས་ཤག་ཤག་སྐད་རིགས་མཐུན་པ་ལ་བྱོན་པར་ཡིན་འདུག་སྙམ་པའི་གོ་བ་དེ། ཐོས་པས་ཐོས་པ་བཙལ་ནས་ཐོས་དོན་ཤེས་རབ་ཀྱི་མིག་གིས་རྙེད་ན་ད་གཟོད་མཐོང་དུ་ཡོད་པ་ཡིན། དེས་ན་ཆོས་ཞུ་བའི་གྲལ་དུ་བསྡད་དེ་དང་པོར་ཐོས་པ་འཚོལ་དགོས། མ་ཐོས་ན་ཅི་ཞིག་གོ་ཡོང་སྟེ་མ་ཉན་ན་གོ་ཡོང་རྒྱུ་ཞིག་མེད་པ་ཡིན། ཐོས་དོན་བསམ་དགོས་ཏེ་དོན་དེ་ལ་བསམ་བློ་མ་བཏང་ཞིང་གོ་བ་མ་བླངས་ན་ཅི་ཞིག་ཤེས་ཡོང་། དེས་ན་བསམ་དོན་བསྒོམ་དགོས། མ་བསྒོམས་ཏེ་རྒྱུད་ཐོག་ལ་མ་སྦྱར་ན་རང་གི་སེམས་རྒྱུད་ལ་ཕན་ཐོགས་ཡོང་རྒྱུ་ཞིག་ཡོད་པ་མ་ཡིན། དཔེར་ན་ཟ་མ་མ་ཟོས་ན་ཕོ་བ་བརྒྱགས་དོན་མེད་པ་དང་གཅིག་མཚུངས་ཡིན། རིན་ཆེན་ཕྲེང་བ་ལས། ཤེས་རབ་རྒྱས་བྱེད་པ་ནི་ཐོས་པ་སྟེ། །བསམ་པ་དང་ནི་གཉིས་པོ་ཡོད་གྱུར་ན། །དེ་ལས་སྒོམ་པ་ཡང་ནི་རབ་ཏུ་སྐྱེ། །དེ་ལས་དངོས་གྲུབ་བླ་ན་མེད་པ་ཐོབ། །ཞེས་གསུངས་པས། ཆོས་གྲྭའི་ནང་དུ་བསྡད་དེ། ཆོས་ཞིབ་ཀྱིས་ཉན། གོ་བ་ཞིབ་ཀྱིས་ལོངས་དང་། གསེར་ལོག་ལོག་ཅིག་གིས་མི་ཁུག་པའི་ཡོང་སྒོ་རིན་ཐང་ཅན་དེ་ནས་ལོན་རྒྱུ་ཡོད་པ་ཡིན། སྔར་ཡང་བཤད་པ་ལྟར་ཆོས་ཞུས་པ་ལྟ་ཅི། ཆོས་ཞུ་རུ་འགྲོ་དགོས་སྙམ་ནས་ཆོས་སྨྲ་བའི་ཕྱོགས་སུ་གོམ་པ་གང་ཙམ་སྤོས་ནའང་ལྷ་ཚངས་པར་སྐྱེ་བའི་བསོད་ནམས་འཐོབ་ཏུ་ཡོད་པ་དང་། མི་སྨྲ་ཤེས་དོན་གོ་དཔྱོད་ཤེས་ཉན་ཤེས་ཤིག་གིས་དད་པ་སྐྱེས་ནས་ཆོས་ཉན་ན་ཕན་ཐོགས་ཆེ་བ་སྨྲོས་ག་ལ་དགོས། ཐ་ན་དུད་འགྲོའི་གནས་སུ་སྐྱེས་པ་ཞིག་གིས་ཆོས་སྒྲ་རྣ་བས་གོ་ན་ཕན་ཐོགས་ཆེ་བའི་དཔེ་སོགས་མང་པོ་ཡོད་དེ། གནའ་སྔོན་མ་ཞིག་ལ་སློབ་དཔོན་དབྱིག་གཉེན་གྱིས་གཞུང་འབུམ་སྡེ་དགུ་བཅུ་གོ་དགུ་ཐུགས་ཐོག་ཏུ་ལེན་བཞིན་པའི་དུས་སུ་ཉིན་མཚན་གཉིས་ཀར་ཁོང་གིས་གསུང་རབ་ཞལ་འདོན་ཏག་ཏག་མཛད་པ་ཡིན། དེའི་སྐབས་སུ་གཟིམ་ཁང་གི་འགེབ་གསེང་ན་བྱ་ཕུག་རོན་ཞིག་ཡོད་པ་དེས་ཆོས་སྒྲ་ནམ་ཡིན་ནའང་ཐོས་པ་ཡིན། ཉིན་ཞིག་བྱ་ཕུག་རོན་དེ་ཚེ་འཕོས་ནས་ཡུལ་མཐའ་འཁོབ་ཀྱི་རྒྱལ་ཕྲན་ཞིག་གི་བུའི་སྐྱེ་བ་བླངས་པས། བུ་དེ་སྐྱེས་མ་ཐག་ཏུ་ངས་བླ་མ་གང་དུ་བཞུགས་ཡོད་ཟེར་བར། ཐམས་ཅད་ཡ་མཚན་སྐྱེས་ཏེ། ཁྱོད་ཀྱི་བླ་མ་སུ་ཞིག་ཡིན་ཞེས་དྲིས་པས། ངའི་བླ་མ་སློབ་དཔོན་དབྱིག་གཉེན་ཡིན་ཟེར། འོན་ཀྱང་ས་ཆ་དེའི་མི་ཚང་མ་མཐའ་འཁོབ་པ་ཡུལ་དབུས་དང་ཐག་རིང་བས་སློབ་དཔོན་དབྱིག་གཉེན་སུས་ཀྱང་ཞལ་མ་ཚོར་བས། ཡུལ་དབུས་ཀྱི་ཕྱོགས་སུ་དུས་རྒྱུན་ཚོང་དུ་འགྲོ་བའི་ཚོང་པ་མང་པོ་ཡོད་པའི་རྩར་སོང་སྟེ་སློབ་དཔོན་དབྱིག་གཉེན་གྱི་ལོ་རྒྱུས་དྲིས་པ་ན། དེ་དག་གིས་སློབ་དཔོན་དབྱིག་གཉེན་ཞེས་པའི་མཁས་པ་ཆེན་པོ་ཞིག་རྒྱ་གར་ཡུལ་དབུས་སུ་བཞུགས་པའི་ལོ་རྒྱུས་བཤད་པས། བྱིས་པ་དེས་ཡིན་ན་མིན་ན་བླ་མ་དེའི་མདུན་ན་འགྲོ་དགོས་པ་ཏག་ཏག་བཤད་པས། བུ་དེ་སློབ་དཔོན་དབྱིག་གཉེན་གྱི་མདུན་དུ་བསྐྱལ་སོང་བ་དང་། སློབ་དཔོན་དབྱིག་གཉེན་གྱི་མདུན་ན་ཐོན་མ་ཐག་ཏུ་བླ་མ་ཞེས་བོས་པ་ལ། སློབ་དཔོན་གྱིས་ཁོ་བོ་ཁྱོད་ཀྱི་བླ་མ་ཡིན་པར་མི་དྲན་ནོ་གསུངས་པར། དེས་ཚེ་རབས་སྔ་མ་དྲན་པའི་ལོ་རྒྱུས་ཞིབ་ཀྱིས་ཞུས་པས། སློབ་དཔོན་གྱིས་རྗེས་སུ་བཟུང་སྟེ་དེ་སློབ་གཉེར་སྦྱང་བཅུག་པས་རྗེས་སུ་སློབ་དཔོན་བློ་གྲོས་བརྟན་པ་ཞུ་བའི་སྡེ་སྣོད་གསུམ་ལ་མཁས་པའི་མཁས་པ་ཆེན་པོ་རུ་གྱུར་པ་ཡིན། ཆོས་སྒྲ་རྣ་ལམ་དུ་ཐོས་པ་ཙམ་ལ་ཡང་ཕན་ཡོན་དེ་ལྟར་ཆེན་པོ་ཡོད་པ་ཡིན། ཡང་བཅོམ་ལྡན་འདས་སྤང་ལྗོངས་ནགས་ཚལ་གྱིས་བསྐོར་ཡོད་ས་ཞིག་ནས་ཆོས་གསུངས་ཤིང་བཞུགས་པའི་སྐབས་སུ་སྟེང་གི་ནམ་མཁའ་ནས་བྱ་ངང་པ་ལྔ་བརྒྱ་ཙམ་འཕུར་བ་དག་གིས་སངས་རྒྱས་ཀྱིས་ཆོས་གསུངས་པའི་སྒྲ་ཐོས་པས། སེམས་ལ་དགའ་སྤྲོ་ཆེན་པོ་སྐྱེས་ཏེ་ལྡིང་སྐོར་ཞིག་བྱས་ནས་ཕྱོགས་དེར་བབ་པས། ས་ཆ་དེར་སྔར་ཞིག་ནས་བསམ་ངན་མ་རུངས་ཁོག་བཅང་གི་རྔོན་པ་མང་པོ་ཡོད་པ་དེ་ཚོས་བྱ་འཛིན་བྱེད་ཀྱི་རྙི་མང་པོ་བཙུགས་ཡོད་ཕྱིར་ངང་པ་ཚང་མ་བཟུང་སྟེ་བསད་པ་དང་། དེ་དག་ཤི་མ་ཐག་ཏུ་སངས་རྒྱས་ཀྱི་ཞལ་ནས་ཆོས་སྒྲ་ཐོས་པའི་བྱིན་རླབས་ཀྱིས་སུམ་ཅུ་རྩ་གསུམ་གྱི་ལྷ་ཡུལ་དུ་ལྷའི་བུ་ལྔ་བརྒྱའི་སྐྱེ་བ་བླངས་སོང་བ་ལ་སོགས་པ་ཆོས་ཐོས་པའི་ཕན་ཡོན་གྱི་ལོ་རྒྱུས་ཤིན་ཏུ་ནས་ཀྱང་མང་ལ་། དུད་འགྲོ་ཡན་ཆད་དང་མི་མན་ཆད་འུ་ཚོས་མཐོང་དུ་ཡོད་པའི་བློ་རིག་གསལ་བ་ཞིག་ཡོད་ཚད་ཐམས་ཅད། སྔོན་ཆད་ཆོས་ཚིག་གཅིག་ཐོས་པ་ཡན་ཆད་ཀྱི་འབྲས་བུ་ལས་མ་འདས། ད་ལྟའི་སྐབས་སུ་མིའི་ནང་ནས་ལ་ལ་དག་མི་དགེ་སྡིག་ལས་ཤིག་ལས་རན་དུས་བློ་རིག་རྣམ་དཔྱོད་བཀྲ་ཡང་། དམ་པའི་ཆོས་ཕྱོགས་ལ་ཁ་ཞིག་བསྐོར་ན་བླུན་པོ་རྨོངས་པ་ཅི་ཡང་མི་ཤེས་མཁན་འདི་དག་སྔོན་ཆད་ཆོས་ཐོས་པའི་བག་ཆགས་ཅུང་ཙམ་ཡང་མེད་པའི་རྟགས་ཡིན། དོ་ཞག་གོང་དུ་དྲངས་པའི་ས་སྐྱ་པཎ་ཆེན་གྱི་གསུང་། སྐྱེ་བ་སྔ་མ་མ་བསླབས་པར། །ཚེ་འདིར་བླུན་པོར་གྱུར་མཐོང་ནས། །ཕྱི་མར་བླུན་པོར་སྐྱེ་དོགས་པས། །ཚེ་འདིར་དཀའ་བས་འབད་དེ་ཉན། །ཞེས་དང་། རིག་པ་ནངས་པར་འཆི་ཡང་སློབས། །ཚེ་འདིར་མཁས་པར་མ་གྱུར་ཀྱང་། །སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་དང་མཚུངས། །ཞེས་གསུངས་པ་བཞིན་དུ་ལོ་རྒས་གཞོན་སུ་ཡིན་ནའང་ཐོས་བསམ་གྱི་ཕྱོགས་ལ་འབད་པ་རེ་བྱེད་ཐུབ་ན་འབད་རྩོལ་མ་བྱས་པ་ལས་དགའ་དང་དགའ་ཡིན། སྔར་མིག་མེད་ཀྱི་དུས་ལས་མིག་ཡོད་འགྱུར་དུ་ཡོད་པ་ཡིན། རྒྱ་ཆེ་བའི་རྒྱང་མིག་ཤེས་བྱ་སྣ་མང་དག་མ་ཤེས་ནའང་། རང་ཉིད་འགྲོ་སའི་རྡོག་ལྷམ་རྡོག་སྣེ་མིག་གིས་མཐོང་ནས་རང་གི་ཐར་བ་སྒྲུབ་སྟངས་ཀྱི་འགྲོ་ཕྱོགས་ཙམ་རེ་རང་གིས་ཤེས་པར་བྱས་ན། རང་དྲིན་རང་ལ་ཆེ་བའི་ཡོང་སྒོ་ཆེན་པོ་ཞིག་དེ་ན་ཡོད་པ་ཡིན། དེས་ན་ལོ་རྒས་གཞོན་ཚང་མས་ཡི་གེ་རེ་ཨེ་ཤེས་ལྟོས། གསུང་རབ་ཀྱི་ནང་དོན་ཚིག་རེ་རེ་ཡིན་ཡང་ཨེ་གོ་ལྟོས། ངོ་ཚ་མི་དགོས་པ་ནི་ཤེས་ཡོན་སྦྱང་བརྩོན་རེད། དེ་བས་ཡ་སྒྱེད་ཁུག་ལ་བསྡད་ནས་བསམ་ངན་ཕྲག་དོག་ངན་སེམས་ཏག་ཏག་གིས་ཡ་ཆུང་གང་ཞིང་། རང་གི་ནུས་པའི་ཐོག་ནས་མཆིག་ཅིག་གི་ཡ་ལོ་མི་ཁྱག་ནའང་བུ་ཚ་བོའི་ཁོག་པ་རླུང་གིས་བརྒྱངས་ཤིང་། ལྐོག་འཕྱ་ལབ་བཙོག སྐུར་འདེབས་ལོག་ལྟ་ལ་སོགས་པ་དོན་མེད་ཀྱི་སྡིག་ཆེན་བསགས་འདུག་པ་དེས་ངོ་ཚ་བ་རེད། མི་ཚེའི་དུས་ཚོད་ནི་འགྲོ་མགྱོགས་པ་རགས་པ་རྒྱུན་གྱི་མི་རྟག་པ་དང་། ཕྲ་བ་སྐད་ཅིག་གི་མི་རྟག་པ་ཡིན་ནའང་། ནང་རྟག་འཛིན་མ་ཞིག་པ་དང་། ཕྱི་འདྲ་བ་གཞན་བྱུང་གི་འཁྲུལ་རྒྱུས་བསླད་པ་དེ་གཉིས་ཐོ་ཐུག་པའི་དབང་གིས། མི་རྟག་པ་ལ་རྟག་པར་བཟུང་། ཁ་སང་གི་དེ་དེ་རིང་ཡོད་སྣང་ཤར་ནས། ད་ནང་གི་རྒྱུག་ཆུ་དེ་ད་རུང་རྒྱུག་འདུག་རྒྱུ་འདི་ཡིན་སྣང་ཤར་བ་རེད་མ་གཏོགས། ཕྱིའི་ནམ་ཟླ་དུས་བཞིའི་འགྱུར་ལྡོག་ཆེ་བས་མ་ཚད། ནང་རང་ལུས་དར་རྒུད་ཀྱི་འགྱུར་བ་དེ་བཞིན་འགྱུར་བཞིན་ཡོད་པ་ཡིན། དེས་ན་གོ་མ་ཆོད་ཆོད་ཀྱི་བྱ་བ་ཅི་འདྲ་ཞིག་བསྒྲུབས་ནས་མི་འདུག ད་དུང་ཡང་བསྒྲུབས་ནས་ག་ལ་ཚར། ཁ་མ་ན་བར་དུ་ཅི་འདྲའི་བཤད་ཡོད་ཀྱང་། རྐང་མ་ན་བར་དུ་ཅི་འདྲ་སོང་ཡོད་ན་ཡང་། དོན་དག་ཅན་གྱི་བྱ་བ་ཁེ་རུ་མ་ཞིག་འཆི་རན་ནས་འགྲོ་བའི་ཉིན་མོ་དེར་མེད་པས་མི་ཚད། བསགས་བསགས་སྡིག་པའི་ཁུར་པོ་དེ་རང་གི་སྐེ་ཐོག་མ་གཏོགས་འགྲོ་ས་མེད་པའི་ཡུལ་ཁ་རིག་རིག་བལྟས་བལྟས་ལ་ཡོད་པ་ཡིན་པས། བདག་གི་སྙིང་འདི་རྡོའམ་ལྕགས་ཀྱི་གོང་བུ་ལས་གྲུབ་པ་ཞིག་ཡིན་ན་མ་གཏོགས་བསམ་བློ་ཞིག་འཁོར་ས་ཡོད་འདུག་སྙམ་པའི་དྲན་སྐུལ་རང་གིས་རང་ལ་བྱེད་པ་དང་། སྤྱིར་ན། དྲིན་ཕ་མ་བརྒྱ་ཡིས་ཁ་ཏ་ལས། །སྡང་དགྲ་བོ་གཅིག་གིས་གློ་རྒྱག་དགའ། །ཟེར་བ་ལྟར་དུ་རྐྱེན་ངན་ཐོག་ཏུ་བབ་ན་མི་རྟག་སྟོན་པའི་སློབ་དཔོན། རྐྱེན་ངན་དགེ་བའི་སྐུལ་མར་ཡོང་བ་ཡིན་པས། མདོར་ན་སྐྱིད་སྡུག་གཉིས་ཀའི་སྔར་བསམ་ཕྱིར་འདེང་མ་ནོར་བ་ཞིག་རྒྱག་ཐུབ་པའི་ཐོག་ནས་རང་ཆུས་རང་གིས་འཚོ་རྒྱུ་དེ་རང་གིས་མ་བལྟས་ན། ན་སོ་བརྒྱད་པའི་རྟ་རྒན་ལ་ཁ་ལོ་སློབ་མཁན་ཞིག་ཟུར་ནས་ཡོང་རྒྱུ་མེད་ངེས་ཡིན། སྐབས་སུ་བབ་པའི་བཤད་བྱ་བདེ་བ་ཅན་གྱི་ཞིང་ཁྲིད་མཁས་གྲུབ་རཱ་ག་ཨ་སྱས་མཛད་པའི་བདེ་སྨོན་གྱི་སྟེང་ནས་ཁྲིད་པའི་སྐབས་ལས། ཉི་མ་དང་པོའི་སྐབས་སུ་ཆོས་ཞུ་བའི་ཀུན་སློང་དང་ཀུན་སྤྱོད། ཆོས་ཞུ་བ་ལས་ཀྱང་དང་པོར་ཞུ་ཚུལ་ཤེས་པ་གལ་ཆེ་བའི་སྐོར་གྱི་ཤེས་བྱ་དང་། འདིའི་བཤད་བྱའི་ཡན་ལག་རྗེས་འཇུག་སྤྲོ་བ་བསྐྱེད་ནས་ཉམས་སུ་ལེན་པར་སྐུལ་བ་དང་། བཤད་བྱ་དངོས་བཤད་པ་ལ་ས་བཅད་རྣམ་པ་བཞི་ཡི་ཆིངས་ཀྱིས་བཅིངས་ནས་བདེ་བ་ཅན་དུ་སྐྱེ་བའི་རྒྱུ་བཞིས་གཞུང་དོན་ལུས་ཀྱི་རྣམ་བཞག་ཚང་པར་བསྟན་པ་ལས། དང་པོ་རྟེན་ཚོགས་ཞིང་གསལ་འདེབས་པ་དེ་ལའང་རྟེན་ཞིང་ཁམས་ཀྱི་རྣམ་པ་ཡིད་ལ་བྱེད་པ་དང་། བརྟེན་པ་སངས་རྒྱས་འོད་དཔག་མེད་གཙོ་འཁོར་དང་བཅས་པའི་སྐུའི་རྣམ་པ་ཡིད་ལ་བྱེད་པ་གཉིས་སུ་ཕྱེས་ནས་བདེ་བ་ཅན་དུ་སྐྱེ་བའི་རྒྱུ་བཞིའི་དང་པོ་བཤད་པ་དང་། ཁ་སང་ཉིན་གཉིས་པ་ལ་བདེ་བ་ཅན་དུ་སྐྱེ་བའི་རྒྱུ་གཉིས་པ་ཚོགས་བསགས་སྒྲིབ་སྦྱོང་གི་སྐོར་ནས། ཚོགས་བསགས་པའི་སྒོ་ཐམས་ཅད་ཡན་ལག་བདུན་དུ་བསྡུས་པའི་དང་པོ་ཕྱག་འཚལ་བ་དང་། གཉིས་པ་མཆོད་པའི་ཡན་ལག་གཉིས་བཤད་པ་ཡིན་ལ། ཁ་རྩང་བཤད་མ་ཐག་པའི་མཆོད་པ་དེ་ལའང་། དངོས་སུ་འབྱོར་བའི་མཆོད་པ་དང་། ཡིད་ཀྱིས་སྤྲུལ་བའི་མཆོད་པ་གཉིས་དང་། ད་དུང་ཞིབ་ཀྱིས་གོ་བ་བླངས་ན་བླ་ན་ཡོད་པའི་མཆོད་པ་དང་། བླ་ན་མེད་པའི་མཆོད་པ་གཉིས། བླ་ན་ཡོད་པའི་མཆོད་པ་ལའང་། ཟང་ཟིང་གི་མཆོད་པ་དང་། སྒྲུབ་པའི་མཆོད་པ་སྟེ་གཉིས། དེ་ལས་ཟང་ཟིང་གི་མཆོད་པ་ནི། ལུས་ཀྱི་གར་དང་ཕྱག་རྒྱའི་མཆོད་པ་དང་། ངག་གི་བསྟོད་པ་དབྱངས་ཀྱི་མཆོད་པ་དང་། གཞན་ཡང་འདོད་ཡོན་རྫས་ཀྱི་མཆོད་པ་སྟེ། བདག་པོས་བཟུང་བའི་འབྱོར་ཚོད་དངོས་པོའི་མཆོད་པ་དང་། བདག་པོས་ཡོངས་སུ་མ་བཟུང་བའི་ཡིད་སྤྲུལ་བློ་ཡི་མཆོད་པ་ལ་སོགས་པ་དང་། སྒྲུབ་པའི་མཆོད་པ་ལྷའི་སྐུ་བསྒོམ་པ་དང་། བྱང་ཆུབ་སེམས་པའི་ཏིང་ངེ་འཛིན་ལས་བྱུང་བའི་བཀོད་པའི་མཆོད་པ་དང་། བླ་ན་མེད་པའི་མཆོད་པ་ལ། དམིགས་བཅས་ཀྱི་མཆོད་པ་དང་། དམིགས་མེད་ཀྱི་མཆོད་པ་གཉིས་ལས། དམིགས་བཅས་ཀྱི་མཆོད་པ་ནི། སྨོན་འཇུག་བྱང་ཆུབ་ཀྱི་སེམས་བསྒོམ་པ་སྟེ། མཁས་པས་བྱང་ཆུབ་སེམས་བསྒོམས་ན། །རྒྱལ་བ་སྲས་དང་བཅས་པ་ལ། །མཆོད་པ་འདི་ནི་དམ་པ་སྟེ། །ཞེས་གསུངས་སོ། །དམིགས་པ་མེད་པའི་མཆོད་པ་ནི། བདག་མེད་ཀྱི་དོན་སྒོམ་པ་སྟེ། མཆོད་པའི་ནང་ནས་མཆོག་ཏུ་གྱུར་པ་ཡིན་ནོ། །མདོར་ན་མཆོད་པའི་རྣམ་གྲངས་ཐམས་ཅད་ཚུར་བསྡུ་ན་གོང་དུ་བཤད་པའི་བདག་ལུས་ལོངས་སྤྱོད་དགེ་ཚོགས་དང་བཅས་པ་སྟེ་བདག་འཛིན་གྱི་གཞི་གསུམ་འབུལ་བའི་ནང་དུ་ཕལ་ཆེར་མ་འདུས་པ་མེད་པ་ཡིན་ནོ། །དེ་རིང་ཡན་ལག་གསུམ་པ་གཏི་མུག་གི་གཉེན་པོ་བཤགས་པའི་ཡན་ལག་བཤད་པ་ནི། གསུམ་པ་གཏི་མུག་གི་གཉེན་པོ་བཤགས་པའི་ཡན་ལག་བཤད་པ། ཕ་མས་ཐོག་དྲངས་བདག་སོགས་འགྲོ་ཀུན་གྱིས། །ཐོག་མ་མེད་པའི་དུས་ནས་ད་ལྟའི་བར། །སྲོག་གཅོད་མ་བྱིན་ལེན་དང་མི་ཚངས་སྤྱོད། །ལུས་ཀྱི་མི་དགེ་གསུམ་པོ་མཐོལ་ལོ་བཤགས། །ཞེས་པ་ནས། བདེ་གཤེགས་འོད་དཔག་མེད་པ་སྲས་བཅས་ཀྱིས། །བདག་རྒྱུད་ཡོངས་སུ་དག་པར་བྱིན་གྱིས་རློབས། །ཞེས་པའི་བར་གྱིས་བསྟན་པ་ཡིན། མི་བདེ་སྡུག་བསྔལ་ཐམས་ཅད་ཀྱི་རྒྱུ་སྡིག་པ་མི་དགེ་བའི་འབྱུང་རྩ་དེ་གཏི་མུག་ཡིན་ལ། ཁམས་གསུམ་འཁོར་བ་རིགས་དྲུག་ན་ཡོད་པའི་སེམས་ཅན་ཐམས་ཅད་ཐོག་མེད་ནས་མཐའ་མེད་ཀྱི་བར་དུ་གཏི་མུག་རྨོངས་པ་འདིས་གཞན་དབང་དུ་སོང་ནས་སྡིག་པ་མི་དགེ་བའི་ལས་བསགས་ཡུན་རིང་། བསགས་སྟོབས་ཆེ། བསགས་གྲངས་མང་བ་འདི་དག་གལ་ཏེ་བཤག་མ་ཐུབ་ན། འཁོར་བའི་གནས་ནས་ཐར་པའི་དུས་ཤིག་ཤར་རྒྱུ་མེད་པ་ཡིན། དེས་ན་གཏི་མུག་གི་གཉེན་པོ་བཤགས་པ་འདི་གལ་ཆེ། བཤགས་པ་བྱེད་དུས་བཤག་པའི་ཡུལ་ཞིག་ཡོད་དགོས་པས། ད་རེས་སྐབས་འདིའི་བཤག་ཡུལ་གྱི་ཚོགས་ཞིང་རྒྱལ་བ་འོད་དཔག་མེད་འཁོར་དང་བཅས་པའི་སྤྱན་སྔར། རང་གཞན་སེམས་ཅན་ཐམས་ཅད་ཀྱིས་བཤགས་པ་བྱེད་པའི་མོས་པ་དང་བཅས་པས་བཤགས་དགོས་པ་ཡིན། ཆོས་བཞི་བསྟན་པའི་མདོ་ལས། ཆོས་བཞི་དང་ལྡན་ན་བྱས་ཤིང་བསགས་པའི་སྡིག་པ་དང་སྒྲིབ་པ་ཐམས་ཅད་དག་པར་གསུངས་པའི་ཆོས་བཞི་ནི་གཉེན་པོ་སྟོབས་བཞི་ཡིན་ལ། དེའི་སྦྱང་བྱ་སྡིག་པའི་སྒོ་དྲུག་ཡོད་པ་དེ་དག་བློར་འཛིན་བདེ་བའི་ཆེད་དུ། སྡོམ་བྱས་ན། དུས་དང་ཀུན་སློང་འགྲིམ་ངོ་བོ། །ཡུལ་དང་བྱེད་ལས་རྣམ་པ་དྲུག །ཅེས་པ་སྟེ། དེ་ཡང་དུས་ཀྱི་སྒོ་དང་གཅིག ཀུན་སློང་གི་སྒོ་དང་གཉིས། འགྲིམ་པའི་སྒོ་དང་གསུམ། ངོ་བོའི་སྒོ་དང་བཞི། ཡུལ་གྱི་སྒོ་དང་ལྔ། བྱེད་ལས་ཀྱི་སྒོ་དང་དྲུག་ལས། དང་པོ་དུས་ཀྱི་སྒོ་ནི། འཁོར་བ་ཐོག་མ་མེད་པ་ནས་དུས་ད་ལྟའི་བར་དུ་བསགས་པའི་སྡིག་པ་མི་དགེ་བ་རྣམས་དང་། ཁྱད་པར་དུ་ཚེ་འདིའི་ཐོག་ནས་བསགས་པའི་བཅས་དང་རང་བཞིན་གྱི་ཉེས་ལྟུང་དང་སྡིག་པ། ལོ་འདི་དང་ཟླ་བ་འདི་དང་དུས་ཚོད་འདི་ལ་སྡིག་པ་མི་དགེ་བ་བདག་རང་གིས་བགྱིས་པ་དང་། གཞན་ལ་བགྱིད་དུ་བསྩལ་བ། གཞན་གྱིས་བགྱིས་པ་ལ་རྗེས་སུ་ཡི་རང་བ་ལ་སོགས་པའི་སྡིག་པ་དང་སྒྲིབ་པ་ཐམས་ཅད་དུས་ཚོད་དང་འབྲེལ་བའི་ཆ་ནས་དུས་ཀྱི་སྒོ་དང་། གཉིས་པ་ཀུན་སློང་གི་སྒོ་ནི། སྡིག་པ་མི་དགེ་བའི་ལས་བྱས་ཚད་བསགས་ཚད་ཐམས་ཅད་ཉོན་མོངས་པ་དུག་གསུམ་པོ་གང་གིས་ཀུན་ནས་བསླངས་ནས་བསགས་པ་ཡིན་འདུག་བརྟགས་ན། ཡང་ན་འདོད་ཆགས། ཡང་ན་ཞེ་སྡང་། ཡང་ན་གཏི་མུག་གི་སྒོ་ནས་བསགས་པ་ཞིག་ཡིན་པ་དང་། གསུམ་པ་འགྲིམ་པའི་སྒོ་ནི། བསགས་པའི་སྒོ་ལུས་ངག་ཡིད་གསུམ་གང་གི་སྒོ་ནས་བསགས་པ་ཡིན་ན་དེ་དག་ཡིན། བཞི་བ་ངོ་བོའི་སྒོ་ནི། རང་བཞིན་གྱི་སྡིག་པ་མི་དགེ་བ་བཅུ་དང་མཚམས་མེད་པ་ལྔ་ལ་སོགས་པ་ལྟ་བུ་དང་། བཅས་པའི་ལྟུང་བ་བཅོམ་ལྡན་འདས་ཀྱིས་ད་ཕྱིན་ཆད་འདི་བྱས་ན་ཉེས་ལྟུང་འདི་དང་འདི་ལྟ་བུར་འགྱུར་རོ་གསུངས་པའི་ཕྱི་སོ་ཐར། ནང་བྱང་སེམས། གསང་བ་རིག་འཛིན་སྔགས་ཀྱི་སྡོམ་པ་དང་འགལ་བ་ཐམས་ཅད་ཡིན། ལྔ་བ་ཡུལ་གྱི་སྒོ་ནི། སྲིད་པ་འཁོར་བ་དང་ཞི་བ་མྱ་ངན་ལས་འདས་པའི་ཡུལ་གཉིས་པོ་གང་ལ་བརྟེན་ནས་སྡིག་པ་བསགས་པ་གང་ཡིན་པ་དེ་དག་དང་། དྲུག་པ་བྱེད་ལས་ཀྱི་སྒོ་ནི། ཚེ་འདི་དང་ཕྱི་མར་རྣམ་སྨིན་ཡིད་དུ་མི་འོང་བ་མྱོང་བར་བྱེད་པ་སྟེ། དེ་ལྟ་བུའི་སྡིག་པའི་སྒོ་དྲུག་དང་འབྲེལ་བའི་མི་དགེ་བ་དེ་དག་འཆགས་པར་བྱེད་པའི་ཆོས་བཞིའམ་གཉེན་པོ་སྟོབས་བཞི་ནི། གཉེན་པོ་ཀུན་ཏུ་སྤྱོད་པའི་སྟོབས། ཉེས་བྱས་སུན་འབྱིན་པའི་སྟོབས། སོར་ཆུད་པའི་སྟོབས་སམ་སྡོམ་པའི་སྟོབས། རྟེན་གྱི་སྟོབས་དང་བཞི་ལས། དང་པོ་གཉེན་པོ་ཀུན་ཏུ་སྤྱོད་པའི་སྟོབས་ནི། དེ་ཡང་ང་ཚོས་བསམ་པ་བྱང་ཆུབ་མཆོག་ཏུ་སེམས་བསྐྱེད་པ་ཡིན་ཕྱིར་ང་གཅིག་པུའི་སྡིག་པ་བཤག་དགོས། གཞན་སེམས་ཅན་ཐམས་ཅད་ཅི་འགྱུར་ཡང་འགྱུར་སྙམ་དུ་མི་རིགས་པས། ཕ་མས་ཐོག་དྲངས་བདག་སོགས་འགྲོ་ཀུན་གྱིས།། ཐོག་མ་མེད་པའི་དུས་ནས་ད་ལྟའི་བར།། ཞེས་གསུངས་པ་སྟེ། ད་ལྟ་ཚེ་འདིའི་ཕ་མས་ཐོག་དྲངས་ནས་བདག་སོགས་ཁམས་གསུམ་འགྲོ་བ་ཀུན་ཀྱིས། འཁོར་བར་འཁོར་བའི་ཚེ་རབས་ཐོག་མ་མེད་པ་དུས་འདི་ནས་འགོ་བརྩམས་པས་དེ་ཡན་ཆད་མེད་དོ་ཞེས་པ་ལྟ་བུའི་འཁོར་བའི་ཡར་ཐོག་གི་མཐར་ཐུག་པ་མེད་པའི་དུས་རིང་པོ་ནས་ད་ལྟའི་དུས་ཀྱི་སྐྱེ་བ་འདི་ལ་མ་ཐུག་གི་བར་གྱི་སྡིག་པ་མི་དགེ་བའི་ལས་སྣ་ཚོགས་པ་ཤིན་ཏུ་མང་པོ་བྱས་པའི་ནང་ནས། དང་པོར་མི་དགེ་བ་བཅུ་བཤགས་པ་ནི། དང་པོ་ལུས་ཀྱི་མི་དགེ་བ་གསུམ་བཤགས་པ། སྲོག་གཅོད་མ་བྱིན་ལེན་དང་མི་ཚངས་སྤྱོད།། ལུས་ཀྱི་མི་དགེ་གསུམ་པོ་མཐོལ་ལོ་བཤགས།། རྫུན་དང་ཕྲ་མ་ཚིག་རྩུབ་ངག་འཁྱལ་བ།། ངག་གི་མི་དགེ་བཞི་པོ་མཐོལ་ལོ་བཤགས།། བརྣབ་སེམས་གནོད་སེམས་ལོག་པར་ལྟ་བ་སྟེ།། ཡིད་ཀྱི་མི་དགེ་གསུམ་པོ་མཐོལ་ལོ་བཤགས།། ཞེས་གསུངས་པ་སྟེ། དེ་ཡང་མི་དགེ་བ་དེ་ལ་ལུས་ཀྱི་སྒོ་ནས་གསུམ། ངག་གི་སྒོ་ནས་བཞི། ཡིད་ཀྱི་སྒོ་ནས་གསུམ་དང་བཅུ་ལས། དང་པོ་ལུས་ཀྱི་མི་དགེ་བ་གསུམ་གྱི་དང་པོ་སྲོག་གཅོད་པ་ནི། དེ་ཡང་གཞི་སེམས་ཅན་ཡིན་པ་གང་ཞིག བསམ་པ་བསམ་བཞིན་དུ་གསོད་པའི་སེམས་ཀྱིས། སྦྱོར་བ་མཚོན་དང་དུག་དང་ངན་སྔགས་ལ་སོགས་པའི་གསོད་ཐབས་སྣ་ཚོགས་ཀྱིས་སེམས་ཅན་གྱི་སྲོག་གི་དབང་པོ་བཅད་ཅིང་འགག་པར་བྱེད་པ་ཡིན་ཞིང་། དེ་ལ་སྲོག་བཅད་པའི་ཆ་ནས་འདྲ་ནའང་། ཡུལ་ཀྱི་ངོས་ནས་ཉེས་དམིགས་ཆེ་ཆུང་མི་འདྲ་བ་ཡོད་དེ། དཔེར་ན་ཕ་མ་སློབ་དཔོན་དགྲ་བཅོམ་སོགས་བསད་ན་མཚམས་མེད་ཀྱི་གྲལ་དུ་འགྲོ་བའི་ཉེས་དམིགས་ཆེན་པོ་དང་། སྤྱིར་བཏང་གི་མི་བསད་པ་རང་བཞིན་གྱི་ཉེས་པའི་ཆ་ནས་སྲོག་བཅད་པ་དང་། བཅས་པའི་ཁྲིམས་ལས་ཕམ་ལྟུང་། དུད་འགྲོ་གསོད་པ་ལྟ་བུ་ལ་མཚོན་ན་རང་བཞིན་གྱི་ངོས་ནས་སྲོག་བཅད་པ། སོ་ཐར་གྱི་སྐབས་སུ་སྤངས་ལྟུང་ལྟ་བུ་དང་། ཡང་ཀུན་སློང་གི་ཐོག་ནས་བཤད་ན། འདོད་ཆགས་ཀྱི་སྒོ་ནས་ཤ་ལྤགས་གླ་རྩི་སོགས་ཀྱི་ཆེད་དུ་རི་དྭགས་གསོད་པ་ལྟ་བུ་དང་། ཞེ་སྡང་གི་སྒོ་ནས་དགྲ་བསོད་པ་ལྟ་བུ་དང་། གཏི་མུག་གི་སྒོ་ནས་འཚེ་བ་ཆོས་སུ་སྨྲ་བས་སྲོག་གཅོད་དགེ་བར་བརྩིས་པ་ལྟ་བུ་དང་། ཉེས་དམིགས་མ་ཤེས་པར་བསད་པ་དང་། རང་ཉིད་ཀྱི་ལག་དངོས་སུ་དར་ནས་བསད་པ་བྱས་ལ་བསགས་པའི་སྡིག་པ། གཞན་ལ་གསོད་དུ་འཇུག་པ་དང་བསད་པ་ལ་རྗེས་སུ་ཡི་རང་བྱས་པ་བསགས་ལ་མ་བྱས་པའི་སྡིག་པ་དང་། རང་གཞན་གཉིས་ཀའམ་མི་མང་པོས་མཉམ་དུ་བསད་བྱ་གཅིག་བསད་ནའང་སྡིག་པ་ཐམས་ཅད་ལ་ཡོད་པ། མཛོད་ལས། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་གསུངས་པ་ལྟ་བུ་སྟེ། དེ་ཡང་སྒོ་བཤས་བཤའ་བའི་སྐབས་སུ་སྒོ་ཕྱུགས་གཡག་དང་ལུག་ལྟ་བུ་དེ་ཤན་པ་ཞིག་ཁྲིད་དེ་གསོད་དུ་བཅུག་ནས་གླ་བྱིན་ན་སྡིག་པ་དེས་ཁྱེར་འགྲོ་སྣང་ཤར་བ་ནི་གླེན་པ་ངོ་མ་བོའི་ལས་ཀ་སྟེ། སྡིག་པ་འདྲ་འདྲར་ཡོད་པ་མ་ཟད་རྗེས་སུ་ཡི་རང་བྱེད་མཁན་ལའང་སྡིག་པ་དེ་དང་གཅིག་མཚུངས་སུ་ཡོད་པ་ཡིན། དེ་ཡང་སྲོག་གཅོད་ཀྱི་སྡིག་པ་གཅིག་བགོས་བཞག་པ་ལྟ་བུ་མ་ཡིན་པར་མི་རེ་རེ་བཞིན་དུ་སྲོག་གཅོད་ཀྱི་སྡིག་པ་ཆ་ཚང་རེ་ཡོད་པར་གསུངས་པ་ཡིན། གསོད་སེམས་མེད་བཞིན་བསད་པ་དཔེར་ན་རྐང་ཞབས་སུ་འབུ་ཤི་བ་ལྟ་བུ་ནི་བྱས་ལ་མ་བསགས་པའི་སྡིག་པ་སྟེ། དེ་ནི་གཞི་སེམས་ཅན་ཡིན་པ་མ་ཤེས་ཤིང་བསམ་པ་གསོད་སེམས་དང་སྦྱོར་བ་གསོད་པར་རྩོམ་པ་གཉིས་ཀ་མེད་པས་གཞི་བསམ་སྦྱོར་བ་གསུམ་ཀ་མ་ཚང་བས་སྡིག་པ་ཆུང་ཤོས་ཡིན། སྤྱིར་ན་སེམས་ཅན་གྱི་སྲོག་བཅད་པ་འདི་ལུས་ངག་གི་མི་དགེ་བའི་ནང་ནས་ཉེས་པ་ལྕི་ཤོས་ཡིན་པས། སྲོག་བཅད་གོང་ན་སྡིག་གཞན་མེད། །ཅེས་གསུངས་པ་ཡིན། སྲོག་གཅོད་ཀྱི་ཐད་ནས་ཞིབ་ཀྱིས་བཤད་ན། སྲོག་བཅད་པའི་རྣམ་སྨིན་གྱི་འབྲས་བུ་ངན་སོང་གང་རུང་དུ་སྐྱེས་ནས་བསྐལ་བ་མང་པོ་ལ་སྡུག་བསྔལ་མྱོང་དགོས་པ་དང་། མྱོང་བ་རྒྱུ་མཐུན་གྱི་འབྲས་བུ་གལ་ཏེ་རྣམ་པར་སྨིན་པ་མྱོང་སྟོབས་ཀྱིས་ཟད་ནས་ངན་སོང་གི་གནས་ནས་ཐར་ན་ཡང་། གང་དུ་སྐྱེས་ན་ཚེ་ཐུང་ནད་མང་སྲོག་ལེན་ལྔ་བརྒྱ་འཇལ་དགོས་པ་དང་། བྱེད་པ་རྒྱུ་མཐུན་གྱི་འབྲས་བུ་ཁྲ་དང་སྤྱང་ཀི་ལ་སོགས་པ་དུད་འགྲོ་གསོད་སེམས་ཅན་གྱི་ལུས་དང་། མི་ལུས་ཐོབ་ན་ཡང་ཤན་པ་ལ་སོགས་པ་སྲོག་གཅོད་ལ་དགའ་མཁན་གྱི་རིགས་སུ་སྐྱེ་བ་དང་། དབང་གི་འབྲས་བུ་དགྲ་ཇག་གི་འཇིགས་པ་ཆེ་ས་དང་སྲོག་མགོ་མི་ཐོན་པའི་ས་ཆ་སྡུག་པོའི་ཡུལ་དུ་སྐྱེ་བ་ལེན་པ་ཡིན། སྐྱེས་བུ་བྱེད་པའི་འབྲས་བུ་ནི། རྒྱུ་དེའི་འབྲས་བུ་དེ་ཆུད་མི་ཟ་བར་སྨིན་པའོ། །སེམས་ཅན་བསད་པའི་རྣམ་སྨིན་མྱོང་བའི་གཏམ་རྒྱུད་ཅིག་བཤད་ན། སྔར་སྟོན་པ་སངས་རྒྱས་བཅོམ་ལྡན་འདས་ཞལ་བཞུགས་སྐབས། འཕགས་པ་མོའུ་འགལ་གྱི་བུ་དང་དགེ་སློང་དཔལ་སྐྱེས་གཉིས་ཉིན་ཞིག་ལ་རྒྱ་མཚོ་ཆེན་པོའི་འགྲམ་དུ་བྱོན་སྐབས་ཀྱི་ལམ་ཁ་ཞིག་ན་མི་གཅན་གཟན་གྱི་མགོ་བོ་ཅན། ལུས་ཐམས་ཅད་མེ་འབར་ཞིང་ཨ་ཚ་ཨ་ན་དང་ངུ་འབོད་ཀྱིས་ལུང་པ་བཀང་ནས་ཡོད་པ་ཞིག་ལ། ཡི་དྭགས་འཇིགས་སུ་རུང་བ་ལག་ན་མདའ་གཞུ་ཐོགས་པ་ཁྲི་འབུམ་མང་པོས་བསྐོར་ནས་མི་དེ་འབེན་དུ་བཙུགས་ཏེ། མདས་གཙག་བཞིན་ཡོད་པར། དགེ་སློང་དཔལ་སྐྱེས་ཀྱིས་མོའུ་འགལ་བུ་ལ། མི་འདིས་ལས་ཅི་ཞིག་བསགས་པའི་རྣམ་སྨིན་ཡིན་ཞེས་དྲིས་པས། མོའུ་འགལ་གྱི་བུས། མི་འདི་ཚེ་རབས་སྔོན་མ་རི་དྭགས་མང་པོ་གསོད་མཁན་གྱི་རྔོན་པ་ཞིག་ཡིན་པས་སྡུག་བསྔལ་འདི་ལོ་མང་པོར་མྱངས་ནས་ད་དུང་གཞི་ནས་སེམས་ཅན་དམྱལ་བ་ཆེན་པོར་སྐྱེ་དགོས་པས་དེ་ལས་ཐར་པའི་དུས་ཡོད་པར་དཀའ། ཞེས་གསུངས་པ་ཡིན། དེ་ལྟར་དུ་སྲོག་གཅོད་ཀྱི་རྣམ་སྨིན་ལྕི་ཞིང་ཉེས་པ་ཆེ་བས་སྡུག་བསྔལ་ཆེན་པོ་མྱོང་དགོས་པ་དང་། ཡང་གནའ་སྔ་མོ་ཞིག་ལ་ཉེས་ཅན་ཁྲིམས་ལ་སྦྱར་ནས་གསོད་མཁན་གྱི་རྒྱལ་པོ་ཞིག་ཡོད་པ་དེ་རྒྱ་མཚོའི་ནང་དུ་ཆུ་སྲིན་ཆེན་པོ་ལུས་དཔག་ཚད་བདུན་བརྒྱ་ཡོད་པ་ཞིག་ཏུ་སྐྱེས་པ་དང་། འཁོར་དང་བློན་པོ་སེམས་ཅན་བསད་ཚད་ཐམས་ཅད་ཆུ་སྲིན་ཆུང་ཆུང་ཤ་སྟག་སྐྱེས་ནས། ཆུ་སྲིན་ཆེན་པོ་དེའི་ལུས་ལ་ཞུགས་ནས་ཁ་ཟས་བྱེད་པའི་སྡུག་བསྔལ་དེ་ལོ་བརྒྱ་སྟོང་མང་པོར་མྱོང་བའི་མཐར་རྒྱལ་པོའི་ཁབ་ཏུ་སྲིན་བུའི་ལུས་ལེན་པ་སོགས་གསུངས་པ་ཡིན། ཉེས་ཅན་ཁྲིམས་ལ་སྦྱར་ནས་བསད་པའི་རྣམ་སྨིན་དེ་འདྲ་ལྕི་ན་ཉེས་མེད་ཀྱི་སེམས་ཅན་རང་དབང་མེད་པར་བསད་ན་ཉེས་པ་ཅི་འདྲའི་མི་ཆེ་ཨང་། ཡང་རྒྱུ་མཐུན་གྱི་འབྲས་བུ་ལན་གྲངས་གཞན་ལ་མྱོང་འགྱུར་གྱི་དཔེ་ཞིག་བཤད་ན། སྟོན་པ་ཐུགས་རྗེ་ཅན་གྱི་སྐུ་དུས་སུ་རྒྱ་གར་གྱི་རྒྱལ་པོ་འཕགས་སྐྱེས་པོ་ཞེས་པ་དང་བློན་པོ་མ་ལ་གནོད་ཅེས་པ་གཉིས་ཡོད། བློན་པོ་དེས་རྒྱལ་པོའི་བློ་ཁ་བསྒྱུར་ནས་ཡུལ་སེར་སྐྱའི་གྲོང་ཁྱེར་ལ་དམག་དྲངས་ཏེ་སྟོན་པའི་སྐུ་ཉེ་རུས་རྒྱུད་ཏག་ཏག་ཡིན་པའི་ཤཱཀྱ་བ་ཁྲི་བདུན་སྟོང་དུས་གཅིག་ལ་མཉམ་པོར་བསད་པ་ཕལ་ཆེ་བ་བདེན་པ་མཐོང་བ་ཤ་སྟག་ཡིན། ཤུལ་དུ་ལྷག་པའི་ཡུག་ཟ་མོ་དང་དྭ་ཕྲུག་ཐམས་ཅད་ཀྱང་གསོན་པོ་དོང་དུ་བཅུག་ནས་མནན་པར་བྱས། སྟོན་པ་བཅོམ་ལྡན་འདས་ས་ཆ་དེ་ན་བཞུགས་ཡོད་ཀྱང་། དམག་ཟློག་པ་ཕར་ཞོག་ལས་ཀྱི་ཚུལ་བཞེས་ནས་དབུ་བསྙུངས་བར་གྱུར། དེའི་རྒྱུ་མཚན་ཅི་ཡིན་པ་དགེ་སློང་རྣམས་ཀྱིས་བཅོམ་ལྡན་འདས་ལ་ཞུས་སོ། །བཅོམ་ལྡན་འདས་ཀྱིས་གནའ་སྔ་མོ་ཞིག་ལ་ཆུ་ཆེན་པོ་ཞིག་གི་འགྲམ་དུ་ཉ་པ་ལྔ་བརྒྱ་གནས་ཆགས་ནས་བསྡད་ཡོད་ཅིང་། ཉ་བ་དེ་དག་གིས་རྒྱ་མཚོའི་ནང་དུ་ཉ་ཤིན་ཏུ་ཆེན་པོ་གཉིས་ཡོད་པ་མཐོང་ནས། དེ་གཉིས་ཐག་ཉེ་སར་འོང་བའི་སྐབས་དང་བསྟུན་ནས་ཉ་རྒྱས་བཟུང་སྟེ་སྐམ་ལ་ཕྱུངས། ཉ་བ་དག་ན་རེ། ཉ་འདི་གཉིས་ལུས་ཤིན་ཏུ་ནས་ཀྱང་ཆེ་བས་ད་མགྱོགས་པོར་བསད་ན་ཤ་མི་ཚོང་བས་ཤ་རུལ་ནས་འཕྲོ་བརླག་ཏུ་འགྲོ་བས་ཀ་བ་ཆེན་པོ་ལ་བཏགས་ཏེ་ཉིན་རེ་བཞིན་ཤ་གཅོད་ཅིང་གཅོད་ཅིང་བཙོང་ན་དགའ། ཞེས་བགྲོས་ནས་ཉ་གཉིས་པོ་གསོན་པོ་ཀ་བའི་ཤིང་སྡོང་ཆེན་པོ་ལ་བཏགས་ནས་ཤ་རྣམས་རིམ་བཞིན་བཅད་པས། ཉ་གཉིས་པོས་ན་ཚ་མ་བཟོད་དེ་སྐད་ངན་བཏོན་ནས་འགྲེ་ལྡོག་བྱས་ཚེ། ཉ་པའི་ནང་དུ་བྱིས་པ་ཞིག་ཡོད་པ་དེས་མཐོང་སྟེ་བཞད་གད་བྱས་སོ། །ཉ་གཉིས་འཆི་རན་ཁར་ཚེ་རབས་ཐམས་ཅད་དུ་འདི་ཚོ་ངེད་གཉིས་ཀྱིས་གསོད་ཐུབ་པར་ཤོག་ཅིག་ཅེས་སྨོན་ལམ་ལོག་འདེབས་བྱས་ནས་ཤིའོ། །དེའི་དུས་ཀྱི་ཉ་ཆེན་པོ་གཉིས་དེ་རྒྱལ་པོ་འཕགས་སྐྱེས་པོ་དང་བློན་པོ་མ་ལ་གནོད་གཉིས་པོ་དང་། ཉ་བ་ལྔ་བརྒྱ་པོ་ནི་ད་ལྟའི་ཤཱཀྱ་ལྔ་བརྒྱ་པོ་འདི་དག ཉ་བ་ཚང་གི་ཁྱེའུ་དེ་ང་ཡིན་ཞེས་གསུངས་པ་ཡིན། རྫོགས་པའི་སངས་རྒྱས་ཀྱིས་ཀྱང་སྲོག་བཅད་དང་འབྲེལ་བའི་རྣམ་སྨིན་གྱི་ལྷག་མ་བཞེས་དགོས་ཚུལ་བསྟན་པ་ཡིན་ན། ང་ཚོ་འཁོར་བ་པ་ཞིག་ལ་ཐོག་མེད་ནས་བསགས་པའི་རྣམ་སྨིན་ཅི་འདྲའི་སྨིན་རྒྱུ་མེད། མདོ་སྡེ་ལས་བརྒྱ་པ་ལས། ལུས་ཅན་དག་གི་ལས་རྣམས་ནི། །བསྐལ་བ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་གསུངས་པ་ལྟར། ལས་ཀྱི་རྣམ་པར་སྨིན་པ་འདི་ས་ལ་མི་སྨིན། རྡོ་ལ་མི་སྨིན། རྣམ་ཤེས་ཀྱིས་ཟིན་པའི་ཕུང་པོ་འདི་འབའ་ཞིག་ལ་སྨིན་གསུངས་ཤིང་། ལས་ཀྱི་རྣམ་སྨིན་མྱོང་བ་ལ་བྲོས་ནས་གཞའ་ས་དང་། གབ་པས་གཟུར་ས་མི་རྙེད། འདུལ་བ་ལས། གང་དུ་གནས་ན་ལས་ཀྱིས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ལ་མེད་རྒྱ་མཚོའི་ནང་ན་མེད། །རི་རྣམས་ཀྱིས་ནི་གསེབ་ཏུ་ཞུགས་ནའང་མེད། །ཅེས་གསུངས་སོ། །རྔོན་པ་དང་ཤན་པ་ཚོའི་ཕ་མ་བུ་ཚ་ཆུང་མ་ཐམས་ཅད་ལན་རེར་དམྱལ་བར་འགྲོ་མི་དགོས་པ་མེད་པར་གསུངས་པ་དང་། ཡུལ་ལུང་སྡེ་བ་གཅིག་གི་ནང་དུ་རྔོན་པ་སྡིག་རྒན་མང་པོ་ཡོད་ན། ཁོ་རང་ཚོ་མ་ཚད་ཡུལ་དེར་སྡེ་བརྒྱད་ཀྱི་བྱད་ཁ་ཕོག་ནས་མི་འདོད་སྣ་དགུ་འབྱུང་བ་དང་། མི་སྡིག་རྒན་དང་ཡུན་རིང་འགྲོགས་ན་སྡིག་སྒྲིབ་ཀྱིས་གནོད་པས། མི་དེ་འདྲ་ཁྱིམ་དུ་ཡོང་ནའང་བསེ་རག་འཁྲི་ནས་གཡང་ཉམས་པ་དང་། བྱིན་རླབས་ཀྱི་རྟེན་རྩ་ཆེན་དེའི་ལག་ཏུ་བཞག་ན་ཉམས་འགྲོ་བ་ཡིན། གཏི་མུག་གི་སྒོ་ནས་གནད་མི་ཤེས་པར་སྲོག་བཅད་པའི་རྣམ་སྨིན་མྱོང་རབས་ཤིག་བཤད་ན། གནའ་སྔ་མོར་དགྲ་བཅོམ་པ་ཞིག་དུད་ཚང་ཞིག་གི་སྒོར་བཞུགས་ཡོད་པ་དང་། དུད་ཚང་དེའི་ཁྱིམ་གྱི་ཕ་ཟུར་ནས་མི་ཞིག་གིས་བཤས་ཟོག་ཅིག་ཁྲིད་ནས་ཡོང་བཞིན་ཡོད་པ་དེས་ངུར་སྒྲ་འབྱིན་སྐབས། དུད་འགྲོའི་སྐད་དང་སྔོན་ལས་ཐམས་ཅད་མཁྱེན་ནས་ཀྱེ་མ་ཀྱེ་ཧུད་ག་ལ་སྲིད་ཅེས་པའི་གསུངས་ཤོར་བས། མི་དེས་དགེ་སློང་ཁྱེད་ཀྱིས་ཅི་ཞིག་གསུངས་པ་ཡིན་ཞེས་དྲིས་དུས། དགེ་སློང་གིས་དེ་ལ་མི་དད་པའི་མི་ལ་བཤད་མི་རུང་ཡང་ཁྱོད་ཀྱིས་དྲིས་པ་ལ་ལྐོག་ཏུ་ངས་བཤད་ཅེས་གསུངས་པ། ཟོག་འདིའི་སྐྱེ་བ་ཡང་སྔོན་ཞིག་ལ་ཚོང་པ་ཕྱུག་པོ་ཞིག་ཡིན། དེའི་དུས་ཁོ་རང་གིས་རྟེན་བཞེངས་བྱས་ནས། དེའི་ཆོས་སྟོན་གྱི་སྐབས་སེམས་ཅན་མང་པོ་བསད། དེའི་ཁྱིམ་ཚང་གིས་ཕྱིན་ཆད་ཆོས་སྟོན་གྱི་སྐབས་སེམས་ཅན་མང་པོའི་ཤ་སྟོན་བྱེད་པའི་གཤོ་དར་བ་ཡིན། དེའི་རྒྱུ་མཐུན་གྱི་འབྲས་བུ་ཚོང་པ་ཤི་ནས་ཁྱིམ་དེའི་སྒོ་ཟོག་ཏུ་ཚུར་སྐྱེས་ཏེ་བསད་པ་ནི་ད་རེས་འདི་དང་ཐེངས་མ་དྲུག་རེད་ཅེས་གསུངས། ཡང་དགྲ་བཅོམ་པ་དེས་དུད་འགྲོ་དེ་སྙིང་རྗེ་བས་གསུངས་པ། སྔོན་རྟེན་བཞེངས་བྱེད་མཁན་ཡང་ཁྱོད་རང་རེད། ཕྱུགས་བསད་དེ་མཆོད་སྦྱིན་བྱེད་མཁན་ཡང་ཁྱོད་རང་རེད། ད་འབྲས་བུ་མྱོང་བ་པོ་ཡང་ཁྱོད་རང་ལ་བབ་སོང་བ་ཡིན། སྔོན་ལས་ལ་གཟུར་རྒྱུ་མེད། ད་ངུར་སྒྲ་བྱས་ནས་འབོད་པས་ཕན་ཐོགས་ཅི་ཞིག་ཡོད། དེ་བས་སེམས་ཀྱིས་འགྱོད་བཤགས་རེ་གྱིས་ལ་འཆི་ཁར་སྨོན་ལམ་ཡག་པོ་རེ་ཐོབ་ཅེས་གསུངས། རྣམ་སྨིན་ནི་དེ་ལྟར་སྨིན་རྒྱུ་ཅན་ཞིག་ཡིན། བཅོམ་ལྡན་འདས་ཀྱིས། རང་གི་ལུས་ལ་དཔེ་ལོངས་ལ། །གཞན་ལ་གནོད་པ་མ་བྱེད་ཅིག །ཅེས་གསུངས་པ་ལྟར་དུ། འཇིག་རྟེན་ན་གཅེས་པ་རང་སྲོག་ཡིན་པས། ཐ་ན་ཚེར་མའི་ཟུག་པ་ཙམ་ཡང་མི་བཟོད་ན་རང་གཅེས་པ་རྒྱུ་མཚན་དུ་བྱས་ཏེ་གཞན་གྱི་སྲོག་དང་ལུས་ལ་གནོད་པ་བྱེད་རུང་བ་མ་ཡིན། རྒྱལ་སྲས་ཞི་བ་ལྷས། གང་ཚེ་བདག་དང་གཞན་གཉིས་ཀ །སྡུག་བསྔལ་མི་འདོད་མཚུངས་པ་ལ། །བདག་དང་ཁྱད་པར་ཅི་ཡོད་ན། །གང་ཕྱིར་གཞན་མིན་བདག་སྲུང་བྱེད། །ཅེས་གསུངས་པ་ཡིན། སྲོག་བཅད་པའི་རྣམ་སྨིན་ལྕི་བ་བཞིན་དུ་སྲོག་གཅོད་སྤངས་པའི་ཕན་ཡོན་ཡང་དེ་ལྟར་ཆེ་བ་ཡིན། སྲོག་གཅོད་སྤངས་པའི་གང་ཟག་ལ་བྱམས་སྙིང་རྗེ་ངང་གིས་སྐྱེ་བ་དང་། དཀར་ཕྱོགས་སྐྱོང་བའི་ལྷ་ཡིས་སྡོང་གྲོགས་བྱེད་པ་དང་། འདྲེའི་བར་ཆད་ཀྱིས་མི་ཚུགས་པ་དང་། སྲོག་ཆགས་ཐམས་ཅད་ཀྱིས་གཉེན་དུ་བརྩི་ཞིང་དགའ་བ་དང་། ཅི་བསམ་ཡིད་བཞིན་དུ་འགྲུབ་པ་ཡིན། སེམས་ཅན་གྱི་སྲོག་ལ་འཚེ་བ་ཇི་ལྟར་བྱས་ན་དེའི་ཚོད་ཀྱིས་བསོད་ནམས་ཉམས་འགྲོ་བ་བཞིན་དུ་ཅི་ཙམ་མ་བསད་ནའང་དེ་ཙམ་གྱིས་བསོད་ནམས་ཇེ་འཕེལ་དུ་འགྲོ་བ་ཡིན། སྡིག་པ་ལ་ཡོན་ཏན་མེད་ཀྱང་བཤགས་ན་དག་པ་སྡིག་པའི་ཡོན་ཏན་ཡིན་གསུངས་པས་སྔོན་ཆད་སྲོག་མང་པོ་བཅད་མྱོང་མཁན་ཞིག་ཡིན་ན། ཕྱིན་ཆད་མི་གསོད་རྒྱུའི་དམ་བཅའ་དང་ལྡན་པའི་སྡིག་བཤགས་རེ་བྱས་ནས་བདེ་བ་ཅན་དུ་སྐྱེ་བའི་སྨོན་ལམ་རེ་ཐོབ་དང་འགྲུབ་མི་འགྲུབ་ལ་སྐྲག་མི་དགོས་པ་ཡིན། སྔོན་སུམ་ཅུ་རྩ་གསུམ་གྱི་ལྷ་ཡི་བུ་ཞིག་འཆི་ལྟས་ལྔ་བྱུང་བས་ལྷའི་མངོན་ཤེས་ཀྱིས་གར་སྐྱེ་བལྟས་དུས། ཕག་ཅིག་གི་ལུས་ལེན་པར་ཤེས་ནས་ངུ་འབོད་བྱས་སོ། །དེའི་གནས་ཚུལ་ལྷའི་དབང་པོ་བརྒྱ་བྱིན་གྱིས་ཤེས་ཏེ་བཅོམ་ལྡན་འདས་ལ་ཞུས་པས། བཅོམ་ལྡན་འདས་ཀྱིས་སྲོག་གཅོད་སྤང་དུ་ཆུག་དང་ངན་སོང་ནས་ཐར་བར་འགྱུར་རོ་གསུངས་པས། བརྒྱ་བྱིན་གྱིས་ལྷའི་བུ་དེ་ལ་ཁྱོད་ཀྱིས་སྲོག་གཅོད་སྤོང་བའི་སྡོམ་པ་ལོངས་དང་ངན་སོང་ལས་ཐར་ཐུབ་ཅེས་སྡོམ་པ་ལེན་དུ་བཅུག་པས་དེ་ཚེ་འཕོས་ནས་དགའ་ལྡན་ལྷ་ཡུལ་དུ་སྐྱེས་སོ། །དེས་ན་རང་ལེགས་སུ་འདོད་པའི་གང་ཟག་ཅིག་ཡིན་ན། རང་གིས་སེམས་ཅན་གྱི་སྲོག་མི་གཅོད་ཅིང་། གཞན་ལ་ཡང་དེ་ལྟར་དུ་སྲོག་བཅད་ཀྱི་ཉེས་དམིགས་དང་སྲོག་གཅོད་སྤངས་པའི་ཕན་ཡོན་བསྒྲགས་ན་བསོད་ནམས་ལྷག་པར་ཆེ་བ་ཡིན། དེའི་ཡན་ཆད་ཀྱིས་མི་དགེ་བ་བཅུ་ལས་ལུས་ཀྱི་མི་དགེ་བ་སྲོག་གཅོད་ཀྱི་སྐོར་དེ་དཔེ་དོན་སྦྲགས་མ་བྱས་ནས་བཤད་པའོ། །གཉིས་པ་མ་བྱིན་ལེན་ནི། འདི་ཡང་དུག་གསུམ་གང་རུང་གི་ཀུན་སློང་དང་། གཙོ་བོ་འདོད་པའི་དབང་གིས་འབྱུང་ཉེ་བ་ཞིག་ཡིན། མ་བྱིན་ལེན་གྱི་ནང་གི་ཉེས་པ་ཆེ་ཤོས་ནི། རྟེན་གསུམ་བཞེངས་པའི་ཆ་རྐྱེན་གྱི་རྒྱུ་ནོར་མཆོད་རྫས་དང་། དགེ་འདུན་ཐུན་མོང་གི་རྒྱུ་རྫས་དང་། ཕ་མའི་རྒྱུ་ནོར་རྐུ་བ་དེ་ཚོ་ཉེས་པ་ཆེ་ཤོས་ཡིན། དེའི་འཕྲོར་རྐུ་འཕྲོག་བཅོམ་གསུམ་དང་བཙན་པོའི་སྒོ་ནས་ལེན་པ་དང་། གཡོ་སྒྱུ་སྣ་ཚོགས་པའི་སྒོ་ནས་ལེན་པ་དེ་ཚོ་ཡིན། ཁྱད་པར་དུ་དཀོན་མཆོག་གི་རྟེན་བཞེངས་རྒྱུ་དང་། དགེ་འདུན་པ་ལ་ཁག་བཞག་ནས་རྒྱུ་ནོར་གཡོ་ལེན་བྱེད་པའི་ལོག་འཚོའི་འཚོ་བ་སྐྱེལ་བ་ནི་ཡར་ཐར་མེད་པའི་ལས་ངན་དངོས་ཡིན་པ་དང་། ཆོས་མིན་ཆོས་ལྟར་བཅོས་ནས་རྒྱུ་ནོར་ལེན་པ་དང་། ཟོག་པོས་གྲུབ་ཐོབ་ཀྱི་རྣམ་པ་བསྟན་ཏེ་དཀོར་ནོར་བསྡུ་བ་དེ་ལོག་པའི་འཚོ་བ་མ་བྱིན་ལེན་གྱི་ནང་ནས་ཚབས་ཆེ་ཤོས་ཡིན། མ་ཎི་བཀའ་འབུམ་གྱི་ནང་དུ་དཀོར་རྫས་བསྡུས་ཏེ་ཕ་མ་གཉེན་གྲོགས་གསོས་ན། དཀོར་བསྡུ་མཁན་རྔ་མོང་དུ་སྐྱེ་ཞིང་ཟ་མཁན་རྔ་ཕྲུག་ཏུ་སྐྱེ་བ་དང་། ཡོན་བདག་ཐམས་ཅད་རྔ་མོང་གི་བདག་པོར་སྐྱེས་ཏེ་ལན་ཆགས་འཇལ་དགོས་ཞེས་གསུངས་པ་ཡིན། རབ་ཏུ་བྱུང་བ་ཞིག་ལ་ཕམ་པ་བཞིའི་ནང་ནས་བསྲུང་དཀའ་ཤོས་ཀྱང་འདི་ཡིན། གྲུབ་ཆེན་ཐང་སྟོང་རྒྱལ་པོས། རྡོ་ཕ་བོང་གཅིག་གི་ནང་ནས་སྦྲུལ་འདོམ་པ་གང་ཙམ་ཞིག་གི་ལུས་ཐོག་ལ་སྲོག་ཆགས་གཞན་པ་སྟོང་ཕྲག་མང་པོས་ཁ་ལག་ཐམས་ཅད་འཐམས་ནས་ཟ་བ་ཞིག་ལ་ལྗགས་ཆབ་གཏོར་ཏེ། གནས་སྤར་མཛད་ནས་གྲྭ་པ་ཡོན་ཏན་མེད་པས་དཀོར་ཟོས་ན་འདི་འདྲ་འགྱུར་བ་ཡིན་ཞེས་གསུངས་པ་ཡིན། གྲྭ་བ་ཡོན་ཏན་མེད་པས་དཀོར་ཟོས་ན་དེ་འདྲ་ཉེས་པ་ཆེ་ན། བླ་མ་ཡོན་ཏན་མེད་པ་བླ་རྫུན་རྟགས་ཙམ་འཆང་བ་ཞིག་གིས་དཀོར་ཟོས་ན་ཅི་འདྲའི་སྡུག་བསྔལ་ཞིག་མྱོང་མི་དགོས། མྱོང་བའི་ལོ་རྒྱུས་ཀྱང་ཡོད་དེ། གནའ་སྔ་མོ་རྗེ་ཁ་རག་པ་ཞེས་པའི་བླ་མ་རྩ་ཆེན་ཞིག་བཞུགས་ཡོད་པ་ལ། ཁོང་གི་གཟིམ་ཁང་གི་ཉེ་འཁོར་དུ་ཁྲ་སྡིག་ཅན་ཞིག་ཡོད་པ་དེས་བྱིའུ་བརྒྱ་སྟོང་ཁྲི་འབུམ་བསད་བསད་དེ་ཉིན་ཞིག་ཁྲ་རྒན་དེ་ཤི་སོང་བས། བླ་མས་མངོན་ཤེས་ཀྱིས་དེ་གར་སྐྱེ་བལྟ་དགོས་སྙམ་སྟེ་གཟིགས་དུས། ཁྲ་རྒན་སྡིག་པ་ཆེ་ན་ཡང་སྔོན་གྱི་དགེ་འབྲས་ཅུང་ཟད་ཅིག་ཡོད་པའི་དབང་གིས་འབྲོག་པ་ཕྱུག་པོ་ཞིག་གི་བུར་སྐྱེས་། ཡིན་ནའང་སྔོན་མ་བསད་བསད་གཏུབས་གཏུབས་ཀྱི་ལས་དབང་གིས་ཚེ་རིང་པོ་མ་ཐུབ་སྟེ་ཤིའོ། །ཡང་གར་སྐྱེ་གཟིགས་པས། བླ་མ་དགེ་བཤེས་ཆེན་པོ་གདུལ་བྱ་ཕྲིན་ལས་ཤིན་ཏུ་རྒྱས་པ་ཞིག་གི་ལུས་བླངས་པ་ཡིན། བླ་མ་བར་སྐབས་ཤིག་ལ་གདུལ་བྱ་རྒྱས་ཆེ་ནས་གཤིན་ཆོག་ཐམས་ཅད་རྟ་ཐོག་ནས་མར་མ་བབ་སྟེ་བྱོན་ཞོར་དུ་མཛད་ནས་འཕོ་རྟ་མང་པོ་རྟ་ཐོག་ནས་རུག་མཁན་དུ་གྱུར་པས་བླ་མ་རྟ་ཆོག་པ་ཞེས་གྲགས་པར་གྱུར། ཐ་མར་ཁྲོམ་དབང་ཆེན་པོ་ཞིག་བསྐུར་རྩིས་བྱེད་དུས། བླ་མ་བསམ་ལོང་དྲན་ལོང་མེད་པར་གཤེགས་སོང་། དེའི་དུས་བླ་མ་ཁ་རག་པ་ཚང་གི་ཉེ་གནས་ཤིག་དེར་ཡོད་པས་བླ་མ་འདས་པའི་དབང་པོ་རྣམ་ལྔ་སྦྱང་ཆོག་བྱེད་རྒྱུར་ཁ་རག་པའི་མདུན་སར་བསྐུར་བ་དང་། གྲྭ་པས་བླ་མའི་མདུན་དུ་མ་ཐོན་གོང་བྲག་རྩ་ཞིག་ཏུ་བླ་མ་འདས་པའི་སྐུ་གདུང་དེ་དར་གྱིས་ལྕིབས་ནས་བཞག་སྟེ། བླ་མ་ཁ་རག་པའི་མདུན་དུ་སོང་ནས་ལོ་རྒྱུས་ཚང་མ་ཞུས་སྐབས། བླ་མས་ཁོང་གི་སྣམ་སྦྱར་དེ་བསྐུར་ཏེ་དེས་བཏུམས་ལ་ཁྱེར་ཤོག་གསུངས། གྲྭ་པས་སྣམ་སྦྱར་ཁྱེར་ནས་དར་ཁ་ཚུར་བཤིག་སྟེ་བལྟས་དུས། བླ་མ་འདས་པའི་དབང་པོ་རྣམ་ལྔ་གང་ན་ཡོད། སྡིག་པ་ར་ཙ་གྲུ་གང་ཙམ་དུ་གྱུར་ནས་འདུག་པ་ལ། ཕྱིར་འོང་ནས་བླ་མ་ལ་ཞུས་མ་ཐག་ཏུ། བླ་མ་ཁ་རག་པ་ཁོང་བྱོན་ནས་སྣམ་སྦྱར་གྱིས་གཡོགས་ཀྱང་རྟེན་འབྲེལ་མ་འཛོམས་པས་མ་ཐུབ་སྟེ་ཤོར། བྲག་ཆེན་པོ་ཞིག་གི་རྩར་བརྒྱུགས་ནས་བྲག་རྩར་ཐོན་སྐབས་ལས་ཀྱི་དབང་གིས་བྲག་གི་ཁ་རང་བྱེ་རུ་བྱུང་བའི་ནང་དུ་འཛུལ་བ་དང་བྲག་གི་ཁ་ཟུམ་སོང་། བླ་མ་དེ་ལ་འབྲེལ་བ་ཐོབ་པའི་རྣམ་ཤེས་སྲོག་ཆགས་མང་པོ་བྲག་དེ་ལ་ཐིམ་ནས་སྡིག་པ་ར་ཙ་དེའི་ལུས་ལ་ཁ་ཟས་བྱས་ནས་འཆིའང་མི་ཐུབ་པའི་སྡུག་བསྔལ་མྱོང་ཞིང་། སྡིག་པ་ར་ཙ་དེའི་སྙིང་ནང་ནས་ཤིང་སྡོང་ཆེན་པོ་ཞིག་སྐྱེས། བླ་མ་ཁ་རག་པའི་སློབ་མ་རྣམས་ཀྱིས་ལས་ངན་འདི་དུས་ནམ་ཞིག་ནས་ཐར་བ་ཡིན་ཞུས་པས། ཤིང་སྡོང་ཆེན་པོ་དེའི་ཐོག་བྱ་བབ་པའི་བྱའི་སྡེར་མོས་བཞོགས་ནས་ཤིང་སྡོང་དེ་མ་ཟད་ཀྱི་བར་ཐར་བར་མི་འགྱུར་རོ་ཞེས་གསུངས་པ་ཡིན། དེས་ན་དཀོར་ནག་པོ་བྱུང་རྒྱལ་དུ་སྤྱོད་པ་འདི་བདེ་བ་ཅན་དུ་སྐྱེ་བ་ལ་བར་དུ་གཅོད་པའི་སྒྲིབ་པ་གཅིག་ཡིན་པས། དེ་ལྟ་བུའི་མ་བྱིན་ལེན་གྱི་ཉེས་དམིགས་བསམས་ནས་སྲོག་ལ་བབ་ཀྱང་མ་བྱིན་ལེན་པ་སྤངས་ན། དེ་མཐོ་རིས་སུ་སྐྱེ་ཞིང་ལོངས་སྤྱོད་ཤིན་ཏུ་ཆེ་བ་དང་། གནོད་པ་མེད་པར་རང་དབང་དུ་སྤྱོད་ཆོག་པའི་ཕན་ཡོན་ཆེན་པོ་ཡོད་པའོ། །གསུམ་པ་མི་ཚངས་སྤྱོད་ནི། མི་ཚངས་སྤྱོད་འདི་ཚངས་སྤྱོད་སྡོམ་ལྡན་གྱི་ཕམ་བཞིའི་ནང་གི་གཅིག་ཡིན། འདི་ནས་གཙོ་ཆེ་བའི་དབང་དུ་བྱས་ཏེ་བརྗོད་བདེར་གསུངས་པ་མ་གཏོགས། ཁྱིམ་པར་བཀག་རྒྱུ་དངོས་ནི་འདོད་པས་ལོག་པར་གཡེམ་པ་སྟེ་རང་ཉིད་ཀྱི་བཟའ་ཟླ་མ་ཡིན་པའི་སྐྱེས་པ་དང་བུད་མེད་བསྟེན་པ་ཡིན། འདི་ཡང་དུག་གསུམ་གྱི་དབང་གིས་སྤྱད་པ་ལས་གཙོ་བོ་འདོད་པ་ལས་བྱུང་བ་ཡིན། འདི་ལ་ཡང་རིགས་ཀྱིས་བསྲུངས་པ་དང་། ཡུལ་དུས་ཀྱིས་བསྲུངས་པ་དང་། མ་སྨིན་པ་དང་། གནས་མ་ཡིན་པ་ལ་སོགས་པའི་རྣམ་གྲངས་ཡོད་ཅིང་། དེས་ན་རབ་ཏུ་བྱུང་བ་ཞིག་ཡིན་དུས་མི་ཚངས་སྤྱོད་ཀྱི་ཕམ་ལྟུང་བྱུང་ན་སྡོམ་པ་ཡོངས་སུ་གཏོང་བ་ནི་སྨྲོས་མ་དགོས་ཤིང་། འདི་ནས་མི་དགེ་བ་བཅུ་བརྩི་དུས་ཁྱིམ་པའི་ཕྱོགས་གཙོ་བོར་བྱས་ཏེ་ལོག་གཡེམ་གསུངས་པ་ཡིན། སྐལ་བ་དང་ལྡན་པའི་གང་ཟག་རང་རང་གི་ངོས་ནས་མི་ལུས་ཐོབ་པ་དོན་ཡོད་ཀྱི་ཐོག་ནས་ཕྱི་མ་བདེ་བ་ཅན་གྱི་ཞིང་ཁམས་སུ་ཨེ་སྐྱེ་བསམ་པ་ཡིན་ན། ཁྱིམ་པས་འདོད་ལོག་དང་། རབ་ཏུ་བྱུང་བ་ཞིག་ཡིན་ན་མི་ཚངས་སྤྱོད་ཕྱོགས་མཐུན་དང་བཅས་པ་སྤོང་བ་ལ་བརྩོན་པ་བསྐྱེད་དགོས། དེ་ལྟར་བྱས་ན་ཚེ་འདིར་ཐམས་ཅད་ཀྱིས་བསྟོད་ཅིང་བསྔགས་པ་བརྗོད་པ་དང་། ཡ་རབས་དམ་པའི་རིགས་སུ་འགྱུར་བས་མ་ཟད། ཚེ་རབས་ཀུན་ཏུ་ཚུལ་ཁྲིམས་བསྲུང་རྒྱུར་དགའ་བ་དང་། གནས་སྐབས་སུ་ལྷ་ཡུལ་ལ་སོགས་པ་མཐོ་རིས་ཀྱི་གནས་སུ་སྐྱེས་ནས་མཐར་ཐུག་རྣམ་པ་ཐམས་ཅད་མཁྱེན་པ་ཐོབ་པའི་རྒྱུར་འགྱུར་བ་ཡིན། དེ་ཡིས་ལུས་ཀྱི་མི་དགེ་གསུམ་པོ་སོང་བས་དེ་ལྟ་བུ་ལུས་ཀྱི་སྒོ་ནས་བསགས་པའི། སྲོག་གཅོད་མ་བྱིན་ལེན་དང་མི་ཚངས་སྤྱོད་དམ་འདོད་ལོག་སྤྱད་པའི་མི་དགེ་གསུམ་པོ་དེ་མགོན་པོ་འོད་དཔག་མེད་འཁོར་དང་བཅས་པའི་སྤྱན་སྔར་འགྱོད་པ་དང་བཅས་མཐོལ་ལོ་བཤགས་སོ་ཞེས། གནོང་ཚིག་དང་བཅས་པས་བཤགས་སྡོམ་གྱི་ཚིག་བརྗོད་པ་སྟེ། སྡིག་པ་མི་གསང་བར་མཐོལ་ལོ། །སྡིག་པ་རང་རྒྱུད་དང་ཐ་དད་དུ་ཕྲལ་ནས་བཤགས་སོ་ཞེས་པའོ།། གཉིས་པ་ངག་གི་མི་དགེ་བ་བཞི་བཤགས་པ། རྫུན་དང་ཕྲ་མ་ཚིག་རྩུབ་ངག་འཁྱལ་བ།། ངག་གི་མི་དགེ་བཞི་པོ་མཐོལ་ལོ་བཤགས།། ཞེས་གསུངས་ཏེ། དང་པོ་རྫུན་ནི། མ་མཐོང་བཞིན་དུ་ལྷ་འདྲེ་མཐོང་བར་སྨྲ་བ་དང་། མ་ཐོབ་བཞིན་དུ་གྲུབ་རྟགས་དང་ལུང་བསྟན་ཐོབ་པར་སྨྲ་བའི་མི་ཆོས་བླ་མའི་རྫུན་རབ་ཏུ་བྱུང་བ་ཞིག་ཡིན་ན་ཕམ་ལྟུང་འབྱུང་བྱེད་ཀྱི་རྫུན་དང་། ཆོས་དང་བླ་སེར་ལ་སྐུར་འདེབས་ངན་འདོགས་བྱེད་པ་དང་། བླ་མ་དང་ཕ་མ་བསླུ་བའི་རྫུན་ཆེན་པོ་དང་། གཞན་མགོ་སྐོར་གྱི་ཚིག་གིས་བསླུ་བའི་རྫུན་འབྲིང་པོ་དང་། ཁ་ཤོབ་སྣ་ཤོབ་ཨ་མཚར་གྱི་རྩེད་མོ་ཡན་ཆད་ཀྱི་མཐོ་བཤད་དམའ་བཤད་ཀྱི་རྫུན་ཆུང་ཆུང་སྟེ། རྫུན་འདི་ལ་ཡང་དུག་གསུམ་གྱིས་ཀུན་ནས་བསླངས་པའི་རྫུན་འདྲ་མིན་ཡོད་པ་ཡིན། རྫུན་སྨྲ་བ་ལ་ཡང་ཉེས་པ་ཆེ་བས་རྣམ་སྨིན་ཡིད་དུ་མི་འོང་བ་ཚེ་འདི་དང་ཕྱི་མར་མྱོང་དགོས་པ་ཡིན། རྫུན་མི་བཤད་པ་ནི་གནས་སྐབས་སུ་ཀུན་ཀྱིས་ཡིད་ཆེས་ཀྱི་གནས་སུ་བཞག་ནས་མི་རབ་གསེར་འདྲ་འདྲ་བརྩི་བ་དང་། ཕྱི་མར་ལྷ་ཡུལ་དུ་སྐྱེ་ཞིང་། མཐར་ཐུག་རྫོགས་པའི་སངས་རྒྱས་ཐོབ་པའི་རྒྱུར་འགྱུར་བ་ཡིན། མདོ་ལས། རིན་པོ་ཆེ་ཐམས་ཅད་ཀྱི་ནང་ནས་བདེན་པའི་རིན་པོ་ཆེ་མཆོག་ཏུ་བཟང་ངོ་། །སྒྲོན་མ་ཐམས་ཅད་ཀྱི་ནང་ནས་བདེན་པའི་སྒྲོན་མ་མཆོག་གོ །མཛའ་བཤེས་ཐམས་ཅད་ཀྱི་ནང་ནས་བདེན་པའི་མཛའ་བཤེས་ཁྱད་པར་འཕགས་པ་ཡིན་ནོ། །ཞེས་གསུངས་པ་ཡིན། མི་རྫུན་རྐྱལ་ཞིག་ཡིན་ཚེ་འདིས་བརྒྱ་བཤད་ན་གཅིག་མི་བདེན། ཀན་གྱིས་ཅི་མི་ཟེར་ཨ་ཞིག་མིན་ཚད་པོ་ཤོབ་ཡིན་རྒྱུ་རེད་སྙམ་པ་ཡིན། ཤོབ་གཅིག་གིས་མི་གཅིག་གི་ཚེ་གང་རྫོད་འགྲོ་བ་ཡིན། གཉིས་པ་ཕྲ་མ་ནི། མཐུན་པ་ཚིག་གི་སྒོ་ནས་མི་མཐུན་པར་བྱེད་པ་དེ་ལ་ཕྲ་མ་ཞེས་ཟེར་བ་ཡིན། འདི་ལ་ཆེ་ས་ནས་དགེ་འདུན་འཁོར་ལོའི་དབྱེན་འདི་དེང་སང་མེད་ནའང་དེའི་ཕྱོགས་མཐུན། བླ་མ་སྐྱེས་ཆེན་འཁོར་དང་བཅས་པ་དབྱེ་བའི་དབྱེན་ཆེན་པོ་དང་། དགོན་སྡེ་ཕན་ཚུན་དང་དགེ་འདུན་འདུས་སྡེའི་བར་དབྱེ་བའི་དབྱེན་འབྲིང་པོ་དང་། ཐ་ན་ཁྱིམ་མཚེས་བཟའ་ཚང་དབྱེ་བ་ཙག་གི་ཙིག་གིའི་དབྱེན་ལ་སོགས་པ་ཕྱི་ཁ་ནང་དབྱེན་གྱིས་འཁོན་ཁ་གཏུག་པ་སྟེ། འདི་ལ་ཡང་དུག་གསུམ་གྱིས་ཀུན་ནས་བསླངས་པའི་ཁྱད་པར་གྱིས་རྣམ་སྨིན་འདྲ་དང་མི་འདྲ་མྱོང་དུ་ཡོད་པ་ཡིན། མི་འགའ་རེ་ཡར་ལ་བརྒྱུགས་ཏེ་དགོན་པ་དཀྲུག མར་ལ་བརྒྱུགས་ཏེ་སྡེ་བ་དཀྲུག དགོན་པ་དང་དགོན་པའི་བར་དཀྲུག སྡེ་བ་དང་སྡེ་བའི་བར་དཀྲུག ཕྱི་དཀྲུག་སྡེ་བ་དཀྲུག ནང་དཀྲུག་བཟའ་ཚང་དཀྲུག་ཡོས་རྔོད་བྱེད་ཀྱི་ཡོག་ཐོད་ཅིག་དང་མཚུངས་པར་ཚང་མ་དཀྲུག་པའི་དཀྲུག་ཐུར་ཕུང་གསུམ་ཐལ་བའི་ཡོག་མགོ་རུ་གྱུར་པའང་ཡོད་པ་ཡིན། དེ་ཚོ་ཤི་མ་ཐག་ཏུ་དམྱལ་བ་མནར་མེད་དུ་སྐྱེ་འགྲོ་རྒྱུ་མ་གཏོགས་མེད་པར་སངས་རྒྱས་ཀྱི་བཀའ་ཚད་མས་གྲུབ་པ་ཡིན། ས་ཐོབ་ཀྱི་སེམས་དཔའ་སྐྱེས་བུ་དམ་པ་དབྱེན་གྱིས་དཀྲུག་མི་ཐུབ་ན་ཡང་། སོ་སྐྱེའི་རང་གཤིས་ལས་མ་འདས་པའི་ཕལ་བ། དེ་ལས་ཀྱང་དེ་རིང་ཁ་རྩང་གི་དུས་ཚོད་ཀྱི་མི། ཨ་གསར་ཆེ། རྔ་ལོ་ཡང་། དྲན་རྒྱུ་མང་། ལས་རྒྱུ་འབེལ། རང་འདོད་ཆེ། བློ་གྲོས་དམན་པ་རྣམས་དབྱེན་གྱིས་གཏོར་ཐུབ་པ་ཡིན། དེས་ན་འདིར་ཡོད་སེར་སྐྱ་ལ་མ་ལྟོས་པར་ཚང་མ་ལ་མཚོན་ན། སྤྱིར་ན་རྒྱལ་བ་ཤཱཀྱ་ཐུབ་པའི་བསྟན་པ་གཅིག་གིས་སྦྲེལ་བའི་མཆེད་ཡིན་པ་དང་། དེའི་ཐོག་ཏུ་ཆོས་གཅིག་དང་ཆོས་བརྒྱུད་གཅིག་གིས་སྦྲེལ་བའི་སྤུན། ཁྱད་པར་དུ་ཞིང་ཁྲིད་འདི་ལ་འབྲེལ་ཚད་པོ་སངས་རྒྱས་འོད་དཔག་མེད་ཀྱི་སྲས། བདེ་བ་ཅན་དུ་འགྲོ་བའི་ལམ་གྲོགས་ཡིན་པས་དབྱེན་ཁ་དཀྲུག་ཤིང་མཁན་གྱི་རྗེས་སུ་འབྲངས་ནས་དམ་ཚིག་ལ་སེལ་ཞུགས་སུ་འཇུག་མི་རུང་། དེ་ནི་གཟབ་དགོས་སའི་གལ་ཆེན་གྱི་གནད་ཅིག་ཡིན། གནའ་སྔ་མོ་ཞིག་ལ་སེང་གེ་ཞིག་གིས་བ་གླང་མོ་ཞིག་བསད་ནས་དེའི་ཕྲུ་གུ་དེ་རང་གི་ཕྲུ་གུ་དང་མཉམ་པོར་གསོས་པས་ནར་སོན་ཏེ་གཉིས་ཀ་ཆེན་པོར་གྱུར་བ་ན། ཉིན་ཞིག་སེང་གེ་མོ་འཆི་རན་པའི་དུས་སུ་ཁ་ཆེམས་བཞག་སྟེ། ཁྱེད་གཉིས་ཀ་ངའི་ནུ་མ་གཅིག་གིས་གསོས་པའི་སྤུན་ཡིན་པས་མཐུན་པར་གནས་དགོས། འཇིག་རྟེན་འདིའི་ཐོག་ཕྲ་མ་མཁན་མང་བས་ང་ཤི་ཚར་རྗེས་ལ་སུ་ཞིག་གི་ཁ་ལའང་ཉན་མི་རུང་ཁྱེད་གཉིས་མཐུན་པོ་གྱིས་ཤིག་ཟེར་ཏེ་ཤིའོ། །དུས་རྒྱུན་དུ་སེང་གེའི་རྗེས་སུ་དེད་ནས་ལྷག་རོ་ཟ་མཁན་གྱི་ཝ་རྒན་ཞིག་ཡོད་པ་ཡིན། སེང་གེས་ནམ་ཡིན་དུ་རི་དྭགས་རེ་བསད་དེ་མགྱོགས་པར་བཟས་ཚར་སྐབས་ཁྱིམ་གྱི་གྲོགས་པོ་དྲན་ནས་ཚང་དུ་ལོག་པ་ཡིན། རི་དྭགས་མང་པོ་མ་བསད་དུས་ཝ་རྒན་གྱིས་ཟ་ལྷག་དེ་ཙམ་ཟ་རྒྱུ་མ་ལོན་པས། ཝ་རྒན་ཁོང་ཁྲོ་ལངས་ནས་ངས་སེང་གེའི་ཟ་ལྷག་ཟ་རྒྱུ་མི་རྙེད་པའི་རྩ་བ་ཁྱུ་མཆོག་འདིའི་ཁུངས་ནས་བྱུང་བ་ཡིན་འདུག་པས། འདི་གཉིས་མི་མཐུན་པའི་གཏམ་ཞིག་གིས་དབྱེ་དགོས་སྙམ་ནས། ཝ་ཡི་རིགས་དེ་སྤྱིར་ན་གཡོ་སྒྱུ་ཆེ་བ་ཡིན་པས། ཁྱུ་མཆོག་གི་ཟུར་དུ་སོང་ནས་གཞའ་གཞའ་གཞུམ་གཞུམ་གྱིས་རྣ་བ་ཕབ་ནས་ཉལ་ཏེ་ཞུམ་ཞུམ་གྱིས་ཉམ་ང་སྟོན་པས། ཁྱུ་མཆོག་གིས་ཞང་པོ་ཁྱོད་ནའམ། ཁྱོད་ཀྱི་ནད་དེ་རླུང་དང་ཚ་བ་གང་ཡིན་ཞེས་དྲིས་པས། ཝ་རྒན་གྱིས་ཤི་ཁུལ་འགུལ་ཁུལ་བྱས་ནས། ང་ལུས་མི་ན་ཡང་སེམས་ན་ནས་མི་བཟོད་པར་འདུག་ཟེར་བར། ཁྱོད་སེམས་ན་རྐྱེན་ཅི་ཞིག་གིས་མ་ཉན་པ་ཡིན་ཞེས་དྲིས་དུས། སེང་གེས་བཤད་རྒྱུར་ཁྱུ་མཆོག་གིས་ཁྱོད་གསོད་དགོས་ཟེར་འདུག་དེ་ཡིས་སེམས་མི་བདེ་བ་ཡིན་ཞེས་ཤོབ་ཆེན་པོ་ཞིག་བཤད་པས། ཁྱུ་མཆོག་གིས་བསམ་བློ་ཞིག་བཏང་ནས་ངེད་གཉིས་མ་གཅིག་གི་ནུ་མས་མཉམ་དུ་གསོས་པ་དང་། དེས་མ་ཚད་མ་ཡིས་ཁ་ཆེམས་བཞག་ཡོད་པས་མི་བདེན་ངེས་ཅན་ཡིན་སྙམ་ནས། ཝ་རྒན་ཁྱོད་ཀྱིས་ཤོབ་དེ་འདྲ་མ་བཤད་ཟེར་བར། ཝ་རྒན་གྱིས་ངས་བཤད་པ་ལ་བདེན་དུ་མ་བཟུང་ན་དེ་རེད་ཟེར་ནས་སོང་ངོ་། །ཡང་སེང་གེའི་ཟུར་དུ་སོང་སྟེ་ད་ལྟའི་དེ་ཨ་ན་མ་ན་འདྲ་ཞིག་བཤད་པས། སེང་གེས་ཀྱང་ཁྱུ་མཆོག་གིས་བཤད་པ་ནང་བཞིན་ཡིད་མི་ཆེས་པར་སྨྲས་ན་ཡང་། གཉིས་ཀའི་ཁོག་ལ་དོགས་པ་མི་སྐྱེ་ཞེས་ཀྱང་སྐྱེས་པས། གཉིས་སྔར་བཞིན་ཚང་ལ་ཚུར་འཛོམས་དུས། སྔར་དང་མི་འདྲ་བའི་གཅིག་གིས་གཅིག་ལ་རྟོག་དཔྱོད་བྱེད་རྒྱུའི་བསམ་བློ་རེ་འཁོར་བས། དུས་རྒྱུན་དུ་ནམ་ཡིན་ཡང་སེང་གེའི་རལ་བ་གསིག་པ་དང་། ཁྱུ་མཆོག་གིས་རྭ་བརྡར་བ་ཡོད་ནའང་། དུས་རྒྱུན་དོགས་མེད་ཡིན་པའི་སྟབས་ཀྱིས་གཉིས་ཀས་ཉམས་སྣང་མེད་པ་ཡིན། དེའི་ཉིན་པར་དོགས་པ་ཁོག་ཏུ་བཅངས་ནས་རྟོག་དཔྱོད་བྱེད་སྐབས། གཉིས་ཀས་ཝ་ཡིས་ཟེར་རྒྱུ་དེ་ངོ་མ་བདེན་འདུག་སྙམ་ནས་ཁྱུ་མཆོག་གིས་སེང་གེའི་ཕོ་བ་དབྲལ། སེང་གེས་ཁྱུ་མཆོག་བསད་དེ་གཉིས་ཀ་ཤི་སོང་བས། སྡིག་ཅན་གྲོགས་ལ་བསྟེན་པ་ཡི། །མིས་ནི་བཟང་པོ་མཐོང་མི་འགྱུར། །སེང་གེ་ཁྱུ་མཆོག་མཛའ་བ་ལ། །ཝ་ཡིས་ཐ་དད་ཕྱེས་ལ་ལྟོས། །ཞེས་པའི་དཔེ་དེ་གྲགས་པ་ཡིན། མི་ཡ་རབས་བརྟན་པོ་ཞིག་ཡིན་ན་དབྱེན་གྱི་ཁ་ཕྱོགས་ལ་རྒྱུག་པ་མ་ཡིན། དེ་ཡང་གནའ་སྔ་མོ་ཞིག་སྟག་ཕྲུག་དཔུང་བཟང་ཞེས་པ་ཞིག་དང་། སེང་ཕྲུག་མཆེ་བཟང་ཟེར་བ་གཉིས་ནི་མཛའ་བཤེས་ཀྱི་གྲོགས་པོ་ཡིན་པ་ན། སྐབས་ཤིག་ལ་ཡང་ཝ་རྒན་ཞིག་གིས་ཁོ་རང་གི་ཁེ་ཕན་ཆུང་ཆུང་ཞིག་ལ་བལྟས་ཏེ། ད་ལྟ་སྔོན་མ་དང་མཚུངས་པར་དབྱེན་སྦྱོར་དཀྲུག་ཤིང་བྱས་པ་ན། དེ་གཉིས་ནི་བུ་རབ་འདྲ་འདྲ་བློ་བརྟན་པོ་གཉིས་ཡིན་པས་ན། ཐེ་ཚོམ་ཙམ་ཡང་མ་སྐྱེས་ཏེ་བརྟགས་པས། ཝ་ཡིས་ཕྲ་མ་བྱས་པ་ཤེས་ཏེ་སེང་གེས་སྦར་ཤད་གཅིག་གི་སྣ་ལ་ཝ་རྒན་བསད་དོ། །ཝ་སྐྱེས་གྲོང་པ་རྫུན་དུ་སྨྲ་བྱེད་པ། །མཛའ་བཤེས་འབྱེད་པར་བྱེད་པས་སྐྱེངས་ཏ་རེ། །ཕྲ་མ་སྨྲ་བ་དེ་ནི་བསད་གྱུར་ནས། །བདེ་བས་མཛའ་བཤེས་དགའ་བར་བྱེད་ལ་ལྟོས། །ཞེས་པའི་གཏམ་རྒྱུད་ཅིག་དེ་ནས་གྲགས་པ་ཡིན་ནོ། །ཇི་སྐད་དུ། དབྱེ་ཕྱིར་ཕྲ་མའི་ངག་རྣམས་ནི། །སྨྲ་བ་ལྟ་ཅི་མཉན་མི་བྱ། །གལ་ཏེ་མཉན་པར་འོས་པ་ལའང་། །བརྟགས་ཤིང་ངེས་པའི་བར་དུ་བསྒུག །ཅེས་ཀྱང་གསུངས་པ་ཡིན། དེ་ལྟ་བུ་ཕྲ་མའི་ཉེས་དམིགས་བསམས་ཏེ་ཕྲ་མ་སྤངས་ན། ཚེ་རབས་ཀུན་ཏུ་གྲོགས་བཟང་པོ་དང་འཕྲད་པ་ལ་སོགས་པ་རྣམ་སྨིན་ཡིད་དུ་འོང་བ་ཐོབ་པ་ཡིན་ནོ། །གསུམ་པ་ཚིག་རྩུབ་ནི། གཞན་སེམས་དཀྲུག་པའི་ཚིག་མི་སྙན་པ་བཤད་པ་དེ་ཡིན། མ་བཏབ་གནད་དུ་ཟུག་པའི་མཚོན། །མ་འཐུང་ཁོང་དུ་སོང་བའི་སྨན། །མ་ཟོས་ཡིད་འཕྲོག་སྦྲང་རྩིའི་རོ། །ཚིག་གི་ཁྱད་པར་རྣམས་ལ་ཡོད། །ཅེས་གསུངས་པ་ལྟར་དུ་ཚིག་ལ་འདྲ་མིན་འཇམ་རྩུབ་མང་པོ་བཤད་ཐུབ་མཁན་ཡོད་པ་ཡིན། ཚིག་ལ་མདའ་མཚོན་མེད་ཀྱང་། མི་སེམས་ཚལ་བར་གཏོར་ཟེར་བ་དེ་རེད། ཚིག་རྩུབ་ནི། རྒྱོབ་སོད་ཤི་ལ་སོགས་པ་ཚིག་ངན་བཤད་པ་དེ་ཡིན། གཞན་ཡང་ཁྲམ་པ། རྐུན་མ། ཤན་པ་ལ་སོགས་པ་རིགས་ཀྱི་སྐྱོན་བརྗོད་པ་དང་། ཁྱོད་ནི་མི་ངན་གྱི་རྒྱུད་ཡིན་པ་དང་། ཁྱོད་ཚང་ལ་མ་རབས་ཐ་ཤལ་ལས་བཟང་དགེ་ཅི་ཞིག་ཡོད་ཅེས་རུས་ལ་སྐྱོན་བརྗོད་པ་དང་། ཁྱོད་ཀྱི་ཕ་ཁུ་བོ་དག་གི་རིང་ལ་ལས་བྱ་བ་འདི་དང་འདི་ཉེས་སོ་ཁྱོད་ནི་དེ་ཚང་མ་ཡིན་ནམ་ཞེས་སྐྱོན་གྱི་མཚང་འབྲུ་བ་དང་། དམ་ཉམས། སྡོམ་ཤོར། གླེན་པ། ཐོམ་རོ་ལ་སོགས་ཡོན་ཏན་གྱི་སྐྱོན་བརྗོད་པ་དང་། ཡང་ཞ་ར། འོན་པ། ཁ་ཡོ། མིག་གཟུར། མགོ་ཆེ། ཁ་ཤོ་ལ་སོགས་པ་ལུས་ཀྱི་སྐྱོན་བརྗོད་པ་དང་། ཁྱོད་ནི་སེམས་ཅན་ཆེ་གེ་མོ་དང་འདྲའོ་ཞེས་མིང་ངན་སྣ་ཚོགས་འདོགས་པར་བྱེད་པ་ལྟ་བུ་ནི་མིན་བཞིན་དུ་དེ་ལྟར་སྨྲས་པས་སྒྲོ་འདོགས། སྐུར་འདེབས་ཚིག་རྩུབ་ཐམས་ཅད་དུ་འགྱུར་བ་དང་། ལྷ་སྐུ་རྟེན་གསུམ། སངས་རྒྱས་བྱང་སེམས། བླ་མ་ཕ་མ་སོགས་ལ་ཚིག་རྩུབ་བཤད་ན་དེ་བས་ཀྱང་ཉེས་པ་ཆེ་བ་ཡིན། ཐ་ན་དུད་འགྲོའི་སྐྱེ་གནས་སུ་སྐྱེས་པ་ཞིག་ཡིན་རུང་ངན་སྨོད་བྱེད་མི་རུང་ཞིང་། ཚིག་རྩུབ་སྤངས་ན། ངན་སོང་དུ་མི་སྐྱེ་ཞིང་། ཚིག་སྙན་མོ་ཤ་སྟག་ཐོས་པ་དང་། མཛའ་བཤེས་ཇེ་མང་དུ་འཕེལ་བ་དང་། རྒྱུ་མེད་སྤྲང་པོར་གྱུར་ཀྱང་ཐམས་ཅད་དགའ་བ་ལ་སོགས་པ་འབྱུང་བས་ཚེ་འདི་ཕྱིའི་བདེ་སྐྱིད་ཚང་མ་དེའི་ཁུངས་ནས་འབྱུང་བ་ཡིན། བཞི་བ་ངག་འཁྱལ་ནི། གཙོ་ཆེར་མ་བརྟགས་བྱུང་རྒྱལ་དུ་སྨྲ་བ་འབྲེལ་མེད་ཀྱི་གཏམ་ལ་ཟེར་ཞིང་། དུས་སུ་མ་བབ་པ་ཡི་གཏམ། །གང་སྨྲ་དེ་ལ་ཀུན་གྱིས་བརྙས། །ཞེས་གསུངས་པས་གཏམ་བཤད་དུས་བསམ་བློ་བཏང་ནས་བཤད་དགོས་པ་ལས། བསམ་བློ་མ་བཏང་བའི་སྐད་ཆ་དང་། དམིགས་པ་མ་བཟུང་བའི་ཕཊ་སྒྲ་ཡིས་དོན་མེད་དུ་ཕོག་ཐུག་གཏོང་བ་མང་པོ་ཡོད་པ་ཡིན། ཁ་བདག་མེད་མི་དགེའི་བང་མཛོད། གཏམ་བྱུང་རྒྱལ་གྱོད་ཀྱི་རྩ་བ་ཡིན་པས་དེ་ལ་བརྟེན་ནས་ཆགས་སྡང་གི་རྟོག་པ་སྐྱེད་པ་ཡིན། ཁྱད་པར་དུ་ཁ་ཏོན་དགེ་སྦྱོར་འཆལ་གཏམ་དང་བསྲེས་ཏེ་བཏོན་ན་ནུས་པ་མི་འབྱིན་བའི་ཐོག་ཏུ་ད་དུང་ཉེས་པ་ཆེན་པོ་ཡོད་པ་ཡིན། ངག་འཁྱལ་སྤངས་ན་ཚེ་རབས་ཀུན་ཏུ་རིགས་བཙུན་པར་སྐྱེ་བ་དང་། ཚིག་ལ་ཀུན་ཀྱིས་བཀུར་སྟི་བྱེད་པ་དང་། སྨྲ་བ་དོན་ཡོད་དུ་འགྱུར་བ་ལ་སོགས་པ་འཕྲལ་དང་ཡུན་གྱི་ཕན་འབྲས་ཆེ་བ་ཡིན། དེས་ན་བདག་སོགས་སེམས་ཅན་ཐམས་ཅད་ཀྱིས་ངག་གི་སྒོ་ནས་བསགས་པའི་ལས། རྫུན་དང་ཕྲ་མ་ཚིག་རྩུབ་ངག་འཁྱལ་ཏེ་བཞི་པོ་སྙིང་ནས་མཐོལ་ལོ་བཤགས་པ་ཡིན་བསམས་ནས་བཤགས་དགོས་སོ། །གསུམ་པ་ཡིད་ཀྱི་ལས་གསུམ་ནི། གསུམ་པ་ཡིད་ཀྱི་མི་དགེ་བ་གསུམ་བཤགས་པ། བརྣབ་སེམས་གནོད་སེམས་ལོག་པར་ལྟ་བ་སྟེ།། ཡིད་ཀྱི་མི་དགེ་གསུམ་པོ་མཐོལ་ལོ་བཤགས།། ཞེས་གསུངས་པ་སྟེ། དང་པོ་བརྣབ་སེམས་ནི། གཞན་ཕྱུག་པོའི་རྒྱུ་ནོར། བཙན་པོའི་ཐོབ་ཐང་། དཔའ་བོའི་དཔུང་སྟོབས། མཁས་པའི་ཁ་སྒྲོས། མཛེས་པའི་ངོ་གཟུགས་ལ་སོགས་པ་ཅི་དང་ཅི་ལའང་ཧེབ་ལངས་ནས་དེ་དང་དེ་ང་ལ་ཡོད་ན་ཨང་དེ་ངས་ལོན་ན་ཨེ་ཤེད་སྙམ་པ་དེ་ཡིན། འདི་ལ་ཡང་སྤྱིར་ཆགས་སྡང་རྨོངས་གསུམ་གྱི་ཀུན་སློང་དང་། འདོད་པས་ཀུན་ནས་བསླངས་པ་ཤས་ཆེ་བ་ཡིན། བརྣབ་སེམས་ལ་བརྟེན་ནས་གནོད་སེམས་སྐྱེ་བ་དང་། དེ་ནས་སྲོག་གཅོད་མ་བྱིན་ལེན་སོགས་ཀྱང་འབྱུང་བས་འདི་ནི་ཉེས་པ་ཀུན་ཀྱི་སྣ་འདྲེན་ཡིན། དེས་ན་འདོད་ཆུང་ཆོག་ཤེས་བྱས་ན་ལུས་སེམས་གཉིས་ཀ་ལ་བདེ་བ་ཐོབ་པ་ཡིན། རང་ཉིད་ལ་འབྱོར་བ་ཅི་ཙམ་ཡོད་པ་དེས་ཆོག་ཤེས་ཏེ་བརྣབ་སེམས་མི་སྐྱེ་བའི་མི་དེ་ནི་ལུས་འབྱོར་བས་དམན་པའི་སྤྲང་པོ་ཡིན་ཡང་སེམས་འདོད་ཆུང་ཆོག་ཤེས་ཀྱི་ཕྱུག་པོ་ཡིན། སེམས་ལ་ཆོག་ཤེས་ཤིག་མེད་པའི་བརྣབ་སེམས་ཅན་དེ། ལུས་ཕྱུག་པོ་ཡིན་ཡང་སེམས་སྤྲང་པོ་ཡིན། ཧ་ཅང་རྒྱུ་ནོར་འདི་ཚོ་ལ་བརྣབ་སེམས་ཆེ་དྲག་ན་རང་ལ་ནོར་ཡོད་པ་དེ་ཡང་མར་རླག་བྱེད་དུ་འགྲོ་བ་ཡིན། ཝ་ལུ་མ་ཞིག་གིས་ཆུ་འགྲམ་ཞིག་ནས་ཤ་ལིང་མ་ཞིག་ཟ་བཞིན་སྡོད་པའི་སྐབས་སུ། ཆུ་ནང་ནས་ཉ་ཞིག་རྒྱུག་པ་མཐོང་བས། དེ་ཟ་དགོས་སྙམ་སྟེ་ཁ་ནང་གི་ཤ་བཞག་སྟེ། ཆུ་ནང་གི་ཉའི་སྟེང་དུ་རྒྱུག་དུས་ཉ་ཆུ་གཏིང་འཛུལ་ཤོར་བ་དང་། ཤུལ་དུ་བཞག་པའི་ཤ་དེ་བྱ་ཁྭ་ཏ་ཞིག་གིས་ཁུར་ཏེ་རི་མགོར་འཕུར་སོང་བས། ཁ་ཤ་རི་རྒྱལ་གྱི་རྩེ་ལ་ཤོར། །ཉ་ཤ་རྒྱ་མཚོའི་འགྲམ་དུ་ཤོར། །ཞེས་པའི་གཏམ་དཔེ་དེ་བྱུང་བ་ཡིན། རང་ཉིད་ལ་བསོད་ནམས་བསགས་པའི་དབང་སྡུད་ཅིག་མེད་ན། སེམས་ལ་ཤར་ཚད་དང་མིག་གིས་མཐོང་ཚད་ལ་ཉེར་ལེན་བྱས་ན་ལུས་སེམས་གཉིས་ཀ་དཀའ་ལས་ཆེ་བྱེད་ལས་མ་འདས། དེས་ན་བརྣབ་སེམས་སྤངས་ན་འདི་དང་ཕྱི་མའི་བདེ་བ་གཉིས་ཀ་བསྒྲུབ་ཐུབ་པ་ཡིན་ནོ། །གཉིས་པ་གནོད་སེམས་ནི། དམྱལ་བའི་ཕོ་ཉ་དངོས་ཡིན་པར་གསུངས་ཤིང་། དེའི་ནང་ནས་ཀྱང་ཡུལ་ཁྱད་པར་ཅན། སངས་རྒྱས་བྱང་སེམས། བླ་མ་ཕ་མ་སོགས་ལ་ཞེ་ནག་པོ་བསམ་པ་ངན་པ་འཆང་ན་ཉེས་པ་ཆེ་བ་དང་། དེ་མིན་ཡང་ཐ་ན་དུད་འགྲོ་ཡན་ཆད་ལ་གནོད་སེམས་འཆང་ནས་དེ་རིང་གཅིག་ལ་མི་འདོད་པ་སྡུག་པོ་ཞིག་བྱུང་བར་ཐོས་ན། ཁ་བགད་ཁོག་ལ་མི་ཤོང་བ་དེ་ཚོ་གནོད་སེམས་ཀྱི་དབང་གིས་རེད། བསམ་པ་ངན་པ་གཞན་ལ་འཚགས་ན། སྦྱོར་བ་རྩུབ་མོ་རང་ལ་འཁོར་བ་ཡིན། གནའ་ཞིག་ལ་རྒན་པོ་ཕ་བུ་གཉིས་ཡོད་པའི་ཕ་རྒན་ཉལ་ནས་ཡོད་པ་དང་། ཕ་རྒན་མགོ་ཀླད་སྒག་ཅིག་ཡིན་པ་དང་། བུ་གླེན་པ་ཞིག་ཡིན་པས། ཕ་རྒན་རྒད་པོའི་མགོ་ངང་སྒག་གེ་ཡོད་ས་དེར་འབུ་སྦྲང་མ་ཞིག་བབས་ཏེ་ཟ་བཞིན་ཡོད་པར་བུ་གླེན་པས་མཐོང་ནས། ངའི་ཕ་རྒན་མ་ཤི་གོང་དུ་འདིས་གསོན་ཟ་ཅི་སྟེ་བྱེད། འདི་གསོད་དགོས་སྙམ་སྟེ་ཤིང་ལེབ་ཅིག་འབུའི་ཐོག་ཏུ་འཕངས་པས་སྦྲང་མ་ག་ལ་སོད་ཕ་རྒན་གྱི་མགོ་ལ་ཕོག་སྟེ་ཀླད་པ་བཅོམ་ནས་ཤི་བ་ཡིན། རྒྱལ་སྲས་ཞི་བ་ལྷས། ལྕགས་བསྲེགས་ས་གཞི་སུ་ཡིས་བྱས། །མོ་ཚོགས་དེ་དག་ཅི་ལས་བྱུང་། །དེ་འདྲ་དེ་དག་ཐམས་ཅད་ཀྱང་། །སྡིག་སེམས་ཡིན་པར་ཐུབ་པས་གསུངས། །ཞེས་གསུངས་པ་ལྟ་བུ་ཡིན། གནོད་སེམས་སྤངས་ན་ཚེ་འདི་དང་ཕྱི་མ་གཉིས་ཀར་བདེ་བ་ཐོབ་པ་ཡིན་ནོ། །གསུམ་པ་ལོག་ལྟ་ནི། ཡང་དག་པའི་གནས་ལ་ཕྱིན་ཅི་ལོག་ཏུ་ལྟ་བ་སྟེ། མི་དགེ་བཅུ་ལས་ལོག་ལྟ་ལྕི། །ཞེས་གསུངས་པ་ཡིན། དེ་ལའང་དུག་གསུམ་གྱིས་ཀུན་ནས་བསླངས་པ་ཡོད་ཀྱང་གཙོ་བོ་གཏི་མུག་གི་དབང་གིས་བྱུང་བ་ཤས་ཆེ་ཞིང་། ལས་རྒྱུ་འབྲས་མི་བདེན། ཚེ་སྔ་ཕྱི་མེད། དཀོན་མཆོག་གསུམ་པོ་མི་བདེན། དགེ་འདུན་པ་ལ་ལྷ་མེད། ལྷ་ལ་ནུས་མཐུ་མེད། བླ་མ་དང་སེར་མོ་བ་སྐྱོན་ཆེ་སྙམ་པ་དང་། ཆོས་ཆོས་མིན་དུ་ལྟ། ཆོས་མིན་ཆོས་སུ་ལྟ་བའང་ཐམས་ཅད་ལོག་ལྟའི་རིགས་ཡིན་ལ། འདིའི་བསམ་པ་ཤུགས་ཆེ་ཆུང་གིས་ངན་སོང་གསུམ་གང་རུང་དུ་སྐྱེ་བ་དང་། གང་ཟག་ལོག་ལྟ་ཅན་གྱིས་མཚམས་རེར་དགེ་བའི་གཟུགས་བརྙན་རེ་བྱས་ཀྱང་། ལོག་ལྟའི་སྐྱོན་གྱིས་མྱོང་བ་སྡུག་བསྔལ་ཁོ་ན་ལས་མེད་དེ། སློབ་དཔོན་ཀླུ་སྒྲུབ་ཀྱིས། གལ་ཏེ་མཐོ་རིས་ཐར་བ་མངོན་བཞེད་ན། །ཡང་དག་ལྟ་ལ་གོམས་པ་དག་ཏུ་མཛོད། །གང་ཟག་ལོག་པར་ལྟ་བས་ལེགས་སྤྱད་ཀྱང་། །ཐམས་ཅད་རྣམ་པར་སྨིན་པ་མི་ཟད་ལྡན། །ཞེས་གསུངས་པ་ལྟ་བུ་ཡིན། འགའ་རེ་བསོད་ནམས་ཟད་ཁར་ལྷ་ལ་ཡི་ཆད་སྐྱེས་ནས་ལོག་ལྟ་སྐྱེ་མཁན་དེ་འདྲ་ཡོད་པ་རེད། ཚེ་རབས་ཐོག་མེད་ཀྱི་ལས་སྣ་ཚོགས་པའི་དབང་གིས་ཚེ་འདི་ལ་དགེ་སྦྱོར་ཅན་ལ་སྡུག་བསྔལ་འབྱུང་བ་དང་། སྡིག་རྒན་འགའ་རེ་བདེ་བ་ཙམ་རེ་ཐོབ་པ་དེ་འདྲ་མཐོང་རྒྱུ་ཡོད་པ་ཡིན། འོན་ཀྱང་རྐྱེན་དེ་ཙམ་གྱིས་རྒྱུ་འབྲས་གོ་ལོག་ཏུ་བཟུང་ན་རང་ཉིད་དམྱལ་བར་འགྲོ་བའི་རྒྱུ་ལས་མ་འདས། ལས་རྒྱུ་འབྲས་ཕྲ་ཞིང་ཕྲ་བ་དེས་ཀྱང་བསླུ་བ་མི་སྲིད་པས། རྒྱུ་འབྲས་ཡིད་ཆེས་ཀྱི་དད་པ་འདི་གནད་ཆེ་བ་ཡིན། འདི་ལ་འཇིག་རྟེན་ཡང་དག་གི་ལྟ་བའང་ཟེར་བ་ཡིན། དཔེར་ན། ཆུ་ཐིགས་རེ་རེ་ནས་ཕན་ཐོགས་ཅི་ཞིག་ཡོད་བསམས་ནས་མ་བསགས་ན་སོག་ཡོང་རྒྱུ་ཞིག་ཡོད་པ་མིན་ལ། ཆུ་ཡི་ཐིགས་པ་ཆུང་ཆུང་ཞིག་ཡིན་རུང་བསགས་ན་སྣོད་ཆེན་གང་བ་ལྟ་བུ་དང་། མེ་སྟག་ཆུང་ཆུང་འདིས་ཅི་གནོད་སྙམ་ནས་མ་འཛེམས་ན་མེ་སྟག་ཆུང་ཆུང་གིས་ཀྱང་རི་ཆེན་པོ་སྲེག་ནུས་པ་ལྟ་བུ་དང་མཚུངས་པར་ཚོམ་ལས། སྡིག་པ་ཆུང་ངུ་བྱས་གྱུར་ཀྱང་། །འཇིག་རྟེན་ཕ་རོལ་སྡུག་བསྔལ་ཐོབ། །བསོད་ནམས་ཆུང་ངུ་བྱས་གྱུར་ཀྱང་། །འཇིག་རྟེན་ཕ་རོལ་བདེ་བ་ཐོབ། །ཅེས་གསུངས་པ་ཡིན། དེས་ན་དུས་རྟག་ཏུ་དག་སྣང་སྦྱངས་བ་དང་། ལས་རྒྱུ་འབྲས་ལ་ཡིད་ཆེས་བྱས་ན་ལོག་ལྟའི་ཉེས་པ་ལས་ལྡོག་པའི་ཕན་ཡོན་ཆེན་པོ་འབྱུང་བ་ཡིན། དེ་ལྟ་བུ་ཡིད་ཀྱི་སྒོ་ནས་བསགས་པའི་བརྣབ་སེམས་གནོད་སེམས་ལོག་པར་ལྟ་བ་སྟེ་ཡིད་ཀྱི་མི་དགེ་བ་གསུམ་པོ། བདག་གཞན་སེམས་ཅན་ཐམས་ཅད་ཀྱིས། རང་གིས་བགྱིས་པ་དང་གཞན་ལ་བགྱིད་དུ་བསྩལ་བ་དང་། བགྱིས་པ་ལ་རྗེས་སུ་ཡི་རང་བ་ཐམས་ཅད་མཐོལ་ལོ་བཤགས་སོ་ཞེས་སྤང་བྱ་མི་དགེ་བ་བཅུ་བསྟན་ནས་དེ་ཉིད་གནོང་འགྱོད་ཀྱི་སྒོ་ནས་བཤགས་པའི་ཚུལ་གསུངས་པ་འོ། །ད་ནི་ཉེས་དམིགས་ཤིན་ཏུ་ཆེ་བ་ལྔ་བྱེ་བྲག་ཏུ་བཤད་པ་ལ། ཉེས་དམིགས་ཤིན་ཏུ་ཆེ་བ་ལྔ་བྱེ་བྲག་ཏུ་བཤད་པ། དང་པོ་མཚམས་མེད་པ་ལྔ་བཤགས། ཕ་མ་སློབ་དཔོན་དགྲ་བཅོམ་བསད་པ་དང་།། རྒྱལ་བའི་སྐུ་ལ་ངན་སེམས་སྐྱེས་པ་སྟེ།། མཚམས་མེད་ལྔ་ཡི་ལས་བསགས་མཐོལ་ལོ་བཤགས།། ཞེས་གསུངས་ཏེ། ཚེ་འདིའི་ལུས་སྲོག་བསྐྱེད་པའི་ཕ་མ་དང་། སོ་བྱང་སྔགས་གསུམ་གྱི་སློབ་དཔོན་དང་། ཉན་རང་དགྲ་བཅོམ་པ་བསད་པ་དང་། རྒྱལ་བའི་སྐུ་ལ་ངན་སེམས་སྐྱེས་ནས་རྨ་འབྱིན་པ་སྟེ་ལས་དེ་དག་རང་གིས་བྱས་པའམ། གཞན་ལ་བྱེད་དུ་བཅུག་པ་དང་། གཞན་གྱིས་དེ་ལྟར་བྱས་པ་ལ་རྗེས་སུ་ཡི་རང་བྱེད་མཁན་ཐམས་ཅད་ཤི་མ་ཐག་ཏུ་སྐྱེ་བ་གཞན་གྱིས་མཚམས་སམ་བར་ཆོད་པ་མེད་པར་དམྱལ་བ་མནར་མེད་པར་སྐྱེ་བར་འགྱུར་བའི་ལས་ངན་པ་ལྔ་བསགས་པ་དེ། སྙིང་ནས་མཐོལ་ལོ་བཤགས་སོ་ཞེས་སྔར་བཞིན་བཤགས་དགོས་པ་ཡིན། དེ་ལ་དགེ་འདུན་འཁོར་ལོའི་དབྱེན་གྱིས་ཆོས་འཁོར་གྱི་རྒྱུན་གཅོད་པ་དང་། སངས་རྒྱས་སྤྲུལ་བའི་སྐུའི་གཟུགས་སྐུ་ལ་གནོད་པ་བསྐྱལ་བ་དང་། དགྲ་བཅོམ་པ་བསད་པ་གསུམ་པོ་ད་ལྟའི་ལུས་རྟེན་འདིའི་ཐོག་ནས་མི་བསྒྲུབ་ཀྱང་། སྔར་དེ་ལྟར་བྱས་པ་ཡོད་ངེས་པས་བཤགས་དགོས་པ་ཡིན། སོ་བྱང་སྔགས་གསུམ་གྱི་མཁན་སློབ་ལ་སོགས་པའི་བླ་མ་ནི་རང་ཉིད་ལ་སངས་རྒྱས་དངོས་ལས་ཀྱང་བཀའ་དྲིན་ཆེ་བས་གསོད་པ་ཕར་ཞོག་བརྙས་བཅོས་ཙམ་ཞིག་བྱས་ཀྱང་། དམྱལ་བ་ནས་བསྐལ་བར་ཡར་ཐར་མེད་པ་ཡིན་པ་དང་། བླ་མ་ལས་ང་ལྷག་གི་རྟོག་པ་ཅུང་ཟད་སྐྱེས་ནའང་ཉེས་པ་ཆེ་བ་སྟེ། གཉགས་ཛྙ་ན་ཀུ་མཱ་རས་བླ་མ་བས་ཅུང་ཟད་ང་བཟང་སྙམ་པ་ཙམ་གྱིས་སྐུ་ལུས་དེའི་ཐོག་ནས་སྲོག་ལ་མ་ཐུག་ཙམ་གྱི་དགྲ་ལན་བདུན་བྱུང་བའི་ལོ་རྒྱུས་དང་། གྲུབ་ཆེན་ནག་པོ་བ་སློབ་མ་ཞིག་དང་མཉམ་དུ་རྒྱ་མཚོའི་ནང་དུ་བྱོན་སྐབས། སློབ་མ་དེས་ཡོན་ཏན་བླ་མ་ཁོང་བཟང་ཡང་། ཆས་ཆ་ལུགས་ཡོ་བྱད་ཀྱི་ཐད་ནས་ང་དགའ་བསམ་པས་ཆུ་ནང་དུ་ལྷུང་བ་ལྟ་བུ་ཡིན་ནོ། །རྒྱུད་ལས་ཀྱང་། གང་གིས་ཚིགས་བཅད་གཅིག་ཉན་པ། །དེ་ཡང་བླ་མར་མ་བཟུང་ན། །ཁྱི་ཡི་སྐྱེ་བ་བརྒྱ་བླངས་ནས། །སྨེ་ཤ་ཅན་དུ་སྐྱེ་བར་འགྱུར། །ཞེས་གསུངས་པ་ཡིན། དེ་བཞིན་དུ་ཕ་མ་ནི་ཚེ་འདིར་དྲིན་ཤིན་ཏུ་ཆེ་ཞིང་། དགེ་བའི་ལུས་རྟེན་སྐྱེད་པ་པོ་ཡིན་པས་ཡུལ་གཉན་པ་དང་། རབ་ཏུ་བྱུང་བ་ཞིག་ཡིན་ན་མཁན་སློབ་དང་ཕ་མ་ཡུལ་གཉན་ལུགས་འདྲ་བ་ཡིན། སྤྱིར་ན་ཕ་མ་ལ་སོགས་པ་རྒན་པ་ཡོད་ཚད་ལ་གཞོན་པས་བསྙེན་བཀུར་བྱས་ན། བསོད་ནམས་ཐོབ་པས་མི་ཚད་ཡ་རབས་ཀྱི་ལུགས་སྲོལ་ཡང་ཡིན། མཐུན་པ་སྤུན་བཞིའི་རྣམ་ཐར་ལྟར་གཞོན་པས་རྒན་པར་གུས་བཀུར་བྱེད་དགོས། མཐུན་པ་སྤུན་བཞི་ཞེས་པ་དེ་གང་གང་ཞེ་ན། བྱ་གོང་མོ་སྲེག རི་བོང་། སྤྲེའུ། གླང་པོ་ཆེ་དང་བཞི་ཡིན། ཁོང་ཚོ་མཐུན་གྲོགས་ཡིན་པས་གཅིག་གིས་གཅིག་ལ་གཅེས་སེམས་དང་མཐུན་སེམས་འདྲ་ཡང་། རྒས་གཞོན་གྱི་ཁྱད་པར་གྱིས་གཞོན་པས་རྒན་པར་བཀུར་བའི་ཡ་རབས་ཀྱི་སྤྱོད་བཟང་དེ་དག་ཡོད་པ་སྟེ། ཁོ་ཚོའི་ནང་ནས་ན་ཚོད་ཆུང་བ་གླང་པོ་ཆེ་དང་། དེ་འཕྲོར་སྤྲེའུ་དང་། དེ་འཕྲོར་རི་བོང་དང་། རྒན་པ་ནི་བྱ་གོང་མོ་སྲེག་ཡིན་པས་ཐམས་ཅད་ཀྱིས་དེ་ལ་གུས་བཀུར་བྱེད་ཅིང་། བགྲོད་དཀའ་བའི་ལམ་དུ་ཐུག་སྐབས་ཚང་མས་གླང་པོ་ཆེར་ཞོན་ནས་འགྲོ་བ་ལྟ་བུ་ཡིན། དེས་ན་ཕ་མ་དང་བླ་མ་སོགས་རང་ལ་དྲིན་ཆེ་བ་དག་གི་དྲིན་ལན་མི་བརྗེད་པ་ནི་གནད་ཆེ་བ་སྟེ། ཨོ་རྒྱན་ཆེན་པོས། ཕ་མ་བླ་མའི་དྲིན་ལ་མི་བརྩི་དུས། །ལྷ་དང་སྲུང་མ་བདུད་དུ་འབབ་པ་འབྱུང་། །ཞེས་ལུང་བསྟན་གནང་བ་ལྟར་དུ་དྲིན་ཅན་གྱི་དྲིན་ལ་མི་བརྩི་བས་མ་ཚད་དྲིན་ལན་ལོག་འཇལ་བྱས་ནས་དྲིན་ཆེན་ལག་པ་རྡོ་བརྡུང་བྱས་ན་དེ་ནི་རྒྱུ་འབྲས་དང་མི་མཐུན་པས་ལྷ་དང་སྲུང་མ་བདུད་དུ་འབབ་པ་འབྱུང་བ་ཡིན། དུས་ངན་གྱི་སྐབས་འདིར་སྒོ་ཟོག་རྒས་པ་བཤའ་རྒྱུ་དང་། ཕ་མ་རྒས་པ་ཕུད་རྒྱུ་དེ་ཚོ་མ་རབས་ཀྱི་ལུགས་ཡིན། མི་རྒན་པ་སེམས་ཤེད་ཆུང་བ་ཡིན། ལུས་ཅི་འདྲ་སེམས་ཀྱང་དེ་དང་མཚུངས་པ་ཡིན། དེས་ན། རྒས་པ་ཡི་མུག་མ་འཇུག་བཀུར་སྟིས་སྐྱོངས། །ཞེས་གསུངས་པ་ལྟར་དུ་ཁ་དྲིན་ངག་འཇམ་གྱིས་བསྐྱང་དགོས་པ་ཡིན། རྒན་རྒོན་ལོ་ལོན་དག་གིས་ཀྱང་ལུས་བདེ་སེམས་བདེའི་ཐོག་ནས་འཆི་ཆོས་མ་ཎི་རྡོག་རེ་ཡིན་རུང་འབད་ནས་ཁ་མི་མང་བར་འདུག་དགོས་པ་ཡིན། ད་རུང་ཁྱིམ་བཟའ་ཚང་གསོན་པོ་ཡོད་ཚེ། ཁྱོས་མ་ཟོས་ན་ངས་མི་འཐུང་ཟེར་ཁུལ་བྱེད་ཀྱང་། ཤི་ནས་རོར་གྱུར་ཏེ་རྣམ་ཤེས་གར་འགྲོ་ཆ་མེད་དུ་ལས་རླུང་གིས་དེད་ཚེ། གསོན་པོ་ཚོས་རྒྱུ་བགོ་གྲ་མི་འགྲིགས་པར་འུར་ཟིང་དང་། རང་རང་གི་འདུག་ཆུས་མི་འགྲུབ་འདུག་རྒྱུ་མ་གཏོགས་པར་ཤི་བོའི་དོན་དུ་མི་ཁ་གཅོད་བྱེད་ཀྱི་ཞེ་དགུ་ཁྲལ་གསོད་མ་ཞིག་འདེད་པ་དགོས་པ་ཆུང་བ་ཡིན། བླ་མ་རྣམས་རང་ཡུལ་དུ་མ་བཞུགས་དུས། ཤི་བོ་རྣམས་ཆོས་མེད་དུ་འགྲོ་བ་འདུག་ཟེར་ན་ཡང་། ཁྱོད་ཀྱིས་བླ་མ་ལ་དེ་འདྲའི་དད་པ་ཞིག་ཡོད་ན་བླ་མ་གྲང་ང་ཁམས་ལ་མི་བཞུགས་པར་གང་དུ་བྱོན་འགྲོ། གལ་ཏེ་མི་མངོན་ཆོས་ཀྱི་དབྱིངས་སུ་བྱོན་སོང་བ་ཡིན་ན་ད་དུང་ཐུགས་རྗེ་ལྷག་པར་མྱུར་བ་ཡིན། བླ་མ་ལ་རྒྱང་འཕོ་བསྔོ་འབྲེལ་ཞིག་ཞོག་དང་བླ་མའི་ཐུགས་རྗེ་ལ་ཉེ་རིང་མེད་པ་ཡིན། ཐག་ཉེ་རིང་ལ་ཁྱད་ཡོད་སར་ཐུག་དུས་གང་ལྟར་རོ་མགོར་ལོན་ན་ཡང་ཕུང་པོ་འདྲ་ཁུར་བེད་ཆོད་ན་མ་གཏོགས་རྣམ་ཤེས་འདྲེན་བེད་མི་ཆོད་པ་ཡིན། ཁག་བླ་མ་ཐག་རིང་དུ་ཡོད་པ་ལ་བཞག་སྟེ་དོན་ཤི་བོ་འདང་ཆུང་བྱས་ན་ཐ་ཆད་རེད། མདོར་ན་ཕ་མ་ཤི་གསོན་གང་ཡིན་རུང་ཕ་མའི་དྲིན་ལན་བསམ་ཤེས་ན། འདི་དང་ཕྱི་མ་གཉིས་ཀར་དགེ་ཞིང་བཀྲ་ཤིས་པར་འགྱུར་རོ། །དེ་ཡན་ཆད་ཀྱིས་མཚམས་མེད་ཀྱི་ལས་བསགས་པ་བཤགས་པ་སོང་བ་འོ། །གཉིས་པ་མཚམས་མེད་ཀྱི་ལས་དངོས་མིན་ན་ཡང་དེ་དང་ཆ་འདྲ་བའི་ལས་ཚབས་ཆེན་བསགས་པ་ཐམས་ཅད་བཤགས་པ་ནི། གཉིས་པ་ཉེ་བའི་མཚམས་མེད་ཀྱི་སྡིག་པ་བཤགས་པ། དགེ་སློང་དགེ་ཚུལ་བསད་དང་བཙུན་མ་ཕབ།། སྐུ་གཟུགས་མཆོད་རྟེན་ལྷ་ཁང་བཤིགས་ལ་སོགས།། ཉེ་བའི་མཚམས་མེད་སྡིག་བྱས་མཐོལ་ལོ་བཤགས།། ཞེས་གསུངས་ཏེ། ཚུལ་ཁྲིམས་ལྡན་པའི་དགེ་སློང་དང་དགེ་ཚུལ་གང་ཡང་རུང་བ་བསད་པ་དང་། དགེ་ཚུལ་མ་དང་དགེ་བསྙེན་མ་ལ་སོགས་པ་སྡོམ་ལྡན་གྱི་བཙུན་མ་དཀའ་ཐུབ་ལས་ཕབ་སྟེ་སྡོམ་པ་ཕྲོགས་པ་དང་། སངས་རྒྱས་བྱང་སེམས་ཀྱི་སྐུ་གཟུགས་རིས་སུ་བྲིས་པ་འབུར་དུ་དོད་པ་ལུགས་སུ་བླུགས་པ་ལ་སོགས་གང་ཡང་རུང་བ་དང་། མཆོད་རྟེན་ཆེ་ཆུང་བྲིས་འབུར་གང་ཡང་རུང་བ་དང་། ལྷ་ཁང་དང་གཙུག་ལག་ཁང་ཀུན་དགའ་ར་བ་ལ་སོགས་པ་བསམ་ངན་གྱི་སྒོ་ནས་བཤིགས་པ་དང་། མེར་བསྲེགས་པ་ལ་སོགས་པ་ནི་མཚམས་མེད་པ་དངོས་མིན་ཡང་དེ་དང་ཆ་འདྲ་བ་ཡིན་པས་ན་ཉེ་བའི་མཚམས་མེད་པ་ཞེས་གསུངས་པ་ཡིན་ལ། སྤྱིར་ན་མངོན་པ་མཛོད་ལས། མ་དགྲ་བཅོམ་མ་སུན་འབྱིན་དང་། །བྱང་ཆུབ་སེམས་དཔའ་ངེས་གནས་དང་། །སློབ་པ་གསོད་དང་དགེ་འདུན་གྱི། །འདུ་བའི་སྒོ་ནི་འཕྲོག་པ་དང་། །མཚམས་མེད་པ་དང་ཆ་འདྲ་བ། །ལྔ་བ་མཆོད་རྟེན་བཤིགས་པ་ཡིན། །ཞེས་གསུངས་པ་ལྟ་བུའོ། །དེ་ལྟ་བུ་སྡིག་པ་རང་གཞན་སེམས་ཅན་ཐམས་ཅད་ཀྱིས་འཁོར་ཚེ་ཐོག་མེད་ནས་ད་ལ་ཐུག་གི་བར་དུ་བྱས་པ་ཐམས་ཅད། མགོན་པོ་འོད་དཔག་མེད་དང་ཐུགས་སྲས་བྱང་ཆུབ་སེམས་དཔའི་ཚོགས་དང་བཅས་པའི་སྤྱན་སྔར་མཐོལ་ལོ་བཤགས་སོ་ཞེས་པའོ། །དགེ་ཚུལ་སློང་རྣམ་པར་དག་པ་སངས་རྒྱས་བསྟན་པའི་རྩ་བ་ཡིན། བཅོམ་ལྡན་འདས་ཀྱིས། ཐུབ་བསྟན་རིན་ཆེན་སྒྲོན་མེ་མཆོག །འབར་བའི་སྣོད་ནི་དཀའ་ཐུབ་སྟེ། །ངུར་སྨྲིག་འཛིན་པ་ཤཱཀྱའི་སྲས། །དགེ་སློང་རྣམས་ནི་ཡིན་ཕྱིར་རོ། །ཞེས་གསུངས་པས་དགེ་ཚུལ་སློང་གྲྭ་བ་བསད་ན་ཆོས་དགེ་འདུན་གཉིས་ཀ་བཤིག་པ་ཡིན་པས་ཉེས་པ་ལོས་ལྕི། རབ་ཏུ་བྱུང་བའི་སྡོམ་པ་ཉམས་ཚར་རུང་གནོད་པ་བྱས་ན་ཉེས་དམིགས་ཆེ་སྟེ། སྤོས་ཀྱི་གླང་པོ་ཆེ་ཤི་བའི་རོ་དང་འདྲ་བས་ད་དུང་རིན་ཐང་ཡོད་ཅིང་མུ་སྟེགས་པའི་དགེ་སྦྱོང་རྣམས་ཟིལ་གྱིས་གནོན་པ་ཡིན་ཏེ། ས་སྙིང་འཁོར་ལོ་བཅུ་བའི་མདོ་ལས། ཙམ་པ་ཀ་ཡི་མེ་ཏོག་རྒས་གྱུར་ཀྱང་། །མེ་ཏོག་གཞན་པ་རྣམས་ལས་ཁྱད་དུ་འཕགས། །དགེ་སློང་ཚུལ་ཁྲིམས་ཉམས་པ་སྡིག་སྤྱོད་ཀྱང་། །མུ་སྟེགས་ཅན་རྣམས་ཐམས་ཅད་ཀུན་པས་མཆོག །ཅེས་གསུངས་པའི་ཕྱིར། དེས་ན་དགེ་ཚུལ་སློང་ལ་ངན་སེམས་ཙམ་ཡང་སྐྱེ་མི་རུང་། དེར་མ་ཟད་དགེ་ཚུལ་སློང་གི་ན་བཟའ་ཙམ་ལ་གུས་བཀུར་བྱས་ན་བསོད་ནམས་ཆེན་པོ་འབྱུང་བ་ཡིན། གྲྭ་པ་སེར་མོ་བ་ཞིག་མཇལ་ན་ཞྭ་ཕུད་ནས་གུས་པ་བྱེད་དགོས། འོན་ཀྱང་གྲྭ་ཇོ་སེར་རྣམས་ཉིན་བཞིན་གྲོང་ནང་དུ་བྱོན་བསྡད་ན། ཡང་ཞྭ་ཕུད་ཚོད་མེད་པ་ལའང་ཅུང་ཟད་ཁག་མེད་རེད། སྐུ་གསུང་ཐུགས་རྟེན་བཤིགས་ན། བཤིག་པ་པོ་རང་ཉིད་ཉེས་པ་ཆེ་བ་རེད་མ་གཏོགས་དེས་བསྟན་པ་ལ་གནོད་ཆེན་པོ་མི་ཐུབ་པ་ཡིན། དགེ་ཚུལ་སློང་བཟང་ངན་ཅི་འདྲ་ཡིན་རུང་བསྟན་པ་ཅུང་ཟད་ཙམ་མ་བཟུང་བ་ཞིག་མེད་པས། བསྟན་འཛིན་གྱི་གང་ཟག་བསད་ན་མི་བསད་པའི་ཉེས་པས་མ་ཚད་བསྟན་པ་བཤིག་པའི་ཉེས་པའང་འབྱུང་བ་ཡིན། དེ་བཞིན་དུ། དགེ་ཚུལ་སློང་བཙུན་མ་བསྙེན་གནས་ཀྱི་སྡོམ་པ་ལ་གནས་པ་ཡན་ཆད་ཀྱི་སྡོམ་པ་ཕྲོགས་ན་བསྟན་པ་ལ་རྨ་འབྱིན་པ་དང་གང་ཟག་གི་ཐར་ལམ་བཅད་པ་ཡིན་པས། གསེར་ནག་གི་མཆོད་རྟེན་ལ་དུག་ནག་གི་སྟ་རེ་གཡུག་ཅེས་ཉེས་པ་ཤིན་ཏུ་ཆེ་བ་ཡིན། སྐུ་གཟུགས་ནི་བཟོའི་སྤྲུལ་སྐུ་ཡིན་ཏེ། སྐུ་གཟུགས་རྣམ་པ་མང་པོ་དེར་སྤྲུལ་ནས། །འགྲོ་བ་དགེ་ལ་སྤྱོད་པའི་དོན་བྱེད་དོ། །ཞེས་གསུངས་པ་ཡིན། གསུང་རབ་ཀྱང་གཟུགས་སྐུ་དང་ཁྱད་མེད་པ་སྟེ། ལྔ་བརྒྱ་ཐ་མར་གྱུར་པ་ན། །ང་ཉིད་ཡི་གེའི་གཟུགས་སུ་སྣང་། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་གྱིས། །ཞེས་གསུངས་པ་ཡིན། འདི་ཉིད་གཟུགས་སྐུའི་རོལ་བ་ཡིན་པས་མ་ཚད་ཆོས་སྐུའི་རིང་བསྲེལ་ཡང་ཡིན་པས་ན། སྐུ་གསུང་ཐུགས་རྟེན་བཤིག་རྒྱུ་དང་བཙོང་རྒྱུ་བྱས་ན་ཉེས་པ་ཆེ་ཞིང་། སྐུ་གསུང་ཐུགས་རྟེན་གྱི་རིན་པ་ཁོང་དུ་སོང་ན་ཉེས་པ་དེ་བས་ཀྱང་ཆེ་བ་ཡིན། མཆོད་རྟེན་ནི་རྒྱལ་བའི་ཐུགས་རྟེན་ཡིན་པས་བཞེངས་ན་བསོད་ནམས་ལྷག་པར་ཆེ། སཱཙྪ་གཅིག་གིས་མི་གསུམ་སངས་རྒྱས་གསུངས་པ་ལྟ་བུ་དང་། གནའ་ཞིག་ལ་ཕག་རྒན་ཞིག་གི་ལུས་པོར་འདམ་བག་འགོས་ཡོད་དུས། མཆོད་རྟེན་ལ་ཟ་འཕྲུག་བྲད་པས་མཆོད་རྟེན་གྱི་གས་ཁ་བསུམས་པས་ཤི་ནས་ལྷ་ཡུལ་དུ་སྐྱེས་པའི་ལོ་རྒྱུས་ཡོད་པ་ཡིན། སྐུ་གསུང་ཐུགས་རྟེན་དང་གཙུག་ལག་ཁང་ལ་བསྐོར་བ་བྱས་ན་ཕན་ཡོན་བསམ་གྱིས་མི་ཁྱབ་པ་འབྱུང་བ་ཡིན། ལྷ་ཁང་དང་གཙུག་ལག་ཁང་ནི་རྟེན་གསུམ་དང་དགེ་འདུན་པའི་བཞུགས་གནས་དང་ཚོགས་ཁང་ཡིན་པས་དེའི་ནང་དང་། ཁོར་ཡུག་ལ་སྣབས་ལུད་དང་མཆིལ་མ་སོགས་བཙོག་པ་དོར་མི་རུང་བར་མ་ཟད། ཕྱི་རོལ་གྱི་ཉེ་འཁོར་དུ་མི་གཙང་པ་འདོར་མི་རུང་བ་ཡིན། ཁྱད་པར་དུ་ལྷ་ཁང་ནང་དུ་གདན་བཙོག་པ་བཏིངས་ཏེ་འདུག་པ་དང་། ལུས་མི་གཙང་བ་དྲི་ངན་ཅན་གྱིས་བསྡད་ན་ཉེས་པ་ཆེ་བ་ཡིན། སངས་རྒྱས་བཅོམ་ལྡན་འདས་ཡུལ་ཡངས་པ་ཅན་དུ་བསོད་སྙོམས་ལ་བྱོན་པའི་སྐབས་སུ། མི་རྒྱབ་ནག་པོ་རྫ་རྐུབ་འདྲ་བ་ཞིག་གཟིགས་པ་དང་། འདི་སངས་རྒྱས་འོད་སྲུང་གི་བསྟན་པ་ལ་རབ་དུ་བྱུང་བ་ཞིག་ཡིན། དགེ་འདུན་གྱི་གཙུག་ལག་ཁང་དུ་གདིང་བ་ཚི་དྲེག་ཅན་ཞིག་བཏིངས་ནས་བསྡད་པའི་རྣམ་སྨིན་ཡིན་པ་དང་། ལས་དེའི་སྟོབས་ཀྱིས་ཚེ་རབས་ལྔ་བརྒྱའི་བར་དུ་རྒྱབ་གཞུང་ནག་པོ་ཅན་ཤ་སྟག་གི་ལུས་བླངས་པར་གསུངས་པ་ཡིན། དེས་ན་ལྷ་ཁང་ནང་དུ་སྤོས་དྲི་ཞིམ་མཆོད་རྒྱུ་མེད་ཀྱང་། དྲི་ངན་ཕ་ལེར་སྐུ་གསུང་ཐུགས་རྟེན་དང་དགེ་འདུན་པ་རྣམས་མནོལ་འགྲོ་བར་འདུག་སྙམ་པ་ཞིག་བྱས་ན་ཉེས་པ་ཆེ་བ་ཡིན། རྣམ་སྨིན་ཡིད་དུ་མི་འོང་བ་མྱོང་དུས་སྡུག་བསྔལ་བ་ཡིན་ནོ། །ད་ནི་ཆོས་སྤོང་གི་ལས་བཤགས་པ་སྟེ། སྤྱིར་ན་ནུབ་ཕྱོགས་བདེ་ཅན་དུ་འགྲོ་བའི་རྒྱུ་རྣམ་པ་བཞི་དང་གེགས་རྣམས་པ་གཉིས་ཡོད་པ་ལས། རྒྱུ་རྣམ་པ་བཞི་ནི་ད་ལྟ་འཆད་བཞིན་པ་ཡིན་ལ། གེགས་རྣམ་པ་གཉིས་ནི་མཚམས་མེད་ཀྱི་ལས་དང་ཆོས་སྤོང་གི་ལས་བསགས་པ་གཉིས་རེད། དེ་གཉིས་བསགས་ཚར་དུས་བདེ་བ་ཅན་དུ་སྐྱེ་མི་ཐུབ་པ་ཡིན། སྤྱིར་བདེ་བ་ཅན་དུ་སོ་སོའི་སྐྱེ་བོ་སྐྱེ་ཐུབ་པ་ཡིན་ཡང་དེ་གཉིས་བསགས་ཚར་དུས་སྐྱེ་མི་ཐུབ་པ་ཡིན། མཚམས་མེད་ཀྱི་ལས་གོང་དུ་བཤད་ཟིན། ཆོས་སྤོང་གི་ལས་ནི། གསུམ་པ་ཆོས་སྤང་གི་ལས་ངན་བཤགས་པ། དཀོན་མཆོག་ལྷ་ཁང་གསུང་རབ་རྟེན་གསུམ་སོགས།། དཔང་ཞེས་ཚད་བཙུགས་མནའ་ཟོས་ལ་སོགས་པ།། ཆོས་སྤངས་ལས་ངན་བསགས་པ་མཐོལ་ལོ་བཤགས།། ཞེས་གསུངས་ཏེ། ཡུལ་ཁྱད་པར་ཅན་དཀོན་མཆོག་གསུམ་དང་། ལྷ་ཁང་། གཙུག་ལག་ཁང་། རྒྱལ་བའི་གསུང་རབ་བཀའ་དང་བསྟན་བཅོས། བཀའ་འགྱུར་བསྟན་འགྱུར་ལ་སོགས་པ་སྟེ། དེ་ལྟ་བུའི་རྟེན་གསུམ་ཁྱད་པར་ཅན་ལ་སོགས་པ་དཔང་པོར་བཞག་སྟེ། དེ་ཚང་མ་སྤངས་པ་ཡིན་ཟེར་ནས་ཚད་བཙུགས་ཏེ་མནའ་གང་ཆེ་དང་གང་གཉན་སྐྱེལ་ཞིང་། མནའ་ཟོས་པ་ལ་སོགས་པ་ཆོས་སྤོང་གི་ལས་བསགས་པ་ཡིན་པས་ན། དེ་འདྲ་བ་གང་བསགས་ཚད་ཀུན་མགོན་པོ་འོད་དཔག་མེད་འཁོར་དང་བཅས་པའི་སྤྱན་སྔར་མཐོལ་ལོ་འཆགས་སོ། །དེ་འདྲ་མཐོལ་ཞིང་བཤགས་ན་ཁྱེད་རྣམ་པའི་ཐུགས་རྗེ་དང་བྱིན་རླབས་ཀྱི་སྟོབས་ཀྱིས་སྡིག་པ་མི་དགེ་བའི་ཚོགས་འདི་དག་མྱུར་བ་ཉིད་དུ་དག་པར་བྱིན་གྱིས་རློབས་ཤིག་ཅེས་པའོ། །མི་འགའ་རེའི་ཁ་བརྡ་བྱེད་སྐབས་གཏམ་ལས་མནའ་མང་ཞིང་། མནའ་རྣམས་ཕར་བསལ་བཞག་ན་དེའི་ཤུལ་ན་གོ་བརྡ་འཕྲོད་བྱེད་ཀྱི་སྐད་ཆ་ངོ་མ་དེ་མང་པོ་མེད་པ་ཡིན། གང་སྡུག་ཚོས་མནའ་གཏམ་གཉིས་སྲེ་བར་བྱེད་ཀྱང་། གཏམ་གྱིས་གོ་མ་ཆོད་ན་མནའ་ཡིས་གོ་ཆོད་དཀའ་ཞིང་། ཤོབ་རྐྱལ་ཞིག་ཡིན་དུས་མནའ་ཟན་ཞིག་ཀྱང་ལོས་ཡིན་སྙམ་པ་ཡིན། སཱཙྪ་ཁེ་རུ་ཞིག་ཡར་བཞེངས་མི་ཐུབ་མཁན་ཞིག་གིས་བཀའ་བསྟན་འགྱུར་གཉིས་མན་ཆད་ཁ་ཐོག་ཏུ་ལེན་པ་དང་། རང་ཁེ་རུ་ཡིས་སྡིག་པ་མི་ཁྱག་པ་ཞིག་གིས་ལྷོ་འཛམ་བུའི་གླིང་གི་སྡིག་པ་ཅི་འདྲ་བྱས་ནས་ཁྱག ད་རུང་གཞན་ཡང་གནམ་སྔོན་པོ་དང་ཤར་ཉི་ཟླ་ལ་ཚད་བཞག་ནས་ག་ཆེ་གང་མནོག་གི་མནའ་སྐྱེལ་བ་ནི་ཁ་སྡིག་དོན་མེད་དུ་ཉོས་པ་རེད། མནའ་ཟན་སྡིག་རྒན་ཐུར་འགྲོ་དག་གིས་མནའ་འདི་བསྐྱལ་འདི་མི་བསྐྱལ་ཟེར་རྒྱུ་ཞིག་ཅི་ཡོད། བླ་རྒན་རྣམ་པའི་ངོ་ལ་ཡང་མཛུབ་མོ་བཙུགས་ནས་ཁྱོད་ཀྱི་སྡིག་པ་ཁུར་ཟེར་བ་རེད། བླ་རྒན་ཚོར་སྡིག་པ་ཅི་འདྲ་ཡོད་ཅི་ཤེས་ཏེ། དཀོར་སྦྱང་འདྲ་བཏོན་མེད་ན་དཀོར་སྒྲིབ་ངན་པ་འདྲ་ཡོད་ནའང་ཐང་། ཁྱོད་རང་གི་སྡིག་པ་མི་ཁྱོག་འདུག་པའི་སྟེང་དུ་བླ་མའི་སྡིག་པ་ཁུར་ག་ལ་ཐུབ། སྤྱིར་མནའ་བསྐྱལ་ན་སྡིག་པ་ཆེ་ཚུལ་དེ་ལྟར་རེད། དེའི་ཐོག་ཏུ་གྲྭ་པ་དང་བུད་མེད་རྣམས་ཀྱིས་མནའ་བསྐྱལ་ན་དེ་བས་བཙོག་ཅིག་ཡོད་ན་ཐན་རེད། ས་ཆ་འདི་ནས་ཙིས་རོགས་སུམ་མདོ་དང་། སྒ་སྒྲིས་རྒྱ་ལམ་ཟེར་བ་དེ་ཚོ་ཡང་མནའ་ཆེན་པོ་རེད། བླ་མ་ཞེ་རྫོགས་གཉིས་ཞེས་མནའ་སྐྱེལ་ན་མར་དྲུད་ཚར་སོང་བ་རེད། མནའ་ཟོས་ལ་སོགས་པ་ཞེས་པའི་སོགས་ཁོངས་ནང་དུ་ཅི་ཞིག་ཡོད་ཅེ་ན། རྒྱལ་བ་བུ་རམ་ཤིང་པའི་བསྟན་པ་བུ་རམ་གོར་མོ་ལྟ་བུ་དེ་ལ་ང་ཁྱོད་ཀྱི་ཕྱོགས་རིས་བྱས་ནས། ཆོས་བརྒྱུད་སོ་སོ་དང་དགོན་པ་ཡར་མར་གྱི་བར་ལ་ཆགས་སྡང་གི་ཀུན་སློང་གིས་བསྟོད་སྨད་བྱས་ན། ཆོས་སྤོང་གི་ལས་ངན་རང་གིས་རང་ལ་གསོག་པ་ཡིན། རབ་ན་ཐམས་ཅད་ལ་འབྲེལ་བ་སྣ་རེ་ཞོག དེ་མིན་ན་བསྟོད་སྨད་གཉིས་ཀ་མེད་པར་ཁ་རོག་སྡོད་དང་ཉེས་པ་མེད་པ་ཡིན། གཞན་གྱི་བཟང་ངན་སུས་ཤེས། གཞན་ངན་རུང་རང་ཉིད་བཟང་དུ་ཆུག་དང་དེས་ཆོག་པ་ཡིན། མདོ་སྡེ་རྒྱན་ལས། མི་རིག་པ་ཡི་གཟུགས་ལ་མི་རིག་ན། །ཐེ་ཚོམ་ཟ་བའི་ཆོས་ལ་སྨོས་ཅི་དགོས། །དེ་བས་བཏང་སྙོམས་བཞག་ན་ཉེས་པ་མེད། །ཅེས་གསུངས་པ་ལྟ་བུ་ཡིན། དེས་ན་ཆོས་སྤོང་གི་ལས་ངན་ལ་འཛེམ་རྒྱུ་ནི་གལ་ཤིན་ཏུ་ཆེའོ། །བྱང་ཆུབ་སེམས་དཔའ་ལ་སྐུར་བ་འདེབས་པའི་ཉེས་པ་བཤགས་པ་ནི། བཞི་བ་བྱང་སེམས་ལ་སྐུར་བ་འདེབས་པའི་ཉེས་པ་བཤགས་པ། ཁམས་གསུམ་སེམས་ཅན་བསད་ལས་སྡིག་ཆེ་བ།། བྱང་ཆུབ་སེམས་དཔའ་རྣམས་ལ་སྐུར་པ་བཏབ།། དོན་མེད་སྡིག་ཆེན་བསགས་པ་མཐོལ་ལོ་བཤགས།། ཞེས་གསུངས་ཏེ། མི་གང་ཞིག་གིས་ཁམས་གསུམ་སེམས་ཅན་ཡོད་ཚད་ཐམས་ཅད་པོ་བསད་པ་བས་བྱང་ཆུབ་སེམས་དཔའ་གཅིག་ལ་སྐུར་པ་བཏབ་ན་ཉེས་པ་ཆེ་བ་ཡིན་ཞེས་པའི་དོན་ཏེ། ཁམས་གསུམ་ཞེས་པ་ནི། འདོད་ཁམས། གཟུགས་ཁམས། གཟུགས་མེད་ཀྱི་ཁམས་གསུམ་དང་། སྲིད་པ་ཟེར་དུས། ས་འོག་ས་སྟེང་། ས་བླའི་སྲིད་པ་གསུམ་ཟེར་ནས་བརྩི་བ་དང་། ཡང་གྲོང་ཁྱེར་གསུམ་ཞེས་པའི་སྐབས་སུ། སྣང་བ་འདོད་ཁམས་ཀྱི་གྲོང་ཁྱེར། ཕྱེད་སྣང་གཟུགས་ཁམས་ཀྱི་གྲོང་ཁྱེར། མི་སྣང་གཟུགས་མེད་ཀྱི་གྲོང་ཁྱེར་དང་གསུམ་སྟེ་འདི་གསུམ་ལ་གནས་པའི་སེམས་ཅན་ཐམས་ཅད་བསད་པའི་སྡིག་པ་བས་ཆེ་བ་ཞིག་ཡིན་ཚེ་དེ་བས་ཆེ་ཞིག་ཡོད་ཐབས་ཡོད་པ་མ་ཡིན། བྱང་ཆུབ་སེམས་དཔའ་ནི་སངས་རྒྱས་ཀྱི་རྒྱུ་དང་། སེམས་ཅན་ཐམས་ཅད་ཀྱི་ཕ་མ་ལྟ་བུ་ཡིན་ལ། དེ་འདྲའི་བྱང་ཆུབ་སེམས་དཔའ་དེ་ཕར་ལྟས་ཚོད་ཀྱི་འདི་བྱང་ཆུབ་སེམས་དཔའ་རེད་འདི་མ་རེད་ཅེས་དབྱེ་བ་འབྱེད་དཀའ་བ་ཡིན། ཁྱད་པར་དུ་སྦས་པའི་རྣལ་འབྱོར་པ་ཞིག་ཡིན་ན་དེ་བས་ཀྱང་ཤེས་དཀའ་ལ། བྱང་ཆུབ་སེམས་དཔའ་ས་ལ་བཞུགས་པ་དེ་ཚོས་སྤྲུལ་བ་སྣ་ཚོགས་མཛད་ནས་འགྲོ་དོན་འདྲ་མི་འདྲ་མཛད་བཞིན་ཡོད་པ་ཡིན། སྤྲང་པོ་ཤན་པ་དུད་འགྲོ་དག་གི་ནང་དུའང་བྱང་ཆུབ་སེམས་དཔའི་སྤྲུལ་བ་མེད་ཅེས་བརྗོད་མི་ཤེས་པ་ཡིན་ན་བླ་སེར་གྱི་ནང་ན་ཡོད་པ་ནི་སྨོས་མ་དགོས་ལ། ཁྱད་པར་དུ་བོད་གངས་ཅན་གྱི་ལྗོངས་སུ་རིགས་གསུམ་སེམས་དཔའི་སྤྲུལ་བ་རྒྱུན་ཆད་མེད་པ་འབྱོན་བཞིན་ཡོད་ཕྱིར། སུ་དང་སུ་ཡིན་ཡང་གང་ཟག་གི་ཚོད་གང་ཟག་གིས་ཟིན་པ་ནི་དཀའ་མོ་ཡིན་ཏེ། བཅོམ་ལྡན་འདས་ཀྱིས་ཁོང་དང་ཁོང་འདྲ་བ་མ་གཏོགས། གང་ཟག་གི་ཚོད་གང་ཟང་གིས་མི་ཟིན་པར་གསུངས་པས། ཚིག་ཐག་བཅད་དེ་འཆད་དཀའ་བ་ཡིན། རང་རྒྱུད་ཀྱི་སྐྱོན་མངོན་གྱུར་ཡོད་པ་དག་མི་མཐོང་བ་ཡིན་ན། གཞན་རྒྱུད་ལ་ཡོན་ཏན་ལྐོག་གྱུར་དུ་ཡོད་པ་དེ་བས་ཀྱང་ག་ལ་མཐོང་། དེས་ན་ཐར་བ་འདོད་པའི་གང་ཟག་ཅིག་ཡིན་ན་སུ་ལ་ཡང་སྐུར་པ་འདེབས་མི་རུང་བ་ཡིན། དེ་ལྟ་བུའི་དོན་མེད་ཀྱི་སྡིག་ཆེན་བསགས་པ་མཐོལ་ལོ་བཤགས་སོ། །སྡིག་པའི་ལྟ་བ་ངན་པ་བཤགས་པ་ནི། ལྔ་བ་སྡིག་པའི་ལྟ་བ་ངན་པ་བཤགས་པ། དགེ་བའི་ཕན་ཡོན་སྡིག་པའི་ཉེས་དམིགས་དང་།། དམྱལ་བའི་སྡུག་བསྔལ་ཚེ་ཚད་ལ་སོགས་པ།། ཐོས་ཀྱང་མི་བདེན་བཤད་ཚོད་ཡིན་བསམ་པ།། མཚམས་མེད་ལྔ་བས་ཐུ་བའི་ལས་ངན་པ།། ཐར་མེད་ལས་ངན་བསགས་པ་མཐོལ་ལོ་བཤགས།། ཞེས་གསུངས་ཏེ། དེ་ཡང་གོང་དུ་བཤད་པའི་སངས་རྒྱས་འོད་དཔག་མེད་ཀྱི་མཚན་ཐོས་པའི་ཕན་ཡོན་དང་། མཆོད་པ་ཆུང་ཆུང་གིས་འབྲས་བུ་ཆེན་པོ་སྨིན་པ་ལ་སོགས་པ་དགེ་བའི་ཕན་ཡོན་དང་། ཡང་བྱང་ཆུབ་སེམས་དཔའ་ལ་སྐུར་པ་བཏབ་པ་དང་། ངན་སེམས་སྐད་ཅིག་མ་ཙམ་སྐྱེས་པས་ཀྱང་། དམྱལ་བའི་ནང་དུ་བསྐལ་བར་གནས་དགོས་པ་ལ་སོགས་པ་སྡིག་པའི་ཉེས་དམིགས་དང་། དམྱལ་བའི་སྡུག་བསྔལ་བཤད་དུས། དཔེར་ན་མི་གཅིག་ལ་མདུང་ཐུང་སུམ་བརྒྱ་དུས་མཉམ་པོར་བརྒྱབ་པའི་ན་ཚ་བས་དམྱལ་བའི་སྡུག་བསྔལ་གྱི་ནང་ནས་ཆུང་ཤོས་ཡང་སོས་ཀྱི་སྡུག་བསྔལ་གྱི་ཆ་ཤས་ཙམ་ཞིག་གི་དཔེར་མི་ཕོད་པ་དང་། དེ་བཞིན་དུ་དམྱལ་ཁམས་འོག་མ་ནས་འོག་མར་རེ་རེ་བཞིན་སྡུག་བསྔལ་ཇེ་ཆེ་ནས་ཇེ་ཆེ་ཡིན་པ་དང་། དམྱལ་བའི་སེམས་ཅན་གྱི་ཚེ་ཚད་བཤད་པའི་སྐབས་སུ། མི་ལོ་ས་ཡ་དགུ་ལ་དམྱལ་བ་ཡང་སོས་ཀྱི་ཞག་གཅིག་ཡིན་པ་སྟེ། མཛོད་ལས། ཡང་སོས་ལ་སོགས་དྲུག་རིམ་བཞིན། །འདོད་ལྷའི་ཚེ་དང་ཉིན་ཞག་མཉམ། །ཞེས་གསུངས་པའི་ཕྱིར། དེ་ལྟར་བརྩིས་ཚེ་དམྱལ་བ་འོག་མ་དག་གི་སེམས་ཅན་གྱི་ཚེ་ཚད་བསྐལ་བའི་བར་དུ་ཡོད་པ་སོགས་ཐོས་ནའང་དེ་ལྟར་མི་བདེན་ནོ་སྙམ་ནས། དེ་འདྲ་ཡིན་རྒྱུ་མ་རེད། རང་གར་བཤད་ཚོད་དང་གྲགས་ཚོད་ཙམ་ཡིན་ནོ་སྙམ་ནས་རྒྱུ་འབྲས་ལ་ལོག་ལྟ་བྱས་ན་མཚམས་མེད་པ་ལྔ་བས་ཐུ་བའི་ལས་ངན་ཡིན་པས། དེ་ལྟ་བུའི་བསྐལ་ཆེན་གྲངས་མང་པོར་ངན་སོང་ལས་ཐར་དུ་མེད་པའི་ལས་ངན་བསགས་པ་དེ་དག་མཐོལ་ལོ་བཤགས་སོ་ཞེས་པའོ། །འོ་ན་གོང་དུ་མཚམས་མེད་ཀྱི་ལས་བས་སྡིག་ཆེ་མེད་པར་བཤད་པ་མིན་ནམ་སྙམ་ན། མཚམས་མེད་ཀྱི་ལས་ཤིན་ཏུ་ལྕི་བ་ཡིན་ཡང་བཤག་པར་བྱ་རུ་ཡོད་ལ། འདི་ནི་དགེ་རྩ་ཆད་སོང་བ་ཡིན་པས་རྒྱུ་འབྲས་ལ་ཡིད་ཆེས་མ་སྐྱེས་ཀྱི་བར་དུ་བཤགས་རྒྱུ་བཅོས་རྒྱུ་གཉིས་ཀ་མེད་པས་དེ་བས་ཐུ་བའི་ལས་སུ་བསྟན་པ་ཡིན་ནོ། །དགེ་བའི་ཕན་ཡོན་དང་སྡིག་པའི་ཉེས་དམིགས་བཤད་པའི་སྐབས་སུ། དགེ་བའི་ཕན་ཡོན་བཤད་ཚེ་དེ་འདྲའི་ལས་སླ་བ་ཏག་ཏག་དང་། སྡིག་པའི་ཉེས་དམིགས་བཤད་སྐབས་དེ་འདྲའི་དཀའ་མོ་དང་ཚབས་ཆེན་ཏག་ཏག་རེད་འདུག འདི་དག་ནི་བླ་མ་རྣམས་ཀྱིས་ཁ་མཁས་པས་ཅི་བཤད་ཡིན་པ་ལས་དེ་ཙམ་ཅི་ལ་ཡིན་སྙམ་པ་དེ་འདྲ་བསམ་དུ་མི་རུང་མ་གཏོགས། རང་རྒྱུད་ན་ཡོད་པའི་དགེ་རྩ་ཆུང་ཆུང་ཙམ་པོ་དེ་ཡང་བཅད་ནས་ཕྱིན་ཆད་དགེ་རྩ་སྐྱེ་བའི་སྐལ་བ་མེད་པར་འགྲོ་བ་ཡིན། ལས་དང་ལས་ཀྱི་འབྲས་བུ་ཞེས་པ་དེ་བསམ་གྱིས་མི་ཁྱབ་པ་ཡིན། རང་རེ་སོ་སྐྱེ་རྨོངས་པ་རྣམས་ཀྱིས་ཀྱང་ཤེས་རྒྱུ་ཞིག་ཡིན་ན་རྒྱུ་འབྲས་ཟབ་མོའི་ཆོས་ཅི་ལ་ཟེར། འཇིག་རྟེན་ལ་མངོན་སུམ་ཡོད་པའི་རྒྱུ་རྫས་མི་འགའ་རེས་བཟོ་བསྐྲུན་ཤེས་རྒྱུ་རྣམས་འུ་ཚོས་བེད་སྤྱོད་ཀྱང་གཏོང་མི་ཤེས་པ་ཡིན་ན། རྒྱུ་འབྲས་ཟབ་མོའི་རྣམ་གཞག་ལྐོག་ཏུ་གྱུར་པ་ལས་འབྲས་ཀྱི་ཆ་ཕྲ་མོ་རྣམས་ག་ལ་ཤེས་ཏེ། རྨ་བྱའི་མདོངས་བཀྲ་གཅིག་ལ་ཡང་། །རྒྱུ་ཡི་དབྱེ་བ་ཐ་དད་པ། །དེ་མཁྱེན་པ་ནི་ཀུན་མཁྱེན་ཏེ། །ཀུན་མཁྱེན་ཡེ་ཤེས་མིན་པས་མིན། །ཞེས་གསུངས་པ་ཡིན། དེས་ན་ཀུན་མཁྱེན་སྟོབས་བཅུ་མངའ་བས་གནས་དང་གནས་མ་ཡིན་པ་མཁྱེན་པའི་སྟོབས་ཀྱིས་རྒྱུ་འབྲས་ཕྲ་བ་ནས་གཟིགས་པ་དེ་ལ་བསླུ་བ་ཞིག་ཨེ་ཡོད་སྙམ་པའི་དོགས་པ་ག་ལ་དགོས། རྒྱུ་འབྲས་ལ་ཡིད་ཆེས་མེད་དུས་སངས་རྒྱས་ལ་དད་པ་མེད་རྟགས་ཡིན་པས། དེ་ནི། དད་པ་མེད་པའི་མི་རྣམས་ལ། །དཀར་པོའི་ཆོས་ནི་མི་འབྱུང་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་གསུངས་པས། དད་པའི་ཨ་ལུང་མེད་ན། ཐུགས་རྗེའི་ལྕགས་ཀྱུས་ཟིན་ཐབས་མེད། མདོ་ལས་ཀྱང་། ངས་ནི་ཁྱོད་ལ་ཐར་པའི་ཐབས་བསྟན་གྱི། །ཐར་བ་རང་ལ་རག་ལས་བརྩོན་པར་གྱིས། ཞེས་གསུངས་པས། ཡིད་ཆེས་ཀྱི་དད་པའི་སྒོ་ནས་རང་ཉིད་ཐར་པའི་ཐབས་ལ་འབད་དགོས་པ་ཡིན་ནོ།། གཉིས་པ་བཅས་པའི་ལྟུང་བ་བཤགས་པ། གཉིས་པ་བཅས་པའི་ལྟུང་བ་བཤགས་པ་ལ། ཕྱི་སོ་སོ་ཐར་བའི་སྡོམ་པ་འགལ་བ་བཤགས་པ་དང་། ནང་བྱང་ཆུབ་སེམས་པའི་བསླབ་པ་དང་འགལ་བ་བཤགས་པ་དང་། གསང་བ་རིག་འཛིན་སྔགས་ཀྱི་དམ་ཚིག་དང་འགལ་བའི་ཉེས་ལྟུང་བཤགས་པ་དང་གསུམ་ལས། དང་པོ་ནི། དང་པོ་ཕྱི་སོ་སོ་ཐར་བའི་སྡོམ་པ་འགལ་བ་བཤགས་པ། ཕམ་པ་བཞི་དང་ལྷག་མ་བཅུ་གསུམ་དང་།། སྤང་ལྟུང་སོར་བཤགས་ཉེས་བྱས་སྡེ་ཚན་ལྔ།། སོ་ཐར་ཚུལ་ཁྲིམས་འཆལ་བ་མཐོལ་ལོ་བཤགས།། ཞེས་གསུངས་ཏེ། དེ་ཡང་ཕྱི་སོ་ཐར་གྱི་རྩ་བའི་བཅས་ལྟུང་ཕམ་པ་བཞི་དང་། ལྷག་མ་བཅུ་གསུམ། སྤང་ལྟུང་སུམ་ཅུ། ལྟུང་བྱེད་འབའ་ཞིག་པ་དགུ་བཅུ། སོར་བཤགས་བཞི། ཉེས་བྱས་བརྒྱ་དང་བཅུ་གཉིས་ཏེ་ལྟུང་བའི་སྡེ་ཚན་ལྔ་པོ་ལས་བཅས་ལྡན་བསླབ་ཁྲིམས་ནོད་ཚར་བའི་དགེ་སློང་ཞིག་གིས་དེ་ལྔའི་གང་ཡང་རུང་བ་ཞིག་ལ་འགལ་བ་བྱུང་ནས་བཟུང་། སོ་ཐར་གྱི་ཚུལ་ཁྲིམས་འཆལ་བ་ཡིན་པས་ན། དེ་ལྟ་བུའི་དམྱལ་བར་སྐྱེ་བའི་རྒྱུ་རང་གཞན་སེམས་ཅན་གྱིས་ཅི་བྱས་པ་ཐམས་ཅད་མཐོལ་ལོ་བཤགས་སོ་ཞེས་པ་སྟེ། རབ་ཏུ་བྱུང་བའི་བསླབ་བྱ་ཐམས་ཅད་རབ་ཏུ་བྱུང་བས་ཤེས་འོས་ཤིང་ཤེས་དགོས་པའང་ཡིན། གལ་ཏེ་བསྲུང་བྱ་ཙམ་ཡང་མ་ཤེས་ན་སྡོམ་པ་ཅི་ཞིག་བསྲུང་། བསྲུང་བྱ་མི་ཤེས་སྲུང་བར་རློམ་པ་མཚར། །ཞེས་གསུངས་པ་ལྟ་བུ་ལས་མ་འདས་པ་ཡིན། ཚུལ་ཁྲིམས་ཉམས་པ་དགེ་འདུན་གྱི་གྲལ་དུའང་མི་ཚུད་པ་ཡིན་ཕྱིར་བཤགས་སྡོམ་མ་བྱས་ན་བདེ་བ་ཅན་དུ་སྐྱེ་མི་ཐུབ་པ་ཤག་ཤག་རེད། དེས་ན་ཚུལ་ཁྲིམས་བསྲུངས་པའི་ཕན་ཡོན་དང་ཉམས་པའི་ཉེས་དམིགས་ལ་བསམས་ཏེ་ཕྱིར་བཅོས་དང་སྲུང་སྡོམ་ལ་འབད་དགོས་སོ། །ནང་བྱང་ཆུབ་སེམས་དཔའི་བསླབ་བྱ་དང་འགལ་བའི་ཉེས་ལྟུང་བཤགས་པ་ནི། གཉིས་པ་ནང་བྱང་ཆུབ་སེམས་དཔའི་བསླབ་བྱ་དང་འགལ་བ་བཤགས་པ། ནག་པོའི་ཆོས་བཞི་ལྟུང་བ་ལྔ་ལྔ་བརྒྱད།། བྱང་སེམས་བསླབ་པ་ཉམས་པ་མཐོལ་ལོ་བཤགས།། ཞེས་གསུངས་ཏེ། དེ་ལ་ནག་པོའི་ཆོས་བཞི་ཞེས་པ་ནི། བླ་མ་མཁན་སློབ་རྫུན་གྱིས་བསླུ་བ་དང་གཅིག གཞན་གྱིས་ལྷ་སྒོམ་སྔགས་བཟླས་སྡོམ་པ་ཞུ་བ་ལ་སོགས་པའི་དགེ་བ་བྱེད་པ་ལ་ཐེ་ཚོམ་དང་འགྱོད་པ་སྐྱེར་བཅུག་པ་དང་གཉིས། སྐྱེས་བུ་དམ་པ་ལ་སྐུར་པ་འདེབས་པ་དང་གསུམ། ཚོང་རྒྱག་པ་ལ་སོགས་པའི་སྐབས་སུ་གཡོ་སྒྱུ་སྣ་ཚོགས་ཀྱིས་སེམས་ཅན་མགོ་སྐོར་བ་དང་བཞི་སྟེ། དེ་བཞི་བྱས་ན་བྱང་ཆུབ་ཀྱི་སེམས་བརྗེད་པ་ལ་སོགས་པ་ཉེས་དམིགས་ཆེ་བ་ཡིན་པས་ནག་པོའི་ཆོས་བཞི་ཞེས་བྱ་ལ། དེ་བཞི་སྤངས་ཏེ་ལྡོག་ཕྱོགས་དཀར་པོའི་ཆོས་བཞི་ལ་སློབ་དགོས་པ་ཡིན། ལྟུང་བ་ལྔ་ལྔ་ཞེས་པའི་ལྔ་སྔོན་མ་དེ། བྱང་སེམས་རྒྱལ་པོ་ལ་འབྱུང་ཉེ་བའི་རྩ་ལྟུང་ལྔ་སྟེ། དཀོན་མཆོག་དཀོར་འཕྲོག་དང་ནི་ཆོས་སྤོང་ལས། །མཚམས་མེད་ལས་བྱེད་ལོག་ལྟ་ལྔ་རྒྱལ་པོ། །ཞེས་པ་རྣམས་ཡིན་ལ། དེ་ཡང་དཀོན་མཆོག་གི་དཀོར་འཕྲོག་པ་དང་། ཆོས་སྤོང་གི་ལས་བསགས་པ་དང་། དགེ་ཚུལ་སློང་གི་སྡོམ་འཕྲོག་བྱེད་པ་དང་། མཚམས་མེད་ཀྱི་ལས་བྱེད་པ་སྟེ་དེ་ལྔ་བོ་དང་། །ལྔ་རྗེས་མ་ནི་བྱང་སེམས་བློན་པོ་ལ་འབྱུང་ཉེ་བ་ལྔ་སྟེ། གྲོང་ལྗོངས་གྲོང་ཁྱེར་གྲོང་རྡལ་ཡུལ་འཁོར་རྣམས། །འཇོམས་པར་བྱེད་པའང་བློན་པོར་ངེས་པ་ཡིན། །ཞེས་པ་ལྟར་དུ་རྒྱལ་པོ་ལ་འབྱུང་ཉེ་བའི་དང་པོ་བཞིའི་ཁར། གྲོང་ཁྱེར་གྲོང་ལྗོངས་གྲོངས་རྡལ་ཡུལ་འཁོར་བཅོམ་པ་དེ་རྣམས་གཅིག་ཏུ་བརྩིས་པ་སྟེ་བྱང་སེམས་བློན་པོ་ལ་འབྱུང་ཉེ་བ་ལྔའོ། །བརྒྱད་ཅེས་པ་ནི། མ་སྦྱངས་སྟོང་ཉིད་བརྗོད་སྔས་ཉན་ཐོས་སྨོན། །རྫོགས་བྱང་ཕྱིར་བཟློག་ཐེག་དམན་སེམས་བསྐྱེད་དང་། །སོ་ཐར་སྤངས་ནས་ཐེག་ཆེན་སློབ་པ་དང་། །ཉན་ཐོས་ཐེག་པས་ཆགས་སོགས་མི་བཟློག་པས། །དེ་བཟློག་དེ་ཡི་འབྲས་བུ་མེད་པར་བྱས། །ཕྲག་དོག་དབང་གིས་བདག་བསྟོད་གཞན་སྨོད་དང་། །རྙེད་དང་བཀུར་སྟིའི་ཆེད་དུ་བདག་འཚོང་དང་། །དགེ་སློང་ཆད་པས་གཅོད་འཇུག་གསུག་འབུལ་དང་། །སྤོང་བའི་ལོངས་སྤྱོད་ཁ་ཏོན་པ་ལ་བྱིན། །ཞི་གནས་འདོར་བཅུག་ཕལ་ལ་འབྱུང་ངེས་བརྒྱད། །ཅེས་གསུངས་པའི་བྱང་སེམས་ཕལ་བ་ལ་འབྱུང་ཉེ་བ་བརྒྱད་དེ། དེ་དག་ལ་རྩ་ལྟུང་བཅོ་བརྒྱད་དང་། དེའི་ཁར་སྨོན་འཇུག་གི་སེམས་བསྐྱེད་བཏང་བ་གཉིས་བསྣན་པས་རྩ་ལྟུང་ཉི་ཤུ་ཞེས་སུ་ཟེར་བ་ཡིན། དེའི་ཉི་ཤུ་པོ་ལས་གང་བྱུང་ནའང་བྱང་ཆུབ་སེམས་དཔའི་བསླབ་བྱ་ཉམས་པ་ཡིན་པས་དེ་དག་གང་དང་གང་བྱུང་བ་ཐམས་ཅད་མཐོལ་ལོ་བཤགས་སོ་ཞེས་པའོ། །བྱང་ཆུབ་ཀྱི་སེམས་རིན་པོ་ཆེ་རང་རྒྱུད་ལ་སྐྱེས་ནས་མི་ཉམས་པར་བསྲུངས་པའི་ཕན་ཡོན་ནི། སྤྱོད་འཇུག་ལས། གསེར་འགྱུར་རྩི་ཡི་རྣམ་པ་མཆོག་ལྟ་བུ། །མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་བསྒྱུར་བས་ན། །བྱང་ཆུབ་སེམས་ཞེས་བྱ་བ་རབ་བརྟན་བཟུང་། །ཞེས་གསུངས་པ་ལྟར་དང་། མིང་དོན་གནས་འགྱུར་བ་ལ་སོགས་པའི་དགོས་པ་ཁྱད་པར་ཅན་དང་ལྡན་པའོ། །གསང་བ་རིག་འཛིན་སྔགས་ཀྱི་དམ་ཚིག་དང་འགལ་བའི་ཉེས་ལྟུང་བཤགས་པ་ནི། གསུམ་པ་གསང་བ་རིག་འཛིན་སྔགས་ཀྱི་དམ་ཚིག་དང་འགལ་བའི་ཉེས་ལྟུང་བཤགས་པ། རྩ་ལྟུང་བཅུ་བཞི་ཡན་ལག་སྦོམ་པོ་བརྒྱད།། གསང་སྔགས་དམ་ཚིག་ཉམས་པ་མཐོལ་ལོ་བཤགས།། ཞེས་གསུངས་ཏེ། དེ་ལ་སྔགས་ཀྱི་རྩ་བའི་ལྟུང་བ་བཅུ་བཞི་ནི། མངའ་རིས་པཎ་ཆེན་གྱིས་སྡོམ་གསུམ་རྣམ་ངེས་ལས། རྩ་བའི་ལྟུང་བ་བཅུ་བཞི་བསྟན་པ་ནི། སློབ་དཔོན་རྣམ་གསུམ་སྙིང་ནས་སྨོད་པ་དང་། །བརྙས་དང་ཐུགས་དཀྲུགས་ལྟུང་བའི་སྒོ་ཀུན་ལས། །ཤིན་ཏུ་ལྕི་ཕྱིར་འདི་ཉིད་དང་པོར་བཤད། །བླང་དོར་གནས་སྟོན་བདེ་བར་གཤེགས་པའི་བཀའ། །བླ་མས་གསུངས་ཤིང་རང་གིས་གོ་བཞིན་དུ། །ཁྱད་གསོད་མི་མཐུན་སྤྱོད་འབྲེལ་བཀའ་འདས་གཉིས། །སྤྱི་རང་ཉེ་དང་ནང་འདྲེས་སྤུན་ལ་ཁྲོས། །འཁོན་འཛིན་ཕྲག་དོག་བརྙས་སོགས་གསུམ་པའོ། །སེམས་ཅན་བདེ་བ་ཀུན་དང་བྲལ་ན་བསམས། །སྙིང་ནས་བྱམས་པ་བཏང་བ་བཞི་བའོ། །འདོད་ཆགས་སེམས་ཀྱིས་གནས་སྐབས་མ་ཡིན་པར། །བསམ་བཞིན་ཁུ་བ་འབྱིན་དང་སེམས་ཅན་ལ། །བྱང་ཆུབ་སེམས་བསྐྱེད་བཏང་བ་ལྔ་བ་ཡིན། །ལམ་འཚོལ་མུ་སྟེགས་ལམ་ཞུགས་ཉན་རང་དང་། །ལམ་ཆེན་ཐེག་ཆེན་གྲུབ་མཐར་སྨོད་ན་དྲུག །སྣོད་དང་ཆོ་ག་མ་བྱས་མ་རྫོགས་དང་། །ཉམས་དང་ཟབ་མོས་འཇིགས་ལྔར་གསང་སྒྲོགས་བདུན། །ཕུང་ལྔ་སངས་རྒྱས་ལྔ་ལ་བརྙས་པ་ཡིས། །སྨོད་དང་གདུང་བ་བསྐྱེད་ན་བརྒྱད་པ་ཡིན། །གཞི་ལམ་འབྲས་བུའི་རང་བཞིན་དག་པ་ལ། །དཀྲི་བར་ཐེ་ཚོམ་ཟ་བ་དགུ་པར་བཤད། །བསྒྲལ་བའི་ཞིང་བཅུ་ཚང་བ་ནུས་བཞིན་དུ། །མི་སྒྲོལ་བ་དང་བྱམས་པར་བྱེད་ན་བཅུ། །མིང་སོགས་བྲལ་ལ་དངོས་དང་དངོས་མེད་རྟོག །རྟོག་གེས་འཇལ་བར་བྱེད་ན་བཅུ་གཅིག་པའོ། །དད་གསུམ་ལྡན་པའི་སེམས་ཅན་དོན་མི་བྱེད། །སེམས་མི་བསྲུངས་དང་བསླུ་བ་བཅུ་གཉིས་པ། །སྐབས་བབ་ཡོ་བྱད་ལོངས་སྤྱོད་དམ་ཚིག་རྫས། །དུས་ཚོད་འབྲེལ་ཡང་མི་བསྟེན་བཅུ་གསུམ་པ། །སྤྱི་དང་བྱེ་བྲག་ལ་ལྟོས་ཤེས་རབ་མ། །ངོས་ལྐོག་སྙིང་ཚིམས་སྨད་གོ་བཅུ་བཞི་པའོ། །ཞེས་གསུངས་པ་ལྟ་བུ་དང་། ཡང་དེ་ལས། ད་ནི་ཡན་ལག་སྦོམ་པོའི་ལྟུང་བ་བཤད། །དབང་དང་དམ་ཚིག་མ་སྨིན་རིག་མ་བསྟེན། །ཚོགས་ཀྱི་འཁོར་ལོའི་དུས་སུ་ལུས་ངག་རྩོད། །མ་གསུངས་རིག་མར་རང་སྟོབས་བདུད་རྩི་ལེན། །སྣོད་ལྡན་སློབ་མར་གསང་སྔགས་མི་སྟོན་དང་། །དད་ལྡན་ཆོས་འདྲི་བ་ལ་ཆོས་གཞན་སྟོན། །ཉན་ཐོས་ནང་དུ་ཞག་བདུན་ལོངས་པར་བསྡད། །རྣལ་འབྱོར་ཡེ་ཤེས་མི་ལྡན་སྔགས་པར་རློམ། །སྣོད་མིན་ལ་བཤད་ཡན་ལག་ལྟུང་བ་བརྒྱད། །ཅེས་པ་སྟེ། མདོར་ན་གསང་སྔགས་རྡོ་རྗེ་ཐེག་པའི་དམ་ཚིག་ལས་གང་ཡང་རུང་བ་ཉམས་པ་ཐམས་ཅད་མ་བཤགས་ན། རྡོ་རྗེ་དམྱལ་བའི་ནང་ལྷུང་བ་དང་བཤགས་སྡོམ་བྱས་ན་མྱུར་དུ་སངས་རྒྱས་ཐོབ་པར་འགྱུར་བ་ནི། རྒྱུད་ལས། སྔགས་ལ་ཞུགས་པའི་སྐྱེས་བུ་ངན་སོང་དང་། །སངས་རྒྱས་གཉིས་ལས་འགྲོ་ས་གསུམ་པ་མེད། །ཅེས་གསུངས་པ་ཡིན། དེས་ན་དེ་ལྟ་བུའི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ་ཞེས་པའོ། །རང་རེ་མདོ་སྔགས་གཉིས་ལྡན་གྱི་རིང་ལུགས་འཛིན་པའི་ཆོས་བརྒྱུད་འདིར་སྐྱེས་ནས་བཟུང་སྟེ། སོ་ཐར་རིགས་བདུན་གང་རུང་གི་སྡོམ་པ་ཞུས་པས་མ་ཚད་པར། བྱང་ཆུབ་སེམས་ཀྱི་སྡོམ་པ་སྲོལ་གཉིས་གང་རུང་ལ་བརྟེན་ནས་ཞུས་པ་དང་། དེའི་ཐོག་ཏུ་གསང་སྔགས་ཀྱི་དབང་མ་ཞུས་པ་མེད་པ་ལྟ་བུ་ཡིན་པས། དེ་ཡང་འཇུག་སྒོ་དབང་དང་དབང་སྲོག་དམ་ཚིག་གིས་འཛིན་དགོས་པ་ཡིན། སོ་བྱང་སྔགས་གསུམ་གྱི་སྡོམ་པ་གསུམ་པོ་ཐོབ་ཀྱང་སྲུང་སྡོམ་གྱི་ཕྱོགས་ནས་གཅིག་ཀྱང་མེད་ན། བཤགས་ཏག་ཏག་བསྡད་ན་བཤགས་ཏེ་ཉམས་པའི་ངན་འབྲས་མི་འབྱུང་བ་ལོས་ཡོད་མ་གཏོགས། བསྲུངས་ནས་བསྲུངས་པའི་བཟང་འབྲས་འཁོར་བ་མཐའ་ཅན་འདྲ་སྲིད་ན་མ་གཏོགས་མྱུར་བའི་རེ་བ་ནི་ཅི་ཡང་མེད་པ་ཡིན། ངོ་བོ་གནས་འགྱུར་ཡོན་ཏན་ཡར་ལྡན་ཞེས་པ་ཞིག་ཡོད་ཀྱང་། ལས་དང་པོ་བས་སྡོམ་པ་གསུམ་སོ་སོའི་རང་ལམ་ལྟར་དུ་བསྲུངས་ནས། རང་རྒྱུད་ཀྱི་ཀུན་རྟོག་ཉོན་མོངས་དང་བསྟུན་ཏེ་འགལ་ན་རང་ལམ་ནས་བཤགས་རྒྱུ་འདི་གནད་ཆེ་བ་ཡིན་ནོ། །ད་ནི་རང་བཞིན་གྱི་སྡིག་པ་ངོ་མ་ཤེས་པ་བཤགས་པ་ནི། གསུམ་པ་རང་བཞིན་གྱི་སྡིག་པ་ངོ་མ་ཤེས་པ་བཤགས་པ། སྡོམ་པ་མ་ཞུས་མི་དགེའི་ལས་བྱས་པ།། མི་ཚངས་སྤྱོད་དང་ཆང་འཐུང་ལ་སོགས་པ།། རང་བཞིན་ཁ་ན་མ་ཐོའི་སྡིག་པ་སྟེ།། སྡིག་པ་སྡིག་ཏུ་མ་ཤེས་མཐོལ་ལོ་བཤགས།། ཞེས་གསུངས་ཏེ། སྡོམ་པ་མ་ཞུས་པའི་ཁྱིམ་པ་ཕོ་མོ་རྣམས་ལ། བཅས་པ་དང་འབྲེལ་བའི་སྡིག་པ་མེད་ཀྱང་། མི་དགེ་བའི་ལས་ལམ་རང་བཞིན་གྱིས་སྡིག་པར་འགྱུར་བ་གྲངས་ཀྱིས་མི་ཆོད་པ་ཡོད་པ་སྟེ། དེ་ཡང་མི་ཚངས་པ་སྤྱོད་པའི་ཕྱོགས་མཚུངས་ལོག་པར་གཡེམ་པ་དང་། མྱོས་བྱེད་ཀྱི་ཆང་འཐུང་བ་དང་། སོགས་ཁོངས་ནས་བྱུང་བ་སྲོག་གཅོད། རྐུ་འཕྲོག ཁ་དུད། སྣ་དུད། ཤོ་དང་རྭ་ཕེ་ལ་སོགས་པ་ཉོན་མོངས་ཅན་གྱིས་བསྐྱེད་ཚད་ཐམས་ཅད་སྟོན་པས་མ་བཅས་ཀྱང་རང་བཞིན་གྱི་ཁ་ན་མ་ཐོའི་སྡིག་པ་ཡིན་པས། རྣམ་སྨིན་གྱི་སྡུག་བསྔལ་ལ་བསམས་ན་ཁ་ཐོག་ནས་བརྗོད་པ་ཙམ་ཡང་མི་ཕོད་པའི་ཕྱིར་ན་སྡིག་པའི་མིང་ལ་ཁ་ན་མ་ཐོ་བ་ཞེས་གསུངས་པ་ཡིན། དེ་དག་ནི་ཁྱིམ་པ་དང་རབ་བྱུང་སུས་ཀྱང་བྱེད་དུ་མི་རུང་བའི་སྡིག་པ་ཡིན་ཡང་སྡིག་པ་ལ་སྡིག་ཏུ་མ་ཤེས་པར་བྱས་པ་ཐམས་ཅད་མཐོལ་ལོ་བཤགས་སོ་ཞེས་བཤགས་པ་སྟེ། སྡིག་པ་ལ་སྡིག་ཏུ་མ་ཤེས་པར་བྱས་ནའང་ཉེས་པ་ཡོད་པས་མ་ཚད་རྣམ་སྨིན་ཡང་ཡོད་པ་ཡིན་པས་ཡང་བསྐྱར་བཤད་ན། མི་ཚངས་སྤྱོད་དང་ལོག་གཡེམ་གྱི་ཉེས་པ་གོང་དུ་ཡང་བཤད་ཟིན་ལ། གཞན་ཡང་། མདོ་ལས། ཆགས་པས་ཟིལ་གནོན་མི་ཡིས་ནི། །བྱ་དང་མི་བྱ་རྟོགས་མི་འགྱུར། །ཞེས་གསུངས་པ་ལྟར་དུ། ཆགས་པའི་དབང་གིས་མཚམས་མེད་ཀྱི་ལས་བྱེད་པ་ལ་སོགས་པ་ཉེས་པ་ཆེན་པོ་འབྱུང་བའང་ཡོད་པ་དེས་ན་རབ་བྱུང་གིས་མི་ཚངས་སྤྱོད་དང་། ཁྱིམ་པས་ལོག་གཡེམ་མཐའ་གཅིག་ཏུ་སྤོང་དགོས་པ་དང་། ཆང་ཨ་རག་འཐུང་བའི་ཐད་ནས་བཅོམ་ལྡན་འདས་ཀྱིས། ཆང་འཐུང་ང་ཡི་རྗེས་འཇུག་མིན། །ཞེས་དང་། ང་ལ་སྟོན་པར་ཁས་ལེན་པ་རྣམས་ཀྱིས་ཆང་རྩྭ་རྩེས་ཀྱང་བཏུང་བ་མི་བྱའོ་ཞེས་གསུངས་པ་ཡིན་པས། རབ་བྱུང་མིན་ཡང་ཁྱིམ་པ་ནང་པའི་ཆོས་སྒོར་ཞུགས་མཁན་ཞིག་ཡིན་ན་སངས་རྒྱས་ཀྱི་རྗེས་འཇུག་དང་སློབ་མ་ཡིན་པས་སངས་རྒྱས་ཀྱི་བཀའ་ལ་མ་འཛེམས་ན་སངས་རྒྱས་ཀྱི་སློབ་མ་མིན་པ་དང་། ནང་པའི་གྲལ་དུ་མ་ཚུད་པ་ནི་ཕྱི་རོལ་བ་ལས་གཞན་འགྲོ་ས་མེད་པ་ཡིན་པས། ཁྱོད་ཕྱི་རོལ་མུ་སྟེགས་པ་ང་ཚོས་གྲལ་དུ་མ་འོངས་ཞེས་པ་ལས་འོས་མེད་པར་ཆགས་པ་ཡིན། དེས་ན་ཆང་འཐུང་མི་རུང་བ་ནི་བཅས་དང་རང་བཞིན་གཉིས་ཀའི་ཉེས་པ་ཡིན་པས་ཡིན་ལ། ཁ་དུད་སྣ་དུད་འདི་གཉིས་ནི་རྒྱུ་གཅིག་གིས་བྱས་པ་སྟེ། འདི་ཡང་བཅོམ་ལྡན་འདས་ཀྱིས་ཉེས་པ་བསྐྱེད་ཚད་ཐམས་ཅད་སྤང་དགོས་ཞེས་སྤང་བྱ་མདོར་བསྡུས་ནས་གསུངས་པ་དང་འགལ་ཞིང་། འདི་ནི་རྒྱུ་ངན་པ་དམ་སྲི་འདྲེ་མོའི་མངལ་ཁྲག་གི་ས་བོན་ལས་བྱུང་བ་དང་། སྦྱོར་བ་ངན་པ་མི་གཙང་བའི་རྫས་ཀྱིས་སྡེབ་སྦྱོར་བྱས་པ་དང་། རྒྱས་འདེབས་ངན་པ་དམ་སྲིས་སྨོན་ལམ་ལོག་འདེབས་ལས་བྱུང་པའི་རྫས་ངན་ཡིན་པས། གལ་སྲིད་འདི་འཐེན་ན་ཡུལ་ལྷ་དཀར་ཕྱོགས་སྐྱོང་བའི་ཟོ་དོར་དང་ལྷ་ཀླུ་ཐམས་ཅད་ལ་ཕོག་ཐུག་འགྲོ་བ་དང་། རང་གི་ཕྲག་ལྷ་ལུས་ལྷ་རྒུད་ནས་ཁ་ལས་ཀླུང་རྟ་ཞན་པ་དང་། འཆི་བྱེད་ཀྱི་ནད་བསྐྱེད་པ་དང་། ཤི་ན་འཕོ་བ་མི་ཐེབས་ཤིང་། གདོན་གྲིབ་གཉིས་ཀ་འདི་ལ་འཁྲི་བ་དང་། དྲི་ངན་ཁོར་ཡུག་ལ་ཁྱབ་པ་དེ་རྐྱང་པས་ཀྱང་ལྷ་དང་སྲུང་མ་ཕྱོགས་དེར་མི་གཅར་བར་འགྱུར་བ་ཡིན་པས་དུད་འཐེན་དང་སྒོག་ཟན་ལྷ་ཁང་ནང་དུ་སོང་ན་ཉེས་པ་ཆེ་བ་ཡིན་ནོ། །མདོར་ན་མགོན་པོ་ཀླུ་སྒྲུབ་ཀྱིས། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བ། །མ་ཆགས་མི་སྡང་གཏི་མུག་མེད། །དེས་བསྐྱེད་ལས་ནི་དགེ་བའོ། །ཞེས་དང་། མངའ་རིས་པཎ་ཆེན་གྱིས། མདོར་ན་ཡེ་ནས་གནང་དང་བཀག་པ་མེད། །བྱ་རུང་དང་ཉེ་མི་རུང་ལྡོག་བྱེད་ན། །དེ་དག་སྤྱོད་ཀྱང་མི་རུང་དང་ཉེ་ཞིང་། །རུང་བ་ལྡོག་ན་ཀུན་ཏུ་སྤོངས་ཞེས་གསུངས། །ཞེས་པ་ལྟར་དུ་རུང་བ་དང་ཉེ་ན་ཆོག་པ་དང་། མི་རུང་བ་དང་ཉེ་ན་མི་ཉན་པ་ཡིན་ནོ། །དེ་ནས་ངོ་མ་ཤེས་པའི་བཅས་ལྟུང་བཤགས་པ་ནི། བཞི་བ་ངོ་མ་ཤེས་པའི་བཅས་ལྟུང་བཤགས་པ། སྐྱབས་སྡོམ་དབང་བསྐུར་ལ་སོགས་ཐོབ་ན་ཡང་།། དེ་ཡི་སྡོམ་པ་དམ་ཚིག་བསྲུང་མ་ཤེས།། བཅས་པའི་ལྟུང་བ་ཕོག་པ་མཐོལ་ལོ་བཤགས།། ཞེས་གསུངས་ཏེ། དེ་ལ་སྐྱབས་འགྲོའི་སྡོམ་པ་དང་། དབང་བསྐུར་སྔགས་ཀྱི་སྡོམ་པ་ལ་སོགས་པ་ཞུ་རྒྱུ་ཅི་ཡོད་ཐམས་ཅད་ཞུས་ཏེ་ཐོབ་ཡོད་ན་ཡང་། ཞུས་ཡོད་པ་དེ་དག་གི་སྡོམ་པ་དང་དམ་ཚིག་དེ་དག་བསྲུང་མ་ཤེས་པར་བཅས་པའི་ལྟུང་བ་དང་ཉེས་ལྟུང་ཕོག་པ་ཐམས་ཅད་མཐོལ་ལོ་བཤགས་སོ་ཞེས་པའོ། །སྐྱབས་འགྲོའི་བསླབ་བྱ་ལྟ་བུ་ཞིག་ལ་མཚོན་ན། དགག་པའི་བསླབ་བྱ་གསུམ། སྒྲུབ་པའི་བསླབ་བྱ་གསུམ། ཆ་མཐུན་གྱི་བསླབ་བྱ་གསུམ་དང་དགུ་ཁས་བླངས་ཡོད་པ་དང་། གསང་སྔགས་ཀྱི་དབང་ཞུས་ནས། གཙོ་བོས་ཇི་ལྟར་བཀའ་སྩལ་བ། །དེ་དག་ཐམས་ཅད་བདག་གིས་བགྱིད། །ཅེས་ཁས་བླངས་པ་ཡིན། བླ་མས་རང་གི་སྒེར་དོན་དུ་ཆོས་དང་མི་མཐུན་པ་འདི་འདྲ་ཞིག་སྒྲུབས་ཤིག་ཅེས་གསུངས་པ་མིན་ཡང་། གསང་སྔགས་ཀྱི་དམ་ཚིག་སྲུང་བ་ཡིན་ཞེས་རྗེས་ཟློས་བྱས་ཏེ་ཁས་བླངས་ཚར་དུས་དམ་ཚིག་གི་རྣམ་གྲངས་ས་མ་ཡ་འབུམ་སྡེ་ལ་སོགས་པ་མང་ན་ཡང་། གཙོ་བོ་བླ་མའི་སྐུ་གསུང་ཐུགས་ལས་འཕྲོས་པའི་དམ་ཚིག་ཉེར་བདུན་ལ་སོགས་པ་སྤྱི་དང་བྱེ་བྲག་གི་དམ་ཚིག་བསྲུང་བྱ་མང་བ་ཡིན། བསྲུང་མ་དགོས་བསྲུང་བྱ་ཙམ་ཡང་མ་ཤེས་ན་ཉེས་འགལ་ཇི་ཙམ་སོང་ཡོད་མི་ཤེས་ལ། ཁྱད་པར་དུ་འགལ་ཉམས་འདས་རལ་གྱིས་ལོ་གསུམ་འདས་ན་གསོ་མི་རུང་བ་ཡིན་པས་དེ་ལྟ་བུ་སོ་བྱང་སྔགས་གསུམ་དང་འགལ་བའི་ཉེས་ལྟུང་རང་གཞན་སེམས་ཅན་ཐམས་ཅད་ཀྱིས་བྱས་པ་ཐམས་ཅད་གནོང་ཞིང་འགྱོད་པའི་སེམས་ཀྱིས་བཤགས་དགོས་པ་ཡིན། ས་ཆ་འདི་ཚོ་རྐྱང་པ་མ་ཡིན་པར་བོད་ཀྱི་ས་ཆ་མང་པོ་ཞིག་ལ་མཚོན་ན། དབང་ཞིག་ཞུ་ཟེར་དུས་ཁྱིམ་སྲུང་དུ་ཤུལ་སྡོད་ཀྱང་ཡོད་ལ་མེད་ཅིག་བྱས་ཏེ་ལོ་རྒས་གཞོན་ཚང་མ་གཤར་ཡོང་བ་ཡིན། དབང་ཚིག་མགོ་རྔ་ཚང་བ་ཞིག་གོ་དགོས་སྣང་ཡང་མི་འཆར་བ། བུམ་ཆུ་ཞིག་རག་ཚར་དུས་དབང་ཐོབ་ཚར་སོང་སྙམ་ནས། ཕྱག་དབང་ཞིག་ཞུས་པ་འདྲ་འདྲའི་སྣང་བ་ཤར་ཏེ། བསྲུང་བྱ་ཞིག་ཡོད་སྣང་ཙམ་ཡང་མི་ཤར་བ་ཕྱུགས་ཟོག་ཚེ་ཐར་བྱས་ནས་རྣ་རྟགས་བླངས་ཚར་དུས་ཇི་མི་སྙམ་པར་བཤར་བ་ལྟ་བུ་བྱེད་པ་ནི་རྟོགས་པའི་བསྟན་པ་ནུབ་པའི་རྟགས་ཡིན་པར་གསུངས་པ་ཡིན། ཆོས་ཁྲིད་བཤད་པའི་སྐབས་སུ་ནི་ལོ་ཉུང་དག་ཡོང་མི་ཆོག་ཅེས་བཀག་པ་དང་འདྲ་བར་མི་ཡོང་བར་འདུག་མ་གཏོགས། ད་ལྟ་ལུང་གི་བསྟན་པ་ནུབ་ཟིན་མེད་པས། ཉན་ན་སྤང་བླང་གི་གནད་ཅུང་ཟད་རེ་ཤེས་སུ་ཡོད་པས་མ་ཚད། ཆོས་འཇིག་རྟེན་གཉིས་ཀའི་ཐད་ནས་བློ་གྲོས་ཀྱི་མིག་གསར་བ་རེ་འཐོབ་རྒྱུ་ཡོད་པ་ཡིན། མི་ཤེས་པ་ཐམས་ཅད་སྦྱངས་ནས་ཤེས་དགོས་པ་ཡིན། ངས་དེ་སྔར་མ་ཤེས་ལ་ད་དུང་ཡང་ཤེས་རྒྱུ་མ་རེད་སྙམ་ནས་བསྐྱུར་བཞག་ན། གླང་ཆེན་སྨྱོན་པ་རང་ཡན་དུ་མངགས་པ་དང་འདྲ་བར་ཕུང་ཀྲོལ་ཐམས་ཅད་པོ་དེས་བསྐྱེད་ནས་རང་སྡུག་རང་གིས་བཀལ་བ་ཡིན་པས་ཤེས་རབ་ཀྱི་མིག་རེ་བསྟེན་པ་ནི་གནད་ཆེ་བ་ཡིན། ཉེས་འགལ་བཤགས་པ་ལ་གཉེན་པོ་སྟོབས་བཞིའི་སྒོ་ནས་བཤགས་དགོས་པས་དེའི་ཡན་ཆད་ཀྱིས་གཉེན་པོ་ཀུན་ཏུ་སྤྱོད་པའི་སྟོབས་བཤད་པ་སོང་བའོ། །གཉིས་པ་ཉེས་བྱས་སུན་འབྱིན་གྱི་སྟོབས་ནི། གཉིས་པ་ཉེས་བྱས་སུན་འབྱིན་གྱི་སྟོབས། འགྱོད་པ་མེད་ན་བཤགས་པས་མི་འདག་པས།། སྔར་བྱས་སྡིག་པ་ཁོང་དུ་དུག་སོང་ལྟར།། ངོ་ཚ་འཇིགས་སྐྲག་འགྱོད་པ་ཆེན་པོས་བཤགས།། ཞེས་གསུངས་ཏེ། སྔར་བྱས་ཀྱི་སྡིག་པ་མི་དགེ་བའི་ལས་དྲན་ཡོང་དུས་འགྱོད་པ་དྲག་པོ་ཞིག་མེད་པར་ཁ་ཙམ་ཚིག་ཙམ་གྱི་བཤགས་པ་ཞིག་གིས་སྡིག་པ་རྩ་བ་ནས་མི་འདག་པ་ཡིན་པས་ན། སྔར་བྱས་ཀྱི་སྡིག་པ་བསགས་ཚད་པོ་ཚུར་སེམས་ཐོག་ཏུ་བླངས་ཏེ། དཔེར་ན། མི་ནད་མེད་ཅིག་གིས་འཆི་བྱེད་ཀྱི་དུག་ཅིག་འཐུང་ནས་ཁོག་ཏུ་སོང་བ་རང་ཉིད་ཀྱིས་ཤེས་སོང་བ་ལྟར་དུ། ངས་ཅི་འདྲ་འདྲའི་ལས་ངན་ཚབས་ཆེན་ཞིག་བསགས་པར་བྱས་འདུག་སྙམ་ནས། རང་ངོ་ལ་ལྟོས་པའི་ངོ་ཚ་དང་། གཞན་ངོ་ལ་ལྟོས་པའི་ཞེ་ཁྲེལ། རྒྱལ་བ་སྲས་དང་བཅས་པས་མཁྱེན་ན་ཐུགས་ཁྲེལ་བར་འདུག་སྙམ་པའི་འཇིགས་པ་དང་། རྣམ་སྨིན་རང་ཐོག་ལ་སྨིན་ན་ཅི་བྱེད་སྙམ་པའི་དངངས་སྐྲག་ཀྱིས་འགྱོད་པ་ཆེན་པོས་བཤགས་པ་ནི་ཉེས་བྱས་སུན་འབྱིན་པའི་སྟོབས་སོ། །གསུམ་པ་སོར་ཆུད་ནས་ཉེས་སྤྱོད་སྡོམ་པའི་སྟོབས་ནི། གསུམ་པ་སོར་ཆུད་ནས་ཉེས་སྤྱོད་སྡོམ་པའི་སྟོབས། ཕྱིན་ཆད་སྡོམ་སེམས་མེད་ན་མི་འདག་པས།། ཕྱིན་ཆད་སྲོག་ལ་བབ་ཀྱང་མི་དགེའི་ལས།། ད་ནས་མི་བགྱིད་སེམས་ལ་དམ་བཅའ་བཟུང་།། ཞེས་གསུངས་ཏེ། འགྱོད་བཤགས་བྱས་ནས་ཕྱིན་ཆད་མི་བྱེད་སྙམ་པའི་སྡོམ་སེམས་བརྟན་པོ་ཞིག་མེད་ན་ཉེས་པ་མི་འདག་པས། ཕྱིན་ཆད་སྲོག་དམར་པོ་ཐེངས་མ་དགུ་ལ་ཆད་ཀྱང་མི་དགེ་བའི་ལས་དེ་དང་འདྲ་བ་ཉི་མ་ད་ལྟ་ནས་བྱང་ཆུབ་སྙིང་པོ་མ་ཐོབ་ཀྱི་བར་དུ་མི་བགྱིད་དོ་སྙམ་ནས་སེམས་ལ་དམ་བཅའ་གཟུང་དགོས་པ་ཡིན། དུག་འཐུང་སྟེ་ཐེངས་གཅིག་ཡར་སོས་ཡོང་ན་ད་དུང་མ་འཛེམས་ན་ཕན་ཐོགས་མེད་པ་ལྟ་བུ་ཡིན། སྤོང་བའི་སེམས་ནི་ཐོབ་པ་ལ། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་གསུངས་པས། ཉི་མ་ད་ནས་བཟུང་སྟེ་སྡིག་པ་མི་བྱེད་པར་དགེ་བ་བསྒྲུབ་སྙམ་པའི་དམ་བཅའ་བྱས་ན་གང་ལྟར་ཡང་སེམས་ཀྱི་དགེ་བ་ཆེན་པོ་ཞིག་ཐོབ་པ་ཡིན། བཞི་བ་རྟེན་གྱི་སྟོབས་ནི། བཞི་བ་རྟེན་གྱི་སྟོབས། བདེ་གཤེགས་འོད་དཔག་མེད་པ་སྲས་བཅས་ཀྱིས།། བདག་རྒྱུད་ཡོངས་སུ་དག་པར་བྱིན་གྱིས་རློབས།། ཞེས་གསུངས་ཏེ། གོང་ནས་བཤད་པ་བཞིན་དུ་རང་ངོས་ནས་འགྱོད་སྡོམ་གྱིས་བཤགས་ན། བདེ་བར་གཤེགས་པ་འོད་དཔག་མེད་སྲས་དང་བཅས་པས་ཀྱང་། བདག་གཞན་གྱི་རྒྱུད་འདི་མེ་ལོང་གཡའ་ཕྱིས་པ་དང་། ཤེལ་གོང་ཆུས་བཀྲུས་པ་བཞིན་དུ་ཡོངས་སུ་དག་པར་བྱིན་གྱིས་རློབས་ཞེས་མོས་གུས་དྲག་པོས་གསོལ་བ་འདེབས་པ་ནི་རྟེན་གྱི་སྟོབས་ཡིན་ནོ། །དེ་ལྟ་བུའི་གཉེན་པོ་སྟོབས་བཞིའི་སྒོ་ནས་སྙིང་ཐག་པ་ནས་བཤགས་ན། སྡིག་པ་ཅི་ཙམ་ཆེ་ཡང་མི་འདག་པ་མི་སྲིད་པ་ཡིན། སྔར་བཤད་པ་ལྟར་དུ་སྡིག་པ་ལ་ཡོན་ཏན་མེད་ཀྱང་འདག་རྒྱུ་ཡོད་པ་དེ་སྡིག་པའི་ཡོན་ཏན་ཡིན། སྡིག་པ་ནི་འདུས་བྱས་བདེན་པར་མ་གྲུབ་པ་ཡིན་ཕྱིར་འདག་ཏུ་ཡོད་པ་ཡིན་ནོ། །མི་མཁས་བླུན་པོ་དག་གིས་སྡིག་པ་བྱེད་ཤེས་ཀྱང་། བཤགས་མ་ཤེས་པར་ལུས་སོང་ན། སྡིག་པ་ཅི་འདྲའི་ཆུང་ཡང་ངན་སོང་ལ་འཕེན་ཐུབ་པ་ནི་དཔེར་ན་ལྕགས་ཀྱི་རིལ་བུ་ཅི་འདྲ་ཆུང་ཆུང་ཞིག་ཡིན་རུང་ཆུ་ནང་དུ་འཕངས་ན་ཆུ་གཏིང་དུ་འགྲོ་བ་ལྟ་བུ་དང་། མཁས་པ་ཞིག་གིས་སྡིག་པ་བྱེད་ཤོར་ཡང་བཤགས་ཤེས་པའི་དབང་གིས་ན་ངན་སོང་ལ་མི་ལྷུང་བའི་ཐབས་ཐོན་པ་དཔེར་ན་ལྕགས་ཀྱི་རིལ་བུ་དེ་བརྡུངས་ཤིང་ལེབ་ལེབ་བྱས་ཏེ་ལྕགས་ཤོག་སྲབ་མོར་བྱས་ནས་ཆུ་ནང་དུ་འཕངས་ན་གཏིང་དུ་མི་ནུབ་པར་ཆུའི་ཁར་གཡེང་བ་ལྟ་བུ་སྟེ། སྡིག་པ་བཤགས་ཤེས་དང་མི་ཤེས་པའི་སྒོ་ནས་ཁྱད་པར་དེ་ལྟར་ཆེན་པོ་འབྱུང་བ་ཡིན། ཁྱད་པར་དུ་སྐབས་འདི་ལྟ་བུའི་བཤགས་པ་ནི་གཉེན་པོ་བྱང་ཆུབ་སེམས་དང་འབྲེལ་བའི་བཤགས་པ་ཡིན་པས་སྡིག་པ་དེ་ལས་ཆེ་མེད་པའི་མཚམས་མེད་ཀྱི་ལས་ཡིན་ཡང་གནས་སྐབས་ཟིལ་གྱིས་མནན་ནས་ཇེ་སྲབ་ལ་གཏོང་ཐུབ་པ་ཡིན། སྡིག་པ་རྩ་བ་མི་བྱེད་པ་དང་། སྡིག་པ་ཅུང་ཟད་བྱེད་ཤོར་ཡང་བཤགས་པ་ལ་འབད་མཁན་གཉིས་ཀའང་སྐྱེས་བུ་དམ་པ་ཡིན་པར་གསུངས་པ་ཡིན། དེས་ན་ཚེ་རབས་ཐོག་མེད་ནས་བསགས་པའི་སྡིག་སྒྲིབ་དེ་བྱང་ཞིང་དག་པར་མ་བྱས་ཤིང་། རྒྱུ་ཚོགས་བསགས་པ་ལ་མ་འབད་ན་དག་པའི་ཞིང་ཁམས་མཐོང་བར་གེགས་དང་བར་ཆད་ཆེན་པོ་ཡོད་པ་ཡིན། གང་ལྟར་ཡང་བཤགས་པ་བྱས་པའི་མཐར། ཚོགས་ཞིང་གི་ལྷ་ཚོགས་དེ་དག་ཐམས་ཅད་ཀྱི་སྐུ་ལས་འོད་ཟེར་ཁ་དོག་སྣ་ལྔ་དཔག་ཏུ་མེད་པ་འཕྲོས་ཏེ། ཕ་མ་གཉིས་དང་དགྲ་བགེགས་གཉིས་ཀྱིས་གཙོར་བྱས་པའི་རང་གཞན་སེམས་ཅན་ཐམས་ཅད་ལ་འོད་ཟེར་དེ་ཕོག་པས་སྡིག་སྒྲིབ་བག་ཆགས་དང་བཅས་པ་བྱང་ཞིང་དག་པར་བསམ་དགོས་པ་ཡིན། དེ་ཡན་ཆད་དུ་ཚོགས་བསགས་པའི་སྒོ་ཐམས་ཅད་ཡན་ལག་བདུན་གྱི་ནང་དུ་བསྡུས་ནས་འཆད་པའི་སྐབས་ནས་བཤགས་པའི་ཡན་ལག་ཆ་ཚང་བཤད་ཟིན་པ་ཡིན། བདེ་གཤེགས་འོད་དཔག་མེད་པ་སྲས་བཅས་ཀྱིས། །བདག་རྒྱུད་ཡོངས་སུ་དག་པར་བྱིན་གྱིས་རློབས། །ཞེས་པའི་མཚམས་སུ་དེ་རིང་བཞག་སྟེ། སང་ཉིན། གཞན་གྱིས་དགེ་བ་བྱས་པ་ཐོས་པའི་ཚེ། །དེ་ལ་ཕྲག་དོག་མི་དགེའི་སེམས་སྤངས་ནས། །ཞེས་པའི་རྗེས་སུ་ཡི་རང་གི་ཡན་ལག་ནས་འགོ་བཟུང་སྟེ་བཤད་རྒྱུ་བྱེད། སྤྱིར་ན་འཛམ་བུའི་གླིང་འདིའི་ཐོག་ལ་ཆོས་ལུགས་ཀྱི་རིགས་འདྲ་དང་མི་འདྲ་མང་པོ་ཞིག་ཡོད་པ་དང་། ཆོས་ལུགས་སྣ་ཚོགས་ལ་དད་པ་བྱེད་མཁན་གྱིས་འཛམ་གླིང་གི་མི་གྲངས་བརྒྱ་ཆ་བརྒྱད་ཅུ་ཙམ་ཞིག་བཟུང་ཡོད་པར་གྲགས་ལ། དེ་དག་ལས་ནང་པ་སངས་རྒྱས་པའི་ཆོས་ལ་དད་པ་བྱེད་མཁན་གྱི་མི་ཡིས་ཀྱང་གྲངས་ཚད་མི་ཉུང་བ་ཞིག་བཟུང་ཡོད་པ་དང་། དེ་ལྟ་བུའི་ཆོས་ཀྱི་རིགས་ཐམས་ཅད་ལས་བོད་རྒྱུད་ནང་བསྟན་གྱི་ཆོས་རང་རེ་ཁ་བ་ཅན་ལ་དར་བའི་མདོ་སྔགས་གཉིས་ལྡན་གྱི་ཆོས་འདི་ཉིད་ལྟ་བུ་ལ་མཚོན་ན། འདྲ་འདྲའི་ནང་གི་མི་འདྲ་བ། ཁྱད་ཆོས་ཁྱད་པར་དུ་འཕགས་པ་ཡིན་པས། དེ་རིང་ཁ་སང་རྒྱ་དང་ཕྱི་རྒྱལ་ལ་སོགས་པ་འཛམ་གླིང་ཤར་ནུབ་ཀྱི་མགོ་སེར་ནག་ཅན་མང་པོ་ཞིག་གིས་འདི་དོན་གཉེར་བྱེད་བཞིན་ཡོད་ལ། མི་སུ་ཡིན་ཡང་རང་སྐྱིད་ཐབས་བདེ་ཐབས་སེམས་མཁན་ཞིག་མ་གཏོགས་ཡོད་དཀའ་ཞིང་། མི་རིགས་གཞན་དག་དེ་ཚོ་འཇིག་རྟེན་ཚེ་འདིའི་དཔལ་འབྱོར་ཡར་རྒྱས་ཀྱི་ཐད་ནས་དེའི་ཡན་དུ་མེད་པའི་སར་ཐོན་ཡོད་ནའང་། ངས་དོ་ཞག་ཅིག་ལ་བཤད་པ་ཕྱིའི་འབྱོར་བས་ནང་གི་བདེ་སྐྱིད་མ་ཐོབ་པར། སྤྱིར་དམ་པའི་ཆོས་དང་། དེ་ལས་ཀྱང་བོད་དུ་དར་བའི་ཆོས་འདིས་ནང་གི་བདེ་བ་ཞིག་ཐོབ་པ་དང་། འདི་ལ་ཕུགས་ཤིག་ཡོད་སྙམ་ནས་ཚང་མས་དེ་ཨེ་ལོན་དང་ཨེ་ཤེས་ལྟ་བཞིན་ཡོད་ལ། མི་དེ་དག་ལ་མཚོན་ན་འཇིག་རྟེན་འདི་སྣང་གི་སོ་ཚིས་ལ་རྣམ་རིག་བཀྲ་ཞིང་། ནམ་མཁར་འཕུར་རྒྱུ་དང་མཚོ་ཐོག་ལ་ལྡིང་རྒྱུ་སོགས་གནའ་གཏམ་རྙིང་པ་ཞིག་ལ་བསྒྱུར་བ་དང་། ནམ་མཁའི་རྒྱུ་སྐར་གྱི་ཐོག་ལ་མིའི་རྟེན་གཞི་འཛུགས་འདེང་དང་། རྫས་འཕྲུལ་འདྲ་དང་མི་འདྲ་ང་ཚོའི་དྲན་མི་ཐུབ་པ་བཟོ་ཤེས་པ་ཡིན། དེ་དག་གིས་བཟོ་བསྐྲུན་བྱས་པའི་ཅ་ལག་ཙག་ཙིག་རྣམས་ང་ཚོས་བེད་སྤྱོད་ཡག་པོ་ཞིག་ཀྱང་མ་ཤེས་ནས་ཡོད་པས། འཇིག་རྟེན་གྱི་ཐོག་ནས་མཁས་བླུན་དང་སྔོན་རྗེས་ཤིག་ཤོར་ནས་ཡོད་པ་ཡིན། འོན་ཀྱང་ཚེ་ཕྱི་མ་དང་ཚེ་སྲོག་གི་གསང་བ་ལྐོག་གྱུར་གྱི་ཐད་ནས། ང་ཚོའི་ཆོས་ལ་མགོ་མི་འདོགས་ཁ་མེད་དུ་ཐུག་པ་འདི་ཚོ་རྐྱང་པ་ལ་ལྟོས་དང་། བོད་ལ་དར་བའི་ཆོས་དང་རིག་གཞུང་འདི་རྩ་ཆེན་ཡིན་མིན་ཤེས་པ་ཡིན། འདི་རིག་གནས་རྐྱང་པ་ཞིག་ཡིན་པའི་ངོས་ནས་བསམ་བློ་བཏང་ནའང་འཛམ་གླིང་རིག་གནས་ཀྱི་བང་མཛོད་ནང་གི་ནོར་བུ་རྩ་ཆེན་མཐོན་ཀ་འོད་འབར་ཞིག་ཏུ་ཆགས་ནས་ཡོད་པ་ཡིན། དེ་ལྟ་བུའི་ཆོས་དེ་ད་ལྟའི་དུས་འདིར་འུ་ཚོ་མི་རབས་འདིའི་ལག་ཏུ་ཡོད་པ་ཡིན་ཕྱིར། འདི་ལ་གཅེས་སྤྲས་བྱེད་དང་མི་བྱེད་རང་ཉིད་ལ་ཐུག་ནས་ཡོད་པ་ཡིན། ནོར་བུའི་ནོར་ངོ་མ་ཤེས་པར་ནོར་བུ་འདམ་རྙོག་གི་ཁྲོད་དུ་གཡུག་དང་མི་གཡུག་རང་ལ་ཐུག་ནས་ཡོད་པ་ཡིན། འདི་ནི་གཟུགས་ཅན་གྱི་ཅ་ལག་ཅིག་དང་མི་འདྲ་སྟེ། གཟུགས་ཅན་གྱི་ཅ་ལག་ཅིག་ཡིན་ན་དབང་ཆེན་ཞིག་གིས་བདག་པོ་བརྒྱབ་སོང་དུས་གཞན་པ་ལ་ཐེམས་རྒྱུ་མེད་པ་ཡིན། འོན་ཀྱང་འདི་ནི་དེ་འདྲ་མ་ཡིན་པར་ཆོས་བདག་མེད་ལ་སྙིང་རུས་སུ་ཆེ་ཞེས་པ་ལྟར་དུ་རང་ཉིད་ལ་བརྩོན་པའི་སྟོབས་ཤུགས་དང་རྣམ་དཔྱོད་ཀྱི་ཤེས་རབ་ཡོད་ན་ནོར་བུ་སུའི་རྒྱན་དུ་བླངས་ཀྱང་ཆོག་པ་ཡིན། དེང་སང་རྒྱ་དང་། ཕྱི་རྒྱལ་མང་པོ་ཞིག་གིས་བོད་ཀྱི་བླ་མ་ཐམས་ཅད་དེད་ནས་ཆོས་གང་ཟབ་ཨེ་ལོན་དང་ཨེ་ཐོབ་ལྟ་བཞིན་ཡོད། དེ་ནི་བོད་མི་གཅེས་པས་དང་། བླ་མ་གཅེས་པས་ག་ལ་ཡིན། ཁོ་ཚོ་རང་ཉིད་གཅེས་པའི་དབང་གིས་རེད། ངོ་མས་ངོ་མ་བཤད་དེ་དོན་དམ་དོན་ལ་བསྐོར་སོང་ན། དབང་ཕར་ལ་བསྐུར་བཞིན་ཡོད་དམ་ཚུར་ལ་བསྐུར་འཆར་ཡིན་ཁྱེད་ཚོས་ཕུགས་མཐོང་བ་འདུག་གམ། བླ་མ་རྣམ་པས་ཟས་ངོ་ནོར་ངོ་ཙམ་ལ་ལྟ་བ་ནི་མེད་ངེས་ཀྱང་རྗེས་སུ་དེད་ནས་རོགས་རེ་བྱེད་མདོག་བསྟན་དུས་བར་ཞིག་ལ་མི་ཤོར་ཞེས་ཀྱང་ངོ་ཤོར་སྐྲ་ཤོར་གྱིས་གདམས་ངག་ཟབ་ཁྲིད་ཀྱི་ཐད་ནས་རང་ལ་ཇི་ཙམ་ཡོད་ཅི་ཤེས་ཀྱང་། ཅུང་ཟད་རེ་ཤོར་ཡོད་མེད་ཟེར་ཚོད་མི་ཐིག་པ་ཡིན། རང་ཡུལ་བོད་ཀྱི་མི་དག་ལ་དེའི་ཆོས་སྐལ་དེ་ཆད་འགྲོ་བ་རེད། གཅིག་བྱས་ན་བླ་རྒན་དག་ལའང་ཁག་མི་འདུག ཆོས་ངས་བཤད་ད་ཞུ་རུ་ཤོག་ཟེར་དུས་ཡོང་མི་ཤེས་པ་རེད། མི་རྣམས་ལ་ཡང་ཀྱང་ཁག་མི་འདུག དམ་པའི་ཆོས་ཀྱི་རོ་བྲོ་བ་ཞིག་བསྟན་ནས་མ་མྱོང་དུས་དེའི་དགོས་པ་རྒྱུ་མཚན་མ་ཤེས་པས་རེད། དོ་ཞག་བཤད་པ་ལྟར་དུ་ཆོས་ཟེར་རྒྱུ་དེ་ཟ་རྒྱུ་ལྡག་རྒྱུ་ཞིག་མིན་པ་ཙམ་ཞིག་ལོས་ཤེས་ཀྱང་། དེའི་ཕན་གྱི་སྤྱོད་སྒོ་ཅི་ཞིག་ཡོད་པ་དང་། ཕན་ཐོགས་ཅི་ཞིག་ཡོད་པར་མི་ཤེས་པ་རེད། དེ་མ་ཤེས་ནའང་དཔེར་ན་མི་རིགས་གཞན་གྱི་མི་ལྟ་བུ་ཞིག་ཡིན་ན་དོན་དག་གསར་པ་དེ་སྔོན་ཐུག་མ་མྱོང་བ་ཞིག་དང་ཐུག་དུས་དེ་ལ་ཞིབ་འཇུག་བྱེད་དར་བ་ཞིག་ཡིན་ནའང་། དེ་འདྲའི་རྣམ་འབྱེད་ཀྱི་ཤེས་རབ་ལ་རྩལ་སྦྱོང་མ་མྱོང་བའི་དབང་གིས། མེ་ཆ་མེ་རྡོ་སྤྲ་བ་གསུམ་མཉམ་དུ་འཛོམས་པའི་རྟེན་འབྲེལ་འགྲིག་པ་ལ་འགག་སྒོ་མང་པོ་ཞིག་གིས་བཀག་ནས་ཡོད་པ་ཡིན། རྒྱུ་རྐྱེན་དེ་འདྲ་ཞིག་ལ་བརྟེན་ནས་མི་མིན་ཟོག་མིན་སྤྲ་མིན་སྤྲེལ་མིན་གྱི་ལུས་ཤིག་ད་དུང་ཡང་བོད་ཡུལ་མཐོ་སྒང་གནས་འདི་ནས་བརྗེ་ཐུབ་ཀྱིན་མེད་པ་རེད། དེས་ན་མི་འགའ་རེས་ཆོས་དང་བླ་མ་ཞིག་ལས་ཟན་རྡོག་དྲོན་མོ་ཞིག་དགའ་ཟེར་འོང་བ་ཡིན། དེ་ཟེར་དུས་ཧ་ལུ་ཞིག་དང་ཁྱད་པར་མེད་པ་ཡིན། ཁྱད་པར་དུ་ཕོ་གསར་ཆ་ཁ། ཕོ་སར་ཆ་ཁ་ཟེར་ཡོང་ས་ཞིག་འདིའི་སྒོ་ཤོབ་ནང་དུ་ཕོ་སར་མང་པོ་ཞིག་མི་འདུག་མོད། ཁྱེད་ཆ་ཁས་ངས་ཕོ་སར་ཚོ་ལ་ཆ་ཞིག་བསྐུར་དེ་ཟློས་ཤོག ཁྱེད་ཆ་ཁ་ནི་སྐྱེས་ཕོ་ཁྲ་ནམ་ལངས། སྐྱེས་བུ་འཁོར་ལོ་དྲུག་པ། ངེད་ཚང་ལ་བུ་ཞིག་སྐྱེས་བྱུང་ཟེར་ནས་དགའ་དགའ་བྱས་ཏེ་ལོ་ཉི་ཤུ་སུམ་ཅུ་ནང་ལ་མ་ཐོན་བར་དུ་གཉོར་སྐྱོང་བྱས་ཤིང་། ད་ལོ་ཉི་ཤུ་སུམ་ཅུའི་ནང་དུ་ཐོན་དུས་མི་ཁ་ད་སྐྱིད་དང་། ཕྱི་མ་ད་མགོན་རེད། ཁ་ལས་རླུང་རྟ་དར་དགོས་པའི་དུས་དང་། དབང་ཐང་ལམ་འགྲོ་ཡོད་དགོས་པའི་དུས་ཚོད་འདི་ལ། ཁྱིམ་བཟའ་ཚང་དང་སྡེ་ཡུལ་མིའི་དར་རྒུད་ཁྱེད་ཆ་ཁ་ལ་ཐུག་ཡོད་པའི་སྐབས་འདིར། ཁྱེད་ཆ་ཁས་བག་ཁང་ཆང་ཁང་ཉུལ། ཕ་མའི་བསགས་པ་དེ་རྒྱན་འགྱེད་ཆང་རག་ལ་བྱིན། ཕུ་ནས་ཧ་བྱེད། མདོ་ནས་དོམ་བྱས་ཏེ། མགོ་སྟོང་གི་བྱ་བ་ཏག་ཏག་གིས་འདས་ནས། ཐ་མ་དོམ་བགོས་ནང་དུ་འཛུལ་བའམ་ཡང་ན་མནའ་ཟ། ཁྲེལ་སྣོག རྐུ་བྱེད། ཤོབ་བཤད། ནང་འཛིང་དམེ་ཁ་རོ་མཆུ་གཏུག་པ་དང་སྡིག་ཉོ་སྡིག་ཚོང་བྱེད་རྒྱུ་ལ་སོགས་པ། མདོར་ན་སྡུག་རིགས་སྡུག་ཚད་པོ་ལས་ན་བོད་མི་རིགས་ཀྱི་ལ་རྒྱ་ནི་ཕར་ཞོག ཡུལ་སྡེ་བའི་མགོ་རྣ་དང་། ཁྱིམ་བཟའ་ཚང་གི་སྐྱིད་སྡུག་གི་ཉམས་ལ་རན་པ་འདུག་གམ། ཕ་བཟང་གི་བུ་ཚོ་ཁ་མིག་ཡར་ལྟོས་ཤིག་གྱིས་དང་། མི་མི་གྲལ་ལ་ཐོན་ནས་མི་ས་ལྷ་གྲས་སུ་ཚུད་དགོས་ན་རིག་གནས་ཡོན་ཏན་ཡོད་དགོས་པ་ཡིན། མི་རིགས་ཤིག་ལ་རང་ཉིད་ཀྱི་རིག་གནས་མེད་ན་དེའི་མི་རིགས་དེ་མི་རིགས་ཤི་བོ་དང་། མི་སྒེར་ཞིག་ལ་རིག་གནས་མེད་ན་དེ་ཁོ་རང་བྱོལ་སོང་རྔ་ལུ་མེད་པ་ཞིག་གི་གྲལ་དུ་འགྲོ་རྒྱུ་རེད། དེང་སང་སྤྱི་ཚོགས་ཡར་རྒྱས་ཀྱི་སྐབས་སུ་མི་ཡིན་ཚད་ཀྱིས་མི་གོ་མ་ཆོད་པས། མིའི་རིན་ཐང་གཞལ་ནས་གོང་ཚད་རྒྱག་པའི་དུས་ཚོད་རེད། རིག་གནས་ཡོན་ཏན་ཡོད་པའི་ཐོག་ཏུ་ཡ་རབས་སྤྱོད་བཟང་གི་གཤིས་ཀ་དགོས་པ་ཡིན། དེ་མེད་ན་མི་མི་གྲལ་དུ་མི་འཇོག་པ་ཡིན། ཁོག་ན་ཡོན་ཏན་དང་རྒྱུད་ན་གཤིས་བཟང་མེད་པའི་མི་ཞིག་གིས་གཏམ་ཚིག་གཅིག་བཤད་ལུགས་ཕར་ཞོག ཐ་ན་གོས་གྱོན་ལུགས་ཙམ་དང་། ཟ་མ་ཟ་ལུགས་ཙམ་གྱིས་མི་ཚེའི་རིན་ཐང་ཆག་འགྲོ་བ་ཡིན། ཁྱད་པར་དུ་བོད་རང་གི་རིག་གནས་འདི་ཆོས་རིག་གཞུང་གཉིས་ཀ་ལ་འབྲེལ་ཡོད་པ་ཞིག་ཡིན། ཁྱེད་ཆ་ཁ་ཆོས་གྲྭའི་ནང་དུ་གཅིག་ཤོག་དང་། ཁྱོད་ཀྱིས་ཚེ་ཕྱི་མ་མ་བསམ་ནའང་། གསོན་འདི་ངོགས་ལོས་བསམ། མི་གཞན་པ་ལ་བསམ་བློ་མི་གཏོང་ནའང་། ཁྱོད་རང་ཉིད་ཡག་ན་བཟང་ན་ལོས་དགའ། དེ་དགའ་ན་ཡ་རབས་སྤྱོད་བཟང་ལ་སློབ་དགོས་པ་ཡིན། ཆོས་རའི་ནང་དུ་ཡོང་ནས་དམ་པའི་གཞུང་དང་། མཁས་པའི་ལེགས་བཤད་ལ་ཉོན་དང་མིའི་གྲལ་དུ་ཚུད་བྱེད་ཆོས་ཀྱི་ནང་དུ་ཡོད་པ་ཡིན། ད་ལྟ་ཁྱོད་མི་མ་རེད་ཟེར་བ་མིན་སྨྲ་ཤེས་དོན་གོ་ཙམ་ཡིན་པ་རེད། འོན་ཀྱང་ད་དུང་སྨིན་དགོས་པ་ཡིན་པས་སྦྱོང་བརྡར་བྱེད་དགོས། ཁྱི་དང་བྱི་ལ་ཚོ་ལའང་སློབ་བཞག་དུས་ཅི་བསླབ་བོ་ཤེས་པར་འདུག་ན་མི་ལ་ལོབ་རྒྱུ་ཅི་ལ་མེད། དཔེ་གཞན་ལ་མི་འཇོག་པར་ང་ཚོའི་སྒོ་ཁ་ན་ཡོད་པའི་རྟ་རྒན་ཞིག་ལ་དཔེ་བཞག་ན། རྟ་འགྲོས་མ་འགྲོས་གོམ་ལོབ་ཡོད་པ་ཞིག་ལ་སྒོར་མོ་ཁྲི་ཚོ་མང་པོ་རི་བ་དང་། རྟ་རྒོད་ཁ་ལོ་མེད་པ་མཐུར་ཤེད་ཅན། ད་དུང་དེའི་ཐོག་ཏུ་གློ་འཕྲ་ཡང་གཡུག་འདུག་པ་ཞིག་ལ་གོང་ཅི་ཡང་མི་རི་བ་དང་འདྲ་འདྲ་རེད། དེས་ན་རང་ཉིད་ཀྱི་རིན་ཐང་རང་ཉིད་ཀྱིས་བསྐྲུན་དགོས་པས། རང་གིས་རང་བཟང་པོའི་ལམ་དུ་ཁ་འཁོར་དུ་འཇུག་དགོས་པ་ཡིན། རྒྱ་ཆོས་པ་ཞིག་གིས་ཁྱོད་ལ་དཀོན་མཆོག་གསུམ་གང་རེད་ཅེས་དྲིས་ཡོང་ན། ཁྱོད་ཀྱིས་དུ་བ་འཐེན་རྒྱུ་དང་རྒྱན་སྐུགས་འཇོག་རྒྱུ་ཙམ་ལས་ཅི་ཡང་མ་ཤེས་ཚེ། ང་ནི་ཧོས་རིགས་ཤིག་ཡིན་ཞེས་བཤད་ན་མ་གཏོགས་ངོ་ཚ་ཉོ་བ་ཡིན། ད་དུང་ཡང་སྐེ་ཡི་རྡོ་རིལ་ཆ་ཁ་འཕུར་རེས་དང་། ཕུ་དུང་ནང་གི་མཛུབ་མོ་འཐེན་རྒྱུ་ས་ཆ་ཁུག་ཀྱོག་ལ་ཉམས་མེད་པ་འདིས་བོད་ཡར་རྒྱས་གཏོང་ག་ལ་ཐུབ། ཚོང་བརྒྱབ་ན་ཁ་ཕྱི་ལ་འཁོར་དགོས་པ་ཡིན། ཨ་རིའི་སྒོར་མོ་དུང་ཕྱུར་ཁ་གྲངས་ཀྱི་རྩིས་གྲངས་དེ་ནང་དུ་ཨེ་འཁོར་བལྟ་དགོས་པ་ཡིན། ཅི་ཡང་མི་ཤེས་པའི་གློས་རྒན་ཞིག་གིས་རྒྱལ་ཕྱི་ནང་གི་ཚོང་དཔོན་ཕར་ཞོག་ཚོང་གཡོག་ཅིག་གི་ཕྱི་རྟིང་ཆོད་ས་མི་འདུག དེ་རིང་ཁ་རྩང་རྒྱལ་ཁབ་འགའ་རེའི་སྲིད་འཛིན་དང་སྲིད་བློན་ཚོས་ཀྱང་ནང་ཆོས་སྦྱོང་རྒྱུ་ལ་བློ་ཁ་ཕྱོགས་བཞིན་ཡོད་པ་ཡིན་ན། ང་ཚོ་འུར་རྡོ་སྐེད་ནས་བླངས་མ་ཐག་པ་ཚོ་དེའི་ཡན་དུ་སླེབས་ཡོད་དམ། ཆོས་རའི་ནང་དུ་ཡོང་ནས་ཆོས་ཉོན་དང་བོད་ཀྱི་མི་ཞིག་ཡིན་པའི་ཚུགས་ཀ་དོད་ཡོང་བ་རེད། མགོ་གནམ་ལ་སྟོན་ལུགས་དང་། རྐང་པ་ས་ལ་བཙུགས་ལུགས་གཞི་ནས་ཤེས་ཡོང་བ་ཡིན། ཚེ་འདི་ཕྱི་གཉིས་ཀྱི་འགྲོ་ལམ་མཐོང་བྱེད་ཀྱི་མིག་གསར་བ་ཞིག་ཕྱེ་ཡོང་རྒྱུ་ཡོད་པ་ཡིན། ཕོ་གསར་བརྒྱགས་པས་ཕྱི་སོ་མི་རིག རྟ་གསར་བརྒྱགས་པས་སྔ་སོ་མི་རིག ཟེར་བ་ཡིན་པས་མི་ཆུང་ཆུང་གིས་སྔ་འདེང་ཕྱི་འདེང་ཕོག་པ་མ་རེད། ཁག་ཅི་ཡོད་སྐ་རགས་དམ་ནས་ཡུན་རིང་སོང་མེད་པས་རེད། ལྡུམ་རའི་ནང་གི་ལྗོན་ཤིང་གི་སྡོང་པོ་ས་ནས་ཡར་སྐྱེས་པ་དེ་ལའང་མིས་ཚུགས་ཀ་བཏོད་ཞོར་དུ་ལམ་དུ་འཇོག་དགོས་པ་ཡིན་ན། མིས་མི་ལམ་དུ་ཅིའི་ཕྱིར་འཇོག་མི་དགོས། སངས་རྒྱས་བྱང་སེམས་ཀྱི་སྤྲུལ་བ་ཁྲི་ཐོག་ལ་ཡོད་པའི་བླ་མ་ཆེན་པོ་དེ་ཚོ་ལ་ཡང་ཡོངས་འཛིན་དགོས་ན། རང་གའི་མི་ལ་ལམ་དུ་འཇོག་མཁན་མེད་ན་མི་མ་ལོ་བ་ཞིག་མ་གཏོགས་ཡོང་རྒྱུ་ཅི་ལ་ཡོད། དེ་ཕྱིན་ཅི་ལོག་ཏུ་སྐྱེ་ལོས་འགྲོ། གལ་ཏེ་ཁྱེད་ཆ་ཁ་ལ་མོས་པ་ཡོད་ན་ཕོ་གསར་ལོ་བཅོ་བརྒྱད་ཡན་ཆད་དང་། སུམ་ཅུ་མན་ཆད་རྣམས་ལ་ངས་ཆེད་སྦྱོང་གི་འཛིན་གྲྭ་ཞིག་བཙུགས་ནས། མིའི་བྱེད་ལུགས་དང་། སྐད་ཡིག་འདྲ་མི་འདྲ་འགའ་རེ་དང་། དཔལ་འབྱོར་རིག་པའི་ཤེས་བྱ་སློབ་ཏུ་འཇུག་དགོས་བསམ་གྱིན་ཡོད། དུས་ཡུན་ཟླ་བ་དྲུག་གི་རིང་ཡིན། དེའི་ཚེ་ལ་སྒྲིག་ལམ་བསྲུང་དགོས། བཙུགས་སའི་ས་ཆ་ནི་མུ་ཏིག་ཟམ་པའི་ཚུ་རོལ། ལམ་གྱི་བཞི་མདོའི་ཁ་འདི་ན་ཡིན། དེའི་ནང་དུ་ཞུགས་རྒྱུའི་རེ་བ་ཡོད་མཁན་ཚོའི་མིང་ཐོ་འགོད་པར་གྱིས། མདོར་ན་ཆོས་རའི་ནང་ལ་ཤོག་ཅེས་པ་དེ་ཁྱེད་ཆ་ཁ་ལ་ཕན་ཐོགས་ཡོད་པའི་དོན་དག་དང་། རང་རང་ལ་ཡོང་སྒོ་ཆེན་པོ་ཞིག་དེ་ན་ཡོད་པ་ཡིན་པས་ན། ཁྱེད་ཆ་ཁའི་དོན་དག་ཡིན་བསམ་པ་མ་གཏོགས། ངེད་ཆ་ཁ་ལ་མཚོན་ན་འཕྲ་བརྡུང་བཀྱེ་ཨེ་འགྲོ་སྙམ་པའི་དོགས་པ་མི་དགོས་པས་ན། ཆོས་རའི་ནང་ཁྱེད་ཚོ་མེད་ན་སྟབས་བདེ་བདེ་ལྟ་བུ་ཞིག་ཡིན། ལོ་ཆུང་རྣམས་ཀྱིས་ཀྱང་ལོ་ཉུང་ཡིན་སྙམ་རྒྱུ་ཡོད་པ་མ་ཡིན། ཚེ་གཅིག་ལ་ལོ་ཉུང་བྱས་ནས་སྡོད་དུ་ག་ལ་ཡོད། འདི་ན་ཡོད་པའི་རྒན་རྒོན་རྣམས་ཀྱང་ལོ་ཉུང་མ་མྱོང་བ་དང་། ཕོ་སར་མ་མྱོང་པ་ཞིག་ཅི་ལ་ཡིན། དུར་ཁྲོད་མི་མགོ་བཙའ་བོ་དེ། མ་ཨ་མས་གཅེས་ཕྲུག་བྱས་མ་མྱོང་བ་ཞིག་དང་། ལ་ཁའི་ཤ་རྭ་རྒོག་ཐོ་དེ། ཤྭ་ཕོ་ཆེན་གྱི་དུང་རྭ་མ་མྱོང་པ་ཞིག་ག་ལ་ཡིན། དགེ་བཤས་ཧྭ་ཡི་དུར་ཁྲོད་དེ་རྒན་རྒོན་ཏག་ཏག་གི་ཕ་མཚེར་ག་ལ་ཡིན། དེས་ན་སྐྱིད་རེའི་ཕག་ན་སྡུག་རེ། ལ་རེའི་ཕག་ན་ཐུར་རེ། ཞེས་པའི་དཔེ་བཞིན་དུ་མི་ལ་སྐྱིད་སྡུག་མང་པོ་ཡོང་རྒྱུ་ཡོད་པས། སྡུག་ཐུག་གི་ཉི་མ་ལ་སྐྱབས་རེ་ས་དཀོན་མཆོག་གསུམ་མ་གཏོགས་ཡོད་པ་མ་ཡིན། ང་ཚོའི་སྒྲུང་བཤད་དུས། ལྷ་དཀོན་མཆོག་ནམ་མཁའི་དབྱིངས་བཞུགས་ལ། །དུས་རྒྱུན་དུ་མཆོད་པ་མ་བྱས་ན། །སྡུག་ཨ་ཐང་ཆད་དུས་འབོད་པ་རང་ག་རེད། །ཅེས་པ་ལྟ་བུ་ལས་མ་འདས། འདིའི་ཆ་འདི་ཕོ་སར་གསར་བུ་ཆ་ཁས་མ་ཚད་པར་རུ་རོགས་ཁྱིམ་མཚེས་ཀྱི་ལོ་བཞི་བཅུ་ལྔ་བཅུ་ཅན་གྱི་རྒས་ཕོ་གསར་དང་བཅས་པ་ཀུན་ལ་ཤོད་ཤོག དེ་ཚོ་རང་གར་ཆོས་ཁྲིད་ཀྱི་ཞོར་ལ་ཁ་བརྡ་བྱས་པ་ཡིན། ཉིན་བཞི་བའི་བཀའ་ཆོས།ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་སར་འགོད་པའི་ཆེད་དུ་དམ་པའི་ཆོས་ཉན་ནས། བདེ་བ་ཅན་དུ་སྐྱེ་བའི་རྒྱུ་བཞི་བསྒྲུབས་ཏེ། སྐྱེ་བ་འདི་བརྗེས་མ་ཐག་ཏུ་ཞིང་ཁམས་བདེ་བ་ཅན་དུ་སྐྱེས་ནས་སངས་རྒྱས་སྐུ་དངོས་ཀྱི་མདུན་ནས་ཆོས་ཉན་ནས་བླ་ན་མེད་པའི་བྱང་ཆུབ་ལུས་རྟེན་དེའི་ཐོག་ནས་བསྒྲུབས་ཏེ། འཁོར་བའི་གནས་ཀྱི་སེམས་ཅན་གཅིག་ཀྱང་མ་ལུས་པ་བདེ་བ་ཅན་དུ་དབུགས་དབྱུང་བར་བྱའོ་སྙམ་པའི་སེམས་བསྐྱེད་ཁྱད་པར་ཅན་སྙིང་རྗེས་སེམས་ཅན་ལ་དམིགས་པ་དང་། ཤེས་རབ་ཀྱིས་རྫོགས་བྱང་ལ་དམིགས་པ་གཉིས་དང་མ་བྲལ་བའི་སྒོ་ནས་དམ་པའི་ཆོས་ཟབ་མོ་འཆད་ཉན་ལ་འཇུག་དགོས་པ་ཡིན། དེས་ན་ཁ་སང་གོང་དུ་སོང་མ་ཐག་གི་བཤགས་པའི་སྐབས་སུ། སྐྱབས་སྡོམ་དབང་བསྐུར་ལ་སོགས་ཐོབ་ན་ཡང་། །དེ་ཡི་སྡོམ་པ་དམ་ཚིག་བསྲུང་མ་ཤེས། །བཅས་པའི་ལྟུང་བ་ཕོག་པ་མཐོལ་ལོ་བཤགས། །ཞེས་གསུངས་ན། ཉེས་པ་ཐམས་ཅད་ཀྱི་འབྱུང་རྩ་དེ་སྤྱིར་ན་ཉོན་མོངས་དུག་གསུམ་དང་། དེ་ལས་ཀྱང་ཀུན་ལ་ཁྱབ་བྱེད་མ་རིག་པའམ་གཏི་མུག་གིས་དབང་བསྒྱུར་ཏེ། མི་ཤེས་རྨོངས་པའི་གཞན་དབང་དུ་སོང་ནས་ལམ་ལོག་ལམ་གོལ་ངན་འགྲོའི་གཡང་སར་དུས་རྟག་ཏུ་འདི་བཞིན་འཕྱན་ནས་ཡོད་པ་ཡིན། ས་ཆོས་ལྡན་གྱི་ཡུལ་དུ་སྐྱེས་ནས་ཆོས་སངས་རྒྱས་ཀྱི་བསྟན་པ་ལ་དད་པ་འཇོག་བཞིན་ཡོད་པའི་ཚུལ་ཙམ་རེ་བཟུང་ན་ཡང་། དཔེར་ན་མཁར་ཆེན་པོ་ཞིག་གི་ནང་ལ་འཛུལ་དགོས་ན། དང་པོ་མཁར་དེའི་སྒོ་དེ་གང་ཡིན་རྙེད་དགོས་ལ། སྒོ་དེ་མ་རྙེད་ཚེ་ནང་དུ་འཛུལ་ཐབས་དང་ཐར་ཐབས་མེད་པ་ཡིན། ནང་དུ་མ་ཚུད་དུས་གང་ལྟར་བཤད་ཀྱང་ད་རུང་ཕྱི་ལ་ལུས་ནས་ནང་མའི་གྲས་སུ་མི་ཚུད་པ་དང་འདྲ་བར། ཐར་པའི་ལམ་ལ་འཇུག་པའི་སྒོའམ་ལམ་ཐམས་ཅད་ཀྱི་རྨང་རྡོ་ལྟ་བུ་ནི་སྐྱབས་སུ་འགྲོ་བ་ཡིན་ལ། དེ་ཡང་དད་པ་དབང་བཙན་དུ་བྱས་པའི་གང་ཟག་ཅིག་ལ་མཚོན་ན། ཕྱི་པ་ནང་པ་སྐྱབས་འགྲོའི་ཁྱད། །ཅེས་གསུངས་པ་ལྟར་དུ་ཕྱི་ནང་གི་དབྱེ་མཚམས་དེ་གང་ལ་སྐྱབས་སུ་འགྲོ་བའི་སྐྱབས་ཡུལ་གྱི་ཐོག་ནས་དབྱེ་བ་སྟེ། གལ་ཏེ་དཀོན་མཆོག་རིན་པོ་ཆེ་རྣམ་པ་གསུམ་ལ་སྐྱབས་སུ་མ་སོང་ན། དཀོན་མཆོག་གསུམ་གྱི་སྐྱབས་ཀྱི་ར་བའི་ནང་དུ་མ་ཚུད་པར་ཕྱི་རོལ་དུ་ལུས་ནས་ཡོད་པ་ཡིན་ཕྱིར་ནང་པ་མིན་པ་དང་། གྲུབ་མཐའ་སྨྲ་བའི་ལུགས་དབང་བཙན་དུ་བྱས་ན། ལྟ་བ་བཀའ་རྟགས་ཀྱི་ཕྱག་རྒྱ་བཞི་ཁས་ལེན་མི་ལེན་གྱི་ཐོག་ནས་འབྱེད་པ་སྟེ། དེ་ཡང་འདུས་བྱས་ཐམས་ཅད་མི་རྟག་པ། ཟག་པ་དང་བཅས་པ་ཐམས་ཅད་སྡུག་བསྔལ་བ། ཆོས་ཐམས་ཅད་སྟོང་ཞིང་བདག་མེད་པ། མྱ་ངན་ལས་འདས་པ་ཞི་བ་སྟེ་བཀའ་རྟགས་ཀྱི་ཕྱག་རྒྱ་བཞི་ཡིན། སྐབས་འདིར་སྔ་མ་ལྟར་དུ་དད་པ་དབང་བཙན་དུ་བྱས་པའི་ལུགས་ལྟར་དུ་བྱེད་ནའང་། གང་ལ་སྐྱབས་སུ་འགྲོ་བའི་ཡུལ་དཀོན་མཆོག་གསུམ་པོ་དེ་ངོས་ཟིན་དགོས་པ་ཡིན། དེ་ཡང་ཚང་མས་ཁ་ཡིས་སྐྱབས་སུ་མཆི་ཟེར་ནས་སྐྱབས་འགྲོ་བཞི་སྐོར་མ་འདོན་མི་ཤེས་མཁན་ཕལ་ཆེར་མེད་ནའང་། གང་འདོན་རྒྱུའི་སྐྱབས་འགྲོའི་ནང་དོན་དེ་ཅུང་ཟད་ཅིག་མ་ཤེས་ཐབས་མེད་ཡིན་པས། གང་ལ་སྐྱབས་སུ་འགྲོ་བའི་ཡུལ་དང་། སྐྱབས་སུ་ཇི་ལྟར་འགྲོ་བའི་ཚུལ་དང་། སྐྱབས་སུ་སོང་ནས་དོན་ཅི་ཞིག་འགྲུབ་པའི་དམིགས་ཡུལ་ཏེ། དེ་ཙམ་གྱི་སྒྲོག་ཅིག་ཡིན་ན་མིན་ན་ཁྲོལ་དགོས་པ་ཡིན། ཁྱད་པར་དུ་གདན་ས་ཆོས་འཁོར་ཆེན་པོའི་ཉེ་འདབས་ལ་སྐྱེས་ཤིང་། མི་ཚེ་མི་ཐོག་ལ་དཀར་པོ་དགེ་བའི་ལས་ལ་བརྩོན་མཁན་གྱི་ཆོས་བྱས་བྱས་ཀྱིས་རྒས་སོང་བའི་དཀར་ཕྱོགས་པ་ཞིག་ཡིན་བསམ་པ་ཞིག་གིས། གལ་ཏེ་སྐྱབས་འགྲོ་ཙམ་ཞིག་མ་ཤེས་ན། དེའི་ཡན་གྱི་ཆོས་ཕྱོགས་ཀྱི་སྐད་ཆ་མཐོན་པོ་བཤད་ཐབས་མེད་སོང་བ་ཡིན། གོང་དུ་བཤད་པ་ལྟར་དུ་དཀོན་མཆོག་གསུམ་ལ་སྐྱབས་སུ་མ་སོང་ན་ནང་པ་སངས་རྒྱས་པའི་ཁྱུ་ལ་ཚུད་མེད་ཅིང་། དེ་མེད་དུས་སྡོམ་པ་ཐམས་ཅད་ཀྱི་རྨང་གཞི་སྐྱབས་གསུམ་འཛིན་པའི་སྐྱབས་སྡོམ་ཞིག་ཀྱང་ཐོབ་ཡོད་པ་མ་ཡིན་ཏེ། སྡོམ་པ་ཉི་ཤུ་པའི་ནང་ལ། སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་པ་ལ་མེད། །ཅེས་གསུངས་པ་ཡིན། སྤྱིར་ན་ཕྱི་རོལ་མུ་སྟེགས་པ་དག་ལ་ཡང་སྡོམ་པ་རེ་ཁོ་རང་ཚོའི་ལུགས་ཀྱིས་དམ་བཅའ་དང་སྦྲགས་ནས་ལེན་རྒྱུ་ཡོད་པ་ཡིན། འོན་ཀྱང་དེ་ལ་ནང་པས་བཤད་ན་སྡོམ་མིན་རྒྱུད་ལྡན་ཞེས་སུ་སྨྲ་བ་ཡིན། དེ་ལྟ་བུ་མ་ཡིན་པར་ནང་པ་སངས་རྒྱས་པའི་ཆོས་དང་བསྟན་པའི་སྒོར་ཞུགས་པ་ལ་སྐྱབས་འགྲོ་རྩོམ་བྱེད་དུ་མ་བྱས་པའི་དགེ་བའི་སྡོམ་པ་རྣམ་དག་ཅིག་ལེན་རྒྱུ་ཡོད་པ་མ་ཡིན། འཁོར་བའི་སྡུག་བསྔལ་ལས་དུས་གཏན་དུ་ཐར་བའི་ཐར་བ་རྣམ་དག་ཅིག་ཐོབ་དགོས་ན། ལམ་བདེན་བདག་མེད་རྟོགས་པའི་ཤེས་རབ་དེ་རྒྱུད་ལ་མ་བསྟེན་ཐབས་མེད་ཡིན། ལམ་གཅིག་པུ་དེ་མི་བརྒྱུད་ནས་འགྲོ་ས་གཞན་པ་ཡོད་པ་མིན་ཞིང་། ལམ་བདེན་བདག་མེད་རྟོགས་པའི་ཤེས་རབ་རྒྱུད་ལ་བསྟེན་པར་བྱེད་པ་ལ། དེའི་རྟེན་དངོས་མེད་ཐབས་མེད་པ་ནི་ཏིང་ངེ་འཛིན་ཡིན་པས་ན་དེ་བསྒོམ་དགོས་པ་ཡིན། དེ་མ་བསྒོམས་ན་གྲོལ་བ་ཐོབ་པའི་འབྲས་བུ་སྨིན་ཞེས་པ་ཞིག་མི་སྲིད་པ་ཡིན། དེ་ལྟ་བུའི་ཏིང་ངེ་འཛིན་བསྒོམས་ནས་བསམ་གཏན་མཉམ་བཞག་གི་ཡེ་ཤེས་རྒྱུད་ལ་བསྐྱེད་དགོས་ན། རྟེན་གཞི་དངོས་ནི་ཚུལ་ཁྲིམས་ཡིན་པས། ཚུལ་ཁྲིམས་རྣམ་པར་དག་པ་ཞིག་བསྲུང་བ་ནི་དེ་བས་ཀྱང་གལ་ཆེ་བ་སྨྲོས་མ་དགོས་ལ། དེ་ཡང་། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་གསུངས་པ་ཡིན། ཚུལ་ཁྲིམས་ཡང་དག་པ་ཞིག་ལེན་དགོས་ན། དང་པོར་སྐྱབས་འགྲོ་རྩོམ་བྱེད་དུ་མ་བྱས་པའི་ནང་པ་སངས་རྒྱས་པའི་ལུགས་ཀྱི་སྡོམ་པ་ཞིག་ལེན་རྒྱུ་མེད་པ་ནི་སྐྱབས་འགྲོ་ཉི་ཤུ་པའི་ལུང་གིས་གསལ་བ་གོང་དུ་བཤད་པ་ལྟར་དུ་ཚིག་སྣ་དོན་གྱི་ཐོག་ནས་དེ་ལྟར་འབྲེལ་བ་ཡིན། དེ་ཡིན་ན་རང་རེ་སེར་སྐྱ་ཕོ་མོ་ལ་མ་ལྟོས་པའི་ཆོས་ར་འདིའི་ནང་ན་ཡོད་ཚད་པོ་ཐམས་ཅད་ཀྱིས། ནང་པ་སངས་རྒྱས་པའི་ཁྱུ་ན་ཡོད་སྙམ་ནས་རང་ཉིད་ནང་པ་སངས་རྒྱས་པ་ཡིན་པར་ཁས་འཆེ་བ་ཤ་སྟག་ཡིན་པས། སྐྱབས་འགྲོའི་སྐོར་དེ་མདོ་ཙམ་ཞིག་མཁྱེན་བཞིན་པ་རྣམས་ལ་ཡང་བསྐྱར་ཐུགས་གསོས་ཤིག་དང་། གསལ་བོར་བརྡ་མ་འཕྲོད་པ་རྣམས་ལ་གསལ་འདེབས་ཀྱི་ཚུལ་དུ་ཞར་ལ་ཅུང་ཟད་བཤད་ན་སྙམ་པ་ཡིན། གོང་དུ་གང་ལ་སྐྱབས་སུ་འགྲོ་བའི་ཡུལ་དང་། ཇི་ལྟར་སྐྱབས་སུ་འགྲོ་བའི་ཚུལ་དང་། སྐྱབས་སུ་སོང་བ་ལ་ཕན་པ་ཅི་ཞིག་ཡོད་པ་རྣམས་གསལ་བོར་ཤེས་དགོས་པ་ཡིན་ཞེས་སྐད་ཆའི་འཕྲོས་གཞི་དེ་ནས་བྱུང་བ་ཡིན། འོ་ན་སྐྱབས་སུ་འགྲོ། སྐྱབས་སུ་འགྲོ་ཞེས་པ་འདིའི་ངེས་ཚིག་ངོ་མ་དེ་གང་ཞིག་ཡིན་ན། ནང་པ་ཟེར་ན་ཕྱི་རོལ་བ་མ་ཡིན་པའི་དོན་ཡིན་པར་གོ་ཡང་། སྐྱབས་དང་འགྲོ་ཞེས་པའི་དོན་ད་རུང་མ་གོ་བས་དེའི་དོན་གང་ཡིན་ཞེ་ན། རང་གཞན་འཁོར་བའི་སྡུག་བསྔལ་གྱིས་འཇིགས་ནས་ཡུལ་ཁྱད་པར་ཅན་ཞིག་ལ་སྐྱབས་སུ་འཛིན་པར་ཁས་བླངས་ཏེ་དམ་བཅའ་བའམ་སྐྱབས་སུ་འཛིན་ཅིང་འགྲོ་བ་དེ་སྐྱབས་འགྲོའི་ངེས་ཚིག་ཡིན། དཔེར་ན། བྱིས་པ་ཆུང་ཆུང་ཞིག་ཁྱི་ཡིས་བདས་ཡོང་དུས། བྱིས་པ་དེ་ཁྱི་བཙན་པོ་དེས་གཟུང་བར་སྐྲག་ནས་མི་ཆེན་པོ་ཞིག་གི་རྩར་བརྒྱུགས་ཏེ་དེ་ལ་སྐྱབས་བཅོལ་བའི་སྐབས་སུ། དེས་དེ་ལྟར་བྱས་ན་ཁྱིས་གཟུང་རྒྱུ་ལས་ཐར་འདུག་སྙམ་ནས་སྐྱབས་སུ་སོང་བ་ཡིན། དེ་དང་འདྲ་བར་འཁོར་བ་དང་ངན་སོང་གི་སྡུག་བསྔལ་མྱོང་རྒྱུ་ལ་སྐྲག་ནས་སམ། ཁྱད་པར་དུ་ཐེག་པ་ཆེན་པོའི་ལུགས་ལ་འཁོར་བའི་སྡུག་བསྔལ་ལ་སྐྲག་པས་མ་ཚད་པར། རང་དོན་ཞི་བ་ཕྱོགས་གཅིག་པ་རང་གཅིག་པུ་བདེ་ཐབས་དེ་ལ་ཡང་འཇིགས་ཤིང་སྐྲག་ནས་སྐྱབས་སུ་འགྲོ་བ་ཡིན། གང་ལ་སྐྱབས་སུ་འགྲོ་བའི་ཡུལ་དཀོན་མཆོག་གསུམ་དང་། ཇི་ལྟར་སྐྱབས་སུ་འགྲོ་བའི་སྐོར་འཆད་པའི་སྔོན་དུ་དང་པོར་དད་པ་ཤེས་དགོས་པ་ཡིན། དེ་དགོས་པ་ཅིའི་ཕྱིར་སྙམ་ན། སྐྱབས་འགྲོའི་སྒོ་འབྱེད་པ་ནི་དད་པ་ལ་རག་ལས་ཡོད་པས་ན་དང་པོར་དད་པ་ཤེས་དགོས་པ་ཡིན། དད་པ་འདི་ལ་དབྱེ་ན་དད་པ་གསུམ་མམ་བཞི་ཡོད་པ་ཡིན། དེ་དག་གང་དང་གང་ཡིན་ཞེ་ན། དང་བའི་དད་པ་དང་གཅིག འདོད་པའི་དད་པ་དང་གཉིས། ཡིད་ཆེས་པའི་དད་པ་དང་གསུམ། ཕྱིར་མི་ལྡོག་པའི་དད་པ་དང་བཞི་སྟེ་དེ་དག་ཡིན། དེ་ལས་དང་པོ་དང་བའི་དད་པ་ནི། དེ་ལ་དད་དགོས་པའི་རྒྱུ་མཚན་ཆེན་པོ་ཞིག་ཤེས་དགོས་པ་མ་ཡིན་པར། དཔེར་ན། ལྷ་ཁང་། གནས་རི། སྐུ་གསུང་ཐུགས་རྟེན་ལ་སོགས་པ་མཇལ་ཡོང་དུས། སེམས་དང་བའི་སྒོ་ནས་ཐུགས་རྗེ་མ་ཆུང་སྙམ་པའི་དང་བ་འདྲེན་པའི་སྣང་བ་ཞིག་དང་སྦྲགས་ཏེ། རྒྱུ་མཚན་ཆེན་པོ་བཤད་རྒྱུ་མེད་པའི་དགའ་བ་དང་དད་པ་ཟུང་འབྲེལ་ཞིག་སྐྱེ་རྒྱུ་དེ་དང་བའི་དད་པ་ཡིན། གཉིས་པ་འདོད་པའི་དད་པ་ནི། དད་དགོས་པའི་རྒྱུ་མཚན་དང་ཕན་ཐོགས་བགྲང་རྒྱུ་ཡོད་པ་ཞིག་ཡིན་ལ། འཁོར་བའི་སྡུག་བསྔལ་འདི་མྱོང་མྱོང་གིས་རྨུས་ནས་བྱུང་། ད་དུང་མུ་མཐུད་དུ་མྱོང་དགོས་ན་བཟོད་ཐབས་བྲལ་འདུག་སྙམ་སྟེ་འཁོར་བའི་ཉེས་དམིགས་ཤེས་པ་དང་། ཐར་བ་རྫོགས་པའི་སངས་རྒྱས་ཀྱི་གོ་འཕང་ཐོབ་ན་དེ་ནི་གཏན་གྱི་བདེ་བ་དོན་དུ་གཉེར་བྱ་མ་ནོར་བ་ཞིག་གོ་སྙམ་ནས་ཐར་པའི་ཕན་ཡོན་དྲན་པ་སྟེ། གཅིག་ལ་སྤང་འདོད་དང་གཅིག་ཤོས་ལ་ཐོབ་འདོད་ཀྱི་བསམ་པ་ཡོད་པའི་རྒྱུ་མཚན་དམིགས་ཡུལ་ཡོད་པའི་དད་པ་ཞིག་ཡིན་པ་དང་། གསུམ་པ་ཡིད་ཆེས་པའི་དད་པ་ནི། ལས་རྒྱུ་འབྲས་དང་སྐྱེ་བ་སྔ་ཕྱི་ཡོད་པའི་གོ་བ་གཏིང་ནས་ལོན་པའི་ཡིད་ཆེས་པ་དང་། སྟོན་པ་སངས་རྒྱས། སྐྱོབ་པ་དམ་ཆོས། འདྲེན་པ་དགེ་འདུན་གསུམ་གྱི་ཡོན་ཏན་ཤེས་ཤིང་དྲན་པ་དང་། ཁྱད་པར་དུ་དཀོན་མཆོག་ཀུན་འདུས་ཀྱི་ངོ་བོ་བླ་མ་ལ་མི་བསླུ་བར་ཤེས་ཏེ་ཡིད་ཆེས་པ་ནི་ཡིད་ཆེས་པའི་དད་པའོ། །དེ་འདྲའི་ཡིད་ཆེས་ནམ་ཡང་འགྱུར་བ་མེད་པར་བླ་མ་དཀོན་མཆོག་ལ་བློ་གཏད་ལིང་བསྐྱུར་བྱེད་པ་བྲང་ཁར་མདུང་ཐུང་གཟིར་ཡང་ཕྱིར་ནུད་མི་བྱེད་པ་ནི་ཕྱིར་མི་ལྡོག་པའི་དད་པ་སྟེ། དེ་ལྟ་བུའི་དད་པ་བཞིའི་ནང་གི་ཡིད་ཆེས་པའི་དད་པའམ་ཕྱིར་མི་ལྡོག་པའི་དད་པ་དེས་གཞི་བཟུང་སྟེ་རང་ངོས་ནས་དད་པ་ཡོད་ན། ཡུལ་ལ་བཟང་ངན་མེད་པར་སངས་རྒྱས་ཀྱི་བྱིན་རླབས་འཇུག་ཚུལ་ནི་རྒན་མོ་ཁྱི་སོས་སངས་རྒྱས་ཀྱི་དཔེ་ལྟར་ཡིན། དེ་ཡང་གནའ་སྔ་མོ་ཞིག་ལ་རྒན་མོ་མ་བུ་གཉིས་ཡོད་པ་ལས། བུ་ནར་སོན་ནས་ལོ་བསྟར་ཆགས་ལ་རྒྱ་གར་དུ་ཚོང་བྱེད་དུ་སོང་སྐབས། མ་རྒན་དེ་དཀོན་མཆོག་གསུམ་ལ་དད་པའི་ནང་པའི་ཆོས་པ་ཞིག་ཡིན་པས། མ་རྒན་གྱིས་བུ་ཚོང་ལ་ནམ་འགྲོའི་སྐབས་ཀྱི་འགྲོ་རན་ཁར་ཁྱོད་རྒྱ་གར་དུ་སོང་ནས་ཕྱིར་ཡོང་དུས་ཕྱག་འཚལ་ས་དད་པའི་རྟེན་ཞིག་ཁུར་ཤོག་ཅེས་ཡང་ཡང་བཤད་ན་ཡང་། བུས་ཐེངས་གྲངས་མང་པོའི་བར་དུ་བརྗེད་ངེས་སུ་སོང་ནས་མ་རྒན་ལ་དད་རྟེན་ཁྱེར་རྒྱུ་མ་བྱུང་བས། མཐར་མས་བཤད་རྒྱུར་ད་ཐེངས་ཁྱོད་ཀྱིས་དད་རྟེན་ཞིག་ཁྱེར་མ་ཡོང་ན་ང་ཁྱོད་ཀྱི་སྔོན་དུ་ལྕེབས་པ་ཡིན་ཞེས་བཤད་དོ། །བུ་ཡང་རྒྱ་གར་དུ་ཚོང་ལ་སོང་ནས་ཚོང་བྱས་ཏེ་ཕྱིར་ཡོང་སྐབས་ཁྱིམ་གྱི་ཉེ་སར་སླེབས་ནས་ཁང་མགོ་རིག་པ་དང་སྔར་བཤད་པ་དྲན་ནས། ད་ཅི་ཞིག་དགོས་སམ་ད་རེས་མ་རྒན་ལ་སྟོན་རྒྱུ་ཞིག་མེད་ན་མ་རྒན་རང་སྲོག་ལྕེབས་པ་འགྱུར་བས་ཅི་དྲག་སྙམ་ནས་ཕར་ལྟ་ཚུར་ལྟ་ཞིག་བྱེད་སྐབས། ལམ་ཟུར་དེར་ཁྱི་མགོ་དཀར་སེང་ཞིག་ཡོད་པ་མཐོང་བས་ཅི་ཡིན་འདི་ཡིན་མེད་པར་ཁྱི་མགོའི་རྩར་སོང་ནས་དེའི་ཁ་ནང་གི་སོ་ཞིག་ཕུད་དེ། དར་དཀར་གྱིས་ལྕིབས་ནས་མ་རྒན་ལ་འདི་ནི་སངས་རྒྱས་ཀྱི་ཚེམས་ཡིན་ཞེས་བྱིན་པ་དང་། མ་རྒན་ནི་སྤྱིར་དད་པ་ཆེ་བ་དང་། དེའི་ཐོག་སངས་རྒྱས་ཀྱི་ཚེམས་ལག་ཏུ་ལོན་སོང་སྙམ་པས་དགའ་སྟེ་ཚེམས་ལ་ཕྱག་དང་མཆོད་འབུལ་བྱས་པས། སངས་རྒྱས་ཀྱི་ཐུགས་རྗེ་གདུལ་བྱའི་ཡུལ་ལ་འཇུག་པའི་ཕྲིན་ལས་ཀྱི་སྟོབས་ཀྱིས་མ་རྒན་ལ་སངས་རྒྱས་ཀྱི་བྱིན་རླབས་ཐོབ་སྟེ། ཤི་དུས་འཇའ་འོད་ཀྱི་གུར་ཕུབ་རྒྱུ་ལ་སོགས་པ་ཞིང་དག་པར་སྐྱེ་བའི་རྟགས་མཚན་ཤར་བ་ཡིན། དད་པ་ཡོད་ན་བྱིན་རླབས་དེ་ལྟར་འདྲེན་ཐུབ་པ་དང་། དད་པ་མེད་ན་སངས་རྒྱས་དངོས་སུ་མཇལ་ཡང་ཕན་ཐོགས་མེད་པ་སྟེ། དགེ་སློང་ལེགས་པའི་སྐར་མས་སངས་རྒྱས་ཀྱི་ཉེ་གནས་ལོ་ཉི་ཤུ་རྩ་ལྔ་བྱས་ན་ཡང་། མཐར་ཁྱོད་ལ་འོད་འདོམ་གང་ཡོད་པ་ཙམ་ལས་འུ་གཉིས་འདྲ་འདྲ་ཡིན་ཞེས་དད་ལོག་སྐྱེས་ཏེ། ཕྱི་མ་ཡི་དྭགས་ཀྱི་ཡུལ་དུ་སྐྱེས་སོང་བ་ལྟ་བུ་ཡིན། དེ་ལྟ་བུའི་དད་པའི་སྒོ་ཕྱེས་པའི་སྐྱབས་འགྲོ་འདི་ལ། སྐྱེས་བུ་ཆུང་འབྲིང་ཆེ་གསུམ་གྱི་བློ་རིམ་དང་བསྟུན་ཡོང་ན་སྐྱབས་འགྲོ་རྣམ་པ་གསུམ་གྱི་རྣམ་བཞག་ཡོད་པ་ཡིན། དེ་ལྟ་བུའི་སྐྱབས་འགྲོ་གསུམ་གྱི་རྣམ་བཞག་གི་ཁྱད་པར་དེ་ཅི་ཞིག་གི་ཐོག་ནས་ཕྱེ་བ་ཡིན་ཞེ་ན། བསམ་པའི་ཁྱད་པར་དང་གཅིག དུས་ཀྱི་ཁྱད་པར་དང་གཉིས། ཡུལ་གྱི་ཁྱད་པར་དང་གསུམ་གྱི་ཐོག་ནས་ཕྱེ་བ་ཡིན། དཀོན་མཆོག་གསུམ་ལ་སྐྱབས་སུ་འགྲོ་བའི་ནང་པ་སངས་རྒྱས་པ་ཡིན་པ་གཞིར་བཞག་གི་ཐོག་ནས་སྐྱེས་བུ་ཆུང་ངུ་ལ་མཚོན་ན། བསམ་པའི་ཁྱད་པར་ནི་རང་ཉིད་ངན་སོང་གསུམ་ལས་ཐར་ཏེ་མཐོ་རིས་ལྷ་མིའི་གོ་འཕང་ཐོབ་པའི་ཆེད་དུ་སྐྱབས་སུ་འགྲོ་བ་ཡིན། དུས་ཀྱི་ཁྱད་པར་ནི་གནས་སྐབས་ཇི་སྲིད་འཚོའི་བར་ཏེ་ཤི་མ་སོང་གི་བར་དང་། མཐར་ཐུག་ལྷ་མིའི་གོ་འཕང་མ་ཐོབ་ཀྱི་བར་དུ་སྐྱབས་སུ་འགྲོ་བ་ཡིན། ཡུལ་གྱི་ཁྱད་པར་ནི། སྐྱབས་སུ་འགྲོ་ཡུལ་སངས་རྒྱས་ཆོས་དང་དགེ་འདུན་ཏེ་དཀོན་མཆོག་གསུམ་པོ་སྟེ། དེ་ཡང་སངས་རྒྱས་ནི་སངས་རྒྱས་ཀྱི་སྐུ་གཟུགས་ལི་མ་གཏེར་མ་ལུགས་སུ་བླུགས་པ་རིས་སུ་བྲིས་པ་དེ་ཚོས་ཆོག་པ་དང་། ཆོས་དཀོན་མཆོག་དམ་ཆོས་གླེགས་བམ་གསུང་རབ་པོ་ཏིའི་རྣམ་པ་ཅན་དེ་དག་དང་། དགེ་འདུན་ཡང་འཕགས་པ་དང་སོར་སྐྱེའི་ཁྱད་པར་སོགས་ཤེས་པ་མ་ཡིན་པས། གྲྭ་པ་ཚུལ་ལྡན་ཆ་རེ་ལ་དགེ་འདུན་དུ་བརྩི་རྒྱུ་ཙམ་ཞིག་ལས་རྒྱུ་མཚན་ཆེན་པོ་ཞིག་ཤེས་དགོས་པ་མ་ཡིན། སྐྱེས་བུ་འབྲིང་གི་སྐྱབས་སུ་འགྲོ་བའི་ཚུལ་ནི། སྐྱེས་བུ་འབྲིང་ཞེས་པ་ནི་ཉན་ཐོས་དང་རང་རྒྱལ་གཉིས་ཏེ། དེ་ཡང་སྐྱེས་བུ་འབྲིང་གི་ལམ་ཉན་རང་ལ་མཚོན་ན་རྒྱུ་མཚན་ཤེས་དགོས་པ་ཡིན། བསམ་པའི་ཁྱད་པར་གྱི་ཐོག་ནས་བཤད་ན། ཕྱི་མར་ལྷ་མིའི་བདེ་འབྲས་ཐོབ་ཀྱང་འཁོར་བའི་གནས་ལས་མ་འདས། འཁོར་བ་རིགས་དྲུག་གང་དུ་སྐྱེས་ཀྱང་སྡུག་བསྔལ་གསུམ་གྱིས་དམ་ལ་མ་བཞག་ས་ཞིག་ཡོད་པ་མི་འདུག་སྙམ་ནས། སྲིད་པ་རིགས་དྲུག་པོ་གང་དུ་སྐྱེས་ཀྱང་སྡུག་བསྔལ་དུ་ཤེས་པའི་སྒོ་ནས་འཁོར་བ་སྡུག་བསྔལ་གྱི་རྒྱ་མཚོ་ལས་རང་ཉིད་ཁོ་ན་ཐར་འདོད་གྱི་བསམ་པ་སྐྱེ་བ་དེ་སྐྱེས་བུ་འབྲིང་གི་བསམ་པའི་ཁྱད་པར་ཡིན། སྐྱེས་བུ་འབྲིང་དེ་ཐེག་པའི་དབང་དུ་བྱས་ན་ཐེག་པ་དམན་པ་ཡིན། དེ་དག་ལ་འཁོར་བ་ལས་ངེས་པར་འབྱུང་བའི་བློ་ཡོད་པ་སྟེ། ཐེག་དམན་སོ་ཐར་བཤད་པའི་སྐབས་སུ་ཐོག་མ་ཉིད་ནས། ངེས་པར་འབྱུང་བའི་བསམ་པས་ཀུན་ནས་བསླངས་པའི་ཞེས་གསུངས་ཡོད་པ་ཡིན། དེའི་སྐྱབས་འགྲོའི་དུས་ཀྱི་ཁྱད་པར་ནི་གནས་སྐབས་ལུས་རྟེན་འདིའི་སྲོག་ཇི་སྲིད་འཚོའི་བར་དུ་དང༌། མཐར་ཐུག་ཉན་རང་དགྲ་བཅོམ་པའི་གོ་འཕང་ཐོབ་མ་སོང་གི་བར་དུ་སྐྱབས་སུ་འགྲོ་བ་ཡིན། སྐྱབས་ཡུལ་གྱི་ཁྱད་པར་ནི། སངས་རྒྱས་ནི་ཉན་རང་དགྲ་བཅོམ་པ་གཉིས་ཀའི་ཆ་ལས་གྲོལ་བ་ཞིག་གི་ཕན་དུ་སྤངས་རྟོགས་ཀྱི་ཡོན་ཏན་མ་ལུས་པ་མཐར་ཕྱིན་སོང་བ་མཐའ་གཉིས་ལ་མི་གནས་པའི་མྱང་འདས་ཡིན་པར་འདོད་པ་མ་ཡིན། སངས་རྒྱས་བཅོམ་ལྡན་འདས་ལ་གཞན་དང་མ་འདྲ་བའི་མཁྱེན་པའི་ཡེ་ཤེས་དང༌། མཚན་དཔེའི་ཡོན་ཏན་ཁྱད་པར་འཕགས་པས་བརྒྱན་པ་ཉན་རང་དགྲ་བཅོམ་པ་དག་ལས་ཁྱད་པར་དུ་འཕགས་པ་ནི་བསྐལ་བ་གྲངས་མེད་གསུམ་དུ་ཚོགས་བསགས་པའི་སྟོབས་དང༌། རིགས་འཁོར་ལོའི་སྒྱུར་བའི་རྒྱལ་པོའི་རིགས་སུ་འཁྲུངས་པའི་སྟོབས་ཀྱིས་ཡིན་པར་འདོད་པ་ཡིན། སངས་རྒྱས་ཀྱི་སྐུ་གཟུགས་དེ་རྣམ་སྨིན་སྡུག་བདེན་གྱི་ཕུང་པོ། མི་གཙང་བའི་རྫས་ཀྱི་རང་བཞིན་ཅན་ཞིག་ཡིན་པས། སྐྱབས་སུ་འགྲོ་ཡུལ་དངོས་ནི་སངས་རྒྱས་ཀྱི་ཐུགས་འགོག་པ་དམ་པ་དེ་ལ་སྐྱབས་སུ་འགྲོ་དགོས་པ་ཡིན་ཞེས་སྨྲ་བ་དང་། ཆོས་དཀོན་མཆོག་ནི་ཐེག་དམན་རང་ལུགས་ཀྱི་སྡེ་སྣོད་གསུམ་དང་བསླབ་པ་གསུམ་པོ་སྟེ། ལུང་དང་རྟོགས་པའི་ཆོས་གཉིས་ཀྱི་ནང་ནས་རྟོགས་པའི་ཆོས་དང་། རྟོགས་པའི་ཆོས་དེ་ལ་ལམ་དང་འགོག་པའི་བདེན་པ་གཉིས་ཡོད་པ་ལས་འགོག་པའི་བདེན་པ་དེ་སྐྱབས་སུ་འགྲོ་ཡུལ་གྱི་ཆོས་དངོས་ཡིན་པར་འདོད་པ་ཡིན། དགེ་འདུན་ནི། སོ་སྐྱེས་དགེ་འདུན་དང་འཕགས་པའི་དགེ་འདུན་གཉིས་ཡོད་པ་ལས། དགེ་འདུན་དཀོན་མཆོག་དེ་འཕགས་པ་རྒྱུན་ཞུགས་ཕྱིར་འོང་ཕྱིར་མི་འོང་བའི་འཕགས་པའི་དགེ་འདུན་ལ་འདོད་པ་དང་། དེ་ཡང་དེ་དག་གི་སྐུ་ལུས་ནི་རྣམ་སྨིན་སྡུག་བདེན་གྱི་ཕུང་པོའི་ལྷག་མ་མི་གཙང་བའི་རང་བཞིན་ཡིན་པས་དེ་དག་གི་ཐུགས་འགོག་པ་དམ་པ་དེ་ལ་སྐྱབས་སུ་འགྲོ་དགོས་ཞེས་གསུངས་པ་ཡིན། དཀོན་མཆོག་གསུམ་གྱི་ངོས་འཛིན་ཚུལ་དེ་དག་གིས་དེ་ལྟར་འདོད་པ་ཡིན། སྐྱེས་བུ་ཆེན་པོའི་ལམ་ཐེག་པ་ཆེན་པོའི་ལུགས་ཀྱི་བསམ་པའི་ཁྱད་པར་ནི། བདག་རང་ཉིད་གཅིག་པུ་འཁོར་བ་དང་ངན་སོང་གི་གནས་ནས་ཐར་དགོས་སྙམ་པ་དེ་འདྲ་མ་ཡིན་པར། ནམ་མཁའི་མཐའ་ཀླས་གྱུར་པའི་མ་རྒན་སེམས་ཅན་ཐམས་ཅད་བདེ་བ་དང་ལྡན། སྡུག་བསྔལ་དང་བྲལ་བར་བྱ་བའི་ཕྱིར་དུ་སངས་རྒྱས་ཀྱི་གོ་འཕང་ཐོབ་པར་བྱའོ་སྙམ་པའི་སྦྱོར་བ་སེམས་བསྐྱེད་དམ་པ་ཀུན་སློང་དོན་གཉིས་སམ་ཟུར་གཉིས་དང་ལྡན་པ་ཞིག་དང་། དུས་ཀྱི་ཁྱད་པར་ནི། དུས་དེ་རིང་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་མ་ཐོབ་ཀྱི་བར་དུ་སྐྱབས་སུ་འགྲོ་བ་ཡིན། དེ་ལའང་སྐྱབས་སུ་འགྲོ་བའི་དུས་ཚོད་གཅིག་དང་མི་འགྲོ་བའི་དུས་ཚོད་གཉིས་ཡོད་འདུག་པས་མཐར་ཐུག་པ་མ་ཡིན་པར་འགྱུར་རོ་སྙམ་ན། དེ་ནི་བྱང་ཆུབ་ཆེན་པོའི་གོ་འཕང་ཐོབ་དུས་སྐྱབས་སུ་འགྲོ་དགོས་པ་མ་ཡིན་ཏེ། དེའི་དུས་བདག་རང་ཉིད་སྟོབས་བཅུའི་སྟོབས་དང་ལྡན། དབང་བཅུའི་དབང་གིས་ཕྱུག་ཡོད་པས་ན། རང་ཉིད་གཞན་གྱིས་སྐྱོབ་མི་དགོས་པར་མ་ཟད། གཞན་ཕ་རོལ་པོ་སྐྱོབ་པའི་ནུས་པ་དང་ལྡན་ཡོད་པས་ན་སྐྱབས་སུ་འགྲོ་དགོས་པ་མིན་ནོ། །སྐྱབས་ཡུལ་གྱི་ཁྱད་པར་ནི། སངས་རྒྱས་ནི་སྐུ་བཞི་ཡེ་ཤེས་ལྔ་དང་ལྡན་པ་སྟེ་དེ་ནི་སྐྱེས་བུ་ཆེན་པོའི་ལུགས་ཀྱི་སྐྱབས་ཡུལ་སངས་རྒྱས་དཀོན་མཆོག་དང་། ཆོས་ཐེག་པ་ཆེན་པོའི་ལུང་དང་རྟོགས་པའི་ཆོས་དང་། དགེ་འདུན་དེ་འཕགས་པའི་གང་ཟག་ས་དང་པོ་ནས་ས་བཅུའི་རྒྱུན་མཐའི་བར་གྱི་བྱང་ཆུབ་སེམས་དཔའ་རྣམས་ཏེ་ཐེག་ཆེན་ལུགས་ཀྱི་ཐུན་མོང་ཕྱི་ཡི་སྐྱབས་ཡུལ་དཀོན་མཆོག་གསུམ་པོ་ནི་དེ་ལྟ་བུའོ། །ཐུན་མོང་མ་ཡིན་པ་ནང་གི་སྐྱབས་འགྲོའི་ཡུལ་ནི་བླ་མ་ཡི་དམ་མཁའ་འགྲོ་གསུམ་སྟེ། བྱིན་རླབས་ཀྱི་རྩ་བ་བླ་མ། དངོས་གྲུབ་ཀྱི་རྩ་བ་ཡི་དམ། ཕྲིན་ལས་ཀྱི་རྩ་བ་མཁའ་འགྲོའོ། །ཁྱད་པར་དུ་ཐབས་མཆོག་རྡོ་རྗེ་སྙིང་པོ་གསང་སྔགས་རྫོགས་པ་ཆེན་པོའི་ལུགས་ཀྱི་སྐྱབས་ཡུལ་ནི་རྩ་རླུང་ཐིག་ལེའི་རང་བཞིན་ཏེ། གནས་པ་རྩ། གཡོ་བ་རླུང༌། བཀོད་པ་བྱང་ཆུབ་སེམས་དང་གསུམ་ཡིན་པ་དང་། མཐར་ཐུག་བསླུ་བ་མེད་པ་གནས་ལུགས་རྡོ་རྗེའི་སྐྱབས་ཡུལ་ནི། ངོ་བོ་རང་བཞིན་ཐུགས་རྗེའི་བདག་ཉིད་ཅན་ཏེ། མདོ་ལྟར་ན་བདེ་གཤེགས་སྙིང་པོ། སྔགས་ལྟར་ན་རང་བྱུང་ནང་གསལ་གྱི་ཡེ་ཤེས། སྣང་སྟོང་དབྱེར་མེད་པའི་བདག་ཉིད་རྣམ་གསུམ་དབྱེར་མེད་ཆེན་པོའོ། །དེ་ཡང་ཐེག་ཆེན་ཐུན་མོང་གི་ལུགས་ལ། ཆོས་དགེ་འདུན་གཉིས་ཀ་གནས་སྐབས་ཀྱི་སྐྱབས་དང༌། མཐར་ཐུག་གི་སྐྱབས་དེ་དཀོན་མཆོག་ཀུན་འདུས་སངས་རྒྱས་ཁོ་ན་ཡིན་པར་འདོད་པ་ཡིན། སྐྱེས་བུ་ཆེན་པོའི་ལུགས་ཀྱི་དུས་ཀྱི་ཁྱད་པར་ནི། རྒྱུ་མཚན་ཉིད་ཐེག་པའི་ལུགས་ལྟར་དུ་བྱས་ན། ཕྱི་བྱང་ཆུབ་སྙིང་པོ་བྱང་ཆུབ་ཤིང་དྲུང་དུ་བཞུགས་ནས་མངོན་པར་རྫོགས་པ་སངས་མ་རྒྱས་ཀྱི་བར་དང༌། ནང་གི་བྱང་ཆུབ་སྙིང་པོ་རིག་པ་བདེ་གཤེགས་སྙིང་པོ་མངོན་དུ་མ་གྱུར་གྱི་བར་དུ་སྐྱབས་སུ་འགྲོ་བ་དང་། སྔགས་ཀྱི་ལུགས་རྐྱང་པའི་ཐོག་ནས་བཤད་ན། ལྷུན་གྲུབ་རིག་འཛིན་གྱི་ས་ཐོབ་སྟེ། ནང་གསལ་གདོད་མའི་དབྱིངས་སུ་སངས་རྒྱས་མ་སོང་གི་བར་དུ་སྐྱབས་སུ་འགྲོ་བ་ཡིན་ཞེས་འཆད་པ་ཡིན། དེས་ཁྱད་པར་གསུམ་ལྡན་གྱི་སྐྱེས་བུ་ཆེ་འབྲིང་ཆུང་གསུམ་གྱི་སྐྱབས་འགྲོའི་དབྱེ་བ་བཤད་པའོ། །དེ་ནས་སྐྱབས་སུ་འགྲོ་བའི་ཡུལ་གང་ཡིན་གསལ་བོར་ཤེས་དགོས་པ་ཡིན་ལ། དེ་ཡང་སྐྱབས་ཀྱི་ཡུལ་དུ་གྱུར་པའི་དཀོན་མཆོག་གསུམ་པོ་དེ་ཇི་ལྟ་བུ་ཞིག་ཡིན་པར་ཞིབ་ཀྱིས་ཤེས་དགོས་ན། དཀོན་མཆོག་གསུམ་པོ་དེའི་ངོ་བོ། དབྱེ་བ། ཡོན་ཏན་གསུམ་གྱི་ཐོག་ནས་བཤད་དགོས་པས། དང་པོ་སངས་རྒྱས་དཀོན་མཆོག་གི་ངོ་བོ་ནི་སྤངས་རྟོགས་མཐར་ཕྱིན་པ་སྟེ། འོ་ན་སྤངས་རྟོགས་མཐར་ཇི་ལྟར་ཕྱིན་པ་ཡིན་ཞེ་ན། ལམ་ལྔ་ས་བཅུ་བརྒྱུད་ནས་རྫོགས་སྨིན་སྦྱངས་གསུམ་གྱི་སྒོ་ནས་སྒྲིབ་གཉིས་ཀྱི་དྲི་མ་ཕྲ་རགས་ཐམས་ཅད་སྤངས་ཏེ། ས་བཅུའི་རྒྱུན་གྱི་ཐ་མའི་བག་ཆགས་ཀྱི་སྒྲིབ་པ་ཕྲ་མོ་དེ་གཉེན་པོ་རྡོ་རྗེ་ལྟ་བུའི་ཡེ་ཤེས་ཀྱིས་བཅོམ་ནས་སྤང་བྱ་ལྷག་མ་མ་ལུས་པ་སྤངས་ཤིང་། རྟོགས་བྱ་ལྷག་མ་མ་ལུས་པ་རྟོགས་པའི་སྤངས་རྟོགས་མཐར་ཕྱིན་པ་དེ་སངས་རྒྱས་ཀྱི་ངོ་བོ་ཡིན་པའོ། །སངས་རྒྱས་དཀོན་མཆོག་དེ་ལ་དབྱེ་བའི་ཐོག་ནས་བཤད་སོང་ན། རྟེན་སྐུ། བརྟེན་པ་ཡེ་ཤེས། མཛད་པ་ཕྲིན་ལས་དང་གསུམ་དུ་དབྱེ་རུ་ཡོད་ཅིང་། རྟེན་སྐུ་ནི་ངོ་བོ་ཉིད་སྐུ། ཆོས་སྐུ། ལོངས་སྐུ། སྤྲུལ་སྐུ་སྟེ་བཞི་ཡིན་ལ། དེ་ལས་ངོ་བོ་ཉིད་སྐུ་ནི། དབྱིངས་རང་བཞིན་གྱིས་རྣམ་པར་དག་པའི་ཆ་དེ་ཡིན་པར་གསུངས་པ་དང་། བྲལ་སྨིན་གྱི་ཡོན་ཏན་དང་ལྡན་པ་འབྲས་ཆོས་ཉེར་ལྔའི་བདག་ཉིད་ཅན་ནི་སངས་རྒྱས་ཆོས་ཀྱི་སྐུ་དང་། ཕྱི་གསལ་སྐུ་དང་ཡེ་ཤེས་རྒྱ་མཚོའི་རང་བཞིན་ཁ་སྦྱོར་ཡན་ལག་བདུན་ལྡན་གྱི་ངོ་བོ་དེ་ལོངས་སྤྱོད་རྫོགས་སྐུ་དང་། སྣ་ཚོགས་གདུལ་བྱའི་སྣང་ངོར་གང་ལ་གང་འདུལ་དེ་ལ་དེར་སྣང་དུ་བྱོན་པ་ནི་སྤྲུལ་བའི་སྐུ་སྟེ་སྐུ་བཞིའོ། །ཡེ་ཤེས་ལྔ་ནི། ཆོས་དབྱིངས་ཡེ་ཤེས། མེ་ལོང་ཡེ་ཤེས། མཉམ་ཉིད་ཡེ་ཤེས། སོར་རྟོག་ཡེ་ཤེས། བྱ་གྲུབ་ཡེ་ཤེས་དང་ལྔ་བོ་དེ་ཡིན་ལ། དེ་ཡང་ཆོས་ཐམས་ཅད་ཀྱི་གནས་ལུགས་དོན་དམ་པའི་བདེན་པ་མངོན་སུམ་དུ་ཤེས་པ་དེ་ཆོས་དབྱིངས་ཡེ་ཤེས་དང་། ཆོས་དབྱིངས་ཡེ་ཤེས་དེའི་ངོ་ཁ་ལ་འཁོར་འདས་ཀྱི་ཆོས་ཐམས་ཅད་ཀྱི་སྣང་ཆ་འགག་པ་མེད་པ་དེ་མེ་ལོང་ལྟ་བུའི་ཡེ་ཤེས་དང་། མེ་ལོང་གི་ངོས་ལ་འཆར་བའི་གཟུགས་ལ་བཟང་ངན་གང་ཡོད་ཀྱང་གཟུགས་བརྙན་དུ་མཉམ་པ་བཞིན་འཁོར་འདས་མཉམ་ཉིད་ཚུལ་གཅིག་རོ་གཅིག་ཏུ་གཟིགས་པ་ནི་མཉམ་ཉིད་ཡེ་ཤེས་དང་། ཆོས་ཉིད་ཀྱི་ངོས་ནས་ཆོས་ཐམས་ཅད་མཉམ་པ་ཉིད་དུ་མཉམ་པ་ཡིན་ནའང་ཆོས་ཅན་གྱི་ངོས་ནས་འཁོར་འདས་ཀྱི་ཆོས་ཐམས་ཅད་མ་འདྲེས་སོ་སོར་མཁྱེན་པ་ནི་སོར་རྟོག་ཡེ་ཤེས་དང་། སངས་རྒྱས་ཀྱིས་གདུལ་བྱ་འདུལ་བ་ལ་འབད་པ་དང་རྩོལ་བ་མི་དགོས་པར་ཡིད་བཞིན་གྱི་ནོར་བུ་དང་། དཔག་བསམ་གྱི་ཤིང་ལྟར་དུ་རྩོལ་མེད་ལྷུན་གྲུབ་ཏུ་འདོད་དགུ་ངང་གིས་འབྱུང་བ་ནི་བྱ་གྲུབ་ཡེ་ཤེས་ཞེས་སུ་གསུངས་པ་ཡིན་ལ། དེ་ལྟ་བུའི་རྟེན་སྐུ་བརྟེན་པ་ཡེ་ཤེས་ཅན་དེའི་མཛད་པ་ཕྲིན་ལས་ནི། རྟག་པ། ཀུན་ཁྱབ། ལྷུན་གྲུབ། འབད་རྩོལ་མེད་པ་ཞིག་སྟེ། དེ་ཡང་རྟག་པའི་མཐར་ལྷུང་བ་ཞིག་མ་ཡིན་པར་རྟག་པ་རྒྱུན་ཆད་མེད་པའི་རྟག་ཆད་ཀྱི་མཐའ་ལས་འདས་པའི་རྟག་པ་དམ་པ་དང་། ཀུན་ལ་ཁྱབ་པས་མ་ཁྱབ་པ་མེད་པ་དང་། ལྷུན་གྱིས་གྲུབ་པས་འབད་རྩོལ་མི་དགོས་པའོ། །དེས་སྐྱབས་ཡུལ་སངས་རྒྱས་དཀོན་མཆོག་གི་ངོ་བོ་དང་དབྱེ་བ་བཤད་པ་ཡིན། སངས་རྒྱས་དཀོན་མཆོག་གི་ཡོན་ཏན་གྱི་ཕྱོགས་ནས་བསམ་བློ་ཞིག་བཏང་ན། སངས་རྒྱས་ཆོས་སྐུའི་ཡོན་ཏན་དེ་ཇི་ལྟ་བུ་ཞིག་ཡིན་ཞེ་ན། སྟོབས་བཅུ་མི་འཇིགས་པ་བཞི་མ་འདྲེས་པ་བཅོ་བརྒྱད་སོགས་ཟག་མེད་ཀྱི་ཆོས་སྡེ་ཚན་ཉི་ཤུ་རྩ་གཅིག་གི་རང་བཞིན་ཅན་དང་། གཟུགས་སྐུའི་ཡོན་ཏན་ལ་མཚོན་ན། སྐུ་མཚན་བཟང་སོ་གཉིས་དང་དཔེ་བྱད་བརྒྱད་ཅུའི་ཡོན་ཏན། གསུང་ཚངས་དབྱངས་ཡན་ལག་དྲུག་ཅུའི་ཡོན་ཏན། ཐུགས་མཁྱེན་བརྩེ་ནུས་གསུམ་གྱི་ཡོན་ཏན་དང་ལྡན་པ་དང་། བརྩེ་བའི་ཐུགས་རྗེས་ཉིན་མཚན་དུས་དྲུག་ཏུ་སེམས་ཅན་ཐམས་ཅད་ལ་ཉེ་རིང་མེད་པར་གཟིགས་པ་དང་། སྐྱོབ་པའི་ནུས་མཐུ་དེ་ཇི་ལྟར་ཡིན་ན། རྒྱ་མཚོ་ཆུ་སྲིན་གནས་ཀྱི་རླབས། །དུས་ལས་ཡོལ་བར་འགྱུར་སྲིད་ཀྱི། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་སྲིད། །ཅེས་གསུངས་པ་ལྟ་བུ་ཡིན་ལ། དེས་སངས་རྒྱས་དཀོན་མཆོག་གི་ངོ་བོ། དབྱེ་བ། ཡོན་ཏན་ཐམས་ཅད་བཤད་ཟིན་པ་དང་། ཆོས་དཀོན་མཆོག་ལ་མཚོན་ན། ཡང་དེ་ལྟར་དུ་ངོ་བོ་དབྱེ་བ་ཡོན་ཏན་གསུམ་གྱི་ཐོག་ནས་བཤད་དུ་ཡོད་པ་སྟེ། ཉོན་མོངས་པ་དང་ཤེས་བྱ་བག་ཆགས་ཀྱི་སྒྲིབ་པ་སྤངས་པ་འམ་སྤོང་བྱེད་ཀྱི་ཐབས་སུ་གྱུར་པ་དེ་དམ་པའི་ཆོས་ཀྱི་ངོ་བོ་ཡིན། དབྱེ་ན་ལུང་གི་ཆོས་དང་རྟོགས་པའི་ཆོས་གཉིས། ལུང་གི་ཆོས་ལའང་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི། དེ་ཚུར་ལ་བསྡུ་ན་གསུང་རབ་ཡན་ལག་བཅུ་གཉིས། དེ་བསྡུ་ན་འདུལ་བ་མདོ་སྡེ་མངོན་པ་སྟེ་སྡེ་སྣོད་རིན་པོ་ཆེ་རྣམ་པ་གསུམ་གྱི་ནང་དུ་འདུས་པ་ཡིན། རྟོགས་པའི་ཆོས་ནི་སྡེ་སྣོད་རིན་པོ་ཆེ་རྣམ་པ་གསུམ་གྱི་དོན་ཉམས་སུ་བླངས་པའི་ལམ་ལྷག་པའི་བསླབ་པ་རིན་པོ་ཆེ་རྣམ་པ་གསུམ་སྟེ། དེ་ཡང་ལྷག་པ་ཚུལ་ཁྲིམས་ཀྱི་བསླབ་པ། ལྷག་པ་ཏིང་ངེ་འཛིན་གྱི་བསླབ་པ། ལྷག་པ་ཤེས་རབ་ཀྱི་བསླབ་པའོ། །དེ་གསུམ་པོ་ནི་ཕྱི་རོལ་མུ་སྟེགས་པའི་ལུགས་ཀྱི་བརྟུལ་ཞུགས་མཐའ་དག་ལས་ལྷག་པས་ན་ལྷག་པའི་བསླབ་པ་ཞེས་སུ་གསུངས་པ་ཡིན། དམ་པའི་ཆོས་ཀྱི་ཡོན་ཏན་ནི། ཆོས་ཀྱི་ཡོན་ཏན་བསམ་གྱིས་མི་ཁྱབ། །ཅེས་གསུངས་པ་ལྟར་དུ་སྲིད་ཞིའི་རྒུད་པ་ཐམས་ཅད་སེལ་བ་དང་། སྲིད་ཞིའི་ཕུན་ཚོགས་ཐམས་ཅད་འབྱུང་བའོ། །དེས་དམ་པའི་ཆོས་དཀོན་མཆོག་གི་དབྱེ་བ་དང་ཡོན་ཏན་ཐམས་ཅད་བཤད་པའོ། །དགེ་འདུན་དཀོན་མཆོག་ལའང་ངོ་བོ་དབྱེ་བ་ཡོན་ཏན་གསུམ་གྱི་ཐོག་ནས་བཤད་རྒྱུ་ཡོད་པ་སྟེ། ངོ་བོ་ནི། རིག་གྲོལ་ཡོན་ཏན་བརྒྱད་དང་ལྡན་པ་སྟེ། བདེན་པ་མཐོང་ཞིང་རིག་ནས་སྤང་བྱ་ཅི་རིགས་ལས་གྲོལ་བས་རིག་གྲོལ་ཟེར་བ་ཡིན། དབྱེ་ན་ཐེག་དམན་ཉན་རང་གི་དགེ་འདུན་དང་ཐེག་ཆེན་འཕགས་པའི་དགེ་འདུན་གཉིས་སོ། །དགེ་འདུན་གྱི་ཡོན་ཏན་ནི་བསླབ་པ་གསུམ་དང་གཟུངས་དང་སྤོབས་པའི་ཡོན་ཏན་མཐའ་ཡས་པ་རྒྱ་མཚོ་ལྟ་བུ་དང་ལྡན་པའོ། །དེ་ལྟ་བུའི་སྐྱབས་གནས་དཀོན་མཆོག་གསུམ་པོ་དེ་ཚུར་ལ་བསྡུ་ན་བླ་མ་གཅིག་ལ་འདུས་པ་ཡིན། བླ་མའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཡིན་པ་སྟེ། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །བླ་མ་དཔལ་ལྡན་རྡོ་རྗེ་འཆང་། །ཞེས་གསུངས་པ་ལྟ་བུ་དང་། ད་དུང་མདོ་ཕྱོགས་ནས་ཡིན་ན། མྱ་ངན་མ་བྱེད་ཀུན་དགའ་བོ། །སྨྲེ་ངག་མ་འདོན་ཀུན་དགའ་བོ། །ང་ཉིད་ཕྱི་མའི་དུས་ཀྱི་ཚེ། །དགེ་བའི་བཤེས་ཀྱི་གཟུགས་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་གསུངས་པ་ཡིན། སངས་རྒྱས་ཐམས་ཅད་ལ་ཐུགས་རྗེ་ཡོད་ཀྱང་བར་དུ་བླ་མ་མ་བརྒྱུད་ན་བྱིན་རླབས་འཇུག་ཐབས་ཡོད་པ་མ་ཡིན་ཏེ། དཔེར་ན། ཉི་མའི་དཀྱིལ་འཁོར་ལ་ཚ་དྲོད་ཡོད་ཀྱང་མེ་ཤེལ་ཞིག་དེའི་བར་དུ་མ་བརྒྱུད་ན། རྩྭ་སྐམ་པོ་ལ་མེ་འབར་ཐབས་མེད་པ་ལྟ་བུ་ཡིན། དེས་ན་བླ་མ་ནི་སྐྱབས་གསུམ་ཀུན་འདུས་ཡིན་པས་མ་ཚད། རྩ་གསུམ་ཀུན་འདུས། སྐུ་གསུམ་ཀུན་འདུས་ཀྱང་ཡིན་པས། སྔོན་འགྲོ་དང་དངོས་གཞིའི་ཆོས་གང་ཞིག་ཉམས་ལེན་བྱེད་ཀྱང་། བླ་མའི་ཐུགས་རྒྱུད་ཀྱི་བྱིན་རླབས་སློབ་མའི་མོས་གུས་ཀྱིས་འདྲེན་ཏེ་རྟོགས་པ་ཁྱད་པར་ཅན་རྙེད་དགོས་པ་ཡིན། སྐྱབས་འགྲོ་འདི་ལ་རྒྱུའི་སྐྱབས་འགྲོ་དང་འབྲས་བུའི་སྐྱབས་འགྲོ་ལ་སོགས་པའི་དབྱེ་བ་དང་རྣམ་གྲངས་མང་པོ་འཆད་དུ་ཡོད་ཀྱང་། ལས་དང་པོ་བ་དང་། ཁྱད་པར་དུ་ཁྱིམ་པ་ཕོ་མོ་ཚོས་དཀོན་མཆོག་གསུམ་པོ་གང་ཡིན་གྱི་དོན་སྤྱིའི་གོ་བ་ཙམ་ཞིག་ཆགས་པའི་ཆེད་དུ། སྐྱབས་ཡུལ་དཀོན་མཆོག་གསུམ་གང་ཡིན་དང་། བློ་ཆེ་འབྲིང་ཆུང་གསུམ་གྱིས་སྐྱབས་སུ་འགྲོ་ཚུལ་ཇི་ལྟར་ཡིན་པ། སྐྱབས་སུ་སོང་བའི་ཕན་ཡོན་དང་། དགོས་པ་ཆེ་ཚུལ་གྱི་སྐོར་རགས་རིམ་ཙམ་ཞིག་དེ་རིང་ཆོས་ཁྲིད་ཀྱི་ཞར་ལ་གླེང་མོལ་བྱས་པ་ཡིན། ད་སྐབས་སུ་བབས་པ་གང་ཞིག་གསན་པར་བྱ་བ་བདེ་བ་ཅན་གྱི་ཞིང་གི་སྨོན་ལམ་དང་སྦྲེལ་བའི་བདེ་ཆེན་ཞིང་ཁྲིད་འཆད་པའི་སྐབས་ཏེ། དེ་ལ་བདེ་བ་ཅན་དུ་སྐྱེ་བའི་རྒྱུ་བཞི་འཆད་པའི་སྐབས་ནས། རྒྱུ་དང་པོ་རྟེན་ཚོགས་ཞིང་གསལ་འདེབས་པ་སོང་ནས། རྒྱུ་གཉིས་པ་ཚོགས་བསགས་སྒྲིབ་སྦྱོང་གི་སྐབས་དང་། དེ་ལ་ཚོགས་བསགས་པའི་སྒོ་དམ་པ་དེ་ཉིད་ལ་ཡན་ལག་བདུན་ཡོད་པ་ལས། ཕྱག་འཚལ་བ་དང་། མཆོད་པ་དང་། བཤགས་པ་རྣམས་སོང་ནས། དེ་རིང་ནི་ཡན་ལག་བཞི་བ་རྗེས་སུ་ཡི་རང་བའི་ཡན་ལག་བཤད་པའི་སྐབས་ཏེ། བཞི་བ་ཡན་ལག་བཞི་བ་རྗེས་སུ་ཡི་རང་བའི་ཡན་ལག དེ་ཡང་རྗེས་སུ་ཡི་རང་བའི་ཡན་ལག་ནི་ཕྲག་དོག་གི་གཉེན་པོ་ཡིན་ལ། དེ་ལ་ཕྲག་དོག་ཅེས་པའི་ཉོན་མོངས་པ་འདི་ནི། གཞན་གྱི་ཕུན་སུམ་ཚོགས་པའི་དཔལ་ལ་མི་བཟོད་པའི་སེམས་ཀྱི་ཟུག་རྔུ་བསྐྱེད་པ་ཞིག་སྟེ། འདི་ལ་ནང་གསེས་ཀྱི་དབྱེ་བ་ཕྱེས་ན་གཞན་འབྱོར་བ་རྒྱས། མངའ་ཐང་དར། གོ་གནས་མཐོ། ཡོན་ཏན་ལྡན། དཔུང་སྟོབས་བཙན་པ་ལ་སོགས་པ་ཕྲག་གིས་དོག་པ་སྐྱེ་སའི་ཡུལ་དང་འབྲེལ་བའི་ནང་གི་དབྱེ་བ་དུ་མ་ཡོད་ཅིང་། འོན་ཀྱང་འདིར་གཞན་གྱིས་རྣམ་དཀར་དགེ་བའི་ལས་བསྒྲུབས་ཏེ་བསོད་ནམས་བསགས་པ་ལ་ཕྲག་གིས་དོག་པ་དངོས་བསྟན་དང་གཞན་རྣམས་ཤུགས་ཀྱིས་གོ་བར་འགྱུར་བའི་སྒོ་ནས་བསྟན་ཏེ། དང་པོ་ཕྲག་དོག་སྤངས་པའི་ཕན་ཡོན་གྱི་སྒོ་ནས་བསྟན་པ་ནི། དང་པོ་ཕྲག་དོག་སྤངས་པའི་ཕན་ཡོན་གྱི་སྒོ་ནས་བསྟན་པ། གཞན་གྱིས་དགེ་བ་བྱེད་པ་ཐོས་པའི་ཚེ།། དེ་ལ་ཕྲག་དོག་མི་དགའི་སེམས་སྤངས་ཏེ།། སྙིང་ནས་དགའ་བས་རྗེས་སུ་ཡི་རང་ན།། དེ་ཡི་བསོད་ནམས་མཉམ་དུ་ཐོབ་པར་གསུངས།། ཞེས་གསུངས་ཏེ། གང་ཟག་གཞན་གྱིས་ཐོས་བསམ་སྒོམ་གསུམ་གྱི་ཤེས་རབ་བསྟེན་ནས་རང་རྒྱུད་ཡོན་ཏན་གྱིས་ཕྱུག་པའི་དམ་པའི་རྣམ་ཐར་གྱི་རྗེས་སུ་སློབ་ཅིང་། རྒྱལ་བའི་བསྟན་པ་བཤད་དང་སྒྲུབ་པས་འཛིན་སྐྱོང་སྤེལ་གསུམ་བྱེད་པ་དང་། ཡང་གང་ཟག་འགའ་ཞིག་གིས་དགེ་འདུན་འདུ་བའི་གཙུག་ལག་ཁང་དང་། སྐུ་གསུང་ཐུགས་རྟེན་གྱི་བཞེངས་པ་རྒྱ་ཆེན་པོ་མཛད་པ་དང་། ཡང་སྦྱིན་སོགས་རྒྱལ་སྲས་ཀྱི་སྤྱོད་པ་ལ་བསླབ་སྟེ། མཆོད་སྦྱིན་རྒྱ་ཆེན་པོ་མཛད་པ་ལ་སོགས་པ། གཞན་དག་གིས་རྣམ་དཀར་དགེ་བའི་ལས་བྱེད་པ་མིག་གིས་མཐོང་བ་དང་རྣ་བས་ཐོས་པའི་ཚེ་ན། དེ་ལ་ཕྲག་དོག་སྟེ་སེམས་གུ་དོག་ཆུང་ཆུང་གི་ནང་དུ་གཞན་གྱི་བཟང་ཆ་ལེགས་ཆ་གོ་རྒྱུ་རིག་རྒྱུ་དེ་དག་མི་ཤོང་ཞིང་མ་རན་པའི་ན་ཟུག་སྐྱེས་ཤིང་རང་གི་དགེ་བ་བས་ཕ་རོལ་པོའི་དགེ་བ་དེས་ཆེ་འགྲོ་བར་འདུག་སྙམ་པའི་སྒོ་ནས། དེ་ལ་འགྲན་སེམས་དང་ལྡན་པའི་བསམ་ངན་ཏེ། གཞན་འབྱོར་ལ་སྡང་ལྷ་མ་ཡིན་གྱི་སེམས། །ཞེས་གསུངས་པ་བཞིན་དུ་གཞན་འབྱོར་ལ་སྡང་ཞིང་གཞན་ལ་བཟང་ཆ་ཡོད་པར་བཟོད་མི་ཐུབ་ཅིང་། གལ་ཏེ་དེ་རང་ལ་ཡོད་ན་དགའ་དགའ་རྒྱན་རྒྱན་གྱིས་མ་ཚད། ད་དུང་དེ་བས་ལྷག་ཅིག་ཡོད་ནའང་ཆོག་པ། གཞན་ལ་ཡོད་ན་ཡོད་མི་ཆོག་པར་དྲན་པའི་སེམས་ཀྱི་ནད་ཅིག་ཡིན། དེའི་ནད་དེ་གཏིང་ནས་སྤངས་མ་ཐུབ་རུང་། ཉོན་མོངས་ཕྲག་དོག་དེ་ལ་ཚོད་འཛིན་ཞིག་ཐུབ་སྟེ་དེའི་དབང་དུ་དེ་ཙམ་མ་ཤོར་ནའང། དེའི་ཚོད་ཀྱི་བདེ་སྐྱིད་ཅིག་རྙེད་རྒྱུ་ཡོད་པ་ཁོ་ཐག་ཡིན། ཕྲག་དོག་ཅིག་རང་རྒྱུད་ལ་ཡོད་ནས་བཟུང་སྟེ། དེས་མི་གཞན་གྱི་ཡོན་ཏན་མཐོང་མི་ཐུབ་པ་དང་། རང་གི་སྐྱོན་ཆ་མི་ཤེས་པ་ཡིན། དེ་མི་ཤེས་པའི་སྐྱོན་ཆ་དང་ཉེས་པ་ནི་ཤིན་ཏུ་ཆེ་བ་ཡིན། དེས་ན་གཞན་གྱིས་དགེ་བ་བྱེད་པ་ཐོས་པ་དང་མཐོང་བའི་སྐབས་སུ་མི་དགའ་བའི་སེམས་སྤངས་ནས། ཨ་སྐྱིད་པ་ལ་འདིས་འདི་འདྲའི་དགེ་བ་རླབས་ཆེན་བསྒྲུབས་པ་ཅི་འདྲའི་ངོ་མཚར་ཆེན་པོ་ཞིག་རེད་ཨང་ཞེས་དེའི་དགེ་བ་དེ་རང་ཉིད་ཀྱིས་དངོས་སུ་འགྲུབ་པ་དང་འདྲ་བའི་དགའ་ཚོར་བསྐྱེད་དེ། སྙིང་ནས་དགའ་བས་དེ་ལ་རྗེས་སུ་ཡི་རང་བྱས་ན། ཕ་རོལ་པོས་དངོས་སུ་བསྒྲུབས་པ་དང་། རང་གིས་སེམས་ཀྱིས་བསྒྲུབས་པ་གཉིས་ལ་ཁྱད་པར་མེད་པར་དགེ་རྩ་དེའི་བསོད་ནམས་ལ་རྗེས་སུ་ཡི་རང་བྱས་པའི་དབང་གིས་རང་ཉིད་ལ་ཡང་དེ་འདྲ་བའི་བསོད་ནམས་མཉམ་དུ་ཐོབ་ཏུ་ཡོད་པ་བཅོམ་ལྡན་འདས་ཀྱིས། མདོ་སྡུད་པ་ལས། སྟོང་གསུམ་རི་རབ་སྲང་ལ་གཞལ་བས་ཚད་བཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །ཞེས་གསུངས་པ་ཡིན། སྟོང་གསུམ་རི་རབ་གླིང་བཞི་དང་བཅས་པ་སྲང་རྒྱ་མར་གཞལ་ཏེ་བལྟས་ན། དེའི་ལྗིད་ཚད་ཅི་ཙམ་ཡོད་པ་ཤེས་པ་བྱར་ཡོད་ལ། འོན་ཀྱང་གཞན་གྱི་དགེ་བ་བྱེད་པ་ལ་རྗེས་སུ་ཡི་རང་བྱེད་པའི་དགེ་བའི་ཆེ་ཆུང་གི་ཚད་ནི། དེ་ལས་ཀྱང་གཞལ་དཀའ་ཞིང་མང་བ་བསམ་གྱིས་མི་ཁྱབ་པ་ཡིན་ཞེས་པའོ། །གནའ་སངས་རྒྱས་བཅོམ་ལྡན་འདས་ཞལ་བཞུགས་པའི་སྐབས་སུ། རྒྱལ་པོ་གསལ་རྒྱལ་ཞེས་པ་བཅོམ་ལྡན་འདས་ཀྱི་སྦྱིན་བདག་ཆོས་རྒྱལ་ཆེན་པོ་ཞིག་ཡོད་པ་དེས། སངས་རྒྱས་བཅོམ་ལྡན་འདས་འཁོར་དགྲ་བཅོམ་པའི་ཚོགས་དང་བཅས་པ་ཉིན་གུང་གི་གདུགས་ཚོད་ལ་སྤྱན་དྲངས་ཏེ་མཆོད་པ་རྒྱ་ཆེན་པོ་ཕུལ་བ་ན། བཅོམ་ལྡན་འདས་འཁོར་དང་བཅས་པས་གུང་ཚིགས་བཞེས་ཏེ། མཇུག་གི་ཡོན་བསྔོ་གསུང་རན་དུས། བཅོམ་ལྡན་འདས་ཀྱིས་དེ་རིང་ཡོན་བསྔོ་དེ་རྒྱལ་པོ་ཁྱེད་རང་ལ་བྱེད་དམ། དེ་ལས་ལྷག་པའི་བསོད་ནམས་བསགས་པ་ཞིག་ཡོད་འདུག་པ་དེ་ལ་ཡོན་བསྔོ་བར་བྱེད་ཅེས་རྒྱལ་པོ་ལ་དྲིས་པས། རྒྱལ་པོས་སྟོན་པ་ལ་ང་ལས་ལྷག་པའི་དགེ་རྩ་བསགས་པ་དེ་ལ་ཡོན་བསྔོ་མཛད་དུ་གསོལ་ཞེས་ཞུས་པས། དེ་ནས་བཅོམ་ལྡན་འདས་ཀྱིས། དབུལ་མོ་གྲོང་ཉུག་མ་ཟེར་བ་ཚེ་གཅིག་ལ་གྲོང་ཤ་སྟག་ཉུག་པའི་སྤྲང་མོ་དེའི་མིང་ནས་བཟུང་སྟེ་ཡོན་བསྔོ་མཛད་པ་ཡིན། དབུལ་མོ་གྲོང་ཉུག་མ་ནི་འབྱོར་བ་དང་འཁོས་ཀ་ཞན་པའི་དབང་གིས་མོ་རང་ལ་བསོད་ནམས་གསོག་བྱེད་ཅི་ཡང་མེད་ཀྱང་། དེའི་ཉིན་པར་རྒྱལ་པོ་གསལ་རྒྱལ་གྱིས་སངས་རྒྱས་འཁོར་བཅས་ལ་མཆོད་པ་ཕུལ་བ་ལ་དད་ནས་སྙིང་ནས་དགའ་བས་རྗེས་སུ་ཡི་རང་བྱས་པའི་རྐྱེན་གྱིས་དེ་ལྟ་བུའི་བསོད་ནམས་ཆེན་པོ་ཐོབ་པ་ཡིན། དེ་ལྟར་རྒྱུ་ཚེགས་གཉིས་ཀའི་འབད་རྩོལ་མི་དགོས་པར་སེམས་ཀྱི་རྣམ་རྟོག་ཤར་ཚུལ་གྱི་ཁྱད་པར་ཞིག་གིས་དེ་འདྲའི་དགེ་བ་རླབས་ཆེན་རང་ཤུགས་ཀྱིས་ཐོབ་པའི་ཐབས་ནི་ཕྲག་དོག་སྤངས་པའི་རྗེས་སུ་ཡི་རང་གི་དགའ་བ་བསྒོམས་པ་དེ་ཉིད་ཡིན་པས། རང་གི་ཕྲག་དོག་གི་སྐྱོན་ཆ་ངོས་བཟུང་ནས་ལྷང་ལ་ཕུད་ནས་རྗེས་སུ་ཡི་རང་བསྒོམ་པ་ལ་བློ་གོམས་སུ་འཇུག་དགོས། དུས་རྒྱུན་དུ་ཕྲག་དོག་མེད་པའི་བློ་རྒྱ་གུ་ཡངས་མོ་ལ་སྦྱངས་ཨེ་ཐུབ་ལྟོས་དང་། སེམས་སྙིང་ཁམས་མི་བདེ་བའི་ནད་གཞི་དྲག་སྐྱེད་ལའང་ཕན་ཐོགས་དེས་ཆེ་བ་ཡིན། ཕྲག་དོག་གིས་ཀུན་ནས་བསླངས་པས་གཞན་གྱི་བླ་བཙག་རྐང་འདྲེན་བྱེད་པ་འདི་དག་ཇེ་ཉུང་དུ་སོང་ན། གཞན་སེམས་བསྲེགས་པའི་ལས་ངན་བསགས་པ་དེའང་ཇེ་ཉུང་དུ་འགྲོ་བ་ཡིན། མ་ཟད་མི་གཞན་གྱིས་རང་ཉིད་ལ་གནོད་པ་མི་བྱེད་ཅིང་རང་གཞན་གཉིས་ཀ་བདེ་བའི་ཁོར་ཡུག་བཟང་པོ་ཞིག་ཀྱང་སྐྲུན་ཐུབ་པས་མ་ཚད། དེའི་འབྲས་བུ་བདེ་ནས་བདེ་བའི་སར་ཕྱིན་ཐུབ་པ་ཡིན། དེ་ཡན་ཆད་ཀྱིས་ཕྲག་དོག་གི་གཉེན་པོ་རྗེས་སུ་ཡི་རང་བའི་ཡན་ལག་སྤྱིར་བཤད་པའོ། །ནང་གསེས་ཟག་བཅས་ཀྱི་དགེ་བ་གཙོ་བོར་བྱས་པ་ལ་རྗེས་སུ་ཡི་རང་བ་ནི། ཟག་བཅས་ཀྱི་དགེ་བ་གཙོ་བོར་བྱས་པ་ལ་རྗེས་སུ་ཡི་རང་བ། དེ་ཕྱིར་འཕགས་པ་རྣམས་དང་སོ་སྐྱེ་ཡིས།། དགེ་བ་གང་བསྒྲུབས་ཀུན་ལ་ཡི་རང་ངོ་།། ཞེས་གསུངས་ཏེ། གོང་དུ་བཤད་པ་དེ་ལྟ་བུའི་རྗེས་སུ་ཡི་རང་བྱས་ན། འབད་པ་མེད་པར་ཕན་ཡོན་དང་བསོད་ནམས་རྒྱ་ཆེན་པོ་ཐོབ་པ་དེའི་ཕྱིར་ན་ཐེག་དམན་ཉན་རང་གི་རིགས་སུ་གཏོགས་པ་འཕགས་པ་ཟུང་བཞི་ཡ་བརྒྱད་ཀྱིས་སྤང་བྱ་སྤངས་པ་དང་། རྟོགས་བྱ་རྟོགས་པར་བྱེད་པའི་ཞི་གནས་དང་ལྷག་མཐོང་གི་བསམ་གཏན་བསྒོམས་པ་དང་འགྲོ་དོན་མཛད་པ་དང་། ཐེག་ཆེན་བྱང་སེམས་འཕགས་པ་ཐམས་ཅད་ཀྱིས་བསྐལ་ཆེན་གྲངས་མེད་མང་པོར་བསོད་ནམས་དང་ཡེ་ཤེས་ཀྱི་ཚོགས་རྒྱ་ཆེན་པོ་བསགས་པ་དང་། རིག་པ་དང་གྲོལ་བའི་ཡོན་ཏན་ལ་སོགས་པ་དང་། ལམ་ལྔ་ས་བཅུས་བསྡུས་པའི་ཡོན་ཏན་རྣམས་དང་། རང་གཞན་དོན་གཉིས་ཕུན་སུམ་ཚོགས་པའི་ཟག་མེད་ཀྱི་དགེ་བ་དང་། སོ་སྐྱེ་ཞེས་པ་ནི། སོ་སོ་ཐ་དད་འགྲོ་བ་ལ། །སོ་སོའི་སྐྱེ་བོ་ཞེས་བྱའོ། །ཞེས་ལས་དང་ཉོན་མོངས་པ་ཐ་དད་པས་གནས་རིས་སོ་སོ་ཐ་དད་དུ་འཕེན་པའམ་འགྲོ་བར་བྱེད་པའི་སོ་སོའི་སྐྱེ་བོ་ཐར་པའི་ལམ་དུ་ཞུགས་ཟིན་པ་ཚོགས་ལམ་པ་ཡན་ཆད་དང་། ལམ་མ་ཞུགས་པའི་གང་ཟག་སོ་སོའི་སྐྱེ་བོ་རྣམས་ཀྱིས་ཟག་བཅས་ཀྱི་དགེ་བ་ཆེ་ཕྲ་ཆུང་གསུམ་གང་བསྒྲུབས་པ་ཀུན་ལ་རྗེས་སུ་ཡི་རང་ངོ་ཞེས་པའོ། །ཐེག་ཆེན་གྱི་དགེ་བ་ལ་བྱེ་བྲག་ཏུ་རྗེས་སུ་ཡི་རང་བ་ནི། ཐེག་ཆེན་གྱི་དགེ་བ་ལ་བྱེ་བྲག་ཏུ་རྗེས་སུ་ཡི་རང་བ། བླ་མེད་བྱང་ཆུབ་མཆོག་ཏུ་སེམས་བསྐྱེད་ནས།། འགྲོ་དོན་རྒྱ་ཆེན་མཛད་ལ་ཡི་རང་ངོ་།། ཞེས་གསུངས་ཏེ། རྫོགས་པའི་སངས་རྒྱས་བཅོམ་ལྡན་འདས་རྣམས་ཀྱིས་དང་པོར་བླ་མེད་བྱང་ཆུབ་མཆོག་ཏུ་ཐུགས་བསྐྱེད་ཅིང་། བར་དུ་བསྐལ་བ་གྲངས་མེད་མང་པོར་ལྷག་བསམ་རྣམ་པར་དག་པས་སྦྱོར་བ་ཕར་ཕྱིན་དྲུག་གིས་སེམས་ཅན་ཡོངས་སུ་སྨིན་པར་མཛད་དེ། རྫོགས་སྨིན་སྦྱངས་གསུམ་མཐར་དབྱུང་པར་མཛད་པ་དང་། མཐར་མངོན་པར་རྫོགས་པར་སངས་རྒྱས་ཏེ་མཛད་པ་བཅུ་གཉིས་ལ་སོགས་པའི་རྨད་དུ་བྱུང་བའི་ངོ་མཚར་གྱི་མཛད་པ་བསམ་གྱིས་མི་ཁྱབ་པས་ཞིང་ཁམས་བྱེ་བ་ཁྲག་ཁྲིག་རྣམས་སུ་མཛད་པ། ཇི་སྐད་དུ། མ་དག་འགྲོ་བ་དྲུག་གི་ཁམས་རྣམས་སུ། །རྒྱལ་རིགས་རྗེའུ་རིགས་དམངས་རིགས་བྲམ་ཟེའི་རིགས། །གདོལ་བ་བུད་མེད་ཁྱེའུ་དགེ་སྦྱོང་དང་། །ཀུན་ཏུ་རྒྱུ་དང་བསླབ་གནས་རིག་བྱེད་མཁན། །རིགས་ཀྱིས་བཀུར་བ་དང་ནི་མ་བཀུར་བ། །སྨད་དང་བསྟོད་དང་ནད་པ་ཆོས་སྨྲ་དང་། །བྱ་དང་རི་དྭགས་གྲོང་ཁྱེར་སློང་མོ་བ། །གང་ལ་གང་འདུལ་དེ་ལ་དེར་སྟོན་པ། །སྣ་ཚོགས་གཟུགས་ཀྱིས་འགྲོ་བ་འདུལ་བར་ཤོག །ཅེས་གསུངས་པ་ལྟར་དུ་གང་ལ་གང་གིས་འདུལ་དགོས་ན། དེ་ལ་དེར་སྟོན་པའི་ཚུལ་གྱིས་འདུལ་བའི་ཐུགས་རྗེ་དང་མཛད་པ་ཕྲིན་ལས་རྟག་ཁྱབ་ལྷུན་གྲུབ་ཀྱི་སྒོ་ནས་འགྲོ་དོན་རྒྱ་ཆེ་ལ་རྒྱུན་མི་ཆད་པར་མཛད་པ་ལ་རྗེས་སུ་ཡི་རང་ངོ་ཞེས་པ་སྟེ། སངས་རྒྱས་བཅོམ་ལྡན་འདས་ཐམས་ཅད་སྔོན་སློབ་པ་ལམ་ལ་གནས་པའི་དུས་སུའང་རྫོགས་སྨིན་སྦྱངས་པ་མཛད་པའི་ལོ་རྒྱུས་སྟོན་པའི་སྐྱེས་རབས་དང་མདོ་སྡེ་སོ་སོའི་ནང་ནས་འབྱུང་བ་ལྟ་བུ་དང་། སངས་རྒྱས་ཡོན་ཏན་བསམ་མི་ཁྱབ། །ཆོས་ཀྱི་ཡོན་ཏན་བསམ་མི་ཁྱབ། །དགེ་འདུན་ཡོན་ཏན་བསམ་མི་ཁྱབ། །བསམ་མི་ཁྱབ་ལ་དད་བྱས་ན། །རྣམ་པར་སྨིན་པའང་བསམ་མི་ཁྱབ། །ཅེས་གསུངས་པ་ལྟ་བུའི་མཛད་པ་དང་ཡོན་ཏན་བསམ་གྱིས་མི་ཁྱབ་པ་ཐམས་ཅད་ལ་དགའ་བ་སྒོམ་པའི་ཡུལ་ལམ་རྗེས་སུ་ཡི་རང་བྱེད་པའི་ཡུལ་ཡིན། སོ་སོའི་སྐྱེ་བོའི་དུས་ན་ཡང་འགྲོ་དོན་ཡོད་པ་ནི། དཔེར་ན། སེམས་ཅན་གཅིག་ལ་ཕན་སེམས་སྐད་ཅིག་མ་གཅིག་སྐྱེས་པ་དང་། གཞན་གྱི་སེམས་དགའ་ཐབས་ཀྱི་བྱ་བ་སྣ་གཅིག་བསྒྲུབས་པ་དང་། སེམས་ཅན་གཅིག་གི་བློ་སྣ་ཆོས་ལ་བསྒྱུར་བ་དང་། དགེ་བ་སྣ་གཅིག་འགྲུབ་པ་ཡང་འགྲོ་བ་སེམས་ཅན་ལ་བསྔོས་པ་ལ་སོགས་པ་མདོར་ན་རང་འདོད་མེད་པའི་བྱ་བ་ཐམས་ཅད་འགྲོ་བ་སེམས་ཅན་ཀྱི་དོན་ཡིན་པས། དེ་ཐམས་ཅད་ཀྱི་རྗེས་སུ་ཡི་རང་བའི་ཡུལ་ཡིན་ནོ། །དེ་ལྟར་རྗེས་སུ་ཡི་རང་བྱས་པ་ལ་བསོད་ནམས་དང་། ཕན་ཡོན་ཆེན་པོ་ཐོབ་རྒྱུ་ཡོད་པ་ལྟར་དུ། གཞན་གྱི་རྣམ་དཀར་ལ་ཕྲག་དོག་དང་སྡང་སེམས་སྐྱེས་ན་དེ་མཚུངས་ཀྱི་སྡིག་པ་ཆེན་པོའང་དོན་མེད་དུ་བསགས་པ་ཡིན་པས། གཞན་ལ་ཕྲག་དོག་བྱེད་པ་འདིའི་དོན་དངོས་སུ་བཤད་ན། མྱི་མི་ཐུབ་རང་ལ་གནོད་པ། གནོད་པ་དེ་ཡང་གནས་སྐབས་སེམས་འཁྲུག་ཅིང་ཞེ་མི་བདེ། མཐར་ཐུག་ངན་སོང་གི་འབྲས་བུ་དང་རྣམ་སྨིན་ཡིད་དུ་མི་འོང་པ་མྱོང་དགོས་པས་ན། ཕྲག་དོག་ཞེས་པ་འདི་ནི་ནད་དགྲ་ཆེན་རང་གི་ཁོག་ནས་ཡར་ལ་ལངས་ཡོང་བ་ཞིག་ཡིན་པའི་ངོས་འཛིན་གསལ་པོ་ཐོབ་དགོས་པ་ཡིན། གཞན་གྱི་སྲོག་སྐྱོབ་པ་ལ་སོགས་པ་ཁྱད་པར་ཅན་གྱི་དགེ་བ་བཅུ་བསྒྲུབས་པ་ལ་རྗེས་སུ་ཡི་རང་བ་བསྟན་པ་ནི། ཁྱད་པར་ཅན་གྱི་དགེ་བ་བཅུ་བསྒྲུབས་པ་ལ་རྗེས་སུ་ཡི་རང་བ་བསྟན་པ། མི་དགེ་བཅུ་པོ་སྤངས་པ་དགེ་བ་བཅུ།། གཞན་གྱི་སྲོག་བསྐྱབ་སྦྱིན་པ་གཏོང་བ་དང་།། སྡོམ་པ་སྲུང་ཞིང་བདེན་པར་སྨྲ་བ་དང་།། འཁོན་པ་སྡུམ་དང་ཞི་དུལ་དྲང་པོར་སྨྲ།། དོན་དང་ལྡན་པའི་གཏམ་བརྗོད་འདོད་པ་ཆུང་།། བྱམས་དང་སྙིང་རྗེ་སྒོམ་ཞིང་ཆོས་ལ་སྤྱོད།། དགེ་བ་དེ་རྣམས་ཀུན་ལ་ཡི་རང་ངོ་།། ཞེས་གསུངས་ཏེ། དེ་ཡངསྤྱིར་མི་དགེ་བ་བཅུ་པོ་སྤོང་བར་དམ་བཅས་ནས་སྤངས་པ་དེ་ཐུན་མོང་གི་དགེ་བ་བཅུ་ཡིན་པ་དང་། དེའི་ཐོག་ཏུ་དགེ་བཅུ་ཁྱད་པར་བ་ཞེས་པ། སྲོག་གཅོད་སྤངས་པའི་བསོད་ནམས་ཀྱི་ཐོག་ཏུ་སྲོག་བསྐྱབ་པའི་བྱ་བ་བསྒྲུབས་ན་དེ་བས་ཀྱང་ཕན་ཡོན་ལྷག་པར་ཆེ་བ་སྟེ། གནའ་སྔ་མོ་ཞིག་ལ་རྒྱ་གར་གྱི་ཡུལ་གྲོང་ཁྱེར་མཉན་ཡོད་དུ་ཁྱིམ་བདག་ཕྱུག་པོ་ཞིག་ལ་བུ་ཡ་མཚན་ཅན་ཞིག་སྐྱེས་པ་ན། ཁྱིམ་བདག་དེ་ཚང་གི་གཉེན་ཉེ་རྩ་ལག་ཐམས་ཅད་ཆུ་ཆེན་པོ་ཞིག་གི་འགྲམ་དུ་འདུས་ནས་བུ་དེའི་བཙས་སྟོན་བྱས་པ་དང་། ཁྱེའུ་དེ་གཞན་དང་མི་འདྲ་བ་གཟུགས་མཛེས་ཤིང་ཡ་མཚན་ཅན་ཞིག་ཡོད་པས། མི་ཐམས་ཅད་ཀྱིས་ལག་ཏུ་བླངས་ནས་ཚང་མས་གཅེས་གཅེས་དགའ་དགའ་ཡིས་གཅིག་གི་གཅིག་ལ་ལག་བརྒྱུད་བྱེད་སྐབས་སྟབས་མ་ལེགས་པར་ཆུ་ནང་དུ་ཤོར་ནས་ཆུས་ཁྱེར་སོང་བ་དང་། དེ་ནི་བསོད་ནམས་ཆེན་པོ་ཅན་ཡིན་པའི་སྟབས་ཀྱིས་ཆུ་ནང་དུ་འཚུབས་ཏེ་མ་ཤི་བ་ཡོད་པ་ལ། སྐབས་ཤིག་ལ་ཆུ་དེའི་ནང་གི་ཉ་ཆེན་པོ་ཞིག་གིས་ཟོས་ཏེ་ཁྱུར་མིད་བྱས་ཀྱང་། མ་ཤི་བ་ཉ་ཡི་ལྟོ་བའི་ནང་དུ་གསོན་པོར་འཚོ་སྟེ་ཡོད་པ་ལ། ཆུ་དེའི་སྨད་ཅིག་ལ་དུད་ཚང་བུ་མེད་པ་ཚང་ཞིག་གིས་ཉ་རྒྱའི་ནང་ཉ་དེ་ཚུད་ནས་བཟུང་སྟེ། བཤས་སྐབས་ཉ་དེའི་ཁོག་པའི་ནང་དུ་བུ་ཁྱེའུ་མཛེས་ཤིང་ལྟ་ན་སྡུག་པ་ཞིག་ཡོད་པ་མཐོང་བས། དེ་ཚང་དགའ་ནས་བུ་ཚབ་ཏུ་གསོས་ཏེ་སྐྱེད་སྲིང་བྱས་ནས་དེ་ཚང་གི་བུར་གྱུར་པ་དང་། དེ་ནས་ཡར་ལག་ཁྱག་སྟེ་ནར་སོན་ཚེ་སངས་རྒྱས་ཀྱི་བསྟན་པ་ལ་རབ་ཏུ་བྱུང་ནས་དགྲ་བཅོམ་པ་ཐོབ་པ་ཡིན། དགྲ་བཅོམ་པ་དེའི་སྔོན་གྱི་སྐྱེ་བརྒྱུད་དེ་ཅི་ཞིག་ཡིན་པར་སྟོན་པའི་འཁོར་ཐམས་ཅད་ཀྱིས་སྟོན་པ་ལ་ཡར་ཞུས་ཚེ། བཅོམ་ལྡན་འདས་ཀྱིས་སྔོན་སངས་རྒྱས་རྣམ་པར་གཟིགས་འཇིག་རྟེན་དུ་བྱོན་ནས་སྲོག་གཅོད་སྤངས་པའི་ཕན་ཡོན་མང་པོ་གསུངས་པའི་དུས་སུ་ཁྱིམ་བདག་ཅིག་གིས་སྲོག་གཅོད་སྤངས་པའི་སྡོམ་པ་བླངས་ཏེ་དེ་ལས་འགལ་བ་མ་བྱུང་བས། ཁྱིམ་བདག་དེའི་སྐྱེ་དང་ཚེ་རབས་ཐམས་ཅད་དུ་གཟུགས་མཛེས་པ་ཤ་སྟག་ཏུ་སྐྱེ་བས་མ་ཚད། སྲོག་ཆགས་གཏུམ་པོ་གདུག་རྩུབ་ཅན་ཆུ་སྲིན་མྱི་གཟན་གྱི་ཁ་ནང་དུ་ཚུད་ཀྱང་འཆི་རུ་མེད་པ་ཤ་སྟག་གི་སྐྱེ་བ་བླངས་བ་ཡིན། དེས་སྲོག་གཅོད་སྤངས་པའི་སྡོམ་པ་བླངས་པས་མི་ཚད་སངས་རྒྱས་རྣམ་པར་གཟིགས་ལ་གསེར་གྱི་དོང་ཙེ་ཞིག་ཀྱང་ཕུལ་མྱོང་བས་ན། ཞིང་ཁྱད་པར་ཅན་དེས་བསོད་ནམས་ཀྱི་སྟོབས་ཀྱིས་གང་དུ་སྐྱེས་ན་ཕྱུག་པོ་ཤ་སྟག་གི་ལུས་བླངས་པ་དང་། ད་ལྟ་རབ་ཏུ་བྱུང་ནས་དགྲ་བཅོམ་པ་ཐོབ་པ་ཡིན་ཞེས་དེ་ལྟར་ལུང་བསྟན་པ་ཡིན། དེས་ན་དེ་ནི་སྐྱེ་བ་ནས་ཚེ་རབས་གང་དུ་སྐྱེས་ཀྱང་རྒྱུ་ཕྱུག་པོ་ཡིན་པ་དང་། གཟུགས་མཛེས་པ་ཡིན་པ་དང་། ཚེ་སྲོག་ལ་བར་ཆད་མེད་པར་བྱུང་བ་ཡིན་པས། སྲོག་གཅོད་སྤངས་པའི་སྟེང་དུ་གཞན་སྲོག་བསྐྱབ་པའི་དགེ་བ་ཁྱད་པར་ཅན་བསྒྲུབས་ན་དེ་ལྟར་ཕན་ཡོན་ཡོད་པ་ཡིན། ཡང་དེ་དང་འབྲེལ་བའི་གཏམ་རྒྱུད་གཞན་ཞིག་ནི། ཡང་ཁྱིམ་བདག་ཚང་ཞིག་ལ་ནོར་ལྷ་མ་ཎི་བྷ་དྲའི་ལྷ་རྟེན་བཞུགས་པའི་རྟེན་མཁར་ཞིག་ཡོད་པ་ཡིན། དེ་ཚང་ལ་རིགས་རྒྱུད་འཛིན་མཁན་གྱི་བུ་མེད་པས་རྒྱུ་ཡོད་ཀྱང་བུ་མེད་པ་ན། དེ་ཚང་གི་ཁྱིམ་བདག་གིས། མ་ཎི་བྷ་དྲའི་རྟེན་མཁར་ལ། གལ་ཏེ་ཁྱོད་ཀྱིས་ང་ལ་བུ་ཞིག་འབྱུང་བའི་དངོས་གྲུབ་ཅིག་མི་སྦྱིན་ན་རྟེན་མཁར་བཤིག་ཡིན་རྒྱུ་ཞེས་སྨྲས་པས། མ་ཎི་བྷ་དྲ་སྐྲག་ནས། རྣམ་ཐོས་སྲས་ཁྱོད་ལ་ཐབས་ཤིག་ཡོད་དམ་ཞུས་པས། རྣམ་ཐོས་སྲས་ལའང་ཐབས་མེད་ནས་ལྷའི་དབང་པོ་བརྒྱ་བྱིན་ལ་ཞུས་པས། ལྷའི་དབང་པོ་བརྒྱ་བྱིན་གྱིས་ལྷ་ཚེ་ཚད་རྫོགས་ནས་འཕོ་རན་ཁ་ཞིག་ལ་ཁྱོད་ཁྱིམ་བདག་དེ་ཚང་གི་བུ་རུ་སྐྱེ་བ་ལེན་དགོས་ཞེས་བཀའ་སྩལ་བ་ན། ལྷ་འཆི་ཁ་མ་དེས་ངས་ནི་རབ་ཏུ་བྱུང་བའི་ལུས་རྟེན་ཞིག་ལེན་སྙམ་པ་ཡིན། དེ་ཚང་གི་བུ་རུ་སྐྱེ་བ་བླངས་ན་རབ་ཏུ་བྱུང་བ་ལ་གེགས་དང་བར་ཆད་ཡོད་པར་འདུག་པས་སྐྱེ་བ་ལེན་དུ་མི་རུང་བ་ཁོ་རང་གིས་མངོན་ཤེས་ཀྱིས་ཤེས་པ་ལྟར་བཤད་པ་དང་། ལྷའི་དབང་པོ་བརྒྱ་བྱིན་གྱིས་ཁྱོད་ངེས་པར་དུ་དེར་སྐྱེ་བ་ལེན་དགོས། རབ་ཏུ་བྱུང་བ་ལ་གེགས་དང་བར་ཆད་བྱུང་དུས་ངས་རོགས་བྱེད་ཆོག་ཅེས་བཤད་པས། ལྷ་དེས་ཀྱང་ཁས་བླངས་ཏེ་འཆི་ཁའི་མཚམས་སྦྱོར་གྱི་སྨོན་ལམ་བཏབ་ནས་ཁྱིམ་བདག་དེ་ཚང་གི་བུར་སྐྱེས་པ་ཡིན། དེ་ཡར་ནར་སོན་དུས་ཁོ་རབ་ཏུ་བྱུང་དགོས་ཞེས་སྨྲས་ཀྱང་། ཁོང་ཚང་གིས་རིགས་རྒྱུད་འཛིན་མཁན་ལྷ་ལ་གསོལ་བ་བཏབ། མཆོད་པ་ཕུལ། བསོད་ནམས་བསགས་ཏེ་ཐོབ་པ་ཡིན་པས། ཁྱོད་རབ་ཏུ་བྱུང་རྒྱུ་ཡོད་པ་མིན། རིགས་བརྒྱུད་འཛིན་ཏེ་ཁྱིམ་སོ་གཟུང་དགོས་པ་ཡིན་ཞེས་སྨྲས་པས། བུས་བསམ་པར་ད་ལུས་རྟེན་འདིའི་ཐོག་ནས་རབ་ཏུ་བྱུང་མ་ཐུབ་ན་མི་ལུས་བླངས་ཀྱང་དོན་མེད་རེད་སྙམ་ནས་རང་སྲོག་རང་གིས་བཅད་ནས་ཤི་དགོས་སྙམ་སྟེ་ཆུ་ནང་དུ་མཆོངས་སྐབས། ཆུས་ཐུར་དུ་མ་ཁུར་ཏེ་གྱེན་དུ་ཁུར། དེ་བཞིན་དུ་མཚོན་ཆས་རང་གིས་རང་ལ་བརྒྱབ་ཀྱང་མ་ཤི། མེ་ནང་དུ་མཆོངས་ཀྱང་མ་ཚིག བྲག་མཐོན་པོ་དང་མཁར་གྱི་རྩེ་མོ་ནས་མཆོངས་ཀྱང་གཏན་ནས་མ་ཤི་བས། ཁོ་རང་གིས་བསམ་བློ་ཞིག་བཏང་སྟེ་སྲོག་འདི་འདོར་ཐབས་ཤིག་དང་ལུས་འདི་སྤང་དགོས་པས་ཅི་དགའ་འདུག་སྙམ་སྟེ་བསམ་བློ་ཞིག་བཏང་བ་དང་། ཁོས་བསམ་པར་ཡུལ་ཁམས་དེའི་རྒྱལ་པོ་གསལ་རྒྱལ་ནི་རྒྱལ་པོ་ཆེན་པོ་གཏུམ་པོ་ཞིག་ཀྱང་ཡིན་པས། དེ་ཡི་ཁྲིམས་དང་འགལ་བར་བྱས་ན་གསོད་པར་ཐེ་ཚོམ་མི་དགོས་སྙམ་སྟེ། རྒྱལ་པོ་གསལ་རྒྱལ་གྱི་རྒྱལ་ས་ཡོད་སའི་ཡུལ་མཉན་ཡོད་ཀྱི་གྲོང་ཁྱེར་དུ་ཕྱུག་པོ་འགའི་ཁྱིམ་དུ་རྐུ་བྱེད་དུ་སོང་བ་དང་། ཁྱིམ་ཚང་དེ་ཚོས་རྐུན་མ་ཡོང་བར་ཐོས་ནས་ཚུར་བཟུང་སྟེ་རྒྱལ་པོའི་ཁྲིམས་རའི་ནང་དུ་བཙུད་པ་དང་། རྒྱལ་པོས་ཉེས་ཁྲིམས་གཅོད་སྐབས་སྲོག་ཁྲིམས་ཕོག་སྟེ་མདའ་འབེན་ལ་འཛུགས་རྒྱུའི་བཀའ་ཐག་བཅད་པས། དེ་མ་ཐག་ཏུ་ཤན་པ་ལག་དམར་རྣམས་ཀྱི་རྩལ་གྱིས་དུག་མདའ་འཕངས་ཀྱང་མ་ཕོག་པ་དང་། ཕོག་ཀྱང་མ་ཆོད་པས་སྔར་བྱུང་མ་མྱོང་བའི་གནས་ཚུལ་དེར་རྒྱལ་པོ་སོགས་ཡ་མཚན་སྐྱེས་ཏེ། སྐྲག་ནས་བཟོད་པར་གསོལ་བ་དང་བུ་དེས་ལོ་རྒྱུས་ཚང་མ་ཆད་ལུས་མེད་པར་བཤད་པ་ན། རྒྱལ་པོས་དེ་རབ་ཏུ་བྱུང་ཆོག་པའི་གནང་བ་བྱིན་པས། བུ་དེ་རབ་ཏུ་བྱུང་ནས་བརྩོན་འགྲུས་བརྩམས་ནས། དུས་ཡུན་རིང་པོར་མ་འགོར་བར་དགྲ་བཅོམ་ཐོབ་པར་གྱུར། དེའི་སྐྱེ་བ་སྔོན་མའི་ལོ་རྒྱུས་སྟོན་པ་ལ་དྲིས་པ་ན། སྟོན་པས་སྔར་འཇིག་རྟེན་གྱི་ཁམས་འདིར་རྒྱལ་པོ་ཚངས་བྱིན་ཟེར་བ་ཞིག་ཡོད་པ་དང་། དེའི་བློན་པོ་མདུན་ན་འདོན་དབང་ཆེན་ཞིག་ཡོད་པ་དེས་རྒྱལ་པོས་ཁྲིམས་ཀྱིས་གསད་རྒྱུར་ཐག་བཅད་ཚར་བའི་མི་ཞིག་མ་བསད་པར་སྲོག་ཐར་བར་བྱས་པའི་རྣམ་དཀར་གྱི་དགེ་བའམ་བསོད་ནམས་ཀྱིས་ཚེ་རབས་ལྔ་བརྒྱའི་བར་འཇིགས་པ་གང་གིས་ཀྱང་མི་ཚུགས་པ་དེ་ལྟ་བུ་ཡིན་ཞེས་གསུངས་པ་ཡིན། ཡང་དེའི་ལོ་རྒྱུས་དེ་དང་ཕྱོགས་འདྲ་བའི་གཏམ་རྒྱུད་གཞན་པ་ཞིག་བཤད་ན། བདག་ཅག་གི་སྟོན་པ་ཐུགས་རྗེ་ཅན་སྔོན་སློབ་པ་ལམ་གྱི་གནས་སྐབས་ན་གཅན་གཟན་ཀུན་ཏ་ཞེས་པའི་སྐྱེ་བ་བཞེས་སྐབས། གཅན་གཟན་ཀུན་ཏ་ཟེར་པ་མཛེས་ཤིང་ཡིད་དུ་འོང་བ། སྤུ་རྩེ་སེར་པོ་གསེར། སྤུ་སྐེད་ཁམས་པ་དངུལ། སྤུ་རྟིང་དཀར་པོ་དུང་ལས་གྲུབ་པ། གཡུའི་རྫི་མ་ཡོད་པ། མུ་ཏིག་གི་ཐིག་ལེ་ཡོད་པ། རྒྱ་མཚོའི་ཆུ་རིས་ཀྱི་རི་མོ་དང་། ནམ་མཁའ་གློག་སྤྲིན་གྱི་ལྡབ་ཤ་ཡོད་པ་སྟེ། དེ་ལྟ་བུའི་རིགས་ཀྱི་སྒོ་ནས་རིན་ཐང་ཅན་ཞིག་ཡོད་པ་ན། ཡུལ་དེའི་རྒྱལ་པོ་ཚངས་བྱིན་ཞེས་པ་དེ་རློམ་སེམས་ཀྱི་འདོད་རྔམ་མེ་ལྟར་འབར་ཏེ། ཡུལ་དེའི་རྔོན་པའི་གཙོ་བོ་ལ་བཀའ་ཕབ་པ། ཁྱོད་ཀྱིས་གཅན་གཟན་ཀུན་ཏའི་པགས་པ་དེ་མྱུར་དུ་ལོན་དགོས་ལ། གལ་ཏེ་མ་ལོན་ན་ཁྱོད་གཙོར་བྱས་པའི་ས་འདིའི་རྔོན་པ་ཡོད་ཚད་གཅིག་ཀྱང་མི་ལྷག་པར་གསོད་རྒྱུ་ཡིན་ཞེས་བཤད་པས། རྒྱལ་པོའི་སྨྲ་བ་ནི་ལན་གཅིག་ཡིན་པས་བཀའ་ལ་ཡར་ལྡོག་མེད་པར་ཤེས་ནས། རྔོན་པའི་གཙོ་བོ་མི་འགྲོ་ཀ་མེད་དུ་གྱུར་ཏེ་མདའ་གཞུ་མཆན་དུ་བཟུང་ཞིང་སོང་སོང་ནས་ཉིན་ཞག་མང་པོ་ཞིག་འགོར་ཡང་གཅན་གཟན་ཀུན་ཏ་ལ་མ་ཐུག་ཅིང་། དེ་ནི་དཀའ་ཞིང་ལྟོགས་ནས་ཆུ་མེད་པའི་བྱེ་ཚན་གྱི་མྱ་ངན་གྱི་ཐང་ཞིག་ལ་འཁྱམས་འཁྱམས་ནས། གཟུགས་གཞི་ལུས་པོས་མ་ཁྱོག་པར་འཆི་ལ་རན་པར་གྱུར་པ་ན། གཅན་གཟན་མངོན་ཤེས་ཅན་དེས་དེའི་གནས་ཚུལ་ཤེས་ཏེ་སྙིང་རྗེ་སྐྱེས་ནས། ཆུ་དང་ཤིང་ཏོག་བྱིན་ཏེ་རྔོན་པ་ཡར་སོས་སུ་བཅུག་པས་མ་ཚད། དེ་རྗེས་རང་གི་པགས་པ་རང་གིས་གསོན་བཞིན་དུ་བཤུས་ཏེ། རྔོན་པ་ལ་བྱིན་ནས་རང་སྲོག་ཐད་དུ་བོར་ཏེ་སེམས་ཅན་གྱི་སྲོག་དེ་ལྟར་བསྐྱབས་པ་ལ་སོགས་པའི་རྣམ་ཐར་མང་པོ་ཡོད་པ་ལྟར་དུ་སེམས་ཅན་གྱི་སྲོག་མི་གཅོད་ཅིང་བསྐྱབས་པར་བྱས་ན་ལྷའི་ཚེ་སྲོག་ཐོབ་པ་དང་། སེམས་ཅན་གྱི་སྲོག་བཅད་ན་དམྱལ་བའི་ཚེ་སྲོག་ཐོབ་པ་ཡིན་པར་གསུངས་ཤིང་། ཚུལ་ཁྲིམས་བསྲུངས་པའི་ནང་ནས་གཞན་གྱི་སྲོག་བསྐྱབས་པ་འདི་མཐོ་རིས་སུ་སྐྱེ་བའི་རྒྱུ་ལས་མཆོག་ཏུ་གྱུར་པ་ཡིན་ནོ། །དེ་བཞིན་དུ་སྦྱིན་པ་གཏོང་བའི་བསོད་ནམས་ཀྱང་བསམ་གྱིས་མི་ཁྱབ་པ་ཡིན་ཏེ། སྦྱིན་པ་གཏོང་བ་ལ་བརྩོན་ན་ཚེ་འདི་ཕྱི་ཀུན་ཏུ་ལོངས་སྤྱོད་ཆེན་པོ་ཐོབ་ཅིང་དབུལ་ཕོངས་མེད་པ་དང༌། ཡི་དྭགས་ཀྱི་སྐྱེ་སྒོ་ཆོད་ནས་མཐར་ཐུག་སངས་རྒྱས་ཀྱི་གོ་འཕང་འཐོབ་པར་འགྱུར་བ་ཡིན་པས། རྗེ་མི་ལ་རས་པས། ལྟོ་ཁ་ནས་བྲུས་ལ་སྦྱིན་པ་ཐོངས། །ཞེས་གསུངས་པ་ཡིན། སྦྱིན་པ་དེ་ཡང་ཆུང་ས་ནས་ཐ་ན་དུད་འགྲོའི་སྐྱེ་གནས་སུ་སྐྱེས་པའི་ཁྱི་དང་བྱ་ཉ་ལ་སོགས་པ་ལ་ཟས་ཁམ་བུ་གང་བྱིན་པ་ཡན་ཆད་དང་། ཆེ་ས་ནས་རྟ་དང་གླང་ཆེན། བུ་དང་ཆུང་མ། མགོ་དང་ཡན་ལག་ནས་སྲོག་གི་སྦྱིན་པ་གཏོང་བའི་བར་དུ་བརྩོན་དགོས་པ་ཡིན། བསྐལ་བ་མང་པོ་འདས་པའི་སྔོན་རོལ་དུ་ཡུལ་འཛམ་བུའི་གླིང་འདི་ན། རྒྱལ་པོ་ཟླ་འོད་ཟེར་བ་འཛམ་གླིང་ཡོངས་ལ་དབང་བའི་རྒྱལ་པོ་ཆེན་པོ་ཞིག་ཡོད་མྱོང་བ་ཡིན། དེ་ནི་དབུལ་ཕོངས་མགོན་མེད་ལ་བྱམས་བརྩེ་ལྷག་པར་ཆེ་བ། དཀོར་མཛོད་ཀྱི་ནོར་ཡོད་ཚད་པོ་སྦྱིན་པ་ཤ་སྟག་གཏོང་བས་སྙན་གྲགས་ཀྱིས་འཛམ་གླིང་གི་ས་ཆ་གང་ས་རུ་ཁྱབ་པར་བྱུང་། ཡང་ཡུལ་མཐའ་འཁོབ་ཀྱི་རྒྱལ་ཕྲན་བྱེ་མ་སེ་ལ་ཟེར་བ་ལ་སྡིག་རྒྱལ་ཕྲག་དོག་ཆེན་པོ་ཅན་ཞིག་ཡོད་པ་དེས། རྒྱལ་པོ་ཟླ་འོད་ཀྱིས་དཀོར་མཛོད་ཀྱི་ནོར་དབུལ་ཕོངས་མགོན་མེད་ལ་སྦྱིན་པ་གཏོང་བའི་སྙན་པ་ཐོས་པས་ཕྲག་དོག་གིས་སེམས་མ་བདེ་ནས། རྒྱལ་པོ་ཟླ་འོད་མེད་པར་བྱེད་ཐབས་ཅི་ཞིག་དགོས་སྙམ་ནས་བསམ་བློ་བཏང་ཡང་ཅི་ཡང་མ་དྲན་ལ། མུ་སྟེགས་པའི་མཆོད་གནས་དེ་ཚོར་བློ་འདྲི་བྱས་ཀྱང༌ཐབས་མ་རྙེད་ནས་ཡིད་མུག་སྟེ་གནས་པ་ལ། ཉིན་ཞིག་ཁོ་རང་གི་མངའ་འོག་གི་མི་རྣམས་ལ་དྲིལ་གྱིས་བསྒྲགས་ནས། སུ་ཞིག་གིས་རྒྱལ་པོ་ཟླ་འོད་ཀྱི་མགོ་བཅད་ནས་འདིར་ཁུར་ཡོང་མཁན་ཞིག་ཡོད་ན་རྒྱལ་སྲིད་ཀྱི་ཕྱེད་ཀ་སྦྱིན་ཞེས་སྨྲས་ཀྱང་ཁས་ལེན་བྱེད་མཁན་སུ་ཡང་མེད་པའི་སྐབས་དེར། རི་བྲག་གི་ཁོང་གསེང་ཞིག་ནས་བྲམ་ཟེ་ལེའུ་ཏེ་ཙ་ཟེར་བ་ཞིག་ཡོང་ནས་དེས་ཁས་བླངས་ནས་རྒྱལ་པོ་ཟླ་འོད་བཞུགས་སའི་ཕྱོགས་སུ་སོང་ངོ་། །རྒྱལ་པོ་ཟླ་འོད་བཞུགས་སའི་ཕྱོགས་དེར་ལྟས་ངན་རྣམ་པ་སྣ་ཚོགས་པ་མང་པོ་ཞིག་བྱུང་བ་ནི། རྒྱལ་ཕྲན་བརྒྱད་ཁྲི་བཞི་སྟོང་གི་རྨི་ལམ་དུས་གཅིག་ལ་མཐུན་པར་རྒྱལ་པོའི་གསེར་གྱི་རྒྱལ་མཚན་ཆག་ཡོད་པར་རྨིས་པ་དང་། ཁྱད་པར་དུ་རྒྱལ་པོའི་ཆོས་བློན་ཟླ་བ་ཆེན་པོ་ཟེར་བ་དེའི་རྨི་ལམ་དུ་འདྲེ་ངན་ཞིག་གིས་རྒྱལ་པོའི་གསེར་གྱི་ཅོད་པན་འཕྲོག་སོང་བ་རྨིས་པ་སོགས་རྨི་ལམ་དང་། རྟགས་དང་མཚན་མ་མ་ལེགས་པ་མང་པོ་ཡོང་བ་མངའ་འབངས་ཚང་མ་སེམས་མ་བདེ་བར་གནས་པ་ན། ཅུང་མ་འགོར་བ་བྲམ་ཟེ་ལེའུ་ཏེ་ཙ་༼དྲག་པོའི་མིག་༽ཕོ་བྲང་གི་སྒོ་རུ་ཐོན་པ་ན། ཕོ་བྲང་གི་སྲུང་མ་ལྷ་ཞིག་ཡོད་པ་དེའི་མངོན་ཤེས་ཀྱིས་རྒྱལ་པོའི་དབུ་སློང་མཁན་ཡིན་པ་མཁྱེན་ཏེ་ནང་དུ་མ་མངགས་པ་ན། དེའི་ཚེ་གཙང་རིས་ཀྱི་ལྷ་ཐམས་ཅད་ཀྱིས་རྒྱལ་པོའི་དབུ་སྦྱིན་པ་བཏང་ན་སྦྱིན་པའི་ཕར་ཕྱིན་རྫོགས་པར་ཤེས་ཏེ། རྒྱལ་པོའི་གཟིམ་ལམ་གྱི་ནང་ནས་བྲམ་ཟེ་ལེའུ་ཕོ་བྲང་གི་སྒོ་རུ་ཁྱེད་ཀྱི་དབུ་སློང་བར་ཡོང་འདུག་སྟེ། ཕོ་བྲང་གི་སྒོ་སྲུང་གིས་ཡར་ནང་ལ་མ་མངགས་པར་འདུག་ཅེས་ལོ་རྒྱུས་ཆ་ཚང་བཤད་པས་རྒྱལ་པོ་གཉིད་ལས་སད་དེ་བསམ་བློ་ཞིག་གཏོང་དུས། ངས་ལུས་དང་སྲོག་ཀྱང་སློང་མཁན་ཡོད་ན་སྦྱིན་པའི་དམ་བཅས་ཟིན་པས་ན། སྒོ་ཁའི་བྲམ་ཟེ་ནང་དུ་མངོགས་ཤིག་གསུངས་ཏེ་བློན་པོ་རྣམས་ལ་ནང་དུ་མ་བཏང་ན་མི་ཆོག་པའི་བཀའ་ཕབ་པ་དང་། བློན་པོ་ཐམས་ཅད་ཀྱིས་ནང་དུ་མི་མངག་པ་མ་ཕོད་ནས་རྒྱལ་པོའི་མདུན་དུ་མངགས་པ་དང་། བྲམ་ཟེ་དེས་རྒྱལ་པོ་ལ་དབུ་བསླངས་སྐབས། བློན་པོ་ཟླ་བ་ཆེན་པོ་ཡོང་ནས་རིན་པོ་ཆེ་སྣ་བདུན་རེ་རེ་ཡང་རྒྱལ་པོའི་དབུ་དང་ལྗིད་ཚད་དང་ཆེ་ཆུང་གི་ཚད་མཉམ་པ་ལྔ་བརྒྱ་ལྔ་བརྒྱ་བྲམ་ཟེ་ལ་བྱིན་ནས་རྒྱལ་པོའི་དབུ་ནི་ཤ་ཁྲག་ལས་གྲུབ་པའི་མི་གཙང་བའི་རྫས་ཤིག་ཡིན་ཕྱིར་དེས་ཁྱོད་ལ་དགོས་མཁོ་མེད་པ་དང་། རིན་པོ་ཆེ་འདི་དག་གིས་ཁྱོད་ཀྱི་མི་རབས་མི་རྒྱུད་དང་བཅས་པ་མི་ཚེ་མང་པོར་ཕྱུག་པོ་ཡོང་བ་སོགས་བཤད་ནས་ཐབས་སྣ་ཚོགས་ཀྱིས་བྲིད་ཀྱང་ཁར་མ་ཉན་པར་ཡང་བསྐྱར་རྒྱལ་པོའི་དབུ་བསླངས་པ་དང་། ལྷག་བསམ་ཅན་གྱི་བློན་པོ་དེ་སྙིང་མ་བདེ་བར་སྙིང་གས་ཏེ་ཤི་བར་གྱུར། དེ་ནས་རྒྱལ་པོ་ཟླ་འོད་ཀྱིས་བློན་པོ་ཞིག་ཉིན་རེ་དཔག་ཚད་བརྒྱ་སྟོང་མང་པོ་འགྲོ་ཐུབ་པའི་གླང་པོ་ཆེ་ཞིག་ལ་བསྐྱོན་ཏེ། ཡུལ་གྲུ་མཐའ་དག་ལ་ཆ་རྒྱག་པར་མངགས་ཏེ། ད་ནས་བརྩིས་པའི་ཞག་མ་བདུན་གྱི་མཚམས་ནས་ང་རྒྱལ་པོ་ཟླ་འོད་ཀྱིས་བྲམ་ཟེ་ལེའུ་ལ་དབུ་སྦྱིན་པ་གཏོང་རྒྱུ་ཡིན་པས། ལྟ་འདོད་མཁན་ཡོད་ན་ཤོག་ཅེས་དྲིལ་གྱིས་བསྒྲགས་པས། དེའི་ཉི་མ་བདུན་གྱི་ཉིན་པར་ས་ཐོག་གི་མི་མཆོག་དམན་ཚང་མ་མཉམ་པོར་འདུས་པའི་ཚེ། རྒྱལ་ཕྲན་བརྒྱད་ཁྲི་བཞི་སྟོང་། བློན་པོ་སྟོང་ཕྲག་གཅིག བཙུན་མོ་སྟོང་ཕྲག་ཉི་ཤུ། རྒྱལ་བུ་ལྔ་བརྒྱ་ལ་སོགས་པ་ཐམས་ཅད་ཀྱིས་རང་རང་སོ་སོའི་ངོས་ནས་ཞུ་བ་ཕུལ་བར། ཁྱེད་ཀྱིས་དབུ་སྦྱིན་པ་མི་གཏོང་བར་འཚལ། གཞན་མངའ་འབངས་ལོངས་སྤྱོད་དང་བཅས་པ་ཅི་ཞིག་སྦྱིན་དགོས་ན་ལོས་ཆོག་ཅེས་གསོལ་བ་བཏབ་ཀྱང་མ་གནང་བར་རྒྱལ་པོ་ཟླ་འོད་ཀྱིས་འཁོར་དམར་ནག་གི་ཁྲོམ་འདུས་ས་ནས་འདི་ལྟར་གསུངས་པ། འུ་ཅག་ཐོག་མ་མེད་པ་ནས་འཁོར་བའི་གནས་འདིར་འཁོར་ནས་ངན་སོང་གསུམ་ལ་སོགས་པར་ལུས་གྲངས་མེད་འདི་མ་བླངས་བསམ་པ་ཞིག་ཡོད་པ་མ་ཡིན་ཡང་། ལུས་བླངས་ཚད་ཀུན་ཆུད་ཟོས་དོན་མེད་ཤ་སྟག་ལས་མ་འདས། ད་ངས་ལུས་འདི་བཏང་སྟེ་བླ་ན་མེད་པའི་བྱང་ཆུབ་བསྒྲུབ་པ་ཡིན་པས། བདག་ནམ་ཞིག་སངས་རྒྱས་པ་ན་ཁྱེད་རྣམས་ཀྱང་སྡུག་བསྔལ་གྱི་མཚོ་ལས་ངས་བསྒྲལ་བར་བྱ་ཡི་ཁྱེད་ཅག་གིས་ངས་བྱང་ཆུབ་སྒྲུབ་པ་ལ་གེགས་དང་བར་ཆད་མ་བྱེད་ཅིག་གསུངས་པ་དང་། ཡང་བྲམ་ཟེ་ལ་གསུངས་པར་ཁྱོད་ཀྱིས་ངའི་མགོ་ལེན་པའི་དུས་ལ་བབ་པས་ལོངས་ཤིག་གསུངས་པས། བྲམ་ཟེས་རྒྱལ་བློན་འཁོར་དང་བཅས་པའི་གཟི་བྱིན་མ་བཟོད་དེ། ངས་འདི་ནས་ལེན་པར་མི་བྱ་སྐྱེད་མོའི་ཚལ་གྱི་གླིང་ག་ཞིག་ནས་ལེན་དགོས་པས། ཁྱེད་ཕེབས་པར་ཞུ་ཞུས་པས། རྒྱལ་པོ་དེར་ཕེབས་ནས་སྐྱེད་མོའི་ཚལ་གྱི་ཤིང་གི་ཡལ་ག་ཞིག་ལ་དབུ་བཏགས་ཏེ། ཁྱོད་ཀྱིས་ངའི་མགོ་བཅད་ནས་ངའི་ལག་ཏུ་ཞོག་དང་། ངའི་ལག་ནས་ཁྱོད་ལ་སྟེར་བར་བྱ། སྐྱེས་བུ་དམ་པ་ཐམས་ཅད་ཀྱིས་སྦྱིན་པ་སྦྱིན་སྐབས་དད་པས་སྦྱིན་པ། གུས་པས་སྦྱིན་པ། རང་གི་ལག་ནས་སྦྱིན་པ། གཞན་དག་ལ་མི་གནོད་པར་སྦྱིན་པ་སོགས་ལྔ་ཚང་དགོས་པས། ངས་ཁྱོད་ལ་མགོ་སྦྱིན་པའི་བསོད་ནམས་འདིས་ཁམས་གསུམ་གྱི་བདེ་བའི་ལོངས་སྤྱོད་འདོད་པའི་ཕྱིར་བྱིན་པ་མིན། འགྲོ་བ་སེམས་ཅན་མང་པོ་ཞིག་སྐྱོབ་པའི་ཆེད་དུ་བླ་ན་མེད་པའི་བྱང་ཆུབ་འདོད་ནས་སྦྱིན་པ་ཡིན་གསུངས་པ་དང་། དེ་ནས་བྲམ་ཟེས་རལ་གྲི་གནམ་དུ་ཕྱར་བ་ན། ཤིང་གི་ལྷ་མོས་ཐལ་ལྕག་ཅིག་བརྒྱབ་པས་བྲམ་ཟེ་ས་ཐོག་ཏུ་འགྱེལ་བ་ན། རྒྱལ་པོས་ཤིང་གི་ལྷ་མོ་ལ་གསུངས་པར་འདས་པའི་དུས་སུ་ཤིང་སྡོང་པོ་འདིའི་དྲུང་ནས་ངས་མགོ་ཐེངས་མ་དགུ་བརྒྱ་དགུ་བཅུ་གོ་དགུ་སྦྱིན་པ་བཏང་བ་ཡིན། ད་རེས་འདི་བརྩིས་ན་སྟོང་ཕྲག་གཅིག་ཚང་ཞིང་སྦྱིན་པའི་ཕར་ཕྱིན་ཡོངས་སུ་རྫོགས་པ་ཡིན་པས་བདག་གི་བྱང་ཆུབ་ལ་བར་ཆད་མ་གཏོང་ཞིག་གསུངས་པ་དང་། དེ་ནས་བྲམ་ཟེ་ཡར་ལ་ཡོང་སྟེ་རལ་གྲིས་རྒྱལ་པོའི་དབུ་བཅད་ནས་དབུ་ཕྱག་གི་ནང་དུ་ལྷུངས་པ་དང་ས་རྣམ་པ་དྲུག་ཏུ་གཡོས་སོ། །དེ་ལྟར་རྒྱལ་པོ་ཟླ་འོད་ཀྱིས་དབུ་སྦྱིན་པ་བཏང་བས་སྦྱིན་པའི་ཕར་ཕྱིན་ཡོངས་སུ་རྫོགས་སོང་བ་ཡིན་ནོ། །གཏམ་སྙན་དེས་འཛམ་གླིང་གི་ས་ཆ་ཡུལ་གྲུ་ཐམས་ཅད་ལ་ཁྱབ་པས། རྒྱལ་པོ་བྱེ་མ་སེ་ན་ལྷག་ཏུ་ཕྲག་དོག་འབར་བའི་དབང་གིས་སྙིང་གས་ནས་ཤི་བ་དང་། བྲམ་ཟེས་རྒྱལ་པོའི་དབུ་ཁྱེར་ཏེ་སོང་བ་རྒྱལ་ཁམས་ཐམས་ཅད་ཀྱིས་ངན་སྨོད་བྱས་ནས་ཁ་ཟས་སྟེར་མཁན་ཙམ་ཞིག་ཀྱང་མ་རྙེད་པར་ཉམ་ཐག་གི་གནས་སུ་ལྷུང་སོང་བ་དང་། རྒྱལ་པོའི་དབུ་ཡང་རུལ་ཏེ་འདོར་དགོས་ཐུག་ཅིང་། དེའི་ཐོག་རྒྱལ་པོ་བྱེ་མ་སེ་ན་ཤི་བ་གོ་བས་ཡི་མུག་ནས་མྱ་ངན་གྱིས་མནར་ཏེ་སྙིང་ཚལ་བ་བདུན་དུ་གས་ཤིང་ཁ་ནས་ཁྲག་བསྐྱུགས་ཏེ་ཚེ་འཕོས་སོ། །རྒྱལ་པོ་བྱེ་མ་སེ་ན་དང་བྲམ་ཟེ་གཉིས་ཀས་མཚམས་མེད་ཀྱི་ལས་བསགས་པས་དམྱལ་བ་མནར་མེད་དུ་སྐྱེས་ཤིང་། རྒྱལ་པོ་ཟླ་འོད་ཀྱི་ཆེད་དུ་སེམས་ནད་བྱས་ཏེ་ཤི་སོང་བ་ཚང་མ་མཐོ་རིས་ཀྱི་ལྷ་གནས་སུ་སྐྱེས་པ་ཡིན། དེའི་སྐབས་ཀྱི་རྒྱལ་པོ་ཟླ་འོད་དེ་སངས་རྒྱས་བཅོམ་ལྡན་འདས་དང༌། རྒྱལ་པོ་བྱེ་མ་སེ་ན་བདུད་སྡིག་ཏོ་ཅན་དང་། བྲམ་ཟེ་དེ་ལྷས་བྱིན། ཤིང་གི་ལྷ་མོ་དེ་མོའུ་འགལ་གྱི་བུ། བློན་པོ་ཟླ་བ་ཆེན་པོ་དེ་འཕགས་པ་ཤཱ་རིའི་བུ་ཡིན་པར་གསུངས་སོ། །དེ་ལྟ་བུའི་སྒོ་ནས་སྦྱིན་པའི་ཕར་ཕྱིན་རྫོགས་དགོས་པ་ཡིན་ཡང་། རང་ཅག་སོ་སོའི་སྐྱེ་བོ་ལས་དང་པོ་བ་ཞིག་གིས་དང་པོ་ཉིད་ནས་མགོ་དང་ཡན་ལག་གི་སྦྱིན་པ་གཏོང་བའི་སྐབས་ལ་མ་སླེབས་ཀྱང་། ཆོས་དང་ཟང་ཟིང་གི་སྦྱིན་པ་ནུས་པས་ལྕོགས་ཚད་རེ་ཡིས་འགོ་བརྩམས་ཏེ། མཐའ་ཡས་སེམས་ཅན་གྱི་དོན་དུ་གཏོང་པ་ཆེན་པོའི་སྒོ་འཕར་ཕྱེས་ཏེ་དཔའ་ཆེན་སེམས་དཔའི་རྣམ་ཐར་གྱི་རྗེས་སུ་འཇུག་དགོས་པ་ཡིན་ནོ། །སྡོམ་པ་སྲུང་ཞིང་ཞེས་པའི་སྡོམ་པ་འདི་ལ་སྤྱིར་ན་སོ་ཐར་རིགས་བདུན་གྱི་རང་ལམ་གྱི་བསྲུང་བྱའི་རྣམ་གྲངས་མང་པོ་ཡོད་པ་ལས། རང་ཉིད་ཀྱིས་མཁན་སློབ་ཀྱི་མདུན་ནས་གང་བླངས་ཤིང་ཁས་བླངས་ཏེ་དམ་བཅས་པའི་སྡོམ་པ་དེ་སྲོག་ལ་བབ་ཀྱང་གཏོང་མི་རུང་བ་སྟེ། ཚུལ་ཁྲིམས་བསྲུངས་པའི་ཕན་ཡོན་དེ་བསམ་གྱིས་ཀྱང་མི་ཁྱབ་ཅིང་། ཚུལ་ཁྲིམས་བསྲུངས་པའི་དགེ་བ་རྒྱ་ཆེན་བསྒྲུབས་པའི་གང་ཟག་དེ་ལ་རྗེས་སུ་ཡི་རང་བྱེད་དགོས། སྡོམ་པ་བསྲུངས་པའི་དཔེ་མཚོན་གྱི་གཏམ་རྒྱུད། སྔར་ཉན་ཐོས་འོད་སྲུང་ཆེན་པོ་འདི་བྲམ་ཟེའི་བུ་ནྱ་གྲོ་དྷ་རུ་སྐྱེས་ཤིང་། དགེ་སློང་མ་སེར་སྐྱ་བཟང་མོ་དེ་བྲམ་ཟེ་སེར་སྐྱའི་བུ་མོར་སྐྱེས་པའི་ཚེ། ཕ་མ་དག་གིས་མི་འདོད་བཞིན་དུ་གཉེན་དུ་བསྒྲིགས་ནས་ལོ་བཅུ་གཉིས་ཀྱི་བར་དུ་ཁྱིམ་ཐབ་གཅིག་ལ་བཞག་ཀྱང༌། དེ་གཉིས་ནི་སྔར་ནས་ཚུལ་ཁྲིམས་བསྲུངས་ཤིང་འདོད་པའི་ཉེས་དམིགས་ཤེས་པའི་སྐྱེས་བུ་དམ་པ་གཉིས་ཡིན་པའི་སྟབས་ཀྱིས་ཚུལ་ཁྲིམས་ལ་ཉེས་སྐྱོན་གཏན་ནས་མ་བྱུང་སྟེ། མཐར་རབ་ཏུ་བྱུང་བའི་གནས་སྐབས་སུ་སངས་རྒྱས་ཀྱི་རྒྱལ་ཚབ་བསྟན་པ་གཏད་སའི་གཏད་རབས་དགྲ་བཅོམ་འོད་སྲུང་ཆེན་པོ་དང་། དགྲ་བཅོམ་མ་སེར་སྐྱ་བཟང་མོ་གཉིས་སུ་གྱུར་སོང་བ་ལྟ་བུ་དང་། གཞན་ཡང་ཚུལ་ཁྲིམས་བསྲུངས་པའི་ཕན་ཡོན་ནི། ཚུལ་ཁྲིམས་ཡང་དག་པར་ལྡན་པའི་མདོ་ལས། ཚུལ་ཁྲིམས་ལྡན་པ་མཐོ་རིས་འགྲོ་བའི་རྒྱུ། །ཚུལ་ཁྲིམས་བསྲུངས་པས་མྱ་ངན་འདའ་ཐོབ་འགྱུར། །ཇི་ལྟར་མིག་མེད་གཟུགས་མཐོང་མི་རུང་ལྟར། །དེ་བཞིན་ཚུལ་ཁྲིམས་མེད་ན་ཆོས་མི་མཐོང་། །ཇི་ལྟར་རྐང་མེད་ལམ་འཇུག་ག་ལ་ནུས། །དེ་བཞིན་ཚུལ་ཁྲིམས་མེད་ན་ཐར་མི་འགྱུར། །ཞེས་གསུངས་པ་ཡིན། དགེ་ཚུལ་སློང་གི་སྡོམ་པ་བླངས་པའི་དགེ་འདུན་པས་ཚུལ་ཁྲིམས་སྲོག་གིས་བསྲུང་དགོས་པ་སྨོས་མ་དགོས་པ་ནི། དགེ་ཚུལ་ཞིག་གིས་སྡོམ་པ་བསྲུང་བའི་ཆེད་དུ་རང་སྲོག་བཏང་བའི་ལོ་རྒྱུས་ཡོད་པ་ལྟ་བུ་དང་། ལུས་རྟེན་ཁྱིམ་པ་ཡིན་ཡང༌དགེ་བསྙེན་གྱིས་བསྲུང་རྒྱུའི་བསླབ་པའི་ཁྲིམས་སྲོག་གཅོད་མ་བྱིན་ལེན། ལོག་གཡེམ་མི་ཆོས་བླ་མའི་རྫུན། ཆང་དང་ལྔ་པོ་རབ་ན་གཏན་ཁྲིམས་བྱས་ཏེ་བསྲུང་རྒྱུ། མིན་ཡང་སྟོན་པའི་དུས་ཆེན་བཞིའམ་ཉ་སྟོང་བརྒྱད་གསུམ་ལ་སོགས་པར་བསྙེན་གནས་ཡན་ལག་བརྒྱད་པ་ཉིན་ཞག་གི་མཐའ་ཅན་རེ་བསྲུངས་ཐུབ་ན་ཕན་ཡོན་དང་དགོས་འབྲེལ་རྒྱ་ཆེན་པོ་ཡོད་པ་ཡིན། སྲོག་གཅོད་སྤངས་པས་རྡོ་རྗེའི་སྐུ་འགྲུབ། མ་བྱིན་ལེན་སྤངས་པས་མཚན་བཟང་ཐོབ། ལོག་གཡེམ་སྤངས་པས་དབང་པོ་ཚང་ཞིང་ལུས་རྒྱས། ཆང་སྤངས་པས་མཛེས་ཤིང་བཀྲག་མདངས་ལྡན་ལ་འཁྲིལ་བག་ཆགས་པ་ལ་སོགས་པའི་ཡོན་ཏན་དེ་དག་ཐོབ་པ་དང་། བསྐལ་བ་བཟང་པོའི་དུས་སུ་ཚུལ་ཁྲིམས་བསྲུངས་པ་བས། དུས་སྙིགས་མ་ལྔ་བདོའི་གནས་སྐབས་འདི་ལྟ་བུར་ཚུལ་ཁྲིམས་བསྲུངས་ན་ལྷག་པར་དུ་ཕན་ཡོན་ཆེ་བའི་ཚུལ། མདོ་སྡེ་ཏིང་འཛིན་རྒྱལ་པོ་ལས། བསྐལ་བ་གང་གཱའི་ཀླུང་གི་བྱེ་སྙེད་དུ། །དྭངས་བའི་སེམས་ཀྱིས་ཟས་དང་སྐོམ་རྣམས་དང༌། །གདུགས་དང་བ་དན་མར་མེའི་ཕྲེང་བ་ཡིས། །སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས། །གང་ཞིག་དམ་ཆོས་རབ་ཏུ་འཇིག་པ་དང་། །བདེར་གཤེགས་བསྟན་པ་ནུབ་པར་འགྱུར་བའི་ཚེ། །ཉིན་ཞག་དུ་ནི་བསླབ་པ་གཅིག་སྤྱོད་ན། །བསོད་ནམས་དེ་ནི་དེ་བས་ཁྱད་པར་འཕགས། །ཞེས་གསུངས་པ་ཡིན། གཞན་ཡང་དག་པའི་ཞིང་ཁམས་གཞན་ཞིག་ནས་བསྐལ་བ་བརྒྱ་སྟོང་གི་བར་དུ་ཚངས་སྤྱོད་བསྲུངས་པའི་དགེ་བ་བས། ཞིང་འདི་ནས་སྔ་དྲོ་ཙམ་ཞིག་ཏུ་བསྲུངས་པའི་ཕན་ཡོན་ཆེ་བ་ཡིན་པས། ཁྱིམ་པ་ཕོ་མོ་ཐམས་ཅད་ཀྱིས་བསྙེན་གནས་ཀྱི་སྡོམ་པ་འདི་བསྲུངས་ན་ཕན་ཡོན་ལྷག་པར་ཆེ་བ་ཡིན། དེ་ཡང་ཡན་ལག་བརྒྱད་པོ་མ་ཉམས་པར་བསྲུང་དགོས་ལ། ཡན་ལག་བརྒྱད་པོ་མ་ཉམས་པར་བསྲུངས་ན་ལྷ་ཡུལ་དུ་སྐྱེ་བ་ལ་སོགས་པའི་ཕན་ཡོན་ཡོད་པ་དང་། དེ་ལས་སྣ་རེ་རེ་ཙམ་ལས་བསྲུང་མ་ཐུབ་པར་ཉམས་ན། འབྲས་བུ་བདེ་སྡུག་སྤེལ་མ་མྱོང་བའི་ཚུལ། གནའ་སྔ་མོར་རྒྱ་གར་ནས་བྲམ་ཟེ་སྤྲང་པོ་ཞིག་གིས་ཁྱིམ་བདག་མགོན་མེད་ཟས་སྦྱིན་གྱིས་རབ་ཏུ་བྱུང་བའི་དགེ་འདུན་པ་དང་། ཁྱིམ་པ་གསོ་སྦྱོང་ལེན་མཁན་རྣམས་ཀྱི་སྦྱིན་བདག་བྱས་ནས་དེ་དག་བསོད་སྙོམས་མང་པོ་སྦྱིན་པར་མཐོང་ནས། ཁོ་རང་གིས་གསོ་སྦྱོང་ཞིག་ལེན་དགོས་སྙམ་སྟེ་དེར་སོང་ནས་གསོ་སྦྱོང་བླངས་ཤིང་། དགོང་མོ་ཁོ་རང་ས་ཆ་ཁུག་ཀྱོག་ཅིག་ལ་ཐོན་དུས་གནས་ཚང་མ་རྙེད་པར་མུན་འགོ་རུབ་རྩིས་བྱེད་སྐབས། བྲམ་ཟེའི་ཁྱིམ་ཚང་ཞིག་ཡོད་པ་དེར་གནས་ཚང་གཡར་ཏེ་དེ་ནུབ་དེར་བསྡད་པ་ན། དེ་ཚང་གིས་ཟ་མ་བྱིན་པ་ན། ཁོས་དེ་རིང་གསོ་སྤྱོང་བླངས་པས་ཕྱི་དྲོའི་ཁ་ཟས་ཟ་བ་མིན་ཞེས་སྨྲས་པ་ན། དེ་ན་རེ་གལ་ཏེ་ཟ་མ་མ་ཟོས་ན་ངེད་ཚང་ལ་མ་སྡོད་པར་སོང་ཟེར་བས་ནམ་གུང་ཞིག་ལ་སྒོར་ཕུད་པར་སྐྲག་ནས་ཟས་ཟོས་པས་གསོ་སྦྱོང་རལ་ལོ། །སྤྱིར་ན་དེ་སུམ་ཅུ་རྩ་གསུམ་ལ་སྐྱེ་བ་ཡིན་ཡང་། དེའི་ཚེ་བསྙེན་གནས་ཀྱི་སྡོམ་པ་སྣ་གཅིག་ཉམས་སོང་བས་རྒྱལ་ཆེན་རིགས་བཞིའི་ལྷ་ཡུལ་དུ་སྐྱེས་སོ། །སྔར་མི་ཡུལ་ནས་གསོ་སྦྱོང་ཉམས་པའི་རྐྱེན་གྱིས་ལྷ་ཡུལ་ནས་གསོ་སྦྱོང་རལ་ཞེས་པའི་མིང་ངན་ཡང་ཐོགས་པ་དང་། ལོངས་སྤྱོད་དང་གཟི་བརྗིད་ཀྱང་ལྷ་གཞན་ལས་དམན་པ་ངོ་ཚ་དགོས་པ་ཞིག་ཏུ་གྱུར་པ་ཡིན། དེ་བཞིན་དུ་སྡོམ་པ་སྣ་རེ་ཉམས་ན་དེའི་ཚོད་ཀྱིས་རྣམ་སྨིན་མྱོང་རབས་ལོ་རྒྱུས་ཀྱང་མང་ངོ་། །དེ་ནས་བདེན་པར་སྨྲ་བ་དང་ཞེས་པ་སྟེ། རྫུན་སྤངས་པས་མ་ཚད་བདེན་པར་སྨྲ་བ་ལ་འབད་ན་བསོད་ནམས་ཆེ་བ་ཡིན་ལ་དེ་ནི་ངག་གི་དགེ་བ་ཡིན། ཚེ་གཅིག་ལ་རྫུན་མི་སྨྲ་བར་བདེན་པའི་ཚིག་ཏག་ཏག་སྨྲ་བའི་མི་དེ་ལྟ་བུ་ལ་ཐམས་ཅད་ཡིད་ཆེས་ཤིང་དགའ་བ་དང་། མི་དེ་ལྟ་བུ་ནི་ལྷད་མེད་གསེར་དང་འདྲ་བ་ཞེས་པ་དེ་ཡིན། ཚོམས་ལས་ཀྱང༌། བདེན་པའི་ཚིག་ནི་བདུད་རྩི་སྟེ། །བདེན་པའི་ཚིག་ནི་བླ་མེད་ཡིན། །དོན་དང་ཆོས་ལ་རབ་གནས་པ། །བདེན་པ་ཡིན་ཞེས་དམ་པ་གསུངས། །ཞེས་གསུངས་སོ། །འཁོན་པ་སྡུམ་ཞིང་ཞི་དུལ་དྲང་པོར་སྨྲ། །ཞེས་པ་ནི། འཁོན་ཞེ་འགྲས་ཀྱིས་འཁྲུག་རྩོད་བྱུང་ན་ལུས་ངག་ཡིད་གསུམ་གྱི་མི་དགེ་བ་སྣ་ཚོགས་འབྱུང་བ་ཡིན་པས་ན། ནང་འཁྲུག་ཞེ་འཁོན་གྱི་རིགས་ཐམས་ཅད་མེད་པར་བྱས་ནས། ཕན་ཚུན་གྱི་བར་དགྲ་བོར་གྱུར་པའི་ཁག་གཉིས་ཚུར་ལ་འགྲིག་མཐུན་གྱིས་མཛའ་བཤེས་ཀྱི་འབྲེལ་བ་མཐུད་དེ་འདུམ་པའི་ཆེད་དུ་འཁོན་པ་སྡུམ་པར་བྱེད་པ་དེ་ནི་དགེ་ལས་ཁྱད་པར་ཅན་ཞིག་ཡིན། དེ་ཆེ་འདོད་ཀྱི་གཙོ་བོ་དང་། ཟ་འདོད་ཀྱི་བར་པ་མིན་པར་ཀུན་སློང་རྣམ་པར་དག་པ་རང་འདོད་དང་ཕྱོགས་ཞེན་མ་འདྲེས་པའི་བསམ་པ་བཟང་པོའི་ངང་ནས། ཕྲ་མ་སྤངས་ཏེ་འཁོན་པ་བསྡུམས་ན་མི་དགེ་བ་མང་པོ་ཞིག་དེའི་ཁོངས་ནས་ཞི་བ་ཡིན་པས། རང་གིས་འཁོན་པ་བསྡུམས་མ་ཐུབ་ནའང་གཞན་གྱིས་འཁོན་པ་བསྡུམ་པ་ལ་མི་དགའ་བ་མེད་པར་མ་ཟད་རྗེས་སུ་ཡི་རང་བྱེད་དགོས། དེ་ནི་རྣམ་དཀར་གྱི་དགེ་བ་ཕུལ་དུ་བྱུང་བ་ཞིག་ཡིན་ཏེ། དྲན་པ་ཉེར་བཞག་ལས། གྲོགས་པོ་གཉེན་བཤེས་རྩ་ལག་དང༌། །ཕན་ཚུན་མི་མཐུན་གྱུར་པ་ལ། །གང་ཞིག་ཤིན་ཏུ་སྡུམ་བྱེད་པ། །ལྷ་མི་རྣམས་ཀྱི་ནང་དུ་འགྲོ། །ཞེས་གསུངས་སོ། །ཞི་དུལ་དང་ལྡན་པའི་ཚིག་གིས་དྲང་པོར་སྨྲ་བ་ནི། ཆགས་སྡང་མེད་པས་སེམས་རྒྱུད་ཞི་བ། ངང་རྒྱུད་འཇམ་ཞིང་དུལ་བ། བབས་ཆགས་པ་སྟེ། དེ་འདྲའི་ཁ་ཞེ་གཉིས་ཀ་འཇམ་པའི་མི་ནི་མང་པོའི་ནང་དུ་རེ་གཉིས་ཙམ་ཡོད་པའི་སྲིད་མཐའ་མ་བཀག་པ་ཙམ་ཞིག་ཡིན་ལ། མི་འགའ་རེའི་ལྟར་སྣང་ལ་འདི་འདྲའི་མི་རྒྱུད་འཇམ་ཞི་དུལ་གཉིས་འཛོམས་མཐོང་དཀའ་འོ་སྙམ་པ་ལྟ་བུ་ཡང་། ཡུན་རིང་པོར་གཤིབ་ན་དེ་ལས་ལྡོག་སྟེ། སྔར་གྱི་མི་དེ་ལས་གཞན་དུ་འགྱུར་འགྲོ་བ། ཁྱད་པར་དུ་རྐྱེན་དང་ཐུག་ན་གཤིས་སྤྱོད་ངན་པ་དཔེར་ན། གཡི་དཀར་གྱི་སེན་མོ་བཞིན་དུ་དུས་རྒྱུན་མཐོང་དུ་མེད་ལ་མཚམས་རེར་མདུན་ན་མངོན་ཡོང་བའི་མི་ཁོག་ནག་དེ་ལ་གཡོ་ཅན་བྱི་ལའི་བརྟུལ་ཞུགས་ཅན་ཞེས་པ་དེ་ཡིན། བྱི་ལ་རྣམས་དུས་རྒྱུན་འགྲོ་འདུག་གི་ཀུན་སྤྱོད་འཇམ་ཞིང་དལ་བ་ཡིན་ན་ཡང་། བྱི་བ་ཞིག་དང་འཕྲད་ན་ཀུན་སྤྱོད་ཨེ་འཇམ་གསལ་ཡོང་བ་རེད། དེ་ལྟ་བུའི་མིང་ལ་གཡོ་སྒྱུ་ཅན་ནམ་གཡོན་ཅན་ཞེས་ཟེར་བ་ཡིན། གཡོན་ཅན་སྙན་པར་སྨྲ་བ་ནི། །རང་དོན་ཡིན་གྱི་གུས་ཕྱིར་མིན། །ཞེས་གསུངས་ཏེ་གཡོ་ཅན་གྱིས་འཇམ་འཇམ་སྙན་སྙན་བྱེད་པ་ནི་ཁྱོད་ལ་གུས་ཞབས་ཆེ་བས་མ་ཡིན་པར་ཁོ་རང་གིས་རང་དོན་ཞིག་མ་འགྲུབ་པར་ཡོད་པ་ཡིན་ཞེས་པའི་དོན། དེ་འདྲ་དེ་ལ་སླུ་རུ་མི་འཇུག་པར་དོགས་ཟོན་བྱེད་དགོས་པ་ཡིན། དེ་ལྟར་མ་ཡིན་པར་གཤིས་སྤྱོད་ལམ་གཉིས་ཀ་བཟང་ཞིང༌དྲང་ལ་གཡོ་སྒྱུ་མེད་པ་ལ་དྲང་པོར་སྨྲ་བ་ཟེར་བ་ཡིན་པས། རྟག་ཏུ་ངག་ཚིག་འཁྱོག་པོ་སྤང་དགོས། རང་གར་དོན་མེད་དུ་རྫུན་བཤད་མཁན་གྱི་མི། ཡར་ལ་འགྲོ་ན་མར་ལ་འགྲོ་བ་ཡིན་ཟེར་མཁན། བྱ་རོག་ལྟར་དུ་དོན་མེད་དུ་དོགས་འདྲོག་བྱེད་འདུག་པ་དེ་དག་ཀྱང་གཡོ་ཅན་གྱི་ཕྱོགས་སུ་གཏོགས་པ་ཡིན། ཡང་བྱང་ཆུབ་སེམས་དཔའ་ཐབས་ལ་མཁས་པའི་མཛད་པ་དང་དགོས་པ་ཆེན་པོ་ལྡན་ན། དགག་བྱ་དོར་དགོས་པའི་རིགས་ཀྱང་ཡོད་པས། ཐབས་མཁས་དང་མགོ་བདེ་ནོར་མི་ཉན། གཡོ་ཅན་དང་མཛངས་པ་ནོར་མི་ཉན། དེས་ན་དུས་རྟག་ཏུ་འཁྱོག་པོའི་ལས་ལམ་དང་ངག་ཚིག་སྤོང་པ་ལ་བརྩོན་ཞིང་། ཞི་དུལ་དྲང་པོར་རང་གིས་སྨྲ་བ་དང་། གཞན་གྱིས་དེ་ལྟར་བྱེད་པ་ལ་རྗེས་སུ་ཡི་རང་བྱེད་དགོས་པ་ཡིན། དོན་དང་ལྡན་པའི་གཏམ་བརྗོད་འདོད་པ་ཆུང༌། །ཞེས་གསུངས་ཏེ། དེ་ཡང་རྒྱལ་སྲས་འཕགས་པ་ཐོགས་མེད་ཀྱིས། །སྨྲ་བ་མང་པོས་མི་དགེ་སྐྱེད་བྱེད་ཅིང༌། །དེ་མ་བསྐྱེད་ཀྱང་དོན་མེད་དུས་འདའ་བས། །རང་དང་གཞན་ལ་ཕན་ངེས་མ་གཏོགས་པ། །སྨྲ་བརྗོད་སྤངས་པ་བརྩོན་འགྲུས་གྲོགས་སུ་གྱིས། །ཞེས་གསུངས་པ་ཡིན་པས། གདུལ་བྱ་ཆོས་ལ་བསྐུལ་བའི་གཏམ་དང་། སྡུག་བསྔལ་ཅན་གྱི་ན་ཚ་ཞི་བའི་གཏམ། ཡིད་ཆད་མགྲོན་པོ་ངལ་འཚོ་བའི་གཏམ་ལ་སོགས་པ་བཤད་ན་གཞན་ལ་ཕན་ཐོགས་ཤིང་། འཕྲལ་ཕུགས་ཀྱི་ཕན་བདེ་འགྲུབ་པ་ཡིན། དེ་ལྟ་བུའི་གོང་དུ་བཤད་པའི་ལུས་ཀྱི་དགེ་བ་གསུམ་དང་། དེའི་ཐོག་ལ་ངག་གི་དགེ་བ་བཞི་བསྣན་པས་ལུས་ངག་གི་དགེ་བ་བདུན་པོ་སྒྲུབ་མཁན་ཐམས་ཅད་ལ་སྙིང་ཐག་པས་རྗེས་སུ་ཡི་རང་བྱེད་པ་དང་། དེ་བཞིན་དུ་ཡིད་ཀྱི་དགེ་བ་བརྣབ་སེམས་སམ་རློམ་སེམས་སྤངས་ཏེ་རྒྱུ་རྫས་ལོངས་སྤྱོད་ལ་འདོད་པ་ཆུང་བའི་ཆོག་ཤེས་བསྟེན་དགོས། བསོད་ནམས་ཡོད་ན་མི་འདོད་བཞིན་དུ་འབྱུང༌། །བསོད་ནམས་མེད་ན་འདོད་པས་འོང་བ་དཀའ། །ཞེས་གསུངས་པ་ཡིན། ནོར་ལོངས་སྤྱོད་རང་ལ་ཡོད་པ་དེའི་ཐོག་ཆོག་ཤེས་བྱེད་ཅིང་མེད་པ་ཞིག་མི་འཚོལ་བར་འདོད་པ་ཆུང་ངུ་བྱེད་ཐུབ་ན་བདེ་བ་དེའི་ཚོད་ཀྱིས་ཆེ་བ་ཡིན། ནོར་ཡོད་པའི་བདེ་བ་ཙམ་ལ་སྤྱོད་མཁན་མང་ན་ཡང༌། འདོད་ཆུང་ཆོག་ཤེས་ཀྱི་བདེ་བར་སྤྱོད་མཁན་ཤིན་ཏུ་ནས་ཀྱང་དཀོན་པ་ཡིན། ཆོག་ཤེས་ཀྱི་བདེ་བ་ནི་ལྷའི་དབང་པོ་ཚངས་པ་དང་བརྒྱ་བྱིན་གྱིས་ཀྱང་རྙེད་དཀའ་བ་ནི། རྒྱལ་སྲས་ཞི་བ་ལྷས། ཆོག་ཤེས་བདེ་སྐྱིད་གང་ཡིན་པ། །དབང་པོས་ཀྱང་ནི་རྙེད་པར་དཀའ། །ཞེས་གསུངས་པ་ཡིན། རང་རྒྱུད་ལ་ཆོག་ཤེས་མེད་པར། འདོད་པ་ཁ་ཡན་ལ་ཤོར། བདག་མེད་ལང་ཤོར་དུ་མངགས་ན། གསེར་རི་བོ་ཙམ་ཞིག་ཡོད་ཀྱང་དེས་འདོད་པའི་ཁ་མི་གང་ཞིང་། ཁྱད་པར་དུ་རབ་ཏུ་བྱུང་བའམ་ཆོས་ལ་ཞུགས་པའི་གང་ཟག་ཅིག་ཡིན་ཚེ། དུས་དང་རྣམ་པ་ཀུན་ཏུ་ཆོག་ཤེས་བསྟེན་པ་དེ་ཇོ་བོ་བཀའ་གདམས་པའི་བླ་མ་ཐམས་ཅད་ཀྱིས་ཕ་ནོར་བུ་སྐལ་ལ་བཞག་པ་ཡིན། ནོར་ཐམས་ཅད་ཀྱི་ནང་ནས་མཆོག་ཏུ་གྱུར་པའི་ནོར་མཆོག་ཆོག་ཤེས་ཡིན་པས་དེ་དང་དུ་ལེན་པ་ནི་མེད་དུ་མི་རུང་བའོ། །བྱམས་དང་སྙིང་རྗེ་སྒོམ་ཞིང་ཆོས་ལ་སྤྱོད། །དགེ་བ་དེ་རྣམས་ཀུན་ལ་ཡི་རང་ངོ་། །ཞེས་གསུངས་ཏེ། མ་སེམས་ཅན་ཐམས་ཅད་ལ་ཡིད་འོང་གི་བྱམས་པ་དང་བརྩེ་བའི་སྙིང་རྗེ་དུས་རྒྱུན་དུ་སྒོམ་པར་བྱེད་པ་ནི། ཐེག་ཆེན་ལམ་གྱི་གཞུང་རྟ་དོན་གཉིས་ལྷུན་གྲུབ་ཀྱི་གཞི་ཡིན་པས། ཕ་བསད་ཀྱི་དགྲ་བོ་ལག་དམར་ཞིག་ཡིན་ཡང་། རྨོངས་པ་མ་རིག་པའི་གཞན་དབང་དུ་གྱུར་ཏེ། ལས་བྱ་བ་དེ་དང་དེ་ལྟ་བུར་གྱུར་པ་ལས། སྔོན་ཆད་བདག་གི་གཉེན་ཡང་ཡིན་པ་དང་། གནོད་ཕར་ལ་བསྐྱལ་ན་གནོད་པའི་ལན་ཆགས་རང་ལ་ཚུར་འཁོར་བ་ཡིན་པས། འདི་ནི་ཞེ་སྡང་སྐྱེ་སའི་ཡུལ་ཞིག་མིན་ནོ་སྙམ་ནས། གནོད་སེམས་མེད་པས་མ་ཚད་སེམས་ཅན་འདི་དག་ཐམས་ཅད་བདེ་བ་དང་ལྡན་འདོད་ཀྱི་བྱམས་པ་དང་། འདི་དག་ཐམས་ཅད་སྡུག་བསྔལ་དག་དང་བྲལ་ན་ཅི་མ་རུང་སྙམ་པའི་སྙིང་རྗེ་སྟེ། དེ་འདྲའི་སེམས་ལན་རེ་ཙམ་བསྒོམས་ན་ཡང་དགེ་བ་བསམ་གྱིས་མི་ཁྱབ་པ་བསགས་པ་ཡིན་པ་ནི། ཚོམས་ལས། ཟླ་བ་རེ་རེར་མཆོད་སྦྱིན་སྟོང་། །ལོ་བརྒྱར་བྱེད་པ་གང་ཡིན་དེས། །སེམས་ཅན་རྣམས་ལ་བྱམས་པ་ཡི། །བཅུ་དྲུག་ཆར་ནི་མི་ཕོད་དོ། །ཟླ་བ་རེ་རེར་མཆོད་སྦྱིན་སྟོང་། །ལོ་བརྒྱར་བྱེད་པ་གང་ཡིན་དེས། །སེམས་ཅན་རྣམས་ལ་སྙིང་བརྩེ་བའི། །བཅུ་དྲུག་ཆར་ནི་མི་ཕོད་དོ། །ཞེས་གསུངས་པ་སྟེ། དེ་ཡང་ཟླ་བ་རེ་རེའི་ནང་དུ་ཆག་མེད་ཀྱིས་མཆོད་པ་དང་སྦྱིན་པ་ཐེངས་མ་སྟོང་ཕྲག་ཏུ་ལོང་བ་རྒྱུན་མི་ཆད་པར་མི་ལོ་བརྒྱར་བྱེད་པ་གང་ཡིན་པ་དེས། བྱམས་པ་ཐེངས་གཅིག་བསྒོམས་པའི་དགེ་བ་དེའི་བཅུ་དྲུག་གི་ཆ་གཅིག་ཙམ་ལའང་འགྲན་མི་ཕོད་པ་དང་། དེ་བཞིན་དུ་སྙིང་རྗེ་ལན་གཅིག་བསྒོམས་པའི་བཅུ་དྲུག་གི་ཆར་ཡང་མི་ཕོད་པ་ཡིན་ཞེས་གསུངས་པ་ཡིན། དེས་ན་སངས་རྒྱས་བཅོམ་ལྡན་འདས་ཀྱིས། སངས་རྒྱས་ཀྱི་གོ་འཕང་ཐོབ་པར་འདོད་པ་རྣམས་ཀྱིས་ཆོས་མང་པོ་ལ་བསླབ་པར་མི་བྱ། ཆོས་གཅིག་ལ་བསླབ་པར་བྱའོ། །གཅིག་དེ་གང་ཞེ་ན། སྙིང་རྗེ་ཆེན་པོའོ་ཞེས་གསུངས་པ་ཡིན། དེས་ན་ལོག་པར་ལྟ་བ་སྤངས་ཏེ། ལས་རྒྱུ་འབྲས་ལ་སྙིང་ནས་ཡིད་ཆེས་བསྐྱེད་ནས་དམ་པའི་ཆོས་ལ་ལོངས་སྤྱོད་དགོས། དེ་ནི་ཡིད་ཀྱི་དགེ་བ་གསུམ་པ་ཡིན། རྒྱུ་འབྲས་ཡིད་ཆེས་ནི་འཇིག་རྟེན་ཡང་དག་གི་ལྟ་བ་ཡང་ཡིན་ཏེ། འཇིག་རྟེན་པ་ཡི་ཡང་དག་ལྟ། །ཆེན་པོ་སུ་ལ་ཡོད་གྱུར་པ། །དེ་ནི་བསྐལ་བ་སྟོང་དུ་ཡང་། །ངན་འགྲོར་འགྲོ་བར་མི་འགྱུར་རོ། །ཞེས་གསུངས་པ་ཡིན། དགེ་བ་དེ་རྣམས་ཀུན་ལ་ཡི་རང་ངོ་། །ཞེས་པ་སྟེ། དེ་ལྟ་བུའི་མི་དགེ་བཅུ་པོའི་ལྡོག་ཕྱོགས་ཀྱི་དགེ་བཅུ་སྒྲུབ་པའི་གང་ཟག་དེ་ཐམས་ཅད་ཀྱི་དགེ་བའི་རྩ་བ་ཐམས་ཅད་ལ་མི་དགའ་བའི་ཕྲག་དོག་སྤངས་ཏེ་སྙིང་ནས་དགའ་བའི་ངང་ནས་རྗེས་སུ་ཡི་རང་ངོ་སྙམ་པའི་བསམ་པ་ལ་བློ་ཡང་ནས་ཡང་དུ་སྦྱང་དགོས་སོ། །དེ་ཡན་ཆད་རྗེས་སུ་ཡི་རང་བའི་ཡན་ལག་སོང་བའོ། །ལྔ་བ་ཆོས་སྤོང་གི་གཉེན་པོར་ཆོས་འཁོར་བསྐོར་བར་བསྐུལ་བའི་ཡན་ལག་ནི། ལྔ་བ་ཆོས་སྤོང་གི་གཉེན་པོར་ཆོས་འཁོར་བསྐོར་བར་བསྐུལ་བའི་ཡན་ལག ཕྱོགས་བཅུའི་འཇིག་རྟེན་རབ་འབྱམས་ཐམས་ཅད་ན།། རྫོགས་སངས་རྒྱས་ནས་རིང་པོར་མ་ལོན་པར།། དེ་དག་རྣམས་ལ་ཆོས་ཀྱི་འཁོར་ལོ་ནི།། རྒྱ་ཆེན་མྱུར་དུ་བསྐོར་བར་བདག་གིས་བསྐུལ།། མངོན་ཤེས་ཐུགས་ཀྱིས་དེ་དོན་མཁྱེན་པར་གསོལ།། ཞེས་ཆོས་འཁོར་བསྐོར་བར་བསྐུལ་བའི་ཡན་ལག་ནི་ཚིག་རྐང་ལྔ་པོ་དེས་བསྟན་པ་སྟེ། དཔག་ཡས་འཇིག་རྟེན་གྲངས་མེད་བརྗོད་ཀྱིས་མི་ལང་བ། རྡུལ་གཅིག་གི་སྟེང་ན་རྡུལ་སྙེད་ཀྱི་ཞིང་ཁམས་མཐའ་ཡས་པ་བསམ་གྱིས་མི་ཁྱབ་པ་དེ་ལྟ་བུའི་ཞིང་ཁམས་རབ་འབྱམས་གྲངས་མེད་པ་ཐམས་ཅད་ན་བཞུགས་པའི་རྫོགས་པའི་སངས་རྒྱས་དེ་དག རྫོགས་པའི་སངས་རྒྱས་ཀྱི་གོ་འཕང་མངོན་དུ་བྱས་ནས་དུས་ཡུན་རིང་པོར་མ་ལོན་པར། ཆོས་ཀྱི་ཆེ་བ་འདོན་པའི་ཕྱིར་དུ་ཆོས་མི་གསུངས་པའི་ཚུལ་བསྟན་ནས་བཞུགས་པའི་ཚེ་ན། དཔེར་ན་ལྷ་ཚངས་པས་གསེར་གྱི་འཁོར་ལོ་དང་། བརྒྱ་བྱིན་གྱིས་དུང་དཀར་པོ་གཡས་སུ་འཁྱིལ་བ་ཕུལ་ཏེ་ཆོས་འཁོར་བསྐོར་བར་ཞུས་པ་ལྟར་དུ་སངས་རྒྱས་ཀྱི་སྤྲུལ་བ། སྟོན་པའི་ཞལ་ཚབ། བྱང་ཆུབ་སེམས་དཔའ་དང་། བླ་མ་དགེ་བའི་བཤེས་གཉེན་གང་ན་སུ་བཞུགས་པ་དེ་དག་གི་དྲུང་དུ་སོང་སྟེ། རང་གི་ལུས་དཔག་ཏུ་མེད་པ་མང་པོར་སྤྲུལ་ནས་ཆོས་འཁོར་བསྐོར་བར་བསྐུལ་བའི་རྟེན་འབྲེལ་གྱི་རྫས། གསེར་གྱི་འཁོར་ལོ་རྩིབས་སྟོང་དང་ལྡན་པ་དང་། དུང་དཀར་པོ་གཡས་སུ་འཁྱིལ་བ་ལ་སོགས་པའི་མཆོད་རྫས་མང་པོ་ཐོགས་ཏེ། སེམས་ཅན་ཐམས་ཅད་ཀྱི་སྡུག་བསྔལ་སེལ་བའི་ཆེད་དུ་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་རྒྱ་ཆེ་ལ་རྒྱུན་རིང་བ་ཞིག་བསྐོར་བར་བསྐུལ་ཞིང་གསོལ་བ་བཏབ་པས། སངས་རྒྱས་དེ་དག་གི་མངོན་ཤེས་ཀྱི་ཐུགས་ཀྱིས་བདག་གིས་གང་ཞུས་པ་དེ་དག་དགོངས་ཏེ། བདག་སོགས་སེམས་ཅན་ཐམས་ཅད་ལ་ཐུགས་བརྩེ་བ་ཆེན་པོའི་སྒོ་ནས་ཆོས་འཁོར་བསྐོར་བར་ཞལ་གྱིས་བཞེས་ཏེ་བཀས་གནང་བར་ཐོབ་པར་བསམས་ན་དངོས་སུ་ཞུས་པ་དང་འདྲ་བ་ཡིན། དེ་སེམས་ཀྱིས་བསྒོམས་པ་ཡིན། དངོས་སུའང་བླ་མ་དགེ་བའི་བཤེས་གཉེན་ལུང་དང་རྟོགས་པའི་ཡོན་ཏན་དང་ལྡན་པ་དག་ལ་རང་གི་འབྱོར་ཚོད་ཀྱི་མཎྜལ་ཕུལ་ཏེ། ཆོས་འཁོར་སྐོར་བའི་སྣ་འདྲེན་བྱེད་ཐུབ་ན། སེམས་ཅན་མང་པོ་ཞིག་ཆོས་ཀྱི་ཆར་འདབ། དགེ་བའི་རྟ་འཕོངས་ལ་བཞག་ཐུབ་པ་དང་། སོ་སོ་རང་ཉིད་ཀྱང་ཚེ་རབས་འཁོར་བ་ཐོག་མེད་ནས་བསགས་པའི་ཆོས་སྤོང་གི་ལས་སྒྲིབ་དག་སྟེ། ཚེ་རབས་ཐམས་ཅད་དུ་དཀོན་མཆོག་གསུམ་གྱི་སྣང་བ་དང་མི་འབྲལ་ཞིང་། ཆོས་མེད་མུན་པའི་བསྐལ་བར་ནམ་ཡང་མི་སྐྱེ་བའི་དགོས་པ་དེ་ལྟ་བུ་ཡོད་པ་ཡིན་ནོ། །ལོག་ལྟའི་གཉེན་པོ་མྱ་ངན་ལས་མི་འདའ་བར་གསོལ་བ་འདེབས་པ་ནི། དྲུག་པ་ལོག་ལྟའི་གཉེན་པོ་མྱ་ངན་ལས་མི་འདའ་བར་གསོལ་བ་འདེབས་པ། སངས་རྒྱས་བྱང་སེམས་བསྟན་འཛིན་དགེ་བའི་བཤེས།། མྱ་ངན་འདའ་བར་བཞེད་ཀུན་དེ་དག་ལ།། མྱ་ངན་མི་འདའ་བཞུགས་པར་གསོལ་བ་འདེབས།། ཞེས་པས་བསྟན་པ་སྟེ། སྔོན་སྟོན་པ་རྫོགས་པའི་སངས་རྒྱས་བཅོམ་ལྡན་འདས་ཤཱཀྱའི་རྒྱལ་པོ་སྐུ་མྱ་ངན་ལས་འདའ་བར་བཞེད་པའི་སྐབས་སུ་དགེ་བསྙེན་ཙུནྡས་བཞུགས་གསོལ་བཏབ་པས། སྐུ་ཚེའི་འདུ་བྱེད་བྱིན་གྱིས་བརླབས་ཏེ་སྐུ་ཚེ་ཟླ་བ་གསུམ་ལ་བསྲིངས་ནས་བཞུགས་མཛད་པ་ལྟར་དུ། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་རྒྱལ་བ་རྫོགས་པའི་སངས་རྒྱས་རྣམས་དང་། རྒྱལ་སྲས་བྱང་ཆུབ་སེམས་དཔའ་བསྟན་པ་འཛིན་སྐྱོང་སྤེལ་གསུམ་གནང་བའི་དགེ་བའི་བཤེས་གཉེན་གྱི་ཚོཊ་དང་བཅས་པ་རྣམས་བསམ་བཞིན་དུ་རེ་ཞིག་མྱ་ངན་ལས་འདའ་བར་བཞེད་པ་ཀུན་ལ། བསྐལ་བ་གྲངས་མེད་མང་པོར་མྱ་ངན་ལས་མི་འདའ་བར། འགྲོ་བ་མགོན་མེད་ཀྱི་མགོན་དང་སྐྱབས་མེད་ཀྱི་སྐྱབས་སུ་བཞུགས་པར་སྙིང་ཐག་པ་ནས་གསོལ་བ་འདེབས་པར་བསམས་པ་སྟེ། དེ་ལྟར་སྐྱེས་བུ་དམ་པ་རྣམས་ཞབས་པད་བརྟན་པའི་གསོལ་འདེབས་དང་སྨོན་ལམ་བྱས་ན་རང་གི་ཚེ་ཐུང་ནད་མང་གི་སྒྲིབ་པ་དག་ཅིང་། སྤྱིར་ན་ས་ཐོབ་ཡན་ཆད་ཀྱི་སྐྱེས་བུ་དམ་པ་ཐམས་ཅད་ལ་གཤེགས་བཞུགས་ཀྱི་རང་དབང་ཡོད་པ་ཡིན། བཞེད་ན་བསྐལ་བ་ལ་ཡང་བཞུགས་ནུས་པ་དང་། གདུལ་བྱ་རྟག་འཛིན་ཅན་ཆོས་ལ་བསྐུལ་ཞིང་སྐྱོ་བ་སྐྱེ་བའི་ཕྱིར་དུ་མྱ་ངན་ལས་འདའ་ཚུལ་ཡང་སྟོན་པ་ཡིན། ཁྱད་པར་དུ་སངས་རྒྱས་དང་བྱང་ཆུབ་སེམས་དཔའ་རྣམས་ཡུན་དུ་བཞུགས་པ་ཞིག་ཡིན་ན། སེམས་ཅན་ལེ་ལོ་ཅན་རྣམས་ཀྱིས་དེ་རྣམ་པ་རྟག་ཏུ་བཞུགས་པའི་འདུ་ཤེས་ཀྱིས་ཆོས་བསྒྲུབ་པ་ལ་ལེ་ལོ་སྐྱེ་བ་དང་། སྙིགས་མའི་དུས་ཀྱི་སེམས་ཅན་དམུ་རྒོད་ཡིན་པའི་དབང་གིས་ལོག་སྒྲུབ་བྱས་ན་རེ་ཞིག་ཏུ་འདུལ་ཐབས་མི་ཐོན་པ་ཡིན་ཕྱིར། ཐུགས་སུན་པའི་ཚུལ་གྱིས་བླ་མ་དགེ་བའི་བཤེས་གཉེན་དེ་ཚོ་ཞིང་ཁམས་གཞན་ལ་ཐུགས་གཏད་འགྲོ་བ་དེ་འདྲ་ཡོད་པ་ཡིན། གདུལ་བྱ་མེད་ན་འདུལ་བྱེད་དབྱིངས་སུ་ནུབ་པ་ནི། ཆུ་སྣོད་ཟླ་གཟུགས་ཀྱིས་དཔེས་མཚོན་པ་ཞིག་ཡིན་པས། གདུལ་བྱའི་བསོད་ནམས་ཀྱི་དབང་ལས་འདུལ་བྱེད་དམ་པའི་སྐྱེས་བུ་འབྱོན་པ་ཡིན། དེས་ན་འཇིག་རྟེན་གྱི་ཁམས་ན་རྒྱལ་བ་སྲས་དང་སློབ་མར་བཅས་པ་གང་དག་འཚོ་ཞིང་གཞེས་པའི་སྐྱེས་ཆེན་ཐམས་ཅད་མྱ་ངན་ལས་མི་འདའ་བར། ཞབས་པད་བསྐལ་བ་རྒྱ་མཚོར་ཆོས་འཁོར་དང་བཅས་པ་བཞུགས་པར་གསོལ་བ་འདེབས་པ་དེ་ཡན་ལག་དྲུག་པའོ། །ཡན་ལག་བདུན་པ་བསྔོ་བའི་ཡན་ལག་ནི། བདུན་པ་བསྔོ་བའི་ཡན་ལག འདིས་མཚོན་བདག་གི་དུས་གསུམ་དགེ་བ་རྣམས།། འགྲོ་བ་སེམས་ཅན་ཀུན་ཀྱི་དོན་དུ་བསྔོ།། ཀུན་ཀྱང་བླ་མེད་བྱང་ཆུབ་མྱུར་ཐོབ་ནས།། ཁམས་གསུམ་འཁོར་བ་དོང་ནས་སྤྲུགས་གྱུར་ཅིག། ཅེས་གསུངས་ཏེ། འདི་ཉིད་ནི་ཐེ་ཚོམ་གྱི་གཉེན་པོ་སྟེ། གང་བསྔོ་བར་བྱ་བ་ནི། ད་ལྟ་སྒྲུབ་བཞིན་པའི་དགེ་བའི་རྩ་བ་འདིས་མཚོན་ཏེ། བདག་གིས་སྔར་དགེ་བ་བྱས་པ་དང་། ཕྱིས་སུ་བྱེད་པར་འགྱུར་བའི་དགེ་བ་སྟེ། དུས་གསུམ་གྱི་དགེ་བའི་ཚོགས་ཅི་མཆིས་པ་ཐམས་ཅད་སེམས་ཐོག་ཏུ་བླངས་ནས། གང་ལ་བསྔོ་ན། མཁའ་ཁྱབ་ཀྱི་འགྲོ་བ་སེམས་ཅན་གཅིག་ཀྱང་མ་ལུས་པ་ཐམས་ཅད་ཀྱི་དོན་དུ་བསྔོ་ཞེས་པས་སྙིང་རྗེས་གཞན་དོན་ལ་དམིགས་པ་དང་། དོན་ཅི་ཞིག་ཐོབ་པའི་ཆེད་དུ་བསྔོ་ན། སེམས་ཅན་ཀུན་ཀྱང་བླ་ན་མེད་པའི་བྱང་ཆུབ་བམ་རྫོགས་པའི་སངས་རྒྱས་ཀྱི་གོ་འཕང་མྱུར་བ་ཉིད་དུ་ཐོབ་ནས། སེམས་ཅན་ཞེས་པའི་མིང་ཙམ་ཡང་མི་ལུས་ཤིང་། འདོད་གཟུགས་གཟུགས་མེད་ཁམས་ཀྱི་ཁམས་གསུམ་འཁོར་བ་འདི་སྣོད་སྟོང་གཙང་སྦྲ་བྱས་པ་བཞིན་དུ་དོང་ནས་སྤྲུགས་པའམ་གཏིང་ནས་བཏོན་ཏེ་སྟོང་པར་གྱུར་ཅིག་ཅེས་ཤེས་རབ་ཀྱིས་རྫོགས་བྱང་ལ་དམིགས་པའི་བསྔོ་བ་མཛད་པའོ། །བསྔོ་བའི་ཚུལ་མང་པོ་ཡོད་ཀྱང་དུས་གསུམ་རྒྱལ་བ་སྲས་བཅས་ཀྱིས་ཇི་ལྟར་བསྔོས་པ་བཞིན་དུ། བདག་གིས་ཀྱང་དེ་ལྟར་བསྔོ་བ་ཡིན་སྙམ་ནས་བསྔོས་ན་བསྔོ་བ་ཡང་དག་པ་དང་རྗེས་སུ་མཐུན་པའི་བསྔོ་བ་ཡིན། ཕུང་པོ་གསུམ་པ་ལྟུང་བཤགས་ཀྱི་མདོ་ལས། ཇི་ལྟར་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོས་པ་དང༌། ཇི་ལྟར་མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་འགྱུར་པ་དང༌། ཇི་ལྟར་ད་ལྟར་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་མཛད་པ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ། །ཞེས་གསུངས་པ་དང་། བཟང་སྤྱོད་ལས། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་ཀྱི་རྗེས་སུ་བདག་སློབ་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ། །ཞེས་གསུངས་པ་བཞིན་དུ་བསྔོ་བའི་འདུན་པ་བྱས་ན། སེམས་ཅན་ཐམས་ཅད་ལ་བསྔོས་པ་བཞིན་དུ་ཐོབ་པ་ནི་སངས་རྒྱས་ཀྱི་མཐུ། ཆོས་ཉིད་ཀྱི་བདེན་སྟོབས། རང་གི་ལྷག་བསམ་བཟང་པོས་མཚམས་སྦྱར་བྱས་པ་བཅས་ཀྱི་འབྲས་བུ་ཡིན་ལ། གལ་ཏེ་སོ་སོའི་སྐྱེ་བོས་ཟག་བཅས་ཀྱི་དགེ་རྩ་ལ་བདག་ཏུ་བཟུང་སྟེ་མ་བསྔོས་ན། བསྐལ་བ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་དག་ཀུན། །ཁོང་ཁྲོ་གཅིག་གིས་འཇོམས་པར་བྱེད། །ཅེས་གསུངས་པ་ལྟར་དུ། ཁོང་ཁྲོ་སྐྱེས་པ་སོགས་ཀྱིས་དགེ་རྩ་དེ་འཇོམས་ཤིང་མེད་པར་བྱས་ཏེ་ཆུད་ཟ་བ་དང་། སེམས་ཅན་ཐམས་ཅད་སངས་རྒྱས་ཐོབ་པའི་ཕྱིར་དུ་བསྔོས་ན་ཟད་དུ་མེད་པ་ནི་ཆོས་ཀྱི་དབྱིངས་ཟད་པ་མེད་པའི་ཕྱིར་ན། རྒྱ་མཚོ་ཆུ་ཐིགས་ཀྱི་དཔེ་བཞིན་དུ་ནམ་ཡང་འཛད་པ་མེད་པ་ཡིན་ནོ། །དེ་ཡན་ཆད་ནི་མཐར་ཐུག་གི་བསྔོ་བའོ། །ཞོར་དུ་དེ་ལྟ་བུའི་དགེ་བའི་རྩ་བ་དེ་དག་གནས་སྐབས་གཞན་དོན་འགྲུབ་པའི་རྒྱུ་རྒྱལ་སྲས་ཀྱི་སྤྱོད་པའི་དོན་དུ་དམིགས་ནས་སྨོན་ལམ་འདེབས་པ་ནི། ཞར་ལ་དགེ་བའི་རྩ་བ་དེ་དག་གནས་སྐབས་གཞན་དོན་འགྲུབ་པའི་རྒྱུ་རུ་སྨོན་པ། དེ་ཡི་དགེ་བ་བདག་ལ་མྱུར་སྨིན་ནས།། ཚེ་འདིར་དུས་མིན་འཆི་བ་བཅོ་བརྒྱད་ཞི།། ནད་མེད་ལང་ཚོ་རྒྱས་པའི་ལུས་སྟོབས་ལྡན།། དཔལ་འབྱོར་འཛད་མེད་དབྱར་གྱི་གངྒཱ་ལྟར།། བདུད་དགྲའི་འཚེ་བ་མེད་ཅིང་དམ་ཆོས་སྤྱོད།། བསམ་པའི་དོན་ཀུན་ཆོས་ལྡན་ཡིད་བཞིན་འགྲུབ།། བསྟན་དང་འགྲོ་ལ་ཕན་ཐོགས་རྒྱ་ཆེན་འགྲུབ།། མི་ལུས་དོན་དང་ལྡན་པ་འགྲུབ་པར་ཤོག། ཅེས་པས་བསྟན་པ་སྟེ། གོང་དུ་བཤད་པའི་སེམས་བསྐྱེད་ཁྱད་པར་ཅན་གྱིས་བསྔོ་བ་བྱས་པ་ལ་སོགས་པའི་དགེ་བའི་རྩ་བ་དེ་དག་ཐམས་ཅད་ལུས་རྟེན་འདིའི་ཐོག་ནས་རང་གཞན་ཀྱི་དོན་སྒྲུབ་པའི་ཆེད་དུ་མྱུར་དུ་སྨིན་ནས། ཚེ་འདིར་དུས་མིན་གྱི་འཆི་བ་བཅོ་བརྒྱད་ཞི་ཞིང་། ཚེ་རིང་། ནད་མེད། ལང་ཚོ་རབ་དུ་རྒྱས་པའི་མདངས་པད་མ་ལྟར་དུ་བཀྲ་བ་དང་། ལུས་ལ་སྟོབས་ཤུགས་ཆེན་པོ་དང་ལྡན་པ་སྲེད་མེད་ཀྱི་བུ་ལྟ་བུ་དང་། འདོད་དགུའི་དཔལ་འབྱོར་ཐམས་ཅད་འཛད་པ་མེད་པར་དབྱར་གྱི་ཆུ་བོ་གང་གཱ་ལྟར་དུ་ཡར་ལ་འཕེལ་ཞིང་རྒྱས་པར་གྱུར་ཅིག་ཅེས་སྨོན་ལམ་བཏབ་པའོ། །འོན་ཀྱང་། སྤྱོད་འཇུག་ལས། ནོར་ལ་ཆགས་པས་གཡེང་བར་གྱུར་པ་རྣམས། །སྲིད་པའི་སྡུག་བསྔལ་ལས་གྲོལ་སྐབས་མེད་དོ། །ཞེས་གསུངས་པའི་ཕྱིར་ན། ཧ་ཅང་ནོར་གསོག་སྲུང་སྤེལ་གསུམ་གྱིས་གཡེངས་ན། དགའ་བྲོད་ལྷའི་བུའི་བདུད་སོགས་ཀྱིས་ཆོས་ལ་བར་ཆད་དང་། སྔོན་གྱི་ལན་ཆགས་ཀྱི་བུ་ལོན་མ་སོད་པའི་དབང་གིས་དགྲ་ཇག་གིས་འཚེ་བ་ཡོད་པ་ཡིན་ཕྱིར། དེ་ལ་ཞེན་པ་མི་ཆེ་ཞིང༌ཚོགས་བསགས་པའི་སྟོབས་ཀྱིས་གནོད་པ་སྐྱེལ་མཁན་མེད་ཅིང་དམ་པའི་ཆོས་ལ་འབད་མེད་རང་དབང་དུ་སྤྱོད་པར་ཤོག་ཅིག་ཅེས་སྨོན་པའོ། །ཚེ་ཐུང་། ནོར་མེད། བདུད་དགྲའི་འཚེ་བ་ཡོད་ན་གཞན་དོན་སྒྲུབ་པའི་བར་ཆད་ཡིན་པས་བྱང་ཆུབ་སེམས་དཔའ་ཁྱིམ་ན་གནས་པ་ཞིག་ཡིན་པའི་དབང་དུ་བྱས་ནས་ལུས་དང་ལོངས་སྤྱོད་ཀྱི་འབྱོར་བ་འཕགས་པ་འཇམ་དཔལ་དང་ཀུན་ཏུ་བཟང་པོ་སོགས་ཀྱི་རྒྱན་དང་བཀོད་པ་ལྟ་བུ་ཞིག་ལ་འདིར་སྨོན་པ་མཛད་པ་སྟེ། བྱང་ཆུབ་སེམས་དཔའ་ལ་ལོངས་སྤྱོད་འབྱོར་བ་ཕུན་སུམ་ཚོགས་ན། སྦྱིན་པ་གཏོང་བ་ལ་སོགས་པ་བསྡུ་བའི་དངོས་པོ་བཞིའི་སྒོ་ནས་འགྲོ་དོན་འཕེལ་བ་ཡིན་པས་ཕལ་བའི་གང་ཟག་ལ་ལོངས་སྤྱོད་ཡོད་པ་དང་མི་འདྲའོ། །དེ་ལྟ་བུའི་བསམ་པའི་དོན་ཀུན་ཆོས་ལྡན་ནམ་ཆོས་དང་མཐུན་པའི་དོན་རང་དོན་དུ་ཐོས་བསམ་སྒོམ་གསུམ། གཞན་དོན་དུ་འཆད་རྩོད་རྩོམ་གསུམ། གཉིས་དོན་དུ་མཁས་བཙུན་བཟང་གསུམ་སྟེ་དམ་པའི་ཚུལ་དགུའི་ཡོན་ཏན་མཐའ་དག་གེགས་མེད་ཡིད་བཞིན་དུ་འགྲུབ་ནས་ལུང་དང་རྟོགས་པའི་བདག་ཉིད་རྒྱལ་བའི་བསྟན་པ་རིན་པོ་ཆེ་ལ་བཤད་དང་སྒྲུབ་པས་འཛིན་སྐྱོང་སྤེལ་གསུམ་བྱེད་ནུས་པ་དང༌། བསྟན་པ་ནི་ཕན་བདེ་འབྱུང་བའི་གཞི་ཡིན་པས་ན། དེ་ལ་བརྟེན་ནས་འགྲོ་བ་སེམས་ཅན་ཐམས་ཅད་གནས་སྐབས་ཕན་ཐོགས་པ་ལྷ་དང་མི་ཡི་དཔལ་དང་། མཐར་ཐུག་གི་བདེ་བ་བྱང་ཆུབ་ཆེན་པོར་འགོད་པ་ལ་སོགས་པའི་སྒོ་ནས། བསྟན་དང་འགྲོ་བའི་དོན་རྒྱ་ཆེན་པོ་འགྲུབ་པ་དེ་ལྟ་བུའི་སྒོ་ནས་མི་ལུས་རིན་པོ་ཆེ་ཐོབ་པ་དོན་མེད་དུ་མ་གྱུར་པར་དོན་ཆེན་པོ་དང་ལྡན་པ་འགྲུབ་པར་ཤོག་ཅེས་སྨོན་པ་མཛད་པའོ། །འདིའི་བསྟན་དང་འགྲོ་ལ་ཞེས་པའི་བསྟན་པ་ནི། སློབ་དཔོན་དབྱིག་གཉེན་གྱིས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་དང༌། །སྒྲུབ་པར་བྱེད་པ་ཁོ་ནའོ། །ཞེས་གསུངས་པ་ལྟར་དུ་ལུང་གི་ཆོས་སྡེ་སྣོད་རིན་པོ་ཆེ་རྣམ་པ་གསུམ་འཆད་ཉན་སྤེལ་གསུམ་བྱེད་པ་དང་། རྟོགས་པའི་ཆོས་བསླབ་པ་རིན་པོ་ཆེ་རྣམ་པ་གསུམ་སྒོམ་སྒྲུབ་རྟོགས་གསུམ་བྱེད་པ་འདི་ཁོ་ན་སངས་རྒྱས་ཀྱི་བསྟན་པ་ལ་རྗེས་འཇུག་གིས་བྱ་བ་བྱས་པ་ཡིན་གྱི། དེ་ལས་གཞན་པའི་འབྱོར་བ་ལོངས་སྤྱོད་མངའ་ཐང་སྟོབས་རྒྱ་ཇི་ཙམ་བསྐྱེད་པར་བྱས་ཀྱང་སངས་རྒྱས་ཀྱི་བསྟན་པ་དངོས་མ་ཡིན་པར་གསུངས་སོ། །བསྟན་པ་མི་ཤེས་བསྟན་འཛིན་རློམ་པ་མཚར། །ཞེས་གསུངས་པ་ལྟར་དུ་ལུང་རྟོགས་བཤད་སྒྲུབ་ཀྱི་བསྟན་པ་གང་ཡིན་ཙམ་ཡང་མི་ཤེས་པར་ཆགས་སྡང་ཕྱོགས་འཛིན། བདག་བསྟོད་གཞན་སྨོད་ཀྱི་རྣམ་གཡེང་ལས་ཀྱི་འཁོར་ལོ་ཙམ་ཞིག་ལ་བསྟན་པར་བྱ་བ་བྱས་པའི་མིང་བཏགས་པ་ནི། སེང་གེའི་ཁོག་པ་འབུས་འཇིག་པའི་སངས་རྒྱས་ཀྱི་ལུང་བསྟན་དུས་ལ་བབ་པ་ཙམ་ལས་བསྟན་པ་འཛིན་སྐྱོང་གི་དོན་ཞིག་ངོ་མས་ངོ་མ་དྲང་པོར་དཔྱད་ན་དེའི་ནང་དུ་འདྲེས་ཡོད་པ་མ་ཡིན། བཤད་སྒྲུབ་ཀྱི་བསྟན་པ་རྒྱ་ཆེན་པོ་འཛིན་མཁན་ནི་རྒྱལ་བའི་རྒྱལ་ཚབ་མཁན་སྤྲུལ་དགེ་བའི་བཤེས་གཉེན་རྣམས་ལོས་ཡིན་ཡང་། སངས་རྒྱས་ཀྱི་རྗེས་འཇུག་ཡིན་ཚད་པོས་རང་རང་གི་ཚོད་ཀྱི་བསྟན་པ་འཛིན་ཆོག་པ་ཡིན། བསྟན་པ་ཕྱི་རུ་མི་བཞུགས་ནང་དུ་བཞུགས། །ནང་དུ་རང་གི་སེམས་རྒྱུད་བསྟན་པས་འདུལ། །ཞེས་གསུངས་པ་ཡིན། སངས་རྒྱས་ཀྱི་བསྟན་པ་ཆ་ཚང་གང་ཟག་རང་རྒྱུད་ལ་བཞུགས་པ་ཡིན་པས། ཐུབ་པའི་སྲས་ཀྱི་སྡེ་སྣོད་གསུམ། །ཐམས་ཅད་ཤེས་པ་ཡོད་མིན་ཡང་། །ཚིག་འབྲུ་གཅིག་གི་དོན་ཤེས་ན། །དེ་ཡང་ལུང་གི་བསྟན་པ་ཡིན། །ཞེས་པ་དང་། རྒྱལ་བའི་སྲས་ཀྱི་བསླབ་པ་གསུམ། །ཐམས་ཅད་བསྒྲུབས་པ་ཡོད་མིན་ཀྱང༌། །དགེ་སེམས་སྐད་ཅིག་གཅིག་སྐྱེས་ན། །དེ་ཡང་རྟོགས་པའི་བསྟན་པ་ཡིན། །ཞེས་གསུངས་པ་ཡིན་པས། ཆོས་ཚིག་གཅིག་གི་དོན་ཤེས་ནའང་ལུང་གི་བསྟན་པ་དང་། ཚིག་དེའི་དོན་ལ་བསམས་ཏེ་དགེ་སེམས་སྐད་ཅིག་མ་གཅིག་སྐྱེས་ནའང་རྟོགས་པའི་བསྟན་པ་ཡིན། དེ་རིང་ཁ་རྩང་ཕྱི་ཚུལ་ནས་ཧང་སེ་བལྟས་ན་བསྟན་པ་དར་བའི་དུས་ཡིན་ཀྱང༌། ཉམས་སུ་བླངས་ཏེ་རྒྱུད་ལ་གཅར་ན། དོན་གྱི་བསྟན་པ་ཉམ་དམའ་ཉག་ཕྲའི་སྐབས་ལ་ཁེལ་བས། རླབས་ཆེན་ཕྱི་ཚུལ་གྱི་འགྲོ་དོན་རྒྱ་ཆེན་ཞིག་མ་འགྲུབ་རུང་། རང་རྒྱུད་བསྟན་པས་ཕྱུག་པ་རྒྱལ་བ་དགྱེས་པའི་རྣམ་ཐར་སྐྱོང་ཐུབ་ན་དེས་ཀྱང་དོན་གྱི་ཐོག་ནས་བསྟན་པ་དང་སེམས་ཅན་ལ་ཕན་པ་ཆེན་པོ་འབྱུང་བས་མ་ཚད་པར་རང་ཉིད་ཀྱི་མི་ལུས་ཐོབ་པའང་དོན་ཡོད་དུ་འགྱུར་བ་ཡིན། ཁྱིམ་པ་ཕོ་མོ་ལྟ་བུ་ཞིག་ལ་མཚོན་ནའང་ངེད་ཅག་ལ་བསྟན་པའི་ཁུར་ཐང་ཅི་ཡོད་ཡ་མི་སྙམ་པར་ལྷག་བསམ་རྣམ་དག་གིས་སྤྱིའི་བསྟན་ཆུས་རང་ཐོག་ལ་བབ་པ་ལྟ་བུའི་བསམ་བློ་རེ་བཏང་ན། གོང་གི་བླ་སྤྲུལ་མན་ཆད་དང་། འོག་གི་ལོ་བརྒྱད་ལོན་པའི་གྲྭ་ཆུང་ཡན་ཆད་ཐམས་ཅད་ཁྱིམ་ཕ་མའི་གོ་ཁ་ལ་བརྟེན་ཏེ་མ་བྱུང་བར་ནམ་མཁའ་ནས་ཐོག་བབ་ཏུ་བྱུང་བ་སུ་ཡང་མེད་ཕྱིར་ཕ་མ་གཉེན་གྲོགས་ཀྱིས་ཡར་སྐུལ་བཟང་སེམས་ཀྱིས་ཕན་ཐོགས་ཡོད་པ་དང༌། མི་དགེ་བའི་བཤེས་གཉེན་གྱིས་དབྱེན་དཀྲུག་གཏོར་བཤིག་གིས་གནོད་པ་ཤུགས་རྐྱེན་ཐེབས་སུ་ཡོད་པ་ནི་སྨོས་མ་དགོས་པས། ཐད་ཀ་ཐད་དུ་བསྟན་པ་འཛིན་སྐྱོང་གི་འགན་མེད་རུང༌བསྟན་པ་ཡར་རྒྱས་དང་བསྟན་འཛིན་ཐུགས་མཐུན་གྱི་མཐུན་རྐྱེན་སྐྲུན་པའི་ཐོབ་ཐང་དེ་ཡོད་པ་ཡིན། ཅི་མ་ཐུབ་ཀྱང་སྨོན་ལམ་བཟང་པོའི་རྒྱས་འདེབས་ཅན་གྱི་རྒན་མོ་བསམ་བཟང་སུ་ཡིན་ཡང་བྱེད་ཐུབ་པ་ཡིན། སྡུག་སྡིག་པའི་བྲེ་ཁ་མ་གང་ན་ཞེས་པའི་དཔེ་བཞིན་དུ་ལར་སྔོན་བསགས་ཀྱི་རྟེན་བཟང་ཁྱད་པར་ཅན་ཞིག་མ་ཐོབ་པས་བསགས་པ་ཆུང༌། དེའི་ཐོག་ལ་ཆགས་སྡང་དོན་མེད་ཅིག་གིས་ཀུན་ནས་བསླངས་ཏེ་མི་ཁ་ལ་བརྒྱུགས་པའི་དབང་གིས་བསྟན་འཛིན་གྱི་སྐྱེས་བུ་དག་ལ་སྐུར་བ་འདེབས་པའི་དོན་མེད་ལོག་ལྟ་མི་བྱེད་པ་ནི་གནད་ཆེ་སྟེ། གཅིག་ན་རང་དོན། གཉིས་སུ་བསྟན་དོན་ཚང་མ་མཉམ་འགྲུབ་ཡོང་བ་ཡིན། གཞན་དུ་ཕ་རོལ་པོར་གནོད་བསྐྱལ་དགོས་སྙམ་ནས་རང་ཉིད་བསྡད་ཡོད་པའི་ཁང་པའི་ཀ་བ་བླངས་ན་རང་གཞན་གཉིས་ཀའི་མགོ་ཐོག་ཏུ་བརྡིབ་པ་ལས་འོས་མེད་པ་རང་གཞན་གཉིས་ཀ་གནོད་པ་ལས་མ་འདས་པ་ནི། སྔོན་ཕ་རྒན་ཀླད་དམར་ཞིག་ལ་བུ་གླེན་པ་ཞིག་ཡོད་པ་ན། ཕ་བུ་གཉིས་ཀ་ཉལ་ནས་ཡོད་པ་ལ་ཕ་རྒན་ཀླད་དམར་གྱི་མགོར་འབུ་སྦྲང་མ་ཞིག་ནག་རིལ་ལེ་བབས་ཡོད་དུས། བུ་གླེན་པས་ཕ་རྒན་གསོན་གསོན་དུ་ཟ་འགྲོ་བར་བསམས་ཏེ་འབུ་སྦྲང་མར་འཁོན་རྩོད་ས་ནས་ཕ་རྒན་བསད་བཞག་པའི་གཏམ་རྒྱུད་གོང་ནས་བཤད་པ་ལྟ་བུ་སྟེ། དེ་འདྲའི་གླེན་ལས་ཀྱིས་རང་གཞན་གཉིས་ཀ་ཕུང་དུ་ཡོད་པ་ཡིན། དེས་ན་ཆོས་འཇིག་རྟེན་གང་གི་སྐབས་སུ་ཡིན་ཡང་སྤྱི་དོན་ལྷག་བསམ་ལྷད་མེད་ཀྱི་སྒོ་ནས། རང་གིས་རང་ལ་དགེ་རྒན་བྱེད་པ་དང་། མཚམས་རེར་རང་ཉིད་ཐད་དུ་བཞག་སྟེ། རང་གིས་རང་ལ་ལན་བལྟས་བྱེད་པ་གལ་ཆེན་པོ་ཡིན། མི་སྐྱ་ཕོ་མོ་ཁྱིམ་ཚང་ཕལ་བ་ཞིག་ལ་མཚོན་ན། རང་རང་གིས་ཐུབ་ཚོད་ནུས་ཚོད་ཀྱིས་གྲྭ་པ་སློབ་གཉེར་བ་རེ་ལ་རོགས་བྱེད་པ་དང་། མཚམས་པ་ཉམས་ལེན་པ་ལ་གསོལ་བ་ཙམ་རེ་འདྲེན་པ་དང་། དབྱར་གནས་པའི་དགེ་འདུན་ལ་གུང་ཚིགས་རེ་འདྲེན་པ་དང་། ཆོས་འཆད་པའི་བླ་མ་སློབ་དཔོན་ལ་ཞབས་ཏོག་རེ་བསྒྲུབ་རྒྱུ་དང་། ཐག་རིང་གི་ཆོས་ཞུ་བ་དམ་ཆོས་དོན་གཉེར་གྱིས་ཕེབས་པ་ལ་རྒྱུག་སྐྱེལ་རོགས་དན་རེ་བྱས་ན་དེ་དག་ཀྱང་བསྟན་པའི་ཞབས་ཞུ་ཡིན། བསྟན་པའི་སྦྱིན་བདག་མངའ་ཐང་འབྱོར་པ་རྒྱས། །ཞེས་སྨོན་ལམ་འདེབས་ས་དེའི་གྲལ་དུ་བསླེབས་པ་ཡིན། རང་ངོས་ནས་ཀྱང་དགེ་སྒྲུབ་སྡིག་སྤངས་སྣ་རེ་ཙམ་ཞིག་ཐུབ་སོང་ནའང་བསྟན་པ་ལ་བྱ་བ་བྱས་པ་ཟེར་ཆོག་པ་ཡིན། རང་མགོ་ཉི་མ་ཆོས་ཀྱིས་བཏོན་ན་གྲགས་རྒྱ་ཆེན་པོ་ཞིག་མེད་རུང༌། དོན་ནང་ནོམ་ཚང་ནས་ཡོད་པ་ཡིན། སངས་རྒྱས་ཀྱི་བསྟན་པ་མཐའ་དག་ནུབ་ཅེས་པ་དེ་དཔེར་ན་ཡུལ་གྲོང་ཚོ་གཅིག་གི་ནང་དུ་ཆོས་ཚིག་གཅིག་ཙམ་ཡང་ཤེས་མཁན་མེད་ཅིང་། དགེ་སེམས་སྐད་ཅིག་མ་ཙམ་ཡང་དྲན་མཁན་ཞིག་མེད་པའི་དུས་ཚོད་ལ་ཐོན་དུས་བསྟན་པ་ཉམས་པ་ཡིན་པར་གསུངས་ཤིང་། དེང་སང་དེ་ཙམ་ཞིག་ལ་ཐོན་མེད་ཀྱང༌། ཕལ་ཆེའི་མཚམས་ཤིག་ལ་སྙེག་བཞིན་ཡོད་པའི་དུས་ངན་སྙིགས་མའི་སྐབས་འདིར། ལུས་རྟེན་མཆོག་དམན་ལ་མ་ལྟོས་པར་ཆོས་ཤེས་མཁན་རྣམས་ཀྱིས་ལྷག་བསམ་རྣམ་དག་གི་སྒོ་ནས་དམ་ཆོས་འཆད་སྤེལ་ཆེ་ཐུབ་ཆུང་ཐུབ་བྱེད་དགོས་པ་སྟེ། རྒྱུད་ཀྱི་ནང་དུ། དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབ། །བྱང་ཆུབ་སྤྱད་དཀའ་བདག་གིས་སྤྱད། །ཅེས་གསུངས་པ་ལྟར་དགོས་པ་ཡིན། འཆད་སྤེལ་ཐུབ་མཁན་དག་གིས་བསྟན་པ་ལ་བསམ་བློ་བཏང་སྟེ་འཆད་ཐུབ་ན་འཆད་པ་དང་། འཆད་མི་ཐུབ་ན་ཉན་པར་བྱས་ནས། དམ་ཆོས་འཆད་ཉན་སྤེལ་གསུམ་གྱི་བྱ་བ་ལ་འཇུག་དགོས་པ་ཡིན། ཁྱིམ་པ་ཕོ་མོ་རྐྱང་པ་ལ་ཟེར་བ་མིན། སོ་སོའི་སྐྱེ་བོ་སུ་ཡིན་ཡང་སྡིག་པ་རི་རབ་འདྲ་བ་དེ་མ་བཤགས་པར་སྔོན་དུ་སོང་ཞིང་། དགེ་བ་ཏིལ་འབྲུ་ཙམ་ཞིག་བྱེད་དུ་ཡོད་པ་དེ་ཕྱི་བཤོལ་བྱས་ནས་མ་བསྒྲུབས་པའི་སྔོན་དུ་འཇིག་རྟེན་ཕྱི་མའི་ཡུལ་དུ་འགྲོ་དགོས་པའི་དུས་ལ་ཐོན་ནས། ཆོས་སྔོན་སོང་རང་གིས་བསྒྲུབས་པ་ཞིག་མེད་ན་ཤི་བའི་རྗེས་ཀྱི་བདུན་ཚིགས་ཁྲལ་བསད་མ་ཞིག་འདེད་ན་ཐང་ཡང་། ཚོགས་ངན་སེར་སྣ་འདྲེས་མ་དེས་ཉམ་ལ་རན་པའི་བེད་ཅིག་ཆོད་དཀའ་བ་ཡིན། ཆོས་སྔོན་སོང་རང་གིས་འདི་བསྒྲུབས་ཡོད་བསམ་པ་ཞིག་ཡོད་ན་ཤི་ཡང་འགྱོད་པ་མེད་པས་མ་ཚད་སྡིག་པ་སྔོན་སོང་ལ་སྐྲག་སྔངས་འདར་གསུམ་མི་དགོས་པར་མེ་དྲག་ཏུ་འབར་བའི་ཁྱིམ་གྱི་ནང་ནས་ཐར་སོང་བ་བཞིན་དུ་བློ་བདེ་བདེ་ཡིད་སྤྲོ་སྤྲོའི་ངང་དུ་ཞིང་ཁམས་བདེ་བ་ཅན་དུ་རང་མི་རང་ཁྱིམ་དུ་ཕྱིན་པ་ལྟ་བུ་དང་། ངང་པ་པདྨའི་མཚོ་ལས་པདྨའི་མཚོ་གཞན་ཞིག་ཏུ་འཕུར་བ་ལྟ་བུ་ནི་མི་ལུས་བླངས་པའི་དོན་གོ། དལ་འབྱོར་ཐོབ་པའི་རིན་ཐང༌། དམ་པའི་ཆོས་ཐོབ་ཅིང་བླ་མ་མཇལ་བའི་འབྲས་བུ་ཡིན་པས། གྲལ་འདྲ་འདྲའི་ནང་ནས་རང་གི་ཆོས་སྐལ་མ་ཆད་པར་ཚེ་ཕྱི་མ་ཐར་བའི་ལམ་སྣ་ཟིན་ནས། རང་གཞན་གཉིས་དོན་མཉམ་དུ་འགྲུབ་སོང་བ་ཡིན། བདེ་བ་ཅན་དུ་སྐྱེ་བའི་རྒྱུ་བཞིའི་ནང་གི་རྒྱུ་གཉིས་པ་ཚོགས་བསགས་སྒྲིབ་སྦྱོང་གི་སྒོ་ཐམས་ཅད་གཅིག་ཏུ་འདུས་པ་ནི་ཡན་ལག་བདུན་པ་ཡིན་པས། ཞིང་ཁམས་བདེ་བ་ཅན་དུ་ལུས་འདི་བརྗེས་མ་ཐག་ཏུ་སྐྱེ་བའི་ཆེད་དུ་ཚོགས་བསགས་ཡན་ལག་བདུན་པ་འདི་ཉམས་ལེན་གྱི་མཐིལ་དུ་གཟུང་རྒྱུ་གནད་ཆེ་བ་ཡིན་ནོ། །དེ་རིང་ཆོས་མཚམས་ནི། མི་ལུས་དོན་དང་ལྡན་པ་འགྲུབ་པར་ཤོག །གསུངས་པའི་མཚམས་དེར་བཞག་ནས། སང་ཉིན་བདག་དང་བདག་ལ་འབྲེལ་ཐོག་ཀུན། །ཞེས་པ་ནས་འཆད་རྒྱུ་བྱེད། ད་རེས་ཀྱི་ཞིང་ཁྲིད་འདིའི་བླ་གྲྭ་དགེ་འདུན་པ་མན་ཆོད། དད་ལྡན་གྱི་མི་སྐྱ་ཕོ་མོ་ཡན་ཆོད་ཚང་མས་ཐུགས་སེམས་རྣམ་དག་གིས་དམ་ཆོས་འཆད་ཉན་ལ་ཞུགས་པ་ནི། རྗེས་སུ་ཡི་རང་གི་བསྔགས་བརྗོད་འབུལ་འོས་པའི་གནས་ཤིག་རེད། དགེ་འདུན་པ་ནི་རྟག་ཏུ་ཆོས་སྤྱོད་བཅུའི་མཛད་པ་སྐྱོང་མཁན་ཏག་ཏག་ཡིན་དགོས་པས་དེ་ལྟར་ཡིན་ངེས་ཀྱང་། ད་སྔའི་ཉིན་ལྔ་བོའི་གནས་ཚུལ་ལ་བལྟས་ན་མི་སྐྱ་ཕོ་མོ་ལོ་རྒན་གཞོན་ཚང་མའི་ཆོས་སྒྲུབ་ཚུལ་དང་ཆོས་གྲྭའི་ནང་དུ་ཞུགས་སྟངས་ཐམས་ཅད་ཤིན་ཏུ་བཟང་བར་འདུག འགའ་རེ་ས་ཐག་རིང་ནས་ཉིན་བཞིན་འདིར་ཡོང་དགོས་པ་རེད། དེ་ལ་དཀའ་ངལ་ཆེན་པོ་ཡོད་ཅིང་། འཁོར་བ་པ་ཞིག་ཡིན་དུས་མི་ཁོམ་པའི་རང་བཞིན་ཡོད་པ་རེད། ཡང་སྒོས་དེང་སང་ནམ་ཟླ་སྟོན་ཁ་སྟོན་ལས་ཀྱི་སྐབས་ཡིན་པས་ལྡུམ་བུ་བརྐོ་རྒྱུ་ལ་སོགས་པ་ལས་རྒྱུ་མང་པོ་ཡོད་པ་དང་། འདིར་ཞག་སྡོད་བྱས་ཡོད་པ་རྒས་པའི་གྲས་རྣམས་ལ་ཡང་དཀའ་ངལ་ཆེན་པོའི་སྒོ་ནས་ནང་སྔ་ལངས་བྱེད་བཞིན་འདུག ནུབ་ཕྱི་ཉལ་བྱེད་བཞིན་འདུག ལ་ལ་སྔ་མོ་ཆུ་ཚོད་བཞིའི་ཐོག་ནས་ཡར་ལངས་ནས་སྐོར་བ་བྱེད་པ་དང་། ལ་ལས་དེ་བས་སྔ་ལ་བརྐྱངས་ཕྱག་འཚལ་བཞིན་འདུག བརྐྱངས་ཕྱག་འཚལ་མཁན་མང་བའི་དབང་གིས་སྐོར་ལམ་ཡང་འཇམ་པོར་སོང་ནས་འདུག འཚལ་སའི་ལམ་ཡང་མི་ཐེམས་པར་སྒུག་དགོས་པ་སོགས་ཧ་ལས་དགོས་པའི་ཆོས་ཕྱོགས་ལ་དང་བ་དང་བརྩོན་འགྲུས་ཆེན་པོ་བྱེད་ཀྱིན་འདུག ས་ཆ་ཆོས་ལྡན་གྱི་མི་ལོས་ཡིན་བསམ་རྒྱུ་ཞིག་རེད། འདི་ནས་གུར་ཕུབ་ནས་འདུག་མཁན་མང་ཆེ་བར་ལོ་ལོན་ཡིན་པས་ས་འཁྱག་གི་ཐོག་ནས་རྐང་ལག་མི་བདེ་བ་སོགས་དཀའ་ངལ་ཡོད་ཤག་ཤག་རེད། འོན་ཀྱང་དཀའ་ངལ་འཛེམས་མེད་ཀྱིས་ཆོས་སྒྲུབ་པ་ནི་མ་འདྲ་བ་ཞིག་རེད། མདོར་ན་ཐམས་ཅད་ལ་རྗེས་སུ་ཡི་རང་བྱེད་པས་མ་ཚད་དགེ་རྩ་རྫོགས་བྱང་དུ་བསྔོ་བས་རྗེས་འདེབས་བྱེད་ཡོང་། ངས་བསམ་ན་འདི་འདྲའི་ལུས་ངག་གི་དགེ་བ་ལ་བརྩོན་སེམས་ཤིག་ཡོད་པའི་ཁར་སེམས་ཀྱི་དགེ་བ་སྒྲུབ་སྟངས་དེ་ཡང་དག་ཅིག་ཤེས་ན་ཅི་འདྲའི་མི་བཟང་ན་སྙམ་པ་ཡིན། དེས་ན་མི་སྐྱ་ཕོ་མོ་དག་གིས་ཀྱང་ང་ལ་རིག་གནས་མེད་པས་ངས་གོ་རྒྱུ་མ་རེད། ཤེས་རྒྱུ་མ་རེད་ཅེས་དང་པོ་ཉིད་ནས་མི་ཤེས་པའི་ཐག་གཅོད་མ་བྱེད། ངས་ཤེས་སོ་སྙམ་པ་དག་གིས་དང་པོར་ཀ་ཁ་ཙམ་ཡང་མི་ཤེས་ཀྱང་སྦྱངས་ནས་རིམ་གྱིས་ཤེས་སོང་བ་རེད། དེས་ན་ཆོས་ཀྱི་ཚིག་དོན་རེ་རེ་བཞིན་དུ་ཨེ་གོ་ལྟོས་དང་རིམ་གྱིས་གོ་ཡོང་བ་ཡིན། ཀུན་བཟང་བླ་མའི་ཞལ་ལུང་དེ་ལ་ཚར་མང་པོར་ལྟོས་དང་ཕན་པ་ཡོད་པ་ཡིན། ཡི་གེ་མི་ཤེས་མཁན་དག་གིས་ཀྱང་སྒྲ་འཁོར་རེ་ཉོན་དང་ཕན་པ་ཡོད་པ་ཡིན། ངས་ན་ནིང་བཤད་པའི་སྒྲ་འཁོར་དེ་ཉོན་དང་ཕན་ཐོགས་ཡོད་ཤས་ཆེ། ཁྱེད་ཚོས་སྒྲ་འཁོར་འོད་སྡེར་ཞེས་པའི་གོ་གོར་དེ་ཉན་སའི་འཕྲུལ་ཆས་དེ་ཉོ་དགོས་པ་ཡིན། ད་ཕྱིན་ཆད་དེས་བེད་ཆེ་བ་རེད། རང་རེས་སྔར་བེད་སྤྱོད་གཏོང་བའི་སྒྲ་ཐག་སྟེ་རྒྱ་སྐད་ཀྱི་ཚི་དེད་ཅེས་པ་དེ་ད་ཕན་ཆོད་བེད་སྤྱོད་མེད་པར་འགྱུར་བ་རེད་ཟེར་གྱིན་འདུག ད་རུང་སྙིང་ཐིག་གི་སྨོན་ལམ་རྣམ་ལྔ་དེ་ངས་རྫོགས་ཆེན་རང་སྐད་ཀྱི་ཐོག་ནས་སྒྲ་བླངས་པ་ཞིག་ཡོད། དེ་བསམ་བཞིན་དུ་ས་ཆ་འདིའི་མི་ཡི་གེ་མི་ཤེས་མཁན་རྣམས་ཀྱིས་བློ་ལ་ལེན་པའི་ཆེད་དུ་སྒྲ་བླངས་པ་ཡིན། དེ་ཉོན་ནས་དུས་རྒྱུན་དུ་ཁ་བཏོན་གྱིས་དང་ཕན་ཡོན་ཆེ་ཞིང་ནང་དོན་ལ་ཡང་གོ་བ་ཆེན་པོ་ལེན་རྒྱུ་ཡོད་པ་ཡིན། ཆོས་སྒྲུབ་པ་ལ་ཡར་བསྐྱེད་ཡོང་བའི་ཕན་ཐོགས་ཆེན་པོ་ཡོད་པ་ཡིན་ནོ། །དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་བཤད་སྒྲུབ་འཁོར་ལོ་གཉིས་ལྡན་གྱི་སྒོ་ནས་གོང་དུ་འཕེལ་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་རྣམས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་འཁྲུག་རྩོད་ཐམས་ཅད་རྒྱུན་ཆད། བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པའི་ཕྱིར་དང་། བདག་ཅག་རྣམས་ཀྱི་ཚེ་འདིའི་ཕ་མ་གཉིས་དང་། དགྲ་བགེགས་གཉིས་ཀྱི་གཙོས་བྱས་པའི་བཟང་འབྲེལ་ངན་འབྲེལ་ཐོགས་པའི་མཐའ་ཡས་པའི་སེམས་ཅན་ཐམས་ཅད་མཐར་ཐུག་རྣམ་པ་ཐམས་ཅད་མཁྱེན་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པ་དང་། དེ་མ་ཐོབ་ཀྱི་བར་དུ་ཡིན་ན་ཡང་མཐོ་རིས་ཡོན་ཏན་བདུན་དང་ལྡན་པའི་ལུས་རྟེན་ཁྱད་པར་ཅན་ཞིག་རྙེད་ནས་ཐེག་པ་ཆེན་པོའི་ཆོས་ལ་ཚུལ་བཞིན་དུ་སྤྱོད་པའི་སྐལ་བ་དང་ལྡན་པའི་ཕྱིར་དུ་རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་གནང་བར་ཞུ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆི་རྦ་རླབས་འཁྲུག་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག། ཉིན་ལྔ་བའི་བཀའ་ཆོས།ཡང་ང་ཚོས་བོད་མདོ་ཁམས་ཉི་མ་ཤར་ཕྱོགས་ཀྱི་ཆོས་མིང་ས་ལ་ཐོགས་པའི་སྔ་འགྱུར་བའི་གདན་ས་ཆེན་པོ་འདི་ནས། བསྟན་པ་ཡང་དར་གྱི་སྐབས་འདིར་དམ་པའི་ཆོས་ཀྱི་རྔ་བརྡུང་བ་དང་། དམ་པའི་ཆོས་ཀྱི་དུང་བུས་པ་ལ་བརྟེན་ནས་ལས་ཅན་གྱི་སེར་སྐྱ་ཕོ་མོ་མང་པོ་ཞིག་ཆོས་གཅིག་གིས་མཉམ་དུ་བསྡུས་ཏེ། ཆོས་ར་འདིའི་ནང་ལ་མཉམ་དུ་འཚོགས་ནས་དམ་པའི་ཆོས་ཀྱི་བདུད་རྩི་ལ་ལོངས་སྤྱོད་པའི་བགོ་སྐལ་ཐོབ་པ་ཡིན་ལ། འདི་ལྟ་བུའི་བགོ་སྐལ་ཐོབ་པ་འདི་ཡང་ལས་སྔོན་སོང་ཞིག་མཉམ་དུ་བསགས་པ་དང་། ཐུགས་བསྐྱེད་དང་སྨོན་ལམ་གྱི་མཐུ་མཉམ་དུ་གྲུབ་པ་ཞིག་ཡིན་པ་གཞིར་བཞག་གི་ཐོག་ཏུ་སྐྱེ་དཀའ་བ་ལྷོ་རྒྱལ་འཛམ་གླིང་ལས་ཀྱི་ས་པ། དེའི་ནང་ནས་ཀྱང་སྒྲོན་མེའི་བསྐལ་བ་བཟང་པོ་ལ་ཁེལ། ཐོབ་དཀའ་བ་མི་ལུས་རིན་པོ་ཆེ་ཐོབ། དེའི་ནང་ནས་ཀྱང་ཆོས་ལ་སྨོན་པའི་རིགས་ཅན་ལ་སྐྱེས་ཡོད་པའི་སྐབས་འདིར་འདི་དོན་མེད་ཆུད་ཟོས་སུ་འགྲོ་མི་རུང་བར་གསུངས་པ་ཡིན། དེ་ཡང་རང་ཐོག་ལ་བསྐོར་ནས་ཕྱི་བལྟས་ཤིག་བྱས་ན། དང་པོར་རྣམ་ཤེས་འཁྱམ་པོ་ཞིག་ལས་རླུང་གིས་བདས་ཡོང་བའི་སྐབས་དེར་ཚེ་འདིའི་ཕ་མ་དང་འཕྲད་དེ་ལུས་འདི་བླངས་པ་ཡིན་པས། འཇིག་རྟེན་མི་ཡུལ་འདི་ཐོག་མར་རིག་པའི་དུས་སུ་རྒྱབ་གང་ལ་གཏད་ནས་ཡོང་སའི་ཡོང་ཁུངས་ཤིག་དང་། སྔུན་གང་ལ་བསྐོར་ནས་འགྲོ་བཞིན་ཡོད་པའི་འདུན་པ་ཞིག་ཡོད་པ་མ་ཡིན་པར་འཇིག་རྟེན་འདི་སྣང་ཞིག་ཁྲ་ལམ་མེར་མིག་སྔོན་དུ་ཤར་བ་ཙམ་མ་གཏོགས་པར་ཅི་བསམ་འདི་དྲན་ཞིག་དང་ཅི་ཤེས་འདི་ཤེས་གཉིས་ཀ་མེད་པའི་བྱིས་པ་བསམ་མེད། ལུས་ཤིག་ལ་རྣམ་པར་ཤེས་པ་ཞིག་འཁྲིས་པའི་དབུགས་ཡོད་ཙམ་པ་ཞིག་མ་གཏོགས་མི་ཞིག་གི་བྱེད་ལས་ཆ་ཚང་མི་འགྲུབ་པའི་ཉམ་ཆུང་ཞིག་ཡིན་པ་དེ་རིམ་གྱིས་ནར་སོན་ནས་ལག་ཁྱག་སྟེ་ལུས་དར་བའི་མཉམ་དུ་སེམས་ཀྱིས་ཀྱང་བསམ་བློ་གཏོང་ཇེ་ཤེས་སུ་བྱུང་ཞིང་། དེ་དང་མཉམ་དུ་ལྷན་སྐྱེས་ཀྱི་ཉོན་མོངས་པ་དུག་གསུམ་དུག་ལྔ་ལ་སོགས་པ་སེམས་ཀུན་རྟོག་གི་འཁྲུལ་བའི་བློ་སྣ་སྤོས་རྒྱའི་རི་མོ་འདྲ་བ་ཟད་དུ་མེད་པ་བྱུང་བ་དེ་ལ་བརྟེན་ནས་སེམས་བསམ་པའི་ལུས་འབྱུང་བཞི་གྲུབ་ཅིང་། འདི་སྣང་འཁོར་བའི་སྡུག་བསྔལ་འདི་མྱོང་དང་འདི་མ་མྱོང་བསམ་པ་མེད་པ་མྱོང་བ་དང་། ཚེ་སྔོན་མའི་ལས་ཉོན་གྱིས་འཕངས་པའི་རྣམ་སྨིན་གྱི་ཕུང་པོ་སྡུག་བདེན་གྱི་སྒྱུ་ལུས་ལ་བརྟེན་ནས་ཕྱི་མར་འཁོར་བའི་རྒྱུ་བྱས་ཏེ། ཡང་ཉིན་ཞིག་སྔར་བཞིན་གྲོགས་མེད་གཅིག་པུ་སྐལ་མེད་ལག་སྟོང་། གོས་མེད་གཅེར་བུར་འགྲོ་བ་ནི་ཐོད་སྟེང་ལ་ཐེལ་བརྒྱབ་ཡོད་པས་ན། རྟེན་འབྲེལ་བཅུ་གཉིས་ལུགས་འབྱུང་སྲིད་པའི་འཁོར་ལོ་དེ་ཡང་ཡང་འཁོར་བའི་འཁོར་མཚམས་མ་བཞག་པའི་བར་སྐབས་ལུས་རྟེན་འདིའི་ཐོག་ནས། ཕྱིན་ཆད་འཁོར་བར་འཁྲུལ་མི་དགོས་པའི་གདམས་ངག་གཅིག་ཐོབ་ཡོད་པ་སྟེ། དེ་ཡང་ང་གཅིག་པུས་མི་ཚད་པར་རང་ཅི་འདྲ་རོགས་ཡིན་པ་ནང་བཞིན་གྱི་མཁའ་མཉམ་ཀྱི་སེམས་ཅན་ཟད་མེད་ཅིག་ཡོད་པ་ཐམས་ཅད་དང་བཅས་པ་དུས་གཏན་དུ་བདེ་བའི་ས་ལ་ཐོན་པར་བྱེད་པའི་ལམ་ཞིག་ད་ལྟ་རྙེད་དུས་འདིར་དེ་མི་བསྒྲུབ་པར་འདོར་བ་ནི་བསམ་མེད་ཐབས་རྡུགས་འདང་རྒྱག་མ་ཤེས་པའི་བསམ་སྤྱོད་ཅིག་ཡིན་པ་ནི་ཤེས་སུ་འོས་ཤིང་། འུ་གུ་མི་རང་ག་བས་བསམ་བློ་བཏང་ན་འཇིག་རྟེན་མི་ཡུལ་གྱི་བདེ་སྐྱིད་ཆུང་ཆུང་། ལུས་གནས་སྐབས་ལ་ན་ཚ་མེད་པ་དང་། སེམས་སྐབས་རེ་ཙམ་ལ་མི་བདེ་མི་སྐྱིད་པ་མེད་ཅིང་། འདོད་དོན་བསམ་རྒྱུ་གང་ལ་གང་འཚམས་རེ་འགྲུབ་པའི་དུས་ཚོད་སྡུག་བསྔལ་རགས་པའི་ཚོར་སྣང་ཅུང་ཟད་ཆུང་བའི་སྐབས་འདིར་སྐྱིད་པའི་སྣང་བ་ལྟ་བུ་ཞིག་འཆར་བ་ཡིན། འོན་ཀྱང་དེ་ནི་རྟག་པ་མ་ཡིན་པར། སྐྱིད་རེའི་རྒྱབ་ན་སྡུག་རེ། ལ་རེའི་ཕག་ན་ཐུར་རེ་བྱུང་བའི་སྐྱིད་སྡུག་ཉིན་སྲིབ་ཀྱི་ཉི་མ་འདྲ་བ་དེའི་ངང་ནས་མི་ཚེ་ས་ཆོད་རྡོ་ཆོད་ཀྱིས་ཡས་མ་འགྲུབ་མས་མ་ཐོན་པར་མཐོན་པོ་ལ་བཀུར་མདོག་བྱས། དམའ་མོ་ལ་སྐྱོང་མདོག་བྱས། མཉམ་པོར་འགྲོགས་མདོག་བྱས་ཏེ་ཤོབ་བཤད། ཁྲེལ་བསྣོགས། ཡས་ནས་བཅད་དེ་མར་གླན། མས་ནས་བཅད་དེ་ཡར་གླན། སོར་གང་མཐོ་གང་ཙམ་ཡིན་ཡང་ང་ཨེ་ལེགས་ན། ང་ཨེ་ཡག་ན། ང་ཨེ་བཟང་ན། ང་ཨེ་མཐོ་ན་སྙམ་སྟེ་ཁ་ཤ་རླུང་ལ་བསྐུར། ཉྭ་ཤ་ཁྱི་ལ་བྱིན་ནས་རྒྱུག་རྒྱུག་འདུར་འདུར་གྱིས་བརྩོན་ན་ཡང་། མཐར་བལྟས་དུས་ཉི་མ་ཉིན་གཅིག་གི་བདེ་སྐྱིད་འདི་ཐོབ་ཡོད་ཟེར་རྒྱུ་ཙམ་ཞིག་མེད་པར། མི་ཚེའི་ནམ་ཟླ་བཟང་ས་ཡག་ས་ཐམས་ཅད་ཤོར་དང་འཆོར་བཞིན་པ་སྟེ། འགའ་རེ་ན་ཚོད་ཡོལ་ས་ལ་ཐོན་ནས་སྐྲ་དཀར་གཉེར་མས་རྟགས་བརྒྱབ་ནས་འཆི་བདག་གཤིན་རྗེའི་ཕོ་ཉས་བསུ་ཐག་ཇེ་ཉེ་ཇེ་ཉེར་ཐོན་ཡོད་ནའང་། དེ་སྔར་ལས་ལས་རྒྱུག་རྒྱུག་འདུར་འདུར་བྱས་པ་དེས་གོ་མ་ཆོད། ས་མ་ཟིན་ས་ལ་ཐུག་དུས། སྔོན་ཞིག་ནས་ཐོས་བསྡད་པའི་ཆོས་ཞེས་པ་དེ་ནི་ངོ་མས་གདམས་ངག་བདུད་རྩིའི་ཐིགས་པ་ཡིན་པར་འདུག་ཀྱང་། མཉམ་འགྲོགས་ལེ་ལོ་གཉིས་ཀྱི་དབང་དུ་སོང་ནས། རང་རང་ཁ་ཁ་སོ་སོས་ཉམས་ལེན་མ་ཐུབ་ཅིང་ཕོ་མ་སྐྱེས་པ་ལ་འགྱོད་པ་སྐྱེ་རྒྱུ་ཞིག་ཡོང་བ་ནི། ཨོ་རྒྱན་རིན་པོ་ཆེས། ཨ་རེ་འགྱོད་དེ་བག་ཙམ་འཕྱིས་པ་འདྲ། །ཞེས་གསུངས་པ་ལྟར། འཕྱིས་དྲག་པའི་སྐྱོན་གྱིས་འགྱོད་པས་མི་སླེབ་པའི་ས་ལ་ཐོན་ཚར་བ་ཡིན་པས་དེ་དུས་བཅོས་རྒྱུ་ག་ལ་ཡོད། དེས་ན་ད་ལྟ་རང་དབང་རང་ལག་ཏུ་ཡོད་ཅིང་། སྔོན་ལག་རྒྱབ་ལག་གཉིས་ཀ་ཆོས་པའི་དུས་ཚོད། སྔ་འདེང་ཕྱི་འདེང་གཉིས་ཀ་རྒྱག་ལོང་ཡོད་པའི་དུས་སུ་འདེང་ཞིག་མ་བརྒྱབ་ན། ཕག་རྒན་གྱིས་ས་འབའ་ཞིག་སྣ་ཡིས་བརྐོས་ནས་ས་མིག་ཏག་ཏག་བལྟས་ནས་སོང་སོང་བའི་ཉིན་ཞིག་ལ་གནམ་མཐོང་བའི་སྐབས་སུ་ཤན་པས་བྲང་ཁ་ལ་གྲི་བཙུག་རན་ཡོད་པའི་དཔེ་ལས་མི་འདའ་བ་ཡིན་པས་མཆེད་གྲོགས་ཚང་མ། འདིའི་ནང་གི་བསྟན་འཛིན་གྱི་སྐྱེས་བུ་ཐུགས་རྗེ་ཡས་སྤྲུལ་རྣམས་ནི་བསམ་བཞིན་སྲིད་པར་བྱོན་པ་རེད། དེ་དང་མཚུངས་པའི་དགེ་འདུན་པ། ལུང་སྡེ་སྣོད་གསུམ་ལ་འཆད་ཉན་དང་ལམ་བསླབ་པ་གསུམ་ལ་ཉམས་ལེན་ལ་འབད་བཞིན་ཡོད་པ་འདི་རྣམ་པ་ནི་བསྟན་པའི་སྒྲོན་མེ་ཡིན་ལ། སྟོན་པའི་རྒྱལ་ཚབ་ཀྱང་ཡིན། གོས་ངུར་སྨྲིག་གི་རྒྱལ་མཚན་འཆང་བའི་རྣམ་དག་བསླབ་པའི་གཞི་ལྔ་མིག་འབྲས་ལྟར་བསྲུངས་ཡོད་པའི་དགེ་འདུན་གྱི་སྡེ་འདི་མེད་ན། དམ་ཆོས་འདུལ་བའི་བསྟན་པ་མེད་པ་ཡིན། དམ་ཆོས་འདུལ་བའི་བསྟན་པ་མེད་ན། སངས་རྒྱས་ཀྱི་བསྟན་པ་ཡོད་པ་མ་ཡིན། དེ་མེད་ན་དེའི་ས་ཆ་དེ་ལ་དཀོན་མཆོག་གི་སྣང་བ་མེད་པ་ཡིན། དེ་རྣམ་པ་ཡར་ཕུད་པའི་ཤུལ་གྱི་རྟགས་ཙམ་གྱི་བསྟན་པར་ཚུད་པའི་མི་དང་། ལག་ནས་ཕྲེང་བ་མངག་མེད་ཀྱང་དཀོན་མཆོག་གི་སྐྱབས་འོག་ཏུ་ཚུད་བྱེད་ཀྱི་དག་སྣང་དང་དད་པ་ཡོད་ལ་མེད་ཀྱི་མི་དེ་ཚོས་འདེང་རེ་བརྒྱབ་ནས། རང་དྲིན་རང་ལ་ཆེ་བའི་དཀོན་མཆོག་གི་སྐྱབས་འོག་ནས་མི་འདའ་ཐབས་ཤིག་ད་ལྟ་ནས་མ་བྱས་དུས། ཉིན་ཞིག་སྐྱོབ་ཐབས་མེད་པའི་ས་ཚོད་ལ་ཐུག་ཏུ་ཡོད་པ་ཡིན། གཟེར་ཆེན་པོ་བརྩེགས་ནས་དབུགས་ཕྱི་འཕེན་ནང་འཕེན་བྱེད་པའི་དུས་སུ་སྔས་མགོ་རུ་བླ་མ་གང་དྲག་དྲངས་པར་བྱས་ཀྱང་། བླ་མས་མི་ཚད་སངས་རྒྱས་དངོས་སུ་བྱོན་རུང་དད་པའི་ཨ་ལུང་སྒོར་སྒོར་ཞིག་སྔར་ནས་མེད་ཚེ། ཐུགས་རྗེའི་ལྕགས་ཀྱུའི་གུག་གིས་ཚམ་ཚོམ་མེད་པར་འཛིན་རྒྱུ་དེ་སླ་མོ་ཞིག་མིན་པའི་སྟབས་ཀྱིས། བླ་མ་མི་བཟང་བ་མིན་ཡང་ལས་ཀྱི་དབང་ཤུགས་ལ་བཟློག་ཐབས་མེད་པ་ཡིན། མི་འགའ་རེས་བདེ་འགྲོ་མ་ཐོབ་པའི་ལོ་རྒྱུས་ལྐོག་གྱུར་གཟིགས་པ་ཚོས་གསུངས་ཡོང་ཚེ། དེ་དུས་ཤི་བོའི་ཁྱིམ་མི་ཉེ་རིང་སོགས་ཀྱིས་ཆོས་ཀྱི་ར་མདའ་རེ་བཏང་ན་ཡང་། གལ་ཏེ་གནད་ཐོག་ལ་ཁེལ་ན་མེ་ཏོག་རྙིང་པ་སྦྲང་ཆར་གྱིས་གསོས་པ་ལྟ་བུ་ཡིན་ན་ཐང་ཡང་། གལ་ཏེ་གནད་ཐོག་ལ་མ་ཁེལ་ན་དེ་ལས་ཀྱང་སྡུག་པ་ཞིག་ཏུ་འགྱུར་ནའང་ཐང་སྟེ། སྔོན་ཆད་ཤྭ་རིའི་བུ་དང་མོའུ་འགལ་གྱི་བུ་གཉིས་དམྱལ་ཁམས་ལ་སེམས་ཅན་གྱི་འགྲོ་དོན་དུ་བྱོན་དུས་ཤིག་ལ། མུ་སྟེགས་པའི་སྟོན་པ་ཞིག་དམྱལ་བར་སྐྱེས་ཡོད་པ་དེས་ཆ་འཕྲིན་བསྐུར་ནས། ཁྱེད་རྣམ་པ་གཉིས་ཕྱིར་མི་ཡུལ་ལ་བྱོན་དུས་ཁོའི་སློབ་མ་རྣམས་ལ་འདི་ལྟར་སྨྲོས་ཤིག ངའི་དོན་དུ་ཁྱེད་ཅག་གིས་སྦྱིན་སྲེག་ལ་སོགས་པའི་མཆོད་འབུལ་བྱས་ཚད་པོ་ཐམས་ཅད་ངའི་ཐོག་ཏུ་ལྕགས་བསྲེགས་ཀྱི་སེར་བ་ཤ་སྟག་ཏུ་གྱུར་ནས་འབབ་པར་འདུག་པས་དེ་འདྲ་མ་བྱེད་ཅིག མ་གཞི་ངེད་ཅག་གི་ལམ་དེ་ཕྱིན་ཅི་ལོག་པར་འདུག ཁྱེད་ཚོ་སངས་རྒྱས་བཅོམ་ལྡན་འདས་ཀྱི་རྗེས་སུ་ཞུགས་དང་ལམ་ཡང་དག་པར་འདུག་ཅེས་པ་བཞིན་དུ། གལ་ཏེ་ཆོས་བྱེད་པའི་སྐབས་སུ་བྱེད་ཚུལ་ཤེས་མེད་ན། ཆོས་མིན་ལ་ཡང་ལོག་ཏུ་ཡོད་པས། ཚོགས་མ་བསགས་པའི་རྒྱུ་རྫས་ཤིག་ཞིང་མ་དག་པའི་ས་ལ་བཏང་ན། བླ་མ་དམྱལ་བར་ལྟུང་། ཚེ་འདས་ཀྱང་དམྱལ་བར་ལྟུང་ནས། ཤི་བོའི་རྣམ་ཤེས་ཀྱི་ཐོག་ཏུ་ས་སྤུངས་པ་ལྟ་བུ་ཡང་འགྱུར་དུ་ཡོད་པ་ཡིན། མདོར་ན་ཚེ་འདིའི་བདེ་སྐྱིད་བསྐྲུན་ཐབས་ཀྱི་ཕྱོགས་ལ་བསམ་བློ་བཏང་ན་ཡང་། འཇིག་རྟེན་མི་ཡིས་འཇིག་རྟེན་གྱི་བྱ་བཞག་གི་ཐོག་ནས་སྒྲུབ་མི་ཐུབ་རྒྱུ་མང་པོ་ཞིག་ཐུག་ཏུ་ཡོད་པ་ཡིན། དེའི་སྐབས་སུ་ཇི་ལྟར་བྱ་དགོས་སྙམ་ན། དཀོན་མཆོག་ལ་སྙིང་ནས་གསོལ་བ་བཏབ་ན་འགྲུབ་ཐུབ་པ་ཡིན། འོན་ཀྱང་སྔོན་ཞིག་ནས་དཀོན་མཆོག་ལ་དད་པ་དང་། ཚོགས་བསགས་ཁྱད་པར་ཅན་རེ་མ་བྱས་ན། ཐང་བདེ་དུས་ཨ་ལ་ལ་མོ། །འཕྲང་དོག་དུས་ཨོ་རྒྱན་པདྨ། །ཞེས་པ་བཞིན་དུ་སྡུག་ཐུག་དུས་གཞི་ནས་དཀོན་མཆོག་ཚར་དྲན་དང་ཚར་འབོད་བྱས་པ་ཙམ་གྱིས་འདོད་དོན་འགྲུབ་དཀའ་བ་ཡིན། འོན་ཀྱང་དེ་ནི་འགྲུབ་རུང་མ་འགྲུབ་རུང་ཚེ་འདིའི་སྣང་བ་འདི་བར་སྣང་གི་གློག་དང་འདྲ་བ་ཡུན་ཐུང་བ་ཡིན། འདེང་ཕོག་ན་ཚེ་ཕྱི་མའི་སྐྱེ་བའི་ཕྲེང་བ་ཚེ་རབས་ཚེ་བརྒྱུད་ཐམས་ཅད་ཀྱི་སྐྱིད་སྡུག་དེ་རྩ་བ་རང་གིས་བསགས་འབྲས་ཡིན་པས། བླ་མ་དཀོན་མཆོག་ལ་དད་གུས་མཆོད་འབུལ་གྱི་ཐོག་ནས། ཚོགས་བསགས་སྒྲིབ་སྦྱོང་གི་ཐབས་ཟབ་མོ་ཉམས་སུ་ལེན་ཐུབ་ན། ཕྱི་མའི་དོན་ཆེན་འགྲུབ་ཞོར་དུ་ཚེ་འདིའི་དོན་ཆུང་རང་བཞིན་ཤུགས་ཀྱིས་འགྲུབ་པ་ནི། དཔེར་ན་སྟོན་ལོ་ཡག་གི་སྙེ་མ་བསྡུ་ཡོང་དུས། རྩྭ་སོག་མ་ཞོར་འབྱུང་གིས་ཡོང་བ་ལྟ་བུ་ཡིན། ལོགས་སུ་འབད་པ་ཞིག་བྱེད་དགོས་མ་ཡིན། ས་བཟང་ས་ཆོས་ས་ཆོས་ཡུལ་གྱི་མི་དེ་ཆོས་འཇིག་རྟེན་གཉིས་ཀྱི་ཐད་ནས་ཤེས་བྱ་སྣ་མང་ཞིག་གོ་མྱོང་ཡོད་པའི་སྟབས་ཀྱིས་རྒྱུ་དག་འཇམ་ཤ་རེ། ངང་རྒྱུད་རིང་ཤད་དེ། མི་མཐོ་དམན་དྲག་ཞན་སུ་དང་ཐུག་ཀྱང་། འཛུམ་པའི་མདངས་ཀྱིས་སྔུན་བསུ། སྙན་མོའི་ཚིག་གིས་ལན་བྱིན། གཏམ་དྲིས་ན་དྲང་མོར་བཤད་པ། འདྲིས་ན་འགྲོགས་ཡུན་རིང་བ། དོན་ཅི་ཞིག་གི་ཐད་ནས་འབྲེལ་ཡང་ཕན་སེམས་བསམ་པ་བཟང་པོ་དང་མ་བྲལ་བ། རང་གཅེས་པ་རྒྱུ་མཚན་དུ་བྱས་ཏེ་སེམས་ཅན་སྲོག་ཆགས་གཞན་ལ་གནོད་པ་མི་སྐྱེལ་བར། བདེན་གྱིས་སྐྱེས། དྲང་གིས་རྒས་སོང་བའི་ཕོ་མོ་རྒན་གཞོན་སུ་དང་ཐུག་ཀྱང་ཡ་རབས་ཆོས་དང་མཐུན་པའི་གཏམ་ཞིག་མ་གཏོགས་བཤད་རྒྱུ་མེད་པ། ཁྱིམ་པ་ཕོ་མོ་དག་ཀྱང་ཁ་མ་ཎི་ལས་མི་མི་འབྲལ་ཞིང་། ལག་ཕྲེང་བ་དང་མི་འབྲལ་བ། རྒྱུ་ཐང་ལ་བརྡལ་ནས་ཡོད་ཀྱང་རྐུ་མཁན་མེད་པ། མི་ལ་གཏམ་ཡོད་པ། གཏམ་ལ་མནའ་ཡོད་པ། དེ་འདྲ་དེ་དག་གི་ཚེ་བསོད་ནམས། ལས་དབང་ཐང་། ཁ་ལས་རླུང་རྟ་གྱེན་ལ་འགྲོ་བ་ཡིན། དེ་ཅིའི་ཕྱིར་ཞེ་ན། དེ་དག་ལ་དཀར་ཕྱོགས་ཀྱི་ལྷ་དང་སྲུང་མས་སྲུང་སྐྱོབ་བྱེད་པའི་དབང་གིས་ཡིན། དེ་ལྟ་བུའི་ས་ཆ་བཟང་ས་དེ་ལ། རི་སྨུག་པ་ཅན་ལ་རི་དྭགས་འཁོར། མཚོ་རླངས་པ་ཅན་ལ་ཉ་སྲམ་འཁོར་ཞེས་པའི་དཔེ་ལྟར་ཏུ། ཕྱོགས་ཀྱི་མགྲོན་པོ་ངང་གིས་འདུས་ནས། ཆོས་ནོར་སྡེ་བཞིའི་དཔལ་དང་འབྱོར་བ་རྒྱས་པ་ཡིན། མི་སྨོན་རང་སྐྱིད་གཉིས་ཀ་ཞེས་པ་དེ་འབྱུང་བ་ཡིན། ས་སྡུག་ས། ཆོས་མེད་ས། ལས་རྒྱུ་འབྲས་ངོ་མི་ཤེས་པ། ཡ་རབས་བཟང་པོའི་སྤྱོད་ལམ་ཞིག་མཐོང་མ་མྱོང་ཞིང་། རྒྱུ་ཟས་ནོར་ཞིག་གི་དོན་ལ་དྲིན་ཕ་མ་ཡིན་རུང་མི་བརྩི་བ། ཤག་ཕུ་ནུ་ཡིན་ཡང་མི་ལྟ་བ། རྐུ་རྒྱུ་བསྣོག་རྒྱུ། ཆང་འཐུང་། དུ་བ་འཐེན། རྒྱན་འཇོག ཕ་གཞིས་མ་གསོག་གི་རྒྱུ་ནོར་ཡོད་ཚད་གཏའ་མ་བུ་ལོན་ཤོ་བག་གི་རྒྱན་ལ་ཤོར་ནས། དགྲ་ལ་ཐུག་ནས་ཐམས་ཅད་ཕྲོག་སོང་བ་དང་། ཁང་མྱེ་རོ་དུད་སོང་ནས་ཁྱིམ་གཞིས་རླག་སོང་བ་མིན་ན་ཡང་། མདོར་ན་ཉི་མ་གཅིག་ལ་སྤྲང་པོར་བུད། ཧ་བརྒྱ་དོམ་སྟོང་ལ་ལོག གསོན་ན་རྒྱུ་མེད། ཤི་ན་ཆོས་མེད། དེ་ལྟ་བུའི་ས་ཆ་ལ་ཕྱི་མི་ཞིག་ཡོང་ནས་གཏམ་ཞིག་དྲིས་ན་རྒྱུད་གྱོང་ཤ་རེ། གཤིས་རྩུབ་ཤ་རེ། གང་ལ་ཐུག་ན་ལྡུམ་བུ་གཟེ་མ་ར་འགོ་ལ་རེག་པ་དང་འདྲ་བ། རང་སྡེའི་ནང་གི་ཤག་ཕུ་ནུ་ནང་ཁ་ནང་གསུམ་ཞིག་ལ་ཐུག་ནའང་གཏམ་ཚིག་གསུམ་བཤད་ས་མེད་པར་གྲི་མགོ་འཕུར་ཞིང་། ཉམ་ཆུང་ཐུབ་འདུག་བསམ་ན་དགེ་སྡིག་མེད་པ། ཕྱི་དགྲ་ལྕགས་ནག་གི་སེར་བ་འདྲ་ཞིག་ཐུག་ན་གར་སོང་མེད་པར་བྲོས་འགྲོ་བ། དྲིན་ཕ་མ་རྒན་གསུམ་ལ་མི་བརྩི་མི་སྐྱོང་། ལྷ་བླ་མ་དགེ་བའི་བཤེས་གཉེན་ལ་དད་གུས་མེད་པ་དེ་ལྟ་བུས་ལུང་པ་གང་སོང་དུས་ས་ཆ་མུན་པ་ནག་པོར་ལོག་སོང་བ་རེད། གནའ་ཞིག་ལ་མི་དྲ་མ་ཞིག་སྐྱེས་མྱོང་བ་དང་བླ་མ་མཆོག་གྱུར་རེ་བྱོན་མྱོང་བ་ཟེར་བ་ཙམ་ལས་ད་ལྟ་མེད་པ་གནའ་ཤྭ་བ་ཉལ་ཤུལ་དུ་དེང་སང་ཤེའུ་མ་ཉལ་ན། ན་ནིང་གི་དྲོད་རླངས་ཀྱིས་ད་ལོའི་ས་ཆུ་ལ་ཕན་ཐོགས་མེད་པ་ཡིན། དེ་འདྲ་བའི་ས་ཆ་ལ་ནད་མུག་ཡམས། མཚོན་འཁྲུག་རྩོད་དར་ཞིང་། དམ་སྲི་མི་ཁོག་ལ་ཞུགས་ནས་མི་བློ་འདྲེ་ཡིས་བསྒུལ་ཏེ་ཤར་ཕུང་། ལྷོ་བརྫད། ཐ་མར་ཡུལ་ལུང་ནག་པོར་གྱུར་ཏེ། ལྷ་སྲུང་མ་རྒྱབ་ཀྱིས་ཕྱོགས། འདྲེ་འབྱུང་པོ་ཚུར་ལ་འཁོར་ཏེ། ཆོས་དཀར་ཕྱོགས་ཀྱི་དབུ་འཕངས་མར་ལ་འབེབ་དུས། མི་ཡུལ་ཞེས་ཀྱང་འདྲེ་ཡུལ་ཞིག་ཏུ་འགྱུར་དུ་ཡོད་པ་ཡིན། ཨོ་རྒྱན་ཆེན་པོས། དུས་ནི་མི་འགྱུར་མི་རྣམས་འགྱུར་བ་ཡིན། །ཞེས་གསུངས་ཡོད་པ་ཡིན། དེ་ཡང་དུས་འགྱུར་བ་ཞེས་པ་ཕྱིའི་འབྱུང་བཞིའི་འཕོ་འགྱུར་ནམ་ཟླ་དབྱར་དགུན་སྟོན་དཔྱིད་ཀྱི་བརྗེ་རེས་ལོ་སྐོར་ཟླ་བ་བཅུ་གཉིས་ཀྱི་འཁོར་འགྲོས་འགྱུར་ག་ལ་འགྲོ། གནམ་ས་དང་ས་གནམ་ལ་གྱུར་ནས་མགོ་མཇུག་ལོག་འགྲོ་བ་མ་ཡིན་པར་མི་བློ་བདུད་ཀྱིས་བསྒྱུར་ཏེ་ནག་ཕྱོགས་འབྱུང་པོ་ཁ་དར་དུས། མིའི་བསམ་པ་དང་བྱ་སྤྱོད་འགྱུར་ཞིང་། དེའི་དབང་གིས་ཡུལ་ལ་མི་དགེ་བ་དར་ནས། དེའི་འབྲས་བུ་ནད་མུག་མཚོན་འཁྲུག་དར་ཏེ་རང་གཞན་ཐམས་ཅད་མི་བདེ་བར་འགྱུར་བ་ཡིན། དེས་ན་སྤྱིར་ཡུལ་དང་ལུང་པ། སྒོས་རང་ཉིད་ཀྱི་ཉེ་གཞིས་རྩ་ལག ཁྱད་པར་དུ་ཁྱིམ་ཕ་མ་སྤུན་གྲོགས་རྣམས། ཚེ་འདི་བདེ་ཕྱི་མ་སྐྱིད་པ་ཞིག་བྱེད་དགོས་འདུག་སྙམ་ན། ལས་རྒྱུ་འབྲས་བསྲུངས་ཤིང་དཀར་པོ་དགེ་བའི་ལས་ལ་སྙིང་རྗེའི་ཕན་སེམས་ཀྱིས་གཞིར་བཟུང་བའི་ལུས་ངག་གི་དགེ་བ་སྣ་རེ་ཡན་ཆད་འགྲུབ་ན། རང་བདེ་གཞན་སྐྱིད་གཉིས་ཀ་དེའི་ཐོག་ནས་ཡོང་བ་ཡིན། དེའི་ཐོག་ནས་མིས་མི་ལ་ལྟོས་དང་། ཚང་མ་མི་ཡིན་ཕྱིར། མི་འགའ་རེས་གསོན་གྲོང་ངའི་ཁམས་ན་ཡོད་པའི་རིང་ལ་ཆོས་དགེ་བ་བསྒྲུབས། ཚོགས་བསགས་སྒྲིབ་སྦྱོང་བྱས། ཚེ་སྟོད་སྨད་གཉིས་ཀ་ཆོས་དང་འབྲེལ་ནས་ཕྱི་མ་ཞིང་ཁམས་གང་སྐྱིད་གདམ་འགྲོ་བའི་མི་དང་། ཡང་མི་འགའ་རེས་མི་ཚེ་སྡིག་སྡུག་གཉིས་ཀ་ལ་འབགས། ཁ་མ་སོས། ནམ་མ་ལངས། ཤི་ཁར་བྲང་ལག་འཐབ། ལས་ལས་བཅས་བཅས་པ་ཐམས་ཅད་ཀྱིས་དམྱལ་བའི་གཏིང་རྡོ་རང་གིས་རང་ལ་བྱས་པའི་མི་ཡོད་པ་རེད། དེ་ལས་གང་ཅན་པོ་བྱེད་ད་ལྟའི་སྐབས་འདིར་རང་ལག་ཡིན། ཡར་འགྲོ་མར་འགྲོའི་ས་མཚམས་ཟེར་བ་དེ་མཚན་བྱང་མགོ་ལ་དབང་བསྐུར་དུས་ཤིག་ལ་མིན་པར་ད་ལྟ་རང་དབང་རང་ལག་ཏུ་ཡོད་དུས་ལམ་གང་གདམ་རྟ་ཁ་སྲབ་ཀྱིས་གང་ལ་བསྒྱུར་ན་ཆོག་དུས་ལྟ་བུ་ལས་མ་འདས། དེ་ཡང་ཆོས་སྒྲུབ་ཅེས་པ་དེ་ཡིན་ན་མིན་ན་མཚམས་ནག་སྒོ་བཅད་བྱེད་ནས་འདུག་དགོས་པ་ཞིག་དང་། ཡིན་ན་མིན་ན་བླ་སེར་ཞིག་གིས་མ་གཏོགས་བསྒྲུབ་མི་རུང་བ་དང་། ཡིན་ན་མིན་ན་ལྷ་ཁང་ཞིག་དང་ཆོས་ར་ཞིག་གི་ནང་ནས་མ་གཏོགས་བསྒྲུབ་མི་རུང་བ་ཞིག་མ་ཡིན་པར། ཆོས་ནི་འགྲོ་ཞོར་འདུག་ཞོར་ལའང་སྒྲུབ་ཆོག་ཅིང་། ཟེར་ཞོར་གཏམ་ཞོར་ལའང་སྒྲུབ་ཆོག་པ་ཡིན། འདོན་རྒྱུ་བསྐོར་རྒྱུ་ལས་གཞན་པའི་ཆོས་བསྒྲུབ་རྒྱུ་མེད་པ་མ་ཡིན་པར་རང་རྒྱུད་ཆོས་དང་འདྲེས་དགོས་པ་ཞིག་ཡིན། རང་རྒྱུད་ཆོས་དང་འདྲེས་ན་བྱ་སྤྱོད་ཆོས་ལ་འདྲེས་ཡོང་བ་དང་། བྱ་སྤྱོད་ཆོས་ལ་འདྲེས་ན་ངག་ཚིག་ཆོས་ལ་འདྲེས་ཡོང་བ་ཡིན། ཆོས་དང་རྒྱུན་གྱི་འཚོ་བ་གཉིས་ཀ་ཁ་མ་བྲལ་བ་ཞིག་ཏུ་ལོག་དུས། སོང་ཚད། བསྡད་ཚད། བཤད་ཚད། ལས་ཚད་ཚང་མ་ཆོས་དང་མཐུན་པ། འབྲེལ་ཚད་དོན་ལྡན་རང་གཞན་གཉིས་ཀྱི་དོན་མཉམ་དུ་འགྲུབ་ཏུ་ཡོད་པ་དེ་འདྲ་ཞིག་ཐབས་བཀོད་པ་མེད་པ་ཞིག་ག་ལ་ཡིན། དཔེར་ན་དེ་རིང་མི་མང་འཛོམས་ས་ཞིག་ལ་ཐོན་སོང་དུས། གཅིག་གིས་ཁྱོད་ལ་དོན་མེད་ས་ཞིག་ནས་ཁེལ་ཐོ་གློ་མདུང་ཞིག་བྱས་ཡོང་ན། ཁྱོད་ཀྱིས་ཕར་ལ་སྤུན་ཡ་སྤུན་རྡིས་ཁྱོད་སྤྲོ་མ་ལངས་ཞེས་སྨྲས་ན། དེ་ལ་བཟོད་པ་བསྒོམས་པ་ཡིན་པས་བསོད་ནམས་ཆེན་པོ་བསགས་པ་ཡིན། ཕ་རོལ་གྱི་མི་དེས་ངན་གཤིས་ཤིག་ངོམ་པ་དེ་ངོ་ཚ་ཉོ་བྱེད་དུ་སོང་བ་ཡིན། གལ་ཏེ་ཁྱོད་ཀྱིས་དེ་ཐུབ་དགོས་ན། འཇམ་པོའི་ཚིག་དེས་ཁུ་ཚུར་གྱིས་རྣ་རྩར་གཅིག་བརྒྱབ་པ་བས་ཐུ་ཞིག་ཐུབ་སོང་བ་ནི། འཇམ་པོས་འཇམ་པོ་འཇོམས་བྱེད་ཅིང་། །འཇམ་པོས་རྩུབ་པོའང་འཇོམས་པར་བྱེད། །འཇམ་པོས་ཀུན་འགྲུབ་དེ་ཡི་ཕྱིར། །འཇམ་ཉིད་རྣོ་ཞེས་མཁས་རྣམས་སྨྲ། །ཞེས་གསུངས་པ་ལྟ་བུ་ཡིན། ཕ་རོལ་པོ་ལ་ཡང་ཕྱིན་ཆད་དེ་འདྲ་བྱ་རུང་མི་འདུག་སྙམ་པའི་དྲན་བསྐུལ་བཟང་པོ་ཞིག་ཐོབ་སོང་བ་ཡིན། དེ་ལ་བརྟེན་ནས་རང་ཡང་མི་ཁོག་ཡངས་བློ་རྒྱ་ཅན། ཐམས་ཅད་ཀྱིས་བརྩི་ས། ཐམས་ཅད་ཀྱིས་ཆ་འཇོག་སའི་མི་ཞིག་ཏུ་གྱུར་པ་ཡིན། འུ་ཚོ་ས་ཁུག་ལུང་དཀྱོག་གི་མི་དག་གིས་རྒྱག་རེས་བྱེད་འདུག་པ་དེ་ཡང་། ཀན་གྱིས་ངའི་ཚོད་ལ་བལྟ་བ་འདུག་སྙམ་པ་དང་། གཅིག་ཤོས་ཀྱིས་ཀྱང་དེ་ལྟར་སེམས་ནས་ཁོག་ཆུང་འདྲ་འདྲ་གཉིས་ཐུག་སོང་བ་ལས་བྱུང་བ་ཡིན། སྒྲུང་ཡིག་གི་ནང་ནས། སྐྱེས་ཕོ་ངན་འདྲ་གཉིས་ཐུག་པའི་དུས། །ཀུ་རུས་འཕྲ་རྡུང་བྱས་པ་འདྲ། །ན་ལེ་གཟེར་ལེ་གཉིས་ཀ་རེད། །ཅེས་པ་ལྟ་བུ་ལས་མི་འདའ་བར་རང་གཞན་གཉིས་ཕུང་དུ་འགྲོ་བ་ཡིན། དེས་ན་རྒྱུན་དུ་བསམ་པ་བཟང་པོ་སྙིང་རྗེའི་སེམས་དང་མ་བྲལ་བ་ཞིག་བྱེད་དགོས། སེམས་ཅན་ཐམས་ཅད་ད་ལྟའི་ཕ་མ་དང་ཁྱད་མེད་པ་ཞིག་དང་པོ་ཉིད་ནས་བསམ་མ་ཐུབ་རུང་། དམྱལ་བ་ཡང་སོས་ཀྱི་ཡུལ་དང་། ལྷ་མ་ཡིན་གྱི་ཡུལ་དུ་སྐྱེས་སོང་བ་ལྟར་དུ་མི་དང་མི་ཐུག་དུས་དགྲ་དང་དགྲ་ཐུག་སོང་བ་འདྲ་བའི་འཇིགས་སྐྲག་ཅན་གྱི་དམྱལ་ཁམས་ཤིག་ཏུ་མི་འགྱུར་བའི་ཕན་པ་ཡོད་པ་ཡིན། བདེ་བ་ཅན་དུ་སྐྱེ་དགོས་ན་སྐྱེ་བྱེད་ཀྱི་རྒྱུ་དང་པོ་དེ་རྟེན་ཚོགས་ཞིང་གསལ་འདེབས་པ་སྣང་སྲིད་ལྷ་དང་ལྷ་མོ། སྒྲ་གྲགས་སྔགས་དང་ཆོས་སྒྲ། དྲན་རྟོག་ཐུགས་ཀྱི་ཏིང་འཛིན། སྣོད་བཅུད་བདེ་བ་ཅན་གྱི་ཞིང་ཁམས་སུ་བསྒོམས་ན་སྔགས་ཀྱི་མྱུར་ལམ་དང་འབྲེལ་ཏེ་ཡོད་པ་ཡིན། རྒྱུ་ཚོགས་བསགས་སྒྲིབ་སྦྱོང་དེ་ཡང་ཡར་དཀོན་མཆོག་ལ་མཆོད་ན་མཆོད་ཡུལ་གྱི་ཞིང་ས་དང་། མར་སེམས་ཅན་ལ་བྱིན་ན་སྦྱིན་ཡུལ་གྱི་ཞིང་ས་ཡིན་པས། སྙིང་རྗེའི་སེམས་དང་བསམ་པ་བཟང་པོས་མ་འབྲེལ་ས་ཞིག་ཡོད་པ་མ་ཡིན། རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ། ཁྱད་པར་དུ་དེ་རིང་སྐབས་སུ་བབ་པའི་བཤད་བྱ་བདེ་བ་ཅན་དུ་སྐྱེ་བའི་རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་འདི་དང་འབྲེལ་ཆེ་བས་མ་ཚད་དེ་ནི་ལྷག་པར་དུ་སྙིང་རྗེ་ཕན་སེམས་ཤིག་དང་མ་འབྲེལ་ཐབས་མེད་ཡིན། དེ་ཡང་གྲོགས་བྱང་ཆུབ་མཆོག་ཏུ་སེམས་བསྐྱེད་པ་འདི་སྨོན་ལམ་གྱི་གཞུང་གི་ནང་ནས་ས་བཅད་ལོགས་སུ་གསུངས་མེད་པས་ཚིག་ཟིན་དུ་དངོས་སུ་མེད་ན་ཡང་། གོང་གི་བསྔོ་བའི་སྐབས་ཀྱི་ཤུགས་བསྟན་དུ་འབྱུང་བ་ཡིན། འདི་ནས་དེའི་སྐོར་ལ་ཡང་བསྐྱར་རྗེས་དྲན་ཞིག་བྱེད་ན། ཐེག་ཆེན་ལམ་གྱི་རྩ་བ་ནི་བྱང་ཆུབ་མཆོག་ཏུ་སེམས་བསྐྱེད་པ་ཡིན་པས། བྱང་ཆུབ་མཆོག་ཏུ་སེམས་བསྐྱེད་པ་དེ་དང་བྲལ་སོང་པ་ཡིན་ན། ཐེག་པ་ཆེ་ཆུང་གང་གི་ཆོས་ཉམས་སུ་བླངས་ཀྱང་། དེ་ཐེག་པ་ཆེན་པོའི་ཆོས་ཀྱི་གྲལ་ལ་འགྲོ་བ་མ་ཡིན། དེས་ན་ཐེག་པ་ཆེན་པོའི་ཆོས་སྒོར་ཚུད་པའི་ཆོས་པ་ངོ་མ་ཞིག་བྱེད་བསམ་ན། ལས་དང་པོ་བའི་གནས་སྐབས་ན་ལྟ་བ་སྒོམ་པ་ལ་སོགས་པ་མང་པོ་ཞིག་བཤད་འདུག་པ་བས་བསམ་པ་བྱང་ཆུབ་ཀྱི་སེམས་ཤིག་བསྐྱེད་རྒྱུ་གལ་ཆེ་བ་ཡིན། དེས་ན་ཆོས་པ་ལས་དང་པོ་བ་ལ་ཐོག་མའི་རྨང་གཞི་སྙིང་རྗེས་ཀུན་ནས་བསླངས་པའི་བསམ་པ་བཟང་པོ་ཞིག་དགོས་པ་ནི། བསམ་པ་བཟང་ན་ས་དང་ལམ་ཡང་བཟང་། །བསམ་པ་ངན་ན་ས་དང་ལམ་ཡང་ངན། །ཞེས་རང་རེས་ཉིན་བཞིན་ལུང་སྐྱོར་བ་ལྟ་བུ་ཡིན། དེ་ལ་བསམ་པ་བཟང་པོ་དང་ལྡན་ན་ས་དང་ལམ་བཟང་པོ་ཅི་ཞིག་ལྡན་པ་ཡིན་ཅེ་ན། ས་བཟང་པོ་ས་བཅུ་དང་། ལམ་བཟང་པོ་ལམ་ལྔ་བགྲོད་ནས་འབྲས་བུ་བཟང་པོ་སངས་རྒྱས་ཀྱི་གོ་འཕང་ཐོབ་པ་དང་། བསམ་པ་ངན་ན་ས་དང་ལམ་ཇི་ལྟར་ངན་པ་ཡིན་ཞེ་ན། ས་ངན་པ་ཁམས་གསུམ་ས་དགུ་དང་། ལམ་ངན་པ་འགྲོ་བ་རྒྱུད་ལྔ་ལ་བརྟེན་ནས་འབྲས་བུ་ངན་པ་ཁམས་གསུམ་འཁོར་བའི་གནས་ནས་ཐར་དུ་མེད་པའོ། །དེས་ན་སྙིང་རྗེས་དྲངས་བའི་བསམ་པ་བཟང་པོས་ཀུན་ནས་བསླངས་ཏེ། བྱང་ཆུབ་ཀྱི་སེམས་རིན་པོ་ཆེ་ངེས་པར་དུ་རྒྱུད་ལ་བསྐྱེད་དགོས་པ་ཡིན། དེ་དགོས་ན་བྱང་ཆུབ་ཀྱི་སེམས་ཞེས་པ་དེ་གང་འདྲ་ཞིག་ཡིན་ཅེ་ན། དེ་ལ་ཀུན་རྫོབ་བྱང་ཆུབ་ཀྱི་སེམས་སྨོན་དང་འཇུག་པའི་བདག་ཉིད་ཅན་ཞིག་དང་། དོན་དམ་བྱང་ཆུབ་ཀྱི་སེམས་ངེས་དོན་མཐར་ཐུག་གི་སྐྱེལ་སོ་ལ་བབ་པ་ཞིག་དང་གཉིས་ཡོད་པ་ལས། ལས་དང་པོ་བས་ཀུན་རྫོབ་བྱང་ཆུབ་ཀྱི་སེམས་བསྐྱེད་པ་དེ་ཡང་ལྟ་བའི་གྲོགས་སུ་ཡོད་དགོས་པ་ཞིག་ཡིན་ཏེ། གལ་ཏེ་བསམ་པ་རྒྱ་ཆེ་བ་བྱང་ཆུབ་ཀྱི་སེམས་དེ་དང་བྲལ་བ་ཡིན་ན་སྟོང་ཉིད་ཉན་རང་གིས་ཀྱང་རྟོགས་ཡོད་ན་ཡང་མཐར་ཐུག་རང་གཞན་གཉིས་དོན་འགྲུབ་མེད་པ་ལྟ་བུ་ཡིན། བར་དུ་ཀུན་རྫོབ་དང་དོན་དམ་གྱི་སེམས་གཉིས་ཀ་ཟུང་འཇུག་ཡ་མ་བྲལ་བའི་ཐོག་ནས། ཆེན་པོ་གསུམ་གྱི་ལྟ་བས་བློ་སྦྱོང་པས་མཐར་ཐུག་ངེས་དོན་ངོ་མ་དོན་དམ་བྱང་ཆུབ་ཀྱི་སེམས་རྒྱུད་ལ་སྐྱེས་ཏེ། སེམས་རྣམ་པར་རྟོག་པའི་རྒྱུ་བ་དབྱིངས་སུ་ནུབ་ཅིང་ས་ལམ་གྱི་ཡོན་ཏན་མཐར་ཕྱིན་ནས། དོན་གཉིས་ལྷུན་གྱིས་འགྲུབ་དགོས་པ་ཡིན། དེས་ན་དྲང་དོན་དང་གཅིག ངེས་དོན་ཙམ་དང་གཉིས། ངེས་དོན་མཐར་ཐུག་པ་ཞིག་དང་གསུམ་གྱི་རིམ་པ་བརྒྱུད་དགོས་པ་ཡིན་པས། ཐོག་མར་ཀུན་རྫོབ་བྱང་ཆུབ་ཀྱི་སེམས་དེ་ལ་མ་བརྒྱུད་ཐབས་མེད་ཡིན། དེ་རྒྱུད་ལ་སྐྱེ་བར་བྱེད་པ་ལ་ཚད་མེད་བཞིས་བློ་སྦྱོང་བ་སྔོན་དུ་མ་སོང་ཐབས་མེད་ཡིན། གལ་ཏེ་ཚད་མེད་བཞིས་བློ་ལེགས་པོ་ཞིག་སྦྱངས་མ་ཐུབ་ན། ཐོག་མེད་ནས་གོམས་པའི་བདག་འཛིན་གྱི་བསམ་པ་འདི་ཤུགས་ཆེ་སོང་བའི་སྟབས་ཀྱིས་རང་དོན་ཁོ་ན་ལ་བརྩོན་པའི་བསམ་པ་དང་སྦྱོར་བ་འདི་སྤངས་མི་ཐུབ་ལ། དེ་སྤངས་མ་ཐུབ་པར་རང་དོན་ཏག་ཏག་ཅིག་བསྒྲུབས་ཀྱང་རང་དོན་ཡང་དག་ཅིག་འགྲུབ་པ་མ་ཡིན། ཆོས་དང་འཇིག་རྟེན་གང་གི་ཐད་ནས་ཡིན་ཡང་གཞན་དོན་བསྒྲུབས་ནས་རང་དོན་ཞོར་འབྱུང་ལ་འགྲུབ་སོང་བ་ཞིག་མ་གཏོགས་པར་རང་དོན་བསྒྲུབས་ནས་རང་དོན་བཟང་པོར་འགྲུབ་སོང་བའི་དཔེ་ཞིིག་ཡོད་པ་མ་ཡིན། འཇིག་རྟེན་གྱི་ཕྱོགས་ནས་ཀྱང་མི་རང་འདོད་ཕུགས་བཅུག་བྱེད་འདུག་མཁན་ང་ཏག་ཏག་བླ་མས་སྐྱོབས་ཟེར་འདུག་པ་དེས་ཐ་མར་རང་འདོད་ཀྱང་འགྲུབ་པ་མ་རེད། དམ་པའི་ཆོས་ཕྱོགས་ནས་ཀྱང་ཉན་རང་གཉིས་ཀས་རང་དོན་ཞི་བདེ་དོན་དུ་གཉེར་བས། རྒྱལ་སྲས་བྱང་ཆུབ་སེམས་དཔའི་སའི་ཡོན་ཏན་དང་། སངས་རྒྱས་བཅོམ་ལྡན་འདས་ཀྱི་མཐར་ཐུག་གི་འབྲས་བུ་མ་ཐོབ་པ་ཡིན། དེ་ལྟར་དོན་མི་འགྲུབ་པའི་རྩ་བ་ནི་རང་འདོད་ལ་ཐུག་ཡོད་པ་ཡིན། དེས་ན་རང་འདོད་མི་བསྒྲུབས་པར་གཞན་ཕན་བྱང་ཆུབ་ཀྱི་སེམས་རྒྱུད་ལ་བསྐྱེད་པར་བྱ་དགོས། འོ་ན་བྱང་ཆུབ་ཀྱི་སེམས་རིན་པོ་ཆེ་ཞེས་པ་དེ་གང་ཡིན་ཅེ་ན། སེམས་ཅན་ཐམས་ཅད་སངས་རྒྱས་ཀྱི་གོ་འཕང་མཆོག་ལ་འགོད་འདོད་ཀྱི་བསམ་པ་ཡང་དག་པ་ཞིག་རྒྱུད་ལ་སྐྱེས་པ་དེ་ཡིན། དེ་འདྲའི་བསམ་པ་དེ་སྐྱེ་དགོས་ན་ཐབས་ཅི་འདྲ་ཞིག་ལ་བརྟེན་དགོས་པ་ཡིན་སྙམ་ན། བྱམས་དང་སྙིང་རྗེ་དགའ་བ་བཏང་སྙོམས་ཏེ་ཚད་མེད་རྣམ་པ་བཞིས་བློ་སྦྱོང་དགོས་པ་ཡིན། བྱམས་པ་དང་སྙིང་རྗེ་ལ་སོགས་པ་བཞི་པོ་དེ་ལ་ཚད་མེད་ཅེས་པའི་དོན་ནི། དམིགས་པའི་ཡུལ་ཚད་མེད། རྣམ་པའི་བློ་ཚད་མེད། དེའི་འབྲས་བུ་ཚད་མེད་ཡིན་པས་ན་ཚད་མེད་ཅེས་སུ་གསུངས་པ་ཡིན། བྱམས་པ་ལ་སོགས་པ་བཞི་པོ་དེ་ལ་ངེས་འབྱུང་གི་བསམ་པས་མ་ཟིན། བྱང་ཆུབ་ཀྱི་སེམས་ཀྱིས་མ་ཟིན། སྟོང་ཉིད་ཀྱི་ལྟ་བས་མ་ཟིན། བདག་མེད་རྟོགས་པའི་ཤེས་རབ་ཀྱིས་མ་ཟིན་ན། དེའི་མིང་ལ་ཚངས་པའི་གནས་པ་བཞི་ཞེས་གྲགས་པ་ཡིན། ཚད་མེད་བཞིའི་མིང་མི་ཐོབ་པ་ཡིན། ཚངས་པ་མདུན་ན་འདོན་ལ་སོགས་པ་ཚངས་གནས་བཞི་ལ་སྐྱེ་བྱེད་ཀྱི་རྒྱུ་རུ་འགྲོ་བ་ལས། ཐམས་ཅད་མཁྱེན་པའི་ལམ་དུ་འགྲོ་བའི་དངོས་རྒྱུ་རུ་མི་འགྱུར་བ་ཡིན། ཐམས་ཅད་མཁྱེན་པའི་དངོས་རྒྱུ་རུ་འགྱུར་བ་ལ་དམིགས་རྣམ་ཚད་མེད་པ་ཞིག་དགོས་པ་ཡིན། གཞུང་གི་གོ་རིམ་ལྟར་ན་བྱམས་པ་ནས་འགོ་བཟུང་ཏེ་བགྲང་བ་ཡིན་མོད། མན་ངག་གི་ལུགས་སུ་བཏང་སྙོམས་ཚད་མེད་ནས་འགོ་བཟུང་ནས་བསྒོམ་དགོས་པ་ཡིན། ལས་དང་པོ་བས་དམིགས་བཅས་ཀྱི་ཚད་མེད་སྒོམ་དུས་དམིགས་རྣམ་སྤྲད་ནས་བསྒོམ་དགོས་པ་ཡིན། དམིགས་རྣམ་སྤྲད་ཅེས་པ་དེ་ཅི་འདྲ་ཞིག་ཟེར་བ་ཡིན་སྙམ་ན། དམིགས་པ་ནི་ཡུལ་དང་། རྣམ་པ་ནི་བློ་ཡིན། དེ་ལ་དམིགས་པའི་ཡུལ་མ་ནམ་མཁའ་དང་མཉམ་པའི་སེམས་ཅན་ཐམས་ཅད་ལ་དམིགས་ནས། རྣམ་པའི་བློ་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་འདོད་ཀྱི་བྱམས་པ། སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་འདོད་པའི་སྙིང་རྗེ། སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་འདོད་པའི་དགའ་བ། སེམས་ཅན་ཐམས་ཅད་ཉེ་རིང་ཆགས་སྡང་གཉིས་དང་བྲལ་བར་འདོད་པའི་བཏང་སྙོམས་ཏེ་། དེ་དག་ནི་དམིགས་བཅས་ཀྱི་སྒོམ་ལུགས་སོ། །དམིགས་མེད་དེ་ཇི་ལྟར་བསྒོམ་དགོས་སྙམ་ན། ལས་དང་པོ་བས་ནི་འདི་ལྟར་སྣང་བའི་ཆོས་ཐམས་ཅད། སྒྱུ་མ་སྨིག་སྒྱུ་མིག་ཡོར་བྲག་ཆ་ལ་སོགས་པ་སྒྱུ་མའི་དཔེ་བརྒྱད་དུ་བློ་སྦྱངས་ནས་བསྒོམ་པར་བྱ་བ་དང་། རྟོགས་པ་མཆོག་ལྡན་ཞིག་ཡིན་ན། མཉམ་བཞག་གི་རྩལ་དེ་བྱམས་དང་སྙིང་རྗེ་ལ་སོགས་པ་ཤར་བའི་ཚུལ་གྱིས་སྒོམ་པའོ། །ལས་དང་པོ་བས་དམིགས་བཅས་ཀྱི་ཚད་མེད་བཞི་བསྒོམ་ཚེ། དང་པོར་བཏང་སྙོམས་ནས་འགོ་བཟུང་སྟེ་མ་སྦྱངས་ན། བྱམས་པ་ལ་སོགས་པ་གཞན་ཐམས་ཅད་ཚད་མེད་ལ་འགྲོ་ཐུབ་པར་ཕྱོགས་རེ་བ་རུ་འགྲོ་བ་ཡིན། སྒོམ་ཚུལ་ལ་ཡང་བརྟགས་ཤིང་དཔྱད་ནས་བསྒོམ་པའི་དཔྱད་སྒོམ་ཞིག་དང༌། མ་བཅོས་གཤིས་ལ་འཇོག་པའི་འཇོག་སྒོམ་ཞིག་དང་གཉིས་ལས། དང་པོ་དཔྱད་སྒོམ་གྱི་སྐབས་སུ་བཏང་སྙོམས་བསྒོམ། བྱམས་པ་བསྒོམ། སྙིང་རྗེ་བསྒོམ། དགའ་བ་བསྒོམ་ཞེས་སུ་བརྗོད་པ་དང་། རྗེས་མ་འཇོག་སྒོམ་གྱི་སྐབས་སུ་བཏང་སྙོམས་ཀྱི་ཏིང་ངེ་འཛིན། བྱམས་པའི་ཏིང་ངེ་འཛིན། སྙིང་རྗེའི་ཏིང་ངེ་འཛིན། དགའ་བའི་ཏིང་ངེ་འཛིན་ཞེས་བརྗོད་པ་ཡིན། འདི་ནི་ཞི་གནས་ལྷག་མཐོང་གཉིས་ལས་ཞི་གནས་བསྒོམ་པ་ཡིན། དེ་ལས་བཏང་སྙོམས་བསྒོམ་དུས་ཇི་ལྟར་བསྒོམ་དགོས་སྙམ་ན། རང་ཉིད་ཀྱི་གཡས་ཕྱོགས་སུ་དེ་བས་སྡང་ཞིག་མེད་པའི་སྐྱེ་བ་ད་རེས་ཀྱི་དགྲ་དེ་དང༌། གཡོན་ཕྱོགས་སུ་དེ་བས་གཅེས་ཤིག་མེད་པའི་སྐྱེ་བ་ད་རེས་ཀྱི་གཉེན་གཉིས་ཀ་ཡོད་པར་བསམས་ནས། དང་པོར་དེ་གཉིས་ལ་དགྲ་གཉེན་གྱི་ཆགས་སྡང་དེ་བས་ཡན་ལ་ལངས་རྒྱུ་མེད་པ་ཞིག་ཡར་བསླངས་ཞིང་། དེ་ནས་བསམ་བློ་ནང་ལ་བསྐོར་ཏེ། འདས་མ་འོངས་ད་ལྟ་དུས་གསུམ་ཀྱི་ཐོག་ནས་འདེང་ཞིག་བརྒྱབ་ན། འདིའི་དགྲ་གཉེན་གཉིས་ཀ་དང་ང་རང་བཅས་པ་ཐམས་ཅད་སྐྱེ་བ་ཚེ་རབས་མང་པོ་ཞིག་ནས་སྐྱེ་ཤིའི་ཁ་བརྒྱུད་ནས་ཡོང་བ་ཞིག་ཡིན་ཤག་ཤག་ཏུ་འདུག དེའི་སྐབས་སུ་དགྲ་དགྲ་ཡིན་པའི་ངེས་པ་དང་གཉེན་གཉེན་ཡིན་པའི་ངེས་པ་མི་འདུག སྐབས་རེར་དགྲ་གཉེན་ལ་འགྱུར་བ་དང་། སྐབས་རེར་གཉེན་དགྲ་ལ་འགྱུར་བའང་ཡོད་པར་འདུག ཕ་མ་གཉེན་བཤེས་མཛའ་གྲོགས་ལ་སོགས་པ་བྱས་པ་ཡང་གྲངས་ཀྱིས་མི་ཆོད་པར་འདུག དེ་དག་གི་སྐབས་སུ་ད་ལྟའི་དགྲ་འདིས་ཕན་ཆེན་པོ་བཏགས་པ་དང་། གནོད་ཆེན་པོ་ལས་བསྐྱབས་པའང་ཡོད་ངེས་པས་ན་དགྲ་འདི་དགྲ་ཡིན་པའི་ངེས་པ་མེད་པ་དང་། གཉེན་འདི་ཡང་ད་ལྟའི་གཉེན་ཡིན་ན་ཡང་། སྐྱེ་བ་སྔོན་མར་འདིས་དགྲ་བྱས་པ་ཡང་གྲངས་ཀྱིས་མི་ཆོད་ཅིང་། ལར་མ་གཞི་ད་ལྟའི་དགྲ་འདི་ལྟ་བུ་ཞིག་ལ་མཚོན་ན་ཡང་། དང་པོར་དགྲ་མ་ཡིན་པར་གཉེན་ཡིན། ངེད་གཉིས་ཕན་ཚུན་བཟང་ས་ཞིག་ཡིན་ན་ཡང་ཕྱིས་སུ་དགྲ་རུ་གྱུར་སོང་བ་རེད། འཇིག་རྟེན་སྟེང་གི་དགྲ་མང་ཆེ་བ་དེ་གཉེན་དགྲ་རུ་གྱུར་པ་ཕལ་ཆེར་ཡིན་པ་སྟེ། འབྲེལ་བ་མེད་ན་འགལ་བ་ཡོང་དོན་ཡོད་པ་མ་ཡིན། འདི་ཡང་ཉིན་ཞིག་གཉེན་དུ་འགྱུར་ན་ཁྲིགས་ཁྲིགས་ཡོད་རྒྱུ་མ་རེད། དུས་ངན་སྙིགས་མའི་སྐབས་འདིར་སྔ་དྲོ་གཉེན་གྱི་དྭངས་མ་ཡིན་ཡང་། ཕྱི་དྲོ་དགྲ་ཡི་རྩེ་མོར་འགྱུར་བ་ཡང་མང་ལ། ཆོས་ཕྱོགས་ནས་འདང་ཞིག་བརྒྱབ་ན་ཡང༌། དགྲས་ལོག་སྒྲུབ་བྱས་ཀྱང་ཐུགས་དམ་གྱི་བོགས་འདོན། །གཏམ་མ་ཉེས་ཁ་གཡོག་དགེ་བསྐུལ་གྱི་ལྕག་འདེབས། །འདི་ཆགས་ཞེན་འཇིག་པའི་བླ་མ་རུ་མཐོང་ནས། །ཁོའི་དྲིན་ལན་འཁོར་ཐབས་མེད་པ་རུ་འདུག་གོ། །ཞེས་གསུངས་པ་ལྟ་བུ་ཡིན། དགྲས་གནོད་བསྐྱལ་བའི་དབང་གིས་ཆོས་རྣམ་དག་ཅིག་ལ་འཕྲད་ཅིང་ཆོས་རྣམ་དག་གི་སྐུལ་མ་རུ་སོང་བ་དཔེར་ན། རྗེ་བཙུན་མི་ལ་རས་པ་ལ་ཨ་ཁུ་དང་ཨ་ནེ་གཉིས་ཀྱིས་དགྲ་བྱས་པའི་ཐ་མར་ངེས་འབྱུང་གིས་བསྐུལ་ཏེ་ཆོས་བསྒྲུབས་ནས་གྲུབ་པ་ཐོབ་སོང་བ་ལྟ་བུ་ཡིན། སྦྱིན་པ་ལོ་བརྒྱ་བྱིན་པ་བས། །ཚུལ་ཁྲིམས་ཉིན་གཅིག་བསྲུངས་ན་དགའ། །ཚུལ་ཁྲིམས་ལོ་བརྒྱ་བསྲུངས་པ་བས། །བཟོད་པ་ཉིན་གཅིག་བསྒོམས་ན་དགའ། །ཞེས་གསུངས་པ་ཡིན་པས་ཕན་ཡོན་ལྷག་ཏུ་ཆེ་ལ། སངས་རྒྱས་ཀྱི་མཚན་དང་དཔེ་བྱད་དེ་རྣམས་ཀྱི་ཐོབ་བྱེད་ཀྱང་བཟོད་པ་བསྒོམས་པ་འདི་ཡིན། དེས་ན་དགྲ་མེད་ན་བཟོད་པ་སུ་ལ་བསྒོམ། བཟོད་པ་བསྒོམ་ས་དགྲ་ཡིན། རང་ཉིད་ཀྱིས་བཟོད་པ་སྒོམ་ཐུབ་ན་དགྲས་ཕན་བཏགས་པ་མ་གཏོགས་གནོད་བསྐྱལ་མེད་པ་ཡིན། གཉེན་ལ་ཡང་གཉེན་ཡིན་པར་སྙམ་ནས་ཆགས་པ་མ་གཏོགས། སྐྱེ་བ་སྔོན་མ་ཐམས་ཅད་གཉེན་ཤ་སྟག་ཏུ་སོང་བ་ཞིག་ག་ལ་ཡིན། མཚམས་རེ་ལ་དགྲར་བྱས་ཏེ་ཅི་འདྲའི་གནོད་བསྐྱལ་མེད། ཚེ་འདི་ལ་ཡང་གཉེན་ལ་ཞེ་ཆགས་ནས། དགྲ་འདུལ་གཉེན་སྐྱོང་གཡོ་སྒྱུའི་སྡིག་ལས་ལ་མགོ་འཁོར་བས། ཆོས་སྒྲུབ་པའི་བར་ཆད་བྱས་དང་བྱེད་བཞིན་པ་འདི་དག་ལ་བསམ་བློ་ཞིག་བཏང་ན། ངོ་མ་བཤད་ན་དགྲ་དངོས་དེ་འདི་དག་རེད་མི་འདུག་གམ་སྙམ་པ་ཞིག་ཡོང་བ་ཡིན། དེ་ལྟར་ཞིབ་ཏུ་བསམ་བློ་ཞིག་བཏང་ན་དགྲ་གཉེན་ཞེས་པ་འདི་མཐའ་གཅིག་ཏུ་ངེས་པ་ཅན་ཞིག་མ་ཡིན་པར། མཚམས་རེར་གཉེན་དང་། མཚམས་རེར་དགྲ་རུ་གྱུར་ནས་རྟག་བརྟན་ངེས་པ་ཞིག་མེད་པར་གྱུར་ནས་དགྲ་འདི་རེད་ཟེར་བ་ཞིག་དང་གཉེན་འདི་རེད་ཟེར་སའི་མཛུབ་མོ་འཛུགས་ས་མ་ལོན་པར་ཆགས་པ་ཡིན། དེ་ལྟར་བསམ་བློ་བཏང་ནས་གཏན་ལ་ཕབ་ཚེ་གཉིས་ཀ་ལ་ཞེན་ཁ་ལོག་པ་ཞིག་བྱུང་ནས་ཕན་ཡང་མི་གདགས། གནོད་ཀྱང་མི་བསྐྱལ་སྙམ་པ་ཞིག་གི་ཚད་ལ་ཐོན་དུས་བསྐྱུར་བཞག་ན་ཕན་མེད་གནོད་མེད་གཏི་མུག་བཏང་སྙོམས་ཟེར་བ་དེ་ཡིན། དེས་བཏང་སྙོམས་ཀྱི་གོ་མི་ཆོད་པ་ཡིན། བཏང་སྙོམས་ཚད་མེད་ཡིན་པ་མ་རེད། དགྲ་གཉེན་གཉིས་ཀ་ད་ལྟའི་མ་རྒན་དྲིན་ཅན་མ་དང་ཁྱད་པར་མེད་པ་གཅེས་པའི་བཏང་སྙོམས་ཤིག་དགོས་པ་ཡིན། དེ་ཡང་བསམ་བློ་རྒྱ་ཆེ་ས་ནས་བཏང་ན། ནམ་མཁས་གར་ཁྱབ་སེམས་ཅན་གྱིས་ཁྱབ་ཡོད་པ་དང་། སེམས་ཅན་གྱིས་གར་ཁྱབ་ལ་ལས་སྣང་སྡུག་བསྔལ་གྱིས་ཁྱབ་ཡོད་ཅིང་། ལས་སྣང་སྡུག་བསྔལ་གྱིས་མནར་བའི་སེམས་ཅན་འདི་ཚོ་ཐམས་ཅད་ཐོག་མ་མེད་པའི་དུས་ནས་རང་གི་ཕ་མ་གཉེན་བཤེས་ལ་སོགས་པ་འདི་མ་བྱས་བསམ་པ་ཞིག་མེད། ད་དུང་མ་བྱས་པའི་དུས་སྐབས་སུ་ད་ལྟའི་ཚེ་འདིའི་མ་འདི་དང་འདྲ་འདྲ་གཅེས་སྐྱོང་བྱས་ཡོད་ལ། མ་བྱས་མྱོང་བ་དེ་ཡང་ལན་གཅིག་པུས་མི་ཚད་དེ། མ་ཡི་ཐུག་མཐའ་རྒྱ་ཤུག་ཚི་གུ་ཙམ། །རིལ་བུར་བགྲངས་ཀྱང་ས་ཡིས་ལང་མི་འགྱུར། །ཞེས་གསུངས་པས། ཐམས་ཅད་མཁྱེན་པ་ཞིག་གི་མདུན་དུ་སོང་ནས་ངའི་དགྲ་འདི་དང་ངའི་མ་འདི་གཉིས་ཀ་ངའི་སྐྱེ་བ་སྔོན་མའི་མ་བྱས་གྲངས་སུས་མང་བ་ཡིན་ཞེས་ཞུས་པའི་དབང་དུ་བཏང་ན། གཉིས་ཀའི་གྲངས་ས་གཞི་རིལ་བུ་བསྒྲིལ་ནས་རྩིས་ཤིག་བརྒྱབ་པའི་གྲངས་ལས་མང་ཞིག་ཡིན་པར་གསུངས་ངེས། དེ་ཅིའི་ཕྱིར་ཟེར་ན། འཁོར་བ་ཐོག་མེད་ནས་འཁོར་བས་ས་ལག་མཐིལ་འདྲ་བའི་ཐོག་ནས་ལན་གྲངས་མང་པོ་སྐྱེ་མ་མྱོང་ས་དང་ལན་གྲངས་མང་པོ་ཤི་མ་མྱོང་ས་མེད་པ་ཡིན་ཕྱིར་ད་ལྟའི་དགྲ་འདི་སྐྱེ་བ་སྔོན་མ་མང་པོ་ཞིག་གི་སྐབས་ཀྱི་མ་ཡིན་པའི་ཐག་ཆོད་སོང་བ་ཡིན་ཞིང་། དེའི་མིང་ལ་མར་ཤེས་ཟེར་བ་དེ་ཡིན། མ་ཡིན་པར་ཤེས་པ་རྐྱང་པས་མི་ཆོག་སྟེ། མར་ཤེས། དྲིན་དྲན། དྲིན་ལན་གསབ་འདོད་དེ་དག་ཡོད་དགོས། དྲིན་དྲན་པའི་ཕྱོགས་ནས་བསམ་བློ་ཞིག་བཏང་ན། མས་བུ་ལ་གཅེས་པ་ལྟ་བུ་དེ་མ་རང་ཉིད་ཀྱིས་རང་ཉིད་ལ་གཅེས་པ་མ་ཡིན། ཁྲ་དང་སྤྱང་ཀི་སྟག་གཟིག་དོམ་དྲེད་ལྟ་བུ་སྲོག་ཆགས་གཏུམ་པོ་ཡིན་ཡང་གཞན་གྱི་སྲོག་བཅད་ནས་རང་གི་བུ་གསོ་བཞིན་ཡོད། བུའི་དོན་དུ་རང་ཉིད་ཀྱི་སྲོག་ཀྱང་གཏོང་ཐུབ། མི་ལུས་བླངས་སྐབས་ཀྱི་མ་འདི་ལ་མཚོན་ན། ཟས་ཀྱི་ཕུད་བྱིན། གོས་ཀྱི་རྩེས་གཡོགས། བུ་ན་བ་ལས་ཀྱང་མ་རང་ཉིད་འཆི་བ་བདམས་ནས་སེམས་ནད་ལུས་གཅོང་བུའི་དོན་དུ་མྱོང་ཞིང་། འཇིག་རྟེན་གྱི་ཕྱོགས་ནས་དྲིན་ཆེ་ལུགས་ལ་བསམ་བློ་བཏང་ན། ལུས་བསྐྱེད་པའི་དྲིན། སྲོག་བྱིན་པའི་དྲིན། ཡོ་བྱད་བསྟབས་པའི་དྲིན། འཇིག་རྟེན་བསྟན་པའི་དྲིན། དམ་པའི་ཆོས་ཕྱོགས་ནས་བསམ་བློ་བཏང་ན། དལ་འབྱོར་བཅོ་བརྒྱད་ཚང་བའི་མི་ལུས་འདི་བསྐྱེད། བྱང་ཆུབ་སྒྲུབ་པའི་ཡོ་བྱད་ཟས་གོས་གནས་མལ་སྤྲད། མ་སེམས་ཅན་མེད་ན་དང་པོར་བྱང་ཆུབ་མཆོག་ཏུ་སེམས་བསྐྱེད་ཐབས་མེད། མ་སེམས་ཅན་འདི་དག་མེད་ན་བར་དུ་རྒྱལ་སྲས་ཀྱི་སྤྱོད་པ་རྒྱ་མཚོ་ལ་སློབ་ཐབས་མེད། དེ་གཉིས་ཀ་མེད་ན་མཐར་མངོན་པར་རྗོགས་པར་སངས་རྒྱས་ཐབས་ཤིག་གང་ན་ཡང་མེད་སྙམ་ནས་ཆོས་འཇིག་རྟེན་གཉིས་ཀའི་དྲིན་དྲན་པ་དེ་དྲིན་དྲན་པ་ཡིན། དྲིན་ལན་གསབ་འདོད་ཀྱི་ཐད་ནས་བསམ་བློ་བཏང་ན། དེ་ལྟ་བུའི་དྲིན་ཅན་གྱི་མ་འདིས་དེ་སྔ་ཉི་མ་ཡན་ཆད་ལ་དྲིན་ཆེན་པོས་ཚུར་འབའ་ཞིག་བསྐྱངས་ཡོད་ཅིང་། ད་རེས་ངས་ཐེག་པ་ཆེན་པོའི་ཆོས་དང་མཇལ། བླ་མ་དགེ་བའི་བཤེས་གཉེན་གྱིས་རྗེས་སུ་བཟུང་ནས། སྤང་བླང་འདོར་ལེན་ཤེས་པའི་སྐབས་ལ་ཁེལ་ཡོད་ལ། ད་རེས་ངས་མ་རྒན་སེམས་ཅན་འདི་དག་གི་དྲིན་ལན་འཇལ་རྒྱུའི་རེས་ལ་བབ་པ་ཡིན་སྙམ་པའི་དྲིན་ལན་བཟོ་འདོད་ཀྱི་རྟོག་པ་ཞིག་བསྐྱེད་དེ། སེམས་ཅན་ཐམས་ཅད་ལ་སྙོམས་པར་བྱ་རྒྱུ་དེ་བཏང་སྙོམས་ཚད་མེད་བསྒོམ་པ་དེ་ཡིན། དེ་ལྟར་བྱས་ནས་བརྟགས་ཤིང་དཔྱད་པ་བཏང་སྟེ་སྒོམ་ཚེ་བར་སྐབས་ཤིག་ལ་སེམས་འདི་ཐང་ཆད་ནས་རྣམ་རྟོག་གཏན་ནས་མི་འཕྲོ་དུས་འདས་པའི་རྗེས་སུ་མི་འབྲང་། མ་འོངས་པའི་མདུན་མི་བསུ། ད་ལྟའི་རྟོག་པ་འཕྲོ་མི་མཐུད་པར་བཅས་བཅོས་མེད་པར་བཞག་པ་དེ་ཉིད་བཏང་སྙོམས་ཀྱི་ཏིང་ངེ་འཛིན་སྒོམ་པ་ཞེས་པ་དེ་ཡིན། དམིགས་མེད་ཀྱི་བཏང་སྙོམས་སྒོམ་པ་ནི། རང་གཞན་སེམས་ཅན་ཐམས་ཅད་ཀྱི་ལུས་འདི་རྡུལ་ཕྲན། སེམས་སྐད་ཅིག་མའི་སྐྱེ་འགག་གི་ཕྲེང་བ། སྐད་ཅིག་གཉིས་པར་མི་སྡོད་པ། དོན་དམ་པར་རང་བཞིན་གྱིས་མ་གྲུབ་པ། ཐ་སྙད་དུ་སྟོང་ཉིད་ཅིར་ཡང་མ་ཡིན་པ་ལས་ཅིར་ཡང་སྣང་བའི་རྟེན་འབྱུང་འགག་པ་མེད་པ། སྟོང་རྟེན་འབྱུང་དབྱེ་བསལ་མེད་པའི་དོན་ལ་ངེས་ཤེས་དྲངས་ཏེ་ཡང་བཅས་བཅོས་མེད་པར་འཇོག་རྒྱུ་དེ་ལྷག་མཐོང་སྐྱེད་པའི་ཐབས་ཡིན། དེ་ལྟར་ཐུན་བཅད་ནས་སྒོམ་དུས་ཀྱི་ཐུན་གྱི་བར་མཚམས་ཐམས་ཅད་ལ་སེམས་ཅན་ཐམས་ཅད་ཀྱི་རྒྱུད་ཀྱི་ཆགས་སྡང་གཉིས་པོ་དུས་དང་རྣམ་པ་ཐམས་ཅད་དུ་བྲལ་བར་གྱུར་ཅིག་ཅེས་དེ་ལྟར་བསམ་པ་དེ་ཉིད་སྨོན་པ་དང་འབྲེལ་བ་ཡིན་ཞིང་། དེ་བྲལ་ན་ཅི་མ་རུང་སྙམ་པ་དེ་ཉིད་འདུན་པ་དང་འབྲེལ་བ་ཡིན་ལ། བྲལ་བ་ཞིག་ངས་བྱེད་དགོས་སྙམ་པ་དེ་ཉིད་དམ་བཅའ་དང་འབྲེལ་བ་སྟེ་འབྲེལ་བ་གསུམ་ལྡན་ཞེས་ཟེར། དེའི་ཐོག་ཏུ་དེ་ལྟར་འགྲུབ་པར་བླ་མ་དཀོན་མཆོག་ལ་གསོལ་བ་འདེབས་པ་ནི་གསོལ་འདེབས་དང་འབྲེལ་བ་སྟེ་འབྲེལ་བ་བཞི་ལྡན་དུ་ཐུན་དང་ཐུན་མཚམས་ཐམས་ཅད་དུ་མི་འབྲལ་བ་བྱེད་དགོས། འདི་མན་ངག་གི་ལུགས་ཀྱི་སྒོམ་སྟངས་ཡིན་ཞིང་། ཚད་མེད་གཞན་ཐམས་ཅད་ནི་འདིའི་རིགས་བསྒྲེས་ནས་བསྒོམ་དགོས། ཡང་བྱམས་པ་སྒོམ་དུས་བཏང་སྙོམས་ཀྱིས་སེམས་ཅན་ཐམས་ཅད་ཕན་པའི་ཡུལ་དུ་ཁྱད་པར་མེད་པ་འདྲ་འདྲར་བྱས་ཏེ་སྙོམས་པར་བྱས་པ་དེའི་ཐོག་ཏུ་བྱམས་པ་བསྒོམ་དགོས། འདི་ཚང་མ་ཐུན་གྱི་འགོ་ནས་ཁོལ་བུ་ཁོལ་བུར་བྱས་ཏེ་དམིགས་རྟེན་ལ་བཟུང་ཞིང་། དམིགས་རྣམ་སྤྲད་ནས་ཐུན་གྱི་སྨད་དུ་སེམས་ཅན་ཐམས་ཅད་ལ་བསྒོམ་དགོས། དེས་ན་དང་པོར་རང་གི་ཚེ་འདིའི་མ་དྲིན་ཆེན་མ་དེ་ཅི་འདྲའི་དྲིན་ཆེན་ཞིག་ཡིན། འདིས་འདོད་རྒྱུ་བདེ་བ་འདོད་ཀྱང་བདེ་བའི་རྒྱུ་སྒྲུབ་མི་ཤེས། སྡུག་བསྔལ་མི་འདོད་ཀྱང་སྡུག་བསྔལ་གྱི་རྒྱུ་མི་དགེ་བ་ལ་རང་བཞིན་ཤུགས་ཀྱིས་སྤྱོད་ཀྱིན་ཡོད་བསམས་ནས། མ་རྒན་དེ་དམིགས་པའི་ཡུལ་དུ་བཟུང་སྟེ། རྣམ་པ་བློ་དེ་ཅི་འདྲ་ཞིག་ཡིན་ཟེར་ན། མ་རྒན་དྲིན་ཆེན་མ་འདི་སྐྱེ་བ་ནས་ཚེ་རབས་ཐམས་ཅད་ལ་བདེ་བའི་རྒྱུ་དད་དང་ངེས་འབྱུང་བྱང་ཆུབ་ཀྱི་སེམས་རིན་པོ་ཆེ་རྣམ་པ་གསུམ་དང་ལྡན་པར་གྱུར་ཅིག ལྡན་ན་ཅི་མ་རུང་། ལྡན་པ་ཞིག་ངས་བྱ་བསམ་རྒྱུ་དང་། དེ་ལྟར་ལྡན་པ་ཞིག་དཀོན་མཆོག་རིན་པོ་ཆེ་རྣམ་པ་གསུམ་ལ་གསོལ་བ་འདེབས་དགོས། སྤྱིར་ན་རྒྱུ་འབྲས་ཡིད་ཆེས་ཀྱི་དད་པ་ཟེར་བ་དེ་མཐོ་རིས་ཀྱི་རྒྱུ། ངེས་འབྱུང་དེ་ནི་ཐར་པའི་རྒྱུ། བྱང་ཆུབ་ཀྱི་སེམས་དེ་རྫོགས་པའི་སངས་རྒྱས་ཀྱི་རྒྱུ་ཡིན། སེམས་ཅན་ཐམས་ཅད་མར་ཤེས་པ་ནས་བདེ་བ་རྒྱུ་འབྲས་གཉིས་དང་ལྡན་པར་འདོད་པའི་བར་གྱི་དཔྱད་སྒོམ་གྱི་ཐོག་ནས་བྱམས་པ་སྒོམ་ལུགས་དེ་ལྟ་བུ་ཞིག་ཡིན། དེ་ནས་ཡང་སྔར་བཞིན་དུ་འཇོག་སྒོམ་བྱེད་རྒྱུ་དེ་ཉིད་ཞི་གནས་དང་དམིགས་མེད་ཀྱི་ཏིང་ངེ་འཛིན་འཁོར་གསུམ་པོ་སྣང་ལ་རང་བཞིན་མེད་པར་བསྒོམས་ནས། ཐུན་མཚམས་ཐམས་ཅད་ལ་དུས་རྒྱུན་དུ་བྱམས་པའི་ལུས་ཀྱི་ལས། མི་སུ་ལ་བལྟས་ན་འཛུམ་དམུལ་ལེ། སུ་དང་ཐུག་ཀྱང་དགའ་ཡ་ལེ། ཁྱད་པར་དུ་བྱམས་པའི་ལུས་ཀྱི་ལས། རྒན་པ་དང་ཉམ་ཆུང་རྣམས་བྱམས་པས་བསྐྱངས། བྱམས་པའི་ངག་གི་ལས། ཚིག་སྙན་མོ་བཤད། གཏམ་འཇམ་པོ་སྨྲ། སུ་ཡིན་ན་ཕན་པའི་དྲང་གཏམ་བརྗོད། བྱམས་པའི་སེམས་ཀྱི་ལས། མ་རྒན་སེམས་ཅན་ཐམས་ཅད་གནས་སྐབས་དང་མཐར་ཐུག་གི་བདེ་བ་ལ་ཇི་ལྟ་བུས་འགོད་དགོས་བསམས་ནས་བསམ་སྦྱོར་གྱིས་སྒྲུབ་དགོས་པ་དེ་ལྟ་བུ་ཡིན། སྙིང་རྗེ་ཚད་མེད་སྒོམ་དུས་ཀྱང་རང་གི་ཚེ་འདིའི་རྩ་བའི་མ་ཉིད་བསྒོམ་རྒྱུ་ཞིག་དང་། བཤའ་ལུག་ལ་སོགས་པ་གསོད་རན་པའི་སེམས་ཅན་ཞིག་ལ་དམིགས་ཡུལ་བྱས་པ་སྟེ། དེ་ཡང་མིན་ན་རང་ཉིད། ཡང་མིན་ན་ཨ་མ་རྒན་མོ་དེ་ཡིན་པའི་འདུ་ཤེས་བཞག་ནས། སྒོམ་ལུགས་ཤིག་སྟེ་ལུགས་སྲོལ་འདྲ་མི་འདྲ་གཉིས་ལྟ་བུ་ཞིག་ཡོད་ལ། གང་སྒོམ་ན་དོན་གཅིག་ཡིན། རང་གི་རྩ་བའི་མ་ནས་སྒོམ་པ་ལྟ་བུ་ལ་མ་རྒན་མོ་དེ་དམིགས་པའི་ཡུལ་དུ་བྱས་ཏེ་བསྒོམས་ནས་འདིས་མ་ལན་གཅིག་གིས་མི་ཚད་ཐེངས་མང་པོར་བྱས་ཤིང་། མ་བྱས་པའི་སྐབས་སུ་ལུས་བསྐྱེད་པའི་དྲིན། སྲོག་བྱིན་པའི་དྲིན། ཡོ་བྱད་བསྟབས་པའི་དྲིན། འཇིག་རྟེན་བསྟན་པའི་དྲིན་ལ་སོགས་པ་དྲིན་ཐམས་ཅད་ཚུར་དྲན་པར་བྱེད་པ་སྟེ། ལུས་བསྐྱེད་པའི་དྲིན་ལ་བསམ་བློ་ཞིག་བཏང་ན། རྣམ་ཤེས་བར་དོར་ཁྱི་གླེན་བཞིན་དུ་འཁྱམས་ནས། དེར་གནས་མེད་རྟེན་མེད་འཇིགས་སྐྲག་སྣ་ཚོགས་པས་མནར་ནས་ཡོད་པའི་སྐབས་སུ་རྟེན་སའི་ལུས་ཤིག་བྱིན། སྲོག་བྱིན་པའི་དྲིན་ལ་བསམ་བློ་བཏང་ན། ཚེ་འདིའི་གསོན་པོར་འཚོ་བའི་སྲོག་དམར་ཐང་ཅན་དེ་ཉིད་འདིས་བྱིན། ཡོ་བྱད་བསྟབས་པའི་དྲིན་ལ་བསམ་བློ་བཏང་ན། རྒྱུ་ལོངས་སྤྱོད་རྔུལ་ཆུའི་ཐིགས་པས་བསགས་པ་དེ་བུ་ལ་ཕངས་སེམས་མེད་པར་བྱིན། འཇིག་རྟེན་བསྟན་པའི་དྲིན་གྱི་ཐད་ནས་བསམ་བློ་བཏང་ན། མེ་ནང་ལ་མ་ལྕེབས་མ་གཏོགས་ཚིག་འགྲོ། ཆུ་ནང་ལ་མ་མཆོངས་མ་གཏོགས་འཁུར་འགྲོ། འདི་གྱིས་དང་འདི་ཡ་རབས་སྦྱོད་བཟང་གི་བྱ་བ་རེད། འདི་མ་བྱེད་འདི་མ་རབས་ཐ་ཆད་ཀྱི་ལས་ཀ་རེད་ཅེས་མ་རང་གིས་མ་ཤེས་ན་མ་གཏོགས་བསམ་བཟང་གིས་བུ་ལ་བསླབས་པ་དེ་ཉིད་འཇིག་རྟེན་བསྟན་པའི་དྲིན་ཡིན། དེ་ཚོ་ཚང་མ་ཞེ་ལ་བླངས་ན་མར་ཤེས་དྲིན་དྲན་གཉིས་ཀ་གྲུབ་སོང་བ་ཡིན། དྲིན་གཟོ་འདོད་ཀྱི་ཐོག་ནས་བསམ་བློ་བཏང་ན། འདིའི་བསམ་རྒྱུ་འདོད་རྒྱུ་ཅི་ཞིག་ཡིན་ན་བདེ་བ་འདོད་པ་ཡིན་ལ། ཁ་ཚིག་གཅིག་མ་གཏོགས་མ་གྲག ལག་ཡ་གཅིག་མ་གཏོགས་མ་འགུལ་ན་བདེ་བའི་ཆེད་དུ་ཡིན་ཡང་བདེ་བའི་རྒྱུ་ངོ་མ་དེ་ཉིད་དད་པ་ངེས་འབྱུང་བྱང་ཆུབ་ཀྱི་སེམས་ནི་འདིས་སྒྲུབ་མི་ཤེས། ལམ་སྟོན་གྱི་དགེ་བའི་བཤེས་གཉེན་ནི་འདི་ལ་མེད། ཡོད་ཀྱང་དེའི་བཀའ་བཞིན་སྒྲུབ་མི་ཤེས། སྤྱོད་འཇུག་གི་ནང་དུ། བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །ཞེས་གསུངས་པ་ལྟར་སྡུག་བསྔལ་ནི་འདིས་མི་འདོད། ཐ་ན་མེ་སྟག་ཕྲ་མོ་ལུས་ལ་ཕོག་པའི་སྡུག་བསྔལ་དང་ཚེར་མ་རྣོན་པོ་ལག་པ་ལ་ཟུག་པའི་སྡུག་བསྔལ་ཙམ་ཡང་འདིས་མི་འདོད་ཀྱང་། སྡུག་བསྔལ་འདོར་འདོད་སེམས་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུག །ཅེས་གསུངས་པ་ལྟར་ཞེ་འདོད་དང་ལག་ལེན་གཉིས་ཀ་ཕྱིན་ཅི་ལོག་ཏུ་གྱུར་ཏེ། སྡུག་བསྔལ་གྱི་བདེན་པས་དངོས་སུ་གནོད། ཀུན་འབྱུང་གི་བདེན་པས་བརྒྱུད་ནས་གནོད། ཚེ་འདིའི་སྡུག་བསྔལ་གྱིས་སྐྱེལ་མ་བྱས། ཚེ་ཕྱི་མའི་སྡུག་བསྔལ་གྱིས་བསུ་མ་བྱས་ཏེ། བར་དོའི་སྡུག་བསྔལ་གྱིས་མཚམས་སྦྱོར་བའི་སྡུག་བསྔལ་རྒྱུ་འབྲས་ཀྱིས་མནར་ནས། མ་རྒན་དྲིན་ཅན་མ་འདི་ཤ་ཚ་སྙིང་རྗེ་བསམས་ཏེ། འདི་སྲིད་པ་ཁམས་གསུམ་འཁོར་བའི་སྡུག་བསྔལ་དང་བྲལ་བར་གྱུར་ཅིག བྲལ་ན་ཅི་མ་རུང༌། བྲལ་བ་ཞིག་ངས་བྱ། དེ་ལྟར་བྲལ་བར་བླ་མ་དཀོན་མཆོག་གསུམ་ལ་གསོལ་བ་འདེབས་པ་དེ་ཉིད་རྣམ་པ་བློ་ཡིན། མཐར་སེམས་ཅན་ཐམས་ཅད་ལ་དེ་འདྲ་བསྒོམས་ནས་འབྲེལ་བ་བཞི་ལྡན་གྱི་ཐོག་ནས་དཔྱད་སྒོམ་དང་འཇོག་སྒོམ་སྤེལ་མ་རེ་བྱེད། སྙིང་རྗེའི་ཏིང་ངེ་འཛིན་འཁོར་གསུམ་པོ་སྣང་ལ་རང་བཞིན་མེད་པའི་ངེས་ཤེས་དྲངས་པས་དུས་རྒྱུན་དུ་སེམས་ཅན་མིག་གིས་མཐོང་ཚད་ལ་སྙིང་རྗེ་བསྒོམ། དགའ་བ་ཚད་མེད་ལ་མཚོན་ན། ཡང་རང་གི་རྩ་བའི་མ་དེ་དམིགས་ཡུལ་ལ་བཟུང་སྟེ། མར་ཤེས། དྲིན་དྲན། དྲིན་གཟོ་འདོད་དང་། ཁྱད་པར་དུ་བདེ་བ་དང་ལྡན་འདོད་ཀྱི་བྱམས་པ་དང་། སྡུག་བསྔལ་དང་བྲལ་འདོད་ཀྱི་སྙིང་རྗེ་གཉིས་ཀ་བཅོས་མ་མ་ཡིན་པ་ཞིག་བསྒོམ། མ་རྒན་དེ་ཟས་གོས་ལོངས་སྤྱོད་འབྱོར་བ་མངའ་ཐང་ཞིག་ཡོད་པ་དེ་དམིགས་པའི་ཡུལ་དུ་བཟུང་སྟེ། དེའི་ཐོག་ལ་རྣམ་པ་བློ་དེ་ཅི་འདྲ་དགོས་པ་ཡིན་ཟེར་ན། མ་རྒན་སྐྱིད་ཀྱིན་ཡོད་པ་དེ་ལ་དགའ་བ་བསྒོམ། མ་རྒན་དེ་སྐྱིད་ཀྱི་འབྲས་བུ་མྱོང་བ་དེའི་རྒྱུ་དགེ་བ་ཅུང་ཟད་ཅིག་ཡོད་པ་དེ་ཉིད་མ་ཉམས་མི་ཟད་པར་གོང་ནས་གོང་དུ་འཕེལ། བདེ་བ་རྒྱུ་འབྲས་གཉིས་ཀ་དང་ནམ་ཡང་འབྲལ་བར་མ་གྱུར་ཅིག མ་བྲལ་ན་ཅི་མ་རུང་། མི་འབྲལ་བ་ཞིག་ངས་བྱ། མི་འབྲལ་བར་བླ་མ་དཀོན་མཆོག་མཁྱེན་སྙམ་ནས་གསོལ་བ་འདེབས་དགོས། དེ་ལྟར་དཔྱད་སྒོམ་གྱི་ཐོག་ནས་དགའ་བ་བསྒོམ། སྣང་ལ་རང་བཞིན་མེད་པའི་ངེས་ཤེས་དྲངས་ནས་དགའ་བའི་ཏིང་ངེ་འཛིན་བསྒོམ། དམིགས་མེད་ཀྱི་ངང་ལ་མཉམ་པར་བཞག དུས་རྒྱུན་དུ་ཡང་སེམས་ཅན་ཐམས་ཅད་ཀྱི་བདེ་བ་ལ་ཕྲག་དོག་མེད་པའི་དགའ་བ་བསྒོམ་དགོས། བྱང་ཆུབ་མཆོག་ཏུ་སེམས་བསྐྱེད་པའི་ཐོག་མར་དེ་ལྟར་ཚད་མེད་བཞི་དེ་བསྒོམ་དགོས། ཚད་མེད་བཞི་པོ་དེ་བསྒོམས་ནས་ངེས་ཤེས་གང་ལ་གང་འཚམས་ཤིག་འདྲོངས་བའི་རྗེས་ཐོག་དེ་ནས་དངོས་སུ་བྱང་ཆུབ་མཆོག་ཏུ་སེམས་བསྐྱེད་དགོས་པ་ཡིན། སེམས་བསྐྱེད་ཅེས་པ་འདི་ལ་ངོ་བོ་དང་དབྱེ་བ་དང་སེམས་བསྐྱེད་ཚུལ་དང་གསུམ་བཤད་རྒྱུ་ཡོད། དེའི་ནང་གི་དང་པོ་ངོ་བོ་དེ་ཅི་འདྲ་ཞིག་ཡིན་ཟེར་ན། དོན་གཉིས་ལྡན་པའི་སེམས་བསྐྱེད་དེ་བྱང་ཆུབ་སེམས་བསྐྱེད་ཀྱི་ངོ་བོ་ཡིན། དོན་གཉིས་སམ་ཟུར་གཉིས་དེ་གང་ཡིན་ཞེ་ན། རྒྱལ་ཚབ་བྱམས་པ་མགོན་པོས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་ཡོད་ལ། ཟུར་དང་པོའམ་དོན་དང་པོ་དེ་གང་ཡིན་ཞེ་ན། སྙིང་རྗེས་སེམས་ཅན་ལ་དམིགས་པ་སྟེ། སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ན་སྙམ་པ་དེ་ཡིན། དོན་གཉིས་པའམ་ཟུར་ཕྱི་མ་དེ་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ནས་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ་སྙམ་པ་དེ་ཤེས་རབ་ཀྱིས་རྫོགས་བྱང་ལ་དམིགས་པ་ཡིན། ཟུར་གཉིས་ཀ་དེ་མ་ཚང་ན་སེམས་བསྐྱེད་ཡང་དག་པ་ཞིག་འགྱུར་མི་ཐུབ། དེ་ལ་དབྱེ་ན་བློ་སྟོབས་ཀྱི་ཁྱད་པར་གྱིས་ཟུར་དང་པོ་སྙིང་རྗེས་སེམས་ཅན་ལ་དམིགས་པ་ལ་དབྱེ་བ་མེད་ཀྱང་ཟུར་གཉིས་པ་ཤེས་རབ་ཀྱིས་རྫོགས་བྱང་ལ་འགོད་ལུགས་ལ་བློ་སྟོབས་ཀྱི་ཁྱད་པར་གྱིས་དབྱེ་བ་ཡོད། དེ་ཇི་ལྟར་ཡིན་ཞེ་ན། དང་པོ་རང་ཉིད་སངས་རྒྱས་ཐོབ་སྟེ། དེ་ནས་སེམས་ཅན་སངས་རྒྱས་ཀྱི་སར་བཀོད་པ་རྒྱལ་པོ་ལྟ་བུའི་སེམས་བསྐྱེད་ཅེས་པ་སྟེ། རྒྱལ་པོས་སྔོན་ན་རང་ཉིད་ཀྱིས་རྒྱལ་ས་ཐོབ། དེ་ནས་མངའ་འབངས་བདེ་བ་ལ་བཀོད་པ་དང་འདྲ་བ་ཡིན། གཉིས་པ་གྲུ་པ་ལྟ་བུའི་སེམས་བསྐྱེད་ཅེས་པ་ནི་རང་ཉིད་སྔོན་ལ་མི་འགྲོ་སེམས་ཅན་རྗེས་ལ་མི་བཞག་ནས་ལྷན་དུ་སངས་རྒྱས་ཀྱི་གོ་འཕང་སྒྲུབ་པ་སྟེ། གྲུ་པ་དང་གྲུ་ནང་གི་འགྲུལ་བ་གཉིས་ཀ་ཆུའི་ཕ་རོལ་མཉམ་པོར་ཐོན་པ་ལྟ་བུ་ཡིན། གསུམ་པ་རྫི་བོ་ལྟ་བུའི་སེམས་བསྐྱེད་ཅེས་པ་ནི། དང་པོ་སྔོན་ལ་སེམས་ཅན་འདི་དག་ཐམས་ཅད་ཀྱིས་གཏན་བདེ་རྫོགས་པའི་སངས་རྒྱས་ཀྱི་གོ་འཕང་ཞིག་ཐོབ་དགོས། དེའི་རྗེས་སུ་རང་ཉིད་ལྟོས་པ་མེད་པར་གཏན་བདེའི་གོ་འཕང་ཐོབ་ན་ཐོབ་མ་ཐོབ་ན་མ་ཐོབ་སྙམ་རྒྱུའི་སེམས་བསྐྱེད་དེ་ཡིན། སེམས་བསྐྱེད་འདིའི་ས་མཚམས་ཀྱི་དབྱེ་བའི་ཐད་ནས་བཤད་ན། ཚོགས་སྦྱོར་གཉིས་ཀྱི་ལམ་ན་མོས་པས་སྤྱོད་པའི་སེམས་བསྐྱེད་ཅེས་གསུངས་ཡོད། དེ་ཅིའི་ཕྱིར་ཟེར་ན། དེའི་སྐབས་སུ་ཀུན་རྫོབ་བྱང་ཆུབ་ཀྱི་སེམས་མཚན་ཉིད་པ་རྒྱུད་ལ་སྐྱེ་རུང་དུ་ཡོད་ཀྱང་། དོན་དམ་བྱང་ཆུབ་ཀྱི་སེམས་ལ་དོན་སྤྱིའི་ཐོག་ནས་གོ་བའམ་མྱོང་བ་ཙམ་ཞིག་མ་གཏོགས། མངོན་སུམ་དུ་མ་རྟོགས་པས་མོས་པས་སྤྱོད་པའི་སེམས་བསྐྱེད་ཅེས་གསུངས་ལ། ས་དང་པོ་ནས་བདུན་པའི་བར་ལྷག་བསམ་དག་པའི་སེམས་བསྐྱེད་ཅེས་གསུངས་ཤིང་། དེའི་དོན་ཅི་ཡིན་ཞེ་ན། དེའི་དུས་མཉམ་བཞག་གི་སྐབས་ཉོན་ཡིད་འགགས་ནས་རྗེས་ཐོབ་ཏུ་ངར་འཛིན་ཕྲ་བ་རེ་སྐྱེས་ཀྱང་ལམ་གྱི་བར་ཆད་དུ་མི་འགྱུར་བས་ན་ལྷག་བསམ་དག་པའི་སེམས་བསྐྱེད་ཅེས་གསུངས། དག་པ་ས་གསུམ་གྱི་གནས་སྐབས་སུ་རྣམ་པར་སྨིན་པའི་སེམས་བསྐྱེད་ཅེས་གསུངས་ཏེ། དེའི་དོན་ཅི་ཡིན་ཞེ་ན། དེའི་སྐབས་སུ་སྔར་ཚོགས་སྦྱོར་གྱི་དུས་སུ་སྨོན་ལམ་བཏབ་པ་ཐམས་ཅད་འགྲུབ་རན་ནས། དཔེར་ན་ལོ་ཐོག་སྨིན་པ་དང་འདྲ་བས་མི་ཚད་གཞན་དོན་རླབས་ཆེན་འགྲུབ་པའི་དུས་ཀྱང་ཡིན། སངས་རྒྱས་ཀྱི་ས་ན་སྒྲིབ་པ་སྤངས་པའི་སེམས་བསྐྱེད་དེ། སྒྲིབ་པ་སྤངས་པའི་སེམས་བསྐྱེད་དེ་ཅི་འདྲ་ཞིག་ཡིན་ཞེ་ན། སྒྲིབ་གཉིས་བག་ཆགས་དང་བཅས་པ་སྤངས་པས་ཀུན་རྫོབ་སེམས་བསྐྱེད་སྔར་བྱང་ཆུབ་སྙིང་པོ་མ་ཐོབ་ཀྱི་བར་དུ་ཁས་བླངས་པས་དུས་ཚོད་ཀྱི་ཐོག་ཐོན་པས་མི་ཚད་འདས་ཟིན་ཀྱང༌། དོན་དམ་སེམས་བསྐྱེད་ཐོབ་ལ་མ་ཉམས་པའི་ཚུལ་ཡར་ལྡན་དུ་ཡོད་པ་ཡིན། དེས་ན་ཚོགས་སྦྱོར་གྱི་གནས་སྐབས་སུ་ཀུན་རྫོབ་སེམས་བསྐྱེད་རྣམ་པར་དག་པ་ཞིག་ཡོད་ཀྱང་། དོན་དམ་སེམས་བསྐྱེད་ཐད་ཀྱི་ཚོགས་ལམ་པས་གོ སྦྱོར་ལམ་པས་མྱོང་། མཐོང་ལམ་པས་རྟོགས། ས་དང་པོ་ཐོབ་ནས་མཐོང་ལམ་ཆོས་ཉིད་ཀྱི་བདེན་པ་རྟོགས་པའི་གནས་སྐབས་སུ་རང་དོན་དུ་ཡེ་ཤེས་མངོན་སུམ་དུ་རྟོགས་ཀྱང་གཞན་དོན་དུ་ཏིང་ངེ་འཛིན་དང་རྫུ་འཕྲུལ་ལ་རང་དབང་འབྱོར་བའི་ཡོན་ཏན་ཐོབ་རྒྱུ་ཡོད། མ་དག་ས་བདུན་གྱི་གནས་སྐབས་ན་ཉོན་ཡིད་མ་སྤངས་པའི་སྟབས་ཀྱིས་མ་དག་ས་བདུན་ཞེས་གསུངས་ཡོད། འདིའི་དུས་སུ་རྗེས་ཐོབ་ན་རང་འདོད་ཀྱི་རྟོག་པ་ཕྲ་མོ་རེ་ཡོད་ཀྱང་རང་བཞིན་གྱིས་དག་ནས་ཞིག་འགྲོ་བ་མ་གཏོགས་སྦྱོར་བས་རང་དོན་མི་བསྒྲུབས་པས་ན་ལྷག་བསམ་དག་པ་ཞེས་གསུངས། དེའི་ཡན་གྱི་དག་པ་ས་གསུམ་ནི་ཞིང་དང་སྤྱོད་ཡུལ་དག་པས་ན་དག་པ་ཞེས་གསུངས་ལ། དག་པ་ས་གསུམ་འདིའི་གནས་སྐབས་ན་ཤེས་སྒྲིབ་ཕྲ་རགས་ཐམས་ཅད་སྤངས་པས་ས་བཅུའི་རྒྱུན་གྱི་ཐ་མ་ལ་གཉེན་པོ་རྡོ་རྗེ་ལྟ་བུའི་ཡེ་ཤེས་ཀྱིས་བག་ཆགས་ཀྱི་སྒྲིབ་པ་ལྷག་མ་མ་ལུས་པ་སྤངས་ཏེ། རྣམ་པ་ཐམས་ཅན་མཁྱེན་པའི་ཡེ་ཤེས་སུ་གནས་གྱུར་པ་སྒྲིབ་པ་སྤངས་པའི་སེམས་བསྐྱེད་ཅེས་གསུངས་ཤིང་། སྤྱིར་ན་ཤེས་སྒྲིབ་ངོས་འཛིན་ལུགས་ལ་ཁྱད་པར་ཅི་རིགས་ཡོད་ལ། སྔ་འགྱུར་རང་ལུགས་ལ་རྒྱུད་བླ་མའི་དགོངས་དོན་ལྟར་དུ་ཡིན་པ་སྟེ། སེར་སྣ་ལ་སོགས་རྣམ་རྟོག་གང་། །དེ་ནི་ཉོན་མོངས་སྒྲིབ་པར་འདོད། །འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་གསུངས་པས་ཉོན་མོངས་འདོད་ཆགས་ལ་སོགས་པ་ཉོན་སྒྲིབ་དང་། འཁོར་གསུམ་དུ་རྣམ་པར་ཞེན་པ་ཤེས་སྒྲིབ་ཏུ་འདོད་པ་ཡིན། ལུགས་གཞན་ལྟར་ན་ཉོན་ཤེས་ཀྱི་སྒྲིབ་པ་གཞི་མཐུན་དུ་འདོད་པ་དང་། བདེན་འཛིན་ཉོན་སྒྲིབ་དང་དེ་ཇེ་ཕྲར་སོང་བ་དེ་ཤེས་སྒྲིབ། དེ་ཇེ་ཕྲར་སོང་བ་བག་ཆགས་ཀྱི་སྒྲིབ་པར་འདོད་པ་ལ་སོགས་པ་དེ་ཚོ་ཞིབ་ཅིང་ཕྲ་བ་ནི་གཞུང་བཤད་པའི་ཞལ་ནས་གསལ་བ་ཡིན། སེམས་བསྐྱེད་དེ་ངོ་བོའི་སྒོ་ནས་དབྱེ་ན། ཀུན་རྫོབ་བྱང་ཆུབ་ཀྱི་སེམས་ཞེས་པ་ཞིག་དང་། དོན་དམ་བྱང་ཆུབ་ཀྱི་སེམས་ཞེས་པ་གཉིས་ཡིན། དེ་ཅི་འདྲ་ཡིན་ཞེ་ན། ཀུན་རྫོབ་བྱང་ཆུབ་ཀྱི་སེམས་དེ་བློ་རྣམ་པར་རྟོག་པ་འདིའི་སྟེང་ནས་བསྐྱེད་བསྡུད་བྱེད་རྒྱུ་ཞིག་དང་། དོན་དམ་བྱང་ཆུབ་ཀྱི་སེམས་ཟེར་རྒྱུ་དེ་སེམས་རྣམ་པར་རྟོག་པའི་རྒྱུ་བ་དབྱིངས་སུ་ནུབ་པའི་ཡེ་ཤེས་དེ་ཡིན། དེས་ན་འུ་ཅག་གིས་མ་ཤེས་ཐབས་མེད་ཅིག་ལ། ཀུན་རྫོབ་བྱང་ཆུབ་ཀྱི་སེམས་དེ་ལ། སྨོན་པ་བྱང་ཆུབ་ཀྱི་སེམས་ཞེས་པ་ཞིག་དང་། འཇུག་པ་བྱང་ཆུབ་ཀྱི་སེམས་ཞེས་པ་ཞིག་སྟེ་གཉིས་ཡོད་དེ། རྒྱལ་སྲས་ཞི་བ་ལྷས། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་བཞིན། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་ཏེ། ས་ཆ་ག་གེ་མོ་ཞིག་ལ་འགྲོ་དགོས་སྙམ་པའི་བསམ་པ་དང་། ངོ་མ་དངོས་སུ་འགྲོ་འགོ་བཙུགས་པ་ལྟ་བུ་ཞིག་གི་ཁྱད་པར་ཡོད་པ་ཡིན། དེས་ན་དོན་གྱི་ཐོག་ནས་སེམས་ཅན་ཐམས་ཅད་སངས་རྒྱས་ཀྱི་སར་འགོད་དགོས་བསམས་ནས་དེའི་འབྲས་བུ་ལ་སྨོན་པ་སྨོན་པ་བྱང་ཆུབ་ཀྱི་སེམས་དང་། དེ་ཐོབ་པའི་རྒྱུའམ་ཐབས་ཕ་རོལ་ཏུ་ཕྱིན་པ་དྲུག་སྒྲུབ་འདོད་ཀྱི་འཇུག་པ་དེ་རྒྱུ་ལ་དམ་བཅའ་བ་འཇུག་པ་བྱང་ཆུབ་ཀྱི་སེམས་ཡིན། དོན་དམ་བྱང་ཆུབ་ཀྱི་སེམས་དེ་སྒོམ་པའི་སྟོབས་ལས་སྐྱེ་དགོས་པ་སྟེ། ཡོངས་འཛིན་དམ་པ། རྗེས་གྲུབ་དམ་པ། རྟོགས་པ་དམ་པ་གསུམ་ལས་སྐྱེ་རྒྱུ་ཞིག་ཡིན་ལ། ཀུན་རྫོབ་བྱང་ཆུབ་ཀྱི་སེམས་དེ་ཆོ་ག་ལ་བརྟེན་ནས་སྐྱེ་བ་ཡིན། དེས་ན་སྐབས་འདིར་བདེ་བ་ཅན་དུ་སྐྱེ་བའི་རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་ཡིན་ལ། དམ་བཅའི་ལྕགས་ཀྱུས་ཟིན་པའི་སེམས་བསྐྱེད་ཀྱི་སྡོམ་པ་ཇི་ལྟར་ལེན་དགོས་ཤེ་ན། སྤྱིར་ན་དབུ་མ་དང་ནི་སེམས་ཙམ་གྱི་ལུགས་རྣམ་པ་གཉིས་སམ། ཡང་ན་འཕགས་པ་འཇམ་དཔལ་ནས་ཀླུ་སྒྲུབ་ལ་བརྒྱུད་པའི་ཟབ་མོ་ལྟ་སྲོལ་དང་། རྗེ་བཙུན་བྱམས་མགོན་ནས་ཐོགས་མེད་ལ་བརྒྱུད་པའི་རྒྱ་ཆེན་སྤྱོད་སྲོལ་ཏེ། སྲོལ་གཉིས་ཀྱི་ནང་གི་གང་ཡིན་རུང་། སྦྱོར་བ་སྔོན་འགྲོའི་ཆོས། དངོས་གཞི་དམ་བཅའ་བ། མཇུག་རང་གཞན་དགའ་བ་སྒོམ་པ་དང་གསུམ་ཡོད། དེའི་ནང་གི་དང་པོ་སྦྱོར་བ་སྔོན་འགྲོའི་ཆོས་དེ་ཚོགས་བསགས་པ་དང་། བློ་སྦྱོང་བ་དང་། ཡོངས་སུ་བཟུང་བའི་གཞི་གསུམ་བཏང་བ་རྣམས་སྔོན་དུ་སོང་ནས། རང་རེས་ནངས་དུས་སྔ་མོ་འདོན་རྒྱུ་དེས་བྱང་སེམས་ཀྱི་སྡོམ་པ་ལེན་ལུགས་ནི། མདུན་གྱི་ནམ་མཁར་འོད་དཔག་མེད་ལ་སོགས་པ་ཕྱོགས་བཅུའི་རྒྱལ་བ་སྲས་དང་བཅས་པ་རྣམས་དང་། བླ་མ་རྡོ་རྗེ་འཛིན་པ་རྣམས་མངོན་སུམ་དུ་བཞུགས་ཡོད་པར་བསྒོམས་ཏེ་དམིགས་པའི་སྤྱན་སྔར། སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ཏེ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པའི་ཆེད་དུ་སྨོན་པ་བྱང་ཆུབ་མཆོག་ཏུ་སེམས་བསྐྱེད། འཇུག་པ་ཕར་ཕྱིན་དྲུག་ལ་བསླབ་རྒྱུའི་དོན་དུ་གོང་དུ་བསྐྱེད་པའི་ཚོགས་ཞིང་གི་མདུན་དེ་ནས་བདག་གིས་ཐེག་ཆེན་སེམས་བསྐྱེད་ཀྱི་སྡོམ་པ་ཞུ་བ་ཡིན་སྙམ་པས། དགོངས་སུ་གསོལ་བ་གསུམ་སྔོན་དུ་སོང་ནས། བྱང་ཆུབ་སྙིང་པོར་མཆིས་ཀྱི་བར་ལ་སོགས་པ་སྐྱབས་སུ་འགྲོ་བ་གསུམ་གྱིས་གཞི་བཟུང་སྟེ། ཇི་ལྟར་སྔོན་གྱི་བདེ་གཤེགས་ཀྱིས་ལ་སོགས་པ་དངོས་གཞི་དམ་བཅའ་བ་གསུམ་གྱི་ཐོབ་མཚམས་བརྗོད་པ་གསུམ་གྱི་ཐ་མ་ལ་ཀུན་རྫོབ་བྱང་ཆུབ་སེམས་ཀྱི་སྡོམ་པ་དེ་ཐོབ་སོང་བ་ཡིན། དེ་ནས་མཇུག་ཏུ་དེང་དུས་བདག་ཚེ་ལ་སོགས་པ་རང་གཞན་དགའ་བ་བསྒོམ། རང་དགའ་བའི་རྒྱུ་མཚན་ཅི་ཡིན་ཟེར་ན། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ཞེས་གསུངས་ཤིང་། སངས་རྒྱས་ཀྱི་སྲས་སུ་གྱུར་སོང་བས་དགའ་བ་སྨྲོས་ཅི་དགོས་ཏེ། རང་དགའ་བ་སྒོམ་པའི་རྒྱུ་མཚན་དེ་ཡིན། མི་ཡི་ལུས་རྟེན་ཞིག་བླངས་བ་གོ་ཆོད་ནས་སངས་རྒྱས་ཀྱི་རིགས་སམ་སངས་རྒྱས་ཀྱི་སྲས་སུ་སྐྱེས་ཏེ་སྐུའི་གདུང་འཚོབ། གསུང་གི་མཛོད་འཛིན། ཐུགས་ཀྱི་གསང་བ་འཆང་། གདུལ་བྱའི་ལྷག་མ་སྐྱོང་བའི་བྱང་ཆུབ་སེམས་དཔར་གྱུར་སོང་བ་སྟེ། ལོང་བས་ཕྱག་དར་ཕུང་པོ་ལས། །ཇི་ལྟར་རིན་ཆེན་རྙེད་པ་ལྟར། །དེ་བཞིན་ཅི་ཞིག་ལྟར་སྟེས་ནས། །བྱང་ཆུབ་སེམས་ནི་བདག་ལ་སྐྱེས། །ཞེས་གསུངས་པ་ལྟར་མི་ལོང་བ་ཞིག་གིས་རྡུལ་སྙིགས་ཀྱི་ཁྲོད་ནས་ཡིད་བཞིན་གྱི་ནོར་བུ་བསམ་དོན་ཐམས་ཅད་འགྲུབ་པའི་རྙེད་པ་ཆེན་པོ་ཞིག་རྙེད་པས་ད་ནི་སྲོག་དམར་པོ་འདི་ལ་བབ་ཀྱང་རང་དོན་ཡིད་བྱེད་ཀྱི་སྐྱོན་མེད་པ་ཞིག་བྱེད་དགོས། རིགས་དམ་པ་རྒྱལ་སྲས་ཀྱི་རིགས་འདི་བརྫད་མི་ཉན། འདི་བརྫད་དུས་ཕྱོགས་བཅུའི་སངས་རྒྱས་བསླུས་ཤིང་། ཁམས་གསུམ་སེམས་ཅན་བསླུས་ལ། དེ་ལྟར་དུ་བསམ་དགོས། དེས་ནི་རང་དགའ་བ་བསྒོམ་པའི་རྗེས་སུ་ཡང་གཞན་དགའ་བ་བསྐྱེད་པ་སྟེ། བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །ཞེས་གསུངས་པ་ལྟར་རང་རེའི་འདོན་ཆའི་ནང་དུ་ཡོད་པ་ལྟར་རང་དགའ་བ་བསྒོམས་པའི་རྗེས་སུ་གཞན་དགའ་བ་བསྒོམ་དགོས། ངས་ཉི་མ་དེ་རིང་ནས་རྒྱལ་བ་སྲས་དང་བཅས་པའི་སྤྱན་སྔར་སེམས་ཅན་ཐམས་ཅད་གནས་སྐབས་ལྷ་མིའི་གོ་འཕང་ནས་མཐར་ཐུག་རྫོགས་པའི་སངས་རྒྱས་ཀྱི་གོ་འཕང་གི་བདེ་བ་ལ་དགོད་རྒྱུའི་མགྲོན་ལ་བོས་ཚར་བ་ཡིན་པས་ལྷ་དང་ལྷ་མིན་ལ་སོགས་པ་ཐམས་ཅད་ཀྱིས་དགའ་དགའ་གྱིས་ཞེས་གསུངས་པ་ཡིན། དེ་ལྟར་བྱང་ཆུབ་མཆོག་ཏུ་སེམས་བསྐྱེད་དེ་སེམས་བསྐྱེད་ཀྱི་སྡོམ་པ་དེ་ཐོབ་པ་ནས་བཟུང་སྟེ། མིང་གནས་གྱུར་ནས་བྱང་ཆུབ་སེམས་དཔར་གྱུར་སོང་བ་ནི། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་གསུངས་པ་ལྟ་བུ་དང་། དོན་གནས་གྱུར་སོང་ཞིང་། དོན་ཇི་ལྟར་གནས་གྱུར་སོང་ཞེ་ན། དོན་གནས་གྱུར་ནས་འགྲོ་བ་ལྷ་དང་བཅས་པས་ཕྱག་བྱ་བའི་འོས་སུ་གྱུར་སོང་ལ། ཉི་མ་དེ་རིང་ནས་བཟུང་སྟེ་དཀར་ཕྱོགས་སྐྱོང་བའི་ལྷ་ཐམས་ཅད་ཀྱིས་ཡོངས་སུ་སྐྱོབ་པ་དང་། གང་དུ་གནས་པའི་ས་ཕྱོགས་སུ་དབུལ་ཕོངས་དང་འཐབ་རྩོད་ཞི་བ་ལ་སོགས་པའི་ཡོན་ཏན་ཁྱད་པར་ཅན་དེ་ལྟར་ཐོབ་རྒྱུ་ཡོད། འོན་ཀྱང་སེམས་མཆོག་བསྐྱེད་པ་སླ་ཡང་སྐྱེས་པ་དཀའ་ཞེས་གསུངས་ཏེ། བྱང་སྡོམ་ལེན་རྒྱུ་ཆོ་གའི་སྟེང་ནས་ལས་སླ་མོ་བྱས་ཏེ་ཚིག་འགའ་ཞིག་བཏོན་ནས་ལེན་རྒྱུ་ཡོད་ཀྱང་རྒྱུད་ལ་དངོས་སུ་སྐྱེས་པ་དེ་ཉིད་དཀའ་མོ་ཡིན། གོང་དུ་བཤད་པའི་ཚད་མེད་བཞི་དེ་ཚུར་བསྡུས་ན། བྱམས་སྙིང་རྗེ་གཉིས། དེ་ཡང་གཅིག་ཏུ་ཚུར་བསྡུས་ན། སྙིང་རྗེ་གཅིག་པུ་བསྒོམ་རྒྱུ་དེ་གཟབ་རྒྱུ་འདི་གལ་ཆེན་ནང་གི་དོན་ཆེན་ཡིན། བྱང་ཆུབ་ཀྱི་སེམས་རིན་པོ་ཆེ་སྐྱེས་པའི་ཕན་ཡོན་ལ་བསམས་ན། ཡོད་ན་སངས་རྒྱས་སྒྲུབ་ལ་དེས་ཆོག་ཅིང༌། །མེད་ན་སངས་རྒྱས་སྒྲུབ་ལ་ཐབས་ཆག་པ། །སངས་རྒྱས་སྒྲུབ་པའི་ས་བོན་མ་ནོར་བ། །རྣམ་དག་བྱང་ཆུབ་སེམས་མཆོག་བསྐྱེད་པར་ཤོག །ཅེས་གསུངས་པ་ལྟར་ཡིན་པ་མ་ཟད་བྱང་ཆུབ་སེམས་ཀྱིས་མ་ཟིན་པའི་དགེ་རྩ་ཡོད་ཚད་ཐམས་ཅད་བདེ་འབྲས་ལན་གཅིག་མྱོང་ཚར་ནས་ཟད་འགྲོ་རྒྱུ་དཔེར་ན་ཆུ་ཤིང་གི་འབྲས་བུ་གཅིག་མ་གཏོགས་མེད་པ་དེ་ལྟ་བུ་ཡིན་པ་རེད། བྱང་ཆུབ་ཀྱི་སེམས་འདི་རྒྱུད་ལ་ཡོད་ན་དགེ་རྩ་རྒྱུན་མི་ཆད་པ་གོང་ནས་གོང་དུ་འཕེལ། ངེས་པའི་སྡིག་པ་མཚམས་མེད་བསགས་པ་ལྟ་བུ་ཡོད་ཀྱང་ངན་སོང་ལ་སྐྱེས་ན་དར་གྱི་ཕོ་ལོང་བརྡབས་པའི་ཡུན་ཙམ་ཞིག་ལས་འགྲོ་མི་དགོས། མ་ངེས་པའི་སྡིག་པ་མི་རྟ་བཅོ་བརྒྱད་བསད་ཡོད་ཀྱང་བྱང་ཆུབ་ཀྱི་སེམས་དེ་སྐྱེས་པའི་སྐད་ཅིག་གཅིག་ལ་དུས་མཐའི་མེས་རྩྭ་དང་སྦུར་མ་བསྲེགས་པ་ལྟར་སྡིག་པ་ཆེན་པོ་དེ་འཇོམས་འགྲོ། དེས་ན་ཞིང་ཁམས་འདིའི་བྱང་ཆུབ་སེམས་དཔའ་ཐམས་ཅད་བདེ་བ་ཅན་དུ་སྐྱེ་བར་སྨོན་ལམ་བཏབ་ན་ཞིང་ཁམས་དེར་སྐྱེ་ཞེས་གསུངས་པས་སེམས་བསྐྱེད་འདི་ལ་རྒྱུན་དུ་འབད་པ་བྱེད་རྒྱུ་དེ་ཉིད་གལ་ཆེ། བདེ་བ་ཅན་དུ་སྐྱེ་བྱེད་ཀྱི་རྒྱུ་ངོ་མ་དེ་ཉིད་ཡིན། བྱང་ཆུབ་ཀྱི་སེམས་འདི་བླངས་ནས་ཉམས་ཤོར་ན་ནག་པོའི་ཆོས་བཞི་མཉམ་གཅིག་ཏུ་རྒྱུད་ལ་འབྱུང་བ་ཡིན་ཞིང་། བྱང་ཆུབ་མཆོག་ཏུ་སེམས་བསྐྱེད་ནས་སྨོན་འཇུག་གི་བསླབ་བྱ་ལ་སློབ་དགོས། བྱང་ཆུབ་སྨོན་པའི་བསླབ་བྱ་རང་འདོད་མ་དོར་ནས་སེམས་ཅན་བློས་བཏང་དང་། རྣམ་མཁྱེན་བློས་བཏང་མི་བྱེད་པའི་ཐོག་ནས་བདག་གཞན་མཉམ་པ། བདག་གཞན་བརྗེ་བ། བདག་བས་གཞན་གཅེས་གསུམ་པོ་བསྒོམ། འཇུག་པའི་བསླབ་བྱ་ལ་མཚོན་ན་རྒྱལ་སྲས་ཀྱི་སྤྱོད་པ་རྒྱ་མཚོ་ལྟ་བུ་མང་པོ་ཞིག་ཡོད་ཅིང་། དེ་ཐམས་ཅད་ཚུར་བསྡུ་ན་ཕ་རོལ་ཏུ་ཕྱིན་པ་དྲུག་གི་ནང་དུ་འདུས་པ་ཡིན། སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན་ཏེ། དེ་དག་དམིགས་བཅས་བསོད་ནམས་ཀྱི་ཚོགས་དང་ཐབས་སྤྱོད་པའི་ཚོགས་ཞེས་ཀྱང་ཟེར། ཤེས་རབ་དེ་དམིགས་མེད་ཡེ་ཤེས་ཀྱི་ཚོགས་སམ་ལྟ་བའི་ཚོགས་ཡིན། འདི་དྲུག་ལ་ཕར་ཕྱིན་ཞེས་གསུངས་དོན་ཅི་ཡིན་ཟེར་ན། ཕ་རོལ་མྱ་ངན་ལས་འདས་པའི་ས་ལ་ཕྱིན་པར་བྱེད་པའི་ཐབས་སུ་གྱུར་པས་ན་ཕར་ཕྱིན་ཞེས་གསུངས། སྦྱིན་པ་ལ་སོགས་པ་དྲུག་པོ་དེ་ངེས་འབྱུང་གི་བསམ་པས་མ་ཟིན། བདག་མེད་རྟོགས་པའི་ཤེས་རབ་ཀྱིས་མ་ཟིན། སྟོང་ཉིད་ཀྱི་ལྟ་བས་མ་ཟིན་ན་ཕར་ཕྱིན་ཉི་ཚེ་བར་འགྱུར་འགྲོ། དེ་ལྟ་བུ་དེ་ཉིད་ཀྱིས་ཉན་རང་གི་གོ་འཕང་ཙམ་མ་གཏོགས་སངས་རྒྱས་ཀྱི་གོ་འཕང་ཐོབ་པའི་རྒྱུར་འགྱུར་མི་ཐུབ། སངས་རྒྱས་ཀྱི་གོ་འཕང་དེ་མཐའ་གཉིས་ལ་མི་གནས་པ་ཞིག་ཡིན་པས་དེ་ཐོབ་པའི་ཐབས་ལ་ལྟ་བས་སྲིད་པའི་མཐའ་གནོན་དགོས་པ་དང་། སྙིང་རྗེས་ཞི་བའི་མཐའ་མནན་ཏེ་སྲིད་ཞི་གཉིས་ཀྱི་མཐའ་ལ་མི་གནས་པའི་ཕ་རོལ་ཏུ་ཕྱིན་པར་བྱེད་པས་ན་ཕ་རོལ་ཏུ་ཕྱིན་པ་དྲུག་ཡིན་ལ། སྨོན་འཇུག་གི་བསླབ་བྱའི་སྐོར་དེ་ཚོ་རིམ་གྱིས་གཞུང་གི་ནང་ནས་ཤེས་པར་བྱ་བ་ཞིག་ཡིན་ཞིང་། དེ་ཡིས་བདེ་བ་ཅན་དུ་སྐྱེ་བའི་རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་ཤུགས་ལ་བསྟན་པའི་གོ་དོན་དེ་གསལ་བཤད་བྱས་པ་ཡིན། རྒྱུ་བཞི་བ་རྐྱེན་སྨོན་ལམ་དག་པས་མཚམས་སྦྱར་བ། དེ་ལ་འཆི་ཁར་འོད་དཔག་མེད་ཀྱི་ཞལ་མཇལ་བ་ལ་སྨོན་པ། ཤི་བའི་འོག་ཏུ་བདེ་བ་ཅན་དུ་སྐྱེ་བའི་གེགས་འཁོར་བ་ལ་ཆགས་ཞེན་གཅོད་པར་སྨོན་པ། བདེ་བ་ཅན་ལ་སོང་ནས་ཡོན་ཏན་ཐོབ་ཚུལ་ལ་སྨོན་པ། ཞིང་ཁམས་ཀྱི་བཀོད་པ་ཡིད་ལ་བྱས་ཏེ་སྨོན་པ་དང་བཞི་ལས། དང་པོ་འཆི་ཁར་འོད་དཔག་མེད་ཀྱི་ཞལ་མཇལ་བར་སྨོན་པ་ནི། ད་ནི་རྒྱུ་བཞི་བ་རྐྱེན་སྨོན་ལམ་དག་པས་མཚམས་སྦྱར་བ་བཤད་པའི་སྐབས་ཏེ། རྐྱེན་སྨོན་ལམ་དག་པས་མཚམས་སྦྱར་བ་འདི། སྨོན་ལམ་རྣམ་པར་དག་པས་དགེ་རྩ་ཐམས་ཅད་རང་གཞན་བདེ་བ་ཅན་དུ་སྐྱེ་བའི་ཆེད་དུ་བསྔོ་བ་དང་སྨོན་ལམ་འདེབས་པ་དེ་ཡིན། བདག་དང་བདག་ལ་འབྲེལ་ཐོགས་ཀུན།། འདི་ནས་ཚེ་འཕོས་གྱུར་མ་ཐག། ཅེས་གསུངས་ཏེ། སྨོན་ལམ་འདི་ཉིད་ལྗགས་རྩོམ་མཛད་པ་པོ་དེ་སུ་ཡིན་ན་མཁས་གྲུབ་ཀརྨ་ཆགས་མེད་རིན་པོ་ཆེ་ཡིན་ཞིང་། ཁོང་ཞིང་ཁམས་ལ་ཕེབས་དུས་ཁོང་གི་སྐུ་ཚེ་དེའི་མ་དང་། ཁོང་གི་གཡོག་ཞབས་ཕྱི། སྒོ་ཁྱི་ལ་སོགས་པ་ཐམས་ཅད་བདེ་བ་ཅན་དུ་སྐྱེས་སོང་བའི་ལོ་རྒྱུས་ཡོད། དེ་དང་མཚུངས་པར་གྲོགས་བྱང་ཆུབ་སེམས་ཀྱིས་ཀུན་ནས་བསླངས་ཏེ་རྟེན་ཚོགས་ཞིང་གསལ་འདེབས་དང་། རྒྱུ་ཚོགས་བསགས་སྒྲིབ་སྦྱོང་གི་མཐུ་དེར་བརྟེན་ནས། བདག་དང་བདག་ལ་འབྲེལ་ཐོགས་ཀུན་ཞེས་སྨོན་ལམ་འདེབས་པ་པོ་བདག་དང་། བདག་ལ་བཟང་པོ་ཆོས་དང་ཟང་ཟིང་གི་འབྲེལ་བ་ཡོད་པ། ངན་པ་འཕྲོག་བཅོམ་རྡུང་རྡེག་ངན་སྨོད་མཚང་འབྲུ་ལ་སོགས་པ་བྱེད་མཁན། མདོར་ན་དངོས་ཡོད་ཀྱི་དགྲ་དང་དངོས་མེད་ཀྱི་བགེགས་ལ་སོགས་པ་བཟང་ངན་གྱི་འབྲེལ་བ་ཐོགས་པའི་ཕ་མར་གྱུར་པའི་སེམས་ཅན་གཅིག་ཀྱང་མ་ལུས་པ་ཐམས་ཅད། འདི་ནས་ཚེ་འཕོས་གྱུར་མ་ཐག་ཅེས་ནམ་ཞིག་འཇིག་རྟེན་གྱི་ཁམས་འདི་ནས་ཚེ་འཕོས་ནས་ཤི་བ་གྱུར་མ་ཐག་པའམ། ཡང་ན་འཆི་ནད་དྲག་པོ་ཞིག་ཐེབས་ནས་ལུས་ཀྱིས་ཚུགས་མི་ཐུབ། ཟས་བཟའ་བཏུང་གི་ཡི་ག་ཆད། གོས་གདན་ཉལ་ཆས་ཅི་འདྲའི་བདེ་མོ་ཞིག་བཞག་ནའང་མི་བདེ་བའི་སྣང་བ་ཤར། འབྱུང་བའི་ཐིམ་རིམ་རགས་པ་ཤར་ནས་མིག་གིས་གཟུགས་ལ་བལྟས་ན་རབ་བེ་རིབ་བེ་ཞིག་མ་གཏོགས་མི་མཐོང་། རྣ་བས་སྒྲ་ཉན་ན་ཐག་རིང་གི་སྒྲ་དང་མཚུངས་པ་ཞིག་ལས་མི་གོ། སྲོག་ཆད་པའི་གནད་མང་པོ་གང་ཡིན་ཚོར་བའི་སྡུག་བསྔལ་ཆེན་པོས་གཟིར་བའི་གནས་སྐབས་ན་སྡིག་ཆེན་ལ་སྡིག་པའི་སྣང་བ་དང་། དགེ་བ་ཅན་ལ་དགེ་བའི་སྣང་བ་དེའི་དུས་སུ་ཤར་བ་ཡིན། དེའི་སྐབས་སུ་སྡིག་ཆེན་འགའ་རེས་སེམས་སྐྲག་སྟེ་རྣལ་དུ་མི་གནས་པར་སྨྱོ་གཏམ་བྱས་ཏེ། འདྲ་མི་འདྲ་དུ་མའི་འཆལ་གཏམ་སྔོན་བྱས་ཚད་ཐམས་ཅད་བཤད་པའི་དུས་དེར། སྤྲུལ་བའི་སངས་རྒྱས་འོད་དཔག་མེད།། དགེ་སློང་དགེ་འདུན་འཁོར་གྱིས་བསྐོར།། མདུན་དུ་མངོན་སུམ་འབྱོན་པར་ཤོག། ཅེས་གསུངས་ཏེ། དེའི་དུས་སུ་སྤྲུལ་བའི་སངས་རྒྱས་འོད་དཔག་མེད་པ་ལ། འཁོར་དགེ་སློང་གི་དགེ་འདུན་མང་པོས་བསྐོར་བ་ཐམས་ཅད་ཀྱིས་ཆོས་གོས་རྣམ་གསུམ་སྐུ་ལ་གསོལ་ནས། གསེར་རིའི་ཕྲེང་བ་ལ་ཉི་མའི་འོད་ཟེར་ཕོག་པ་ལྟ་བུའི་སེར་མདངས་ལམ་མེར་ནམ་མཁའ་འཇའ་འོད་ཀྱི་ཀློང་ནས་མདུན་དུ་མངོན་སུམ་དུ་འབྱོན་ཞིང་མཇལ་བར་ཤོག་ཅེས་གསུངས་པ་ཡིན། ཞིང་ཁྲིད་འདི་དང་འབྲེལ་བའི་སེམས་ཅན་ཐམས་ཅད་ཀྱང་དེ་དུས་ལས་ངན་པའི་འཁྲུལ་སྣང་དག་ནས་རྒྱལ་བ་འོད་དཔག་མེད་འཁོར་དང་བཅས་པའི་ཞལ་མཇལ་ཞིང་མེ་ཏོག་སྣ་ཚོགས་ཀྱི་ཆར་ཕབ། དྲི་ཞིམ་སྤོས་ཀྱི་དྲི་བཟང་གིས་ཁྱབ། རོལ་མོ་སྙན་འཇེབས་ཀྱི་སྒྲ་གྲགས། འཇའ་འོད་སྣ་ལྔས་ལམ་འཐེན་ནས་ནུབ་ཕྱོགས་བདེ་བ་ཅན་གྱི་ཞིང་ཁམས་ལ་བསུ་འགྲོ་བའི་སྨོན་ལམ་ཐེབས་པ་ཡིན། དེ་མཐོང་ཡིད་དགའ་སྣང་བ་སྐྱིད།། ཤི་བའི་སྡུག་བསྔལ་མེད་པར་ཤོག། ཅེས་གསུངས་ཏེ། མགོན་པོ་འོད་དཔག་མེད་འཁོར་དང་བཅས་པའི་སྐུ་མཚན་དཔེའི་ཞལ་བཟང་མཆོག་དུ་གྱུར་པ་དེ་མཇལ་བའི་རྐྱེན་དང་། ད་ལྟ་ཚོགས་ཞིང་མགོན་པོ་འོད་དཔག་མེད་འཁོར་དང་བཅས་པའི་དཀྱིལ་འཁོར་བཀྲ་ལམ་མེར་རང་གིས་གསལ་བཏབ་སྟེ་བསྒོམས་པའི་བག་ཆགས་ཏེ། ད་ལྟ་སྒོམ་པ་དང་དེ་དུས་དེའི་བག་ཆགས་ཡོད་པ་གཉིས་ཀ་དུས་གཅིག་ཏུ་ཚོགས་སྐབས་བུས་མ་ངོ་མཐོང་མ་ཐག་ཏུ་ཤེས་པ་བཞིན་དུ་ཡིད་དགའ་ཡ་ལེ། རིག་པ་སྤྲོ་སང་ངེ་། སྣང་བ་སྐྱིད་དུང་ངེ་། འཆི་བ་འོད་གསལ་དུ་གྲོལ་བ་ལྟར་གནད་གཅོད་ཤི་བའི་སྡུག་བསྔལ་དང་། བར་དོ་འཁྲུལ་བའི་སྡུག་བསྔལ། ཕྱི་མ་ངན་འགྲོའི་སྡུག་བསྔལ་ལ་སོགས་པ་སྡུག་བསྔལ་སྤུ་ཙམ་ཡང་མེད་པར་ཤོག་ཅེས་གསུངས་པ་ཡིན། རང་ཉིད་དུས་རྒྱུན་དུ་བག་ཆགས་དང་གོམས་ཆ་ཅི་ཞིག་ཡོད་ན་འཆི་ཁའི་འཁྲུལ་སྣང་ལ་དེ་འཆར་ལ། སྡིག་ཆེན་འགའ་རེས་ར་ལུག་བཤའ་ཟོག་དེ་ཚོ་ཕར་རྒྱོབ་ཟེར་བ་ལྟ་བུ་དང་། རྔོན་པ་འགའ་རེས་རི་དྭགས་དེ་ཚོ་ཕར་རྒྱོབ་ཟེར་བ་ལྟ་བུ། ང་བརྡུང་བྱུང་ཞེས་ཟེར་བ་ལྟ་བུ། གནའ་མཛོ་ཁལ་དེད་ནས་རྒྱ་འགྲོ་དབུས་བསྐོར་བྱས་ནས་ཚོང་ཤ་སྟག་བརྒྱབ་ནས་འགྲོ་བ་དེ་ཚོས་ཐེས་ལུང་དང་འབྲེང་པ་ཁྱེར་ཤོག་ཅེས་ཟེར་མཁན་ཡོད་ཚུལ་བཤད་སྲོལ་ཡོད་དར། དེ་འདྲའི་འཁྲུལ་སྣང་ཤར་གྱིན་ཡོད་པའི་རྟགས་ཅི་ཞིག་ཡོད་ཟེར་ན། འཆི་ཁ་མ་དེའི་ལུས་ཀྱི་རྣམ་འགྱུར་གྱི་ཐོག་ནས་ཤེས་རྒྱུ་ཅན་ཞིག་ཡིན། དེའི་དུས་ཚོད་གནད་གཅོད་ཚོར་བའི་སྡུག་བསྔལ་དང་བག་ཆགས་འཁྲུལ་སྣང་གི་སྡུག་བསྔལ་གྱིས་འཆི་རྒྱུ་ལ་འཚེར་ཞིང་། ཤི་རྒྱུ་སྡུག་པོ་ཉམ་ཐག་འགའ་རེས་ང་ཤི་མ་བཅུག་ཅེས་མཐེ་བོང་སློང་མཁན་ལ་སོགས་ཡོད། འོན་ཀྱང་དེའི་དུས་སུ་ཕོ་སུ་འདྲ་ཞིག་ཡིན་ཡང་འཇིག་རྟེན་ན་སྲིད་པ་གསུམ་པོ་ར་མདའ་ལ་སྦྲན་རུང་དེ་ཤི་མི་དགོས་པའི་ཐབས་ཤིག་བྱེད་རྒྱུ་མེད་དེ། སྨན་པའི་རྒྱལ་པོ་དངོས་སུ་བྱོན་གྱུར་ཀྱང་། །ཚེ་ཡི་འཕེན་ཟད་སྲོག་ལ་མཐུད་མི་ཤེས། །ཞེས་གསུངས་པ་ཡིན། གཉེན་གྲོགས་ནོར་རྫས་ཐམས་ཅད་བློས་མི་ཐོང་ལ། བློས་མ་ཐོང་ཡང་མི་སྐྱུར་ཐབས་མེད་ལ་ཐུག་པ་ཡིན། བློས་མི་ཐོང་ན་ཡང་རྗེས་སུ་མི་འབྲང་ལ། ནག་ཆེན་གྱི་མྱི་ཁྲིམས་ཆེན་གྱི་ཁྲིམས་ལ་ཐུག་པ་བཞིན་དུ་འཇིགས་རུང་མུན་པ་ནག་པོས་མདུན་ནས་བསུས། ལས་ཀྱི་རླུང་དམར་དྲག་པོས་རྒྱབ་ནས་དེད། གཤིན་རྗེའི་སྐྱེས་བུས་ཁྲོ་གཉེར་སྡང་མིག་བགྲད། རྒྱོབ་སོད་ཀྱི་སྒྲ་བསྒྲགས། འཆི་བདག་གི་ཞགས་ནག་སྐེ་ལ་བསྐོན་ནས་འཁྲིད་པའི་དུས་དང་། ཚེ་ཕྱི་མར་སྐྲག་ནས་སྡུག་བསྔལ་མྱོང་བའི་སྐབས་དེར། ཕོ་ཐ་མའི་བློ་དེ་རྗེས་ནས་དྲན་ཞེས་པ་ལྟར་དུ། སྔར་དགེ་སྡིག་སྤང་བླང་འདོར་ལེན་མ་བྱས་པས་ད་གཟོད་འགྱོད་ནས་སྡུག་ཁོག་ལ་མི་ཤོང་། བྲང་སེན་རྗེས་ཀྱིས་གང་། ཁ་ངུ་འབོད་ཀྱིས་གང་། མིག་མཆི་མས་གང་། སེམས་སྡུག་ཡུས་ཀྱིས་གང་ཞོར་ལ་གཅིག་པུ་གྲོགས་མེད་ཁེར་རྐྱང་། གཅེར་བུ་ལག་སྟོང་མཆན་ལ་བཅུག་ནས་འགྲོ་དགོས་པའི་དུས་སུ་འཆི་རྒྱུའི་ཤི་བོ་མ་ཟད་ཟུར་ནས་ལྟ་མཁན་གྱི་མི་ཡང་སྐྱི་གཡའ་ཞིང་སྐྲག་དགོས་པ་སྟེ། རྗེ་མི་ལ་རས་པས། མི་སྡིག་ཆེན་འཆི་བ་མཐོང་ཙ་ན། །ལས་རྒྱུ་འབྲས་སྟོན་པའི་སློབ་དཔོན་ཡིན། །ཞེས་གསུངས་པ་ལྟ་བུ་ཡིན། དེས་ན་ད་ལྟ་གསོན་པོའི་གནས་སྐབས་སུ་རང་དབང་རང་ལག་ཡོད་དུས་དགེ་བ་སྔོན་སོང་རེ་ཡོད་དུ་འཇུག་པ་དང་། བག་ཆགས་བཟང་པོ་རེ་གོམས་སུ་འཇུག་པ་དང་། ཁྱད་པར་དུ་བདེ་བ་ཅན་དུ་སྐྱེ་བའི་རྒྱུ་བཞི་ལ་གོམས་པ་རེ་ཡོད་ན་དེ་དུས་རང་མི་རང་ཁྱིམ་བྱས་ཏེ་དག་པའི་ཞིང་ཁམས་ལ་འགྲོ་ཆོག་པ་ཡིན། བྱང་ཆུབ་སེམས་དཔའ་མཆེད་བརྒྱད་ནི།། རྫུ་འཕྲུལ་སྟོབས་ཀྱིས་ནམ་མཁར་བྱོན།། བདེ་བ་ཅན་དུ་འགྲོ་བ་ཡི།། ལམ་སྟོན་ལམ་སྣ་འདྲེན་པར་ཤོག། ཅེས་གསུངས་ཏེ། གོང་དུ་བཤད་པ་ལྟ་བུའི་ཕྱི་དབུགས་ཆད་ལ་ཉེ་བའི་སྐབས་དེར། བྱང་ཆུབ་སེམས་དཔའ་མཆེད་བརྒྱད་ནི་ཞེས་འཕགས་པ་སྤྱན་རས་གཟིགས་དང་། རྒྱལ་སྲས་མཐུ་ཆེན་ཐོབ། འཇམ་དཔལ་དབྱངས། བྱམས་པ། སའི་སྙིང་པོ། ནམ་མཁའི་སྙིང་པོ། སྒྲིབ་པ་རྣམ་པར་སེལ་བ། བྱང་ཆུབ་སེམས་དཔའ་ཀུན་ཏུ་བཟང་པོ་སྟེ། དེ་རྣམས་ཉེ་བའི་སྲས་བརྒྱད་ཡིན་ཞིང་། བྱང་ཆུབ་སེམས་དཔའ་ཉེ་བའི་སྲས་ཆེན་བརྒྱད་པོ་དེ། སྐུ་རྫུ་འཕྲུལ་གྱི་སྟོབས་ཀྱིས་ཤི་རན་པའི་འཆི་ཁ་མ་དེའི་མདུན་གྱི་ནམ་མཁའ་ཡངས་པ་ན་འཇའ་ཚོན་མེ་ཏོག་གི་ལམ་ནས་བྱོན་ཏེ། དེ་རྣམ་པའི་ཞལ་ནས་ཀྱཻ་རིགས་ཀྱི་བུ་ཞེས་གསུངས་ཤིང་མིང་ནས་བོས་ཏེ། ཁྱོད་སྐྲག་མི་དགོས་གསུངས་ནས་དབུགས་འབྱིན་གནང་བ་ཡིན། ད་ལྟ་གསང་སྔགས་ཀྱི་དབང་བསྐུར་ཐོབ་ནས་གསང་མཚན་གྱི་ཐོག་ནས་འབོད་པའམ། ཡང་མིན་ན་གང་ཟག་རང་གི་མིང་ནས་བཟུང་སྟེ་འབོད་པར་མཛད་ལས་ཆེ། མདོར་ན་མིང་ནས་བཟུང་སྟེ། ཁྱོད་སྐྲག་མི་དགོས། འཇིགས་མི་དགོས། ངེད་ཅག་གིས་ཁྱོད་བདེ་བ་ཅན་གྱི་ཞིང་ཁམས་སུ་འཁྲིད་པའི་བསུ་མ་ལ་ཡོང་བ་ཡིན་པས་འདིར་ཤོག་ཅེས་གསུངས་ནས་ཁྲིད་འགྲོ་བ་ལྟ་བུ། ཡང་མིན་ན་རང་གང་ལ་མོས་པའི་ཡི་དམ་གྱི་ལྷག་པའི་ལྷའི་ཚུལ་བྱས་པའམ། དེ་མིན་ན་རང་གི་རྩ་བའི་བླ་མ་དེ་དེ་དུས་མངོན་སུམ་བྱོན་ཏེ་མིང་ནས་བཟུང་ཞིང་བུ་ཁྱོད་མ་སྐྲག་ཅིག མ་འཇིགས་ཤིག འཁྲུལ་སྣང་འཁོར་བའི་བདེ་སྐྱིད་ལ་ཞེ་མ་ཆགས། ངས་ཁྱོད་བདེ་ཆེན་ཐར་པའི་ལམ་ལ་ཁྲིད་འགྲོ་བ་ཡིན་ཞེས་གསུངས་ནས་གསུང་གི་དབུགས་འབྱིན་ཐོབ་མ་ཐག་འཇིགས་སྐྲག་རང་ཡལ་དུ་སོང་ནས་བདེ་བ་ཅན་ལ་འགྲོ་བའི་ལམ་སྟོན་པ་དེ་ཉིད་ཀུན་མཁྱེན་འཇིགས་གླིང་གིས་ཟངས་མདོག་དཔལ་རིའི་སྨོན་ལམ་ལས། མངོན་སུམ་ལག་པའི་ཁུ་ཚུར་ནས་བཟུང་སྟེ། །མཁར་ཆེན་བཟའ་དང་གུ་ཎ་ནཱ་ཐ་ལྟར། །བདག་ཀྱང་པདྨ་འོད་དུ་འཁྲིད་པར་ཤོག །ཅེས་ལག་མགོ་ནས་བཟུང་སྟེ་ཁྲིད་འགྲོ་བར་ཤོག་ཅེས་གསུངས་པ་དེ་ལྟར་མངོན་སུམ་ལམ་སྣ་ཁྲིད་ནས་དགེ་སློང་དགེ་འདུན་གྱི་ཚོགས་ཀྱིས་འཇའ་གུར་གྱི་ནང་ནས་རོལ་མོ་དབྱངས་སྙན་གྱི་ཁྲོད་ནས་འགའ་རེས་སྔོན་བསུ། འགའ་རེས་རྒྱབ་ནས་སྐྱེལ། འགའ་རེས་གཡས་ནས་བརྟེན་ཏེ་ལམ་སྟོན་ཅིང་ལམ་སྣ་འདྲེན་པར་མཛད་དེ། བར་དོའི་སྣང་བ་ཙམ་ཡང་མེད་པར་བདེ་བ་ཅན་གྱི་ཞིང་ཁམས་སུ་ཁྲིད་པར་ཤོག་ཅེས་གསུངས་པ་ཡིན། རྒྱལ་བ་ཙོང་ཁ་པས་ཀྱང་། ནམ་ཞིག་ཚེ་ཡི་འདུ་བྱེད་གཏོང་བ་ན། །འཁོར་ཚོགས་རྒྱ་མཚོས་བསྐོར་བའི་འོད་དཔག་མེད། །མིག་གི་ལམ་དུ་གསལ་བར་མཐོང་གྱུར་ནས། །དད་དང་སྙིང་རྗེས་བདག་རྒྱུད་གང་བར་ཤོག །བར་དོའི་སྣང་བ་ཤར་བར་གྱུར་མ་ཐག །རྒྱལ་སྲས་བརྒྱད་ཀྱིས་མ་ནོར་ལམ་བསྟན་ཏེ། །བདེ་བ་ཅན་དུ་སྐྱེས་ནས་སྤྲུལ་བ་ཡིས། །མ་དག་ཞིང་གི་འགྲོ་བ་འདྲེན་གྱུར་ཅིག །ཅེས་གསུངས་ཡོད་པ་དང་། བཟང་པོ་སྤྱོད་པའི་སྨོན་ལམ་གྱི་ནང་དུ། བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནས་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །ཞེས་གསུངས་ཤིང་། མདོ་སྡེ་ཟ་མ་ཏོག་བཀོད་པའི་ནང་དུ་ཡང་། གསུང་ཡི་གེ་དྲུག་མའི་སྒྲ་ཐོས་ཚད་ཐམས་ཅད་འཆི་བའི་ཚེ་སངས་རྒྱས་བཅུ་གཉིས་དང་། ཉེ་སྲས་བརྒྱད་ཀྱིས་ལམ་སྣ་དྲངས་ནས་བདེ་བ་ཅན་དུ་འགྲོ་བར་གསུངས་ཡོད། བདེ་བ་ཅན་དུ་སྐྱེ་བའི་རྒྱུ་བཞི་བསྒྲུབས་ནས་སྒྲིབ་སྦྱོང་མོས་གུས་བྱས་ན་སངས་རྒྱས་འོད་དཔག་མེད་འཁོར་དང་བཅས་པ་བསུ་བར་འབྱོན་རྒྱུར་ཐེ་ཚོམ་མི་དགོས། ཞིང་ཁམས་བདེ་བ་ཅན་དུ་སྐྱེ་རྒྱུ་དེར་གེགས་བར་ཆད་ཅི་ཞིག་ཡོད་པ་ཡིན་ཞེ་ན། འཁོར་བའི་གནས་ལ་ཆགས་ཞེན་ཡོད་རྒྱུ་དེ་བར་ཆད་ཆེ་ཤོས་ཡིན། དེ་ལྟ་བུའི་འཁོར་བའི་ཆགས་ཞེན་ཆོད་པར་སྨོན་ལམ་ཆེད་དུ་འདེབས་པ་ནི། གཉིས་པ་ཤི་བའི་འོག་ཏུ་བདེ་བ་ཅན་དུ་སྐྱེ་བའི་གེགས་འཁོར་བ་ལ་ཆགས་ཞེན་གཅོད་པར་སྨོན་པ། དེ་ལ་གནོད་པ་མང་བའི་སྡུག་བསྔལ་ལ་བསམ་པ། འཁོར་བར་ཡུན་རིང་བའི་སྡུག་བསྔལ་ལ་བསམས་ནས་སྨོན་པ། ལྷ་དང་མི་ཡི་སྡུག་བསྔལ་བྱེ་བྲག་ཏུ་བསམས་ནས་ཐར་བ་ལ་སྨོན་པ། ཆགས་ཞེན་བཅད་ནས་བདེ་བ་ཅན་གྱི་ཞིང་ཁམས་ལ་སྨོན་ལམ་རྣམ་པར་དག་པས་མཚམས་ཇི་ལྟར་སྦྱོར་ཚུལ། འཁོར་གནས་ཡུལ་འཁོར་ནོར་རྫས་ཉེ་དུ་ཟས་ནོར་ཐམས་ཅད་ལ་ཆགས་ཞེན་མེད་པར་བདེ་བ་ཅན་ལ་འགྲོ་བའི་ཚུལ་ལ་སྨོན་པ་དང་ལྔ་ལས། དང་པོ་གནོད་པ་མང་བའི་སྡུག་བསྔལ་ལ་བསམ་པ། ངན་སོང་སྡུག་བསྔལ་བཟོད་གླགས་མེད།། ལྷ་མིའི་བདེ་སྐྱིད་མི་རྟག་འགྱུར།། དེ་ལ་སྐྲག་སེམས་སྐྱེ་བར་ཤོག། ཅེས་གསུངས་ཏེ། ཁམས་གསུམ་འཁོར་བའི་གནས་འདིར་ངོ་མས་བསམས་ན་ཆགས་ཞེན་བྱེད་ཡོང་ས་ཞིག་མེད། ཆགས་ཞེན་བྱེད་པར་ཕར་ཞོག་སྔ་དྲོ་ཕྱི་དྲོའི་བར་ཡིན་ཡང་འདི་ནས་གཅིག་ཐར་སོང་ན་བསམ་ས། ནག་ཅན་བཙོན་ནས་ཐར་འདོད་ཡོད་པ་ལྟ་བུ་ཡིན་འོས། ངན་སོང་གསུམ་ལ་མཚོན་ན། དམྱལ་བ་ཚ་གྲང་གི་སྡུག་བསྔལ། ཡི་དྭགས་བཀྲེས་སྐོམ་གྱི་སྡུག་བསྔལ། དུད་འགྲོ་གླེན་ལྐུག་གི་སྡུག་བསྔལ་ལ་སོགས་པ་སྡུག་བསྔལ་བསམ་གྱིས་མི་ཁྱབ་པ་ཡོད་པས་ངན་སོང་གི་སྡུག་བསྔལ་དངོས་སུ་མྱོང་བ་ཕར་ཞོག་དེའི་ལོ་རྒྱུས་ཉན་ན་སྐྲག་རྒྱུ་དེ་ལྟ་བུ་ཞིག་ཡིན། གནའ་རྒྱ་གར་ནས་ཀུན་དགའ་བོ་ལ་ཚ་བོ་གཉིས་ཡོད་ལ། དེ་གཉིས་ཀ་རབ་ཏུ་བྱུང་ནས་གྲྭ་པར་བྱས། རབ་ཏུ་བྱུང་ནས་དགོན་པའི་ནང་དུ་དགེ་འདུན་གྱི་སྡེའི་གྲལ་དུ་བསྡད་ཡོད་ཀྱང་དགེ་བ་སྒྲུབ་པའི་བརྩོན་འགྲུས་གཏན་ནས་བྱེད་རོགས་མ་བྱས། རྣམ་གཡེང་བྱས་ཏེ་འཁྱར་བསྡད་པ་ཡིན། ཉིན་ཞིག་ལ་དེ་གཉིས་ཀ་འཕགས་པ་མོའུ་འགལ་གྱི་བུ་རྫུ་འཕྲུལ་ཅན་གྱི་མཆོག་ཡིན་པས་ཁོང་གི་རྫུ་འཕྲུལ་གྱིས་དམྱལ་བའི་ཡུལ་ལ་ཁྲིད་དུས་དམྱལ་བའི་སེམས་ཅན་གྱི་སྡུག་བསྔལ་མྱོང་གིན་ཡོད་པ་བལྟར་བཅུག་པ་ཡིན་ལ། དེའི་ཕྱིན་ཆད་དེ་གཉིས་ཀས་ངན་སོང་དམྱལ་བའི་གནས་ལ་སྐྱེ་རྒྱུར་སྐྲག་སྟེ་འཁོར་བའི་གནས་ནས་ངེས་འབྱུང་སྐྱེས་ནས་སྔ་དྲོ་དམྱལ་བ་དྲན་ན་ཉིན་གུང་གི་གུང་ཚིགས་ཟ་རྒྱུར་ཡི་ག་མེད། ཕྱི་དྲོར་དམྱལ་བ་དྲན་ན་ཉིན་གུང་གི་གུང་ཚིགས་ཟོས་པ་དེ་ཉིད་སྐྱུག་རྒྱུ་ཡོང་བ་དེ་ལྟར་བྱུང་སྟེ། ཕྱིས་ནས་དེ་གཉིས་ཀྱིས་བརྩོན་འགྲུས་མགོ་ལ་མེ་འབར་ན་གསོད་ལོང་མེད་པའི་ཚོད་ཅིག་བརྩམས་ནས་ཡུན་རིང་མ་འགོར་ནས་དགྲ་བཅོམ་པ་ཐོབ་སོང་བ་ཡིན། དམྱལ་བའི་གནས་སྡུག་བསྔལ་ཆེ་བ་དང་མཚུངས་པར་ཡི་དྭགས་དང་དུད་འགྲོའི་གནས་རིས་ཀྱི་སྡུག་བསྔལ་དེ་ཚོ་ཞེ་ཐོག་ལ་གཅིག་བླངས་ན་གནས་དེ་ཚོ་ལ་རང་ཉིད་མི་སྐྱེ་བའི་ངེས་པ་མེད་རྒྱུའི་འདང་རེ་བརྒྱབ་ཚེ་ཉིན་ཟས་ཡིད་དུ་མི་འོང་། མཚན་གཉིད་ཀླད་ལ་མི་ཁུག་པ་དེ་ལྟ་བུ་ཡིན། དེས་ན་ངན་སོང་གི་གནས་སུ་སྐྱེ་རྒྱུ་ལ་སྐྲག་ནས་ངེས་འབྱུང་སྐྱེ་དགོས། དེ་དང་འདྲ་བར་མཐོ་རིས་ལྷ་དང་མིའི་ཡུལ་ལ་སྐྱེས་པ་ཡིན་ཡང་སྡུག་བསྔལ་མེད་ས་ཞིག་མེད། སྡུག་བསྔལ་ལ་བདེ་བར་འཁྲུལ་བའི་བདེ་སྐྱིད་ལྟར་སྣང་བ་ཙམ་རེ་ཡོད་དུ་ཆུག་ཀྱང་སོས་ཀའི་སྨིག་སྒྱུ་ལྟ་བུ་སྒྱུ་མའི་འཁྲུལ་སྣང་བཞིན་དུ་སྐད་ཅིག་ཐང་ཅིག་ལ་མི་རྟག་པ། སྤྱིར་སྡུག་བསྔལ་གསུམ་དང་། ཁྱད་པར་དུ་འགྱུར་བའི་སྡུག་བསྔལ་ལས་མ་འདས་པ་ཞིག་ཡིན། དེའི་ནང་ནས་སྐྱིད་ཤོས་ལྟ་བུ་དེ་ཉིད་ལྷ་ཡུལ་ཡིན་ཡང་དེ་ཡང་ལྷ་འཆི་འཕོ་ལྟུང་བའི་སྡུག་བསྔལ་ལས་མ་འདས་པ་དེ་ཉིད་ནི། བཤེས་སྤྲིངས་ལས། བརྒྱ་བྱིན་འཇིག་རྟེན་མཆོད་འོས་གྱུར་ཀྱང་ནི། །ལས་ཀྱི་དབང་གིས་ཕྱིར་ཡང་ས་སྟེང་ལྷུང་། །འཁོར་ལོས་སྒྱུར་བ་ཉིད་དུ་གྱུར་ནས་ཀྱང་། །འཁོར་བ་དག་ཏུ་ཡང་བྲན་ཉིད་དུ་འགྱུར། །ཞེས་གསུངས་ཡོད། མདོར་ན་འཁོར་བའི་གནས་ན་བདེ་བ་མེད་དེ། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །མི་རྣམས་འཚོ་བ་ཐུང་བས་ཉམས། །ལྷ་རྣམས་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་གསུངས་པ་ལྟར་ཁབ་བཞག་ཤུལ་གྱི་རྩེ་མོ་ལྟ་བུ་འཁོར་བའི་གནས་ལ་བདེ་བ་ཡོད་པ་མ་ཡིན་ལ། འཁོར་བའི་གནས་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན། སྡུག་བསྔལ་གྱི་ཡོ་ལང་། སྡུག་བསྔལ་གྱི་འཕྲུལ་འཁོར། མེ་མ་མུར་གྱི་འོབས་ལྟ་བུ། རལ་གྲི་ལོ་མའི་ནགས་ཚལ་ལྟ་བུ། དུག་སྦྲུལ་གདུག་པ་ཅན་གྱི་ཚང་ལྟ་བུ། སྲིན་མོ་མི་ཟན་མའི་གླིང་ལྟ་བུ་ཡིན་པ་ཤེས་ནས་དེ་དག་ལ་འཇིགས་ཤིང་སྐྲག་པའི་སེམས་སྐྱེ་བར་ཤོག་ཅེས་གསུངས་པ་ཡིན། དེས་ན་དཔེ་བཞག་ན་མེ་དོང་ངམ་མེ་འོབས་ཤིག་དང་བསིལ་ཁང་གཉིས་ཀྱི་བདེ་སྡུག་གི་ཁྱད་པར་རྒྱུག་པ་ལྟ་བུ་འཁོར་བའི་སྡུག་བསྔལ་དང་བདེ་བ་ཅན་གྱི་བདེ་སྐྱིད་གཉིས་ཀྱི་ཁྱད་པར་ཤེས་ནས་གདམ་ཀ་བྱེད་དགོས། གཉིས་པ་འཁོར་བར་ཡུན་རིང་བའི་སྡུག་བསྔལ་ལ་བསམས་ནས་སྨོན་པ། དེ་ནས་འཁོར་བར་ཡུན་རིང་བའི་སྡུག་བསྔལ་ལ་བསམ་བློ་བཏང་ནས་དེ་ལ་སྐྱོ་བ་སྐྱེ་བར་སྨོན་པ་ནི། ཐོག་མ་མེད་ནས་ད་ལྟའི་བར།། འཁོར་བ་འདི་ན་ཡུན་རེ་རིང་།། དེ་ལ་སྐྱོ་བ་སྐྱེ་བར་ཤོག། ཅེས་གསུངས་ཏེ། འཁོར་བ་འདི་ལ་རྟོག་ཞིབ་ཅིག་བྱས་ན། ཐོག་མ་མེད་ནས་ད་ལྟའི་བར། །ཞེས་འཁོར་བའི་ཐོག་མ་འདི་དུས་ཡིན། འདིའི་ཕན་ཆོད་འཁོར་བ་ཟེར་རྒྱུ་ཞིག་མེད། དེ་ནི་འདི་ནས་བཟུང་སྟེ་དར་ཡོང་བ་ཡིན་ཞེས་ཟེར་རྒྱུ་ཞིག་ཡོད་མ་དར་ནས་ཐོག་མ་མེད་པའི་དུས་རིང་ནས་ད་ལྟའི་སྐྱེ་བ་འདི་ལ་མ་ཐུག་གི་བར་དུ་འཁོར་བ་འདིའི་ནང་ནས་ཡུན་རིང་པོར་སྡུག་བསྔལ་མྱོང་པ་ལ་བསམ་བློ་ཞིག་བཏང་ན། སྔོན་གནས་རྗེས་དྲན་ཡོད་པ་མངོན་ཤེས་ཡོད་ནི་ཞིག་གིས་བལྟས་ན་སྐྲག་སྟེ་ཁ་ནས་ཁྲག་ཚན་བསྐྱུགས་ནས་ངོ་མ་ཅི་བྱེད་འདི་བྱེད་མེད་པ་ཞིག་ལ་ཐུག་པ་དང་། དེ་འདྲའི་སྐྲག་དངངས་སྐྱེ་རྒྱུ་ཅན་ཞིག་ཡིན། དམྱལ་བའི་ནང་ལ་སྐྱེས་དུས་དེར་ཟངས་ཞུན་དང་ཁྲོ་ཆུ་ཁོལ་མ་ཤ་སྟག་འཐུང་བ་དང་། ཡི་དྭགས་ཀྱི་ལུས་བླངས་ནས་རྣག་དང་མི་གཙང་བ་ཟོས་པ་རྐྱང་པ་བསགས་ན་རྒྱ་མཚོ་ཆེན་པོ་ལས་ཀྱང་མང་བ་ཞིག་ཡིན། དེ་ཧ་ལས་ས་ཨེ་ཡོད་ཁི། དུད་འགྲོའི་ལུས་རྟེན་བླངས་བའི་སྐབས་སུ་སེམས་ཅན་ཁེ་རུ་ཞིག་འབུ་སྲིན་ཕྲ་མོ་སྐྱེས་པའི་རྐང་ལག་དང་ཤི་ནས་འཐོར་སོང་བའི་རུས་པ་ཤ་སྟག་བརྩིགས་བཞག་ན་རི་ཡི་རྒྱལ་པོ་རི་རབ་ལས་ཀྱང་ད་དུང་མཐོ་བ་ཞིག་ཡིན་ཏེ། རུ་ཏྲ་ཐར་བ་ནག་པོ་ཁོའི་སྔོན་གྱི་ཚེ་རབས་དྲན་པའི་སྨྲེ་བཤགས་ཀྱི་ནང་ལ། ཤ་རུས་བསགས་ན་འཇིག་རྟེན་གཏོས་དང་མཉམ། །རྣག་ཁྲག་བསགས་ན་རྒྱ་མཚོ་ཆེན་པོ་ཙམ། །ལས་འཕྲོ་བསགས་ན་བསམ་འདས་བརྗོད་མི་ལང་། །ཁམས་གསུམ་བགྲང་ཞིང་སྐྱེ་འཆིའི་ཁ་བརྒྱུད་ཀྱང་། །བྱས་པའི་ལས་རྣམས་དོན་མེད་ཆུད་རེ་ཟོས། །ཞེས་པ་ལྟ་བུ་ཡིན། དེ་འདྲའི་ཡུན་རིང་ཟད་མེད་ཀྱི་སྡུག་བསྔལ་མྱོང་མྱོང་བས། འཁོར་བ་འདི་ལ་ཡུན་རེ་རིང་། །དེ་ལ་སྐྱོ་བ་སྐྱེ་བར་ཤོག །ཅེས་གསུངས་ཏེ། འཁོར་བ་འདིར་སྐྱོ་ཤས་ཀྱི་སེམས་སྙིང་ཁོང་རུས་པའི་གཏིང་ནས་སྐྱེ་བར་ཤོག་གསུངས་པ་རེད། གནའ་སྔ་མོ་ཞིག་ལ་སྟོན་པ་ཞལ་བཞུགས་པའི་སྐབས་སུ་དགེ་སློང་དཔལ་སྐྱེས་ཟེར་བའི་རྒན་པོ་ལེ་ལོ་ཅན་ཞིག་ཡོད་པ་དེས་དགེ་བ་དེ་ཙམ་སྒྲུབ་མ་ཐུབ་པའི་སྐབས་སུ་དེ་ལ་སྐྱོ་བ་སྐྱེ་བའི་ཕྱིར་དུ། འཕགས་པ་མོའུ་འགལ་གྱི་བུ་རྫུ་འཕྲུལ་ཅན་གྱི་མཆོག་དེས་དགེ་སློང་དཔལ་སྐྱེས་རྒྱ་མཚོ་ཆེན་པོའི་འགྲམ་ཞིག་ལ་ཁྲིད་སོང་ཟིག དེ་ནས་ཁོང་རྣམ་པ་གཉིས་སོང་སོང་བས་རྒྱ་མཚོ་ཆེན་པོའི་འགྲམ་ཞིག་ན་རུས་པའི་རི་བོ་ཆེན་པོ་མཐོ་དམན་གྱི་ཚད་ཉི་ཟླ་ཡང་སྒྲིབ་ཀྱིན་འདུག་པའི་རི་དེས་གྲིབ་མས་རྒྱ་མཚོའི་ནང་ལ་མུན་ནག་རེད་འགྲོ་བ་དེ་འདྲའི་རི་ཆེན་པོ་དེའི་རི་མགོར་ཡར་ལ་འགོས་སོང་དུས་དེར། བར་བར་རྩིབ་མ་འདྲ་བའི་ཤར་ཤར་ཡོད་པ། རྩིབ་བུ་རེའི་བར་ལུང་ཤུར་ཆེན་མོ་འདྲ་བ་ཡོད་པའི་རུས་པའི་རི་མགོ་དེར་བྱོན་པས། དེ་དུས་དགེ་སློང་དཔལ་སྐྱེས་ཀྱིས་འདིའི་རི་འདི་ཅི་ཞིག་རེད་ཅེས་འདྲི་དུས། མོའུ་འགལ་གྱི་བུས་རི་འདི་ཁྱོད་ཀྱི་སྐྱེ་བ་སྔོན་མ་ཞིག་གི་རུས་པ་རེད་གསུངས། དེ་ཅི་འདྲ་རེད་ཅེས་ནན་ཏན་གྱིས་འདྲི་དུས། དེར་མོའུ་འགལ་གྱི་བུས་གསུངས་ནས། གནའ་གནའ་ཞིག་ལ་ཁྱོད་ཀྱི་སྐྱེ་བ་སྔོན་མའི་ནང་གི་ཡང་སྔོན་ཡང་སྔོན་ཞིག་ལ། རྒྱལ་པོ་ཆོས་ཀྱིས་འཕགས་པ་ཟེར་བའི་སྐྱེ་བ་ལེན་སྐབས། དེའི་དུས་ཁྲིམས་འགལ་ཅན་གྱི་མི་ཞིག་ཡོད་པ་དེ་བློན་པོ་རྣམས་ཀྱིས་ཅི་བྱེད་ཅེས་དྲིས་དུས། རྒྱལ་པོ་དེ་དུས་ཤོ་མིག་མང་གི་རྩེད་མོ་ལ་ཡེངས་བའི་སྐབས་སུ་ཁེལ་བས། རྒྱལ་པོས་ཞིབ་ཀྱིས་བསམ་བློ་མ་བཏང་ནས་ངའི་རྒྱལ་ཁྲིམས་བཙན་པོ་ཇི་ལྟར་ཡིན་ན་དེ་ལྟར་དུ་ལག་ལེན་གྱིས་ལ་ཤོག་ཅེས་བཤད་པས། དེ་དུས་བློན་པོ་རྣམས་ཀྱིས་ཡང་ཞུ་བྱེད་མ་ཕོད་པར། ངའི་བཀའ་ཁྲིམས་བཙན་པོ་ལྟར་དུ་ལག་ལེན་གྱིས་ཤོག་ཟེར་དུས། སོད་ལ་ཤོག་ཟེར་བ་རེད་སྙམ་ནས་མི་དེའི་ནག་ཉེས་ཆེ་ཆུང་ཞིབ་འཇུག་ཅིག་གཏན་ནས་མ་བྱས་ཏེ་བསད་པ་ན། རྒྱལ་པོས་རྩེད་མོ་བརྩེས་ཚར་དུས་ད་རེས་བཙོན་པ་དེ་གང་རེད་ཅི་རེད་ཟེར་དུས། རྒྱལ་པོས་བཀའ་བཞིན་ཁྲིམས་བཙན་པོས་སྲོག་ཆད་བཅད་ནས་བསད་ཚར་བ་རེད་ཅེས་རྒྱལ་པོ་ལ་ཡར་ཞུ་དུས་རྒྱལ་པོ་འགྱོད་པ་སྐྱེས་ཏེ། མ་ལེགས་སོ་དོན་མེད་ལ་མི་ཞིག་བསད་པ་ཡིན་པས། ད་ནི་ཁོ་བོ་རིགས་ངན་གྱི་རྒྱལ་པོ་རུ་གྱུར་ཟིན་སོང་། རྒྱལ་སྲིད་བསྐྱངས་ཀྱང་ཅི་ཞིག་གི་ཕན་ཐོགས་ཡོད་བསམས་ནས་རྒྱལ་པོ་དེ་ས་མཐར་འཁྱམས་སོང་བ་རེད། དེ་ནས་རྒྱལ་པོ་དེ་ཚེ་འཕོས་ནས་དོན་མེད་དུ་མི་བསད་བཞག་པའི་ལས་དེས། རྒྱ་མཚོ་འདིའི་ནང་ལ་སྐྱེས་ནས་ཆུ་སྲིན་ཆེན་པོ་ཞིག་ལ་ལུས་ཀྱི་མཐོ་དམན་ཚད་བཞག་ན་འདིའི་རུས་པ་འདི་དང་འདྲ་བ། དཔག་ཚད་བདུན་བརྒྱ་བརྒྱད་བརྒྱ་ཡོད་པ་དེ་འདྲ་ཞིག་གི་སྐྱེ་བ་བླངས་ནས། དེའི་ཆུ་གནས་སྲོག་ཆགས་ཆེན་པོ་དེ་གཉིད་སོང་དུས་ལོ་བརྒྱ་རེའི་མཚམས་ནས་གཉིད་རེ་རེ་སད་ཡོང་དུས། དེ་ཕོ་བ་ལྟོགས་ནས་ཁ་རེ་རེ་གདང་དུས་རྒྱ་མཚོའི་ཆུ་ཡང་ཆུ་ཆེན་རྒྱུགས་པ་ལྟ་བུས་སྲོག་ཆགས་ཆེན་པོ་དེའི་ཁ་ནང་དུ་མང་རབ་ཅིག་བུད་འགྲོ་བ་དང་། དེ་དང་མཉམ་དུ་སྲོག་ཆགས་དུང་ཕྱུར་མང་པོ་དེའི་མིད་པར་བུད་སོང་བས་སྲོག་ཡང་ཤོར་འགྲོ་ནི་དེ་འདྲ་ཞིག་གི་སྲོག་ཆགས་ཀྱི་སྐྱེ་བ་བླངས་སོང་བ་རེད། སྔར་མི་ལུས་བླངས་ནས་རྒྱལ་པོ་བྱེད་སྐབས་ཀྱི་བློན་པོ་ལ་སོགས་པ་ལས་ངན་བསགས་ཚད་པོ་ཚང་མ་དེའི་ལུས་པོའི་གསེང་གི་འབུ་སྲིན་དང་། དུང་དང་ཆུ་སྲིན་ཆུང་ཆུང་ལ་སོགས་པར་སྐྱེས་ནས་དེའི་ལུས་པོ་ཟ་དུས། དེས་ན་ཚ་མ་བཟོད་ནས་མཚམས་རེ་མཚམས་རེ་ཁོའི་ལུས་པོ་ཤེད་ཀྱིས་རི་མགོ་ལ་རེ་རེ་དྲུད་དུས་ལུས་ཀྱི་ཐོག་ཏུ་ཡོད་པའི་སྲོག་ཆགས་མང་པོ་བསད་པའི་ཁྲག་གིས་རྒྱ་མཚོ་ཆེན་པོ་དེའི་ངོས་ཀྱི་རྒྱང་གྲགས་རེ་ཙམ་གྱི་རྒྱ་ཁྱོན་དུ་རྒྱ་མཚོ་ཁྲག་མདོག་ཏུ་འགྱུར་འགྲོ་བ་དེ་ལྟ་བུ་དང་། དེའི་ཆུ་སྲིན་ཆེན་པོ་དེ་ལོ་བརྒྱ་སྟོང་མང་པོར་དེ་འདྲ་སྡུག་བསྔལ་མྱོང་མྱོང་ནས་མཐར་ཚེ་འཕོས་པའི་རོ་དེ། རྒྱ་མཚོ་རོ་དང་མཉམ་དུ་མི་གནས་པ་ཡིན་དུས་འདི་ན་འཕངས་ནས་ཉི་མས་བསྐམས། ཆར་པས་བརླན་ཏེ་ཤ་ཟད་པའི་རུས་པ་བྲག་རྡོར་འགྱུར་སོང་བ་འདི་རེད་གསུངས་པས། དགེ་སློང་དཔལ་སྐྱེས་ལ་དེའི་སྟེང་ནས་ངེས་འབྱུང་དྲག་པོ་རྐྱེན་གང་གིས་ཀྱང་བཟློག་ཏུ་མེད་པ་ཞིག་སྐྱེས་ནས། ཆོས་བསྒྲུབ་རྒྱུའི་བརྩོན་འགྲུས་ཉིན་མཚན་ཁ་སྦྱར་བྱས་ཏེ་བརྩམས་པས་ཐར་པའི་ས་བོན་གྱི་གསོས་ཐེབས་སོང་བ་རེད། མི་གཅིག་བསད་པའི་སྡུག་བསྔལ་མྱོང་བའི་ཚད་ཀྱི་ཆ་ཤས་ཙམ་ཞིག་དེ་འདྲ་ཡིན་ན། དེ་བས་ཆེ་བའི་ལས་ངན་བསགས་པའི་རྣམ་སྨིན་མྱོང་ཚད་ལ་བཤད་ཚོད་མེད་རྒྱུ་ཅན་ཞིག་རེད། དེ་ཡིན་དུས་སྔོན་གནས་རྗེས་དྲན་ཡོད་པ་ཞིག་གིས་སྔོན་གྱི་སྐྱེ་བ་རྣམས་སུ་སྡིག་པ་བསགས་རབས་དང་ལས་མྱོང་རབས་ལ་བསམ་བློ་བཏང་ན་ངོ་མ་ཁ་ནས་ཁྲག་དྲན་མོ་བསྐྱུག་ཡོང་བ་དེ་འདྲ་ཧ་ལས་དགོས་པ་ཞིག་ཡིན་པ་དེས་ན་ད་རེས་མི་ལུས་ཐོབ་ནས་ཆོས་སྒྲུབ་ཤེས་པའི་དུས་ཚོད་འདིར་ངེད་ཚོས་ཡིན་ན་འཁོར་བ་ལ་ཕྱི་ཕྱག་འཚལ་ནས་ད་ཕྱིན་ཆད་འཁོར་བ་ལ་འཁྱམས་དགོས་མི་ཐུག་ཅིང་། ཞིང་ཁམས་བདེ་བ་ཅན་ལ་འགྲོ་ཆོག་ཆོག་གི་ཐབས་ལ་ད་ནས་འབད་དགོས་པ་ལས་ཕྱིར་འགྱངས་ན་དུས་ཚོད་ཤོར་ཉེན་ཡོད་པ་ཡིན། གསུམ་པ་ལྷ་དང་མི་ཡི་སྡུག་བསྔལ་བྱེ་བྲག་ཏུ་བསམས་ནས་ཐར་བ་ལ་སྨོན་པ། མི་ནས་མི་རུ་སྐྱེ་ཆོག་ཀྱང་།། སྐྱེ་རྒ་ན་འཆི་གྲངས་མེད་མྱོང་།། དུས་ངན་སྙིགས་མར་བར་ཆད་མང་།། མི་དང་ལྷ་ཡི་བདེ་སྐྱིད་འདི།། དུག་དང་འདྲེས་པའི་ཟས་བཞིན་དུ།། འདོད་པ་སྤུ་ཙམ་མེད་པར་ཤོག། ཅེས་གསུངས་ན། སྐྱེས་བུ་ཆུང་ངུའི་བློ་རིམ་ཅན་ཕུགས་ཀྱི་གཏན་བདེ་སྒྲུབ་པའི་བློ་སྟོབས་མེད་པའི་གང་ཟག་གིས་ལྷ་དང་མི་ཡི་བདེ་བ་ལ་རེ་ཆགས་ཡོད་པས། ཟག་བཅས་ཀྱི་དགེ་བ་ལ་བརྟེན་ནས་ལྷ་མིའི་ལུས་རྟེན་ཐོབ་ཐུབ་པ་ཡིན་ཡང་། དེ་ལས་མི་ལྟ་བུ་ཞིག་ལ་མཚོན་ན་མིའི་ལུས་རྟེན་འདི་བརྗེས། ཡང་མིའི་ལུས་རྟེན་ཞིག་གལ་ཏེ་སྐྱེ་ཆོག་ཀྱང་། དེ་ལ་སྐྱིད་པོ་ཞིག་ཡོད་པ་མ་ཡིན་ཏེ། དང་པོར་སྐྱེ་བའི་སྡུག་བསྔལ། བར་དུ་རྒ་བའི་སྡུག་བསྔལ། ཐ་མར་ན་བའི་སྡུག་བསྔལ། ཡང་མཐར་འཆི་བའི་སྡུག་བསྔལ་ལ་སོགས་པ་སྡུག་བསྔལ་གྲངས་མེད་པ་མྱོང་ཚུལ་ལ་བསམ་བློ་ཞིག་བཏང་ན། བཤད་མི་ཚར་བ་ཞིག་ཡོད་པ་ཡིན། གཞན་ཡང་དགྲ་སྡང་འཕྲད་ཀྱིས་དོགས་པའི་སྡུག་བསྔལ། གཉེན་བྱམས་འབྲལ་གྱིས་དོགས་པའི་སྡུག་བསྔལ། འདོད་པ་ཐོག་ཏུ་མི་ཁེལ་བའི་སྡུག་བསྔལ། མི་འདོད་པ་ཐོག་ཏུ་བབ་པའི་སྡུག་བསྔལ། ཁྱད་པར་དུ་དེ་རིང་ཁར་སང་སྙིགས་མ་ལྔ་བདོའི་གནས་སྐབས་འདིར་གནའ་དུས་བཟང་པོ་ཡ་རབས་ཀྱི་ཉི་མ་དེ་ཕར་ལ་ནུབ། ད་དུས་ངན་པའི་མུན་ནག་སྨག་རུམ་གྱིས་ཚུར་ལ་ཁྱབ་པའི་དུས་ཡིན་ན། དུག་ལྔ་ཤིན་ཏུ་རགས་པས་ཉོན་མོངས་པའི་སྙིགས་མ། ལོག་ལྟ་ཤིན་ཏུ་ཆེ་བས་ལྟ་བའི་སྙིགས་མ། དུས་ངན་གྱི་མི་ཚེ་ངེས་པ་མེད་པས་ཚེ་ཡི་སྙིགས་མ། རྒྱུད་རྩུབ་ཅིང་འདུལ་བར་དཀའ་བ་སེམས་ཅན་གྱི་སྙིགས་མ། དེ་འདྲའི་སྙིགས་མ་ལྔ་བདོ་བའི་སྒང་ཡིན་པས། དམ་ཆོས་རྣམ་དག་ཅིག་བསྒྲུབ་དགོས་བསམ་ཡང་སྒྲུབ་མཁན་ལ་བར་ཆད་མང་པོ་འབྱུང་སྟེ། ནག་པོ་བདུད་ཀྱི་བསྟན་པ་དར་བའི་དུས། །ལྷ་ཆོས་སྒྲུབ་ལ་བར་ཆད་མང་དུ་འབྱུང་། །ཞེས་གསུངས་པ་ལྟ་བུ་ཡིན། མ་ཚད་མི་དང་ལྷ་ཡི་གནས་སྐབས་ཀྱི་བདེ་སྐྱིད་ལྟར་སྣང་བ་ཞིག་ཡོད་རྒྱུ་འདི་ཡང་། དུག་དང་འདྲེས་པའི་ཁ་ཟས་ཞིམ་ཡང་ཟ་མི་རུང་ཞིང་སྲོག་གི་དགྲ་ཡིན་པས་འཛེམས་དགོས་པ་བཞིན་དུ། དེ་ལ་འདོད་པ་སྤུ་ཙམ་ཡང་མེད་ཅིང་ད་ལྟ་ཉིད་དུ་བློས་ཐོང་བར་ཤོག་གསུངས་པ་ཡིན། སྟོན་པ་ཐུགས་རྗེ་ཅན་གྱིས་རྒྱལ་སྲིད་ཀྱི་འབྱོར་བ་ཡང་མཆིལ་མའི་ཐལ་བ་བཞིན་དུ་བོར་ནས་དོན་གཉིས་འགྲུབ་པའི་སངས་རྒྱས་སུ་གྱུར་བ་དང་། ཨོ་རྒྱན་རིན་པོ་ཆེས་ཨིནྡྲ་བྷུ་ཏིའི་རྒྱལ་སྲིད་སྤངས་ནས་སྐྱེ་འཆི་མེད་པ་རྡོ་རྗེའི་སྐུ་བརྙེས་སོང་བ་ཡིན་པས། ང་ཚོའི་ཁྱིམ་གཞིས་བྱེའུ་ཚང་འདྲ་བོ་ལ་ཆགས་རྒྱུ་འདི་ཁྱི་ཕག་མི་གཙང་བའི་ཟས་ལ་ཆགས་པ་དང་འདྲ་བ་ཞིག་ལས་མ་འདས། ཉེ་དུ་ཟས་ནོར་མཐུན་གྲོགས་རྣམས།། མི་རྟག་སྒྱུ་མ་རྨི་ལམ་བཞིན།། ཆགས་ཞེན་སྤུ་ཙམ་མེད་པར་ཤོག། ཅེས་གསུངས་ཏེ། གཉེན་ཉེ་རིང་རྩ་གསུམ་གྱི་རིགས་འདི་སྔ་མའི་ལན་ཆགས་འཁོར་བའི་ཚེ་སྔོན་གྱི་དགྲ་བོ་ཡིན་ཤས་ཆེ་ཡང་། འདི་ཐག་རིང་ན་ཡོད་དུས་ཉེ་འབྲེལ་གྱི་གདུང་སེམས་ཆེ་བས་དེ་དང་གཅིག་ཐུག་དགོས་པ་འདྲ་འདྲ། འདི་ཟུར་ལ་བཞག་ན་ཉོན་མོངས་དུག་གསུམ་གྱི་ཕུང་པོ་ཟད་མེད་སྐྱེད་བྱེད་ཀྱི་གཞི་མ་མེད་ན་དགའ་སྣང་ཤར་བ། ཤི་བའི་དུས་སུ་གཉེན་ཉེ་བ་དང་་གྲོགས་ལ་ཞེ་ཆགས་ན་འདྲེ་ལུས་ལེན་བྱེད་དུ་འགྲོ་བ་སྟེ། དེ་འདྲའི་གནོད་བྱེད་ཡིན་པ་དང་། ཟས་ནོར་ཞིག་ལ་ཆགས་ནའང་དེ་བཞིན་དུ་ཚེ་འདིར་མི་བདེ་དཀའ་ལས་ཐམས་ཅད་ཀྱི་གཞི་མ་སྟེ། ཟས་ནོར་བརླགས་པའི་སྡུག་བསྔལ་གྱིས་མི་ཚེ་སྡུག་བསྔལ་བར་བྱེད་པ་སོགས་ཏེ། བསགས་དང་སྲུང་དང་སྤེལ་བས་དུས་འདའ་བའི། །ནོར་ནི་ཕུང་ཁྲོལ་མཐའ་ཡས་སྐྱེད་པའི་རྒྱུ། །ཞེས་གསུངས་པ་དང་འདྲ་བ་ཡིན། ཕྱི་མ་བར་དོའི་གནས་སྐབས་སུའང་དེ་ལ་ཆགས་པས་ཕྱི་མའི་རྣམ་སྨིན་ལྕི་བ་སོགས་ཟས་ནོར་གྱི་ཁུངས་ནས་འབྱུང་བ་སྟེ། གནའ་སྔོན་ཆད་ཅིག་ལ། ཡུལ་ཝ་ར་ཎ་སི་ཞེས་པའི་རྒྱ་གར་གྱི་ས་ཆར་ཞིག་ནས་ཁྱིམ་བདག་ཕྱུག་པོ་ཞིག་གིས་ཚོང་བརྒྱབ་ནས་རྒྱུ་ཆེན་དུ་གྱུར་ཏེ་རྒྱུ་ནོར་བསགས་ཚད་པོ་གསེར་ཤ་སྟག་ཏུ་བརྗེས་པས། བར་ཞིག་ལ་གསེར་བུམ་པ་བདུན་ཙམ་ཡོད་པ་ཞིག་ཏུ་ཆགས་ཀྱང་། སེར་སྣའི་དབང་གིས་གསེར་བུམ་པ་བདུན་པོ་དེ་བེད་སྤྱོད་གཏོང་མ་བྲ་ནས་གསོག་གིན་བསྡད་ཅིང་། མ་ཤི་བའི་སྔོན་ལ་གསེར་བུམ་པ་བདུན་པོ་དེ་ས་འོག་ལ་སྦས་པ་དང་། ཉིན་ཞིག་ཁྱིམ་བདག་ཤི་སོང་དུས་གསེར་བུམ་པ་བདུན་པོ་དེར་ཞེ་ཆགས་ནས་སྦྲུལ་ཞིག་གི་ལུས་བླངས་ནས་གསེར་བུམ་པ་བདུན་པོ་བསྲུངས་ནས་བསྡད་པ་དང་། ནམ་ཞིག་དེའི་གྲོང་པ་དེ་ཡང་ས་སྟོང་དུ་གྱུར། སྦྲུལ་དེ་ཡང་ཤི་ཐེངས་མང་པོ་བྱས་ཏེ། ཡང་ཚུར་སྦྲུལ་གྱི་ལུས་ཏག་ཏག་བླངས་ནས་གསེར་བུམ་རྣམས་ལ་ལུས་པོས་དཀྲིས་བརྒྱབ་ནས་ལོ་ཁྲི་ཕྲག་མང་པོ་ལ་གསེར་བུམ་གྱི་རྩར་སྦྲུལ་ལ་སྐྱེས་པ་ཡིན། ནམ་ཞིག་ལ་ཐར་པའི་ས་བོན་ཞིག་རང་གི་རྒྱུད་ལ་སྔོན་ཆད་ཡོད་པའི་སྟོབས་ཀྱིས། སྒྲིབ་པ་མྱོང་སྟོབས་ཀྱིས་ཅུང་ཟད་ཇེ་སྲབ་ལ་སོང་བས་གསེར་དེར་ཞེ་ཆགས་པའི་དབང་གིས་སྦྲུལ་ལུས་བླངས་བ་དེ་ཤེས་ཤིང་། སྔར་གྱི་བག་ཆགས་ཀྱིས་རིག་པ་སད་ནས་མི་སྐད་ཀྱང་བཤད་ཤེས་པ་དེ་ལྟ་བུ་གྱུར། དེ་ནས་འཁོར་བའི་སྡུག་བསྔལ་ལ་ངེས་འབྱུང་ཞེ་གཏིང་ནས་སྐྱེས་ཏེ་ལམ་ཟུར་རྩྭ་ལྡུམ་གྱི་ཁྲོད་ལ་གབ་ནས་བསྡད་པ་ན། སྐབས་ཤིག་མི་ཞིག་ལམ་དུ་འགྲོ་གིན་འདུག་པ་མཐོང་ཞིང་། མི་དེ་ལ་མི་སྐད་ཀྱིས་བོས་པས། མི་དེས་མི་ཞིག་ཡིན་ནམ་སྙམ་ནས་ཕར་བལྟ་ཚུར་ལྟ་མང་པོ་བྱས་ཀྱང་ཅི་ཡང་མ་མཐོང་ནས་ཁོའི་སྔུན་གྱི་ལམ་དེད་ནས་སོང་ཙ་ན། ཡང་སྦྲུལ་དེས་མི་སྐད་བརྒྱབ་ནས་ཁྱོད་ཀྱིས་ལམ་ཟུར་དེར་ལྟོས་དང་ངའི་ཟུར་ལ་ཤོག་དང་ཟེར་ནས་བོས་པས། མི་དེས་སྦྲུལ་དེའི་སྐེ་རྩྭ་གསེང་ནས་ཡར་བསྲིངས་ནས་འདུག་པ་རིག་ནས། ཁྱོད་སྦྲུལ་ཞིག་མ་རེད་དམ། ཁྱོད་ཀྱི་ཟུར་ལ་ཡོང་ན་ང་ལ་གནོད་པ་བྱེད་སྲིད་པས། ཡོང་མི་ཕོད་པར་འདུག་ཟེར་བ་ལ། སྦྲུལ་གྱིས་ངས་ཁྱོད་ལ་གནོད་པ་བྱེད་བསམ་ན་ཁྱོད་ངའི་ཟུར་དུ་མ་ཡོང་རུང་གནོད་པ་བསྐྱལ་ཐུབ་ཅེས་སྨྲས་པས། མི་དེ་སྐྲག་ནས་ངོ་མ་བདེན་འདུག་འདི་འདྲའི་ཐག་ཉེ་ཞིག་ནས་དུག་སྦྲུལ་འདི་འདྲ་ཞིག་གིས་གནོད་བསྐྱལ་ལོས་ཐུབ། ཐུབ་ཤག་ཤག་རེད། དེ་བས་ཟུར་ལ་སོང་ན་དགའ་སྙམ་ནས་མི་དེ་སྐྲག་ཞོར་སྦྲུལ་གྱི་རྩར་སོང་བས། སྦྲུལ་གྱིས་ཁྱོད་སྐྲག་མི་དགོས། ང་ལ་རོགས་ཤིག་གྱིས། ང་ལ་འདི་ན་གསེར་བུམ་པ་འགའ་ཞིག་ཡོད། ཁྱོད་ཀྱིས་འདི་ཁྱེར་སོང་ནས་དགེ་འདུན་པ་ལ་མཆོད་འབུལ་ཞིག་བྱེད་རོགས་གྱིས་ཟེར་བས། མི་དེས་སྦྲུལ་དེ་བཅུག་སའི་སྒམ་ཆེན་པོ་ཞིག་ཐབས་བྱས་ཏེ་དེའི་ནང་ལ་བསྡུས་ནས། གསེར་དང་བཅས་པ་རྒྱབ་ལ་ཁུར་ཏེ་སངས་རྒྱས་ཀྱི་སློབ་མ་དགེ་འདུན་གྱི་སྡེ་ཡོད་སར་སོང་སྟེ་སྦྲུལ་དེ་དགེ་འདུན་པའི་མདུན་དེར་བཞག གསེར་དེ་དག་གིས་མཆོད་པའི་ཡོ་བྱད་དང་ཞལ་ཟས་བཟང་པོ་ཤ་སྟག་ཉོས་ཏེ་དགེ་འདུན་པ་ལ་མཆོད་པ་ཕུལ་བས། སྦྲུལ་དེ་དགའ་ནས་སྒམ་ནང་ནས་མགོ་ཡར་བཀྱགས་ནས་ཆོས་ཉན་པ་དང་། སྦྲུལ་གྱི་ལུས་རྟེན་ངན་པ་དེ་བརྗེས་ནས་སུམ་ཅུ་རྩ་གསུམ་གྱི་ལྷ་ཡུལ་དུ་སྐྱེས་ནས་རིམ་གྱིས་ཐར་བ་ཐོབ་སོང་བ་ཡིན། གཞན་ཡང་ཞེན་ཆགས་སྐྱེས་ན་ཆགས་ཡུལ་ལ་ཆེ་ཆུང་ཡོད་པ་མིན་ཏེ། གསེར་བུམ་པ་བདུན་པོ་ལྟ་བུ་དེ་ལ་ཆགས་ན་ཆགས་རིན་ཡོད་ས་ཞིག་ཡིན་མོད། དེ་ལས་གཞན་སྤྲང་པོ་དབྱུག་པ་ལ་ཞེ་ཆགས་རབས་དང་། རྫི་བོ་ཞིག་ཤི་དུས་འུར་ཐག་གམ་འུར་རྡོ་ལ་ཞེ་ཆགས་ནས་ཉལ་སའི་ཞབས་ཀྱི་འུར་ཐག་སྦྲུལ་ཞིག་ཏུ་འགྱུར་སོང་བ་ལྟ་བུ་དང་། ཡང་བན་རྒན་ཞིག་ལ་ཤ་རྐང་ཡ་ཞིག་ཡོད་པ་དེར་ཞེ་ཆགས་ནས་བན་རྒན་འདས་དུས་དགོན་གསེང་ནས་ནུབ་རྟག་པར་ཤ་རྐང་ཡ་ཞིག་ཁྱིས་དེད་ནས་འུར་འདུག་པ་ལ། བན་རྒན་གྱི་བུད་ཤིང་གསེང་དུ་ཟོག་ཤ་རྐང་པ་ཞིག་ཡོད་པ་ན། བླ་རྒན་གཞན་ཞིག་གིས་མཐོང་ནས་གསུར་གྱི་ནང་བསྲེགས་བཞག་པས་དེ་ཕྱིན་ཆད་ཁྱིས་བདའ་རྒྱུ་མེད་པར་འགྱུར་རབས་དང་། དེ་བཞིན་མཐུན་གྲོགས་ལ་ཆགས་ན་ཡང་དགེ་བའི་བཤེས་གཉེན་འདྲ་ཡིན་ན་མ་གཏོགས་གནོད་བྱེད་དུ་འགྲོ་བ་ལས་ཕན་བྱེད་དུ་མི་འགྲོ་བ་ནི། བྱིས་པ་རྣམས་ནི་མ་མཐོང་ན། །རྟག་ཏུ་བདེ་བ་ཉིད་དུ་འགྱུར། །ཞེས་གསུངས་པ་ཡིན། སོ་སོའི་སྐྱེ་བོ་རྣམས་ནི་བྱིས་པའི་སྡིག་གྲོགས་ཡིན་པས། སྡིག་གྲོགས་ལ་ཆགས་ཤིང་ཞེན་ན་དེ་འཁོར་བ་ལས་ཡར་ཐར་མེད་བྱེད་ཀྱི་རྒྱུ་དང་རྐྱེན་ཡིན་ན། དང་པོར་སྐྱེས་པའི་དུས་ཚོད་ནས་ཁེ་རུ་སྐྱེས་པ་དང་། ཐ་མར་ཤི་བའི་ཉིན་པར་ཡང་ཁེ་རུ་ཤི་དགོས་པས། དགྲ་དང་འདྲ་བའི་གྲོགས་ངན་ཐམས་ཅད་ཞེན་ཆགས་བྱེད་མ་དགོས་རོ་བཞིན་དུ་སྤངས་དགོས་ཏེ། རོ་ཁྱིམ་ལ་བཞག་ནས་འདུག་རྒྱུ་མེད་པ་ལྟ་བུ་དང་གཅིག་པ་ཡིན། སྤྱིར་ན་ཉེ་དུ་ཟས་ནོར་ཐམས་ཅད་ལ་རྟག་པ་དང་བརྟན་པ་ཞིག་ཡོད་པ་མ་ཡིན། མི་རྟག་འཆི་བའི་གནས་ལུགས་ལ་བསམ་བློ་ཞིག་བཏང་ན་སྒྱུ་མ་དང་རྨི་ལམ་ལྟ་བུ་ལས་མ་འདས་པས། འདུས་བྱས་འཁོར་བའི་ཆོས་ཐམས་ཅད་མཐའ་བཞི་ལས་མ་འདས་པ་ཞིག་ཏེ། སྐྱེས་པའི་ཐ་མ་འཆི། འདུས་པའི་ཐ་མ་འབྲལ། བསགས་པའི་ཐ་མ་འཛད། མཐོ་བའི་ཐ་མ་ལྷུང་བ་ཡིན་པས་གང་ལ་བསམ་ན་རྟག་བརྟན་མེད་པ། གང་ཞིག་བསྒྲུབས་ཀྱང་སྙིང་པོ་མེད་པས་སྙིང་མེད་འཁོར་བའི་ཆོས་ལ་ཞེན་པ་ལོག་ནས་དེར་ཆགས་ཞེན་སྤུ་ཙམ་ཞིག་མེད་པར་ཤོག་གསུངས་པའོ།། ས་ཆ་ཡུལ་རིས་ཁང་ཁྱིམ་རྣམས།། རྨི་ལམ་ཡུལ་གྱི་ཁང་ཁྱིམ་ལྟར།། བདེན་པར་མ་གྲུབ་ཤེས་པར་ཤོག། ཅེས་གསུངས་ཏེ། དེ་བཞིན་དུ་ངའི་ཕ་ས་ཡིན་བསམས་རྒྱུའི་ས་ཆ་དང་། ངའི་ཕ་ཡུལ་དང་རང་སྡེ་ཡིན་བསམས་རྒྱུའི་ཡུལ་རིས། ངའི་ཕ་གཞིས་མ་མཁར་ཡིན་བསམ་རྒྱུའི་ཁང་ཁྱིམ་འདི་ཚོ། རྨི་ལམ་གྱི་ཁང་ཁྱིམ་གཉིད་སད་དུས་མེད་པ་དང་འདྲ་བར་རྟག་བརྟན་མེད་ཅིང་། དོན་ལ་བདེན་པར་མ་གྲུབ་པ་ཡིན་པ་ཤེས་པར་ཤོག་ཅིག་གསུངས་པ་སྟེ། ཁར་སང་ཉིན་ཀར་གྱི་སྣང་བ་དང་མདང་དགོང་རྨི་ལམ་གྱི་སྣང་བ་གཉིས་ཀ་དེ་རིང་མེད་པའི་ཆ་ནས་འདྲ་འདྲ་དང་། འཁྲུལ་བ་ཡིན་པའི་ངོས་ནས་འདྲ་འདྲ་ཡིན། དེ་རིང་གི་སྣང་བ་དང་དོ་དགོང་གི་རྨི་ལམ་གཉིས་སང་ཉིན་མེད་པའི་ཆ་ནས་ཀྱང་འདྲ་འདྲ་དང་། འཁྲུལ་བ་ཡིན་པའི་ངོས་ནས་ཀྱང་གཅིག་པ་ཡིན་པ་དེས་ན་ས་ཆ་ཡུལ་རིས་ཁང་ཁྱིམ་དང་ནོར་རྫས་རྣམས་ལ་ཆགས་ཞེན་བྱེད་མི་ཉན་པ་ཡིན། ས་ཆ་ལ་ཆགས་ན་ས་ཆ་དེའི་འབུ་སྲིན་ཡན་ཆད་ལ་སྐྱེ་རྒྱུ་དང་། ཁང་ཁྱིམ་ལ་ཆགས་ན་མཁའ་ལ་རྒྱུ་བའི་ཡི་དྭགས་ཀྱི་སྐྱེ་བ་བླངས་ནས་དེ་ལ་བདག་བཟུང་བྱེད་པ་དེ་འདྲའི་སྐྱེ་བ་ལེན་སྲིད་པ་སྟེ། གནའ་ཞིག་ལ་མ་རྒན་སེར་སྣ་ཅན་ཞིག་གསོན་ཚེ་ནོར་རྫས་དང་ཁྱིམ་ལ་འཛིན་ཆགས་ཆེ་སྟབས། ཤི་དུས་ཁྱིམ་དེའི་ཁྱི་མོ་ཞིག་ལ་སྐྱེས་ཏེ། སྔོན་གྱི་བག་ཆགས་སད་པས་ཉིན་མཚན་ཐམས་ཅད་ལ་ཁྱིམ་རྐུན་ཡོང་དོགས་བྱས་ཏེ་བསྐོར་ནས་སྲུང་བསྡད་རབས་སོགས་གསུངས་པ་ཡིན། ང་ཚོའི་སྒོ་ཁྱི་སྲོང་མོ་འདི་ཚོ་ཡང་ཕལ་ཆེར་ཁྱིམ་དེའི་ཕ་མ་སེར་སྣ་ཅན་རྣམས་ཀྱི་སྐྱེ་བ་ཡིན་པར་གསུངས་ཡོད་པ་ཡིན། མདོར་ན་གང་སྣང་སྣང་བ་ཐམས་ཅད་གཏི་མུག་མ་རིག་པའི་གཉིད་ཆེན་པོས་ནོན་པའི་རྨི་ལམ་གྱི་སྣང་བ་ལྟ་བུའི་འཁྲུལ་བ་ཡིན་པས་ན། མེད་པ་གསལ་སྣང་གི་དངོས་པོ་ཐམས་ཅད་ཤེས་རབ་ཀྱིས་བརྟགས་ཏེ་མཐའ་བྲལ་ཆགས་ཞེན་གྱི་ཡུལ་མེད་པའི་གནད་ཤེས་སུ་འཇུག་པ་ནི་གལ་ཆེའོ། །འཁོར་བའི་འཁྲུལ་སྣང་ལ་བདེན་པར་ཞེན་པ་དེ་ཅི་འདྲ་ཞིག་རེད་ཟེར་ན། དཔེར་ན་རི་མོ་མཁན་ལྷ་བཟོ་མཁས་པ་ཞིག་གིས་རང་ཉིད་ཀྱིས་གནོད་སྦྱིན་འཇིགས་སུ་རུང་བ་སྐྲག་ཏུ་འཇུག་བྱེད་ཅིག་བྲིས་ནས། རང་དེ་ལ་སྐྲག་པ་དང་གཅིག་འཚུངས་ཡིན། ཁམས་གསུམ་འཁོར་བའི་སྣང་བ་འདི་བདེན་མེད་སྟོང་ཉིད་ཡིན་པ་ལ་ཡིན་ནོ་སྙམ་པའི་དོན་འགྱུར་གྱི་ཐེ་ཚོམ་ཙམ་ཞིག་སྐྱེས་པས་ཀྱང་། སློབ་དཔོན་ཨཱརྱ་དེ་བས། བསོད་ནམས་ཆུང་ངུས་ཆོས་འདི་ལ། །ཐེ་ཚོམ་ཙམ་ཡང་ཟ་མི་འགྱུར། །གལ་ཏེ་ཐེ་ཚོམ་ཟོས་གྱུར་ན། །སྲིད་པའི་རྩ་བ་ཧྲུལ་པོར་བྱེད། །ཅེས་གསུངས་པ་ཡིན། དེས་ན་ད་ལྟ་ནས་ཆགས་ཞེན་སྤོང་ཨེ་ཐུབ་བལྟས་ནས་སྤོང་ཐུབ་པ་ཞིག་བྱེད་དགོས་པ་དང་། ད་ལྟ་རང་གིས་རང་ལ་བལྟས་ན་ཆགས་ཞེན་མི་ཆེ་རྒྱུ་མེད་ཀྱང་། འཆི་ཁར་ངོ་མ་ང་མི་ཆགས་སོ་སྙམ་ན་ཡང་དེ་དུས་དོན་ཐོག་ལ་ཨེ་གནས་ཅི་ཤེས། ལར་ཉིན་དཀར་གྱི་རྣམ་ཤེས་བས་རྨི་ལམ་གྱི་ཤེས་པ་གསལ་ལ། བར་དོའི་རྣམ་ཤེས་དེ་བས་ཀྱང་གསལ་བ་སྟེ། ཤེས་པ་དགུ་འགྱུར་གྱིས་གསལ་བ་ཡིན་པས། ཡུད་ཙམ་དྲན་མ་ཐག་ཏུ་ལུས་ངན་ལེན་པའི་ཉེན་ཁ་ཡོད་པས། དེས་ན་འཇིག་རྟེན་འདི་སྣང་གི་དངོས་པོ་ཐམས་ཅད་ལ་ཆགས་ཞེན་སྤུ་རྩེ་འདྲ་ཞིག་མི་བྱེད་པར། བདེ་བ་ཅན་གྱི་ཞིང་ཁམས་ལ་དེ་རིང་ནས་འགྲོ་དགོས་སྙམ་པའི་འདུན་པ་གཏད་རྒྱུ་དེ་ད་ནས་ཤི་མ་སོང་གི་བར་དུ་མི་བརྗེད་པར་གོམས་སུ་འཇུག་དགོས་པ་ཡིན། བཞི་བ་ཆགས་ཞེན་བཅད་ནས་བདེ་བ་ཅན་གྱི་ཞིང་ཁམས་ལ་སྨོན་ལམ་རྣམ་པར་དག་པས་མཚམས་ཇི་ལྟར་སྦྱོར་ཚུལ། དེ་ལྟར་ཆགས་ཞེན་བཅད་ནས་བདེ་བ་ཅན་གྱི་ཞིང་ཁམས་ལ་སྨོན་ལམ་རྣམ་པར་དག་པས་མཚམས་ཇི་ལྟར་སྦྱོར་ཚུལ་ནི། ཐར་མེད་འཁོར་བའི་རྒྱ་མཚོ་ནས།། ཉེས་ཆེན་བཙོན་ནས་ཐར་བ་བཞིན།། བདེ་བ་ཅན་གྱི་ཞིང་ཁམས་སུ།། ཕྱིར་བལྟས་མེད་པར་འབྲོས་པར་ཤོག། ཅེས་གསུངས་ཏེ། དམན་པ་ལ་དགག་པའི་སྒྲ་སྦྱར་ནས་ཐར་བ་དཀའ་བ་ལ་ཐར་མེད་ཅེས་པའི་ཚིག་སྒྲ་སྦྱར་ནས། ཐར་པའི་དུས་མེད་པ་འཁོར་བ་ཆུ་སྲིན་གནས་ཀྱི་རྒྱ་མཚོ་འཇིགས་སུ་རུང་བ་མཐའ་མི་མངོན་པ་འདི་ནས། དཔེར་ན་རྒྱལ་པོའི་ཁྲིམས་རའི་ནང་གི་སྲོག་ཆད་ལ་བབ་པའི་མི་སང་ཉིན་གསོད་རན་པའི་ཉེས་ཆེན་ཞིག་དེ་རིང་བྲོས་ནས་ཐར་སོང་བ་བཞིན་དུ་ནུབ་ཕྱོགས་བདེ་བ་ཅན་གྱི་ཞིང་ཁམས་ལ། དཔེར་ན་བཙོན་པ་ནག་ཅན་ཁྲིམས་ཞབས་ནས་ཤོར་དུས་རྗེས་ནས་འདེད་ཨེ་ཡོང་གི་དོགས་ནས་ཕྱིར་བལྟས་བྱེད་ཤོར་ན་མ་གཏོགས། བཙོན་ར་འདི་བསྐྱུར་མི་བྲ་སྙམ་པའི་ཕྱིར་བལྟས་ཤིག་མི་བྱེད་པ་ལྟར་དུ་འཁོར་བའི་གནས་ལ་ཆགས་ཞེན་གྱི་དབང་གིས་ཕྱིར་བལྟས་མེད་པར་འཁོར་བའི་གནས་ནས་བྲོས་ཏེ་ཐར་བའི་བཙན་ས་ཟིན་པར་ཤོག་ཅེས་གསུངས་པའི་དོན་ཡིན། ཐོས་གྲོལ་གྱི་གནས་འདྲེན་ནང་ནས་ཀྱང་། ཡུལ་དང་ཁང་ཁྱིམ་ནོར་རྫས་ཀུན། །སྒྱུ་མའི་རྟ་གླང་ཇི་བཞིན་དུ། །མི་རྟག་འགྱུར་བའི་ཆོས་ཅན་ཡིན། །རྟག་པར་གནས་པ་གཅིག་ཀྱང་མེད། །མ་ཆགས་མ་ཞེན་རིགས་ཀྱི་བུ། །ཞེས་དང་། ཕ་མ་བུ་ཚ་ཉེ་དྲུང་ཀུན། །རྨི་ལམ་སྐྱེས་བུ་ཇི་བཞིན་དུ། །མི་རྟག་འབྲལ་བའི་ཆོས་ཅན་ཡིན། །ཁྱོད་ཀྱི་མིང་ནས་འབོད་བྱེད་ཅིང་། །ཕ་མ་ཉེ་དྲུང་ང་ཡིན་ཞེས། །སྨྲེ་སྔགས་འོ་དོད་འབོད་པ་ཀུན། །ཐར་ལམ་བར་ཆད་གེགས་ཡིན་པས། །དེ་ལ་མ་ཉན་རིགས་ཀྱི་བུ། །ཆགས་པར་མ་བྱེད་རིགས་ཀྱི་བུ། །ཞེས་གསུངས་པ་ལྟར་དུ་ཆགས་ཞེན་བྱ་མི་རུང་བ་ཡིན། གནའ་ཞིག་ལ་དེད་དཔོན་བློ་སྟོབས་ཆེན་པོ་ཅན་ཞིག་གིས་ཚོང་གཡོག་ལྔ་བརྒྱ་ཐམ་པ་ཁྲིད་ནས་རྒྱ་མཚོའི་གླིང་དུ་ནོར་བུ་ལེན་དུ་སོང་བ་དང་། རྒྱ་མཚོའི་གླིང་དུ་ཚོང་དཔོན་དེས་ཚོང་གཡོག་ལྔ་བརྒྱ་ཁྲིད་ནས་འགྲོ་དུས་དེར། ལམ་ནས་མི་འདོད་པའི་རླུང་གིས་གྲུ་གཟིངས་ཀྱི་ཁ་ཕྱིན་ཅི་ལོག་ཏུ་སྐོར་ནས་མཐར་སྲིན་མོའི་གླིང་ལ་ཐོན་སོང་བ་དང་། སྲིན་མོའི་གླིང་གི་སྲིན་མོ་ལྔ་བརྒྱས་བསླུ་བྲིད་བྱས་ཏེ་ཚོང་པ་ལྔ་བརྒྱ་དེ་དང་ཁྱིམ་ཐབ་བྱས་ཤིང་། གྲུ་རྗེས་མ་ཡང་ནམ་ཞིག་མི་འདོད་པའི་རླུང་གིས་དེད་ཡོང་བ་དེའི་བར་དུ་ཚོང་པ་སྔོན་མ་རྣམས་བཞག་ནས། ཚོང་པ་རྗེས་མ་གསར་པ་ཞིག་ཐོན་དུས་སྔོན་མ་རྣམས་བཟས་ནས་གསོད་རྒྱུ་དང་། དེར་གྲུ་རྗེས་མ་མི་མཐུན་པའི་རླུང་གིས་དེད་ནས་ཚོང་པ་གསར་པ་ནམ་ཐོན་ན་དེ་དུས་སྔོན་མ་རྣམས་ཟ་རྒྱུ་ཡིན་པ་དེ་དེད་དཔོན་གྱིས་ཤེས་ནས། ཚོང་གཡོག་རྣམས་ལ་ལྐོག་ནས། ང་ཚོ་འདི་ན་ཚུད་རྒྱུ་དེ་ཡག་པོ་ཞིག་རྩ་བ་ནས་རེད་མི་འདུག ནམ་ཞིག་ན་ང་ཚོ་ཟ་རྒྱུ་དང་། འདི་ནི་སྲིན་མོའི་གླིང་ཡིན་པ་འདུག ཚེས་བཅོ་ལྔའི་དགོང་མོར་སྤྲུལ་བའི་རྟ་མཆོག་ཅང་ཤེས་བྷ་ལ་ཧ་ཟེར་བ་ཞིག་ནམ་མཁའ་ནས་འབབ་སྟེ་གསེར་གྱི་བྱེ་མའི་ནང་འགྲེ་ལྡོག་བརྒྱབ་ནས་གཡུའི་ལྗང་བུ་ཁམ་གང་ཟོས་ཏེ། མི་སྐད་ཀྱི་ཐོག་ནས་ཕྱིར་འཛམ་བུའི་གླིང་དུ་འགྲོ་བསམ་མཁན་ཡོད་ན་ངའི་རྒྱབ་ལ་འཐོམས་གསུང་ཡོང་བས། དེ་དུས་སྲིན་མོ་རྣམས་ཀྱི་བསླུ་བྲིད་ལ་ཆགས་ཞེན་བྱེད་མ་ཤོར་རང་ཅག་དེ་དུས་བྲོས་དགོས་ཞེས་ཚང་མ་ལ་ཆ་བརྒྱབ་ཅིང་ལྐོག་ནས་བཤད་པས། ངོ་མ་དེ་ལྟར་དུ་ཚེས་ཆེན་བཅོ་ལྔའི་དགོང་མོར་ནམ་མཁའི་སྤྲིན་གསེབ་ཀྱི་བར་སྣང་ཁམས་ནས་སྤྲུལ་བའི་རྟ་མཆོག་ཅང་ཤེས་བྷ་ལ་ཧས་འཚེར་སྐད་ཅིག་བྱས་ཏེ། ས་ལ་བབས་ནས་སྔར་དེད་དཔོན་གྱིས་བཤད་པ་ནང་བཞིན་གསེར་གྱི་བྱེ་མའི་ནང་འགྲེ་ལྡོག་གསུམ་བྱས། གཡུའི་ལྗང་བུ་དེ་ཁམ་གང་ཟོས་ནས་མི་སྐད་ཀྱི་ཐོག་ནས་འཛམ་བུའི་གླིང་དུ་ཕྱིར་འགྲོ་འདོད་ཡོད་མཁན་ཚང་མ་ངའི་རྒྱབ་ལ་ཞོན། སྲིན་མོའི་གླིང་ལ་མ་ཆགས་ཤིག མ་ཞེན་ཅིག ཆགས་ཤིང་ཕྱིར་བལྟས་ཤོར་ན། ཉམས་ཉེས་པར་འགྱུར་ཏ་རེ་ཞེས་བཤད་དེ། སྤུ་གསིག་ཅིག་བྱས་ནས་ནམ་མཁར་འཕུར་གྲབས་བྱས་དུས་དེད་དཔོན་གྱིས་ཐེ་ཚོམ་མེད་པར་རྟ་མཆོག་གི་སྒའི་སྟེང་དུ་མཆོངས་སོང་བ་དང་། གཞན་དག་ཚང་མ་དེ་བཞིན་དུ་འཐམས་ནས་འགའ་རེའི་རྔ་མ་དང་འགའ་རེ་སྤུ་རྩེ་ལ་འཐམས་ཏེ་ཚོང་ཕྲུག་ལྔ་བརྒྱ་དང་བཅས་པ་རྟ་མཆོག་ཅང་ཤེས་བྷ་ལ་ཧ་ལ་འཐམས་པས། རྟ་མཆོག་གི་རྩལ་གྱིས་ནམ་མཁར་འཕུར་ནས་ནམ་མཁའི་དབྱིངས་སུ་ཐོན་དུས་དེར། སྲིན་མོ་ལྔ་བརྒྱས་མཐོང་ནས་རང་རང་གི་བུ་རྒྱུད་དག་གནམ་ལ་བཀྱགས་ནས་ངུ་འབོད་བྱས་ཏེ་ཁྱེད་ཅག་གིས་ཁོང་ཚོ་ལ་སྙིང་མི་རྗེ་འམ། ཁྱེད་ཅག་གིས་ངེད་ཚོ་མ་བསམས་ཀྱང་བུ་རྒྱུད་འདི་རྣམས་བསྐྱུར་བཏང་བ་ཕོད་དམ། ཞེས་དེ་ལྟ་བུ་སྙིང་ལ་མདའ་བརྒྱབ་པ་འདྲ་འདྲའི་ངུ་འབོད་བྱས་དུས། ཚོང་ཕྲུག་རྣམས་ཀྱིས་ཕྱིར་བལྟས་རེ་ཤོར་བས་ཚང་མ་ལྷུང་ནས་ས་ཐོག་ལ་མ་ཐོན་གོང་ནས་སྲིན་མོ་ལྔ་བརྒྱས་རང་གཟུགས་འཇིགས་སུ་རུང་བའི་འདྲེ་ལུས་མངོན་སུམ་དུ་བསྟན་ཏེ་བར་སྣང་ཁམས་ནས་ཚོང་ཕྲུག་ལྔ་བརྒྱ་བོ་བཟུང་སྟེ། ཤ་དུམ་བུ་ཁྲག་ཐིགས་པ་བྱས་ནས་ཟོས་ཏེ། ཐ་ན་ཁྲག་ཐིགས་ས་ལ་བབ་པ་ཡང་སྦར་མོས་བྲད་ནས་ཟོས་སོང་བ་ལྟར་དུ། འཁོར་བའི་གནས་ལ་ཆགས་ཞེན་བྱས་ན་འདམ་གྱིས་རྫས་འཛིན་པ་དང་། རྙི་ཡིས་བྱ་འཛིན་པ་ལྟར་ཏུ་འཁོར་བའི་གནས་ལ་དབང་མེད་དུ་བཀུག་འགྲོ་བ་ཡིན་ཏེ། གནའ་བླ་མ་ཞིག་ཞིང་ཁམས་ལ་བྱོན་འགྲོ་དུས་དེར། ཁོང་གི་རོལ་མོ་ཡག་པོ་ཞིག་ཡོད་པ་དེ་གྲྭ་པ་རྣམས་ཀྱིས་བརྡུངས་ཡོང་དུས། བླ་རྒན་གྱིས་དེ་གོ་ནས་རོལ་མོ་ལ་ཐུགས་ཆགས་ནས་ཕྱིར་བལྟས་ཤིག་ཤོར་སོང་དུས་འདྲེ་ངན་ཞིག་གི་སྐྱེ་བ་བླངས་སོང་བའི་ལོ་རྒྱུས་ཡོད་པ་ལྟ་བུ་ཡིན་པ་དེས་ན། ལྔ་བ་འཁོར་གནས་ཡུལ་འཁོར་ནོར་རྫས་ཉེ་དུ་ཟས་ནོར་ཐམས་ཅད་ལ་ཆགས་ཞེན་མེད་པར་བདེ་བ་ཅན་ལ་འགྲོ་བའི་ཚུལ་ལ་སྨོན་པ། ཆགས་ཞེན་འཁྲི་བ་ཀུན་བཅད་ནས།། བྱ་རྒོད་རྙི་ལས་ཐར་བ་བཞིན།། ནུབ་ཀྱི་ཕྱོགས་ཀྱི་ནམ་མཁའ་ལ།། འཇིག་རྟེན་ཁམས་ནི་གྲངས་མེད་པ།། སྐད་ཅིག་ཡུད་ལ་བགྲོད་བྱས་ནས།། བདེ་བ་ཅན་དུ་ཕྱིན་པར་ཤོག། ཅེས་གསུངས་ཏེ། འཁོར་བའི་གནས་དོན་ལུས་གསུམ་ལ་ཆགས་ཤིང་ཞེན་པའི་སེམས་ཀྱི་འཁྲི་བ་ཀུན་ཁྲིགས་སེ་བཅད་དེ། དཔེར་ན་བྱ་རྒོད་ཅིག་ཐག་རྙིས་བཟུང་བ་ན། གལ་ཏེ་དེ་ལས་ཐར་བ་ཙམ་གྱིས་སྐད་ཅིག་ཙམ་ཡང་མི་སྡོད་པར་ནམ་འཕང་རིམ་གྱིས་གཅོད་འགྲོ་བ་བཞིན་དུ། རྣམ་ཤེས་ཞེས་པ་འདི་ནི་འདི་གང་ལའང་ཐོགས་པ་མེད་པ། གང་བསམ་ཡུད་ཀྱིས་བགྲོད་པ་ཞིག་ཡིན་པས། བྱ་ངང་པའི་རྒྱལ་པོས་མཁའ་ལམ་གཤགས་པ་དང་ནི། དར་དཀར་པོ་རླུང་གིས་རིང་དུ་བསྐྱོད་པ་ལྟ་བུའི་ཚུལ་གྱིས། འཇིག་རྟེན་གྱི་ཁམས་གྲངས་མེད་པ་སྐད་ཅིག་ཡུད་ཙམ་གྱིས་བགྲོད་པར་བྱས་ཏེ་བདེ་བ་ཅན་དུ་ཕྱིན་པར་ཤོག་ཅེས་པའོ། །ཐོགས་མེད་བར་དོའི་ཡིད་ལུས་དེ་དགེ་བའི་རླུང་གིས་བསྐྱོད། སྨོན་ལམ་གྱིས་མདུན་བསུས། དད་སྤྲོའི་ཤུགས་ཕྱུང་སྟེ་རྩལ་ཆེན་གྱིས་མདའ་འཕངས་པ་བཞིན་དུ་མྱུར་བའི་ཤུགས་ཀྱིས་ཞིང་ཁམས་བདེ་བ་ཅན་དུ་སྐྱེ་རྒྱུའི་དཀའ་ཚེགས་མེད་པར་འགྲོ་བའི་གོ་དོན་ནོ། །དེ་རིང་གི་ཆོས་མཚམས་ནུབ་ཀྱི་ཕྱོགས་ཀྱི་ནམ་མཁའ་ལ། །འཇིག་རྟེན་ཁམས་ནི་གྲངས་མེད་པ། །སྐད་ཅིག་ཡུད་ལ་བགྲོད་བྱས་ནས། །བདེ་བ་ཅན་དུ་ཕྱིན་བར་ཤོག །ཅེས་གསུངས་སའི་མཚམས་འདི་ནས་འཇོག །རང་རེའི་ཞིང་ཁྲིད་འདི་འཚོགས་ནས་དེ་རིང་ཉིན་དྲུག་པ་རེད། སང་ཉིན་ཉིན་བདུན་པ་ལ་ཞིང་ཁྲིད་ཀྱི་དགེ་བ་རྫོགས་བྱང་དུ་བསྔོ་རན་པ་ཡིན། གནང་ཉིན་འཕོ་ལོང་ཞིག་དང་། སྙིང་ཐིག་སྔོན་འགྲོའི་ངག་འདོན་དང་སྨོན་ལམ་རྣམ་ལྔའི་ལུང་ཞིག་འདོན་འཆར་ཡིན། དེའི་ཕྱི་ཉིན་བདེ་ཆེན་ཞིང་དབང་ཞིག་བསྐུར་ཏེ་སྐབས་ཤིག་ལ་བཀྲ་ཤིས་མཐར་རྒྱས་བྱེད་འཆར་ཡིན། ད་རེས་སྡེ་ཡོངས་རྫོགས་ཀྱི་མི་སྣ་རྒན་དར་གཞོན་གསུམ་པོ་བདེ་ཆེན་ཞིང་ཁྲིད་འདི་ན་མཉམ་དུ་འཛོམས་ནས་ཆོས་ཁྲིད་ལ་ཉན། འགའ་རེ་དེའི་རིང་ལ་གཏན་སྡོད་བྱས་ནས་ཐུན་བཞིའི་ཆོས་ཁྲིད་མ་ཆགས་པ་སོགས་མདོར་ན་ཚང་མས་ཚོགས་བསགས་སྒྲིབ་སྦྱོང་ཕྱག་སྐོར་འཆོད་འབུལ། གསོལ་འདེབས་སྨོན་ལམ་བྱེད་བཞིན་ཡོད་པ་རེད། སྐབས་འདིའི་འཆོད་འབུལ་བྱེད་སའི་ཞིང་ས་ཁྱད་པར་ཅན་དཀོན་མཆོག་གི་རྟེན་གསུམ་ལྟ་བུ་ཞིག་ལ་མཚོན་ན། སངས་རྒྱས་དཀོན་མཆོག་གི་རྟེན་དུ་ཇོ་བོའི་སྐུ་བརྙན་འདི་བཞུགས་པ་ཡིན། འདིའི་གཟུངས་བཞུགས་སུ་རྒྱ་བཟའ་ཀོང་ཇོས་ལྷ་སའི་ཇོ་བོ་དང་མཉམ་དུ་གདན་དྲངས་ཡོང་བའི་ཇོ་བོ་བྱིན་རླབས་ཅན་སངས་རྒྱས་ཉིད་ཀྱིས་རབ་གནས་འཐོར་ཡོད་པ། སྔོན་ཆད་ས་ཆ་གཞན་དུ་བཞུགས་པའི་མཚན་སྙན་གྲགས་ཅན། ད་ལྟ་ས་ཆ་འདིའི་བསོད་ནམས་ཀྱི་རྟེན་སྐལ་དུ་ཡོད་པའི་སྐུ་དེ་བཞུགས་ཡོད་པ་རེད། ཕྱིའི་ཇོ་བོ་གཟུངས་འབུལ་ས་འདི་ཉིད་ལྷ་སའི་ཇོ་བོ་ཡིད་བཞིན་ནོར་བུའི་སྐུ་ཚད་ལ་ཚད་བླངས་ནས་རིན་ཆེན་སྣ་མང་བསྲེས་ཏེ་ལི་མ་རུ་བླུགས་པ་ཡིན། འདིའི་ཞལ་ངོའི་དཔེ་འདི་ང་རང་གིས་དངོས་སུ་ལག་དར་ནས་བཟོས་པ་ཡིན། ད་རུང་འཇིགས་བྲལ་བྱང་ཆུབ་རྡོ་རྗེའི་སྐུ་གདུང་དང་། པདྨ་ཐང་གི་ནང་རྟེན་རྩ་ཆེན་ཐུགས་དམ་ཙྪིན་དྷ་མ་ནི། མདོ་མཁྱེན་བརྩེའི་རལ་གྲི། ཐུབ་པ་གྲོང་ཁྱེར་མ། མདོ་མཁྱེན་བརྩེའི་ང་འདྲ་གསུང་འབྱོན་མ། ཀུན་མཁྱེན་འཇིགས་གླིང་གི་ཕྱག་བྲིས། ཀུན་མཁྱེན་འཇིགས་གླིང་གི་སྐུ་ཤ། མདོ་མཁྱེན་བརྩེའི་གཏེར་བྱོན་གཟིའི་སྒྲོམ་བུ། གྲུབ་ཐོབ་རས་དཀར་བའི་དབུ་ཐོད་ལྷ་བཅུ་དྲུག་གི་རང་བྱོན་ཡོད་པ་ལ་སོགས་པའི་རྟེན་རྩ་ཆེན་ཁྱད་འཕགས་འཛམ་གླིང་བསྐོར་བ་བྱས་ཀྱང་མཇལ་དཀོན་པ་མང་པོ་ད་ལྟ་འདི་ན་བཞུགས་པ་དང་། ཆོས་དཀོན་མཆོག་གི་རྟེན་ཡང་། སྡེ་དགེའི་པར་ཁང་ཆོས་མཛོད་ཆེན་པོའི་ནང་དུ་བཞུགས་སོ་ཅོག་གི་གསུང་རབ་ཐམས་ཅད་དང་། གཞན་ཡང་དཔེ་དཀོན་མང་རབ། དཔལ་སྤྲུལ་ཕྱག་དཔེ་ཀུན་བཟང་ཞལ་ལུང་གི་མ་ཕྱི་ལ་སོགས་པ་མཐོང་གྲོལ། ཐོས་གྲོལ། མྱོང་གྲོལ། རེག་གྲོལ་དུ་ཡོད་པ་དེ་རྣམས་དང་། དེའི་སྟེང་དུ་བདེ་སྨོན་གྱི་ཞིང་ཁྲིད་འཆད་ཉན་བྱེད་བཞིན་པ་འདི་དང་། དགེ་འདུན་དཀོན་མཆོག་གི་རྟེན་ལ་ཡང་། མཁན་སྤྲུལ་སྡེ་སྣོད་འཛིན་པ་མཁས་བཙུན་ཉིས་ལྡན་འདི་འདྲ་མང་པོ་བཞུགས་པ་དང་མཉམ་དུ་ཆོས་ར་ལྷ་ཁང་གཅིག་གི་ནང་དུ་འཚོགས་ནས་སྨོན་ལམ་མཉམ་དུ་རྒྱག་པ་ནི། དགོན་ཡུལ་བསམ་པ་གཅིག་མཐུན། མྱི་གཅིག་བསམ་པའི་སེམས་འདྲ་འདྲ། གཞོག་གཅིག་སྟ་རེའི་སོ་འདྲ་འདྲ་ཞིག་གི་གཅིག་སེམས་གཅིག་ལ་ཡོད་པའི་སྐྱིད་སྡུག་གཅིག་པ་སྟེ། དེ་ཡང་དམ་ཚིག་ཤེལ་དཀར་གྱི་སྒོ་ང་ལ་གས་སེར་མ་སོང་བ་དང་། འདི་ཕྱི་གསེར་ནག་གི་ཐག་པ་ལ་རྐྱ་འཇུར་མ་སོང་བའི་རྟགས་མཚན་གྱིས་མཉམ་དུ་འཛོམས་པ་དེ་ཇི་ལྟར་ཡིན་པས། ལྷ་ཡུལ་གྱི་དམ་ཚིག་མ་ཉམས་བས་མི་ཡུལ་གྱི་སྣང་བ་མཐུན་ཏེ། ཚེ་འདིར་ཆོས་ར་གཅིག་གི་ནང་དུ་མཉམ་དུ་འཚོགས་ནས་ཆོས་གཅིག་ལ་བརྟེན་པའི་སྨོན་ལམ་མཉམ་དུ་བརྒྱབ་པ་རེད། དེ་ནི་ཚེ་ཕྱི་མ་བདེ་བ་ཅན་གྱི་ཞིང་ཁམས་སུ་ཚོམ་བུ་གཅིག་ཏུ་ཚོགས་པའི་སྨོན་ལམ་འགྲུབ་རྒྱུ་ལ་ཡིད་ཆེས་བྱེད་ཆོག་པ་ཞིག་ཀྱང་ཡིན་སྙམ་པ་ཡིན། དེས་ན་ཚང་མ་ཕྱིར་ཁྱིམ་དུ་སོང་ནས་བདེ་བ་ཅན་དུ་སྐྱེ་བའི་རྒྱུ་བཞིས་གཙོ་བོ་བྱས་པའི་དགེ་སྒྲུབ་སྡིག་སྤོང་གི་ཕྱོགས་ལ་འཆུག་ཉན་པ་མ་ཡིན། བདེ་བ་ཅན་གྱི་ཞིང་ཁམས་ལ་ཞིང་ཁམས་གཞན་དང་མི་འདྲ་བར་སོ་སོའི་སྐྱེ་བོས་བགྲོད་ཐུབ་པ་ནི་སངས་རྒྱས་འོད་དཔག་མེད་ཀྱི་ཐུགས་བསྐྱེད་རེད། དེ་ལ་བསླུ་བ་ཞིག་གང་ན་ཡོད། མེད་ཤག་ཤག་ཡིན་པས་ཐེ་ཚོམ་དགོས་པ་མ་ཡིན་ནོ། །རྫོགས་ཆེན་ཚང་གི་ད་བཞུགས་བླ་སྤྲུལ་བགྲེས་གཞོན་ཐམས་ཅད་ཀྱིས་སྡེ་ཡུལ་བའི་སྐྱིད་སྡུག་ཚེ་འདི་ཕྱིའི་བགྲོད་ལམ་ལ་ཐུགས་ཁུར་གནང་དང་གནང་བཞིན་པ་ཡིན། ཆོས་ཁྲིད་འདི་གྲོལ་བའི་རྗེས་ནས་རྫོགས་ཆེན་ཚང་གི་ད་བཞུགས་བསྟན་སྲིད་ཀྱི་འགན་བཞེས་པ། རིན་པོ་ཆེ་དང་བསྟན་བདག་ཁྲི་བས་གཙོ་མཛད་པའི་ངེད་ཆ་ག་མི་ཉུང་བ་ཞིག་དབུས་ཕྱོགས་ལ་བྱོན་འཆར་རེད། དེའི་ཞར་ལ་རྫོགས་ཆེན་ཚང་སྤྱི་ཁྱབ་ཀྱི་མཚན་གྱི་ཐོག་ནས་ཚོགས་བསགས་ཆེ་ཙམ་ཞིག་མཛད་འཆར་རེད། ད་རེས་ཀྱི་ཚོགས་བསགས་འདི་ལ་ཕྱིའི་སྦྱིན་བདག་སོགས་ཐེ་རུ་མི་འཇུག་པར་སྤྲུལ་སྐུ་རྣམ་པ་རང་གི་ཕྱག་རྫས་ལས་སྒོར་ཁྲི་སོ་བརྒྱ་ཡན་ཆད་དང་ཉིས་བརྒྱ་མན་ཆད་ཅིག་ཕུད་འཆར་ཡིན་འདུག ཁོང་རྣམ་པས་སྡེ་ཡུལ་བ་ལ་སྐབས་འདིའི་བསོད་ནམས་བསགས་པའི་བགོ་སྐལ་ཞིག་ཐེམ་དགོས་འདུག་སྙམ་པའི་ཐུགས་བཞེད་ཀྱང་ཡོད་པར་འདུག དགོན་ཡུལ་བསམ་པ་ཕྱོགས་གཅིག་གིས་ཚོགས་བསགས་བྱས་ན་བཟང་བས་མ་ཚད་བསོད་ནམས་མཉམ་དུ་བསགས་ཤིང་སྨོན་ལམ་མཉམ་དུ་ཐེབ་འགྲོ་བ་ཡིན། དེས་ན་འདི་ལ་མོས་པ་ཡོད་པའི་ཁྱིམ་ཚང་ཐམས་ཅད་ཀྱིས་བཟའ་མགོ་བསྐལ་གྱིས་མི་རེས་སྒོར་མོ་གསུམ་རེ་གསུམ་རེ་སྡུས་ཤོག དེ་བས་ཡན་དུ་མཐོ་ཆོག་པ་མི་འདུག དེ་སྡེ་ཤོག་སོ་སོའི་མགོ་དཔོན་འགན་ཁུར་བས་བསྡུས་ནས་བསྟན་བདག་ཁྲི་བའི་ཕྱག་ཏུ་མི་འགོར་བར་འཕྲོད་པར་གྱིས་ཤོག འདིའི་འགྲོ་གྲོན་ཚང་མ་བླ་མ་གཅིག་གིས་ཕུད་དགོས་ཀྱང་གཏོང་ཕོད་ཡོད་ན་ཡང་དགོན་ཡུལ་སྐྱིད་སྡུག་གཅིག་པའི་མཚོན་རྟགས་དང་བློ་སེམས་བསམ་པ་ཕྱོགས་གཅིག་ཡིན་པའི་མི་བརྗེད་དྲན་རྟེན་ཙམ་ཞིག་བྱས་པ་ཡིན་པས་དེ་ཚང་མས་ཞེ་ལ་འཛིན་རྒྱུ་གྱིས། དོན་དག་གཞན་པ་ཞིག་ལ་རྫོགས་ཆེན་ཚང་གི་གཞི་གྲྭ་མི་ཉུང་བ་ཞིག་གིས་ན་ནིང་སྔོན་འགྲོ་ཀུན་བཟང་བླ་མའི་ཞལ་ལུང་གི་ཁྲིད་གསན་པ་དང་ད་ལོར་རྫོགས་པ་ཆེན་པོའི་དངོས་གཞིའི་ཁྲིད་ཡེ་ཤེས་བླ་མ་གསན་ནས་ལོ་གསུམ་ཟླ་གསུམ་གྱི་མཚམས་ལ་བཞུགས་ཟིན་པ་རེད། དེ་ནི་བཀྲ་ཤིས་པའི་དོན་བཟང་ངོ་མཚར་ཅན་ངོ་མ་ཡིན། ཚེ་ཆོས་གཉིས་ཀ་མཐར་ཕྱིན་པའི་སྨོན་ལམ་རྒྱག་བཞིན་ཡོད། དེ་ལྟ་བུའི་རིགས་དེ་ལ་རྫོགས་ཆེན་ཚང་གི་བཀའ་གྲོས་གོང་མས་ཐུགས་ཐག་ཇི་ལྟར་བཅད་ཡོད་པ་ཡིན་ཞེ་ན། ལོ་གསུམ་ཟླ་གསུམ་ལ་བཞུགས་མཁན་རྣམས་ཀྱིས་གྲྭ་ཁྲལ་མི་དགོས་པར་གནང་བ་ཡོད་པ་ཡིན། དེ་ཡང་འགན་འཛིན་རྣམ་པ་སྒྲུབ་པ་ཉམས་ལེན་ལ་ཐུགས་ཤིན་ཏུ་དགྱེས་པའི་དབང་གིས་དེ་ལྟར་ཐག་བཅད་པ་མ་གཏོགས། འཆམ་རྔ་བརྡུང་ལ་མི་འདང་བའི་འོ་བརྒྱལ་ཆེན་པོ་འབྱུང་བཞིན་ཡོད་དེ། གནའ་རྫོགས་ཆེན་ཚང་མ་ཉམས་དགུང་ལ་ཡོད་དུས་ཀྱི་གྲྭ་དགུ་བརྒྱ་ཐམ་པས་འཚོགས་རྒྱུ་འཆམ་རྒྱུ་ཚང་མ་ད་རྡོག་མ་ཁ་ཤས་ཀྱིས་འགྲུབ་དགོས་པ་ཡིན། འོན་ཀྱང་ཁོང་རྣམ་པ་ནི་གནད་རྒྱུ་མཚན་མཁྱེན་མཁན་ཏག་ཏག་ཡིན་ཕྱིར་མཚམས་ལ་ལོ་གསུམ་ཟླ་གསུམ་ངོ་མས་བཞུགས་པ་དག་ལ་གནང་བ་སྟེར་བ་རེད། དེ་ལ་ཆ་རྐྱེན་ཞིག་དགོས་པ་ནི། ང་ས་ནས་མཚམས་ལ་འདི་ལྟར་ཚད་ལྡན་གྱིས་འདུག་པ་རེད་ཅེས་པའི་ཡི་གེ་ཞིག་བླངས་ནས་དེ་བསྟན་བདག་ཁྲི་བ་ལ་ཕུལ་ནས། བསྟན་བདག་ཁྲི་བས་བཀའ་ཁྲོལ་གྱི་ཡི་གེ་ཞིག་ཕྱིར་གནང་ཡོང་བ་དེ་པདྨའི་ཐང་གི་འགན་འཛིན་པ་ལ་སྤྲད་རྗེས། པདྨའི་ཐང་ནས་མཚམས་ཁང་ངམ་སྒྲུབ་ཕུག་ཅིག་སྤྲད་ནས་དེར་བཞུགས་རྒྱུ་ཡིན་པ་དང་། མཚམས་ལ་བཞུགས་པའི་ས་གནས་ཀྱང་ངེས་པར་དུ་རུ་དམ་ལུང་འདི་ན་ཡིན་དགོས་པའི་ཐུགས་འཆར་དང་གཏན་འབེབས་མཛད་ཡོད་པར་འདུག གཞན་དུ་ཞག་བརྒྱའི་མཚམས་པ་རྣམ་པས་གྲྭ་ཁྲལ་མི་ཆག་པར་དུས་མཆོད་མེད་པའི་སྐབས་དང་བསྟུན་ནས་བཞུགས་དགོས་པའི་ཐུགས་ཐག་ཀྱང་བཅད་འདུག དེ་དག་ནི་ངས་གཅིག་ན་བསྟན་བདག་རྣམ་པའི་ཞལ་ཚབས་བྱས་ནས་ཞར་ལ་ཞུས་པ་ཡིན། གཉིས་ན་ཁྲིད་ཁ་དེ་ངས་ཟུར་ནས་གསན་པ་ཡིན་པས་ང་དང་གཏན་ནས་མ་འབྲེལ་བ་ཞིག་ཀྱང་མིན་ཕྱིར་ཁོང་གྲྭ་བ་རྣམ་པའི་ཕ་མ་ཐམས་ཅད་ཡོད་པའི་གཞི་བྱེས་གོ་རུག་འཛོམས་ས་ནས་སྒར་འདིའི་ཁོར་ཡུག་དང་འབྲེལ་བའི་གནས་ཚུལ་ཅུང་ཙམ་ཞིག་ཞར་ལ་བཤད་པ་ཡིན། གནང་ཉིན་འཕོ་ལུང་གི་རྗེས་ནས་གསུར་ཆེན་ཕུད་རྒྱུ་ཡིན། ཚང་མས་གསུར་རྫས་མང་ལ་ལ་རེ་ཁྱེར་ནས་ཤོག ཡང་དགོས་སྲི་ངན་འཕྲོ་ངན་ཡོད་པ། ཕྱུགས་ནད་གོད་ཁ་ཡོང་འདུག་མཁན། ན་རེས་ཚ་སྐོར་རྒྱུན་མི་ཆད་མཁན། བསེ་རག་འགོངས་པོ་འཁྲི་ནས་འདུག་བསམ་པ། ཁྱད་པར་དུ་རྒྱལ་གདོན་གྱི་གནོད་པས་སྙིང་གཟེར་རོ་སྟོད་ན་མཁན། བྱིས་པ་མི་འཚམས་མཁན། ཤི་གསོན་ལག་སྦྲེལ་གྱི་རིགས་སུ་གྱུར་བའི་གནོད་པ་ཡོད་པ་དག་གིས་གསུར་རྫས་ཁྱེར་ཤོག་དང་། ཞིང་ཁྲིད་འདི་དང་འབྲེལ་བའི་དགེ་འདུན་མང་མས་གསུར་ཆེན་ཕུད་ནས། མཆོད་སྦྱིན་གྱི་དམིགས་པ་མཛད་དུས་བྱིན་རླབས་དང་བདེན་མཐུ་ཡི་སྟོབས་ཀྱིས་རྒྱལ་ཁམས་སྤྱི་དང་བྱེ་བྲག་གི་མི་ཕྱུགས་ནད་རིམས་ཞི་ཞིང་། དུས་མིན་གྱི་འཆི་བ་བཟློག་པ་དང་། ཁྱད་པར་དུ་དེ་རིང་ཁ་རྩང་འདིར་སྔར་མ་གྲགས་པའི་མི་ཕྱུགས་ཀྱི་ནད་རིགས་གསར་བ་ཡོད་པ་དེ་དག་ཀྱང་མི་འབྱུང་བ་དང་། དམེ་སྲི་གསར་བ་མི་ལང་ཞིང་རྙིང་པ་རྒྱུན་ཆད་པ་དང་། གསར་ཤི་ང་ཆག་གི་གློ་བུར་ཡེ་འདྲོག་གི་རིགས་རྣམས་ཟློག་བྱེད་ཀྱི་ཕན་ཐོག་ཆེན་པོ་ཡོད་པ་ཡིན་པས་དེའི་ཉིན་དེར་ལམ་གྱི་བཞི་མདོའི་རྒྱ་གྲམ་ཡོད་ས་དེར་གསུར་ཕུད་རྒྱུ་བྱེད། དེ་ལས་གཞན་དུ་གྱུར་བའི་དོན་དག་ཅིག་ནི། ཞིང་ཁྲིད་འདི་འཚོགས་དང་མི་འཚོགས་ཀྱི་ཐད་ཀྱི་གླེང་བརྗོད་དེ་ཁ་རྩང་གོང་ནས་བཤད་ཟིན་ན་ཡང་། ཡང་བསྐྱར་མ་བཤད་ཐབས་མེད་ཀྱི་གླེང་མགོ་ཞིག་བྱུང་འདུག འདི་འཚོགས་མི་འཚོགས་ནི་གཙོ་བོར་མང་ཚོགས་ཀྱི་ལག་ན་ཡོད། དེ་ཡང་འཚོགས་རྒྱུ་ཨེ་ཡིན་ཞེས་དྲིས་ན་མི་མང་གིས་འོ་ཡིན་གོ་ཞེས་ལག་པ་གནམ་ལ་འགྱོག་རྒྱུ་རེད། འོན་ཀྱང་དེ་ལྟར་བྱས་ནས་ཐག་གཅོད་རྒྱུ་མིན། ཡང་མི་ཁ་ཤས་ཡོང་ནས་འཚོགས་རྒྱུའི་རེ་བ་ཡོད་ཅེས་ཟེར་སྲིད་ན་ཡང་དེ་ལྟར་བྱས་ནས་ཀྱང་འཚོགས་རྒྱུ་མིན། དེ་བས་དངོས་ཡོད་གནས་ཚུལ་ངོ་མ་ལ་བལྟ་རྒྱུ་ཡིན། དེ་ཡང་གཙོ་ཆེ་བ་བྱ་སྤྱོད་ཀྱི་ཐོག་ནས་བལྟ་རྒྱུ་ཡིན། འདི་འཚོགས་ནས་མིའི་སེམས་རྒྱུད་ལ་ཕན་འདི་འདྲ་ཞིག་འདུག་ཟེར་རྒྱུ་ཞིག་དང་། སེམས་ལ་ཕན་ཐོག་ཡོད་ན་དེའི་རྟགས་སུ་ལུས་ངག་གི་བྱ་བ་སྤྱོད་པ་སྔར་དང་མི་འདྲ་བའི་འགྱུར་བ་འདི་འདྲ་ཞིག་བྱུང་འདུག་ཟེར་རྒྱུ་ཞིག་ཡོད་དགོས་པ་ཡིན། དེ་ཡང་དཔེར་ན། རྒྱག་རེས་འཛིངས་རྩོད་ཇེ་ཉུང་ལ་སོང་འདུག་ཟེར་བ་དང་། ནང་བསད་ནང་དམེ་བྱས་མེད་རབས་དང་། སྡིག་ཉོ་སྡིག་ཚོང་ཡང་མི་བྱེད་པའི་ཚུལ་དང་། གསེར་ཐང་ལ་བརྡལ་ཡང་རྐུ་མཁན་མི་འདུག་ཚུལ་དང་། མེད་པོ་ཆད་གསུམ་ལ་རོགས་པ་བྱེད་ཚུལ་དང་། སྡེ་བའི་ལ་རྒྱ་མགོ་རྣ་བཟང་ཞིང་ཆོས་དང་རིག་གནས་ལ་སློབ་སྦྱོང་བྱེད་འདུག་པ་སོགས་ཀྱི་གཏམ་གྲགས་ཡོང་ན་འཚོགས་དགོས་པའི་རྟགས་དོད་ཡོང་བ་ཡིན། དུས་བབས་ཀྱི་ཆོས་ཡིན་པའི་རྟགས་རེད། དེ་ལྟར་མིན་པར་ཆོས་ཀུན་རིག་འདོན་གྱིན་ཞེ་སྡང་ཇེ་ཆེ། རྡོ་ཅོང་ཞི་འཐུང་གིན་ནད་པ་ཇེ་ཐུ་ཡིན་ན། ད་རུང་འཚོག་རན་མེད་པའི་རྟགས་རེད། འོད་དཔག་མེད་ཀྱི་ཐུགས་རྗེ་བྱིན་རླབས་མི་ཆེ་བ་མ་ཡིན་ཡང་། སེམས་ཅན་འདུལ་རན་མེད་པའི་རྟགས་ཡིན་ཕྱིར་གཙོ་ཆེར་འགྲོ་དོན་ཡོད་མེད་ལ་འུ་ཚོས་བལྟ་རྒྱུ་བྱེད། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་བཤད་སྒྲུབ་འཁོར་ལོ་གཉིས་ལྡན་གྱི་སྒོ་ནས་གོང་དུ་འཕེལ་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་རྣམས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་འཁྲུག་རྩོད་ཐམས་ཅད་རྒྱུན་ཆད། བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པའི་ཕྱིར་དང་། བདག་ཅག་རྣམས་ཀྱི་ཚེ་འདིའི་ཕ་མ་གཉིས་དང་། དགྲ་བགེགས་གཉིས་ཀྱི་གཙོས་བྱས་པའི་བཟང་འབྲེལ་ངན་འབྲེལ་ཐོགས་པའི་མཐའ་ཡས་པའི་སེམས་ཅན་ཐམས་ཅད་མཐར་ཐུག་རྣམ་པ་ཐམས་ཅད་མཁྱེན་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕོང་ཐོབ་པ་དང་། དེ་མ་ཐོབ་ཀྱི་བར་དུ་ཡིན་ན་ཡང་མཐོ་རིས་ཡོན་ཏན་བདུན་དང་ལྡན་པའི་ལུས་རྟེན་ཁྱད་པར་ཅན་ཞིག་རྙེད་ནས་ཐེག་པ་ཆེན་པོའི་ཆོས་ལ་ཚུལ་བཞིན་དུ་སྤྱོད་པའི་སྐལ་བ་དང་ལྡན་པའི་ཕྱིར་དུ་རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་གནང་བར་ཞུ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆི་རྦ་རླབས་འཁྲུག་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག། ཉིན་དྲུག་པའི་བཀའ་ཆོས།ནམ་མཁས་གར་ཁྱབ་ཏུ་མ་ཁྱབ་པ་མེད་པའི་མཐའ་ཡས་པའི་སེམས་ཅན། སེམས་ཅན་གྱིས་གར་ཁྱབ་ཏུ་མ་ཁྱབ་པ་མེད་པའི་འཁོར་བ་སྡུག་བསྔལ་ཅན་གྱི་ཕུང་པོ་འདི་ལ་ང་མེད་ལ་ང་དང་། བདག་མེད་ལ་བདག་ཏུ་བཟུང་བས་མ་རིག་འཁྲུལ་བའི་གཞན་དབང་གཉིད་མོ་ཆེའི་རྨི་ལམ་ལྟ་བུ། སད་ཀྱི་ཕ་མཐའ་མི་མངོན་པ་འདིའི་ནང་དུ་འཁྱམས་པའི་འཁོར་བའི་སེམས་ཅན་ཕ་མར་གྱུར་པ་འདི་དག་ཐམས་ཅད་གཏན་བདེ་ཐར་བའི་ལམ་ཆེན་རྫོགས་བྱང་ཡང་དག་པའི་ས་ལ་འགོད་པར་བྱ། དེར་བཀོད་མ་ཐུབ་བར་དུ་ང་རང་ཉིད་ལ་ཅི་འདྲའི་བདེ་བ་དང་ལྡན་རུང་མི་འཚེང་བར་འདུག་སྟེ། དེ་ཡང་དཔེར་ན་ཚེ་འདིའི་དྲིན་ཆེན་གྱི་མ་རྒན་དེ་ཟུར་འདི་ནས་སྐེ་བཅད་ནས་གསོད་བཞིན་ཡོད་ཚེ། བུ་ང་ཟུར་དེ་ནས་བདེ་བདེ་སྐྱིད་སྐྱིད་བྱས་ནས་འདུག་དགོས་ན་སེམས་ཀྱིས་བཟོད་པ་དང་ལུས་ཀྱིས་ཐེག་པར་འདུག་གམ། དེ་དང་གཅིག་མཚུངས་ཡིན་ནོ་སྙམ་ནས། གལ་ཏེ་ངས་མ་རྒན་སེམས་ཅན་ཐམས་ཅད་བློས་བཏང་བར་བྱས་ཚེ། རྒྱལ་བ་སྲས་དང་བཅས་པས་ཅི་ཞིག་དགོངས་པར་འདུག རྒྱལ་སྲས་སློབ་མར་བཅས་པའི་མདུན་ནས་ངོ་ཚ་ཁི། མ་རྒན་སེམས་ཅན་གྱི་སྔུན་ནས་ཡིན་ན་ཁྲེལ་བོར་བ་མིན་ན་ཅི་ཡིན་སྙམ་པའི་སྒོ་ནས། སྙིང་རྗེ་བའི་སེམས་དང་སྨོན་པའི་སེམས་ཙམ་ཞིག་ཡོད་པས་མི་ཚད་པར་དམ་བཅའི་ལྕགས་ཀྱུ་གཉིས་པ་ཞིག་གིས་ཟིན་ཤག་ཤག་བྱས་པའི་ཐོག་དེ་ནས་འཇུག་པ་བྱང་ཆུབ་ཀྱི་སྤྱོད་པ་ལ་འཇུག་པའི་བསམ་པ་ཐང་ལྷོད་མེད་པ་ཞིག་དང་བཅས་ཏེ། ཐེག་པ་ཆེན་པོའི་ཆོས་འཆད་ཉན་སྒོམ་སྒྲུབ་ལ་འཇུག་དགོས་ཚུལ་ནི་ལན་གཅིག་མིན་པར་ནམ་དང་ནམ་དུ་བཤད་པ་ལྟར་ཡིན་ལ། འུ་ཚོས་ཆོས་ཚིག་བཞི་ཞིག་གི་མགོ་མ་བླང་ན་མ་གཏོགས་སྦྱོར་བ་སེམས་བསྐྱེད་དམ་པ། དངོས་གཞི་དམིགས་མེད་དམ་པ། རྗེས་བསྔོ་བ་དམ་པ་ཞེས་འཆད་བཞིན་ཡོད་པས་མ་ཚད་པར། སངས་རྒྱས་ཆོས་ཚོགས་མས་དབུ་བཟུང་སྟེ། འཇམ་དཔལ་དཔའ་བོས་མཇུག་བསྐྱངས་བའི་ཁ་བཏོན་ཆེ་ཚོད་ཆུང་མིན་རེ་ཁ་བྱང་ལ་ཡོད་པ་ཡིན། འོན་ཀྱང་བརྗོད་པ་ནི་ཚིག་གི་སྒོ་ཡིན་པས། གཙོ་ཆེ་བ་དོན་བསམ་པ་ནི་གནད་ཆེ་བ་ཡིན། དོན་བསམ་པའི་ཆེད་དུ་ངག་གིས་བཏོན་པ་ལས། སྒྲ་ཙམ་ཞིག་བསླབ་ན་བྱ་ནེ་ཙོའི་ཁ་ནས་ཀྱང་ཡོང་བ་དང་། བྲག་ཆ་ལྟ་བུའི་སྒྲ་ཞིག་ཀྱང་སྒྲ་སྡུད་འཕྲུལ་ཆས་ཀྱི་ནང་ནས་ཀྱང་འབྱུང་བ་ཡིན་ཡང་། དེས་གོ་ཆེན་པོ་ཞིག་ཆོད་དུ་མེད་པ་དེས་ན་གོང་དུ་སེམས་བསྐྱེད་ཀྱི་སྐབས་སུ་བཤད་པ་ལྟར་དུ་དང་པོར་སེམས་ཅན་ཐམས་ཅད་མར་ཤེས། དེ་ནས་མ་ཡི་དྲིན་དྲན། དེ་ནས་དྲིན་ལན་གསབ་རྒྱུ་དེ་བུ་ངའི་རེས་ལ་བབས་པ་ཡིན་སྙམ་པའི་བསམ་པ་ཞིག་སྐྱེ་དགོས་པ་ཡིན་ཕྱིར། དང་པོར་ཚད་མེད་བཞིས་བློ་སྦྱོང་དགོས་པ་ཡིན། དེ་ལ་གཞུང་གི་བབ་ལྟར་དུ་བྱས་ན་ཚད་མེད་བཞི་དེ་བྱམས་དང་སྙིང་རྗེ་དགའ་བ་བཏང་སྙོམས་བཞིའི་གོ་རིམ་ཡིན་ཡང་། མན་ངག་གི་ལུགས་འདིར་བཏང་སྙོམས་སྔོན་དུ་མ་བསྒོམས་པར་བྱམས་དང་སྙིང་རྗེའི་ཡུལ་དུ་སྙོམས་མི་ནུས་ལ། དེ་ལྟར་ན་བྱམས་སྙིང་རྗེ་དེ་གཉིས་ཕྱོགས་རིས་ཅན་ཞིག་ཏུ་འགྱུར་བར་ཡིན་ཕྱིར། ཐོག་མར་བཏང་སྙོམས་ཀྱིས་མགོ་བརྩམས་ནས་བློ་སྦྱོང་དགོས། དེས་ན་བཏང་སྙོམས་ཚད་མེད་དྲང་སྲོང་གིས་མགྲོན་འགྱེད་པ་ལྟ་བུས་ཕྱོགས་རིས་མེད་པའི་ཐོག་ནས་བྱམས་སོགས་ཚད་མེད་རྣམ་བཞི་དང་། བསྡུ་ན་བྱམས་སྙིང་རྗེ་གཉིས། དེ་ཡང་ཚུར་བསྡུ་ན་སྙིང་རྗེའི་སེམས་འདི་གཅིག་པུ་ལ་ཐུག་ཡོད་པར། ཐེང་མ་ཁ་ཤས་ལ་བཤད་པ་ཡིན། དེ་ཡང་ཁ་སྐད་ཡིག་སྐད་གཞུང་གི་ལུགས་དང་མན་ངག་གི་ལུགས་སོགས་གང་ལྟར་བཤད་ཀྱང་མདོ་དོན་ཚིག་ཏུ་དྲིལ་ན། རང་ཕར་བརྒྱབ་རོགས་ཚུར་ལ་བརྒྱབ་ཀྱི་རང་གཞན་རྟ་ཞོན་ཁལ་ཁུར་སུ་ལ་འདེང་རྒྱབ་ཀྱང་ཨེ་བདེ་ཨེ་སྐྱིད་སྙམ་པ་ཞིག་ལས་མེད་ལ། འོན་ཀྱང་རིང་ས་ནས་བཤད་ན་འཁོར་བ་ཐོག་མེད་དང་། ཐུང་ས་ནས་བཤད་ན་ས་འདི་ཆགས་ནས་མི་ལོ་དུང་ཕྱུར་མང་པོར་སོང་ན་ཡང་། སྔ་འཁྲུལ་འཁྲུལ་བ་དེ་ལ་ཟད་རྒྱུ་ཞིག་དང་། ད་འཁྲུལ་འཁྲུལ་བ་འདི་ལ་འཛད་མཐའ་ཞིག་མེད་པ་དེ་ལ་བསམ་བློ་ཞིག་བཏང་ན། སྤྱན་རས་གཟིགས་ཀྱི་དབུ་ཚལ་བ་སྟོང་དུ་གས་པ་དེ་ལ་ཐུགས་ཁག་ཅི་ཡོད་ཐུགས་རྗེ་རེ་མ་ཆུང་། ཡིན་ནའང་འདི་སངས་རྒྱས་བྱང་སེམས་ཀྱི་ཐུགས་རྗེས་མ་གཟིགས་ནས་མ་དྲངས་བས་ལན་པ་ཞིག་ག་ལ་ཡིན། སེམས་ཅན་རང་རང་གི་མ་དག་ལས་ཀྱི་སྒྲིབ་པ་དེ་མཐུག་ཆེ་སོང་བ་དང་། མི་དགེ་སྡིག་པའི་ལས་ཀ་དེ་བསགས་ཡུན་རིང་བསགས་ཚབས་ཆེ་ཞིང་། བསགས་གྲངས་མང་བའི་དབང་གིས་གདུལ་བྱ་རང་ངོས་ཀྱི་དད་པའི་ཨ་ལོང་སྒོར་སྒོར་ཞིག་མེད་སོང་བ་དེས། འདྲེན་པའི་ཐུགས་རྗེའི་ལྕགས་ཀྱུའི་གུག་ཁ་དེ་ཇི་འདྲའི་རྣོ་རུང་ཐབས་མེད་ལས་མེད་ལ་ཐུག་པའི་རྒྱུ་མཚན་ལས་མ་འདས་པའི་ཚུལ་ལ་དེ་ལྟར་ཞིབ་ཀྱིས་དཔྱད་ན། གོ་བ་ངེས་ཤེས་ཤིག་རྡོ་གོར་མོ་ཡིན་ཡང་ནེམ་ཅུང་ཟད་རེ་ཕོག་ཏུ་ཡོད་པ་ཡིན། འོན་ཀྱང་ཁ་བཤད་ཀྱི་ཐོག་ནས་མ་རྒན་སེམས་ཅན་ཐམས་ཅད་ཀྱི་དོན་དུ་ཚེ་གཅིག་ལུས་གཅིག་འདིའི་ཐོག་ནས་སངས་རྒྱས་སྒྲུབ་དགོས་ཚུལ་དེ་བླ་མས་བསླབས་ནས་སློབ་མ་ལའང་དེ་ལོབ་ནས་དེའི་ཁ་སྟངས་བྱེད་པ་ཡིན་ན་ཡང་། འདི་འདྲའི་མི་ཚེ་ཐུང་ཐུང་། ཐུང་བའི་ཚད་ངོ་མ་དེ་རང་གིས་ཀྱང་མ་ཤེས་པར། རྟག་ཏུ་བྲེལ་བ་ཆེན་པོས་ངང་ནས་ཁ་མི་སོས། ནམ་མི་ལང་། རྒྱུ་མི་སོགས། གཅིག་ཡོད་ན་གཉིས་ཨེ་ཐོབ་དང་། སྟོང་ཡོད་ན་ཁྲི་ཁ་ལ་ཨེ་བུད། ཡོད་པ་ཟད་ཀྱིས་དོགས། མེད་པ་འཚོལ་གྱིས་བྲེལ། ངའི་ཡན་ན་ཁོ་ཤོར་ཐལ། ཁོའི་ཡན་ན་ང་ཇི་ལྟར་འབུད། ད་རུང་བྱིས་པའི་དུས་སུ་བསམ་མེད་ཀྱི་སྡུག གཞོན་ནུའི་དུས་སུ་སློབ་གཉེར་མི་ཤེས་པའི་སྡུག དར་མའི་སྐབས་སུ་མི་ཆོས་ཁྲེལ་འཛིན་གྱིས་སྡུག རྒས་གོམ་མཇུག་གི་དུས་སུ་མི་གྲལ་ནས་བུད་པའི་སྡུག་བསྔལ། ལར་མ་གཞི་སྐྱེ་རྒ་ན་འཆིའི་སྡུག་བསྔལ་སྟེ། དེའི་འདྲའི་སྡུག་བསྔལ་འདི་ཚོ་ཐམས་ཅད་ཀྱི་འོག་ནས་ངེས་འབྱུང་ཞིག་མ་སྐྱེས་ཐབས་མེད། མི་སྐྱེ་ཁ་མེད་ལ་ཐུག་པའི་གནད་ཀ་རྒྱུ་མཚན་རིག་ནས་སེམས་ཐག་གཏིང་ནས་ཆོད། ཉམས་ལེན་གྱི་གནད་རེ་ཁྲོལ་ནས་ཆོས་དང་བླ་མ་ཁྱད་པར་ཅན་ཞིག་ལ་ཐུག་དུས་འཁོར་བ་ལ་ཕྱི་ཕྱག་འཚལ། ཐོད་པ་བོར་ཆོག་མ་ཞིག་བྱེད་ཆོག་ཀྱང་ཆོག་ལ་དགོས་ཀྱང་དགོས་སྙམ་པ་ཞིག་དགོས་པ་ཡིན། ཡང་ལ་ལ་ཞིག་དེ་ལྟ་བུའི་ལས་སྐལ་དང་མ་ལྡན། ཆོས་ཆེན་པོ་མ་ཤེས། ཆུང་ཆུང་གིས་མ་འཚེངས་པར་ཐ་མར་ཆོས་མེད་དུ་ལྷག་ན། གྲལ་འདྲ་འདྲའི་ནང་ནས་ཆོས་སྐལ་ཆད་དེ། ཆུ་ལེན་སར་སོང་ནས་ཟོམ་སྟོང་ཁྱིམ་ལ་ཁུར་ནས་ཡོང་བ་ལྟར་དུ་དལ་འབྱོར་སྟོང་ལོག་ཏུ་སོང་བའི་མི་ཚེའི་ཕམ་ཁ་དེ་ལྟར་ཁུར་བ་ཡང་ཡོད་པ་ཡིན། རྒྱུ་ཡོད་དུས་མེད་དུས་ཀུན་ཏུ་ཡོད་པས། ཕྱུག་མི་རྟག སྤྲང་མི་རྟག ཁྱིམ་བཟའ་ཚང་མགོ་འཛོམས་ནི་དེ་བས་ཀྱང་རྟག་བརྟན་མེད་པས། དགྲ་གཉེན་ཉེ་རིང་ཆགས་སྡང་ནི་བྱིས་པའི་རྩེད་མོ་ལས་མ་འདས། ཤི་མིག་གསོན་ལ་བལྟ་བའི་གནས་སྐབས་ན་གསོན་ད་གོང་གི་མི་རྒྱུ་གཉིས་ཀ་གཅིག་ཀྱང་མེད་པར་མར་གྱི་དཀྱིལ་ནས་སྤུ་བཏོན་པ་བཞིན་དུ་ལས་ཀྱི་རྗེས་སུ་རང་གཅིག་པུར་འགྲོ་དགོས་པ་ཡིན། དེ་ཡང་དང་པོར་ཚུར་ཡོང་དུས་ཀྱང་རྣམ་ཤེས་འཁྱམ་པོ་རེད། ཕར་སོང་ན་ཡང་རྣམ་ཤེས་འཁྱམ་པོ་ལས་ཚད་བྱས་ཚད་ཀྱི་དཀར་ནག་དགེ་སྡིག་གཉིས་དེ་ལུས་གྲིབ་མ་གཉིས་ཀ་ཕྱེ་རྒྱུ་མེད་པ་བཞིན་དུ་འབྲལ་དུ་མེད་པ་ཡིན། ད་རེས་ཐོབ་ཤག་ཤག་འགྲུབ་ཤག་ཤག་གོ་བ་མི་ལོན་རྒྱུ་ཆེར་མེད་པའི་བདེ་བ་ཅན་དུ་སྐྱེ་བའི་རྒྱུ་བཞི་དེ་བསྒྲུབས་པར་བྱས་ནས་སྙིང་རུས་བྱས་ན། བདེ་བ་ཅན་དུ་སྐྱེ་མི་སྐྱེའི་དོགས་པ་མི་དགོས་པ་ཡིན། འོད་དཔག་མེད་ཀྱི་ཞལ་ཐང་ཞིག་མིག་གི་ཐད་ལ་བཤམས་ནས་འཆི་ཁར་འདུན་པ་དེ་ལ་གཏད་ན། བེད་ཆོད་ཤག་ཤག་གི་ཆོས་ཀྱི་བྲོ་ཆས་རྟ་རིན་མ་དེ་ཡིན་པས་ཚང་མས་སྒོ་གསུམ་དགེ་བའི་ལམ་ལ་ཆིག་སྒྲིལ་བྱས་ཏེ། དང་པོ་སེམས་ཅན་ཐམས་ཅད་ཀྱི་དོན་དུ་བསམ་པའི་སེམས་དང་མི་འབྲལ། གཉིས་པ་འདི་ལྟར་སྣང་བའི་ཆོས་ཐམས་ཅད་མེད་སྣང་སྒྱུ་མའི་རང་གཟུགས། སྟོང་རྟེན་འབྱུང་དབྱེར་མེད་པ་སྣང་བཞིན་དུ་སྟོང་ལ། སྟོང་བཞིན་དུ་སྣང་བ་ཟུང་འཇུག་སྤྲོས་བྲལ་ཆེན་པོའི་ལྟ་བ་དང་མ་འབྲལ་བའི་ཐོག་དེ་ནས། ལུས་ཀྱིས་ཕྱག་འཚལ་མཆོད་འབུལ་ལ་སོགས་པ་བྱེད་པའི་སྐབས་སུའང་ངག་གིས་ཀྱང་ཁ་འདོན་བཟླས་བརྗོད་བྱེད་ཞོར་དང་། སེམས་ཀྱིས་ཏིང་འཛིན་གྱི་གསལ་སྣང་ཞེས་པ་ཆེན་པོ་ཞིག་མ་ཤེས་རུང་། ཚིག་རྗེས་དོན་དྲན་གྱི་ཐོག་ནས། གསུམ་པ་དགེ་རྩ་དེ་དག་མར་གྱུར་སེམས་ཅན་ཐམས་ཅད་ཀྱི་དོན་ལ་བྱང་ཆུབ་ཆེན་པོའི་ནང་དུ་ཆུ་ཐིགས་རྒྱ་མཚོའི་ནང་དུ་འདྲེས་པ་ལྟ་བུས་བསྔོ་བ་དེ་མ་བྱས་ན། ལར་དགེ་བའི་རྩ་བ་ཆུ་ཐིགས་ཆུང་ཆུང་ལྟ་བུ་ཞིག་ལས་མེད་པ་དེ་ཉིད་མེ་དང་ཉི་མ་རླུང་དང་སེར་བུས་འོག་ནས་མགྱོགས་པོར་མེད་པར་འགྱུར་བ་བཞིན་དུ་ཉོན་མོངས་ཁོང་ཁྲོ་ལྟ་བུ་གཅིག་གིས་ཀྱང་འཇོམས་པར་འགྱུར་བ་ཡིན། གལ་ཏེ་མི་འཇོམས་པའི་དབང་དུ་བྱས་ཀྱང་དགེ་བ་གཅིག་ལ་འབྲས་བུ་ལན་གཅིག་ཙམ་ལས་མེད་ལ། བསྔོས་ན་བརྒྱ་འགྱུར་སྟོང་འགྱུར་དུ་འཕེལ་བ་ཡིན། མགོ་ནས་ཆོས་ཞུ་བ་བས་དང་པོར་ཞུ་ལུགས་ཤེས་པ་གཙོ་ཆེ་ཚུལ་སྨྲོས་པ་བཞིན་དུ། ཆོས་སྒྲུབ་པ་བས་ཀྱང་དང་པོར་སྒྲུབ་ཚུལ་ཤེས་པ་དེ་གཙོ་ཆེ་བ་ཡིན། དེ་སྔོན་ཉི་མ་ཡན་ཆད་ལ་བོད་མགོ་ནག་ཕྲེང་བཟུང་གི་བདག་པོ། སྐྱེས་ནས་ད་བར་ལ་དགེ་སྡིག་ལས་འབྲས་ཀྱི་རྣམ་བཞག་ཡོད་པའི་འདང་རྒྱག་མཁན་ཞིག་ཡིན་ཁུལ་དུ་ཡོད་ཀྱང་དོན་དངོས་སུ་ཆོས་དང་མཐུན་པའི་ཆོས་ཤིག་འགྲུབ་ཨེ་ཡོད་ནི་རང་བློ་རང་ལ་ལྐོག་ཏུ་མ་གྱུར་པ་ཡིན། མིའི་སྔུན་ནས་མིན་ན་ཡིན་མདོག་དང་མེད་ན་ཡོད་མདོག་སྟོན་ཆོག་ཀྱང་། རང་གི་ངོས་ནས་ལས་དཀར་ནག་གཉིས་ཀར་རྒྱ་མ་བཀྱག་ས་དང་། གཤིན་རྗེའི་སྐྱེས་བུའི་མེ་ལོང་གི་ངོས་སུ་ཤར་ས་ལ་ཐུག་དུས། གསོན་གྲོང་ང་ཁམས་ཀྱི་མ་ཡིན་ཡིན་མདོག་དེ་སྟོན་ས་ལ་མི་འགྲོ་བ་ཡིན། དེས་ན་ཆོས་ད་ཞུས་ཟེར་དུས་མ་ཞུས་ན། ཨེ་ཐོབ་ཟེར་དུས་ཐོབ་རྒྱུ་ཡང་དཀའ་བ་ཡིན། སྤྱིར་ན་འཇིག་རྟེན་མྱི་ཡི་བསོད་ནམས་ཆུང་བའི་དབང་གིས་མིའི་བསམ་ཐོག་ལ་རྟ་ཡིས་བརྫི་བ་ལ་ཡང་དཀའ་ཁག་ཆེན་པོ་ཡོད། བླ་མ་ཡོད་དུས་དད་པ་མེད། །དད་པ་ཡོད་དུས་བླ་མ་མེད། །གཉིས་ཀ་འཛོམས་པའི་དུས་མ་བྱུང་། །ཞེས་གསུངས་པ་དང་འདྲ་བ་ཡིན། གནའ་སྔ་མོ་རྫ་མཚམས་པ་འཇིགས་མེད་རྒྱལ་བའི་མྱུ་གུ། དཔལ་དགེ་རྡོ་རྗེ་འཆང་། རྡོ་གྲུབ་ཆེན་ཀུན་བཟང་གཞན་ཕན། མུ་ར་པདྨ་བདེ་ཆེན་བཟང་པོ། དེ་ཚོ་འདིའི་ཁམས་དང་མགོ་ལོག་གི་ས་ཆ་སྟོད་སྨད་བར་གསུམ་ལ་བྱོན་ནས། བདེ་ཆེན་ཞིང་སྒྲུབ་བཙུགས། འཚེ་བ་ཆོས་སུ་སྨྲ་བའི་དམར་མཆོད་ཀྱི་རྒྱུན་ཐམས་ཅད་བཅད། ཆང་ཨ་རག དུ་བ་སྣ་ཐ། རྔོན་རི་དྭགས། རྐྱང་ཤ་ཁྱི། བཤས་ཉོ་བཤས་ཚོང་ལ་སོགས་པ་སྤང་དུ་བཅུག་ནས་ཅི་འདྲའི་དགེ་བསྐུལ་ཞིག་མཛད་པར་འདུག ད་རུང་ས་ཆ་འདི་ལ་མཚོན་ནའང་དེ་རྣམ་པས་མ་ཚད་པར་བླ་མ་ཞེ་རྫོགས་གཉིས་ཀའི་ཡབ་སྲས་བརྒྱུད་པ་དང་བཅས་པས་ཅི་འདྲའི་ཆོས་ཤིག་གསུངས་མེད། འོན་ཀྱང་དེ་དུས་ཀྱི་སློབ་མས་སྐབས་དེའི་མི་གྲངས་ཀྱི་བརྒྱ་ཆ་ཇི་ཙམ་བཟུང་ཡོད་པར་དཔྱད་ན། སྤྱིར་བསྐལ་བ་དེང་སང་བས་བཟང་དུས་ཡིན་པས་ལེགས་པར་ལྟ་བུ་མངོན་ནའང་། ཕྱོགས་གཅིག་ནས་བསམ་བློ་བཏང་ན་དེའི་དུས་སུ་འཇམ་མགོན་བླ་མ་མི་ཕམ་ཚང་ཞེས་པ་ས་གསུམ་ན་འགྲན་ཟླ་དང་བྲལ་བའི་མཁས་པ་ཆེན་པོ། རྗེ་བཙུན་འཇམ་དཔལ་དབྱངས་མིའི་གཟུགས་སུ་བྱོན་པ་དེ་ཚོའི་འཁོར་ལའང་དགེ་འདུན་ཆོས་ཞུ་བ་ཁྲི་ཚོ་མ་དགོས་སྟོང་ཚོ། སྟོང་ཚོ་མ་དགོས་བརྒྱ་ཚོའི་ཡན་དུ་བུད་མྱོང་ཡོད་ས་འདུག་གམ་སྙམ་པ་ལྟ་བུ་ཞིག་རེད། དེ་རིང་ཁ་སང་ཡིན་ནའང་དེ་དང་མཚུངས་པར་ང་འདྲ་འདྲའི་རྟ་ཐོག་གི་བླ་མ་ཞིག་གིས་དེ་རིང་ཁྲོམ་དབང་ཞིག་བསྐུར་རྒྱུ་རེད་ཟེར་དུས་སྒོ་བསྒྲོགས་ནས་ཐོན་འོང་བ་ཡིན། བསྐུར་བྱའི་དབང་དེ་ཅི་ཞིག་ཡིན་ཡང་ཡིན་བུམ་རིལ་དེ་མགོ་ལ་བཞག་ཚར་དུས་གར་འགྲོ་བ་ལས་དབང་གི་དམ་ཚིག་སོགས་ཅི་ཡིན་ཉན་དགོས་སྣང་ཙམ་ཡང་མི་འཆར་བ་རེད། དེ་རིང་དགེ་བའི་བཤེས་གཉེན་ཞིག་གིས་ཁྲིད་ཅིག་གསུངས་པ་རེད་ཟེར་ན། དེ་ནི་ས་མཐའི་ཨ་ཅོ་བྱེས་བན་སྐོར་ཞིག་དང་དགོན་མཐའི་རྒན་འཁོགས་ལས་མེད་ཁ་ཤས་ཀྱི་ཆོས་སྐལ་ལོས་ཡིན་སྙམ་པའི་སྣང་བ་དེ་ཤར་བ་རེད། གལ་སྲིད་ཆོས་གྲལ་དུ་བསྡད་ནའང་གཉིད་ལོག་བྱེད་པ་ཡིན། དེ་ཡང་ཁག་མེད་སྟེ་དེ་འདྲའི་གོ་བརྡ་སྤྲད་མཁན་ཡོད་མ་མྱོང་བས་རེད། དེ་དག་ནི་དངོས་ཡོད་གནས་ཚུལ་ཡིན། ས་ཆ་གཞན་ལ་མཚོན་ནའང་བོད་ཀྱི་ས་ཆ་མང་ཆེ་བ་དེ་འདྲ་ཞིག་ལ་ཆགས་ཡོད་པ་ཡིན། དེ་རིང་གླུ་བ་ཞིག་གིས་གླུ་ཞིག་ལེན་པ་དང་། རྒྱ་རྒན་སྤྲེལ་ཁྲིད་ཅིག་གིས་སྤྲེའུ་ཞིག་འཁྲབས་པར་བྱེད་ན་ཚང་མ་དེར་འཛོམས་ནས་བསྐོར་ནས། བླ་མ་ཞིག་གིས་ཆོས་གསུངས་ནའང་དེ་འདྲའི་དད་གུས་བྱེད་མཁན་དཀོན་པ་ཡིན། དེ་ནི་ཡང་ན་ཆོས་ས་ཆོས་ཡུལ་བླ་ས་བླ་ཡུལ། ཚང་མ་བླ་མར་འགྱུར་བའི་དུས་སུ་བླ་རྩིས་ཆུང་བར་སོང་བའམ། ཡང་ན་ཆོས་དྲེད་ཆོས་ཀྱིས་མ་ཐུལ། མར་སྐོག་སྣུམ་གྱིས་མ་ཐུལ་ཏེ་ཆོས་སྒར་ཆེན་པོའི་ཉེ་འདབས་ནས་ཆོས་སྐལ་སྒེར་ལ་ཆད་དེ། རྒྱ་མཚོའི་འགྲམ་ནས་ཁ་སྐོམ་སྟེ་འཆི་བ་ཡང་སྲིད་པ་ཡིན་ཕྱིར། ཐོག་མར་ཆོས་ཞུས་ན་ཅི་ཞིག་གིས་ཕན་ཐོགས་ཡོད་པ་དེ་ཤེས་དགོས་པ་ཡིན། དེ་ཡང་ཆོས་ཞུས་ན་དགེ་སྡིག་སྤང་བླང་གི་འདོར་ལེན་དང་། ལས་རྒྱུ་འབྲས་བསླུ་མེད་ཀྱི་རྣམ་བཞག་རྣམས་ཤེས་ནས་ཐོས་བསམ་སྒོམ་པའི་ཤེས་རབ་འཕེལ་དེ་ཡོང་བ་ཡིན། ཆོས་འཇིག་རྟེན་གཉིས་ཀའི་ཐད་ནས་འགྲུབ་མི་འགྲུབ་གཉིས་སུ་བྱུང་བ་དེ་བྱ་བ་གང་སྒྲུབ་དེའི་སྒྲུབ་སྟངས་ཤེས་མི་ཤེས་ལ་རག་ལས་པ་ཡིན། དཔེར་ན་རང་རེ་འབྲོག་པའི་ས་ཆ་འདི་ལྟ་བུ་ཞིག་ལ་མཚོན་ན། ཕྱུགས་སྒོ་ཟོག་ཚགས་འཚོ་སྐྱོང་ཡག་པོ་ཞིག་མ་ཤེས་ནས་ཁྱི་ཟས་སྤྱང་བསྐུར་དུ་སོང་ནས་ཐ་མར་སྒོ་ནག་ལ་འགྲོ་བ་ཡིན། དཔེ་དེ་བཞིན་དུ་ཆོས་སྒྲུབ་ན་བསྒྲུབས་ལུགས་ཤེས་དགོས་པ་ཡིན། དེ་ཤེས་པར་བྱེད་པ་ལ་དང་པོར་ཆོས་ཉན་ནས་ཐོས་པ་བསྟེན་དགོས། མ་ཐོས་ན་གོ་རྒྱུ་མེད་པ་ཡིན། ཐོས་པ་རྐྱང་པས་མི་ཆོག་པར་ཐོས་དོན་སེམས་དགོས་དེ་ལ་བསམ་པ་ཟེར་བ་ཡིན། ཚིག་གོ་བ་དང་། དོན་ཤེས་པ་ཙམ་གྱིས་ཀྱང་ཕན་ཆ་ཚང་ཞིག་ཐོགས་པ་མིན་པས། ཐོས་དོན་བསམས་པ་དང་། བསམ་དོན་བསྒོམས་ནས་རྒྱུད་ལ་སྦྱར་ཏེ་ལག་ལེན་ལ་བཏབས་དུས་གཟོད་བེད་ཆོད་པ་ཞིག་འབྱུང་བ་ཡིན། དེས་ན་ཐོས་བསམ་སྒོམ་པའི་ཤེས་རབ་སྔར་མེད་པ་ཞིག་ཡོད་པར་བྱེད་དགོས་ན་ཆོས་ཞུ་བ་དང་ཉན་པ་དེ་གནད་ཆེན་གལ་ཆེན་ཡིན་པ་ཤེས་དགོས་པ་ཡིན། མི་ཞིག་གིས་མནའ་ཟ་ཁྲེལ་འགམ་ཞིག་དང་ལྷན་དུ་སྒོར་རྡོག་ཁ་ཤས་ཤིག་ཁེ་ཟ་རྒྱུ་རག་པ་བས་ཆེ་དང་ཆེ་ཡི་ཡོང་སྒོ་ཚེ་འདི་ཕྱི་གཉིས་ཀ་དང་། ཤི་གསོན་འབྲེལ་བ་ཐོབ་ཚད་ལ་ཕན་ཐོགས་པ་ཞིག་སྔུན་འདི་ན་ཡོད་བཞིན་དུ་ལམ་ཁའི་རྡོ་བཞིན་དུ་མིག་གིས་ལྟ་ཙམ་ཡང་མ་བྱས་ན་རྨོངས་པའི་ནང་གི་རྨོངས་ཆེན་ཡིན་པས། ཕྱིན་ཆད་རང་གི་ཉམས་ལ་ཕན་པའི་བྱ་བ་ཞིག་ཇི་ལྟར་བསྒྲུབ་པའི་སྔ་འདེང་ཞིག་སྨྲ་ཤེས་དོན་གོའི་མི་ལ་ཡོད་དགོས་པ་ཡིན་པས་དེ་ལུགས་ཀྱི་འདེང་རེ་རྒྱག་རྒྱུ་གལ་ཆེན་ཡིན་པའི་འཕྲོས་དོན་བཤད་པ་དང་བཅས་ཏེ། ད་ལོ་གནའ་སྔ་རབས་ཀྱི་རྫོགས་ཆེན་ཀློང་ཆེན་སྙིང་ཐིག་གི་ཆོས་བརྒྱུད་འདིའི་དམ་པ་གོང་མ་ཚོའི་ཕྱག་བཞེས་ལ་གཞིར་བཟུང་སྟེ། མཁས་གྲུབ་རཱ་ག་ཨ་སྱས་མཛད་པའི་དུས་རྒྱུན་གྱི་ང་ཚོའི་ཁ་སྲོལ་ལྟར་ན་ཆགས་མེད་བདེ་སྨོན་ཞེས་སུ་གྲགས་པ་འདིའི་ཐོག་ནས་ཞིང་ཁྲིད་བཤད་པའི་སྐབས་ནས་བདེ་བ་ཅན་དུ་སྐྱེ་བའི་རྒྱུ་བཞི་ལས། དང་པོ་རྟེན་ཚོགས་ཞིང་གསལ་འདེབས་པ། གཉིས་པ་རྒྱུ་ཚོགས་བསགས་སྒྲིབ་སྦྱོང་། གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་རྣམས་གོང་དུ་སོང་བས་མ་ཚད། རྒྱུ་བཞི་བ་རྐྱེན་སྨོན་ལམ་དག་པས་མཚམས་སྦྱར་བའི་སྐབས་ནས་ཀྱང་འགའ་ཞིག་སོང་སྟེ་དེ་རིང་ནི། གསུམ་པ་བདེ་བ་ཅན་ལ་སོང་ནས་ཡོན་ཏན་ཐོབ་ཚུལ་ལ་སྨོན་པ། དེ་ལ་བདེ་བ་ཅན་གྱི་ཡོན་ཏན་ཐོབ་ཚུལ་ལ་བསམས་ནས་སྨོན་པ། བདེ་བ་ཅན་དུ་གནས་བཞིན་ཞིང་ཁམས་གཞན་གྱི་སངས་རྒྱས་དང་བྱང་ཆུབ་སེམས་དཔའ་མང་པོ་མཇལ་ནས་ཆོས་ཐོས་པར་སྨོན་པ། རང་ཉིད་དག་པའི་ཞིང་ཁམས་གཞན་དུ་སོང་ནས་ཆོས་ཐོས་པར་སྨོན་པ། མ་དག་པའི་ཞིང་གི་གདུལ་བྱ་འདུལ་ནུས་པ་ལ་སྨོན་པ་དང་བཞི་ལས། དང་པོ་བདེ་བ་ཅན་གྱི་ཡོན་ཏན་ཐོབ་ཚུལ་ལ་བསམས་ནས་སྨོན་པ། དེ་རུ་སངས་རྒྱས་འོད་དཔག་མེད།། མངོན་སུམ་བཞུགས་པའི་ཞལ་མཐོང་ནས།། སྒྲིབ་པ་ཐམས་ཅད་དག་པར་ཤོག། ཅེས་གསུངས་ཏེ། དེ་ཡང་བདེ་བ་ཅན་གྱི་ཞིང་ཁམས་དེར་སྐྱེས་པ་ན། ཞིང་ཁམས་དེ་རུ་སངས་རྒྱས་འོད་དཔག་མེད་ཀྱི་སྐུ་མཚན་དཔེའི་རང་བཞིན་ཅན་མངོན་སུམ་བཞུགས་པའི་ཞལ་མཇལ་ནས། སོ་སྐྱེ་ཕལ་བ་ཞིག་ཡིན་ཡང་དེའི་རྒྱུད་ཀྱི་ངན་སོང་དུ་སྐྱེ་བའི་རྒྱུ་ཐམས་ཅད་བཅོམ་ནས་མེད་པར་གྱུར་བས་མ་ཚད། མཐོང་བས་སྤང་བར་བྱ་བའི་སྒྲིབ་པ་ཐམས་ཅད་ཀྱང་བཅོམ་ཞིང་མཐོང་ལམ་གྱི་ཡེ་ཤེས་རྒྱུད་ལ་སྐྱེས་ན་ས་དང་པོ་ཐོབ་བྱེད་ཀྱི་གེགས་དང་སྒྲིབ་པ་ཐམས་ཅད་དག་པར་ཤོག་ཅེས་པ་སྟེ། དེ་ཡང་སྐབས་འདིར་བདེ་བ་ཅན་དུ་མཐོང་ལམ་མ་ཐོབ་པའི་སོ་སྐྱེ་ཕལ་བ་སྐྱེ་ཐུབ་པ་དང་། སངས་རྒྱས་འོད་དཔག་མེད་པའི་ཞལ་མཇལ་བ་དང་མཐོང་ལམ་ཐོབ་པ་དུས་མཉམ་པ་ཡིན་པ་བསྟན་པ་སྟེ། དཔེར་ན་བུ་མོ་མུ་ཏིག་འཁྲི་ཤིང་གིས་སངས་རྒྱས་ཀྱི་སྐུ་གཟུགས་བྲིས་སྐུ་ཞིག་མཇལ་བ་ཙམ་གྱིས་མཐོང་སྤང་བཅོམ་པ་ལྟ་བུ་དང་། འོད་མདོ་ལས། དེ་དག་འགུམ་པའི་དུས་ཀྱི་ཚེ་སངས་རྒྱས་འཁོར་བཅས་མཐོང་སྟེ། དེ་དག་གི་ལས་ཀྱི་སྒྲིབ་པ་མ་ལུས་པ་ལྡོག་པར་གྱུར་ཅིག་ཅེས་འོད་དཔག་མེད་ཀྱིས་སྨོན་ལམ་བཏབ་པ་དེ་གྲུབ་པ་ཡིན་པས། ད་ལྟ་སོ་སོའི་སྐྱེ་བོའི་ལུས་རྟེན་འདིའི་ཐོག་ནས་བདེ་བ་ཅན་དུ་སྐྱེ་བའི་རྒྱུ་བཞི་བསྒྲུབས་ན་ཚེ་འདིའི་ཐོག་ནས་ས་ཐོབ་མི་དགོས་པར། ཤི་བའི་གནས་སྐབས་ན་ཚོགས་ལམ་ཆོས་རྒྱུན་ཐོབ་པ་དང་འདྲ་བར་སངས་རྒྱས་ཀྱི་ཞལ་མཇལ་ཞིང་གསུང་ཐོས་པའི་སྐབས་སུ་མཐོང་ལམ་སྐྱེ་བ་ཡིན། གཞན་ཡང་མདོ་ལས། གང་ཟག་ལས་སྒྲིབ་མཐུག་པོ་ཅན་འགའ་རེ། སྨོན་ལམ་དང་དགེ་རྩའི་སྟོབས་ཀྱིས་བདེ་བ་ཅན་ལ་སྐྱེས་ནས་མགོན་པོ་འོད་དཔག་མེད་ཀྱིས་ཆོས་སྟོན་པ་ཐོས་ལ། དེའི་དོན་མི་ཤེས་པ་དང་། སྐུ་དངོས་སུ་མི་མཇལ་བ་དང་། འོད་ལུས་ལ་མི་ཕོག་པ་དང་། དེ་ནས་སྒྲིབ་པ་སྦྱངས་ནས་གཟོད་ཞལ་མཇལ་བ་དང་། ཆོས་ཤེས་ནས་ལུང་བསྟན་ཐོབ་པ་ཡང་གསུངས་པ་དང་། པདྨའི་སྦུབས་ནས་སྐབས་ཤིག་གི་རིང་ལ་སངས་རྒྱས་ཀྱི་ཞལ་མི་མཐོང་བ་ལ་སོགས་པའི་རྒྱུ་མཚན་ལ་བརྟེན་ནས་སོ་སྐྱེ་བདེ་བ་ཅན་ལ་སྐྱེ་བ་དེའང་རང་ཤུགས་ཀྱིས་གྲུབ་པའོ།། སྐྱེ་གནས་བཞི་ཡི་མཆོག་གྱུར་པ།། མེ་ཏོག་པདྨའིསྙིང་པོ་ལ།། བརྫུས་ཏེ་སྐྱེ་བ་ལེན་པར་ཤོག། ཅེས་གསུངས་ཏེ། སྐྱེ་གནས་བཞི་དེ་གང་ཡིན་ན་བརྫུས་སྐྱེས། མངལ་སྐྱེས། སྒོང་སྐྱེས། དྲོད་གཤེར་ལས་སྐྱེས་པ་སྟེ་སྐྱེ་བ་རྣམ་པ་བཞི་ཡིན་ལ། དེ་འདྲའི་སྐྱེ་གནས་བཞི་པོ་དེ་ལས་མཆོག་ཏུ་གྱུར་པ་ནི་རང་ཉིད་ལ་གནོད་པ་མེད་པ་དང་། ཕ་མ་ལ་གནོད་པ་མེད་པས་བརྫུས་སྐྱེས་ཡིན་ལ། དེ་ལས་ཀྱང་པདྨ་ལས་སྐྱེས་པ་ནི་མཆོག་ཏུ་གྱུར་པ་ཡིན་པས། རིན་པོ་ཆེ་སྣ་ཚོགས་ལས་གྲུབ་པའི་མེ་ཏོག་པདྨའི་སྙིང་པོ་དེར་ཡིད་ཀྱིས་འདུན་པ་གཏད་པ་ཙམ་ཞིག་གིས་བརྫུས་ཏེ་སྐྱེ་བ་ལེན་པར་ཤོག་ཅིག་གསུངས་པའོ། །དེས་ན་འདུན་པ་གཏད་རྒྱུ་འདི་གལ་ཆེ་བ་ནི་འདི་ནས་ཀྱང་འབྱུང་བ་ཡིན། སྐད་ཅིག་ཉིད་ལ་ལུས་རྫོགས་ནས།། མཚན་དཔེ་ལྡན་པའི་ལུས་ཐོབ་ཤོག། ཅེས་གསུངས་ཏེ། བརྫུས་སྐྱེས་དེ་ནི་མངལ་སྐྱེས་ལྟར་དུ་ཡུན་རིང་པོར་འཚར་ལོངས་འབྱུང་བའི་རྒྱུ་ལ་མི་ལྟོས་པ་ཡིན་པས་སྐྱེས་ནས་རིམ་གྱིས་ནར་སོན་དགོས་པ་འགོར་བ་དེ་ལྟ་བུ་མ་ཡིན་པ་དེ་མ་ཐག་ཏུ་ལུས་སྟོབས་ཡོངས་སུ་རྫོགས་ནས་སྐད་ཅིག་དེ་ཉིད་ལ་ལུས་ཀྱི་ཁོ་ལག་ཐམས་ཅད་ཡོངས་སུ་རྫོགས་ནས་མཚན་དང་དཔེ་བྱད་ལྡན་པའི་ལུས་མཆོག་ཏུ་གྱུར་པ་ཐོབ་པར་ཤོག་ཅིག མི་སྐྱེ་དོགས་པའི་ཐེ་ཚོམ་གྱིས།། ལོ་གྲངས་ལྔ་བརྒྱའི་བར་དག་ཏུ།། ནང་དེར་བདེ་སྐྱིད་ལོངས་སྤྱོད་ལྡན།། སངས་རྒྱས་གསུང་ནི་ཐོས་ན་ཡང་།། མེ་ཏོག་ཁ་ནི་མི་བྱེ་བས།། སངས་རྒྱས་ཞལ་མཇལ་འཕྱི་བའི་སྐྱོན།། དེ་འདྲ་བདག་ལ་མི་འབྱུང་ཤོག། ཅེས་གསུངས་ཏེ། བློ་དམན་རྟོག་དཔྱོད་ལ་ཞེན་པའི་གང་ཟག་ངོ་མ་སྐྱེའམ་མི་སྐྱེ་སྙམ་པའི་གཉིས་འཛིན་གྱི་རྟོག་པའམ་ཐེ་ཚོམ་ཅན་གྱིས། རྒྱུ་བཞི་སྔོན་ནས་བསྒྲུབས་ཡོད་པའི་སྟབས་ཀྱིས་ཞིང་ཁམས་དེར་སྐྱེས་ཀྱང་། ཐེ་ཚོམ་གྱི་སྒྲིབ་པ་དེའི་དབང་གིས་ལོ་གྲངས་ལྔ་རྒྱའི་བར་དག་ཏུ་མེ་ཏོག་པདྨ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་དང་སྐྱེད་མོས་ཚལ་དུ་སྣང་བའི་ནང་དེར་བདེ་སྐྱིད་ལོངས་སྤྱོད་སོགས་རྒྱ་ཆེན་པོ་དང་ལྡན་ཞིང་། ཕྱི་རོལ་ནས་སངས་རྒྱས་ཀྱིས་ཆོས་འཁོར་བསྐོར་བའི་གསུང་ཐོས་ན་ཡང་། དེ་འདྲའི་ལོ་ཡུན་རིང་ཞིག་ལ་མེ་ཏོག་ཁ་མི་བྱེ་བར་སངས་རྒྱས་ཀྱི་ཞལ་མཇལ་འཕྱི་བའི་སྟབས་ཀྱིས། ད་ལྟ་ནས་ཐེ་ཚོམ་མེད་པའི་ཡིད་ཆེས་ཀྱི་དད་པ་བརྟན་པོས་བདེ་བ་ཅན་ལ་སྐྱེ་བའི་རྒྱུ་བཞི་སྒྲུབ་ན་སྐྱོན་དེ་འདྲ་བ་བདག་གཞན་རྣམས་ལ་འབྱུང་མི་སྲིད་པར་སྐྱེས་མ་ཐག་ཏུ་མེ་ཏོག་ཁ་བྱེ་བ་ལ་སོགས་པ་དེ་འདྲའི་ཡོན་ཏན་དང་ལྡན་ཞིང་། ཐེ་ཚོམ་གྱི་དབང་གིས་བྱུང་བའི་སྐྱོན་དེ་འདྲ་མི་འབྱུང་བར་ཤོག་ཅིག སྐྱེས་མ་ཐག་ཏུ་མེ་ཏོག་ཕྱེ།། འོད་དཔག་མེད་པའི་ཞལ་མཐོང་ཤོག། ཅེས་གསུངས་ཏེ། བདེ་བ་ཅན་གྱི་ཞིང་ཁམས་སུ་བརྫུས་ཏེ་སྐྱེས་མ་ཐག་ཏུ་མེ་ཏོག་པདྨའི་ཁ་རང་ཤུགས་ཀྱིས་བྱེ་སྟེ་སངས་རྒྱས་འོད་དཔག་མེད་ཀྱི་མཚན་དཔེའི་ཞལ་མཐོང་བར་ཤོག་ཅིག་ཅེས་པའོ། །སྤྱིར་སངས་རྒྱས་ཀྱི་བཀའ་ལ་དྲང་དོན་དང་ངེས་དོན་ཅན་གྱི་ཁྱད་པར་མང་ཡང་། འདི་ལྟ་བུའི་སྐབས་སུ་བསམ་བློ་མང་པོ་ཞིག་འཁོར་ནས་དྲང་དོན་དང་ངེས་དོན་གང་ཡིན་ན། སྒྲ་ཐད་དྲང་གི་གོ་བ་ལེན་ཆོག་པ་ཨེ་ཡིན་ན་སྙམ་པའི་རྟོག་དཔྱོད་བྱེད་པ་ནི། རྟོག་ཅིང་དཔྱོད་པའི་རྟོག་གེ་བ། །དེ་ལ་སྦྱོར་བའི་དངོས་གྲུབ་མེད། །ཅེས་གསུངས་པ་ལས་མ་འདས་པ་ཡིན་ཕྱིར་འདི་དག་ལ་རྟོག་གེ་བྱ་མི་རུང་ངོ། །དངོས་སྟོབས་ཀྱི་ཚད་མས་རྟོགས་མི་ནུས་པའི་གཞལ་བྱ་ཤིན་ཏུ་ལྐོག་གྱུར་ནི་དྲང་སྲོང་ཆེན་པོའི་ལུང་ཁོ་ན་ལ་མི་བརྟེན་པའི་ཐབས་མེད་པ་སྟེ། རྒྱལ་སྲས་ཞི་བ་ལྷས་ཀྱང་། ཐུབ་པའི་བཀའ་ནི་མི་བསླུ་བས། །འདི་ཡི་ཡོན་ཏན་ཕྱིས་སྣང་འགྱུར། །ཞེས་གསུངས་པ་ལྟར་ཡིན་པས་བདེ་བ་ཅན་དུ་སྐྱེ་མི་སྐྱེ་སོགས་རང་གིས་མ་ཤེས་ནའང་སངས་རྒྱས་ཀྱིས་མི་མཁྱེན་པ་མི་སྲིད་པ་ནི། ནམ་མཁའ་འདི་དངོས་པོ་གཟུགས་ཅན་པར་འགྱུར་མི་སྲིད་པ་ལྟ་བུ་ཡིན་ཡང་དེ་བས་ཀྱང་ཐུབ་བའི་བཀའ་མི་བསླུ་བ་ཡིན་ཕྱིར། ཀུན་དགའ་བོས་སངས་རྒྱས་བཅོམ་ལྡན་འདས་ལ་གསོལ་བ། བདེ་བ་ཅན་དུ་སྐྱེ་བའི་རྒྱུ་བཞི་བསྒྲུབས་ན་སེམས་ཅན་རྣམས་བདེ་བ་ཅན་དུ་ངེས་པར་དུ་སྐྱེས་ངེས་སམ། བཀའ་སྩལ་བ། སྐྱེ་ངེས་སོ། །ཀུན་དགའ་བོས། བདག་ནི་དེ་ལ་དོགས་པའམ་ཡིད་གཉིས་སམ་ཐེ་ཚོམ་མ་མཆིས་ཏེ། བདག་ནི་མ་འོངས་པའི་སེམས་ཅན་རྣམས་ཀྱི་དོགས་པ་དང་ཡིད་གཉིས་དང་ཐེ་ཚོམ་བསལ་བའི་སླད་དུ་དེ་བཞིན་གཤེགས་པ་ལ་དོན་འདི་ཡོངས་སུ་ཞུའོ། །ཞེས་གསུངས་པ་ཡིན་པས་ཡིད་ཆེས་བྱའོ།། བསོད་ནམས་སྟོབས་དང་རྫུ་འཕྲུལ་གྱིས།། ལག་པའི་མཐིལ་ནས་མཆོད་པའི་སྤྲིན།། བསམ་མི་ཁྱབ་པར་སྤྲོས་བྱས་ནས།། སངས་རྒྱས་འཁོར་བཅས་མཆོད་པར་ཤོག། ཅེས་གསུངས་ཏེ། ནུབ་ཕྱོགས་བདེ་བ་ཅན་དུ་སྐྱེས་ནས་མགོན་པོ་འོད་དཔག་མེད་ཀྱི་ཞལ་མཇལ་མ་ཐག་ཏུ་སྔར་རང་གིས་རྒྱུ་བཞི་བསྒྲུབས་པའི་བསོད་ནམས་ཀྱི་སྟོབས་དང་། སངས་རྒྱས་ཀྱི་སྨོན་ལམ་དང་ཐུགས་བསྐྱེད་མཛད་པའི་མཐུ་དེའི་དབང་གིས་རྫུ་འཕྲུལ་རང་འགྲུབ་ཀྱི་སྒོ་ནས། རང་གི་ལག་པའི་མཐིལ་ལས་ཡིད་དུ་འོང་བའི་མཆོད་རྫས་ཀྱི་དངོས་པོའི་སྤྲིན་གྱི་ཚོགས་བསམ་གྱིས་མི་ཁྱབ་པར་སྤྲུལ་ཞིང་སྤྲོ་བར་བྱས་ཏེ། སངས་རྒྱས་འཁོར་དང་བཅས་པར་མཆོད་ནུས་པར་ཤོག་ཅིག་ཅེས་པའོ། །དེས་ན་ད་ལྟའི་ཞིང་ཁྲིད་ཀྱི་སྐབས་འདི་ཚོའི་དུས་སུ་ཡང་སེམས་འཁུམས་ནས་ལག་པ་སྡོམ་མི་འདུག་པར་མཆོད་འབུལ་ཅི་འགྲུབ་བྱས་ན། རྒྱུ་མ་འཁྲུལ་བའི་འབྲས་བུ་ཐོབ་པ་ལ་ཁྱད་པར་ཆེན་པོ་ཡོད་པ་ཡིན། དེ་ཚེ་དེ་བཞིན་གཤེགས་པ་དེས།། ཕྱག་གཡས་བརྐྱངས་ནས་མགོ་ལ་བཞག། བྱང་ཆུབ་ལུང་བསྟན་ཐོབ་པར་ཤོག། ཟབ་དང་རྒྱ་ཆེའི་ཆོས་ཐོས་ནས།། རང་རྒྱུད་སྨིན་ཅིང་གྲོལ་བར་ཤོག། ཅེས་གསུངས་ཏེ། སྔར་བདེ་བ་ཅན་ལ་སྐྱེ་བའི་རྒྱུ་བཞི་བསྒྲུབས་ནས་བདེ་བ་ཅན་སྐྱེས་ཚེ་རྫུ་འཕྲུལ་དང་བསོད་ནམས་ཀྱི་མཐུ་ཡིས་བདེ་བ་ཅན་གྱི་ཞིང་ཁམས་འདི་དང་ཞིང་ཁམས་གཞན་ནས་བསོད་ནམས་རྒྱ་ཆེན་པོ་བསགས་ཏེ་ས་ལམ་རིམ་གྱིས་བགྲོད་པའི་དུས་ནམ་ཞིག་རང་ཉིད་ས་བརྒྱད་པ་ཐོབ་པ་དེའི་ཚེ་ན། དེ་བཞིན་གཤེགས་པ་སངས་རྒྱས་འོད་དཔག་མེད་ཀྱི་བསོད་ནམས་བརྒྱ་ལས་གྲུབ་པའི་ཕྱག་གཡས་པ་བརྐྱངས་ནས་རང་གི་མགོ་ལ་བཞག་སྟེ། རིགས་ཀྱི་བུ་ཁྱོད་མ་འོངས་པར་ཡུལ་དུས་འདི་དང་འདི་འདྲ་བར་སངས་རྒྱས་འདི་ཞེས་བྱ་བར་འཚང་རྒྱ་བར་འགྱུར་ཞེས་བྱང་ཆུབ་མཆོག་གི་ལུང་བསྟན་ཆེན་པོ་ཐོབ་སྟེ་དབུགས་དབྱུང་བར་ཤོག་ཅིག ཟབ་པ་སྟོང་པ་ཉིད་དང་རྒྱ་ཆེ་བ་ཕྱིན་དྲུག་གི་སྤྱོད་པའི་སྐོར་སོགས་ཆོས་ཀྱི་རྣམ་གྲངས་མཐའ་ཡས་པ་ཐོས་ནས་དེས་རང་རྒྱུད་མ་སྨིན་པ་སྨིན་པ་དང་། སྨིན་པ་གྲོལ་བར་ཤོག་ཅིག་ཅེས་པའོ། །ད་ལྟའི་ལུས་རྟེན་འདིའི་ཐོག་ནས་རང་རྒྱུད་གྱོང་པོ་མ་སྨིན་པ་འདི་སྨིན་ཐབས་དང་། ལོག་ལྟ་ཐེ་ཚོམ་སོགས་ཀྱིས་བསྒྲིབས་པ་ལས་སེམས་རྒྱུད་འདི་གྲོལ་ཐབས་གྱིས་དང་། དེ་དུས་ཆོས་ཐོས་པ་དང་རང་རྒྱུད་གྲོལ་བ་དུས་མཉམ་དུ་ཡོང་བའི་ཕན་ཐོགས་ཡོད་པ་ཡིན། སྤྱན་རས་གཟིགས་དང་མཐུ་ཆེན་ཐོབ།། རྒྱལ་སྲས་ཐུ་བོ་རྣམ་གཉིས་ཀྱིས།། བྱིན་གྱིས་བརླབས་ཤིང་རྗེས་བཟུང་ཤོག། ཅེས་གསུངས་ཏེ། རྒྱལ་ཀུན་སྙིང་རྗེའི་རང་གཟུགས་འཕགས་མཆོག་སྤྱན་རས་གཟིགས་དབང་ཕྱུག་དང་། མཐུ་སྟོབས་ནུས་པའི་མངའ་བདག་མཐུ་ཆེན་ཐོབ་བམ་ཕྱག་ན་རྡོ་རྗེ་སྟེ། རྒྱལ་བའི་སྲས་མཆོག་སྲས་ཀྱི་ནང་ནས་ཐུ་བོའམ་གཙོ་བོ་རྣམ་པ་གཉིས་ཀྱིས་ཀྱང་བདག་གི་རྒྱུད། གསང་གསུམ་མཁྱེན་བརྩེ་ནུས་པའི་བྱིན་གྱིས་བརླབས་ཤིང་ཐུགས་བརྩེ་བ་ཆེན་པོས་རྗེས་སུ་བཟུང་བར་ཤོག་ཅིག གཉིས་པ་བདེ་བ་ཅན་དུ་གནས་བཞིན་ཞིང་ཁམས་གཞན་གྱི་སངས་རྒྱས་དང་བྱང་ཆུབ་སེམས་དཔའ་མང་པོ་མཇལ་ནས་ཆོས་ཐོས་པར་སྨོན་པ། ཞིང་ཁམས་བདེ་བ་ཅན་དུ་གནས་བཞིན་ཞིང་ཁམས་གཞན་གྱི་སངས་རྒྱས་དང་བྱང་ཆུབ་སེམས་དཔའ་མང་པོ་མཇལ་ནས་ཆོས་ཐོས་པར་སྨོན་ལམ་བཏབ་པ་ནི། ཉིན་རེ་བཞིན་དུ་ཕྱོགས་བཅུ་ཡི།། སངས་རྒྱས་བྱང་སེམས་དཔག་མེད་པ།། འོད་དཔག་མེད་པར་མཆོད་པ་དང་།། ཞིང་དེར་བལྟ་ཕྱིར་འབྱོན་པའི་ཚེ།། དེ་དག་ཀུན་ལ་བསྙེན་བཀུར་ཞིང་།། ཆོས་ཀྱི་བདུད་རྩི་ཐོབ་པར་ཤོག། ཅེས་གསུངས་ཏེ། སྤྱིར་ན་སངས་རྒྱས་ཀྱི་ཞིང་ཁམས་བདེ་བ་ཅན་དེར་གཟའ་སྐར་ཉི་ཟླའི་འགྲོ་ལུགས་ཀྱི་ཆ་ནས་བཏགས་པའི་ཉིན་མཚན་གྱི་དབྱེ་བ་མེད་ནའང་། རང་རེ་མིའི་འགྲོ་བའི་སྣང་ཕྱོགས་དང་མཐུན་པར་བྱས་ཏེ་ཉིན་མཚན་ལོ་ཟླ་བསྐལ་བའི་ཚོད་ཀྱི་ཕྱོགས་ཙམ་མཚོན་ཐབས་ཀྱིས་གསུངས་པའི་ཉིན་རེ་བཞིན་དུ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་རྣམས་སངས་རྒྱས་འོད་དཔག་མེད་པ་མཆོད་པའི་ཆེད་དུ་དང་། ནུབ་ཕྱོགས་བདེ་བ་ཅན་གྱི་ཞིང་ཁམས་དེར་ཞིང་ཁམས་སྦྱོང་ཞིང་བལྟ་བའི་ཕྱིར་དུ། མདོ་ལས། འདྲེན་པ་འོད་དཔག་མེད་ཀྱི་སངས་རྒྱས་ལ། །ཕྱག་བྱའི་ཕྱིར་ན་ཕྱོགས་བཅུའི་སངས་རྒྱས་ཞིང་། །མཐའ་ཡས་གང་གཱའི་ཀླུང་གི་བྱེ་སྙེད་ནས། །རྫོགས་པའི་བྱང་ཆུབ་སེམས་དཔའ་དེ་དག་ལྷགས། །ཞེས་གསུངས་པ་ལྟར་དུ་ཞིང་ཁམས་དེར་འབྱོན་པའི་ཚེ་ན། བདག་གིས་ཀྱང་སངས་རྒྱས་དང་བྱང་ཆུབ་སེམས་དཔའ་དེ་དག་ཀུན་ལ་མཆོད་པའི་སྤྲིན་གྱིས་མཆོད་ནས་བསྙེན་པ་དང་བཀུར་སྟི་བྱས་ཤིང་། ཆོས་ཀྱི་སྒོ་བསམ་གྱིས་མི་ཁྱབ་པ་འཁོར་བའི་མྱ་ངན་དང་གདུང་བ་ཞི་བར་བྱེད་པའི་བདུད་རྩི་ལྟ་བུ་ཐོབ་པས་མ་ཚད། ཆོས་དེ་དག་ལ་ངོམས་པ་མེད་པར་ལོངས་སྤྱོད་པར་ཤོག་ཅིག དག་པའི་ཞིང་ཁམས་བདེ་བ་ཅན་དུ་ཚུར་ཕེབས་པའི་སངས་རྒྱས་འཁོར་དང་བཅས་པ་མཆོད་ཅིང་བསྙེན་བཀུར་བྱས་པས་མི་ཚད་པར། གསུམ་པ་རང་ཉིད་དག་པའི་ཞིང་ཁམས་གཞན་དུ་སོང་ནས་ཆོས་ཐོས་པར་སྨོན་པ། རྫུ་འཕྲུལ་ཐོགས་པ་མེད་པ་ཡིས།། མངོན་དགའི་ཞིང་དང་དཔལ་ལྡན་ཞིང་།། ལས་རབ་རྫོགས་དང་སྟུག་པོ་བཀོད།། སྔ་དྲོ་དེ་དག་རྣམས་སུ་འགྲོ།། མི་བསྐྱོད་རིན་འབྱུང་དོན་ཡོད་གྲུབ།། རྣམ་སྣང་ལ་སོགས་སངས་རྒྱས་ལ།། དབང་དང་བྱིན་རླབས་སྡོམ་པ་ཞུ།། མཆོད་པ་དུ་མས་མཆོད་བྱས་ནས།། དགོང་མོ་བདེ་བ་ཅན་ཉིད་དུ།། དཀའ་ཚེགས་མེད་པར་སླེབ་པར་ཤོག། ཅེས་གསུངས་ཏེ། ས་དང་པོ་རབ་ཏུ་དགའ་བ་ཐོབ་པའི་བྱང་ཆུབ་སེམས་དཔའ་ལ་བརྒྱ་ཕྲག་བཅུ་ཡི་རྫུ་འཕྲུལ་ལ་དབང་འབྱོར་ཞིང་ས་ལམ་གྱི་ཡོན་ཏན་བསམ་གྱིས་མི་ཁྱབ་པ་མངའ་བ་ཡིན་པས། རྣམ་གྲོལ་དབུགས་ཆེན་འབྱིན་པའི་ཞིང་ཁམས་ལྔ་སྟེ། ཤར་ཕྱོགས་མངོན་པར་དགའ་བའི་ཞིང་ཁམས། ལྷོ་ཕྱོགས་དཔལ་དང་ལྡན་པའི་ཞིང་ཁམས། བྱང་ཕྱོགས་ལས་རབ་རྫོགས་པའི་ཞིང་ཁམས། དབུས་ཕྱོགས་སྟུག་པོ་བཀོད་པའི་ཞིང་ཁམས་ཏེ། རིགས་ལྔའི་ཞིང་ཁམས་དེ་དག་ཏུ་འདྲ་སྔ་དྲོའི་དུས་ཀྱི་ཚེ་འགྲོ་ཞིང་། ཞིང་ཁམས་དེ་དག་ན་བཞུགས་པའི་སངས་རྒྱས་མི་བསྐྱོད་པའམ་རྡོ་རྗེ་སེམས་དཔའ། རིན་ཆེན་འབྱུང་ལྡན། དོན་ཡོད་གྲུབ་པ། རྣམ་པར་སྣང་མཛད་ལ་སོགས་པ་རིགས་ལྔའི་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་མདུན་ནས་གསང་སྔགས་རྡོ་རྗེ་ཐེག་པའི་དབང་དང་བྱིན་རླབས་སྡོམ་པ་ལ་སོགས་བའི་མདོ་དང་སྔགས་ཀྱི་ཆོས་མང་པོ་ཞུས་ཏེ། གཏང་རག་མཎྜལ་གྱི་ཚུལ་དུ་མཆོད་སྤྲིན་རྒྱ་མཚོའི་མཆོད་པ་བླ་ན་མེད་པ་ཕུལ་བས་མཉེས་པར་བྱས་ཏེ་དགོང་མོའི་དུས་ཙམ་ན་རང་གནས་བདེ་བ་ཅན་དེ་ཉིད་དུ་ཡང་དཀའ་ཚེགས་དང་ངལ་དུབ་ཅི་ཡང་མེད་པར་སླེབ་པར་ཤོག་ཅིག་ཅེས་པའོ།། པོ་ཊ་ལ་དང་ལྕང་ལོ་ཅན།། རྔ་ཡབ་གླིང་དང་ཨོ་རྒྱན་ཡུལ།། སྤྲུལ་སྐུའི་ཞིང་ཁམས་བྱེ་བ་བརྒྱ།། སྤྱན་རས་གཟིགས་དང་སྒྲོལ་མ་དང་།། ཕྱག་རྡོར་པད་འབྱུང་བྱེ་བ་བརྒྱ།། མཇལ་ཞིང་མཆོད་པ་རྒྱ་མཚོས་མཆོད།། དབང་དང་གདམས་ངག་ཟབ་མོ་ཞུ།། མྱུར་དུ་རང་གནས་བདེ་ཆེན་ཞིང་།། ཐོགས་པ་མེད་པར་ཕྱིན་པར་ཤོག། ཅེས་གསུངས་པ་སྟེ། འོད་མདོ་ལས། རྫུ་འཕྲུལ་སྟོབས་ཀྱིས་ཞིང་མང་སོང་ནས་ནི། །སངས་རྒྱས་བྱེ་བ་མང་ལ་མཆོད་བྱས་ཏེ། །བདེ་བར་གཤེགས་ལ་མཆོད་པ་བྱས་ནས་ཀྱང་། །དྲོ་ཁར་བདེ་བ་ཅན་དུ་སླར་ཡང་འོང་། །ཞེས་གསུངས་པ་ལྟར། ལྷོ་ཕྱོགས་ཀྱི་རི་བོ་པོ་ཊ་ལ་དང་། བྱང་ཤར་གྱི་ལྕང་ལོ་ཅན་དང་། ལྷོ་ནུབ་རྔ་ཡབ་གླིང་གི་ཟངས་མདོག་དཔལ་གྱི་རི་བོ་དང་། ནུབ་ཕྱོགས་ཨོ་རྒྱན་མཁའ་འགྲོའི་ཡུལ་ལ་སོགས་པ་འགྲོ་འདུལ་སྤྲུལ་སྐུའི་ཞིང་ཁམས་བྱེ་བ་ཕྲག་བརྒྱ་ལ་བཞུགས་པའི་སྤྱན་རས་གཟིགས་དང་རྗེ་བཙུན་སྒྲོལ་མ། ཕྱག་ན་རྡོ་རྗེ་དང་སློབ་དཔོན་པདྨ་འབྱུང་གནས་ལ་སོགས་པ་སྤྲུལ་བའི་སྐུ་བྱེ་བ་ཕྲག་བརྒྱ་རྣམས་ཀྱི་ཞལ་མཇལ་ཞིང་ཕྱི་ནང་གསང་བའི་མཆོད་པ་རྒྱ་མཚོས་མཆོད་ནས། དེ་དག་ལས་ཐུན་མོང་མཚན་ཉིད་ཐེག་པའི་ཆོས་དང་། ཐུན་མོང་མ་ཡིན་པའི་གསང་སྔགས་ཀྱི་དབང་དང་གདམས་ངག་ཟབ་མོ་ཞུས་ནས། དབང་ཆོས་གདམས་ངག་དེ་དག་ཞུས་ཚར་དུས་སླར་ཡང་ཡིད་ཀྱིས་དྲན་པ་ཙམ་གྱིས་མྱུར་བ་ཉིད་དུ་རང་ཉིད་ཀྱི་གནས་བདེ་བ་ཅན་གྱི་ཞིང་ཁམས་དེར། སངས་རྒྱས་ཀྱི་མཐུ་དང་རང་གི་རྫུ་འཕྲུལ་གྱི་ཤུགས་ལ་བརྟེན་ནས་ཐོགས་པ་མེད་པར་འགྲོ་བར་ཤོག་ཅིག་ཅེས་པ་སྟེ། ཞིང་ཁམས་གཞན་ཉུལ་ཆོས་ལས་ཐོབ་པ་ཡིས། །བྱེ་བ་ཕྲག་བརྒྱའི་ཏིང་འཛིན་སྒོ་འབྱེད་པ། །ཞེས་དག་པའི་ཞིང་ཁམས་གཞན་ཉུལ་ནས་ཆོས་ཞུས་ཏེ་འབྲས་བུ་ཐོབ་པའི་སྨོན་ལམ་གྱི་དོན་ཏོ།། བཞི་བ་མ་དག་པའི་ཞིང་གི་གདུལ་བྱ་འདུལ་ནུས་པ་ལ་སྨོན་པ། ཤུལ་གྱི་ཉེ་དུ་གྲྭ་སློབ་སོགས།། ལྷ་ཡི་མིག་གིས་གསལ་བར་མཐོང་།། སྲུང་སྐྱོབ་བྱིན་གྱིས་རློབ་བྱེད་ཅིང་།། འཆི་དུས་ཞིང་དེར་ཁྲིད་པར་ཤོག། ཅེས་གསུངས་ཏེ། ཞིང་ཁམས་བདེ་བ་ཅན་དུ་སྐྱེས་པ་དེའི་ཚེ། ད་ལྟ་འཇིག་རྟེན་འདི་ནས་དམ་ཚིག་གི་སེལ་དང་ཉམས་ཆག་མ་སོང་བ་ཤུལ་ན་ཡོད་པའི་ཉེ་དུ་ལ་སོགས་པ་གཉེན་རིགས་རུས་ཀྱིས་འབྲེལ་བ་དང་། གྲྭ་བ་དང་སློབ་མ་ལ་སོགས་པ་ཆོས་དང་དམ་ཚིག་གིས་འབྲེལ་བ་ཅན་ལ་སོགས་ལྷའི་མིག་རྣམ་པར་དག་པས་གསལ་བར་མཐོང་ནས། དེ་རྣམས་མི་མཐུན་པའི་ཉེས་པའི་ཚོགས་གེགས་དང་བར་ཆད་ཐམས་ཅད་ལས་བསྐྱབས་ཤིང་། ལུས་ངག་ཡིད་གསུམ་དགེ་བའི་ལས་ལ་འགོད་ཅིང་སྐུ་གསུང་ཐུགས་ཀྱི་བྱིན་རླབས་ཀྱིས་དེ་ཐམས་ཅད་ཀྱི་རྒྱུད་བྱིན་གྱིས་བརླབས་པར་བྱས་ནས་དེ་དག་འཆི་བའི་དུས་ཀྱི་ཚེ་ན། འཆི་ཁ་གནད་གཅོད་ཀྱི་སྡུག་བསྔལ་བར་དོའི་འཁྲུལ་སྣང་གི་འཇིགས་སྐྲག་ཅི་ཡང་མེད་པར་ཞིང་ཁམས་བདེ་བ་ཅན་དེར་ལམ་སྣ་འདྲེན་ཅིང་འཁྲིད་ནུས་པར་ཤོག་ཅིག་ཅེས་དེས་མཚོན་པའི་མ་དག་པའི་ཞིང་གི་འགྲོ་བ་ཀུན་ལ་ཕན་པར་སྨོན་པའོ།། བསྐལ་བཟང་འདི་ཡི་བསྐལ་བའི་ཡུན།། བདེ་བ་ཅན་གྱི་ཞག་གཅིག་སྟེ།། བསྐལ་བ་གྲངས་མེད་འཆི་བ་མེད།། རྟག་ཏུ་ཞིང་དེར་འཛིན་པར་ཤོག། ཅེས་གསུངས་ཏེ། བསྐལ་བ་བཟང་པོ་འདི་ཡི་བསྐལ་བ་ཆེན་པོ་གཅིག་གི་ཡུན་ཚད་དེ་བདེ་བ་ཅན་གྱི་ཞིང་ཁམས་ཀྱི་ཞག་གཅིག་ལ་བརྩིས་པའི། བསྐལ་བ་གྲངས་མེད་དཔག་ཏུ་མེད་པ་ལ་འཆི་བའི་མིང་དང་སྒྲ་ཙམ་ཡང་མེད་པར་དུས་རྟག་ཏུ་ཞིང་ཁམས་བདེ་བ་ཅན་དེ་ན་སྐྱེ་བ་བཟང་པོ་འཛིན་ཅིང་དེར་གནས་ཐུབ་པར་ཤོག་ཅིག སྨོན་ལམ་གྱི་དབང་གིས་ཞིང་གཞན་དང་གཞན་དོན་དུ་སྐྱེ་བ་དང་འཆི་འཕོ་བའི་ཚུལ་སྟོན་པ་ནི་མ་གཏོགས་སོ།། བྱམས་པ་ནས་བཟུང་མོས་པའི་བར།། བསྐལ་བཟང་འདི་ཡི་སངས་རྒྱས་རྣམས།། འཇིག་རྟེན་འདི་ན་ནམ་འབྱོན་ཚེ།། རྫུ་འཕྲུལ་སྟོབས་ཀྱིས་འདིར་འོངས་ནས།། སངས་རྒྱས་མཆོད་ཅིང་དམ་ཆོས་ཉན།། སླར་ཡང་བདེ་ཆེན་ཞིང་ཁམས་སུ།། ཐོགས་པ་མེད་པར་འགྲོ་བར་ཤོག། ཅེས་གསུངས་ཏེ། རང་ཅག་གི་ད་ལྟའི་དུས་ཀྱི་བསྐལ་བ་འདིའི་མིང་ལ་བཟང་པོ་ཟེར་བ་ཡིན་ཞིང་། བསྐལ་བ་བཟང་པོ་ཞེས་བྱ་བ་དེར་སངས་རྒྱས་སྟོང་རྩ་བྱོན་པ་ལས་བདག་ཅག་གི་སྟོན་པ་ཤཱཀྱ་ཐུབ་པ་ནི་རྣམ་འདྲེན་བཞི་བ་ད་ལྟའི་སངས་རྒྱས་ཡིན་ལ། མ་འོངས་པར་འབྱོན་འགྱུར་གྱི་སངས་རྒྱས་བྱམས་པ་མགོན་པོ་ནས་བཟུང་སྟེ། མཐར་སངས་རྒྱས་མོས་པའི་བར་གྱི་བསྐལ་བ་བཟང་པོ་འདི་ཡི་འདྲེན་མཆོག་སངས་རྒྱས་སྟོང་རྩ་ལ་སོགས་པ་རྣམས་མི་མཇེད་འཇིག་རྟེན་གྱི་ཁམས་འདི་ན་ནམ་འབྱོན་པའི་ཚེ་ན། རང་ཉིད་ལ་རྫུ་འཕྲུལ་ཐོགས་པ་མེད་པ་མངའ་བའི་སྟོབས་ཀྱིས། ཞིང་ཁམས་འདིར་ཡོང་ནས་སངས་རྒྱས་དེ་དག་ལ་མཆོད་པ་རྒྱ་ཆེར་རབ་འབྱམས་ཞིང་གི་རྣམ་འཕྲུལ་གྱིས་མཆོད་ཅིང་། སངས་རྒྱས་དེ་དག་གིས་དམ་པའི་ཆོས་ཀྱི་འཁོར་ལོ་བསྐོར་བ་རྣམས་ཉན་ཏེ། ཆོས་འཁོར་བསྐོར་བ་རྣམས་ཉན་པའི་རྗེས་ཐོག་དེ་ནས་སླར་ཡང་ནུབ་ཕྱོགས་བདེ་བ་ཆེན་པོའི་ཞིང་ཁམས་ལ་རྫུ་འཕྲུལ་གྱི་སྟོབས་ཀྱིས་ཐོགས་པ་མེད་པར་འགྲོ་ནུས་པར་ཤོག་ཅིག དེ་ལྟ་བུ་སྨོན་ལམ་འདི་དག་ཐམས་ཅད་རྒྱུ་ཚོགས་བསགས་སྔོན་སོང་ལ་བརྟེན་ནས་འགྲུབ་པ་ཞིག་ཡིན་པ་དེས་ན་ད་ལྟ་ནས་ཕྱོགས་གཅིག་ནས་ཚོགས་བསགས། ཕྱོགས་གཅིག་ནས་སྨོན་ལམ་འདེབས་དགོས་པ་ཡིན། ཚོགས་བསགས་ཅུང་ཙམ་ཡང་མེད་པར་རང་གར་སྨོན་ལམ་བཏབ་པ་ཙམ་གྱིས་སྨོན་ལམ་འགྲུབ་པ་མ་ཡིན་ཏེ། ཁྱོད་ཚེ་རིང་ཞེས་སྨོན་ལམ་བཟང་པོ་བཏབ་ན་ཚེ་རིང་བྱེད་དང་། ཁྱོད་འཆི་འགྲོ་བར་ཤོག་ཅེས་སྨོན་ལམ་ངན་པ་བཏབ་ན་ཤི་འགྲོ་ཐབས་ཐོན་དཀའ་བས། ཚོགས་བསགས་སྒྲིབ་སྦྱོང་གི་ནུས་པ་ཞིག་སྔོན་སོང་མེད་ཚེ་གང་ཡིན་རུང་འགྲུབ་དཀའ་བ་ཡིན། ང་ཚོས་བླ་མ་ཞིག་ལ་ཁྱེད་མ་འཆུགས་ཟེར་ནས་རེ་ཞིག་འཆའ། བླ་མས་འོད་དཔག་མེད་ལ་རེ་ལྟོས་བཅོལ་སྟེ་བདེ་བ་ཅན་ལ་དྲངས་ཨེ་ཐུབ་བལྟ་བ་ལས། འུར་རྡོའི་མཐིལ་དུ་རྡོ་བཞག་ནས་འཕེན་བཞག་པ་ལྟ་བུ་ཞིག་གང་ན་ཡོད། གུ་རུ་རིན་པོ་ཆེས། བེམ་རིག་མ་བྲལ་ཆོས་ལ་ནན་ཏན་གྱིས། །མཚན་བྱང་མགོ་ལ་དབང་སྐུར་བྱེད་ཙ་འཕྱིས། །རྣམ་ཤེས་བར་དོར་ཁྱི་གླེན་བཞིན་དུ་འཁྱམས། །མཐོ་རིས་འདྲེན་དུས་དེ་ལ་དཀའ་ལས་ཡོད། །ཅེས་གསུངས་པ་ལས། ལས་སླ་མོ་ཞིག་ཡིན་པར་གསུངས་མེད། སྨོན་ལམ་ཨེ་འགྲུབ་མི་འགྲུབ་དེ་སྨོན་ལམ་འགྲུབ་པའི་རྒྱུ་ལ་རག་ལས་ཡོད་པ་ཡིན། འོ་ན་རྒྱུ་གང་ཡིན་ཟེར་ན། བསོད་ནམས་ཀྱི་ཚོགས་བསགས་པ་དེ་ཡིན། ཚོགས་བསགས་ཤིག་ཡོད་ན་དེའི་འབྲས་བུ་སྨོན་ལམ་མ་བཏབ་ན་ལོས་ཡོད་བསམ་རྒྱུ་ཡང་མེད་པས། རང་གིས་ཚོགས་བསགས་དང་སྨོན་ལམ། འོད་དཔག་མེད་ཀྱིས་ཐུགས་བསྐྱེད་ནུས་པ་ཐམས་ཅད་མཐུ་བསྡོང་དཔུང་བསྡོང་ཞིག་མ་བྱས་པར། བདེ་བ་ཅན་དུ་སྐྱེ་བའི་རྒྱུ་དེའི་འབྲས་བུ་འགྲུབ་དཀའ་མོ་ཡིན། བསོད་ནམས་ཕྲན་བུ་ཞིག་ཡོད་ཀྱང་སྨོན་ལམ་འདེབས་ལུགས་མ་ཤེས་ན་ལྡོག་ཕྱོགས་ཀྱི་འབྲས་བུ་འབྱུང་བའི་དཔེ་ཡང་། གནའ་སྔོན་མ་ཞིག་ལ་རྒྱ་གར་ཡུལ་དུ་གཞོན་ནུ་སྟོང་ཐུབ་ཟེར་བའི་མི་དཔའ་བོ་ཞིག་ཡོད་པ་དེ། མཐར་དམག་མང་པོ་ཞིག་གིས་རུབ་བརྒྱབ་ནས་བསད་སོང་བའི་སྐབས་སུ་ཁོས་ཞེ་སྡང་གིས་མཚམས་སྦྱོར་བྱས་ཏེ་སྨོན་ལམ་ལོག་འདེབས་ངན་པ་ཞིག་བྱས་པ་ཡིན། དེས་སྔར་ཤཱ་རིའི་བུ་ལ་བསོད་སྙོམས་ཤིག་འབུལ་མྱོང་བའི་དགེ་བའི་སྟོབས་དེས་སྨོན་ལམ་ལོག་འདེབས་བྱས་པ་དེ་ལོག་པར་གྲུབ་ནས། གནོད་སྦྱིན་འབྲོག་གནས་ནག་པོ་ཟེར་བ་ཞིག་ཏུ་གྱུར་སོང་བ་ལྟ་བུ་དང་། ཡང་མཁན་སློབ་ཆོས་གསུམ་གྱི་སྐྱེས་རབས་སྔོན་མར་བལ་ཡུལ་མཆོད་རྟེན་བྱ་རུང་ཁ་ཤོར་གསར་དུ་བཞེངས་བའི་དུས་སུ་བུ་སྤུན་གསུམ་གྱིས་རྟེན་འབྲེལ་བརྟགས་ནས་སྨོན་ལམ་བཟང་པོ་བཏབ་དུས་དེར། ས་རྡོ་འགེལ་སའི་གླང་རྒན་ཞིག་ཡོད་པ་དེས་སྨོན་ལམ་ལོག་འདེབས་བྱས་ནས། ཁྱེད་གསུམ་པོ་གཅིག་གིས་རྟེན་གཞི་གཙུག་ལག་ཁང་བཞེངས་པ་དང་། གཅིག་གིས་བསྟན་པ་རབ་བྱུང་གི་སྡེ་བཙུགས། གཅིག་གིས་བསྟན་དགྲ་ཚར་བཅད་ནས་བསྟན་པ་སྲུང་བའི་སྨོན་ལམ་འདེབས་བཞིན་ཡོད་འདུག ང་ནི་ཁྱེད་གསུམ་གྱིས་ཡར་བརྩིགས་རྒྱུ་བོ་མར་བཤིག་ཐུབ་པར་ཤོག་ཅེས་སྨོན་ལམ་བཏབ་པས། ཕྱིས་རྒྱལ་བོ་གླང་དར་མ་འུ་དུམ་བཙན་པོར་སྐྱེས་པ་ཡིན། ཁོས་མཆོད་རྟེན་རྩིག་བྱེད་ཀྱི་ས་རྡོ་ཁུར་བའི་བསོད་ནམས་ཡོད་པའི་སྟོབས་ཀྱིས་སྨོན་ལམ་དེ་འགྲུབ་ནས། མི་ལོ་བདུན་ཅུའི་བར་དུ་བོད་གངས་ཅན་གྱི་ལྗོངས་ནས་བསྟན་པ་བསྣུབས་པ་ཡིན། ད་ལྟའི་སྐབས་སུ་ཡང་སངས་རྒྱས་བྱང་སེམས་དང་གུ་རུའི་སྤྲུལ་བ་བར་མ་ཆད་པར་བྱོན་ཞིང་འགྲོ་དོན་མཛད་དུས་དེར་དེ་ལ་ལོག་སྒྲུབ་བྱེད་མཁན་གྱི་ལྷ་ཁ་དཀར་གྱི་རྩིབ་ན། འདྲེ་ངོ་ནག་ཅིག་ཞེས་པའི་དཔེ་ལྟར་ཡོད་པ་འདི་ཡང་། ངོ་མ་བཤད་ན་བཟང་པོ་ཡིན་པའི་རྟགས་མཚན་ཡིན་ཏེ། གུ་རུ་རིན་པོ་ཆེ་གསོན་བསྲེགས་བྱས་པ་དང་། བཻ་རོ་ཙ་ནས་འོ་བརྒྱལ་མང་པོ་མྱོང་བ་དེ་ཚོར་བལྟས་ན་ཤེས་ཐུབ་པ་ཡིན། གནའ་ཞིག་ལ་བན་རྒན་ཉམ་ཆུང་ཞིག་ཡོད་པ་ལ། བན་རྒན་ཉམ་ཆུང་བས། ཟུར་གྱི་མི་དོན་མེད་ཚོས་དོན་མེད་ས་ནས་བརྙས་བཅོས་ཤ་སྟག་བྱས་པས། བན་རྒན་གྱིས་མགོན་པོ་ཚོགས་བདག་གི་བསྙེན་པ་དུང་ཕྱུར་ཞིག་བཏོན་ནས་ཁོ་ཚེ་འདི་ནས་ཚང་མས་བརྙས་བཅོས་བྱེད་བཞིན་འདུག་སྟེ། སྐྱེ་བ་ཕྱི་མར་ཐམས་ཅད་ཕར་ལ་དབང་དུ་བསྡུ་ཐུབ་པའི་དབང་ཐང་ཅན་ཞིག་གི་སྐྱེ་བ་ལེན་པར་ཤོག་ཅེས་སྨོན་ལམ་ལོག་འདེབས་བྱས་པའི་སྟོབས་ཀྱིས་ཉག་སྐེད་མགོན་པོ་རྣམ་རྒྱལ་གྱི་སྐྱེ་བ་བླངས་སོང་བ་ལྟ་བུ་ཡིན་པས། སྤྱིར་ན་སྨོན་ལམ་དང་། ཁྱད་པར་དུ་འཆི་ཁའི་མཚམས་སྦྱོར་དེ་འགྲུབ་སླ་མོ་ཡིན་པས་དགེ་བ་སྣ་རེ་བསྒྲུབས་ཀྱང་སྨོན་ལམ་བཟང་པོ་རེ་བཏབ་ནས་དགེ་བ་སེམས་ཅན་ལ་བསྔོ་དགོས། ཁྱད་པར་དུ་བདེ་སྨོན་འདི་ནི་རྒྱུའི་ཐད་ནས་སྒྲུབ་སླ་ཞིང་འབྲས་བུའི་ཐད་ནས་འགྲུབ་སླ་བའི་ཉེ་ལམ་རྨད་དུ་བྱུང་བ་ཞིག་ཡིན་པས། དེ་བསྒྲུབས་ན་མི་སུ་ཡིན་ཡང་བདེ་བ་ཅན་དུ་སྐྱེ་བ་ལ་དཀའ་ལས་མེད་ཅིང་། བདེ་ཅན་དུ་སྐྱེས་ནས་ཇི་ལྟར་སྡུག་ཀྱང་ལས་ཀྱི་དབང་གིས་ངན་སོང་དུ་སྐྱེ་མི་དགོས་ཤིང་། སངས་རྒྱས་ཀྱི་སྨོན་ལམ་མཐུ་བཙན་པས་མཐར་ཐུག་སངས་རྒྱས་ཐོབ་པ་ལས་གཞན་དུ་ལྡོག་འགྲོ་ས་ཞིག་ཡོད་པ་མ་ཡིན་ནོ།། བཞི་བ་ཞིང་ཁམས་ཀྱི་བཀོད་པ་ཡིད་ལ་བྱས་ཏེ་སྨོན་པ། ད་ནི་ཞིང་ཁམས་ཀྱི་བཀོད་པ་ཡིད་ལ་བྱས་ཏེ་སྨོན་པ་ལ། ཞིང་ཁམས་ཀྱི་བཀོད་པ་སྤྱིར་ཡིད་ལ་བྱེད་པའི་སྒོ་ནས་སྨོན་པ་དང་། བྱེ་བྲག་གི་ཡོན་ཏན་ཡིད་ལ་བྱེད་པའི་སྒོ་ནས་སྨོན་པ་གཉིས་ལས། དང་པོ་ཞིང་ཁམས་ཀྱི་བཀོད་པ་སྤྱིར་ཡིད་ལ་བྱེད་པའི་སྒོ་ནས་སྨོན་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག། བརྒྱད་ཅུ་རྩ་གཅིག་སངས་རྒྱས་ཞིང་ཀུན་གྱི།། ཡོན་ཏན་བཀོད་པ་ཐམས་ཅད་གཅིག་བསྡོམས་པ།། ཞིང་ཁམས་ཀུན་ལས་ཁྱད་འཕགས་བླ་ན་མེད།། བདེ་བ་ཅན་གྱི་ཞིང་དེར་སྐྱེ་བར་ཤོག། ཅེས་གསུངས་ཏེ། ཕྱོགས་བཅུའི་སངས་རྒྱས་ཀྱི་ཞིང་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་སངས་རྒྱས་ཀྱི་ཞིང་ཁམས་ཀུན་གྱི་ཡོན་ཏན་བཀོད་པ་ཐམས་ཅད་ཕྱོགས་གཅིག་ཏུ་བསྡོམས་པ་ལྟ་བུའི་ཞིང་ཁམས་གཞན་དག་ཀུན་ལས་ཀྱང་ཁྱད་དུ་འཕགས་ཤིང་། ཕུན་སུམ་ཚོགས་པ་བླ་ན་མེད་པ་ཞིག་གཟུང་བའི་ཐུགས་བསྐྱེད་ནས་སྨོན་ལམ་བཏབ་པས་མ་ཚད། བསྐལ་བ་དེ་བས་མང་ཞིག་ལ་སངས་རྒྱས་གཞན་ལས་ལྷག་པའི་ཚོགས་བསགས་ནས། ཞིང་ཁམས་ཡོངས་སུ་སྦྱོང་བར་ད་ལྟ་མངོན་དུ་མཛད་པའི་བདེ་བ་ཅན་དེར་བདག་ཅག་དད་པས་མོས་པའི་དགེ་རྩ་ཅན་ཡང་ཞིང་ཁམས་དེར་སྐྱེ་བར་ཤོག་ཅིག་ཅེས་པའོ། །ཞིང་ཁམས་ཀྱི་བཀོད་པའི་ཡོན་ཏན་དང་འབྱོར་བ་བྱེ་བྲག་རྣམས་འདི་ནས་རིམ་བཞིན་གསུངས་པ་སྟེ། སྤྱིར་ན་ཞིང་ཁམས་དེའི་ཡོན་ཏན་གྱི་ཁྱད་པར་ཕྲན་བུ་ཙམ་ཡང་ཞིབ་པར་བརྗོད་དགོས་ན། སངས་རྒྱས་ཀྱི་ལྗགས་ཀྱིས་དུས་བསྐལ་བའི་བར་དུ་བརྗོད་ནའང་ཟད་མི་ཤེས་པ་ཡིན་ཡང་། འདིར་སྤྲོ་བ་བསྐྱེད་པ་དང་ནི་ཚོགས་གསོག་པའི་རྟེན་ཅུང་ཟད་བཤད་པ་ལས། གཉིས་པ་བྱེ་བྲག་གི་ཡོན་ཏན་ཡིད་ལ་བྱེད་པའི་སྒོ་ནས་སྨོན་པ། དེ་ལ་ས་གཞིའི་ཡོན་ཏན་ཡིད་ལ་བྱེད་པའི་སྒོ་ནས་སྨོན་པ། ཞིང་ཁམས་དེའི་ཤིང་གི་ཡོན་ཏན་ཡིད་ལ་བྱེད་པའི་སྒོ་ནས་སྨོན་པ། ཆུ་དང་པདྨའི་ཡོན་ཏན་ཡིད་ལ་བྱེད་པའི་སྒོ་ནས་སྨོན་པ། བཅུད་ཀྱི་ཡོན་ཏན་ཡིད་ལ་བྱེད་པའི་སྒོ་ནས་སྨོན་པ། ཞིང་གི་གཙོ་བོ་མགོན་པོ་འོད་དཔག་མེད་ཀྱི་ཡོན་ཏན་ཡིད་ལ་བྱས་ཏེ་ཞབས་འབྲིང་དང་བསྟན་པ་འཛིན་པ་སོགས་ལ་སྨོན་པ་དང་ལྔ་ལས། དང་པོ་ས་གཞིའི་ཡོན་ཏན་ཡིད་ལ་བྱེད་པའི་སྒོ་ནས་སྨོན་པ། རིན་ཆེན་ས་གཞི་ཁོད་སྙོམས་ལག་མཐིལ་ལྟར།། ཡངས་ཤིང་རྒྱ་ཆེ་གསལ་ཞིང་འོད་ཟེར་འབར།། མནན་ན་ནེམ་ཞིང་བཏེགས་ན་སྤར་བྱེད་པ།། བདེ་འཇམ་ཡངས་པའི་ཞིང་དེར་སྐྱེ་བར་ཤོག། ཅེས་གསུངས་ཏེ། བདེ་བ་ཅན་གྱི་ས་གཞི་ཚང་མ་ནི་འཇིག་རྟེན་འདི་ན་མི་སྤྱོད་པའི་རིན་པོ་ཆེའི་རིགས་མི་འདྲ་བ་སྣ་ཚོགས་ལས་གྲུབ་ཅིང་། ཁོད་སྙོམས་ཤིང་ཚེར་མ་དང་ངམ་གྲོག་དང་རྒུད་པ་ལ་སོགས་མེད་པར་ལག་མཐིལ་ལྟར་དུ་མཉམ་པ་དང་། གསེར་གྱི་དྲ་བ་ཤ་སྟག་གིས་ཁེབས་པ། གང་ན་བལྟས་ཀྱང་མཐའ་དང་དབུས་སུ་མེད་ཅིང་ཐ་གྲུ་རྒྱ་ཆེ་ཞིང་ཁྱོན་ཡངས་པ། བཀྲ་ཞིང་ཤིན་ཏུ་མཛེས་པའི་འོད་ཟེར་གྱི་རི་མོ་ཅན། ཕྱི་གསལ་ནང་གསལ་གྱི་རྣམ་པ་ལྟ་བུའི་གསལ་ཞིང་འོད་ཟེར་སྣ་ལྔའི་ཁ་དོག་དེ་ཕྱོགས་བཅུ་ལ་ལམ་ལམ་དུ་འཕྲོ་བཞིན་ཡོད་པ་མེ་ལོང་དག་པ་རྡུལ་གྱིས་མ་གོས་པའི་ནང་ལ་བལྟས་པ་བཞིན་དུ་སངས་རྒྱས་ཀྱི་ཞིང་ཁམས་ཚད་མེད་པའི་རྒྱན་གྱི་གཟུགས་བརྙན་སྣང་བ། ས་གཞི་དེ་མ་དག་ས་རྡོ་ལྟ་བུའི་སྲ་ཞིང་འཐས་པའི་རྣམ་པ་ཅན་མ་ཡིན་པར་རྐང་པས་མར་མནན་ན་སོར་བཞིའི་ཚད་དུ་ནེམ་ཞིང་ཡར་ལ་བཀྱགས་ན་སོར་བཞིའི་ཚད་དུ་ཡར་འཕར་བ་ཅན་ཡིན་པ། ས་གཞི་དེ་རྐང་བས་རེག་པ་ཙམ་གྱིས་ལུས་སེམས་ལ་བདེ་བ་ཚད་མེད་པ་སྐྱེད་པར་བྱེད་ཅིང་། དར་གོས་ཆེན་གྱི་འབོལ་གདན་ལྟར་དུ་རེག་བྱ་འཇམ་པ། ས་གཞི་ཐམས་ཅད་བཙིར་ཅིང་གུ་དོག་པོ་མ་ཡིན་པར་ཁོད་སྙོམས་ཤིང་ཐ་གྲུ་ཡངས་པ་སྟེ། དེ་ལྟ་བུའི་ཞིང་ཁམས་དེ་སྐྱེ་བར་ཤོག་ཅིག་ཅེས་ས་གཞིའི་ཡོན་ཏན་རགས་རིམ་ཙམ་ཞིག་བརྗོད་པའོ། ། གཉིས་པ་ཞིང་ཁམས་དེའི་ཤིང་གི་ཡོན་ཏན་ཡིད་ལ་བྱེད་པའི་སྒོ་ནས་སྨོན་པ། རིན་ཆེན་དུ་མ་ལས་གྲུབ་དཔག་བསམ་ཤིང་།། ལོ་མ་དར་ཟབ་འབྲས་བུ་རིན་ཆེན་བརྒྱན།། དེ་སྟེང་སྤྲུལ་བའི་བྱ་ཚོགས་སྐད་སྙན་སྒྲས།། ཟབ་དང་རྒྱ་ཆེའི་ཆོས་ཀྱི་སྒྲ་རྣམས་སྒྲོགས།། ངོ་མཚར་ཆེན་པོའི་ཞིང་དེར་སྐྱེ་བར་ཤོག། ཅེས་གསུངས་ཏེ། ཤིང་ལྗོན་པ་རེ་རེ་ཡང་རིན་པོ་ཆེ་དུ་མ་ལས་གྲུབ་པ་དཔེར་ན་རྩ་བ་གསེར་ཡིན་པ་དང་། སྡོང་པོ་དངུལ། ཡལ་ག་བེེཌཱུརྱ་ཡིན་པ། ལོ་མ་ཤེལ་དང་། འདབ་མ་སྤུག མེ་ཏོག་ནི་མུ་ཏིག་དཀར་དམར་སྣ་ཚོགས་པ་ཡིན་པ། འབྲས་བུ་ནི་རྡོ་རྗེའི་སྙིང་བོ་ལས་བྱས་པའི་ཕ་ལམ་ལས་གྲུབ་པ་སྟེ་དེ་ལྟ་བུའི་རིན་པོ་ཆེ་སྣ་བདུན་ལས་གྲུབ་པ་དང་། ཡང་ལྗོན་ཤིང་འགའ་རེ་ནི་རིན་པོ་ཆེ་སྣ་རེ་རེ་ལས་གྲུབ་ཅིང་། ཤིང་དེ་དག་ཐམས་ཅད་ཀྱང་འཇམ་ཞིང་རེག་ན་བདེ་ལ་ལྷན་སྐྱེས་ཀྱི་དྲི་ངད་ཞིམ་པོ་འཐུལ་བ་ཅན། འོད་དཔག་མེད་ཀྱི་དཔག་ཏུ་མེད་པའི་བསོད་ནམས་དང་རང་ཉིད་ཀྱིས་བསོད་ནམས་བསགས་པའི་དབང་གིས་འབྲས་བུ་ལས་དཔག་བསམ་གྱི་ཤིང་འདོད་དགུ་ཐམས་ཅད་བསམ་པ་ལྟར་འབྱུང་བའི་ནོར་བུ་སྟེ། ཞིང་དེའི་མཐའ་བསྐོར་ཐམས་ཅད་ན་ཤིང་ཏཱ་ལའི་ལྗོན་ཤིང་གི་ཕྲེང་བས་བསྐོར་ཅིང་། ཤིང་དེ་ཚོའི་ཡལ་ག་དང་ལོ་མ་རླུང་གིས་སྐྱོད་དུས་དྲི་ཞིམ་པོ་བྲོ་བ། སྒྲ་སྙན་པོ་ཉན་ན་ཉན་པས་ཆོག་མི་ཤེས་པའི་སྒྲ་སྙན་སྒྲོགས་པ། ཤིང་དེ་ཚོ་རེ་རེ་བཞིན་དུ་ཁ་དོག་འདྲ་མིན་སྣ་ཚོགས་ཀྱིས་སོ་སོར་མ་འདྲེས་པར་ཕྱེས་ཡོད་ཅིང་། དེའི་ཁ་དོག་སྣ་ཚོགས་པས་ས་གཞི་རྣམ་པར་བཀྲ་བ་མཛེས་ཤིང་ཡིད་དུ་འོང་བ། ལོ་མ་ཐམས་ཅད་རིན་པོ་ཆེས་རྒྱན་སྣ་ཚོགས་པ་དང་དར་ཟབ་ཀྱིས་བརྒྱན་པ། འབྲས་བུ་དང་མེ་ཏོག་སྣ་ཚོགས་པ་དེ་ཚོ་རིན་པོ་ཆེའི་དྲྭ་བ་དང་དྲྭ་བ་ཕྱེད་པ་དང་། དྲིལ་བུ་དང་གཡེར་ཁ་དང་རྔ་ཡབ་དང་ནོར་བུ་རིན་པོ་ཆེ་སྣ་ཚོགས་ཀྱིས་བརྒྱན་ནས་ཡོད་པ། དེ་ལྟ་བུ་ཤིང་ལྗོན་པ་རིན་པོ་ཆེ་སྣ་ཚོགས་ཀྱིས་བརྒྱན་ཡོད་པའི་སྟེང་ན། ངན་འགྲོའི་སེམས་ཅན་དུད་འགྲོ་མ་ཡིན་པ་སྤྲུལ་བའི་བྱ་རིགས་སྣ་ཚོགས་པ་ཀ་ལ་པིང་ཀ་དང་ཁུ་བྱུག་དང་ནེ་ཙོ་ལ་སོགས་པ་སྤུ་སྡུག་འཇའ་ཚོན་གྱི་རི་མོ་བཀྲ་བ་ཅན་དུང་གི་མདོག་ལྟར་དཀར་བ། གཡུའི་མདོག་ལྟར་སྔོ་བ། བྱུ་རུའི་མདོག་ལྟར་དམར་བ། ཨིནྡྲ་ནི་ལའི་མདོག་ལྟར་ལྗང་བ་ལ་སོགས་པ་གཟུགས་དབྱིབས་ཀྱང་ཐ་དད་པ་མི་འདྲ་བ་སྣ་ཚོགས་པ་མཐོང་བ་ཙམ་གྱིས་ཡིད་འཕྲོག་པར་བྱེད་ནུས་པ་སྟེ། དེ་ལྟ་བུའི་བྱ་དང་བྱེའུ་རིགས་སྣ་ཚོགས་དེ་དག་གིས་ཀྱང་སྐད་སྙན་པའི་སྒྲ་ལས་ཟབ་དང་རྒྱ་ཆེའི་ཆོས་ཀྱི་སྒྲ་དང་། དཀོན་མཆོག་གསུམ་གྱི་ཡོན་ཏན་དང་། འོད་དཔག་མེད་ཀྱི་མཚན་དང་དེའི་ཆེ་བ་བརྗོད་པའི་སྒྲ་དང་། མི་རྟག་ཞི་དང་བདག་མེད་ལ་སོགས་པ་སྟོན་པའི་ཆོས་ཀྱི་སྒྲ་རང་ཤུགས་ཀྱིས་འབྱུང་ཞིང་། མདོ་དང་སྔགས་ཀྱི་ཆོས་ཚུལ་སྟོན་པའི་སྒྲ་རྣམ་པ་སྣ་ཚོགས་སྒྲོགས་པ་དང་། ཞིང་དེར་སྐྱེས་པ་ཐམས་ཅད་ཀྱི་སེམས་ཀྱི་འཁྲུལ་རྟོག་སྐད་ཅིག་ལ་ཞི་ནས་བདེ་དང་སྟོང་པའི་ཡེ་ཤེས་ཚད་མེད་པ་རྒྱུད་ལ་སྐྱེ་བ་སོགས་ངོ་མཚར་ཆེན་པོའི་ཞིང་ཁམས་བདེ་བ་ཅན་དེར་སྐྱེ་བར་ཤོག་ཅིག གསུམ་པ་ཆུ་དང་པདྨའི་ཡོན་ཏན་ཡིད་ལ་བྱེད་པའི་སྒོ་ནས་སྨོན་པ། སྤོས་ཆུའི་ཆུ་ཀླུང་ཡན་ལག་བརྒྱད་ལྡན་མང་།། དེ་བཞིན་བདུད་རྩིའི་ཁྲུས་ཀྱི་རྫིང་བུ་རྣམས།། རིན་ཆེན་སྣ་བདུན་ཐེམ་སྐས་ཕ་གུས་བསྐོར།། མེ་ཏོག་པདྨའི་དྲི་ཞིམ་འབྲས་བུ་ལྡན།། པདྨའི་འོད་ཟེར་དཔག་ཏུ་མེད་པ་འཕྲོ།། འོད་ཟེར་རྩེ་ལ་སྤྲུལ་བའི་སངས་རྒྱས་བརྒྱན།། ཡ་མཚན་ཆེན་པོའི་ཞིང་དེར་སྐྱེ་བར་ཤོག། ཅེས་གསུངས་ཏེ། བདེ་བ་ཅན་གྱི་ཞིང་ཁམས་ཀྱི་ཆུ་རྣམས་ནི་སྤོས་དྲི་ཞིམ་པོ་ཅན་གྱི་དྲི་དང་ལྡན་པའི་ཆུ་ཀླུང་སྟེ། དཔེར་ན་ལྷའི་སྤོས་ཤིང་སྟེ་ཏ་མ་ལ་དང་། ཨ་ག་རུ་དང་། རྒྱ་སྤོས་དང་། ཙནྡན་སྦྲུལ་སྙིང་ལ་སོགས་པ་དྲི་དང་ངད་ལྡན་པའི་ཤིང་དེ་དག་གི་རྩ་བ་ཆུ་ཡིས་ཟོས་པས་ན། ཆུ་ཀླུང་དུ་ཡང་སྤོས་ཀྱི་དྲི་ཞིམ་པོ་བྲོ་བ་དང་། ཆུ་ཀླུང་ཡན་ལག་བརྒྱད་ལྡན་གསེར་གྱི་བྱེ་མ་བརྡལ་བས་ན། འདམ་གྱི་རྙོགས་པ་དང་བྲལ་བ་དལ་འབབ་ཀྱི་ཆུ་བོ་དྭངས་ཤིང་བསིལ་བ། འཐུང་ན་ཞིམ་པ། ཡང་ཞིང་འཇམ་པ། ལྟོ་བ་བདེ་བ་ལ་སོགས་པ་སྟེ་དྭངས་བསིལ་ཡན་ལག་བརྒྱད་ལྡན་གྱི་ཡོན་ཏན་དང་ལྡན་པ་ཡིན་ཞིང་། དེ་ལྟ་བུའི་ཡན་ལག་བརྒྱད་ལྡན་གྱི་ཆུ་བོ་མང་པོ་དེ་ཚོ་ནི་མེ་ཏོག་སྣ་ཚོགས་ཀྱིས་ཁེབས་པ། འབབ་སྟེགས་མཆོག་ཏུ་བདེ་བའི་སྤོས་ཆུའི་ཆུ་ཀླུང་དེ་དག་གི་ནང་ལ་རོལ་རྩེད་ཀྱི་རྩེད་མོ་རྩེ་ཞིང་ཁྲུས་བྱ་བ་ལ་སོགས་པའི་ཆེད་དུ་ཆུ་ལ་ཞུགས་ན། སྐྱེ་བོ་དེ་དག་གིས་གང་ལ་གང་འདོད་ཀྱི་འདོད་པའི་རྗེས་སུ་ཞུགས་པའི་རེག་བྱ་དྲོན་པོར་འདོད་ཚེ་དྲོན་པོ་དང་། བསིལ་མོར་འདོད་ན་བསིལ་མོར་དང་། མར་ཆུའི་གཏིང་གི་ཟབ་ཚད་ཀྱང་གང་འདོད་ཀྱི་རྗེས་སུ་འགྲོ་བ། ལོང་བུ་མན་ཆད་ནུབ་པར་འདོད་པ་དང་། མགྲིན་པ་མན་ཆད་ནུབ་པར་འདོད་པ་སོགས་གང་འདོད་དུ་འབྱུང་བ་དང་། དེ་འདྲའི་མཚམས་མཚམས་སུ་བྱ་ངང་པ་དང་། ངུར་པ་དང་། ཁྲུང་ཁྲུང་དང་། ལྷའི་བྱ་ངང་ངུར་དང་། ཀ་རནྡ་དང་། ནེ་ཙོ་དང་། རི་སྐེགས་དང་། རྨ་བྱ་དང་། ཀུ་ལ་ན་ལ་སོགས་པ་རྩེད་འཇོར་རོལ་བ་སོགས་བདེ་སྨོན་གཞན་དག་ལས་འབྱུང་བ་ལྟར་དང་། དཔེ་དེ་བཞིན་དུ་ཡང་བདུད་རྩིའི་ཆར་རྒྱུན་འཕྱུར་བའི་ཁྲུས་ཀྱི་རྫིང་བུ་དྲི་ཞིམ་པ་མཛེས་ཤིང་ཡིད་དུ་འོང་བ་དེ་ཚོ་ཡང་རིན་པོ་ཆེ་སྣ་བདུན་གྱི་ཐེམ་སྐས་དང་། མུ་ཏིག་དམར་པོ་དང་མུ་མེན་མཐིང་ག་ལ་སོགས་པའི་ཕ་གུའི་དྲ་བས་བསྐོར་ཡོད་པ། དེ་ཡི་ནང་དུ་ཁྲུས་ལན་རེ་བྱས་པ་ཙམ་གྱིས་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བ། ཁྲུས་ཀྱི་རྫིང་བུ་ཡོད་སའི་སྐྱེད་ཚལ་གྱི་ཁོ་ར་ཁོར་ཡུག་དེར་ལྷའི་མེ་ཏོག་ཨུཏྤལ་དང་། ཨུ་དུམ་ཝ་ར་དང་། པདྨ་དང་། པུནྜ་རི་ཀ་སོགས་ང་ཚོའི་འཇིག་རྟེན་མི་ཡུལ་ལ་ཡོད་མི་སྲིད་པ་དེ་དག་དང་། ཀུ་མུ་ད་དང་། པདྨ་དཀར་པོ་ལ་དྲི་ཞིམ་པོའི་ཟེའུ་འབྲུ་དང་ལྡན་པས་ཁྱབ་ཡོད་པ། ཁྱད་པར་དུ་མེ་ཏོག་པདྨ་དེ་དག་རིན་པོ་ཆེ་སྣ་བདུན་གྱི་ཚོན་མདོག་དང་ལྡན་པ། པདྨ་རེ་རེའི་ཁ་རྒྱ་ཆེ་ཆུང་ཡང་ཆུང་བ་དཔག་ཚད་ཕྱེད་ནས་ཆེ་བ་བཅུ་ཡི་བར་དུ་ཡོད་པ་སྟེ། དེ་དག་ཐམས་ཅད་ལས་འོད་ཟེར་བྱེ་བ་སྟོང་ཕྲག་སུམ་བརྒྱ་རྩ་དྲུག་འབྱེད་བཞིན་ཡོད་པ། འོད་ཟེར་དཔག་ཏུ་མེད་པའི་འོད་ཟེར་རེ་རེའི་རྩེ་ནས་ཀྱང་དེ་བཞིན་གཤེགས་པའི་སྤྲུལ་བའི་སྐུ་གཟུགས་དཔལ་དང་གཟི་བརྗིད་འབར་བ་བྱེ་བ་སྟོང་ཕྲག་སུམ་ཅུ་རྩ་དྲུག་དྲུག་གིས་བརྒྱན་པ་འབྱུང་བ་དང་། དེ་ཐམས་ཅད་ཀྱང་ཕྱོགས་བཅུའི་འཇིག་རྟེན་གྱི་ཁམས་བགྲང་ལས་འདས་པའི་སངས་རྒྱས་མི་བཞུགས་པའི་ཞིང་ཁམས་གཞན་ལ་བྱོན་ནས་འགྲོ་བའི་དོན་མཛད་པར་སྟོན་པ་ལ་སོགས་པ། མདོར་ན་ཤིན་ཏུ་ཡ་མཚན་ཆེན་པོའི་ངོ་མཚར་གྱི་ལྟད་མོ་དང་ལྡན་པའི་ཞིང་ཁམས་དེར་སྐྱེ་བར་ཤོག་ཅིག་ཅེས་སྨོན་པའོ།། བཞི་བ་བཅུད་ཀྱི་ཡོན་ཏན་ཡིད་ལ་བྱེད་པའི་སྒོ་ནས་སྨོན་པ། མི་ཁོམ་བརྒྱད་དང་ངན་སོང་སྒྲ་མི་གྲགས།། ཉོན་མོངས་དུག་ལྔ་དུག་གསུམ་ནད་དང་གདོན།། དགྲ་དང་དབུལ་ཕོངས་འཐབ་རྩོད་ལ་སོགས་པ།། སྡུག་བསྔལ་ཐམས་ཅད་ཞིང་དེར་ཐོས་མ་མྱོང་།། བདེ་བ་ཆེན་པོའི་ཞིང་དེར་སྐྱེ་བར་ཤོག། ཅེས་གསུངས་ཏེ། ཞིང་ཁམས་བདེ་བ་ཅན་དེ་ན་མི་ཁོམ་པ་དང་ངན་སོང་ཞེས་པ་ཞིག་ཡོད་མ་དགོས། མི་ཁོམ་བརྒྱད་དང་། ངན་སོང་གསུམ་ཞེས་པའི་སྒྲ་ཙམ་ཡང་རྣ་ལམ་དུ་མི་གྲགས་པ་ཡིན་ན་དེའི་སྡུག་བསྔལ་ཞིག་ག་ལ་ཡོད། དེ་ཡང་སྡུག་བསྔལ་གྱི་རྒྱུ་ཉོན་མོངས་པ་དུག་ལྔ་དུག་གསུམ་དང་དེས་བསླངས་པའི་སྲོག་གཅོད་རྫུན་རྐུ་སོགས་ཀྱི་ལས་ཐམས་ཅད་ཀྱང་ཡོད་པ་མ་ཡིན་ལ། རྒྱུ་ཀུན་འབྱུང་ལས་དང་ཉོན་མོངས་པ་དེ་དག་གིས་བསྐྱེད་པའི་འབྲས་བུ་སྡུག་བསྔལ་གྱི་བྱེ་བྲག་དགྲས་གསོད་གཅོད་དང་། འཕྲོག་བཅོམ་དང། རྐུ་བ་དང་། བླ་བཙག རྐང་འདྲེན་བྱེད་པ་ལ་སོགས་པའི་སྡུག་བསྔལ་དང་། རྒྱུ་ནོར་གྱིས་དབུལ་ཞིང་ཕོངས་པ་དང་། དེས་རྐྱེན་གྱིས་ཕན་ཚུན་ནང་འཁྲུག་ཡོང་བ་དང་། ནང་རྐུན་བྱེད་པ་དང་། ནད་འདུ་བ་རྣམ་བཞི་དང་། ཕོ་གདོན་མོ་གདོན་ལ་སོགས་པའི་གདོན་སྟོང་ཕྲག་བརྒྱད་ཅུ་ལ་སོགས་པ་ཚོར་བ་སྡུག་བསྔལ་ཅན་གྱི་སྒྲ་ཐམས་ཅད་གཅིག་ཀྱང་ཞིང་ཁམས་བདེ་བ་ཅན་ན་ཐོས་པ་ཙམ་ཡང་མེད་ན་དངོས་སུ་འབྱུང་བ་ཞིག་ལྟ་ཅི་སྨོས་ཏེ་དཔེ་མི་སྲིད་པ་ཞིག་ཡིན་པ་སྟེ། དེ་ལྟ་བུའི་བདེ་བ་ཆེན་པོའི་ཞིང་ཁམས་དེར་སྐྱེ་བར་ཤོག་ཅིག བུད་མེད་མེད་ཅིང་མངལ་ནས་སྐྱེ་བ་མེད།། ཀུན་ཀྱང་མེ་ཏོག་པདྨའི་སྦུབས་ནས་འཁྲུངས།། ཐམས་ཅད་སྐུ་ལུས་ཁྱད་མེད་གསེར་གྱི་མདོག། དབུ་ལ་གཙུག་ཏོར་ལ་སོགས་མཚན་དཔེས་བརྒྱན།། མངོན་ཤེས་ལྔ་དང་སྤྱན་ལྔ་ཀུན་ལ་མངའ།། ཡོན་ཏན་དཔག་མེད་ཞིང་དེར་སྐྱེ་བར་ཤོག། ཅེས་གསུངས་ཏེ། ཞིང་ཁམས་དེ་ན་སྐྱེ་བའི་ལུས་རྟེན་རྣམས་ལ་བུད་མེད་མེད་ཅིང་མངལ་ནས་སྐྱེ་བ་ཡང་མེད་ལ། ཞིང་ཁམས་དེར་སྐྱེས་ཚད་ཀུན་ཀྱང་མེ་ཏོག་པདྨའི་སྦུབས་ནས་བརྫུས་ཏེ་འཁྲུངས་ཤིང་། བདེ་བ་ཅན་དུ་སྐྱེས་ཚད་ཐམས་ཅད་ཀྱི་སྐུ་ལུས་ལ་ཆེ་ཆུང་དང་མཐོ་དམན་དང་མཛེས་མི་མཛེས་ལ་སོགས་པའི་ཁྱད་པར་མེད་པར་གསེར་གྱི་ཁ་དོག་དང་ལྡན་པའི་མདོག་དྭངས་ཤིང་གསལ་བ། དབུ་ལ་གཙུག་ཏོར་དང་ཞབས་ལ་འཁོར་ལོ་ལ་སོགས་པ་སྐྱེས་བུ་ཆེན་པོའི་མཚན་དང་དཔེ་བྱད་མང་པོས་བརྒྱན་ཡོད་པ་དང་། ལྷའི་མིག་གི་མངོན་ཤེས། ལྷའི་རྣ་བའི་མངོན་ཤེས། རྫུ་འཕྲུལ་གྱི་མངོན་ཤེས། སྔོན་གནས་རྗེས་དྲན་གྱི་མངོན་ཤེས། གཞན་སེམས་ཤེས་པའི་མངོན་ཤེས་ཏེ་མངོན་ཤེས་ལྔ་དང་ལྡན་པའི་སྟོབས་ཀྱིས་ཞིང་ཁམས་གཞན་བྱེ་བ་ཁྲག་ཁྲིག་མང་པོ་རྣམས་སྐད་ཅིག་གཅིག་གིས་བགྲོད་ནུས་པ་དང་། དེ་ཐམས་ཅད་གཟིགས་ཤིང་དེ་དག་ན་ཡོད་པའི་སྒྲ་ཕྲ་རགས་ཐམས་ཅད་ཀྱང་གསན་ཞིང་། དེ་དག་ན་ཡོད་པའི་སེམས་ཅན་ཐམས་ཅད་ཀྱི་སེམས་རྒྱུད་མཁྱེན་པ་ལ་སོགས་པ་དེ་འདྲའི་ཡོན་ཏན་དང་ལྡན་པ་ཡིན་པས་མ་ཟད། ཤའི་སྤྱན་དང་། ལྷའི་སྤྱན་དང་། ཤེས་རབ་ཀྱི་སྤྱན་དང་། ཆོས་ཀྱི་སྤྱན་དང་། སངས་རྒྱས་ཀྱི་སྤྱན་ཡང་རྗེས་མཐུན་པ་ཡོད་པ་སྟེ་སྤྱན་ལྔ་ཡང་ཀུན་ལ་མངའ་བ་དང་། བདག་དང་གཞན་གྱི་འདུ་ཤེས་མེད་ཅིང་། སེམས་ཅན་ཐམས་ཅད་ལ་རིས་སུ་མ་ཆད་པའི་བྱམས་སྙིང་རྗེའི་ཐུགས་དང་ལྡན་པ་དང་། གཟུངས་དང་སྤོབས་པའི་བློ་གྲོས་དང་ཤེས་རབ་ཀྱི་གཏེར་རྒྱ་མཚོ་ཆེན་པོ་དང་འདྲ་ཞིང་། བསམ་གཏན་ལ་བརྟན་པ་ཐོབ་པས་ཏིང་ངེ་འཛིན་གྱི་སྒོ་བརྒྱ་ཕྲག་མང་པོ་ལ་རང་དབང་འབྱོར་བའི་བློ་ཆེན་རི་རབ་དང་འདྲ་བ་ལ་སོགས་པ་ཡོན་ཏན་དཔག་ཏུ་མེད་པ་བསམ་གྱིས་མི་ཁྱབ་པས་རྒྱུད་ཡོངས་སུ་གང་བ་དང་ལྡན་པའི་ཞིང་ཁམས་དེར་སྐྱེ་བར་ཤོག་ཅིག རང་བྱུང་རིན་ཆེན་སྣ་ཚོགས་གཞལ་ཡས་ཁང་།། ཅི་འདོད་ལོངས་སྤྱོད་ཡིད་ལ་དྲན་པས་འབྱུང་།། རྩོལ་སྒྲུབ་མི་དགོས་དགོས་འདོད་ལྷུན་གྱིས་གྲུབ།། ང་ཁྱོད་མེད་ཅིང་བདག་ཏུ་འཛིན་པ་མེད།། གང་འདོད་མཆོད་སྤྲིན་ལག་པའི་མཐིལ་ནས་འབྱུང་།། ཐམས་ཅད་བླ་མེད་ཐེག་ཆེན་ཆོས་ལ་སྤྱོད།། བདེ་སྐྱིད་ཀུན་འབྱུང་ཞིང་དེར་སྐྱེ་བར་ཤོག། ཅེས་གསུངས་ཏེ། མགོན་པོ་འོད་དཔག་མེད་ཀྱིས་སྔར་སློབ་པ་ལམ་གྱི་གནས་སྐབས་ན་རྒྱལ་བ་གཞན་ལས་ཀྱང་ཁྱད་དུ་འཕགས་པའི་ཐུགས་བསྐྱེད་དང་། བསྐལ་བ་གངྒཱའི་ཀླུང་གི་བྱེ་མ་སྙེད་མང་པོར་ཚོགས་བསགས་སྨོན་ལམ་མཛད་པའི་མཐུ་དང་། ཞིང་དེར་སྐྱེས་པའི་བྱང་ཆུབ་སེམས་དཔའ་རྣམས་ཀྱིས་ཀྱང་རྒྱུ་བཞི་བསྒྲུབས་པ་སྔོན་དུ་སོང་བའི་བསོད་ནམས་ཀྱི་སྟོབས་ལས་གྲུབ་པའི་མ་བྱས་རང་བྱུང་གི་གཞལ་ཡས་ཁང་། བ་གམ་བང་རིམ་གྱི་བརྩེགས་པ་ཅན་བརྒྱ་སྟོང་ཁྲི་འབུམ་རྒྱན་སྣ་ཚོགས་ཀྱིས་བརྒྱན་པ་ཡོད་ཅིང་། ཅི་འདོད་གང་བསམ་གྱི་གོས་རྒྱན་ཡོ་བྱད་སོགས་ཀྱི་ལོངས་སྤྱོད་ཐམས་ཅད་ཀྱང་ཡིད་ལ་དྲན་པ་ཙམ་གྱིས་རང་འགྲུབ་ཏུ་འབྱུང་བ་དང་། རྩོལ་བས་སྒྲུབ་པའི་ངལ་བ་ལ་བརྟེན་མི་དགོས་པར་དགོས་འདོད་ཐམས་ཅད་མ་བསམས་ལྷུན་གྱིས་གྲུབ་པའི་དཔལ་དང་ལྡན་པ། ང་ཞེས་པ་གཅེས་འཛིན་བྱེད་རྒྱུ་ཞིག་དང་། ཁྱོད་དང་ཁོ་ཞེས་པའི་ཡལ་བར་འདོར་རྒྱུ་ཞིག་མེད་པར་བདག་གཞན་མཉམ་པ་བྱང་ཆུབ་ཀྱི་སེམས་དང་ལྡན་པ་དང་། བདག་དང་བདག་གིར་ལྟ་བའི་འཛིན་པའང་མེད་པར་བདག་མེད་སྤྲོས་པ་དང་བྲལ་བའི་དོན་ཇི་ལྟ་བ་བཞིན་དུ་རྟོགས་པ་ཡིན་ཕྱིར་ལོངས་སྤྱོད་དང་ཡོ་བྱད་ལ་དེ་བས་ཀྱང་ང་ཡིར་འཛིན་པའི་ཞེན་ཆགས་ཡོད་པ་མ་ཡིན། བསོད་ནམས་ཀྱི་ཚོགས་སྒྲུབ་པའི་སྐབས་སུ་གང་དང་ཅི་འདོད་པའི་མཆོད་པའི་སྤྲིན་རབ་འབྱམས་བསམ་པ་ཙམ་གྱིས་ལག་པའི་མཐིལ་ནས་ནམ་ཡིན་ཡིན་དུ་འབྱུང་བས་ན། སྐད་ཅིག་རེར་ཡང་ཚོགས་ཆེན་པོ་གསོག་ཐུབ་པ་ཡིན། ནམ་མཁའ་མཛོད་ཀྱི་ཡོ་བྱད་དང་ཀུན་ཏུ་བཟང་པོའི་མཆོད་སྤྲིན་ཞེས་པ་ཟད་པ་མེད་པ་ལ་མངའ་བརྙེས་པའི་དབང་གིས་དེ་འདྲ་འབྱུང་བ་ཡིན། ཞིང་ཁམས་དེ་ན་དགྲ་འདུལ་གཉེན་སྐྱོང་ཚོང་དང་སོ་ནམ་འཇིག་རྟེན་འཁོར་བའི་བྲེལ་ཟིང་མེད་པས་མི་ཚད། ཞི་བའི་མཐར་ལྷུང་བའི་ཉན་རང་ཕལ་བ་ཡང་ཡོད་པ་མ་ཡིན་པར་ཉན་ཐོས་དགྲ་བཅོམ་ཐེག་ཆེན་ལ་ཞུགས་པ་དང་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་ཏག་ཏག་གིས་གང་བས་ན། ཐམས་ཅད་ཀྱང་བླ་ན་མེད་པའི་ཆོས་ཐེག་པ་ཆེན་པོ་ཤ་སྟག་ལ་ལོངས་སྤྱོད་པ་དེས་ན་བསམ་གྱིས་མི་ཁྱབ་པའི་འཆི་འཕོ་ལ་སོགས་པ་ཡང་མེད་པས་བདེ་སྐྱིད་ཀྱི་ཡོན་ཏན་ཐམས་ཅད་རང་ཤུགས་འབད་མེད་ལྷུན་གྲུབ་ཏུ་འབྱུང་བའི་ཞིང་ཁམས་བདེ་བ་ཅན་དེར་སྐྱེ་བར་ཤོག་ཅིག་གསུངས་པ་ཡིན་ནོ།། དྲི་ཞིམ་རླུང་གིས་མེ་ཏོག་ཆར་ཆེན་འབེབས།། ཤིང་དང་ཆུ་ཀླུང་པདྨོ་ཐམས་ཅད་ལས།། ཡིད་དུ་འོང་བའི་གཟུགས་སྒྲ་དྲི་རོ་རེག། ལོངས་སྤྱོད་མཆོད་པའི་སྤྲིན་ཕུང་རྟག་ཏུ་འབྱུང་།། ཞེས་གསུངས་ཏེ། བཅུད་དེ་དང་འབྲེལ་བའི་སྣོད་ཀྱི་བཀོད་པ་གཞན་ཡང་། དྲི་ཞིམ་པོ་ཅན་གྱི་རླུང་ལངས་ནས་ཤིང་ལྗོན་པའི་ཡལ་ག་དང་ལོ་མ་དང་མེ་ཏོག་འབྲས་བུ་དང་བཅས་པ་ཐམས་ཅད་བསྒུལ་ཞིང་བསྐྱོད་པའི་སྐབས་སུ་མེ་ཏོག་གི་ཆར་ཆེན་པོ་འབེབས་པས་ཉམས་དགའ་བ་དང་། སྔ་དྲོའི་དུས་སུ་ཕྱོགས་བཞི་ནས་རླུང་འཇམ་པོ་ལངས་ཏེ་རིན་པོ་ཆེའི་ཤིང་ལྗོན་པ་ཁ་དོག་བཀྲ་ཞིང་ལྷའི་སྤོས་དྲི་ཞིམ་པོ་ཅན་གྱིས་བགོས་པ་དེ་དག་བསྐྱོད་ཅིང་བསྒུལ་ཚེ། ལྷའི་མེ་ཏོག་མཛེས་ཤིང་ལྟ་ན་སྡུག་པ་དྲི་ཞིམ་པོ་ཅན་ཤ་སྟག་འབེབས་ཤིང་མི་འགྲེང་བདུན་ཙམ་དུ་མེ་ཏོག་གིས་ཁྱབ་ཅིང་ཁེབས་པར་ཡིན་ནོ། །འདིའི་མི་འགྲེང་ཞེས་པ་ནིི་འུ་ཚོའི་ཞིང་ཁམས་འདིའི་མི་འགྲེང་གི་མིའི་ལུས་ཚད་དུ་བརྩིས་ན་ཆོག་པ་ཡིན། དེ་ལྟ་བུའི་ས་གཞི་མེ་ཏོག་གིས་ཁྱབ་པ་དེ་ལ་རྐང་པས་འདེགས་འཇོག་བྱས་ན་སོར་བཞི་ཙམ་མཐོ་དམའ་རུ་འགྱུར་ཞིང་། དྲི་ཞིམ་གྱི་རླུང་སྣ་ལ་ཕོག་པ་ཙམ་གྱིས་དགེ་སློང་འགོག་པ་ལ་སྙོམས་པར་ཞུགས་པའི་བདེ་བས་ཀྱང་མཚོན་དུ་མེད་པའི་བདེ་བ་ཆེན་པོ་ཐོབ་པ་ཡིན། སྔ་དྲོའི་དུས་དེ་འདས་མ་ཐག་ཏུ་མེ་ཏོག་སྔ་མ་རྣམས་རླུང་གིས་ཕྱགས་སོང་ན་ཡང་། མེ་ཏོག་གསར་བ་ཤ་སྟག་སྔར་བཞིན་དུ་དྲི་ཞིམ་པོའི་རླུང་གིས་འགྲེམ་ཅིང་། མེ་ཏོག་གི་ཆར་ཉིན་ལན་གསུམ་མཚན་ལན་གསུམ་ལ་འབེབས་པ་དང་། ཡང་སྔར་བཞིན་འགྲེམ་པ་དང་ཡང་བར་བར་ན་མེ་ཏོག་གི་ཆར་མི་འབེབས་པར་དབེན་ཞིང་ས་གཞིའི་ཡོན་ཏན་གྱིས་མཛེས་ཤིང་ཉམས་དགའ་བར་གནས་སོ། །དཔག་བསམ་གྱི་ཤིང་ལྗོན་པ་དང་ཤིན་ཏུ་མཛེས་ཤིང་ཡིད་དུ་འོང་བའི་མེ་ཏོག་པདྨོ་དང་། ཡན་ལག་བརྒྱད་ལྡན་གྱི་ཆུ་ཀླུང་ཉམས་དགའ་བ་ཐམས་ཅད་ལས་གང་ལ་གང་འདོད་ཀྱི་ཡིད་དུ་འོང་བའི་གཟུགས་མཛེས་པ། སྒྲ་སྙན་མོ། དྲི་ཞིམ་པ། རོ་མངར་བ། རེག་བྱ་འཇམ་པ་ལ་སོགས་པའི་ལོངས་སྤྱོད་མཆོད་པའི་སྤྲིན་ཕུང་རྣམས་དུས་རྟག་ཏུ་འབྱུང་བ་ཡིན་ནོ།། བུད་མེད་མེད་ཀྱང་སྤྲུལ་པའི་ལྷ་མོའི་ཚོགས།། མཆོད་པའི་ལྷ་མོ་དུ་མས་རྟག་ཏུ་མཆོད།། ཅེས་གསུངས་ཏེ། ཞིང་ཁམས་དེ་ན་སྔར་བཤད་པ་ལྟར་ཐ་མལ་མ་དག་པའི་བུད་མེད་མེད་ཀྱང་། སངས་རྒྱས་ཀྱིས་སྤྲུལ་བའི་ལྷའི་བུ་དང་བུ་མོའི་ཚོགས་དང་མཆོད་པའི་ལྷ་མོ་བརྒྱད་དང་བཅུ་དྲུག་དང་བདུན་སྟོང་ལ་སོགས་པས་གང་ཟག་རེ་རེ་ལ་ཡང་རྟག་ཏུ་མཆོད་པ་སྣ་ཚོགས་ཀྱིས་མཆོད་པ་ཡིན་ནོ།། འདུག་པར་འདོད་ཚེ་རིན་ཆེན་གཞལ་ཡས་ཁང་།། ཉལ་བར་འདོད་ཚེ་རིན་ཆེན་ཁྲི་བཟང་སྟེང་།། དར་ཟབ་དུ་མའི་མལ་སྟན་སྔས་དང་བཅས།། ཞེས་གསུངས་ཏེ། འགྲོ་བར་མི་འདོད་པར་སྟན་ལ་འདུག་པར་བསམ་ཚེ། རིན་པོ་ཆེའི་གཞལ་ཡས་ཁང་གི་ནང་དུ་འདོད་དགུའི་ཡོན་ཏན་བསམ་གྱིས་མི་ཁྱབ་པ་ལ་དབང་འབྱོར་ནས་དམ་པའི་ཆོས་ཀྱི་དགའ་སྟོན་གྱིས་དུས་འདའ་བ་དང་། ཡང་འདུག་པར་མི་འདོད་པར་ཉལ་ཞིང་འཕྲེས་པར་འདོད་པའི་ཚེ། རིན་པོ་ཆེའི་གཞལ་ཡས་ཁང་ན་དར་ཟབ་སྣ་ཚོགས་པའི་མལ་སྟན་འཇམ་པོ་སྔས་དང་བཅས་པ་རིན་ཐང་དང་བྲལ་བ་ཉམས་དགའ་བའི་ཡོན་ཏན་ཅན་འབྱུང་བ་ཡིན་ནོ།། བྱ་དང་ལྗོན་ཤིང་ཆུ་ཀླུང་རོལ་མོ་སོགས།། ཐོས་པར་འདོད་ཚེ་སྙན་པའི་ཆོས་སྒྲ་སྒྲོགས།། མི་འདོད་ཚེ་ན་རྣ་བར་སྒྲ་མི་གྲགས།། བདུད་རྩིའི་རྫིང་བུ་ཆུ་ཀླུང་དེ་རྣམས་ཀྱང་།། དྲོ་གྲང་གང་འདོད་དེ་ལ་དེ་ལྟར་འབྱུང་།། ཡིད་བཞིན་འགྲུབ་པའི་ཞིང་དེར་སྐྱེ་བར་ཤོག། ཅེས་གསུངས་ཏེ། སྤྲུལ་བའི་བྱ་ཀ་རན་ཏ་ལ་སོགས་པ་སྐད་སྙན་གདངས་ཀྱི་འགྱུར་ཁུག་ཅན་དང་། ལྗོན་ཤིང་རླུང་གི་བསྒུལ་བའི་སྒྲ་དབྱངས་སྙན་མོ་དང་། ཆུ་ཀླུང་དལ་གྱིས་འབབ་པའི་འཇམ་དལ་གྱི་སྒྲ་དང་། ལྷའི་རོལ་མོ་ལ་སོགས་པས་ཉན་པར་སྤྲོ་ནས་ཐོས་པར་འདོད་ཚེ་དཀོན་མཆོག་གསུམ་དང་ས་བཅུ་ཕར་ཕྱིན་དྲུག་ལ་སོགས་པའི་ཆོས་སྒྲ་སྒྲོག་ནས། གདངས་སྙན་པོ་དང་དབྱངས་སྙན་པོའི་ཚུལ་གྱིས་དྲངས་ནས་ཆོས་ཀྱི་དོན་དེ་དག་རྗེས་སུ་དྲན་པ་དང་མི་འབྲལ་ལ། ཡང་གལ་ཏེ་ནང་དུ་ཡང་དག་འཇོག་གི་ཏིང་ངེ་འཛིན་ལ་མཉམ་པར་འཇོག་པ་ལྟ་བུའི་ཚེར་ཕྱིའི་སྒྲ་ཉན་པར་མི་འདོད་ན། རྣ་བར་སྒྲ་མི་གྲགས་པར་དབེན་ཞིང་འཇམ་ཐིང་ངེར་གནས་པ་དང་། དེ་བཞིན་དུ་བདུད་རྩིའི་ཆབ་རྒྱུན་དུ་གྱུར་པའི་རྫིང་བུ་དང་ཆུ་ཀླུང་དལ་གྱིས་འབབ་པ་རྣམས་ཀྱང་། དྲོ་བར་འདོད་ན་ནི་དྲོན་པོ་དང་། གྲང་ཞིང་བསིལ་བར་འདོད་ན་དེ་ལྟར་བསིལ་བར་གྱུར་བ་དང་། ཁྲུས་བྱེད་ཚེ་རྫིང་བུ་ལ་ལུས་ནུབ་ཙམ་དང་། ཕྱེད་ནུབ་པ་ལ་སོགས་པ་ཆེ་ཆུང་རང་གིས་གང་འདོད་པ་ལྟར་དུ་ཡིད་བཞིན་ཏུ་འགྲུབ་པའི་ཞིང་ཁམས་དེར་སྐྱེ་བར་ཤོག་ཅིག དེ་ཡན་ཆད་ཀྱིས་བདེ་བ་ཅན་གྱི་ཞིང་ཁམས་ཀྱི་སྣོད་བཅུད་ཀྱི་ཡོན་ཏན་གྱི་བཀོད་པ་བཤད་ནས། ལྔ་བ་ཞིང་གི་གཙོ་བོ་མགོན་པོ་འོད་དཔག་མེད་ཀྱི་ཡོན་ཏན་ཡིད་ལ་བྱས་ཏེ་ཞབས་འབྲིང་དང་བསྟན་པ་འཛིན་པ་སོགས་ལ་སྨོན་པ། ད་ནི་ཞིང་གི་གཙོ་བོ་མགོན་པོ་འོད་དཔག་མེད་ཀྱི་ཡོན་ཏན་དང་། དེའི་འཁོར་རྣམ་པ་གཉིས་ཀྱི་ཡོན་ཏན་ལ་སོགས་པ་ཡིད་ལ་བྱས་ཏེ། དེའི་ཞབས་འབྲིང་དང་བསྟན་པ་འཛིན་པ་སོགས་ལ་སྨོན་ལམ་འདེབས་པ་ནི། ཞིང་དེར་རྫོགས་པའི་སངས་རྒྱས་འོད་དཔག་མེད།། བསྐལ་པ་གྲངས་མེད་མྱ་ངན་མི་འདའ་བཞུགས།། དེ་སྲིད་དེ་ཡི་ཞབས་འབྲིང་བྱེད་པར་ཤོག། ཅེས་གསུངས་ཏེ། ཞིང་ཁམས་དེ་ན་ད་ལྟ་དངོས་སུ་བཞུགས་པའི་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པའི་སྐུ་ཚེ་དཔག་ཏུ་མེད་པ་ཡིན་པས་ན་ཚད་གཟུང་དུ་མེད་པ་ཡིན་ལ། སངས་རྒྱས་འོད་དཔག་མེད་བསྐལ་བ་གྲངས་མེད་དུ་མྱ་ངན་ལས་མི་འདའ་བར་ཇི་སྲིད་དུ་བཞུགས་པ་དེ་སྲིད་ཀྱི་བར་དུ་བདག་གིས་སངས་རྒྱས་དེའི་ཞབས་འབྲིང་དང་སངས་རྒྱས་དེ་ལ་བསྙེན་བཀུར་བྱེད་པར་ཤོག་ཅིག ནམ་ཞིག་འོད་དཔག་མེད་དེ་ཞི་བར་གཤེགས།། བསྐལ་པ་གངྒཱའི་ཀླུང་གི་བྱེ་མ་སྙེད།། གཉིས་ཀྱི་བར་དུ་བསྟན་པ་གནས་པའི་ཚེ།། རྒྱལ་ཚབ་སྤྱན་རས་གཟིགས་དང་མི་འབྲལ་ཞིང་།། དེ་ཡི་ཡུན་ལ་དམ་ཆོས་འཛིན་པར་ཤོག། ཅེས་གསུངས་ཏེ། སངས་རྒྱས་ཆོས་ཀྱི་སྐུ་ལ་སྐྱེ་འཆི་བགྲེས་རྒུད་མི་མངའ་ན་ཡང་། ཞིང་ཁམས་འདི་ནི་མཆོག་གི་སྤྲུལ་པའི་སྐུའི་ཞིང་ཁམས་ཡིན་ཕྱིར། ནམ་ཞིག་འོད་དཔག་མེད་དེ་གཟུགས་སྐུ་ཆོས་དབྱིངས་སུ་ཐིམ་ཞིང་གཤེགས་པའི་ཚུལ་བསྟན་ནས་བསྐལ་པ་གངྒཱའི་ཀླུང་གི་བྱེ་མ་སྙེད་གཉིས་ཀྱི་བར་དུ་སངས་རྒྱས་དེའི་ལུང་རྟོགས་ཀྱི་བསྟན་པ་གནས་པ་ཡིན་ལ། དེའི་ཚེ་ན་འོད་དཔག་མེད་ཀྱི་རྒྱལ་ཚབ་སྤྱན་རས་གཟིགས་ཡིན་པས་བདག་སོགས་སེམས་ཅན་དེ་ན་སྐྱེས་ཚད་ཐམས་ཅད་རྒྱལ་ཚབ་སྤྱན་རས་གཟིགས་དང་མི་འབྲལ་ཞིང་། དེའི་ཡུན་ལ་ལུང་རྟོགས་དམ་པའི་ཆོས་ཀྱི་མཛོད་འཛིན་ཅིང་། རྒྱལ་བསྟན་འཛིན་སྐྱོང་སྤེལ་གསུམ་བྱེད་ནུས་པར་ཤོག་ཅིག སྲོད་ལ་དམ་ཆོས་ནུབ་པའི་ཐོ་རེངས་ལ།། སྤྱན་རས་གཟིགས་དེ་མངོན་པར་སངས་རྒྱས་ནས།། སངས་རྒྱས་འོད་ཟེར་ཀུན་ནས་འཕགས་པ་ཡི།། དཔལ་བརྩེགས་རྒྱལ་བོ་ཞེས་བྱར་གྱུར་པའི་ཚེ།། ཞལ་བལྟ་མཆོད་ཅིང་དམ་ཆོས་ཉན་པར་ཤོག། ཅེས་གསུངས་ཏེ། དེ་ནས་མགོན་པོ་འོད་དཔག་མེད་སྐུ་དངོས་ཀྱི་བསྟན་པའི་གནས་ཚད་རྫོགས་ནས་སྲོད་ལ་བསྟན་པ་དམ་པའི་ཆོས་ནུབ་པའི་ཐོ་རེངས་ལ་བབ་པའི་སྐབས་སུ་སྤྱན་རས་གཟིགས་དེ་མངོན་པར་རྫོགས་པར་སངས་རྒྱས་ཏེ། སངས་རྒྱས་འོད་ཟེར་ཀུན་ནས་འཕགས་པའི་དཔལ་བརྩེགས་ཀྱི་རྒྱལ་བོ་ཞེས་བྱ་བར་གྱུར་པའི་ཚེ། དེའི་ཞལ་ལ་བལྟ་ཞིང་མཆོད་པས་མཆོད་ཅིང་དམ་ཆོས་མཉན་ནས་བསྟན་པ་ཡོངས་སུ་འཛིན་ནུས་པར་ཤོག་ཅིག སྐུ་ཚེ་བསྐལ་པ་བྱེ་བ་ཁྲག་ཁྲིག་ནི།། འབུམ་ཕྲག་དགུ་བཅུ་རྩ་དྲུག་བཞུགས་པའི་ཚེ།། རྟག་ཏུ་ཞབས་འབྲིང་བསྙེན་བསྐུར་བྱེད་པ་དང་།། མི་བརྗེད་གཟུངས་ཀྱིས་དམ་ཆོས་འཛིན་པར་ཤོག། ཅེས་གསུངས་ཏེ། སངས་རྒྱས་འོད་ཟེར་ཀུན་ནས་འཕགས་པའི་དཔལ་བརྩེགས་ཀྱི་རྒྱལ་པོ་དེའི་སྐུ་ཚེའི་ཚད་ཀྱང་བསྐལ་པ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དྲུག་ལ་བཞུགས་པ་ཡིན་ལ། དེའི་ཚེ་བདག་གིས་ཀྱང་དུས་རྟག་ཏུ་ཞབས་འབྲིང་བྱེད་པ་དང་བསྙེན་བཀུར་དང་། མཆོད་པ་བྱེད་པ་དང་མི་བརྗེད་པའི་གཟུངས་ཀྱིས་དམ་པའི་ཆོས་ཚིག་གཅིག་ཀྱང་མ་ལུས་པ་འཛིན་ནུས་པར་ཤོག་ཅིག དེ་ལྟ་བུའི་མི་བརྗེད་པའི་གཟུངས་ཐོབ་པའི་ཆེད་དུ་ད་ལྟ་ནས་གཞན་གྱིས་ཆོས་འཆད་པ་ལ་བར་ཆད་མི་བྱེད་པར་མཐུན་རྐྱེན་གང་ཐུབ་བསྒྲུབས་པ་དང་། བདེ་སྨོན་འདི་ལྟ་བུའི་ཚིག་དོན་ལ་སོགས་པ་གསུང་རབ་ཀྱི་ཚིག་རེ་ཡན་ཆད་བློ་ལ་འཛིན་ཅི་ཐུབ་བྱས་ན། མ་འོངས་པར་མི་བརྗེད་པའི་གཟུངས་ཐོབ་པར་ཕན་ཐོགས་ཆེན་པོ་ཡོད་པ་ཡིན་ནོ།། མྱ་ངན་འདས་ནས་དེ་ཡི་བསྟན་པ་ནི།། བསྐལ་པ་དུང་ཕྱུར་དྲུག་དང་བྱེ་བ་ཕྲག། འབུམ་ཕྲག་གསུམ་གནས་དེ་ཚེ་ཆོས་འཛིན་ཅིང་།། མཐུ་ཆེན་ཐོབ་དང་རྟག་ཏུ་མི་འབྲལ་ཤོག། ཅེས་གསུངས་ཏེ། སངས་རྒྱས་དེ་ཡང་སྐུ་མྱ་ངན་ལས་འདས་པའི་ཚུལ་བསྟན་ནས་དེའི་བསྟན་པའི་གནས་ཚད་བསྐལ་བ་དུང་ཕྱུར་དྲུག་དང་བྱེ་བ་ཕྲག་འབུམ་ཕྲག་གསུམ་དུ་གནས་པ་དེའི་ཚེ་བདག་གིས་དམ་པའི་ཆོས་ཀྱི་མཛོད་འཛིན་ཅིང་། རྒྱལ་ཚབ་མཐུ་ཆེན་ཐོབ་དང་ཡང་རྟག་ཏུ་མི་འབྲལ་བར་ཤོག་ཅིག དེ་ནས་མཐུ་ཆེན་ཐོབ་དེ་སངས་རྒྱས་ནས།། དེ་བཞིན་གཤེགས་པ་རབ་ཏུ་བརྟན་པ་ནི།། ཡོན་ཏན་ནོར་བུ་བརྩེགས་པའི་རྒྱལ་པོར་འགྱུར།། སྐུ་ཚེ་བསྟན་པ་སྤྱན་རས་གཟིགས་དང་མཉམ།། སངས་རྒྱས་དེ་ཡི་རྟག་ཏུ་ཞབས་འབྲིང་བྱེད།། མཆོད་པས་མཆོད་ཅིང་དམ་ཆོས་ཀུན་འཛིན་ཤོག། ཅེས་གསུངས་ཏེ། དེ་ནས་ནམ་ཞིག་མཐུ་ཆེན་ཐོབ་དེ་ཉིད་ཀྱང་སངས་རྒྱས་ནས་དེ་གཞིན་གཤེགས་པ་རབ་ཏུ་བརྟན་པ་ཡོན་ཏན་ནོར་བུ་བརྩེགས་པའི་རྒྱལ་པོར་འགྱུར་བར་ཡིན་ལ། སངས་རྒྱས་དེའི་སྐུ་ཚེའི་ཚད་དང་བསྟན་པའི་གནས་ཚད་ཚང་མ་སྤྱན་རས་གཟིགས་དང་ཡུན་མཉམ་པ་ཡིན་ཞིང་། སངས་རྒྱས་དེ་ཡི་ཡུན་ལ་ཡང་བདག་གིས་རྟག་ཏུ་ཞབས་འབྲིང་བྱེད་པ་དང་མཆོད་པའི་ཚོགས་དུ་མས་རྟག་ཏུ་མཆོད་ཅིང་། བསྟན་པ་དམ་པའི་ཆོས་ཀུན་འཛིན་ནུས་པར་ཤོག དེ་ནས་མཐར་ཐུག་རང་ཉིད་ཀྱང་སེམས་ཅན་གྱི་དོན་དུ་སངས་རྒྱས་པར་སྨོན་པ་ནི། དེ་ནས་བདག་གི་ཚེ་དེ་བརྗེས་མ་ཐག། ཞིང་ཁམས་དེའམ་དག་པའི་ཞིང་གཞན་དུ།། བླ་མེད་རྫོགས་པའི་སངས་རྒྱས་ཐོབ་པར་ཤོག། ཅེས་གསུངས་ཏེ། དེ་ནས་བདག་ཉིད་ཀྱང་ཞིང་དེར་གནས་པའི་ཚད་རྫོགས་ནས། ཚེ་དེ་བརྗེས་མ་ཐག་ཏུ་བསོད་ནམས་དང་ཡེ་ཤེས་ཀྱི་ཚོགས་གཉིས་སྔར་ནས་རྫོགས་ཟིན་པ་ཡིན་པས་ཞིང་ཁམས་བདེ་བ་ཅན་དེ་ཉིད་དུ་སངས་རྒྱས་པའམ། ཡང་ན་དག་པའི་ཞིང་ཁམས་གཞན་ཞིག་ལ་སངས་རྒྱས་ཀྱང་རུང་། མདོར་ན་བླ་ན་མེད་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་ཤོག་ཅིག རྫོགས་སངས་རྒྱས་ནས་ཚེ་དཔག་མེད་པ་ལྟར།། མཚན་ཐོས་ཙམ་གྱིས་འགྲོ་ཀུན་སྨིན་ཅིང་གྲོལ།། སྤྲུལ་པ་གྲངས་མེད་འགྲོ་བ་འདྲེན་པ་སོགས།། འབད་མེད་ལྷུན་གྲུབ་འགྲོ་དོན་དཔག་མེད་ཤོག། ཅེས་གསུངས་ཏེ། བདག་མངོན་པར་རྫོགས་པར་སངས་རྒྱས་པ་དེ་ཡང་མགོན་པོ་ཚེ་དཔག་མེད་པ་ཇི་ལྟ་བ་བཞིན་དུ། མཚན་ཐོས་པ་ཙམ་གྱིས་ཀྱང་འགྲོ་བ་ཀུན་གྱི་རྒྱུད་སྨིན་ཅིང་གྲོལ་ནུས་པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པ་དང་། སྤྲུལ་པ་གྲངས་མེད་དཔག་ཏུ་མེད་པ་ཕྱོགས་བཅུ་དུས་གསུམ་ཀུན་ཏུ་འགྱེད་ནས་འགྲོ་བའི་དེད་དཔོན་དུ་འགྱུར་བར་ཤོག་ཅིག དེ་ལྟ་བུའི་ཐུགས་རྗེ་དང་མཛད་པ་ཕྲིན་ལས་བསམ་གྱིས་མི་ཁྱབ་པ་མི་ཟད་རྒྱན་གྱི་འཁོར་ལོའི་བདག་ཉིད་དུ་འབད་ཅིང་རྩོལ་བ་མི་དགོས་པར་རྟག་ཁྱབ་ལྷུན་གྱིས་གྲུབ་པའི་ཚུལ་གྱིས་འགྲོ་དོན་དཔག་ཏུ་མེད་པ་བྱེད་ནུས་པར་ཤོག་ཅིག གཉིས་པ་མཚན་བཟུང་བའི་བྱིན་རླབས་ཚེ་འདིར་འབྱུང་བར་གསོལ་བ་འདེབས་པ། ད་ནི་སངས་རྒྱས་ཀྱི་མཚན་བཟུང་ནས་ཕན་ཡོན་བཤད་པའི་སྒོ་ནས་མཇུག་བསྡུ་བ་ནི། དེ་བཞིན་གཤེགས་པའི་ཚེ་དང་བསོད་ནམས་དང་།། ཡོན་ཏན་ཡེ་ཤེས་གཟི་བརྗིད་ཚད་མེད་པ།། ཆོས་སྐུ་སྣང་བ་མཐའ་ཡས་འོད་དཔག་མེད།། ཚེ་དང་ཡེ་ཤེས་དཔག་མེད་བཅོམ་ལྡན་འདས།། ཞེས་གསུངས་ཏེ། དེ་བཞིན་གཤེགས་པ་འོད་དཔག་མེད་ཀྱི་སྐུ་ཚེའི་ཡོན་ཏན་ཚད་མེད་པ་སྔར་བཤད་པ་ལྟར་དང་། བསྐལ་པ་གྲངས་མེད་མང་པོ་ལ་བསོད་ནམས་དང་ཡེ་ཤེས་ཀྱི་ཚོགས་གཉིས་རྒྱ་མཚོ་ལྟ་བུ་བསགས་པས་རྒྱུ་ཚོགས་གཉིས་ཀྱི་ཡོན་ཏན་ཚད་མེད་པ་དང་། འབྲས་བུ་སྟོབས་བཅུ་དང་མི་འཇིགས་པ་བཞི་ལ་སོགས་པ་སྤངས་རྟོགས་ཀྱི་ཡོན་ཏན་རྒྱ་མཚོ་ལྟར་ཚད་མེད་པ་དང་། སྐུ་མཐོང་ན་མི་མཐུན་པ་མེད་པས་བསོད་ནམས་ཆེན་པོའི་དཔལ་དེ་གཞན་གྱིས་མི་ནོན་པ་ཡིན་པས་ན་འགྲོ་བ་ལྷ་དང་བཅས་པའི་སྤྱོད་ཡུལ་ལས་འདས་པའི་གཟི་བརྗིད་ཚད་མེད་པ་ལ་སོགས་པ་གཟུགས་སྐུའི་ཡོན་ཏན་ཏེ། སྐུ་བཞི་དང་སྐུ་ལྔ་ལྷུན་གྱིས་གྲུབ་པའི་ཡོན་ཏན་ཚད་མེད་པ་རྣམས་ལ་དད་པ་རྩེ་གཅིག་གི་སྒོ་ནས་རྗེས་སུ་དྲན་ནས་མཚན་འཛིན་དགོས་པ་ཡིན་ལ། མཚན་བརྗོད་པའི་གནས་སྐབས་སུ་མཚན་གྱི་རྣམ་གྲངས་གང་ལྟར་གསོལ་ཡང་ཆོག་སྟེ། ཆོས་སྐུ་སྣང་བ་མཐའ་ཡས་ཞེས་བྱ་བ་དང་། འོད་དཔག་མེད་དང་། ཚེ་དང་ཡེ་ཤེས་དཔག་མེད་བཅོམ་ལྡན་འདས་སོགས་གང་གསོལ་ཡང་སྐུ་གསུམ་སྐུ་བཞི་སྐུ་ལྔ་འདུས་པའི་བདག་ཉིད་རྒྱལ་བ་འོད་སྣང་མཐའ་ཡས་དེ་ཉིད་ཡིན་ནོ།། གང་ཞིག་ཁྱེད་ཀྱི་མཚན་ནི་སུས་འཛིན་པ།། སྔོན་གྱི་ལས་ཀྱི་རྣམ་སྨིན་མ་གཏོགས་པར།། མེ་ཆུ་དུག་མཚོན་གནོད་སྦྱིན་སྲིན་པོ་སོགས།། འཇིགས་པ་ཀུན་ལས་སྐྱོབ་པར་ཐུབ་པས་གསུངས།། ཞེས་གསུངས་ཏེ། གང་ཞིག་བདེ་བར་གཤེགས་པ་ཁྱེད་ཀྱི་མཚན་གྱི་ཆ་ཤས་ཙམ་ཞིག་སྐྱེས་པ་བུད་མེད་ཁྱེའུ་དགེ་སྦྱོང་སོགས་སུ་ཞིག་གིས་འཛིན་ཅིང་ཐེ་ཚོམ་མེད་པར་གསོལ་བ་འདེབས་པའི་གང་ཟག་དེ་དག་ནི། ལས་དབང་ཆུ་ཀླུང་འཕྲལ་དུ་ག་ལ་ལྡོག །གསུངས་པ་ལྟར་དུ་སྔོན་གྱི་ལས་ཀྱི་རྣམ་སྨིན་བཟློག་ཐབས་མེད་པས་དེ་དག་མ་གཏོགས་པ། དེ་མིན་གློ་བུར་འཕྲལ་བྱུང་གི་བར་ཆད་ཀྱི་རྐྱེན་མེའི་དགྲ། ཆུ་ཡི་གནོད་པ། དུག་དང་མཚོན་གྱི་འཇིགས་པ། གནོད་སྦྱིན་དང་སྲིན་པོ་སོགས་གདོན་བགེགས་མ་རུངས་བའི་འཇིགས་པ་ལ་སོགས་པ་ལས་སྐྱོབ་ནུས་པ་སངས་རྒྱས་ཀྱི་བཀའ་བསླུ་བ་མེད་པ་འཆི་མེད་རྔ་སྒྲ་དང་འོད་མདོ་ལ་སོགས་པ་ལས་གསུངས་པ་ཡིན་པས་དེ་ལ་ཡིད་ཆེས་སྐྱེད་ནས་གསོལ་བ་འདེབས་དགོས་སོ།། བདག་ནི་ཁྱེད་ཀྱི་མཚན་འཛིན་ཕྱག་འཚལ་བས།། འཇིགས་དང་སྡུག་བསྔལ་ཀུན་ལས་བསྐྱབ་མཛད་གསོལ།། བཀྲ་ཤིས་ཕུན་སུམ་ཚོགས་པར་བྱིན་གྱིས་རློབས།། ཅེས་གསུངས། བདག་དད་པ་ཅན་གྱི་གང་ཟག་གིས་མགོན་པོ་ཁྱེད་ཀྱི་སྐུ་གསུང་ཐུགས་ཀྱི་གསང་བ་གསུམ་ལ་རྩ་བའི་བླ་མ་སོགས་སྐྱབས་གནས་ཐམས་ཅད་འདུས་པར་བསམས་ནས། ཡིད་ཁྱེད་ཤེས་ཀྱི་དད་པས་མཚན་ཡིད་ལ་འཛིན་ཅིང་ངག་གིས་བརྗོད་ཅིང་། ལུས་ཀྱིས་ཁྱེད་ལ་ཕྱག་འཚལ་བར་ཡིན་པས། མགོན་པོ་ཁྱེད་ཀྱིས་གནས་སྐབས་འཇིགས་པ་བརྒྱད་དང་བཅུ་དྲུག་ལ་སོགས་པ་དང་། མཐར་ཐུག་སྐྱེ་འཆི་བར་དོའི་སྡུག་བསྔལ་ཀུན་ལས་བསྐྱབ་པར་མཛད་དུ་གསོལ་ཞེས་སྙིང་ནས་གསོལ་བ་འདེབས་པ་དང་། ནམ་ཞིག་བདེ་བ་ཅན་དུ་སྐྱེས་ནས་སངས་རྒྱས་ཐོབ་པ་ལ་སོགས་པ་འདི་དང་ཕྱི་མའི་ལེགས་ཚོགས་འཕེལ་བའི་བཀྲ་ཤིས་དགེ་མཚན་ཕུན་སུམ་ཚོགས་པ་ཐོབ་པར་བྱིན་གྱིས་བརླབ་ཏུ་གསོལ་ཞེས་སྨོན་ལམ་བྱེད་དགོས་སོ། །དུས་སྙིགས་མའི་སྐབས་འདིར་མི་འདོད་པ་སྣ་དགུ་སོགས་མི་འདོད་པ་མང་པོ་འབྱུང་བ་དང་། སྔར་མ་དར་བའི་མི་ཕྱུགས་ནད་ཡམས་གཟའ་ཀླུ་རྒྱལ་གདོན་འབྱུང་པོས་འཚེ་བ་ལ་སོགས་པ་བསམ་གྱིས་མི་ཁྱབ་པ་དེ་ཚོ་བཟློག་ཐབས་རིམ་འགྲོ་ཅི་ཞིག་བྱས་རུང་། རྫོགས་པའི་སངས་རྒྱས་འོད་དཔག་མེད་སྐྱབས་གནས་ཀུན་འདུས་སུ་བཟུང་ནས་གསོལ་བ་ཐོབས་དང་དེ་བས་ལྷག་ཅིག་ཡོད་པ་མ་ཡིན། མདོ་ཉི་མའི་སྙིང་པོའི་ལས། སངས་རྒྱས་སྐྱབས་སུ་སེམས་ཅན་སུ་འགྲོ་བ། །བདུད་རྣམས་བྱེ་བས་བསད་པར་མི་ནུས་ཏེ། །ཚུལ་ཁྲིམས་ཉམས་ཤིང་བློ་ནི་འཁྲུགས་གྱུར་ཀྱང་། །དེ་ནི་ངེས་པར་སྐྱེ་བའི་ཕ་རོལ་འགྲོ། །ཞེས་གསུངས་པ་ཡིན་ནོ། །གནའ་ཞིག་ལ་ཚོང་པ་མང་པོ་ཞིག་རྒྱ་མཚོར་གྲུ་བཏང་ནས་ཚོང་ལ་སོང་བ་ན། རྒྱ་མཚོའི་ནང་ནས་ཆུ་སྲིན་ཆེན་པོ་ཞིག་གིས་གྲུ་བཟུང་ནས་མ་གཏོང་ནས་ཅི་བྱ་མེད་པར་གྱུར་དུས། མི་འགའ་རེས་འཇིག་རྟེན་པའི་ལྷ་གཞི་བདག་རི་དང་ཤིང་གི་ལྷ་ལ་གསོལ་བ་བཏབ་ཀྱང་ཕན་མ་ཐོགས། དེའི་ནང་ན་དགེ་བསྙེན་དེད་དཔོན་ཞིག་ཡོད་པ་དེས་སངས་རྒྱས་ལ་གསོལ་བ་བཏབ་ན་འཇིགས་པ་ལས་ཐར་པ་ཤེས་ཏེ་ཚོང་པ་ཐམས་ཅད་ལ་དེ་ལྟར་བསྐུལ་བས། ཐམས་ཅད་ཀྱིས་སངས་རྒྱས་ལ་ཕྱག་འཚལ་ལོ་ཞེས་བསྒྲགས་པས་ཆུ་སྲིན་གྱིས་གྲུ་བཏང་ནས་ཚོང་པ་ཐམས་ཅད་བདེ་བླག་ཏུ་འགྲོ་སར་ཐོན་པ་མ་ཟད། ཆུ་སྲིན་གྱིས་ཀྱང་སངས་རྒྱས་ཀྱི་མཚན་རྣ་ལམ་དུ་ཐོས་པའི་རྐྱེན་གྱིས་ལུས་ངན་དེ་བོར་ནས་ལྷ་ཡུལ་དུ་སྐྱེས་སོང་བའི་ལོ་རྒྱུས་ཡོད་པ་ཡིན་ནོ། །ཡང་མི་ཞིག་མཚན་མོ་ལམ་དུ་འགྲོ་སྐབས་ངལ་ཞིང་དུབ་སྟེ་ངལ་གསོ་ཞིག་བྱེད་དགོས་སྙམ་སྟེ། དུག་སྦྲུལ་ཉལ་བ་ཤིང་སྡོང་དུ་འཁྲུལ་སྟེ་སྟེང་དུ་བསྡད་པ་ན་སྦྲུལ་གྱིས་གསོད་པར་བརྩམ་ཚེ། དེ་མ་ཐག་རྗེ་བཙུན་འཕགས་མ་སྒྲོལ་མ་ལ་གསོལ་བ་བཏབ་པས་དེ་ལས་ཐར་བའི་ལོ་རྒྱུས་ཡོད་དོ། །དེ་བཞིན་དུ་སྔར་བཤད་པའི་རྒྱ་གར་དུ་འཆི་ཁར་སྨོན་ལམ་ལོག་འདེབས་བྱས་པའི་གནོད་སྦྱིན་འབྲོག་གནས་ནག་པོ་ཞེས་པའི་སྲིན་པོ་མི་གཟན་ཞིག་ཡོད་པ་དེས། འབྲོག་གནས་ཞེས་པའི་ས་ཆ་དེའི་ཁྱིམ་ཚང་ཐམས་ཅད་ཀྱི་བུ་རྣམས་རིམ་གྱིས་ཁྲལ་དུ་བསྡུས་ཏེ་གསོན་པོ་ཟོས་པ་ན། སྐབས་ཤིག་བཟའ་ཚང་ཉམ་ཆུང་གཉིས་ཀྱི་བུ་དེ་ཟ་རེས་ལ་བབ་ཚེ། མ་དེས་རྫོགས་པའི་སངས་རྒྱས་ལ་སྐྱབས་འགྲོ་བྱས་པས་སངས་རྒྱས་ཀྱིས་དེ་མཁྱེན་ནས་སྲིན་པོ་མི་གཟན་འབྲོག་གནས་འདུག་སའི་གནས་དེར་བྱོན་ནས། ཁོང་གིས་ཆོས་གསུངས་ཏེ་དཀོན་མཆོག་གསུམ་གྱི་སྐྱབས་འོག་ཏུ་བཙུད་ཀྱང་། བཟའ་མི་ཉམ་ཆུང་གཉིས་ཀྱིས་དེ་མ་ཤེས་ཏེ་བུ་ཁུར་ནས་ངུ་ཞོར་དུ་སྲིན་པོའི་སར་སོང་བས་སྲིན་པོས་ཟས་གཞན་དག་བླངས་ནས། བུ་འདི་བཅོམ་ལྡན་འདས་ལ་ཕུལ་ཞིག་ཟེར་བ་ལྟར་བྱས་པས། བཅོམ་ལྡན་འདས་ཀྱིས་བུ་དེ་ཁྱིམ་བདག་ལ་ཕྱིར་གནང་ནས་ཕྱོགས་གཉིས་ཀ་ལ་དམ་པའི་ཆོས་གསུངས་པ་ལྟ་བུ་སྟེ། སངས་རྒྱས་ལ་གསོལ་བ་བཏབ་ན་དེ་འདྲའི་འཇིགས་པ་ཆེན་པོའི་གནས་ལས་ཐར་པའི་ལོ་རྒྱུས་ཡོད་པ་ཡིན། ཁྱད་པར་དུ་དེ་རིང་ཁར་སང་གི་འདྲེ་རྒོད་གདུག་པ་ཅན་དྲག་པོས་མི་ཐུལ་ཞིང་ཞི་བས་འདུལ་བའི་དུས་ཡིན་པས། སེམས་ཅན་ལ་བྱམས་སྙིང་རྗེའི་ངང་ནས་སྐྱབས་འགྲོ་བྱེད་རྒྱུ་འདིས་མི་ཐུལ་བའི་ལྷ་འདྲེ་ཞིག་ཡོད་མི་སྲིད། ཁྱད་པར་དུ་ད་སྐབས་ཚེ་སྲོག་གློ་བུར་དུ་འཕྲོག་པའི་དུས་ནད་མ་ངེས་པ་མང་ལ། ནད་དེ་ཚོ་འགའ་རེ་ནི་སེམས་ཅན་དམུ་རྒོད་ངན་སེམས་ཅན་གཅིག་གིས་གཅིག་ལ་གནོད་སྐྱེལ་བྱེད་ཀྱི་དུག་རྫས་ངན་པའི་རྫས་སྦྱོར་གྱི་ཁུངས་ནས་ཡོང་བ་དང་། ཡང་འགའ་རེ་ནི་ཚོང་པ་ཧམ་སེམས་ཅན་གྱི་ཟས་རིགས་རྫུན་མའི་སྡེབ་སྦྱོར་གྱི་ཁུངས་ནས་ཡོང་བ་དང་། མང་ཆེ་བ་ནི་མི་ཡུལ་ལ་དགེ་བ་མེད་པས་ལྷ་ཕམ། ལྷ་མིན་ནག་ཕྱོགས་གཡུལ་ལས་རྒྱལ་བའི་ཁ་རླངས་འདོད་ཁམས་ཀྱི་ཡུལ་ལ་བཏང་འོང་དུས་གཉན་ནད་མི་འདྲ་བ་མང་པོ་དར་ཡོང་བར་གསུངས་ཤིང་། དེའི་དུས་སུ་མིའི་ཁ་རྗེ་དབང་ཐང་བསོད་ནམས་མར་ཉམས་ནས། རྩི་ཤིང་ལ་བཅུད་མེད། སྨན་གྱི་ནུས་པ་ཆུང་བས་སྨན་ཇི་ལྟར་བཏུངས་ཀྱང་ནད་དྲག་ཐབས་མེད་པར་འགྱུར་བ་དང་། གཅོད་ཅིང་གཤགས་པའི་ཕྱི་ལུགས་སྨན་བཅོས་ཀྱི་ཐབས་འདི་ཚོས་གནས་སྐབས་ཀྱི་གཟེར་འཇོམས་དང་འཕྲལ་སེལ་ཙམ་གྱི་ཕན་རེ་ཐོགས་པ་ཙམ་མ་གཏོགས། དུག་གསུམ་ལས་གྱུར་པའི་རླུང་མཁྲིས་བད་ཀན་འདུ་བའི་ནད་རིགས་རྩ་བ་ནས་འཇོམས་བྱེད་ལ་རྒྱུད་བཞིའི་དགོངས་དོན་བོད་ལུགས་གསོ་རིགས་ཀྱི་སྨན་པའི་རྫས་སྦྱོར་འདི་ཁྱད་ཆོས་ཅན་ཡིན་ཡང་། གཙོ་བོ་སངས་རྒྱས་འོད་དཔག་མེད་ལ་གསོལ་བ་བཏབ་ན་དུས་མིན་འཆི་བའི་འཇིགས་པ་བཟློག་པ་གོང་དུ་བཤད་པ་ལྟར་དུ་འོད་མདོ་དང་། འཆི་མེད་རྔ་སྒྲ་དང་། ཚེ་མདོ་ལ་སོགས་པ་ནས་གསུངས་པ་ཡིན། དེ་ལྟར་གསོལ་བ་བཏབ་ན་བྱིན་རླབས་འབྱུང་བ་ནི་ཡིད་གཉིས་ཐེ་ཚོམ་མེད་པ་ཞིག་གིས་གསོལ་བ་བཏབ་ན་དེ་ལྟར་འགྲུབ་པ་མ་གཏོགས། ཐེ་ཚོམ་དང་བཅས་ཏེ་གསོལ་བ་བཏབ་ན་ཕན་ཐོགས་ཆུང་བ་ཡིན། དེས་ན་འོད་དཔག་མེད་ཀྱི་མཚན་བཟུང་ནས་གསོལ་བ་བཏབ་པས་གནས་སྐབས་ཚེ་འདིའི་ནད་གདོན་བར་ཆད་ཐམས་ཅད་ཞི་བར་མ་ཟད། མཐར་ཐུག་བདེ་བ་ཆེན་པོའི་ཞིང་ཁམས་ལ་སྐྱེ་བ་ཡིན། མདོ་ལས་སངས་རྒྱས་བཅོམ་ལྡན་འདས་ཀྱིས། འདི་ནས་ནུབ་ཀྱི་ཕྱོགས་རོལ་ན། །བདེ་བ་ཅན་གྱི་འཇིག་རྟེན་ཁམས། །དེ་ན་རྫོགས་པའི་སངས་རྒྱས་བཞུགས། །དེ་བཞིན་གཤེགས་པ་ཚེ་དཔག་མེད། །སུ་ཞིག་དེ་ཡི་མཚན་བརྗོད་ན། །ཞིང་ཁམས་དེ་ན་སྐྱེ་བར་འགྱུར། །དེ་ལྟར་གསུངས་ཡོད་པས་བདེ་བར་གཤེགས་པའི་བཀའ་བསླུ་བ་མེད་པ་ཡིན་པས་ཚང་མས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ། །ཞེས་པ་འདི་ཚར་གྲངས་མང་པོ་གསོག་དགོས། མི་སྐྱ་ཕོ་མོ་ཐམས་ཅད་ཀྱིས་ཞིང་ཁམས་བདེ་བ་ཅན་དུ་འགྲོ་བསམ་ན་འདི་ཏག་ཏག་གསོག་དགོས། མི་རེས་འོད་མཚན་བྱེ་ཆུང་རེ་སོགས་ཐུབ་ངེས་བྱེད་དགོས། ད་རེས་ཀྱི་ཞིང་ཁྲིད་འདིའི་ནང་ལ་ཡོད་ཚད་ཀྱིས་འོད་མཚན་བྱེ་བ་རེ་ཆེ་སོག་ཆུང་སོག་བྱེད་རྒྱུ་ནི་གནད་ཆེ། བླ་མ་སེར་མོ་བ་ཡིན་ན་བཀའ་མདོ་རྒྱུད་ལུང་མན་ངག་གི་བསྐྱེད་རྫོགས་དང་འབྲེལ་བའི་ཆོ་ག་གཞན་དག་ཡོད་རྒྱུ་རེད། དེས་མ་འཐུས་པ་ཅི་ཡོད། འོན་ཀྱང་སེར་གྱི་སེར་སྐལ་དང་སྐྱ་བོའི་ཆོས་སྐལ་གཉིས་ཀ་མེད་ན། འདྲ་བེའུ་ཁ་འཆལ་མུ་གེས་འཆི་རྒྱུ་ཡོད་པས་རང་སེམས་དེ་ཡང་རང་གིས་མ་བརྟགས་ཐབས་མེད་པ་ཡིན། འོད་མཚན་དང་ཡིག་དྲུག་སོགས་ཆོས་ཆུང་ཆུང་རེད་བསམ་རྒྱུ་ཡོད་པ་མ་ཡིན། བླ་མ་རྩ་ཆེན་འགའ་རེས་མ་ཎི་སཏྭ་གསུངས་པའི་སྒྲ་ཐག་རེ་ཉན་ནས། དེ་ལ་ཨ་ཕྱི་རྒན་མོ་ཞིག་ཉིན་ཁུག་ལ་བསྡད་ནས་འདོན་པ་ཞིག་དང་འདྲ་འདུག་ཟེར་ནས་འཕྱ་རྒྱུ་དང་ཁྲེལ་ལབ་བྱེད་ག་ལ་རུང་། དེ་འདྲའི་སྙིང་ཁྲེལ་གྱིས་འཕྱ་ཁུལ་བྱེད་པ་ནི་གནད་མ་ཤེས་པའི་གླེན་རྟགས་རང་གིས་བསྟན་པ་རེད། ཆོས་ཕུང་བརྒྱད་ཁྲི་བཞི་སྟོང་གི་སྙིང་པོ་གསུང་མཆོག་ཡི་གེ་དྲུག་མ་ཡིན་ན། དེའི་དོན་ཕྱོགས་ཙམ་ཡང་མི་ཤེས་པ་ཞིག་གིས་དེ་འདྲའི་རྡོལ་གཏམ་བཤད་ན་གང་ཟག་ལ་བརྟེན་ནས་ཆོས་སྤོང་གི་ལས་ངན་བསགས་པ་ཡིན་ནོ། །ཚང་མས་ཉལ་ཕྱག་རེ་མ་ཆགས་པར་གྱིས། བོད་མགོ་ནག་ཆོས་ས་ཆོས་ཡུལ་གྱི་མི་ཞིག་ཡིན་དུས་ཕྱུགས་ཉལ་ཉལ་དང་། ཕྱུགས་ལང་ལང་མ་བྱེད། བླ་སེར་ཚོར་ཞུ་ཅི་དགོས་ཀྱང་། ཐུན་བཞིའི་རྣལ་འབྱོར་ཆག་མེད་མ་ཐུབ་རུང་། ཡི་དམ་རེའི་བསྙེན་ཚད་དང་། རྒྱུན་དུ་ཞལ་འདོན་ཉམས་ལེན་རེ་ཆག་མེད་དགོས་མ་གཏོགས། ཤི་བོ་ཡར་འདྲེན་གྱི་སྔས་མགོའི་གཏད་ས་རེད། མི་སྐྱ་ཕོ་མོས་བླ་སེར་སྐ་རགས་སེར་པོའི་རྟགས་འཆང་ཚད་ཡན་ལ་གུས་པ་གྱིས། མི་ཁོ་རང་ལ་མ་དད་རུང་དེའི་གྱོན་རྒྱུ་སངས་རྒྱས་ཀྱི་ན་བཟའ་ངུར་སྨྲིག་གི་རྒྱལ་མཚན་དེར་གུས་པ་གྱིས་དང་བསོད་ནམས་ཁྱོད་རང་ལ་ཐོབ་པ་ཡིན། སྨོན་ལམ་འགྲུབ་པའི་རྒྱུ་བདེན་ཚིག་གཟུངས་སྔགས་དང་བཅས་པ་བརྗོད་པ། གསུམ་པ་སྨོན་ལམ་འགྲུབ་པའི་མཐུན་འགྱུར་བདེན་ཚིག་དང་གཟུངས་སྔགས་ཀྱིས་བྱིན་གྱིས་བརླབ་པ། སངས་རྒྱས་སྐུ་གསུམ་བརྙེས་པའི་བྱིན་རླབས་དང་།། ཆོས་ཉིད་མི་འགྱུར་བདེན་པའི་བྱིན་རླབས་དང་།། དགེ་འདུན་མི་ཕྱེད་འདུན་པའི་བྱིན་རླབས་ཀྱིས།། ཇི་ལྟར་སྨོན་ལམ་བཏབ་བཞིན་འགྲུབ་པར་ཤོག། ཅེས་གསུངས་ཏེ། སྤྱིར་ན་སྨོན་ལམ་བཏབ་ནས་འགྲུབ་རྒྱུ་དེ་རྒྱུ་ཚོགས་བསགས་རྒྱ་ཆེན་པོ་སྔོན་དུ་སོང་བ་ལ་ལྟོས་པ་ནི་གོང་དུ་བཤད་པ་ལྟར་ཡིན་པ་དེས་ན་ས་ཐོབ་འཕགས་ཆེན་གྱི་སེམས་དཔའ་ཐམས་ཅད་ཀྱིས་སྨོན་ལམ་ཅི་བཏབ་པ་ཐམས་ཅད་འགྲུབ་པ་དང་། ཡང་ཞིང་ཁྱད་པར་ཅན་ལ་བརྟེན་པ་དང་། ལྷག་བསམ་རྣམ་པར་དག་པས་སྨོན་ལམ་བཏབ་ན་འགྲུབ་སླ་བའང་གསུངས་ཤིང་། འོན་ཀྱང་རང་སྟོབས་ཀྱིས་སྨོན་ལམ་འགྲུབ་པའི་ནུས་པ་མེད་ན་གཞན་དཀོན་མཆོག་གི་མཐུ་ནུས་ལ་བརྟེན་ནས་བདེན་བརྡར་བྱས་ན། དཀོན་མཆོག་གསུམ་གྱིས་བསླུ་བ་མི་སྲིད་པ་ཡིན་པས་རང་གིས་སྨོན་ལམ་བཏབ་པ་ལ་མཐུན་འགྱུར་མཛད་དེ་འགྲུབ་ངེས་པ་ཡིན། ནམ་རྒྱུན་ང་ཚོས་སངས་རྒྱས་སྐུ་གསུམ་བརྙེས་པའི་བྱིན་རླབས་དང་ཞེས་རྟག་པར་འདོན་ན་ཡང་། དེའི་དོན་སོགས་ལ་དེ་ཙམ་དོ་སྣང་བྱེད་ཀྱིན་ཨེ་ཡོད་མི་ཤེས། དེས་ན་སྐབས་འདིའི་སངས་རྒྱས་ཞེས་པ་ནི་མ་རིག་པའི་གཉིད་ལས་སངས་ཤིང་མཁྱེན་པའི་ཡེ་ཤེས་རྒྱས་པས་ན་སངས་རྒྱས་དང་། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་ན་སངས་རྒྱས་ཉིད། །ཅེས་གསུངས་པ་ལྟར་དུ་སངས་རྒྱས་དཀོན་མཆོག་ཆོས་སྐུ། ལོངས་སྐུ། སྤྲུལ་སྐུ་སྟེ་སྐུ་གསུམ་དབྱེར་མེད་གཅིག་ཏུ་འདུས་པའི་གོ་འཕང་བརྙེས་པའི་བདག་ཉིད་དེའི་བྱིན་རླབས་དང་། ཆོས་ཉིད་དེ་བཞིན་ཉིད། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པ་ལྟར་ནམ་ཡང་མི་འགྱུར་བ་བདེན་པ་བསླུ་བ་མེད་པའི་མཚན་ཉིད་ཅན་དེའི་བྱིན་རླབས་དང་། འཕགས་པའི་དགེ་འདུན་གྱི་ཐུགས་རྒྱུད་རྟོགས་པའི་ཡོན་ཏན་ནི་བདུད་ལ་སོགས་པ་སུ་ཞིག་གིས་ཀྱང་ཐ་དད་དུ་སོ་སོར་མི་ཕྱེད་པར་འདུས་པའི་གང་ཟག་བཞི་ཡན་ཆད་ཚོགས་པའི་དགེ་འདུན་འདུས་པའི་བྱིན་རླབས་ལྷག་པར་དུ་ཆེ་བ་ཡིན་པས་ན་དེ་ལྟ་བུའི་འདུས་པའི་བྱིན་རླབས་དང་བདེན་པ་ཆེན་པོའི་མཐུས། གོང་དུ་རང་གི་ཡིད་ལ་བསམ་པའི་དོན་དེ་ཉིད་སྨོན་ལམ་གྱི་ཚིག་གི་སྟེང་ནས་མང་དུ་བཏབ་པ་དེ་དག་ཐམས་ཅད་གེགས་མེད་ཡིད་ལ་ཇི་ལྟར་འདོད་པ་བཞིན་དུ་འགྲུབ་པར་ཤོག་ཅིག་ཅེས་བདེན་དཔང་བརྗོད་བའི་ཚིག་འདི་སྨོན་ལམ་ནམ་འདེབས་ཀྱི་སྐབས་སུ་དྲན་ཐུབ་ན་བཟང་ངོ། །སྨོན་ལམ་འགྲུབ་པའི་མཐུན་འགྱུར་བདེན་ཚིག་གི་གཟུངས་སྔགས་ནི། དཀོན་མཆོག་གསུམ་ལ་ཕྱག་འཚལ་ལོ། །ཞེས་པས་སྣ་དྲངས་ཏེ། ཏདྱ་ཐཱ། པཉྩ་ནྡྲི་ཡ་ཨ་ཝ་བོ་དྷ་ནི་སྭཱ་ཧཱ། ཞེས་གསུངས་པ་འདི་ནི་དབང་པོ་ལྔ་ཡོངས་སུ་དག་པའི་གཞི་ཚུགས་པའི་དོན་ཡིན་པར་གསུངས་ཤིང་། མདོར་ན་སྨོན་ལམ་འགྲུབ་པའི་འགྱུར་སྔགས་ཡིན་པས་སྨོན་ལམ་འགྲུབ་པའི་གཟུངས་སོ། །ཞེས་གསུངས་པ་ཡིན། ཕྱག་གི་འགྱུར་སྔགས་ནི། དཀོན་མཆོག་གསུམ་ལ་ཕྱག་འཚལ་ལོ། །ཞེས་པས་སྣ་དྲངས་ཏེ། ན་མོ་མཉྫུ་ཤྲི་ཡེ། ན་མཿསུ་ཤྲི་ཡེ། ན་མོ་ཨུཏྟ་མ་ཤྲི་ཡེ་སྭཱ་ཧཱ། ཞེས་གསུངས་ཏེ། འདིའི་དོན་རིམ་པ་བཞིན་ཏུ། འཇམ་པའི་དཔལ་ལ་ཕྱག་འཚལ་ལོ། །ལེགས་པའི་དཔལ་ལ་ཕྱག་འཚལ་ལོ། །མཆོག་གི་དཔལ་ལ་ཕྱག་འཚལ་ལོ། །དེ་དག་གི་ཆེད་དུ་གཞི་ཚུགས་ཤིག་ཅེས་པའི་དོན་ཡིན་པར་གསུངས་འདུག འདི་དག་དེ་བཞིན་གཤེགས་པ་དེ་དག་གིས་བྱིན་གྱིས་བརླབས་པའི་གཟུངས་སྔགས་ཁྱད་པར་ཅན་ཡིན་པས་ཚར་རེ་བརྗོད་ན་ཕྱག་ལ་སོགས་པའི་དགེ་བ་མང་པོ་ཡར་འཕེལ་བ་དང་། སྨོན་ལམ་འགྲུབ་པའི་ཐབས་ཁྱད་པར་ཅན་ཡིན་པ་ཆགས་མེད་ཁོང་རང་གིས་ཀྱང་འདི་ནས་མཛད་བྱང་གི་ཡིག་ཆུང་དང་སྦྲེལ་ནས་གསུངས་པ་སྟེ། ཞེས་བརྗོད་ནས་ཞེས་པ་ནི་གོང་གི་སྔགས་དེ་དག་བཏོན་བཞིན་དུ་ཕྱག་གསུམ་འཚལ་ན་འབུམ་ཐེར་དུ་འགྱུར་བར་གསུངས། དེ་ནས་རབ་བརྒྱ་ཕྲག འབྲིང་ཅི་ནུས། ཐ་མ་ཡང་ཕྱག་བདུན་ཡན་འཚལ། རབ་འདི་མ་ཆག་པ་ཞེས་པ་སྟེ་བདེ་སྨོན་འདི་ཉིན་རེ་ཚར་རེ་འདོན་རྒྱུ་མ་ཆག་ན་ཤིན་ཏུ་ལེགས་ཤིང་། འབྲིང་ལོ་ཟླ་ཙམ་དུ་མ་ཆག་པ། ཐ་མ་ནམ་སྐབས་སུ་ཁ་ནུབ་ཏུ་གྱུ་ནས་བདེ་བ་ཅན་གྱི་ཞིང་ཁམས་ཡིད་ལ་དྲན་ཞིང་འོད་དཔག་མེད་ལ་ཐལ་མོ་སྤྱར་ཏེ་དད་པ་རྩེ་གཅིག་གིས་བཏོན་ན། ཚེ་འདིར་ཚེའི་བར་ཆད་སེལ། ཕྱི་མ་བདེ་བ་ཅན་དུ་སྐྱེ་བར་ཐེ་ཚོམ་མེད་དོ། །འོད་མདོ་ཞིང་བཀོད་མདོ་དང་། པདྨ་དཀར་པོ་འཆི་མེད་རྔ་སྒྲ་སོགས་ཀྱི་དགོངས་པ་ཡིན། ཞེས་དགེ་སློང་རཱ་ག་ཨ་སྱས་སྦྱར་བས་འགྲོ་བ་སེམས་ཅན་མང་པོ་བདེ་བ་ཅན་དུ་སྐྱེ་བའི་རྒྱུར་གྱུར་ཅིག །ཅེས་གསུངས་ཏེ། མཇུག་ཡོངས་སུ་རྫོགས་པའི་དགེ་བ་སེམས་ཅན་ཐམས་ཅད་རྫོགས་བྱང་དུ་འགོད་པར་བྱེད་པའི་སྨོན་ལམ་གྱིས་མཐའ་བརྒྱན་པར་མཛད་པའོ། །དེའི་ཡན་ཆད་ང་ཚོས་མཁས་གྲུབ་ཀརྨ་ཆགས་མེད་ཀྱིས་མཛད་པའི་བདེ་བ་ཅན་དུ་སྐྱེ་བའི་སྨོན་ལམ་བོད་ཁམས་ཡོངས་རྫོགས་ལ་ཁྱབ་རྒྱ་ཆེ་བའི་འགྲོ་དོན་ཅན་འདིའི་སྟེང་ནས། ཞིང་ཁྲིད་བཤད་ནས་མཇུག་ཡོངས་སུ་རྫོགས་པའི་དགེ་བ་བསྔོ་ས་ལ་ཐུག་པ་རེད། སྤྱིར་ན་རང་གཞན་བར་གསུམ་སེར་སྐྱ་ཕོ་མོ་རྒན་དར་གཞོན་གསུམ་སྟེ། སྲོག་ཆགས་ཚད་རྣམ་ཤེས་ཡོད་ཚད་ཐམས་ཅད་བདེ་བ་འདོད་མཁན་ཞིག་མ་གཏོགས་སྡུག་བསྔལ་འདོད་མཁན་གཅིག་ཀྱང་ཡོད་པ་མ་ཡིན་ཡང་། མཐར་ཐུག་གཏན་གྱི་བདེ་བ་སྡུག་བསྔལ་གྱི་ཤུལ་རྗེས་ཙམ་ཡང་མེད་པ་ནི་རྫོགས་བའི་སངས་རྒྱས་ཀྱི་གོ་འཕང་ཡིན་པས། དེ་ཉིད་ཐོབ་པར་བྱེད་པ་ལ་བྱང་ཆུབ་སེམས་དཔའི་བྱ་དཀའ་བའི་སྤྱོད་པ་རྒྱ་མཚོ་ལྟ་བུ་ལ་བསླབས་ནས་རྫོགས་སྨིན་སྦྱངས་གསུམ་བྱེད་དགོས། མདོ་ལམ་ལ་ཆ་བཞག་ན་བསྐལ་བ་གྲངས་མེད་མང་པོ་ཞིག་ལ་འགོར་བ་དང་། སྔགས་ལམ་ནས་བཤད་ཡོང་ནའང་གསང་སྔགས་མྱུར་ལམ་ཐབས་མང་དཀའ་བ་མེད་པ་དང་། ཚེ་གཅིག་ལུས་གཅིག་གིས་སངས་རྒྱས་རྙེད་པའི་ཆོས་ཡིན་ཡང་། ཆོས་ཐུན་མིན་ཡིན་པ་མ་ཟད་གང་ཟག་ཀྱང་ཐུན་མིན་ཡིན་དགོས་པ་མ་གཏོགས། མགོ་མཐོ་ས་ལ་བཏགས་ཀྱང་སྐེ་དམའ་ས་ནས་ཆད་དེ། མདོ་ལམ་མ་བསྒྲུབས་སྔགས་ལམ་མ་འགྲུབ་ནས། ཡང་འདྲ་བེའུ་ཁ་འཆལ་མུ་གེས་ཤི་བའི་དཔེ་ཡོད་པ་ཡིན། ད་རེས་ཀྱི་སྐྱེ་བ་འདིར་ཐར་ལམ་གྱི་སྣེ་ཞིག་མ་ཟིན་ན། ཕྱིས་ནས་འདི་འདྲའི་ལུས་རྟེན་རྙེད་པ་དཀའ་མོ་རེད། རྙེད་ཀྱང་དམ་ཆོས་ཚུལ་བཞིན་དུ་སྒྲུབ་པའི་ད་ལྟའི་ལུས་འདི་འདྲ་དེ་བས་ཀྱང་དཀའ་ལ། སྐྱེ་བ་འདི་བརྗེས་ནས་དག་པའི་ཞིང་ཁམས་ཤིག་ལ་ཐད་ཀར་འགྲོ་དགོས་ན་འཕགས་པ་ཞིག་མིན་ན་ནམ་མཁའི་སྐར་མ་ལ་ལག་སྙོབ་བྱས་པ་ལྟར་ཐོན་དཀའ་བ་ཡིན། མགོན་པོ་འོད་དཔག་མེད་སློབ་པ་ལམ་གྱི་གནས་སྐབས་ན་དགེ་སློང་ཆོས་ཀྱི་འབྱུང་གནས་ཀྱི་སྐྱེ་བ་བཞེས་པའི་ཚེའམ། རྒྱལ་པོ་རྩིབས་ཀྱི་མུ་ཁྱུད་ཀྱི་སྐྱེ་བ་བཞེས་བའི་སྐབས་སུ་ཐུགས་བསྐྱེད་དང་ཚོགས་བསགས་རྒྱ་ཆེན་པོ་མཛད་པ་ལ་བརྟེན་ནས་ཞིང་ཁམས་བཟུང་བ་ཡིན་པས། བདེ་བ་ཅན་གྱི་ཞིང་ཁམས་དེར་འཕགས་པ་མིན་ཡང་སོ་སོའི་སྐྱེ་བོ་བགྲོད་ཐུབ་པ་ཡིན། ལར་རང་ཅག་གི་མི་ལུས་འདི་ཚེ་ཐུང་ནད་མང་གི་གནས་སུ་སྐྱེ་བ་བླངས་བ་དང་། དུས་ངན་སྙིགས་མའི་སེམས་ཅན་ཡིན་པས། བདེ་བ་ཅན་གྱི་ཞིང་ཁམས་ཀྱི་ཚེ་ཚད་མ་དགོས་ལྷ་ཡུལ་གྱི་ལྷའི་འགྲོ་བའི་ཚེ་དང་བསྡུར་ནའང་། རང་ཅག་གི་ཚེ་ཚད་འདི་སྐད་ཅིག་ཐང་ཅིག་ཡུད་ཙམ་ཞིག་ལས་མ་འདས། དེའི་སྟེང་དུ་འཁོར་བའི་སྡུག་བསྔལ་གྱིས་མནར་ནས་ཟིན་མེད་ཀྱི་བྲེལ་དོས་ཁོམ་པ་མེད་པའི་གནས་འདི་ནས་ཐར་བའི་སྲོག་རྩ་བརྟན་པོ་ཞིག་ཐོབ་པ་དེ་ལམ་གཞན་ནས་འགྲུབ་དཀའ་བ་ནི་ཕར་བལྟས་ཚུར་གཟིགས་གཉིས་ཀ་རེད། དེས་ན་དང་པོ་བདེ་བ་ཅན་ན་སྐྱེ་ཐབས་བྱེད། བདེ་བ་ཅན་ན་སོ་སོའི་སྐྱེ་བོ་ཐ་མལ་པ་ཡིན་ཡང་སྐྱེ་ཐུབ་པ་ནི་སངས་རྒྱས་ཀྱི་གསུང་བསླུ་བ་མེད་པས་གསུངས་པས་ཐེ་ཚོམ་ཡིད་གཉིས་མི་དགོས་ལ། མི་དང་མི་འདྲ་འདྲ་ཡིན་པ་དང་། བདེ་བ་འདོད་ལུགས་དང་སོ་སྐྱེ་ཡིན་པའང་གཅིག་མཚུངས་ཡིན་པས། འགའ་རེས་འགྲུབ་རྒྱུ་དེ་འགའ་རེས་མི་འགྲུབ་པར་སྐལ་བ་སྒེར་ལ་ཆད་དགོས་དོན་ཅི་ཡང་མེད་པ་ཡིན། བདེ་བ་ཅན་དུ་སྐྱེས་ཚར་དུས་ཚེ་རིང་ཞིང་ནད་མེད་པ། འབྱོར་བ་རྒྱས་པ། འཇིག་རྟེན་གྱི་སྡུག་བསྔལ་དང་། མི་བདེ་བྲེལ་ཟིང་མིང་ཙམ་ཡང་མེད་པས། སངས་རྒྱས་མཐོང་བ་དང་མི་འབྲལ་བར་དམ་ཆོས་ཉན་ཆོག་པ་ཡིན། ཞིང་ཁམས་དེ་ནས་ས་བཅུ་ལམ་ལྔ་རིམ་གྱིས་བགྲོད་ནས་རྫོགས་བའི་སངས་རྒྱས་ཀྱི་གོ་འཕང་ཐོབ་པར་བྱས་ཏེ། མ་རྒན་སེམས་ཅན་ཐམས་ཅད་འཁོར་བའི་སྡུག་བསྔལ་ལས་འདྲེན་པར་བྱེད་ན་མ་གཏོགས། ད་ལྟའི་རང་ཅག་གི་ལུས་ངན་འདིའི་ཐོག་ནས་རྣམ་སྨིན་མྱོང་ཞོར་དུ་གཞན་སེམས་ཅན་འདྲེན་ཟེར་བ་ནི། ལྷ་རང་མགོ་མི་ཐོན་པའི་ཐོག་ཏུ་འདྲེ་ཤ་ཐག་བྱེད་པ་ཞེས་པའི་དཔེ་ལས་མ་འདས་པ་ཡིན། དེས་ན་རང་མི་གཅེས་པ་དང་རང་མི་དམར་བ་ཞིག་མེད་པས། བདེ་བ་ཅན་དུ་སྐྱེ་བའི་རྒྱུ་བཞི་ལ་འབད་པ་གྱིིས་དང་། འབད་ཚད་ཐམས་ཅད་བདེ་བ་ཅན་དུ་མ་སྐྱེས་ན་རྫོགས་པའི་སངས་རྒྱས་ཀྱིས་བསླུས་པ་ཡིན། གཞན་ཡང་རྫ་མཚམས་པ་འཇིགས་མེད་རྒྱལ་བའི་མྱུ་གུ་དང་། རྫོགས་ཆེན་དཔལ་སྤྲུལ་ཚང་། རྡོ་གྲུབ་ཆེན་ཀུན་བཟང་གཞན་ཕན་རྣམ་པས་ཀྱང་རྒྱུ་བཞི་ལ་འབད་ནས་མ་སྐྱེས་ན་ངེད་ཅག་གིས་བསླུས་པ་ཡིན་ཞེས་ཚང་མས་ཞལ་དྲོན་མོའི་ནང་ནས་གསུངས་པ་ཡིན། སངས་རྒྱས་དངོས་བྱོན་གྱི་བླ་མ་དེ་ཚོས་རང་ཅག་བསླུ་བ་ཞིག་ག་ལ་སྲིད། དེས་ན་བདེ་བ་ཅན་དུ་སྐྱེ་བའི་རྒྱུ་བཞི་འདི་མདོ་རང་ལམ་ནས་ཤིན་ཏུ་ཟབ་པའི་མྱུར་ལམ་ཁྱད་པར་ཅན་ཡིན་པས། ཚང་མས་དེ་ལ་འབད་རྒྱུ་དེ་རང་དྲིན་རང་ལ་ཆུང་མ་བཅུག འཆི་ཁར་འགྱོད་པ་མེད་པ་ཞིག་ད་ནས་བྱེད་དགོས། འདིའི་ཉི་མ་བདུན་སྒྲུབ་དེའི་ཚེ་ལ་བདེ་བ་ཅན་ལ་སྐྱེ་བའི་རྒྱུ་བཞི་པོ་ཨ་འོར་ཡང་འོར་བྱས་ཡོད་པས། རྣ་འཇགས་རེ་ཕལ་ཆེར་ཁུར་ཡོད་ཚོད་ཡིན་བསམ་རྒྱུ་ཞིག་ཡིན། ད་རུང་ཡང་བསྐྱར་ང་ཚོས་རྗེས་དྲན་གྱི་ཚུལ་དུ་དྲན་གསོ་ཐེངས་གཅིག་བྱེད་ན། རྟེན་རྒྱུ་གྲོགས་རྐྱེན་བཞི་ལས། དང་པོ་ནི་རྟེན་ཚོགས་ཞིང་གསལ་འདེབས་པ་ཡིན། གཉིས་པ་ནི་རྒྱུ་ཚོགས་བསགས་སྒྲིབ་པ་སྦྱོང་བ་དང་། གསུམ་པ་ནི་གྲོགས་བྱང་ཆུབ་མཆོག་ཏུ་སེམས་བསྐྱེད་པ་དང་། བཞི་པ་ནི་རྐྱེན་སྨོན་ལམ་རྣམ་པར་དག་པས་མཚམས་སྦྱར་བ་དང་བཞི་པོ་ཡིན་པས། ཚང་མས་བློ་ལ་ཟུང་། དེའི་དོན་ཕར་བཤད་ཚུལ་བཤད་རེ་གྱིས། ཁྱིམ་པ་མི་ནག་པ་རྣམས་ཀྱིས་ཀྱང་དགོང་འདོན་བདེ་སྨོན་ཚར་རེ་མཉམ་དུ་འདོན་རྒྱུ་མ་ཆག་པར་གྱིས་དང་། གསོན་པོའི་སྐུ་རིམ། ཤི་བོའི་དགེ་རྩ་ལ་དེ་ལས་དགའ་ཞིག་ཅི་ཡོད། ཟོག་གི་ལྷས་ནང་དུ་རྟ་སྒ་མ་ཞིག་ཁྲིད་པ་ལ་རྣམ་རྟོག་བྱེད་འདུག་པ་ལས་སྒོ་བཤས་སྤོངས། ཚེ་ཐར་གྱིས། མ་འབྲི་ཚེ་རྒན་དག་བཤས་ལག་ལ་མ་རྒྱག སྒོ་ཁྱི་རྒས་པ་ཁ་མ་སྐོར། སྐོར་ཁྱི་དེ་ཚོ་ལ་ཁྱི་ཆས་ཡག་པོ་རེ་བྱིན། བེའུ་ལུག་ཆུང་གསུམ་མུ་གེས་མ་གསོད། རང་ཉིད་གཞན་གྱི་ལག་ཞབས་ལ་ཚུད་དུས་སྡུག་གཏད་ཡོང་ན་ཅི་འདྲ་ཞིག་ཡོད་པར་འདུག དེ་ཚོ་ཞེ་ཐོག་ལ་བླངས་ནས་རང་གི་ལག་ཞབས་ལ་ཡོད་པའི་མི་ཕྱུགས་སེམས་ཅན་སུ་ཡིན་ཡང་། སྡུག་བསྔལ་མེད་ཐབས་དང་། བདེ་བ་ལྡན་ཐབས་རེ་གྱིས་དང་དེ་དག་ཆོས་དང་གཞན་ཕན་ཡིན། ཉོན་མོངས་པ་དུག་ལྔ་དུག་གསུམ་རྩ་བ་ནས་ད་ལྟ་སྤོང་མ་ཐུབ་རུང་། ཉོན་མོངས་དབང་ཆེན་ལ་མ་ཤོར་བར་ཚོད་འཛིན་རེ་ཨེ་ཐུབ་ལྟོས་དང་དེའི་ཚོད་ཀྱི་བདེ་བ་རེ་ཐོབ་རྒྱུ་ཡོད་པ་ཡིན། ད་རེས་ང་ཚོས་པདྨ་ཐང་ལུང་རྟོགས་པདྨའི་དགའ་ཚལ་གྱི་གཙུག་ལག་ཁང་འདིའི་ནང་ནས། ཞིང་ཁྲིད་ཞིང་སྒྲུབ་དང་སྦྲགས་མ་བདུན་ཕྲག་གཅིག་གི་འཆད་ཉན་ཐེངས་གཅིག་ཡོངས་སུ་གྲུབ་སོང་བ་རེད། ད་ཕྱིན་ཆད་ད་དུང་འདོན་དང་མི་འདོན་ནི་གཅིག་མང་མོས་ཀྱི་འདོད་ཕྱོགས། གཉིས་དུས་བབ་ཀྱི་དགོས་ཆོས་ཏེ་ལྟོས་ས་ལྟོས་ཆོས་ཅན་ཞིག་རེད། ཡིནའང་ཆོས་འདིའི་སྒོ་མོ་ཕྱེས་ནས་སེམས་ཅན་མང་པོ་ཞིག་དག་པའི་ཞིང་ཁམས་བདེ་བ་ཅན་ལ་འདྲེན་ཐུབ་པའི་སྨོན་ལམ་འདེབས་རྒྱུ་ཡིན། རང་གཞན་ཚང་མ་ལྷ་དང་བླ་མས་བསྐྱབས། དཀོན་མཆོག་གི་ཐུགས་རྗེས་འཚོ་ཁམས་བརྟན་ནས་སླར་ཡང་འདི་བཞིན་དུ་འཛོམ་རྒྱུ་བྱུང་ན། སང་ཕོད་ཀུན་བཟང་བླ་མའི་ཞལ་ལུང་ཟླ་ཁྲིད་ཅིག་དང་། ཀློང་ཆེན་སྙིང་ཐིག་གི་སྔོན་འགྲོ་སེམས་སྦྱོང་བདུན་གྱི་དོན་ཁྲིད ཁྲིད་སྦྱོང་དང་སྦྲགས་མ་ཟླ་བ་ཕྱེད་གཉིས་ཙམ་གྱི་རིང་ལ་འདོན་སྙམ་པ་ཡིན། དེ་ལ་ཐོབ་མི་ཐོབ་ཀྱི་ཆ་རྐྱེན་མང་པོ་ཞིག་འཛོམ་འདུག་མི་དགོས། དམ་ཉམས་ངན་པ་དང་སྲུང་མ་མི་གཅིག་པའི་རིགས་འདྲ་མིན་ན་སུ་ཡིན་ཡང་ཐོབ་ཆོག སྲུང་མ་བསྟེན་ཕྱོགས་འདིའི་སྐོར་ནས་ཚང་མས་གཟབ་གཟབ་བྱེད་དགོས། དེ་སྔོན་ས་འདིའི་དམེ་འཁྲུག་གྱོད་གཞི་ན་ཚ་ཤི་ཆད་གཏོར་བརླགས་དཀྲུག་ཤིང་མང་པོ་ཞིག་འདིའི་ཁོངས་ནས་ཡོང་བ་ཡིན། དེ་ཚོ་དང་མ་འབྲེལ་དུས་ཆོས་འདི་དག་ཐོབ་པ་ཡིན། ཡིན་ནའང་མི་རྟག་པ་ལ་རྟག་པར་འཛིན་པ་དང་། མི་ཚེ་ཐུང་ཐུང་ལ་ཚད་ཤིང་རིང་པོ་འཇོག་རྒྱུ་དེ་རང་ག་རེད། ལར་འདོན་ལོང་ཡོད་རུང་ཉན་ལོང་ཡོད་པའི་མི་འདིའི་ནང་ན་དཀོན་པོ་རེད། འཇིག་རྟེན་ཁྱིམ་པ་བ་ཡིན་ཡང་ངས་ན་ནིང་བཤད་པའི་ཀུན་བཟང་ཞལ་ལུང་གི་སྒྲ་འཁོར་རེ་ལོན་ན་ཉོན་དང་སེམས་ལ་ཅུང་ཟད་རེ་ཕན་ཤས་ཆེ། དམ་པའི་ཆོས་ཞེས་པ་འདི་སྐྱིད་ན་གོང་གནོན་ཡིན་པ་དང་། སྡུག་ན་སྐྱོ་རོགས་ཡིན་པས་སྐྱིད་སྡུག་གཉིས་ཀའི་སྐབས་ལ་མཁོ་བ་ཞིག་ཡིན། དུས་གསུམ་གྱི་དུས་ཞེས་པ་དེ་ཉིན་མཚན་བར་མེད་དུ་སྐད་ཅིག་གཅིག་ཙམ་ལའང་མི་འདུག་པར་འཁོར་ཞིང་། འདིས་སྲིད་པ་གསུམ་པོ་རྔམ་ཟས་སུ་ཟ་བཞིན་ཡོད་པས། དེ་སྔ་སྲིད་པ་ཆགས་ནས་བཟུང་ས་འདིའི་ཐོག་ལ་རྐང་རྗེས་བཞག་ཚད་རྣམས་ལ་བསམ་བློ་ཞིག་བཏང་ན། ཅི་འདྲའི་མཐོན་པོའི་ཐོབ་ཡོད་པ། ཕྱུག་པོའི་འབྱོར་བ་ཡོད་པ། དཔའ་བོ་སྟག་ལྟ་བུ། མཛེས་མོ་ལྷ་ལྟ་བུ་ཡོད་མྱོང་ན་ཡང་། ཚང་མ་དུས་ཀྱི་ཆོས་ཉིད་ཀྱི་དབང་དུ་སོང་ནས་ལོ་རྒྱུས་ཀྱི་རྗེས་ཤུལ་ཡོད་ལ་མེད་ལ་དང་། དེ་ཡང་ལོ་བརྒྱ་ཚོ་སྟོང་ཚོ་སོང་ན་ལོ་རྒྱུས་ཡང་མེད་པ་གྱུར་ཏེ་མི་མངོན་པའི་དབྱིངས་སུ་རྒྱས་བཏབ་པ་ཡིན། རགས་པ་རྒྱུན་གྱི་མི་རྟག་པ་ལོ་དང་ཟླ་བ་ཡིས་འགྱུར་བ་དང་། ཕྲ་བ་སྐད་ཅིག་གིས་མི་རྟག་པ་སྐད་ཅིག་སྐར་མའི་ཆ་ཤས་ཀྱིས་འགྱུར་བཞིན་ཡོད་པ་ཡིན། རང་རེ་འང་ཆོས་ར་འདིའི་ནང་ལ་ཁར་སང་ཁས་ཉིན་ཞིག་ལ་མཉམ་དུ་འཛོམས་པ་ཡིན་སྙམ་པ་ལྟ་བུ་དེ་ཡང་བརྩིས་འོངས་ན་དེ་རིང་གི་ཉི་མ་བདུན་འདས་ཚར་བ་རེད། ཚང་མའི་ཚེའི་ནང་གི་ཉི་མ་བདུན་རེ་ཟད་སོང་བ་རེད། འདི་ལྟར་བསམ་བློ་བཏང་ན་འཇིག་རྟེན་ཕྱི་མའི་ལམ་ཆེན་ལ་ཐོན་ཞེས་པ་དེའང་ཐག་རིང་རྒྱང་གི་སྐད་ཆ་ཞིག་མ་ཡིན་པས། ཚང་མས་འདང་རེ་བརྒྱབ་ནས་ཆོས་འཇིག་རྟེན་གྱི་བྱ་བ་གང་བསྒྲུབས་ཀྱང་མི་ཚེའི་དུས་ཚོད་དང་ཚོད་འགྲིག་པ་ཞིག་གི་འཆར་གཞི་ཞོག་པ་ནི་གལ་ཆེ་བ་ཡིན། འདུས་པ་ཐམས་ཅད་འབྲལ་བའི་ཆོས་ཅན་ཡིན་པས། རང་རེ་མཉམ་དུ་འཛོམས་པ་འདི་ཡང་སང་གནང་ཟེར་དུས་རང་རང་ཁ་ཁ་སོ་སོའི་ལམ་དུ་སོང་ནས་འབྲལ་རན་པ་ཡིན། ཀུན་མཁྱེན་ཆོས་རྗེས། བདེ་སྐྱིད་ལོངས་སྤྱོད་འདི་དང་དུས་རྟག་ཏུ། །མི་འབྲལ་སྤྱོད་པར་འདོད་ཀྱང་འབྲལ་བར་ངེས། །བཟང་པོའི་བླ་མ་འདི་དང་དུས་རྟག་ཏུ། །མི་འབྲལ་ཆོས་ཉན་འདོད་ཀྱང་འབྲལ་བར་ངེས། །ཞེས་གསུངས་པ་ཡིན། ཁྱིམ་ཕ་མ། པང་བུ་རྒྱུད། མིང་སྲིང་ཚ་ཞང་ཐམས་ཅད་པོ་འབྲལ་མེད་ཡུན་དུ་བརྟན་རྒྱུ་ཞིག་མ་ཡིན་པར་ཞག་ཉི་མའི་ལོ་ཟླ་ཚང་དུས་འབྲལ་རན་པ་མ་ཟད། ང་ཟེར་ནས་གཅེས་སྤྲས་བདག་སྐྱོང་བྱེད་སའི་ལུས་འབྱུང་བཞི་ཁྲག་གི་ཕུང་པོ་འདི་ཡང་ཤ་དང་རུས་པ། སྐྲ་དང་བ་སྤུ་རྣམས་ཁ་ཁར་གྱེས་ཏེ་རྡུལ་ཕྲན་གྱི་ཕུང་པོར་འཐོར་བ་ལས་མ་འདས་པས་འདུས་བྱས་ཀྱི་ཆོས་ལ་རྟག་འཛིན་བྱེད་རྒྱུ་ག་ལ་ཡོད། དེས་ན་འཆི་བ་ཟེར་བའི་དགྲ་ཆེན་པོ་དེ་ད་ལྟ་མགོ་ཐོག་ལ་ཐོན་ཡང་འགྱོད་པ་མེད་པ་ཞིག་གྱིས། ངས་དུས་རྒྱུན་དུ་སྨོན་ལམ་ཅི་ཞིག་འདེབས་ཀྱིན་ཡོད་ཟེར་ན། ང་པདྨ་སྐལ་བཟང་མིག་གིས་རིག་ཚད། ངའི་མིང་རྣ་བས་གོ་ཚད། ང་ལ་བཟང་པོ་ཁ་ལག་སྤྱོད་གསུམ་གྱིས་འབྲེལ་ཚད། ངན་པ་ལོག་སྒྲུབ་སྐུར་འདེབས་ཀྱིས་འབྲེལ་ཚད། ང་ལ་བླ་མ་བྱས་ནས་དད་པ་བྱེད་མཁན། ང་ལ་དགྲ་རུ་བཟུང་ནས་འཁོན་དུ་འཛིན་མཁན། ང་ལ་ཟས་ཀྱི་འདུ་ཤེས་བཞག་ནས་ཟ་མཁན་གྱི་འབུ་དང་སྦྲང་མ། ཐ་ན་ངའི་ལུས་ལ་བརྒྱུད་ནས་རླུང་གི་རྫི་ཕྱོགས་ཕོག་པ་ཡན་གྱི་ཐམས་ཅད་ཡོངས་རྫོགས་ཚེ་འདི་དང་ཕྱི་མར་བདེ་ནས་བདེ་བའི་ལམ་ལ་འགྲོ་བར་ཤོག་ཅེས་སྨོན་ལམ་རྒྱག་བཞིན་ཡོད་པས་ཁྱེད་འདིར་ཡོད། ང་དང་ད་རེས་ཆོས་ཀྱིས་འབྲེལ་ཚད་ཚང་མ་ཚེ་འདིར་བདེ་ཞིང་། ཕྱི་མ་སྐྱིད་པའི་སྨོན་ལམ་བཏབས་པས་མ་ཚད། ཕྱི་མ་བདེ་བ་ཅན་གྱི་ཞིང་ཁམས་སུ་ལམ་སྟོན་ལམ་སྣ་འདྲེན་ཐུབ་པའི་སྨོན་ལམ་འདེབས་ནས་འདུག སང་ནང་རང་གཞན་ཚང་མ་བྲེལ་བ་ཚབ་ཚུབ་རེད་འགྲོ་རྒྱུ་རེད། སྐད་ཆ་བཤད་རྒྱུའི་གོ་སྐབས་ཡོད་རྒྱུ་མ་རེད། ཚང་མ་ཡོངས་རྫོགས་ཚེ་རིང་ལོ་བརྒྱ། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་དང་། ད་རེས་ཀྱི་ཆོས་ཁྲིད་འདིའི་ནང་དུ་ཞུགས་ནས་ཆོས་ར་རྡོག་པས་བརྫིས་ཚད། ཆོས་མ་ཎི་ཁ་ཡིས་བླངས་ཚད། དགེ་སེམས་སྐད་ཅིག་མ་ཞིག་སྐྱེས་ཚད། དགེ་སྒྲུབ། སྡིག་སྤོང་། ཚོགས་གསོག་སྨོན་ལམ། ཕྱག་སྐོར། སྒྲིབ་སྦྱོང་ཁས་ལེན་དམ་བཅའ་བྱས་ཚད་ཀྱི་དགེ་བའི་རྩ་བས་མཚོན་ཏེ། རང་གཞན་གྱི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཏེ་བསྡོམས་པའི་མཐུས། ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་རྣམ་ཀྱི་སྐུ་ཚེའི་ཞབས་པད་ཡུན་རིང་དུ་བརྟན། རྨད་བྱུང་ཐུགས་ཀྱི་བཞེད་དོན་མཐའ་དག་གེགས་མེད་ལྷུན་གྱིས་གྲུབ། སླད་ནས་འབྱོན་གྱུར་གྱི་སྐྱེས་ཆེན་དམ་པ་དག་གིས་བསྟན་ལ་སྨོན་པའི་ཕྲིན་ལས་མཁའ་ཁྱབ་ཏུ་བརྡལ། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འབྱོར་ལྡན་བསྟན་པའི་སྦྱིན་བདག་གང་ན་སུ་ཡོད་ཐམས་ཅད་ཀྱི་དབུ་འཕང་མངའ་ཐང་དགུང་དུ་བསྟོད། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་ཐམས་ཅད་རྒྱུན་ཆད། ནད་མུག་མཚོན་འཁྲུག་གི་བསྐལ་པ་ཞི། ཁྱད་པར་དུ་ཡངས་པའི་རྒྱལ་ཁམས་ལ་དབང་བསྒྱུར་བའི་ཆེ་བཙན་དྲག་ཤུལ་ཅན་རྣམས་ཀྱི་གནོད་འཚེ་གདུག་པའི་བསམ་སྦྱོར་ཐམས་ཅད་ཞི་ནས་ཞི་བ་བྱང་ཆུབ་ཀྱི་སེམས་དང་ལྡན་པར་གྱུར་ཏེ། ཡིད་ཅན་འགྲོ་བ་མཐའ་དག་ཕན་ཚུན་ཕ་མ་དང་སྤུན་སྲིང་ལྟ་བུའི་འདུ་ཤེས་ནམ་ཡང་མི་ལྷོད་པའི་ཐོག་ནས། ད་རེས་འདི་ན་ཞུགས་ཚད་ཀྱི་ཚེ་འདིའི་ཕ་མ་གཉིས་དང་དགྲ་བགེགས་གཉིས། འབྲེལ་ཐོགས་ཚེ་འདས་ཕོ་མོ་རྣམས་ཀྱིས་གཙོར་བྱས་པའི་མཐའ་ཡས་པའི་སེམས་ཅན་ཐམས་ཅད་མྱུར་དུ་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་གོ་འཕང་ཐོབ་བའི་རྒྱུར་འགྱུར་བའི་ཕྱིར་དུ་བསྔོ་བའི་ཐུགས་འདུན་ཟབ་མོ་གནང་བར་ཞུ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒ་ན་འཆི་རྦ་ཀླུང་འཁྲུག་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ།། ལན་གསུམ། ༈ ཨེ་མ་ཧོ༔ ངོ་མཚར་སངས་རྒྱས་སྣང་བ་མཐའ་ཡས་དང༔ གཡས་སུ་ཇོ་བོ་ཐུགས་རྗེ་ཆེན་པོ་དང༔ གཡོན་དུ་སེམས་དཔའ་མཐུ་ཆེན་ཐོབ་རྣམས་ལ༔ སངས་རྒྱས་བྱང་སེམས་དཔག་མེད་འཁོར་གྱིས་བསྐོར༔ བདེ་སྐྱིད་ངོ་མཚར་དཔག་ཏུ་མེད་པ་ཡི༔ བདེ་བ་ཅན་ཞེས་བྱ་བའི་ཞིང་ཁམས་དེར༔ བདག་གཞན་འདི་ནས་ཚེ་འཕོས་གྱུར་མ་ཐག༔ སྐྱེ་བ་གཞན་གྱིས་བར་མ་ཆོད་པ་རུ༔ དེ་རུ་སྐྱེས་ནས་སྣང་མཐའི་ཞལ་མཐོང་ཤོག༔ དེ་སྐད་བདག་གིས་སྨོན་ལམ་བཏབ་པ་ཡིས༔ ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱིས༔ གེགས་མེད་འགྲུབ་པར་བྱིན་གྱིས་བརླབ་ཏུ་གསོལ༔ ཏདྱ་ཐཱ༔པཉྩ་ནྡྲི་ཡ་ཨ་ཝ་བོ་དྷ་ནི་སྭཱ་ཧཱ༔ ༈ བསླུ་མེད་བདེ་ལྡན་ཞིང་མགོན་འོད་དཔག་མེད། །རྩེ་གཅིག་དད་པའི་ཤུགས་ཀྱིས་ཁྱེད་བསྒོམས་ན། །དྭངས་བའི་ཡིད་ངོར་སྣང་སྟོང་སྒྱུ་མའི་སྤྲིན། །སྐུ་དང་ཞིང་ཁམས་རྟག་ཏུ་འཆར་བར་ཤོག །བརྩེ་ཆེན་སྙིང་རྗེས་དྲངས་པའི་བྱང་སེམས་ལ། །རྟག་ཏུ་གོམས་པའི་རྒྱལ་སྲས་སྤྱོད་མཆོག་གིས། །རླབས་ཆེན་ཚོགས་གཉིས་སྤྱོད་པ་མཐར་ཕྱིན་ཏེ། །དཔག་ཡས་དགེ་བའི་རྩ་བ་ཡོངས་བསྐྱེད་ཤོག །རང་དང་གཞན་གྱིས་དུས་གསུམ་བསགས་པ་ཡི། །རྣམ་དཀར་བསོད་ནམས་ཕུང་པོ་ཇི་སྙེད་པ། །དམིགས་བྲལ་འཁོར་གསུམ་དག་པས་བྱང་ཆུབ་ཆེར། །ཡོངས་སུ་བསྔོ་བས་སྲིད་པ་མཐར་བྱེད་ཤོག །ཁྱེད་ལ་ཡང་ཡང་གསོལ་བ་བཏབ་པ་དང་། །མངོན་རྟོགས་ཡིད་ལ་གོམས་པའི་ཏིང་འཛིན་མཐུས། །ངེས་དོན་འོད་དཔག་མེད་པའི་ཞལ་མཐོང་ནས། །བདེ་ཆེན་ཞིང་ཁམས་རྟག་ཏུ་འཛིན་པར་ཤོག། ༈ འདི་ནས་ཉིང་མཚམས་སྦྱར་མ་ཐག །དག་པའི་ཞིང་ཁམས་བདེ་བ་ཅན། །པདྨའི་སྙིང་པོའི་ཟེའུ་འབྲུ་ལ། །བརྫུས་ཏེ་སྐྱེ་བ་ལེན་པར་ཤོག། ༈ མི་གཙང་ལུས་འདི་བོར་བར་གྱུར་མ་ཐག །བདེ་བ་ཅན་དུ་བརྫུས་ཏེ་སྐྱེ་བར་ཤོག །སྐྱེས་མ་ཐག་ཏུ་ས་བཅུ་རབ་བགྲོད་ནས། །སྤྲུལ་པས་ཕྱོགས་བཅུར་གཞན་དོན་བྱེད་པར་ཤོག། ༈ མདོ་སྔགས་ཆོས་ཚུལ་ཚང་ལ་མ་ནོར་བའི། །མཁས་ཤིང་གྲུབ་བརྙེས་རིག་འཛིན་བརྒྱུད་པའི་སྲོལ། །ཐུབ་བསྟན་སྙིང་པོ་གསང་སྔགས་སྔ་འགྱུར་བའི། །བསྟན་པ་འཕེལ་རྒྱས་འཛམ་གླིང་ཁྱབ་གྱུར་ཅིག། ༈ ཧྲཱིཿ སྔོན་ཚེ་དེ་བཞིན་གཤེགས་པ་གཙུག་ཏོར་ཅན། །འཕགས་པའི་ཡུལ་དུ་གྲུབ་ཆེན་ཀུ་ཀུ་རི། །ཁ་བ་ཅན་དུ་དཔལ་ལྡན་ཐང་པ་ཞེས། །པདྨ་རིག་འཛིན་ཞབས་ལ་གསོལ་བ་འདེབས། །བསྟན་པ་ཡུན་རིང་གནས་པའི་བཀྲ་ཤིས་ཤོག། ༈ ཐུབ་བསྟན་མཛེས་པའི་རྒྱན་ཅིག་ཀློང་ཆེན་པ། །བཤད་སྒྲུབ་བསྟན་པའི་མངའ་བདག་འཇིགས་མེད་གླིང་། །མཚུངས་མེད་བླ་མའི་བསྟན་པ་སྲིད་མཐའི་བར། །བཤད་སྒྲུབ་ཐོས་བསམ་སྒོམ་པས་འཛིན་གྱུར་ཅིག། ༈ དཔལ་ལྡན་མཁས་གྲུབ་བྱེ་བའི་གཙུག་གི་རྒྱན། །མདོ་སྔགས་ལུང་རྟོགས་བསྟན་པའི་ཤིང་རྟ་ཆེ། །འཇིགས་བྲལ་སྔ་འགྱུར་རྒྱལ་བ་རྫོགས་ཆེན་པ། །ཤྲཱི་སེང་ཆོས་གྲྭའི་བསྟན་པ་རྒྱས་གྱུར་ཅིག། ༈ གངས་རིའི་ར་བས་སོགས། ༈ སྐར་མ་རབ་རིབ་མར་མེ་དང་། །སྒྱུ་མ་ཟིལ་པ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུ། །འདུས་བྱས་ཆོས་རྣམས་དེ་ལྟར་བལྟ།། སྨྲས་པ།ལེགས་གསུང་བཀའ་དང་དེ་ཡི་དགོངས་འགྲེལ་གྱི།། དོན་འདུས་ཆོས་རྗེ་བླ་མའི་ཞལ་གསུང་བཅུད།། ལེགས་བཤད་མན་ངག་བྱེ་བ་འབྱུང་བའི་གནས།། གདམས་ཟབ་འདི་འདྲ་སྲིད་པ་གསུམ་ན་དཀོན།། དེ་སླད་གདམས་ངག་བདུད་རྩིའི་སྙིང་པོ་འདིར།། རང་ཉིད་གཅིག་ཏུ་མོས་ཤིང་འདུན་པའི་ཁར།། རྡོ་རྗེའི་མཆེད་ཀྱིས་བསྐུལ་བ་དང་བླངས་ཏེ།། སྐྱེས་སྦྱངས་དམན་ཡང་ལྷག་བསམ་དག་པས་སྤེལ།། དེང་ནས་སྐྱེ་དང་ཚེ་རབས་ཐམས་ཅད་དུ།། དཔལ་ལྡན་བླ་མ་མཆོག་དང་མི་འབྲལ་ཞིང་།། ཞལ་མཇལ་གསུང་གི་བདུད་རྩིས་བདག་ཚིམས་ཏེ།། རླབས་ཆེན་ཕྲིན་ལས་སྤེལ་བའི་མཐུ་ཐོབ་ཤོག། ཐུབ་བསྟན་ཡང་དར་བསྟན་པའི་རྒྱལ་མཚན་བཤད་སྒྲུབ་དཔུང་པ་གཅིག་གིས་བཏེག། མཁས་བཙུན་གྲུབ་པའི་རྣམ་མཐར་འབྲུག་སྒྲ་འཛམ་གླིང་འཛིན་མའི་ཡང་རྩེར་སྒྲོག། འཆད་རྩོད་རྩོམ་པའི་ལུས་རྩལ་དར་བབ་མི་འཇིགས་སྤོབས་པའི་གདོང་ལྔ་འབར།། ཀུན་གཟིགས་བླ་མ་༧པདྨ་སྐལ་བཟང་སྲིད་མཐའི་བར་དུ་ཞབས་བརྟན་སྨོན།། དེ་ལྟར་ཆོས་རྗེ་བླ་མའི་ཞལ་ལུང་གི། གདམས་ཟབ་ཟེར་སྡེར་སྒྲ་ལས་ཕབ་པ་ལ།། མ་རྟོགས་བྱིས་བློས་ནོར་འཁྲུལ་ཅི་མཆིས་ཀུན།། གཟུར་གནས་དམ་པའི་སྤྱན་སྔར་མཐོལ་ཞིང་བཤགས།། འདིར་འབད་རྣམ་དཀར་ལེགས་བྱས་དགེ་བའི་ཆར།། བདག་སོགས་འགྲོ་བློའི་འཛིན་མར་ཡོངས་སྨིན་ནས།། ཚེ་འདིར་དགེ་ལེགས་མེ་ཏོག་རབ་བཀྲ་ཞིང་།། ཕྱི་མ་བདེ་ཆེན་ཞིང་དུ་སྐྱེ་ཕྱིར་བསྔོ།། ཞེས་༧སྐྱབས་རྗེ་ཆོས་ཀྱི་རྒྱལ་པོ་ཁྱབ་བདག་དཔལ་ལྡན་བླ་མ་དམ་པ་མཆོག་གི་ཞལ་ལུང་། བདེ་ཆེན་ཞིང་ཁྲིད་འདི་ཉིད་ནུབ་མེད་ཡུན་དུ་གནས་པའི་ཆེད་དུ། ༧སྐྱབས་རྗེ་བླ་མའི་ཞལ་སློབ་དམ་པ་མཁན་སྤྲུལ་ཀུན་དགའ་བསྟན་འཛིན་མཆོག་ནས་ཁྱེད་ཀྱིས་བླ་མའི་ཞིང་ཁྲིད་འདི་ཡིག་འཇོག་ཅིག་བྱེད་ཐུབ་ན་ཤིན་ཏུ་ལེགས་པའི་གསུང་བསྐུལ་མཛད་ཅིང་། རང་ཉིད་ཀྱིས་ཀྱང་བླ་མའི་གསུང་ལ་དེ་ལྟར་བྱ་བ་ཞིག་བྱེད་ཐུབ་ན་ཅི་མ་རུང་སྙམ་པས་ཀུན་ནས་བསླངས་ཁར། མཁས་བཙུན་གྲུབ་པའི་བདག་ཉིད་མུ་ར་སྤྲུལ་སྐུ་བསྟན་འཛིན་མཁའ་ཁྱབ་རྡོ་རྗེ་མཆོག་ནས་རྗེས་སུ་གནང་བ་མ་ཟད། རྡོ་རྗེའི་མཆེད་པོ་དུ་མས་ལེགས་པའི་དབུགས་དབྱུང་བཅས་མཛད་པར་བརྟེན། མ་གཞི་རང་ཉིད་ནད་ཁམས་ལྕི་ཞིང་བླ་མའི་གསུང་འགའ་ཞིག་ཡུལ་སྐད་ཀྱི་དབང་གིས་ཇི་བཞིན་མི་གོ་བར་བརྟེན། ཚིག་དོན་གྱི་ཆ་གང་ཅིའི་ཐད་ནས་ཇི་བཞིན་མ་གྱུར་པའི་ཡིག་ནོར་མི་ཉུང་བ་ཡོད་ངེས་པས་མཁས་དབང་རྣམས་ཀྱིས་དག་བཅོས་དང་ཡོ་བསྲང་གང་མང་མཛད་པའི་རེ་བསྐུལ་དང་བཅས། ཀློང་ཆེན་ཆོས་དབྱིངས་སྟོབས་ལྡན་རྡོ་རྗེའི་ཡང་སྲིད་དུ་སྒྲོ་བཏགས་པ་འབྲུ་རིགས་རོང་པོའི་རུས་སུ་སྐྱེས་པ་གུས་ཟླ་བའི་འོད་ཟེར་རམ་རྗེ་བླ་མ་མཆོག་གིས་བསྩལ་བའི་མིང་ལ་པདྨ་དོན་ཡོད་ནོར་བུར་འབོད་པས། རབ་བྱུང་བཅུ་བདུན་པའི་ཆུ་འབྲུག་ལོའི་ཆུ་སྟོད་ཟླ་བའི་དམར་ཕྱོགས་མཁའ་འགྲོ་འདུ་བའི་དུས་ཚེས་བཟང་པོ་རྒྱལ་དང་ཕུར་བུའི་འགྲུབ་སྦྱོར་ཉིན་རུ་དམ་ཡང་དབེན་རྗེ་བླ་མའི་གདན་ས་པདྨ་ཐང་གི་རང་ཤག་ནས་མཇུག་གྲུབ་པར་བཀོད་པའོ།། ཕྱིས་སུ་རྗེ་གང་གི་ཞལ་སློབ་ཐ་ཤལ་བསྟན་འཛིན་དགྲ་ལྷ་ནས་རབ་རྒྱན་མེ་སྤྲེལ་ལོའི་ཟླ་བ་བཅུ་ཙམ་གྱི་རིང་ལ་སྒྲ་འཁོར་དང་ཞིབ་ཀྱིས་བཏུག་ནས་ཡུལ་སྐད་མ་གོ་བའི་རིགས་རྣམས་ལེགས་པར་བཅོས་ཤིང་གཏན་ལ་ཕབ་པ་ལགས་པས་ཡིད་བརྟན་ཕེར་བ་ལགས་སོ།། དགེ་བ་འགྲོ་ཀུན་བདེ་བ་ཅན་དུ་སྐྱེ་བའི་རྒྱུ་རུ་བསྔོ།། །། |