 ཁྱབ་བདག་པདྨ་སྐལ་བཟང་གི་གསུང་འབུམ་གླེགས་བམ་ཉེར་བཞི་པ།ཐོག་མཐའ་བར་དགེའི་གཏམ་གྱི་ཁྲིད་ཡིག་ཐུགས་རྗེ་ཆེན་པོའི་ལྟ་སྒོམ་སྤྱོད་པའི་གསལ་སྒྲོན།རྫོགས་ཆེན་པདྨ་སྐལ་བཟང་། སྤྲུལ་ཚུལ་ཁྲིམས་རྒྱལ་མཚན་གྱིས་ཡི་གེར་ཕབ།པདྨའི་འོད་སྣང་ཚོགས་པ།ཀན་སུའུ་མི་རིགས་དཔེ་སྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཐུགས་རྗེ་ཆེ་ཞུ།༈ སྐྱེ་རྒུའི་བདེ་སྐྱིད་ཀྱི་འབྱུང་གནས་རྒྱལ་བ་མཉམ་མེད་དོན་ཀུན་གྲུབ་པ་ཆེན་པོའི་གསང་གསུམ་ཡེ་ཤེས་ཀྱི་སྒྱུ་འཕྲུལ་ངོ་མཚར་ཆོས་སྐུའི་རིང་བསྲེལ་གྱི་གཟུགས་སུ་བལྟམས་པ་གསུང་རབ་རྒྱལ་བའི་བཀའ་འགྱུར་རིན་པོ་ཆེ་དང་། ཐུབ་པའི་དགོངས་པ་རང་སྟོབས་ཀྱི་བཀྲལ་ནུས་པའི་འཕགས་ཡུལ་པཎ་གྲུབ་རྣམས་ཀྱི་མཛད་པའི་བསྟན་འགྱུར་རིན་པོ་ཆེ་སྟེ་མདོ་སྔགས་གཉིས་ལྡན་གྱི་ཡོངས་རྫོགས་བསྟན་པ་རྒྱ་མཚོ་འདི་ཉིད། དེང་གི་ཆར་གངས་རིའི་ལྗོངས་ཀྱི་ཡེ་གེ་ཁོ་ནའི་གཟུགས་སུ་བཞུགས་པ་ནི་སྤྲུལ་པའི་མཁན་སློབ་ཆོས་གསུམ་གྱི་ཐུགས་བསྐྱེད་ཉག་གཅིག་ལས་བྱུང་བ་དང་། དེ་དག་མི་ནུབ་བརྒྱུད་འཛིན་ཡུན་གནས་ཀྱི་ཆེད་དུ་གངས་ལྗོངས་ཆོས་བརྒྱུད་ཁག་ལས་བྱོན་པའི་རིས་སུ་མ་ཆད་པའི་སྐྱེས་ཆེན་རྣམས་ཀྱིས་བཀའ་བསྟན་རིན་པོ་ཆེའི་དགོངས་སྙིང་ཅན་གྱི་གསང་རབ་གླེགས་བམ་སྟོང་ཕྲག་མང་པོ་མཛད་ཅིང་། དཀའ་སྤྱད་ཐུགས་བརྩོན་སྣ་ཚོགས་གྱིས་མ་ཕྱི་གསར་བསྐྲུན་དང་བསྐྱར་བསྐྲུན་སོགས་ཀྱིས་འཇིག་རྟེན་གྱི་ཁམས་སུ་བཞུགས་པ་མཛད་མུས་བཞིན། དེང་གི་ཆར་གློག་རྡུལ་འཕྲུལ་ཆ་དང་དྲྭ་རྒྱའི་དུས་རབས་ཀྱི་འགྲོས་དང་བསྟུན་ནས་རྒྱལ་སྤྱིའི་རིག་གཞུང་སྤྱི་མཚུངས་ལྟར། རྒྱལ་བའི་གསུང་རབ་རིན་པོ་ཆེ་གཙོ་བོར་གྱུར་པའི་འཕགས་བོད་མཁས་པའི་གཞུང་ལུགས་རྣམས་དྲྭ་ཐོག་ནས་བཤེར་འཚོར་དང་འདྲ་བཤུས་སྒྲིག་གཟོ་སོགས་སྟབས་བདེའི་ལམ་ནས་བཀོལ་སྤྱོད་ཐུབ་པའི་གཞི་རྒྱ་ཆེ་བའི་འཆར་འགོད་དངོས་སུ་ལས་བཞིན་པར། མཆོག་སྤྲུལ་མུ་ར་རིན་པོ་ཆེའི་གཙོས་པདྨའི་འོད་སྣང་ཚོགས་པ་ནས་༧སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་གི་གསུང་འབུམ་མཚན་བཟང་སོ་གཉིས་ཀྱི་གྲངས་ལྡན་ཅན་འདིར་གནང་འབྱོར་བྱུང་བ་ལགས་ན། ཁོང་རྣམ་པའི་རྨད་དུ་བྱུང་བའི་མཛད་རྒྱས་ལ་སྙིང་ནས་ཐུགས་རྗེ་དང་བཀའ་དྲིན་བླ་ལྷག་ཏུ་ཆེ་ཞུ་བ་དང་ཆབ་གཅིག་སླད་ནས་ཀྱང་གསུང་རབ་རིན་པོ་ཆེ་ཅི་རིགས་དཔེ་སྐྲུན་གནང་ན་འདི་གར་འདྲ་བཤུས་གནང་སྩོལ་ཡོང་བར་ཅི་ནས་ཀྱང་བཀའ་དྲིན་མི་ཆུང་བ་ཞུ། ཞེས་དྲྭ་རྒྱའི་དཔེ་མཛོད་འགན་འཛིན་པ་རྫོགས་ཆེན་བསྟན་འཛིན་རྣམ་དག་ནས་ཕུལ།། ཐོག་མཐའ་བར་དགེའི་གཏམ་གྱི་ཁྲིད་ཡིག་ཐུགས་རྗེ་ཆེན་པོའི་ལྟ་སྒོམ་སྤྱོད་པའི་གསལ་སྒྲོན།གླེང་གཞི།འོད་གསལ་རྫོགས་པ་ཆེན་པོའི་ལྷུན་གྲུབ་ཐོད་རྒལ་གྱི་གླུ་དབྱངས་ཏིང་འཛིན་སྒོ་འཕར་བརྒྱ་ཕྲག་ཅིག་ཅར་འབྱེད་པའི་ལྡེའུ་མིག་གི་ཞལ་ཁྲིད་འོད་གསལ་མཐོང་བ་ཆེན་པོ་ཅེས་བྱ་བ་བཞུགས་སོ།། བླ་མ་སྤྱན་རས་གཟིགས་ལ་ཕྱག་འཚལ་ལོ།། མཁས་བཙུན་བཟང་པོའི་དཔལ་གྱིས་འཇིག་རྟེན་འགེངས།། འཆད་རྩོད་རྩོམ་པའི་ལས་ཀྱིས་སྙིགས་རྒུད་འཇོམས།། མཁྱེན་བརྩེ་ནུས་པའི་མཐུ་ཡིས་སྐལ་ལྡན་སྐྱོང་།། ཁྱབ་བདག་བླ་མས་སྙིང་ལ་བྱིན་རླབས་སྩོལ།། སྙིང་རྗེའི་རང་གཟུགས་ཕྱག་ན་པདྨོ་ཡི།། སྒྱུ་འཕྲུལ་གར་སྒྱུར་དཔལ་སྤྲུལ་སེམས་དཔའ་ཆེའི།། ལེགས་བཤད་རྨད་བྱུང་ཐོག་མཐའ་བར་དགེ་བ།། ཁྱབ་བདག་བླ་མས་བཀྲལ་དེའི་ཟིན་ཐུན་སྡེབ།། ཅེས་ཚིགས་སུ་བཅད་པ་ཉུང་ངུས་མདུན་བསུས་ཏེ་མཚུངས་མེད་འཁོར་ལོའི་མགོན་པོ་སྐྱབས་རྗེ་ཡིད་བཞིན་ནོར་བུ་མཚན་བརྗོད་པ་དཀའ་ཡང་དོན་གྱི་སླད་དུ་མཚན་ནས་སྨོས་ན་༧ཐུབ་བསྟན་ལུང་རྟོགས་བསྟན་པའི་རྒྱལ་མཚན་དཔལ་བཟང་པོ་གང་གིས་ཆུ་མོ་སྦྲུལ་གྱི་ལོར་གངས་རྒྱན་གསེར་གྱི་པདྨའི་ལྷ་ཁང་ནས། བདག་ཅག་སྐལ་ལྡན་མཆེད་ལྕམ་ཁྲི་ཕྲག་དུ་མ་ལ་འཛུམ་པའི་ཞལ་བསྟན། བརྩེ་བའི་སྤྱན་གྱིས་གཟིགས་བཞིན་རྡོ་རྗེའི་ཆོས་ཀྱི་སྒྲ་དབྱངས་བསྒྲོགས་པ་ནི་འདི་ལྟར། ཉིན་དང་པོའི་ཆོས་ཁྲིད།ད་རེས་ཀྱི་ཆོས་ཞུ་བ་མང་ཆེ་བ་དུས་རྒྱུན་དུ་ཁྱིམ་གྱི་འཚོ་ཚིས་ཀྱི་བྱ་བས་བྲེལ་པའི་འཇིག་རྟེན་མི་ནག་གི་ཁྱིམ་པ་ཕོ་མོ་རེད་ལ། འདིར་ཐོན་ཏེ་ཆོས་ར་རྡོག་པས་མནན་ནས་ཆོས་གྲལ་དུ་བསྡད་པ་ཐམས་ཅད་ལ་ཆོས་པ་ཟེར་དགོས་ཤིང་། འཇིག་རྟེན་ལས་འདས་པའི་ལམ་ཞིག་འཚོལ་བའི་དོན་དུ་ཆོས་ཞུ་རུ་འོངས་པས། ཆོས་རའི་ནང་ནས་ཆོས་དང་མཐུན་པའི་ཆོས་ཞུ་ལུགས་ཀྱི་བསམ་པ་དང་། སྤྱོད་ལམ་དག་ཐོག་མར་སྦྱངས་ནས་ཤེས་དགོས། འདི་ན་ཡོད་པའི་ཁྱིམ་པ་ཕོ་མོ་མང་ཆེ་བ་འབྲོག་རྩྭ་ཐང་གི་སྟེང་། ས་མཐོ་སྒང་གི་སྤང་ལྗོངས་རི་ཀླུང་། རང་བྱུང་ཁམས་ཆེན་པོའི་པང་སྟེང་། ས་རྒྱ་ཆེ་ཞིང་། མི་གྲངས་ཉུང་ས། མིས་མིར་སྐད་ཤུགས་ཆེན་པོས་མ་བོས་ན་མི་གོ་ས་ནས་འོངས་པས་སྐད་འགོ་མཐོ་བའང་ཁག་ཡོད་པ་མིན་ལ། ཡང་མི་མང་འདུས་སྡོད་ཀྱི་གྲོང་ནས་ཡོང་བ་ཚོ་ཡང་། དུས་རྒྱུན་པར་འུར་སྒྲ་ཟིང་ཆའི་ནང་ནས། བཤད་རེས། འབོད་རེས་ཁོ་ནར་བྱས་པ་ལ་གོམས་སོང་བའི་དབང་གིས་མི་ཞིག་དང་ཐུག་དུས། འུར་བརྒྱབ་སྟེ་བཤད་དགོས་རྒྱུ་ཞིག་ལོས་ཡིན་སྙམ་ཞིང་། ལར་སུ་ཡིན་རུང་འདི་ལྟར་མང་པོ་ལྷན་དུ་འཛོམས་དུས། ངོ་ཤེས་རྣམས་ལ་བདེ་འདྲི་འཚམ་འདྲི། མི་ཤེས་པ་རྣམས་ལ་ཁྱོད་གང་ནས་ཡིན་ཞེས་ཁ་ཞིག་གྲག་དར་བ་སོགས་ལ་བརྟེན་ནས། དེ་ལྟར་བཤད་ཀྱིན་བཤད་ཀྱིན་ཚོང་ཡང་བཤད་རྒྱུར་འོང་བ་དང་། མང་ཆེ་བ་ས་ཆ་གཅིག་གི་མི་ཡིན་པས་ཁ་རེ་གྲག་ཅིང་སྐད་ཆ་རེ་བཤད་བསམ་ས་དང་ཐུག་ཡོང་དུས་བཤད་རྒྱུ་མང་བ་སྟེ། རྒ་རྒས་ཚོ་ལ་མཚོན་ན་རྐང་པ་ན་རབས། པུས་མགོ་གཟེར་རབས། མར་བསྡད་དུས་ཡར་ལང་དཀའ་རབས་སོགས་དང་། སྐྱེས་པ་རྣམས་ཀྱིས་ཚོང་གི་ལོ་རྒྱུས། ས་ག་གེ་མོར་སོང་ཚུལ་གྱི་སྐད་ཆ། གྱོད་དང་ཁ་མཆུའི་དོན་དག དོམ་བུ་ལོན་གྱི་གནས་ཚུལ་དང་། འབྲོག་པ་རྣམས་ཀྱིས་རྩྭ་ས་དང་། ཕྱུགས་ཟོག་གི་ལོ་རབས་དང་། བུད་མེད་རྣམས་ཀྱིས་བུ་རྒྱུད་ཀྱི་རྣམ་ཐར། ཕྲ་གསེར་མདོག་གི་སྐད་ཆ་དང་། ད་རུང་ལོ་ཉུང་ཕོ་གསར་མོ་གསར་སྣང་བ་མ་ཁུག་པ་རྣམས་ཀྱིས། ཁྱོད་ཀྱི་ཁ། ངའི་སྣ་ཞེས། འཕྱ་ཁུལ། དགོད་ཁུལ་ལ་སོགས་པ་བཤད་རྒྱུ་མང་བ་ཡིན་ཡང་། ཆོས་རའི་ནང་དུ་ཐོན་ཏེ་གཙུག་ལག་ཁང་གི་སྒོ་ཐེམ་བརྒལ་ཟིན་ཚེ། སྐད་འགོ་དམའ་དགོས་པར་མ་ཟད་ངག་བཅད་བྱ་དགོས་ལ། ངག་བཅད་བྱས་ན་བཟང་ཆ་མང་པོ་ཡོད་པ་སྟེ། འུ་ཚོ་སོང་སོང་ནས་བསྡད་ན་ངལ་སོས་པ་ལྟར་དུ། བཤད་བཤད་ད་ལ་མ་ཐུག་གི་བར་དུ་བཤད་པས་ད་ནི་མ་བཤད་པར་སྡོད་དང་ངལ་སོས་ཤིང་། དེ་བཞིན་དུ་ད་སྔོན་ཡང་ཡང་དྲན་ཞིང་ངལ་བ་དག་གིས་དྲན་བྱ་དྲན་བྱེད་མེད་པའི་ཐོག་ཏུ་བཞག་ན་སེམས་ཀྱི་ངལ་སོས་པ་ཡིན་པས། ཁྱེད་ཅག་གཡུ་འབྲུག་ཟམ་ཁ་ནས་ཡར་ཡོང་སའི་སྒོ་ཆེན་ཞིག་གི་ངོས་སུ། ཡུན་རིང་ངལ་ཞིང་དུབ་པའི་སེམས་ཁྱོད་ཀྱིས་ངལ་གསོས་ཤིག་ཅེས་པ་ནི། ས་ཆ་འདི་སྒོམ་རྒྱག་ས་ཡིན་པས་མང་པོ་དྲན་པའི་སེམས་རྣམ་རྟོག་ལས་འདས་པའི་སྒོམ་རྒྱོབ་ལ་འཁོར་བའི་སྡུག་བསྔལ་ཆུང་ཐབས་གྱིས་ཞེས་པའི་དོན་ཡིན། ངག་བཅད་བྱས་ཚེ་མ་ལོབས་པ་དག་གིས་དང་པོར་ངག་ཤོར་སྲིད་རུང་། ངག་ཤོར་ཚེ་ཨོཾ་བཛྲ་ས་ཏྭ་ཧཱུྃ་ཞེས་བྱོས་ལ་དེའི་མཚམས་ནས་ཁ་ཚུམས་དང་ནམ་ཞིག་ལོབས་འགྲོ་བའོ། །ཆོས་ཁྲིད་ཞུ་སྐབས་འཁོར་ལོ་དང་། ཕྲེང་བ། ཁ་འདོན། དགེ་སྦྱོར་གཞན་དག་ཀྱང་བསྐྱུར་ནས། སྒོ་ལུས་ངག་ཡིད་གསུམ་ཆུན་གཅིག་ཏུ་དྲིལ་ནས་ཉན་དགོས་ལ། དེ་ཡང་ཆོས་ཀྱི་སྒྲ་རྣ་བས་གོ་བ་རྐྱང་བས་མི་ཆོག་པར་དེའི་དོན་ཡིད་ལ་བསམ་པ་དང་། ཉན་བསམ་གཉིས་ཀའང་རང་རྒྱུད་ལ་སྦྱར་བའི་ཆེད་དུ་ཡིན་པས་ཆོས་སེམས་སུ་ངེས་པར་བྱས་ནས་ཕྱིར་ཁྱིམ་དུ་སླེབས་དུས་སུའང་ཆོས་དང་བསམ་སྤྱོད་གཉིས་ཀ་འབྲེལ་བའི་བེད་སྤྱོད་གཏོང་ཤེས་དགོས་པས། དེས་ན་ཡག་པོར་བྱས་ནས་མ་ཉན་དུས་མི་གོ་ལ། མ་གོ་དུས་མི་ཤེས་པས། ཆོས་ཞུ་ཚེ་བྱ་བ་བཟང་ངན་ཐམས་ཅད་བསྐྱུར་ཏེ། ཁབ་མིག་ཏུ་སྐུད་པ་འཛུད་པ་ལྟར་དུ། སེམས་དེ་ལ་གཏོད་ཅིང་རྣམ་ཤེས་རིག་པ་བསྒྲིམས་ཏེ་ཉན་དགོས། ད་རེས་ཀྱི་ཆོས་ཁྲིད་འདིའི་སྨད་མཚམས་ནས་ཐུགས་རྗེ་ཆེན་པོའི་སྐུ་སྒོམ་པས་མ་ཚད་པར་ཐུགས་སྒོམ་རྒྱུར་སྦྱོང་དགོས། ཐུགས་རྗེ་ཆེན་པོའི་སྐུ་དང་ཐུགས་བསྒོམས་ནས་བྱང་ཞིང་གོམས་ན། སྒོ་ལུས་ངག་ཡིད་གསུམ་སྔར་དང་མི་འདྲ་བར་གྱུར་བའི་བྱིན་རླབས་ཞུགས་ཏེ་ཚེ་འདིར་སྐྱིད་པ་དང་། ཕྱི་མ་བདེ་བ་ཅན་དུ་ཕ་ཁྱིམ་དུ་བུ་འགྲོ་འགྲོ་བྱེད་ཆོག་པའི་ཕན་ཐོགས་ཡོད་དོ། །འདིར་བཞུགས་ཀྱི་དགེ་འདུན་པ་རྣམ་པ་དང་ཡུན་རིང་པོར་ཆོས་ཁྲིད་མང་པོའི་ནང་དུ་མཉམ་དུ་ཞུགས་ནས་ཞོར་འཕྲོས་ཀྱི་བཀའ་མོལ་ངས་ངག་བཅད་བྱེད་ཞོར་དུ། ཆོས་ཁྲིད་ལ་ཁག་བཞག་སྟེ་ད་ལོའི་དབྱར་སྟོན་གཉིས་ཀ་ལ་ཞལ་བརྡ་མང་པོ་བྱུང་ཡོད་པས་མ་ཚད། ཆོས་དད་མང་ཚོགས་ཀྱི་ཁྱིམ་པ་ཕོ་མོ་རྣམས་དང་ལོ་རེའི་ནང་དུ་ལན་རེར་ངོ་འཕྲད་ཡོང་བའི་གོ་སྐབས་ལོ་ཁ་ཤས་སུ་འདི་ལྟར་བྱུང་བ་ཡིན་ཞིང་། ད་ལོ་ཡང་དེ་བཞིན་དུ་དཀོན་མཆོག་གི་ཐུགས་རྗེའི་སྐྱབས་འོག་ནས་རང་རོགས་མ་ཤི་གསོན་པོའི་མི་རྣམས་ཆོས་གཅིག་གིས་བསྡུས་ཏེ། ཆོས་ར་གཅིག་གི་ནང་དུ་མཉམ་འཛོམས་བྱུང་ཞིང་། ཐེངས་འདིའི་ཆེད་དུ་བྱ་བའི་གདུལ་བྱའམ། ཆོས་ཕྱོགས་ཀྱི་གླེང་མོལ་བྱ་ཡུལ་གཙོ་བོ་ནི་སྡེ་བའི་ཁྱིམ་པ་ཕོ་མོ་ཡིན་པས། ལོ་གཅིག་ལ་མ་ཐུག་ནས་དེ་རིང་ཐུག་ཚེ། བདེ་འདྲི་འཚམ་འདྲི་ཞིག་གི་ཚབ་ཏུ་དམ་ཆོས་འདུལ་བའི་ཆོས་སྐད་ཀྱི་འགྲོས་བྱས་ན། ཁྱིམ་པ་ཕོ་མོ་དང་། དང་པོར་ཐུག་དུས། ཚེ་དང་ལྡན་པ་དག་འོངས་པ་ལེགས་སོ། །བསྐྱོད་པ་ཡང་ངམ། ཞེས་འདྲི་བ་བྱེད་ཅིང་། དེའི་དོན་འུ་ཚོའི་ཁ་སྐད་བྱས་ན་ཁྱེད་ཅག་ཐོན་ནམ། དཀའ་ཨེ་ཐལ་ཞེས་པའི་དོན་ཡིན། འདིའི་ནང་དུ་ངོ་ཤེས་རྒ་རྒས་རྡོག་མ་ཁ་ཤས་ལས་བརྒྱ་ཐམ་པའི་ནང་དུ་མིང་ཟིན་བཅུ་ཙམ་ཡང་ཡོད་མེད་ཡིན་ཡང་། ངོ་ཤེས་དང་མི་ཤེས་ཀྱི་ཁྱད་པར་མི་ཆེ་བར་གནའ་མི་དེ་ཚོའི་མི་རྒྱུད་དམ། དེ་དག་དང་ཕན་ཚུན་འབྲེལ་བའི་མི་སྣ་ཡིན་འདུག་པས། ས་འདིའི་ཕོ་མོ་རྒན་དར་གཞོན་གསུམ་ཚང་མ་ནི། ལས་སྐྱིད་སྡུག་གཅིག་ཏུ་བསྐོས་པའི་མི། ཡུལ་དགོན་གད་པ་ལྟག་འོག མཛོ་རྒན་རྩིབ་མ་གཡས་གཡོན་ཡིན་པའོ། །འདིའི་ནང་ན་འགའ་རེ་དགོན་ཡུལ་གཅིག་དང་། འགའ་རེ་ཆོས་བརྒྱུད་གཅིག་གིས་བསྡུས་པ་ཡང་ཡོད་ཅིང་། མང་ཆེ་བ་ནི་རིགས་རུས་གཅིག་གིས་བསྡུས་པའི་བོད་གངས་ལྗོངས་ཆོས་ལྡན་གྱི་ཞིང་དུ་སྐྱེས་པའི་ཕུ་ནུ་སྤུན་ཟླ་མིང་སྲིང་། ལྷ་ཡུལ་གྱི་དམ་ཚིག་གཅིག་པ། མི་ཡུལ་གྱི་འདུན་མ་གཅིག་པ་ཤ་སྟག་ཡིན་པས། དེ་རིང་མཉམ་འཛོམས་ཀྱི་ངོ་འཕྲད་ཡོང་བའི་ཐོག་མར། ཁྱེད་ཚོ་ཚང་མ་ལ་བཀྲ་ཤིས་བདེ་ལེགས་ཀྱི་འཚམ་འདྲི་བརྒྱུད་ནས། ཆོས་མཐུན་གཏམ་གྱི་གླེང་མོ་ལ་ཕྱོགས་རྒྱུ་ཡིན། རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་གྱི་གནས་འདི་ནས། ངས་རྫོགས་པ་ཆེན་པོའི་ཟབ་ཆོས་ཀྱི་རང་ལུགས་དྲི་མ་མེད་པའི་ཆོས་རྒྱུན་སྤེལ་བའི་དབུ་བཙུགས་ཏེ་ཆོས་དུང་ཐོག་མ་བུས་པ་ནས་བཟུང་ད་ལྟའི་བར་ལོ་ངོ་བཅུ་གཅིག་སོང་ཞིང་། མི་ལོ་བཅུ་གཅིག་དེའི་རིང་ལ་ཆོས་འཁོར་ཆེན་པོའི་གདན་སའི་ཉེ་འདབ་ཏུ་གནས་པའི་རང་སྡེ་རང་སའི་མིས་གཙོ་བོར་བྱས་པའི་ཁྱིམ་པ་ཕོ་མོ་རྣམས་ལའང་དེ་མཚུངས་ཀྱི་ཆོས་སྐལ་རེ་ཐོབ་པའི་ཐོག་ཏུ། ཁྱིམ་པ་ཕོ་མོ་ཆེད་དུ་བྱ་བའི་ཡུལ་བྱས་ཏེ། བདེ་ཆེན་ཞིང་ཁྲིད་བཤད་པ་དང་། ཞིང་མཆོད་ཆེན་མོ་ཕུལ་བར་བྱས་ནས་ཞིང་སྒྲུབ་ཀྱི་ཚོགས་པ་དངོས་སུ་གཞི་ཁྱོན་ཆེན་པོའི་སྒོ་ནས་སྤེལ་བའི་ད་ལོའི་འདི་ཐེངས་བདུན་པ་རེད་ལ། འདི་དང་པོ་འགོ་འཛུགས་རྒྱུའི་དམིགས་ཡུལ་ཅི་ཡིན་ཞེ་ན། དམ་པའི་ཆོས་ནི་ཚེ་འདི་ཕྱི་གཉིས་ཀའི་བདེ་སྐྱིད་ཀྱི་འབྱུང་ཁུངས་ཡིན་ཞིང་། མི་ཡི་ནུས་པས་མི་འགྲུབ་པའི་ཆོས་དང་དཀོན་མཆོག་ལ་བརྟེན་ནས་སྒྲུབ་ཐུབ་རྒྱུའི་ལྐོག་གྱུར་གྱི་དོན་གྱི་གནད་འགག་ཆེན་པོ་ཞིག་ཡོད་པས། འཛམ་གླིང་ན་མི་གྲངས་དུང་ཕྱུར་བདུན་ཅུ་ཙམ་ཡོད་པའི་ནང་གི་བརྒྱ་ཆ་བརྒྱད་ཅུ་ཡན་གྱི་མི་རྣམས་ཀྱིས། ཆོས་ཀྱིས་སྒྲུབ་ཐུབ་པའི་དོན་གནད་ཅིག་ཡོད་པ་རིག་ནས། རང་རང་གི་དད་མོས་བྱ་ཡུལ་གང་ཡིན་ལ་མ་ལྟོས་པའི་ཆོས་རེ་སྒྲུབ་བཞིན་ཡོད་ལ། དེ་དག་གི་ནང་ན་འཇིག་རྟེན་འདིར་སྣང་གི་བྱ་བ་སྒྲུབ་པ་ལ་རྣམ་རིག་ལྷག་པར་བཀྲ་ཞིང་། ཕྱིའི་འབྱོར་བའི་ཡང་རྩེར་བསྙེགས་པ་རྣམས་ཀྱང་ཡོད་ལ། དེ་དག་གིས་ཀྱང་དཔོག་པར་དཀའ་བའི་གསང་དོན། མིས་ཐད་ཀར་ཤེས་དཀའ་བའི་གསང་བ་ལྐོག་གྱུར་གྱི་དོན་དག་ངོ་མཚར་ཅན་ཞིག་ཆོས་ཀྱི་ནང་དུ་ཡོད་པར་ཤེས་ནས། ཁེ་ཕན་ཆེན་པོ་ཞིག་ཆོས་ཀྱི་ནང་དུ་ལེན་རྒྱུ་འདུག་བསམ་པའི་ཚོར་སྣང་སྐྱེས་ནས་ཆོས་ལ་འཇུག་བཞིན་ཡོད། རང་རེ་བོད་གངས་ཅན་གྱི་ལྗོངས་ལ་སྔར་ནས་ཆོས་མདོ་སྔགས་ཀྱི་བསྟན་པ་དར། མཁས་གྲུབ་གཉིས་ལྡན་གྱི་དམ་པའི་སྐྱེས་བུ་མང་པོ་བྱོན། དེ་རྣམ་པས་ཤུལ་བཞག་མཛད་པའི་ཆོས་རིག་གཞུང་གི་པོ་ཏི་བྲག་རི་ལྟར་རྩིག་ཆོག་པའི་རིན་ཐང་བྲལ་བ་མཇལ་དུ་ཡོད་པ་འདི་ཡིན་ཞིང་། དེའང་བེད་མེད་རང་བཞིན་གྱི་ཅ་ལག་མིན་པར་དབང་ཁྲིད་ལུང་གི་བརྒྱུད་པ་ནས་བཟུང་སྟེ་ཡོད་པ་འདི་དག་གིས་སྔར་གྱི་མེས་པོ་རྣམ་པའི་རླབས་ཆེན་གྱི་མཛད་རྗེས་མཚོན་ཐུབ། འོན་ཀྱང་དུས་ཀྱི་རྒུད་པའི་དབང་གིས་ལོ་ངོ་བཅུ་ཕྲག་ཁ་ཤས་སུ་མུན་པའི་བསྐལ་པ་ཚེས་ཏེ། མི་ཤི་ཤི་ཟེར་བ་ཁྱི་ཤི་ཤི་རུ་གྱུར་ནས། རང་ཅག་གི་མི་ཐོག་སྔོན་མའི་ནང་གི་མང་པོ་ཞིག གྲི་ཤི་མིན་རུང་མུག་ཤི ཆོས་མེད་ཀྱིས་ཤི་བ་མང་བ་ནི་ལོ་ལོན་རྣམས་ཀྱིས་མྱོང་བ་མངོན་སུམ་དང་། ལོ་ཉུང་རྣམས་ཀྱིས་རང་ཉིད་ཀྱི་མི་ཐོག་སྔོན་མའི་ལོ་རྒྱུས་རྣ་ཐོས་སུ་གྱུར་ཡོད། ཉེ་བའི་ལོ་གྲངས་བཅུ་ཕྲག་གཉིས་གསུམ་ཚུན་ཆོད་ནས། དུས་ཇེ་ཡག བསྐལ་པ་ཇེ་བཟང་གྱུར་ནས། སྔོན་བྱོན་དམ་པ་གོང་མའི་ཐུགས་བསྐྱེད་དང་། ས་ཆ་རེ་རེ་ནས་བསྟན་འཛིན་གྱི་སྐྱེས་བུ་རྣམ་པ་རེ་རེ་གཉིས་གཉིས་དཀའ་སྡུག་ཅན་གྱི་འཕྲང་ལས་སྐུ་སྲོག་ཐར་ཏེ། བསོད་ནམས་ཀྱི་ཞིང་སར་འཚོ་བཞུགས་གནང་བའི་བཀའ་དྲིན་གྱིས། བསྟན་པའི་མེ་རོ་སླར་གསོ་གནང་ཞིང་། ཆོས་སངས་རྒྱས་ཀྱི་བསྟན་པ་འདི་བསྟན་པ་ཡང་དར་གྱི་སྐབས་སུ་རང་ས་རང་སྒོ་ནས་སླར་གསོ་མཛད་དེ། མེ་ཏོག་གང་ལ་ཕོག་པའི་ལྷ་སྐལ། རང་རང་གི་སྔོན་ལས་ཐོད་པའི་བསྐོས་ཐང་གིས་འབྲེལ་པའི་མཆོད་གནས་ཀྱི་དགོན་པ་རེ་ཡི་སྔར་ཡོད་ཀྱི་མཚན་ཡར་གསོ་མཛད་བའི་གནས་སྐབས་ཚེས་ནས། དགོན་པའི་གྲྭ་བཙུན་རྣམས་ལ་ཆོས་སྐལ་ཞིག་ཡོད་སོང་བ་ཡིན། འོན་ཀྱང་དེའི་འཁྲིས་སུ་ཡོད་པའི་སྡེ་བ་མང་ཚོགས་ལ་ཆོས་སྐལ་མེད་པར། ཐོས་བསམ་འཆད་ཉན་དང་། ཆོས་སྒྲུབ་རྒྱུ་དེ་གྲྭ་པ་བླ་མ་རྐྱང་བའི་སྐལ་བར་གྱུར་ནས། མི་ལུས་བླངས་པ་འདྲ་བ་དང་། ཁ་ལག་སྤྱོད་གསུམ་མཚུངས་པ་དང་། ཤི་དགོས་ལུགས་གཅིག་པ་དང་། ཐར་བ་འདོད་ལུགས་མཐུན་པ་ཡིན་ཡང་། ལས་དབང་བསྐོས་ཐང་མི་གཅིག་པར་མི་སྐྱ་ཕོ་མོ་རྣམས་ཟོག་ལྟར་དུ་ཆོས་མེད་མུན་ནག་གི་ནང་དུ་སྡོད་དགོས་པ་འདི་སྔར་སྲོལ་ད་གནས་གང་ཡིན་ཡང་ཡག་པ་ཞིག་ཏུ་མ་མཐོང་ལ། ཁྱད་པར་དུ་ས་ཆ་འདིའི་རྒན་རབས་པ་རྣམས་དང་ང་ཚོས་ས་རྡོ་གཉིས་ཀྱི་ནང་ནས་སྐྱིད་སྡུག་མཉམ་མྱོང་གི་འགྲོ་ལམ་བརྒྱུད་དེ་ཡོང་བས། སྡེ་བ་མང་ཚོགས་ཀྱི་གནས་སྟངས་སྐྱིད་སྡུག་ཚང་མ་ཤེས་པ་ཡིན། བོད་བསྟན་པ་ཡང་དར་གྱི་མགོ་ཚེས་ཚུན་ཆད་ནས་བསྟན་པ་དགོན་པ་སླར་གསོའི་ཆེད་དུ་ས་ར་རྡོ་ཁང་ལ་འཐམས་པ་ནས་བཟུང་སྟེ། ཐམས་ཅད་ཀྱིས་རང་ནུས་གང་ཡོད་ཀྱིས། ཕ་ཁུ་བོའི་ཐོད་རུས་གཞག་ས་དང་། མ་སྲི་མོའི་ལྟེ་ཐག་གཅད་སའི་རང་ས་རང་ཡུལ་གྱི་ཕ་དགོན་དཀར་པོ་འདི། མི་ཐོག་མི་རབས་ཀྱི་ཤི་བོའི་རྣམ་ཤེས་བཅོལ་ས། གསོན་པོའི་སྐྱབས་འཇུག་ཞུ་ས་ཡིན་བསམས་ཏེ། སྡེ་འདིར་གཏོགས་པའི་ཕོ་མོ་རྒན་གཞོན་མེད་པས་མི་ཤུགས་དང་དངོས་ཤུགས་ཀྱི་ནུས་པ་ཕྱུང་བ་ཡིན་ཡང་། དེ་རིང་ཁ་རྩང་དགོན་པའི་ནང་ནས་ངེད་ཅག་གིས་ཉལ་ས་གྲུ་བཞི་རེ་འགྲུབ་སོང་བས། ཁྱོད་ཚོ་ཅི་རེད་ན་རེད་ཅེས་སྔར་གྱི་མི་དེ་མིན་པ་ལྟར་བྱས་ནས་བསྡད་ན། མི་ཞིག་ཡིན་པའི་ངོས་ནས་མི་ཆོས་ཡ་རབས་ཀྱི་བཟང་སྤྱོད་མ་ཡོད་པ་ཡིན་ལ། ཆོས་པ་ཞིག་ཡིན་པའི་ངོས་ནས་ཀྱང་མ་ནམ་མཁའ་དང་མཉམ་པའི་འགྲོ་བ་སེམས་ཅན་ཞེས་ཁས་བརྗོད་རུང་། དོན་རང་འཁྲིས་ཀྱི་མི་ལ་ཆོས་ཚིག་བཞི་གཅིག་ཙམ་གྱིས་ཚེ་འདི་ཕྱི་གང་རུང་ལ་ཕན་ཐོགས་ཡོད་པའི་ལམ་སྟོན་ཞིག་མེད་ཚེ། ཆོས་འཇིག་རྟེན་གཉིས་ཀའི་ལུགས་དང་མཐུན་པ་ཞིག་མ་ཡིན་སྙམ་པ་དང་། དུས་རབས་ཀྱི་འགྲོས་དང་བསྟུན་ན་ཡང་། ཆོས་ཀྱི་ནང་དོན་ཤེས་མིན་གྱིས་གང་ཟག་རང་རྒྱུད་ཀྱི་བསྟན་པའི་སྲོག་རྩ་ཆགས་འཇིག་གི་གནད་འགག་ཏུ་ཐུག་འདུག་པ་ལ་སོགས་པའི་རྒྱུ་མཚན་ལ་བརྟེན་ཏེ་བདེ་ཆེན་ཞིང་སྒྲུབ་འཚོགས་པ་ཡིན་པས། གོ་སྐབས་འདི་དང་བསྟུན་ནས། ཤི་བོའི་རྒྱབ་ཏུ་གསོན་པོ་ལུས་པའི་དོན་པོ་ཡིན་པས་སྔར་གྱི་ཤི་བོ་མང་ཆེ་བ་དེའི་རྗེས་སུ་ཆོས་ཀྱི་ར་མདའ་ཞིག་མངག་དགོས་པ་དང་། ཤི་གསོན་གཉིས་ཀའི་དོན་དུ་ཚོགས་གསོག་མཆོད་འབུལ་དགེ་སྒྲུབ་སྡིག་སྤོང་རང་ནུས་གང་ཡོད་ཀྱིས་བྱ་རྒྱུའི་རྨང་གཞིའི་ཐོག་ནས། གཙོ་བོ་ཆོས་སྒྲུབ་པའི་སྒྲུབ་ལུགས་སྒོ་ལུས་ངག་ཡིད་གསུམ་གྱི་ནང་ནས་སེམས་ཀྱིས་བསྒྲུབ་རྒྱུའི་ཆོས་ཀྱིས་ཆོད་ཆེ་བས། ཆོས་ཕྱོགས་ཀྱི་ཤེས་བྱ་ཅུང་ཙམ་རེ་ཡིན་ཡང་མི་སྐྱ་ཕོ་མོ་རྣམས་ཀྱིས་ཤེས་ཨེ་མི་འགྲོ། དེ་བཞིན་ཚང་མས་ཡིག་ངོ་རེ་ཡང་ཤེས་སོང་ན་ཆོས་འཇིག་རྟེན་གཉིས་ཀའི་མིག་གསར་བ་ཕྱེས་པ་ལྟ་བུ་ཞིག་རེད་བསམས་ནས། རྒན་གཞོན་ཚང་མས་ཡི་གེ་སྦྱངས་ཏེ་ཡིག་རྨོངས་སེལ་ཐབས་ཀྱང་བྱས་པ་ཡིན། མདོར་ན་བདེ་ཆེན་ཞིང་སྒྲུབ་འདི་འཚོགས་པའི་དམིགས་ཡུལ་ཚུར་བསྡུས་ན། རང་ཅི་འདྲ་རོགས་ཡིན་པས་ཚེ་འདི་ཕྱི་རང་གཞན་གཉིས་ཕན་གྱི་དམ་ཆོས་རྣམ་དག་བསླད་དང་མ་འདྲེས་པའི་སྒྲུབ་ལུགས་དེ་སྐྱ་སེར་ཚང་མས་ཤེས་དགོས་ཤིང་། ཁྱད་པར་དུ་ལོ་འཁོར་མོ་གཅིག་གི་དུས་ཚོད་དེ་ཁ་གསོ་རྒྱབ་འགེབས་ཚེགས་ལས་ཀ་གཉིས་ཀྱིས་ཟད་བཞིན་པའི་ཉམ་ཆུང་ཁྱིམ་པ་ཕོ་མོས་ཤེས་དགོས་འདུག་བསམ་པའི་དམིགས་ཡུལ་བཟུང་བའོ། །དེས་ན་བླ་མས་གྲྭ་པ་གྲྭ་རྐྱང་གི་འཚོ་བར་སྤྱད་དེ་གྲྭ་པ་དཀྱུས་མ་ཞིག་དང་འདྲ་བར་བྱེད་རྒྱུའི་མིག་དཔེ་བསྟན་ནས། ཚོགས་བསགས་མཆོད་འབུལ་གྱི་ཐེབས་རྩ་ཞིག་དགོས་དུས། དེ་ཟུར་དུ་བཅད་པའི་སྤྱི་གཞུང་ཞིག་བཙུགས་ན་ལེགས་སྙམ་པའི་བསམ་བློ་ཡོད་པ་ལྟར་དུ། ཞིང་སྒྲུབ་འདི་པདྨ་ཐང་གཞུང་གི་གྲོན་དངུལ་ཕུད་དེ་གཞུང་གིས་འཚོགས་རྒྱུ་མ་གཏོགས་ཟུར་ནས་རྒྱུ་འགྲོ་གཏོང་མཁན་ཞིག་ལ་འཚོགས་འཇོག་འཆར་དང་པོ་ནས་མིན་པས་ཁ་ཤས་ཀྱིས་ལག་བཙུག་བྱེད་པ་ཡིན་ཟེར་རུང་འཚོགས་སུ་མ་བཅུག་པའོ། །འོན་ཀྱང་རྗེས་སུ་སྡེ་ཤོག་ཀྱི་དཔོན་པོ་ལྷག་བསམ་ཅན་འགའ་རེས་གཙོ་བོར་བྱས་ཏེ། རེ་བ་ཐེངས་མང་བརྒྱབ་པས། མི་མང་སྤྱི་ཁྱབ་ཀྱི་རེ་འདུན་དེ་ཐང་དུ་འཕེན་མ་ཐུབ་སྟེ། འབྲོག་རུའི་སྡེ་ཤོག་ལྔ་ཡིས་མི་ལོ་ལྔ་ལ་འཚོགས་ཤིང་། ཡང་སྒོས་ད་ལོའི་སྦྱིན་བདག་མཚོ་ཁྲི་ཀླུ་ཕྱུག་སྡེ་བར་མཚོན་ན། ཤོག་ཁག་གཞན་དང་བསྡུར་ན་དུད་གྲངས་ཉུང་པའི་སྡེ་བ་ཆུང་ཆུང་ཡིན་པས། བགོས་ཁུར་དེ་ཚོད་ཀྱིས་ལྷག་ཏུ་ལྕི་ཡང་། ལྷག་བསམ་སེམས་པ་རྣམ་དག་གིས་སྤོབས་པ་བསྐྱེད་དེ་འཚོགས་པ་ལ། ངས་ན་ནིང་ནས་དང་ལེན་བྱས་པ་ཡིན། ས་ཆ་ཡུལ་སྡེ་གང་ནས་ཡིན་ཡང་། སྡེ་ཤོག་ཁག་ཅེས་པ་དུད་ཚང་མང་པོའི་ཚོགས་པ་ཡིན་པས་ཁྱིམ་ཚང་རེ་རེའི་ནང་ན་ཤི་བོ་ཆོས་མེད་ཅི་འདྲའི་མང་པོ་ཞིག་མི་ཐོག་སྔོན་ནས་ད་བར་ལ་ཡོད་མྱངས་མེད། ཤི་བོ་ཆོས་མེད་དེ་རྣམས་ཀྱིས་ཁ་གསོ་རྒྱབ་འགེབས། ཁྱད་པར་དུ་མི་རབས་རྗེས་མའི་པང་བུ་རྒྱུད་ཀྱི་དོན་དུ་ཅི་འདྲའི་སྡིག་པ་བསགས་མེད། འུ་ཚོ་བོད་ནས་ཀྱང་སྔར་མཉམ་ལས་བཙུགས་ཚུན་ཆད་སྤྱི་སྒེར་གཉིས་ཀའི་སྐབས་སུ་ཁྱིམ་མི་ནག་གི་འཚོ་བ་ཞིག་སྐྱེལ་དགོས་དུས། སྡིག་དང་མ་འདྲེས་པ་ཞིག་གང་ན་ཡོད། སྤྱིར་རྒྱུ་ནོར་སྡིག་དང་མ་འདྲེས་པ་དཀོན་པ་ཡིན། ཁྱིམ་པ་ཕོ་མོ་རྣམས་ཀྱིས་རྐུ་རྫུན་གཡོ་ཁྲམ་ལ་སོགས་པས་རྒྱུ་འབྲས་མ་བསྣོགས་པར་ལག་པ་གཉིས་ཀྱིས་ལས་ཀ་ལས་ནས་ཡོང་སྒོ་ཞིག་ཡོད་པ་དེ་གཙང་མ་ངོ་མ་ཡིན་གྱི། བླ་མ་གྲྭ་པའི་མིང་དང་འབྲེལ་བའི་ལོག་པའི་འཚོ་བ་དཀོན་མཆོག་གི་ཕག་གི་དཀོར་ནག་སྒེར་གྱིས་སྤྱད་ན་རྣམ་སྨིན་ལྷག་ཏུ་ལྕི་བའོ། །འཚོ་ཁྲི་ཀླུ་ཕྱུག་སྡེ་བས་ད་རེས་ཀྱི་འཚོགས་འགོ་འདི་སྦྲེལ་ནས། ཆོས་ར་རྡོག་པས་བརྫིས་མཁན་ཚང་མར་དངོས་ཤུགས་བརྒྱུད་གསུམ་ནས་དགེ་བསྐུལ་བྱས་པར་ངས་རྗེས་སུ་ཡི་རང་དང་བཅས་ཏེ་ཆོས་ཁྲིད་མ་བཤད་པའི་སྔོན་དུ་ས་ཆ་འདིར་གཏོགས་དང་མ་གཏོགས་པའི་ཁྱིམ་པ་ཕོ་མོ་ཚོ་ལ་གཙོ་བོར་དམིགས་ཏེ། གསལ་བཤད་ཁ་བརྡའི་ཚུལ་གྱིས་མཚམས་སྦྱོར་རེ་བྱས་ན་བསམས་པ་ཡིན། འདི་ལྟར་བསམ་བློ་བཏང་ན། རང་རེ་ཆགས་སའི་འཛམ་གླིང་གི་ས་གཞི་རིལ་མོ་འདིའི་ཐོག་ཏུ་མིའི་འགྲོ་བས་གཙོར་བྱས་པའི་སྲོག་ལྡན་གྱི་སེམས་ཅན་རིགས་མང་པོ་ཞིག་མཉམ་དུ་འཚོ་གནས་བྱས་ཡོད་ཅིང་། དེའི་ནང་གི་འགྲོ་བ་མི་ཞེས་པ་འདི་མཐོ་རིམ་གྱི་སྲོག་ཆགས། མཐོ་རིས་རྣམ་གསུམ་གྱི་ཡ་གྱལ། འགྲེངས་ཏེ་འགྲོ་བའི་རྐང་གཉིས། སྨྲ་ཤེས་དོན་གོ་ཅན། མགོ་གནམ་ལ་བསྟན། རྐང་བ་སར་བཙུགས། སྐེད་རགས་ཐད་དུ་བཅིངས། གཏམ་བཤད་ནས་གོ་བརྡ་འཕྲོད་པའི་མི་ཞེས་པ་དེ་ཡིན་པས། རང་རེ་གསོན་པོར་འཚོ་བཞིན་པའི་འཚོ་བའི་ནང་ན་མེད་དུ་མི་རུང་པའི་དགོས་མཁོ་ཁྱད་པར་ཅན་ནི། དམ་པའི་ལྷ་ཆོས་བསྒྲུབ་རྒྱུ་ཡིན་ཞིང་། དམ་པའི་ལྷ་ཆོས་རྣམ་དག་སྒྲུབ་རྒྱུའི་འཚོ་བའི་ཆ་རྐྱེན་བཟང་པོ་ཞིག་མེད་ན། མཁའ་དང་ས་ལ་རྒྱུ་བའི་སྲོག་ཆགས་ཆེ་ཕྲ་དང་། གཞན་བོད་འབྲོག་ཕྱོགས་ཀྱི་སྒོ་ཁར་ཡོད་པའི་སྒོ་ཕྱུགས་རྟ་ཟོག་སྒོ་ཁྱི་སོགས་དང་ཁྱད་པར་འབྱེད་བྱེད་མ་ཡོད་པ་ཡིན། ཅིའི་ཕྱིར་ཞེ་ན་འུ་ཚོ་མི་ཡིན་པའི་དོན་པོ་ཆོས་ཤིག་མ་ཤེས་ཚེ། ཟ་ཉལ་ལངས་འདུག་ཙམ་ཞིག་དུད་འགྲོ་རྣམས་ཀྱིས་ཀྱང་ཤེས་པས་དུད་འགྲོའི་འཚོ་བ་ཙམ་ལས་ཁྱད་པར་མ་ཡོད་པ་ཡིན། ད་རུང་དུད་འགྲོའི་ནང་ན་འདྲིས་བཟང་ཕྱི་ཐག་རིང་པོ་ཅན་སྟོབས་དང་ནུས་པ་ལྡན་པ་དང་། འགའ་རེས་གཞན་གནོད་མི་བྱེད་པ་སྡིག་མེད་རྩྭ་གཙང་ཆུ་གཙང་གིས་འཚོ་བཞིན་པ་ཡང་མང་བ་ཡོད། མིའི་ནང་ན་ཡང་དམ་པའི་ལྷ་ཆོས་འདི་ཕྱི་རང་གཞན་གཉིས་ཕན་གྱི་དོན་ཨེ་གོ་ལྟ་བར་མི་མོས་པ་དང་། དེར་བློ་ཁ་ཙམ་ཡང་མི་ཕྱོགས་ཤིང་ཆོས་མ་དགོས་ཡ་རབས་བསམ་སྤྱོད་ཀྱི་དྲི་ཙམ་ཡང་མེད་པའི་དུད་འགྲོ་བཟང་ཤོས་ལས་ཀྱང་ཞན་པའི་ཐ་ཤལ་དུ་གྱུར་པ། ཚེ་ཕྱི་མ་ཕར་ཟད་ཞོག ཚེ་འདིའི་རང་དོན་ཆུང་ངུ་ཙམ་ཡང་སྒྲུབ་མི་ཤེས་པ་དང་། ཕྱི་མ་མ་ཟད་ཚེ་སྨད་ལ་འདང་མི་ཕོག་པ་དང་། ད་དུང་སང་ཕོད་ཀྱི་འདང་རྒྱག་ད་ལོ་མེད་པའི་མི་ཚེའི་འདུན་ལམ་ཙམ་ཡང་མི་རིག་པ་ཡོད། སྤྱིར་ཆོས་ཞེས་པའི་སྒྲ་ཙམ་ལ་གོ་དོན་མང་ཡང་། འདིར་དམ་པའི་ཆོས་དང་འབྲེལ་དུས་ཆོས་ཞེས་པ་དེ་བཅོས་ཞེས་པའི་དོན་ཏེ། བཅོས་བསྒྱུར་གཏོང་ཟེར་རྒྱུ་ཞིག་ཡོད་དར་བ་དེ་དང་གོ་དོན་འདྲ་བ་ཡིན། བཅོས། ཆོས། འཆོས་རྣམས་ཡིག་འབྲུ་བྲི་ལུགས་དང་། བོད་སྐད་ཀྱི་འདས་མ་ད་གསུམ་དང་། བྱ་བྱེད་ཀྱི་ཁྱད་པར་ཙམ་ཞིག་ལས་དོན་གྱིས་གོ་དོན་གཅིག་པ་ཡིན། དེས་ན་ཆོས་བསྒྲུབས་ཏེ་གང་ལ་བཅོས་བསྒྱུར་བྱེད་དགོས་ཤེ་ན། བསམ་སྤྱོད་ཕྱིན་ཅི་ལོག་པ། རང་གཞན་འཕྲལ་ཡུན་ལ་སྡུག་ཏུ་སྦྱོར་བྱེད་དེ་ཉིད། བསམ་སྤྱོད་བཟང་པོ་རང་གཞན་བདེ་བའི་ལམ་དུ་སྦྱོར་བྱེད་དུ་ཚུར་འཆོས་དགོས་པས། འཆོས་བྱེད་དམ་སྡུག་བསྔལ་གྱི་གཡང་ལས་སྐྱོབ་བྱེད་ཡིན་པས། ཆོས་ཞེས་པ་འཆོས་སྐྱོབ་གཉིས་ཀའི་ཡོན་ཏན་དང་ལྡན་པ་ཞིག་ཡིན་པར་ཤེས་དགོས། ཁྱིམ་པ་ཕོ་མོའང་ཆོས་དད་མང་ཚོགས་ཡིན་པས་། དུས་རྒྱུན་དུ་ཁྱིམ་བཟའ་བའི་ནང་གི་གོ་ཁ་ཕན་ཚུན་ནམ། རླངས་འཁོར་འཕྲུལ་རྟ་ལ་བརྟེན་ཏེ་མཉམ་དུ་འགྲོ་སྐབས་སམ། གཞན་ཁྱིམ་ཚང་ཕན་ཚུན་ལ་འགྲུལ་པ་འགྲོ་རེས་བྱ་བའི་དུས་ཚོད་ཡིན་རུང་། མི་དང་མིར་ཐུག་ཚེ་བདེ་འདྲི་འཚམ་འདྲི་རེ་བྱས་པའི་གཞུག་ཏུ་སྐད་ཆ་དོན་ལྡན་འཇིག་རྟེན་ཡ་རབས་ཀྱི་ལུགས་སྲོལ་དང་། དམ་པའི་ཆོས་ཀྱི་ཤེས་བྱ་ལབ་གླེང་བྱས་ན་བཟང་བ་ཡིན། འུ་ཚོས་ཞུས་པའི་ཆོས་ཞེས་པ་དེ་ཆོས་སྐྱོབ་ཀྱི་ཡོན་ཏན་གཉིས་ལྡན་དེ་ཇི་ལྟར་ཡིན། འུ་ཅག་གིས་སྐྱབས་དམ་པ་དཀོན་མཆོག་གསུམ་ལ་སྐྱབས་སུ་སོང་ཏེ་སྐྱབས་འགྲོའི་སྡོམ་པ་ཞུས་ན། དཀོན་མཆོག་གསུམ་གྱི་གོ་དོན་དང་། རྣམ་དབྱེ་ཇི་ལྟར་ཡིན་ཞེས་བཤད་ན་གོ་དོན་རྒྱ་ཆེ་ཞིང་། གོ་བ་གཏིང་ཟབ་པ། རང་གི་ཤེས་རབ་འཕེལ་བ་དང་། ཚེ་འདི་ཕྱི་གཉིས་ཀའི་ལེགས་པའི་ལམ་སྣེ་ཟིན་པ་ལ་ཕན་ཐོགས་ཆེ་བ་ཡིན། དེ་མིན་ཁྱོད་ཀྱི་ཁ། ངའི་སྣ། ཡས་ཚང་ལ་བླ་བཙག མས་ཚང་ལ་ཕྲག་དོག གཡོ་སྒྱུའི་ངན་མཚང་ཏག་ཏག་བཤད་ནས་ཅི་བྱེད། སྔོན་ནས་ད་བར་དུ་དེ་བཤད་ནས་གོ་མ་ཆོད་པ་འདིའོ། །མདོར་ན་ཆོས་ཀྱི་སྒྲ་དོན་དེ་འཆོས་སྐྱོབ་གཉིས་ཏེ་བསམ་སྤྱོད་ཕྱིན་ཅི་ལོག་ལས་བཅོས་ཏེ། སྡུག་བསྔལ་ལས་སྐྱོབ་པའི་དོན་ཅན་ཞིག་ཡིན། ཆོས་ཞེས་པ་དེ་ཇི་ལྟར་ཡིན་མ་ཤེས་གོང་ནས་རྨོངས་དད་རེད་ཅེས་པ་དང་། ཆོས་ཞེས་པ་ཅི་ཡིན་གང་ཡིན་མ་ཤེས་པར་ཐུགས་རྗེ་མ་ཆུང་ཞེས་པ་གཉིས་ཀ་ལ་སྙིང་པོ་དེ་ཙམ་མེད་ལ། བརྟགས་ཤིང་དཔྱད་པ་སྔོན་དུ་མ་སོང་བའི་མ་བརྟགས་བབ་ཅོལ་སྨྲས་པའི་ཁྱི་རྗེས་སྤྱང་འདྲོགས་ཡིན་པས་གཉིས་ཀ་རྨོངས་དད་ཡིན། ཆོས་པ་ཡིན་ཡང་རུང་། ཆོས་དད་མི་བྱེད་མཁན་ཡིན་ཡང་རུང་། ནང་ཆོས་མ་ཡིན་པའི་ཆོས་ལུགས་ལ་དད་མཁན་ཡིན་ཡང་རུང་། གང་ལྟར་འཇིག་རྟེན་གྱི་མི་མ་དགོས་དུད་འགྲོའི་རིགས་གྱུར་གྱི་སྲོག་ཆགས་ཆེ་ཕྲ་ནས་བཟུང་སྟེ་ཉིན་མི་དལ་མཚན་མི་ཁོམ་བྲེལ་ཏེ་རྒྱུག་བཞིན་པ་འདི་ཐམས་ཅད་ལུས་ཀྱི་ཆགས་དབྱིབས། སྣང་བའི་བག་ཆགས། འཚོ་བའི་སྤྱོད་ཡུལ་མི་འདྲ་རུང་། ཐམས་ཅད་ཀྱིས་བདེ་བ་འདོད་པ་དང་། བདེ་བ་དོན་གཉེར་གྱི་ཆེད་དུ་རྒྱུག་བཞིན་པ་དང་འདྲ་བ་ཡིན། དེ་ཡང་སོ་སོ་རང་ཉིད་བདེ་བའི་ཆེད་དུ་རྒྱུག་པ་མ་གཏོགས་གཞན་བདེ་བའི་ཆེད་དུ་རྒྱུག་པ་ཉུང་ཞིང་། ཁག་ཀྱང་མེད་དེ་རང་ལྟོགས་པ་དང་། གཞན་ལྟོགས་པ་མི་འདྲ་ཞིང་། རང་འཁྱག་པ་དང་། གཞན་འཁྱག་པ་མ་འདྲ་བས་ཡིན། དེས་ན་ང་ཞེས་པའི་འདང་ཆེན་ཞིག་ཡོད་པ་འདི་རྩད་གཅོད་དགོས་ཤིང་། ལར་མ་གཞི་ང་ཞེས་པ་གང་ནས་འོངས། གང་དུ་འགྲོ་བ་ཞིག་ཡིན། དང་པོ་ཁ་ངུ་སྐད་ཅིག་དང་ལྷན་དུ་འཇིག་རྟེན་འདིར་སྣང་གི་སྣང་བ་སྐྱ་རིབ་འདི་ཤར། ངོ་མི་ཤེས་པ་ཁ་ཤས་མཉམ་དུ་ཐོན། ཁྱིམ་བཟའ་ཚང་དུ་ལོག་ནས་ངོ་ཤེས་སུ་གྱུར། ཆགས་ཞེན་འཁྲུལ་བ་ཡིས་སྦྲེལ་ཏེ་ཉིན་ཁ་ཤས་ཀྱི་བདེ་སྡུག་བར་མའི་འཁྲུལ་སྣང་གཉིད་མ་བདེ་བའི་རྨི་ལམ་ལྟ་བུ་འདི་བརྒྱུད་ནས། ནམ་ཡིན་རང་གིས་ཀྱང་མི་ཤེས་པའི་ཉིན་གཅིག་ལ་མིག་མཆི་མ་ཙ་རེ་མི་འདོད་བཞིན་དུ། སྔར་དང་པོ་འོངས་པ་ལྟར་དུ་འཇིག་རྟེན་ཕྱི་མའི་ཡུལ་དུ་མར་གྱི་དཀྱིལ་ནས་སྤུ་བཏོན་པ་ལྟར་དུ་ཁྱིམ་བཟའ་བའི་དཀྱིལ་ནས་ཁེ་རུར་འགྲོ་དགོས་པས། དེས་ན་འདིའི་ཐོག་མཐའ་བར་གསུམ་གྱི་ཕུགས་དེ་ཆོད་དགོས། དེས་ན་ད་ལྟའི་སྐབས་སུ་ང་ཞེས་མཛུ་གུ་འཛུགས་ས་དེ་ལུས་སེམས་གཉིས་ཡིན་ཞིང་། དེ་གཉིས་མཉམ་དུ་ཚོགས་ཤིང་གསོན་པོ་དབུགས་ཡོད་ཚེ་འདིར་ང་ཞེས་བྱ་བ་ཡིན། ལུས་འདི་མི་འཁྱག་སྤྱད་ཀྱི་གོས་སྐོན། མི་ལྟོགས་སྤྱད་ཀྱི་ཟས་སྦྱིན། ཡག་སྤྱད་ཀྱི་བརྒྱན་བཏགས། ཁྲུས་དང་བྱི་དོར་བྱེད་དགོས་པ་ལྟར་དུ། སེམས་འདི་ལ་དེ་ལྟར་དུ་གཙང་སྦྲ་བྱི་དོར་མི་བྱེད་པ་འདི་གླེན་པ་སྟེ། ལུས་ལ་གཙང་སྦྲ་བྱི་དོར་དགོས་དུས་སེམས་ལ་གཙང་སྦྲ་བྱི་དོར་མི་དགོས་པ་ཅི་ཞིག་ཡོད། ལུས་ལ་སྨན་བཅོས་དགོས་པ་ལྟར་དུ་སེམས་ལ་སྨན་བཅོས་དེ་བས་ཀྱང་དགོས་པ་སྟེ་གནད་ཆེ་བ་སེམས་འདི་ཉིད་ཡིན་པས་སོ། །ལུས་ནི་ཉི་མ་ཁ་ཤས་དང་། ལོ་ཟླ་ཁ་ཤས་ཀྱི་རྗེས་ནས་དོར་རྒྱུ་ཡིན་པ་སྟེ་ཡུན་རིང་སོང་ཚེ་རྙིང་སྟེ་ཅི་ཡང་མི་ལོ་བ་ཅ་ལག་རྙིང་པ་དང་གཅིག་མཚུངས་ཡིན། སེམས་རྣམ་ཤེས་ཀྱི་རྒྱུན་འདི་ཚེ་རབས་ཚེ་བརྒྱུད་ལ་གཅིག་ཡིན་ཞིང་། ལས་དཀར་ནག་གི་འབྲས་བུ་སྐྱིད་སྡུག་འདིས་མྱོང་དགོས་ཤིང་། ལས་བསགས་མཁན་གཙོ་བོ་ཡང་སེམས་ཡིན་ལ་མྱོང་མཁན་གཙོ་བོའང་སེམས་ཡིན། སེམས་འདི་དཔོན་པོ་ལྟ་བུ་དང་། ལུས་ངག་གཉིས་ཀ་གཡོག་པོ་ལྟ་བུ་སྟེ་སེམས་དགའ་ན་ལུས་དགོད་ཅིང་། སེམས་སྡུག་ན་ལུས་ངུ་དགོས་ཐུག་པ་ཡིན། ལུས་ཀྱིས་མྱོང་བཞིན་པའི་སྡུག་བསྔལ་ཐམས་ཅད་སེམས་ཀྱིས་བཀོད་འདོམས་ཉེས་པའི་ལན་ཆགས་ལུས་ཐོག་ཏུ་སྨིན་པ་ཡིན་ཞིང་། སེམས་ཀྱིས་ངན་བློ་ཉེས་ཏེ་རང་སྲོག་རང་གིས་བཅད་དགོས་ཐུག་པའང་མང་བ་ཡིན། མི་བརྒྱ་ཡི་དཔོན་བྱ་དགོས་ན་དེའི་ཚོད་ཀྱིས་དཔོན་པོ་བྱེད་ཤེས་པའི་ཤེས་ཡོན་སྦྱོང་བརྡར་རྒྱག་དགོས་ཀྱི། ལྷ་རང་མགོ་མི་ཐོན་དུས་འདྲེ་ཤ་ཐག་མི་ཐུབ་པ་ཡིན། ང་ཞེས་གཅེས་འཛིན་བྱ་སའི་ལུས་ངག་ཡིད་གསུམ་ལས་གཙོ་བོ་ཡིན་པའི་སེམས་འདི་ཉིད་བཟང་པོའི་ལམ་ལ་འཇོག་པའི་སྦྱོང་བརྡར་བྱ་མ་མྱངས་དུས། སེམས་ངན་པ་ལང་ཤོར་གྱུར་ནས། མགོ་བཅའ་མེད་པའི་བཟའ་ངན་གྱི་བུ་རྒྱུད་བཞིན་དུ། ངན་ཆུ་རྒྱུན་ཐུར་དུ་རྒྱུགས་པ་ལྟར་དུ་གྱུར་ནས་ཅི་སྡུག་གང་སྡུག་དག་ལོབས་པར་སླ་ལ། བཟང་མེ་ལྕེ་གྱེན་དུ་འབར་བ་ལྟ་བུ་དེ་མ་བསླབས་པར་ཤེས་དཀའ་ཞིང་། བསླབས་ཀྱང་བཟང་པོ་ཞིག་མིན་ན་མི་ཤེས་པ་ཡིན། བཟང་པོའི་ལམ་ལ་འཇོག་མ་མྱངས་པའི་སེམས། ཡོན་ཏན་མེད་པར་སྐྱོན་གྱིས་གང་སྟེ། འདང་རྒྱག་ཉེས། བསམ་བློ་བཏང་ཉེས་བྱས་ཏེ། ཁ་རྩང་གི་དྲན་ཉེས་ཀྱིས་དེ་རིང་མི་བདེ་བར་བྱས་པས་མ་ཚད། ཚེ་སྟོད་ཀྱི་བསམ་བློ་བཏང་ཉེས་ཀྱིས་ཚེ་སྨད་ཀྱི་མི་ཚེ་དང་། རང་ཉིད་ཁོར་ཡུག་ཉེ་འབྲེལ་མཐུན་གསུམ་ནས་བཟུང་སྟེ་བརྫད་པའི་ཐོག་ཏུ། ཚེ་འདིའི་དྲན་ཉེས་ལས་ཉེས་ཀྱིས་ཕྱི་མ་བརྫད་ནས་ཚེ་རབས་ཚེ་བརྒྱུད་དུ་སྡུག་གི་མུན་པ་མགོ་ནས་དྭངས་མེད་ཀྱི་འཁོར་གནས་བཙན་ཁང་ལྟ་བུའི་ནང་དུ་ཡང་ཡང་འཁོར་བའི་རྩ་བ་རང་ཉིད་ལ་ཐུག་ཡོད། དེ་ཡང་མ་ཤེས་མ་མཁས་པའི་རྨོངས་པ་མ་རིག་པའི་གཞན་དབང་དུ་སོང་བ་ལ་ཐུག་པའོ། །ལུས་ལ་ནད་ན་ཚ་ཡོང་ཚེ་སྨན་བཅོས་བྱ་དགོས་ཤིང་། དེ་ཡང་སྔོན་ཞིག་ནས་ནད་མི་ཡོང་བའི་སྔོན་འགོག་ཐུབ་ན་ལུས་ཁམས་བདེ་ཐང་གི་མི་ཚེ་སྐྱིད་ཀྱིས་འཚོ་ཐུབ་པས་རྒྱུ་མེད་རུང་ནད་མེད་ན་སྐྱིད་པོ་ཡིན། གལ་སྲིད་ན་རུང་སྨན་བཅོས་འཕྲོད་བསྟེན་ལ་འབད་པ་བྱས་ན་ནད་ལ་དྲག་ཐབས་བྱ་རྒྱུ་ཡོད། ལུས་ན་རྒྱུ་ཡོད་པ་ལྟར་དུ་སེམས་ཀྱང་ན་རྒྱུ་ཡོད་ཅིང་། སེམས་ཀྱི་ལྷན་སྐྱེས་ཀྱི་ནད་ཉོན་མོངས་དུག་གསུམ་ཡིན་ཞིང་། དེ་ལས་འཕྲོས་པའི་ཉོན་མོངས་བརྒྱད་ཁྲི་བཞི་སྟོང་དེ། ནད་བརྒྱད་ཁྲི་བཞི་སྟོང་ཡིན། སེམས་ཀྱི་ནད་དེས་ལུས་ལ་ཡང་ན་ཚ་བསྐྱེད་ཅིང་། བོད་ཀྱི་གསོ་རིག་མཁས་ཆེན་ཚོར་དྲིས་དང་ནད་ཀྱི་རྩ་བ་རླུང་མཁྲིས་བད་ཀན་གསུམ་ཉོན་མོངས་དུག་གསུམ་གྱི་ཁུངས་ནས་ཡོང་བཞིན་ཡོད་པ་ཡིན། ལུས་འདིའི་མགོ་ཙམ་ན་ཡང་སྨན་འཐུང་བ་དང་། མཛུ་གུར་རྨ་ཆུང་ངུ་ཙམ་བྱས་ན་རྨ་དཀྲིས་ཤིག་རྒྱག་པ་བྱེད་ཀྱང་། སེམས་ཀྱི་ནད་ལ་སྨན་བཅོས་ཤིག་གཏན་ནས་མ་མྱངས་པའི་རྐྱེན་གྱིས། ནད་ཀྱི་གཞི། གདོན་གྱི་ཚང་ཐམས་ཅད་སེམས་ལ་བཅས་ནས། མི་བདེ་སྡུག་བསྔལ་གྱི་རིགས་ཚང་མ་དེ་ནས་ཡོང་བས། གཏོ་སྐུ་རིམ། ཞབས་བརྟན་རིམ་གྲོ་གང་བྱས་ཀྱང་། གནོད་པ་དང་སྡུག་བསྔལ་ཇེ་མང་དང་། ཇེ་ཆེ་ཡིན་པ་ནི་གནད་ཀྱི་ཐོག་ཏུ་མེ་བཙའ་མ་ཁེལ་པར་འདྲེ་ཤར་དུ་བཞག་ནས། གཏོར་མ་ནུབ་ཏུ་འཕངས་པ་ལྟ་བུ་ཤ་སྟག་བྱས་པས་ཡིན། དེས་ན་སེམས་ཁམས་ཀྱི་སྨན་ནི་དམ་པའི་ཆོས་ཡིན་པས། སྨན་དངོས་མས་ནད་འཇོམས་པ་ལ་ཕན་ཐོགས་ཆེ་བ་ལྟར་དུ། ཆོས་ངོ་མ་ཉམས་ལ་རན་པའི་སྨན་དེ་བསྟེན་དགོས། སྨན་གྱི་ནང་དུའང་ནད་འདྲ་མིན་གྱི་གཉེན་པོ་ལ་སྨན་འདྲ་མིན་ཡོད་པ་དང་། ནད་པ་ལོ་རྒས་གཞོན། ནད་རིགས་འདྲ་མིན་སོགས་ཀྱི་ཉམས་དང་གནས་ཚུལ་ལ་དཔགས་ཏེ། སྨན་པས་སྨན་གྱིས་ནད་བཅོས་པ་ལྟར་དུ། ཆོས་ཀྱི་སྨན་ཡང་དེ་བཞིན་དགོས་པས། སྟོན་པ་བཅོམ་ལྡན་འདས་ཀྱིས་སྐྱེས་བུ་ཆུང་འབྲིང་ཆེ་གསུམ་གྱི་ཁམས་དང་། དབང་པོ། མོས་པ་ལྟར་དུ་ཐེག་པ་ཆུང་འབྲིང་ཆེ་གསུམ་གྱི་ཆོས་བསྟན་པའོ། །ང་ཚོ་བོད་ཡུལ་འདི་ནས་ཀྱང་སྔར་བྱོན་བསྟན་འཛིན་གྱི་སྐྱེས་བུ་དམ་པ་གོང་མ་བསྟན་པའི་སྲོལ་འབྱེད་ཀྱི་སློབ་དཔོན་རྣམ་པས། ས་དགེ་བཀའ་རྙིང་གི་བཤད་རྒྱུད་འདེགས་པའི་ཀ་ཆེན་དང་། སྒྲུབ་རྒྱུད་འདྲེན་པའི་ཤིང་རྟ་མང་པོའི་སྲོལ་གཏོད་མཛད་པ་དེའང་། གདུལ་བྱའི་གང་ཟག་སོ་སོ་ལ་མཁོ་དགོས་གཅིག་ཆེ་གཉིས་ཆེར་གཟིགས་ནས། གང་ལ་གང་འདུལ། གང་ལ་གང་ཕན་གྱིས་ཆོས་བསྟན་པ་བྱས་པའོ། །འོ་ན་ཆོས་དེ་དག་ལས་གང་ཟབ། གང་བཟང་ཞེ་ན། རང་ཉིད་ལས་འབྲེལ་གང་ལ་ཡོད་པའི་ཆོས་དེ་ལྷག་པར་ཟབ་པ་དང་བཟང་བའོ། །མིའི་ནང་ན་ལོ་ནམ་ཟླས་གཉའ་ནས་མ་ནོན། ལུས་འབྱུང་བཞི་ནད་ཀྱིས་མ་ཟིན། ནད་ན་ཚའི་ཟུག་གཟེར་ཅི་ཡང་མེད་དུས། ཚེ་འདི་ཕྱི། ལས་རྒྱུ་འབྲས་སོགས་ལ་བརྩི་སྲུང་མི་བྱེད་པར། སེམས་ཅན་རྒྱུ་མ་དྲུད་ཀྱང་སྙིང་རྗེ་མེད། །སངས་རྒྱས་ནམ་མཁར་འཕུར་ཡང་དད་པ་མེད། །ཟེར་མཁན་ཉི་མ་ཁ་ཤས་སུ་ཡོད་སྲིད་རུང་། གཟེར་རྒོད་ཅིག་བརྒྱབ་ནས་དབུགས་ཕར་འགྲོ་ཚུར་མི་འདུས་སར་ཐོན་པའམ། གང་གཅེས་གང་དམར་གྱི་མི་ལག་ནས་ཤོར་བ་ལ་སོགས་རྐྱེན་ངན་དྲག་པོ་ཞིག་གློ་བུར་ཐོག་ཏུ་བབ་ཚེ། ཆོས་དཀོན་མཆོག་མིན་པའི་རེ་ས་སྐྱབས་གནས་ཤིག་ཡོད་པ་མ་ཡིན། གཞན་རྒས་ཚེ་མཇུག་ལ་ཐོན། འཆི་བདག་གཤིན་རྗེའི་བསུ་མ་དང་གཉིས་ཀ་གཅིག་ངོ་གཅིག་གིས་ཕར་ལྟ་ཚུར་ལྟ་བྱེད་སར་ཐོན་དུས། སྐྱབས་དམ་པ་དཀོན་མཆོག་གསུམ་ལས་རེ་ས་སྐྱབས་གནས་ཤིག་ཡོད་པ་མ་ཡིན་ཞིང་། སྐྱབས་དང་། སྐྱོབ་པ། འཇུ་ས། འཁེལ་ས། གང་ཡང་མེད་པའི་སྐབས་སུ་སླེབས་ཚེ། སྔར་ཞིག་ནས་ཚེ་ཕྱི་མའི་འདང་རྒྱག་དང་། འགྲོ་རྟེན། འདུག་རྟེན་ཞིག་མ་བསྒྲུབས་བསམས་ནས། བྲང་ལ་སྤར་འབལ་བྱེད། མིག་ནས་མཆི་མ་ཡོང་དུས་འཕྱིས་པ་ཤོར་བ་གཉིས་ཀ་ཡིན། དབང་མེད་གཤིན་རྗེའི་ཞགས་པ་སྐེ་ལ་ཐེབས། མར་གྱི་དཀྱིལ་ནས་སྤུ་བཏོན་པ་བཞིན། གཟེར་ཚ་ན། སྐྲག་སྔངས་སྡུག་གསུམ། ཤི་ཁའི་གནད་གཅོད་དང་བཅས་ཏེ་ཕྱི་མའི་ཡུལ་དུ་སོང་རྗེས་སུ། འུ་ཚོ་ཤུལ་མི་གསོན་པོས་བེམ་ཤེས་གཉིས་ཀ་སོ་སོར་བྲལ་བའི་རོ་ཞེས་པ་སེམས་མེད་ས་རྡོ་ལྟ་བུའི་བེམ་གོག་འདི། བྱ་ཁྱིའི་གཟན་ལ་བྱས་རྗེས་ཅི་ཡང་མི་རིག་ཀྱང་། ཤི་བོ་རང་གི་སྣང་བ་ལ། འཇིགས་པའི་སྒྲ་བཞི། ཡ་ང་བའི་གཡང་ས་གསུམ་སོགས་སྐྲག་སྔངས་འཇིགས་གསུམ་གྱི་སྣང་བ་བརྒྱུད་ནས། སེམས་རྣམ་ཤེས་ལས་ཀྱི་རྗེས་སུ་འབྲངས་ནས་བདེ་སྡུག་མྱོང་དགོས། དུས་ཐ་མའི་གནས་སྐབས་འདིར་བླ་མས་སྐྱེ་བརྟག་མ་གསུངས་ཀྱང་དམྱལ་བ་ཡི་དྭགས་སུ་སྐྱེ་བ་མང་བ་ལུང་དང་། རིགས་པས་ཀྱང་གྲུབ་པ་སྟེ། ཚེ་སྐྱེ་བ་སྔ་མའི་རྣམ་ཤེས་ཀྱི་རྒྱུན་གྱིས་ཚེ་འདིའི་སྣང་བ་བྱུང་བ་ཡིན་ལ། སྐྱེ་བ་སྔོན་མ་དྲན་པའི་མི་ཡང་དེང་སང་འཇིག་རྟེན་གྱི་ཐོག་ཏུ་མང་བ་ཡིན། དེ་བཞིན་དུ་སྐྱེ་བ་འདིའི་རྒྱུན་ཕྱི་མ་སྐྱེ་བའི་སྐབས་སུ་བདེ་སྡུག་རྒྱུ་འབྲས་མུ་མཐུད་དགོས་པ་ནི་རྟེན་ཅིང་འབྲེལ་འབྱུང་མཐོང་ཆོས་སུ་གྲུབ་པ་འདིའོ། །ཚེ་ཕྱི་མ་མ་དགོས་ཚེ་འདིའི་དོན་ཆེན་ཞིག་སྒྲུབ་དགོས་ན་ཡང་། ཆོས་ལ་བརྟེན་དགོས་པ་མིས་མི་འགྲུབ་པའི་བྱ་བ་དཀོན་མཆོག་ལ་གསོལ་བ་བཏབ་ན་འགྲུབ་པ་ཡིན། གསོལ་འདེབས་སྨོན་ལམ་ཡང་འགྲུབ་བྱེད་ཀྱི་རྒྱུ་ཚོགས་བསགས་སྒྲིབ་སྦྱོང་སྔོན་སོང་ཡོད་དགོས། ཚོགས་བསགས་སྒྲིབ་སྦྱོང་བྱེད་པ་ཡང་ཆོས་ཡིན་ལ། བསོད་ནམས་ཅན་གྱི་མིས་བསམ་པ་འགྲུབ་པ་ལ་ཉི་མ་ནམ་མཁར་ཤར་བ་ལྟ་བུ་འགོག་རྐྱེན་མེད་ཅིང་། བསོད་ནམས་མ་བསགས་པའི་མིས་འབད་པ་བྱས་ཏེ་སྒྲུབ་པ་ནི་རླུང་ནང་གི་མར་མེ་ལྟར་དུ་འགལ་རྐྱེན་མང་བ་ཡིན། དེས་ན་ཁོག་པའི་ནང་ན་སེམས་ཤིག་ཡོད། སེམས་ཀྱིས་བསམ་བློ་བཏང་ཤེས་ན། ཚེ་འདི་དང་ཕྱི་མ་རུ་རང་གཞན་ཡུན་གྱིས་སྐྱིད་པའི་ཆེད་དུ་དམ་པའི་ཆོས་སྒྲུབ་དགོས། དམ་ཆོས་སྒྲུབ་པ་ལ་སྒྲུབ་ཚུལ་ཤེས་དགོས་པས་ཐོས་བསམ་སྒོམ་གསུམ་གྱི་རིམ་པ་བརྒྱུད་དགོས་པ་ཡིན། དང་པོར་ཐོས་པ་འཚོལ་ནས་ཆོས་ཉན་དགོས་ཀྱི་མ་ཉན་པར་ཅི་ཞིག་ཐོས། དེ་ནས་ཐོས་དོན་ཡང་ཡང་བསམ་དགོས་ཀྱི་ཚིག་ཉན་པ་དོན་ཤེས་པའི་ཆེད་དུ་ཡིན་པས་དོན་ལ་བསམ་བློ་མ་བཏང་ན་ཚིག་བཤད་པ་རྣ་རྒྱབ་ཀྱི་རླུང་ཞིག་ཡིན། དོན་ཤེས་པས་ཀྱང་མི་ཆོག་སྟེ། སྨན་ཡོད་ཀྱང་མ་འཐུང་ན་ནད་དྲག་པ་ལ་ཕན་ཐོགས་མེད་པ་ལྟར་དུ། བསམ་དོན་སྒོམ་པ་ནི། ཆོས་རང་རྒྱུད་ལ་སྦྱར་ནས་ཆོས་དང་རང་རྒྱུད་གཉིས་ཀ་དབྱེར་མེད་པར་གྱུར་དུས། ནད་དང་སྨན་གཉིས་ཀ་འཕྲོད་པ་ལྟ་བུ་ཡིན་པས། ཚེ་འདི་ཕྱི་རང་གཞན་གྱི་སྡུག་བསྔལ་སེལ་ཏེ་སྐྱིད་ཀྱི་ཉི་མ་ནང་ནས་ཤར་རྒྱུ་ཡོད་པས། བསམ་བློ་དེ་ལ་བཏང་ནས། དང་པོ་ཆོས་ཉན་པ་དེ་བྱ་བའི་གཙོ་བོར་འཇོག་དགོས། ཆོས་བཤད་དུས་ཚེ་མི་རྟག་པ། འཁོར་བའི་སྡུག་བསྔལ་ལ་སོགས་པ་གང་བཤད་ཀྱང་། སྡུག་རབས་བཤད་པ་ལྟ་བུ་ཞིག་ཡིན་འདུག་པས་ཉན་མི་འདོད་ཞེས་ཟེར་མཁན་ཡོད་སྲིད་ཀྱང་། ལེགས་པར་ཉོན་དང་འཁོར་བའི་སྡུག་བསྔལ་དེ་དག་རང་གཞན་གྱི་ལུས་ཐོག་སེམས་ཐོག་ན་ཡོད་པའི་དངོས་ཡོད་གནས་ཚུལ་ཤ་སྟག་ཡིན་པས། འཁོར་བའི་སྡུག་བསྔལ་དེ་མེད་ཚུལ་བྱ་བ་ནི། རང་མགོ་རང་གིས་གཡོགས་པ་ཡིན་པས། སྡུག་བསྔལ་དེ་ལྷང་ལ་ཕུད་ནས་གདོང་ལེན་གྱི་ནུས་པ་ཐོན་པ་ཞིག་ཏུ་བསམ་བློ་གཏོང་ཤེས་ན་འདང་རྒྱག་མ་ནོར་བ་ཡིན། འཆི་བར་མི་སྐྲག་མཁན་མེད་ཀྱང་། འཆི་བར་སྐྲག་སྟེ་ཆོས་སྒྲུབ་ན་འཆི་བར་མི་སྐྲག་པར་འགྱུར་རྒྱུ་ཡོད་པར་མ་ཟད་འཆི་མེད་གཉུག་མའི་བཙན་ས་ཟིན་ཏེ། ཤི་རྒྱུ་མེད་པའི་སར་ཡང་ཐོན་དུ་ཡོད། དེ་དག་ཅི་ཡང་མི་ཤེས་པར་སྡུག་སྒུར་བྱེད་ནས་སྡོད་པ་ནི། བཤས་རའི་ནང་གི་གཡག་རྒན་རྣམས་དང་འགྲེངས་ཏེ་འགྲོ་བའི་རྐང་གཉིས་མི་ཡིན་མིན་གྱི་ཁྱད་པར་ཙམ་མ་གཏོགས་གཅིག་མཚུངས་ཡིན། ཤི་རན་ཁར་ད་གཟོད་སྡུག་བསྔལ་བྱ་བ་ནི་གཡག་ལུག་འགའ་རེ་སྐེ་གཅད་ཁར་མིག་ནས་མཆི་མ་ཐོན་འདུག་ཅེས་བ་དང་འདྲ་བ་ཡིན། ད་རེས་ཀྱི་བཤད་བྱའི་ཆོས་ནི་ཐེག་ཆེན་མདོ་སྔགས་འདྲེས་མའི་ཆོས་ཤིག་ཡིན། བཅུད་བཟང་པོ་བླུག་སར་སྣོད་གཙང་མ་དགོས་པ་ནང་བཞིན། ཆོས་ཁྲིད་མ་བཤད་ཀྱི་སྔོན་ལ་རང་རྒྱུད་དུ་ཐོག་མེད་ནས་བསགས་པའི་སྡིག་སྒྲིབ་བག་ཆགས་དང་། ཁྱད་པར་དུ་གསང་སྔགས་ཀྱི་དམ་ཚིག་ལ་ཉེས་ལྟུང་ཉམས་ཆགས་སོང་བ་འདག་པའི་ཆེད་དུ་བླ་མ་རྡོ་རྗེ་སེམས་དཔའི་བསྐྱེད་བཟླས་དང་འབྲེལ་ནས་ཡིག་བརྒྱ་དང་། སཏྭ་བཏོན་ཏེ་བསག་སྦྱོང་གིས་མགོ་བཟུང་ནས། ཆོས་ཁྲིད་དངོས་ལ་འཇུག་དགོས། སྔོན་མར་འུ་ཚོས་གཞི་ཐོག་དང་པོའི་སྒོ་ནས་ཡིག་བརྒྱ་དང་སཏྭ་བསགས་པ་ཡིན་ཡང་། དེང་སང་མང་ཆེ་བས་ཡིག་ངོ་ཟིན་ས་ཡོད། ས་འདི་རྫོགས་པ་ཆེན་པོའི་ཆོས་དར་ས། ཆོས་མིང་སར་ཐོག ས་མིང་མིར་ཐོག་པ་ཡིན། དེང་སྐབས་ཀྱང་དེ་བཞིན་དུ་བཤད་སྒྲུབ་ལས་གསུམ་གྱི་བསྟན་པ་དར་སའི་ཆོས་འཁོར་ཆེན་པོའི་ཉེ་འཁྲིས་ཀྱི་མི་ཡིན་ལ། འདིའི་ནང་ན་འབུམ་ལྔ་བསགས་པའི་དགེ་བསྙེན་ཡང་མི་ཉུང་པ་ཡོད་པ་ཡིན་པས། ད་རེས་སྙིང་ཐིག་གི་རྡོར་སེམས་བསྒོམ་བཟླས་ལ་འཇུག་རྒྱུ་བྱ། དང་པོ་ཆོས་ཁྲིད་ཀྱི་སྔོན་དུ་ཡིག་བརྒྱ་དང་ས་ཏྭ་གསོག་རྒྱུ་ཡིན། ཨ༔ བདག་ཉིད་ཐ་མལ་སྤྱི་བོ་རུ༔ པད་དཀར་ཟླ་བའི་གདན་གྱི་དབུས༔ ཧཱུྃ་ལས་བླ་མ་རྡོ་རྗེ་སེམས༔ དཀར་གསལ་ལོངས་སྤྱོད་རྫོགས་པའི་སྐུ༔ རྡོ་རྗེ་དྲིལ་འཛིན་སྙེམས་མ་འཁྲིལ༔ ཁྱོད་ལ་སྐྱབས་གསོལ་སྡིག་པ་སྦྱོང༔ འགྱོད་སེམས་དྲག་པོས་མཐོལ་ལོ་བཤགས༔ ཕྱིན་ཆད་སྲོག་ལ་བབས་ཀྱང་སྡོམ༔ ཁྱོད་ཐུགས་ཟླ་བ་རྒྱས་པའི་སྟེང༔ ཧཱུྃ་ཡིག་མཐའ་མར་སྔགས་ཀྱིས་བསྐོར༔ བཟླས་པ་སྔགས་ཀྱིས་རྒྱུད་བསྐུལ་བས༔ ཡབ་ཡུམ་བདེ་རོལ་སྦྱོར་མཚམས་ནས༔ བདུད་རྩི་བྱང་ཆུབ་སེམས་ཀྱི་སྤྲིན༔ ག་བུར་རྡུལ་ལྟར་འཛག་པ་ཡིས༔ བདག་དང་ཁམས་གསུམ་སེམས་ཅན་གྱི༔ ལས་དང་ཉོན་མོངས་སྡུག་བསྔལ་རྒྱུ༔ ནད་གདོན་སྡིག་སྒྲིབ་ཉེས་ལྟུང་གྲིབ༔ མ་ལུས་བྱང་བར་མཛད་དུ་གསོལ༔ ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ། ཏིཥྛ་དྲྀ་ཌོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་པོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཾ་ཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ། བཛྲ་མ་མེ་མུཉྩ། བཛྲི་བྷ་ཝ། མ་ཧཱ་ས་མ་ཡ་ས་ཏྭ་ཨཿ མགོན་པོ༔ བདག་ནི་མི་ཤེས་རྨོངས་པ་ཡིས༔ དམ་ཚིག་ལས་ནི་འགལ་ཞིང་ཉམས༔ བླ་མ་མགོན་པོས་སྐྱབས་མཛོད་ཅིག༔ གཙོ་བོ་རྡོ་རྗེ་འཛིན་པ་སྟེ༔ ཐུགས་རྗེ་ཆེན་པོའི་བདག་ཉིད་ཅན༔ འགྲོ་བའི་གཙོ་ལ་བདག་སྐྱབས་མཆི༔ སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ༔ སྡིག་པ་དང་སྒྲིབ་པ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ༔ རྡོ་རྗེ་སེམས་དཔའ་དགྱེས་བཞིན་འཛུམ་པ་དང་བཅས་པས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ་ཞེས་གནང་བ་བྱིན་ཞིང་འོད་དུ་ཞུ་ནས་རང་ལ་ཐིམ་པའི་རྐྱེན་ལས་རང་ཉིད་ཀྱང་རྡོ་རྗེ་སེམས་དཔའ་སྣང་སྟོང་མེ་ལོང་ནང་གི་གཟུགས་བརྙན་ལྟ་བུར་གྱུར་པའི་ཐུགས་སྲོག་ཧཱུྃ་གི་མཐའ་མར་ཡི་གེ་འབྲུ་བཞི་བོ་གསལ་བ་ལས་འོད་ཟེར་འཕྲོས། ཁམས་གསུམ་སྣོད་བཅུད་དང་བཅས་པ་རྡོར་སེམས་རིགས་ལྔའི་རྟེན་དང་བརྟེན་པའི་རང་བཞིན་དུ་སངས་རྒྱས་པར་གྱུར༔ ཨོཾ་བཛྲ་ས་ཏྭ་ཧཱུྃ༔ དགེ་བ་འདི་ཡིས་མྱུར་དུ་བདག། རྡོ་རྗེ་སེམས་དཔའ་འགྲུབ་གྱུར་ནས།། འགྲོ་བ་གཅིག་ཀྱང་མ་ལུས་པ།། དེ་ཡི་ས་ལ་འགོད་པར་ཤོག། རྡོ་རྗེ་སེམས་དཔའ་ཁྱེད་སྐུ་ཅི་འདྲ་དང་།། འཁོར་དང་སྐུ་ཚེའི་ཚད་དང་ཞིང་ཁམས་དང་།། ཁྱེད་ཀྱི་མཚན་མཆོག་བཟང་བོ་ཅི་འདྲ་བ།། དེ་འདྲ་ཁོ་ནར་བདག་སོགས་འགྱུར་བར་ཤོག། བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ།། གང་གི་བློ་གྲོས་སྒྲིབ་གཉིས་སྤྲིན་བྲལ་ཉི་ལྟར་རྣམ་དག་རབ་གསལ་བས།། ཇི་སྙེད་དོན་ཀུན་ཇི་བཞིན་གཟིགས་ཕྱིར་ཉིད་ཀྱི་ཐུགས་ཀར་གླེགས་བམ་འཛིན།། གང་དག་སྲིད་པའི་བཙོན་རར་མ་རིག་མུན་འཐུམས་སྡུག་བསྔལ་གྱིས་གཟིར་བའི།། འགྲོ་ཚོགས་ཀུན་ལ་བུ་གཅིག་ལྟར་བརྩེ་ཡན་ལག་དྲུག་ཅུའི་དབྱངས་ལྡན་གསུང་།། འབྲུག་ལྟར་ཆེར་སྒྲོག་ཉོན་མོངས་གཉིད་སློང་ལས་ཀྱི་ལྕགས་སྒྲོག་འགྲོལ་མཛད་ཅིང་།། མ་རིག་མུན་སེལ་སྡུག་བསྔལ་མྱུ་གུ་ཇི་སྙེད་གཅོད་མཛད་རལ་གྲི་བསྣམས།། གདོད་ནས་དག་ཅིང་ས་བཅུའི་མཐར་སོན་ཡོན་ཏན་ལུས་རྫོགས་རྒྱལ་སྲས་ཐུ་བོའི་སྐུ།། བཅུ་ཕྲག་བཅུ་དང་བཅུ་གཉིས་རྒྱན་སྤྲས་བདག་བློའི་མུན་སེལ་འཇམ་དཔལ་དབྱངས་ལ་འདུད།། བརྩེ་ལྡན་ཁྱེད་ཀྱི་མཁྱེན་རབ་འོད་ཟེར་གྱིས།། བདག་བློའི་གཏི་མུག་མུན་པ་རབ་བསལ་ནས།། བཀའ་དང་བསྟན་བཅོས་གཞུང་ལུགས་རྟོགས་པ་ཡི།། བློ་གྲོས་སྤོབས་པའི་སྣང་བ་སྐྱེད་དུ་གསོལ།། དུས་གསུམ་སངས་རྒྱས་ཐམས་ཅད་ཀྱི་ངོ་བོ། རིགས་དང་དཀྱིལ་འཁོར་རྒྱ་མཚོའི་ཁྱབ་བདག བཀའ་དྲིན་མཚུངས་ཟླ་མ་མཆིས་པ། དཔལ་མགོན་བླ་མ་དམ་པའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་པར་མཛད་དུ་གསོལ། གང་གི་ཞལ་བཟང་ལྟ་བས་མི་ངོམས་གེ་སར་འཛུམ་པའི་མདངས་བཀྲ་ཞིང་།། མཚན་དཔེའི་གཟི་འོད་ཟེའུ་འབྲུ་གསལ་བས་འགྲོ་ཀུན་མིག་གི་བདུད་རྩིར་གྱུར།། ཐུགས་རྗེའི་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་པའི།། ཐུབ་དབང་པདྨ་དཀར་པོའི་ཞབས་པད་དེ་རིང་བདག་བློའི་ཡིད་མཚོར་སྐྱོངས།། བདེ་བ་ཅན་ན་འོད་དཔག་མེད་དེ་རི་བོ་ཏ་ལར་སྤྱན་རས་གཟིགས།། འཛམ་བུའི་གླིང་འདིར་པདྨ་རྒྱལ་པོ་འགྲོ་ལ་ཐ་དད་སྣང་གྱུར་ཀྱང་།། སྐུ་གསུམ་མཛད་པའི་ངོ་བོ་གཅིག་སྟེ་དཔལ་ལྡན་སངས་རྒྱས་པདྨ་སྐྱེས།། གངས་ལྗོངས་འགྲོ་ལ་ལྷག་པར་བརྩེ་བའི་ཐུགས་བརྩེའི་འོད་ཟེར་ཅན་ལ་འདུད།། འཛམ་གླིང་མཛེས་པའི་རྒྱན་དྲུག་མཆོག་གཉིས་དང་།། ཐུགས་རྗེ་ལུང་རྟོགས་མཉམ་པའི་མཐུ་མངའ་ཡང་།། ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས།། འཁོར་འདས་ཆོས་སྐུར་རྟོགས་པའི་ཀློང་ཆེན་པ།། དྲི་མེད་འོད་ཟེར་ཞབས་ལ་གསོལ་བ་འདེབས།། ཤེས་བྱ་ཀུན་མཁྱེན་འགྲོ་ལ་རྗེས་བརྩེའི་གཏེར།། དྲི་མེད་འོད་ཟེར་ཡང་སྤྲུལ་ཐུགས་གཏེར་མཛོད།། འོད་གསལ་ཀློང་ཆེན་ནམ་མཁའི་རྣལ་འབྱོར་བ།། འཇིགས་མེད་གླིང་བའི་ཞབས་ལ་གསོལ་བ་འདེབས།། ཕྱི་ལྟར་རྒྱལ་བའི་སྲས་པོ་ཞི་བ་ལྷ།། ནང་ལྟར་གྲུབ་པའི་དབང་ཕྱུག་ཤ་ཝ་རི།། གསང་བ་འཕགས་མཆོག་སྡུག་བསྔལ་རང་གྲོལ་དངོས།། འཇིགས་མེད་ཆོས་ཀྱི་དབང་པོར་གསོལ་བ་འདེབས།། ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས།། དུས་གསུམ་སངས་རྒྱས་ཀུན་གྱི་ངོ་བོ་ཉིད།། རང་སེམས་ཆོས་སྐུར་མངོན་སུམ་སྟོན་མཛད་པ།། རྩ་བའི་བླ་མ་མཆོག་ལ་གསོལ་བ་འདེབས།། གང་དག་ཕྱོགས་བཅུའི་སྟོང་གི་འཇིག་རྟེན་ན།། བདེ་གཤེགས་སློབ་མར་གྱུར་བ་གང་སུ་དག། དེང་འདིར་དམ་པའི་ཆོས་ཀྱི་ཆར་འབེབས་ཀྱིས།། གསན་པར་འདོད་པ་ཐམས་ཅད་འདིར་གཤེགས་ཤིག། ལྷ་ཡི་སྐད་དང་ཀླུ་དང་གནོད་སྦྱིན་སྐད།། གྲུལ་བུམ་དག་དང་མི་ཡི་སྐད་རྣམས་དང་།། འགྲོ་བ་ཀུན་གྱི་སྒྲ་རྣམས་ཇི་ཙམ་པར།། ཐམས་ཅད་སྐད་དུ་ཆོས་འདི་འགྱུར་བར་ཤོག། ༈ འོ་ན་ནམ་མཁའི་མཐའ་དང་མཉམ་པའི་ཁམས་གསུམ་རིགས་དྲུག་གམ་འགྲོ་བ་ལམ་རྒྱུད་ལྔས་བསྡུས་པའི་འཁོར་བར་འཁྱམས་པའི་སེམས་ཅན་ཐམས་ཅད། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་མུ་དང་མཐའ་མེད་པ་འདིའི་ནང་ནས་ཡང་ནས་ཡང་དུ་འཁོར་ཞིང་། འཁོར་བའི་སྡུག་བསྔལ་མྱོང་བའི་ཉམ་ཐག་པའི་སེམས་ཅན་འདི་དག་ཀྱང་བདག་རང་ཉིད་ཇི་ལྟ་བ་བཞིན་དུ། བདེ་བ་འདོད་ཅིང་སྡུག་བསྔལ་མི་འདོད་པ་ཤ་སྟག་ཡིན་ཡང་། བདེ་འདོད་སྡུག་བསྔལ་གྱི་རྒྱུ་བསྒྲུབས་ནས། ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་ནས་རྨོངས་པའི་གཞན་དབང་དུ་སོང་བ་འབའ་ཞིག་ཡིན་པས་འདི་རྣམས་སྙིང་རེ་རྗེ། སྙིང་རྗེ་བ་ཙམ་མིན་པར་བདག་གིས་ད་རེས་དམ་པའི་ཆོས་ཐོབ། ཐར་བའི་ལམ་བཙལ་པའི་གོ་སྐབས་རྙེད་པས། འདི་དང་བསྟུན་ཏེ་སེམས་ཅན་འདི་དག་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ཐར་ཐབས་དང་། གཏན་བདེ་རྫོགས་པའི་སངས་རྒྱས་ཀྱི་གོ་འཕང་ཐོབ་ཐབས་ཤིག་བྱ་སྙམ་པའི་བསམ་པ་བྱང་ཆུབ་སེམས་ཀྱི་ཀུན་སློང་དང་ལྡན་པས་ཆོས་ཉན་དགོས། དེ་ཡང་ཀུན་མཁྱེན་ཆོས་རྗེས། ཁྱད་པར་ཐེག་ཆེན་དགེ་བ་རླབས་པོ་ཆེ། །སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་བསྔོ་བས་ཡོངས་སུ་ཟིན་པ་ནི། །ཐར་ལམ་བགྲོད་པའི་གཅེས་པ་རྣམ་གསུམ་ཡིན། །ཞེས་གསུངས་པ་ལྟར་དུ། ཐེག་ཆེན་མདོ་སྔགས་ཀྱི་ཆོས་འཆད་ཉན་སྒོམ་སྒྲུབ་གང་གི་སྐབས་སུ་ཡང་། དམ་པ་གསུམ་དང་འབྲལ་མི་རུང་བ་ཤེས་ནས་ལག་ལེན་ལ་འདེབས་དགོས། དེ་ཡང་སྦྱོར་བ་སེམས་བསྐྱེད་དམ་པ་ནི། ཕྱི་པ་ནང་པ་སྐྱབས་འགྲོའི་ཁྱད། །ཅེས་པ་ལྟར་དུ་སྐྱབས་ཀྱི་མཆོག་གྱུར་སངས་རྒྱས་ཆོས་དང་དགེ་འདུན་ཏེ་དཀོན་མཆོག་གསུམ་ལ་སྐྱབས་སུ་སོང་ནས། ཐེག་པ་ཆེ་ཆུང་སེམས་བསྐྱེད་ཁྱད། །ཅེས་པ་བཞིན་མཐའ་ཡས་སེམས་ཅན་ཐམས་ཅད་འཁོར་བའི་སྡུག་བསྔལ་ལས་ཐར་ན་ཅི་མ་རུང་སྙམ་པའི་བསམ་པ་བཟང་པོའི་ཡིད་སྨོན་ཙམ་མིན་པར། འཁོར་བ་ཐོག་མེད་ནས་དྲིན་གྱིས་བསྐྱངས་པའི་མ་རྒན་སེམས་ཅན་ཐམས་ཅད། བདག་གཅིག་པུའི་སྟོབས་ཀྱིས་བྱང་ཆུབ་ཆེན་པོར་འགོད་པ་བགྱི། ད་ལྟ་དེ་ལྟའི་ནུས་པ་བདག་ལ་མེད་ཀྱང་ནུས་པ་དེ་སྒྲུབ་པའི་ཆེད་དུ་ལུས་དང་སྲོག་ལ་ཡང་མི་ལྟ་བར་དམ་པའི་ཆོས་བསྒྲུབ་སྙམ་པའི་སྙིང་རྗེས་སེམས་ཅན་ལ་དམིགས་པ་དང་། ཤེས་རབ་ཀྱིས་རྫོགས་བྱང་ལ་དམིགས་པའི་ཟུར་གཉིས་སམ་དོན་གཉིས་དང་ལྡན་པའོ། །དངོས་གཞི་དམིགས་མེད་དམ་པ་ནི། འདི་ལྟར་སྣ་ཚོགས་སྣང་བའི་ཆོས་ཐམས་ཅད་མེད་ལ་ཡོད་པར་བཟུང་པའི་འཁྲུལ་སྣང་། འཁྲིས་ནད་ཅན་གྱི་མིག་སྔར་དུང་དཀར་སེར་པོར་སྣང་བ་ལྟར་དུ་དོན་ལ་མེད་བཞིན་སྣང་བ་ཡིན་ཞིང་། འདི་ལྟར་སྣང་བ་ཡང་སྟོང་པ་ཡིན་པའི་རྟེན་འབྲེལ་གྱིས་སྣང་བ་སྣ་ཚོགས་སུ་ཤར་ཞིང་། སྟོང་རྟེན་འབྱུང་དབྱེར་མེད་ཡིན་སྟབས་ཀྱིས་སྣང་བའི་ངོ་བོ་ཡང་སྟོང་བ། སྣང་བཞིན་ངོས་བཟུང་མེད་པའི་སྣང་སྟོང་ཟུང་དུ་འཇུག་པ། སྤྲོས་བྲལ་རྣམ་པར་མི་རྟོག་པའི་ངང་ནས་མཐའ་ཡས་སེམས་ཅན་ལ་ཁྱབ་པའི་བྱམས་སྙིང་རྗེ་བྱང་ཆུབ་ཀྱི་སེམས་དང་། མཉམ་པར་བཞག་པའི་ངང་དང་མི་འབྲལ་པར་ཆོས་ཉན་བསམ་སྒོམ་པ་ལ་སོགས་པའི་དགེ་སྦྱོར་བསྒྲུབས་པའོ། །རྗེས་བསྔོ་བ་དམ་པ་ནི། དགེ་རྩ་ཆེ་ཆུང་གང་བསྒྲུབས་ཡོད་ཀྱང་དེར་ཞེན་འཛིན་དང་། དངོས་འཛིན་གྱི་འཁྲུལ་བས་མ་བསླད་པར་དུས་གསུམ་གྱི་རྒྱལ་བ་སྲས་བཅས་དང་། ཁམས་གསུམ་སེམས་ཅན་གྱིས་བསགས་པའི་དགེ་ཚོགས་དང་བཅས་པ་ལྷན་དུ་བསྡོམས་ཏེ་རང་ཉིད་ཀྱི་དགེ་རྩ་ཆུང་ངུ་ཆུ་ཐིགས་ལྟ་བུ་དེ་བྱང་ཆེན་རྒྱ་མཚོ་ཆེན་པོར་བསྲེས་ཏེ། མཐའ་ཡས་སེམས་ཅན་གཅིག་ཀྱང་མ་ལུས་པ། གཏན་བདེ་རྫོགས་བྱང་གི་ས་ལ་འགོད་པའི་ཆེད་དུ། སྔོན་ཆད་འཕགས་པ་འཇམ་པའི་དབྱངས་དང་བྱང་ཆུབ་སེམས་པ་ཀུན་ཏུ་བཟང་པོས་ཇི་ལྟར་བསྔོས་པ་བཞིན་དུ་བསྔོ་བའོ། །དེ་ལྟར་སྦྱོར་བ་སེམས་བསྐྱེད་དམ་པ། དངོས་གཞི་དམིགས་མེད་དམ་པ། རྗེས་བསྔོ་བ་དམ་པ་གསུམ་དང་མི་འབྲལ་བར་ཆོས་ཉན་དགོས། སྤྱིར་ཆོས་འཆད་པ་ལ་འཆད་མཁན་གྱི་སློབ་དཔོན་མི་འདྲ་བའི་དབང་གིས་ཆོས་འཆད་ཚུལ་ཡང་མི་འདྲ་བར་ཡོད་ཀྱང་། སློབ་དཔོན་སངས་རྒྱས་དང་། སློབ་དཔོན་དགྲ་བཅོམ་པ། སློབ་དཔོན་པཎྜི་ཏ་ལ་སོགས་པ་གཅིག་ཀྱང་མིན་པའི་བདག་ལྟ་བུ་སོ་སོའི་སྐྱེ་བོ་དུས་ཐ་མའི་གནས་སྐབས་སུ་ཆོས་སྨྲ་པའི་གཟུགས་བརྙན་འཆང་བ་ཞིག་གིས་ཇི་ལྟར་འཆད་ཅེ་ན། བསྟན་པ་ལ་ལྷག་བསམ་དག་པས་རང་མཉམ་ལས་དང་པོ་པར་ཕན་འདོད་ཀྱིས་ཀུན་ནས་བསླངས་ཏེ་འཆད་པ་ཡིན་པས། ཉན་མཁན་གྱིས་ཀྱང་ཆོས་རའི་ནང་དུ་ཡོང་ནས་ཆོས་ཉན་པའི་གནས་སྐབས་ན། ཆོས་ཆོས་ཉན་པའི་ཚུལ་བཞིན་བྱས་ཏེ་ཀུན་སློང་གོང་ནས་བཤད་པའི་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་ཡོད་པའི་ཐོག་ཏུ། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ཕུན་སུམ་ཚོགས་པ་ལྔ་ཚང་པའི་འདུན་པ་ཡོད་དགོས། དེ་ཡང་མ་ཡིན་པ་ལ་ཡིན་པར་བསམ་དགོས་པ་མིན་པར་ད་རེས་ལྟ་བུ་ལ་མཚོན་ན། སངས་རྒྱས་འོད་དཔག་མེད་ཀྱི་དཀྱིལ་འཁོར་ཞལ་ཕྱེས་ཏེ་བདེ་ཆེན་ཞིང་མཆོད་དང་འབྲེལ་བའི་ཞིང་སྒྲུབ་འཚོགས་བཞིན་ཡོད་པས་འཚོགས་སའི་ས་ཆ་འདི་གནས་ཕུན་སུམ་ཚོགས་པ་སྟེ་གྲུབ་དབང་རྫོགས་ཆེན་པའི་གདན་ས། གངས་ར་ཉེར་ལྔའི་ནང་གི་ཡ་གྱལ། ཡོན་ཏན་གནས་ཀྱི་གཙོ་བོ་ཡིན་ཞིང་། ཁྱད་པར་པདྨ་ཐང་འདིར་གུ་རུ་རིན་པོ་ཆེ་རྫུ་འཕྲུལ་གྱིས་བྱོན་ཏེ་བདུད་རྩི་སྨན་གྱི་སྒྲུབ་པ་མཛད་པའི་གནས་ཀྱང་ཡིན་པའོ། །དུས་ཕུན་སུམ་ཚོགས་པ་ནི་རྫོགས་པ་ཆེན་པོའི་ཆོས་འཁོར་བསྐོར་པའི་དེ་མ་ཐག་གམ་དེ་རིང་སངས་རྒྱས་སྟོང་གི་དུས་ཆེན་གནམ་གང་ལ་ཁེལ་ཡོད་པས་དུས་ཕུན་སུམ་ཚོགས་པ་ཡང་དེ་ལྟར་ཡིན་པའོ། །ཆོས་ཕུན་སུམ་ཚོགས་པ་ནི་བྱམས་སྙིང་རྗེ་བྱང་ཆུབ་སེམས་ཀྱི་ཆོས་སྐོར་འུ་ཅག་གིས་བཤད་བཞིན་པ་འདིའོ། །སྟོན་པ་ཕུན་སུམ་ཚོགས་པ་ནི་ཆོས་བཤད་པ་པོ་ངར་མཚོན་ན། མི་རང་ཐང་པ་ཞིག་ཡིན་ཡང་བཤད་བྱའི་དམ་ཆོས་དེ་རྒྱལ་བའི་ཐུགས་ཀྱི་གསང་བ་ཆེན་པོ་ཡིན་པས་ཐུགས་གསང་ཕྲིན་ལས་དེའི་བྱེད་པོ་ཡིན་པའི་ཆ་ནས། རྒྱལ་བ་ཀུན་གྱི་སྙིང་རྗེའི་རང་གཟུགས་འཕགས་མཆོག་སྤྱན་རས་གཟིགས་ཀྱི་ཕྲིན་ལས་པའམ། དེ་དང་གཉིས་སུ་མ་མཆིས་པའི་སྟོན་པར་བསྒོམས་ན། གདུལ་བྱ་ཡུལ་ལ་ཡོད་པའི་ཕྲིན་ལས་ཀྱི་དད་སྟོབས་ཀྱིས་བྱིན་རླབས་འབྱུང་བས་སོ། །འཁོར་ཕུན་སུམ་ཚོགས་པ་ནི་འདིར་འདུས་ཐམས་ཅད་བོད་ཁ་བ་ཅན་གྱི་ཡུལ་ཁམས་འཕགས་པ་སྤྱན་རས་གཟིགས་ཀྱི་གདུལ་ཞིང་དུ་སྐྱེས་པ། ཆུང་བྱིས་པའི་དུས་ནས་ཨ་མ་དང་མ་ཎི་མཉམ་དུ་ཤེས། དགེ་འདུན་པ་མ་ཟད་ཁྱིམ་པ་ཕོ་མོ་ཡིན་ཡང་། ཕོ་ཐམས་ཅད་འཕགས་པའི་དགེ་བསྙེན། མོ་ཐམས་ཅད་ཆོས་ཀྱི་ལྷ་མོ་ཡིན་པའོ། །ཡང་ན་གཟུགས་སུ་སྣང་བ་ཐམས་ཅད་སངས་རྒྱས་འོད་དཔག་མེད་ཀྱི་ཞིང་ཁམས་ཀྱི་རྟེན་དང་བརྟེན་པ་བཅས་པ། སྒྲ་རུ་གྲག་པ་ཐམས་ཅད་སངས་རྒྱས་འོད་དཔག་མེད་ཀྱི་མཚན་དང་ཡི་གེ་དྲུག་མའི་ཆོས་སྒྲ། དྲན་རྟོག་ཅི་ཤར་ཐམས་ཅད་དག་པ་ཡེ་ཤེས་ཀྱི་རོལ་བར་བསམ་པའི་དག་དྲན་དང་བཅས་ཏེ། བདག་ཉིད་ལ་ནད་པའི་འདུ་ཤེས་དང་། ཆོས་ལ་སྨན་གྱི་འདུ་ཤེས། དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས། ནན་ཏན་ཉམས་སུ་ལེན་པ་ལ་ནད་ཉེ་བར་འཚོ་བའི་འདུ་ཤེས་བཞག་སྟེ་ཆོས་ཉན་དགོས། ཆོས་ཉན་པའི་ཀུན་སྤྱོད་ཀྱི་ཐོག་ནས་ཀྱང་། རྣ་བ་མི་གཏད་ཁ་སྦུབ་ལྟ་བུའི་སྐྱོན། །ཞེས་རྣ་བ་མི་གཏད་ན་སྣོད་ཁ་སྦུབ་ཀྱི་ཐོག་ཏུ་ཆུ་ཕྱར་ཡང་ནང་དུ་མི་འགྲོ་བ་བཞིན་དང་། ཡིད་ལ་མི་འཛིན་ཞབས་རྡོལ་ལྟ་བུའི་སྐྱོན། །ཞེས་སྣོད་ཞབས་རྡོལ་མཐིལ་བྲལ་བའི་ནང་དུ་ཆུ་བླུགས་ཀྱང་མི་སོག་པ་ལྟར་དང་། ཉོན་མོངས་དང་འདྲེས་དུག་ཅན་ལྟ་བུའི་སྐྱོན། །ཞེས་ཆགས་སྡང་རྨོངས་གསུམ་དང་བཅས་ཏེ་ཆོས་ཉན་པ་ནི་དུག་དང་འདྲེས་པའི་ཟས་ཟ་མི་རུང་པ་ལྟར་དུ་ཆོས་ཀྱི་གོ་མི་ཆོད་པར་འགྱུར་རོ། །དེའི་ཐོག་ཏུ་དྲི་མ་དྲུག མི་འཛིན་པ་ལྔ་དང་བཅས་པ་ཆོས་ཉན་པའི་ཀུན་སློང་ཀུན་སྤྱོད་མང་ཡང་། ད་སྔོན་ཐེངས་མང་བཤད་མྱངས། མདོར་ན་སྤང་བྱ་དེ་ཐམས་ཅད་སྤངས་ཏེ། བླང་བར་བྱ་བའི་ཀུན་སྤྱོད་དགའ་དང་གུས་པའི་སྤྱོད་ལམ་གྱིས་ཉན་དགོས། དེ་ལྟ་བུའི་ཀུན་སློང་དང་ཀུན་སྤྱོད་རྣམ་པར་དག་པ་དང་བཅས་པས་སྐབས་འདིར་གང་ཞིག་གསན་པར་བྱ་བའི་ཆོས་ནི། འཕགས་མཆོག་སྙིང་རྗེའི་རང་གཟུགས་སྤྱན་རས་གཟིགས་དང་གཉིས་སུ་མ་མཆིས་པ། སྔར་རྒྱ་གར་འཕགས་པའི་ཡུལ་དུ་འཛམ་གླིང་མཛེས་པར་བྱེད་པའི་རྒྱན་དྲུག་དང་མཆོག་གཉིས། རྨད་དུ་བྱུང་བའི་སློབ་དཔོན་གཉིས་བཅས་བྱོན་པའི་ནང་གི་རྨད་བྱུང་གི་སློབ་དཔོན་ཆེན་པོ་རྒྱལ་སྲས་ཞི་བ་ལྷ་ཕྱི་མའི་དུས་འདིར་བོད་ཡུལ་དུ་མིའི་ཤ་ཚུགས་ཀྱིས་བྱོན་པའི་རྫོགས་ཆེན་དཔལ་སྤྲུལ་རིན་པོ་ཆེ་འཇིགས་མེད་ཆོས་ཀྱི་དབང་པོ་དེ་ཉིད་ཀྱིས་གསུངས་པའི་ཐོག་མཐའ་བར་གསུམ་དུ་དགེ་བའི་གཏམ་ལྟ་སྒོམ་སྤྱོད་གསུམ་ཉམས་ལེན་དམ་པའི་སྙིང་ནོར་ཞེས་བྱ་བ་འདི་ཉིད་བཤད་པའི་སྣོལ་མཚམས་མ་ལོག་པ་ཆིངས་ཆེན་པོ་གསུམ་གྱིས་བཅིངས་ཏེ་འཆད་པ་ལ་ཀླད་ཀྱི་དོན་དང་། གཞུང་གི་དོན། མཇུག་གི་དོན་ནོ།། ཀླད་ཀྱི་དོན། དང་པོ་བཤད་བྱའི་ཡན་ལག་ཀླད་དོན་ལ། མཚན་སྨོས་པ་དང་། ཕྱག་འཚལ་བ། མཆོད་པར་བརྗོད་པ། བརྩམ་པར་དམ་བཅའ་བ་དང་བཞི་ལས། དང་པོ་མཚན་སྨོས་པ། དང་པོ་མཚན་སྨོས་པ་ནི། ཐོག་མཐའ་བར་གསུམ་དུ་དགེ་བའི་གཏམ་ལྟ་སྒོམ་སྤྱོད་གསུམ་ཉམས་ལེན་དམ་པའི་སྙིང་ནོར་ཞེས་བྱ་བ་བཞུགས་སོ། །ཞེས་པས་དབུའི་ཞལ་བྱང་གི་མཚན་བསྟན་པའོ། །འདིའི་མཚན་དོན་འགྲེལ་ན། ཐོག་མར་དགེ་བ་སྙིགས་མའི་བསམ་སྤྱོད་ལ་སྐྱོ་བའི་གཏམ་འཁོར་བའི་གནས་ལས་ངེས་པར་འབྱུང་བའི་གནད་བསྟན་པ་དང་། བར་དུ་དགེ་བ་ལྟ་སྒོམ་སྤྱོད་པའི་ལམ་གཏན་ལ་འབེབས་པའི་གཏམ་དབེན་གསུམ་ཞི་བའི་རྒྱལ་སར་སྙེག་པའི་ཚེ་འདིར་ཆོས་སྐུའི་བསྟན་སྲིད་ཟིན་ཏེ། འཁོར་བར་ཕྱི་ཕྱག་འཚལ་དགོས་པའི་གདམས་པ་བསྟན་པ་དང་། མཐའ་མར་དགེ་བ་ངེས་འབྱུང་ཆོས་ལ་བསྐུལ་བའི་གཏམ་ངེས་པར་འབྱུང་བའི་གནད་ཤེས། ལྟ་སྒོམ་སྤྱོད་པའི་དོན་གོ་ཡང་། སྒྲུབ་པ་ལག་ལེན་ལ་མ་ཞུགས་ན་ཕན་ཐོགས་མེད་པས། སྒྲུབ་པ་ལག་ལེན་གྱིས་གནད་ལ་ཁེལ་བའི་ཕྱིར་དུ། འཁོར་བར་ངེས་འབྱུང་སྐྱེས་པའི་གང་ཟག་དེས། ཆོས་དང་རང་རྒྱུད་ཇི་ལྟར་བསྲེ་དགོས་པའི་ཚུལ་བསྟན་པའོ། །ངེས་འབྱུང་ཞེས་པ་ཡང་འཁོར་བར་སྐྱོ་སུན་གྱིས་དམུས་པ་ཙམ་མིན་པར་ཐར་འདོད་ཀྱི་བློ་ཡོད་པའི་སྒོ་ནས། ཇི་ལྟར་ཐར་བ་སྒྲུབ་པའི་གདམས་ངག་གི་མདོ་འགག་ཀྱང་བསྟན་པའོ། །ལྟ་སྒོམ་སྤྱོད་གསུམ་ཞེས་བྱ་བ་ནི། གོམ་པ་བླངས་ནས་འགྲོ་དགོས་ཚེ་དང་པོ་མིག་གིས་བལྟས་ཏེ་མིག་གིས་བལྟ་སར་རྐང་པས་བརྫི་དགོས་པ་བཞིན། ལྟ་བ་མིག་དང་འདྲ་བས་བལྟས་ཏེ་ལྟ་བས་ཐག་བཅད་པའི་དོན་དེ་སྒོམ་པ་རྐང་པ་དང་འདྲ་བས་དེར་བརྫིས་ནས་ཉམས་སུ་བླངས་ནས། སྤྱོད་པས་བོགས་ཐོན་པར་བྱས་པའི་ཐོག་ནས་འབྲས་བུ་ཡོན་ཏན་བརྙེས་པའི་ཐར་བ་འདོད་པའི་གང་ཟག་གི་ཉམས་ལེན་གྱི་གནད་ཆ་ཚང་འདུས་པས་ན་དམ་པའི་སྙིང་ནོར་ཞེས་བྱའོ། །དམ་པ་མིན་པའི་གང་ཟག་གིས་ནོར་བུའི་ནོར་ངོ་མི་ཤེས་པར་དོན་ཆེན་རིན་ཐང་ཅན་དེ་བསྐྱུར་ནས། དོན་ཆུང་ཙག་ཙིག་ལ་མགོ་འཁོར་བ་ཡིན་ཡང་། འདི་ནི་དམ་པ་ཞིག་གིས་མཐོང་བ་ཙམ་གྱིས་གནད་ཆེན་དུ་སེམས་ཏེ་རྩ་ཆེན་སྙིང་ལས་གཅེས་ཤིང་སྙིང་ལ་འཛིན་པའི་སྙིང་ནོར་ཡིན་པས་དམ་པའི་སྙིང་ནོར་ཞེས་བརྗོད་བྱ་ལ་བརྟེན་ཏེ་དོན་གྱི་སྒོ་ནས་མཚན་བཏགས་པའོ། །མཚན་བསྟན་པའི་དགོས་པ་ནི། དབང་པོ་རྣོན་པོས་མཚན་ཐོས་པ་ཙམ་གྱིས་ཀྱང་དབུ་ཞབས་ཀྱི་དོན་ཆ་ཚང་ཁོང་དུ་ཆུད་པ་དང་། དབང་འབྲིང་གིས་བརྗོད་བྱའི་དོན་སྤྱིའི་ནང་དོན་འདི་ལྟ་བུའོ་ཞེས་ཤེས་པ་དང་། དབང་པོ་ཐ་མས་གླེགས་བམ་འཚོལ་བདེ་བའི་དགོས་པ་ཡོད་པ་སྟེ་ཁ་བྱང་དུ་ཐོག་མཐའ་བར་དགེའི་གཏམ་ཞེས་བྲིས་པ་རིག་པས་དེ་ཐོག་མཐའ་བར་དགེའི་གཏམ་ཡིན་པར་ཤེས་པའི་དགོས་པ་ཡོད་དོ། །དེ་ཡིས་མཚན་བསྟན་པ་སོང་བའོ།། གཉིས་པ་ཕྱག་འཚལ་བ། གཉིས་པ་ཕྱག་འཚལ་བ་ནི། ན་མོ་ལོ་ཀེ་ཤྭ་ར་ཡ། ཞེས་པ་འདི་རྒྱ་གར་སཾསྐྲྀཏའི་སྐད་ཡིན་གྱི་བོད་སྐད་མིན། རང་ཅག་གི་ནང་པའི་ཆོས་འདི། སངས་རྒྱས་ཤཱཀྱ་ཐུབ་པ་སངས་རྒྱས་པའི་གནས་རྒྱ་གར་རྡོ་རྗེའི་གདན་ཡིན་ཞིང་། རྒྱ་གར་ནས་བོད་དུ་དར་བས་ཆོས་ཁུངས་རྒྱ་གར་ཡིན། སྟོན་པ་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་གཙོ་ཆེར་སཾསྐྲྀཏའི་སྐད་ཀྱིས་གསུངས་པས་སཾསྐྲྀཏའི་སྐད་འདི་མགོར་བཞག་པས། བརྒྱུད་ལ་བྱིན་རླབས་འཇུག་པའི་དགོས་པ་སོགས་ལྡན་པས་རྒྱུ་མཚན་ཆེན་པོ་ཡོད། སཾསྐྲྀཏའི་སྐད་དུ་ན་མོ་ལོ་ཀེ་ཤྭ་ར་ཡ་ཞེས་པ་འདི་བོད་སྐད་དུ་བསྒྱུར་པའི་དོན་འཇིག་རྟེན་དབང་ཕྱུག་ལ་ཕྱག་འཚལ་ལོ་ཞེས་པ་ཡིན། སྐད་གཉིས་ཤན་སྦྱར་ན། ན་མོ་ཞེས་པ་ཕྱག་འཚལ་ལོ། །ལོ་ཀེ་ལོ་ཤྭ་ར་འཇིག་རྟེན་དབང་ཕྱུག ཡ་ཞེས་པ་གང་ལ་ཕྱག་འཚལ་བའི་ཡུལ་ངེས་པ་བཟུང་བ་སྟེ། རང་གར་ཕྱག་འཚལ་ཞེས་པས་སུ་ལ་འཚལ་བ་མི་ཤེས་པས་འཇིག་རྟེན་དབང་ཕྱུག་ལ་ཞེས་ཕྱག་འཚལ་བའི་ཡུལ་གནས་གཞི་ངེས་བཟུང་གི་སྒྲས་གསལ་བར་བྱས་པའོ། །ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཀྱིས་སྤྱན་རས་གཟིགས་ཀྱི་ཡོན་ཏན་དང་། མཚན་དང་། གཟུངས་བརྗོད་པའི་ཕན་ཡོན་བསྟན་པའི་མདོ་རྒྱུད་ཉི་ཤུ་རྩ་གཅིག་གསུངས་པ་ལས། གཟུངས་སྔགས། གསང་སྔགས། རིག་སྔགས་སུ་གསུངས་པའི་མདོ་གཟུངས་བཅུ་བཞི། སྤྱན་རས་གཟིགས་ཀྱི་མཚན་ཐོས་པའི་ཡོན་ཏན་གྱི་མདོ་བདུན་གསུངས་ཏེ། གཟུངས་བཅུ་བཞི་ལ། ཕྱག་སྟོང་སྤྱན་སྟོང་གི་གཟུངས་དང་། པདྨའི་སྙིང་པོའི་གཟུངས་དང་། ཞལ་བཅུ་གཅིག་པའི་མདོ་དང་། གདོང་བཅུ་གཅིག་པའི་གཟུངས་དང་། དོན་ཡོད་ཞགས་པའི་གཟུངས་དང་། པདྨ་མཆོག་གི་མདོ་དང་། དབང་ཕྱུག་འཁོར་ལོའི་མདོ་དང་། ཆོ་ག་སྔགས་ཀྱི་རྒྱུད་དང་། ཡིད་བཞིན་ནོར་བུའི་མདོ་དང་། སྙིང་རྗེ་ཆེན་པོའི་མདོ་དང་། འོད་ཟེར་བཀོད་པའི་མདོ་དང་། པདྨ་ཅོད་པན་སྔགས་ཀྱི་རྒྱུད་དང་། ཡི་གེ་དྲུག་མའི་མདོ་དང་བཅུ་བཞིའོ། །དེ་རྣམས་ནས་སོ་སོའི་གཟུངས་སྔགས་ཀྱི་ཡོན་ཏན་བསྟན་པའོ། །སྤྱན་རས་གཟིགས་ཀྱི་མཚན་ཐོས་པའི་ཡོན་ཏན་བསྟན་པའི་མདོ་བདུན་ནི། ཟ་མ་ཏོག་བཀོད་པའི་མདོ་དང་། པདྨ་བཀོད་པའི་མདོ་དང་། པུཎྜ་རཱི་ཀའི་མདོ་དང་། ཆུ་ཀླུང་སྣ་ཚོགས་པའི་མདོ་དང་། སྣང་བ་རོལ་བའི་མདོ་དང་། མཚན་བརྒྱ་རྩ་བརྒྱད་པའི་མདོ་དང་། མཚན་རབ་བདུན་ཡོངས་སུ་བསྟན་པའི་མདོ་སྟེ། ཡོན་ཏན་གྱི་མདོ་བདུན་བཅས་བསྡོམས་པས་མདོ་རྒྱུད་ཉི་ཤུ་རྩ་གཅིག་གསུངས་པའོ། །ཕྱག་སྟོང་སྤྱན་སྟོང་གི་གཟུངས་ནས་གསུངས་པ་ནི། བཅོམ་ལྡན་འདས་རྒྱ་གར་གཉན་ཡོད་ཀྱི་ཨ་མྲའི་ཚལ་དུ་འཁོར་མང་པོ་དང་ཐབས་ཅིག་ཏུ་བཞུགས་ཏེ། ཆོས་བསྟན་པ་ལས་འཁོར་རྣམས་ཀྱི་ནང་ནས། བྱང་ཆུབ་སེམས་དཔའ་སྤྱན་རས་གཟིགས་ཀྱིས་རྫུ་འཕྲུལ་ཕྱོགས་བཅུར་བཏང་ནས། རིགས་དྲུག་གི་སེམས་ཅན་གྱི་སྡུག་བསྔལ་སྦྱངས་ནས་བདེ་བ་ལ་བཀོད་པའི་འོད་ཟེར་གསེར་གྱི་ཁ་དོག་ལྟ་བུའི་སྟོང་གསུམ་འཇིག་རྟེན་གྱི་ཁམས་ཐམས་ཅད་ཁྱབ་པའི་ཆོ་འཕྲུལ་བསྟན་ཏོ། །བཅོམ་ལྡན་འདས་ཀྱིས། བྱང་ཆུབ་སེམས་དཔའ་སྤྱན་རས་གཟིགས་འདི་འདས་པའི་བསྐལ་པ་གྲངས་མེད་འདས་པའི་ཕ་རོལ་ནས་སངས་རྒྱས་ཟིན་པ་ཡིན་ཏེ། མཚན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་ཀུན་ནས་འཕགས་པ་དཔལ་བརྩེགས་རྒྱལ་པོ་ཞེས་བྱའོ། །ཐོག་མར་བྱམས་པ་དང་སྙིང་རྗེ་བསྒྲུབས་ཏེ་ཐུགས་བསྐྱེད་ཚུལ་ཞིག་གིས། ད་དུང་བྱང་ཆུབ་སེམས་དཔའི་སྤྱོད་པ་འབའ་ཞིག་གིས་སེམས་ཅན་རྣམས་ཕན་པ་དང་བདེ་བ་ལ་འགོད་པ་ཡིན་ནོ། །སྤྱན་རས་གཟིགས་ཀྱི་མཚན་ནས་བརྗོད་ན་ཡང་སྡིག་པ་གྲངས་མེད་པ་བྱང་ཞིང་བསོད་ནམས་དཔག་ཏུ་མེད་པ་ཐོབ་སྟེ། འདི་ནས་ཤི་འཕོས་ན་ཡང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ་ཞེས་པ་ལ་སོགས་པ་མང་དུ་གསུངས་སོ། །ཡང་སངས་རྒྱས་བཅོམ་ལྡན་འདས་ཀྱིས་པདྨ་དཀར་པོའི་མདོ་ལས་གསུངས་པ་ནི། འཕགས་པ་སྤྱན་རས་གཟིགས་དབང་ཕྱུག་འདི་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་ཇི་སྙེད་ཅིག་སྡུག་བསྔལ་སྣ་ཚོགས་མྱོང་བར་འགྱུར་བ་དེ་དག་ལ་སྤྱན་གྱིས་ཁྱབ་པར་གཟིགས་ནས། སེམས་ཅན་དེ་དག་ཐམས་ཅད་སྡུག་བསྔལ་ལས་ཐར་བར་མཛད་དོ། །ཞེས་གསུངས་ཤིང་། སྤྱན་རས་གཟིགས་ཀྱི་མཚན་གྱི་ངེས་ཚིག་ལ་སོགས་པའང་མདོ་དེ་ལས་བསྟན་ཅིང་། སྤྱན་རས་གཟིགས་ཀྱི་མཚན་ཙམ་བཟུང་པས་ཀྱང་འཇིགས་པ་ཆེན་པོ་བརྒྱད་དང་བཅུ་དྲུག་ལ་སོགས་པ་ཞི་བ་དང་། རྒྱུད་ཀྱི་ཉོན་མོངས་པ་དང་བྲལ་ཞིང་། བུ་དང་ནོར་ལ་སོགས་པ་གང་འདོད་ཐམས་ཅད་སྤྱན་རས་གཟིགས་ལ་གསོལ་བ་བཏབ་ན་ཐོབ་པར་གསུངས་སོ། །ཡང་སངས་རྒྱས་གང་གཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་ལ། ན་བཟའ་དང་། བསོད་སྙོམས་དང་། གཟིམས་ཆ་སོགས་ཀྱི་མཆོད་པ་ཕུལ་བ་ལས། སྤྱན་རས་གཟིགས་དབང་ཕྱུག་གི་མཚན་ནས་བརྗོད་ནས་ཕྱག་འཚལ་བའི་བསོད་ནམས་ཆེ་བར་གསུངས་པ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ནི་ནམ་མཁའི་མཐའ་དང་མཉམ་པའི་སེམས་ཅན་རེ་རེ་ལ། དེ་དང་འཚམས་པའི་སྐུ་གཟུགས་རེ་རེར་སྤྲུལ་ནས་ཆོས་སྟོན་ཏོ། །ལ་ལར་སངས་རྒྱས་ཀྱི་གཟུགས་ཀྱིས་ཆོས་སྟོན། ལ་ལ་ལ་ཉན་ཐོས་ཀྱི་གཟུགས་ཀྱིས་ཆོས་སྟོན། ཁ་ཅིག་ལ་ཚངས་པའི་གཟུགས་ཀྱིས་ཆོས་སྟོན། ཁ་ཅིག་ལ་བརྒྱ་བྱིན་གྱི་གཟུགས་ཀྱིས་ཆོས་སྟོན། ཁ་ཅིག་ལ་དྲི་ཟའི་གཟུགས་ཀྱིས་ཆོས་སྟོན། ཁ་ཅིག་ལ་གནོད་སྦྱིན་གྱི་གཟུགས་ཀྱིས་ཆོས་སྟོན། ཁ་ཅིག་ལ་ནི་དབང་ཕྱུག་ཆེན་པོའི་གཟུགས་ཀྱིས་ཆོས་སྟོན་པ་སོགས་གང་ལ་གང་འདུལ་དེ་ལ་དེ་སྟོན་གྱིས་སྤྲུལ་བ་སྣ་ཚོགས་ཀྱིས་སེམས་ཅན་གྱི་དོན་མཐའ་ཡས་པར་མཛད་པར་གསུངས་སོ། །འདི་ནས་སྤྱན་རས་གཟིགས་ལ་འཇིག་རྟེན་དབང་ཕྱུག་ཅེས་པ་ཡང་། སེམས་ཅན་མང་པོ་ཞིག་འཇིག་རྟེན་དབང་ཕྱུག་ཅེས་པའི་མཚན་དང་སྐུ་ཡི་རྣམ་པས་བཏུལ་བའི་ཕྲིན་ལས་མཛད་པས་སྤྱན་རས་གཟིགས་ཀྱི་མཚན་ལ་འཇིག་རྟེན་དབང་ཕྱུག་ཞུ་བ་ལྟར་དུ་གསུངས་པའོ།། གསུམ་པ་མཆོད་པར་བརྗོད་པ། གསུམ་པ་མཆོད་པར་བརྗོད་པ་ནི། གང་མཚན་བདུད་རྩིའི་ཟེགས་མ་གཅིག་ལྷུང་བས།། ཚེ་རབས་དུ་མར་རྣ་བར་ཆོས་ཀྱི་སྒྲས།། འགེངས་པའི་ངོ་མཚར་རིན་ཆེན་རྣམ་གསུམ་ཞེས།། གྲགས་པའི་དཔལ་དེས་ཀུན་ཏུ་ཤིས་གྱུར་ཅིག། ཅེས་གསུངས་ཏེ། སངས་རྒྱས་ཆོས་དང་དགེ་འདུན་ཏེ་དཀོན་མཆོག་གསུམ་གང་གི་མཚན་གྱི་སྒྲ། འཆི་སོས་ཀྱི་བདུད་རྩི་ལྟ་བུ། ཐར་པའི་སྲོག་སྦྱིན་པར་བྱེད་པའི་ཟེགས་མའམ་ཐིགས་ཕྲན་གཅིག་གི་ཆ་ཤས་ཙམ་ཡང་། སེམས་ཅན་ལས་སྐལ་དང་ལྡན་པ་སུ་ཞིག་གི་རྣ་བར་ལྷུང་བའམ་ཐོས་པས་ཀྱང་། ཚེ་རབས་ཀུན་ཏུ་མཐོ་རིས་ཀྱི་རྟེན་ལ་རིགས་བཟང་པོར་སྐྱེས་ནས། དམ་པའི་ཆོས་ཐོས་པ་དང་མི་འབྲལ་བར་དམ་པའི་ཆོས་སྒྲས་རྣ་བར་འགེངས་བར་བྱེད་པའི་ངོ་མཚར་དང་ལྡན་པ་འཁོར་བའི་སྲིད་པ་ཕ་མཐའ་བྱེད་པའི་དཀོན་པ་རྣམས་ཀྱི་མཆོག་རིན་ཆེན་རྣམ་གསུམ་ཞེས། མཐའ་ཡས་རྒྱལ་བའི་ཞིང་ཀུན་ཏུ་གྲགས་པའི་དཔལ་དང་ལྡན་པ་དེས། ཀུན་ཏུ་དགེ་བའི་ཤིས་པ་སྩོལ་བར་གྱུར་ཅིག་ཅེས། ཡུལ་དམ་པ་ལ་མཆོད་པ་བརྗོད་པའི་ཤིས་ཚིག་གིས། གྲགས་པའི་བཀྲ་ཤིས་སྙན་གྲགས་དགེ །དབུགས་འབྱིན་ཆེན་པོ་དགའ་སྟོན་ཆེ། །གསུངས་པ་ལྟར་དུ་གནས་སྐབས་དང་མཐར་ཐུག་གི་ཕན་བདེ་རྒྱ་ཆེན་ཐོབ་པར་འགྱུར་བ་ཡིན་པས་དེ་ལྟར་གསུངས་པའོ། །བཞི་པ་བརྩམ་པར་དམ་བཅའ་བ་ལ། ང་རྒྱལ་སྤངས་པའི་དམ་པའི་རྣམ་ཐར་གྱིས་ཁེངས་སྐྱུང་མཛད་པ་དང་། ཇི་ལྟར་བསྐུལ་བའི་དོན་བཞིན་བརྩམ་པར་དམ་བཅའ་བ་གཉིས་ལས། དང་པོ་ང་རྒྱལ་སྤངས་པའི་དམ་པའི་རྣམ་ཐར་གྱིས་ཁེངས་སྐྱུང་མཛད་པ། དང་པོ་ང་རྒྱལ་སྤངས་པའི་དམ་པའི་རྣམ་ཐར་གྱིས་ཁེངས་སྐྱུང་མཛད་པ་ནི། གང་ཞིག་སྟོན་གྱི་དུས་ན་ཨ་མྲའི་འབྲས།། ཁ་ཅིག་ནང་མ་སྨིན་ཀྱང་ཕྱི་སྨིན་འདྲར།། སྣང་བ་དེ་ལྟར་ཆོས་པའི་གཟུགས་བརྙན་བདག། སེམས་དང་ཆོས་མ་འདྲེས་ཕྱིར་ཆོས་གཏམ་དཀོན།། ཞེས་གསུངས་ཏེ། རྒྱལ་སྲས་ཞི་བ་ལྷས་བྱང་ཆུབ་སེམས་དཔའི་སྤྱོད་འཇུག་གི་དབུ་ནས། སྔོན་ཆད་མ་བྱུང་བ་ཡང་འདིར་བརྗོད་མེད། །སྡེབ་སྦྱོར་མཁས་པའང་བདག་ལ་ཡོད་མིན་ཏེ། །དེ་ཕྱིར་གཞན་དོན་བསམ་པའང་བདག་ལ་མེད། །རང་གི་ཡིད་ལ་གོམས་ཕྱིར་ངས་འདི་བརྩམས། །གསུངས་པ་ལྟར་དུ་སྟོན་ཀའི་དུས་སུ་ཤིང་ཏོག་ཨ་མྲའི་འབྲས་བུ་འགའ་རེ་ཕྱི་སྨིན་ལ་ནང་མ་སྨིན་པ་དང་། འགའ་རེ་ནང་སྨིན་ཀྱང་ཕྱི་མ་སྨིན་པ་དང་། ཕྱི་ནང་གཉིས་ཀ་མ་སྨིན་པ་ལ་སོགས་པ་མུ་བཞིའི་དབྱེ་བ་ཡོད་པ་དེ་ལྟར། གང་ཟག་འགའ་ཞིག་ཕྱི་ཚུལ་ནས་བལྟས་ཚེ་ཕྱི་ནང་གཉིས་ཀར་དམ་པའི་ཆོས་ཀྱི་བྱིན་རླབས་ཐོབ་སྟེ། རྒྱུད་སྨིན་པའི་ཡོན་ཏན་ལོས་ལྡན་བསམ་པ་ལྟ་བུ་ཡོད་ཀྱང་། དོན་གྱིས་དཔྱད་ཚེ་ཕྱི་ནང་ཆ་མི་མཚུངས་པར་ནང་མ་སྨིན་པ་སྟེ། དཔལ་སྤྲུལ་རིན་པོ་ཆེའི་གསུངས་གཞན་དག་གི་ནང་དུ། ཁ་ཚིག་གཟུགས་ཀྱིས་བཅོས་པའི་ཆོས་པ། །ཡང་དག་ཆོས་དང་རྒྱང་ཐག་རིང་སྟེ། །ལུང་རྟོགས་ཡོན་ཏན་གང་དུ་སོང་བ། །སྙིགས་མའི་ཆོས་པས་ཤེས་ཚོད་མ་རེད། །ཅེས་གསུངས་པ་ལྟར་དུ། དེ་ལྟ་བུ་དག་གི་ང་རྒྱལ་བཅོམ་པའི་ཕྱིར་དང་། དམ་པའི་རང་གཤིས་ང་རྒྱལ་སྤོང་བ་ཡིན་པས། བདག་ལྟ་བུ་སེམས་དང་ཆོས་མ་འདྲེས་པ་གོང་གི་དཔེ་དང་ཆོས་མཚུངས་ཡིན་པས། སྡེ་སྣོད་རྒྱུད་སྡེ་དང་འབྲེལ་པའི་ཆོས་གཏམ་བཤད་རྒྱུ་དཀོན་ཞེས་ཁེངས་སྐྱུང་མཛད་པའི་ཞོར་དུ། ཆོས་པ་ངོ་མ་ཕྱི་ནང་གཉིས་ཀ་མཚུངས་པ་ནི། ཆོས་དང་རང་རྒྱུད་འདྲེས་པ་ཞིག་ཡིན་པའང་བསྟན་ཏོ།། གཉིས་པ་ཇི་ལྟར་བསྐུལ་པའི་དོན་བཞིན་བརྩམ་པར་དམ་བཅའ་བ། གཉིས་པ་ཇི་ལྟར་བསྐུལ་པའི་དོན་བཞིན་བརྩམ་པར་དམ་བཅའ་བ་ནི། དེ་ལྟར་ན་ཡང་དམ་པ་ཁྱེད་ཀྱི་བཀས།། བསྐུལ་བའི་ནན་མ་ལྡོག་ཕྱིར་དྲང་པོའི་ངག། སྙིགས་སྤྱོད་ཕལ་པའི་ཚུལ་དང་མི་མཐུན་པར།། གཡོ་སྒྱུ་མེད་པའི་སེམས་ཀྱིས་གསོལ་འདིར་དགོངས།། ཞེས་གསུངས་ཏེ། རང་རྒྱུད་ཆོས་དང་མ་འདྲེས་པས་དོན་དང་ལྡན་པའི་ཆོས་ཀྱི་འབེལ་གཏམ་སྨྲ་བ་དཀོན་པ་དེ་ལྟར་ན་ཡང་། སྐུལ་བ་པོ་དམ་པ་ཁྱེད་ཀྱིས་ནན་ཏན་གྱིས་བསྐུལ་པའི་གསུང་ངོ་ལྡོག་མ་ཐུབ་པའི་ཕྱིར་དྲང་པོའི་ངག་གིས། ཀློང་ཆེན་པས་རྒྱུ་ལ་ཁམས་བསྡུས་མེ་ཏོག་ཕྲེང་ལྡན་གྱི་ནང་དུ། མཐུན་འཇུག་མཁན་ལ་དགེ་བཤེས་བཟང་པོར་བརྩི། །གཡོན་ཅན་ཚུལ་འཆོས་མཁན་ལ་བཙུན་པར་སྨྲ། །ཚིག་རྩུབ་གླེན་ཟོག་མཁན་ལ་བཟང་པོར་བརྩི། །དེ་འདྲའི་སྐྱེ་བོ་མཐོང་ནས་ཁམས་འདི་འདུས། །ཞེས་པ་ལྟར་དུ། སྙིགས་སྤྱོད་ཕལ་པའི་ངོ་བསྟོད་དང་གཅམ་བུའི་ཚུལ་དང་མི་མཐུན་པར། སྐྱོན་ཡོད་ཀྱང་མེད་པར་བསྒྱུར་པའི་གཡོ་དང་། ཡོན་ཏན་མེད་ཀྱང་ཡོད་པར་འཆོས་པའི་སྒྱུ་མེད་པའི་ཕན་སེམས་བསམ་པ་བཟང་པོ་ལྡན་པའི་དྲང་པོ་འཁྱོག་ལ་མ་འཆང་བའི་ངག་གིས་གསོལ་བ་སྟེ་ཞུ་བས་འདིར་དགོངས། །ཞེས་གསུངས་པའོ། །དེ་ཡན་གྱིས་བཤད་བྱའི་ཡན་ལག་བཤད་པ་ཀླད་ཀྱི་དོན་སོང་སྟེ། སྤྱི་དོན་གྱི་ཆིངས་གཉིས་པ་གཞུང་གི་དོན་ལ། ཐོག་མར་དགེ་བ་སྙིགས་མའི་སྤྱོད་པ་ལ་སྐྱོ་བའི་གཏམ། བར་དུ་དགེ་བ་ལྟ་སྒོམ་སྤྱོད་གསུམ་གཏན་ལ་འབེབས་པའི་གཏམ། མཐའ་མར་དགེ་བ་ངེས་འབྱུང་ཆོས་ལ་བསྐུལ་བའི་གཏམ་དང་ས་བཅད་རྣམ་པ་གསུམ་ལས། དང་པོ་ཐོག་མར་དགེ་བ་སྙིགས་མའི་སྤྱོད་པ་ལ་སྐྱོ་བའི་གཏམ་ལ། དུས་ངན་གྱི་བསམ་སྤྱོད་ངན་པའི་མཚང་བགྲང་བ་དང་། དེ་ལ་སྐྱོ་བ་དང་དེ་ལས་ཐར་བར་བྱ་དགོས་པར་བསྐུལ་ནས་ངེས་འབྱུང་གི་གནད་བསྟན་པ། འཁྱོག་པོས་དྲང་པོ་ཡིན་ཡང་འཁྱོག་པོར་མཐོང་བའི་སྐྱོ་བའི་རབས་ཀྱིས་མཐའ་བསྡུ་བ་གསུམ་ལས། དང་པོ་དུས་ངན་གྱི་བསམ་སྤྱོད་ངན་པའི་མཚང་བགྲང་བ། དང་པོ་དུས་ངན་གྱི་བསམ་སྤྱོད་ངན་པའི་མཚང་བགྲང་བ་ལ་ལྔ་ལས། དང་པོ་སྙིགས་སྤྱོད་ངན་པའི་མཚང་ནས་འདོན་པར་དགོངས་ཏེ་དྲང་པོའི་ལམ་བཟང་གི་ཚུལ་བསྟན་པ། སྙིགས་སྤྱོད་ངན་པའི་མཚང་ནས་འདོན་པར་དགོངས་ཏེ་དྲང་པོའི་ལམ་བཟང་གི་ཚུལ་བསྟན་པ་ནི། དྲང་སྲོང་ཆེན་པོ་ཐུབ་དབང་ལྷའི་ཡང་ལྷས།། དྲང་པོའི་ལམ་ནས་དྲང་པོའི་གོ་འཕང་བརྙེས།། དྲང་པོའི་ལམ་བཟང་འགྲོ་ལ་དྲང་པོར་སྟོན།། དེ་སླད་དྲང་སྲོང་ཆེ་ཞེས་གྲགས་མིན་ནམ།། ཞེས་གསུངས་ཏེ། སྲིད་ན་ཆེ་བའི་དྲང་སྲོང་ཆེན་པོ་ཉེས་སྤྱོད་དང་། ཅ་ཅོ་འཁྲུལ་བར་བཅས་པ་མི་མངའ་བའི་བདག་ཅག་གི་སྟོན་པ་སྐུ་གསུང་ཐུགས་ཀྱི་མི་མཐུན་པའི་ཕྱོགས་ཐམས་ཅད་ཐུབ་པས་ན་ཐུབ་པ་བཅོམ་ལྡན་འདས་ཏེ། སྐུ་ཐུབ་སྟེ་སྟག་དང་སྤྲེའུ་ལྟར་དུ་མི་མཛད། གསུང་ཐུབ་སྟེ་ཅ་ཅོ་དང་ག་ཞ་མི་སྨྲ། ཐུགས་ཐུབ་སྟེ་མཉམ་པར་མ་བཞག་པ་མི་མངའ་བའི་མཆོག་གི་རབ་ཏུ་གྱུར་པ། འཇིག་རྟེན་ན་ཆེ་བའི་ལྷ་ཆེན་རྣམས་ཀྱིས་ཀྱང་། རལ་པའི་ཅོད་པན་གྱི་རྩེ་མོས་གང་ཞབས་སྤྱི་བོར་ལེན་པས་ལྷའི་ཡང་ལྷ་རུ་གྱུར་པ་མཉམ་མེད་རྫོགས་པའི་སངས་རྒྱས་དེས། མཐའ་གཉིས་ཀྱི་ཕྱོགས་སུ་མ་ལྷུང་བའི་མི་གནས་པའི་བྱང་ཆུབ་ཀྱི་སེམས་རྒྱལ་བ་ཀུན་གྱི་བགྲོད་པ་གཅིག་པུར་གྱུར་བའི་དྲང་པོའི་ལམ་བཟང་པོ་ལ་བརྟེན་ནས་མངོན་པར་རྫོགས་པར་སངས་རྒྱས་ཀྱི་དྲང་པོའི་གོ་འཕང་དམ་པ་བརྙེས་ཏེ་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོར་གྱུར་ནས། རང་ཉིད་ཀྱིས་བརྙེས་པའི་དྲང་པོའི་བྱང་ཆུབ་ལམ་བཟང་དེ་ཉིད་འགྲོ་བ་རྣམས་ལ་དྲང་པོར་སྟོན་པ་མཛད་པས། ཐུབ་པ་རྒྱལ་བའི་དབང་པོ་གང་ལ་དྲང་སྲོང་ཆེན་པོ་ཞེས་པའི་མཚན་ཐོགས་པ་མ་ཡིན་ནམ། ཞེས་གསུངས་པའོ། །ཐུབ་པའི་དབང་པོ་བཅོམ་ལྡན་འདས་ལ་བསྟོད་བསྔགས་བརྗོད་ནས་འཁྱོག་པོའི་ལམ་དེ་ཟོལ་གྱིས་སྨད་པའོ།། གཉིས་པ་དྲང་པོ་ལས་ལྡོག་པའི་འཁྱོག་སྤྱོད་གཡོ་སྒྱུ་ཟོལ་ཟོག་གི་སྣང་ཤེས་ཅན་གྱི་མཚང་འདོན་མཛད་པ། གཉིས་པ་དྲང་པོ་ལས་ལྡོག་པའི་འཁྱོག་སྤྱོད་གཡོ་སྒྱུ་ཟོལ་ཟོག་གི་སྣང་ཤེས་ཅན་གྱི་མཚང་འདོན་མཛད་པ་ནི། ཀྱེ་མ་སྙིགས་མའི་དུས་འདིར་འགྲོ་བའི་རྒྱུད།། དྲང་པོའི་གཞུང་བཟང་ཉམས་ནས་གཡོ་སྒྱུར་སྤྱོད།། དེ་སླད་འཁྱོག་པོའི་བློ་དང་འཁྱོག་པོའི་ངག། གྱ་གྱུས་གཞན་སེམས་བསླུ་ལ་སུ་ཡིད་གཏོད།། ཅེས་གསུངས་ཏེ། ཀྱེ་མ་ཞེས་སྐྱོ་བའི་ངག་གིས་སྣ་དྲངས་ཏེ་ཚེ་དང་དུས་དང་ལྟ་བ་དང་ཉོན་མོངས་དང་སེམས་ཅན་གྱི་སྙིགས་མ་ལྔ་བདོ་ཞིང་སྨིན་པའི་དུས་འདིར། འགྲོ་བའི་ཤེས་རྒྱུད་དྲང་པོའི་གཞུང་བཟང་ཡ་རབས་དྲ་མའི་སྲོལ་དང་། སྔར་ཡོད་དགེ་བཅུའི་ཁྲིམས་ལས་འདས་ཤིང་ཉམས་ནས། ཁོང་གི་གསུང་གཞན་ལས། དུས་ངན་སྐྱེ་བོའི་བསམ་སྤྱོད་གྱ་མ་གྱུ། །སུ་དང་མཐུན་ཡང་དམ་པའི་ཆོས་དང་འགལ། །གསུངས་པ་ལྟར་དུ་གྱུར་ནས། གཡོ་སྒྱུར་སྤྱོད་པ་ཡིན་པ་དེ་ཡི་སླད་ན། དུས་ངན་སྐྱེ་བོའི་འཁྱོག་པོའི་བློ་ཐབས་སྣ་ཚོགས་ཀྱིས་ཕ་རོལ་བསླུ་བར་བྱེད་པའི་བསམ་པ་དང་། དེས་ཀུན་ནས་བསླངས་པའི་དྲང་པོའི་གནམ་ཐིག་ལྟ་བུ་མ་ཡིན་པའི་འཁྱོག་པོའི་ངག་རྫུན་དང་། ཟོལ་ཟོག་ཚུལ་འཆོས་ཕར་འཁྱོག་ཚུར་འཁྱོག་གྱ་མ་གྱུའི་ངག་ཚིག་གིས་གཞན་སེམས་བསླུ་བར་བྱེད་པ་ལ་བློ་དང་ལྡན་པའི་སྐྱེ་བོ་མ་རྨོངས་པ་ཤེས་པ་མནལ་དུ་ཕབ་པ་སུ་ཞིག་དེར་ཡིད་གཏོད་པར་བྱེད་དེ་མི་བྱེད་དོ། །ཞེས་གསུངས་པའོ། །དེས་ནི་དྲང་དང་འཁྱོག་པོའི་ལམ་གྱི་བཟང་ངན་གྱི་ཁུངས་སྣེའི་གླེང་གཞི་མཛད་དོ།། གསུམ་པ་སྙིགས་སྤྱོད་དངོས་ལྷོངས་སུ་ཕུད་དེ་མཚང་ནས་འདོན་པ། གསུམ་པ་སྙིགས་སྤྱོད་དངོས་ལྷོངས་སུ་ཕུད་དེ་མཚང་ནས་འདོན་པ་ནི། ཀྱི་ཧུད་སྙིགས་འགྲོ་མཐོང་ནས་བློ་འདི་རྨོངས།། ཀྱེ་མ་སུ་ཡི་ངག་ལ་སུ་ཡིད་རྟོན།། མི་སྲུན་སྲིན་མོའི་གླིང་ན་གནས་འདྲ་འདི།། དགོངས་ནས་རང་དྲིན་རང་ལ་ཆེ་བར་མཛོད།། ཅེས་གསུངས་ཏེ། ཀྱི་ཧུད་ཅེས་སྨྲེ་ངག་གི་ཚིག་དང་བཅས་ནས་སྙིགས་མ་ལྔ་བདོའི་གནས་སྐབས་ན་སྣོད་བཅུད་ཀྱི་རྒུད་པ། དུས་ངན་གྱི་འཚེ་བ། ཁྱད་པར་སེམས་ཅན་གྱི་སྙིགས་མར་གྱུར་བས་སྐྱིད་པོ་མེད་ཅིང་། དེ་ཡང་འགྲོ་བ་ཞེས་པའང་སྡུག་བདེན་གྱིས་བསྡུས་པའི་སྣོད་བཅུད་གཉིས་ཀ་ལ་གོ་ཡང་། སྐབས་འདིར་སྙིགས་ལྔའི་ནང་གི་སྙིགས་མར་གྱུར་པའི་སེམས་ཅན་ལ་གཙོ་བོར་གོ་བས། སེམས་ཅན་དེ་དག་གིས་ཀྱང་བསམ་པས་བདེ་བ་འདོད་ཀྱང་སྦྱོར་བས་རང་གཞན་ཕུང་ལ་སྦྱོར་པའི་བསམ་སྦྱོར་ཕྱིན་ཅི་ལོག་པ་ཁོ་ནས་ངན་སྤྱོད་སྣ་དགུ་བྱེད་པ་འདི་མཐོང་ནས་བློ་འདི་རྨོངས་ཤིང་ཅི་བྱ་གཏོལ་མེད་དུ་གྱུར་ཏོ། །ཡང་ཀྱེ་མ་ཞེས་སྐྱོ་བའི་སྨྲེ་ངག་མྱ་ངན་གྱི་ཉམས་བཅས། སུ་ཡི་ངག་ལ་སུ་ཞིག་ཡིད་རྟོན་བློ་ཁེལ་གྱིས་བློ་གཏོད་བྱ་སྲིད་དེ། དུས་ལ་མངོན་པར་སྐྱོ་བའི་རབས་བི་ཛ་ཧ་རཾ་ལས། སྔོན་དུས་ཁོང་ཡངས་ལྷོད་ཆ་ཆེ་ན་ཡང་། །ད་དུས་གྲིམ་པས་ཅུང་ཟད་ཙམ་གྱི་ཕྱིར། །ཕ་དང་བུ་འཐབ་དཔོན་སློབ་མཛའ་བཤེས་འབྲལ། །རང་བཞིན་ཀུན་སྤྱོད་ངན་པས་སེམས་འདི་སྐྱོ། །ཞེས་ཀུན་མཁྱེན་ཆེན་པོས་གསུངས་པ་ལྟར་དུ་བློ་གཏད་དང་ཡིད་ཆེས་ཆོག་ས་སུ་ཡང་མེད་པར་སྲིན་མོའི་གླིང་དུ་ཐོན་པ་ལྟ་བུ་རེད་ཅེས་ཏེ། དེ་ཡང་ཐུགས་རྗེ་ཆེན་པོས་ཚོང་པ་རྣམས་སིངྒ་ལའི་སྲིན་མོའི་གླིང་ནས་བཏོན་པའི་ལེའུ་ལས། གནའ་སྔ་མོ་སྔ་མོ་ཞིག་ལ། རྒྱ་གར་གྱི་ཡུལ་ནས་དེད་དཔོན་ནམ་ཚོང་དཔོན་ཆེན་པོ་གྲུའི་གཟིངས་ཀྱི་ཁ་ལོ་བསྒྱུར་པ་ཞིག་གིས། ཚོང་པ་ལྔ་བརྒྱ་ཁྲིད་དེ་རྒྱ་མཚོའི་ནང་དུ་རིན་པོ་ཆེ་ལེན་དུ་ཕྱིན་པར། དེ་དུས་ཀྱི་གྲུ་གཟིངས་ཆེན་པོ་རྣམས་རྒྱ་མཚོའི་ནང་ནས་བསྐྱོད་དུས། རས་ཀྱི་དར་ཡོལ་ཆེན་པོ་ཕྱར་ཏེ་རླུང་ཤུགས་ཀྱིས་འགྲོ་བས། སྟབས་ལེགས་ན་འགྲོ་དགོས་པའི་སར་ཕྱིན་ཡང་། སྟབས་མ་ལེགས་ན་ཕྱིན་ཅི་ལོག་ཏུ་རླུང་གིས་འདེད་པའང་སྲིད་པས། དེད་དཔོན་གྱིས་ཁྲིད་པའི་ཚོང་པ་ལྔ་བརྒྱའི་གྲུ་གཟིངས་མི་འདོད་པའི་རླུང་གིས་བདས་ཏེ། སིངྒ་ལ་ཞེས་པའི་རྒྱ་མཚོའི་གླིང་ཕྲན་ཞིག་ན་སྲིན་མོའི་གླིང་ཡོད་པ་དེར་ཕྱིན་པར། སྲིན་མོ་ལྔ་བརྒྱས་ཚོང་པ་ལྔ་བརྒྱ་བསླུ་ཐབས་ཀྱིས་བསླུས་ནས་མཐའ་མར་གསོད་པར་སེམས་ཏེ། གཞོན་ནུ་མ་ལྔ་བརྒྱའི་གཟུགས་དང་ཆ་བྱད་བྱས་ནས། ཚོང་པ་ལྔ་བརྒྱའི་འདུན་བསུས་ཏེ་བསླུ་ཐབས་སྣ་ཚོགས་ཀྱིས་བྲིད་ནས་མགོ་གཡོགས་པས། ཚོང་པ་རྣམས་སྲིན་མོའི་གླིང་ལ་སོང་སྟེ་སྲིན་མོ་རྣམས་དང་ཁྱིམ་ཐབ་བྱས། སྲིན་མོའི་གཙོ་མོ་དང་དེད་དཔོན་གཉིས་ཁྱིམ་ཐབ་བྱས་ནས་བསྡད་དོ། །དུས་ཡུན་གང་འཚམས་ཤིག་སོང་རྗེས། དགོང་གཅིག་ལ་སྲིན་མོས་གཉིད་འོག་ནས་ཧ་བགད་ཆེན་པོ་ཞིག་བྱས་ཏེ་བླ་བརྡོལ་གྱི་ཚིག་གམ་གཉིད་ལབ་ཁ་ཤས་སྨྲས་པས། དེད་དཔོན་དོགས་པ་ཟོས་ཏེ་སྲིན་མོ་གཉིད་མ་སད་བཞིན་དུ་མོ་རང་གིས་བཤད་པའི་གཏམ་དེར་མཐུད་དེ་སྐད་ཆ་དྲིས་པས། སྲིན་མོས་སྨྲས་པར་གནས་འདི་སྲིན་མོའི་གླིང་ཡིན། ཚོང་པ་གསར་བ་འཛམ་བུ་གླིང་ནས་ཐོན་མ་ཐག་ཏུ་ཁྱེད་ཅག་ཟ་རྒྱུ་ཡིན། ཚོང་པ་རྙིང་པ་བརྒྱ་ཕྲག་མང་པོ་ཟོས་ཟིན། ཟོས་མ་ཚར་པ་རྣམས་ཡར་ཀའི་ལུང་པའི་ཕུ་རུ་ལྕགས་ཀྱི་ཁང་པའི་ནང་དུ་བཙུད་ཡོད་ཅེས་བཤད་པས། དེད་དཔོན་གྱིས་དེ་མ་ཐག་ཏུ་གླེན་མའི་དྲ་བ་ཞེས་པའི་རིགས་སྔགས་ཤིག་སྲིན་མོར་བཏབ་ཏེ་གཉིད་སད་དུ་མེད་པར་བྱས་ཏེ་འཇབ་བུས་སྒོར་བུད་ནས་སྲིན་མོས་བཤད་པའི་ས་ཕྱོགས་སུ་བདེན་མིན་ལྟ་རུ་ཕྱིན་ནས། ཤིང་སྡོང་ཞིག་གི་རྩེར་འཛེགས་ནས་ལྕགས་ཀྱི་ར་བའི་ནང་དུ་བལྟས་ཚེ། སྲིན་མོས་སྨྲས་པ་ཇི་བཞིན་ཚོང་པ་བཟས་མ་ཚར་པ་རྣམས་དེར་བཙུད་ནས་བཞག་ཡོད་པ་རིག་པས། ཡང་ཕྱིར་སྲིན་མོའི་གམ་དུ་འོངས་ནས་འདི་ནས་ཐར་བའི་ཐབས་ཅི་ཡོད་ཅེས་དྲིས་པ་དང་། སྲིན་མོས་གཉིད་མ་སད་བཞིན་དུ་སྨྲས་པར་མི་རྣམས་ཀྱིས་མི་ཤེས་པ་ཡིན་གྱི་མ་གཏོགས་ཐར་ཐབས་ཡོད། ཚེས་ཆེན་བཅོ་ལྔའི་དགོང་མོར་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་ཀྱི་སྤྲུལ་བ་རྟའི་རྒྱལ་པོ་བ་ལ་ཧ་ཞེས་ཀྱང་བྱ། སྤྲིན་གྱི་ཤུགས་ཅན་ཞེས་ཀྱང་བྱ་བ་ཞིག་སིངྒ་ལའི་གླིང་འདིར་བབ་ནས། སྨན་སྤེད་ཏའི་རྩྭ་ཟོས་ནས་གསེར་གྱི་བྱེ་མའི་ནང་དུ་ཕར་འགྲེ་ཚུར་འགྲེ་ལན་གསུམ་བྱས་ནས་ལུས་སྤྲུགས་ནས། མི་སྐད་ཀྱིས་སྲིན་མོའི་གླིང་ནས་ཐར་བར་འདོད་པ་ཡོད་ན། ང་ལ་འཇུས་ཤིག སྤུ་ཉག་རེ་ལ་འཇུས་ཀྱང་ཐར་རོ། །ཆགས་ཞེན་འཁྲི་བས་ཕྱིར་བལྟས་མ་ཤོར་བ་གྱིས་གསུངས་པས་དེ་ལྟར་བྱས་པ་རྣམས་ཐར་བ་ཡིན་ཞེས་བཤད་པས། དེད་དཔོན་གྱིས་དོན་རྣམས་ཁོང་དུ་ཆུད་ནས། ཕྱི་ཉིན་ལྐོག་ནས་ཚོང་རོགས་ལྔ་བརྒྱ་བསྡུས་ཏེ་འུ་ཅག་ཕྱིན་པའི་གནས་འདི་སྲིན་མོའི་གླིང་དུ་འདུག་གོ །བཟའ་ཟླ་བྱས་ནས་ཁྱིམ་ཐབས་སུ་སྦྲེལ་ཡོད་པ་འདི་དག་སྲིན་མོར་འདུག་གོ །འདི་དག་གིས་རང་གཟུགས་དངོས་མ་མ་བསྟན་པ་ཡིན་འདུག་པས། ནམ་ཞིག་ཚོང་པ་གསར་བ་ཐོན་དུས་འུ་ཅག་ཟ་རྒྱུ་ཡིན་ཚུལ། ཐར་ཐབས་དང་བཅས་པ་བཤད་ནས་སྲིན་མོ་རྣམས་ལ་ཟེར་མི་རུང་བའི་ཚིག་ཁ་བསྡམས་ནས། ཞག་གསུམ་གྱི་རྗེས་ནས་དུས་ཆད་ཀྱི་ཐོག་ཏུ་ཐམས་ཅད་འཛོམ་རྒྱུ་བྱས་སོ། །ཞག་མ་གསུམ་རྗེས་ཀྱི་ཚེས་ཆེན་བཅོ་ལྔའི་དགོང་མོར་ཟླ་བ་ཤར་རིའི་རྩེ་ནས་ཤར་ཚེ། རྟ་རྒྱལ་བ་ལ་ཧས་སྨན་སྤེད་ཏའི་རྩྭ་ཟོས་གསེར་གྱི་བྱེ་མའི་ནང་དུ་འགྲེ་ལྡོག་ལན་གསུམ་བྱས་ནས། མི་སྐད་ཀྱིས་སྲིན་མོའི་གླིང་ནས་བྲོས་ཏེ་འཛམ་བུའི་གླིང་དུ་ཐར་འདོད་པ་ཡོད་ན་ང་ལ་འཇུས་གསུངས་ཚེ། དེད་དཔོན་གྱིས་དེ་མ་ཐག་ཏུ་བསམ་བློ་ཅི་ཡང་མ་བཏང་བར་རྟ་མཆོག་གི་གོང་དུ་བུད་དོ། །ཚོང་པ་གཞན་པ་རྣམས་ཀྱིས་ཀྱང་ཅི་ཟིན་གང་ཟིན་གྱིས་རྟ་མཆོག་ལ་འཐམས་པས། དེས་རྐྱེན་གྱིས་སིང་ག་ལའི་གླིང་དེར་གཡོ་འགུལ་ཆེན་པོ་ཞིག་བྱུང་བས། སྲིན་མོ་རྣམས་ཀྱིས་ཤེས་ནས་ངེད་ཅག་མ་སྐྱུར་ཞེས་ངུ་འབོད་ཆེན་པོ་བྱས་པས། དེད་དཔོན་དང་། ཚོང་ཕྲུག་ཁ་ཤས་ཙམ་མིན་པས་ཆགས་ཞེན་གྱིས་ཕྱིར་བལྟས་ཤོར་བས་མཚོ་ནང་དུ་ལྷུང་བར་སྲིན་མོ་རྣམས་ཀྱིས་འཇིགས་སུ་རུང་པ་འདྲེ་ཡི་རང་གཟུགས་བསྟན་ཏེ་མཚོ་ནང་ནས་བླངས་ཏེ་དེ་མ་ཐག་ཏུ་ཟོས་སོ། །ཆགས་ཞེན་དང་། ཕྱིར་བལྟས་མ་བྱས་པ་རྣམས་ནི་རང་རང་གི་ཕ་ཡུལ་དུ་ཕྱིན་ཏོ། །རྟ་མཆོག་བ་ལ་ཧ་ཡང་ཚོང་པ་རྣམས་འཛམ་བུ་གླིང་དུ་བསྐྱལ་རྗེས་མི་སྣང་བར་གྱུར་ཏོ། །དེ་བཞིན་དུ་གཉེན་ཉེ་མཛའ་བཤེས་མཐུན་གྲོགས་གང་ཡིན་ཡང་། ཡང་དག་པའི་ལམ་སྟོན་ཤེས་མཁན་དང་། ཡང་དག་པའི་ལམ་སྟོན་པ་དུས་ངན་འདིར་ཡོད་པ་མིན་པས། འཕྲལ་ཕུག་ཡུན་ལ་ཕན་པའི་དམ་ཆོས་བསྒྲུབས་ཏེ། མི་རྟག་སྲིན་མོའི་གླིང་ལྟ་བུའི་འཁོར་བའི་གནས་ནས་བྲོས་ན་རང་དྲིན་རང་ལ་ཆེ་བས་དེ་ལྟར་མཛོད་དང་། རང་གཞན་ཀུན་ལ་ཕན་ཞིང་། གནས་སྐབས་དང་མཐའ་ཐུག་ཀུན་ཏུ་བདེ་བ་ཡིན། །ཞེས་གསུངས་པའོ།། བཞི་བ་མི་ཚེ་ཡུད་ཙམ་ཡིན་པས་ནམ་འཆི་ངེས་མེད་ཡིན་པའི་ཚུལ་བསྟན་པ། བཞི་བ་མི་ཚེ་ཡུད་ཙམ་ཡིན་པས་ནམ་འཆི་ངེས་མེད་ཡིན་པའི་ཚུལ་བསྟན་པ་ནི། སྔོན་ཡང་རང་སེམས་རྣམ་ཤེས་གཅིག་པུ་ཞིག། འཁྱམས་ཤིང་ལས་ཀྱིས་བདས་ནས་འདིར་སྐྱེས་ཟིན།། ད་ཡང་མར་གྱི་དཀྱིལ་ནས་སྤུ་བཏོན་ལྟར།། ཐམས་ཅད་བཞག་ནས་རང་ཉིད་གཅིག་པུར་འགྲོ།། ཞེས་གསུངས་ཏེ། སྔོན་སྐྱེ་བ་ཐོག་མེད་ནས་ད་ལྟའི་བར་དུ་རང་སེམས་རྣམ་ཤེས་གཅིག་བུ་ཞིག་འཁྱམས་ནས་ཁྱིམ་བཟའ་ཚང་གཅིག་གི་མིས་ཀྱང་གང་ནས་འོངས་ངོ་མི་ཤེས་པའི་ཆ་མེད་པའི་རྣམ་ཤེས་འཁྱམ་པོ་ཚོ་གཅིག ལུས་རྟེན་འདི་ལྟ་བུ་ཞིག་ཏུ་ལས་ཀྱིས་བདས་ཤིང་འཕངས་ནས་འདིར་སྐྱེས་ཟིན་ཏེ། མི་ཚེ་ཉི་མ་ཁ་ཤས་ལྟ་བུ་དུས་ཡུན་ཐུང་ངུ་ཞིག་ལ་མགྲོན་ཁང་དུ་འགྲུལ་བ་ཞག་སྡོད་བྱས་པ་བཞིན་དུ་མཉམ་དུ་བསྡད་ནས། ད་ཡང་དུས་མ་ངེས་པའི་ཉིན་གཅིག་ལ་མར་གྱི་དཀྱིལ་ནས་སྤུ་བཏོན་པ་ལྟར་དུ། ཁྱིམ་བཟའ་ཚང་རྒྱུ་ནོར་རྫས་ཐ་ན་རང་ཉིད་ཀྱི་ལུས་ནས་བཟུང་སྟེ་ཐམས་ཅད་བཞག་པའམ་བསྐྱུར་ནས་རང་ཉིད་ཀྱི་རྣམ་ཤེས་འཁྱམ་པོ་དེ་ཕྱི་མའི་ཡུལ་དུ་གཅིག་པུར་གྲོགས་མེད་ཁེར་རྐྱང་དུ་དང་པོ་འོངས་པ་ལྟར་དུ་འགྲོ་དགོས་པ་ཡིན། །ཞེས་གསུངས་པའོ།། ལྔ་བ་ལུས་རྟེན་འདིའི་ཐོག་ནས་དམ་ཆོས་མ་འགྲུབ་ན་རང་སྲིད་རང་གིས་བརླག་པའི་ཚུལ་བསྟན་པ། ལྔ་བ་ལུས་རྟེན་འདིའི་ཐོག་ནས་དམ་ཆོས་མ་འགྲུབ་ན་རང་སྲིད་རང་གིས་བརླག་པའི་ཚུལ་བསྟན་པ་ནི། རང་སེམས་རང་ལ་མི་དཀར་ཐབས་མེད་ཅིང་།། རང་བློ་རང་ལ་མི་དྲང་མི་སྲིད་ཀྱིས།། རང་དོན་སྙིང་པོའི་ལྷ་ཆོས་མ་འགྲུབ་ན།། རང་སྲིད་རང་གིས་བརླག་པ་མ་ཡིན་ནམ།། ཞེས་གསུངས་ཏེ། མི་ཞིག་ཡིན་ནས་བཟུང་རང་སེམས་རང་ལ་མི་དཀར་བར་རང་གིས་རང་ལ་བསམ་ནག་བྱ་བ་མི་སྲིད་པས་རང་སེམས་རང་ལ་མི་དཀར་ཐབས་མེད་ཅིང་། དེ་བཞིན་དུ་རང་བློ་རང་ལ་མི་དྲང་པར་འཁྱོག་དང་གཡོ་སྒྱུ་བྱ་བ་མི་སྲིད་པ་ཡིན་པས། རང་དོན་ཡིན་ངེས་ཀྱི་ཚེ་འདི་ཕྱི་ཐམས་ཅད་དུ་རང་ཉིད་ལ་ཕན་ཐོགས་ཡོད་ངེས་པའི་དམ་པའི་ལྷ་ཆོས་བསྒྲུབ་པའི་ཆ་རྐྱེན་ཚོགས་ཤིང་། འཆི་བ་ཤེས་ཤེས་ཁར། མ་ཎི་འཁྱོལ་འཁྱོལ་ཁར་ཡོད་དུས་འདིར་སྙིང་པོའི་ལྷ་ཆོས་མ་བསྒྲུབས་ནས་མ་འགྲུབ་ན། རང་སྲིད་རང་གིས་བརླག་པའམ་རང་ཆུས་རང་གིས་ཕུང་བ་སྟེ་ཚེ་སྐྱེ་བ་རེ་གཉིས་ཙམ་མིན་པར་ཚེ་རབས་གཏན་གྱི་འདུན་མ་བཟང་པོའི་ཆུས་གནད་ཆེན་དེ་རྡོ་མགོ་རུ་བརྒྱབ་ནས་བརླག་པ་མ་ཡིན་ནམ། འདེང་ལོག་བརྒྱབ་ནས་ཚེ་འདིའི་བྱ་བཞག་ཁབ་ཙམ་ལ་བལྟ་ས་ནས། ཚེ་རབས་གཏན་གྱི་འདུན་མ་སྟ་རེ་ཙམ་ཞིག་ཆད་འགྲོ་བ་ཡིན། ཞེས་གསུངས་པའོ། །དེ་ཡན་གྱིས་དུས་ངན་གྱི་བསམ་སྤྱོད་ངན་པའི་མཚང་བགྲངས་ནས། གཉིས་པ་དེ་ལ་སྐྱོ་བ་དང་དེ་ལས་ཐར་བ་བྱ་དགོས་པར་བསྐུལ་ནས་ངེས་འབྱུང་གི་གནད་བསྟན་པ་ལ་གསུམ་ལས། དང་པོ་འདུ་འཛིའི་འབྲེལ་ཐག་བཅད་དེ་དབེན་པ་བསྟེན་པར་གདམས་པ། དང་པོ་འདུ་འཛིའི་འབྲེལ་ཐག་བཅད་དེ་དབེན་པ་བསྟེན་པར་གདམས་པ་ནི། སྙིགས་མའི་སྐྱེ་བོ་བསམ་སྤྱོད་དམན་ཆེས་པས།། སུས་ཀྱང་རང་ལ་མི་ཕན་གཡོ་སྒྱུས་བསླུ།། སུ་ལའང་རང་གིས་ཕན་པ་འགྲུབ་དཀའ་བས།། འདུ་འཛིའི་འབྲེལ་ཐག་བཅད་ན་མི་ལེགས་སམ།། ཞེས་གསུངས་ཏེ། སྙིགས་མའི་སྐྱེ་བོ་ཡིན་པས་བསམ་པ་དམན་པ་རང་འདོད་ཕུག་བཅུག་གཡོ་སྒྱུ་ཅན་ཡིན་ཞིང་། བསམ་པ་དམན་པ་དེས་དྲངས་པའི་སྤྱོད་པ་ཡང་ལྷག་ཏུ་ངན་པ་མི་དགེའི་སྡིག་ལས་འབའ་ཞིག་བྱེད་པའི་ཆེས་དམན་པའི་བསམ་སྤྱོད་ཅན་གྱིས་རྒྱལ་ཁམས་གང་བའི་དུས་ཚོད་འདིར། མཚང་འདོན་མན་ངག་རྡོ་རྗེའི་ཐོལ་གླུ་ལས། དེང་སང་སྙིགས་མའི་སྐྱེ་བོ་སུ་དང་གང་ཡིན་ཡང་། །སྤྱོད་ལམ་བརྟགས་ཤིང་བརྟགས་ན་ཡིད་སྐྱོ་ལས་མི་འདུག །ཅེས་པ་ལྟར་དུ། སུས་ཀྱང་རང་ཉིད་ལ་ཕན་མི་ཐོགས་ཤིང་། ཐོགས་ཀྱང་མི་བཏགས་པར་གཡོ་སྒྱུས་བསླུ་ཐབས་ལ་འབད་བཞིན་ཡོད་ལ། སུ་ལའང་རང་གིས་ཀྱང་ཕན་པ་འགྲུབ་དཀའ་སྟེ། སྤྱིར་འདི་ཕྱིར་ཕན་ཐོགས་ཅན་གྱི་དམ་པའི་ཆོས་ཀྱིས་ཕན་བཏགས་དགོས་ཀྱང་། རྒྱལ་བ་རྫོགས་པའི་སངས་རྒྱས་ཀྱིས་ཀྱང་གདུལ་དཀའི་བསོད་ནམས་མེད་ནས་ལུས་པ་རྣམས། འུ་ཅག་གིས་ཇི་ལྟར་བྱ་ནས་འདུལ་ཐུབ། སྐྱེ་བོ་མི་རྒོད་ཁ་བྱང་བསྟན་གྱི་བྲག་ཕུག་ལྟ་བུ་ལ་དམ་པའི་ཆོས་ཀྱི་ཉི་མ་འཆར་ཐབས་ཡོད་པ་མིན་པས་རང་དོན་གཞན་དོན་གཉིས་ཀ་ཤོར་དུ་འཇུག་པ་ལས། འདུ་འཛིའི་འབྲེལ་ཐག་བཅད་དེ་མི་མེད་དབེན་པའི་རི་ཁྲོད་ལ་རྩེ་གཅིག་དམ་ཆོས་སྒྲུབ་ཏུ་ཕྱིན་ན་མི་ལེགས་སམ། ཞེས་གྲོས་སུ་གདམས་ཏེ་གསུངས་པའོ། །རང་དོན་ཞི་བདེར་གཞོལ་ཏེ་རང་གཅིག་པུ་བདེ་ཐབས་ཀྱིས་སེམས་ཅན་བློས་ཐོངས་ཤོག་ཅེས་པ་མིན་པར་རང་རྒྱུད་ཆོས་ཀྱིས་བཏུལ་ནས་རང་སྣང་དབང་དུ་འདུས་ཚེ་གཞན་སྣང་ཟིལ་གྱིས་གནོན་པའི་དུས་ཚོད་ཡིན་པ་ཤུགས་ཀྱིས་བསྟན་པའོ། །ཆོས་བསྒྲུབ་པར་འཇིག་རྟེན་བློས་བཏང་ཐུབ་དགོས་པས། གཉིས་པ་འཇིག་རྟེན་བློས་གཏོང་ཐུབ་པའི་གདམས་ངག་བསྟན་པ་ནི་། གཉིས་པ་འཇིག་རྟེན་བློས་གཏོང་ཐུབ་པའི་གདམས་ངག་བསྟན་པ་ནི་། བཀུར་ཀྱང་གོང་མ་མཉེས་དུས་མི་འོང་གིས།། སྐྱོང་ཡང་འོག་མ་མགུ་དུས་མི་འོང་གིས།། བརྩེ་ཡང་ཕར་བསམ་ཚུར་ལ་མི་སེམས་པའི།། ཚུལ་འདི་དགོངས་ལ་བློ་ཐག་ཆོད་པར་མཛོད།། ཅེས་གསུངས་ཏེ། འཇིག་རྟེན་གྱི་བྱ་བ་མང་དག་ཅིག་གོང་མ་བཀུར་ལུགས་འོག་མ་སྐྱོང་ལུགས་མཉམ་པོར་འགྲོགས་ལུགས་ཡིན་པས་དེ་དག་འབའ་ཞིག་ལ་བརྩོན་ནས་མགོ་འཁོར་བཞིན་ཡོད་ཀྱང་། གོང་བཀུར་འོག་སྐྱོང་མཉམ་འགྲོགས་རྣམས་བསྐྱུར་ན་མ་གཏོགས་ལས་ཟིན་ནས་མཇུག་གྲུབ་པའི་དུས་མེད་དོ། །གོང་མ་ནི་བཀུར་ཀྱང་མཉེས་ནས་མགུ་བའི་དུས་མི་འོང་ཞིང་། ཡང་སྒོས་དཔོན་ངན་པ་བཀྱག་གིན་བཀྱག་ལ་ཉིལ་རན་པའི་རི་བོའི་ཁ་འོག་ཏུ་བསྡད་པ་ལྟར་དུ་ཇེ་སྡུག་ཇེ་ཐུ་ཡིན་ཞིང་། སྐྱོང་ཡང་འོག་མ་མགུ་དུས་དང་འཚེང་དུས་མི་ཡོང་བར་དེ་བས་ཆེ་ཞིག་ཐོབ་ཏུ་རེ་ནས་ཁ་གདང་བ་སྲིད་ཅིང་། རྟེའུ་ཆུང་བརྒྱགས་ན་མ་ལ་འཕྲ་ལྕག །ཅེས་པ་ལྟར་དུ་ངན་པས་དྲིན་ལན་ལོག་འཇལ་ཡང་བྱེད་པས། ཇི་སྐད་དུ། ད་ལོ་གཅེས་གཅེས་འདྲ་ཡང་སང་ཕོད་དེ་མེད། །ཉམ་ཆུང་བྱེད་མདོག་ཁ་ཡང་མཐོ་སྣང་ཆེ་འོང་། །ཕར་ལ་བརྩེ་བས་བསྐྱངས་ན་ཕར་ཕར་རིང་བའི། །ཨ་གསར་ཁ་འཛུམ་ངོ་དགའི་སྙིང་གྲོགས་སྐྱུར་ཐོང་། །ཞེས་པ་ལྟར་དང་། །རང་དང་འདྲ་མཉམ་ཡིན་ཡང་མཐུན་པོར་མཉམ་དུ་འགྲོགས་པ་དཀའ་ཞིང་། དང་པོ་ཨ་གསར་གྱི་དུས་ལྟ་བུ་མིན་པར་གཅིག་གི་ངན་སྐྱོན་གཅིག་གིས་རིག་ནས་རང་སྐྱོན་ལ་སྐྱོན་དུ་མི་མཐོང་ཡང་། གཞན་སྐྱོན་ལྷག་ཏུ་སྐྱོན་དུ་མཐོང་བས། ཕར་ལ་བསམས་པ་ལྟར་དུ་ཚུར་ལ་བསམ་མཁན་མེད་པའི་ཚུལ་འདི་དགོངས་ཏེ་འདུ་འཛིའི་འབྲེལ་ཐག་གཅད་རྒྱུའི་བློ་ཐག་ནང་ནས་ཆོད་པར་མཛོད། ཅེས་གསུངས་ཏེ་གདམས་ངག་གནང་བའོ།། གསུམ་པ་ལྷག་པར་དུས་འདིར་གཞན་དོན་ཡང་འགྲུབ་དཀའ་བ་བསྟན་པ། གསུམ་པ་ལྷག་པར་དུས་འདིར་གཞན་དོན་ཡང་འགྲུབ་དཀའ་བ་བསྟན་པ་ནི། མཁས་ཀྱང་བསྟན་དོན་མི་འགྲུབ་རྩོད་པ་འཕེལ།། གྲུབ་ཀྱང་གཞན་དོན་མི་འབྱུང་སྒྲོ་སྐུར་མང་།། མཐོ་ཡང་སྡེ་ཆུས་མི་ཟིན་ཁེང་ལོག་ཆེ།། ད་ལྟའི་དུས་འདི་དགོངས་ལ་སྐྱོ་བར་མཛོད།། ཅེས་གསུངས་ཏེ། མཁས་ཀྱང་མཁས་ཚོད་ཙམ་གྱིས་བསྟན་དོན་མི་འགྲུབ་སྟེ་ཕྱོགས་གཅིག་དགའ་ནས་ཡར་བཀྱག་ཀྱང་། ཕྱོགས་གཅིག་མི་དགའ་ནས་མར་ཕབ་པ་བྱེད་ཅིང་། དེ་གཉིས་ཀའི་བར་ནས་ཕྱོགས་ཞེན་གྱི་རྩོད་པ་འཕེལ་བར་འགྱུར། གྲུབ་ཀྱང་འགའ་རེས་དད་པ་བྱ་སྲིད་ཀྱང་འགའ་རེས་དད་ལོག་བྱེད་པས་དུས་འདིར་མཁས་པ་གྲུབ་པ་གང་ཡིན་ཡང་གཞན་དོན་མི་འབྱུང་བའི་སྟེང་དུ། སྐྱོན་མེད་ཀྱང་ཡོད་པར་མདའ་ལ་སྒྲོ་བཏགས་པ་ལྟར་དུ་ཡར་སྒྲོ་འདོགས་བྱེད། ཡོན་ཏན་ཡོད་ཀྱང་མེད་པར་དངོས་ཡོད་བསྙོན་འཛུགས་བྱེད་ནས་མར་སྐུར་བ་འདེབས་མཁན་མང་། ཐོབ་མངའ་ཐང་མཐོ་ནས་སྡེ་ཆུས་སྔོན་ཟིན་ཡང་། ད་ནི་ཟིན་དཀའ་བ་སྟེ། མི་མང་ཁེང་ལོག་བྱེད། དུས་ཟིང་འཕོ་འགྱུར་ཆེ་བའི་སྐབས་སུ་ཐོན་ཡོད་པས། སྙིགས་དུས་ཀྱི་ཚུལ་ལ་བསམས་ཏེ་སྐྱོ་བ་སྙིང་ནས་སྐྱེ་བར་མཛོད། ཅེས་གསུངས་པའོ། །དཔལ་སྤྲུལ་རིན་པོ་ཆེའི་གསུང་གཞན་ལས་ཀྱང་། དེ་རིང་དགའ་དགའ་འདྲ་ཡང་སང་ཉིན་ཁྲོས་ཡོད། །མི་ངོ་དཀར་ནག་འཚོས་འཚོས་དགའ་དུས་མི་འོང་། །དགའ་ཡང་དགོས་དུས་མི་ཕན་ཡི་ཆད་སྣོན་པ། །ངོ་དགའ་ངོ་བསྟོད་དགོས་པའི་ངོ་འཛིན་སྐྱུར་ཐོང་། །ཞེས་གསུངས་པ་དང་གོ་བའི་གནད་དང་གདམས་པའི་ཚུལ་འདྲ་བའོ།། གསུམ་པ་འཁྱོག་པོས་དྲང་པོ་ཡིན་ཡང་འཁྱོག་པོར་མཐོང་པའི་སྐྱོ་བའི་རབས་ཀྱི་མཐའ་བསྡུ་བ། གསུམ་པ་འཁྱོག་པོས་དྲང་པོ་ཡིན་ཡང་འཁྱོག་པོར་མཐོང་པའི་སྐྱོ་བའི་རབས་ཀྱི་མཐའ་བསྡུ་བ་ནི། བཤད་ཀྱང་བདེན་དུ་མི་འཛིན་གཞན་དུ་གོ། ཕན་སེམས་གཏིང་ནས་དག་ཀྱང་ལོག་པར་འཛིན།། འཁྱོག་པོས་དྲང་པོ་འཁྱོག་པོར་མཐོང་དུས་འདིར།། སུ་ལའང་ཕན་པ་མི་འགྲུབ་རེ་ཐག་ཆོད།། ཅེས་གསུངས་ཏེ། དྲང་ཞིང་སྲོང་པོར་སྨྲ་བའི་ངག་གིས་བདེན་པར་བཤད་ཀྱང་། བདེན་པར་བདེན་དུ་མི་འཛིན་པར་རང་གཡོ་སྒྱུ་ཅན་གྱིས་གཞན་གྱིས་བཤད་ཚད་གཡོ་སྒྱུའི་གཏམ་ལ་སོགས་པ་གཞན་ཞིག་ཡིན་པའི་ལོག་པར་གོ་ཞིང་། ཕན་སེམས་བསམ་པས་ཞེ་གཏིང་ནས་བསམ་དཀར་བྱས་ཀྱང་། བསམ་དཀར་བསམ་དཀར་དུ་མི་གོ་བར་ཕྱིན་ཅི་ལོག་པར་འཛིན་ཞིང་། མདོར་ན་འཁྱོག་པོའི་བསམ་སྤྱོད་ཅན་གྱི་ལྟ་སྣང་དང་མཐོང་ཚུལ་ལ། དྲང་པོ་ཡིན་ཡང་འཁྱོག་པོར་མཐོང་བའི་དུས་འདིར། སུ་ལ་ཡང་ཕན་པ་མི་འགྲུབ་པས། འགྲུབ་ཏུ་མེད་པའི་བྱ་བ་ལ་འགྲུབ་ཏུ་རེ་ནས་མགོ་མི་འཁོར་པར་རེ་ཐག་གདེང་ནས་ཆོད། རང་ཐག་རང་གིས་ཆོད། སྣ་ཐག་མགོར་རྫེས་དང་། སེམས་ཐག་ནམ་ཆོད་ན་དེ་དུས་རང་ཐག་ཆོད་ཀྱི། རང་གིས་ཐག་མ་ཆོད་པར་གཞན་རྗེས་སྙེགས་ནས་ཐག་ཆོད་པའི་ཉི་མ་ཞིག་ཡོད་པ་མིན། ཞེས་གསུངས་པའོ། །དེ་ཡན་གྱིས་ཐོག་མར་དགེ་བ་གཞུང་གི་དོན་ངེས་འབྱུང་ཆོས་ལ་བསྐུལ་བའི་གནད་བསྟན་པ་སོང་བའོ།། གཉིས་པ་བར་དུ་དགེ་བ་ལྟ་སྒོམ་སྤྱོད་གསུམ་གཏན་ལ་འབེབས་པའི་གཏམ། གཉིས་པ་བར་དུ་དགེ་བ་ལྟ་སྒོམ་སྤྱོད་གསུམ་གཏན་ལ་འབེབས་པའི་གཏམ་ལ། དབེན་པར་བསྐུལ་བའི་གཏམ། རེ་དོགས་གཅོད་པའི་གཏམ། ལྟ་སྒོམ་གྱི་གནད་མཐའ་དག་གསུང་མཆོག་ཡི་གེ་དྲུག་མར་བསྡུས་ཏེ་བསྟན་པ་དང་གསུམ་མོ།། དང་པོ་དབེན་པར་བསྐུལ་བའི་གཏམ། དང་པོ་དབེན་པར་བསྐུལ་བའི་གཏམ་ལའང་ལྔ་ལས། དང་པོ་སྙིགས་སྤྱོད་གང་མཐོང་ཐམས་ཅད་སྒྱུ་མ་ལྟ་བུར་འཇིགས་པར་སྐུལ་བར་བསྟན་པ། དང་པོ་སྙིགས་སྤྱོད་གང་མཐོང་ཐམས་ཅད་སྒྱུ་མ་ལྟ་བུར་འཇིགས་པར་སྐུལ་བར་བསྟན་པ་ནི། ཆོས་ཀུན་སྒྱུ་མ་ལྟ་བུར་རྒྱལ་བས་གསུངས།། ད་ནི་སྒྱུ་མ་ལས་ཀྱང་སྒྱུ་ཆེན་ཏེ།། གཡོ་སྒྱུའི་སྒྱུ་མ་ཤོམ་པའི་མིག་འཕྲུལ་མཁན།། སྙིགས་སྤྱོད་སྒྱུ་མ་འདི་ལ་འཇིགས་པར་མཛོད།། ཅེས་གསུངས་ཏེ། སྤྱིར་སྣང་སྲིད་སྣོད་བཅུད་ཀྱིས་བསྡུས་པའི་ཆོས་ཀུན་སྒྱུ་མ་གཟུགས་བརྙན་ཆུ་ཟླ་འཇའ་ཚོན་ལ་སོགས་པ་སྒྱུ་མའི་དཔེ་བརྒྱད་ལྟར་དུ་སྙིང་པོ་མེད་པ་བསླུ་བའི་ཆོས་ཅན་འབའ་ཞིག་ཡིན་པར་རྒྱལ་བ་རྫོགས་པའི་སངས་རྒྱས་སྟོབས་བཅུ་མངའ་བ་དེས་གསུངས་ཤིང་། ཁྱད་པར་དུ་ད་ལྟར་སྙིགས་མའི་དུས་ཀྱི་སྐབས་འདི་ལ་ནི་སྒྱུ་མ་ཕལ་པ་ལས་ཀྱང་བསླུ་ཚབས་ཆེ་བའི་སྒྱུ་ཆེན་ཏེ་གཡོ་སྒྱུའི་སྒྱུ་མ་ཤོམ་པའི་མིག་འཁྲུལ་མཁན་དབང་མེད་གཞན་ཡིད་བསླུ་མཁས་ཀྱི་འཁྲབ་སྟོན་པ་གར་སྟེགས་ལ་ཕྱིན་པ་ལྟ་བུའི་སྙིགས་མའི་སྤྱོད་པ་སྒྱུ་མ་ལྟ་བུ་ཡིད་རྟོན་མེད་པ་འདི་ལ་འཇིགས་ཤིང་སྐྲག་པར་མཛོད། ཅེས་གསུངས་པའོ།། གཉིས་པ་གང་ཐོས་གང་སྨྲས་ཀྱི་བསླུ་ཚིག་གཏམ་བྲག་ཅ་ལྟ་བུ་ལ་སུན་པར་བསྟན་པ། གཉིས་པ་གང་ཐོས་གང་སྨྲས་ཀྱི་བསླུ་ཚིག་གཏམ་བྲག་ཅ་ལྟ་བུ་ལ་སུན་པར་བསྟན་པ་ནི། གཏམ་རྣམས་བྲག་ཅ་ལྟ་བུར་རྒྱལ་བས་གསུངས།། ད་ནི་བྲག་ཅ་ལས་ཀྱང་ཡང་ཅ་སྟེ།། ཁ་དང་དོན་དུ་མི་མཚུངས་བྲག་ཅའི་གཏམ།། སླུ་ཚིག་བྲག་ཅ་འདི་ལ་སུན་པ་སྐྱེད།། ཅེས་གསུངས་ཏེ། གང་ཐོས་གང་སྨྲས་ཀྱི་གཏམ་རྣམས་ལ་སྙིང་པོ་མེད་པ་བྲག་ཅ་ལྟ་བུར་རྒྱལ་བས་སྔར་ནས་གསུངས་ཤིང་། ད་ནི་དེ་བས་ཀྱང་བྲག་ཅའི་ནང་གི་ཡང་ཅ། རྫུན་པ་ལས་ཀྱང་ཡང་རྫུན། སྙིང་མེད་ལས་ཀྱང་སྙིང་མེད་དུ་གྱུར་པ་སྟེ། སྙིགས་དུས་ཀྱི་མིས་བཤད་ཚད་ཁ་དང་དོན་དུ་མི་མཚུངས་པར། རྐྱེན་ངེས་མེད་ལས་བྱུང་བའི་འབྲེལ་མེད་བྲག་ཅའི་སྒྲ་དང་འདྲ་བའི་བསླུ་བྱེད་གཏམ་ལ་སུན་པ་བསྐྱེད་རན་པའམ་རྨུས་རན་པ་ཡིན། ཞེས་གསུངས་པའོ།། གསུམ་པ་མཐོང་ཐོས་ཐམས་ཅད་སླུ་བྱེད་དུ་མཐོང་བས་གཅིག་པུར་གནས་པ་བསྟན་པ། གསུམ་པ་མཐོང་ཐོས་ཐམས་ཅད་སླུ་བྱེད་དུ་མཐོང་བས་གཅིག་པུར་གནས་པ་བསྟན་པ་ནི། སུ་མཐོང་མི་མ་ལགས་ཏེ་སླུ་བྱེད་མཁན།། སུས་བཤད་གཏམ་མ་ལགས་ཏེ་བསླུ་བྲིད་ཚིག། ད་ནི་སུ་ལའང་བློ་གཏད་མི་འདུག་གིས།། རང་ཉིད་གཅིག་པུ་རང་དགར་གནས་པར་མཛོད།། ཅེས་གསུངས་ཏེ། མིའི་ཁྱུ་རུ་སྡོད་པའི་སྐབས་འདིར་རིགས་མཐུན་ངོ་འཕྲད་བྱུང་ན་མཐུན་པའི་གཏམ་དང་ཕན་པའི་གྲོས་ཤིག་དགོས་ཀྱང་། སྙིགས་མའི་དུས་འདིར་ཐམས་ཅད་རྫུན་པར་གྱུར་ནས་སུ་མཐོང་ཐམས་ཅད་མི་མ་ལགས་ཏེ་མི་རྫུན། མིའི་འདྲ། བསླུ་བྱེད་མཁན་དུ་འདུག་གོ །སུ་ཞིག་གིས་གང་ཅི་ཞིག་བཤད་ཀྱང་གཏམ་དངོས་མ་མ་ལགས་ཏེ་བསླུ་བྲིད་གཞན་མགོ་སྐོར་བྱེད་ཀྱི་ཚིག་ཤ་སྟག་ཏུ་མཆིས་སོ། །མདོར་ན་བསམ་རྒྱུ་མི་མགོ་བསྐོར་བ་སེམས་ཀྱང་ཐ་མ་རང་མགོ་རང་གིས་གཡོགས་པའི་ལས་འབྲས་ཁྱད་གསོད་རྨོངས་པའི་ལས་བྱེད་བཞིན་འདུག་པས། ད་ནི་སུ་མཐོང་གང་ཐོས་ཅི་ལའང་བློ་གཏད་མི་འདུག་གིས། སྐྱོན་མེད་བཟང་པོར་བརྩི་བ་དག་ལའང་གདིང་གི་བློ་གཏད་མི་འདུག་པས་ན་རང་བློ་རང་ལ་མི་དཀར་མི་སྲིད་པས་རང་ཉིད་གཅིག་པུར་འབྲེལ་འདྲིས་ཀྱི་འཁྲི་བ་བསྐྱུངས་ཏེ་གནས་པར་མཛོད་ཅིག ཅེས་གསུངས་པའོ།། བཞི་བ་སྒོ་གསུམ་ཆོས་དང་མཐུན་ཡང་རང་ཚུལ་སྦེད་པར་བསྟན་པ། བཞི་བ་སྒོ་གསུམ་ཆོས་དང་མཐུན་ཡང་རང་ཚུལ་སྦེད་པར་བསྟན་པ་ནི། ལུས་སྤྱོད་ཆོས་བཞིན་སྤྱོད་ན་ཀུན་དང་འགལ།། ངག་གཏམ་དྲང་པོར་བཤད་ན་ཕལ་ཆེར་ཁྲོ།། བསམ་བཟང་གཏིང་ནས་དཀར་ཀྱང་སྐྱོན་དུ་རྩི།། ད་ནི་རང་ཚུལ་སྦེད་པའི་དུས་ལ་བབ།། ཅེས་གསུངས་ཏེ། ལུས་ཀྱི་སྤྱོད་པ་ཆོས་དང་མཐུན་པར་བྱས་ན། བྱ་རོག་དཀར་པོ་མེད་པའི་ས་ནས་བྱ་རོག་དཀར་པོ་ཐན་ལྟས་སུ་བརྩི་བ་དང་། ཡུལ་སྡེ་ཞིག་ནས་རྒྱལ་པོ་མ་གཏོགས་པའི་འབངས་ཐམས་ཅད་སྨྱོན་པར་གྱུར་དུས་རྒྱལ་པོ་སྨྱོན་པ་དང་། འབངས་རྣམས་སྨྱོན་པ་མིན་པར་བརྩིས་པའི་གཏམ་རྒྱུད་ལྟར་དུ་འགྱུར་སྲིད་ཅིང་། ལུས་ཀྱི་སྤྱོད་པ་ཆོས་དང་མཐུན་པར་བྱས་ཀྱང་། ཚུལ་འཆོས་དང་། ངོམས་ཆོས་སུ་སེམས་ནས་ཐམས་ཅད་སྐྱོན་དུ་བརྩི་བའི་དུས་སྐབས་འདིར་ལུས་སྤྱོད་ཆོས་བཞིན་བྱས་ན་ཐམས་ཅད་དང་འགལ་ཞིང་། མ་བྱས་ན་ཆོས་དང་འགལ་ལ། ངག་གཏམ་དྲང་པོར་བཤད་ན་སྙིགས་མའི་སྤྱོད་པ་ཐམས་ཅད་སྐྱོན་མཚང་ཡིན་པས་སྐྱོན་མཚང་ཐད་ཀར་བཏོན་ཏེ་མཚང་ཐོག་ཏུ་རྒོལ་ན་ཕལ་ཆེར་ཁྲོ་བར་འགྱུར་ཞིང་། སེམས་པ་གཏིང་ནས་དཀར་ཏེ་བསམ་པ་བཟང་པོས་ཁ་ཏ་བྱས་ནའང་དོན་མེད་ཁ་མཆུ་གླེང་མཁན་གྱི་སྐྱོན་ཅན་དུ་བརྩི་བའི་དུས་ངན་གྱི་སྐབས་ཡིན་པས། ད་ནི་རང་ལ་ཡོན་ཏན་ཡོད་ཀྱང་རང་ཚུལ་བསྐུངས་ཏེ་སྦེད་པར་བྱེད་པའི་དུས་ཚོད་ཡིན་པ་ལས་ངོམ་དགོས་པའི་དུས་ཚོད་མ་ཡིན། ཞེས་གསུངས་པའོ། །ས་སྐྱ་པཎྜི་ཏས། ལེགས་པར་སྨྲས་ན་ཐམས་ཅད་ཁྲོ། །ལོག་པར་སྨྲས་ན་བསྟན་པ་འཇིག །སྨྲ་བ་སྤངས་ན་དོན་མི་རྟོགས། །དེས་ན་དམ་པའི་སྤྱོད་པ་དཀའ། །ཞེས་གསུངས་པ་དང་ཚུལ་མཐུན་པའོ།། ལྔ་བ་རང་ཚུལ་ཇི་ལྟར་སྦེད་པའི་ཚུལ་བསྟན་པ། ལྔ་བ་རང་ཚུལ་ཇི་ལྟར་སྦེད་པའི་ཚུལ་བསྟན་པ་ནི། ལུས་སྦས་དབེན་པའི་རི་ལ་གཅིག་པུར་སྡོད།། ངག་སྦས་སྨྲ་བ་མ་མང་འབྲེལ་ཐག་ཆོད།། སེམས་སྦས་རང་སྐྱོན་ཁོ་ནར་ཅེར་རེ་ལྟོས།། སྦས་པའི་རྣལ་འབྱོར་ཟེར་ན་དེ་ལ་ཟེར།། ཞེས་གསུངས་ཏེ། དཔལ་སྤྲུལ་རིན་པོ་ཆེ་ཉིད་ཀྱི་གསུང་དབེན་པའི་གཏམ་ལྷའི་རྔ་སྒྲ་ལས། ཐུབ་པས་བསྔགས་པའི་དབེན་པའི་རི་ཁྲོད་དུ། །རྒྱལ་དང་རྒྱལ་སྲས་དྲང་སྲོང་ཆེ་རྣམས་བསྟེན། །ཡོན་ཏན་ཀུན་གྱི་འབྱུང་གནས་རིན་པོ་ཆེ། །གནས་འདི་བསྟེན་ལ་ཐར་ལམ་ཉེ་བ་ཡིན། །ཞེས་གསུངས་པ་ལྟར་དུ། ཕྱི་ཡི་དབེན་པར་ལུས་སྦས་པ་མི་མེད་དབེན་པའི་རི་ཁྲོད་དམ་པས་བསྔགས་པའི་རྒྱལ་སར་གཅིག་པུར་སྡོད་ལ། ནང་གི་དབེན་པར་ངག་སྦས་པ་སྨྲ་བ་མ་མང་བར་ཕྱིའི་མི་དང་གཏམ་གྱི་འབྲེལ་ཐག་ཆོད། གསང་བའི་དབེན་པར་སེམས་སྦས་པ་རང་སྐྱོན་ཁོ་ན་ཐེར་ལ་བཏོན་ཏེ་སེམས་ཉིད་མ་བཅོས་རྣལ་མར་ཅེ་རེ་ལྟོས་དང་། སྦས་པའི་རྣལ་འབྱོར་མིང་དོན་མཚུངས་པ་དེ་ལ་ཟེར། ཞེས་གསུངས་པའོ། །ད་ནི་སྒོ་གསུམ་སྐུ་གསུམ་དུ་དག་པའི་ཉམས་ལེན་གྱི་རྣལ་འབྱོར་སྐྱོང་བ་ལ། གཉིས་པ་རེ་དོགས་གཅོད་པའི་གཏམ། གཉིས་པ་རེ་དོགས་གཅོད་པའི་གཏམ་ལ་བཞི་ལས། དང་པོ་སྒོ་གསུམ་སྦས་པའི་རྣལ་འབྱོར་པས་ཞེན་ལོག་དང་སྐྱོ་ཤས་རེ་དོགས་གཅོད་པའི་གྲོགས་གསུམ་མི་འབྲལ་པར་བསྟེན་དགོས་པ་གདམས་པ་ནི། དང་པོ་སྒོ་གསུམ་སྦས་པའི་རྣལ་འབྱོར་པས་ཞེན་ལོག་དང་། སྐྱོ་ཤས། རེ་དོགས་གཅོད་པའི་གྲོགས་གསུམ་མི་འབྲལ་པར་བསྟེན་དགོས་པ་གདམས་པ་ནི། སུ་ལའང་བློ་གཏད་མི་འདུག་ཞེ་ལོག་གེ། གང་ལའང་སྙིང་པོ་མི་འདུག་སྐྱོ་ཆད་དེ།། གང་བསམ་འགྲུབ་དུས་མི་འདུག་རྦད་ཐག་ཆོད།། འདི་གསུམ་གཏན་དུ་འགྲོགས་ན་ཕན་པར་མཆིས།། ཞེས་གསུངས་ཏེ། སྤྱིར་ན་སོ་སོའི་སྐྱེ་བོ་བྱིས་པའི་རྣམ་ཐར་ལ་ཡིད་རྟོན་མ་མཆིས་ཤིང་། ཁྱད་པར་དུ་གོང་ནས་བཤད་པ་ལྟར་དུ་སྙིགས་མའི་སེམས་ཅན་ལ་བློ་གཏད་མེད་པས། རང་གཞན་དགྲ་གཉེན་བར་མའི་ཕྱོགས་སུ་གཏོགས་པ་སུ་ལ་ཡང་བློ་གཏད་མེད་པར་མཁྲིས་ནད་ཅན་གྱིས་སྣུམ་ཟན་མཐོང་བ་ལྟར་ཞེ་ལོག་གེ་བ་དང་། འཇིག་རྟེན་སྒྱུ་མའི་ནོར་རྫས་འདོད་ཡོན་ལོངས་སྤྱོད་གྱི་འབྱོར་བ་མངའ་ཐང་སྙན་གྲགས་ལ་སོགས་པ་གང་དང་གང་ལའང་སྙིང་པོ་མེད་པའི་མཚང་རིག་པ་ནི། དུག་དང་འདྲེས་པའི་ཁ་ཟས་ཟོས་པའི་ངན་སྐྱོན་རིག་ནས་དེ་ལ་ཞེ་ལོག་པ་ལྟར་དུ་ཡིད་སེམས་དེ་ཕྱོགས་སུ་མི་འཁོར་པ་སྐྱོ་ཆད་དེ་བ་དང་། གང་བསམ་གྱི་བློ་སྣ་རིང་པོ་ཟད་མེད་སྤོས་རྒྱའི་རི་མོ་ལྟ་བུ་འགྲུབ་དུས་ཤིག་ཚེ་འདིར་མ་དགོས་ཚེ་རབས་གཉིས་གསུམ་ཞིག་སྦྲེལ་མཐུད་ཆོག་ནས་བསྒྲུབས་ཀྱང་ལས་མཇུག་འགྲུབ་དུས་མི་འདུག་པའི་བློ་ཐག་རྦད་ཀྱིས་ཆོད་དང་། བྱས་ན་མི་ཟིན་བསྐྱུར་ན་ཟིན། །ཟེར་བ་བཞིན་འཇིག་རྟེན་གྱི་བྱ་བ་དེ། ནམ་བཞག་ཙ་ན་དེ་དུས་ཚར་གྱི། ཚར་སྒུག་བྱེད་ནས་ཚར་རྒྱུ་མེད་པས། ཞེན་ལོག་དང་གཅིག སྐྱོ་ཤས་དང་གཉིས། རེ་དོགས་ཆད་པའི་གྲོགས་འདི་གསུམ་དང་། དུས་གཏན་དུ་མི་འབྲལ་པར་འགྲོགས་ཤེས་པར་གྱིས་དང་། རང་ལ་ཕན་པར་མཆིས་པ་སྟེ་ཕན་ཐོགས་ཡོད་པའི་གྲོགས་ཡིན། ཞེས་གསུངས་པའོ།། གཉིས་པ་སླར་ཡང་རེ་དོགས་གཏིང་ནས་ཆོད་པར་ནན་གྱིས་གདམས་པ། གཉིས་པ་སླར་ཡང་རེ་དོགས་གཏིང་ནས་ཆོད་པར་ནན་གྱིས་གདམས་པ་ནི། སྐྱིད་དུས་མི་འདུག་སྐྱིད་པོ་ད་ནི་ཟད།། སྡུག་པོ་མི་འདོད་སྡུག་མཐའ་ཆོས་ཀྱིས་ཆོད།། སྐྱིད་སྡུག་ཅི་འོང་སྔོན་ལས་བཙན་པོས་ཤེས།། ད་ནི་སུ་ལའང་མི་རེ་མི་དོགས་སོ།། ཞེས་གསུངས་ཏེ། སྤྱིར་འཇིག་རྟེན་འཁོར་བའི་གནས་འདིར་སྐྱིད་དུས་མི་འདུག་སྟེ་སྡུག་བསྔལ་རགས་པའི་ཚོར་སྣང་ཅུང་ཟད་ཆུང་བའི་གནས་སྐབས་སུ་སྐྱིད་ཅེས་བློས་བཏགས་པ་དེ་ཡང་། དོན་གྱིས་བཤད་ན་ཁྱབ་པ་འདུ་བྱེད་ཀྱི་སྡུག་བསྔལ་ལས་མ་འདས་ཀྱང་། འཁོར་བའི་སེམས་ཅན་སྡུག་བསྔལ་མྱོང་ལོབས་མ་དག་གིས་སྤུ་འཇག་མ་གཅིག་ལག་མཐིལ་དུ་བཞག་པ་མི་ཚོར་བ་ལྟར་དུ་སྡུག་བསྔལ་རགས་པའི་ཚོར་སྣང་དང་བྲལ་དུས་སྡུག་བསྔལ་ཡིན་པར་མ་ཤེས་པ་ཡིན། འོན་ཀྱང་དེ་ཉིད་མིག་ཏུ་བཞག་ན་ཚོར་བ་ཡོད་པ་ལྟར་དུ་འཁོར་བའི་སེམས་ཅན་རྣམས་ཀྱིས་བདེ་བར་བསྒོམ་རྒྱུ་དེ་ཡང་འཕགས་པ་སྡུག་བསྔལ་དང་བྲལ་བ་དག་གིས་སྡུག་བསྔལ་ཆེན་པོ་ཡིན་པའི་གཟིགས་སྣང་ཡོད་ཅིང་། ཁྱད་པར་དུ་སྙིགས་མའི་སྐབས་སུ་སྐྱིད་པོ་ཡོད་པ་མིན་ཏེ་རྒྱུ་དགེ་བ་བསྒྲུབས་ནས་བསོད་ནམས་མ་བསགས་དུས། འབྲས་བུ་བདེ་སྐྱིད་གང་ནས་འབྱུང་ཏེ་རྒྱུ་མེད་ཀྱི་འབྲས་བུ་སྨིན་པ་མིན་པ་དེས་ན་སྐྱིད་པོ་ད་ནི་ཟད་ཚར་སོང་། འོན་ཀྱང་སྡུག་པོ་མི་འདོད་ན་སྡུག་མཐའ་ཆོས་ཀྱིས་ཆོད་དང་སྐྱིད་པའི་ཉི་མ་རྗེས་ནས་མེད་པ་མིན་པས་སྐྱིད་སྡུག་གང་ཡིན་རུང་སོ་སོའི་འདོད་པ་ཙམ་གྱིས་ཐོག་ཏུ་མི་འགྲོ་བ་སྐྱིད་སྡུག་ཅི་ཡོང་སྔོན་ལས་བཙན་པོས་ཤེས་པ་སྟེ་ལས་དགེ་བ་བསགས་ན་འབྲས་བུ་བདེ་བ་དང་། མི་དགེ་བ་བསགས་ན་འབྲས་བུ་སྡུག་བསྔལ་འབྱུང་བ་ལྡོག་མེད་ལས་ཀྱི་དབང་གིས་རང་གིས་བསགས་པ་རང་ལ་སྨིན་པས། སྐྱིད་སྡུག་ཅི་ཡོང་སྔོན་ལས་བཙན་པོ་བསྒུག་རྒྱུ་ཡིན་པས། ད་ནི་སྐྱབས་གནས་དཀོན་མཆོག་གསུམ་ལ་བློ་བཅོལ་ཏེ་དགྲ་གཉེན་བར་བའི་རེ་དོགས་བསྐྱུར་ནས། སུ་ལའང་སྐྱབས་ཨེ་ཡོང་། སྐྱོར་ཨེ་ཡོང་བསམས་ནས་མི་རེ། གནོད་སྐྱེལ་ཨེ་ཡོང་། འཁོན་བཟུང་ཨེ་ཡོང་བསམས་ནས་མི་དོགས་པར་བྱང་ཆུབ་སེམས་དཔའི་སྤྱོད་འཇུག་ལས། དེ་ཚེ་ཤིང་བཞིན་གནས་པར་བྱ། །ཞེས་གསུངས་པའི་གདམས་པ་དྲན་པ་བྱས་ཏེ། རེ་དོགས་གཉིས་ཀ་སྡུག་བསྔལ་གྱི་འབྱུང་གནས་ཡིན་པས་རེ་དོགས་གཏིང་ནས་ཆོད་དང་རེ་དོགས་གཏིང་ནས་ཆོད་པའི་རྣལ་འབྱོར་པ་སྐྱིད་པ་བརྒྱ་ཡི་ཡང་རྩེ་ཡིན། ཞེས་གསུངས་པའོ།། གསུམ་པ་རེ་དོགས་སྡུག་བསྔལ་གྱི་འབྱུང་རྩ་ཡིན་པ་བསྟན་པ། གསུམ་པ་རེ་དོགས་སྡུག་བསྔལ་གྱི་འབྱུང་རྩ་ཡིན་པ་བསྟན་པ་ནི། མི་ལ་རེ་ཆེ་རེ་ཁ་འཛུམ་མུལ་མུལ།། རང་ལ་དགོས་མང་དགོས་དགོས་སྒྲུབ་པའི་ཤོམས།། འདི་བྱ་འདི་བྱེད་ཕྱི་ཚེས་རེ་དོགས་བློ།། ད་ནི་ཅི་ལ་བབ་ཀྱང་མི་བྱེད་དོ།། ཞེས་གསུངས་ཏེ། རེ་དོགས་གཉིས་ཀའི་རྩ་བ་མ་ཆོད་ཚེ་མི་ལ་རེ་བ་བྱེད་ནས་ཕན་ཞིག་བཏགས་ཡོང་བའི་རེ་བ་ཆེན་པོ་བཅངས་ཏེ། རེ་ཆེན་པོ་ཞིག་མི་ལ་དགོས་དུས་འཛུམ་མུལ་མུལ་མི་བྱེད་ཀ་མེད་ཡིན་པས། དགོད་རྒྱུ་མེད་ཀྱང་དགོད་ཁ། འཛུམ་རྒྱུ་མེད་ཀྱང་འཛུམ་ཁ། ངོ་བསྟོད་གཡོ་སྒྱུའི་ཚིག་ཕ་རོལ་པོས་བདེན་དུ་བཟུང་རུང་མ་བཟུང་རུང་བཤད་དགོས་ཐུག་ཅིང་། ཆོག་ཤེས་དང་དགོས་མེད་ཀྱི་བསམ་བློ་ནང་དུ་མེད་དུས་རང་ལ་དགོས་རྒྱུ་མང་བས་དགོས་དགོས་མང་པོ་དེ་ཨེ་འགྲུབ་ཀྱི་རེ་བས་སྒྲུབ་པའི་ཤོམས་ར་དང་གྲ་སྒྲིག་ཁོ་ནས་མི་ཚེའི་ནམ་ཟླ་རྫོགས་འགྲོ་བ་དེས་ན། འདིའི་རྗེས་སུ་འདི་དང་དེའི་རྗེས་སུ་དེ་བྱེད་བསམ་པའི་འདི་བྱ་འདི་བྱེད་ཀྱིས་ཕྱི་ཚིས་སམ་ཕྱི་འདེང་ཡུན་རིང་གི་རེ་དོགས་བློ་རྒྱ་ད་ནི་ལས་ཅི་ལ་བབ་ཀྱང་མི་བྱེད་དོ་བསམ་པའི་བློ་ཐག་ནང་ནས་ཆོད་དགོས། ཞེས་གསུངས་པའོ།། བཞི་བ་བློ་སྣ་ནང་དུ་སྟུང་བའི་དོན་བསྡུ་བ། བཞི་བ་བློ་སྣ་ནང་དུ་སྟུང་བའི་དོན་བསྡུ་བ་ནི། དེ་རིང་ཤི་ཡང་མི་འགྱོད་འཁོར་བའི་ཆོས།། ལོ་བརྒྱར་བསྡད་ཀྱང་མི་དགའ་ལང་ཚོ་སོང་།། ད་ནི་ཤི་ཡང་གསོན་ཡང་ཚེ་འདིའི་ཅི།། ཕྱི་མའི་ཆོས་ཙམ་འགྲུབ་ན་དེ་ག་རང་།། ཞེས་གསུངས་ཏེ། དེ་རིང་མ་གཏོགས་ཚེ་མེད་ནས་ད་ཤི་ཡང་མི་འགྱོད་དེ། འཁོར་བའི་གནས་ན་བདེ་བ་མེད་པ་དང་། བྱ་བྱེད་ཐམས་ཅད་སྡུག་བསྔལ་གྱི་ཡོ་ལང་ཡིན་པར་ཤེས་པས་སོ། །གཞན་ད་རུང་ལོ་བརྒྱ་ཐམ་པར་མི་ཤི་ནས་བསྡད་ཀྱང་དགའ་རྒྱུ་ཅི་ཞིག་ཡོད་དེ་མི་དགའ། ལུས་ལང་ཚོ་དར་བའི་ན་ཚོད་སྔ་དྲོའི་ཉི་མ་ལྟ་བུ་དེ་སོང་ཚར་བས། འདུག་ཡུན་རིང་ནས་རྒས་པའི་སྡུག་བསྔལ་གྱིས་གཉའ་ནས་གནོན་དུས་མགྱོགས་པོར་ཤི་བར་ཤོག་ཅེས་སྨོན་ལམ་འདེབས་པའི་རྒས་པ་མང་བ་ཡིན་པ་དེས་ན། ད་ནི་ཤི་ཡང་གསོན་ཡང་ཚེ་འདིའི་ཅི་བྱ། དལ་འབྱོར་ཚང་བའི་ལུས་རྟེན་འདིའི་ཐོག་ནས་ཕྱི་མ་ཕན་པའི་ཆོས་ཙམ་འགྲུབ་ན། དེ་ག་རང་སྟེ་འདི་ཕྱི་གཉིས་ཀར་ཕན་པ་ཡོད་ཤག་ཤག་ཡིན་གྱི། ཟིན་མེད་ཚེ་འདིའི་བྱ་བ་དགོས་དོན་མི་འདུག་ཅེས་གསུངས་ཏེ་དོན་བསྡུས་པའོ། །དེ་རིང་འདིའི་མཚམས་ནས་བཞག་སྟེ། གསུམ་པ་ལྟ་སྒོམ་གྱི་གནད་བསྡུས་ཏེ་ཆོས་ཕུང་བརྒྱད་ཁྲི་བཞི་སྟོང་གི་འགག་གསུང་མཆོག་ཡི་གེ་དྲུག་མར་བསྡུས་ཏེ་བསྟན་པའི་སྐོར་ནས་སང་ཉིན་བཤད་རྒྱུ་བྱ། ༈ རྫོགས་པའི་སངས་རྒྱས་བཅོམ་ལྡན་འདས་སྣང་བ་མཐའ་ཡས་འོད་དཔག་ཏུ་མེད་པ་ཐུགས་རྗེ་ཆེ་ལ་ཐབས་མཁས་པ་དེས། སེམས་ཅན་གྱི་འགྲོ་བའི་དོན་དུ་ཐུགས་རྗེས་གཟིགས་ནས། ལྷ་ཕོ་རིགས་ཀྱིས་འདུལ་བ་ལ་ཐུགས་རྗེ་ཆེན་པོས་འདུལ་བར་དགོངས། ལྷ་མོའི་ཆ་བྱད་ཀྱིས་འདུལ་བ་ལ་ལྷ་མོ་སྒྲོལ་མས་འདུལ་བ་དགོངས་ནས། སངས་རྒྱས་སྣང་བ་མཐའ་ཡས་ཀྱིས་སྙིང་རྗེ་ཆེན་པོས་འགྲོ་དོན་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཕྱག་གཡས་པ་ནས་འོད་ཟེར་དཀར་པོ་ཞིག་སྤྲོས་ཏེ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སྤྲུལ་བ་དང་། ཕྱག་གཡོན་པ་ནས་འོད་ཟེར་སྔོན་པོ་ཞིག་སྤྲོས་ནས་ལྷ་མོ་སྒྲོལ་མ་སྤྲུལ་ཏོ། །དེ་ནས་བྱང་ཆུབ་སེམས་དཔའ་རྣམས་ཀྱི་མཆོག་འཕགས་པ་སྤྱན་རས་གཟིགས་དབང་ཕྱུག་གིས་སངས་རྒྱས་འོད་དཔག་མེད་ལ་སོགས་པ་སངས་རྒྱས་བྱེ་བ་ཕྲག་བཅུ་གཅིག་གི་དྲུང་དུ་འགྲོ་བའི་དོན་བྱེད་པར་སེམས་བསྐྱེད་དེ། བདག་གི་བ་སྤུའི་ཁུང་བུ་རེ་ནས། དུས་གསུམ་གྱི་སངས་རྒྱས་ཐམས་ཅད་ཀྱི་མཛད་པ་དང་རྣམ་པར་འཕྲུལ་བ་བསམ་གྱིས་མི་ཁྱབ་པ་གང་ལ་གང་འདུལ་དུ་སྤྲུལ་ནས། སེམས་ཅན་གཅིག་ཀྱང་མ་ལུས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགོད་པར་བྱའོ། །དེ་ལ་མ་བཀོད་པར་རང་ཞི་བདེ་འདོད་པའི་བློ་བྱུང་ན། ངའི་མགོ་བོ་ཨ་རྫ་ཀའི་དོག་པ་བཞིན་དུ་ཚལ་བ་བཅུར་གས་པར་གྱུར་ཅིག་ཅེས་སྨོན་ལམ་བཏབ་བོ། །འཕགས་པ་སྤྱན་རས་གཟིགས་དབང་ཕྱུག་གིས་ཐུགས་བསྐྱེད་ཀྱི་དམ་བཅའ་དེ་མཛད་ཚེ། དེ་ལ་སངས་རྒྱས་སྣང་བ་མཐའ་ཡས་ཀྱིས་བཀའ་སྩལ་བ། ལེགས་སོ། །ལེགས་སོ། །རིགས་ཀྱི་བུ། བདག་ལ་སོགས་པ་ཕྱོགས་བཅུ་དུས་གསུམ་ན་བཞུགས་པའི་སངས་རྒྱས་ཐམས་ཅད་ཀྱིས་ཀྱང་ཚུལ་དེ་ལྟ་བུ་དང་། སྨོན་ལམ་དེ་ལྟ་བུ་ལ་བརྟེན་ནས་སངས་རྒྱས་པ་ཡིན་པས། ཁྱོད་ཀྱིས་སེམས་ཅན་གྱི་དོན་བྱེད་པའི་གྲོགས་ངས་ཀྱང་བྱའོ་ཞེས་བཀའ་བསྩལ་ཏོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གིས་སྐུ་ལས་འོད་ཟེར་དྲུག་སྤྲོས་ཏེ། འགྲོ་བ་རིགས་དྲུག་གི་གནས་སུ་འོད་ཟེར་གྱིས་ཁྱབ་པར་བྱས་སོ། །འོད་ཟེར་ལ་ལ་ལྷའི་གནས་སུ་ཁྱབ་པར་བྱས་ནས། ལྷ་འདུལ་བའི་དོན་དུ་ལྷའི་ཐུབ་པ་བརྒྱ་བྱིན་དུ་སྤྲུལ་ནས་ལྷ་འཆི་འཕོ་ལྟུང་པའི་སྡུག་བསྔལ་ཞི་བར་མཛད་དོ། །འོད་ཟེར་ལ་ལ་ལྷ་མིན་གྱི་གནས་སུ་འཕྲོས་ནས། ལྷ་མིན་གྱི་ཐུབ་པ་ཐག་བཟང་རིས་སུ་སྤྲུལ་ཏེ་ལྷ་མ་ཡིན་གྱི་འཐབ་རྩོད་ཀྱི་སྡུག་བསྔལ་ཐམས་ཅད་ཞི་བར་མཛད་དོ། །འོད་ཟེར་ལ་ལ་མིའི་གནས་སུ་ཁྱབ་པར་སྤྲོས་ནས་མིའི་ཐུབ་པ་ཤཱཀྱ་ཐུབ་པར་སྤྲུལ་ཏེ་མིའི་སྐྱེ་རྒ་ན་འཆིའི་སྡུག་བསྔལ་ཞི་བར་མཛད་དོ། །འོད་ཟེར་ལ་ལ་བྱོལ་སོང་དུད་འགྲོའི་གནས་སུ་སྤྲོས་ནས་བྱོལ་སོང་གི་ཐུབ་པ་སེངྒེ་རབ་བརྟན་སྤྲུལ་ཏེ་བྱོལ་སོང་གཏི་མུག་གི་སྡུག་བསྔལ་ཐམས་ཅད་ཞི་བར་མཛད་དོ། །འོད་ཟེར་ལ་ལ་ཡི་དྭགས་ཀྱི་གནས་སུ་སྤྲོས་ཏེ་ཡི་དྭགས་ཀྱི་ཐུབ་པ་ནམ་མཁའ་མཛོད་ཅེས་པ་གང་འདོད་ཀྱི་ལོངས་སྤྱོད་འབྱུང་བ་ཞིག་ཏུ་སྤྲུལ་ནས་ཡི་དྭགས་བཀྲེས་སྐོམ་གྱི་སྡུག་བསྔལ་ཞི་བར་མཛད་དོ། །འོད་ཟེར་ལ་ལ་དམྱལ་བའི་གནས་སུ་སྤྲོས་ཏེ་དམྱལ་བའི་ཐུབ་པ་ཆོས་ཀྱི་རྒྱལ་པོར་སྤྲུལ་ནས་དམྱལ་བ་ཚ་གྲང་གི་སྡུག་བསྔལ་ཞི་བར་མཛད་དོ། །དེ་ལྟར་འགྲོ་བ་རིགས་དྲུག་གི་གནས་ཀྱི་སེམས་ཅན་གཅིག་ཀྱང་མ་ལུས་པ་བདེ་བར་བཀོད་དེ་སྟོང་བར་བྱས་སོ། །དེ་ནས་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་རི་རབ་ཀྱི་རྩེ་མོར་ཕེབས་ཏེ་ཡེ་ཤེས་ཀྱི་སྤྱན་གྱིས་གཟིགས་པས་འཁོར་བའི་སེམས་ཅན་སྔར་བཞིན་ཁ་མ་དམའ། གྲངས་མ་ཉུང་བར་སྔོན་ལས་མང་བ་ལྟར་གནས་སོ། །ཡང་སྔར་བཞིན་དུ་འགྲོ་བ་རིགས་དྲུག་གི་གནས་སུ་སེམས་ཅན་གཅིག་ཀྱང་ལྷག་ཏུ་མེད་པར་བདེ་བ་ཅན་གྱི་ཞིང་དུ་དྲངས་ནས་དེ་ལྟར་འཁོར་བ་ལན་གསུམ་དོང་ནས་སྤྲུགས་པར་མཛད་ནས་རི་རབ་ཀྱི་རྩེ་ནས་གཟིགས་དུས་སྔར་བཞིན་སེམས་ཅན་གྱི་ཁམས་ལ་སྐྱེ་བྲི་ཅི་ཡང་མེད་པར་གང་འདུག་པས་ཐུགས་མུག ཡིད་ཆད་ནས། ཀྱེ་མ་བདེ་བར་བཤེགས་པའི་དགོངས་པས་འདུལ་བའི་ཞིང་ཁམས་བསམ་གྱིས་མི་ཁྱབ། ནམ་མཁའི་ཁམས་བསམ་གྱིས་མི་ཁྱབ། སེམས་ཅན་གྱི་ཁམས་ཀྱང་བསམ་གྱིས་མི་ཁྱབ་བྱ་བ་བདེན་པར་འདུག ངས་སེམས་ཅན་གྲངས་མང་བ་འདི་ཙམ་འཁོར་བའི་གནས་ནས་དྲངས་ཀྱང་། འཁོར་བ་སྟོང་མ་དགོས་ཇེ་ཉུང་ཙམ་ཡང་མ་སོང་བས་སེམས་ཅན་གྱི་དོན་མི་འགྲུབ་པར་འདུག་པས། རང་ཞི་བདེ་ཐོབ་པར་བྱས་ནས་མྱ་ངན་ལས་འདས་པ་སངས་རྒྱས་ཀྱི་ས་ལ་གནས་པར་བྱའོ་སྙམ་པ་དང་། སྔར་གྱི་སེམས་བསྐྱེད་དམ་བཅའ་ཉམས་ནས། དེ་མ་ཐག་ཏུ་དབུ་དང་སྐུ་ལུས་ཚལ་བ་བརྒྱ་ཕྲག་སྟོང་ཕྲག་ཏུ་གས་སོ། །དེའི་སྐབས་སུ་སངས་རྒྱས་འོད་དཔག་མེད་ཀྱིས་དབུ་ཚལ་བར་གས་པ་བཅུ་གཅིག་ཞལ་དུ་བྱིན་གྱིས་བརླབས་ནས། འཁོར་བ་ལ་ཐོག་མ་དང་ཐ་མ་མེད་པས་སེམས་ཅན་གྱི་དོན་འཁོར་བ་མ་སྟོངས་ཀྱི་བར་དུ་གྱིས་ཤིག་ཅེས་གསུངས་པ་དང་། འཕགས་པ་སྤྱན་རས་གཟིགས་ཀྱིས་ཀྱང་བདག་ཕྱག་སྟོང་དང་སྤྱན་སྟོང་དང་ལྡན་པར་གྱུར་ནས། ཕྱག་སྟོང་འཁོར་ལོས་སྒྱུར་བའི་རྒྱལ་པོ་སྟོང་དང་། སྤྱན་སྟོང་བསྐལ་པ་བཟང་པོའི་སངས་རྒྱས་སྟོང་དུ་གྱུར་ཏེ་གང་ལ་གང་འདུལ་གྱིས་འགྲོ་བའི་དོན་བྱེད་པར་གྱུར་ཅིག་ཅེས་སྨོན་ལམ་ཡང་འདེབས་དང་། དམ་བཅའ་ཡང་བཞེས་མཛད་པའི་སྐད་ཅིག་དེ་ཉིད་ལ་ཕྱག་སྟོང་གི་མཐིལ་དུ་སྤྱན་སྟོང་དང་། དབུ་ཚལ་བ་བཅུ་གཅིག་ཏུ་གས་པ་བཅུ་གཅིག་ཞལ་དུ་གྱུར་ཏོ། །དེ་ནས་སངས་རྒྱས་སྣང་བ་མཐའ་ཡས་ཀྱིས་བཀའ་སྩལ་བ། ཐུགས་རྗེ་ཆེན་པོ་དང་ལྡན་པའི་འཕགས་པ་སྤྱན་རས་གཟིགས་ཀྱི་སྙིང་པོ་འགྲོ་བ་རིགས་དྲུག་ཏུ་སྐྱེས་པའི་སེམས་ཅན་གྱི་སྐྱེ་སྒོ་གཅོད་པའི་གསུང་མཆོག་གཟུངས་སྔགས་ཡི་གེ་དྲུག་མ་འདི་ཡིན་ནོ། །ཨཱོྃ་མ་ཎི་པདྨེ་ཧཱུྃ་ཞེས་པ་འདིས་ཨཱོྃ་གྱིས་ལྷའི་སྐྱེ་སྒོ་གཅོད། མས་ལྷ་མ་ཡིན་གྱི་སྐྱེ་སྒོ་གཅོད། ཎི་ཡིས་མིའི་སྐྱེ་སྒོ་གཅོད། པད་ཀྱིས་བྱོལ་སོང་གི་སྐྱེ་སྒོ་གཅོད། མེ་ཡིས་ཡི་དྭགས་ཀྱི་སྐྱེ་སྒོ་གཅོད། ཧཱུྃ་གིས་དམྱལ་བའི་སྐྱེ་སྒོ་གཅོད་ནས། ཡི་གེ་དྲུག་མ་འདིས་འགྲོ་བ་རིགས་དྲུག་གི་གནས་སྟོང་པར་བྱེད་པས་འདི་ཟུངས་ཤིག ཆོངས་ཤིག ཀློགས་ཤིག ཀུན་ཆུབ་པར་གྱིས་ཤིག་ཅེས་བཀའ་བསྩལ་ཏོ། །དེ་ནས་བྱང་ཆུབ་སེམས་དཔའ་རྣམས་ཀྱི་མཆོག་འཕགས་པ་སྤྱན་རས་གཟིགས་དབང་ཕྱུག་གིས། གང་ལ་ཅི་འདོད་དེ་ལ་དེར་སྟོན་གྱི་ཕྲིན་ལས་ཀྱིས་སེམས་ཅན་གྱི་དོན་བསམ་གྱིས་མི་ཁྱབ་པར་མཛད་དེ། སྐུ་ལས་འོད་ཟེར་བསམ་གྱིས་མི་ཁྱབ་དཔག་གིས་མི་ལང་བ་ཞིག་སྤྲོས་ནས། ལོངས་སྐུའི་ཞིང་ཁམས་མང་པོར་སྤྲུལ་ཏེ། གཞི་སྙིང་མེ་ཏོག་གིས་བརྒྱན་པའི་ཞིང་ཁམས་རྣམ་པར་བཀོད་པ་མཛད་དོ། །དེ་བཞིན་དུ་སྤྲུལ་སྐུའི་ཞིང་ཁམས་མང་པོ་བཀོད་ནས། ཕྱག་སྟོང་ལས་འཁོར་ལོས་བསྒྱུར་པའི་རྒྱལ་པོ་སྟོང་དང་། སྤྱན་སྟོང་ལས་བསྐལ་པ་བཟང་པོའི་སངས་རྒྱས་སྟོང་སྤྲུལ་ཏེ་འགྲོ་བའི་དོན་མཛད་དང་མཛད་བཞིན་པ་དང་ཇི་སྲིད་འཁོར་བ་མ་སྟོང་གི་བར་དུ་མཛད་པའི་ལོ་རྒྱུས་དེ་ལྟར་ཡོད་དོ། །དེ་ནས་དུས་ནམ་ཞིག་གི་ཚེ་རིགས་ཀྱི་བདག་པོ་སངས་རྒྱས་སྣང་བ་མཐའ་ཡས་ཀྱི་ཞལ་ནས། འཕགས་པ་སྤྱན་རས་གཟིགས་ལ། རིགས་ཀྱི་བུ། འདི་ནས་ཤར་ཕྱོགས་ན་མི་མཇེད་འཇིག་རྟེན་གྱི་ཁམས་བྱ་བ་ཡོད། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཞིང་ཁམས་དེ་ན། དུས་གསུམ་གྱི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པའི་གནས། ཕོ་བྲང་རི་བོ་ཏ་ལའི་རྩེ་མོ། ས་ཕྱོགས་ཐམས་ཅད་རིན་པོ་ཆེ་སྣ་ཚོགས་ལས་གྲུབ་པ། མེ་ཏོག་སྣ་ཚོགས་ཀྱིས་བརྒྱན་པ། དཔག་བསམ་ཤིང་དང་། ཤིང་སྣ་འབྲས་བུ་ཅན་དུ་མས་གང་བ། བྱའི་ཚོགས་མང་པོས་སྐད་སྙན་པ་སྒྲོག་པ། རི་དྭགས་དང་སེམས་ཅན་གྱི་ཚོགས་མང་པོ་ཡོད་པ། རི་བོ་དེ་ལྟ་བུ་བཀྲ་ཤིས་པ། བྱིན་ཆེ་བ། ཉམས་དགའ་བ་ཞིག་ཡོད་དེ། རི་དེའི་རྩེ་མོ་ན་འཕགས་པ་སྤྱན་རས་གཟིགས་དབང་ཕྱུག་གི་ཕོ་བྲང་། རིན་པོ་ཆེ་སྣ་ཚོགས་ལས་གྲུབ་པ། ལྟ་ན་སྡུག་པ། མཛེས་ཤིང་ཡིད་དུ་འོང་བ། རྒྱ་ཆེ་བ། དཔངས་མཐོ་བ། དབུས་སུ་སེངྒེའི་ཁྲི་ཉི་མ་ཟླ་བའི་གདན་བཤམ་པ། ལྷ་ཀླུ་མི་མ་ཡིན་ལ་སོགས་པའི་འཁོར་མང་འདུས་པ་མང་པོ་ཡང་རིགས་ཀྱི་བུ་སྤྱན་རས་གཟིགས་ཁྱོད་ལ་དགའ་བ་དང་། གུས་པས་གནས་སོ། །ཁང་བ་བརྩེགས་པ་དེ་ནི་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱིས། རིགས་ཀྱི་བུ་སྤྱན་རས་གཟིགས་ཁྱོད་བཞུགས་པའི་གནས་སུ་བསྒྲུབས་པ་ཡིན་གྱིས། དེར་སོང་ལ་སངས་རྒྱས་ཀྱི་ཕྲིན་ལས་སྒྲུབས་ཤིག འགྲོ་བའི་དོན་འགྲུབ་པར་འགྱུར་རོ་ཞེས་བཀའ་བསྩལ་ཏོ། །དེ་ནས་འཕགས་པ་སྤྱན་རས་གཟིགས་མི་མཇེད་འཇིག་རྟེན་གྱི་ཁམས་འདིར་ཕོ་བྲང་རི་བོ་ཏ་ལའི་ཁང་པར་བྱོན་པའི་སྔ་ལྟས་སུ། སྐུ་ལས་འོད་ཟེར་མང་པོ་བཀྱེ་སྟེ། འོད་དེས་མི་མཇེད་འཇིག་རྟེན་གྱི་ཁམས་ཐམས་ཅད་རབ་ཏུ་ཁྱབ་པར་མཛད་དེ། ཉི་མ་དང་ཟླ་བའི་འོད་ཐམས་ཅད་ཀྱང་ཟིལ་གྱིས་མནན་ཏེ་མོག་མོག་པོར་མཛད་དོ། །དེ་ནས་བཅོམ་ལྡན་འདས་ཀྱི་འཁོར་འདུས་པའི་ནང་ནས། བྱང་ཆུབ་སེམས་པ་སྒྲིབ་པ་རྣམ་སེལ་སྟན་ལས་ལངས་ཏེ། བཅོམ་ལྡན་འདས། འོད་ཟེར་ཆེན་པོ་འདི་ལྟ་བུ་གདའ་བ་ཅིའི་རྒྱུ་ལགས། ཅིའི་རྐྱེན་ལགས་ཞེས་གསོལ་བ་དང་། བཅོམ་ལྡན་འདས་ཀྱིས་བཀའ་བསྩལ་བ། འདི་ནས་ནུབ་ཕྱོགས་སུ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་འདས་པའི་ཕ་རོལ་ན། འཇིག་རྟེན་གྱི་ཁམས་པདྨོ་ཅན་ཞེས་བྱ་བ་ཡོད། དེ་ན་སངས་རྒྱས་སྣང་བ་མཐའ་ཡས་བྱ་བ་བཞུགས། དེའི་དྲུང་ན་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་བྱ་བ་ཡོད། དེ་འཇིག་རྟེན་གྱི་ཁམས་འདིར་འོངས་ནས། ཕོ་བྲང་རི་བོ་ཏ་ལའི་རྩེ་མོར་བཞུགས་ནས། སེམས་ཅན་གྲངས་མེད་དཔག་ཏུ་མེད་པའི་དོན་མཛད་པར་འགྱུར་ཏེ། འོད་ཟེར་འདི་བྱང་ཆུབ་སེམས་པ་དེའི་མཐུ་ཡིན་ཏེ་དེ་འདྲའོ། །འོད་ཟེར་དཔག་ཏུ་མེད་ལས་ཀྱང་དཔག་ཏུ་མེད་པ། འོད་ཟེར་རེ་རེ་ལས་ཀྱང་དེ་བཞིན་གཤེགས་པའི་སྐུ་མང་པོར་སྤྲུལ་ནས། ཕ་རོལ་ཏུ་ཕྱིན་པ་དྲུག་གི་ཆོས་སྟོན་ཏེ་སེམས་ཅན་དཔག་མེད་གྲངས་མེད་བསམ་གྱིས་མི་ཁྱབ་པའི་དོན་མཛད་པར་འགྱུར་རོ་ཞེས་བཀའ་སྩལ་བ་དང་། གཞན་ཡང་འཕགས་པ་སྤྱན་རས་གཟིགས་ཀྱི་ཆེ་བའི་ཡོན་ཏན་གྱི་རྣམ་པ་ཇི་ལྟར་ཡོད་པ་བཅོམ་ལྡན་འདས་ཀྱིས་མདོ་དུ་མ་ལས་གསུངས་ཏེ། ཆུ་ཀླུང་སྣ་ཚོགས་པའི་མདོ་ལས། འཕགས་པ་སྤྱན་རས་གཟིགས་དབང་ཕྱུག་ཅེས་བྱ་བ། བྱང་ཆུབ་སེམས་དཔའ་རྣམས་ཀྱི་ནང་ནས་མཆོག་ཏུ་གྱུར་པ་ཞིག་ཡོད་དེ། དེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མའི་སྙེད་དང་མཉམ་པའི་འཇིག་རྟེན་གྱི་ཁམས་རྣམས་སུ། སངས་རྒྱས་སྟོང་རྩ་གཉིས་སུ་སྤྲུལ་ནས་སེམས་ཅན་གྱི་དོན་བྱེད་པར་གསུངས་པ་དང་། པུ་ཌ་རི་ཀའི་མདོ་ལ་སོགས་པ་ལས་འཕགས་པ་སྤྱན་རས་གཟིགས་ཀྱི་ཡོན་ཏན་བརྗོད་པ་མང་ཞིང་། སངས་རྒྱས་བཅོམ་ལྡན་འདས་མཉན་ཡོད་ན་འཁོར་མང་པོ་དང་ཐབས་ཅིག་ཏུ་བཞུགས་པའི་ཚེ་བཀའ་སྩལ་བ། སྔོན་འདས་པའི་དུས་སུ། སངས་རྒྱས་ཐམས་ཅད་སྐྱོབ་ཅེས་བྱ་བ་འཇིག་རྟེན་དུ་བྱུང་ཞིང་། དེའི་ཚེ་དེའི་དུས་ན་ང་བྲམ་ཟེའི་ཁྱེའུར་གྱུར་ཏོ། །སངས་རྒྱས་དེ་ལས་འཕགས་པ་སྤྱན་རས་གཟིགས་ཀྱི་ཡོན་ཏན་བརྗོད་པ་ཐོས་སོ། །འཕགས་པ་སྤྱན་རས་གཟིགས་དབང་ཕྱུག་དེ་གསེར་གྱི་ས་གཞི་ལ་སོང་ནས། སྤྱི་ཚུགས་སུ་སོང་བའི་སེམས་ཅན་དམྱལ་བ་པ་རྣམས་ལ་རིག་སྔགས་ཀྱི་རྒྱལ་མོ། ཨཱོྃ་མ་ཎི་པདྨེ་ཧཱུྃ་བྱ་བའི་ཡི་གེ་དྲུག་མ་བརྗོད་ནས་ཡོངས་སུ་སྨིན་པ་བྱས་སོ། །དེ་ནས་དངུལ་གྱི་ས་གཞི་ལ་སོང་ནས་རྐང་བ་བཞི་པ་དུད་འགྲོའི་སེམས་ཅན་གྱི་རྣ་བའི་བུ་གར། ཡི་གེ་དྲུག་མའི་སྒྲ་ཕྱུང་ནས་དེ་དག་གིས་ཕྱིར་མི་ལྡོག་པའི་ས་ཐོབ་པ་དང་བདེ་བ་ཅན་གྱི་ཞིང་དུ་སྐྱེས་ནས་སེམས་ཅན་གྱི་གཞན་དོན་མཛད་ཚུལ་ལ་སོགས་པ་གསུངས་སོ། །དེ་ནས་འཁོར་གྱི་ནང་ནས་བྱང་ཆུབ་སེམས་དཔའ་ལག་ན་རིན་པོ་ཆེས་གསོལ་བ། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་དེ་ད་ལྟ་གང་ན་མཆིས། བཅོམ་ལྡན་འདས་ཀྱིས་བཀའ་སྩལ་བ། དེ་ནི་ད་ལྟར་ནུབ་ཕྱོགས་བདེ་བ་ཅན། སངས་རྒྱས་སྣང་བ་མཐའ་ཡས་ཀྱི་ཞིང་ཁམས་ན་བཞུགས་ཏེ། གང་ཟག་སུ་ཞིག་གིས་འཕགས་པ་སྤྱན་རས་གཟིགས་ཀྱི་མིང་དྲན་པ་ཙམ་གྱིས་ཀྱང་བདེ་བ་དང་ལྡན་པ་ལགས་སོ། །སྐྱེ་བ་དང་། རྒ་བ་དང་། ན་བ་དང་། འཆི་བའི་སྡུག་བསྔལ་ལས་ཡོངས་སུ་ཐར་བར་འགྱུར་རོ། །བདེ་བ་ཅན་གྱི་ཞིང་ཁམས་སུ་སྐྱེས་ནས་སངས་རྒྱས་སྣང་བ་མཐའ་ཡས་ཀྱི་མདུན་ནས་ཆོས་ཉན་པར་འགྱུར་རོ། །ཞེས་དང་། འཕགས་པ་སྤྱན་རས་གཟིགས་དབང་ཕྱུག་ལ་ཡི་དམ་བརྟན་པོར་འཛད་པའི་གང་ཟག་དེ། སངས་རྒྱས་ཀྱི་ཞིང་ཁམས་རྟག་ཏུ་འཛིན་ཅིང་གནས་སོ། །ཞེས་སངས་རྒྱས་ཀྱིས་སངས་རྒྱས་གཞན་གྱིས་གསུངས་པའི་རྣམ་པར་ཐར་བ་ཡང་དེ་ལྟར་བཀའ་སྩལ་ཏོ། །དེ་ལྟ་བུའི་འཕགས་པ་སྤྱན་རས་གཟིགས་ཀྱི་སྙིང་པོ་ཇི་ལྟར་བགྲང་བའི་སྐོར་གདམས་པའི་སྙིང་དོན་དུ་བསྟན་པའི་ཐོག་མཐའ་བར་དགེའི་གཏམ་འདི་ཐོབ་པའི་རྗེས་སུ་ཚང་མས་འཕགས་པ་སྤྱན་རས་གཟིགས་ཀྱི་སྙིང་པོ་ཡི་གེ་དྲུག་མ་བཟླ་བར་བརྩོན་དགོས། ཁྱད་པར་དུ་གངས་ཅན་བོད་ཀྱི་ཡུལ་འདི་འཕགས་པ་ཐུགས་རྗེ་ཆེན་པོའི་གདུལ་ཞིང་ཡིན་ཞིང་། འཕགས་པ་སྤྱན་རས་གཟིགས་ཀྱིས་འཛམ་གླིང་བྱེ་བ་ཕྲག་བརྒྱ་ན་རྡོ་རྗེའི་གདན་བྱེ་བ་ཕྲག་བརྒྱ། དེའི་བྱང་ཕྱོགས་ན་བོད་ཁ་བ་ཅན་གྱི་རྒྱལ་ཁམས་བྱེ་བ་ཕྲག་བརྒྱ། རྒྱལ་པོ་སྲོང་བཙན་སྒམ་པོ་དང་། ལྷ་གཅིག་ཀོང་ཇོ། ཁྲི་བཙུན་བྱེ་བ་ཕྲག་བརྒྱ་རྣམས་སུ་སྤྲུལ་ནས་འགྲོ་བའི་དོན་མཛད་པར་སྙིང་རྗེ་རྣམ་པར་རོལ་པའི་མདོ་ལས་བཀའ་སྩལ་ཅིང་། དེ་བཞིན་དུ་བོད་ཀྱི་བླ་མ་མཁས་བཙུན་གྲུབ་པའི་དབང་ཕྱུག་མང་དག་ཅིག་སྤྱན་རས་གཟིགས་ཀྱི་རྣམ་སྤྲུལ་ཡིན་ཞིང་། སྤྱན་རས་གཟིགས་ནི་སྔར་བྱོན། ཕྱིས་མི་འབྱོན་པ་མིན་པར་གང་ལ་གང་འདུལ་དེ་ལ་དེ་སྟོན་གྱིས་སྤྲུལ་བ་མང་པོས་བྱོན་པ་བགྲངས་ཀྱིས་ལང་བ་མིན་ནོ། །འུ་ཅག་ད་ལྟའི་སྐབས་སུ་མི་ལུས་ཐོབ། ཆོས་ལྡན་གྱི་ཡུལ་དུ་སྐྱེས། འཕགས་པ་ཐུགས་རྗེ་ཆེན་པོ་ཡི་དམ་གྱི་ལྷར་བསྟེན། ཡི་གེ་དྲུག་མ་ངག་འདོན་བཟླ་ཆོག་པའི་སྐལ་བ་བཟང་པོ་འདི་ལྟར་ཡོད་པ་ནི། སྔོན་བསགས་བསོད་ནམས་ཀྱི་སྟོབས་དང་། འཕགས་པ་ཐུགས་རྗེ་ཆེན་པོར་ལས་འབྲེལ་ཡོད་པའི་རྟགས་ཡིན་པ་སྟེ། སྔ་མ་གང་བྱས་ད་ལྟའི་ལུས་ལ་ལྟོས། །ཞེས་པ་ལྟར་ཡིན་པས་ལས་འབྲེལ་བཟང་པོ་དེའི་འཕྲོ་མཐུད་ནས་ལས་རྒྱུ་འབྲས་ཚུལ་བཞིན་དུ་སྲུང་། སྡིག་པ་བཤགས། བསོད་ནམས་བསགས་ན། ཚོགས་གཉིས་མཉམ་དུ་རྫོགས་ཏེ། ཕྱི་མ་གར་སྐྱེ་ད་ལྟའི་ལས་ལ་ལྟོས། །གསུངས་པ་ཡིན་པས་ཕྱི་མ་བདེ་བ་ཅན་གྱི་ཞིང་དུ་སྐྱེས་ནས་འཕགས་པ་སྤྱན་རས་གཟིགས་དང་། སངས་རྒྱས་འོད་དཔག་མེད་ཀྱི་ཞལ་མཇལ། འབྲེལ་ཚད་འགྲོ་བའི་ལམ་སྣ་འདྲེན་ནུས་པར་འོང་ཞིང་། ཚེ་འདིར་ཡང་དཀོན་མཆོག་ཀུན་འདུས་ཀྱི་ངོ་བོ་རྩ་བའི་བླ་མ་དང་མགོན་པོ་སྤྱན་རས་གཟིགས་དབྱེར་མེད་པ་ལ་གསོལ་འདེབས་དང་ཚོགས་བསགས་སྔོན་དུ་འགྲོ་བའི་སྨོན་ལམ་བཏབ་ན། ཚེ་འདིར་ནད་གདོན་བར་ཆད་ཐམས་ཅད་ཞི་བ་དང་། བསམ་དོན་ཐམས་ཅད་ངང་གིས་འགྲུབ་ནས་སྐྱིད་ཅིང་། ཕྱི་མར་བདེ་ནས་བདེ་བར་བགྲོད་ཐུབ་པའོ། །དེ་ལས་ལྡོག་སྟེ་ཚེ་འདིར་སྡིག་པ་ཁོ་ན་བསགས་ན་སྡིག་པའི་འབྲས་བུས་ཕྱི་མ་ངན་སོང་གསུམ་དུ་སྐྱེའོ། །འོན་ཀྱང་བཤད་པ་ཙམ་ཡིན་གྱི་སྐྱེ་སའི་དམྱལ་བ་ཞེས་པ་ཨེ་ཡོད་ཅི་ཤེས། མིག་གིས་ནི་མི་རིག་གོ་བསམ་མཁན་ལ་ནི་རྒྱུ་འབྲས་བསླུ་མེད་ལ་མི་བརྩི་པའི་ལོག་ལྟ་ཅན་ཟེར་ཞིང་། ལོག་ལྟའང་དེའི་རྒྱུ་མི་ཤེས་པ་མ་རིག་པའི་དབང་གིས་བྱུང་བས་མ་རིག་ཙ་ན་མེད་པ་མིན་ཏེ། ལ་ཕར་རྒྱབ་ཀྱི་མེ་ཨེ་ཡོད་མི་རིག་ཀྱང་མེད་ཐག་ཆོད་པ་མིན་པར་ཡོད་ཅིང་། སང་ཉིན་མི་རིག་ཀྱང་སང་ཉིན་ཤར་རྒྱུ་ཡོད་ངེས་ཤིང་། ཁོ་རང་ཤིའང་གཞན་གྱི་སང་ཉིན་ཡོད་པ་གཏན་ཁེལ་ཞིང་། ཁར་རྩང་གི་རྣམ་རྟོག་འདས་པའི་ཕྱོགས་སུ་སོང་བས་མ་ཚད། ད་ཆ་ཡར་ཡོང་དུས་ཀྱི་རྣམ་རྟོག་འགགས་ནས་རྗེས་མི་འདུག་ཀྱང་སྐད་ཅིག་སྐད་ཅིག་གིས་རྣམ་རྟོག་གསར་བ་སྐྱེ་བ་དེ་བཞིན་དུ་ཚེ་འདིའི་རྣམ་ཤེས་ཀྱིས་ཕྱི་མའི་རྣམ་ཤེས་ཀྱི་རྒྱུན་འདྲེན་ནས། ལས་དགེ་སྡིག་གང་བྱས་ཆུད་མི་ཟ་བར་འབྲས་བུ་བདེ་སྡུག་གི་རྣམ་སྨིན་མྱོང་བ་སྟེ། ཚེ་འདིར་སྡིག་པ་ཆེན་པོ་བསགས་ནས་བཤགས་སྦྱོང་མ་བྱས་ན་ཤི་མ་ཐག་ཏུ་དམྱལ་བར་སྐྱེ་ཞིང་། ལས་ཀྱི་དབང་གིས་སྣང་བའི་དམྱལ་བའི་གནས་སུ་ལྕགས་ཀྱི་ཁང་པ་གྲུ་བཞི་པ་ངོས་རེ་རེར་དཔག་ཚད་བཅུ་གཉིས་ལངས་པ་ཡོད་ཅིང་། དེའི་དབུས་སུ་སེང་གེའི་ཁྲི་ཆེན་པོ་ཞིག་གི་ཐོག་ཏུ་གཤིན་རྗེ་ཆོས་ཀྱི་རྒྱལ་པོ་ཞེས་པ་དམྱལ་བའི་གཤེད་མ། གཤིན་རྗེའི་ལས་མཁན་ཐམས་ཅད་ཀྱི་དཔོན་པོ། ལག་ཏུ་སྲིད་པ་ལས་ཀྱི་མེ་ལོང་དང་། ཁྲམ་ཤིང་དཀར་ནག རྩིས་ཀྱི་རྡེའུ་དཀར་ནག་སོགས་བསྣམས་པ་བཞུགས་སོ། །དམྱལ་བའི་གནས་སུ་ཐོག་མར་ཐོན་པའི་ཉམ་ཐག་པའི་སེམས་ཅན་རྣམས་ཀྱི་ལེགས་ཉེས་ཀྱི་སྟངས་འབྱེད་པ་དང་། དཀར་ནག་གི་ཁྲིམས་ཀྱི་དྲང་ཐིག་རྒྱག་པ་བྱེད་དོ། །དེའང་འཇིག་རྟེན་མི་ཡུལ་ནས་ཤི་བའི་མི་ཕལ་ཆེར་དམྱལ་བའི་གཤེད་མས་ཁྲིད་ནས་ལྷན་གཅིག་སྐྱེས་པའི་ལྷ་ལས་ཀྱི་བུ་ཆུང་དཀར་པོས་མདུན་ནས་འཐེན། ལྷན་གཅིག་སྐྱེས་པའི་འདྲེ་ལས་ཀྱི་བུ་ནག་པོས་རྒྱབ་ནས་ཕུལ། གཤིན་རྗེ་ཆོས་ཀྱི་རྒྱལ་པོའི་མདུན་དུ་དགེ་སྡིག་རྩིས་བཤེར་བྱ་རུ་འཁྲིད་དོ། །གཤིན་རྗེ་ཆོས་ཀྱི་རྒྱལ་པོའི་མདུན་ནས་ལྷན་གཅིག་སྐྱེས་པའི་ལྷས་ཚེ་འདས་ཀྱིས་གསོན་འཇིག་རྟེན་ཁམས་ནས་ལས་དགེ་བ་བསགས་པའི་རྡེའུ་དཀར་པོ་གང་ཡོད་བཞག ལྷན་གཅིག་སྐྱེས་པའི་འདྲེས་ལས་མི་དགེ་བ་བསགས་པའི་རྡེའུ་ནག་པོ་ཡོད་ཚད་བཞག འོན་ཀྱང་དེང་སང་སྙིགས་མའི་དུས་སུ་དམྱལ་བའི་སེམས་ཅན་གྱི་ཁ་གྲངས་ལྷག་པར་འཕེལ་བའི་སྐབས་ཡིན་པས། ལྷན་གཅིག་སྐྱེས་པའི་ལྷས་རྡེའུ་དཀར་པོ་བཞག་སྟེ་ངོ་འཛུམ་བྱེད་པ་ཉུང་བའི་དུས་ཡིན། ལས་དགེ་བ་བྱས་པའི་རྡེའུ་དཀར་པོ་མང་ན་ཁྲམ་ཤིང་དཀར་པོ་ལ་བཏབ་ནས་མཐོ་རིས་ཀྱི་འཇའ་ལམ་དཀར་པོའི་ནང་དུ་གཏོང་། སྡིག་པ་བྱས་པའི་རྡེའུ་ནག་པོ་མང་ན་ཁྲམ་ཤིང་ནག་པོ་ལ་བཏབ་ནས་དམྱལ་བའི་གཤེད་མའམ་དམྱལ་བའི་ལས་མཁན་གྱི་ལག་ཏུ་གཏོད་དོ། །དེའི་དུས་སུ་གཤིན་རྗེ་ཆོས་ཀྱི་རྒྱལ་པོས་དགེ་སྡིག་ཅི་བྱས་ཐམས་ཅད་གཅིག་མ་ཆད་གཉིས་མ་ལུས་པར་བཀྲ་གསལ་ལེར་ཤར་བའི་སྲིད་པ་ལས་ཀྱི་མེ་ལོང་བསྟན་པས། ཚེ་སྔ་མ་ལ་དགེ་སྡིག་ཅི་བྱས་མཐོང་ནས། རང་བྱས་ཀྱི་སྡིག་པའི་ལས་ལ་ཤིན་ཏུ་འགྱོད་ཅིང་ངུ་འབོད་ཀྱིས་ཞུ་བ་བྱས། མཐེ་བོང་བཙོང་ཡང་། ཕན་ཐོགས་དང་། ཞུ་ས་མེད་དོ། །དམྱལ་བའི་ཡུལ་གྱི་ལྕགས་ཀྱི་ཁང་པ་ཆེན་པོའི་ཕྱོགས་བཞི་མཚམས་བཞི་ན་དམྱལ་བའི་གཤེད་མའམ་དམྱལ་སྲུང་ལས་མཁན་ཆེན་པོ་བརྒྱད་ཡོད་དེ། ཤར་ན་འཇོམས་བྱེད་སེང་གེའི་མགོ་ཅན། ལྷོ་ན་དཔའ་གཏུམ་སྟག་གི་མགོ་ཅན། ནུབ་ན་སྟོབས་ལྡན་ཕག་གི་མགོ་ཅན། བྱང་ན་རག་ཤ་གླང་གི་མགོ་ཅན། མཚམས་གཞི་རུ་རྔམ་བྱེད་དྲེད་ཀྱི་མགོ་ཅན། གཏུམ་པོ་དོམ་གྱི་མགོ་ཅན། ཨ་བ་གླང་གི་མགོ་ཅན། ལྕགས་གདོང་ཁྱུང་གི་མགོ་ཅན་རྣམས་ལ་མགོ་བརྙན་སྣ་ཚོགས་པའི་འཁོར་རང་འདྲ་མང་པོས་བསྐོར་ནས་ཡོད་དོ། །ཚ་དམྱལ་བརྒྱད་དང་གྲང་དམྱལ་བརྒྱད་ཀྱི་གནས་རྣམས་གཞུང་གི་ལུགས་དང་། མན་ངག་གི་ལུགས་ལ་བསྒོམ་ལུགས་དང་། གྲངས་ཀྱི་འདྲེན་ལུགས་སོགས་དགོས་དབང་གིས་ཁྱད་པར་ཅུང་ཟད་ཡོད་ཀྱང་། མདོར་ན་དམྱལ་བའི་སྡུག་བསྔལ་ནི་ཤིན་ཏུ་བཟོད་པར་དཀའ་བ་ངག་གིས་ཇི་བཞིན་བརྗོད་མི་ཐུབ་པར་ཡོད་དོ། །འདི་ནས་དམྱལ་གནས་རྣམས་ཀྱི་སྡུག་བསྔལ་སྣེ་ཟིན་ཙམ་ཐུགས་རྗེ་ཆེན་པོའི་ཆོས་སྐོར་ནས་གསུངས་པ་རུ་གཞི་བཟུང་སྟེ་རེ་གཉིས་ཞུས་ན། ཤར་སྟོད་ན་དམྱལ་བ་བསྡུས་འཇོམས་ཞེས་པ་བྲག་རི་ནག་པོ་ལུག་ལྟ་བུ་གཉིས་ཀྱི་བར་དུ་དམྱལ་བའི་སེམས་ཅན་མང་པོ་བཅུར་ནས་ཁྲག་དམར་ཆིལ་ཆིལ་དུ་འབབ་པ་ཡོད་དོ། །གཞན་ཡང་གཅན་གཟན་དང་རི་དྭགས་ཀྱི་མགོ་ཅན་མང་པོས་དམྱལ་བའི་སེམས་ཅན་རྣམས་འཐར་ནས། སྡུག་བསྔལ་བའི་མཐོང་སྣང་གིས་སྲོག་གཅོད་ཀྱི་རྣམ་སྨིན་མྱོང་བ་ཡོད་དོ། །དམྱལ་བ་དེའི་འཁོར་ན་ལྕགས་ཀྱི་ཐོ་གདན་གྱི་ཐོག་ཏུ་དམྱལ་བའི་སེམས་ཅན་བཞག་སྟེ་ཀླད་པ་ནས་ཐོ་བས་རྡུང་བ་ཡོད་དོ། །ཤར་དབུས་ནས་དུག་སྦྲང་ནག་པོ་བྱེའུ་ཙམ་པས་ཤ་ཟོས་ནས་རུས་པ་ལའང་ཟ་བ་ཡོད་དོ། །དེའི་འཁོར་ན་དཔའ་གཏུམ་སྟག་གི་མགོ་ཅན་གྱིས་ལྕགས་ཀྱི་སོག་ལེས་ལུས་འདྲ་བ་ཡོད་དོ། །ཤར་སྨད་ནས་ཆུ་ཚན་ཁོལ་མའི་ནང་དུ་འཚེད་པ་དང་། རྩལ་ཆེན་སེང་གེའི་མགོ་ཅན་གྱིས་དམྱལ་བའི་སེམས་ཅན་གྱི་རྐང་བ་ནས་བཟུང་སྟེ་ཤ་རུས་སོ་སོར་ཕྱེ་བ་ཡོད་དོ། །ལྷོ་སྟོད་ན་དམྱལ་བ་རབ་ཏུ་ཚ་བ་བྱ་བ་སྔར་ཆོས་མེད་སྡིག་ལས་འབའ་ཞིག་གིས་དུས་འདས་ནས། སེམས་ཅན་གཞན་ལ་གནོད་པ་བྱས་པས་སྐྱེས་པའི་དམྱལ་བའི་སེམས་ཅན་སྐྱབས་མེད་མགོན་མེད་རྣམས་ཀྱི་རྐང་ལག་བཞིར་ལྕགས་ཕུར་བཞི་རེ་བཏབ་སྟེ་རྒྱོང་བརྒྱབ་ནས་ཕྱོགས་བཞི་ནས་མེ་བཏང་སྟེ། ཤ་རུས་ཐམས་ཅད་སྲེག་པ་ཡོད་དོ། །གཞན་ཡང་མུན་པའི་གླིང་ནག་རོང་ངེ་། འཇིགས་ཤིང་སྐྲག་པ། རིག་ཙ་ན་ཤ་སྦྲིད་པའི་སྐྱི་གཡའ་བ་ཡོད་པས་གཤེད་མ་མང་པོས་ལག་པ་བཀྱིགས། ཀླད་པ་བརྟོལ་ནས་ལྕགས་ཀྱི་བྱ་ཁྲ་མང་པོས་ཀླད་པ་དང་མིག་ལ་སོགས་པ་འབྲུ་བ་ཡོད་དོ། །དེའི་འཁོར་ན་གཏུམ་པོ་དོམ་གྱི་མགོ་ཅན་གྱིས་ལྕགས་ཀྱི་ཚེར་མའི་གསེབ་ཏུ་ལྕགས་ཀྱི་ཐོ་བས་རྡུང་། མདུང་གིས་ཕུག་པ་ཡོད་དོ། །དེའི་འཁོར་ན་དམྱལ་བ་ཐིག་ནག་བྱ་བ་ཡོད་དེ། ལུས་ཕྱེད་ཚལ་དུ་ཐིག་བཏབ་ནས་ཤིང་བཟོས་ཤིང་དྲས་པ་ལྟར་དུ་གཤེད་མས་ལྕགས་ཀྱི་སོག་ལེས་དྲ་བ་དང་། སྟ་རེས་གཤོག་པ་ཡོད་དོ། །དེ་དག་ནི་སྔར་སེམས་ཅན་གསོན་པོར་བཤས་པ་དང་། མི་བསད་པའི་རྣམ་སྨིན་མྱོང་བ་ཡིན་པའོ། །དམྱལ་བ་ཡང་སོས་བྱ་བ་ཡོད་དེ། ལྕགས་ཀྱི་གཏན་པ་ལ་མགོ་བོ་བཞག་ནས་ལྕགས་ཀྱི་ཕ་བོང་གིས་ཐོག་ནས་མནན་ནས་ཡང་ཤི་ཡང་སོས་ཀྱི་སྡུག་བསྔལ་མྱོང་བ་བྱེད་པ་ཡོད་དོ། །དེ་དག་གསོན་འཇིག་རྟེན་གྱི་ཁམས་ནས་རྡོ་དང་མཚོན་ཆས་མི་བསད་པའི་རྣམ་སྨིན་གྱིས་སྐྱེས་པའོ། །བྱང་དབུས་ན་ལྕགས་ཀྱི་ཟངས་ཆེན་པོའི་ནང་དུ་དམྱལ་བའི་སེམས་ཅན་མང་པོ་འབྲས་བཞིན་འཚེད་པ་བྱེད་དོ། །གཞན་ཡང་བྱང་སྨད་ན་གྲང་བའི་དམྱལ་བ་རྣམས་ཡོད་ཚུལ་སོགས་མ་ཎི་བཀའ་འབུམ་ལ་ལྟོས་དང་དེ་ལྟར་གསུངས་སོ། །སྤྱི་ཁྱབ་ཀྱི་ལུགས་ལ། ཡང་སོས་ཐིག་ནག་བསྡུས་འཇོམས་དང་། །ངུ་འབོད་ངུ་འབོད་ཆེ་ཚ་བ། །རབ་ཚ་མནར་མེད་ཚ་དམྱལ་བརྒྱད། །ཅེས་དམྱལ་གནས་གོང་མའི་སྡུག་བསྔལ་ཐམས་ཅད་འོག་མ་ལ་ཚང་བ་དང་། མཚམས་མེད་ཀྱི་ལས་བྱས་པ་དང་། གསང་སྔགས་ཀྱི་དམ་ཚིག་ཉམས་པ་རྣམས་དེ་ལས་མནར་དུ་མེད་པའི་སྡུག་བསྔལ་ཅན་གྱི་དམྱལ་བ་མནར་མེད་དུ་སྐྱེ་བ་དང་། མནར་མེད་དུ་སྐྱེས་པའི་སེམས་ཅན་ལ་བར་དོ་ཡོད་པ་མིན་པ་སྟེ། སྲིད་པ་བར་དོ་བརྒྱུད་མི་དགོས་པར་མར་གྱི་ཟང་ཐལ་ཞེས་པ་མིག་བཙུམ་པ་དང་ལྷན་དུ་མགོ་ཐུར་དུ་གཏད་ནས་དེར་སྐྱེ་བར་གསུངས་ཤིང་། དམྱལ་བར་སྐྱེ་བའི་ལས་ཀྱང་ཉོན་མོངས་ཆགས་སྡང་རྨོངས་གསུམ་གྱིས་གཞན་ལ་གནོད་པར་བྱས་པའི་འབྲས་བུ་ཡིན་པ་དང་། འཛམ་གླིང་ལས་ཀྱི་ས་པ་ཡིན་པས། ལས་དཀར་ནག་གང་བྱས་ཀྱི་འབྲས་བུ་བརྒྱ་སྟོང་དུ་འཕེལ་ནས་མྱོང་དགོས་པ་ནི་ལས་འབྲས་བསླུ་མེད་ཡིན་ནོ། །དེའང་སྔ་དྲོ་གྱེན་དུ་སོང་ན་ཕྱི་དྲོ་ཐུར་དུ་འབབ་དགོས་པ་ལྟར་དུ། ཚེ་སྔོན་མའི་རྣམ་དཀར་བསོད་ནམས་ཀྱི་འབྲས་བུ་ཅུང་ཙམ་ལུས་པའི་མཐོ་རིས་མི་ཡི་བདེ་འབྲས་མྱངས་ཟིན་མ་ཐག་ཏུ། ལས་ནག་པོ་སྡིག་པའི་བསགས་པ་ཆེ་བས་དམྱལ་བ། འབྲིང་གིས་ཡི་དྭགས། ཆུང་ངུས་དུད་འགྲོར་སྐྱེས་ནས། སྡུག་བསྔལ་མྱངས་ནས་བུ་ལོན་འཇལ་དགོས་སོ། །དེ་ལྟར་དམྱལ་བ་ལ་ཚ་དམྱལ། གྲང་དམྱལ། ཉི་ཚེ་ཉེར་འཁོར་བཅས་ཡོད་དོ། །ཡི་དྭགས་ལ་ཡང་བྱིངས་ན་གནས་པ་དང་། ཁ་འཐོར་དུ་གནས་པ་གཉིས། བྱིངས་གནས་ལ་ཡང་ཕྱིའི་སྒྲིབ་པ་ཅན་དང་། ནང་གི་སྒྲིབ་པ་ཅན་ལ་སོགས་པ་རྣམ་གྲངས་དུ་མ་ཡོད་ཅིང་། ཕྱིའི་སྒྲིབ་པ་ཅན་ནི་བཀྲེས་ཤིང་སྐོམ་ཡང་བཟའ་བཏུང་ལོངས་སྤྱོད་མི་རྙེད་པའམ་མིང་ཙམ་ཡང་གོ་རྒྱུ་མེད་པ། ཟས་ཤིག་རྙེད་ཀྱང་རྣག་ཁྲག་དང་ངན་སྐྱུགས་སུ་གྱུར་པའམ་སྲུང་མ་གོ་མཚོན་ཅན་གྱིས་བསྲུངས་ནས་བཟའ་དབང་དང་འཐུང་དབང་མེད་པའོ། །ནང་གི་སྒྲིབ་པ་ཅན་ནི་ཁ་ཁབ་མིག་ཙམ། མགོ་རི་རབ་ཙམ། མགྲིན་པ་རྟ་རྔ་ཙམ། ལྟོ་བ་ཡུལ་ལྗོངས་ཙམ། རྐང་ལག་རྩྭ་འཇག་ལྟ་བུ་ཡོད་ཅིང་། རྐང་ལག་རྩྭ་འཇག་ལྟ་བུས་ལུས་མི་ཐེག་ནས་སྡུག་བསྔལ། ལོ་བརྒྱ་ཚོ་མང་པོ་སོང་བའི་མཚམས་ནས་ཟས་སྣབས་ལུད་དང་། ངན་སྐྱུགས་ཙམ་རེ་རྙེད་ཀྱང་། ཁ་ཁབ་མིག་ལྟ་བུའི་ནང་དུ་མི་ཆུད། ཆུད་ཀྱང་མིད་པ་རྟ་རྔ་ལྟ་བུ་ལས་མི་ཐར། ཐར་ཡང་ལྟོ་བ་ཡུལ་ལྗོངས་ཙམ་པ་མི་གང་ནས་སྡུག་བསྔལ་ལོ། །གལ་ཏེ་ཁོག་ཏུ་ཅུང་ཙམ་སོང་ཡང་ཟས་སྐོམ་མེ་རུ་འབར་ནས་ལྷག་ཏུ་སྡུག་བསྔལ་བའོ། །དེ་བཞིན་དུ་སྒྲིབ་པ་ཅན་གྱི་སྒྲིབ་པ་ཅན་ལ་སོགས་པ་མ་ཎི་བཀའ་འབུམ་ལས་གསུངས་སོ། །གཞན་ཡང་ཡི་དྭགས་གྱེའུ་སྐྱེས་བྱ་བ། རླུང་མཁའ་ལ་རྒྱུ་བའི་ཡི་དྭགས་བྱ་བ་སོགས་འདྲ་མི་འདྲའི་སྡུག་བསྔལ་མྱོང་སྟངས་སྣ་ཚོགས་པའི་ཡི་དྭགས་ཀྱི་རིགས་མང་བའོ། །སེམས་ཅན་གྱིས་སྡིག་པའི་ལས་བསགས་པའི་སྣ་གྲངས་མང་བ་ལྟར་དུ། དམྱལ་བའི་སྡུག་བསྔལ་མྱོང་བ་ཡང་མང་ཞིང་། ཡི་དྭགས་དང་། དུད་འགྲོ་ཡང་དེ་ལྟར་རོ། །དམྱལ་བ། ཡི་དྭགས་ཀྱི་འགྲོ་བ་དེ་དག་གི་ཚེའི་ཚད་མི་ལོ་བྱེ་བ་དུང་ཕྱུར་དུ་སྡུག་བསྔལ་མྱོང་ལ། འུ་ཅག་གིས་བགྲངས་བར་དཀའ་བའི་ལོ་གྲངས་ཅན་ཤ་སྟག་ཡིན་ནོ། །དེ་བཞིན་དུ་དུད་འགྲོ་ལ་བསམ་བློ་བཏང་ན། བླུན་རྨོངས་གཅིག་ལ་གཅིག་ཟའི་སྡུག་བསྔལ་བྱིངས་གནས་རྒྱ་མཚོ་ཆེན་པོའི་ནང་དུ་ཡོད་པ་དང་། ཁ་འཐོར་མིའི་གནས་ན་ཡོད་པ་རྣམས། རང་རེ་མི་རྣམས་ཀྱིས་ཤ་ཟ། པགས་གྱོན། འོ་མ་བཞོ། ཁལ་འགེལ། སྣ་ཕུག སྒ་གཏོད། སྲབ་སྐོན། ལྕག་གིས་བྲབ། རང་དབང་ཅུང་ཟད་ཙམ་ཡང་མེད་པའི་དམྱལ་བ་མིན་ཡང་དམྱལ་འདྲ། རང་ཅག་གིས་དམྱལ་བའི་ལས་མཁན་བྱས་ཏེ་སྡུག་ཏུ་བཀོལ་བ་རིག་བཞིན་ཡོད་པ་འདིའོ། །མཐོ་རིས་རྣམ་གསུམ་ལྷ་དང་། མི། ལྷ་མ་ཡིན་གསུམ་ལའང་སྡུག་བསྔལ་མེད་པ་ཡོད་མིན་ཏེ། ལྷ་འཕོ་ལྟུང་གིས་སྡུག་བསྔལ་ཏེ་ཤི་རན་པའི་ལྷའི་ཞག་མ་བདུན་ནམ་མིའི་ལོ་གྲངས་བརྒྱ་ཚོ་དུ་མར་ལྷ་ཡུལ་ནས་ཤི་འཕོ་སྡུག་དང་། འོག་མའི་ངན་སོང་གནས་སུ་ལྟུང་སྡུག་གིས་འཕོ་ལྟུང་གི་སྡུག་བསྔལ་ལོ། །ལྷ་མ་ཡིན་གྱིས་ཕྲག་དོག་དབང་གིས་འཐབ་རྩོད་འབའ་ཞིག་བྱེད་ནས་དམྱལ་བ་ཡང་སོས་ཀྱི་སྡུག་བསྔལ་ལྟ་བུ་མྱོང་དགོས་སོ། །མིའི་སྡུག་བསྔལ་ལ་མཚོན་ན་འུ་ཅག་གི་རང་ཐོག་ཏུ་ཡོད་པའི་སྐྱེ་རྒ་ན་འཆི་བདུད་ཀྱི་ཆུ་བོ་བཞི་སྟེ་སྐྱེ་བའི་སྡུག་བསྔལ་གྱིས་འགོ་བཟུང་ནས་རྒ་ན་འཆི་བའི་སྡུག་བསྔལ་སོགས་མྱོང་དགོས་ཤིང་། ལས་ལས་བཅས་བཅས་ཐམས་ཅད་ཀྱི་མཐའ་མའི་མཇུག་བསྡོམས་སམ་མི་ཚེ་གཅིག་གི་ཕྱོགས་བསྡོམས་འཆི་བས་བྱེད་ཅིང་། དེ་ལྟར་སྐྱེ་རྒ་ན་དང་འཆི་བ་བཞི་བོ་བར་མེད་དུ་སྲིད་པའི་ཁ་བརྒྱུད་ནས་འཁོར་བས། འདི་དག་གི་མིང་ལའང་བར་མེད་བདུད་ཀྱི་ཆུ་བོ་ཞེས་ཆུའི་བཞུར་རྒྱུན་ལྟར་ཆད་དུ་མེད་ཅེས་གསུངས་པའོ། །དེའི་བར་དུ་འདོད་པ་ཐོག་ཏུ་མི་ཁེལ་བའི་སྡུག་བསྔལ། མི་འདོད་པ་བཙན་གྱིས་བབ་པ་ལ་སོགས་པའི་སྡུགས་བསྔལ་སོགས་སྡུག་བསྔལ་གྱི་རྣམ་གྲངས་མཐའ་ཡས་པ་མྱོང་བའོ། །དེས་ན་དམ་པའི་ཆོས་ཞུ་བ་འདི་བདེ་བ་སྒྲུབ་པའི་ཆེད་ཡིན་ཞིང་། དེའང་ཐེག་པ་དམན་པས་རང་དོན་ཡིད་བྱེད་ང་གཅིག་པུ་འཁོར་བའི་སྡུག་བསྔལ་ལས་ཐར་ན་བསམ་པ་དེས་མི་ཆོག་པར་ང་ཐར་རུང་། ཤུལ་དུ་ཕ་དང་། མ། བུ། ཚ་བོ། ཚ་མོ། གྲོགས་དགའ་མཛའ། ཉེ་བ་མཐུན་གསུམ། ཡུལ་སྡེ་བུ་ཕྲུག་རྣམས་ལུས་ཤིང་། ཞིབ་ཏུ་བསམས་ན་སྐྱེ་བ་རེ་རེར་དེའི་གྲངས་ཀྱི་དེ་དག་ཡོད་པས། སྐྱེ་བ་ལ་མཐའ་མེད་པར་སངས་རྒྱས་ཀྱིས་མ་གསུངས་ཀྱང་། ཕའི་ཕ། དེའི་ཕ། དེའི་ཨ་མྱེ། དེའི་ཡང་མྱེ། མ་ཡི་ཕྱོགས་ནས་ཀྱང་དེ་བཞིན་དུ་བགྲངས་ན་སྐྱེ་བ་བླངས་གྲངས་བརྩིས་མཐའ་མེད་པས། འཁོར་བ་ཐོག་མེད་མཐའ་ལ་ཐུག་རྒྱུ་མེད་པར་ཤེས་སོ། །དེ་ལྟར་སེམས་ཅན་ཐམས་ཅད་ཕ་མ་ཡིན་པས་སྡུག་བསྔལ་མི་འདོད་ཅིང་བདེ་བ་འདོད་པའང་རང་ཅི་འདྲ་རོགས་ཡིན་བསམས་ནས། ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་ནས་སྡོམ་པ་བླངས་པ་བཞིན་དུ་སེམས་བསྐྱེད་རྒྱུད་ལ་སྐྱེས་ན་སྡིག་པ་དེ་ཡིས་འདག བསོད་ནམས་ཀྱི་ཚོགས་དེ་ཡིས་སོག་ཅིང་། འཇུག་སེམས་སྐྱེས་ལ་མ་ཉམས་ན། དབུགས་ཀྱི་རྒྱུ་འགྲུལ་ཙམ་ཡང་གཞན་དོན་དུ་འགྱུར་ནས། འཇུག་པའི་བསླབ་བྱ་ཕ་རོལ་ཏུ་ཕྱིན་པ་དྲུག་དང་། བསྡུ་བའི་དངོས་པོ་བཞི། དོན་དམ་བྱང་ཆུབ་ཀྱི་སེམས་ཐོབ་པ་སོགས་ས་ལམ་གྱི་བགྲོད་པ་མཐར་ཕྱིན་ཏེ་དོན་གཉིས་ལྷུན་གྲུབ་འབྱུང་བར་ཁ་སང་བྱང་ཆུབ་སེམས་སྡོམ་ལེན་སྐབས་སུ་བཤད་པ་ལྟར་ཡིན་ནོ། །དེའང་དུས་བསྐལ་ཆེན་གྲངས་མེད་མང་པོའི་མཐའ་དང་། མི་ཚེའི་སྐྱེ་བ་མང་པོ་རུ་སྒུག་མི་དགོས་པར། ཚེ་ལུས་འདིའི་ཐོག་ནས། རང་ཉིད་ལ་སྙིང་རུས་ཡོད་ན། སངས་རྒྱས་ཀྱི་གོ་འཕང་ཐོབ། རང་གཞན་དོན་གཉིས་འགྲུབ་ཐུབ་པས། སྤྱིར་ན་ཐེག་ཆེན་མདོ་སྔགས་གཉིས། དེ་ལས་གསང་སྔགས་མྱུར་ལམ་ཁྱད་པར་ཅན་སྒྲུབ་རྒྱུའི་བགོ་སྐལ་བཟང་པོ་ཐོབ་པའི་སྐབས་སུ། དུས་སྐར་ཆ་ཙམ་ཡང་འཕྲོ་བརླག་མི་གཏོང་པར་རང་གཞན་འདི་ཕྱིའི་དོན་ཆེན་སྒྲུབ་རྒྱུ་འཕྱུག་མི་རུང་ཞེས། མདུན་ན་ཡོད་པའི་བྱ་བ་གནད་ཆེན་གཅིག་པུར་ཡིན་པའི་དྲན་བསྐུལ་གསལ་འདེབས་བྱས་པ་ཡིན་ནོ།། ༈ འདིའི་མཚམས་ནས་པདྨ་ཐང་གི་བླ་མ་ཐུབ་བསྟན་གོ་ཆས་མགུར་ཞིག་འཐེན་མཛོད། ཐམས་ཅད་ཆོས་རའི་ནང་དུ་བསྡད་ནས་ཆོས་ཉན་ཚུལ་དཔེ་མ་སྲིད་པར་ཡག་ཐལ། ཞུ་ཨེ་རུང་ན་ཡང་དགོན་པ་སྡ་གེ་སྡུག་གེའི་གྲྭ་ཚང་འཚོགས་པ་ལས་ཀྱང་བཟང་རེད། རེ་བ་བརྒྱབ་ཚོད་ལས་བརྒལ་ཐལ། འབྲོག་རུ་བསོད་ནམས་ལྷ་སྡེའི་མི་རབས་རྗེས་མར་ཆོས་ཀྱིས་ཆོས་དགེ་ཡོང་རྒྱུའི་རྟེན་འབྲེལ་ཚང་འདུག་བསམ་བཞིན་ཡོད། ད་དུང་ཡང་མ་འཕྱུག ཁ་སང་ཡང་བཤད་ཀྱང་། གལ་ཆེན་དོན་དང་ལྡན་པ་ལ། །ཚིག་གཅིག་ལན་གཉིས་གདབ་པར་བྱ། །ཞེས་པ་ཡིན་པས། ཞིང་སྒྲུབ་འདིའི་ཚེ་ཚང་མས་ཕར་འགྲོ་ཚུར་འོང་གི་ལམ་ནས། འགྲིམ་འགྲུལ་གྱི་ཐད་ནས་མི་ལུས་བདེ་འཇག་ལ་གཟབ་གཟབ་བྱོས། འཕྲུལ་རྟ་རླངས་འཁོར་ཅི་ཞིག་བཀོལ་ནས་འགྲོ་མཁན་ཡིན་ཡང་། ལམ་ནས་དལ་མོ་གྱིས། དུས་ཚོད་སྐར་མ་ཁ་ཤས་དང་། ཆུ་ཚོད་གཅིག་གཉིས་ཀྱིས་ཐོན་སྔ་ཕྱིའི་བྲེལ་བ་མ་བྱེད། འཕྲུལ་རྟར་སུམ་འཕང་བཞི་འཕང་མ་བྱེད། རླངས་འཁོར་ཡིན་ཡང་ཤོང་ཚད་དང་། འགྲིམ་འགྲུལ་གྱི་ཚད་གཞིའི་ཆ་ཚད་ལྟར་དུ་བྱེད་དགོས། བདེ་འཇག་གི་ཆེད་དུ་དང་པོ་ལས་མཁན་གྱིས་ཉམས་ཞིབ་བྱས་ནས་བཞག་པ་རེད། ཞིང་སྒྲུབ་འཚོགས་ནས་ཆོས་ཁྲིད་རེའི་ནང་དུ་ཞུགས་རྒྱུ་ནི། བརྒྱ་སྐོར་གཅིག ལོ་རེའི་ནང་གི་ལན་རེ་ཡིན་པས། ཆོས་རའི་ནང་ནས་སྒོ་གསུམ་དགེ་བའི་ལམ་ལ་ཞོག བདེ་སྨོན་ཚར་གཅིག་འདོན་ས་མིན་པར་མ་ཐོན་རུང་། སྦྱོར་དངོས་རྗེས་ཀྱི་དམ་པ་གསུམ་གྱི་རྩི་ཡིས་ཨེ་ཟིན་ལྟོས་དང་། དགེ་རྩ་རྒྱ་ཆེ་ཞིང་། རྒྱུན་མི་ཆད་པ་ཡིན་པ་རེད། དགོང་མོའི་གཅོད་ཐུན་གྱི་སྐབས་སུ་གཅོད་འོག་ཏུ་སྡོད་དང་། བྱིན་རླབས་འཇུག བར་ཆད་སེལ་བ་རེད། དགེ་འདུན་པ་བརྒྱ་ཚོ་མང་པོ་སྟོང་ཚོ་ལ་ཉེ་བ་ཞིག་གིས་ད་ལོའི་དབྱར་སྟོན་གཉིས་སུ་གཅོད་ཐུན་འཚོགས་ཤིང་། བསྡོམས་པས་ཐེངས་བརྒྱད་ཅུ་ཁ་གྲངས་ཤིག་གསུངས་པ་རེད། མི་འགའ་རེ་གཅོད་འོག་འདུག་རྒྱུ་ཆག་མ་མྱངས་པ་ཡང་ཡོད་ཐལ། གཏན་ནས་ཞུགས་མ་མྱངས་པ་ཉུང་ཉུང་ཡིན་རྒྱུ་རེད། འདི་རྣམ་པ་ནི་གཅོད་ཀྱི་དབང་ཁྲིད་མན་ངག་དང་བཅས་པ་ཐོབ་མཁན་འབའ་ཞིག་ཡིན་པས་མ་ཚད། བསྙེན་ཚད་ཡོད་མཁན་མང་ཆེ་བ་རེད། དོ་དགོང་ནས་བརྩིས་པའི་དགོང་མོ་དྲུག་ལ་མ་གཏོགས་གཅོད་ཐུན་ད་ལོ་ཡོད་པ་མ་རེད། ལོ་ཀེག་དང་། སྲི་ཐོག་ལ་ཡོད་མཁན། བྱ་བའི་ལམ་འགྲོ་ཞན་མཁན། བྱིས་པ་ཡ་མ། བུད་མེད་སྦྲུམ་མ་དེ་ཚོ་ཁྱད་པར་དུ་གཅོད་འོག་ཏུ་སྡོད་དང་བཟང་། ལས་བྱ་བ་ལམ་ལ་འགྲོ། ན་ཚ་རྐྱེན་ཆགས་མེད་དུས་རིམ་གྲོ་སྒྲུབ་དགོས་ཀྱི། ད་ཁ་ད་ཐུག་ལ་འཚུབ་ཕོག་ནས་གཟོད་བརྒྱབ་ཆོག་བྱས་ན་ཕན་པ་ཡོད་ཀྱང་། ཆུ་ལོག་བརྒྱུགས་ནས་འཕྱུར་ལ་ཉེ་སྐབས་སུ་བཀག་པ་ལས། ཆུ་རགས་སྔ་ཚེ་ནས་བརྒྱབ་ན་ཁོག་ཆེ་བ་རེད། དུས་རྒྱུན་པར་བློ་གཏད་ས་བླ་མ་དཀོན་མཆོག་ལ་ཡིད་ཁྱེད་ཤེས་ཀྱིས་བློ་གཏད་ལིང་བསྐྱུར་གྱིས་དང་། འཕྲལ་རྐྱེན་ཉེར་འཚེའི་བར་ཆད་སེལ་བ་རེད། གལ་ཏེ་ཟློག་མེད་ཀྱི་ལས་ལ་ཐུག་རུང་འགྱོད་པ་རྗེས་ན་མེད་པའི་བློ་སེམས་བདེ་རྒྱུ་ཡོད། ད་ལོ་དབང་གི་ཉིན་མོར་རྟེན་དབང་བསྐུར་རྒྱུ་ཡོད། དུས་རྒྱུན་སེམས་བསྐྱེད་འབུམ་མཆོད་ཀྱི་སྐབས་སུ་ཐུབ་པ་གྲོང་ཁྱེར་མའི་ལྷ་ཁང་ནང་ནས་རྟེན་གསུམ་མཇལ་ཁ་ཐེངས་རེ་བསྟན་རུང་། ད་ལོ་སེམས་བསྐྱེད་འབུམ་མཆོད་ཁྲི་གྲྭ་མ་འཚོགས་པས་མཇལ་ཁ་མ་ཐོབ་པ་རེད། པདྨའི་ཐང་གི་རྟེན་གསུམ་རབ་ཀྱི་ཡང་རབ་སུམ་ཅུ་ཐམ་པ་རྫོགས་ཆེན་ཚང་གི་རྟེན་སྒོམ་ཨ་མའི་ནང་དུ་ཡར་འབུལ་བྱེད་འཆར་རེད། སྔོན་མའི་འཆར་གཞི་རུ་ད་སྔོན་གྱི་ཉི་མ་ཁ་ཤས་ནས་གདན་འདྲེན་ཞུ་འཆར་ཡིན་ཡང་། ད་བར་དུ་གདན་འདྲེན་མ་ཞུས་པར་ཕྱིར་འཐེན་བྱེད་དོན་སྡེ་བའི་ཆོས་དད་མང་ཚོགས་ལ་རྟེན་དབང་ཞིག་བསྐུར་ནས་ཡར་འབུལ་བྱེད་འཆར་ཡིན། རྟེན་རེ་རེ་ཡང་དགོན་པ་རེ་རེའི་ཆགས་རྟེན་བྱེད་ཆོག་པའི་རྩ་ཆེན་དོན་ཆེན་ཏག་ཏག་ཡིན། དུས་བཟང་ངན་གཉིས་ཀའི་སྐབས། མི་ལོ་དྲུག་ཅུའི་རིང་ལ་ཉར་ཚགས་བྱས། ཚབས་ཆེ་བའི་སྐབས་སུ་མི་འགའ་རེས་སྲོག་བསྡོས་བྱས་པའི་རྟེན་གསུམ་འགངས་ཆེན་ཁོ་ན་རེད། འདི་དག་སྔར་འགྱུར་མདོ་ཁམས་རྒྱལ་བ་རྫོགས་ཆེན་པའི་གདན་ས་ཨ་མའི་ཕོ་བྲང་ཆེན་མོའི་གཟིམ་སྤྱིལ་འཆི་མེད་གྲུབ་པའི་དགའ་ཚལ་དུ་བཞུགས་ན། རྟེན་འགྲོ་སྤྱི་དང་བྱེ་བྲག་གི་རྒུད་པ་སེལ་ཆེད་དང་། མ་འོངས་སེམས་ཅན་སྤྱི་མཐུན་གྱིས་བསོད་ནམས་གསག་པའི་ཞིང་ས། མདོ་ཁམས་སྨད་ཀྱི་རྟེན་སྐལ་རྩ་ཆེན་ཏུ་འགྱུར་རྒྱུའི་དམིགས་འདུན་བྱས་པ་ཡིན། འདི་དག་གདན་འདྲེན་བྱས་པའི་རྗེས་སུའང་། རྫོགས་ཆེན་པདྨ་ཐང་ལུང་རྟོགས་པའི་དགའ་ཚལ་དུ། དུས་འདིར་ཆེད་དུ་བསྐོས་ཐང་ཡོད་པའི་དུས་བབ་ཀྱི་རྟེན་རྫས་མང་པོ་བཞུགས་པ་རེད། དེ་དག་རྗེས་མའི་སྐབས་སུ་ལོ་རེའི་ནང་ནས་ཐེངས་རེ་མཇལ་སྲིད། གཞན་གཙུག་ལག་ཁང་ལ་སྐོར་བ་ཐེངས་རེ་རྒྱོབ་དང་། འབྲེལ་ཚད་དོན་ལྡན་གྱི་རྟེན་རྫས་རྩ་ཆེན་བཞུགས་པས། ཚོགས་རྫོགས་རྒྱུ་སྡིག་སྒྲིབ་དག་རྒྱུ་གཉིས་ཀ་མཉམ་དུ་འགྱུར་རོ། །གུ་རུ་རིན་པོ་ཆེའི་སྐུ་བརྙན་ཡིད་བཞིན་དབང་རྒྱལ་གྱི་ཐུགས་ཀ་ན། མདོ་མཁྱེན་བརྩེས་མི་ཉག་བཞག་ར་ལྷ་རྩེ་ནས། གཏེར་ནས་བཞེས་པའི་གཟི་ཡི་སྒྲོམ་བུ་བཞུགས་པ་རེད། འབྲི་རྫ་གཉིས་ཀྱི་ཁ་བར་གྱི་ས་ཆ་ལིང་ལིང་འདིར། ཆོས་ནོར་གཉིས་ཀྱི་གཡང་རྟེན་དེ་ལས་དགོས་རྒྱུ་མིན། དེ་ལ་གསོལ་བ་ཐོབ་དང་ཡིད་བཞིན་གྱི་ནོར་བུ་ཞེས་པའང་དེ་ལས་ལྷག་ཅིག་རྙེད་རྒྱུ་ཅི་ཡོད། རྐྱེན་བར་ཆད་བྱུང་ན་གསོལ་བ་ཐོབ་དང་ཟློག་ཐུབ། ནོར་ལ་གོད་ཁ་བྱུང་། རྒྱུ་ལག་ཏུ་མ་འཁོར་ན་འདོད་དོན་གསོལ་དང་། ཨོ་རྒྱན་མཁའ་འགྲོ་ནོར་ལྷའི་གཏེར་བུམ་གྱི་གཡང་གཏའ་འདིའི་ནང་དུ་བསྡམས་ཡོད། སེམས་ཀྱིས་མ་ཐུབ་ན་ཀླུའི་རྒྱལ་པོ་དངོས་སུ་ཐོན་ནས་ནོར་བུ་ཞིག་ལག་ཏུ་བཞག་ཀྱང་བེད་ཆོད་པ་མིན། སྤྱིར་ནོར་ལོངས་སྤྱོད་ཀྱི་ཕུན་སུམ་ཚོགས་པར་བསོད་ནམས་དགོས་ཀྱང་། ཡུལ་ཁྱད་པར་ཅན་ལ་ཡིད་ཆེས་ཁྱེད་ཤེས་ཀྱི་དད་པས་གསོལ་བ་བཏབ་ན། ཞིང་ཁྱད་པར་ཅན་དང་། རྩེ་གཅིག་དད་དང་འདུན་པའི་དམིགས་གནད་གཉིས་འཛོམས་ན་བསོད་ནམས་རང་ཤུགས་ཀྱིས་སོག་ནས་འདོད་དོན་འགྲུབ་བོ། །དེ་ནས་སང་ཉིན་ཐུག་ཡོང་། ༈ དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་བཤད་སྒྲུབ་འཁོར་ལོ་གཉིས་ལྡན་གྱི་སྒོ་ནས་གོང་དུ་འཕེལ་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་རྣམས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་འཁྲུག་རྩོད་ཐམས་ཅད་རྒྱུན་ཆད། བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པའི་ཕྱིར་དང་། བདག་ཅག་རྣམས་ཀྱི་ཚེ་འདིའི་ཕ་མ་གཉིས་དང་། དགྲ་བགེགས་གཉིས་ཀྱི་གཙོར་བྱས་པའི་བཟང་འབྲེལ་ངན་འབྲེལ་ཐོགས་པའི་མཐའ་ཡས་པའི་སེམས་ཅན་ཐམས་ཅད་མཐར་ཐུག་རྣམ་པ་ཐམས་ཅད་མཁྱེན་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པ་དང་། དེ་མ་ཐོབ་ཀྱི་བར་དུ་ཡིན་ན་ཡང་མཐོ་རིས་ཡོན་ཏན་བདུན་དང་ལྡན་པའི་ལུས་རྟེན་ཁྱད་པར་ཅན་ཞིག་རྙེད་ནས་ཐེག་པ་ཆེན་པོའི་ཆོས་ལ་ཚུལ་བཞིན་དུ་སྤྱོད་པའི་སྐལ་བ་དང་ལྡན་པའི་ཕྱིར་དུ་རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་གནང་བར་ཞུ། བསོད་ནམས་འདི་ཡིས་ཐམས་ཅད་གཟིགས་པ་ཉིད།། ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་།། སྐྱེ་རྒ་ན་འཆིའི་རྦ་རླབས་འཁྲུགས་པ་ཡི།། སྲིད་པའི་མཚོ་ལས་འགྲོ་བ་སྒྲོལ་བར་ཤོག། ཉིན་གཉིས་པའི་ཆོས་ཁྲིད།ད་ཡང་རང་རེ་མཉམ་འཛོམས་ཀྱིས་ཆོས་འཆད་ཉན་བྱ་བ་འདི་ཡང་། དབང་མེད་བར་དོའི་སེམས་ཅན་ཁ་ཤས་ཐེངས་གཅིག་ལ་རིགས་མཐུན་མཉམ་དུ་འཛོམས་ནས། ཐུན་མོང་གིས་སྐྱིད་སྡུག་གི་གྲོས་འགོ་ཞིག་བཤམས་པ་ཡིན། སྲིད་པ་བར་དོའི་གནས་སྐབས་ཀྱི་སེམས་ཅན་དེ་མིང་གཞི་འདུས་པའི་ཡིད་ལུས་ཅན་ཡིན་པས། སྔ་མའི་ལུས་རྟེན་བོར། བེམ་གོག་བྱ་ཁྱིའི་གཟན་ལ་སྟོར་ནས། ཕྱི་མའི་ལུས་རྟེན་མ་རྙེད་པར། བྱ་སྒྲོ་རླུང་གིས་ཁྱེར་བ་ལྟར་དུ་རྣམ་ཤེས་རང་དབང་མི་འདུས་པར་སྐྲག་སྔངས་སྡུག་གསུམ་གྱི་ངང་ནས། ཡི་ཆད་དང་། སྐྱོ་གདུང་། ཉམ་ངའི་སྣང་བ་རྣམས་འཆར། བར་མཚམས་རེ་ལ་ངོ་ཤེས་རེ་དང་ཐུག་ཙམ་བྱེད་ཀྱང་། ལས་ཀྱི་རླུང་གིས་བདས་ཏེ་གར་སོང་མེད་པར་ཁ་འཐོར་དུ་འགྲོ། ལས་ཅུང་ཟད་དག་པ་ཆོས་ཀྱི་བག་ཆགས་ཙམ་རེ་སྔོན་ལ་ཡོད་པ་ཚོས། དེའི་སྐོར་གྱི་གླེང་མོ་རེ་ངོ་ཤེས་རྣམས་དང་ཐུག་ཚེ་བྱེད་པ་ཡིན་ཡང་། འགའ་རེ་དེ་མ་ཐག་ཏུ་རང་དབང་མེད་པར་དམྱལ་བའི་སྣང་བ་ཤར་ཏེ། ལམ་དམར་ནག་འཇིགས་སུ་རུང་བ་ཞིག་མིག་སྔར་ཤར་བ་དེ་བརྒྱུད་ནས་དམྱལ་བའི་དོང་མོ་ཆེའི་ནང་དུ་དྲངས་ཚུལ་ཡོད། རིགས་དྲུག་གི་སྐྱེ་གནས་སོ་སོར་སྐྱེ་བ་ལེན་རན་དུས། མག་མོག་གི་འོད་འདྲ་མིན་དྲུག་ལམ་གྱི་སྣང་བར་འཆར་ཏེ། ལམ་དཀར་པོའི་ནང་དུ་ཕྱིན་ན་ལྷའི་སྣང་བ་འཆར། ལྗང་གུ་ལ་ཕྱིན་ན་ལྷ་མ་ཡིན་གྱི་སྣང་བ་ཤར། ལམ་སེར་པོ་མག་མོག་གི་སྣང་བ་འཆར་ན་མིའི་སྐྱེ་བ་ལེན། ལམ་ནག་པོ་ལ་ཕྱིན་ན་དུད་འགྲོའི་ནང་དུ་སྐྱེ་བ་ལེན། ལམ་ཐལ་སྐྱ་ལ་ཕྱིན་ན་ཡི་དྭགས་ཀྱི་སྣང་བ་འཆར། ལམ་དམར་ནག་ལ་ཕྱིན་ན་དམྱལ་བའི་སྣང་བ་འཆར་བ་ཡིན། དེས་ན་རགས་པའི་ལུས་རྟེན་ཡོད་མེད་ཀྱི་ཁྱད་པར་ཙམ་མ་གཏོགས་རང་ཅག་གི་ད་ལྟའི་སྣང་བ་འདི་ཡང་། ལས་ཀྱི་རྗེས་སུ་འབྲང་ལུགས། སྡུག་བསྔལ་ཁོ་ནས་དུས་འདའ་ལུགས། ཕྱི་མ་གར་འགྲོས་ངེས་པ་མེད་ལུགས་སོགས་ཕྱོགས་མང་པོ་ནས་བར་དོའི་སྣང་བ་དང་འདྲ་བའོ། །དེ་འདྲ་བ་ཡང་ཡིན་དགོས་ཏེ་བར་དོ་བཞི་དང་། བར་དོ་དྲུག་ལ་སོགས་པའི་རྣམ་དབྱེ་བཤད་པའི་ནང་ནས། རང་ཅག་གི་ད་ལྟའི་སྣང་བ་འདི་རང་བཞིན་སྐྱེ་གནས་བར་དོ་ཡིན་པས་སོ། །བར་དོ་ཞེས་པའང་གཞི་མ་འཁྲུལ་ཀ་དག་ཆོས་ཉིད་ལས་གཡོས་ཏེ་འཁྲུལ་བ་ནས། ཕར་ཀ་དག་ཆོས་ཉིད་ཀྱི་ངང་དུ་མ་ཐིམ་གྱི་བར། གཞི་སྣང་འཁྲུལ་བའི་སྣང་བ་དེ་བར་དོ་ཡིན་པ་སྟེ་བར་དོ་མིན་པ་མེད་པས་སོ། །ཐུགས་རྗེ་ཆེན་པོའི་འཆི་ཁའི་ཆོས་བཞིའི་གདམས་ངག་ལས་ཀྱང་། ད་ལྟའི་སྣང་བ་འདི་ལ་སྐྱེ་ཤི་བར་དོ་ཞེས་འགོ་སྐྱེ་བས་བཟུང་བ་ནས་མཇུག་ཤི་བས་བསྡུས་པའི་བར་ལ་ཁྱབ་ཆེ་བའི་མིང་དེ་ལྟར་བཏགས་པའོ། །སྐྱེ་ཤི་བར་དོ་འདི་ལ་རྒོད་ཕྲུག་མ་ཡིས་གསོས་པ་ལྟ་བུའི་གདམས་ངག་ཅེས་པ་ཞིག་ཐུགས་རྗེ་ཆེན་པོའི་ཆོས་སྐོར་ལས་གསུངས་ཤིང་། རྒོད་ཀྱི་ཕྲུ་གུ་སྒོང་རྒྱ་རལ་མ་ཐག་ཏུ་ཉམ་ཆུང་ཡང་། མ་ཡིས་གསོས་ནས་ལུས་སྟོབས་བསྐྱེད། གཤོག་རྩལ་བསླབ་ནས་གཤོག་རྩལ་འབྱོངས་དུས། ས་གཞིའི་གཡང་ས་ལ་ཉམ་ང་དང་། ལྷུང་དོགས་མེད་པར་མ་མཉམ་བུ་མཉམ་གྱིས་གཤོག་རྩལ་ཆེན་པོས་མཐོ་ནམ་མཁའི་བྱ་ལམ་གོང་མར་སྤྱོད་ཐུབ་པར་འགྱུར་བ་ལྟར་དུ། རང་བཞིན་སྐྱེ་གནས་ཀྱི་བར་དོའམ་སྐྱེ་ཤིའི་བར་དོའི་སྐབས་འདིར། རྒོད་ཕྲུག་མ་ལ་བརྟེན་པ་ལྟར་དུ་དམ་པའི་བཤེས་གཉེན་ལ་བརྟེན་ནས་དམ་ཆོས་རྣམ་དག་ཅིག་འགྲུབ་ན། དབང་མེད་འཁྲུལ་བའི་དབང་དང་ཤུགས་ལ་མི་ཤོར་བར་རང་དབང་གིས་སྡུག་བསྔལ་ཅན་གྱི་འཁོར་བའི་འཁྲུལ་སྣང་ལས་འདའ་ཐུབ་པ་ཡིན། རང་རེ་འཁོར་བའི་སེམས་ཅན་སོ་སོའི་སྐྱེ་བོའི་ས་ལས་མ་འཕགས་པ་ཤ་སྟག་ཡིན་པའི་དབང་དུ་བཏང་ན། སྔར་གྱི་ལས་དང་སྨོན་ལམ་མཐུན་པ་ཞིག་སྟོབས་སུ་བདོ། དུས་ལ་བབ་ནས། ཡུད་ཙམ་ཡུད་ཙམ་ལྟ་བུའི་ཞག་མ་གསུམ་བཞིའི་ཚེ་རུ་རང་རེ་མཉམ་པོར་འཚོགས་ཏེ་ཆོས་ཁྲིད་བཤད་ཅིང་ཕྱི་མའི་བདེ་སྡུག་གི་གྲོས་གླེང་རེ་བྱེད་རྒྱུ་འདི། ཆོས་དུང་བོས་པའི་དམིགས་ཡུལ་ཡིན། འོད་དཔག་མེད་པའི་དཀྱིལ་འཁོར་ཞལ་ཕྱེས་ནས། བདེ་ཆེན་ཞིང་སྒྲུབ་འཚོགས་རྒྱུ་འདི་ཡང་། རང་གཞན་འཁོར་བར་གནས་པའི་སེམས་ཅན་ཐམས་ཅད་ཀྱིས་ཐོགས་མེད་ནས་བསགས་པའི་སྡིག་སྒྲིབ་བག་ཆགས་དང་བཅས་པ་དག་ནས། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་ཏེ། གཏན་བདེའི་རྫོགས་བྱང་ཐོབ་པའི་ཆེད་དུ་འཚོགས་པ་ཡིན། ཁ་སང་བཤད་པ་ལྟར་དུ་སེམས་ཀྱི་བདེ་བ་ནི་བདེ་བ་ཐམས་ཅད་ཀྱི་མཆོག་ཡིན་ཞིང་། སེམས་ཀྱི་བདེ་བ་རྙེད་དགོས་ན་དམ་པའི་ཆོས་ལས་མ་གཏོགས་ཕྱིའི་དངོས་པོའི་འབྱོར་བས་རྙེད་མི་ཐུབ་པ་ནི། རང་རེ་བོད་ཀྱི་ས་ཆ་ལ་བསམ་བློ་བཏང་ན། གུ་ཡངས་སྤར་ཁ་དམ་ལྷོད་ཐོབ་ནས་མི་ལོ་ཉི་ཤུ་སུམ་ཅུ་ཙམ་ཡིན་མོད། དེ་ཚུན་ཆད་ལ་བརྒྱུགས་ནས་ཕྱིའི་མཐུན་རྐྱེན་བསྒྲུབས་ཚུལ་བྱས་པས་མ་ཚད། འཛམ་གླིང་གི་ཡུལ་གྲུ་འགའ་རེས་མི་ལོ་བརྒྱ་ཚོ་མང་པོའི་རིང་དངོས་པོ་ཡར་རྒྱས་ཀྱི་འབད་པ་བྱས་ནས་ཡང་རྩེའི་མཐོ་སར་ཕྱིན་ཡོད་ཀྱང་། ནང་སེམས་ཀྱི་བདེ་བ་ཐོབ་པ་ལ་ཕན་ཐོགས་མེད་པའི་ཐོག་ཏུ་མི་བདེ་བ་ཇེ་ཐུར་གྱུར་ནས། སེམས་ཁམས་མི་བདེ་བའི་ནད་ཀྱིས་མནར་མཁན་ཇེ་མང་ཡིན་པ་སོགས་མཐོང་ཆོས་མངོན་གྱུར་ལ་རིག་ཏུ་ཡོད། འཛམ་གླིང་ཡུལ་གྲུ་སོ་སོའི་ལོ་ཆུང་གཞོན་ནུའི་རིགས། དེང་རབ་ཀྱི་ཤེས་ཡོན་ཅན་མང་པོས་བོད་བརྒྱུད་ནང་བསྟན་གྱི་ཆོས་ལ་ཁ་ཕྱོགས་པ་ནི། བདེ་བ་ཕྱི་ནས་མི་རྙེད་པར་བོད་ཀྱི་ས་ཆ་འདི་ནས་སྣུམ་ཐིག་ཅིག་རྙེད་རྒྱུའི་ཁུངས་སྣེ་རིག་ནས། མགོ་སེར་ནག་ལ་མ་ལྟོས་པའི་འཛམ་གླིང་ཤར་ནུབ་ཀྱི་མི་མང་པོ་ཞིག་གིས་བོད་ཀྱི་བླ་མ་བཙལ་ནས་བསྟེན་པའི་རྒྱུ་མཚན་དེ་ཡིན་གྱི། མཐའ་མི་འདི་དག་མཐོ་སྒང་གི་གདོད་མའི་རང་གཤིས་མངའ་བའི་རྒྱུད་དྲང་ཅན་གྱི་བོད་མི་ལས། ལོག་པའི་རྣམ་རིག་དགུ་འགྱུར་གྱིས་བཀྲ་བས། ཁོང་ཅག་གཅེས་བཞིན་མེད་ན་ང་རང་ཚོ་གཅེས་ནས། ང་ཚོའི་དོན་དུ་དཀའ་ལས་བརྒྱབ་ནས་འོང་དཀའ་བ་ནི་བྱ་ཁྭ་ཏས་ཤ་ལ་ལྟའམ་སྒྲོ་ལ་ལྟ་ཟེར་བའི་དཔེ་ལས་མ་འདས། ཁོང་ཚོས་རང་གི་ཁེ་ཕན་ཞིག་རིག་གིན་ཡོད་པས་ཡིན། དེས་ན་དཀའ་ཚེགས་ཅན་གྱི་ཚེ་འདིའི་དོན་ཆུང་། སྡུག་སྡིག་པ་གཉིས་དང་མ་སྦགས་ན་མི་འགྲུབ་རྒྱུ་དེ་དག་བསྐྱུར་ནས། དོན་ཆེན་རང་གཞན་གཉིས་ཀ་ལ་ཕན་ཐོགས་ཆེ་བའི་དམ་ཆོས། མི་རིགས་གཞན་གྱི་སྐད་དང་ཡི་གེ་བརྒྱུད་ནས། ཨེ་ལོན་ཨེ་ཤེས་ལྟ་མི་དགོས་པར་རང་མི་རིགས་ཀྱི་མེས་པོ་གོང་མ་བཀའ་དྲིན་ཅན་ཚོས། སྐུ་ངལ་བརྒྱ་ཕྲག་གིས་མ་ཚད་སྐུ་སྲོག་དང་བསྡོས་ནས། གསོག་ཉར་བྱས་ནས་བཞག་མཛད་པའི་ནོར་བུའི་ནང་གི་ནོར་མཆོག རིན་ཐང་གཞལ་དུ་མེད་པ། བརྒྱུད་པ་མ་ཆད་གཅིག་ནས་གཅིག་ལ་བརྒྱུད་ནས། ཕ་ནོར་བུ་སྐལ་དུ་བཞག་པ་འདི་ཉམས་སུ་མ་བླངས་ན། སྨྱོན་པའི་ནང་གི་སྨྱོན་པ། གཟའ་རོའི་ནང་གི་གཟའ་གོག གླེན་པའི་ནང་གི་གླེན་པ། ཤེས་རྨོངས་བླུན་པོ་ཡིན་པའི་རྟགས་སྟོན་བཞིན་ཡོད་པའོ། །འདི་ལྟར་འདང་བརྒྱབ། བསམ་བློ་བཏང་ན། རང་རེ་མི་འདི་མ་ཆགས་གོང་ནས་ས་འདི་ཆགས། ས་འདི་ཆགས་ནས་ས་སྟེང་མི་རྗེས་ཀྱིས་བཀང་། མི་སྐྱེས་ཚད་གཅིག་ཀྱང་ཤི་མེད་ན། ས་ཐོག་ཏུ་ཤོང་བ་མིན་རྒྱུའི་མི་མང་པོ་ཞིག་བྱུང་མྱངས་ཡོད། དེའི་ནང་ན་ཚེ་འདིའི་འདུག་ཚིས་སྒྲུབ་མཁས་པ། མངའ་ཐང་འབྱོར་བ་ཡོད་པ། སྟོབས་དང་གཟི་བརྗིད་རྒྱས་པ། རང་རེ་དུས་བསྐལ་པ་ངན་པའི་མི་ལས་ཆེས་ལྷག་པ་མང་པོ་ཞིག ཚེ་གཅིག་བསགས་པའི་ནོར་རྫས་ཁྱེར་དབང་མ་གཏད། གཅེས་པའི་ཕ་མ་སྤུན་སྲིང་དང་འགྲོགས་ལོང་མ་བྱུང་ནས། ཚེ་འདིའི་འདོད་ཡོན་གྱིས་མ་འཚེངས་བཞིན་དུ། དབང་མེད་གཤིན་རྗེའི་ཞགས་ཁ་ནས་གཟུར་རྒྱུ་མ་ལོན་ནས། མི་འདོད་བཞིན་དུ་ཤི་མིག་གསོན་ལ་བལྟས། མི་བོར་བས་མ་ཚད། མིང་ཡང་བོར་ནས། ལས་དཀར་ནག་གཉིས་ཀྱི་ཁུར་བོ་གཞན་དང་མ་མཚུངས་པ་ཞིག་ཁུར་ནས་སོང་བ་ཤ་སྟག་ཡིན། རང་ཅག་ད་ལྟའི་མི་ཡིས་ཀྱང་དེ་དང་དེ་བཞིན་དུ། ཆོས་གཏན་ནས་མ་གོ་བ་མིན་པར་ཅུང་ཟད་གོ་ཡང་། གནད་ཇི་བཞིན་མ་རིག རྒྱུ་འབྲས་ཀྱི་འགྲོ་སྟངས་ངོ་མ་དེ་ངོས་མ་ཟིན་པས་དགེ་སྡིག་འཆོལ་ཉོག་ཏུ་སྤྱད། མི་རྟག་པའི་ངེས་ཤེས་གདེང་ནས་མེད་པས་ཤི་སྣང་ཞེ་ལ་མ་ཤར། འཁོར་བའི་སྡུག་བསྔལ་སྡུག་བསྔལ་ཡིན་པར་མ་ཤེས་ནས་བདེ་སྡུག་གོ་ནོར། དེར་ཞེན་ཅིང་ཆགས་ནས་དལ་འབྱོར་སྟོང་ལོག་བྱེད་པར་ཉེ་རུ་ཡོད་པ་ཡིན། ཆོས་སྒྲུབ་དགོས་ཀྱང་ད་རུང་མིན། དང་པོ་གནད་འདི་དང་དེ་ཡིས་ཆེ་འདུག སྔོན་དུ་འདི་དག་ལས་ནས་གྲུབ་རྗེས་དེ་ནས་ཡིན་བསམ་ནས། ལོ་ཟླ་རྡོག་མ་ཁ་ཤས་དེ། ཉིན་ཡར་ལངས་ནས་མི་ཁོམ་པས་གཅིག་ཟད། མཚན་མར་ཉལ་ཏེ་གཏི་མུག་གཉིད་ཞབས་ནས་གཅིག་ཟད། ཉིན་མཚན་ལྟེབ་བསྣོལ་གྱིས་མི་ཚེ་འདོམ་ལ་གཞལ་དུས། ཆོས་སྒྲུབ་པའི་དུས་ཚོད་ལྷག་མ་ཞིག་གང་ན་ཡོད་དེ། ལས་མཇུག་མ་རྫོགས་གོང་ནས་ཕྱི་ལྟས་མེད་པའི་ས་ཕྱོགས་སུ་རང་ཤུགས་ཀྱིས་འགྲོ་བར་བྱེད་ནས་མི་འགྲོ་ཐབས་མེད་ལ་ཐུག་པ་ཡིན། དེ་རང་རེའི་སྔུན་ལ་ཡོད་པའི་རྒྱ་ལམ་ཡིན། དཔལ་སྤྲུལ་རིན་པོ་ཆེས། སྲིད་པའི་བདེ་འབྱོར་གཡོ་བའི་ཟློས་གར་མཁན། །འདི་གཅིག་ཁོ་ནས་སྔར་ཡང་འགྲོ་རྣམས་བསླུས། །ཚེ་གང་འགྲོགས་ཤིང་འཆི་བའི་ཕྱི་ལམ་དུ། །ཞུགས་པའི་ཚེ་ན་བདག་ཉིད་གཅིག་པུར་མཐོང་། །ཞེས་གསུངས་པ་འདི་ལུང་བསྟན་ཞིག་སྟེ་ལུང་བསྟན་འདི་ང་ལ་གསུངས་པ་ཡིན་འདུག་སྙམ་པའི་ཐོག་ཏུ་བརྒྱབ་སྟེ། ད་གཟོད་མི་ཚེའི་འགྲོ་ལམ་རིང་མོའི་སྔོན་སོང་གི་རྐང་རྗེས་ལག་རྗེས་ལ་གཅིག་བལྟས་ཚེ། འགྱོད་པ་རང་གིས་ཉོས་པ་ལྟ་བུའི་འགྱོད་གདུང་གིས་མནར་རུང་། དེ་དུས་ཐབས་མེད་ལས་མེད་ཡིན་པའི་ཚུལ་ལ་ཁོག་བརྩིས་ད་ནས་ཕོག་དགོས་པ་ནི། སྐྱེས་ཕོ་རབ་ཕོ་འབྲིང་ཕོ་མཐའ་གསུམ། །དྲན་སྔ་ཕྱི་མ་གཏོགས་འདྲ་འདྲ་ཡིན། །ཟེར་བས། བློ་ཡག་པ་སྔོན་ནས་དྲན་ན་མཁས་པ་ཡིན། ལས་འགྱོད་པ་རྗེས་ནས་སྐྱེས་ན་བླུན་པོ་ཡིན་པའི་ཚུལ་དེ་ལྟར་རང་ཉམས་དང་བསྟུན་པའི་ལག་ལེན་དངོས་ཀྱི་འདྲ་འབག་སྔོན་དུ་བཏང་བ་དང་ཆབས་ཅིག་ཏུ། གང་འཆད་ཉན་བྱ་བ་རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོའི་གསུང་ཐོག་མཐའ་བར་དགེའི་གཏམ་གྱི་ཆོས་ཚན་འདི་ཉིད་བློ་སྦྱོང་སྔོན་འགྲོ་ལྟར་དུ་གཙོ་བོར་བྱས་ཏེ་བཀྲལ་བ། ཐུགས་རྗེ་ཆེན་པོའི་ཆོས་སྐོར་དང་སྦྲེལ་བ། ཆོས་ཕུང་བརྒྱད་ཁྲི་བཞི་སྟོང་གི་སྙིང་པོ་གསུང་མཆོག་ཡི་གེ་དྲུག་མ་བཟླས་པའི་ཕན་ཡོན་དང་འབྲེལ་བ་སྟེ་སྤྱི་ཆིངས་གསུམ་གྱིས་བཤད་པ་ལས། དང་པོ་ཀླད་ཀྱི་དོན་སོང་ཞིང་། གཞུང་དོན་ལས་ཀྱང་དངོས་གཞིའི་ལྟ་སྒོམ་གྱི་སྐོར་ནས་འགའ་ཞིག་སོང་ནས། གསུམ་པ་ལྟ་སྒོམ་གྱི་གནད་མཐའ་དག་གསུང་མཆོག་ཡི་གེ་དྲུག་མར་བསྡུས་ཏེ་བསྟན་པ། གསུམ་པ་ལྟ་སྒོམ་གྱི་གནད་མཐའ་དག་གསུང་མཆོག་ཡི་གེ་དྲུག་མར་བསྡུས་ཏེ་བསྟན་པ་ལ། སྤྱིར་མདོར་བསྟན་པ་དང་། བྱེ་བྲག་རྒྱས་པར་བཤད་པ་གཉིས་སོ། །དང་པོ་ལ་གཉིས། རེ་ས་ཁྱེད་ལས་མེད་པའི་ཚུལ་བསྟན་པ། ཕན་ངེས་ཡིག་དྲུག་བགྲང་བའི་དུས་ལ་བབ་ཚུལ་བསྟན་པའོ།། དང་པོར་རེ་ས་ཁྱེད་ལས་མེད་པའི་ཚུལ་བསྟན་པ། དང་པོར་རེ་ས་ཁྱེད་ལས་མེད་པའི་ཚུལ་བསྟན་པ་ནི། ཀྱེ་མ་བདག་གི་མགོན་གཅིག་ཐུགས་རྗེའི་གཏེར།། རྩ་བའི་བླ་མ་མགོན་པོ་སྤྱན་རས་གཟིགས།། གསུང་གི་སྙིང་པོ་དམ་ཆོས་ཡི་གེ་དྲུག། ད་ནི་རེ་ས་ཁྱེད་ལས་མི་འདུག་གོ། ཞེས་གསུངས་ཏེ། ཀྱེ་མ་ཞེས་ཉམ་ཐག་ང་རོའི་འབོད་པའི་ཚིག་གིས་སྣ་དྲངས་ཏེ། བདག་ལས་ངན་ཉམ་ཐག་གི་འགྲོ་བ། སྔར་བསགས་བསོད་ནམས་ཀྱི་ས་བོན་མེད་པས། ད་ལྟར་སྡུག་བསྔལ་ཅན་འཁོར་བའི་གནས་འདིར་ཚུད། ད་ལྟར་རྣམ་དཀར་གྱི་དགེ་ལས་མ་བསྒྲུབས་པས། ཕྱི་མ་ངན་སོང་གི་གནས་ལས་ཐར་ཐབས་མེད་པ། སྔར་འཁྲུལ་འཁྲུལ་བའི་ཡ་མཐའ་རིག་རྒྱུ་མེད་པའི་ཐོག་ཏུ། ད་འཁྲུལ་འཁྲུལ་བའི་ཕྱི་མཐའ་མངོན་ཐབས་མེད་པའི་འདི་ལྟར་བཙན་ཁང་ལྕགས་མཁར་སྒོ་མེད་ཀྱི་ནང་དུ་བཙུད་པའམ། བུང་བ་བུམ་ནང་དུ་བཅུག་པ་ལྟ་བུའི་འཁོར་གནས་འགྲོ་བ་རིགས་དྲུག དེ་ལས་ཀྱང་མང་ཆེ་ས། ཡུན་རིང་ས་རུ་ངན་སོང་ངན་འགྲོའི་གནས། མུ་མཐའ་མེད་པར་འཁྱམས་དང་འཁྱམ་འགྱུར་གྱི་ལས་ངན་གྱི་སེམས་ཅན་བདག་གིས། འབོད་སའི་མགོན་ནམ་སྐྱབས་སུ་གྱུར་པ་ཉག་གཅིག་ཁྱེད་ལས་མེད་པས། རྒྱལ་ཀུན་སྙིང་རྗེའི་རང་གཟུགས། ལྷག་པའི་ལྷ་མཆོག་ཏུ་ཤར་པའི་ཐུགས་རྗེའི་གཏེར་ཆེན། རྩ་བའི་བླ་མ་སྟེ། སྤྱིར་བླ་མ་ལ་དབྱེ་བ་མང་ཞིང་། བླ་མ་ཟེར་ཚད་བླ་མ་མིན་པར་གོང་དུ་ཤིང་ཏོག་ཨ་མྲའི་འབྲས་བུ་ལ་སྨིན་མ་སྨིན་གྱི་མུ་བཞིར་ཕྱེས་ནས་གསུངས་པ་ལྟར་དུ། མིང་གི་བླ་མ། དོན་གྱི་བླ་མ། མིང་དོན་གཉིས་ཀྱི་བླ་མ། མིང་དོན་གཉིས་མིན་གྱི་བླ་མ་སྟེ་བཞིར་ཕྱེ་རྒྱུ་ཡོད་ཀྱང་། སྤང་བླང་གི་ཕྱོགས་གཉིས་སུ་ཕྱེས་ནས་བཤད་ན། སྤང་བྱའི་བླ་མ་ལ་མེ་ལྟ་བུའི་བླ་མ། ཁྱི་འབྲིད་པ་ལྟ་བུའི་བླ་མ། ཚོང་པ་ལྟ་བུའི་བླ་མ་དང་གསུམ་བཤད་པ་ལས། དང་པོ་མེ་ལྟ་བུའི་བླ་མ་ཉོན་མོངས་པ་དུག་གསུམ་ཤས་ཆེ་བ་དང་ཉེ་ན་མེ་ལ་རེག་ཚེ་ཚིག་པ་བཞིན་དུ་རང་ཉིད་ཉམས་ཤིང་རྒུད་པ་བྱེད། ཁྱི་འབྲིད་པ་ལྟ་བུའི་བླ་མ་ནི་ཟས་ནོར་ལ་འདོད་པ་ཆེ་ཞིང་། མགུ་ཐབས། འཚེང་ཐབས་དཀའ་བའོ། །ཚོང་པ་ལྟ་བུའི་བླ་མ་ནི་རྒྱུ་ཟས་ཡོན་འབུལ་གྱི་ཁེ་ཐོབ་ལ་ལྟ་བས་དེ་དག་སྤང་བྱའི་བླ་མའོ། །དང་དུ་བླང་བྱའི་བླ་མ་ལ་ཕ་ལྟ་བུའི་བླ་མ། མ་ལྟ་བུའི་བླ་མ། རིན་པོ་ཆེ་ལྟ་བུའི་བླ་མ་དང་གསུམ་ལས། ཕ་ལྟ་བུའི་བླ་མ་ནི། གདམས་ཟབ་གནང་རྒྱུ་ཡོད་པ། དམ་པའི་ཆོས་ལ་མཁས་པ། བཀའ་ཡངས་ཤིང་ཐུགས་དཀྱེལ་ཆེ་བའོ། །མ་ལྟ་བུའི་བླ་མ་ནི། བསྟེན་ན་ཐུགས་ལ་འདོགས་པའམ་རྗེས་སུ་གཟུང་བ། སྙིང་རྗེའི་བརྩེ་བ་ཅན། བྱམས་པ་དང་ནམ་ཡང་མི་འབྲལ་བའོ། །རིན་པོ་ཆེ་ལྟ་བུའི་བླ་མ་ནི། བྱིན་རླབས་ལྡན་པ། འགྲོ་དོན་ཆེ་བ། གྲུབ་པ་ཐོབ་པ་ཡིན་པས་དེ་ལྟ་བུའི་བླ་མ་དེ་གསུམ་ནི་དུས་ཐ་མའི་སྐབས་འདི་ལྟ་བུ་ལ་དཀོན་པ་ཡིན་གྱི། གལ་ཏེ་རྙེད་ན་དང་དུ་བླངས་ཏེ་བསྟེན་དགོས་སོ། །དེ་ཡང་དབང་བསྐུར། གདམས་ངག་གཏད། སྒྲུབ་ལུང་ཕོག ཁྱད་པར་དུ་རང་སེམས་སངས་རྒྱས་སུ་ངོ་སྤྲོད་མཁན་ནི། ཡན་ལག་གི་བླ་མ་མིན་པར་རྩ་བའི་བླ་མ་ཡིན་པས། དེ་ལྟ་བུའི་རྩ་བའི་བླ་མ་དང་གཉིས་སུ་དབྱེར་མ་མཆིས་པའི་མགོན་པོ་སྤྱན་རས་གཟིགས་ཞེས་གསུངས་དུས། སྤྱན་རས་གཟིགས་ཞེས་པའི་ཚིག་གི་ངེས་ཚིག་འགྲེལ་ན། གང་ལ་གཟིགས་པའི་ཡུལ་དྲུག གང་གིས་གཟིགས་པའི་སྤྱན་དྲུག ཇི་ལྟར་གཟིགས་པའི་ཚུལ་དྲུག ཐུགས་རྗེ་དྲུག ཆེ་བ་དྲུག་བཅས་བཤད་རྒྱུ་ཡོད་པས། གང་ལ་གཟིགས་པའི་ཡུལ་དྲུག་ནི། འགྲོ་བ་རིགས་དྲུག་གི་སེམས་ཅན་ཐམས་ཅད་དོ། །གང་གིས་གཟིགས་པའི་སྤྱན་དྲུག་ནི། ཤའི་སྤྱན། ལྷའི་སྤྱན། ཆོས་ཀྱི་སྤྱན། སངས་རྒྱས་ཀྱི་སྤྱན། ཐུགས་རྗེའི་སྤྱན་ལ་སོགས་པའོ། །ཇི་ལྟར་གཟིགས་པའི་ཚུལ་དྲུག་ནི། ཐུགས་རྗེ་མཉམ་པ་རིས་མེད་ཀྱིས་སེམས་ཅན་སྤྱི་དང་། ཁྱད་པར་དུ་བོད་ཁ་བ་ཅན་གྱི་ཞིང་ཁམས་ལ་ལྷག་པར་གཟིགས་། སྟོང་དང་སྙིང་རྗེ་དབྱེར་མེད་ཀྱིས་ཟུང་འཇུག་གི་ཚུལ་ལ་གཟིགས། གདུལ་བྱ་དག་དང་མ་དག་གི་སེམས་ཅན་ལ་སྣ་ཚོགས་ཐབས་ཀྱིས་གཟིགས། གསོལ་བ་འདེབས་པའི་གང་ཟག་ལ་བྱིན་གྱིས་རློབ་ཅིང་མྱུར་དུ་གཟིགས། སྙིང་པོ་ཡི་གེ་དྲུག་པ་ཟློས་པ་ལ་བུ་གཅིག་པ་ལ་མས་འབོད་པ་ལྟར་ཐུགས་བརྩེ་བ་ཆེན་པོས་སྐད་ཅིག་ལ་གཟིགས་སོ། །ཐུགས་རྗེ་དྲུག་ལ། སྐུས་འདུལ་བའི་ལྷ་དྲུག གསུང་གིས་འདུལ་བའི་སྔགས་དྲུག ཐུགས་ཀྱིས་འདུལ་བའི་དགོངས་པ་དྲུག་གིས་སེམས་ཅན་ལ་ཐུགས་རྗེས་གཟིགས་པའོ། །སྐུས་འདུལ་བའི་ལྷ་དྲུག་ལ། སྤྱན་རས་གཟིགས། སྣང་བ་མཐའ་ཡས། རྟ་མགྲིན། སྒྲོལ་མ། ལྷ་མོ་ཁྲོ་གཉེར་ཅན། དོན་ཡོད་ཞགས་པ་དང་དྲུག་གོ །གསུང་གིས་འདུལ་བའི་སྔགས་དྲུག་ལ། ཨཱོྂ་ལྷའི་ཐུབ་པས་ལྷ་འདུལ། མ་ལྷ་མ་ཡིན་གྱི་ཐུབ་པས་ལྷ་མ་ཡིན་འདུལ། ཎི་མིའི་ཐུབ་པས་མི་འདུལ། པད་བྱོལ་སོང་གི་ཐུབ་པས་བྱོལ་སོང་འདུལ། མེ་ཡི་དྭགས་ཀྱི་ཐུབ་པས་ཡི་དྭགས་འདུལ། ཧཱུྃ་དམྱལ་བའི་ཐུབ་པས་དམྱལ་བ་འདུལ་བའི་སྔགས་དང་དྲུག་གོ །ཐུགས་ཀྱིས་འདུལ་བའི་དགོངས་པ་དྲུག་ནི། ཆོས་ཉིད་རང་དོན་དང་འབྲེལ། ཐུགས་རྗེ་གཞན་དོན་དང་འབྲེལ། ལྟ་བ་ཕྱོགས་བྲལ་དང་འབྲེལ། སྒོམ་པ་ཏིང་འཛིན་དང་འབྲེལ། སྤྱོད་པ་ངེས་མེད་དང་འབྲེལ། འབྲས་བུ་དམིགས་མེད་དང་འབྲེལ་བ་རྣམས་སོ། །ཆེ་བ་དྲུག་ནི། དགོངས་པ་མཁའ་ལྟར་ཡེ་གནས་ཀྱི་ཆེ་བ། ཐུགས་རྗེ་ཉེ་རིང་དང་ཕྱོགས་རིས་མེད་པས་སྤང་ལེན་བྲལ་བའི་ཆེ་བ། སྤྲུལ་བ་སྣ་ཚོགས་སུ་བསྟན་ནས་ཅིར་ཡང་སྣང་དུ་རུང་བས་གར་ཡང་མཐུན་པའི་ཆེ་བ། མ་བྱམས་བུ་ལ་བརྩེ་བ་ལྟ་བུའི་བསླུ་བ་མེད་པའི་ཆེ་བ། རིགས་དྲུག་གང་ལ་གང་འདོད་དུ་སྣང་བས་འདོད་འབྱུང་ནོར་བུ་ལྟ་བུའི་མཐུན་སྣང་གྲུབ་པའི་ཆེ་བ། ཐུགས་རྗེ་རྒྱ་མཚོ་ལྟར་དུ་ཟབ་པ་ཡིན་པས་གཏིང་མཐའ་མེད་པའི་ཆེ་བ་དང་རྣམ་པ་དྲུག་གོ །དེ་དག་ལ་སོགས་པ་ཆེ་བའི་ཡོན་ཏན་གྱི་མཐའ་མེད་དོ། །སྤྱན་རས་གཟིགས་ཀྱི་ཡོན་ཏན་བཤད་དགོས་ན། རྒྱལ་བའི་ལྗགས་ཀྱང་རྡུགས། གསུངས་པ་ལྟ་བུ་ཡིན་ཞིང་། རྒྱལ་བའི་ལྗགས་ལ་གསུང་རྒྱུ་མེད་པས་མིན་ཡང་། སེམས་ཅན་གྱི་བློས་དཔོག་པའི་སྒྲ་ཚིག་གིས་སྨྲ་བརྗོད་ཀྱི་ཡུལ་ལས་འདས་པས། སེམས་ཅན་གྱི་སྒྲ་ཚིག་གི་ཐོག་ནས་གསུངས་རྒྱུ་མེད་པའོ། །དེ་ལྟ་བུའི་སྤྱིར་རིགས་དྲུག་འགྲོ་བའི་མགོན་པོ། སྒོས་གངས་ཅན་བོད་ཀྱི་མགོན་ནམ་ལྷ་སྐལ་ཡིན་པས་མགོན་པོ་སྤྱན་རས་གཟིགས། གསུང་གི་སྙིང་པོ་དམ་ཆོས་ཡི་གེ་དྲུག་མ་གོང་ནས་གསུང་གིས་འདུལ་བའི་སྔགས་དྲུག་གི་སྐབས་ནས་བཤད་པ་ཡིན་ཡང་། ཆོས་ཕུང་བརྒྱད་ཁྲི་བཞི་སྟོང་དེ་གསུང་མཆོག་ཡི་གེ་དྲུག་མ་ཨཱོྂ་མ་ཎི་པདྨེ་ཧཱུྃ་ཞེས་པའི་ནང་དུ་འདུས་པ་ཡིན་ནོ། །ཨཱོྂ་ཡེ་ཤེས་ལྔ་ལྡན་ཡིན་པས། མ་ཎི་རྡོ་ལ་རྐོ་བའམ་ས་ལ་འབྲི་སྐབས་སུ་ཨཱོྂ་ལ་འ་ཆུང་ངེས་པར་དགོས། བརྡ་སྤྲོད་ཅུང་ཙམ་ཤེས་ཟེར་མཁན་འགའ་རེས་མི་དགོས་ཟེར་སྲིད་རུང་། ཁོ་རང་ཐོས་རྒྱ་ཆུང་བས་ཡིན། ཨཱོྂ་ལ་འ་ཆུང་ཅིའི་ཕྱིར་དགོས་ཤེ་ན། ཨཱོྂ་ཡེ་ཤེས་ལྔ་མཚོན་བྱེད་ཀྱི་ཡི་གེ་ཡིན་པས། ཨ་ཁོག་ཆོས་ཀྱི་དབྱིངས་ཀྱི་ཡེ་ཤེས། ཐིག་ལེ་མེ་ལོང་ལྟ་བུའི་ཡེ་ཤེས། ཟླ་ཚེས་མཉམ་པ་ཉིད་ཀྱི་ཡེ་ཤེས། ན་རོ་སོ་སོར་རྟོགས་པའི་ཡེ་ཤེས། ནཱ་ད་བྱ་བ་གྲུབ་པའི་ཡེ་ཤེས་ཡིན་པས། ཨཱོྂ་གྱིས་ཡེ་ཤེས་ལྔ་དེ་ལྟར་མཚོན་པའོ། །མ་ཐུགས་རྗེ་ཀུན་ཁྱབ། འཕགས་པ་སྤྱན་རས་གཟིགས་ཀྱི་ཐུགས་རྗེ་ཀུན་ལ་སྙོམས་པས་མ་བཞིན་དུ་བརྩེ་བར་མཛད་པའོ། །ཎི་འཁོར་བ་རང་ལོག ཎི་ལོག་གི་ཡི་གེ་འདི། ཐུགས་རྗེ་ཆེན་པོས་འཁོར་བ་ན་གནས་ནས་འཁོར་བའི་སེམས་ཅན་གྱི་དོན་མཛད་ཀྱང་། འཁོར་བའི་སྐྱོན་གྱིས་མ་གོས་པར་འཁོར་བའི་སེམས་ཅན་འཁོར་བའི་གནས་ནས་བླ་ན་མེད་པའི་བྱང་ཆུབ་ཏུ་འདྲེན་པའོ། །པད་ཐབས་ཤེས་འབྲེལ་བའི་ཡི་གེ་སྟེ། པ་ཐབས་ཀྱི་ཞགས་པས་འཁོར་བ་ཐུགས་རྗེས་འཛིན་ལ། ད་ཤེས་རབ་སྟོང་བའི་མཚོན་གྱིས་རྣམ་རྟོག་གི་དྲ་བ་བཅད་ནས་འཁོར་བའི་གནས་སྟོང་བར་བྱེད་པའོ། །མེ་ཡེ་ཤེས་རང་གསལ། ཡེ་ཤེས་ཀྱི་མེ་རང་གསལ་རང་བྱུང་དུ་ཤར་བས། འཁོར་བའི་མ་རིག་པའི་མུན་པ་སེལ་བ་དང་ཆབས་ཅིག་ཏུ་རྣམ་པར་རྟོག་པའི་བུད་ཤིང་སྲེག་པར་བྱེད་པའོ། །ཧཱུྃ་རྡོ་རྗེ་ལྟ་བུ་མི་འགྱུར་པའི་ཡི་གེ་སྟེ། བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་གསང་བ་ཆེན་པོ་མཚོན་བྱེད། ཐུགས་རྗེ་ཆེན་པོའི་ཐུགས་ཆོས་ཀྱི་དབྱིངས་སྟོང་པ་ཉིད་ཀྱི་རྡོ་རྗེ་དེ་སྙིང་རྗེའི་བརྩེ་བ་ཆེན་པོ་དང་སྟོང་བར་དབྱེར་མེད་པས་རྟག་ཏུ་སེམས་ཅན་གྱི་དོན་མཛད་པ་ལས་མི་འགྱུར་བར་གནས་པའོ། །དེ་ལྟ་བུའི་གསུང་གི་སྙིང་པོ་དམ་ཆོས་ཡི་གེ་དྲུག་མ་སྟེ། ཉམ་ཐག་འགྲོ་བ་བདག་གི་མགོན་གཅིག་འཕགས་པ་སྤྱན་རས་གཟིགས་དང་། གསུང་གི་སྙིང་པོ་དམ་ཆོས་ཡི་གེ་དྲུག་མ་ཞེས་གདུང་བའི་ང་རོས་བོས་ཏེ། ད་ནི་རེ་ས་སྐྱབས་གནས་ཁྱེད་ལས་མི་འདུག་གོ །ཞེས་སྐྱབས་སུ་མཆི་བའི་སྨྲ་ངག་བཏོན་པའོ། །གསོན་འཇིག་རྟེན་གྱི་ཁམས་ན་ཡོད་དུས་ཕ་མ་གཉེན་བཤེས་བུ་ཚ་སྡེ་ཤོག་ཡོད་ཅིང་། དེ་ཐམས་ཅད་ཀྱང་ཉམ་ཆུང་། འཁོར་བའི་སྡུག་བསྔལ་གྱིས་མནར་བཞིན་ཡོད་པ། གཅིག་ལས་གཅིག་གིས་སྡུག་པ། གཅིག་ལས་གཅིག་གིས་རང་དབང་མེད་པ། གཅིག་ལས་གཅིག་གིས་ཉམ་ཆུང་བ་ཤ་སྟག་ཡིན་པས། རི་དང་མཚོ་ལ་གནས་པའི་ཡུལ་ལྷ་གཞི་བདག་ལ་མཆོད་པར་བྱེད་ཀྱང་། དེ་ཐམས་ཅད་ཀྱང་རང་ཉིད་འཁོར་བའི་གནས་ལས་མ་ཐར་བས་གཞན་ཇི་ལྟར་སྐྱོབ་ཐུབ་སྟེ་སྐྱོབ་མི་ནུས་པ་དེས་ན་སྐྱབས་གཅིག་རྩ་བའི་བླ་མ་དང་དབྱེར་མེད་མགོན་པོ་སྤྱན་རས་གཟིགས་ལ་མགོན་སྐྱབས་ཞུས་པའོ། །དེ་ཡིས་རེ་ས་ཁྱེད་ལས་མེད་པའི་ཚུལ་བསྟན་ནས། གཉིས་པ་ཕན་ངེས་ཡིག་དྲུག་བགྲང་བའི་དུས་ལ་བབ་ཚུལ་བསྟན་པ། གཉིས་པ་ཕན་ངེས་ཡིག་དྲུག་བགྲང་བའི་དུས་ལ་བབ་ཚུལ་བསྟན་པ་ནི། ཤེས་ཚད་གོ་བར་ལུས་ནས་ད་མ་ཕན།། བྱས་ཚད་ཚེ་འདིར་ཤོར་ནས་ད་མ་ཕན།། བསམ་ཚད་འཁྲུལ་པར་སོང་ནས་ད་མ་ཕན།། ཕན་ངེས་ཡིག་དྲུག་བགྲང་བའི་དུས་ལ་བབ།། ཅེས་གསུངས་ཏེ། ས་གངས་ལྡན་བོད་ཀྱི་ས་ཆ། ཆོས་ས་ཆོས་ཡུལ་དུ་སྐྱེས་པས་ཆོས་མ་གོ་ཞེས་རུང་གོ་ཞིང་། གཞུང་པོ་ཏིའི་རྩིག་པ་རི་ལྟ་བུ་ཡོད་པ་རྣམས་བལྟ་ཤེས་ན་ཐམས་ཅད་གདམས་ངག་ཁོ་ན་ཡིན་ལ། ཆོས་འཆད་ཉན་གྱི་རྒྱུན་ཡང་དར་བས་གང་ལ་གང་མཚམས་ཀྱི་ཐོས་བསམ་ཉན་བཤད་རེ་བྱས་ཀྱང་། ཐོས་པ་ཚིག་ཐོག གོ་བ་དཔེ་ཐོག་ཏུ་ལུས་ནས། བཤད་པ་བྱས་པ་ཚིག་སྐམ་ཞིག རྩོད་པ་བྱས་པ་སྟོང་འུར་ཞིག རྩོམ་པ་བྱས་ཀྱང་རང་རྒྱུད་ལ་མེད་པའི་བཤད་ཡམ། ཡང་ན་རང་ངོམ་གྱི་ཆེད། ཡང་ན་གཞན་སྐྱོན་ལ་ཟུར་ཟ། མདོར་ན་རང་གི་ངན་སྐྱོན་གཞན་ལ་བསྟན་པ་ལྟར་དུ་གྱུར་ཅིང་། སྐྱེ་བོ་མི་ནག་པ་ཞིག་ལ་མཚོན་ནའང་དཔེ་དེ་བཞིན་དུ། ཆོས་གོ་བ་གནའ་སྒྲུང་ཐག་རིང་གི་ལྟད་མོར་གྱུར། རང་རྒྱུད་ཀྱི་ཉམས་ལ་རན་པའི་ཆོས་དང་རང་རྒྱུད་སྦྱར་མ་ཐུབ་ནས། ནམ་ཞིག་གཤིན་རྗེའི་སྐྱེ་བུས་བདས་ནས་ཉམ་ཐག་གི་འཕྲང་ལ་གྱུར་ཚེ། ཤེས་ཚད་གོ་བར་ལུས་ནས་ཕན་ཐོགས་མ་ཡོད། བྱས་ཚད་དགྲ་འདུལ་ལུགས། གཉེན་སྐྱོང་ལུགས། རང་ཉིད་ལ་ཁེ་གྲགས་ཐོབ་ཐབས། རྒྱུ་ནོར་ལོངས་སྤྱོད་གསོག་ཐབས་ཁོ་ན་ལ་བསམ་བློ་བཏང་ནས། དེ་འབའ་ཞིག་མ་འགྲུབ་ནས་ཉིན་མཚན་དལ་མེད་དུ་སྡུག་དཀའ་ལས་ཐམས་ཅད་བརྒྱབ་ནས། ཉིན་མཚན་ལྟེབ་བསྣོལ་གྱིས་ལོ་དང་ཟླ་བ་གར་སོང་མ་ཤེས་ནས། ནམ་ཞིག་རང་ཉིད་ལོ་དུ་ཡིན་ཡང་གཞི་བརྩི་བྱེད་དགོས་པར་གྱུར་ནས། བྱིས་པ། གཞོན་པ། དར་མ་ནས་རྒས་པའི་བར་དུ་ལས་ལས་བཅས་བཅས། བྱས་ཚད་སྒྲུབ་ཚད་ཐམས་ཅད་། ཚེ་མཇུག་དགོང་ཁའི་གྲིབ་སོ་ལྟ་བུ་ལ་ཉེ་སྐབས་ཕྱོགས་བསྡོམས་ཤིག་བརྒྱབ་ན། བྱས་ཚད་ཚེ་འདིའི་དོན་ཞིག་མ་གཏོགས་མེད་ཅིང་། དྲང་པོར་བྱས་ནས་བཤད་ན་ཚེ་འདིའི་དོན་ཙམ་ཡང་སྒྲུབ་མ་ཤེས་ནས་མ་འགྲུབ་པས། འདི་ཕྱི་གཉིས་ཀའི་དོན་གང་ཡང་མ་འགྲུབ་ནས་ལུས་ཡོད། དགེ་བའི་གཟུགས་བརྙན་ཙམ་རེ་བསྒྲུབས་ཀྱང་། དེ་སྦྱོར་དངོས་རྗེས་ཀྱི་དམ་པ་གསུམ་གྱིས་མ་ཟིན་ནས། ཐེག་ཆེན་ཐར་བ་ཆ་མཐུན་བླ་ན་མེད་པའི་བྱང་ཆུབ་འགྲུབ་སྤྱད་ཕར་ཞོག རང་དོན་ཞི་བདེ་འགྲུབ་སྤྱད་ཀྱི་ཕྱོགས་ཙམ་ལ་ཡང་མ་ཉེ་བར། ལེགས་སྨོན་ཙམ་དང་། རང་དོན་ཉི་ཚེ་བ་ཞིག མདོར་ན་འཁོར་བ་སྒྲུབ་སྤྱད་ཙམ་ལས་མ་འགྲུབ་ནས། ཚེ་འདི་ཕྱི་གཉིས་ཀའི་སོ་མཚམས་ལ་ཐོན་དུས་ཕན་ཐོགས་ཡོད་པ་གཅིག་ཀྱང་མ་ཡོད་པའོ། །དེ་ཡང་བསམ་ཚད་འཁྲུལ་བར་སོང་བའི་རྐྱེན་གྱིས་ཡིན་ཏེ། འཆི་བ་འོང་སྙམ་ཞེ་ལ་མ་ཤར་ནས་རྟག་འཛིན་གྱིས་གཅིག་འཁྲུལ། ནོར་རྫས་གསོག་གྲུན་གྱིས་བདེ་སྐྱིད་སྒྲུབ་ཏུ་ཡོད་པར་སེམས་ནས་གཅིག་འཁྲུལ། རང་ཕྱོགས་གཉེན་དུ་བཟུང་། གཞན་ཕྱོགས་དགྲ་རུ་བཟུང་ནས་གཅིག་འཁྲུལ། རང་སྐྱོན་རང་གིས་མི་རིག་ནས་གཞན་སྐྱོན་རྗེས་ཟློས་བྱས་ནས་གཅིག་འཁྲུལ། དཀར་ནག་ལས་འབྲས་ཀྱི་དབྱེ་བ་མ་ཤེས་ནས་རྒྱུ་འབྲས་འཇོལ་ཉོག་ཏུ་སྤྱད་ནས་གཅིག་འཁྲུལ། དམ་པ་སྔུན་དུ་ཡོད་པ་མ་རིག་ནས་རྨོངས་དད་རྒྱང་དུ་འཇོག་ཚུལ་བྱས་པས་ཐར་བའི་ལམ་སྣེ་ཁྲིད་མཁན་མ་རྙེད་ནས་གཅིག་འཁྲུལ། སངས་རྒྱས་རང་ལས་སྒྲུབ་དགོས་ཚུལ་མ་ཤེས་ནས་འབྲས་བུ་གཞན་ལས་འབྱུང་དུ་རེ་ནས་གཅིག་འཁྲུལ། ཆོས་དང་རང་རྒྱུད་འདྲེས་ཐབས་མ་ཤེས་ནས་ཆོས་སྒྲུབ་ཅེས་པ་གཏོ་དང་། མདོས་འཕེན། མོ་འདེབས། ལྷ་ཀླུ་གཞི་བདག་མཆོད་རྒྱུ་ཡིན་སྣང་ཤར་ནས་འཁྲུལ་ཚབས་གཅིག་ཆེ། འཁྲུལ་བའི་འཁྲུལ་ལུགས་བཙོག འཁྲུལ་ཚུལ་སྣ་ཁ་མང་། འཁྲུལ་བ་ལམ་དུ་མ་ལོངས་བའི་ཚུལ་བཤད་ཚོད་ཡོད་པ་མིན། མདོར་བསྡུས་ན། ཚེ་འདིའི་བྱ་བ་གང་གིས་ཀྱང་འགག་རྩ་ཡག་ཉེས་ཆེ་སར་ཐུག་དུས་ཕན་མི་ཐོགས་པར། ཕན་ངེས་གསུང་མཆོག་ཡི་གེ་དྲུག་མ་འདི་ཡིན་པར་ད་གཟོད་ཤེས་པའོ། །འོན་ཀྱང་ཤེས་སྔ་མེད་པར་འཕྱིས་ཡོད་ཀྱང་། ད་ཐེངས་འདི་ཤེས་པ་ནི་རྩ་བའི་བླ་མ་མགོན་པོ་སྤྱན་རས་གཟིགས་ཀྱི་བྱིན་རླབས་ཡིན་ཞིང་། ཡིད་མོས་གུས་དད་པས་ཡིག་དྲུག་བགྲངས་ན། བྱིན་རླབས་རང་རྒྱུད་ལ་འཇུག་པའི་རྟེན་འབྲེལ་འགྲིག་པས། ད་ནི་གཅིག་སྐྱུར། གཉིས་སྐྱུར། བྱ་བ་ཐམས་ཅད་བསྐྱུར་ནས། འདི་ཕྱིའི་རང་གཞན་གྱི་དོན་ཆེན་གཅིག་པུ་མ་ཎི་ཡིག་དྲུག་བགྲང་བའི་དུས་ལ་བབ་པ་ཡིན། ཞེས་གསུངས་པའོ། །བར་དོའི་ཁྲིད་ཡིག་སོགས་ལས། དཔེར་ན་བྲག་ངོས་གཟར་མོ་ཁང་བརྩེགས་སྟོང་ཕྲག་མང་པོ་ཙམ་དུ་ཡོད་པའི་མཐོན་པོ་ཞིག་གི་ངོས་ནས། མི་ཞིག་ཐུར་དུ་ལྷུང་བཞིན་ཡོད་པའི་སྐབས་སུ། རྩྭ་ཕུང་གཅིག་པུ་ཞིག་བྲག་གསེང་ནས་ཚུར་སྐྱེས་ཡོད་པ་ལ་ལག་པ་གཉིས་ཀྱིས་འཐམ་ས་ལོན་ནས། དེར་སྤར་མོ་ཁེན་ནས་མ་ལྷུང་ཙམ་ཞིག་ཡོད་སྐབས། གཡས་ནས་ཙི་གུ་དཀར་པོ་ཞིག་བརྒྱུགས་ཏེ་རྩྭ་ཐུར་གཅིག་བཅད། གཡོན་ནས་ཙི་གུ་ནག་པོ་ཞིག་བརྒྱུགས་ཏེ་ཡང་རྩྭ་ཕུང་ལས་ཐུར་མ་གཅིག་བཅད་ནས་རྩྭ་ཕུང་ཇེ་ཉུང་ཇེ་ཕྲར་གྱུར། མར་བལྟས་ན་འོག་གི་དུག་མཚོའི་ནང་ན། དུག་གི་ཁ་རླངས་ཅན་གྱི་ཆུ་སྲིན་དང་། ཆུ་སྦྲུལ་མཐོང་དུས་འཇིགས་ཤིང་ཡ་ང་། ཡར་གནམ་ལ་བལྟས་ན་གནམ་སྔོན་མོ་མ་གཏོགས་རིག་རྒྱུ་མེད་ནས། ལྷུང་ལ་ཁད་པ་ཡོད་པའི་འཇིགས་སྐྲག་ཉམ་ངའི་སྐབས་དེར། བྲག་གི་རྩེ་མོ་ནས་མར་ཐག་པ་ཞིག་དཔྱངས་ནས། ཁྱོད་འདི་ལ་འཇུས་དང་ངས་ཁྱོད་སྐྱོབ་ཟེར་མཁན་ཞིག་ཡོད་ན་ཤིན་ཏུ་དགའ་བར་འགྱུར་བ་ལྟར་དུ། དཔེ་དེ་དང་གཅིག་མཚུངས་ཀྱི་དུས་ཚོད་ད་ལྟ་ལ་ཐོན་ཡོད་དོ། །རང་ཉིད་ཐུར་དུ་ལྷུང་བཞིན་ཡོད་པ་མིན་བསམ་ནའང་ད་ལྟ་དངོས་སུ་ལྷུང་བཞིན་ཡོད་ཅིང་། དོན་གྱི་ཐོག་ནས་བྲག་ཧ་མའི་ཐོག་ནས་ལྷུང་ན་ཚེ་གཅིག་གི་སྐྱེ་བ་གཅིག་བརྗེས་པ་ཙམ་ཡིན་ཡང་། ད་རེས་འདི་ནས་ལྷུང་དུས་ཚེ་རབས་སྐྱེ་བ་མང་པོའི་རིང་ལ་ལྷུང་གཅིག ངན་སོང་ངན་འགྲོའི་གནས་སུ་འཁྱམ་གཅིག་ཡིན་ལས་ཆེ་བས། བྲག་ཧ་མའི་རྩེ་ནས་ལྷུང་བ་ལྟར་དུ་ངན་སོང་གི་གནས་སུ་རྡོ་བཞིན་ལྷུང་བའི་བར་ནས། མི་ཚེ་རྩྭ་ཕུང་ལྟ་བུ་ལ་འཐམས་པའི་ཡུན་ཐུང་ངུ་འདི་ཡང་། ཉིན་དཀར་མོའི་འར་འུར་གྱི་ངང་ནས་གཅིག་ཟད། མཚན་ནག་པོའི་གཏི་མུག་གི་གཉིད་ཞབས་ནས་གཅིག་ཟད། དེ་ལྟར་ཉིན་མཚན་ལྟེབ་བསྣོལ་གྱིས་མི་ཚེ་རྩྭ་ཕུང་ལྟ་བུ་དེ་ཟད་ནས་ལྷུང་ལ་ཉེ་སྐབས། རྩ་བའི་བླ་མ་དང་མགོན་པོ་སྤྱན་རས་གཟིགས་དབྱེར་མེད་པ་ཡིས་ཐུགས་རྗེའི་དཔྱང་ཐག་ཅིག་བར་སྣང་ནས་དཔྱངས་པ་དེ་ལ་མི་འཐམ་ཟེར་ན། སྙིང་མེད་ཀྱི་སྨྱོན་པ་ཡིན་འདུག་སྙམ་པའི་རང་ངོ་འདི་ལྟར་བཤད་ན་འཕྲོད་རྒྱུ་ཡོད་དོ། །འོན་ཀྱང་ཐུགས་རྗེའི་དཔྱང་ཐག་ལ་འཐམ་མ་ཤེས་ན། འཕགས་པ་སྤྱན་རས་གཟིགས་ལ་ཐུགས་རྗེའི་ལྕགས་ཀྱུ་ཡོད་ཀྱང་། རང་རེ་ལས་ངན་གྱི་སེམས་ཅན་ལ་དད་པའི་ཨ་ལོང་མེད་ནས། འདྲེན་དགོས་ཀྱང་འདྲེན་ཐབས་མེད་པའི་ཚུལ་མགོན་པོ་སྤྱན་རས་གཟིགས་ཀྱིས་དང་པོ་བྱང་ཆུབ་མཆོག་ཏུ་ཐུགས་བསྐྱེད་སྐབས། འོད་ཟེར་རྣམ་པ་དྲུག་ཏུ་སྤྲོས་ཤིང་འཁོར་བ་དོང་ནས་ལན་གསུམ་སྤྲུགས་ནས་གཟིགས་དུས་སྔར་ལས་མང་བ་ལྟར་ཡོད་པ་ནི་རང་ཅག་ཡིན་ཞིང་། ཐེངས་གཅིག་གཉིས་ཙམ་གྱིས་ཅི་ལ་ཚད། ཕྱོགས་བཅུ་དུས་གསུམ་གྱི་རྒྱལ་བས་འདྲེན་མ་ཐུབ་པར་ལུས་པ་ལ། ད་རེས་ཀྱི་མཐོ་རིས་མིའི་ལུས་རྟེན་རྩྭ་ཕུང་ལ་འཐམ་བཞིན་ཡོད་པ་ལྟ་བུ་འདིའི་ཐོག་ནས་ལམ་ཞིག་མ་རྙེད་ན། ཤུད་ཐེངས་གཅིག་གིས་མཐའ་མེད་འཁོར་བའི་དུག་མཚོའི་ནང་དུ་རྡོ་ལྕི་མོ་སྐེ་ལ་བཏགས་ནས། མཚོ་ཞབས་མེད་ཀྱི་ནང་དུ་ལྕེབས་པ་ཨ་ན་མ་ན་ལྟར་དུ་འགྱུར་བ་ནི་ཐོད་པའི་ཐེལ་ཙེ་ཡིན་ནོ། །འགྲོ་བ་རིགས་དྲུག་གི་གནས་ཀྱང་གོང་ནས་བཤད་པ་ལྟར་དུ། དམྱལ་བར་སྐྱེས་ན་ཚ་གྲང་ལ་སོགས་པའི་སྡུག་བསྔལ་ཆེ། ཡི་དྭགས་སུ་སྐྱེས་ན་བཀྲེས་སྐོམ་ལ་སོགས་པའི་སྡུག་བསྔལ་ཆེ། དུད་འགྲོར་སྐྱེས་ན་གླེན་ལྐུགས་ལ་སོགས་པའི་སྡུག་བསྔལ་ཆེ། མིར་སྐྱེས་ཀྱང་སྐྱེ་རྒ་ན་འཆི་ལ་སོགས་པའི་སྡུག་བསྔལ་ཆེ། ལྷ་མ་ཡིན་དུ་སྐྱེས་ཀྱང་འཐབ་རྩོད་ལ་སོགས་པའི་སྡུག་བསྔལ་ཆེ། ལྷར་སྐྱེས་ཀྱང་འཕོ་ལྟུང་ལ་སོགས་པའི་སྡུག་བསྔལ་ཆེ་བ་དེས་ན་། འཁོར་བའི་གནས་ན་བདེ་བ་མེད། །མི་གཙང་ཁང་བར་དྲི་ཞིམ་མེད། །ཅེས་གསུངས་པ་ལྟར་དུ། འཁོར་བ་སྡུག་བསྔལ་གྱི་རང་བཞིན་ཡིན་པས་གང་དུ་སྐྱེས་ཀྱང་། སྐྱིད་མེད་པས་མ་ཚད་སྡུག་འབའ་ཞིག་གིས་མནར་བཞིན་ཡོད་པས། སྡུག་བསྔལ་དེ་ཐམས་ཅད་ལས་ཐར་སྤྱད་ཀྱི་ཐར་ལམ་ཉག་གཅིག་ནི། དམ་པའི་ཆོས་བསྒྲུབ་པ་འདི་ལས་གཞན་ཞིག་ཡོད་པ་མིན་ནོ། །ཐར་ལམ་སྒྲུབ་སྤྱད་ཀྱི་ལུས་རྟེན་འདི་ཡང་གཅིག་ན་རྒྱུན་གྱིས་མི་རྟག་སྟེ་ཉིན་མཚན་ལོ་དང་ཟླ་བ་སྤུངས་པའི་མི་ཚེ་འདི་སྐད་ཅིག་སྐར་མའི་རྒྱུན་དུ་མ་མཐུད་དེ་གྲུབ་པས། སྐད་ཅིག་སྐར་མའི་རྒྱུན་བཞིན། སྐྱེས་པའི་སྐད་ཅིག་དང་པོ་ནས་བཟུང་སྟེ། འཆི་བའི་ཕྱོགས་སུ་ཇེ་ཉེ་ཇེ་ཉེར་གྱུར་པ་ལས་འཆི་བ་མེད་པའི་ཕྱོགས་སུ་ཉེ་རུ་མེད་པའི་ཕྱིར་ན་རྒྱུན་གྱིས་མི་རྟག གནས་སྐབས་ཀྱིས་མི་རྟག་སྟེ། ཕྱི་དུས་ཀྱི་འགྱུར་བ་དབྱར་རྗེས་སུ་སྟོན། སྟོན་སྣེ་རུ་དགུན། དགུན་འཕྲོས་སུ་དཔྱིད་ཤར་ནས་འགྱུར། ནང་རང་ལུས་ཀྱི་འགྱུར་བ། དང་པོ་བྱིས་པ་ལོ་བརྒྱད་ཡིན་ཡང་། ནམ་ཞིག་གཞོན་ནུ། དར་མ། རྒས་པ་རྣམས་མུ་མཐུད་ནས་སོང་ཞིང་། རང་རང་གི་མི་ཚེའི་ལོ་རིམ་ནས་བླངས་པའི་འདྲ་པར་ཡོད་ན་གཤིབས་ནས་ལྟོས་དང་། གནས་སྐབས་མི་རྟག་པར་ཇི་ལྟར་འགྱུར་འདུག་དེ་ཡིས་ཤེས། གང་ལྟར་འཆི་བའི་ཕྱོགས་སུ་བསྐྱོད་ནས་མི་ཚེའི་མཇུག་སྡོམ་འཆི་བས་རྒྱག་པས། ཤི་ནས་མེ་ཤི་བའམ་ཆུ་སྐམ་པ་ལྟར་ཡིན་ན་དེ་ག་རང་ཡིན་ཡང་། ཤི་ནས་འགྲོ་བ་རིགས་དྲུག་གང་རུང་དུ་སྐྱེ་བ་ལེན་དགོས་པ་དེས་ན་ཡིག་དྲུག་མ་བགྲངས་ན་ཕན་མི་འདུག འཆི་བ་ད་ཡོང་དང་། དོ་དགོང་ཡོང་། སང་ཉིན་ཙམ་ཡང་མི་ཡོང་བའི་ཚུལ་ཤེས་པ་མིན་པས། གང་ལྟར་ཡུན་མི་རིང་བར་འཆི་བདག་ཟུར་ལ་ཐོན་ངེས། མི་ཚེའི་ཡུན་དང་སེ་གོལ་གདབ་པའི་ཡུན་གཉིས་ཟད་པའི་ཆ་ནས་འདྲ་བས། མི་རྟག་འཆི་བ་སེམས་ལ་དྲན་ཏེ་ཆོས་ལ་བརྩོན་པ་བསྐྱེད་དགོས། བརྩོན་པ་བསྐྱེད་ན་སྐྱིད་པའི་ཉི་མ་རང་མགོར་ཤར་རྒྱུ་ཡོད་པ་ཡིན། འཇིག་རྟེན་ཚེ་འདིའི་བྱ་བ་མནོག་ཆུང་པོ་སྒྲུབ་དུས། ཉི་མ་རེ་རེ་བཞིན་གཞོན་ནས་རྒས་ཀྱི་བར་དུ་པུས་མོ་སྐེད་ཚིགས་གཉིས་ཀ་ནད་དུ་མ་ལོག་གི་བར་དུ། སྡུག་སྡིག་པའི་ཁུར་བོ་དང་ལྷན་དུ་ཕན་པ་ཅི་ཡང་མེད་པར་མཐའ་ད་ལ་ཐུག་གི་བར་དུ་སྡུག་རུས་དེ་ཙམ་བྱས་ན། ཚེ་གཅིག་ཡུན་ལ་ཕན་པའི་དམ་ཆོས་ལ་བརྩོན་འགྲུས་བསྐྱེད་ལོས་དགོས་ཏེ། གཟར་མོའི་བྲག་ལ་མ་འཛེགས་ན། བདེ་མོའི་ཐང་ལ་ཇི་ལྟར་ཐོན། དེས་ན་ཆོས་བསྒྲུབས་ན་སྐྱིད་པའི་ཉི་མ་རང་མགོ་ལ་འཆར་བས། ཆོས་ཀྱི་ནང་ནས་ཀྱང་། ཆོས་ཀྱི་སྙིང་པོ་གསུང་མཆོག་ཡི་གེ་དྲུག་མ་འདི་བགྲངས་ན། བྱ་སླ། ཚེགས་ཆུང་། དོན་ཆེ། དང་པོ་བྱ་སླ་སྟེ། དཀའ་ཚེགས་ངལ་དུབ་ཅི་ཡང་མི་དགོས་པར་འགྲོ་འདུག་ཉལ་འཆག་སྤྱོད་ལམ་རྣམ་བཞིའི་སྐབས་ཐམས་ཅད་ལ་ཐུགས་རྗེ་ཆེན་པོའི་གསལ་སྣང་བཟླས་སྒོམ་དང་མ་བྲལ་བའི་ངང་ནས། ལུས་ཀྱིས་ཅི་བདེ་བདེ་རུ་འདུག་བཞིན་སྒོམ་སྒྲུབ་ཉམས་ལེན་ཆོག་པས་སོ། །གཉིས་པ་ཚེགས་ཆུང་སྟེ། མདོ་དང་རྒྱུད་སྡེ་མང་པོའི་དཔེ་ཀློག་དང་། ཚིག་མང་བློ་ལ་ཨེ་ཟིན་གྱི་དཀའ་ལས་རྒྱག་མི་དགོས་པར། ཨཱོྂ་མ་ཎི་པདྨ་ཧཱུྃ་ཞེས་པ་ནི་སུས་ཀྱང་ཤེས་པས། དེར་ཆོས་ཐམས་ཅད་ཀྱི་ཚིག་དོན་འདུས་པས་སོ། །གསུམ་པ་དོན་ཆེ་བ་ནི། ཡི་གེ་དྲུག་མ་འདི་བཟླས་ན། ཕྱི་མ་བདེ་བ་ཅན་གྱི་ཞིང་དུ་སྐྱེ། ཚེ་འདིར་ནད་དང་གནོད་པ་ཞི། བསམ་དོན་ཐམས་ཅད་ཡིད་བཞིན་དུ་འགྲུབ་པའོ། །སྡེ་ཤོག་ཁ་དང་། མི་དུད་ཚང་སྒེར་གྱིས་ལོ་སྲུང་གི་སྒྲུབ་པ་ཅི་ཙམ་བཅས་པ་ལས་ཀྱང་། མ་ཎི་དུང་སྒྲུབ་དང་། སིདྡྷི་དུང་སྒྲུབ་འཚོགས་དང་། ཆོད་སྒོ་ཕན་ཡོན་དེ་ལས་ཆེ་བ་མེད་དོ། །རྒྱལ་འདྲེ་འགོང་པོ་མ་རུང་བ་རྣམས་དྲག་པོའི་མངོན་སྤྱོད་ཀྱིས་འདུལ་བའི་ནུས་པ་མེད་ན། ཞི་བ་སྙིང་རྗེའི་སྒོ་ནས་གཟུངས་སྔགས་ཡི་གེ་དྲུག་མས་ཐུལ་དང་། རྒྱུད་གདུག་རྩུབ་ཀྱི་ངང་ནས་ལས་ངན་བསགས་པས་རྒྱུ་བྱས། སྨོན་ལམ་ངན་པས་རྐྱེན་བྱས་ནས་མཚམས་སྦྱར་བའི་འདྲེ་གདོན་རྣམས་ཀྱི་ལས་སྒྲིབ་བྱང་ནས་དེ་དག་ལ་ཕན་པ་དང་། སྙིང་རྗེའི་ཆོས་སྦྱིན་ཡང་འགྱུར་བས། ཚོགས་རྫོགས་ཞོར་གནོད་པ་ཟད་ཞོར། དོན་གཅིག་གིས་བསམ་པ་གཉིས་འགྲུབ། རྟ་རྒྱུག་ཞོར་མེ་ཏོག་འཐུ་ཞོར། གོ་གཉིས་ཆོད་ཡིན་པའོ། །དེ་ཡན་གྱིས་སྤྱིར་མདོར་བསྟན་པ་སོང་ནས། གཉིས་པ་བྱེ་བྲག་རྒྱས་པར་བཤད་པ། གཉིས་པ་བྱེ་བྲག་རྒྱས་པར་བཤད་པ་ལ་གསུམ། ཐུན་མིན་སྔོན་འགྲོའི་ཆོས་སྐོར། དངོས་གཞིའི་ལྟ་སྒོམ་གྱི་གནད་བསྟན་པ། གཅིག་ཤེས་ཀུན་གྲོལ་གྱི་གདམས་པར་འགག་སྡོམ་པའོ།། དང་པོ་ཐུན་མིན་སྔོན་འགྲོའི་སྐོར། དང་པོ་ཐུན་མིན་སྔོན་འགྲོའི་སྐོར་ལ་ས་བཅད་བཅུ་གསུམ་ལས། དང་པོ་ལམ་གྱི་རྨང་གཞི་སྐྱབས་འགྲོ་བསྟན་པ། དང་པོ་ལམ་གྱི་རྨང་གཞི་སྐྱབས་འགྲོ་བསྟན་པ་ནི། མི་བསླུ་གཏན་གྱི་སྐྱབས་གཅིག་དཀོན་མཆོག་གསུམ།། དཀོན་མཆོག་ཀུན་འདུས་ངོ་བོ་སྤྱན་རས་གཟིགས།། ཁྱེད་ཤེས་བློ་གཏད་གཅིག་ལས་མི་འགྱུར་བའི།། ངེས་ཤེས་བློ་ཐག་ཆོད་ལ་ཡིག་དྲུག་སྒྲོངས།། ཞེས་གསུངས་ཏེ། གོང་དུ་ཐུན་མོང་ཕྱིའི་སྔོན་འགྲོ་བློ་ལྡོག་རྣམ་བཞིའི་སྒོ་ནས། དལ་འབྱོར་བཅོ་བརྒྱད་ཚང་པའི་ཆོས་ལྡན་གྱི་མི་ལུས་ཡིད་བཞིན་ནོར་བུ་ལྟ་བུ་བསམ་དོན་འགྲུབ་སྤྱད་དེ་རྙེད་དཀའ་བ་དང་། རྙེད་ཀྱང་དུས་སྙིགས་མའི་ཚེ་ལ་ངེས་པར་མེད་པ། ནམ་འཆི་ཆ་མེད། འཆི་རྐྱེན་ངེས་མེད་ཡིན་པ་དང་། ཤི་ནས་འཁོར་བའི་གནས་རིས་བརྒྱུད་དགོས་པས་འགྲོ་བ་རིགས་དྲུག་གང་དུ་སྐྱེས་ཀྱང་བདེ་བའི་སྐབས་མེད་པ་དང་། སྐྱིད་སྡུག་ལས་ལ་རག་ལས་པས། རྒྱུ་ཀུན་འབྱུང་ལས་དང་ཉོན་མོངས་ཀྱི་དབང་གིས། འབྲས་བུ་ཁམས་གསུམ་འཁོར་བའི་སྡུག་བསྔལ་གྲུབ་པའི་ཚུལ་རྣམས་ཅི་རིགས་པར་བསྟན་ནས། འཁོར་བའི་གནས་ལ་སྐྱོ་ཤས་དང་། རྒྱུ་འབྲས་ལ་ཡིད་ཆེས་ཀྱི་དད་པ་སྙིང་ནས་འཁྲུངས་ཚེ་སྐྱབས་སུ་འགྲོ་དགོས། སྐྱབས་སུ་མ་སོང་ན། ངན་འགྲོའི་སྡུག་བསྔལ་ལ་སྐྲག་པ་ཙམ་གྱིས་ངན་སོང་གི་འཇིགས་པ་ལས་མི་ཐར་བ་ལ་སོགས་པའི་སྐྱོན་དཔག་ཏུ་མེད་པ་ཡོད་པ་དེས་ན་སྐྱབས་སུ་འགྲོ་དགོས། སྐྱབས་འགྲོ་ལ་བཤད་ཚུལ་མང་ན་ཡང་། ཐུགས་རྗེ་ཆེན་པོའི་ཆོས་སྐོར་ལས་གསུམ་སྐོར་གྱི་འགྲོས་དང་སྒོ་བསྟུན་ནས་བཤད་ན། སྐྱབས་སུ་འགྲོ་བ་ལ་སྐྱབས་འགྲོའི་ངོ་བོ་དང་། ངེས་ཚིག དབྱེ་བ་གསུམ་གྱིས་སྐྱབས་སུ་འགྲོ་ལུགས་ཤེས་དགོས། སྐྱབས་འགྲོའི་ངོ་བོའམ་སྐྱབས་སུ་འགྲོ་ཡུལ་ནི། སངས་རྒྱས་དང་། ཆོས་དང་། དགེ་འདུན་སྟེ་དཀོན་མཆོག་གསུམ་མོ། །ངེས་ཚིག་གི་སྒྲ་དོན་ནི། ངན་སོང་གི་སྡུག་བསྔལ་དང་། འཁོར་བའི་གནས་ངན་ལེན་དང་། མི་སྟེགས་ཀྱི་ལྟ་ལོག་ལས་སྐྱོབ་པས་ན་སྐྱབས་འགྲོའོ། །སྐྱབས་འགྲོའི་དབྱེ་བ་ནི། ཐུན་མོང་གི་སྐྱབས་འགྲོ་དང་། ཁྱད་པར་གྱི་སྐྱབས་འགྲོ་དང་། ཁྱད་པར་བླ་ན་མེད་པའི་སྐྱབས་འགྲོ་དང་གསུམ། དང་པོ་ཐུན་མོང་གི་སྐྱབས་འགྲོ་ལ་གསུམ། དད་པ་ཅན་གྱི་སྐྱབས་འགྲོའི་དུས་དང་། སྒྲུབ་པ་པོའི་སྐྱབས་འགྲོའི་དུས་དང་། གནས་སྐབས་ཀྱི་སྐྱབས་འགྲོའི་དུས་སོ། །དང་པོ་དད་པ་ཅན་གྱི་སྐྱབས་འགྲོའི་དུས་ནི། ལས་རྒྱུ་འབྲས་ལ་ཡིད་ཆེས་སྐྱེས་ནས་འཁོར་བའི་སྡུག་བསྔལ་ལ་འཇིགས་སྐྲག་སྐྱེས་ཏེ། དེ་ལས་སྐྱོབ་ཐུབ་པའི་དཀོན་མཆོག་གསུམ་ལ་དད་པ་དང་ཡིད་ཆེས་ཀྱི་སྒོ་ནས་སྐྱབས་གནས་སུ་མཐོང་བའོ། །གཉིས་པ་སྒྲུབ་པ་པོའི་སྐྱབས་འགྲོའི་དུས་ལ་གསུམ། བརྗོད་པའི་ཚུལ་གྱིས་བསྟན་པ་དང་། སྤང་བའི་ཚུལ་གྱིས་བསྟན་པ་དང་། ཉམས་སུ་བླངས་པའི་ཚུལ་གྱིས་བསྟན་པའོ། །དང་པོ་བརྗོད་པའི་ཚུལ་གྱིས་བསྟན་པ་ནི། བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཞེས་སྐྱབས་འགྲོའི་ངག་འདོན་བཞི་སྐོར་མ་ངག་གིས་ལན་གྲངས་མང་དུ་བརྗོད་པའོ། །དེ་ཡང་དཀོན་མཆོག་ཀུན་འདུས་ཀྱི་ངོ་བོ་བླ་མ་ཡིན་པས་རང་རེ་བོད་ཀྱིས་བླ་མ་སྔོན་དུ་བཞག་པ་ཡིན། གཉིས་པ་སྤང་པའི་ཚུལ་གྱིས་བསྟན་པ་ནི། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་སྤངས་ལ། དེ་བཞིན་གཤེགས་པའི་སྐུ་གཟུགས་ལ་མོས་གུས་བྱ། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་སྤངས་ལ། པོ་ཏི་གླེགས་བམ་ལ་གུས་པར་བྱ། དགེ་འདུན་ལ་སྐྱབས་སུ་སོང་ནས་སྡིག་པའི་གྲོགས་སྤངས་ལ། དགེ་སློང་གི་དགེ་འདུན་ལ་གུས་པར་བྱའོ། །གསུམ་པ་ཉམས་སུ་བླངས་པའི་ཚུལ་གྱིས་བསྟན་པ་ནི། ལུས་དང་སྲོག་ལ་ཐུག་པའམ། བྱ་དགའ་དཔའ་དར་ཆེན་པོའི་ཕྱིར་དུ་ཡང་། དཀོན་མཆོག་མི་སྤང་པར་དང་དུ་བླང་། ནད་གདོན་བར་ཆད་སོགས་ཀྱི་ཉེར་འཚེ་དྲག་པོ་ཅི་བྱུང་ཡང་དཀོན་མཆོག་མིན་པའི་སྐྱབས་དང་དཔུང་གཉེན་གཞན་ཞིག་མི་བཙལ། དུས་རྟག་ཏུ་དཀོན་མཆོག་གསུམ་གྱི་ཡོན་ཏན་དྲན་པར་བྱ། དུས་དང་དུས་སུ་དཀོན་མཆོག་གསུམ་པོ་མཆོད་པ་དང་། སྒྲུབ་པ་ལ་བརྩོན་པར་ནན་ཏན་དུ་བྱ་བའོ། །གསུམ་པ་གནས་སྐབས་ཀྱི་སྐྱབས་འགྲོའི་དུས་ནི། ཉ་སྟོང་ཚེས་བརྒྱད་ལ་སོགས་པའི་ཚེས་གྲངས་ཁྱད་པར་ཅན་ལ། དཀོན་མཆོག་ལ་མཆོད་པ་ཕུལ་ནས་སྐྱབས་སུ་འགྲོ་ཞིང་གསོལ་བ་འདེབས་པའོ། །གཉིས་པ་ཁྱད་པར་གྱི་སྐྱབས་འགྲོ་ལ་གསུམ་སྟེ། དུས་ཀྱི་ཁྱད་པར་དང་། རྟེན་གྱི་ཁྱད་པར་དང་། ཡོན་ཏན་གྱི་ཁྱད་པར་རོ། །དུས་ཀྱི་ཁྱད་པར་ནི། དུས་ད་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་སངས་རྒྱས་ཀྱི་གོ་འཕང་མ་ཐོབ་ཀྱི་བར་དུ་སྐྱབས་སུ་འགྲོ་བའོ། །རྟེན་གྱི་ཁྱད་པར་ནི། སངས་རྒྱས་སྐུ་གསུམ་སྐུ་བཞིའི་ཡེ་ཤེས་ལྔའི་བདག་ཉིད། ཆོས་དོན་དམ་སྤྲོས་པ་དང་བྲལ་བ། དགེ་འདུན་འཕགས་པ་ཕྱིར་མི་ལྡོག་པ་གསུམ་ལ། རང་དང་ཆོས་གཉིས་མེད། སེམས་དང་ཆོས་གཉིས་མེད། འཁོར་བ་དང་མྱང་འདས་གཉིས་མེད་དུ་རྟོགས་པའི་ཕྱིར་དུ་སྐྱབས་སུ་འགྲོ་བའོ། །ཡོན་ཏན་གྱི་ཁྱད་པར་ནི། དཀོན་མཆོག་གསུམ་གྱི་ཆེ་བ་དང་། མཛད་པའི་ཡོན་ཏན་བསམ་གྱིས་མི་ཁྱབ་པ་དྲན་ཏེ་སྐྱབས་སུ་འགྲོ་བའོ། །གསུམ་པ་ཁྱད་པར་བླ་ན་མེད་པའི་སྐྱབས་འགྲོ་ལ་གསུམ། ལུས་ལྷ་ལ་སྐྱབས་སུ་འགྲོ། ངག་སྔགས་ལ་སྐྱབས་སུ་འགྲོ། ཡིད་ཆོས་ཉིད་ལ་སྐྱབས་སུ་འགྲོ་བའོ། །ལུས་ལྷ་ལ་སྐྱབས་སུ་འགྲོ་བ་ནི། ལུས་ཀྱི་མི་དགེ་བ་སྲོག་གཅོད་དང་། མ་བྱིན་ལེན་དང་། ལོག་གཡེམ་གསུམ་ལས་ལོག་ནས། ལུས་ལྷ་དང་མི་འབྲལ་པར་ཐུགས་རྗེ་ཆེན་པོའི་སྐུར་བསྒོམས་ལ་སྐྱབས་སུ་འགྲོ། ངག་སྔགས་ལ་སྐྱབས་སུ་འགྲོ་བ་ནི། ངག་གི་མི་དགེ་བ་རྫུན། ཕྲ་མ། ཚིག་རྩུབ། ངག་འཆལ་བཞི་ལས་ལོག་ནས། སྙིང་པོ་ཡི་གེ་དྲུག་མ་ལ་སྐྱབས་སུ་འགྲོ། ཡིད་ཆོས་ཉིད་ལ་སྐྱབས་སུ་འགྲོ་བ་ནི། ཡིད་ཀྱི་མི་དགེ་བ་བརྣབ་སེམས། གནོད་སེམས། ལོག་ལྟ་གསུམ་སྤངས་ནས། སེམས་རང་གསལ་རང་གྲོལ་དུ་རྒྱུན་ཆད་མེད་པར་ཉམས་སུ་བླངས་ཏེ་སྐྱབས་སུ་འགྲོ་བའོ། །འདིའི་ལུགས་ཀྱི་བཤད་ཚུལ་དེ་ལྟར་ཡིན། །དེས་ན་སྐྱབས་གཞན་ལ་བརྟེན་ན་འཁོར་བ་ལས་སྐྱོབ་པའི་ནུས་པ་མེད་པས་བསླུ་ཞིང་། དུས་གཏན་དུ་མི་བསླུ་ངེས་པའི་སྐྱབས་གཅིག་ནི་དེ་ལྟ་བུའི་དཀོན་མཆོག་གསུམ་པོ་ཡིན་ལ། དཀོན་མཆོག་ཀུན་འདུས་ཀྱི་ངོ་བོ་སྤྱན་རས་གཟིགས་ཡིན་པའི་རྒྱུ་མཚན་ནི། བླ་མ་སྤྱན་རས་གཟིགས་ཀྱི་ངོ་བོར་བསྟེན་པས་དཀོན་མཆོག་གསུམ་པོ་དེར་འདུས་པ་སྟེ། རྒྱུད་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །བླ་མ་དཔལ་ལྡན་རྡོ་རྗེ་འཆང་། །གསུངས་པ་ལྟར་དུ་ཡིན་པ་དེས་ན་ཡིད་ཁྱེད་ཤེས་ཀྱིས་བློ་རྩེ་གཅིག་ལས་མི་འགྱུར་པར་སྐྱབས་སུ་འགྲོ་དགོས་པ་ཡིན། སྐྱབས་འགྲོ་དང་སྦྱར་ན། ཨཱོྂ་སངས་རྒྱས་ལ་སྐྱབས་སུ་འགྲོ། མ་ཆོས་ལ་སྐྱབས་སུ་འགྲོ། ཎི་དགེ་འདུན་ལ་སྐྱབས་སུ་འགྲོ། པད་བླ་མ་ལ་སྐྱབས་སུ་འགྲོ། མེ་ཡི་དམ་ལ་སྐྱབས་སུ་འགྲོ། ཧཱུྃ་མཁའ་འགྲོ་ལ་སྐྱབས་སུ་འགྲོ། དེ་ལྟར་སྐྱབས་སུ་འགྲོ་བས་ངན་སོང་དང་འཁོར་བ་ལས་སྐྱོབ་པ་ཡང་ཡི་གེ་དྲུག་མ་བཟླས་པ་ལས་འབྱུང་བ་ཡིན་ནོ།། གཉིས་པ་ལམ་གྱི་རྩ་བ་སེམས་བསྐྱེད་བསྟན་པ། གཉིས་པ་ལམ་གྱི་རྩ་བ་སེམས་བསྐྱེད་བསྟན་པ་ནི། ཐེག་ཆེན་ལམ་གྱི་རྩ་བ་བྱང་ཆུབ་སེམས།། སེམས་མཆོག་རྒྱལ་བ་ཀུན་གྱི་བགྲོད་གཅིག་ལམ།། ལམ་བཟང་བྱང་ཆུབ་སེམས་དང་མི་འབྲལ་ཞིང་།། འགྲོ་ལ་སྙིང་རྗེའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། སྐྱབས་སུ་སོང་ཡང་ཐེག་ཆེན་བྱང་ཆུབ་སེམས་བསྐྱེད་ཀྱིས་མ་ཟིན་ན། སངས་རྒྱས་ཐོབ་བྱེད་ཀྱི་ཐེག་པ་ཆེན་པོའི་ཆོས་སུ་མི་འགྲོ་བས། བྱང་ཆུབ་མཆོག་ཏུ་སེམས་བསྐྱེད་དགོས། སྐབས་འདིའི་བཤད་སྲོལ་དང་བསྟུན་ནས་བཤད་ན། སེམས་བསྐྱེད་ལ་ངོ་བོ་དང་། ངེས་ཚིག་དང་། དབྱེ་བ་གསུམ་ལས། ངོ་བོ་ནི་སྙིང་རྗེ་ཆེན་པོ་ཡིན་པས། སྙིང་རྗེ་དེ་ལ་དབྱེ་ན། བརྩེ་བའི་སྙིང་རྗེ་དང་། ཆོས་ལ་དམིགས་པའི་སྙིང་རྗེ་དང་། དམིགས་པ་མེད་པའི་སྙིང་རྗེ་གསུམ་མོ། །བརྩེ་བའི་སྙིང་རྗེ་ནི་སེམས་ཅན་ལ་དམིགས་པའི་སྙིང་རྗེ་ཡིན་ཏེ། སེམས་ཅན་ཐམས་ཅད་ལ་སྙིང་ཐག་པ་ནས་རང་གི་ལུས་ནས་ཆད་པའི་བུ་བཞིན་དུ་བརྩེ་བར་བྱེད་པའོ། །ཆོས་ལ་དམིགས་པའི་སྙིང་རྗེ་ནི། འདུས་བྱས་དང་འདུས་མ་བྱས་ཀྱི་དགེ་བའི་རྩ་བ་བསྐྱེད་པར་བྱེད་པའོ། །དམིགས་པ་མེད་པའི་སྙིང་རྗེ་ནི་མི་སྐྱེ་པའི་ཆོས་ལ་བཟོད་པ་ཐོབ་ནས་བདག་དང་སེམས་ཅན་གང་ཡང་མི་དམིགས་པར་བྱེད་པའོ། །སེམས་བསྐྱེད་ཀྱི་ངེས་ཚིག་ལ་སྒོམ་ཐབས་དང་སྦྲེལ་ནས་གསུམ་དུ་གསུངས་ཏེ། རང་གི་སྡུག་བསྔལ་ལ་དཔགས་ཏེ་བསྒོམ་པ་དང་། གཞན་གྱི་སྡུག་བསྔལ་ལ་དཔགས་ཏེ་བསྒོམ་པ་དང་། རང་གཞན་གཉིས་ཀའི་སྡུག་བསྔལ་ལ་དཔགས་ཏེ་བསྒོམ་པའོ། །དང་པོ་རང་གི་སྡུག་བསྔལ་ལ་དཔགས་ཏེ་བསྒོམ་པ་ནི། རང་ཉིད་འཁོར་བའི་སྡུག་བསྔལ་ཉམས་སུ་མྱོང་བའི་ང་བདག་གི་འཛིན་པ་ལས་གྲོལ་བར་བྱ་སྙམ་དུ་བསྒོམ། གཉིས་པ་གཞན་གྱི་སྡུག་བསྔལ་ལ་དཔགས་ཏེ་བསྒོམ་པ་ནི། གཞན་འཁོར་བར་ལྷུང་བ་འདི་རྣམས་སྡུག་བསྔལ་ཐམས་ཅད་ལས་ཐར་ན་ཅི་མ་རུང་སྙམ་དུ་བསྒོམ། གསུམ་པ་རང་གཞན་གཉིས་ཀའི་སྡུག་བསྔལ་ལ་དཔགས་ཏེ་བསྒོམ་པ་ནི། རང་གཞན་གཉིས་ཀ་འཁོར་བའི་སྡུག་བསྔལ་ལས་ཐར་ན་ཅི་མ་རུང་སྙམ་དུ་བསྒོམ་པ་སྟེ། རང་ཅག་གིས་རྒྱུན་དུ་བཤད་རྒྱུའི་ཚད་མེད་རྣམ་བཞི་སྔོན་དུ་འགྲོ་བའི་འབྲེལ་བ་བཞི་ལྡན་གྱི་བཤད་ཚུལ་དང་ཁོག་གིས་གཅིག་པའོ། །ངེས་ཚིག་དངོས་ནི་སྔར་སེམས་མ་སྐྱེས་པ་གཅིག་བསྐྱེད་པས་ན་སེམས་བསྐྱེད་པ་ཞེས་བྱའོ། །སེམས་བསྐྱེད་ཀྱི་དབྱེ་བ་ལ་གཉིས། ཀུན་རྫོབ་བྱང་ཆུབ་ཀྱི་སེམས་དང་། དོན་དམ་བྱང་ཆུབ་ཀྱི་སེམས་སོ། །ཀུན་རྫོབ་བྱང་ཆུབ་ཀྱི་སེམས་ལ། སྨོན་པ་བྱང་ཆུབ་ཀྱི་སེམས་དང་། འཇུག་པ་བྱང་ཆུབ་ཀྱི་སེམས་གཉིས་སོ། །དེ་ཡང་། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །གསུངས་པ་ལྟར་དུའོ། །དེ་ཡང་ཀུན་རྫོབ་སེམས་བསྐྱེད་ནི་སེམས་ཅན་ཐམས་ཅད་བདག་གཅིག་པུས་སངས་རྒྱས་ཀྱི་ས་ལ་འགོད་པར་འདོད་པའི་སེམས་ཏེ་ལས་དང་པོ་པ་ནས་སོ་སྐྱེའི་ས་ན་ཡོད་པའོ། །དོན་དམ་སེམས་བསྐྱེད་ནི་ཐེག་ཆེན་མཐོང་ལམ་ཐོབ་པ་ནས་ཡོད་པའི་གཉིས་སུ་མེད་པའི་ཡེ་ཤེས་སོ། །འདི་གཉིས་ཀ་ཡང་སྙིང་རྗེའི་རྩ་བ་ཅན་ཡིན་པས་སྙིང་རྗེ་སྔོན་དུ་མ་སོང་བར་ཡོད་མི་སྲིད་པ་སྟེ། གྱང་མེད་པའི་རི་མོ་བཞིན་ཡིན་ནོ། །དེས་ན་གཉིས་ཀའི་སྔོན་དུ་སྙིང་རྗེ་ལ་བློ་སྦྱོང་བ་ནི་གནད་གལ་བོ་ཆེ་ཡིན་ལ། དེར་མ་ཟད་མདོ་སྔགས་ཀྱི་ལམ་ཐམས་ཅད་མཐར་ཕྱིན་པ་དང་འབྲས་བུ་གཞན་དོན་བྱེད་པ་ལ་ཡང་མེད་དུ་མི་རུང་བས་རྒྱལ་བ་ཀུན་གྱི་ཐུགས་ཞེས་ཀྱང་བྱའོ། །ཐུགས་རྗེ་ཆེན་པོའི་ཆོས་སྐོར་ཁྱད་པར་རྒྱལ་པོའི་ལུགས་ལྟར་དུ་བཤད་སྐབས་གོང་ནས་སྨོས་པ་ལྟར་དུ། སེམས་བསྐྱེད་ཀྱི་ངོ་བོ་ནི་སྙིང་རྗེ་ཆེན་པོ་ཡིན་གསུངས་པ་ནི་དགོངས་པ་ཟབ་པའོ། །ཐེག་ཆེན་ལམ་གྱི་རྩ་བ་བྱང་ཆུབ་ཀྱི་སེམས་རིན་པོ་ཆེ་ཡིན་ཞིང་། སེམས་མཆོག་དེ་ཉིད་རྒྱལ་བ་ཀུན་གྱི་བགྲོད་པ་གཅིག་པའི་ལམ་ཡིན་པ་ནི། དབུ་མ་འཇུག་པ་ལས། སྙིང་རྗེའི་སེམས་དང་གཉིས་སུ་མེད་བློ་དང་། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་གསུངས་པ་ལྟར། ལམ་བཟང་བྱང་ཆུབ་ཀྱི་སེམས་འདི་དང་མི་འབྲལ་ཞིང་རྒྱུན་དུ་བསྒོམ་དགོས། སྒོམ་ཐབས་ཀྱང་ཐུགས་ཆེན་ལམ་རིམ་སྐོར་གསུམ་ལས། སྐུ་གསུམ་དང་སྦྱར་ནས། སྐུ་གསུམ་རང་ཡིན་པའི་ཚུལ་གྱིས་བསྒོམ་པ་དང་། རང་ལ་སྐུ་གསུམ་གནས་པའི་ཚུལ་གྱིས་བསྒོམ་པ་དང་། བསྒོམས་ཤིང་འབད་པ་ལས་སྐུ་གསུམ་འོང་པའི་ཚུལ་གྱིས་བསྒོམ་པ་དང་གསུམ་གསུངས་ཤིང་། དང་པོ་སྐུ་གསུམ་རང་ཡིན་པའི་ཚུལ་གྱིས་བསྒོམ་པ་ནི། སེམས་ཉིད་སྟོང་པ་ཆོས་སྐུ། སྟོང་ཉིད་ཀྱི་ངང་ལས་ཉིད་ལ་ཉིད་ལོངས་སྤྱོད་པ་ལོངས་སྐུ། སྣ་ཚོགས་ཤར་བ་མ་འགག་པར་སྤྱོད་པ་སྤྲུལ་སྐུ་ཡིན་ནོ། །གཉིས་པ་རང་ལ་གནས་པའི་ཚུལ་གྱིས་བསྒོམ་པ་ནི། ལུས་ལོངས་སྐུ་ཐུགས་རྗེ་ཆེན་པོ། ངག་སྤྲུལ་སྐུ་ཡི་གེ་དྲུག་པ། ཡིད་ཆོས་སྐུ་རང་བྱུང་དུ་བསྒོམ་པའོ། །གསུམ་པ་བསྒོམས་ཤིང་བསྒྲུབས་པ་ལས་ཐུགས་རྗེ་ཆེན་པོ་འོང་པའི་ཚུལ་གྱིས་བསྒོམ་པ་ནི། ལུས་ལོངས་སྐུ་ཐུགས་རྗེ་ཆེན་པོར་བསམས་ལ། སྣང་ལ་རང་བཞིན་མེད་པ་མེ་ལོང་གི་གཟགས་བརྙན་ལྟར་དུ་སྒྲུབ། ངག་སྙིང་པོ་ཡི་གེ་དྲུག་པ་སྤྲུལ་བའི་སྐུའི་གསུང་བཟླས་ལ་གྲག་སྟོང་བྲག་ཅ་ལྟ་བུར་སྒྲུབ། ཡིད་ཆོས་སྐུ་ནམ་མཁའ་ལྟ་བུར་བསྒོམས་ལ། རང་གསལ་རྟོག་མེད་སྤྲོས་མཐའ་དང་བྲལ་བར་སྒྲུབ་བོ། །དེ་ལྟར་བསྒྲུབས་པའི་འབྲས་བུ་ལ་ཐུགས་རྗེ་ཆེན་པོ་གྲུབ་ནས་འགྲོ་བ་སེམས་ཅན་གྱི་དོན་བྱེད་པའོ། །དེ་ལྟར་འགྲོ་ལ་སྙིང་རྗེའི་ངང་ནས་ཡིག་དྲུག་སྒྲོངས། ཞེས་གསུངས་ཏེ་ཡིག་དྲུག་སྙིང་རྗེའི་ངང་ནས་བཟླ་བར་བསྐུལ་བའོ། །སེམས་བསྐྱེད་དང་སྦྱར་ན། ཨཱོྂ་གྱིས་སྨོན་པ་བྱང་ཆུབ་ཀྱི་སེམས་སྐྱེ། མས་འཇུག་པ་བྱང་ཆུབ་ཀྱི་སེམས་སྐྱེ། ཎིས་གཉིས་མེད་བྱང་ཆུབ་ཀྱི་སེམས་སྐྱེ། པད་ཀྱིས་ཆོས་ཉིད་བྱང་ཆུབ་ཀྱི་སེམས་སྐྱེ། མེ་ཡིས་ཡེ་ཤེས་བྱང་ཆུབ་ཀྱི་སེམས་སྐྱེ། ཧཱུྃ་གིས་དོན་དམ་བྱང་ཆུབ་ཀྱི་སེམས་སྐྱེ། བྱང་ཆུབ་མཆོག་གི་སེམས་སྐྱེ་བ་ཡང་། ཡི་གེ་དྲུག་པ་བཟླས་པ་ལས་འབྱུང་ངོ་།། གསུམ་པ་ལམ་གྱི་འགལ་རྐྱེན་སྡིག་སྒྲིབ་བཤགས་པར་བསྟན་པ། གསུམ་པ་ལམ་གྱི་འགལ་རྐྱེན་སྡིག་སྒྲིབ་བཤགས་པར་བསྟན་པ་ནི། ཐོག་མེད་འཁོར་བར་འཁྱམས་ནས་ད་ཕན་ཆད།། ཅི་བྱེད་སྡིག་ཏུ་སོང་ནས་སྲིད་པར་འཁྱམས།། སྡིག་ལྟུང་སྙིང་ནས་མཐོལ་ཞིང་བཤགས་སེམས་ཀྱིས།། སྟོབས་བཞི་ཚང་པའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། རང་རེ་ཁམས་གསུམ་འཁོར་བའི་སེམས་ཅན་རྣམས་དང་པོ་འདི་ནས་འཁྲུལ་བས། དེ་ཡན་ཆད་ལ་འཁོར་བ་མེད་ཅེས་བརྗོད་དུ་མེད་པར། འཁོར་བའི་ཡ་མཐའི་ཐོག་མ་ལ་ཐུག་ཏུ་མེད་པས་ཐོག་མེད་ནས་འཁོར་བར་འཁྱམས་ནས་ད་ལ་མ་ཐུག་གི་བར་དུ་ཅི་བསམ་ཅི་བྱས་ཐམས་ཅད་ལ་བསམ་བློ་བཏང་ན། ད་ཕན་ཆད་ཀྱི་ལས་བྱ་བ་ཅི་བྱས་སྡིག་པ་འབའ་ཞིག་པའམ་སྡིག་དང་འདྲེས་པ་གང་ལྟར་རུང་འཁོར་བའི་རྒྱུ་སྲིད་པ་སྒྲུབ་པའི་ལས་ཤ་སྟག་སོང་ནས་སྲིད་པར་འཁྱམས་པ་ཡིན་པས། ད་ནི་འཁོར་བ་དང་ངན་སོང་གི་གནས་ལས་ཐར་དགོས་པས། དེ་ལས་ཐར་བར་བྱེད་པ་ལ་སྡིག་སྒྲིབ་ཉེས་ལྟུང་། འཁོར་བ་ཐོག་མེད་ནས་བསགས་པའི་རིའི་རྒྱལ་པོའི་རི་རབ་ལས་མཐོ་བ། མཐའི་རྒྱ་མཚོ་ཆེན་པོ་ལས་ཟབ་པ་ལྟ་བུ་སོགས་ཡོད་ཤག་ཤག་ཡིན་པས། སྡིག་ལྟུང་ཉེས་སྒྲིབ་དེ་ཐམས་ཅད་སྙིང་ཐག་པ་ནས། མི་འཆབ། མི་སྦེད། མཐོལ་ཞིང་། འགྱོད་པ་དྲག་པོ་དང་བཅས་ནས་བཤགས་པ་ཡིན་ཞེས། བཤགས་པའི་སེམས་ཀྱིས་གཉེན་པོ་སྟོབས་བཞི་ཚང་པའི་སྒོ་ནས་བཤགས་དགོས། སྟོབས་བཞི་མ་ཚང་ན་ཁ་ཙམ་གྱིས་བཤགས་པ་ཡིན་ཞེས་རུང་བཤགས་ཐུབ་པ་མིན་ལ། ཁྱད་པར་དུ་སྡིག་པ་བྱེད་དགོས་རུང་བཤགས་ཆོག་སྙམ་ནས་སྡིག་པ་ལ་འཇུག་ན་ནི་སྡིག་པ་ལྷག་པར་ལྕི་བ་བཤགས་མེད་ཀྱི་སྡིག་པར་འགྱུར་བའོ། །སྟོབས་བཞི་ནི། རྟེན་གྱི་སྟོབས། སུན་འབྱིན་པའི་སྟོབས། གཉེན་པོ་ཀུན་ཏུ་སྤྱོད་པའི་སྟོབས། སོར་ཆུད་པའི་སྟོབས་སོ། །དང་པོ་རྟེན་གྱི་སྟོབས་ནི། སྐྱབས་ཡུལ་ཀུན་འདུས་ཀྱི་ངོ་བོ་འཕགས་པ་ཐུགས་རྗེ་ཆེན་པོ་མདུན་གྱི་ནམ་མཁར་གསལ་འདེབས་པའོ། །སུན་འབྱིན་པའི་སྟོབས་ནི། སྔོན་ཆད་སྡིག་ལྟུང་བསགས་པའི་ཉེས་སྒྲིབ་ལ་ཁོང་དུ་དུག་སོང་བ་ལྟ་བུའི་འགྱོད་པ་དྲག་པོ་བྱ་བའོ། །གཉེན་པོ་ཀུན་ཏུ་སྤྱོད་པའི་སྟོབས་ནི། སྤྱིར་མདོ་འདོན་པ་དང་། བྱང་ཆུབ་མཆོག་ཏུ་སེམས་བསྐྱེད་པ་ལ་སོགས་ཡིན་ཡང་། སྐབས་འདིར་མཚོན་ན་མདུན་གྱི་ཐུགས་རྗེ་ཆེན་པོ་ལ་མོས་གུས་གདུང་བ་ཆེར་བསྐྱེད་ཀྱིས་འགྱོད་པ་དྲག་པོས་ཉེས་ལྟུང་བཤགས་སེམས་ཀྱི་སྒོ་ནས་སྡིག་པ་ཐམས་ཅད་ལྕེ་ཐོག་ཏུ་བསྡུས་ནས་གཟུངས་སྔགས་ཡི་གེ་དྲུག་མ་བཟླས་པས་བྱེ་མ་ལ་ཆུ་བརྒྱབ་པ་ལྟར་དུ་ཧ་ར་ར་སོང་ནས་ཟད་པར་བསམ་པའོ། །སོར་ཆུད་པའི་སྟོབས་ནི། ཕྱིན་ཆད་སྲོག་ལ་བབས་ཀྱང་ཉེས་ལྟུང་དེ་དང་དེ་ལྟ་བུ་མི་བྱེད་བསམ་པའི་སྡོམ་སེམས་བརྟན་པོ་བྱེད་པའོ། །ཐུགས་རྗེ་ཆེན་པོའི་སྤྲུལ་བ་རྒྱལ་པོ་སྲོང་བཙན་སྒམ་པོས། བློན་པོ་མགར་སྟོང་བཙན་ལ། ཁྱོད་ཀྱིས་ཚེ་སྟོད་དུ་སྤྱི་དང་བྱེ་བྲག་གི་དགོས་ཆེད་མང་པོ་ལ་བརྟེན་ནས་སྡིག་ལྟུང་མང་པོ་བསགས་ཡོད་པས། དེ་ལྟར་གྱིས་དང་། ཁྱོད་ཀྱི་སྡིག་ལྟུང་ཉམས་ཆགས་ཐམས་ཅད་དག་པ་ཡིན་ཞེས་གདམས་པ་དེ་བསྟན་པའོ། །སོར་ཆུད་པའི་རྟགས་ནི། རྨི་ལམ་དུ་ལུས་ལས་རྣག་ཁྲག་ཟག་པ་དང་། གོས་དྲི་མ་མེད་པ་གྱོན་པ་རྨིས་ན་སྡིག་སྒྲིག་དག་ནས་སོར་ཆུད་པ་ཡིན་ནོ། །སྡིག་པ་ལ་ཡོན་ཏན་མེད་ཀྱང་། བཤགས་པས་འདག་པ་སྡིག་པའི་ཡོན་ཏན་ཡིན་པས། གཉེན་པོ་སྟོབས་བཞི་ཚང་པའི་ངང་ནས་གསུང་མཆོག་རྒྱལ་པོ་ཡི་གེ་དྲུག་མ་སྒྲོངས། ཞེས་གསུངས་པའོ། །འདི་ཉོན་མོངས་པ་དྲུག་གི་སྒོ་ནས་བསགས་པའི་སྡིག་སྒྲིབ་ཉེས་ལྟུང་འཇོམས་པ་དང་སྦྱར་ན། ཨཱོྂ་གྱིས་ང་རྒྱལ་གྱི་སྒོ་ནས་བསགས་པའི་སྡིག་སྒྲིབ་འཇོམས། མ་ཡིས་ཕྲག་དོག་གི་སྒོ་ནས་བསགས་པའི་སྡིག་སྒྲིབ་འཇོམས། ཎི་ཡིས་ཐེ་ཚོམ་གྱི་སྒོ་ནས་བསགས་པའི་སྡིག་སྒྲིབ་འཇོམས། པད་ཀྱིས་གཏི་མུག་གི་སྒོ་ནས་བསགས་པའི་སྡིག་སྒྲིབ་འཇོམས། མེས་འདོད་ཆགས་ཀྱི་སྒོ་ནས་བསགས་པའི་སྡིག་སྒྲིབ་འཇོམས། ཧཱུྃ་གིས་ཞེ་སྡང་གི་སྒོ་ནས་བསགས་པའི་སྡིག་སྒྲིབ་ཉེས་ལྟུང་ཐམས་ཅད་འཇོམས་པར་བྱེད། ཉོན་མོངས་པ་དྲུག་གི་སྒོ་ནས་བསགས་པའི་སྡིག་སྒྲིབ་འཇོམས་པར་བྱེད་པ་ཡང་། ཡི་གེ་དྲུག་པ་བཟླས་པ་ལས་འབྱུང་ངོ་།། བཞི་བ་ལམ་གྱི་མཐུན་རྐྱེན་ཚོགས་བསག་པར་བསྟན་པ། བཞི་བ་ལམ་གྱི་མཐུན་རྐྱེན་ཚོགས་བསག་པར་བསྟན་པ་ནི། བདག་འཛིན་ཞེན་པའི་བློ་འདི་སྲིད་པའི་རྒྱུ།། དེ་སླད་ལུས་དང་ལོངས་སྤྱོད་དགེ་བའི་ཚོགས།། ཡར་མཆོད་མར་སྦྱིན་འཁོར་འདས་ཀུན་ལ་བསྔོ།། གཅེས་འཛིན་རྒྱངས་ཀྱིས་སྐྱུར་ལ་ཡིག་དྲུག་སྒྲོངས།། ཞེས་གསུངས་ཏེ། སྲིད་པ་འཁོར་བའི་རྒྱུ་འཇིག་ལྟ་མ་རིག་པ་ཡིན་པས། དང་པོར་ང་ཞེས་བདག་ལ་ཞེན་གྱུར་ཅིང་། །བདག་གི་འདི་ཞེས་དངོས་ལ་ཆགས་བསྐྱེད་པ། །ཞེས་གསུངས་པ་ལྟར་དུ་ང་བདག་ཏུ་འཛིན་པ་དང་། མངོན་ཞེན་གྱི་བློའི་འཛིན་པ་དང་ཞེན་པ་དེ་ཆོད་པའི་སླད་དུ་བདག་གིས་ཡོངས་སུ་འཛིན་པའི་གཞི་ལུས་དང་གཅིག ལོངས་སྤྱོད་དང་གཉིས། དགེ་ཚོགས་དགེ་བའི་དངོས་པོ་དང་གསུམ་པོ་ཡར་བསོད་ནམས་ཀྱི་ཞིང་ལ་མཆོད་པ་དང་། མར་སྙིང་རྗེའི་ཞིང་ལ་སྦྱིན་པ་གཏོང་བ་ཡིན་བསམས་ཏེ། གཅེས་འཛིན་དང་ཞེན་འཛིན་རྒྱངས་ཀྱིས་སམ་ཁད་ཀྱིས་སྐྱུར་བ་སྟེ་བོར་ལ་ཡིག་དྲུག་སྒྲོངས་ཞེས་གསུངས་པའོ། །གཅེས་འཛིན་རྒྱངས་ཀྱིས་བོར་བས་བདག་འཛིན་རྩད་ནས་ཆོད་པའི་དོན་འདི་ཆོས་ཉིད་དང་སྦྱར་ན། ཨཱོྂ་ཆོས་ཉིད་སྤྲོས་བྲལ། མ་ཆོས་ཉིད་རང་བྱུང་། ཎི་ཆོས་ཉིད་རང་གསལ། པད་ཆོས་ཉིད་གསལ་དག མེ་ཆོས་ཉིད་སྟོང་གསལ། ཧཱུྃ་ཆོས་ཉིད་ཀ་དག་གོ །གང་ལྟར་བཤད་རུང་ཆོས་ཉིད་ཅེས་པ་ཐམས་ཅད་ངོ་བོ་གཅིག་ཡིན་པས། ཆོས་ཉིད་ཀྱི་དོན་རྟོགས་པས་ཚོགས་གཉིས་རང་ཤུགས་སུ་རྫོགས་པའོ།། ལྔ་བ་རྟོགས་པའི་ཡེ་ཤེས་རང་རྒྱུད་ལ་སྐྱེད་པའི་ཐབས་དམ་པ་བྱིན་རླབས་ཀྱི་རྩ་བ་བླ་མའི་རྣལ་འབྱོར་བསྟན་པ། ལྔ་བ་རྟོགས་པའི་ཡེ་ཤེས་རང་རྒྱུད་ལ་སྐྱེད་པའི་ཐབས་དམ་པ་སྟེ། བྱིན་རླབས་ཀྱི་རྩ་བ་བླ་མའི་རྣལ་འབྱོར་བསྟན་པ་ནི། སངས་རྒྱས་ཀུན་གྱི་ངོ་བོ་བླ་མ་རྗེ།། སྐུ་དྲིན་སངས་རྒྱས་ཀུན་ལས་ལྷག་པའི་མགོན།། བླ་མ་སྤྱན་རས་གཟིགས་དང་དབྱེར་མེད་དུ།། དད་པའི་གདུང་ཤུགས་སྐྱེད་ལ་ཡིག་དྲུག་སྒྲོངས།། ཞེས་གསུངས་ཏེ། དཔལ་ལྡན་བླ་མ་དམ་པ་ནི་འདས་པའི་སངས་རྒྱས་ཐམས་ཅད་ཀྱི་སྤྲུལ་བ། མ་འོངས་པའི་སངས་རྒྱས་ཐམས་ཅད་ཀྱི་འབྱུང་གནས། ད་ལྟའི་སངས་རྒྱས་ཐམས་ཅད་ཀྱི་རྒྱལ་ཚབ་བམ་ཕྲིན་ལས་པ་ཡིན་པས། སངས་རྒྱས་ཀུན་གྱི་ངོ་བོ་འདུས་པ་ནི་རྗེ་བླ་མ་ཡིན་ཞིང་། ཡོན་ཏན་སངས་རྒྱས་ཀུན་དང་མཉམ་ན་ཡང་། སྐུ་དྲིན་གྱི་ངོས་ནས་སངས་རྒྱས་ཀུན་ལས་ཀྱང་ལྷག་པའི་མགོན་ནམ་སྐྱབས་སུ་གྱུར་པ་ཡིན་པའོ། །བླ་མ་བསྟེན་ཅིང་སྒྲུབ་དུས། དང་པོ་བླ་མ་བརྟག་ལ་མཁས་པ། བར་དུ་བླ་མ་བསྟེན་ལ་མཁས་པ། ཐ་མ་དགོངས་སྤྱོད་བསླབ་ལ་མཁས་པ་སྟེ་རྣམ་པ་གསུམ་གྱི་ཐོག་ནས་བླ་མ་བསྟེན་ལུགས་སྤྱིར་བསྟན་ཅིང་། ཁྱད་པར་ཐུགས་རྗེ་ཆེན་པོའི་ཆོས་སྐོར་ལས་རང་ཉིད་ཀྱི་ཆོས་སྐད་དང་མཐུན་པའི་དོན་རྟགས་མཚོན་པ་གསུམ་གྱིས་གསུངས་པ་སྟེ། དོན་གྱི་བླ་མ་དང་། རྟགས་ཀྱི་བླ་མ་དང་། མཚོན་པའི་བླ་མ་དང་གསུམ་མོ། །དོན་གྱི་བླ་མ་ལ་སྐྱེ་མེད་དོན་གྱི་བླ་མ་དང་། འགག་མེད་དོན་གྱི་བླ་མ་དང་། རིས་མེད་དོན་གྱི་བླ་མ་དང་། སྤྲོས་བྲལ་དོན་གྱི་བླ་མ་དང་། གསལ་སྟོང་ཉམས་ཀྱི་བླ་མ་དང་། རིག་པ་རང་ཤར་གྱི་བླ་མ་དང་ནང་གསེས་རྣམ་པ་དྲུག་ལས། དོན་ཆོས་ཉིད་སྐྱེ་བ་མེད་པ་ཡེ་ནས་རང་ལ་གནས་པ་རང་གིས་ངོ་ཤེས་པས་སྐྱེ་མེད་དོན་གྱི་བླ་མའོ། །དོན་ཆོས་ཉིད་འགག་པ་མེད་པ་རང་བྱུང་རང་ཤར་རང་གིས་ངོ་ཤེས་པས་འགག་མེད་དོན་གྱི་བླ་མའོ། །དོན་ཆོས་ཉིད་མཉམ་པ་རིས་མེད་དུ་འདུག་པ་རང་གིས་ངོ་ཤེས་པས་རིས་མེད་དོན་གྱི་བླ་མའོ། །དོན་ཆོས་ཉིད་སྤྲོས་བྲལ་དུ་འདུག་པ་རང་གིས་ངོ་ཤེས་པས་སྤྲོས་བྲལ་དོན་གྱི་བླ་མའོ། །དོན་ཆོས་ཉིད་གསལ་སྟོང་དུ་འཆར་བ་རང་གིས་ངོ་ཤེས་པས་གསལ་སྟོང་ཉམས་ཀྱི་བླ་མའོ། །དོན་ཆོས་ཉིད་རང་བྱུང་དུ་ཤར་བ་རང་གིས་ངོ་ཤེས་པས་གསལ་སྟོང་ཉམས་ཀྱི་བླ་མའོ། །དོན་ཆོས་ཉིད་རང་བྱུང་དུ་ཤར་བ་རང་གིས་ངོ་ཤེས་པས་རིག་པ་རང་ཤར་གྱི་བླ་མའོ། །དེ་ལྟར་རྣམ་པ་དྲུག་གསུངས་པའོ། །རྟགས་ཀྱི་བླ་མ་ཡང་དེ་བཞིན་དུ་རྣམ་པ་དྲུག སྣང་བ་རང་ཤར་གྱི་བླ་མས་སྣང་སྲིད་རང་གྲོལ་དུ་སྟོན། རྣམ་རྟོག་རང་གྲོལ་ལམ་སློང་གི་བླ་མས་འགྱུ་དྲན་རང་སར་གྲོལ་བར་སྟོན། དུག་ལྔ་རྟོག་བྲལ་གྱི་བླ་མས་ཉོན་མོངས་པ་རང་གྲོལ་དུ་སྟོན། རྐྱེན་སྣང་ཐོག་འགྱེལ་གྱི་བླ་མས་འགལ་རྐྱེན་རང་གྲོལ་དུ་སྟོན། རང་སྣང་རིས་མེད་ཀྱི་བླ་མས་སྣང་བ་ལ་དགག་སྒྲུབ་རང་གྲོལ་དུ་སྟོན། འཁོར་བ་རྒྱས་འདེབས་ཀྱི་བླ་མས་རིགས་དྲུག་གི་སྐྱེ་གནས་རང་ཤར་རང་གྲོལ་དུ་སྟོན་ནོ། །མཚོན་པའི་བླ་མ་ལ་ཡང་རྣམ་པ་དྲུག་སྟེ། རྩ་བའི་བླ་མ་དང་། དབང་བསྐུར་བའི་བླ་མ་དང་། བྱིན་གྱིས་རློབ་པའི་བླ་མ་དང་། ལུང་འབོགས་པའི་བླ་མ་དང་། བརྒྱུད་པའི་བླ་མ་དང་། འདྲེན་པའི་བླ་མ་དང་དྲུག་གོ །རྩ་བའི་བླ་མ་གང་ལ་བྱ་ན། དང་པོ་དབང་བསྐུར། བར་དུ་རྒྱུད་བཤད། ཐ་མ་གདམས་ངག་བཏབ་པ་སྟེ་གསུམ་ལྡན་ནོ། །དེ་ལ་རང་གི་སྙིང་ངམ་སྲོག་ལྟ་བུར་བཀུར་རོ། །གཉིས་པ་དབང་གི་བླ་མ་ནི། དབང་བཞི་རྫོགས་པར་བསྐུར་བའམ་གསུམ་ལ་སོགས་པ་བསྐུར་ནས། ལུས་ངག་ཡིད་གསུམ་སྨིན་པར་བྱས་པས་མ་ལྟ་བུ་ཡིན་ཏེ་རང་གི་མའམ་ལུས་ཀྱི་ཡན་ལག་ལྟ་བུར་བཀུར་རོ། །གསུམ་པ་བྱིན་གྱིས་རློབ་པའི་བླ་མ་ནི། རང་གི་ལུས་ངག་ཡིད་གསུམ་ལ་བླ་མའི་སྐུ་གསུང་ཐུགས་ཀྱིས་བྱིན་གྱིས་བརླབས་ནས་ནད་གདོན་བར་ཆད་ཞི་བར་བྱེད་པ་དེ་ཡིན་པས་རང་གི་ཕ་ལྟ་བུ་ལ་ལུས་ཀྱི་ཉིང་ལག་བཞིན་དུ་བཀུར་རོ། །བཞི་བ་ལུང་འབོགས་པའི་བླ་མ་ནི། བཤད་སྒྲུབ་ལ་སོགས་པའི་ལུང་ཕོག་པ་དེ་ཡིན་ཏེ་རང་གི་ལུས་ཀྱི་ཟླ་གྲོགས་ལྟ་བུར་བརྩེ་གདུང་འབྲེལ་བས་མགོ་བོའི་ཐོད་བཞིན་དུ་བཀུར་རོ། །ལྔ་པ་བརྒྱུད་པའི་བླ་མ་བྱ་བ། གཅིག་ནས་གཅིག་ཏུ་བརྒྱུད་པའི་བླ་མ་གོང་མ་རྣམས་ཡིན་ནོ། །སྤུན་ཟླ་ལྟ་བུ་ཐབས་མེད་པར་ཤིན་ཏུ་གཅེས་པར་བཀུར་རོ། །དྲུག་པ་འདྲེན་པའི་བླ་མ་བྱ་བ། ཆོས་གང་ཡིན་པ་དེ་མཛད་པའི་མཁན་པོ་སེམས་ཅན་འཁོར་བ་ནས་བྱང་ཆུབ་ཏུ་འདྲེན་པ་དེ་ལ་བྱ་སྟེ། དེ་ལ་སངས་རྒྱས་དང་བྱང་ཆུབ་སེམས་དཔའ་ལྟར་བཀུར་རོ། །དེ་ལྟ་བུའི་བླ་མ་ཐམས་ཅད་ཀྱི་ནང་ནས་གཙོ་བོ་རྩ་བའི་བླ་མ་འཕགས་མཆོག་སྤྱན་རས་གཟིགས་དང་དབྱེར་མེད་དུ་གསལ་བ་ལ། དད་པའི་གདུང་ཤུགས་དྲག་པོས་ལུས་ཀྱི་བ་སྤུ་ཟིང་། མིག་ནས་མཆི་མ་ཐོན་པར་བསྐྱེད་ནས་ཡིག་དྲུག་སྒྲོངས། ཞེས་གསུངས་པའོ། །འདི་བྱིན་རླབས་དང་སྦྱར་ན། ཨཱོྂ་གྱིས་སྐུའི་བྱིན་རླབས་ལུས་ལ་འབྱུང་། མས་གསུང་གི་བྱིན་རླབས་ངག་ལ་འབྱུང་། ཎིས་ཐུགས་ཀྱི་བྱིན་རླབས་སེམས་ལ་འབྱུང་། པད་ཀྱིས་ཡོན་ཏན་གྱི་བྱིན་རླབས་རང་ལ་འབྱུང་། མེས་འཕྲིན་ལས་ཀྱི་བྱིན་རླབས་གང་འདོད་པར་འབྱུང་། ཧཱུྃ་གིས་བྱིན་རླབས་ཐམས་ཅད་ཐོགས་པ་མེད་པར་འབྱུང་། སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་ཐམས་ཅད་འབྱུང་བར་བྱེད་པ་ཡང་ཡི་གེ་དྲུག་པ་བཟླས་པས་འབྱུང་བ་ཡིན་ནོ།། དྲུག་པ་རྒྱུ་རྡོ་རྗེ་བཞིའི་ངོ་བོར་སྒྲུབ་པའི་དབང་བཞི་བསྟན་པ། དྲུག་པ་རྒྱུ་རྡོ་རྗེ་བཞིའི་ངོ་བོར་སྒྲུབ་པའི་དབང་བཞི་བསྟན་པ་ལ་གཉིས་ལས། དང་པོ་རང་དོན་དུ་ལམ་དབང་ལེན་པར་བསྟན་པ། དང་པོ་རང་དོན་དུ་ལམ་དབང་ལེན་པར་བསྟན་པ་ནི། སྒྲིབ་བྱང་ལམ་སྒོམ་སྐུ་བཞི་མངོན་དུ་བྱེད།། དབང་བཞིའི་བདག་ཉིད་བླ་མ་སྤྱན་རས་གཟིགས།། རང་སེམས་བླ་མར་ཤེས་ན་དབང་བཞི་རྫོགས།། རང་དབང་རང་ཐོབ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ལུས་དང་ངག་དང་ཡིད་དང་སྒོ་གསུམ་ཆ་མཉམ་པའི་སྒྲིབ་པ་བཞི་བྱང་བ་དང་། ལམ་བསྐྱེད་རིམ་དང་རླུང་དང་གཏུམ་མོ་དང་རྫོགས་ཆེན་བཞི་སྒོམ་པ་ལ་དབང་བ་དང་། འབྲས་བུ་སྤྲུལ་སྐུ་དང་ལོངས་སྐུ་དང་ཆོས་སྐུ་དང་ངོ་བོ་ཉིད་ཀྱི་སྐུ་སྟེ་སྐུ་བཞི་མངོན་དུ་བྱེད་པའི་ནུས་པ་རང་རྒྱུད་ལ་འཇོག་པས། དབང་བཞིའི་བདག་ཉིད་དེ་དབང་བཞིའི་འབྱུང་གནས་ནི་རྩ་བའི་བླ་མ་འཕགས་མཆོག་སྤྱན་རས་གཟིགས་ཡིན་ལ། གོང་དུ་སྨོས་པ་བཞིན་དུ་རང་སེམས་ཆོས་ཉིད་དོན་གྱི་བླ་མ་ཡིན་པར་ངོ་ཤེས་ན། བུམ་དབང་དང་གསང་དབང་དང་ཤེས་རབ་ཡེ་ཤེས་ཀྱི་དབང་དང་ཚིག་དབང་རིན་པོ་ཆེ་སྟེ་དབང་བཞི་རང་ལ་རྫོགས་པ་ཡིན་པས། རང་ལ་ཡོད་པའི་དབང་རང་གིས་ཐོབ་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ། །འདི་དབང་དང་སྦྱར་ན། ཨཱོྂ་གྱིས་ལྷ་དབང་ལུས་ལ་བསྐུར་བར་བྱེད། མས་སྔགས་དབང་ངག་ལ་བསྐུར་བར་བྱེད། ཎིས་ཆོས་དབང་སེམས་ལ་བསྐུར་བར་བྱེད། པད་ཀྱིས་བུམ་པའི་དབང་གིས་ལུས་སྨིན་པར་བྱེད། མེས་གསང་བའི་དབང་གིས་ངག་སྨིན་པར་བྱེད། ཧཱུྃ་གིས་ཤེས་རབ་ཡེ་ཤེས་ཀྱི་དབང་དང་། ཚིག་དབང་རིན་པོ་ཆེས་སེམས་སྨིན་པར་བྱེད། དེ་ལྟར་དབང་གིས་ལུས་ངག་ཡིད་གསུམ་སྨིན་པ་དང་། སྐུ་བཞིའི་ཡེ་ཤེས་བསྐྱེད་པ་ཡང་ཡི་གེ་དྲུག་པ་བཟླས་པ་ལས་འབྱུང་ངོ་།། གཉིས་པ་གཞན་དོན་དུ་བྱིན་རླབས་ཐུགས་རྗེའི་དབང་བསྐུར་བར་བསྟན་པ། གཉིས་པ་གཞན་དོན་དུ་བྱིན་རླབས་ཐུགས་རྗེའི་དབང་བསྐུར་བར་བསྟན་པ་ནི། འཁོར་བ་རང་སྣང་ཙམ་སྟེ་ལོགས་ན་མེད།། སྣང་སྲིད་ལྷ་རུ་ཤེས་ན་གཞན་དོན་རྫོགས།། དག་སྣང་དབང་བཞི་འགྲོ་ལ་དུས་གཅིག་བསྐུར།། འཁོར་བ་དོང་སྤྲུགས་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ཕུང་པོ་ལྔ་ཡིས་བསྡུས་པའི་སྣོད་བཅུད་ཀྱི་འཁོར་བ་འདི། རང་སྣང་འཁྲུལ་བའི་སྣང་བ་ཙམ་སྟེ་དོན་དུ་བདེན་པར་གྲུབ་པ་ཞིག་ལོགས་ན་མེད་ཅིང་། སྣང་སྲིད་སྣོད་བཅུད་ཀྱིས་བསྡུས་པའི་ཆོས་ཐམས་ཅད་དག་པ་ལྷ་དང་དཀྱིལ་འཁོར་གྱི་རྣམ་པར་ཡེ་ནས་ཡིན་པ་ལ་ཡིན་པར་ཤེས་ན། བདག་གཞན་གཉིས་འཛིན་གྱི་རྟོག་པ་དག་ནས་གཞན་དོན་ངང་གིས་རྫོགས་པས། དག་པ་རབ་འབྱམས་ཀྱི་སྣང་བ་རུ་གོམས་དུས། མ་དག་མཚན་འཛིན་གྱི་རྟོག་པ་ཟུར་ན་ཡོད་པ་མིན་པས། མ་དག་པ་མེད་པའི་དག་པ་ཡེ་ཤེས་ཀྱི་དབང་བཞི་འགྲོ་བ་ཡོངས་ལ་དུས་གསུམ་མཉམ་ཉིད་ཡིན་པའི་དུས་གཅིག་ལ་བསྐུར་ནས། ཁམས་གསུམ་འཁོར་བའི་མིང་ཡང་མི་གྲག་པའི་འཁོར་བ་དོང་སྤྲུགས་ངང་ནས་ཡིག་དྲུག་སྒྲོངས། ཞེས་གསུངས་པའོ། །འདི་འགྲོ་དོན་དྲུག་དང་སྦྱར་ན། ཨཱོྂ་གྱིས་འགྲོ་དྲུག་གི་སྡུག་བསྔལ་བསལ་བར་བྱེད། མས་འགྲོ་དྲུག་བུ་བཞིན་དུ་སྐྱོང་བར་བྱེད། ཎིས་འགྲོ་དྲུག་འཁོར་བའི་གནས་ནས་འདྲེན་པར་བྱེད། པད་ཀྱིས་འགྲོ་དྲུག་བདེ་བའི་གནས་སུ་འགོད་པར་བྱེད། མེས་འགྲོ་དྲུག་གི་ལས་དང་སྒྲིབ་པ་སྦྱོང་ཞིང་སྲེག་པར་བྱེད། ཧཱུྃ་གིས་འགྲོ་དྲུག་གི་དུག་ལྔ་གནས་སུ་སྦྱོང་བར་བྱེད་དོ། །འགྲོ་དྲུག་གི་སྒྲིབ་པ་སྦྱོང་ཞིང་དོན་བྱེད་པ་ཡང་ཡི་གེ་དྲུག་པ་བཟླས་པ་ལས་ཐོབ་པར་བྱེད་པ་ཡིན་ནོ།། བདུན་པ་སྣང་སྟོང་ལྷ་སྐུའི་བསྐྱེད་རིམ་བསྟན་པ། བདུན་པ་སྣང་སྟོང་ལྷ་སྐུའི་བསྐྱེད་རིམ་བསྟན་པ་ནི། བསྐྱེད་རིམ་རྣམ་གྲངས་མང་མང་བློར་མི་འཁྱུད།། བདེ་གཤེགས་གཅིག་བསྒོམས་རྒྱལ་བ་ཀུན་གྱི་ངང་།། གང་སྣང་སྣང་བ་ཐུགས་རྗེ་ཆེན་པོའི་སྐུ།། སྣང་སྟོང་ལྷ་སྐུའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། འདི་ནི་འཁྱེར་སོ་གསུམ་ལས་ལུས་ལྷ་ཡི་འཁྱེར་སོ་སྟེ། དཀྱིལ་འཁོར་གྱི་ལྷ་ཚོགས་རིགས་བརྒྱ་རིགས་སྟོང་བྱེ་བ་གྲངས་མེད་ཀྱི་ཞལ་ཕྱག་ཚོམ་བུའི་སྤྲོས་པའི་རྣམ་གྲངས་མང་མང་པོར་གོམས་ཆ་མེད་པ་ཞིག་གིས་བློར་མི་འཁྱུད་པའམ་སེམས་སུ་མི་ལོང་ནས་སྒོམ་མི་ཐུབ་ཀྱང་། བདེ་གཤེགས་གཅིག་བསྒོམས་པས་རྒྱལ་བ་ཐམས་ཅད་ཀུན་པོ་དེར་རྫོགས་པའི་སྤྲོས་མེད་ངང་སྒོམ་གང་དུ་ཇི་ལྟར་སྣང་བའི་གཟུགས་ཐམས་ཅད་ཐུགས་རྗེ་ཆེན་པོའི་སྐུ་དང་ཞིང་ཁམས་ཡིན་པར་གསལ་འདེབས། སྣང་བཞིན་སྟོང་བ། སྟོང་བཞིན་སྣང་བ། གང་སྣང་ལྷ་སྐུར་ཤར་བའི་ངང་ནས་ཡིག་དྲུག་སྒྲོངས། ཞེས་གསུངས་པའོ། །དེ་ཡང་ཐུགས་རྗེ་ཆེན་པོའི་སྐུའི་གསལ་སྣང་འདི་སྐུ་གསུམ་གྱི་དབྱེ་བའི་ཐོག་ནས་ཕྱེས་ན། ཆོས་སྐུ་ཐུགས་རྗེ་ཆེན་པོ་ཞལ་གཅིག་ཕྱག་བཞི་པ། ལོངས་སྐུ་ཐུགས་རྗེ་ཆེན་པོ་ཞལ་བཅུ་གཅིག་ཕྱག་བརྒྱད་པ། སྤྲུལ་སྐུ་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་ངོ་། །དེ་ལ་ཆོས་སྐུ་ཐུགས་རྗེ་ཆེན་པོ་ཞལ་གཅིག་ཕྱག་བཞི་པ་ནི། འཁོར་བའི་སྐྱོན་གྱིས་མ་གོས་པའི་སྐུ་མདོག་དཀར་པོ། ཆོས་ལོངས་སྤྲུལ་བའི་སྐུ་གསུམ་ཡང་སྐུ་གསུམ་ཚང་བས་གཉིས་མེད་ཆོས་སྐུའི་རྩ་བའི་ཕྱག་གཉིས་ཐལ་མོར་སྦྱར་བ། ལོངས་སྐུ་ཤེས་རབ་ཀྱི་པདྨ་གཡོན་ན་འཛིན་པ། སྤྲུལ་སྐུ་ཐབས་ཀྱི་བགྲང་ཕྲེང་གཡས་ན་འཛིན་པ། ཞབས་གཉིས་སེམས་ཅན་གྱི་དོན་ལ་རིས་མེད་པདྨའི་གདན་ལ་བཞུགས་པ་ཡིན་པའོ། །ལོངས་སྐུ་ཐུགས་རྗེ་ཆེན་པོ་ཞལ་བཅུ་གཅིག་ཕྱག་བརྒྱད་པ་ནི། རྣམ་དག་དྲི་མ་མེད་པའི་སྐུ་མདོག་དཀར་ལ་འཚེར་བ། རྩ་བ་ཆོས་སྐུའི་ཕྱག་གཉིས་ཐལ་མོར་སྦྱར་བ། ཡན་ལག་ལོངས་སྐུའི་ཕྱག་གསུམ་གྱི་དང་པོར་སྐྱོན་གྱིས་མ་གོས་པའི་པདྨ་དཀར་པོ་འཛིན་པ། གཉིས་པ་ཉོན་མོངས་དག་བྱེད་ཀྱི་རིལ་བ་སྤྱི་བླུགས་ཐོགས་པ། གསུམ་པ་ཐབས་དང་ཤེས་རབ་གཉིས་མེད་ཀྱི་མདའ་གཞུ་བསྣམས་པའོ། །ཉིང་ལག་སྤྲུལ་སྐུའི་ཕྱག་གསུམ་གྱི་དང་པོས་འཁོར་བའི་སེམས་ཅན་འདྲེན་པའི་ཤེལ་དཀར་གྱི་བགྲང་ཕྲེང་འཛིན་པ། གཉིས་པས་ཡི་དྭགས་ཀྱི་བཀྲེས་སྐོམ་སེལ་བའི་མཆོག་སྦྱིན་གྱི་ཕྱག་རྒྱ་མཛད་པ། གསུམ་པས་འཕོ་ཞིང་གཅོད་བའི་དོན་མཚོན་པར་བྱེད་པའི་འགྲོ་ལ་ཆོས་འཁོར་སྐོར་བའི་གསེར་གྱི་འཁོར་ལོ་བསྐོར་བར་མཛད་པ། འགྲོ་དོན་རིངས་པའི་བརྡར་ཞབས་གཉིས་པདྨའི་གདན་ལ་མཉམ་པར་བཞུགས་པའོ། །སྤྲུལ་སྐུ་ཕྱག་སྟོང་སྤྱན་སྟོང་ནི། སྐུ་མདོག་དཀར་པོ་ཆོས་སྐུ་ཞི་བའི་ཞལ་གསུམ། ལོངས་སྐུ་བཞད་པའི་ཞལ་གསུམ། དམར་སྨུག་གཙིགས་པའི་ཞལ་གཉིས། སྤྲུལ་སྐུ་ཁྲོས་པའི་ཞལ་གཉིས། འོད་དཔག་མེད་ཀྱི་དབུ་དང་བཅུ་གཅིག་ཡིན་པའོ། །རྩ་བ་ཆོས་སྐུའི་ཕྱག་བཅུ་ཡོད་པ་ལས། རྩ་བའི་ཕྱག་གཉིས་ཀ་ཐུགས་ཀར་ཐལ་མོར་སྦྱར་བ། དེའི་འོག་མ་གཉིས་ན་ཕྲེང་བ་དང་པདྨ་འཛིན་པ། དེའི་འོག་མ་གཉིས་ན་འཁོར་ལོ་དང་རིལ་བ་སྤྱི་བླུགས་འཛིན་པ། དེའི་འོག་མ་གཉིས་ན་མཆོག་སྦྱིན་གྱི་ཕྱག་རྒྱ་དང་རིན་པོ་ཆེ། དེའི་འོག་མ་གཉིས་ན་སྤྲུལ་སྐུ་དང་མདའ་གཞུ་འཛིན་པའོ། །ཡན་ལག་ལོངས་སྐུའི་ཕྱག་སུམ་ཅུ་སོ་བརྒྱད་ཡོད་པ་ལས། གཡས་ཀྱི་བཅུ་དགུ་ན། རིན་པོ་ཆེ། ཞགས་པ། ལྷུང་བཟེད། རལ་གྲི། རྡོ་རྗེ། རྡོ་རྗེ་རྒྱ་གྲམ། ཆུ་ཤེལ། མེ་ཤེལ། མདའ་གཞུ། ལྕུག་མ། རྔ་གཡབ། ཕུབ། བུམ་པ། དགྲ་སྟ། ཕྲེང་བ། པདྨ་སྔོན་པོ། ཉི་མ། ཟླ་བ། པདྨ་དཀར་པོ་འཛིན་པའོ། །གཡོན་གྱི་བཅུ་དགུ་ན། སྤྲིན། སྤྱི་བླུགས། པདྨ་སེར་པོ། རལ་གྲི། དུང་དཀར། ཐོད་དབྱུག ཕྲེང་བ། དྲིལ་བུ། རྡོ་རྗེ། ལྕགས་ཀྱུ། གསིལ་བྱེད། སྤྲུལ་སྐུ། གཞལ་མེད་ཁང་། གླེགས་བམ། འཁོར་ལོ། སྤྲུལ་བའི་གཟུགས། རྒུན་འབྲུམ། པདྨ་དམར་པོ། རིན་པོ་ཆེ་ཟུར་བརྒྱད་པ་འཛིན་པའོ། །ཉིང་ལག་སྤྲུལ་སྐུའི་ཕྱག་སྟོང་ནི། མཆོག་སྦྱིན་གྱི་ཕྱག་རྒྱ་མཛད་པའི་ཕྱག་མཐིལ་ན་སྤྱན་རེ་རེ་གསལ་བས་འགྲོ་དྲུག་སེམས་ཅན་རྣམས་ལ་ཐུགས་རྗེས་ཕྱོགས་རིས་མེད་པར་མཉམ་པར་གཟིགས་པ། ཞབས་གཉིས་འགྲོ་བའི་དོན་ལ་མྱུར་སྟབས་ཀྱིས་བཞེངས་པར་མཛད་པའོ། །ཐང་སྐུ་བྲིས་ཆ་དག་མ་དང་། སྐུ་གཟུགས་ཚད་ལྡན་དག་ལ་བལྟས་ན་ཤེས། ལྷ་གང་སྒོམ་ན་ཡང་ལྕགས་ཀྱིས་མགར་བའི་འབར་འབུར་དང་། ཤིང་གིས་བྱས་པའི་གཤོང་མོ། ཐང་ཀའི་ངོས་སུ་བྲིས་པའི་རྒྱབ་མེད་ལེབ་མོ་ལྟ་བུ་མིན་པར་ནམ་མཁའི་འཇའ་ཚོན་ལྟར། སྣང་ལ་རང་བཞིན་མེད་པ། འོད་ཀྱི་ལུས་ལ་ཡེ་ཤེས་ཀྱི་སྙིང་པོ་ཅན་དུ་བསྒོམ་དགོས། སྤྱན་རས་གཟིགས་ཀྱི་ལྷ་ཚོགས་ཤིན་ཏུ་རྒྱས་པར་སྒོམ་ན་རྒྱལ་བ་རིགས་ལྔ། ཡུམ་ཆེན་ཤེར་ཕྱིན་རིགས་དྲུག རིགས་དྲུག་གི་ཐུབ་པ་དྲུག བསྐལ་བཟང་སངས་རྒྱས་སྟོང་རྩ་ལ་སོགས་པ་འཁོར་ཤིན་ཏུ་མང་བར་བསྐྱེད་ཆོག་རྒྱས་པ་ལྟར་དུ་སྒོམ་ཚུལ་ཡོད་ཀྱང་། ཤིན་ཏུ་བསྡུས་ཏེ་སྒོམ་སླ་བར་བཤད་ན། ཐུགས་རྗེ་ཆེན་པོ་ཕྱག་བཞི་པ། མདུན་དུ་ཡུམ་ཡི་གེ་དྲུག་མ་སྐུ་མདོག་ཕྱག་མཚན་ཡབ་དང་འདྲ་བ། གཡས་སུ་སྲས་ནོར་བུ་འཛིན་པ་དཀར་པོ་རིན་པོ་ཆེའི་སྡོང་བུ་འཛིན་པ། གཡོན་དུ་སྲས་མོ་རིགས་སྔགས་འཛིན་མ་དཀར་མོ་ཤེལ་ཕྲེང་འཛིན་པ། འགྲོ་བ་རིགས་དྲུག་གི་སེམས་ཅན་ཐམས་ཅད་ཐུགས་རྗེ་ཆེན་པོའི་སྐུ་ཤ་སྟག་ཡིན་པར་བསྒོམ་དགོས། སྙིང་ཐིག་གི་རྩ་བའི་གདན་ས་འདི་ནས་རྫོགས་པ་ཆེན་པོ་ཀློང་ཆེན་སྙིང་ཐིག་གི་འཕགས་མཆོག་སྡུག་བསྔལ་རང་གྲོལ་གྱི་དཀྱིལ་འཁོར་གཉན་པོ་ཞལ་ཕྱེས་ནས། དབང་ཡང་ལན་གྲངས་དུ་མར་བསྐུར་བ་ཡིན་པས། འདིའི་བསྐྱེད་རིམ་གྱི་གསལ་སྣང་དང་བསྟུན་ནས་བསྒོམ་ན། རང་ཉིད་གང་དུ་གནས་པའི་ས་ཕྱོགས་དེ་ཉིད་རི་བོ་པོ་ཏ་ལའི་ཞིང་ཁམས་བརྡ་རྟགས་མཚན་ཉིད་ཐམས་ཅད་རྫོགས་པའི་དཀྱིལ་འཁོར་གྱི་དབུས་སུ། སྣ་ཚོགས་པདྨ་དང་ཉི་མ་ཟླ་བའི་གདན་སྟེང་ན་ཡི་གེ་ཧྲཱིཿ་ ཡིག་ཡོངས་སུ་གྱུར་བ་ལས། རང་ཉིད་འཕགས་མཆོག་སྙིང་རྗེའི་ལྷ་སྡུག་བསྔལ་རང་གྲོལ་སྐུ་མདོག་དཀར་པོ། ཞལ་གཅིག ཕྱག་བཞི། ཞབས་གཉིས་མཉམ་པའི་སྟབས་ཀྱིས་བཞེངས་པ། རྩ་བའི་ཕྱག་གཉིས་ཐུགས་ཀར་ཐལ་མོ་སྦྱར་བ། ལྷག་མ་གཉིས་ཀྱིས་བགྲང་ཕྲེང་དང་པདྨ་དཀར་པོ་བསྣམས་པ། ལོངས་སྤྱོད་རྫོགས་སྐུའི་དར་དང་རིན་ཆེན་གྱི་རྒྱན་གྱིས་མཛེས་པ། ཞི་ཚུལ་དགུ་དང་། རྒྱན་ཆས་བཅུ་གསུམ་གྱིས་བརྒྱན་པ། དབུ་གཙུག་ན་རིགས་བདག་འོད་དཔག་མེད་པས་མཚན་པ། ཕྱོགས་བཞིར་པདྨ་འདབ་བཞིའི་གདན་སྟེང་དུ་མཁའ་འགྲོ་རིགས་བཞི་སྟེ། ཤར་དུ་རྗེ་བཙུན་སྒྲོལ་མ་སྐུ་མདོག་དཀར་མོ། ལྷོ་རུ་འོད་ཟེར་ཅན་མ་སྐུ་མདོག་སེར་མོ། ནུབ་ཏུ་ཀུ་རུ་ཀུ་ལེ་དམར་མོ། བྱང་དུ་ནོར་རྒྱུན་ལྷ་མོ་ལྗང་མོ་དག་གིས་ཞི་རྒྱས་དབང་དྲག་གི་ལས་བཞི་འགྲུབ་པ། སྒོ་བཞིར་དབང་ཆེན་སྡེ་བཞི་ལས་རང་མདོག་ཅན། མཐའ་སྐོར་བར་མཚམས་སུ་སངས་རྒྱས་བྱང་སེམས་རིག་འཛིན་གྱིས་སྐོར་བ། སྣང་སྟོང་སྒྲིབ་གཡོགས་དང་བྲལ་བའི་དབྱིངས་ན་གསལ་བར་བསྒོམ་དགོས་པའོ། །འདི་ཐུགས་རྗེ་ཆེན་པོའི་སྒྲུབ་ཐབས་སྤྱིའི་ཁོག་དབུབ་གོང་ནས་ཞུས་པ་ལྟར་དུ། ཆོས་སྐུ་ཐུགས་རྗེ་ཆེན་པོ་ཞག་གཅིག་ཕྱག་བཞི་པ། ལོངས་སྐུ་ཐུགས་རྗེ་ཆེན་པོ་ཞལ་བཅུ་གཅིག་ཕྱག་བརྒྱད་པ། སྤྲུལ་སྐུ་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་དང་། གཞན་ཡང་ཆོས་ཉིད་དོན་གྱི་ཐུགས་རྗེ་ཆེན་པོ། རིག་པ་རྟགས་ཀྱི་ཐུགས་རྗེ་ཆེན་པོ། མཚོན་པ་དཔེའི་ཐུགས་རྗེ་ཆེན་པོ་དང་སྦྱར་ན། ཨཱོྂ་གྱིས་སྐུ་དྲུག་བདེ་བར་ཆེན་པོར་ཤར། མས་ཉོན་མོངས་དྲུག་རང་སར་ཞི། ཎིས་རིགས་དྲུག་གི་སྐྱེ་རྒྱུན་གཅོད། པད་ཀྱིས་རང་རིག་པའི་ཡེ་ཤེས་དྲུག་ཤར། མེས་སྡུག་བསྔལ་བདེ་བར་ཤར། ཧཱུྃ་གིས་ཁམས་གསུམ་འཁོར་བའི་སྡུག་བསྔལ་གྱི་རྒྱུན་གཅོད་པར་བྱེད་པ་ཡང་ཡི་གེ་དྲུག་པ་བཟླས་པ་ལས་འབྱུང་ངོ་།། བརྒྱད་པ་བཟླས་བརྗོད་སྔགས་དང་བསྙེན་པར་བསྟན་པ། བརྒྱད་པ་བཟླས་བརྗོད་སྔགས་དང་བསྙེན་པར་བསྟན་པ་ནི། བཟླས་བརྗོད་བསྙེན་སྒྲུབ་ལས་སྔགས་སྤྲོས་པ་ཙམ།། ཆིག་ཆོད་ཡི་གེ་དྲུག་པ་ཆོས་ཀྱི་སྒྲ།། སྒྲ་གྲག་འཕགས་པའི་གསུང་དང་འདུ་འབྲལ་མེད།། གྲག་སྟོང་སྔགས་སུ་ཤེས་པས་ཡིག་དྲུག་སྒྲོངས།། ཞེས་གསུངས་ཏེ། སྤྱིར་ཐུགས་རྗེ་ཆེན་པོའི་སྒྲུབ་པའི་དཀྱིལ་འཁོར་ཞལ་ཕྱེས་པའི་སྐབས་སུ། ངག་དག་པ་སྔགས་ཀྱི་འཁོར་ལོ་ལ་རྣམ་པ་དྲུག་གི་སྒོ་ནས་དྲུག་སྐོར་ལས། ཕྱི་མདོ་སྡེ་ལྟར་གཞན་དོན་དུ་བཟླས་པ་དང་། ནང་གསང་སྔགས་ལྟར་བསྙེན་སྒྲུབ་ཏུ་བཟླས་པ་དང་། མཁའ་འགྲོ་མའི་བྱིན་རླབས་བརྡའི་ཚུལ་དུ་བཟླས་པ་དང་། བླ་མ་དང་ལྷ་ལ་གསོལ་བ་བཏབ་པ་མ་ལ་བུ་འབོད་ཀྱི་ཚུལ་དུ་བཟླས་པ་དང་། སྒྲིབ་སྦྱོང་ཆོས་སྤྱོད་ཀྱི་ཚུལ་དུ་བཟླས་པ་དང་། རྡོ་རྗེའི་བཟླས་པ་མཉམ་བཞག་བསམ་གཏན་གྱི་ཚུལ་དུ་བཟླས་པ་དང་དྲུག་གསུངས་ཤིང་། དེ་ལས་བསྙེན་སྒྲུབ་ལ་བསྙེན་པ་ནི། ཡེ་ཤེས་སེམས་དཔའ་དང་། དམ་ཚིག་སེམས་དཔའ་གཉིས་ལས་ཡེ་ཤེས་པ་བསྙེན་པ་ལ་བྱ་ལ། སྒྲུབ་པ་ནི། དམ་ཚིག་པ་དང་ཡེ་ཤེས་པ་གཉིས་སུ་མེད་པར་བསྒྲུབ་པ་ལ་བྱ་ཞིང་། དེ་དག་གི་སྐབས་སུ་འོད་ཟེར་སྤྲོ་བསྡུ་ལ་སོགས་པ་བཟླས་དམིགས་ཀྱི་སྤྲོས་པ་མང་བ་ཡིན་ཡང་། སྒྲ་གྲག་ཐམས་ཅད་ཆིག་ཆོད་ཡི་གེ་དྲུག་པ་ཆོས་ཀྱི་སྒྲ་འཕགས་པའི་གསུང་དང་འདུ་འབྲལ་མེད་པར་ཤེས་ན། བཟླས་སྔགས་བསྙེན་པ་ཚང་མ་དེའི་ནང་དུ་འཐུས་ཤིང་། དཀྱིལ་འཁོར་གསུམ་གྱི་ནང་གསེས་གྲག་པ་གསུང་གི་དཀྱིལ་འཁོར་ནི། སྐྱེ་འགྲོ་གཟུགས་ཀྱིས་བསྡུས་པ་ཐམས་ཅད་ཀྱི་སྐད། ས་སྒྲ་ཆུ་སྒྲ་མེ་སྒྲ་རླུང་སྒྲ། སེམས་ཅན་གྱི་སྒྲ། རྟེན་འབྲེལ་གྱི་སྒྲ་ལ་སོགས་པ་ཐམས་ཅད་ཡི་གེ་དྲུག་པའི་སྒྲ་མ་གཏོགས་གཞན་མེད་པས་ཁམས་གསུམ་ཐམས་ཅད་དུ་དིར་གྱིས་གྲག་ཅིང་བཟླས་པར་བསམས་ནས་ཡི་གེ་དྲུག་མ་བཟླ་དགོས། ངག་སྔགས་ཀྱི་གདངས་ཀྱིས་ཟིན་པས་ཐུགས་རྗེ་ཆེན་པོའི་གསུང་ལ་འགག་པ་དང་། རྒྱུན་ཆད་པ་མི་མངའ་སྟེ། སྔགས་དང་སྙིང་པོ་རྒྱུན་མི་ཆད་པའོ། །གྲག་སྟོང་སྔགས་སུ་ཤེས་པ་ནི་འཁྱེར་སོ་གསུམ་གྱི་ནང་ཚན་ངག་སྔགས་སུ་འཁྱེར་བ་ཡིན་པས་གྲག་པ་གསུང་ཡི་གེ་དྲུག་མའི་གདམས་ངག་འཁྱེར་ཤེས་ན་ངག་སྔགས་སུ་སྨིན་པས། ངག་སྔགས་ཀྱི་བརྟུལ་ཞུགས་ཀྱིས་འགྲོ་བ་དབང་དུ་འདུས། གྲག་སྟོང་ཟུང་དུ་འཇུག ཐུགས་རྗེ་ཆེན་པོའི་གསུང་དུ་གྲོལ་བའོ། །འདི་གསོལ་འདེབས་དང་སྦྱར་ན། ཨཱོྂ་སྐུ་ལ་གསོལ་བ་འདེབས། མ་གསུང་ལ་གསོལ་བ་འདེབས། ཎི་ཐུགས་ལ་གསོལ་བ་འདེབས། པད་ཡོན་ཏན་ལ་གསོལ་བ་འདེབས། མེ་ཕྲིན་ལས་ལ་གསོལ་བ་འདེབས། ཧཱུྃ་སྐུ་གསུང་ཐུགས་ཡོན་ཏན་འཕྲིན་ལས་ལྔ་ཆར་ལ་གསོལ་བ་འདེབས། བདེ་བར་གཤེགས་པའི་སྐུ་གསུང་ཐུགས་ཡོན་ཏན་འཕྲིན་ལས་ལྔ་ལ་གསོལ་བ་ཕར་བཏབ་པས། བྱིན་རླབས་ཚུར་འབྱུང་བར་བྱེད་པ་ཡང་ཡི་གེ་དྲུག་པ་བཟླས་པས་འབྱུང་ངོ་།། དགུ་བ་མཆོག་ཐུན་གྱི་དངོས་གྲུབ་འགྲུབ་པར་བསྟན་པ། དགུ་བ་མཆོག་ཐུན་གྱི་དངོས་གྲུབ་འགྲུབ་པར་བསྟན་པ་ནི། སྒྲིབ་གཉིས་རྣམ་རྟོག་ཞི་ན་ཉམས་རྟོགས་རྒྱས།། རང་སྣང་དབང་དུ་འདུས་ན་དགྲ་བགེགས་ཐུལ།། མཆོག་ཐུན་ཚེ་འདིར་སྩོལ་མཛད་སྤྱན་རས་གཟིགས།། ལས་བཞི་ལྷུན་གྲུབ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། སེར་སྣ་ལ་སོགས་པ་ཉོན་མོངས་པའི་སྒྲིབ་པ་དང་། འཁོར་གསུམ་དུ་རྣམ་པར་རྟོག་པ་ཤེས་བྱའི་སྒྲིབ་པ་སྟེ་སྒྲིབ་གཉིས་ཀྱི་རྣམ་རྟོག་ཞི་ན། བདེ་དང་། གསལ་བ། སྟོང་པ་སོགས་ཀྱི་ཉམས་དང་། རྟོགས་པའི་ཡེ་ཤེས་ཀྱི་རྩལ་ནང་ནས་རྒྱས་ཤིང་། རང་སྣང་དབང་དུ་འདུས་ན། གཞན་སྣང་ཟིལ་གྱིས་རང་ཤུགས་ཀྱིས་ནོན་པ་ཆོས་ཉིད་ཡིན་པས། ཕྱིའི་དགྲ་བགེགས་སོགས་སྒྲུབ་ལ་བར་དུ་གཅོད་པའི་འཚེ་བ་ཐུལ་བས་མ་ཚད། མཆོག་གི་དངོས་གྲུབ་རིག་འཛིན་རྣམ་པ་བཞི་འགྲུབ་པ་དང་། ཐུན་མོང་གི་དངོས་གྲུབ། རིལ་བུ་དང་། མིག་སྨན་དང་། ས་འོག་དང་། རལ་གྲི་དང་། ནམ་མཁར་འཕུར་བ་དང་། མི་སྣང་དང་། འཆི་བ་མེད་པ་དང་། ནད་འཇོམས་ཏེ་བརྒྱད་སོགས་ཐོབ་པར་འགྱུར་རོ། །ཐུགས་རྗེ་ཆེན་པོ་སྒོམ་པའི་རྣལ་འབྱོར་པས། ལུས་ལྷ་ཡི་དཀྱིལ་འཁོར་དུ་བསྒོམ་སྟེ། སྣང་བ་སྐུའི་ཏིང་འཛིན་དང་མི་འབྲལ་བས་ལྷ་སྣང་རྒྱུན་མི་ཆད་པར་ཐུགས་རྗེ་ཆེན་པོའི་སྐུ་སྒྲུབ་པས་སྐུ་འགྲུབ། ངག་གྲག་པ་སྒྲ་ཡི་དཀྱིལ་འཁོར་སྔགས་ཀྱི་ཏིང་འཛིན་དང་མི་འབྲལ་བས་ངག་སྔགས་སུ་གྲོལ་ནས་ཐུགས་རྗེ་ཆེན་པོའི་གསུང་སྒྲུབ་པས་གསུང་འགྲུབ། ཡིད་དྲན་རྟོག་ཐུགས་ཀྱི་དཀྱིལ་འཁོར་ཆོས་ཉིད་ཀྱི་ཏིང་ངེ་འཛིན་དང་མི་འབྲལ་བས་སེམས་ཆོས་ཉིད་དུ་གྲོལ་ནས་ཐུགས་རྗེ་ཆེན་པོའི་ཐུགས་འགྲུབ་བོ། །དེ་ལྟར་སྐུ་གསུང་ཐུགས་གསུམ་པོ་འགྲུབ་སྟེ་མཆོག་ཐུན་གྱི་དངོས་གྲུབ་ཚེ་འདིར་འགྲུབ་ཅིང་། ཞི་བ་དང་། རྒྱས་པ་དང་། དབང་དང་། དྲག་པོའི་ལས་བཞི་ཐོགས་མེད་ལྷུན་གྱིས་གྲུབ་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ། །འདི་སྐུ་གསུང་ཐུགས་ཡོན་ཏན་འཕྲིན་ལས་ལྔའི་བྱིན་རླབས་དངོས་གྲུབ་ཐོབ་པ་དང་སྦྱར་ན། ཨཱོྂ་གྱིས་སྐུ་ཡི་བྱིན་རླབས་དང་དངོས་གྲུབ་ཐོབ། མ་ཡིས་གསུང་གི་བྱིན་རླབས་དང་དངོས་གྲུབ་ཐོབ། ཎི་ཡིས་ཐུགས་ཀྱི་བྱིན་རླབས་དང་དངོས་གྲུབ་ཐོབ། པད་ཀྱིས་ཡོན་ཏན་གྱི་བྱིན་རླབས་དང་དངོས་གྲུབ་ཐོབ། མེ་ཡིས་ཕྲིན་ལས་ཀྱི་བྱིན་རླབས་དང་དངོས་གྲུབ་ཐོབ། ཧཱུྃ་གིས་སྐུ་གསུང་ཐུགས་ཡོན་ཏན་འཕྲིན་ལས་ལྔའི་བྱིན་རླབས་དང་དངོས་གྲུབ་ཐོབ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་ཐམས་ཅད་འབྱུང་བར་བྱེད་པ་ཡང་ཡི་གེ་དྲུག་པ་བཟླས་པས་འབྱུང་བ་ཡིན་ནོ།། བཅུ་བ་ཆོས་སྤྱོད་ཡོངས་རྫོགས་ཀྱི་ངང་ནས་ཡིག་དྲུག་བཟླ་ཚུལ་བསྟན་པ། བཅུ་བ་ཆོས་སྤྱོད་ཡོངས་རྫོགས་ཀྱི་ངང་ནས་ཡིག་དྲུག་བཟླ་ཚུལ་བསྟན་པ་ནི། གང་ཤར་གཏོར་མ་ཤར་གྲོལ་མགྲོན་ལ་བསྔོས།། སྣང་སྟོང་སཱཙྪ་གང་སྣང་ས་ལ་འདེབས།། གཉིས་མེད་ལྷ་ཕྱག་སེམས་ཉིད་མགོན་ལ་འཚལ།། ཆོས་སྤྱོད་ཡོངས་རྫོགས་ངང་ནས་ཡིག་དྲུག་སྒྲོངས།། ཞེས་གསུངས་ཏེ། དགེ་རྩ་སྒྲུབ་པ་ལ་ཆོས་སྤྱོད་ཀྱི་བྱ་བ་མང་པོ་ཡོད་པས། རྩེ་གཅིག་སྒྲུབ་ལ་གཞོལ་བའི་སྤོང་བ་བསམ་གཏན་ལ་བརྩོན་པའི་རྣལ་འབྱོར་པས་ཀྱང་། མཆོད་སྦྱིན་གཏོར་བ་བསྔོ་བ་ལ་སོགས་པ་ཆོས་སྤྱོད་ཀྱང་རྒྱུན་གྱི་རྣལ་འབྱོར་དུ་བྱེད་ཅིང་། ཚོགས་ཆུང་རིམ་ནས་དམིགས་མེད་དང་སྦྲེལ་ནས་གསོག་པས། སྤྱིར་གཏོར་མ་ལ་བཤད་པ་མང་ཡང་གསུམ་དུ་ཕྱེས་ན། སྣང་སྲིད་གཞི་བཞེངས་ཀྱི་གཏོར་མ་དང་། བག་ཆགས་འཁྲུལ་དག་གི་གཏོར་མ་དང་། སྣང་བ་རྒྱན་གྱི་གཏོར་མ་དང་གསུམ་མོ། །དང་པོ་སྣང་སྲིད་གཞི་བཞེངས་ཀྱི་གཏོར་མ་ནི། འདི་ལྟར་སྣང་ཞིང་སྲིད་པའི་ཆོས། འཁོར་འདས་འདུས་བྱས་འདུས་མ་བྱས་ཀྱི་ཆོས་ཐམས་ཅད་རྩིས་གདབ་མེད་པར། སྤང་བླང་དགག་སྒྲུབ་མེད་པར་གཏོར་མར་འབུལ་བའོ། །འཛིན་པ་མེད་པས་གཏོར་ཞེས་བྱ། དགག་སྒྲུབ་མེད་པས་མ་ཞེས་བྱའོ། །གཉིས་པ་བག་ཆགས་འཁྲུལ་དག་གི་གཏོར་མ་ནི། དུག་གསུམ་གྱི་རྣམ་རྟོག་དང་། དུག་ལྔ་སྔར་བསགས་པ་དང་། ད་ལྟ་སྤྱོད་པ་དང་། མ་འོངས་པའི་སྔོན་བསུ་བ་ཐམས་ཅད་སྔ་མ་ལ་མ་ཆགས། ད་ལྟ་ལ་མ་ཞེན། ཕྱི་མ་ལ་མི་ཞེན་པར་ཆགས་མེད་འཛིན་མེད་དུ་རང་ཞི། རང་དག་རང་དྭངས་སུ་གཏོང་ངོ་། །དེ་ལ་གཏོར་མར་བྱ་དོན་ནི། ཆགས་ཞེན་མེད་པས་གཏོར་ཞེས་བྱ། རང་སར་གྲོལ་བས་མ་ཞེས་བྱའོ། །གསུམ་པ་སྣང་བ་རྒྱན་གྱི་གཏོར་མ་ནི། མིག་གི་ཡུལ་དུ་གཟུགས་མཐོང་ཚད། རྣ་བའི་ཡུལ་དུ་སྒྲ་ཐོས་ཚད་ལ་སོགས་པ། སྣ། ལྕེ། ལུས། ཡིད་ཀྱི་ཡུལ་དུ་དྲན་རྟོག་ཅི་བྱུང་ཐམས་ཅད་རང་ཤར་རང་གྲོལ་དུ་སྤྱོད་ལ་ཞེན་པར་མེད་པར་འབུལ་ལོ། །འདོད་ཡོན་མ་སྤངས་རང་བྱུང་རང་ཤར་བས་གཏོར་ཞེས་བྱ། རང་སར་གྲོལ་ནས་རང་ས་རང་དག་པས་མ་ཞེས་བྱའོ། །སྐབས་འདིར་གསུམ་པོ་ལ་སྦྱར་ཆོག་སྟེ། གང་ཞིག་བསྔོ་བྱའི་གང་ཤར་གྱི་གཏོར་མ། གང་ལ་བསྔོ་ཡུལ་ཤར་གྲོལ་གྱི་མགྲོན་ལ་བསྔོ་བའི་སྐབས་སུ། ཤར་གྲོལ་རིས་མེད་མཉམ་པར་གདལ་ཚེ་གཏོར་མ་བསྔོ་བའི་མཆོག་ཡིན་ནོ། །ཐུགས་རྗེ་ཆེན་པོའི་ཆོས་སྐོར་ལས་སཱཙྪ་འདི་ཡང་ཕྱི་ནང་གསང་བ་གསུམ། དོན་རྟགས་མཚོན་པ་གསུམ་སྟེ་དྲུག་གི་ཐོག་ནས་གསུངས་པ་ལས། ཕྱིའི་སཱཙྪ་ནི། འདག་པ་ལ་རིན་པོ་ཆེ་དང་སྨན་སྣ་བཏབ་ལ་འཇིམ་པ་རིན་པོ་ཆེའི་ཕུང་པོར་བསམ། ཨཱོྂ་མ་ནི་པདྨེ་ཧཱུྃ་ཞེས་བཟླས། འབི་འབི་བྱས་ལ་ཆོས་སྐུ་བསམ། སྐུ་པར་དུ་བཅུག་པས་ལོངས་སྐུར་བསམ། ཕྱི་ལ་བཏོན་པས་མཆོད་རྟེན་དུ་གྲུབ་པ་སྤྲུལ་སྐུ་ཐུགས་རྗེ་ཆེན་པོར་བསམ་པའོ། །ནང་གི་སཱཙྪ་ནི། རྣལ་འབྱོར་པས་ཟས་ཟ་བ་རིན་ཆེན་གྱི་ཕུང་པོར་བསམས་ལ། ཁམ་དུ་བཅད་པས་ཆོས་སྐུར་བསམ། ཟས་ཁོང་དུ་མིད་པས་ལོངས་སྐུར་བསམ། དྲི་མ་ཕྱིར་བྱུང་བས་སྤྲུལ་སྐུར་བསམ། སེམས་ཅན་གྱིས་དྲི་ཚོར་བས་སྒྲིབ་པ་བྱང་བར་བསམ་མོ། །གསང་བའི་སཱཙྪ་ནི། རང་ལུས་ཤའི་འདག་པ་ལ། ཡི་དམ་ཐུགས་རྗེ་ཆེན་པོའི་ཚ་ཚ་གདབ། གསལ་བར་འདུག་ན་ཐེབས་པ་ཡིན། གདབ་རྒྱུ་མེད་ན་བསྟེན་པ་ཡིན་ནོ། །དོན་གྱི་སཱཙྪ་ནི། གཞི་དངོས་པོ་གནས་ལུགས་ཀྱི་སྐུ་པར་དུ། རིག་པ་མ་འགག་པའི་འདག་པ་བཅུག་ནས། རང་ཤར་རང་གྲོལ་གྱི་སཱཙྪ་གདབ་པས། འདེབས་མཁན་མེད་ན་ཐེབས་པ་ཡིན་ནོ། །རྟགས་ཀྱི་སཱཙྪ་ནི། སྣོད་ཀྱི་འཇིག་རྟེན་ཀྱི་སྐུ་པར་དུ། བཅུད་ཀྱི་སེམས་ཅན་གྱི་འདག་པ་བཅུག་ནས། འཁོར་འདས་དབྱེར་མེད་ཀྱི་སཱཙྪ་གདབ། སེམས་སངས་རྒྱས་སུ་ལྷུན་གྱིས་གྲུབ་པ་ནི་ཚ་ཚ་ཐེབས་པའོ། །མཚོན་པའི་སཱཙྪ་ནི། ལག་པ་གཡས་པ་སྐུ་ལྔ། གཡོན་པ་ཡེ་ཤེས་ལྔར་གསལ་བཏབ་ནས། སྐུ་ལྔ་ཡེ་ཤེས་ལྔའི་བར་ནས་ལས་དང་བྱ་བ་བྱས་པ་ཐམས་ཅད། ཆོས་སྐུ། ལོངས་སྐུ། སྤྲུལ་སྐུ་གསུམ་དུ་བསམ། ཅི་བྱེད་སངས་རྒྱས་ཀྱི་མཛད་སྤྱོད་ཡིན། སེམས་བསྐྱེད་ཀྱིས་ཟིན་ན་ཐེབས་པ་ཡིན་ནོ། །སྐབས་འདིར་སྣང་སྟོང་གི་སཱཙྪ་གང་སྣང་གི་ས་ལ་འདེབས་པ་ནི་རྣལ་འབྱོར་པའི་རྟོགས་རིགས་ཀྱིས་གང་ལ་སྦྱར་ན་ཆོག་ཀྱང་། གསང་བ་དེ་ཁོ་ན་ཉིད་ཀྱི་སཱཙྪ་སྤྲོས་བྲལ་གྱི་གཞི་ལ་འདེབས་པ་ཞེས་བཀྲལ་ན་འབྲེལ་ཆགས་པར་སྣང་ངོ་། །ཆོས་སྤྱོད་ཀྱི་ནང་དུ་གཏོར་མ་བསྔོ་བ། སཱཙྪ་གདབ་པ། ཕྱག་འཚལ་བ་སོགས་ཡོད་པས་ཕྱག་འཚལ་བ་ལ་ཡང་ཕྱི་ནང་གསང་བ་ལ་སོགས་པའི་ཕྱག་འཚལ་ལུགས་ཀྱི་རྣམ་གྲངས་མང་ན་ཡང་། གསང་བ་དོན་གྱི་ཕྱག་འཚལ་བྱ་དང་། འཚལ་བྱེད། འཚལ་ཡུལ་དང་བཅས་པ་སོ་སོར་མ་གྲུབ་པ། གཉིས་མེད་ལྟ་བ་རང་ཞལ་མཇལ་བའི་དོན་ཕྱག་གིས་ཕྱག་འཚལ་བ་དང་བཅས་ཏེ་ཆོས་སྤྱོད་ཡོངས་རྫོགས་ཆོས་ཉིད་ཀྱི་དོན་མཐོང་བའི་ངང་ནས་ཡིག་དྲུག་སྒྲོངས། ཞེས་གསུངས་པའོ། །འདི་སྒྲིབ་སྦྱོང་དང་སྦྱར་ན། ཨཱོྂ་གྱིས་ལུས་ཀྱི་སྒྲིབ་པ་སྦྱོང་། མས་ངག་གི་སྒྲིབ་པ་སྦྱོང་། ཎིས་ཡིད་ཀྱི་སྒྲིབ་པ་སྦྱོང་། པད་ཀྱིས་ཉོན་མོངས་པའི་སྒྲིབ་པ་སྦྱོང་། མེས་བག་ཆགས་ཀྱི་སྒྲིབ་པ་སྦྱོང་། ཧཱུྃ་གིས་ཤེས་བྱའི་སྒྲིབ་པ་སྦྱོང་། སྒྲིབ་པ་དྲུག་སྦྱོང་བ་ཡང་ཡི་གེ་དྲུག་པ་བཟླས་པས་འབྱུང་ངོ་།། བཅུ་གཅིག་པ་ཚེ་འདིའི་ལས་རྫོགས་ངང་ནས་ཡིག་དྲུག་བཟླ་ཚུལ་བསྟན་པ། བཅུ་གཅིག་པ་ཚེ་འདིའི་ལས་རྫོགས་ངང་ནས་ཡིག་དྲུག་བཟླ་ཚུལ་བསྟན་པ་ནི། ཞེ་སྡང་དགྲ་བོ་བྱམས་པའི་མཚོན་གྱིས་ཐུལ།། རིགས་དྲུག་གཉེན་འཁོར་སྙིང་རྗེའི་ཐབས་ཀྱིས་སྐྱོངས།། དད་པའི་ཞིང་ལ་ཉམས་རྟོགས་ལོ་ཏོག་རྨོས།། ཚེ་འདིའི་ལས་རྫོགས་ངང་ནས་ཡིག་དྲུག་སྒྲོངས།། ཞེས་གསུངས་ཏེ། འཇིག་རྟེན་པས་གོ་སླ་ཐབས་སུ་འཇིག་རྟེན་ཁྱིམ་གྱི་བྱ་བ་ལ་དཔེ་མཛད་པ་སྟེ། འཇིག་རྟེན་པའི་བྱ་བའི་གཙོ་བོ་ནི། དགྲ་འདུལ་བ་དང་། གཉེན་སྐྱོང་བ། སོ་ནམ་གྱི་བྱ་བ། རྒྱུ་ནོར་སྐྱེད་འཕེལ་གཏོང་བ་རྣམས་ཡིན་པས། དེ་དག་དང་སྦྱར་ནས། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་འདོད་ཀྱི་བྱམས་པའི་མཚོན་ཆ་བཟུང་བའི་སྟོབས་ཀྱིས། ཞེ་སྡང་གི་དགྲ་བོའི་གཡུལ་ལས་རྒྱལ་བས། གནོད་ཅིང་སྡང་བའི་ཞེ་སྡང་གི་དགྲ་བོ་དེ། ཕན་ཞིང་བྱམས་པའི་མཚོན་གྱིས་ཐུལ་ཞིག རིགས་དྲུག་སེམས་ཅན་ཐོག་མེད་ནས་ཕ་མ་བྱས་པའི་གཉེན་འཁོར་དེ་དག་སྡུག་བསྔལ་དང་བྲལ་འདོད་ཀྱི་སྙིང་རྗེའི་ཐབས་ཀྱིས་སྐྱོངས་ཤིག དད་པའི་ཞིང་ས་གཤིན་པོ་ལ་ཉམས་དང་རྟོགས་པའི་ལོ་ཏོག་རྨོས་ནས་འབྲས་བུ་གཡུར་དུ་ཟ་བ་ལོན་དགོས་པས། དད་པ་ལ་དང་འདོད་ཡིད་ཆེས་ཀྱི་དད་པ་གསུམ་ལས། ཐུགས་རྗེ་ཆེན་པོའི་ཆོས་སྐོར་ལས་གསུམ་སྐོར་གྱི་ནང་དུ། འདོད་པའི་དད་པ་ནི། སྐོམ་པས་ཆུ་འདོད་པ་ལྟར་དུ་འཁོར་བ་སྤོང་འདོད་དང་། མྱ་ངན་ལས་འདས་པ་ཐོབ་པར་འདོད་པས་ཡིད་གདུང་བ་དང་བཅས་ནས་ཉམས་སུ་ལེན་ཅིང་སྒྲུབ་པ་བྱེད་པའོ། །དང་བའི་དད་པ་ནི། སྤྲོ་བ་སྐྱེས་པ་མི་འདོད་ཆེན་གྱིས་གསེར་གྱི་གཏེར་ཁ་རྙེད་པ་བཞིན་དུ་སྒྲུབ་པ་ཉམས་ལེན་བྱེད་པ་ལ་ཡིད་སྤྲོ་པའི་དགའ་བྲོད་དང་བཅས་ཉམས་སུ་ལེན་པའོ། །ཡིད་ཆེས་པའི་དད་པ་ནི། མས་བུ་ངོ་ཤེས་པ་ལྟར་ཐུགས་རྗེ་ཆེན་པོ་ལ་ཡིད་ཆེས་ནས། ཐེ་ཚོམ་དང་ཡིད་གཉིས་མེད་པར་ཆོས་ཉམས་སུ་ལེན་པའོ། །དེ་ལྟ་བུའི་དད་པ་གསུམ་གྱི་ཞིང་ས་ལ་བསྐྱེད་རྫོགས་ཟུང་འབྲེལ་གྱི་ཉམས་དང་རྟོགས་པ། བསྐྱེད་རིམ་གྱི་སྐབས་སུ་ཐུགས་རྗེ་ཆེན་པོའི་སྐུ་སྣང་ལ་རང་བཞིན་མེད་པར་གོམས། རྫོགས་རིམ་དང་འབྲེལ་བའི་སྒོམ་པ་གསལ་འགྲིབ་མེད་པ་ཉི་མ་ལྟ་བུ་སྟོང་དང་སྙིང་རྗེ་དབྱེར་མེད་དུ་གོམས་པ་བརྟན་པས། བདེན་གཉིས་དབྱེར་མེད་ཀྱི་སྒོམ་པ་ཀུན་རྫོབ་རང་སྣང་མ་འགག་སྒྱུ་མ་རྨི་ལམ་ལྟ་བུ། དོན་དམ་ཅི་ཡང་བདེན་མེད་སྒྱུ་མ་ཞིག་པའམ་གཉིད་སད་པ་ལྟ་བུའི་ཉམས་རྟོགས་ཀྱི་ལོ་ཏོག་རྨོས་ནས། ཚེ་འདིའི་ལས་རྫོགས་ཀྱི་ངང་ནས་ཡིག་དྲུག་སྒྲོངས་ཞེས་གསུངས་པའོ། །འདི་འགྲོ་དོན་ཚད་མེད་པ་དྲུག་དང་སྦྱར་ན། ཨཱོྂ་འགྲོ་དོན་མཉམ་པ་རིས་མེད་ཐུགས་རྗེ་ཚད་མེད་པ། མ་བྱམས་པ་ཚད་མེད་པ། ཎི་སྙིང་རྗེ་ཚད་མེད་པ། པད་དགའ་བ་ཚད་མེད་པ། མེ་བཏང་སྙོམས་ཚད་མེད་པ། ཧཱུྃ་ཆོས་ཉིད་ཚད་མེད་པའོ། །ཚད་མེད་པ་དྲུག་གིས་འགྲོ་བའི་དོན་བྱེད་པ་ཡང་ཡི་གེ་དྲུག་པ་བཟླས་པས་འགྲུབ་པར་འགྱུར་རོ།། བཅུ་གཉིས་པ་གཤིན་པོའི་དགེ་རྫོགས་ཀྱི་ངང་ནས་ཡིག་དྲུག་བཟླ་ཚུལ་བསྟན་པ། བཅུ་གཉིས་པ་གཤིན་པོའི་དགེ་རྫོགས་ཀྱི་ངང་ནས་ཡིག་དྲུག་བཟླ་ཚུལ་བསྟན་པ་ནི། བདེན་ཞེན་རོ་རྒན་ཞེན་མེད་མེ་ལ་སྲེགས།། འདིར་སྣང་བདུན་ཚིགས་སྙིང་པོའི་ཆོས་ཀྱིས་དེད།། ཚོགས་བསགས་རོ་རྒྱགས་ཚེ་རབས་གསུར་དུ་བསྔོས།། གཤིན་པོའི་དགེ་རྫོགས་ངང་ནས་ཡིག་དྲུག་སྒྲོངས།། ཞེས་གསུངས་ཏེ། འཇིག་རྟེན་གྱི་སྣང་ཤས་ཀྱིས་སྐྱེ་རྒ་ན་འཆིའི་སྡུག་བསྔལ་ལ་འཕྱན། འདུ་བྱེད་ཀྱི་ལས་སྣ་ཚོགས་ཀྱིས་ཕྱི་མའི་བདེ་སྡུག་བསྐྱེད་ནས་འཁོར་བར་འཁྱམ་པས། འཇིག་རྟེན་འདིར་སྣང་གི་ཞེན་པ་ལྡོག་ཐབས་ཀྱི་ཆོས་ཤིག་དགོས་ལ། དེ་ཡང་སྐྱེ་བའི་མཐའ་མར་ཤི་ལ། ཤི་ནས་རོ་གོག་གཙང་མར་མི་བྱེད་ཐབས་མེད་ཡིན་པ་ལྟར་དུ། ཆོས་དང་གང་ཟག་ལ་བདེན་པར་ཞེན་པའི་བདག་འཛིན་ཨ་འཐས་ཀྱི་རོ་རྒན་དེ་ཉིད་ཞེན་མེད་སྲིད་ཞི་མཉམ་ཉིད་དུ་རྟོགས་པའི་མེ་ལ་སྲེགས་ཤིག བར་དོའི་སེམས་ཅན་ལ་ཤི་ནས་ཉི་མ་བདུན་རེའི་མཚམས་ནས་སྔར་ཇི་ལྟར་ཤི་བའི་སྣང་བ་འཆར་བས་བདུན་ཚིགས་བཟུང་བ་གནད་དུ་ཆེ་བ་ཡིན་ཞིང་། སྤྱིར་བཏང་བར་དོའི་སེམས་ཅན་གྱི་ཚེ་ལ་ངེས་པ་མེད་ཀྱང་བདུན་ཕྲག་བདུན་རིང་ཚད་དུ་བཞག་ནས་བདུན་བདུན་བཞི་བཅུ་ཞེ་དགུའི་བདུན་ཚིགས་བཟུང་བ་ལྟར་དུ། འདིར་སྣང་གློ་བུར་གྱི་བདུན་ཚིགས་སྙིང་པོའི་ཉམས་ལེན་ལ་བརྩོན་པའི་ཆོས་ཀྱིས་དེད་ཅིག བསོད་ནམས་དང་ཡེ་ཤེས་ཀྱི་ཚོགས་གཉིས་བསགས་པའི་རོ་རྒྱགས་ཞེས་པ་ནི། རོར་གྱུར་པས་ཟས་ཟ་བ་མིན་ཡང་མིང་བཞི་འདུས་པའི་བར་དོའི་སེམས་ཅན་དེས་དྲི་ཙམ་གྱི་ཟས་ལ་བརྟེན་ཡོད་པས་གསུར་རྫས་ལ་རོ་རྒྱགས་ཀྱི་མིང་གིས་བསྟན་པ་དེ་ཉིད་ཚེ་རབས་གསུར་དུ་བསྔོས་ཞེས། དེ་ཡང་རྫས་སྔགས་ཏིང་འཛིན་གྱི་བྱེད་པ་ལ་བརྟེན་ནས་གང་འདོད་ལོངས་སྤྱོད་ཀྱི་དངོས་པོར་བསྒྱུར་ནས་མཆོད་སྦྱིན་བྱེད་པ་ལ་གསུར་བྱ་བས་མ་བསྔོས་ན་མི་ཐོབ་པས་བསྔོས་ཤིག །དེ་ལྟའི་ངང་ནས་གཤིན་པོའམ་ཤི་བོའི་དགེ་རྫོགས་ཀྱི་ངང་ནས་ཡིག་དྲུག་སྒྲོངས། ཞེས་གསུངས་པའོ། །ཐུགས་རྗེ་ཆེན་པོའི་དྲུག་སྐོར་གྱི་ཆོས་ཚན་ལས། རོ་བསྲེག་ལ་ཕྱི། ནང་། གསང་བ། དོན། རྟགས། མཚོན་པ་དྲུག་གིས་བསྟན་པ་ལས། ཕྱིའི་རོ་བསྲེག་ནི། རོ་བཀྲུས་ནས་རས་ཀྱིས་དྲིལ། འགྲོ་དྲུག་སྐྱེ་སྒོ་གཅོད་པའི་ཡི་གེ་དྲུག་པ་གདགས་ཤིང་དོང་དུ་བཅུག་ལ་མེ་ལ་སྦར་རོ། །ནང་གི་རོ་བསྲེག་ནི། རོའི་སྙིང་གར་ཐུགས་རྗེ་ཆེན་པོ་བསྐྱེད་ནས། སྲེག་རྫས་ཡམ་ཤིང་ཇོ་བོ་ཐུགས་རྗེ་ཆེན་པོའི་ཞལ་དུ་སོང་བར་བསམ་ཞིང་། ཨཱོྂ་མ་ཎི་པདྨེ་ཧཱུྃ་ཞེས་དབུལ་ལོ། །གསང་བའི་རོ་བསྲེག་ནི། བདུད་རྩིར་ཞི་བས་ཐུགས་རྗེ་ཆེན་པོའི་ལྷ་ཚོགས་མཉེས་ཤིང་ཚིམས་ནས་ཚེ་འདས་ཀྱི་སྒྲིབ་པ་མ་ལུས་པ་ཟད་པར་བསམ་མོ། །དོན་གྱི་རོ་བསྲེག་ནི། ཚེ་འདས་གཤིན་པོ་དེའི་སྡིག་སྒྲིབ་སྦྱངས་ནས། རྣམ་པར་ཤེས་པ་ཆོས་ཀྱི་དབྱིངས་ལ་གནས་པས་སྐྱེ་བ་མེད་པར་བསམ་མོ། །རྟགས་ཀྱི་རོ་བསྲེག་ནི། རིག་པ་མ་འགག་པ་ཆོས་ཀྱི་སྐུ་ལས་གཟུགས་ཀྱི་སྐུས་འགྲོ་དོན་རྒྱུན་ཆད་མེད་པ་བྱེད་པར་བསམ་མོ། །མཚོན་པའི་རོ་བསྲེག་ནི། རུས་པ་དང་། ཐལ་བ་བསྡུས་ལ་ཚ་ཚ་བཏབ་སྟེ། སྤྲུལ་སྐུ་མདུན་གྱི་རྟེན་དུ་བཞག་གོ །དེ་ཡང་བདེན་ཞེན་གྱི་མཚན་མ་ལ་ཞེན་པ་མེད་པར་མ་དག་པའི་ཕུང་པོ་བསྲེགས་ནས། ཞེན་བྲལ་བདེན་མེད་ཆོས་དབྱིངས་སྐྱེ་འགག་དང་བྲལ་བར་སྦྱང་རྒྱུ་ཡིན་པའོ། །འདི་འགྲོ་དྲུག་གི་སྡུག་བསྔལ་འཇོམས་པའི་ཡིག་དྲུག་བཟླ་ཚུལ་དང་སྦྱར་ན། ཨཱོྂ་གྱིས་ལྷ་འཕོ་ལྟུང་གི་སྡུག་བསྔལ་སྦྱོང་། མས་ལྷ་མིན་འཐབ་རྩོད་ཀྱི་སྡུག་བསྔལ་སྦྱོང་། ཎིས་མི་སྐྱེ་རྒ་ན་འཆིའི་སྡུག་བསྔལ་སྦྱོང་། པད་ཀྱིས་བྱོལ་སོང་གླེན་ལྐུགས་ཀྱི་སྡུག་བསྔལ་སྦྱོང་། མེས་ཡི་དྭགས་བཀྲེས་སྐོམ་གྱི་སྡུག་བསྔལ་སྦྱོང་། ཧཱུྃ་གིས་དམྱལ་བ་ཚ་གྲང་གི་སྡུག་བསྔལ་སྦྱོང་། འགྲོ་དྲུག་གི་སྡུག་བསྔལ་གྱི་གནས་སྦྱོང་བ་ཡང་ཡི་གེ་དྲུག་པ་བཟླས་པས་འབྱུང་ངོ་།། བཅུ་གསུམ་པ་གསོན་པོའི་ཆོས་རྫོགས་ཀྱི་ངང་ནས་ཡིག་དྲུག་བཟླ་བ་བསྟན་པ། བཅུ་གསུམ་པ་གསོན་པོའི་ཆོས་རྫོགས་ཀྱི་ངང་ནས་ཡིག་དྲུག་བཟླ་བ་བསྟན་པ་ནི། དད་པའི་བུ་ཚ་ཉམས་ལེན་ཆོས་སྒོར་ཚུད།། འདིར་སྣང་ཁྱིམ་དུ་ཞེན་ལོག་བུ་ཐང་ཞོག། སྙིང་རྗེའི་བུ་མོ་ཁམས་གསུམ་མག་པར་བྱིན།། གསོན་པོའི་ཆོས་རྫོགས་ངང་ནས་ཡིག་དྲུག་སྒྲོངས།། ཞེས་གསུངས་ཏེ། རང་རེ་བོད་ཀྱི་ཁྱིམ་ཚང་ཞིག་ལ་དཔེ་མཚོན་ན། གསོན་པོའི་འདུག་ཆུས་ལ་བུ་ཞིག་མཆིས་ཚེ་འདང་ཆེན་བརྩི་ནས་རབ་ཏུ་བྱུང་རྒྱུ་རེ་བའི་ནང་གི་ཆེ་ཤོས་བྱེད་ནས་ཆོས་སྒོར་བཙུད་པའམ་རིག་གནས་སློབ་སྦྱོང་བྱེད་དུ་འཇུག་པ་དང་། བུ་ཐང་ཁྱིམ་ལ་བཞག བུ་མོ་བག་མར་བཏང་ནས་ཁྱིམ་གྱི་ཆུས་དོན་བསྒྲུབས་ཡོད་ཅེས་པ་ལྟར་དུ། ཐར་བ་སྒྲུབ་པ་ལ་མེད་དུ་མི་རུང་བའི་དད་པ་ནོར་དང་གཏེར་དང་ལག་པ་ལ་སོགས་པ་དང་མཚུངས་པའི་བུ་གཅེས་ལྟ་བུ་དེ་ཉིད་ཉམས་ལེན་རྒྱུད་ལ་སྦྱོར་བའི་ཆོས་སྒོར་ཚུད་ཅིག འདིར་སྣང་ཁྱིམ་འདྲ་བ་ལ་མེད་དུ་མི་རུང་བའི་ཞེན་ལོག་བུ་ཐང་ལྟ་བུ་དེ་བསུས་ནས་ཞོག་ཅིག སྙིང་རྗེའི་བུ་མོ་ཁ་ཕྱིར་ལྟས་གྱུར་བ་དེ་ཉིད་ཁམས་གསུམ་གྱི་སེམས་ཅན་མག་པ་ལྟ་བུ་ལ་བག་མར་བྱིན་ཅིག་ཅེས་པའོ། །ཐུགས་རྗེ་ཆེན་པོའི་ཆོས་སྐོར་ལས་སྙིང་རྗེ་ཤིན་ཏུ་གལ་ཆེ་བའི་ཆོས་སུ་བསྟན་ཏེ། ཕྱི་སེམས་ཅན་ལ་དམིགས་པའི་སྙིང་རྗེ། ནང་ཆོས་ལ་དམིགས་པའི་སྙིང་རྗེ། དམིགས་པ་མེད་པའི་སྙིང་རྗེ་གསུམ་གསུངས་པ་ལས། དང་པོ་ཕྱི་སེམས་ཅན་ལ་དམིགས་པའི་སྙིང་རྗེ་ནི། ཕ་མར་གྱུར་པའི་སེམས་ཅན་རིགས་དྲུག་གི་སྡུག་བསྔལ་གྱིས་མནར་ཞིང་གདུང་བ་འདི་དག་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་བར་བྱའོ། །སྒྲོལ་བའི་ནུས་པ་ད་ལྟ་བདག་ལ་མེད་ཀྱང་། མ་འོངས་པར་བདག་གིས་ཐུགས་རྗེ་ཆེན་པོའི་འབྲས་བུ་བླ་མེད་ཀྱི་བྱང་ཆུབ་ཐོབ་དུས་སྒྲོལ་བར་ནུས་སྙམ་ནས་དེར་བརྩོན་པར་བྱེད་པའོ། །གཉིས་པ་ནང་ཆོས་ལ་དམིགས་པའི་སྙིང་རྗེ་ནི། སེམས་ཅན་སྡུག་བསྔལ་ལས་སྒྲོལ་བའི་ཆེད་དུ་ཡི་དམ་ཐུགས་རྗེ་ཆེན་པོའི་གསུང་ཡི་གེ་དྲུག་པ་གྲག་སྟོང་སྔགས་སུ་བཟླས་པར་བརྩོན་པའི་སྐབས་སུ། རྣམ་རྟོག་དང་། དུག་ལྔའི་རྟོག་པ་གང་སྐྱེས་ཐམས་ཅད། རང་ཤར་རང་གྲོལ་གྱི་ངང་ནས་བཟླས་པས། སྙིང་རྗེ་ཡས་བབ་ཀྱིས་འཁྲུངས་ནས། ཆོས་ཉིད་ཤར་གྲོལ་གྱི་དོན་མ་རྟོགས་པར་གཟུང་འཛིན་འཁྲུལ་སྣང་ལ་བདེན་པར་བཟུང་ནས། རིགས་དྲུག་ཏུ་འཁོར་བ་འདི་རྣམས་སྙིང་རེ་རྗེ་བསམ་པའི་སྙིང་རྗེ་ཤུགས་འབྱུང་གིས་ཆོས་ཉིད་རྟོགས་པའི་བྱིན་རླབས་ཀྱིས་བྱུང་བ་དེའོ། །གསུམ་པ་དམིགས་པ་མེད་པའི་སྙིང་རྗེ་ནི། ཆོས་ཉིད་རྟོགས་པ་དང་། དམིགས་མེད་ཀྱི་སྙིང་རྗེ་སྐྱེ་བ་དུས་མཉམ་ཡིན་པས། སེམས་ཅན་མི་དམིགས་འཁོར་བ་རང་གྲོལ། སངས་རྒྱས་མི་དམིགས་མྱང་འདས་ཡེ་དག གང་དུའང་དམིགས་པ་མེད་པའི་ཆོས་ཉིད་ཆེན་པོའི་ངང་དུ་མཉམ་པར་བཞག་པའོ། །དེ་ཡང་སེམས་ཅན་ལ་དམིགས་པའི་སྙིང་རྗེས་འབྲས་བུ་སྤྲུལ་སྐུར་འཆར་བ་དང་། ཆོས་ལ་དམིགས་པའི་སྙིང་རྗེས་འབྲས་བུ་ལོངས་སྐུར་འཆར་བ་དང་། དམིགས་པ་མེད་པའི་སྙིང་རྗེས་འབྲས་བུ་ཆོས་སྐུར་འཆར་བ་ཡིན་ནོ། །དེ་ལྟ་བུའི་སྙིང་རྗེ་གསུམ་གྱིས་རྒྱུད་འབྱོངས་མ་འབྱོངས་ལས་ཐུགས་རྗེ་ཆེན་པོའི་རྣལ་འབྱོར་པ་ཡིན་མིན་གྱི་དབྱེ་བའང་འབྱེད་དོ། །དེ་ཡང་ལྷ་ཐུགས་རྗེ་ཆེན་པོ་ཡབ་ཀྱི་ཚུལ་དུ་སྣང་བ་དང་། ཡུམ་ཡི་གེ་དྲུག་མ་ཡུམ་གྱི་ཚུལ་དུ་སྣང་བ་དང་། སྲས་ནོར་བུ་འཛིན་པ་སྲས་ཀྱི་ཚུལ་དུ་སྣང་བ་དང་། སྲས་མོ་རིགས་སྔགས་འཛིན་པ་སྲས་མོའི་ཚུལ་དུ་སྣང་བ་ནི་འཇིག་རྟེན་གྱི་ཕ་མ་བུ་གསུམ་འདུལ་བའི་ཆེད་དུ་དེ་དང་སྒོ་བསྟུན་ནས་མཚོན་བྱེད་རྟགས་ཀྱི་ལྷར་སྣང་བ་ཡིན་གྱི། མཚན་མ་རིས་ཅན་གྱི་ཞལ་ཕྱག་ཅན་དུ་ཡོད་པ་མིན་ནོ། །དེ་ལྟར་གསོན་པོའི་ཆོས་རྫོགས་ངང་ནས་ཡིག་དྲུག་སྒྲོངས། ཞེས་གསུངས་པའོ། །འདི་ཆོས་ཉིད་ཀྱི་དོན་དང་སྦྱར་ན། ཨཱོྂ་ཡེ་ཤེས་རང་གསལ་ཆོས་ཉིད་ཀྱི་དོན། མ་སྙིང་པོ་རང་བྱུང་ཆོས་ཉིད་ཀྱི་དོན། ཎི་འཁོར་བ་རང་ལོག་ཆོས་ཉིད་ཀྱི་དོན། པད་དབྱིངས་དང་ཡེ་ཤེས་གཉིས་མེད་ཆོས་ཉིད་ཀྱི་དོན། མེ་རྣམ་རྟོག་བག་ཆགས་དབྱིངས་སུ་སྲེག་པ་ཆོས་ཉིད་ཀྱི་དོན། ཧཱུྃ་འགྱུར་མེད་ཐུགས་ཆོས་ཉིད་ཀྱི་དོན། ཆོས་ཉིད་དོན་གྱི་གནས་ལུགས་ཀྱང་ཡི་གེ་དྲུག་པ་བཟླས་པས་རྟོགས་པར་འགྱུར་རོ།། གཉིས་པ་དངོས་གཞིའི་ལྟ་སྒོམ་གྱི་གནད་བསྟན་པ། གཉིས་པ་དངོས་གཞིའི་ལྟ་སྒོམ་གྱི་གནད་བསྟན་པ་ལ་བརྒྱད་ལས། དང་པོ་གྲོལ་ལུགས་གནད་ཀྱི་ངང་ནས་ཡིག་དྲུག་བགྲང་བའི་ཚུལ་བསྟན་པ། དང་པོ་གྲོལ་ལུགས་གནད་ཀྱི་ངང་ནས་ཡིག་དྲུག་བགྲང་བའི་ཚུལ་བསྟན་པ་ནི། སྣང་ཚད་འཁྲུལ་བ་ལགས་ཏེ་བདེན་པར་མེད།། འཁོར་འདས་རྣམ་རྟོག་ཙམ་སྟེ་ལོགས་ན་མེད།། རྣམ་རྟོག་ཤར་གྲོལ་ཤེས་ན་ས་ལམ་རྫོགས།། གྲོལ་ལུགས་གནད་ཀྱི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། སྣང་མེད་ཀྱི་འོད་གསལ་ལ་ཐུགས་རྗེ་ཆེན་པོའི་ཆོས་སྐོར་ལས་ཕྱི་ནང་གསང་བ་དོན་རྟགས་མཚོན་པ་དྲུག་གིས་བསྟན་པ་ལས། དོན་གྱི་འོད་གསལ་མངོན་དུ་མ་གྱུར་ཀྱི་བར་དུ་སྣང་ཚད་འཁྲུལ་བ་ཡིན་པས་འཁྲུལ་སྣང་ལ་བདེན་པ་མེད། དོན་གྱི་ཐོག་ནས་བཤད་ན་འཁོར་འདས་ཞེས་པའང་རྣམ་རྟོག་འཁྲུལ་བས་བཏགས་པའི་འཁྲུལ་སྣང་ཙམ་ལས་ལོགས་ཤིག་ཏུ་བདེན་པར་གྲུབ་པ་མེད་ཅིང་། རྣམ་རྟོག་ཤར་དུས་ནས་གཞི་མེད་དུ་ཤར། རྟེན་མེད་དུ་གྲོལ་བ་ཡིན་པའི་གནད་ཤེས་ན། ས་དང་ལམ་གྱི་ཡོན་ཏན་ཐམས་ཅད་རྩོལ་མེད་དུ་རྫོགས་པ་ཡིན་པས། དེ་ལྟར་གྲོལ་ལུགས་ཀྱི་གནད་ཤེས་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ། །འདིའི་ཐད་ནས་ཉོན་མོངས་སྐྱེས་གྲོལ་དུས་མཉམ་ཞེས་པ་ནི་ཐུགས་རྗེ་ཆེན་པོའི་ཆོས་སྐོར་གྱི་ཆོས་སྐད་དམིགས་བསལ་པ་ཞིག་ཡིན་ལ། ཉོན་མོངས་དུག་ལྔ་སྐྱེས་པ་དང་གྲོལ་བ་དུས་མཉམ་སྟེ། ཞེ་སྡང་སྐྱེས་པའི་དུས་སུ་ཞེ་སྡང་འབྱུང་བས་སྟོང་སྟེ། འདི་ནས་བྱུང་བྱ་བའི་ཁུངས་ཡོད་པ་མིན། ཞེ་སྡང་སྐྱེ་བའི་ཡུལ་གྱིས་སྟོང་སྟེ། འདི་ལས་སྐྱེས་བྱ་བ་མེད། ཡུལ་གང་ལ་ཡང་རང་བཞིན་མེད་པར་སྟོང་། ཞེ་སྡང་རང་གི་ངོ་བོས་སྟོང་སྟེ། དངོས་པོ་དང་མཚན་མར་མ་གྲུབ། ཞེ་སྡང་སྤང་དུ་མེད་དེ་རང་བྱུང་རང་ཤར། ཞེ་སྡང་མི་གནས་ཏེ་རང་སར་གྲོལ་བས་ཆོས་ཉིད་སྟོང་བའི་ངང་ལ་གནས་སོ། །དེ་བཞིན་དུ་འདོད་ཆགས། གཏི་མུག ང་རྒྱལ། ཕྲག་དོག་རྣམས་ཀྱང་མ་སྤངས་ལ་མི་གནས་པར་རང་ཤར་རང་གྲོལ་དུ་བཞེད་དོ། །འདི་ཕྱོགས་མེད་ལྟ་སྒོམ་སྤྱོད་འབྲས་དང་སྦྱར་ཏེ་བཤད་ན། ཨཱོྂ་གོལ་ས་མེད་པའི་ལྟ་བ་ཕྱོགས་རིས་མེད་པ་ནམ་མཁའ་ལྟ་བུ། ཐུགས་རྗེ་ཆེན་པོའི་ཐུགས་མཐའ་བྲལ་ཕྱོགས་མེད་ལ་ངོ་སྤྲད། མ་འགྱུར་བ་མེད་པའི་སྒོམ་པ་ལ་གསལ་འགྲིབ་མེད་པ་ཉི་མ་ལྟ་བུ། ཎི་སྣང་བ་ལ་སྐྱོན་དུ་མི་ལྟ་བས་རྒྱ་མཚོའི་རླབས་ལྟ་བུ། པད་བླང་དོར་མེད་པས་སྤྱོད་པ་ལ་བྱ་མི་བྱ་མེད་པ་ཚངས་པའི་དྲི་མ་ལ་བཀྲུ་མི་དགོས་པ་ལྟ་བུ། མེ་མི་ཐུབ་པའི་ཕྱོགས་གང་ཡང་མེད་པས་རྡོ་རྗེ་ལྟ་བུ། ཧཱུྃ་འབྲས་བུ་རང་ལ་གནས་པས་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའོ། །རྣལ་འབྱོར་པས་དེ་ལྟར་འཁྱེར་ཤེས་ན། མི་མཐུན་པའི་ཕྱོགས་གང་ཡང་མེད་པས་གཉེན་པོ་བཙལ་མི་དགོས་སོ།། གཉིས་པ་རིག་སྟོང་རྗེན་པར་བཞག་པའི་གནད་བསྟན་པ། གཉིས་པ་རིག་སྟོང་རྗེན་པར་བཞག་པའི་གནད་བསྟན་པ་ནི། རང་སེམས་རིག་སྟོང་གཉིས་མེད་ཆོས་སྐུའི་ངང་།། མ་བཅོས་གཉུག་མར་བཞག་ན་རང་གསལ་འཆར།། བྱར་མེད་ཆིག་ཆོད་ངང་དུ་བྱས་ཆོས་ཟིན།། རིག་སྟོང་རྗེན་པར་ཞོག་ལ་ཡིག་དྲུག་སྒྲོངས།། ཞེས་གསུངས་ཏེ། རང་སེམས་ཀུན་རྫོབ་ཏུ་སྣང་བའི་ཆོས་ཅན་འདིའི་ཆོས་ཉིད་ནི། མ་རིག་པའམ་མི་ཤེས་རྨོངས་པའི་ལྡོག་ཟླར་གྱུར་པའི་གསལ་བ་ལྷུན་གྲུབ་ཀྱི་རིག་པའི་ཡེ་ཤེས། སྟོང་པ་ཆེན་པོའི་དབྱིངས་དང་གཉིས་སུ་མེད་པའི་ཆོས་ཀྱི་སྐུ་ཡིན་པས། དེའི་ངང་དུ་རེ་དོགས་གཉིས་འཛིན་གྱི་འཁྲུལ་རྟོག་གིས་མ་བཅོས་པར་གཉུག་མའམ་ཡེ་ནས་གནས་པའི་ཆོས་ཉིད་ལྷན་ཅིག་སྐྱེས་པའི་ཡེ་ཤེས་ཀྱི་ངོ་བོར་བཞག་ན་རང་བྱུང་གི་ཡེ་ཤེས་མ་བཅོས་རང་གསལ་དུ་འཆར་བ་ཡིན་པས། བྱར་མེད་རྩོལ་སྒྲུབ་དང་བྲལ་བ་ས་ལམ་ཆིག་ཆོད་ཀྱི་ངང་དུ་བྱས་ཆོས་ཐམས་ཅད་བྱས་ཟིན་པ་ཡིན་པས། རིག་སྟོང་རང་གི་ངོ་བོ་ལ་བཅོས་སླད་མེད་པར་རང་སོ་རྗེན་པར་ཞོག་ལ་ཡིག་དྲུག་སྒྲོངས། ཞེས་གསུངས་པའོ། །འདི་ཆོས་སྐུ་ཐུགས་རྗེ་ཆེན་པོའི་རང་སེམས་སྟོང་གསལ་འགག་མེད་ཡེ་ནས་རང་ལ་གནས་པ་ངོ་ཤེས་པར་གདམས་པའི་མན་ངག་གོ །འདི་ཡེ་ཤེས་དྲུག་དང་སྦྱར་ན། ཨཱོྂ་ཆོས་ཀྱི་དབྱིངས་ཀྱི་ཡེ་ཤེས། མ་མེ་ལོང་ལྟ་བུའི་ཡེ་ཤེས། ཎི་མཉམ་པ་ཉིད་ཀྱི་ཡེ་ཤེས། པད་སོ་སོར་རྟོགས་པའི་ཡེ་ཤེས། མེ་བྱ་བ་ནན་ཏན་གྱི་ཡེ་ཤེས། ཧཱུྃ་ལྷན་ཅིག་སྐྱེས་པ་རང་བྱུང་གི་ཡེ་ཤེས། ཡེ་ཤེས་དྲུག་མ་བཙལ་རང་ལ་འཆར་བ་ཡང་ཡི་གེ་དྲུག་པ་བཟླས་པ་ལས་འབྱུང་ངོ་།། གསུམ་པ་ཕྱག་ཆེན་གྱི་ཆོས་སྐད་དང་བསྟུན་པའི་རྣལ་འབྱོར། གསུམ་པ་ཕྱག་ཆེན་གྱི་ཆོས་སྐད་དང་བསྟུན་པའི་རྣལ་འབྱོར་ལ། རྩེ་གཅིག སྤྲོས་བྲལ། རོ་གཅིག སྒོམ་མེད་དང་བཞི་ལས། དང་པོ་རྩེ་གཅིག་ཉམས་ཀྱི་ངང་ནས་ཡིག་དྲུག་བགྲང་བའི་ཚུལ་བསྟན་པ། དང་པོ་རྩེ་གཅིག་ཉམས་ཀྱི་ངང་ནས་ཡིག་དྲུག་བགྲང་བའི་ཚུལ་བསྟན་པ་ནི། གནས་པའི་སྟེང་ནས་འགྱུ་བའི་རྗེས་མཐུད་ཆོད།། འགྱུ་བའི་ངང་ནས་གནས་པའི་རང་ངོ་ལྟོས།། གནས་འགྱུ་གཉིས་མེད་ཐ་མལ་ཤེས་པ་སྐྱོངས།། རྩེ་གཅིག་ཉམས་ཀྱི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། མ་ཡེངས་ཐུགས་རྗེ་ཆེན་པོའི་གསལ་སྣང་ཏིང་འཛིན་ལ་བྱིང་རྒོད་དང་བྲལ་བར་གནས་པའི་སྟེང་ནས། སྔོན་ཤར་རྣམ་རྟོག་ཕྲ་རགས་འགྱུ་བའི་རྗེས་མི་མཐུད་པར་ཆོད་ལ། འགྱུ་བ་ཉིད་ཀྱི་ངང་ནས་མ་ཡེངས་གནས་པའི་རང་ངོ་ལ་ཅེར་གྱིས་ལྟོས་དང་། གནས་པ་དང་འགྱུ་བ་གཉིས་སུ་ཕྱེ་རུ་མེད་པའི་ཆོས་ཉིད་མཉམ་པ་ཆེན་པོར་མ་བཅོས་ཐ་མར་བཞག་པའི་ཤེས་པ་ཡུལ་རྗེས་སུ་མ་འབྲངས་པར་ས་ལེར་སྐྱོང་བའི་རྩེ་གཅིག་གི་ཉམས་དང་ལྡན་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ། །འདི་ཐུགས་རྗེ་ཆེན་པོའི་ཟུང་འཇུག་གི་ཉམས་ལེན་དང་སྦྱར་ན། བསྐྱེད་རྫོགས་ཟུང་འཇུག་བདག་ཉིད་ཀྱི་སྒོ་གསུམ་ཐུགས་རྗེ་ཆེན་པོའི་གསང་གསུམ་ལ་སྒོམ་པའི་སྐབས་སུ། ལྷ་གཞན་ན་མེད་པའི་རང་སེམས་རིག་སྟོང་རྗེན་པ་ལས་མི་གཡོ་ཙམ་དུ་གནས་པ་དེ་དང་སྦྲེལ་ན་ཆོག་པ་ཡིན། འདི་གནད་ཀྱི་ཆོས་དྲུག་དང་སྦྱར་ན། ཨཱོྂ་གཞི་མ་བཅོས་པའི་གནད། མ་ལམ་མ་འགག་པའི་གནད། ཎི་ཉོན་མོངས་པ་ཡེ་ཤེས་སུ་ལྡོག་པའི་གནད། པད་ཐབས་ཤེས་རབ་གཉིས་མེད་ཆོས་ཉིད་ཀྱི་གནད། མེ་ཡེ་ཤེས་རང་བྱུང་རྣམ་རྟོག་བསྲེག་པའི་གནད། ཧཱུྃ་རིག་པ་དབང་དུ་སྡུད་པ་ཆོས་ཉིད་རང་བྱུང་གི་གནད་དོ། །ཆོས་ཉིད་ཀྱི་གནད་ཐམས་ཅད་ཁྲོལ་བར་བྱེད་པ་ཡང་ཡི་གེ་དྲུག་པ་བཟླས་པས་འབྱུང་ངོ་། །དེ་རིང་རྩེ་གཅིག་ཉམས་ཀྱི་ངང་ནས་ཡིག་དྲུག་སྒྲོངས། །ཞེས་པའི་མཚམས་འདིར་བཞག་ནས་སང་ཉིན། ཀུན་རྫོབ་བརྟགས་ནས་དོན་དམ་གཏན་ལ་ཕོབ། །ཅེས་པ་ནས་འཆད་རྒྱུ་བྱེད། ༈ ད་རེས་ཀྱི་ཞིང་སྒྲུབ་འདིར་ཞུགས་པའི་སེར་སྐྱ་ཚང་མ་མི་གྲངས་དང་། ཐེངས་གྲངས་ཉི་མ་རེ་རེ་བཞིན་བརྩིས་བགྲངས་བྱས་ན། འབུམ་ཚོ་མང་པོར་ལངས་ཡོད་ཅིང་། དེ་བཞིན་དུ་མཆོད་པའི་གྲངས་ཀ་ཡང་ཉིན་གྲངས་མང་ཉུང་གིས་སེམས་བསྐྱེད་འབུམ་མཆོད་ལས་ཀྱང་ལྡབ་འགྱུར་གྱིས་མང་བའི་འབུམ་མཆོད་ཁ་ཤས་སོང་ཡོད་ཅིང་། ཚང་མས་ལྷག་བསམ་རྣམ་པར་དག་པའི་མདུན་པ་གཅིག་ལ་གཏད་པའི་དད་དང་དམ་ཚིག་གཙང་བའི་མཐུས། མཆོད་གཏོར་ལ་ཉིན་དང་པོའི་སྔ་ནུབ་ནས་བདུད་རྩི་བབ་པ་རང་ཅག་ཚང་མས་རིག་ཏུ་ཡོད་པ་འདིས་ཀྱང་། ད་རེས་ཆོས་རྣམ་དག་ཅིག་ལ་འབྲེལ་བ་ཞོག ཐར་བའི་ས་བོན་ཞིག་རང་རྒྱུད་ལ་ཐེབས་ཡོད་པའི་བློ་བདེ་བདེ་ནི་རང་རང་གི་ངོས་ནས་བྱེད་ཆོག་པ་ཡིན། བདུད་རྩི་འདིས་ཕབས་གཏའ་བྱས་ནས། དམ་རྫས་ཁྱད་པར་ཅན་སེལ་མེད་པ་འགའ་རེ་བསྲེས་པའི་ཞིང་སྒྲུབ་རིལ་བུ་ཚང་མ་ལ་ཐེམས་ཤག་ཤག་ཅིག་ལས་ནས། རྗེས་ནས་སྡེ་ཤོག་སོ་སོའི་དཔོན་པོ་རྣམས་བརྒྱུད་ནས་བསྐུར་ཡོང་། གཞན་ཞིག་གིས་རྩ་ཆེན་ཞིག་ཡིན་ཞེས་པ་དང་མི་འདྲ་བར་རང་རེས་མིག་རིག་ལག་ཟིན་མྱོང་བ་མངོན་གྱུར་དུ་མིག་སྔར་ཡོད་པ་འདི་ཡིན། བདུད་རྩི་འབབ་བཞིན་ཡོད་པ་མ་རིག་པ་རྣམས་ཀྱིས་འདི་ཉིད་མཇོལ་དང་ངོ་མཚར་ཅན་ཡིན་ལ། འདི་གཞན་སུ་ཡི་སྟོབས་དང་ནུས་པས་མིན་པར་ཆོས་ཀྱི་བྱིན་རླབས་རང་རང་གི་དད་པ་དང་མོས་པས་དྲངས་བར་བྱས་པ་ཡིན་ནོ།། ༈ དེ་རིང་རྫོགས་ཆེན་ཤྲཱི་སེང་ཆོས་གྲྭའི་བྱང་བཤད་སྒྲུབ་རྣམ་ངེས་གླིང་གི་སྐྱོར་དཔོན་དགེན་རང་རིག་ལགས་ཀྱིས་མགུར་འཐེན་མཛོད། ༈ ཁ་སང་དོ་ཞག་ཅིག་ལ་རྫོགས་ཆེན་སྡེ་ཤོག་བརྒྱད་ཀྱི་དཔོན་པོ་དང་། འགན་ཁུར་མི་སྣ་ཉི་ཤུ་ལྷག་འདུས་ནས། ཕྱིན་ཆད་ཞིང་སྒྲུབ་འཚོགས་རྒྱུའི་སྐོར་གྱི་སྐད་ཆ་ཞིག་ངར་འཕྲོད་བྱུང་། དེ་རིང་ཁ་སང་ལྟར་ན་རྫོགས་ཆེན་སྡེ་ཤོག་བརྒྱད་དང་། གནའ་སྔ་མོའི་སྡེ་བའི་མིང་ད་དུང་མ་བོར་ནས་ཡོད་པ་ལྟར་བརྩིས་ན། འབྲོག་རུ་ཤོག་ཁག་བཅུ་གསུམ་ཞེས། རྒྱབ་ཤིས་འབྲུག་ཚང་སྡེ་བའམ། ན་གཞུང་། རྒྱབ་ཤིས་གཉིས། བ་སྲས་གཉིས་སམ། བ་ཁོག སྲས་ཚ་གཉིས་བཅས་བཞི། རྟ་སྨུག་གཉིས་སམ། རྟ་མཛེས། སྨུག་རི་གཉིས་དང་དྲུག མཚོ་ཁྲི་ཀླུ་ཕྱུག་སྡེ་བའམ། བཀྲ་ནང་། གདོང་ནང་གཉིས་བསྣན་པས་བརྒྱད། རྫ་ཕྱུག འབྲུག་ཆུ་གཉིས་དང་བཅུ། དེའི་སྟེང་དུ་གཡང་འཁྱིལ་བརྟན་པ་དང་། འབམ་མཐའ་སྡེ་བ་བཅས་བཅུ་གཉིས་ཡིན་ལ། འབྲོག་རུའི་གཞུང་སྡེའི་མོ་དུད་སྟོང་རུ་ཕྱེད་གཉིས་ཀྱི་སྟེང་དུ། དེང་སང་དགོན་མདའི་གྲོང་ནང་རྐྱང་བ་རུ། ན་ནིང་བརྩིས་བསྡོམས་བྱས་དུས་མི་གྲངས་ཁྲི་ཞིག་ཡོད་པར་ཟེར་བ་ལྟར་ན། སྡེ་གསར་རུ་གསར་རྐྱང་བ་ཡང་སྟོང་མིས་མ་ཚད་པར་ཡོད་འདུག་པས། དེ་དག་ས་འདིའི་དགོན་ལྷ་སྡེའི་འདི་ཕྱིའི་སྐྱབས་འོག་དང་། ཡུལ་མི་སྡེའི་སྐྱིད་སྡུག་གྲལ་ནང་དུ་ཡོད་པ་ཞིག་ཡིན་ན། སྡེ་གསར་རུ་གསར་གྱི་སྡེ་ཤོག་ཅིག་དང་བཅུ་གསུམ་ཡོད་པའམ། ཡང་ན་གཞུང་སྡེ་ཚོའི་ནང་དུ་དུད་གྲངས་འདི་ཙམ་ཞིག་འཕར་ཡོད་ཅེས་པའི་འཕར་ཐོ་ཡོད་རྒྱུ་རེད། མཚམས་རེར་དགོན་པས་རྟེན་དམ་རྫས་རེ་འགྱེད་དུས་སུ་གྲངས་ཚད་ཅིག་ལོན་དགོས་པ་ཡིན་ལ། ཆོས་ཕྱོགས་ཀྱི་བྱ་བའི་ལས་བགོས་ཤིག་བྱ་ན་ཡང་། ག་ཐེ་འདི་ཐེའི་གཟུང་སའི་ལུང་ཞིག་དང་། བླུག་སའི་མཆུ་ཞིག་ཡོད་དགོས་པ་རེད། ཡང་མཚམས་རེ་སྡེ་གསར་རུ་གསར་ཤར་མི་ལྷོ་འཁྱར་རྣམས་ཀྱིས། བཞོན་མ་བཤའ་འགྲོ་ཁི། ཁང་རྐུབ་ཕེད་འགྲོ་ཁི། རི་དྭགས་གསོད་འགྲོ་ཁི། རིན་ཐང་ཅན་གྱི་སྨན་རིགས་ཡོད་ཚད་ཀྱི་རྩ་བ་བསློག་ནས་ས་ནག་སློག་བྱེད་འགྲོ་ཁི། ངན་སྣ་དགུ་དེ་དག་གིས་སློབ་ཡོང་འདུག་ཅེས་བཤད་ན། ཤ་ཚ། ཐམས་ཅད་གཅིག་འདྲ་ཏག་ཏག་ཅི་ལ་ཡིན། དེའི་ནང་དུ་ཡང་དྲང་མོ་ཁ་ཤས་ཡོད་སྲིད་ཀྱང་། ང་དཀར། ཁོ་ནག་ཅེས་བཤད་དགོས་ནའང་བཤད་དཀའ་རྒྱུ་ཡིན་ལས་ཆེ་བས། དེ་རྣམས་ལ་འདུག་སའི་གདན་ཞིག་ངའི་ཚེ་སྨད་ལས་ཀྱིས་བསྐོས་ཐང་འདི་ན་ཡིན་བསམ་ས་ཞིག་དང་། ཡང་ན་འགྲོ་སའི་ལམ་ཞིག བྱ་རིག་པ་ཅན་ལ་ནམ་ཚོད་རང་གིས་བཟུང་དུ་བཅུག་རྒྱུ་ཨེ་ཡིན་ན། དེ་ཚོ་རི་ཁྲོད་ཀྱི་མཚམས་པ་ངག་བཅད་པ་ཞིག་གིས་ཆོས་ཀྱི་བར་གསེང་ནས་བཤད་རྒྱུ་ཞིག་མིན་ན་ཡང་། གཏམ་འདྲ་གཞིའི་སྐབས་ཀྱི་གླེང་གཞི་ཤོར་བ་རེད། དོན་མདོ་རྩ་ཅི་ཞིག་བཤད་བཞིན་ཡོད་ཅེ་ན། དོ་ཞག་སྡེ་ཤོག་རྣམས་ཀྱི་དཔོན་པོ་དང་། འགན་ཁུར་མི་སྣ་ཉི་ཤུ་ཙམ་ཞིག་འདུས་ས་ནས། ད་ཕྱིན་ཆད་ཞིང་སྒྲུབ་འདི་ལོ་ལྟར་ཆད་མི་ཉན་ལུགས་དང་། ད་སྔོན་སྦྱིན་བདག་བྱས་ནས་འཚོགས་ཟིན་པ་ཁ་ཤས་ཀྱིས་ཀྱང་། འདི་བཞིན་དུ་ལོ་ལྟར་སྡེ་བ་རྣམས་ཀྱིས་རེས་བསྐོར་ནས་ཡང་མགོ་གཞི་ནས་སྦྱིན་བདག་བྱས་ཏེ་འཚོགས་ཞེས་པ་དང་། ཁྱད་པར་དུ་གཡང་འཁྱིལ་སྡེ་བས་ནན་ཏན་གྱིས་སང་ཕོད་ཁོང་སྡེ་བས་ཡིན་གཅིག་མིན་གཉིས་འཚོགས་དགོས་ཚུལ་བཤད་འདུག་ཅེས་སྐད་ཆ་གོ་བྱུང་། གདན་ས་ཆོས་འཁོར་ཆེན་པོའི་ཉེ་འདབས་ཀྱི། ས་ཆོས་ཡོད། དགོན་པ་སྒྲིག་ཡོད། སྡེ་བ་ཁྲིམས་ཡོད། དགོན་ལྷ་སྡེ། ཡུལ་མི་སྡེ་གཉིས་ཀའི་ཐད་ཕྱོགས་ནས། གོང་ལ་དཔོན་ཡོད་པ། ལུས་ལ་ལྷ་ཡོད་པ། བཟང་ཡར་འགྲོའི་རྟ་བརྒྱའི་གོམ་ཁ་གྱེན་ལ་བཏེག་པའི་ཡུལ་ས་ཞིག་ནས། ཞིང་སྒྲུབ་ལོས་འཚོགས། དེས་མ་ཚད་ཕྱིའི་དཔལ་འབྱོར་གྱི་མཐུན་རྐྱེན་ཡར་རྒྱས་དང་ལྷན་དུ། ནང་བསམ་པའི་དཔལ་ཡོན་གྱིས་ཕྱུག་པོར་འགྱུར་བའི་ཆེད་དུ། འཛམ་གླིང་ས་ཆ་གཞན་ན་མེད་པའི་བོད་ཀྱི་ཆོས་དང་རིག་གཞུང་ལ། རང་ནོར་རང་གིས་ལོངས་སྤྱད་ནས། ཁྱིམ་པ་རྒན་དར་གཞོན་གསུམ་གྱིས་སློབ་སྦྱོང་བྱ་རྒྱུའི་གོམས་སྲོལ་དང་། སློབ་སྦྱོང་བྱ་སའི་ལྟེ་གནས་ཡོད་དགོས་པ་ཡིན། སྔོན་ཐོན་གྱི་ས་ཆ་དང་། རྒྱལ་ཁབ་འགའ་རེ་ནས་བྱིས་པ་མ་ཁོག་ཏུ་ཡོད་དུས་སུ་སློབ་གསོའི་ཐབས་ཤེས་བྱེད་བཞིན་ཡོད་ཚུལ་འདུག་མོད་ཀྱང་། དེ་ཡང་ཟེར་ཚོད་ཙམ་ལས་ཡར་ཐོན་གྱི་རྒྱལ་ཁབ་ཚོའི་ནང་ནས། ཕྱིའི་འབྱོར་བ་རྒྱས་ཤིང་རྒྱས་ལ། ནང་བསམ་པའི་དཔལ་ཡོན་གྱིས་མི་འདང་ནས། དཀའ་ངལ་འཕར་མ་ཅི་ཙམ་མྱོང་བཞིན་ཡོད་པ་རིག་བཞིན་འདུག་མོད། རང་ཅག་བོད་ཀྱི་བྱིས་པ་ལ་མ་ཁོག་ནས་སློབ་གསོ་མེད་པར་མ་ཟད། ཡར་སྐྱེས་ནས་མར་སྒུར་བའི་བར་དུ་སྒོ་ཕྱུགས་རྣམས་དང་མཉམ་སྐྱེས་མཉམ་རྒས་ཀྱིས་དུས་རབས་མང་པོ་སོང་བ་ཡིན། ཁག་ཀྱང་ཡོད་པ་མིན་ཏེ་མི་རབས་རྒན་པ་ཚོས་དེ་ལྟའི་རང་བཞིན་གྱིས་མི་ཚེའི་ནམ་ཟླ་བསྐྱལ་བ་ཡིན། དེ་རིང་ཁ་སང་སློབ་གྲྭ་རུ་མངགས་དགོས་རྒྱུའི་གཉིད་སད་ཡོད་ཚུལ་ཡིན་ཡང་། གཉིད་སད་ཡོད་རུང་མིག་གིས་ལྟ་ཡག་དགོས་ཀྱི་མ་གཏོགས། མི་རིགས་གཞན་གྱི་སྐད་ཡིག་ཤེས་ན་ཁ་གསོ་རྒྱབ་འགེབས་ལ་ཕན་ཐོགས་ཡོད་ཀྱང་། རྒྱ་མིན་བོད་མིན་ར་མ་ལུག སྤྲ་མིན་སྤྲེལ་མིན་རྔ་མ་མེད། ཡར་གྱི་ཤྭ་རྗེས་མ་ཟིན། མར་གྱི་ཤེའུ་རྗེས་མ་ཆོད། རྒྱ་ཡིན་པའི་རྒྱ་རྗེས་མ་ཟིན། བོད་ཡིན་པའི་བོད་གོ་མ་ཆོད་ནས། མཐའ་མར་མི་རིགས་རང་ཉིད་ཀྱི་ཆོས་དང་རིག་གཞུང་མི་ཤེས། འཇིག་རྟེན་ཡང་དག་གི་ལྟ་བའི་སློབ་གསོ་མེད། མིའི་གཤིས་རྒྱུད་བཟང་པོའི་ཀུན་སྤྱོད་མེད་པར་གྱུར་ནས། རིག་གནས་སྣེ་ཁ་རེ་གཉིས་ཤེས་པ་ལས། མ་ཤེས་ན་གནོད་ཚབས་ཆུང་བ་ཡིན་འདུག་སྙམ་པའི་ཚུལ་ལ་འཕྲད་རྒྱུ་ཡོད་པ་ཡིན། དཔེར་ན། ཀྲུང་གོའི་རྒྱལ་ནང་ནས་མི་མང་པོ་ཞིག་གིས་ད་བར་དུ་ཕྱི་རྒྱལ་ལ་མིག་དཔེ་བལྟས་པ་ཡིན་ལ། ཕྱི་རྒྱལ་ནས་རང་ལོ་བཅོ་བརྒྱད་ལོན་དུས་ཕ་མ་དང་བུ་རྒྱུད་ཁ་ཁ་ཡིན་ཞིང་། བུ་རྒྱུད་ཀྱིས་ཕ་མ་ལྟ་དགོས་པ་མིན་ལ། ཕ་མ་རྒས་དུས་རྒན་གསོ་ཁང་དུ་འཛུལ་རྒྱུ་ཡིན་ལ། དེ་དུས་ཕ་མས་བུ་རྒྱུད་ལ་ཐེ་གཏོགས་བྱས་ཚེ་བུ་རྒྱུད་མ་དགའ་ན་ཕ་མ་ཁྲིམས་ལ་གཏུག་ནས། བཙོན་དུ་འཇུག་ཆོག་པ་ཡིན་ལ། ཕ་མ་བཙོན་དུ་བཅུག་པའི་བུ་རྒྱུད་ཀྱང་མང་བ་ཡོད་པ་ཡིན། དེ་ལྟ་བུའི་ཀུན་སྤྱོད་དང་བསམ་བློས་ཅི་ཡང་གོ་མི་ཆོད་པའི་ཚུལ་ཤེས་ནས། དེང་སང་སྲིད་འཛིན་གསར་པས་བུ་རྒྱུད་ཀྱིས་ཕ་མའི་སྐྱིད་སྡུག་མ་བལྟས་ན་མི་ཆོག་པའི་ཁྲིམས་གསར་འཛུགས་བཞིན་ཡོད། རང་ཅག་བོད་ཀྱི་ཡུལ་འདི་ཐེག་ཆེན་གྱི་ནང་ཆོས་དར་ས་ཡིན་པས། སེམས་ཅན་ཐམས་ཅད་ཕ་མ་ཡིན་པའི་སེམས་སྦྱོང་བྱེད་བཞིན་ཡོད་ལ། དེ་དངོས་སུ་སྐྱེ་དང་མི་སྐྱེ་དོན་དག་གཞན་ཞིག་ཡིན་ཡང་། ཚེ་འདིའི་ཕ་མ་ལ་བུ་རྒྱུད་ཀྱིས་དྲིན་ལན་མ་སྤྲད་ན། དེ་མིའི་ཐ་མ་རུ་བརྩི་བ་ནི་བོད་ཀྱི་རིག་གཞུང་གི་ཤུགས་རྐྱེན་ཐེབས་པའི་གོམས་སྲོལ་གྱི་ནང་གི་ཆེས་སྤྱིར་བཏང་བ་ཞིག་ཡིན་ལ། དེས་ན་ངས་བཤད་རྒྱུ་རུ་བོད་ཀྱི་ས་ཆ་འདི་འཛམ་གླིང་ས་གཞིའི་སྟེང་གི་ཞིང་ཁམས་ཉག་གཅིག་ཏུ་འགྱུར་རྒྱུའི་ལམ་ཡོད་པ་ཡིན་ཞེས་པ་ཡིན། དེ་སྨྱོ་གཏམ་ཞིག་བཤད་པ་མིན་ནམ་སྙམ་ན། ལྷ་གནས་པའི་ཡུལ་ཁམས་ལ་ཞིང་ཁམས་ཟེར་བ་ཡིན་པས། བོད་མི་ལྷ་མི་རུ་གྱུར་དུས་བོད་ཡུལ་དག་ཞིང་དུ་གྱུར་བ་ཡིན། དེ་ཡོང་རྒྱུ་མེད་པའི་སྐད་ཆའོ་སྙམ་ན། བོད་མིས་མི་རིགས་གཞན་དག་གི་ལད་མོ་བྱ་ཚུལ་གྱིས། སྲིད་འབྱོར་རིག་གསུམ་གང་ཐད་ནས་འཛམ་གླིང་སྔོན་ཐོན་མི་རིགས་ཀྱི་སྔོན་དུ་མ་ཟད། དཔུང་པ་མཉམ་གཤིབ་བྱ་སའི་གྲལ་ཙམ་དུ་ཡང་ཐོན་རྒྱུ་ཡོད་པ་ནི་ཡོང་རྒྱུ་མེད་པའི་སྐད་ཆ་ཡིན་ཡང་། མི་ལྷ་རུ་གྱུར་བ་ལ་མིའི་སེམས་ལྷའི་སེམས་སུ་བསྒྱུར་དགོས་ཤིང་། མིའི་སེམས་ལྷའི་སེམས་སུ་སྒྱུར་སྤྱད་ཀྱི་སེམས་ཁམས་ཀྱི་སྨན་བོད་ལ་མ་གཏོགས་སུ་ལའང་ཡོད་པ་མིན་ཅིང་། དེ་གང་ཡིན་ཞེ་ན། སྙིང་རྗེས་དྲངས་པའི་བྱང་ཆུབ་ཀྱི་སེམས་རིན་པོ་ཆེ་ཡིན་ལ། ཁས་ཉིན་རང་རེས་བྱང་ཆུབ་སེམས་སྡོམ་བླངས་ནས་རྟེན་འབྲེལ་བསྒྲིགས་པ་ཡིན། སེམས་ཁམས་བསྒྱུར་བཀོད་གཏོང་སྤྱད་ཀྱི་བོད་པའི་ཆོས་དང་རིག་གཞུང་གིས། དང་པོ་མི་སྒེར་རང་ཉིད་བསྒྱུར་བཀོད་གཏོང་། དེ་ནས་ཁྱིམ་ཚང་། དེ་ནས་ཁྱིམ་མཚེས་དུད་རོགས། དེ་ནས་ས་ཁུལ་དང་། ཡུལ་གྲུ་རུ་རྒྱ་ཇེ་ཆེ་ཇེ་ཆེར་གྱུར་ན། བོད་མི་ཐམས་ཅད་ནང་སེམས་ཁམས་ཀྱི་བདེ་བ་དང་ལྡན། གཞན་ཕན་གྱི་བསམ་སྤྱོད་ཀྱིས་འཚོ་བའི་ཡ་རབས་སྤྱོད་བཟང་ཅན། དགའ་སྐྱིད་ཕུན་སུམ་ཚོགས་པ་ཞིག་ཏུ་གྱུར་དུས། འཛམ་གླིང་གི་མི་རྣམས་ཀྱིས་བོད་མི་ལྷ་མི་དང་། བོད་ཁམས་ཞིང་ཁམས་སུ་བརྩི་རྒྱུ་ཡིན་པའོ། །དེ་ལྟར་དཀའ་དཀའ་བྱས་ན་མི་ལྷ་རུ་འགྱུར་རྒྱུ་དཀའ་ན་ཡང་། སླ་སླ་བྱས་ན་བསམ་བློའི་ཁྱེར་སོ་བཟང་ཕྱོགས་སུ་བསྒྱུར་དུས་འགྱུར་བ་ཡིན། དེས་ན་དེང་སྐབས་ཕུགས་འདུན་ཁོ་ན་གླེང་གིན་འདུག་མོད། ངས་བོད་ཀྱི་ཕུགས་འདུན་དེ་ན་ཡོད་པར་སྙམ་ལ། ཁྱོད་ཀྱི་ཕུགས་འདུན་གང་ཡིན་ཞེས་དྲིས་ན་ངའི་ཕུགས་འདུན་དེ་ཡིན་པར་བརྗོད་རྒྱུ་ཡིན། བོད་མི་རིགས་ཀྱི་མགོ་རྣ་ལ་རྒྱའི་སྐད་ཆ་ཡང་དེ་རུ་ཆ་ཚང་འདུས་ཡོད་པར་སེམས། དོན་རང་ལག་ལ་ཡོང་རྒྱུ་ཡོད་པའི་ལམ་སྣེ་བཙལ་མ་ཤེས་ན། ཁ་སྟོང་པའི་བགྲོ་གླེང་དང་། མིང་དམངས་གཙོ་བཏགས་པའི་གྱེན་ལོག་ཅིག་ཅི་ཙམ་འཚོགས། ཅི་ཙམ་བཤད་ཀྱང་། ཁ་སྟོང་ནང་གི་གཏམ་སྟོང་། རང་སྨ་རང་གིས་ཕབ་སྤྱད། ཆེ་ན་ནང་དཀྲུགས་ཤིག་ཐུབ་ན་ཐང་སྟེ། དེ་ཡང་སྔོན་གྱི་སྨོན་ལམ་ལོག་འདེབས་དང་། བསོད་ནམས་ཀྱི་རྒྱབ་རྟེན་ཞིག་མེད་ན་དཀྲུག་རྒྱུ་ཡང་དཀའ་མོ་ཡིན། བཤད་དོན་གཏམ་གྱི་སྙིང་པོ་ནི་ས་འདི་རུ་མཚོན་ན། ཞིང་སྒྲུབ་ཉི་མ་ཁ་ཤས་སུ་ཅིའི་ཕྱིར་མི་འཚོགས་ཏེ་འཚོགས་དགོས་པས་མ་ཚད། དེ་ལས་ཀྱང་བསམ་པའི་དཔལ་ཡོན་གོང་ནས་གོང་དུ་སྤེལ་པའི་སྤོབས་པ་བསྐྱེད་དགོས་པ་དང་། བོད་ཀྱི་ཆོས་དང་། རིག་གཞུང་སྦྱང་བར་བྱ་དགོས། མི་སྐྱ་ཕོ་མོ་ཚོས་ཀྱང་ཤེས་མི་དགོས་པའི་རྒྱུ་མཚན་མེད་ཅིང་། འཆི་རྒྱུ་ཡིན་ལུགས་འདྲ་འདྲ། ཐར་བ་དགོས་ལུགས་གཅིག་པ། བསམ་པའི་དཔལ་ཡོན་དགོས་ཚུལ་ཡང་འདྲ་འདྲ་ཡིན་པས་ཆོས་རིག་ལ་སྦྱང་དགོས། ངས་དོ་ཞག་གྲྭ་པ་རྣམ་པའི་ནང་ནས་ཞུ་རྒྱུ་ལ། བདེ་ཆེན་ཞིང་སྒྲུབ་ཕྱིན་ཆད་འདི་ནས་ངས་འཚོགས་དགོས་པའི་ངེས་པ་མི་འདུག་ཅེས་པ་ཡིན། ཅིའི་ཕྱིར་ཞེ་ན། གནས་འདི་རི་ཁྲོད་ཡིན་ཞིང་། ང་རི་ཁྲོད་པ་ཞིག་ཡིན་ལ། དེང་སང་གི་བཤད་ལུགས་བྱས་ན། ལས་འཁྱུར་ངལ་གསོ་བྱས་པའི་མི་ཞིག་དང་། སྔར་གྱི་ལུགས་སྲོལ་ལྟར་ན་རི་ཁྲོད་ཀྱི་མཚམས་རྒན་དང་། ཡིན་ངེས་པ་ནི་མིའི་ཁྱུ་ནས་བུད། གྲོགས་བྱ་དང་རི་དྭགས་བྱེད་པ་ཡིན་ཟེར་བའི་མི་ཡིན་པས། མི་གཞན་དང་ཁ་བརྡ་མི་བྱེད་དོན་ཡང་དེས་ཡིན། མདོར་ན་མི་ཚེའི་ལྷག་མ་ཅུང་ཟད་ཡོད་པ། འཚོ་ཁམས་འཕྲོད་བསྟེན་གྱིས་ཉི་མ་ཁ་ཤས་སུ་འཚོ་བཞིན་ཡོད་པའི་མི་ཞིག་ཡིན་པས། དེའི་ཕན་ཆད་དུ་ཡུན་རིང་གི་རྟག་འཛིན་བྱེད་ཀྱིན་མེད་པས། ཞིང་སྒྲུབ་འདི་ནས་འཚོགས་པའི་ངེས་པ་མེད་ཅེས་པ་ཡིན། དེ་བཞིན་དུ་སེམས་བསྐྱེད་འབུམ་མཆོད་འཚོགས་རྒྱུའི་རེ་བ་ཆེན་པོ་ཡོད་འདུག་ཅེས་བཤད་བྱུང་བས། འབྲོག་རུ་ཤོག་ཁག་བཅུ་གསུམ་གྱི་དཔོན་རིགས་ཀྱི་ཁ་ནས་བུད་པའི་སྐད་ཆ་དེ་མང་པོའི་འཐུས་ཚབ་ཀྱི་སྐད་ཆར་བརྩིས་ཏེ། དེ་རིང་ཚིག་ལེན་མང་ཚོགས་རང་ཉིད་ལ་རྒྱག་པ་ཡིན། སེམས་བསྐྱེད་འབུམ་མཆོད་འཚོགས་རྒྱུ་འདི་གཅིག་ན་བསོད་ནམས་ཆེ་བ། གཉིས་ན་དགེ་རྩ་ལྷད་མེད། གསུམ་ན་དུས་ཀྱི་སྐུ་རིམ། ཁྱད་པར་དུ་ས་ཆ་འདིའི་བསོད་ནམས་ཀྱིས་གྲུབ་པ་ཞིག་ཡིན་པས། ད་སྔོན་ཐེངས་བརྒྱད་པའི་བར་དུ་འཚོགས་ཤིང་། ན་ནིང་ཁྲི་གྲྭའི་ཡན་དུ་བརྒལ་ཞིང་། འདི་འཚོགས་དུས་རྒྱུའི་འགྲོ་སོང་སྒོར་མོ་ས་ཡ་ཁ་ཤས་འགྲོ་བཞིན་ཡོད་ཀྱང་ཅི་ཡོད་རླུང་ཁྱེར་གྱི་རྫས་བཞིན་བཏང་བཞིན་ཡོད། འོན་ཀྱང་སྡེ་མང་ཚོགས་ལ་ཡང་ཁུར་བོ་ཅུང་ཙམ་རེ་གྱུར་བ་དང་། པདྨའི་ཐང་ཁོར་ཡུག་དང་བཅས་པས་དེ་དོན་ལ་བློས་བཏང་ཞིག་བྱེད་བཞིན་ཡོད་པ་ཡིན། ཚོགས་བསགས་ཐམས་ཅད་ཀྱི་ནང་ནས་དེ་བདམས་པ་ཡིན་པས་བློས་བཏང་བྱ་ས་ཡག་པ་ཡིན་ཡང་། རི་ཁྲོད་པས་ཉིན་བཞིན་འུར་འུར་ཟིང་ཟིང་ངང་ནམ་རྒྱུན་འདུག་སོས་མི་དལ་བའི་བྲེལ་འཚུབ་བྱས་དུས། དེ་ཙམ་མི་མཛའ་བ། འདི་བཏགས་པའི་རྒྱན་དུ་གྱུར་བ་ཡིན་དང་། དྲུད་པའི་གདོས་སུ་ཆེ་བ་ཡིན་ཤེས་པ་མིན་བསམས་ནས་ད་ལོ་མཚམས་བཞག་བྱས་པ་ཡིན། འོན་ཀྱང་ད་ཐེངས་སྡེ་ཤོག་གི་དཔོན་པོ་ཚོས། དགའ་ན་སོ་རྩར་འཛུམ་ཙམ་དང་། སྡུག་ན་ངོ་བར་ནག་ཙམ་གྱི་རྣམ་འགྱུར་ཞིག་བསྟན་པས། ད་གཟོད། གླག་རོག་མོ་ཉལ་སའི་རྫོང་དང་། འབྲོང་བྲེ་མོ་འགྲོ་སའི་རྫ། ཁོག་རྩིས་ཞེ་ཚོད་ཅིག་ཡོད་སོང་བ་ཡིན། སྤྱིར་ན་ཐམས་ཅད་དགའ་ན་དགེ་བ། སེམས་ཅན་མགུ་བྱེད་མ་གཏོགས་པ་རྒྱལ་བའི་ཕྲིན་ལས་ཟུར་བ་ཞིག་ཡོད་པ་མིན་ལ། འུ་གུ་དུས་མཐའ་མའི་སྟོན་པའི་རྗེས་འཇུག་ཤཱཀྱའི་དགེ་སྦྱོང་ཞིག་གིས། ལས་བྱ་བ་བསྟན་འགྲོ་སྤྱི་ལ་སྨོན་ཐབས་སུ་འཇུག་པ་ལ་སུ་མགུ་དང་སུ་མི་མགུའི་ཁྱད་པར་མི་ཆེ་ཡང་། །ས་དང་ལུང་པའི་དོད་ལན། བྲག་དང་ཤུག་པའི་སྐྱེས་ལན་གྱིས་ལས་བསྐོས་ཐོད་པའི་རི་མོ་འདི་ལ་བབ་པ་ཡིན་ན། རྩག་པ་སྐྱ་རིལ་ཨ་མས་བཟོས་ནས། མིང་ལ་སྐྱ་རིལ་ཨ་མས་བཏགས་པ་ཡིན་པས། བུ་ངན་རུང་ཕ་འཚེར་སྲུང་དགོས་པ་ནི་འཇིག་རྟེན་མི་ཡི་འགྲོ་ལུགས་ཡིན་པས། རང་སྡེ་རང་མིའི་སྡེ་བ་མང་ཚོགས་ཀྱི་བསམ་པའི་འདུན་མ་ལ། བརྩི་སྒོ་རིན་ཐང་སྔར་བྱས་ད་མི་བྱེད་པ་མིན་ཡང་། ད་དུང་མུ་རིམ་བཞིན་རང་རོགས་གཉིས་ཀས་ཅི་ས་གང་ཐད་ནས་བབས་ལ་ལྟ་ཞོར་བྱ་དགོས་ཞེས་ལོ་རེའི་ནང་ནས་ཐེངས་རེར་ངོ་འཕྲད་ཡོང་བ་རུ། མི་ངོ་རེ་ལ་གསེར་སྲང་རེའི་ཚུལ་གྱིས་བཤད་པ་ཡིན། དེའི་འཕྲོས་སུ་ངས་སྔོན་ཆད་ཀྱི་ལས་འཕྲོ་མཇུག་སྡུད་བྱ་རྒྱུ་ཞིག་ལ། ད་སྔོན་ཁ་བཤད་བྱས་ནས་བུ་ལོན་དགོས་རྒྱུ་ལ། མི་ལོ་སུམ་ཅུ་ཐམ་པའི་ཡར་སྔོན་ནས། ཤྲཱི་སེང་ཆོས་གྲྭ་གཟོད་གསར་བཙུགས་བྱས་ནས་ཆོས་དུང་འབུད་པའི་སྐབས་ཤིག་ལ། དངུལ་སྤྱི་ཁྱིམ་ཚང་དགུ་དང་། འབྲུ་བཞི་བཅུ་ཐམ་པ་བཞག་སའི་འབྲུ་སྤྱི་ཁྱིམ་ཚང་བཅུ་གཅིག་སྟེ་ཁྱིམ་ཚང་ཉི་ཤུ་ཐམ་པ་ཡོད་པ་ལ། དྲན་རྟེན་གྱི་རྟགས་མ་རེ་སྦྱིན་རྒྱུའི་ཁ་ཆད་བྱས་པ་དེ་འཕྲོད་མེད་པས། ད་ཐེངས་ཞིང་སྒྲུབ་ཀྱི་སྐབས་འདིར་ངས་མིང་ཐོ་གཞུང་ལས་ཁང་ལ་སྤྲད་ཡོང་། ཁྱོད་ཚོས་གཞུང་ལས་ཁང་ནས་ལོངས། གཞན་འབྲུ་ཉི་ཤུ་བཞག་སའི་ཁྱིམ་ཚང་ཉི་ཤུ་དང་། ཚོགས་འཁོར་སྤྱི་བ་བཅས་ཡོད། ཚང་མ་ལ་དཀའ་ངལ་ཡོད་དུས་སུ་འགན་ཁུར་དང་ལེན་བྱས་པ་རྣམས་ལ། དེ་དུས་སུ་ངས་དཔའ་དར་བཏགས་རྒྱུ་ཁས་བླངས་ཡིན་པས། ཁྱོད་ཚོའི་སྐལ་བ་རྗེས་མར་མུ་རིམ་བཞིན་སྦྱིན་ཡོང་། རྫོགས་ཆེན་ཚང་གི་སྤྱི་རིགས་སྡེ་ཚན་འགན་ཁུར་བྱས་ཚད་ལ་སྦྱིན་རྒྱུ་ཡོད་ཅེས་པ་མིན། མི་ཚེའི་མཐའ་མཇུག་སྡུད་དུས། བུ་ལོན་དགོས་པའི་ཐད་ནས་གཙང་མར་བྱེད་དགོས་པས་དེས་བཤད་པ་ཡིན། སང་ཉིན་ཐུག་ཡོང་། ༈ དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་བཤད་སྒྲུབ་འཁོར་ལོ་གཉིས་ལྡན་གྱི་སྒོ་ནས་གོང་དུ་འཕེལ་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་རྣམས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་འཁྲུག་རྩོད་ཐམས་ཅད་རྒྱུན་ཆད། བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པའི་ཕྱིར་དང་། བདག་ཅག་རྣམས་ཀྱི་ཚེ་འདིའི་ཕ་མ་གཉིས་དང་། དགྲ་བགེགས་གཉིས་ཀྱི་གཙོར་བྱས་པའི་བཟང་འབྲེལ་ངན་འབྲེལ་ཐོགས་པའི་མཐའ་ཡས་པའི་སེམས་ཅན་ཐམས་ཅད་མཐར་ཐུག་རྣམ་པ་ཐམས་ཅད་མཁྱེན་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པ་དང་། དེ་མ་ཐོབ་ཀྱི་བར་དུ་ཡིན་ན་ཡང་མཐོ་རིས་ཡོན་ཏན་བདུན་དང་ལྡན་པའི་ལུས་རྟེན་ཁྱད་པར་ཅན་ཞིག་རྙེད་ནས་ཐེག་པ་ཆེན་པོའི་ཆོས་ལ་ཚུལ་བཞིན་དུ་སྤྱོད་པའི་སྐལ་བ་དང་ལྡན་པའི་ཕྱིར་དུ་རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་གནང་བར་ཞུ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་རླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག། ཉིན་གསུམ་བའི་ཆོས་ཁྲིད།ད་ཡང་ཚང་མ་ཆོས་ཉན་ས་དང་སྒྲུབ་སའི་ཆོས་རའི་ནང་དུ་ཐོན་ཡོད་པས། ཐོས་བསམ་སྒོམ་སྒྲུབ་ཀྱི་ཆོས་གང་བྱེད་ཀྱང་སྤུས་དག་ཅིང་ཚད་དང་ལྡན་ལ་ཚུལ་དང་མཐུན་པའི་རང་བློ་བདེ་བྱེད་ཀྱི་ཆོས་ཡང་དག་སྒྲུབ་དགོས་ཤིང་། དེ་སྒྲུབ་པར་བྱེད་པ་ལ་སྒྲུབ་མཁན་རང་ཉིད་ཀྱིས་སྒོ་ལུས་ངག་ཡིད་གསུམ་ཆུན་གཅིག་ཏུ་དྲིལ་ནས། དཔེར་ན་ཁབ་མིག་ཏུ་སྐུད་པ་འཛུད་པ་ལྟར་དུ་བློ་རྩེ་རིག་པ་བསྒྲིམས་ནས་གང་སྒྲུབ་ཏུ་ཡོད་པའི་ཆོས་ལ་སེམས་གཏོད་དགོས། དེས་ན་དང་པོ་གཙུག་ལག་ཁང་གི་སྒོ་ནང་ནས་ཡར་འཛུལ་མ་ཐག་ཏུ། ཁ་གྲག་མི་ཉན་བསམས་ནས་ངག་བཅད་བྱ་དགོས། དེ་ནས་ཆོས་ཉན་པའི་ཀུན་སློང་ཀུན་སྤྱོད་དག་པའི་སྒོ་ནས་ཆོས་ཉན་ནས་ཆོས་ཁྲིད་གྲོལ་ལ་ཉེ་སྐབས་ཀྱི་བསྔོ་བ་ཆ་ཚང་མ་གྲུབ་ཀྱི་བར་དུ་ཡར་ལངས་མི་ཉན། དགེ་འདུན་པ་བཞེངས་དུས་ད་གཟོད་རང་ཡང་ཡར་ལངས་ནས། ཆོས་སྟོན་པའི་བླ་མའི་ཕྱོགས་སུ་ཁ་འཁོར་ནས་འདུག་དགོས་པ་ཡིན་གྱི། ཡར་ལངས་མ་ཐག་ཏུ་ཁ་ལོག་གེ་འཁོར་ནས་བླ་མ་ལ་རྒྱབ་གཏོད་བཞིན་སྒབ་མཐའ་ཞིག་སྤྲུགས་ནས་ཚོགས་འདུ་གྲོལ་བ་བཞིན་དུ་འགྲོ་ཉན་པ་མིན། ལྷ་དང་བླ་མ་དང་། ཚོགས་དང་རྟེན་གསུམ་མཇལ་རྗེས་སུ་གུས་ཤིང་དང་པའི་ཚུལ་གྱིས་མ་མཐའ་ཡིན་ཡང་ཁ་ཡར་འཁོར་བཞིན་ཕྱིར་ནུད་ཀྱིས་གོམ་པ་གསུམ་འོང་ནས་རིམ་གྱིས་གཙུག་ལག་ཁང་གི་སྒོར་འབུད་དགོས་ཤིང་། སྐྱེས་ནས་ད་ལ་མ་ཐུག་བར་ཚེ་གཅིག་ལ་བཤད་པ་ཡིན་ཡང་བཤད་ནས་མ་ཚར་བ་ཡིན་པས་གཙུག་ལག་ཁང་གི་སྒོ་རུ་མ་ཐོན་གྱི་བར་དུ་ངག་སྒོ་མ་དཀྲོལ་ན་བཟང་བའོ། །བླ་མ་བསྟེན་ནས་ཆོས་ཞུས་པའི་ཡོང་སྒོ་ཇི་ལྟ་བུ་ཞིག་དགོས་ཤེ་ན། ཚ་ཚ་བརྐོས་ཕོར་ལས་ཕྱུང་བ་ལྟ་བུ་ཞིག་མ་བྱུང་རུང་སྣམ་བུ་ཚོས་ནང་དུ་བཙོས་པ་ལྟར་དུ་སྔར་དང་མ་འདྲ་བ་ཞིག་ཏུ་རྒྱུད་འགྱུར་དགོས་ཀྱང་། རང་རེ་འདི་རུ་འཛོམས་ནས་ཆོས་འཆད་ཉན་བྱ་བའི་ཡུན་ནི་ལོ་གཅིག་གི་ཉིན་ཞག་སུམ་བརྒྱ་དྲུག་བཅུའི་ནང་ནས་ཉི་མ་རྡོག་པོ་བཞི་སྟེ། དེ་ཡང་ཞིབ་ཏུ་བཤད་ན་ཆུ་ཚོད་རྡོག་མ་བཞི་ཁོ་ན་ཡིན་པས་དེ་རྐྱང་བའི་རིང་ལ་མ་འཁྲུལ་ཡང་དག་གི་ལམ་དུ་ཞུགས་དགོས་པ་ཡིན་ཞེས་པ་ཙམ་གྱིས། མི་ཚེའི་སོ་དཀར་བ་ནས་བཟུང་མགོ་དཀར་བའི་བར་དུ་འཁྲུལ་སྣང་ངན་གོམས་ལ་སོང་བ་དེ་མར་བུད་དུས་སུ་ཡར་འཛུལ་བའི་མི་དེ་ཡིན་མིན་ལ་ཐེ་ཚོམ་ཟ་དགོས་པའི་རྒྱུད་ལ་འགྱུར་བ་ཐོན་པ་ཞིག་ཡུན་རིང་ཐུང་དང་གོམས་ཤུགས་ཆེ་ཆུང་གི་དབང་གིས་ཤིན་ཏུ་དཀའ་ཡང་། སེམས་ནང་དུ་བསྐོར་ནས་དུས་ཚོད་རྡོག་པོ་བཞིའི་རིང་ལ་ཆོས་ཉན་པ་འདིས་རྗེས་སོར་འཁྲུལ་ཚབས་ཧ་ཅང་མི་ཆེ་བའི་དུས་སུ་སྔར་ཆོས་ཞུས་པའི་སྐབས་སུ་དེ་ལྟར་ཞིག་གོ་མྱངས་སྙམ་པའི་དྲན་གསོ་ཞིག་ཡོང་བ་གྱུར་ན་ཆོས་ཞུས་པའི་དོན་པོ་ཡོད་སོང་བའོ། །ཆོས་རའི་ནང་ནས་ངག་བཅད་བྱས་པ་འདིས་རང་ཁྱིམ་ནས་ཁ་འདོན་དགེ་སྦྱོར་བྱེད་པའི་ཚེ་ཡང་ངག་བཅད་བྱ་དགོས་འདུག་སྙམ་པའི་དྲན་གསོ་ཡོང་དགོས་ཤིང་། འཇིག་རྟེན་གྱི་མི་རྣམས་ནི་འདོད་པ་ཆེ་བ་ཡིན་པས། རང་གི་ཡིན་པ་དེ་ཅི་ཞིག་ཡིན་རུང་ཡག་པ་དང་། སྤུས་དག་དང་། ཆེན་པོ་དང་། མང་པོ་ལོན་དགོས་སྙམ་ནས་དེ་ཨེ་ལོན་ཁོ་ནས་རྒྱུག་བཞིན་ཡོད་མོད། ད་རེས་ཆོས་རའི་ནང་ནས་ལོན་དགོས་པ་ནི་ལུས་ངག་ཡིད་གསུམ་གྱིས་ཆོས་ཇི་ལྟར་སྒྲུབ་པའི་ཚུལ་ཡང་དག་པ་དེ་ཤེས་དགོས་པའོ། །ཆོས་རའི་ནང་ནས་གང་སྒྲུབ་བཞིན་ཡོད་པའི་ཆོས་ཀྱི་ཕྱོགས་སུ་ལུས་ངག་ཡིད་གསུམ་ཆུན་གཅིག་ཏུ་དྲིལ་ནས། འཁོར་ལོ་ཕྲེང་བ་ཡང་བཞག་ནས་ལུས་ཀྱིས་ཅི་ཡང་མི་བྱ། ངག་གིས་ཅི་ཡང་མི་བཤད། སེམས་མི་དགེའི་རྣམ་རྟོག་གིས་བར་མ་ཆོད་པར་ཆོས་ཉན་དགོས། ལར་ལུས་ངག་གཉིས་ཀ་སྡོམ་པ་ནི་སེམས་ཆོས་ལམ་དུ་ཞོག་པའི་ཆེད་ཡིན་ཞིང་སེམས་དགེ་བའི་ལམ་དུ་ཞོག་རྒྱུ་གལ་ཆེ་བས། སྔོན་འགྲོའི་ངག་འདོན་ལ་བརྟེན་ནས་འབུམ་ལྔ་གསོག་པའམ། བདེ་སྨོན་བཏོན་ནས་འོད་མཚན་དང་མ་ཎི་གསོག་པའམ། ཕྱག་དང་སྐོར་བ་ལ་འབད་པའམ། དགེ་སྦྱོར་གང་ཞིག་བྱེད་མཁན་ཡིན་རུང་། གཙོ་བོ་སེམས་དགེ་བའི་ལམ་ལ་འཇོག་རྒྱུ་ལས་གལ་ཆེ་བ་གཞན་མེད་པར་ཤེས་དགོས། མ་ཎི་རྡོག་མ་གཅིག་ལས་མ་བཏོན་ཀྱང་དགེ་བ་དེ་རླབས་ཆེན་དུ་འགྱུར་མིན་ནི་དམ་པ་གསུམ་ཚང་མ་ཚང་ལ་རག་ལས་ཤིང་། དམ་པ་གསུམ་ཡང་སེམས་ལ་རག་ལས་པའོ། །ཁས་འདོན་པ་བཏོན་པ་ནི་སེམས་ཀྱིས་དོན་དྲན་པའི་ཆེད་དུ་ཡིན་ཞིང་དོན་དྲན་ནས་རང་རྒྱུད་ལ་སྦྱར་དགོས་པ་སྟེ། དཔེར་ན་ནད་པས་རང་གི་ནད་ལ་ཕན་པའི་སྨན་ཡོད་པ་ཐོས་པ་དང་། སྨན་གྱི་མིང་ཤེས་པ་དང་། སྨན་དེ་ཉོས་ནས་སྒྲོ་བ་ཁ་ཤས་ཁྱིམ་དུ་བརྩིགས་པས་ཕན་ཐོགས་མི་ཡོང་བར། གཙོ་ཆེ་བ་ཁོག་ཏུ་བཏུང་ནས་ནད་སྨན་འཕྲོད་དགོས་པ་ལྟར་དུ་ཡིན་པ་དེས་ན་སེམས་གཞན་དུ་གཡེང་ནས་ཁ་རྐྱང་བས་བཏོན་པ་ཙམ་ནི་ཕན་པ་ཆུང་ངོ་། །ཆོས་རའི་ནང་ནས་ཇི་ལྟར་དགོས་པ་དེ་ལྟར་དུ་རང་ཁྱིམ་ནས་འཚོ་བའི་ཆ་ཤས་སུ་མེད་དུ་མི་རུང་པའི་དམ་པའི་ཆོས་སྒྲུབ་དུས་སུའང་དགོས་པ་ཡིན་སྙམ་པའི་དྲན་གསོ་བྱ་དགོས་པ་ཡིན། ཆོས་སྒྲུབ་པ་འདི་འཚོ་བའི་ནང་དུ་མེད་མི་རུང་པ་ཡིན་པ་སྔར་བཤད་པ་ལྟར་ཏེ། འཚོ་བའི་ནང་དུ་ཟ་རྒྱུ་མེད་ན་ལྟོགས་པ་དང་གོན་རྒྱུ་མེད་ན་འཁྱག་པ་ཡིན་པས་ཟ་རྒྱུ་དང་གོན་རྒྱུ་དང་སྐོམ་དུས་སུ་འཐུང་རྒྱུ་ཡོད་དགོས་ལ། མ་གཉིད་ན་ཡུན་རིང་དུ་འཚོ་མི་ཐུབ་པས་གཉིད་ཀྱང་དགོས་པའོ། །གཞན་ཡང་འཚོ་བའི་ཤ་ཆས་གལ་ཆེན་ལ་སེམས་ཀྱི་སྨན་ཆོས་དགོས་པ་སྟེ། ལུས་ལ་སྨན་དགོས་པ་ལྟར་དུ་སེམས་ལའང་དེ་བཞིན་ཆོས་དགོས་ཤིང་། སེམས་གཙོ་བོ་ཡིན་པས་སེམས་ཀྱི་སྨན་ཆོས་མེད་ན་ལུས་ཀྱང་མི་བདེ་བར་ན་བས་ཆོས་ནི་འཚོ་བའི་ཆ་ཤས་སུ་མེད་དུ་མི་རུང་བའོ། །གལ་སྲིད་འཚོ་བའི་ཆ་ཤས་སུ་ཆོས་སྒྲུབ་པ་མེད་དུས་རང་ཅག་གི་སྒོ་ཁྱི་སྒོ་ཟོག་དང་གཅིག་མཚུངས་སུ་གྱུར་པ་སྟེ། སྒོ་ཁའི་ཁྱི་རྒན་རྒྱ་བོ་དང་ཁྱོད་གཉིས་གཅིག་མཚུངས་རེད་ཅེས་བརྗོད་པར་བྱས་རུང་ཟེར་ཆེ་རུ་མ་སོང་སྟེ། ཤི་དུས་སུ་ཆོས་མེད་ཡིན་པར་འདྲ་ཞིང་ཟ་ཉལ་ཙམ་ནི་ཁྱིས་ཀྱང་བྱེད་བཞིན་ཡོད་པས་གཞན་པའི་ཁྱི་ལས་ཁྱད་པར་འབྱེད་བྱེད་ཀྱི་ལས་ཤིག་མ་བསྒྲུབས་པས་སོ། །གལ་སྲིད་དེ་ལས་གཞན་པའི་ལས་ཤིག་བསྒྲུབས་ཡོད་ཚེ་རྣམ་སྨིན་ལྕི་སྤྱད་ཀྱི་སྡིག་པའི་ལས་ཡིན་ངེས། མདོར་ན་ཆོས་སྒྲུབ་པ་ནི་རང་གི་འཚོ་བའི་ཆ་ཤས་སུ་མེད་དུ་མི་རུང་བ་ཡིན་པས་ཆོས་རའི་ནང་ཙམ་ནས་མིན་པར་རང་ཁྱིམ་ནས་ཀྱང་སྒྲུབ་དགོས་འདུག་སྙམ་པའི་དྲན་གསོ་ཡོང་དགོས་པའོ། །པདྨའི་ཐང་དུ་ཞིང་སྒྲུབ་འཚོགས་ས་ནས་ཉིན་ཁ་ཤས་སུ་ཆོས་བསྒྲུབས་པ་དང་། སྐོར་བ་བྱས་ནས་སྒོ་ཕྱི་ནང་གཉིས་ཀ་ནས་སོང་དུས་སུ། གཙུག་ལག་ཁང་གི་ཁོར་ཡུག་དང་བཅས་ཏེ་ཕྱི་ནང་ཐམས་ཅད་དུ་གཙང་སྦྲ་བྱས་པ་དང་། མཆོད་པ་སྤུས་དག་པ་དངོས་གཙང་བ་བཤམས་ཡོད་པ་འདིས་དྲན་སྐུལ་གྱིས། རང་ཁྱིམ་ནས་ཀྱང་དེ་བཞིན་ཁ་ལག་སྤྱོད་གསུམ་གཙང་མར་བྱས་པའི་སྒོ་ནས་མཆོད་རྫས་མང་ཉུང་དང་འབྱོར་བ་ཆེ་ཆུང་ལ་མ་ལྟོས་པར་དག་པ་རྣམ་གསུམ་ཚང་བའི་མཆོད་པ་བཤམས་དགོས་པ་སྟེ། དག་པ་གསུམ་གང་ཞེ་ན་ཞིང་དག་པ་ནི་མཆོད་པ་འབུལ་སའི་ཡུལ་དག་པ་དང་། དངོས་པོ་དག་པ་ནི་འབུལ་བྱའི་དངོས་པོ་སྡིག་པས་བསགས་པའི་རྒྱུ་རྫས་དང་། ཟ་འཕྲོ་འཐུང་འཕྲོ་རུལ་བ་བམ་པ་སེར་སྣས་བཅིངས་པ་སོགས་མིན་པ་དང་། བསམ་པ་དག་པ་ནི་མཐའ་ཡས་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་དོན་དུ་ཡིན་པའོ། །མཆོད་ཀོང་རྡོག་པོ་གཅིག་དང་ཡོན་ཆབ་བདུན་ཆ་ཙམ་ལས་མ་ཡོད་རུང་གཙང་མར་བཤམ་དགོས་པ་ཡིན། གཙང་མི་གཙང་ཡང་ཞིབ་ཏུ་རྟོག་དཔྱོད་བྱས་ན་དཀའ་ཡང་། རང་གིས་གཙང་མར་བྱས་ཡོད་སྙམ་པའི་རང་སེམས་དག་པ་བྱུང་ན་གཙང་མ་ཡིན་པའི་གོ་ཆོད་པའོ། །གཞན་ཡང་གཙུག་ལག་ཁང་གི་ལྷ་ཁང་སྦུག་མའི་དྲི་གཙང་ཁང་དུ་རྟེན་གཙོ་ཇོ་བོའི་སྐུ་བརྙན་ཁྱོད་ཅག་གིས་མཇལ་ཁ་ཞུས་པ་དང་། གསེར་ཆབ་གསོལ་བ་དང་། གསོལ་སྨོན་འདེབས་པའི་རྟེན་ཞིག་བཞུགས་སུ་གསོལ་ཡོད་པ་འདི་ནི་བདག་ཅག་གི་སྟོན་པ་བཅོམ་ལྡན་འདས་ཤཱཀྱའི་རྒྱལ་པོའི་སྐུ་བརྙན་ཡིན་ཡང་། སྤྲུལ་སྐུ་ལོངས་སྐུ་རུ་ཞལ་བསྒྱུར་ནས་རིགས་ལྔ་གསོལ་ཞིང་རིན་པོ་ཆེའི་རྒྱན་ཆ་མང་པོས་བརྒྱན་པ་ནི་བསོད་ནམས་གསོག་པའི་ཆེད་དུ་ཡིན་པའོ། །རང་རེས་སྟོན་པ་ལ་ཇོ་བོ་ཞེས་ཞུ་སྲོལ་ཡོད་པ་སྟེ་ལྷ་སའི་ཇོ་བོ་ཞེས་དང་། སྟོན་པའི་སྐུ་ལ་ཇོ་བོ་ཞེས་ཞུ་བཞིན་ཡོད་ཅིང་། ཇོ་བོ་ཞེས་པ་ནི་གནའ་བོད་དབུས་གཙང་གི་ཕྱོགས་ནས་འབོད་སྲོལ་ཡོད་པའི་ཆེ་བཀྱགས་ཀྱིས་བོས་པའི་མཚན་ཏེ། དགའ་ཞིང་དང་བའི་ཉམས་ལྡན་གྱི་ཚིག་གིས་འབོད་ཚུལ་ཞིག་ཡིན་པས། དཔལ་ལྡན་ཨ་ཏི་ཤ་རྒྱ་གར་ནས་བོད་དུ་བྱོན་དུས་བོད་རྣམས་ཀྱིས་ཇོ་བོ་རྗེ་ཞེས་ཞེ་ས་ཞུས་པ་ལྟ་བུའོ། །ས་ཆ་འདི་ཡས་མས་ནས་ཨ་བུ་ཞེས་པ་དང་འདྲ་བ་སྟེ། རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོ་ཚང་ལ། ཐམས་ཅད་ཀྱིས་ཨ་བུ་ཞེས་ཞུས་པ་ལྟ་བུ་ཡིན། ཁོང་རྫོགས་ཆེན་དུ་ལོ་ཉི་ཤུ་ཙམ་བཞུགས་པས་མཚན་དེ་དང་པོ་རྫོགས་ཆེན་པས་ཞུས་པ་ཞིག་ཨེ་ཡིན་ན་སྙམ་བཞིན་ཡོད། དཔལ་སྤྲུལ་རིན་པོ་ཆེའི་གསུང་གི་ནང་དུ་ཆུ་གྲུ་ལུས་རྣམ་བཤད་ཅེས་པའི་བསྟན་བཅོས་ཤིག་ཡོད་པ་ནི། ཉིན་གཅིག་རྒད་པོ་ཞིག་རི་ཁྲོད་དུ་ཕྱིན་པས། དཔལ་སྤྲུལ་རིན་པོ་ཆེས། ཡ་རྒད་པོ། དེ་རིང་ཅི་ཞིག་གོ་རྒྱུ་འདུག ཅི་ཞིག་རིག་རྒྱུ་འདུག་གསུངས་པས། རྒད་པོས་ཆུ་གྲུ་ལུས་གོ་རྒྱུ་མི་འདུག་ཞུས་པས་བརྩམས་པ་སྟེ། དེ་ལྟར་ཞུ་མཁན་དེའི་སྐད་ལུགས་ལ་བརྟགས་ན། ས་རོང་པ་ཞིག་ཡིན་པར་སྣང་བས་དེ་དུས་ནས་ཀྱང་རོང་རྒན་འཁྱར་པོ་འགའ་རེ་འདིར་ཡོད་པའི་ཚོད་དཔག་ཐུབ་འདུག དཔལ་སྤྲུལ་ཚང་ནི་གདུལ་བྱར་མཚང་ནས་རྒོལ་བའི་གདམས་ངག་གནང་དུས་ཞལ་ཅུང་ཟད་གྱོང་པ་ཡིན་ལ། ཞེ་སའི་ཚིག་གིས་ཨ་བུ་ཞེས་ཞུས་དུས། ཁོང་ཨ་བུ་ཧྲལ་པོ་ཡིན། དུག་ལྔ་མེ་འབར་ཡིན་ཞེས་གསུངས་སྲོལ་ཡོད། གསུང་ཆོས་ཚོའི་ནང་དུ་ཡང་དད་པ་མེད་པའི་ཕྱག་གིས་ཐལ་འཚུབ་སློང་མ་ཡོང་ཞེས་གསུངས་འདུག་པ་ནི་འགའ་རེའི་ངོར་གཟིགས་ནས་གསུངས་ཡོད་ལས་ཆེ་སྙམ་རྒྱུ་ཡིན་པའོ། །རང་རེས་ཇོ་བོའི་མཚན་གྱི་བྱུང་ཁུངས་བཤད་བཞིན་ཡོད་པས། སངས་རྒྱས་བྱང་སེམས་ཀྱི་མཚན་གཟུང་དུས། ཞེ་ས་དང་བཅས་ཏེ་བརྗོད་དགོས་ཀྱི། སྐུ་འདྲ་ཞིག་ལ་མཛུ་གུ་ཁེ་རུ་མ་ཞིག་བཙུགས་ནས། ཁོ་རེ། ཤཱཀྱ་ཐུབ་པ་དེ་ཚུར་སྤྲོད་དང་ཞེས་དེ་ལྟར་ཟེར་མི་རུང་ཞིང་། དེ་གོ་དུས་ཅིག་ཤོས་ཀྱིས་ཀྱང་མགུལ་ནས་བཟུང་སྟེ་འཁྱེར་ཡོང་མི་རུང་བར། གུས་པའི་ཚུལ་གྱིས་ཡར་བཀྱགས་ནས། མཚན་ལ་བདག་ཅག་གི་སྟོན་པ་མཉམ་མེད་ཤཱཀྱ་སེང་གེ་ཞེས་མ་ཡོང་རུང་། སྟོན་པའི་སྐུ་འདྲའམ། ཐུབ་པའི་སྐུ། ཐུབ་དབང་གི་སྐུ་ཞེས་ཞུ་དགོས་སོ། །སྤྱིར་ཁམས་པའི་སྐད་ལ་གུས་ཚིག་ཞེ་ས་མེད་པ་ཡིན་ཞེས་ཟེར་སྲོལ་ཡོད་ཀྱང་། དབུས་གཙང་པ་ལྟར་དུ། ཁྱི་དང་། ཧ་ལི་ལ་ཞེ་ས་འཕྲོད་བ་མིན་རུང་། ལྷ་དང་བླ་མ་ལས་གཞན་ལ་ཞེ་ས་མི་སྤྲོད་པ་ལ་ཡང་ཁྱད་ཆོས་ཡོད་པར་སེམས། དེས་ན་ཁྱོད་ཅག་གིས་ཇོ་བོ་རྒྱ་ནག་མ་འདི་དང་པོ་བཞེངས་དུས་སུ། ངེད་ཅག་གི་བླ་མས་བསོད་ནམས་བསག་པའི་ཞིང་དུ་དམིགས་ནས་ཁོང་རང་ཉིད་ཀྱིས་ལག་དར་ནས་འདིའི་དཔེ་གཞི་ལས་སར་ཞུགས་ནས་བཟོས་ཤིང་། འདི་ལ་ཇོ་བོ་རྒྱ་ནག་མ་ཞེས་མཚན་བཏགས་པའི་བཏགས་དོན་ནི། རྒྱ་བཟའ་ཀོང་ཇོས་ལྷ་སའི་ཇོ་བོ་དང་ལྷན་དུ་བོད་ཀྱི་རྟེན་སྐལ་དུ་བསྣམས་པའི་ཇོ་བོའི་སྐུ་བརྙན་ཞིག་དུས་རབས་སྔོན་མར་མེ་ཉག་རབ་སྒང་དུ་བཞུགས་པར་དེང་སང་གི་དུས་རབས་འདི་ལ་ས་ཆ་འདིའི་བསོད་ནམས་ཀྱི་བགོ་སྐལ་དུ་བྱོན་པ་དེ་འདིའི་ནང་གཟུངས་སུ་བཞུགས་སུ་གསོལ་ཡོད་པས་ཡིན་འདུག་སྙམ་པར་བྱས་ཚེ། རང་ཁྱིམ་དུ་ཡང་བསྟན་པའི་བདག་པོ་སྟོན་མཆོག་ཐུབ་པའི་དབང་པོའི་སྐུ་བརྙན་ཞིག་ཡོད་དགོས་པར་འདུག་སྙམ་པའི་དྲན་གསོ་ཡོང་བར་བྱོས་ལ། ཆ་རྐྱེན་གྱིས་འཛོམས་ན་ལི་ཁྲ་ལ་སོགས་གསེར་དངུལ་གྱི་རྒྱུ་རྩ་ཅན་དང་། མ་འཛོམས་ན་ས་སྐུས་ཀྱང་ཆོག་པ་སྟེ། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་། །བགྱིས་པ་ཅི་འདྲའང་རུང་སྟེ་མཁས་པས་མཆོད། །ཅེས་གསུངས་པས། རྒྱུ་བཟང་ངན་མིན་པར་དད་པ་འགྲོ་མིན་ཡིན་པ་སྟེ། མ་རྒན་ཞིག་ལ་བུ་ཚོང་པ་ནམ་རྒྱུན་རྒྱ་གར་དུ་ཚོང་ལ་འགྲོ་བ་ཞིག་ཡོད། མ་རྒན་གྱིས་ཁྱོད་ཀྱིས་རྒྱ་གར་ནས་དད་པའི་རྟེན་ཁྱད་པར་ཅན་ཞིག་ཁྱེར་ཤོག་ཅེས་ལན་མང་པོར་སྨྲས་ཀྱང་བུས་ནམ་རྒྱུན་བརྗེད་པ་ལ། སྐོར་ཞིག་ཡང་བུ་རྒྱ་གར་དུ་འགྲོ་བའི་ཚེ་ད་རེས་ཁྱོད་ཀྱིས་ང་རང་ལ་ཕྱག་འཚལ་བའི་རྟེན་ཞིག་ཁྱེར་མ་འོང་ན་ང་ཁྱོད་ཀྱི་སྔོན་དུ་ལྕེབས་ནས་འཆིའོ་ཟེར་བ་ལ། བུ་བརྗེད་ངས་ཅན་ཞིག་ཡིན་པས་ས་མཐའ་བསྐོར་ནས་སོང་སོང་ནས་སླར་ལྡོག་པའི་མ་རྒན་གྱི་སྦྲ་མགོ་མཐོང་བའི་བར་དུ་བརྗེད། ཁྱིམ་དུ་སླེབ་ཀར་མས་སྨྲས་པ་དྲན་ནས། ད་ཅི་བྱེད་ངས་མ་རྒན་མོ་ལ་ཕྱག་འཚལ་བའི་རྟེན་ནི་གང་ཡང་མ་ལོན། རྟེན་མེད་པར་ཁྱིམ་དུ་ཕྱིན་ན་མ་རྒན་ལྕེབས་ནས་འཆི་སྙམ་སྟེ། གཡས་གཡོན་དུ་བལྟས་པས་ཟུར་དེ་ན་ཁྱི་མགོ་ཞིག་འདུག དེའི་སོ་ཞིག་ཕྱུངས་པ་དར་གྱིས་དྲིལ་ཏེ་ཁྱེར་འོངས་ནས་མ་ལ་བྱིན། འདི་བཅོམ་ལྡན་འདས་ཀྱི་ཚེམས་མཆེ་བ་ཡིན་པས་ཁྱོད་ཀྱིས་གསོལ་བ་འདེབས་པའི་རྟེན་གྱིས་ཤིག་བྱས་པས། མ་རྒན་གྱིས་ཁྱི་སོ་དེ་ལ་སངས་རྒྱས་ཀྱི་ཚེམས་དངོས་སུ་བཟུང་ནས་དད་པ་བསྐྱེད་དེ་དུས་རྒྱུན་དུ་སྤོས་དང་མཆོད་མེ་ཕྱག་དང་མཆོད་པ་ཕུལ་ནས་དད་རྟེན་དུ་བྱས་པས་ཁྱི་སོ་ལ་རིང་བསྲེལ་མང་པོ་བབས། རྒན་མོ་འཆི་བའི་ཚེ་འཇའ་འོད་ཀྱི་གུར་ཁང་ཕུབ་པ་སོགས་བྱུང་ཞིང་། ཁྱི་སོ་ངན་རུང་རྒན་མོའི་དད་པའི་སྟོབས་ཀྱིས་སངས་རྒྱས་ཀྱི་བྱིན་རླབས་འདྲེན་ཐུབ་སོང་བའོ། །དེ་ལྟར་རྒྱུ་བཟང་ངན་ལ་མ་ལྟོས་པའི་སྟོན་མཆོག་ཐུབ་པའི་དབང་པོ་ནི་བསྟན་པའི་བདག་པོ་ཡིན་པས་དེའི་སྐུ་བརྙན་ཞིག་ངེས་པར་བཤམ་དགོས། གཞན་ཡང་འཕགས་པ་སྤྱན་རས་གཟིགས་ཀྱི་སྐུ་དང་། རྗེ་བཙུན་འཕགས་མ་སྒྲོལ་མའི་སྐུ་དང་། གུ་རུ་པདྨ་འབྱུང་གནས་ཀྱི་སྐུ་གསུམ་བཤམས་ན་བཟང་བ་སྟེ། དེ་རྣམ་པ་ལྔ་བརྒྱ་ཐ་མའི་སྐབས་སུ་མཛད་འཕྲིན་ལྷག་པར་མྱུར་བར་ཤོག་ཅེས་ཐུགས་བསྐྱེད་པས་དུས་འདིར་ཐུགས་རྗེ་ལྷག་པར་མྱུར་བ་ཡིན། མདོར་ན་སྐུ་གསུང་ཐུགས་ཀྱི་རྟེན་གསུམ་ཆ་ཚང་བ་ཞིག་མཆོད་ཁྲིའི་ཐོག་ཏུ་བཤམས་པ་དེ་དག་ལ། འབྱོར་བའི་ཆེ་ཆུང་ལ་མི་ལྟོས་པར་བདུན་ཚར་ནང་གི་ཆུ་ཐིགས་ཁ་ཤས་འདི་དང་། མཆོད་ཀོང་རྡོག་པོ་ཁ་ཤས་འདི་རྣམས་འབུལ་བ་ཡིན་བསམ་དགོས་ཤིང་། འབུལ་དོན་ཡང་རང་ཉིད་ཕོ་རྒྱགས་ཙམ་གྱི་ཆེད་དུ་རུང་བ་མིན་ཏེ། སྔོན་རིག་གནས་གསར་བརྗེ་ཟིན་མ་ཐག་ཏུ་ཐོག་མ་ཇོ་མཇལ་ཆོག་པའི་སྐབས་ཤིག་ལ་ང་ཉི་མ་ལྷ་སར་ཇོ་བོ་མཇལ་དུ་སོང་ལ། དེའི་སྐབས་སུ་རྒན་མོ་ཞིག་གིས་གསོལ་འདེབས་སྨོན་ལམ་བྱ་དུས། ང་ལས་རྒྱགས་ཤིག་མེད་པར་ཤོག ང་ལས་སྐྱིད་ཅིག་མེད་པར་ཤོག་ཅེས་ལྷ་རེའི་མདུན་ནས་དེ་ལྟར་སྨོན་ལམ་རྒྱག་བཞིན་འདུག ངས་རྒན་མོའི་མདོག་ལ་བལྟས་པས་རྒན་མོའི་ཟོ་མདོག་བཟང་རྒྱུ་མི་འདུག་པས་རྒན་མོ་རང་ཉིད་རྒྱགས་དགོས་པར་འདུག་པས་མོ་རང་རྒྱགས་པའི་སྨོན་ལམ་ལོས་འདེབས་ཀྱང་། རང་ཉིད་ཀྱི་ཡན་དུ་སུ་ཡང་རྒྱགས་མི་ཉན་པར་འདུག་པས་དེ་ནི་ཇོ་བོས་ཀྱང་འགྲུབ་དཀའ་བར་སྣང་། དེས་ན་རང་ཉིད་གཅིག་པུ་བཟང་ཆེད་དུ་མི་བསམ་པར། རང་ཉིད་སྔོན་མར་པདྨའི་ཐང་ནས་ཞིང་སྒྲུབ་འཚོགས་སྐབས་སུ། ཐོག་མར་ཕྱོགས་བཅུའི་རྒྱལ་བ་སྲས་བཅས་ལ་དགོངས་གསོལ་ཞུས། དེ་ནས་སྐྱབས་སུ་འགྲོ་བ་གསུམ་གྱིས་གཞི་བཏིང་། སེམས་ཅན་ཐམས་ཅད་ཀྱི་དོན་སྒྲུབ་པའི་ཆེད་དུ་བྱང་ཆུབ་མཆོག་ཏུ་སེམས་བསྐྱེད་དགོས་པར་འདུག་པས། ཁྱིམ་ནས་ཀྱང་དེ་བཞིན་དུ་བྱ་དགོས་པ་ཡིན་བསམས་ཏེ། སྐུ་འདྲ་དང་ཐང་ག་ཅི་ཞིག་བཤམས་ཡོད་པ་དེ་དམིགས་རྟེན་དུ་བྱས་ནས། ཕྱོགས་བཅུའི་རྒྱལ་བ་སྲས་དང་བཅས་པ་རྡུལ་སྙེད་ཀྱི་གྲངས་དང་མཉམ་པ་ཐམས་ཅད་ཡིད་ཀྱིས་སྤྱན་དྲངས་པར་བྱོས་དང་། རང་སེམས་ཀྱི་ནུས་པས་ཐེངས་ན་སངས་རྒྱས་ཀྱིས་ཐུགས་རྗེས་གཟིགས་ཏེ། །ཨོ་རྒྱན་ཆེན་པོས། དད་པ་ཅན་གྱི་གང་ཟག་ཕོ་མོ་ལ། །པད་འབྱུང་གང་དུའང་མ་བཞུད་སྒོ་ཉལ་ཡོད། །ང་ཡི་ཚེ་ལ་འདས་གྲོང་ཡོད་མ་ཡིན། །དད་ལྡན་མི་རེའི་མདུན་ན་པད་འབྱུང་རེ། །ཞེས་གསུངས་པ་དེ་བཞིན་དུ་ཕྱོགས་བཅུའི་སངས་རྒྱས་ཐམས་ཅད་ཀྱི་ཐུགས་རྗེའི་སྤྱན་གྱིས་གཟིགས་ངེས་པ་ཡིན་ནོ། །རང་ཉིད་ཀྱིས་ཕུལ་བའི་མཆོད་རྫས་ཉུང་ངུ་དེས་དམིགས་རྟེན་བྱས་ནས། ཕྱོགས་བཅུའི་ཞིང་ཁམས་རབ་འབྱམས་ཀྱི་ལྷ་མིའི་ལོངས་སྤྱོད་ཐམས་ཅད་དངོས་སུ་འབྱོར་བ་དང་། ཡིད་ཀྱི་སྤྲུལ་བའི་སྒོ་ནས་ཕྱི་ནང་གསང་བ་བླ་མེད་ཀྱི་མཆོད་པ་དང་བཅས་ཏེ། སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་པའི་ཆེད་དུ་འབུལ་བ་ཡིན་ཞེས་ཞེ་སྙིང་ནས་བསམ་པར་བྱ་དགོས། དེ་ལྟར་ཞེ་སྙིང་ནས་བསམས་ན་གྱོང་ཁ་མེད་པའི་ཐོག་ཏུ་ཁེ་ཁ་ཆེན་པོ་ཞིག་ཐོབ་པ་ཡིན། དེས་ན་ཚོགས་བསགས་མཆོད་འབུལ་ནི་དངོས་པོ་ཆེ་ཆུང་མིན་པར་བསམ་པ་དག་མིན་ཡིན་གྱི། རྒྱུ་ཆེ་ཆུང་གིས་ཡིན་ན་ཕྱུག་པོ་ཐམས་ཅད་དག་ཞིང་དུ་སྐྱེ་ངེས་ཀྱང་། དམྱལ་བར་ཕྱུག་པོ་དང་བཙན་པོ་སྐྱེ་བ་མང་ངོ་། །འདིར་ཡོད་པ་མང་ཆེ་ཤོས་ནི་སྐྱབས་གསུམ་འཛིན་པའི་སྡོམ་པ་བླངས་མྱངས་མཁན་ཤ་སྟག་ཡིན་ཞིང་། ད་ལོ་བྱང་ཆུབ་སེམས་སྡོམ་ཡང་བླངས་པ་ཡིན་པས། བྱང་ཆུབ་སེམས་སྡོམ་ནི་དང་པོ་སློབ་དཔོན་གྱི་མདུན་ནས་བླངས་རྗེས་སུ། ནམ་རྒྱུན་རྟེན་གྱི་མདུན་ནས་ཉིན་རེ་བཞིན་དུ་མི་ཆག་པར་ལེན་པའམ། ཉིན་ལན་གསུམ། མཚན་ལན་གསུམ་སྟེ་དུས་དྲུག་ཏུ་ལེན་པར་བྱས་ན་བཟང་ཞིང་། རྟེན་གྱི་མདུན་ནས་ལེན་ས་མེད་རུང་ཡིད་ཀྱིས་བསྒོམས་ནས་བླངས་ནའང་ཆོག་པ་སྟེ་ཕྱོགས་བཅུའི་སངས་རྒྱས་བྱང་སེམས་ཐམས་ཅད་གཟིགས་པ་ཐོགས་མེད་ཡིན་པས་གཟིགས་ཤིང་དགོངས་པ་ཡིན་ནོ། །འདི་ནས་ཉི་མ་བཞིའི་རིང་དུ་མི་ཚེ་གཅིག་གི་སྡིག་ལྟུང་དང་། ཚེ་རབས་ཐོག་མེད་ནས་བསགས་པའི་སྡིག་སྒྲིབ་བག་ཆགས་ཐམས་ཅད། ཤིན་ཏུ་དབང་རྣོན་དང་ལས་ཅན་གྱི་གང་ཟག་ཞིག་ཡིན་ན་མ་གཏོགས་སྦྱོང་ཐུབ་པར་དཀའ་བ་ཡིན་ཡང་། ཆོས་ར་འདིའི་ནང་ནས་ཐར་བའི་ས་བོན་ཞིག་རང་རྒྱུད་ལ་བཞག་ཐུབ་སོང་ན། རྒྱུ་བདེ་གཤེགས་སྙིང་པོ་རང་ལ་ཡེ་གནས་ཀྱིས་ཡོད་པས། རྟེན་མི་ལུས་རིན་ཆེན་ཐོབ་པའི་སྟེང་དུ་རྐྱེན་དགེ་བའི་བཤེས་གཉེན་བསྟེན་པ་དང་། ཐབས་དེ་ཡི་གདམས་པ་ལག་ཏུ་བླངས་ཤིང་རང་ཉིད་ཀྱིས་འབད་པས་ཐུབ་ཚེ་རང་གཞན་དོན་གཉིས་ཚེ་འདིའི་ཐོག་ནས་འགྲུབ་པ་ཞིག་བྱེད་ཆོག་པས་དེ་བྱེད་དང་མི་བྱེད་རང་ལ་ཐུག་པའོ། །དམ་པའི་ཆོས་འདི་གཞན་ཞིག་གིས་སྒྲུབ་ཤོར་ནས་རང་གིས་སྒྲུབ་མི་ཐུབ་པའམ། བཙན་པོ་དབང་ཡོད་ཚོས་སྒྲུབ་ནས་ཉམ་ཆུང་དབང་མེད་ཚོས་སྒྲུབ་ཏུ་མི་དབང་བར་མིན་པར། ཉི་མ་ཀུན་གྱི་ཉི་མ་སྟེ་འཛམ་གླིང་ལ་ཤར་བ་ལྟར་དུ། ཆོས་ཀྱང་ཀུན་གྱི་ཆོས་སྟེ་སུས་སྒྲུབ་ཀྱང་དེ་ལ་སྒྲུབ་ཏུ་ཡོད་པས། རང་ཉིད་མ་ཞན་དུས་དམ་པའི་ཆོས་འདི་སྒྲུབ་རྒྱུ་མེད་ནས་ཐབས་མི་ཆག་གོ །ཆོས་རའི་ནང་དང་རང་ཉིད་ཀྱི་མཆོད་ཁང་རྐྱང་པ་ནས་ཆོས་སྒྲུབ་ཅིང་། སྒོ་ནས་ཕྱིར་བུད་རྗེས་སྔོན་གྱི་མི་དེ་མིན་པ་ལྟར་དུ་གཏན་ནས་མི་རུང་ལ། མི་དེ་ལྟ་བུ་ལ་འཇིག་རྟེན་གྱི་བྱ་བ་དང་མཉམ་དུ་ཆོས་སྒྲུབ་པའི་ལོང་མེད་པས་མི་ཁོམ་པའི་དུས་ཚོད་མང་པོ་ཤར་བ་སྟེ། འཇིག་རྟེན་གྱི་བྱ་བ་ནི་ཁ་གསོ་རྒྱབ་འགེབས་ཀྱི་ཆེད་དུ་མ་སྒྲུབ་ཐབས་མེད་ཡིན་ལ། ཆོས་ཤིག་ཀྱང་སྒྲུབ་དགོས་ཀྱང་སྒྲུབ་པའི་དུས་ཚོད་མི་འདུག་སྙམ་པའི་མི་ཁོམ་པའི་ཐོག་ཏུ་མི་འགྲུབ་པའི་སྣོན་མ་སྟེ། ཆོས་ཀྱི་ཁུར་བོ་ཆེན་པོ་གཅིག་དང་། ལས་ཀའི་ཁུར་བོ་ཆེན་པོ་གཅིག་དང་། འཚོ་བའི་ཁུར་བོ་ཆེན་པོ་གཅིག་བཅས་དེ་ལྟར་ཁུར་བོ་སུམ་བརྩེགས་བཞི་བརྩེགས་ཀྱིས་མནན་ནས། སྤྱིར་སེམས་ལ་གུ་ཡངས་གཞི་ནས་མེད་པའི་ཐོག་ཏུ། ཁུར་བོ་ཇེ་ལྕིར་སོང་ནས། ཆོས་སྒྲུབ་ན་འཇིག་རྟེན་མི་འགྲུབ། འཇིག་རྟེན་སྒྲུབ་ན་ཆོས་མི་འགྲུབ། རུ་བྱས་ན་ཁྱིམ་མི་འགྲིག ཁྱིམ་བྱས་ན་རུ་མི་འགྲིག་པར་འདུག་སྙམ་ནས་ནམ་ཞིག་སེམས་འཚུབས་ནས་སྨན་ཁང་དུ་སོང་ཚེ་ཁྱོད་ལ་སྙིང་ནད་འདུག་ཟེར་ས་ཞིག་ཏུ་འགྱུར་བའོ། །ཆོས་ནི་འཇིག་རྟེན་ན་ཡོད་པའི་སྡུག་བསྔལ་གྱི་ཁུར་པོ་ཐམས་ཅད་ཇེ་ཡང་དུ་གཏོང་སྤྱད་ཡིན་ཡང་། ཆོས་རང་ཉིད་ཁུར་པོ་རུ་གྱུར་དུས་ཆོས་སྒྲུབ་མ་ཤེས་པ་ཡིན་པས། རྒྱུན་གྱི་བསམ་སྤྱོད་དང་ཆོས་འབྲེལ་ནས་ཡོད་དགོས་པའོ། །གོང་དུ་སྣམ་བུ་ཚོས་ནང་དུ་འཕངས་པ་ལྟ་བུ་ཞིག་དགོས་ཞེས། སྣམ་བུ་ཚོས་དམར་པོའི་ནང་དུ་འཕངས་ན་དམར་པོ་དང་། སྨུག་པོ་རྒྱ་སྨུག་རྒུན་འབྲུམ་མདོག་གི་ནང་དུ་འཕངས་ན་སྨུག་པོར་འགྱུར་བ་ལྟར་དུ་བསམ་སྤྱོད་ཐམས་ཅད་ལ་ཆོས་ཀྱིས་ཁྱབ་ན། ཅི་བསམ་ཅི་ལས་ཐམས་ཅད་སྡིག་དང་བྲལ་བས་མ་ཚད། སྙིང་རྗེ་བྱང་སེམས་དང་མ་བྲལ་པའི་སྟོབས་ཀྱིས། བསོད་ནམས་སོག་པས་མ་ཚད་གང་ཟག་དེ་དང་འབྲེལ་ཚད་ཐམས་ཅད་དོན་ལྡན་དུ་འགྱུར་བའོ། །སྣམ་བུ་ཚོས་སུ་བཙོས་དུས་རྒྱུ་ཚོས་ཀྱིས་ཟོས་ལ་སྤུན་མ་ཟོས་པ་མེད་པར་མཉམ་པོར་ཟ་བ་ལྟར་དུ་ཅི་བྱས་ཅི་ལས་ཐམས་ཅད་ཆོས་སུ་འགྱུར་བས། ཆོས་སྒྲུབ་པའི་མི་ནི་དེ་ལྟར་ཞིག་ཡིན་དགོས་པའོ། །མདོར་ན་སྐྱིད་ན་དཀོན་མཆོག་གི་ཐུགས་རྗེ་དང་། སྡུག་ན་ཚེ་སྔོན་གྱི་ལས་འབྲས་སུ་ཤེས་ན། སེམས་ཁྲལ་ལྷག་མོ་མི་དགོས་པར་སེམས་པ་གུ་ཡངས་བློ་བདེ་རུ་འགྱུར་བས། དེའི་དུས་སུ་རྒྱུད་གདུག་རྩུབ་ཀྱིས་འཁྲུགས་ནས། གཟེར་ཁེངས་སེ། ཨུམ་ཐུམ་མེར་འདུག་མི་དགོས་པའི་དུས་ཚོད་ཅིག་ཚེས་པའོ། །འཇིག་རྟེན་སྟེང་གི་ཆེས་ཤིན་ཏུ་རིན་ཐང་ཆེ་ཤོས་ཀྱི་ནོར་བུ་ཅི་བསམ་ཐམས་ཅད་འགྲུབ་སྤྱད་དེ་ཕྱི་རུ་མེད་པར་ནང་དུ་ཡོད་ཅིང་། ཕྱི་རུ་ཡོད་པ་ཞིག་ཡིན་ན་ཕྱི་རྒྱ་མགོ་སེར་རྣམས་ཀྱིས་སྔོན་ཞིག་ནས་གནམ་གྲུ་ནང་དུ་བསྡད་ནས་སམ། འཕུར་མདའ་ལ་སོགས་པའི་ཐབས་ལ་བརྟེན་ཏེ་བླངས་ཚར་ལས་ཆེ་ཡང་། རང་རེ་བོད་ཀྱི་ནང་ཆོས་ལྟ་བུའི་ནང་སེམས་ཀྱི་བདུད་རྩི་འདི་མེད་ནས། དེ་དག་གིས་ཀྱང་མི་ཤེས་པར་ད་གཟོད་རང་ཅག་གི་ཕྱོགས་སུ་ཁ་འཁོར་ནས་ཅི་ཞིག་ཨེ་ལོན་ལྟ་བཞིན་ཡོད། ནང་རང་གི་སེམས་རྒྱུད་ན་ཅི་བསམ་ཐམས་ཅད་ཡིད་བཞིན་དུ་འགྲུབ་བྱེད་ཀྱི་ནོར་བུ་རྩ་ཆེན་དེ་ཡོད་པ་དེས་ན་ཡིད་བཞིན་རིན་ཆེན་སེམས་ཀྱི་གཏེར་སྒོ་དེ་ཕྱེས་དང་། མཛོད་ཕྱི་མའི་ནང་དུ་ནང་མ་ཡོད་པ་དང་། ནང་མའི་ནང་དུ་ནང་མ་སོགས་མང་ཞིང་། ཡིད་བཞིན་རིན་ཆེན་སེམས་ཀྱི་གཏེར་སྒོའི་ལྡེ་མིག་གི་གསང་བའི་ཨང་གྲངས་དང་། སྒོ་ཇི་ལྟར་ཕྱེ་བའི་ཐབས་དང་གདམས་ངག་ནི་ཆོས་རའི་ནང་ནས་ཤེས་དགོས་ཤིང་། སྒོ་ཕྱི་མ་ཕྱེ་སྤྱད་ཀྱི་ལྡེ་མིག་ནི་དད་པ་ཡིན་པས་དད་པའི་ལྡེ་མིག་གིས་ཕྱི་སྒོ་དང་པོ་དེ་ཕྱེས་དང་། དེའི་ནང་དུ་གསང་པའི་སྒོ་ཡི་ལྡེ་མིག་ཤིན་ཏུ་མང་པོ་ཡོད་ལ། མཛོད་ཕྱི་མ་དང་པོ་ཕྱེས་པ་ནི་ལྡེ་མིག་གི་མཛོད་ཁང་ཡིན་པས་དེ་ལས་ལྡེ་མིག་གང་འདོད་རང་གིས་བླངས་ཏེ། གསེར་གྱི་ལྡེ་མིག་ཁྱེར་ཏེ་གསེར་སྒོ་དང་། དངུལ་གྱི་ལྡེ་མིག་གིས་དངུལ་སྒོ་དང་། བཻཌཱུརྱའི་ལྡེ་མིག་གིས་བཻཌཱུརྱའི་སྒོ་དང་། རྡོ་རྗེ་ཕ་ལམ་གྱི་ལྡེ་མིག་གིས་རྡོ་རྗེ་ཕ་ལམ་གྱི་སྒོ་ཕྱེས་དང་། ཁ་ཤས་ནི་གསང་སྒོ་ཡིན་པ་ཡོད་པས་གསང་སྒོ་ཡི་ནང་དུ་འཛུལ་ཐུབ་ནས་ཤིན་ཏུ་གསང་བའི་སྒོའི་ལྡེ་མིག་ལོན་ན། ཡིད་བཞིན་གྱི་ནོར་བུ་རིན་པོ་ཆེ་འདོད་དགུ་ཀུན་འབྱུང་། གསོལ་བ་ཅི་བཏབ་པ་དེ་མ་ཐག་ཏུ་འགྲུབ་བྱེད་ལྟ་བུ་དེ་མྱུར་དུ་ལོན་པ་ཡིན་ནོ། །སེམས་ཀྱི་མཛོད་ཁང་དེ་རྒྱ་ཆེ་བ་ནི་ནམ་མཁའ་དང་མཚུངས་ཤིང་། ནམ་མཁའི་རྒྱ་ཁྱོན་ནི་རང་རེས་གཞལ་མི་ཐུབ་པར་མིག་གིས་ཡར་བལྟས་ལ་ནམ་མཁའ་ནི་དཀྱིལ་མཐོ་བ་དང་། མཐའ་སྡེར་སྡེར་ས་རུ་ཐུག་པ་ལྟ་བུར་ཡོད་ཀྱང་། དེ་ནི་ང་ཚོའི་མིག་ཆུང་བ་དང་། ལྟ་སྤྱད་ངན་པས་ཡིན་གྱི། ནམ་མཁའི་ཕ་རོལ་ཏུ་སོང་གིན་སོང་ལ་ནམ་མཁའི་མཐའ་གཏུགས་པ་མེད་དོ། །སེམས་ཀྱི་སྟོབས་དང་རྒྱ་ཁྱོན་ནི་དེ་ཙམ་དུ་ཆེ་བ་སྟེ། ལུས་ངག་ཡིད་གསུམ་གྱི་འདུས་པ་འདི་ལ་ང་ཞེས་ཟེར་ལ། དེ་ལས་ངག་ནི་ལུས་སེམས་ལྷན་དུ་ཚོགས་ནས་གསོན་པོ་ཡིན་པའི་དུས་སུ་སྨྲ་རུ་ཡོད་ཀྱང་ལུས་སེམས་སོ་སོར་བྲལ་ཚེ་མེད་པར་འགྱུར་ལ། ལུས་ནི་ཅི་ཙམ་སྟོབས་ཆེ་རུང་རྒྱ་མ་བརྒྱ་གཉིས་བརྒྱ་ཡས་མས་ཙམ་ཞིག་ལས་འདེགས་མི་ཐུབ་ཅིང་། རྐང་ཐང་དུ་ལེ་དབར་གཅིག་ཙམ་དུ་ཡང་ཤི་ཤི་ཆད་ཆད་ཀྱིས་ཕྱིན་དགོས་པ་དང་། ངག་གིས་ཀྱང་ཀི་འདེབས་ཅི་ཙམ་ཆེ་བར་བྱས་རུང་རྒྱང་གྲགས་གཅིག་གི་མཚམས་སུའང་ཐོས་དཀའ་བའོ། །ལུས་ངག་གཉིས་ལ་དེ་ཙམ་ཞིག་ལས་ནུས་པ་མེད་ཀྱང་། སེམས་ཀྱིས་ནི་ཁམས་གསུམ་འཇིག་རྟེན་འདི་ཡང་ཡུད་ཙམ་གྱིས་བསྐོར་ནུས་པ་སྟེ། ད་ལྟ་ཡར་རུ་ནང་དུ་སོང་ནས་རྟ་ནོར་ལུག་གསུམ་གྱི་རྫི་བོས་ཅི་བྱེད་ཀྱིན་ཡོད་བསམས་ནས་མར་འཁོར་ཆོག་པས། སེམས་དང་ལུས་གཉིས་སྟོབས་ཤུགས་ཆེ་ཆུང་དེ་ཙམ་དུ་ཡོད་པའོ། །དེས་ན་སེམས་སྟོབས་ཆེན་རྒྱལ་པོ་ལྟ་བུ་དེ་ཆོས་ཕྱོགས་སུ་གཏོང་མ་ཐུབ་ན། ལུས་ངག་གཡོག་པོ་ལྟ་བུ་དབང་མེད་ནུས་ཆུང་དེ་གཉིས་ཀྱིས་ཅུང་ཟད་ཙམ་སྒྲུབ་ཚུལ་བྱས་རུང་འགྲུབ་ཏུ་མེད་དོ། །སེམས་ཕྱོགས་དེར་མ་འཁོར་ན་ལུས་ངག་གིས་སྐོར་བ་བསྐོར། འདོན་པ་བཏོན། འཁོར་ལོ་ཚ་བསྐོར་བྱས་རུང་ཕན་ཐོགས་མི་ཆེ་བ་དེས་ན་དོན་ཆེན་བསྐྱུར་ནས་དོན་ཆུང་ལ་འཇུག་པའི་མཚམས་ནས་འཆར་གཞི་ཆེན་པོ་འཕྱུག་བཞིན་ཡོད་པའི་གནད་འདི་ཤེས་དགོས་པའི་དྲན་སྐུལ་བྱས་ནས། ད་ནི་ཆོས་ཁྲིད་དངོས་ལ་འཇུག་པར་བྱ་ལ་དེ་རིང་གི་ཆོས་ཁྲིད་སྤྲོས་བཤད་མང་པོ་མི་བྱེད་པར་མགྱོགས་ཙམ་གྱིས་འཆད་ནས། སྔོན་འགྲོའི་ངག་འདོན་གྱི་ལུང་ཞིག་འདོན་ན་སྙམ་པ་སྟེ། ས་འདི་ནི་ཆོས་མིང་ས་རུ་ཐོགས། ས་མིང་མི་རུ་ཐོགས་ནས་ཁྱོད་གང་ནས་ཡིན་ཞེས་དྲིས་དུས། རྫོགས་ཆེན་ནས་ཡིན་ཟེར་བས། དོན་དངོས་ཀྱི་ཐོག་ནས་ཀྱང་ལས་འབྲེལ་ཡོད་པའི་རྫོགས་ཆེན་གྱི་ཆོས་ལ་སྐྱ་སེར་ཐམས་ཅད་ཀྱིས་ཉམས་ལེན་བྱ་དགོས་པ་སྟེ། ཐར་བ་ཐོབ་པ་དང་། ཤི་གསོན་གཉིས་ཀའི་དགེ་རྩ་སྒྲུབ་པ་དང་། རང་གཞན་གཉིས་ཀའི་དོན་ཆེན་སྒྲུབ་དགོས་ལུགས་སྐྱ་སེར་ཚང་མ་འདྲ་བས་སོ། །འདིའི་ནང་དུ་དགེ་བསྙེན་འབུམ་ལྔ་བསགས་ཟིན་པ་མང་ཞིང་། གཞན་རྒན་གཞོན་ཚང་མས་ཡིག་ངོ་ནི་ཤེས་པས། སྔོན་འགྲོའི་ངག་འདོན་ཁ་ཏོན་བྱས་ནས་བློ་རུ་བྱང་ཐུབ་པར་བྱ་དགོས་ལ། ཁས་བཏོན་པའང་སེམས་ཀྱིས་དོན་དྲན་པའི་ཆེད་ཡིན་པར་གོང་དུ་བཤད་པས། སྔོན་འགྲོའི་ངག་འདོན་གྱི་དོན་ཞིབ་ཅིང་ཕྲ་བར་གོ་བར་བྱ་བསམ་ན། སྔོན་འགྲོ་ཀུན་བཟང་བླ་མའི་ཞལ་ལུང་ལ་ཚར་མང་པོ་ལྟ་བ་དང་། ཀུན་བཟང་ཞལ་ལུང་ད་སྔོན་ངས་བཤད་མྱོང་བས་མང་ཤས་ཀྱིས་ཐོབ་ཡོད་ལས་ཆེ་ལ། ངས་བཤད་པའི་སྒྲ་སྡེར་ཡང་ཡོད་པས་དེ་ལ་ཉོན་དང་། ལས་དང་པོ་རྣམས་ལ་དྲན་གསོ་རེ་འགྱུར་རྒྱུའི་ཕན་ཐོགས་ཡོད་སྲིད་དོ། །ཀུན་བཟང་ཞལ་ལུང་ལ་རྒྱུན་དུ་ཡང་ཡང་ལྟོས་དང་སྔོན་འགྲོའི་ངག་འདོན་གྱི་འགྲེལ་བ་ཡིན་པས་མ་ཟད་ཤེས་བྱའི་བང་མཛོད་ཀྱང་ཡིན་ཞིང་། རྒྱུ་བཟང་ཤོས་ནི་ཡོན་ཏན་རིག་གནས་ཀྱི་རྒྱུ་ཡིན་པས་དེ་མེད་ཚེ་ཟང་ཟིང་འབྱོར་པའི་རྒྱུ་རྫས་ཅི་ཙམ་ཡོད་ཀྱང་མི་མཛེས་ཤིང་། ཇི་ཙམ་གྱི་འབྱོར་ཆེན་ཕྱུག་པོ་ཡིན་ཡང་ཁ་ཞིག་གྲག་དུས་བླུན་རྟགས་བསྟན་ནས་ཟོག་བཞིན་དུ་ངུར་གྱིན་ཡོད་པ་ནི་རྒྱན་མིན་པར་མཚང་དུ་ཆེ་བས་སོ། །བླུན་པོ་གསེར་དངུལ་གྱིས་བརྒྱན་པ་ནི་མཚང་དང་། ཡོན་ཏན་ཅན་གོས་ཧྲུལ་ཐེད་པོའི་ནང་དུ་ཡོད་ཀྱང་རྒྱན་ཡིན་པ་སྟེ། དཔལ་སྤྲུལ་ཚང་གིས་ཁོང་ཨ་བུ་ཧྲལ་པོ་ཡིན། ཤེས་རྒྱུ་ནི་ཨ་བུ་ཧྲལ་པོས་ཤེས། །མཁོ་རྒྱུ་ནི་བཙན་ཕྱུག་བུ་ལ་མཁོ། །ཞེས་གསུངས་པ་ལྟར་དུ་ཡོན་ཏན་ནི་རྒྱན་དུ་མཆིས་སོ། །དེས་ན་སྔོན་འགྲོ་ཀུན་བཟང་བླ་མའི་ཞལ་ལུང་འདི་ཤེས་བྱའི་བང་མཛོད་ཡིན་པས་ཚར་མང་པོར་ལྟོས་དང་། རང་ཉིད་ཀྱི་ཆོས་སྲིད་ལུགས་གཉིས་ཀྱི་མིག་རྒྱང་དང་། འཇིག་རྟེན་ཡང་དག་གི་ལྟ་བ་སོགས་མདོར་ན་མི་ཡ་རབས་བྱེད་སྤྱད་རྣམས་དེའི་ནང་དུ་ཡོད་པས། དེ་ལ་འཇུག་རྒྱུ་ནི་ཤིན་ཏུ་གལ་ཆེའོ། །རང་གིས་རང་ལ་མི་གཅེས་པ་དང་། རང་དོན་རྒྱབ་ཏུ་བསྐྱུར་མཁན་སུ་ཡང་མེད་ཀྱང་། རང་དོན་སྒྲུབ་མི་ཤེས་ནས་མགོ་འཁོར་ལམ་ལོག་ཏུ་སོང་བ་དེས་ན་ལམ་གྱི་བཞི་མདོ་རུ་ཐོན་དུས་ལམ་མ་ནོར་བ་གལ་ཆེ་ཡི་ལམ་ལོག་པར་ཞུགས་ཚེ་སོང་གིན་སོང་ལ་ལམ་ལོག་ཇེ་ཐུ་རུ་འགྲོ་བས་དོན་འདི་ལ་བསམ་བློ་གཏོང་རྒྱུ་གལ་ཆེན་ཡིན་ནོ། །ད་ཆོས་ཁྲིད་དངོས་ལ་འཇུག་པར་བྱ། ༈ དེ་ཡང་ཇི་སྐད་དུ་རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོའི་ཞལ་སྔ་ནས། འཁྲུལ་པའི་སེམས་འདི་ངེས་པ་མ་བཏུལ་ན། །མཆུ་འདབ་རླུང་གིས་བསྐྱོད་པའི་བཟླས་བརྗོད་དང་། །ལེགས་སྨོན་དུག་གིས་བསྐྱེད་པའི་སྲུང་སྡོམ་དེ། །འབྲས་བུ་ཐར་མཆོག་བཅུད་དུ་སྨིན་པར་དཀའ། །ཞེས་གསུངས་པས། རང་རེ་ཁམས་གསུམ་འཁོར་བའི་སེམས་ཅན་རྣམས་ཀྱིས། འགྲོ་བ་རིགས་དྲུག་གི་གནས་སུ་སྡུག་བསྔལ་རྒྱུ་འབྲས་འབའ་ཞིག་ལ་ཁོར་མོ་ཡུག་ཏུ་སྤྱོད་ནས་བདེ་བའི་གོ་སྐབས་ཏིལ་འབྲུ་ཙམ་ཡང་མ་རྙེད་པར་གནས་པ་འདི་འཁྲུལ་བའི་སེམས་ཀྱིས་བསླད་ནས་འཁྲུལ་སྣང་བདེ་སྡུག་ཏུ་ཤར་བས་ཡིན་པ་སྟེ། དཔེར་ན་ཆུ་ནི་ཆུ་རང་ཡིན་ཡང་དགུན་ལྷགས་རླུང་གིས་བསྡམས་དུས་རླན་གཤེར་གྱི་རང་བཞིན་དང་བྲལ་བའི་འཁྱག་རོམ་དུ་གྱུར་ནས་མགོ་རུ་བརྒྱབ་ན་རྨ་བྱེད་ནུས་པའི་འཁྱག་གོང་དུ་འགྱུར་བ་ལྟར་དུ་སོང་བས། དེ་ལྟ་བུའི་འཁྲུལ་སྣང་གཉིད་མ་བདེ་བའི་རྨི་ལམ་སད་རྒྱུ་མེད་པ་ལྟ་བུ་འདིའི་ཕུགས་དེད་ནས་གཞི་རྩ་ངོས་བཟུང་ན་འཁྲུལ་བའི་སེམས་འདི་ལ་ཐུག་པས། མེ་དང་ཉི་མ་གང་རུང་ལ་འཁྱག་བཞུས་ནས་ཆུ་རུ་མ་བསྒྱུར་བར་བཏུང་མི་རུང་བ་ལྟར་དུ། འཁྲུལ་བའི་སེམས་འདི་བཏུལ་ནས་མ་འཁྲུལ་ཡང་དག་པའི་ལམ་དུ་མ་བཞག་པ་དེ་སྲིད་དུ་ཐབས་གཞན་ལ་བརྟེན་ནས་བདེ་དུས་སྐྱིད་དུས་ཤིག་ཡོང་བའི་ཐབས་མེད་དོ། །གོང་ནས་བཤད་པ་ལྟར་དུ་ལུས་ལ་ནད་ཆུང་ངུ་ཞིག་ཕོག་ཚེ་སྨན་བཅོས་མ་བྱས་ན་མི་བདེ་བས་དེ་བཅོས་ཐབས་དང་གཟེར་འཇོམས་ཀྱི་སྨན་ཚུན་ཆོད་འཐུང་བ་བྱེད་ཀྱང་། ནད་གདོན་གཉིས་ཀྱི་གཞི་བཅས་ཡོད་པའི་འཁྲུལ་བའི་སེམས་འདི་སྨན་བཅོས་བྱ་བ་ཕར་ཞོག་བྱ་རྒྱུ་ཡོད་འདང་ཙམ་ཡང་མི་བྱེད་པ་ནི་འཁྲུལ་ཚབས་ཆེས་ཆེ་བའོ། །དེས་ན་འཁྲུལ་བའི་སེམས་འདི་ཇི་ལྟར་བཏུལ་དགོས་ཤེ་ན། ནད་ཞིག་ལ་དཔེ་མཚོན་ནས་བཤད་ན་ནད་གང་ཡིན་རུང་ཐོག་མ་ནད་དེ་ངོས་ཟིན་པར་བྱ་བ་དང་། དེ་ནས་ངོས་བཟུང་བ་ཙམ་གྱིས་མི་ཕན་པས་མེད་ཐབས་ལ་འབད་དགོས་པ་དང་། ནད་མེད་ཐབས་བྱེད་པ་ལའང་བྱ་བའི་བརྒྱུད་རིམ་གྱིས། དང་པོ་ཆུང་ཐབས་བྱེད་པ་དང་། དེ་ནས་རྩ་བ་དྲུང་འབྱིན་བྱ་དགོས་ཤིང་། དེ་ཡང་ནད་ཐོག་ཏུ་ནད་འཕར་སྤྱད་ཀྱི་སྨན་བསྟེན་མི་རུང་པས་ནད་ཀྱི་ལྡོག་ཟླའི་གཉེན་པོ་ནད་འཇོམས་ཀྱི་སྨན་བསྟེན་དགོས་པ་སྟེ། དཔེར་ན་མེ་ཐོག་ཏུ་འབུད་ཤིང་བསྣན་ན་མེ་ཤི་ཐབས་སུ་མི་འགྲོ་བར་ལྷག་ཏུ་འབར་བའི་རྒྱུར་འགྱུར་བ་དང་མེ་ཐོག་ཏུ་ཆུ་བླུགས་པའམ་ས་ཡིས་མནན་ན་མེ་ཤི་བ་དང་མཚུངས་པས་རང་རང་གི་དགྲའམ་འཇོམས་བྱེད་ཀྱི་གཉེན་པོ་བསྟེན་དགོས་པས་འཁྲུལ་བ་ལྡོག་པ་ལ་འཁྲུལ་བའི་ལྡོག་ཟླ་མ་འཁྲུལ་བའི་ཐབས་ལམ་བསྟེན་དགོས་པའོ། །དེས་ན་རང་རེ་འཁྲུལ་ནས་སྡུག་བསྔལ་མྱངས་པར་འདུག་སྙམ་ནས་མ་འཁྲུལ་ཡང་དག་གི་ལམ་དང་། དེ་ཇི་ལྟར་བཙལ་བའི་ཚུལ་ཤེས་པར་བྱས་ནས་བསྟེན་དགོས་པའོ། །ང་ཕྱི་རྒྱལ་གྱི་ས་ཆ་ཁ་ཤས་སུ་སོང་བར་དགུན་ཁ་རུ་ནམ་སྐྱ་མདའ་གཏོང་ཙམ་ལས་ཉི་མ་འཆར་རྒྱུ་མི་འདུག་པས་ཉིན་ལྔ་དྲུག་རེར་བསྡད་པས་རྨུས་ནས་སྐྱིད་པོ་ཞིག་གཏན་ནས་མི་འདུག་ཅིང་། རང་རེས་ཀྱང་མཚན་ལ་མཆོད་མེ་སྒྲོན་པ་ལས་ལམ་མགོ་ཡང་མི་ཆོད་པས་ཉལ་དགོས་པས་མཚན་མོར་མུན་པར་འཐིབས་ནས་སྐྱིད་པོ་མེད་པ་ཡིན་ཡང་། ཉི་མ་ཤར་མ་ཐག་ཏུ་མཚན་མོའི་མུན་ནག་འཐིབས་པོ་རང་སངས་སུ་གྱུར་པ་དེ་བཞིན་སེམས་མ་འཁྲུལ་པའི་ཐོག་ཏུ་བཞག་པས་འཁྲུལ་བའི་གཉེན་པོ་ཐོབ་སྟོབས་ཀྱིས་འཁྲུལ་བ་གཞི་མེད་དུ་རང་ཞི་རང་སངས་ལ་འགྲོ་བའོ། །དེས་ན་རྩ་བ་འཁྲུལ་བའི་སེམས་དེ་འདུལ་མ་ཐུབ་ན། དར་ལྕེ་རླུང་གིས་བསྐྱོད་པ་ལྟར་དུ་ཁ་ཡ་མཆུ་མ་མཆུ་རླུང་གིས་བསྐྱོད་པའི་མ་ཎིའི་བཟླས་གྲངས་གསོག་རྒྱུའི་གྲངས་ཀ་རྐྱང་པ་རུ་རེ་བ་བྱས་ནས་སེམས་གཞན་དུ་གཡེངས་ནས་བཟླས་པས་ནི་གོ་ཆོད་པ་མིན་ནོ། །བཟླས་གྲངས་རྐྱང་པ་ལ་ཞེན་ནས་གཏམ་ཉོག་དང་བསྲེས་ནས་ཅུང་ཙམ་བཏོན་པ་དེ་དང་། གྲྭ་ཇོ་སེར་གྱིས་གཞན་གྱི་མིག་ཡོལ་ཙམ་ལས་དོན་གྱི་སྲུང་སྡོམ་གང་ཡང་སྲུང་མེད་པའི་ཕྱི་ཚུལ་ཙམ་འཆང་བ་དང་། གྲྭ་པ་ཇོ་མོ་དང་དགེ་བསྙེན་ཕོ་མོ་གང་ཡིན་ཡང་བསམ་པ་མ་དག་པའི་དུག་གིས་བསྐྱེད་པའི་སྲུང་སྡོམ་གཞན་ཀྱིས་བསྟོད་སྔགས་ཡོང་ཆེད་དང་། ལེགས་སྨོན་འཇིགས་སྐྱོབ་ཀྱི་ཆེད་དུ་བླངས་པ་དེ་ཐེག་ཆེན་ཐར་བ་ཆ་མཐུན་མ་དགོས་ཐེག་དམན་ཐར་བ་ཆ་མཐུན་ཙམ་དུའང་མི་འགྱུར་བས་འབྲས་བུ་ཐར་བ་མཆོག་གི་བཅུད་དུ་སྨིན་པར་དཀའོ། །དེས་ན་ཆོས་རྣམ་པར་དག་པ་ཞིག་སྒྲུབ་པ་ལ་སེམས་ཆོས་ཕྱོགས་སུ་འཁོར་བའི་ངང་ནས་སྒྲུབ་དགོས་ཀྱི། ཁ་ཡ་མཆུ་མ་མཆུ་དར་ལྕེ་རླུང་གིས་བསྐྱོད་པ་ལྟ་བུ་དང་། སྲུང་སྡོམ་དོན་གྱིས་མ་བསྲུངས་པར་ཕྱིའི་ཚུགས་ཀ་གཏོད་པ་ཙམ་གྱིས་ནི་ཅི་ཡང་མི་ཕན་ལ། ཐེག་ཆེན་ཐར་བ་ཆ་མཐུན་མ་ཟད་ཐེག་དམན་ཐར་བ་ཆ་མཐུན་ཙམ་དུའང་དཀའ་བས་འཁོར་བ་ལས་ཐར་བའི་རྒྱུ་ཙམ་དུ་ཡང་མི་འགྱུར་རོ། །སངས་རྒྱས་བཅོམ་ལྡན་འདས་ཀྱིས་གླང་པོ་ཆེ་དུ་མའི་ཁལ་རྒྱབ་དུ་ལོང་པའི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་དང་། བཀའ་འཁོར་ལོ་ཐོག་མཐའ་བར་གསུམ་བསྐོར་བ་དང་། སྤྲུལ་བ་སྣ་ཚོགས་པས་ཆོས་ལོངས་སྤྲུལ་གསུམ་གྱི་བསྟན་པ་ཚད་གཟུང་རིས་སུ་མེད་པ་ཤིན་ཏུ་མང་བ་གསུངས་པ་དེ་དག་རྩ་བའི་ཚིག་གཅིག་ཏུ་བསྡུས་ནས་བཤད་པ་ནི། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་པའི་རང་གི་སེམས་འདུལ་ཞེས་པའི་ཚིག་རྡོག་མ་གཉིས་རང་རེ་སུས་ཀྱང་གོ་སླ་བ་འདི་སྙིང་པོ་ཡིན་ཞིང་། འདི་སྙིང་པོ་ཡིན་པ་ནི་སངས་རྒྱས་ཉིད་ཀྱི་བཀའ་ཡིས་གསུངས་པས་ཨེ་ཡིན་སྙམ་པའི་ཐེ་ཚོམ་ཙམ་ཡང་མི་དགོས་པའོ། །རང་སེམས་མ་དུལ་བ་འདུལ་དགོས་ཀྱི། ཐུལ་ཟིན་ཚེ་ཡང་འདུལ་དགོས་པ་མིན་པ་སྟེ། རྟ་ཁ་ལོ་མ་ལོབས་པར་སྲབ་བསྐོན། སྒ་བསྟད་ནས་སློབ་དགོས་ཀྱང་། ཁ་ལོ་ལོབས་ཟིན་དུས་ཡང་བསླབ་དགོས་པ་མིན་པ་བཞིན་ནོ། །སངས་རྒྱས་བཅོམ་ལྡན་འདས་ཀྱི་ཞལ་ནས་གསུངས་པའི་ཆོས་ལ་ཆོས་ཀྱི་འཁོར་ལོ་ཞེས་བརྗོད་པ་ཅི་ཡི་ཕྱིར་ཞེ་ན། འཁོར་ལོ་རིན་པོ་ཆེ་བཞིན་དུ་འགྲོས་མགྱོགས་པས་འཕར་ཞིང་མྱུར་བ་བསྐྱོད་པ་དང་། ལྡོག་ཟླ་མ་དག་པ་གྲིས་གཅོད་པ་ལྟར་བྱེད་པའི་བྱེད་ལས་གཉིས་དང་ལྡན་པས་ཆོས་ཀྱི་འཁོར་ལོ་ཞེས་བྱ་སྟེ། གང་དུ་བསྐྱོད་ན་འཁོར་བ་ལས་ཐར་བ་མྱང་འདས་སུ་བསྐྱོད་ཅིང་། ས་ནས་ས་འཕར་ཞིང་འདྲེན་པར་བྱེད་ལ། གང་གཅོད་ན་འཁོར་བའི་འཁྲུལ་སྣང་རྒྱུན་གཅོད་པར་བྱེད་པའི་བྱེད་ལས་དང་ལྡན་པའོ། །དཔལ་སྤྲུལ་ཚང་གིས་ད་དུང་གོང་གི་ཚིག་བཞི་དེའི་རྗེས་སུ། དྲན་དང་ཤེས་བཞིན་སེམས་ཀྱི་ཁ་ལོ་པ། །བག་ཡོད་སེམས་ཀྱི་སྲུང་མ་དཔའ་བོ་སྟེ། །བྱང་ཆུབ་སེམས་མཆོག་སེམས་ཀྱི་ནོར་བུ་འདི། །ཤེས་ནས་སེམས་འདི་དབྱིག་དང་ལྡན་པར་མཛོད། །ཅེས་གསུངས་པ་ཏེ། དྲན་དང་ཤེས་བཞིན་སེམས་ཀྱི་ཁ་ལོ་པ་ལྟ་བུ་དང་། བག་ཡོད་པ་སེམས་ཀྱི་སྲུང་མ་དཔའ་བོ་ལྟ་བུ་སྟེ། དྲན་དང་ཤེས་བཞིན་བག་ཡོད་གསུམ་རྒྱུན་ལྡན་དུ་མེད་པའི་མིས་བྱ་བ་ཚོད་ཐོག་ཏུ་ཁེལ་བ་མི་འགྲུབ་ལ། བྱང་ཆུབ་ཀྱི་སེམས་མཆོག་སེམས་ཀྱི་ནོར་བུ་ལྟ་བུ་འདི་དག་ངོ་ཤེས་པར་བྱས་ནས། དྲན་དང་ཤེས་བཞིན་བག་ཡོད་བྱང་ཆུབ་སེམས་མཆོག་གི་དབྱིག་གམ་རིན་པོ་ཆེའི་ནོར་དང་ལྡན་པར་མཛོད་དང་འབྱོར་ཆེན་ཕྱུག་པོ་བྱ་བ་ནི་དེ་ཡིན་ཞེས་པའོ། །དེས་ན་དྲན་པ་ནི་མི་བརྗེད་པའི་དྲན་པ་སྟེ་ངས་འདི་བྱ་རུང་། འདི་བྱ་མི་རུང་སྙམ་ནས་བླང་དོར་གྱི་གནས་མི་བརྗེད་པ་དྲན་པའོ། །ཤེས་བཞིན་ནི་སེམས་གཞན་དུ་མི་གཡེང་བར་སྒོ་གསུམ་གྱི་བྱ་བ་ལ་སྐྱོན་ཡོན་རྟོག་པའོ། །དེ་ལྟ་བུའི་དྲན་ཤེས་གཉིས་ནི་སེམས་ཀྱི་ཁ་ལོ་པ་ལྟ་བུ་དང་། བག་ཡོད་པ་ནི་སེམས་ཀྱི་སྲུང་མ་དཔའ་བོ་ལྟ་བུ་སྟེ་ལུས་ངག་ཡིད་གསུམ་ཆོས་བཞིན་ལྷུར་ལེན་པར་བྱེད་ནས་ཉེས་སྤྱོད་ཆེན་པོའི་གཡང་སར་ལྟུང་བར་གཟོབ་པར་བྱེད་པ་སྟེ། དཔེར་ན་ཕྱོགས་ཕར་ཁ་ན་གཡང་རོང་འདུག་པས་སྨྱོ་རྒྱུག་མཆོང་རྒྱུག་མ་བྱེད་མ་གཏོགས་གཡང་དུ་ལྷུང་ཡོང་བྱ་མཁན་ལྟ་བུའོ། །བྱང་ཆུབ་ཀྱི་སེམས་རིན་པོ་ཆེ་ནི་ཡིད་བཞིན་གྱི་ནོར་བུ་ལྟ་བུ་གསོལ་བ་ཅི་བཏབ་འགྲུབ་བྱེད་ཡིན་ཞིང་། གོང་ནས་བཤད་པའི་རིན་པོ་ཆེའི་སྒོ་མང་ཕྱེས་ནས་ཨེ་ལོན་བྱ་རྒྱུ་ནི་བྱང་ཆུབ་ཀྱི་སེམས་འདི་ཡིན་པས་འདིའི་ཡིན་ཚུལ་ཤེས་པར་བྱས་ནས་སེམས་ཀྱི་དབྱིག་གམ་ནོར་བུ་རིན་ཐང་དང་ལྡན་པ་ལོངས་མཛོད་ཅེས་པའོ། །རང་རེའི་ད་ལྟའི་སྤྱི་ཚོགས་ཀྱི་རྒྱུ་ནོར་འགངས་ཆེན་སྐྱེལ་འདྲེན་བྱེད་པའི་རླངས་འཁོར་ཞིག་ལ་དཔེ་མཚོན་ན། གཏོང་མཁན་གྱི་ཁ་ལོ་པ་དང་། སྲུང་མཁན་གྱི་སྲུང་མ་དཔའ་བོ་མེད་ན། ནང་གི་རྒྱུ་ནོར་ཇི་ལྟར་འགངས་ཆེ་རུང་ས་ཐག་རིང་དུ་བསྐྱོད་པའི་ལམ་བར་ནས་ཇག་པས་འཕྲོག་ངེས་ཡིན་པ་ལྟར་དུ། དྲན་དང་ཤེས་བཞིན་ཁ་ལོ་པ་ལྟ་བུ་དང་། བག་ཡོད་པ་སྲུང་མ་དཔའ་བོ་ལྟ་བུ་འདི་མེད་ན་བྱང་ཆུབ་སེམས་མཆོག་ནོར་བུ་ལྟ་བུ་དེ་འཁྲུལ་བའི་སེམས་ཇག་རྐུན་ལྟ་བུ་དེས་འཁྲུངས་སུ་མི་འཇུག་གོ །དེས་ན་འཁྲུལ་བའི་སེམས་ཀྱི་ཇག་རྐུན་སྲུང་མཁན་གྱི་སྲུང་མ་དཔའ་བོ་བག་ཡོད་དང་། སེམས་ཡང་དག་པའི་ལམ་དུ་ཁ་ལོ་སྒྱུར་མཁན་གྱི་ཁ་ལོ་པ་དྲན་དང་ཤེས་བཞིན་གཉིས་དང་། བྱང་ཆུབ་ཀྱི་སེམས་མཆོག་ཡིད་བཞིན་ནོར་བུ་ལྟ་བུ་འདི་མེད་པས་མ་ཟད་བྱམས་སྙིང་རྗེའི་དྲི་མ་ཙམ་ཡང་མི་བྲོ་བར་མཆུ་འདབ་རླུང་གིས་བསྒུལ་ནས། ཁ་ཡ་མཆུ་མ་མཆུ་འཕགས་ནས་ཅི་ཙམ་བཏོན་ཀྱང་ཕན་ཐོགས་ཆུང་བས། དེ་ལྟ་བུའི་མི་ནི་རང་གིས་ཆོས་པ་ཡིན་བསམས་ཤིང་། གཞན་གྱིས་ཆོས་པ་རེད་ཅེས་རུང་། དོན་དུ་ཕྱི་ཚུལ་ཆོས་པའི་ཚུགས་ཀ་ཅན་གྱི་ཆོས་པ་ཁོག་སྟོང་དང་། ལེགས་སྨོན་དུག་གིས་སྦགས་པའི་བསམ་པ་མ་དག་པའི་བཙུན་པའི་ཆས་ཅན་དང་། འདུལ་འཛིན་རྫུན་མ་དང་། གྲྭ་པ་གྲྭ་རྫུན་ཡིན་ཞིང་། འཁྲུལ་འཛིན་བདག་རྟོག་དང་རང་གཅེས་འཛིན་ནང་ནས་མ་ཆོད་པའི་སྒོམ་ཆེན་གྱི་མིང་འཛིན་རྣམས་ཀྱང་། སྒོམ་ཆེན་བཏགས་པ་བ། མིང་གི་ཨོ་ཟོབ་འཛིན་པ། དོན་ལ་སྙིང་པོ་མེད་པའི་དོན་སྟོང་། ནང་སྟོང་པ་ཕྱི་བརྗིད་ཉམས་ཅན། གནའ་སྔོན་མར་མགོན་ཁང་ནང་དུ་གཡག་གི་གསོབ་དང་། སེང་གེའི་གསོབ། སྟག་གཟིག་གི་གསོབ་མང་པོ་ནང་དུ་རྩྭ་བརྫངས་ནས་བཏགས་ཡོད་པ་དེ་བཞིན་དུ་གསོག་གསོབ་རྫུན་པ་བསླུ་བའི་ཆོས་ཅན་ཡིན་པར་བཅོམ་ལྡན་འདས་ཀྱིས་མདོ་མང་པོའི་ནང་ནས་གསུངས་པས། ལྟར་སྣང་མི་མགོ་བསྐོར་ན་བསྐོར་ཆུང་ཡིན་རུང་། དོན་དུ་མི་མགོ་བསྐོར་ས་ནས་རང་མགོ་བསྐོར་བ་ནི་བསྐོར་ཆེན་ཡིན་པ་སྟེ། མི་མགོ་བསྐོར་ན་བསྐོར་ཆུང་ཡིན། །རང་མགོ་བསྐོར་ན་བསྐོར་ཆེན་ཡིན། །ཞེས་པ་ལྟ་བུའོ། །དེ་ལྟར་ཡིན་པ་དེས་ན་ད་ནི་ཆོས་ཡང་དག་པ་ཞིག་སྒྲུབ་དགོས་བསམ་ནས། རང་རྒྱུད་ཉམས་ལེན་ལ་སྦྱར། ཤེས་ཚད་ལག་ལེན་ལ་འདེབས་པ་ནི་གལ་ཆེན་མང་པོའི་ནང་གི་དོན་ཆེན་གཅིག་པུ་ཡིན་གྱི། ཤེས་ནས་ལག་ལེན་ལ་མ་བཏབས་ན་ཅི་ཡང་མི་ཕན་ཏེ། སྨན་སྒྲོ་མང་པོ་བརྩིགས་ཡོད་ཀྱང་མ་འཐུང་ན་ནད་ལ་མི་ཕན་པ་ལྟ་བུའོ། །རང་རེའི་དུས་རྒྱུན་གྱི་འཚོ་བ་སྤྱོད་ལམ་ལ་འདང་བརྒྱབ་ན། མི་སུ་ཡིན་ཡང་རང་ཉིད་ཀྱི་གོས་གོན་རྒྱུ་དང་། ཁ་ཟ་རྒྱུ་ཅི་ཞིག་ཡིན་རུང་རང་གི་སྤྱོད་ཆས་དེ་སྤུས་དག་མ་དང་། དངོས་གཙང་མ་དང་། མིག་ལ་མཛའ་བ་ཞིག་ཨེ་ལོན་བསམ་ཀྱང་། ཆོས་རྣམ་དག་ཅིག་ཨེ་འགྲུབ་དང་སྒྲུབ་ཚུལ་ཨེ་ཤེས་མི་ལྟ་བ་ནི། གནད་མ་ཤེས་ཧ་མ་གོ་བར་ཧོན་ཅུང་ཟད་ལོག་སོང་བའི་རྟགས་སོ། །མདོར་ན་ཆོས་ནི་ཡང་དག་པའི་རྣམ་དཔྱོད་ཀྱི་ལམ་ནས་ཐོབ་པའི་ཚད་མཐོའི་རང་བཞིན་ཅན་གྱི་སྲོག་ལྡན་ཐམས་ཅད་ལ་ཕན་བདེ་སྐྲུན་སྤྱད་ཀྱི་ཐབས་ལམ་ཉག་གཅིག་དང་ཤེས་ཡོན་ཡིན་ལ། ཤེས་ཡོན་གྱི་རིགས་རྣམས་སྦྱངས་ནས་ཤེས་རྗེས་སུ་བེད་སྤྱོད་གཏང་བ་ལྟར་དུ། ཆོས་སྒྲུབ་དུས་སུའང་དད་པ་བཞག་པ་རྐྱང་བས་གོ་མི་ཆོད་པས་ནང་དོན་ཤེས་ནས་བེད་སྤྱོད་གཏོང་བ་དང་། མ་མཐའ་ཡང་དད་པ་བྱ་སའི་ཡུལ་དང་། དད་པའི་ངོ་བོ་གང་ཡིན་དང་། ཇི་ལྟར་དད་པ་བྱེད་དགོས་པའི་ཚུལ་ཙམ་ནི་ཤེས་དགོས་པའོ། །དད་པ་ཡང་མི་དགོས་པ་མིན་པར་མ་ཡོད་ཐབས་མེད་ཡིན་པ་སྟེ། སངས་རྒྱས་བཅོམ་ལྡན་འདས་ཀྱིས། ཀུན་དགའ་བོ་དོན་དམ་པ་ནི་དད་པས་རྟོགས་པར་བྱའོ། །ཞེས་གསུངས། འོན་ཀྱང་དོན་དམ་པ་རྟོགས་པའི་དད་པ་ནི་ཐོས་བསམ་སྦྱོང་བ་ལ་བརྟེན་ནས་རྒྱུ་མཚན་ཤེས་པའི་དབང་རྣོན་ཆོས་ཀྱི་རྗེས་འབྲང་གི་དད་པ་ཡིན་གྱི། རྨོངས་དད་ལ་གསུངས་པ་མིན་ནོ། །དེས་ན་རྒྱུ་མཚན་ཅི་ཡང་མི་ཤེས་པར་ཐུགས་རྗེ་མ་ཆུང་ཞེས་དད་པ་བྱེད་པ་དེ་དང་། རྒྱུ་མཚན་ཅི་ཡང་མི་ཤེས་པར་དད་པ་བྱ་བ་ལ་སྙིང་པོ་མེད་པའི་བདེན་འཛིན་བྱེད་པ་གཉིས་ཀ་རྨོངས་དད་ཡིན་པའོ། །ཐོས་བསམ་བསྟེན་པ་ནི་གྲྭ་པ་བླ་མའི་ལས་ཀ་ཡིན་གྱི། མི་སྐྱ་ཕོ་མོའི་ལས་ཀ་མིན་བསམ་པ་ནི་ནོར་འཁྲུལ་ཆེས་མང་བའི་ཁུངས་ཡིན་ལ། སངས་རྒྱས་ཀྱི་བསྟན་པ་ཉམས་པའི་གཞི་རྩ་ཡང་ཡིན། བུད་མེད་ཀྱིས་སྐྱིལ་ཀྲུང་བཅས་ན་ས་གས་འགྲོ་ཞེས་པ་སུས་བཤད་པར་མི་ཤེས་ཀྱང་དེ་ནི་བདུད་ཀྱི་གསང་ཚིག་ངོ་མ་སྟེ། ཆོས་ཕོ་མོ་སུས་ཀྱང་སྒྲུབ་ཆོག་ཅིང་། ཕོ་མོ་སུ་ཡིན་རུང་སངས་རྒྱས་ཐོབ་རྒྱུ་དང་། གཞི་རྒྱུད་བདེ་གཤེགས་སྙིང་པོ་ཡོད་ལ། ཐ་ན་སྲིན་འབུ་པདྨ་ཡན་ཆོད་ལ་ཏིལ་ལ་མར་གྱིས་ཁྱབ་པ་བཞིན་དུ་བདེ་གཤེགས་སྙིང་པོས་མ་ཁྱབ་པ་མེད་པར་ཡོད་པས་སོ། །ཁྱད་པར་དུ་ད་ལྟའི་དུས་རབས་གསར་བའི་སྤྱི་ཚོགས་ཀྱི་འཕེལ་འགྱུར་མྱུར་ཚད་མཐོ་ཞིང་། མིག་འཕྲུལ་ལས་ཀྱང་མྱུར་པའི་འཇིག་རྟེན་གྱི་རྒུད་པ་བདོ་མགྱོགས་པའི་སྐབས་སུ། དེའི་ཚོད་དང་བསྟུན་པའི་ཆོས་རིག་གཞུང་གི་ཤེས་ཡོན་ཆོས་བཤད་མཁན་ཉན་མཁན་ཚང་མའི་རྒྱུད་ལ་ཡོད་དགོས་པ་ཡིན་གྱི་མ་གཏོགས། དཔེ་ཆའི་སྟེང་གི་ཡིག་འབྲུ་སྐམ་པོའི་བཤད་པ་ཚད་མཐོ་ཡང་། དེ་སྒྲུབ་པའི་མིའི་བསམ་སྤྱོད་ཆེས་དམན་པར་གྱུར་ན་ཆོས་བསྒྲུབས་ནས་རང་གཞན་གྱི་དོན་མི་འགྲུབ་པར་མ་ཟད་ཡ་རབས་ཀྱི་མིག་ལྟོས་ཙམ་དུ་ཡང་མི་འགྱུར་བར་ཆོས་ཁྱེད་ཅག་གིས་བསྒྲུབས་པ་བྱས་མོད་ཀྱང་ཁྱེད་ཅག་ལ་བཟང་དགེ་ཅི་ཡང་མི་འདུག་ཅེས་གཞན་གྱིས་སྨད་ར་གཏོང་བའི་རྒྱུ་རུ་འགྲོ་བའོ། །བླ་མ་སེར་མོ་བ་མ་གཏོགས་ཁྱིམ་པ་ཕོ་མོ་ལ་ཆོས་ཀྱི་གོ་རྟོགས་མི་དགོས་པའི་འདང་རྒྱག་ནི་ནང་བའི་བསྟན་པ་དང་འགལ་བ་སྟེ། ཤཱཀྱའི་བསྟན་པ་ལ་རིགས་མི་གཙོ། རུས་མི་གཙོ་གསུངས་ནས། འབྲེག་མཁན་ལས་རབ་ཏུ་བྱུང་བའི་ཉེ་བ་འཁོར་གྱི་རྐང་པ་ལ་ཤཱཀྱའི་རྒྱལ་པོ་བཟང་ལྡན་གྱིས་ཕྱག་འཚལ་བ་ལྟ་བུའོ། །ཆོས་འདི་ལས་ཕྱི་རོལ་དུ་གྱུར་པ་ཁ་ཤས་ཀྱིས་ཆོས་བཤད་པའི་ཐོབ་ཐང་ཡོད་མེད་ལ་སོགས་པ་རིགས་རུས་དང་། ཕོ་མོའི་དབྱེ་འབྱེད་བྱེད་པ་མང་བ་ཡིན་པས། དེ་དག་གི་ཤན་ཞུགས་ངན་པ་རང་རེ་ལ་ཐེབས་ནས། སྒེར་དོན་སྲུང་པའི་སྲིད་དོན་པ་ཐ་ཤལ་འགའ་རེས། དེ་དང་ཆ་འདྲ་བའི་བྱེད་སྟངས་ཀྱིས་བསླད་བཙུད་པའི་ངན་སྲོལ་རྒྱུན་འབྱམས་དུ་སོང་བའོ། །དེས་ན་ཆོས་ནི་གླིང་བཞི་བསྐོར་པའི་ནམ་མཁའི་ཉི་མ་ལྟ་བུ་ཡིན་པས། གཅིག་ལ་དབང་བ་དང་། གཅིག་ལ་མི་དབང་བ་མེད་པར་སེམས་ཅན་ཐམས་ཅད་ཀྱི་དོན་སྒྲུབ་རྒྱུ་དེ་སངས་རྒྱས་ཀྱི་མཛད་པའོ། །གྲྭ་པ་བླ་མས་ཐར་བ་དོན་གཉེར་དགོས་ཀྱི། མི་སྐྱ་ཕོ་མོས་མི་དགོས་ཞེས་ཁས་མ་བཤད་རུང་། ལག་ལེན་གྱི་ཐོག་ནས་མི་སྐྱ་ཕོ་མོས་ཐར་བ་ཐོབ་ཐབས་མ་བྱས་དུས། སེམས་ཅན་ཐམས་ཅད་ཀྱི་ནང་དུ་མི་སྐྱ་ཕོ་མོ་མ་ཚང་བས་མ་ཟད་མིའི་གྲངས་ཚད་མང་ཆེ་བ་མི་སྐྱ་ཕོ་མོས་ཟིན་ཡོད་པས་མི་མང་ཆེ་བ་ལ་ཐར་བ་ཐོབ་ཐབས་མ་བྱས་པའོ། །མདོར་ན་དམ་པའི་ཆོས་འདི་མི་ཉུང་ངུ་ཙམ་གྱི་ཁེ་ཕན་སྒྲུབ་བྱེད་དུ་གྱུར་ཚེ་སངས་རྒྱས་ཀྱི་མཛད་པ་མ་འགྲུབ་པ་ཡིན་ལ། རང་རེའི་གནས་ཚུལ་དང་བསྟུན་ནའང་དབང་ཞུ་ཞེས་ཚང་མས་སྒོ་བསྒྲོགས་ནས་གཤར་བ་ཡིན་ཡང་། དེ་རིང་ཆོས་བཤད་པ་ཡིན་ཞེས་དུས་གོ་རྒྱུ་མ་རེད་བསྐྱུར་ཞོག་ཟེར་བ་ནི་མི་ཉན་ཏེ། དབང་ཞུ་རྒྱུ་གནད་ཆེ་བ་ཡིན་ཡང་། དང་པོ་ཆོས་ཐོས་བསམ་གྱིས་འཆད་ཉན་བྱ་བ་ལ་ཞུགས་རྒྱུ་དེ་བས་ཀྱང་གལ་ཆེ་བའོ། །དབང་ཐོབ་རྒྱུ་གསང་སྔགས་ལམ་གྱི་འཇུག་སྒོ་ཡིན་ཡང་། ཆུ་ཐིགས་པ་གཅིག་བཏུངས་ནས་འདུར་སོང་བ་ཙམ་གྱིས་ནི་དབང་ཐོབ་པ་མིན་པས་དབང་གི་ཚིག་དོན་གོ་ནས་བསྐུར་ཐབས་ལྟར་བྱ་དགོས་པ་སྟེ། རང་རྒྱུད་དུ་བདེ་གཤེགས་སྙིང་པོའི་ས་བོན་སྨིན་རུང་གི་ནུས་པ་ཡེ་ལྡན་དུ་ཡོད་པ་དེ་ཉིད། བླ་མ་རྡོ་རྗེའི་སློབ་དཔོན་ལྟ་དགོངས་ཏིང་འཛིན་དང་ལྡན་པས། དབང་རྫས་ཀྱི་ཡོ་བྱད་དང་། སྔགས་དང་ཏིང་འཛིན་གྱི་བྱེད་པ་ལ་བརྟེན་ནས་ཆང་གི་ནང་དུ་ཕབས་བཏབ་པ་བཞིན་དུ་དེ་ཡར་སྨིན་པར་བྱེད་པ་ནི་དབང་བསྐུར་བའི་དགོས་པ་ཡིན་ཞིང་། ཁྱད་པར་དུ་དབང་སྲོག་རྒྱུད་ལ་འཛིན་པ་ནི་དམ་ཚིག་ཡིན་ཡང་། དམ་ཚིག་གི་རྣམ་བཞག་ཙམ་དང་། སྲུང་བྱ་ཅི་ཡིན་ཙམ་ཡང་མ་ཤེས། ཆོ་གའི་ཡན་ལག་ཙམ་ཡང་མ་རྫོགས། དམིགས་པ་མ་དགོས་ཚིག་ཙམ་ཡང་མ་ཉན་ནས་མ་གོ་ཚེ་དབང་ཡང་དག་མི་ཐོབ་པའོ། །དབང་ཞུ་བ་ནི་ལུག་ཚེ་ཐར་བྱས་པ་བཞིན་དུ་རྩིས་གྲངས་བླངས་པ་ལྟ་བུས་མི་ཆོག་པས། ཆོས་ཀྱི་ཚིག་དོན་རེ་རེ་བཞིན་དུ་ཉན་ནས་ཞེ་ལ་བཞག་རྒྱུ་ནི་དང་པོ་ཆོས་སྒོར་ཞུགས་པའི་རང་རྒྱུད་ཆོས་ཀྱིས་སྨིན་པའི་རྟེན་འབྲེལ་གྱི་སྒོ་དང་པོ་ཡིན་པས། དེ་ལྟར་གཟབ་པར་བྱ་རྒྱུ་མ་འཕྱུག་ཅེས་གཙོ་བོར་ཁྱིམ་པ་ཕོ་མོ་རྣམས་ལ་དྲན་བསྐུལ་དང་བཅས་ཏེ། སྐབས་སུ་བབ་པ་གང་ཞིག་འཆད་པར་བྱ་བའི་ཆོས་ནི་རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོའི་གསུང་། ཐོག་མཐའ་བར་དགེའི་གཏམ་ལྟ་སྒོམ་སྤྱོད་གསུམ་ཉམས་ལེན་དམ་པའི་སྙིང་ནོར་ཞེས་བྱ་བ་འདི་ཉིད་ལ། ཀླད་ཀྱི་དོན་དང་། གཞུང་གི་དོན། མཇུག་གི་དོན་དང་གསུམ་ལས་དང་པོ་སོང་ནས། གཉིས་པ་གཞུང་དོན་ལས་ཀྱང་ཐོག་མར་དགེ་བ་སྙིགས་མའི་སྤྱོད་ལ་སྐྱོ་བའི་གཏམ་བཤད་པ་སོང་། བར་དུ་དགེ་བ་ལྟ་སྒོམ་སྤྱོད་གསུམ་གཏན་ལ་འབེབས་པའི་གཏམ་ལས། རྣལ་འབྱོར་བཞིའི་རིམ་པ་ལ་བརྟེན་ནས་སྤྲོས་བཅས་ཀྱི་རྩོལ་བ་གཞིག་པའི་སྐབས་ལས། རྩེ་གཅིག་ཉམས་ཀྱི་ངང་ནས་ཡིག་དྲུག་བགྲང་བའི་ཚུལ་བསྟན་པ་སོང་ནས། གཉིས་པ་སྤྲོས་བྲལ་ལྟ་བའི་ངང་ནས་ཡིག་དྲུག་སྒྲོང་བའི་ཚུལ་བསྟན་པ། གཉིས་པ་སྤྲོས་བྲལ་ལྟ་བའི་ངང་ནས་ཡིག་དྲུག་སྒྲོང་བའི་ཚུལ་བསྟན་པ་ནི། ཀུན་རྫོབ་བརྟགས་ནས་དོན་དམ་གཏན་ལ་ཕོབ།། དོན་དམ་ངང་ནས་ཀུན་རྫོབ་འཆར་ཚུལ་ལྟོས།། བདེན་གཉིས་དབྱེར་མེད་བློ་བྲལ་གཉུག་མའི་གཤིས།། སྤྲོས་བྲལ་ལྟ་བའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། གཞི་དབུ་མ་བདེན་གཉིས་ཟུང་འཇུག་དང་། ལམ་དབུ་མ་ཚོགས་གཉིས་སམ་ཐབས་ཤེས་ཟུང་འཇུག་དང་། འབྲས་བུ་དབུ་མ་སྐུ་གཉིས་ཟུང་འཇུག་ཡིན་པས། ཀུན་རྫོབ་ཏུ་ཇི་ལྟར་སྣང་བའི་ཆོས་ཐམས་ཅད་དོན་ལ་མ་གྲུབ་ཅིང་། ཇི་ལྟར་མ་གྲུབ་པའི་ཚུལ་ཡང་འཕགས་པ་ལྷས། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཀྱང་མིན་པས། །མཐའ་བཞི་ལས་གྲོལ་དབུ་མ་པ། །མཁས་པ་རྣམས་ཀྱི་དེ་ཁོ་ནའོ། །ཞེས་གསུངས་པ་ལྟར་དུ། རིགས་པའི་རྒྱལ་པོ་རྟེན་འབྲེལ་ཆེན་པོའི་གཏན་ཚིགས་ཀྱིས་བརྟགས་ན་དོན་དམ་པའི་གནས་ལུགས་གཏན་ལ་དབབ་ཐུབ་པ་སྟེ། འདི་ལྟར་སྣང་བའི་ཆོས་ཐམས་ཅད་རྟེན་ཅིང་འབྲེལ་འབྱུང་གི་བདག་ཉིད་ཅན་དང་། རྟེན་འབྱུང་གི་ངོ་བོ་སྟོང་པ་དང་། སྟོང་པའི་ངོ་བོ་སྤྲོས་པའི་མཐའ་ཐམས་ཅད་དང་བྲལ་བ་དབུས་ཡང་མི་དམིགས་པ་གང་ཡིན་པ་དེ་ལ་བརྗོད་བདེའི་ཆ་ནས་དབུ་མ་ཞེས་པའི་མིང་བཏགས་པའོ། །དེ་ལྟར་ཀུན་རྫོབ་ཀྱི་སྣང་ཚུལ་ལ་བརྟགས་ནས་དོན་དམ་སྤྲོས་བྲལ་གྱི་བཞུགས་ཚུལ་གཏན་ལ་ཕོབ་ཅིག དོན་དམ་སྐྱེ་བ་མེད་པའི་ངང་ནས་སྐྱེ་མེད་སྐྱེ་བའི་ཆོ་འཁྲུལ་ཀུན་རྫོབ་སྒྱུ་མ་ལྟ་བུའི་འཆར་ཚུལ་ལ་ལྟོས་དང་། རྣམ་པ་སོ་སོར་སྣང་བའི་ཀུན་རྫོབ་བདེན་པ་དང་། དོན་དམ་པའི་བདེན་པ་གཉིས་ཀ་དོན་ལ་དབྱེར་མེད་ཆོས་ཉིད་ངོ་བོ་ཀ་ནས་དག་པ་བློ་བྲལ་གདོད་མའི་གནས་ལུགས་སྤྲོས་བྲལ་ལྟ་བའི་རང་གནད་དུ་ཤེས་པའི་བདེན་གཉིས་དབྱེར་མེད་སྤྲོས་བྲལ་སྨྲ་བསམ་བརྗོད་འདས་ཆེན་པོའི་ལྟ་བའི་ངང་མ་ཤོར་བར་ཡིག་དྲུག་སྒྲོངས། ཞེས་གསུངས་པའོ། །ཁྱིམ་པ་ཕོ་མོའི་ཉམས་སུ་རན་པར་མི་འདུག་པས་ དེ་རིང་རང་རེས་སྤྲོས་བཤད་དེ་ཙམ་བྱེད་མི་ཉན་ཞིང་། ཁྱད་པར་གཞི་དབུ་མ་ཆེན་པོ། ལམ་ཕྱག་རྒྱ་ཆེན་པོ། འབྲས་བུ་རྫོགས་པ་ཆེན་པོ་སྟེ་ཆེན་པོ་གསུམ་གྱིས་ལྟ་སྒོམ་སྤྱོད་པ་དང་འབྲེལ་ནས་གསུང་བའི་སྐབས་སུ་ཁེལ་འདུག་པ་འདི་ཞིབ་ཅིང་ཕྲ་བར་འགྲེལ་བའི་སྐབས་ཀྱང་མིན་ལ། མང་པོ་བཤད་ན་ཁྱིམ་པ་ཕོ་མོ་མགོ་ཉོག་སྤྱད་ཡིན་པ་དེས་ན་དད་པས་མོས་པའི་ཡུལ་དུ་བྱས་ཏེ་བྱིན་རླབས་འཇུག་པའི་དགོས་ཆེད་དུ་ཆོས་ཟབ་མོའི་འབྲེལ་བ་ཐོགས་པར་བྱས་ནས་བཏོན་ན་ཆོག་འདུག་སྙམ། དེ་ལྟར་དབུ་མ་ཐལ་འགྱུར་བའི་ལྟ་བ་དང་སྒོ་བསྟུན་ནས་བཤད་པ་སོང་ནས། གསུམ་པ་རོ་གཅིག་རྟོགས་པའི་ངང་ནས་ཡིག་དྲུག་སྒྲོང་བའི་ཚུལ་བསྟན་པ། གསུམ་པ་རོ་གཅིག་རྟོགས་པའི་ངང་ནས་ཡིག་དྲུག་སྒྲོང་བའི་ཚུལ་བསྟན་པ་ནི། སྣང་བའི་སྟེང་དུ་སེམས་ཀྱི་ཞེན་པ་ཆོད།། སེམས་ཀྱི་སྟེང་དུ་སྣང་བའི་རྫུན་ཕུག་རྡིབ།། སྣང་སེམས་གཉིས་མེད་རྒྱ་གྲོལ་ཕྱལ་བ་ཆེ།། རོ་གཅིག་རྟོགས་པའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ཕྱི་སྣང་བ་སྣང་ཡུལ་གྱི་སྟེང་གི་གཟུང་འཛིན་ཚོགས་དྲུག་ཏུ་སྣང་པའི་སྣང་བ་དེ་ཇི་ལྟར་སྣང་བ་དེ་ལྟར་དོན་ལ་མ་གྲུབ་པས་ཞེན་སྣང་སེམས་ཀྱི་ཞེན་པ་ཆོད། ནང་སྣང་མཁན་སེམས་ཀྱི་སྟེང་དུ་མེད་སྣང་བློ་ཡིས་ཡོད་པར་བཟོས་པའི་སྣང་བའི་རྫུན་རིས་ཀྱི་ཕུག་རྡིབ་ཏུ་ཆུག སྣང་སེམས་གཉིས་མེད་ཀྱི་རིག་པ་རྒྱ་ཡན་རང་གྲོལ་རང་བབ་མི་མཉམ་པ་མེད་པའི་མཉམ་ཉིད་ཕྱལ་བ་ཆེན་པོ་འཁོར་འདས་གཉིས་མེད་སྲིད་ཞི་རོ་གཅིག་ཏུ་རྟོགས་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ། །ཕྱག་ཆེན་དང་སྒོ་བསྟུན་ནས་བཤད་པ་སོང་ནས། བཞི་པ་བསྒོམ་མེད་ཆོས་སྐུར་རྟོགས་པའི་ངང་ནས་ཡིག་དྲུག་སྒྲོང་བའི་ཚུལ་བསྟན་པ། བཞི་པ་བསྒོམ་མེད་ཆོས་སྐུར་རྟོགས་པའི་ངང་ནས་ཡིག་དྲུག་སྒྲོང་བའི་ཚུལ་བསྟན་པ་ནི། སེམས་ཀྱི་རང་བཞིན་རིག་སྟོང་གཉུག་མར་གྲོལ།། རིག་པའི་རང་རྩལ་སེམས་རྟོག་རང་སར་དག། སེམས་རིག་གཉིས་མེད་ཐིག་ལེ་གཅིག་གི་ངང་།། བསྒོམ་མེད་ཆོས་སྐུའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། འདི་དག་ནི་ཟབ་དོན་ཉམས་རྟོགས་ཅན་གྱི་རྣལ་འབྱོར་པའི་སྤྱོད་ཡུལ་ཡིན་པ་ལས། རང་བཞིན་གྱི་ཆོས་པ་ཕལ་གྱིས་གོ་རྒྱུ་དང་། ཡོངས་གྲགས་སུ་བཤད་རྒྱུ་མིན་ནའང་། གཞུང་ཕྱི་མོའི་དབུ་མ་དེ་ཐལ་རང་གང་དུ་ཡང་བཀྲལ་ཆོག་པ་ལྟར་དུ། ཕྱག་རྫོགས་ཀྱི་ཆོས་སྐད་མཐོན་པོ་རྣམས་ཀྱང་སྨོན་པའི་ཡུལ་དུ་བྱས་ན། སྨོན་ལམ་རྣམ་ལྔ་བཏོན་པ་ལྟར་དུ་ཐུན་མོང་གི་སྨོན་པའི་སྤྱོད་ཡུལ་དུ་མ་གྱུར་པ་མིན་པས། ཐུན་མོང་གི་སྨོན་པའི་རྗེས་འགྲོའི་དད་པའི་ཡུལ་ཙམ་དུ་བཀྲལ་ན། འདི་ལྟར་སྣང་བའི་འཁྲུལ་རྟོག་སྣ་ཚོགས་སུ་ཤར་པའི་ཆོས་ཅན་སེམས་ཀྱི་ཆོས་ཉིད་དམ་རང་བཞིན་གྱི་གནས་ལུགས་ནི། རིག་སྟོང་གཉུག་མའི་ཡེ་ཤེས་གདོད་ནས་ཡེ་གྲོལ་མ་བཅིངས་འཆིང་མེད་སུས་ཀྱང་བཀྲོལ་བ་མེད་པའི་རང་གཤིས་སུ་གནས་པ་གང་ལས། སྟོང་དང་རྟེན་འབྱུང་བསླུ་མེད་གཤིས་ཀྱི་གནས་ལུགས་ཡིན་པ་བཞིན་དུ་རིག་པའི་རང་རྩལ་སེམས་རྟོག་འདྲ་དང་མི་འདྲ་གང་ཤར་ཡང་། ཅི་ཤར་ཆོས་ཉིད་ཀྱི་རྩལ་དང་རོལ་བ་ཡིན་པས་སེམས་རྟོག་ཀྱང་རང་སར་རང་སར་དག་པ་མ་གཏོགས་མ་དག་པ་ཞིག་ཡོད་པའི་གནས་མེད་པས། སྟོང་དང་རྟེན་འབྱུང་དབྱེར་མེད་ཡིན་པ་བཞིན་དུ་སེམས་རིག་གི་ངོ་བོ་དང་རང་རྩལ་ལ་དོན་དུ་ཐ་དད་མེད་པ་གཉིས་སུ་དབྱེ་མི་རུང་བ་གོང་བུ་གཅིག་ལས་མི་གཡོ་པའི་གཉིས་མེད་ཆོས་དབྱིངས་ཐིག་ལེ་ཉག་གཅིག་གི་ངང་ལས་མ་འདས་པར་ཡིག་དྲུག་སྒྲོངས། ཞེས་གསུངས་པའོ། །དེ་ནི་རྫོགས་ཆེན་དང་མཐུན་པར་བཤད་པའོ།། བཞི་པ་ཚོགས་དྲུག་རང་སར་གྲོལ་བའི་མན་ངག་བསྟན་པ། བཞི་པ་ཚོགས་དྲུག་རང་སར་གྲོལ་བའི་མན་ངག་བསྟན་པ་ལ་དྲུག་ལས། དང་པོ་མཐོང་སྣང་རང་གྲོལ་གྱི་ངང་ནས་ཡིག་དྲུག་སྒྲོང་བའི་ཚུལ་བསྟན་པ། དང་པོ་མཐོང་སྣང་རང་གྲོལ་གྱི་ངང་ནས་ཡིག་དྲུག་སྒྲོང་བའི་ཚུལ་བསྟན་པ་ནི། གཟུགས་སྣང་ལྷ་རུ་ཤེས་ན་བསྐྱེད་རིམ་གནད།། མཛེས་དང་མི་མཛེས་སྣང་ཞེན་རང་སར་གྲོལ།། ཞེན་མེད་སེམས་ཀྱི་སྣང་ཆ་འཕགས་པའི་སྐུ།། མཐོང་སྣང་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། གཟུགས་སུ་སྣང་བའི་དངོས་པོ་ཐམས་ཅད་ལྷ་རུ་ཤེས་ན། གསལ་བརྟན་གྱི་ཚད་བརྒྱད་ལ་སོགས་པ་བསྐྱེད་རིམ་བསྒོམ་པའི་གནད་ཡིན་པས། མཛེས་དང་མི་མཛེས་ཡིད་དུ་འོང་མི་འོང་གི་གཉིས་འཛིན་གྱི་སྣང་བ་དང་ཞེན་འཛིན་ཐམས་ཅད་རང་སར་གྲོལ་ཏེ། ཞེན་མེད་འཛིན་པ་དང་བྲལ་བའི་སེམས་ཀྱི་སྣང་ཆ་འཕགས་མཆོག་ཐུགས་རྗེ་ཆེན་པོའི་སྐུ་རུ་ཤར་ནས། སྣང་བ་སྐུ་ཡི་འཁྱེར་སོ་དང་མ་བྲལ་བར་མཐོང་སྣང་རང་སར་གྲོལ་བའི་ངང་ནས་ཡིག་དྲུག་སྒྲོངས། ཞེས་གསུངས་པའོ།། གཉིས་པ་ཐོས་སྣང་རང་གྲོལ་གྱི་ནང་ནས་ཡིག་དྲུག་སྒྲོང་བའི་ཚུལ་བསྟན་པ། གཉིས་པ་ཐོས་སྣང་རང་གྲོལ་གྱི་ནང་ནས་ཡིག་དྲུག་སྒྲོང་བའི་ཚུལ་བསྟན་པ་ནི། སྒྲ་སྣང་སྔགས་སུ་ཤེས་ན་བཟླས་བརྗོད་གནད།། སྙན་དང་མི་སྙན་སྣང་ཞེན་རང་སར་གྲོལ།། ཞེན་མེད་འཁོར་འདས་རང་སྒྲ་ཡིག་དྲུག་གསུང་།། ཐོས་སྣང་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། འདི་ལྟར་རྣ་བས་ཐོས་པར་བྱ་བའི་ཡུལ་དུ་གྱུར་པའི་སྒྲ་རུ་སྣང་བ་ཐམས་ཅད་གྲག་སྟོང་སྔགས་སུ་ཤེས་ན། ངག་སྔགས་ཀྱི་འཁྱེར་སོ་བཟླས་པ་སྔགས་དང་། བརྗོད་པ་ཚིག་ཐམས་ཅད་ཀྱི་གནད་མཆོག་ཏུ་གྱུར་པ་ཡིན་པས་ན། སྒྲ་ཐོས་པ་སྙན་དང་མི་སྙན་བཟང་ངན་དུ་བཏགས་པའི་བློ་རྟོག་འཁྲུལ་སྣང་གི་ཞེན་པ་འཛིན་མེད་རང་སར་གྲོལ་ནས། ཞེན་པ་མེད་པའི་ངང་ནས་འཁོར་འདས་ཀྱི་རང་སྒྲ་གང་དང་གང་ཐོས་པ་ཐམས་ཅད་ཡི་གེ་དྲུག་པའི་གསུང་མཆོག་ལས་གཞན་དུ་མ་དམིགས་པའི་ཐོས་སྣང་རང་སར་གྲོལ་བའི་ངང་ནས་ཡིག་དྲུག་སྒྲོངས། ཞེས་གསུངས་པའོ།། གསུམ་པ་དྲི་སྣང་རང་གྲོལ་གྱི་ངང་ནས་ཡིག་དྲུག་སྒྲོང་བའི་ཚུལ་བསྟན་པ། གསུམ་པ་དྲི་སྣང་རང་གྲོལ་གྱི་ངང་ནས་ཡིག་དྲུག་སྒྲོང་བའི་ཚུལ་བསྟན་པ་ནི། དྲི་སྣང་སྐྱེ་མེད་ཤེས་ན་རྫོགས་རིམ་གནད།། ཞིམ་དང་མི་ཞིམ་ཞེན་སྣང་རང་སར་གྲོལ།། ཞེན་མེད་དྲི་སྣང་འཕགས་པའི་ཚུལ་ཁྲིམས་ངད།། དྲི་སྣང་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ཞིམ་དང་མི་ཞིམ་གྱི་བསྣམ་པར་བྱ་བའི་དངོས་པོ་དྲི་རུ་སྣང་བ་འདི་ཡང་། དང་པོ་སྣང་དུས་ཉིད་ནས་སྐྱེ་བ་མེད་པར་སྣང་བ་ཤེས་ན། མཚན་མེད་དམིགས་པ་མེད་པའི་བསྐྱེད་རྫོགས་ཀྱི་ཟླས་ཕྱེས་པའི་རྫོགས་རིམ་གྱི་གནད་ཡིན་པས་ན། དེ་ལྟར་ཤེས་པའི་གནད་ཟབ་མོ་ཀློང་དུ་གྱུར་བའི་སྐབས་སུ་དྲི་ཞིམ་པ་དང་མི་ཞིམ་པའི་གཉིས་འཛིན་མཚན་མའི་ཞེན་སྣང་རང་སར་དག་ཅིང་གྲོལ་བ་ཡིན། ཞེན་པ་མེད་པའི་དྲི་བསུང་འགག་མེད་དུ་རང་བཞིན་གྱིས་སྣང་བ་ནི་འཕགས་པའི་ཚུལ་ཁྲིམས་ཀྱི་དྲི་བསུང་གི་ངད་པ་ཡིན་པས་ན། དྲི་རུ་སྣང་བ་སྣང་དུས་ཉིད་ནས་རང་སར་གྲོལ་བའི་ངང་ནས་ཡིག་དྲུག་སྒྲོངས། ཞེས་གསུངས་པའོ། །བཅོམ་ལྡན་འདས་ཀྱིས། ལྕགས་ཀྱི་སྡོང་བུ་ཤིར་ཥ་ལ་ཕྱིང་པས་བཤུད་ན་དེ་ཡང་ཟད་ནུས་ཏེ། ཡི་གེ་དྲུག་པ་ལན་ཅིག་བརྗོད་པའི་ཕན་ཡོན་ནི་ཟད་མི་སྲིད་དོ། །ཞེས་ཡི་གེ་དྲུག་པ་མ་ཎིའི་ཕན་ཡོན་དེ་ལྟར་གསུངས། བཞི་པ་རོ་སྣང་རང་གྲོལ་གྱི་ངང་ནས་ཡིག་དྲུག་སྒྲོང་བའི་ཚུལ་བསྟན་པ། བཞི་པ་རོ་སྣང་རང་གྲོལ་གྱི་ངང་ནས་ཡིག་དྲུག་སྒྲོང་བའི་ཚུལ་བསྟན་པ་ནི། རོ་སྣང་ཚོགས་སུ་ཤེས་ན་མཆོད་པའི་གནད།། བཅུད་དང་མི་བཅུད་ཞེན་སྣང་རང་སར་གྲོལ།། ཞེན་མེད་བཟའ་བཏུང་འཕགས་པ་དགྱེས་པའི་རྫས།། རོ་སྣང་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། བཟའ་བཅའ་བཏུང་བ་དང་བཅས་པའི་ལྕེས་མྱོང་བྱའི་ཡུལ་དུ་གྱུར་པའི་རོ་རུ་སྣང་བ་ཐམས་ཅད་ཚོགས་སུ་ཤེས་ན་མཆོད་པ་གནས་སུ་སྟོབ་པའི་གནད་ཡིན་པས། རོ་བཅུད་དང་མི་བཅུད་དམ་ཞིམ་དང་མི་ཞིམ་གྱི་ཞེན་འཛིན་གྱི་སྣང་བ་རང་སར་གྲོལ་ནས་ཞེན་པ་མེད་པའི་བཟའ་བཏུང་དལ་འབྱོར་གྱི་ལུས་འཚོ་བའི་ཆེད་དམ། རང་ལུས་ཕུང་ཁམས་སྐྱེ་མཆེད་གདན་གསུམ་ལྷ་རུ་ཤེས་ནས་ནང་གི་སྦྱིན་སྲེག་གམ་མཉེས་ཟས་སུ་ཕུལ་ན། བཟའ་བཅའ་བཏུང་བ་འཕགས་པ་དགྱེས་པའི་རྫས་ཡིན་པས་ན། རོ་སྣང་རང་གྲོལ་ཞེན་མེད་ཀྱི་ངང་ནས་ཡིག་དྲུག་སྒྲོངས། ཞེས་གསུངས་པའོ། །ཚོགས་ཞེས་པ་ནི་དུ་མ་འཛོམས་པ་ལ་བྱ་བས། སྐལ་ལྡན་འདུས་པའི་ཚོགས་ཀྱིས། འབྱོར་ལྡན་ཡོ་བྱད་ཀྱི་ཚོགས་འདུ་བར་བྱས་ནས། དངོས་གྲུབ་ལྷ་ཡི་ཚོགས་ལ་ཕུལ་ནས། བསོད་ནམས་ཡེ་ཤེས་ཀྱི་ཚོགས་གཉིས་རྫོགས་པ་ལ་ཚོགས་ཞེས་བྱའོ། །ཚོགས་ཀྱི་མཆོད་པ་དང་། ཚོགས་ཀྱི་འཁོར་ལོས་རྣམ་བཞག་སྔགས་ཀྱི་གཞུང་ནས་ཤེས་པར་བྱ་བ་མང་བའོ། །བཅོམ་ལྡན་འདས་ཀྱིས། རིགས་ཀྱི་བུ་འདི་ལྟ་སྟེ་དཔེར་ན་རྒྱ་མཚོའི་མཆིང་རྣམ་ཆེན་པོ་ཟབས་སུ་དཔག་ཚད་བརྒྱད་ཁྲི་བཞི་སྟོང་ཞེང་དུ་རྟ་རྒོད་མའི་གདོང་གི་མཐའི་བར་དུ་དཔག་ཏུ་མེད་པ་ངས་སྐྲའི་རྩེ་མོའི་བརྒྱ་ཆས་ཐིགས་པ་རེ་རེ་བཞིན་བགྲང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིགས་སྔགས་ཆེན་མོ་ལན་གཅིག་བཟླས་པའི་བསོད་ནམས་ཀྱི་ཕུང་པོ་ངས་བགྲང་མི་ནུས་སོ། །ཞེས་གསུངས་ཤིང་། མདོ་སྡེ་ཏིང་འཛིན་རྒྱལ་པོ་ལས། ཟླ་བ་སྐར་མར་བཅས་པ་གནས་ལྷུང་ཞིང་། །རི་དང་གྲོང་དང་བཅས་པའི་ས་ཞིག་ལ། །ནམ་མཁའི་ཁམས་ནི་རྣམ་པ་གཞན་གྱུར་ཀྱང་། །ཁྱོད་ནི་མི་བདེན་པ་ཡི་ཚིག་མི་གསུང་། །ཞེས་ཟླ་བ་ཤར་ནས་འཆར་བ་དང་། ཉི་མའང་ཤར་ནས་འཆར་ཞིང་། སྐར་མ་སྨིན་དྲུག་ལ་སོགས་ནམ་མཁའི་ཁམས་ན་རྒྱུན་དུ་གནས་པ་རྣམས་ཀྱང་ཤར་ས་དང་། གནས་སའི་ཕྱོགས་འགྱུར་བ་དང་། རི་དང་གྲོང་དང་བཅས་པའི་རང་རེའི་རྟེན་དུ་གྱུར་བའི་ས་གཞི་འདི་ཡང་ཞིག་པ་དང་། ནམ་མཁའ་ཡང་འདི་ལྟར་མིན་པར་ཀག་སྒྲ་གྲག་བཞིན་རྡུང་ཆོག་པ་དང་། རུམ་དུ་བཅུག་ཆོག་པ། ཁ་རུ་ཟ་ཆོག་པ་སོགས་སུ་གྱུར་ན་ཡང་། ཤིན་ཏུ་བདེན་པར་སྨྲ་བའི་སངས་རྒྱས་བཅོམ་ལྡན་འདས་ཀྱིས་མི་བདེན་པའི་ཚིག་གསུང་བར་མི་སྲིད་ཅེས་དེ་བཞིན་གཤེགས་པ་རྫོགས་པའི་སངས་རྒྱས་ཉིད་ཀྱིས་གསུངས་པས། དེ་ལ་ཡིད་ཆེས་ཀྱི་ངེས་པ་མ་རྙེད་ན་དམ་ཆོས་གང་ཉན་རུང་རྒྱལ་བ་དགྱེས་པའི་ངེས་ཤེས་རྙེད་དུ་ཡོད་པ་མིན། གཞན་ཡང་མ་ཎིའི་ཕན་ཡོན་ལས། གླིང་བཞི་རི་རབ་བཅས་པ་ཡང་། །སྲང་ལ་སྦྱར་ན་གྲངས་ཀྱིས་ཆོད། །མ་ཎིའི་ཡོན་ཏན་གྲངས་མི་ཆོད། །སྐལ་ལྡན་ཀུན་མ་ཎི་པདྨེ་བགྲོངས། །ཞེས་གླིང་བཞི་རིའི་རྒྱལ་པོའི་རི་རབ་དང་བཅས་པའི་ཡང་ལྗིད་སྲང་ལ་བཅལ་བའི་ཚད་གཞལ་ཐུབ་ཀྱང་། གསུང་མཆོག་ཡི་གེ་དྲུག་པ་ལན་གཅིག་བཟླས་པའི་ཕན་ཡོན་གྱི་ཚད་བཟུང་མི་ཐུབ་པར་གསུངས་པའོ། །གཞལ་བྱ་ཤིན་ཏུ་ལྐོག་གྱུར་འདི་དག་བདེ་བར་བཤེགས་པའི་བཀའ་ལུང་ཚད་མས་གྲུབ་ཀྱང་། རིགས་པས་གཞལ་ནའང་གསུང་མཆོག་ཡི་གེ་དྲུག་པ་ནི་འཕགས་པ་སྤྱན་རས་གཟིགས་ཀྱི་སྙིང་པོ་དང་། འཕགས་པ་སྤྱན་རས་གཟིགས་ནི་རྒྱལ་བ་ཐམས་ཅད་ཀྱི་སྙིང་རྗེའི་རང་གཟུགས་ཡིན་ཞིང་། རྒྱལ་བ་ཐམས་ཅད་ཀྱང་ཚད་བཟུང་རིས་སུ་གཞལ་དུ་མེད་ཅིང་། དེ་དག་གི་ཐུགས་སྙིང་རྗེ་ཆེན་པོའི་བརྩེ་བས་ཁྱབ་ཡུལ་ཡང་ཁམས་གསུམ་གྱི་སེམས་ཅན་ཡིན་ཞིང་། སེམས་ཅན་གྱི་མཐའ་ལ་ཐུག་པར་མེད་པ་ནམ་མཁས་གར་ཁྱབ་ཡིན་པས། གཟུངས་སྔགས་ཡི་གེ་དྲུག་པའི་ཕན་ཡོན་ལ་ཚད་བཟུང་མེད་པ་ནི་རིགས་པས་དཔྱད་ནའང་གྲུབ་པའོ།། ལྔ་པ་རེག་སྣང་རང་གྲོལ་གྱི་ངང་ནས་ཡིག་དྲུག་སྒྲོང་བའི་ཚུལ་བསྟན་པ། ལྔ་པ་རེག་སྣང་རང་གྲོལ་གྱི་ངང་ནས་ཡིག་དྲུག་སྒྲོང་བའི་ཚུལ་བསྟན་པ་ནི། རེག་སྣང་མཉམ་ཉིད་ཤེས་ན་རོ་སྙོམས་གནད།། འགྲང་ལྟོགས་ཚ་གྲང་སྣང་བ་རང་སར་གྲོལ།། ཞེན་མེད་ཕྱི་ནང་རེག་བྱ་ལྷའི་ཕྲིན་ལས།། རེག་སྣང་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ལུས་ཀྱི་ཡུལ་དུ་གྱུར་པའི་རེག་བྱར་སྣང་བ་འཇམ་རྩུབ་ལྕི་ཡང་ལ་སོགས་པ་ཐམས་ཅད་སྤོང་ལེན་མེད་པར་བཟང་ངན་མཉམ་པར་ཉིད་དུ་ཤེས་ན་རོ་སྙོམས་བརྟུལ་ཞུགས་ཀྱི་ཉམས་ལེན་གནད་དུ་ལྷོང་བ་ཡིན་པས། དེའི་དུས་སུ་འགྲང་ལྟོགས་སམ་ཕོ་བ་རྒྱགས་ལྟོགས་དང་། ཚ་གྲང་གི་རེག་བྱར་སྣང་བ་ཐམས་ཅད་རང་གྲོལ་དུ་སོང་ཞིང་། ཞེན་པ་དང་འཛིན་པ་མེད་པའི་ངང་ནས་ཕྱི་དང་ནང་གི་རེག་བྱ་ཚོར་ཞིང་མྱོང་བ་ནི་ཡི་དམ་ལྷ་ཡི་ཕྲིན་ལས་ཡིན་པས། རེག་བྱར་སྣང་བ་སྣང་དུས་ཉིད་ནས་རང་སར་གྲོལ་བའི་ཉམས་ལེན་གྱི་གནད་ཀྱི་ངང་ནས་ཡིག་དྲུག་སྒྲོངས། ཞེས་གསུངས་པའོ། །བཅོམ་ལྡན་འདས་ཀྱིས། རིགས་ཀྱི་བུ་འདི་ལྟ་སྟེ་དཔེར་ན་ངས་ས་ཆེན་པོ་འདིའི་རྡུལ་ཕྲ་རབ་རེ་རེ་བཞིན་བརྩིས་པའི་གྲངས་ཚད་གཟུང་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིགས་སྔགས་ཆེན་མོ་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །གསུངས་ཤིང་། ཡི་གེ་དྲུག་པ་ཨཱོྃ་མ་ཎི་པདྨེ་ཧཱུྃ་ཧྲཱིཿ་ ཞེས་པ་འདི་སྔགས་ཡིན་པས། ཁྱོད་ཀྱིས་ཟོ། ཁྱོད་ཀྱིས་འཐུང་ཞེས་པ་དང་མི་འདྲ་བ་ཆོས་ཉིད་ངོ་བོས་གྲུབ་པ་དང་། ཆོས་ཅན་རང་བཞིན་གྱིས་གྲུབ་པ་དང་། བྱིན་གྱིས་བརླབས་ཀྱིས་གྲུབ་པ་དང་། ནུས་པ་མཐུ་ཡིས་གྲུབ་པ་སྟེ་གྲུབ་པ་བཞི་ལྡན་གྱི་སྔགས་ཡིན་ཞིང་། སྔགས་ལ་དངོས་གྲུབ་སྒྲུབ་པའི་ནུས་པ་མི་བསླུ་པ་ཐོགས་མེད་དུ་ཡོད་པས། གསུང་མཆོག་ཡི་གེ་དྲུག་པ་འདི་རྒྱལ་བ་ཐམས་ཅད་ཀྱི་ཐུགས་རྗེའི་ནུས་པ་ཐམས་ཅད་གཅིག་ཏུ་བསྡམས་ནས། ལྷ་སྔགས་ཆོས་ཉིད་གསུམ་པོ་དབྱེར་མེད་དུ་ཡི་གེ་འབྲུ་དྲུག་གི་རྣམ་པར་སྐྱེ་མེད་ཀྱི་དབྱིངས་ལས་འགག་མེད་ཀྱི་རང་སྒྲ་རུ་སྔགས་སུ་ཤར་བས། སྔགས་ཉིད་ལ་བརྟེན་ནས་ལྷ་དང་ཆོས་ཉིད་གྲུབ་པ་དེ་ལྟར་ཡིན་ནོ། །མདོ་སྡེ་ཟ་མ་ཏོག་བཀོད་པའི་ནང་ན། གང་ལ་ལ་ཞིག་གིས་ཡི་གེ་དྲུག་པའི་རིག་སྔགས་ཆེན་མོ་འདི་བྲག་ལ་བརྐོས་པའམ་རྩིག་ངོགས་སུ་བྲིས་པ་དེ་སེམས་ཅན་གང་གིས་མཐོང་བ་ཙམ་གྱིས་བྱང་ཆུབ་སེམས་དཔའ་སྲིད་པ་ཐ་མ་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་གསུངས་པ་སྟེ་ཡི་གེ་དྲུག་པའི་རིག་སྔགས་ཆེན་མོ་གྱང་ངོས་སུ་བྲིས་པ་སེམས་ཅན་སུ་ཞིག་གིས་མཐོང་པའི་ཕན་ཡོན་གྱིས་མཐར་ཐུག་སངས་རྒྱས་ཐུབ་ཅེས་པའོ། །དེས་ན་འཁོར་ལོ་བྱས་ནས་བསྐོར་བ་དང་། ཇོ་དར་བྱས་ནས་རླུང་ལ་ཕྱར་ན་ཕན་ཡོན་དེ་བཞིན་དུ་འབྱུང་བའོ། །ཡང་ཡི་གེ་དྲུག་པའི་རིག་སྔགས་ཆེན་མོ་གང་གིས་བཟླས་པ་དེའི་ལུས་ཀྱི་རླུང་སེམས་ཅན་གང་ལ་ཕོག་པས་ཀྱང་ལས་ཀྱི་སྒྲིབ་པ་བྱང་བར་གསུངས་སོ། །འདི་ལྟ་སྟེ་མ་ཎི་ཡི་གེ་དྲུག་པའི་རིག་སྔགས་ཆེན་མོ་འདོན་མཁན་གྱི་ལུས་ལ་བརྒྱུད་ནས་བྱུང་བའི་རླུང་གིས་ཕོག་ཚད་ཀྱི་སེམས་ཅན་རྣམས་ཀྱི་ལས་ཀྱི་སྒྲིབ་པ་དག་པའི་ཕན་ཡོན་ཆེན་པོ་འབྱུང་བ་ཡིན་ཞེས་གསུངས་པས་མ་ཎི་ལ་ཕན་ཡོན་དེ་ལྟར་ཡོད་པའོ།། དྲུག་པ་རྟོག་ཚོགས་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ། དྲུག་པ་རྟོག་ཚོགས་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ་ནི། ཆོས་ཀུན་སྟོང་པར་ཤེས་ན་ལྟ་བའི་གནད།། བདེན་རྫུན་བློ་ཡི་འཛིན་སྟངས་རང་སར་གྲོལ།། ཞེན་མེད་སྣང་སྲིད་འཁོར་འདས་ཆོས་སྐུའི་ངང་།། རྟོག་ཚོགས་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ཡིད་ཀྱི་ཡུལ་དུ་གྱུར་པའི་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གསར་དུ་བཅོས་ཤིང་བསྒྲུབས་པ་མ་ཡིན་པར་གདོད་ནས་སྟོང་པ་ཡིན་པར་ཤེས་ན་ལྟ་བ་མ་བཅོས་སྤྲོས་པ་དང་བྲལ་བའི་རང་གནད་ཡིན་པས། གནད་དེ་ཇི་བཞིན་རྟོགས་པའི་སྐབས་སུ་བདེན་པ་ལ་མཆོག་དང་། རྫུན་པ་ལ་དམན་པར་ལྟ་བའི་བློ་བྲལ་བློ་ཡིས་འཆོས་པའི་བློ་ཡི་འཛིན་སྟངས་དམ་ཀྲང་ངེ་བའི་གཉིས་འཛིན་གྱི་སྣང་བ་རང་སར་གྲོལ་ལོ། །ཞེན་མེད་ཀྱི་ངོ་ཁར་སྣང་སྲིད་འཁོར་འདས་ཀྱི་ཆོས་ཐམས་ཅད་ཆོས་སྐུའི་ཡོ་ལང་གཅིག་ལས་མི་འདའ་བས་རྟོག་ཚོགས་བཟང་ངན་དུ་སྣང་བ་ཐམས་ཅད་གཉིས་མེད་མ་སྤངས་འཛིན་མེད་རང་གྲོལ་གྱི་ངང་ནས་ཡིག་དྲུག་སྒྲོངས། ཞེས་གསུངས་པའོ།། ལྔ་པ་ཉོན་མོངས་དུག་ལྔ་དབྱིངས་ཆོས་ཉིད་ཀྱི་ངོ་བོར་གྲོལ་བ་ཀུན་འབྱུང་ལམ་དུ་སློང་པའི་མན་ངག་བསྟན་པ། ལྔ་པ་ཉོན་མོངས་དུག་ལྔ་དབྱིངས་ཆོས་ཉིད་ཀྱི་ངོ་བོར་གྲོལ་བ་ཀུན་འབྱུང་ལམ་དུ་སློང་པའི་མན་ངག་བསྟན་པ་ལ་ལྔ་ལས། དང་པོ་ཞེ་སྡང་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ། དང་པོ་ཞེ་སྡང་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ་ནི། ཞེ་སྡང་ཡུལ་རྗེས་མ་འབྲང་ཁྲོ་བློ་ལྟོས།། ཁྲོ་སྣང་རང་ཤར་རང་གྲོལ་གསལ་སྟོང་ངང་།། གསལ་སྟོང་མེ་ལོང་ཡེ་ཤེས་ལོགས་ན་མེད།། ཞེ་སྡང་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། གན་གྱིས་ང་ལ་དོ་བསྡོས་ཕོད་བཙུགས་ཀྱིས་ངོ་ལ་བལྟས་ནས་མགོ་ལ་བརྒྱབ་བྱུང་སྙམ་པའི་ཕྱིའི་ཡུལ་རྐྱེན་ལ་བརྟེན་ནས་ཞེ་སྡང་དྲག་པོ་སྐྱེས་པའི་དུས་སུ། ཞེ་སྡང་སྐྱེ་བའི་ཡུལ་མི་སྡུག་པའི་མཚན་མ་ཅན་དུ་སྣང་པའི་ཡུལ་རྐྱེན་གྱི་རྗེས་སུ་ཕར་མ་འབྲང་བར་ཁོང་ཁྲོ་བ་པོ་ཁྲོ་བློ་ཉིད་ལ་ཚུར་ལྟོས་དང་། ཁྲོ་བ་ནི་ཕྱིའི་ཡུལ་ལས་མ་བྱུང་། ནང་སེམས་ལས་མ་བྱུང་བར་དབྱིངས་ཆོས་ཉིད་ཀྱི་ངང་ལས་དང་པོ་སྣང་དུས་ནས་རང་ཤར་རང་གྲོལ་གཞི་མ་གྲུབ་པ་གསལ་ལ་སྟོང་པ་སྟེ། ཁྱོད་ཀྱི་ཞེ་སྡང་དེ་གང་ཡིན་སྟོན་ཅིག གྲུ་བཞི་ཞིག་གམ་གྲུ་གསུམ་ཡིན་ཞེས་དྲིས་ན་སྟོན་དུ་མེད་པ་ནི་རང་ཤར་རང་གྲོལ་གཞི་མེད་སྟོང་པ་ཡིན་པའི་གནད་ཀྱིས་སོ། །དེ་ལྟ་བུའི་གསལ་སྟོང་གཉིས་སུ་མེད་པ་ནི་མེ་ལོང་ལྟ་བུའི་ཡེ་ཤེས་ཡིན་པས་དེ་ལས་གཞན་དུ་མེ་ལོང་ལྟ་བུའི་ཡེ་ཤེས་བྱ་བ་ལོགས་ན་མེད་པས་ཞེ་སྡང་རང་གྲོལ་མེ་ལོང་ཡེ་ཤེས་སུ་རྟོགས་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ།། གཉིས་པ་ང་རྒྱལ་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ། གཉིས་པ་ང་རྒྱལ་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ་ནི། ང་རྒྱལ་ཡུལ་རྗེས་མ་འཛིན་འཛིན་བློ་ལྟོས།། མཆོག་འཛིན་རང་ཤར་རང་གྲོལ་ཡེ་སྟོང་ངང་།། ཡེ་སྟོང་མཉམ་ཉིད་ཡེ་ཤེས་ལོགས་ན་མེད།། ང་རྒྱལ་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ང་རྒྱལ་ཞེས་པ་ནི་ང་བཟང་པོ་ཡིན། ང་ཆེ་བ་ཡིན། ང་ལྷག་པ་ཡིན་སྙམ་ནས་གང་མེད་ཀྱང་དོ་ཡོད་མདོག་བྱེད་པའམ། །ཡང་ན་ཡོན་ཏན་ཅུང་ཙམ་ཤེས་ནས་ང་རྒྱལ་བ་དང་། མངོན་པའི་ང་རྒྱལ་ཞེས་པ་ཅི་ཡང་མི་ཤེས་པར་རང་གིས་ཤེས་པར་སེམས་ནས་ང་རྒྱལ་བ་དང་། རང་དང་མི་མཉམ་པ་ལ་དམིགས་ཏེ་ཁོ་བས་ང་ལྷག་སྙམ་པ་དང་། རང་དང་འདྲ་བ་ལ་དམིགས་ཏེ་ངེད་གཉིས་འདྲ་དགོས་པ་ཡིན་ཡང་ངས་ལྷག་གོ་སྙམ་ནས་གཞན་ལས་རང་ཉིད་མཆོག་ཏུ་འཛིན་པའི་ང་རྒྱལ་གྱི་རྣམ་རྟོག་སྐྱེས་པ་ན། ཡུལ་རྗེས་སུ་རང་ཉིད་མཆོག་གོ་སྙམ་པའི་དམིགས་རྣམ་ལ་འཛིན་པ་མ་ཞུགས་པར་མཆོག་འཛིན་གྱི་བློ་རང་ལ་ལྟོས་དང་། རང་ཉིད་ལ་མཆོག་ཏུ་འཛིན་པའི་ང་རྒྱལ་གྱི་བློ་ཉིད་ཤར་པའི་དུས་ནས་ཀྱང་སྐྱེ་མེད་འགག་པའི་ཐ་སྙད་དང་བྲལ་བ་རང་ཤར་རང་གྲོལ་བ་སྟེ། དང་པོ་སྐྱེ་བ་མེད་པས་འདི་ནས་བྱུང་ཞེས་བྱ་བ་དང་། དབྱིབས་དང་ཁ་དོག་དང་། གཟུགས་ཀྱི་རིང་ཐུང་དང་། ལྕི་ཡང་སོགས་ཀྱིས་གཞལ་དུ་མེད་པ་དང་། སྐྱེ་བ་མེད་ན་མཐར་འགག་པ་ཡང་མེད་པས་སྐྱེ་འགག་མེད་པ་རང་ཤར་རང་གྲོལ་བས་ཡེ་ནས་སྟོང་པའི་ངོ་བོའི་ངང་ལས་འཕོ་འགྱུར་བྱུང་མ་མྱངས་པའི་ང་རྒྱལ་ཡེ་ནས་རང་གྲོལ་བ་མདུད་པས་བསྡམས་མ་མྱངས་པ་ལ་བཀྲོལ་མི་དགོས་པ་ལྟར་རོ། །ཡེ་སྟོང་དེ་ཉིད་ལས་མཉམ་པ་ཉིད་ཀྱི་ཡེ་ཤེས་ཀྱང་ལོགས་ན་མེད་པས་ང་རྒྱལ་ཡེ་ནས་རང་གྲོལ་ཡིན་པར་ཤེས་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ།། གསུམ་པ་འདོད་ཆགས་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ། གསུམ་པ་འདོད་ཆགས་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ་ནི། འདོད་ཆགས་ཡུལ་རྗེས་མ་ཞེན་ཞེན་བློ་ལྟོས།། ཞེན་སྣང་རང་ཤར་རང་གྲོལ་བདེ་སྟོང་ངང་།། བདེ་སྟོང་སོར་རྟོགས་ཡེ་ཤེས་ལོགས་ན་མེད།། འདོད་ཆགས་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ཡུལ་ཡིད་དུ་འོང་བ་སྡུག་པ་སྟེ་མཛེས་པར་སྣང་བ་ལས་འདོད་ཅིང་ཆགས་པའི་བློ་འབྱུང་བས་ན་ཆགས་པའི་ཡུལ་རྗེས་སུ་འབྲང་ནས་མ་ཞེན་པར་འདོད་ཅིང་ཆགས་པའི་བློ་ཉིད་ལ་ལྟོས་དང་། ཞེན་ཅིང་ཆགས་པའི་བློ་དེ་ཡང་དབྱིངས་ཆོས་ཉིད་ཀྱི་ངང་ནས་རང་ཤར་ལ་དབྱིངས་ཆོས་ཉིད་ཀྱི་ངང་དུ་རང་གྲོལ་ཏེ་བདེ་སྟོང་གི་ངང་ལས་མི་འདའ་བས། བདེ་སྟོང་དེ་ལས་གཞན་དུ་སོ་སོར་རྟོགས་པའི་ཡེ་ཤེས་བྱ་བ་ལོགས་ན་མེད་པའི་ཕྱིར་འདོད་ཆགས་རང་གྲོལ་གྱི་ངང་ནས་ཡིག་དྲུག་སྒྲོངས། ཞེས་གསུངས་པའོ།། བཞི་པ་ཕྲག་དོག་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ། བཞི་པ་ཕྲག་དོག་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ་ནི། ཕྲག་དོག་ཡུལ་རྗེས་མ་འབྲང་དཔྱོད་བློ་ལྟོས།། རྟོག་དཔྱོད་རང་ཤར་རང་གྲོལ་བློ་སྟོང་ངང་།། བློ་སྟོང་བྱ་གྲུབ་ཡེ་ཤེས་ལོགས་ན་མེད།། ཕྲག་དོག་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ཕྲག་དོག་སྐྱེ་བའི་ཡུལ་རང་ཉིད་དང་མཉམ་པ་ལ་དམིགས་ནས་ཀན་ངའི་གོང་ན་ཤོར་མི་ཉན་སྙམ་པ་དང་། རང་དང་མི་མཉམ་པ་ལ་དམིགས་ནས་ང་ཀན་གྱི་ཡན་དུ་ཐོན་དགོས་སྙམ་པའི་འགྲན་སེམས་དང་། དེའི་ཕུན་སུམ་ཚོགས་པ་ལ་དམིགས་ནས་ཀན་ལ་ཡོད་པའི་རྒྱུ་ལོངས་སྤྱོད་ལས་མང་བ་ང་ལ་དགོས་སྙམ་པ་དང་། ཁོ་ལ་ཡོན་ཏན་འདུག་པ་དེ་བས་ལྷག་ཅིག་ངས་ཤེས་དགོས་སྙམ་ནས་ཕྲག་ཅིང་དོག་པའི་མི་བདེ་བའི་ཟུག་ངུ་རང་རྒྱུད་ལ་སྐྱེས་པས་ན། རང་རེས་ཆོས་སྒྲུབ་དུས་སུ་ཁ་ཚུར་ནང་ཁོ་ནར་བསྐོར་ནས་ཡུལ་ཕར་ལ་ལྟ་མཁན་ཉིད་ལ་བརྟག་དགོས་པས། ཕྲག་དོག་བྱ་ཡུལ་གྱི་རྗེས་སུ་བློ་ཕར་མ་འབྲང་བར་རེ་དོགས་བྱེད་མཁན་གྱི་ཕྲག་ཅིང་དོག་པའི་རྟོག་དཔྱོད་ཀྱི་བློ་ཉིད་ལ་ཁ་ཚུར་བསྐོར་ནས་ལྟོས་དང་། རྟོག་དཔྱོད་དེ་དབྱིངས་ལས་ཤར་ཞིང་ཤར་བའི་དུས་ཉིད་ནས་མ་གྲོལ་པ་མི་སྲིད་པར་རང་ཤར་བ་དང་རང་གྲོལ་བ་དུས་མཉམ་པར་མཐོང་སྟེ་བློ་རང་ཉིད་རང་སྟོང་གི་ངང་ན་གནས་པས། བློ་རང་ཉིད་སྟོང་པར་མཐོང་པའི་ཡེ་ཤེས་དེ་ལས་བྱ་བ་གྲུབ་པའི་ཡེ་ཤེས་བྱ་བ་ལོགས་སུ་མེད་པའི་ཕྱིར། ཕྲག་དོག་རང་གྲོལ་གྱི་ངང་ནས་ཡིག་དྲུག་སྒྲོངས་། ཞེས་གསུངས་པའོ། །ཡི་གེ་དྲུག་པ་བཏོན་ཅིང་དད་པས་བླ་མ་དང་ལྷ་ལ་གསོལ་བ་འདེབས་པ་མ་ལ་བུས་འབོད་ཀྱི་ཚུལ་དུ་བཟླས་པ་དང་སྦྱར་ན། ཨཱོྃ་མ་ཎི་པདྨེ་ཧཱུྃ་ཞེས་པ། ཨོཾ་སྐུ་ལ་གསོལ་བ་འདེབས། མ་གསུང་ལ་གསོལ་བ་འདེབས། ཎི་ཐུགས་ལ་གསོལ་བ་འདེབས། པད་ཡོན་ཏན་ལ་གསོལ་བ་འདེབས། མེ་ཕྲིན་ལས་ལ་གསོལ་བ་འདེབས། ཧཱུྃ་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་བྱིན་རླབས་སྡུད་པར་བྱེད་པའོ། །གསོལ་བ་མ་བཏབ་པར་བྱིན་རླབས་འབྱུང་ལུགས་མེད་ཅིང་། མ་ཎི་བཏོན་པ་ནི་གསོལ་འདེབས་དང་དངོས་གྲུབ་འགྲུབ་པའི་སྔགས་ལགས་པས་མ་ཎིས་གསོལ་བ་འདེབས་པ་གལ་ཆེན་ནང་གི་དོན་ཆེན་ཡིན་པ་སྟེ། ནོར་བུ་རིན་པོ་ཆེ་དགོས་འདོད་འབྱུང་བའི་གཞི་ཡོད་ཀྱང་གསོལ་བ་མ་བཏབ་པར་དགོས་འདོད་མི་འབྱུང་བ་བཞིན་ནོ།། ལྔ་བ་གཏི་མུག་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ། ལྔ་བ་གཏི་མུག་རང་གྲོལ་གྱི་ངང་ནས་ཡིག་དྲུག་བཟླ་བའི་ཚུལ་བསྟན་པ་ནི། གཏི་མུག་ཡུལ་ལ་མ་རློམ་རང་ངོ་ལྟོས།། རྟོག་ཚོགས་རང་ཤར་རང་གྲོལ་རིག་སྟོང་ངང་།། རིག་སྟོང་ཆོས་དབྱིངས་ཡེ་ཤེས་ལོགས་ན་མེད།། གཏི་མུག་རང་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ཡུལ་ཡང་དག་མ་ཡིན་པ་ཕྱིན་ཅི་ལོག་ལ་བརྟེན་ནས་རྨོངས་ཤིང་གཏི་མུག་པ་འབྱུང་བས་ན། གཙང་བདེ་བདག་རྟག་གི་ཡུལ་ལ་བདེན་པར་མ་རློམ་པར། གཏི་མུག་ཅེས་དམུན་ཞིང་འཐིབས་པའི་ཡང་དག་ལྟ་བའི་བློ་རིག་མི་གསལ་བ་རང་གི་ངོ་བོ་ལ་ལྟོས་དང་། འཛིན་པ་ཡང་དག་མ་ཡིན་པའི་བློ་རྟོག་དེ་ཉིད་དང་པོ་ཤར་པའི་དུས་ནས་དབྱིངས་ལས་ཤར་པས། དབྱིངས་ཆོས་ཉིད་སྐྱེ་འགག་དང་བྲལ་བ་ལས་གང་ཤར་རང་སར་མ་གྲོལ་པ་གཅིག་ཀྱང་མེད་པས་རྟོག་ཚོགས་རང་ཤར་རང་གྲོལ་གྱི་རིག་སྟོང་ཡེ་ཤེས་དེ་ག་ལས་གཞན་པའི་རིག་སྟོང་ཆོས་དབྱིངས་ཡེ་ཤེས་བྱ་བའང་ལོགས་ན་མེད་པས་གཏི་མུག་རང་གྲོལ་གྱི་ངང་ནས་ཡིག་དྲུག་སྒྲོངས། ཞེས་གསུངས་པའོ།། དྲུག་པ་སྡུག་བསྔལ་ཀ་དག་འཁོར་འདས་རོ་སྙོམ་གྱི་གནད་བསྟན་པ། དྲུག་པ་སྡུག་བསྔལ་ཀ་དག་འཁོར་འདས་རོ་སྙོམ་གྱི་གནད་བསྟན་པ་ལ་ལྔ་ལས། དང་པོ་གཟུགས་ཕུང་ཡེ་གྲོལ་སྟོང་ཉིད་ལྟ་བའི་ངང་ནས་ཡིག་དྲུག་བཟླ་བར་བསྟན་པ། དང་པོ་གཟུགས་ཕུང་ཡེ་གྲོལ་སྟོང་ཉིད་ལྟ་བའི་ངང་ནས་ཡིག་དྲུག་བཟླ་བར་བསྟན་པ་ནི། གཟུགས་ཕུང་ཡེ་སྟོང་སྐྱེ་མེད་ནམ་མཁའི་ངང་།། སྟོང་ཉིད་རིག་པའི་ཐིག་ལེ་སྤྱན་རས་གཟིགས།། འཕགས་པ་ནམ་མཁའི་རྒྱལ་པོ་ལོགས་ན་མེད།། སྟོང་ཉིད་ལྟ་བའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། གཟུགས། ཚོར་བ། འདུ་ཤེས། འདུ་བྱེད། རྣམ་ཤེས་ཏེ་ཕུང་པོ་ལྔ་ལས། གཟུགས་ཀྱི་ཕུང་པོ་ནི་ཡེ་ནས་སྟོང་པ་སྐྱེ་མེད་འགག་པ་དང་བྲལ་བ་ནམ་མཁའ་ལྟ་བུའི་ངང་ལ་འཕོ་འགྱུར་བྲི་གང་མེད་ཅིང་། དབྱིངས་ངོ་བོ་ཀ་ནས་དག་པ་སྟོང་པ་ཉིད་དང་། ཡེ་ཤེས་ལྷུན་གྱིས་གྲུབ་པ་རིག་པའི་ཐིག་ལེའམ་འཕོ་ཆགས་མཚན་མའི་སྤྲོས་པ་དང་བྲལ་བ་གཉིས་ཀུན་ཟླུམ་ཐིག་ལེའི་གོང་བུ་གཅིག་ཏུ་འདུས་པ་གཉིས་སུ་མེད་པ་དབྱིངས་རིག་དབྱེར་མེད་དེ་ཉིད་སྤྱན་རས་གཟིགས་ཡིན་ཞིང་། སྤྱིར་འཕགས་པ་ཐུགས་རྗེ་ཆེན་པོས་གང་འདུལ་འགྲོ་བའི་སྣང་བའི་ངོར་མཚན་དང་སྐུ་ཡི་བཀོད་པ་བསམ་གྱི་མི་ཁྱབ་པས། རྡུལ་སྙེད་ཀྱི་ཞིང་ཁམས་རྒྱ་མཚོར་འགྲོ་དོན་མཛད་བཞིན་ཡོད་པ་ལས། བྱེ་བྲག་མདོ་དང་རྒྱུད་སྡེ་རུ་ཡོངས་སུ་གྲགས་པའི་མཚན་གྱི་རྣམ་གྲངས་ལ་འཕགས་པ་ནམ་མཁའི་རྒྱལ་པོ། འཕགས་པ་དོན་ཡོད་ཞགས་པ། འཕགས་པ་འཁོར་བ་དོང་སྤྲུགས། འགྲོ་འདུལ་ཐུགས་རྗེ་ཆེན་པོ། འཕགས་མཆོག་རྒྱལ་བ་རྒྱ་མཚོ། འཕགས་མཆོག་ཁ་སརྤ་ཎི། འཕགས་མཆོག་སེང་གེའི་སྒྲ། འཕགས་པ་སེམས་ཉིད་ངལ་གསོ། འཕགས་མཆོག་འཇིག་རྟེན་དབང་ཕྱུག་སོགས་དེ་ལྟར་མཚན་དང་སྐུ་ཡི་བཀོད་པ་གདུལ་བྱའི་བློ་དང་། དབང་པོ། བསམ་པའི་ཁྱད་པར་གྱིས་འདུལ་བྱེད་འདྲ་མིན་དུ་སྣང་བ་ལས། གཟུགས་ཕུང་ཡེ་སྟོང་སྐྱེ་མེད་སྟོང་པའི་ངང་ལས་སྟོང་ཉིད་རིག་པའི་ཐིག་ལེ་དབྱིངས་ཡེ་ཟུང་འཇུག་ཏུ་ཤར་བ་དེ་ལས་གཞན་འཕགས་པ་ནམ་མཁའི་རྒྱལ་པོ་བྱ་བ་ལོགས་ན་ཡོད་པ་མིན་པས། འཕགས་པ་ནམ་མཁའི་རྒྱལ་པོའི་རང་ཞལ་ནང་ནས་མཇལ་བའི་སྟོང་ཉིད་ལྟ་བའི་ངང་ནས་ཡིག་དྲུག་སྒྲོངས། ཞེས་གསུངས་པའོ། །གནའ་གཏོ་རུ་ཨ་དགེ་ཚང་གི་དགུན་ཤུལ་དུ་རྫོགས་ཆེན་དགོན་པ་བཏབ་ཅེས་ལོ་རྒྱུས་ཐོག་ནས་བཤད་རྒྱུ་ཡོད་པའི་གཏོ་རུ་ཨ་དགེ་ཚང་གི་ནང་རྟེན་སྤྱན་རས་གཟིགས་འགྲོ་འདུལ་ཕྱག་བཞི་པ་ཞིག་དེ་རིང་ང་སར་འབྱོར་བ་རྟེན་འབྲེལ་ཤིན་ཏུ་བཟང་ལ། རྟེན་འདི་ཤིན་ཏུ་རྩ་ཆེན་ཡིན་པས་རྗེས་སོར་པདྨའི་ཐང་གི་ནང་རྟེན་མིང་གྲགས་ཅན་ཞིག་ཏུ་འགྲོ་ངེས་འདུག གཉིས་པ་ཚོར་བ་རང་གྲོལ་རོ་མཉམ་དག་བའི་ངང་ནས་ཡིག་དྲུག་བཟླ་བར་བསྟན་པ། གཉིས་པ་ཚོར་བ་རང་གྲོལ་རོ་མཉམ་དག་བའི་ངང་ནས་ཡིག་དྲུག་བཟླ་བར་བསྟན་པ་ནི། ཚོར་བ་ཡུལ་སེམས་གཉིས་འབྲེལ་འཆིང་བའི་ཞགས།། མཉམ་ཉིད་གཉིས་མེད་རྟོགས་ན་སྤྱན་རས་གཟིགས།། འཕགས་པ་དོན་ཡོད་ཞགས་པ་ལོགས་ན་མེད།། རོ་མཉམ་རྟོགས་པའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ཚོར་བ་བདེ་སྡུག་བར་མར་སྣང་བ་ཐམས་ཅད་ཀུན་ཡུལ་དང་སེམས་གཉིས་ཀ་འབྲེལ་ནས་འཆིང་བྱེད་ཀྱི་ཞགས་པ་ལྟ་བུ་འདི་གྲུབ་པས། དོན་ཡུལ་མེད་མཉམ་པ་ཆེན་པོའི་ངང་ན་བདེ་སྡུག་བཏང་སྙོམས་བྱ་བ་མ་གྲུབ་པས་བདེ་དང་སྡུག་བསྔལ་སྣ་ཚོགས་སུ་སྣང་བ་འདི་ཐམས་ཅད་དོན་ལ་མཉམ་པ་ཉིད་ཡུལ་སེམས་གཉིས་སམ་གཟུང་འཛིན་གཉིས་སུ་མེད་པར་ཡིན་ལུགས་གཤིས་ཀྱི་བཞུགས་ཚུལ་དུ་རྟོགས་ན་སྤྱན་རས་གཟིགས་ཡིན་ཏེ། འདི་ལས་གཞན་དུ་འཕགས་པ་དོན་ཡོད་ཞགས་པ་བྱ་བ་ལོགས་ན་མེད་པས། འཁོར་འདས་ཡུལ་སེམས་བདེ་སྡུག་ལ་སོགས་པ་གཉིས་མེད་རོ་མཉམ་དུ་རྟོགས་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ།། གསུམ་པ་འདུ་ཤེས་རང་གྲོལ་དམིགས་མེད་སྙིང་རྗེའི་ངང་ནས་ཡིག་དྲུག་བཟླ་བར་བསྟན་པ། གསུམ་པ་འདུ་ཤེས་རང་གྲོལ་དམིགས་མེད་སྙིང་རྗེའི་ངང་ནས་ཡིག་དྲུག་བཟླ་བར་བསྟན་པ་ནི། འདུ་ཤེས་མཚན་མར་འཛིན་པ་འཁྲུལ་བའི་བློ།། འགྲོ་ཀུན་སྙིང་རྗེས་འཛིན་ན་སྤྱན་རས་གཟིགས།། འཕགས་མཆོག་འཁོར་བ་དོང་སྤྲུགས་ལོགས་ན་མེད།། དམིགས་མེད་སྙིང་རྗེའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། མེད་ལ་ཡོད་པར་སྣང་བའི་སྨིག་རྒྱུའི་ཆུ་ལ་རི་དྭགས་འཁྲུལ་བ་བཞིན་དུ་འདུ་ཤེས་སྣ་ཚོགས་པས་ཡུལ་ལ་མཚན་མར་འཛིན་པ་ནི་འཁྲུལ་བའི་བློ་ཡིན་ལ། དེ་ལྟ་བུའི་འཁྲུལ་བའི་འདུ་ཤེས་དེ་ཉིད་དག་སྟེ་འགྲོ་བ་སེམས་ཅན་ཀྱི་སྡུག་བསྔལ་སྣ་ཚོགས་ལ་དམིགས་ནས་སྙིང་རྗེས་སེམས་ཅན་ཡལ་བ་མི་འདོར་བར་འཛིན་པར་བྱེད་པ་དེ་ཉིད་སྤྱན་རས་གཟིགས་ཡིན་ཏེ། འཕགས་མཆོག་འཁོར་བ་དོང་སྤྲུགས་བྱ་བ་ཡང་དེ་ལས་ལོགས་ན་མེད་པས་དམིགས་མེད་སྙིང་རྗེའི་ངང་ནས་ཡིག་དྲུག་སྒྲོངས། ཞེས་གསུངས་པའོ།། བཞི་པ་འདུ་བྱེད་རང་གྲོལ་གཞན་ཕན་རོ་གཅིག་གི་ངང་ནས་ཡིག་དྲུག་བཟླ་བར་བསྟན་པ། བཞི་པ་འདུ་བྱེད་རང་གྲོལ་གཞན་ཕན་རོ་གཅིག་གི་ངང་ནས་ཡིག་དྲུག་བཟླ་བར་བསྟན་པ་ནི། འདུ་བྱེད་འཁོར་བའི་ལས་ཀྱིས་རིགས་དྲུག་འཁོར།། སྲིད་ཞི་མཉམ་ཉིད་རྟོགས་ན་སྤྱན་རས་གཟིགས།། འགྲོ་འདུལ་ཐུགས་རྗེ་ཆེན་པོ་ལོགས་ན་མེད།། གཞན་ཕན་རོ་གཅིག་ངང་ནས་ཡིག་དྲུག་སྒྲོངས།། ཞེས་གསུངས་ཏེ། སྲིད་རྩ་མ་རིག་པའི་རྒྱུས་མངོན་པར་འདུ་བྱེད་པའི་མཚན་ཉིད་ཅན་གྱི་འདུ་བྱེད་འཁོར་བར་འཁོར་སྤྱད་ཀྱི་ལས་ཀྱིས་ཁམས་གསུམ་རིགས་དྲུག་གི་གནས་ཐར་མེད་འཁོར་བའི་རྒྱ་མཚོ་ཆེན་པོ་འདིར་འཁྱམས་ཤིང་འཁོར་བར་འགྱུར་ལ། དོན་དུ་ན་འཁོར་བ་ཡེ་དག་དག་ཆེན་མཉམ་པ་ཆེན་པོ་ཡིན་པས་འཁོར་བ་བྱ་བའི་སྤང་བྱ་ངན་པ་ཞིག་དང་། མྱང་འདས་བྱ་བའི་ཐོབ་བྱ་ཡག་པ་ཞིག་མེད་པ་སྟེ། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ནས་རྣམ་པར་གྲོལ། །ཅེས་གསུངས་པ་ལྟར་དུ། སྲིད་ཞི་མཉམ་ཉིད་ཀྱི་དོན་རྟོགས་ན་སྤྱན་རས་གཟིགས་ཡིན་ཏེ། དེ་ལས་གཞན་དུ་འགྲོ་འདུལ་ཐུགས་རྗེ་ཆེན་པོ་བྱ་བ་ལོགས་ན་མེད་པས་རང་གཅེས་འཛིན་གྱི་བློ་ངན་དེ་བོར་ལ་གང་སྨྲས་གང་དྲན་གང་བྱེད་ཐམས་ཅད་གཞན་ཕན་ཁོ་ནར་རོ་གཅིག་ཏུ་གྱུར་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ།། ལྔ་པ་རྣམ་ཤེས་རང་སེམས་སངས་རྒྱས་སུ་ཤེས་པའི་ངང་ནས་ཡིག་དྲུག་བཟླ་བར་བསྟན་པ། ལྔ་པ་རྣམ་ཤེས་རང་སེམས་སངས་རྒྱས་སུ་ཤེས་པའི་ངང་ནས་ཡིག་དྲུག་བཟླ་བར་བསྟན་པ་ནི། རྣམ་ཤེས་སེམས་ཀྱི་རང་བཞིན་ཚོགས་བརྒྱད་ཆ།། སེམས་ཉིད་ཆོས་སྐུར་རྟོགས་ན་སྤྱན་རས་གཟིགས།། འཕགས་མཆོག་རྒྱལ་བ་རྒྱ་མཚོ་ལོགས་ན་མེད།། རང་སེམས་སངས་རྒྱས་ཤེས་པས་ཡིག་དྲུག་སྒྲོངས།། ཞེས་གསུངས་ཏེ། ཡུལ་སོ་སོར་རྣམ་པར་རིག་པའི་རྣམ་ཤེས་སེམས་དང་སེམས་བྱུང་གི་ཟླས་ཕྱེས་པའི་གཙོ་སེམས་ཀྱི་རང་བཞིན་ཚོགས་བརྒྱད་ཀྱི་ཆ་རུ་སྣང་བ་ཐམས་ཅད། སེམས་ཉིད་སྐྱེ་བ་མེད་པ་རིག་སྟོང་ཆོས་སྐུའི་རང་བཞིན་དུ་རོ་གཅིག་ཏུ་རྟོགས་ན་དེ་ཉིད་སྤྱན་རས་གཟིགས་ཡིན་ཏེ། རང་སེམས་ཆོས་སྐུར་རྟོགས་པ་འདི་ལས་འཕགས་མཆོག་རྒྱལ་བ་རྒྱ་མཚོ་བྱ་བ་ལོགས་ན་མེད་པས། རང་སེམས་རྟོགས་ན་ཡེ་ནས་སངས་རྒྱས་ཡིན་པ་ལ་ཡིན་པར་ཤེས་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ།། བདུན་པ་སྒོ་གསུམ་ལྷ་སྔགས་ཆོས་ཉིད་ཀྱི་རང་བཞིན་དུ་ལ་བཟླ་བར་བསྟན་པ། བདུན་པ་སྒོ་གསུམ་ལྷ་སྔགས་ཆོས་ཉིད་ཀྱི་རང་བཞིན་དུ་ལ་བཟླ་བར་བསྟན་པ་ལ་གསུམ། དང་པོ་སྣང་སྟོང་ལྷ་སྐུའི་ངང་ནས་ཡིག་དྲུག་ལ་བཟླ་བར་བསྟན་པ། དང་པོ་སྣང་སྟོང་ལྷ་སྐུའི་ངང་ནས་ཡིག་དྲུག་ལ་བཟླ་བར་བསྟན་པ་ནི། ལུས་སྣང་གདོས་བཅས་འཛིན་པ་འཆིང་བའི་རྒྱུ།། སྣང་སྟོང་ལྷ་རུ་ཤེས་ན་སྤྱན་རས་གཟིགས།། འཕགས་མཆོག་ཁ་སརྤ་ཎི་ལོགས་ན་མེད།། སྣང་སྟོང་ལྷ་སྐུའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། ལུས་སུ་སྣང་བའི་ཤ་ཁྲག་དྲོད་དབུགས་ཀྱི་ཕུང་པོ་གདོས་བཅས་རགས་པ་འདི་ལ། ངའི་ལུས་ཞེས་གཅེས་འཛིན་དང་ང་ཡིར་འཛིན་པ་ནི་འཁོར་བ་ཐར་མེད་ཀྱི་གནས་སུ་འཆིང་བར་བྱེད་པའི་རྒྱུ་ཡིན་ལ། ལུས་འདི་ཉིད་བརྟགས་ན་ཆོས་དང་གང་ཟག་གི་བདག་གཉིས་ཀྱིས་སྟོང་པ་ཕྱི་ནང་གསང་གསུམ་གང་དུའང་མེད་པ་སྣང་བ་ཉིད་ན་ངོ་བོས་སྟོང་བའི་མིང་རྐྱང་ཙམ་སྣང་སྟོང་ཟུང་འཇུག་སྤྲོས་པ་ཀུན་བྲལ་གྱི་དེ་བཞིན་ཉིད་ནི་ཆོས་ཉིད་དོན་དམ་པའི་ལྷ་ཡིན་པ་རུ་ཡིན་པར་ཤེས་ན་སྤྱན་རས་གཟིགས་ཡིན་ཏེ། དེ་ལས་གཞན་དུ་གྱུར་པའི་འཕགས་མཆོག་ཁ་སར་པ་ཎི་བྱ་བ་ཞལ་ཕྱག་མཚན་མ་ཅན་གྱི་ལྷ་ཞིག་ལོགས་ན་བཙལ་ནས་རྙེད་རྒྱུ་མེད་པས། སྣང་སྟོང་ལྷ་སྐུར་ཤེས་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ།། གཉིས་པ་སྒྲ་གྲག་སྔགས་སུ་ཤེས་ནས་ཡིག་དྲུག་བཟླ་བར་བསྟན་པ། གཉིས་པ་སྒྲ་གྲག་སྔགས་སུ་ཤེས་ནས་ཡིག་དྲུག་བཟླ་བར་བསྟན་པ་ནི། ངག་སྣང་བརྗོད་པའི་སྒྲ་རྟོག་འཁྲུལ་པའི་རྒྱུ།། གྲག་སྟོང་སྔགས་སུ་ཤེས་ན་སྤྱན་རས་གཟིགས།། འཕགས་མཆོག་སེངྒེ་སྒྲ་ཞེས་ལོགས་ན་མེད།། སྒྲ་གྲག་སྔགས་སུ་ཤེས་པས་ཡིག་དྲུག་སྒྲོངས།། ཞེས་གསུངས་ཏེ། རིགས་དྲུག་འཁྲུལ་བའི་སྒྲ་སྐད་ངག་གི་སྨྲ་བརྗོད་དུ་སྣང་བ་ལ་སྒྲ་སྐད་རང་མཚན་དུ་འཛིན་པའི་རྟོག་པ་ནི་འཁྲུལ་རྟོག་མཆེད་པའི་རྒྱུ་རྐྱེན་ཡིན་ལ། སྒྲ་གྲག་པ་ཐམས་ཅད་དོན་ལ་གྲག་སྟོང་སྔགས་ཀྱི་རང་བཞིན་ལས་མ་འདས་པ་ཡིན་པའི་དོན་ཇི་ལྟ་བ་བཞིན་དུ་ཤེས་ན་དེ་ཉིད་སྤྱན་རས་གཟིགས་ཡིན་ཏེ། དེ་ལས་གཞན་དུ་འཕགས་མཆོག་སེངྒེ་སྒྲ་ཞེས་བྱ་བ་ལོགས་ན་མེད་པ་ཡིན་པས། སྒྲ་གྲག་ཐམས་ཅད་སྔགས་སུ་ཤེས་པའི་ངང་ནས་ཡིག་དྲུག་སྒྲོངས། ཞེས་གསུངས་པའོ།། གསུམ་པ་སེམས་ཉིད་ཆོས་སྐུའི་ངང་ནས་ཡིག་དྲུག་བཟླ་བར་བསྟན་པ། གསུམ་པ་སེམས་ཉིད་ཆོས་སྐུའི་ངང་ནས་ཡིག་དྲུག་བཟླ་བར་བསྟན་པ་ནི། སེམས་སྣང་བདེན་ཞེན་འཁྲུལ་འཁོར་འཁོར་བའི་རྒྱུ།། རྟོག་བྲལ་གཤིས་ལ་བཞག་ན་སྤྱན་རས་གཟིགས།། འཕགས་མཆོག་སེམས་ཉིད་ངལ་གསོ་ལོགས་ན་མེད།། སེམས་ཉིད་ཆོས་སྐུའི་ངང་ནས་ཡིག་དྲུག་སྒྲོངས།། ཞེས་གསུངས་ཏེ། རྟོག་ཚོགས་སེམས་སུ་སྣང་བ་ལ་ཤེས་རིག་རང་མཚན་དུ་བདེན་པར་ཞེན་པའི་ཨ་འཐས་འཁྲུལ་བའི་སེམས་འདི་ནི་འཁོར་བའི་རྩ་བའམ་འཁོར་བའི་སྡུག་བསྔལ་མྱོང་བའི་མཆེད་གཞིར་གྱུར་པས་ན་འཁོར་བའི་རྒྱུ་ཞེས་བྱ་ལ། ཆོས་ཅན་སེམས་ཀྱི་ཆོས་ཉིད་རྟོག་བྲལ་མ་འཁྲུལ་བ་ཡིན་པས་དེ་ལྟར་ཤེས་ནས་རྟོག་བྲལ་མ་འཁྲུལ་པའི་སེམས་ཉིད་ཆོས་སྐུའི་གཤིས་ལ་དགག་སྒྲུབ་དང་སྤྲོ་བསྡུ་མེད་པར་བཞག་ན་སྤྱན་རས་གཟིགས་ཡིན་ཏེ། དེ་ལས་གཞན་ན་འཕགས་མཆོག་སེམས་ཉིད་ངལ་གསོ་བྱ་བ་དེ་ཡང་ལོགས་ན་མེད་པས། སེམས་ཉིད་ཆོས་སྐུའི་རང་གཤིས་གནས་ལུགས་དོན་གྱི་བཞུགས་ཚུལ་དུ་ཤེས་ནས་རང་གི་སེམས་ཉིད་ཆོས་སྐུ་ཡིན་པ་དང་། ཆོས་སྐུའི་ངོ་བོ་རང་ལ་ཡོད་པ་དང་། སྐྱབས་གནས་དཀོན་མཆོག་གསུམ་པོ་རང་ལ་ཚང་བའི་ངེས་ཤེས་ཀྱི་ངང་ནས་ཡིག་དྲུག་སྒྲོངས། ཞེས་གསུངས་པའོ།། བརྒྱད་པ་ཐམས་ཅད་ཡེ་ནས་སངས་རྒྱས་པའི་རང་བཞིན་དག་པ་རབ་འབྱམས་སུ་ལྟ་བའི་ངང་ནས་ཡིག་དྲུག་བཟླ་བར་བསྟན་པ། བརྒྱད་པ་ཐམས་ཅད་ཡེ་ནས་སངས་རྒྱས་པའི་རང་བཞིན་དག་པ་རབ་འབྱམས་སུ་ལྟ་བའི་ངང་ནས་ཡིག་དྲུག་བཟླ་བར་བསྟན་པ་ནི། སྣང་སྲིད་ཡེ་ནས་དག་པ་ཆོས་སྐུའི་ངང་།། ཆོས་སྐུའི་རང་ཞལ་མཇལ་ན་སྤྱན་རས་གཟིགས།། འཕགས་མཆོག་འཇིག་རྟེན་དབང་ཕྱུག་ལོགས་ན་མེད།། དག་པ་རབ་འབྱམས་ངང་ནས་ཡིག་དྲུག་སྒྲོངས།། ཞེས་གསུངས་ཏེ། འདི་ལྟར་སྣང་ཞིང་སྲིད་པའི་འཁོར་འདས་ཀྱི་ཆོས་ཐམས་ཅད་ཡེ་ནས་རྣམ་པར་དག་པ། དག་མཉམ་བདེན་པ་དབྱེར་མེད། ཆོས་སྐུའི་ངང་ལས་གཡོས་མ་མྱངས། གཡོ་བར་མི་སྲིད་པ་ཡིན་ལ། འཁོར་བར་གནས་པ་མི་སྲིད་པ་སྣང་སྲིད་གཞིར་བཞུགས་ཀྱི་སངས་རྒྱས་ཡེ་ནས་ཡིན་པ་ལ་ཡིན་པར་ཤེས་པའི་གཞིར་བཞེངས་ཀྱི་དགོངས་པས། ཆོས་སྐུའི་རང་ཞལ་མཇལ་ན་སྤྱན་རས་གཟིགས་ཡིན་ཏེ། དེ་ལས་གཞན་དུ་གྱུར་པའི་འཕགས་མཆོག་འཇིག་རྟེན་དབང་ཕྱུག་ཅེས་བྱ་བ་ལོགས་ན་བཙལ་དུ་མེད་པའི་ཕྱིར། སྣོད་དག་པ་རི་བོ་ཏཱ་ལའི་ཞིང་ཁམས། བཅུད་དག་པ་ཐུགས་རྗེ་ཆེན་པོའི་ལྷ་ཚོགས་སུ་ཤེས་པའི་དག་པ་རབ་འབྱམས་ཀྱི་ངང་ལས་མི་གཡོ་བར་ཡིག་དྲུག་སྒྲོངས། ཞེས་གསུངས་པའོ། །འོ་ན་སྣང་བ་ལྷའི་དཀྱིལ་འཁོར་ཡིན་དུ་ཆུག་ཀྱང་ཐམས་ཅད་སྤྱན་རས་གཟིགས་ཁོ་ན་ལ་སྦྱར་བ་འདི་ཅི་ཡིན་ཞེ་ན། དེ་ནི་རྒྱུད་དང་སྒྲུབ་ཐབས་རྣམས་ལས་རིགས་བརྒྱ་དང་། རིགས་ལྔ་དང་རིགས་གསུམ་སོགས་ཇི་ལྟར་བསྟན་པ་ཐམས་ཅད་འདིར་རིགས་གཅིག་ཏུ་བསྡུ་བ་ཡིན་ཏེ། གསུམ་པ་གཅིག་ཤེས་ཀུན་གྲོལ་གྱི་གདམས་པར་འགག་སྡོམ་པ། གསུམ་པ་གཅིག་ཤེས་ཀུན་གྲོལ་གྱི་གདམས་པར་འགག་སྡོམ་པ་ནི། ལྷ་གཅིག་རྒྱལ་བ་ཀུན་འདུས་སྤྱན་རས་གཟིགས།། སྔགས་གཅིག་སྙིང་པོ་ཀུན་འདུས་ཡི་གེ་དྲུག། ཆོས་གཅིག་བསྐྱེད་རྫོགས་ཀུན་འདུས་བྱང་ཆུབ་སེམས།། གཅིག་ཤེས་ཀུན་གྲོལ་ངང་ནས་ཡིག་དྲུག་སྒྲོངས།། ཞེས་གསུངས་ཏེ། སྤྱིར་ལྷ་ལ་ཆོས་ཉིད་དོན་གྱི་ལྷ་དང་། ཡེ་ཤེས་པའི་ལྷ་དང་། མཚན་མའི་ལྷ་རྣམ་པ་གསུམ་དུ་ཕྱེས་ནས་བཤད་ན། ཆོས་ཉིད་དོན་གྱི་ལྷ་ནི། ཆོས་ཀྱི་དབྱིངས་སྤྲོས་པ་ཐམས་ཅད་དང་བྲལ་བ་དང་ངོ་བོ་དབྱེར་མེད་པའི་སངས་རྒྱས་ཀྱི་ཡེ་ཤེས་དང་། ཡེ་ཤེས་པའི་ལྷ་ནི། དབྱིངས་དང་ཡེ་ཤེས་ཟུང་དུ་འཇུག་པ་དེ་ཉིད་ཀྱི་ཆོ་འཕྲུལ་ལམ་རྣམ་རོལ་དང་། མཚན་མའི་ལྷ་ནི། རྒྱལ་བ་ཐམས་ཅད་ཀྱི་སྙིང་རྗེའི་རང་གཟུགས་རྣམ་པ་རྟགས་ཀྱི་ཕྱག་རྒྱར་སྣང་བ་ལྷ་གཅིག་ལ་རྒྱལ་བ་ཀུན་འདུས་པ། རིགས་བརྒྱ་རིགས་ལྔར་འདུས་པ། རིགས་ལྔ་གཅིག་ཏུ་འདུས་པ། རིགས་དྲུག་པའི་བདག་ཉིད་འཕགས་མཆོག་སྤྱན་རས་གཟིགས་དང་། གསུང་གཅིག་ཡན་ལག་རྒྱ་མཚོའི་སྒྲ་སྐད་ཀྱིས། །རྒྱལ་བ་ཀུན་དབྱངས་ཡན་ལག་རྣམ་དག་པ། །གསུངས་པ་ལྟ་བུའི་སྔགས་གཅིག་ལ་ཆོས་ཀྱི་སྙིང་པོ་ཀུན་འདུས་པ་གསུང་མཆོག་ཡི་གེ་དྲུག་པ་དང་། དོན་ཆོས་ཉིད་དུ་འདུས་པ་དང་། རྟགས་སེམས་ཉིད་དུ་རྫོགས་པ་དང་། གནད་བྱང་ཆུབ་ཀྱི་སེམས་སུ་འདུས་པའི་ངང་ནས། ཆོས་གཅིག་བསྒོམས་པས་བསྐྱེད་རྫོགས་གཉིས་ཀ་འདུས་པ་བྱང་ཆུབ་ཀྱི་སེམས་ཡིན་པས། གནད་གཅིག་ཤེས་པས་འགག་ཀུན་གྲོལ་བའི་ངང་ནས་ཡིག་དྲུག་སྒྲོངས། ཞེས་གསུངས་པའོ། །རྒྱལ་པོ་སྲོང་བཙན་སྒམ་པོ་འཕགས་མཆོག་སྤྱན་རས་གཟིགས་ཀྱི་སྤྲུལ་བ་ཡིན་པས་དེ་ཉིད་ཀྱིས། ཐུགས་རྗེ་ཆེན་པོའི་དགོངས་པ་ནི་ཀུན་རྫོབ་དང་དོན་དམ་རྟོགས་མ་རྟོགས་ཀྱི་ཁྱད་པར་ཙམ་ཡིན། དོན་དམ་བྱང་ཆུབ་ཀྱི་སེམས་གཅིག་ཏུ་འདུས་པ་ཡིན་གསུངས་པའོ། །དེ་ཡན་གྱིས་བར་དུ་དགེ་བ་ལྟ་སྒོམ་སྤྱོད་པའི་གནད་བསྟན་པ་སོང་བས། དེ་རིང་གཅིག་ཤེས་ཀུན་གྲོལ་ངང་ནས་ཡིག་དྲུག་སྒྲོངས་ཞེས་པའི་མཚམས་སུ་བཞག་ནས། སང་ཉིན་མཐའ་མ་ངེས་འབྱུང་ཆོས་ལ་བསྐུལ་བའི་གཏམ་ལས་མཇུག་ཡོངས་སུ་རྫོགས་པའི་མཛད་བྱང་བསྔོ་སྨོན་དང་བཅས་ཏེ་ཐེངས་འདིའི་ཆོས་ཁྲིད་རེ་ཞིག་ཡོངས་སུ་གྲུབ་པའི་བཀྲ་ཤིས་ཀྱིས་མཇུག་སྡོམ་བྱེད་སར་ཐུག་པའོ། །ད་དེ་རིང་གི་ཆོས་ཁྲིད་གྲོལ་ལ་ཉེ་བ་ཡིན་པས་གོང་དུ་བཤད་པ་བཞིན་དུ་ཆོས་ཁྲིད་གྲོལ་ལ་ཉེ་སོང་སྙམ་མ་ཐག་ཏུ་ཡར་ལ་ཧར་རེ་ལངས་མི་ཉན་པར་དགེ་འདུན་པ་ཡར་བཞེངས་དུས་སུ་རང་ཡང་ཡར་ལངས་ནས་ལག་གིས་ཐལ་མོ་སྦྱར་ནས་དད་པ་དང་དང་བའི་སྒོ་ནས་བླ་མའི་ཕྱོགས་སུ་ལྟ་བཞིན་འདུག་དགོས། དགེ་འདུན་པ་བྱོན་པ་དང་བསྔོ་བ་ཆ་ཚང་མ་བྱས་གོང་ནས་ཁ་ལོག་གེར་འཁོར་ནས་སྒབ་མཐའ་སྤྲུགས་ནས་བུད་འགྲོ་མི་ཉན་པར་ཕྱིར་གྱེད་གོམ་པ་གསུམ་བྱས་ནས་རིམ་བཞིན་གཙུག་ལག་ཁང་གི་སྒོར་མ་ཐོན་བར་དུ་ངག་སྒོ་མི་དཀྲོལ་བར་འགྲོ་དགོས་ཤིང་། ལྷག་པར་དུ་བསྔོ་བ་བྱ་དགོས་ཀྱི་མ་གཏོགས་བསྔོ་བ་མ་བྱས་གོང་ནས་བུད་སོང་བ་ནི་ཅ་ལག་སྡུད་གསོག་མ་བྱས་པར་གང་སར་སྟོར་ནས་སོང་བ་ལྟ་བུ་ཡིན་ལ། ཁྱོད་རང་ལ་ཡོད་པའི་སྒོར་མོ་རྡོག་མ་ཁ་ཤས་དེ་ཉེན་འགོག་སྒྲོམ་དུ་མ་བཅུག་པར་གང་སར་བཞག་ནས་ཁང་པའི་སྒོ་ཟྭའང་མ་བརྒྱབ་པར་ཕྱི་རུ་སོང་ཚེ་རྐུན་མས་ཁྱེར་ནས་བོར་ཤས་ཆེ་ཡང་ཉེན་འགོག་སྒྲོམ་དུ་བཅུག་ན་མི་འབོར་བ་ལྟར་དུ། བསྔོ་བས་རང་གིས་བསགས་པའི་དགེ་རྩ་དེ་སངས་རྒྱས་ཐམས་ཅད་ཀྱིས་བསགས་པའི་ཟག་མེད་ཀྱི་དགེ་བ་དང་། སེམས་ཅན་ཐམས་ཅད་ཀྱིས་བསགས་པའི་ཟག་བཅས་ཀྱི་དགེ་བ་ཐམས་ཅད་དང་བསྲེས་ནས་བྱང་ཆུབ་ཆེན་པོར་བསྔོས་ཏེ་དགེ་རྩ་ཆུད་མི་ཟ་བར་བྱེད་པས། རྒྱ་མཚོའི་ནང་དུ་ཆུ་ཐིགས་བསྲེས་པར་རྒྱ་མཚོ་མ་བསྐམས་བར་དུ་ཆུ་ཐིགས་མི་སྐེམ་པ་བཞིན་དུ་འགའ་རེ་ཆོས་ཁྲིད་ཀྱི་སྐབས་མང་ཤོས་སུ་གཡེང་ཡོད་ལས་ཆེ་ཡང་མཚམས་དང་མཚམས་སུ་ཆོས་ཁྲིད་ལ་སེམས་གཏད་པའི་དགེ་རྩ་ཆུང་ངུ་ཚུན་ཆོད་ཡང་བྱང་ཆུབ་ཆེན་པོར་བསྔོས་ནས་དགེ་བ་སྡུད་གསོག་བྱས་ཚེ་ནམ་ཡང་ཆུད་མི་གཟོན་པའོ།། འདིའི་མཚམས་ནས་རྫོགས་ཆེན་དགོན་གཞུང་གི་དབུ་མཆོད་བརྒྱད་ཅུའི་ནང་གི་མཆོད་ཐུབ་བསྟན་འཇིགས་མེད་ཀྱིས་མགུར་ཞིག་གསུངས་མཛོད། ༈ ཡག་སོང་ཞལ་དཀར་ཚང་གི་གསུང་ཡག་པ་རེད་ལ། ད་དུང་འདོན་པའི་ངག་རྟ་ཡག་ཅིང་ཚིག་གསལ་མོ་རེ་རེ་བཞིན་དུ་གོ་གིན་འདུག དེས་ན་ཕྱིན་ཆད་རང་གི་ཡི་གེའི་ངོས་བལྟས་ཏེ་ཞལ་དཀར་ཚོགས་དྲུག་རང་གྲོལ་གྱི་རྣམ་ཐར་གྱི་མགུར་འབུམ་དང་མི་ལ་རས་པའི་མགུར་འབུམ་བླ་མ་གོང་མ་རྣམ་པའི་མགུར་འབུམ་དེ་དག་རང་གིས་ངག་བཀུག་སྟེ་འདོན་དང་ཆོག་པ་རེད། དེ་གྲྭ་པ་མ་གཏོགས་གཞན་པས་འཐེན་མི་ཉན་པ་མིན། འདིའི་མཚམས་ནས་ངས་སྔོན་འགྲོའི་ངག་འདོན་གྱི་ལུང་འདོན་རྒྱུ་ཡིན། ལུང་འདོན་ཟེར་དུས་དེའི་སྒྲ་དེ་རྣ་ཅོས་གོ་སོང་བས་ཐོབ་སོང་བ་ཡིན་ལ། ཕྱིན་ཆད་རང་གིས་འདོན་ན་འདོན་པའི་དབང་ཆ་ལྟ་བུ་ཐོབ་སོང་བས་ཕན་ཡོན་ཡོད་ཅིང་། ཕྱིན་ཆད་འདི་ཡིན་གཅིག་མིན་གཉིས་ཁ་བཏོན་གྱི་ནང་དུ་བཞག་སྟེ་འདོན་དགོས་པ་ཡིན་ནོ།། ཉིན་བཞི་བའི་ཆོས་ཁྲིད།ད་ཡང་ཆོས་ཉན་པའི་གནས་སྐབས་སུ་ཚང་མས་ངག་བཅད་བྱས་ཏེ་སྒོ་ལུས་ངག་ཡིད་གསུམ་ཆུན་གཅིག་ཏུ་དྲིལ་ནས་ཉན་དགོས། ཐེག་པ་ཆེན་པོའི་མདོ་སྔགས་ཀྱི་ཆོས་སྤྱི་དང་། ཁྱད་པར་དུ་མདོ་སྔགས་ཟུང་དུ་འབྲེལ་བའི་དམ་པའི་ཆོས་འདི་ལྟ་བུ་འཆད་ཉན་གྱི་སྐབས་སུ། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་གཏན་བདེ་རྫོགས་པའི་བྱང་ཆུབ་ཀྱི་གོ་འཕང་དམ་པར་འགོད་པའི་ཆེད་དུ་བདག་གིས་ད་རེས་དམ་པའི་ཆོས་ཉན་ཅིང་། དེའི་དོན་ཚུལ་བཞིན་དུ་བསྒྲུབ་པར་བྱ་སྙམ་པའི་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དང་པོ་བཅོས་མའི་ཚུལ་གྱིས་སྒོམ་ཞིང་། མཐར་བཅོས་མ་མིན་པ་རྒྱུད་ལ་བསྐྱེད་དགོས། འོ་ན་སེམས་ཅན་ཁམས་དབང་མོས་པ་སྣ་ཚོགས་པ་ཅན་ཡིན་པས། འགའ་རེས་བསམ་པ་རྣམ་པར་དག་པ་བྱང་ཆུབ་སེམས་ཀྱི་ཀུན་སློང་དེ་ལྟར་བསྐྱེད་ཐུབ་རུང་། འགའ་རེས་དེ་བཞིན་བསྐྱེད་མ་ཐུབ་ན་ཇི་ལྟར་འགྱུར་ཞེ་ན། ཆོས་ཐེག་པ་ཆེན་པོའི་ཆོས་ཡིན་ཡང་དེ་སྒྲུབ་པའི་གང་ཟག་གི་བསམ་པའི་ཁྱད་པར་གྱི་དབང་གིས་ཐེག་ཆེན་སེམས་བསྐྱེད་ཀྱིས་མ་ཟིན་པའི་ཆོས་ནི་ཐེག་པ་ཆེན་པོའི་ཆོས་གྲལ་དུ་འགྲོ་བ་མིན་པར་ཐེག་དམན་གྱི་ཆོས་སུ་འགྱུར་ཞིང་། ཆོས་ཐེག་པ་དམན་པའི་ལུགས་ཀྱི་ཆོས་ཡིན་རུང་བསམ་པ་ཐེག་ཆེན་བྱང་ཆུབ་སེམས་ཀྱིས་ཟིན་ན་ཐེག་ཆེན་གྱི་ཆོས་སུ་འགྲོ་ལ། དེ་བཞིན་དུ་དགེ་སྡིག་ཐམས་ཅད་ཀྱང་བསམ་པའི་བྱེ་བྲག་ཡིན་པའོ། །སེམས་ཅན་ཐམས་ཅད་སངས་རྒྱས་ཐོབ་པའི་རྒྱུར་དམིགས་ནས་བསྒྲུབས་པ་མ་ཡིན་པའི་དགེ་རྩ་ནི་སངས་རྒྱས་ཐོབ་པའི་རྒྱུ་རུ་མི་འགྱུར་ཞིང་། རང་ཉིད་འཁོར་བ་དང་ངན་སོང་གི་སྡུག་བསྔལ་ལས་ཐར་ཆེད་དུ་ཆོས་ཞུས་ན་སྐྱེས་བུ་འབྲིང་གི་ལམ་རང་ཉིད་ཞི་བདེར་སྦྱོར་བའི་ཆེད་ཙམ་ཡིན་པ་སྟེ། དེ་ཡང་འཁོར་བ་དང་ངན་སོང་ལས་ཐར་འདོད་ཀྱི་ངེས་འབྱུང་ཡོད་པའི་ཐོག་ནས། རང་ལུགས་ཀྱི་མཆོག་གསུམ་ལ་སྐྱབས་སུ་འགྲོ་བ་སྔོན་དུ་སོང་བའི་ལུང་སྡེ་སྣོད་གསུམ་གྱི་ཐོས་བསམ་སྒོམ་གསུམ་ལ་བརྟེན་ནས། ལམ་བསླབ་པ་གསུམ་གྱི་ཉམས་ལེན་རིམ་པ་ཅན་ཞིག་བརྒྱུད་ནས། ལམ་དེ་དང་བསྟུན་པའི་སྤང་བྱ་སྤངས། རྟོགས་བྱ་རྟོགས། བདག་མེད་རྣམ་གཉིས་གང་ལ་གང་འཚམས་རྟོགས་ནས་ཁམས་གསུམ་གྱི་ཉོན་མོངས་པའི་དགྲ་བཅོམ་པའི་ཞི་བ་མྱང་འདས་ལ་ཕྱོགས་རྒྱུ་ཡིན་པའོ། །དེ་ལྟའི་ཆ་ཚད་དང་ཡང་མི་ལྡན་པས་སྐྱེས་བུ་འབྲིང་ཡང་མིན་པའི་ཕྱི་མ་ལྷ་མིའི་བདེ་འབྲས་ཙམ་དོན་དུ་གཉེར་ནས། ང་རང་ཤི་སྐབས་དམྱལ་བ་ཡི་དྭགས་དུད་འགྲོ་གསུམ་ལ་མ་སྐྱེས་ན་བསམ་མཁན་ནི་སྐྱེས་བུ་ཆུང་ངུ་ཞེས་བྱ་ཞིང་། དམིགས་ཡུལ་དེ་ཙམ་འཛིན་པ་དག་གིས་ཀྱང་མི་དགེ་བཅུ་སྤངས་ཤིང་། དགེ་བ་བཅུ་ཚུལ་བཞིན་དུ་བསྒྲུབ་དགོས་ཤིང་། ད་དུང་འདོད་ཁམས་ལས་འདས་པའི་ལྷ་ཡུལ་དུ་སྐྱེ་དགོས་བསམ་མཁན་ཞིག་གིས་ནི་བསམ་གཟུགས་ཀྱི་ཏིང་ངེ་འཛིན་ཚོགས་བསག་དང་འབྲེལ་བར་བསྒོམ་དགོས། འཇིག་རྟེན་མི་ཡུལ་འདིར་ཞེན་ཆགས་ཅན་ཚོས་ད་དུང་མི་ལུས་ཤིག་བླངས་ན་བསམ་ནས། དེ་ཡང་ཕྱི་མ་ངན་སོང་གསུམ་དུ་མ་སྐྱེས་པའི་མི་ལུས་ཡིན་ཙམ་གྱིས་མི་ཆོག་པར་ས་ཆ་སྐྱིད་ས། འབྱོར་བ་རྒྱས་ས་ཞིག་ཏུ་སྐྱེ། རང་ཉིད་ལ་རིགས་དང་། གཟུགས་དང་། ལང་ཚོ་དང་། འབྱོར་བ་དང་། མངའ་ཐང་ཕུན་སུམ་ཚོགས་པ་དང་། ཚེ་རིང་བ་དང་། ནད་མེད་པ་དང་། ཅི་བསམ་འབད་མེད་ལྷུན་གྱིས་འགྲུབ་པ་དང་། གཏམ་མི་སྙན་པ་དང་། མི་འདོད་པའི་ཚིག་གཅིག་གི་སྒྲ་ཙམ་ཡང་གོ་རྒྱུ་མེད་པའི་མི་ལུས་ཤིག་འདོད་ན་ནི། མི་དགེ་བ་བཅུ་སྤངས་པ་དང་། དགེ་བཅུ་ཁྱད་པར་བ་བསྒྲུབས་ན་འགྲུབ་པ་ཡིན་ལ། ད་རུང་ཕར་ཕྱིན་དྲུག་སྟེ། སྦྱིན་དང་། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་རྣམས་བསྒྲུབས་ན་དེ་བས་ཀྱང་ལྷག་པ། སྦྱིན་པས་ལོངས་སྤྱོད་ཆེ་བ་དང་། ཚུལ་ཁྲིམས་ཀྱིས་གཟུགས་མཛེས་ཐོབ་པ་དང་། བཟོད་པས་དགྲ་མེད་པར་འགྱུར་བ་དང་། བརྩོན་འགྲུས་ཀྱིས་རྟག་ཏུ་ལེ་ལོ་དང་གཡེང་བས་མི་ཁྱེར་བ་དང་། བསམ་གཏན་གྱིས་མཐོང་བའི་ཆོས་ལ་བདེ་བར་གནས་ཐུབ་པ་དང་། ཤེས་རབ་ཀྱིས་འདི་དང་ཕྱི་མའི་ཕན་བདེའི་སྒོ་འཕར་རྣམ་དཔྱོད་ཀྱིས་འབྱེད་ཐུབ་པ་འོང་བའོ། །ཚེ་ཕྱི་མར་མི་སེམས་པར་ཚེ་འདི་རྐྱང་པར་བསམ་པའི་བློ་ཆུང་ནང་གི་ཡང་ཆུང་། རྒྱང་མིག་གྱེན་ཁ་མ་གཏོགས་མི་རིག་པ་དང་། ཕྱི་ཐག་སང་ཉིན་ཕན་ལས་མེད་མཁན་ཞིག་ཡིན་རུང་། སང་ཉིན་གྱི་འཚོ་བ་བདེ་མོ་སྐྱིད་པོ་ཡོང་པའི་དོན་དུ། དེའི་རྒྱུ་ལ་དེ་རིང་ནས་བསམ་བློ་གཏོང་དགོས་ལ། མི་ཞིག་ཡིན་ཚེ་ཇི་ལྟར་ཞན་རུང་ཁ་སང་། དེ་རིང་། སང་ཉིན་གསུམ་གྱི་སྔ་བར་ཕྱི་གསུམ་དྲན་ཤེས་པས། ཁ་སང་གི་ང་དེ་རིང་གི་ང་མིན་པར་སྐད་ཅིག་སྐད་ཅིག་གིས་འགྱུར་སོང་བ་ཤེས་དགོས། འོ་ན་ཁ་སང་གི་ང་དེ་རིང་གི་ང་མིན་ན་འདྲེ་ཡིན་ནམ་ཞེ་ན། ལོ་བརྒྱད་ཀྱི་སྐབས་ཀྱི་ཁྱོད་རང་ད་ལྟའི་ཁྱོད་རང་ཡིན་སྣང་ཤར་ན་ཁྱོད་རང་ཆུང་དུས་ཀྱི་པར་ལ་ལྟོས་དང་མིན་པར་ཤེས། དེས་ན་ཁ་སང་གི་ང་དེ་རིང་བསྡད་མེད་པས་སང་ཉིན་ཡང་དེ་བཞིན་དུ་འགྱུར་བ་ཡིན་པ་ཤེས་དགོས། ཁ་སང་བདེ་ནས་ཡོད་ཀྱང་། དེ་རིང་ན་བཞིན་འདུག་པས། སང་ཉིན་ཤི་མེད་པའང་སུ་ཡིས་ཤེས། དེ་བཞིན་ན་ནིང་ད་ལོ་སང་ཕོད་གསུམ་ལ་ཡང་འགྱུར་བ་དེ་ལས་ཆེ་བ་འགྲོ་བས། མི་ཚེ་ལ་རྟག་བརྟན་དང་། དབུལ་ཕྱུག་ལ་ངེས་པ་དང་། དགྲ་གཉེན་ལ་གཏན་ཁེལ་ཡོད་པ་མིན་པའི་ཚུལ་ལ་དེ་ལྟར་བསམ་བློ་བཏང་ན་ཁ་སང་ཡོད་པ་ལྟར་དུ་སྐྱེ་བ་སྔ་མ་ཡོད་ཅིང་། སང་ཉིན་ཡོད་པ་ལྟར་དུ་ཚེ་ཕྱི་མའང་དེ་རིང་མ་རིག་པས་མེད་པར་མི་འགྱུར་བར་ཡོད་ལ། ད་སྔོན་གྱི་མི་ཚེ་སོང་ཟིན་པ་ཕྱིར་ཡོང་མེད་རུང་། སང་ཉིན་ཕན་ཆད་འབྱུང་འགྱུར་ཚེ་སྨད་ཀྱི་ཕྱི་འདང་མི་རྒྱག་ཐབས་མེད་ཅིང་། ཕྱི་མ་ཞེས་པའང་ཐག་རིང་རྒྱང་གི་སྐད་ཆ་མིན་པར་དབུགས་ཕར་འཕངས་ཚུར་ལ་མ་འདུས་ན། ཚེ་འདི་ཕྱི་གཉིས་ཀའི་སོ་མཚམས་སུ་ཐོན་པ་ཡིན། ཐམས་ཅད་ཀྱིས་ང་ཤི་དུས་ཇི་ལྟར་བྱ་སྙམ་རུང་། དེ་ནི་བསམ་མེད་ཅོལ་ཆུང་བྱིས་པའི་འདང་རྒྱག་ཡིན་པ་སྟེ། རང་གཅིག་པུར་ཤི་རྒྱུ་ལ་འདང་བརྒྱབ་པས་མི་ཆོག་སྟེ། ཁྱིམ་ན་ཕ་མ། པང་ན་བུ་རྒྱུད། གཉེན་དང་གྲོགས་པོ་ཡོད་ལ། དང་པོ་གཅིག་ངོ་གཅིག་གིས་མི་ཤེས་པའི་རྣམ་ཤེས་འཁྱམ་པོ་ཁ་ཤས་ཤ་ཁྲག་གི་ལུས་རྟེན་འདིར་ཉིང་མཚམས་སྦྱར་ནས། ལས་ཇི་ལྟ་བུ་ཞིག་གིས་སྦྲེལ་བ་ཡིན་རུང་། གཅིག་སེམས་གཅིག་ལ་ཆགས། ཤ་དང་རུས་པས་འབྲེལ། བརྩེ་གདུང་འཆིང་ཞགས་ཀྱིས་བཅིངས་ནས། ཉིན་གཅིག་གི་ལམ་ཙམ་དུ་སོང་ཡང་འགྲོ་མཁན་འདུག་མཁན་ཚང་མས་གཅིག་སེམས་གཅིག་ལ་འཁྲེང་བ། ཁོའི་ཚབ་ཏུ་ང་ཤི་ཐུབ་སེམས་མཁན་རྣམས་ཀྱི་ཚེ་ཕྱི་མའི་སྐྱིད་སྡུག་ལ་འདང་རྒྱག་མ་བྱས་དུས། དུད་འགྲོ་ཐ་ཤལ་དང་མཚུངས་པ་སྟེ་དུད་འགྲོས་ཀྱང་བུ་རྒྱུད་ལ་ཤིན་ཏུ་གཅེས་སེམས་ཤེས་པའོ། །དེ་ལྟར་འདང་རྒྱག་བྱས་ན་ཚེ་འདིའི་བཟའ་ཚོ་གཉེན་གྲོགས་དང་འདྲ་བར་སྐྱེ་བ་སྔོན་མ་ལ་ཡང་དེ་བཞིན་དུ་བརྩེ་བའི་ཕ་མ་སྤུན་གྲོགས། གཅེས་པའི་བུ་དང་བཟའ་ཚོ་རྣམས་ཡོད་ཀྱང་སྐྱེ་བ་སྔ་ཕྱི་བརྗེས་ནས་ངོ་མི་ཤེས་པ་ཙམ་མོ། །ན་ནིང་གི་ཨ་མ་དང་ད་ལོའི་ཨ་མ་ལ་ཁྱད་མེད་པ་དང་། ཨ་མ་ལ་ཕར་རྒྱབ་ཐག་རིང་ན་ཡོད་པ་དང་། ཚུར་ནང་ཐག་ཉེ་ན་ཡོད་དུས་སུ་གཅེས་སེམས་དང་། བརྩེ་གདུང་ལ་ཁྱད་པར་མེད་པ་ལྟར་དུ་སྐྱེ་བ་སྔོན་རྗེས་ཀྱི་ཨ་མ་ལ་ཁྱད་པར་ཅི་ཞིག་ཡོད། གཞན་ཡང་རང་རེའི་ཚེ་སྟོད་ཀྱི་གནའ་ཤི་རྙིང་པ་དང་། ད་ཤི་གསར་བའི་མི་སྙིང་དམར་ཅན་རྣམས་ཕྱི་མའི་ལམ་ཆེན་དུ་བལྟས་བལྟས་རིག་རིག་ལ་བུད་སོང་བས། ཤི་ནས་སྐྱེ་བ་གར་བླངས་མི་རིག་ཅིང་། འགའ་རེ་དང་ཐུག་བཞིན་ཡོད་ནའང་ལུས་རྟེན་བརྗེས་ནས་སྔོན་མ་དང་ལུས་རྟེན་མི་འདྲ་བས་ཕན་ཚུན་མི་ཤེས་ཤིང་། འགའ་རེས་དམྱལ་བ་ཡི་དྭགས་ཀྱི་སྡུག་བསྔལ་ཡང་མྱོང་བཞིན་ཡོད་ལས་ཆེ་སྟེ། མི་ཐོག་སྔོན་མ་དག་གིས་དུས་བཟང་ངན་གཉིས་ཀའི་སྐབས་སུ། ཤུལ་གྱི་བཟའ་ངན་ཁྱིམ་ཚང་ལ་སེམས་པའི་ཁུལ་བྱས་ནས་སྡུག་སྡིག་པ་ལ་ཅི་ཙམ་འབགས་མེད། འགའ་རེས་ཚེ་སྟོད་ལྷ་མེད་འདྲེ་མེད་ཀྱི་ལྟ་བ་འཛིན་ཁུལ་བྱས་ཀྱང་། ནམ་ཞིག་དེ་ཡང་རྨོངས་དད་ཀྱི་རིགས་ཡིན་པ་དང་། རྒས་ཁར་ཤི་ཁ་རུ་དེ་ལ་བློ་གཏད་མེད་པར་ཤེས་ནས་འགྱོད་ཀྱང་། ཆོས་ངོ་མ་གོ་མྱོང་མེད་ནས་སྒྲུབ་མ་ཤེས་ནས་ཆོས་འགྲུབ་པའི་བསོད་ནམས་མེད་པར་ཆོས་མེད་ལག་སྟོང་ངང་ཤི་མིག་གསོན་ལ་ཡང་བལྟ་བྱས་ནས་སོང་བ་མང་བས། དེ་དག་ལ་བསམ་བློ་རེ་བཏང་ན། ངས་ཕྱི་མར་ལྷ་མིའི་བདེ་འབྲས་ཙམ་ཐོབ་པས་མི་ཆོག་པར་འཁོར་བའི་གནས་ནས་གཏན་དུ་མ་ཐར་དུས་ནམ་ཞིག་ངན་སོང་དུ་ལྷུང་བ་ལ་སྔ་ཕྱི་ཙམ་དུ་འདུག་ཅིང་། ལར་རང་གཅིག་པུ་བསམ་པ་ནི་ནོར་བ་ཚབས་པོ་ཆེ་སྟེ། རང་ཞེས་པ་ནི་གཅིག་པུ་ཡིན་ལ་གཞན་ཞེས་པ་ནི་ཤིན་ཏུ་མང་བ་ཡིན་པས། མི་མང་ཇི་ལྟར་གྱུར་རུང་གྱུར། ང་གཅིག་པུ་བཟང་དགོས། ཡག་དགོས་ཞེས་པ་ནི། མི་བསམ་ཤེས་ཤིག་གིས་སེམས་པ་ཡང་མིན་ལ། བསམས་ན་ངོ་ཚས་ཀྱང་ཟེར་མི་ཐུབ་པའི་ཁྲེལ་མེད་ཀྱི་སྐད་ཆ་སྟེ། རང་གཅིག་པུ་བཟང་དགོས་ཞེས་པའི་མི་ནི་མིའི་ནང་གི་ཐ་ཤལ་ཡིན་པས། རང་གཅིག་པུའི་བདེ་ཐབས་ལ་སེམས་པར་མི་བྱ་བར། ཕ་མ། སྤུན་སྲིང་། གཉེན་དང་། མཛའ་གྲོགས། བུ་དང་། ཚ་བོ། གྲོང་རོགས། ཁྱིམ་མཚེས། ཡུལ་སྡེ་བུ་ཕྲུག གཞན་ཡང་ཚེ་སྐྱེ་བ་རེ་ལའང་ཕ་མ་ཉེ་འབྲེལ་རེ་ཡོད་ཅིང་། སྐྱེ་བ་ཐོག་མེད་ཀྱི་མཐའ་ལ་དེད་ནས་ཐུག་ཏུ་མེད་པས། སེམས་ཅན་ཐམས་ཅད་ཕ་མ་དང་། སྙིང་རྗེའི་ཡུལ་དུ་འདུག་པའི་བསམ་པ་ནི་མི་ཞིག་ལ་སེམས་ཤིག་ཡོད་ཚེ་མི་སྐྱེ་ཐབས་མེད་པའོ། །དེས་ན་ཆོས་བཤད་སྐབས་དལ་འབྱོར་རྙེད་དཀའ་དང་། ཚེ་མི་རྟག་པ། འཁོར་བའི་ཉེས་དམིགས་ལ་སོགས་པ་གང་བཤད་ཀྱང་། སྡུག་རབས། ཐ་རབས་བཤད་བཞིན་ལྟ་བུར་འདུག་པས་དེ་ལ་ཉན་པར་མི་སྤྲོའོ་ཞེས་སེམས་པར་མི་བྱ་སྟེ། འཁོར་བའི་སྡུག་བསྔལ་འདི་དག་སྐྱིད་རིག་མ་མྱངས་པའི་སེམས་ཅན་གྱིས། དམྱལ་བ་རང་ཡུལ་ལ་དུང་། ཞེས་པ་ལྟར་དུ། སྡུག་ལ་སྡུག་ངོ་མ་ཤེས་པར་སྐྱིད་དུ་འཁྲུལ་བའི་ཚུལ་གསལ་བཤད་བྱས་ནས་ར་སྤྲོད་བྱེད་བཞིན་ཡོད་པ་སྟེ། དེ་ཡང་འཁོར་བའི་གནས་འདིར་སྡུག་བསྔལ་ཆེ་ཚུལ་དང་། མི་ལུས་མཐོ་རིས་ཀྱི་ལུས་རྟེན་ཡིན་རུང་བདེ་སྐྱིད་མེད་པའི་ཚུལ་ནི་ཉན་བསམ་རུང་མ་བསམ་རུང་། རང་རེས་མྱོང་བཞིན་ཡོད་པའི་དངོས་ཡོད་གནས་ཚུལ་ཡིན་པའོ། །འོ་ན་དེ་བཤད་པས་ཅི་ཕན་ཞེ་ན། སྡུག་བསྔལ་དེ་བདེ་བའི་ལམ་དུ་བསྒྱུར་ཐབས་དང་། ཕྱིན་ཆད་སྡུག་བསྔལ་དེ་མྱོང་མི་དགོས་པ་དང་། བདེ་བ་རྙེད་ཐབས་སུ་སྡུག་བསྔལ་སྔོན་དུ་བཤད་ནས་དེ་སེལ་ཐབས་དང་། བདེ་སྐྱིད་གང་ཡིན་དང་། དེ་ལག་ཏུ་ལོན་ཐབས། རང་ཐོག་ཏུ་སྨིན་ཐབས་རྣམས་རིམ་པ་བསྒྲིགས་ནས་བཤད་བཞིན་ཡོད་པའོ། །མདོར་ན་ཆོས་བཤད་ཅེས་པ་ནི་མ་འོངས་པར་རང་གཞན་ཐམས་ཅད་ཀྱི་ཚེ་འདི་ཕྱིའི་བདེ་ཐབས་ལ་གྲོས་གཞི་འདོན་པ་སྟེ། སྡུག་བསྔལ་ལ་སྡུག་བསྔལ་དུ་མི་ཤེས་པའི་བླུན་རྨོངས་མགོ་འཁོར་ནས་བསྡད་ཡོད་པ་རྣམས་ལ་ཁྱད་པར་དུ་འཁོར་བའི་སྡུག་བསྔལ་གྱི་གནད་བཤད་པ་དང་། ཚེ་ཕྱི་མ་ཨེ་ཡོད་ཅི་ཤེས་བསམ་ནས་རྒྱུ་འབྲས་ཀྱི་གནད་དོན་མི་ཤེས་པ་རྣམས་ལ་ལས་རྒྱུ་འབྲས་ཀྱི་འགྲོ་སྟངས་བཤད་ནས་ཤེས་ཐབས་བྱེད་པ་དང་། མི་ཚེ་ལ་རྟག་འཛིན་བྱས་ནས་ཤི་སྣང་ཞེ་ལ་མི་ཤར་བ་རྣམས་ལ། ཝ་ཡེ། གཟབ་པར་གྱིས་ཤིག ཁྱོད་འཆི་བདག་གཤིན་རྗེས་མི་ཁྲིད་ཅེས་ཚེ་ཐར་བྱས་སམ། ནམ་འཆི་ཆ་མེད་དང་། འཆི་རྐྱེན་ངེས་མེད་ཡིན་པས། འཆི་བ་རང་ཐོག་ཏུ་གློ་བུར་ཐོན་ན་མི་འཇིགས་མི་སྐྲག་པའི་དཔའ་གདེང་ཁྱོད་ལ་ཅི་ཡོད་ཅེས་པ་ལ་སོགས་པའི་འཆི་བ་མི་རྟག་པའི་ལབ་གླེང་བྱ་བ་དང་། ཆོས་ལྡན་དལ་འབྱོར་གྱི་ལུས་ཤིག་རྙེད་པ་འདིའི་རིན་ཐང་ཤེས་ཀྱིན་མེད་ཚེ། ཆོས་ལྡན་དལ་འབྱོར་ཚང་པའི་ལུས་རྟེན་རྙེད་པར་དཀའ་རབས་དང་། སྲོག་ཆགས་གཞན་དང་མི་གཉིས་ཀའི་གྲངས་ཀྱི་མང་ཉུང་། མིའི་ནང་ནས་བསོད་ནམས་ཅན་ཉུང་ཤས་ཤིག་ལས་གཞན་ལ་དལ་འབྱོར་ཚང་མེད་ཚུལ། དལ་འབྱོར་སྟོང་ལོག་བྱས་ན་དོན་མེད་ཆུད་ཟོས་ཡིན་པའི་ཚུལ་སོགས་དལ་འབྱོར་རྙེད་དཀའི་ཆོས་བཤད་དགོས་ཤིང་། འདི་དག་མཐའ་གཅིག་ཏུ་ཁྲིད་སྦྱོང་ལྟར་དུ་རིམ་པ་སྒྲིག་དགོས་པའི་ངེས་པ་མེད་པར་ནད་མ་ངེས་པ་ལ་སྨན་དེ་བཞིན་དུ་སྤྲད་པ་དང་མཚུངས་པ་སྟེ། ཕན་ཐོགས་གང་ཆེའི་གནད་དང་བསྟུན་ནས་ཆོས་བསྟན་དགོས་པའོ། །གང་ལྟར་ཡིན་རུང་བདེ་བ་ཞེས་པ་ཕྱི་དངོས་པོའི་རྒྱུ་ནོར་ལས་ཐོབ་སྣང་གིས་དེ་ཐོབ་ཐབས་བྱ་ཁུལ་གྱིས་མི་ཚེ་ཟད་དུ་འཇུག་པ་ནི་ནོར་བ་ཆེའོ། །ཆོས་སྒྲུབ་པ་ནི་མངོན་མཐོ་ངེས་ལེགས་གཉིས་ཐོབ་ཆེད་ཡིན་ཞིང་། མཐར་ཐུག་ཏུ་ངེས་པར་ལེགས་པ་སངས་རྒྱས་ཀྱི་གོ་འཕང་དོན་དུ་གཉེར་བྱ་དངོས་ཡིན་པས་ཐོབ་དགོས་ཀྱང་། དེ་མ་ཐོབ་པའི་གནས་སྐབས་སུ་མངོན་མཐོ་ལྷ་མིའི་ལུས་རྟེན་བཟང་པོ་ཆོས་སྒྲུབ་པའི་སྣོད་དུ་རུང་བ་ཞིག་ཐོབ་དགོས། དེ་ཡང་ཆོས་ནོར་འདོད་དང་ཐར་བ་སྟེ་ཕུན་ཚོགས་སྡེ་བཞི་འཛོམས་པ་ཞིག་དགོས་པ་སྟེ། ནོར་གྱི་འདོད་ཡོན་ཚོགས་ན་བསོད་ནམས་ཀྱི་ཚོགས་གསོག་ཆོག་པ་དང་། ཆོས་ཡོད་ན་ཐར་བ་ཐོབ་ཐུབ་པ་དང་། བསོད་ནམས་ཀྱི་ཚོགས་ལ་བརྟེན་ནས་ཡེ་ཤེས་ཀྱི་ཚོགས་རྫོགས་ཤིང་མཐར་ཐུག་སྐུ་གཉིས་ཀྱི་གོ་འཕང་ཐོབ་དགོས་པའོ། །དེ་ལྟར་ནའང་ཁྱིམ་ན་གནས་པའི་ཆོས་བྱེད་པའམ། ཁྱིམ་ན་གནས་པའི་བྱང་ཆུབ་སེམས་དཔའ་པས་འདོད་པ་ཆུང་ལ་ཆོག་ཤེས་པའི་འཕགས་པའི་ནོར་དང་མ་བྲལ་པའི་འཇིག་རྟེན་པའི་འཚོ་ཚིས་ཆོས་དང་མཐུན་པར་བྱ་དགོས། དེ་ཡང་ཆོས་པས་སྤྲང་པོ་བྱ་དགོས་ཞེས་པ་མིན་པར་བསོད་ནམས་ཅན་གྱིས་ནོར་ཕར་བཏང་ཡང་ནོར་གྱིས་ཚུར་མི་འདོར་ལ། བསོད་ནམས་མེད་ན་མིས་རྒྱུ་ནོར་ཕར་མ་དོར་ཡང་རྒྱུ་ནོར་གྱིས་མི་ཚུར་འདོར་བས་ཐོད་པའི་ཨ་ཡིག་དཀར་པོ་ལ་རི་མོ་གང་བྲིས་བསོད་ནམས་ལ་རགས་ལས་སོ། །དེས་ན་མིའི་ཆེད་དུ་ནོར་གྱི་གསོག་གྲུན་བྱ་དགོས་པ་ལས། རྒྱུ་ནོར་གསོག་གྲུན་གྱི་ཆེད་དུ་མི་བློས་བཏང་མི་ཉན་ཞིང་། བློས་བཏང་ཞེས་པ་རྒྱུ་ནོར་གྱི་ཆེད་དུ་མི་སྲོག་ཞ་བ་མ་ཡིན་རུང་རྒྱུ་ནོར་གྱི་དོན་དུ་མི་ཚེའི་མགོ་རྣ་དང་ཁྲེལ་བོར། ལས་རྒྱུ་འབྲས་རྩིས་མེད་བྱས་ནས་ཡོད་ཚད་དོར་བ་བྱས་ཚེ་ལན་གཅིག་ཤི་བ་ལས་སྡུག་པའི་བྱ་ཉེས་ཡིན་པས། དེ་ལས་ཤི་ཤུལ་གཙང་མ་རུ་སོང་ན་ཤི་བོ་རང་ཉིད་བླ་བདེ་བ། བླ་བདེ་མིང་དོན་མཚུངས་པའི་རྗེས་དཀར་བཞག་ནས་བུད་སོང་ན་ལེགས་པའོ། །དེ་ལྟར་ཤི་བ་ནི་འཕུར་བ་མ་ཡིན་རུང་ཤི་བ་ཤོར་བ་གཉིས་ཀ་མིན། དེས་ན་ཕྱིའི་དངོས་པོའི་རྒྱུ་ནོར་གྱི་ཟས་གོས་འདུག་གནས་ཀྱི་འཚོ་བའི་མཐུན་རྐྱེན་ཚོགས་པ་དང་མཉམ་དུ། ནང་ཆོས་ཀྱི་སེམས་ཁམས་ཀྱི་འཚོ་བའི་ཐད་ནས་ཕྱུག་པོར་འགྱུར་དགོས། དད་དང་། ཚུལ་ཁྲིམས། གཏོང་ལ་གོམས་པ་ལ་སོགས་པའི་འཕགས་པའི་ནོར་རྣམས་མེད་ཚེ་དབུལ་བོ་ཡིན་པའོ། །དབུལ་བོ་ཅི་ལ་ཡིན། རྒྱུ་ཡོད་ཅེ་ན། མིག་གཏན་དུ་བཙུམས་ནས་ཚེ་ཕ་རོལ་ཏུ་རིང་འགྲོ་བྱེད་པའི་ཉིན་ལ་རྒྱུ་ནོར་དངོས་པོའི་ཅ་ལག་མ་ཟད། ང་དང་། ངའི་ལུས་ཞེས་འབོད་སའི་བེམ་གོག་ཤུལ་དུ་བསྐྱུར་ནས་འགྲོ་རན་པས། དེའི་དུས་སུ་ཅང་མེད་དབུལ་བོ་ཡིན་པའོ། །དེ་ལྟའི་འདང་རྒྱག་གིས་སྔ་བསམ་ཕྱི་འདང་གི་ཆ་བཞག་དང་འཆར་གཞི་ཞོག་པའི་སྟེང་ནས། དམ་པའི་ཆོས་ཉན་དུས་སུ་རང་ཉིད་ལ་ཉོན་མོངས་དུག་ལྔ་དུག་གསུམ་གྱི་ནད་ཀྱིས་མནར་བཞིན་པའི་ནད་པའི་འདུ་ཤེས་དང་། ཆོས་ལ་ནད་དེའི་གདུང་བ་ལས་སྐྱོབ་ཅིང་གསོ་བའི་སྨན་གྱི་འདུ་ཤེས་དང་། ཆོས་བཤད་མཁན་གྱི་དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས་དང་། དམ་པའི་ཆོས་ལ་དཀོན་པའི་འདུ་ཤེས་བསྐྱེད་ནས་དེ་ལྟ་བུའི་ཀུན་སློང་དང་མ་བྲལ་བའི་སྒོ་ནས། གུས་འདུད་ཞེ་ས་དང་བཅས་བཞིན། དང་བ་དང་དད་པའི་སྤྱོད་ལམ་གྱིས་ཆོས་ཉན་དགོས་པའོ། །དེ་ཡང་སངས་རྒྱས་འོད་དཔག་མེད་པའི་དཀྱིལ་འཁོར་ཞལ་ཕྱེས་ནས་བདེ་ཆེན་ཞིང་སྒྲུབ་དང་བསྟུན་ཏེ། གང་ཞིག་འཆད་ཉན་བྱ་བའི་ཆོས་ནི། རྫོགས་ཆེན་དཔལ་སྤྲུལ་འཇིགས་མེད་ཆོས་ཀྱི་དབང་པོའི་གསུང་ཐོག་མཐའ་བར་གསུམ་དུ་དགེ་བའི་གཏམ་ལྟ་སྒོམ་སྤྱོད་གསུམ་ཉམས་ལེན་དམ་པའི་སྙིང་ནོར་ཞེས་བྱ་བ་འདི་ཉིད་ཐུན་མོང་ལྟར་དུ་བཀྲལ་ཏེ་འཆད་པའི་སྐབས་ལས། ཀླད་ཀྱི་དོན་སོང་ནས། གཞུང་གི་དོན་ལ་ཡང་གསུམ་ལས། དང་པོ་སྙིགས་མའི་སྤྱོད་ལ་སྐྱོ་བའི་གཏམ་དང་། གཉིས་པ་བར་དུ་ལྟ་སྒོམ་གཏན་ལ་འབེབ་པའི་གཏམ་སོང་ནས། གསུམ་པ་ཐ་མར་ངེས་འབྱུང་ཆོས་ལ་སྐུལ་བའི་གཏམ། གསུམ་པ་ཐ་མར་ངེས་འབྱུང་ཆོས་ལ་སྐུལ་བའི་གཏམ་ལ་བཅུ་གསུམ་ལས། དང་པོ་བྱ་བྱེད་ཅམས་སེ་བཞག་ལ་ཡིག་དྲུག་བཟླ་བར་བསྟན་བ། དང་པོ་བྱ་བྱེད་ཅམས་སེ་བཞག་ལ་ཡིག་དྲུག་བཟླ་བར་བསྟན་བ་ནི། བྱས་པས་ཅི་བྱ་བྱ་བྱེད་འཁོར་བའི་རྒྱུ།། བྱས་ཚད་སྙིང་པོ་མེད་པའི་ཚུལ་ལ་ལྟོས།། ད་ནི་བྱར་མེད་ངང་དུ་བཞག་ན་དགའ།། བྱ་བྱེད་ཅམས་སེ་ཞོག་ལ་ཡིག་དྲུག་སྒྲོངས།། ཞེས་གསུངས་ཤིང་། དཔལ་སྤྲུལ་རིན་པོ་ཆེ་ཉིད་ཀྱི་གསུང་གཞན་ལས་ཀྱང་། གང་ལྟར་བསམས་ཀྱང་འགྲུབ་དུས་མི་འདུག་གི །ཇི་ལྟར་བྱས་ཀྱང་སྙིང་པོ་མི་འདུག་གི །བྱས་བྱས་བསྒྲུབས་བསྒྲུབས་རང་གཞན་བསླུས་མཐོང་ནས། །ད་ནི་བྱར་མེད་འཆི་བ་སྒུག་སྙིང་འདོད། །གསུངས་པ་ལྟར་དུ་འཇིག་རྟེན་འདིར་སྣང་དང་འབྲེལ་བའི་བྱ་བ་ཐོག་མེད་ནས་ད་ལྟའི་བར་ལ་འཁྲུལ་ནས་བྱས་པས་མ་ཚད། སྐྱེ་བ་འདིའི་ཐོག་ནས་ཀྱང་ཚེ་འདིའི་སྣང་བ་མཐོང་དང་ཚུན་ཆད་ནས་དོན་མེད་ཀྱི་བྱ་བ་འགྲུབ་རྒྱུ་དང་ཚར་རྒྱུ་མེད་པ། གྲུབ་ཀྱང་ཕན་ཐོགས་མེད་པའི་བྱ་བ་འདི་བྱས་ཀྱང་། བྱས་ནས་ཕན་ཐོགས་མེད་པའི་ཐོག་ཏུ་ཚེ་འདིའི་བྲེལ་དོ། ཕྱི་མའི་ཁུར་བོ་འདི་གྲུབ་པས། ད་ནི་དེ་བྱས་པས་ཅི་བྱ་བྱ་བྱེད་ཐམས་ཅད་འཁོར་བའི་རྒྱུ། ཕྱི་མ་ཡིད་མི་འོང་བའི་རྣམ་སྨིན་སྐྱེད་བྱེད་དུ་འདུག་ཅིང་། ད་སྔ་ཡན་ཆོད་ཀྱི་རང་གི་མི་ཚེ་སྟོང་གྱོང་། བྱ་བ་འབྲས་མེད་དུ་སོང་ཞིང་། ས་འདིའི་ཐོག་ཏུ་རྐང་རྗེས་བཀོད་ཚད་པོ་སུ་ལ་བསམ་བློ་བཏང་རུང་བྱས་ཚད་སྙིང་པོ་མེད་པའི་ཚུལ་ཤེས་པས། ད་ནི་ཅིས་ཀྱང་དགོས་པ་མི་འདུག་པས་འཁོར་བའི་བྱ་བ་ནི། བྱས་ན་མི་ཟིན་བསྐྱུར་ན་ཟིན། །ཞེས་པ་ལྟར་དུ་ནམ་བཞག་ཙ་ན་དེ་དུས་མཇུག་གྲུབ་པ་ཡིན་གྱི། ལས་ནས་ཚར་སྒུག་བྱ་རྒྱུ་མེད་པས། ད་ནི་བྱར་མེད་ངང་དུ་བྱས་ཆོས་བོར་ནས་བྱ་རྒྱུ་བཞག་ན་དགའ་བས། རབ་ན་བྱ་བ་དགུ་ཕྲུགས་སུ་བོར་བའི་མན་ངག་སྙིང་པོའི་ཉམས་ལེན་ལ་བརྩོན། མིན་རུང་ཟིན་མེད་ཀྱི་བྱ་བ་བསྐྱུར་ནས་དགེ་སྦྱོར་གང་ལྕོགས་རེ་འབད་ནས། ཐག་མི་ཆོད་འཁྲུལ་བ་མི་ཆོད་ནས་མི་འདུག་པར་སེམས་ཐག་ཐགས་སེ་བཅད་ནས་བྱ་བྱེད་ཐམས་ཅད་ཅམས་སེའམ་ཁྲིགས་སེ་ཞོག་ལ་ཡིག་དྲུག་སྒྲོངས། ཞེས་གསུངས་པའོ།། གཉིས་པ་སྨྲ་བརྗོད་རྦད་ཀྱིས་ཆོད་ལ་ཡིག་དྲུག་བཟླ་བར་བསྟན་པ། གཉིས་པ་སྨྲ་བརྗོད་རྦད་ཀྱིས་ཆོད་ལ་ཡིག་དྲུག་བཟླ་བར་བསྟན་པ་ནི། སྨྲས་པས་ཅི་བྱ་སྨྲས་ཚད་བྲེ་མོའི་གཏམ།། འབྲེལ་མེད་རྣམ་གཡེང་སྐྱེད་པའི་ཚུལ་ལ་ལྟོས།། ད་ནི་བརྗོད་མེད་ངང་ལ་གནས་ན་དགའ།། སྨྲ་བརྗོད་རྦད་ཀྱིས་ཆོད་ལ་ཡིག་དྲུག་སྒྲོངས།། ཞེས་གསུངས་ཏེ། མི་སུ་ཡིན་རུང་སྐྱེས་ནས་ད་ཡི་བར་དུ་ཁ་དལ་མོ་བྱས་ནས་ཉིན་གཅིག་ལའང་མ་བསྡད་པར། སྐབས་རེ་འགའི་ཁ་ཏོན་བཟླས་བརྗོད་ཙམ་ཡང་ངག་འཆལ་དང་མ་འདྲེས་པ་དཀོན་པ་དེས་ན། སྨྲས་པས་ཅི་བྱ་སྙིང་པོ་ཡོད་པའི་དོན་ལྡན་ནི་མ་བཤད་ནས་མི་ལུས་སྟོང་ལོག་ཏུ་འགྱུར་བཞིན་ཡོད་ཅིང་། སྔོན་བཤད་པའི་ཚུལ་ལ་བསམ་བློ་ཐོངས་དང་། སྨྲས་ཚད་བྲེ་མོའི་གཏམ་དོན་མེད་ལོང་གཏམ་ཁོ་ན་རུ་སོང་ཞིང་། དོན་མེད་ལོང་གཏམ་ཕན་མེད་གནོད་མེད་ཡིན་ན་སླ་བར་ཆུག་ཀྱང་། དོན་ལོག་དོན་ལས་གཡེར་ནས། དམ་པ་ལ་སྐུར་འདེབས། གཞན་གྱི་སྐྱོན་མཚང་། ཚུལ་མིན་ཡིད་བྱེད་ཀྱི་སྣེ་ཁྲིད་པའི་ཀུན་རྟོག་ངན་པའི་ཕྱོགས་སུ་གཡོ་སྤྱད་ཀྱི་གཏམ་སྡུག་པོ་ཤ་སྟག་བཤད་ཅིང་། མདོར་ན་འབྲེལ་མེད་རྣམ་གཡེང་སྐྱེད་པའི་གཏམ་ཁོ་ན་སྨྲས་པའི་ཚུལ་ལ་བསམ་བློ་ཐོངས་དང་། སྨྲས་པ་དེ་དག་སྔགས་དང་བཟླས་བརྗོད་ཡིན་ན་དུང་ཕྱུར་མང་པོ་བཟླས་ཟིན་པའི་ཚོད་ཡིན་པས། དེ་ལྟའི་ཚུལ་ལ་རང་གིས་ལྟོས་ལ། ད་ནི་རབ་ན་བརྗོད་མེད་བརྗོད་པ་དང་བྲལ་བའི་གནས་ལུགས་མ་བཅོས་པའི་དོན་ལ་གནས་ན་དགའ་ཞིང་། དེ་ལྟར་མིན་རུང་རྫུན་དང་ཕྲ་མ་ཚིག་རྩུབ་ངག་འཆལ་རྣམས་ཀྱིས་གཙོ་བོར་བྱས་པའི་སྨྲ་བརྗོད་ཐམས་ཅད་རྦད་ཀྱིས་ཆོད་ལ་ཡིག་དྲུག་སྒྲོངས། ཞེས་གསུངས་པའོ།། གསུམ་པ་འགྲོ་འདུག་རྒྱུག་འདུར་མི་མང་བར་བག་ཕེབས་ལྷོད་ཀྱིས་སྡོད་ལ་ཡིག་དྲུག་བཟླ་བར་བསྟན་པ། གསུམ་པ་འགྲོ་འདུག་རྒྱུག་འདུར་མི་མང་བར་བག་ཕེབས་ལྷོད་ཀྱིས་སྡོད་ལ་ཡིག་དྲུག་བཟླ་བར་བསྟན་པ་ནི། སོང་བས་ཅི་བྱ་འགྲོ་འདུག་ངལ་བའི་རྒྱུ།། འཁྱམས་ཤིང་ཆོས་ལས་རིང་བའི་ཚུལ་ལ་ལྟོས།། ད་ནི་གཅིག་ཏུ་སེམས་བག་ཕབ་ན་དགའ།། བག་ཕེབས་ལྷོད་ཀྱིས་སྡོད་ལ་ཡིག་དྲུག་སྒྲོངས།། ཞེས་གསུངས་ཏེ། ད་སྔོན་སོང་སོང་ལ་བསམ་བློ་བཏང་ན། མི་གཅིག་གིས་གོམ་པ་བླངས་ཚད་མཐུད་པར་བྱས་ན་ལེ་དབར་ཁྲི་ཕྲག་ཁ་ཤས་ཡོད་ངེས་ཤིང་། དེང་སང་གི་དུས་སྐབས་སུ་གནམ་ས་གཉིས་ཀ་ནས་འཁོར་ལོའི་རིགས་ཀྱི་ནང་ནས་ཡུལ་འཛམ་གླིང་ཤར་ནུབ་དང་། གཞན་རང་ཡུལ་དགོན་གྲོང་གཉིས་ཀའི་བར་ནས་འཁྱམས་ཚད་དེ། དོན་ཡོད་ཕྱག་བསྐོར་སྒྲིབ་སྦྱོང་འབའ་ཞིག་ཡིན་པའི་དབང་དུ་བཏང་ན། ལུས་ཀྱི་ཤིན་སྦྱངས་ཐོབ་པའི་ཚོད་ཡིན་ཡང་། ཆུང་ན་ས་འགྲོ་རྡོ་འགྲོ། ཆེ་ན་འགྲོ་ཉེས་འདུག་བཙོག སྡུག་སྡིག་པ་ཁོ་ན་དང་འབྲེལ་སོང་བས། ད་ནི་སོང་བས་ཅི་བྱ་འགྲོ་འདུག་ཐམས་ཅད་ངལ་བའི་རྒྱུ། རྒས་མ་རན་གོང་ནས་པུས་ཚིག་ལྟེབ། ཉྭ་ཡུར་འཁྱོག སྐེད་ཚིགས་སྒུར་བ་ནི། དོན་མེད་སྡུག་ལས་ཀྱིས་སྒྱིད་པ་སར་འཁུམས་ནས་འདུག་དབང་མེད་པས་ཡིན་ཞིང་། འཁྱམས་ཤིང་འཁྱམས་ཤིང་ཆོས་ལས་ཐག་ཇེ་རིང་། འཆི་བདག་ལ་ཐག་ཇེ་ཉེར་སོང་ནས། ཆོས་ཤར་དུ་ལུས་ཀྱང་ཁ་ནུབ་ཏུ་འཁོར་ནས་དོན་ཆུང་ལ་གཡེང་བཞིན་དེ་མི་འགྲུབ་པར་ཁ་ཤ་རླུང་ལ་བཟེད་ནས་འགྲོ་བཞིན་འཁྱམ་གྱིན་ཡོད་པས། ད་ནི་ལུས་ཉལ་སའི་ནང་དུ་ཡོད་ཀྱང་སེམས་ཐག་རིང་ཡུལ་དུ་མི་འཁྱམ་པར་འདུག་ས་གཅིག་ཏུ་སྡོད་ལ་ལུས་སེམས་གཉིས་ཀ་བག་ཕབ་ན་དགའ་བས། དེ་ལྟར་བག་ཕེབས་ལྷོད་ཀྱིས་སྡོད་ལ། རབ་ན་ལྷོད་ཀྱིས་གློད་པ་རང་བཞག་ཆུ་བོ་རྒྱུན་གྱི་རྣལ་འབྱོར་ལ་བརྩོན་པ་དང་། དེ་ལྟར་མ་བྱུང་རུང་བློ་བདེ་བག་ཕེབས་ཀྱིས་ལྷ་ཡི་དམ་ཐུགས་རྗེ་ཆེན་པོའི་གསལ་སྣང་དང་མ་བྲལ་པའི་སྒོ་ནས་ཡིག་དྲུག་གསུང་གི་བཟླས་པ་སྒོ་གསུམ་ཆུན་གཅིག་ཏུ་དྲིལ་ནས་བཟླས་ན་འགྲུབ་ཐག་ཉེ་ཞེས་གསུངས་པའོ།། བཞི་པ་ལོག་འཚོའི་སྡིག་ཟས་སྤངས་ཏེ་ཡིག་དྲུག་བཟླ་བར་བསྟན་པ། བཞི་པ་ལོག་འཚོའི་སྡིག་ཟས་སྤངས་ཏེ་ཡིག་དྲུག་བཟླ་བར་བསྟན་པ་ནི། ཟོས་པས་ཅི་བྱ་ཟོས་ཚད་མི་གཙང་རྒྱུ།། ཟ་འདོད་ཚིམ་པ་མེད་པའི་ཚུལ་ལ་ལྟོས།། ད་ནི་ཏིང་འཛིན་ཟས་སུ་ཟོས་ན་དགའ།། བཟའ་བཏུང་བྱེད་འཕྲོ་བོར་ལ་ཡིག་དྲུག་སྒྲོངས།། ཞེས་གསུངས་ཏེ། སྤྱིར་ན་འདོད་ཁམས་པ་ཁམ་གྱི་ཟས་ལ་བརྟེན་ནས་ལུས་འཚོ་དགོས་ཤིང་། ལུས་འདི་ཐུན་མོང་ཐེག་པའི་ལུགས་ལྟར་ན་ཐར་བའི་གྲུ་གཟིངས་ཡིན་པས། མཐའ་གཉིས་སུ་མ་ལྷུང་པའི་ཟས་གོས་ཀྱིས་འཚོ་དགོས་ཤིང་། ཐུན་མིན་གསང་སྔགས་ལྟར་ན་གདན་གསུམ་ལྷ་ཡི་དཀྱིལ་འཁོར་ཡིན་པས། བཟའ་བཏུང་ཐམས་ཅད་ཚོགས་འཁོར་གྱི་ཚུལ་དུ་མཆོད་དགོས་པར་གསུངས་ཤིང་། གང་ལྟར་ཡང་ཆོས་སྒྲུབ་པའི་ཆེད་དུ་སྲོག་འཚོ་དགོས་ལ། ཟས་གང་ཡིན་ཡང་གཏན་ནས་སྡིག་མེད་ཀྱི་ཟས་དཀོན་རུང་། ཆོས་པས་ཤ་ཟ་མི་ཉན་པ་ཡིན། ཇ་དང་རྩམ་པ་ལ་སྡིག་པ་ཡོད་པར་གསུངས་ཡོད་ཀྱང་། མ་ཟོས་ནས་རང་སྲོག་ལ་ཉེན་ཁ་ཡོད་པར་བྱས་ན་ཉེས་པ་དེ་བས་ཆེ་བ་འཕོ་བ་སོགས་ཀྱིས་དུས་མིན་དུ་སྤར་ན་ལྷ་བསད་པའི་ཉེས་པ་འབྱུང་གསུངས་པ་ལྟར་དུ་ཡིན་པའོ། །འོན་ཀྱང་ཟས་ཟོས་ན་ཚོད་ཅིག་དགོས་ཀྱི། མགོ་མིན་པ་ཁ་དང་ཕོ་བ་བྱས་ཏེ་ཅི་རིག་གང་རིག་ཐམས་ཅད་ཟ་བ་ནི་ཟས་ཀྱི་ཉེས་དམིགས་མ་ཤེས་པའི་རང་མཚང་ཡིན་པར་ཤེས་སུ་བཅུག་ནས། དཔེར་ན་ནད་ལ་ཕན་པའི་ཕྱིར་དུ་སྨན་བསྟེན་པ་ལྟར་དུ་ལུས་སྲོག་གཉིས་ཀ་འཚོ་ཞིང་ཆོས་འགྲུབ་པའི་ཐབས་སུ་ཟས་ཀྱི་ཚོད་རིག་པར་བྱས་ཏེ་འགྲངས་ལྟོགས་སྙོམ་པོ་འདུལ་བའི་ནང་ནས་གསུངས་པ་དང་། གསོ་རིག་པས་བཤད་པ་ལྟར་དུ་བཟང་བ་ཡིན། ཆོས་པ་སེར་སྐྱ་སུ་ཡིན་རུང་འཚོ་བ་དག་དགོས་ཏེ་འཚོ་བ་དག་ན་ལྟ་སྒོམ་དག་པའོ། །འཚོ་བ་མ་དག་པ་ནི་ལོག་འཚོའི་འཚོ་བ། དཀོན་མཆོག་གི་རྫས་དང་། རྐུས་འཕྲོག་གི་ཟས་ཀྱིས་འཚོ་བ་སྟེ། སངས་རྒྱས་ཀྱིས་ཁྱིམ་པའི་དཀོར་ཟ་ཆོག་པར་གནང་བའི་རབ་བྱུང་དགེ་འདུན་གྱི་སྡེའི་ནང་དུ་ཞུགས་རུང་པའི་ཆ་ཚད་ཇི་ལྟར་ཡིན་ཞེ་ན། ལྡན་གྲོལ་གཉིས་ལྡན་དགོས་པར་གསུངས་ཤིང་། དེ་ཡང་ལྡན་པ་ཚུལ་ཁྲིམས་ཅན་དང་། གྲོལ་བ་སྟོང་ཉིད་རྟོགས་པའོ། །སོ་སོར་ཐར་བའི་རྟགས་དང་ཆ་ལུགས་འཆང་བ་མ་གཏོགས། གསང་སྔགས་ཀྱི་བརྟུལ་ཞུགས་ཅན་ལ་སོགས་པ་ལ་གྲོལ་བ་ཅན་མི་སྲིད་པ་མིན་རུང་། སྦྱངས་པའི་ཡོན་ཏན་བཅུ་གཉིས་དང་ལྡན་པ། འདུལ་བ་གཞི་གསུམ་གྱི་ཆོ་གའི་ཕྱག་ལེན་ལ་མཁས་པ། ལྡན་གྲོལ་གྱི་བརྟུལ་ཞུགས་ལ་དབང་འབྱོར་བ་ཞིག་ཡིན་དགོས་པའོ། །དཀོར་ཞེས་པ་འདི་ལ་འཛེམ་བག་མ་བྱས་ན། འདི་སེར་སྐྱ་སུ་ཡི་ཁོག་ཏུ་སོང་ན་དུག་ལྟ་བུ་ཡིན་པ་དེས་ན་ལོག་འཚོའི་ཟས་དང་སྡིག་ཟས་ཟོས་པས་ཅི་བྱ། ཟོས་ཚད་མི་གཙང་བའི་རྒྱུ་ཡིན་ཞིང་། སྡིག་ཟས་ཤ་ལྟ་བུ་ལ་མཚོན་ན། ཟོས་ཤིང་ཟོས་ཤིང་ཟ་འདོད་ཇེ་ཆེར་གྱུར་ནས་ཚིམ་རྒྱུ་མེད་པར་འགྲོ་བས་ངོམས་པ་མེད་པའི་ཚུལ་ངན་པ་ལ་ལྟོས་དང་། ད་ནི་ཏིང་ངེ་འཛིན་ཟས་སུ་ཟོས་ན་དགའ་ཞིང་། ཞི་གནས་ཀྱི་ཏིང་ངེ་འཛིན་རྐྱང་པ་ལ་གནས་ཀྱང་ལུས་འཚོ་བའི་རྒྱུ་ཡིན་ཞིང་། ཟག་མེད་ཀྱི་ཏིང་ངེ་འཛིན་གྱི་འཚོ་བ་ནི་ལུས་བརྟས་པའི་མཆོག་ཡིན་པའོ། །དེས་ན་ལོག་འཚོའི་སྡིག་ཟས་ཀྱི་བཟའ་བཏུང་བྱེད་འཕྲོ་བསྐྱུར་ཏེ་ཡིག་དྲུག་སྒྲོངས། ཞེས་གསུངས་པའོ། །ཡི་གེ་དྲུག་པ་བླ་མ་དང་ལྷ་ལ་ནམ་དྲན་དུ་གསོལ་བ་འདེབས་པ་མ་ལ་བུས་འབོད་ཀྱི་ཚུལ་དུ་བཟླ་དགོས་པ་སྟེ། མ་ལ་བུས་བོས་པས་སྙིང་ཐག་པ་ནས་ཨའོ་ཟེར་ནས་ལན་སྟེར་བ་འདྲ་བར། ཐུགས་ཀྱི་དཀྱིལ་ནས་བླ་མ་ཡི་དམ་མཁའ་འགྲོ་རྣམས་ཀྱིས་གསོལ་བ་འདེབས་པའི་བུ་ལ་དགོངས་པའོ། །ཨཱོྃ་མ་ཎི་པདྨེ་ཧཱུྃ་ཞེས་པ། ཨོཾ་སྐུ་ལ་གསོལ་བ་འདེབས། མ་གསུང་ལ་གསོལ་བ་འདེབས། ཎི་ཐུགས་ལ་གསོལ་བ་འདེབས། པད་ཡོན་ཏན་ལ་གསོལ་བ་འདེབས། མེ་ཕྲིན་ལས་ལ་གསོལ་བ་འདེབས། ཧཱུྃ་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་བྱིན་རླབས་སྡུད་པར་བྱེད་པའོ། །མ་ཎི་བཟླ་དུས་ངག་གྲེ་འགྱུར་སྙན་པའི་གདངས། ཏམྦུ་ར་ཡི་རྒྱུད་མང་གི་སྒྲ་བཞིན་དུ་བཟླས་པ་དང་བཅས། རང་ཉིད་ཐུགས་རྗེ་ཆེན་པོར་གསལ་བའི་ཐུགས་ཀའི་ཟླ་བའི་དཀྱིལ་འཁོར་གྱི་སྟེང་ན་ཧྲཱིཿ་ ཡིག་དཀར་པོ་ཞིག་བསྒོམས་པའི་མཐར་ཡི་གེ་དྲུག་པས་བསྐོར་ནས་ཡོད་པ་ལས་འོད་ཟེར་སྣ་ཚོགས་འཕྲོས་ནས། རྩ་གསུམ་རྒྱལ་བའི་ཞིང་ཁམས་ནས་བླ་མ་ཡི་དམ་མཁའ་འགྲོའི་ཚོགས་དང་བཅས་པར་བྱོན་ནས། བདག་དང་སེམས་ཅན་ཐམས་ཅད་ལ་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་དངོས་གྲུབ་ཐོབ་པར་བསམས་ན། གདུལ་བྱ་ཡུལ་ལ་ཡོད་པའི་ཕྲིན་ལས་སྒྲུབ་པ་པོ་རང་ཉིད་ཀྱི་དད་དང་། གུས་པ། གསོལ་འདེབས། བཟླས་པས་ལྕོགས་ན། འདུལ་བྱེད་སངས་རྒྱས་ལ་ཡོད་པའི་ཐུགས་རྗེ་དང་ཕྲིན་ལས་ལ་གཡེལ་བ་ཡོད་པ་མིན་ནོ།། ལྔ་པ་བློ་ཐག་རྦད་ཀྱིས་ཆོད་ལ་ཡིག་དྲུག་བཟླ་བར་བསྟན་པ། ཡང་ཐར་པའི་ལམ་བསྒྲུབ་པ་ལ་འཇིག་རྟེན་ཚེ་འདིའི་འདུན་མ་སྐྱུར་དགོས་པས། ལྔ་པ་བློ་ཐག་རྦད་ཀྱིས་ཆོད་ལ་ཡིག་དྲུག་བཟླ་བར་བསྟན་པ་ནི། བསམ་པས་ཅི་བྱ་བསམ་ཚད་འཁྲུལ་པའི་རྒྱུ།། བསམ་དོན་ཐོག་ཏུ་མི་ཁེལ་ཚུལ་ལ་ལྟོས།། ད་ནི་ཚེ་འདིའི་བློ་སྣ་བསྟུངས་ན་དགའ།། བློ་ཐག་རྦད་ཀྱིས་ཆོད་ལ་ཡིག་དྲུག་སྒྲོངས།། ཞེས་གསུངས་ཏེ། དྲན་བསམ་རྣམ་རྟོག་གི་འགྱུ་བ་རླུང་ལྟ་བུ། འདི་དྲན་དང་འདི་མི་དྲན་བྱ་བ་མེད་པར་སྤྲང་པོས་ཉལ་བསམ་བཏང་ན། རྒྱ་ར་རྟ་ཡིས་བཀང་ཆོག་ཀྱང་། བསམ་ཚད་འགྲུབ་པ་མིན་ཏེ། ངས་གཅིག་བྱེད། གཉིས་བྱེད། བཅོ་བརྒྱད་ཀྱི་སྣེར་བཅུ་དགུ་མཐུད་བསམ་ནས། སེམས་ཀྱི་ནང་དུ་བློས་བསླངས་བཞེངས་པ་ནི། ཡིད་ཀྱིས་རྒྱལ་སྲིད་སྐྱོང་བ་ཞེས་བྱ་བས། དེ་ལྟར་སྣ་ཚོགས་པའི་ཚུལ་ལ་བསམ་པས་ཅི་བྱ་བསམ་ཚད་ཐམས་ཅད་འཁྲུལ་བ་ཡིན་ཞིང་། དེས་ཕྱི་མའི་འཁྲུལ་བ་ཡང་བསྐྱེད་དེ་འཁྲུལ་བའི་རྒྱུ་ཡང་བྱེད་པ་སྟེ། གཅིག་སྣེར་གཅིག་དྲན། དེའི་སྣེར་ཡང་དྲན་ནས་འཁྲུལ་བ་ཁོ་ནར་འགྱུར་ཞིང་། མི་ཞིག་གིས་བསམ་པའི་དོན་ཐམས་ཅད་ཐོག་ཏུ་ཁེལ་བ་ཡང་མིན་པ་སྟེ། རང་ཉིད་ཕུན་སུམ་ཚོགས་དགོས་པས་མ་ཚད། གཞན་སུ་ཡང་ལེགས་མི་རུང་བ་སེམས་པ་སྲིད་དེ། རྒྱལ་པོ་ང་ལས་ནུ་ཞེས་པ་དེས་གླིང་བཞི་རུ་དབང་བསྒྱུར་བས་མ་ཚད་རི་རབ་ཀྱི་རྩེ་མོའི་སུམ་ཅུ་རྩ་གསུམ་པའི་ལྷ་ལ་དབང་བསྒྱུར། ལྷའི་དབང་པོ་བརྒྱ་བྱིན་དང་དབང་ཆ་དང་ཐོབ་ཐང་མཉམ་པར་བྱས་ཏེ་ཡུན་རིང་དུ་གནས་ཀྱང་། ནམ་ཞིག་ལ་ང་ལས་ནུས་སྙམ་པར་ད་ནི་བརྒྱ་བྱིན་གནས་འདི་ནས་དབྱུང་ལ་བདག་ཁོ་ནས་ལྷ་དང་མི་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་དོ་སྙམ་མ་ཐག་ཏུ་དབང་ཐང་འབྱོར་བ་ཐམས་ཅད་ཀྱི་མཇུག་རྫོགས་ཏེ་འཇིག་རྟེན་མི་ཡུལ་དུ་ལྷུང་ནས་མཐར་ངན་སོང་གི་གནས་སུ་ལྟུང་བའི་ཚུལ་ལ་ལྟོས་དང་། ད་ནི་ཡས་བསམ་མས་བསམ་གྱི་ཚེ་འདིའི་བློ་སྣ་རིང་མོ་ཤི་སྣང་མེད་པའི་མདང་རྒྱག་བསྐྱུར་ཏེ་བློ་སྣ་ནང་དུ་བསྟུངས་ན་དགའ་བས། བློ་ཐག་རྦད་ཀྱིས་ཆོད། རང་ཐག་རང་གིས་ཆོད། སྣ་ཐག་མགོ་ལ་དཀྲིས་ཏེ་ཡིག་དྲུག་སྒྲོངས། ཞེས་གསུངས་པའོ། །གསུང་མཆོག་ཡི་གེ་དྲུག་པ་སྒྲིབ་སྦྱོང་ཆོས་སྤྱོད་ཀྱི་ཚུལ་དུ་བཟླ་བསམ་ན། རང་ཐུགས་རྗེ་ཆེན་པོ་བསྒོམས་པའི་ལྕེ་སྣ་ཚོགས་པདྨ་འདབ་མ་དྲུག་པར་བསམ། པདྨའི་དབུས་སུ་ཧྲཱིཿ་ ཡིག་དཀར་གསལ་དང་། འདབ་མ་དྲུག་ལ་ཡི་གེ་དྲུག་པོ་ཡོད་པར་བསྒོམས་ནས། ཨཱོྃ་མ་ཎི་པདྨེ་ཧཱུྃ། ཨོཾ་གྱིས་ལུས་ཀྱི་སྒྲིབ་པ་སྦྱོང་། མ་ཡིས་ངག་གི་སྒྲིབ་པ་སྦྱོང་། ཎི་ཡིས་ཡིད་ཀྱི་སྒྲིབ་པ་སྦྱོང་། པད་ཀྱིས་ཉོན་མོངས་པའི་སྒྲིབ་པ་སྦྱོང་། མེ་ཡིས་བག་ཆགས་ཀྱི་སྒྲིབ་པ་སྦྱོང་། ཧཱུྃ་གིས་ཤེས་བྱའི་སྒྲིབ་པ་སྦྱོང་། དེ་ལྟར་བསྒོམས་པའི་གསལ་སྣང་དང་མ་བྲལ་བར་ངག་གིས་ཨཱོྃ་མ་ཎི་པདྨེ་ཧཱུྃ་ཧྲཱིཿ་ ཞེས་བརྡ་གསལ། སྔགས་ཀྱི་འབྲུ་དག བར་གྱི་ཁུགས་ལྡིང་། སྨད་ཀྱི་ལྡིང་དང་བཅས། ཀློག་མཁས་པས་སྟོད་ཀྱི་འདྲེན། བར་གྱི་ཁུགས། སྨད་ཀྱི་ལྡིང་དག་པས་འདོན་པ་ལྟར་བཟླ་དགོས། སྤྱིར་བཏང་གི་འདོན་པ་བཟླ་ཚུལ་ལྟར་སྒྲ་དག་སྒྲོས་གཙང་གིས་བཟླས་ནའང་ཆོག་པའོ།། དྲུག་པ་ནོར་ཟས་གསོག་འཇོག་གི་རྩོལ་སྒྲུབ་བོར་ལ་ཡིག་དྲུག་བཟླ་བར་བསྟན་པ། དྲུག་པ་ནོར་ཟས་གསོག་འཇོག་གི་རྩོལ་སྒྲུབ་བོར་ལ་ཡིག་དྲུག་བཟླ་བར་བསྟན་པ་ནི། འབྱོར་པས་ཅི་བྱ་ལོངས་སྤྱོད་ཞེན་པའི་བློ།། བསགས་ཚད་ཤུལ་དུ་ལུས་པའི་ཚུལ་ལ་ལྟོས།། ད་ནི་བདག་འཛིན་ཞེན་པ་བཅད་ན་དགའ།། གསོག་འཇོག་རྩོལ་སྒྲུབ་བོར་ལ་ཡིག་དྲུག་སྒྲོངས།། ཞེས་གསུངས་ཏེ། ལོངས་སྤྱོད་ཀྱི་འབྱོར་བ་ནི་ཁྱིམ་པ་ཕོ་མོ་རྣམས་ལ་ཡོད་དགོས་པ་ཞིག་སྟེ། ཆོས་ནོར་འདོད་དང་ཐར་བ་སྟེ་ཕུན་ཚོགས་སྡེ་བཞིའི་ཡ་གྱལ་ཡིན་པས། དེ་དག་ལ་མངོན་མཐོའི་འབྱོར་བ་ཚོགས་དགོས་པས་སོ། །ཁྱིམ་ནས་ཁྱིམ་མེད་པར་རབ་ཏུ་བྱུང་བ་རྣམས་ནི་མཚན་དང་དོན་མཐུན་པ་མཐའ་གཉིས་སྤངས་པའི་འཚོ་གོས་ཀྱིས་འཚོ་ནས་སྦྱངས་པའི་ཡོན་ཏན་ལ་གནས་དགོས་ཀྱང་། དགེ་འདུན་འདུ་བའི་སྒོ་དང་། བསོད་ནམས་བསག་པའི་ཞིང་ས་དང་། ཚོགས་བསག་མཆོད་འབུལ་གྱི་ཆ་རྐྱེན་སྐྲུན་པ་ནི་དོན་དག་ཁ་ཁར་ཡིན་པས། དེ་ལྟ་བུའི་སྤྱི་ཕན་དང་། ཆོས་མཐུན་གྱི་མཐུན་རྐྱེན་མ་ཡིན་པར་ཧ་ཅང་འབྱོར་བ་ཆེ་ཡང་ཚིམ་པ་མེད་པའི་འདོད་རྔམས་ནི། རབ་བྱུང་མ་ཟད་ཁྱིམ་པས་ཀྱང་སྤངས་ནས། ནོར་ལས་ནོར་གྱི་སྙིང་པོ་ལེན་ཕྱིར་དུ་བསོད་ནམས་བསག་སར་བཏང་ཐུབ་པ་དགོས་ཀྱི། གཞན་འབྱོར་བས་ཅི་བྱ་ཅི་ཙམ་འབྱོར་རུང་དེ་ཙམ་གྱིས་ཡོད་པའི་སྟེང་དུ་གསོག་འདོད་ཀྱི་ཞེན་པའི་བློ་ངན་སྐྱེ་ནས། མི་ཚེ་ནོར་རྫས་གསོག་སྐྲུན་གྱི་ངང་དུ་སྡིག་སྡུག་གཏམ་ངན་དང་འབྲེལ་ནས་ཟད་ཤོར་ལ། ནམ་ཞིག་རྒྱུ་ཡོད་ཀྱང་མེད་བའི་སྣང་བའང་ཤར་ཏེ། ཕྱུག་པོ་ཡི་དྭགས་ཀྱི་གཏེར་སྲུང་བཞིན་དུ་གྱུར་ཅིང་། ད་ལྟ་ནས་ཡི་དྭགས་ཀྱི་སྐྱེ་བ་ལེན་ལ་ཉེ་བའི་རྟགས་སུ་ཟ་གོན་ལོངས་སྤྱོད་ཙམ་ཡང་བྱེད་མི་ཕོད་པར་བསགས་ཚད་ཐམས་ཅད་ཤུལ་དུ་ལུས་ཚེ། ཤུལ་མི་རྣམས་ཀྱིས་ཤི་བོའི་ཞེ་དགུ་མ་ཚང་པའི་གོང་དུ་རྒྱུ་ནོར་བགོ་གྲོས་མི་འགྲིག་པར་ནང་འཐབ་བྱེད་པའང་ཡོད་ཅིང་། དེ་ཙམ་མིན་རུང་དང་པོ་བདུན་ཕྲག་ཁ་ཤས་ལ་ཤི་བོ་མིན་པ་དྲན་རྒྱུ་མེད་པ་ཡིན་ཡང་། བདུན་ཚིགས་སོང་གིན་སོང་གིན་གསོན་པོའི་འདུག་ཆས་ལ་བསམ་བློ་གཏོང་རྒྱུ་ཤུགས་ཇེ་ཆེར་སོང་ནས། མཐར་གཞུག་བསགས་པ་གཞན་གྱི་ལོངས་སྤྱད་བྱར་གྱུར་ནས། བསགས་ཚད་ཤུལ་དུ་ལུས་ཏེ་ཕན་ཐོགས་མེད་པའི་མིག་དཔེ་རང་རོགས་གཉིས་ཀའི་སྔུན་དུ་ཡོད་པའི་ཚུལ་ལ་ལྟོས་དང་། ད་ནི་བདག་དང་བདག་གིར་འཛིན་པའི་ཞེན་པ་བཅད་ཐུབ་ན་འདི་དང་ཕྱི་མ་རུ་བདེ་བའི་དགའ་བ་དེ་ལས་ཐོབ་པས། རྒྱུ་ནོར་འབའ་ཞིག་གསོག་འཇོག་གིས་མི་ཚེ་ཟད་པའི་རྩོལ་སྒྲུབ་བོར་ལ་ཡིག་དྲུག་སྒྲོངས། ཞེས་གསུངས་པའོ། །སྤྱིར་ཕྱིའི་ལོངས་སྤྱོད་ཀྱི་འབྱོར་བ་ཇི་ཙམ་ཚོགས་པ་དེ་ཙམ་གྱིས་ནང་བསམ་པའི་འབྱོར་བ་ཚོགས་དགོས་ཀྱི། ཕྱིའི་དངོས་པོའི་འབྱོར་བའི་མཐུན་རྐྱེན་ཚོགས་པ་དང་ལྷན་དུ་ནང་བསམ་པའི་དཔལ་ཡོན་ཡར་རྒྱས་སུ་གྱུར་ནས་ཕྱི་ནང་གི་བདེ་སྐྱིད་ཆ་མཚུངས་པར་མ་སོང་དུས། རྒྱབ་ཁལ་དོ་མཉམ་མ་བྱུང་བའི་ཁལ་གཡག་ལ་ཁལ་ལོག་ཐེབ་པ་བཞིན་དུ་སྔར་མེད་ཀྱི་སྡུག་བསྔལ་གསར་བ་མང་པོ་འབྱུང་བའོ། །གཞན་ཡང་དམ་པའི་ཆོས་ལས་ལོག་པའི་ལམ་ནོར་ལ་འཁྲིད་བྱེད་ཡིན་པས་ནོར་ཞེས་བཀའ་གདམས་པའི་དགེ་བའི་བཤེས་གཉེན་དག་གིས་ནོར་གྱི་ངེས་ཚིག་བཀྲལ་ཅིང་། སྤྱོད་འཇུག་ལས་ཀྱང་། བསགས་དང་བསྲུང་དང་བརླག་པའི་གདུང་བ་ཡིས། །ནོར་ནི་ཕུང་ཁྲོལ་མཐའ་ཡས་ཤེས་པར་བྱ། །ནོར་ལ་ཆགས་པས་གཡེངས་པར་གྱུར་པ་རྣམས། །སྲིད་པའི་སྡུག་བསྔལ་ལས་གྲོལ་སྐབས་མེད་དོ། །ཞེས་གསུངས་པ་ལྟར་ཡིན་པའོ།། བདུན་པ་ཉིན་མཚན་རྣམ་གཡེང་སྤངས་ནས་ཡིག་དྲུག་བཟླ་བར་བསྟན་པ། བདུན་པ་ཉིན་མཚན་རྣམ་གཡེང་སྤངས་ནས་ཡིག་དྲུག་བཟླ་བར་བསྟན་པ་ནི། ཉལ་བས་ཅི་བྱ་གཉིད་ཚད་གཏི་མུག་ངང་།། སོས་དལ་མི་ཚེ་འཛད་པའི་ཚུལ་ལ་ལྟོས།། ད་ནི་སྙིང་ནས་བརྩོན་འགྲུས་བསྐྱེད་ན་དགའ།། ཉིན་མཚན་རྣམ་གཡེང་སྤངས་ནས་ཡིག་དྲུག་སྒྲོངས།། ཞེས་གསུངས་ཏེ། ཁམས་དྲུག་དང་ལྡན་པའི་ལུས་རྟེན་ཅན་གྱི་འདོད་ཁམས་པར་གཉིད་ནི་ལུས་འཚོ་བའི་མཐུན་རྐྱེན་ལ་མེད་དུ་མི་རུང་བ་ཡིན་པས་མི་ཚེའི་ཕྱེད་ཀ་ཉལ་ནས་ཟད་བཞིན་ཡོད་ཀྱང་། གཉིད་འདི་ལ་ཚོད་འཛིན་མ་བྱས་ན་གཏི་མུག་གཉིད་ལ་ཟད་པ་མེད་པས། ལུས་འཚོ་བའི་ཆེད་དུ་གཉིད་ཀྱིས་འདང་ངེས་ཤིག་བྱས་པའི་རྗེས་སུ་ཉལ་བས་ཅི་བྱ། རྣལ་འབྱོར་པ་གཉིད་འོད་གསལ་དུ་ཟིན་མཁན་ཡིན་ན་མ་གཏོགས། གཉིད་ཚད་གཏི་མུག་གི་ངང་ནས་ཉིང་འཁྲུལ་གྱིས་དུས་འདའ་བཞིན་ཡོད་པས། རིན་ཐང་ཆེ་བའི་མི་ཚེའི་དུས་ཚོད་འགངས་ཆེན་འདི་ཉིད། སོས་དལ་སྙོམ་ལས་ཀྱི་ངང་ནས་གཉིད་དགའ་ཅན་གྱི་མི་ཚེ་དོན་མེད་དུ་འཛད་པའི་ཚུལ་ལ་ལྟོས་དང་། དེ་ཡང་ཉིན་ཞག་ཕྲུགས་གཅིག་ཏུ་འཁོར་ལོའི་ཆུ་ཚོད་ཉེར་བཞི་ཡོད་པ་ལས། འགའ་རེས་ཆུ་ཚོད་ལྔ་ལས་གཉིད་དགོས་ཀྱིན་མི་འདུག་པས་དཔེ་ཆ་ལྟ་བ་ཡིན་ཞེས་བྱ་མཁན་ཡོད་དར་མོད་ཀྱང་། ཆུ་ཚོད་བདུན་རེར་ཉལ་ན་གཉིད་ཀྱིས་རྒྱས་འདངས་ཡིན་གྱི་དེ་ལས་ཉལ་ཡུན་རིང་ན་ལུས་ཁམས་དྭངས་བྱེད་མ་དགོས་རྙོག་བྱེད་དུ་གྱུར་ནས་ནད་སྐྱེད་པའི་རྒྱུ་རུ་འགྲོ་བ་ཡིན་པས་ཆུ་ཚོད་ཉི་ཤུ་རྩ་བཞི་ལས་བདུན་ཕུད་པའི་འཕྲོ་མ་ཆུ་ཚོད་བཅུ་བདུན་ལ་ཆོས་སྒྲུབ་ཆོག་པའོ། །ཅི་ཟ་འཐུང་གཡོས་སྦྱོར་ལ་སོགས་ལས་ཀ་གཞན་དག་གཅིག་ཀྱང་བྱ་མི་དགོས་སམ། རི་ཁྲོད་ཀྱི་མཚམས་པ་ཡིན་ཡང་སྒོ་ཕྱི་ནང་གི་འགྲོ་འདུག་ཉལ་འཆག་སྟེ་སྤྱོད་ལམ་རྣམ་བཞི་དང་ཟ་འཐུང་ཙམ་རེ་དགོས་པ་མིན་ནམ་ཞེ་ན། བདེན་མོད་ཀྱང་། ལྷ་ཁང་དང་། མཆོད་ཁང་། སྒོམ་ཁང་སོགས་ལས་ཆོས་སྒྲུབ་པའི་ཚེ་ཆོས་པ་ཡིན་རུང་། སྒོ་ཕྱི་རུ་བུད་དུས་ཆོས་པ་མིན་པ་ལྟར་དུ་གྱུར་ཚེ་ཆོས་སྒྲུབ་མ་ཤེས་པ་ཡིན་ཞེས་གོང་དུ་བཤད་པས། དེ་ལྟ་བུའི་ཆོས་སྒྲུབ་མཁན་ནི་རྐྱེན་དང་འཕྲད་སྐབས་ཆོས་གར་སོང་མེད་པ་མ་ཟད། ཚེ་འདི་ཕྱི་གཉིས་ཀའི་སོ་མཚམས་སུ་ཐོན། བེམ་རིག་སོ་སོར་བྲལ་བའི་དུས་སུ། དེ་བས་ཀྱང་ཆོས་ཀྱིས་ཕན་ཐོགས་དཀའ་བ་ཡིན། དེ་ལྟའི་ཆོས་སྒྲུབ་མཁན་གྱི་རང་རྒྱུད་ལ་ཆོས་མ་འབྱོར་བས་ཆོས་དང་རང་རྒྱུད་ཁ་ཁར་སོང་ཤིང་། དེ་དག་ལ་ནི་ཆོས་སྒྲུབ་པའི་དུས་ཚོད་ཀྱིས་ཀྱང་འདང་དཀའ་སྟེ། ཆོས་སྒྲུབ་པའི་དུས་ཚོད་གཅིག་དང་། འཇིག་རྟེན་སྒྲུབ་པའི་དུས་ཚོད་གཅིག་བཅས་སོ་སོར་དགོས་ཤིང་། ད་དུང་མི་དགེ་བསག་པའི་དུས་ཚོད་གཅིག་ཀྱང་དགོས་པས། གཅིག་དུས་ཚོད་ཀྱིས་འགལ་བ། གཉིས་བྱ་བ་མི་འདྲ་བ་གཉིས་ཐོད་མི་ཐུག་པའི་འགལ་བ། དེའི་ཐོག་ལ་ཆོས་ཆོས་ཀྱང་མ་འགྲུབ། འཇིག་རྟེན་འཇིག་རྟེན་ཡང་མ་འགྲུབ་སྙམ་ནས་ཁུར་བོ་ཉིས་བརྩེགས་སུམ་བརྩེགས་ཀྱིས་གནོན་པའི་དཀའ་ངལ་མང་པོ་ལྷན་དུ་ཡོང་བས་དེ་དག་གིས་ནི་ཆོས་སྒྲུབ་མ་ཤེས་པའོ། །དེ་ལྟ་བས་ན་དམ་པའི་ཆོས་ཀྱི་སྙིང་པོ་ནི་བྱང་ཆུབ་ཀྱི་སེམས་ཡིན་པས་ཕྱོགས་བཅུའི་དུས་གསུམ་གྱི་སངས་རྒྱས་ཐམས་ཅད་བྱང་ཆུབ་ཀྱི་སེམས་རིན་པོ་ཆེ་ལ་བརྟེན་ཏེ་བྱང་ཆུབ་བརྙེས་ཤིང་། བྱང་ཆུབ་ཀྱི་སེམས་དེ་ཡང་སྙིང་རྗེའི་སྙིང་པོ་ཅན་ཡིན་པས། ལས་དང་པོ་པ་ནས་བྱམས་སྙིང་རྗེས་ཀུན་ནས་བསླངས་པའི་བསམ་པ་བཟང་པོ་དང་མི་འབྲལ་བའི་ངང་ནས། འདི་ལྟར་སྣང་བའི་སྣང་སྲིད་ཀྱི་ཆོས་ཐམས་ཅད་མི་བདེན་སྒྱུ་མ་རྨི་ལམ་ལྟ་བུ། ཁ་སང་གི་བྱ་བ་དང་མདང་སོང་གི་རྨི་ལམ་གྱི་འཁྲུལ་སྣང་གཉིས་དེ་རིང་མེད་པར་མཚུངས་ཤིང་། དེ་རིང་གི་བྱ་བ་དང་དོ་དགོང་གི་རྨི་ལམ་གཉིས་ཀའང་སང་ཉིན་མེད་པའི་ཚུལ་འདྲ་ཞིང་། སྣང་བ་ཐམས་ཅད་དེའི་རང་བཞིན་ཡིན་ཡང་དེ་ལྟར་མ་རྟོགས་པར་འཁྲུལ་སྣང་ལ་ཨ་འཐས་པའི་སེམས་ཅན་འདི་ཐམས་ཅད་སྙིང་རེ་རྗེ། རང་དང་གཞན་གྱིས་དུས་གསུམ་བསགས་ཡོད་ཀྱི་དགེ་ཚོགས་དགེ་བའི་དངོས་པོ་འདི་ཀུན་ཀྱང་སེམས་ཅན་ཐམས་ཅད་ཀྱིས་མ་འཁྲུལ་དོན་གྱི་གནས་ལུགས་རྟོགས་པའི་རྒྱུ་རུ་གྱུར་ནས་དེ་དག་གིས་གནས་ལུགས་ཇི་ལྟ་བ་བཞིན་དུ་རྟོགས་པར་ཤོག་ཅེས་འགྲོ་འདུག ཟ་ཉལ། མི་དང་གཏུག་འབྲེལ་སོགས་གང་གི་སྐབས་ཡིན་ཡང་དྲན་ཤེས་བཞིན་བག་ཡོད་གསུམ་དང་མི་འབྲལ་བར་དེ་ལྟར་སེམས་པར་བྱས་ན། སྤྱོད་ལམ་ཐམས་ཅད་ཆོས་སུ་འགྱུར་བས་ཆོས་སྒྲུབ་པའི་དུས་ཚོད་ཟུར་དུ་དགོས་པ་མིན་ལ། ཁྱད་པར་དུ་སྨོན་འཇུག་བྱང་ཆུབ་ཀྱི་སེམས་བསྐྱེད་ནས་ཐོབ་ལ་མ་ཉམས་པར་དེ་གཉིས་ཀྱི་བསླབ་བྱ་ལ་སྤྱོད་ཐུབ་ན། ཟ་ཉལ། འགྲོ་འདུག ཐ་ན་ལག་པ་བརྐྱངས་བསྐུམས་ཚུན་ཆོད་ཀྱང་སེམས་ཅན་གྱི་དོན་དུ་འགྱུར་བ་ཡིན་ཞིང་། ཐེག་ཆེན་གྱི་ཆོས་ཐམས་ཅད་ཀྱང་སེམས་ཅན་གྱི་དོན་སྒྲུབ་པ་ཤ་སྟག་དང་། རྒྱལ་བ་རྫོགས་པའི་སངས་རྒྱས་ཀྱི་མཛད་པ་ཡང་སེམས་ཅན་ལ་ཕན་བདེ་སྒྲུབ་པ་ཁོ་ན་ཡིན་པའོ། །དེས་ན་ལོ་ན་རྒན་དར་གཞོན་གསུམ་སུ་ཡིན་རུང་། ད་སྔོན་འདས་པའི་མི་ཚེའི་ལོ་ཟླ་ཞག་པོ་གྲངས་ཅན་དུ་སོང་བ་དོན་ལྡན་དང་སྟོང་གྱོང་ཇི་ལྟར་སོང་འདུག་རྩིས་བཤེར་དང་། ཕྱིས་འབྱུང་མི་ཚེའི་དུས་ཚོད་ལ་འཆར་འགོད་བྱ་དགོས་ཤིང་། དེ་ལྟར་བྱས་ན་མི་ཚེ་དོན་མེད་སྟོང་ཟད་མི་རུང་སྙམ་པའི་དྲན་སྐུལ་ཡོང་བའོ། །དེས་ན་ད་ནི་སྙིང་ཐག་པ་ནས་བརྩོན་འགྲུས་བསྐྱེད་ན་དགའ་ཞིང་། དེའང་དཀའ་ངལ་གྱིས་ཤིན་ཏུ་གདུང་བ་བཟོད་ཨེ་ཐུབ་ལྟ་ནས་སྡུག་རུས་རྡོ་ལ་རྡར་བ་བརྩོན་འགྲུས་མིན་ཅིང་། ལུས་ལ་མེ་ལྔའི་དཀའ་ཐུབ་བསྟེན་པ་ལྟ་བུ་ཕྱོགས་བཞི་དང་དབུས་སུ་མེ་སྦར་བའི་དཀྱིལ་དུ་འདུག་ཅིང་རང་ལུས་ཚ་ཞིང་སྲེག་ཀྱང་ཨེ་བཟོད་ལྟ་བ་དང་། གཅེར་བུ་དམར་རྗེན་དུ་བུད་ཅིང་ཁྱི་ཕག་ལྟ་བུ་གཙང་བཙོག་མེད་པའི་སྤྱོད་པ་བྱེད་པ་ནི་ཕྱི་རོལ་པའི་ཆོས་ལུགས་ཡིན་པས། དེ་ལྟར་མི་དགོས་པར། བརྩོན་གང་དགེ་ལ་སྤྲོ་བའོ། །ཞེས་པ་ལྟར་བརྩོན་འགྲུས་ནི་དགེ་ལ་སྤྲོ་བའི་མཚན་ཉིད་ཅན། གཞན་གྱིས་ཆོས་སྒྲུབ་རྒྱུ་སྐྱུར་ཤོག་ཅེས་རུང་གཞན་དུ་བསྒྱུར་མི་བཏུབ་པར་ཆོས་བསྒྲུབ་རྒྱུ་ལ་མོས་པ་དང་སྤྲོ་བ་ཡིན་པས། ཆོས་སྒྲུབ་རྒྱུ་ལ་སྤྲོ་བའི་སེམས་ཤུགས་ཀྱིས་བརྩོན་འགྲུས་བསྐྱེད་དེ་ཉིན་མཚན་རྣམ་གཡེང་སྤངས་ནས་ཡིག་དྲུག་སྒྲོངས། ཞེས་གསུངས་པའོ། །དེ་ཡང་ཉིན་མཚན་རྣམ་གཡེང་སྤངས་ནས་ཞེས་པ་མཚན་ལ་གཉིད་མི་ཆོག་ཅེས་གསུངས་པ་མིན་ཞིང་། སྨོན་འཇུག་བྱང་ཆུབ་ཀྱི་སེམས་ཀྱིས་ཟིན་ན་གཉིད་ཀྱང་གཞན་དོན་དུ་འགྱུར་བ་གོང་ནས་ཀྱང་སྨྲོས་པ་དེ་ལྟར་ཡིན་ལ། གཞན་མཚན་མོ་གཉིད་ཀྱི་སྐབས་སུ་བླ་མ་ཐུགས་རྗེ་ཆེན་པོ་སྙིང་ཁའི་པདྨ་འདབ་བརྒྱད་ཀྱི་དཀྱིལ་དུ་བཞུགས་ཡོད་པར་སྒོམ་པའམ། སྤྱན་རས་གཟིགས་ཀྱི་ཐུགས་སྲོག་གི་སྙིང་པོ་ཧྲཱིཿ་ ཡིག་དཀར་གསལ་ཞིག་སྙིང་པདྨ་འདབ་བརྒྱད་ཀྱི་དཀྱིལ་དུ་སྒོམ་ནའང་ཆོག་པས། དེ་ལྟར་བསྒོམས་ཏེ་གཉིད་ཀྱི་རྣལ་འབྱོར་ལ་ཞུགས་ན་མཚན་མོའི་གཉིད་ཀྱི་འོད་གསལ་ཟིན་ནས་ཐུགས་དམ་གྱི་མཆོག་ཏུ་འགྱུར་བ་དང་། དེ་ལྟར་མ་བྱུང་རུང་ཉིང་འཁྲུལ་རྒྱ་འབྱམས་སུ་མི་འགྲོ་བར་རྨི་ལམ་དགེ་བ་རྨིས་པ་འབྱུང་ངོ་། །མདོར་ན་སྤྱོད་ལམ་ཐམས་ཅད་ཆོས་དང་སྦྲེལ་ཞེས་པ་ནི་ཆོས་སྒྲུབ་མཁན་ཞིག་གིས་ཉམས་སུ་ལེན་བྱའི་མན་ངག་ཟབ་མོ་སྟེ། ཆོས་དང་སེམས་འདྲེས་ཚེ་སྤྱོད་ལམ་དང་ཆོས་གཉིས་རང་ཤུགས་ཀྱིས་འབྲེལ་བ་བྱེད་པས་དེས་ནི་འཇིག་རྟེན་གྱི་བྱ་བ་སྒྲུབ་པ་ལ་མི་གནོད་པ་མ་ཟད། འཇིག་རྟེན་ཡ་རབས་ཀྱི་བྱ་བ་འགྲུབ་པའི་ཕན་ཐོགས་ཀྱང་འབྱུང་བ་སྟེ། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་བ་གམ་ན་འདུག །ཅེས་གསུངས་པ་ལྟར་དུ་མི་ཡི་ཆོས་ལུགས་ནི། འཇིག་རྟེན་ཡ་རབས་ཀྱི་སྤྱོད་པ་བསམ་པ་བཟང་པོས་ཀུན་ནས་བསླངས་པའི་ཁྲེལ་དང་ངོ་ཚ་ཡོད་པ། ལས་དང་རྒྱུ་འབྲས་ཤེས་པ། རྣམ་པ་ཀུན་ཏུ་མ་བརྟགས་བབ་ཅོལ་གྱི་སྤྱོད་པ་ངན་པ་མི་བྱེད་པ་དེ་ཡིན་ཞིང་། སྤྱིར་མི་ལུས་བླངས་པ་ཙམ་གྱིས་མི་མ་ཡིན་པས། སློབ་གསོ་དང་། སྦྱོང་བརྡར་གྱིས་མི་ངོ་མ་བྱེད་པ་དང་། དེ་ནས་ཆོས་པ། དེ་ནས་ཆོས་པ་རྣམ་དག་བྱེད་རྒྱུའི་རིམ་པ་དེ་ལྟར་བརྒྱུད་དགོས་པ་ཡིན། མདོར་བཤད་དོན་གཏམ་གྱི་སྙིང་པོ་ནི། བྱང་ཆུབ་ཏུ་སེམས་བསྐྱེད། ཐེག་ཆེན་གྱི་ཆོས་སྒོར་ཞུགས་པའི་གང་ཟག་དག་གིས་སྨོན་པའི་བསླབ་བྱ་ཚད་མེད་བཞི་དང་། འཇུག་པའི་བསླབ་བྱ་ཕར་ཕྱིན་དྲུག་སྤྱོད་ལམ་དུ་བསྟེན་པ་དང་། འཇིག་རྟེན་ཡ་རབས་ཀྱི་སྤྱོད་བཟང་དང་། དམ་པའི་ལྷ་ཆོས་གཉིས་ཀ་མཉམ་དུ་འགྲུབ་ཐུབ་པ་ཡིན་ཟེར་བ་ཡིན། ཕར་ཕྱིན་དྲུག་ལ་མཚོན་ན་དང་པོ་སྦྱིན་པ་སྟེ། ཟང་ཟིང་གི་སྦྱིན་པ་རྒྱུ་ཟས་སྦྱིན་པ་ལས་གཞན། མི་འཇིགས་པ་སྐྱབས་ཀྱི་སྦྱིན་པ་དང་། ཆོས་ཀྱི་སྦྱིན་པ་བྱས་ན་སྦྱིན་པའི་མཆོག་ཡིན་པ་སྟེ། ལས་གྲོགས་དང་། འགྲོ་རོགས། འདུག་རོགས། ཡུལ་མི། ཁྱིམ་མཚེས་དག་ལ་ཤོབ་མ་བཤད། རྐུ་མ་བྱེད། འཛིང་མོ་དང་འཁོན་རྩོད་ལ་སོགས་པ་མ་བྱེད་མ་གཏོགས་དེ་དག་གིས་རང་ལ་གནོད་པ་འབྱུང་བ་ཡིན་ཞེས་མི་དགེ་བཅུ་སྤོང་གི་ཚུལ་ཁྲིམས་ཀྱི་སྐོར་ནས་བཤད་ནའང་ཆོས་ཀྱི་སྦྱིན་པ་ཡིན་ཞིང་། དུད་འགྲོ་འཆི་ཁ་མ་མིན་ཡང་ཆོས་སྒྲ་རྣ་བས་གོ་མ་མྱངས་པའི་སེམས་ཅན་གྱི་རྣ་ལམ་དུ་ཨཱོྃ་མ་ཎི་པདྨེ་ཧཱུྃ་ཞེས་མ་ཎི་འབྲི་དྲུག་ལན་གཅིག་ཙམ་བཟླས་ན་ཡང་ཆོས་སྦྱིན་ཡིན་ལ། དེས་ནི་རང་གི་ལས་ཀ་ལའང་མི་གནོད་ཅིང་གཞན་སེམས་ཅན་ལ་ཕན་ཐོགས་སོང་བ་ཡིན། གཉིས་པ་ཚུལ་ཁྲིམས་སྟེ་ཁྱིམ་ན་གནས་པའི་དགེ་བསྙེན་ཕོ་མོས་ནི་མི་དགེ་བཅུ་སྤོང་གི་ཚུལ་ཁྲིམས་སྲུང་དགོས་ཤིང་། ཚུལ་ཁྲིམས་ལྡན་པའི་མི་ཡིས་སྨོན་ལམ་ཅི་བཏབ་འགྲུབ་པ་དང་། དཀར་ཕྱོགས་སྐྱོང་བའི་ལྷས་ཀྱང་སྲུང་སྐྱོབ་བྱེད་པས་ཚུལ་ཁྲིམས་ཀྱིས་ནི་རང་གི་ལས་ཀ་ལ་མི་གནོད་པས་མ་ཚད་འགྲུབ་པའི་ཕན་ཐོགས་ཀྱང་ཆེ་བ་ཡིན། མིས་སྒྲུབ་མི་ཐུབ་པའི་དཀའ་ངལ་དང་འཕྲད་དུས་ལྷ་དང་སྲུང་མ་ལ་རེ་བཅའ་བར་དགོན་པར་རྒྱབ་ཆོག་བྱེད་དུ་རྒྱུག་པ་ཡིན་མོད་ཀྱང་། ཚུལ་ཁྲིམས་སྲུང་བ་དེ་བས་ཀྱང་བཟང་བ་ཡིན། དུས་རྒྱུན་དུ་རང་གིས་སྙིང་རྗེའི་སེམས་དང་མི་འབྲལ་བར་ལྷ་དཀོན་མཆོག་དང་། ཡི་དམ་ཐུགས་རྗེ་ཆེན་པོར་གསོལ་བ་འདེབས་པ་ནི་རིམ་གྲོ་ཐམས་ཅད་ཀྱི་མཆོག་ཡིན་ཞིང་། །ཆོས་སྐྱོང་ནི་ཆོས་བྱེད་པའི་སྲུང་མ་ཡིན་པས་དམ་ཚིག་དང་ལྡན་པའི་ཆོས་བྱེད་ཀྱི་རྣལ་འབྱོར་པ་དང་ཆོས་པ་རྣམ་དག་གིས་ནི་གསོལ་ཀ་མ་བཏོན་ཀྱང་འགོ་ཞིང་སྡོང་གྲོགས་བྱེད་པའོ། །གསུམ་པ་བཟོད་པ་སྟེ་ཞེ་སྡང་ཁོང་ཁྲོ་མི་བྱེད་པར་ཀུན་ལ་བཟོད་པ་བསྒོམས་ན། ཁྱིམ་བཟའ་ཚང་། ཁྱིམ་མཚེས་དུད་གྲོགས། ཡུལ་སྡེ་ཚོ་པ་བཅས་ཐམས་ཅད་ཕན་ཚུན་འགྲིག་མཐུན་འོང་ཞིང་། སུ་དང་གང་ལ་ཡང་མི་མཐུན། མི་དགའ་ས་མེད་དུས་བྱ་བ་གང་ཡིན་ཡང་འགྲུབ་རྒྱུ་རུ་ཕན་ཐོགས་ཆེ་ཞིང་། རང་གི་ལུས་ཀྱི་སྙིང་ནད་ལ་སོགས་པའི་ན་ཚ་མང་ཆེ་བ་ཞིག་བཟེ་རེ་སྡུག་རྩུབ་ཆེ་བའི་ཁུངས་ནས་འབྱུང་བཞིན་ཡོད་པའོ། །བཞི་པ་བརྩོན་འགྲུས་སྟེ། བརྩོན་འགྲུས་ཅན་གྱིས་རི་རབ་ཐལ་བར་རློག །ཟེར་བས་མི་རང་ཉིད་ལ་ཞུམ་པ་མེད་པའི་བརྩོན་འགྲུས་ཡོད་ན་ཆོས་འཇིག་རྟེན་གྱི་བྱ་བ་གང་བསྒྲུབ་དགོས་ཀྱང་། རང་ཉིད་ཀྱི་ལག་པའི་མཐིལ་དུ་ཡོད་པ་ལྟར་དུ་འགྲུབ་ཅིང་། ངས་ག་ལ་འགྲུབ་ཅེས་སྤོབས་པ་ཉམས་ན་འགྲུབ་པའི་དུས་མེད་དོ། །དེས་ན་བརྩོན་འགྲུས་ཀྱིས་ཀྱང་ལས་ཀ་ལ་གནོད་པ་མིན། ལྔ་པ་བསམ་གཏན་སྟེ། དེའི་ངོ་བོ་ནི་གཡེང་བ་མེད་པ་ཡིན་པས། སྤྱོད་ལམ་གང་གི་སྐབས་སུ་ཡང་ཚུལ་མིན་གཡེང་བའི་དབང་དུ་མི་ཤོར་བར་དྲན་པའི་སོ་པ་དང་། གཡེང་མེད་ཀྱི་བྱ་ར་པ་ཡོད་ན་ཉེན་ཁ་ཐམས་ཅད་ལས་གྲོལ་བས་མེད་ཐབས་མེད་པ་ཡིན། དྲུག་པ་ཤེས་རབ་སྟེ། ཤེས་རབ་ཡོད་མེད་ཀྱིས་སྡེ་ཡུལ་གཅིག་པ་མ་ཟད་ཁྱིམ་ཚང་གཅིག་གི་བུ་སྤུན་གཉིས་ཡིན་རུང་བཟང་ངན་ཤོར་སྲིད་ཅིང་། ཤེས་རབ་རྒྱ་ཆེ་ཆུང་གིས་ལས་དང་བྱ་བ་སྒྲུབ་ལུགས་བཅའ་སྟངས་མི་འདྲ་ཞིང་། འཇིག་རྟེན་པའི་ཤེས་རབ་མཆོག་ལ་བརྟེན་ཏེ་འཇིག་རྟེན་ལས་འདས་པའི་ཤེས་རབ་རྣམ་པར་དག་པ་ཡང་རྙེད་ཐུབ་པ་ཡིན། དེས་ན་སྤྱོད་ཡུལ་ཡོངས་སུ་དག་པའི་མདོ་སྡེ་རྣམས་ཀྱི་དགོངས་དོན་ལྟར་དུ་བསམ་སྤྱོད་ཆོས་དང་འདྲེས་ཐུབ་ན་འདི་ཕྱི་དགེ་བའི་ལམ་ནས་བདེ་ནས་བདེ་བའི་སར་བགྲོད་ཐུབ་པའོ། །ཨཱོྃ་མ་ཎི་པདྨེ་ཧཱུྃ། འདི་ཕ་རོལ་ཏུ་ཕྱིན་པ་དྲུག་དང་སྦྱར་ན། ཨཱོྃ་སྦྱིན་པའི་ཕ་རོལ་ཏུ་ཕྱིན་པས་ཟང་ཟིང་གི་སྦྱིན་པ་དང་། ཆོས་ཀྱི་སྦྱིན་པ་དང་། མི་འཇིགས་པ་སྐྱབས་ཀྱི་སྦྱིན་པ་གསུམ་རྫོགས་པར་བྱེད། མ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་ཉེས་སྤྱོད་སྡོམ་པའི་ཚུལ་ཁྲིམས་དང་། དགེ་བ་ཆོས་སྡུད་ཀྱི་ཚུལ་ཁྲིམས་དང་། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་རྫོགས་པར་བྱེད། ཎི་བཟོད་པའི་ཕ་རོལ་ཏུ་ཕྱིན་པས། གཞན་གྱིས་ལོག་སྒྲུབ་བཟོད་པའི་བཟོད་པ་དང་། ཆོས་ཕྱིར་དཀའ་སྤྱད་བཟོད་པའི་བཟོད་པ་དང་། ཟབ་མོའི་དོན་ལ་མི་སྐྲག་པར་བཟོད་པའི་བཟོད་པ་གསུམ་རྫོགས་པར་བྱེད། པད་བརྩོན་འགྲུས་ཀྱི་ཕ་རོལ་ཏུ་ཕྱིན་པས། གོ་ཆའི་བརྩོན་འགྲུས་དང་། སྦྱོར་བའི་བརྩོན་འགྲུས་དང་། ཆོག་པར་མི་འཛིན་པའི་བརྩོན་འགྲུས་གསུམ་རྫོགས་པར་བྱེད། མེ་བསམ་གཏན་གྱི་ཕ་རོལ་ཏུ་ཕྱིན་པས་བྱིས་པ་ཉེར་སྤྱོད་ཀྱི་བསམ་གཏན་དང་། དོན་རབ་འབྱེད་པའི་བསམ་གཏན་དང་། དེ་བཞིན་གཤེགས་དགེས་བསམ་གཏན་གསུམ་རྫོགས་པར་བྱེད། ཧཱུྃ་ཤེས་རབ་ཀྱི་ཕ་རོལ་ཏུ་ཕྱིན་པས། ཐོས་པའི་ཤེས་རབ་དང་། བསམ་པའི་ཤེས་རབ་དང་། སྒོམ་པའི་ཤེས་རབ་གསུམ་རྫོགས་པར་བྱེད། དེ་ལྟར་ཕ་རོལ་ཏུ་ཕྱིན་པ་དྲུག་རྫོགས་པ་བྱེད་པ་ཡང་ཡི་གེ་དྲུག་པ་བཟླས་པ་ལས་འབྱུང་ངོ་།། བརྒྱད་པ་ལོང་མེད་རྒྱུད་ལ་བསྟེན་ཏེ་ལ་འུར་ཡིག་དྲུག་བཟླ་དགོས་པར་བསྟན་པ། བརྒྱད་པ་ལོང་མེད་རྒྱུད་ལ་བསྟེན་ཏེ་ལ་འུར་ཡིག་དྲུག་བཟླ་དགོས་པར་བསྟན་པ་ནི། ལོང་མེད་ལོང་མེད་སྡོད་པའི་ལོང་མི་འདུག། འཆི་བདག་གློ་བུར་སླེབས་ན་ཅི་ཞིག་བྱ།། ད་ནི་འཕྲལ་ལ་ལྷ་ཆོས་འགྲུབ་ན་དགའ།། ད་ལྟ་ལ་འུར་ཉིད་དུ་ཡིག་དྲུག་སྒྲོངས།། ཞེས་གསུངས་ཏེ། ཤིན་ཏུ་དོན་དང་ལྡན་པ་ལ། །ཚིག་གཅིག་ལན་གཉིས་བརྗོད་པར་བྱ། །ཞེས་པ་ལྟར་དུ། ལོང་ཁོམ་མི་འདུག ལོང་ཁོམ་མི་འདུག སྡོད་པའི་ལོང་ཁོམ་མི་འདུག་ཅེས་ཚིག་གཅིག་ལན་གཉིས་ཀྱིས་མ་ཚད་པར་གསུམ་དུ་གལ་པོ་ཆེ་ལ་ནན་ཏན་གྱིས། ང་ཚོའི་ཁ་སྐད་དུ་ལག་མགོར་འོར་མ་དགུ་ལ་བཟུང་ནས་བཤད་ཅེས་པ་ནང་བཞིན་མཛད་ནས་གསུངས་ཤིང་། དེ་ཡང་ལོང་མེད་དང་པོས་དལ་འབྱོར་རྙེད་དཀའ་བ་དང་། གཉིས་པས་འཁོར་བ་སྡུག་བསྔལ་ཆེ་བ་དང་། གསུམ་པས་སྡོད་པའི་ལོང་མི་འདུག་ཅེས་ཚེ་མི་རྟག་པར་དངོས་སུ་བསྟན་པ་སྟེ་འཆི་བདག་གཤིན་རྗེ་ནི་མདའ་གཞུ་རྒྱུད་ནས་མངགས་པ་ལྟར་དུ། རང་རེ་ལ་ཇེ་ཉེ་ཇེ་ཉེར་བྱེད་ཅིང་ཡོང་བཞིན་ཡོད་པས་གློ་བུར་དུ་སླེབས་ན་ཅི་ཞིག་བྱ། ང་ད་དུང་ཁོམ་གྱིན་མི་འདུག་པས་ལས་ཀ་འདི་མཇུག་ཕུད་ཆུག བུ་འཚར་ལོངས་བྱུང་མེད། བུ་མོ་མི་སར་ཐོན་མེད། ངས་མ་ཎི་རྡོག་པོ་གཅིག་ཙམ་ཡང་མ་འགྲུབ་ཅེས་འཆི་བདག་ལ་བཤད་ས་ནི་མི་འདུག་མོད། དེ་ལྟར་བསམ་བློ་བཏང་ནས་ད་ནི་ད་སྔོན་གྱི་དུས་ཚོད་སྔ་དྲོའི་ཉི་མ་ལྟ་བུ་བཟང་ཤོས་དེ་ཤོར་སོང་བས་ཕྱིར་ཡོང་མེད་རུང་། སང་ལོ་དང་། གནངས་ལོ་ལྟ་ཅི། སང་ཉིན་དང་། གནངས་ཉིན་ཙམ། སྔ་དྲོ་དང་། ཕྱི་དྲོ་ཙམ་ལའང་ཕྱིར་འགྱངས་མི་བྱེད་པར་བསྡད་ཡོད་ན་སྡོད་པའི་ཐོག་དང་། ལངས་ཡོད་ན་ལང་བའི་ཐོག་དེ་ནས་འཕྲལ་ལ་ལྷ་ཆོས་འགྲུབ་ན་དགའ་བའི་དུས་སུ་བབ་པས། ད་ལྟ་ལ་འུར་ཉིད་དུ་ཡིག་དྲུག་སྒྲོངས་ཞེས་གསུངས་པའོ། །མཚང་ཆོས་དྲུག་གི་ཞལ་གདམས་ལས། ཆོས་ཚིག་ཏུ་ཐོས་ཀྱང་ཉམས་སུ་མ་བླངས་པས། ངན་དྲེད་དུ་ཐལ་བས་རྣམ་སྨིན་ལ་མི་འཛེམ་པར་དམ་ཚིག་མི་སྲུང་། དད་པ་ཆུང་ཞིང་མི་གུས། ལེ་ལོ་ཆེ་ཞིང་རྩེ་ལ་དགའ། གྲོགས་དད་ཆེ་ཞིང་སྨྲ་ལ་དགའ། བརྩོན་འགྲུས་ཆུང་ཞིང་ཕྱི་བཤོལ་ཆེ། སྒོམ་སྲན་ཆུང་ཞིང་སྙིང་རུས་མེད། ཅོལ་ཆུང་ཞིང་རང་མདོ་མེད། ཞེན་ཆགས་ཆེ་ཞིང་སྙིང་རྗེ་མེད། མི་ཚེ་ནམ་ཟླ་ཡབ་ཡོབ་ལ་ཟད་ནས་འཆི་ཁར་ཡན་ཆད་འགྱོད་པ་ཞིག་འོང་བས་བླ་མ་དཀོན་མཆོག་རིན་པོ་ཆེ་རྣམས། ལྷ་ཇོ་བོ་ཐུགས་རྗེ་ཆེན་པོ། ཐར་བ་སྒྲུབ་པའི་སྙིང་རུས་དང་ལྡན་པར་བྱིན་གྱིས་བརླབ་ཏུ་གསོལ་ཞེས་རྩེ་གཅིག་དད་པས་གསོལ་བ་ཐོབ་དང་། རང་བཞིན་ཤུགས་ཀྱི་ཐུགས་རྗེ་དེ་ཉི་མ་དང་དེའི་དྲོད་ལྟ་བུ་ཡིན་པས། གང་ཟག་སུ་ཞིག་གིས་ཉི་མ་ལྡེ་ཡང་ཉི་འོད་ཀྱི་དྲོད་བཅུད་ཕོག་པ་ལྟར་དུ་དད་པ་ཅན་ལ་ཐུགས་རྗེ་ཆེན་པོའི་ཐུགས་རྗེ་དུས་ལས་འདའ་བར་མི་སྲིད་དོ་ཞེས་གསུངས་པའོ། །ཨཱོྃ་མ་ཎི་པདྨེ་ཧཱུྃ། འདིའི་བཟླས་པ་དམ་ཚིག་དང་སྦྱར་ན། ཨཱོྃ་གྱིས་སྐུའི་དམ་ཚིག་མི་ཉམས་སྐོང་། མས་གསུང་གི་དམ་ཚིག་མི་ཉམས་སྐོང་། ཎིས་ཐུགས་ཀྱི་དམ་ཚིག་མི་ཉམས་སྐོང་། པད་ཀྱིས་རྩ་བའི་དམ་ཚིག་མི་ཉམས་སྐོང་། མེས་ཡན་ལག་གི་དམ་ཚིག་མི་ཉམས་སྐོང་། ཧཱུྃ་གིས་དམ་ཚིག་ཐམས་ཅད་མི་ཉམས་སྐོང་། དམ་ཚིག་ཉམས་པ་ཐམས་ཅད་སྐོང་བ་ཡང་ཡི་གེ་དྲུག་པ་བཟླས་པ་ལས་འབྱུང་ངོ་།། དགུ་པ་ལོ་ཟླའི་འགྲོས་སྐད་ཅིག་གིས་འགྲོ་བར་བསམས་ཏེ་ད་ལྟ་ཉིད་ནས་ཡིག་དྲུག་བཟླ་བར་བསྟན་པ། དགུ་པ་ལོ་ཟླའི་འགྲོས་སྐད་ཅིག་གིས་འགྲོ་བར་བསམས་ཏེ་ད་ལྟ་ཉིད་ནས་ཡིག་དྲུག་བཟླ་བར་བསྟན་པ་ནི། ལོ་དང་ཟླ་གྲངས་ཞག་གི་རྩིས་ཀྱིས་ཅི།། ད་ལྟ་སྐད་ཅིག་འགྱུར་བའི་ཚུལ་ལ་ལྟོས།། སྐད་ཅིག་རེ་རེར་སོང་བཞིན་འཆི་ལ་ཉེ།། ད་ལྟ་ད་ལྟ་ཉིད་ནས་ཡིག་དྲུག་སྒྲོངས།། ཞེས་གསུངས་ཏེ། དེ་ཡང་ལོ་ཞེས་བྱ་བ་དུས་ཡུན་རིང་པོ་ཡིན་པའི་སྣང་བ་འཆར་ན་ཡང་། ལོ་ནི་ཟླ་བའི་ཕུང་པོ་དང་། ཟླ་བ་ཞག་གི་ཕུང་པོ། ཞག་ཆུ་ཚོད་དང་། ཆུ་ཚོད་སྐར་མའི་ཆ་ཤས་བསགས་པ་ཡིན་པས་རྩ་བ་སྐད་ཅིག་ལ་ཐུག་ཅིང་། ངས་ད་ལྟ་སྐད་ཅིག་མ་ཞེས་བརྗོད་པའི་ཚེ་རུ་ཡང་རང་རེའི་མི་ཚེའི་དུས་ཚོད་ཀྱི་ནང་ནས་འཛམ་གླིང་གི་རྒྱུ་ནོར་རིན་དུ་བྱིན་ཀྱང་ཁུག་རྒྱུ་མེད་པའི་མི་ཚེའི་སྐད་ཅིག་ཁ་ཤས་སོང་ཟིན་ཅིང་། དེས་ན་ལོ་དང་ཟླ་བའི་ཁ་གྲངས་དང་། ཞག་གི་རྩིས་བགྲང་གིས་ལོ་ཞེས་ཡུན་རིང་ཡིན་སྙམ་གྱིས་ཅི་བྱེད། རང་མགོ་གཡོགས་སྤྱད་དང་། རང་སེམས་གསོ་སྤྱད་ཡིན་གྱི། གནད་ཀྱི་རྩ་བ་ནི་ད་ལྟ་རང་འཁྲིས་ནས་སྐད་ཅིག་སྐད་ཅིག་གིས་འགྱུར་བཞིན་ཡོད་པ་འདི་ལ་ལྟོས་དང་། སྐད་ཅིག་རེ་རེ་སོང་གིན་འཆི་ལ་ཇེ་ཉེར་གྱུར་པ་ནི་སྐེ་གཅོད་པའི་ཤན་པའི་དྲུང་དུ་གོམ་པ་གཅིག་གཅིག་བཞིན་གཅར་བ་དང་མཚུངས་པས་། དེ་ལྟར་སེམས་ཚེ་མི་སྡོད་པརཡུལ་གང་ཞིག་ཏུ་འབྲོས་ས་ནི་མེད་ཀྱི་མ་གཏོགས་འབྲོས་རེ་རན་པའི་དུས་སུ་སླེབས་ཡོད་ཀྱང་། བཤའ་ལུག་ཐག་པས་བཀྱིགས་པ་ལྟར་དུ་འཆི་བ་ཤེས་ཀྱང་མི་འདུག་ཀ་མེད་ཡིན་པ་དེས་ན་ད་ལྟ་ད་ལྟ་ཞེས་ལན་གཉིས་སུ་བལྡབས་ཅིང་གཟབ་ནན་གྱི་སྒོ་ནས་ཕྱིར་འགྱངས་མི་བྱེད་པར་འདུག་ས་འདི་ཉིད་ཀྱི་ཐོག་ནས་འཆི་དུས་ཕན་ཐོགས་ཡོད་ངེས་ཀྱི་མ་ཎི་ཡིག་དྲུག་སྒྲོངས། ཞེས་གསུངས་པའོ།། བཅུ་པ་དཔེ་དོན་གང་ལ་བསམས་ཀྱང་སྡོད་པའི་ལོང་མེད་པས་ཡིག་དྲུག་བཟླ་བར་སྐུལ་པ། བཅུ་པ་དཔེ་དོན་གང་ལ་བསམས་ཀྱང་སྡོད་པའི་ལོང་མེད་པས་ཡིག་དྲུག་བཟླ་བར་སྐུལ་པ་ནི། ཚེ་ནི་ཉི་མ་བཞིན་དུ་ཕར་ཕར་འགྲོ།། འཆི་བདག་གྲིབ་སོ་བཞིན་དུ་ཚུར་ཚུར་འོང་།། ད་ནི་ཚེ་ལྷག་ཉི་རྒས་གྲིབ་སོ་ཙམ།། སྡོད་པའི་ལོང་ཁོམ་མི་འདུག་ཡིག་དྲུག་སྒྲོངས།། ཞེས་གསུངས་ཏེ། མི་ཡི་ཚེ་ནི་ཉི་མ་ཤར་རིའི་ཕྲག་པ་ནས་ཤར་ཏེ་སྐད་ཅིག་ཙམ་ཡང་མི་སྡོད་པར་ནུབ་རིའི་ཕག་ལ་ཆས་པ་ལྟར་དུ་ཕར་ཕར་འགྲོ་ཞིང་། འཆི་བདག་ཀྱང་གྲིབ་སོ་བཞིན་དུ་ཚུར་ཚུར་དུ་ཉེ་བར་འོང་ཞིང་། དེ་ཡང་ཉིན་ཞག་གཅིག་དང་མི་ཚེ་གཉིས་ཀ་དཔེ་དོན་མཐུན་པར་བསྒྲིགས་ན་སྔ་དྲོའི་ཉི་མ་ལོ་ཉུང་གཞོན་པའི་ཚོད་དང་། ཕྱི་དྲོའི་ཉི་མ་ན་སོ་རྒན་པའི་ཚོད། ལ་སྒང་ཉི་མ་རྒས་ཤིང་གོག་པའི་ཚོད་ལྟ་བུ་ཡིན་པ་དེས་ན། ད་ནི་ཚེ་ལྷག་ཉི་མ་རྒས་པའི་གྲིབ་སོ་ཙམ་འདི་འགྲོ་མགྱོགས་པས་ན་སྡོད་པའི་ལོང་ཁོམ་མི་འདུག་པས་འཆི་ཁའི་མ་ཎི་རྟ་རིན་མ་ཡིན་པས་ཡིག་དྲུག་སྒྲོངས། ཞེས་གསུངས་པའོ། །མཚང་ཆོས་དྲུག་གི་ཞལ་གདམས་ལས་དཔེ་འདི་ལྟར་གསུངས་ཏེ། ཕྱིའི་དགྲ་བགེགས་གཉིས་ཀྱིས་ནི་སྲོག་དང་དགེ་བ་ལ་བར་དུ་གཅོད་པས་སྤྱང་ཀི་ལུག་ལ་འཇབ་པ་དང་འདྲ། ནང་དགྲ་བགེགས་དུག་གསུམ་ནི་རང་རྒྱུད་བསྲེགས་པས་རྩྭ་ཕུང་ལ་མེ་བཅུག་པ་དང་འདྲ། གསང་དགྲ་ང་བདག་འགོང་པོས་རང་ལ་གནོད་པ་ནི་ལྷ་བདུད་དུ་བབས་པས་སྲོག་གཅོད་པ་དང་འདྲ། ཕྱི་ནང་གསང་བའི་དགྲ་དེ་གསུམ་ཡང་གཞན་ལས་མ་ཡོང་བར་རང་ལས་བྱུང་ནས་རང་གསོད་པར་གདའ་བ་སྐྱེ་བོ་ཐ་མལ་པ་རྣམས་ཀྱིས་གཟིགས་སམ་གསུངས་པའོ། །ཨཱོྃ་མ་ཎི་པདྨེ་ཧཱུྃ། ཨཱོྃ་གྱིས་ཕྱི་དགྲ་དངོས་ཡོད་ཀྱིས་སྲོག་ལ་འཚེ་བ་ལས་སྐྱོབ། མ་ཡིས་ནང་དགྲ་ཆགས་སྡང་གི་འཚེ་བ་ལས་སྐྱོབ། ཎི་ཡིས་གསང་དགྲ་ངར་འཛིན་གྱི་གནོད་པ་ལས་སྐྱོབ། པད་ཀྱིས་ཕྱི་དགྲ་གདོན་བགེགས་ཀྱི་ནད་རིགས་ལས་སྐྱོབ། མེ་ཡིས་ནང་དགྲ་གཏི་མུག་གི་རྨོངས་པ་ལས་སྐྱོབ། ཧཱུྃ་གིས་གསང་དགྲ་ང་དང་ང་ཡིར་འཛིན་པའི་གནོད་པ་ལས་སྐྱོབ། ཕྱི་ནང་གསང་བའི་དགྲ་གསུམ་གྱི་གནོད་པ་ལས་སྐྱོབ་པར་བྱེད་པ་ཡང་ཡི་གེ་དྲུག་པ་བཟླས་པ་ལས་འབྱུང་ངོ་།། བཅུ་གཅིག་པ་མ་ཡེངས་རྩེ་གཅིག་སེམས་ཀྱིས་ཡི་གེ་དྲུག་པ་བཟླ་བ་བསྟན་པ། བཅུ་གཅིག་པ་མ་ཡེངས་རྩེ་གཅིག་སེམས་ཀྱིས་ཡི་གེ་དྲུག་པ་བཟླ་བ་བསྟན་པ་ནི། ཆོས་སུ་ཡི་གེ་དྲུག་པ་བཟང་མོད་དེ།། ཁ་ཡེངས་མིག་ཡེངས་བཟླས་པས་འབྲས་མི་འབྱིན།། ངག་བཟླས་གྲངས་ལ་ཞེན་པ་ཨ་འཐས་བློ།། རྩེ་གཅིག་སེམས་ལ་ལྟོས་ལ་ཡིག་དྲུག་སྒྲོངས།། ཞེས་གསུངས་ཏེ། སངས་རྒྱས་ཤཱཀྱ་ཐུབ་པའི་ཆོས་ཚུལ་ཐམས་ཅད་ཀྱི་སྙིང་པོ་མདོ་རྒྱུད་གསུང་རབས་ཐམས་ཅད་ཀྱི་བཅུད་འདུས་པའི་དམ་ཆོས་ཡི་གེ་དྲུག་མ་ལས་ལྷག་པའི་ཆོས་ཤིག་བཙལ་ཀྱང་རྙེད་དུ་མེད་པས་ཆོས་སུ་ཡི་གེ་དྲུག་པ་བཟང་བ་ཡིན་མོད་དེ། ཡིག་དྲུག་དེ་ཉིད་ཟློ་མཁན་གྱིས་ཐོག་མར་བྱང་ཆུབ་མཆོག་ཏུ་སེམས་མ་བསྐྱེད། བར་དུ་དངོས་གཞི་དམིགས་མེད་ཀྱི་དམིགས་པས་མ་ཟིན། མཐའ་མར་དགེ་རྩ་བསྔོ་སྨོན་གྱི་རྒྱས་མ་ཐེབས། བསྐྱེད་རིམ་གྱི་གསལ་སྣང་དང་། རྫོགས་རིམ་མཚན་བཅས་མཚན་མེད་ཀྱི་ཕྱོགས་ཙམ་ཡང་མི་ཤེས་པར་ཁ་ཡེངས་མིག་ཡེངས། ཡས་ལྟ་མས་ལྟ། ཡས་ཉན་མས་ཉན། ཁྱོད་ཀྱི་ཁ་ཆེ་ཁི། ཁོ་ཡི་སྣ་རིང་ཁི་ཟེར་ཞོར། ལུས་ཆོས་རའི་ནང་དུ་ཡོད་ཀྱང་སེམས་མི་དགེ་སྡིག་ལས་ཀྱི་རྗེས་སུ་འབྲང་བཞིན་བཟླས་པས་ནི་ནེ་ཙོའི་ཁ་ཡི་འདོན་པ་ལྟར་འབྲས་བུ་མི་འབྱིན་པ་སྟེ་འབྲས་བུ་ཐོབ་ཏུ་མེད་པས། ངག་བཟླས་ཀྱི་ཁ་གྲངས་ཁོ་ན་སོང་བས་ཆོག་སེམས་ཀྱིས་གྲངས་ལ་ཞེན་པའི་བདེན་འཛིན་ཨ་འཐས་ཀྱི་བློ་ངན་འདི་བོར་ལ་རྩེ་གཅིག་ཏུ་སེམས་ལ་ལྟོས་ལ་ཡིག་དྲུག་སྒྲོངས། ཞེས་གསུངས་པའོ། །སེམས་དོན་འདི་ཆོས་པ་སྲང་དུ་གཞུག་པའི་ཞལ་གདམས་ལས། སྟོང་ཉིད་སྙིང་རྗེ་དང་འབྲེལ་དགོས། སྙིང་རྗེ་འགྲོ་དོན་དང་འབྲེལ་དགོས། འགྲོ་དོན་ཐུགས་རྗེ་དང་འབྲེལ་དགོས་པ་སྟེ་འབྲེལ་བ་གསུམ་གྱིས་བཤད་ན། དང་པོ་སྟོང་པ་དང་སྙིང་རྗེ་འབྲེལ་དགོས་པ་ནི། སེམས་སྟོང་པ་ཡིན། སྟོང་པ་ལ་བཅོས་རྒྱུ་མེད། སྒོམ་རྒྱུ་མེད། འོན་ཀྱང་སྟོང་པ་ཕྱལ་ཆད་པ་དེ་བྱང་ཆུབ་སེམས་དཔའ་ཐུགས་རྗེ་ཆེན་པོའི་ཆོས་མ་ཡིན་པས། རང་དོན་དུ་སྟོང་ཉིད་རང་གསལ་སྒོམ། གཞན་དོན་དུ་སེམས་ཅན་ལ་སྙིང་རྗེ་བསྐྱེད་དགོས། སྟོང་ཉིད་སྙིང་རྗེའི་སྙིང་པོ་ཅན་ལས་སངས་རྒྱས་སྐུ་གསུམ་ཡེ་ཤེས་ལྔའི་བདག་ཉིད་ཅན་འབྱུང་ངོ་། །གཉིས་པ་སྙིང་རྗེ་འགྲོ་དོན་དང་འབྲེལ་དགོས་པ་ནི། སྙིང་རྗེས་མ་ཟིན་ན་འགྲོ་དོན་མི་འོང་བས། སེམས་ཅན་འཁོར་བའི་སྡུག་བསྔལ་གྱིས་ཟིན་པ་རྣམས་ལ་ཕན་གདགས་པའི་སེམས་ཀྱིས། ཨཱོྃ་མ་ཎི་པདྨེ་ཧཱུྃ་ཞེས་པའི་སྙིང་པོ་ཡི་གེ་དྲུག་པ་ལ་འགོད་པར་བྱའོ། །ཡི་གེ་དྲུག་པས་སེམས་ཅན་ཐམས་ཅད་འཕགས་པ་ཐུགས་རྗེ་ཆེན་པོའི་སར་འགོད་པར་བྱེད་པས་ཐུགས་རྗེ་ཆེན་པོའི་གོ་འཕང་ལ་ནམ་ཞིག་འཁོད་པའི་ཆེད་དུ་ཡི་གེ་དྲུག་པ་བཟླ་དགོས་པའི་བརྩོན་པའི་སྐུལ་ལྕག་ཀྱང་བྱས་པའོ། །གསུམ་པ་འགྲོ་དོན་ཐུགས་རྗེ་དང་འབྲེལ་བ་ནི། འགྲོ་བའི་དོན་བྱེད་པ་ལ་རིགས་དྲུག་སྤྱིའི་ལྷ་ཐུགས་རྗེ་ཆེན་པོ་ཡིན་པས། ཨཱོྃ་མ་ཎི་པདྨེ་ཧཱུྃ་ཞེས་བཟླས་ན། ཨཱོྃ་ལྷ་ཡི་ཐུབ་པས་ང་རྒྱལ་དག་སྟེ་ལྷའི་གནས་སྦྱོང་། མ་ལྷ་མ་ཡིན་གྱི་ཐུབ་པས་ཕྲག་དོག་དག་སྟེ་ལྷ་མ་ཡིན་གྱི་གནས་སྦྱོང། ཎི་མི་ཡི་ཐུབ་པས་ཐེ་ཚོམ་དག་སྟེ་མིའི་གནས་སྦྱོང་། པད་བྱོལ་སོང་གི་ཐུབ་པས་འདོད་ཆགས་དག་སྟེ་བྱོལ་སོང་གི་གནས་སྦྱོང་། མེ་ཡི་དྭགས་ཀྱི་ཐུབ་པས་སེར་སྣ་དག་སྟེ་ཡི་དྭགས་ཀྱི་གནས་སྦྱོང་། ཧཱུྃ་དམྱལ་བའི་ཐུབ་པས་དམྱལ་བར་སྐྱེ་བའི་རྒྱུ་ཞེ་སྡང་དག་སྟེ་དམྱལ་བའི་གནས་སྦྱོང་། འགྲོ་དྲུག་ཐུགས་རྗེས་བཟུང་ནས་རིགས་དྲུག་གི་སྡུག་བསྔལ་སྦྱོང་བ་ཐུགས་རྗེ་འགྲོ་དོན་དང་འབྲེལ་བ་ཡིན་ནོ། །དེས་ན། རྩེ་གཅིག་སེམས་ལ་ལྟོས་ལ་ཡིག་དྲུག་སྒྲོངས། །ཞེས་པ་འདིས་ཆོས་ཐམས་ཅད་ཀྱི་རྩ་བ་སྟོང་ཉིད་ཡིན་པས་དེ་ཤེས་ན་གཅིག་ཤེས་ཀུན་གྲོལ་ཡིན་པའང་བསྟན་ཏོ།། བཅུ་གཉིས་པ་ནན་གྱིས་བསྐྱར་ཏེ་སེམས་ལ་ལྟ་བའི་མན་ངག་བསྟན་པ། བཅུ་གཉིས་པ་ནན་གྱིས་བསྐྱར་ཏེ་སེམས་ལ་ལྟ་བའི་མན་ངག་བསྟན་པ་ནི། ཡང་དང་ཡང་དུ་རང་གི་སེམས་བརྟགས་ན།། ཇི་ལྟར་བྱས་ཀྱང་ཡང་དག་ལམ་ལ་འགྲོ།། གདམས་པའི་གནད་བརྒྱ་འདུས་པ་འདི་ཁོ་ན།། གནད་དོན་གཅིག་ཏུ་སྒྲིལ་ལ་ཡིག་དྲུག་སྒྲོངས།། ཞེས་གསུངས་ཏེ། ད་སྔོན་ཐོག་མེད་ནས་ད་ལྟའི་བར་དུ་འཁྲུལ་བའི་སེམས་འདི་ཀུན་འབྱུང་ལས་དང་ཉོན་མོངས་ཀྱིས་ཁ་ལོ་བསྒྱུར་ནས། ཁམས་གསུམ་འཁོར་བའི་འཁྲུལ་སྣང་མེད་བཞིན་སྣང་བ་ཇི་ལྟར་དྷ་དུ་རའམ་ཐང་ཕྲོམ་གྱི་འབྲས་བུ་ཟོས་པ་ལྟ་བུའི་སྣང་བ་འདི་བྱུང་ཞིང། དེ་ཡང་སེམས་འདིས་ཕྱི་གཞན་གྱི་སྐྱོན་ལ་རྟོག་པ་ལས་ཁ་ནང་དུ་ཚུར་འཁོར་དེ་རང་གིས་རང་ཉིད་ལ་བརྟགས་མ་མྱངས་པ་ཡིན་གྱི། འདི་ལྟར་ཡང་དང་ཡང་དུ་རང་གི་སེམས་ལ་བརྟག་དཔྱད་གྱིས་ཞེས་གདམས་ངག་གི་གནད་བསྟན་པ་ལྟར་དུ་རང་སེམས་ལ་བལྟས་ཚེ། ཕྱིའི་སྐྱོན་དང་གནོད་པ་མང་པོ་མཐོང་དུ་ཡོད་པ་འདི་མེ་ལོང་གི་ངོས་སུ་རང་བྱད་ཤར་བ་བཞིན་དུ། རང་སེམས་འཁྲུལ་བའི་སྣང་ངོར་འཁྲུལ་སྣང་གི་མི་འདོད་པ་ཁོ་ནར་ཤར་བར་ཟད་ཀྱི། རང་སེམས་འཁྲུལ་བའི་དབང་དུ་མ་ཤོར་ན་སྒྲིབ་པ་དག་རིམ་བཞིན་དུ་སེམས་ཉིད་ཀྱི་རང་ངོ་མཇལ་ཏེ། མ་འཁྲུལ་གཞི་ཡི་གནས་ལུགས་མངོན་དུ་གྱུར་པ་ཡིན་པས། ཡང་དང་ཡང་དུ་རང་གི་སེམས་བརྟགས་པའམ་སེམས་ཉིད་དོན་གྱི་བཞུགས་ཚུལ་གཏན་ལ་ཕབ་ན། གཞི་མ་འཁྲུལ་གདོད་ནས་དག་པ་ལ། ལམ་མ་འཁྲུལ་བྱང་ཆུབ་སེམས་ཀྱི་རྩལ་སྦྱོང་ནས། འབྲས་བུ་མ་འཁྲུལ་གཉིས་འཛིན་གྱི་འཁྲུལ་བ་ཞིག་སྟེ། ཇི་ལྟར་བྱས་ཀྱང་ཡང་དག་གི་ལམ་ཟུང་འཇུག་ཐུགས་རྗེ་ཆེན་པོའི་གོ་འཕང་ལ་སྦྱོར་ཞིང་མཐའ་ཡས་འགྲོ་བའི་གཞན་དོན་ནམ་མཁའ་མ་ཞིག འཁོར་བ་མ་སྟོང་གི་བར་དུ་བྱེད་ནུས་པ་ཡིན་པས། གདམས་པའི་གནད་བརྒྱ་འདུས་པ་རང་སེམས་རང་གིས་བརྟགས་ནས་སེམས་ཀྱི་ཆོས་ཉིད་དེ་ཁོ་ན་ཉིད་སྟོང་ཉིད་སྙིང་རྗེའི་སྙིང་པོ་ཅན་མངོན་དུ་བྱེད་པ་འདི་ཁོ་ན་རུ་གནད་དོན་གཅིག་ཏུ་དྲིལ་ལ་ཡིག་དྲུག་སྒྲོངས། ཞེས་གསུངས་པའོ། །དེ་ལྟར་བསྒྲུབས་ནས་ཐུགས་རྗེ་ཆེན་པོ་གྲུབ་ན། ཐུན་མོང་དང་། མཆོག་གི་དངོས་གྲུབ་གང་ལ་ཅི་འདོད་ཐམས་ཅད་ཐོབ་ནས་ཚེ་འདི་དང་ཕྱི་མར་རང་གཞན་ཐམས་ཅད་ལ་བདེ་སྐྱིད་འབྱུང་བའོ། །དུས་རྒྱུན་དུ་ཡང་འདི་ལྟ་བུའི་སྣང་བ་ཐམས་ཅད་ཐུགས་རྗེ་ཆེན་པོའི་ཞིང་ཁམས་ཡིན་པའི་སྣང་བ་དང་། ཕྱི་སྣོད་ཁང་ཁྱིམ་དང་བཅས་པ་ཐམས་ཅད་ཐུགས་རྗེ་ཆེན་པོའི་ཞིང་ཁམས་དང་གཞལ་ཡས་ཁང་། ནང་བཅུད་ཀྱི་འགྲོ་བ་ཕོ་མོ་ཐམས་ཅད་ཀྱང་ཕོ་ཐམས་ཅད་ཐུགས་རྗེ་ཆེན་པོ། མོ་ཐམས་ཅད་ཡུམ་ཡི་གེ་དྲུག་མ། ཁྱེའུ་ཐམས་ཅད་སྲས་ནོར་བུ་འཛིན་པ། བུ་མོ་ཐམས་ཅད་སྲས་མོ་རིག་སྔགས་འཛིན་པ། སྒྲ་ཐམས་ཅད་གསུང་མཆོག་ཡི་གེ་དྲུག་མའི་རང་སྒྲ། དྲན་རྟོག་ཕྲ་རགས་གང་ཤར་ཐམས་ཅད་འཕགས་པ་ཐུགས་རྗེ་ཆེན་པོའི་ཡེ་ཤེས་ཀྱི་རང་རྩལ་མ་འགག་བརྡ་ཆོས་སུ་ཤར་བ་རང་འབྲེལ་ཆོས་ཉིད་ཀྱི་ཀློང་དུ་རྒྱུན་མི་ཆད་པར་ཉམས་སུ་ལེན་དགོས་པའོ།། བཅུ་གསུམ་པ་གདམས་པའི་མཇུག་བསྡུ་བ། བཅུ་གསུམ་པ་གདམས་པའི་མཇུག་བསྡུ་བ་ནི། དང་པོར་སྙིགས་མའི་སྤྱོད་ལ་སྐྱོ་བའི་གཏམ།། གཏམ་འདི་རང་གིས་རང་ལ་གདམས་པ་སྟེ།། རང་བློ་གཏིང་ནས་འགྱུར་བའི་སྨྲེ་སྔགས་ཚིག། ཁྱོད་ལའང་འདྲའམ་སྙམ་ནས་ཕུལ་བ་ལགས།། ཞེས་གསུངས་ཏེ། གདམས་པ་འདིའི་དབུ་ཞབས་ཀྱི་དོན་བསྡུས་ནས་འགག་བསྡམས་ཏེ་གསུང་བ་ནི། དང་པོ་སྙིགས་མའི་སྤྱོད་ལ་སྐྱོ་བའི་གཏམ། །ཞེས་དེ་རིང་ཁ་སང་ཚེ་ཡི་སྙིགས་མ། དུས་ཀྱི་སྙིགས་མ། ལྟ་བའི་སྙིགས་མ། ཉོན་མོངས་པའི་སྙིགས་མ། སེམས་ཅན་གྱི་སྙིགས་མ་སྟེ་སྙིགས་མ་ལྔ་ལྷག་པར་བདོ་ཞིང་སྨིན་པའི་དུས་ཏེ། དེ་ཡང་སེམས་ཅན་སྤྱི་མཐུན་གྱི་བསོད་ནམས་དམན་པས་མི་ཐམས་ཅད་ཀྱི་ཚེ་ཐུང་ཞིང་གློ་བུར་ཡེ་འདྲོག་གི་འཆི་རྐྱེན་མང་། དུས་གཞིའི་འགྱུར་ལྡོག་ཆ་མི་སྙོམ་པར་འབྱུང་གཞིའི་འཚེ་བས་ཉེན། ལྟ་སྤྱོད་ལོག ངན་ཡིད་ལྟ་ངན་གྱི་རྗེས་སུ་འབྲང་། ཉོན་མོངས་པའི་གཞན་དབང་དུ་གྱུར་པའི་སེམས་ཀྱིས་ཀུན་ནས་བསླངས་པའི་སྤྱོད་པ་ངན་པ། ཡ་རབས་དམ་པའི་མཛད་བཟང་ལམ་ཁའི་རྡོ་བཞིན་དུ་བོར། མ་རབས་སྙིགས་མའི་སྤྱོད་ངན་ལ་སློབ་མི་དགོས་པར་རང་བཞིན་གྱིས་འཇུག བསམ་ངན་གཡོ་སྒྱུ་འཆང་ནས་གཞན་མགོ་སྐོར་ཟོལ་བྱས་ཀྱང་། ཐ་མར་ལ་ཡོགས་རྒྱུ་འབྲས་རང་ལ་སྨིན་ནས་རང་མགོ་འཐོམས་ནས་འདུག་པ། ཕར་ལ་བཟང་བྱས་ཀྱང་ཚུར་ལ་ངན་ལན་སྤྲོད་པ། བསམ་དཀར་དྲང་པོའི་ཕན་སེམས་ཀྱིས་བསླབ་བྱ་བྱས་རུང་དེ་ལ་ངན་དུ་བརྩི་བ། དེ་ལྟར་རྒྱལ་ཁམས་ངན་སྤྱོད་ཅན་རྐྱང་བས་གང་ནས། ཆོས་བྱེད་ལ་སྨོད། སྡིག་བྱེད་ལ་བསྟོད། ཕྲག་དོག་ངན་སེམས་ཀྱིས་རང་མིན་ཐམས་ཅད་དགྲ་རུ་མཐོང་། གཞན་གྱི་ལེགས་པ་ཡོད་ཚད་མིག་གི་ཚེར་མར་གྱུར། ཡ་རབས་དྲང་པོའི་ལམ་སྲོལ་འཛིན་མཁན་ལ་དམན་པ་དང་ལོག་པར་མཐོང་བའི་དུས་ཚོད་འདིར། གཅིག་པུར་དབེན་པའི་རི་ལ་དམ་པའི་ལྷ་ཆོས་རྣམ་དག་རེ་འགྲུབ་ན་དགའ་བ་ལས། གཞན་རྒྱ་ཆེའི་བསྟན་འགྲོར་སྨོན་པའི་བྱ་བ་རེ་ལ་བསམ་བཟང་གིས་ཞུགས་ཀྱང་སྒྲོ་སྐུར་གྱི་གཞི་ལས་མི་འདའ་བས། ཅིས་ཀྱང་དགོས་མེད་ཀྱི་བློ་སྣ་སྟུང་དགོས་པའི་གཏམ་སྟེ། གཏམ་འདི་རང་གིས་རང་ཉིད་ལ་སྙིང་ནས་གདམས་པ་སྟེ། རང་བློ་སྙིགས་མའི་བསམ་སྤྱོད་ངན་པའི་རྐྱེན་གྱིས་གཏིང་ནས་འགྱུར་བའི་གདམས་པའི་སྨྲེ་ངག་གི་ཚིག་འདི་སྐུལ་བ་པོ་ཁྱོད་ལའང་རང་དང་འདྲའམ་སྙམ་སྟེ་ཕུལ་བ་ལགས། ཞེས་གསུངས་སོ། །ཀུན་མཁྱེན་ཀློང་ཆེན་པས་རང་ལ་གྲོས་སུ་གདམས་པ་རྡོ་རྗེའི་མགུར་ལས། སྙིང་པོའི་དེ་ཉིད་ནམ་ཡང་མི་སྒྲུབ་པར། །ཚེ་འདི་ལྷུར་ལེན་ཉིན་མཚན་འཁྲུལ་པས་འདའ། །མདོ་མེད་ཅོལ་ཆུང་དམ་པས་བཞད་གད་གནས། །འདི་འདྲའི་སྤྱོད་པས་ཡོང་བར་འདུག་གམ་སོམས། །ཞེས་དང་། གཞན་ཡང་། ཚེ་ཡང་ཡུན་ཐུང་སྐད་ཅིག་རེ་རེས་འགྲིབ། །སྐྱེས་པ་འཆི་ཞིང་འདུས་པ་རྣམས་ཀྱང་འབྲལ། །མཐོན་པོ་རྒུད་ཅིང་བསགས་པའི་མཐའ་ཡང་འཛད། །གཅིག་པུར་ཞི་བ་བསྒྲུབ་ན་མི་ལེགས་སམ། །ཞེས་གསུངས་པ་ལྟར་དུ། རང་གིས་རང་ལ་གྲོས་འདེབས་ཀྱི་ཚུལ་དུ་ཕན་པའི་གདམས་ངག་རྗེས་འཇུག་ལ་གནང་བ་ནི་ཆོས་བརྒྱུད་འདིའི་དམ་པ་གོང་མ་རྣམས་ཀྱི་ཕྱག་བཞེས་ཡིན་པའོ། །གལ་ཏེ་ཁྱེད་ལ་ཆོས་འཇིག་རྟེན་མཉམ་དུ་འགྲུབ་པ་སོགས་ཀྱི་རྣམ་དཔྱོད་ཡོད་ན་མཐོལ་ལོ་བཤགས་ཞེས་སྙིགས་དུས་ཀྱི་མིང་ཆེན་འཛིན་པའི་དཔོན་མ་བླ་རྣམས་ལ་བསྟིང་ཚིག་གམ་ཁྲེལ་གཏམ་ཅུང་ཟད་མཛད་པའི་ཚུལ་གྱིས་གསུང་བ་ནི། མི་འདྲ་ལྟ་སྒོམ་མཐོན་པོའི་གདེངས་ཚད་དང་།། ལུགས་གཉིས་བྱ་བཞག་འགྲུབ་པའི་རྣམ་དཔྱོད་བློ།། རང་གཞན་བློ་གཏད་འཕེར་བའི་འདུན་གྲོས་ཤོམས།། ཁྱོད་ལ་ཡོད་པར་གྱུར་ན་མཐོལ་ལོ་བཤགས།། ཞེས་གསུངས་ཏེ། དུས་ངན་སྙིགས་མའི་བསམ་སྤྱོད་ལ་སྐྱོ་ནས་སྡུག་གཏམ་སྨེ་ངག་བཏོན་པའི་ཚིག་འདི་དག་དང་མི་འདྲ་བར་ལྟ་བ་དང་སྒོམ་པ་མཐོན་པོར་སོན་པའི་རྟོགས་པའི་གདེང་ཚོད་དང་། ཆོས་དང་སྲིད་ཀྱི་ལུགས་གཉིས་ཀྱི་བྱ་བཞག་མཉམ་དུ་འགྲུབ་ཐུབ་པའི་རྣམ་དཔྱོད་ཀྱི་བློ་གྲོས་དང་། རང་ཉིད་ཀྱི་བསམ་སྤྱོད་ཡང་དག་ཡིན་པར་རང་ཉིད་ལ་བློ་ཁེལ་དང་ར་འཕྲོད་ཡོད་ཅིང་། གཞན་དག་ལམ་དེར་ཁྲིད་ཀྱང་མི་བསླུ་ངེས་པ་ཡིན་པའི་བློ་གཏད་འཕེར་བའི་འདི་དང་ཕྱི་མའི་འདུན་གྲོས་བྱེད་པའི་ཤོམས་ཁྱོད་ལ་ཡོད་པར་གྱུར་ན་ཁོ་བོས་སྨྲས་པ་ཐལ་ཆེས་པས་མཐོལ་ལོ་བཤགས། །ཞེས་གསུངས་པའོ།། བར་དུ་ལྟ་སྒོམ་གཏན་ལ་འབེབས་པའི་གཏམ།། རྟོགས་པའི་ཉམས་མྱོང་བདག་ལ་མེད་མོད་ཀྱང་།། ཀུན་མཁྱེན་ཡབ་སྲས་བརྒྱུད་པ་རིན་པོ་ཆེའི།། གསུང་གིས་བསྐྱངས་པའི་གོ་ཡུལ་བཤད་པ་ལགས།། ཞེས་གསུངས་ཏེ། བར་དུ་ལྟ་སྒོམ་སྤྱོད་འབྲས་ཀྱི་རྣམ་བཞག་ཇི་བཞིན་གཏན་ལ་འབེབས་པའི་གཏམ་གོང་དུ་བཤད་པ་དེ་དག རྟོགས་ཤིང་གོམས་པ་མཐར་ཕྱིན་པའི་ཉམས་མྱོང་མཐོན་པོ་བདག་ལ་མེད་པས་མྱངས་པའི་སྒོ་ནས་བཤད་པ་མིན་མོད་ཀྱང་། ཀུན་མཁྱེན་ཆོས་ཀྱི་རྒྱལ་པོ་རྒྱལ་བ་ཀློང་ཆེན་རབ་འབྱམས་དང་། དེའི་ཡེ་ཤེས་ཀྱི་སྐུས་ལན་གསུམ་རྗེས་སུ་བཟུང་བའི་ཐུགས་ཀྱི་སྲས་ཀློང་ཆེན་སྙིང་ཐིག་གི་བསྟན་པའི་མངའ་བདག་ཆེན་པོ་ཀུན་མཁྱེན་ཕྱི་མ་རིག་འཛིན་འཇིགས་མེད་གླིང་པ་སོགས་སྔ་འགྱུར་བརྒྱུད་པ་རིན་པོ་ཆེའི་རྩ་བརྒྱུད་ཀྱི་བླ་མ་དམ་པ་རྣམས་ཀྱིས་གསུང་གིས་བསྐྱངས་པའི་གོ་ཡུལ་རྣམས་མ་ནོར་བར་བཤད་པ་ལགས། ཞེས་གསུངས་པའོ།། ཐ་མ་ངེས་འབྱུང་ཆོས་ལ་སྐུལ་བའི་གཏམ།། གཏམ་འདི་བརྗོད་དོན་མེད་ཀྱང་ཤུགས་ཀྱིས་ཐལ།། འོན་ཀྱང་སྲས་བཅས་རྒྱལ་བའི་བཞེད་གཞུང་དང་།། མི་འགལ་ཉམས་སུ་བླངས་ན་སྐུ་དྲིན་ཆེ།། ཞེས་གསུངས་ཏེ། ལྟ་སྒོམ་གཏན་ལ་ཕབ་ཟིན་པའི་རྗེས་ཐོག་གམ་ཐ་མ་རུ། སྤྱིར་སྒྲ་འཇུག་པ་ཙམ་གྱི་དབང་དུ་བྱས་ན་འཁོར་བའི་སྡུག་བསྔལ་ལ་ཡིད་འབྱུང་བའི་སྐྱོ་ཤས་ལ་ངེས་འབྱུང་ཙམ་དང་། འཁོར་བར་སྐྱོ་ནས་ཐར་བར་འཇུག་པར་འདོད་པའི་ངེས་འབྱུང་རྣམ་དག་གཉིས་སུ་ཡོད་པ་ལས། ངེས་འབྱུང་རྣམ་དག་ཐར་བའི་ཆོས་ལ་འཇུག་པར་སྐུལ་བའི་གཏམ་བཤད་ཅིང་། སྙིགས་མའི་སྐབས་འདིར་གཞན་ལ་བཤད་ཀྱང་གོ་མཁན་དང་། སྒྲུབ་འདོད་བྱེད་མཁན་ཉིན་མོའི་སྐར་མ་ལྟར་དུ་དཀོན་པས་གཏམ་འདི་ཆེད་དུ་བརྗོད་དོན་མེད་ཀྱང་། སྙིགས་མའི་དུས་ཀྱི་གདུལ་དཀའི་འགྲོ་བའི་བསམ་སྤྱོད་ལ་བསམས་ནས་བརྩེ་བའི་སྙིང་རྗེའི་ཤུགས་ཀྱིས་ཐལ་ལོ། །འོན་ཀྱང་གདམས་པ་འདི་ཉིད་སྲས་བཅས་རྒྱལ་བའི་བཞེད་གཞུང་བཀའ་དང་རྗེས་འཇུག་མཁས་པའི་བསྟན་བཅོས་དང་བཅས་མདོར་ན་མདོ་རྒྱུད་ཀྱི་གཞུང་དང་མི་འགལ་བས། ལེགས་པར་ཉམས་སུ་བླངས་ན་བསྟན་དང་འགྲོ་བའི་མིག་ལྟོས་སུ་སྐུ་དྲིན་ཆེའོ། །ཞེས་གསུངས་པའོ། །དེ་ཡན་གྱིས་གཞུང་དོན་མཇུག་བསྡུ་དང་བཅས་པ་སོང་བའོ།། གསུམ་པ་མཇུག་གི་དོན། ད་ནི་སྤྱིའི་ས་བཅད་གསུམ་པ་མཇུག་གི་དོན་ལ་གཉིས་ལས། དང་པོ་གདམས་པ་གང་ཞིག་གནས་གང་ནས་རྩོམ་པ་པོ་སུ་ཞིག་གིས་ཇི་ལྟར་བརྩམས་པའི་ཚུལ་བསྟན་པ། དང་པོ་གདམས་པ་གང་ཞིག་གནས་གང་ནས་རྩོམ་པ་པོ་སུ་ཞིག་གིས་ཇི་ལྟར་བརྩམས་པའི་ཚུལ་བསྟན་པ་ནི། དེ་ལྟར་ཐོག་མཐའ་བར་གསུམ་དགེ་བའི་གཏམ།། བྲག་དཀར་རྩེ་རྒྱལ་གྲུབ་པའི་བྲག་ཕུག་ཏུ།། སྔར་འདྲིས་གྲོགས་ཀྱིས་བསྐུལ་བ་མ་བཟོད་ནས།། དུག་ལྔ་མེ་འབར་ཨ་བུ་ཧྲལ་པོས་བྲིས།། ཞེས་གསུངས་ཏེ། གོང་དུ་བཤད་པ་དེ་ལྟར་ཐོག་མར་དགེ་བ་སྤྱིར་འཁོར་བ་དང་དགོས་སྙིགས་མའི་བསམ་སྤྱོད་ལས་བློ་ལྡོག་པའི་གཏམ། བར་དུ་དགེ་བ་ལྟ་སྒོམ་སྤྱོད་པའི་གདེང་འཚོལ་པའི་མན་ངག ཐ་མར་དགེ་བ་སྤང་བླང་འཇུག་ལྡོག་གི་གནད་མ་ནོར་བར་ཤེས་ནས་ཞེན་མེད་ཆོས་ལ་ཞུགས་ཏེ་སྒྲུབ་པ་མཐར་ཕྱིན་པའི་གཏམ་སྟེ་ཐོག་མཐའ་བར་གསུམ་དུ་དགེ་བའི་ཆིངས་ཀྱིས་བཅིངས་ནས་བཤད་པའི་གཏམ་འདི་ནི། ས་འཛིན་ལྷུན་པོའི་ཕྲེང་བས་བསྐོར་བའི་ཁོར་ཡུག་གིས་མཛེས་པར་བྱས་པའི་བྲག་དཀར་རྩེ་རྒྱལ་ན་གྲུབ་ཐོབ་གོང་མས་བསྟེན་པའི་ཡིད་འོང་རང་བྱུང་གི་དབེན་པ་མི་ཉག་རྒྱལ་འཕགས་རི་ཁྲོད་ཀྱི་བྲག་ཕུག་ཏུ་དཔལ་སྤྲུལ་རིན་པོ་ཆེ་བཞུགས་པའི་སྐབས་སུ། ཁོང་གི་སྔར་འདྲིས་ཀྱི་གྲོགས་པོ་སློབ་མ་རྒན་བུ་ཞིག་གིས་དེ་ལྟར་གསུང་རོགས་ཞེས་ཞུ་སྐུལ་བགྱིས་པར་ངོ་ཟློག་ཏུ་མ་བཟོད་ནས། རྩོམ་པ་པོ་དུག་ལྔ་མེ་འབར་ཨ་བུ་ཧྲལ་པོ་ཞེས་མཚན་འདི་ཁོང་རང་ཉིད་ཀྱིས་རང་ཉིད་ལ་བཏགས་པ་སྟེ། ཕྱི་ལྟར་ན་དམ་པའི་རང་གཤིས་ཁེངས་པ་དང་བྲལ་བའི་དམན་ས་གོང་མའི་གདན་ས་འཛིན་པའི་ཁྱད་ཆོས་དང་། ནང་ལྟར་ན་ཉོན་མོངས་འཁྲུལ་བའི་ནད་ཀྱིས་མི་བརྫི་བའི་བྱ་བཏང་སྦས་པའི་རྣལ་འབྱོར་གྱི་རྣམ་ཐར་དང་། གསང་བ་ལྟར་ན་ཉོན་མོངས་དུག་ལྔ་ལ་ཡེ་ཤེས་ཀྱི་མེ་འབར་བ་ཨ་ཡིག་སྐྱེ་བ་མེད་པའི་དོན་རྟོགས་པས་སྲིད་པའི་སྣང་ཤེས་ཁྲལ་མ་ཁྲོལ་དུ་སོང་བའི་ཧྲལ་པོ་དེས་བྲིས་སོ། །ཞེས་གསུངས་པའོ།། གཉིས་པ་དགེ་ཚོགས་བསྔོ་བ་དང་སྨོན་ལམ་མཛད་པས་མཐའ་བརྒྱན་པ། གཉིས་པ་དགེ་ཚོགས་བསྔོ་བ་དང་སྨོན་ལམ་མཛད་པས་མཐའ་བརྒྱན་པ་ནི། ཁ་བཤད་རྐྱང་པར་སོང་ཡང་ཅི་ཆ་སྟེ།། དོན་བཟང་འཁྲུལ་བ་མེད་པའི་དགེ་ཚོགས་རྒྱུན།། ཁྱེད་དང་བདག་བཅས་ཁམས་གསུམ་འགྲོ་བ་ཀུན།། ཆོས་མཐུན་བསམ་པ་འགྲུབ་པའི་རྒྱུ་རུ་བསྔོ།། ཞེས་གསུངས་ཏེ། སླར་ཡང་ཁེངས་སྐྱུང་མཛད་པ་དང་བཅས་ཏེ་གཞུང་འདི་ལས་བསྟན་པའི་དོན་གྱི་ཉམས་ལེན་དེ་དག་རང་རྒྱུད་དུ་མ་ཁེལ་བར་ཁ་བཤད་སྟོང་གཏམ་རྐྱང་པ་རུ་སོང་ཡང་ཅི་ཆ་སྟེ་ངེས་པ་ཅི་ཡོད། འོན་ཀྱང་གོང་དུ་བཤད་པ་དག་ནི་མ་ནོར་དོན་བཟང་འཁྲུལ་བ་མེད་པ་ཡིན་པས། རྒྱལ་གསུང་བཀའ་དང་དགོངས་འགྲེལ་གྱི་ཟབ་ཅིང་རྒྱ་ཆེའི་གནད་ཀུན་ཚིག་ཉུང་དོན་འདུས་པ་རུ་བསྡུས་ཏེ་གོ་སླའི་ཚིག་གིས་བཀྲལ་བའི་རྣམ་དཀར་དགེ་ཚོགས་ཀྱི་རྒྱུན་འདི་བདག་གཞན་གྱིས་དུས་གསུམ་བསགས་ཡོད་ཀྱི་དགེ་རྩ་དང་བསྡོམས་ཏེ། སྐུལ་བ་པོ་ཁྱེད་དང་རྩོམ་པ་པོ་བདག་དང་བཅས་པའི་ཁམས་གསུམ་སྲིད་པ་གསུམ་གྱིས་བསྡུས་པའི་འགྲོ་བ་སེམས་ཅན་གྱི་ཚོགས་ཀུན་གྱི་ཆོས་དང་མཐུན་པའི་བསམ་པ་འགྲུབ་པའི་རྒྱུ་རུ་བསྔོ་བ་ཡིན་ཞེས། ཆོས་དང་མཐུན་པའི་བསམ་པའི་འབྲས་བུ་མཐར་ཐུག་བླ་མེད་བྱང་ཆུབ་ཆེན་པོ་ཐོབ་པ་ཉིད་ཡིན་པས་དོན་དུ་འགྲོ་ཀུན་སངས་རྒྱས་ཐོབ་པའི་རྒྱུ་རུ་བསྔོ་བ་ཡིན། ཞེས་གསུངས་པའོ། །གང་ཞིག་བསྔོ་བར་བྱ་བ་དང་། གང་གིས་སྔོ་བར་བྱེད་པ་དང་། གང་ལ་བསྔོ་བའི་ཡུལ་དང་བཅས་པ་འཁོར་གསུམ་རྣམ་པར་མི་རྟོག་པའི་དམིགས་མེད་ཀྱི་བསྔོ་བས་བསྔོས་པ་དང་ཆབས་ཅིག་ཏུ་དེ་བཞིན་སྒྲུབ་པའི་སྨོན་ལམ་ཡང་ཤུགས་ལ་བསྟན་ཏོ། །དགེའོ། །ཞེས་འཇིག་རྟེན་ཀུན་ཏུ་དགེ་བའི་བཀྲ་ཤིས་ཀྱི་སྣང་བ་ཆེན་པོས་ས་གསུམ་ཡོངས་སུ་ཁྱབ་པའི་ཤིས་ཚིག་གིས་ཐོག་མཐའ་བར་དུ་དགེ་བའི་གཏམ་ལྟ་སྒོམ་སྤྱོད་གསུམ་ཉམས་ལེན་དམ་པའི་སྙིང་ནོར་ཞེས་བྱ་བའི་གདམས་པ་འདི་ཉིད་ཆ་ཚང་བ་ཡོངས་སུ་གྲུབ་པར་བསྟན་པ་ཡིན་ནོ།། ༈ ད་ནི་ཐེངས་འདིའི་རང་རེའི་ཆོས་ཁྲིད་ཀྱི་མཚམས་རེ་ཞིག་འཇོག་རྒྱུ་རུ་ཁེལ་ཞིང་། གོང་དུ་ཡང་ལན་མང་བཤད་པ་ལྟར་དུ། དམ་པའི་ཆོས་ནི་མིའི་སེམས་ཁམས་ཀྱི་སྨན་དང་། ནང་གི་བདེ་སྐྱིད་ཐོབ་བྱེད་ཀྱི་བདུད་རྩི་དང་། རང་དང་གཞན་གྱིས་འདི་དང་ཕྱི་མའི་བདེ་འབྲས་ཐོབ་པ་ལ་མེད་དུ་མི་རུང་བའི་ལམ་སྟོན་དང་། མ་ཞུགས་ཐབས་མེད་ངེས་པར་དུ་འཇུག་པར་བྱ་དགོས་པའི་འཇུག་བྱའི་ལམ་ཉག་གཅིག་དེ་ཡིན་ཞིང་། དམ་པའི་ཆོས་ཀྱི་བསྟན་དོན་སྙིང་པོ་ནི་སྟོང་ཉིད་རྣམ་པར་མི་རྟོག་པའི་ཡེ་ཤེས་མཐའ་ཐམས་ཅད་དང་བྲལ་བའི་དོན་དམ་བྱང་ཆུབ་ཀྱི་སེམས་ཐོབ་བྱ་གཞི་འབྲས་དབྱེར་མེད་པའི་བདག་ཉིད་འདི་ཡིན་ཞིང་། འདི་ནི་སྔར་མེད་གསར་དུ་སྐྱེས་པ་དང་། གང་སུ་ཞིག་གིས་གསར་དུ་བྱས་ནས་དེ་ཕྱིན་ཡོད་སོང་བ་ཞིག་མིན་ལ། གནས་ལུགས་ཇི་བཞིན་པའི་ཆོས་ཉིད་གཤིས་ཀྱི་བཞུགས་ཚུལ་འདི་ཇི་བཞིན་མ་རྟོགས་པར་འཁོར་བར་འཁྱམས་པའི་འགྲོ་བ་ལ། འདུལ་བྱེད་སྟོན་པར་ཤར་ནས་གདུལ་བྱའི་བློ་དང་འཚམས་པ་རུ་དམ་པའི་ཆོས་ཀྱི་སྣང་བ་གང་ལ་གང་འཚམས་ཀྱིས་སྟོན་པར་མཛད་པ་སྟེ། དེ་ཡང་སྟོན་པ་བཅོམ་ལྡན་འདས་ཀྱིས་ཐུན་མོང་གི་ཆོས་འཁོར་བསྐོར་བའི་གནས་རྒྱ་གར་འཕགས་པའི་ཡུལ་དུ་གདུལ་བྱའི་བློ་རིམ་ལྟར་དུ། མདོ་ཕར་ཕྱིན་མཚན་ཉིད་ཐེག་པ་གྲུབ་མཐའ་སྡེ་བཞིའི་ཁོངས་སུ་གཏོགས་པའི་རྣམ་གཞག་དང་། གནས་མ་ངེས་པ་ནས་སྔགས་རྒྱུད་སྡེ་དང་བཅས་པ་གསུངས་ཤིང་། བོད་ནས་སྲོལ་འབྱེད་ཀྱི་མཁས་གྲུབ་གོང་མ་རྣམས་ཀྱིས་དགོས་པའི་དབང་གིས་ལམ་སྲོལ་ཕྱེས་པའི་མདོ་སྔགས་ཟུང་འབྲེལ་གྱི་ཆོས་བརྒྱུད་ཁག་མང་པོ་སྔ་ཕྱི་རིམ་ཅན་དུ་དར་བ་ཐམས་ཅད་ཀྱང་སྟོན་པ་གཅིག་གི་བསྟན་པ་ཐེག་ཆེན་མདོ་སྔགས་ཀྱི་ལམ་བཟང་དུ་གཅིག་པ་ཡིན་ཞིང་། སྔགས་འདི་ལ་དུས་རབས་སྔ་ཕྱིའི་འགྱུར་གསར་རྙིང་གི་དབང་གིས་གསར་རྙིང་ཞེས། དུས་ཀྱི་ཁྱད་པར་འབྱེད་པའི་མིང་བརྡ་ཙམ་ཞིག་ཡོད་པ་ལས་གཞན་བཟང་ངན་ཡག་བཙོག་གིས་གསར་རྙིང་དུ་ཕྱེས་པ་མིན་ལ། གསར་རྙིང་གི་ཆོས་ཞེས་བྱ་དུས་ཤར་ནུབ་ཏུ་འགྲོ་ལམ་གྱི་ཁ་འཁོར་ཕྱོགས་སོ་སོར་ལྟར་དུ་མ་ཡིན་པར་གསར་རྙིང་དང་བཀའ་གཏེར་གང་ཡིན་རུང་། ཚད་མའི་སྟོན་པའི་ཞལ་ནས་གསུངས་པའམ། བྱིན་གྱིས་བརླབས་པ། རྗེས་སུ་གནང་བའི་མདོ་རྒྱུད་ཚད་མ་ལ་ཁུངས་ཐུག་པའི་བཞེད་སྲོལ་གཅིག་ལས་གཅིག་བཟང་བའི་ཆོས་ཚད་མ་ཤ་སྟག་ཡིན་པས། རྒྱ་ཟངས་འོ་མ་ལ་ཁ་རྐུབ་དང་། བུ་རམ་སྒོར་མོ་ལ་དཀྱིལ་ཟུར་མེད་པ་ལྟར་དུ། གང་ཟག་གཅིག་མངོན་འཚང་རྒྱ་བའི་ལམ་ཆ་ཚང་ཡིན་པར་མ་ཟད་བརྩོན་འགྲུས་དང་ལས་སྐལ་ལྡན་པའི་དབང་རྣོན་ཚེ་ལུས་གཅིག་ལ་འཚང་རྒྱ་བའི་ཆོས་ཀྱང་ཡིན་པའོ། །རང་ཉིད་གང་ལ་ལས་འབྲེལ་ཡོད་པའི་ཆོས་རྒྱུད་དེའི་གདམས་པ་གང་ཟག་རང་རང་ལ་ཟབ་པའང་ཡིན་ལ། ཆོས་ཀྱི་ངོས་ནས་གངས་ཅན་ཤིང་རྟ་ཆེན་པོ་བརྒྱད་ཀྱི་བཞེད་སྲོལ་གཅིག་ལས་གཅིག་བཟང་ཡིན་ཡང་གང་ཟག་གི་ངོས་ནས་མ་འཇོན་ཚེ་ཆོས་བརྒྱུད་གང་ལ་ཐུག་ཀྱང་ལྷམ་སྣ་རྡོ་ལ་ཐུག་པ་བཞིན་དུ་ཅི་ཡང་མེད་དོ། །དེ་ལྟར་ཡང་དཔལ་སྤྲུལ་རིན་པོ་ཆེའི་ཞལ་ནས། ལྔ་རིག་སྣང་བའི་ཉིན་བྱེད་ས་པཎ་རྗེ། །མདོ་སྔགས་ལེགས་བཤད་འབྱུང་གནས་ཙོང་ཁ་པ། །ཡོངས་རྫོགས་བསྟན་པའི་མངའ་བདག་ཀློང་ཆེན་པ། །གངས་ལྗོངས་འཇམ་པའི་དབྱངས་དངོས་རྣམ་གསུམ་ཡིན། །ཕྱོགས་ལྷུང་གདོན་གྱི་དབང་དུ་མ་གྱུར་པས། རྣམ་གསུམ་མཁས་པའི་གཞུང་ལ་ལེགས་སྦྱངས་ན། །ཡོངས་རྫོགས་རྒྱལ་བའི་བསྟན་པ་རིན་པོ་ཆེ། །ཇི་སྙེད་གཟུངས་དང་སྤོབས་པའི་ཡུལ་དུ་འགྱུར། །ཞེས་གསུངས་པས། བསྟན་པ་རིས་མེད། དག་སྣང་ཕྱོགས་མེད་བྱེད་དགོས་པའོ། །འོན་ཀྱང་བསྟན་པ་རིས་མེད་ཅེས་ཡ་གི་དང་མ་གི་བསྲེས། མ་གི་དང་ཡ་གི་བསྲེས། ཡས་ཚང་གི་དགོན་པའི་ཆོ་གའི་སྟོད་ལས་ཁྱེར་ནས་མས་ཚང་གི་དགོན་པའི་ཆོ་གའི་སྨད་ལས་དང་སྦྱར་མི་ཉན་པར་རང་རང་གི་ཆོས་བརྒྱུད་དྲི་མ་མེད་པའི་བཞེད་སྲོལ་གྱི་རྐང་འཛིན་ཤེས་པའི་ཐོག་ཏུ་ཕྱོགས་ཞེན་ཆགས་སྡང་གིས་ཀུན་ནས་བསླངས་པའི་འགལ་འདུའི་ལོག་རྟོག་ཐམས་ཅད་སེལ་ཆེད་དུ་འགལ་མེད་གནད་གཅིག་ཏུ་སྒྲུབ་པའི་དགོངས་པ་ལོན་ན་སྔར་མེད་བསྟན་པའི་བྱི་དོར་གསར་བ་ཡིན་པའོ། །མདོར་ན་མདོ་སྔགས་གསར་རྙིང་གང་ནས་བཤད་ཀྱང་ཆོས་གཅིག་ཆོག་སྟོང་ཉིད་སྙིང་རྗེའི་སྙིང་པོ་ཅན་དང་། ལྷ་གཅིག་ཆོག་སངས་རྒྱས་ཐམས་ཅད་ཀྱི་སྙིང་རྗེའི་རང་གཟུགས་འཕགས་མཆོག་སྤྱན་རས་གཟིགས་དབང་ནི་བསྐལ་པ་མང་པོའི་སྔོན་རོལ་ནས་མངོན་པར་རྫོགས་པར་སངས་རྒྱས་ཟིན་ཀྱང་། དུས་སྙིགས་མའི་གདུལ་བྱའི་ངོ་རུ་བྱང་ཆུབ་སེམས་དཔའི་ཚུལ་མཛད་ནས། འགྲོ་བའི་དོན་ལ་ནམ་མཁའ་ཇི་སྲིད་དུ་གཞན་དོན་མཛད་པའི་ཐུགས་བསྐྱེད་ནས་མཐའ་ཡས་གདུལ་བྱ་འདུལ་བྱེད་ཀྱི་ཞིང་ཁམས་རབ་འབྱམས་རྡུལ་སྙེད་ཀྱི་གྲངས་དང་མཉམ་པ་བཀོད་པ་སྟེ། དེ་ཡང་བསྐལ་པ་བཟང་པོའི་སངས་རྒྱས་སྟོང་དང་རྩ་གཉིས་སྤྱན་རས་གཟིགས་ཀྱི་དཀྱིལ་འཁོར་དུ་རྫོགས་པས་མ་ཚད། འཕགས་བོད་དུ་བྱོན་དང་འབྱོན་འགྱུར་གྱི་བསྟན་པ་འཛིན་པའི་སྐྱེས་ཆེན་ཕལ་ཆེར་བ་ཡང་སྤྱན་རས་གཟིགས་ཀྱི་རྣམ་པར་འཕྲུལ་བ་ཡིན་པ་དང་། ཉམས་ལེན་གདམས་པ་གཅིག་ཆོག་གསུང་མཆོག་ཡི་གེ་དྲུག་མ་ཉིད་སྙིང་རྗེའི་སེམས་དང་མ་བྲལ་བའི་ངང་ནས་དད་མོས་བརྟན་པོ་རྩེ་གཅིག་པའི་སྒོ་ནས་བཟླས་པ་ལས་གཞན་ཅི་ཡང་དགོས་པ་མིན་པས། ཚེ་འདིའི་བགེགས་དང་བར་ཆད་སེལ་ཆེད་དང་། བསམ་དོན་ཇི་བཞིན་དུ་འགྲུབ་ཆེད་དང་། ཕྱི་མ་ངན་སོང་མེད་ཐབས་དང་། རྫོགས་པའི་སངས་རྒྱས་ཀྱི་གོ་འཕང་ཐོབ་ཆེད་དང་། གནས་སྐབས་མངོན་མཐོ་དང་མཐར་ཐུག་ངེས་ལེགས་ཐོབ་ཆེད་དང་། རང་གཞན་འཕྲལ་ཕུགས་ཀུན་ཏུ་བདེ་ནས་བདེ་བར་འཁོད་པའི་ཆེད་དུ་ཆོས་འདི་ལས་གཞན་གང་ལའང་འགྲམ་ཆུ་ལྡང་མི་དགོས་པའི་ངེས་པ་རྙེད་པའོ། །རང་རེ་བོད་མཐོ་སྒང་གི་ས་ཆ་ན་ཡོད་པའི་མི་ཐམས་ཅད་འཕགས་པ་ཐུགས་རྗེ་ཆེན་པོའི་སྤྲུལ་བ་སྤྲེལ་སྒོམ་བྱང་ཆུབ་སེམས་དཔའི་རྒྱུད་པ་ཡིན་ཟེར་གྱིན་ཡོད་ལ། དེང་གི་དུས་སུ་འཛམ་གླིང་ས་སྒང་འདིའི་ཐོག་ཏུ་མདོ་སྔགས་གཉིས་ལྡན་གྱི་ཐུབ་པའི་བསྟན་པ་ཆ་ཚང་རྒྱུད་སྲོལ་དང་བཅས་པ་གནས་སའི་ཆོས་ཚིགས་ཀྱི་ཡུལ་དབུས་ཉག་གཅིག་ཏུ་གྱུར་པ་ནི་བོད་ཆོས་ལྡན་གྱི་ས་ཆ་འདི་ཉིད་ཡིན་པས། བསྟན་པ་ཞེས་པ་འདི་ཡང་ཕྱིའི་རྟེན་གཞི་གཙུག་ལག་ཁང་དང་། ལྷ་རྟེན་རྐྱང་བར་ངོས་འཛིན་བྱེད་རྒྱུ་མིན་པར། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་དང༌། །སྒྲུབ་པར་བྱེད་པ་ཁོ་ན་ཡིན། །ཞེས་པ་ལྟར་དུ། ཐུབ་པའི་བསྟན་པ་ལུང་དང་རྟོགས་པའི་བདག་ཉིད་ཅན་འདི་བཤད་དང་སྒྲུབ་པས་མ་གཏོགས་འཛིན་ཐབས་མེད་པར་གཟུང་བྱའི་བསྟན་པ་དང་དེ་འཛིན་བྱེད་དང་བཅས་པ་གང་ཟག་རང་རྒྱུད་ལ་བཞུགས་པས། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱོར། །གསུངས་པ་ལྟར་དུ། གཞི་ཚུལ་ཁྲིམས་རྣམ་པར་དག་པའི་རྨང་གཞིའི་སྟེང་དུ་ཐོས་བསམ་སྒོམ་པའི་ཡོན་ཏན་རྒྱ་མཚོ་ལྟར་དུ་བསགས་ནས་བསྟན་པ་འཛིན་སྲུང་སྤེལ་གསུམ་མཛད་པ་ནི་དགོན་གྱི་ལྷ་སྡེ་དགེ་འདུན་པས་ཉམས་བཞེས་གནང་དགོས་ཤིང་། ཁྱིམ་དུ་གནས་པའི་ཁྱིམ་པ་ཕོ་མོས་ཀྱང་དེ་དང་ཆ་མཚུངས་པར་སྐྱབས་ཀྱི་དྭངས་མ་དཀོན་མཆོག་གསུམ་ལ་བཟུང་ཞིང་སོ་ཐར་དགེ་བསྙེན་གྱི་སྡོམ་པ་ལ་གནས་པའི་རྨང་གཞིའི་སྟེང་དུ། སྨོན་དང་འཇུག་པའི་བདག་ཉིད་ཀྱི་ཐེག་ཆེན་ལམ་གྱི་རྩ་བ་བྱང་ཆུབ་སེམས་བསྐྱེད་ཀྱི་སྡོམ་པ་བླངས་ནས། བྱང་ཆུབ་ཀྱི་སེམས་རིན་པོ་ཆེ་དེ་ཉིད་མ་སྐྱེས་པ་སྐྱེད་པ་དང་། སྐྱེས་པ་མི་ཉམས་པར་གོང་ནས་གོང་དུ་འཕེལ་བའི་བསླབ་བྱ་ཉམས་ལེན་དང་བཅས་ཏེ། མདོར་ན་ཁྱིམ་པས་ཁྱིམ་པར་ཕོག་པའི་སྡོམ་གསུམ་གྱི་ཉམས་ལེན་རང་རྒྱུད་ནས་བསྲུངས་ཤིང་། གང་ཟག་རེ་རེའི་ངོས་ནས་བསོད་ནམས་སྟོབས་ཆེན་བསགས་ན། རེ་རེ་ཚོགས་པའི་ཐུན་མོང་གི་རླབས་ཆེན་སྤྱི་མཐུན་གྱི་བསོད་ནམས་ཆེན་པོའི་སྟོབས་ཀྱིས། སྐྱེ་དགུའི་བདེ་སྐྱིད་ཀྱི་འབྱུང་རྩ་སྟོན་པའི་བསྟན་པ་རིན་པོ་ཆེ་འཇིག་རྟེན་གྱི་ཁམས་སུ་ཡུན་དུ་གནས་པ་དང་། བོད་མི་རིགས་ཀྱི་དབུ་འཕང་སྒང་ལས་མཐོ་བ་དང་། མངའ་ཐང་མཐའ་ནས་རྒྱས་པ་དང་། ཡུལ་ལུང་བདེ་སྐྱིད་སྙན་གསུམ་འཛོམས་ཤིང་། མི་ནོར་ཆོས་གསུམ་འཛོམས་པའི་གནད་ཐམས་ཅད་དེར་འདུས་པའོ། །ཁྱད་པར་དུ་གཟབ་ནན་གྱིས་བཤད་རྒྱུ་ཞིག་ལ། ད་སྔོན་ཡན་ཆོད་དུ་བོད་ཀྱི་མི་འདི་རྒྱུད་དྲང་བ། རང་བཞིན་བཟང་བ། སེམས་ཁམས་ལ་སྤྲོ་སྣང་ཡོད་པ། འདྲིས་ན་འགྲོགས་ཡུན་རིང་བ། ལས་རྒྱུ་འབྲས་ལ་བརྩི་སྲུང་བྱེད་མཁན། མིའི་ནང་གི་ལྷ་ཞིག་ཏུ་འཛམ་གླིང་ཐོག་གི་མི་མང་པོས་བརྩི་བཞིན་ཡོད་ཅིང་། དེ་ནི་ཕ་མེས་བཟང་པོས་བཞག་པ་དང་། མཁན་སློབ་བཟང་པོའི་བཀའ་དྲིན་དང་། སྟག་ཤ་ར་རི་གསུམ་གྱི་རྩེ་ནས་སོང་ན། གཏམ་སྙན་གྲགས་ལུང་གསུམ་གྱི་མདོ་ནས་ཁྱབ་པའི་བཟང་ལ་བུད་ཁ་ཤས་ཀྱིས་མགོ་འདྲེན་ལེགས་པས་ཡིན་ན་ཡང་། ད་ནི་ཁོར་ཡུག་འདྲེས་སྡོད་ཀྱིས་མི་རིགས་གཞན་དག་ཀྱང་བོད་མིའི་ནང་དུ་འདུས་པའི་སྒོ་ནས་དུས་ནི་མི་འགྱུར་མི་རྣམས་འགྱུར་བའི་སྐབས་ཡིན་པས། བོད་མིའི་སྤྱོད་པ་ལོ་རེ་ནས་ལོ་རེ་བཞིན་ཇེ་ངན་དུ་སོང་ཞིང་། ཡང་སྒོས་རྐུ་རྫུན་གཡོ་ཁྲམ་གྱི་ལས་སུ་ཞུགས་པ་ནི་ལས་རྒྱུ་འབྲས་ཀྱིས་ཀྱང་མཐའ་གྱེན་དུ་མི་འགྲོ་བར་མ་ཟད། མི་ངན་ཁ་ཤས་ཀྱིས་མིག་སྔུན་བརྫད་ནས་ནམ་ཞིག་བོད་རིགས་ཞེས་ཁྱི་རྐུན་ལྟར་དུ་མི་རིགས་གཞན་གྱིས་ཁྱིམ་དུའང་འོང་མི་འཇུག་པས་ངོ་ཚ། དེ་བཞིན་སྐུ་གསུང་ཐུགས་རྟེན་འཚོང་མཁན་དང་། ཕ་མའི་དྲིན་ལན་ལོག་འཇལ་བྱེད་མཁན། རང་ཡུལ་སྡུག་གི་སྣ་འདྲེན་བྱེད་མཁན་དེ་དག་ནི་ཡུལ་ལུང་བཀྲ་མི་ཤིས་པར་བྱེད་པའི་གདོན་འདྲེ་ཁོག་ཏུ་ཞུགས་པའི་མི་མིན་ན་ཅི་ཞིག་ཡིན། དེས་ན་ན་ཆུང་གཞོན་ནུའི་སྡེ་ཚོགས་འདི་ས་གང་ནས་ཡིན་ཡང་མ་འོངས་པར་ས་དེའི་བདག་པོ་དང་། མ་འོངས་གངས་ལྗོངས་ཀྱི་རེ་ལྟོས་བྱེད་ས་ཡིན་པས། མི་རབས་དང་དུས་རབས་ཀྱིས་སྤྲད་པའི་གཙུག་ལག་ཟུང་གི་ལས་འགན་ལྕི་མོ་དེ་རང་ཤུགས་ཀྱིས་འབྱུང་འགྱུར་གྱི་ན་གཞོན་ཚོའི་ཕྲག་ཏུ་བབ་ཡོད་པས། རང་ཉིད་ཀྱི་ལང་ཚོ་དར་བ་དང་ལྷན་དུ་དུས་རབས་དང་བསྟུན་པའི་ནང་གི་ཤེས་ཡོན་ཡང་དེ་བཞིན་ཡར་ལ་དར་དུ་ཆུགས། ལྷག་པར་དུ་གཞན་ཕན་དང་སྤྱི་སེམས་བསམ་པ་བཟང་པོས་ཀུན་ནས་བསླངས་པའི་ཀུན་སྤྱོད་གཙང་མའི་ཡ་རབས་ཀྱི་སྤྱོད་བཟང་འདི་ཉིད། སྒེར་དང་སྒེར་གྱི་བར། གྲོང་ཚོ་དང་གྲོང་ཚོའི་བར། སྡེ་ཕྱོགས་དང་སྡེ་ཕྱོགས་ཀྱི་བར་དུ་ཁྱབ་སྤེལ་བཏང་ནས། རང་གི་རིན་ཐང་རང་གིས་བསྐྲུན་པའི་སྒོ་ནས་འཛམ་གླིང་མིའི་རིགས་ཀྱི་དཔེ་མཚོན་བཟང་པོ་ཞིག་ཏུ་འགྱུར་ཐབས་བྱེད་རྒྱུ་ནི། མ་འོངས་ཕྱིས་འབྱུང་གི་བོད་གདོང་དམར་གྱི་རིགས་རྒྱུད་འདི་ཡི་ལས་དབང་ཁ་ལས་བཟང་ངན་ལ་རག་ལས་པའི་རྒྱུ་རྐྱེན་གཙོ་བོ་ཞིག་ཡིན་པར་བསམ་བཞིན་ཡོད། མཐའ་མཇུག་གི་གཏམ་ལ། ས་གཙང་། ཆུ་གཙང་། འཛམ་གླིང་ས་མཐོའི་རྩེ་མོ། གངས་རིས་མཚོན་པའི་ཡུལ་ལྗོངས་འདིར། ལུས་གཙང་། སེམས་གཙང་། ཀུན་སྤྱོད་གཙང་བའི་ཆོལ་གསུམ་རིགས་རུས་གཅིག་ལས་ཆད་པའི་གཅེན་གཅུང་མིང་སྲིང་གི་མཐུན་སྒྲིལ་ཆོད་སེམས་བརྟན་པོའི་ངང་ནས་རང་གཞན་བར་གསུམ་འདི་བདེ་ཕྱི་མར་སྐྱིད་པར་བདེ་ནས་བདེ་བར་འགོད་པའི་སྨོན་ལམ་གྱིས་མཐའ་བརྒྱན་ནས། ཐེངས་འདིའི་དགེ་རྩས་སེམས་ཅན་ཐམས་ཅད་རྫོགས་བྱང་དུ་འཁོད་པའི་བསྔོ་བ་བྱེད་དགོས། ༈ འདིའི་མཚམས་སུ་ད་རེས་ཀྱི་སྦྱིན་བདག་ཆེན་མོ་མཚོ་ཁྲི་ཀླུ་ཕྱུག་སྡེ་བའི་སློབ་གྲྭའི་སློབ་མས་སྦྱངས་འབྲས་རྒྱུགས་སྤྲོད་ཅིག་ཡོད་ཟེར་བ་དེ་དང་པོ་ཡོང་རྒྱུ་བྱོས། ༈ ཤིན་ཏུ་ཡག་ཁི། ཚིག་ལ་རྔ་མ་ཡོད་པ་འབའ་ཞིག་རེད། ཡི་གེ་འདོན་དུས་མི་རྒན་གཞོན་སུས་བཏོན་ཀྱང་ཚིག་ལ་རྔ་མ་ཡོད་པ་གནད་ཆེ། འགའ་རེས་ཚིག་བཅད་འདོན་དུས་རྔ་མ་མེད་པ་འབའ་ཞིག་བཏོན་པས་ཆ་ཚང་གོ་མི་ཐུབ་པས་ཚིག་ཆ་ཚང་བ་ཞིག་རེད་ཀྱིན་ཡོད་པ་མ་རེད། དུས་ཚོད་ཀྱི་དབང་གིས་དེ་ཡིས་ཆོག་རྒྱུ་བྱོས། མ་སྲིད་པའི་རྒྱུགས་ཡག་པོ་རེད་སོང་། ༈ འདིའི་མཚམས་ནས་པདྨ་ཐང་གི་འབའ་ཆུང་མཁན་པོ་ནུས་ལྡན་རྡོ་རྗེས་མགུར་འཐེན་རྒྱུ་མཛོད། ༈ དུས་ཚོད་ཅེས་བྱ་བ་འདི་འགྲོ་མགྱོགས་པ་ཡིན་པས་མིག་གཅིག་གི་སྡེབ་བསྒྱུར་ལ་ཞིང་སྒྲུབ་འཚོགས་ནས་དེ་རིང་གིས་ཉི་མ་དྲུག་དང་། སང་ཉིན་མ་ཎི་ཉིན་གཅིག་ལ་འཚོགས་དུས་བདུན་སྒྲུབ་གཅིག་ཚང་འགྲོ་བ་ཡིན། དེའི་རིང་གི་ཕྱི་དྲོ་བཞིའི་ཆུ་ཚོད་རེའི་ཡུན་དུ་རང་རེ་འདིར་འཛོམས་ནས། ཆོས་ཁྲིད་དང་ལྷན་དུ་ངས་ངག་བཅད་ཡིན་ཞེས་ཟེར་ཞོར་དུ་ཡུལ་སྡེ་གཅིག་དང་ཆོས་སྡེ་གཅིག་གིས་འབྲེལ་བའི་མི་གྲངས་ཁྲི་ཚོ་གཅིག་གཉིས་ཤིག་ཐེངས་མ་བཞིར་ཐུག་ཙམ་རེ་བྱས་ཏེ་ཆོས་ཕྱོགས་ཀྱི་ཁ་བརྡ་རྡོག་མ་ཁ་ཤས་བྱུང་བ་འདི། གོང་དུ་བཤད་པའི་བར་སྲིད་ཀྱི་སེམས་ཅན་མཚམས་རེ་ལ་ངོ་ཤེས་རེ་ལ་ཐུག་ཙམ་བྱེད་པ་ན། འདི་ནས་ཐག་མི་རིང་ས་ན་ལམ་དམར་ནག་འཇིགས་སུ་རུང་བ་ཡ་ང་བ་ཞིག་ཡོད་པ་དེའི་འཁྲིས་སུ་མ་བཅར་མ་གཏོགས། དོང་མོ་ཆེ་མེ་སྟག་གི་ཟི་ར་མཆེད་པའི་ནང་དུ་འཐེན་གྱིན་འདུག་པས་གཟབ་གཟབ་གྱིས། ལམ་དཀར་པོ་འོད་ཟེར་བཀྲག་མདངས་ཅན་ཞིག་མཚམས་རེ་ལ་ཤར་དུ་འོང་བ་དེའི་ནང་དུ་ཨེ་ཐོན་ལྟོས། ལྷ་ཇོ་བོ་ཐུགས་རྗེ་ཆེན་པོ་ལ་གསོལ་བ་ཐོབ་ལ་མཚན་ནས་བཟུང་སྟེ་བོས། ཆོས་གཅིག་ཆོག་གཟུངས་སྔགས་ཡི་གེ་དྲུག་པ་ལས་ལྷག་པ་ཡོད་པར་མིན་པས་འཕགས་པ་ཐུགས་རྗེ་ཆེན་པོ་ལ་གསོལ་བ་ཐོབ་ཅེས་ཟེར་བའི་ལོང་ཡོད་མེད་མཚམས་ནས་ལས་ཀྱི་རླུང་དམར་དྲག་པོས་ཕྱོགས་བཞི་མཚམས་བརྒྱད་དུ་གཏོར་སོང་བ་ལྟར་དུ། དུས་ཚོད་སྐར་མ་ཁ་ཤས་ཀྱི་མཚམས་ནས་རང་རེའི་ཁ་བརྡའི་རྒྱུན་མཐུད་ལོང་མི་གཏོད་པར་ད་ལོའི་ཁ་བརྡ་བཤད་པའི་དུས་ཚོད་ཡལ་ནས་སང་ཉིན་ནས་རང་རང་སོ་སོའི་གནས་སུ་འགྲོ་བས། ལུས་ཞེས་པའི་གདོས་བཅས་རགས་པའི་གཟུགས་འདི་ཡོད་མེད་ཙམ་ལས་ད་ལྟར་བཤད་མ་ཐག་པའི་བར་སྲིད་དང་གཅིག་མཚུངས་ཡིན། ཀུན་མཁྱེན་ཆེན་པོས། བཟང་པོའི་བླ་མ་འདི་དང་དུས་རྟག་ཏུ། །མི་འབྲལ་ཆོས་ཉན་འདོད་ཀྱང་འབྲལ་བར་ངེས། །བཟའ་ཚང་ཉེ་འབྲེལ་འདི་དང་དུས་རྟག་ཏུ། །མི་འབྲལ་འགྲོགས་པར་འདོད་ཀྱང་འབྲལ་བར་ངེས། །ཞེས་གསུངས་པ་ལྟར་དུ། ད་རེས་ཀྱི་ཉི་མ་བདུན་གྱིས་རང་རེའི་མི་ཚེའི་ནང་གི་ཉི་མ་བདུན་ཟད་པ་ཡིན་ཞིང་། ཕྲུ་གུ་འཚར་ལོངས་བྱུང་བ་ལ་ཉི་མ་བདུན་གྱིས་ཁ་སྣོན་བྱས་རུང་། རྒན་གོག་འབྱུང་བ་རྒུད་པ་པ་ཉི་མ་བདུན་གྱིས་ཇེ་སྡུག་ཏུ་སོང་བས། མདོར་ན་ཐམས་ཅད་ཀྱི་ཚེ་ཟད་པའི་ཕྱོགས་སུ་ཉི་མ་བདུན་གྱིས་ཉེ་སོང་བའོ། །ཆོས་རའི་ནང་དུ་ང་ཚོ་བླ་སློབ་དང་ཆོས་གྲོགས་མཉམ་དུ་འཚོགས་ནས་ད་ལྟ་རུ་གྲོལ་རྒྱུ་ཡིན་པ་ལྟར་དུ། ཉེ་དུ་ཁྱིམ་མཚེས་ཞེས་བྱ་སའི་འགྲིག་ཞོར་དང་འཁོན་ཞོར་དུ་ཡོད་པ་རྣམས་དང་། ཁྱིམ་ཚང་བཟའ་ཚོ་ཞེས་བྱ་སའི་མཐུན་ཞོར་དང་འཛིང་ཞོར་དུ་སྐྱིད་སྡུག་ཉི་མ་ཁ་ཤས་ལ་མཉམ་མྱོང་བྱེད་དགོས་པ་འདི་དག་དང་ཡང་ཡུན་རིང་མི་འགྱང་བར་འབྲལ་རྒྱུ་ཡིན་པས་མ་ཟད། ང་ཞེས་གདགས་པའི་གཞིའམ་མཛུ་གུ་འཛུགས་སའི་གསོན་གྲང་ང་ཁམས་ན་ཡོད་དུས་སུ་ཞིམ་པོའི་ཟས་བྱིན། དྲོན་པོའི་གོས་བསྐོན། མཛའ་མོའི་རྒྱན་གདགས་སའི་རང་གཞན་གྱི་ལུས་འདི་དབང་མེད་འཆི་བདག་གི་ཞགས་པས་འཕྲལ་དུ་བཟུང་ནས་ཤི་གསོན་ལམ་གྱི་གྱེས་མདོར་ཐོན་ནས་ལུས་སེམས་གཉིས་ཀ་སོ་སོར་བྲལ་པའི་ཉིན་མོ་རུ། ལུས་བེམ་གོག་དུར་ཁྲོད་ཀྱི་བྱ་རྒོད་ལ་སྦྱིན་པས། ཕྱིའི་ཤ་དང་པགས་པ་གྲི་ཡིས་བཤགས། ནང་དོན་ལྔ་སྣོད་དྲུག་ཕྱི་རུ་ཕུད། མིག་ཁྲ་ཆུང་དབང་པོའི་དྭངས་མ་དེ་བྱ་ཁྭ་ཏ་ཞིག་གི་ཁ་ཟས་གྱུར། མགོའི་སྐྲ་ལོ་དར་སྐུད་ལྟ་བུ་དེ་རྩྭ་རྩི་ཤིང་ཞིག་གི་མགོ་རུ་གཟར། ནོམ་པ་གང་བཟང་གི་ཁུག་ཏུ་ལྕིབས། གསེར་དངུལ་གཉིས་ཀྱི་རྒྱན་འདོགས་སའི་གསོན་ལུས་དེ་གློ་བུར་དུ་རོ་གྲི་དང་རོ་སྟར་གྱི་གདན་ས་རུ་འགྱུར་བ་ནི་ཀུན་ལ་ཡོང་ཞིང་སུ་ལའང་མི་འོང་པ་མིན་པ་དེའི་ཕྱིར། འདུས་པའི་མཐའ་མ་འབྲལ། མཐོ་བའི་མཐའ་མ་ལྷུང་། བསགས་པའི་མཐའ་མ་འཛད། སྐྱེས་པའི་མཐའ་མ་འཆི་བ་སྟེ་མི་རྟག་མཐའ་བཞིས་བསྡུས་པའི་འདུས་བྱས་ཀྱི་ཆོས་ལ་རྟག་པ་མེད་པའི་ཚུལ་སྔོན་ནས་ཤེས་པར་གྱིས་ལ། རང་གཞན་ཕྱི་མའི་ལམ་མགོ་ཐོན་སྤྱད་ཀྱི་ཆོས་བྱེད་དགོས་ཞེས་རང་རེ་འབྲལ་རན་པའི་དུས་སུ་ཕྱིར་འབོད་བྱས་པའི་གཏམ་ཡིན། ཆོས་ཞེས་བྱ་བ་འདི་རྒྱུས་སྒྲུབ་རྒྱུ་ཞིག་ཡིན་ན་རྒྱུ་ཆེ་ཆུང་དང་དབང་ཡོད་མེད་ཀྱིས་མི་འགྲུབ་པར་ཡོད་སྲིད་ཀྱང་། ཆོས་རྣམ་དག་སེམས་ཀྱིས་སྒྲུབ་དགོས་པས་ཕྱོགས་དང་རིས་མེད་པར་ཐམས་ཅད་ལ་གཅིག་མཚུངས་སུ་དབང་ལ། བསམ་པ་བཟང་པོས་ཀུན་ནས་བསླངས་པའི་སྙིང་རྗེའི་སེམས་དང་མ་བྲལ་བའི་སྒོ་ནས་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེ་རུ་འཇུག་ཐུབ་ཚེ་ཐར་བའི་ལམ་སྣ་ཟིན་པ་ཡིན་ཞིང་། ཐར་བའི་ལམ་སྣ་ཟིན་ཚེ་སླེབས་སྔ་ཕྱི་ཙམ་མ་གཏོགས་མཐར་ཐུག་གི་ཐོན་ས་སངས་རྒྱས་ཀྱི་གོ་འཕང་ཡིན་པའོ། །སང་ཉིན་ནས་བཟུང་སྟེ་ཁ་བརྡ་བྱེད་རྒྱུའི་གོ་སྐབས་མ་ཡོད་པ་ཡིན་པས་དེ་རིང་ཁྱེད་ཅག་ཚེ་རིང་ལོ་བརྒྱ་ཟེར་རན་སོང་བ་སྟེ། ཁྱོད་རང་ཚོས་དཀའ་སྡུག་ལས་རྩོལ་ཆེན་པོ་སྔོན་ལ་བརྒྱབ་པའི་རྗེས་སུ་ཚེ་སྨད་ལ་སྐྱིད་པོ་ཡོང་རྒྱུའི་འདང་རྒྱག་མ་བྱེད། གལ་སྲིད་ཚེ་སྨད་ཅེས་བྱ་བ་རིང་པོ་ཡོད་སྲིད་རུང་དེའི་དུས་སུ་ན་རྒས་གཉིས་ཀྱི་སྡུག་བསྔལ་གྱིས་མནར་ནས་སྐྱིད་པོར་ཡོད་པ་མིན། ད་ལྟའི་དུས་སུ་ནད་ན་ཚས་མ་མནར། ལུས་འབྱུང་བཞི་མ་རྒུད། ཁྱིམ་བཟའ་ཚང་མགོ་འཛོམས་ཡིན་དུས་སུ་སྐྱིད་པོ་སྟོང་གི་ཡང་རྩེ་ཡིན་སྙམ་དགོས་ཀྱི། དེ་ཙམ་ལས་ཕན་ཆད་དུ་འཇིག་རྟེན་ན་བདེ་སྐྱིད་ཡོད་པ་མིན། ཕུ་ནུ་ནང་དམེ་མ་བྱེད་མི་ཡི་ཐ་མ་ཡིན། བཟའ་ཚང་འཛིང་མོ་མ་བྱེད་རྗེས་ནས་འགྱོད་སྤྱད་ཡིན། ཤ་ཉེ་བའི་མཐུན་སེམས་ཡོད་དགོས་པས་ཉེ་རིང་དང་ཉེ་སྐོར་དཔུང་སྒྲིལ་པ་བཟང་མོད་ཀྱང་། དེ་ཚོ་ཅི་ཡང་མེད་རུང་སྡེ་དགོན་སྤྱི་ལ་སེམས་པའི་སྤྱི་སེམས་ལྷག་བསམ་ལྡན་པའི་མི་སྐྱེས་པ་ནི་ཕ་བཟང་གི་བུ་རྒྱུད་བཟང་པོ་ཡིན་པ་སྟེ། སྒྲུང་གི་ནང་དུ་སྤྱི་དཔོན་རོང་ཚ་ཁྲ་རྒན་གྱིས། ངར་རྟ་གཅིག་ཡོད་པ་སྤྱི་རྟ་བྱས། །ཁྲབ་གཅིག་ཡོད་པ་སྤྱི་ཁྲབ་བྱས། །ངར་སྤྱི་དཔོན་ཐོགས་དོན་དེ་ནས་བྱུང་། །ཞེས་གསུངས་པ་ལྟར་དུ། སྡེ་ཡུལ་པ་སྤྱི་ཡི་གཅེས་ཕྲུག་ཅིག་བྱ་བསམ་ཚེ་སྲོག་དམར་པོ་ཡིན་ཡང་སྤྱི་དོན་དང་གཞན་དོན་དུ་གཏོང་ཕོད་ཅིང་། སྒེར་དོན་ཙག་གི་ཙིག་གི་སྣང་མེད་དུ་འཇོག་ཐུབ་པ་ཞིག་ཡིན་དགོས། མ་མཐའ་ཡང་རྐུ་མ་བྱེད་མ་གཏོགས་རང་གི་ཁ་རྗེ་དབང་ཐང་དང་ཟ་ཐང་ལོངས་སྤྱོད་མར་ལ་འགྲིབ་པར་བྱེད། ཤོབ་མ་བཤད་མ་གཏོགས་རྫུན་གྱི་རྣམ་སྨིན་ལྕི་བས་ཚེ་ཕྱི་མ་རུ་རྣམ་སྨིན་མྱོང་ཞིང་། ཤོབ་ཐེངས་གཅིག་གིས་མི་ཚེའི་རིན་ཐང་བརླག་པར་བྱེད། སྲོག་མ་གཅོད་མ་གཏོགས་རང་དང་བཟའ་ཚང་བུ་རབས་ཚ་རྒྱུད་དང་བཅས་པས་ཚེ་ཐུང་ནད་མང་གི་སྡུག་བསྔལ་མྱོང་ཞིང་། ཕྱི་མ་རུ་དམྱལ་བའི་སྡུག་བསྔལ་ཡ་ང་བ་མྱོང་བར་བྱེད་དོ། །ཁྱིམ་ལས་བྱ་མཁན། རྫི་བོར་འགྲོ་མཁན། སྨན་རྩྭ་རྐོ་མཁན་གྱི་ཕོ་མོ་སུ་ཡིན་རུང་མ་མཐའ་རུ་སྐར་མ་ལྔ་རུ་ཁོམ་སྲིད་པས་ཐོག་མཐའ་བར་གསུམ་དུ་དགེ་བའི་གཏམ་ལྟ་སྒོམ་སྤྱོད་གསུམ་ཉམས་ལེན་དམ་པའི་སྙིང་ནོར་ཞེས་བྱ་བའི་ཆོས་འདི་ཐོབ་ནས་བཟུང་སྟེ་ཕྱིན་ཆད་ཉི་མ་རེ་རེ་བཞིན་དུ་ཉམས་ལེན་གྱི་སྙིང་པོ་རུ་སྐྱིལ་ཀྲུང་གྲུ་བཞི་པ་ཞིག་འཆོས་ལ་ཁ་ཡིས་མ་ཎི་འདོན་བཞིན། སེམས་ཀྱིས་ལྷ་ཡི་དམ་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་མདུན་གྱི་ནམ་མཁའ་ལ་ཡོད་པར་སྒོམས་དང་། དེ་ནི་ཐུགས་རྗེ་ཆེན་པོའི་མཚན་བཅས་ཀྱི་བསྐྱེད་རིམ་བསྒོམས་པ་ཡིན། དེ་ནས་སྙིང་རྗེ་དང་གཅིག དད་པ་དང་གཉིས་། རྣམ་རྟོག་འཁྲུལ་བའི་རྗེས་སུ་མི་འབྲང་བའི་མ་ཡེངས་པ་དང་གསུམ་པོ་སོ་སོར་ཕྱེ་རུ་མེད་པར་ཆུ་དང་འོ་མ་འདྲེས་པ་ལྟ་བུའི་ངང་དུ་སྡོད་དང་། དེ་ནི་ཐུགས་རྗེ་ཆེན་པོའི་མཚན་མེད་ཀྱི་རྫོགས་རིམ་བསྒོམས་པ་ཡིན། དེ་ཡང་བསྐྱེད་རིམ་གྱིས་བསོད་ནམས་ཀྱི་ཚོགས་རྫོགས་ཤིང་། རྫོགས་རིམ་གྱིས་ཡེ་ཤེས་ཀྱི་ཚོགས་རྫོགས་པ་ཡིན། གཞི་ལམ་འབྲས་གསུམ་གྱི་ཐོག་ནས་བཤད་ན། གཞི་བདེན་གཉིས་ཟུང་འཇུག་ཡིན་སྟབས། ལམ་ཚོགས་གཉིས་ཟུང་འཇུག་ལ་བརྟེན་ནས། འབྲས་བུ་མཐའ་ཐུག་སྐུ་གཉིས་ཟུང་འཇུག་ཐོབ་པ་ཡིན། དེ་ནི་ཐེངས་འདི་རུ་མཐའ་ཐུག་གི་གདམས་ངག་བྱིན་པ་ཡིན། དེ་ནས་ཐམས་ཅད་ཚེ་རིང་། ལོ་བརྒྱ། མ་ཤི་ཚེ་རིང་བྱུང་ན་སང་ཕར་ལོའི་ད་ལྟའི་དུས་ཚོད་ལ་སླར་ཡང་ཐུག་པའི་སྨོན་འདུན་དང་བཅས་ཏེ། ༈ དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་དང་། ད་རེས་ཀྱི་ཚོགས་འཛུགས་ཀྱི་སྦྱིན་བདག་གཙོ་བོ་མཚོ་ཁྲི་ཀླུ་ཕྱུག་སྡེ་བའི་མི་ཐོག་སྔོན་རྗེས་ཐམས་ཅད་ཀྱིས་དགེ་བ་བསྒྲུབས་པ་བྱས་ཚད་དང་། འབྲེལ་འཇོག་ཞལ་འདེབས་བྱས་པ་དང་། མར་མེའི་མཆོད་ཐིགས་དཀར་གསབ་དང་། གསོལ་ཇ་དང་གུང་ཚིགས་དྲངས་པ་དང་། འགྱེད་དང་ཡོན་འབུལ་བྱས་པ་དང་། ཆོས་ར་འདི་རྡོག་པས་བརྫིས་པ་དང་། རྒྱང་ནས་རྗེས་སུ་ཡི་རང་བྱས་པ་དང་། ཐ་ན་མ་ཎིའི་མགུར་དབྱངས་ཀྱི་སྒྲ་ཙམ་ཐོས་པའི་དགེ་བའི་རྩ་བས་མཚོན་ཏེ། དུས་གསུམ་བཤེགས་བཞུགས་འབྱོན་འགྱུར་གྱི་སྲས་བཅས་རྒྱལ་བའི་ཟག་མེད་ཀྱི་དགེ་རྩ་དང་། ཁམས་གསུམ་སེམས་ཅན་ཐམས་ཅད་ཀྱིས་དུས་གསུམ་ཀུན་ཏུ་བསགས་པའི་ཟག་བཅས་ཀྱི་དགེ་ཚོགས་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུ་ཡིས། སྤྱིར་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་སྔ་རབས་བྱོན་པ་རྣམས་ཀྱི་དགོངས་པ་ཡོངས་སུ་རྫོགས་པ་དང་། ད་ལྟར་བཞུགས་པ་ཐམས་ཅད་ཀྱི་སྐུ་ཚེའི་ཞབས་པད་བརྟན་ཅིང་བསྟན་པ་དང་འགྲོ་བར་སྨོན་པའི་ཐུགས་བཞེད་གེགས་མེད་དུ་འགྲུབ་པ་དང་། འཇིག་རྟེན་གྱི་ཁམས་ཀུན་ཏུ་ས་གཡོ་པ་དང་། མེ་དགྲ་འབྱུང་བ་དང། མཚོ་འཕྱུར་བ་དང་། རླུང་ནག་འཚུབ་པ་དང་། ཆུ་ཡིས་དེད་པ་དང་། ནད་མུག་མཚོན་འཁྲུགས་ཀྱི་འཇིགས་པ་ཐམས་ཅད་ཞི་བ་དང་། ཁྱད་པར་དུ་གངས་ཅན་གྱི་ལྗོངས་སུ་སྡེ་བཞི་དགེ་བཅུའི་འབྱོར་བ་རྒྱས་པའི་རྒྱུ་རུ་འགྱུར་བ་དང་། བདག་ཅག་རྣམས་ཀྱི་སྡང་བྱེད་དགྲ་དང་། གནོད་བྱེད་ཀྱི་བགེགས་དང་། མཁའ་དང་ས་ལ་རྒྱུ་བའི་སྲོག་ཆགས་དུད་འགྲོ་ཆེ་ཕྲ་དང་། མི་མིན་ལྷ་འདྲེའི་རིགས་སུ་གྱུར་བ་དང་། བར་དོའི་རྣམ་ཤེས་འཁྱམས་པོ་དང་། སྲུལ་པོའི་རིགས་ཅན་གྱི་སེམས་ཅན་མཁའ་ལ་རྒྱུ་བའི་ཡི་དྭགས་ཀྱི་སྡེ་ཚོགས་དང་། རང་རེའི་ལུས་ལ་གནས་པའི་སྲོག་ཆགས་ཕྲ་མོ་ཚུན་ཆོད་དང་། ཞིང་སྒྲུབ་འདིའི་དུས་སུ་དབང་དང་ཆོས་ཁྲིད་རྒྱུན་འཚོགས་སུ་ཡོང་བའི་ལམ་ནས་བསད་པའི་འབུ་སྦྲང་ཕྲ་མོ་རྐང་པས་བརྫིས་ཚད་དང་། རང་རེའི་ཆོས་ར་འདི་དང་འབྲེལ་ཚད་ཐམས་ཅད་དང་། ནང་མི་བཟའ་ཚང་དང་། ཉེ་འབྲེལ་དང་། ངོ་ཤེས་དང་། གནའ་ཤི་རྙིང་པ་དང་། ད་ཤི་གསར་བ་དང་། ཁྱད་པར་དུ་ཤི་ནས་ལུས་རྟེན་མ་རྙེད་པའི་བར་དོའི་སེམས་ཅན་ཐམས་ཅད་དང་། དྲིན་ཅན་གྱི་ཚེ་འདིའི་ཕ་མས་གཙོར་བྱས་པའི་མཁའ་ཁྱབ་ཀྱི་སེམས་ཅན་ཐམས་ཅད། རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་གོ་འཕང་ཐོབ་པའི་རྒྱུ་རུ་འགྱུར་བ་དང་། དེ་མ་ཐོབ་པའི་གནས་སྐབས་ཀུན་ཏུ་ཡང་ལྷ་དང་མི་ཡི་ལུས་ཐོབ་སྟེ་མཐོ་རིས་ཀྱི་འབྱོར་བ་ཕུན་སུམ་ཚོགས་པའི་ཟད་པ་མེད་པའི་བདེ་སྐྱིད་དང་བཅས་ཏེ། སྐྱེས་མ་ཐག་ཏུ་དམ་པའི་ཆོས་དང་འཕྲད་ཅིང་འཕགས་པ་ཐུགས་རྗེ་ཆེན་པོའི་ཞལ་མཇལ་བ་དང་། ཚེ་དེ་འཕོས་མ་ཐག་ཏུ་ཞིང་ཁམས་རི་བོ་ཏ་ལ་རུ་འཕགས་པའི་གསུང་གི་བདུད་རྩིས་དབུགས་འབྱིན་པ་སོགས་ཀྱི་ཕྱིར་དུ། གང་ཞིག་བསྔོ་བར་བྱ་བ་དང་། གང་གིས་སྔོ་བར་བྱེད་པ་དང་། གང་དུ་བསྔོ་བའི་ཡུལ་དང་བཅས་ཏེ་ཁྱད་པར་གསུམ་ལྡན་གྱི་འཁོར་གསུམ་ཡོངས་སུ་དག་པའི་བསྔོ་བ་ཟབ་མོ་འཕགས་པ་འཇམ་པའི་དབྱངས་དང་། བྱང་ཆུབ་སེམས་དཔའ་ཀུན་ཏུ་བཟང་པོ་སོགས་ཀྱིས་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་མདུན་དང་བཅས་ཏེ་བསྔོ་བ་ལྷན་དུ་གསུངས་ཏེ་གྲོལ་རྒྱུ་བྱའོ།། །། བསོད་ནམས་འདི་ཡིས་ཐམས་ཅད་གཟིགས་པ་ཉིད།། ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་།། སྐྱེ་རྒ་ན་འཆི་རྦ་རླབས་འཁྲུག་པ་ཡི།། སྲིད་པའི་མཚོ་ལས་འགྲོ་བ་སྒྲོལ་བར་ཤོག། འཇམ་དཔལ་དཔའ་བོས་ཇི་ལྟར་མཁྱེན་པ་དང་།། ཀུན་ཏུ་བཟང་པོ་དེ་ཡང་དེ་བཞིན་ཏེ།། དེ་དག་ཀུན་གྱི་རྗེས་སུ་བདག་སློབ་ཅིང་།། དགེ་བ་འདི་དག་ཐམས་ཅད་རབ་ཏུ་བསྔོ།། ཆོས་ཚུལ་འདི་ཡང་ཉི་ཟླའི་དཀྱིལ་འཁོར་བཞིན།། ཕྱོགས་ཀྱི་ཐ་གྲུ་ཀུན་ཏུ་གྲགས་གྱུར་ཏེ།། བློ་གྲོས་པདྨོ་རབ་ཏུ་རྒྱས་བྱེད་ཅིང་།། སངས་རྒྱས་བསྟན་པ་དར་ཞིང་རྒྱས་པར་ཤོག། དཔལ་ལྡན་བླ་མའི་སྐུ་ཚེ་རབ་བརྟན་ཅིང་།། བསྟན་པའི་སྦྱིན་བདག་མངའ་ཐང་དར་བ་ཡིས།། ཆོས་སྲིད་མི་ནུབ་ནོར་བུའི་རྒྱལ་མཚན་བསྒྲེངས།། མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག། ཧྲཱིཿ སྔོན་ཚེ་དེ་བཞིན་གཤེགས་པ་གཙུག་གཏོར་ཅན།། འཕགས་པའི་ཡུལ་དུ་གྲུབ་ཆེན་ཀུ་ཀུ་རི།། ཁ་བ་ཅན་དུ་དཔལ་ལྡན་ཐང་བ་ཞེས།། པདྨ་རིག་འཛིན་ཞབས་ལ་གསོལ་བར་འདེབས།། བསྟན་པ་ཡུན་རིང་གནས་པའི་བཀྲ་ཤིས་ཤོག། ཐུབ་བསྟན་མཛེས་པའི་རྒྱན་གཅིག་ཀློང་ཆེན་པ།། བཤད་སྒྲུབ་བསྟན་པའི་མངའ་བདག་འཇིགས་མེད་གླིང་།། མཚུངས་མེད་བླ་མའི་བསྟན་པ་སྲིད་མཐའི་བར།། བཤད་སྒྲུབ་ཐོས་བསམ་སྒོམ་པས་འཛིན་གྱུར་ཅིག། དཔལ་ལྡན་མཁས་གྲུབ་བྱེ་བའི་གཙུག་གི་རྒྱན།། མདོ་སྔགས་ལུང་རྟོགས་བསྟན་པའི་ཤིང་རྟ་ཆེ།། འཇིགས་བྲལ་སྔ་འགྱུར་རྒྱལ་བ་རྫོགས་ཆེན་པ།། ཤྲཱི་སེང་ཆོས་གྲྭའི་བསྟན་པ་རྒྱས་གྱུར་ཅིག། གངས་རིའི་ར་བས་སོགས། སྐར་མ་རབ་རིབ་མར་མེ་དང་།། སྒྱུ་མ་ཟིལ་བ་ཆུ་བུར་དང་།། རྨི་ལམ་གློག་དང་སྤྲིན་ལྟ་བུ།། འདུས་བྱས་ཆོས་རྣམས་དེ་ལྟར་བལྟ།། སླར་སྨས་པ། ཐུགས་རྗེ་ཆེན་པོའི་ལྟ་སྒོམ་སྤྱོད་པའི་སྲོལ།། མ་ནོར་ཇི་བཞིན་བཀྲལ་བའི་རྡོ་རྗེའི་ངག། ཡི་གེའི་འཕྲུལ་དུ་བཏབ་པའི་རྣམ་དཀར་དགེས།། འབྲེལ་ཚད་དོན་ལྡན་འཁོར་བ་དོང་སྤྲུག་ཤོག། ཅེས་པའང་རྗེ་གང་གི་སློབ་ཕྲན་ཚུལ་ཁྲིམས་རྒྱལ་མཚན་གྱིས་ལེགས་པར་གྲུབ་པར་བགྱིས་པའོ།། །།མངྒ་ལཾ།། |