 ཁྱབ་བདག་པདྨ་སྐལ་བཟང་གི་གསུང་འབུམ་གླེགས་བམ་ཉེར་ལྔ་པ།ཞིང་སྨོན་བདེ་ཆེན་ལམ་སྟོན་གྱི་དོན་ཁྲིད་ཕན་བདེའི་འཇུག་ངོགས།རྫོགས་ཆེན་པདྨ་སྐལ་བཟང་། མཁན་བསོད་ནམས་རྒྱ་མཚོ་ཡིས་ཡི་གེར་ཕབ།པདྨའི་འོད་སྣང་ཚོགས་པ།ཀན་སུའུ་མི་རིགས་དཔེ་སྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཐུགས་རྗེ་ཆེ་ཞུ།༈ སྐྱེ་རྒུའི་བདེ་སྐྱིད་ཀྱི་འབྱུང་གནས་རྒྱལ་བ་མཉམ་མེད་དོན་ཀུན་གྲུབ་པ་ཆེན་པོའི་གསང་གསུམ་ཡེ་ཤེས་ཀྱི་སྒྱུ་འཕྲུལ་ངོ་མཚར་ཆོས་སྐུའི་རིང་བསྲེལ་གྱི་གཟུགས་སུ་བལྟམས་པ་གསུང་རབ་རྒྱལ་བའི་བཀའ་འགྱུར་རིན་པོ་ཆེ་དང་། ཐུབ་པའི་དགོངས་པ་རང་སྟོབས་ཀྱི་བཀྲལ་ནུས་པའི་འཕགས་ཡུལ་པཎ་གྲུབ་རྣམས་ཀྱི་མཛད་པའི་བསྟན་འགྱུར་རིན་པོ་ཆེ་སྟེ་མདོ་སྔགས་གཉིས་ལྡན་གྱི་ཡོངས་རྫོགས་བསྟན་པ་རྒྱ་མཚོ་འདི་ཉིད། དེང་གི་ཆར་གངས་རིའི་ལྗོངས་ཀྱི་ཡེ་གེ་ཁོ་ནའི་གཟུགས་སུ་བཞུགས་པ་ནི་སྤྲུལ་པའི་མཁན་སློབ་ཆོས་གསུམ་གྱི་ཐུགས་བསྐྱེད་ཉག་གཅིག་ལས་བྱུང་བ་དང་། དེ་དག་མི་ནུབ་བརྒྱུད་འཛིན་ཡུན་གནས་ཀྱི་ཆེད་དུ་གངས་ལྗོངས་ཆོས་བརྒྱུད་ཁག་ལས་བྱོན་པའི་རིས་སུ་མ་ཆད་པའི་སྐྱེས་ཆེན་རྣམས་ཀྱིས་བཀའ་བསྟན་རིན་པོ་ཆེའི་དགོངས་སྙིང་ཅན་གྱི་གསང་རབ་གླེགས་བམ་སྟོང་ཕྲག་མང་པོ་མཛད་ཅིང་། དཀའ་སྤྱད་ཐུགས་བརྩོན་སྣ་ཚོགས་གྱིས་མ་ཕྱི་གསར་བསྐྲུན་དང་བསྐྱར་བསྐྲུན་སོགས་ཀྱིས་འཇིག་རྟེན་གྱི་ཁམས་སུ་བཞུགས་པ་མཛད་མུས་བཞིན། དེང་གི་ཆར་གློག་རྡུལ་འཕྲུལ་ཆ་དང་དྲྭ་རྒྱའི་དུས་རབས་ཀྱི་འགྲོས་དང་བསྟུན་ནས་རྒྱལ་སྤྱིའི་རིག་གཞུང་སྤྱི་མཚུངས་ལྟར། རྒྱལ་བའི་གསུང་རབ་རིན་པོ་ཆེ་གཙོ་བོར་གྱུར་པའི་འཕགས་བོད་མཁས་པའི་གཞུང་ལུགས་རྣམས་དྲྭ་ཐོག་ནས་བཤེར་འཚོར་དང་འདྲ་བཤུས་སྒྲིག་གཟོ་སོགས་སྟབས་བདེའི་ལམ་ནས་བཀོལ་སྤྱོད་ཐུབ་པའི་གཞི་རྒྱ་ཆེ་བའི་འཆར་འགོད་དངོས་སུ་ལས་བཞིན་པར། མཆོག་སྤྲུལ་མུ་ར་རིན་པོ་ཆེའི་གཙོས་པདྨའི་འོད་སྣང་ཚོགས་པ་ནས་༧སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་གི་གསུང་འབུམ་མཚན་བཟང་སོ་གཉིས་ཀྱི་གྲངས་ལྡན་ཅན་འདིར་གནང་འབྱོར་བྱུང་བ་ལགས་ན། ཁོང་རྣམ་པའི་རྨད་དུ་བྱུང་བའི་མཛད་རྒྱས་ལ་སྙིང་ནས་ཐུགས་རྗེ་དང་བཀའ་དྲིན་བླ་ལྷག་ཏུ་ཆེ་ཞུ་བ་དང་ཆབ་གཅིག་སླད་ནས་ཀྱང་གསུང་རབ་རིན་པོ་ཆེ་ཅི་རིགས་དཔེ་སྐྲུན་གནང་ན་འདི་གར་འདྲ་བཤུས་གནང་སྩོལ་ཡོང་བར་ཅི་ནས་ཀྱང་བཀའ་དྲིན་མི་ཆུང་བ་ཞུ། ཞེས་དྲྭ་རྒྱའི་དཔེ་མཛོད་འགན་འཛིན་པ་རྫོགས་ཆེན་བསྟན་འཛིན་རྣམ་དག་ནས་ཕུལ།། ཞིང་སྨོན་བདེ་ཆེན་ལམ་སྟོན་གྱི་དོན་ཁྲིད་ཕན་བདེའི་འཇུག་ངོགས།བདེ་བ་ཅན་དུ་སྐྱེ་བའི་རྒྱུ་བཞི་དང་འབྲེལ་བའི་ཞིང་སྨོན་བདེ་ཆེན་ལམ་སྟོན་གྱི་དོན་ཁྲིད་ཕན་བདེའི་འཇུག་ངོགས་ཞེས་བྱ་བ་བཞུགས་སོ།། འགོ་བརྗོད།མཚན་དཔེ་ཡོན་ཏན་རྒྱ་མཚོའི་དཔལ་འབར་ཞིང་།། བདེ་ཆེན་དག་པའི་ཞིང་གི་ལམ་སྟོན་མཆོག། བཅོམ་ལྡན་རྒྱལ་བ་འོད་མཐའ་ཡས་པ་གང་།། རབ་ཏུ་དད་པས་ཕྱག་འཚལ་བྱིན་རླབས་སྩོལ།། ངོ་མཚར་མཚོ་དབུས་པད་སྡོང་རྒྱས་པའི་རྩེར།། རང་བྱུང་རྫུས་སྐྱེས་ཨོ་རྒྱན་རྡོ་རྗེ་འཆང་།། སྙིགས་དུས་རྒུད་པས་རབ་མནར་འགྲོ་ཚོགས་ལ།། བརྩེ་ཆེན་ཐུགས་ཀྱིས་ནམ་ཡང་སྐྱོང་མཛོད་ཅིག། རྣམ་དག་ཚུལ་ཁྲིམས་གཙང་མའི་དྲི་བསུང་འཐུལ།། མ་སྨད་ཏིང་ངེ་འཛིན་གྱི་རྩལ་ཆེན་རྫོགས།། རྨད་བྱུང་ཤེས་རབ་ཉི་ཟླའི་འོད་སྟོང་འབར།། བཀའ་དྲིན་སུམ་ལྡན་ཁྱབ་བདག་བླ་མར་བསྟོད།། གང་ཐུགས་བརྩེ་བའི་ཆུ་འཛིན་བརྡོལ་བ་ལས།། ཞི་བསིལ་དམ་ཆོས་གྲུ་ཆར་ཅིར་ཡང་རྩེན།། དེ་ལས་གདམས་ཟབ་བདུད་རྩིའི་ཆ་ཤས་ཤིག། རབ་གུས་དད་པས་ཡི་གེའི་གཟུགས་སུ་འབྲི།། དེ་ཡང་ཇི་སྐད་དུ་གཡོན་རུ་གཏེར་ཆེན་པདྨ་རྣམ་གྲོལ་གླིང་པའི་ལུང་བྱང་ལས། ཆོས་སྡེ་ཤྲཱི་སེང་ཧ་ཡི༔ མི་འཇིགས་སེང་གེའི་ཁྲི་མཆོག་སྟེང༔ པདྨའི་ཐུགས་སྤྲུལ་པདྨའི་མཚན༔ པད་གཞོན་མང་པོ་འདབ་སྟོང་འཛུམ༔ རྒྱལ་བསྟན་སྤྱི་དང་བྱེ་བྲག་གི༔ དགེ་ལེགས་ཡོན་ཏན་ཉིན་མོར་བྱེད༔ ཅེས་གསུངས་པ་ལྟར་ལུང་ཟིན་གྱི་སྐྱེས་བུ་ཆེན་པོ། ཐུབ་བསྟན་མདོ་སྔགས་ཡོངས་རྫོགས་ཀྱི་མངའ་བདག སྙིགས་དུས་ཀྱི་སྒྲོན་མེ། འདུལ་འཛིན་གྱི་རྒྱལ་པོ། སར་གནས་ཀྱི་སེམས་དཔའ། རིགས་དང་དཀྱིལ་འཁོར་ཀུན་གྱི་ཁྱབ་བདག བཀའ་དྲིན་སུམ་ལྡན་གྱི་རྩ་བའི་བླ་མ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན་༧ཐུབ་བསྟན་ལུང་རྟོགས་བསྟན་པའི་རྒྱལ་མཚན་དཔལ་བཟང་པོའམ་གྲུབ་དབང་རྒྱལ་བ་རྫོགས་ཆེན་པའི་གདན་རབས་བཅུ་གཉིས་པ་སྟེ་ཁྱབ་བདག་པ་ཆེན་པོ་པདྨ་སྐལ་བཟང་མཆོག་གིས་ཕྱོགས་དང་རིས་སུ་མ་ཆད་པར་གདུལ་བྱའི་བློ་རིམ་དང་མཐུན་པར་ཆོས་ཀྱི་འཁོར་ལོ་རྟག་པར་རྒྱུན་དུ་སྐོར་བར་མཛད་པ་ལས་ཤིང་ཕོ་རྟ་ཡི་ལོའི་བདེ་ཆེན་ཞིང་སྒྲུབ་ཀྱི་སྐབས་སུ་གདུལ་བྱའི་སློབ་ཚོགས་སེར་སྐྱ་ཁྲི་ཕྲག་ལས་བརྒལ་བ་ལ་བཀའ་ཆོས་ཟབ་མོ་གནང་བ་ནི་འདི་ལྟར་ཏེ། ཉིན་དང་པོའི་ཆོས་ཁྲིད།བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །གང་གི་བློ་གྲོས་སྒྲིབ་གཉིས་སྤྲིན་བྲལ་ཉི་ལྟར་རྣམ་དག་རབ་གསལ་བས། །ཇི་སྙེད་དོན་ཀུན་ཇི་བཞིན་གཟིགས་ཕྱིར་ཉིད་ཀྱི་ཐུགས་ཀར་གླེགས་བམ་འཛིན། །གང་དག་སྲིད་པའི་བཙོན་རར་མ་རིག་མུན་འཐུམས་སྡུག་བསྔལ་གྱིས་གཟིར་བའི། །འགྲོ་ཚོགས་ཀུན་ལ་བུ་གཅིག་ལྟར་བརྩེ་ཡན་ལག་དྲུག་ཅུའི་དབྱངས་ལྡན་གསུང་། །འབྲུག་ལྟར་ཆེར་སྒྲོག་ཉོན་མོངས་གཉིད་སློང་ལས་ཀྱི་ལྕགས་སྒྲོག་འགྲོལ་མཛད་ཅིང་། །མ་རིག་མུན་སེལ་སྡུག་བསྔལ་མྱུ་གུ་ཇི་སྙེད་གཅོད་མཛད་རལ་གྲི་བསྣམས། །གདོད་ནས་དག་ཅིང་ས་བཅུའི་མཐར་སོན་ཡོན་ཏན་ལུས་རྫོགས་རྒྱལ་སྲས་ཐུ་བོའི་སྐུ། །བཅུ་ཕྲག་བཅུ་དང་བཅུ་གཉིས་རྒྱན་སྤྲས་བདག་བློའི་མུན་སེལ་འཇམ་པའི་དབྱངས་ལ་འདུད། །བརྩེ་ལྡན་ཁྱེད་ཀྱི་མཁྱེན་རབ་འོད་ཟེར་གྱིས། །བདག་བློའི་གཏི་མུག་རྨོངས་པ་རབ་བསལ་ནས། །བཀའ་དང་བསྟན་བཅོས་གཞུང་ལུགས་རྟོགས་པ་ཡི། །བློ་གྲོས་སྤོབས་པའི་སྣང་བ་བསྐྱེད་དུ་གསོལ། །གང་གིས་རྟེན་ཅིང་འབྲེལ་བ་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་སྟོན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཉན་ཐོས་ཞི་བ་འཚོལ་རྣམས་ཀུན་ཤེས་ཉིད་ཀྱིས་ཉེར་ཞི་ཁྲིད་མཛད་གང་ཡིན་དང་། །འགྲོ་ལ་ཕན་པར་བྱེད་རྣམས་ལམ་ཤེས་ཉིད་ཀྱིས་འཇིག་རྟེན་དོན་སྒྲུབ་མཛད་པ་གང་། །གང་དང་ཡང་དག་ལྡན་པས་ཐུབ་རྣམས་རྣམ་པ་ཀུན་ལྡན་སྣ་ཚོགས་འདིི་གསུངས་པ། །ཉན་ཐོས་བྱང་ཆུབ་སེམས་དཔའི་ཚོགས་བཅས་སངས་རྒྱས་ཀྱི་ནི་ཡུམ་དེ་ལ་ཕྱག་འཚལ། །དུས་གསུམ་སངས་རྒྱས་ཐམས་ཅད་ཀྱི་ངོ་བོ་རིགས་དང་དཀྱིལ་འཁོར་རྒྱ་མཚོའི་ཁྱབ་བདག་བཀའ་དྲིན་མཚུངས་ཟླ་མ་མཆིས་པ་དཔལ་མགོན་བླ་མ་དམ་པའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ་བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་པར་མཛད་དུ་གསོལ། གང་གི་ཞལ་བཟང་ལྟ་བས་མི་ངོམ་གེ་སར་འཛུམ་པའི་མདངས་བཀྲ་ཞིང་། །མཚན་དཔེའི་གཟི་འོད་ཟེའུ་འབྲུ་གསལ་བས་འགྲོ་ཀུན་མིག་གི་བདུད་རྩིར་གྱུར། །ཐུགས་རྗེ་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་པའི། །ཐུབ་དབང་པདྨ་དཀར་བོའི་ཞབས་པད་དེ་རིང་བདག་བློའི་ཡིད་མཚོར་སྐྱོངས། །དྲི་མེད་མཚོ་གླིང་པདྨའི་སྡོང་པོའི་རྩེར། །རྒྱལ་བའི་རྣམ་སྤྲུལ་རང་བྱུང་ལྷུན་གྱིས་གྲུབ། །མཚན་རྫོགས་དཔེ་བྱད་ཡོན་ཏན་ཚོགས་འབར་བ། །པདྨ་འབྱུང་གནས་བདག་བློའི་པད་མཚོར་སྐྱོངས། །གང་མཚན་དྲན་པས་ཐོག་མེད་སྲིད་པའི་སྨག །སྙིང་ལ་ཡུན་རིང་ཉལ་བའི་དགྲ་འཇོམས་པ། །གཞོན་ནུ་སྨྲ་བའི་ཉི་མ་གང་དེ་དང་། །དབྱེར་མེད་དྲིན་ཆེན་བླ་མས་བདག་སྐྱོངས་ཤིག །གང་དག་ཕྱོགས་བཅུ་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་དམ་པའི་ཆོས་ཀྱི་ཆར་འབེབས་ཀྱིས། །གསན་པར་འདོད་པ་ཐམས་ཅད་འདིར་གཤེགས་ཤིག །ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་ཆོས་འདི་འགྱུར་བར་ཤོག། ༼ཀ༽ སྔོན་དུ་འགྲོ་བའི་ཆོས། ད་ཆོས་གྲྭའི་ནང་ལ་ཞུགས་པ་ནས་བཟུང་སྟེ་ཚང་མས་ངག་བཅད་གྱིས། ད་སྔོན་ཉི་མ་ཡན་ཆད་ལ་གཉིད་ཐུན་གཅིག་གི་ཞབས་མིན་པར་བཤད་པ་རེད། ད་མ་བཤད་ནས་ཆུ་ཚོད་གཅིག་ལ་སྡོད་དང་སྨྲ་བ་བསྡམས་པའི་ཡོན་ཏན་གྱི་བྲོ་བ་ཞིག་མྱོང་ཐུབ་པ་ཡིན། རང་རེ་ཆོས་དུང་གི་དུང་སྒྲ་ཞིག་གིས་བསྐུལ་ནས་ཆོས་གྲྭའི་ནང་ལ་ཡོང་རྒྱུ་དེ་ཆོས་ཞུ་བའམ་ཆོས་སྒྲུབ་པའི་དོན་དུ་ཡིན་པ་དེ་ཉིད་ཕལ་ཆེར་བོད་ཆོས་ལྡན་གྱི་ས་ཆའི་མི་དབང་པོ་ཚང་ཞིང་སེམས་པ་རྣལ་དུ་གནས་པ་ཞིག་ཡིན་པ་ནས་བཟུང་སྟེ་ཚང་མས་ཁ་ཡིས་ཟེར་ཤེས་རྒྱུ་ཅན་ཞིག་ཡིན། དེ་ཡིན་ན་ཆོས་ཞུ་ཟེར་རྒྱུའི་ཐ་སྙད་ཀྱི་ཚིག་དེ་གཞན་ལས་བླངས་ནས་རང་ལ་ཐོབ་པའི་དོན་ཞིག་དང་། ཆོས་བསྒྲུབ་ཟེར་བའི་ཐ་སྙད་ཀྱི་ཚིག་དེ་ཐོབ་པ་དེ་ཉིད་རང་གི་སྒོ་གསུམ་གྱི་སྟེང་ནས་ལག་ལེན་ཉམས་ལ་སྦྱོར་རྒྱུ་ཞིག་ཡིན། དེ་ང་ཚོས་ཁྱིམ་པ་ཕོ་མོ་ཐ་མལ་པ་ཡི་གྲོང་ཚིག་གི་དབང་དུ་བཏང་ནས་བཤད་ན། ཆོས་ཞུ་བ་དེ་རང་ལ་མེད་པའི་དགོས་མཁོ་ཅན་མེད་ཐབས་མེད་པའི་རྒྱུ་དེ་ལོན་པར་བྱས་ནས། ཆོས་སྒྲུབ་ཅེས་པ་དེ་ལོན་ཡོད་པའི་རྒྱུ་དེས་ཅི་དགོས་གང་དགོས་བེད་སྤྱོད་གཏོང་ཞེས་བཤད་པ་ལྟ་བུ་ཞིག་ཡིན། དོན་འདི་ནད་ཚབས་ཆེན་ཞིག་ལུས་ལ་ཕོག་ནས་བདེ་བདེ་ཉིན་གཅིག་ལ་མེད་པའི་མི་ནད་པ་ཞིག་གིས་སྨན་པ་མཁས་པ་ཞིག་བཙལ། དེ་ནས་སྨན་པས་དེའི་ནད་ལ་ཕན་ཐོགས་ཅན་གྱི་སྨན་བྱིན་པས་མི་ཚད་སྨན་བསྟེན་ལུགས་དང་། ཟས་དང་སྤྱོད་ལམ་གྱི་ཐད་ནས་ཉན་རྒྱུ་དང་མི་ཉན་རྒྱུའི་སྤང་བླང་འདོར་ལེན་གྱི་འཛེམ་ཟོན་བྱ་དགོས་པའི་རིགས་སོགས་བཤད་སྐབས་ནད་པས་དེ་བཞིན་དུ་ལག་ལེན་ལ་བཏབ་ནས་དགོས་དོན་ངོ་མ་དེ་ཉིད་ནད་པ་ནད་ལས་གྲོལ་སོང་བ་ལྟ་བུའི་དཔེ་དེ་འཇོག་རྒྱུ་ཞིག་སྟེ། མདོ་སྡོང་པོ་བཀོད་པའི་ལུང་དྲངས་ནས་འདུ་ཤེས་བཞི་བསྟེན་པར་གསུངས་པ་ལྟར་དུ་ཡིན། སྤྱིར་ན་བེད་མེད་ཀྱི་རྒྱུ་དེ་ཡོད་མེད་གཉིས་ཀ་འདྲ་འདྲ་ཡིན་ལ། ད་རུང་མེད་པས་དགའ་འོ་སྙམ་པ་དང་མེད་པས་སྤུས་གཙང་འདུག་སྙམ་རྒྱུ་ཞིག་ཡིན། དེའི་རྒྱུ་མཚན་གང་ཡིན་ཟེར་ན། དེའི་དོན་ལ་དཀའ་ལས་བརྒྱབ་པ་དེ་ཉིད་སྡུག་གྱོང་ཡིན་པའི་རྒྱུ་མཚན་གྱིས་ཡིན། བེད་མེད་ན་ཆོས་ཡིན་ཡང་སྐྱུར་འཇོག་དགོས་པ་ཡིན་ཞེས་སྔར་ཡང་བཤད་མྱོང་། ཡིན་ན་ཡང་འདང་བསམ་བློ་གང་ལ་བསྐོར་ཀྱང་ཆེ་ས་ནས་བཤད་ན་འུ་ཚོ་ཁམས་གསུམ་འཁོར་བའི་སེམས་ཅན་ཞེས་བཤད་ལ། ཆུང་ས་ནས་བཤད་ན་མི་ཞེས་པ་འདི་དབང་མེད་པ། ནུས་པ་ཆུང་ཆུང་། གནོད་པ་དང་སྡུག་བསྔལ་མང་བ། དེ་འདྲ་བའི་འཇིག་རྟེན་གྱི་ཁམས་འདིར་སྐྱེ་བ་བླངས་ཚར་དུས་སྒྱུ་མའི་ལུས་རྟེན་ཆུ་ཐོར་ལྟ་བུ་འདི་བྲལ་མ་སོང་གི་བར་དུ་འདིའི་སྐྱིད་སྡུག་མངར་སྐྱུར་ཁ་གསུམ་གྱི་བྲོ་བ་འདི་མྱོང་ནས་འགྲོ་བཞིན་མི་འདུག་ཐབས་མེད་ཡིན། དབང་མེད་ལུགས་ལ་བསམ་བློ་ཞིག་བཏང་ན། བཤས་རའི་ནང་གི་ཕྱུགས་ཟོག་དང་གཅིག་འདྲ་ཞིག་སྟེ། སྲོག་རྟ་རྔ་འདྲ་བོ་འགྲོ་འོང་རང་དབང་མེད་པ་ཞིག་ཡིན། ཉམ་ཆུང་ལུགས་ལ་འདང་རེ་བརྒྱབ་ན། སྐྱབས་མེད་བར་དོའི་སེམས་ཅན་དང་ཅི་ཞིག་ཁྱད་ཡོད་དེ། ལས་ཀྱི་རླུང་དམར་གྱིས་མི་འདོད་ཉམ་ངའི་གནས་ལ་དེད་ལུགས། ན་དོགས། ཤི་དོགས། བོར་དོགས། བརླག་དོགས་ལ་སོགས་པའི་འཇིགས་སྐྲག་མང་པོ་བཤད་ན་བཤད་ཚོད་མེད་པའི་འཇིགས་སྐྲག་མང་པོ་ཡོད་པ་འདི་དག་སྟེ། འཇིགས་པའི་དགྲ་བཞི་དང་ཡ་ང་བའི་གཡང་ས་མིན་ན་གཞན་ཅི་ཡིན། གཞན་ལ་ཕར་བལྟས་ཀྱང་རང་ལ་ཚུར་བསྐོར་ཀྱང་ཉམ་གཅིག་བས་གཅིག་ཐག ཤ་གཅིག་བས་གཅིག་ཚ་ཞིག་ཡིན། གནའ་གཅིག་གིས་གཏམ་དཔེ་བཀོད་པ་ལྟ་བུ་སྟེ། རྨ་ཆུ་ལེབ་མོའི་ཁུག་སོ་ན། །གཅེར་བུ་གཅིག་སྟོང་དགུ་བརྒྱ་ཡོད། །ཞྭ་གཅིག་ལ་བསྐོན་དང་གཉིས་ལ་བསྐོན། །གོས་གཅིག་ལ་བཟོ་དང་གཉིས་ལ་བཟོ། །ཞེས་བཤད་པ་ལྟ་བུ་ཉམ་ཐག་སྡུག་བསྔལ་སྣ་ཚོགས་ཀྱིས་མནར་བ་ལ་ཤ་ཚ་སྙིང་རྗེ་ཆེ་ཡང་ལྟ་འདུག་རྒྱུ་དེ་ཉིད་མ་གཏོགས་གཅིག་གིས་གཅིག་ལ་སྐྱོབ་མ་དགོས་རང་གིས་རང་ཉིད་སྐྱོབ་པའི་ནུས་པ་མེད་པའི་ས་ཚོད་འདི་ལྟ་བུ་ཞིག་ལ་སླེབས་པ་ཡིན། དེས་ན་འདིའི་སྡུག་བསྔལ་འཇིགས་སྐྲག་འདིའི་ནང་ནས་ཐར་སོང་བ་ཞིག་དང་སྐྱོབ་ཐུབ་པ་ཞིག་ལ་སྐྱབས་གནས་མ་ཚོལ་ཐབས་མེད་གྱུར་ཡོད་པས་དེ་ལས་ཐབས་གཞན་མེད་ས་ལ་ཐུག་ཡོད། དེས་ན་འུ་ཚོས་ཆོས་དུང་གསུམ་བུས་ནས་ཆོས་དུང་གསུམ་པའི་དུང་སྒྲ་དང་བསྟུན་ནས་ཆོས་གྲྭའི་ནང་འདིར་འཚོགས་པ་དང་ལྷན་དུ་ངས་བྱང་སེམས་ཀྱི་གསོ་སྦྱོང་ཞིག་བླངས་ནས་དེ་མ་ཐག་ལ་གང་བློ་མ་ཚར་གསུམ་བཏོན་པ་རེད། གང་བློ་མ་ཚར་གསུམ་འདོན་རྒྱུའི་གང་བློ་མ་ཞེས་པ་དེ་ཅི་ཞིག་ཡིན་ཟེར་ན། རྒྱལ་སྲས་འཇམ་དཔལ་དབྱངས་ཀྱི་བསྟོད་པ་པཎ་ཆེན་ལྔ་བརྒྱས་མགྲིན་གཅིག་ཏུ་བསྟོད་པའི་ཚིག་ཡིན་ཞིང་། འཕགས་པ་འཇམ་པའི་དབྱངས་ཞུ་བ་དེ་གདུལ་བྱའི་སེམས་ཅན་གྱི་མིག་ངོ་ལ་རྣམ་པ་རྟགས་ཀྱི་ཕྱག་རྒྱར་རྒྱལ་སྲས་གཞོན་ནུའི་ཚུལ་འཆང་བ་ཞིག་ཏུ་ཤར་བ་ཞིག་ཡིན་པ་མ་གཏོགས་དོན་ལ་རྒྱལ་བ་ཐམས་ཅད་ཀྱི་མཁྱེན་རབ་ཀྱི་ཕུང་པོ་གཅིག་ཏུ་བསྡུས་པའི་རང་གཟུགས་ཡིན། གང་བློ་མ་ཆོས་ཁྲིད་ཀྱི་འགོར་འདི་ལྟར་འདོན་འདུག་དགོས་པ་དེ་ཉིད་སྙིང་ལ་ཡུན་རིང་ཉལ་བའི་རྨོངས་པའི་མུན་ཆེན་འདི་ཕར་བསལ་ནས་ཤེས་རབ་ཡེ་ཤེས་ཀྱི་སྣང་བ་ཞིག་ནང་ནས་རྒྱས་པའི་དོན་ལ་གསོལ་བ་འདེབས་བཞིན་ཡོད་པ་ཡིན། ངེས་དོན་རང་རིག་འཇམ་དཔལ་དཔའ་བོའི་ཆོས་ཉིད་དོན་གྱི་རང་ཞལ་མ་མཇལ་ནས་གཉིས་སྣང་འཁྲུལ་བས་སྦགས་པའི་དུས་འདིར་སྣང་ཆའི་ཐབས་ཀྱི་སྤྱོད་པ་བསྟོད་པ་ཕྱག་འཚལ་མཆོད་འབུལ་སོགས་ཀྱི་བསོད་ནམས་ཀྱི་ཚོགས་ལ་བརྟེན་པ་དང་། མཐར་ཐུག་སྣང་མེད་སོ་སོ་རང་གི་རིག་པར་དཔྱད་པའི་ཤེས་རབ་ཡེ་ཤེས་ཀྱི་ཚོགས་རང་ལས་བརྙེས་དགོས། སྐྱེས་ཕོ་རབ་ཕོ་འབྲིང་ཕོ་མཐའ་གསུམ། །དྲན་སྔ་ཕྱི་མིན་པ་འདྲ་འདྲ་ཡིན། །ཞེས་ཟེར་ལ། དྲན་སྔ་ཕྱི་ཞེས་པ་རིག་སྔ་ཕྱི་ཞིག་ཡིན་ཞིང་། རིག་སྔ་ཕྱི་ཞེས་པ་ཤེས་སྔ་ཕྱི་ཡིན། ཤེས་དང་མ་ཤེས་ཀྱི་བར་ནས་མཁས་བླུན་ཤོར་སོང་བས་མཁས་བླུན་ཞེས་པ་མིག་རྒྱང་རིང་ཐུང་གི་ཁྱད་པར་ཡོད། འུ་ཚོས་འཕགས་པ་འཇམ་པའི་དབྱངས་ཤེས་རབ་ཀྱི་ལྷ་ལ་བསྟོད་པ་ཚར་གསུམ་དང་སྦྲགས་ནས་གསོལ་འདེབས་བྱེད་པའི་དོན་ངའི་རྨོངས་པའི་མུན་ནག་འདི་མགོ་ནས་དྭངས་པར་ཤོག སྔར་མེད་ཀྱི་བློ་སྟོབས་དང་ཤེས་རབ་རྣམ་དཔྱོད་གསར་བ་ཞིག་ཁྱེད་ཀྱིས་གནང་རོགས་ཞུ་ཞེས་ཟེར་གྱིན་ཡོད་པ་ཡིན། དེ་ལྟར་ན་ཕྱེད་འཇམ་པའི་དབྱངས་ལ་བརྟེན་ཏེ་དེ་ལ་གསོལ་བ་འདེབས་བཞིན་ཡོད་ན་ཐུགས་མཁྱེན་བརྩེའི་ཡོན་ཏན་ལ་བསླུ་བ་མེད་ཀྱང་ཕྱེད་གདུལ་བྱ་རང་ཉིད་ལ་ཡང་ཐུག་ཡོད་པ་ཡིན། དད་དང་མོས་གུས་དེས་ཤེས་རབ་ཀྱི་སྟོབས་སད་ནས་ཤེས་བྱར་དཔྱོད་པའི་རྣམ་དཔྱོད་རང་གི་སྙིང་དབུས་ནས་ཤར་དུས་རྨོངས་པའི་དྲ་བ་གཅོད་པའི་རིག་པ་དེ་གྲུབ་ནས་འཇམ་དབྱངས་ཕྱག་གི་རལ་གྲི་གཉིས་པ་ཞིག་ཐོབ་པས་མི་ཚད་གསོལ་འདེབས་སྨོན་ལམ་བྱེད་མཁན་གྱིས་བྱེད་ལས་ཀྱི་ནུས་པ་ཐོབ་སོང་བ་ཡིན། རང་དང་འདྲ་བའི་སོ་སྐྱེ་ཐ་མལ་པ་ལ་བཤད་རྒྱུའི་སྐད་ཆ་དེས་ཚིག་སྣེ་དྲངས་ཏེ་ད་སྔའི་ཚེ་སྟོད་རང་རང་ཁ་ཁ་སོ་སོའི་འདས་པའི་དུས་ཚོད་ལ་འདང་ཞིག་བརྒྱབ་ནས་ཕྱི་བལྟས་ཤིག་བྱས་ན། ཚེ་སྟོད་ཀྱི་ལོ་གྲངས་དུས་ཚོད་དེ་ཅི་ཙམ་ཞིག་སོང་བ་ཡིན། དེ་ཟོག་འགྲོ་འགྲོར་བྱས་ནས་རྣམ་ཤེས་ཐ་མེ་ཐོམ་མེ་དེ་ཉིད་ཚུར་སད་དུ་བཅུག་ནས་སྔ་བསམ་ཕྱི་འདང་ཡོད་པ་ཞིག་བྱས་ཚེ་ཕ་ཨ་མྱེ་རྒན་གསུམ་གྱི་མི་ཐོག་ཚུན་ཆད། བུ་བུ་ཕྲུག་ཕྱིས་འབྱུང་གི་བདག་པོ་རང་ཕར་བརྒྱབ་ས་དེ་ཉིད་ནས་བཟུང་སྟེ། འདིའི་གཉིད་མ་འཐམ་འཐུམ་གྱི་གཉིད་མ་བདེ་བའི་འཁྲུལ་སྣང་ལྟ་བུའི་འདིའི་སྐབས་སུ་ཆོས་ཤིག་བྱེད་ཀྱིན་ཡོད་པའི་མིང་བཏགས་པ་ཡིན། འོན་ཀྱང་དོན་གྱི་ཐོག་ནས་ཆོས་དེ་ཉིད་ཅི་ཡིན་དང་ཇི་ལྟར་སྒྲུབ་དགོས་རང་གིས་ཀྱང་མི་ཤེས། བྱ་ལས་བྲེལ་ཟིང་གི་འདུ་འགོད་མང་ཆེ་ས་དེ་འཇིག་རྟེན་གྱི་བྱ་བ་སྒྲུབ་པའི་ཚུལ་ལུགས་ཡིན། དེ་ཡང་འདི་འགྲུབ་སོང་ཟེར་རྒྱུ་ཞིག་སྟོན་རྒྱུ་མེད་པར་མ་ཟད་ད་རུང་མ་འགྲུབ་བཞིན་དུ་རེ་ཐག་ཆད་ནས་བྲང་ལ་སྦར་བྲད་བྱེད་ཞོར་དུ་མིག་སྔོན་པོར་ལོག་ནས་མིང་མེད་ལ་འགྱུར་བ་ནི་སྔ་འཕྲོ་ཕྱི་འཕྲོ་ཡིན། དེ་ལྟར་ཡིན་འདུག་བསམ་པའི་དེ་ལྟ་བུའི་སེམས་ཤིག་ནང་ལ་ཚུར་འཁོར་བ་ཡིན་ན་དེ་འཇམ་པའི་དབྱངས་ཀྱི་བྱིན་རླབས་ཞུགས་སོང་ཟེར་ཆོག ཉི་མ་ཤར་བའི་སྔོན་ལ་སྐྱ་རེངས་ཤར་བ་ལྟ་བུ་ཡིན་ལ། ངེས་འབྱུང་གི་བློ་སྣ་གཅིག་རྒྱུད་ལ་སྐྱེས་སོང་བ་ཡིན། ངེས་འབྱུང་། བྱང་སེམས། ཡང་དག་པའི་ལྟ་བ་རྣམས་གཅིག་རྗེས་སུ་གཅིག་འབྲེལ་ནས་ཡོང་དགོས། བྱིན་རླབས་ཀྱི་རྩ་བ་བླ་མ་ཡིན་ལ། བླ་མ་དང་མགོན་པོ་འཇམ་དབྱངས་ཞེས་གཉིས་མེད་དད་པའི་ཡིད་ཀྱིས་གསོལ་བ་བཏབ་པའི་འབྲས་བུ་ཡིན་ཞིང་། ང་ཚོའི་ཁ་བརྡའི་མགོ་དེ་ཆོས་ཞུ་རྒྱུ་དང་ཆོས་བསྒྲུབ་རྒྱུ་ཞེས་པའི་ཐ་སྙད་ཀྱི་ཚིག་གིས་སྐད་ཆའི་ཚིག་མགོ་བླངས་པ་ཡིན་ན་ཆོས་བསྒྲུབ་རྒྱུ་དེ་ཉིད་ཀྱི་སྔོན་དུ་གང་བསྒྲུབ་པའི་ཆོས་དེ་ཐོབ་རྒྱུའམ་ཐོས་རྒྱུ་ལ་དང་པོ་འདང་རྒྱག་བྱེད་དགོས་པ་ཡིན། དེ་ལྟར་ན་ཆོས་ཞེས་པའི་ཚིག་དེའི་ཁུངས་དེ་རྒྱ་གར་ནས་ཡོང་བ་ཡིན་ཞིང་། དེ་ལ་འཇུག་ཡུལ་མང་པོ་ཡོད་པ་ཡིན་ཡང་རང་རེའི་བགོ་སྐལ་དུ་གྱུར་པའི་དམ་པའི་ཆོས་འདི་ལ་མཚོན་ན། འདི་འདས་པའི་མི་ལོ་ཉིས་སྟོང་ལྔ་བརྒྱ་ཙམ་ཞིག་གི་སྔོན་ནས་སྤྲུལ་སྐུའི་སངས་རྒྱས་ཤཱཀྱ་ཐུབ་པས་མི་མཇེད་འཇིག་རྟེན་གྱི་ཁམས་འདི་ནས་གསུངས་པ་ཡིན། བརྗོད་བྱ་གང་ཡིན་ཞེ་ན། ཚུལ་ཁྲིམས། ཏིང་འཛིན། ཤེས་རབ་རྣམ་པ་གསུམ་པོ། རྗོད་བྱེད་འདུལ་བ། མདོ་སྡེ། མངོན་པ་གསུམ་གྱིས་གསུངས་ཡོད། དེ་ཡང་རང་གར་ཚུལ་ཁྲིམས། ཏིང་འཛིན། ཤེས་རབ་ཅེས་བཤད་པ་ཙམ་ཞིག་མ་ཡིན་པར་ལམ་ལྷག་པའི་བསླབ་པས་ཁྱད་པར་དུ་ཕྱེས་པའི་བརྗོད་བྱ་ཅན་ཞིག་སྟེ། དེ་སེམས་ཅན་ཉོན་མོངས་དུག་གསུམ་གྱི་ནད་ཀྱིས་གདུང་ནས་མནར་གྱིན་ཡོད་པ་རྣམས་སྐྱོབ་པའི་ཆེད་དུ་འདོད་ཆགས་འདུལ་བའི་གཉེན་པོ་འདུལ་བ། ཞེ་སྡང་འདུལ་བའི་གཉེན་པོ་མདོ་སྡེ། གཏི་མུག་འདུལ་བའི་གཉེན་པོ་མངོན་པ། དུག་གསུམ་ཆ་མཉམ་འདུལ་བའི་གཉེན་པོ་སྡེ་སྣོད་བཞི་བའམ་རིག་འཛིན་སྔགས་ཀྱི་སྡེ་སྣོད་གསུངས་པ་ཡིན། དེ་གསུངས་པས་མི་ཚད་པར། ངས་ནི་ཁྱོད་ལ་ཐར་བའི་ཐབས་བསྟན་གྱི། །ཐར་བ་རང་ལ་རག་ལས་བརྩོན་པར་གྱིས། །ཞེས་གསུངས་ཏེ། ཆོས་གསུངས་པས་མི་ཚད་ཆོས་སྒྲུབ་ལུགས་ཀྱི་ཞལ་གདམས་དང་བཅས་ཏེ་གནང་བ་དེ་ཉིད་ནི་ང་ཚོས་བསྒྲུབ་རྒྱུའི་ཆོས་དེ་ཡིན་ལ་ཐོབ་དགོས་རྒྱུའི་ཆོས་ཀྱང་དེ་ཡིན། དེའི་ཕྱིར་ན་བདག་ཅག་གི་སྟོན་པས་རིགས་ཅན་གསུམ་གྱི་གདུལ་བྱར་ཆོས་འཁོར་རིམ་གསུམ་བསྐོར་བ་ཡིན། དེ་ལྟར་ན་དེ་ཉིད་བསླབ་གསུམ་གཞིར་བཞག་ནས་རིམ་འཇུག་བྱེད་རྒྱུ་དེ་ཐུབ་པའི་བསྟན་པ་དེ་སྐས་ཀྱི་གདང་བུ་ལྟ་བུའི་དཔེར་བཞག་ནས་གསུངས་པ་དེ་ལ་འཕོ་འགྱུར་མེད། དེས་ན་གོང་ཞིག་ནས་བཤད་པ་ལྟར་དུ་འུ་ཚོ་རང་གཞན་རིགས་འདྲ་གང་ལ་ཁ་བསྐོར་ན་བར་སྲིད་ཀྱི་སེམས་ཅན་དང་འདྲ་ཞེས་སྨྲས་པ་ཡིན། ཡུན་རིང་ས་དེ་ཉིད་ལ་འཁྲུལ་སྣང་བྱ་སྒྲོ་རླུང་ཁྱེར་གྱིས་དབང་མེད་ལ་བསྡུས་པ་དེའི་ཚེ་བར་སྲིད་ཀྱི་སེམས་ཅན་དེ་མཚམས་རེར་ངོ་ཤེས་ས་རེ་ཐུག་སྐབས་རེ་རེ་ཐུག་ནས་དུས་སྐད་ཅིག་སྐར་མའི་ཡུན་ཙམ་རེ་ལ་སྐྱིད་སྡུག་གི་སྐད་ཆ་འདྲ་རེ་བཤད་མགོ་རྩོམ་ཚེ་ཡང་ལས་རླུང་གིས་དབང་མེད་དུ་རང་རང་སོ་སོའི་ལས་ཀྱི་རྗེས་སུ་འབྲངས་ནས་བདའ་འགྲོ་བ་ཡིན། དེ་ལྟར་དུ་འུ་ཚོ་ལོ་རེའི་ནང་གི་འགའ་རེ་ཆོས་ཁྲིད་ཐེངས་གསུམ་བཞི་དེ་ཉིད་དང་། འགའ་རེ་ཆོས་ཁྲིད་རེ་རེའི་ཆུ་ཚོད་རེ་ཙམ་འདི་ལྟར་བྱས་ནས་ཐུག་ཙམ་རེ་བྱས་པ་ན་བཤད་དགོས་རྒྱུ་དོན་དག་དེ་ཚེ་འདི་ཕྱིའི་དོན་ཆེན་གླེང་རྒྱུ་མང་བ་ཡིན། དེའི་ཐོག་ཏུ་ཆོས་འཐོབ་རྒྱུ། ཆོས་བསྒྲུབ་རྒྱུ། ཆོས་འགྲུབ་རྒྱུ་ཚང་མ་དུས་ཐོག་གཅིག་ལ་འཛོམས་དགོས་དུས་དཀའ་མོ་ཡིན་ཡང་ཚིག་གཅིག་དོན་གྱིས་སྙིང་པོ་ལ་བསྡུས་ཏེ་བཤད་ཡོང་ན། ཨ་རོགས་ཚང་མ་ཁ་དེ་ཕྱོགས་སུ་མ་འཁོར་འདི་ཕྱོགས་ལ་འཁོར་ཟེར་རྒྱུའི་མཛུ་གུས་རི་སྟོན་ལྟ་བུ་ཞིག་གྱུར་སོང་བ་ཡིན་ན་དེ་ལ་བརྟེན་ནས་འབད་པ་རེ་བྱས་ཏེ་ཕྱིན་ཆད་རང་རང་སོ་སོའི་ངོས་ནས་ཆོས་དང་བསམ་སྤྱོད་གཉིས་ཀ་འདྲེས་སོང་ཚེ་ཆོས་སྒྲུབ་ལུགས་མི་ཤེས་པ་དང་ཆོས་སྒྲུབ་ལོང་མེད་པའི་ཁུར་པོ་ཆེན་པོ་སེམས་ནད་ཅན་ཡོད་པ་དེ་མེད་འགྲོ་བའི་སྟེང་དུ་དེའི་ཆོས་དེ་ཡིས་ལས་ཀ་དང་འཚོ་བའི་ཁུར་པོ་གཞན་དག་ཀྱང་ཡང་ཐབས་དང་། དེ་ཡིས་བེད་ཆོད་པའི་རེ་བ་རྒྱག་གིན་ཡོད་པས་མི་ཚད་ཚེ་འདི་ཕྱི་གཉིས་ཀའི་འགྲོ་རྟེན་འདུག་རྟེན་བློ་གཏད་ས་རེ་རང་རང་ལ་ཡོད་ཐབས་ཀྱི་རེ་བ་དེ་རྒྱག་བཞིན་ཡོད། དེས་ན་ཆོས་སྒྲུབ་དུས་ཆོས་དག་མ་ངོ་མ་དེ་ཉིད་བསྒྲུབ་དགོས། སྟོན་པ་སངས་རྒྱས་ཀྱིས་ཇི་ལྟར་གསུངས་པའི་བསླབ་གསུམ་ཉམས་ལེན་གྱི་ལམ་ཆོས་དག་མ་ངོ་མ་དེ་ཉིད་ལ་མ་ཞུགས་ན་དམ་ཆོས་རྣམ་དག་འགྲུབ་ཅེས་པ་ཞིག་མི་སྲིད། དེ་ལྟར་དུ་བཤད་ཡོང་ན་བརྗོད་བྱ་བསླབ་པ་གསུམ་དང་རྗོད་བྱེད་སྡེ་སྣོད་གསུམ་ཞེས་བཤད་ཚེ་བླ་མ་གྲྭ་པའི་སྐད་ཆ་ཞིག་མ་ཡིན་ནམ་དེའི་ནང་ནས་དཔེ་ཆ་པའི་དོན་དག་ཅིག་ཏུ་གྱུར་པས་ངེད་ཚོ་མི་སྐྱ་ཕོ་མོ་དེ་ལྟ་བུའི་རིགས་ཅན་མིན་བསམ་རྒྱུ་མེད། བླ་མ་གྲྭ་པ་དང་དཔེ་ཆ་པ་ལས་གཞན་པས་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་མ་དགོས་ན་མི་ཤེས་མ་གཏོགས་དེ་ཐོབ་དགོས་དུས་དམིགས་ཡུལ་གཅིག་ལས་གཉིས་པ་ཞིག་མེད་ལ། ཐེག་པ་གསུམ་གཅིག་གི་ལམ་ལ་མ་ཞུགས་ནས་མངོན་མཐོ་དང་ངེས་ལེགས་ཀྱི་གོ་འཕང་ཐོབ་ཐབས་མེད། དང་པོར་ནང་པ་སངས་རྒྱས་པའི་ཆོས་སྒོ་ལ་ཞུགས། དཀོན་མཆོག་གསུམ་ལ་སྐྱབས་སུ་སོང་། ཐེག་ཆེན་མདོ་སྔགས་གཉིས་ཀྱི་ཆོས་སྒོ་ལ་ཞུགས་པ་རང་རེ་ལྟ་བུ་ཞིག་ལ་མཚོན་ན། སོ་ཐར་བྱང་སེམས་སྔགས་གསུམ་གྱི་སྡོམ་པ་གསུམ་པོ་དེ་ཡར་ལྡན་དུ་རྫོགས་དགོས་ལ། དེ་ཟེར་ན་ཅི་ཞིག་ཟེར་ཏེ་སྡོམ་པ་ཞེས་བཤད་ཡོང་དུས་གྲྭ་ཇོ་སེར་ལྟ་བུ་ཞིག་མིན་ན་མི་སྐྱ་ཕོ་མོས་སྡོམ་པ་ཞུ་ཞེས་པ་ཞིག་གོ་མ་མྱོང་སྟེ་སྡོམ་པ་སྲུང་ཟེར་རྒྱུ་ཞིག་དེ་བས་ཀྱང་གོ་མ་མྱོང་བསམ་ན། དེ་ལྟར་ཡིན་ནོ་སྙམ་པའི་རྒྱུ་མཚན་གྱིས་འདིའི་མི་ཐོག་སྔོན་རྗེས་ཚང་མ་གདན་ས་ཆོས་འཁོར་ཆེན་པོ་རེའི་ཉེ་འཁྲིས་ནས་རྒྱ་མཚོའི་ཟུར་ནས་ཁ་སྐོམ་སྟེ་ཤི་ལ་ཉེ་བཞིན་ཡོད་པ་ལྟ་བུ་ཐ་མེ་ཐོམ་མེའི་ངང་ནས་མི་ཚེའི་དུས་སྐབས་ཀྱི་ལ་མོ་རྒྱག་གིན་འདུག་ཟེར་དོན་དེ་ཡིས་ཡིན། ཁྱིམ་པ་རབ་བྱུང་སུ་ཡིན་ན་དང་པོ་སྐྱབས་སུ་འགྲོ་བའི་ཆོས་སྒོར་ཞུགས། དེའི་འཕྲོ་སྐྱབས་འགྲོ་དེས་རྩོམ་གཞི་བྱས་ནས་སོ་ཐར་གྱི་སྡོམ་པ་རིགས་བདུན་ནམ་རིགས་བརྒྱད་གང་རུང་ཞུས། ཡང་མིན་ན་རིམ་ནོད་ཀྱིས་ཐམས་ཅད་ཞུས་པའི་ཐོག་ཏུ་བྱང་ཆུབ་སེམས་བསྐྱེད་ཀྱི་སྡོམ་པ་བླངས། དེ་ནས་དེའི་སྟེང་དུ་སྔགས་ལ་ཞུགས་ཏེ་སྔགས་སྡོམ་བླངས་ནས་སྡོམ་གསུམ་ཡར་ལྡན་དེ་གང་ཟག་གཅིག་གི་རྒྱུད་ལ་ཚང་དགོས། ལམ་དེ་ནས་དེ་ལྟར་བྱས་ཏེ་མ་བརྒྱུད་ནས་ཆོས་ངོ་མ་ཞིག་བྱེད་ཐབས་མེད། ལམ་གཞན་ནས་ལམ་ཆོས་ངོ་མ་ཞིག་བྱེད་ཐབས་མེད་ལ། ལམ་དེ་མིན་པ་ཞིག་ལ་ཁྲིད་སོང་དུས་དེའི་ལམ་དེ་ལམ་དང་ལམ་མིན་གང་ཡིན་ངོས་འབྱེད་དཀའ་བ་ཞིག་ཡིན། དེའི་ཕྱིར་ན་མང་པོ་ཞིག་གིས་བློ་གཏད་ལིང་བཅོལ་ཚེ་འདི་ཕྱི་གཉིས་ཀའི་རེ་ལྟོས་བྱེད་ཀྱིན་ཡོད་ན་འདི་ལྟ་བུའི་མི་མང་ཞིག་གི་ནང་ནས་ཕལ་མོ་ཆེ་ངོ་མས་མཛུ་གུས་གར་བསྟན་ཤར་དུ་ངོས་འཛིན་ཁུལ་བྱེད་བཞིན་ཡོད་པས་དེ་སླུ་ཐབས་དང་བློས་གཏོང་ཐབས་མེད་ནས་ལྷག་བསམ་དྲང་པོས་ཕན་པ་གཙོར་བཟུང་བྱས་ཏེ་བཤད་པའི་ཚུལ་ཡིན། ཤཱཀྱའི་རྒྱལ་པོའི་རྗེས་འཇུག་གི་རབ་བྱུང་ཞིག་ཡིན་དུས་ཁྱད་པར་དུ་རང་གི་སྟོན་པའི་མཛད་རྒྱུན་སྐྱོང་དགོས་ལ། རྒྱལ་བའི་འཕྲིན་ལས་དང་མཛད་པ་ཐམས་ཅད་ཚུར་བསྡུས་ན་སེམས་ཅན་གྱི་དོན་ཡིན། ཆུང་བྱིས་པའི་དུས་ཤིག་ནས་གཙུག་སྐྲ་སོར་གསུམ་དེ་མཁན་སློབ་ལ་ཕུལ། གྲོང་ནང་ལ་མ་བསྡད་པར་གྲོང་ལྟག་ལ་སོང་། གྲོང་ལྟག་དགོན་ཆུང་ཕྲ་མོ་དེ་ཚེ་གཅིག་གི་རྟེན་གཞི་ཡིན་བསམས་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཡིན། གསེར་དངུལ་གཟི་བྱུར་གྱི་རྒྱན་ཆ་ཕར་སྤངས། ལྷག་བསམ་ཡོན་ཏན་གྱི་རྒྱན་དེ་ཚུར་འཆང་། གོས་ངུར་སྨྲིག་གི་རྒྱལ་མཚན་གྱི་འོག་ནས་སྡེ་སྣོད་འཛིན་པ་ཡིན་ཞེས་སྨྲས་ན་རབ་བྱུང་གིས་ཁྱིམ་པར་ཆོས་བཤད་རྒྱུ་དེ་ཉིད་ཐོབ་ཐང་བབ་འོས་དང་ལྡན་པའི་ལས་ཁུར་ཞིག་ཡིན། དེ་ལྟར་ཡིན་ན་ཆོས་ཉན་པ་པོའི་ངོས་ནས་ཀྱང་གོང་ནས་བཤད་པ་ལྟ་བུ་ཞག་པོ་སུམ་བརྒྱ་དྲུག་ཅུ་ཐམ་པའི་ནང་ནས་ཆོས་ཞུ་སར་ཐེངས་རེ་ཐེངས་གཉིས་ཡོང་བ་ལ་ཡོང་བའི་དོན་དགོས་དོན་དག་འདི་ཆོད་སོང་བསམ་རྒྱུའི་ཚེ་འདི་ཕྱི་སྐྱིད་སྡུག་གང་བྱུང་གི་སྐབས་ལ་བློ་གཏད་ས་འདི་ཡོད་བསམ་པ་ཞིག་ལོན་དགོས་པ་མ་གཏོགས་པར་ཡར་ལག་སྟོང་ལ་ཡོང་མར་ལག་སྟོང་ལ་བུད་སོང་དུས་ཡོང་གོ་མ་ཆོད་པ་མིན་ན་ཅི་ཡིན། ཆོས་ཚུལ་བཞིན་དུ་སྒྲུབ་པའི་མི་དེ་ཡིས་དང་པོར་སོ་ཐར་གྱི་སྡོམ་པ་ཞུ་དགོས། སོ་ཐར་གྱི་སྡོམ་པ་ཞེས་པ་རབ་ཏུ་བྱུང་བ་རྐྱང་པ་ཞིག་གི་མ་ཡིན། སོ་ཐར་རིགས་བརྒྱད་དུ་དབྱེ་བ་ཕྱེས་ན། ཁྱིམ་པའི་ཕྱོགས་ཀྱི་གསུམ་དང་རབ་བྱུང་གི་ཕྱོགས་ཀྱི་ལྔ། དེ་ཡང་རྫས་སུ་བསྡུ་ན་རིགས་བཞིར་ངེས་པ་སྟེ། བསྙེན་གནས། དགེ་བསྙེན། དགེ་ཚུལ། དགེ་སློང་བཞི་ཡིན། དེའི་ནང་གི་བསྙེན་གནས་ཕར་ཕུད་ན་རིགས་བདུན་གྱི་ཟླས་ཕྱེ་བའི་དགེ་བསྙེན་དེ་ཡོངས་རྫོགས་དགེ་བསྙེན་ལ་ངོས་འཛིན་དགོས། ཁྱད་པར་དུ་ཚིགས་གསུམ་རིམ་ནོད་དུ་ལེན་པའི་སྐབས་སུ་ཡོངས་རྫོགས་དགེ་བསྙེན་ཡིན་པར་བཤད་ཅིང་། གཞི་ཐམས་ཅད་ཡོད་པར་སྨྲ་བའི་ལུགས་ལ། དགེ་བསྙེན་གྱི་སྡོམ་པ་ལེན་ཡུལ་དེ་ཡང་དགེ་སློང་ཡིན་དགོས་པ་དེ་ཉིད་གསལ་མོར་བྱས་ནས་གསུངས་ཡོད། འོན་ཀྱང་བསླབ་གཞི་ལྔ་འཛིན་པ་ཡོངས་རྫོགས་དགེ་བསྙེན་ལས་སྲུང་ཚུལ་གྱི་སྒོ་ནས་ཕྱེས་ན་ནང་གསེས་ཀྱི་དབྱེ་བ་ཡོད། སྲོག་གཅོད་ཙམ་ཞིག་སྤོང་བ་དེ་སྣ་གཅིག་སྤྱོད་པ་དང་། དེའི་སྟེང་དུ་མ་བྱིན་ལེན་ཙམ་སྤོང་བ་སྣ་འགའ་སྤྱོད་པ། དེའི་སྟེང་དུ་རྫུན་དང་གསུམ་སྤོང་ན་ཕལ་ཆེར་སྤྱོད་པ། འདོད་ལོག་དང་ཆང་གཉིས་ཀ་སྟེ་ལྔ་བོ་སྤོང་ན་གོང་ནས་བཤད་པའི་ཡོངས་རྫོགས་དགེ་བསྙེན་ཡིན། འདོད་ལོག་གི་ཚབ་ཏུ་མི་ཚངས་སྤྱོད་སྤོང་ན་ཚངས་སྤྱོད་དགེ་བསྙེན་དང་། གོང་ནས་བཤད་པའི་བསྙེན་གནས་དེ་དུས་ཁྲིམས་ཡིན། བསྙེན་གནས་འདི་གཏན་ཁྲིམས་མ་ཡིན་པའི་ཕྱིར་ན་སྡོམ་པ་གོང་མའི་ཡོན་ཏན་གྱི་རྟེན་དུ་མི་རུང་བས་ངོ་མས་བཤད་ན་སོ་ཐར་གྱི་སྡོམ་པ་རིགས་བདུན་ཁོ་ན་ཡིན། དགེ་བསྙེན་གྱིས་དུས་ཁྲིམས་བརྒྱད་པོ་འདི་བླངས་ན་གསོ་སྦྱོང་དུ་འགྲོ། བསྙེན་གནས་ཀྱི་བསྲུང་བྱ་བརྒྱད་པོ་དེ་ཇི་སྲིད་འཚོའི་བར་དུ་བསྲུངས་ན་གོ་མིའི་དགེ་བསྙེན་ཡིན་ཞིང་། གོ་མིའི་དགེ་བསྙེན་ཞེས་པ་ཡང་དགེ་བསྙེན་གྱི་རིགས་ཤིག་ཡིན་ལ། འདི་གཙོ་བོ་འཕགས་པ་གནས་བརྟན་སྡེ་པའི་ལུགས་ཡིན་པ་ལ་ཐེག་ཆེན་གྱི་སྡེ་སྣོད་ལས་ཀྱང་འབྱུང་བ་ཞིག་ཡིན། ༼ཁ༽ གཞུང་དོན། ༼ཀ ཁྱིམ་པ་རྗེས་འཛིན་གྱི་སོར་སྡོམ་གནང་བ། མདོ་དོན་ཚིག་གི་རྩ་བ་ད་རེས་ཀྱི་ཆེད་དུ་བྱ་བའི་ཡུལ་གཙོ་བོ་དེ་ཁྱིམ་པ་ཕོ་མོ་ཡིན་ན་དུས་ཚོད་དེ་རིང་མ་གཏོགས་ལོ་གཅིག་ལ་མེད་པས་དེ་རིང་སོར་བྱང་གཉིས་ཀའི་སྡོམ་པ་བྱིན་ནས་སྔགས་ཀྱི་དོད་དུ་སྔོན་འགྲོའི་ལུང་ཞིག་བཏོན་ན་དེའི་ནང་ལ་དངོས་གཞིའི་སྨིན་གྲོལ་གྱི་ལམ་གྱི་རིམ་པའི་ཆ་ཤས་བྱིན་རླབས་བླ་མའི་རྣལ་འབྱོར་དང་། ལམ་དབང་གི་སྐོར་ཡོད་པས་མི་ཚད་ཐུན་མིན་བསྐྱེད་རྫོགས་ཀྱི་རིམ་པ་ཡང་གང་འཚམས་ཤིག་ཚང་འགྲོ། སོར་བྱང་གཉིས་ཀྱི་སྡོམ་པ་ཡར་ལྡན་གྱི་སྟེང་ནས་སྔགས་ལ་ཞུགས་པའི་རིམ་པ་དེ་ཡང་མཚན་ཉིད་ལྡན་པ་ཞིག་ཏུ་འགྱུར་འགྲོ། དེའི་ནང་ནས་ཐོག་མར་གྱུར་བ་ད་ལྟ་རང་རེས་བླང་བར་བྱ་བའི་སོ་ཐར་གྱི་སྡོམ་པའི་མཚན་ཉིད་སྤྱིར་བཏང་ཇི་ལྟ་བུ་ཞིག་ཡིན་ཞེ་ན། ངེས་འབྱུང་གི་བསམ་པས་ཟིན་པའི་ཉེས་སྤྱོད་སྡོམ་པའི་ཚུལ་ཁྲིམས་གང་ཞིག་འདོད་པའི་སས་བསྡུས་པ་སོ་ཐར་གྱི་སྡོམ་པའི་མཚན་ཉིད་ཡིན། རང་གི་སྡོམ་པ་འགྲུབ་བྱེད་ཀྱི་རྒྱུ་ཕུན་སུམ་ཚོགས་པ་ལ་བརྟེན་ནས་ཐོབ་པའི་ངེས་འབྱུང་གི་ཚུལ་ཁྲིམས་གང་ཞིག་དགེ་བསྙེན་གྱི་སྡོམ་པའི་མི་མཐུན་ཕྱོགས་སུ་གྱུར་བའི་སྤང་བྱ་ཇི་སྲིད་འཚོའི་བར་དུ་སྤོང་བར་ཁས་བླངས་པ་དེ་དགེ་བསྙེན་གྱི་སྡོམ་པའི་མཚན་ཉིད། འདི་ཆོ་ག་ཐུན་མིན་དང་ཐུན་མོང་གི་ལུགས་བཞིན་བྱས་ནས་བསམ་པ་སེམས་བསྐྱེད་ཀྱིས་ཟིན་དུས་ཐེག་ཆེན་སོ་ཐར་དུ་འགྱུར། འདི་ན་ཡོད་པའི་མང་ཆེ་བ་ལོ་རེ་བཞིན་སྐྱབས་སྡོམ་ཞུས་ཡོད་པ་ཤ་སྟག་ཡིན། ཡོངས་རྫོགས་དགེ་བསྙེན་ཡང་མི་ཉུང་བ་ཞིག་ཡོད། ཚངས་སྤྱོད་དགེ་བསྙེན་ཡང་ཆ་རེ་ཡོད། དེ་རིང་མང་ཆེ་བའི་ངོ་སྐལ་དུ་སྐྱབས་སྡོམ་སྦྱིན་རྒྱུ་བྱེད། ཁས་བླངས་པའི་ཁྱད་པར་གྱིས་རང་རང་གི་མོས་པས་སྡོམ་པ་གཞན་དག་ཐོབ་ཆོག་པ་ལ་དགག་བྱ་མི་ཆེ་ཡང་ཟུར་ནས་ཆེད་དུ་བླངས་ན་ཕུན་སུམ་ཚོགས་པའི་ཡན་ལག་ཡིན། དེ་རིང་གཙོ་བོར་སྦྱིན་རྒྱུའི་སྐྱབས་སྡོམ་དེ་དཀོན་མཆོག་གསུམ་ལ་སྐྱབས་སུ་འགྲོ་བར་ཁས་བླངས་ནས་དེའི་བསླབ་བྱ་ཙམ་སྲུང་མཁན་དེ་ལ་དགེ་བསྙེན་གྱི་སྡོམ་པ་མཚན་ཉིད་པར་བཞག་རྒྱུ་ཡོད་མེད་ལ་བཞེད་པ་སྣ་ཚོགས་ཡོད། སྐྱབས་གསུམ་འཛིན་པའི་དགེ་བསྙེན་ཞེས་དགེ་བསྙེན་མཚན་ཉིད་པ་ཡོངས་སུ་གྲགས་པ་ལྟར་ན་སྡོམ་པ་ཡང་བཏགས་ཆོག་པ་ཙམ་དུ་མ་ཟད་བསླབ་བྱ་བསླབ་ཚུལ་ལས་ཀྱང་དེ་ལྟར་བཏགས་ཆོག་པར་དཔོག་པ་ཡིན། གང་ལྟར་མཆོག་གསུམ་ལ་དངོས་སུ་ཆོ་གའི་སྒོ་ནས་སྐྱབས་སུ་སོང་བས་ནང་པ་སངས་རྒྱས་པའི་ཁྱུ་ལ་ཚུད་པ་དང་། སྡོམ་པ་ཐམས་ཅད་ཀྱི་རྟེན་ནམ་རྩོམ་གཞི་ཡིན། དེ་རིང་དང་པོར་སྐྱབས་སྡོམ་སྦྱིན་རྒྱུ་བྱེད། ཁྱིམ་པའི་ཕྱོགས་ཀྱི་སྡོམ་པ་དེ་ཚོ་ཐེངས་གྲངས་མང་པོ་བསྐྱར་དུ་ཡང་ལེན་བྱས་ན་ཆོག་པ་ཡིན། སྡོམ་པ་ཡར་འབུལ་རྒྱུ་ལྟ་བུ་རབ་བྱུང་གི་སྡོམ་པ་དང་མི་འདྲ། དེ་ལྟར་ཡིན་ཕྱིར་རྒས་རྒན་དང་ནད་པ་དེ་སྔོན་བླངས་ཚར་མཁན་ཚོས་ཕྱག་འཚལ་མི་ཐུབ་པས་ཟུར་ཞིག་ལ་སྡོད་དང་ཆོག དེ་མིན་པའི་ཁྱིམ་པ་ཕོ་མོ་ཕྱག་འཚལ་ཐུབ་མཁན་ཚང་མ་ཡར་ཐམས་ཅད་ལངས་ནས་ཕྱག་འཚལ་སའི་ས་ཁོངས་ཡོད་པ་ཞིག་གྱིས། ཁྱད་པར་དུ་རྒྱབ་ཕྱོགས་སུ་ཡོད་མཁན་ཚང་མ་ཕྱི་ནུད་ཅིག་བྱས་ཏེ་ཕྱག་འཚལ་ཆོག་པ་ཞིག་བྱོས། ཐོག་མར་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་ལ་ཕྱག་གསུམ་འཚལ་དགོས། ད་རུང་བྲེལ་བ་མི་དགོས། ཕྱག་འཚལ་ལུགས་ཀྱང་ཐེངས་མ་མང་པོར་བཤད་མྱོང་ཡང་དེ་ཕྱག་འཚལ་དུས་དང་པོར་ཐལ་མོ་སྙིང་ཁར་སྦྱོར། ཐལ་མོ་སྙིང་ཁར་སྦྱར་དུས་དེའི་སྐབས་སུ་དཀོན་མཆོག་གསུམ་གྱི་ཡོན་ཏན་དྲན་དགོས། དེ་ནས་ཐལ་མོ་ཁོག་སྟོང་སྤྱི་བོར་སྦྱར་དགོས། ཐལ་མོ་སྤྱི་བོར་སྦྱར་དུས་སངས་རྒྱས་ཐམས་ཅད་ཀྱི་སྐུའི་བྱིན་རླབས་ཐོབ། རང་གི་ལུས་ཀྱི་སྡིག་སྒྲིབ་དག་པར་བསམ། དེ་ནས་མགྲིན་པར་སྦྱར་ནས་སངས་རྒྱས་ཐམས་ཅད་ཀྱི་གསུང་གི་བྱིན་རླབས་ཐོབ། རང་གི་ངག་གི་སྒྲིབ་པ་དག དེ་ནས་སྙིང་ཁར་སྦྱར། སངས་རྒྱས་ཐམས་ཅད་ཀྱི་ཐུགས་ཀྱི་བྱིན་རླབས་ཐོབ། རང་གི་ཡིད་ཀྱི་སྒྲིབ་པ་དག དེ་ནས་མ་ལྔ་ས་ལ་ཕབ། དེའི་སྐབས་སུ་ཉོན་མོངས་པ་དུག་ལྔའི་སྒོ་ནས་བསགས་པའི་ལས་ཀྱི་སྡིག་སྒྲིབ་ཐམས་ཅད་དག་ནས་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ཡོན་ཏན་ཐམས་ཅད་ཐོབ་པར་བསམ། དེ་ལྟར་དུ་བྱེད་དགོས། དེའི་འཕྲོས་རབ་བྱུང་ཚང་མ་བཞུགས་སྡོད་དང་ཆོག ཁྱིམ་པ་ཕོ་མོ་ཕྱག་འཚལ་ཐུབ་མཁན་ཚང་མ་ཡར་ལངས་ནས་ཕྱག་འཚལ་ལུགས་ཡོད་པ་ཞིག་གྱིས། ཕྱིར་ནུད་བྱོས་དང་ཁོད་ཡངས་པས་ད་རུང་ཕྱིར་ནུད་ཆོག་རྒྱུ་རེད། དང་པོར་ཡར་ལངས་ནས་རྐང་པ་གཉིས་ཀའི་ལོང་བུ་གཉིས་གཤིབས་གཤིབས་བྱས་ཏེ་ལུས་པོ་དྲང་པོར་བྱས་ཏེ་ལང་དགོས། དང་པོ་ཁྱེད་ཚོས་ཕྱག་འཚལ་སའི་ས་ཁོངས་ཡོད་པ་ཞིག་གྲ་སྒྲིག་གྱིས། ཕར་ནུད་ཚུར་ནུད་རེ་དགོས་ཨེ་འདུག རྐང་པའི་ལོང་བུ་གཉིས་ཀ་གཤིབས་ནས་ལག་པ་གཉིས་ཀའི་ཐལ་མོ་སྙིང་ཁར་སྦྱོར། ཐལ་མོ་ཁོང་སྟོང་བྱོས། ལག་པས་སྡེར་སྡེར་བྱས་པ་མ་ཡིན་པ་དང་། ཡང་འདི་ལྟར་མཛུ་གུ་ཐར་ཐར་བྱས་པ་མ་ཡིན་པར་མེ་ཏོག་ཁ་ཕྱེ་མ་ཁད་པ་ལྟ་བུ་ཞིག་གི་ཚུལ་བྱས་ནས་ཐལ་མོ་སྦྱར་དགོས། དེ་ནས་དཀོན་མཆོག་གསུམ་གྱི་ཡོན་ཏན་དྲན་ནས་སྙིང་ཁར་ཐལ་མོ་སྦྱར། དེ་ནས་ཕྱག་དང་པོའི་འགོ་འཛུགས་རྒྱུ་ཡིན། ཐལ་མོ་སྤྱི་བོར་སྦྱོར། ཐལ་མོ་མགྲིན་པར་སྦྱོར། ཐལ་མོ་སྙིང་ཁར་སྦྱོར། ལུས་ཀྱི་མ་ལྔ་ས་ལ་ཕོབས། བདག་ཅག་གི་སྟོན་པའི་སྐུ་གཟུགས་བྱིན་རླབས་ཀྱི་གཟི་འོད་འབར་བ་ངའི་རྒྱབ་ན་བཞུགས་ཡོད་པའི་ཇོ་བོའི་སྐུ་འདི་ལ་འུ་ཚོས་ཕྱག་འཚལ་དགོས། གཅིག་འཚལ་ཚར་སོང་ལ། ད་ཡང་ཐལ་མོ་སྙིང་ཁར་སྦྱོར། དཀོན་མཆོག་གི་ཡོན་ཏན་དྲན། ཐལ་མོ་སྤྱི་བོར་སྦྱོར། ཐལ་མོ་མགྲིན་པར་སྦྱོར། ཐལ་མོ་སྙིང་ཁར་སྦྱོར། མ་ལྔ་ས་ལ་ཕོབས། གཉིས་རེད། ད་ཡང་ཡར་ལངས་ནས་ཐལ་མོ་སྙིང་ཁར་སྦྱོར། ཐལ་མོ་སྤྱི་བོར་སྦྱོར། ཐལ་མོ་མགྲིན་པར་སྦྱོར། ཐལ་མོ་སྙིང་ཁར་སྦྱོར། མ་ལྔ་ས་ལ་ཕོབས། དེ་ཡིས་བདག་ཅག་གི་སྟོན་པ་ཤཱཀྱའི་རྒྱལ་པོ་ལ་ཕྱག་གསུམ་འཚལ་ཚར་སོང་བ་ཡིན། སྡོམ་པ་སྦྱིན་པའི་སློབ་དཔོན་ང་ལ་ཡང་ཕྱག་གསུམ་འཚལ་དགོས་པ་ཡིན་ལ། ཐལ་མོ་སྙིང་ཁར་སྦྱོར། ཐལ་མོ་སྤྱི་བོར་སྦྱོར། ཐལ་མོ་མགྲིན་པར་སྦྱོར། ཐལ་མོ་སྙིང་ཁར་སྦྱོར། མ་ལྔ་ས་ལ་ཕོབས། གཅིག་རེད། ཡང་ཡར་ལོངས། ཐལ་མོ་སྙིང་ཁར་སྦྱོར། ཐལ་མོ་སྤྱི་བོར་སྦྱོར། ཐལ་མོ་མགྲིན་པར་སྦྱོར། ཐལ་མོ་སྙིང་ཁར་སྦྱོར། མ་ལྔ་ས་ལ་ཕོབ། གཉིས་རེད། ཡང་ཡར་ལངས་ནས་ཐལ་མོ་སྙིང་ཁར་སྦྱོར། ཐལ་མོ་སྤྱི་བོར་སྦྱོར། ཐལ་མོ་མགྲིན་པར་སྦྱོར། ཐལ་མོ་སྙིང་ཁར་སྦྱོར། མ་ལྔ་ས་ལ་ཕོབས། འདིིའི་མཚམས་ནས་ཙོག་པུའམ་པུས་བཙུགས་ཀྱིས་ཐལ་མོ་སྦྱར་ནས་འདུག་དགོས་ཤིང་། རང་རང་ཅི་བདེར་བྱས་ནས་སྡོད། པུས་མོ་བཙུགས་ན་ཆོག ཙོག་པུའི་ཚུལ་དུ་ལང་མ་འདུག་ལྟ་བུ་བྱས་ཏེ་བསྡད་ན་ཆོག མདོར་ན་ཐལ་མོ་སྙིང་ཁར་སྦྱར་ནས་དད་པའི་སེམས་ཀྱིས་ཉན་དགོས། ཁྱིམ་པ་རྗེས་སུ་འཛིན་པའི་སོ་སོ་ཐར་བའི་སྡོམ་ཆོག་ཡོད་པ་ཡིན་ལ། ངས་འདིའི་མཚམས་ནས་ཆོ་ག་ཆོག་ཁྲིགས་མ་འདོན་ཡོང་དུས་ངས་འདོན་པ་ལྟར་དུ་ཁྱེད་ཚོས་ཚིག་རྗེས་དོན་དྲན་གྱིས། རྙེད་པར་དཀའ་བ་དལ་འབྱོར་གྱི་རྟེན་ཁྱད་པར་ཅན་རྙེད། མཇལ་བར་དཀའ་བ་སངས་རྒྱས་ཀྱི་བསྟན་པ་དང་མཇལ། བདག་ལེགས་སུ་འདོད་པའི་སྐྱེ་བོ་དག་གིས་དོན་དུ་གཉེར་བྱ་ནི་སངས་རྒྱས་ཀྱི་བསྟན་པ་ལ་ནན་ཏན་སྙིང་པོ་བྱ་བ་ཉིད་ཡིན་ལ། དེ་ལ་ཡོན་ཏན་ཐམས་ཅད་ཀྱི་གཞི་ཚུལ་ཁྲིམས་ཀྱི་བསླབ་པ་ལ་ཐོག་མར་བསླབ་དགོས་ཤིང། དེའི་རྩ་བ་ཡང་སྐྱབས་སུ་འགྲོ་བའི་སྡོམ་པ་ཉིད་ལ་རག་ལས་པ་ཡིན་ཏེ། ཇི་སྐད་དུ། དཀོན་མཆོག་གསུམ་ལ་སྐྱབས་འགྲོ་བ། །འཇིགས་པ་མེད་པ་ཐོབ་པར་འགྱུར། །ཞེས་གསུངས་པས་ཕན་ཡོན་ཤིན་ཏུ་ཆེ་བ་ཡིན། དེ་ཡང་བླ་མའི་རྗེས་སུ་བཟློས་ནས་གླེང་ན་ངོ་ཚ་ཁྲེལ་ཡོད་ཀྱི་རྟེན་སོགས་དགོས་པ་ཁྱད་པར་ཅན་ཡོད་པས་འདིའི་རྗེས་ཟློས་མཛོད། འདི་ནས་རྗེས་ཟློས་བྱེད་དགོས། སྤྱིར་བཏང་བ་ཞིག་རྒྱུས་མེད་ཅིག་གི་མདུན་ནས་ཞུ་ན་བཙུན་པ་ཟེར་དགོས་ལ། ཆོས་འབྲེལ་ཡོད་ས་ཞིག་གི་མདུན་ནས་ཞུ་ན་སློབ་དཔོན་ཞེས་ཟེར་དགོས། མང་ཆེ་བ་ཆོས་འབྲེལ་ཡོད་པ་འབའ་ཞིག་ཡིན་པས་དེ་རྣམས་ཀྱི་དབང་དུ་བཏང་ནས་སློབ་དཔོན་ཞེས་ཟེར་རྒྱུ་བྱེད། འདིའི་རྗེས་ཟློས་གསུམ་པའི་སྐབས་སུ་སྡོམ་པ་ཐོབ་པ་ཡིན། དེ་དུས་ངས་བརྡ་བརྒྱག་ཆོག ད་རྗེས་ཟློས་གྱིས། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་ཟེར་དུས་རང་རང་གི་མིང་གཟུང་དགོས། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱིི་མཆོག་དགེ་འདུན་ལ་སྐྱབས་སུ་མཆིའོ། །བདག་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྐྱབས་གསུམ་འཛིན་པའི་དགེ་བསྙེན་དུ་སློབ་དཔོན་གྱིས་གཟུང་དུ་གསོལ། དེ་རྗེས་ཟློས་དང་པོ་ཡིན། ད་རྗེས་ཟློས་གཉིས་པ་ནི། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྟེ་ཇི་སྲིད་འཚོའི་བར་དུ་ཞེས་པ་མ་ཤི་བར་དུ་ཞེས་པའི་དོན་ཡིན། རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྐྱབས་གསུམ་འཛིན་པའི་དགེ་བསྙེན་དུ་སློབ་དཔོན་གྱིས་གཟུང་དུ་གསོལ། དེ་རྗེས་ཟློས་ཐེངས་གཉིས་པ་ཡིན། རྗེས་ཟློས་ལན་གསུམ་པའི་སྐབས་སུ་སྡོམ་པ་ངོ་མ་དངོས་སུ་ཐོབ་པ་ཡིན་ལ། དེ་ཐོབ་ལུགས་དེ་ཇི་ལྟར་ཡིན་ཞེ་ན། ཚིགས་སྔ་མ་དགེ་བསྙེན་དང་དགེ་ཚུལ་གྱི་སྡོམ་པ་འདི་གཉིས་ཀ་སྐྱབས་བརྗོད་དང་། བདག་བརྗོད་དང་། གཞན་བརྗོད་ཅེས་པ་གསུམ་ཡོད་པའི་ནང་གི་བདག་བརྗོད་རྫོགས་མ་ཐག་ཏུ་ཐོབ་པ་ཡིན། བདག་བརྗོད་ཅེས་པ་གང་ཡིན་ཞེ་ན། དགེ་བསྙེན་དུ་ཞེས་བརྗོད་ཡོང་དུས་ཁྱེད་ཚོས་དགེ་བསྙེན་གྱི་སྡོམ་པ་དངོས་སུ་ཐོབ་པ་ཡིན་ལ། དེ་དུས་ཐོབ་སོང་བསམ་པའི་ཐོབ་ཤེས་ཀྱི་བསམ་པ་གཟུང་དགོས། དགེ་སློང་ལྟ་བུ་ཞིག་ཡིན་ན། དགེ་འདུན་གྱི་ལས་བརྗོད་པའི་སྒོ་ནས་ངོ་བོ་བརྗོད་པ། བྱ་བ་བརྗོད་པ། བྱེད་པ་བརྗོད་པ་རྣམས་ཀྱི་ཐོབ་ལུགས་གཞན་ཡིན། ཡིན་ན་ཡང་འདི་ཚོ་ལྷག་ཏུ་བཤད་དགོས་དོན་མེད་ཅིང་། འགལ་དང་མ་འབྲེལ་བསྡུས་པ་ལ་སོགས་པ་འཆད་པའི་སྐྱོན་ཡིན་ཡང་འདི་ཚིགས་གསུམ་རིམ་ནོད་ཀྱི་འགྲོས་དང་བསྟུན་ནས་བཤད་པའི་གོ་དོན་དང་ཤིན་ཏུ་འབྲེལ་བ་ཞིག་ཡིན། ད་ལན་གསུམ་པའི་རྗེས་ཟློས་གྱིས། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྐྱབས་གསུམ་འཛིན་པའི་སྟེ་ད་བདག་བརྗོད་ཡིན་ལ། དགེ་བསྙེན་དུ་ཞེས་བརྗོད་ཡོང་དུས་ཁྱེད་ཚོར་སྡོམ་པ་ཐོབ་པ་ཡིན་པས་ཐོབ་ཤེས་ཀྱི་བསམ་པ་ཟུངས། དགེ་བསྙེན་དུ་སློབ་དཔོན་གྱིས་གཟུང་དུ་གསོལ། ངས་ཐབས་ཡིན་ནོ་ཞེས་ཟེར་དུས་ཁྱེད་ཚོས་ལེགས་སོ་ཞེས་ཟེར་དགོས། ཐབས་ཡིན་ནོ། །༼ལེགས་སོ། །༽ ཚིགས་གསུམ་རིམ་ནོད་ཀྱི་སྐབས་སུ་དགེ་བསྙེན། དགེ་ཚུལ། དགེ་སློང་གི་སྡོམ་པ་སྟེ། འུ་ཚོས་ད་ལྟ་ཚིགས་གསུམ་རིམ་ནོད་ཟེར་བ་ཞིག་བཤད་མྱོང་ཞིང་། དེའི་སྐབས་ཀྱི་དགེ་བསྙེན། དགེ་ཚུལ། དགེ་སློང་གི་སྡོམ་པ་གསུམ་དེ་སྡོམ་པ་མི་འདྲ་བ་གསུམ་དེ་གང་ཟག་གཅིག་གི་རྒྱུད་ལ་ཇི་ལྟར་ལྡན་ཞེས་དོགས་པ་ཞིག་འཆར་བ་ཡིན་ལ། འདིར་སྡོམ་པ་གཟུགས་ཅན་དུ་འདོད་པའི་ལུགས་ཤིག་དང་། སྡོམ་པ་ཤེས་པར་འདོད་པའི་ལུགས་ཤིག་སྟེ་གཉིས་ཡོད། སྡོམ་པ་གཟུགས་ཅན་དུ་འདོད་པའི་ལུགས་ལྟར་ན་རྫས་ཐ་དད་དུ་ལྡན་པར་འདོད་པ་དང་། སྡོམ་པ་ཤེས་པར་འདོད་པའི་ལུགས་ལྟར་ན་ངོ་བོ་གཅིག་ལ་ལྡོག་པས་ཐ་དད་དུ་དབྱེ་བ་དེ་ལྟ་བུ་ཞིག་ཡིན། དེ་ལྟར་སྐྱབས་འགྲོའི་སྡོམ་པ་ཐོབ་པ་ཙམ་གྱིས་མི་ཆོག བསླབ་བྱ་ལ་བསླབ་དགོས། འདི་ཚོ་གོ་སླ་བ་ཡིན་ཡང་གནད་ཆེ་བས་ངས་དལ་མོར་ག་ལེ་བྱེད། ཚིག་རེ་བཞིན་དུ་དལ་མོར་བྱས་ཏེ་འདོན་འགྲོ། ཁྱེད་ཚོས་གོ་བ་ཙམ་གྱིས་མི་ཆོག་པར་ཞེ་ལ་བཟུང་ནས་དེའི་འཕྲོས་ཁྱིམ་ལ་སོང་དུས་འདིའི་ཐད་ཀྱི་བགྲོ་གླེང་རེ་བྱོས་དང་ཞེ་ལ་ངེས་རྒྱུ་ཕན་ཐོགས་ཡོད། དེ་ལྟར་སྐྱབས་འགྲོའི་སྡོམ་པ་ཐོབ་པ་ཙམ་གྱིས་མི་ཆོག བསླབ་བྱ་ལ་བསླབ་དགོས། བསླབ་བྱའི་ཆོས་དེ་ཡང་ཇི་ལྟ་བུ་ཡིན་སྙམ་ན། དགག་པའི་བསླབ་བྱ་གསུམ་དང་སྟེ་དགག་པའི་བསླབ་བྱ་གསུམ་ཞེས་པ་མི་ཉན་རྒྱུ་གསུམ་ཞེས་པའི་དོན་ཡིན། བསྒྲུབ་པའི་བསླབ་བྱ་གསུམ་དང་ཞེས་པ་དགོས་རྒྱུའི་བསླབ་བྱ་གསུམ་ཞེས་པའི་དོན། ཆ་མཐུན་གྱི་བསླབ་བྱ་ཞེས་པ་དེ་གཉིས་ཀ་དང་ཕྱོགས་མཐུན་པའི་དོན། དགག་བསྒྲུབ་ཆ་མཐུན་གྱི་བསླབ་བྱ་དགུ་ཡོད་ཅེས་ཟེར་ཆོག གསུམ་སྟེ་དགུའོ། །དང་པོ་ནི་ཞེས་པ་དགག་པའི་བསླབ་བྱ་རེད། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་སྐྱབས་འགྲོ་མི་བྱ། ད་ངས་མར་དལ་མོར་བྱས་ཏེ་འདོན་འགྲོ། འུ་ཚོར་དེ་རིང་དུས་ཚོད་ཐུང་བ་ཡིན་ལ། སོར་བྱང་སྔགས་གསུམ་གྱི་སྡོམ་པ་སྦྱིན་ཟེར་གྱིན་ཡོད་པ་ཡིན་ཞིང་། དེ་ལྟར་ཡིན་དུས་དོད་ཐུབ་ཙམ་ཞིག་དགོས་པས་ཉི་མ་དུས་ཚོད་ཡུན་རིང་མེད་ཕྱིར་མར་འདོན་འགྲོ་ན་མ་གཏོགས་ཐབས་མེད། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་མི་བྱ། དགེ་འདུན་ལ་སྐྱབས་སུ་སོང་ནས་མུ་སྟེགས་ཅན་ལ་མི་བསྟེན་པའོ། །དེ་ཡང་བོད་འདིར་མུ་སྟེགས་པ་དངོས་སུ་མི་འབྱུང་ཡང་སྡིག་ཅན་གྱི་གྲོགས་དེ་དང་འདྲ་བས་མི་བསྟེན་པའོ། །ཞེས་གསུངས་ཏེ་མུ་སྟེགས་པ་སྔོན་ཆད་ཞྭ་མོ་དཀར་པོ་ཅན་ལ་སོགས་པ་མང་པོ་ཞིག་མེད་པ་ཨེ་ཡིན་ནམ། སྡིག་ཅན་གྱི་གྲོགས་ཀྱང་དེ་དང་འདྲ་བས་མི་བརྟེན་པ་ཞེས་རིགས་མཐུན་རུས་གཅིག་ལས་ཆད་པ་ཡིན་ཡང་སྡིག་གྲོགས་མ་བསྟེན་ཞེས་གསུངས་པ་ཡིན་འདུག གཉིས་པ་ནི་བསྒྲུབ་པའི་བསླབ་བྱ་ཡིན། སངས་རྒྱས་ལ་སྐྱབས་སུ་སོང་ནས་བདེ་བར་གཤེགས་པའི་སྐུ་གཟུགས་ཀྱི་རྟེན་ཐ་ན་སཱཙྪ་ཆག་དུམ་ཡན་ཆད་ལ་སངས་རྒྱས་དངོས་ཀྱི་འདུ་ཤེས་བཞག་ནས་ཕྱག་མཆོད་བཀུར་སྟི་སོགས་གུས་པར་བྱེད། ཆོས་ལ་སྐྱབས་སུ་སོང་ནས་ཆོས་དཀོན་མཆོག་གི་རྟེན་གསུང་རབ་ཀྱི་རྟེན་ཐ་ན་ཡིག་འབྲུ་གཅིག་ཡན་ཆད་ལ་ཆོས་དཀོན་མཆོག་དངོས་ཀྱི་འདུ་ཤེས་བཞག་ནས་གུས་འདུད་བཀུར་སྟི་སོགས་སྔ་མ་ལྟར་བྱའོ། །དགེ་འདུན་ལ་སྐྱབས་སུ་སོང་ནས་དགེ་འདུན་དཀོན་མཆོག་གི་རྟེན་རབ་ཏུ་བྱུང་བ་ནས་ཐ་ན་ལྷན་པ་སེར་པོ་བཏབ་པ་ཡན་ལ་དགེ་འདུན་དཀོན་མཆོག་དངོས་ཀྱི་འདུ་ཤེས་བཞག་ནས་གུས་འདུད་བཀུར་སྟི་སོགས་སྔར་ལྟར་བྱའོ་ཞེས་གསུངས་ལ། དགེ་འདུན་པ་ཞེས་པ་དགེ་འདུན་པའི་རྟེན་དེ་གྲྭ་པ་སེར་མོ་པ་ཡིན་ན་གྲྭ་པ་སེར་མོ་པ་ལ་མདའ་གྲི་མདུང་གསུམ་གཏོད་མ་དགོས་ཁོ་རེ་མོ་རེ་ཞེས་ཀྱང་ཞུ་རུང་བ་མ་ཡིན། གསུམ་པ་ནི་ཆ་མཐུན་གྱི་བསླབ་བྱ་སྟེ། དུས་རྟག་ཏུ་དཀོན་མཆོག་མཆོད་པ་ལ་བརྩོན་པར་བྱ་སྟེ་ཐ་ན་ཅི་ཟ་ཅི་འཐུང་གི་ཕུད་ཀྱིས་མཆོད་པ་དང་། ནངས་ནུབ་སོགས་སུ་སྐྱབས་འགྲོ་བཟླ་བ་ལ་བརྩོན་པ་དང་། སྐྱེས་བུ་དམ་པ་ལ་བརྟེན་ནས་ཆོས་ཀྱི་རྗེས་སུ་འཇུག་ཅིང་ཆོས་དང་མཐུན་པའི་སྤྱོད་པ་ལ་བསླབ་པར་བྱའོ། །དེ་ལྟ་བུའི་བསླབ་བྱ་རྣམས་ཡིད་ལ་བཟུང་སྟེ་དྲན་ཤེས་དང་ལྡན་པས་དུས་རྟག་ཏུ་སློབ་པར་གྱིས་ཤིག འདི་དག་སྐྱབས་འགྲོའི་བསླབ་བྱ་ཡིན། འདི་དང་སྦྲེལ་ནས་དགེ་བསྙེན་གྱི་བསླབ་བྱ་བཏོན་ན་སྙམ། དགེ་བསྙེན་གྱི་བསླབ་བྱ་ལ་དངོས་ཀྱི་སྤང་བྱ་ཡན་ལག་ལྔ་དང་ཞེས་ཡོངས་རྫོགས་དགེ་བསྙེན་གྱིས་འདིའི་ཡན་ལག་ལྔ་པོ་འདི་བསྲུང་དགོས། ཕྱོགས་མཐུན་གྱི་བསླབ་བྱ་དང་། ཐབས་མཁས་ཀྱི་སྒོ་ནས་ཉེས་མེད་དང་གསུམ་ལས། དང་པོ་ཡན་ལག་ལྔ་ལས། སྲོག་གཅོད་ནི་གཞི་མིའམ་མིར་ཆགས་པ་ལ་དེར་འདུར་ཤེས་པ། ཀུན་སློང་ཞེ་སྡང་། བསམ་པ་གསོད་སེམས། སྦྱོར་བ་མཚོན་བརྩམས་པ་ལ་སོགས་པ། མཐར་ཐུག་སྦྱོར་བ་བརྩམས་མ་ཐག་པའམ་གཞན་གྱི་ཚེ་གང་རུང་གསོད་པ་པོ་བདག་ཉིད་མ་ཤི་བའི་སྔ་རོལ་དུ་ཕ་རོལ་པོ་སྲོག་དང་བྲལ་ན་ཡན་ལག་རྫོགས་པའོ། །མ་བྱིན་པར་ལེན་པ་ནི། གཞི་གཞན་གྱིས་བདག་གིར་བཟུང་བའི་དངོས་པོ་གསེར་ཞོ་ཕྱེད་ཀྱི་རིན་ཐང་ཚང་བ་ཡན་ཆད་དེར་འདུར་ཤེས་པ། ཀུན་སློང་ཆགས་པ། བསམ་པ་རྐུ་སེམས། སྦྱོར་བ་མཐུའམ་གཡོ་དང་འཇབ་བུས་གནས་ནས་སྤོས་པ། མཐར་ཐུག་ཐོབ་བློ་སྐྱེས་པས་ཡན་ལག་རྫོགས་པའོ། །ལོག་གཡེམ་ནི། གཞི་རང་གི་ཆུང་མ་དང་ཁྱོ་ག་མ་ཡིན་པའི་རུས་བདུན་བརྒྱུད་ལས་མ་འདས་པ་དང་། སྡོམ་པ་དང་ཕ་མ་སོགས་ཀྱིས་བསྲུངས་པ་དང་། གཞན་ཡང་དུས་དང་གནས་དང་ཡུལ་ལ་སོགས་པ་མ་ཡིན་པ། ཀུན་སློང་འདོད་ཆགས། བསམ་པ་འཁྲིག་པར་སེམས་པ། སྦྱོར་བ་བཅུག་རེག་ལ་སོགས་པས་འཁྲིག་པ། མཐར་ཐུག་བདེ་བའི་ཚོར་བ་ཉམས་སུ་མྱོང་བ་སྲེད་པས་བདག་གིར་བྱས་པས་ཡན་ལག་རྫོགས་པའོ། །རྫུན་དུ་སྨྲ་བ་ནི། གཞི་སྨྲ་ཤེས་དོན་གོའི་མི་རང་ལས་གཞན་པ་ལ། བདེན་གཞིའི་དོན་རྟོགས་པ་སོགས་ཡོན་ཏན་གོང་མ་དང་། ལྷ་ཀླུ་ལ་སོགས་པ་མཐོང་ངོ་ཞེས་པ་རྣམས་སོ། །ཀུན་སློང་དུག་གསུམ་གང་རུང་ལས་གཏི་མུག་གཙོ་བོར་གྱུར་པའོ། །བསམ་པ་མངོན་ཤེས་རྫུ་འཕྲུལ་སོགས་མེད་པར་ཤེས་བཞིན་དུ་གཞན་བསླུ་སེམས་ཀྱིས་ཡོད་པ་འདུ་ཤེས་བསྒྱུར་བ། སྦྱོར་བ་ལུས་ངག་གི་རྣམ་རིག་ཏུ་ཐོན་པས་བརྡ་སྤྲོད་པ། མཐར་ཐུག་སྨྲས་པའི་ཡུལ་དེ་ལ་བརྡ་འཕྲོད་པས་ཡན་ལག་རྫོགས་པའོ། །ཆང་འཐུང་བ་ནི། གཞི་ནས་དང་འབྲས་ལ་སོགས་པ་འབྲུ་དང་། མེ་ཏོག་དང་། རྒུན་འབྲུམ་དང་། བུར་སྦྲང་གི་ཁུ་བ་སོགས་ལས་བྱས་པའི་མྱོས་པར་འགྱུར་བ། ཀུན་སློང་སྲེད་པ་སྟེ་ཆགས་པའོ། །བསམ་པ་ནི་བག་མེད་པར་འཐུང་བར་སེམས་པའོ། །སྦྱོར་བ་ནི་ཆང་འཐུང་བ་ལུས་ངག་གི་ལས་སོ། །མཐར་ཐུག་མྱོས་པར་གྱུར་པ་ན་ཡན་ལག་རྫོགས་པའོ། །གཞན་ཡང་རྩ་བ་བཞིར་མ་ལོངས་པ་ལ་ཕྲ་མོ་ཞེས་བཏགས་པ་སྟེ། མིའམ་མིར་ཆགས་པ་མ་ཡིན་པ་དུད་འགྲོ་ལ་སོགས་པ་བསད་པ་དང་། གསད་བྱ་མིའམ་མིར་ཆགས་ཀྱང་གསད་བྱ་མ་ཤི་བའི་གོང་དུ་འགྱོད་པ་སོགས་དང་། མ་བྱིན་ལེན་རིན་ཐང་མ་རྫོགས་པ་དང་། ལོག་གཡེམ་རང་ཉིད་ཀྱིས་སམ་སྤྱད་པར་མི་བཟོད་པའི་ཡུལ་ལས་ཁུ་བ་ཕྱུང་བ་དང་། རྫུན་སྨྲ་བ་ནི་མི་ཆོས་བླ་མར་སྨྲ་བ་མ་ཡིན་པ་རྣམས་སོ། །གཉིས་པ་ཕྱོགས་མཐུན་ནི། མི་དགེ་བ་བཅུ་ལས་གོང་གི་བཞི་བོ་མ་གཏོགས་པའི་ལྷག་མ་དྲུག་སྟེ། ཕྲ་མ་ནི་དབྱེན་ཚིག་སྨྲ་བའོ། །ཚིག་རྩུབ་ནི་གཞན་གྱི་གནད་དུ་ཕོག་པའོ། །ཀྱལ་བ་ནི་བྲེ་མོ་དང་གླུ་དང་བསྟན་བཅོས་ངན་པར་སྨྲ་བའོ། །བརྣབ་སེམས་ནི་གཞན་གྱི་རྫས་ལ་ཐོབ་འདོད་བསྐྱེད་པའོ། །གནོད་སེམས་ནི་གཞན་ལ་གསོད་ཅིང་རྡེག་པར་སེམས་པ་སོགས་སོ། །ལོག་ལྟ་ནི་ལས་འབྲས་མི་བདེན་པར་སྨྲ་བའོ། །དྲུག་པོ་འདི་དག་ཀྱང་མི་དགེ་བའི་ལས་ལམ་དུ་རྫོགས་པ་ལ་གཞི། ཀུན་སློང་། འདུ་ཤེས། སྦྱོར་བ། མཐར་ཐུག་གི་ཡན་ལག་ལྔ་རྩ་བ་བཞི་ལ་ཡོད་པ་ལྟར་ཚང་དགོས་ཀྱང་འདི་ནི་ཡིད་ཀྱི་བསྡོམ་བྱ་ཙམ་སྨྲོས་པའོ། །དེ་དག་ཇི་ལྟར་སྤོང་བ་ལ་བསླབ་པའི་ཚུལ་ནི། དེ་ལྟར་སྤང་བྱ་ལྔ་ཕྱོགས་མཐུན་དང་བཅས་པ་དེ་དག་ཡིད་ཀྱིས་བསྡམ་ཞིང་། ལུས་ངག་གིས་སླར་ལོག་པ་ལ་བསླབ་པ་ཡིན་ཏེ། བླང་དོར་གྱི་གནས་མི་བརྗེད་པའི་དྲན་པ། སྒོ་གསུམ་གྱི་བྱ་བ་ལ་སྐྱོན་ཡོན་རྟོག་པའི་ཤེས་བཞིན། ལུས་ངག་ཡིད་གསུམ་ཆོས་བཞིན་དུ་ལྷུར་བྱེད་པ་བག་ཡོད་དེ། ཆོས་གསུམ་ལ་ནན་ཏན་ལྷུར་བྱེད་པའི་བརྩོན་འགྲུས་དང་ལྡན་པ་ལ་བསླབ་བོ། །གསུམ་པ་ཐབས་ལ་མཁས་པས་ཉེས་མེད་དུ་འགྱུར་བ་ནི། སྙིང་བརྩེ་ལྡན་དང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། །ཅེས་གསུངས་པ་ལྟར་རང་དོན་གྱི་འཁྲི་བ་མེད་པའི་གཞན་ལ་ཕན་པར་འདོད་པའི་བྱམས་པ་དང་། སྡུག་བསྔལ་བྲལ་འདོད་ཀྱི་སྙིང་རྗེས་ཀུན་ནས་བསླངས་ཏེ། མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པའི་བསམ་པ་ཅན་ལ་ཡིད་ཀྱི་གསུམ་མམ་ལོག་ལྟ་མ་གཏོགས་པ་ལུས་ངག་གི་མི་དགེ་བ་བདུན་པོ་གནང་བ་ཡིན་ཏེ། བསམ་པ་བྱང་ཆུབ་སེམས་དཔའ་ལ། །དགེའམ་ཡང་ན་མི་དགེའང་རུང་། །ཐམས་ཅད་བདེ་དགེ་ཉིད་དུ་འགྱུར། །ཞེས་གསུངས་པས་ཀུན་སློང་དགེ་བ་འབའ་ཞིག་ཡིན་ཡང་ལུས་ངག་གི་སྦྱོར་བ་མི་དགེ་བ་ལྟར་སྣང་བས་མི་དགེ་བ་ཞེས་བཏགས་པའོ། །འོན་ཀྱང་སྲོག་གཅོད་ཀྱི་ལས་ལམ་རྫོགས་པར་གནང་བ་ནི་ས་ཐོབ་པ་ཡན་གྱི་དབང་དུ་བྱས་པའོ། །གསུམ་པ་ཉམས་ན་ཕྱིར་འཆོས་པའི་ཚུལ་ནི། རྩ་བ་བཞི་ཉམས་ན་དགེ་བསྙེན་ཡན་གྱི་སྡོམ་ལྡན་གྱི་དྲུང་དུ་བསྐྱར་ལ་བླང་དགོས་ཤིང་། ཡན་ལག་མ་ཚང་བ་བྱུང་ན་བཤགས་བྱའི་ཉེས་པ་ཡིན་པས་ཡུལ་སྔ་མ་རྣམས་ཀྱི་མདུན་དུ་ཕྱག་དང་དགོངས་གསོལ་བྱས་ཏེ། བདག་མིང་འདི་ཞེས་བྱ་བ་ལ་ཇི་ལྟར་ཡོངས་སུ་གྲགས་པའི་ལྟུང་བ་འདི་ལྟ་བུ་ཞིག་བྱུང་བ་ལས་བཤགས་པར་བགྱིའོ། །མི་འཆབ་བོ། མི་སྦེད་དོ་ཞེས་ལན་གསུམ་གྱིས་སྦྱང་ཞིང་། ཕྱོགས་མཐུན་རྣམས་ཡིད་ཀྱིས་བསྡམས་པས་ཀྱང་ཆོག་གོ །བཞི་བ་ཕན་ཡོན་ནི། སའི་སྙིང་པོ་འཁོར་ལོ་བཅུ་བའི་མདོ་ལས། གལ་ཏེ་རང་བཞིན་གྱི་སྡིག་པའི་རྩ་བ་བཞི་བོ་དེ་བསྲུངས་ན་དེ་ནི་ཟག་པ་དང་བཅས་པ་དང་ཟག་པ་མེད་པའི་དགེ་བའི་ཆོས་ཐམས་ཅད་ཀྱི་རྒྱུའི་མཆོག་དམ་པ་རྣམ་པར་བཞག་པ་ཡིན་ནོ། །དེ་བས་ན་ཆོས་རྣམ་པ་བཞི་བསྲུངས་པ་ནི་དགེ་བའི་ཆོས་ཐམས་ཅད་ཀྱི་རྩ་བ་ཞེས་བྱའོ། །འདི་ལྟར་ཏེ། ས་ཆེན་པོ་འདི་ལ་བརྟེན་ནས་རྩི་ཤིང་དང་། མེ་ཏོག་དང་། ཤིང་གེལ་བ་དང་། ནགས་ཚལ་ལ་སོགས་པ་ཐམས་ཅད་ཀྱང་སྐྱེའོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་བོ་འདི་བསྲུངས་པ་ལ་བརྟེན་ནས་དགེ་བའི་ཆོས་ཐམས་ཅད་འཕེལ་ཞིང་སྐྱེ་བར་འགྱུར་རོ། །ཞེས་སོགས་གསུངས་པ་དང་། གཞན་ཡང་། དང་པོར་བསླབ་པའི་གཞི་ལྔ་རྣམས། །གསོ་སྦྱོང་སོགས་དང་ཡང་དག་ལྡན། །མི་དགེ་བཅུ་ནི་ཡོངས་སྤོང་བ། །བྱིན་ནས་དགེ་བསྙེན་ཉིད་དུ་བྱ། །ཞེས་གསུངས་པས་དགེ་བསྙེན་གྱི་བསླབ་པ་ནི་མི་དགེ་བཅུ་སྤོང་གི་སྡོམ་པ་ཡིན་པའི་ཕྱིར་སྡོམ་པ་གོང་མ་ཐམས་ཅད་ཀྱི་གཞིའམ་རྩ་བར་གྱུར་བ་ཡིན་ལ། ཆང་ནི་མྱོས་པ་འཐུང་བ་ལས་བག་མེད་པར་འགྱུར་ཏེ། ཉེས་པ་གཞན་དག་འདྲེན་པའི་ཕྱིར་དུ་བཅས་པའི་ཁ་ན་མ་ཐོ་བ་རྣམས་ཀྱི་ནང་ནས་ཆེས་ལྕི་བ་ཡིན་པས་སྡོམ་ལྡན་གྱི་ནད་པས་ཀྱང་རྩྭ་རྩེའི་ཐིགས་པ་ཙམ་ཡང་མི་འཐུང་བར་གསུངས་སོ། །དེ་ལྟར་ཡོངས་རྫོགས་དགེ་བསྙེན་གྱི་བསླབ་བྱ་ཆ་ཙམ་བཤད་པ་འདིས་ནི་སྣ་གཅིག་སྤྱོད་པ་དང་། ཕྱོགས་གཅིག་སྤྱོད་པ་དང་། ཕལ་ཆེར་སྤྱོད་པའི་དགེ་བསྙེན་གྱི་བསླབ་བྱ་ཡང་ཤེས་པར་འགྱུར་ཞིང་། །ཡན་ལག་ལྔ་ལས་ལོག་གཡེམ་གྱི་དོད་དུ་མི་ཚངས་སྤྱོད་སྤོང་བ་ཚངས་སྤྱོད་དགེ་བསྙེན་དང་། བསྙེན་གནས་ཡན་ལག་བརྒྱད་ཇི་སྲིད་འཚོའི་བར་དུ་སྲུང་བ་གོ་མིའི་དགེ་བསྙེན་དུ་གྲགས་པ་སྟེ་གཞན་དུ་ཤེས་པར་བྱའོ། །སྐྱབས་འགྲོའི་དགེ་བསྙེན་གྱི་བསླབ་བྱ་ནི་ཐམས་ཅད་ཀྱི་ཐུན་མོང་པའོ། །དེ་ལྟར་ཡང་ཆོས་འདུལ་བ་ལས། དགེ་བསྙེན་ཉིད་དང་། དགེ་ཚུལ་ཉིད་དང་། དགེ་སློང་ཉིད་དག་གི་སྔ་མ་བསྙེན་པར་མ་རྫོགས་པ་ལ་ཕྱི་མ་མི་བྱའོ་ཞེས་གསུངས་པས་སངས་རྒྱས་ཀྱི་བསྟན་པའི་བསླབ་པ་ཐམས་ཅད་ཀྱི་རྩ་བར་གྱུར་པའོ། །ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག །རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང་། །ཚུལ་ཁྲིམས་སྤྱོད་པ་ཡང་དག་དྲི་མེད་པ། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །གཞན་གནོད་གཞིར་བཅས་སྤོང་ལ་གོམས་པའི་མཐུས། །རྨི་ལམ་ན་ཡང་སྡིག་སེམས་མི་འབྱུང་ཞིང་། །བྱང་ཆུབ་སེམས་དང་ནམ་ཡང་མི་འབྲལ་བའི། །ཚུལ་ཁྲིམས་ཕུན་སུམ་ཚོགས་པའི་བཀྲ་ཤིས་ཤོག །ད་ངོ་མས་བཤད་ན་སྡོམ་པ་རེ་རེ་ཞུ་དུས་གཏང་རག་གི་ཚུལ་དུ་ཡང་ཕྱག་གསུམ་རེ་འཚལ་དགོས་ཀྱང་འུ་ཚོས་ཕྱག་འཚལ་ནས་ཉི་མ་དུས་ཚོད་ཤོར་འགྲོ་བས་གུས་ཕྱག་འཚལ་བའི་མོས་པ་དང་བཅས་པས་ཆོག་རྒྱུ་བྱེད། ༼ཁ སྨོན་པ་སེམས་བསྐྱེད་ཀྱི་སྡོམ་པ་གནང་བ། དེ་ཡན་ཆད་ཀྱིས་ཁྱིམ་པའི་དབང་དུ་བྱས་པའི་སོ་ཐར་གྱི་སྡོམ་པ་སྐྱབས་འགྲོས་རྩོམ་གཞིར་བྱས་པའི་དགེ་བསྙེན་གྱི་སྡོམ་པ་ནོད་པ་དེ་སོང་ནས་བྱང་ཆུབ་སྨོན་པའི་སེམས་བསྐྱེད་པ་གཙོ་བོར་བྱས་པའི་བྱང་སྡོམ་ཞིག་འབོག་རྒྱུ་བྱེད། སྤྱིར་ན་ཟབ་མོ་ལྟ་ལུགས་དང་རྒྱ་ཆེན་སྤྱོད་ལུགས་ཀྱི་ཁྱད་པར་དང་། དེ་ཡང་སྨོན་དང་འཇུག་པའི་སྡོམ་པ་དེ་གཉིས་ཀ་སྟབས་གཅིག་ཏུ་ལེན་པ་དང་། སོ་སོར་ཐ་དད་པར་ལེན་པའི་སྲོལ་ལ་སོགས་པའི་ཁྱད་པར་ཡོད་པའི་ནང་ནས་འདིའི་ཆོ་ག་སྨོན་འཇུག་སྟབས་གཅིག་ཏུ་ལེན་པའི་རང་ལུགས་ཀུན་མཁྱེན་རྒྱལ་བ་ཀློང་ཆེན་པས་བཞེད་པའི་ཆོ་གའི་ཆོག་ཁྲིགས་ལྟར་དུ་འདོན་རྒྱུའི་ནང་ནས། དེ་རིང་དམིགས་བསལ་གྱི་ཉམས་པའི་ཉེས་པ་སྤང་བའི་ཕྱིར་དུ་ཁྱིམ་ན་གནས་པའི་དགེ་བསྙེན་ལས་དང་པོ་པའི་ངོ་སྐལ་དུ་འདོན་པ་ཁ་སྒྱུར་གཏོང་། རང་རང་གི་མོས་པས་ཁྱད་པར་དུ་བྱེད་པའི་དབང་དུ་བཏང་ནས་སྨོན་པ་སེམས་བསྐྱེད་གཙོ་བོར་བྱས་ཏེ་འདོན་འགྲོ། འདིའི་ཡན་ལག་བདུན་པའི་ཕྱག་འཚལ་བའི་སྐབས་སུ་ཡང་སྒོ་གསུམ་འཇུག་པ་གཅིག་པའི་ཕྱག་འཚལ་དགོས། དེས་ན་སེར་སྐྱ་མཆོག་དམན་ཐམས་ཅད་ཀྱིས་ཆོ་ག་བཞིན་དུ་ཕྱག་འཚལ་རྒྱུའི་ས་ཁོངས་སྔར་བཞིན་དུ་ཡོད་པ་ཞིག་མཛོད། དེ་རིང་དུས་ཚོད་ཀྱི་དབང་གིས་མར་འདོན་ནས་ཚར་རྒྱུ་གཙོ་བོ་བྱེད་དགོས། འོ་སྐོལ་རྣམས་རྙེད་པར་དཀའ་བ་དལ་འབྱོར་གྱི་རྟེན་ཁྱད་པར་ཅན་རྙེད། མཇལ་བར་དཀའ་བ་སངས་རྒྱས་ཀྱི་བསྟན་པ་རིན་པོ་ཆེ་དང་མཇལ། འཁོར་འདས་ཀྱི་འདམ་ཀ་རང་དབང་ཐོབ་པའི་དུས་འདིར་དལ་འབྱོར་ལ་སྙིང་པོ་ལེན་པ་ཞིག་ཅི་ནས་ཀྱང་འབད་དགོས་ཏེ། མགོན་པོ་ཀླུ་སྒྲུབ་ཀྱིས། རྒྱ་མཚོ་ཆེར་གཡེང་གཉའ་ཤིང་བུ་ག་དང་། །རུས་སྦལ་འཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱད་པས་དེ་འབྲས་མཆིས་པར་མཛོད། །ཅེས་གསུངས་ཤིང་། དམ་པའི་ཆོས་ཀྱི་ནང་ནས་ཀྱང་རང་གཞན་ཐམས་ཅད་སྡུག་བསྔལ་ལས་སྒྲོལ་ཞིང་། གནས་སྐབས་དང་མཐར་ཐུག་གི་བདེ་བ་དམ་པ་ཐོབ་པར་བྱེད་པའི་རྒྱུའི་གཙོ་བོ་བྱང་ཆུབ་ཀྱི་སེམས་ཡིན་ཏེ། བསླབ་བཏུས་ལས། སྡུག་བསྔལ་མཐར་ཕྱིན་འདོད་པ་དང་། །བདེ་བའི་མཐར་ཡང་འགྲོ་འདོད་པས། །དད་པའི་རྩ་བ་བརྟན་བྱས་ཏེ། །བྱང་ཆུབ་ལ་ནི་བློ་བརྟན་བྱ། །ཞེས་གསུངས་པས་དེ་ལྟ་བུའི་ཡོན་ཏན་ལྡན་པའི་སེམས་བསྐྱེད་ཀྱི་ཆོ་ག་སྒྲུབ་པ་ལའང་སྡོང་པོ་བཀོད་པ་དང་ནམ་མཁའི་སྙིང་པོའི་མདོ་ལ་སོགས་པའི་རྗེས་སུ་འབྲངས་པ་འཕགས་པ་འཇམ་དཔལ་ནས་བརྒྱུད་དེ་མགོན་པོ་ཀླུ་སྒྲུབ་ཡབ་སྲས་དང་རྒྱལ་སྲས་ཞི་བ་ལྷ་ལ་སོགས་ཀྱི་ཕྱག་བཞེས་དབུ་མ་ལུགས་སུ་གྲགས་པ་དང་། དེ་ཟབ་མོ་ལྟ་ལུགས་ཡིན། བྱང་ཆུབ་སེམས་དཔའི་ས་ཆེན་པོའི་མདོ་ལ་སོགས་པའི་རྗེས་སུ་འབྲངས་པ། མགོན་པོ་བྱམས་པ་ནས་བརྒྱུད་དེ་འཕགས་པ་ཐོགས་མེད་སྐུ་མཆེད་དང་སློབ་དཔོན་ཆེན་པོ་ཙནྡྲ་གོ་མི་དང་ཇོ་བོ་ཨ་ཏི་ཤ་སོགས་ཀྱི་ཕྱག་བཞེས་སེམས་ཙམ་ལུགས་སུ་གྲགས་པ་སྟེ་རྒྱ་ཆེན་སྤྱོད་སྲོལ་ཡིན། དེ་ལྟར་གཉིས་ཡོད་པ་ལས་འདི་སྔ་མ་བཞིན་དུ་སྒྲུབ་པར་བགྱིད་པས། དེ་ལ་ཐོག་མར་སྡོམ་པ་ལེན་པའི་ཚུལ། བར་དུ་མི་ཉམས་པ་བསྲུང་བའི་ཚུལ། མཐར་ཉམས་ན་ཕྱིར་བཅོས་པའི་ཚུལ། སྡོམ་པའི་རང་བཞིན་གཏན་ལ་དབབ་པའི་ཚུལ་དང་བཞི་ལས། ས་བཅད་བཞི་བཞག་པའི་ནང་གི་དང་པོ་སྡོམ་པ་ལེན་པའི་ཚུལ་ལ། གང་ལས་བླང་བའི་ཡུལ། གང་གིས་ལེན་པའི་གང་ཟག ཇི་ལྟར་ལེན་པའི་ཆོ་ག་དངོས་བཤད་པའོ། །དང་པོ་གང་ལས་བླང་བའི་ཡུལ་ནི། ཐེག་པ་ཆེན་པོ་ལ་དངོས་གཞི་བྱང་ཆུབ་སེམས་དཔའི་སྡོམ་པ་ལ་གནས་པ། བྱང་སེམས་ཀྱི་སྡེ་སྣོད་སྤྱི་དང་ཁྱད་པར་བྱང་སྡོམ་འབོག་པ་དང་བསླབ་བྱ་ལ་དྲིལ་མཁས་ཤིང་། ཕར་ཕྱིན་དྲུག་གི་མི་མཐུན་ཕྱོགས་སེར་སྣ་སོགས་དང་བྲལ་བ་སྟེ། སྤྱོད་འཇུག་ལས། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏོང་ངོ་། །ཞེས་གསུངས་སོ། །ལུགས་འདི་ལ་སེམས་བསྐྱེད་གསར་དུ་ལེན་པ་དང་། ཉམས་པ་གསོ་བ་གཉིས་ཀ་སློབ་དཔོན་མ་འབྱོར་ན་རྟེན་གྱི་དྲུང་དུ་བླངས་ནས་ཀྱང་རུང་བར་བཤད་དོ། །གཉིས་པ་གང་གིས་ལེན་པའི་གང་ཟག་ནི། གཟུགས་མེད་ཁམས་པ་དང་འདུ་ཤེས་མེད་པའི་ལྷ་མ་གཏོགས་སེམས་ཅན་བརྡ་ཤེས་ཤིང་སྡོམ་པ་ལེན་འདོད་ཡོད་པ་ཀུན་ལ་སྐྱེ་བར་བཤད་པ་དང་། ཁྱད་པར་ཤེས་རབ་ཀྱིས་བྱང་སེམས་ཀྱི་སྤྱོད་པ་རླབས་པོ་ཆེ་རྣམས་རྟོགས་ཤིང་། སྙིང་རྗེས་འགྲོ་ཀུན་ཕན་བདེ་ལ་འགོད་འདོད་ཀྱི་བྱམས་སྙིང་རྗེ་ཁྱད་པར་ཅན་དང་ལྡན་པས་བྱང་སེམས་ཀྱི་བསླབ་པ་ལ་སློབ་པར་འདོད་བཞིན་དགོས་སོ། །གསུམ་པ་ཇི་ལྟར་ལེན་པའི་ཆོ་ག་ལ། སྦྱོར་བ། དངོས་གཞི་། རྗེས་སོ། །སྦྱོར་བ་ལ་བཞི་སྟེ། གདམས་ངག་ཁྱད་པར་ཅན་གྱིས་བློ་བཅོས་པ། ཡུལ་ཁྱད་པར་ཅན་ལ་གསོལ་བ་གདབ་པ། རྟེན་ཁྱད་པར་ཅན་ལ་སྐྱབས་སུ་འགྲོ་བ། ཐབས་ཁྱད་པར་ཅན་གྱིས་ཚོགས་བསགས་པའོ། །དང་པོ་ལའང་སྡུག་བསྔལ་འཁོར་བའི་མཐའ་ལ་སྐྱོ་བ་བསྐྱེད་པ། ཞི་བ་མྱང་འདས་ཀྱི་མཐའ་ལ་ཞེན་པ་དགག་པ། མཐའ་གཉིས་སྤངས་པའི་བྱང་ཆུབ་ཀྱི་སེམས་ལ་སྤྲོ་བ་བསྐྱེད་པ་དང་གསུམ་གྱི་དང་པོ་སྡུག་བསྔལ་འཁོར་བའི་མཐའ་ལ་སྐྱོ་བ་བསྐྱེད་པ་ནི། ཚེ་འདིའི་སྤྱོད་ཡུལ་ལ་ཆགས་པའི་གཉེན་པོར་མི་རྟག་པ་དང་། སྲིད་པའི་བདེ་བ་ལ་ཆགས་པའི་གཉེན་པོར་འཁོར་བ་སྤྱི་དང་བྱེ་བྲག་གི་ཉེས་དམིགས་རྣམས་དྲན་པར་བྱ་སྟེ། དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་རྣམས་འཚོ་བ་ཐུང་བས་ཉམས། །ལྷ་རྣམས་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་གསུངས་པས་ན་ཚུལ་དེའི་ཕྱིར་བཤེས་སྤྲིངས་ལས། མགོའམ་གོས་ལ་གློ་བུར་མེ་ཤོར་ན། །དེ་དག་ལྡོག་ཕྱིར་བགྱི་བ་བཏང་ནས་ཀྱང་། །ཡང་སྲིད་མེད་པར་བགྱིད་སླད་འབད་འཚལ་ཏེ། །འདི་ལས་ཆེས་མཆོག་དགོས་པ་གཞན་མ་མཆིས། །ཞེས་གསུངས་པ་ལྟར་འཁོར་བ་ལས་ངེས་པར་འབྱུང་ཞིང་དམ་ཆོས་སྒྲུབ་པ་ལ་སྤྲོ་ཤུགས་ཆེན་པོས་བློ་འཁུལ་བར་བྱའོ། །གཉིས་པ་ནི་ཞི་བའི་བདེ་བ་ལ་ཆགས་པའི་གཉེན་པོར་སེམས་ཅན་ཐམས་ཅད་ལ་བྱམས་སྙིང་རྗེ་སྒོམ་པ་སྟེ། འཁོར་བ་སྡུག་བསྔལ་གྱི་རང་བཞིན་དུ་འདུག་པས་དེ་སྤངས་ནས་ཕུང་པོ་ལྷག་མེད་ཀྱི་མྱང་འདས་འཐོབ་པར་བྱ་བ་ཡིན་ནམ་སྙམ་ན་མ་ཡིན་ཏེ། དེས་གཞན་དོན་མི་ནུས་ལ་འཁོར་བའི་སེམས་ཅན་ཐམས་ཅད་ཐོག་མ་མེད་པ་ནས་མར་བྱས་པའི་དྲིན་ཆེན་ཡིན་པས་དེ་རྣམས་ཀྱི་དོན་མི་བྱེད་པར་རང་ཉིད་ཞི་བདེ་སྒྲུབ་པ་ནི་དྲིན་མི་ཤེས་པའི་ཁྲེལ་མེད་པའི་སྤྱོད་པར་འགྱུར་ཏེ། སློབ་སྤྲིངས་ལས། ཉེ་དུ་འཁོར་བའི་རྒྱ་མཚོའི་ཁོང་དུ་ཆུད་གྱུར་པ། །ཀློང་གི་ནང་དུ་ལྷུང་བ་ལྟ་བུ་སྣང་བཞིན་དུ། །སྐྱེ་ཤིས་འཕོས་པས་ངོ་མ་ཤེས་པ་དེ་བོར་ནས། །གལ་ཏེ་གཅིག་ཐར་བྱེད་ན་དེ་ལས་ཁྲེལ་བོར་མེད། །ཅེས་གསུངས་པས་གཞན་དོན་བོར་ནས་རང་ཉིད་གཅིག་པུར་ཞི་བདེ་དོན་གཉེར་གྱི་བློ་སྤང་བ་ལ་ནན་ཏན་དུ་བྱའོ། །གསུམ་པ་མཐའ་གཉིས་སྤངས་པའི་བྱང་ཆུབ་སེམས་ལ་སྤྲོ་བ་བསྐྱེད་པ་ནི། སངས་རྒྱས་སྒྲུབ་པའི་ཐབས་མི་ཤེས་པའི་གཉེན་པོར་བྱང་ཆུབ་ཀྱི་སེམས་གཉིས་སྒོམ་པ་སྟེ། འོ་ན་འཁོར་བ་སྡུག་བསྔལ་གྱི་རང་བཞིན་ཡིན་པས་སྤང་དགོས་ཤིང་སྡུག་བསྔལ་སྤངས་པའི་མྱང་འདས་དེ་ཡང་ཐོབ་པར་མི་བྱེད་ན་ཅི་ཞིག་འཐོབ་པར་བྱ་བ་ཡིན་སྙམ་ན། མགོན་པོ་བྱམས་པས། བདག་སྲེད་མ་ལུས་ཤེས་རབ་ཀྱིས་བསལ་ནས། །སེམས་ཅན་སྲེད་ཕྱིར་བརྩེ་ལྡན་ཞི་ཐོབ་མིན། །དེ་ལྟར་བློ་རྩེ་བྱང་ཆུབ་ཐོབ་བརྟན་ནས། །འཕགས་པ་འཁོར་བ་མྱ་ངན་འདས་མི་འགྲོ། །ཞེས་གསུངས་པ་ལྟར་ཤེས་རབ་ཆེན་པོས་འཁོར་བའི་མཐའ་ལ་མི་གནས། སྙིང་རྗེ་ཆེན་པོས་མྱ་ངན་ལས་འདས་པའི་མཐའ་ལ་མི་གནས་པའི་བྱང་ཆུབ་ནི་ཡང་དག་པར་རྫོགས་པའི་སངས་རྒྱས་ཡིན་ལ། དེ་ཐོབ་ན་རང་དོན་སྤངས་རྟོགས་མཐར་ཕྱིན། གཞན་དོན་མཁའ་ཁྱབ་ཀྱི་འཁོར་བ་ཇི་སྲིད་པར་འབད་མེད་ལྷུན་གྲུབ་ཏུ་འབྱུང་བས་དོན་གཉིས་མཐར་ཕྱིན་པ་དེ་ཉིད་ཐོབ་བྱ་ཡིན་ཞིང་། དེ་ཐོབ་བྱེད་ཀྱི་རྒྱུའི་གཙོ་བོ་བྱང་ཆུབ་ཏུ་སེམས་བསྐྱེད་པ་ཡིན་ཏེ། རྣམ་སྣང་མངོན་བྱང་ལས། གསང་བའི་བདག་པོ། ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་ནི་བྱང་ཆུབ་ཀྱི་སེམས་སོ། །ཞེས་དང་། སྡུད་པ་ལས། དེ་བཞིན་འདིར་ཡང་བྱང་ཆུབ་སེམས་མེད་བདེ་གཤེགས་ཀྱི། །ཡེ་ཤེས་འཇིག་རྟེན་འདི་དག་ཀུན་ཏུ་ག་ལ་འབྱུང་། །ཞེས་གསུངས་པས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་འཐོབ་པར་བྱ་བའི་ཕྱིར་བྱང་ཆུབ་ཏུ་སེམས་བསྐྱེད་པར་བྱའོ་སྙམ་པའི་སྤྲོ་བ་ཤུགས་དྲག་ཏུ་བསྐྱེད་པ་རྣམས་ནི་ལམ་འདིའི་གཞི་ཡིན་པས་རྒྱས་བསྡུས་ཅི་རིགས་པས་སློབ་མའི་རྒྱུད་ལ་ངེས་པར་འབྱོར་ངེས་སུ་བརྡ་སྤྲད་པར་བྱའོ། །དེ་ལྟར་གསུངས་པས་གོ་བཞིན་ཡོད་པའི་ཚུལ་གྱིས། གཉིས་པ་ནི། ཡུལ་ཁྱད་པར་ཅན་ལ་གསོལ་བ་གདབ་པ་སྟེ། སློབ་དཔོན་ལ་སྟོན་པའི་འདུ་ཤེས་བསྐྱེད་ནས་མཎྜལ་ཕུལ་བའི་འདུན་པ་དང་བཅས་ཏེ། བདག་ཅག་ལ་བྱང་ཆུབ་མཆོག་ཏུ་སེམས་བསྐྱེད་པ་བསྩལ་དུ་གསོལ་སྙམ་པའི་འདུན་པ་ཆེན་པོ་དང་ལྡན་པས་འདིའི་རྗེས་ཟློས་མཛོད་ཅིག ད་རྗེས་ཟློས་བྱེད་དགོས་འདུག རྗེས་ཟློས་ལན་གསུམ་བྱེད་དགོས། སློབ་དཔོན་དགོངས་སུ་གསོལ། རིགས་ཀྱི་བུ་བདག་ལ་དུས་གསུམ་སངས་རྒྱས་ཐམས་ཅད་ཀྱི་བགྲོད་པ་གཅིག་པུ་ལམ་སྐྱབས་གསུམ་སྔོན་དུ་འགྲོ་བ་ཅན་གྱི་བྱང་ཆུབ་ཏུ་སེམས་བསྐྱེད་པ་བསྩལ་དུ་གསོལ། དེ་ཡན་ཆད་གསོལ་བ་འདེབས་པ་སོང་ནས། གསུམ་པ་ནི། རྟེན་ཁྱད་པར་ཅན་ལ་སྐྱབས་སུ་འགྲོ་བ་སྟེ། སྐྱབས་འགྲོའི་ཡུལ་སངས་རྒྱས་སྐུ་གསུམ་གྱི་བདག་ཉིད། ཆོས་ཐེག་པ་ཆེན་པོའི་ལུང་དང་རྟོགས་པ། དགེ་འདུན་བྱང་སེམས་འཕགས་པ་ཕྱིར་མི་ལྡོག་པ་རྣམས་ཡིན། དུས་བྱང་ཆུབ་སྙིང་པོ་མ་ཐོབ་ཀྱི་བར། རྒྱུ་སེམས་ཅན་ཐམས་ཅད་སྡུག་བསྔལ་ལས་བསྒྲལ་བར་འདོད་པའི་སྙིང་རྗེས་ཀུན་ནས་བསླངས་ཏེ། ངོ་བོ་སེམས་ཅན་རྣམས་སྡུག་བསྔལ་ལས་སྐྱོབ་པ་ལ་སངས་རྒྱས་ཐོབ་དགོས། དེ་ཐོབ་པར་དཀོན་མཆོག་གསུམ་ལ་རག་ལས་པས་བདག་གིས་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པ་དཀོན་མཆོག་གསུམ་པོ་མཁྱེན་སྙམ་པའི་དད་པ་ཆེན་པོ་དང་ལྡན་པའི་སྒོ་ནས་སླར་ཡང་འདིའི་རྗེས་ཟློས་མཛོད། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། བྱང་ཆུབ་སྙིང་པོ་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །དེང་ཕྱིན་ཆད་སངས་རྒྱས་ལ་སྟོན་པ། ཐེག་ཆེན་གྱི་ཆོས་ལ་ལམ། བྱང་སེམས་འཕགས་པ་རྣམས་ལམ་སྒྲུབ་པའི་གྲོགས་སུ་གཟུང་བར་བགྱིའོ་སྙམ་པ་ལ་བློ་བརྟན་པར་མཛོད། བཞི་བ་ནི། ཐབས་ཁྱད་པར་ཅན་གྱིས་ཚོགས་བསགས་པ་སྟེ། ཚོགས་ཀྱི་ཞིང་མདུན་གྱི་ནམ་མཁར་སེངྒེའི་ཁྲི་སྟན་བཀོད་པ་ཕུན་སུམ་ཚོགས་པའི་སྟེང་དུ་སྟོན་པ་བཅོམ་ལྡན་འདས་ཤཱཀྱའི་དབང་པོ་ལ་འཁོར་ཉེ་བའི་སྲས་བརྒྱད་ལ་སོགས་པས་བསྐོར་བས་གཙོར་བྱས་ཕྱོགས་བཅུ་ཞིང་ཁམས་རབ་འབྱམས་ཀྱི་སངས་རྒྱས་བྱང་སེམས་ཐམས་ཅད་སྤྲིན་ཕུང་འཐིབས་པ་ལྟར་བཞུགས་པར་བསམས་ནས། དེ་དག་གི་ཞབས་ཀྱི་རྡུལ་ཕྲ་རབ་རེ་རེ་ལ་ཡང་རང་གི་ལུས་ཞིང་ཁམས་རྒྱ་མཚོའི་རྡུལ་སྙེད་དུ་སྤྲུལ། མཁའ་མཉམ་སེམས་ཅན་ཐམས་ཅད་དང་ལྷན་གཅིག་ཏུ་ཕྱག་འཚལ་བར་བསམས་ནས་གནས་ལྔ་ས་ལ་གཏུགས་པའི་ཕྱག་དང་བཅས་པས་འདིའི་རྗེས་ཟློས་མཛོད། འདི་ནས་ཕྱག་འཚལ་དགོས་པས་ཚང་མ་ཡར་བཞེངས་ནས་འདིའི་ཇི་སྙེད་སུ་དག་ལ་སོགས་པ་མཉམ་དུ་བཏོན་ནས་དུས་རྒྱུན་ལྟར་དུ་ཕྱག་འཚལ་བ་དལ་མོར་བྱས་ཏེ་ཕྱག་འཚལ་བའི་ཚིག་དང་སྦྲེལ་ཏེ་ཕྱག་འཚལ་རྒྱུ་བྱེད། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེངྒེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱི་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །དེ་ནས་སྔར་ལྟར་རང་གནས་སུ་བདེ་བདེར་བྱས་ཏེ་བཞུགས་མཛོད། ཕྱག་འཚལ་བ་འདི་ནི་ང་རྒྱལ་གྱི་གཉེན་པོ་ཡིན། དེ་ནས་རང་གཞན་ཐམས་ཅད་ཀྱི་ལུས་དང་ལོངས་སྤྱོད་དགེ་རྩ་དང་བཅས་པ་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་སྤྲིན་རྒྱ་མཚོ་ནམ་མཁའི་མཐའ་དང་མཉམ་པ། ངོ་བོ་བཟང་ཞིང་དགེ་བ། དུས་འཁོར་བ་མ་སྟོང་གི་བར་དུ་རྒྱུན་མི་ཆད་པར་འབྱུང་བ་རྣམས་ཀྱིས་ཡང་དག་པར་མོས་ལ། ད་མཆོད་པའི་ཞལ་འདོན་འདི་མཉམ་དུ་གསུངས། མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པ་གདུགས་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མ་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །འདི་འདོད་ཆགས་ཀྱི་གཉེན་པོ་མཆོད་པའི་ཡན་ལག་ཡིན། དེ་ནས་རང་གཞན་ཐམས་ཅད་ཀྱི་བཅས་པ་དང་རང་བཞིན་གྱི་སྡིག་ལྟུང་སྔར་བྱས་ལ་འགྱོད་པ་དུག་འཐུང་བ་ལྟ་བུ་དང་། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་སྡོམ་སེམས་བརྟན་པོ་དང་ལྡན་པས་བདག་སོགས་སེམས་ཅན་ཐམས་ཅད་ཀྱི་སྡིག་སྒྲིབ་ཐམས་ཅད་དག་པ་དཀོན་མཆོག་རིན་པོ་ཆེ་མཁྱེན་སྙམ་ནས་བཤགས་པས་སྡིག་སྒྲིབ་ཐམས་ཅད་སངས་ཀྱིས་དག་པར་མོས་ནས། སླར་ཡང་མཉམ་དུ་གསུངས། འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །བཤགས་པ་འདི་ཞེ་སྡང་གི་གཉེན་པོ་ཡིན། བཤགས་པའི་ཡན་ལག་སོང་ཟིན་པ་ཡིན། འཕགས་པ་དང་སོ་སྐྱེས་བསྡུས་པའི་ཟག་བཅས་དང་ཟག་མེད་ཀྱི་དགེ་བའི་རྩ་བ་ཐམས་ཅད་ལ་ཤིན་ཏུ་དགའ་ཞིང་ཡི་རང་བའི་བློ་བསྐྱེད་ལ། སླར་ཡང་མཉམ་དུ་གསུངས། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །རྗེས་སུ་ཡི་རང་འདི་ཕྲག་དོག་གི་གཉེན་པོ་ཡིན། དེ་ཡན་གྱིས་རྗེས་སུ་ཡི་རང་གི་ཡན་ལག་སོང་ནས། ད་ཆོས་འཁོར་བསྐོར་བར་བསྐུལ་བའི་ཡན་ལག་སྟེ། ཕྱོགས་བཅུ་འཇིག་རྟེན་གྱི་ཁམས་ན་བདེ་བར་གཤེགས་པ་གང་དག་གདུལ་བྱའི་དབང་གིས་ཆོས་ཀྱི་འཁོར་ལོ་མི་བསྐོར་བར་བཞུགས་པ་རྣམས་ལ་ཐེག་པ་ཆེན་པོའི་ཆོས་ཀྱི་འཁོར་ལོ་བསྐོར་བར་མཛད་དུ་གསོལ་སྙམ་ལ། གསོལ་བ་འདེབས་པ་འདི་བཞིན་ཡང་མཉམ་དུ་གསུངས། གང་རྣམས་ཕྱོགས་བཅུའི་འཇིག་རྟེན་སྒྲོན་མ་རྣམས། །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །འདི་གཏི་མུག་གི་གཉེན་པོ་སྟེ་ཆོས་ཀྱི་འཁོར་ལོ་བསྐོར་བའི་ཡན་ལག་སོང་ཟིན། ད་ཡན་ལག་དྲུག་པ་མྱ་ངན་ལས་མི་འདའ་བར་གསོལ་བ་འདེབས་པ་སྟེ། ཕྱོགས་བཅུའི་འཇིག་རྟེན་གྱི་ཁམས་ན་བདེ་བར་གཤེགས་པ་འགའ་ཞིག་སངས་རྒྱས་ལ་དཀོན་པའི་འདུ་ཤེས་བསྐྱེད་པའི་ཆེད་དུ་མྱ་ངན་ལས་འདའ་བའི་ཚུལ་སྟོན་པ་རྣམས་ལ་འཁོར་བ་ཇི་སྲིད་པ་དེ་སྲིད་དུ་མྱ་ངན་ལས་མི་འདའ་བའི་བསམ་པ་དང་བཅས་ཏེ་ཞལ་འདོན་ལྷན་དུ་གསུངས། མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་བ་ཞིང་གི་རྡུལ་སྙེད་བཞུགས་པ་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །འདི་ལོག་ལྟའི་གཉེན་པོ་སྟེ། ལོག་ལྟའི་གཉེན་པོ་གསོལ་བ་གདབ་པའི་ཡན་ལག་གི་སྐོར་སོང་ནས། དེ་ལྟར་བསོད་ནམས་ཀྱི་ཚོགས་སུ་གྱུར་བ་དེ་དག་གིས་མཚོན་ཏེ་བདག་གཞན་འཁོར་འདས་ཐམས་ཅད་ཀྱི་དུས་གསུམ་བསགས་ཡོད་ཀྱི་དགེ་བ་ཐམས་ཅད་སེམས་ཅན་གྱི་དོན་དུ་བླ་ན་མེད་པའི་བྱང་ཆུབ་ཆེན་པོར་ཡོངས་སུ་བསྔོ་བར་བགྱིའོ་སྙམ་པས་ལྷན་དུ་གསུངས། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །འདི་ཐེ་ཚོམ་གྱི་གཉེན་པོ་ཡིན་ཞིང་། དེ་ཡན་གྱིས་བསྔོ་བའི་ཡན་ལག་སོང་ཟིན་ལ། དེ་དག་གིས་སྦྱོར་བའི་ཆོ་ག་རྣམས་གྲུབ་པ་ལགས། གཉིས་པ་དངོས་གཞི་ལ། བློ་སྦྱོང་བ་དང་། དམ་བཅའ་བ་སྟེ་གཉིས་ལས། དང་པོ་བློ་སྦྱོང་བ་ནི། འཁོར་བ་ཐོག་མ་མེད་པ་ནས་ཡང་དང་ཡང་དུ་ཕ་མར་གྱུར་བའི་དྲིན་ཆེན་གྱི་སེམས་ཅན་འདི་དག་འཁོར་བ་ན་སྡུག་བསྔལ་དཔག་ཏུ་མེད་པས་གཟིར་ཏེ་འདུག་པས་འདི་རྣམས་ཀྱི་སྡུག་བསྔལ་མ་ལུས་པ་བསལ་ཞིང་བདེ་བ་བླ་ན་མེད་པ་ལ་འགོད་པའི་ཆེད་དུ་བདག་གིས་ལུས་དང་ལོངས་སྤྱོད་དགེ་རྩ་ཐམས་ཅད་དེ་དག་གི་དོན་ཀུན་འགྲུབ་པའི་རྒྱུར་ཕངས་པ་མེད་པར་བཏང་ཞིང་། དཀའ་སྤྱད་དང་སྡུག་བསྔལ་ཐམས་ཅད་དགའ་ཞིང་སྤྲོ་བས་དང་དུ་བླང་བར་བྱའོ་སྙམ་པས་འདིའི་རྗེས་ཟློས་བྱོས། ལུས་དང་དེ་བཞིན་ལོངས་སྤྱོད་དང་། །དུས་གསུམ་དགེ་བ་ཐམས་ཅད་དང་། །སེམས་ཅན་ཀུན་གྱི་དོན་བསྒྲུབ་ཕྱིར། །ཕངས་པ་མེད་པར་གཏང་བར་བྱ། །ས་སོགས་འབྱུང་བ་ཆེན་པོ་དང་། །ནམ་མཁའ་བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག །དེ་བཞིན་ནམ་མཁའི་མཐས་གཏུགས་པའི། །སེམས་ཅན་ཁམས་ལ་རྣམ་ཀུན་ཏུ། །ཐམས་ཅད་མྱ་ངན་འདས་བར་དུ། །བདག་ནི་ཉེར་འཚོའི་རྒྱུར་ཡང་ཤོག །དེ་ཡིས་བློ་སྦྱོང་བ་སོང་ཟིན་ནས། གཉིས་པ་དམ་བཅའ་བ་སེམས་བསྐྱེད་པ་ནི། ཆོས་ཐམས་ཅད་དོན་དམ་སྤྲོས་པའི་མཐའ་ལས་འདས་ཀྱང་ཀུན་རྫོབ་བདག་གཞན་བདེ་སྡུག་ལ་སོགས་པ་སྣ་ཚོགས་སུ་སྣང་བ་སྟེ། ཏིང་ངེ་འཛིན་རྒྱལ་པོ་ལས། སྒྱུ་མར་བྱེད་པ་དག་གིས་གཟུགས་སྤྲུལ་ཏེ། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་བཞིན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་འདྲར་ཤེས་པར་གྱིས། །ཞེས་གསུངས་པ་ལྟར་ཆོས་ཐམས་ཅད་བདེན་མེད་ཡིན་ཡང་དེ་ལྟར་མ་ཤེས་པར་བདེན་འཛིན་ཨ་འཐས་པས་འཁོར་བ་ན་སྡུག་བསྔལ་མི་ཟད་པས་རྟག་ཏུ་མནར་བའི་སེམས་ཅན་འདི་དག་ཐོག་མ་མེད་པ་ནས་ཡང་དང་ཡང་དུ་ཕ་མར་བྱས་ཏེ། ཕན་བདེ་མཐའ་དག་ནི་སྒྲུབ། གནོད་འཚེ་ཐམས་ཅད་ལས་ནི་སྐྱབས། བསམ་རྒྱུ་དང་དྲན་རྒྱུ་རང་རེ་ལས་མེད་པར་ཤེས། རང་རེའི་ཆེད་དུ་ཡང་ལུས་སྲོག་གྲངས་མེད་པར་བཏང་བའི་དྲིན་ཆེན་ཡིན་ཡང་། །བདེ་བ་འདོད་བཞིན་དུ་བདེ་བ་དང་ནི་བྲལ། སྡུག་བསྔལ་མི་འདོད་བཞིན་དུ་སྡུག་བསྔལ་དང་ནི་ལྡན། བདེ་བ་བསྒྲུབས་ཀྱང་སྡུག་བསྔལ་འདོར་བའི་ཐབས་མི་ཤེས་པའི་རྨོངས་པ་འདི་དག་སྡུག་བསྔལ་ཅན་གྱི་འཁོར་བ་ལས་སྒྲོལ་དགོས། དེ་ཡང་ད་ལྟ་བདག་ལ་དེའི་ནུས་པ་མེད་པས་ནུས་པ་དང་ལྡན་པའི་སངས་རྒྱས་དེ་ཉིད་ཐོབ་དགོས་པ་འདུག དེའི་ཕྱིར་བླ་ན་མེད་པའི་བྱང་ཆུབ་ཏུ་སྨོན་པའི་སེམས་བསྐྱེད་ནས་འཇུག་པ་བྱང་ཆུབ་ཀྱི་སེམས་བསླབ་བྱ་ཉེས་སྤྱོད་སྡོམ་པའི་ཚུལ་ཁྲིམས། དགེ་བ་ཆོས་སྡུད་ཀྱི་ཚུལ་ཁྲིམས། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་ལ་ཇི་ལྟར་སྔོན་གྱི་རྒྱལ་བ་སྲས་དང་བཅས་པ་རྣམས་ཀྱིས་ཡོངས་སུ་བསླབ་པ་བཞིན་དུ་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་ཚོགས་གཉིས་དང་ལྡན། སྡུག་བསྔལ་དང་སྡུག་བསྔལ་གྱི་རྒྱུ་སྒྲིབ་གཉིས་དང་བྲལ་ནས་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱའོ་སྙམ་དུ་བསམ་ཞིང་། དགོངས་གསོལ་བརྗོད་པ་ནས་བྱང་ཆུབ་སེམས་དཔའ་རྣམས་ཀྱིས་བདག་གི་བསམ་སྦྱོར་ཇི་ལྟ་བ་བཞིན་དུ་མཁྱེན་ངེས་སྙམ་དུ། འདིའི་སྐབས་སུ་ཆེན་པོ་གསུམ་དང་ལྡན་པའི་འདུ་ཤེས་དང་མ་བྲལ་བས་དེ་རིང་གཙོ་བོ་སྨོན་སེམས་ལེན་གྱིན་ཡོད་པས་དེའི་རྗེས་ཟློས་བྱེད་དགོས། ཆེན་པོ་གསུམ་གང་ཡིན་ན། བླ་མ་དཀོན་མཆོག་ལ་དད་པ་ཆེན་པོ། སེམས་ཅན་ལ་སྙིང་རྗེ་ཆེན་པོ། སངས་རྒྱས་ལ་ཐོབ་འདོད་ཀྱི་འདུན་པ་ཆེན་པོ་སྟེ་འདུ་ཤེས་གསུམ་དང་མ་བྲལ་བའི་སེམས་རྩེ་གཅིག་པས་འདིའི་རྗེས་ཟློས་མཛོད་ཅེས་གསུངས་ལ། གོང་ནས་ཀྱང་ཐེངས་མ་གཉིས་ལ་བཤད་ཡོད་ཀྱང་ད་རེས་ཀྱི་ཆེད་དུ་བྱ་བའི་གདུལ་བྱ་ཁྱིམ་པ་ཕོ་མོ་ཡིན་པའི་སྟབས་ཀྱིས་ཉམས་པའི་ཉེས་པ་སྤང་བའི་ཕྱིར་དུ་འོག་གི་དམ་བཅའ་བའི་རྗེས་ཟློས་ཀྱི་སྐབས་སུ་བྱང་ཆུབ་འཇུག་པའི་བསླབ་བྱ་ལེན་པའི་ཚིག་གཉིས། བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །ཞེས་པ་ཞིག་ཡོད་པ་དེ་བསྐྱུར་ནས། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་ཞེས་མི་ཟེར་བར་བྱང་ཆུབ་ཐུགས་ནི་བསྐྱེད་པ་ལྟར་ཞེས་བརྗོད་ནས་དེའི་འོག་གི་ཚིག་མཇུག་ལ་མཆོངས་ཏེ་བདག་ཀྱང་འགྲོ་ལ་ཕན་དོན་དུ་སོགས་ནས་དམ་བཅའ་བའི་ཚིག་སྤྱི་མཚུངས་ཀྱིས་བྱེད་ཆོག འདིའི་རྗེས་ཟློས་ཐེངས་གསུམ་བྱེད་དགོས། འདིའི་སྐབས་སུ་བྱང་ཆུབ་སྨོན་པ་མཆོག་ཏུ་སེམས་བསྐྱེད་བཞིན་ཡོད་པ་དེའི་འདུན་པ་དང་། གོང་ནས་གསུངས་མ་ཐག་པ་ལྟར་ཆེན་པོ་གསུམ་གྱི་འདུ་ཤེས་དང་མ་འབྲལ་བ་ཤིན་ཏུ་གལ་ཆེ་བ་དེ་ལྟར་སྨྲས་པ་ཤེས་པར་བྱས་ནས་ད་རྗེས་ཟློས་བྱོས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །དེས་ཁྱེད་རང་རྣམས་ཀྱི་རྒྱུད་ལ་སྨོན་པའི་བདག་ཉིད་ཅན་གྱི་བྱང་ཆུབ་ཀྱི་སེམས་རིན་པོ་ཆེ་སྐྱེས་པ་ཡིན་པས་ཐོབ་ཤེས་ཀྱི་དགའ་བ་མཛད་འཚལ། གསུམ་པ་མཇུག་གི་ཆོ་ག་ལ། དགའ་བ་སྒོམ་པ་དང་། གཏང་རག་འབུལ་བ་གཉིས་ལས། དང་པོ་ལ། རང་དགའ་བ་སྒོམ་པ་དང་། གཞན་དགའ་བ་བསྐྱེད་པ་གཉིས་ལས། དང་པོ་རང་དགའ་བ་སྒོམ་པ་ནི། བདག་གིས་ཐོག་མ་མེད་པ་ནས་ལུས་དཔག་ཏུ་མེད་པ་ཞིག་བླངས་ཀྱང་བྱང་ཆུབ་ཀྱི་སེམས་དང་མ་ལྡན་པས་དོན་མེད་པར་ཁོ་ནར་སོང་། ད་རེས་རང་གཞན་ཐམས་ཅད་ཀྱི་ཕན་བདེའི་རྒྱུ་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེས་པས་དོན་ཆེན་པོ་གྲུབ་སྙམ་དུ་དགའ་བ་བསྒོམ་པར་བྱའོ། །དེ་ཙམ་དགའ་བ་བསྒོམས་པའི་ཕན་ཡོན་ཅི་ཡོད་སྙམ་ན། མཐའ་ཡས་པའི་ཕྱིར་བརྗོད་པར་མི་ནུས་མོད། ཆ་ཤས་ཙམ་བརྗོད་ན་མིང་དོན་འཕོ་བ། སྡིག་པ་སྟོབས་ཆེན་སྦྱོང་བ། ཕན་ཡོན་དཔེས་བསྟན་པ། བསོད་ནམས་རྒྱུན་ཆགས་སུ་འབྱུང་བ། ཕན་ཡོན་མཐའ་ཡས་པ་རྣམས་ལས། དང་པོ་མིང་དོན་འཕོ་བ་ནི། སྤྱོད་འཇུག་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་ཆུད་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པའི་ཕྱག་བྱར་འགྱུར། །ཞེས་གསུངས་སོ། །གཉིས་པ་ནི། སྡིག་པ་ཤིན་ཏུ་མི་བཟད་བྱས་ན་ཡང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བརྟེན་ནས་ཡིད་ཀྱིས་སྒྲོལ་གྱུར་པ། དེ་ལ་བག་ཅན་རྣམས་ཀྱིས་ཅིས་མི་བརྟེན། །དེས་ནི་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་གིས་ནི་ངེས་པར་སྲེག་པར་བྱེད། ཅེས་གསུངས་སོ། །གསུམ་པ། ཕན་ཡོན་དཔེས་བསྟན་པ་ནི། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། །བྱང་ཆུབ་སེམས་དཔའི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །ཞེས་གསུངས་སོ། །བཞི་བ། བསོད་ནམས་རྒྱུན་ཆགས་སུ་འབྱུང་བ་ནི། གང་ནས་བཟུང་སྟེ་སེམས་ཅན་ཁམས། །མཐའ་ཡས་རབ་ཏུ་སྒྲོལ་བའི་ཕྱིར། །ནམ་ཡང་ལྡོག་པ་མེད་སེམས་ཀྱིས། །སེམས་དེ་ཡང་དག་བླངས་གྱུར་པ། །དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་གསུངས་སོ། །ལྔ་བ་ནི་དཔལ་བྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་འདི་ལ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་བས་ཀྱང་ནི་ལྷག་པར་འགྱུར། །ཞེས་དང་། བློ་གྲོས་རྒྱ་མཚོས་ཞུས་པའི་མདོར། རྫོགས་པའི་བྱང་ཆུབ་སེམས་དང་ཆོས་འཛིན་དང་། །ཆོས་སྒྲུབ་པ་དང་སྲོག་ཆགས་སྙིང་བརྩེ་བ། །ཆོས་ཞུ་འདི་དག་ཡོན་ཏན་མཐའ་མེད་དེ། །དེ་དག་མཐའ་ནི་རྒྱལ་བས་མི་གསུང་ངོ་། །ཞེས་སོགས་རྒྱ་ཆེར་གསུངས་ཤིང་། གཞན་ཡང་བྱང་ཆུབ་ཆེན་པོའི་རྒྱུ་འབྲས་ཀྱི་ཕན་ཡོན་དཔག་ཏུ་མེད་པའི་བྱང་ཆུབ་ཀྱི་སེམས་སྐྱེས་པ་དེ་ལ་དགའ་སྤྲོ་དང་ལྡན་པས་སླར་ཡང་འདིའི་རྗེས་ཟློས་མཛོད། ད་མཉམ་དུ་གསུངས་ན་ཆོག དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །ལོང་བས་ཕྱག་དར་ཕུང་པོ་ལས། །ཇི་ལྟར་རིན་ཆེན་རྙེད་པ་ལྟར། །དེ་བཞིན་ཇི་ཞིག་ལྟར་ལྟས་ནས། །བྱང་ཆུབ་སེམས་ནི་བདག་ལ་སྐྱེས། །དེ་ལན་གཅིག་བརྗོད་ན་ཆོག གཉིས་པ་གཞན་དགའ་བ་བསྐྱེད་པ་ནི། བདག་གིས་རྒྱལ་བ་སྲས་དང་བཅས་པ་རྣམས་ཀྱི་སྤྱན་སྔར་འགྲོ་བ་ཐམས་ཅད་གནས་སྐབས་དང་མཐར་ཐུག་གི་བདེ་བ་ལ་མགྲོན་དུ་བོས་པ་ཡིན་པས་དགའ་བར་གྱིས་ཤིག་སྙམ་པས་སླར་ཡང་མཉམ་དུ་གསུངས། བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །ཞེས་བརྗོད་དོ། །གཉིས་པ་གཏང་རག་འབུལ་བ་ནི། དེ་ལྟར་བྱང་ཆུབ་ཀྱི་སེམས་སྐྱེས་པ་དེ་བླ་མ་དང་དཀོན་མཆོག་གི་བཀའ་དྲིན་ཡིན་པས་བཀའ་དྲིན་རྗེས་སུ་དྲན་པས་བླ་མ་དང་དཀོན་མཆོག་ལ་ཕྱག་དང་མཆོད་པ་རྒྱས་བསྡུས་ཅི་རིགས་པ་དང་བློས་དབུལ་བ་རྣམས་བྱས་ནས། གཏོར་མ་གསུམ་གྱི། དང་པོ་བླ་མ་དཀོན་མཆོག གཉིས་པ་ཆོས་སྐྱོང་སྲུང་མ། གསུམ་པ་གནས་དང་གཞི་ཡི་བདག་པོ་རྣམས་ལ་ཕུལ་ནས་འདོད་པའི་དོན་ལ་གསོལ་བ་གདབ་པར་བྱ་ཞེས་གསུངས་ལ། འདིའི་མཚམས་ནས་གཏོར་མ་འབུལ་རྒྱུ་ལ་ཐུག་སོང་། ཨོཾ་སྭ་བྷཱ་ཝ་ཤུདྡྷོ་སརྦ་དྷརྨ་སྭ་བྷཱ་ཝ་ཤུདྡྷོ྅་ཧཾ༔ སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་དུ་ཨོཾ་ཨཱཿ ཧཱུྃ་འོད་དུ་ཞུ་བ་ལས་བྱུང་བའི་ལྷ་རྫས་འདོད་ཡོན་གྱི་ཕུང་པོ་ཟད་མི་ཤེས་པར་གྱུར། ཨོཾ་ཨཱཿ ཧཱུྃ༔ ལན་གསུམ། ན་མཿ སརྦ་བུདྡྷ་བོ་དྷི་ས་ཏྭ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཧེ་ཧེ་བྷ་ག་ཝ་ཏེ་མ་ཧཱ་ས་ཏྭ་སརྦ་བུདྡྷ་ཨ་ཝ་ལོ་ཀི་ཏེ། མ་བི་ལཾ་བ། མ་བི་ལཾ་བ། ཨེ་དཾ་བ་ལིཾ་ཏ་གྲྀཧྞ་པ་ཡ་གྲྀཧྞ་པ་ཡ་ཧཱུྃ་ཧཱུྃ་ཛ་ཛ་སརྦ་བི་སཉྩ་རེ་སྭཱ་ཧཱ། ལན་གསུམ། ཨོཾ་ཨཱཿཧཱུྃ། ཨོཾ་གུ་རུ་བཛྲ་ནེེ་ཝི་ཏྱ་ཨཱཿ ཧཱུྃ། ཨོཾ་སརྦ་བུདྡྷ་བོ་དྷི་སཏྭ་བྷྱོ་བཛྲ་ནེེ་ཝི་ཏྱ་ཨཱཿཧཱུྃ། ཨོཾ་ཀ་མ་དེ་ཝ་མཎྜལ་བཛྲ་ནེེ་ཝི་ཏྱ་ཨཱཿཧཱུྃ། ཨོཾ་བཛྲ་མཉྫི་ཤྲཱི་བཛྲ་ནེེ་ཝི་ཏྱ་ཨཱཿཧཱུྃ། དཀོན་མཆོག་གསུམ་པོ་བླ་མ་ཡི་དམ་དཀྱིལ་འཁོར་གྱི་ལྷ་ཚོགས་བྱང་ཆུབ་སེམས་དཔའི་ཚོགས་དང་བཅས་པ་རྣམས་ལ་འབུལ་ལོ། །དཀོན་མཆོག་གསུམ་གྱིས་བདག་ལ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མ་ལུས་པ་བསྩལ་དུ་གསོལ། ད་གཏོར་མ་གཉིས་པ་སྟེ། རཾ་ཡཾ་ཁཾ། ཨོཾ་ཨཱཿཧཱུྃ། ན་མཿསརྦ་ཏ་ཐཱ་ག་ཏ་བྷྱོ་བྷི་ཤྭ་མུ་ཁེ་བྷྱ། སརྦ་ཏརྑཾ་ཨུཏྒ་ཏེ་སྥ་ར་ཎ་ཨེ་མཾ་ག་ག་ཎ་ཁཾ་སྭཱ་ཧཱ། ལན་གསུམ། ཨོཾ་ཤྲཱི་དྷརྨ་པཱ་ལ་བཛྲ་ནེེ་ཝི་ཏྱ་ཨཱཿཧཱུྃ། རྡོ་རྗེའི་ཆོས་སྐྱོང་བའི་སྲུང་མ་འཁོར་དང་བཅས་པ་རྣམས་ལ་འབུལ་ལོ། །བདག་གིས་བཅོལ་བའི་འཕྲིན་ལས་ཐམས་ཅད་ཐོགས་མེད་དུ་འགྲུབ་པར་མཛད་དུ་གསོལ། གང་ཞིག་ཡིད་ལ་དྲན་པ་ཙམ་གྱིས་ཀྱང་། །འདོད་པའི་དངོས་གྲུབ་སྟེར་བ་མཛད་པ་ཡི། །ཆོས་སྐྱོང་ཡིད་བཞིན་ནོར་བུ་ཁྱེད་རྣམས་ཀྱིས། །བདག་གི་བསམ་དོན་མ་ལུས་འགྲུབ་པར་མཛོད། །ད་གཏོར་མ་གསུམ་པ་སྟེ། ཨོཾ་ཨཱ་ཀཱ་རོ་མུ་ཁཾ་སརྦ་དྷརྨ་ནཱཾ་ཨཱདྱ་ནུཏྤནྣ་ཏྭ་ཏ་ཨོཾ་ཨཱཿཧཱུྃ་ཕཊ་སྭཱ་ཧཱ། ལན་གསུམ། གནས་དང་གཞི་ཡི་བདག་པོ་གཉུག་མར་གནས་པ་རྣམས་ལ་འབུལ་ལོ། །གནས་མགྲོན་གྱི་དམ་ཚིག་སྲུང་པ་དང་འགོ་ཞིང་སྡོང་གྲོགས་གཉེན་པོ་མཛད་དུ་གསོལ། མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛོད། །དུས་མིིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །དགེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་མཛོད། །དེ་ཡིས་བླ་མ་དཀོན་མཆོག་ཆོས་སྐྱོང་སྲུང་མ་གནས་གཞིའི་བདག་པོ་ཐམས་ཅད་ལ་གཏང་རག་གི་གཏོར་མ་ཕུལ་ནས་འདོད་པའི་དོན་ལ་གསོལ་བ་བཏབ་པ་ཡིན། རྩ་བའི་ས་བཅད་གཉིས་པ་དེ་གང་ཡིན་ན། བར་དུ་མི་ཉམས་པ་སྲུང་བའི་ཚུལ་ལ། བསླབ་བྱ་ངོས་བཟུང་བ་དང་། དེ་ཉིད་སྲུང་ཚུལ་གྱི་འགག་བསྡུ་བའོ། །སྨོན་འཇུག་སྟབས་གཅིག་ཏུ་ཚང་མ་བཏོན་སོང་ན་དེ་ཡང་ཕན་ཡོན་ཆེན་པོ་ཡོད་པ་ཡིན་པས། དང་པོ་སྨོན་འཇུག་སྤྱིའི་བསླབ་བྱ་དང་། བྱེ་བྲག་སོ་སོའི་བསླབ་བྱའོ། །དང་པོ་སྤྱིའི་བསླབ་བྱ་ལ། བསྒྲུབ་པར་བྱ་བའི་ཆོས་གསུམ་དང་། ཤེས་པར་བྱ་བའི་ཆོས་བཞི་ལས། དང་པོ་བསྒྲུབ་པར་བྱ་བའི་ཆོས་གསུམ་ནི། དགེ་བའི་བཤེས་གཉེན་ལ་བསྟེན་ཅིང་དེ་ལ་འདུན་པ་དང་། དཀོན་མཆོག་གསུམ་གྱི་གདུང་རྒྱུན་མི་གཅོད་པ་དང་། སེམས་ཅན་བློས་མི་འདོར་པའོ། །དེར་མ་ཟད་བྱང་ཆུབ་དུ་སེམས་བསྐྱེད་ནས་དེ་མི་ཉམས་པ་སྲུང་བ་དང་། བྱང་ཆུབ་སེམས་དཔའི་སྡེ་སྣོད་ཀློག་པ་དང་། རྒྱུན་དུ་བག་ཡོད་བསྟེན་པའོ། །གཉིས་པ་ཤེས་པར་བྱ་བའི་ཆོས་བཞི་ནི། ལྟུང་བ་དང་། ལྟུང་བ་མེད་པ་དང་། ལྟུང་བའི་གཟུགས་བརྙན་དང་། ལྟུང་མེད་ཀྱི་གཟུགས་བརྙན་རྣམས་ལེགས་པར་ཤེས་པ་བྱའོ། །མདོར་ན་བྱང་ཆུབ་སེམས་དཔའི་བསྒྲུབ་པའི་བསླབ་བྱ་བསམ་གྱིས་མི་ཁྱབ་ཀྱང་བསྡུ་ན་གསུམ་ཡིན་ཏེ། སངས་རྒྱས་ཀྱི་ཆོས་རྣམས་ཡོངས་སུ་རྫོགས་པར་བྱ་བ་དང་། སེམས་ཅན་ཡོངས་སུ་སྨིན་པར་བྱ་བ་དང་། སངས་རྒྱས་ཀྱི་ཞིང་ཡོངས་སུ་དག་པར་བྱ་བའོ། །གཉིས་པ་བྱེ་བྲག་གི་བསླབ་བྱ་ལ་སྨོན་པ་དང་འཇུག་པའི་བསླབ་བྱ་གཉིས་ལས། དང་པོ་སྨོན་པའི་བསླབ་བྱ་ནི། སྐྱེས་བུ་དམ་པའི་སྨོན་པ་གསུམ་དང་། སྤང་བྱ་ནག་པོའི་ཆོས་བཞི་དང་། བསྒྲུབ་བྱ་དཀར་པོའི་ཆོས་བཞི་ལ་བསླབ་པའོ། །དང་པོ་སྐྱེས་བུ་དམ་པའི་སྨོན་པ་གསུམ་ནི། སེམས་ཅན་གྱི་དོན་དུ་རྫོགས་བྱང་འཐོབ་པར་བྱའོ་སྙམ་པ་འབྲས་བུ་ལ་སྨོན་པ་དང་། ས་དང་ལམ་ཐམས་ཅད་བསླབ་པར་བྱའོ་སྙམ་པ་ཐབས་ལ་སྨོན་པ། སེམས་ཅན་ཐམས་ཅད་ཀྱི་རེ་བ་བསྐོང་བར་བྱའོ་སྙམ་པ་འཕྲིན་ལས་ལ་སྨོན་པའོ། །གཉིས་པ་སྤང་བྱ་ནག་པོའི་ཆོས་བཞི་ནི། བླ་མ་དང་སྦྱིན་གནས་བསླུ་བ་དང་། ཐེག་པ་ཆེན་པོའི་གང་ཟག་ལ་མི་བསྔགས་པ་བརྗོད་པ་དང་། སེམས་ཅན་ལ་གཡོ་སྒྱུ་བྱེད་པ་དང་། འགྱོད་པའི་གནས་མ་ཡིན་པ་ལ་འགྱོད་པ་བསྐྱེད་པ་སྟེ་ནག་པོའི་ཆོས་བཞི་བོ་དེ་སྤང་བ་ལ་ནན་ཏན་དུ་བྱའོ། །གསུམ་པ་བསྒྲུབ་བྱ་དཀར་བོའི་ཆོས་བཞི་ལ་བསླབ་པ་ནི། སྲོག་གི་ཕྱིར་ཡང་ཤེས་བཞིན་དུ་རྫུན་མི་སྨྲ་བ་དང་། བྱང་ཆུབ་སེམས་དཔའ་རྣམས་ལ་སྟོན་པའི་འདུ་ཤེས་བསྐྱེད་ཅིང་དེ་དག་གི་ཡོན་ཏན་གྱི་བསྔགས་པ་བརྗོད་པ་དང་། གཡོ་སྒྱུ་སྤངས་ཏེ་ལྷག་པའི་བསམ་པས་གནས་པ་དང་། གདུལ་བར་བྱ་བའི་སེམས་ཅན་ཐམས་ཅད་ཐེག་པ་ཆེན་པོའི་དགེ་བ་ལ་འགོད་པ་སྟེ། དེ་ལྟར་དཀར་པོའི་ཆོས་བཞི་བོ་དེ་ལ་བསླབས་པས་ནི་ནག་པོའི་ཆོས་བཞི་བོ་དེ་ཡང་ཤུགས་ལ་ཁེགས་པ་ཡིན་ནོ། །གཉིས་པ་འཇུག་པའི་བསླབ་བྱ་ལ། སྤང་བྱ་དང་། བསྒྲུབ་བྱ་གཉིས། དང་པོ་ལ་རྩ་བའི་ལྟུང་བ་དང་། ཡན་ལག་གི་ལྟུང་བའོ། །དང་པོ་ལ། བྱང་སེམས་རྒྱལ་པོ་ལ་འབྱུང་ཉེ་བ་ལྔ་དང་། བློན་པོ་ལ་འབྱུང་ཉེ་བ་ལྔ། ལས་དང་པོ་པ་ལ་འབྱུང་ཉེ་བ་བརྒྱད། ཐུན་མོང་དུ་སྨོན་སེམས་ལྟུང་བའོ། །ལྟུང་བ་དེ་དག་འབྱུང་བའི་རྟེན་བྱང་སེམས་ཀྱི་སྡོམ་ལྡན་སྨྱོ་བ་དང་སེམས་འཁྲུགས་པ་དང་ཚོར་བས་གཟིིར་བ་སོགས་མ་ཡིན་པ་ཞིག་དགོས་ཏེ། སྨྱོ་བ་སོགས་ཀྱི་རྟེན་ལ་རྩ་ལྟུང་གང་ཡང་མི་འབྱུང་ཞིང་། འདི་དག་ལ་ཀུན་སློང་ཉོན་མོངས་མི་དགོས་ཏེ། བྱ་བ་འོས་པ་དང་མི་འོས་པ་དག་གི་འཇུག་ལྡོག་ལོག་པ་ལས་ལྟུང་བ་འགྱུར་བའི་ཕྱིར་རོ། །དེ་ལས་དང་པོ་རྒྱལ་པོ་ལ་འབྱུང་ཉེ་བ་ལྔ་ནི། དཀོན་མཆོག་གསུམ་གྱི་དཀོར་འཕྲོག་པའམ་རྐུ་བ་དང་། དམ་པའི་ཆོས་སྤོང་བའམ་སྤོང་དུ་འཇུག་པ། དགེ་སློང་རབ་ཏུ་བྱུང་བ་ལ་ཡོ་བྱད་འཕྲོག་པ་སོགས་ཀྱི་སྒོ་ནས་གནོད་པར་བྱེད་པ་དང་། མཚམས་མེད་པའི་ལས་ལྔ་བོ་དག་ལས་གང་ཡང་རུང་བ་བྱས་པ། ལོག་ལྟས་རང་མི་དགེ་བ་བཅུ་ལ་སྤྱོད་ཅིང་གཞན་ཡང་དེ་ལ་འགོད་པ་དང་ལྔ་ཡིན་ཏེ། ནམ་མཁའི་སྙིང་པོའི་མདོར་གསུངས་པའི་དོན་བསླབ་བཏུས་ལས། དཀོན་མཆོག་གསུམ་གྱི་དཀོར་འཕྲོག་པ། །ཕས་ཕམ་པ་ཡི་ལྟུང་བར་འདོད། །དམ་པའི་ཆོས་ནི་སྤོང་བྱེད་པ། །གཉིས་པར་རྒྱལ་བས་གསུངས་པ་ཡིན། །ཚུལ་ཁྲིམས་འཆལ་བའི་དགེ་སློང་ལའང་། །ངུར་སྨྲིག་འཕྲོག་དང་རྡེག་པ་དང་། །བཙོན་རར་གཞུག་པར་བྱེད་པ་དང་། །རབ་ཏུ་བྱུང་ལས་འབེབས་པ་དང་། །སྲོག་འབྲལ་བྱེད་པ་གསུམ་པ་ཡིན། །མཚམས་མེད་ལྔ་པོ་བྱེད་པ་དང་། །ལོག་པར་ལྟ་བ་འཛིན་པ་དང་། །ཞེས་གསུངས་ཤིང་། དགེ་འདུན་ལས་འཕྲོག་པ་ནི་རྩ་ལྟུང་དང་པོར་འདུས་པས་གསུམ་པར་དགེ་སློང་ཞེས་བཀར་ཏེ་གསུངས་པའོ། །བློན་པོ་ལ་འབྱུང་ཉེ་བའི་ལྟུང་བ་ལྔ་ནི། སྔ་མ་བཞི་ཐུན་མོང་བ་དང། ལོག་ལྟ་འཛིན་པའི་ཚབ་ལ་གྲོང་ངམ་གྲོང་ཁྱེར་སོགས་འཇོམས་པར་བྱེད་པ་རྣམས་སྔར་ལྟར་གཅིག་ཏུ་བགྲང་བས་ལྔ་ཡིན་ཏེ། གྲོང་ལ་སོགས་པ་འཇིག་པ་ཡང་། །རྩ་བའི་ལྟུང་བ་རྒྱལ་བས་གསུངས། །ཞེས་སོ། །ལས་དང་པོ་པ་ལ་འབྱུང་བར་ཉེ་བ་བརྒྱད་ནི། དང་པོ་རིམ་གྱིས་ཐེག་ཆེན་ལ་བློ་མ་སྦྱངས་པ་ལ་སྟོང་བ་ཉིད་བསྟན་པས་སྐྲག་ནས་དེའི་བྱང་སེམས་ཉམས་པར་བྱེད་པ་དང་། གཉིས་པ་རྫོགས་བྱང་སྒྲུབ་པའི་བསམ་སྦྱོར་ལ་ཞུགས་པ་ལས་ཕྱིར་ལྡོག་པར་བྱེད་པ་དང་། གསུམ་པ་ཉན་ཐོས་ཀྱི་རིགས་ཅན་སོ་སོར་ཐར་བ་ལ་སློབ་པ་དག་ལ་དགོས་པ་ཁྱད་པར་ཅན་མེད་པར་དེ་སྤངས་ནས་ཐེག་ཆེན་ལ་སྦྱོར་བ་དང་། བཞི་བ་ཉན་ཐོས་ཀྱི་ཐེག་པས་ཉོན་མོངས་སྤོང་མི་ནུས་པར་རང་ཉིད་འཛིན་ཅིང་གཞན་ཡང་འཛིན་དུ་བཅུག་ནས་དེའི་བཤད་ཉན་འགོག་པ་དང་། ལྔ་བ་རྙེད་བཀུར་གྱི་ཕྱིར་རྙེད་བཀུར་ཅན་གཞན་ལ་ཕྲག་དོག་གིས་བདག་ལ་བསྟོད་ཅིང་གཞན་ལ་སྨོད་པ་དང་། དྲུག་པ་སྟོང་ཉིད་མ་རྟོགས་ཀྱང་རྟོགས་སོ་ཞེས་མི་ཆོས་བླ་མའི་རྫུན་སྨྲས་པ་དང་། བདུན་པ་དགེ་སྦྱོང་དང་རྒྱལ་རིགས་ཕྱེས་ནས་དགེ་སྦྱོང་ལ་ནོར་གྱི་ཆད་པ་གཅོད་དུ་འཇུག་པ་དང་འབྲེལ་བའི་ལྟུང་བ་དང་། བརྒྱད་པ་ཆོས་ལྡན་གྱིས་དགེ་སྦྱོང་ལ་གནོད་པའི་ཁྲིམས་ངན་བཅས་ཏེ་ཞི་གནས་ཀྱིས་མཚོན་པའི་རྣལ་འབྱོར་འདོར་བ་བྱེད་པ་དང་། དགེ་སློང་ཡང་དག་འཇོག་གི་ནོར་འཕྲོག་ནས་ཁ་ཏོན་པ་ལ་སྟེར་བ་རྣམས་ཏེ། བློ་སྦྱོང་མ་བྱས་སེམས་ཅན་ལ་། །སྟོང་བ་ཉིད་ནི་བརྗོད་པ་དང་། །ཞེས་པ་ནས། དེ་དག་རྩ་བའི་ལྟུང་བ་སྟེ། །སེམས་ཅན་དམྱལ་བ་ཆེན་པོའི་རྒྱུ། །ཞེས་པའི་བར་ཤོ་ལོ་ཀ་ལྔ་དང་རྐང་པ་གཉིས་ཀྱིས་བསྟན་པ་རྣམས་སོ། །དེ་ལྟར་ན་རྟེན་གྱི་སྒོ་ནས་བཅོ་བརྒྱད་དུ་གསུངས་ཀྱང་རྫས་ཀྱི་སྒོ་ནས་བཅུ་བཞིར་ངེས་པའོ། །ཐུན་མོང་དུ་སྨོན་སེམས་བཏང་བ་ནི། རང་དོན་དུ་ཞི་བདེ་དོན་གཉེར་གྱི་བློ་སྐྱེས་ན་ལྟུང་བའི་ནང་ནས་ལྕི་ཤོས་ཡིན་ཏེ། སྡུད་པ་ལས། གལ་ཏེ་བསྐལ་བ་བྱེ་བར་དགེ་བའི་ལས་ལམ་བཅུ། །སྤྱོད་ཀྱང་རང་རྒྱལ་དགྲ་བཅོམ་ཉིད་ལ་འདོད་བསྐྱེད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་བས་ཀྱང་ཤིན་ཏུ་ལྕི། །ཞེས་གསུངས་པས་བཅུ་དགུ་དང་། དེའི་སྟེང་དུ་དཀོན་བརྩེགས་ལས་འཇུག་སེམས་སྤངས་ཏེ་དགེ་ལ་མི་སྦྱོར་བ་དང་ཉི་ཤུ་ཡིན་ནོ་ཞེས་ཀྱང་འབྱུང་ངོ། །གཉིས་པ་ཡན་ལག་གི་ལྟུང་བ་ནི། རྩ་བར་མ་གཏོགས་པའི་ལུས་དང་ངག་དང་ཡིད་ཀྱི་བསླབ་བྱ་ལས་ཉམས་པ་རྣམས་ཏེ། དང་པོ་ལུས་ཀྱི་བསླབ་བྱ་ལས་ཉམས་པ་ནི། མིག་ཕབ་སྟེ་ལྟ་བར་བྱ་བ་སོགས་བསྒྲུབ་བྱ་དང་། དོན་མེད་རྒྱུག་མཆོང་སོགས་དགག་བྱ་ལས་ཉམས་པའོ། །གཉིས་པ་ངག་གི་བསླབ་བྱ་ལས་ཉམས་པ་ནི། ལེགས་པར་འོངས་སོ་ཞེས་བྱ་བ་སོགས་བསྒྲུབ་བྱ་དང་། བྲེ་མོའི་གཏམ་སྨྲ་བ་སོགས་དགག་བྱ་ལས་ཉམས་པའོ། །གསུམ་པ་ཡིད་ཀྱི་བསླབ་བྱ་ལས་ཉམས་པ་ནི། བྱམས་སྙིང་རྗེ་དང་དྲན་ཤེས་བག་ཡོད་བསྟེན་པ་སོགས་བསྒྲུབ་བྱ་དང་། ཆགས་སྡང་མི་སྤང་བ་སོགས་དགག་བྱ་ལས་ཉམས་པ་སྟེ་དབང་པོ་འབྲིང་རྟུལ་གྱི་ཡན་ལག་གི་ཉེས་པ་རྣམས་ཀྱང་དེ་དག་ཏུ་འདུ་བར་བཤད་དོ། །དེ་ཡང་རྩ་ལྟུང་རྣམས་ལ་ཀུན་སློང་ཉོན་མོངས་དྲག་ཞན་སོགས་ཀྱི་དབྱེ་བ་མེད་ཀྱང་རྩ་ལྟུང་དེ་དག་བྱས་ནས་ཐུན་ཚོད་ལས་འདས་ན་འཇུག་པ་སེམས་བསྐྱེད་ཀྱི་སྡོམ་པ་ནི་ལྟུང་ལ། སྨོན་པ་སེམས་བསྐྱེད་ཀྱི་སྡོམ་པ་ནི་ཇི་སྲིད་རྫོགས་བྱང་ལས་བློ་མ་ལོག་པ་དེ་སྲིད་དུ་མི་གཏོང་ངོ་། །དེས་ན་སྨོན་སེམས་བཏང་བ་རྩ་ལྟུང་དང་སྡོམ་པའི་གཏོང་རྒྱུ་གཉིས་ཀར་འདོད་པ་དབུ་མ་པའི་ལུགས་སོ། །རྩ་ལྟུང་བྱུང་ཡང་ཐུན་ཚོད་ལས་མ་འདས་གོང་དུ་འགྱོད་པ་སྐྱེས་ན་སྡོམ་པ་མི་གཏོང་ལ། ཐུན་ཚོད་ནི་ཉིན་ཞག་གཅིག་གི་དྲུག་ཆའི་མཐའོ། །ཉེས་བྱས་ནི་ཉིན་ཞག་གཅིག་འདས་ན་ལྟུང་བར་འགྱུར་རོ། །གཉིས་པ་བསྒྲུབ་པའི་བསླབ་བྱ་ནི། ཇི་སྐད་བཤད་པའི་ལྟུང་བ་རྣམས་སྤོང་བའི་སེམས་པ་ས་བོན་དང་བཅས་པ་ནི་ཉེས་སྤྱོད་སྡོམ་པའི་ཚུལ་ཁྲིམས་དང་། ཕ་རོལ་ཏུ་ཕྱིན་པ་དྲུག་གིས་བསྡུས་པའི་དགེ་ཚོགས་སྒྲུབ་པ་ལ་བསླབ་པ་ནི་དགེ་བ་ཆོས་སྡུད་ཀྱི་ཚུལ་ཁྲིམས་དང་། སེམས་ཅན་རྣམས་ཀྱི་གནས་སྐབས་དང་མཐར་ཐུག་གི་ཕན་བདེ་སྒྲུབ་པར་འདོད་པའི་སེམས་པ་ས་བོན་དང་བཅས་པ་ནི་སེམས་ཅན་དོན་བྱེད་ཀྱི་ཚུལ་ཁྲིམས་ཏེ་ཚུལ་ཁྲིམས་གསུམ་པོ་དེ་ལ་ནན་ཏན་དུ་བསླབ་པར་བྱ་སྟེ། ཡུམ་བར་མ་ལས། གང་ཁ་ན་མ་ཐོ་བ་སྡོམ་པའི་སེམས་དང་། དགེ་བའི་ཆོས་སྡུད་པའི་སེམས་དང་། སེམས་ཅན་སྨིན་པར་བྱེད་པའི་སེམས་ཏེ། སེམས་བསྐྱེད་པ་འདི་གསུམ་ལ་ནན་ཏན་དུ་བྱའོ། །ཞེས་དང་། བྱང་ས་ལས། བྱང་ཆུབ་སེམས་དཔའི་ཚུལ་ཁྲིམས་ཐམས་ཅད་ནི་གསུམ་པོ་འདི་དག་ཙམ་ཁོ་ནར་ཟད་དེ། ཞེས་བྱང་སེམས་ཀྱི་བསླབ་བྱ་ཐམས་ཅད་དེ་གསུམ་དུ་འདུས་པས། དེའི་སྤང་བྱ་རྣམས་སྤོང་ཞིང་། བསྒྲུབ་བྱ་རྣམས་ལ་རྩེ་གཅིག་ཏུ་བསླབ་པར་བྱའོ། །གཉིས་པ་དེ་ཉིད་བསྲུང་བ་ལ། ཉེས་དམིགས་བསམ་པ་དང་། བསྲུང་ཚུལ་དངོས་སོ། །དང་པོ་ལ་ཁས་བླངས་ཉམས་པ། མིང་དོན་ཤོར་བ། ངན་སོང་དུ་ལྟུང་བའོ། །དང་པོ་ནི། སྟོན་པ་སངས་རྒྱས་བསླུས་པས་སངས་རྒྱས་མི་མཉེས། ཡུལ་སེམས་ཅན་བསླུས་པས་སེམས་ཅན་མི་མགུ། །རང་ཆེད་དུ་བསླུས་པས་རང་དོན་ཉམས་ཤིང་ལྷ་དང་བཅས་པའི་འཇིག་རྟེན་གྱིས་སྨད་པ་སྟེ། བློ་གྲོས་རྒྱ་མཚོའི་མདོར། བྱང་ཆུབ་སེམས་དཔའ་དེ་ལྟར་སེམས་བསྐྱེད་ནས་ཇི་སྐད་སྨྲས་པ་བཞིན་མི་བྱེད་ན་ལྷ་དང་བཅས་པའི་འཇིག་རྟེན་བསླུས་པ་ཡིན་ནོ། །ཞེས་སོགས་གསུངས་པ་དང་། གཉིས་པ་ནི། རྒྱལ་པོ་རྒྱལ་སྲིད་ཤོར་བ་ལྟར་ཚེ་འདིར་བཀྲ་མི་ཤིས་པ་སྣ་ཚོགས་འབྱུང་ཞིང་། འཆི་ཁར་མྱ་ངན་གྱིས་གདུང་བར་མདོ་ལས་གསུངས་སོ། །གསུམ་པ་ནི། ཕྱི་མར་ངན་སོང་དུ་འགྲོ་ཞིང་དེ་ལས་ཀྱང་ཐར་བར་དཀའ་བ་དང་། རྩ་ལྟུང་གི་ཉེས་པས་ནི་སྔོན་དུ་བསྐྱེད་པའི་བྱང་སེམས་ཀྱི་དགེ་རྩ་ཐམས་ཅད་འཇིག་པ་དང་། དཀོན་མཆོག་ལྷ་དང་བཅས་པ་བསླུས་པས་སྤྱིར་ངན་འགྲོ་དང་། ཁྱད་པར་དམྱལ་བར་སྐྱེ་བར་གསུངས་ཏེ། སེམས་ཅན་དམྱལ་བ་ཆེན་པོའི་རྒྱུ། །ཞེས་གསུངས་པ་ལྟར་རོ། །གཉིས་པ་ནི། དེ་ལྟ་བུའི་ཉེས་དམིགས་ཅན་གྱི་ལྟུང་བ་དེ་འབྱུང་བའི་རྒྱུ་ནི། མི་ཤེས་པ་དང་། བག་མེད་པ་དང་། ཉོན་མོངས་པ་མང་བ་དང་། མ་གུས་པའོ། །དེ་ལ་མི་ཤེས་པ་ནི་བསླབ་པ་ལ་འབད་ཀྱང་ལྟུང་བའི་མཚན་ཉིད་མི་ཤེས་པས་ལྟུང་བ་འབྱུང་བ་སྟེ། དེའི་གཉེན་པོ་བསླབ་བྱ་རྣམས་ཉན་ནས་ཤེས་པར་བྱའོ། །བག་མེད་པ་ནི་ལྟུང་བ་ཤེས་ཀྱང་ཉེས་དམིགས་མ་མཐོང་བའམ། མཐོང་ཡང་དྲན་ཤེས་མེད་པས་ལྟུང་བ་འབྱུང་བ་སྟེ། དེའི་གཉེན་པོར་བླང་དོར་གྱི་དམིགས་རྣམ་མ་བརྗེད་པའི་དྲན་པ་དང་། སྒོ་གསུམ་ལ་སོ་སོར་བརྟག་ཅིང་ལེགས་ཉེས་གང་འཇུག་ལྡོག་ཤེས་པར་བྱེད་པའི་ཤེས་བཞིན་དང་། བདག་གམ་ཆོས་ཀྱི་དབང་དུ་བཏང་ནས་ཉེས་པ་ལ་འཛེམ་པའི་ངོ་ཚ་ཤེས་པ་དང་། གཞན་གྱིས་སྨད་དུ་འོང་སྙམ་ནས་འཛེམ་པའི་ཁྲེལ་ཡོད་དང་། ཉེས་སྤྱོད་ཀྱི་རྣམ་སྨིན་ལ་འཇིགས་ནས་བག་ཡོད་ལ་བསླབ་པར་བྱའོ། །ཉོན་མོངས་པ་མང་བ་ནི་འཛེམ་བག་ཅུང་ཟད་སྐྱེས་ཀྱང་དུག་གསུམ་ཤས་ཆེ་བས་ཉོན་མོངས་པ་ལས་ལྟུང་བ་འབྱུང་བ་སྟེ། དེའི་གཉེན་པོ་རང་རྒྱུད་ལ་བརྟགས་ཏེ་ཉོན་མོངས་གང་ཤས་ཆེ་བ་ལ་གཉེན་པོ་འབད་ནས་བརྟེན་ཅིང་འདི་ཙམ་འགལ་ཡང་ཉེས་པ་ཆུང་ངོ་སྙམ་པའི་བག་ཡངས་ཀྱི་ཚོད་ཡོད་མི་བྱའོ། །མ་གུས་པ་ནི། ལྟུང་བ་ཤེས་ཀྱང་དམན་པ་ལ་མོས་ནས་བསླབ་པ་ལ་མི་འཇུག་པས་ལྟུང་བ་འབྱུང་བ་སྟེ། དེའི་གཉེན་པོར་སྟོན་པ་དང་། དེའི་བཅས་པ་རྣམས་ལ་གུས་པར་བྱའོ། །དེ་ཡང་མི་ཤེས་པ་དང་། བག་མེད་པས་ལྟུང་བ་ཆུང་ངུ་། ཉོན་མོངས་པ་མང་བ་ལ་འབྲིང་། མ་གུས་པ་ལ་ཆེན་པོ་འབྱུང་ཞིང་། ཞིང་བསམ་གྱི་ཁྱད་པར་གྱིས་ཅི་རིགས་པར་འགྱུར་བའང་ཡོད་དོ། །དེས་ན་བླང་དོར་གྱི་གནས་རྣམས་ལ་སྲོག་བསྡོས་བྱས་ནས་བསླབ་པ་ལ་ནན་ཏན་དུ་བྱ་སྟེ། ཏིང་འཛིན་རྒྱལ་པོ་ལས། ཁྱིམ་པ་སྐྱ་བོའི་གོས་གྱོན་ལ། །ངས་ནི་བསླབ་པ་གང་བཤད་པ། །དེ་ཚེ་དགེ་སློང་དེ་དག་ལ། །བསླབ་པ་དེ་ཡང་མེད་པར་འགྱུར། །ཞེས་དགེ་བསྙེན་ལ་གསུངས་པའི་བསླབ་གཞི་ལྔ་བོ་དགེ་སློང་གིས་ཀྱང་བསྲུང་བ་མེད་པའི་དུས་འདིར་བསླབ་པ་ལ་བརྩོན་པ་ནི་འབྲས་བུ་ལྷག་པར་ཡང་ཆེ་བ་སྟེ། དེ་ཉིད་ལས། གང་གིས་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགག་པར་འགྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །བསོད་ནམས་འདི་ནི་དེ་བས་ཁྱད་པར་འཕགས། །ཞེས་གསུངས་སོ། །གསུམ་པ་ཉམས་པ་ཕྱིར་བཅོས་པ་ལ། ཉེས་པ་བཤགས་པའི་ཚུལ་དང་། སྡོམ་པ་བཏང་ནས་སླར་བླང་བའི་ཚུལ་ལོ། །དང་པོ་ལ་ཐེག་ཆེན་སྤྱིའི་ལུགས་དང་། དབུ་མ་རང་ལུགས་ཀྱི་བཤགས་པའོ། །དང་པོ་ནི། བཤགས་བྱའི་ཡུལ་ལྟུང་བས་མ་གོས་པའི་བྱང་སེམས་སམ། རྟེན་གྱི་དྲུང་དུ་སྔར་བྱས་ཀྱི་ཉེས་པ་ལ་འགྱོད་སེམས་དང་། ཕྱིན་ཆད་མི་བྱ་བའི་སྡོམ་སེམས་དང་ལྡན་པའི་སྒོ་ནས་བཏུད་དེ། དགོངས་གསོལ་བྱས་ནས། བདག་བྱང་ཆུབ་སེམས་དཔའ་འདི་ཞེས་བགྱི་བ་ལ་ཉེས་པ་འདི་ལྟ་བུ་ཞིག་བྱུང་སྟེ། བདག་བྱང་ཆུབ་སེམས་དཔའ་མིང་འདི་ཞེས་བགྱི་བའི་ཉེས་པ་དེ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་མཐོལ་ཞིང་བཤགས་སོ། །མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་དེ་ལྟར་མི་འགྱུར་རོ། །ཞེས་ལན་གསུམ་དང་ཐབས་ལེགས་བྱའོ། །གཉིས་པ་ནི། ངན་སོང་དུ་ལྟུང་བས་འཇིགས་ཏེ་འགྱོད་པ་ཆེན་པོས་འཕགས་པ་ནམ་མཁའི་སྙིང་པོ་མཐོང་བར་ནུས་ན་དེ་ལ་དངོས་སུ་བཤགས་པ་དང་། དེ་ལྟར་མི་ནུས་ན་ཐོ་རངས་ལངས་ལ་གཙང་སྦྲ་དང་ལྡན་པས་ཤར་དུ་ཕྱོགས་ཏེ་མཆོད་ཅིང་ལྷའི་བུ་སྐྱ་རེངས་ལ་ཕྲིན་གསོལ་ནས། རྨི་ལམ་དུ་དེའི་མདུན་དུ་ལྟུང་བ་བཤགས་པ་དང་། ཕྱག་བྱ་བ་དང་། གཟུངས་སྔགས་བཟླ་བ་སོགས་ཀྱི་སྒོ་ནས་འཕགས་པ་དེ་མངོན་སུམ་དུ་མཐོང་བའམ། སྡིག་པ་དག་པའི་རྟགས་མ་བྱུང་གི་བར་དུ་བཤགས་པར་བྱ་སྟེ། བསླབ་བཏུས་སུ། རྨི་ལམ་འཕགས་པ་ནམ་སྙིང་པོའི། །མདུན་དུ་འདུག་སྟེ་བཤགས་པར་བྱ། །ཞེས་དང་། སྤྱོད་འཇུག་ལས། ཉིན་དང་མཚན་མོ་ལན་གསུམ་དུ། །ཕུང་པོ་གསུམ་པ་གདོན་བྱ་ཞིང་། །རྒྱལ་དང་བྱང་ཆུབ་སེམས་བརྟེན་ནས། །ལྟུང་བའི་ལྷག་མ་དེས་ཞི་བྱ། །ཞེས་དང་། ཆོས་བཞི་བསྟན་པའི་མདོ་ལས་ཀྱང་། བྱང་ཆུབ་སེམས་དཔའི་ལྟུང་བ་ཐམས་ཅད་སྟོབས་བཞིས་འདག་པར་གསུངས་པས་སྐུ་གཟུགས་ལ་སོགས་པའི་སྤྱན་སྔར་ཅི་འབྱོར་བའི་མཆོད་པ་དང་བཅས་པས་སམ། དཀོན་མཆོག་གསུམ་ལ་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་ཡོངས་སུ་མི་གཏོང་བ་ནི་རྟེན་གྱི་སྟོབས་དང་། སྔར་བྱས་ཀྱི་ཉེས་པ་ལ་དུག་འཐུང་བ་ལྟ་བུའི་འགྱོད་པ་དྲག་པོ་སྐྱེས་པ་ནི་རྣམ་པར་སུན་འབྱིན་པའི་སྟོབས་དང་། ལྟུང་བའི་གཉེན་པོར་སྐུ་གཟུགས་བཞེངས་པ་དང་ཕྱག་མཆོད་བསྐོར་བ་བཟླས་བརྗོད་དང་ཏིང་ངེ་འཛིན་དང་སྟོང་ཉིད་སྒོམ་པ་སོགས་དགེ་བ་ལ་བརྩོན་པ་ནི་གཉེན་པོ་ཀུན་ཏུ་སྤྱོད་པའི་སྟོབས་དང་། ཕྱིན་ཆད་སྲོག་ལ་བབ་ཀྱངསྡིག་པའི་ལས་འདི་དག་མི་བྱའོ་སྙམ་དུ་དམ་བཅའ་བརྟན་པར་བྱེད་པ་ཉེས་པ་ལས་ལྡོག་པའི་སྟོབས་ཏེ་བཞི་ཡིན་ནོ། །གཉིས་པ་སྡོམ་པ་བཏང་ནས་བླང་བའི་ཚུལ་ནི། རྩ་ལྟུང་བྱུང་ནས་ཐུན་ཚོད་ལས་འདས་ན་སྡོམ་པ་བཏང་བས་ལེན་དགོས་ལ། ལེན་ཡུལ་དགེ་བའི་བཤེས་གཉེན་མ་རྙེད་ན་རྟེན་གྱི་དྲུང་དུ་སྔར་བཞིན་བླངས་པས་སྐྱེ་བ་ཡིན་ནོ། །མདོར་ན་དབུ་མ་ལུགས་ཀྱི་བསླབ་བྱ་ནི། རང་གི་ལུས་ལོངས་སྤྱོད་དགེ་ཚོགས་དང་བཅས་པ་སེམས་ཅན་ཀུན་ལ་གཏང་བ་དང་། དེ་དག་མི་ཉམས་པར་བསྲུང་བ་དང་། དྲི་མ་དག་པར་བྱ་བ་དང་། གོང་ནས་གོང་དུ་སྤེལ་བར་བྱ་བ་རྣམས་ཡིན་ཏེ། བསླབ་བཏུས་ལས། གང་གིས་ལྟུང་བར་མི་འགྱུར་བའི། །གནད་ཀྱི་གནད་རྣམས་འདི་རིགས་བྱ། །གནད་ཀྱི་གནད་དེ་གང་ཞེ་ན། །བདག་གི་ལུས་དང་ལོངས་སྤྱོད་དང་། །དགེ་བ་དུས་གསུམ་སྐྱེས་པ་རྣམས། །སེམས་ཅན་རྣམས་ལ་གཏང་བ་དང་། །དེ་བསྲུང་དགེ་བ་སྤེལ་བའོ། །ཞེས་དང་། དེ་ཐམས་ཅད་ཀྱི་རྩ་བ་ཡང་སེམས་བསྲུང་བ་ལ་ཐུག་སྟེ། སྤྱོད་འཇུག་ལས། བསླབ་པར་བསྲུང་བར་འདོད་པ་ཡིས། །རབ་ཏུ་བསྒྲིམས་ནས་སེམས་བསྲུང་སྟེ། །ཞེས་གསུངས་ཤིང་། སེམས་བསྲུང་བའི་ཐབས་ཀྱང་དེ་ཉིད་ལས། སེམས་བསྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དག །སྲོག་ལ་བབ་ཀྱང་སྲུངས་ཤིག་ཅེས། །དེ་ལྟར་བདག་ནི་ཐལ་མོ་སྦྱོར། །ཞེས་དང་། རྔ་སྒྲའི་ཚིགས་བཅད་ལས་ཀྱང་། བདག་གི་ནོར་ནི་གཏང་ལ་ལུས་བསྲུང་ངོ་། །ནོར་དང་ལུས་ཀྱང་གཏང་ལ་སྲོག་བསྲུང་ངོ་། །ནོར་དང་ལུས་དང་དེ་བཞིན་སྲོག་རྣམས་ཀྱང་། །ཐམས་ཅད་གཏང་ལ་འདིར་ནི་ཆོས་བསྲུང་ངོ་། །ཞེས་གསུངས་པ་ལྟར་བསླབ་པ་ལ་འབད་པར་བྱའོ། །བཞི་བ་རང་བཞིན་གཏན་ལ་དབབ་པ་ནི། སེམས་བསྐྱེད་ཀྱི་ངོ་བོ། དབྱེ་བ། སོ་སོའི་ས་མཚམས། སེམས་བསྐྱེད་ཀྱི་རྒྱུ། ཕན་ཡོན། ཉེས་དམིགས་རྣམས་ལས། དང་པོ་ནི། གཞན་དོན་དུ་སངས་རྒྱས་ཐོབ་པར་འདོད་པ་སྟེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་དང་། མདོ་སྡེ་རྒྱན་ལས། དོན་གཉིས་ལྡན་པའི་སེམས་འབྱུང་བ། །ཞེས་གསུངས་པ་བཞིན་ནོ། །གཉིས་པ་དབྱེ་བ་ནི། གཞན་དོན་དུ་བྱང་ཆུབ་ཐོབ་པར་འདོད་པ་སྨོན་པ་དང་། གཞན་དོན་དུ་བྱང་ཆུབ་ཏུ་འགྲོ་བཞིན་པ་འཇུག་པ་སྟེ། བསམ་པས་འགྲོ་འདོད་དང་སྦྱོར་བས་འགྲོ་བཞིན་པ་ལྟ་བུར་སྤྱོད་འཇུག་ལས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་པ་དང་། ཀུན་རྫོབ་དང་དོན་དམ་པའི་སྒོ་ནས་ཀྱང་རྣམ་པ་གཉིས་ཏེ། མྱང་འདས་ལས། ཀུན་རྫོབ་དོན་དམ་དབྱེ་བ་ཡིས། །བྱང་ཆུབ་སེམས་དེ་རྣམ་པ་གཉིས། །ཞེས་པས་ཕྱི་རོལ་སེམས་ཅན་ལ་དམིགས་ཏེ་སོ་སྐྱེ་ལ་གཙོ་བོར་སྐྱེ་བ་ཀུན་རྫོབ་སེམས་བསྐྱེད་དང་། ནང་སེམས་ཉིད་ལ་དམིགས་ཏེ་གཙོ་བོར་འཕགས་རྒྱུད་ལ་སྐྱེ་བ་དོན་དམ་སེམས་བསྐྱེད་ཡིན་ནོ། །དེས་ན་སྨོན་པ་བྱང་ཆུབ་ཀྱི་སེམས་ནི་བྱང་ཆུབ་ཏུ་སྨོན་པ་ཙམ་ལས་ཀྱང་སྐྱེ་ཞིང་། འཇུག་པའི་སེམས་བསྐྱེད་ནི་ཆོ་ག་ལས་སྐྱེས་པའི་སྡོམ་པ་ཡིན་ཏེ། དེ་གཉིས་ཀའང་ཀུན་རྫོབ་སེམས་བསྐྱེད་དུ་འདུ་ལ། དོན་དམ་སེམས་བསྐྱེད་ནི་དེའི་ཆོས་ཉིད་གོམས་པའི་སྟོབས་ལས་སོ། །གསུམ་པ་ས་མཚམས་ལ། སྨོན་སེམས་ནི། དང་པོ་སེམས་བསྐྱེད་མ་ཐག་ནས་སྡོམ་པ་མ་བཟུང་བར་གྱི་ཚོགས་ལམ་ཆུང་ངུ་ནས་ཡོད་ལ། འཇུག་སེམས་ནི། འཇུག་སྡོམ་བཟུང་ནས་རྒྱུན་མཐའ་བར་ན་ཡོད་དེ། འགྲོ་བར་འདོད་དང་འགྲོ་བ་ཡི། །ཞེས་སོགས་ཀྱིས་འགྲུབ་ཅིང་། གལ་ཏེ་འཇུག་སེམས་འཕགས་ལམ་ཁོ་ནར་ཡོད་དམ་ཞེ་ན་མ་ངེས་ཏེ། སྡོམ་པའི་རྟེན་སོ་སྐྱེའི་རྟེན་ཅན་དུ་གྲུབ་པ་དང་། གཞན་དུ་འཇུག་སྡོམ་བླངས་ནས་རྩ་ལྟུང་གཅོད་པར་མི་སྲིད་པར་འགྱུར་བའི་ཕྱིར་རོ། །བཞི་བ་སེམས་བསྐྱེད་ཀྱི་རྒྱུ་ནི། སངས་རྒྱས་ལ་དམིགས་པའི་དད་པ། སེམས་ཅན་ལ་དམིགས་པའི་སྙིང་རྗེ། བྱང་ཆུབ་སེམས་ཀྱི་ཕན་ཡོན་ཤེས་ནས་ཐོབ་པར་འདོད་པ་སྟེ་གསུམ་ལས་སྐྱེ་བར་མདོ་སྡེ་རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་པའི་གྲོགས་སྟོབས་དགེ་བའི་བཤེས་གཉེན་ལ་བརྟེན་ཅིང་ཐོས་པ་བྱས་པ་ལས་སྨོན་པ་སེམས་བསྐྱེད་བརྟན་པའི་རྒྱུ་དང་པོར་འབྱུང་ཞིང་། རང་གིས་དགེ་བ་གོམས་པ་དང་། རྒྱུ་རིགས་སད་པ་དང་། རྩ་བ་སྙིང་རྗེ་སྐྱེས་པ་ལས་འཇུག་པ་སེམས་བསྐྱེད་བརྟན་པོར་སྐྱེ་བའི་རྒྱུར་གསུངས་སོ། །ལྔ་པ་སེམས་བསྐྱེད་པའི་ཕན་ཡོན་ནི། སྨོན་པ་སེམས་བསྐྱེད་ཀྱིས་ཉན་རང་སེམས་བསྐྱེད་པ་ལ་སོགས་པའི་བསོད་ནམས་ཐམས་ཅད་ཟིལ་གྱིས་ནོན་ཅིང་། འཇུག་སེམས་ཀྱི་རྩ་ལྟུང་མ་བྱུང་ན་གཉིད་འཐུག་པོ་མ་ལོག་པའམ། བག་མེད་པར་གྱུར་ཀྱང་བསོད་ནམས་རྒྱུན་མི་ཆད་པར་འབྱུང་བ་སྟེ། སྤྱོད་འཇུག་ལས། དེང་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པ་རབ་ཏུ་འབྱུང་། །ཞེས་སོགས་མཐའ་ཡས་པར་གསུངས་པ་ལས་ཆ་ཤས་ཙམ་སྔར་བརྗོད་ཟིན་ཏོ། །དྲུག་པ་སེམས་མ་བསྐྱེད་པའི་ཉེས་དམིགས་ནི། གཙོ་བོར་འཁོར་བ་དང་ངན་སོང་དུ་ལྟུང་བ་རྒྱུན་མི་ཆད་ཅིང་། ཇི་ལྟར་ཆོས་ལ་འབད་ཀྱང་ཉན་རང་དུ་གོལ་བ་དང་། དམྱལ་བར་ལྟུང་བ་བྱང་ཆུབ་ཀྱི་གཏན་གེགས་མ་ཡིན་ཡང་། ཉན་རང་དགྲ་བཅོམ་དུ་ལྟུང་བ་ནི་གྲངས་མེད་པའི་བསྐལ་བར་བླ་ན་མེད་པ་རྫོགས་བྱང་གི་གེགས་ཡིན་པའི་ཕྱིར་རོ། །བདུན་པ་ཆོ་གའི་ཁྱད་པར་ནི། མགོན་པོ་བྱམས་པ་ལས་བརྒྱུད་པ་སེམས་ཙམ་ལུགས་སུ་གྲགས་པ་དང་། འཕགས་པ་འཇམ་དཔལ་ལས་བརྒྱུད་པ་དབུ་མ་ལུགས་སུ་གྲགས་པ་སྟེ། དེ་དག་ཀྱང་བླང་བྱའི་ཡུལ་གྱི་ཁྱད་པར། ལེན་པ་པོ་གང་ཟག་གི་ཁྱད་པར། ལེན་བྱེད་ཆོ་གའི་ཁྱད་པར། མི་ཉམས་པར་བསྲུང་བའི་ཁྱད་པར་རྣམས་ཀྱིས་བསྟན་པ་སྟེ། དེ་དག་ནི་ཐེག་པ་ཆེན་པོའི་མདོ་སྡེ་རྣམས་དང་བསྟན་བཅོས་རྣམས་ལས་ཤེས་པར་བྱ་བ་ཡིན་ནོ། །བྱང་ཆུབ་སེམས་མཆོག་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག །སྐྱེས་པ་ཉམས་པ་མེད་པ་ཡང་། །གོང་ནས་གོང་དུ་འཕེལ་བར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་བཟུང་ཞིང་། །བདུད་ཀྱི་ལས་རྣམས་སྤོང་བར་ཤོག །བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལའང་དེ་འབྱོར་ཤོག །སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོངས་གྱུར་ཅིག །བྱང་ཆུབ་སེམས་དཔའ་གང་དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་པར་ཤོག། ༼ག གསང་བ་སྔགས་ཀྱི་ཁྲིད་ལུང་གནང་བ། དེ་ཡན་ཆད་ཀྱིས་སོར་བྱང་གཉིས་ཀྱི་སྡོམ་པ་ཆོ་གའི་སྒོ་ནས་ཚུལ་བཞིན་བླངས་པ་སོང་སྟེ། སོ་ཐར་གྱི་ངོ་བོ་དེ་ངེས་འབྱུང་ཡིན་ཞིང་། བྱང་སྡོམ་གྱི་ངོ་བོ་གཞན་ཕན་ཡིན་ལ། སྔགས་སྡོམ་གྱི་ངོ་བོ་དག་སྣང་ཡིན་པ་དེ་ཉིད་ཤེས་པའི་སྟེང་ནས། སྔགས་ལ་ཞུགས་པའི་འཇུག་སྒོ་དེ་སྨིན་བྱེད་དབང་གི་རིམ་པ་ནས་གྲོལ་བྱེད་ཁྲིད་ལ་འཇུག་དགོས་རྒྱུ་དེ་ཉིད་ཐོབ་ཐང་ཡིན་པས་སྔགས་སྡོམ་བཏགས་པ་བ་དེ་སྡོམ་གཟུང་གི་སྐབས་དང་། མཚན་ཉིད་པ་དངོས་གཞིའི་དམ་ཚིག་ཁས་ལེན་གྱི་སྐབས་ནས་ཐོབ་པ་ཡིན། འདིའི་ནང་གི་མང་ཆེ་བས་སྔགས་རྡོ་རྗེའི་ཐེག་པ་སྤྱི་དང་བྱེ་བྲག་གི་དབང་ཐོབ་ཡོད་པས་མི་ཚད་རྒྱུ་མཚན་གསལ་པོས་ཤེས་མིན་ལ་མ་ལྟོས་པའི་སྔགས་བླ་མེད་ཀྱི་དབང་ཞུས་པའི་ཁ་གྲངས་རང་གིས་ཀྱང་རྩི་མི་ཤེས་པ་ཞུས་ཚར་བ་ནི་ཕལ་ཆེ་བ་ཡིན། ཡིན་ན་ཡང་དབང་སྲོག་རྒྱུད་ལ་འཛིན་པ་དེ་དམ་ཚིག་སྲུང་བ་ལ་བརྟེན་ཡོད་པས་དམ་ཚིག་སྲུང་མ་དགོས་བསྲུང་བྱའི་རྣམ་གྲངས་ཙམ་ཡང་མི་ཤེས་པའི་མི་གྲངས་སྤྱིའི་མི་གྲངས་ཀྱི་ཆ་ཤས་མང་ས་བཟུང་ཡོད་འདུག་སྙམ། ཡང་དབང་སྐུར་མཁན་གྱི་བླ་མ་རང་ཉིད་དབང་མེད་ལུང་མེད་མིན་ཡང་མཚན་ཉིད་ཆ་ཚང་མ་ལྡན་ན་དོན་གྱི་ཐོག་ནས་བསྐུར་ཐོབ་གཉིས་ཀ་མེད་པས་ཐོབ་པའི་ཕན་ཡོན་ཡང་མེད་ལ་ཉམས་པའི་ཉེས་དམིགས་ཀྱང་ཡོད་པ་མ་ཡིན་ཞིང་། སོ་གཏན་ནས་མེད་ན་སྲིན་གཏན་ནས་མེད་པ་ལྟ་བུ་ཡིན། ཆོས་ལ་དབང་ཟ་བའི་ཉེས་པ་མི་འབྱུང་ཟེར་མི་ཤེས། གང་ལྟར་གསང་བ་སྔགས་ཀྱི་སྨིན་གྲོལ་གྱི་ལམ། ཁྱད་པར་དུ་ཐེག་པ་དགུ་ཡི་ཡང་རྩེ་འབྲས་བུའི་སྙིང་བཅུད་མན་ངག་རྫོགས་པ་ཆེན་པོའི་ཆོས་སྒོ་ལ་ཞུགས་དུས་སྔོན་འགྲོ་དངོས་གཞིའི་རིམ་པ་བརྒྱུད་དགོས་པ་ཡིན་པས་དེ་རིང་འདི་ནས་རྫོགས་པ་ཆེན་པོ་ཀློང་ཆེན་སྙིང་ཐིག་གི་སྔོན་འགྲོའི་ངག་འདོན་གྱི་ལུང་ཞིག་འདོན་རྒྱུ་བྱེད། སྔར་ཞིག་ལ་འདི་ཞིབ་ཁྲིད་བྱས་ནས་ངས་ཚར་གཅིག་བཏོན་པ་དེ་ཉིད་མང་ཆེ་བས་ཐོབ་ཡོད་ས་ཡིན་ཡང་ད་རེས་ཐེངས་འདིའི་སོར་བྱང་སྔགས་གསུམ་ལ་རིམ་ཞུགས་ཀྱི་དོད་དང་། ཡང་སྒོས་མ་ཐོབ་པ་ཚོའི་ངོ་སྐལ་དུ་ལུང་ཞིག་བཏོན་བཞག་དུས་དེ་ཡིས་ངས་ཞིབ་ཁྲིད་བྱས་པ་དེ་ཉིད་ཀྱི་འོད་སྡེར་ལ་ཉན་ཆོག ཁྱད་པར་དུ་ཀུན་བཟང་བླ་མའི་ཞལ་ལུང་ཚར་མང་པོ་ལྟོས་ཟེར་རྒྱུ་དེ་ཉིད་སྔར་ནས་བཤད་མྱོང་། ཚར་མང་པོ་ལྟ་རྒྱུ་ཁས་ལེན་བྱས་ན་ཧ་ཅང་བཟང་ལ། བཟང་ཆ་སུ་ལ་ཡོད་ཟེར་ན་རང་ཉིད་ལ་ཡོད་པ་ཡིན། ད་སྔོན་འགྲོའི་ངག་འདོན་གྱི་ལུང་འདོན་རྒྱུ་བྱེད། སླར་ཡང་ནམ་མཁའ་དང་མཉམ་པའི་སེམས་ཅན་ཐམས་ཅད་ཡིད་ལ་གཅགས་ཏེ་གང་ཞིག་གསན་པར་བྱ་བ་ནི། རྫོགས་པ་ཆེན་པོ་ཀློང་ཆེན་སྙིང་ཐིག་གི་སྔོན་འགྲོའི་ངག་འདོན་ཁྲིགས་སུ་བསྡེབས་པ་རྣམ་མཁྱེན་ལམ་བཟང་ཞེས་བྱ་བ་བཞུགས་སོ། །གདོད་ནས་མངོན་སངས་རྒྱས་ཀྱང་གང་ལ་གང་འདུལ་གཟུགས་སྐུ་འགགས་པ་མེད། །སྣ་ཚོགས་སྒྱུ་འཕྲུལ་ངོམ་ཡང་ཕུང་ཁམས་སྐྱེ་མཆེད་གཟུང་དང་འཛིན་པ་བྲལ། །མི་ཡི་གཟུགས་སུ་སྣང་ཡང་མཁྱེན་བརྩེའི་འོད་ཟེར་སྟོང་འབར་རྒྱལ་བ་དངོས། །ཚེ་འདི་ཙམ་དུ་མ་ཡིན་གཏན་གྱི་སྐྱབས་སུ་ཁྱོད་བསྟེན་བྱིན་གྱིས་རློབས། །དེ་ལ་འདིར་རྫོགས་པ་ཆེན་པོ་ཀློང་ཆེན་སྙིང་ཐིག་གི་སྔོན་དུ་འགྲོ་བའི་ངག་འདོན་ཁྲིགས་སུ་བསྡེབས་པ་ལ། ཐོག་མར་ངག་བྱིན་རླབས་ནི། ཨོཾ་ཨཱཿཧཱུྃ། ལྕེ་དབང་རྃ་ཡིག་ལས་བྱུང་མེས་བསྲེགས་ནས། །འོད་དམར་རྣམ་པའི་རྡོ་རྗེ་རྩེ་གསུམ་སྦུབས། །ཨཱ་ལི་ཀཱ་ལིའི་མཐར་བསྐོར་རྟེན་འབྲེལ་སྙིང་། །མུ་ཏིག་ཕྲེང་བ་ལྟ་བུའི་ཡིག་འབྲུ་ལས། །འོད་འཕྲོས་རྒྱལ་བ་སྲས་བཅས་མཆོད་པས་མཉེས། །སླར་འདུས་ངག་སྒྲིབ་དག་ནས་གསུང་རྡོ་རྗེའི། །བྱིན་རླབས་དངོས་གྲུབ་ཐམས་ཅད་ཐོབ་པར་བསམ། །ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨེེ། ཨོ་ཨོོ། ཨཾ་ཨཿ ལན་བདུན། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ ལན་བདུན། ཡེ་དྷཱརྨ་ཧེ་ཏུ་པྲ་བྷ་ཝཱ་ཧེ་ཏུན་ཏེ་ཥཱནྟ་ཐཱ་ག་ཏྭ་ཧྱ་ཝ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲཱ་མ་ཎཿཡེ་སྭཱ་ཧཱ། ལན་བདུན་གྱིས་བརླབས་སོ། །དང་པོ་དཔལ་ལྡན་བླ་མའི་ཐུགས་རྒྱུད་བསྐུལ་ཕྱིར་གསོལ་བ་གདབ་པ་ནི། བླ་མ་མཁྱེན། བླ་མ་མཁྱེན། བླ་མ་མཁྱེན་ནོ། །ཞེས་གདུང་བ་དྲག་པོས་བོས་ནས། སྙིང་དབུས་དད་པའི་གེ་སར་བཞད་པ་ནས། །སྐྱབས་གཅིག་དྲིན་ཆེན་བླ་མ་ཡར་ལ་བཞེངས། །ལས་དང་ཉོན་མོངས་དྲག་པོས་གཟིར་བ་ཡི། །སྐལ་བ་ངན་པ་བདག་ལ་སྐྱོབ་པའི་ཕྱིར། །སྤྱི་བོ་བདེ་ཆེན་འཁོར་ལོའི་རྒྱན་དུ་བཞུགས། །དྲན་དང་ཤེས་བཞིན་ཀུན་ཀྱང་བཞེངས་སུ་གསོལ། །ད་རེས་དམྱལ་བ་ཡི་དྭགས་དུད་འགྲོ་དང་། །ཚེ་རིང་ལྷ་དང་ཀླ་ཀློ་ལོག་ལྟ་ཅན། །སངས་རྒྱས་མ་བྱོན་ཞིང་དང་ལྐུགས་པ་སྟེ། །མི་ཁོམ་བརྒྱད་ལས་ཐར་བའི་དལ་བ་ཐོབ། །མིར་གྱུར་དབང་པོ་ཚང་དང་ཡུལ་དབུས་སྐྱེས། །ལས་མཐའ་མ་ལོག་བསྟན་ལ་དད་པ་སྟེ། །རང་ཉིད་འབྱོར་བ་ལྔ་ཚང་སངས་རྒྱས་བྱོན། །ཆོས་གསུངས་བསྟན་པ་གནས་དང་དེ་ལ་ཞུགས། །བཤེས་གཉེན་དམ་པས་ཟིན་དང་གཞན་འབྱོར་ལྔ། །ཐམས་ཅད་རང་ལ་ཚང་བའི་གནས་ཐོབ་ཀྱང་། །རྐྱེན་མང་ངེས་པ་མེད་པའི་ཚེས་སྤངས་ནས། །འཇིག་རྟེན་ཕ་རོལ་ཉིད་དུ་སོན་པར་འགྱུར། །བློ་སྣ་ཆོས་ལ་སྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །ད་རེས་དལ་རྟེན་དོན་ཡོད་མ་བྱས་ན། །ཕྱི་ནས་ཐར་བའི་སྒྲུབ་པའི་རྟེན་མི་རྙེད། །བདེ་འགྲོའི་རྟེན་ལ་བསོད་ནམས་ཟད་གྱུར་ནས། །ཤི་བའི་འོག་ཏུ་ངན་སོང་ངན་འགྲོར་འཁྱམས། །དགེ་སྡིག་མི་ཤེས་ཆོས་ཀྱི་སྒྲ་མི་ཐོས། །དགེ་བའི་བཤེས་དང་མི་མཇལ་མཚང་རེ་ཆེ། །སེམས་ཅན་ཙམ་གྱི་གྲངས་དང་རིམ་པ་ལ། །བསམས་ན་མི་ལུས་ཐོབ་པ་སྲིད་མཐའ་ཙམ། །མི་ཡང་ཆོས་མེད་སྡིག་ལ་སྤྱོད་མཐོང་ན། །ཆོས་བཞིན་སྤྱོད་པ་ཉིན་མོའི་སྐར་མ་ཙམ། །བློ་སྣ་ཆོས་ལ་སྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །གལ་ཏེ་མི་ལུས་རིན་ཆེན་གླིང་ཕྱིན་ཡང་། །ལུས་རྟེན་བཟང་ལ་བྱུར་པོ་ཆེ་ཡི་སེམས། །ཐར་བ་བསྒྲུབ་པའི་རྟེན་དུ་མི་རུང་ཞིང་། །ཁྱད་པར་བདུད་ཀྱིས་ཟིན་དང་དུག་ལྔ་འཁྲུགས། །ལས་ངན་ཐོག་ཏུ་བབ་དང་ལེ་ལོས་གཡེངས། །གཞན་ཁོལ་བྲན་གཡོག་འཇིགས་སྐྱོབ་ཆོས་ལྟར་བཅོས། །རྨོངས་སོགས་འཕྲལ་བྱུང་རྐྱེན་གྱི་མི་ཁོམ་བརྒྱད། །བདག་ལ་ཆོས་ཀྱི་འགལ་ཟླར་ལྷགས་པའི་ཚེ། །བློ་སྣ་ཆོས་ལ་སྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །སྐྱོ་ཤས་ཆུང་ཞིང་དད་པའི་ནོར་དང་བྲལ། །འདོད་སྲེད་ཞགས་པས་བཅིངས་དང་ཀུན་སྤྱོད་རྩུབ། །མི་དགེ་སྡིག་ལ་མི་འཛེམ་ལས་མཐའ་ལོག །སྡོམ་པ་ཉམས་ཤིང་དམ་ཚིག་རལ་བ་སྟེ། །རིས་ཆད་བློ་ཡི་མི་ཁོམ་རྣམ་པ་བརྒྱད། །བདག་ལ་ཆོས་ཀྱི་འགལ་ཟླར་ལྷགས་པའི་ཚེ། །བློ་སྣ་ཆོས་ལ་སྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །ད་ལྟ་ནད་དང་སྡུག་བསྔལ་གྱིས་མ་གཟིར། །བྲན་ཁོལ་ལ་སོགས་གཞན་དབང་མ་གྱུར་པས། །རང་དབང་ཐོབ་པའི་རྟེན་འབྲེལ་འགྲིགས་དུས་འདིར། །སྙོམ་ལས་ངང་དུ་དལ་འབྱོར་ཆུད་གསོན་ན། །འཁོར་དང་ལོངས་སྤྱོད་ཉེ་དུ་འབྲེལ་བ་ལྟ། །ལྟ་ཅི་གཅེས་པར་བཟུང་བའི་ལུས་འདི་ཡང་། །མལ་གྱི་ནང་ནས་ས་ཕྱོགས་སྟོང་པར་བསྐྱལ། །ཝ་དང་བྱ་རྒོད་ཁྱི་ཡིས་འདྲད་པའི་དུས། །བར་དོའི་ཡུལ་ན་འཇིགས་པ་ཤིན་ཏུ་ཆེ། །བློ་སྣ་ཆོས་ལ་སྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །དགེ་སྡིག་ལས་ཀྱི་རྣམ་སྨིན་ཕྱི་བཞིན་འབྲང་། །ཁྱད་པར་དམྱལ་བའི་འཇིག་རྟེན་ཉིད་སོན་ན། །ལྕགས་བསྲེགས་ས་གཞིར་མཚོན་གྱིས་མགོ་ལུས་འདྲལ། །སོག་ལེས་གཤོགས་དང་ཐོ་ལུམ་འབར་བས་འཚིར། །སྒོ་མེད་ལྕགས་ཁྱིམ་འཐིམས་པར་འོ་དོད་འབོད། །འབར་བའི་གསལ་ཤིང་གིས་འབུགས་ཁྲོ་ཆུར་འཚོད། །ཀུན་ནས་ཚ་བའི་མེས་བསྲེགས་བརྒྱད་ཚན་གཅིག །གངས་རི་སྟུག་པོའི་འདབ་དང་ཆུ་འཁྱགས་ཀྱི། །གཅོང་རོང་ཡ་ངའི་གནས་སུ་བུ་ཡུག་སྦྲེབས། །གྲང་རེག་རླུང་གིས་བཏབ་པའི་ལང་ཚོ་ནི། །ཆུ་བུར་ཅན་དང་ལྷག་པར་བརྡོལ་བ་ཅན། །སྨྲེ་སྔགས་རྒྱུན་མི་ཆད་པར་འདོན་པ་ཡང་། །ཚོར་བའི་སྡུག་བསྔལ་བརྣག་པར་དཀའ་བ་ཡིས། །ཟུངས་ཀྱིས་རབ་བཏང་འཆི་ཁའི་ནད་པ་བཞིན། །ཤུགས་རིང་འདོན་ཅིང་སོ་འཐམ་པགས་པ་འགས། །ཤའུ་ཐོན་ནས་ལྷག་པར་འགས་ཏེ་བརྒྱད། །དེ་བཞིན་སྤུ་གྲིའི་ཐང་ལ་རྐང་པ་གཤོགས། །རལ་གྲིའི་ཚལ་དུ་ལུས་ལ་བཅད་གཏུབས་བྱེད། །རོ་མྱགས་འདམ་ཚུད་ཐལ་ཚན་རབ་མེད་ཀློང་། །མནར་བའི་ཉེ་འཁོར་བ་དང་འགྱུར་བ་ཅན། །སྒོ་དང་ཀ་བ་ཐབ་དང་ཐག་པ་སོགས། །རྟག་ཏུ་བཀོལ་ཞིང་སྤྱོད་པའི་ཉེ་ཚེ་བ། །རྣམ་གྲངས་བཅོ་བརྒྱད་གང་ལས་འབྱུང་བའི་རྒྱུ། །ཞེ་སྡང་དྲག་པོའི་ཀུན་སློང་སྐྱེས་པའི་ཚེ། །བློ་སྣ་ཆོས་ལ་སྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །དེ་བཞིན་ཕོངས་ལ་ཉམས་མི་དགའ་བའི་ཡུལ། །བཟའ་བཏུང་ལོངས་སྤྱོད་མིང་ཡང་མི་གྲག་པར། །ཟས་སྐོམ་ལོ་ཟླར་མི་རྙེད་ཡི་དྭགས་ལུས། །རིད་ཅིང་ལྡང་བའི་སྟོབས་ཉམས་རྣམ་པ་གསུམ། །གང་ལས་འབྱུང་བའི་རྒྱུ་ནི་སེར་སྣ་ཡིན། །གཅིག་ལ་གཅིག་ཟ་གསོད་པའི་འཇིགས་པ་ཆེ། །བཀོལ་ཞིང་སྤྱོད་པས་ཉམ་ཐག་བླང་དོར་རྨོངས། །ཕ་མཐའ་མེད་པའི་སྡུག་བསྔལ་གྱིས་གཟིར་བའི། །ས་བོན་གཏི་མུག་མུན་པར་འཁྱམས་པ་བདག །བློ་སྣ་ཆོས་ལ་སྒྱུར་ཅིག་གུ་རུ་མཁྱེན། །ལམ་གོལ་དམན་པར་མ་གཏོང་ཀུན་མཁྱེན་རྗེ། །གཉིས་སུ་མེད་དོ་དྲིན་ཆེན་བླ་མ་མཁྱེན། །ཆོས་ལམ་ཞུགས་ཀྱང་ཉེས་སྤྱོད་མི་སྡོམ་ཞིང་། །ཐེག་ཆེན་སྒོར་ཞུགས་གཞན་ཕན་སེམས་དང་བྲལ། །དབང་བཞི་ཐོབ་ཀྱང་བསྐྱེད་རྫོགས་མི་སྒོམ་པའི། །ལམ་གོལ་འདི་ལས་བླ་མས་བསྒྲལ་དུ་གསོལ། །ལྟ་བ་མ་རྟོགས་ཐོ་ཅོའི་སྤྱོད་པ་ཅན། །སྒོམ་པ་ཡེངས་ཀྱང་གོ་ཡུལ་འུད་གོག་འཐག །སྤྱོད་པ་ནོར་ཀྱང་རང་སྐྱོན་མི་སེམས་དཔའི། །ཆོས་དྲེད་འདི་ལས་བླ་མས་བསྒྲལ་དུ་གསོལ། །ནངས་པར་འཆི་ཡང་གནས་གོས་ནོར་ལ་སྲེད། །ན་ཚོད་ཡོལ་ཡང་ངེས་འབྱུང་སྐྱོ་ཤས་བྲལ། །ཐོས་པ་ཆུང་ཡང་ཡོན་ཏན་ཅན་དུ་རློམ། མ་རིག་འདི་ལས་བླ་མས་བསྒྲལ་དུ་གསོལ། །རྐྱེན་ཁར་འཆོར་ཡང་འདུ་འཛི་གནས་སྐོར་སེམས། །དབེན་པར་བརྟེན་ཀྱང་རང་རྒྱུད་ཤིང་ལྟར་རེངས། །དུལ་བར་སྨྲ་ཡང་ཆགས་སྡང་མ་ཞིག་པའི། །ཆོས་བརྒྱད་འདི་ལས་བླ་མས་བསྒྲལ་དུ་གསོལ། །གཉིད་འཐུག་འདི་ལས་མྱུར་དུ་སད་དུ་གསོལ། །ཁྲི་མུན་འདི་ལས་མྱུར་དུ་དབྱུང་དུ་གསོལ། །ཞེས་འབོད་པ་དྲག་པོས་ཐུགས་རྗེ་བསླང་བར་བྱའོ། །གཉིས་པ་སྐྱབས་སུ་འགྲོ་བ་ནི། དཀོན་མཆོག་གསུམ་དངོས་བདེ་གཤེགས་རྩ་བ་གསུམ༔ རྩ་རླུང་ཐིག་ལེའི་རང་བཞིན་བྱང་ཆུབ་སེམས༔ ངོ་བོ་རང་བཞིན་ཐུགས་རྗེའི་དཀྱིལ་འཁོར་ལ༔ བྱང་ཆུབ་སྙིང་པོའི་བར་དུ་སྐྱབས་སུ་མཆི༔ གསུམ་པ་སེམས་བསྐྱེད་ནི། ཧོ༔ སྣ་ཚོགས་སྣང་བ་ཆུ་ཟླའི་རྫུན་རིས་ཀྱིས༔ འཁོར་བ་ལུ་གུ་རྒྱུད་དུ་འཁྱམས་པའི་འགྲོ༔ རང་རིག་འོད་གསལ་དབྱིངས་སུ་ངལ་གསོའི་ཕྱིར༔ ཚད་མེད་བཞི་ཡི་ངང་ནས་སེམས་བསྐྱེད་དོ༔ བཞི་བ་རྡོར་སེམས་སྒོམ་བཟླས་ནི། ཨཱཿ བདག་ཉིད་ཐ་མལ་སྤྱི་བོ་རུ༔ པད་དཀར་ཟླ་བའི་གདན་གྱི་དབུས༔ ཧཱུྃ་ལས་བླ་མ་རྡོ་རྗེ་སེམས༔ དཀར་གསལ་ལོངས་སྤྱོད་རྫོགས་པའི་སྐུ༔ རྡོ་རྗེ་དྲིལ་འཛིན་སྙེམས་མ་འཁྲིལ༔ ཁྱོད་ལ་སྐྱབས་གསོལ་སྡིག་པ་སྦྱོང་༔ འགྱོད་སེམས་དྲག་པོས་མཐོལ་ལོ་བཤགས༔ ཕྱིན་ཆད་སྲོག་ལ་བབ་ཀྱང་སྡོམ༔ ཁྱོད་ཐུགས་ཟླ་བ་རྒྱས་པའི་སྟེང༔ ཧཱུྃ་ཡིག་མཐའ་མར་སྔགས་ཀྱིས་བསྐོར༔ བཟླས་པ་སྔགས་ཀྱིས་རྒྱུད་བསྐུལ་བས༔ ཡབ་ཡུམ་བདེ་རོལ་སྦྱོར་མཚམས་ནས༔ བདུད་རྩི་བྱང་ཆུབ་སེམས་ཀྱི་སྤྲིན༔ ག་བུར་རྡུལ་ལྟར་འཛག་པ་ཡིས༔ བདག་དང་ཁམས་གསུམ་སེམས་ཅན་གྱི༔ ལས་དང་ཉོན་མོངས་སྡུག་བསྔལ་རྒྱུ༔ ནད་གདོན་སྡིག་སྒྲིབ་ཉེས་ལྟུང་གྲིབ༔ མ་ལུས་བྱང་བར་མཛད་དུ་གསོལ༔ ཨོཾ་བཛྲ་ས་ཏྭ་ས་མ་ཡ༔ མ་ནུ་པཱ་ལ་ཡ༔ བཛྲ་ས་ཏྭ་ཏྭེ་ནོ་པ་ཏིཥྛ༔ དྲྀ་ཌྷོ་མེ་བྷ་ཝ༔ སུ་ཏོཥྱོ་མེ་བྷ་ཝ༔ སུ་པོཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སརྦ་སིདྡྷི་མྨེ་པྲ་ཡཙྪ༔ སརྦ་ཀརྨ་སུ་ཙ་མེ༔ ཙིཏྟཾ་ཤྲི་ཡཾཿཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝཱན༔ སརྦ་ཏ་ཐཱ་ག་ཏ༔ བཛྲ་མཱ་མེ་མུཉྩ༔ བཛྲི་བྷ་ཝ༔ མ་ཧཱ་ས་མ་ཡ་ས་ཏྭ་ཨཱཿ ཡི་གེ་བརྒྱ་བ་ཅི་ནུས་བཟླས་མཐར། མགོན་པོ་བདག་ནི་མི་ཤེས་རྨོངས་པ་ཡིས༔ དམ་ཚིག་ལས་ནི་འགལ་ཞིང་ཉམས༔ བླ་མ་མགོན་པོས་སྐྱབས་མཛོད་ཅིག༔ གཙོ་བོ་རྡོ་རྗེ་འཛིན་པ་སྟེ༔ ཐུགས་རྗེ་ཆེན་པོའི་བདག་ཉིད་ཅན༔ འགྲོ་བའི་གཙོ་ལ་བདག་སྐྱབས་མཆི༔ སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ༔ སྡིག་པ་དང་སྒྲིབ་པ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ༔ ཞེས་བརྗོད་པས། རྡོ་རྗེ་སེམས་དཔའ་དགྱེས་བཞིན་འཛུམ་པ་དང་བཅས་པས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ་ཞེས་གནང་བ་བྱིན་ཞིང་འོད་དུ་ཞུ་ནས། རང་ལ་ཐིམ་པའི་རྐྱེན་ལས་རང་ཉིད་ཀྱང་རྡོ་རྗེ་སེམས་དཔའ་སྣང་སྟོང་མེ་ལོང་ནང་གི་གཟུགས་བརྙན་ལྟ་བུར་གྱུར་པའི་ཐུགས་སྲོག་ཧཱུྃ་གི་མཐའ་མར་ཡི་གེ་འབྲུ་བཞི་བོ་གསལ་བ་ལས། འོད་ཟེར་འཕྲོས་ཁམས་གསུམ་སྣོད་བཅུད་དང་བཅས་པ་རྡོར་སེམས་རིགས་ལྔའི་རྟེན་དང་བརྟེན་པའི་རང་བཞིན་དུ་སངས་རྒྱས་པར་གྱུར་པར་བསམས་ལ། ཨོཾ་བཛྲ་སཏྭ་ཧཱུྃ༔ ཞེས་ཅི་ནུས་སུ་བཟླས་མཐར་མཉམ་པར་བཞག་གོ། །ལྔ་བ་མཎྜལ་ནི། ཨོཾ་ཨཱཿཧཱུྃ༔ སྟོང་གསུམ་འཇིག་རྟེན་བྱེ་བ་ཕྲག་བརྒྱའི་ཞིང་༔ རིན་ཆེན་སྣ་བདུན་ལྷ་མིའི་འབྱོར་བས་གཏམས༔ བདག་ལུས་ལོངས་སྤྱོད་པ་ཡོངས་འབུལ་གྱིས༔ ཆོས་ཀྱི་འཁོར་ལོས་བསྒྱུར་བའི་སྲིད་ཐོབ་ཤོག༔ འོག་མིན་བདེ་ཆེན་སྟུག་པོ་བཀོད་པའི་ཞིང་༔ ངེས་པ་ལྔ་ལྡན་རིགས་ལྔའི་ཚོམ་བུ་ཅན༔ འདོད་ཡོན་མཆོད་པའི་སྤྲིན་ཕུང་བསམ་ཡས་པ༔ ཕུལ་བས་ལོངས་སྐུའི་ཞིང་ལ་སྤྱོད་པར་ཤོག༔ སྣང་སྲིད་རྣམ་དག་གཞོན་ནུ་བུམ་པའི་སྐུ༔ ཐུགས་རྗེ་མ་འགགས་ཆོས་ཉིད་རོལ་བའི་རྒྱན༔ སྐུ་དང་ཐིག་ལེའི་འཛིན་པ་རྣམ་དག་ཞིང་༔ ཕུལ་བས་ཆོས་སྐུའི་ཞིང་ལ་སྤྱོད་པར་ཤོག༔ དྲུག་པ་ཀུ་ས་ལུའི་ཚོགས་གསོག་ནི། ཕཊ༔ ལུས་གཅེས་འཛིན་བོར་བས་ལྷ་བདུད་ཆོམ༔ སེམས་ཚངས་པའི་སྒོ་ནས་དབྱིངས་ལ་ཐོན༔ འཆི་བདག་གི་བདུད་བཅོམ་ཁྲོས་མར་གྱུར༔གཡས་ཉོན་མོངས་བདུད་བཅོམ་གྲི་གུག་གིས༔ གཟུགས་ཕུང་པོའི་བདུད་བཅོམ་ཐོད་པ་བྲེགས༔ གཡོན་ལས་བྱེད་ཚུལ་གྱིས་བྷནྡྷ་ཐོགས༔ སྐུ་གསུམ་གྱི་མི་མགོའི་སྒྱེད་པུར་བཞག༔ ནང་སྟོང་གསུམ་གང་བའི་བམ་རོ་དེ༔ ཨ་ཐུང་དང་ཧཾ་ཡིག་གིས་བདུད་རྩིར་ཞུ༔ འབྲུ་གསུམ་གྱི་ནུས་པས་སྦྱང་སྤེལ་བསྒྱུར༔ ཨོཾ་ཨཱཿཧཱུྃ༔ གྲངས་མེད་མཐར། ཕཊ༔ ཡར་མཆོད་ཡུལ་མགྲོན་གྱི་ཐུགས་དམ་བསྐང་༔ ཚོགས་རྫོགས་ནས་མཆོག་ཐུན་དངོས་གྲུབ་ཐོབ༔ མར་འཁོར་བའི་མགྲོན་མཉེས་ལན་ཆགས་བྱང་༔ ཁྱད་པར་དུ་གནོད་བྱེད་བགེགས་རིགས་ཚིམ༔ ནད་གདོན་དང་བར་ཆད་དབྱིངས་སུ་ཞི༔ རྐྱེན་ངན་དང་བདག་འཛིན་རྡུལ་དུ་བརླགས༔ མཐར་མཆོད་བྱ་དང་མཆོད་ཡུལ་མ་ལུས་ཀུན༔ གཤིས་རྫོགས་པ་ཆེན་པོ་མ་བཅོས་ཨཱཿ བདུན་པ་བླ་མའི་རྣལ་འབྱོར་ནི། ཨེ་མ་ཧོ༔ རང་སྣང་ལྷུན་གྲུབ་དག་པ་རབ་འབྱམས་ཞིང་༔ བཀོད་པ་རབ་རྫོགས་ཟངས་མདོག་དཔལ་རིའི་དབུས༔ རང་ཉིད་གཞི་ལུས་རྡོ་རྗེ་རྣལ་འབྱོར་མ༔ ཞལ་གཅིག་ཕྱག་གཉིས་དམར་གསལ་གྲི་ཐོད་འཛིན༔ ཞབས་གཉིས་དོར་སྟབས་སྤྱན་གསུམ་ནམ་མཁར་གཟིགས༔ སྤྱི་བོར་པདྨ་འབུམ་བརྡལ་ཉི་ཟླའི་སྟེང་༔ སྐྱབས་གནས་ཀུན་འདུས་རྩ་བའི་བླ་མ་དང་༔ དབྱེར་མེད་མཚོ་སྐྱེས་རྡོ་རྗེ་སྤྲུལ་བའི་སྐུ༔ དཀར་དམར་མདངས་ལྡན་གཞོན་ནུའི་ཤ་ཚུགས་ཅན༔ ཕོད་ཁ་ཆོས་གོས་ཟ་བེར་འདུང་མ་གསོལ༔ ཞལ་གཅིག་ཕྱག་གཉིས་རྒྱལ་པོ་རོལ་བའི་སྟབས༔ ཕྱག་གཡས་རྡོ་རྗེ་གཡོན་པས་ཐོད་བུམ་བསྣམས༔ དབུ་ལ་འདབ་ལྡན་པདྨའི་མཉེན་ཞུ་གསོལ༔ མཆན་ཁུང་གཡོན་ན་བདེ་སྟོང་ཡུམ་མཆོག་མ༔ སྦས་པའི་ཚུལ་གྱིས་ཁ་ཊྭཱཾ་རྩེ་གསུམ་བསྣམས༔ འཇའ་ཟེར་ཐིག་ལེའི་འོད་ཕུང་ཀློང་ན་བཞུགས༔ ཕྱི་འཁོར་འོད་ལྔའི་དྲྭ་བས་མཛེས་པའི་ཀློང་༔ སྤྲུལ་བའི་རྗེ་འབངས་ཉི་ཤུ་རྩ་ལྔ་དང་༔ རྒྱ་བོད་པཎ་གྲུབ་རིག་འཛིན་ཡི་དམ་ལྷ༔ མཁའ་འགྲོ་ཆོས་སྐྱོང་དམ་ཅན་སྤྲིན་ལྟར་གཏིབས༔ གསལ་སྟོང་མཉམ་གནས་ཆེན་པོའི་ངང་དུ་གསལ༔ ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱིས༔ བྱིན་གྱིས་བརླབ་ཕྱིར་གཤེགས་སུ་གསོལ༔ གུ་རུ་པདྨ་སིདྡྷི་ཧཱུྃ༔ ཧྲཱི༔ བདག་ལུས་ཞིང་གི་རྡུལ་སྙེད་དུ༔ རྣམ་པར་འཕྲུལ་པས་ཕྱག་འཚལ་ལོ༔ དངོས་བཤམས་ཡིད་སྤྲུལ་ཏིང་འཛིན་མཐུས༔ སྣང་སྲིད་མཆོད་པའི་ཕྱག་རྒྱར་འབུལ༔ སྒོ་གསུམ་མི་དགེའི་ལས་རྣམས་ཀུན༔ འོད་གསལ་ཆོས་སྐུའི་ངང་དུ་བཤགས༔ བདེན་པ་གཉིས་ཀྱིས་བསྡུས་པ་ཡི༔ དགེ་ཚོགས་ཀུན་ལ་རྗེས་ཡི་རང་༔ རིགས་ཅན་གསུམ་གྱི་གདུལ་བྱ་ལ༔ ཐེག་གསུམ་ཆོས་འཁོར་བསྐོར་བར་བསྐུལ༔ ཇི་སྲིད་འཁོར་བ་མ་སྟོངས་བར༔ མྱ་ངན་མི་འདའ་བཞུགས་གསོལ་འདེབས༔ དུས་གསུམ་བསགས་པའི་དགེ་རྩ་ཀུན༔ བྱང་ཆུབ་ཆེན་པོའི་རྒྱུ་རུ་བསྔོ༔ རྗེ་བཙུན་གུ་རུ་རིན་པོ་ཆེ༔ ཁྱེད་ནི་སངས་རྒྱས་ཐམས་ཅད་ཀྱི༔ ཐུགས་རྗེ་བྱིན་རླབས་འདུས་པའི་དཔལ༔ སེམས་ཅན་ཡོངས་ཀྱི་མགོན་གཅིག་པུ༔ ལུས་དང་ལོངས་སྤྱོད་བློ་སྙིང་བྲང་༔ ལྟོས་པ་མེད་པར་ཁྱེད་ལ་འབུལ༔ འདི་ནས་བྱང་ཆུབ་མ་ཐོབ་པར༔ སྐྱིད་སྡུག་ལེགས་ཉེས་མཐོ་དམན་ཀུན༔ རྗེ་བཙུན་ཆེན་པོ་པད་འབྱུང་མཁྱེན༔ བདག་ལ་རེ་ས་གཞན་ན་མེད༔ ད་ལྟ་དུས་ངན་སྙིགས་མའི་འགྲོ༔ མི་བཟད་སྡུག་བསྔལ་འདམ་དུ་བྱིང་༔ འདི་ལས་སྐྱོབས་ཤིག་མ་ཧཱ་གུ་རུ༔ དབང་བཞི་སྐུར་ཅིག་བྱིན་རླབས་ཅན༔ རྟོགས་པ་སྤོར་ཅིག་ཐུགས་རྗེ་ཅན༔ སྒྲིབ་གཉིས་སྦྱོངས་ཤིག་ནུས་མཐུ་ཅན༔ ནམ་ཞིག་ཚེ་ཡི་དུས་བྱས་ཚེ༔ རང་སྣང་རྔ་ཡབ་དཔལ་རིའི་ཞིང་༔ ཟུང་འཇུག་སྤྲུལ་བའི་ཞིང་ཁམས་སུ༔ གཞི་ལུས་རྡོ་རྗེ་རྣལ་འབྱོར་མ༔ གསལ་འཚེར་འོད་ཀྱི་གོང་བུ་རུ༔ གྱུར་ནས་རྗེ་བཙུན་པད་འབྱུང་དང་༔ དབྱེར་མེད་ཆེན་པོར་སངས་རྒྱས་ཏེ༔ བདེ་དང་སྟོང་པའི་ཆོ་འཕྲུལ་གྱིས༔ ཡེ་ཤེས་ཆེན་པོའི་རོལ་པ་ལས༔ ཁམས་གསུམ་སེམས་ཅན་མ་ལུས་པ༔ འདྲེན་པའི་དེད་དཔོན་དམ་པ་རུ༔ རྗེ་བཙུན་པདྨས་དབུགས་དབྱུང་གསོལ༔ གསོལ་བ་སྙིང་གི་དཀྱིལ་ནས་འདེབས༔ ཁ་ཙམ་ཚིག་ཙམ་མ་ཡིན་ནོ༔ བྱིན་རླབས་ཐུགས་ཀྱི་ཀློང་ནས་སྩོལ༔ བསམ་དོན་འགྲུབ་པར་མཛད་དུ་གསོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ བརྒྱུད་པའི་གསོལ་འདེབས་ནི། ཨེ་མ་ཧོ༔ རྒྱ་ཆད་ཕྱོགས་ལྷུང་བྲལ་བའི་ཞིང་ཁམས་ནས༔ དང་པོའི་སངས་རྒྱས་ཆོས་སྐུ་ཀུན་ཏུ་བཟང་༔ ལོངས་སྐུ་ཆུ་ཟླའི་རོལ་རྩལ་རྡོ་རྗེ་སེམས༔ སྤྲུལ་སྐུར་མཚན་རྫོགས་དགའ་རབ་རྡོ་རྗེ་ལ༔ གསོལ་བ་འདེབས་སོ་བྱིན་རླབས་དབང་བསྐུར་སྩོལ༔ ཤྲཱི་སེངྷ་དོན་དམ་ཆོས་ཀྱི་མཛོད༔ འཇམ་དཔལ་བཤེས་གཉེན་ཐེག་དགུའི་འཁོར་ལོས་བསྒྱུར༔ ཛྙཱ་ན་སཱུ་ཏྲ་པཎ་ཆེན་བི་མ་ལར༔ གསོལ་བ་འདེབས་སོ་གྲོལ་བྱེད་ལམ་སྣ་སྟོན༔ འཛམ་བུའི་གླིང་གི་རྒྱན་གཅིག་པདྨ་འབྱུང་༔ ངེས་པར་ཐུགས་ཀྱི་སྲས་མཆོག་རྗེ་འབངས་གྲོགས༔ ཐུགས་གཏེར་རྒྱ་མཚོའི་བརྡ་འགྲོལ་ཀློང་ཆེན་ཞབས༔ མཁའ་འགྲོའི་དབྱིངས་མཛོད་བཀའ་བབ་འཇིགས་མེད་གླིང་༔ གསོལ་བ་འདེབས་སོ་འབྲས་བུ་ཐོབ་གྲོལ་སྩོལ༔ ཆོས་ཀྱི་བདག་པོ་བྱང་ཆུབ་རྡོ་རྗེའི་ཞབས༔ གྲུབ་བརྙེས་འཇིགས་མེད་རྒྱལ་བའི་མྱུ་གུ་དང་། །སྤྲུལ་བའི་སྐུ་མཆོག་མི་འགྱུར་ནམ་མཁའི་མཚན། །རྒྱལ་བའི་སྲས་པོ་གཞན་ཕན་མཐའ་ཡས་ལ། །གསོལ་བ་འདེབས་སོ་གནས་ལུགས་རང་ཞལ་སྟོན། །ཧེ་རུ་ཀཿདཔལ་ཡེ་ཤེས་རྡོ་རྗེ་དང་། །ཨོ་རྒྱན་འཇིགས་མེད་ཆོས་ཀྱི་དབང་པོའི་ཞབས། །གྲུབ་པའི་དབང་ཕྱུག་པདྨ་བཛྲ་པ། །མཚོ་སྐྱེས་བླ་མ་མཁྱེན་བརྩེའི་དབང་པོ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཨོ་རྒྱན་བསྟན་འཛིན་པདྨ་བདེ་ཆེན་བཟང་། །དཀོན་མཆོག་གྲགས་པ་ཐུབ་དབང་བསྟན་པའི་ཉི། །ཆོས་ཀྱི་རྡོ་རྗེ་གཞན་ཕན་སྣང་བའི་ཞབས། །བྱ་བྲལ་འཁྲུལ་ཞིག་ཀུན་དགའ་དཔལ་ལྡན་དང་། །ཐེག་མཆོག་བློ་ལྡན་བཤད་སྒྲུབ་དར་རྒྱས་ཞབས། །བསྟན་པའི་རྒྱལ་མཚན་གུ་ཎ་ན་ཐ་རྗེ། །ཨོ་རྒྱན་འཇིགས་བྲལ་བྱང་ཆུབ་རྡོ་རྗེ་སོགས། །གསོལ་བ་འདེབས་སོ་རྟོགས་པའི་ཕ་ཕོག་སྩོལ། །སྲིད་ལས་ངེས་པར་འབྱུང་བའི་ཞེན་ལོག་གིས༔ རྡོ་རྗེའི་བླ་མ་དོན་ལྡན་མིག་བཞིན་བསྟེན༔ ཅི་གསུང་བཀའ་བསྒྲུབ་ཟབ་མོའི་ཉམས་ལེན་ལ༔ ལྟེམ་རྐྱང་མེད་པའི་སྒྲུབ་ཚུགས་ཞེ་རུས་ཀྱིས༔ ཐུགས་རྒྱུད་དགོངས་པའི་བྱིན་རླབས་འཕོ་བར་ཤོག༔ སྣང་སྲིད་འཁོར་འདས་ཡེ་ནས་འོག་མིན་ཞིང་༔ ལྷ་སྔགས་ཆོས་སྐུར་དག་རྫོགས་སྨིན་པའི་འབྲས༔ སྤང་བླང་བྱ་རྩོལ་མེད་པའི་རྫོགས་པ་ཆེ༔ ཤེས་ཉམས་ཡིད་དཔྱོད་ལས་འདས་རིག་པའི་གདངས༔ ཆོས་ཉིད་མངོན་སུམ་རྗེན་པར་མཐོང་བར་ཤོག༔ མཚན་མའི་རྟོག་པ་རྣམ་གྲོལ་འཇའ་ཟེར་སྦུབས༔ སྐུ་དང་ཐིག་ལེའི་ཉམས་སྣང་གོང་དུ་འཕེལ༔ རིག་རྩལ་ལོངས་སྐུའི་ཞིང་ཁམས་ཚད་ལ་ཕེབས༔ ཆོས་ཟད་བློ་འདས་ཆེན་པོར་སངས་རྒྱས་ཏེ༔ གཞོན་ནུ་བུམ་སྐུར་གཏན་སྲིད་ཟིན་པར་ཤོག༔ ཤིན་ཏུ་རྣལ་འབྱོར་ཉམས་འོག་མ་ཆུད་དེ༔ རགས་ལུས་དྭངས་མའི་དབྱིངས་སུ་མ་གྲོལ་ན༔ ནམ་ཞིག་ཚེ་ཡི་འདུ་བྱེད་བསྟུང་བའི་ཚེ༔ འཆི་བ་འོད་གསལ་ཀ་དག་ཆོས་སྐུར་ཤར༔ བར་དོའི་སྣང་ཆ་ལོངས་སྤྱོད་རྫོགས་སྐུར་གྲོལ༔ ཁྲེགས་ཆོད་ཐོད་རྒལ་ལམ་གྱི་རྩལ་རྫོགས་ནས༔ མ་པང་བུ་འཇུག་ལྟ་བུར་གྲོལ་བར་ཤོག༔ གསང་ཆེན་འོད་གསལ་ཐེག་པ་མཆོག་གི་རྩེ༔ སངས་རྒྱས་གཞན་ནས་མི་འཚོལ་ཆོས་སྐུའི་ཞལ༔ མངོན་གྱུར་གདོད་མའི་ས་ལ་མ་གྲོལ་ན༔ མ་བསྒོམས་སངས་རྒྱས་ཆོས་ལྔའི་ལམ་མཆོག་ལ༔ བརྟེན་ནས་རང་བཞིན་སྤྲུལ་བའི་ཞིང་ལྔ་དང་༔ ཁྱད་པར་པདྨ་འོད་ཀྱི་ཕོ་བྲང་དུ༔ རིག་འཛིན་རྒྱ་མཚོའི་གཙོ་མཆོག་ཨོ་རྒྱན་རྗེས༔ གསང་ཆེན་ཆོས་ཀྱི་དགའ་སྟོན་འགྱེད་པའི་སར༔ སྲས་ཀྱི་ཐུ་བོར་སྐྱེས་ནས་དབུགས་དབྱུང་སྟེ༔ མཐའ་ཡས་འགྲོ་བའི་ཉེར་འཚོར་བདག་འགྱུར་ཤོག༔ རིག་འཛིན་རྒྱལ་བ་རྒྱ་མཚོའི་བྱིན་རླབས་དང་༔ ཆོས་དབྱིངས་བསམ་མི་ཁྱབ་པའི་བདེན་པ་ཡིས༔ དལ་འབྱོར་རྟེན་ལ་རྫོགས་སྨིན་སྦྱངས་གསུམ་གྱི༔ རྟེན་འབྲེལ་མངོན་གྱུར་སངས་རྒྱས་ཐོབ་པར་ཤོག༔ ཅེས་ཁ་ཞེ་མེད་པར་གསོལ་བ་སྙིང་ནས་གདབ་བོ༔ དགུ་བ་དབང་བཞི་བླང་བ་ནི། གུ་རུའི་སྨིན་མཚམས་ནས་ཨོཾ་ཡིག་ཆུ་ཤེལ་ལྟར་འཚེར་བ་ལས་འོད་ཟེར་འཕྲོས། རང་གི་སྤྱི་བོ་ནས་ཞུགས། ལུས་ཀྱི་ལས་དང་རྩ་ཡི་སྒྲིབ་པ་དག སྐུ་རྡོ་རྗེའི་བྱིན་རླབས་ཞུགས། བུམ་པའི་དབང་ཐོབ། བསྐྱེད་རིམ་གྱི་སྣོད་དུ་གྱུར། རྣམ་སྨིན་རིག་འཛིན་གྱི་ས་བོན་ཐེབས། སྤྲུལ་སྐུའི་གོ་འཕང་ཐོབ་པའི་སྐལ་བ་རྒྱུད་ལ་བཞག མགྲིན་པ་ནས་ཨཱཿཡིག་པདྨ་རཱ་ག་ལྟར་འབར་བ་ལས་འོད་ཟེར་འཕྲོས། རང་གི་མགྲིན་པ་ནས་ཞུགས། ངག་གི་ལས་དང་རླུང་གི་སྒྲིབ་པ་དག གསུང་རྡོ་རྗེའི་བྱིན་རླབས་ཞུགས། གསང་བའི་དབང་ཐོབ། བཟླས་བརྗོད་ཀྱི་སྣོད་དུ་གྱུར། ཚེ་དབང་རིག་འཛིན་གྱི་ས་བོན་ཐེབས། ལོངས་སྤྱོད་རྫོགས་སྐུའི་གོ་འཕང་གི་སྐལ་བ་རྒྱུད་ལ་བཞག ཐུགས་ཀའི་ཧཱུྃ་ཡིག་ནམ་མཁའི་མདོག་ཅན་ལས་འོད་ཟེར་འཕྲོས། རང་གི་སྙིང་ཁ་ནས་ཞུགས། ཡིད་ཀྱི་ལས་དང་ཐིག་ལེའི་སྒྲིབ་པ་དག ཐུགས་རྡོ་རྗེའི་བྱིན་རླབས་ཞུགས། ཤེས་རབ་ཡེ་ཤེས་ཀྱི་དབང་ཐོབ། བདེ་སྟོང་ཙཎྜ་ལིའི་སྣོད་དུ་གྱུར། ཕྱག་རྒྱའི་རིག་འཛིན་གྱི་ས་བོན་ཐེབས། ཆོས་སྐུའི་གོ་འཕང་ཐོབ་པའི་སྐལ་བ་རྒྱུད་ལ་བཞག སླར་ཡང་ཐུགས་ཀའི་ཧཱུྃ་ལས་ཧཱུྃ་ཡིག་གཉིས་པ་ཞིག་སྐར་མདའ་འཕངས་པ་བཞིན་དུ་ཆད། རང་སེམས་དང་ཐ་དད་མེད་པར་འདྲེས། ཀུན་གཞིའི་ལས་དང་ཤེས་བྱའི་སྒྲིབ་པ་སྦྱངས། ཡེ་ཤེས་རྡོ་རྗེའི་བྱིན་རླབས་ཞུགས། ཚིག་གིས་མཚོན་པ་དོན་དམ་གྱི་དབང་ཐོབ། ཀ་དག་རྫོགས་པ་ཆེན་པོའི་སྣོད་དུ་གྱུར། ལྷུན་གྲུབ་རིག་འཛིན་གྱི་ས་བོན་ཐེབས། མཐར་ཐུག་གི་འབྲས་བུ་ངོ་བོ་ཉིད་སྐུའི་སྐལ་བ་རྒྱུད་ལ་བཞག་གོ །དེ་ལྟར་འདོན་སྒོམ་ཟུང་དུ་འཇུག་པས་ལམ་དབང་བླངས་མཐར། བླ་མའི་ཐུགས་ཀ་ནས་འོད་ཟེར་དམར་བོ་དྲོད་དང་བཅས་པ་ཞིག་ཝལ་གྱིས་བྱུང་བ་བདག་ཉིད་རྡོ་རྗེ་རྣལ་འབྱོར་མར་གསལ་བའི་སྙིང་ཁར་རེག་པ་ཙམ་གྱིས་འོད་དམར་གྱི་གོང་བུ་ཞིག་ཏུ་གྱུར་ནས་གུ་རུ་རིན་པོ་ཆེའི་ཐུགས་ཀར་ཐིམ་པས་དབྱེར་མེད་རོ་གཅིག་ཏུ་གྱུར་པར་བསྒོམ་ཞིང་། དམིགས་བསམ་བརྗོད་པ་དང་བྲལ་བའི་ངང་ལ་མཉམ་པར་བཞག་གོ །དེ་ལས་ལྡང་ནས། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པདྨའི་གདན་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་བསྩལ་ཏུ་གསོལ། །དཔལ་ལྡན་བླ་མའི་རྣམ་པར་ཐར་བ་ལ། །སྐད་ཅིག་ཙམ་ཡང་ལོག་ལྟ་མི་སྐྱེ་ཞིང་། །ཅི་མཛད་ལེགས་པར་མཐོང་བའི་མོས་གུས་ཀྱིས། །བླ་མའི་བྱིན་རླབས་སེམས་ལ་འཇུག་པར་ཤོག །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ནས། །ས་དང་ལམ་གྱི་ཡོན་ཏན་རབ་རྫོགས་ཏེ། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །བཅུ་བ་བསྔོ་བ་ནི། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག །འགྲོ་ཀུན་དགེ་བ་ཇི་སྙེད་ཡོད་པ་དང་། །བྱས་དང་བྱེད་འགྱུར་དེ་བཞིན་བྱེད་པ་དག །བཟང་པོ་ཇི་བཞིན་དེ་འདྲའི་ས་དག་ལ། །ཀུན་ནས་ཀུན་ཀྱང་བཟང་པོར་རེག་གྱུར་ཅིག །འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །བཅུ་གཅིག་པ་སྨོན་ལམ་ཁྱད་པར་བ་ནི། །གང་དུ་སྐྱེས་པའི་སྐྱེ་བ་ཐམས་ཅད་དུ། །མཐོ་རིས་ཡོན་ཏན་བདུན་ལྡན་ཐོབ་པར་ཤོག །སྐྱེས་མ་ཐག་ཏུ་ཆོས་དང་འཕྲད་གྱུར་ཅིང་། །ཚུལ་བཞིན་སྒྲུབ་པའི་རང་དབང་ཡོད་པར་ཤོག །དེར་ཡང་བླ་མ་དམ་པ་མཉེས་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པར་ཤོག །ཆོས་རྟོགས་ནས་ནི་སྙིང་པོའི་དོན་བསྒྲུབས་ཏེ། །ཚེ་དེར་སྲིད་པའི་རྒྱ་མཚོ་བརྒལ་བར་ཤོག །སྲིད་པར་དམ་པའི་ཆོས་རབ་སྟོན་བྱེད་ཅིང་། །གཞན་ཕན་བསྒྲུབ་ལ་སྐྱོ་ངལ་མེད་པར་ཤོག །རླབས་ཆེན་གཞན་དོན་ཕྱོགས་རིས་མེད་པ་ཡིས། །ཐམས་ཅད་ཕྱམ་གཅིག་སངས་རྒྱས་ཐོབ་པར་ཤོག །དེང་ནས་ཚེ་རབས་ཐམས་ཅད་དུ། །བླ་མ་མཆོག་དང་མི་འབྲལ་ཞིང་། །དབང་བཞིའི་ཆུ་བོས་རྒྱུད་སྨིན་ཏེ། །སྡོམ་དང་དམ་ཚིག་རྣམ་པར་དག །རིམ་གཉིས་ལམ་ལ་རབ་བརྟེན་ནས། །མཐར་ཐུག་རྔ་ཡབ་དཔལ་རིའི་རྩེར། །ཨོ་རྒྱན་སློབ་དཔོན་པདྨའི་དྲུང་། །རིག་འཛིན་མཁའ་འགྲོའི་ཚོགས་ཁང་དུ། །ཚོམ་བུ་གཅིག་ཏུ་སངས་རྒྱས་ཤོག །དེ་ཡན་ཆད་ཀྱིས་འུ་ཚོས་བསྟན་པ་སྤྱིའི་རྣམ་བཞག་གི་སྒྲོམ་གཞི་དང་མཐུན་ཞིང་། རང་ལུགས་དམ་པ་གོང་མའི་ཕྱག་བཞེས་རྨ་མེད་ཇི་བཞིན་དུ་སོ་བྱང་སྔགས་གསུམ་གྱི་རིམ་པའི་འགྲོས་ཀྱི་དོད་ཐུབ་ས་ཁོངས་འཛིན་བྱེད་དང་ཆབས་ཅིག་ཏུ་མ་འདྲེས་ཡོངས་རྫོགས་དགོས་དགུ་ཚང་པའི་ལམ་གྱི་རིམ་པའི་ཕྱོགས་སྟོན་ཞིག་བྱས་པ་ཡིན། སྤྱིར་ན་སྡོམ་པ་གསུམ་ཞེས་པ་འདིའི་ཐ་སྙད་གྲགས་པའི་རྣམ་གྲངས་ལ་བསམ་བློ་ཞིག་བཏང་ན། སོ་ཐར་གྱི་དགེ་བསྙེན། དགེ་ཚུལ། དགེ་སློང་སྟེ་བསླབ་ཚིགས་གསུམ་དང་། བྱང་སྡོམ་གྱི་ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་ཀྱི་ཚུལ་ཁྲིམས་གསུམ། དེའི་སྟེང་དུ་སྔགས་སྡོམ་གྱི་སྐུ་གསུང་ཐུགས་ཀྱི་དམ་ཚིག་གསུམ་ལ་སྡོམ་པ་གསུམ་གསུངས་ལ། འོན་ཀྱང་སྡོམ་གསུམ་གྱི་ངོས་འཛིན་དེ་དོན་གྱི་སྟེང་ནས་བཤད་ཡོང་ན། རང་དང་གཞན་དོན་ཕན་པ་ཆེ། །ཞེས་གསུངས་པའི་རྩ་བརྒྱུད་ཀུན་འདུས་ཀྱི་ལུང་ཞིག་ཡོད་པའི་དོན་ལྟར་རང་དོན་དང་། གཞན་དོན། གཞན་དོན་རླབས་པོ་ཆེ་གསུམ་གྱི་སྟེང་ནས་སོར་བྱང་སྔགས་གསུམ་གྱི་སྡོམ་པ་དེ་བརྩི་དགོས་པ་དེ་ཉིད་ཡིན་ཞིང་། སྡེ་སྣོད་གསུམ་གྱི་ནང་ནས་བཤད་ཡོང་ན། འདུལ་བའི་བསྟན་དོན་སོ་ཐར། མདོ་སྡེའི་བསྟན་དོན་བྱང་སྡོམ། སྡེ་སྣོད་བཞི་བའམ་རིག་པ་འཛིན་པའི་སྡེ་སྣོད་ཀྱི་བསྟན་དོན་དེ་སྔགས་སྡོམ་ཡིན། དེ་ལྟར་ན་སོ་ཐར་དེ་ཀུན་སློང་གི་ཁྱད་པར་རང་དོན་ཞི་བདེ་འདོད་པས། ཆོ་གའི་ཁྱད་པར་ཉན་ཐོས་དང་ཐུན་མོང་བའི་འདུལ་བའི་ཆོ་ག་ལ་བརྟེན་ནས། དུས་ཀྱི་ཁྱད་པར་ཉིན་ཞག་གི་མཐའ་ཅན་ནམ་ཡང་ན་ཇིི་སྲིད་འཚོའི་བར་དུ། སྤང་བྱའི་ཁྱད་པར་ལུས་ངག་གི་མི་དགེ་བ་ཅི་རིགས་སྤོང་བའི་སོ་ཐར་རིགས་བརྒྱད་གང་རུང་ལ་སློབ་པ་དེ་ཡིན། བྱང་སྡོམ་ཞེས་པ་དེ་ཀུན་སློང་གི་ཁྱད་པར་གཞན་དོན་རྫོགས་བྱང་ལ་དམིགས་ནས། ཆོ་གའི་ཁྱད་པར་གོང་ནས་བཤད་པ་ལྟར་ཟབ་མོ་ལྟ་སྲོལ་དང་རྒྱ་ཆེན་སྤྱོད་སྲོལ་གྱི་སྲོལ་གཉིས་གང་རུང་ལ་བརྟེན་ནས། དུས་ཀྱི་ཁྱད་པར་བྱང་ཆུབ་མ་ཐོབ་ཀྱི་བར། སྤང་བྱའི་ཁྱད་པར་བྱང་ཆུབ་སེམས་དཔའི་འཆལ་ཚུལ་གྱི་རྒྱུན་སྤོང་བའི་སྨོན་འཇུག་གཉིས་ཀའམ་གང་རུང་ལ་བསླབ་པ་དེ་ཡིན། སྔགས་སྡོམ་ཞེས་པ་དེ་ཇི་ལྟ་བུ་ཞིག་ཡིན་ཞེ་ན། ཀུན་སློང་ཐབས་ཤེས་ཁྱད་པར་ཅན་གྱིས་ཟིན་པའི་གཞན་དོན་རླབས་ཆེན་བསྒྲུབ་འདོད་ཀྱིས། ཆོ་གའི་ཁྱད་པར་རྒྱུད་སྡེ་བཞི་གང་རུང་གི་དབང་ལ་བསྟེན་ནས། དུས་ཀྱི་ཁྱད་པར་བླ་ན་མེད་པའི་བྱང་ཆུབ་མ་ཐོབ་ཀྱི་བར་དུ། སྤང་བྱའི་ཁྱད་པར་སྔགས་ཕྱི་ནང་སོ་སོ་ལ་ལྟོས་པའི་རང་སྐལ་གྱི་འཆལ་ཚུལ་སྡོམ་པའི་ཚུལ་ཁྲིམས་ཡིན་པ་གང་ཞིག་བཏགས་པ་བ་བརྗོད་པ་ཁས་བླངས་དང་། མཚན་ཉིད་པ་དབང་གི་དངོས་གཞི་ལས་ཐོབ་པ་གོང་ནས་ཀྱང་བཤད་པ་ལྟར་ཡིན། དེས་ན་སྡེ་སྣོད་གང་ཡིན་ཡང་རང་རང་གི་བསྟན་དོན་ལ་བསྟུན་ནས་སོ་སོར་ངོས་བཟུང་ན། སོ་ཐར་ཉན་ཐོས། སེམས་བསྐྱེད་བྱང་སེམས། དབང་ཐོབ་རིག་པ་འཛིན་པ་ཞེས་ཐ་སྙད་གྲགས་པའི་རྣམ་གྲངས་ཀྱི་དབང་དུ་བཏང་ན་དེ་ལྟར་དུ་གྲགས་པ་ཡིན། འོན་ཀྱང་ཀུན་སློང་གི་ཁྱད་པར་གྱིས་དེ་ཡང་མཐའ་གཅིག་ཏུ་ངེས་པ་ཅན་མིན། དེ་ངེས་པ་ཅན་མིན་པ་ནི། སྡོམ་གསུམ་རབ་དབྱེ་ལས། བསམ་པ་སེམས་བསྐྱེད་ཀྱིས་ཟིན་པའི། །ཆོ་ག་ཉན་ཐོས་ལུགས་བཞིན་གྱིས། །སོ་སོར་ཐར་བ་རིགས་བརྒྱད་པོ། །བྱང་སེམས་སོ་སོར་ཐར་བར་འགྱུར། །ཞེས་གསུངས། དེ་ལྟར་གསུངས་པ་དེ་ཉིད་ཀྱིས་ཅི་ཞིག་བསྟན་ཞེ་ན། བྱང་སེམས་ཀྱི་སོ་ཐར་ངོས་བཟུང་བའི་ཞོར་དུ་སྔགས་ཀྱི་སོ་ཐར་དོན་གྱིས་འཕངས་ཏེ་བསྟན་པ་ཡིན། དེ་ལྟར་ན་སོར་བྱང་སྔགས་གསུམ་གྱི་སྡོམ་གསུམ་མཉམ་དུ་རྫོགས་པའི་ཐད་ནས་རྟེན་རབ་བྱུང་བསྙེན་རྫོགས་ཀྱི་སྡོམ་ལྡན་ཞིག་ལ་མཚོན་ན། ཐུན་མོང་སོ་ཐར་གྱི་སྡོམ་པ་གནང་བཀག་གི་དབྱེ་བས་ཉིས་བརྒྱ་ལྔ་བཅུའི་ཁྲིམས་ལ་སོགས་པའི་ཉེས་སྤྱོད་སྡོམ་པ་གཞིར་བཞག་ལ། དེའི་སྟེང་དུ་བྱང་ཆུབ་སེམས་དཔའི་དགེ་བ་ཆོས་སྡུད་དང་སེམས་ཅན་དོན་བྱེད་དེ་ཚུལ་ཁྲིམས་རྣམ་པ་གསུམ། དེའི་སྟེང་དུ་རིག་འཛིན་སྔགས་ཀྱི་སྡོམ་པ་མཐའ་ཡས་པ་ཚང་། དེ་ཐམས་ཅད་གང་ཟག་གཅིག་གི་རྒྱུད་ལ་ཇི་ལྟར་ཚང་དགོས་པ་ཡིན་ཞེ་ན། རང་ལྡོག་མ་འདྲེས། དགག་དགོས་ཡོངས་རྫོགས། ངོ་བོ་གནས་འགྱུར། ཡོན་ཏན་ཡར་ལྡན་གྱིས་ཚང་དགོས། དེ་ཇི་ལྟར་ཞེ་ན། སྡོམ་གསུམ་སོ་སོའི་མཚན་ཉིད་སོ་སོར་འཛིན་པ་ཡིན་པས་ན་རང་ལྡོག་མ་འདྲེས་ཡིན། སྡོམ་པ་གསུམ་ཁས་གང་ཟག་གཅིག་པོ་དེའི་རྒྱུད་ཀྱི་མི་དགེ་བ་སྡོམ་པ་ཡིན་པས་ན་དགག་དགོས་ཡོངས་རྫོགས་ཡིན། སྔགས་ཀྱི་དུས་སུ་སོ་ཐར་བྱང་སེམས་ཞེས་པ་རྫས་ཐ་དད་པ་མེད་པས་ངོ་བོ་གནས་འགྱུར། དེའི་སྟེང་དུ། དབང་གསུམ་བགྲོད་པའི་རྣལ་འབྱོར་པ། །དེ་ནི་དགེ་སློང་ཆེན་པོར་གསུངས། །ཞེས་པདྨ་ཅོད་པན་གྱི་རྒྱུད་ཀྱི་ལུང་ལས་གསུངས་པ་དེ་ལྟ་བུའི་ཡོན་ཏན་ཡར་ལྡན། དེ་ཡང་གནད་ཀྱིས་མི་འགལ་བ་དང་། དུས་སྐབས་ཀྱི་བྱ་བས་གང་གཙོ་བོར་སྤྱད་པ་དེ་ཀུན་མཁྱེན་ཆོས་རྗེའི་བརྒྱུད་འཛིན་དང་བཅས་པའི་རང་ལུགས་ཀྱི་བཞེད་པ་དེ་དེ་ལྟ་བུ་ཞིག་ཡིན། མདོར་ན་སྐབས་སུ་བབ་པའི་བཤད་དོན་སོ་ཐར་གྱི་ངོ་བོ་ངེས་འབྱུང་། ལམ་གྱི་རྩ་བ་བྱང་ཆུབ་ཀྱི་སེམས། ངོ་བོ་ཉིད་ཀྱི་འབྲས་བུ་སྟོང་ཉིད་ཀྱི་ལྟ་བ་གསུམ་ལ་མི་འཕྲོག་པའི་དད་པ་དང་ངེས་ཤེས་སྐྱེས་པའི་གང་ཟག་དེ་ཉིད་ཁྱིམ་ན་གནས་པ་ཡིན་ཡང་དམ་པའི་ཆོས་དང་འབྲེལ་ཞིང་བྱང་ཆུབ་ཀྱི་སྤྱོད་པ་ལ་གནས་པ་ཡིན། དེའི་འཕྲོས་རུ་པ་བདག་པོ་སོ་སོ་ལ་འདིའི་ཞོར་དུ་དམིགས་བསལ་གྱིས་བཤད་རྒྱུ་ཞིག་ལ། འདིའི་ཞིང་སྒྲུབ་དང་ཞིང་ཁྲིད་ཀྱི་སྐབས་སུ་ཆོས་ཁྲིད་དང་གཅོད་ཞུ་ལ་སོགས་པར་ཡོང་དུས་འཕྲུལ་རྟ་རླངས་འཁོར་ཅི་ཞིག་གཏོང་བཞིན་ཡོད་ན་རང་རང་སོ་སོའི་རང་ངོས་ཀྱི་འགྲིམ་འགྲུལ་བདེ་འཇགས་དེ་རང་རང་སོ་སོའི་ངོས་ནས་གཟབ་གཟབ་གྱིས་ཟེར་རྒྱུ་དེ་ཡིན། ཉིན་གཉིས་པའི་ཆོས་ཁྲིད།༼ཀ༽ སྔོན་དུ་འགྲོ་བའི་ཆོས། དེ་རིང་གི་དུས་ཚོད་ནས་འདས་པའི་ཕྱོགས་ལ་ཡར་ཕྱིར་ལྡོག་ལ་བརྩིས་ཏེ་ཟླ་བ་བཅུ་གཉིས་ལོ་གཅིག་གི་ཁ་གང་བའི་ཡར་སྔོན་གྱི་ད་ལྟའི་དུས་མཉམ་སྟེ། ན་ནིང་གི་ཟླ་བ་ཚེས་གྲངས་འདིའི་ཚོད་ཙམ་ཞིག་ལ་གྲུབ་དབང་རྫོགས་ཆེན་པའི་གདན་སའི་བཤད་སྒྲུབ་ལས་གསུམ་གྱི་དགེ་འདུན་པ་དབུར་བཞུགས་ས་ནས་ས་འདིའི་སྟེང་གི་འབྲོག་རུ་བསོད་ནམས་ལྷ་སྡེའི་སྡེ་ཚོ་པ་ཤོག་ཁག་བཅུ་གསུམ་ཆོས་བརྒྱུད་མ་ལག་ཡང་ལག་དང་བཅས་པའི་སེར་སྐྱ་ཆོས་དད་མང་ཚོགས་ཞལ་གྲངས་དང་ངོ་གྲངས་ཁྲི་ཕྲག་ཁ་གྲངས་ཅན་འཛོམས་ཏེ། མཚོ་ཁྲི་ཀླུ་ཕྱུག་སྡེ་བས་སྦྱིན་བདག་བྱས་ནས་བདེ་ཆེན་ཞིང་མཆོད་ཆེན་མོའི་མཆོད་འབུལ་དང་མཉམ་དུ་སེམས་བསྐྱེད་འབུམ་མཆོད་ཀྱི་མཆོད་འབུལ་ཡང་དེ་དང་སྦྲེལ་ནས་སེམས་བསྐྱེད་འཚོགས། བྱང་སྡོམ་བླངས། བདེ་ཆེན་ཞིང་སྒྲུབ་ཐེངས་བདུན་པ་ན་ནིང་འཚོགས་ལ། དཔལ་སྤྲུལ་འཇིགས་མེད་ཆོས་ཀྱི་དབང་པོའི་གསུང་ཐོག་མཐའ་བར་དགེའི་གཏམ་གྱི་ཆོས་ཁྲིད་ཅིག་ཀྱང་བཤད། དེ་ནས་དགའ་སྟོན་གྱི་ཚོགས་འཁོར་བསྐོར། ཚོགས་མཆོད་རྒྱ་ཆེན་པོ་ཞིག་ཕུལ། མཐར་བདེ་ཆེན་ཞིང་དབང་ཞིག་གིས་བསྡུས་ནས་ཚང་མ་ལ་ཚེ་རིང་ལོ་བརྒྱ་སྨྲས་ནས་འབྲལ་མི་ཕོད་བཞིན་དུ་ཚང་མ་དང་ཞལ་གྱེས་བྱས་པ་ཡིན། དེ་ལྟར་ན་འུ་ཚོ་སྤྱིར་མ་ཐུག་ནས་ལོ་གཅིག་འཁོར་ནས་ཁ་རྩང་དེ་རིང་གི་དུས་ཚོད་ལ་མ་ཤི་གསོན་པོར་ཡོད་པ་རྣམས་ལ་ཡང་ཐེངས་གཅིག་ལ་ཐུག་པའི་གོ་སྐབས་ཚེས་པ་ཡིན། འདས་མ་ཐག་པའི་ལོ་གཅིག་པོ་དེའི་ཁ་རྩང་གི་དུས་ཚོད་ལྟ་བུ་ལ་ཕྱིར་བལྟས་ཤིག་བྱས་ན་འདས་པའི་བྱ་དངོས་ཐམས་ཅད་པོ་མཐོང་ཡུལ་ལ་ཡོད་པ་མ་ཡིན་ཞིང་། འདང་བརྒྱབ་ན་ཡིད་ངོར་ཤར་རྒྱུ་ཡོད་པ་དེ་དང་དེ་དག་གི་བྱུང་བ་དྲན་པའི་ལོ་རྒྱུས་དེ་མདང་གི་རྨི་ལམ་ཕྱིར་དྲན་བྱས་པ་ལྟ་བུ་ཞིག་ཡིན། བསྐལ་བ་རྟ་སྦྲུལ་གཉིས་ཀྱི་བར་གྱི་ལོ་གཅིག་པོ་འདི་ལ་ཡུལ་སྡེ་སྤྱི་ལ་དམིགས་བསལ་གྱི་ཆག་ཆེ། ཉམ་ང་། ས་གཡོ། མེ་དགྲ་ལ་སོགས་པའི་འབྱུང་བཞིའི་གནོད་པ་དང་། གློ་བུར་གྱི་ཉེར་འཚེའི་རིགས་གཞན་དག་ཆེན་པོ་མ་བྱུང་ལ། འོན་ཀྱང་སྤྱིར་ན་རྩོད་ལྡན་སྙིགས་མ་ལྔ་བདོ་བའི་དུས་འདིར་ཕྱིའི་འབྱོར་འཁོས་དེ་ཉིད་ཡར་རྒྱས་བཞིན་མེད་ན་མར་རྒུད་ཀྱིན་ཡོད་པའི་ཚོར་སྣང་འདི་ཡོད་འདུག་བསམ་རྒྱུ་མེད་མོད། ནང་ཉོན་མོངས་དུག་ལྔས་ནད་གཞི་དེ་ཤུགས་ཇེ་དྲག་ལ་འགྲོ་བཞིན་ཡོད་པ་དེ་ཉིད་ལ་ཕན་ཐོགས་ཅན་གྱི་ནང་བསམ་པའི་བདུད་རྩི་སེམས་ཀྱི་སྨན་མཆོག་ཕན་ནུས་ཅན་གནད་ཐོག་ལ་ཁེལ་བ་ཡང་དཀོན་པའི་སྟབས་ཀྱིས་བདེ་ཟེར་ཡང་སྡུག་བསྔལ་མེད་པའི་སྐྱིད་པོ་ཞིག་འདིའི་ཉིན་པར་སྐྱིད་ཟེར་རྒྱུ་མིག་གིས་འདི་རིག་སོང་བསམ་པ་ཞིག་དཀའ་མོ་ཡིན། ཡིན་ན་ཡང་མི་ཤི་ན་ཚ་ངན་པ་མ་ཡོང་བ་དེ་ཉིད་ལ་བདེ་ཟེར་ཁུལ་བྱེད་པ་ཡིན་ཡང་དེ་ཡང་གཅིག་ཚང་བདེ་ན་གཅིག་ཚང་བདེ་བ་མ་ཡིན་ཞིང་། འགའ་རེའི་ཕ་མ་རྒན་གསུམ་མ་འཚམས། འགའ་རེའི་ལོ་ཉུང་དང་བྱིས་པ་མ་བསམ་མ་དྲན་ས་ནས་གསར་ཤི་དར་ཆག་གྱུར་ཤོར། འགའ་རེ་དབུགས་རྟ་རྔ་འདྲ་བོ་མ་ཆད་ཀྱང་ཤི་གསོན་གཉིས་ཀ་གང་དགའ་གདམ་ཞེས་སྨྲས་ན་ཤི་རྒྱུ་སྔོན་མར་གདམ་འགྲོ་བའི་ནད་ན་ཚའི་སྡུག་བསྔལ་ཆེ། ཡང་འགའ་རེ་མི་དགོས་ས་ནས་བྱ་ཉེས་བྱུར་གྱི་སྣ་འདྲེན་དུ་སོང་ནས་དགྲ་གྱོད་གཉིས་ཀྱི་བར་ལ་ལྷུང་རྒྱུ། ད་ནངས་ཀྱི་གཉེན་དང་གྲོགས་པོ་དེ་མ་བསམ་ས་ནས་དོ་དགོང་དགྲར་གྱུར་པ། རེ་བ་ཅན་དེ་ཉིད་ཀྱིས་རེ་ཐག་བཅད་པ། ལས་ལས་བྱས་བྱས་དཀའ་ལས་བརྒྱབ་པ་དེ་ཉིད་སྟོང་ཟད་ལ་སོང་བ་ལ་སོགས་པ་མདོར་ན་སྐྱེ་རྒ་ན་འཆིའི་སྡུག་བསྔལ་གྱི་ཆུ་བོ་ཆེན་པོ་བཞི་བཤད་ཅི་དགོས་ཏེ། དེ་དང་འདྲ་བའི་སྡུག་བསྔལ། དེ་བས་ཚབས་ཆེ་འདུག་བསམ་རྒྱུའི་སྡུག་བསྔལ་སྣ་ཚོགས་པ་འདི་དག་གིས་འཁོར་བའི་སེམས་ཅན་ལ་སྡུག་མ་བསྐོལ་བསམ་རྒྱུ་ཞིག་དང་མ་མནར་བསམ་རྒྱུ་ཞིག་མེད། དེ་ལྟར་ན་ཡང་ན་ནིང་ཆོས་གྲྭའི་ནང་ལ་མཉམ་འཚོགས་བྱས་པ་ད་ལོ་མིང་མེད་ཕྱི་མའི་ལམ་ལ་མིག་ལམ་དུ་དེ་ལྟར་ཆས་སོང་བ་ནི་གང་མང་མང་ཡིན་ཞིང་། ལོ་གཅིག་སོང་ནས་འབྱུང་འགྱུར་གྱི་སང་ལོ་ད་ལྟའི་དུས་ཚོད་ལ་ཡང་ཐམས་ཅད་པོ་བཟའ་ཚོ་ཁ་ཚང་འཛོམས་པ་དེ་ཉིད་ཀྱང་སྔར་བསགས་བསོད་ནམས་ཀྱི་རྒྱུ་ཚོགས་ཚོགས་ཡག་བྱས། དཀོན་མཆོག་གསུམ་གྱི་སྐྱབས་འོག་ལ་ཡང་དག་ཅིག་ཚུད་ཡོད། ལྷ་དང་སྲུང་མའི་སྐྱོར་ཡ་མ་འདྲ་བ་ཞིག་མེད་ན་རྐྱེན་གློ་བུར་གྱིས་ཤུགས་ལ་མི་འགྲོ་ཟེར་མི་ཤེས། གང་ལྟར་འདིར་ཡོད་ཀྱི་ཕོ་མོ་རྒན་དར་གཞོན་གསུམ་པོ་མ་ཤི་ཚེ་རིང་བྱུང་ནས་མཉམ་དུ་འཛོམས་པ་ནི་ཚེ་རབས་གཏན་གྱི་འདུན་མ་ཕུགས་བསམ་ཡོད་ཚད་ཀྱི་ནང་ནས་བཟང་ཤོས་ཀྱི་ཆེད་ཡིན། རང་གཞན་ཐམས་ཅད་ལ་འཕྲལ་དང་ཡུན་གྱི་ཕན་ཐོགས་ཅན་དམ་པའི་ཆོས་ཀྱི་དགའ་སྟོན་ལ་ལོངས་སུ་སྤྱོད་པའི་སྐལ་བ་བཟང་པོ་འདི་ལྟ་བུ་དང་ལྡན་པ་འདི་ཚོ་སྔར་བསགས་བསོད་ནམས་ཀྱི་མཐུ་དང་། ལས་དང་སྨོན་ལམ་བཟང་པོའི་མཐུ་མཉམ་དུ་གྲུབ་པ་ཞིག་ཡིན་པར་སྨོས་མི་དགོས། འུ་ཚོའི་ན་ནིང་གི་གླེང་མོལ་ནང་ན་སྤྱིར་ན་ཆོས་པ་ཞིག་གིས་རྟག་འཛིན་བྱེད་སའི་བློ་སྣ་རིང་པོ་བྱེད་རྒྱུ་མེད། ཁྱད་པར་དུ་ཞིང་སྒྲུབ་རྗེས་མ་ངའི་ཟུར་འདི་ནས་འཚོགས་ཟེར་རྒྱུའི་ལོ་གཅིག་གི་སྔོན་འཆར་མ་དགོས་དང་ཞག་དང་ཟླ་བའི་ཚོད་རྩིས་ཡིད་ཚོད་སུས་ཐིག་སྟེ། དེ་ལ་མ་གཞིར་བཤད་ན་ཞིང་སྒྲུབ་འདི་རི་ཁྲོད་འདི་ནས་འཚོགས་མ་འཚོགས་ཨེ་འདུག་ཅེས་སྨྲས་ནས་བློ་ཐེ་ཚོམ་ཅན་གྱི་མདུད་སྣེ་ཁ་ཡ་དེ་སྡེ་བ་མང་ཚོགས་ཀྱི་ལག་ལ་བཞག་པ་ཡིན། དེ་ལྟར་ཡིན་ཕྱིར་ཆོས་པ་ཞིག་གིས་ཆོས་ཕྱོགས་ཀྱི་བྱ་བ་གང་སྒྲུབ་ན་བརྟགས་ཤིང་དཔྱད་པ་སྔོན་ལ་བཏང་སྟེ། ཆོས་བསྒྲུབས་ན་ཆོས་ཀྱི་སྒྲུབ་ལུགས་བློ་ཐག་རང་གིས་བཅད། སྣ་ཐག་མགོ་ལ་སྡོག་རྒྱུ་མིན་པར་ཕྱིར་བལྟས་བྱེད་སར་ཐུག་དུས་ཆོད་སེམས་ཀྱི་བློ་སྟོབས་དེ་ཉིད་རང་ངོས་ནས་དེ་ཙམ་མ་བརྟན་པ་ཡིན་ཤས་ཆེ། ལུས་རྟེན་འདི་ལ་མི་ལུས་ཤིག་བླངས་པ་དེ་ཉིད་ཀྱི་བསྐོས་ཐང་ཐོད་པའི་རི་མོ་དེ་ས་འདིར་བྲིས་བཞག་པ་ཡིན་ན་མི་ཐོག་སྔོན་རྗེས་ཀྱི་ན་ཚོད་རབ་འབྲིང་ཐ་གསུམ་དང་སྐྱིད་སྡུག་མཉམ་དུ་ཁུར། ཁྱད་པར་དུ་མང་པོ་ཞིག་གིས་ད་སྔའི་འགྲོ་ལམ་རིང་མོའི་མི་ལོ་དྲུག་ཅུ་བདུན་ཅུའི་མངར་སྐྱུར་ཁ་གསུམ་གྱི་བྲོ་བ་མྱངས་པའི་ལོ་རྒྱུས་ཀྱི་ར་སྤྲོད་དང་བསྟུན་ནས་ཆོས་ཁྲིད་ལུགས་གཉིས་ཀྱི་ཐད་ནས་བློ་གཏད་འདྲ་ཞིག་བཅོལ་ཁུལ་བྱས། འུ་ཚོ་ལ་ཆོས་འཇིག་རྟེན་གཉིས་ཀྱི་ཐད་ནས་ལེགས་པའི་ལམ་སྟོན་དང་གནས་སྐབས་དང་མཐར་ཐུག་ལ་བདེ་ཞིང་སྐྱིད་པའི་མགྱོགས་ལམ་ཟིན་པ། དེའི་བར་ནས་ལམ་ངན་རང་གཞན་གཉིས་ཕུང་ལ་རྡོག་འཁྱར་མི་འགྲོ་བ། དེ་ལྟ་བུའི་ལམ་ཁྲིད་ཀྱི་ནུས་པ་འདི་ཡོད་འདུག་བསམ་རྒྱུའི་གདིང་ཚོད་སྤོབས་པ་མི་འདུག་ཀྱང་དམ་པ་གོང་མ་ཚོས་ཐུགས་བསྐྱེད་སྨོན་ལམ་དང་གསུང་གི་ཞལ་ཆེམས་རྣམས་གཞིར་བཟུང་སྟེ། ས་མི་འགྱུར་གྱི་ས་རྟགས་དེ། །ཤར་གྱི་དུང་རི་དཀར་ཆུང་དང་། །ཕྱོགས་མི་ནོར་གྱི་ཕྱོགས་རྟགས་དེ། །བྱང་གི་སྐར་མ་ཨ་བརྟན་ལ་བཟུང་ནས། ཆོས་བརྒྱུད་འཆུག་མེད་ཀྱི་གདམས་ངག་དང་། ཡ་རབས་འཇིག་རྟེན་གྱི་ལམ་སྲོལ་དེ་དེད་ནས་སོང་ན་ས་ཁ་ཐག་རིང་པོའི་འགྲོ་ལམ་བརྒྱུད་ནས་འགྲོ་བཞིན་ཡོད་ཕྱིར་གྱེན་ཐུར་བརྩེགས་གསུམ་དང་། ལ་ཆུ་འཕྲང་གསུམ་གྱི་བདེ་གཟར་སྣ་ཚོགས་ལ་ལོས་ཐུག་སྟེ། ཡིན་ན་ཡང་། ཁྲ་ཆུང་མིག་གི་ལྟ་ཕྱོགས། གངས་དཀར་སེམས་ཀྱི་འཁོར་ཕྱོགས། བློ་གཏད་སའི་མདུད་སྣེ་ལྟ་བུ་དེ་ཉིད་མ་འཆུག་དུས་ཅིག་འགྲིག་བཞིན་ཡོད་ལས་ཆེ་སྙམ་ནས་མི་ཆེན་དཔོན་ཆེན་བརྒྱ་ཐམ་པའི་ངོ་ལོན་པ་བས་ཡུལ་སྡེ་པའི་འབངས་མི་ཕལ་པ་གཅིག་དགའ་སོང་བས་དགའ། སྟོབས་འབྱོར་བ་ཅན་གྱི་དངོས་པོའི་འབྱོར་བས་ལུང་པ་རྟ་ནོར་གྱིས་བཀང་ནས་བྱིན་པ་བས་མང་ཚོགས་ཉམ་ཆུང་ཕལ་པ་ཞིག་གི་ཡིད་ཆེས་ཀྱི་རིན་ཐང་ཆེ་བསམ་གྱིན་ཡོད། ས་འདི་དང་སྡེ་འདིའི་མི་རྐྱང་པ་མིན་ཡང་འདི་ན། ས་ནག་འདོམ་ལ་འཇལ། སྤྲིན་དཀར་ཐོད་ལ་བཏགས་ནས་ཡོང་བ་རྣམས་གཅིག་དང་གཅིག་ཡིན། དེར་མ་ཟད་ངའི་འབྱུང་བཞི་འདུས་པའི་ཕུང་པོ་ཞིག་སོང་ཞིང་། རུས་གོང་དཀར་པོའི་ཚོགས་པ་འཐོར་སོང་ཡང་མ་འོངས་ཕྱི་རབས་འབྱུང་འགྱུར་གྱི་གྲོགས་པོ་ཚོའི་ངོ་སྐལ་དུ་ཕན་པའི་སྙིང་གཏམ་ཚིག་རེ་ཚིག་གཉིས་ཤིག་ཡིག་ཐོག་ལ་བཞག་པ་རྣམས་ལ་བལྟས་ན་ལྟ་བསམ་པའི་མོས་པ་ཅན་ཚོ་ངའི་མ་འདྲིས་སེམས་གཏམ་གྱི་གྲོགས་པོ་ཡིན་པ་དང་། དོན་སེམས་ལ་བླངས་ནས་ཕན་རེ་ཐོགས་ས་ཞིག་ཡོད་ན་ངའི་ལས་དང་སྐལ་བ་ལྡན་པའི་གདུལ་བྱ་ཡིན་སྙམ་གྱིན་ཡོད། དེ་ལྟར་ཡིན་ཕྱིར་ས་ཆ་གང་ཡིན་ལ་མ་ལྟོས་པའི་རིས་མེད་ཉམ་ཆུང་གི་མང་ཚོགས་ཕལ་པ་ཚོའི་ཡིད་ཆེས་དེ་རིན་ཐང་ཆེ་བས་མི་ཚད་དེ་དག་ལ་ཕན་རེ་ཐོགས་ན་ངའི་བདེ་སྐྱིད་ཀྱི་ཆེ་ཤོས་དེ་ཡིན། འདང་དེ་ལྟ་བུ་བརྒྱབ་ནས་ང་ཚོའི་གོམ་པ་རྗེས་མའི་ས་ཚུགས་དེ་ས་གང་ན་ཇི་ལྟར་འཛོམས་ན་དགའ་ཁྱེད་ཚོས་ཤེས་ཞེས་མདུད་སྣེ་གཅིག་མི་ལག་ལ་བཞག་པ་ཡིན། ཡང་ཁ་ཁ་ཡ་ནས་མི་ལོ་བདུན་ཅུའི་རིང་དུ་སོང་ཚར། ལས་ཚར། བཤད་ཚར་བ་ཡིན། ད་ནི་མི་ཁྱུ་ནས་བུད་ནས་གྲོགས་བྱ་དང་རི་དྭགས་བྱས་ཏེ་མི་ཚེའི་ལྷག་མ་དེ་མཇུག་སྒྲིལ་བ་ཡིན་ཟེར་ཞོར་དུ། ཡང་ཁ་ཁ་ཡ་ནས་ད་རུང་ཅི་བྱེད་ཁྱེད་ཚོ་དང་བསྟུན་ལྟ་བུ་བཤད་པས་ཀི་རང་གིས་བཏབ་ཀྱང་གོམ་པ་ཐུང་ལེན། ཕྱི་བལྟས་རེ་ཤོར་བཞིན་ཡོད་པའི་རྣམ་འགྱུར་དུ་གྱུར་མེད་ཟེར་ཡང་འགྱུར་བཞིན་འདུག ན་ནིང་ང་ཚོའི་ཆོས་ཚོགས་གྲོལ་རན་ཁར་ཚེ་རིང་ལོ་བརྒྱ་ཞིག་དང་ལྷན་དུ་འདུས་བྱས་ཀྱི་ཆོས་ལ་རྟག་བརྟན་ཡོད་པ་མ་ཡིན་ཡང་ལྷ་དང་བླ་མས་བསྐྱབས་ན་སང་ཕར་ལོའི་ད་ལྟའི་དུས་ཚོད་ལ་གཅིག་བྱས་ན་རང་རེ་མཉམ་འཛོམས་ཡོང་སྲིད་ཟེར་རྒྱུའི་ཚིག་དེའི་ཐོག་ནས་སྐད་ཆའི་མཚམས་བྱས་ནས་ད་ལ་ཐུག་པ་ཡིན། ལོ་མང་པོ་ཞིག་གི་ཡར་སྔོན་ལ་བདེ་ཆེན་ཞིང་མཆོད་ཀྱི་དབུ་བཙུགས་ཞོར་དུ་ཉེ་འཁོར་གྱི་ཆོས་དད་མང་ཚོགས་ཁ་ཤས་ལ་ཆོས་ཀྱི་སྦྱིན་པ་རེ་ཡོང་ན་རྣམ་དཀར་གྱི་དགེ་ལས་ཡིན་བསམས་ནས་ཚོགས་བསགས་རང་གི་དམིགས་པས་བྱེད་རྒྱུ་མ་གཏོགས་མི་ཞིག་གི་ལག་ལ་བཞག་སྟེ་བསྐལ་བའི་མར་མེ་དལ་མེད་ཀྱི་ཐེབས་རྩར་འགྱུར་རྒྱུ་དང་བསྒྱུར་རྒྱུའི་འདང་མེད་པར་མ་ཟད་ད་རུང་ཡིན་ན་འདི་ཐེངས་རེ་ཐེངས་གཉིས་ཀྱི་སྟབས་བསྟུན་བྱེད་རྒྱུའི་བསམ་བློ་ལ་འགྱུར་བ་མེད་ཀྱང་ཡུལ་མི་སྟོང་ཚོ་དང་ཁྲི་ཚོའི་རེ་འདུན་ཐང་ལ་འཕེན་མ་ཐེག་ནས་ཐེངས་མང་པོ་ཞིག་ལ་འདི་ལྟར་བྱས་ཏེ་འཛོམས་པ་ཡིན། འདི་ལ་ས་ཆ་གཅིག་དང་མི་འདྲ་བར་ས་ཆ་འདིའི་ཤོག་ཁ་དང་ཤོག་ཁའི་བར་སྦྱིན་བདག་བྱེད་རྒྱུར་ང་ཡིན་ཁོ་ཡིན་གྱི་རྩོད་པ་བྱེད་ཀྱིན་ཡོད་ལ། ཡིན་ན་ཡང་སྒེར་གཅིག་གི་ལག་ལ་ད་སྔོན་མ་བཞག་པ་ཡིན། གནས་ཚུལ་དང་བསྟུན་ཞོར་ལ་སྡེ་ཤོག་ཁ་ཚང་མ་ལ་མཚམས་རེ་ཁ་སྔོན་རྗེས་དང་། སྐབས་རེ་རྒྱན་འཕེན་པ་ལྟ་བུ་ཡང་བྱས་པ་ཡིན་ཞིང་། ན་ནིང་གལ་ཏེ་ཐེངས་རྗེས་མ་འཚོག་རྒྱུ་ཞིག་གྲུབ་སོང་ན་སྦྱིན་བདག་གཡང་འཁྱིལ་སྡེ་བར་བབ་འདུག་ཅེས་བཤད་པ་ཡིན། རང་རོགས་མ་ཤི་གསོན་པོར་ཡོད་པའི་མི་ཚང་མའི་མི་ཚེའི་དུས་ཚོད་ཀྱི་ནང་ནས་ལོ་གཅིག་སོང་ཚར་ནས་དེ་རིང་ཡང་འདི་ལྟར་འཛོམས་པ་དང་། དེ་བཞིན་དུ་ན་ནིང་གི་བཤད་ཐོག་ལྟར་ད་ལོ་གཡང་འཁྱིལ་སྡེ་བས་བཀོད་བསྒྲིགས་བྱས་ཏེ་འཚོགས་བཞིན་ཡོད་པ་འདི་ཡིན། གནའ་སྔོན་ཆད་གཡང་འཁྱིལ་སྡེ་བ་དེང་སང་ངས་མིང་བརྗེས་ནས་མདའ་བཞི་སྡེ་བ་བཏགས་ལ། མིང་ཆ་ཚང་སྨོས་ན་མདའ་བཞི་གཡང་སྡེ་ཕྱུག་མོ་ཞེས་བཏགས་པ་དང་། སྔར་གྱི་མིང་རྙིང་པའི་ཡིག་འབྲུ་གཅིག་ཡོད་པར་བྱས་ཏེ་བཏགས་པ་ཡིན། གནས་གདན་ས་ཁྱད་པར་ཅན་ཞིག་ནས་རྟེན་ཁྱད་པར་ཅན་གྱི་མདུན་དུ་དགེ་འདུན་འདུས་པ་མང་ཚོགས་འཛོམས་ས་ནས་དཀྱིལ་འཁོར་ཁྱད་པར་ཅན་གྱི་ཞལ་ཕྱེས་ཏེ་ཚོགས་བསགས་མཆོད་འབུལ་རྣམ་དག་ཅིག་བྱས་ན་ཕན་ཡོན་བསམ་གྱིས་ཅི་ཁྱབ། དེའི་ཚོགས་གྲལ་ལ་ཚུད་རྗེས་སུ་ཡི་རང་ཞིག་བྱེད་རྒྱུ་བྱུང་ན་ཡང་དགེ་རྩའི་འགྱུར་ཁྱད་ཀྱིས་ཚད་བཟུང་ཕལ་བ་ཞིག་གིས་བྱེད་ཅི་ཤེས་ཏེ་ཕལ་བའི་མི་ཡིས་དེའི་ཚད་བཟུང་ཤེས་པ་མིན། ཡང་སྒོ་གསུམ་དགེ་བའི་ལམ་ལ་འཇོག་ཤེས་མཁན་ཐེག་གསུམ་དམ་པའི་ཆོས་ཀྱི་རྣམ་བཞག་ངེས་པས་མི་ཚད་ཐེག་ཆེན་སྦྱོར་དངོས་རྗེས་གསུམ་གྱི་འགྲོས་དང་གསང་སྔགས་བསྐྱེད་རྫོགས་རིམ་གཉིས་ཀྱི་གནད་ཆེ་ཚོད་ཆུང་མིན་རེ་ཟིན་པའི་གང་ཟག་ཅིག་ཡིན་ན་ནི་འདི་ལྟར་བྱས་ཏེ་མ་འཚོགས་ཀྱང་ཚོགས་བསགས་མཆོད་འབུལ་མི་ལོ་རྒྱུ་དང་ལུས་ངག་གི་དགེ་སྦྱོར་གཅིག་ཀྱང་འགྲུབ་ཐབས་མེད་པ་མ་ཡིན། འོན་ཀྱང་འདི་ལྟར་བྱས་ཏེ་འཚོགས་དུས་འཚོག་རྒྱུ་འདོན་རྒྱུ་རྐྱང་པ་ཞིག་གིས་མི་ཚད་པར་ཆོས་ཁྲིད་མིང་དོན་ཚང་བ་རེ་བཤད་རྒྱུ་ཉན་རྒྱུ་བྱས་ན་རིན་ཐང་དེ་ན་ཡོད་སྙམ། འགའ་རེས་ས་ཐག་རིང་པོའི་དཀའ་ལས་ལ་མ་འཛེམ། འགའ་རེས་རྟ་ཟོག་རི་རྒྱག་བྱས་ཏེ་ཁྱིམ་སྲུང་གི་མི་རེ་ཡང་མ་བསྡད་ནས་ཡོང་བ་དེ་ཉིད་ཀྱི་ཡོང་སྒོ་དེ་ཆོས་ཁྲིད་ཐེངས་རེ་ཉན་པ་དེ་ཉིད་ཀྱི་ནང་ནས་ལོན་དགོས། ཆོས་ཁྲིད་ཆོས་ཁྲིད་ཅེས་པ་མིང་བཟང་མིང་བཏགས་པ་ཡིན་མ་གཏོགས་རིགས་མཐུན་བསམ་པ་མཉམ། སྐྱིད་འདོད་སྡུག་ལ་མི་དགའ་བར་འཕྲལ་ཡུན་གཉིས་ཀའི་བདེ་སྐྱིད་ཀྱི་ལམ་ཞིག་ཨེ་རྙེད་སྙམ་སྟེ། ཕོ་མོ་རྒན་དར་གཞོན་གསུམ་གྱི་མི་སྣ་མ་མང་མི་ཉུང་བ་ཞིག་འཛོམས་ནས་མཉམ་དུ་གྲོས་འགོ་ཞིག་རུག་པ་ཡིན། མཐའ་ཡས་འགྲོ་བ་རིགས་དྲུག་གི་སེམས་ཅན་གྱི་མཐོང་སྣང་ཇི་ལྟར་འདྲ་སྟེ་འགྲོ་བ་མིའི་རིགས་ཀྱི་འཛམ་གླིང་ཤར་ནུབ་ལྷོ་བྱང་གི་མིའི་བསམ་ཚུལ་སྤྱོད་སྟངས་མི་འདྲ་ལ། དེར་མ་ཟད་མི་རིགས་གཅིག་གམ་སྡེ་བ་གཅིག ཁྱིམ་ཚང་གཅིག་གི་ལས་སྐྱིད་སྡུག་གཅིག་ལ་བསྐོས་པའི་ཁྱིམ་མི་ཡིན་ཡང་གོ་ཁ་ཕན་ཚུན་བསམ་པ་མི་གཅིག་པའི་རྒྱུ་མཚན་གྱིས་མི་ཁ་ཁ་ཡིན་ཕྱིར་བསམ་ཚུལ་དེ་བཞིན་དུ་མི་གཅིག འོན་ཀྱང་གཅིག་རྒྱུ་གང་གཅིག་པ་ཡིན་ཟེར་ན། སྐྱིད་ལ་དགའ་རྒྱུ་དང་། སྡུག་ལ་མི་འདོད་པ་དེ་ཉིད་ཐམས་ཅད་གཅིག་མཚུངས་ཡིན། འདི་ཆོས་ཕྱོགས་རྐྱང་པའི་ཐ་སྙད་ཀྱི་ཚིག་ཐོག་ནས་བཤད་ན། ལས་དང་སྐལ་བ་ལྡན་པའི་དོན་མཐུན་གྱི་ཆོས་གྲོགས་མང་པོ་ཞིག་དུས་ཀྱི་མཐའ་འདིར་ཆོས་ཀྱི་གྲུ་ཆེན་པོ་ལ་མཉམ་དུ་ཞུགས་ནས་འཁོར་བའི་རྒྱ་མཚོ་བརྒལ་དཀའ་བའི་ཕ་རོལ་གྱི་ཐར་བའི་འགྲམ་ངོགས་ལ་བགྲོད་ཅེས་པའི་ཚིག་དེ་བེད་སྤྱོད་གཏོང་སྐབས་ཡིན། འུ་ཚོ་འདིར་ཡོད་མང་ཆེ་བ་འཛམ་གླིང་གི་ས་ཆའི་རྩེ་མོའི་ཡང་ཏོག་བོད་ཁ་བ་ཅན་གྱི་ལྗོངས་ལ་སྐྱེས་པའི་མི་ཡིན་ལ། ང་ཚོས་རང་བསྟོད་བྱེད་སྐབས་རི་མཐོ་ས་གཙང་བསིལ་བའི་གནས་མཆོག་ཡིན། འཕགས་པ་སྤྱན་རས་གཟིགས་ཀྱི་གདུལ་ཞིང་། ཕལ་བའི་གནས་མིན། དག་པའི་ཞིང་ཁམས་ཤིག་ཡིན་ཞེས་ཟེར་ལ། དོན་ངོ་མས་བཤད་ན། ལོ་རྒྱུས་ཀྱི་དངོས་ཡོད་གནས་ཚུལ་དང་སྦྲགས་ན་ཡང་མེས་པོ་དམ་པ་གོང་མ་ཚོའི་སྐུ་དྲིན་གྱིས་གནའ་ཡི་བཤད་སྟངས་བྱས་ན་རྟ་རྨིག་ལྕགས་ཀྱིས་བཏུམ་ནས་སོང་ཡང་། དེང་སང་གི་སྐད་བྱས་ན་གླིང་ལྔ་མཚོ་དྲུག་ནས་བཙལ་ན་ཡང་རྙེད་རྒྱུ་མེད་པའི་འཇིག་རྟེན་ཕལ་བའི་དངོས་འབྱོར་སླུ་བྱེད་སྒྱུ་མའི་ནོར་རྫས་ཤིག་གིས་བསྡུར་ཡོང་ས་མེད་པའི་རང་གཞན་གཏན་བདེའི་འདུན་མའི་ལམ་སྣེ་རྙེད་སའི་ཆོས་དང་རིག་གཞུང་གི་ཁྱད་ནོར་བཞུགས་སའི་ས་ཆ། ཆོས་སྐད་བྱས་ན་ཆོས་ཚིགས་ཀྱི་ཡུལ་དབུས་ཁྱད་པར་ཅན་གཅིག་པུར་ཡིན་པར་གྲགས་ཤིང་གྲུབ་པ་ཡིན། དེང་སང་གི་བཤད་སྟངས་བྱས་ན་ལྷོ་བརྒྱུད། ནུབ་བརྒྱུད། རྒྱ་བརྒྱུད། བོད་བརྒྱུད་ཀྱི་ནང་བསྟན་ཞེས་དེ་ལྟར་བཤད་རྒྱུ་ཡོད་ཅིང་། ཐེག་གསུམ་དམ་པའི་ཆོས་ཀྱི་རིམ་པ་དེ་མདོ་རྒྱུད་བཀའ་དང་བསྟན་བཅོས། སྟོན་པ་ཐུབ་པའི་དབང་པོ་ནས་ད་ལྟའི་བར་དང་། རྒྱལ་བ་རྡོ་རྗེ་འཆང་ཆེན་ནས་དེང་གི་བར་དུ་བརྒྱུད་པ་མ་ཆད་པ་སྟེ། དེ་ཡང་བསྟན་པའི་གཏད་རབས་བདུན་དང་། བྱམས་འཇམ་དབྱངས། ལྷ་དང་མི་ཡི་གྲུབ་པའི་རིག་འཛིན་ལ་བརྒྱུད་པའི་ཐུན་མོང་དང་ཐུན་མིན་གྱི་ཆོས་སྐལ་དུ་བཞུགས་པ། རྗོད་བྱེད་སྡེ་སྣོད་གསུམ་མམ་བཞིའི་ཁོངས་སུ་བསྡུས་པའི་བརྗོད་བྱ་ལམ་བསླབ་གསུམ་ཉམས་ལེན་གྱི་རིམ་པ། བཀའ་འཁོར་ལོ་རིམ་གསུམ། སྔགས་རྒྱུད་སྡེ་བཞི་དྲུག་དང་བཅས་པ། མཁས་པའི་ཐད་ནས་རྒྱན་དྲུག་མཆོག་གཉིས་ཀྱི་འཆད་རྩོད་རྩོམ་པའི་རྒྱུན་མ་ཉམས། གྲུབ་པའི་ཐད་ནས་བཤད་ན་རིག་འཛིན་རྣམ་བཞིའི་ས་ལམ་ནས་མཆོག་གི་དངོས་གྲུབ་ལ་དབང་འབྱོར་པ་ཚོའི་མན་ངག་གི་བརྒྱུད་པ་མ་ཆད་པ། སོར་བྱང་སྔགས་གསུམ་གྱིས་བསྡུས་པའི་རྒྱལ་བསྟན་ཚང་ལ་མ་ནོར་བར་བཞུགས་པ་འདི་ས་གཞན་གཅིག་ལ་མེད་པའི་རིན་ཐང་ཅན་ཡིན། དེ་ཡིན་རྒྱུ་དེ་ཉིད་སུས་བཤད་ཀྱང་ངོ་གནོང་དགོས་པ་མིན། འོན་ཀྱང་འདི་དབུལ་པོའི་ཁྱིམ་གྱི་གཏེར་ཁ་ཞེས་པ་ལྟར་ཡོད་རང་ས་རང་ཁྱིམ་ལ་ཡོད་ལ་བེད་རང་གིས་སྤྱད་མི་ཤེས་པར་ཕྱུག་པོ་ཡི་དྭགས་ཀྱི་གཏེར་སྲུང་ཞེས་པ་ལྟར་གྱུར་སོང་ན་ཟས་གོས་ནོར་རྫས་ཀྱི་བང་མཛོད་ཀྱི་ནང་ལ་བསྡད་ནས་འཁྱགས་ལྟོགས་གཉིས་ཀྱི་སྡུག་བསྔལ་གྱིས་ཤི་ས་ལ་ཐུག་བཞིན་འདུག་ཅེས་བཤད་པ་དང་མཚུངས་པར་རང་དང་རང་འདྲའི་འཁོར་ཡུག་ལ་བལྟས་ཡོང་ན་རང་རྒྱུས་རང་གིས་བླངས་པའི་གནས་ཚུལ་དེ་ལྟར་ལ་ཐུག་འདུག་སྙམ། དེས་ན་ང་མིན་ང་དང་འདྲ་བའི་བྱི་ལ་མ་བུ་ནད་གཅིག་ཅན་ཡོད་ཚད་ཀྱིས་འདིའི་གནད་རྒྱུ་མཚན་ཅི་ཞིག་ལ་ཐུག་འདུག་ལྟ་སྐབས་གྱུར་ཡོད། གཅིག་གིས་ཡིན་མདོག་བྱས་ནས་ཡིན་ཁུལ་ཞིག་བྱས། ཚང་མས་དེ་ལོས་ཡིན་ལྟ་བུའི་ཚུལ་བྱས། ཕ་མགོ་བུས་གཡོགས། བུ་མགོ་དགྲས་གཡོགས་བྱས་ན་མི་ལོ། ད་མ་ཡིན་ཡིན་མདོག་གི་མཚམས་མཚང་དབྱེ་ས། ས་འདིའི་ཁ་སྐད་བྱས་ན་མདོག་མདོག་བྱེད་ས་ང་ཚོའི་བར་ན་ཡོད་མ་སོང་། འུ་ཚོས་ཁེད་བཞག་པ་ལྟ་བུ་མགྱོགས་དེ་བས་མགྱོགས་མེད་ལ་ས་གོམ་པ་གང་ལ་མི་ཐོན་པ་དང་། རིང་དེ་བས་རིང་མེད་ལ་ཁྱི་མོ་རྒྱ་ལུ་མའི་སྦོ་ཞབས་ལ་མི་སླེབས་པ་དེ་ཉིད་ཅི་ཁེད་སྨྲས་པ་ལྟ་བུ་མི་ཚེ་གཅིག་ལ་ཆོས་པ་ཡིན་ཞེས་ཟེར་ཞིང་། ད་ཤི་ཁའི་ལ་སྒང་ཉག་ཉག་ལ་ཐོན་དུས་རྟ་བྲོ་རོགས་གསུམ་གཅིག་ཀྱང་མེད་པ་དེ་ཉིད་སུ་ཁེད་ཟེར་ན་ང་ཁེད་ཟེར་རྒྱུ་ལས་མ་འདས་པ་ཡིན། འུ་ཚོའི་ས་ཆ་འདི་གོང་ནས་བཤད་པ་ལྟ་བུ་ཆོས་ཐེག་ཆེན་དར་སའི་ས་ཆ་ཡིན་ལ། ཆོས་ས་ཆོས་ཡུལ་ངོ་མར་གྱུར་མྱོང་ཞིང་ཡིན་མྱོང་བའི་དབང་གིས་ཡུལ་སྲོལ་གོམས་གཤིས་ཕལ་བ་ཙམ་ཡང་ཆོས་དང་འབྲེལ་བའི་སྟབས་ཀྱིས་མ་ནམ་མཁའ་དང་མཉམ་པའི་སེམས་ཅན་ཞེས་པའི་ཚིག་ཅིག་ཚང་མས་འགོ་ལེན་བྱེད་པ་ཡིན། སྐྱབས་འགྲོ་སེམས་བསྐྱེད་གཉིས་ཀྱི་འགོ་བཟུང་ཁུལ་བྱེད་པ་དང་། མཇུག་ལ་བསྔོ་བའི་ཚིག་ཅིག་ཀྱང་འདོན་པ་ཡིན། འདོན་འདུག་རྒྱུ་དེ་ཉིད་ཀྱི་དོན་མ་གོ ཅི་ཞིག་བསམས་ནས་ཇི་ལྟར་འདོན་དགོས་པའི་རྒྱུ་མཚན་མ་ཤེས་ཚེ་བྱ་ནེ་ཙོ་ལ་མི་སྐད་བསླབས་ཏེ་ནེ་ཙོས་མི་སྐད་རྗེས་ཟློས་བྱེད་པ་ལྟ་བུ་ཞིག་མ་གཏོགས་མེད་པས་དོན་འགྲམ་ལ་བཅར་ན་གཞན་དོན་མ་དགོས་རང་དོན་སྒྲུབ་མི་ཤེས་པའི་ས་ཚོད་ལ་ཐུག་ཡོད། དེའི་གནས་ཚུལ་དེ་དགོངས་ནས་སངས་རྒྱས་བཅོམ་ལྡན་འདས་ཀྱིས་ཆོས་ཐེག་གསུམ་གྱི་རྣམ་བཞག་བསྟན་པ་དེ་ཉིད་གདུལ་བྱའི་སེམས་ཅན་སྐྱེས་བུ་ཆུང་འབྲིང་ཆེ་གསུམ་གྱི་བློ་ཚོད་ལ་གཟིགས་འདུག་སྙམ་རྒྱུའི་གོ་བ་ངེས་ཤེས་འུ་ཚོས་འདི་ལྟར་བྱས་ཏེ་བཤད་ན་ལོན་རྒྱུ་ཡོད། དེ་ལྟར་བྱས་ཏེ་ཡང་ཡང་བཤད་ནས་སོང་ན་ཆོས་སྒྲ་ད་ཐེངས་མ་གཏོགས་མ་གོ་བ་མིན་ལ། ཆོས་ལ་ལོག་ལྟ་སྐྱེས་ནས་དེའི་ཕྱོགས་ལ་ཞེན་པ་ལོག་ནས་ཆོས་ཕྱོགས་ལ་ཆ་རྒྱུས་མེད་པའི་མི་འབའ་ཞིག་མིན་ཞིང་། མཐོ་རིས་མིའི་འཇིག་རྟེན་ལ་སྐྱེས། མགོ་གནམ་ལ་བསྟན། རྐང་པ་ས་ལ་བཙུགས། འགྲེངས་ཏེ་འགྲོ་བའི་རྐང་གཉིས་ཀྱི་མིའི་ལུས་རྟེན་ཞིག་བླངས་ནས་སྐ་རགས་ཐད་ལ་བཅིངས་ཀྱང་ལེགས་ཉེས་དཔྱོད་པའི་རྣམ་དཔྱོད་གྱི་རྩལ་འདོན་མ་ཐུབ་པའི་དབང་གིས་ཡིན། ད་དུང་འདི་ལྟར་བྱས་ཏེ་མུ་མཐུད་ན་ལ་ཁའི་རི་དྭགས་རྒས་པ་ལྟར་བྱས་ནས་ཆུ་འགོ་ཁུག་ཀྱོག་ཅིག་ལ་རུས་བཞི་འཐོར་དགོས་པ་ཡིན་ན་འདྲ། ཡང་མིན་ན་ཁྱིམ་ཁུག་ལས་མཐའ་ཞིག་ནས་ཅི་བསམ་འདི་དྲན་མེད་ནས་མིག་སྔོན་པོར་གྱུར་ན་ཡང་སྒོ་ཁའི་སྒོ་ཟོག་ཤི་བ་ལྟ་བུ་ཡིན། གཞན་གྱི་བཀོལ་སྤྱོད་ཀྱི་ཁ་འོག་ནས་མནར་མནར་ནས་མུག་ཤི་གོད་ཤི་གྱུར་སོང་བ་ལྟ་བུ་དང་ཁྱད་པར་མི་ཆེ། དེ་ལྟར་ཡིན་དུས་དམ་པའི་ཆོས་སྒྲུབ་པ་འདི་ཚེ་འདི་ཕྱི་རང་གཞན་གཉིས་དོན་ལ་ཕན་ཐོགས་ཅན་ཞིག་གྱུར་འདུག དེའི་སྟབས་ཀྱིས་ཆོས་ཐོབ་པས་མི་ཚད་དོན་ཤེས་དགོས་འདུག དོན་ཤེས་པས་མི་ཚད་རང་རྒྱུད་ལ་སྦྱར་ནས་ཆོས་བསྒྲུབས་པའི་གྲུབ་འབྲས་ལོན་དགོས་འདུག་བསམ་པ་ཞིག་གིས་ཆོས་ཀྱི་ནང་དོན་དང་པོར་ཤེས་པ་གལ་ཆེ་བ་སྨོས་མ་དགོས་ཀྱང་ཡང་ཆོས་འདི་ལ་ཡིད་དེ་ཙམ་མི་ཆེས་ཤིང་ལས་རྒྱུ་འབྲས་ཟེར་བ་དེ་ཉིད་བསླུ་མེད་ཨེ་ཡིན་ཅི་ཤེས་སྙམ་མཁན་ཚོས་ཁྱད་པར་དུ་དམ་པའི་ཆོས་ཀྱི་བསྟན་དོན་དང་བརྗོད་བྱ་དེའི་གོ་བ་གཏིང་ནས་ལོན་དགོས། འབེན་མིག་གིས་མ་རིག་དུས་མདའ་གང་ལ་འཕེན། འུ་ཚོའི་ས་ཆ་འདི་ལ་དེ་ལྟ་བུ་ལས་ལྷག་གི་ཕན་གནོད་གཏུག་བྱེད་ཕལ་ཆེར་མེད་ལས་ཆེ། ༼ག༽ གཞུང་གི་དོན། ༼ཀ སྤྱིའི་ལུས་རྣམ་བཞག དེ་ལྟར་ན་ཡང་རང་རོགས་གཉིས་ཀྱིས་ཆོས་འཆད་ཉན་ལོ་གྲངས་མང་པོ་ལ་བྱས་ཀྱང་ག་འཕངས་འདི་བརྒྱབ་འདྲ་ཞིག་ཅི་ཡང་ཨེ་འདུག་བསམས་ནས། གཞུང་བསྟན་བཅོས་ཀྱི་གླེགས་བམ་ཞལ་ཕྱེས་ཏེ། རང་གིས་དེ་ཙམ་གཅིག་ན་མ་གོ གཉིས་ན་མ་ངེས། ཁྱད་པར་དུ་རྒྱུད་ལ་མི་འབྱོར་པ་ཞིག་ཡིན་ཚེ། འོན་པ་རོལ་མོ་མཁན་གྱིས་སྒྲ་སྙན་བསྒྲགས་པ་ལྟར་དུ་མིའི་རྣ་ལ་སྙན་གྱིན་ཡོད་མེད་ཅི་ཤེས་ཏེ་རང་གིས་གོ་བ་མིན་ལ། ཕ་རོལ་པོ་ལ་ཕན་ཐོགས་ཆེ་དང་མི་ཆེ་དེ་ལྟར་བསམས་ནས་འུ་ཚོའི་ད་ལོའི་ཆོས་ཁྲིད་ལ་ང་རང་གིས་བྲིས་པའི་བདེ་སྨོན་ཉུང་བསྡུས་ཚིག་ཤོ་ལོ་ཀ་རྡོག་མ་བཞི་བོ་དེ་ཡང་འདོན་ཞིག་བྱས་ནས་ཉིན་རེ་ཚིག་བཞི་རེ་སྟེ་ཚིག་བཞི་ཞེས་པ་ཤོ་ལོ་ཀ་རེ་ཡིན། ཤོ་ལོ་ཀ་རེ་རེའམ་གཉིས་རེ་ཙམ་རེ་བཏོན་ན་སྙམ། རྒན་པ་ལོ་ལོན་དང་ཡིག་ངོ་མི་ཆོད་པའི་ལོ་ཉུང་ཡིན་ཡང་ཡིག་འབྲུ་ཆེ་ན་དགའ་སྣང་ཡོད་རྒྱུ་རེད་བསམས་ནས་ཚིག་རྐང་བཞི་བོ་དེ་ཡིག་འབྲུ་ཆེན་པོ། དོན་གྱི་དབྱེ་མཚམས་ནོར་མི་འགྲོ་བའི་ཆེད་དུ་ཚིག་རྐང་བཞི་བོའི་ཡིག་འབྲུའི་ཁ་དོག་གི་མདོག་མི་འདྲ་བར་བྱས་ནས་དེབ་ཆུང་ཆུང་ཁྱེར་བདེ་མོ་ཞིག་ལས་བཅུག་ཡོད། ཁྱེད་ཚོའི་ལག་ལ་ཕལ་ཆེར་འབྱོར་ཡོད་རྒྱུ་རེད། འདི་གཞུང་བཤད་བྱེད་སྟངས་བྱས་ནས་ཐོག་མཐའ་བར་དུ་དགེ་བའི་ཆིངས་ཀྱིས་བཅིངས་ནས་བཤད་རྒྱུ་ཅན་ལྷག་ཏུ་བྱས་མེད། འདི་སྨོན་ལམ་རྒྱས་པ་དག་གི་མཇུག་ཏུ་འདོན་རྒྱུ། ཡང་སྨོན་ཡིད་ལ་ངེས་པའི་དགོས་དོན་ལ་བསམས་ནས་སྡོམ་གྱི་དོན་བསྡུས་པའི་ཚུལ་ཅན་ཞིག་གིས་སྨོན་ལམ་བསྡུས་པ་རིགས་འདྲ་གཞན་དག་དང་འདྲ་མཚུངས་སུ་སྦྱར་བ་ཡིན། དེ་ལྟར་ཡིན་ཚེ་བདེ་ཆེན་ཞིང་སྒྲུབ་ཅེས་པ་ཆོ་ག་ཞིག་དང་སྦྲེལ་ནས་བསྐྱེད་རིམ་དང་བཟླས་དམིགས་ཀྱི་སྒོ་ནས་བསྙེན་སྒྲུབ་གཙོ་བོ་བྱེད་པ་དང་། བདེ་ཆེན་ཞིང་ཁྲིད་ཅེས་སྨོས་སྐབས་བདེ་བ་ཅན་དུ་སྐྱེ་བའི་རྒྱུ་བཞི་ལྟ་བུ་ཞིག་ས་བཅད་ཀྱི་སྒྲོམ་གཞི་ཞིག་བཞག ལོང་བ་ལག་མགོ་ནས་བཟུང་ཞིང་ཁྲིད་དེ་གང་འདོད་ཀྱི་བདེ་བའི་གནས་ལ་ཐོན་ཐབས་བྱེད་པ་དེ་ལྟ་བུ་ཞིག་གི་གཙོ་བོ་རྫོགས་རིམ་གྱི་གོ་དོན་ཅན་གྲོལ་བྱེད་ཁྲིད་ཀྱི་རིམ་པ་ལ་བཞག་པ་ཡིན། འདི་མདོ་སྔགས་ཟུང་འབྲེལ་གྱི་ལམ་བྱས་ཚེ་སྨིན་བྱེད་ཀྱི་དབང་སྒྲུབ་པའི་འབྲས་བུ་དངོས་གྲུབ་ལེན་པའི་འགྲོས་དང་སྦྱར་ནས་ཞིང་དབང་བསྐུར་རྒྱུ་བྱས་པས་འདིའི་བཤད་པ་བྱེད་རྒྱུ་འདི་མདོ་རྒྱུད་ཁུངས་མ་དང་སྦྱར་ཏེ་གོ་དོན་འགྲོལ་གྱིན་ཡོད་པའི་ཉམས་དེ་ལྟར་ཡིན། དེ་ལྟར་བྱས་ན་དཀྱུས་བཤད་གཞུང་གི་ཆུ་བོ་འགྲེལ་ཊིཀ་སྟོང་ཐུན་དང་བཅས་པ། སྨིན་བྱེད་དབང་གི་ཆུ་བོ་སྐུར་ཐབས་ངོ་སྤྲོད་དང་བཅས་པ། ཉམས་ལེན་གདམས་པའི་ཆུ་བོ་དམར་ཁྲིད་གནད་ཕྱུང་དང་བཅས་པ། ཕྲིན་སྒྲུབ་ཏིང་འཛིན་གྱི་ཆུ་བོ་ལས་བཞི་ཁ་ཚར་དང་བཅས་པ་ཞེས་སྔ་འགྱུར་རྙིང་མ་པའི་སྐབས་བབ་ཀྱི་ཆུ་བོ་ཆེན་པོ་བཞིའི་འགྲོས་དང་བསྟུན་ནས་འདི་སོར་སྐྱེ་ཕལ་པས་འདུ་བྱས་ནས་ཐ་མལ་པའི་ཚིག་ལ་རྗོད་བྱེད་དུ་བྱས་པ་ཡིན་ཡང་འདིའི་དོན་གྱི་ངོས་ནས་བརྗོད་བྱ་མདོ་རྒྱུད་ཀྱི་དགོངས་དོན་གནད་ལ་བཟུང་བ་ཡིན་པའི་ཆ་ནས་དེ་དག་གི་གནད་འདིར་བསྡུས་པའམ་འདི་དེ་དག་གི་གནད་ཀྱི་སྡོམ་བྱང་གཞན་ཞིག་ཡིན་པར་ཁས་འཆེ་བཞིན་ཡོད། དལ་འབྱོར་གྱི་ཆོས་བཅོ་བརྒྱད་དམ་སུམ་ཅུ་སོ་བཞི་ཚང་བའི་མི་ལུས་རིན་པོ་ཆེ་ལྟ་བུ་ཐོབ་ཡོད་པའི་སྐལ་བ་མཆོག་ལྡན་གྱི་གང་ཟག་ཚུལ་དང་ལྡན་པ་ཞིག་གི་དམིགས་འདུན་དེ་སྲིད་པ་འཁོར་བའི་གནས་ལ་མི་ལྷུང་། ཞི་བ་མྱ་ངན་ལས་འདས་པ་ལ་མི་ཞེན་པར་མཐའ་ཡས་སེམས་ཅན་གྱི་དོན་དུ་མཐའ་གཉིས་ལ་མི་གནས་པའི་མྱང་འདས་སྒྲུབ་པ་དེ་ཉིད་ཡིན། དེ་ཡང་ཚེགས་དཀའ་ལས་ཆུང་ཆུང་གིས་དོན་ཆེན་པོ་ཞིག་རང་ཤུགས་ཀྱིས་བདེ་བླག་ཏུ་ཐོབ་པའི་ཐབས་དམ་པ་དེ་སྨོན་ལམ་ཡིན་ལ། སྨོན་ལམ་དེ་ཡང་ཚུལ་ཁྲིམས་རྣམ་པ་དག་པས་གཞིར་བཟུང་། སྦྱིན་སོགས་དགེ་བའི་དངོས་པོས་གྲོགས་བྱས། སྨོན་ལམ་རྣམ་པར་དག་པ་དེ་ཉིད་ཀྱིས་མཚམས་སྦྱར་བ་ཡིན་ན་དཔེ་ཇི་ལྟར་ཡིད་བཞིན་གྱི་ནོར་བུ་ལ་གསོལ་བ་བཏབ་ན་དགོས་འདོད་ངང་གིས་འབྱུང་བ་ཡིན་ཞེས་པ་ལྟ་བུའི་དཔེ་དོན་གཉིས་ཀ་འདི་ལ་འབྱོར། མདོ་རྒྱུད་བསྟན་བཅོས་བཀའ་གཏེར་ཐམས་ཅད་ནས་བདེ་བ་ཅན་གྱི་སྨོན་ལམ་རྒྱས་འབྲིང་བསྡུས་གསུམ་ཤིན་ཏུ་མང་པོ་འབྱུང་ཞིང་། ཡིན་ན་ཡང་ཐམས་ཅད་ཀྱི་བསྟན་དོན་གྱི་སྙིང་པོ་ངོ་མ་དེ་འོད་མདོ་དང་། སྙིང་རྗེ་པདྨ་དཀར་པོའི་མདོ། ཞིང་བཀོད་ཀྱི་མདོ། དེ་བཞིན་དུ་འཆི་མེད་རྔ་སྒྲ། འཕགས་པ་ཏིང་ངེ་འཛིན་རྒྱལ་པོ། ད་རུང་མདོ་སྡེ་ཟ་མ་ཏོག་བཀོད་པའི་རྒྱལ་པོ། སྡོང་པོ་བཀོད་པ་ལ་སོགས་པ་མདོ་ཤིན་ཏུ་མང་པོ་དང་། བསྟན་བཅོས་ཀྱི་ཐད་ནས་ཡིན་ན་རྒྱུད་བླ་མ་དང་། འཇུག་པ་རྩ་འགྲེལ་ལ་སོགས་པ་དང་། རྒྱུད་དང་སྒྲུབ་ཐབས་དག་གི་དགོངས་དོན་ལ་གཞི་བཟུང་བ་ཤ་སྟག་ཡིན། ཐམས་ཅད་ཀྱི་བརྗོད་དོན་གྱི་གཙོ་བོ་དེ་ཚུར་བསྡུས་ན་བདེ་བ་ཅན་དུ་སྐྱེ་བའི་རྒྱུ་བཞི། རྒྱུ་དང་པོ་དེ་སངས་རྒྱས་འོད་དཔག་མེད་ཞིང་ཁམས་དང་བཅས་པ་ཡང་ཡང་ཡིད་ལ་བྱེད་པ། རྒྱུ་གཉིས་པ་དེ་དགེ་རྩ་དཔག་ཏུ་མེད་པ་བསགས་པ། རྒྱུ་གསུམ་པ་དེ་བྱང་ཆུབ་མཆོག་ཏུ་སེམས་བསྐྱེད་པ། རྒྱུ་བཞི་བ་དེ་དགེ་རྩ་ཐམས་ཅད་བདེ་བ་ཅན་དུ་སྐྱེ་བའི་དོན་དུ་བསྔོ་ཞིང་སྨོན་ལམ་འདེབས་པ་དེ་རྣམས་ཡིན། བློ་འཛིན་བདེ་བའི་ཆེད་དུ་འདི་བཞི་བོ་ལ་རྟེན་རྒྱུ་གྲོགས་རྐྱེན་བཞི་ཡིན་ཞེས་སྨྲས་ལ། ཞིང་ཁྲིད་ནམ་བཤད་ལ་ཁྱེད་ཚོས་ཚིག་ཉུང་ཉུང་ཞིག་དང་སླ་མོ་ཞིག་གིས་བློར་བླངས་ན་བློ་འཛིན་སླ་ཞེས་སྨྲས་ནས་རྟེན་རྒྱུ་གྲོགས་རྐྱེན་བཞི་བློ་ལ་ཟུངས། ཁར་བྱང་ཆུག་ཅེས་ནམ་ཡིན་དུ་བཤད་མྱོང་། ཁྱིམ་ཚང་ཞིག་ལ་འགྲུལ་པ་ཇ་འཐུང་ཞིག་ཡོང་། ཡང་ན་ལམ་གྱི་འདྲིས་རོགས་མི་གཉིས་ཀྱིས་ས་ཐག་རིང་པོ་གཏམ་གྱིས་བཅད། དེ་མིན་ཡང་ཁྱིམ་བཟའ་ཚང་གི་ནང་མི་གཉེན་ཚན་དང་ཐུག་དུས་མི་ཚེ་གཅིག་ལ་བཤད་ཀྱིན་འདུག་རྒྱུའི་བླ་བཙག་རྐང་འདྲེན་ཁ་ཡག་ངོ་བསྟོད་ཆགས་སྡང་ཁོང་ཁྲོའི་གཏམ་དུད་ངན་ཞིག་གི་ལྷམ་སྒྱེ་སློག་པ་ལྟ་བུ་འབའ་ཞིག་བཤད་པས་དགོས་པ་མེད་ལ། ཡག་ན་ངག་འཆལ་དོན་མེད། ཉེས་ན་བྱུར་གྱི་སྣ་འདྲེན། དང་པོར་ཁ་མཚར་རྩེ་ཁུལ་བྱས། རྩེ་མ་ཤེས་རྩེ་མཇུག་ཕྱིན་ཅི་ལོག་ལ་འཁྱོག་ནས་འཐམ་རེས་བྱེད་འགྲོ་རྒྱུ། དམེ་ཤི་གྲི་ཤི་འགའ་རེ་སྒོར་རྡོག་ཆ་རེའི་དོན་དུ་རྩེད་མོ་ཁ་མཚར་གྱིས་སྣ་འདྲེན་བྱས་པ་མང་། དེ་བས་བདེ་བ་ཅན་དུ་སྐྱེ་བའི་རྒྱུ་བཞི་ཇི་ལྟར་ཡིན་ཞེས་སྨྲས་ནས་གོ་བསྡུར་རེ་བྱོས་དང་རང་གཞན་འདི་ཕྱི་གཉིས་ཕན་གྱི་སྐད་ཆ་དེ་ཡིན། གོང་ནས་བཤད་པ་ལྟ་བུ་མ་ནམ་མཁའ་དང་མཉམ་པའི་སེམས་ཅན་ཞེས་ཁ་ཡིས་ཟེར་ཡང་དོན་ངོ་མས་གཞན་དོན་མ་དགོས་རང་དོན་སྒྲུབ་མི་ཤེས་པ་འདི་ཡིན། འོན་ཀྱང་དེའི་ཁ་ཟེར་དེ་ངོ་ཚ་བའི་གཏམ་ཡིན་ཞེས་བསྐྱུར་བཞག་ཚེ་དེ་འདྲའི་གང་ཟག་ལ་བསམ་བློ་ཐོངས་དང་དེ་ལྟ་བུ་ལ་ལོ་སྤྱད་ཉན་སྤྱད་གཅིག་ཀྱང་མེད། ངེས་འབྱུང་མེད་ན་སོ་ཐར་གྱི་སྡོམ་པ་མེད། ངུར་སྨྲིག་གི་རྒྱལ་མཚན་ཕུད་རན་སོང་ལ། བྱང་སེམས་དང་སྔགས་སྡོམ་ཕར་ཞོག སྐྱབས་ཡུལ་ཙམ་ཞིག་མ་ཤེས་ན་སྐྱབས་སྡོམ་ཇི་ལྟར་ཐོབ་སྐྱབས་འགྲོའི་བསླབ་བྱ་དེ་ལ་མེད། དེ་ལྟར་དུ་བཤད་ན་ནང་པ་ཙམ་དུ་མི་རུང་ཡང་རིམ་པས་སྦྱངས་ནས་ལམ་ཡང་དག་ལ་ཚུད་དགོས་པ་ཡིན་པས་བློ་སྦྱོང་གིས་བློ་ལས་སུ་རུང་བར་བྱས་པའི་སྟེང་དེ་ནས་རིམ་གྱིས་ཐེག་ཆེན་གྱི་ལམ་ལ་སྦྱང་རྒྱུ་དེ་སྦྱངས་ནས་བྱང་ཐུབ་དགོས། དེ་ལྟར་ན་རྒྱུ་དང་པོ་རྟེན་བདེ་བ་ཅན་གྱི་ཞིང་ཁམས་ཚོགས་ཞིང་གསལ་འདེབས་པ་དེ་ཡིན། བདེ་བ་ཅན་གྱི་ཞིང་ཁམས་མགོན་པོ་འོད་དཔག་མེད་དང་བཅས་པ་རྟེན་བརྟེན་པ་ཐམས་ཅད་ཡིད་ལ་གསལ་བར་བྱེད་པ། རྒྱུ་གཉིས་པ་དེ་རྒྱུ་ཚོགས་བསགས་སྒྲིབ་སྦྱོང་། རྒྱུ་གསུམ་པ་དེ་གྲོགས་བྱང་ཆུབ་མཆོག་ཏུ་སེམས་བསྐྱེད་པ། རྒྱུ་བཞི་བ་དེ་རྐྱེན་སྨོན་ལམ་རྣམ་དག་དགེ་རྩ་ཐམས་ཅད་རང་གཞན་བདེ་བ་ཅན་དུ་སྐྱེ་བའི་དོན་དུ་བསྔོ་བ། དེ་རྣམས་ཀྱིས་བདེ་བ་ཅན་དུ་སྐྱེ་བའི་སྨོན་ལམ་གྱི་གཞུང་རྒྱས་བསྡུས་ལ་མ་ལྟོས་པའི་ལུས་རྣམ་བཞག་ཀྱང་བསྟན་ཞིང་ཚང་བར་བྱེད་ཐུབ། འདིའི་སྐབས་སུ་བབ་པའི་གང་བཤད་བྱའི་སྨོན་ལམ་ཐུང་ཐུང་འདི་ཉིད་ཀྱི་ཤོ་ལོ་ཀ་དང་པོ། བསླུ་མེད་བདེ་ལྡན་ཞིང་མགོན་འོད་དཔག་མེད། །རྩེ་གཅིག་དད་པའི་ཤུགས་ཀྱིས་ཁྱེད་བསྒོམ་ན། །དང་བའི་ཡིད་ངོར་སྣང་སྟོང་སྒྱུ་མའི་སྤྲིན། སྐུ་དང་ཞིང་ཁམས་རྟག་ཏུ་འཆར་བར་ཤོག །ཅེས་པ་འདིས་རྟེན་བདེ་བ་ཅན་གྱི་ཞིང་ཁམས་དང་མགོན་པོ་འོད་དཔག་མེད་འཁོར་དང་བཅས་པ་ཡིད་ལ་བྱེད་པ་དེ་བསྟན་ཡོད། དེ་འཕྲོས་ཤོ་ལོ་ཀ་བར་བ། བརྩེ་ཆེན་སྙིང་རྗེས་དྲངས་པའི་བྱང་སེམས་ལ། །རྟག་ཏུ་གོམས་པའི་རྒྱལ་སྲས་སྤྱོད་མཆོག་གིས། །རླབས་ཆེན་ཚོགས་གཉིས་སྤྱོད་པ་མཐར་ཕྱིན་ཏེ། །དཔག་ཡས་དགེ་བའི་རྩ་བ་ཡོངས་བསྐྱེད་ཤོག །ཅེས་པ་དང་། རང་དང་གཞན་གྱིས་དུས་གསུམ་བསགས་པ་ཡི། །ཞེས་པ་ལ་སོགས་པ་བསྔོ་བ་རྩལ་འདོན་གྱི་བརྗོད་བྱ་ཅན་དེ་རྒྱུ་བཞི་བ་དང་ཡང་འབྲེལ་བ་ཡིན་ཡང་གང་བསྔོ་རྒྱུའི་དགེ་རྩའི་ཆ་ནས་རྒྱུ་ཚོགས་བསགས་སྒྲིབ་སྦྱོང་དང་སྦྲེལ་ནས་ཤོ་ལོ་ཀ་བར་བ་གཉིས་ཀྱིས་རྒྱུ་གཉིས་པ་ཚོགས་བསགས་སྒྲིབ་སྦྱོང་དང་རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་གཉིས་ཀ་མཉམ་དུ་བསྟན་པ་ཡིན། རྒྱུ་གཉིས་པ་ཚོགས་བསགས་སྒྲིབ་སྦྱོང་དང་། རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་གཉིས་ཀ་མཉམ་དུ་བསྟན་པར་བཀྲལ་ན་ཡང་འབྲེལ་ཆེ་ཞིང་། རྒྱུ་གསུམ་པ་འདི་མེད་ན་ཐབས་མེད་མིན་རྒྱུ་བདེ་བ་ཅན་དུ་སྐྱེ་བའི་རྒྱུ་གཞན་གསུམ་པོས་ཀྱང་སྐྱེ་མི་ཐུབ་པ་མིན་པའི་རྒྱུ་མཚན་གྱིས་འདི་གྲོགས་ཙམ་དུ་བཞག་པ་ཡིན། ཡིན་ན་ཡང་བདེ་བ་ཅན་དུ་སྐྱེ་བའི་ཉན་རང་ཡང་སྐྱེ་བ་གཅིག་གི་རྗེས་སུ་བྱང་ཆུབ་སེམས་དཔར་གྱུར་ནས་རྒྱལ་བའི་ཡོན་ཏན་ཚད་མེད་བརྙེས་པ་ལ་མེད་ན་མི་འབྱུང་བའི་དངོས་རྒྱུ་ཡིན་པས་ན་རྒྱུ་གསུམ་པའི་ཐ་སྙད་མཛད་ལ། དེ་ཡང་རྒྱུ་ཚོགས་གཉིས་བསགས་ནས་འབྲས་བུ་སྐུ་གཉིས་ཐོབ་པ་ལ་བསོད་ནམས་དང་ཡེ་ཤེས་ཀྱི་ཚོགས་གཉིས་གསོག་པ་ལ་བརྩེ་ཆེན་སྙིང་རྗེས་དྲངས་བའི་བྱང་ཆུབ་ཀྱི་སེམས་བསྐྱེད་དགོས་པས་ཀུན་རྫོབ་སྨོན་དང་འཇུག་པའི་བདག་ཉིད་ཅན་གྱི་སེམས་བསྐྱེད་དེ་ཐོབ་ལ་མ་ཉམས་པའམ་སེམས་བསྐྱེད་པས་མི་ཚད་སྐྱེས་པའི་ཐོག་དེར་སྨོན་དང་འཇུག་པའི་བསླབ་བྱ་ཕྱིན་དྲུག་བསྡུ་དངོས་བཞི་ཡིས་ཚུལ་བཞིན་དུ་བསླབ་ན་ཐབས་སྤྱོད་པའི་ཕྱོགས་ཀྱི་ཕར་ཕྱིན་དམིགས་བཅས་བསོད་ནམས་ཀྱི་ཚོགས་རྫོགས། ཤེས་རབ་ལྟ་བའི་དམིགས་མེད་ཁྱད་པར་ཅན་གྱིས་དམིགས་མེད་ཡེ་ཤེས་ཀྱི་ཚོགས་རྫོགས་ཏེ་ཚོགས་གཉིས་མཉམ་རྫོགས་ཀྱི་སྒོམ་སྟོབས་དེས་སྒྲིབ་གཉིས་བག་ཆགས་དང་བཅས་པ་ཡང་རིམ་དང་ཅིག་ཆར་གྱིས་དག་ནས་དོན་དམ་བྱང་ཆུབ་ཀྱི་སེམས་རྒྱུད་ལ་སྐྱེས་ནས་སྟོང་ཉིད་རྟོགས་རིམ་བཞིན་དུ་བདེ་བ་ཅན་གྱི་ཞིང་ཁམས་ལ་ཞིང་ཁམས་སྦྱོང་བ། སངས་རྒྱས་མཆོད་པ། དམ་ཆོས་ཉན་པ་སོགས་ཀྱིས་རྫོགས་སྨིན་སྦྱངས་པ་རྒྱ་མཚོ་ལྟ་བུ་བརྒྱུད་ནས་སྤངས་རྟོགས་ཀྱི་ཡོན་ཏན་ན་འཕར། རླབས་ཆེན་རྒྱལ་སྲས་ཀྱི་སྤྱོད་པ་མཐར་ཕྱིན་ཏེ། ས་བཅུ་ལམ་ལྔའི་སྤངས་རྟོགས་ཀྱི་ཡོན་ཏན་ཁྱད་པར་ཅན་རྒྱུད་ལ་སྐྱེས་ནས་རང་གཞན་གྱི་དོན་ཆེན་འགྲུབ་པ་ཡིན། རྒྱུ་འབྲས་གཉིས་ཀ་དེ་དཔྱད་པ་གཅིག་པའི་ཆོས་ཅན་ཡིན་ཕྱིར་ཚོགས་བསགས་སྒྲིབ་སྦྱོང་སེམས་བསྐྱེད་ཁྱད་པར་ཅན་གྱིས་ཟིན་ན་ད་ལྟ་ནས་ཐེག་ཆེན་ཐར་བ་ཆ་མཐུན་གྱི་དགེ་བར་འགྱུར་བའི་རྒྱུ་མཚན་གྱིས་རྒྱུ་གཉིས་པ་ཚོགས་བསགས་སྒྲིབ་སྦྱོང་དང་། རྒྱུ་གསུམ་པ་བྱང་ཆུབ་མཆོག་ཏུ་སེམས་བསྐྱེད་པ་གཉིས་ཀ་སྦྲེལ་ནས་བཤད་དོན་དེ་ཡིས་ཡིན། འདི་ནས་བརྩེ་ཆེན་སྙིང་རྗེས་སོགས་ཤོ་ལོ་ཀ་གཅིག་གི་ནང་ལ་བསྡུས་ནས་བསྟན་ཡོད། དེ་ནས་ཤོ་ལོ་ཀ་གསུམ་པ། རང་དང་གཞན་གྱིས་དུས་གསུམ་བསགས་པ་ཡི། །རྣམ་དཀར་བསོད་ནམས་ཕུང་པོ་ཇི་སྙེད་པ། །དམིགས་བྲལ་འཁོར་གསུམ་དག་པས་བྱང་ཆུབ་ཆེར། །ཡོངས་སུ་བསྔོ་བས་སྲིད་པ་མཐར་བྱེད་ཤོག །ཅེས་པ་འདི་བསྔོ་བ་ཚིག་ཟིན་གྱིས་དངོས་སུ་བུད་པ་འདི་ཉིད་ཡིན་ལ། རྒྱུ་གཉིས་པ་དང་ཁྱད་པར་གསུམ་པ་ལ་ཇི་ལྟར་སྦྲེལ་ནས་འབྲེལ་བ་གྲུབ་པ་ཡིན་ཟེར་ན། ཐེག་པ་ཆེ་ཆུང་སེམས་བསྐྱེད་ཁྱད་ཅེས་གསུངས་ལ། དེ་ཡིན་ན་ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་པ་ནས་བརྩམས་པའི་ཐེག་ཆེན་གྱི་དགེ་བ་དེ་ཐོག་མར་གཞན་དོན་སེམས་བསྐྱེད་ཀྱི་རྩིས་ཟིན་པ། དངོས་གཞི་སྟོང་ཉིད་སྙིང་རྗེ་ཐབས་ཤེས་ཟུང་འབྲེལ་གྱི་ལྟ་སྒོམ་དང་འབྲེལ་བ། རྗེས་ཡོངས་སུ་བསྔོ་བས་ཁྱད་པར་དུ་ཕྱེས་པ་ཞིག་ཡིན་དགོས་ཕྱིར་དམིགས་བྲལ་འཁོར་གསུམ་དག་པའི་ལྟ་སྒོམ་སྤྱོད་གསུམ་གྱིས་ཐོག་མཐའ་བར་གསུམ་ལ་ཁྱབ་པ་ཞིག་ལ་གཏན་ལ་འབེབས་པའི་དགོས་དོན་གྱི་དབང་གིས་ས་བཅད་གསུམ་པ་ཡང་དེ་ལྟར་བྱས་ཏེ་འབྲེལ་བ་གྲུབ་ལ། བསྔོ་བ་འདི་ས་བཅད་བཞི་བར་ཡང་མི་འབྲེལ་བ་ཞིག་མ་ཡིན། རྒྱུ་བཞི་བ་དགེ་རྩ་རང་གཞན་བདེ་བ་ཅན་ལ་སྐྱེ་བའི་དོན་དུ་བསྔོ་ཞིང་སྨོན་ལམ་འདེབས་པ་དེ་དགེ་རྩ་སྔོན་སོང་གི་ཆ་ནས་བསྔོ་བ་དང་། ཅིག་ཤོས་སྨོན་ལམ་ཡིན་པའི་བྱེ་བྲག་ཕྱེས་ན་ཐ་དད་ལ་ཕྱེ་རུང་ཞིང་། བསྔོ་བ་ལ་སྨོན་ལམ་གྱི་ཁྱབ་པས་བྱེད་པ་གཅིག་ཏུ་བསྡུས་ནས་ཀྱང་བཀྲལ་དུ་རུང་། དགོས་འབྲེལ་ཡན་ལག་བཞིའི་ནང་གི་འབྲེལ་བས་ཀྱང་གོང་འོག་འབྲེལ་སྦྱར་ན། འདི་བརྗོད་བྱ་རྗོད་བྱེད་གང་ལ་སྦྱར་ན་ཡང་ཆོག་རྒྱུ་ཅན་ཞིག་ཡིན། རྒྱུ་བཞི་བ་རྐྱེན་སྨོན་ལམ་རྣམ་དག་པས་མཚམས་སྦྱར་བ་དེ་ཤོ་ལོ་ཀ་བཞི་བ། ཁྱེད་ལ་ཡང་ཡང་གསོལ་བ་བཏབ་པ་དང་། །མངོན་རྟོགས་ཡིད་ལ་གོམས་པའི་ཏིང་འཛིན་མཐུས། །ངེས་དོན་འོད་དཔག་མེད་པའི་ཞལ་མཐོང་ནས། །བདེ་ཆེན་ཞིང་ཁམས་རྟག་ཏུ་འཛིན་པར་ཤོག །ཅེས་པ་འདིས་བསྟན་ཞིང་། འདིའི་སྨོན་ལམ་ཤོ་ལོ་ཀ་བཞི་བོའི་སྤྱི་དོན་ས་བཅད་ཀྱི་ཆིངས་ཀྱིས་བཅིངས་ན་དེ་ལྟར་དུ་བྱས་ཏེ་འཆད་ཉན་བྱེད་རྒྱུའི་སྤྱི་ཁོག་ལྟ་བུ་དེ་བཤད་པ་ཡིན། ༼ཁ བྱེ་བྲག་གཞུང་དོན་དངོས་བཤད་པ། ༼ཀ༽ རྒྱུ་དང་པོ་རྟེན་ཚོགས་ཞིང་གསལ་འདེབས་པ། སྐབས་སུ་བབ་པ་དེ་རིང་གི་བཤད་བྱ་དེ་གང་ཡིན་ཞེ་ན། ཞིང་ཁམས་བདེ་བ་ཅན་དུ་སྐྱེ་བའི་རྒྱུ་དང་པོ་རྟེན་ཚོགས་ཞིང་གསལ་འདེབས་པ་སྟེ། བསླུ་མེད་བདེ་ལྡན་ཞིང་མགོན་འོད་དཔག་མེད། །རྩེ་གཅིག་དད་པའི་ཤུགས་ཀྱིས་ཁྱེད་བསྒོམ་ན། །དང་བའི་ཡིད་ངོར་སྣང་སྟོང་སྒྱུ་མའི་སྤྲིན། །སྐུ་དང་ཞིང་ཁམས་རྟག་ཏུ་འཆར་བར་ཤོག །ཅེས་སྨོས་ཏེ། བདེ་བ་ཅན་དུ་སྐྱེ་བའི་རྒྱུ་བཞིའི་དང་པོ་དེ་རྟེན་སྐུ་དང་ཞིང་ཁམས་ཡིད་ལ་བྱེད་པ་ཡིན་ཞེས་གོང་ནས་ཀྱང་བཤད་ལ་སྔོན་ཐེངས་མ་མང་པོ་ལ་སྨྲས་པ་ཡིན། འདི་ལ་ནང་གསེས་ཀྱི་ས་བཅད་ཅིག་འུ་ཚོས་བཞག་ན། འགལ་རྐྱེན་སེལ་བ་དང་གཅིག མཐུན་རྐྱེན་སྒྲུབ་པ་དང་གཉིས། སྐུ་དང་ཞིང་ཁམས་ཇི་ལྟར་ཡིད་ལ་བྱེད་པ་དང་གསུམ། སྐུ་དང་ཞིང་ཁམས་ཡིད་ལ་བྱས་པའི་ཕན་ཡོན་དང་རྣམ་པ་བཞི་ལྟ་བུ་ཞིག་གི་ཐོག་ནས་བཤད་ན། དེའི་ནང་གི་དང་པོ་འགལ་རྐྱེན་སེལ་བ་ཡིན་ལ། ༼༡༽ འགལ་རྐྱེན་སེལ་བ། ༼༡ འགལ་རྐྱེན་ངོས་བཟུང་བ། འགལ་རྐྱེན་སེལ་བ་དེ་ལ་ཡང་འགལ་རྐྱེན་ངོས་བཟུང་བ་ཞིག་དང་། དེ་ཉིད་སེལ་བའི་ཐབས་བསྟན་པ་གཉིས་ཀྱི་ཐོག་ནས་བཤད་ཆོག དེ་གཉིས་ཀ་ཚིག་གང་གིས་བསྟན་ཅེ་ན། བསླུ་མེད་ཅེས་པའི་མགོའི་ཚིག་གཉིས་པོས་བསྟན་ལ། བསླུ་ཞེས་པ་འདིས་འགལ་རྐྱེན་ངོས་བཟུང་ཞིང་། མེད་ཅེས་པ་འདིས་དེ་ཉིད་སེལ་ཐབས་ཡན་ལག་དང་བཅས་པ་བསྟན་ཡོད། དེ་ཉིད་ངེས་པར་བྱས་ཏེ། དང་པོ་བསླུ་ཞེས་པ་འདིས་སླུ་བྱེད་ཕྱིའི་རྐྱེན་གྱིས། གང་བསླུས་པ་ནང་གི་སེམས། ཇི་ལྟར་བསླུས་པ་འཁོར་བའི་འཁྲུལ་སྣང་ལ་ཨ་འཐས་འཁྲུལ་བ་རྒྱ་འབྱམས་ལ་སོང་བའི་རྒྱུ་མཚན་གྱིས་ལོ་རྒྱུས་དེའི་ཐོག་ནས་བཤད་རྒྱུ་ཡིན། འདི་ཐུན་མོང་ལྟར་དུ་བྱས་ན་ང་མེད་ལ་ང་དང་། བདག་མེད་ལ་བདག་ཏུ་བཟུང་སྟེ་བསླུས་ནས་ཀུན་འབྱུང་ལས་དང་ཉོན་མོངས་ཀྱི་དབང་དུ་སོང་སྟེ་ཁམས་གསུམ་འཁོར་བའི་གནས་སུ་འཁྲུལ་ཞིང་། འཁོར་བ་འཁྱམས་པར་མ་ཟད་འགྲོ་བ་རིགས་དྲུག་གི་སྡུག་བསྔལ་འདི་མི་འབྱུང་བསམ་རྒྱུ་མེད་པ་བདེ་བ་སྐད་ཅིག་ཀྱང་མེད་པ་འདི་བྱུང་བ་ཡིན། འདི་ཇི་ལྟར་འཁྲུལ་བའི་དཔེ་ཞིག་འདིར་ཁྱིམ་པ་ཕོ་མོ་མང་ཆེ་བ་ཡིན་དུས་དཔེ་སྒྲུང་གི་ཐོག་ནས་བཤད་ན་གོ་བདེ་ལ། འདི་གནའ་བོའི་གཏམ་རྒྱུད་དང་སྦྱར་བའི་རྩོམ་ཐུང་ཞིག་ངས་སྔོན་མར་བྲིས་མྱོང་བ་དེ་ལྟ་བུ་ཞིག་ཡིན། རྩོམ་ཐུང་དེའི་མིང་ལ་དུས་རིག་ཅེས་ཟེར་ཞིང་། སྤྱིར་དེང་དུས་ཀྱི་ཚན་རིག་པ་ཟེར་བ་དངོས་ཁམས་ལྟོས་གྲུབ་རིག་པ་ཕྱོགས་ཙམ་ཞིག་དང་། ཕྲ་རྡུལ་གྱི་ནུས་རྒྱུའི་ཁུངས་ཙམ་ཞིག་རྙེད་པའི་རིག་གསར་བ་ཞེས་པའམ་ཚན་རིག་པ་ཞེས་པ་ཚང་མས་དུས་དང་ནམ་མཁའི་རྒྱ་ཁྱོན་གཞལ་སར་ཐུག་དུས་ཁ་ལྕེ་ལོ་ལོར་གྱུར་འགྲོ་བ་ཡིན། ངས་དེའི་ཕྱོགས་ཀྱི་སྒོ་འབྱེད་ཀྱི་བརྡ་སྟོན་ལ་དུས་རིག་ཅེས་པའི་རྩོམ་ཡིག་འདིས་དུས་དང་། དེ་མིན་པའི་སྐྱེ་འཆི་འཁྲུལ་སྣང་ཞེས་པའི་རྩོམ་ཡིག་གཞན་ཞིག་གི་ནང་དུ་ནམ་མཁའི་རྒྱ་ཁྱོན་གྱི་སྐོར་ནས་ཅི་རིགས་པ་གླེང་ཡོད་བསམ་རྒྱུ་ཞིག་ཡིན། དེང་སང་གི་ཁ་སྐད་བྱས་ན་ཞིབ་འཇུག་ཟེར། འདི་བོད་ཡིག་ཚང་མས་བལྟ་རྒྱུ་ཞིག་ཡོད་མ་སོང་། དེ་གཉིས་ཀའི་བོད་ཡིག་གི་རྩོམ་གཞི་ལ་རང་རོགས་གཉིས་ཀས་དོ་དམ་མ་བྱས་པ་རེད། དུས་རིག་ཅེས་པའི་རྩོམ་ཡིག་ནང་ནས་བཤད་ཡོད་པའི་མགོ་རྔ་མ་གཉིས་ཀྱི་ཚིག་ཆ་རེ་དྲན་གྱིན་མི་འདུག བར་གྱི་གཏམ་རྒྱུད་ངོ་མ་དེ་ཉིད་གནའ་བོའི་སྲོལ་རྒྱུན་གྱི་ཁ་སྲོལ་ལ་གཞིར་བཟུང་ནས་བྲིས་པ་ཕལ་ཆེར་འདི་ལྟ་བུ་ཞིག་ཡིན། གནའ་སྔོན་མ་ཞིག་ལ་སྒྱུ་མའི་སྤྲུལ་སྒྱུར་གྱི་རིག་སྔགས་ལ་མཁས་པའི་སྒྱུ་མ་མཁན་ཞིག་དང་། དེའི་ངོ་ཤེས་སམ་ཁོ་རང་གི་གྲོགས་པོ་གྲྭ་པ་བན་དེ་ཞིག་ཡོད་པ་ཡིན། སྒྱུ་མ་མཁན་དེ་དང་གྲྭ་པ་བན་དེ་དེ་གཉིས་ཀ་ཧ་ལས་པའི་གྲོགས་པོ་འདྲིས་ཆེ་ས་ཡིན་ཞིང་། དེ་དུས་དེ་ལྟ་བུའི་ཤེས་སར་གྱུར་ཡོད་ལ། གྲྭ་པ་གྲོང་ནང་ལ་འཁྱར་དགའ་ཅན་ཞིག་ཀྱང་ཡིན། དེ་དུས་འཕྲུལ་རྟ་མ་དགོས་ལྕགས་རྟ་དར་མེད་ཀྱང་གྲྭ་པ་ནམ་རྒྱུན་དུ་རྐང་ཐང་དུ་ཐལ་བ་ཚུབས་སེ་ཤོར་སོང་བ་ལོས་ཡིན། དེའི་ཉིན་ཞིག་ལ་ཡང་སྒྱུ་མ་མཁན་གྱི་ཁྱིམ་ལ་གྲྭ་པ་ཐོན་ཡོང་དུས་སྒྱུ་མ་མཁན་གྱིས་གྲོགས་པོ་བཞུགས་ཞེས་སྨྲས་ནས་གསོལ་ཇ་དཀར་ཡོལ་གང་ཡང་ཡར་དྲངས་པ་དང་། གྲྭ་པས་བཤད་རྒྱུར་ཁྱོད་སྒྱུ་མ་མཁན་མཁས་ཆེན་ཡིན་པས་ཁྱོད་ཀྱིས་དེ་རིང་ང་ལ་སྒྱུ་མའི་ལྟད་མོ་ཞིག་སྟོན་ཅིག་གསུངས་པ་ལ། ཞེ་ས་ཞུ་དགོས་ཤིང་། སངས་རྒྱས་ཀྱི་ན་བཟའ་གྱོན་ཡོད་པའི་མི་སྣ་ཞིག་གི་གཟུགས་བརྙན་བཞེངས་བཞིན་ཡོད་པ་ཡིན་ལ། སྒྱུ་མ་མཁན་གྱིས་བཤད་པར་སྒྱུ་མ་ཞེས་པ་རྫུན་མ་ཞིག་སྟེ། ཆོས་བཤད་པ་ཞིག་གིས་ཡང་སྒོས་དེ་ལ་ལྟ་རིན་ཞིག་ཅི་ཡོད། དགོས་པ་ཡོད་པ་མིན་ཞེས་སྨྲས་ཀྱང་། ཞེ་འདོད་ལ་སྡོད་ཐབས་འདྲ་ཞིག་མི་འདུག་ཅིང་གྲྭ་པ་ལ་དེ་རིང་སྡུག་བཀལ་ནས་རྩེད་རྟེན་ཞིག་བྱེད་དགོས་འདུག་བསམ་པ་དང་། གྲྭ་པས་དེ་མ་ཟེར། ཁྱོད་ཀྱིས་དེ་ཤེས་འདུག དེའི་ལྟད་མོ་དེ་ང་ལ་བསྟན་ན་ཅི་སྐྱོན་ཞེས་སྨྲས་ནས། འཁང་ར་བྱས་པའི་ཉམས་ཤིག་བསྟན་ཏེ་ཡང་འདུག་ལྟ་བུ་ཞིག་བྱས་སྐབས་སྒྱུ་མ་མཁན་པོ་ལ་གྲྭ་པའི་རྒྱུས་ཡོད་ཅིང་། གྲྭ་པས་རང་རྒྱུས་མི་ལ་སྔར་ནས་བསྟན་ཚར་བ་ཡིན། སྒྱུ་མ་མཁན་པོས་འདི་ཇི་ལྟར་བྱས་ན་བསླུ་ཐུབ་པ་དེ་ཉིད་ཤེས་བཞིན་དུ་སྒྱུ་མ་སྒྱུ་མ་ཅི་མི་ཤེས། གནམ་ཡག་འདུག་འུ་གཉིས་ཀ་སྒོར་སྒོ་བལྟས་ཤིག་འགྲོ་ཞེས་སྨྲས་པ་དང་། གྲྭ་པ་རྔ་ལོ་ཡང་སྟབས་ཀྱིས་ཁྱི་ཁོག་ཅེས་སྨྲས་ཤིང་། ཤར་མར་ལངས་ཏེ་གཉིས་ཀ་སྒོར་བུད་ཚེ། སྒྱུ་མ་མཁན་ཚང་གི་སྒོ་ཁ་ལ་ཡར་ཡོང་སྐབས་མེད་པའི་རྟ་ཕོ་སྔོ་ནག་ཅིག་འབྲུག་སྔོན་མོ་ཐང་ལ་ལྷུང་བ་ལྟ་བུ། ཐང་གའི་ངོས་སུ་བྲིས་པའི་རྟ་མཆོག་བས་ཡག་དང་ཡག མགོ་འཕང་མཐོ་བ། མགོ་རྣ་ཡག་པ། སྟོད་ཞེང་ཆེ་བ། གཟུགས་ལྷུ་བཞི་རྔ་རྔོག་མཛེས་པ། སྲབ་མདའ་གང་རེ་ལ་སྐོར་ལྡིང་རེ་བྱེད་ཀྱིན་འདུག གྲྭ་པ་ལར་རྟ་ལ་དགའ་མཁན་ཞིག་ཀྱང་ཡིན་ཞིང་། དེའི་སྟེང་དུ་དེ་ལྟ་བུ་སྔར་རིག་མ་མྱོང་བའི་རྟ་མཆོག་གྱི་ལིང་ཞིག་རིག་སོང་བས་སེམས་དེ་ལ་ཤོར་ནས། འདིའི་རྟ་འདི་ཡིན་གཅིག་མིན་གཉིས་ང་ལ་བཙོང་རོགས་དགོས་ཞེས་སྨྲས་པ་དང་། སྒྱུ་མ་མཁན་པོས་བཤད་རྒྱུར། དེ་བཙོང་རྒྱུ་མིན། མི་ཞིག་ལ་ཡག་པ་ཞིག་ཡོད་ཚད་པོ་ལོན་དགོས་དྲན་པ་ཙམ་གྱིས་དེས་ཨེ་སྤྲད་ཅི་ཤེས་ཞེས་སྨྲས་པ་ལ། དེ་མ་ཟེར་གྲོགས་པོ་ལོ་ལོ་ཡིན། རྟ་འདི་ང་ལ་མ་བཙོང་ཐབས་མེད། རིན་གོང་ཚད་ཅི་དགོས་ཁྱོད་རང་གི་ཁ་ཡིས་ཅི་བཤད་ན་དེ་སྦྱིན་ཞེས་གྲྭ་པས་ཡང་དང་ཡང་དུ་དེ་ལྟར་སྨྲས་ཚེ། ཁོ་རང་གིས་བསམ་བློ་མང་པོ་གཏོང་ཁུལ་བྱས་ནས་བཙོང་ཟེར་ན་ཕྱིན་ཆད་ལག་ལ་མི་ཡོང་བའི་བྱོལ་སོང་འདང་ཆེན་ཡིན། མི་བཙོང་ཟེར་ན་གྲོགས་པོའི་ཕྱི་ཐག་ལ་མ་བརྩིས་པ་རེད། གོང་ཅི་སྦྱིན་ཁྱོད་ཀྱིས་ཚུར་ཤོད་དང་ཆུང་ས་ཞིག་ནས་གྲོགས་པོ་མཆོད་ཡོན་གཉིས་ཀྱི་བར་ལ་བཤད་ཀྱང་མི་བཤད། ལར་མ་གཞི་རྟའི་རིན་ཐང་འགྲོས་གོམ་གྱིས་ཤེས་པ་ཡིན་པས་ཁྱོད་ཀྱིས་དང་པོ་གོམ་ཚད་ཅིག་ལོངས་དང་ཤེས་རྒྱུ་ཡོད་ཅེས་སྨྲས་པ་རེད། དེ་ཟེར་དུས་རེད་ཅེས་སྨྲས་ནས་གྲྭ་པས་ཅི་བསམ་འདི་དྲན་མེད་པར་ཡར་རྟ་གོང་ལ་བུད་ནས་སྒྱུ་མ་མཁན་གྱིས་སྲབ་མདའ་ལག་ལ་བཞག་ནས་གྲུག་ཐོག་ལ་ལྕག་གིས་གཅིག་བྲབ་དུས་རྟ་མཆོང་རྩལ་ཞིག་དང་ལྷན་དུ་ལྡིང་གིན་ཡོད་པ་ལྟ་བུ། མཆོང་གིན་ཡོད་པ་ལྟ་བུ། འཕུར་གྱིན་ཡོད་པ་ལྟ་བུ། རྒྱུག་གིན་ཡོད་པ་ལྟ་བུ། མཚམས་རེ་ལ་རྨིག་བཞི་སར་ཐུག་གིན་ཡོད་པ་ལྟ་བུ། མཚམས་རེ་ཐུག་གིན་མེད་པ་ལྟ་བུ། མདོར་ན་མཆོང་མ་ལྡིང་། འཕུར་མ་རྒྱུག་ཁོ་ནས་མདའ་ཉག་ཕྲན་གཞུ་རྒྱུད་ནས་ཤོར་བ་ལྟ་བུ་ཞིག་བྱས་ཏེ། མཐོ་རི་བོའི་རྩེ་མོ། དམའ་ལུང་ཆེན་གྱི་ཁོག་གཞུང་མང་པོ་བརྒྱུད་ནས་ཐང་ཆེན་གྱི་དཀྱིལ་བཤགས། ཆུ་ཆེན་གྱི་འགྲམ་བཤགས། ཉིན་ཞག་ཆ་རེར་གྱུར་སོང་བསམ་རྒྱུའི་སྣང་བ་ཤར་རྒྱུ་ཞིག་བྱས། ཆུ་ཁྲི་རི་སྟོང་གི་ཕར་རྒྱབ། སྐྱེ་བ་ཚེ་འདིའི་རིང་ལ་ཕ་ཡུལ་མིག་གིས་རིག་རྒྱུ་མ་རེད་བསམ་རྒྱུའི་ས་ཆ་རྒྱུས་མེད་ཅིག་གི་མི་མེད་ལུང་སྟོང་ཞིག་ལ་འཕངས་ཏེ་རྟ་ཕོ་གར་སོང་རྗེས་ཙམ་ཞིག་ཀྱང་མ་རིག་ནས་མུན་ནག་ཅིག་གི་ནང་ལ་ལྷག་སོང་བ་དང་། བན་རྒན་བརྒྱལ་སོང་བ་དེ་ཉིད་ཅུང་ཞིག་དྭངས་ནས་ས་ལ་སྦར་ཉུལ་ཞིག་བྱས་ཀྱང་བྱང་ཐང་སྐྱ་མོར་བྱེ་མ་སྦར་གང་མིན་པར་ཅི་ཞིག་རྙེད་ཡོང་སྟེ་རྙེད་རྒྱུ་མེད་ལ། ད་ནི་འཁྱག་རྒྱུ། ལྟོགས་རྒྱུ། ཡི་མུག་པ། ཡི་ཐང་ཆད་པ་ཚང་མ་ཐོ་ཞིག་ཐུག་དུས་ཅི་བྱེད་འདི་བྱེད་མེད་ལ། ནམ་ཡར་ལངས་དུས་ཕྱོགས་བཞི་མཚམས་བཞི་སྟེ་བརྒྱད་པོ་གང་ལ་བལྟས་ན་རྒྱུས་མེད་ཀྱི་ཡུལ་ཞིག་ཡིན་འདུག ཕ་ཡུལ་ཡོད་ས་དེ་ཉིད་ཕྱོགས་གང་ལ་ཁ་འཁོར་ནས་འགྲོ་ས་ཡིན་པ་ཙམ་ཞིག་ཀྱང་མ་ཤེས་ནས་ལྷག་པར་དུ་སྐྱོ་སྣང་སྐྱེས། ཉིན་ཞག་མང་པོ་ལ་མི་ཟས་ཁ་ལ་མ་རག་པ་དང་། གཟུགས་སྟོབས་ཀྱང་ཞན་ཞིང་། གཟབ་གཟབ་ལྟ་བུ་ཞིག་བྱེད་ཁུལ་བྱས་ཏེ། རྒྱུ་མས་སྐེ་རགས་། མཆི་མས་སྐོམ་ཆུ་བྱས་ནས། དེའི་ལུང་སྟོང་དེ་ནས་སོང་སོང་བ་ན་མཐར་སྡུག་ཐུག་རོ་སྣ་དབུགས་མ་ཆད་ཙམ་ཞིག་ལ་འབྲོག་སྡེའི་དུད་ཚང་ཐ་རེ་ཐོ་རེ་ཡོད་པ་དེ་ལྟ་བུ་རིག་འདུག་ས་ཞིག་ལ་ཐོན་སོང་བ་ཡིན། དེ་ནས་དུད་དྲི་འདྲ་ཞིག་སྣ་ལ་བརྒྱབ་ནས་མི་ཞིག་གི་གྲིབ་མ་རིག་རྒྱུ་ཡོད་པ་དེ་ཉིད་ཀྱིས་སེམས་དགའ་ནས་དེའི་ཕྱོགས་ལ་སོང་སྟེ། ཟ་རྒྱུ་རེ་སློང་ཁུལ་བྱས་དུས་ཟ་ལྷག་འཐུང་ལྷག་ཁྱི་ཆས་བས་དགའ་རེ་ལོན་ནས་དེས་སྲོག་འཚོས་ཏེ་ཤི་མ་སོང་ལ། དེ་འཕྲོས་འབྲོག་སྡེའི་ཚོ་པ་མང་པོའི་སྒོར་ཉུལ་ནས་འཁྱམས་པའི་སྟབས་ཀྱིས་དང་ཐོག་ས་དེའི་མི་ཡི་སྐད་རིགས་མ་གོ་ཡང་ནམ་ཞིག་འདྲིས་སོང་བའི་རྐྱེན་གྱིས་སྐད་བརྡ་འཕྲོད་པ་ལྟ་བུ་ཞིག་གྱུར་སོང་། ས་ཆ་དེ་ནང་ཆོས་ལ་ཡང་དད་པ་ཡོད་ས་ཞིག་ཡིན་པས་འགའ་རེས་འདིའི་ཚུགས་ཀ་ལ་བལྟས་ན་གྲྭ་པ་བྱས་མྱོང་བ་ཞིག་ཡིན་འདུག་བསམས་ནས་ཁྱོད་ཀྱིས་ཨ་མཆོད་འདྲ་འདོན་ཨེ་ཤེས་ཞེས་དྲིས་པ་ན། དེ་ཤེས་མཁན་ཞིག་སྟེ་དགེ་རྒན་བཀའ་དྲིན་ཅན་གྱི་སྐུ་བེད་ཀྱིས་ཀློག་འདོན་ཞིག་བྱེད་དགོས་ན་ཡིག་དཀར་ནག་གཉིས་ཀ་ལ་ཐོགས་རྒྱུ་ཞིག་མེད་ལ་འདོན་བཟང་ངོ་མ་ཞིག་ཡིན་ཞེས་སྨྲས་པ་དང་། དེ་ནས་ཚང་མས་ཨ་མཆོད་དུ་གདན་དྲངས་ཏེ་གསོལ་ཇ་གང་ཡག་དྲངས། ཡོན་འདུ་བ་མང་པོ་སོག་ནས་བར་ཞིག་ལ་བན་རྐྱང་རྒྱུ་ཆེན་དུ་གྱུར་ཏེ། ཨ་མཆོད་འདོན་ན་ཁེ་སྐྱེད་མི་ཆེ་བར་ད་ནི་ཚོང་བརྒྱབ་ན་ཁེ་སྐྱེད་ཆེ་འདུག་སྙམ་ནས་བན་དེ་ཚོང་པ་སྐྱ་སེར་གཉིས་གོ་ཆོད་པ་ལྟ་བུ་ཞིག་གྱུར་སོང་པ་ཡིན། དེ་ལྟར་བྱས་ནས་དགེ་བའི་བཤེས་གཉེན་དང་དགེ་བའི་གྲོགས་པོ་སོགས་དང་ཁ་བྲལ་ནས་ཡུན་རིང་གྱུར་སོང་ལ། ཡུན་རིང་ཞིང་རིང་ལ་གྲོགས་ངན་འགའ་རེའི་ཁ་ལ་བརྒྱུགས་ནས་ཨ་མཆོད་བླ་རྒན་བན་ཧྲུལ་བསྟན་པའི་བསླབ་པ་ལ་རྩིས་མེད་གཏོང་མཁན་ཞིག་ཏུ་གྱུར་ནས་མཐར་ཐུག་སྐྱ་སར་འབབ་ཁུལ་བྱས། འཁོར་ངན་ཞིག་བཟུང་། རྟ་ནོར་ལུག་གསུམ་གྱི་འཚོ་སྐྱོང་བྱས། དང་པོའི་སྐབས་སུ་རྒྱུ་ཡོད་ཅིང་ལོ་ཉུང་བས་ཉི་མ་ཟླ་ལུ་ཆ་རེ་ལ་ཧ་ཅང་མ་སྡུག་ལ། ཡུན་གྱི་ཡུན་ལ་སོང་ནས་སྡུག་སྡིག་པ་གཉིས་ཀ་དང་འབགས། དཀའ་ལས་སྐྱིད་སྡུག་མང་པོ་ཞིག་མྱོང་། བུ་བུ་མོ་སྤྲང་ཕྲུག་ཆ་རེས་མཐར་བསྐོར། དེ་ཚང་མ་ན་དོགས། ཤི་དོགས། འཁྱར་ཤོར་དོགས། ལྟོགས་འགྲོ་དོགས་ལ་སོགས་པའི་སྡུག་གི་ཉི་མ་དུས་ཚོད་སོང་གིན་སོང་ལ་གཞིས་ངན་ཡུན་གྱིས་སྐྱོང་རྒྱུ་དེ་ངམ་གནག་པ་ཡིན་ཕྱིར་ཚེ་ཡར་སྟོད་དབང་པོ་དར་ཐོག་གི་ཁ་ལས་རླུང་རྟ་ལྟ་བུ་ཡང་མེད་དེ། ཡར་རྒྱབ་ནས་དབྱུ་གུ་བོར་སོང་ན་རྒན་པོ་འཁྱར་པོ་མིན་ནམ། མར་རྒྱབ་ཚང་གི་སྦྲ་ཁ་ཆོན་ཐག་ཅིག་འཆོས་སོང་ན་ཁྱི་རྐུན་མིན་མི་རྐུན་དེ་ཡིན་ཟེར་ཞིང་། གདོན་སྣ་དམར་ཞིག་ལ་ཅི་ཚང་དེ་ཉིད་འདི་ལ་ཚང་ཡོད་ཟེར་ས་དེ་ལྟ་བུ་ཞིག་ཏུ་གྱུར་སོང་བ་ཡིན། ནང་བཟའ་བའི་ནང་ནས་ཡིན་ཡང་ངན་པ་ལང་ཤོར་གྱི་སྤྲང་ཕྲུག་རྣམས་ཡར་སོང་སྨྲས་ན་མར་འགྲོ་བ། མར་སོང་སྨྲས་ན་ཡར་འགྲོ་བ། གཅག་རྒྱུ། སྟོར་རྒྱུ། མེད་འདྲེ་འཕུང་བརླག་ཅིག་དང་། མི་དགེ་བ་ཞིག་སྤྱད་དུས་བསླབ་མི་དགོས་པར་ཤེས་ཡོད་པ། རིག་ས་ནས་བཙོང་། མི་རིག་ས་ནས་རྐུ་འགྲོ་བ། བཟའ་བ་ནངས་འཐབ་ནུབ་འཐབ། ཐ་ན་མ་ཤི་ཙམ་གྱི་བཟའ་འཛིང་རྡུང་རེས་རྒྱག་རེས་ཀྱང་ཐེངས་མ་ཆ་རེ་བྱེད་དགོས་ཐུག་ལ། རྒྱུད་གླག་གསར་ལྟ་བུ་དེ་ཉིད་མར་རྒུད་སྐབས་མིའི་མིག་གིས་རིག་ས་མེད་པར་གྱུར་ནས། མི་ཕུང་པས་ལས་སྣ་ཚོགས་བྱས་ཀྱང་བཟའ་མི་མང་གི་ཁ་མ་སོས་ཏེ་དོམ་བུ་ལོན་གྱི་ཁ་འོག་ནས་མ་ཐར་ཞིང་། མི་ལྟོགས་ཕོ་བ་ལ་མེ་འབར་ན། །མཐོ་རྒྱལ་པོའི་མཁར་ལ་སྐས་བཙུགས། །ཞེས་པའི་དཔེ་ལྟར་རྐུ་ཇག་ལྟ་བུ་རེ་བྱེད་ཁུལ་བྱས་ཀྱང་ཁ་སྣ་མིག་གསུམ་མ་ཤོར་བ་ཙམ་གྱི་ཁྲིམས་གཅེར་བུར་ལྕག་ཤད། གཞིས་འཁོར་བ་མདའ་མོ་སྟོང་གཤགས་ཀྱང་ཐེངས་མ་ཆ་རེ་བྱེད་དགོས་བྱུང་སྟེ། མཐའ་མཇུག་རྔོན་འདྲ་ཞིག་བདའ་ཁུལ་བྱས་ནས། ལས་མཐའ་ལོག་དུས་སྡིག་སྟོབས་དེ་ཡར་ལྷག་ཆེ་སྟབས་ཀྱིས་ཁོ་རང་རྔོན་བདར་སོང་དུས་ཚེ་སྟོད་ཀྱི་ལོ་ཉུང་དུས་ཀྱི་སྐབས་སུ་རྫ་མགོའི་གཡའ་སྤང་གི་རྒོ་བ། ནགས་ཀྱི་ཤྭ་བ། བྲག་གི་གླ་བ་ལ་སོགས་པ་མི་གསོད་རྒྱུ་ཞིག་མེད་ལ། སྔ་དྲོར་རྫ་སྒང་འགྲིམས་ནས་འབྲོང་མོའི་རྫ་ལམ་བཅད། དགོང་མོར་རི་ཟུར་བཤེར་ནས་ཤྭ་བོའི་བསིལ་རྩྭ་ཟ་བ་དེ་ཉིད་སྒུག་གིན་ཡོད་པ་དང་། ཝ་མོ་ཆུ་འཐུང་། འཕྱི་བ་རྩྭ་ཟན། ཐ་ན་རི་བོང་སྲེག་པ་ཚུན་ཆད་མི་གསོད་རྒྱུ་ཞིག་མེད། དེ་ལྟ་བུར་བྱས་ཏེ་སྡུག་སྡིག་པ་གཉིས་ཀྱི་འཚོ་བ་ཡིས་མི་ཚེའི་དུས་ཚོད་ཕལ་ཆེ་བ་བསྐྱལ་བ་ཡིན། ད་ནི་ལོ་ན་ཚོད་ཀྱིས་གཉའ་ནོན། ཁ་མིག་དབང་པོ་སོགས་མར་རྒུད། སྔོན་ཆད་ལྟ་བུ་ལུས་གཟུགས་གཞི་ལ་རྩལ་མེད། ཚིགས་ཐམས་ཅད་མི་ན་མི་གཟེར་ས་མེད། མར་བསྡད་ན་ཡར་ལངས་དཀའ་ཤོར། དེ་ལྟར་དུ་གྱུར་ནས་རི་དྭགས་ཀྱང་མ་སོད། རྔོན་བདའ་རུ་འགྲོ་ཁུལ་བྱས་ཀྱང་ནམ་རྒྱུན་དུ་ལག་སྟོང་དུ་ཡོང་རྒྱུ་ཇེ་མང་དང་ཇེ་མང་དུ་གྱུར། སྤྲང་ཕྲུག་ཆ་ག་ནར་སོན་པ་ལྟ་བུར་གྱུར་ཀྱང་ཁྱི་ལ་རྒྱག་པའི་དབྱུག་པ་ཉན་མཁན་གཅིག་ཀྱང་མ་ཡོད། བཟའ་མ་སྨད་ཆ་གས་རྒད་པོའི་ལག་གི་སྡིག་ཟས་ལ་བརྟེན་ནས་བསྡད་ཡོད་ཕྱིར་ད་རུང་ཡིན་ན་ཡང་གསོད་སེམས་འདྲ་རེ་ཞེ་ལ་འཆང་ཁུལ་བྱས་ནས་རྩྭ་རྩི་ཤིང་གཉིས་དང་མཉམ་འགྲོགས། རླུང་བསེར་མ་གཉིས་དང་མཉམ་རྒྱུག་གིས་ཚེ་སྟོད་ཀྱི་བག་ཆགས་འདྲ་བོ་དེད་ཁུལ་བྱེད་སྐབས་ཉིན་ཞིག་སོང་སོང་ནས་མཐར་ཐུག་རི་ཁུག་གད་ནག་ཅིག་གི་ཟུར་ནས་རྒོ་ཡུ་མ་ཕྲུ་གུ་བཙས་མ་ཐག་པ་ཞིག་མས་ཕྲུ་གུ་ལ་ལྕེ་ལྡག་བྱེད་བཞིན་ཡོད་པ་ཞིག་ལུས་ཟུངས་ཉམས་ནས། རྒྱུག་རྒྱུ་དང་བྲོས་རྒྱུ་ཆེན་པོ་མེད་པ་ཞིག་ལ་ཐུག་སྟེ། དེ་བྲོས་ཞོར་དུ་ཕྲུ་གུ་ལ་ཕྱིར་བལྟས་བྱེད་ཞོར་འབྲོ་བཞིན་ཡོད་པ་དེ་ཉིད་ལ་རྩི་མདའ་ཞིག་བརྒྱབ་ནས་གསད་རྒྱུ་ལོན་པ་དང་། དགོང་མོ་ཉི་མ་ལ་ཁར་རྒོ་རོ་ཕྲག་ལ་ཁུར་ནས་བོའུ་ངན་འདྲ་བོ་ལག་རྟེན་བྱས་ནས་གྱོལ་མ་འཐེང་ཞིག་མ་གཏོགས་འགྲོ་ཐུབ་ཀྱིན་མེད་ལ། གྱོལ་མ་འཐེང་གིས་ཁྱིམ་དང་ཐག་ཉེ་སའི་ཕ་རོལ་གྱི་རི་ངོས་ནས་ཕྱི་དྲོ་དགོང་ཁ་ཞིག་ལ་ཡོང་བཞིན་ཡོད་སྐབས་བྱིས་པ་གསུམ་གྱི་ཆུང་བ་དེ་ཉིད་ཀྱིས་ཨ་ཕ་ཐོན་བྱུང་ཟེར་ནས་སྐད་འབོད་ཅིག་དང་ལྷན་དུ་ཨ་ཕའི་ཕྱོགས་ལ་རྒྱུག་ཡོང་དུས་དེའི་བར་གྱི་ལུང་གཞུང་དུ་རྒྱུག་ཆུ་ཤུར་མོ་ཞིག་རྒྱུག་གིན་ཡོད་པ་དེ་ཉིད་ཀྱི་ཟམ་ཐོག་ནས་རྡོག་འཁྱར་ནས་ཆུ་ནང་དུ་ལྷུང་སོང་ཞིང་། དེ་རིག་མ་ཐག་ཏུ་དེ་མིན་པའི་མིང་སྲིང་གཉིས་པོ་གཅིག་འཕྲོ་ལ་གཅིག་བྱས་ནས་སྔོན་གྱི་བུ་ཆུང་བ་ཚང་མའི་འདང་ཆེན་དེ་ཉིད་ཀྱི་རྗེས་ལ་ལྕེབས་སོང་བས་ཨ་མ་རྒད་མོས་དེ་རྣམས་རིག་པ་དང་ལྷན་དུ་བྲང་ལ་ཁུ་ཚུར་གྱིས་གཅིག་བརྒྱབས་ནས་ངུ་འབོད་ཆེན་པོ་ཞིག་བྱེད་ཞོར་དུ་ཐེ་ཚོམ་ཞིག་ཀྱང་མ་བྱས་ནས་རྒྱུག་ཐེངས་གཅིག་གིས་བྱིས་པ་གསུམ་གྱི་རྗེས་སུ་ཆུ་ནང་ལ་ལྕེབས་སོང་། བཟའ་ཁྱིམ་ཚང་གང་པོ་དུས་ཐོག་གཅིག་ལ་དེ་ལྟར་བྱས་ཏེ་ཤི་སོང་བ་དེ་ཉིད་རིག་དུས་རྒད་པོ་སྡུག་བསྔལ་ཆེ་བའི་དབང་གིས་ཡུད་ཙམ་ཞིག་ལ་བརྒྱལ་ནས་དབང་པོ་ཤོར་སོང་བ་དང་། བར་ཞིག་ཡར་ཅུང་ཞིག་སོས་ཡོང་སྐབས་མེ་མདའ་ཟད་པོ་དེ་ཉིད་ཀྱིས་ལག་རྟེན་བྱས་ནས་ཡར་ལང་ཁུལ་བྱས་ཀྱང་ཡར་ལང་མ་ཐུབ་པར་མར་འགྱེལ་ནས་ནག་ཐིམ་མེར་སོང་བ་ལ། དེའི་མཚམས་ཤིག་ནས་ནམ་ལངས་ཏེ་གཉིད་སད་པའི་སྣང་བ་ལྟ་བུ་ཞིག་ཤར་བ་དང་མཉམ་དུ་རང་གིས་རང་ལ་གཅིག་ལྟ་སྐབས་གྲོགས་པོ་སྒྱུ་མ་མཁན་གྱི་སྒོ་ཁ་ནས་དབྱུག་པ་ཞིག་ལག་རྟེན་བྱས་ནས་ནུད་ཀྱིན་འདུག གྲོགས་པོ་སྒྱུ་མ་མཁན་གྱིས་དགོས་པ་མི་འདུག་ཡར་ལོངས་ལ་ཁྱིམ་དུ་འགྲོ་ཇ་འཐུང་ཞེས་སྨྲས་པ་དང་། ཡར་ཁྱིམ་ལ་སོང་དུས་ད་ལྟ་སྔོན་ནས་དཀར་ཡོལ་ནང་ལ་ཇ་བླུགས་པ་དེ་ཉིད་ད་དུང་འཁྱགས་མི་འདུག དེ་ལྟར་ཡིན་པའི་རྐྱེན་གྱིས་དུས་མ་འགྱུར་སྣང་བ་འགྱུར་བ་དེ་ཉིད་ཀྱིས་བན་ཆུང་ཧ་ལས་ནས་རང་གིས་རང་ལ་ཡིད་མི་ཆེས་པའི་འདང་རྒྱག་ནང་ལ་ལྷུང་སྟེ། སྙིང་མེད་འཁོར་བའི་འཁྲུལ་སྣང་གི་ཆོས་ལ་སྙིང་པོ་མེད་པ་དེ་ཉིད་བཤད་པ་བརྒྱ་བས་མྱོང་བ་གཅིག་གིས་གསལ་བའི་རྐྱེན་དེས་ངེས་འབྱུང་ཤུགས་དྲག་ཅིག་རྒྱུད་ལ་སྐྱེས་ནས་ཆོས་མཐར་ཕྱིན་སོང་བའི་ལོ་རྒྱུས་དེ་ལྟ་བུ་ཞིག་ངས་བྲིས་མྱོང་། དཔེ་དེ་དང་ཉེ་བ་ཆ་མཚུངས་ཀྱི་བསླུ་ཞེས་པའི་ཚིག་འདིས་འགལ་རྐྱེན་ཇི་ལྟར་ངོས་བཟུང་ཡོད་ཟེར་ན། སེམས་དང་ལྡན་པའི་སྲོག་ལྡན་གྱི་འགྲོ་བ་ཐམས་ཅད་ལ་བདེ་ཐབས་སྡུག་བསྔལ་དང་བྲལ་འདོད་ཀྱི་བློ་ཡོད་ཀྱང་། མེད་ལ་ཡོད་པར་བཟུང་བའི་འཁྲུལ་སྣང་གོང་གི་གཏམ་རྒྱུད་ལྟར་ང་མེད་ལ་ང་དང་བདག་མེད་ལ་བདག་ཏུ་བཟུང་ནས་ཁམས་གསུམ་སྲིད་པའི་གནས་འདིར་འཁྲུལ་བ་ཡིན། ཐམས་ཅད་སྒྱུ་མ་མཁན་པོའི་ཆོ་འཕྲུལ་གྱིས་སྒྱུ་མའི་རིག་སྔགས་ཀྱི་ནུས་པས་དུས་ཐུང་རིང་པོ་ལ་སྣང་། དུས་ཚོད་སྐར་མ་ཆ་རེའི་ཡུན་ལ་མི་ཚེ་གཅིག་གི་སྐྱིད་སྡུག་སྣང་བ་ལྟར་དུ་ད་ལྟའི་གནས་སྐབས་ཀྱི་རང་རེ་འཁོར་བའི་སེམས་ཅན་གྱི་འཁྲུལ་སྣང་ལ་ཤར་བའི་སྣང་བ་འདི་ཐམས་ཅད་དེ་དང་གཅིག་པ་གཅིག་རྐྱང་ཡིན་ལ། འཁྲུལ་དང་ཉིང་འཁྲུལ་གྱི་ཁྱད་པར་ཙམ་ཞིག་ཡིན། ཉིན་དཀར་གྱི་སྣང་བ་འཁྲུལ་བ་ཡིན་པ་དང་མཚན་མོའི་རྨི་ལམ་དེ་ཉིང་འཁྲུལ་ཡིན་ཞིང། ཉ་གི་གུ་ཉི་ང་བཞག་ཉིང་སྟེ། བསམ་ལྷུན་འདོན་སྐབས་འཁྲུལ་སྣང་ཉིད་འཁྲུལ་མི་ཟེར་བར་ཉིང་འཁྲུལ་དང་། ཚེ་རིང་མའི་གསོལ་ཁ་འདོན་དུས་ཉིད་སྤྲུལ་བྲན་གཡོག་མི་ཟེར་བར་ཉིང་སྤྲུལ་ཞེས་བརྗོད་དགོས་པ་དེ་བཞིན་དུ་ཡིན། གཉིད་ཡོད་པ་དང་མེད་པའི་མི་གཉིས་མཉམ་དུ་བསྡད་ན་དེ་གཉིས་ཀྱི་སྣང་བ་མི་འདྲ་བ་ལྟར་དུ་འཁྲུལ་དང་མ་འཁྲུལ་གྱི་ཁྱད་པར་དེ་ལྟ་བུ་ཞིག་ཡིན། འཕགས་པ་མ་འཁྲུལ་བ་དང་སེམས་ཅན་འཁྲུལ་སོང་ལ། མི་མ་གཉིད་པའི་མངོན་ཤེས་ཅན་ཞིག་གིས་ཟུར་གྱི་མི་གཉིད་ཡོད་པའི་རྨི་ལམ་ལ་ཅི་ཤར་དེ་ཉིད་ཤེས་ཀྱིན་ཡོད་པ་དང་འདྲ་བར་མ་འཁྲུལ་ཡེ་ཤེས་བརྙེས་པ་དེ་ཉིད་ལ་འཁྲུལ་བ་མེད་ཀྱང་སེམས་ཅན་གྱི་འཁྲུལ་སྣང་མཁྱེན་གྱིན་ཡོད་པ་དང་། སེམས་ཅན་ཞེས་བཤད་སྐབས་སེམས་དང་ལྡན་པའི་གོ་དོན་ཡིན་ཞིང་། སེམས་ཡོད་པ་ཞིག་ལ་སེམས་ཅན་ཞེས་ཟེར། སེམས་ཞེས་པ་སེམས་སེམས་བྱུང་ཡུལ་དང་བཅས་པ་དེ་འཁྲུལ་བ་ཡིན་ལ། བློ་ནི་ཀུན་རྫོབ་ཡིན་པའི་ཕྱིར་ན་ཀུན་རྫོབ་རྫུན་པ་སླུ་བའི་ཆོས་ཅན་ཡིན་ཞིང་། མ་འཁྲུལ་བའི་ཡེ་ཤེས་དེ་སེམས་ལས་འདས་པ་ཞིག་ཡིན་དགོས། དམ་ཆོས་དཀོན་མཆོག་བརྩེགས་པའི་ནང་དུ། སེམས་དང་ཡིད་དང་རྣམ་པར་ཤེས་པ་དང་ཡང་བྲལ་ལ་ཏིང་ངེ་འཛིན་གྱི་གནས་ཀྱང་མི་འདོར་བ་སྟེ་། འདི་ནི་དེ་བཞིན་གཤེགས་པའི་ཐུགས་ཀྱི་གསང་བ་ཟབ་མོ་བསམ་གྱིས་མི་ཁྱབ་པ་ཡིན་ཞེས་གསུངས་ཡོད། སེམས་དང་ཡིད་དང་རྣམ་ཤེས་ལ་སོགས་པ་ཞེས་པའི་སེམས་འཁྲུལ་བ་གཅིག་ལ་རྩིང་ཞིབ་ཀྱི་དབྱེ་བ་དང་། གཙོ་སེམས་དང་སེམས་བྱུང་ཞེས་པའི་འཁྲུལ་སེམས་ཀྱི་རྩ་བ་ངོ་མ་དེ་ངར་འཛིན་ལྷན་སྐྱེས་ཀྱི་མ་རིག་པ་དེས་བདག་དང་བདག་གིར་བཟུང་ནས་འཁྲུལ་བ་དེ་ཉིད་ནི། ཀུན་མཁྱེན་ཆེན་པོས། མར་མེའི་འོད་ལ་ཕྱེ་མ་ལེབ་བཞིན་དུ། །འདོད་པའི་ཡིད་ལ་ཆགས་སྲེད་འཛིན་པས་བསླུས། །ཞེས་གསུངས་པ་ལྟར་དུ་སེམས་ཅན་ཐམས་ཅད་ལ་བདེ་བ་ཐོབ་འདོད་ཡོད་པས་མི་ཚད་སྡུག་བསྔལ་དང་བྲལ་འདོད་ཀྱི་བློ་ཡོད་ཀྱང་རྨོངས་པ་མི་ཤེས་པའི་གཞན་དབང་དུ་གྱུར་སོང་བའི་དབང་གིས་བདེ་བའི་རྒྱུ་བླང་བར་བྱ་བ་གང་ཡིན་པ་དང་། སྡུག་བསྔལ་གྱི་རྒྱུ་དོར་བར་བྱ་བ་གང་ཡིན་མི་ཤེས། འདོད་པའི་ཡུལ་ལ་ཆགས་སྲེད་ཀྱི་དབང་གིས་མིག་གཟུགས་ལ་ཆགས་པ་ཕྱེ་བ་ལེབ་མར་མེའི་འོད་ལ་ཆགས་ནས་དེ་ལ་ལྕེབས་པས་ཚིག་ནས་ཤི་བ་སྟེ། ས་འདིའི་ཁ་སྐད་བྱས་ན་རྒད་པོ་མེར་ལྕེབས་མེ་ནང་ལྕེབས་ནས་ཤི་སོང་བ་ལྟ་བུ། རྣ་བ་སྒྲ་ལ་ཆགས་ནས་རི་དྭགས་པི་ཝང་དང་གླིང་བུའི་སྒྲ་ལ་ཉན་དུ་འགྲོ་ས་ནས་རྔོན་པས་བསད་པ་ལྟ་བུ། དེ་བཞིན་དུ་བུང་བ་མེ་ཏོག་གི་དྲི། མི་ཟས་ཀྱི་རོ། གླང་ཆེན་འདམ་གྱི་བསིལ་བའི་རེག་བྱས་ཕུང་བ་ལྟ་བུ། སླུ་བྱེད་ཀྱི་ཕྱིའི་རྐྱེན་འདོད་པའི་ཡུལ་ལྔ་ཡིས་གང་བསླུས་པ་ནང་གི་སེམས་འདོད་ཆགས་ཀྱི་མཐུ་རྒྱས་ནས་གོང་གི་སྡུག་བསྔལ་སོགས་མྱོང་བ་ལྟ་བུས་ཉོན་མོངས་ཤིང་ཐང་ཆད། ཕྱིའི་ཡུལ་རྐྱེན་གྱིས་ནང་ཉོན་མོངས་གཞན་གྱི་མཐུ་ཡང་རྒྱས་ནས་མི་འདོད་སྡུག་བསྔལ་སྣ་ཚོགས་ཀྱི་འབྱུང་རྐྱེན་དེ་ལྟར་བྱེད་བཞིན་ཡོད། དེ་ལྟར་ན་སླུ་བྱེད་ཕྱིའི་རྐྱེན་གྱིས། གང་བསླུས་པ་ནང་གི་སེམས། དེ་ཇི་ལྟར་བསླུས་པ་འཁྲུལ་བ་རྒྱ་འབྱམས་སུ། ཐོག་མེད་ནས་ད་ཡི་བར་ལ། ཁམས་གསུམ་འགྲོ་བ་རིགས་དྲུག་གི་གནས་རིས་མཐོ་དམན་ཐམས་ཅད་ལ་འཁྱམས་ནས་སྡུག་བསྔལ་སྣ་ཚོགས་དེ་སྔོན་མྱངས། ད་ལྟ་མྱོང་བཞིན་པ། ད་རུང་ཕྱིན་ཆད་མྱང་བའི་རྒྱུ་སྒྲུབ་བཞིན་པ། སྡུག་བསྔལ་རྒྱུ་འབྲས་ཤ་སྟག་ལ་སྤྱོད་པའི་འཁྲུལ་སྣང་སད་རྒྱུ་མེད་པའི་རྨི་ལམ་གཉིད་མ་བདེ་བའི་སྣང་བ་ལྟ་བུ་རྒྱུན་མི་ཆད་འདུག་པ་འདི་ལ་འཁྲུལ་བ་རྒྱ་འབྱམས་ཞེས་ཟེར། དེ་ཡིས་འགལ་རྐྱེན་སྡུག་བསྔལ་ཐམས་ཅད་ཀྱི་རྩ་བ་མཐར་ཐུག་ན་མ་རིག་པ་ལ་ཐུག་པ་དེ་ཉིད་ངོས་བཟུང་སྟེ་དེ་ཐུན་མོང་ལྟར་དུ་བཤད་པ་ཡིན། ཐུན་མིན་ལྟར་དུ་བཤད་ཁུལ་བྱས་ན། གཞི་དངོས་པོའི་གཤིས་ཀྱི་གནས་ལུགས་འཁྲུལ་དང་མ་འཁྲུལ་གྱི་མིང་དང་དོན་ལས་འདས་སོང་བ་དེ་ཉིད་ལ་ངོ་བོ་རང་བཞིན་ཐུགས་རྗེའི་ཡེ་ཤེས་གསུམ་ལྡན་དུ་འགྱུར་བ་མེད་པར་བཞུགས་པ་ཡིན་ཡང་གཞི་ལས་གཞི་སྣང་དུ་ཤར་བའི་གནས་སྐབས་སུ་རང་ངོ་རང་གིས་མ་ཤེས་ནས་རྒྱུ་བདག་ཉིད་གཅིག་པའི་མ་རིག་པ། ལྷན་གཅིག་སྐྱེས་པའི་མ་རིག་པ། ཀུན་ཏུ་བཏགས་པའི་མ་རིག་པ་གསུམ་ངོ་བོ་གཅིག་ལ་ལྡོག་པ་ཐ་དད་ཡོད་པའི་དབང་གིས་མ་རིག་གསུམ་དང་རྐྱེན་བཞིས་དམིགས་པ་མ་དག་པའི་ཆ་དེ་ལས་འཁྲུལ་སྣང་གཟུང་འཛིན་ཅན་དུ་ཤར་དུས་ཡིད་དྲུག་གི་འཛིན་པ་མ་འགགས། ཉོན་མོངས་དྲུག་བག་ཉལ་གྱིས་ཤར་ཏེ། ཡུལ་དྲུག་གི་སྣང་བ་དེ་ལ་ཡིད་དྲུག་གིས་གཟུང་འཛིན་རྒྱང་ཆད་ཞེན་པའི་དབང་གིས་ཡུལ་དྲུག་གི་སྣང་བ་ལ་འཁྲུལ་སོང་བ་ཡིན། མདོ་སྔགས་ཐུན་མོང་དང་ཐུན་མིན་གང་ནས་བཤད་ཀྱང་གཞི་མེད་སྟོང་བའི་དབྱིངས་ལས་འཁྲུལ་འཛིན་གློ་བུར་གྱི་སེམས་འདི་བྱུང་ནས་གཟུང་འཛིན་དུ་ཞེན་པས་འཁྲུལ་བ་ཡིན་ལ། ༼༢ དེ་ཉིད་སེལ་བའི་ཐབས་བསྟན་པ། འཁྲུལ་བའི་དབང་གིས་བསླུས་ཤིང་མགོ་འཁོར་སོང་བ་དེ་ཉིད་ངོས་ཟིན་པའི་རྗེས་ཐོག་ཏུ་སྤྱིའི་ས་བཅད་གཉིས་པ་དེ་ཉིད་སེལ་བའི་ཐབས་བསྟན་པ་དེ་བཞག་པ་ཡིན། འདི་ཕྱི་ནང་གཉིས་ཀྱིས་བཤད་ན། ཕྱི་ལྟར་ན་བསླུ་བ་དེ་ལས་ལྡོག་པའི་བསླུ་བ་མེད་པའམ་འཁྲུལ་བ་མེད་པ་གང་ཞིག་སླུ་བར་བྱེད་པའི་འགལ་རྐྱེན་དེ་ཉིད་མེད་ཅེས་པའི་དགག་སྒྲས་བཅད་པའམ་བཀག་པའི་ཤུལ་ལ་རྣམ་གཅོད་ཀྱིས་བསླུ་བ་བསལ་བ་དང་ཆབས་ཅིག་ཏུ་ཡོངས་གཅོད་ལ་བསླུ་མེད་གྲུབ་པར་བསྟན་པ་ཡིན། བསླུ་བ་སེམས་ཀྱི་རང་བཞིན་ཆོས་ཅན་རྣམ་ཤེས་ཚོགས་བརྒྱད་ཡིན་པ་དང་། མི་བསླུ་བ་ཆོས་ཉིད་དམ་དེའི་ངོ་བོའམ་ཡེ་ཤེས་གཉིས་ཀ་ཐ་སྙད་དུ་གཅིག་མ་ཡིན། ཕྱི་ལྟར་ན་ཀུན་རྫོབ་འཁྲུལ་དང་མ་འཁྲུལ་གཉིས་ཀ་ཐ་དད་ཡིན་ཡང་ནང་ལྟར་ན་དོན་དམ་པ་འཁྲུལ་བ་མིང་ཙམ་ཡོད་མེད་ཀྱི་མཐའ་ལས་འདས་པས་ན་ཐ་དད་ཀྱང་མ་ཡིན་པས་ན་གཅིག་ཐ་དད་གང་དུ་ཡང་ཁས་བླང་བར་བྱ་བ་མ་ཡིན། ༼༢༽ མཐུན་རྐྱེན་སྒྲུབ་པ། དེ་ལྟ་བུའི་ཆོས་ཉིད་འདུས་མ་བྱས་པ་གློ་བུར་སྒྲིབ་བྱེད་ཀྱི་དྲི་མ་ཐམས་ཅད་ལམ་གྱིས་བསལ་སྟོབས་ཀྱིས་ཡེ་ནས་སྐུ་དང་ཡེ་ཤེས་རྒྱ་མཚོའི་ངོ་བོར་བཞུགས་པ་དེ་ཉིད་མངོན་དུ་གྱུར་པའི་ཚེ་ན་ཆོས་ཀྱི་སྐུ་དང་གཟུགས་ཀྱི་སྐུ་དམ་པ་གཉིས་ཀ་བརྙེས་པ་དེ་ཉིད་ལ་སངས་རྒྱས་བཅོམ་ལྡན་འདས་ཞེས་ཞུ་བ་ཡིན། དབྱིངས་ནང་གསལ་སྣང་བའི་ཆོས་སྐུ་དང་། ཕྱི་གསལ་རང་སྣང་གི་ལོངས་སྐུ། དེ་ལས་གདུལ་བྱ་གཞན་ལ་སྣང་བའི་གཟུགས་སྐུ་རྣམ་པ་གཉིས་འབྱུང་བ་རྒྱུན་མི་ཆད་པའི་ཚུལ་ཅན་ཡིན་པར་གཏན་ལ་ཕབ་ཅིང་། ༼༣༽ སྐུ་དང་ཞིང་ཁམས་ཇི་ལྟར་ཡིད་ལ་བྱེད་པ། ༡༽ ཚུལ་ཇི་ལྟར་ཡིད་ལ་བྱེད་པ། འདི་ནས་གང་བཤད་བྱ་རྟེན་སྐུ་དང་ཞིང་ཁམས་ཡིད་ལ་བྱེད་པའི་འགལ་རྐྱེན་སེལ་བ་དང་། མཐུན་རྐྱེན་སྒྲུབ་པའི་ཚུལ་གཉིས་ཀ་བསྟན་ནས། རྟེན་སྐུ་དང་ཞིང་ཁམས་ཡིད་ལ་བྱེད་པ་ལ་ཚུལ་ཇི་ལྟར་ཡིད་ལ་བྱེད་པ་དང་། ཅི་ཞིག་ཡིད་ལ་བྱེད་པ་གཉིས་ཀ་བཤད་དགོས་ཤིང་། དེ་ནི་བསླུ་མེད་ཅེས་པའི་ཚིག་གཉིས་པོ་ཡར་ཕུད་ཤུལ་དུ། བདེ་ལྡན་ཞིང་མགོན་འོད་དཔག་མེད། །རྩེ་གཅིག་དད་པའི་ཤུགས་ཀྱིས་ཁྱེད་བསྒོམ་ན། །ཞེས་པ་འདིས་བསྟན་པ་ཡིན། སྡུག་བསྔལ་གྱི་མིང་ཙམ་ཡང་མི་གྲག་པའི་ཟག་མེད་ནང་གི་བདེ་བ་ཁྱད་པར་ཅན་དང་ལྡན་པའི་སངས་རྒྱས་ཀྱི་ཞིང་དེའི་མགོན་དང་གཙོ་བོར་གྱུར་པ་སངས་རྒྱས་འོད་དཔག་མེད་ཅེས་སྨོས་པ་ཡིན་ལ། སྤྱིར་ན་ཕྱོགས་དུས་མཐའ་ཡས་མུ་མེད་པའི་སངས་རྒྱས་ཀྱི་ཞིང་ཁམས་དང་། ཁྱད་པར་དུ་རྒྱལ་བ་རིགས་ལྔའི་ཞིང་དང་སྣང་བ་ལ་ཟག་མེད་ཡེ་ཤེས་ཀྱི་རོལ་བས་མ་ཁྱབ་པ་མེད་པ་ཟུག་རྔུ་ཆ་ཕྲ་མོ་ཙམ་ཡང་མི་སྲིད་ན་མགོན་པོ་འོད་དཔག་མེད་པའི་ཞིང་ཁམས་འདི་ལ་དམིགས་བསལ་གྱིས་བདེ་བ་ཅན་ཞེས་པའི་སྒྲ་སྦྱར་དགོས་པའི་རྒྱུ་མཚན་གང་ཡིན་ཞེ་ན། འདི་དང་པོ་ཐུགས་བསྐྱེད་ཁྱད་པར་ཅན་གྱིས་སྨོན་ལམ་ཇི་ལྟར་བཏབ་ཚུལ། བར་དུ་སྦྱོར་བ་ཁྱད་པར་ཅན་གྱིས་ཚོགས་གཉིས་ཇི་ལྟར་བསགས་པ། མཐར་ཞིང་ཁམས་ཁྱད་འཕགས་ཇི་ལྟར་གྲུབ་ཚུལ་དང་གསུམ་གྱིས་བཤད་པ་ལས། ༡ ཐུགས་བསྐྱེད་ཁྱད་པར་ཅན་གྱིས་སྨོན་ལམ་ཇི་ལྟར་བཏབ་ཚུལ། དང་པོ་ཐུགས་བསྐྱེད་ཁྱད་འཕགས་ཅན་གྱིས་སྨོན་ལམ་བཏབ་ཚུལ་དེ་ཡིན་ལ། འདི་འོད་མདོའི་རྗེས་སུ་འབྲངས་ཏེ་བཤད་ན། བསྐལ་བ་དཔག་མེད་ཀྱི་སྔ་རོལ་དུ་སངས་རྒྱས་འཇིག་རྟེན་དབང་ཕྱུག་རྒྱལ་པོ་འཇིག་རྟེན་དུ་བྱོན་པའི་སྐབས་སུ་དགེ་སློང་ཆོས་ཀྱི་འབྱུང་གནས་དེ་ཉིད་ཀྱིས་སངས་རྒྱས་དེའི་ཞབས་འབྲིང་པར་མཛད་ནས་གཟུངས་སྤོབས་བློ་གྲོས་མཆོག་ལྡན་ཤེས་རབ་དང་བརྩོན་འགྲུས་མོས་པ་ལ་སོགས་པ་ལ་མངའ་བརྙེས་པ་དེ་ལྟ་བུ་ཞིག་གིས་སངས་རྒྱས་དེའི་མདུན་ནས་སྙིང་རྗེའི་རྩ་བ་ཅན་གྱི་བྱང་ཆུབ་མཆོག་ཏུ་སེམས་བསྐྱེད། ཐུགས་བསྐྱེད་པ་ཙམ་གྱིས་མི་ཚད་པར་སངས་རྒྱས་གཞན་ལས་ཀྱང་ཁྱད་པར་འཕགས་པའི་སྨོན་ལམ་རྒྱ་ཆེན་པོ་བཏབ་པ་ཡིན། སྨོན་ལམ་དེ་ཡང་ཐོག་མ་ཉིད་ནས་སངས་རྒྱས་གཅིག་ལ་དད་ཅིང་འདུན་པས་ཁྱེད་སྐུ་ཅི་འདྲ་དེ་འདྲར་འགྱུར་བར་ཤོག་ཅེས་པ་ཙམ་མ་ཡིན་པར་ཞིང་དང་སངས་རྒྱས་ཀྱི་ཡོན་ཏན་མང་པོ་དང་པོར་གསན། དེ་ནས་བསམ། དེ་འཕྲོས་དེ་ལྟ་བུའི་ཞིང་ཁམས་གཟུང་རྒྱུའི་ཐུགས་བསྐྱེད་རྒྱ་ཆེན་པོས་སྐུལ་མ་བྱས་ནས་སྨོན་ལམ་བཏབ་པ་ཡིན་ཞིང་། ལོ་བྱེ་བ་གཅིག་ལ་གསན་པ་ཡིན། ཁྱིམ་པ་ཕོ་མོའི་ཁ་ལུགས་ལ་བྱེ་བ་ས་ཡ་ཟེར་ནས་བརྩི་རྒྱུ་དེ་གྲངས་ཀྱི་མིང་གོ་རིམ་ནོར་ཡོད་པ་ཡིན་པས་ས་ཡ་བྱེ་བ་ཞེས་ཟེར་དགོས། འབུམ་བཅུ་དེ་ས་ཡ་གཅིག་སྟེ་ང་ཚོའི་ཁ་སྐད་ལ་བྱེ་ཆུང་ཞེས་པ་དེ་ཡིན་ལ། དེ་བཅུ་དེ་བྱེ་བ་སྟེ་དེ་བྱེ་ཆེན་ཞེས་ཟེར་འདུག་རྒྱུ་དེ་ཡིན་ཞིང་། བྱེ་བ་བཅུ་དེ་དུང་ཕྱུར་ཡིན། དགེ་སློང་ཆོས་ཀྱི་འབྱུང་གནས་ཀྱིས་ལོ་བྱེ་བ་གཅིག་གི་ཚེ་ལ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་ཁམས་རྟེན་དང་བརྟེན་པར་བཅས་པ་ཐམས་ཅད་ཀྱི་རྒྱན་དང་བཀོད་པ་ཡོན་ཏན་ཕུན་སུམ་ཚོགས་པ་ཐམས་ཅད་དང་། དེ་ཉིད་གཞི་ཅི་ལས་དེ་ལྟར་བྱུང་བ་ཡིན་པ་དེ་ཐམས་ཅད་གསན་པ་ཡིན་ལ། དེའི་མཚམས་ནས་བསྐལ་བ་ཆེན་པོ་ལྔའི་དུས་ཚོད་ཀྱི་རིང་ལ་སྔར་ལོ་བྱེ་བ་གཅིག་ལ་གསན་པའི་ཞིང་ཁམས་མང་པོ་དེ་ལྟ་བུའི་རྟེན་དང་བརྟེན་པའིི་ཡོན་ཏན་ཐམས་ཅད་གཅིག་ཏུ་བསྡོམས་པའི་ཡོན་ཏན་ལས་ཀྱང་ད་དུང་ཁྱད་པར་དུ་འཕགས་པ་ཞིག་རང་ཉིད་ཀྱིས་བསམ་ཞིང་། རྩེ་གཅིག་ཏུ་དེའི་ཞིང་གི་ཁྱད་འཕགས་ཀྱི་རྒྱ་ཁྱོན་དང་། རང་བཞིན་དང་། ལོངས་སྤྱོད་ཀྱི་བྱེ་བྲག་ཟད་མི་ཤེས་པ་ལ་འདུན་པ་སྟོབས་སུ་གྱུར་པ་སྔོན་དུ་བཏང་བའི་རྗེས་ཐོག་དེར་ད་གཟོད་བདེ་བར་གཤེགས་པའི་སྤྱན་སྔ་ནས་ཞིང་ཁམས་དེ་ལྟ་བུ་ཞིག་གཟུང་རྒྱུའི་སྨོན་ལམ་བཏབ་ནས་དམ་བཅའ་མཛད་པ་ཡིན་ཞིང་། དེ་འོད་མདོའི་རྗེས་སུ་འབྲངས་ན་དེ་ལྟ་བུ་ཞིག་ཡིན། སྙིང་རྗེ་པད་དཀར་གྱི་རྗེས་སུ་འབྲངས་ནས་བཤད་ན། བསྐལ་བ་གྲངས་མེད་མང་པོའི་སྔ་རོལ་ཞིག་ལ་གླིང་བཞི་ལ་དབང་བསྒྱུར་བའི་འཁོར་ལོས་སྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་པ་ཞིག་ཡོད་པ་ལ། དེ་ལ་བློན་པོ་བྲམ་ཟེ་རྒྱ་མཚོའི་རྡུལ་ཞེས་བྱ་བ་ཞིག་ཡོད་པ་དེ་ཉིད་ཀྱི་བུ་རྒྱ་མཚོའི་སྙིང་པོ་ཞེས་པ་ཡ་མཚན་ཅན་ཞིག་ཡོད་པ་དེ་ཉིད་རབ་ཏུ་བྱུང་ནས་སངས་རྒྱས་ཏེ། སངས་རྒྱས་རིན་ཆེན་སྙིང་པོར་གྱུར་སོང་བ་དེའི་མདུན་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་ཞིང་ཁམས་བཟུང་བའི་སྨོན་ལམ་རྒྱ་ཆེན་བཏབ་པའི་ལོ་རྒྱུས་ཡོད་པ་ཡིན། ཇི་ལྟར་ཡོད་པ་ཡིན་ཟེར་ན། རྒྱལ་པོ་རྩིབས་ཀྱི་མུ་ཁྱུད་ཀྱིས་ལོ་བདུན་ལ་གཡེང་བ་ཐམས་ཅད་སྤངས་ནས་ནང་དུ་ཡང་དག་འཇོག་ལ་གནས་ཡོད་པའི་དུས་དེར་དེ་བཞིན་གཤེགས་པ་རིན་ཆེན་སྙིང་པོས་བྱིན་རླབས་མཛད་པའི་མཐུ་ཡིས་ཕྱོགས་བཅུའི་ཕྱོགས་རེ་རེ་ལ་ཡང་སངས་རྒྱས་ཀྱི་ཞིང་འཇིག་རྟེན་གྱི་ཁམས་སྟོང་ཕྲག་གི་རྡུལ་གྲངས་ཇི་སྙེད་པའི་གྲངས་ཀྱི་ཡོན་ཏན་དང་བཀོད་པའི་རྒྱན་ཐམས་ཅད་དེས་མཐོང་བར་གྱུར། དེ་དག་ཐམས་ཅད་ལ་ལྟ་དང་རྟོག་བཞིན་དུ་རང་ཉིད་གང་དུ་འཚང་རྒྱ་བའི་ཞིང་དེ་དེ་དག་ཐམས་ཅད་བསྡོམས་པ་ལས་ཀྱང་ལྷག་པའི་ཡོན་ཏན་དང་རྒྱན་བཀོད་ཕུན་སུམ་ཚོགས་པར་འགྱུར་བའི་སྨོན་ལམ་གྱི་ཚུལ་དུ་མཁས་པར་མཛད། དེ་ནས་དེ་བཞིན་གཤེགས་པའི་སྤྱན་སྔར་ཐུགས་བསྐྱེད་རྨད་དུ་བྱུང་བ་དང་བཅས་པས་ཞིང་ཁམས་གཟུང་བར་སྨོན་ལམ་དང་དམ་བཅའ་མཛད་པ་ལ། དེ་བཞིན་གཤེགས་པས་ཁྱོད་དེའི་ཚེ་དེའི་སྐབས་སུ་དེ་བཞིན་གཤེགས་པ་ཚེ་དཔག་མེད་ཅེས་བྱ་བར་འགྱུར་བ་ཡིན་ཞེས་གསུངས་ཏེ་ལུང་བསྟན་པར་མཛད་པ་ཡིན། དེ་སྙིང་རྗེས་པད་དཀར་གྱི་ཞིང་བཟུང་བའི་སྐུ་ཚེའི་ཐོག་མ་དེ་ཡིན་པར་གསུངས་ཡོད། གང་ལྟར་བྱས་ཀྱང་འགལ་བ་མེད་པ་ཞིག་སྟེ། འདི་སོ་སོ་སྐྱེ་བོའི་ཡིད་ངོར་ཤོང་རྒྱུའི་འཇིག་རྟེན་མི་ཡི་ཚིག་གི་སྒྲ་བརྡ་ཐ་སྙད་ཅིག་དང་བསྟུན་ནས་ཕྱི་ལྟར་དུ་དཔེ་མཚོན་ཙམ་དང་ཕྱོགས་ཙམ་ཞིག་གསུངས་པ་མ་གཏོགས་པར་སངས་རྒྱས་ཀྱིས་སྐད་ཅིག་གི་མཛད་པ་ཙམ་ཞིག་བྱིས་པ་སོ་སོ་སྐྱེ་བོའི་བློས་བསྐལ་བར་གཞལ་ཡང་ཆ་ཙམ་མཚོན་ནུས་པ་མ་ཡིན་ལ། ནང་དང་གསང་བའི་བསམ་གྱིས་མི་ཁྱབ་པའི་མཛད་པ་དང་སྒྱུ་འཕྲུལ་དེ་བས་ཀྱང་ཕར་ཚད་ཡིན་ཞིང་། དེ་དང་པོ་ཐུགས་བསྐྱེད་ཁྱད་པར་ཅན་གྱིས་སྨོན་ལམ་ཇི་ལྟར་བཏབ་ཚུལ་ཡིན། ༢ བར་དུ་སྦྱོར་བ་ཁྱད་པར་ཅན་གྱིས་ཚོགས་གཉིས་ཇི་ལྟར་བསགས་ཚུལ། བར་དུ་སྦྱོར་བ་ཁྱད་པར་ཅན་གྱིས་ཚོགས་ཇི་ལྟར་བསགས་པ་དེ་ཉིད་ནི་སྨོན་ལམ་དང་དམ་བཅའ་ཙམ་ཞིག་གིས་ཆོག་པར་མ་མཛད་ནས་དེའི་དོན་དེ་བསྒྲུབས་ཤིང་འགྲུབ་པར་བྱ་བའི་ཆེད་དུ་དུས་ཀྱི་ཁྱད་པར་བསྐལ་བ་གྲངས་མེད་མཐའ་ཡས་པ་ཞིག་ལ། སློབ་ཚུལ་གྱི་ཁྱད་པར་དེ་དྲན་དང་ཤེས་བཞིན་བག་ཡོད་ལ་མངའ་བརྙེས་པའི་སྟེང་ནས་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལྟ་བུ་ཐབས་ལ་མཁས་པའི་རྣམ་གྲངས་བསམ་གྱིས་མི་ཁྱབ་པའི་སྒོ་ནས་བསླབས་ཤིང་། དེ་ཐམས་ཅད་ཀུན་ཏུ་བཟང་པོའི་སྨོན་ལམ་གྱིས་བསྔོ་ཞིང་སྤེལ་བར་མཛད་དེ་རྫོགས་སྨིན་སྦྱངས་པ་མཐར་ཕྱིན་པར་མཛད་པ་ཡིན། ༣ མཐར་ཞིང་ཁམས་ཁྱད་འཕགས་ཇི་ལྟར་གྲུབ་ཚུལ། གསུམ་པ་མཐར་ཞིང་ཁམས་ཁྱད་འཕགས་ཇི་ལྟར་གྲུབ་ཚུལ་གྱི་ཐད་ནས་བཤད་དགོས་ཤིང་། རྒྱུ་དགེ་ཚོགས་བཟང་བ། མང་བ། ཉེས་སྤྱོད་དང་མ་འདྲེས་པ། ཕུན་སུམ་ཚོགས་པ་དེ་རྣམས་ཀྱི་དབང་གིས་ཞིང་ཁམས་ཀྱི་ཡོན་ཏན་ཡང་དེ་བཞིན་དུ་བཟང་བ། མང་བ། རྒྱ་ཆེ་བ། སྣ་ཚོགས་བློ་ཡུལ་ལས་འདས་པའི་ཕུན་སུམ་ཚོགས་པ། སངས་རྒྱས་ཀྱི་མཚན་དཔེའི་འོད་དང་། སྐུ་ཚེ། དབྱིངས་དང་ཡེ་ཤེས། མཛད་པ་འཕྲིན་ལས། མཚན་གྱི་སྒྲ་ཙམ་གྱིས་ཀྱང་གདུལ་བྱའི་རེ་འདོད་སྐོང་བ་ལ་ཡིད་བཞིན་གྱི་ནོར་བུ་བསམ་འཕེལ་དབང་གི་རྒྱལ་པོ་ལྟ་བུར་གྱུར་པ་ལ་སོགས་པ། འདི་ཐམས་ཅད་གང་ལས་བྱུང་བ་ཡིན་ཞེ་ན། རྒྱུ་བསམ་སྦྱོར་ཁྱད་འཕགས་ཀྱིས་བསྒྲུབས་པར་བྱས་ནས་ཇི་ལྟར་གྲུབ་པའི་ཚུལ་དེ་ཡིན། ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་མུ་མེད་པ་ན་སངས་རྒྱས་དེའི་སྐུའི་འོད་ཟེར་གྱིས་སྣང་བར་མཛད་པ་ཡིན་པས་ན་འོད་དཔག་མེད་ཅེས་ཞུ་བ་དང་། ཡེ་ཤེས་ཀྱི་སྣང་བ་དཔག་ཏུ་མེད་པས་ན་སྣང་བ་མཐའ་ཡས་ཞེས་ཞུ་བ་དང་། སྐུ་ཚེ་གྲངས་དང་ཚད་ལས་འདས་པས་ན་ཚེ་དཔག་མེད། ད་རུང་སྐུ་གཅིག་མཚན་གྱི་རྣམ་གྲངས་མང་པོས་སྐུའི་ངོ་བོའི་ཡོན་ཏན་མཚོན་གྱིན་ཡོད། སྐུའི་རྣམ་པའི་ཐོག་ནས་བཤད་ན། རྡུལ་བྲལ་ཤིན་ཏུ་རྣམ་པར་དག་པ་ཞེས་གསུངས་སྐབས་སྐྱེས་བུ་ཆེན་པོའི་མཚན་དང་དཔེ་བྱད་ཀྱིས་བརྒྱན་པ། ཆོས་སྐུ་སྤྲོས་པ་དང་བྲལ་བ་སྟོང་གསལ་ཐིག་ལེ་ཉག་གཅིག་གི་མཚོན་བྱེད་ལ་ཞལ་གཅིག་ཅན། ཐབས་དང་ཤེས་རབ་མཚོན་པའི་ཕྱག་གཉིས། དེ་ཡང་ཐབས་ཤེས་དབྱེར་མེད་ཀྱི་མཉམ་བཞག་ཅན། འཁོར་འདས་མཉམ་པ་ཆེན་པོའི་མཚོན་བྱེད་དུ་ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་པ། སྤྲུལ་སྐུ་ཚངས་པར་སྤྱོད་པའི་ཆས་ཅན། ཆོས་གོས་རྣམ་གསུམ་སྐུ་ལ་གསོལ་ནས་ཕྱག་ན་བདུད་རྩིས་གང་བའི་ལྷུང་བཟེད་བསྣམས་པ་ལ་སོགས་པ། གདན་དང་ཁྲི། འཁོར་དང་གཞལ་ཡས་ཁང་། བྱང་ཆུབ་ཀྱི་ཤིང་ལ་སོགས་པ་མངོན་རྟོགས་རྒྱས་པ་དག་སྦྱོར་དང་བཅས་པ་གཞན་དུ་གསལ་བ་ལྟར་དུ་ཡིན། སྐུའི་ཡོན་ཏན་ལྟར་དུ་གསུང་དང་ཐུགས་དང་ཡོན་ཏན་འཕྲིན་ལས་ཀྱི་མི་ཟད་རྒྱན་གྱི་འཁོར་ལོའི་ཡོན་ཏན་ཞིང་ཁམས་ཀྱི་བཀོད་པའི་ཡོན་ཏན་གཞན་ལས་ཁྱད་དུ་འཕགས་པའི་རིགས་པ་དེས་ཞིང་གི་གཙོ་བོའི་སྟོན་པའི་ཡོན་ཏན་དང་སྐུ་ཚེ་མཛད་པ་སོགས་དཔོག་ནུས་པ་ཡིན། ༢༽ ཅི་ཞིག་ཡིད་ལ་བྱེད་པ། དེ་ཡན་ཆད་ཀྱིས་ཚུལ་ཇི་ལྟར་ཡིད་ལ་བྱེད་པ་དེ་ཉིད་བསྟན་ནས་གཉིས་པ་ཅི་ཞིག་ཡིད་ལ་བྱེད་ཅེ་ན། རྩེ་གཅིག་དད་པའི་ཤུགས་ཀྱིས་ཁྱེད་བསྒོམ་ན་སོགས་ཚིག་རྐང་རྗེས་མ་གསུམ་གྱིས་བསྟན་ཡོད། དད་པ་ཞེས་པ་འདི་ལ་དང་བའི་དད་པ། འདོད་པའི་དད་པ། ཡིད་ཆེས་ཀྱི་དད་པ་གསུམ་གྱི་དབྱེ་བ་ཡོད་ལ། དེ་གསུམ་དང་ཕྱིར་མི་ལྡོག་པའི་དད་པ་བརྟན་པོ་དང་བཅས་པས་རྩེ་གཅིག་གཞན་དུ་གཡོ་བ་མེད་པར་དད་དང་མོས་པའི་འདུན་པ་ཤུགས་དྲག་པོ་དེ་མདུང་ཐུང་བྲང་ཁར་གཏད་ཀྱང་ཕྱིིར་ནུད་མེད་པ་ཞིག་གིས་བཅོམ་ལྡན་འདས་རྒྱལ་བ་མགོན་པོ་འོད་དཔག་མེད་ཁྱེད་ཉིད་བསྒོམ་ན་ཞེས་པའི་དོན་ཡིན། བསྒོམ་ཞེས་པའི་ཚིག་འདིས་མཚན་བཅས་བསྐྱེད་རིམ་དང་འབྲེལ་བའི་སྐུའི་གསལ་སྣང་། མཚན་མེད་རྫོགས་རིམ་དང་འབྲེལ་བའི་ཐུགས་ཀྱི་ཡེ་ཤེས། བསྐྱེད་རྫོགས་གཉིས་མེད་དང་འབྲེལ་བའི་ཞི་ལྷག་ཟུང་འཇུག་གི་སྐུ་གསུང་ཐུགས་གསུམ་རྡོ་རྗེ་གསུམ་གྱི་ངོ་བོར་བསྒོམ་ཞིང་གོམས་པར་གྱུར་པ་དེ་ཉིད་བསྟན་ཡོད། དང་བའི་ཡིད་ངོར་ཞེས་པའི་ཚིག་འདིས་གང་ལ་འཆར་བའི་ཡུལ་ལམ་གཞི་བསྟན་ནས། གང་ཞིག་འཆར་བ་དེ་སྣང་སྟོང་སྒྱུ་མའི་སྤྲིན་དུ་ཤར་བ་སྐུ་དང་ཞིང་ཁམས། རྟག་ཏུ་འཆར་བར་ཤོག་ཅེས་སྨོན་པའི་ཚིག་གིས་རྟེན་ཞིང་ཁམས་ཡིད་ལ་བྱེད་པའི་དོན་བསྡུས་པ་ཡིན། དང་བའི་ཡིད་ཅེས་པ་ནི་མ་དད་པ་དང་། ལོག་པར་རྟོག་པ་དང་། ཐེ་ཚོམ་ཡིད་གཉིས་ལ་སོགས་པ་དད་པའི་ཕྱིན་ཅི་ལོག་ཏུ་གྱུར་པའི་སྐྱོན་དང་། ཉོན་མོངས་པའི་གཞན་དབང་དུ་གྱུར་པའི་ཚུལ་མིན་ཡིད་བྱེད་ཀྱི་ཀུན་རྟོག་སོགས་ཀྱི་ར་རིའི་དྲི་མས་མ་བསླད་མ་སྦགས་པའི་དྭངས་བའི་སེམས་སམ་སྟོང་གསལ་རྙོག་པ་དང་བྲལ་བའི་ཞི་གནས་ཀྱི་མཁའ་དེ་ལ་ལྷག་མཐོང་གསལ་བའི་ཡེ་ཤེས་ཀྱི་ཉི་ཟླ་ལྷག་པར་གསལ་བའི་ཡིད་དམ་སྒྲིབ་བྲལ་སེམས་ཀྱི་ཆོས་ཉིད་ལ་གོ་དགོས། ད་རེས་ཀྱི་ཡིད་འདི་སྒྲིབ་བྲལ་སེམས་ཀྱི་ཆོས་ཉིད་རིག་སྟོང་རྡོ་རྗེ་མི་ཕྱེད་པ་དང་གཉིས་སུ་མེད་པའི་ངོ་བོ་ལ་ལྷུན་གྲུབ་སྣ་ཚོགས་སྣང་བའི་རོལ་རྩལ་འགགས་པ་མེད་པ་ཡེ་སྟོང་གདོད་ནས་དག་པའི་རྟེན་འབྲེལ་གྱི་སྣང་ཆར་ཤར་བ་དེ་ཉིད་སྣང་བཞིན་དུ་སྟོང་ལ་སྟོང་བཞིན་དུ་སྣང་བའི་མེད་སྣང་སྒྱུ་མའི་སྤྲིན་ཆེན་ཏེ། སྤྲིན་ཞེས་པ་ནི་སྣ་ཚོགས་འདོད་དགུར་བསྒྱུར་བའི་ངོ་མཚར་གྱི་བཀོད་པ་ཕུན་སུམ་ཚོགས་པ་མ་ཚང་མ་ཚོགས་པ་མེད་པ་ངང་གིས་འདུ་ཞིང་འཛོམས་པ་ཞིག་ལ་གོ་དགོས། དེ་ལྟ་བུ་ངོ་མཚར་ཕུན་སུམ་ཚོགས་པ་དེ་གང་ཡིན་ན། བདེ་བ་ཅན་གྱི་མགོན་པོ་འོད་དཔག་མེད་འཁོར་དང་བཅས་པའི་སྐུ་དང་ཞིང་ཁམས་ཡིན་པར་བསྟན་ལ། སྐུའི་ངོ་བོ་དང་རྣམ་པ་གོང་ནས་ཀྱང་མདོ་ཙམ་བཤད་ཟིན་ཅིང་། འཁོར་རྒྱལ་སྲས་ཀྱི་ཐུ་བོ་འཕགས་མཆོག་སྤྱན་རས་གཟིགས་མཐུ་ཆེན་ཐོབ་རྣམ་གཉིས་ཀྱི་གཙོར་བྱས་པའི་ཉན་རང་བྱང་སེམས་ལྷ་མིའི་རྣམ་པ་ཅན་ལ་སོགས་པ་དཔག་པར་བྱ་དགོས། ༡༽ ས་གཞིར་འབྱུང་བའི་རྒྱན། འདི་ནས་ཞིང་གི་ཕུན་ཚོགས་བཤད་ཀྱིན་ཡོད་ལ། དེ་ལས་སྣོད་ཀྱི་ཡོན་ཏན་གཙོ་བོ་བཤད་པ་ན་བདེ་བ་ཅན་གྱི་ཞིང་ཁམས་དེ་ས་གཞི་དང་། ནམ་མཁའི་གནས་གཉིས། དེ་མཛེས་བྱེད་ཀྱི་རྒྱན་དང་བཅས་ཡོད། དང་པོ་ས་གཞིའི་རྒྱན་ལྟ་བུ་ཞིག་ལ་བསམ་བློ་བཏང་ན། ཞིང་ཁམས་དེའི་ས་གཞིའི་ཐ་གྲུ་ནི་ཕྱོགས་ཐམས་ཅད་ཡངས་ཤིང་རྒྱ་ཆེ་བ་ཡིན་ཞིང་། ཐ་གྲུ་རྒྱ་ཆེ་བ་ནི་ཕྱོགས་ཐམས་ཅད་ཡངས་ཤིང་རྒྱ་ཆེ་བ་ཁོད་མི་སྙོམས་པའི་འབར་རེ་འབུར་རེ་མེད་པ་དང་། ལ་ལུང་དང་། གཅོང་རོང་དོག་མོ་དང་། གད་པ་ས་ཤུར། བྱེ་རི་བྱེ་ཐང་གི་མྱ་ངམ་གྱི་ས་ཆ་དེ་ལྟ་བུ་མ་ཡིན་པར་ལག་མཐིལ་ལྟར་མཉམ་པར་གསུངས་ཡོད། དཔེ་ཞེས་པ་དེ་ཕྱོགས་རེ་རེ་ཙམ་ནས་མཚོན་བྱེད་ཡིན་པ་སྟེ། ཀུན་མཁྱེན་འཇིགས་གླིང་གིས་འཇམ་པའི་དཔེ། གཞོན་ཤ་ཤིན་ཏུ་ཆག་པའི་ལག་མཐིལ་དང་། །མཉམ་པའི་དཔེ་བྱར་འོས་པའི་འགལ་ཟླ་ནི། །ཆུ་ཞེང་སྲིད་དུ་མི་མངོན་ཐ་གྲུའི་ཁྱོན། །རིན་ཆེན་སྣ་ཚོགས་གཅལ་དུ་བཀྲམ་པར་བྱས། །ཞེས་གསུངས་པ་ལྟ་བུ་ཡིན། རི་ནག་པོ་ཡིད་དུ་མི་འོང་བ་ངམ་གྲོག་འཇིགས་པ་ཅན་ལ་སོགས་པ་མེད་པས་ན་ཡངས་ཤིང་ཁོད་སྙོམས་གསུངས་པ་ལས་དེ་ཡང་རིན་པོ་ཆེ་དང་སྤོས་ཀྱི་དྲི་མཆོག་གིས་ཁྱབ་པའི་རི་བོ་ཡིད་དུ་འོང་བ་མེད་གསུངས་པ་མ་ཡིན། རྗེ་རིན་པོ་ཆེས། རིན་ཆེན་ལས་གྲུབ་རི་བོ་མ་གཏོགས་པ། །ནག་པའི་རི་རྣམས་ཀུན་གྱིས་དབེན་ཞིང་གཙང་། །ཞེས་གསུངས་པས། ཚེར་མ་དང་། རྡོ་ཧྲུག ན་འདམ་བཙོག་པ་ལ་སོགས་པ་ཡིད་དུ་མི་འོང་བ་དང་མཛེས་ཤིང་གཙང་མ་མ་ཡིན་པའི་ས་ཕྱོགས་གཅིག་ཀྱང་མེད། ས་གཞི་ཐམས་ཅད་རིན་ཆེན་སྣ་ཚོགས་ལས་གྲུབ་པ་ཡིན་ལ། རིན་པོ་ཆེ་ཞེས་བཤད་སྐབས་གསེར་དང་དངུལ་ལ་སོགས་པའི་ལྕགས་རིགས་དང་། སྤོས་ཤེལ་དང་མརྒད་ལ་སོགས་པ་འགྱུར་རྡོའི་རིགས་དང་། རང་བྱུང་གི་རིན་པོ་ཆེ་རང་རེ་འཇིག་རྟེན་མིའི་རྒྱན་ཆ་བྱེད་བཞིན་འདུག་རྒྱུ་འདི་ལྟ་བུ་ལ་གསུངས་པ་མ་ཡིན་པར་ལྷའི་རིན་པོ་ཆེ་ཡིན། དེ་ཡང་འཇིག་རྟེན་ལ་མི་སྤྱོད་པའི་རིན་པོ་ཆེར་གསུངས་པས་ལྷ་མིའི་འཇིག་རྟེན་གྱི་ཁམས་ནས་མི་སྤྱོད་པའམ་སྤྱོད་དབང་མེད་པའི་རིན་པོ་ཆེ་སྟེ་ཡེ་ཤེས་རིན་པོ་ཆེ་རང་སྣང་རྣམ་པར་དག་པའི་སྤྱོད་ཡུལ་དུ་གྱུར་པར་བསྟན་པ་ཡིན། འོ་ན་རིན་པོ་ཆེའི་ས་གཞི་གསེར་གྱི་དྲ་བས་ཁེབས་པ་གསུངས་འདུག་སྙམ་ན། ང་ཚོ་འཛམ་བུ་གླིང་གི་མིས་གསེར་ལ་རིན་ཐང་ཅན་དུ་རྩི་བའི་དབང་གིས་རིན་པོ་ཆེ་མཆོག་གི་མཚོན་བྱེད་ཀྱི་ཆེད་དུ་གསེར་ཞེས་གསུངས་པ་ཡིན་ཞིང་། མཚམས་རེ་དག་ཅིང་གཙང་བའི་ཆ་ནས་གསེར་གྱི་བརྡ་ཡིས་བསྙེགས་ས་མང་ལ། བདེ་བ་ཅན་གྱི་ཞིང་གི་ས་གཞི་ཐམས་ཅད་འཇམ་པོ་ཡིན་པས་མི་ཚད་ནེམ་ཞིང་འཕར་བ་སྟེ་མནན་ན་ནེམ་ཞིང་བཏེགས་ན་འཕར་བ་ཡིན་གསུངས་ཡོད། ས་གཞི་ཐམས་ཅད་མཁྲེགས་པོ་དང་སྲ་མོ་ཡུན་རིང་སོང་ན་རྐང་མཐིལ་ཡང་གཟེར་ཡོང་བ་དེ་ལྟ་བུ་མ་ཡིན་ཞིང་། ས་ཕྱོགས་གང་ལ་སོང་ན་ལྷའི་སྤོས་ཀྱི་དྲི་ངད་ལྡན་པ་ཤ་སྟག་གིས་ཁྱབ་པ། གསལ་ཞིང་འོད་ཟེར་སྣ་ཚོགས་ཀྱི་འཇའ་ཚོན་ཤར་བ་ལ་སོགས་པ་མིའི་སྒྲ་ཚིག་གིས་བརྗོད་པ་ལས་འདས་པའི་ཡོན་ཏན་དང་བཀོད་པས་ཁྱད་པར་ཕྱེས་ཡོད། དེས་ན་དགེ་སློང་ཆོས་ཀྱི་འབྱུང་གནས་ཀྱིས་ལོ་བྱེ་བ་གཅིག་ལ་དང་པོ་སངས་རྒྱས་ཀྱི་ཞིང་འཇིག་རྟེན་ཁམས་ཀྱི་རྡུལ་སྙེད་མང་པོའི་གྲངས་ཀའི་ཡོན་ཏན་གསན། བར་དུ་བསྐལ་ཆེན་མང་པོར་དེའི་དོན་བསམ། མཐར་རླབས་ཆེན་ཚོགས་གཉིས་ཀྱི་སྤྱོད་པ་རྒྱ་མཚོ་ནས་རྒྱ་མཚོ་ལྟ་བུ་མང་པོ་བསགས་ནས་ཞིང་ཁམས་ཀུན་ལས་ཁྱད་འཕགས་འདི་གྲུབ་ལ། འུ་ཚོས་ཚིག་ཁ་འགའ་ཞིག་གིས་བཤད་ཐབས་མེད་ཀྱང་གོ་བརྡ་ཅུང་ཟད་འཕྲོད་པའི་སྒོ་ལྟ་བུ་ཕྱོགས་ཙམ་ཞིག་སྟོན་བཞིན་ཡོད་པའི་གོ་བ་ལེན་དགོས། བདེ་བ་ཅན་གྱི་ཞིང་ལ་ལྷ་དང་མི་ཡི་གནས་རིས་རྣམ་པ་གཉིས་ཀྱི་སྟེང་ནས་ཆགས་དབྱིབས་མདོ་ཙམ་ཞིག་བསྟན་པ་ཡིན་ཕྱིར་འདི་ཡན་ཆད་ཀྱིས་ས་གཞིའི་གནས་འདི་མིའི་གནས་རིས་ཀྱི་ཚུལ་གཙོ་བོ་བྱས་ཏེ་བསྟན་པ་ཡིན། ནམ་མཁའི་གནས་གཙོ་བོ་ལྷའི་གནས་རིས་ལ་འཇོག་རྒྱུ་ཡིན། འདི་ལྟར་བྱས་ཏེ་བཤད་སྐབས་རི་རབ་གླིང་བཞི་གླིང་ཕྲན་དང་བཅས་པ་ཀུན་ནས་ཀུན་ཏུ་མི་མཇེད་འཇིག་རྟེན་གྱི་ཁམས་འདི་ལྟ་བུ་ཞིག་ལ་བསམ་བློ་གཏོང་རྒྱུ་མ་ཡིན། ༢༽ ནམ་མཁར་འབྱུང་བའི་རྒྱན། ནམ་མཁར་འབྱུང་བའི་རྒྱན་ལ་བསམ་བློ་བཏང་ན། ནམ་མཁའ་ལས་རླུང་གི་འབྱོར་བའི་ཐད་ནས་བདེ་བ་ཅན་གྱི་ཞིང་ཁམས་དེ་ནས་སྔ་དྲོའི་དུས་སུ་ཕྱོགས་བཞི་ནས་རླུང་འཇམ་པོ་དྲོ་གྲང་སྙོམས་པའི་རེག་བྱ་ཅན་ཞིག་ལངས་ཡོང་བའི་ཚེ་རིན་པོ་ཆེའི་སྤོས་ཤིང་ལྗོན་པ་དེ་ཚོའི་དྲི་ཞིམ་གྱིས་ཁྱབ་པར་བྱེད་པ་སྟེ། རླུང་གི་མིང་ལ་དྲིའི་བཞོན་པ་ཞེས་ཟེར་བ་ཡིན་ལ། ལྷའི་མེ་ཏོག་མཛེས་ཤིང་འཇམ་པ་མང་པོ་རླུང་གིས་བསྐུལ་ནས་ས་ལ་འཐོར་བ་དེ་ཉིད་ས་གཞི་དང་སྲང་ལམ་མི་འགྲེང་བདུན་ཙམ་རེ་ཁེབས་ཡོད་པ། ཡང་སྔ་དྲོའི་དུས་ཚོད་འདས་སོང་དུས་འདས་མ་ཐག་ལ་མེ་ཏོག་རྙིང་པ་ཐམས་ཅད་ཀྱང་མེད་པར་འགྱུར་བ་དང་། མཚམས་མཚམས་སུ་བདུད་རྩིའི་གྲུ་ཆར་ཡང་མེ་ཏོག་དང་སྤོས་ཆུ་འདྲེས་མ་ཤ་སྟག་འབབ་པ། ནམ་མཁའ་ནས་ལྷ་དང་ལྷ་མོ་མང་པོས་ལྷའི་གདུགས་དང་། རྔ་ཡབ་དང་། བ་དན་ལ་སོགས་པའི་མཆོད་རྫས་འཛིན་ཅིང་གཡོ་བ། དེ་བཞིན་དུ་ནམ་མཁའ་ནས་ལྷའི་རོལ་མོ་སྒྲ་དབྱངས་སྙན་པ་སྣ་ཚོགས་པ་སྒྲོག་པ། སྟེང་གི་བར་སྣང་ལ་ཁང་བཟང་དང་། ཀུན་དགའ་ར་བ། ལྷའི་སྐྱེད་མོས་ཚལ། ཆུ་ཀླུང་དང་རྫིང་བུ་ཉམས་དགའ་བ་ལ་སོགས་པ་འོག་མིན་གྱི་ནམ་མཁའི་ངོས་ཀྱི་བར་དུ་ཡོད་ཚུལ་དེ་ལྟར་གསུངས་ཡོད། ༣༽ ནམ་མཁའ་དང་ས་གཞིའི་མཛེས་བྱེད་ཀྱི་རྒྱན། དེ་ཡིས་ནམ་མཁའ་དང་ས་གཞིའི་གནས་གཉིས་ཡོད་པར་བསྟན་ནས་ནམ་མཁའ་དང་ས་གཞིའི་མཛེས་བྱེད་ཀྱི་རྒྱན་ལ་བསམ་བློ་བཏང་ན། རིའི་རྒྱན། ཤིང་གི་རྒྱན། ཆུའི་རྒྱན། པདྨའི་རྒྱན། ད་རུང་ཁང་བཟང་གི་རྒྱན། དེ་འཕྲོས་ཟས་དང་གོས་རྒྱན་གྱི་ཡོ་བྱད་ལ་སོགས་པ། དེ་ཚོའི་སྟེང་ནས་མང་པོ་གསུངས་ཡོད། རི་ཐམས་ཅད་རིན་པོ་ཆེའི་རིགས་སྣ་ཚོགས་ལས་གྲུབ་པ། ངོས་ཡངས་པ། རྩེ་མོ་རིགས་མི་འདྲ་བའི་མཛེས་པ་ཅན་ཡིན་གསུངས་ཡོད། རིན་པོ་ཆེའི་སྙེ་མ་ལོ་འདབ་མཛེས་པའི་རྒྱན་ཡོད་པ། རིན་པོ་ཆེའི་འབྱུང་ཁུངས་ཅན་གྱི་རི་བོ། ནོར་བུའི་བྲག་གི་ཕུག་པ་ཡིད་དུ་འོང་བ་དང་། རིན་པོ་ཆེའི་འཁྲི་ཤིང་གིས་རང་གྲུབ་གྱུར་སོང་བའི་ཁྱིམ་དང་ཁང་བཟང་འགའ་རེ་ཕྲེང་བ་ལྟར་དུ་བསྒྲིགས་པ་དང། འགའ་རེ་སྐྱེད་ཚལ་གྱི་གླིང་ན་ཐ་རེ་ཐོ་རེ་ཡོད་པ་ཡིན། ཤིང་གི་རྒྱན་ལ། རྗེ་རིན་པོ་ཆེས། གསེར་དངུལ་བཻཌཱུརྱ་དང་ཤེལ་དང་སྤུག །མུ་ཏིག་དམར་པོ་རྡོ་ཡི་སྙིང་པོ་སྟེ། །རིན་ཆེན་བདུན་ལས་གྲུབ་པའི་ལྗོན་པ་ལ། །ཡིད་ལ་བསམ་དགུའི་རྒྱན་བཟང་དཔག་མེད་འཆང་། །ཞེས་གསུངས་ལ། གསེར་དངུལ་བཻཌཱུརྱ་རྣམས་དང་། ཤེལ་རང་བྱུང་གི་ཆུ་ཤེལ། སྤུག་ནི་འཁྱག་དཀར་དུམ་བུ་འདྲ་ཟེར་དར་ཞིང་། ལོ་སྟོང་ལོན་པའི་འཁྱག་དེ་སྤུག་ཡིན་ཟེར་སྲོལ་ཡོད་ན་ཡང་དེའི་སྟོང་དེ་མང་ཚིག་ལ་གོ་དགོས་སྙམ། ལོ་དུང་ཕྱུར་ལོན་པའི་འགྱུར་རྡོའི་རིགས་ཡིན་ཆོག མུ་ཏིག་དམར་པོ་དང་། རྡོའི་སྙིང་པོ། རྡོའི་མཆོག རྡོའི་རྒྱལ་པོ་སྟེ་རྡོ་རྗེ་ཕ་ལམ་ཡིན་ས་རེད། ཤིང་ལྗོན་པ་འགའ་རེ་དེ་རིན་པོ་ཆེའི་སྣེ་ཁ་རེ་རེ་ལས་གྲུབ་པ། འགའ་རེ་སྣེ་ཁ་གཉིས་དང་། གསུམ་བཞི་དང་། ལྔ་སོགས་ནས་གོང་གི་རིན་པོ་ཆེ་བདུན་པོ་ལས་གྲུབ་པ། དེ་དག་ལྗོན་ཤིང་གཅིག་ལ་མཚོན་ན། རྩ་བ། སྡོང་པོ། ཡལ་ག ལོ་མ། དེའི་སྟེང་ལ་འདབ་མ། མེ་ཏོག འབྲས་བུ་རྣམས་རིན་པོ་ཆེ་སོ་སོ་ཡིས་གྲུབ་པ་དང་། མེ་ཏོག་ལྟ་བུ་གཅིག་ལ་རིན་པོ་ཆེ་སྣ་བདུན་ཁ་ཚང་བ། ལྗོན་ཤིང་དེ་ཚོ་ཐམས་ཅད་ལ་རེག་ན་འཇམ་ཞིང་བདེ་བ། དྲི་ཞིམ་པོ་ཅན། དྲི་མཆོག་དེ་དག་ཀྱང་གཅིག་དང་གཅིག་མི་འདྲ་བ། ཡལ་འདབ་རླུང་གིས་བསྐྱོད་ན་སྒྲ་སྙན་པོ་ཉན་པས་ཆོག་མི་ཤེས་པ་སྣ་ཚོགས་གྲག་རྒྱུ་ཡོད་པ། ཅི་བསམ་པའི་ལོངས་སྤྱོད་ཐམས་ཅད་ཤིང་ལས་ཀྱང་འབྱུང་བ། ལྗོན་ཤིང་ཁ་དོག་སྣ་ཚོགས་ཅན་གྱི་ས་གཞི་མཛེས་པའི་རྒྱན་ཆ་ཡིན་པ་དེ་ཉིད་ལྟ་བས་ཆོག་མི་ཤེས་པ། དེ་ཐམས་ཅད་ཤིང་གི་རྒྱན་ཡིན། དེ་འཕྲོས་ཆུའི་རྒྱན་གསུངས་ཡོད་ལ། ཆུའི་རྒྱན་འདི་ལ་འབབ་ཆུ་དང་རྫིང་བུ་གཉིས་ཀྱི་ཁོངས་སུ་བསྡུས་ནས་གསུངས་ཡོད་ཅིང་། ས་གཞི་རྒྱ་ཆེན་པོ་དེ་ལ་འབབ་ཆུ་འགའ་རེ་ཁ་ཞེང་རྒྱང་གྲགས་དང་དཔག་ཚད་རེ་རེ་ཡོད་པ་དེ་ལྟ་བུའི་རྒྱ་ཆེན། ཡང་དཔག་ཚད་བརྒྱ་སྟོང་མང་པོའི་བར་ལ་ཡོད་པ། གཏིང་ཟབ་ཚད་ལ་ཡང་རྒྱང་གྲགས་དང་དཔག་ཚད་ཁ་གྲངས་ཀྱི་ཚད་ཅན་གསུངས་ཡོད་ཀྱང་མཐའ་གཅིག་ཏུ་འདི་ཚོ་ངེས་པ་ཅན་མ་ཡིན། འབབ་སྟེགས་མཆོག་ཏུ་བདེ་བའི་སྤོས་ཆུའི་ཀླུང་ཞེས་གསུངས་པ་ཡིན་པས་སོ་སོའི་ཅི་བསམ་པ་ལྟར་དུ་འགའ་རེ་ཆུ་ལོང་བུ་ནུབ་པ་ཙམ། འགའ་རེ་སྐེད་པ་ནུབ་པ་ཙམ། ཡང་མགྲིན་པ་མན་ཆད་ནུབ་དགོས་ན་དེ་བཞིན་དུ་སྣང་བ། རི་བོའི་ཁོང་གསེང་ནས་བབ་པའི་ཆུ་རྒྱུན་ཡང་ཆུ་ཀླུང་ཆེན་པོའི་རྣམ་པ་ཅན་གྱི་འབབ་ཆུ་ཡིན་པ། ཐམས་ཅད་དྭངས་ཤིང་གཙང་བ། མིའི་ཆུ་ཡན་ལག་བརྒྱད་ལྡན་དང་ལྷའི་ཆུ་ཡན་ལག་བརྒྱད་ལྡན་གྱི་ཡོན་ཏན་ཐམས་ཅད་ཚང་བ། འདམ་རྫབ་སྤངས་པའི་གསེར་གྱི་བྱེ་མ་ལ། །བཞད་དང་ཁྲུང་ཁྲུང་ངང་ངུར་ཀ་རན་ད། །ནེ་ཙོ་རི་སྐེགས་རྨ་བྱ་ཀུ་ལ་ན། །ཀ་ལ་པིང་ཀའི་རྒྱུད་མྭངས་ལ་བསྙེན་པ། །ཞེས་གསུངས་པ་ལྟར་དུ་ལྷའི་བྱ་རིགས་སྣ་ཚོགས་ཀྱིས་སྐད་སྙན་སྒྲོག་བཞིན་ཡོད་པ། བྱ་རིགས་དེ་ཚོ་ཡང་ཐ་མལ་གྱི་དུད་འགྲོ་མ་ཡིན་པར་དེ་བཞིན་གཤེགས་པའི་སྤྲུལ་བ་ཡིན་པ། ཆུ་ཀླུང་གི་ངོས་ཐམས་ཅད་ལྷའི་མེ་ཏོག་སྣ་ཚོགས་ཀྱིས་ཁེབས་ཡོད་པ། ཆུ་ཀླུང་དང་མེ་ཏོག་ཐམས་ཅད་སྤོས་ཀྱི་དྲི་ཞིམ་པོ་འཐུལ་བ། ཆུ་ཀླུང་གི་སྒྲ་ཟབ་དང་རྒྱ་ཆེ་ཆོས་ཀྱི་སྙན་དབྱངས་སྒྲོག་པ། ཡང་རྫིང་བུའི་རྒྱན་ལ་བསམ་བློ་བཏང་ན། གཞི་རིན་པོ་ཆེ་སྣ་བདུན་ལས་གྲུབ་པའི་ཁྲུས་ཀྱི་རྫིང་བུ་ཉམས་དགའ་བ། ཆུ་ཡན་ལག་བརྒྱད་ལྡན་གྱིས་གང་སོང་བ། ཕྱོགས་བཞི་ལ་རིན་པོ་ཆེའི་ཐེམ་སྐས་ཡོད་པ། ཕྱི་རོལ་རིན་པོ་ཆེའི་ལྗོན་ཤིང་གི་ཕྲེང་བསྟར་དེ་ཚོ་སྤེལ་ལེགས་པ་གྲལ་འགྲིག་པ་ཤ་སྟག་གིས་བརྒྱན་ཡོད་པ། དྲོ་གྲང་གང་འདོད་ཅི་བསམ་བཞིན་དུ་འབྱུང་བ་དེ་ལྟར་གསུངས་ཡོད། དེ་བཞིན་དུ་པདྨའི་རྒྱན་གསུངས་ཡོད་ལ། རིན་པོ་ཆེ་སྣ་བདུན་ལས་གྲུབ་པའི་མེ་ཏོག་པདྨ། རྒྱ་ཆེ་ཆུང་ལ་དཔག་ཚད་ཕྱེད་ཡན་ཆད་ནས་དཔག་ཚད་བཅུའི་བར་དུ་འདྲ་མི་འདྲ་ཡོད་པ། དེའི་མེ་ཏོག་པདྨ་དེ་ཐམས་ཅད་ལས་འོད་ཟེར་བྱེ་བ་སྟོང་ཕྲག་སུམ་ཅུ་རྩ་དྲུག་དྲུག་འབྱུང་གསུངས་ཏེ། དེའི་འོད་ཟེར་དེ་ཐམས་ཅད་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་ལ་འཕྲོས་ནས་སེམས་ཅན་ལ་ཆོས་སྟོན་པ། ད་དུང་ཁང་བཟང་གི་རྒྱན་ཡོད་ལ། རིན་པོ་ཆེ་སྣ་ཚོགས་ཀྱི་ཁང་བཟང་བ་གམ་བརྒྱ་སྟོང་གིས་བརྒྱན་པ། ནང་ན་རིན་པོ་ཆེའི་ཁྲི་དང་ཁྲིའུ་ལ་སོགས་པའི་ཉེར་སྤྱོད་འདོད་ཡོན་གྱིས་བརྒྱན་ཡོད་པ་དང་། གཞན་ཡང་ཞིང་དེར་སྐྱེས་པ་ཐམས་ཅད་ཀྱི་སྤྲུལ་བའི་ཁང་བཟང་སྐྱེད་ཚལ་དང་བཅས་པའི་ས་གཞི་ལ་འཆག་པར་མ་ཟད་བར་སྣང་ལ་ཆགས་ཐོགས་མེད་པར་འགྲོ་ནུས་པ་ཡིན། ཟས་ཀྱི་འབྱོར་བའི་ཐད་ནས་བཤད་ན། ཞིང་དེ་ནས་ཁམ་གྱི་ཟས་རགས་པ་ཟ་བ་མེད་ཀྱང་རོ་བརྒྱ་ལྡན་པའི་ལྷའི་ཞལ་ཟས་ཀྱིས་དེ་མ་ཐག་ཏུ་ཚིམ་ཞིང་ལུས་བརྟས་པའམ་རྒྱས་པར་འགྱུར་བ། གོས་རྒྱན་གྱི་ཡོ་བྱད་ཅི་དང་ཅི་འདོད་པ་གང་ནས་ཡིན་ཡང་ལེན་ཆོག་ཅིང་བསམ་པ་ཙམ་གྱིས་འགྲུབ་ཡོང་བ། ཞིང་དེར་སྐྱེས་པའི་མིའི་ལོངས་སྤྱོད་ཀྱང་གཞན་འཕྲུལ་དབང་བྱེད་ཀྱི་ལྷ་དང་མཉམ་པར་གསུངས་ཡོད། ཞིང་དེ་ན་ངན་སོང་གསུམ་དང་ལྷ་མ་ཡིན་གྱི་རིས་མེད་ལ། ཞིང་དེར་སྐྱེ་བ་བླངས་དུས་འོད་ཀྱི་ལུས་ཅན་མེ་ཏོག་པདྨ་ལས་བརྫུས་ཏེ་སྐྱེས་པ་ཤ་སྟག་ཡིན། ཞིང་དེར་སྐྱེས་ནས་ཕྱིར་ངན་སོང་དང་ལྷ་མ་ཡིན་དུ་སྐྱེ་མི་སྲིད་ཅིང་། སྨོན་ལམ་གྱི་དབང་གིས་མ་གཏོགས་པར་དུས་མ་ཡིན་པར་འཆི་བ་ཡང་མེད། མཚན་དཔེས་བརྒྱན་པའི་ལུས་རབ་ཏུ་མཛེས་པ་འབའ་ཞིག་ཡིན། ཆོས་ཀྱི་འབྱོར་བའི་ཐད་ནས་བཤད་ན། སངས་རྒྱས་འོད་དཔག་མེད་པའི་མདུན་ནས་ཆོས་ཉིན་མཚན་དུས་བཞིའམ་དུས་དྲུག་ལ་ཉན་པས་མི་ཚད་པར་ཕྱོགས་བཅུའི་ཞིང་ཁམས་རབ་འབྱམས་ཀྱི་སངས་རྒྱས་ཀྱི་མདུན་དུ་རྫུ་འཕྲུལ་གྱིས་ཆོས་ཉན་དུ་སོང་ནས་ཅི་འདོད་ལག་པའི་མཐིལ་ནས་འབྱུང་བའི་མཆོད་པ་འབུལ་ཆོག་པ་ཡིན། ད་ལྟར་ཐེ་ཚོམ་ཡོད་མཁན་དེ་དུས་ཞིང་དེར་སྐྱེས་དུས་མེ་ཏོག་པདྨ་ཁ་མགྱོགས་མྱུར་དུ་མི་བྱེ་བ་རྣམས་མིན་པར་སེམས་ཀྱི་སྐད་ཅིག་གཅིག་ལ་སངས་རྒྱས་ཀྱི་ཞིང་བྱེ་བ་ཕྲག་ཁྲིག་བརྒྱ་སྟོང་མང་པོར་ཉུལ་ཐུབ་པའི་རྫུ་འཕྲུལ་གྱི་མངོན་ཤེས་དང་དེ་བཞིན་དུ་སྔོན་གནས་རྗེས་དྲན་གྱི་མངོན་ཤེས་ལ་སོགས་པ་མངོན་ཤེས་ལྔ་དང་ལྡན་པ་ཤ་སྟག་ཡིན། རྒྱལ་བ་འོད་དཔག་མེད་པའི་འཁོར་ཉན་ཐོས་དང་བྱང་ཆུབ་སེམས་དཔའ་ཡིན་ལ། འཁོར་དེ་ཚོའི་མང་ཉུང་གི་ཐད་ནས་བཤད་ན། བདེ་བ་ཅན་གྱི་ཉན་ཐོས་ཀྱི་འཁོར་འདུས་པ་དང་པོ་ལྟ་བུ་ཞིག་སྟོང་གསུམ་གྱི་ནམ་མཁའི་སྐར་མ་ཐམས་ཅད་ཉིན་ཞག་གཅིག་གིས་རྩི་ནུས་པའི་རྫུ་འཕྲུལ་ཅན་གྱི་མཆོག་མོའུ་འགལ་གྱི་བུ་ལྟ་བུ་བྱེ་བ་ཁྲག་ཁྲིག་བརྒྱ་སྟོང་གིས་ལོ་བྱེ་བ་ཁྲག་ཁྲིག་བརྒྱ་སྟོང་ལ་འདི་དག་ཁོ་ན་བརྩིས་ཀྱང་རྩི་མི་ཚར་རྒྱུ་དང་རྩི་མི་ཐུབ་པ། འདུས་པ་གཉིས་པ་དང་གསུམ་པ་ལ་སོགས་པ་དེ་བས་ཀྱང་རྩི་མི་ཐུབ་པ། བྱང་ཆུབ་སེམས་དཔའ་བློ་རི་རབ་དང་མཚུངས་པ་ཡེ་ཤེས་རྒྱ་མཚོ་དང་འདྲ་བ་ལ་སོགས་པ་ཡོན་ཏན་མཐའ་ཡས་མུ་མེད་པ་དང་ལྡན་པ་གོང་ལས་ཀྱང་མང་བས་ན་ཡང་རྩི་མི་ཐུབ། དེ་ལྟ་བུའི་སྣོད་བཅུད་ཀྱི་ཡོན་ཏན་གྱི་འབྱོར་བས་བརྒྱན་པའི་དབུས་དེ་ན་བྱང་ཆུབ་ཀྱི་ལྗོན་ཤིང་ཡོད། བྱང་ཆུབ་ཀྱི་ལྗོན་ཤིང་དེའི་མཚན་ལ་རིན་པོ་ཆེའི་པདྨོ་རྣམ་པར་སྣང་བ་ཞེས་ཞུ་བ་ཡིན། རྩ་བའི་སྦོམ་ཕྲ་ལ་དཔག་ཚད་ལྔ་བརྒྱ་ཙམ་རེ་གསུངས་ས་དེ་ལྟར་ཡོད། གནམ་འཕང་ལ་དཔག་ཚད་དྲུག་སྟོང་གསུངས་ས་ཡོད་དར། ཡལ་ག་དང་ལོ་མ་འདབ་མས་དཔག་ཚད་མང་པོ་ལ་ཁྱབ་པའམ་བརྒྱ་སྟོང་མང་པོར་ཁྱབ་ནས་འཁོར་ཡུག་ཕྱོགས་ཀུན་ལ་ཁེབས་པ། ནོར་བུའི་རིགས་འདྲ་མི་འདྲ་བ་ཡིས་བརྒྱན་ཡོད་པ། བརྒྱན་ལུགས་ཀྱི་ཁྱད་པར་བཤད་ན། འདི་ལྟ་བུ་སྟེ་ཚངས་པའི་གཙུག་རྒྱན་གྱི་ཟླ་བ་ལྟ་བུར་སྣང་བའི་རིན་པོ་ཆེས་ཡོངས་སུ་གསལ་བར་བྱེད་པ། བརྒྱ་བྱིན་གྱི་ལག་ན་ཐོགས་པའི་ནོར་བུ་རིན་པོ་ཆེས་མཛེས་ཤིང་མཛེས་པར་བྱེད་པ། དེ་བཞིན་དུ་ཡིད་བཞིན་གྱི་ནོར་བུ་རིན་པོ་ཆེས་རྣམ་པར་སྤྲས་ཤིང་ཀུན་ནས་ཁེངས་པ། རྒྱ་མཚོའི་ནོར་བུ་རིན་པོ་ཆེས་འཕྱང་འཕྲུལ་དུ་སྤྲས་པ། དེ་ལས་གཞན་པའི་ལྷ་མིའི་རིན་པོ་ཆེ་སྣ་ཚོགས་ཀྱིས་དྲ་བ་དང་དྲ་བ་ཕྱེད་པ། གཡུང་དྲུང་རིས་དང་། དགའ་བ་འཁྱིལ་བ། དྲིལ་བུ་གཡེར་ཁའི་རྣམ་པ་ལ་སོགས་པ་སེམས་ཅན་གྱི་བསམ་པའི་རྣམ་རིག་ལ་ཤར་ནུས་ཚོད་ཀྱི་རྒྱན་ཆའི་དྲུང་ན་སངས་རྒྱས་འོད་དཔག་མེད་ཀྱི་བཞུགས་ཁྲི་ཡོད། བཞུགས་ཁྲིའི་སྟེང་གི་པདྨའི་གདན་དེའི་མཚན་ལ་དག་ཅིང་བཟང་ལ་བཀྲ་བའི་འོད་ཟེར་ཅན་ཞེས་ཞུ་བ་ཡིན། རྒྱལ་བས་ཆོས་བསྟན་པའི་གཞལ་མེད་ཁང་ལ་ཆོས་ཡང་དག་པར་སྡུད་པའི་ཁང་བཟང་ཞེས་གསུངས་ཤིང་མཚན་གྱི་རྣམ་གྲངས་ལ་ཁྱད་པར་ཅུང་ཟད་རེ་ཡོད། མདོར་ན་བཅོམ་ལྡན་རྒྱལ་བ་འོད་དཔག་མེད་ཅེས་གོང་ནས་ཀྱང་བཤད་པ་ལྟར་དུ་མཚན་དང་དཔེ་བྱད་ཀྱིས་སྤྲས་པ། འོད་ཟེར་དཔག་ཏུ་མེད་པའི་རྒྱན་གྱིས་ཕྱོགས་བཅུ་ན་ཡོད་པའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་གི་བྱེ་མ་སྙེད་ལ་དུས་གཅིག་ཏུ་འོད་ཟེར་གྱིས་ཁྱབ་པ། མི་དང་ལྷའི་དབང་པོ་ཐམས་ཅད་ཟིལ་གྱིས་གནོན་ཅིང་མོག་མོག་པོར་བྱེད་ཐུབ་པ། ཞལ་མཇལ་ཚད། གསུང་ཐོས་ཚད། འོད་ཀྱིས་ཁྱབ་ཚད་ལུས་སེམས་བདེ་བ་དང་དགའ་བདེས་ཚིམ་པར་བྱེད་པ། རིའི་རྒྱལ་པོ་རི་རབ་གླིང་བཞིའི་དབུས་ན་འཕགས་པ་ལྟར་དུ་སངས་རྒྱས་ཀྱི་ཞིང་ཁམས་ཐམས་ཅད་ལས་མངོན་པར་འཕགས་ཏེ་དེ་ཐམས་ཅད་ཟིལ་གྱིས་མནན་ནས་དུས་ཀུན་ཏུ་ལྷམ་མེ། ལྷང་ངེ། ལྷན་ནེར་བདག་སོགས་སེམས་ཅན་ཐམས་ཅད་ལ་དགྱེས་པའི་ཞལ་གྱིས་ཕྱོགས། འཛུམ་པའི་མདངས་ཀྱིས་དྲངས། མཁྱེན་པའི་ཐུགས་ཀྱིས་དགོངས། བརྩེ་བའི་སྤྱན་གྱིས་གཟིགས་ཏེ་བཞུགས་ཡོད། དེ་ལྟར་རྟེན་དང་བརྟེན་པའི་སྣོད་བཅུད་ཀྱི་ཞིང་བཀོད་བཤད་དེ་དོན་བསྡུ་བ་ནི། སྐུ་དང་ཞིང་ཁམས་རྟག་ཏུ་འཆར་བར་ཤོག་ཅེས་པའི་ཚིག་རྐང་རྗེས་མ་འདིས་སྨོན་ལམ་དང་བཅས་ཏེ་བསྟན་ཡོད། བདེ་བ་ཅན་གྱི་ཞིང་ཁམས་ལ་ལུས་འདི་བོར་ཏེ་ཚེ་འདི་བརྗེས་མ་ཐག་ཏུ་སྐྱེ་དགོས་པ་ཡིན་ཡང་དེ་སྐྱེ་བའི་རྒྱུ་ད་ལྟ་ནས་སྒྲུབ་དགོས་ཕྱིར་རྒྱུ་འབྲས་གཉིས་ཀ་བྱེད་པ་མཐུན་པ་ཡིན་པས་ད་ལྟའི་སྐབས་ན་ལུས་མི་གཙང་འབྱུང་བཞིའི་རྡུལ་ཕྲན་ཟག་བཅས་སྙིགས་མའི་ཕུང་པོ་རྡོས་བཅས་རགས་པ་ལ་བརྟེན་ཡོད་ཀྱང་སེམས་རྣམ་ཤེས་གསལ་རིག་ཐོགས་པ་མེད་པ་ཆོས་ཉིད་ཡེ་དག་གི་ངོ་བོ་ཅན་འདིས་བདེ་སྨོན་ཁ་ཡིས་འདོན་པ་དང་མཉམ་དུ་སེམས་མ་ཡེངས་རྩེ་གཅིག་དད་ཅིང་གུས་པས་ཞིང་ཁམས་རྟེན་དང་བརྟེན་པའི་གསལ་སྣང་སྒོམས། དེ་ཡང་རང་སེམས་གདོད་ནས་ཡེ་དག་གི་ཆོས་ཉིད་དེ་རོ་གཅིག་པའི་མཉམ་བཞག་དང་བཅས་ཏེ་རྗེས་ཐོབ་ཐུན་མཚམས་སྤྱོད་ལམ་གྱི་སྐབས་ཡིན་ན་ཡང་སྣོད་དུ་སྣང་བའི་འཇིག་རྟེན་གྱི་ཁམས་འདི་ཐམས་ཅད་བདེ་བ་ཅན་གྱི་ཞིང་ཁམས། བཅུད་དུ་ཤར་བའི་སྐྱེ་འགྲོ་ཕོ་མོ་ཐམས་ཅད་ཞིང་ཁམས་དེའི་ལྷ་ཚོགས། གཟུགས་སུ་སྣང་ཚད་ཐམས་ཅད་འོད་དཔག་མེད་ཀྱི་སྐུ། སྒྲ་རུ་གྲགས་ཚད་ཐམས་ཅད་འོད་དཔག་མེད་ཀྱི་གསུང་། དྲན་རྟོག་གང་ཤར་ཐམས་ཅད་འོད་དཔག་མེད་ཀྱི་ཐུགས་སུ་ཤེས་པའི་སྒོ་ནས་དུས་དང་རྣམ་པ་ཀུན་ཏུ་ཉམས་སུ་བླངས་ན་བདེ་བ་ཅན་དུ་ཐམས་ཅད་སྐྱེ་ཐུབ་པ་ཡིན། བླ་མ་གྲྭ་པ་འདྲ་མིན་ན་ངེད་ཚོ་མི་སྐྱ་ཕོ་མོ་འདིས་ཆོས་སྒྲུབ་ལོང་མི་འདུག་མ་གཏོགས་འདི་ཉན་ན་བསྒྲུབས་ན་ཕན་ཐོགས་ཡོང་སྒོ་ཞིག་ཡོད་ཀྱང་ལོས་ཡོད་དེ་ཡོད་འདུག་སྙམ་ནས་རང་ཉིད་ལ་དེའི་ལས་སྐལ་མེད་པའི་འདང་བརྒྱབ་ན་དེ་ནོར་འཁྲུལ་ཆེན་པོ་ཞིག་ཏུ་འགྱུར་རྩིས་ཡིན། ངས་འདི་ནས་བཤད་པ་དེ་ཉིད་ལ་ཉན་ས་ཡོང་ལོང་མེད་ན་ཐང་། ཁྱད་པར་དུ་ད་ལྟའི་སྐབས་སྟོན་ལས་ཀྱི་དུས་རེད། གཅིག་བྱས་ན་ཅུང་ཟད་མི་སྐྱོན་ལས་ཆེ། ལོ་གཅིག་ལ་ཞག་པོ་སུམ་བརྒྱ་དྲུག་ཅུ་ལྷག་ཅིག་ཡོད་ལ། ཞག་རེ་རེ་ཡི་ཆུ་ཚོད་ཉི་ཤུ་རྩ་བཞི་མ་བརྩིས་ནས་ཉིན་དཀར་གྱི་ཆུ་ཚོད་བཅུ་གཉིས་པོ་ཁོ་ན་བརྩིས་པའི་དབང་དུ་བཏང་ན་ཆུ་ཚོད་བཅུ་གཉིས་ཅན་གྱི་ཚོ་སུམ་བརྒྱ་དྲུག་ཅུའམ་སུམ་བརྒྱ་དྲུག་ཅུ་དེ་བཅུ་གཉིས་ཀྱིས་བསྒྱུར་ན་ཆུ་ཚོད་བཞི་སྟོང་དང་སུམ་བརྒྱ་ལྷག་ཅིག་ཡིན་ཞིང་། དེའི་ནང་ནས་ཆོས་ཁྲིད་ཐེངས་མ་བཞི་ཆུ་ཚོད་རྡོག་མ་བཞི་ཁེ་རུ་མ་སྐྱོན་མི་འདུག ཁྱད་པར་དུ་དུས་རྒྱུན་ཆོས་རང་གིས་སྒྲུབ་པ་ལ་དུས་ཚོད་ཁ་ཁར་མ་ཕུད་ན་ཆོག་པ་ཡིན། ཆོས་སྒྲུབ་ལུགས་ཡག་ཤོས་དེ་གང་ཡིན་ཟེར་ན། འགྲོ་འདུག་ཟ་ཉལ་སྤྱོད་ལམ་རྣམ་བཞི་ཆོས་དང་སྦྲེལ་ཐུབ་པ་དེ་ཡིན་ཞིང་། ཆོས་སྒྲུབ་པ་ལ་དུས་ཚོད་མེད་ནས་དེ་ཡིས་མི་ལོ་འདུག་དྲན་པ་དེ་ཆོས་སྒྲུབ་མ་ཤེས་པས་ཡིན། ཆོས་སྒྲུབ་དུས་རྒྱུ་མེད་སྤྲང་པོར་ལྷག་ཏུ་བྱེད་དགོས་པ་མིན་ལ། ཆོས་སྒྲུབ་ཅེས་པ་ཡོད་ཚད་མེད་པར་བྱེད་དགོས་པ་ཞིག་ཨེ་ཡིན་སྙམ་ན་མ་ཡིན། མི་ཁོམ་འདུག་རྒྱུ་དུས་རྒྱུན་དུ་འཇིག་རྟེན་གྱི་བྱ་བ་ཁོ་ནས་བྲེལ་ཏེ་མི་ཁོམ་མི་དལ་བའི་རྒྱུའི་རྩ་བ་དེད་སོང་ན་རྒྱུ་ནོར་ཞིག་བཙལ་བའི་ཆེད་ཡིན་ཞིང་། རྒྱུ་ནོར་གསོག་པའི་ཆེད་དུ་ལྷག་པར་ཆོས་སྒྲུབ་དགོས། ཆོས་སྒྲུབ་པའི་དམིགས་ཡུལ་དེ་གང་ཡིན་ཟེར་ན། མངོན་མཐོ་དང་ངེས་ལེགས་གཉིས་ཀ་ཐོབ་ཆེད་ཡིན་ལ། དེ་ལྟར་ན་ངེས་པར་སངས་རྒྱས་ཀྱི་གོ་འཕང་སྒྲུབ་པའི་རྟེན་དེ་ལྷ་མིའི་ལུས་རྟེན་ཡིན། ཁྱད་པར་དུ་ཁམས་དྲུག་ལྡན་པའི་མིའི་ལུས་རྟེན་འདི་ཉིད་ཡིན་ཞིང་། དེས་ན་དང་པོ་མངོན་མཐོ་མིའི་ལུས་རྟེན་འབྱོར་བ་ཐམས་ཅད་ཚོགས་པ་ཞིག་ཡིན་དགོས། གཟུགས་མཛེས་དགོས་ལ། ལོངས་སྤྱོད་ཕུན་སུམ་ཚོགས་དགོས། སྐྱེ་ཡག་བཙོག་ཕ་མས་བཞག་པ་ཡིན་པས་ལུས་རྟེན་གཅིག་ལ་བརྗེ་ལུགས་མེད་ཀྱང་རྒྱུ་མེད་ན་མི་དགའ་ཞིང་ཕྱུག་ན་དགའ། འཁོས་མེད་ན་མི་དགའ་བར་དབང་ཐང་ཡོད་ན་དགའ། ན་གིན་ཡོད་པས་མི་དགའ་ཞིང་ནད་མེད་བདེ་ཐང་གིས་དགའ། དེ་དག་དགོས་མཁན་དག་གིས་ལྷག་ཏུ་ཆོས་ཉན་དགོས་ཤིང་། འབད་པ་གྱིས་དང་བསྒྱུར་གཏོང་ཆོག་ཅིང་ཡོད་པར་བྱེད་ཆོག ཆོས་ནོར་འདོད་དང་ཐར་བ་ཞེས་པ་བཞི་བོ་ཕུན་ཚོགས་སྡེ་ཞིན་ཡིན་ཞིང་། དེ་བཞི་བོའི་སྒྲུབ་སྟངས་ཐོས་པར་བརྟེན་ན་ཤེས་ཡོང་རྒྱུ་ཡོད། ཆོས་སྒྲུབ་ཅེས་ཟེར་སྐབས་རྒས་འཁོགས་ལས་མེད་ཤི་རྒྱུ་ལ་སྒུག་བཞིན་ཡོད་པ་རྣམས་དང་། ཕོ་མོ་གཉིས་ཀའི་ནང་ནས་བུད་མེད་མང་ཆེ་བ་ཡིན་དགོས་པའི་ངེས་པ་ཅི་ཡོད། ཁྱད་པར་དུ་རྒྱུ་གསོག་མཁན། ཁྱིམ་འཛིན་མཁན། འཇོན་ཐང་ཡོད་མཁན། ཕོ་གསར་སོགས་ཤོག ཡང་རྒས་མ་གཞོན་གྱི་མི་ལུས་ལོ་ཉུང་གི་དུས་ཚོད་གནའ་ནས་བརྒལ་ཚར་བའི་སེམས་ལོ་ལོན་གྱི་ཉམས་མྱོང་ད་དུང་བབ་ཐུབ་མེད་པ་རྣམས་ཤོག་དང་རང་ངོ་རང་གིས་ཤེས་རྒྱུ་ཡོད། རྐུན་མ་ཁྲམ་པ་ཁྱད་པར་དུ་ཤོག རྐུ་བྱེད་རྒྱུ་དེ་རྒྱུ་ཡི་ཆེད་དུ་ཡིན་ལ། རྒྱུ་འབྲས་སྣོག་རྒྱུ་ཡང་རྒྱུ་ཡི་ཆེད་དུ་ཡིན། དེ་སླ་མོ་ཞིག་མ་ཡིན་པར་སྲོག་དང་བསྡོས་དགོས་ཀྱང་དེ་ལས་སླ་བའི་རྒྱུ་གསོག་ཐབས། སེམས་སྐྱིད་ཐབས་དེ་ཆོས་ཀྱི་ནང་ན་ཡོད། དེས་ན་ལངས་ན། ཉལ་ན། སོང་ན། བསྡད་ན། བདེ་བ་ཅན་དུ་སྐྱེ་བའི་རྒྱུ་དང་པོ་རྟེན་ཚོགས་ཞིང་གསལ་འདེབས་པ་དེ་ཉིད་ཡིད་ནས་མ་བརྗེད་དང་དེ་ཡིས་ཆེ་བའི་ཆོས་ཤིག་མི་དགོས། མཚན་གཉིད་ཞབས་ནས་དེ་རྨིས་ཐུབ་པ་ཞིག་གྱུར་ན་ཕྱི་མར་བདེ་བ་ཅན་དུ་སྐྱེ་ཤས་ཆེ་བ་ཡིན། ལུས་འཇིག་རྟེན་མི་ལུས་ཡིན་ཡང་སེམས་བདེ་བ་ཅན་གྱི་སེམས་ད་ལྟ་ནས་སྦྱངས་ཏེ་ལོབས་སུ་འཇུག་པ་དང་བྱང་དུ་ཆུགས་དང་མིག་བཙུམ་མ་ཐག་ཏུ་བདེ་བ་ཅན་ལ་ཕ་ཁྱིམ་བུ་འགྲོ་ཡིན། སེམས་བཙོག་པ་ད་ལྟའི་འདི་མདོག་ཅིག་འགྱུར་མ་ཐུབ་ཅིང་ཚོགས་བསགས་སྒྲིབ་སྦྱངས་མ་བྱས་ན་རྒྱུ་མེད་ཀྱི་འབྲས་བུ་བདེ་བ་ཅན་དུ་སྐྱེ་བའི་མཐུན་རྐྱེན་རང་ངོས་ནས་མ་ཚོགས་པས་གཞན་ཇི་ལྟར་བཟང་ཡང་བདེ་བ་ཅན་དུ་རྡོ་འཕེན་པ་ལྟར་དུ་བྱེད་ཐབས་མེད། དེ་ལྟ་བུའི་གང་ཟག་གིས་ཚེ་འདིའི་བདེ་སྐྱིད་སྒྲུབ་མི་ཐུབ། ཆོས་མ་བསྒྲུབས་ཀྱང་འགའ་རེ་སྐྱིད་འདུག་དྲན་རྒྱུ་རིག་རྒྱུ་ཡོད་ན་ཡང་དེ་ལྟ་བུ་དེ་ཉིད་མར་མེ་འཆི་རན་ཁར་གསལ་བ་ལྟར་དུ་དེ་འདྲ་བ་དེ་ལ་མཐར་གཏུགས་ན་ཡུན་མེད། མདོར་ན་རང་སེམས་རང་ལ་དཀར་མཁན་རྣམས་ཀྱིས་ཆོས་རང་རྒྱུད་དང་སྦྱར་ཏེ་ཆོས་སྒྲུབ་སྐབས་ཆོས་ངོ་མ་དེ་ཉིད་ཇི་ལྟ་བ་བཞིན་དུ་སྒྲུབས། སྒྲུབས་ཞེས་པའི་ཚིག་མཚམས་ནས་དེ་རིང་གི་ཆོས་མཚམས་གཞག དེ་རིང་བདེ་བ་ཅན་དུ་སྐྱེ་བའི་རྒྱུ་བཞི་ཡི་ནང་ནས་རྟེན་ཞིང་ཁམས་ཡིད་ལ་བྱེད་པ་དེ་ཉིད་བཤད་ཟིན་ལ། ཚིག་བཞི་སྔོན་མ་དང་པོ་ཡི་གེ་དཀར་བོ་དེ་ཉིད་སོང་སྟེ། སང་ཉིན་རྒྱུ་གཉིས་པ་རྒྱུ་ཚོགས་བསགས་སྒྲིབ་སྦྱོང་ཡི་གེ་སེར་བོ་དེ་ཉིད་དང་། གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་ཡི་གེ་དམར་བོ་དེ་ཉིད་མཉམ་དུ་བཤད། གནང་ཉིན་རྒྱུ་བཞི་བ་རྐྱེན་སྨོན་ལམ་གྱིས་མཚམས་སྦྱར་བ་བཤད་ལ། ཉིན་རྗེས་མར་ཐམས་ཅད་ཀྱི་ཕྱོགས་བསྡོམས་དང་ཐེངས་འདིའི་དགེ་རྩ་རྫོགས་བྱང་དུ་བསྔོ་བའི་ལས་རིམ་དེ་ཡིན། འདིའི་མཚམས་ནས་རྣམ་པ་སུ་ཡིན་གང་རུང་ཞིག་གིས་མགུར་ཞིག་འཐེན་རྒྱུ་ཡིན། ད་ལོ་ཤྲཱི་སེང་དང་དགོན་པའི་ནང་ནས་གཙོ་ཆེར་གསར་བ་ཏག་ཏག་གིས་འཐེན་ན་ཅི་འདྲ་ཞེས་བཤད་ཡོད། སུས་འཐེན་ཀྱང་ཁྱད་པར་མེད། འདིའི་མཚམས་སུ་མགུར་ཞིག་འཐེན་མཛོད། ༈ ༼ཁྱབ་བདག་འཁོར་ལོའི་མགོན་པོ་ངེས་པ་དོན་གྱི་རྡོ་རྗེ་འཆང་ཆེན་པོ་འཇིགས་མེད་རྟ་མགྲིན་ཡོན་ཏན་མགོན་པོ་མཆོག་གིས་སློབ་ཚོགས་རྣམས་ལ་ཐོག་མཐའ་བར་དུ་དགེ་བའི་ཞལ་གདམས་ཀྱི་མགུར་དབྱངས་འདི་གསུངས་སོ། །ཐོག་མར་དགེ་བ་ཚུལ་ཁྲིམས་མིག་བཞིན་སྲུང་། །བར་དུ་དགེ་བ་མང་ཐོས་བརྩོན་པར་བྱེད། །ཐ་མར་དགེ་བ་ཐོས་དོན་ཚུལ་བཞིན་སྒྲུབ། །དེ་ལྟར་མཛད་ན་རང་གཞན་དོན་གཉིས་འགྲུབ། །དྲན་དང་ཤེས་བཞིན་བག་ཡོད་གནས་ལ་བསླབ། །བྱིས་དང་སྡིག་གྲོགས་འདོད་ཡོན་ཞེན་པ་སྤོང་། །དགེ་བའི་བཤེས་དང་ཆོས་མཐུན་གྲོགས་ལ་བསྟེན། །དེ་ལྟར་མཛད་ན་ཀུན་གྱིས་བཀུར་བ་འབྱུང་། །ཞི་དུལ་ངང་བརྟན་རྣམ་གཡེང་ལེ་ལོ་མེད། །སྒོ་གསུམ་བསྡམས་པས་ཅི་བྱེད་ཆོས་དང་མཐུན། །འགྲོག་པར་བདེ་བས་གཞན་སྣང་དང་བ་འདྲེན། །དེ་ལྟར་མཛད་ན་དོན་མཐུན་གྲོགས་བཟང་རྙེད། །བླ་མ་ལྷ་ཡིས་དབྱིངས་ནས་མི་ཁྲེལ་ཞིང་། །རང་སེམས་ཟོལ་མེད་དཔང་དུ་བཙུགས་བྱས་ཏེ། །ཆོས་དང་སེམས་བསྲེས་འབྲེལ་ཚད་དགེ་ལ་སྦྱོར། །དེ་འདྲ་ཡ་རབས་དམ་པའི་ངང་ཚུལ་ལགས། །དེང་སང་སྐྱེ་བོ་ཤིན་ཏུ་མི་སྲུན་པས། །སུ་དང་འགྲོགས་ཀྱང་ཆོས་མིན་སྤྱོད་པ་སློབ། །ཉ་རུལ་ཁྲོད་ཀྱི་ཀུ་ཤ་ཇི་བཞིན་དུ། །དམ་པ་ཡིན་ཡང་ཚུལ་མིན་གནས་ལ་སྦྱོར། །དེ་ཕྱིར་རང་གི་ཆོས་ཚུལ་རི་རྒྱལ་བཞིན། །གྲོགས་དང་རྐྱེན་གྱི་རྗེས་སུ་མི་འགྲོ་ཞིང་། །ཆོས་མཐར་ཕྱིན་ཅིང་རང་གཞན་བསྟན་འགྲོའི་དོན། །འབད་མེད་འགྲུབ་པ་དེ་འདྲའི་ཚུལ་ལ་སློབས། །རང་རྒྱུད་ཡང་དག་ཆོས་ཀྱིས་དུལ་བ་ན། །གཞན་གྱི་དོན་ཡང་མ་འབད་ཤུགས་ལ་འབྱུང་། །ལྷ་དང་བླ་མ་དབྱིངས་ནས་དགྱེས་པ་དང་། །དམ་ཚིག་གཙང་བས་དམ་ཅན་བྲན་བཞིན་འཁོར། །བསྟན་དང་འགྲོ་བའི་དོན་རྣམས་ལྷུན་གྱིས་འགྲུབ། །མཁས་དང་གྲུབ་པའི་གྲགས་པ་ལྷས་ཀྱང་སྒྲོག །དམ་པའི་སྐྱེ་སྲིད་གྲགས་པར་དོན་དང་ལྡན། །དེ་འདྲའི་ཕུན་སུམ་ཚོགས་པའི་བཀྲ་ཤིས་ཤོག།༽ དམ་པ་གོང་མ་རྣམ་པའི་རྟོགས་པའི་ཉམས་མགུར་དང་། དོ་ཧའི་རྒྱངས་གླུ། ངེས་འབྱུང་ཆོས་ལ་བསྐུལ་བའི་གཏམ། ཞལ་གདམས་ཉམས་ལེན་གྱི་དྲན་སྐུལ་དེ་རྣམས་སེར་སྐྱ་ཕོ་མོ་རྒན་གཞོན་ཚང་མས་མཚམས་རེར་མགུར་དབྱངས་བྱས་ཏེ་འཐེན། མཚམས་རེར་ཤར་འདོན་བྱས་ཏེ་བཀླག་ཅིང་བཟླས། མཚམས་རེར་སྔས་མགོ་དང་རྒྱུན་དུ་རིག་ས་ཞིག་ལ་སྦྱར་ན་བཟང་། ཉམས་ལེན་པ་རྙིང་པ་ཞིག་ཡིན་ན་རྟོགས་པའི་བོགས་འདོན། ཆོས་པ་གསར་བ་རྣམས་ཀྱི་དྲན་པའི་སོ་མཁར་ཚུགས་པའི་རྨང་གཞི། དེ་མིན་གཞན་པ་ཐམས་ཅད་ཀྱི་བློ་ཁ་ནང་ལ་འཁོར་བའི་དྲན་སྐུལ་ཡོང་བ་ཡིན། མདོར་ན་ཡོད་ཚད་ལ་ངེས་འབྱུང་བཅོས་མིན་སྐྱེ་བའི་གྲོགས་བྱེད། དེང་སང་ཁྱིམ་པ་ཕོ་མོ་རྒན་གཞོན་ཐམས་ཅད་ཀྱིས་ཡི་གེ་ཆེ་ཚོད་ཆུང་ཚོད་ཀྱིས་ཤེས་ས་ཡོད་བསམ་རྒྱུ་ཞིག་ཡིན། སྔོན་ཆད་ངས་དེའི་སྐོར་ལ་ཧ་ཅང་དོ་དམ་ཞིག་བྱས། དེ་རིང་འུ་ཚོའི་ཆོས་ཁྲིད་ཀྱི་འགོར་རྡོར་སེམས་སྒོམ་བཟླས་ཤིག་ངས་ཆེད་དུ་བཏོན་པ་ཡིན། ཚང་མས་འུར་སྒྲ་གྲག་ལོས་འགྲོ་དྲན་ཡང་ཆེན་པོ་ཞིག་གོ་མ་བྱུང་། མདོར་ན་ཡིག་རྨོངས་སེལ་དགོས་རབས། ལོ་ཆུང་གིས་མི་ཚད་རྒན་རྒོན་གྱིས་སྦྱངས་ན་ཕྱི་མར་བླུན་པོར་མི་སྐྱེ་བའི་དགོས་པ་ཆེ་རབས་ཐེངས་མང་པོར་བཤད་མྱོང་། དེས་མ་ཚད་པར་རྒས་གཞོན་སུ་ལེན་མི་ཤེས་ཡིག་རྒྱུགས་ཀྱང་ལེན་རྒྱུ་ཡིན་ཟེར་མྱོང་ཡང་དེང་སྐབས་གཞོན་སྐྱེས་ཀྱི་མི་རབས་གསར་བའི་བསྟན་བདག་མཁན་སྤྲུལ་རྣམ་པ་མཁྱེན་རྒྱ་གཅིག་བས་གཅིག་ཆེ་ཡིན་ཞིང་། གྲྭ་ཚང་གི་ནང་ནས་ཡིན་ཡང་རང་མོས་དང་བླང་གིས་ལྷག་བསམ་ཆེར་བསྐྱེད་མཛད་དེ་རང་ནུས་གང་ཡོད་ཀྱིས་ཤེས་ཡོན་གྱི་ས་བོན་རེ་འཇོག་ཅི་ཐུབ་མཛད་མཁན་ཡང་མི་ཉུང་བ་ཡོད་པ་ཡིན་ན་རི་ཁྲོད་དབེན་པའི་གནས་ནས་གྲོང་དགོན་མང་པོར་ཐེ་གཏོགས་མ་དགོས་པའི་ས་ཚོད་ལ་བརྒྱབ་པ་ཡིན། དེའི་ཕྱིར་དོ་སྣང་མ་བྱས་ཏེ་བཏང་སྙོམས་སུ་བཞག་ཡོད། སྤྱིར་ན་རིས་མེད་ཀྱི་དམ་པ་གོང་མ། བྱེ་བྲག་ཏུ་རང་གང་ལ་མོས་པའི་ཆོས་བརྒྱུད་ཀྱི་བླ་མ་གོང་མ་རྣམས་ཀྱི་རྣམ་ཐར་མཇོལ་དང་བྱིན་རླབས་དང་། ཕན་ཡོན། ངེས་འབྱུང་གི་དྲན་སྐུལ། མ་ཤེས་བློ་ཡི་སྒོ་འབྱེད་ལ་སོགས་པའི་ཡོང་སྒོ་མང་པོ་ཞིག་དེའི་ནང་ནས་ལེན་རྒྱུ་ཡོད། བློ་འདྲི་ས་མཁས་པའི་ལེགས་བཤད་དང་། དམ་པའི་གཞུང་ལུགས་ལ་གྱིས་དང་ཉིན་གཅིག་ཉི་མ་བརྒྱ་འདྲ་འདྲའི་ངོ་གསལ་ཁོ་ན་དང་། མི་བཟང་པོ་ལྟ་བུ་འདྲིས་ཤིང་འདྲིས། བཅར་ཞིང་བཅར་ན་ཇེ་བཟང་ཡིན། ཇི་ལྟར་མིན་ཡང་ཕོ་གསར་མོ་གསར་རྣམས་ཀྱིས་ལུགས་ཀྱི་བསྟན་བཅོས་དང་བློ་གསར་རི་བོང་གི་རྟོགས་བརྗོད་ལྟོས་དང་ཡག་རྒྱུ་སྙན་རྒྱུ་ཡིས་མ་ཚད་པར་མི་སྤུས་མེད་སྤུས་ཚད་ཅན་དུ་བསྒྱུར་ཐུབ་ལ། དེའི་འཕྲོས་སྟོན་པའི་སྐྱེས་རབས་ལས་འཕྲོས་པའི་བོད་ཀྱི་སྒྱུ་རྩལ་གྱི་རིག་གཞུང་། དྲི་མེད་ཀུན་ལྡན་ལ་སོགས་པའི་རྣམ་ཐར་ལ་བལྟས་ན་ཡང་སྦྱིན་སོགས་ཕར་ཕྱིན་ལས་བརྩམས་པའི་བརྗོད་བྱ་ཅན་ཡིན་པས་རང་ཉིད་ལ་ཕན་ཐོགས་ཆེན་པོ་ཡོད། དེའི་འཕྲོས་འབྲུག་ཆུ་སྡེ་བའི་གཡག་ཡར་དར་གྱི་མགོའི་གསེར་མཁར་ལས་ས་ནས་རྙེད་པའི་གནའ་བོའི་སྐུ་རྙིང་གུ་རུ་ཨོ་རྒྱན་བདེ་ཆེན་རྒྱལ་པོའི་སྐུ་དེ་དེ་རིང་སྔ་དྲོར་ཚོགས་ཐོག་ནས་ངའི་ལག་ལ་བཞག་པ་དེ་ངས་ཚོད་དཔག་བྱས་ན་ཐུབ་བསྟན་ཆོས་ཀྱི་རྡོ་རྗེའི་སྐུ་དུས་ཀྱི་རྟེན་རྙིང་ཞིག་ཕྱིས་སུ་འཇིགས་བྲལ་བྱང་ཆུབ་རྡོ་རྗེའི་སྐུ་དུས་སུ་ཨ་ཁྲི་གཏེར་སྟོན་གྱིས་ས་གནད་ཀྱི་མེ་བཙའ་ལ་བཞག་པ་ཞིག་ཡིན་སྙམ། དེས་ན་འདི་ལ་རབ་གནས་ཤིག་ཡང་བསྐྱར་བྱས། གཟུངས་གཞུག་ཡང་འབུལ་བྱས། གཡག་མགོ་ཁོ་རང་གི་སྔོན་མ་ཡོད་སའི་དེ་ཕྱོགས་ཀྱི་ས་མིག་ངོ་མ་དེ་བཙལ་ཏེ་དེ་ན་ཕྱིར་སྦས་དགོས་བསམ་གྱིན་ཡོད། དེ་དག་གྲུབ་མ་ཐག་ཏུ་ཕྱིར་སྤྲོད་ཡོང་། དེ་ནས་ཚང་མ་བདེ་མོ་གྱིས། སང་ཉིན་ཐུག་ཡོང་། ཉིན་གསུམ་པའི་ཆོས་ཁྲིད།༼ཀ༽ སྔོན་དུ་འགྲོ་བའི་ཆོས། འདིར་ཡོད་ཀྱི་ཆོས་གྲྭའི་ནང་གི་བླ་སྤྲུལ་གྲྭ་བཙུན་ཇོ་སེར་རྣམ་པ་ཡར་ཕུད་ཤུལ་གྱི་མང་ཆེ་བ་ཁྱིམ་ན་གནས་པའི་ཁྱིམ་པ་ཕོ་མོ་ཡིན་ཞིང་། དམ་པའི་ཆོས་ཀྱི་ཆེ་བ་འདོན་ཕྱིར་དུ་བསླབ་ལ་གནས་པའི་སྟོན་པའི་རྗེས་འཇུག ཁྱད་པར་དུ་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་དགེ་འདུན་པ་ལ་མཆོད་གནས་དམ་པ་དད་པའི་ཞིང་མཆོག་ཏུ་རྩི་བས་དགེ་འདུན་པ་ཀླད་ལ་བཞུགས། ཁྱིམ་པ་ཕོ་མོ་དམའ་བའི་ས་ནས་གུས་པའི་ཐལ་མོ་སྦྱར་ཏེ་འདུག་རྒྱུ་དེ་ཉིད་ཆོས་ལྡན་ཡ་རབས་ཀྱི་ས་ཆའི་ཆོས་དང་མཐུན་པའི་སྲོལ་ལུགས་ཤིག་ཡིན། འོན་ཀྱང་ཅི་འདྲའི་བླ་ཆེན། ཅི་འདྲའི་མཁས་ཆེན། ཅི་འདྲའི་ཐོབ་ཐམ་ཀའི་ཁ་གྲངས་བརྩི་རྒྱུ་ཡོད་པའི་མངའ་ཐང་ཅན་ཞིག་ཡིན་ན་ཡང་ཁྱིམ་ཕ་མའི་ཁོར་ཡུག་ནས་མ་བུད་པ་ཞིག་སུ་ཡོད། མཐོ་དམན་དྲག་ཞན་གྱི་མིང་བཏགས་ལུགས་ཀྱི་ཁྱད་པར་རེ་ཡོད་ན་ཡང་དོན་ངོ་མའི་ཐོག་ནས་ཁ་ལག་སྤྱོད་གསུམ་འདྲ་འདྲ་ཡིན་པའི་རྐྱེན་གྱིས་མི་ཡིན་པའི་ཆ་ནས་གཅིག་པ་ཡིན། སེར་སྐྱ་ཕོ་མོ་གང་གི་ནང་ལ་ཡིན་ཡང་སྐྱེ་བ་མཐོ་དམན་དང་། ལས་བཟང་ངན་ལོས་ཡོད། ཕ་མ་གཅིག་གི་བུ་རྒྱུད་ཡིན་ཡང་སོ་སོ་སྐྱེ་བོ་ཞིག་ཡིན་ཕྱིར་རིགས་དྲུག་གང་ནས་ཡིན་ན་གཅིག་གི་གནས་རིས་ནས་འཕངས་པ་ཞིག་མིན་པའི་ཐབས་མེད་པ་དེ་ཉིད་གཅིག་ན་བྱེད་པ་རྒྱུ་མཐུན། གཉིས་ན་སྐྱེ་བ་སྔོན་མའི་བག་ཆགས་ཀྱི་དབང་གིས་བསམ་སྤྱོད་འདྲ་མི་འདྲ་ཡོད་རྒྱུ་དེ་ཉིད་མཐོང་ཆོས་ཡིན། དམྱལ་བ་ནས་སྐྱེ་ཡོང་བ་ཞིག་ཡིན་ན་མདོག་ངན། སྡུག་རུས་ཅན། སྡུག་བསྔལ་བཟོད་རྒྱུ་ལ་ལོབས་ཡོད་པ་དེ་ལྟ་བུ་ཞིག་ཡིན་ལ། ཡི་དྭགས་ནས་ཡོང་བ་ཞིག་ཡིན་ན་བརྐམ་ཆགས་སེར་སྣ་ཅན། དུད་འགྲོ་ནས་ཡོང་བ་དེ་ཉིད་བླུན་པོ་ཟོག་འདྲ་ཞིང་། དེ་ཡང་གཅན་གཟན་དང་སྤྱང་ཀི་སོགས་ཀྱི་སྐྱེ་བ་ཡིན་ན་དམར་ཟས་ལ་དགའ་ཞིང་སྲོག་གཅོད་ལ་ངང་གིས་འཇུག་པ། ལྷ་མ་ཡིན་ནས་ཡོང་བ་ཞིག་ཡིན་ན་ཕྲག་དོག་དང་གདུག་རྩུབ་ཅན། ཕར་ངོ་ལ་བལྟས་ན་ཅི་འདྲའི་གནོད་ན་བསམ་རྒྱུ། སྣང་བ་མ་དྭངས་པ། སེམས་ཁམས་མ་སྐྱིད་པ། གུ་དོག་མོ་ཅན། ལྷ་ནས་མི་ཡུལ་ལ་འཕོས་པ་དེ་ཉིད་གཟུགས་བཟང་། ངང་རྒྱུད་རིང་ཞིང་། རྒྱུད་འཇམ་པོ་ཅན་ལྟ་བུ་ཞིག་ཡིན། ཡང་དེ་བཞིན་དུ་མི་ནས་མིར་སྐྱེ་བ་ཡང་སྔ་མའི་ལས་དང་བག་ཆགས་ཀྱིས་ཁྱད་པར་འདྲ་མི་འདྲ་ཡོད་པ་ཡིན། མདོར་ན་བསམ་བཞིན་དུ་དངོས་སུ་འགྲོ་བའི་དོན་ལ་སྤྲུལ་བ་མཛད་པ་ཞིག་ཡོད་ན་མ་གཏོགས་ལམ་ཞུགས་ཀྱི་ཆོས་པ་ཞིག་ཡིན་དུས་སྐྱ་སེར་མཆོག་དམན་མེད་པས་མཐར་ཐུག་གི་བསྒྲུབ་བྱའི་དམིགས་ཡུལ་དེ་གཅིག་ཅེས་ཟེར་ཁ་བདེ་མོ་ཞིག་དང་ཟེར་སླ་མོ་ཞིག་ཡིན། མཚམས་རེ་འདྲ་བ་མ་ཡིན་ཞིང་སོ་སོ་ཡིན་པ་དང་ཕ་མ་གཅིག་གི་བུ་རྒྱུད་ཡིན་ཡང་མི་འདྲ་ཞེས་སྨྲས་ན་འདྲ་རྒྱུ་ཅི་ཞིག་འདྲ་བ་ཡིན་ཟེར་ན། བདེ་བ་ཐོབ་པའི་དོན་དུ་འབད་པ་དེ་ཉིད་འདྲ་ལ། གནས་སྐབས་ཀྱི་བདེ་བ་དང་མཐར་ཐུག་གི་བདེ་བ། རང་ཉིད་སྡུག་བསྔལ་ལས་ཐར་བ་དང་རང་གཞན་ཐམས་ཅད་གཏན་བདེར་འགོད་པའི་ཁྱད་པར་ཡོད། དེ་སེམས་ཅན་སོ་སོའི་བསམ་ཚུལ་མ་འདྲ་བ་ཡིན་ཞིང་། དེ་ལྟ་བུའི་བསམ་ཚུལ་མ་འདྲ་བ་ཡོད་པའི་དབང་གིས་གདུལ་བྱ་མི་འདྲ་བ་ལ་འདུལ་བྱེད་མི་འདྲ་བ་དང་འདུལ་ཐབས་མི་འདྲ་བ་ཡོད་པ་དེ་རྒྱལ་བའི་ཕྲིན་ལས་བསམ་གྱིས་མི་ཁྱབ་པའི་ཡུལ་ཡིན། དེ་ཡིན་ན་དམ་པའི་ཆོས་སྒྲུབ་པ་དེ་བླ་མ་གྲྭ་པའམ་གྲྭ་ཇོ་སེར་ཁོ་ནའི་སྐལ་བ་མིན་པར་མི་ཡིན་ལུགས་འདྲ་འདྲ་དང་བདེ་བ་འདོད་ལུགས་གཅིག་པ་ཡིན་པའི་ཆ་ནས་ཆོས་ཐམས་ཅད་ཀྱིས་བསྒྲུབ་དགོས་ཤིང་། ཁྱད་པར་དུ་ཁྱིམ་པ་ཕོ་མོས་བསྒྲུབ་དགོས་ལ། བསྒྲུབས་པས་མི་ཚད་འགྲུབ་པ་ཞིག་བྱེད་པ་དེ་ཉིད་གལ་ཆེན་ཡིན། དེའི་ཐབས་དང་གདམས་པ་དེ་ཇི་ལྟར་བྱས་ནས་དགའ་ན། དེ་ལ་བརྩོན་པ་མགྱོགས་པར་མ་བསྐྱེད་ན་ཕྱི་བཤོལ་བྱས་ནས་སང་དང་གནངས་བྱར་བྱས་ཚེ་སང་དང་གནངས་ལ་ཟད་རྒྱུ་མེད་ཅིང་། མི་ཚེ་དུས་ཚོད་དེ་ཉིན་རེ་དང་ཞག་རེ་མ་དགོས་དང་ཆུ་ཚོད་སྐར་ཆ་ཡིས་ཟད་ཀྱིན་ཡོད། ཕྱོགས་གཅིག་ནས་ཟད་འགྲོ་བཞིན་ཡོད་ཀྱང་ཕྱོགས་གཅིག་ནས་ཡར་ཁ་སྣོན་རྒྱག་རྒྱུ་ཡོད་ན་ཡང་སྐྱོན་མི་ཆེ་ཡང་འདི་དཔེ་བཞག་ན་ལྟག་ཆུ་ཆད་པའི་རྫིང་བུ་ལ་འཇོག་རྒྱུ་ཞིག་ཡིན་ལ། ལྟག་ཆུ་ཆད་པའི་རྫིང་བུ་ཞེས་པ་ཐོག་ནས་མར་འབབ་རྒྱུ་མེད་པ་འོག་ནས་ཐུར་བོ་ནས་ཟད་བཞིན་ཡོད་པ་དེ་ལ་གསུངས་པ་ཡིན། འཕེལ་མེད་ཟད་པའི་རང་བཞིན་ཅན་ནམ་ཞིག་ལ་ཟད་མཐར་ཐུག་སྟེ་ཚེའི་མཐར་ཐུག་པ་དེ་ཉིད་རང་གིས་ཀྱང་མི་ཤེས་པས་དབང་མེད་ཀྱིས་ལོང་བས་ལོང་བཅོལ་བྱས་ནས་འདིའི་མཐའ་ཁོ་ན་ཕུད་དེ་བསྡད་ན་འགྲིག་མི་འདུག་བསམ་རྒྱུའི་འདང་དེ་ཕོག་དགོས། ཚེ་རིང་རྒྱུ་ལ་སྨོན་ལམ་འདེབས་པ་ཡིན་ཞིང་། ཚེ་རིང་ནས་ཚེ་ལ་བར་ཆད་མེད་ནས་ཚེ་མཐར་ཕྱིན་ན་ཡང་ལོ་བརྒྱའི་ཡན་ལ་མི་འདུག་ལ། དེའི་ནང་ནས་དེ་སྔོན་ཅི་ཙམ་སོང་ཡོད། ད་བརྒྱ་ཐམ་པའི་ནང་ནས་ཅི་ཙམ་ཞིག་ལྷག་ཡོད། བརྒྱ་ཐམ་པའི་ནང་ནས་བརྒྱད་ཅུ་དགུ་བཅུ་ལ་ཐོན་འགྲོ་བའི་དབང་དུ་བྱས་ན་ཚེ་སྨད་ངོ་མ་ཞིག་ལ་ཐོན་དུས་སྔར་ལོ་ཉུང་ལུས་པོ་དར། ཁ་ལས་དགེ། དབང་པོ་རྣམ་རིག་བཀྲ་དུས་དང་མི་འདྲ་ཞིང་། ཕར་བལྟས་ན་མི་འདྲ་བ་དང་རང་ཐོག་ཡོང་ན་ཡང་མི་འདྲ། འབྱུང་བཞི་འཁྲུགས་པའི་ན་བ་དང་། རྒས་ཤིང་རྒུད་པའི་རྒ་བ་སོགས་ལ་འདང་མ་བརྒྱབ་ཐབས་མེད་ཅིག་སྟེ་ཁ་རྩང་འུ་ཚོས་སྒྱུ་མ་མཁན་གྱི་གཏམ་རྒྱུད་བཤད་པ་ལྟ་བུ་ཡིན། ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཞིག་ཡིན་ན་སྦྱངས་པའི་ཡོན་ཏན་ལ་གནས་པ་ཞིག་ཡིན་དགོས། ཁྱིམ་པ་ཕོ་མོས་ནོར་ལོངས་སྤྱོད་ཀྱི་འདུ་འགོད་ཁ་རྩང་བཤད་པ་ལྟར་དུ་ལོས་བྱེད། ཕུན་ཚོགས་སྡེ་བཞི་མ་འཛོམས་ཚེ་མཐོ་རིས་མིའི་ལུས་རྟེན་ཁྱད་འཕགས་ཤིག་མ་ཐོབ་པ་ཡིན། མཐོ་རིས་ཀྱི་འབྱོར་བ་དེ་ཚོགས་དགོས་ཤིང་། ཕུན་ཚོགས་སྡེ་བཞི་དེ་གང་ཡིན་ཟེར་ན། ཆོས་དང་གཅིག ནོར་དང་གཉིས། འདོད་དང་ཐར་བ་བཞི་ཡིན། འདོད་ཡོན་ཐམས་ཅད་ཚོགས་དགོས་ལ། དེ་དགོས་ན་ནོར་ལོངས་སྤྱོད་འཛོམས་དགོས། དེ་ཡང་ཚེ་འདིར་མ་ཟད་ཕྱི་མ་ལ་ཡང་ཕྱུག་པོ་ཡིན་དགོས་ཤིང་། དེས་མི་ཚད་ཕྱི་མའི་ཕྱི་མ་ལ་སྐྱིད་བདེ་དགའ་ལོངས་སྤྱོད་མི་ཟད་པ་ཞིག་དང་། དེའི་བདེ་སྐྱིད་དེ་ཡང་ཟག་བཅས་ལས་འདས་པའི་ཟག་མེད་ཀྱི་བདེ་བ་ཞིག་ཐོབ་ན་ཡང་སྒོས་སྐྱིད་ཅིང་། དེ་སྡུག་བསྔལ་མེད་པའི་བདེ་བ་དང་སྡུག་བསྔལ་དང་གཏན་དུ་བྲལ་བའི་བདེ་བ་ཡིན། དེ་ཐོབ་པ་ལ་སྡུག་བསྔལ་ལས་ཐར་བའི་ཐར་བ་འགྲུབ་དགོས། དེ་ཡིན་ཕྱིར་ཆོས་ནོར་འདོད་ཐར་སྡེ་བཞི་པོ་མ་འཛོམས་ཤིང་མཐོ་རིས་ཀྱི་བདེ་སྐྱིད་ཆ་ཚང་འཛོམས་མེད་ན་ཕུན་ཚོགས་སྡེ་བཞི་དེ་ནི་དམ་པའི་ཆོས་བསྒྲུབས་པ་ལས་བྱུང་བ་ཡིན་པས་དེ་འཛོམས་ཐབས་དང་ཡོད་ཐབས་བྱེད་དགོས། ཆོས་ནོར་འདོད་ཐར་གཅིག་ལ་གཅིག་བརྟེན་ཡིན་ཞིང་། ཚེ་འདིའི་བདེ་སྐྱིད་རྐྱང་པ་ལ་བསམ་ན་ཡང་ཆོས་བསྒྲུབ་དགོས། འདི་འདི་བདེ་ཕྱི་སྐྱིད་སྒྲུབ་པའི་ཐར་ལམ་མ་ནོར་བ་ཡིན་ལ། ཆོས་བསྒྲུབ་རྒྱུ་དེ་འདི་དང་ཕྱི་མ་གཉིས་ཀ་བདེ་བྱེད་ཀྱི་ཐབས་ཡིན། དེ་ཡང་ཡིན་པར་ཟེར་འདུག་ཙམ་ཞིག་གིས་ཆོག་པ་མ་ཡིན་པར་ཨེ་ཡིན་མི་ཡིན་རང་གིས་བལྟ་དགོས། དེ་ལྟར་བཤད་ན་ཁྱིམ་ན་གནས་པའི་མི་སྐྱ་ཕོ་མོས་གཞིས་འཁོར་བའི་ཁྱིམ་སྲོལ་བཟུང་ཞིང་བུ་ནོར་གཉིས་ཀྱི་བྱ་བའི་འདུ་འགོད་ཀྱི་ལས་ཀ་མཐའ་མེད་འདི་ལ་འཐམས་ཚར་དུས་ཆོས་རྐྱང་པ་བསྒྲུབས་ནས་རི་ལ་འདུག་པའི་སྒོམ་ཆེན་ལྟ་བུ་ཞིག་བྱས་ནས་འདུག་རྒྱུའི་ཁོམ་པ་མེད་ཀྱང་ཆོས་དང་འཇིག་རྟེན་གཉིས་ཀ་མཉམ་དུ་འགྲུབ་ཅེས་པ་རང་རྒྱུད་ཆོས་དང་འདྲེས་ན་བསམ་སྤྱོད་ཆོས་ལས་མ་འདས་པ་འགྱུར་རྒྱུ་ཡོད། བསམ་སྤྱོད་ཆོས་ལས་མ་འདས་པ་དེ་ཁྱིམ་ན་གནས་ཀྱང་ཡང་དག་པའི་དགེ་སྦྱོང་ཡིན། འོན་ཀྱང་དེ་ཡང་བཤད་རྒྱུ་སླ་ཡང་འགྲུབ་རྒྱུ་དེ་འདྲས་སླ་མོ་ཞིག་མ་ཡིན་ལ། ཆོས་ཐར་བ་དོན་གཉེར་གྱི་ལམ་ཞིག་བཙལ་ན་འདི་ལ་རིང་ལམ་ཡོད་པ་དང་། ཉེ་ལམ་ཡོད་པ་དང་། མྱུར་ལམ་དང་། ཤིན་ཏུ་མྱུར་ལམ་ཡང་ཡོད། བསྐལ་བ་གྲངས་མེད་སུམ་ཅུ་སོ་བདུན་ལ་སོགས་པས་བསྒྲུབ་རྒྱུ་ཞིག་དང་། གྲངས་མེད་གསུམ་གྱིས་འགྲུབ་རྒྱུ་ཞིག་སྟེ་གྲངས་མེད་ཅེས་པ་གྲངས་མང་བ་ཡིན། སྐྱེ་བ་ཁ་གྲངས་ཅན་གྱིས་འགྲུབ་རྒྱུ་ཞིག སྐྱེ་བ་ཚེ་འདི་ལ་འགྲུབ་རྒྱུ་ཞིག དེར་མ་ཟད་ལོ་དང་ཟླ་བས་འགྲུབ་རྒྱུ་ཅན་གྱི་གདམས་པ་ཟབ་མོ་ཡོད་ཅིང་། ཡོད་པར་གྲགས་ལ་ཡོད་པར་ཡིན་འདུག ཡོད་པས་མ་ཚད་འགྲུབ་པའི་དཔེ་ཡང་མང་དར་བ་ཡིན། འོན་ཀྱང་ད་འུ་གུ་དུས་བསྐལ་བ་སྙིགས་མའི་སེམས་ཅན་ཡིན་པས་ཡིན་ན་འདྲ། ལས་བསོད་ནམས་དམན་པའི་གཞན་དབང་དུ་ཤོར་བས་ཡིན་ན་འདྲ། རང་ཉིད་སེམས་སྟོབས་བརྩོན་འགྲུས་ཞན་པའི་ལེ་ལན་ངན་པ་དེ་རང་ཉིད་ལ་འཁོར་བ་ཡིན་ན་འདྲ། མདོར་ན་སླ་མོ་དེ་སྒྲུབ་མི་ཤེས། དཀའ་མོ་དེ་ནི་སྒྲུབ་མ་ཐུབ་ནས་འདིའི་བར་འདི་ནས་སྐལ་མེད་ལག་སྟོང་། དོན་མེད་སྟོང་ལོག་གྱུར་འདུག་བསམ་རྒྱུའི་ཁ་ཕྱོགས་རིག་ན་ད་རུང་མ་སྔ་མ་ཕྱི་བ་ཞིག་སྟེ། གསོན་པོའི་མྱི་ཡིན་ལ། གསོན་འཇིག་རྟེན་ཁམས་ཀྱི་ས་ཆ་ནས་རང་ལུས་འདོམ་གང་གྲུ་བཞི་དེ་དགྱེ་སྒུར་གཉིས་ཀ་རང་ལག་ཡིན། དེ་ལྟར་སྔོན་མཐའ་ཕྱི་མཐའ་ཚང་མ་ལ་བལྟས་ཡོང་དུས་རང་གཞན་བར་དང་གསུམ་པོ་རང་དང་རིགས་འདྲ་བའི་གྲོགས་པོ་ཐམས་ཅད་ཀྱིས་འདི་ལྟར་གླེན་པ་ལུག་གི་འགྲོ་སྟངས་བྱས་ནས་ཅི་བསམ་འདི་དྲན་མེད་པར་ཁ་གནམ་ལ་གདངས་ནས་སྔོན་མའི་རྗེས་ཕྱི་མས་དེད་ནས་ཅི་བྱུང་གང་བྱུང་མི་བྱེད། ཅི་བྱུང་གང་བྱུང་བྱེད་པ་དེ་མྱི་སར་པ་ཞིག་གིས་ལས་རྒྱུ་མེད། ཆོས་སྒྲུབ་པའི་མིང་ཡོད་ཀྱང་ཆོས་གྲུབ་པའི་དོན་འདི་ཡིན་ཞེས་རིག་རྒྱུ་མེད་པ་འདི་ལ་བློ་གཏད་བྱེད་རྒྱུ་མེད། རང་གི་མགོ་རང་གིས་མི་གཡོགས། ད་ནི་ལྷ་གཅིག་ལ་གསོལ་བ་འདེབས་ས། ལམ་གཅིག་ལ་རྡོག་པ་གཏད་ས་དེ་བདེ་བ་ཅན་དུ་བྱེད། འདི་ན་ཤོག་དང་ལམ་སྣེ་འདི་ལྟར་འཚོལ་ཞེས་རང་གཞན་འདི་ལ་དོན་གཉེར་གྱི་སེམས་མཐུན་བསམ་པ་མཉམ་པ་ཚང་མ་ལོ་དུ་མའི་རིང་ལོ་རེར་ཐེངས་རེར་འདིར་འཛོམས་ནས་ཞིང་སྒྲུབ་འཚོགས། ཞིང་ཁྲིད་བཤད། ཞིང་མཆོད་འབུལ་གྱིན་ཡོད་པ་ཡིན། བོད་གངས་ཅན་ཆོས་ལྡན་གྱི་ཡུལ་གྲུ་ནས་ཆོས་མདོ་སྔགས་གཉིས་ཀྱི་བསྟན་པ་ད་དུང་མ་ནུབ་པར་ཡོད་ཅིང་། བཀའ་སྒྲུབ་བརྒྱུད་ཤིང་རྟ་བརྒྱད་ཀྱི་ཆོས་བརྒྱུད་ནས་ཐོས་བསམ་ཉམས་ལེན་གྱི་སྒོ་མང་ལ། དེ་མང་ཡང་ཞབས་དཀར་ཚོགས་དྲུག་རང་གྲོལ་གྱིས་གསུངས་པ་ནང་བཞིན་སངས་རྒྱས་ཀྱི་ཞིང་ཁམས་ནམ་མཁས་གར་ཁྱབ་རྣམས་ཡིན། ཆོས་ལོངས་སྤྲུལ་སྐུའི་ཞིང་ཁམས་བསམ་གྱིས་མི་ཁྱབ། བསམ་མི་ཁྱབ་ཀྱང་ཆོས་སྐུའི་ཞིང་ཁམས་གནས་འོག་མིན་ཆོས་དབྱིངས་ཀྱི་ཕོ་བྲང་ནང་གསལ་རྒྱལ་བའི་དགོངས་པ་འུ་ཚོས་མངོན་དུ་མ་གྱུར། གདངས་ཕྱི་གསལ་ལོངས་སྐུའི་ཞིང་ཁམས་ཀྱི་འོག་མིན་སྟུག་པོ་བཀོད་པ་ལ་ཐོན་དགོས་ན་ཁ་སྦྱོར་ངེས་པ་ལྔ་ལྡན་འུ་ཚོས་སྤྱོད་ཡུལ་མ་ཡིན། དག་པའི་གདུལ་བྱ་ས་བཅུའི་སེམས་དཔས་ཀྱང་མི་མཇལ། སྐྱེ་སྤྲུལ་ལོངས་སྐུའི་ཞིང་ཁམས་ལ་སྙེགས་ཁུལ་བྱས་ན་ཡང་ས་ཐོབ་ཀྱི་སེམས་དཔའ་མིན་ན་ཐོན་མི་ཐུབ། དག་དང་མ་དག་འདྲེས་མའི་ཞིང་ཁམས་ལ་ཐོན་ཡང་དོན་སྒོ་དེ་འདྲ་མི་ཆེ། གླིང་འདི་ཚོ་ལ་མཚོན་ན་སངས་རྒྱས་ཤཱཀྱ་ཐུབ་པའི་ཞིང་ཁམས་ཡིན་ཞིང་། ལས་དག་པས་བལྟས་ན་དག་པ་ཡིན་ལ། ཚངས་པ་རལ་བ་ཅན་གྱིས་ལྟ་དུས་སངས་རྒྱས་ཤཱཀྱ་ཐུབ་པའི་ཞིང་ཁམས་འུ་ཚོས་ད་ལྟ་མཐོང་རྒྱུ་འདི་དག་པའི་ཞིང་ཁམས་བདེ་བ་ཅན་དང་འདྲ་འདུག་ཅེས་གསུངས་ཀྱང་གཞན་གྱི་མཐོང་སྣང་ལ་དེ་ལྟར་མ་ཡིན། སུས་བལྟས་ན་དག་པའི་ཞིང་ཁམས་ཡིན་རྒྱུ་དང་། བདེ་སྐྱིད་ལོངས་སྤྱོད་འཛོམས་པ། སོ་སོ་སྐྱེ་བོ་ཡིན་ཡང་དེར་སྐྱེ་ཐུབ་པ། དེ་འདྲའི་ཆ་རྐྱེན་ཡོངས་རྫོགས་འཛོམས་པ་ལ་བདེ་བ་ཅན་འདི་ལས་དགའ་ཞིག་མི་འདུག་བསམ་རྒྱུ་དམིགས་འབེན་དེར་བལྟས་ནས་དེས་ན་འདི་ལ་གཏད་ན་དགའ་འདུག་ཅེས་ཟེར་གྱིན་ཡོད། དཔེར་ན་ས་ཐག་རིང་ལ་འགྲོ་འདང་བྱེད་སྐབས་དེར་འགྲོ་བའི་ལས་ཆས་དང་། ཁ་འདི་ཕྱོགས་ལ་འཁོར་ནས་འདི་ལྟར་འགྲོ་བསམ་རྒྱུའི་ཞེ་ཚོད་ཅིག་དགོས་པ་ལྟ་བུ་སྟེ། རྟ་བཟང་པོ་ལ་སྒ་སྲབ་ཆ་འགྲིག་བྱས་པ་ལྟ་བུ་དེ་ཉིད་ཚོགས་བསགས་སྒྲིབ་སྦྱང་ཡིན་པ་དང་། ས་འདི་ན་ཐོན་དགོས་བསམ་རྒྱུའི་གཏད་སའི་དམིགས་འབེན་དེ་རྟེན་ཞིང་ཁམས་ཡིད་ལ་བྱེད་པ། ཁ་དེ་ཕྱོགས་འཁོར་ནས་སྲབ་ཀྱིས་ཁ་ལོ་དཀྱུ་བ་དེ་བསྔོ་བ་སྨོན་ལམ་ཡིན་པས་དེ་རྣམས་མེད་པའི་ཐབས་མེད། འགྲོ་གྲབས་ཀྱི་གྲ་སྒྲིག་དང་འདྲ་བར་ཞིང་ཁམས་བདེ་བ་ཅན་དུ་འགྲོ་བའི་རྒྱུ་བཞི་དེ་དེ་ལྟར་སྒྲུབ་དགོས། བདེ་བ་ཅན་གྱི་སྨོན་ལམ་དང་། འགྲེལ་བ་ལ་སོགས་པ་དམ་པའི་གསུང་བྱིན་རླབས་ཅན་མང་ལ། འོན་ཀྱང་རྒྱ་ཆེན་པོའི་མཐའ་མི་ཆོད་པ་དང་། གདིང་ཟབ་མོའི་གཏིང་མི་དཔོག་ནས་ལུས་འགྲོ་རྒྱུ་ཡང་སྲིད་པས་འུ་བུ་ཆ་ཁས་རང་གིས་བྲིས་པ་དང་སོ་སོ་སྐྱེ་བོས་བྲིས་པའི་ཚིག་སོ་སོ་སྐྱེ་བོར་བཤད་ན་གོ་ཁ་ཉན་ཁ་བདེ་ཤས་ཆེ་བསམས་ནས་ཚིག་ཁ་བཞི་བོར་གོ་བསྡུར་གླེང་མོལ་བྱས་ཤིང་། ཕྱིས་ནས་རྒྱ་ཆེན་ཆོས་ལ་འཇུག་པའི་བློ་སྒོ་རེ་འབྱེད་སྲིད་དོ་བསམས་ནས་ན་མཉམ་རིགས་མཐུན་གྱི་གྲོགས་པོ་ཚོར་དམིགས་ནས་འདི་བྲིས་པ་ཡིན་པར་མ་ཟད་བཤད་ཀྱིན་ཡོད་པ་ཡིན། ༼ཁ༽ གཞུང་གི་དོན་བཤད་པ། ༼ཁ༽ རྒྱུ་གཉིས་པ་ཚོགས་བསགས་སྒྲིབ་སྦྱོང་དང་རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་གཉིས་སྦྲེལ་ནས་བཤད་པ། ཁ་རྩང་ཉིན་དང་པོ་ལ་བདེ་བ་ཅན་དུ་སྐྱེ་བའི་རྒྱུ་བཞིའི་དང་པོ་རྟེན་ཚོགས་ཞིང་ཡིད་ལ་བྱེད་པ་དེ་ཉིད་བཤད་ནས། དེ་རིང་རྒྱུ་གཉིས་པ་ཚོགས་བསགས་སྒྲིབ་སྦྱོང་ལ་ཐུག་ཡོད་ཅིང་། དེ་ཡང་རྒྱུ་གསུམ་པ་བྱང་ཆུབ་མཆོག་ཏུ་སེམས་བསྐྱེད་པ་དང་སྦྲེལ་ནས་བཤད་བཞིན་ཡོད་པ་ཡིན། རྒྱུ་བཞི་པོ་འདི་བསྒྲུབས་ན་བདེ་བ་ཅན་དུ་སྐྱེ་བའི་ཚུལ་དེ་ཇི་ལྟར་ཡིན་ཟེར་ན། བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོས་ཞིང་བཀོད་ཀྱི་མདོ་ལས་གསུངས་ཏེ། གསུང་ས་སུ་ལ་གསུངས་ན་བཅོམ་ལྡན་འདས་ཀྱི་ཉེ་གནས་ཀུན་དགའ་བོ་ལ་མདོ་དུམ་བུ་གསུམ་བྱས་ནས་སྔ་ཕྱིར་བྱས་ནས་གསུངས་པ་ཡིན་ལ། དུམ་བུ་དང་པོའི་སྐབས་སུ་རྒྱུ་བཞི་བོ་འདི་གསུངས་པ་ཡིན་ཞིང་། དེ་ལྟར་ན་འདི་ལ་དམིགས་བསལ་ཞིག་ཡོད་པ་སྟེ། དམིགས་བསལ་ཅི་ཞིག་ཡོད་ཟེར་ན། རྒྱུ་གསུམ་པ་བྱང་ཆུབ་མཆོག་ཏུ་སེམས་བསྐྱེད་པ་འདི་ཞིང་ཁམས་དེ་ན་ཐེག་པ་ཆེ་ཆུང་གི་རིགས་གཉིས་ཡོད་པའི་ནང་གི་ཐེག་ཆེན་གྱི་རིགས་ཅན་ལ་སྐྱེ་བ་འཛིན་འདོད་མཁན་ཚོར་དགོངས་ནས་དེ་གསུངས་པ་ཡིན། དེ་མིན་ན་ཡང་རྒྱུ་གཞན་གསུམ་པོས་བདེ་བ་ཅན་ལ་སྐྱེ་ཐུབ་རྒྱུ་ཐུན་མོང་གི་དབང་དུ་མཛད་པ་ཡིན་པའི་གོ་དོན་དེ་ལྟར་ཡོད། མདོ་དུམ་བུ་གསུམ་པས་ཇི་ལྟར་གསུངས་ཡོད་ཟེར་ན། ཞིང་གི་ཡོན་ཏན་གྱི་བཀོད་པ་ཡང་ཡང་ཡིད་ལ་དྲན་པ་གཅིག་པུས་ཀྱང་ཞིང་ཁམས་དེར་སྐྱེ་བ་འཛིན་ཐུབ་ཅེས་གསུངས་ཡོད། འོ་ན་ཚོགས་བསགས་སྒྲིབ་སྦྱོང་མ་བྱས་ཀྱང་ཆོག་གམ་སྙམ་ན་མ་ཡིན། ཞིང་ཁམས་ཁྱད་པར་ཅན་ཡིད་ལ་བྱས་པས་ཀྱང་ཚོགས་རང་སོག་དང་སྒྲིབ་པ་རང་དག་འགྱུར་བའི་གོ་བ་དེ་ལེན་དགོས། ཞིང་ཁྱད་པར་ཅན་དང་ཐབས་ཁྱད་པར་ཅན་གྱི་མཐུ་ལས་བསྐལ་བའི་ཚོགས་སྐད་ཅིག་ལ་འདུམ་པ་དེ། དཔེ་ཆ་བས་བཤད་ན་ཕྱུགས་ཀྱི་བགྲོད་པ་དང་ཉི་ཟླས་བགྲོད་པ་ཞེས་པ་སྟེ། རྟ་དང་གླང་པོ་ལ་སོགས་པ་ཞོན་ནས་སོང་བ་དང་ཉི་ཟླའི་གླིང་བཞི་ཉིན་གཅིག་ལ་སྐོར་བ་གཉིས་མྱུར་ཁྱད་མི་འདྲ་བའི་ཁྱད་པར་ལྟར་ཡིན་གསུངས་ཡོད། དེ་ལྟར་ཡིན་ན་ཚོགས་བསགས་སྒྲིབ་སྦྱོང་ཟུར་ནས་མ་བསྟན་ཀྱང་འཐུས་འདུག་སྙམ་པ་ཡང་མ་ཡིན། སོ་སོ་སྐྱེ་བོ་དབང་རྟུལ་དད་པའི་རྗེས་འབྲང་ལོག་ལྟ་ཅན་དང་མཚམས་མེད་ཀྱི་ལས་བྱས་པ་མ་གཏོགས་པ་ལམ་འདིས་མ་བཏང་པ་ཡིན་པའི་ཕྱིར་ན་ཚོགས་བསགས་སྒྲིབ་སྦྱོང་གི་སྒོ་མཐའ་ཡས་པ་དང་། དེ་ཡང་ཡན་ལག་བདུན་པ་ལ་སོགས་པར་བསྡུས་ཏེ་བསྟན་ཡོད། དེ་ལྟར་ན་མདོ་དུམ་བུ་བར་བས་ཅི་ཞིག་བསྟན་ཡོད་ཟེར་ན། ཚེ་ཕྱི་མར་བདེ་བ་ཅན་དུ་སྐྱེ་བའི་རྒྱུ་འདི་དག་སྒྲུབས་དང་ཚེ་འདི་ལ་འོད་དཔག་མེད་མཇལ་དགོས་མཁན་རྣམས་ཀྱིས་ཀྱང་མཇལ་ཐུབ་ཅེས་གསུངས་པ་སྟེ། ཚེ་ཕྱི་མ་གཅིག་པུས་མི་ཚད་པར་ཚེ་འདི་ལ་མཇལ་ཐུབ་ཅེས་གསུངས་པ་ཡིན། དེའི་ཟུར་དུ་ཅི་ཞིག་བསྟན་ཡོད་ཟེར་ན། བདེ་བ་ཅན་དུ་སྐྱེ་བའི་རྒྱུ་བཞི་འདི་སྒྲུབས་དང་ཕྱི་མ་བདེ་སྐྱིད་ཁྱད་པར་ཅན་ཐོབ་པས་མི་ཚད་ཚེ་འདིའི་བདེ་སྐྱིད་ཀྱང་རང་ཤུགས་ཀྱིས་ཐོབ་གསུངས་པའི་དོན་དེ་བསྟན་པ་ཡིན། རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་འདི་མི་དགོས་རྒྱུ་བྱས་ན་རྒྱུ་གཞན་གསུམ་པོས་བདེ་བ་ཅན་ལ་སྐྱེ་ཐུབ་པ་དེ་ཉིད་སངས་རྒྱས་ཀྱིས་གསུངས་པ་ཡིན་ཞིང་། འོན་ཀྱང་དེ་དུས་འུ་ཚོས་དགེ་རྩ་ཆེ་ཆུང་ཅི་སྒྲུབ་ན་འགོ་ནམ་བཟུང་ལ་མཐའ་ཡས་སེམས་ཅན་ཐམས་ཅད་ཀྱི་དོན་དུ་ཟེར་འདུག་རྒྱུ་དེ་ཉིད་སྟོང་ཟེར་གྱུར་ཏེ་དེ་མ་དགོས་པ་ཡིན་ལ། དེ་ལྟར་སྨྲས་ན་སྟོང་ཟེར་ཞིག་ནི་ཇི་ལྟར་བྱས་ཀྱང་འགྱུར་བ་ཞིག་སྟེ་ཁ་ཡིས་སེམས་ཅན་ཐམས་ཅད་ཟེར་ཁུལ་བྱས་པ་མ་གཏོགས་སེམས་ཅན་ཡོད་ཚད་མ་དགོས་དང་ཤ་ཕུ་ནུ་མཐུན་ས་ནང་མ་ཞིག་གིས་སྒོར་རྡོག་བརྒྱ་ཐམ་པའི་དོམ་མ་བྱིན་ན་བསྲན་ཐུབ་ཀྱིན་མི་འདུག་སྙམ་ན། དེ་ལྟ་བུ་ཞིག་ཡིན་པའི་སྟབས་ཀྱིས་བཏང་སྙོམས་ཀྱིས་སྙོམས་པར་བྱས་པའི་ཚད་མེད་བཞི་ཡིས་འགོ་བཟུང་ནས་བྱང་ཆུབ་ཀྱི་སེམས་སྦྱོང་གིན་འདུག་དགོས་པ་ཞིག་ཡིན་པ་མ་གཏོགས་འཕུར་ཤེས་པ་ཞིག་གིས་འཕུར་རྩལ་སྦྱོང་མི་དགོས་པ་ལྟར་བྱང་སེམས་རྒྱུད་ལ་སྐྱེས་ཚར་བ་ཞིག་གིས་ཡང་བསྐྱར་སྦྱོང་དགོས་པ་མ་ཡིན། དེ་ལྟར་བྱས་ཏེ་བཤད་ན་སྦྱོར་བ་སེམས་བསྐྱེད། དངོས་གཞི་དམིགས་མེད། རྗེས་བསྔོ་བ་ཚང་མ་ཁ་ཟེར་སྟོང་བཤད་ལ་འགྱུར་འགྲོ་བས་མི་ཚད་སོ་ཐར་གྱི་སྐབས་སུ་ངེས་འབྱུང་སྟོང་གཏམ། སྡོམ་པ་ཀུན་གྱི་གཞི་རྟེན་སྐྱབས་ཡུལ་མ་ཤེས་པས་སྐྱབས་འགྲོ་ཁ་ཟེར། རྒྱུ་འབྲས་ཡིད་ཆེས་རྣལ་མ་ཞིག་གི་གོ་དོན་རྒྱུད་ལ་མ་འཇགས་པ་དེ་ཉིད་ཀྱིས་དད་པའི་རིགས་ཚང་མ་སྟོང་གཏམ། དེ་ཡིན་པ་དེ་ཉིད་སོ་སྐྱེའི་རང་མཚང་ཡིན་པས་ཁག་མེད་ལ། དེའི་སྟེང་དུ་འབད་ན་ཡང་སྔར་མེད་ཀྱི་ཡོན་ཏན་རྒྱུད་ལ་སྐྱེ་རྒྱུ་མེད་པའི་ལྟ་བ་བཟུང་གྲུབ་པའི་སྐབས་སུ་གང་ལྟར་བྱས་ཀྱང་ལྟ་ལོག་མིན་ན་རིས་ཆད། དམན་ལ་དགག་སྒྲ་སྦྱར་ས་དེ་ཉིད་དུ་འགྱུར་རྩིས་ཡིན། དེ་ལྟ་བུའི་གང་ཟག་གིས་སྐབས་འདིའི་བདེ་བ་ཅན་གྱི་ཞིང་གི་ཡོན་ཏན་དང་། རྒྱལ་བའི་ཡེ་ཤེས། ལམ་གྱི་ཐབས་ཟབ་མོ་ལ་ཡང་ཐེ་ཚོམ་སྐྱེས་ནས་ལམ་ལས་ཉམས་པར་འགྱུར་སྲིད་པ་ཡིན། དང་པོར་ཁ་ཟེར་གྱིས་རྗེས་ཟློས་ཤིག་བྱས། བར་དུ་ཚིག་དེའི་དོན་ལ་ངེས་ཤེས་ཤིག་སྐྱེས། རིམ་གྱིས་དོན་ཟེར་ངོ་མ་ལ་འགྱུར་བས་མི་ཚད་ཐ་མར་བསམ་སྦྱོར་གཉིས་ཀ་མཐུན་པ་ཞིག་མ་གྱུར་གྱི་བར་དུ་སྦྱང་དགོས། མ་ཤེས་ནས་སྦྱང་བ་ཡིན་མ་གཏོགས། ཤེས་ཤེས་ཁར་སྦྱང་མི་དགོས། དེ་ཡིན་ཕྱིར་སེམས་འཕང་དམའ་དགོས་པ་མ་ཡིན། གཅིག་གིས་སྒྲུབ་ནུས་རྒྱུ་དེ་ཚང་མས་བསྒྲུབ་ཐུབ་ལ། བྱང་ཆུབ་སེམས་དཔའི་རྫོགས་སྨིན་སྦྱངས་གསུམ་གྱི་སྤྱོད་པ་རྒྱ་མཚོ་ལྟ་བུ་ཡིན་ནས་བྱ་དཀའི་སྤྱོད་པར་མི་ཞུམ་པ་ཡིན་པས་ན་སེམས་དཔའ་ཞེས་པའི་མཚན་དེ་ཐོགས་པ་ཡིན། དེ་ཡིན་ཕྱིར་རྒྱུ་ཚོགས་བསགས་སྒྲིབ་སྦྱོང་བྱེད་པ་ལ་ཐེག་ཆེན་གྱི་རིགས་སུ་ངེས་པའི་གང་ཟག་ལ་གོང་ནས་བཤད་པའི་མདོའི་དགོངས་དོན་དུམ་བུ་གསུམ་པ་ཚེ་འདི་ལ་སངས་རྒྱས་འོད་དཔག་མེད་ཀྱི་ཞལ་མཇལ་བའི་རིགས་ཅན་ལ་སངས་རྒྱས་བཅོམ་ལྡན་འདས་ཀྱིས། ཀུན་དགའ་བོ། རིགས་ཀྱི་བུ་དང་བུ་མོ་ཚེ་འདི་ལ་སངས་རྒྱས་འོད་དཔག་མེད་ཀྱི་ཞལ་དེ་མཇལ་ན་ཅི་མ་རུང་སྙམ་མཁན་ཚང་མས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད། རྫོགས་པའི་བྱང་ཆུབ་ཏུ་སེམས་བསྐྱེད་ནས་ལྷག་པའི་བསམ་པ་དང་ལྡན་པ་ཞིག་བྱས། དགེ་རྩ་བསྐྱེད་ཅིང་བསྔོ་བ་བྱེད་དགོས་ཞེས་གསུངས་པ་ཡིན་ཞིང་། ཚིག་དེ་མ་ཡིན་ཡང་དོན་དེ་དང་གཅིག་པ་ཡིན། དེའི་སྟབས་ཀྱིས་འུ་ཚོས་དེ་རིང་བཤད་བྱ་གང་ཡིན་ཟེར་ན། བརྩེ་ཆེན་སྙིང་རྗེས་དྲངས་པའི་བྱང་སེམས་ལ། ། རྟག་ཏུ་གོམས་པའི་རྒྱལ་སྲས་སྤྱོད་མཆོག་གིས། ། རླབས་ཆེན་ཚོགས་གཉིས་སྤྱོད་པ་མཐར་ཕྱིན་ཏེ། ། དཔག་ཡས་དགེ་བའི་རྩ་བ་ཡོངས་བསྐྱེད་ཤོག། ཅེས་པ་དེ་ཉིད་སྨྲས་པ་ཡིན་ལ། གང་བརྗོད་བྱའི་སྙིང་པོ་དེ་བྱང་ཆུབ་མཆོག་ཏུ་སེམས་བསྐྱེད་དེ་རླབས་ཆེན་ཚོགས་གཉིས་ཀྱི་སྤྱོད་པ་མཐར་ཕྱིན་པའི་དགེ་རྩ་བསྐྱེད་པ་དེ་ཉིད་ཡིན་ཞིང་། འདིར་བྱང་ཆུབ་ཀྱི་སེམས་ཇི་ལྟར་རྒྱུད་ལ་བསྐྱེད་པ་དང་། ཚོགས་གཉིས་ཇི་ལྟར་རྫོགས་ཚུལ་གྱི་ས་བཅད་གཉིས་སུ་ཕྱེས་ནས་བཤད་ན་འཐུས་པ་ཞིག་ཡིན། དེའི་ནང་གི་དང་པོ་བྱང་ཆུབ་ཀྱི་སེམས་ཇི་ལྟར་བསྐྱེད་ཚུལ་ལ་ཡང་། ཐེག་ཆེན་གྱི་རིགས་སུ་ངེས་པའི་ཡོན་ཏན་བཤད་པ་ཞིག་དང་། ལམ་གྱི་གཞི་རྟེན་སྐྱབས་འགྲོ། སྦྱོར་བ་ཚད་མེད་བཞིས་བློ་སྦྱོང་བ། དངོས་གཞི་བྱང་ཆུབ་ཀྱི་སེམས་ཇི་ལྟར་རྒྱུད་ལ་བསྐྱེད་པའི་ཚུལ། བྱང་ཆུབ་ཀྱི་སེམས་དེ་ཉིད་རྒྱུད་ལ་སྐྱེས་ནས་བསླབ་པ་མི་ཉམས་པ་ཇི་ལྟར་སྲུང་ཚུལ་དང་ལྔ་ལྟ་བུ་ཞིག་གིས་མ་བཤད་ཐབས་མེད་ཡིན། ༼ཀ བྱང་ཆུབ་ཀྱི་སེམས་ཇི་ལྟར་བསྐྱེད་ཚུལ། ཀ ཐེག་ཆེན་གྱི་རིགས་ངེས་པའི་ཡོན་ཏན་བཤད་པ། དེའི་ནང་གི་དང་པོ་ཐེག་ཆེན་གྱི་རིགས་སུ་ངེས་པའི་ཡོན་ཏན་གྱི་ཕྱོགས་ནས་བསམ་བློ་ཞིག་བཏང་ན། བདེ་བར་གཤེགས་པའི་བཀའ་ཐ་མ་ངེས་དོན་གྱི་མདོ་སྡེ་ཐམས་ཅད་ཀྱི་བསྟན་དོན་སྙིང་པོ་དེ་ཉིད་ཁམས་བདེ་བར་གཤེགས་པའི་སྙིང་པོ་སྟེ། དཔེ་ནོར་བུ། ནམ་མཁའ། ཆུ་དག་པ་གསུམ་གྱིས་གསུངས་ཡོད་ལ། དེ་རིམ་པ་བཞིན་དུ་ནོར་བུ་ལྟར་ཡོན་ཏན་ལྷུན་གྱིས་གྲུབ་ཡོད་པ། ནམ་མཁའ་ལྟར་གཞན་དུ་འགྱུར་བ་མེད་པ་སྟེ་མི་འགྱུར་བ། ཆུ་དག་པ་ལྟར་དུ་སེམས་ཅན་ཀུན་ལ་ཁྱབ་པར་བསྟན་ཡོད། དེ་ལ་ཐོག་མ་མེད་པའི་ཆོས་ཁམས་དགེ་བ་ཞེས་ཟེར་ཞིང་། དྲི་མས་བསྒྲིབས་ནས་མངོན་སུམ་དུ་མི་གསལ་བའི་སྐབས་སུ་ཁམས་སམ་རིགས་དང་། དྲི་མ་མཐའ་དག་དང་བྲལ་ནས་སངས་རྒྱས་དུས་བྱང་ཆུབ་ཅེས་གསུངས་པའི་ཐ་སྙད་དེ་སྦྱར་ལ། དེ་སེམས་ཅན་ཐམས་ཅད་ལ་ཡོད་པ་ཡིན། ཁོ་རང་གི་ངོ་བོ་དེ་ཇི་ལྟར་ཡིན་ཞེ་ན། སེམས་ཀྱི་ཆོས་ཉིད་འོད་གསལ་བའི་རང་བཞིན་ཡིན་ཞིང་ཁོ་རང་ཉིད་ལ་ཉོན་མོངས་ཀྱིས་གོས་པ་མེད། སྔར་མེད་ཀྱི་ཡོན་ཏན་གསར་དུ་སྐྱེ་ཡོང་རྒྱུ་ཞིག་མེད་ཀྱང་ནུས་པ་རྫོགས་པར་སྣང་མི་སྣང་གི་ཁྱད་པར་དང་། གནས་སྐབས་ལ་སྒྲིབ་བྱེད་ཀྱི་དྲི་མ་སེལ་མི་སེལ་གྱི་ཁྱད་པར་དེ་གནས་པ་ཞིག་ཡིན། དེ་ཡིན་པའི་རྒྱུ་མཚན་གྱིས་རིགས་འདི་ལ་རང་བཞིན་དུ་གནས་པའི་རིགས་དང་། སྒྲུབ་པ་ལས་བྱུང་བའི་རིགས་ཞེས་པའི་དབྱེ་བ་དེ་བྱུང་བ་ཡིན་ལ། དེ་ལྟར་ན་དེ་གཉིས་ཀ་ཡང་རྟེན་དང་བརྟེན་པ་སྟེ། གཅིག་ཆུ་དྭངས་མོ་ལྟ་བུ་ཞིག་ཡིན་ཞིང་། ཅིག་ཤོས་དེའི་ངོས་སུ་གཟུགས་བརྙན་ཤར་སོང་བ་ལྟ་བུ་ཞིག་གི་དབྱེ་བ་ཡིན། འདིའི་སྐོར་ལ་རྒྱས་པར་དབྱེ་བའི་བཤད་པ་དེ་དཔེ་དང་བཅས་པ་མང་བ་ཡིན་ཡང་སྐབས་དོན་རིགས་སམ་བདེ་བར་གཤེགས་པའི་སྙིང་པོ་འདི་ཉོན་མོངས་པས་བསྒྲིབས་ཀྱང་ཉོན་མོངས་པས་མ་གོས་པ་དེ་ཉི་མ་སྤྲིན་གྱིས་བསྒྲིབས་པ་ལྟ་བུ་ཞིག་ཡིན་པས་སྒྲིབ་པ་ཡོད་མེད་དང་སྒྲིབ་པ་ཆེ་ཆུང་གི་ཁྱད་པར་གྱིས་གནས་སྐབས་གསུམ་དུ་ཕྱེས་ནས་བཤད་པ་ཞིག་སྟེ། སྤྲིན་རུམ་ལྟ་བུས་བསྒྲིབས་ཏེ་ཡོད་པ་མ་དག་སེམས་ཅན་གྱི་སྐབས། དག་མ་དག་ཕྱེད་མ་ཕྱེད་འདྲེས་དེ་མ་དག་དག་པ་བྱང་སེམས་ཀྱི་སྐབས། ཤིན་ཏུ་ཡོངས་སུ་དག་ཅིང་སངས་པ་དེ་སངས་རྒྱས་ཀྱི་གནས་སྐབས་ཡིན་པས་དེ་ལྟ་བུ་ཞིག་གི་སྐབས་གསུམ་དུ་ཕྱེ་རྒྱུ་ཡོད། མ་དག་སེམས་ཅན་གྱི་སྐབས་སུ་ཐེག་ཆེན་གྱི་རིགས་ངེས་ལ་རིགས་ཀྱི་རྟགས་ཡོད་པ་ཞིག་སྟེ། དུ་བ་ལས་ནི་མེར་ཤེས་དང་། །ཆུ་སྐྱར་ལས་ནི་ཆུར་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་གསུངས་ཡོད་ལ། དུ་བ་ཡོད་ཕྱིར་མེ་ཡོད་པར་དཔོག་པ་ཡིན་ཞིང་། དེ་བཞིན་དུ་ཆུ་སྐྱར་ལས་ཆུ་ཡོད་པར་ཤེས་པ་ལྟར་དུ་རིགས་སད་པའི་རྟགས་མཐོང་ཆོས་ལ་མངོན་རྒྱུ་ཡོད། དེ་ཇི་ལྟ་བུ་ཞིག་ཡིན་ཞེ་ན། རང་བཞིན་ཆོས་སྐུའི་རིགས་སད་པའི་རྟགས་སུ་སོ་སོ་སྐྱེ་བོ་ཡིན་ཡང་ངེས་དོན་སྟོང་ཉིད་ཀྱི་ཆོས་རེ་གོ་ཐོས་བྱུང་བ་དང་སེམས་ལ་དགའ་བ་ཆེན་པོ་ཡོང་རྒྱུ་དང་། དང་བ་ཆེན་པོ་སྐྱེས་ནས་མིག་ལས་མཆི་མ་འབྱུང་བ། ལུས་ཀྱི་བ་སྤུ་ལྡང་པ་ལྟ་བུའི་དད་པ་དང་། གུས་པ། མོས་པ་འབྱུང་བ་སྟེ། དབུ་མ་འཇུག་པའི་ནང་དུ། སོ་སོ་སྐྱེ་བོའི་དུས་ནའང་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་བརླན་ནས། །ལུས་ཀྱི་བ་སྤུ་ལྡང་པར་གྱུར་པ་གང་ཡིན་པ། །དེ་ལ་རྫོགས་པའི་སངས་རྒྱས་བློ་ཡི་ས་བོན་ཡོད། །དེ་ཉིད་ཉེ་བར་བསྟན་པའི་སྣོད་ནི་དེ་ཡིན་ཏེ། །དེ་ལ་དམ་པའི་དོན་གྱི་བདེན་པ་བསྟན་པར་བྱ། །ཞེས་གསུངས་ལ། གཟུགས་སྐུ་ཆོས་ཅན་གྱི་རིགས་སད་པའི་རྟགས་སུ། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་དེ་ལྟར་མདོ་སྡེ་རྒྱན་ལས་གསུངས་ཡོད། སེམས་ཅན་ལ་སྙིང་རྗེ་མེད་དེ་སེམས་ཅན་རྒྱུ་མ་དྲུད་ན་ཤ་རྩ་ཞིག་མི་འགུལ། སངས་རྒྱས་ལ་དད་པ་མེད་དེ་སངས་རྒྱས་ནམ་མཁའ་ལ་འཕུར་ན་དད་པ་མེད་པ་དེ་ལ་རིགས་ཆད་ཅེས་གསུངས་པ་ཡིན། བདེ་གཤེགས་སྙིང་པོས་སྡིག་རྒན་ལ་ཡང་ཁྱབ་ཀྱང་སྐབས་ཤིག་ཏུ་ལས་ཀྱི་གཞན་དབང་དུ་མངགས་པ་ལས་སྐྱོབ་ཐབས་མེད་པའི་རིགས་ཅན་ཡིན་ལ། སུ་ཞིག་གིས་མ་བསླབས་ཀྱང་སེམས་ཅན་སྡུག་བསྔལ་ཅན་རིག་ན་སྙིང་རྗེ་སྐྱེ་རྒྱུ་དང་། འཁོར་བའི་སྡུག་བསྔལ་འདིས་ཡིད་སུན་ནས་ངེས་འབྱུང་སྐྱེ་རྒྱུ་ཡོད་པ་དེ་ཚོ་ཐེག་པ་ཆེན་པོའི་རིགས་ཅན་དུ་ངེས་པའི་གང་ཟག་ཡིན་པའི་རྟགས་ཡིན། དེ་ལྟ་བུའི་ཐེག་པ་ཆེན་པོའི་རིགས་སད་པའི་གང་ཟག་དེས་བསྒྲུབས་ན་སངས་རྒྱས་རང་ལག་ལ་ཡོད། དེ་ལ་དཔའ་མ་ཞུམ། སེམས་ཀྱི་སྤོབས་པ་བསྐྱེད་དང་། རིགས་སད་པའི་ཕན་ཡོན་རྐྱང་པ་ལ་བསམ་བློ་བཏང་ན། རིགས་ལན་གཅིག་སད་ནས་བཟུང་སྟེ། སེམས་ཅན་ཡིན་པས་ལས་ཉོན་གྱི་དབང་གིས་ངན་སོང་ལ་ལན་རེ་ལན་གཉིས་སྐྱེ་བའི་དབང་དུ་བཏང་ཡང་སྐྱེ་བ་དེ་ཉིད་དར་གྱི་ཕོ་ལོང་བརྡབ་པའི་ཡུན་ཙམ་གྱིས་ཐར་འགྲོ་བ་ཡིན། སྡུག་བསྔལ་ཆུང་བ། རིགས་མཐུན་གྱི་སེམས་ཅན་ཕར་སྨིན་པར་བྱེད་ནུས་པ་དེ་ལྟར་ཡིན་ཞེས་གསུངས་ཡོད། མདོར་ན་སེམས་ཀྱི་རང་བཞིན་འོད་གསལ་བའི་གཞི་གཅིག་དེ་ལས་སྣང་ཆ་གཟུགས་སྐུའི་ཡོན་ཏན་དང་། སྟོང་ཆ་ཆོས་སྐུའི་ཡོན་ཏན་དེ་གཉིས་ཀ་དབྱེར་མི་ཕྱེད་པ་དེ་ཐོག་མ་མེད་པའི་ཆོས་ཁམས་དགེ་བ་ཡིན་པ་སྟེ། འགྱུར་བ་མེད་པའི་ཆ་ནས་རང་བཞིན་གནས་རིགས། དྲི་མ་སྦྱངས་ནས་ཡོན་ཏན་རྒྱས་པར་མངོན་པ་དེ་ཉིད་ཀྱི་ཆ་ནས་རྒྱས་འགྱུར་གྱི་རིགས་ཞེས་བཏགས་པ་ཡིན། རྩ་བ་སེམས་ཉིད་རིག་པའི་ཡེ་ཤེས་ལ་ཐུག་ཡོད། ཁ ལམ་གྱི་གཞི་རྟེན་སྐྱབས་འགྲོ་བཤད་པ། དེ་ཡན་གྱིས་རིགས་ཀྱི་ཡོན་ཏན་བཤད་ཟིན་ནས། གཉིས་པ་ལམ་གྱི་གཞི་རྟེན་སྐྱབས་འགྲོ་བཤད་དགོས་ལ། སྐྱབས་སུ་མ་སོང་པ་ལ་སྡོམ་པ་མི་སྐྱེ་བར་གོང་ནས་ཀྱང་བཤད་མྱོང་ཞིང་། སྡོམ་པས་རྒྱུད་མ་བསྡམས་པ་ཞིག་ལ་ལམ་མེད་པ་ཡིན་པའི་ཕྱིར་ན་ཐར་བའི་ལམ་ལ་སློབ་པའི་གང་ཟག་གིས་ཐོག་མ་ལམ་གྱི་གཞི་རྟེན་སྐྱབས་འགྲོ་ཡིན་པས་མ་བསླབ་ཐབས་མེད་ཡིན། འདི་ལ་གང་ཟག་སྐྱེས་བུ་ཆུང་དང་། འབྲིང་དང་། ཆེན་པོའི་རིམ་པ་ཡིས་སྐྱབས་སུ་འགྲོ་ཚུལ་ལ་ཁྱད་པར་ཡོད། སྐྱེས་བུ་ཆུང་ངུ་ཞེས་པ་ཅི་འདྲ་ཞིག་ལ་བཤད་པ་ཡིན་ཟེར་ན། བློ་ཆུང་ཞིག་ལ་ཟེར་ཞིང་མི་གཟུགས་ཆུང་ཆུང་ཞིག་ལ་ཟེར་བ་མ་ཡིན་པར་རྒྱང་མིག་རིང་པོའི་ཕྱི་ཐག་མེད་པའི་གང་ཟག་མཐའ་ཅུང་ཟད་མི་རིག་པའི་རིགས་ཅན། ཐར་བ་མི་བ་གཅིག་ཀྱང་མི་ཤེས་པ། འཁོར་བའི་བདེ་འབྲས་འདོད། མདོར་ན་སྐྱིད་པོ་དགོས། དགའ་མོ་དགོས། ཕྱུག་པོ་དགོས། ན་མི་ཉན། ཚེ་རིང་དགོས་ཤིང་། དེ་ཡང་ཚེ་འདི་ལ་སྐྱིད་ན་སྐྱིད་པ་ཡིན་སྙམ་ཞིང་། དེའི་ཆེད་དུ་སྐྱབས་ཡུལ་ཞིག་ལ་སྐྱབས་སུ་འགྲོ་བ་ཞིག་དང་། དེས་མི་ཚད་པར་ཚེ་འདིར་མ་ཟད་ཕྱི་མ་སྐྱིད་དགོས་འདུག་མ་གཏོགས་ཚེ་ཕྱི་མ་ཞེས་པ་ཞིག་ཡོད་ནི་ཡོད་ཅིང་། དེ་ཡོད་ཕྱིར་དེ་དུས་སྡུག་ཚེ་སྡུག་འདུག་སྙམ་མཁན་ཞིག་ཀྱང་ཡོད་ལ། དེ་ལྟ་བུའི་རིགས་ཅན་གྱིས་ལྷ་མིའི་གནས་འཁོར་བའི་བདེ་འབྲས་ལ་དམིགས་པ་ཞིག་སྟེ་དེ་ལྟར་སྐྱེས་བུ་ཆུང་ངུ་ལ་ཡང་རིགས་གཉིས་ཡོད། དེ་ལ་ཡང་གྲུབ་མཐར་ཞུགས་མ་ཞུགས་ཀྱི་ཁྱད་པར་ཡང་ཡོད་ལ། དཀོན་མཆོག་ལ་སྐྱབས་འགྲོ་བྱས་ཀྱང་བསམ་པ་མ་དག་ན་སྐྱེས་བུ་ཆུང་ངུའི་སྐྱབས་འགྲོར་དེ་ལྟར་བྱས་ནས་འགྱུར་འགྲོ་བ་ཡིན། སྐྱེས་བུ་འབྲིང་གི་སྐྱབས་འགྲོ་ཞེས་པ་ཞིག་ཡོད་ཅིང་དེ་གང་ཡིན་ཞེ་ན། ཉན་ཐོས་དང་རང་སངས་རྒྱས་ཏེ། ཉན་ཐོས་དང་རང་རྒྱལ་ཐེག་པ་དམན་པའི་རིགས་ཅན་ཚང་མ་ཡིན། དེ་ཚང་མ་ཐེག་པ་དམན་པ་ཡིན་པའི་རྒྱུ་མཚན་གང་ཡིན་ཞེ་ན། འཁོར་བའི་སྡུག་བསྔལ་ལ་སྐྲག་ནས་འཁོར་བའི་སྡུག་བསྔལ་ཞི་བའི་ཞི་བ་མྱ་ངན་ལས་འདས་པ་དེ་རང་དོན་དུ་འཚོལ་གྱིན་ཡོད་པས་ཡིན་ལ། ཞི་བ་མྱ་ངན་ལས་འདས་པའི་ཐར་བ་དེ་ཉིད་རང་དོན་ལ་འཚོལ་བའི་ཆེད་དུ་སྐྱབས་སུ་འགྲོ་བ་དེ་ཉིད་ཡིན། སྐྱེས་བུ་ཆེན་པོའི་སྐྱབས་འགྲོ་དེ་ཅི་འདྲ་ཞིག་ཡིན་ཞེ་ན། གཞན་དོན་དུ་སྐྱབས་སུ་འགྲོ་བ་སྟེ་དམྱལ་བར་སྐྱེ་བ་བས་ཀྱང་རང་དོན་ཞི་བདེར་སྦྱོར་བ་དེ་ལ་འཇིགས་ཤིང་སྐྲག་ནས་སྐྱབས་སུ་འགྲོ་བ་ཡིན། དམྱལ་བ་སྐྱེ་རྒྱུ་དེ་ཐར་བ་དམ་པའི་གཏན་གྱི་གེགས་མ་ཡིན་ཞིང་ཐར་རྒྱུ་ཡོད་པ་ཡིན་ལ། རང་དོན་ཞི་བདེར་སྦྱོར་བ་གཏན་གེགས་ཡིན་པས་གསུངས་པ་ཡིན། ཡིན་ན་ཡང་སྐྱེས་བུ་ཆུང་ངུ་ལྷ་མིའི་ཐེག་པ་དང་། འབྲིང་ཉན་རང་གི་ཐེག་པ་ཡང་སངས་རྒྱས་ཀྱི་བསྟན་པ་ཡིན་ལ། ཆོས་ལ་བཟང་ངན་ཕྱེས་ན་ལོག་རྟོག རང་ཉིད་ཉམས་པའི་རྒྱུ་ཡིན་ཞིང། དེ་ཡིན་ཕྱིར་བསྟན་པ་ཐམས་ཅད་འགལ་མེད་དུ་ཉམས་སུ་ལེན་པ་ལ་བློ་རིམ་དང་བསྟུན་པའི་རིམ་སྒྲུབ་དེ་དཔེར་བཞག་ན་སྐས་ཀྱི་གདང་བུ་ལྟ་བུ་བྱེད་དགོས་གསུངས་ཡོད། སྐས་ཐེམ་འོག་མ་ནས་ཡར་གོང་མར་མ་བརྒྱུད་ན་གོང་མའི་སྟེང་ལ་བརྩེགས་མཆོང་རྒྱག་ས་མི་ལོན་པ་དེ་ལྟ་བུ་ཡིན་གསུངས་ཤིང་། རང་ཉམས་ལ་ཁ་བསྐོར་ན་སྐྱེས་བུ་ཆུང་ངུའི་སྐྱབས་འགྲོ་ཙམ་ཡང་བྱེད་མི་ཤེས་པ་མིན་ན་ཅི་ཡིན། སྐྱབས་སུ་སོང་ནས་སྐྱབས་འགྲོའི་བསླབ་བྱ་བསྲུང་དགོས་ལ། ད་ཞག་བཤད་པའི་དགག་པའི་བསླབ་བྱ། བསྒྲུབ་པའི་བསླབ་བྱ། ཆ་མཐུན་གྱི་བསླབ་བྱ་དང་དགུ་ཡོད་ཅིང་། དགག་སྒྲུབ་ཆ་མཐུན་གྱི་བསླབ་བྱ་དགུ་བོ་ཇི་བཞིན་དུ་སྲུང་མ་ཤེས་ན་སྐྱེས་བུ་ཆུང་ངུའི་སྐྱབས་འགྲོ་ཙམ་ཡང་ལག་ལེན་དམ་བཅའ་བཞིན་དུ་མ་འབྱོར་བ་ཡིན་པས་དཀོན་མཆོག་གི་སྐྱབས་འོག་ལ་ཚུད་ཡོད་མེད་དེ་རང་གིས་རང་ལ་འདྲི་རྟགས་རྒྱག་ས་ལ་ཐུག་ཡོད། དེ་ལྟ་བུ་དེ་ཉིད་ཀྱིས་འབྲིང་དེ་ཆེན་པོར་བྱས་ཏེ་བསྒྱུར་ཐུབ་མེད། དེས་ན་དེའི་གནད་དེ་ཤེས་པའི་ཐོག་ནས་ལམ་ཐམས་ཅད་ཀྱི་རྨང་གཞི་སྟེ་ཁང་པ་བརྩིགས་ན་རྨང་རྡོ་རྩིག་དགོས་པ་ལྟར་སྐྱབས་འགྲོའི་རྨང་དེ་བརྟན་པོ་ཞིག་ཞོག་རྒྱུ་དེ་གལ་ཆེ་བ་ཡིན། སྐྱབས་སུ་འགྲོ་བའི་དུས་ལ་ཁྱད་པར་ཡོད་ཅིང་། སྐྱབས་སུ་འགྲོ་བའི་རྟེན་གྱི་གང་ཟག་བློ་སྟོབས་ཆུང་འབྲིང་ཆེ་གསུམ་པོས་རང་རང་གི་བསྒྲུབ་བྱའི་འབྲས་བུ་ཐོབ་ཆེད་དུ་ཕལ་བ་སྐྱེས་བུ་ཆུང་ངུ་དེ་ཉིད་ཀྱིས་ཚེ་འདིའི་འདོད་དོན་ཅི་ཞིག་འགྲུབ་ཆེད་དུ་ཡིན་ན་དེ་མ་འགྲུབ་ཀྱི་བར་གྱི་དུས་སུ་སྐྱབས་སུ་འགྲོ་ལ། དྲག་ཤོས་དེ་ཉིད་ཀྱིས་ཕྱི་མ་མཐོ་རིས་མ་ཐོབ་ཀྱི་བར་དུ་ཡིན་ཞིང་། སྐྱེས་བུ་ཆུང་ངུ་དེ་ལ་ཡང་བཟང་ངན་གཉིས་ལྟ་བུ་ཞིག་ཡོད། དེ་གཉིས་ཀའི་དུས་ཚོད་ཀྱི་རིམ་པ་དེ་ལྟ་བུ་ཞིག་ཡིན། འབྲིང་གཉིས་ཀ་ཕལ་བ་ལས་མཆོག་ཡིན་ཞིང་། གནས་སྐབས་ཇི་སྲིད་འཚོ་མ་ཤིའི་བར་དུ། མཐར་ཐུག་ཉན་རང་དགྲ་བཅོམ་མ་ཐོབ་ཀྱི་བར་དུ་སྐྱབས་སུ་འགྲོ་བ་ཡིན། སྐྱེས་བུ་ཆེན་པོས་དུས་ཚོད་ཇི་ལྟ་བུ་ཞིག་གི་བར་དུ་སྐྱབས་སུ་འགྲོ་བ་ཡིན་ཞེ་ན། སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་འདོད་ཀྱི་སྐྱེས་བུ་ཆེན་པོའི་བླ་ན་མེད་པའི་སེམས་ཏེ། སྙིང་པོ་བྱང་ཆུབ་ལ་མཆིས་ཀྱི་བར་རམ་སངས་རྒྱས་ཀྱི་ཡེ་ཤེས་མ་ཐོབ་ཀྱི་བར་དུ་སྐྱབས་སུ་འགྲོ་ལ། སྐྱབས་སུ་འགྲོ་བའི་དུས་ཀྱི་ཁྱད་པར་དེ་ལྟ་བུ་ཞིག་ཡིན། གང་ལ་སྐྱབས་སུ་འགྲོ་བའི་ཡུལ་ལ་ཡང་ཐུན་མོང་དང་ཐུན་མོང་མ་ཡིན་པའི་ཁྱད་པར་ཡོད་ཅིང་། སྐྱེས་བུ་ཆུང་འབྲིང་གཉིས་ཀས་སྐྱབས་ཀྱི་རྟེན་དུ་ཁས་བླངས་པའི་དཀོན་མཆོག་གསུམ་པོ། ཆེན་པོས་ཀྱང་གནས་སྐབས་སུ་དེ་ལ་སྐྱབས་སུ་བཟུང་བའི་ཕྱིར་ན་ཐུན་མོང་གི་སྐྱབས་ཡུལ་ཟེར་ལ། ཐེག་ཆེན་ཐུན་མིན་གྱིས་སངས་རྒྱས་ཆོས་ཀྱི་སྐུ། ཆོས་ཐེག་པ་ཆེན་པོའི་ཆོས། དགེ་འདུན་བྱང་ཆུབ་སེམས་དཔའི་དགེ་འདུན་ཏེ་དེ་རྣམས་ཡིན། ད་རུང་རྒྱུ་དང་འབྲས་བུའི་སྐྱབས་འགྲོའི་དབྱེ་བ་ཡོད་ཅིང་། དེའི་ཐད་ནས་མཚན་ཉིད་ཐེག་པས་རྒྱུའི་སྐྱབས་འགྲོ་དེ་འབྲས་བུའི་ས་འཐོབ་པའི་སྐྱེལ་མ་ལྟ་བུ་དང་། འབྲས་བུའི་སྐྱབས་འགྲོ་དེ་འབྲས་བུ་དཀོན་མཆོག་གསུམ་རང་རྒྱུད་ལ་དངོས་སུ་གྲུབ་པར་འདོད་པ་དེ་ཉིད་ཡིན། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་པའི་ཕྱིར། །ཆོས་རྣམས་གཉིས་དང་འཕགས་པའི་ཚོགས། །གཏན་གྱི་སྐྱབས་གནས་མ་ཡིན་ནོ། །ཞེས་གསུངས་ཏེ། མཐར་ཐུག་གི་སྐྱབས་སངས་རྒྱས་ཆོས་སྐུ་ཉག་གཅིག་ཏུ་བཞེད་པ་ཡིན། ཐེག་ཆེན་གསང་སྔགས་ཀྱི་ལུགས་ལ་ཅི་འདྲ་ཞིག་ཡིན་ཞེ་ན། རང་ལ་ཡེ་ནས་ཡོད་པའི་སེམས་ཉིད་སངས་རྒྱས་རང་ཆས་སུ་ཡོད་པ་དེ་ཉིད་མངོན་དུ་འགྱུར་བའི་ཆེད་དུ་ཐུན་མོང་གི་ཡུལ་ཕྱིའི་དཀོན་མཆོག་གསུམ་ལ་སྐྱབས་སུ་འགྲོ་ཞོར་དུ། ཐུན་མིན་སེམས་ཉིད་མ་སྐྱེས་གདོད་ནས་དག་པའི་ངང་ལ་མཉམ་པར་འཇོག་པ་དེ་ཉིད་ཡིན། དེ་བཞིན་དུ་དཀྱིལ་འཁོར་སོ་སོའི་དཀོན་མཆོག་གསུམ་དང་། བསྟན་པ་སྤྱིའི་དཀོན་མཆོག་གསུམ་གཉིས་ཀ་རྒྱུའི་སྐྱབས་ཡུལ་དང་། དེ་ལ་སྐྱབས་སུ་འགྲོ་བ་དེ་ཉིད་རྒྱུའི་སྐྱབས་འགྲོ། སེམས་ཉིད་རང་བྱུང་གི་ཡེ་ཤེས་དཀོན་མཆོག་གསུམ་དུ་ཡེ་ནས་བཞུགས་པ་དེ་ཉིད་འབྲས་བུའི་སྐྱབས་ཡུལ་དང་། གཞན་ལ་མི་སྨིན་པའི་རང་ལ་རང་གཤིས་ལྷུན་གྲུབ་ཏུ་ཡོད་པ་དེ་ཉིད་ཀྱི་ངང་ལ་འཇོག་པ་འབྲས་བུའི་སྐྱབས་འགྲོ་ཞེས་གསུངས་ཡོད། དཀོན་མཆོག་གསུམ་ངོས་འཛིན་ལུགས་ལ་ཁྱད་པར་དེ་ལྟ་བུ་ཆེ་བ་ཡིན། ཐེག་པ་ཆུང་ངུ་ཚང་གིས་སངས་རྒྱས་མཆོག་གི་སྤྲུལ་བའི་སྐུ། ཆོས་ལུང་རྟོགས་གཉིས་ཀྱི་ནང་གི་ལུང་གི་ཆོས་གསུང་རབ་ཡན་ལག་བཅུ་གཉིས། རྟོགས་པའི་ཆོས་སོ་སོའི་རྒྱུད་ཀྱི་ལམ་དང་ཏིང་ངེ་འཛིན་ལ་སོགས་པ་དེ་ལ་ངོས་འཛིན་པ་ཡིན། དགེ་འདུན་ལ་སོ་སོ་སྐྱེ་བོའི་དགེ་འདུན་དང་། འཕགས་པའི་དགེ་འདུན་གཉིས་ཡོད་པའི་ནང་གི་དགེ་ཚུལ་ཕ་མ་ལ་སོགས་པ་དགེ་འདུན་ཆུང་ངུ་དང་། བསྙེན་པར་རྫོགས་པའི་གང་ཟག་ལ་དགེ་སློང་གི་དགེ་འདུན་ཆེན་པོ་གསུངས་པའི་དབྱེ་བ་ཡང་ཡོད། དགེ་སློང་བཞི་འདུས་པ་ཡན་ཆད་ལ་དགེ་འདུན་འདུས་པའི་མཚན་ཉིད་ཐོབ་པ་དེ་ལྟ་བུ་ཡིན་ཞིང་། དེ་དག་སོ་སྐྱེའི་དགེ་འདུན་ཡིན་ལ། འཕགས་པའི་དགེ་འདུན་ལ་བསམ་བློ་བཏང་ན། རྒྱུན་ཞུགས། ཕྱིར་འོང་། ཕྱིར་མི་འོང་གསུམ་གྱི་ཞུགས་གནས་གཉིས་ཞེས་བརྩི་རྒྱུ་ཡོད་པས་རྒྱུན་ཞུགས། ཕྱིར་འོང་། ཕྱིར་མི་འོང་གསུམ་གྱི་ཞུགས་གནས་གཉིས་ཀ་དང་། དགྲ་བཅོམ་པ་ཞུགས་པ་ཚང་མ་འཕགས་པའི་དགེ་འདུན་དང་། དགྲ་བཅོམ་གནས་པ་མཐར་ཐུག་གི་ཐོབ་བྱ་སངས་རྒྱས་སུ་ངོས་འཛིན་པ་ཡིན། ཐེག་ཆེན་ཐུན་མོང་གི་ལུགས་ལ་སངས་རྒྱས་ཆོས་སྐུ། ལོངས་སྐུ། སྤྲུལ་སྐུ་སྟེ་སྐུ་གསུམ་གྱི་བདག་ཉིད། དེ་ཡང་དག་པ་གཉིས་ལྡན་མཐར་ཐུག་པ་དང་། ཆོས་དེ་ངོ་བོ་སྨྲ་བསམ་བརྗོད་མེད། རང་བཞིན་སངས་རྒྱས་ཀྱི་ས་ལ་འགྲོ་བའི་ལམ་དང་ཉོན་མོངས་པའི་གཉེན་པོ། རྣམ་པ་འགོག་ལམ་གྱིས་བསྡུས་པའི་བདེན་གཉིས་ཀྱི་མཚན་ཉིད་ཅན་ཞིག་ལ་ཞུ་བ་ཡིན། དགེ་འདུན་ཡང་འཕགས་པ་ས་བཅུ་ལ་གནས་པ། ཐུན་མིན་སྔགས་ཀྱི་ཐེག་པའི་སྐབས་སུ་རྒྱུད་སྡེ་སོ་སོའི་ཐེག་རིམ་གྱི་དབང་གིས་ཐ་དད་པ་ཡོད་པ་དེ་ཉིད་ཞིབ་ཏུ་སོ་སོའི་རང་གཞུང་ལས་ཤེས་པར་བྱ་བ་ཞིག་ཡིན། སངས་རྒྱས་ཆོས་དང་དགེ་འདུན་གསུམ་ལ་དཀོན་མཆོག་གསུམ་ཞེས་ཞུ་བའི་དོན་ཅི་ཡིན་ཞེ་ན། འབྱུང་བ་དཀོན་ཕྱིར་དྲི་མེད་ཕྱིར་ལ་སོགས་པའི་ལུང་དོན་བཞིན་དུ་འཇིག་རྟེན་ན་དཀོན་ཞིང་རིན་ཐང་ཆེ་བ་རིན་པོ་ཆེ་ཡིན་ལ། རིན་པོ་ཆེ་དང་ཆོས་མཐུན་པ་དྲུག་གིས་ཁྱད་དུ་འཕགས་པའི་མཆོག་ཡིན་པ་དང་དཀོན་པ་རྣམས་ཀྱི་མཆོག་ཡིན་པའི་ཕྱིར་ན་དཀོན་མཆོག་ཅེས་གསུངས་པ་ཡིན། དཀོན་མཆོག་དེ་གསུམ་དུ་འཇོག་དགོས་པའི་རྒྱུ་མཚན་ཅི་ཞིག་ཡིན་ཞེ་ན། སྟོན་པ་བསྟན་པ་སློབ་དོན་གྱིས། །ཐེག་པ་གསུམ་དང་བྱེད་གསུམ་ལ། །མོས་པ་རྣམས་ཀྱི་དབང་བྱས་ནས། །སྐྱབས་གསུམ་རྣམ་པ་བཞག་པ་ཡིན། །ཞེས་གསུངས་པས། སྟོན་པའི་ཡོན་ཏན་བསྟན་པའི་དོན་དང་ཐེག་ཆེན་པའི་དབང་དུ་གཙོ་བོར་བྱས་ཏེ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ་ཞེས་བསྟན་ལ། དེའི་བསྟན་པའི་ཡོན་ཏན་བསྟན་པའི་དོན་དང་རང་སངས་རྒྱས་པའི་གང་ཟག་གི་དབང་དུ་གཙོ་བོར་བྱས་ནས་འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ་ཞེས་བསྟན། སྟོན་པས་བསྟན་པའི་བསྟན་པ་ལ་ལེགས་པར་ཞུགས་པའི་སློབ་མའི་ཡོན་ཏན་བསྟན་པའི་དོན་དང་ཉན་ཐོས་ཀྱི་དབང་དུ་གཙོ་བོར་བྱས་ཏེ་ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ་ཞེས་བསྟན་ཅིང་རྣམ་པར་བཞག་པ་ཡིན། མདོར་ན་གནས་སྐབས་ཀྱི་སྐྱབས་དཀོན་མཆོག་གསུམ་པོ་ཡིན་ཡང་མཐར་ཐུག་གི་སྐྱབས་སངས་རྒྱས་ཉག་གཅིག དེ་ཡང་སངས་རྒྱས་ཆོས་སྐུ་ལ་འདུས་པ་དེ་ཉིད་གོང་ནས་ཀྱང་བཤད་པ་ལྟར་དུ་ཡིན། དམན་ལམ་ས་བརྒྱད། ཐེག་པ་ཆེན་པོའི་ས་བཅུ། ལམ་ལྔ། དེའི་སྐབས་སུ་ཕར་ཕྱིན་བཅུ་ཇི་ལྟར་རྫོགས་ཚུལ། སངས་རྒྱས་སྐུ་བཞིའི་བཤད་པ། མདོ་སྔགས་ཀྱི་སངས་རྒྱས་ལ་ཁྱད་པར་ཡོད་མེད། སྔགས་ཀྱི་བཅུ་དྲུག་ཡེ་ཤེས་བླ་མའི་སར་ཇི་ལྟར་རྩི། ཐུན་མིན་རིག་འཛིན་ནང་གི་དགེ་འདུན་གྱི་སྐོར། རིག་འཛིན་རྣམ་པ་བཞིས་ས་ལམ་ཇི་ལྟར་བགྲོད་པ་ལ་སོགས་པ་འདིའི་སྐབས་ཀྱི་རྣམ་བཞག་གི་དཀའ་གནད་ཤིན་ཏུ་མང་པོ་བཤད་རྒྱུ་ཡོད་ཅིང་འདི་ལྟ་བུ་ཞིག་གི་སྐབས་སུ་བཤད་ཀྱིས་མི་ལོང་པ་ཞིག་ཡིན། ཀློག་པ་ཐོས་བསམ་པ་ཚང་མས་མཁྱེན་ལ། མི་སྐྱ་ཕོ་མོ་རྣམས་ཀྱིས་སྐྱབས་འགྲོའི་རྣམ་བཞག་གི་སྤྱི་ཁོག་དེ་ཉིད་ངེས་པའི་སྟེང་ནས་ཐ་མལ་པས་ངན་སོང་གི་སྡུག་བསྔལ་ལ་སྐྲག མཐོ་རིས་ཀྱི་ཡོན་ཏན་འདོད། ཉན་རང་གིས་དེའི་ཐོག་ཏུ་སྲིད་པ་མཐོ་དམན་ཐམས་ཅད་ཀྱི་སྡུག་བསྔལ་ལ་འཇིགས་ནས་དད་པ་གསུམ་བསྐྱེད། ཐེག་ཆེན་པས་སྙིང་རྗེའི་དབང་གིས་གཞན་འཁོར་བ་ལས་སྐྱོབ་པའི་ཆེད་དུ་སྐྱབས་སུ་འགྲོ་བ་ཡིན། དེའི་ཕྱིར་ན་བརྩེ་ཆེན་སྙིང་རྗེས་ཞེས་པའི་ཚིག་ལ་དངོས་སུ་སྦྱར་ནས་ཚིག་དོན་འགྲེལ་རྒྱུ་ཡིན་ལ། འདིའི་ནང་གི་ལ་ལ་ཞིག་མི་ཤེས་མ་གཏོགས་མང་ཆེ་བ་སྐྱབས་སྡོམ་ཞུས་ཚར་བ་འབའ་ཞིག་ཡིན། མར་གྱུར་མཁའ་མཉམ་གྱི་སེམས་ཅན་གྱི་དོན་ལ་སྐྱབས་སྡོམ་ལེན་པའི་བློ་བསྐྱེད་དགོས་ཞེས་བློ་སྦྱོང་དང་། ཆོ་ག་ཐུན་མོང་གི་ལུགས་ཡིན་ཡང་ཐེག་ཆེན་སོ་ཐར་གྱི་སྡོམ་པ་སྐྱེ་ཞེས་ས་སྐྱ་པཎ་ཆེན་གྱིས་གསུངས་པའི་ལུང་ཞིག་ཀྱང་དྲངས་ཏེ། སྐྱབས་སྡོམ་འདི་སོ་ཐར་རིགས་བདུན་གྱི་ནང་ལ་རྩི་སྲོལ་སྤྱིར་བཏང་དུ་མེད་ཀྱང་སྡོམ་པ་ཐམས་ཅད་ཀྱི་རྨང་གཞི་འདི་མེད་ན་སྡོམ་པ་གཅིག་ཀྱང་ཐོབ་རྒྱུ་མེད་པ་དེ་ཉིད་སྔར་ཡང་བཤད་མྱོང་བ་ཡིན། དེ་ལྟར་བྱས་ནས་ཆོ་ག་བཞིན་དུ་སྦྱོར་དངོས་རྗེས་གསུམ་ཚང་པའི་བསླབ་བྱ་འདོན་པ་དང་བཅས་པ་དུས་རྒྱུན་གྱི་ཕྱག་ལེན་ལྟར་དུ་བྱས་པ་དང་དེ་བཞིན་དུ་དོན་ཡང་གོ་ཡོད་ལས་ཆེ། སྐྱབས་འགྲོའི་བསླབ་བྱ་ཉམས་སོང་བ་ཡིན་ན་གྱང་ལོག་སོང་བའམ་གྱང་འགྱེལ་བའི་རི་མོ་ལ་དཔེ་བཞག་པ་སྟེ། གྱང་ལོག་ཚར་དུས་རི་མོ་ལྷག་མེད་པར་རི་མོ་ཞིག་ནས་གས་འཐོར་འགྲོ་བ་ཡིན་ལ། དེ་ལྟར་དུ་གོང་མའི་ཡོན་ཏན་ཐམས་ཅད་ཉམས་པར་མ་ཟད་ངན་སོང་གི་སྡུག་བསྔལ་མྱོང་བ་ཡིན་ཞིང་། སྐྱབས་དང་སྐྱོབ་པ་རྟེན་ས་རེ་ས་མེད་སོང་བ་ཡིན། དཀོན་མཆོག་གསུམ་གྱི་སྐྱབས་ཡུལ་མེད་སོང་ན་སྐྱབས་འགྲོའི་བསླབ་བྱ་ཉམས་ནས་དེའི་སྐྱབས་འོག་ནས་བུད་སོང་བ་ཡིན་ལ། དེ་མ་ཉམས་ན་བསོད་ནམས་དང་ཡེ་ཤེས་ཀྱིས་ཚོགས་གཉིས་རྫོགས་པ་དང་། འཇིགས་དང་སྡུག་བསྔལ་ཐམས་ཅད་ཞི་བ་ནས་མའགོ་བཟུང་སྟེ་མཐར་ཐུག་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་གོ་འཕང་ཐོབ་པའི་གཞི་རྟེན་ཡང་འདི་ཡིན། དེ་ཡིས་ལམ་གྱི་གཞི་རྟེན་སྐྱབས་འགྲོ་ཞེས་འདི་གནད་ཆེ་བའི་སྟབས་ཀྱིས་ཁྱིམ་པ་ཕོ་མོ་ཚོའི་ཚོད་དང་བསྟུན་ནས་ཞིབ་བཤད་བྱས་པའི་ཚུལ་ཡིན། ག སྦྱོར་བ་ཚད་མེད་བཞིས་བློ་སྦྱང་བ། རྩ་བའི་ཚིག་ལ་བརྩེ་ཆེན་སྙིང་རྗེས་ཞེས་གསུངས་པས་སྙིང་རྗེས་དྲངས་པའི་བྱང་སེམས་བཤད་པའི་སྔོན་དུ་གང་གིས་དྲངས་པའི་སྙིང་རྗེ་སོགས་ཚད་མེད་བཞི་བོ་དེ་མ་བཤད་ཐབས་མེད་ཡིན་ལ། དེས་ན་འདིའི་ས་བཅད་གསུམ་པ་དེ་སྦྱོར་བ་ཚད་མེད་བཞི་བཤད་པ་ཡིན། དེ་ཡིན་ན་འདི་བགྲང་བའི་གོ་རིམ་ལ་བྱམས་དང་། སྙིང་རྗེ། དགའ་བ། བཏང་སྙོམས་བཞི་རུ་རྩི་བ་ཡིན་ལ། འདི་དཔེ་དང་སྦྲེལ་ནས་བཤད་ན། བྱམས་པའི་ས་གཞི་ལ། སྙིང་རྗེའི་མེ་ཏོག་བཀྲམ་པ་དེ་ཉིད། དགའ་བའི་གྲིབ་བསིལ་དང་། བཏང་སྙོམས་ཀྱི་ཆུ་གཙང་གིས་བརྒྱན་པའི་སྐྱེད་མོས་ཚལ་ཞིག་གིས་སྲིད་པའི་མགྲོན་པོའི་ངལ་དུབ་སེལ་ནས་དབུགས་དབྱུང་བྱེད་པའི་དོན་ལ་སྦྱར་ནས་གསུངས་ས་ཡོད། བྱམས་པ་ཡིན་ཚད་བྱམས་པ་ཚད་མེད་དང་། སྙིང་རྗེ་ཡིན་ཚད་སྙིང་རྗེ་ཚད་མེད། དེ་བཞིན་དུ་དགའ་བ། བཏང་སྙོམས་ཡིན་ཚད་པོ་དགའ་བ། བཏང་སྙོམས་ཚད་མེད་ཡིན་པའི་ངེས་པ་མེད་ལ། བརྩེ་ཆེན་ཞེས་པ་འདི་ལ་ཆེན་ཞེས་པའི་སྒྲ་ཞིག་ཆུང་ཆུང་མ་ཡིན་པར་བསྟན་ཏེ། སངས་རྒྱས་བཅོམ་ལྡན་འདས་ཀྱིས་ཡུམ་བར་མའི་ནང་དུ་རབ་འབྱོར་ཞེས་བོས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱམས་པ་ཆེན་པོ། སྙིང་རྗེ་ཆེན་པོ། དགའ་བ་ཆེན་པོ། བཏང་སྙོམས་ཆེན་པོ་བསྒོམ་པར་བྱའོ། །ཞེས་གསུངས་ཡོད་ལ། འོ་ན་ཆེན་པོ་མ་ཡིན་པའི་བྱམས་སོགས་བཞི་བོ་བསྐྱེད་ན་ཅི་ཞིག་ཡིན་ཞེ་ན། ཕན་ཡོན་ཡོད་ཀྱང་སྲིད་པ་མངོན་པར་འདུ་བྱེད་པ་དང་བཅས་པ་ཡིན་པའི་རྒྱུ་མཚན་གྱིས་དེ་ལྟ་བུ་དེ་ཉིད་ལ་ཚངས་པའི་གནས་པ་བཞི་ཞེས་གསུངས་པ་ཡིན། ཚད་མེད་ཀྱི་མིང་དོན་གཉིས་ཀ་མེད་ལ། ཚད་མེད་བཞི་ཡིན་པ་དེ་ཅི་འདྲ་ཞིག་ཡིན་ཟེར་ན། ཚད་མེད་བཞི་འདི་དམིགས་པ་དང་རྣམ་པ་གཉིས་ཀྱི་སྟེང་ནས་བཤད་དགོས་ཤིང་། དམིགས་པ་སེམས་ཅན་ཐམས་ཅད་ལ་དམིགས་ཏེ་བློའི་རྣམ་པ་དམིགས་བཅས་ཀྱི་ཚད་མེད་བཞི་དང་། དམིགས་པ་མེད་པ་ཆོས་ཉིད་དེ་བཞིན་ཉིད་ལ་དམིགས་ཏེ་བློའི་རྣམ་པ་དམིགས་མེད་ཀྱི་ཚད་མེད་བཞི་བཤད་པ་དེ་ལྟ་བུ་ཞིག་ཡིན་ལ། གོང་ནས་བཤད་པའི་ཚངས་པའི་གནས་པ་བཞི་བོ་དམིགས་རྣམ་མ་དག་པའི་ཆ་ནས་ཚངས་པའི་ལྷ་གནས་སུ་སྐྱེ་བ་ལེན་པའི་རྒྱུ་ཙམ་ལས་འགྱུར་མ་ཐུབ་པ་ཡིན་ཞིང་། སེམས་ཀྱི་ཀུན་སློང་བཟང་ངན་དང་། དམིགས་པ་དག་མ་དག་གིས་དགེ་རྩ་ཆེ་ཆུང་དེ་ལྟར་དུ་ཁྱད་པར་ཆེན་པོ་འབྱུང་བ་དེ་ཉིད་འདི་ལ་མིན་ཡང་ཐམས་ཅད་ལ་གཅིག་མཚུངས་སུ་གོ་བ་ལེན་རྒྱུ་དེ་ཉིད་ཡིན། འདི་ལ་ཞིབ་ཏུ་དབྱེ་བ་ཕྱེས་ཏེ་རྒྱས་པར་སྤྲོས་ནས་བཤད་ན། དམིགས་པ་ཚད་མེད། ཚོགས་ཚད་མེད། ཆོས་ཚད་མེད། ཡེ་ཤེས་ཚད་མེད་བཞི་བོ་ཚང་དགོས་པའི་བཤད་པ་ཡོད་ཀྱང་བསྡུས་ན་རྣམ་མཁྱེན་རྫོགས་བྱང་རྒྱུ་འབྲས་དང་འབྲེལ་བའི་སེམས་ཅན་ཐམས་ཅད་ལ་དམིགས་པའི་བྱམས་སོགས་བཞི་བོ་དེ་ཚད་མེད་བཞི་ཡིན་པ་དེ་ཤེས་དགོས། དེ་རེ་རེ་བཞིན་དུ་དམིགས་པ། རྣམ་པ། ངོ་བོ་གསུམ་གྱི་སྟེང་ནས་བཤད་ན། བྱམས་པའི་དམིགས་ཡུལ་དེ་སེམས་ཅན་བདེ་བ་དང་མི་ལྡན་པ་ཞིག་ལ་དམིགས་ཏེ་རྣམ་པ་དང་ངོ་བོ་དེ་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་སྙམ་པ་དང་། སྙིང་རྗེས་སེམས་ཅན་སྡུག་བསྔལ་བ་ཉམ་ཐག་པ་ཞིག་ལ་དམིགས་ཏེ་རྣམ་པ་དང་ངོ་བོ་དེ་སྡུག་བསྔལ་དང་བྲལ་བར་གྱུར་ཅིག་སྙམ་པ་དང་། དགའ་བས་སེམས་ཅན་རང་གི་བདེ་བས་སྐྱིད་ཅིང་འབྱོར་བ་ཞིག་ལ་དམིགས་ཏེ་རྣམ་པ་དང་ངོ་བོ་དེ་སྡུག་བསྔལ་མེད་པའི་བདེ་བ་དམ་པ་དང་མ་འབྲལ་ན་སྙམ་པ། བཏང་སྙོམས་ཀྱིས་ཉེ་རིང་ཆགས་སྡང་ཅན་གྱི་འགྲོ་བ་ཞིག་ལ་དམིགས་ཏེ་རྣམ་པ་དང་ངོ་བོ་དེ་ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་ན་སྙམ་པ་ཡིན། འདི་བཞི་བོ་སེམས་ཅན་ལ་དམིགས་པ། ཆོས་ལ་དམིགས་པ། དམིགས་པ་མེད་པ་གསུམ་རེས་དབྱེ་བ་ཕྱེས་ན། སེམས་ཅན་ལ་དམིགས་པ་ཞེས་པ་དེ་བདེ་སྡུག་བར་མའི་ཡུལ་གསུམ་ལ་དམིགས་རྒྱུ་དེ་ཉིད་དང་། ཆོས་ལ་དམིགས་པ་ཞེས་པ་ཚད་མེད་བཞི་བསྟན་པ་དེ་ཉིད་སློབ་དཔོན་གྱི་ངག་ལས་ཐོས་པའམ་བསྟན་བཅོས་ལས་མཐོང་བ། དམིགས་པ་མེད་པའམ་ཆོས་ཉིད་ལ་དམིགས་པ་དེ་དག་གི་རང་བཞིན་མ་སྐྱེས་པར་རྟོགས་པ་དེ་ཉིད་ཡིན། འདིར་བདག་མེད་མ་རྟོགས་པ་དང་། ཕྱེད་དང་གཉིས་རྟོགས། གཉིས་ཀ་རྟོགས་པའི་རྒྱུད་དང་འབྲེལ་བའི་བཤད་ཚུལ་ཡོད་ལ། ཚད་མེད་བཞི་རྒྱུད་ལ་བསྐྱེད་པ་དེ་ཉིད་གོང་གི་སེམས་ཅན་དང་། ཆོས་དང་། དམིགས་མེད་གསུམ་ལ་བརྟེན་ནས་སྐྱེ་བ་དང་། བཀྲེན་ལ་བརྩེ་དང་མ་རུངས་པ་ལ་བརྩེ། །ཀུན་འཁྲུགས་ལ་བརྩེ་བག་མེད་རྣམས་ལ་བརྩེ། །ཡུལ་གྱི་གཞན་དབང་ཅན་ལ་སྙིང་བརྩེ་དང་། །ལོག་པར་མངོན་པར་ཞེན་ལ་སྙིང་བརྩེ་བའོ། །ཞེས་གསུངས་པ་ལྟར་དུ་ཕར་ཕྱིན་དྲུག་གི་མི་མཐུན་ཕྱོགས་དྲུག་མཐོང་བ་ལས་སྐྱེ་ཞིང་། ཡང་དེ་མ་ཡིན་པར། རབ་འབར་དགྲ་ཡི་དབང་དུ་སོང་། །སྡུག་བསྔལ་གྱིས་ནོན་མུན་པས་བསྒྲིབས། །བགྲོད་དཀའི་ལམ་ལ་ཀུན་ཏུ་ཞུགས། །འཆིང་བ་ཆེ་དང་ཡང་དག་ལྡན། །ཟས་ཆེན་དུག་དང་འདྲེས་ལ་ཞེན། །ལམ་ནི་རབ་ཏུ་སྟོར་གྱུར་པ། །ལམ་གོལ་རབ་ཞུགས་སྟོབས་ཆུང་བའི། །སེམས་ཅན་རྣམས་ལ་སྙིང་བརྩེ་བའོ། །ཞེས་གསུངས་པ་ལྟར་དུ་ཡུལ་བཅུ་ལས་སྐྱེ་བ་ཡང་བཤད་ཡོད། གང་ལྟར་བཤད་ཀྱང་མདོར་ན་སེམས་སེམས་བྱུང་ཞིག་ཡིན་ཚེ་རྐྱེན་བཞི་ཡིས་བསྐྱེད་ལ། དེ་ཅི་ཡི་ཕྱིར་ཞེ་ན། མཛོད་ལས། བཞི་ཡིས་སེམས་དང་སེམས་བྱུང་རྣམས། །ཞེས་གསུངས་ཏེ་རྐྱེན་བཞིས་སེམས་དང་སེམས་བྱུང་བསྐྱེད་པར་བསྟན་ཡོད། གསུམ་གྱིས་སྙོམས་པར་འཇུག་རྣམ་གཉིས། །ཞེས་དམིགས་རྐྱེན་མ་གཏོགས་པའི་གསུམ་པོས་སྙོམས་འཇུག་གཉིས་ཀ་བསྐྱེད་པ་དང་། གཞན་ནི་གཉིས་པོ་དག་ལས་སྐྱེ། །ཞེས་གསུངས་པའི་གཞན་གྱིས་གང་བསྟན་ཟེར་ན། བེམ་པོ་ཐམས་ཅད་དེ། རྒྱུ་རྐྱེན་བདག་རྐྱེན་གཉིས་ཀ་ལས་སྐྱེ་བ་དེ་སྤྱིར་བཏང་གི་བཤད་པ་ཡིན། འདིའི་སྐབས་སུ་རང་བཞིན་གནས་རིགས་སམ་ཁམས་དེ་རྒྱུའི་རྐྱེན་ཡིན་ལ། ཚད་མེད་བཞི་སྟོན་པའི་སློབ་དཔོན་དེ་བདག་པོའི་རྐྱེན། ཚད་མེད་བཞི་དེ་སྒོམ་པའི་རང་རང་གི་ཡུལ་མངོན་དུ་གྱུར་པ་དེ་དམིགས་པའི་རྐྱེན། ཚད་མེད་བཞི་གང་ཡིན། སུ་ལ། ཇི་ལྟར་སྒོམ་ཚུལ། ཕན་ཡོན། ཉེས་དམིགས་དང་བཅས་པ་སྔ་མ་ལས་ཕྱི་མ་རྟོགས་ཏེ་གོམས་པར་བྱེད་པ་དེ་མ་ཐག་རྐྱེན་ཡིན། འདི་ཚོ་གོ་མ་མྱོང་དུས་ཆོས་སྐད་ལྟ་བུ་གོ་མ་བདེ་བ་ལྟར་དུ་ཡོད་ན་མི་ཤེས་ཀྱང་རིམ་གྱིས་རིམ་གྱིས་གོ་རྒྱུ་ལ་བྱང་དགོས་པ་ཡིན་པས་མ་བཤད་ཐབས་མེད་ལ་ཐུག་ཅིང་། མ་བཤད་ན་ཆ་ཚང་ཞིག་བཤད་མི་ཐུབ། འདི་ཚོ་གཅིག་ཉན་ནས་བསྐྱུར་གཏོང་རྒྱུ་ཞིག་མ་ཡིན། མ་གཞིར་ཆོས་ཉན་རྒྱུ་དེ་དོན་བསམ་པའི་ཆེད་ཡིན་ལ། དོན་བསམ་པ་དེ་རྒྱུད་ལ་སྦྱར་བའི་ཆེད་ཡིན་པས་ཁྱིམ་པ་ཕོ་མོ་རྣམས་ཀྱིས་དུས་རྒྱུན་སྒོམ་རྒྱག་དགོས་ཤིང་སྒོམ་རྒྱོབ། སྔོན་འགྲོའི་ངག་འདོན་གྱི་རྩ་བ་དང་། ཀུན་བཟང་ཞལ་ལུང་སྟེ་ཀུན་བཟང་ཞལ་ལུང་ནི་སྔོན་འགྲོའི་ངག་འདོན་རྩ་བ་དེའི་རྒྱབ་ཆོས་སམ་འགྲེལ་བ་སྟེ། ཐུན་མོང་ཕྱི་ཡི་སྔོན་འགྲོ་ནས་རེ་རེ་བཞིན་དུ་སྒོམ་དགོས་ཤིང་། འཁོར་བ་སྡུག་བསྔལ་གྱི་རང་བཞིན་ཡིན་ཞེས་གོ་བ་ཙམ་གྱིས་མི་ཆོག་པ་དང་། ཡང་བཤད་ཤེས་པ་ཙམ་གྱིས་མི་ཆོག་པར་དེ་སྒོམ་དགོས་པ་དང། དེ་རང་གི་ལུས་ཐོག་ཏུ་མྱོང་བཞིན་ཡིན་པར་བསམ་དགོས། དེ་ལྟར་དུ་སྒོམ་དགོས་ལ། ཚད་མེད་བཞི་འདི་ཚོ་སྒོམ་ཚུལ་ཀུན་བཟང་ཞལ་ལུང་ལ་ཞིབ་ལྟ་ཞིག་གྱིས་དང་མན་ངག་གི་ལུགས་ཀྱིས་ཅི་འདྲའི་ཞལ་གསལ་བོར་བྱས་ནས་གསུངས་འདུག ཁྱིམ་པ་ཕོ་མོ་རྣམས་འཇིག་རྟེན་གྱི་བྱ་བས་ལས་བྲེལ་ཆེ་ཞིང་། འདུག་ནས་སྐྱིལ་ཀྲུང་བཅས་ཏེ་སྒོམ་པའི་དུས་ཚོད་ཐུང་ནའང་སྒོམ་ཞེ་ནས་མ་བོར་ན་སྤྱོད་ལམ་ཐམས་ཅད་སྒོམ་གྱི་དུས་ཚོད་དང་། སྣང་བ་ཐམས་ཅད་སྒོམ་གྱི་ལམ་ཁྱེར་བྱེད་ཆོག སྡུག་བསྔལ་ཐམས་ཅད་དང་བྲལ་བའི་གཏན་བདེ་དམ་པ་དེ་རྫོགས་པའི་སངས་རྒྱས་ཀྱི་གོ་འཕང་ཡིན་ཞིང་། རྫོགས་པའི་སངས་རྒྱས་ཀྱི་གོ་འཕང་ཐོབ་དགོས་ན་མ་བསྒོམས་ནས་སངས་རྒྱས་ཐོབ་རྒྱུ་མེད། ཁྱིམ་པ་ཕོ་མོས་ཀྱང་གཏན་བདེ་རྫོགས་པའི་བྱང་ཆུབ་ལ་དོན་གཉེར་བྱེད་བཞིན་ཡོད་ལ། དེ་ལྟར་ན་སྒོམ་རྒྱག་རྒྱུ་རབ་བྱུང་རྐྱང་པས་ལས་ཀ་ཞིག་མ་ཡིན། ཐོས་བསམ་སྒོམ་གསུམ་གྱི་གོ་རིམ་དེ་རགས་པ་མི་ཚེའི་དུས་ཚོད་དང་སྦྱར་ལོས་ཆོག་ཀྱང་ཕྲ་བ་ཆོས་ཐུན་རེ་དང་ཚིག་རེའི་གོ་དོན་དེ་སྔ་ཕྱི་དྲོ་སྐད་ཅིག་སྐར་མའི་དུས་དང་སྦྱར་ཆོག སྦྱར་ཆོག་པས་མ་ཚད་སྦྱར་དགོས་ཤིང་། དེའི་ཕྱིར་ན་ཚད་མེད་བཞི་འདི་བགྲང་བའི་སྐབས་སུ་བྱམས་པ་ནས་བགྲངས་ཀྱང་མན་ངག་གི་ལུགས་སྒོམ་པའི་སྐབས་སུ་བཏང་སྙོམས་ནས་འགོ་བཟུང་སྟེ་སྒོམ་པ་དེ་ཉིད་ཕྱག་ལེན་ཡིན། ཚད་མེད་བཞི་རེ་རེ་བཞིན་དུ་ཇི་ལྟར་བསྒོམ་སྔར་ཀུན་བཟང་བླ་མའི་ཞལ་ལུང་བཤད་པའི་སྐབས་ཀྱི་སྒྲ་འཁོར་དང་། དེ་མིན་ཀྱང་ངག་འདོན་འགྲེལ་བའི་སྒྲ་ཐག་དང་ཟེར་སྡེར་ཡོད་ས་ཡོད། དེ་ཚོ་ཉོན། སྔོན་འགྲོའི་ཁྲིད་ཡིག་ཀྱང་ཐེངས་གཅིག་མིན་པར་ཡང་ཡང་བལྟས་ཏེ་རང་གི་ཉམས་ལ་སྦྱར་ཞོར་གྱིས་དང་ཤེས་ཡོང་རྒྱུ་ཡོད། ཀུན་བཟང་བླ་མའི་ཞལ་ལུང་དེ་བརྒྱ་ཚར་ཆ་རེ་ལྟོས་དང་ཚར་རེ་བལྟས་པའི་ཡོང་སྒོ་དེ་ཉིད་རང་ལ་ཐོབ་རྒྱུ་ཡོད་ཅེས་སྔར་ཡང་ལན་མང་བཤད་ལ། ཀུན་བཟང་ཞལ་ལུང་ཚར་མང་པོ་བལྟ་རྒྱུ་ཁས་ལེན་བྱེད་མཁན་མི་ཉུང་བ་ཞིག་ཡོད་མྱོང་ཞིང་། ད་དུང་དེ་བཞིན་རེད། སྤྱིར་ན་དགེ་སྒྲུབ་སྡིག་སྤང་གི་ཁས་ལེན་བྱེད་རྒྱུ་དེ་ཉིད་བླ་མའི་དོན་དག་ཅི་ཡང་མ་ཡིན་ལ། རང་ཉིད་ཀྱི་དོན་ཡིན། དེས་ན་ཆོས་དང་རང་རྒྱུད་འབྲེལ་བའི་ཐབས་ལ་བརྩོན་པ་དེ་དགེ་སྦྱོར་ཐམས་ཅད་ཀྱི་མཆོག་ཡིན་པས་ཁས་ལེན་བྱེད་རྒྱུ་ཡང་དེས་ན་གལ་ཆེ། ང དངོས་གཞི་བྱང་ཆུབ་ཀྱི་སེམས་ཇི་ལྟར་རྒྱུད་ལ་བསྐྱེད་པའི་ཚུལ། ད་ནི་བཞི་བ་གང་གོམས་པར་བྱ་བ་དངོས་གཞི་བྱང་ཆུབ་ཀྱི་སེམས་ལ་ཐུག་པ་སྟེ། འདི་ལ་ཀུན་མཁྱེན་ཆོས་རྗེས། དེ་ལྟར་ཚད་མེད་ལེགས་པར་གོམས་པ་ཡིས། །ཆོས་ཀུན་རྩ་བ་བྱང་ཆུབ་སེམས་གཉིས་བསྒོམ། །ཞེས་གསུངས་ཏེ། སྦྱོར་བ་སྙིང་རྗེས་གཙོས་པའི་ཚད་མེད་རྣམ་བཞིས་དྲངས་པའི་བྱང་ཆུབ་ཀྱི་སེམས་དེ་ལ་ཆོས་ཀུན་རྩ་བ་ཞེས་མྱ་ངན་ལས་འདས་པའི་ཆོས་ཐམས་ཅད་ཀྱི་རྩ་བ། ཐར་བའི་ལམ་ཐམས་ཅད་ཀྱི་སྙིང་པོ། སེམས་ཅན་སྡུག་བསྔལ་ཅན་ཐམས་ཅད་ཀྱི་འདྲེན་པ། མྱུར་དུ་རྣམ་མཁྱེན་བླ་མེད་ཀྱི་ཡིད་དུ་འོང་ཞིང་ཉམས་དགའ་བའི་གནས་སུ་སྐྱེལ་བའི་རྟ་མཆོག་བཟང་པོ་ལྟ་བུ། བྱང་ཆུབ་ཀྱི་སེམས་འདི་ཡོད་ན་སངས་རྒྱས་སྒྲུབ་ལ་དེས་ཆོག མེད་ན་སངས་རྒྱས་སྒྲུབ་ལ་ཐབས་ཆག་པའི་ཆོས་གཅིག་པུ་ཁོ་ན་ཡིན་པའི་ཕྱིར་ན་མྱུར་དུ་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་བྱང་ཆུབ་ཐོབ་པར་འདོད་མཁན་ཞིག་ཡིན་ནས་བཟུང་སྟེ་ལྷག་པའི་བསམ་པ་བྱང་ཆུབ་ཀྱི་སེམས་བསྐྱེད་དགོས། བྱང་ཆུབ་མཆོག་ཏུ་སེམས་བསྐྱེད་པའི་ཕན་ཡོན་ཤིན་ཏུ་མང་པོ་གསུངས་ཡོད་ཀྱང་གཙོ་བོའི་ཆ་ནས་བཤད་ན། སྲིད་པ་འཁོར་བའི་སྡུག་བསྔལ་དེ་རྒྱ་མཚོ་ཆེན་པོ་ལྟ་བུ་ཞིག་ཡིན་ན་དེ་ལས་སྒྲོལ་ཏེ་ཐར་བར་བྱེད་པའི་གྲུ་བོ་ཆེ་ལྟ་བུ་དང་། སྡིག་ཆེན་བསགས་པའི་བསམ་སྤྱོད་ངན་པ་སྣ་ཚོགས་དེ་དགྲ་ལྟ་བུ་ཞིག་ཡིན་ན་བྱང་ཆུབ་ཀྱི་སེམས་དེ་དགྲ་དེའི་སྔོན་ནས་སྐྲག་མི་དགོས་པའི་སྐྱེལ་མ་དཔའ་བོ་ལྟ་བུ་ཞིག་ཡིན། སྡུག་བསྔལ་གྱི་ནད་ལ་བདུད་རྩིའི་སྨན་མཆོག ལས་ཉོན་གྱི་བུད་ཤིང་སྲེག་པའི་མེ་དཔུང་། དགེ་བའི་འབྲས་བུ་གོང་ནས་གོང་དུ་འཕེལ་བར་བྱེད་པ་ལ་མི་ཟད་པའི་གཏེར་ལྟ་བུ་དང་འབྲས་ལྡན་གྱི་ལྗོན་ཤིང་བཟང་པོ་ལྟ་བུ་ཡིན་ཞེས་དེ་ལྟར་གསུངས་ཡོད། བྱང་ཆུབ་ཀྱི་སེམས་རིན་པོ་ཆེ་དེ་གཅིག་སྐྱེས་སོང་ན་དམན་པ་ཡིན་ཡང་མཆོག་ཏུ་གྱུར་འགྲོ་ཞིང་། འུ་ཚོ་སོ་སོ་སྐྱེ་བོ་ཡིན་ཡང་བྱང་ཆུབ་ཀྱི་སེམས་དེ་སྐྱེས་ན་ངན་སོང་ལས་ཐར་ནས་དམ་པ་ཐོབ་པས་མི་ཚད་པར་ཕྱག་བྱ་བའི་འོས་སུ་འགྱུར་བ་ཉིད་དེ། སྤྱོད་འཇུག་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བཅིངས་པའི་མ་རྣམས་ཀྱང་། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པའི་ཕྱག་བྱར་འགྱུར། །ཞེས་གསུངས་པ་དང་། གསེར་འགྱུར་རྩི་ཡི་རྣམ་པ་མཆོག་ལྟ་བུར། །མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་སྒྱུར་བས་ན། །བྱང་ཆུབ་སེམས་ཞེས་བྱ་བ་རབ་བརྟན་ཟུངས། །ཞེས་གསུངས་པ་ལྟར་ཡིན་པས་ན་བྱང་ཆུབ་ཀྱི་སེམས་དེ་རྒྱུད་ལ་སྐྱེ་ཐབས་བྱེད་རྒྱུ་དེ་ཉིད་བྱ་བ་ཐམས་ཅད་ཀྱི་མཆོག ལམ་ཐམས་ཅད་ཀྱི་རྩ་བ། གོང་ནས་བཤད་མ་ཐག་པ་ལྟར་ངན་སོང་དུ་མི་སྐྱེ་བའི་ཐབས། སྡིག་པ་འདག་ཐབས། ཚོགས་གཉིས་རྫོགས་ཐབས་བཅས་ཡིན་ལ། མདོར་ན་གང་བསམ་ཅི་འདོད་ཐམས་ཅད་འབྱུང་བའི་ཡིད་བཞིན་གྱི་ནོར་བུ་བསམ་དོན་ཐམས་ཅད་འགྲུབ་པ་དེ་ཉིད་བྱང་ཆུབ་ཀྱི་སེམས་འདི་ཉིད་ཡིན་ཞིང་། འདི་རྒྱུད་ལ་གཅིག་སྐྱེ་ཐུབ་ན་ཐར་བའི་མཆོག་ཡང་དག་པའི་སར་རང་གཞན་གཉིས་ཀ་ཕན་ཐོགས་ཅན་གྱི་ལམ་སྣེ་ཟིན་སོང་བ་ཡིན། ལམ་སྣེ་ཟིན་ཚར་དུས་ཐར་ལམ་དུ་འགྲོ་བཞིན་པ་ལས་འགོར་ཡུན་རིང་ཐུང་ལ་མ་ལྟོས་པར་ཐོན་ས་ནོར་འགྲོ་བསམ་མི་དགོས་ཤིང་། ཡུན་རིང་ཐུང་ལ་མ་ལྟོས་པར་ཐོན་ས་རྫོགས་པའི་བྱང་ཆུབ་ཡིན་པས་འབད་པ་འདིའི་ཕྱོགས་ལ་བྱེད་རྒྱུ་དེ་དམ་ཆོས་སྒྲུབ་པའི་སྒོས་དོན་གྱི་རྩ་བ་ངོ་མ་དེ་ཉིད་ཡིན། དེ་ལྟ་བུའི་སེམས་བསྐྱེད་ཀྱི་ངོ་བོ་དེ་ཇི་ལྟ་བུ་ཞིག་ཡིན་ཞེ་ན། གཞན་དོན་དུ་སངས་རྒྱས་འདོད་པ་སྟེ་མངོན་རྟོགས་རྒྱན་གྱི་ལུང་ཚེ་གཅིག་ལ་དྲང་འདུག་རྒྱུ་ཁ་བྱང་གྱུར་ཡོད་པ་ཐོས་བསམ་པ་ཚང་མ་ལ་དེ་བཤད་མ་ཐག་ཏུ་ཞེ་ལ་ཡོད་པ་དེ་ཉིད་དེ། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པ་དེ་ཉིད་ཡིན། དེ་ལ་དབྱེ་བ་བྱས་ན་སྨོན་འཇུག་གཉིས་ཏེ། བྱང་ཆུབ་སེམས་དེ་མདོར་བསྡུས་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །ཞེས་དང་། དེ་ཇི་ལྟར་དབྱེ་བ་ཡིན་ཞེ་ན། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་ལ། ད་ཞག་ནས་ཀྱང་བཤད་ལ། འདི་ལ་དགོངས་པ་ལེན་ཚུལ་ལ་དབྱེ་བ་ཡོད་ཅིང་། རང་ལུགས་ཀློང་ཆེན་པ་བརྒྱུད་པ་དང་བཅས་པས་སྨོན་འཇུག་གཉིས་ཀ་དེ་བསམ་པས་སྨོན་དང་སྦྱོར་བས་ཁྱབ་པ་འགྲོ་བར་འདོད་དང་འགྲོ་བཞིན་པ་ལྟ་བུ་ཡིན། འདིའི་དབྱེ་བ་ཀུན་རྫོབ་སེམས་བསྐྱེད་དང་དོན་དམ་སེམས་བསྐྱེད་གཉིས་སུ་དབྱེ་བའི་སྐབས་ལ་སོ་སོ་སྐྱེ་བོ་དང་འཕགས་པའི་སེམས་བསྐྱེད་དམ་ཕྱི་རོལ་སེམས་ཅན་ལ་དམིགས་པ་དང་ནང་སེམས་ཉིད་ལ་དམིགས་པའི་ཆ་ནས་ཕྱེ་རྒྱུ་ཅན་དང་། ཚུལ་ཁྲིམས་གསུམ་མམ་བསླབ་གསུམ་ལ་ལྟོས་ནས་ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་དང་གསུམ་དུ་དབྱེ་ཆོག ཡང་བཞིར་དབྱེ་བ་ཕྱེས་ན། ཚོགས་སྦྱོར་གཉིས་སུ་མོས་པས་སྤྱོད་པའི་སེམས་བསྐྱེད། མ་དག་ས་བདུན་ན་ལྷག་བསམ་དག་པའི་སེམས་བསྐྱེད། དག་པ་ས་གསུམ་ན་རྣམ་པར་སྨིན་པའི་སེམས་བསྐྱེད། སངས་རྒྱས་ཀྱི་ས་ན་སྒྲིབ་པ་སྤངས་པའི་སེམས་བསྐྱེད་དང་བཞི་རུ་དབྱེ་ཆོག ཡང་ཚོགས་སྦྱོར་མཐོང་སྒོམ་མི་སློབ་པའི་ལམ་ལྔ་ཡི་སེམས་བསྐྱེད་ལྔ་རུ་ཡང་བཞག་ཆོག ཕར་ཕྱིན་དྲུག་ལ་ལྟོས་ཏེ་དྲུག་ཏུ་བཞག་ཆོག ཐབས་སྟོབས་སྨོན་ལམ་ཡེ་ཤེས་བཞི་ཕར་ཕྱིན་དྲུག་གི་སྟེང་དུ་བསྣན་ནས་ཕར་ཕྱིན་བཅུར་བྱས་ཏེ་དེ་བཅུ་ལ་ལྟོས་ནས་ཕར་ཕྱིན་བཅུར་འགྱུར་ཞིང་། དེ་ལས་གཞན་དུ་ས་མཚམས་ཀྱི་དབྱེ་བས་ཉི་ཤུ་རྩ་གཉིས་ཏེ། མངོན་རྟོགས་རྒྱན་གྱི་ནང་དུ་དཔེ་གྲོགས་ཆོས་གསུམ་དང་སྦྱར་ཏེ་བློ་གྲོས་རྒྱ་མཚོས་ཞུས་པའི་མདོའི་དགོངས་དོན་ལྟར་དུ་བསྟན་པ་དེ་ཉིད་སྡེ་སྣོད་འཛིན་པ་ཚང་མས་མཁྱེན་བཞིན་པ་ལྟར་དུ་ཡིན། འདི་དག་རེ་རེ་བཞིན་དུ་སྨོན་པ་བྱང་ཆུབ་དོན་གཉེར་གྱི་ཆ་ཞིག་དང་། འཇུག་པ་སྦྱོར་བ་ལག་ལེན་ལ་འདེབས་པའི་ཆ་ཞིག་སྟེ་ཆ་གཉིས་རེ་ཚང་དགོས་པའི་ཕྱིར་ན་རང་ལུགས་ལ་སྨོན་འཇུག་གཉིས་གཉིས་ཡོད་པར་འདོད། སེམས་བསྐྱེད་ཀྱི་རྟེན་ལ་ལུས་ཀྱི་རྟེན་དེ་ལ་ལྷ། ཀླུ། ལྷ་མ་ཡིན་དང་། མིའི་འགྲོ་བ་ལ་སོགས་པ་ཡོད་ལ། བསམ་པའི་རྟེན་དེ་ལ་དད་སོགས་ཁྱད་པར་ཅན་བློ་ཡོད་པ། གནས་པའི་རྟེན་དེ་ལ་གང་ལ་སྐྱེས་པ་དེའི་རྟེན་དེར་ཉམས་པའི་རྒྱུ་མ་བྱུང་གི་བར་དུ་གནས་པ་དེ་ལྟ་བུ་ཞིག་ཡིན། སེམས་བསྐྱེད་ཀྱི་རྒྱུ་དེ་གང་ཡིན་ཞེ་ན། གྲོགས་སྟོབས་རྒྱུ་སྟོབས་རྩ་བའི་སྟོབས། །ལ་སོགས་པས་བསྟན་དོན་ལྟར་གྱི་སངས་རྒྱས་ལ་དམིགས་པའི་དད་པ་དང་། སེམས་ཅན་ལ་དམིགས་པའི་སྙིང་རྗེ། བྱང་ཆུབ་སེམས་ཀྱི་ཕན་ཡོན་ཐོས་པ་གསུམ་ལས་སྐྱེ་བར་གསུངས་ཡོད། སྨོན་འཇུག་བྱང་ཆུབ་ཀྱི་སེམས་གཉིས་ཞེས་པའམ། སྡོམ་སྡུད་དོན་བྱེད་ཀྱི་ཚུལ་ཁྲིམས་གསུམ་ཞེས་པའམ། བྱང་ཆུབ་སེམས་དཔའི་སྡོམ་པ་ཞེས་གང་བཤད་ཀྱང་དཔེ་རིན་པོ་ཆེ་གཅིག་ལ་རིམས་ནད་སེལ་བ་དང་། དགོས་འདོད་འབྱུང་བ། མུན་པ་སེལ་བ་སོགས་ཀྱི་ལྡོག་པའི་ཆ་ནས་ཐ་དད་ཕྱེས་ཀྱང་ངོ་བོ་གཅིག་ལས་མ་འདས་པ་ལྟར་ཏེ། ངོ་བོའི་ཆ་ནས་བཤད་ན་གཞན་དོན་དུ་རྫོགས་པའི་བྱང་ཆུབ་འདོད་པ་ལས་མ་འདས་པ་ཡིན། དེ་གཉིས་ཀའི་སོ་སོའི་རང་བཞིན་བཤད་སྐབས་ཀུན་མཁྱེན་ཀློང་ཆེན་པས། སྨོན་པ་ཚད་མེད་བཞི་ཡི་ངོ་བོ་ལ། །འཇུག་པ་ཕ་རོལ་ཕྱིན་པ་དྲུག་ཏུ་འདོད། །ཅེས་གསུངས་ལ། སྨོན་སེམས་སྐད་ཅིག་མ་ཞིག་སྐྱེས་པའི་ཕན་ཡོན་ལ་གང་ཟག་གཅིག་གིས་ཕྱོགས་བཅུ་དུས་གསུམ་དུ་བྱོན་བཞུགས་འབྱོན་འགྱུར་གྱི་སངས་རྒྱས་མཐའ་ཡས་ཚད་མེད་པ་ལ། དུས་བསྐལ་བ་བྱེ་བ་མང་པོའི་བར་དུ། མཆོད་པ་སྣ་ཚོགས་པ་ཟད་པ་མེད་པར་ཕུལ་བ་བས་བསོད་ནམས་དེ་ཆེ་ཞེས་གསུངས། འདིའི་ཐད་དུ་མཛའ་བོའི་བུ་མོའི་གཏམ་རྒྱུད་ཅེས་པ་ཞིག་ཡོད་པས་དེ་དང་སྦྱར་ན་ཆོག གནའ་སྔོན་མ་རྒྱ་གར་ཞིག་ན་ཚོང་པ་ཕྱུག་པོ་ཚང་ཞིག་ཡོད་ཅིང་། ཚོང་པ་ཕྱུག་པོ་ཚང་ལ་བུ་ཞིག་ཡོད། བུ་དེའི་མིང་ལ་མཛའ་བོའི་བུ་མོ་ཞེས་མོ་མིང་བཏགས་ཡོད་ལ། དེ་ལྟར་བུ་མོ་མིང་བཏགས་ཡོད་པའི་མཛའ་བོའི་བུ་མོ་ཞེས་པ་ཚོང་དཔོན་གྱི་བུ་ཞིག་ཡོད་པ་དེའི་ཕ་དེ་རྒྱ་མཚོའི་ནང་དུ་ནོར་བུ་ལེན་དུ་སོང་བ་ན་མགོ་མ་ཐོན་ཏེ་མ་བུ་གཉིས་ཀ་ཁེར་བུར་ལྷག་ནས་ཁྱིམ་ཚང་གི་འབྱོར་བ་མར་ཉམས་སོང་བ་ཡིན། དེ་ཉམས་ནས་སྐབས་ཤིག་ལ་བུ་ཅུང་ཟད་ཅིག་ནར་སོན་ཏེ་ཚོང་ཕྲན་བུ་ཕྲན་བུ་རེ་བརྒྱབ་ཅིང་། དང་པོར་ཚོང་བརྒྱབ་ནས་ཀརྵ་པ་ནི་སྟེ་དེ་དུས་ཀྱི་རྒྱ་གར་གྱི་སྒོར་མོ་ཡིན་པ་དང་དེ་བཞི་ལོན་པ་ཡིན། བར་ཞིག་ཡར་ཡར་ཁོ་རང་ལ་ཚོང་གི་ཉམས་མྱོང་ཕོག་སྟེ་བརྒྱད་ལོན། དེ་ནས་བཅུ་དྲུག་ལོན། དེ་ནས་སུམ་ཅུ་སོ་གཉིས་ལོན། ཚོང་གི་ཁེ་སྐྱེད་དེ་ཉིད་ཇེ་དགའ་ཇེ་དགར་གྱུར་ནས་ཚོང་བྱས་ལ། དེ་ནས་ལས་རིགས་བརྗེས་ཏེ་རིམ་པ་བཞིན་དུ་དེ་ལྟར་བྱས་ནས་ཡོང་སྒོ་ཡོད་སོང་བ་ཡིན། བུ་ཡ་རབས་མི་བཟང་ཞིག་ཡིན་པས་ཐམས་ཅད་ལོན་ཚད་ཨ་མ་རྒན་མོའི་ལག་ཏུ་བཞག་ཅིང་། ཉིན་ཞིག་མི་གཞན་ཞིག་གིས་ཁྱོད་ཀྱི་ཕ་ཡི་ལས་ཀ་འདི་དག་མ་ཡིན་ཞེས་སྨྲས་པ་དང་། རྒྱ་གར་ནས་ཕ་ཡི་རིགས་དེ་གང་ཡིན་དང་དེའི་ལས་དེ་གང་ཡིན་ན་དེ་བྱེད་དགོས་ལ། རིགས་འཆོལ་བའི་ལས་བྱེད་མི་དར་བ་ཡིན། ཁྱོད་རྒྱ་མཚོའི་ནང་དུ་ནོར་བུ་ལེན་དུ་འགྲོ་བའི་རིགས་ཡིན་པས་འདིའི་ལས་ཀ་འདི་དག་ཁྱོད་ཀྱིི་རིགས་ཀྱི་ལས་མ་ཡིན་པ་དང་རིགས་འཆོལ་བའི་ལས་མ་བྱེད་ཅེས་སྨྲས་པ་ལ། ཞི་ལུ་བརྒྱུགས་ཡོང་ནས་མ་ལ་ཁོ་ཡིན་ན་མིན་ན་རྒྱ་མཚོའི་གླིིང་དུ་ནོར་བུ་ལེན་དུ་འགྲོ་དགོས་འདུག ཁྱོད་ཀྱིས་ང་ལ་རིགས་ཀྱི་ལས་ཀ་གསང་འདུག ཡང་དག་པར་སྨྲས་མི་འདུག ང་རང་ཕ་ལྟར་དུ་ནོར་བུ་ལེན་དུ་འགྲོ་དགོས་ཞེས་སྨྲས་སྐབས། མ་ཡིས་ཁྱོད་ཀྱི་ཕ་རྒྱ་མཚོའི་ནོར་བུ་ལེན་དུ་འགྲོ་ས་ནས་མགོ་མ་ཐོན་ལ། ཁྱོད་ཀྱང་འགྲོ་མི་ཉན། ངས་ཁྱོད་ལ་རྒྱུ་མཚན་དེས་མ་བཤད་དེ་གསང་བ་ཡིན། གསང་བའི་རྒྱུ་མཚན་དེ་ཁྱོད་ཀྱི་ཚེ་མགོ་སྲོག་མགོ་ཐོན་པའི་ཆེད་དུ་ཡིན་ཞེས་སྨྲས་པ་དང་། ཞི་ལུ་ཁར་མ་ཉན་ནས་འགྲོ་གྲབས་ཀྱི་གྲ་སྒྲིག་ཆ་ཚང་བྱས་ཤིང་། འགྲོ་རན་ཁ་ངོ་མ་དེ་ཉིད་ལ་མ་ཡིས་ཁྱོད་གཏན་ནས་མངག་རྒྱུ་མིན་ཞེས་གོས་ཀྱི་སྣེ་མོ་ནས་བཟུང་ཞིང་འཐམས་ཏེ་མ་མངགས་པ་ལ། བུ་ཁོང་ཁྲོ་ལངས་ཏེ་མའི་མགོ་ལ་རྡོག་ཐོ་ཞིག་བརྒྱབ་པ་དང་ལྷན་དུ་གསིག་འཐེན་བྱས་ནས་རྒྱ་མཚོའི་གླིང་དུ་ནོར་བུ་ལེན་དུ་ཤོར་སོང་བ་ཡིན། བར་སྐབས་ཤིག་ལ་རྒྱ་མཚོའི་གླིང་ནས་ཚོང་པ་ཕལ་བ་མང་པོ་མི་ཐོན་ས་དང་མི་འགྲོ་ས་ནས་ཁོ་བོས་ནོར་བུ་རིན་པོ་ཆེ་ངོ་མ་བསམ་དོན་འགྲུབ་པའི་ནོར་བུ་དེ་ཉིད་ལོན་དགོས་སྙམ་སྟེ་སོང་སོང་བའི་སྐབས་ཤིག་ལ་སྔར་ཁོ་རང་གིས་ཚོང་བརྒྱབ་ནས་ཀརྵ་པ་ན་སྟེ་སྒོར་མོ་བཞི་དང་། བརྒྱད་དང་། བཅུ་དྲུག་དང་། སོ་གཉིས་ལ་སོགས་པ་ལོན་པ་དེ་ཐམས་ཅད་མ་ཡི་ལག་ཏུ་བཞག་པ་དེའི་དགེ་འབྲས་དང་ཕན་ཡོན་གྱིས་ཁོ་རང་ལ་ལམ་ནས་གུས་བཀུར་བྱེད་མཁན་མང་བོ་ཡོད་པ་སྟེ་ལྷའི་བུ་མོ་བཞི་དང་། བརྒྱད་དང་། བཅུ་དྲུག་དང་། སོ་གཉིས་རྣམས་ད་ལྟ་གོང་ནས་བཤད་པའི་ཀརྵ་པ་ནའི་ཁ་གྲངས་ལྟར་རིམ་པ་བཞིན་དུ་དེ་རྣམས་ཀྱིས་ཕེབས་བསུ་བསྙེན་བཀུར་ཚད་མེད་པ་དང་སྣ་ལེན་འབུལ་བཟང་བྱས་ཤིང་། འདིའི་ཕན་ན་ཁྱེད་རང་མ་འགྲོ་ཞེས་སྨྲས་ཀྱང་ཁོ་རང་གིས་ཁར་མ་ཉན་ལ། ཁོ་རང་གི་དགེ་བའི་ལས་ཀྱི་མཐུ་ཟད་པ་དང་ཐོ་ཐུག་སོང་བ་ཡིན། གལ་ཏེ་འགྲོ་རྒྱུ་ཅན་ཞིག་ཡིན་ཏེ་གཏན་ནས་མི་སྡོད་རྒྱུ་ཅན་ཞིག་ཡིན་ན་ལྷོ་ཕྱོགས་ལ་མ་འགྲོ། དེའི་ཕྱོགས་སུ་འགྲོ་མི་ཉན་ཞེས་སྨྲས་པ་དང་། མ་འགྲོ་ཟེར་སའི་ལྷོ་ཕྱོགས་སུ་ལས་ཀྱིས་དེད་ནས་སོང་བ་ཡིན། མ་འགྲོ་ཟེར་སའི་ས་ཕྱོགས་ཀྱི་མཐའི་མཐའ་རུ་སོང་ཞིང་སོང་ལ་བར་ཞིག་ལྕགས་ཀྱི་ཁང་བ་ཆེན་པོ་ཞིག་ཡོད་པའི་ནང་དུ་ལས་ཀྱིས་དེད་ནས་དེའི་ནང་དུ་འཛུལ་བསམ་པ་ཞིག་བྱུང་སྟེ་དེའི་ནང་དུ་འཛུལ་སོང་བ་དང་། དེའི་ནང་ན་སེམས་ཅན་ཉམ་ཐག་གཅིག་གི་མགོ་ན་ལྕགས་ཀྱི་འཁོར་ལོ་རྩེ་མོ་གསོར་དུ་གྱུར་པ་རང་འཁོར་གྱིས་ཀླད་པའི་ཐོག་ཏུ་འཁོར་བཞིན་པ་ཀླད་པ་ཡང་སྐྱ་ཐར་ཐར་དུ་འཐོར་གྱིན་ཡོད་པ་ད་དུང་ཡང་འཆི་རྒྱུ་མེད་པར་ཚོར་བ་སྡུག་བསྔལ་དེ་ལྟ་བུ་མྱོང་བཞིན་ཡོད་པ་དེ་ལྟ་བུ་ཡོད་པ་ལ། དེ་མཐོང་སྐབས་འདིས་ཅི་ཞིག་བྱས་ལ་ཅི་ཡིས་མ་ཉན་པ་ཡིན་ཞེས་དྲིས་པ་ན། འདིས་དྲིན་ཆེན་མ་ཡི་མགོ་ལ་རྡོག་ཐོ་བརྒྱབ་པ་ཡིན་ཞེས་སྨྲས་པ་དང་། དེ་ལྟ་བུ་སྨྲས་མ་ཐག་ཏུ་ཅི་ཡིན་འདི་ཡིན་མེད་པར་ལྕགས་འཁོར་ཆེན་པོ་དེ་མཛའ་བོའི་བུ་མོའི་མགོར་བབ་སྟེ་གསོར་ཅན་གྱི་འཁོར་ལོ་འཁོར་ནས་ཀླད་པ་གཏོར་འགྲོ་བའི་སྡུག་བསྔལ་རང་ཐོག་ཏུ་བབ་པའི་ཚེ་ན། ཁོ་རང་གི་སེམས་སུ་འཛམ་བུའི་གླིང་ལ་ད་རུང་ང་འདྲ་བའི་མའི་མགོ་ལ་རྡོག་ཐོ་བརྒྱབ་ཅིང་བསྣུན་པ་ཅི་སྟེ་མེད། དེ་ཐམས་ཅད་ཀྱིས་འདིའི་སྡུག་བསྔལ་འདི་མྱོང་དགོས་ཐུག་ལ། དེ་ཐམས་ཅད་ཀྱི་སྐལ་བ་དེ་རང་གི་སྟེང་དུ་སྨིན་པར་ཤོག ངས་མྱོང་རྒྱུ་འདིས་དེ་ཐམས་ཅད་མྱོང་རྒྱུ་ཡི་གོ་ཆོད་པར་ཤོག་ཅེས་བསམས་ཏེ་སེམས་བསྐྱེད་དེ་ལྟ་བུ་ཞིག་སྐྱེས་པའི་སྐབས་སུ་དེའི་སྨོན་སེམས་སྐད་ཅིག་མ་དེ་སྐྱེས་མ་ཐག་ཏུ་གསོར་འཁོར་མཚམས་བཞག་ནས་ནམ་མཁའ་ལ་ཡར་འཕགས། དེ་ནས་ཚེ་འཕོས་མ་ཐག་ཏུ་དགའ་ལྡན་ལྷ་ཡུལ་དུ་སྐྱེས་སོང་བ་དེ་ལྟ་བུའི་ལོ་རྒྱུས་ཡོད། སྨོན་སེམས་ཙམ་ཞིག་སྐྱེས་པས་ཀྱང་དེ་ལྟ་བུའི་ཕན་ཡོན་ཆེ་བ་ཡིན། ཡང་གཏམ་རྒྱུད་གཞན་ཞིག་ལ་བདག་ཅག་གི་སྟོན་པ་བཅོམ་ལྡན་འདས་ཀྱིས་སྔར་ལམ་སྦྱོང་བའི་ཐོག་མར་དམྱལ་བའི་གནས་སུ་སྐྱེས་མྱོང་ལ། གྱད་པཀྵི་ཏ་ཞེས་བྱ་བར་སྐྱེས་ཤིང་། ཁོ་རང་གི་རོགས་པ་དམྱལ་བའི་སེམས་ཅན་གྲོགས་ཀཱ་མ་རུ་པ་ཞེས་པ་དང་གཉིས་ཀ་དམྱལ་བའི་མེ་ཡི་ཤིང་རྟ་འདྲེན་དུ་བཅུག་པའི་སྐབས་སུ་གཤིན་རྗེའི་ལས་མཁན་ཁྲོས་ནས་གྲོགས་ཀཱ་མ་རུ་པའི་མགོར་ཐོ་བས་བརྒྱབ་པ་དེ་ཉིད་ལ་གྱད་པཀྵི་ཏར་སྐྱེ་བ་བཞེས་པ་ཁོང་ཉིད་སྙིང་རྗེ་སྐྱེས་ཏེ་གྲོགས་ཀྱི་ཚབ་ཏུ་ཁོང་ཉིད་ཀྱིས་ཤིང་རྟ་འདྲེན་པར་བརྩམས་པ་ཡིན་ལ། དེ་ལ་མ་རྒྱག་དང་དེ་ལུས་ལ་ཤུགས་མེད་དེ་འདྲེན་མི་ཐུབ་པར་གྱུར་འདུག་པས་ངས་འདྲུད་ཅེས་སྨྲས་པ་ན་གཤིན་རྗེ་སྐྱེས་བུ་དེས་སེམས་ཅན་རང་རང་གི་ལས་ཀྱི་རྣམ་པར་སྨིན་པ་མྱོང་བ་དེ་ཉིད་ལ་སུས་སུ་སྐྱོབ་ཅེས་ཐོ་བས་མགོ་ལ་གཅིག་བརྒྱབ་པ་ན་གྱད་པཀྵི་ཏ་དེ་མ་ཐག་ཏུ་ཤི་འཕོས་ཏེ་སྨོན་སེམས་ལན་གཅིག་སྐྱེས་པ་དེ་ཉིད་ཀྱིས་དམྱལ་བའི་གནས་སུ་བསྐལ་བར་གནས་དགོས་པའི་སྡིག་སྒྲིབ་དག་ནས་དེའི་ལས་ཟད་དེ་སུམ་ཅུ་རྩ་གསུམ་གྱི་ལྷ་ཡུལ་དུ་སྐྱེས་སོང་བ་ཡིན། དེ་བཞིན་དུ་དོན་མེད་ཀྱིས་གནོད་སེམས་དང་སྡིག་སེམས་སྐྱེས་ན་དེ་ལྟར་དུ་སྟོབས་ཆེ་ལ། དེ་ནི་བྱང་ཆུབ་སྨོན་པའི་སེམས་ཀྱི་མཚོན་དཔེ་ཙམ་ཡིན། འཇུག་པའི་ཕན་ཡོན་ལ་བསམ་བློ་བཏང་ན། སྨོན་སེམས་ཀྱི་ཕན་ཡོན་གྱིས་མཚོན་དུ་མེད་པའི་ཕན་ཡོན་མཐའ་ཡས་པ་ཡོད་པར་གསུངས་ཡོད་ཅིང་། དེའི་རྒྱུ་མཚན་ནི་སྨོན་པས་བསམ་པས་སྨོན་པ་ཙམ་ཡིན་ལ་འཇུག་པས་སྦྱོར་བ་ལག་ལེན་གྱིས་དངོས་སུ་ཁྱབ་པ་ཡིན་པའི་ཕྱིར་ན་ཕན་ཡོན་གྱི་ཁྱད་པར་ཡང་དེ་བཞིན་དུ་ཆེ་བ་དང་། སྦྱོར་བ་སྐད་ཅིག་མ་གཅིག་གིས་ཁྱབ་པའི་སེམས་ཀྱིས་བསྐལ་བ་མང་པོའི་ཚོགས་གཉིས་བཟླུམས་པའི་ཁྱད་པར་དེ་ལྟར་ཡོད་པ་ཡིན། དེའི་འཐད་པ་ཇི་ལྟར་འཇོག་པ་དཔེ་མཚོན་དུ་བཤད་ན། སྔོན་བཅོམ་ལྡན་འདས་སློབ་པ་ལམ་ལ་ཡོད་པའི་གནས་སྐབས་ན་མི་ནག་མདུང་ཐུང་ཅན་གྱིས་ཚོང་པ་ལྔ་བརྒྱ་གསོད་རྩིས་བྱེད་པའི་དུས་སུ་ཚོང་པ་དེ་རྣམས་ཀྱི་སྲོག་བསྐྱབས་པ་དང་། མི་ནག་མདུང་ཐུང་ཅན་ངན་སོང་གི་སྡུག་བསྔལ་དོས་དྲག་པོ་ལས་སྐྱོབ་པའི་ཆེད་དུ་ཁོང་རང་ཉིད་དམྱལ་བར་སྐྱེ་ན་སྐྱེ་དགོངས་ནས་མི་ནག་མདུང་ཐུང་ཅན་བསད་པར་བྱས་པ་དེ་ཉིད་ལ་སྡིག་པའི་རྣམ་སྨིན་ཡོད་མ་དགོས་དང་བསྐལ་བ་བཞི་ཁྲིའི་ཚོགས་བསགས་ཤིང་ཚོགས་འདུམས་པ་ཡིན་ལ། བསྐལ་བ་ཆེན་པོ་བཞི་ཁྲི་ཞེས་པ་ཅི་འདྲའི་དུས་རིང་ཞིག་མིན་ཏེ་ཡིན་ཞིང་། དེའི་དུས་སུ་བསགས་པའི་བསོད་ནམས་ཀྱི་བསགས་པ་དང་འདྲ་འདྲར་གྱུར་སོང་བ་ཡིན། ཡང་བྲམ་ཟེའི་ཁྱེའུ་སྐར་མ་ལ་དགའ་བས་ལོ་ཉི་ཁྲི་ལ་ནགས་སུ་དབེན་པར་གནས་ཏེ་ཚངས་སྤྱོད་ཚུལ་ཁྲིམས་སྲུང་བཞིན་པའི་གནས་སྐབས་ཤིག་ལ་གཞན་སྲོག་སྐྱོབ་པའི་ཕྱིར་དུ་ཚངས་སྤྱོད་བཏང་སྟེ་ཡང་བསྐལ་བ་ཉི་ཁྲིའི་ཚོགས་བཟླུམས་པར་གསུངས་པ་ལྟ་བུ་ཡིན། བྱང་ཆུབ་སྨོན་པའི་སེམས་ལ་ཕན་ཡོན་ཆེ་ཡང་བྱང་ཆུབ་འཇུག་པའི་སེམས་ཀྱི་ཕན་ཡོན་གྱི་དོ་ཟླར་ཡོང་བ་མ་ཡིན་ཞིང་། འདིའི་རིགས་པས་ཐབས་ཀྱིས་ཁྱད་པར་དུ་འཕགས་པའི་གསང་སྔགས་ཀྱི་མྱུར་ལམ་ནས་གང་ཟག་དབང་རབ་ཚེ་གཅིག་གིས་གྲོལ་བ་དང་། ཤིན་ཏུ་དབང་རྣོན་ངོ་མ་དེ་ལོ་དང་ཟླ་བས་ཀྱང་གྲོལ་བ་མངོན་གྱུར། ཟུང་འཇུག་རྡོ་རྗེ་འཆང་གི་གོ་འཕང་ཐོབ་པའི་འཐད་པ་ཡོད་པ་ཡིན། དེ་རིགས་པས་དཔྱད་ཀྱང་འགྲུབ་པ་ཞིག་ཡིན་ལ། འུ་ཚོ་འདིར་ཡོད་ཚང་མས་སྐྱབས་སུ་འགྲོ་བ་སྔོན་དུ་སོང་བས་སྨོན་དང་འཇུག་པའི་བདག་ཉིད་ཅན་གྱི་བྱང་ཆུབ་སེམས་སྡོམ་སྨོན་འཇུག་སྟབས་ཅིག་ཏུ་རང་ལུགས་ཇི་ལྟ་བ་བཞིན་དུ་བླངས་པ་དང་། སྨོན་པ་བྱང་ཆུབ་མཆོག་ཏུ་སེམས་བསྐྱེད་པ་འདིའི་ནང་ནས་མང་ཆེ་བ་ཡིན་ཞིང་། ལྷ་བས་ལྷག་པའི་ལུས་རྟེན་ཞེས་གསུངས་པའི་མིང་དོན་མཚུངས་པ་འདི་འདྲའི་ལུས་རྟེན་ཞིག་ཐོབ་པ་དེ་ཉིད་རྙེད་པ་དོན་ལྡན་ཡིན་པར་དགའ་བ་སྒོམ་པ་དང་བཅས་ཏེ། སེམས་མཆོག་བསྐྱེད་པས་མི་ཚད་སྐྱེས་ལ་མ་ཉམས་པར་བསླབ་པ་ཚུལ་བཞིན་དུ་སྲུང་བ་དེ་སྲོག་ལ་བབ་ཀྱང་མི་འདོར་བ་དེ་ཉིད་གནད་ཆེན་ཡིན་པ་དེ་ཉིད་འདི་ལྟར་ཞིབ་ཏུ་བཤད་ན་ཤེས་ཐུབ། ཀུན་རྫོབ་བྱང་ཆུབ་ཀྱི་སེམས་སྨོན་དང་འཇུག་པའི་བདག་ཉིད་དེ་ཆོ་ག་ལས་ཐོབ་པ་དང་། དོན་དམ་བྱང་ཆུབ་ཀྱི་སེམས་ཞེས་པ་དེ་སྒོམ་པའི་སྟོབས་ཀྱིས་ཆོས་ཉིད་ལས་སྐྱེས་པ་ཡིན། དེ་ལྟར་ན་སེམས་བསྐྱེད་ལེན་པའི་ཆོ་ག་སྔོན་འབོགས་ཆོག་གི་སྐབས་ནས་འབྱུང་བ་ལྟར་ཡིན་ཞིང་། དེ་ལྟ་བུའི་བྱང་ཆུབ་ཀྱི་སེམས་ལ་རྟག་ཏུ་གོམས་པའི་རྒྱལ་བའི་སྲས་ཞེས་བརྗོད་པའི་སྐབས་སུ་བདེ་བར་གཤེགས་པའི་ཐུགས་ཀྱི་སྲས་བྱང་ཆུབ་སེམས་དཔའ་ཡིན། དེའི་རྫོགས་སྨིན་སྦྱངས་པའི་སྤྱོད་པ་དེ་རྒྱ་མཚོ་ལྟ་བུ་ཚད་མེད་གཞལ་དུ་མེད་པ་ཡིན་པས་ན། རླབས་ཆེན་ཚོགས་གཉིས་སྤྱོད་པ་མཐར་ཕྱིན་ཏེ། །ཞེས་པའི་ཚིག་འདིའི་སྒྲོམ་གཞི་ནས་བདེ་བ་ཅན་དུ་སྐྱེ་བའི་རྒྱུ་གཉིས་པ་ཐུན་མོང་དང་སྒོ་བསྟུན་པའི་ཚོགས་བསགས་སྒྲིབ་སྦྱོང་བསྟན་པ་དང་ཆབས་ཅིག་ཏུ་རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་ཡང་མཉམ་དུ་བསྟན་པ་འདིས་ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་པའི་གསེར་འགྱུར་གྱི་རྩི་འདི་ཡིས་ཟིན་ན་དགེ་རྩ་ཆེ་ཕྲ་གང་བྱས་ཀྱང་ཐེག་ཆེན་ཐར་བ་ཆ་མཐུན་གྱི་དགེ་བར་འགྱུར་བས་བསོད་ནམས་ཀྱི་ཚོགས་ལ་བརྟེན་ནས་ཡེ་ཤེས་ཀྱི་ཚོགས་རྫོགས། ཀུན་རྫོབ་སེམས་བསྐྱེད་ལ་གོམས་པས་དོན་དམ་སེམས་བསྐྱེད་རྒྱུད་ལ་སྐྱེས་ཏེ། ཚོགས་གཉིས་མཉམ་དུ་རྫོགས་སྟོབས་ཀྱིས་དཔག་ཡས་དགེ་བའི་རྩ་བ་བསྐྱེད་ནུས་པའི་འཐད་པ་དེ་ལྟར་དུ་གྲུབ། ཀ༽ ཕྱག་འཚལ་བའི་ཡན་ལག དེས་ན་འདི་ནས་ཚོགས་གཉིས་གསོག་པའི་སྒོ་དམ་པ་དེ་བསགས་སྦྱོང་གཉིས་ཀའི་གནད་དུ་འདུས་པ་དེ་ཉིད་ཡན་ལག་བདུན་དང་འབྲེལ་ཏེ་བཤད་རྒྱུ་བྱེད་དགོས། སེམས་བསྐྱེད་ཀྱི་སྡོམ་པ་ལེན་སྐབས་སྦྱོར་དངོས་རྗེས་གསུམ་གྱི་ནང་ནས་སྦྱོར་བ་མཐུན་རྐྱེན་བསགས་པ་ཡིན་ལ། སྦྱོར་བ་མཐུན་རྐྱེན་བསགས་པ་དེ་རྟེན་དགྲམ་པ་དང་། མཆོད་པ་འབུལ་བ་སོགས་སྔོན་དུ་འགྲོ་དགོས་ཤིང་། དེ་དག་སྔོན་དུ་སོང་ནས་ཚོགས་ཞིང་གི་མདུན་དུ་ཡན་ལག་བདུན་པ་འབུལ་བ་སྔོན་ལ་འགྲོ་དགོས། དུས་རྒྱུན་རང་སྒེར་གྱིས་བྱང་སྡོམ་ཆགས་མེད་དུ་ལེན་དུས་ཀྱང་དེ་བཞིན་དུ་དགོས་པར་མ་ཟད་བདེ་བ་ཅན་དུ་སྐྱེ་བའི་རྒྱུ་གཉིས་པ་ཚོགས་བསགས་སྒྲིབ་སྦྱོང་གི་གནད་ཀྱང་འདི་ལ་ཡོད། ཁྱིམ་པ་ཕོ་མོའི་རྒྱུན་གྱི་དགེ་སྦྱོར་དང་ཡང་འདི་འབྲེལ་བའི་སྟབས་ཀྱིས་སྔར་ཡང་ཐེངས་མང་བཤད་ཀྱང་ད་རུང་ནན་གྱིས་འདི་བཤད་དགོས། ངག་འདོན་དེ་སྡོང་པོ་བཀོད་པའི་མདོའི་དགོངས་དོན་བཟང་སྤྱོད་སྨོན་ལམ་གྱི་དབུ་ནས་མར་ཡོད་པའི་ཇི་སྙེད་སུ་དག་ལ་སོགས་པ་དང་། རྒྱུན་འདོན་གྱི་ཀརྨ་ཆགས་མེད་ཀྱིས་མཛད་པའི་བདེ་སྨོན་དག་གི་ཚིག་དོན་བཞིན་དུ་དང་པོ་ཕྱག་འཚལ་བའི་ཡན་ལག་ཡོང་བ་ཡིན། ཕྱག་འཚལ་བ་ཞེས་པ་གཙོ་བོ་ལུས་ཀྱི་ལས་ཡིན་ཡང་ལུས་ཀྱིས་ཕྱག་འཚལ་ཞོར་དུ། ངག་གི་ཕྱག་འཚལ་བའི་རྣམ་པ་ཅན་གྱི་ཚིག་དང་སྦྲགས་ཏེ། ཡིད་ཀྱིས་རང་ལུས་དཔག་མེད་ཇི་སྙེད་གྲངས་མེད་རྡུལ་སྙེད་ཀྱི་གྲངས་དང་མཉམ་པར་སྤྲུལ་ནས་ཕྱག་འཚལ་དགོས། ང་མི་གཅིག་ཁེ་རུ་མ་ཞིག་གིས་ལྷ་རྡོག་མ་སྐུ་འདྲ་ཁེ་རུ་མ་དེ་ཉིད་ལ་འཚལ་གྱིན་ཡོད་པ་དེ་འདྲ་མ་ཡིན་པར་རང་ལུས་དཔག་མེད་ཇི་སྙེད་གྲངས་མེད་བསམ་གྱིས་མི་ཁྱབ་པའི་རྡུལ་སྙེད་ཀྱི་གྲངས་དང་མཉམ་པར་སྤྲུལ་ཏེ། ཕྱག་འཚལ་ཡུལ་དེ་ཉིད་ཀྱང་མགོན་པོ་འོད་དཔག་མེད་ལ་སོགས་པ་ཕྱོགས་བཅུའི་སངས་རྒྱས་དང་བྱང་སེམས་མཐའ་ཡས་རྡུལ་སྙེད་ཀྱི་གྲངས་དང་མཉམ་པ་ཕྱག་གི་ཡུལ་དུ་གྱུར་པ་ཐམས་ཅད་ལ་སྒོ་གསུམ་གུས་པས་ཕྱག་འཚལ་དགོས། ཕྱག་འཚལ་ལུགས་དེ་ནམ་ཡིན་ན་བཤད་མྱོང་ཡང་ད་དུང་ཡང་བསྐྱར་བཤད་ན། ཕྱག་དང་། མཆོད་འབུལ། རྟེན་གསུམ་མཆོད་མཇལ་གང་གི་སྐབས་ཡིན་ཡང་དང་པོའི་དང་པོ་འགོ་མར་རང་གི་ལུས་དེ་ཉིད་གཙང་མ་ཞིག་བྱེད་དགོས། གཙང་མི་གཙང་རང་ཉིད་མགུ་ན་མགུ་བ་ཡིན་ཞིང་། ཕྱག་འཚལ་སྐབས་རྟེན་གྱི་མདུན་ངོས་ཀྱི་དམའ་ས་ནས་ཡར་རྟེན་ལ་ཁ་འཁོར། རྐང་བའི་ལོང་བུ་གཉིས་ཀ་གཤིབས། དྲང་མོར་བྱས་ཏེ་ལང་དགོས། ཐལ་མོ་ཁོག་སྟོང་མེ་ཏོག་པདྨ་ཁ་འབུས་པའི་དབྱིབས་འདྲ་བ་ཞིག་བྱས་ཏེ་སྦྱོར། དང་པོར་ཐལ་མོ་སྙིང་ཁར་སྦྱར། དཀོན་མཆོག་གི་ཡོན་ཏན་དྲན། དེ་ནས་ཐལ་མོ་གནས་གསུམ་དུ་གཏུགས། མ་ལྔ་ས་ལ་ཕབ་སྟེ་རང་དང་སེམས་ཅན་ཐམས་ཅད་ཅེས་བསམ་དགོས། རང་གཅིག་པུའི་སྡིག་སྒྲིབ་དག་པར་གྱུར་ཅིག་བསམ་མི་ཉན། ངས་སྔོན་ཆད་སྐབས་ཤིག་ལ་བཤད་མྱོང་ཡོད། ང་དེ་ལོར་རིག་གནས་གསར་བརྗེའི་རྗེས་སུ་ལྷ་སའི་ཇོ་བོའི་སྒོ་སྔ་བས་ཕྱེ་དུས་ལྷ་ས་ལ་གཅིག་སོང་ཞིང་། མཆོད་མཇལ་རྡོག་མ་ཆ་རེ་འདུག སྡེ་དགེ་ནས་ཡིན་པར་འདྲ་བའི་རྒན་མོ་ཞིག་གིས་ང་བས་སྐྱིད་ཅིག་མེད་པར་ཤོག ང་བས་རྒྱགས་ཤིག་མེད་པར་ཤོག་ཅེས་ཟེར་གྱིན་འདུག མོ་རང་གི་མདོག་ལ་བལྟས་ན་དེ་འདྲ་ཞིག་བཟང་རྒྱུ་མི་འདུག དེའི་ཡན་ལ་ཁེ་རུ་ཞིག་འཕར་མི་ཉན་དུས་མ་ཡག་སོང་བསམ་རྒྱུ་ཞིག་རེད། དེ་ལྟ་བུ་མ་ཡིན་པར་རང་དང་སེམས་ཅན་ཐམས་ཅད་ཀྱི་སྒོ་གསུམ་བྱ་བ་དང་བཅས་པའི་ཉེས་སྒྲིབ་བག་ཆགས་ངན་པ་དང་བཅས་པ་ཐམས་ཅད་དག་ནས་བདེ་བར་གཤེགས་པའི་གསང་གསུམ་ཡོན་ཏན་ཕྲིན་ལས་དང་བཅས་པའི་བྱིན་རླབས་ནུས་མཐུ་ཐམས་ཅད་ཐོབ་པར་བསམ་དགོས། ཕྱག་འཚལ་རྒྱུའི་ཁ་གྲངས་མང་ཉུང་མ་ཡིན། ཕྱག་འཚལ་རྒྱུའི་ཀུན་སློང་དང་། ཕྱག་འཚལ་རྒྱུའི་དམིགས་པ་གནད་འགག་ཆེ། ཡང་སྔར་བཞིན་དུ་དྲང་པོར་ལངས་ཏེ། ཐལ་མོ་སྙིང་ཁར་སྦྱར། དཀོན་མཆོག་གི་ཡོན་ཏན་དྲན་པ་ནས་འགོ་བཟུང་ནས། ཁ་ཡེངས་མིག་ཡེངས་མེད་པར་འཚལ་དགོས། འགའ་རེས་དེའི་བར་ནས་ལག་པ་གཉིས་ཀ་བགྲད་དེ་ཐལ་མོའི་ནང་ལོགས་གྱེན་དུ་བསྟན་པ་དེ་ཚོ་ཆོས་བརྒྱུད་གཞན་དང་གཞན་གྱི་བརྒྱུད་པའི་སྲོལ་དགོས་པ་རྒྱུ་མཚན་ཅན་ཡིན་ཤས་ཆེ་ཡང་གཙོ་ཆེ་ཆོས་བརྒྱུད་འདི་དང་། ཁྱད་པར་དུ་ངའི་ཕྱག་འཚལ་ལུགས་གོང་ནས་བཤད་པ་དེ་ལྟར་ཡིན། འགའ་རེས་དགྱེ་མ་སྒུར་ཡི་ཕྱག་གསུམ་རེ་བྱེད་འདུག བཤད་དུ་བཅུག་ན་གུས་པའི་རྣམ་འགྱུར་གཞན་ཞིག་ཡིན་ཟེར་ན་མི་ཤེས་ཀྱང་དཔལ་སྤྲུལ་ཚང་གིས་མི་ཆེན་གྱིས་ཕྱག་འཚལ་ལུགས་ཡིན་ན་ཅི་ཡང་མི་ལོ་ཞེས་གསུངས་ཡོད། དགྱེ་དུས་དྲང་མོར་བྱས་ཏེ་དགྱེ། མར་དགུ་དུས་སྒུར་སྒུར་བྱས་ནས་ཐོད་པ་དང་ལག་མཐིལ་གཉིས་ས་ལ་གཏུགས་ལ་བཞག་དུས་མཛུ་གུ་ཆ་གས་སྡེར་སྡེར་མི་བྱེད། ཡར་ལང་དུས་ཀྱང་ལག་རྒྱབ་ཀྱི་མཛུབ་ཚིགས་སར་ཁེན་ནས་མི་ལང་། དེ་ཚོ་གལ་ཆེ། ཕྱག་འཚལ་བའི་ཕན་ཡོན་ལ་བསམ་ན། དེ་བཞིན་གཤེགས་པའི་མཆོད་རྟེན་ལ་དད་པས་ཕྱག་འཚལ་བའི་རྣམ་པར་སྨིན་པ་དེ་དབང་ཆེན་གསེར་གྱི་ས་གཞི་ལ་མ་ཐུག་གི་བར་དུ་རྡུལ་ཕྲ་རབ་ཀྱི་གྲངས་དང་མཉམ་པའི་འཁོར་ལོས་སྒྱུར་བའི་རྒྱལ་པོའི་བདེ་བ་དང་ལྷ་མིའི་བདེ་སྐྱིད་མྱོང་བར་བཅོམ་ལྡན་འདས་ཁོང་ཉིད་ཀྱིས་གསུངས་ལ། དེ་ལས་ལྡོག་སྟེ་ཕྱག་འཚལ་ན་དེ་བཞིན་དུ་ཉེས་པ་ཡོད་རྒྱུ་དེ་དང་། ཕྱག་མ་འཚལ་ན་ཡང་སྒྲིབ་པ་མི་དག་པ་ལ་སོགས་པ་ཡང་ཤུགས་བསྟན་ཡིན། ཚོགས་མི་གསོག་པའི་རྒྱུ་མཚན་ཡང་བཤད་མི་དགོས། ཕྱག་འཚལ་ལུགས་ཚུན་ཆད་ཀྱང་དགོས་པ་རྒྱུ་མཚན་དང་བཅས་པ་འདི་ཚོ་ཙམ་ཞིག་ཡིན་རུང་དེ་ལྟར་ཡིན་ཨེ་སོང་ཞེས་ཁྱིམ་བཟའ་ཚང་གི་ནང་ནས་ཡིན་ཡང་གཅིག་གིས་གཅིག་ལ་དྲི་བཤད་གྱིས་དང་དོན་ཡོད་པའི་སྐད་ཆ་ཡིན། ཆོས་འཆད་པ་པོའི་ཁ་ནས་བཤད་པའི་སྐད་ཆ་དང་དཔེ་ཆའི་ནང་དུ་ཡོད་པའི་ཚིག་འགའ་རེ་གོ་ཨེ་འདུག་ཅེས་དྲིས་ན་བོད་སྐད་ཡིན་ཞིང་གོ་མི་འདུག་བསམ་རྒྱུ་མེད་པ་ལྟ་བུ། གོ་སོང་ཟེར་ན་ཡང་ངོ་མས་གོ་ནས་ཡང་ཟེར་བྱེད་རྒྱུ་མེད་པ་འདི་ཚོ་མང་ཆེ་བ་བོད་རང་གིས་རང་སྐད་ཆ་ཚང་བ་ཞིག་མ་ཤེས་པའི་དབང་གིས་ཡིན། འགའ་རེ་ཆོས་སྐད་ཡིན་ཡང་འགའ་རེ་ཡིག་སྐད་ཟེར་ཞིང་། ཡི་གེ་དང་སྐད་ཁ་ཁ་ཞིག་གང་ན་ཡོད། ཡིན་ངོ་མ་བོད་ཀྱི་སྤྱི་སྐད་ཡིན། བོད་ཡིག་འདི་བོད་ཆོལ་གསུམ། འབྲུག་འབྲས་ལྗོངས། བལ་བོ། མོན་པ། རྒྱ་གར་གྱི་མཐའ་མཚམས་མང་ཆེ་བ་དང་བཅས་པ་འཛམ་གླིང་ཤར་ཕྱོགས་ཀྱི་ས་ཆ་མང་པོ་ཞིག་གིས་སྤྱོད་རྒྱུའི་སྐད་ཡིག་ཡིན། ཆོས་རིག་གཞུང་གི་གླེགས་བམ་ཚང་མ་དང་དེའི་བདག་པོའི་མི་རྣམས་གཅིག་གིིས་གཅིག་ལ་ཁ་འབག་མེད་པར་གྱུར་ན་མི་ཉན་པ་ཡིན། ཆོས་རིག་གཞུང་གི་གླེགས་བམ་རྣམས་འུ་ཚོ་ཚང་མའི་ལག་ན་ཡོད་ཅིང་། དེའི་བདག་པོའི་མི་རྣམས་འུ་ཚོ་རྣམས་ཡིན། ཆོས་རིག་གཞུང་དང་མི་རྣམས་ཁ་འབག་མེད་པར་གྱུར་ན་དེའི་མི་རིགས་དེ་གནའ་ཞིག་ལ་དེ་ལྟ་བུ་ཞིག་ཡོད་དར་བ་ཡིན་ཞེས་གནའ་གཏམ་རྗེས་མེད་ཅིག་ཏུ་འགྱུར་ངེས་པ་ཡིན། དེ་ལྟར་གྱུར་པ་ཡང་མང་ལ། ཡིན་ན་ཡང་མི་རིགས་རེ་རེ་གཉིས་རེ་མེད་སོང་ཡང་ཧ་ལས་རྒྱུ་གང་ཡང་མེད་ཀྱང་ཐར་ལམ་རྣམ་དག་འཚོལ་རྒྱུའི་རིན་ཐང་ཅན་གྱི་རིག་གཞུང་ཉམས་སོང་ན་མིའི་རིགས་ནས་སེམས་ཅན་གཞན་དང་བཅས་པ་ལ་གནོད་པ་ཅན་ཡིན། ཐང་ས་ཉེ་ས་ནས་བཤད་ན། ཚང་མས་ཡི་གེ་ཤེས་པར་གྱིས་དང་ཤེས་དགོས་པའི་རིན་ཐང་ཅན་མང་པོ་ཡི་གེའི་ནང་ནས་ལེན་རྒྱུ་ཡོད། མཐའ་གཅིག་ཏུ་བན་རྒན་ཞིག་གི་ཁ་ནས་མིན་པར་མི་གོ་རྒྱུ་བྱེད་མི་དགོས། ཉིན་རྟག་པར་གོ་ཁ་ཕན་ཚུན་ཡིན་ཡང་ཁ་འཛིང་རྩོད་པ་ཟེར་རེས་གཏམ་རེས་དང་པོར་ཡག་ས་ཞིག་ནས་བཤད་ཀྱིན་ཡོད་ཀྱང་། བར་ཞིག་མཚང་འབྲུ་སྨད་ར་བྱེད་རེས་དང་གཅིག་གིས་གཅིག་ལ་ཅི་གནོད་གང་གནོད་བྱེད་རེས། མཐའ་མར་སྙིང་འདྲེ་བསླངས་ཏེ་རྫ་བཅག་རྫེའུ་དཀྲུག་ཡན་ཆད་བྱེད་དགོས་ཐུག་པ་དེ་འདྲ་ཡོང་བ་ཡིན། ཐག་རིང་ས་ཡུན་གྱི་དོན་ལ་བསམ་བློ་བཏང་ན། ཆོས་དཔེ་ཆའི་ལོ་རྒྱུས་རེ་ཤེས་ན་སྐྱིད་སྐྱིད་པོ་རང་ལ་ཡོང་ན་དཀོན་མཆོག་གི་ཐུགས་རྗེ་ཡིན་སྙམ་ནས་དད་གུས་ཇེ་ཆེར་སོང་། སྐྱིད་ཀྱི་ས་བོན་གསར་བ་རེ་བཞག སྡུག་སྡུག་པོ་རེ་ཡོང་ན་ཚེ་སྔོན་གྱི་ལས་འབྲས་ཡིན་སྙམ་སྟེ་སྡུག་བསྔལ་གྱི་ཁུར་པོ་ཡང་ཐབས་ཐོན་རྒྱུ། ད་རུང་དེའི་ཐོག་ཏུ་བདེ་སྡུག་གཏོང་ལེན་རེ་ཤེས་ན་རྐྱེན་ངན་གྲོགས་སུ་འགྱུར། སྡུག་བསྔལ་བདེ་བའི་རྒྱུར་སྒྱུར་ཆོག་པ་དེ་ལྟར་ཡིན། ཡི་གེ་སྦྱང་རྒྱུ་འདི་ཚོའི་ཐད་ནས་སྔོན་མ་ཡིན་ན་ཁ་རྩང་ཞིག་བཤད་པ་བཞིན་ཕོ་མོ་ཁྱད་མེད་ཀྱིས་ལོ་ལོན་ཡིན་ཡང་ཡི་གེ་སྦྱོངས་ཞེས་སྨྲས་པ་ཡིན། དེང་སང་གི་གནས་ཚུལ་དང་བསྟུན་ན་བྱིས་པ་ཡིས་ཁྱད་པར་དུ་བོད་ཡིག་སྦྱོངས་མ་གཏོགས་མི་རིགས་གཞན་གྱི་སྐད་ཡིག་གིས་གནས་སྐབས་ཀྱི་ཁ་གསོ་བྱེད་ལ་ཕན་ཐོགས་ཡོད་ཀྱང་མིའི་རིན་ཐང་ཡོན་ཏན་གྱིས་འབྱེད་པའི་ཡོན་ཏན་གྱི་གཙོ་བོ་དེ་མི་གཤིས་སྤུས་ཀ་བཟང་བ། ཡ་རབས་ཀྱི་བསམ་སྤྱོད་དེ་ཡིན་པས་ཐ་ན་སྤྱི་ཚོགས་ཡར་རྒྱས་ཀྱི་ཕྱིའི་དངོས་པོ་འབྱོར་ཞིང་འབྱོར་ལ་ནང་བསམ་པའི་བདུད་རྩི་དེ་བོད་ཀྱི་ཆོས་དང་རིག་གཞུང་འདི་ཉིད་འཛམ་བུའི་གླིང་སྤྱི་ཡི་ནོར་བུ་ཡིན་ཕྱིར་འདིའི་རིན་ཐང་རྩི་སྒོ་ཇེ་ཆེར་འགྱུར་ངེས་པས་དེ་དུས་རང་གི་མི་རྒྱུད་ཀྱིས་རང་གི་སྐད་ཡིག་མ་ཤེས་ན་བློ་འགྱོད་སྐྱེས་ཚེ་སྒེར་སྡུག་ཡིན་པ་དེ་ཉིད་ཞོར་དུ་བློ་སྒོ་ཕྱེས་པ་ཡིན། མན་ངག་གི་ལྡེ་མིག་རྙེད་ཐབས་བྱས་ཏེ་མི་ཟད་སེམས་ཀྱི་གཏེར་མཛོད་ཀྱི་སྒོ་རང་གིས་ཕྱེས་ནས་འཛམ་གླིང་གི་ཁྲོམ་ར་བཤེར་ཡང་ཕྱི་ནས་ཉོ་རྒྱུ་མི་ལོན་པའི་རིན་ཐང་ཅན་རིན་མེད་དུ་རང་གིས་ལེན་ཤེས་དགོས། དེ་དག་འབྲེལ་མེད་ཀྱི་སྐད་ཆ་མང་ཨེ་སོང་ངམ། ཁ༽ མཆོད་པའི་ཡན་ལག ཡན་ལག་བདུན་གྱི་ནང་ནས་གཉིས་པ་དེ་མཆོད་པ་ཡིན་ཞིང་། མཆོད་པ་ཐམས་ཅད་དངོས་བཤམས་ཡིད་སྤྲུལ་གཉིས་ཀྱི་ནང་དུ་འདུས་ལ། འོན་ཀྱང་། བདག་ནི་བསོད་ནམས་མི་ལྡན་བཀྲེན་ཆེན་ཏེ། །མཆོད་པའི་ནོར་གཞན་བདག་ལ་ཅང་མ་མཆིས། །ཞེས་གསུངས་པ་ལྟར་སྔར་མཆོད་སྦྱིན་མ་བྱས་པས་བསགས་འབྲས་ལོངས་སྤྱོད་ཀྱི་འབྱོར་བ་དམན་པས་བཀྲེན་ཆེན་ཞེས་བསོད་ནམས་ཀྱི་བསགས་འབྲས་དམན་པའི་སྤྲང་པོ་ལ་གསུངས་པ་ཡིན། སྤྲང་པོ་ཡིན་སྟབས་ཀྱིས་རྒྱ་ཆེན་པོ་ཞིག་གི་མཆོད་པ་འབུལ་བའི་མཆོད་རྫས་ཆེན་པོ་ཞིག་མེད་ཀྱང་གཅིག་ཡོད་པ་དེ་ཉིད་རྣམ་པར་དག་ངེས་ཅན་གཙང་མ། དེ་ཡང་དག་པ་གསུམ་དང་འབྲེལ་བ་ཞིག་སྟེ། ཞིང་དག་པ་མགོན་པོ་འོད་དཔག་མེད་ལ་སོགས་པ་ཕྱོགས་བཅུའི་ཞིང་ཁམས་རབ་འབྱམས་ན་བཞུགས་པའི་རྒྱལ་བ་སྲས་བཅས་ལ། དངོས་པོ་དག་པ་དེ་ལོག་འཚོ་དང་རྐུ་འཕྲོག་གི་རྫས་མ་ཡིན་པ། བསམ་པ་དག་པ་སེར་སྣའི་འཁྲི་བ་མེད་པ་ཞིག་གིས། མེ་ཏོག བདུག་སྤོས། མར་མེ། དྲི་ཆབ་ལ་སོགས་པ་དབང་པོ་དྲུག་གི་ཡུལ་དུ་གྱུར་པའི་འདོད་ཡོན་དང་ཉེར་སྤྱད་རྣམས་ཕལ་ཆེ་བ་དམིགས་རྟེན་གྱི་ཆེད་ཡིན། མཎྜལ་འདི་ཚོ་ཆོས་ལོངས་སྤྲུལ་སྐུའི་ཞིང་ཁམས་འབུལ་བའི་དམིགས་རྟེན་ཡིན་པ་ལྟར་དུ་ཡིན། དེ་ལས་གཞན། ཐུབ་དབང་མཆོད་གནས་མཆོག་ལ་ཡིད་འོང་བའི། །མེ་ཏོག་མན་ད་ར་དང་ཨུཏྤལ་དང་། །ལ་སོགས་པ་དང་། རིན་ཆེན་གདུགས་མཛེས་གསེར་གྱི་ཡུ་བ་ཅན། །ལ་སོགས་པ་ལྟར་གྱི་ཡིད་དུ་འོང་བའི་དངོས་པོ་ཆེ་འབྱོར་ཆུང་འབྱོར་དུག་གི་རིགས་དང་མཚོན་ཆ་ལ་སོགས་པ་མ་ཡིན་པའི་རང་ཉིད་ལ་གང་ཡིད་དུ་འོང་བའི་དངོས་པོ་མཐོང་ཚད་དེ་ཉིད་རྒྱལ་བ་སྲས་བཅས་ལ་མཆོད་པའི་ཚུལ་དུ་འབུལ་ཆོག་པ་ཡིན། དེ་དག་དམིགས་རྟེན་བྱས་ནས་ཡིད་ཀྱིས་སྤྲུལ་བའི་མཆོད་པ་ཐུན་མོང་ཕྱིིའི་མཆོད་པ། གཞལ་མེད་ཕོ་བྲང་བསྟོད་དབྱངས་ཡིད་འོད་ལྡན། །མུ་ཏིག་རིན་ཆེན་རྒྱན་འཕྱང་མཛེས་འབར་བ། །སོགས་གསུངས་པ་ལྟར་དུ་ལྷ་རྫས་ཀྱི་མཆོད་པ། མེ་ཏོག་འབྲས་བུ་ཇི་སྙེད་ཡོད་པ་དང་། །སྨན་གྱི་རྣམ་པ་གང་དག་ཡོད་པ་དང་། །འཇིག་རྟེན་རིན་ཆེན་ཇི་སྙེད་ཡོད་པ་དང་། །ཆུ་གཙང་ཡིད་དུ་འོང་བ་ཅི་ཡོད་དང་། །ཞེས་གསུངས་པ་ལ་སོགས་པ་ལྟར་གྱི་ཡིད་སྤྲུལ་གྱི་མཆོད་པ་སྟེ། བདག་པོས་ཡོངས་སུ་བཟུང་བ་དང་མ་བཟུང་བ་ཐམས་ཅད་ཡིན། ཐུན་མོང་མ་ཡིན་པའི་མཆོད་པ་ལ་བསམ་བློ་བཏང་ན། ནང་དང་གསང་བའི་མཆོད་པ་སྟེ་མཆོད་པའི་ལྷ་མོ་བརྒྱད་དང་བཅུ་དྲུག་ལ་སོགས་པས་མཆོད་རྫས་སྣ་ཚོགས་པ་ཐོགས་པའི་ཟད་མེད་མཆོད་པའི་སྤྲིན་ཕུང་ཀུན་ཏུ་བཟང་པོའི་རྣམ་སྤྲུལ་གྱི་མཆོད་པ་འབུལ། ཀུན་ཏུ་བཟང་པོའི་མཆོད་པའི་སྤྲིན་ཞེས་པ་ཟད་པ་མེད་པའི་རྫས་ཤིག་ལ་གོ་དགོས། ག༽ བཤགས་པའི་ཡན་ལག གསུམ་པ་བཤགས་པ་ཡིན་ཞིང་། བཤགས་པ་འདི་བཤགས་ཚུལ་རྣམ་པ་བཞི་ཡི་སྟེང་ནས་བཤད་ན། དེ་རིང་འགོ་ནས་ཡིག་བརྒྱ་འདོན་པའི་སྐབས་ཤིག་ནས་བཤགས་པར་བྱེད་པ་འདི་གནད་ཆེ་ཞེས་བཤད་པ་ཡིན། སྡིག་པ་འདི་གང་ནས་ཡོང་ན། སྦྱང་བྱ་སྡིག་པ་ཡིན་ལ་སྡིག་པའི་སྒོ་དྲུག་ཡོད་ཅིང་། སྒོ་དྲུག་དེ་གཉེན་པོ་སྟོབས་བཞི་ཡིས། སྦྱོང་ཚུལ་དེ་སྦྱོར་དངོས་རྗེས་གསུམ་གྱིས། སྦྱངས་འབྲས་དེ་ཇི་ལྟར་དག་ཚུལ་དང་བཞི་ཡིས་ཁོག་ཕུབ་སྟེ་བཤད་དགོས། དེ་ལྟར་བཤད་ན་འུབས་སུ་འདུས་པ་ཡིན། ཡང་ཟེར་བྱས་ན་སྦྱང་བྱ་སྡིག་པའི་སྒོ་དྲུག་དེ། སྦྱོང་བྱེད་གཉེན་པོ་སྟོབས་བཞི་ཡིས། སྦྱོང་ཚུལ་སྦྱོར་དངོས་རྗེས་གསུམ་གྱིས། སྦྱངས་འབྲས་ཇི་ལྟར་དག་ཚུལ་ཏེ་དེ་བཞི་བོའི་ཐོག་ནས་སྡིག་པ་འདག་ཐབས་དེ་དག་འབྲས་དང་བཅས་པ་མགོ་ནས་མཇུག་བར་བཤད་ཐུབ། ༼༡༽ སྦྱང་བྱ་སྡིག་པ་བཤད་པ། སྦྱང་བྱ་སྡིག་པའི་སྒོ་དྲུག་ཅེས་བཤད་སྐབས་ལུས་ངག་ཡིད་གསུམ་གྱི་སྒོ་གསུམ་དེ་དང་འདོད་ཆགས་ཞེ་སྡང་གཏི་མུག་གསུམ་གྱིས་དྲུག་ཏུ་བྱས་ཏེ་རྩི་ཆོག ཡུལ་ཕ་མ་བླ་མ་མཁན་སློབ་སོགས་ལ། དུས་ཐོག་མེད་ནས་ད་ལྟའི་བར་དུ། ངོ་བོ་རང་བཞིན་གྱི་ཁ་ན་མ་ཐོ་དང་བཅས་པའི་ཁྲིམས་དང་འགལ་བ་ཐམས་ཅད། སྦྱོར་བ་རང་གིས་བགྱིས་པའམ་གཞན་ལ་བགྱིད་དུ་བསྩལ་བ་ལ་སོགས་པ། སྒོ་དྲུག་ཅེས་པ་ཡུལ་དུས་ངོ་བོའི་སྒོ་ལ་སོགས་པ་ལ་བྱས་པ་ཡང་ཡོད། གང་ལྟར་ཡང་བཤགས་རྒྱུ་སྡིག་པ་ཡིན་ལ། སྡིག་པའི་བྱེད་ལས་མཐོ་རིས་དང་ཐར་བ་ལ་སྒྲིབ་ཅིང་ངན་སོང་གི་གནས་སུ་སྡུག་བསྔལ་བར་བྱེད་པ་ཞིག་ཡིན། ༼༢༽ སྦྱོང་བྱེད་གཉེན་པོ་བཤད་པ། གཉིས་པ་སྦྱོང་བྱེད་དེ་གཉེན་པོ་སྟོབས་བཞི་ཡིན་ཞེས་སྨྲས་ལ། སྔར་བྱས་སྡིག་པ་ཁོང་དུ་དུག་སོང་ལྟ་བུའི་འགྱོད་པ་སྐྱེ་བ་དེ་ཉིད་སུན་འབྱིན་པའི་སྟོབས། བརྩོན་པས་སྡིག་སྦྱོང་གི་དགེ་བ་ལ་བརྩོན་པ་དེ་ཉིད་གཉེན་པོ་ཀུན་ཏུ་སྤྱོད་པའི་སྟོབས། བཤགས་སྡོམ་བླངས་ཚར་ནས་སླར་ཡང་མི་བྱེད་པ་དེ་སོར་ཆུད་པའི་སྟོབས། དཀོན་མཆོག་གསུམ་དང་། སྡིག་སྦྱོང་གི་ལྷ་རྡོ་རྗེ་སེམས་དཔའ་དང་། ནམ་མཁའི་སྙིང་པོ། ཁྱད་པར་དུ་བྱང་ཆུབ་ཀྱི་སེམས་ལ་བརྟེན་ནས་སྡིག་པ་ཟད་ཅིང་སྲབ་ཐབས་བྱེད་པ་དེ་ཉིད་རྟེན་གྱི་སྟོབས་ཡིན། ༼༣༽ སྦྱོང་ཚུལ་བཤད་པ། དེ་ཡན་གྱིས་ས་བཅད་གཉིས་སོང་ནས་གསུམ་པ་སྦྱོང་ཚུལ་ཡིན་ཞིང་། སྦྱོར་དངོས་རྗེས་གསུམ་གྱི་སྟེང་ནས་སྦྱོང་དགོས། སྦྱོར་བ་བཤགས་ཡུལ་ཡིན་ལ། བཤགས་ཡུལ་དེ་གང་ཡིན་ཞེ་ན། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་བླ་མ་རྡོ་རྗེ་འཛིན་པ་དང་བཅས་པ་དེ་མདུན་གྱི་ནམ་མཁར་བཞུགས་པར་བསམས་ནས་སྐྱབས་འགྲོ་བྱ་བ་སྔོན་དུ་འགྲོ་བ་དང་བཅས་པས། དངོས་གཞི་སྡིག་པ་བྱས་ཚད་ཐམས་ཅད་དང་པོར་རང་གིས་ཞེ་ནས་དྲན་པར་བྱས་ཏེ་དེ་བྱས་པ་ལ་འགྱོད་པ་དྲག་པོ་དང་བཅས་པས་འདི་དང་འདྲ་བ། དེ་ལས་ཚབས་ཆེ་བ། གཞན་གྱིས་བསགས་པ་དང་བཅས་པ། རང་གཞན་གྱི་སྡིག་པ་ཐམས་ཅད་ལྕེ་ཐོག་ཏུ་ནག་ལིང་ངེ་ཡོད་པར་བསམས་ནས་བཤགས་པའི་སྐབས་སུ་བཤགས་པའི་གནས་དེ་ཉིད་སྐྱབས་གནས་མདུན་གྱི་ནམ་མཁར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་བླ་མ་རྡོ་རྗེ་འཛིན་པ་དང་བཅས་པ་ཡོད་ཅིང་། དེ་ལྟ་བུའི་སྐྱབས་གནས་བཤགས་ཡུལ་ཐམས་ཅད་ཀྱི་སྨིན་མཚམས་ནས་འོད་ཟེར་ཞིག་བྱུང་སྟེ་དེ་མ་ཐག་ཏུ་སྡིག་སྒྲིབ་ཐམས་ཅད་དག་པར་བསམ་དགོས། འདིར་རྡོར་སེམས་སྒོམ་བཟླས་དང་འབྲེལ་ཏེ་དམིགས་པ་དེ་བཞིན་དུ་བཟུང་ན་ཡང་གཅིག་པ་ཡིན། རྗེས་འོད་ཟེར་མང་པོ་ཡང་ཡང་བྱུང་ནས་སྡིག་སྒྲིབ་བག་ཆགས་དང་བཅས་པ་དག་པས་མི་ཚད་ལུས་ཤེལ་གོང་ལྟ་བུ་དག་ཅིང་གཙང་མར་གྱུར་པར་བསམས་ཏེ་དམིགས་མེད་ནམ་མཁའ་ལྟ་བུའི་ངང་ལ་དལ་ཅིག་མཉམ་པར་བཞག་དགོས། ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །དེ་ནི་འགྱོད་ཚངས་མཆོག་ཡིན་ནོ། །ཞེས་སངས་རྒྱས་ཀྱིས་མདོ་ཡི་ནང་དུ་གསུངས་ཡོད། འུ་ཚོའི་ས་ཆའི་མི་སྐྱ་ཕོ་མོས་སྡིག་པ་བྱེད་ཟེར་དུས་སྲོག་གཅོད་ཁོ་ན་ལ་གོ་བའི་ས་ཆ་ཡོད་དར། འགའ་རེས་སྡིག་པ་ཁས་ལེན་ཡིན་ཟེར་ཁུལ་བྱེད་དུས་གཡག་མཆུ་ལུག་མཆུ་བཅིང་རྒྱུ་སྤངས་པ་ལ་ཟེར་མཁན་ཡོད། ཡང་ས་ཆ་ལ་ལ་ཡིས་ནོར་ལུག་གསོད་པ་ལ་གཅེས་མིང་འདྲ་ཞིག་བཏགས་ཏེ་མ་ནི་བཏོན་བཏང་ཟེར་དར། དེ་གཅིག་བྱས་ན་དུད་འགྲོ་འཆི་ཁ་མའི་རྣ་བར་གཟུངས་སྔགས་བྱིན་རླབས་ཅན་ལན་གཅིག་བསྒྲགས་ན་ཕན་ཡོན་ཆེ་བ་ཡིན་ཡང་གཅིག་བྱས་ན་སྤྱན་རས་གཟིགས་ལ་ནོར་བུ་པདྨ་ཞེས་མཚན་ནས་བོས་ཏེ་སྙིང་རྗེའི་མངའ་བདག་གི་སྔུན་དེ་ནས་དེས་དགའ་ན་དེ་གྱིས་ཟེར་བ་ལྟ་བུ་ཞིག་གིས་མའི་སྔུན་ནས་ལྟོས་ཞེས་སྨྲས་ཏེ་བུ་བཤས་པ་ལྟ་བུ་ཞིག་ཏུ་འགྱུར་འགྲོ་ལས་ཆེ། འགའ་རེས་ལར་ནས་བསམ་བཞིན་དུ་སྲོག་བཅད་པ་མེད་ལ་ངས་སྲོག་ལར་ནས་བཅད་མ་མྱོང་། ལ་ལས་མང་པོ་མེད་ཅིང་སྡིག་པ་ཆུང་བསམ་རྒྱུ་མེད། སྔོན་གནས་རྗེས་དྲན་མེད་ཕྱིར་ཐོག་མེད་ནས་ཅི་ཞིག་བསགས་ཡོད་ཅི་ཤེས། ཚེ་འདིར་བསགས་པ་མང་ཆེ་བ་བརྗེད་ཚར་ཡོད། སྡིག་པའི་སྡིག་ངོ་མ་ཤེས་ན་ཁྱད་པར་དུ་ཞེ་ལ་མི་འདུག ད་ནངས་ནམ་ལངས་ནས་ཚུན་ཆད་ཀྱི་དེ་རིང་གི་བསམ་སྤྱོད་ཐམས་ཅད་ལོས་དྲན། དེ་ཐམས་ཅད་ཚུར་སློག་ནས་ཞིབ་བཤེར་རྩིས་ཁྲ་ཞིག་ཁོད་དང་། དགེ་སྡིག་ལུང་མ་བསྟན་གསུམ་ལས་གཞན་དུ་འགྲོ་ས་མེད་པས་གཤིན་རྗེ་ཆོས་རྒྱལ་གྱི་མདུན་དུ་ཐོན་སྐབས་རྡེའུ་དཀར་ནག་བརྩིས་པ་ལྟ་བུའི་ད་རེས་ཆོས་རྒྱལ་གྱི་ཚབ་དེ་ཉིད་རང་ཉིད་ཡིན་རྒྱུ་བྱེད་དགོས། ནམ་ལངས་ནས་ད་ལྟའི་བར་དུ་ཅི་བཤད་ཅི་དྲན་ཅི་ལས་ཡོད། ནམ་མ་ལངས་སྐེ་རགས་མ་བཅིངས་པའི་སྔོན་ཞིག་ནས་མི་དགེ་བསམ་ངན་གཡོ་འཕྲུལ་སྡིག་ལས་མང་པོ་ཞིག་དྲན་ཨེ་བྱུང་། མང་ཆེ་བ་སྡིག་པ་མི་དགེ་བ། ཕལ་ཆེ་བ་ནི་དགེ་སྡིག་ཅི་ལ་ཡང་མི་ཐེ་བའི་ལུང་མ་བསྟན། ཅིག་ཡོད་དུ་ཆུག་ཀྱང་ཟག་བཅས་ཀྱི་དགེ་བ། དགེ་སེམས་སྐད་ཅིག་མ་ཞིག་སྐྱེས་ཞེས་པ་དེ་དཀོན་པོ་ཡིན། མགོ་ཡར་བཀྱག་དུས་དང་མདང་མར་ཉལ་དུས་སྐྱབས་འགྲོ་རྡོག་མ་ཆ་རེ་ཁར་ཡོང་ཨེ་སོང་། དེ་རང་བློ་དག་པའི་སྤུས་དག་ལྟ་བུ་ཞིག་ཏུ་གྱུར་སོང་དང་མ་སོང་། དུག་དང་འདྲེས་པའི་ཁ་ཟས་དང་ཆུར་བའི་ནང་དུ་རྡོ་བསྲེས་པ་ལྟར་དུ་ཟ་བེད་མི་ཆོད་པར་གྱུར་སོང་ཨེ་ཡོད། དེ་དག་རང་རྒྱུས་རང་ལ་ཆེ་བ་ཡིན། ལྷ་དང་སྲུང་མ་ཡེ་ཤེས་ཀྱི་སྤྱན་ལྡན་རྣམས་མ་གཏོགས་སུ་གཅིག་གིས་མི་རིག གོང་ནས་བཤད་པའི་མཆུ་བཅིངས་པ་དེ་ཉིད་སྡིག་པ་ཆེ་བ་སྟེ། སྲོག་གཅོད་གོང་ན་སྡིག་གཞན་མེད་ཀྱང་ཤ་ཟ་རྒྱུ་དང་པགས་གོན་རྒྱུ། དེ་མིན་ཡང་བཟའ་མི་མང་གི་ཁ་གསོ་རྒྱབ་འགེབས་ཀྱི་ལྟ་ས་ཞིག་ཡོད་པ་ཡིན། ལྟ་ས་ཁབ་ཅིག་མེད་པའི་དོན་མེད་སྡིག་ཆེན་འདྲ་བསགས་ཨེ་ཡོད། ལྟུང་བ་འབྱུང་བའི་སྒོ་བཞི་ཞེས་པ་མི་ཤེས་པ་དང་། མ་གུས་པ། བག་མེད་པ། ཉོན་མོངས་པ་མང་བ་རྣམས་ཡིན་པས་དེ་རྣམས་གང་གི་དབང་དུ་གྱུར་ནས་ཉེས་འགལ་སོང་ཡོད། སྡོམ་དང་དམ་ཚིག་འགལ་མཁན་ཚོས་ཅིས་ཀྱང་ཉམས་རྒྱུ་ཉམས་ཚར་སོང་། འགལ་རྒྱུ་འགལ་ཚར་སོང་བསམ་རྒྱུ་མེད། གཡག་གཅིག་བསད་པ་དང་གཡག་བརྒྱ་བསད་པའི་སྡིག་པ་གཉིས་འདྲ་ས་མི་འདུག དེ་བཞིན་དུ་ཉེས་ལྟུང་གང་ཡིན་ཡང་ཐེངས་རེ་བཞིན་དུ་གསོག་འགྲོ། ཕམ་ལྟུང་འབྱུང་ལ་ཉེ་བའི་ཆོས་མགོ་མི་ཐོན་པ་འདུག་བསམ་མཁན་ཚོས་སྡོམ་པ་ཕུལ་བཏང་ན་ཡག་ཅེས་ཟེར་བའི་རྒྱུ་མཚན་དེ་ཡིས་ཡིན། ཡིན་ཡང་འདུལ་བ་ཡུལ་དུས་དང་བསྟུན་ཆོག་ལ། དགེ་འདུན་འདུས་པའི་ཚོགས་དབུས་ནས་ཆོ་ག་བཞིན་དུ་ཕུལ་ནས་ཆོས་གོས་རྣམ་གསུམ་དེ་ཡང་ཡར་ཕུལ། བཤགས་སྦྱོང་གི་ཆད་ལས་སྒྲུབ་དགོས་མ་གཏོགས་ང་སོང་ཚར་ཞེས་ཆ་ཞིག་བཞག་སྟེ་རྒྱུག་འགྲོ་རྒྱུ་མི་འདུག་ཅེས་དེ་བཤད་པ་ཡིན། གལ་ཏེ་སྡོམ་པ་འབུལ་རྒྱུ་ཞིག་མེད་ཀྱང་སྡོམ་རོ་ཡར་ཕུལ་ཏེ་ཆོ་ག་བཞིན་དུ་ཕྱག་ལེན་ཁོར་ཡུག་འདི་ཚོ་ནས་དགོས་རྒྱུ་དེ་ཉིད་ཆོས་བཞིན་འདུལ་བ་བཞིན་དུ་ཆོས་ཁྲིམས་གཏན་ལ་ཕབ་པ་ཡིན་ཆགས་རེ། བཅོམ་ལྡན་འདས་ཀྱིས་འདུལ་ཁྲིམས་ཉིས་བརྒྱ་ལྔ་བཅུ་རྩ་གསུམ་གསུངས་པ་དེ་ཉིད་ཐོག་མར་དགེ་སློང་བཟང་བྱིན་གྱིས་རིགས་བརྒྱུད་ཀྱི་ས་བོན་ཞིག་བཞག་པ་ཚུན་ཆད་ནས་ཕམ་ལྷག་བཅུ་བདུན་སྤངས་ལྟུང་སོར་བཤགས་ཉེས་བྱས་ཀྱི་སྡེ་ཚན་རིམ་པར་བཅས་ཡོང་བ་ཡིན། མཐའ་འཁོབ་ལ་ཀོ་ལྤགས་གནང་བ་དང་རུང་དང་མི་རུང་གང་ལ་ཉེ་ན་དེ་གྱིས་ཞེས་གསུངས་པ་དེ་ཚོ་ཡུལ་དུས་དང་བསྟུན་པའི་ཁུངས་རྒྱུ་མཚན་ཡིན། བཅས་དང་རང་བཞིན་གྱི་ཉེས་འགལ་གང་ཡིན་ཡང་སྡིག་པ་ཞེས་པ་དེ་འོ་ཟོའི་ནང་དུ་ཟོ་དྲེག་ཆགས་པ་ལྟ་བུ་མང་པོ་སོག་མ་སོང་བའི་གོང་དུ་བཤགས་དགོས། ཁྱད་པར་གསང་སྔགས་ཀྱི་དམ་ཚིག་དང་འགལ་མཁན་དེ་དག་འགལ། ཉམས། འདས། རལ་རྣམས་དུས་ཚོད་ཀྱི་རིམ་པས་ཕྱེས་ཡོད་པས་ལོ་གསུམ་འདས་ན་གསོ་མི་རུང་བར་འགྱུར་བ་དེ་ཚོ་ད་ལྟའི་སྐབས་སུ་འཇིག་རྟེན་མིའི་སྔུན་ནས་མིན་མདོག་བསྟན་ཆོག་ཀྱང་བཀའ་ཡི་སྲུང་མ་དམ་ཚིག་གི་གཉེར་འཛིན་ཚོས་ཆད་པ་མ་བཅད་ནས་མི་མངགས། ༼༤༽ སྦྱངས་འབྲས་བཤད་པ། འུ་ཚོས་བཤད་རྒྱུ་བཞི་བ་སྡིག་པ་བཤགས་ནས་སྦྱངས་ཏེ་དག་སོང་བའི་སྦྱངས་འབྲས་དེ་ཉིད་ཇི་ལྟར་ཡིན་ཞེ་ན། ཟླ་བ་སྤྲིན་བྲལ་ལ་དཔེ་བཞག་ཡོད། ཟླ་བ་སྤྲིན་དང་བྲལ་བ་ལྟར་དུ་སྔར་བཞིན་དུ་སོས་རྒྱུ་ཡོད་པ་སྟེ། བཤེས་སྤྲིངས་ལས། གང་ཞིག་སྔོན་ཆད་བག་མེད་གྱུར་པ་ལ། །ཕྱིས་ནས་བག་དང་ལྡན་པར་གྱུར་པ་དེ། །ཟླ་བ་སྤྲིན་བྲལ་ལྟ་བུ་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས་ཏེ་དཔེ་བཞག་ཡོད། ཆོས་འཇིག་རྟེན་གྱི་བྱ་བ་གང་བསྒྲུབས་ཀྱང་ཤེས་རབ་ཡོད་དགོས། མི་སྤྱང་པོ་ཡིན་དགོས། ལྷ་ས་པས་བཤད་པ་ལྟར་ན་མི་གྲུང་པོ་ཡིན་དགོས་མ་གཏོགས་ཐབས་ལ་མ་མཁས་ན་བྱ་བ་གང་ཡིན་ཡང་ཉེས་འགྲོ། ཅི་ཞིག་ལ་ཐུག་ཀྱང་ཕག་སྣ་བྲག་ལ་ཐུག་པ་ལྟ་བུར་འགྱུར་འགྲོ། ལྕགས་ཀྱི་རི་ལུ་ཆུང་ཆུང་ཞིག་ཡིན་ཡང་ཆུ་ནང་དུ་འཕངས་ན་ཆུ་འོག་ཏུ་གཏིག་འགྲོ། ལྕགས་ཐོ་ཆེན་པོ་ཞིག་ཡིན་ཡང་སྲབ་མོར་བྱས་ཤིང་བརྡུང་སྟེ་སྦྲང་གཤོག་ལྟ་བུར་བྱས་ནས་ཆུའི་ཁར་ཞོག་དང་ཆུའི་ཁར་ལྡིང་སྟེ་ཆུ་ནང་དུ་གཏིག་པ་མ་ཡིན། སྡིག་པ་ལ་ཡོན་ཏན་མེད་ཀྱང་བཤགས་ན་དག་པ་སྡིག་པའི་ཡོན་ཏན་ཡིན་ཞེས་པ་དེ་ལྟ་བུ་ལ་དགོངས་ཏེ་གསུངས་པ་ཡིན་པས་མདོར་ན་སྡིག་པས་སྒྲིབ་ཤོར་བ་དེ་ཉིད་སོ་སོ་སྐྱེ་བོ་ཡིན་ཕྱིར་ཁག་མེད་ཀྱང་སྡིག་པ་བྱས་ཚར་བའི་རྗེས་སུ་བཤགས་པ་བྱེད་པ་དེ་ཉིད་རང་ལག་ཡིན་པས་དེ་ལ་གཟབ་དགོས། ང༽ ཡི་རང་བའི་ཡན་ལག འུ་ཚོས་ཡན་ལག་བདུན་པ་འཆད་ཀྱིན་ཡོད་པས་ད་ཡན་ལག་བཞི་བ་དེ་དགེ་ལ་རྗེས་སུ་ཡི་རང་ཡིན་ལ། རྒྱུ་ནོར་རྫས་ཀྱི་གཏོང་སྒོ་བྱེད་མི་དགོས། ཚེགས་དཀའ་ལས་ཀྱི་ཤུགས་རྒྱག་མི་དགོས། བསམ་བློ་གཏོང་ལུགས་ཤིག་གིས་ཚོགས་རླབས་ཆེན་དེ་མ་ཐག་ཏུ་འདུམ་འགྲོ་བ་དེ་ཉིད་ཡི་རང་ཡིན། མདོ་སྡུད་པའི་ནང་དུ། སྟོང་གསུམ་རི་རབ་སྲང་ལ་གཞལ་བས་ཚད་བཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟར་མིན། །ཞེས་གསུངས་ཏེ། རིའི་རྒྱལ་པོ་རི་རབ་སྲང་རྒྱ་མར་བཀྱགས་ནས་ལྗིད་ཚད་མ་དགོས་དང་འུ་ཚོའི་མིག་སྔ་ན་ཡོད་པའི་གངས་རི་རྫ་རི་འདིའི་རི་ཕྲན་གཅིག་གི་ལྗིད་ཚད་གྲངས་ཀྱིས་བགྲང་རྒྱུ་ལོན་ས་མི་འདུག་བསམ་རྒྱུ་ཞིག་ཡིན་ལ། སྟོང་གསུམ་གྱི་སྟོང་ཆེན་པོ་གཅིག་ལ་མི་མཇེད་འཇིག་རྟེན་བྱེ་བ་ཕྲག་བརྒྱ་དེ་སྲང་ལ་བཀྱགས་ནས་ཚད་བཟུང་བ་དེ་ཉིད་ནུས་ཀྱང་ཡི་རང་ཁེ་རུ་མ་ཞིག་བྱས་པའི་དགེ་བའི་ཚད་དེ་གཞལ་མི་ནུས་ཞེས་གསུངས་ཡོད། དེ་སངས་རྒྱས་བཅོམ་ལྡན་འདས་ཀྱིས་མདོའི་ནང་དུ་གསུངས་པ་ཡིན། ཚད་མར་གྱུར་པའི་སྟོན་པའི་བཀའ་ལུང་ཡིན། སྔར་སྟོན་པ་བཅོམ་ལྡན་འདས་འཇིག་རྟེན་དུ་ཞལ་བཞུགས་དུས་རྒྱལ་པོ་ཆེན་པོ་གསལ་རྒྱལ་ཞེས་པ་དེས་སྟོན་པ་འཁོར་དང་བཅས་པ་གདུགས་ཚོད་ལ་སྤྱན་དྲངས་ཏེ་ཉིན་གུང་གི་གུང་ཚིགས་དྲངས། ཚོགས་བསགས་རྒྱ་ཆེན་པོ་བྱས། འབུལ་བ་རྒྱ་ཆེན་པོ་ཕུལ། དེའི་ཡོན་བསྔོ་གསུངས་པའི་སྐབས་སུ་རྒྱལ་པོ་ཆེན་པོ་ཞེས་གསུངས་ཏེ་དེ་རིང་གི་ཡོན་བསྔོ་དེ་ཁྱོད་ལས་དགེ་བ་བསགས་སྟོབས་ཆེ་བ་ཞིག་ཡོད་ཅིང་དེ་ལ་བསྔོ་དང་ཁྱོད་ལ་བསྔོ་ཞེས་གསུངས་པ་ལ། རྒྱལ་པོས་ང་བས་བསགས་སྟོབས་ཆེ་བ་དེ་ལ་བསྔོ་བ་མཛོད་ཅེས་ཞུས་པ་ཡིན། དེ་སུ་ཡིན་ཞེ་ན་དབུལ་མོ་གྲོང་ཉུག་མ་ཞེས་པ་སྤྲང་ཟས་ཀྱིས་ཁ་གསོ་བ་དེ་ལྟ་བུ་ཞིག་གིས་རྒྱལ་པོས་བསོད་ནམས་བསགས་པ་ལ་ཡི་རང་བྱས་པ་དེ་ལ་ཡོན་བསྔོ་མཛད་པ་ལྟ་བུ་ཡིན། ཀུན་མཁྱེན་འཇིགས་གླིང་གིས། སྦྱོར་བ་གང་གིས་བདག་ཉིད་མ་འཁྲུགས་བཞིན། །བསམ་པ་ཁྱད་པར་གཅིག་གིས་གཞན་དག་པའི། །རྣམ་དཀར་ཡུད་ལ་འཕྲོག་པའི་ཆོམ་རྐུན་གྱི། །བརྟུལ་ཞུགས་རྗེས་སུ་ཡི་རང་ཁོ་ནས་བྱས། །ཞེས་གསུངས་ཏེ། གཞན་གྱི་རྣམ་དཀར་གྱི་དགེ་ལས་ཆེན་པོ་རང་ཉིད་ཀྱིས་ལུས་སེམས་འཁྲུགས་པའི་དཀའ་ལས་ཆེན་པོ་མ་དགོས་པར་ཆུང་ཆུང་ཤ་རྩ་ཞིག་དངུལ་མ་དགོས་པར་ཐོབ་པ་དེ་ཉིད་འཕྲོག་ཅེས་སྙན་ངག་གི་ཚིག་རྒྱན་སྦྱར་ཏེ་གསུངས་པ་ལྟར་དུ་ཡིན། འདིའི་ཤུགས་ལས་ཅི་ཞིག་གོ་ན། གཞན་གྱི་དགེ་བ་ལ་ཕྲག་དོག་བྱེད་པ་དང་། དེ་ལ་ཟོལ་གྱིས་སྨད་པའམ་དངོས་སུ་སྨོད་པའི་གཞན་དག་གི་དགེ་བ་དེ་ལ་བརྟེན་ཏེ་རང་ཉིད་ཀྱིས་བསོད་ནམས་མ་ཡིན་པར་བཀོད་པའམ་སྡིག་ཅན་དུ་འགྱུར་རྒྱུ་ཡང་ཤུགས་ནས་གོ་ཐུབ། ཅ༽ ཆོས་འཁོར་བསྐོར་བར་བསྐུལ་བའི་ཡན་ལག དེ་ཡིས་ཕྱག་འཚལ་བ་དང་མཆོད་ཅིང་བཤགས་པ་རྗེས་སུ་ཡི་རང་བཞི་སོང་ལ། ལྔ་བ་ཆོས་འཁོར་བསྐོར་བར་བསྐུལ་བའི་ཡན་ལག་ཡིན་ཞིང་། སྔོན་སངས་རྒྱས་བཅོམ་ལྡན་འདས་ཀྱིས་རྒྱ་གར་རྡོ་རྗེའི་གདན་ནས་སྲོད་ལ་བདུད་བཏུལ། ཐོ་རངས་མངོན་པར་རྫོགས་པར་སངས་རྒྱས་པའི་གནས་སྐབས་ན། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་རྙེད། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་ནགས་འདབས་ཉིད་དུ་གནས་པར་བྱ། །ཞེས་གསུངས་ཏེ་ཆོས་མ་བསྟན་ནས་བཞུགས་ཡོད་པའི་གནས་སྐབས་སུ་ཚངས་པས་གསེར་གྱི་འཁོར་ལོ་རྩིབས་སྟོང་དང་ལྡན་པ་ཞིག་དང་། བརྒྱ་བྱིན་གྱིས་སྐྱེ་བ་ལྔ་བའི་ཆོས་དུང་ཞིག་ཕུལ་ཏེ་ཆོས་འཁོར་བསྐོར་བར་བསྐུལ་བའི་གསོལ་བ་བཏབ་ནས་དམ་པའི་ཆོས་ཀྱི་བདུད་རྩིའི་ཆར་འཇིག་རྟེན་ན་ཕབ་པ་བཞིན་དུ་ད་ལྟའི་སྐབས་རྒྱལ་གསུང་བཀའ་དང་དགོངས་འགྲེལ་གྱི་གླེགས་བམ་འཆད་ལུང་གི་རྒྱུན་དང་བཅས་པ་འགའ་ཞིག་བཞུགས་ཀྱང་དགོས་པའི་དབང་གིས་དྲང་ངེས་ཀྱི་ཚུལ་སྣ་ཚོགས་ཀྱིས་གསུངས་ཡོད་པ་དེ་ཉིད་མདོ་ཐམས་ཅད་མཐའ་དྲུག་དང་། རྒྱུད་ཐམས་ཅད་ཚུལ་བཞིའི་ལྡེ་མིག་གིས་ཕྱེ་ཐུབ་པ་ཞིག་མེད་ན་དགོངས་པ་ཇི་བཞིན་དུ་ལེན་དཀའ་ནས་ཕྱོགས་རིས་ཅན་གྱིས་རང་ལུགས་འཇོག་མ་ཤེས། རིས་མེད་ཡིན་ཟེར་མཁན་ཚོས་ར་ལུག་རྩམ་ཕྱུར་བསྲེས་པ་ལྟ་བུ་བྱས། མདོ་ལུགས་ཀྱི་གྲུབ་མཐའ་རྣམ་བཞི། སྔགས་ལུགས་ཀྱི་རྒྱུད་སྡེ་གོང་འོག བོད་ཀྱི་བཤད་བརྒྱུད་དང་སྒྲུབ་བརྒྱུད། ཡོད་ན་ཡོད་ཚད་ཀྱི་ལྟ་སྒོམ་སྤྱོད་པ་རང་ལུགས་ལ་ཇི་བཞིན་དུ་འཇོག་མ་ཤེས་ནས་བལ་ཛ་ལྟར་སྣོག་བསལ་དཀའ་བ་སྟེ་བལ་འཛིང་བཞིན་དུ་སྣོག་བསལ་རྒྱུ་མེད་པའི་དུས་ཚོད་འདིར་རྨོངས་པའི་མིག་འབྱེད། རབ་རིབ་ཀྱི་དྲི་མ་སེལ་ནུས་པའི་དགེ་བའི་བཤེས་གཉེན་མཇལ་རྒྱུ་ཡོད་ན་དེ་ལ་ཆོས་འཁོར་བསྐོར་བར་བསྐུལ་བ་བས་བསོད་ནམས་ཆེ་ཞིག་ཡོད་དཀའ་བ་དེ་ཉིད་འུ་ཚོས་དཔག་ན་ཡང་ཤེས་རྒྱུ་ཅན་ཞིག་ཡིན། ཡིན་ན་ཡང་དེ་འདྲ་ཞུ་ས་མི་འདུག་ཅིང་དེའི་བསོད་ནམས་དེ་དེང་སང་གསོག་ཐབས་མི་འདུག་བསམ་མི་དགོས་ཏེ། རྒྱལ་སྲས་ཞི་བ་ལྷས། ཕྱོགས་རྣམས་ཀུན་གྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ནི། །སེམས་ཅན་སྡུག་བསྔལ་མུན་འཐོམས་ལ། །ཆོས་ཀྱི་སྒྲོན་མེ་སྦར་དུ་གསོལ། །ཞེས་གསུངས་པ་ལྟར་དུ་ཕྱོགས་བཅུའི་འཇིག་རྟེན་གྱི་རྒྱལ་བ་སངས་རྒྱས་ནས་ཆོས་འཁོར་བསྐོར་བར་གདུལ་བྱས་བསྐུལ་བའི་རྟེན་འབྲེལ་སྒྲིག་པ་དང་། དེ་བཞིན་དུ་བྱང་ཆུབ་སེམས་དཔའ་དགེ་བའི་བཤེས་གཉེན་ཆེན་པོ་ཆོས་མི་གསུང་ནས་བཞུགས་པ་ཇི་ལྟར་མེད། རང་ལ་གསོལ་བ་འདེབས་པའི་ནུས་པ་ཡོད་ན་རྒྱལ་བ་སྲས་བཅས་ལ་མཁྱེན་ཅིང་གཟིགས་པའི་ཡོན་ཏན་དང་ཕྲིན་ལས་ལ་ཆགས་ཐོགས་མི་སྲིད། དེ་ཚོ་བསྒྲུབས་ན་འགྲུབ་རྒྱུའི་དགེ་རྩ་རླབས་ཆེན་ཡིན་འདུག ཅི་ཞིག་ཡིན་ན་གོང་ཞིག་ནས་བཤད་པ་ལྟར་ཕག་སྣ་བྲག་ལ་ཐུག་པ་ལྟ་བུ་ཐོགས་འགྲོ་ས་མེད་པར་ལག་པ་ཐོགས་ནས་འདེད་འདུག་མི་དགོས། ཆ༽ མྱ་ངན་ལས་མི་འདའ་བར་གསོལ་བ་འདེབས་པའི་ཡན་ལག ཡན་ལག་དྲུག་པ་མྱ་ངན་ལས་མི་འདའ་བར་གསོལ་བ་འདེབས་པ་ཡིན་ལ། འདི་ལ་ཀུན་མཁྱེན་འཇིགས་གླིང་གིས། རྒྱལ་དང་དེ་སྲས་རྣམས་ཀྱིས་སྤངས་གྱུར་པའི། །འགྲོ་འདིས་སྡུག་བསྔལ་གནས་སྐབས་བསྟེན་མཐོང་ནས། །མྱ་ངན་འདའ་བ་མེད་པའི་གདན་ཁྲི་ལ། །དངོས་པོ་ཀུན་གྱི་རིན་ཐང་གཅིག་ཏུ་སྤུངས། །ཞེས་གསུངས་ཤིང་། དེང་སང་གི་དུས་འདིར་རྒྱལ་བའི་རྒྱལ་ཚབ་བླ་མ་ཡིན་ལ། དེ་ཡང་དགེ་བའི་བཤེས་གཉེན་གྱི་གཟུགས་སུ་བྱོན་ནས་གདུལ་བྱའི་བློ་དང་འཚམས་པའི་ཆོས་སྟོན་པ་པོ་དང་། རྒྱལ་བའི་མཛད་པ་སེམས་ཅན་གྱི་གཞན་དོན་ཡིན་པས་ན་དངོས་ཤུགས་བརྒྱུད་གསུམ་ནས་སེམས་ཅན་ལ་ཕན་བདེ་སྦྱིན་པའི་སྐྱེས་མཆོག་དམ་པ་གང་ན་སུ་བཞུགས་ཐམས་ཅད་ལ་དངོས་སམ་བརྒྱུད་ནས་མྱ་ངན་ལས་མི་འདའ་བར་གསོལ་བ་འདེབས་དགོས། སྟོན་པ་བསྟན་འཛིན་གྱི་སྐྱེས་བུ་མ་བཞུགས་དུས་དེའི་བསྟན་པ་ཡང་རང་བཞིན་གྱིས་ཉམས་པར་འགྱུར་བ་ཡིན་པས་སློབ་དཔོན་དབྱིག་གཉེན་གྱིས་གསུངས་པ་ལྟ་བུ་སྟེ། སྟོན་པ་འཇིག་རྟེན་མིག་ནི་ཟིམ་གྱུར་ཅིང་། །དཔང་གྱུར་སྐྱེ་བོ་ཕལ་ཆེར་ཟད་པ་ན། །དེ་ཉིད་མ་མཐོང་རང་དགར་གྱུར་པ་ཡིས། །ངན་རྟོག་རྣམས་ཀྱིས་བསྟན་པ་འདི་དཀྲུགས་སོ། །ཞེས་གསུངས་པས་རང་བསྟན་རང་གིས་བཤིག་ཅིང་བསྟན་བཤིག་ལག་དམར་ནང་ནས་འབུད་པའི་དུས་འདིར་སྐྱེ་དགུའི་བདེ་སྐྱིད་ཀྱི་གཞི་རྩ་རྒྱལ་བསྟན་མི་ནུབ་ཡུན་གནས་ཀྱི་ཆེད་དུ་བསྟན་འཛིན་གྱི་སྐྱེས་བུ་རེ་རེ་ཡིན་ཡང་མྱ་ངན་ལས་མི་འདའ་བར་བཞུགས་གསོལ་འདེབས་པ་དང་ལྷན་དུ་རང་ངོས་ནས་ཡིན་ན་ལོག་སྒྲུབ་སོགས་ཀྱིས་ཐུགས་སུན་པར་འགྱུར་བའི་བྱ་བ་སྒྲུབ་མི་ཉན། ཐུགས་སུན་པར་འགྱུར་བའི་བྱ་བ་མི་སྒྲུབ་ཅིང་གཞན་དག་བསམ་སྦྱོར་ལོག་པ་དེ་འདྲ་བའི་རིགས་ལ་འདུལ་བའི་ཆོས་སྐད་བྱས་ན་ཤད་སྦྱངས་ཏེ་གང་འཐད་ཅི་ནུས་ཀྱིས་དེ་ལས་ལྡོག་ནུས་ན་ལྡོག་དགོས། ལྡོག་མ་ནུས་ཏེ་རང་ལ་དེའི་ནུས་པ་མེད་ན་ཡང་རང་ཉིད་དེ་འདྲ་བ་ལ་རྒྱབ་ཀྱིས་ཕྱོགས་ཏེ། སྔོན་དགེ་བསྙེན་ཙུན་དས་སྟོན་པ་སངས་རྒྱས་མྱ་ངན་ལས་མི་འདའ་བར་གསོལ་བ་བཏབ་ནས་སྐུ་ཚེའི་འདུ་བྱེད་བྱིན་གྱིས་བརླབས་པ་ལྟ་བུ་བྱུང་ན་རབ་ཡིན་ཞིང་། དེ་མིན་ཡང་རང་ངོས་ནས་འགྱོད་པ་མེད་པའི་གནས་བཟང་པོ་བྱས་པས་བློ་བདེ་བས་མི་ཚད་བསོད་ནམས་རླབས་ཆེན་ཐོབ་ངེས་པ་དེ་ལྟར་ཡིན། འདིའི་མཚམས་ནས་བདུན་པ་བསྔོ་བའི་ཡན་ལག་ཡིན་ལ། དུས་ཚོད་ཀྱི་དབང་གིས་དེ་རིང་བཤད་ཐུབ་ས་མ་རེད། ཆུ་ཚོད་ཀྱང་ཡུན་རིང་ཞིག་སོང་ཚར་འདུག དང་པོའི་འཆར་གཞི་ལ་ཉིན་གཉིས་པ་ལ་ཤོ་ལོ་ཀ་བཞི་བོའི་ནང་གི་བར་གྱི་ཤོ་ལོ་ཀ་གཉིས་ཀ་བཤད་འཆར་ཡིན་ཡང་དེ་རིང་འུ་ཚོས་དཔག་ཡས་དགེ་བའི་རྩ་བ་ཡོངས་བསྐྱེད་ཤོག་ཅེས་པའི་མཚམས་འདི་ནས་འཇོག་དང་སྐྱོན་མི་འདུག འདི་ཡན་ཆད་ཀྱིས་ཁ་རྩང་དེ་རིང་གི་ཉི་མ་གཉིས་ཀ་ལ་རྩ་བའི་སྤྱི་ཆིངས་ཀྱི་བདེ་བ་ཅན་དུ་སྐྱེ་བའི་རྒྱུ་དང་གྲོགས་ཏེ་སྔ་མ་གསུམ་པོ་སོང་ཞིང་། བསྔོ་བ་འདི་སྨོན་ལམ་དང་སྦྲེལ་ཏེ་རྒྱུ་བཞི་བའི་སྐབས་སུ་བཤད་ན་ཡང་འབྲེལ་ཆེ། འདིའི་ཡན་གྱི་བསགས་སྦྱོང་གི་ཡན་ལག་འདི་དག་གནད་གཅིག་བས་གཅིག་ཆེ་ཡིན། ཕྱག་འཚལ་བ་འདི་ང་རྒྱལ་གྱི་གཉེན་པོ་དང་སྒྲིབ་སྦྱོང་གི་མཆོག་ཡིན། སྒྲིབ་པ་དག་རིམ་གྱིས་ཚོགས་ཀྱང་རང་ཤུགས་ཀྱི་རྫོགས་པའི་ཕྱིར་ན་ཚོགས་བསགས་སྒྲིབ་སྦྱོང་གཉིས་ཀའི་ཐབས་ཁྱད་པར་ཅན་ཡིན། མཆོད་པ་འདི་སེར་སྣའི་གཉེན་པོ། དངོས་འབྱོར་གྱི་མཆོད་པ་བྱང་སེམས་ཁྱིམ་པའི་རིགས་ལ་གཙོ་བོར་གོ་ཆོག་རྒྱུ་དང་། རབ་ཏུ་བྱུང་བ་སྦྱངས་ཡོན་ལ་གནས་པ་ཞིག་གིས་དམ་པའི་ཆོས་འཛིན་རྒྱུ་དེ་ཉིད་མཆོད་པ་ཐམས་ཅད་ཀྱི་མཆོག་ཡིན། མཆོད་པ་འབུལ་བ་འདི་རྒྱལ་བ་དགྱེས་པའི་ཐབས་ཡིན། རྒྱལ་བ་དགྱེས་པའི་ཐབས་རྒྱལ་བ་མཉེས་པར་བྱེད་པའི་ལས་ཤིག་གི་ནང་ནས་བྱང་ཆུབ་མཆོག་ཏུ་སེམས་བསྐྱེད་པ་དང་གཅིག དམ་པའི་ཆོས་འཛིན་པ་དང་གཉིས། སེམས་ཅན་ལ་སྙིང་རྗེ་སྒོམ་པ་དང་གསུམ། ཆོས་ཉམས་ལེན་བྱས་ནས་སྒྲུབ་པ་སྙིང་པོར་འཛིན་པ་དང་བཞི་བོ་དེའི་ཡན་གྱི་མཆོད་པ་ཞིག་མེད། མཆོད་པ་མཆོག་ཏུ་གྱུར་པ་དེ་བཞི་བོ་ཡིན། དེའི་ནུས་པ་མེད་ན་བདུན་ཚར་ཀོང་བུ་ལ་མི་བརྟེན་ཀ་མེད་ཡིན། ད་ལྟའི་རྣམ་རྟོག་རང་ག་མ་འདི་ཡོད་པའི་རིང་ལ་ཆེ་འབྱོར་ཆུང་འབྱོར་གྱིས་ཟང་ཟིང་རྫས་ཀྱི་མཆོད་པ་ལ་འབད་དགོས། གོང་གི་དམ་པའི་ཆོས་འཛིན་པ་དང་ཆོས་སྒྲུབ་པའི་མཆོད་པ་གཉིས་ཀ་གཅིག་མ་ཡིན་ནམ་སྙམ་ན། དམ་པའི་ཆོས་འཛིན་ཞེས་པ་གཙོ་བོ་ལུང་གི་ཆོས་འཆད་རྩོད་རྩོམ་པས་འཛིན་པ་དང་། འོག་གི་དེ་རྟོགས་པའི་ཆོས་སྒྲུབ་པ་ཉམས་ལེན་གྱིས་འཛིན་པའི་ཁྱད་པར་དེ་ལྟར་ཕྱེ་དགོས། བཤགས་པའི་ཕན་ཡོན་གོང་ནས་ཀྱང་རྒྱས་བཤད་བྱས་པ་ལྟར་སྤྱིར་ན་བཤགས་པ་ཚུལ་བཞིན་དུ་བྱས་ན་ཉེས་སྒྲིབ་དག་ནས་སོར་ཆུད་པ། ཁྱད་པར་དུ་བྱང་ཆུབ་སེམས་དང་འབྲེལ་ན་སྡིག་པ་ཆེན་པོ་དེ་ཉི་མས་ཁ་བ་བཞུས་པ་ལྟར་ཇེ་སྲབ་ནས་ཇེ་སྲབ་ཏུ་འགྲོ། སྡིག་པ་ཆུང་ཆུང་དེ་ཉི་མས་བ་མོ་བཞུས་པ་ལྟར་རྩ་མེད་དུ་འགྲོ། དེའི་སྟེང་དུ་སྟོང་ཉིད་ཀྱི་ལྟ་བ་བསྒོམས་ན་མཚམས་མེད་བྱས་པ་ཡང་སྐད་ཅིག་གིས་བྱང་བར་མདོ་ལས་གསུངས། རྗེས་སུ་ཡི་རང་གི་དགེ་བ་ལ་མངོན་རློམ་དང་ཞེན་པ་ཆུང་ངུས་ཀྱང་དགེ་རྩ་ལྷད་མེད་ཁྱད་འཕགས་སུ་འགྱུར་ཐུབ་དཀའ་བས་དགེ་རྩ་ལྷད་མེད་ཁྱད་འཕགས་སུ་འགྱུར་རྒྱུ་ལ་མངོན་རློམ་དང་ཞེན་པ་མ་ཞུགས་པ་ཞིག་དགོས། ཆོས་འཁོར་བསྐོར་བར་བསྐུལ་བས་ཞོར་དུ་ཆོས་སྤངས་པའི་ཉེས་པ་འདག་པ་དང་། ཚེ་རབས་ཐམས་ཅད་དུ་དམ་པའི་ཆོས་འཛིན་པར་འགྱུར་བའི་ཕན་ཡོན་དང་ལྡན་པ་ཡིན། མྱ་ངན་ལས་མི་འདའ་བར་གསོལ་བ་བཏབ་པའི་རྒྱུ་མཐུན་གྱི་འབྲས་བུ་ལ་གསོལ་བ་འདེབས་པོ་བདག་རང་ཉིད་ཀྱང་དུས་མ་ཡིན་པའི་འཆི་བའི་མཚན་མ་མཐོང་བ་ཡང་ལྡོག་པར་འགྱུར་བ་ཡིན་ཞེས་གསུངས། འདིའི་མཚམས་ཀྱི་རྣམ་པ་སུ་ཡིན་ན་གཅིག་གིས་མགུར་ཞིག་འཐེན་དང་དེ་ནས་འུ་ཚོས་བསྔོ་བ་བྱེད། ༈ ༼ཁྱབ་བདག་བཀའ་འགྱུར་བ་ཆེན་པོ་རྒྱལ་སྲས་གཞན་ཕན་མཐའ་ཡས་ཀྱི་ཞལ་སྔ་ནས་གསུངས་པའི་གསུང་མགུར་ལེགས་པ་དྲུག་གིི་གླུ་ཆུང་འདི་ལྟར་ཏེ། དཔལ་རྡོ་རྗེ་འཆང་ཆེན་བླ་མ་དང་། །མགོན་རིག་འཛིན་འདུས་པ་རྒྱ་མཚོ་ལ། །བདག་སྙིང་ནས་གུས་པས་གསོལ་བ་འདེབས། །བློ་ཆོས་སུ་འགྱུར་བར་བྱིན་གྱིས་རློབས། །དེང་གསོན་དང་ཆོས་འདོད་གྲོགས་པོ་རྣམས། །དགྲ་འདུ་འཛིའི་ཐག་པ་མ་བཅད་ན། །ཆོས་རྣམ་དག་འགྲུབ་པ་དཀའ་མོ་གདའ། །དོན་དེ་ཕྱིར་ཚུལ་འཆོས་སྤངས་ན་ལེགས། །ལར་དམ་པའི་རྗེས་སུ་སྙེགས་པ་ལ། །ངེས་འབྱུང་དང་སྐྱོ་ཤས་དྲག་པོ་ཡིས། །འཁོར་བ་ལ་གཏིང་ནས་ཞེན་ལོག་དགོས། །དོན་དེ་ཕྱིར་དབེན་པ་བརྟེན་ན་ལེགས། །དུས་ད་ལྟ་ཉིད་ནས་ལྷ་ཆོས་ལ། །སེམས་ཐེ་ཚོམ་མེད་པར་མ་འབད་ན། །ཕྱི་བཤོལ་གྱིས་སྒྲུབ་ལ་འགྲུབ་དུས་མེད། །དོན་དེ་ཕྱིར་བློ་སྣ་བསྟུང་ན་ལེགས། །གཉེར་སྒྱུ་མའི་བསླུ་བྲིད་ཡིན་པ་དེ། །ཤེས་བཞིན་དུ་རང་ཐག་མ་བཅད་ན། །མི་གཞན་ཟེར་ཉན་ན་རང་སྐལ་ཆད། །དོན་དེ་ཕྱིར་ངོ་བསྲུང་བཞག་ན་ལེགས། །དུས་རྟག་ཏུ་རང་གིས་རང་རྒྱུད་ལ། །དཔྱད་ནས་སུ་བླང་དོར་མ་བྱས་ན། །རྒྱུད་གྱོང་པོ་འདི་ལ་ཐུལ་དུས་མེད། །དོན་དེ་ཕྱིར་མཛུབ་མོ་ནང་བཀུག་ལེགས། ལར་དུས་དང་རྣམ་པ་ཐམས་ཅད་དུ། །རང་ཆེ་རློམ་མཐོ་རློམ་མ་བྱེད་པར། །ལུས་དམན་ས་ཅི་ཟིན་བྱེད་བཞིན་དུ། །ཁ་ཞེ་གཉིས་ཨེ་མཐུན་བརྟགས་ན་ལེགས། །དེའི་ཕྱིར་ན་རང་རྒྱུད་རང་ཉིད་ཀྱིས། །མ་བཏུལ་ན་གཞན་གྱིས་འདུལ་བར་དཀའ། །ཚུལ་དེ་ལ་བསམ་ན་སྔོན་བྱོན་གྱི། །གྲུབ་ཐོབ་བཞིན་དབེན་པར་དཀའ་སྤྱད་མཛོད། །དོན་ལེགས་པ་དྲུག་གི་གླུ་ཆུང་འདི། །ལས་དགེ་ལ་བརྩོན་པའི་རྣལ་འབྱོར་པར། །སྤྲང་གྱི་ནར་གནས་པའི་སྙོམ་ལས་མཁན། །མིང་གཞན་ཕན་མཐའ་ཡས་དེ་ཡིས་གདམས། །༽ མགུར་ཞིག་ཡིན་ཚད་པོ་དེ་ནང་དོན་གཅིག་འདྲ་ཁོ་ན་མ་རེད། རང་རང་གི་རྒྱུད་ཚོད་དང་མཐུན་པའི་མགུར་འཐེན་ཆོག་ཅིང་། མི་སྐྱ་ཕོ་མོ་རྣམས་ཀྱིས་གཙོ་བོ་བླ་མ་རྒྱང་འབོད་ཀྱི་རིགས་དང་། མི་རྟག་འཆི་བའི་དྲན་སྐུལ། དབེན་པའི་གནས་ཀྱི་ཡོན་ཏན། ཁྱད་པར་དུ་འདས་ལོག་རྣམས་ཀྱི་ནང་གི་ཤི་བོའི་ཆ་བསྐུར། བར་སྲིད་སེམས་ཅན་གྱི་སྐྱོ་གླུ། ཕ་མ་སློབ་དཔོན་དྲན་མགུར། དེ་ཚོ་ལོངས་དང་རང་གི་བློ་དང་འཚམས་པ་ཡིན་ཤས་ཆེ་ཞིང་། རང་གིས་མི་ཚད་གཞན་ལའང་ཕན་ཐོགས་འབྱུང་བ་ཡིན་པས་ཡིག་ངོ་ཤེས་ཚད་པོས་མགུར་རེ་འཐེན་ཐུབ་ན་བཟང་། ཡིག་ངོ་མ་ཤེས་ཀྱང་གཞན་གྱིས་ཁ་བསླབ་ཀྱིས་བློར་ལེན་ཆོག་ལ། དེ་མིན་ཡང་དགེ་བ་སྒྲུབ་ཐབས་སྣ་ཚོགས་ཡོད་ཅིང་། ལོ་ཉུང་རྣམས་ཟོག་ལུག་གི་རྫི་བོ་དང་སྨན་རིགས་རེ་རྐོ་སར་འགྲོ་དུས་རི་མགོ་མཐོན་པོའི་རྩེ་ནས་རླུང་གི་རྒྱུ་ཕྱོགས་དང་བསྟུན་ནས་མ་ཎིའི་མགུར་དབྱངས་རེ་འཐེན་དང་སེམས་ཅན་མང་པོའི་རྣ་ལམ་དུ་ཐོས་སོང་ན་ཆོས་སྦྱིན་དུ་འགྱུར་འགྲོ། མཐར་རང་ཉིད་སངས་རྒྱས་ཐོབ་པའི་དུས་ན་སེམས་ཅན་དེ་དག་འཁོར་གྱི་ཐོག་མར་གྱུར་ཏེ་ཆོས་འཁོར་སྐོར་བའི་རྟེན་འབྲེལ་གྱི་རྒྱུ་ཚོགས་དེ་འདྲ་ཡན་ཆད་ཀྱིས་གསོག་ཐབས་ལོས་ཡོད། དྲན་དང་ཤེས་བཞིན་བག་ཡོད་གསུམ་པོ་དང་དུས་རྒྱུན་དུ་མི་འབྲལ་བར་བྱེད་རྒྱུ་དེ་གལ་ཆེ། ཆོས་སྒྲུབ་པའི་ཐབས་དང་འགྲུབ་པའི་ཐབས་ཡིན། དྲན་ཞེས་པ་བླང་དོར་མི་བརྗེད་པའི་དྲན་པ་དང་། སྒོ་གསུམ་ཡེངས་མ་ལམ་དུ་མི་འགྲོ་བའི་ཤེས་བཞིན། དེ་འཕྲོས་ལེགས་སྒྲུབ་ཉེས་སྤོང་གི་བག་ཡོད་པ་གསུམ་དང་མ་བྲལ་བའི་སྒོ་ནས། གཞན་གནོད་གཞི་དང་བཅས་པ་སྤོང་ཆེ་ཐུབ་ཆུང་ཐུབ་ཀྱི་སྟེང་དུ། གཞན་ཕན་གཞི་དང་བཅས་པ་སྒྲུབ་གང་ཐུབ་ཅི་ཐུབ་བྱས་ན་སོར་སྐྱེ་ཡིན་པའི་དབང་གིས་ཐོག་མ་ཉིད་ནས་ཉེས་འགལ་མི་ཤོར་བ་ཞིག་ཅི་ལ་ཐོན་ཡང་རིམ་གྱིས་རིམ་གྱིས་གོམས་སོང་ན་སྐྱེས་བུ་ཆེན་པོའི་ལམ་ལ་སློབ་ཐུབ་པ་ཡིན། ངན་པའི་ལས་ལམ་དེ་སྤང་ཅི་ཐུབ་དང་། བཟང་པོའི་ལས་ལམ་ལ་འབད་པ་ཆེར་བསྐྱེད་ཀྱི་གོམས་པ་སྐྱེ་ཐབས་དེ་རང་གིས་བྱེད་དགོས། དེ་རང་གིས་མ་བྱས་ན་རང་གར་ཤི་དུས་བདེ་བ་ཅན་དུ་རང་འབྱར་འགྱུར་དཀའ་བ་ཡིན། དེ་ལྟར་ཡིན་པའི་ཕྱིར་ན་དགེ་སྒྲུབ་སྡིག་སྤང་དེ་རང་གིས་གཟབ་རྒྱུ་དེ་གལ་ཆེ། དགེ་སྒྲུབ་སྡིག་སྤང་བྱེད་པའི་ཐབས་དང་ལྡན་པ་དེ་ཤེས་དགོས། དེ་འཕྲོས་ད་ལོའི་འུ་ཅག་གི་ཚོགས་འཁོར་དེ་རིག་འཛིན་ཡུམ་ཀའི་སྒྲུབ་ཁོག་གིས་གཞུང་བསྲངས་ཏེ་གཏེར་བུམ་སྒྲུབ་པའི་ལྷན་ཐབས་ཤིག་དང་སྦྲེལ་ནས་གཡང་སྒྲུབ་འདོགས་འཆར་ཡིན་ལ། ན་ནིང་ཚེ་སྒྲུབ་བྱས་པ་ཡིན་ལ། ད་ལོ་གཡང་སྒྲུབ་ཀྱི་རེས་ལ་བབ་པ་ཡིན། དེས་ན་སྡེ་བ་སོ་སོའི་དཔོན་རིགས་རྣམས་ཀྱིས་འགན་ཁུར་ཏེ་དེའི་ཉིན་པར་རང་སྡེའི་གཡང་རྟེན་གྱི་རིགས་དཀྱིལ་འཁོར་གྱི་ནང་ལ་ཞོག གཡང་གཏད་ཀྱི་ཕྱག་ལེན་ལ་ད་ལོའི་སྦྱིན་བདག་མདའ་བཞི་སྡེ་བའི་དཔོན་རིགས་རྣམས་ཀྱིས་ད་ལོ་ཚང་མའི་ཚབ་བྱེད་རྒྱུ་ཡིན། མདའ་བཞི་གཡང་སྡེ་ཕྱུག་མོ་མིང་དང་དོན་མཚུངས་པའི་རྟེན་འབྲེལ་འགོ་ནས་འགྲིགས་ཏེ་དགེ་འདུན་པའི་གསོལ་རྒྱུ་དྲང་འདྲེན་དང་མཆོད་པ་མཆོད་འབུལ་གྱི་ཐད་ནས་དེ་ཡན་མི་དགོས་པར་གྱུར་འདུག ངོ་མས་བཤད་ན་སྡེ་བ་ཆུང་ཆུང་ཞིག་ཡིན་ཞིང་། སྡེ་ཤོག་ཆེ་བ་ཞིག་གི་ཁ་ཡ་ཡོང་དཀའ་ལས་ཆེ་བསམ་རྒྱུ་ཞིག་ཡིན་ཡང་ན་ནིང་གི་མཚོ་ཁྲི་ཀླུ་ཕྱུག་དང་འདྲ་འདྲར་གྱུར་འདུག བྱ་བ་འགྲུབ་དང་མི་འགྲུབ་ཟེར་རྒྱུ་དེ་ཡང་སེམས་ཤུགས་ཆེ་ཆུང་དང་ལྷག་བསམ་དག་དང་མི་དག་གིས་ཡིན་འདུག འདིའི་རྗེས་སུ་འབམ་ཁོག་སྡེ་བའམ་འབམ་ཐ་སྡེ་བས་ཡིན་གཅིག་མིན་གཉིས་ཁོང་སྡེ་བས་འཚོག་དགོས། གྲ་སྒྲིག་ཆ་ཚང་བྱས་ཚར་སོང་ཟེར། ལྷ་སའི་སྐད་ལྟར་ན་ཨང་སར་བྱས་ཚར་ལྟ་བུ་ཡིན། ན་ནིང་ཡང་དེ་ལྟར་ཟེར་མྱོང་ལ། ཨུ་ཚུགས་ཆེན་པོས་ནན་ཟེར་བྱེད་བཞིན་འདུག ཡང་རྫ་ཕྱུག་དང་འབྲུག་ཆུ་ལ་སོགས་པའི་སྡེ་ཤོག་ཆེན་པོ་རྣམས་ཀྱིས་ཐེངས་གཉིས་པའི་སྦྱིན་བདག་བྱེད་རྒྱུ་ལ་ན་ནིང་ནས་ང་ཡིན་ཁོ་ཡིན་གྱིས་ལག་བརྡར་བཞིན་ཡོད། དེ་མིན་གྱི་སྒེར་བ་འགའ་རེས་ཁོ་ཚོ་ལ་འཚོག་ཏུ་བཅུག་པ་ཨེ་ཡིན་ཞེས་བཤད་མཁན་ཡང་མང་འདུག སྔར་ཞིག་རྫ་ཕྱུག་གི་སྟོབས་ལྡན་དང་རྒྱ་མོའི་རྟ་མགྲིན་འདི་ཚོས་རེ་བ་བྱས་ལ། ན་ནིང་མདའ་བཞིའི་ཨ་ཆུང་གིས་ཀྱང་ཟེར་མྱོང་། རྫ་ཕྱུག་སྟོབས་ལྡན་གྱི་ད་ལོ་ཡང་བསྐྱར་འཚོག་ཐུབ་པའི་གྲ་སྒྲིག་བྱས་ཚར་ཟེར་ནས་དེ་ལྟར་བཤད་འདུག ད་རུང་དེ་འདྲའི་རིགས་འདྲ་མང་ཡང་སྒེར་པ་སུ་གཅིག་ལ་མི་སྤྲོད་པ་དེ་ཉིད་སྔར་བཤད་གཅིག་པོ་དེའི་ཐོག་ཡིན། ཡིན་ན་ཡང་ཁྱེད་ཚོའི་སེམས་ཤུགས་དང་ལྷག་བསམ་ལ་རྗེས་སུ་ཡི་རང་ཡོད། རྗེས་མར་སྡེ་བ་འདི་ཚང་སྦྱིན་བདག་ཡིན་ཞེས་ད་ལྟའི་སྐབས་འདིར་ཟེར་ཐག་ཆོད་པ་མི་འདུག རྒྱུ་མཚན་ཅིའི་ཕྱིར་མི་ཆོད་པ་ཡིན་ཟེར་ན། གཅིག་རྟག་འཛིན་གྱི་ཚོད་ཐིགས་པ་མི་འདུག གཉིས་མི་ཁྲི་ཚོ་ཆ་རེ་འདུས་ས་དེ་རི་ཁྲོད་ནས་ངོ་མས་དགའ་རྒྱུ་ཨེ་ཡིན་དེ་སྙམ་གྱིན་ཡོད། གསུམ་སྡེ་ཤོག་ཁ་གང་ལ་བལྟས་ཀྱས་ཁ་ངོ་གཅིག་བས་གཅིག་གཉན་ཤ་སྟག་རེད། ལྷག་བསམ་གཅིག་བས་གཅིག་ཆེ་འབའ་ཞིག་རེད། མདོར་ན་རིམ་པས་བལྟ་ཟེར་རྒྱུའི་ཚིག་ལན་དེ་མིན་པའི་དེ་རིང་སྤྲད་ཐག་ཆོད་པ་མི་འདུག མདོར་ན་ས་འདིའི་དགོན་ལྷ་སྡེ། ཡུལ་མི་སྡེ་ཚང་མ་འདྲ་འདྲའི་ནང་གི་མི་འདྲ་བའི་ཆོས་སེམས་དང་སྤྱོད་བཟང་ལོ་རེ་བས་ལོ་རེར་ཁྱད་དུ་འཕགས་ཀྱིན་ཡོད་པ་དེ་ཉིད་མིག་གིས་རིག་འདུག་རྒྱུ་འདི་བཞིན་ཡིན་ལ། ང་རི་ཁྲོད་པ་ཞིག་གིས་མཐོང་བའི་འདིའི་ཁོར་ཡུག་གི་དཔེ་མཚོན་ཞིག་བགྲང་ན་འུ་ཚོའི་སེམས་བསྐྱེད་འབུམ་མཆོད་འཚོག་སྐབས་མང་དུས་དགེ་འདུན་པ་ཁྲི་གྲྭ་ཡན་ཆད། ཉུང་ན་སྟོང་ཚོ་ལྔ་དྲུག་ཡིན་ཞིང་། དེའི་གྲ་སྒྲིག་ཞབས་ཞུ་ཚང་མ་དགོན་ཡུལ་བསམ་པ་གཅིག་སྒྲིལ། མི་གཅིག་གི་ཐོག་ཏུ་བབ་པའི་རང་གི་ལས་ཀ་ཡིན་པ་ལྟ་བུས་མི་ཚད་པར་དེའི་ལྷག་ཅིག་གི་འདུ་ཤེས་འཇོག་བཞིན་ཡོད། དགེ་འདུན་པ་ལ་གསོལ་ཇ་དྲང་རྒྱུ་ལ་དཔེ་མཚོན་ན་འདྲེན་པ་ཉིས་བརྒྱ་སུམ་བརྒྱ་ཞིག་དགོས་ལ། དེའི་འདྲེན་པ་ཉིས་བརྒྱ་སུམ་བརྒྱ་དེ་ཉིད་ཤྲཱི་སེང་གི་ཀློག་པ་ཐོས་བསམ་པ་གཞུང་བཀའ་པོད་ལྔ་ཡི་འཆད་ཉན་ཐོས་བསམ་མཛད་བཞིན་པའི་སྡེ་སྣོད་འཛིན་པ་ཏག་ཏག་གིས་དང་ལེན་མཛད་ཀྱིན་ཡོད། རྫོགས་ཆེན་དགོན་གཞུང་གི་དབུ་མཆོད་བརྒྱད་ཅུའི་གྲལ་ན་བཞུགས་པའི་གྲྭ་སར་ཡོན་ཏན་ཅན་མང་པོ་ཞིག་གིས་རང་མོས་དང་བླང་གི་སྒོ་ནས་འགའ་རེས་གད་སྙིགས་འཕོ་རྒྱུ། འགའ་རེས་རྒྱ་སྒོ་སྲུང་རྒྱུ་ལ་སོགས་པ་ལས་ཀ་གང་སྡུག་གང་བཙོག་ཐམས་ཅད་བདམས་ནས་དེ་ལ་འཐམ་འགྲོ་བཞིན་ཡོད། དེ་ཚོ་ཡོན་ཏན་གྱིས་རང་རྒྱུད་ཕྱུག་ཅིང་ཕྱུག་ལ་ང་རྒྱལ་དང་ཁེངས་སེམས་མེད་པའི་ཡ་རབས་ཀྱི་སྤྱོད་བཟང་རྒྱུད་ལ་ཡོད་པའི་རྟགས་མཚན་ཡིན། དགོན་པའི་དགེ་བསྐོས་འདི་ཚོ་ལ་བལྟས་ན་མང་ཆེ་བ་མཁན་ཐོབ་ཅན་ཏག་ཏག་ཡིན། དང་བླང་པ་ཡིན་ཤས་ཆེ་ངས་བསམ་གྱིན་ཡོད། རྒྱལ་སྲས་ཞི་བ་ལྷས། མ་རབས་རྣམས་ཀྱང་མཐོ་ཐོབ་ཤོག། ཅེས་མ་རབས་ཡིན་ཡང་སེམས་ཅན་ཡིན་པས་དེ་རྣམས་ཀྱིས་དམན་འོག་ཏུ་ཆུད་པའི་སྡུག་བསྔལ་མྱོང་མི་དགོས་པར་ཤོག་གསུངས་ལ། ཡང་མཐོ་རྒྱུ་སྡུག་པའི་རྒྱུ་མཚན་གྱིས་ངན་པ་མཐོ་སར་ཐོན་དུས་ལེགས་པོ་ཞིག་མི་བྱེད་པར་དགོངས་ནས་དེ་མ་ཐག་ཏུ། ང་རྒྱལ་དག་ཀྱང་བཅོམ་པར་ཤོག །ཅེས་གསུངས་ཤིང་། ཡ་རབས་རིགས་ཀྱི་གདོང་ན་པདྨ་མེད། །མ་རབས་རིགས་ཀྱི་ཀླད་ནས་རྭ་མ་སྐྱེས། །ཇི་ལྟར་ཇི་ལྟར་སྤྱོད་པའི་ཁྱད་པར་གྱིས། །འཕྱོན་མའི་བུ་ཡི་རང་བཞིན་གསལ་བར་བྱས། །ཞེས་གསུངས་པ་ལྟ་བུ་ཡིན། དེ་བཞིན་དུ་སྡེ་ཡུལ་པའི་མི་ཡིས་གུར་སྒར་ཆས། ཁོར་ཡུག་གི་གཙང་སྦྲ། འོ་ཞོ་བསྐྱལ་རྒྱུ། དེ་ལ་སོགས་པ་ཐམས་ཅད་ལ་འགན་གཅིག་ཐོག་ཏུ་བབ་པ་ལྟ་བུ་ཡིན་པས་མི་ཚད་ལོ་རེ་བས་ལོ་རེ་མར་མེ་གསེར་ཆབ་ལ་སོགས་པ་མཆོད་འབུལ་ཞལ་འདེབས་རྒྱ་ཇེ་ཆེ་བས་ཇེ་ཆེ་ཡིན་འདུག སྔོན་མར་ངས་ཡི་རང་དགེ་སྐུལ་གྱི་ཆེད་དུ་ཆོས་ཁྲིད་ཀྱི་ཞོར་དུ་དགེ་བསྒྲུབས་དེ་དག་བཏོན་པ་ཡིན། ད་ནི་འདོན་ཚོད་མེད་པའི་མང་པོ་དང་སྟོབས་ཆེན་ཏག་ཏག་རེད། བསོད་ནམས་བསགས་འབྲས་མངོན་སུམ་མཐོང་ཆོས་སུ་དེ་ལྟར་སྨིན་གྱིན་ཡོད། དེ་ཚོ་ངའི་ཁོར་ཡུག་གི་གནས་ཚུལ་རེད། འདིའི་པདྨའི་ཐང་ཆུ་ཉིན་སྲིབ་གཉིས་ཀའི་གྲྭ་ཇོ་སེར་བརྒྱད་སྡེ་དང་བཅས་པས་ཆོས་ར་དབེན་གནས་འདིའི་ཕྱི་ནང་གི་ཚུགས་ཀ་དང་གྲུབ་ཆ་ཐམས་ཅད་དབྱར་དགུན་སྟོན་དཔྱིད་ཀྱི་དུས་བཞི་པོ་ལ་བཟུང་ནས་བསྡད་ཡོད། འཇིག་རྟེན་གྱི་ཐོག་གི་ལེགས་ཆ་མཛེས་ཆ་ཡོད་ན་ཡོད་ཚད་པོ་མི་ཡིས་བསྐུལ་གྲུབ་བྱས་པ་ཁོ་ན་ཡིན། དེ་ལ་ཡང་བཤད་མི་དགོས་པར་ཚང་མས་ཤེས་བཞིན་པ་ཡིན་ལ། ད་ཞག་ལམ་ཞོར་དུ་བ་སྲས་སྡེ་བའི་ས་ཐོག་ནས་མར་ཡོང་བ་ཡིན། ས་ཆ་སྟོད་སྨད་བར་གསུམ་གྱི་འབྲོག་སྡེ་ཐམས་ཅད་གུར་ལུ་དཀར་རིལ་ཅན་དང་མི་ཐམས་ཅད་རྒྱ་ཆས་ཅན་དུ་གྱུར་འདུག་ཅིང་མ་འགྱུར་ས་ཞིག་ཕལ་ཆེར་མི་འདུག གནའ་ཡི་སྲོལ་མ་ཉམས་ས་དེང་སང་དཀོན་དུས་རེད། འབྲོག་རུ་བསོད་ནམས་ལྷ་སྡེའི་ཕ་མེས་ཡང་མེས་རིང་གོང་ནས་བཞག་པའི་སྦྲ་ནག་མགོ་ལ་ཕུབ། ཇོ་གུར་གྱིས་སྒོ་ཕུགས་གཉིས་ཀར་བརྒྱན། རྟ་ནོར་གཉིས་ཀས་ལྷས་མཐར་བཀང་སྟེ་བསྡད་འདུག དེ་ཡང་ཐག་རིང་རྒྱང་གི་ལམ་འགྲུལ་རྒྱུས་མེད་གཅིག་གིས་བལྟས་ན་འདྲ། དེ་མིན་ཡང་རང་རིགས་ས་མཐའ་ན་ཡོད་པ་ཚོས་དེའི་འདྲ་པར་ཙམ་ཞིག་རིག་ཀྱང་གནའ་སྔ་མོའི་ཕ་ཡུལ་གྱི་དག་ཞིང་ཞེ་ལ་འཁོར་བྱེད། གཡང་བསོད་ནམས་ཤིག་ལོས་འཁྲི་སྙམ་པ་སྨོན་པའི་ཡུལ་ཡིན་ཞིང་། དེ་ཚོ་ཡུལ་འདིའི་གཞན་ལ་མེད་པའི་ཁྱད་ཆོས། བལྟས་བཞག་ན་བཤད་མི་དགོས་པར་མིག་གིས་རིག་རྒྱུ་ཅན་འདི་ཡིན། སྡེ་མོ་དུད་སྟོང་རུ་ཕྱེད་གཉིས་ཀྱི་ནང་ན་ནས་ནང་དུ་ཡུག་པོ་འདྲེས་པ་ལྟ་བུ་ངན་སྤྱོད་ཅན་ཆ་རེ་མེད་ཟེར་ཅི་ཤེས་ཀྱང་ཐམས་ཅད་ཀྱི་མང་ཆེ་བས་མུ་མཐུད་ནས་ད་རུང་ཡ་རབས་དམ་པའི་ལུགས་སྲོལ་ལ་ཡར་ལྟོས་བྱས་ན། ནང་དམེ་བྱེད་རྒྱུ། རྐུ་རྫུན་ཇག་གསུམ། སྡིག་ཉོ་སྡིག་ཚོང་། ཤོ་སྦག་གི་ཐབས་ངན་ལ་སོགས་པ་ལ་བརྟེན་ནས་མིས་མི་གཞན་ཟ་རྒྱུ། དེ་དག་གི་སྲོལ་ངན་མེད་པ་ལ་ཚང་མས་འབད་པ་ཞིག་བྱས་ན་ཕོ་ཐམས་ཅན་འཕགས་པའི་དགེ་འདུན། མོ་ཐམས་ཅད་ཆོས་ཀྱི་ལྷ་མོ་ཞེས་གསུངས་པ་དེ་ཉིད་དུ་གྱུར་པར་གྲུབ་དུས་མི་ལྷ་མི། ལུང་པ་ལྷ་ལུང་དུ་གྱུར་ནས་འདི་ཕྱི་གཉིས་ཀར་བདེ་ནས་བདེ་བའི་ལམ་ཆེན་དུ་བགྲོད་ཐུབ་པ་ཡིན། ས་འདིའི་དཔེ་ཡིས་འདིར་ཡོད་སྟོད་སྨད་བར་གསུམ་གྱི་མི་སྣས་མཚོན་པའི་ཡུལ་ལུང་ཐམས་ཅད་ལ་གཏམ་གཅིག་གིས་དེ་བཞིན་དུ་ཁྱབ་པ་ཡིན། དོན་བསྡུས་ན་རང་ལེགས་སུ་འདོད་མཁན་ཐམས་ཅད་ཀྱིས་རྒྱུ་འབྲས་བསླུ་མེད་ལ་ཡིད་ཆེས་ཀྱིས་ལས་འབྲས་ཕྲ་ཞིབ་བསྲུངས་ཏེ་བསམ་པ་བཟང་པོ་རེ་གྱིས་དང་མི་དགོས་ཟེར་ཡང་སྐྱིད་རང་འཁོར་ཡིན་ཞེས་དེ་རིང་ཆོས་མཚམས་འདི་ནས་འཇོག ཉིན་བཞི་བའི་ཆོས་ཁྲིད།༼ཀ༽ སྔོན་དུ་འགྲོ་བའི་ཆོས། རང་རེ་འདིར་ཡོད་ཀྱི་ཆོས་གྲྭ་གཅིག་གི་ནང་དུ་ཆོས་གཅིག་གིས་བསྡུས་པའི་ཆོས་གྲོགས་ཚོ་ལ་མཚོན་ན་འདིའི་ནང་གི་རྒན་རབས་པ་ངོ་མ་ཉུང་ཤོས་ཤིག་དུས་རབས་སྔོན་མའི་དུས་སྟོད་ཀྱི་མི་ཡིན་ཞིང་། བསོད་ནམས་ཆེ་ལུགས་ལ་བསམ་བློ་ཞིག་བཏང་ན། དེང་སང་རང་རང་སོ་སོའི་ཆོས་བརྒྱུད་ཀྱི་བརྒྱུད་པའི་བླ་མ་གསོལ་འདེབས་ཀྱི་ནང་ནས་མཚན་བཟུང་སྟེ་གསོལ་བ་འདེབས་ཀྱིན་འདུག་ས་དེ་ཚོའི་ཞལ་མཇལ། གསུང་ཐོས། གདམས་ངག་གི་བདུད་རྩི་ཐོབ་མྱོང་བ་ཡང་ཡོད། ཡང་བསོད་ནམས་ཞན་ལུགས་ལ་བསམ་བློ་ཞིག་བཏང་ན། དེ་ལྟ་བུའི་མི་དེས་དུས་ཀྱི་རྒུད་པ་སྣ་ཚོགས་ཀྱི་རླབས་དྲག་རླུང་འཚུབ་བརྒྱུད་ནས་ཡོང་བ་ཡིན། མི་རེ་རེ་ལ་སྐྱིད་སྡུག་སྣ་ཚོགས་ཀྱི་ལོ་རྒྱུས་ཀྱི་རི་མོ་རེ་དང་། ལུས་སེམས་ཀྱི་འགྱུར་བའི་ཚོར་སྣང་དམིགས་བསལ་བ་མང་པོ་བྱུང་མྱོང་བ་ཡིན། མདོར་ན་སྐྱིད་སྡུག་ལ་དགུ་འཕྲང་བཅུ་བརྒྱུད་པའི་གནའ་མྱི་ཡིན། དེའི་འཕྲོས་ཡང་བར་མ་བར་གྱི་མང་པོ་ཞིག་སྐྱེ་ཚོད་སྡུག་པོ་ཆོས་ཕྱོགས་ནས་སངས་རྒྱས་ཀྱི་བསྟན་པ་མར་ཉམས་པའི་སྐབས། འཇིག་རྟེན་གྱི་ཕྱོགས་ནས་རྒུད་པའི་བསྐལ་ངན་ཚེས། ཚང་མའི་ཁ་ན་ཡོད་རྒྱུ་དུས་ངན་མ་ཟེར་རྒྱུ་དུས་རབས་གོང་མའི་ལོ་རབས་དྲུག་ཅུ་བའི་སྟོད་ཀྱི་མི། དེ་ལྟ་བུའི་མི་དེའི་ཚེ་སྟོད་ཀྱི་མི་ལོ་བཅུ་ཕྲག་གཉིས་གསུམ་ལ་གནའ་རབས་ཀྱི་རྗེས་ཡར་མ་ཆོད། དེང་རབས་ཀྱི་སྔོན་ལ་ཡང་ཐོན་མ་ཐུབ། མི་རབས་སྔོན་རྗེས་བསྡུར་ཡོང་ན་ཕམ་ཁ་ཆེ་ཤོས་ཀྱི་མིའི་གྲས་ཡིན། དུས་རབས་ཉི་ཤུའི་ལོ་རབས་བརྒྱད་ཅུ་ཚུན་ཆད་ལ་སྐྱེས་པའི་མི་དེ་མང་ཆེ་ཤོས་ཡིན་ཞིང་། གཞོན་ནུ་མིན་ན་དར་མ་ཞིག་ཡིན་ཕྱིར་འཇིག་རྟེན་གྱི་རྒུད་པ་ཡར་སོས། དམ་པའི་ཆོས་ཀྱི་སྒྲ་རེ་གོ་ནས་དཀོན་མཆོག་གི་སྣང་བ་གསར་བ་ཞིག་ཤར་བའི་འུ་ཚོ་བོད་ཁ་བ་གངས་ཅན་གྱི་ལྗོངས་འདིའི་བསྟན་པ་ཡང་དར་ཚེས་ནས་འདི་འདྲ་ཡི་དཀོན་མཆོག་གསུམ་གྱི་སྣང་བ་ཚེས་ཡོད་པའི་སྐབས་ཀྱི་གཞོན་སྐྱེས་ཐམས་ཅད་སྤྱིར་བཏང་གིས་བཤད་ན་བསོད་ནམས་ཅན་གྱི་མི་སྐྱེས་ཚོད་ཡག་པ་ལ་སྐྱེས་པ་དེ་ཉིད་ཡིན། མདོར་ན་རྒན་དར་གཞོན་གསུམ་ཚང་མ་ད་ལྟའི་སྐབས་སུ་དུས་རབས་གསར་བ་སྟོང་ལོ་ཉེར་གཅིག་པའི་འགོ་ཟིན་པས་མི་ཚད་འདིའི་ལོ་རབས་ཉི་ཤུ་བའི་ནང་ནས་འགྲོ་བཞིན་ཡོད་པ་འདི་བཞིན་ཡིན། དེ་ལྟར་ན་རྒན་རབས་དང་གཞོན་རབས་ལ་མ་ལྟོས་པའི་རང་གཞན་ཆོས་གྲོགས་ཚང་མས་དུས་རབས་ཉེར་གཅིག་པའི་མི་བྱས་ནས་འགྲོ་བཞིན་ཡོད་ཕྱིར་དུས་རབས་ཉེར་གཅིག་པའི་རང་འགྲོས་དང་མཐུན་པའི་ཆོས་པ་ཞིག་བྱེད་དགོས་པ་ཡིན། དེང་སང་ཚན་རིག་ཡར་རྒྱས་ཀྱི་སྐབས་ཡིན་ལ། སྔར་མེད་གསར་དར་གྱི་སྤྱི་ཚོགས་ལ་འཕོ་འགྱུར་འགྲོ་བཞིན་ཡོད་ཅིང་། རིག་འཕྲུལ་ཡར་རྒྱས་སུ་འགྲོ་བ་འདིས་ཚེ་འདིར་འཇིག་རྟེན་བདེ་སྐྱིད་གསར་སྐྲུན་ལ་གནོད་པའི་ཕྱོགས་ལ་མེད་པ་མ་ཡིན་ཡང་ཕན་པའི་ཕྱོགས་དེ་རྒྱ་ཆེ། དེ་ལྟར་ན་དེང་སང་གི་མི་འདིའི་ནང་གི་ཚོ་གཅིག་གིས་གསར་བ་ཐམས་ཅད་བཟང་པོ་དང་། རྙིང་པ་ཐམས་ཅད་སྡུག་པོ་ངན་པ་ཡིན་པའི་ལྟ་བ་འཛིན་མཁན་ཡང་ཡོད། ཡང་ཚོ་གཅིག་གིས་དེ་ལས་ལྡོག་པའི་ཕྱོགས་འཛིན་མཁན་ཡང་ཡོད་པ་ཡིན། སྤྱིར་ན་རྒན་གཞོན་མི་རབས་ཀྱི་བག་ཆགས་འཇོག་ལུགས་དང་། ཤུགས་རྐྱེན་སྣ་ཚོགས་པའི་དབང་གིས་ལྟ་ཚུལ་ལ་ཁྱད་པར་རེ་ཡོད་སྲིད་ཅིང་། འོན་ཀྱང་གནའ་རབས་དང་ད་རབས། སྔ་རབས་དང་དེང་རབས་ཀྱི་མི། མི་མ་དགོས་འཁོར་ཡུག་གི་སྲོག་ཆགས་ནས་བཟུང་སྟེ་དུས་ཇི་ལྟར་འགྱུར་ཡང་རེ་འདུན་དང་དོན་གཉེར་བྱེད་ཕྱོགས་ལ་འགྱུར་བ་མེད་པ་དེ་ཁ་རྩང་བཤད་པ་ལྟར་བདེ་སྐྱིད་འདི་ཡིན། གྲོང་ནང་གི་སྐྱེས་པ་བུད་མེད་ནས་རི་ཁྲོད་ཀྱི་མཚམས་པ་མན་ཆད། མཐོ་རྒྱལ་པོ། དམའ་སྤྲང་པོ་ཞེས་བཤད་པ་ལྟ་བུ། མཆོག་དམན་བར་གསུམ་པོས་བདེ་བ་སྒྲུབ་ཐབས་མི་འདྲ་བ་དེ་ཉིད་མ་གཏོགས་བདེ་བ་འདོད་ཅིང་བདེ་བ་དོན་གཉེར་བྱེད་བཞིན་ཡོད་པ་དེ་ཉིད་གཅིག་ཡིན། གནའ་དེང་གཉིས་ཀས་གསར་རྙིང་ལ་བཟང་ངན་འཛིན་པའི་ཕྱོགས་ལ་ཞིབ་དཔྱད་ཅིག་བྱས་ན། དེ་གཉིས་ཀའི་བར་དེ་ནས་ཡོ་གཟུར་མེད་པའི་ཚད་ཤིང་ཞིག་བཞག་ནས་བལྟས་ན། མ་གཞི་གསར་བ་ཞེས་སྨྲས་པ་མ་གཏོགས་དེང་སང་གི་འཕྲུལ་ལས་ཡར་རྒྱས་འདི་ཚོ་མི་ལོ་ཉིས་སྟོང་སུམ་སྟོང་ཚུན་ཆད་ནས་མིའི་རིགས་ཀྱི་ལོ་རྒྱུས་ཀྱི་ཐོག་གི་འཚོ་བའི་འཕེལ་འགྱུར་གྱི་ཉམས་མྱོང་བསགས་པའི་རྨང་གཞི་ཅན་ཞིག་ཡིན། དུས་ཀྱི་འགྱུར་འགྲོས་དེ་མདུན་ཕྱོགས་སུ་འཁོར་བཞིན་ཡོད་ཅིང་། མ་འོངས་མི་ལོ་བཅུ་ཕྲག་ཆ་རེའི་རྗེས་ནས་བལྟས་ན། ད་ལྟའི་ཚན་རིག་གི་ཡར་ཐོན་ཅན་འདི་ཡང་ལོ་རྒྱུས་རྙིང་པའི་དྲན་རྟེན་ལ་འཇོག་རྒྱུ་ཙམ་ཞིག་འགྱུར་མི་འགྲོ་བའི་ཐབས་མེད། དེ་ལྟར་བྱས་ན་ལྟོས་ནས་གྲུབ་པའི་རྟེན་འབྱུང་གི་ཆོས་ཉིད་ལ་འགྱུར་བ་ཡོད་པ་མིན་ལ། སྔར་ཅི་འདྲ་ཞིག་ཡིན་ན་ད་ཡང་དེ་འདྲ་ཞིག་ཡིན་པས་མི་ཚད་མ་འོངས་འབྱུང་འགྱུར་ལ་ཡང་དེ་བཞིན་ཡིན། ལྟོས་ནས་བཞག་པའི་རྣམ་འབྱེད་ཀྱི་ཤེས་རབ་ལ་ཚད་ཡོད་ཅིང་། ཚད་མ་ཚད་མིན་ཀུན་འབྱུང་ཆོག་ལ། དེས་ན་དབང་ལྔའི་ཡུལ་དུ་གྱུར་པའི་ཕྱི་ཡུལ་རགས་པའི་དངོས་པོ་ལ་ཉམས་ཞིབ་བྱས་པའི་ཚོར་སྣང་གསར་བ་ཡིན་བསམ་རྒྱུ་འདི་ཚོ་སྔོན་ཐོན་གྱི་གྲལ་དུ་མི་ཐོན་པ་ཞིག་ཡིན་སྙམ། དེའི་འབྱུང་རྩ་དང་། འབྱུང་རྐྱེན། དེའི་ཆོས་ཉིད་ལ་ཞིབ་དཔྱོད་ཐིངས་མེད། མི་ཞིག་ལ་མཚོན་ན་ང་ཟེར་སའི་ལུས་ཤིག་དང་སེམས་ཤིག་ཡོད། དེ་གཉིས་ཀ་ཚོགས་ཏེ་དྲོད་དབུགས་ཤེས་པ་གསུམ་པོ་འཛོམས་དུས་གསོན་པོའི་མི་ཟེར་བ་ཡིན། ད་ཞག་ཅིག་ལ་འདིའི་སྐོར་བཤད་ཨེ་ཡོད་ཤེས་མ་སོང་། འདི་འབྱུང་ཁུངས་དེད་ནས་སོང་ན་རིག་རྒྱུན་དང་རྫས་རྒྱུན་གཉིས་ཀའི་ཐད་ནས་དེད་ནས་བསམ་བློ་ཞིག་གཏང་དགོས། དེ་དགོས་ན་སེམས་འདི་རིགས་འདྲ་སྔ་མའི་རིག་རྒྱུན་ད་ལྟའི་སྐབས་ཀྱི་རིག་ཟེར་རྒྱུ་འདི་གསལ་ཞིང་རིག་པའི་རིག་དེ་ཉིད་དེ་ཡིན་ལ། དེའི་རིག་རྒྱུན་དེ་དེད་སོང་ན་རང་འབྲས་རྒྱུན་སྔ་མ་ཞིག་ལས་མི་ཡོང་བའི་འབྲས་བུ་རྒྱུ་མེད་པ་ཞིག་དང་། རྒྱུ་འབྲས་བུ་མེད་པ་མི་སྲིད་པ་ཡིན། དེ་བཞིན་དུ་ལུས་འདིའི་རྫས་རྒྱུན་དེད་སོང་ན་ཐུག་མེད་ཡིན་པ་དེ་ཉིད་འདིའི་རགས་པའི་ཕུགས་དེ་ཡར་དེད་སོང་ན་ཕྲ་བ། ཕྲ་བའི་ཕུགས་དེ་དེད་སོང་ན་ཆས་ཕྲ་ལ་ཐུག་སོང་ཚེ་ནམ་མཁའི་མཐའ་རྒྱ་གཅད་ས་ནས་བྱ་རྒོད་པོའི་གཤོག་རྩལ་གྱིས་མ་སླེབས་ནས་བསྐྱུར་བཏང་བ་མིན་པར་ཐབས་མེད་པ་དེ་ཉིད་ཕྲ་རགས་དབྱེ་ཞིབ་ཀྱི་རིགས་པས་ད་རུང་ཚན་རིག་པས་འདང་གིན་མེད་པ་ཞིག་ཡིན། དེ་ཡིན་ན་རིག་འཕྲུལ་ཡོ་བྱད་ལ་སོགས་པ་འདི་ཚོ་ལ་ཕན་པའི་ཕྱོགས་མང་ས་དེ་ཚོ་བཟང་ཡང་ད་ལྟའི་གསར་བ་ཐམས་ཅད་ཡག་པ་ཡིན་ཟེར་དགོས་ན་དངོས་དོན་དང་མཐུན་གྱི་ཡོད་པ་མ་ཡིན། ད་རུང་ཉམས་ཞིབ་ཀྱི་ཕུགས་དང་རྩད་ཆོད་མེད། གནའ་ལུགས་ཐམས་ཅད་བཟང་པོ་ཡིན་པ་དང་དེ་མིན་ཐམས་ཅད་སྡུག་པོ་ལ་རྩི་དགོས་ན་དེ་ཡང་དོན་དངོས་དང་མི་མཐུན། གནའ་ནས་གནའ་ལ་དེད་སོང་ན་གདོད་མའི་མིའི་རིགས་ཀྱི་རི་དྭགས་དང་ཕྱོགས་འདྲའི་འཚོ་བ་སྐྱེལ་སྐོར་ལ་ཐུག་ཡོད། ལར་མ་གཞི་བཤད་ན་གནའ་ཟེར་རྒྱུ་ཞིག་མི་གྲུབ་ཀྱང་ཉེ་བའི་དུས་རབས་ཁ་ཤས་ཚུན་ཆད་ཀྱི་ལོ་རྒྱུས་ལ་དཔྱད་ཞིབ་བྱས་ན་དེའི་སྟེང་དུ་འཕེལ་མེད་ལ་གནས་དགོས་ན་འཕེལ་རིམ་གསར་བའི་ཁ་ཕྱོགས་དང་མི་མཐུན། རང་རེ་ནང་བའི་ཆོས་པ་ཡིན་ཡང་དུས་རབས་འདི་དང་མཐུན་པའི་ཆོས་པ་ཞིག་གིས་དེ་མ་བྱས་ཐབས་མེད་ཡིན་ཞིང་དེ་བྱེད་དགོས། འོན་ཀྱང་དེ་ལྟར་བྱེད་དགོས་ཞེས་བཤད་ན་སྟོན་པའི་དམ་ཆོས་ལ་དེ་མིན་པའི་གསར་བ་ཞིག་བྱེད་དགོས་པ་ཡིན་ནམ་མིན་ཞེ་ན། དེ་དགོས་པ་མ་ཡིན་ལ་བྱེད་རྒྱུ་ཡོད་པ་ཡང་མ་ཡིན། དེ་སྟོན་པ་ཤཱཀྱ་ཐུབ་པས་གསར་གཏོད་མཛད་ནས་དེའི་སྔོན་དུ་མེད་རྒྱུ་ཞིག་ཡོད་རྒྱུ་མཛད་པ་མ་ཡིན་ལ། ཆོས་ཐམས་ཅད་ཀྱི་ཆོས་ཉིད་ཇི་ལྟར་ཡིན་པ་དེ་ལྟར་གཏན་ལ་ཕབ་ནས་ཆོས་ཉིད་ངོ་བོ་འགྱུར་མེད་ལ་ཆོས་ཅན་རྒྱུ་འབྲས་སླུ་མེད་ཡིན་པ་ལ་ཡིན་ལུགས་འདི་ལྟར་ཡིན་ཞེས་གསུངས་པ་ཙམ་ཞིག་ཡིན། དེ་བཞིན་གཤེགས་པ་རྣམས་བྱོན་ཀྱང་རུང་མ་བྱོན་ཀྱང་རུང་། སངས་རྒྱས་ཀྱིས་ཆོས་བསྟན་ཀྱང་རུང་མ་བསྟན་ཀྱང་རུང་། དངོས་པོ་གཤིས་ཀྱི་གནས་ལུགས་ལ་ཇི་ལྟར་ཡིན་པ་དེ་ཉིད་སུ་ཞིག་གིས་བཅོས་སུ་མེད་པ་ཞིིག་ཡིན། དེ་གདུལ་བྱ་ལ་བསྟན་སྐབས་བསྟན་ས་ཐམས་ཅད་གཅིག་འདྲ་རྐྱང་རྐྱང་མིན་པའི་རྒྱུ་མཚན་གྱིས་དྲང་ངེས་ལྡེམ་དགོངས་ཀྱི་ཚུལ་སྣ་ཚོགས་ཀྱིས་བསྟན་པ་དེ་ཉིད་ཤེས་པ་ཞིག་གིས་འགལ་མེད་གནད་གཅིག་ལ་བསྡུ་ཤེས་པ་ཡིན་ཞིང་། མི་ཤེས་པ་ཞིག་གམ་ཁྱད་པར་དེ་རིང་ཁ་རྩང་གི་དུས་རབས་གསར་བའི་འཕེལ་རིམ་དང་བསྟུན་པའི་ལྟ་ཚུལ་བེད་སྤྱད་ནས་དེའི་གཏིང་དེ་དཔོག་པའི་ཐོག་ཏུ་ནང་རིག་པ་སྡེ་སྣོད་གསུམ་ལ་སྦྱངས་པར་བྱས་ན་ལོ་ཉིས་སྟོང་ལྷག་གི་སྔོན་ལ་བྱོན་པའི་སྟོན་པ་བཅོམ་ལྡན་འདས་གཞི་ནས་ཚད་མའི་སྟོན་པ་ཡིན་པ་དེ་ཉིད་དཔྱད་གསུམ་དག་པས་གཏན་ལ་ཕེབས་ཡོད། དེའི་དུས་སུ་ཚན་རིག་ཅེས་པ་རིགས་པ་གསར་བའི་བརྟག་ཞིབ་འདི་ཚོ་ཆེས་ཕྲ་ཞིང་ཞིབ་པའི་གནས་ལ་ཐུག་དུས་རང་སོ་མ་ཟིན་པའི་བྱིས་པའི་ན་ཚོད་ཡིན་པ་དེ་ཉིད་ར་འཕྲོད་རྒྱུ་ཡོད། རང་གི་རྣམ་དཔྱོད་ཀྱིས་བརྟགས་ཤིང་དཔྱད་པའི་ནུས་པ་མེད་ན་གཞན་ཟེར་རྗེས་རྒྱུག་གི་ཆུ་སྣ་གར་ཁྲིད་ཅན་ལ། གཅིག་གིས་རྒྱུ་འབྲས་སླུ་མེད་མ་ཡིན་ཟེར་སྐབས་དེ་བདེན་འདུག་བསམ། གཅིག་གིས་རྒྱུ་འབྲས་སླུ་མེད་ལོས་ཡིན་ཟེར་སྐབས་དེ་བདེན་སྣང་ཤར། དེ་ལྟར་ཡིན་ཕྱིར་རྒྱུ་མཚན་མ་ཤེས་པས་ཨུ་ཚུགས་བྱས་ན་ཡང་མི་ཡོང་། རྙིང་ཞེན་མཁྲེགས་འཛིན་གྱི་ལྟ་བ་ཅན་འདི་ཡིན་ཟེར་རྒྱུའི་མཚན་གཞི་འཇོག་ས་ཞིག་ལས་ཕན་ཆད་དུ་ཅི་ཡང་མེད་པར་གྱུར་སོང་ཚེ་དུས་རབས་ཉེར་གཅིག་པའི་ཆོས་པ་ཞིག་བྱེད་པའི་ཆ་རྐྱེན་མ་ཚང་བ་ཡིན། དེའི་ཕྱིར་ན་བཅོམ་ལྡན་འདས་ཁོང་ཉིད་ཀྱིས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས་པ་ལྟར་དུ་ཁྱིམ་པ་ཕོ་མོ་ཡིན་ཡང་ཆོས་ཀྱི་གནད་དང་རྒྱུ་མཚན་ཤེས་པར་བྱས་ནས་ཕུགས་ཐག་ཅིག་ཆོད་ཤོག དང་པོར་རང་གིས་བརྟགས་ཤིང་དཔྱད་དེ་ངེས་ཤེས་ནང་ནས་རྙེད་དུས་ཆོས་སྒྲུབ་ན་གཅིག་ན་རྨོངས་དད་དུ་མི་འགྲོ། གཉིས་ན་ཕྱིན་ཆད་ལམ་ལོག་ཏུ་མི་འགྲོ་བའི་གནད་ཆེན་པོ་ཞིག་དེ་ན་ཡོད། ཁྱད་པར་དུ་འུ་ཚོ་སྔར་ནས་ད་ལྟའི་བར་དུ་ཆོས་ཀྱིས་འཚོ་བའི་ས་ཆ། ཆོས་དང་ཡུལ་སྲོལ་གཉིས་ཀ་གཅིག་ཏུ་འདྲེས་པའི་ས་ཆ་ནས་ཆོས་ཕྱོགས་ཀྱི་དཔྱད་ཞིབ་ལ་བསམ་བློ་མ་བཏང་ན་དུས་རབས་ཀྱི་རྗེས་མ་ཆོད་པ་ཡིན་ཞེས་བབས་འཕྲོས་ཀྱི་གཏང་གླེང་རེ་བྱས་པ་ཡིན། ༼ཁ༽ གཞུང་གི་དོན། ཇ༽ བསྔོ་བའི་ཡན་ལག ཀ དེ་དང་འབྲེལ་བའི་དམ་པ་གསུམ་བཤད་པ། ད་སྐབས་འདིའི་བདེ་ཆེན་ཞིང་ཁྲིད་ལ་གང་ཞིག་འཆད་ཉན་བྱ་བ་ནི་ངས་བྲིས་པའི་བདེ་སྨོན་ཚིག་བཅད་རྡོག་མ་བཞིའམ་ཤོ་ལོ་ཀ་བཞིས་བདེ་བ་ཅན་དུ་སྐྱེ་བའི་རྒྱུ་བཞི་བསྟན་པ་འདི་བཤད་པའི་སྐབས་ནས་རྒྱུ་དང་པོ་རྟེན་ཚོགས་ཞིང་གསལ་འདེབས་པ་སོང་ཟིན། རྒྱུ་གཉིས་པ་ཚོགས་བསགས་སྒྲིབ་སྦྱོང་གི་སྐོར་ནས་ཀྱང་མང་ཞིག་ཁ་རྩང་སོང་ནས་བསགས་སྦྱང་གི་གནད་ཚུར་བསྡུས་པ་ཡན་ལག་བདུན་པའི་སྐབས་ནས་ཁ་རྩང་དྲུག་པ་མྱ་ངན་ལས་མི་འདའ་བར་གསོལ་བ་འདེབས་པ་སོང་མ་ཐག་པའི་མཚམས་ནས་ད་དེ་རིང་བསྔོ་བ་ལ་ཐུག་ཡོད། ཐེག་པ་ཆེན་པོའི་མདོ་སྔགས་ཟུང་དུ་འབྲེལ་བའི་ཆོ་ག་གཅིག་བསྡུས་ཀྱི་སྟེང་ནས་ཞིང་སྒྲུབ་འཚོག་བཞིན་ཡོད་ལ། ཐེག་ཆེན་སོར་བྱང་སྔགས་གསུམ་གྱི་སྡོམ་དམ་ཚིག་ལ་གནས་པ་ཤ་སྟག་གིས་དམ་ཆོས་འཆད་ཉན་བྱས་ནས་ཐེག་ཆེན་ཐར་བའི་ལམ་ལ་མདོ་སྔགས་ཐབས་ཤེས་ཟུང་འབྲེལ་གྱིས་འཇུག་བཞིན་ཡོད་པའི་དབང་དུ་བྱས་ཏེ་རྒྱུ་གཉིས་པ་ཚོགས་བསགས་སྒྲིབ་སྦྱོང་། རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་དང་སྦྲེལ་ནས་འཆད་བཞིན་ཡོད་པའི་སྟབས་ཀྱིས་མཚམས་འདི་ནས་དམ་པ་གསུམ་དང་སྦྲེལ་ཏེ་བསྔོ་བ་ནི་དེ་དང་མཉམ་དུ་བཤད་རྒྱུར་བྱས་ན་སྙམ་གྱིན་ཡོད། རྒྱལ་བ་ཀློང་ཆེན་པས། ཁྱད་པར་ཐེག་ཆེན་དགེ་བ་རླབས་པོ་ཆེ། །སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་བསྔོ་བས་ཡོངས་སུ་ཟིན་པ་དེ། །ཐར་ལམ་བགྲོད་པའི་གཅེས་པ་རྣམ་གསུམ་ཡིན། །ཞེས་གསུངས་པ་དེ་རང་གཞན་མང་ཆེ་བས་བློ་ཐོག་ན་ཡོད་པ་དེ་ཡིན་ཡང་བློ་ལ་མེད་མཁན་ཚོས་དེ་བློ་ལ་ངེས་པར་གྱིས། ཐེག་ཆེན་ཐར་བའི་ལམ་ལ་ཞུགས། གཞན་དོན་དུ་རྫོགས་པའི་སངས་རྒྱས་ཀྱི་གོ་འཕང་དོན་དུ་གཉེར་མཁན་ཞིག་ལ་མེད་དུ་མི་རུང་བའི་གཅེས་པ་རྣམ་གསུམ། གལ་ཆེན་རྣམ་གསུམ། མེད་ན་ཐབས་མེད་ཡིན་པའི་དམ་པ་རྣམ་གསུམ་དེ་ཉིད་སྦྱོར་བ་སེམས་བསྐྱེད་དམ་པ། དངོས་གཞི་དམིགས་མེད་དམ་པ། རྗེས་བསྔོ་བ་དམ་པ་རྣམས་ཡིན། སྔོན་ཆད་སྔོན་ཆད་ཞིག་ལ་འདིའི་ནང་གི་ཆེ་རིམ་པ་རྣམས་ཀྱིས་ཤེས་ས་ཡོད། འདིའི་ཆོས་གྲྭ་ཕྱི་མ་འདི་མ་བཀབ་གོང་དུ་གཙུག་ལག་ཁང་ནང་མའི་ནང་ནས་ཁྱིམ་པ་ཕོ་མོ་མང་པོ་ཞིག་ལ་བྱིས་པ་ལ་ཡི་གེ་བསླབ་པ་ལྟར་བྱས་ཏེ། སྦྱོར་བ་སེམས་བསྐྱེད་དམ་པ་རྗོད་ཅེས་སྨྲས་ནས་སྦྱོར་བ་སེམས་བསྐྱེད་དམ་པ་སྨྲ་རུ་བཅུག དངོས་གཞི་དམིགས་མེད་དམ་པ་རྗོད་ཅེས་སྨྲས་ནས་ཡང་དངོས་གཞི་དམིགས་མེད་དམ་པ་སྨྲ་རུ་བཅུག དེ་ལྟར་རྗེས་ཟློས་བྱེད་བཅུག་ནས་བསླབས་པར་བྱས་པ་དེ་ཉིད་ད་དུང་ངས་དྲན་གྱིན་འདུག རྒན་དར་གཞོན་གསུམ་ཐམས་ཅད་པོས་ཕར་སོང་ནས་ཆོས་ཀྱི་ལབ་གླེང་གཙོ་བོ་དམ་པ་གསུམ་གྱིས་འགོ་བཟུང་ནས་བཤད་རེས་རེ་གྱིས་དང་། མ་ཤེས་པ་ཤེས་བྱེད། ཤེས་པ་དེ་ཉིད་ཞེ་ལ་ངེས་བྱེད། དེ་བཞིན་དུ་ཤེས་ནས་ལག་ལེན་ལ་འདེབས་དགོས་པ་ཡིན་ཕྱིར་ཆོས་ཁྲིད་ཀྱི་ནང་གི་ཡོང་སྒོ་དེ་ལྟར་བྱས་ཏེ་ཁྱིམ་ལ་ཁྱེར་སོང་ནས་ཁྱིམ་བཟའ་བའི་འཚོ་རྟེན་དེས་དྲག་མེད་པ་དེ་ཉིད་ཡོད་པ་ཞིག་བྱེད་དགོས། ཆོས་ཀྱི་འཚོ་བ་དེ་འཚོ་བའི་ཆ་ཤས་མེད་དུ་མི་རུང་བ་གལ་ཆེན་པོ་ཞིག་ཡིན། དེ་མེད་དུས་འཚོ་བ་གཞན་པ་ཅི་ཞིག་ཡོད་ཀྱང་རྟ་ཟོག་གི་འཚོ་བ་ལྟ་བུ་ཞིག་ལས་ཡན་ལ་འགྲོ་བ་མ་ཡིན། དམ་པ་གསུམ་དང་མ་འབྲེལ་བ་དེ་ཉིད་ཆོས་ཀྱི་གཟུགས་བརྙན། མི་རྒྱུ་གཉིས་ཀྱིས་ཅི་ཙམ་བསྒྲུབས་ཀྱང་གོ་ཆེན་པོ་ཞིག་ཆོད་པ་མ་ཡིན། ཅི་ཞིག་གི་ཐད་ནས་གོ་ཆོད་པ་མ་ཡིན་ཟེར་ན། ཐེག་པ་ཆེན་པོའི་ཆོས་ཀྱི་གོ་ཆོད་པ་མ་ཡིན། དེ་མ་ཆོད་དུས་གཞན་དོན་མི་འགྲུབ་པས་མ་ཚད་རང་དོན་ལེགས་པོ་ཞིག་འགྲུབ་ཐུབ་པ་མ་ཡིན། སྤངས་རྟོགས་མཐར་ཕྱིན་སྐྱོན་ཀུན་ཟད་ཡོན་ཏན་ཀུན་ལྡན་རྫོགས་པའི་སངས་རྒྱས་ཀྱི་གོ་འཕང་འགྲུབ་པའི་རྒྱུ་རུ་གྱུར་ཡོད་པ་མ་ཡིན། དམ་པ་གསུམ་དང་མ་འབྲེལ་བའི་ཚོགས་བསགས་སྒྲིབ་སྦྱོང་ལ་ཅི་འདྲའི་དཀའ་ལས་ཆེན་པོ་ཞིག་བརྒྱབ། རྒྱུ་འགྲོ་ཟས་ཚེགས་ཅི་འདྲའི་ཆེན་པོ་ཞིག་བྱས་ཡོད་ཀྱང་། རྒྱུ་གཅིག་ལ་འབྲས་བུ་གཅིག་མ་གཏོགས་སྨིན་རྒྱུ་མེད་པའི་ཐོག་ཏུ། དེའི་བར་དུ་ཁོང་ཁྲོ་ལྟ་བུ་ཉོན་མོངས་དྲག་པོ་ཞིག་སྐྱེས་ན་དགེ་རྩ་འཇོམས་ནས་འཕྲོ་བརླག་ཏུ་འགྱུར་འགྲོ་བ་ཡིན། འཇིག་རྟེན་གྱི་སྐྱེ་བོ་ཁྱིམ་ན་གནས་པ་ཞིག་གིས་ཞིང་འབྲོག་གི་ལས་ཀ་ལས་ན་འདྲ། ཚོང་སོ་ནམ་གྱི་བྱ་གཞག་ཅིག་སྒྲུབ་ན་འདྲ། ལས་རིགས་གང་ཞིག་གཉེར་གྱི་ཡོད་པ་ཡིན་ན་འདྲ། ཕར་འགྲོའི་མ་རྩ་དེ་ཆུང་ཆུང་ཞིག་ཡིན་ཡང་ཡོང་སྒོ་དེ་བས་ཆེ་ཞིག་དང་། དཀའ་ལས་མང་པོ་ཞིག་རྒྱག་མི་དགོས་པར་དོན་ཆེན་པོ་ཞིག་འགྲུབ་ན་སྙམ་པའི་བསམ་པ་དེ་བཟུང་ཡོད། ཆོས་སྒྲུབ་ན་དེ་དང་གཅིག་མཚུངས་ཡིན། ཚེ་འདིའི་དོན་དག་ཆུང་ཆུང་ཚ་གི་ཚི་གིའི་བྱ་བ་སྣེ་གཅིག་ལ་དེ་ཇི་ལྟར་སྒྲུབ་པ་དང་། འགྲུབ་པའི་ཆ་རྐྱེན་ཇི་ལྟར་ཚོགས་དགོས། འགོ་ཇི་ལྟར་འཇོག སྐེད་པ་ཇི་ལྟར་བཅིང་། མཇུག་ཇི་ལྟར་ཕུད་པའི་འདང་འཆར་གཞི་དགོས་པ་ཡིན་ཞིང་། དཔེ་བཞག་ན་ཁང་ཆུང་གྲུ་བཞི་ཞིག་ལས་ཁུལ་བྱས་ན། དེའི་རྨང་དེ་ཅི་ཚད་བརྐོ་དགོས། ཀ་ར་གདུང་མ་ཅི་འདྲ་བྱས་ཏེ་འགྲེམས་དགོས། ཐོག་ཁེབས་དེ་ཅི་འདྲ་བྱས་ནས་རྒྱག ཁང་མིག་རང་གི་དགོས་མཁོ་དང་བསྟུན་ནས་ཅི་འདྲ་བྱས་ཏེ་མཚམས་བཅད། ཆུང་ས་ནས་དེ་ཚོའི་སྔོན་རྩིས་དང་འདང་རྒྱག་བྱེད་དགོས་ཡོད་པ་ཡིན་ཞིང་། ཡིན་ན་ཡང་འབྲིང་ས་ནས་མི་རང་གི་མི་ཚེ་ལ་ཚད་བཞག་ན་ཚོད་ངོ་མ་མངོན་ཤེས་མེད་ན་མི་ཐིག་ཀྱང་གལ་ཏེ་རྐྱེན་གློ་བུར་གྱི་ན་ཚ་ཤི་གསུམ་ལྟ་བུ་ཞིག་ཡོང་བཞག་ན་གདོང་ལེན་གྱི་འདང་རྒྱག་ཅི་ཡོད་བསམ་བློ་གཏོང་དགོས། དེ་གཏོང་ཤེས་མཁན་དཀོན་པོ་ཡིན་ལ། དེ་བས་ཀྱང་ཆེ་ས་དེ་གང་ཡིན་ཞེ་ན། ཆེ་ས་ངོ་མའི་དོན་དག་དེ་ཚེ་རབས་གཏན་གྱི་དོན་ཆེན་དང་། ད་ལྟའི་ཚེ་འདིའི་བྱ་བ་ཆེ་འབྲིང་ཆུང་གསུམ་དང་བཅས་པ་འགྲུབ་པའི་རྒྱུ་རྐྱེན་གཙོ་བོ་ཆོས་སྒྲུབ་པའམ་བསོད་ནམས་གསོག་པ་ལ་ཐུག་ཡོད། རང་དང་ཁྱིམ་མི་བཅས་པའི་ཚེ་འདི་ཕྱི་ཐམས་ཅད་ཀྱི་སྐྱིད་སྡུག་ཅི་ཡོང་རག་ལས་པའི་དོན་ཆེན། ཆོས་སྒྲུབ་ན་སྒྲུབ་ལུགས་མ་ཤེས་དུས་བྱ་བ་ཆེན་པོ་ཞིག་གི་འགོ་དེ་ནས་ཉེས་འགྲོ་བཞིན་ཡོད། དེས་ན་དགེ་རྩ་ཡི་གཟུགས་བརྙན་ཕར་བལྟས་ན་མ་ཆེ་ཡང་དོན་ཆེན་པོ་ཐར་བ་དམ་པའི་རྒྱུ། དགེ་བ་གཅིག་ལ་དགེ་འབྲས་ལན་མང་དུ་སྨིན་རྒྱུ་ཡོད་པ་དེ་ཉིད་ཐེག་ཆེན་དམ་པ་གསུམ་གྱི་ཉམས་ལེན་འདི་ལ་བརྟེན་ནས་འབྱུང་བཞིན་ཡོད་པས་འདི་མ་ཤེས་ཐབས་མེད་དང་། འགོ་ནས་སྦྱང་དགོས་རྒྱུ་ཞིག་ཡིན། རང་དོན་རྐྱང་པ་ལ་བསམས་ནས་མ་ཎི་ཕྲེང་སྐོར་བརྒྱ་འདོན་པ་བས་གཞན་དོན་བྱང་ཆུབ་མཆོག་ཏུ་སེམས་བསྐྱེད་ནས་སྙིང་རྗེའི་སེམས་དང་མི་འབྲལ་བའི་མ་ཎི་གཅིག་ཁེ་རུ་མ་བཏོན་པའི་ཕན་ཡོན་གྱི་ཆོད་སྒོ་ཆེ་བ་ཡིན། དེ་བཞིན་དུ་ཀུན་སློང་མ་དག་པའམ་ལུང་མ་བསྟན་གྱི་ཀུན་སློང་དང་ལྡན་པས་རྐང་མཐིལ་གཟེར་བཞིན་དུ་གཙུག་ལག་ཁང་ལ་སྐོར་བ་བརྒྱ་ཐམ་པ་བརྒྱབ་པ་བས་དམ་པ་གསུམ་དང་འབྲེལ་བའི་སྐོར་བ་གཅིག་ཁེ་རུ་མ་ཡིས་དགའ་ཤག་ཤག་ཡིན། དེ་ལྟར་ཅིའི་ཕྱིར་ཡིན་ཟེར་ན། གཞན་ཕན་གྱི་སེམས་དང་འབྲེལ་མ་འབྲེལ་གྱི་ཁྱད་པར་རྒྱུགས་སོང་བ་ཡིན་ཞིང་། ཐུབ་པ་བཅོམ་ལྡན་འདས་ཀྱིས་གཞན་དོན་ཁོ་ན་མཛད་ནས་རང་དོན་ཞོར་འབྱུང་ལ་འགྲུབ་པ་དེ་ཉིད་དང་། སེམས་ཅན་གྱིས་རང་དོན་འབའ་ཞིག་བསྒྲུབས་ནས་རང་དོན་ཡང་མ་འགྲུབ་པར་འཁོར་བའི་གནས་སུ་སྡུག་བསྔལ་སྣ་ཚོགས་ལ་ཡིད་ཐང་ཆད་ཡོད་པ་འདི་ཉིད་མཐོང་ཆོས་སུ་གྲུབ་པ་འདིས་ཤེས་པ་ཡིན། དམ་པ་གསུམ་དེ་དགེ་རྩ་གཅིག་ཏུ་ཐེག་ཆེན་ཐར་བའི་དགེ་རྩར་འགྱུར་བའི་སྦྱོར་བ། དངོས་གཞི། རྗེས་གསུམ་མམ། འགོ། བར། མཐའ་གསུམ་ཞེས་པ་ལྟ་བུ་ཡིན། དགེ་རྩ་ཆུང་ཆུང་ཞིག་གིས་གོ་ཆེན་པོ་ཆོད་བྱེད་དུ་ཐབས་ཁྱད་པར་ཅན་ཞིག་དགོས་ཤིང་། དེ་ལ་དགེ་རྩ་ཐབས་ཀྱིས་ཟིན་པ་ཞེས་ཟེར། དེའི་དགེ་རྩ་དེ་ལ་རྐྱེན་བར་ཆད་ཡོད་མི་ཉན་ལ། དེ་གནད་ཁྱད་པར་ཅན་དང་འབྲེལ་དགོས། དེ་འབྲེལ་ན་རྐྱེན་གྱིས་མི་ཤིགས་པའམ་མི་ཐུབ་པ་ཡིན། ཡང་དགེ་རྩ་དེ་གཅིག་གིས་མི་ཚད་མང་པོ་ཟད་མེད་དུ་འཕེལ་ཐབས་བྱེད་དགོས། དེ་དང་གསུམ་པོ་ཚང་དུས་དགེ་བ་ཚད་ལྡན་བསྒྲུབས་ན་བསྒྲུབས་པ་ཇི་བཞིན་གྲུབ་སོང་བ་ཡིན། དེས་ན་དང་པོར་དགེ་རྩ་ཐབས་ཀྱིས་ཟིན་པ་སྦྱོར་བ་སེམས་བསྐྱེད་དམ་པ་ཡིན་ལ། གཉིས་པ་དེ་དགེ་རྩ་རྐྱེན་གྱིས་མི་ཤིགས་པར་བྱེད་པ་དངོས་གཞི་དམིགས་མེད་དམ་པ། གསུམ་པ་དེ་དགེ་རྩ་གོང་ནས་གོང་དུ་འཕེལ་བར་བྱེད་པ་མཇུག་བསྔོ་བ་དམ་པ་སྟེ་གསུམ་ཡིན། དེའི་ནང་གི་དང་པོར་དགེ་རྩ་ཐབས་གང་གིས་ཟིན་དགོས་པ་ཡིན་ཞེ་ན། ཐབས་བྱང་ཆུབ་ཀྱི་སེམས་ཀྱི་རྩི་ཡིས་ཟིན་དགོས་པ་སྟེ། དཔེ་བཞག་ན་གསེར་འགྱུར་གྱི་རྩི་ཞེས་པ་ཞིག་ཡོད་པ་དེ་དཔེ་བཞག་དར་བ་ཡིན་ཞིང་། དེའི་རྩི་དེ་ལྕགས་ལ་ཐེབས་སོང་ན་ལྕགས་གསེར་དུ་འགྱུར་འགྲོ་བ་ཡིན། ལྕགས་དང་གསེར་གཉིས་ཀ་ཡང་ལྗིད་ཆེ་ཆུང་འདྲ་འདྲ་ཅན་ཞིག་ལ་རིན་ཐང་གི་གོང་ཚད་ཁྲི་འགྱུར་འབུམ་འགྱུར་གྱི་ཁྱད་བརྒྱུགས་ཡོད། གོང་ནས་ངས་ད་ལྟ་བཤད་མ་ཐག་པ་མ་ཎི་ཕྲེང་སྐོར་གཅིག་འདོན་པ་དང་། མ་ཎི་རྡོག་མ་ཁེ་རུ་མ་གཅིག་འདོན་པ་གཉིས་ཀ་ཞེས་ཟེར་གྱིན་འདུག་པ་དེ་ཉིད་གོ་བརྡ་འཕྲོད་ཆེད་དུ་གཅིག་དང་བརྒྱ་མང་ཉུང་ཡོད་པས་བཤད་པ་ཡིན་མ་གཏོགས་ངོ་མས་བཤད་ན་ཐབས་སེམས་བསྐྱེད་ཀྱིས་ཟིན་དང་མ་ཟིན་དེ་སྐྱ་སེར་གཉིས་ཀའི་ཁྱད་པར་ལྟ་བུ་ཁྲི་འགྱུར་འབུམ་འགྱུར་གྱི་ཁྱད་པར་རྒྱུགས་ཡོད། དེ་བཞིན་དུ་མར་རྒྱ་མ་ཁྲི་ཕྲག་གཅིག་གི་མཆོད་མེ་བྱས་ཏེ་ང་མི་ན་བ་དང་། ང་མི་ཚ་བ། ངས་བྱ་བ་ག་གེ་མོ་ཞིག་འགྲུབ་ཆེད། དེ་མིན་ཡང་ང་ཤི་དུས་འཇིགས་སྐྲག་མི་ཆེ་བའི་ཆེད། ཤི་ནས་དམྱལ་བ་མི་ལྷུང་ཆེད་ཡིན། དེ་འགྲུབ་པར་ཤོག་ཅེས་བསམས་ནས་མར་མེ་སྦར་བ་དེ་ཉིད་དང་། ཐབས་བྱང་ཆུབ་མཆོག་ཏུ་སེམས་བསྐྱེད་པ་རྣམ་པར་དག་པ་ཡི་སྒོ་ནས་སེམས་ཅན་ཐམས་ཅད་སངས་རྒྱས་ཐོབ་པའི་དོན་དུ་མར་མེ་ཁེ་རུ་ཞིག་སྦར་བ་གཉིས་ཀ་ལས་ཁེ་རུ་མ་ཡིས་དགེ་རྩ་འགྱུར་སྟོབས་ཆེ་བས་མི་ཚད་དགེ་རྩ་རླབས་ཆེ། སྔར་གྱི་གཏམ་རྒྱུད་ཀྱི་ནང་ན་དབུལ་མོ་བསྙེན་དགའ་མོས་ཉི་མ་གཅིག་གི་སྤྲང་ཟས་མར་དུ་རྗེས་ནས་མཆོད་མེ་ཀོང་བུ་ཆུང་ཆུང་ཞིག་སྦར་ཏེ། དེ་སུ་ལ་ཕུལ་བ་ཡིན་ན་སངས་རྒྱས་ཀྱི་མདུན་དུ་ཕུལ་ནས་བྱང་ཆུབ་མཆོག་ཏུ་སེམས་ཤིག་བསྐྱེད་པ་དེ་ཉིད་སངས་རྒྱས་མར་མེ་མཛད་དུ་སངས་རྒྱས་པར་ལུང་བསྟན་ཐོབ་པའི་ལོ་རྒྱུས་ལྟར་དུ་འགྱུར་སྟོབས་ཆེ་ཆུང་དེ་འདྲ་ཞིག་ཡིན། སྤྱིར་ན་སྦྱོར་དངོས་རྗེས་གསུམ་དམ་པ་གསུམ་དེ་ཡང་ནས་ཡང་དུ་བསྐྱར་ཞིང་ལན་གྲངས་ཐེངས་མ་མང་པོ་ལ་བཤད་མྱོང་། ཁྱད་པར་དུ་སེམས་བསྐྱེད་ཀྱིས་ཟིན་དགོས་པ་དེ་ཉིད་ཆོས་ཁྲིད་ནམ་བཤད་ཆོས་དུང་ནམ་བུས་ལ་བཤད་བཞིན་ཡོད། འོན་ཀྱང་འདིའི་གནད་ཀྱི་དོན་འདི་གལ་ཆེ་བས་ཁྱིམ་པ་ཕོ་མོའི་རྒྱུད་ལ་འབྱོར་རྒྱུའི་ཆེད་དུ་ད་རུང་ཡང་ཟེར་བྱས་ན་བྱང་ཆུབ་སེམས་ཀྱི་རྩི་ཡིས་ཟིན་དགོས་ཞེས་པའི་བྱང་ཆུབ་སེམས་དེ་བྱང་ཆུབ་སེམས་སྡོམ་ཞིག་བླངས་མ་ཐག་ནས་སྐྱེས་ཡོད་ཟེར་དཀའ་ཞིང་། འོན་ཀྱང་དཀའ་མོ་ཡིན་སྙམ་ནས་རང་གར་བསྡད་པས་ཕན་ཐོགས་དང་བསྒུགས་ནས་སྐྱེ་ཡོང་རྒྱུ་ཞིག་མེད། སྐྱེ་ཐབས་ལ་འབད་པ་རང་གིས་བྱེད་དགོས། ཤེས་བྱ་ཐམས་ཅད་སྦྱངས་ན་ཤེས་རྒྱུ་ཅན་ཡིན་ལ། དཀའ་བ་སྤྱད་ནས་འབད་པར་བྱས་ན་ནམ་ཞིག་དཀའ་བའི་གནས་ཀྱང་བདེ་བླག་ཏུ་འགྲུབ་རྒྱུ་ཡོད་པ་དེ་ཉིད་ཆོས་ཉིད་ཡིན་ལ། ང་ཚོ་དང་པོ་བྱིས་པའི་སྐབས་སུ་ཨ་ཕ་ཨ་མ་ཟེར་མི་ཤེས་པ་ཡིན། རང་གི་ཕོར་བ་རང་གི་ཁ་ལ་གཏོད་མི་ཤེས་ཀྱང་དེ་ལོབས་རྒྱུ་ཡོད། དང་པོ་ཀ་ཁ་སུམ་ཅུའི་ཡི་གེ་མི་ཤེས་ཀྱང་དེ་སྦྱངས་ནས་ལོབས་རྒྱུ་ཡོད་པ་དཔེ་དེ་བཞིན་དུ་རིག་པའི་གནས་ལྔ་དང་། བཀའ་མདོ་རྒྱུད་ཀྱི་དགོངས་དོན་མན་ཆད། ཅི་ལ་སྦྱངས་ན་དེ་ལ་མཁས། ཞེས་པ་འཇིག་རྟེན་གཏམ་གྱི་དཔེ་ཡིན། གཞན་ཕན་བྱང་ཆུབ་ཀྱི་སེམས་ལ་སྦྱང་རྒྱུ་ཡོད་པ་ཡིན། སྦྱོང་ལུགས་ཇི་ལྟར་དགོས་ཟེར་ན། ཁ་རྩང་ཞིག་ནས་བཤད་པ་བཞིན་ཚད་མེད་བཞི་ཡིས་འགོ་བཟུང་ནས་སྦྱོང་དགོས། ཚད་མེད་བཞི་དབྱེ་བ་རྣམ་གྲངས་ནས་བཟུང་སྟེ་བཤད་ཡོད། སྦྱོང་ལུགས་ནི་མན་ངག་གི་ལུགས་ལྟར་དུ་བཏང་སྙོམས་ཚད་མེད་ནས་འགོ་བཙུགས་ཏེ་སྦྱངས་ན་ལོབས་རྒྱུ་བྱང་རྒྱུ་ལོས་ཡོད། ཐུན་མོང་གི་ལུགས་ཡིན་ན་སེམས་ཀྱིས་འབད་ནས་སངས་རྒྱས་པ་ཡིན། ཐུན་མིན་ལྟར་ན་ངོ་བོ་ཡེ་དག་དང་གློ་བུར་བྲལ་དག་ཡིན་པ་དེ་ཉིད་ཚོགས་གཉིས་བསགས་ནས་སྒྲིབ་གཉིས་དག་སྟེ་རྟོགས་པ་མངོན་དུ་གྱུར་རྒྱུ་ཡོད། འབད་པའི་ཤུགས་ལ་བརྟེན་པ་ཞིག་ཡིན། ད་ལྟ་ང་ཚོས་མ་ནམ་མཁའ་དང་མཉམ་པའི་སེམས་ཅན་ཟེར་ཁུལ་བྱེད་ཀྱང་ང་དང་ཁོ་ཟེར་ས་ལ་ཐུག་དུས་བདག་གཞན་མཉམ་པ་དང་། བདག་ལས་གཞན་གཅེས་སོགས་མ་དགོས་ཚིག་གཅིག་གིས་ཟེར་ལུགས་ཡག་བཙོག་ལ་ཡ་ཡ་དྲག་དྲག་སྙམ་གྱིན་འདུག་རྒྱུ་འདི་ཉིད་ཁོག་རྒྱ་ཆུང་བའི་སྐྱོན་དང་བློ་རྒྱ་དོགས་པའི་མཚང་ཡིན། ཆོས་མ་དགོས་འཇིག་རྟེན་སྒྲུབ་ལུགས་དང་མི་བཟང་པོ་ཡིན་ལུགས་ཙམ་ཞིག་ཤེས་ཀྱིན་མེད་པ་ཡིན། གཞན་ཞེས་པ་མཐའ་ཡས་ཀྱི་སེམས་ཅན་ཡིན་ཞིང་གྲངས་ཀ་བགྲང་རྒྱུ་དང་རྩི་རྒྱུ་མི་ལོན་པའི་མང་པོ་ཞིག་ཡིན་ཞིང་། ང་ཞེས་པ་ཁེ་རུ་མ་ཐོག་མེད་ནས་ད་ཡི་བར་དུ། ང་དང་ང་། ངའི་དང་ངའི་ཞེས་ང་ལ་བདག་ཏུ་བཟུང་བ་དང་ལུས་དང་ནོར་རྫས་ངའི་ཡིན་སྙམ་ནས་བདེན་ཞེན་འཁྲུལ་སྣང་གི་དབང་དུ་ཤོར་སོང་བ་ཡིན། དེའི་རྐྱེན་གྱིས་སྡུག་བསྔལ་ཞིག་མ་གཏོགས་བདེ་བ་ཐོབ་རྒྱུ་མེད་པ་འདི་བྱུང་སོང་བ་ཡིན། རང་རྐྱང་རྐྱང་ལ་བསམས་ནས་རང་དོན་དེ་སྔོན་ཡང་མ་འགྲུབ་ལ་ད་རུང་འགྲུབ་ས་མི་འདུག སེམས་ཅན་འདི་ཐམས་ཅད་སྐྱེ་བ་ཐོག་མེད་ནས་ཕ་མར་མ་བྱས་པ་ཡོད་པ་མ་ཡིན། དེ་ལྟར་དུ་དགྲ་གཉེན་བར་མར་བྱས་པ་ཡང་ཡོད་ཅིང་མ་བྱས་པ་ཕལ་ཆེར་མེད་ལ། འོན་ཀྱང་རང་གིས་ཕར་ལ་དེ་བཞིན་དུ་མཚམས་རེར་ཕ་མར་བྱས། མཚམས་རེར་མཛའ་གྲོགས་བྱས། མཚམས་རེར་གཉེན་འདུན་བྱས། མཚམས་རེ་དགྲ་བོ་བྱས་ནས་སྲོག་གི་འཚེ་བ་བྱས་པའི་ཁ་གྲངས་ཀྱང་སུས་ཐེབས། སེམས་ཅན་ཐམས་ཅད་བདེ་བ་འདོད་མཁན་ད་ལྟའི་རང་ཉིད་དང་འདྲ་འདྲ་ཤ་སྟག་ཡིན་ལ། འདིའི་རང་གི་ཁྱིམ་མི་ཉེ་འབྲེལ་ཟུར་ན་ཡོད་པ་འདི་ཚོ་ལ་མི་འདོད་སྡུག་བསྔལ་བྱུང་ན་ཤ་ཚ་སྙིང་རྗེ་ཡོད་པ་ལྟ་བུ་ཐམས་ཅད་ལ་དེ་བཞིན་དུ་བསྒོམས་ན་ནམ་ཞིག་གོམས་ནས་སྙིང་རྗེས་དྲངས་པའི་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེ་རྒྱུ་ཡོད། དེ་འདྲ་ཡིན་ཕྱིར་དགེ་རྩ་ཆེ་ཆུང་ཅི་ཞིག་བསྒྲུབས་ཀྱང་མར་གྱུར་མཁའ་མཉམ་གྱི་སེམས་ཅན་འདི་དག་འཁོར་བའི་སྡུག་བསྔལ་ལས་གྲོལ་བའི་ཆེད་དུ་ངས་རྫོགས་པའི་བྱང་ཆུབ་སྒྲུབ་བོ། །དེའི་དོན་དུ་ངས་དགེ་བ་འདི་སྒྲུབ་པ་ཡིན་སྙམ་པའི་ལྷག་པའི་བསམ་པ་ཞིག་ཁ་ཞེ་གཉིས་མེད་ཀྱིས་ཡོད་པ་ཞིག་ལ་བློ་སྦྱོང་བྱེད་དགོས། གཞན་ཕན་བྱང་ཆུབ་ཀྱི་སེམས་དེའི་ཐབས་དེས་ཟིན་སོང་ན་མ་ཀའི་ཉན་ཐོས་ཐེག་པ་ནས་ཡ་ཀའི་རྫོགས་པ་ཆེན་པོའི་བར་གྱི་ཆོས་ཆེ་ཆུང་ཅི་ཞིག་བསྒྲུབས་ཀྱང་སངས་རྒྱས་ཐོབ་བྱེད་ཀྱི་རྒྱུ་དང་ཐེག་ཆེན་ཐར་བ་ཆ་མཐུན་གྱི་ལས་སུ་འགྱུར་བ་ཡིན། གཞན་ཕན་བྱང་ཆུབ་ཀྱི་སེམས་དེ་དང་མ་འབྲེལ་ནས་རང་དོན་ཡིད་བྱེད་ཀྱི་ཀུན་སློང་གིས་མིང་ཆེ་ཆུང་དང་ཐེག་པ་མཐོ་དམན་གྱི་ཆོས་ཅི་ཞིག་བསྒྲུབས། ལུང་པ་འུར་གྱིས་བཀང་། མྱི་འགུག་ཁྱི་འབོད་བྱས། གནམ་ས་གཉིས་ཀ་རྔ་རོལ་གྱི་སྒྲས་བཀང་། བསྒོམས་ནས་ལོ་དགུ་ལ་འགོར། བཏོན་ནས་དུང་ཁ་ཆ་རེ་ཕུད་བཞག་ཡོད་ཀྱང་། རབ་ཡིན་ན་ཐེག་དམན་ཐར་བ་ཆ་མཐུན་ཞིག གལ་ཏེ་ངེས་འབྱུང་གི་བསམ་པས་ཟིན་མེད་པ་དང་ཆོས་བརྒྱད་ལེགས་སྨོན་རྐྱང་པས་སྦགས་པ་ཞིག་ཡིན་ན་ནི་ཕན་ཡོན་སྤྱིར་བཏང་བ་ཞིག་ལོས་ཡོད་ཀྱང་ཐར་བའི་རྒྱུར་འགྱུར་དགོས་ན་གཅིག་གི་ས་ལ་འགྲོ་དཀའ་བའི་དགེ་བའི་གཟུགས་བརྙན་རི་མོ་བྲིས་པའི་མར་མེས་མུན་པ་མི་སེལ་བ་ལྟ་བུ་ཞིག་ཡིན། དེ་ཡིན་ཕྱིར་ཆོས་བསྒྲུབས་པའི་དོན་སྙིང་ཐར་བའི་ལམ་སྣེ་ཞིག་རྙེད་དགོས་པ་ཡིན་པས་བྱང་ཆུབ་ཀྱི་སེམས་འདི་རྒྱུད་ལ་སྐྱེ་རྒྱུ་ལ་མ་བསླབས་ན་ཐེག་ཆེན་ཐར་བའི་ལམ་སྣེ་ཞིག་ཀྱང་ཟིན་ཡོད་པ་མ་ཡིན་ལ། དེ་ལ་བལྟས་ན་ད་སྔོན་གང་བསྒྲུབས་དེ་ཉིད་དོན་ཆེན་ངོ་མ་མ་ཡིན་པའི་སྟོང་ལོག་ཏུ་གྱུར་སོང་ཟེར་རྒྱུ་དེ་འདྲ་ཞིག་ལ་ཐུག་ཡོད་པས་དགེ་རྩ་ཐབས་ཀྱིས་ཟིན་པ་སྦྱོར་བ་སེམས་བསྐྱེད་དམ་པ་མེད་ཐབས་མེད་པའི་གནད་དེ་ལྟ་བུའི་སྒོ་ནས་ཆེ་བ་ཡིན། དེ་ནས་དངོས་གཞི་དམིགས་མེད་དམ་པ་ཡིན་ལ། དངོས་གཞི་དམིགས་མེད་དམ་པ་དེ་དགེ་བ་རྐྱེན་གྱིས་མི་ཤིགས་པར་བྱེད་པ་ཞེས་ཟེར་ཞིང་། སྟོང་ཉིད་ཀྱི་ལྟ་བས་ཟིན་དགོས་པ་ཡིན། འོན་ཀྱང་སྟོང་ཉིད་རྟོགས་པ་ཉན་ཐོས་ལ་ཡང་ཡོད་ན་འདི་ནས་ཐེག་ཆེན་དམ་པ་གསུམ་གྱི་ཟླས་ཕྱེ་བའི་སྟོང་ཉིད་དམིགས་པ་མེད་པ་དེ་ཅི་འདྲ་ཞིག་ལ་འཇོག་ཟེར་ན། ཀུན་མཁྱེན་ཆོས་རྗེས་དངོས་གཞི་དམིགས་པ་དང་མཚན་མ་མེད་པའི་ཤེས་རབ་དམ་པས་ཟིན་པ་ཞེས་གསུངས་ཡོད། དེས་ན་འདི་ལྟར་སྣང་བའི་ཆོས་ཐམས་ཅད་ཆུ་ཟླ་ལྟར་སྣང་ལ་རང་བཞིན་མེད་པར་ཤེས་པར་བྱས་ནས་དེའི་ངང་ལ་སྤྲོ་བསྡུ་མེད་པར་བཞག་ན་དེ་ལས་གཞན་པའི་ཆོས་གང་ཡང་དམིགས་སུ་མེད་པ་སྤྲོས་བྲལ་ནམ་མཁའ་ལྟ་བུའི་ངང་ལ་བློའི་འཇུག་པ་ནུབ་པའི་དབྱིངས་དོན་དམ་པ་ཞི་བ་ལྷས་གསུངས་པ་ལྟ་བུ་སྟེ། གང་ཚེ་དངོས་དང་དངོས་མེད་དག། བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་གསུངས་པའི་དོན་དམ་པའི་དབྱིངས་ཤེས་རབ་ཀྱི་ཕར་ཕྱིན་དེའི་ངང་ལ་མཉམ་པར་གཞག་བྱ་འཇོག་བྱེད་དང་བྲལ་བ་བཟོ་མེད་དུ་གནས་པ་ལ་དངོས་གཞི་དམིགས་མེད་དམ་པའི་གོ་བ་སྟོང་ཉིད་འཇིག་འབྲལ་མེད་པའམ་རྡོ་རྗེ་ལྟ་བུའི་ཆོས་དེར་ཉོན་མོངས་དང་རྣམ་རྟོག་གང་གིས་ཀྱང་མི་ཚུགས། རྐྱེན་གྱིས་མི་ཤིགས་པའི་འཐད་པ་དེ་གྲུབ་པ་ཡིན། སྟོང་པ་ཡིན་པས་ན་སྣང་བ་གྲུབ་པ་དང་། སྣང་བའི་ཕྱིར་ན་སྟོང་པ་གྲུབ་པའི་རྒྱུ་མཚན་དེ་ཡིས་གང་ལ་སྟོང་པ་ཉིད་རུང་བ་དེ་ལ་ཐམས་ཅད་རུང་བའི་སྣང་སྟོང་འགལ་མེད་ཟུང་འཇུག་གི་རང་བཞིན་དུ་གནས་སྣང་བདེན་པ་དབྱེར་མེད་དུ་ལྟ་བས་ཐག་བཅད་པ་ལྟར་དུ་གར་ཡང་མི་སེམས་ཅིར་ཡང་མི་རྟོག་པའི་ངང་ལ་མ་ཡེངས་འཕྲོ་འདུ་དང་བྲལ་བར་བཞག་ཚེ་ཕྱི་ཡུལ་ནང་སེམས་ཀྱི་གཟུང་འཛིན་མཚན་མའི་སྤྲོས་པ་ཐམས་ཅད་ཞི་ཞིང་། དེ་ལྟར་སྒོམ་པའི་བློའི་དགག་སྒྲུབ་ཙམ་ཡང་མི་དམིགས་པའི་དུས་སུ་འོད་གསལ་སྤྲུལ་སྐུའི་གནས་སུ་ཕྱིན་ཏེ། སོ་སོ་རང་གི་ཡེ་ཤེས་ཀྱི་དོན་སྒོམ་ཐོག་ལ་འཁྱོལ་བའི་མཉམ་བཞག་ནམ་མཁའ་ལྟ་བུ་ཞེས་ཟེར་ཆོག ཤེས་རབ་ཀྱིས་ལྟ་བ་དག ཐབས་ཀྱིས་སྤྱོད་པ་དག་ན་ལམ་ལ་གོལ་འཕྱུག་འགྲོ་ས་ཡང་ཡོད་པ་མ་ཡིན། དེའི་ངང་དེ་ལས་རྗེས་ཐོབ་སྒྱུ་མ་ལྟ་བུར་སེམས་ཅན་གྱི་དོན་དུ་བསྔོ་བ་བྱས་ན་རྗེས་བསྔོ་བ་དམ་པ་ལ་དགེ་རྩ་གོང་ནས་གོང་དུ་འཕེལ་བར་བྱེད་པ་ཞེས་ཟེར་བ་ཡིན། ཁ བསྔོ་བའི་ཡན་ལག་དངོས་བཤད་པ། དེ་ལྟར་ན་འུ་ཚོ་ཚང་མས་འཆད་བཞིན་ཡོད་པའི་གཞི་འཛིན་སའི་རྩ་བའི་ཚིག་དེ་གང་ཡིན་ཟེར་ན། རང་དང་གཞན་གྱིས་དུས་གསུམ་བསགས་པ་ཡི། །རྣམ་དཀར་བསོད་ནམས་ཕུང་པོ་ཇི་སྙེད་པ། །དམིགས་བྲལ་འཁོར་གསུམ་དག་པས་བྱང་ཆུབ་ཆེར། །ཡོངས་སུ་བསྔོ་བས་སྲིད་པ་མཐར་བྱེད་ཤོག། ཅེས་པ་དེ་ཡིན་ལ། བསྔོ་རྒྱུ་དེ་ཉིད་རང་གཞན་གྱི་དགེ་བ་དུས་གསུམ་དང་འབྲེལ་བ་ཐམས་ཅད་ཡིན་ཞིང་། བདག་གིས་སྔར་བསགས་པ། ད་ལྟར་གསོག་བཞིན་པ། མ་འོངས་བསག་འགྱུར་གྱི་དགེ་བ་དང་། དེའི་སྟེང་དུ་ཕྱོགས་དུས་རྒྱལ་བ་སྲས་བཅས་ཀྱི་ཟག་མེད་ཀྱི་དགེ་བ། སེམས་ཅན་ཐམས་ཅད་ཀྱིས་བསགས་པའི་ཟག་བཅས་ཀྱི་དགེ་བ། དེ་ཐམས་ཅད་བློས་ཚུར་གཅིག་ཏུ་བསྡུས་ཏེ་བཟླུམས་ཤིང་བསྡོམས་ནས། གང་ལ་བསྔོ་དགོས་པ་ཡིན་ཟེར་ན་སངས་རྒྱས་ཀྱི་ས་ཁོ་ན་རུ་བསྔོ་དགོས། སངས་རྒྱས་ཀྱི་ས་ཁོ་ན་རུ་བསྔོ་བ་མ་གཏོགས་པར་ཉན་ཐོས་ཀྱི་ས་དང་། རང་སངས་རྒྱས་ས། དེ་ལས་གཞན་པའི་སར་བསྔོ་བ་བྱ་མི་ཉན་པ་ཡིན། དེ་མི་ཉན་ལུགས་ཇི་ལྟར་ཡིན་ཞེ་ན། སངས་རྒྱས་ཀྱིས་མདོའི་ནང་དུ་དེ་ལྟར་བྱས་ནས་གསུངས་ཡོད་པ་ཡིན་པས་བྱང་ཆུབ་གསུམ་གྱི་ནང་གི་སངས་རྒྱས་ཀྱི་བྱང་ཆུབ་དམ་པ་དེ་ལ་མ་བསྔོས་ན་བསྔོ་བ་ཡང་དག་མི་འགྱུར་བ་དེ་ཉིད་མདོའི་ནང་ནས་གསུངས་པ་ལྟར་དུ་རང་དོན་ཡིད་བྱེད་ཀྱིས་གནས་མ་ཡིན་པ་ལ་བསྔོས་ན་ཤིན་ཏུ་མི་རིགས་པ་ཡིན། རྣམ་པ་ཇི་ལྟར་བྱས་ཏེ་བསྔོ་དགོས་ཤེ་ན། རྣམ་པ་འདི་ལྟར་སྣང་བའི་ཆོས་ཐམས་ཅད་མེད་བཞིན་སྣང་བ་སྒྱུ་མའི་དཔེ་བརྒྱད་ལྟ་བུ་ཡིན་ཞིང་། དགེ་བ་ཡང་དེ་བཞིན་དུ་རྨི་ལམ་དང་སྒྱུ་མ་སོགས་བཞིན་ཡིན་པར་ཤེས་པས་བསྔོ་དགོས། དགེ་བའི་རྩ་བ་ལ་བདེན་ཞེན་ཡོད་ན་བསྔོ་བ་རྣམ་དག་ཏུ་འགྱུར་བ་མ་ཡིན། དུག་དང་འདྲེས་པའི་ཁ་ཟས་དང་འདྲ་བ་ཡིན་གསུངས་ཡོད། འདི་ནས་དམིགས་མེད་གསུངས་རྒྱུ་དེ་ཞེན་མེད་ལ་གོ་དགོས། དེ་ནི་དམིགས་མེད་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་མངོན་རྟོགས་རྒྱན་གྱི་ནང་དུ་གསུངས་པ་ལྟར་ཡིན། བསྔོ་བ་བྱས་ཏེ་དགེ་བའི་རྩ་བ་བྱང་ཆུབ་ཆེན་པོར་བསྔོ་བས་བསྒྱུར་རྒྱུ་དེ་ལ་འདུན་པའི་བློ་ཞིག་རང་ཉིད་ལ་ཡོད་པ་དེ་ཉིད་དང་། ཚིག་ཁྱད་པར་ཅན་བདེན་པའི་མཐུ་ཅན་གྱིས་བསྔོས་པ་རྣམས་ལ་གཞི་བཟུང་སྟེ། སྔར་སངས་རྒྱས་སྲས་བཅས་དེ་དག་གིས་བསྔོས་པ་བཞིན་དུ་བསྔོ་བའི་འདུན་པ་དང་མ་བྲལ་བའི་ཚིག་དང་བཅས་ཏེ་སྦྲགས་ནས་བསྔོ་རྒྱུ་ཡིན། ཆོས་སྒར་འདི་ནས་མཚམས་རེར། འདིས་མཚོན་དུས་གསུམ་བསགས་པའི་དགེ་རྩ་ཀུན། །ཞེས་པའི་ཚིག་བཞི་བོའི་རྗེས་སུ་དལ་ཅིག་མཉམ་པར་བཞག་པའི་སྲོལ་ཞིག་དེང་སང་དར་ཡོད། དེ་ཅི་ཞིག་ཡིན་ཞེ་ན། གང་བསྔོ་བྱ། སྔོ་བྱེད། བསྔོ་ཡུལ་དང་བཅས་པ་སྣང་ལ་རང་བཞིན་མ་གྲུབ་པ་འཁོར་གསུམ་དུ་བདེན་ཞེན་མེད་པའི་འཁོར་གསུམ་དམིགས་མེད་ཆེན་པོའི་ངང་བསྐྱངས་ནས་མཉམ་པར་བཞག་པ་ཡིན། དེ་ལས་གཞན་དངོས་གཞིའི་སྐབས་སུ་དམིགས་མེད་ཀྱི་ལྟ་བའི་རྩི་ཡིས་མ་ཟིན། བསྔོ་བའི་སྐབས་སུ་འཁོར་གསུམ་རྣམ་དག་གི་རྩིས་གདབ་མེད་པ་ཞིག་གིས་མཇུག་རྫོགས་ས་ནས་སྟོང་ཉིད་ཀྱི་ལྟ་བས་རྒྱས་འདེབས་པ་ཡིན་ཞེས་སྨྲས་ཀྱང་གོ་ཆོད་པ་མ་ཡིན། བདེན་ཞེན་དང་བྲལ་བ་ལ་འཁོར་གསུམ་དམིགས་མེད་ཅེས་གསུངས་པ་མ་གཏོགས་མཇུག་རྫོགས་དུས་ཚང་མ་མེད་པར་བསྒོམ་རྒྱུ་ཞིག་མ་ཡིན། འོན་ཀྱང་རྗེས་སྣང་སྙིང་རྗེ་ཆེན་པོས་གང་གཤིན་པོ་ལྟ་བུའི་དམིགས་ཡུལ་ཉམ་ཐག་གི་སེམས་ཅན་དེ་ཉིད་མཉམ་བཞག་ཡེངས་མེད་འཁྲུལ་བ་དང་བྲལ་བའི་ཆོས་ཉིད་ཀུན་ལ་ཁྱབ་པའི་ཡེ་ཤེས་ཀྱིས་ཀུན་བཟང་ཆོས་སྐུའི་དགོངས་པ་དང་གཉིས་སུ་མ་མཆིས་པ་དགོངས་ཀློང་དབྱེར་མེད་ཆེན་པོར་རོ་མཉམ་པའི་དགོངས་དོན་བསྐྱངས་ན་ཧིཀ་དང་ཕཊཿབརྒྱ་ཚར་ཞིག་བརྗོད་པ་བས་བཟང་ངེས་སྙམ་གྱིན་ཡོད། མདོར་ན་བསྔོ་བ་བྱེད་དུས་འཁོར་གསུམ་ཡང་དག་གི་རྩིས་མ་ཟིན་ཚེ་དེའི་དགེ་འབྲས་ཀྱིས་མངོན་མཐོ་ལྷ་མིའི་བདེ་འབྲས་ཙམ་ཞིག་ཐོབ་པ་ལས་གཞན་དུ་འཁོར་གསུམ་ལ་ཞེན་པའི་བདེན་ཞེན་དེའི་སྐྱོན་གྱིས་འཁོར་བའི་གནས་ལས་གཏན་དུ་ཐར་བའི་ཐར་བ་མཆོག་རྫོགས་པའི་བྱང་ཆུབ་ཀྱི་གོ་འཕང་ཐོབ་བྱེད་དུ་འགྲོ་བ་མ་ཡིན། བསྔོ་བ་དུག་མེད་དེ་བདེན་ཞེན་གྱི་འཛིན་སྟངས་མ་འདྲེས་པ་ཞིག་ཡིན་པས། རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད་ཅེས་གསུངས་པས་འདི་ཡང་དངོས་གཞི་དམིགས་མེད་དང་མཚུངས་པའི་རྣམ་ཀུན་མཆོག་ལྡན་གྱི་སྟོང་ཉིད་བྱམས་སྙིང་རྗེ་བྱང་ཆུབ་ཀྱི་སེམས་དེ་བསྔོ་བ་དང་སྨོན་ལམ་གྱི་རྣམ་པར་ཤར་བ་ཞིག་དགོས་པ་དེ་ཉིད་གནད་ཀྱི་སྙིང་པོ་ཡིན། གལ་ཆེན་གྱི་དོན་ལ་ནན་བཤད་ཀྱིས་ཡང་ཟེར་བྱས་ན། ཐེག་ཆེན་མདོ་སྔགས་གཉིས་ཀྱི་ཉམས་ལེན་ཐམས་ཅད་དམ་པ་གསུམ་གྱི་ཁྱོན་ལས་མི་འདའ་ལ། འདི་བསོད་ནམས་དང་ཡེ་ཤེས་ཀྱི་ཚོགས་གཉིས་དང་། ཀུན་རྫོབ་དང་དོན་དམ་གྱི་བདེན་པ་གཉིས་ཀྱིས་བསྡུས་པ་ཞིག་ཀྱང་ཡིན། གཞི་སྒྲིབ་གཉིས་སྦྱོང་། ལམ་ཚོགས་གཉིས་རྫོགས། འབྲས་བུ་སྐུ་གཉིས་ཐོབ་པ་ལ་མེད་མི་རུང་བའི་དམ་པ་རྣམ་པ་གསུམ། འདིའི་ཡན་ལ་མང་མི་དགོས། འདིའི་མན་ལ་ཉུང་མི་རུང་། འདི་གསུམ་མཉམ་པོར་མ་ཚོགས་ཐབས་མེད། ཐེག་ཆེན་ཐར་བའི་ལམ་ཞུགས་ལ་གནད་ཀྱི་གལ་འགངས་ལྡན་པ་དེ་ཉིད་ཡིན་པས་རང་རྒྱུད་ལ་སྦྱར་ནས་བྱང་ཆུབ་ཀྱི་སེམས་མ་སྐྱེས་པ་བསྐྱེད། སྐྱེས་པ་མི་ཉམས་པ་ཡར་སྤེལ། སྟོང་ཉིད་ཀྱི་ལྟ་བ་མ་རྟོགས་པ་རྟོགས་ཐབས་ལ་འབད། རྟོགས་པ་དེ་ཉིད་ཀྱི་རྒྱུན་བསྐྱངས་ཏེ། ཉམས་རྟོགས་ཀྱི་ཡོན་ཏན་འཕེལ་ཐབས་ལ་རང་ཉིད་ཀྱིས་འབད་དགོས། དེ་ལྟར་ན་དམ་པ་གསུམ་དེ་ཐེག་ཆེན་མདོ་སྔགས་གཉིས་ཀྱི་ལམ་གྱི་གཞུང་ཤིང་ལྟ་བུ་ཡིན་པར་ཤེས་སོང་ཚེ་གང་བཤད་བྱའི་སྙིང་པོ་ངོ་མ་ལ་ཚུར་འཁོར་ན། བདེ་བ་ཅན་དུ་སྐྱེ་བའི་རྒྱུ་ཚོགས་བསགས་སྒྲིབ་སྦྱོང་དགོས་པ་ཡིན་ཞིང་། དེ་ཉིད་བྱང་ཆུབ་སེམས་བསྐྱེད་ཀྱི་གྲོགས་དང་མ་བྲལ་བར་གྱུར་ཚེ་གཞི་ནས་རླབས་ཆེན་གྱི་དགེ་རྩར་གྱུར་ཡོད་པ་དེ་ཉིད་གཏན་ལ་ཕབ་པ་དང་མཉམ་དུ་བྱང་ཆུབ་ཀྱི་སེམས་སྔར་གླེང་བ་ཡིན་ལ། རྒྱུན་དུ་རང་རང་སོ་སོས་ལེན་བཞིན་ཡོད་ཀྱང་དེའི་ངོ་བོ་དང་། ཐོབ་མཚམས། ཐོབ་ནས་བསླབ་པ་ཇི་ལྟར་བསྲུང་བ་དེ་ཉིད་མ་ཤེས་ཐབས་མེད་པ་ཡིན། ༼ཁ བྱང་ཆུབ་སེམས་རྒྱུད་ལ་སྐྱེས་ནས་དེ་མི་ཉམས་པར་བསྲུང་བའི་ཚུལ། འུ་ཚོས་དེ་རིང་འཆད་བཞིན་ཡོད་པའི་ཤོ་ལོ་ཀ་འདིའི་ཚིག་མཇུག་ལ། སྲིད་པ་མཐར་བྱེད་ཤོག་ཅེས་པའི་ཚིག་ཅིག་ཡོད་པ་ཡིན་ཞིང་། འདིའི་སྲིད་པ་མཐའ་མར་བྱེད་ལུགས་ཀྱི་གནད་དེ་ཤེས་དགོས། དད་པ་ཡིས་སྒོ་ཕྱེས། སྐྱབས་འགྲོས་གཞི་བཟུང་། དགོངས་གསོལ་གྱིས་སྐྱབས་གནས་དཔང་དུ་བཞག་སྟེ། ཇི་ལྟར་སྔོན་གྱི་བདེ་གཤེགས་ཞེས་པ་ལྟ་བུའི་ཚིག་དང་བཅས་ཏེ་སྨོན་འཇུག་གི་སེམས་བསྐྱེད་བླངས་པ་ཡིན་ལ། བསླབ་པ་ལ་བསླབ་རྒྱུ་དམ་བཅས་ནས་མི་སོ་སོ་སྐྱེ་བོ་འཆིང་བ་ཀུན་ལྡན་ཡིན་ཡང་བྱང་ཆུབ་སེམས་དཔའི་བཞུགས་གྲལ་ལ་བསྡད་ཡོད་པ་ཡིན། བྱང་ཆུབ་སེམས་དཔའ་སེམས་མ་ཞིག་གི་མིང་བླངས་ཚར་བ་ཡིན། དེ་ཡིན་ན་ངས་བྱང་ཆུབ་སེམས་དཔའི་ཐོབ་བླངས་ཚར། དེས་ལས་དགོས་རྒྱུ་འགན་ཚང་མ་བྱེད་པའི་དམ་བཅའ་བཞག་ཚར། དེ་ལ་ཐམས་ཅད་ཀྱིས་དགའ་བ་སྒོམས་ཞེས་འུར་ཆེན་པོས་ཕུ་དཀྲོག་མདའ་དཀྲོག་བྱས་ཚར་བ་ཡིན། དེའི་ཁས་བླངས་དེ་དུས་ཐོག་ལ་མ་བསྒྲུབས་ཚེ་འུ་ཚོའི་དུས་རྒྱུན་ཡིན་ན་བཤད་ཐོག་ལ་མེད་པའི་རྫུན་མཁན་ཁྲེལ་མེད་ཁྲམ་པ། མིའི་ནང་གི་མཐའ་མ། མིའི་མན་ན་ཡོད་རྒྱུ། ཁྱིའི་གྲལ་ལ་འཇོག་རྒྱུ་དེ་ཉིད་དུ་འགྱུར་རྩིས་ཡིན། ད་རེས་འདིའི་ཚིག་ཐོག་ལ་མ་བསྡད་དུས་སྒོར་རྡོག་ཆ་རེའི་དོན་དུ་ལག་སྣ་རིང་ཐུང་ཞིག་གིས་རྫུན་ཞིག་ལབ་དགོས་ཐུག་བཏང་བས་ཅི་ལ་ཚད། ཕྱོགས་བཅུའི་སངས་རྒྱས་བླ་མ་དང་བཅས་པ་བསླུས་ཏེ་ཁམས་གསུམ་སེམས་ཅན་ཕ་མར་གྱུར་ཚད་པོ་མགོ་གཡོགས་བཏང་བ་ཡིན་ཞིང་། ཁེ་ཆེན་པོ་ཡང་ཐོབ་རྒྱུ་ཡོད་ལ། ཐོག་མེད་ནས་བསགས་པའི་སྡིག་ཆེན་སྐད་ཅིག་གཅིག་གིས་འདག་བྱེད་དང་། བསོད་ནམས་དང་ཡེ་ཤེས་ཀྱི་ཚོགས་གཉིས་མྱུར་དུ་རྫོགས་པ་ལ་བྱང་ཆུབ་སེམས་ཀྱི་ཡན་ལ་བསམ་དོན་ཀུན་འགྲུབ་ཀྱི་ནོར་བུ་ཞིག་ལོན་རྒྱུ་ཡོད་པ་མ་ཡིན་ཞིང་དེ་ལོན་དགོས་ལ། དེའི་ཁེ་དེ་ལོན་ནས་འདོད་དོན་སྒྲུབ་པ་ལ་དཀའ་ལས་དང་འབད་པ་ཞིག་ལོས་དགོས། དེའི་བསླབ་བྱ་བསླབ་པ་ལ་ནན་ཏན་མ་བྱས་ན་ཚོགས་བསགས་སྒྲིབ་སྦྱོང་དེ་གོ་ཆོད་པ་ཞིག་འགྱུར་བ་མ་ཡིན། བདེ་བ་ཅན་དུ་རང་འགྲོ་རོགས་ཁྲིད་ཅེས་པ་དེ་ཉིད་རྨི་ལམ་འོག་གི་རྟ་རྒྱུགས་འགྲུབ་རྒྱུ་མེད་པ་སྟོང་བསམ་དུ་འགྱུར་འགྲོ་ལ། བྱང་ཆུབ་སེམས་བསྐྱེད་ཅེས་པ་འདི་ལ་ཀུན་རྫོབ་སེམས་བསྐྱེད་དང་དོན་དམ་སེམས་བསྐྱེད་གཉིས་ཡོད་པ་དེ་ཉིད་མང་ཆེ་བས་ཤེས་བཞིན་པ་ཡིན་ཞིང་། ཀུན་རྫོབ་སེམས་བསྐྱེད་སྨོན་དང་འཇུག་པའི་བདག་ཉིད་ཅན་འདི་བརྡ་ལས་ཐོབ་པ་ཆོ་ག་ལ་བརྟེན་ནས་ལེན་གྱིན་འདུག་པ་འདི་ཡིན་ལ། དོན་དམ་སེམས་བསྐྱེད་སྒོམ་པ་ལས་སྐྱེ་དགོས་པ་ཡིན་ཞིང་། ཀུན་རྫོབ་སེམས་བསྐྱེད་དེ་གཞན་གྱིས་བསྟན་པ་ཡིན། ཁ་རྩང་ཞིག་ནས་གྲོགས་སྟོབས་རྒྱུ་སྟོབས་རྩ་བའི་སྟོབས་ལ་སོགས་པས་བྱུང་བ་དེ་ཉིད་སྔར་བཤད་པ་བཞིན་ཡིན། དོན་དམ་སེམས་བསྐྱེད་དེ་རང་གིས་རྟོགས་པ་ཡིན་པ་ཞིག་སྟེ། རྫོགས་པའི་སངས་རྒྱས་རབ་མཉེས་ཤིང་། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །ཅེས་པའི་བསྟན་དོན་ལྟར་སངས་རྒྱས་མཉེས་པར་བྱས། བསོད་ནམས་དང་ཡེ་ཤེས་ཀྱི་ཚོགས་མང་པོ་བསགས་པའི་སྟོབས་ཀྱིས་ཚོགས་སྦྱོར་གྱི་ལམ་བརྒྱུད་ནས་འཇིག་རྟེན་ཆོས་མཆོག་གི་རྗེས་ཐོག་དེ་ལ་ཐོན་སྐབས་ཆོས་ལ་མི་རྟོག་པའི་ཡེ་ཤེས་མཐོང་ལམ་སྐྱེས་པ་དེ་ཉིད་ལ་དོན་དམ་པའི་སེམས་བསྐྱེད་ཅེས་བྱ་བ་ཡིན། ཀ༽ སྨོན་པ་སེམས་བསྐྱེད་ཀྱི་བསླབ་བྱ་བཤད་པ། དེའི་རྣམ་བཞག་དེ་ཕྱོགས་ཙམ་ཞིག་ངེས་པའི་སྟེང་ནས། འདི་ནས་སྨོན་འཇུག་གི་བསླབ་བྱའི་འགོ་གླེང་གི་ཕྱོགས་ཙམ་ཞིག་བསྟན་པའི་ཚུལ་བྱས་ན། དང་པོ་སྨོན་པའི་བསླབ་བྱ་བཤད་དགོས་ལ། འདི་བཤད་པ་ལ་བསྡུས་འབྲིང་རྒྱས་གསུམ་གྱིས་བཤད་རྒྱུ་ཡོད་ཅིང་། དེ་ཡང་ཚུར་ཚིག་སྣ་བསྡུས་ནས་བཤད་ན་ཚིག་གཅིག་གི་ནང་ལ་འདུས་པ་ཡིན། སེམས་ཅན་ཐམས་ཅད་ཀྱི་དོན་དུ་སངས་རྒྱས་འཐོབ་པར་བྱ་བསམ་རྒྱུ་དང་མི་འབྲལ་བ་དེ་ཉིད་ཡིན། སྨོན་པའི་བསླབ་བྱ་བསྡུས་པ་དེ་དེ་ཡིན། འབྲིང་གི་ཚུལ་བྱས་ན་སྨོན་པ་བྱང་ཆུབ་ཀྱི་སེམས་གཏོང་བའམ་ཉམས་པའི་རྒྱུ་དང་པོ་ཤེས་དགོས། སྨོན་སེམས་གཏོང་བའི་རྒྱུ་དེ་གསུམ་ཡོད། རྒྱུ་གསུམ་དེ་གང་ཡིན་ཞེ་ན། ཞུམ་པ་དང་གཅིག སྒྱིད་ལུག་དང་གཉིས། འཁོར་བའི་ཉམ་ཉེས་ལ་སྐྲག་པ་སྟེ་དེ་གསུམ་པོ་ཡིན། དེ་གསུམ་གྱི་སྔུན་ནས་ཕམ་ཁ་ཁུར་མི་རུང། ཞུམ་པ་ཞེས་པ་ངས་ཅི་ཞིག་འགྲུབ་སྙམ་པ་དེ་ཡིན། འཁུམས་བསྡད་དུས་འགྲུབ་ཡོང་རྒྱུ་ཞིག་ཅི་ཡོད། གཞན་གྱིས་སྡོམ་པ་ལས་རང་ཉིད་འཁུམས་པས་སྡུག་པ་ཡིན། མི་འགྲུབ་རྒྱུ་ཅི་ཞིག་ཡོད་དེ་གཅིག་གིས་འགྲུབ་པ་དེ་ཉིད་ཀུན་གྱིས་མི་འགྲུབ་པ་ཅི་ཞིག་ཡོད། སྤྱོད་འཇུག་གི་ནང་དུ་གསུངས་ཡོད་པ་ལྟར་འབུ་སྦྲང་བུ་དང་ཤ་སྦྲང་བུང་བ་འདི་ཚོས་འགྲུབ་ཀྱིན་ཡོད་པས་ང་མི་ཞིག་གིས་མི་འགྲུབ་པ་ངོ་ཚའོ་བསམ་དགོས། དེ་ཇི་ལྟར་སྨྲས་པ་ཡིན་ཞེ་ན། སྔོན་གྱི་ལོ་རྒྱུས་ཀྱི་ནང་དུ་ཤིང་ལོ་ཞིག་གི་ཐོག་ལ་འབུ་བདུན་འབྱར་བསྡད་ཡོད་པ་དེ་ཉིད་ཤིང་ལོ་རྒྱ་མཚོའི་ནང་ལ་འབུ་བདུན་འབྱར་བཞིན་དུ་ལྷུང་སོང་ལ། རྒྱ་མཚོའི་ནང་དུ་རྣམ་པར་སྣང་མཛད་ཀྱི་སྐུ་ཆེན་པོ་ཞིག་ཡོད་ཅིང་། ཤིང་ལོ་རླུང་གིས་ཁྱེར་ཕྱོགས་ཀྱིས་རྣམ་སྣང་གི་སྐུ་དེ་ལ་སྐོར་བ་བདུན་ཕོག་སོང་ནས་དེའི་དགེ་བའི་སྟོབས་དེས་འབུ་བདུན་པོ་མི་ལུས་བླངས། མི་ལུས་བླངས་ན་ཡང་མི་ལུས་བཟང་པོ་ཞིག་མ་ཐོབ་པར་མི་ལུས་རིགས་ངན་གྱི་བུ་མོ་བདུན་གྱི་སྐྱེ་བ་བླངས་སོང་བ་ཡིན། མི་ལུས་བླངས་ཀྱང་སྐྱེ་ས་སྡུག་སོང་བའི་དབང་གིས་རིགས་དང་འབྱོར་བ་དམན་པ་དེ་ཉིད་ལ་སྐྱོ་བ་སྐྱེས། སྐྱོ་སྣང་ཤར། རྩྭ་བཏུས། ཤིང་བྲེགས། གཞན་གྱི་གཡོག་མོར་བྱས་ནས་དེའི་ཡོང་སྒོ་ཡིས་བསོད་ནམས་བསགས་པས་དེའི་སྐྱེ་བ་རྗེས་མ་ལ་རྒྱལ་པོ་ཀྲྀ་ཀྲྀའི་སྲས་མོ་བདུན་གྱི་སྐྱེ་བ་བླངས་སོང་བ་ཡིན། དེ་དུས་སངས་རྒྱས་འོད་སྲུང་འཇིག་རྟེན་ལ་བྱོན་དུས་ཡིན་ལ། སངས་རྒྱས་འོད་སྲུང་མཆོད་པས་མཉེས་པར་བྱས་ནས་བྱང་ཆུབ་ཀྱི་སེམས་བསྐྱེད་པ་དེ་ཉིད་མ་འོངས་པ་ལ་སངས་རྒྱས་བདུན་དུ་འཚང་རྒྱ་བའི་ལུང་བསྟན་དབུགས་དབྱུང་ཐོབ་པ་ཡིན། དེ་བཞིན་དུ་ཡང་ཕག་ཅིག་ཁྱིས་བདས་ནས་ཕག་ཁྱི་ཡིས་འདེད་ཕྱོགས་ཤིག་གིས་མཆོད་རྟེན་ཞིག་ལ་སྐོར་བ་ལན་གསུམ་བསྐོར་བར་བྱས་པའི་བསོད་ནམས་ཀྱིས་རྗེས་སུ་དགྲ་བཅོམ་ཐོབ་པ་ལ་སོགས་པ་ལོ་རྒྱུས་མང་བ་ཡིན། དེས་ན་སྐྱེ་བ་དམན་པའི་སེམས་ཅན་དུད་འགྲོ་དེ་ཚོས་སྒྲུབ་ཐུབ་པ་དེ་ཉིད་ངས་ལོས་འགྲུབ་བསམས་ནས་ཞུམ་པ་སྤང་དགོས། སྨོན་སེམས་གཏོང་བའི་རྒྱུ་གཉིས་པ་དེ་གང་ཡིན་ཞེ་ན། སྒྱིད་ལུག་ཡིན་ལ། སྒྱིད་ལུག་ཅེས་པ་དེ་ཉིད་ངས་འགྲུབ་ཐུབ་པ་མི་འདུག་འགའ་ཞིག་གིས་ཅི་འདྲའི་དགེ་བ་བསྒྲུབས་ཡོད་འདུག་ཀྱང་ད་རུང་མི་འདོད་པ་འབྱུང་རྒྱུ་མང་འདུག་བསམ་རྒྱུ་དེ་ཚོ་ཡིན། དེ་ལ་བསམ་བློ་གཏང་ཤེས་དགོས། ལས་ཞེས་པ་འདི་ལ་འདྲ་མི་འདྲ་གཉིས་ཀ་ཡོད། ལས་ཀྱི་རྣམ་གྲངས་ཤིན་ཏུ་ནས་ཀྱང་རྒྱ་ཆེ་བས་དེའི་རྒྱ་ཁྱོན་ཤེས་དགོས་ན་སངས་རྒྱས་ཀྱིས་མ་གཏོགས་མཐའ་དཔོག་ཐུབ་པ་མ་ཡིན། མཐོང་ཆོས་མྱོང་འགྱུར་གྱི་ལས། སྐྱེས་ནས་མྱོང་འགྱུར་གྱི་ལས། ལན་གྲངས་གཞན་ལ་མྱོང་འགྱུར་གྱི་ལས་ཏེ་དེ་ལྟ་བུའི་རྣམ་གྲངས་ཡོད། དགེ་སྡིག་གང་རུང་གི་འབྲས་བུ་ཚེ་འདི་ལ་མྱོང་བའི་མཐོང་ཆོས་མྱོང་འགྱུར་དང་། ཞིང་དང་བསམ་པ་དངོས་པོ་རྣམས་ཕུལ་དུ་བྱུང་བ། ཕུལ་དུ་བྱུང་བ་ཞེས་པ་ཆེན་པོ་རུ་གྱུར་པ་ཆེན་པོ་དཔེ་མེད་པ་སྟེ་གཞན་ཕལ་བ་དང་མ་འདྲ་བ་ཞིག་དགོས། ཞིང་དང་བསམ་པའི་བྱེ་བྲག་གིས་མཐོང་ཆོས་འབྲས་བུ་ཅན་གྱི་ལས་གསུངས་པ་ཡིན། ཞིང་དགེ་སྡིག་བསགས་སའི་ཡུལ་ཕུལ་བྱུང་ཞིག་ལ། བསམ་པ་བཟང་ངན་ཕུལ་བྱུང་ངམ་ཁྱད་ཐོན་པ་ཞིག་གིས། དངོས་པོ་བཟང་ངན་ཕུལ་བྱུང་ཞིག་གི་སྒོ་ནས། དགེ་སྡིག་གང་ཡིན་ཕུལ་བྱུང་ཞིག་བྱས་ན་ཚེ་འདི་ལ་འབྲས་བུ་སྨིན་ནས་འབྲས་བུ་དེ་ལས་དེའི་ཡིན་སོང་བསམ་རྒྱུ་རང་རོགས་སུས་བལྟས་ན་ཤེས་རྒྱུ་ཅན་རྣམས་ཡིན། དེ་ལྟ་བུ་ཉུང་བ་ཡིན་ལ་ཁྱད་པར་དུ་དཀར་པོའི་ཕྱོགས་ནས་ཉུང་བ་ཡིན། དེའི་འཕྲོས་སུ་ལས་དེ་ཙམ་མི་ཆེ་བ་ཞིག་བྱས་ན་ཚེ་ཕྱི་མར་སྐྱེས་ནས་མྱོང་འགྱུར་གྱི་ལས་ཡིན། ད་རུང་དེ་བས་ཀྱང་ཆུང་བ་ཞིག་བསྒྲུབས་པ་ཡིན་ན་ཚེ་འདི་ལ་མ་དགོས་སྐྱེ་བ་བརྗེས་མ་ཐག་ཏུ་སྨིན་དཀའ་བ་ཡིན། ལས་ལྕི་ཡང་གི་སྟོབས་ཀྱིས་འབྲས་བུ་སྔོན་རྗེས་ལ་སོགས་པའི་མྱོང་ཚུལ་མང་བ་ཡིན་པས་ཕྱི་མའི་ཕྱི་མ་ལ་སོགས་པ་ལན་གྲངས་གཞན་ལ་མྱོང་འགྱུར་ཡིན་ཕྱིར་ང་ལ་འདི་མ་བབ་བསམས་ནས་རྒྱུ་འབྲས་ལ་ཡིད་ཆད་སྐྱེ་རྒྱུ་ཡོད་པ་མ་ཡིན། སྐྱེ་བོ་བློ་ཆུང་གིས་དེ་ལྟར་ཡིད་ཆད་ཀྱིས་ལོག་ལྟ་སྐྱེས། རང་གིས་རང་ལམ་ལོག་ལ་སྐྱེལ་ཉེན་ཡང་ཡོད། གསུམ་པ་དེ་གང་ཡིན་ཞེ་ན། འཁོར་བའི་ཉམ་ཉེས་སམ་ཉེས་པ་ལ་སྐྲག་ནས་བྱང་ཆུབ་ཀྱི་སེམས་གཏོང་རྒྱུ་འབྱུང་བ་ཡིན། འཁོར་བའི་སེམས་ཅན་ལ་མཐའ་ཞིག་མེད་ལ། སྐྱེ་རྒ་ན་འཆི་ལ་སོགས་པའི་སྡུག་བསྔལ་ལ་ཟད་རྒྱུ་མེད། འགྲོ་བ་མང་བ་ཟད་ཀྱི་མཐའ་ཞིག་དང་བསྐལ་བ་མང་པོའི་ཡུན་ལ་གཞན་དོན་སྤྱོད་པ་རྒྱ་མཚོ་ཐུབ་ས་མི་འདུག་སྙམ་ནས་རང་དོན་ཞི་བདེའི་ཕྱོགས་ལ་བློ་འཁོར་ན་སྨོན་སེམས་གཏོང་བའི་རྒྱུ་གཅིག་ཡིན། ཉེར་ལེན་གྱི་ཕུང་པོ་སྒྱུ་མ་རྨི་ལམ་ལྟ་བུ་ཡིན་པ་འདི་ཉིད་ལ་འདང་བརྒྱབ། སེམས་ཅན་ཐམས་ཅད་ཁྱད་མེད་ཀྱི་བུ་གཅིག་ལྟ་བུའི་སྙིང་རྗེ་བསྒོམས། བསྐལ་བ་སྐད་ཅིག་ཁྱད་མེད་དང་། དུས་གསུམ་དུས་མེད་དུ་རྟོགས་པའི་ཤེས་རབ་བསྐྱེད་པ་ལ་སོགས་པས་ལྡོག་དགོས། སྨོན་པའི་བསླབ་བྱ་རྒྱས་པར་བྱས་ཏེ་བསླབ་བསམ་ན་བྱང་སེམས་སྐྱེ་བའི་རྒྱུ། དེ་ཉིད་འཕེལ་བའི་རྐྱེན། མི་ཉམས་པའི་ཐབས་གསུམ་པོའི་སྟེང་ནས་བསླབ་དགོས། སྐྱེ་བའི་རྒྱུ་དེ་གང་ཡིན་ཞེ་ན། རྒྱས་པར་ཕྱེས་ན་ཚད་མེད་བཞི། ཚུར་བསྡུས་ཡོང་ན་བྱམས་སྙིང་རྗེ་གཉིས་ཀ་ལས་སྐྱེ་བ་ཡིན། རང་གཞན་སྡུག་བསྔལ་དང་བྲལ་འདོད་ཀྱི་སྙིང་རྗེ། བདེ་བ་དང་འཕྲད་འདོད་བྱམས་པ་ཡིན། གཉིས་པ་འཕེལ་བའི་རྐྱེན་དེ་ཅི་ཞིག་ཅེ་ན། མདོར་བསྡུས་ཏེ་བསྟན་ན་འགལ་རྐྱེན་སྤངས་མཐུན་རྐྱེན་བསྒྲུབས་ན་རང་རྒྱུད་བྱང་ཆུབ་ཀྱི་སེམས་འཕེལ་བ་ཡིན། རྒྱས་པར་ཕྱེས་ན་མདོ་ལས་རྐྱེན་བདུན་ལ་སོགས་པ་གསུངས་ཡོད། གཙོ་བོ་བདུད་ལས་སྤོང་བ་དེ་ཡིན། བདུད་ཀྱི་ལས་དེ་ཤེས་པར་བྱས་ནས་སྤང་བ་དང་། ཕྱོགས་བཅུ་རྒྱལ་བ་སྲས་བཅས་ལ་བདུད་ལས་མི་འབྱུང་བའི་གསོལ་འདེབས་བྱེད་པ། བྱང་ཆུབ་སེམས་ཀྱི་ཕན་ཡོན། འཁོར་འདས་གཉིས་ཀྱི་ཉེས་དམིགས་སྒོམ་པ། སངས་རྒྱས་བྱང་སེམས་ཀྱི་ཡོན་ཏན་དྲན་ནས་སྤྲོ་བ་བསྐྱེད་པ་ལ་སོགས་པ་དེ་ལྟར་བྱེད་དགོས། དེ་འཕེལ་པའི་རྐྱེན་ཡིན། གསུམ་པ་དེ་མི་ཉམས་པའི་ཐབས་ཡིན་ལ། བླ་མ་དཀོན་མཆོག་ལ་དད་པ་མི་ཉམས་པར་ཡར་འཕེལ་དུ་བཅུག་པ། བྱང་ཆུབ་ཀྱི་སེམས་དེ་ཡར་འཕེལ་དུ་བཅུག་པ། གཞན་གྱི་ཕུན་ཚོགས་ལ་ཕྲག་དོག་མི་བྱེད་པ། སེམས་ཅན་བློས་བཏང་ནས་རང་བདེ་དོན་གཉེར་མི་བྱེད་པ། ཚོགས་གསོག་གི་ཐབས་རྒྱ་ཆེན་པོ་ལ་འབད་པར་བྱེད་པ། སྤྲོ་བ་དང་བརྩོན་འགྲུས་མི་ཉམས་པར་བྱེད་པ་དེ་རྣམས་ཡིན། ཁ༽ བྱང་ཆུབ་འཇུག་པའི་བསླབ་བྱ་བཤད་པ། ཀ ཕར་ཕྱིན་དྲུག་བཤད་པ། དེ་ཡིས་བྱང་ཆུབ་སྨོན་པའི་བསླབ་བྱ་བསླབ་ཐབས་བཤད་ཟིན་ལ། བྱང་ཆུབ་འཇུག་པའི་བསླབ་བྱ་ལ་བསླབ་ཐབས་དེ་ཡང་རྒྱས་འབྲིང་བསྡུས་པའི་ཚུལ་གྱིས་བཤད་པ་ཡོད་ཅིང་། འདི་ནས་རིམ་པའི་དབང་དུ་བྱས་ན་བསྡུས་འབྲིང་རྒྱས་པ་ཞེས་བཤད་དགོས། འདི་ནས་བསྡུས་པར་བྱས་ཏེ་བཤད་ན་ད་ལྟའི་སྐབས་འདིར་བཤད་ས་གཙོ་བོ་ཁྱིམ་པ་ཕོ་མོ་ཡིན་པ་དང་། གཅིག་ན་རྒྱ་ཆེན་ཆོས་ཀྱི་སྣོད་རུང་གི་ཐོས་པ་སྔོན་སོང་མེད་ལ། གཉིས་ན་འཇིག་རྟེན་གྱི་བྱ་བས་བྲེལ་ཞིང་མང་པོ་ཞིག་ཉན་ལོང་སྒྲུབ་ལོང་གཉིས་ཀ་མེད། ཁྱད་པར་དུ་སུན་མི་འགྲོ་བའི་ཆེད་དུ་འཛིན་བདེ་བའི་བསྡུས་པ་བཤད་པ་གལ་ཆེ་བ་ཡིན། རྒྱལ་པོ་ལ་གདམས་པའི་མདོའི་ནང་དུ། སངས་རྒྱས་བཅོམ་ལྡན་འདས་ཀྱིས་རྒྱལ་པོ་ཆེན་པོ་ལ་གསུངས་ཏེ། རྒྱལ་པོ་ཆེན་པོ་ཁྱོད་ནི་བྱ་བ་མང་བྱེད་པ་མང་པོ་ཡིན་པས་ཉིན་མཚན་གཉིས་ཀ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་བསླབ་མི་ཐུབ་པས་དད་པ་དང་། དོན་གཉེར། སྨོན་ལམ། ཡི་རང་སོགས་བརྗེད་དུ་མ་འཇུག དགེ་བ་བསགས་ཚད་པོ་སེམས་ཅན་དང་ཐུན་མོང་གྱིས། སེམས་ཅན་ཐམས་ཅད་སངས་རྒྱས་འགྲུབ་པའི་དོན་དུ་བསྔོས། ཁྱོད་ཀྱིས་དེ་ལྟར་བྱོས་དང་རྒྱལ་པོས་རྒྱལ་སྲིད་སྐྱོང་བའི་བྱ་བ་ཡང་མི་ཉམས། བྱང་ཆུབ་ཀྱི་ཚོགས་ཀྱང་རྫོགས་པ་ཡིན་ཞེས་གསུངས་པ་དང་མཚུངས་པར་ཁྱིམ་པ་ཕོ་མོས་ཁྱིམ་གྱི་བྱ་བ་འགྲུབ་དགོས། རྒྱུ་ནོར་ལོངས་སྤྱོད་ཡོད་དགོས། འགལ་རྐྱེན་ན་ཚ་རྐྱེན་བགེགས་ཡོད་མི་རུང་། མཐུན་རྐྱེན་གྱི་བསམ་པ་ཐམས་ཅད་འགྲུབ་དགོས། དེ་ལྟར་དགོས་ན་ཁ་སྟོང་ནས་གསོལ་འདེབས་རྐྱང་པ་བྱས་ནས་འགྲུབ་ས་མི་འདུག བསོད་ནམས་ཀྱི་སྟོབས་ཤིག་མེད་ན་རང་སྟོབས་རྐྱང་པས་མི་འགྲུབ། རང་གཞན་གཏན་བདེའི་དམིགས་ཡུལ་འགྲུབ་པ་ལ་ཐར་བའི་ལམ་སྣེ་ཟིན་དགོས། ཕྱོགས་གཞན་ནས་བྱང་ཆུབ་སེམས་དཔའི་བསླབ་བྱ་བསྡུས་པ་ལ་འཇུག་བདེ། དེ་ཅི་འདྲ་ཞིག་ཡིན་ཞེ་ན། རང་རང་སོ་སོའི་ནུས་པ་དང་མཐུན་པའི་སྒྲུབ་ནུས་ཚོད་ཀྱི་སྡིག་པ་སྤང་བ་དང་དགེ་བ་སྒྲུབ་པ་ལ་བསླབ་དགོས། དབང་མེད་ཀྱིས་སྡིག་ལས་རེ་བྱས་ཤོར་སོང་ན་ཉིན་མོར་བྱས་པ་དེ་ཉིད་མཚན་མོར་བཤགས། མཚན་མོར་བྱས་པ་དེ་ཉིད་ཉིན་མོར་བཤགས། མདོར་ན་སྡིག་པ་དང་ཞག་ཏུ་མི་འགྲོགས། དགེ་རྩ་ཅུང་ཟད་བྱས་པ་ཚུན་ཆད་སེམས་ཅན་གྱི་དོན་ལ་བསྔོ་དགོས། དེ་བསྡུས་པར་བྱས་ཏེ་བཤད་པ་ཡིན། གཉིས་པ་དེ་ལས་བློ་ཆེ་བའི་རིགས་ཤིག་ཡིན་ན་འབྲིང་གི་དབང་དུ་བཤད་ཚུལ་ཡོད་ལ། ནག་པོའི་ཆོས་བཞི་སྤང་། དཀར་པོའི་ཆོས་བཞི་བསྟེན་དགོས། ནག་པོའི་ཆོས་བཞི་བོ་གང་ཡིན་ཞེ་ན། རྣམ་གྲངས་ཁ་གྲངས་རྩི་རྒྱུ་ཅན་གྱི་རིགས་འདི་ཚོ་ལ་སྡོམ་ཚིགས་བཅད་བློ་ལ་བཟུང་ན་ཞེ་ལ་འཇགས་བདེ་བས། མཆོད་འོས་བསླུ་དང་འགྱོད་མེད་འགྱོད་པ་བསྐྱེད། །དམ་པར་སྐུར་འདེབས་འགྲོ་ལ་གཡོ་རྒྱུ་སྤྱོད། །ཅེས་པའི་བཞི་བོ་དེ་ཡིན། མཆོད་འོས་མཆོག་བླ་མ་སྟེ་མཆོད་པར་འོས་པ་ཐམས་ཅད་ཀྱི་མཆོག་བླ་མ་ཡིན། དེ་ཉིད་བསླུས་པ་དང་། གཞན་འགྱོད་པའི་གནས་མ་ཡིན་པ་ལ་འགྱོད་པ་སྐྱེ་རུ་བཅུག་པ། དམ་པ་ལ་སྐུར་འདེབས་བྱེད་པ། སྐབས་འདིར་ཐེག་ཆེན་ལ་ཞུགས་པའི་སེམས་ཅན་ནས་བཟུང་སྟེ་མི་བསྔགས་པའི་ཚིག་བརྗོད་པ་དང་། འགྲོ་ལ་གཡོ་རྒྱུ་སྤྱོད་པ་རྣམས་ཡིན། ནག་པོའི་ཆོས་བཞི་བོ་དེ་ལས་ལྡོག་པ་དེ་ཉིད་དཀར་པོའི་ཆོས་བཞི་ཡིན། དེ་འབྲིང་གི་དབང་དུ་བྱས་ནས་བཤད་པ་ཡིན། གསུམ་པ་རྒྱས་པར་བསླབ་པའི་ཐབས་ལ་བསམ་བློ་ཞིག་བཏང་ན། དང་པོ་སྐྱེ་བའི་རྒྱུ། གཉིས་པ་འཕེལ་བའི་རྐྱེན། གསུམ་པ་མི་ཉམས་པའི་ཐབས་ཏེ་དེ་ལྟར་བྱས་ནས་བཤད་ཡོད། དང་པོ་སྐྱེ་བའི་རྒྱུ་དེ་སྨོན་སེམས་ལ་བློ་ཞུགས་པ། དེ་འཕེལ་བའི་ཐབས་འཚོལ་རྒྱུ་དང་། ཉམས་པའི་རྒྱུ་སྤང་ཤེས་པ། འཁོར་བའི་སྡུག་བསྔལ་དང་ཞི་བ་ཕྱོགས་གཅིག་པ་མྱ་ངན་ལས་འདས་པའི་ཉེས་དམིགས་བསྒོམས་ནས་སེམས་ཅན་ཐམས་ཅད་མྱུར་དུ་འཁོར་བ་ལས་བསྒྲལ་བའི་སྙིང་སྟོབས་དང་། མྱ་ངན་ལས་འདས་པ་དེ་དུག་ལྟར་དུ་ལྡོག་ཐུབ་པའི་ཆོད་སེམས་ཡོད་དགོས། སྲིད་ཞི་གཉིས་ཀྱི་མཐའ་རུ་མ་ལྷུང་པ་ཞིག་དགོས་པ་སྟེ་དེ་སྐྱེ་བའི་རྒྱུ་ཡིན། གཉིས་པ་འཕེལ་བའི་རྐྱེན་དེ་གང་ཡིན་ཞེ་ན། ཕྱོགས་བཅུའི་རྒྱལ་བ་སྲས་བཅས་བླ་མ་རྣམས་དྲན་ནས་ཉིན་ལན་གསུམ་མཚན་ལན་གསུམ་དུ་ཡན་ལག་བདུན་པའི་བསགས་སྦྱང་བྱེད་དགོས། བཟང་པོ་སྤྱོད་པའི་སྨོན་ལམ་ལ་སོགས་པ་མི་ཆག་པར་བྱང་ཆུབ་སེམས་དཔའི་སྤྱོད་པ་ལ་བསླབ་དགོས་པ་ཡིན། གསུམ་པ་མི་ཉམས་པའི་ཐབས་ནི་དུས་རྒྱུན་དུ་ནམ་མཁའི་སྙིང་པོའི་མདོ་དང་མདོ་སྡེ་དཀོན་མཆོག་བརྩེགས་པ་ལ་སོགས་པ་ལས་གསུངས་པའི་རྩ་བ་དང་ཡན་ལག་གི་ལྟུང་བ་ཐམས་ཅད་ལ་གཉེན་པོ་བསྐྱེད། ཁྱད་པར་དུ་དེ་བཞིན་གཤེགས་པའི་ཡིག་བརྒྱ་སོགས་བསྒྲངས་ནས་སྡིག་ལྟུང་དག་པའི་ཐབས་སྣ་ཚོགས་ལ་བསླབ་རྒྱུ་དེ་ཡིན། བྱང་ཆུབ་འཇུག་པའི་བསླབ་བྱ་དེ་བསྡུས་ན། ཕྱིན་དྲུག་དང་བསྡུ་དངོས་བཞི་རུ་བསྡུས་ཏེ་གསུངས་ཡོད། རང་གིས་སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པ་ཕ་རོལ་ཏུ་ཕྱིན་པ་དྲུག་ལ་སྤྱོད་པ་དང་། སེམས་ཅན་གཞན་ཡོངས་སུ་སྨིན་པར་བྱེད་པ་བསྡུ་བའི་དངོས་པོ་བཞི་ལ་སྤྱོད་པ་དེ་ཡིན། ཕར་ཕྱིན་དྲུག་གི་སྤྱིའི་མཚན་ཉིད་དེ་གང་ཡིན་ཞེ་ན། འཁོར་བ་དང་མྱ་ངན་ལས་འདས་པའི་ཕ་རོལ་དུ་སྒྲོལ་བའི་ཐབས་དམ་པ་གང་ཡིན་པ་དེ་ཕར་ཕྱིན་གྱི་མཚན་ཉིད་ཡིན། འདི་ཚོ་འདི་ལྟར་བྱས་ཏེ་བཤད་ན་ཁྱིམ་པ་ཕོ་མོ་ཚང་མས་ཐོས་པ་བསྟེན་མྱོང་མེད་པས་ཐོས་པ་བསྟེན་མ་མྱོང་བའི་མི་ཞིག་གིས་དང་པོ་ཉིད་ནས་ཆ་ཚང་མི་གོ་ཡང་ཐོས་པའི་བག་ཆགས་རེ་འདི་ལྟར་བྱས་ཏེ་རྒྱུད་ལ་བཞག་ན་ནམ་ཞིག་མི་ཟད་གཟུངས་དང་སྤོབས་པ་རང་གིས་ཐོབ་ནས་སོ་སོ་རང་རིག་པའི་མཁྱེན་རབ་ཡེ་ཤེས་ཀྱི་ཉི་མ་ནང་ནས་རྒྱས་པའི་དགོས་པ་ཡོད། དཔེར་ན་སངས་རྒྱས་འོད་དཔག་མེད་པའི་མཚན་གྱི་སྒྲ་ཙམ་དུད་འགྲོའི་རྣ་ལམ་དུ་ཐོས་ན་ཞིང་ཁམས་བདེ་བ་ཅན་ལ་དབུགས་འབྱིན་གསུངས་པ་དེ་ངེས་དོན་གྱི་བཀའ་ལ་བསླུ་བ་མེད། དུད་འགྲོའི་རྣ་ལམ་དུ་སངས་རྒྱས་འོད་དཔག་མེད་ཀྱི་མཚན་བསྒྲགས་ན་ཡང་དུད་འགྲོས་ལྷག་ཏུ་དོན་མི་གོ་ཡང་བྱིན་རླབས་འཇུག་པ་བཞིན་དུ་དམ་ཆོས་ཐོས་ན་ཕྱི་མར་བཅོལ་བའི་ནོར་ལ་རང་ཉིད་ལེན་པ་ལྟ་བུ་ཡིན་པས་འདི་ཚོ་བག་ཆགས་རེ་བཞག་ན་བཟང་སྙམ་ནས་དེ་ལྟར་བྱས་ཏེ་འཆད་ཀྱིན་ཡོད། དེའི་ཕྱིར་ན་ཕར་ཕྱིན་དྲུག་གི་སྤྱིའི་མཚན་ཉིད་ནི་འཁོར་བ་དང་མྱ་ངན་ལས་འདས་པའི་ཕ་རོལ་ཏུ་སྒྲོལ་བའི་ཐབས་དམ་པ་གང་ཡིན་པ་ཕར་ཕྱིན་གྱི་མཚན་ཉིད་ཡིན་ཞེས་སྨྲས་ཟིན་ལ། དེ་ཅིའི་ཕྱིར་ཞེ་ན། ཚུ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །དུས་རྣམས་མཉམ་པ་ཉིད་ཤེས་བྱ། །ཤེས་རབ་ཕ་རོལ་ཕྱིན་པར་འདོད། །ཅེས་གསུངས་པ་ལྟར་དུ་ཡིན། ཕར་ཕྱིན་གྱི་དབྱེ་བའི་ཐད་ནས་བཤད་པ་འདི་ལ་ས་བཅད་ཅིག་བཞག་ན། དབྱེ་གཞི་དང་། དབྱེ་བའི་དོན་དང་། དབྱེ་བ་ངེས་པར་སྒྲུབ་པ་དང་གསུམ་གྱིས་བཤད་དགོས། དེ་མཁས་པའི་བསྟན་བཅོས་སོགས་ནས་དེ་ལྟར་གསུངས་ཡོད་པས་དེ་ལྟར་དུ་བཤད་དགོས། རགས་རིམ་འགོ་ཟིན་རེ་མི་སྐྱ་ཕོ་མོ་ཡིན་ཡང་རྒྱ་ཆེན་ཐོས་པའི་ཕན་ཡོན་རྒྱུད་ལ་འཇོག་པའི་ཆེད་དུ་བཤད་ན། དང་པོ་ཕར་ཕྱིན་གྱི་དབྱེ་གཞི་དེ་རྫོགས་པའི་སངས་རྒྱས་སྒྲུབ་པའི་ཐབས་ཁྱད་པར་བ་ཞིག་ཡིན། དབྱེ་བའི་དོན་དེ་རྣམ་པ་དྲུག་ཡོད་པ་སྟེ་ཁྱིམ་པ་ཕོ་མོ་ཡིན་ཡང་ཁ་གྲངས་ཙམ་ཞིག་ངེས་པར་གྱིས་དང་རླབས་ཆེན་བྱང་ཆུབ་སེམས་དཔའི་སྤྱོད་པ་ལ་མ་སྦྱངས་ན་སངས་རྒྱས་ཅི་ལྟར་ཐོབ། ཁ་ཡིས་ཟེར་མ་ཤེས་ཤིང་སེམས་ཀྱིས་བསམ་མ་ཤེས་ན་སྦྱོར་བ་ལག་ལེན་ལ་ཐེབས་ཐབས་མེད། ཁ་གྲངས་མང་པོ་ཞིག་མེད་དེ་ཕྱིན་དྲུག་བསྡུ་དངོས་བཞི་སྟེ་བཅུ་ཐམ་པ་ཡོད། ཕར་ཕྱིན་གྱི་དབྱེ་བ་རྣམ་པ་དྲུག་ནི་སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་བཅས་དྲུག་ཡིན། འུ་ཚོ་བོད་ཆོས་ལྡན་གྱི་ས་ཆའི་མིའི་མིང་ཚུན་ཆད་ཀྱང་ཆོས་དང་འབྲེལ་ཡོད་པ་ཤ་སྟག་ཡིན། ཕར་ཕྱིན་དྲུག་སྒྲོང་དུས་ཤི་མྱིང་རེད་འདུག་སྙམ་ནས་འཛེམ་མི་དགོས། ཕར་ཕྱིན་དྲུག་པོ་རེ་རེ་ནས་མཚན་ཉིད་དང་གཅིག དེའི་རང་བཞིན་ངེས་པར་བྱ་བ་དང་གཉིས། ཕན་ཡོན་དང་གསུམ་རེས་སྤྱི་ཆིངས་ཀྱིས་བཅིངས་ནས་གསུངས་ཡོད། ༼༡༽ སྦྱིན་པའི་ཕར་ཕྱིན། སྦྱིན་པ་ལྟ་བུ་ཞིག་ཡིན་ན་དང་པོར་སྦྱིན་པའི་མཚན་ཉིད་ཞོག་ཟེར་ན། བདོག་པའི་དངོས་པོ་གཞན་ལ་ཕན་པས་སྟེར་བ་དེ་སྦྱིན་པའི་མཚན་ཉིད་ཡིན། དེ་ལྟ་བུའི་སྦྱིན་པ་དེ་སྦྱོར་དངོས་རྗེས་གསུམ་དམ་པ་གསུམ་གོང་ནས་བཤད་པ་དེ་ཉིད་ཀྱིས་ཟིན་ན་སྦྱིན་པའི་ཕར་ཕྱིན་ཏུ་གྱུར་སོང་བ་ཡིན། སྦྱིན་པའི་རང་བཞིན་ངེས་པར་བྱ་བ་ལ་དང་པོར་སྦྱིན་པའི་མི་མཐུན་ཕྱོགས་ངོས་གཟུང་དགོས། སྦྱིན་པའི་མི་མཐུན་ཕྱོགས་དེ་གང་ཡིན་ཞེ་ན། སེར་སྣ་ཡིས་གཞན་ལ་སྦྱིན་མི་ནུས། སྦྱིན་མི་ཕོད། སྦྱིན་རན་ཁར་ལག་པ་འདར་གྱིན་འདུག་པ། སེར་སྣ་དང་འདྲེས་མར་སྦྱིན་ནུས་ན་ཡང་མ་དག་པའི་སྦྱིན་པ་དང་འདྲེས་པ་ཡིན། དེ་མ་འདྲེས་ན་ཡང་རྫོགས་པའི་སངས་རྒྱས་ཀྱི་རྒྱུར་མི་འགྲོ་བ་དེ་ཚོ་སྦྱིན་པ་ཡིན་ཡང་སྦྱིན་པ་ཡང་དག་གི་མི་མཐུན་ཕྱོགས་ཡིན། དེ་ལྟར་བྱས་ཏེ་བྱིན་ན་ཚེ་འདི་ལ་འཇིག་རྟེན་ཐམས་ཅད་ཀྱི་བརྙས་བཅོས་བྱེད་སར་འགྱུར་བ། ཚེ་ཕྱི་མ་ལ་སྤྱིར་སེར་སྣ་ཅན་ལ་ལོངས་སྤྱོད་ཕུན་སུམ་ཚོགས་པ་མི་གྲུབ། ཁྱད་པར་མ་དག་པའི་སྦྱིན་པས་འབྲས་བུ་གནོད་པ་ཅན་འབྱུང་བ་ཡིན་ཞིང་། སྦྱིན་པའི་གེགས་བར་ཆད་བྱེད་པ་དེ་ཉིད་སེར་སྣ་ཡིན་ལ། སེར་སྣའི་རྒྱུ་གང་ཡིན་བཙལ་ན་ནོར་རྫས་ལོངས་སྤྱོད་ལ་ཆགས་སེམས་ཡོད་པ་དེ་ཉིད་ཡིན། དེ་ལ་ཞིབ་ཀྱིས་བསམ་བློ་ཞིག་བཏང་ན། ནོར་རྫས་འདི་ནི། བསགས་དང་བསྲུང་དང་བརླགས་པའི་གདུང་བ་ཡིས། །ནོར་ནི་ཕུང་ཁྲོལ་མཐའ་ཡས་ཤེས་པར་བྱ། །ནོར་ལ་ཆགས་པས་གཡེང་བར་གྱུར་པ་རྣམས། །སྲིད་པའི་སྡུག་བསྔལ་ལས་གྲོལ་སྐབས་མེད་དོ། །ཞེས་རྒྱལ་སྲས་ཞི་བ་ལྷས་གསུངས་པ་ཡིན། དང་པོ་ནོར་མི་ལོན་ནས་བསགས་པའི་སྡུག་བསྔལ། བར་དུ་ནོར་ཚགས་བྱས་ནས་བསྲུང་དགོས་པའི་སྡུག་བསྔལ། ཐ་མ་བརླགས་ནས་མེད་ཤོར་བའི་སྡུག་བསྔལ། དེའི་གཡོག་ཏུ་རྒྱུག་རྒྱུ་དང་། ཚེ་གཅིག་ལ་དེའི་ནོར་དེ་གཡོག་རྒྱུ་དེ་ནི་ཚེ་སྡུག་གི་བཙོན་ཁང་། ཚེ་བཙོན་ཐར་མེད་ཀྱི་ནང་ལ་འཛུལ་བ་དང་འདྲ་བ་ཡིན། དེ་ལྟར་བྱས་ཏེ་བཤད་ན། རྒྱུ་ནོར་རྫས་ལ་ཆགས་སེམས་ཀྱི་འབྲས་བུ་སེར་སྣ་སྐྱེས། དེས་ཚེ་འདི་ཕྱི་གཉིས་ཀ་ལ་སྡུག་མྱོང་བ་ཡིན། དེའི་ནད་ཀྱི་གཉེན་པོ་སྨན་དེ་སྦྱིན་པ་ཡིན་ཞིང་། སྦྱིན་པ་འདི་ལ་སྦྱིན་མཁན་གང་ཟག་མི་འདྲ་བའི་ཁྱད་པར་གྱིས་སྦྱིན་པ་ཡང་མི་འདྲ་བའི་དབྱེ་བ་ཡོད། རབ་ཏུ་བྱུང་བ་ཞིག་ཡིན་ན་གཙོ་བོ་མི་འཇིགས་པ་སྐྱབས་ཀྱི་སྦྱིན་པ་དང་། བྱམས་པའི་སྦྱིན་པ། ཆོས་ཀྱི་སྦྱིན་པ་གསུམ་པོ་སྦྱིན་དགོས། དེའི་ནང་ནས་ད་རུང་ཆོས་ཀྱི་སྦྱིན་པ་སྦྱིན་རྒྱུ་དེ་གནད་ཆེ། རབ་ཏུ་བྱུང་བས་ཟང་ཟིང་གི་སྦྱིན་པ་རླབས་ཆེན་གྱི་འགོ་འདོན་བྱེད་ཁུལ་བྱས་ན། ཐོས་བསམ་སྒོམ་གསུམ་གྱི་གེགས་སུ་འགྱུར་བཞིན་ཡོད་ལ། དེ་ཡིན་པའི་རྒྱུ་མཚན་གྱིས་ཚུལ་ཁྲིམས་དང་། ཏིང་འཛིན་དང་། ཤེས་རབ་ཀྱིས་འགོ་འདོན་གྱིས་ཞེས་གསུངས་ཡོད། ད་དུང་རབ་བྱུང་ནི་ལྷ་དང་བཅས་པའི་མཆོད་གནས་ཡིན་པས་མཆོད་གནས་དང་ཡོན་བདག་གཉིས་ཀ་གོ་ལྡོག་སོང་ན་འཇིན་རྟེན་རྒུད་པའི་རྒྱུར་འགྱུར་ཚུལ་ཡང་གསུངས་ཡོད། ཁྱིམ་པས་ཟང་ཟིང་གི་སྦྱིན་པ་ལ་བསླབས་ནས་རང་གིས་སྟེར་ནུས་ཚོད་ཀྱིས་མ་དག་པའི་སྦྱིན་པ་མིན་པའི་དག་པའི་སྦྱིན་པ་སྟེ། དེ་ཡང་སངས་རྒྱས་ཀྱི་རྒྱུར་མི་འགྱུར་བ་མིན་པར་སངས་རྒྱས་ཀྱི་རྒྱུར་འགྱུར་བ་དེ་ཉིད་ལ་བསླབ་དགོས། དག་པའི་སྦྱིན་པ་ཡིན་ན་ཡང་དགེ་རྩ་འགའ་རེ་ལྷ་མིའི་ཕུན་ཚོགས་ཀྱི་ཕྱོགས་སུ་ལྷུང་འགྲོ་བ། འགའ་རེ་ཉན་རང་གི་ཐར་བའི་རྒྱུར་འགྱུར་འགྲོ་བ་དེ་ཚོ་ལྡོག་པའི་ཆེད་དུ་ཐབས་ཀྱིས་མྱ་ངན་ལས་འདས་པའི་མཐའ་གནོན་པ་དང་། ཤེས་རབ་ཀྱིས་འཁོར་བའི་མཐའ་མནན་ནས། བརྩོན་འགྲུས་ཀྱིས་གཉིས་ཀ་མྱུར་དུ་མཐར་ཕྱིན་པར་བྱས་ཏེ་སྦྱིན་པ་ཅུང་ཟད་ཙམ་བྱས་པ་དེ་ཉིད་ཀྱང་མངོན་པར་རྫོགས་པར་འཚང་རྒྱ་བའི་རྒྱུར་འགྱུར་བ་ཞིག་ལ་བསླབ་དགོས། མི་སྐྱེ་བའི་ཆོས་ལ་བཟོད་པ་ཐོབ་པའི་གང་ཟག་ཅིག་གིས་གཏོང་བ་དང་། གཏོང་བ་ཆེན་པོ། ཤིན་ཏུ་གཏོང་བ་ཆེན་པོ་དེ་རྣམས་ལ་བསླབ་དགོས། གཏོང་བ་ཞེས་པ་དེ་རྒྱལ་སྲིད་ལ་སོགས་པ། གཏོང་བ་ཆེན་པོ་དེ་བུ་དང་བུ་མོ་ཆུང་མ་ལ་སོགས་པ། ཤིན་ཏུ་གཏོང་བ་ཆེན་པོ་དེ་མགོ་དང་ཡན་ལག་ལ་སོགས་པ་རང་གི་ལུས་སྟེར་བ་ལྟ་བུ་དེ་རྣམས་ཡིན། སྦྱིན་པ་ཕྱིན་ཅི་མ་ལོག་པར་སྒྲུབ་པ་ལ་ཡོན་ཏན་བཞི་སྒྲུབ། ཆགས་པ་བདུན་སྤོང་དགོས། ཡོན་ཏན་བཞི་བོ་དེ་གང་ཡིན་ཞེ་ན། མདོ་སྡེ་རྒྱན་ལས། སྦྱིན་པ་མི་མཐུན་ཕྱོགས་ཉམས་དང་། །རྣམ་པར་མི་རྟོག་ཡེ་ཤེས་ལྡན་ལ་སོགས་པ་བཞི་གསུངས་ཡོད་ལ། སེམས་ཅན་རྣམས་སྨིན་བྱེད་རྣམ་གསུམ་ཞེས་སྦྱིན་པས་བསྡུས་ནས་ཉན་རང་ཐེག་ཆེན་གསུམ་གྱི་སྐལ་བ་ཇི་ལྟ་བ་བཞིན་དུ་འགོད་པ་དེ་རྣམས་ཡིན། ཆགས་བདུན་སྤོང་ཞེས་པ་ནི། བྱང་ཆུབ་སེམས་དཔའི་སྦྱིན་པ་ནི། །མ་ཆགས་མ་ཆགས་ཆགས་པ་མེད་ལ་སོགས་པས་གསུངས་པ་ལྟར་ཡིན། སྦྱིན་པའི་ཕན་ཡོན་ལ་བསམ་བློ་བཏང་ན། གནས་སྐབས་སུ་ཚེ་འདི་དང་ཕྱི་མ་ལ་སེམས་ཅན་མགུ་བར་བྱས་པ་དེ་ཉིད་ཀྱིས་ལོངས་སྤྱོད་དང་སྙན་གྲགས་ལ་སོགས་པའི་དཔལ་དང་བདེ་བ་ཐོབ། མྱོང་བ་རྒྱུ་མཐུན་གྱི་འབྲས་བུས་ཕྱི་མ་ཕྱུག་པོར་སྐྱེ། བྱེད་པ་རྒྱུ་མཐུན་གྱིས་གཏོང་ཕོད་ཅན་དུ་འགྱུར་བ་སོགས་དང་། མཐར་ཐུག་སངས་རྒྱས་པའི་གནས་སྐབས་སུ་ཡང་འཇིག་རྟེན་དང་འཇིག་རྟེན་ལས་འདས་པའི་འཁོར་དང་མཆོད་པ་རྒྱ་མཚོ་ལྟ་བུ་འབྱུང་བ་དང་། ནམ་མཁའ་མཛོད་ཀྱི་ཏིང་ངེ་འཛིན་ལ་དབང་སྒྱུར་བ་དེ་ལྟར་འབྱུང་བ་ཡིན། ༼༢༽ ཚུལ་ཁྲིམས་ཀྱི་ཕར་ཕྱིན། ཕར་ཕྱིན་གཉིས་པ་ནི་ཚུལ་ཁྲིམས་ཡིན་ལ། ཚུལ་ཁྲིམས་ཀྱི་མཚན་ཉིད་ཞོག་ཅེ་ན། གཞན་གྱི་དོན་དུ་རང་གི་ཁ་ན་མ་ཐོ་བ་སྤོང་བ་ཚུལ་ཁྲིམས་ཀྱི་མཚན་ཉིད་ཡིན། དེ་ཡང་སྦྱོར་དངོས་རྗེས་གསུམ་གྱིས་ཟིན་ན་ཚུལ་ཁྲིམས་ཀྱི་ཕར་ཕྱིན་ཏུ་འགྱུར་བ་ཡིན། དེའི་རང་བཞིན་དེ་ངེས་པར་བྱེད་པ་ལ་དང་པོ་འཆལ་བའི་ཚུལ་ཁྲིམས་ངོས་བཟུང་དགོས། ཚུལ་ཁྲིམས་ཀྱི་ལྡོག་ཕྱོགས་འཆལ་བའི་ཚུལ་ཁྲིམས་ཡིན་ལ། སྡོམ་པ་གཏན་ནས་མི་སྲུང་བ་དང་། བསྲུངས་ཀྱང་མུ་སྟེགས་པའི་ཚུལ་ཁྲིམས་ལྟ་བུ་ཕྱིན་ཅི་ལོག་སྲུང་བ་དང་། ཕྱིན་ཅི་ལོག་མིན་ཡང་ཉན་ཐོས་ཀྱི་ཚུལ་ཁྲིམས་ལྟ་བུ་སངས་རྒྱས་ཀྱི་རྒྱུར་མི་འགྲོ་བ་སྟེ་དེ་གསུམ་ཡིན། འཆལ་བའི་ཚུལ་ཁྲིམས་ལ་གནོད་པ་ཅི་ཡོད་ཅེ་ན། ཚེ་འདིར་ལྷ་དང་བཅས་པའི་འཇིག་རྟེན་གྱིས་བརྙས་བཅོས་བྱེད་པ། བླ་མ་དཀོན་མཆོག་གི་མདུན་ནས་ཡིན་ན་རང་ཉིད་ངོ་གནོང་དགོས་ཐུག་པ། སངས་རྒྱས་བྱང་སེམས་ཀྱི་ཐུགས་ཁྲེལ་བ། དཀར་ཕྱོགས་སྐྱོང་བའི་ལྷ་ཡིས་མི་སྲུང་བ་ལ་སོགས་པ་དང་། སྐྱེ་བ་གཏན་གྱི་ཕུན་ཚོགས་འཇོམས་པ་ལ་བསམ་བློ་བཏང་ན། མདོ་སྡེ་ཏིང་འཛིན་རྒྱལ་པོ་ལས། ཇི་སྙེད་ཆོས་ཀྱི་རྣམ་པས་བྱང་ཆུབ་ཀྱང་། ཐོས་པས་རྒྱགས་ཤིང་ཚུལ་ཁྲིམས་མི་བསྲུང་ན། །ཚུལ་ཁྲིམས་འཆལ་བ་ངན་འགྲོ་དེར་འགྲོ་སྟེ། །དེ་ལ་ཐོས་པ་མང་པོས་སྐྱོབ་མི་ནུས། །ཞེས་གསུངས་ཡོད། སྤྱིར་ན་ཚུལ་ཁྲིམས་འཆལ་བ་ལ་བདེ་འགྲོ་འབྱུང་བ་མི་སྲིད་ཅིང་། ནམ་ཞིག་ངན་སོང་ནས་ཐར་ན་ཡང་སྲོག་གཅོད་ཀྱིས་ཚེ་ཐུང་། མ་བྱིན་པར་ལེན་པས་ནོར་དབུལ་བ་ལ་སོགས་པ་འབྱུང་། ཚུལ་ཁྲིམས་འཆལ་བའི་རྒྱུ་དེ་གང་ཡིན་ཞེ་ན། ཉོན་མོངས་མང་བ་ཤས་ཆེ་བ་ཡིན་པས་དེའི་གཉེན་པོ་ལ་ཉོན་མོངས་ཕྱོགས་རེ་བ་ལ། འདོད་ཆགས་ལ་མི་སྡུག་པ། ཞེ་སྡང་ལ་བྱམས་པ། གཏི་མུག་ལ་རྟེན་འབྲེལ། ང་རྒྱལ་ལ་ཁམས་ཀྱི་རབ་དབྱེ་དེ་རྣམས་སྒོམ་པ་དང་། མཐའ་དག་དཔྱིས་འབྱིན་གྱི་གཉེན་པོ་ལ་སྟོང་ཉིད་ཀྱི་ཏིང་འཛིན་ལ་འདྲིས་པར་བྱ་བ་གཅིག་པོ་གལ་ཆེ་བ་དེ་ཉིད་རྒྱུ་ཉོན་མོངས་ཀྱི་གཉེན་པོ་ཡིན། རྒྱུ་ཉོན་མོངས་དེ་ལ་བརྟེན་ནས་ཚུལ་བཞིན་མ་ཡིན་པའི་ཡིད་བྱེད་དེ་སེམས་ལ་སྐྱེ། ཚུལ་མིན་ཡིད་བྱེད་དེ་སེམས་ལ་སྐྱེ་དུས་དེའི་དབང་གིས་ལུས་ངག་གི་ཚུལ་ཁྲིམས་འཆལ་བ་འབྱུང་བ་ཡིན་པས་དེའི་གཉེན་པོ་ཚུལ་ཁྲིམས་བསྟེན་དགོས་ཤིང་། ཚུལ་ཁྲིམས་ལ་ནང་གསེས་ཀྱི་དབྱེ་བ་གསུམ་འབྱུང་ལ། ཉེས་སྤྱོད་སྡོམ་པའི་ཚུལ་ཁྲིམས། དགེ་བ་ཆོས་སྡུད་ཀྱི་ཚུལ་ཁྲིམས། སེམས་ཅན་དོན་བྱེད་ཀྱིི་ཚུལ་ཁྲིམས་གསུམ་ཡིན། སྡོམ་པའི་ཚུལ་ཁྲིམས་ཀྱིས་བསྡོམས་པའི་སྡོམ་པ་ལ། སོ་སོར་ཐར་བའི་སྡོམ་པ་དང་། བྱང་ཆུབ་སེམས་དཔའི་སྡོམ་པ་གཉིས་ཡོད། སྡོམ་པ་ཞེས་པ་རབ་བྱུང་རྐྱང་པ་ཡིས་བསྲུང་དགོས་རྒྱུ་འབའ་ཞིག་མ་ཡིན་ཞེས་གོང་དུ་བཤད་ཟིན་ལ། ཁྱིམ་པས་བསྲུང་རྒྱུ་དང་རབ་བྱུང་གི་བསྲུང་རྒྱུ་གཉིས་ཀ་ཡོད། སོར་སྡོམ་ལ་མཚོན་ན། ཁྱིམ་པ་ཞིག་གིས་སྐྱབས་འགྲོའི་སྡོམ་པ་ཞིག་ཞུས། དེའི་བསླབ་བྱ་སྲུང་བ་དེ་ཉིད་ལ་སྐྱབས་གསུམ་འཛིན་པའི་དགེ་བསྙེན་ཞེས་ཟེར། འདི་སོར་ཐར་རིགས་བདུན་གྱི་ནང་ནས་འདི་ལ་བརྩི་ཞེས་ཟེར་རྒྱུ་མེད་ཀྱང་སྡོམ་པ་ཐམས་ཅད་ཀྱི་རྨང་གཞི་ཡིན་པ་དེ་ཉིད་རྒྱུན་དུ་བཤད་པ་ལྟར་ཡིན། སྐྱབས་འགྲོ་བླངས་ནས་བསྙེན་གནས་ཙམ་སྲུང་བ་ལ་སྐྱབས་གསུམ་པའི་དགེ་བསྙེན་ཞེས་གསུངས་ས་ཡོད་ལ། གང་ལྟར་སྲོག་གཅོད་སྤོང་བའི་སྡོམ་པ་བླངས་པ་ལྟ་བུ་སྣ་གཅིག་སྤྱོད་པ། དེའི་སྟེང་དུ་མ་བྱིན་ལེན་ལྟ་བུ་ཞིག་སྤོང་བ་སྣ་འགའ་སྤྱོད་པ། རྫུན་དང་གསུམ་པོ་སྤོང་ན་ཕལ་ཆེར་སྤྱོད་པ། འདོད་ལོག་དང་ཆང་གཉིས་ཀ་ནས་བཟུང་སྟེ་ལྔ་བོ་སྤོང་ན་ཡོངས་སུ་རྫོགས་པའི་དགེ་བསྙེན་ཞེས་ཟེར་བ་ཡིན། དགེ་བསྙེན་ཞེས་པ་སྟོན་པ་གཞན་ལ་མི་བསྟེན་པར་ཆོས་དགེ་བ་བཅུར་སྤྱོད་པ་ཞིག་ཡིན་ཡང་བསྲུང་བྱ་ལ་ལྔ་ཡོད། ལྔ་བསྲུངས་པས་བཅུ་དོན་གྱིས་ཐོབ་པར་འགྱུར་བ་འཇིགས་པ་སྤོང་བའི་དོན་དུ་གསུངས་པ་ཡིན། ཉན་ཐོས་བྱེ་བྲག་སྨྲ་བའི་ལུགས་ལ། དེ་རྣམས་མིན་པའི་དགེ་བསྙེན་ཞིག་ཟུར་དུ་ཕྱེས་ནས་འདོད་པ་མིན་ཡང་མདོ་སྡེ་བས་གསུངས་པ་ལྟར་ན། རྒྱན་གྱིས་བརྒྱན་པར་བྱས་ཤིང་ཆོས་སྤྱོད་ཅིང་། །དུལ་ཞིང་ཡང་དག་སྡོམ་ལ་ཚངས་པར་སྤྱོད། །འབྱུང་པོ་ཀུན་ལ་ཆད་པ་སྤངས་པ་སྟེ། །དགེ་སློང་དགེ་སྦྱོང་དེ་ཡིན་བྲམ་ཟེའང་དེ། །ཞེས་པ་དེ་ལ་གཞི་བཟུང་ནས་དེའི་སྟེང་དུ་ཚངས་སྤྱོད་ཀྱི་དགེ་བསྙེན་འདོད་པ་ཡིན། གནས་བརྟན་པའི་ལུགས་ལ་དེ་ལྟར་ཡིན་ཞིང་། ཐེག་ཆེན་པས་ཀྱང་དེ་ལྟར་དུ་བཞེད་པ་ཡིན། བསྙེན་གནས་ཡན་ལག་བརྒྱད་པ་ཇི་སྲིད་འཚོའི་བར་དུ་བླངས་པ་དེ་ཉིད་ལ་གོ་མིའི་དགེ་བསྙེན་ཞེས་གོང་དུ་བཤད་མྱོང་ལ། གོ་མི་ཞེས་པ་དེ་ཉིད་རྒྱ་གར་གྱི་སྐད་སོར་བཞག་བྱས་པ་ཞིག་ཡིན། ཚངས་སྤྱོད་དགེ་བསྙེན་དང་གོ་མིའི་དགེ་བསྙེན་འདི་གཉིས་ཀ་ཁྱིམ་ཐབ་སྤངས་པས་རབ་བྱུང་གི་ནང་དུ་ཐེ་ས་འདུག་བསམ་རྒྱུ་ཞིག་ཡིན་ཡང་དེ་ཐེ་བ་མ་ཡིན་པ་དང་། བར་མའི་ཆོ་ག་མ་བྱས་པས་ན་རབ་བྱུང་ཡང་མ་ཡིན། བར་མ་རབ་བྱུང་གི་སྡོམ་པ་བླངས་པ་ནས་བཟུང་སྟེ་དགེ་ཚུལ་ངོ་མའི་མིང་མེད་ཀྱང་རབ་ཏུ་བྱུང་བའི་རྟགས་ཆ་ལུགས་འཆང་ཆོག རབ་བྱུང་གི་སྡོམ་པ་དགེ་ཚུལ་དང་དགེ་སློང་གི་སྡོམ་པ་གཉིས་ཀ་ཡིན་ཞིང་། དེའི་སྡོམ་པའི་ངོ་བོ་དང་བསླབ་བྱ་བཅས་མཚམས་དང་བཅས་པ་འདུལ་གཞུང་བཞིན་དུ་ཡིན་ལ། འདི་ནས་ཁྱིམ་པ་ཕོ་མོའི་ཆོས་སྐལ་གཙོར་བཟུང་གི་སྐབས་སུ་ལྷག་ཏུ་བཤད་མི་དགོས་ཤིང་། འདིར་སོ་ཐར་གྱི་སྡོམ་པ་རིགས་བདུན་ནམ་བརྒྱད་པོ་འདི་རྣམས་བྱང་ཆུབ་ཀྱི་སེམས་དང་འཁོར་གསུམ་ཡང་དག་གིས་མ་ཟིན་ན་ཉན་ཐོས་ཀྱི་སོ་ཐར་ཡིན་ཡང་ཟིན་ནས་གཞན་དོན་དུ་སྤྱོད་ན་བྱང་ཆུབ་སེམས་དཔའི་སོ་ཐར་དུ་འགྱུར་བ་ཡིན། བྱང་ཆུབ་སེམས་དཔའི་སྡོམ་པ་དེ་དབུ་མ་སེམས་ཙམ་གང་གི་ལུགས་བྱས་ནས་བླངས་ཡོད་ཀྱང་དེའི་སོ་སོའི་བསླབ་བྱ་ལ་བསླབ་པ་དང་། གཉིས་ཀའི་ཐུན་མོང་ལ་ནག་པོའི་ཆོས་བཞི་སྤངས། དཀར་པོའི་ཆོས་བཞི་སློབ་པ་དེ་ཉིད་གོང་ནས་བཤད་པ་ལྟར་དུ་ཡིན། དེ་ཉེས་སྤྱོད་སྡོམ་པའི་ཚུལ་ཁྲིམས་ཡིན་ལ། གཉིས་པ་དགེ་བ་ཆོས་སྡུད་ཀྱི་ཚུལ་ཁྲིམས་ནི། དགེ་བ་ཆོས་སྡུད་ཀྱི་ཚུལ་ཁྲིམས་དེ་དགེ་བའི་ཆོས་སྒྲུབ་པའི་ཕྱིར་དུ་མི་དགེ་བའི་ཆོས་གཞི་དང་བཅས་པ་སྤོང་བའི་སེམས་པ་རྒྱུན་ཆགས་པ་ཞིག་ཡིན་ལ། སྐྱབས་འགྲོ་ནས་འགོ་བཟུང་སྟེ་མཐར་སངས་རྒྱས་ཀྱི་སའི་ཡོན་ཏན་གྱི་བར་གྱི་དགེ་བའི་ཆོས་སྡུད་པ་ལ་ཅི་རིགས་པར་སློབ་པ་དེ་ཉིད་ཡིན། གསུམ་པ་སེམས་ཅན་དོན་བྱེད་ཀྱི་ཚུལ་ཁྲིམས་ནི། གཞན་དོན་སྒྲུབ་པའི་ཕྱིར་དེ་དང་འགལ་བ་གཞིར་བཅས་སྤོང་བའི་སེམས་པ་རྒྱུན་ཆགས་པ་ཞིག་ཡིན་པ་དང་། གཞན་དོན་དུ་འགྱུར་ན་ཞེས་པའི་ཁྱད་པར་བ་ལ་དམིགས་ཀྱིས་བསལ་བ་ཡོད་ཀྱང་དུས་འདི་ལ་དེ་ལྟ་བུའི་རིགས་ཅན་ཉིན་མོའི་སྐར་མ་ཙམ་ཡིན་ཞིང་། འདི་ཐམས་ཅད་ཕྱིན་ཅི་མ་ལོག་པར་སྒྲུབ་པ་ལ། ཡོན་ཏན་བཞི་སྒྲུབ་པ་དང་། ཆགས་བདུན་སྤོང་བ་སོགས་གོང་གིི་སྦྱིན་པས་རིགས་འགྲེ་རྒྱུ་ཡིན། ཚུལ་ཁྲིམས་བསྲུངས་པའི་ཕན་ཡོན་ནི། གནས་སྐབས་ཚེ་འདིར་འགྱོད་མེད་ཡིད་བདེ་ཡིས་སེམས་རྣལ་དུ་ཕེབས་པ། ཤེས་རབ་གསུམ་གྱི་རྒྱུར་འགྱུར་བ། སྙན་གྲགས་ཕྱོགས་བཅུར་ཁྱབ་པ། ལྷ་དང་བཅས་པའི་མཆོད་གནས་སུ་འགྱུར་བ། ཚོགས་པའི་ནང་ནས་མཛེས་ཤིང་བརྗིད་པ་ལ་སོགས་པའི་ཡོན་ཏན་མང་བ་དང་། ཚེ་ཕྱི་མ་ལ་མཐོ་རིས་ཡོན་ཏན་བདུན་ལྡན་གྱི་སྐྱེ་བ་ལེན་པ་ཡིན་ལ། མཐོ་རིས་ཀྱི་ཡོན་ཏན་བདུན་ཞེས་པ་གང་ཡིན་ཞེ་ན། རིགས་བཟང་བ། གཟུགས་མཛེས་པ། ལོངས་སྤྱོད་ཆེ་བ། ཤེས་རབ་ཕུན་སུམ་ཚོགས་པ། ནད་མེད། ཚེ་རིང་བ། སྐལ་བ་བཟང་བ་སྟེ་དེ་རྣམས་ཡིན། འོག་ནས་ཀྱང་འཆད་འགྱུར་གྱི་བདེ་བ་ཅན་དུ་སྐྱེ་བའི་རྒྱུ་བཞི་བ་སྨོན་ལམ་རྣམ་དག་གིས་མཚམས་སྦྱར་བ། སྨོན་ལམ་འགྲུབ་དང་མི་འགྲུབ་ཀྱང་རྒྱུ་ཚུལ་ཁྲིམས་དག་དང་མི་དག་ལ་མང་ཆེ་བ་ཐུག་ཡོད་པ་ཡིན་ལ། ཚུལ་ཁྲིམས་བསྲུངས་པའི་མཐར་ཐུག་གི་ཕན་ཡོན་ནི། སངས་རྒྱས་པའི་གནས་སྐབས་ན་སྐུ་གསུང་ཐུགས་ཀྱི་འཕྲིན་ལས་ཡོངས་སུ་དག་ནས་སྲུང་བ་མེད་པ་རྣམ་གསུམ་ཐོབ་པར་བྱེད་པ་དེ་ལྟ་བུ་ཡིན། ༼༣༽ བཟོད་པའི་ཕར་ཕྱིན། ཕར་ཕྱིན་གསུམ་པ་བཟོད་པ་ནི། གཞན་གྱིས་གནོད་པ་བྱས་པ་ལ་སེམས་མི་འཁྲུགས་པ་དེ་བཟོད་པའི་མཚན་ཉིད་ཡིིན། དེ་ཡང་སྦྱོར་དངོས་རྗེས་གསུམ་གྱིས་ཟིན་ན་བཟོད་པའི་ཕར་ཕྱིན་ཏུ་འགྱུར་བ་གོང་ལྟར་ཡིན། བཟོད་པའི་མི་མཐུན་ཕྱོགས་ནི་ཁོང་ཁྲོ་ཡིན་ལ། དེས་གནོད་ཅི་ཞིག་བྱེད་ཀྱིན་ཡོད་ཅེ་ན། ཚེ་འདིར་ཞེ་སྡང་ཅན་ལ་དགའ་དུས་སྐྱིད་དུས་ཤིག་ཡོང་རྒྱུ་མེད་ཅིང་། དེའི་སྟོབས་ཀྱིས་ལུས་མི་བདེ་སྙིང་ནད་ལ་སོགས་པའི་ན་ཚ་བསྐྱེད། རང་སྡུག་རོགས་ཀྱིས་སྨད་ས། མི་བཟེ་རེ་ཅན་མིག་གིས་མ་རིག་ན་བསམ་རྒྱུར་འགྱུར་འགྲོ་བ་ཡིན། མི་གཤིས་ངན་ཚེ་འདི་ཕྱི་གཉིས་ཀར་སྡུག་ཅིང་། ཆོས་སྒྲུབ་ན་ཆོས་གྲོགས་དང་མི་འཐད། ཁྱིམ་ལ་བསྡད་ན་ཁྱིམ་བཟའ་ཚང་དང་མི་འགྲིག ཉི་མ་ཁ་ཤས་ལ་ཁ་འདྲིས་མེད་པར་འགྱུར་འགྲོ་བ། བར་ཞིག་བུ་ཚ་བོས་བར་འདུམ་བྱེད་དགོས་ཐུག་པ་དེ་ལྟར་འགྱུར་འགྲོ་བ་ཡིན། གསོན་ཚེ་འཛིང་འཛིང་། འཐབ་འཐབ། དགའ་དགའ་སྐྱིད་སྐྱིད་ཉིན་གཅིག་ལ་ཡོད་མ་མྱོང་བ་དེ་ཉིད་ཤི་དུས་ངུ་ཁུལ་བྱས་དུས་འཕྱིས་སོང་བ་ཡིན་པས་ཞེ་སྡང་འདི་རྒན་གཞོན་ཚང་མས་སྤང་དགོས། དེ་སྤོངས་དང་ཞེ་སྡང་ཁོང་ཁྲོ་མེད་པའི་ཁྱིམ་ཚང་སྐྱིད་པོ་ཡིན་ལ། ཞེ་སེམས་མཐུན་པའི་སྡེ་བ་དེ་སྐྱིད་པོ་ཡིན། དེ་བཟང་འདུག་བསམས་ནས་ཡུལ་ཁམས་མང་པོ་ལ་དེ་བཞིན་དུ་ཁྱབ་སྤེལ་སོང་ན་འཇིག་རྟེན་བདེ་བའི་གཞི་མཆོག་ཏུ་གྱུར་པ་དེ་ཡིན། ཁྱད་པར་དེང་སང་མི་རིགས་ཀྱི་ལ་རྒྱ་ཤ་ཞེན་ཡོད་ཟེར་མཁན་མང་དུས་ཡིན་ཞིང་། ལ་རྒྱའི་རྩ་བ་དེ་གང་ཡིན་ཟེར་ན། རང་རིགས་སུ་གཏོགས་ཚད་པོ་ཐམས་ཅད་ཡོན་ཏན་ལྡན་པར་བྱ་བ་དང་། གཤིས་བཟང་ཡ་རབས་ཀྱི་སྤྱོད་པ་ཅན་དུ་སྒྱུར་བ། མཐུན་སྒྲིལ་བྱེད་པ་དེ་རྣམས་རྩ་བའི་གནད་ལ་ཐུག་ཡོད་པས་ཞེ་སྡང་། ཁོང་ཁྲོ། ང་རྒྱལ། ཕྱོགས་རིས། དེ་ཚོ་དང་འབྲེལ་བའི་ཟུར་ཟ། ངན་བཤད་སོགས་སྤོང་བ་དེ་ཉིད་རང་བདེ་གཞན་བདེའི་ཐར་ལམ་ཉག་གཅིག་ལ་ཐུག་ཡོད། དེ་ལྟར་ན་ལྷག་བསམ་ཅན་གྱི་མི་ཡིས་རང་རྩ་ནས་དང་པོར་འགོ་བཟུང་སྟེ་ལག་ལེན་ལ་གཏུགས་ནས་གཞན་ལ་དེ་བཞིན་དུ་ཡང་ཕར་བཤད་ན་དོན་སྤྱོད་དོན་མཐུན་ཞེས་པ་དེ་ཉིད་ཡིན་པས་བཤད་པ་བརྒྱ་བས་བལྟས་པ་གཅིག་གིས་གསལ་ཆེ་བ་ཡིན། ཞེ་སྡང་སྤོང་བའི་གཉེན་པོ་ལ་བསམ་ན། ཞེ་སྡང་སྐྱེ་བའི་རྒྱུ་ནི་ཡིད་མི་བདེ་བ་ཡིན་ཞིང་། དེའི་གཉེན་པོ་དེ་ལ། གཞན་ལ་ཕར་ཞེ་སྡང་སྐྱེས་ན་གནོད་པ་རང་ལ་ཚུར་འཁོར་གྱིན་ཡོད་འདུག་བསམ་རྒྱུ་དེ་ཉིད་ཡིན་ལ། རང་གིས་རང་ལ་ངར་བསླངས་ནས་ཞེ་སྡང་སློང་མི་ཉན། ཞེ་སྡང་གི་གཉེན་པོར་བཟོད་པ་བསྟེན་པ་ཡིན། འདི་ལ་སྡུག་བསྔལ་དང་དུ་ལེན་པའི་བཟོད་པ་དང་། ཆོས་ལ་ངེས་པར་སེམས་དཔའི་བཟོད་པ། གནོད་བྱེད་ལ་ཅི་མི་སྙམ་པའི་བཟོད་པ་གསུམ་གྱི་དབྱེ་བའི་སྟེང་ནས་གསུང་སྲོལ་ཡོད། སྔོན་མ་གཉིས་ཀ་གཙོ་བོ་ཆོས་སྒྲུབ་པའི་སྐབས་དང་ཆོས་ལ་སེམས་དཔའི་སྐབས་དང་འབྲེལ་ཆེ་ལ། ཆོས་ཕྱིར་དཀའ་སྤྱད་ཀྱི་བཟོད་པ་ནི། སྔར་སངས་རྒྱས་བྱང་སེམས་ཚོའི་རྣམ་ཐར་ལ་བལྟས་ན་དཀའ་བ་ཅི་བྱུང་བཟོད་མ་ཐུབ་དུས་གཞན་དོན་དུ་སངས་རྒྱས་འགྲུབ་པ་མ་ཡིན་གསུངས་ནས་དཀའ་ཐུབ་དང་བཟོད་བསྲན་བྱེད་པ་སྡུག་བསྔལ་དང་ལེན་གྱི་བཟོད་པ་ཡིན། ཆོས་ལ་ངེས་སེམས་ཀྱི་བཟོད་པ་ནི། ང་ལ་ཕ་རོལ་པོས་དོན་དག་མེད་ས་ནས་གནོད་པ་འདི་ལྟ་བུ་བྱེད་འདུག་ཀྱང་མེའི་རང་བཞིན་ཚ་བ་ཡིན་ལ་ཆུའི་རང་བཞིན་གཤེར་བ་ཡིན་ཞིང་འཁོར་བའི་སེམས་ཅན་གྱི་རང་བཞིན་དེ་མི་སྲུན་པ་ཡིན་པས་ཁྲོ་བ་བྱེད་རྒྱུ་མེད་བསམ་པ་དང་། དེ་མིན་ཀྱང་རང་གི་ལས་ངན་ལ་བརྟགས་ཤིང་དཔྱད་པ་བྱས་ན། སྔར་ཕར་གནོད་པ་བྱས་ནས་གནོད་ལན་ཚུར་འཁོར་བ་ཡིན་བསམས་ནས་ལས་འབྲས་ཡིད་ཆེས་ཀུན་རྫོབ་ཀྱི་ཆོས་དྲན་ནས་ཁྲོ་བ་ལྡོག་ཐབས་བྱེད་པ་དང་། དོན་དམ་པར་གནོད་བྱའི་བདག་ཅེས་པ་ཞིག་ཀྱང་མེད་ལ། གནོད་བྱེད་ཀྱི་དགྲ་ཞེས་པ་ཞིག་ཀྱང་མེད། དེ་གཉིས་ཀའི་བར་ན་གནོད་པ་ཞེས་པ་ཞིག་ཀྱང་མ་གྲུབ་པ་དེ་ཉིད་ཤེས་པར་བྱས་ནས་སྤྲོས་བྲལ་གྱི་ངང་ནས་ཁྲོ་བ་ཞི་ཐབས་དེ་ལྟར་བྱེད་དགོས། ཁྱིམ་ན་གནས་པའི་སྐྱེ་བོ་ཕོ་མོས་ཁྱད་པར་དུ་བཟོད་པ་སྒོམ་ལུགས་གསུམ་པ་གནོད་བྱེད་ལ་ཇི་མི་སྙམ་པའི་བཟོད་པ་སྒོམ་ལུགས་འདི་ལ་ནན་ཏན་གྱིས་སྦྱོང་དགོས། འདི་ཡུལ་དང་། དུས་དང་། རང་བཞིན་གསུམ་གྱི་སྒོ་ནས་བཤད་ན། དང་པོའི་སྐབས་སུ་བཟོད་པ་བསྒོམ་སའི་ཡུལ་དེ་རང་ཉིད་ཆེས་ཤིན་ཏུ་དགའ་ས་ཞིག་གཅེས་ཤ་དམར་ཐང་ཆེ་སའི་མི་གཉེན་བཤེས་ལ་བཟོད་པ་བསྒོམ་དགོས། དེ་འཕྲོས་ངོ་ཤེས་གྲོགས་པོར་བསྒོམ། དེ་འཕྲོས་བཏང་སྙོམས་པ་རྣམས་ལ་བསྒོམ། མཐར་དགྲ་ལ་ཡང་བཟོད་པ་བསྒོམ་ཐུབ་པ་ཞིག་ལ་བསླབས་ནས་སྦྱང་དགོས། དུས་ཀྱི་ཐད་ནས་བཤད་ན། དང་པོར་ཞེ་ཆོད་བྱས། གོང་ནས་བཤད་པ་ལྟ་བུ་དེ་རིང་ཉིན་ཕྱེད་ཆུ་ཚོད་འདིའི་ཐོག་ལ་མ་ཐོན་གྱི་བར་དུ་ང་ལ་སུས་གནོད་པ་བྱས་ཀྱང་བཟོད་པ་སྒོམ་པ་ཡིན། བཟོད་པ་དེ་སྒོམ་མ་ཐུབ་ན་ང་མིན་བསམས་ནས་རང་གིས་ཕྱིར་མི་ལྡོག་པའི་ཕྱིར་དུ་མནའ་བསྐྱལ་ན་ཆོག དེ་བཞིན་དུ་དུས་ཐོག་ལ་མ་ཐོན་གྱི་བར་བཟོད་པ་བསྒོམ། འདི་ཁྱིམ་པ་ལ་གཙོ་བོར་བཤད་པ་ཡིན་ལ། རབ་ཏུ་བྱུང་བས་མནའ་བསྐྱལ་མི་ཉན་པ་སངས་རྒྱས་ཀྱིས་གསུངས་ཡོད་པས་བསྐྱལ་ཅི་ལ་བསྐྱལ། རབ་བྱུང་ཞིག་ཡིན་ན་དུས་བཀག་གིས་བཅད་ནས་བཟོད་པ་སྒོམ་དུས་དཀོན་མཆོག་གསུམ་གྱི་དྲུང་ནས་དམ་བཅའ་བྱས་ནས་བཟོད་པ་བསྒོམ། སྔ་ཕྱི་དྲོའི་ཉིན་ཕྱེད་རེ་ལ་བཟོད་པ་བསྒོམ་རྒྱུ་བྱང་སོང་དུས་རིམ་གྱིས་དེ་ནས་ཉི་མ་གཅིག ཞག་གཅིག ཞག་གཉིས། གཟའ་འཁོར་རེ་དང་། ཟླ་ཕྱེད། ཟླ་བ་གཅིག ལོ་གཅིག་ལ་སོགས་པའི་དུས་ཚོད་ཇེ་རིང་དུ་དེ་ལྟར་བྱས་ཏེ་བཟོད་པ་སྒོམ་པ་སྦྱང་དགོས། དེ་ལྟར་བྱས་ཏེ་སྦྱངས་ཤིང་བསྒོམས་ནས་གོམས་སོང་ན་ཇེ་སླར་འགྱུར་མི་འགྲོ་བ་ཞིག་མེད། ཚེ་འདིར་རང་མི་སྐྱིད། རོགས་མི་བདེ། ཕྱི་ནང་གཉིས་ཀ་ལ་འཁོན་འཁྲུགས་སྐྱེད་བྱེད། ཕྱི་མ་མི་སྐྱིད་དམྱལ་བ་སྐྱེ་བྱེད་ཕལ་ཆེ་བ་ཞེ་སྡང་འདི་ཡིན། དེ་ལྟར་ཡིན་འདུག་བསམས་ནས་རང་གར་བསྡད་ན་ཆོག་པ་མ་ཡིན་ཞིང་། གཉེན་པོ་བསྟེན་ནས་མེད་ཐབས་བྱེད་དགོས། བཟོད་པའི་རང་བཞིན་ལ་བསམ་པ་ནི། སེམས་ཅན་ཐམས་ཅད་མ་ཉིད་ཡིན་ལ། མས་གནོད་པ་བྱས་ན་གནོད་ལན་ཕར་བྱེད་མི་ཉན་ལ། དེ་བསམས་ནས་སྦྱང་དགོས། བཟོད་པ་བསྒོམས་ན་ཕན་ཡོན་ཤིན་ཏུ་ཆེ། དེ་བསྒོམ་ས་མེད་ན་ཇི་ལྟར་སྐྱེ། བཟོད་པའི་ཕར་ཕྱིན་རྫོགས་བྱེད་དགྲའི་བཀའ་དྲིན་ཡིན་ལ། ལས་ངན་འཛད་པའི་རྐྱེན་ཡང་དེ་ཡིན། དེ་ཡིན་དུས་དགྲ་དེ་ཡིས་ང་ལ་ཕན་བཏགས་སོང་། མི་ཡུལ་གྱི་སྡུག་བསྔལ་དང་མི་འདོད་པ་འདི་ཚོས་ཕྱི་མར་དམྱལ་བ་སྐྱེ་བའི་སྡུག་བསྔལ་གྱི་གོ་ཆོད་པ་ཡིན་བསམས་ནས་དགའ་བ་བསྒོམ། གནོད་ས་དེའི་སྟེང་ལ་བཟོད་པ་སྒོམ་པ་དེ་སྦྱོར་དངོས་རྗེས་གསུམ་གྱིས་ཟིན་པར་གྱིས་དང་གནོད་པས་ཚུགས་པ་མེད་པའི་སྟེང་དུ་ཆོས་སྒྲུབ་པའི་མཐུན་རྐྱེན་དུ་གྱུར་ནས་ལུས་བདེ། སེམས་བདེ། མི་བདེ་མི་སྐྱིད་པའི་དུས་ཡོད་པ་མ་ཡིན། ཁྱད་པར་དུ་འུ་ཚོ་ཁམས་རིགས་ཀྱི་མི་འདི་གདུག་རྩུབ་ཆེ་འདུག དེ་ཡིན་དུས་རྨོངས་པ་མ་རིག་པའི་གཞན་དབང་དུ་གྱུར་སོང་བས་ཡིན་ལ། དེ་ཡིན་ཕྱིར་མ་རིག་པ་དུག་གསུམ་གྱི་ཁྱབ་བྱེད་དང་། ཁྱད་པར་དུ་ཞེ་སྡང་གི་དབང་གིས་ཤ་ཕུ་ནུ་རུས་མཐུན་ཡུལ་སྡེ་གཅིག་གི་མི་དོན་ཆུང་བཤད་རིན་མེད་ས་ཞིག་གིས་དོན་དག་ཆུང་ཆུང་ཞིག་ལ་བརྟེན་ནས་སྲོག་ལ་འཚེ་བ་བྱེད་པ་དེ་ཚོ་མི་ཆོས་ལས་འདས་པའི་བྱ་བ་ཐབས་སྡུག་ཡིན། བཟོད་པ་ཕྱིན་ཅི་མ་ལོག་པར་སྒྲུབ་པ་ལ། ཡོན་ཏན་བཞི་སྒྲུབ། ཆགས་བདུན་སྤོང་བ་གོང་དང་རིགས་འདྲ་གཅིག་པ་ཡིན། བཟོད་པ་བསྒོམས་པའི་ཕན་ཡོན་གོང་ནས་ཀྱང་བཤད་ཀྱང་གནས་སྐབས་ཚེ་འདི་ལ་གནོད་པའི་བསམ་སྦྱོར་ཞི་བས་ན་ལུས་བདེ་སེམས་སྐྱིད། སུས་སུ་ལ་གནོད་ལན་སྤྲོད་པ་མེད་ནས་དགྲ་ཐམས་ཅད་རང་ཞིར་འགྱུར་འགྲོ་བ་ཡིན། ཚེ་ཕྱི་མར་འཇིགས་སྐྲག་མི་འབྱུང་བ་ལ་སོགས་པའི་ཕན་ཡོན་དང་། མཐར་ཐུག་ལ་མཚན་དང་དཔེ་བྱད་ཐོབ་ནས་ཐམས་ཅད་ཀྱིས་ཡིད་འཕྲོག་པའི་སྐུ་དང་། གསུང་། ཐུགས་ཐོབ་པར་དེ་ལྟར་གསུངས་ཡོད། འདི་ལ་རྒྱུ་འགྲོ་ཟས་ཚེགས་གཏོང་མི་དགོས་ཤིང་། འདི་དབང་ཆེན་རྒྱུ་ཆེན་ཚོས་བླངས་སོང་དུས་ང་ལ་དེའི་སྐལ་མི་ཐོབ་བསམ་མི་དགོས་ལ། འདི་ཚོ་ཤེས་མི་ཤེས་སྙིང་རུས་ཆེ་ཆུང་ལ་ཐུག་ཡོད་པ་ཡིན། ཕར་ཕྱིན་དྲུག་གི་ནང་ནས་གདུལ་བྱ་ཁྱིམ་པ་ལ་སྦྱིན་པ་བཟོད་པ་གཉིས་ཀ་གནད་ཆེ། དེ་ཡིས་ཞིབ་ཆ་བྱས་ནས་མང་ཆེ་བ་སྐྱབས་གསུམ་འཛིན་པའི་དགེ་བསྙེན། དེའི་སྟེང་དུ་བྱང་སྡོམ་བླངས་པ་ཡང་མང་པོ་ཡིན་ཕྱིར་ཚུལ་ཁྲིམས་ཀྱི་སྐོར་ལ་ཞིབ་ཀྱིས་བཤད་པ་ཡིན། ཕར་ཕྱིན་དྲུག་བསླབ་པ་གསུམ་གྱིས་བསྡུས་པའི་ཚུལ་དང་སྦྱར་ན། ཕར་ཕྱིན་དང་པོ་གསུམ་དེ་ཚུལ་ཁྲིམས་ཀྱིས་བསྡུས་ཤིང་། ཇི་ལྟར་བསྡུས་པ་ཡིན་ཞེ་ན། སྦྱིན་པ་རྒྱུ། ཚུལ་ཁྲིམས་ངོ་བོ། བཟོད་པ་ཁྱད་པར་ཡིན་ལ། དེའི་ཕྱིར་ན་འདི་གསུམ་པོ་འབྲེལ་ཆེ་བ་ཡིན། ཕར་ཕྱིན་ལྷག་མ་གཞན་གསུམ་པོ་གནད་ཆེ་ཞིང་། རབ་བྱུང་ལ་ཚུལ་ཁྲིམས་དང་བསམ་གཏན་གཉིས་ཀ་གནད་ཆེ་བ་དང་། བརྩོན་འགྲུས་ཤེས་རབ་གཉིས་ཀ་ཐུན་མོང་གི་གནད་ཆེན་ཡིན་ཡང་འུ་ཚོའི་དུས་སྐབས་ཀྱི་ཚོད་དང་བསྟུན་ནས་མགྱོགས་དལ་རན་པར་བྱས་ཏེ་འགྲོ་རྒྱུ་བྱེད་དགོས། ༼༤༽ བརྩོན་འགྲུས་ཀྱི་ཕར་ཕྱིན། ཕར་ཕྱིན་བཞི་བ་དེ་བརྩོན་འགྲུས་ཡིན་ཞིང་། བརྩོན་འགྲུས་དེ་ཇི་ལྟར་ཡིན་ཞེ་ན། བརྩོན་གང་དགེ་ལ་སྤྲོ་བའོ། །ཞེས་གསུངས་པ་ཡིན་པས་གཞན་གྱི་དོན་དུ་དགེ་བ་ལ་བརྩོན་པ་དེ་ཉིད་བརྩོན་འགྲུས་ཀྱི་མཚན་ཉིད་བཞག་ཆོག འདི་ལ་ཡང་དམ་པ་གསུམ་གྱིས་ཟིན་ན་བརྩོན་འགྲུས་ཀྱི་ཕར་ཕྱིན་ཏུ་འགྲོ། འདིའི་མི་མཐུན་ཕྱོགས་ལེ་ལོ་ཡིན་ལ། ལེ་ལོས་ཆོས་འཇིག་རྟེན་གཉིས་ཀྱི་དོན་མི་འགྲུབ། ཚེ་འདི་ལ་སྡུག ཕྱི་མ་ལ་སྡུག ལེ་ལོའི་ནང་གི་བྱ་བ་ངན་ཞེན་གྱི་ལེ་ལོ་ཡིས་བྱ་བ་ངན་པའམ་དམན་པ་འཇིག་རྟེན་གྱི་བྱ་བར་ཞུགས་ནས་འདི་ཕྱིའི་དོན་ཆེན་ཐམས་ཅད་ཤོར་འགྲོ་བ་དང་། སྒྱིད་ལུག་བདག་ཉིད་བརྙས་པ་ངས་ཅི་འགྲུབ་བསམས་ནས་ནུས་མེད་བྱས་ཏེ་སྡོད་པ། སྙོམ་ལས་གཉིད་དང་གཡེང་བ་སོགས་ཀྱིས་མི་ཚེ་ཆེ་ཆོད་ཆུང་ཆོད་བྱེད་པ། དེ་རྣམས་གང་ནས་ཡོང་བ་ཡིན་ཞེ་ན། འཁོར་བའི་སྡུག་བསྔལ་མ་ཤེས་པའི་སྐྱོན་གྱིས་ཡོང་བ་ཡིན། འཁོར་བའི་ཉེས་དམིགས་བསམས་པས་ལེ་ལོའི་རྒྱུ་ལྡོག་པ་ཡིན། སྤྱོད་ཡུལ་ཡོངས་སུ་དག་པའི་མདོ་སྡེ་ཚོའི་ནང་ནས་གསུངས་པ་ལྟར་སྒྲིབ་པ་ཕུན་ཚོགས་རང་གཞན་དོན་གཉིས་མཉམ་སྒྲུབ། བྱང་ཆུབ་སེམས་དཔའི་གཞན་དོན་གཙོ་བོ་བྱེད་ཞོར་དུ་རང་དོན་ཞོར་འབྱུང་དུ་འགྲུབ་པས་ལེ་ལོའི་འབྲས་བུ་ལྡོག་པས་བརྩོན་པ་བསྐྱེད་དགོས། བརྩོན་འགྲུས་ཕྱིན་ཅི་མ་ལོག་པ་ཡོན་ཏན་བཞི་སྒྲུབ་པ་དང་། ཆགས་བདུན་སྤོང་བ་ཡང་སྔར་བཞིན་ཡིན། བརྩོན་འགྲུས་བརྩམས་པའི་ཕན་ཡོན་ལ་བསམ་བློ་བཏང་ན། གནས་སྐབས་ཚེ་འདིར་ཡོན་ཏན་མང་པོ་ཐོབ་ཅིང་། ཕྱི་མར་དགེ་རྩ་གོང་ནས་གོང་དུ་འཕེལ་བ། མཐར་ཐུག་མངོན་པར་རྫོགས་པར་སངས་རྒྱས་པ་ན་སེམས་ཅན་གྱི་དོན་དུ་ཕྲིན་ལས་ཐོགས་མེད་ཀྱི་ཡོན་ཏན་དེ་བརྩོན་འགྲུས་འདི་ཉིད་ཀྱིས་འགྲུབ་པར་བྱེད་དགོས། དེ་ཡིས་སྦྱིན་པ་ཚུལ་ཁྲིམས་བཟོད་པ་བརྩོན་འགྲུས་བཞི་སོང་ཟིན་པ་ཡིན། ༼༥༽ བསམ་གཏན་གྱི་ཕར་ཕྱིན། ཕར་ཕྱིན་ལྔ་བ་བསམ་གཏན་ནི། རྫོགས་པའི་སངས་རྒྱས་ཀྱི་དོན་དུ་མཉམ་པར་འཇོག་པ་དེ་བསམ་གཏན་གྱི་མཚན་ཉིད་ཡིན། བསམ་གཏན་དེ་ཉིད་སྦྱོར་དངོས་རྗེས་གསུམ་གྱིས་ཟིན་ན་བསམ་གཏན་གྱི་ཕ་རོལ་ཏུ་ཕྱིན་པར་འགྱུར་ཞིང་། བསམ་གཏན་གྱི་མི་མཐུན་ཕྱོགས་འགལ་ཟླར་གྱུར་པ་དེ་གང་ཡིན་ཞེ་ན། སེམས་དམིགས་པ་ལ་རྩེ་གཅིག་ཏུ་འཇོག་མི་ནུས་པ་དེ་ཉིད་དང་། ནུས་ཀྱང་མུ་སྟེགས་པའི་བསམ་གཏན་ལྟར་ཕྱིན་ཅི་ལོག་ཏུ་གྱུར་སོང་བ། ཕྱིན་ཅི་མ་ལོག་ཀྱང་མྱང་འདས་ཞི་བ་ཕྱོགས་གཅིག་པ་དང་ཁམས་གོང་མའི་རྒྱུར་གྱུར་པ་དེ་དག་ཡིན། དེ་རྣམས་ཀྱི་ཉེས་པ་ཚེ་འདི་ལ་རྣམ་གཡེང་གི་དབང་དུ་ཤོར་བ། རྣམ་གཡེང་གི་དབང་དུ་སོང་ན། སེམས་ནི་རྣམ་པར་གཡེང་བའི་མི། །ཉོན་མོངས་མཆེ་བའི་ཕྲག་ན་གནས། །ཞེས་གསུངས་པས། རང་སྡུག གཞན་སྡུག་ལ་སྦྱོར་ཞིང་། ཤི་དུས་འགྱོད་པ་དང་བཅས་ཏེ་ཤི་དགོས་ཐུག་པ་ཡིན། རྣམ་གཡེང་ཅན་གྱི་མི་དེ་ཡིས་ལས་རྒྱུ་མི་དགེ་བ་ཤ་སྟག་ཡིན་པས་དེའི་དབང་གིས་ཤི་ཁར་གནད་གཅོད་མྱོང་། ཚེ་ཕྱི་མ་ལ་ངན་སོང་ལ་སྐྱེས་ནས་སྡུག་བསྔལ་མྱོང་། མ་དག་པའི་སྒོམ་བརྒྱབ་ན་དེའི་སྒོམ་དེས་ལམ་ཕྱིན་ཅི་ལོག་ཏུ་གྱུར་པ་སྟེ། གནའ་སྔོན་མ་ལྷག་སྤྱོད་ཅེས་པ་དེ་ཉིད་ཀྱིས་ལོ་བཅུ་གཉིས་ལ་སྟོང་ཉིད་བསྒོམས་ནས་མཉམ་པར་བཞག་ཀྱང་མཐར་བྱི་ལ་ཞིག་གི་སྐྱེ་བ་བླངས་སོང་བ་ཡིན། དེ་མིན་ཡང་བྱམས་སྙིང་རྗེ་འབའ་ཞིག་གིས་འཁོར་བའི་རྩ་བ་ཆོད་པ་མ་ཡིན། དེར་མ་ཟད་སྟོང་ཉིད་ཕྱིན་ཅི་མ་ལོག་པ་སྒོམ་ཤེས་ཀྱང་ཐབས་མཁས་དང་མ་ལྡན་ན་ཉན་ཐོས་ཀྱི་འགོག་པར་གྱུར་ནས་སངས་རྒྱས་ཐུབ་པ་མ་ཡིན། དེས་ན་ཐབས་ཁྱད་པར་ཅན་དང་འབྲེལ་ན་བསམ་གཏན་ཡང་དག་པར་གྱུར་པ་ཡིན། དེའི་བསམ་གཏན་དེ་ཡང་དག་པར་མི་འགྱུར་བའི་དགྲ་གང་ཡིན་ཞེ་ན། རྣམ་གཡེང་ཡིན་ལ། རྣམ་གཡེང་དེའི་རྒྱུ་སེམས་ཅན་ལ་ཆགས་པ་དང་། ལོངས་སྤྱོད་ལ་ཆགས་པ་གཉིས་ཀྱི་ཁོངས་ནས་འབྱུང་བ་ཡིན། དེའི་ཆགས་པ་དེ་གཉིས་ཀ་སྤངས་ཏེ་དབེན་པའི་ཡོན་ཏན་དྲན་པར་བྱས་ནས་དབེན་པའི་གནས་ནས་བསམ་གཏན་སྒོམ་དགོས། ཁྱིམ་བཟའ་ཚང་། གྲོགས་དགའ་མཛའ། གཉེན་ཉེ་འབྲེལ། ཡུལ་འཁོར། ཁྱིམ་མཚེས་རྣམས་ལ་ཆགས་ཁུལ་བྱེད་ཀྱང་སེམས་ཅན་ཞིག་ཡིན་དུས་སྐྱོན་གྱི་རང་བཞིན་སྐྱོན་གྱི་གོང་བུ་ཞིག་ཡིན། དེ་རྣམས་ཨེ་མགུ་ལྟ་ཁུལ་བྱས་ཀྱང་མགུ་ཐུབ་པ་མ་ཡིན། ཅིའི་ཕྱིར་ཞེ་ན། རྒྱལ་སྲས་ཞི་བ་ལྷས། རྒྱལ་བས་ཀྱང་ནི་མ་མགུ་ན། །བདག་འདྲ་ངན་པས་སྨོས་ཅི་དགོས། །ཞེས་གསུངས་ལ། སངས་རྒྱས་ཀྱིས་ཇི་ལྟར་མ་མགུ་བ་ཡིན་ཞེ་ན། ལྷས་བྱིན་མ་ཞུ་བའི་ནད་དུ་གྱུར་ནས་ན་སོང་བ་ཡིན་ལ། དེའི་མ་ཞུ་བའི་ནད་དེ་ཡིས་ཤི་ལ་ཉེ་དུས་བཅོམ་ལྡན་འདས་ཀྱིས་བདེན་པའི་བྱིན་རླབས་ཀྱིས་བྱིན་རླབས་མཛད་ནས་ཡར་གསོས་པ་ཡིན། ལྷས་བྱིན་ན་བ་ཡར་དྲག་ཚར་དུས་དགེ་སྦྱོང་གོ་ཏ་མས་སྨན་འདྲ་ཞིག་ཤེས་ཁུལ་བྱེད་འདུག རྒས་དུས་འཚོ་བ་ལ་དཀའ་ངལ་ཡོང་ས་མི་འདུག་ཅེས་སྨྲས་པ་ཡིན། དགེ་སློང་ལེགས་པའི་སྐར་མ་ཞེས་པ་དད་ལོག་ཅན་ཞིག་ཡོད་པ་ཡིན། དེས་བཅོམ་ལྡན་འདས་ལ་ཁོ་རང་གིས་གནོད་སེམས་བྱས་ནས་ཞུས་པར། འཇིག་རྟེན་འདིའི་ཐོག་ཏུ་མུ་སྟེགས་གཅེར་བུ་པའི་སྟོན་པ་མ་གཏོགས་མངོན་ཤེས་ཅན་ཞིག་མི་འདུག་ཅེས་སྨྲས་པ་ཡིན། བཅོམ་ལྡན་འདས་ཀྱིས་ཁྱོད་ཀྱི་སྟོན་པ་མངོན་ཤེས་ཅན་ཞག་མ་བདུན་གྱི་མཚམས་ནས་མ་ཞུ་བའི་ནད་ཀྱིས་ཤི་འགྲོ་ས་འདུག་ཅེས་གསུངས་པ་ལ། ཁོ་རང་དེ་ཡོད་ས་ལ་སོང་ནས་ཁྱོད་ཀྱིས་ཟ་རྒྱུ་ལ་ཚོད་ཟུངས། གཟབ་གཟབ་གྱིས་མ་གཏོགས། དགེ་སྦྱོང་གོ་ཏ་མས་ཁྱོད་ཞག་མ་བདུན་གྱིས་འཆི་བར་འགྱུར་ཞེས་བཤད་འདུག་ཅེས་སྨྲས་པ་དང་། དེས་ཞག་མ་དྲུག་ལ་ཟས་བཅད་བྱས་ནས་གཅིག་ཀྱང་མ་ཟོས་ནས་བསྡད་པ་ཡིན་ཞིང་གཅིག་ཀྱང་ཟ་མ་ཕོད་ལ། ཞག་བདུན་པ་རྩི་ནོར་བྱས་ནས་ཞག་བརྒྱད་པ་ཡིན་སྙམ་ནས་བུ་རམ་གྱི་དབུ་བ་ཞིག་ཟོས་པ་དང་། དེ་ཟོས་པས་མ་ཞུ་བའི་ནད་རྐྱེན་བྱས་ནས་ཤི་སོང་བར་མ་ཟད་སྐྱུག་པ་ཟ་བའི་ཡི་དྭགས་ལ་སྐྱེ་སོང་བ་ཡིན། དེའི་ཡི་དྭགས་དེ་དགེ་སློང་ལེགས་པའི་སྐར་མའི་ཟུར་ལ་ཐོན་ཡོང་ནས་བཅོམ་ལྡན་འདས་ནི་ཐམས་ཅད་མཁྱེན་པ་ཐམས་ཅད་གཟིགས་པ་ངོ་མར་གྱུར་འདུག་པས་ཁོ་བོས་དེ་སྔོན་མ་དད་པར་བྱས་པ་དེ་ཉིད་ལ་འགྱོད་པ་སྐྱེས་སོང་། ཁྱོད་ཀྱིས་དད་པ་ཞོག་ཅེས་སྨྲས་པ་ལ། ལེགས་པའི་སྐར་མས་གོ་ཏ་མ་ཡོན་ཏན་དེ་ལྟ་བུ་གཅིག་ཀྱང་མེད། བཤད་མི་དགོས་ཞེས་སྨྲས་པ་དང་། དེ་ནས་དགེ་སློང་ལེགས་པའི་སྐར་མ་བཅོམ་ལྡན་འདས་ཀྱི་མདུན་ལ་སོང་ནས་ཁྱོད་ཀྱིས་མུ་སྟེགས་པའི་སྟོན་པ་ཞག་མ་བདུན་གྱིས་ཤི་འགྲོ་ཞེས་སྨྲས་ཀྱང་ཁོ་ཤི་མི་འདུག་ཅེས་བཤད་པ་ལ། བཅོམ་ལྡན་འདས་ཀྱིས་ཤི་ནས་ཁྱོད་དང་ཐུག་པ་དེ་ཉིད་མ་ཤེས་སམ་ཞེས་གསུངས་པ་དང་། ལེགས་སྐར་གྱིས་དེ་ནི་ཤེས་ཀྱང་ཁོ་རང་ལྷ་ཡུལ་ལ་སྐྱེས་འདུག་ཅེས་བཤད་པ་ལ། བཅོམ་ལྡན་འདས་ཀྱིས་སྐྱུག་པ་ཟ་བའི་ཡི་དྭགས་ལ་སྐྱེས་ནས་ཁྱོད་དང་ཁ་བརྡ་བྱས་པ་དེ་ཉིད་མི་དྲན་ནམ་ཞེས་གསུངས་པ་དང་། དེ་ནས་ཁོ་རང་ཅི་ཟེར་འདི་ཟེར་མེད་ནས་ཁ་འཁོར་ཏེ་བརྒྱུགས་སོང་བ་ཡིན། སེམས་ཅན་ཞེས་པ་འདི་ཉིད་སུ་ཡིན་ཡང་རང་ཕར་བརྒྱབ་ས། རོགས་ཚུར་བརྒྱབ་ས་ཚང་མ་དེ་ལྟར་ཡིན། སྙིང་རྗེའི་ཡུལ་ཡིན་ཡང་ཆགས་ཞེན་བྱེད་ཆོག་ས་ཞིག་མ་ཡིན་པར་ཤེས་དགོས། ལོངས་སྤྱོད་ཅེས་པ་འདི་ཉིད་དེ་བཞིན་དུ་དང་པོ་བསགས་དུས། བར་དུ་སྲུང་དུས། ཐ་མ་བརླག་ཤོར་དོགས་ཀྱི་དུས་ལ་སོགས་པ་འདིས་སྡུག་བསྔལ་མི་བསྐྱེད་པའི་དུས་ཤིག་དང་། འདིས་སྡུག་མི་གཏད་པའི་རིམ་པ་ཞིག་ནམ་ཡོད། ནོར་བས་ན་ནོར་ཏེ་ལམ་ནོར་ལ་ཁྲིད་བྱེད་ཡིན་པས་ནོར་ཞེས་མིང་དང་དོན་མཐུན་པ་ཡིན་ཞེས་བཀའ་གདམས་པའི་དགེ་བའི་བཤེས་གཉེན་རྣམས་ཀྱིས་གསུངས་པ་ལྟར་ཡིན། ཁྱིམ་ན་གནས་པ་དབེན་པའི་རི་ཁྲོད་ལ་འགོས་ནས་གཅིག་པུར་བསམ་གཏན་སྒོམ་པའི་མཐུན་རྐྱེན་ཚོགས་པ་དཀོན་ཡང་ནང་སེམས་ཅན་དང་ཕྱིའི་ལོངས་སྤྱོད་ཀྱི་ཆགས་ཞེན་སྤོང་ཐུབ་པ། མིན་ཡང་ཆགས་ཞེན་མ་ཆེ་ན་ས་གང་ལ་བསྡད་ཀྱང་དབེན་པའི་ཡོན་ཏན་ཕལ་ཆེ་བ་འགྲུབ་ཡོད་པ་ཡིན། དེས་གཡེང་བའི་རྒྱུ་ཆགས་ཞེན་སྤོང་དགོས་ལུགས་ཤེས་དུས་འབྲས་བུ་གཡེང་བ་ཁོ་རང་གི་གཉེན་པོ་ལ་བསམ་གཏན་སྒོམ་དགོས། བསམ་གཏན་ཞེས་ཟེར་ཚད་བསམ་གཏན་མ་ཡིན་ཞིང་སྒོམ་ཞེས་ཟེར་ཚད་སྒོམ་མིན། འཇིག་རྟེན་པ་དང་ཐུན་མོང་གི་བསམ་གཏན། ཉན་ཐོས་དང་ཐུན་མོང་གི་སྒོམ། ཐེག་ཆེན་ཐུན་མོང་མ་ཡིན་པའི་བསམ་གཏན། དེ་ལ་ཡང་ནང་གསེས་ཀྱི་དབྱེ་བ་དང་བཅས་པ་མང་ལ། ཐུན་མོང་གི་ལམ་ལ་ཞུགས་ཏེ་ཐུན་མིན་གྱི་གནད་ཟིན་ན་བསམ་གཏན་གྱི་སྒོམ་སྐྱོན་མི་འབྱུང་། དེ་ལྟར་ན་ཡང་བསམ་གཏན་ཞེས་པའི་ངོ་བོ་དེ་ཅི་འདྲ་ཞིག་ཡིན་ཞེ་ན། དགེ་བའི་དམིགས་ཡུལ་གང་ཡང་རུང་བ་ཞིག་ལ་སེམས་རྩེ་གཅིག་ཏུ་འཛིན་པ་ཡིན། འདི་ནས་དག་པ་འཇིག་རྟེན་པའི་མཉམ་རྗེས་ངོ་བོ་གཅིག་པའི་ཞི་ལྷག་གི་ཐད་ནས་བཤད་ན། བསམ་གཏན་གྱི་ཁང་བུ་ལ་སེམས་མི་གཡོ་ནས་མཉམ་པར་བཞག་པའི་གནས་སྐབས་ལ་སྤྲོས་པའི་སྣང་བ་འདི་ཉིད་ནུབ་ནས་ཆོས་ཉིད་དུ་རོ་གཅིག་སོང་དུས་གླེན་པ་ཞིག་ལ་ཟེར་ཟེར་བྱས་ན་མིག་བཙུམ་བཏང་བ་ལྟ་བུ་ཞིག་དང་མིག་ཕྱེས་བཏང་བ་ལྟ་བུ་ཞིག་གི་ཆ་གཉིས་ལ་བཤད་ཆོག་རྒྱུ་ཞིག་དུས་མཉམ་དུ་ཡོང་བ་ཡིན། མཉམ་བཞག་མི་གཡོ་བ་དེའི་ངང་ནས་སྤྲོས་པའི་སྣང་བ་ཆོས་ཉིད་དུ་རོ་གཅིག་སོང་དུས་ཡུལ་སྣང་ལ་དེ་འཛིན་མེད་ལུགས་ལ་ལྟོས་ནས་མི་བཙུམ་བཞག་པ་ལྟ་བུ་དང་། དེའི་རང་དུས་དེ་ལ་སྣང་ཡུལ་མཐོང་བ་ཡིན་པས་ན་མིག་ཕྱེས་བཏང་བ་ལྟ་བུ་དེ་གཉིས་ཀ་བློ་གཅིག ངོ་བོ་གཅིག དུས་གཅིག་ལ་ཡོད་པར་མ་ཟད་དམིགས་པ་གཅིག་པ་ཡིན་པས་ན་སྒྲིབ་པ་སྤོང་བའི་བྱེད་ལས་སུ་ཡང་གཅིག་པ་ཡིན། དེ་ལྟར་ན་འདི་རྣམ་རྟོག་གིས་དག་ནས་གཟུང་འཛིན་གྱི་རྣམ་པ་མེད་པའི་མི་རྟོག་པའི་སེམས་དེས་མཉམ་བཞག་ཞི་གནས་དང་། དེའི་སྐབས་སུ་ས་རྡོ་རི་བྲག་ལ་སོགས་པ་ཐ་མལ་གྱི་ཡུལ་ལྔ་སྣང་བའི་ཆ་དེ་ལ་རྗེས་ཐོབ་ལྷག་མཐོང་ཞེས་གསུངས་ལ། མཉམ་བཞག་གི་སྐབས་སུ་ཡུལ་མི་འགག་པར་སྣང་ཡང་རྣམ་རྟོག་གིས་དག་པའི་དག་པ། སྣང་རྒྱུ་དེ་ཉིད་ཐ་མལ་ཡུལ་ལྔ་སྣང་བས་འཇིག་རྟེན་པ། དེ་ལ་དག་པ་འཇིག་རྟེན་པར་གསུངས། མཉམ་བཞག་གིས་གཟུང་འཛིན་སྤངས་པའི་རྗེས་མཐུན་དུ་རྗེས་ཐོབ་ཀྱིས་ཀྱང་གཟུགས་ལ་སོགས་པའི་ཆོས་ཐམས་ཅད་ལ་གཟུང་འཛིན་དུ་ཞེན་པའི་འདུ་ཤེས་སྤངས་པ་ཡིན། དེས་ན་དེ་ལྟར་བྱས་ནས་མཉམ་རྗེས་ངོ་བོ་གཅིག་བྱས་དུས་རྗེས་ཐོབ་མེད་པར་གྱུར་ཨེ་སོང་སྙམ་པ་དང་མཉམ་བཞག་ལས་ལངས་དུས་རྗེས་ཐོབ་མ་ཡིན་ནམ་སྙམ་ན། དེ་རྗེས་ཐོབ་རྒྱ་ཡན་པ་ཞེས་པ་དེ་ཉིད་ཡིན། གཟུང་འཛིན་གྱི་ཞེན་པ་དང་བཅས་པའི་སྐབས་ཡིན་ཞིང་། མ་དག་ས་བདུན་ཚུན་ཆད་དུ་ཡོད་པ་ཡིན་ལ། དེ་ཕན་ཆད་ལ་མཉམ་རྗེས་ཐ་དད་ཡོད་པ་མ་ཡིན་པར་རྟག་ཏུ་མཉམ་པར་འཇོག་པ་ཡིན། འདིིའི་ཞིབ་ཕྲའི་དབྱེ་བ་ལ། ལམ་ལ་མ་ཞུགས་པའི་རྒྱུད་ཀྱི་ཏིང་ངེ་འཛིན་བསམ་གཟུགས་ཀྱིས་བསྡུས་པ་ཐམས་ཅད་ལ་བྱིས་པ་ཉེར་སྤྱོད་ཀྱི་བསམ་གཏན། ལམ་ཞུགས་ཚོགས་སྦྱོར་གྱི་ཏིང་འཛིན་ལ་དོན་རབ་འབྱེད་པའི་བསམ་གཏན། ས་དང་པོ་ཡན་ཆད་ལ་འཕགས་པའི་ཏིང་ངེ་འཛིན་ཐམས་ཅད་ཟག་མེད་ཀྱི་ཏིང་ངེ་འཛིན་དེ་བཞིན་གཤེགས་དགེའི་བསམ་གཏན་ཞེས་གསུངས་པ་ཡིན། འདིའི་ཐུན་མོང་གི་བསམ་གཏན་བརྒྱུད་ནས་མཐོང་ཆོས་བདེར་གནས་བསམ་གཏན་ལས་སྐྱེས་པའི་དགའ་བདེའི་ཡོན་ཏན་ཐོབ། དེའི་ཐོག་ཏུ་ཡོན་ཏན་ཐམས་ཅད་འགྲུབ་པའི་བསམ་གཏན་ཚད་མེད་བཞི་དང་ཕར་ཕྱིན་དྲུག་སོགས་སྒྲུབ་དུས་སེམས་རྩེ་གཅིག་པར་གནས་པའི་ཆ་ལ་ཡོན་ཏན་དེ་འབྱུང་ལ། སེམས་ཅན་དོན་སྒྲུབ་ཀྱི་བསམ་གཏན་གྱི་སྐབས་སུ་སེམས་ཅན་གྱི་དོན་ལ་རྩེ་གཅིག་པ་དང་། བསམ་གཏན་གྱི་དངོས་གཞི་སེམས་ལ་བརྟེན་ནས་སྤྲུལ་པ་སྣ་ཚོགས་ཀྱིས་སེམས་ཅན་གྱི་དོན་བྱེད་ནུས་པ་ལ་སོགས་པའི་ཡོན་ཏན་ཡོད། བསམ་གཏན་ཕྱིན་ཅི་མ་ལོག་པ་སྒྲུབ་པ་ལ་ཡང་ཡོན་ཏན་བཞི་སྒྲུབ་པ་དང་། ཆགས་བདུན་སྤོང་བ་སོགས་ཕར་ཕྱིན་གོང་མ་སོགས་དང་སོ་སོའི་སྤང་གཉེན་རིགས་སྦྲེལ་ནས་ཤེས་པར་བྱ་བ་ཡིན། བསམ་གཏན་བསྒོམས་པའི་ཕན་ཡོན་ལ་བསམ་བློ་བཏང་ན། གནས་སྐབས་ཚེ་འདིར་ཉོན་མོངས་གློ་བུར་བ་ལྡོག བསམ་གཏན་གྱི་དགའ་བདེ་ཐོབ། ཡོན་ཏན་ཅི་རིགས་པ་སྐྱེ་བ་དེ་ལྟར་ཡིན། ཚེ་ཕྱི་མ་ལ་བསམ་བློ་བཏང་ན། སྒོ་གསུམ་ལས་སུ་རུང་བ་དང་། མངོན་ཤེས་དང་ཏིང་ངེ་འཛིན་འགྲུབ་པ། མཐར་ཐུག་སངས་རྒྱས་པའི་སྐབས་སུ་ཕྲིན་ལས་སྒྲུབ་པ་ཡོངས་སུ་དག་པར་འགྱུར་བ་དེ་ལྟར་ཡིན། ད་རུང་ཤེས་རབ་ཀྱི་ཕར་ཕྱིན་ལྷག་ཡོད་ཀྱང་དེ་རིང་འུ་ཚོས་དུས་ཚོད་ཀྱི་དབང་གིས་འདིའི་མཚམས་ནས་འཇོག་རྒྱུ་བྱེད། དེ་ཡན་ཆད་འུ་ཚོས་ཅི་ཞིག་བཤད་ཟིན་པ་ཡིན་ཞེ་ན། སྣང་ཆའི་ཐབས་ཀྱི་ཕ་རོལ་ཏུ་ཕྱིན་པ་ལྔ་བཤད་ནས་སང་ཉིན་ཉིན་རྗེས་མ་ལ་འུ་ཚོས་དམིགས་བྲལ་འཁོར་གསུམ་དག་པས་སྲིད་པ་མཐར་བྱེད་ལུགས་སྣང་མེད་ཤེས་རབ་ཀྱི་ཕ་རོལ་ཏུ་ཕྱིན་པ་སླར་ཡང་བཤད་ནས་ཐེངས་འདིའི་དགེ་རྩ་བྱང་ཆུབ་མཆོག་ཏུ་བསྔོས་ཏེ་རེ་ཞིག་ཆོས་མཚམས་འཇོག་རན་རྩིས་རེད། དེ་ཡིས་དེ་རིང་གི་ཆོས་ཁྲིད་འདིའི་མཚམས་ནས་འཇོག་རྒྱུ་ཡིན། དེ་རིང་མགུར་དབྱངས་སུས་འཐེན་རྒྱུ་ཡིན་ན་ཡང་གཅིག་གིས་མགུར་ཞིག་འཐེན་མཛོད་དང་དེ་ནས་བསྔོ་བ་འདོན་རྒྱུ་བྱེད། ༼དེ་ཡང་ས་ཆེན་གྱི་སེམས་དཔའ་ཆེན་པོ་གྲུབ་བརྙེས་ཀྱི་སྐྱེས་བུ་དམ་པ་འཇིགས་མེད་རྟ་མགྲིན་ཡོན་ཏན་མགོན་པོ་གང་ཉིད་ཀྱི་སློབ་བུ་འབུམ་ཕྲག་གི་ཁྱུ་ཚོགས་ལ་བསླབ་བྱ་དང་འབྲེལ་བའི་མགུར་འདི་གསུངས་སོ། །ཐུགས་རྗེ་ཆུ་འཛིན་སྲིད་ཞིའི་ཁོངས་ཁྱབ་ལས། །ཕན་བདེའི་ཆར་ཆེན་རྒྱུན་ཆད་མེད་འཇོ་བས། །འགྲོ་སེམས་ཆོས་དཀར་སྙེ་མ་རྒྱས་བྱེད་པའི། །སྟོན་མཆོག་དོན་ཀུན་གྲུབ་པས་ཤིས་པ་སྩོལ། །ཆོས་དཀར་ཡོན་ཏན་ལྡན་པའི་གྲོགས་མཆོག་ནི། །ཉིན་མོའི་སྐར་མ་ལས་ཀྱང་ཆེས་དཀོན་པས། །ཁྲིམས་གཙང་བཟོད་ལྡན་མང་ཐོས་ཆོས་ཀྱི་གྲོགས། །སྲོག་དང་མིག་ལྟར་བརྟེན་དགོས་སྙིང་གི་གྲོགས། །ན་གཞོན་ལང་ཚོས་ཁེངས་པའི་འཕྱོར་འགྲོས་ཀྱིས། །ཤིན་ཏུ་སྨད་པའི་ངན་འགྲོའི་གཡང་ས་ལ། །རང་གཞན་དཀྲི་བའི་བྱེད་སྤྱོད་གཡོ་ཅན་ལ། །དུག་དང་མཚོན་བཞིན་གཟབ་དགོས་སྙིང་གི་གྲོགས། །ཁེ་གྲགས་འདུ་འཛིས་བྲེལ་བའི་སྡེ་དགོན་ན། །ཆགས་སྡང་རྙེད་ཚོལ་འདོད་པས་བསླུ་སྐྱེན་ཕྱིར། །འདོད་ཆུང་ཆོག་ཤེས་གཙང་མའི་ནགས་ཁྲོད་དུ། །མི་ཚེ་སྒྲུབ་ལ་དྲིལ་ཞིག་སྙིང་གི་གྲོགས། །ལང་ཚོ་ཐལ་བའི་འབྱུང་ཁམས་ཟས་གོས་སོགས། །མཐུན་རྐྱེན་དམན་པས་འཚོ་བ་དཀའ་མོད་ཀྱང་། །གྱི་ན་ལྷག་སྐྱོབ་མི་ཚེ་ཕྱིན་ཙམ་གྱིས། །ཆོག་ཤེས་དམ་བཅའ་མ་ལྷོད་སྙིང་གི་གྲོགས། །ལྷ་དང་བླ་མས་དབྱིངས་ནས་མ་ཁྲེལ་ན། །དུས་ངན་གྲོགས་ཀྱི་སྣང་བ་སུན་ཡང་བླ། །བློ་སྣ་དུམ་ཆོད་ཆོས་ལ་དྲིལ་ནས་ཀྱང་། །དལ་འབྱོར་དོན་ལྡན་དགོས་སོ་སྙིང་གི་གྲོགས། །རྒན་པོ་ལང་ཚོ་ཡོལ་བའི་འདུ་ཤེས་རྒྱུན། །རིང་པོར་འཚོ་བའི་དལ་ཁོམ་གྱིས་དབེན་ཡང་། །རང་བྱུང་པདྨའི་ཐུགས་རྗེ་མི་བསླུ་བས། །ཕྱི་མའི་དོན་ཀུན་འགྲུབ་བོ་སྙིང་གི་གྲོགས། །༽ འདིའི་ནང་གི་མང་ཆེ་བ་མགུར་འཐེན་རྒྱུ་ལ་དང་བ་སྐྱེ་བཞིན་ཡོད། མགུར་འཐེན་རྒྱུ་དེ་རིང་དང་སང་ཉིན་གཉིས་ཀྱི་དུས་ཚོད་མ་གཏོགས་མེད་པས་ད་རུང་གཅིག་གིས་འཐེན། པདྨའི་ཐང་གི་སྒྲོལ་མ་ཁང་ཚན་གྱི་བླ་མ་གོ་ཆ་ཡིས་མགུར་ཞིག་འཐེན་མཛོད། ༼འོ་ལགས་སོ། །རྣལ་འབྱོར་གྱི་དབང་ཕྱུག་རྗེ་བཙུན་མི་ལ་རས་པ་དང་དབྱེར་མེད་པའི་ཞབས་དཀར་རྡོ་རྗེ་འཆང་ཚོགས་དྲུག་རང་གྲོལ་གྱིས་འུ་ཚོ་རྗེས་འཇུག་ཕྱི་རབས་པ་རྣམས་ལ་གདམས་པའི་ཉམས་མགུར་སྐོར་ལས་མཚོ་སྙིང་མ་ཧཱ་དེ་བ་ནས་ཁོང་གིས་མགུར་གླུ་འདི་འདྲ་ཞིག་གསུངས་སོ། །རྗེ་དམ་པ་གོང་མ་རྣམས་ལ་འདུད། །སེམས་སྐྱོ་བ་སྐྱེ་བར་བྱིན་གྱིས་རློབས། །ལུགས་གཉིས་ཀྱིས་ཕན་བཏགས་གྲྭ་སློབ་ཀྱིས། །དུས་དེང་སང་བླ་མར་སྒྲོ་སྐུར་འདེབས། །ཆོས་མཉམ་དུ་ཉན་པའི་གྲོགས་རྣམས་ཀྱིས། །དུས་དེང་སང་ཕན་ཚུན་ངན་སྨྲ་བརྗོད། །ཕན་ཕར་བཏགས་གཉེན་དང་ཡོན་བདག་གིས། །དུས་དེང་སང་ཚུར་ལ་འཁོན་ཚོ་བྱེད། །ཁོང་དམ་པས་གཅིག་གིས་གཅིག་བསྟོད་པ། །དུས་དེང་སང་ཆོས་པ་འགྲན་ཐུབ་ལྟ། །རྒྱུད་འདུལ་ཚུལ་དམ་ཆོས་བཤད་པ་རྣམས། །དུས་དེང་སང་ཁ་བཤད་ཁ་ཟེར་འཕྱ། །ཁ་ཁ་རོག་ཏིང་འཛིན་སྒོམ་པ་རྣམས། །དུས་དེང་སང་བྱིང་བས་ནོན་ཚོ་ཟེར། །ཆོས་སྙིང་པོ་ཡིག་དྲུག་བགྲང་བ་དེ། །དུས་དེང་སང་དམན་དམན་ཞིག་ཏུ་བྱེད། །ཆོས་བར་ཆད་འདུ་ལོང་མང་བ་དེ། །དུས་དེང་སང་བསོད་ནམས་ཅན་དུ་གྲགས། །ཚེ་བློས་བཏང་འཕགས་ནོར་གསོག་པ་དེ། །དུས་དེང་སང་རང་མདོ་མེད་པར་སེམས། །ཚེ་འདི་ཡི་ཡོ་བྱད་གསོག་པ་དེ། །དུས་དེང་སང་རང་མདོ་ཅན་དུ་བྱེད། །ཁོང་མཁས་བཙུན་དམན་ས་འཛིན་པ་དེ། །དུས་དེང་སང་ཀུན་གྱིས་བརྙས་བཅོས་བྱེད། །གཡོ་སྒྱུ་བྱེད་སྡིག་ལ་མི་འཛེམ་པ། །དུས་དེང་སང་ཀུན་གྱིས་སྤྱི་བོར་འཁུར། །ཚེ་འདི་ཡི་བྱ་བཞག་བྱེད་པ་དེ། །དུས་དེང་སང་ཕན་སེམས་ཅན་དུ་བྱེད། །ཚོགས་མིང་བཏགས་ཁ་ལན་བྱེད་པ་དེ། །དུས་དེང་སང་ཆོས་ཀྱི་མཆོག་ཏུ་བྱེད། །ཆོས་ཕྱིར་དུ་དཀའ་བ་སྤྱོད་པ་དེ། །དུས་དེང་སང་སྙིང་རྗེའི་ཡུལ་དུ་བྱེད། །རྩ་བཞི་ཡི་སྡོམ་པ་ཉམས་པ་ཚོས། །དུས་དེང་སང་གཞན་ངོར་ཆབ་ཚོ་ལེན། །དགོན་དགེ་འདུན་ནང་ཁྲིམས་བསྡམས་པ་དེ། །དུས་དེང་སང་རྒན་པ་གོང་མས་བཤིག །ཆོས་ཐོས་བསམ་བྱས་ནས་མི་བསྒོམ་པར། །དུས་དེང་སང་མཁས་པ་གྲོང་ཆོག་བྱེད། །ཚེ་ཕྱི་མར་ཕན་པའི་ཆོས་མི་དགོས། །དུས་དེང་སང་བཟའ་བཏུང་ཡོད་པས་ཆོག །སྤུན་ཤི་ཚེ་ཨེ་འཆི་བལྟས་ཡོད་བཞིན། །དུས་དེང་སང་སེར་མོ་སྐྱ་སར་འབབ། །དབང་ཟབ་མོ་རྗེས་གནང་ནོར་ཕྱིར་དུ། །དུས་དེང་སང་བླ་མས་བརྒྱ་སྟོང་བྱེད། །དགོན་ནང་ཆེན་རྣམས་དང་གྲྭ་ཤག་ན། །དུས་དེང་སང་བུད་མེད་སྐུང་ས་མང་། །བསྒོམ་ཐོས་བསམ་གང་ཡང་མི་བྱེད་པར། །དུས་དེང་སང་བྱ་བཏང་གནས་སྐོར་བྱེད། །གནས་དབེན་པར་སྒྲུབ་པ་ལྷུར་ལེན་པ། །དུས་དེང་སང་ཉིན་པར་སྐར་མ་ཙམ། །བསྒོམ་བྱས་ཀྱིན་བླ་མར་རྟོགས་འབུལ་བ། །དུས་དེང་སང་མིང་ཡང་མེད་པར་འགྱུར། །དོན་དེ་ཕྱིར་མི་ང་དབེན་གནས་སུ། །རྗེ་གོང་མའི་རྣམ་ཐར་སྐྱོང་དུ་འགྲོ། །གཞན་སྐལ་ལྡན་ཡོད་ན་དབེན་གནས་ཤོག །རྗེ་གོང་མའི་རྣམ་ཐར་མཉམ་དུ་སྐྱོང་། །དུས་སྙིགས་མའི་མི་རྣམས་བྱ་སྤྱོད་ལ། །སེམས་སྐྱོ་བ་སྐྱེས་ནས་གླུ་འདི་བླངས། །གང་ཐོས་ཚད་རྣམས་ཀྱིས་སྙིགས་དུས་ཀྱི། །བྱ་སྤྱོད་པ་ངན་པ་འདོར་བར་ཤོག།༽ མགུར་འཐེན་མཁན་ད་དུང་མང་པོ་ཡོད་ཤས་ཆེ་ཡང་དེ་རིང་དེ་ལྟ་བུ་ཞིག་གིས་མཚམས་བྱེད། མང་ཆེ་བ་འཁོར་བ་པ་ཤ་སྟག་རེད། འགའ་རེས་རྟ་ཟོག་རིར་བརྒྱབ་བྱས་ནས་ཐོན་ཡོད་པ་ཡིན་པས་སང་ཉིན་ཡང་མགུར་འཐེན་ཞོར་དང་ཆོས་བཤད་ཞོར་རམ་གྲོས་ཀ་བྱེད་ཞོར་བྱས་ཏེ་ཐེངས་གཅིག་འཛོམས་ཤིང་། དུས་ཚོད་ཅེས་པ་སྐད་ཅིག་གིས་སྐར་མའི་ཆ་ཤས་ལ་མི་འདུག་པར་དུས་གསུམ་གྱི་དུས་ཀྱི་འཁོར་ལོ་དེ་བར་མེད་དུ་མདུན་ཕྱོགས་སུ་འཁོར་གྱིན་ཡོད། འུ་ཚོ་ཚང་མ་ལོ་རེའི་ནང་གི་ཐེངས་རེར་ཐུག་ལ། ཆོས་ཁྲིད་ཅེས་པ་ཁ་བརྡ་གྲོས་གླེང་རེ་བྱས་ཏེ་ཁང་བ་གཅིག་གི་ནང་ལ་འདི་བཞིན་དུ་སེར་སྐྱ་རྒན་གཞོན་ཕོ་མོ་མཉམ་དུ་འཛོམས་པའི་དུས་ཚོད་ཉི་མ་ལྔ་ཡི་ཆོས་ཁྲིད་ཐེངས་མ་ལྔ་ལྟ་བུ་ད་ལོར་ཡོད་འདུག དེའི་ནང་གི་བཞི་དེ་དེ་རིང་ནས་འདས་པའི་ཕྱོགས་སུ་སོང་དང་འགྲོ་བཞིན་པ་ཡིན་ཞིང་། སང་ཉིན་ཉིན་གཅིག་གིས་ཐེངས་འདིའི་ཉིན་རྗེས་མའི་ཆོས་ཁྲིད་ཆུ་ཚོད་གཅིག་དེ་ཉིད་ཀྱིས་ཡང་ཚེ་རིང་ལོ་བརྒྱ་ཟེར་ནས་འདུས་པ་འབྲལ་བའི་ཆོས་ཉིད་ལ་ཕྱོགས་རན་པ་ཡིན། མི་རྟག་མཐའ་བཞིས་བསྡུས་པའི་འཇིག་རྟེན་གྱི་ཆོས་ཉིད་ནི་འདུས་མཐར་འབྲལ། སྐྱེས་མཐར་འཆི། བསགས་མཐར་འཛད། མཐོ་མཐར་ལྷུང་བ་བཞི་བོ་ཟློག་ཡོང་རྒྱུ་ཞིག་སུ་གཅིག་གིས་ཐུབ་པ་མ་ཡིན། ཡིན་ན་ཡང་གང་བྱུང་འགྱོད་པ་མེད་པའི་སྐྱིད་སྡུག་ལམ་དུ་འཁྱེར་ལུགས་ཀྱི་གནད་དེ་ཤེས་ན་ཐམས་ཅད་བདེ་བའི་རང་བཞིན་མི་བདེ་གཅིག་ཀྱང་མེད་པའི་སེམས་ཤིག་ནང་རང་གི་ཤེས་རྒྱུད་ནས་རྙེད་རྒྱུ་གྲུབ་ཚེ་བདེ་བ་ཅན་ད་ལྟ་ནས་མངོན་དུ་གྱུར་ཏེ་མགོན་པོ་འོད་དཔག་མེད་སེམས་ཉིད་ཆོས་སྐུའི་ངོ་བོ་རང་ལ་གནས་པའི་ཡེ་ཤེས་ཀྱི་རང་ཞལ་མངོན་དུ་གྱུར་དུས་ཚེ་འདིའི་ལུས་འདི་མ་བོར་ནས་འོད་དཔག་མེད་པའི་ཞལ་མཇལ་སོང་བ་དང་། ལུས་འདི་བརྗེས་མ་ཐག་ཏུ་སྣང་བ་བདེ་བ་ཅན་དུ་ཤར་ཏེ་འདིའི་མིང་ལ་ཕ་ཁྱིམ་བུ་འགྲོ་མི་ཟེར་བར་ཕ་ཁྱིམ་བུ་ཐོན་ཟེར་དགོས། ཕ་ཁྱིམ་དུ་བུ་ཐོན་ཡོད་པས་མ་ཚད་པར་སྐུ་གསུམ་འདུས་པའི་རྒྱལ་ཐབས་ཆེན་པོ་ལ་མངའ་དབང་འབྱོར་བའི་གོ་འཕང་དེ་ཉིད་ཐོབ་པ་ཡིན་ལ། བྱས་པའི་ལས་ཤིག་ཡིན་དུས་འགྲུབ་པའི་མཐའ་ཞིག་ཡོད་དགོས་པས་ཆོས་བསྒྲུབས་ནས་འགྲུབ་བའི་ཕྱོགས་ལ་འདང་རྒྱག་བློ་གདེང་འཁེལ་བ་རང་གིས་བྱེད་དགོས་ཞེས་མ་འཆུག་གནད་ཀྱི་གདམས་པ་ཞེ་ལ་གཞག་རྒྱུའི་ཚིག་དང་རུམ་དུ་བསྡུ་རྒྱུའི་བྲོ་ཡིན། དེ་འཕྲོས་འདི་ན་ཐོན་པའི་སྐབས་དང་བསྟུན་ནས་ཚང་མས་པདྨའི་ཐང་གི་རྟེན་གསུམ་རྩ་ཆེན་རྣམས་རེ་རེ་མཇོལ། སྨོན་ལམ་རེ་ཐོབ་དང་ལོ་གཅིག་གི་རྐྱེན་བགེགས་བར་ཆད་སེལ་བའི་ཕན་ཐོགས་ཆེན་པོ་ཡོད་རྒྱུ་རེད། འདི་ལོ་གཅིག་ཐེངས་གཅིག་གི་མཇལ་ཁ་ཐེངས་གཅིག་ཡིན་ཞིང་། ལོ་རེའི་ནང་དུ་མཇལ་ཁ་ཐེངས་གཅིག་ཁོ་ན་ཡོད་པ་ཡིན་ལ། སྤྱིར་ན་རྟེན་གསུམ་རྩ་ཆེན་ཁྱད་པར་དུ་གདན་ས་འདིའི་ལོ་རྒྱུས་དང་འབྲེལ་ཚད་ཐམས་ཅད་རྫོགས་ཆེན་ཚང་གི་རྟེན་སྒམ་ནང་དུ་གདན་འདྲེན་ཞུས་ཚར་སོང་བས་ད་རུང་འདི་ན་མཇལ་བར་དཀོན་པའི་རྟེན་གསུམ་རྩ་ཆེན་འཛམ་གླིང་ས་འདིའི་ཐོག་ཏུ་གཅིག་པོ་འདི་མ་གཏོགས་གཉིས་པ་གཞན་ཞིག་མཇལ་རྒྱུ་མེད་པའི་རྟེན་རྩ་ཆེན་མང་ལ། རྩ་ཆེན་ངོ་མའི་གྲལ་ནས་འགའ་ཞིག་གདམ་སྟེ་འདིའི་ཡང་ཐོག་ཐུབ་པ་གྲོང་ཁྱེར་མའི་ལྷ་ཁང་ནང་དུ་བཞུགས་སུ་གསོལ་ཡོད་པས་ཕལ་ཆེ་བས་མཇལ་ཡོད་ལས་ཆེ་ཡང་ས་ཐག་རིང་གི་གནས་མཇལ་པ་ཚོས་ཡང་སྒོས་སུ་མཇོལ། ཁྱད་པར་དུ་མ་མཇལ་པ་ཚོས་མཇལ་དགོས། ཡང་མཇལ་བྱས་ན་ཡང་ཕན་ཡོན་ཆེན་པོ་ཡོད་པ་ཡིན། བྱིས་པ་ཆུང་ཆུང་དང་། ཁྱད་པར་དུ་ཡ་མ་ཆུང་སྲི་ཅན། བུད་མེད་སྦྲུམ་མ། གདོན་བགེགས་ཀྱིས་བཟུང་བའི་ནད་པ། སྨན་གྱིས་བཅོས་དཀའ་མཁན་ཚོས་རྟེན་གསུམ་མཇོལ། གཅོད་ཀྱི་དམིགས་འོག་ཏུ་སྡོད། དེ་ལྟར་གྱིས་དང་ཕན་པ་རང་ཉིད་ལ་ཆེ་བ་ཡིན། འདིའི་མདོ་ཚང་གི་རྟེན་གསུམ་འདི་ཚོ་རྟེན་རེ་རེས་དགོན་པ་རེའི་ཆགས་རྟེན་བྱེད་ཆོག་ལ། འུ་ཚོའི་ས་ཆ་ཆོས་བརྒྱགས་ཁུར་སོང་བས་ཅུང་ཟད་ཤེས་ཨེ་འདུག་སྙམ་པ་ཞིག་ཡིན་ཡང་སྐུ་འདྲ་རྟེན་གསུམ་བྱིན་རླབས་ཡོད་ལས་ཆེ་ན་ཡང་སྐུ་འདྲས་ཆོས་ནི་མི་གསུང་ཐེངས་གཅིག་མཇལ་བར་བྱས་ན་དེ་རེད་དྲན་རྒྱུ་མེད། ཆོས་མཆོག་ཏུ་གྱུར་པ་དེ་ཉིད་བརྗོད་དུ་མེད་པའི་ཆོས་ཡིན་ཞིང་། དེ་དུས་རྟག་པར་རྒྱུན་དུ་གསུང་བཞིན་ཡོད། འོན་ཀྱང་འུ་ཚོས་ཞུ་མ་ཤེས་དུས་མ་གསུང་བ་དང་འདྲ་འདྲར་གྱུར་སོང་བ་རེད། རྟེན་གསུམ་རྩ་ཆེན་གྱི་མདུན་དུ་ཐོན་སྐབས་བརྗོད་མེད་ཟང་ཐལ་གྱི་རིག་སྟོང་རྗེན་པའི་ངང་དུ་མཉམ་པར་བཞག་ནས་སྡོད་དང་བྱིན་རླབས་དེ་དུས་ཐོབ་པ་ཡིན། རྒྱུད་འགྱུར་དུས་བྱིན་རླབས་ཐོབ་ནས་ཚོས་ཀྱིས་ཟོས་ཡོད་པའི་རྟགས་ཏེ་སྣམ་བུ་ཚོས་ལ་འཕངས་པ་ལྟ་བུ་བྱིན་རླབས་འཇུག་ཡོད་པའི་རྟགས་ཡིན་ཞིང་། ཁང་ཐོག་གི་རྟེན་གསར་བའི་གྲས་ཀྱི་རྡོ་ནག་གི་འཇམ་དབྱངས་རང་བྱོན་ཡོད་པ་དེའི་མཚན་ལ་རང་བྱུང་ཛྙཱ་ན་ཤྲཱི་ཞེས་བཏགས་པ་ཡིན་ལ། འདི་སྔོན་ཆད་ས་བར་བ་ལིང་ལིང་གིས་མཇལ་རྒྱུ་མེད་པའི་སྐད་གྲགས་ཅན་ཞིག་ཡིན་པ་དང་། དེང་སང་གདན་ས་འདིའི་རྟེན་སྐལ་དུ་བྱོན་པ་ཡིན། དེ་བཞིན་དུ་ཐུགས་དམ་ཙིནྡ་མ་ཎི། འདི་ལ་སོགས་པ་འདི་དག་ཡོངས་སུ་གྲགས་པ་དང་མ་གྲགས་པའི་ཕྱི་ནང་གསང་བའི་རྣམ་ཐར་མང་ཞིང་། ལྷ་སའི་རྒད་མོས་ཇོ་བོ་མ་མཇལ་བ་ལྟ་བུར་གྱུར་མ་ཤོར། དེ་འཕྲོས་ཇོ་བོ་རྒྱ་ནག་མ་སྟེ་ལྷ་ཁང་སྦུག་མའི་རྟེན་གཙོ་འདི་ང་མི་ངོ་མས་ལག་བཟོས་འདིའི་དཔེ་དབྱིབས་མང་ཆེ་བ་ངས་བྱས་པ་ཡིན། སྐུ་རྒྱུ་ཟངས་རག་གཉིས་ཀ་རྐྱང་པས་བྱས་པ་ཞིག་མིན། རིན་པོ་ཆེ་སྣ་ཚོགས་བསྲེས་པ་ཡིན་ལ། མཚན་ལ་ཇོ་བོ་རྒྱ་ནག་མ་ཐོགས་པ་ནི་རྒྱ་བཟའ་ཀོང་ཇོས་ལྷ་སའི་ཇོ་བོ་ཤཱཀྱ་མུ་ནེ་དང་མཉམ་དུ་བསྣམས་ཡོང་བའི་མདོ་ཁམས་ཀྱི་ས་ཆའི་རྟེན་སྐལ་དུ་བཞག་པའི་ལོ་རྒྱུས་ཡོངས་གྲགས་ཅན་ཡིན་པ་དང་། ཇོ་བོའི་སྐུ་དེ་ཉིད་རིག་གནས་གསར་བརྗེའི་དུས་ཟིང་གི་དུས་སྐབས་བརྒྱུད་དུས། ཡང་བཞུགས་གནས་གོ་འཕོས་ཏེ་ས་འདིའི་རྟེན་སྐལ་དུ་བྱོན་པའི་རྟེན་རྩ་ཆེན་དེ་འདིའི་ནང་གཟུངས་ལ་བཞུགས་ཡོད་པ་ཡིན། བྱེ་བྲག་གི་རྟེན་བཤད་ལྷ་གཉེར་སྐུ་ཞབས་ཀྱིས་མཛད་ཡོང་རྒྱུ་རེད། ན་ནིང་ཡར་འབུལ་རྒྱུ་ལྷག་སོང་བའི་ད་དུང་འདི་ན་རྟེན་གསུམ་རྩ་ཆེན་ཞིག་མི་ལོ་བརྒྱ་ཡི་ཡར་སྔོན་རྫོགས་ཆེན་སྐུ་ཕྲེང་ལྔ་བ་ཐུབ་བསྟན་ཆོས་ཀྱི་རྡོ་རྗེས་བོད་སྡེ་བ་གཞུང་གི་གཞུང་ས་དགའ་ལྡན་ཕོ་བྲང་ནས་བླངས་ཡོང་བའི་བཀའ་ཤེལ་སྦོམ། ཐོབ་ཐམ་ཁའི་ཡི་གེ། གོས་ཆེན་སེར་བོ་དོག་དྲིལ་གྱི་ངོས་སུ་བྲིས་ཡོད་པའི་སྲུང་མ་རྒྱལ་བཙན་གཉིས་ཀྱི་སྣང་བརྙན་དང་བཅས་པ་ཡོད་པ་དེ་ཉིད་ད་རེས་འབུལ་དྲན་གྱིན་ཡོད། རྒྱལ་ཚབ་དེ་མོ་ལོ་མི་ཧན་གྱིས་སྲིད་བཟུང་བའི་དུས་ཚོད་ནས་བླངས་ཡོང་བ་ཡིན་ལ། ཐུབ་བསྟན་ཆོས་ཀྱི་རྡོ་རྗེས་བསྙེན་རྫོགས་སྒྲུབ་ས་ཡང་རྒྱལ་ཚབ་དེ་མོ་ཡིན། འདི་ལོ་རྒྱུས་ཀྱི་དཔྱད་ཞིབ་ལ་རིན་ཐང་ཅན་གྱི་དངོས་རྫས་ཡིན་ཞིང་བྱིན་རླབས་ཅན་ཡང་ཡིན། དེ་འཕྲོས་མཁན་ཆེན་པདྨ་བཛྲའི་རིགས་ཀྱི་དབེན་པོ་ཀོང་ཚའི་རྡོ་རྗེ་རབ་བརྟན་དེ་མ་གཞི་མཁས་བཙུན་གཉིས་ལྡན་ཞིག་ཡིན་འདུག ཁྱད་པར་དུ་མཐོང་བརྒྱུད་ཀྱི་ཕྱག་ལེན་གྱི་ཚད་གཞི་འཇོག་ས་རེད། མདོ་ཁམས་སྨད་ཕྱོགས་ཀྱི་རྙིང་མ་པ་ཞིག་ཡིན་ཚེ་མཐོང་བ་བརྒྱུད་པའི་ཕྱག་ལེན་གྱི་ཐད་ནས་ཀར་ལུགས་ཡིན་དང་དཔལ་ལུགས་ཡིན་དང་རྫོགས་ལུགས་ཡིན་ཞེས་ཟེར་འདུག་ས་དེ་ཉིད་མཐོང་བརྒྱུད་ཀྱི་ཕྱག་ལེན་གྱི་སྟེང་འདི་ནས་ཟེར་གྱིན་ཡོད་ལ། ཀོང་ཚའི་རྡོ་རྗེ་རབ་བརྟན་གྱི་རབ་གནས་ཀྱི་ཟིན་བྲིས་རྡོ་རབ་ཟིན་རྒན་མ་ཞེས་ཡོངས་སུ་གྲགས་པ་ཞིག་ཡོད་པ་དེ་འདིར་ཡོད་པས་དེ་གཉིས་ཀ་ཡར་འབུལ་བསམས་ཀྱང་ད་རེས་བཀའ་བགྲོས་གོང་མའི་བསྟན་བདག་ལྷན་རྒྱས་བཞུགས་མེད་སྐབས་སུ་ཕལ་ཆེར་ཁེལ་འདུག ནམ་བདེ་ན་དེ་དུས་ཡར་འབུལ་རྒྱུ་ཡིན། དེ་འཕྲོས་དོན་དག་གཞན་པ་ཞིག་ལ་མཚོ་ཁྲི་ཀླུ་ཕྱུག་སྡེ་བས་རི་རྒྱ་རྔོན་ཁྲིམས་ཀྱི་ཕྱོགས་ལ་འབད་པ་བྱས་པ་དེ་ཉིད་ཀྱི་གྲུབ་འབྲས་མ་འདྲ་བ་ཞིག་ཐོབ་པ་དང་། ལྕགས་རྙི་མང་པོ་རུག་རྒྱུ་ལོན་འདུག ཐང་རྙེད་རྒད་པོས་གཙོ་བོར་བྱས་པ་ཡིན་རྒྱུ་རེད། སྡེ་ཤོག་ཁ་ཁ་རྒྱ་མ་ཆེ་ན་ཡང་སྡེ་བ་དངོས་གཙང་ལྷག་བསམ་ཅན་ཡིན་ལ། ཁྱེད་སྡེ་བའི་དཔོན་སྡེ་གཉིས་ཀ་ལ་རྗེས་སུ་ཡི་རང་དང་བཅས་ཏེ་བཟང་འདུག་ཅེས་བསྔགས་བརྗོད་བྱེད་རྒྱུ་ཡིན། བདུད་རྩི་རིལ་བུ་སྒམ་ཆུང་བརྒྱ་ཐམ་པ་དང་། སྐྱེ་བདུན་ཤོག་ཆག་བརྒྱ་ཐམ་པ། ཨཿཐམ་ཅན་བརྒྱད། ད་དུང་རྟེན་རྫས་གཞན་དག་དང་བཅས་པ་དཔའ་དར་སྦྱིན་རྒྱུ་ཡོད། རྣམ་རྒྱལ་རྩེའི་བསྟན་བདག་གཞུང་ལས་ཁང་ལ་སོང་ནས་བླངས་དང་ཆོག དེ་འཕྲོས་གནའ་དེ་ལོ་ཞིག་ལ་ང་ཤྲཱི་སེང་དུ་ཡོད་དུས་ཀྱི་ཚོགས་འཁོར་གྱི་སྤྱི་པ་དང་འབྲི་སྤྱི་དུ་མ་ཞིག་ལ་རྗེས་དྲན་གྱི་རྟགས་སྔོན་ནས་སྦྱིན་འཆར་བྱས་པ་དེ་ཉིད་དེ་ད་རུང་ཁ་མ་རུ་སྦྱིན་རྒྱུ་མ་གྲུབ་ནས་ལུས་ཡོད་པས་དེ་ཚོ་གཞུང་ལས་ཁང་ནས་མི་ངོ་མ་ཡོང་ནས་བླངས་སོང་། དེ་ནས་དེ་རིང་ཚང་མ་རིམ་པས་ཡང་བདེ་མོ་གྱིས། སང་ཉིན་ཉིན་རྗེས་མའི་ཆོས་ཁྲིད་ལ་ཐུག་རྒྱུ་བྱེད། ཉིན་ལྔ་བའི་ཆོས་ཁྲིད།༼ཀ༽ སྔོན་དུ་འགྲོ་བའི་ཆོས། དུས་ཚོད་ཟེར་བ་འདི་འགྲོ་མགྱོགས་པ་ཡིན་པར་འུ་ཅག་གིས་དུས་རྒྱུན་ཤེས་བཞིན་པ་ཡིན་ལ། ཡང་སྒོས་སུ་དུས་འདི་སྐད་ཅིག་ཀྱང་མི་འདུག་པར་འགྲོ་བཞིན་ཡོད་པ་དང་ལྷན་དུ་རང་ཉིད་ཀྱི་མི་ཚེའི་དུས་ཚོད་ཀྱང་དེ་དང་འགྲོགས་ནས་ཟད་པའི་ཕྱོགས་སུ་གཅར་གྱིན་ཡོད་པ་ཡིན་ཞིང་། དེ་ལྟར་ཆོས་ནམ་བཤད་ལ་གླེང་བཞིན་ཡོད། དེ་ལྟར་ན་དེའི་དོན་ཚིག་གཅེར་བུར་ཕུད་ན། སྐད་ཅིག་ཀྱང་མི་འདུག་པར་ཤི་སར་གཅར་གྱིན་ཡོད་ཅེས་པ་ལྟ་བུ་ཞིག་ཡིན། འོན་ཀྱང་འཆི་བའི་འཇིགས་པར་གདོང་ལེན་གྱི་ནུས་པ་ཡོད། འཆི་བ་ལམ་བྱེད་ཀྱི་ཐབས་དང་གདམས་པ་ཤེས། དེ་མིན་ཡང་བདེ་བ་ཅན་དུ་སྐྱེ་བའི་རྒྱུ་བཞི་རྣམས་ལམ་མགོ་ཐོན་བྱེད་གྲུབ་ཚར་ཡོད་མཁན་རྣམས་ལ་འཆི་བ་ནི་སྐྱིད་པའི་སྒོ་ཆེན་ཞིག་ཡིན་ཞིང་། བདེ་བ་ཅན་དུ་འགྲོ་སའི་རྒྱ་སྒོ་ཕྱི་མ་ཡིན་པས་ལུས་ཀྱི་སྙིགས་མ་མི་གཙང་བའི་རྫས་སུམ་ཅུ་སོ་དྲུག་གི་བདག་ཉིད་ཅན་བཙོག་པ་འདི་ག་ཤེད་དུ་འཕངས་ནས་མཚན་དང་དཔེ་བྱད་ཀྱིས་བརྒྱན་པའི་ལྷ་ལུས་ཡག་པ་ཞིག་བླངས་ཏེ་འཇའ་འོད་ཀྱི་གུར་ཁང་ཞིག་དང་ལྷན་དུ་འགྲོ་བ་ཡིན་མ་གཏོགས་དེ་མིན་པ་དག་ནི་འཆི་བ་ལ་མི་སྐྲག་པ་དང་། ན་རྒས་གཉིས་ཀར་མི་མཚེར་བ་ཞིག་ཡོད་པ་མ་ཡིན་ཡང་ལས་ཉོན་འཁྲུལ་བའི་དྲྭ་རྒྱ་འདིར་ཚུད་ཚར་ནས་རང་གར་གང་འདོད་ལྟར་དེ་ལས་ཐར་མི་ཐུབ། དེ་ལྟར་ན་ཤི་བ་ད་རུང་ཐོག་ཏུ་མ་ཡོང་པའི་སྔོན་རོལ་འདིར་ད་ལྟར་གསོན་པོའི་མི་ཡིན་པ་དེ་ཉིད་མ་ཤི་གསོན་པོར་བྱས་ན་བཟང་བའི་རྒྱུ་མཚན་གསོན་པོའི་རིན་ཐང་དེ་ཤེས་དགོས། དང་པོ་སྔོན་ལ་ང་འཇིག་རྟེན་ཁམས་སུ་གསོན་པོར་བྱས་ཏེ་འཚོས་ཡོད་པའི་འཚོ་དོན་དེ་འདིའོ་ཞེས་པ་ཞིག་ཡོད་དགོས་པ་ཡིན་པས་སེམས་ཅན་སྲོག་ཅིག་ཐོབ་ཚད་པོ་བདེ་ན་དགའ་ལ་སྡུག་བསྔལ་མི་འདོད་པ་འབའ་ཞིག་སྟེ་སྡུག་བསྔལ་ལ་དགའ་བ་གཅིག་ཀྱང་མེད། ཚང་མ་བདེ་བར་དགའ་བ་དང་སྡུག་བསྔལ་མི་འདོད་པ་འབའ་ཞིག་ཡིན་ཡང་ཐམས་ཅད་ཀྱིས་དོན་གཉེར་བྱེད་རྒྱུ་དེ་བྱེད་ལུགས་འདྲ་དང་མི་འདྲའི་ཁྱད་པར་མ་གཏོགས་བདེ་སྐྱིད་དོན་གཉེར་བྱེད་ཀྱིན་ཡོད་པ་གཅིག་མཚུངས་ཡིན་པས་མི་འདི་འཚོ་བ་སྐྱིད་པོ་ཞིག་མྱོང་བའི་ཆེད་དུ་གསོན་པོར་བྱས་ནས་བསྡད་ཡོད་ཅེས་བཤད་ཀྱང་ཆོག་རྒྱུ་ཞིག་ཡིན། དེས་ན་གསོན་པོའི་མི་ཡིན་ཚད་པོས་སྐྱིད་རང་གིས་རང་ལ་མ་སྤྲད་ན་སྐྱིད་པོ་གཞན་གྱིས་སྤྲད་ཐབས་ཡོད་པ་མ་ཡིན་ཏེ། དེ་ཅིའི་ཕྱིར་ཞེ་ན། ལུས་སེམས་གཉིས་ཀྱི་ནང་ནས་སྐྱིད་པའི་མཆོག་དེ་སེམས་ཀྱི་བདེ་སྐྱིད་ཡིན་ལ། དེ་རང་གིས་རང་ལ་བསྐྲུན་དགོས། རང་གིས་རང་ལ་སྐྲུན་མ་ཐུབ་ན་སེམས་ཀྱི་བདེ་སྐྱིད་ནང་ནས་ཤར་མེད་ཚེ་འཚོ་བ་ལ་རིན་ཐང་མ་ལྡན་པ་ཡིན། སེམས་འདི་ལ་སྐྱིད་དུས་ཉིན་གཅིག་ཀྱང་མེད་དེ་ནང་སེམས་ཀྱི་བདེ་སྐྱིད་ནང་ན་མེད་ན་ཕྱིའི་རྐྱེན་སྣང་བཟང་ངན་གང་ཤར་ཡང་ཐམས་ཅད་པོ་གནོད་པ་ཅན་འབའ་ཞིག་ཡིན། སེམས་བདེ་བ་ཅན་གྱི་སེམས་ལྟ་བུ་ཞིག་ད་ལྟ་ནས་སྦྱངས་ཏེ་བྱང་མ་ཐུབ་ན་ལུས་འདི་མ་སྤངས་བཞིན་དུ་བདེ་བ་ཅན་དུ་ཐོན་པའི་དབང་དུ་བཏང་བའམ་གཞན་ཞིག་གིས་བདེ་བ་ཅན་དང་ཕྱོགས་འདྲ་བ་ཞིག་ཏུ་ཁྱེར་སོང་ཡང་བདེ་བ་ཅན་གྱི་བདེ་སྐྱིད་ལྟ་བུ་ཞིག་དེའི་ཚོར་སྣང་ལ་ཤར་ཐུབ་པ་མ་ཡིན། དེ་ཅིའི་ཕྱིར་ཞེ་ན། ཁོ་རང་གི་སེམས་མུན་པས་རུབ་ནས་སྡུག་གིས་ཁོག་པ་གང་ཡོད་པ་ཡིན་ལ། དེའི་སྟབས་ཀྱིས་བདེ་བ་ཅན་དུ་སྐྱེ་བའི་རྒྱུ་དང་པོ་རྟེན་ཞིང་ཁམས་ཡིད་ལ་བྱེད་པ་ལ་གོམས་དགོས། དེ་གོམས་པས་ནང་སེམས་ཀྱི་འགྱུར་བ་དང་ལྷན་དུ་ད་ལྟའི་སྣང་བ་ཡང་མི་བདེ་མི་སྐྱིད་མེད་དེ་བདེ་བའི་སྣང་བ་ཞིག་ཏུ་ཤར་ཐུབ་པ་ཡིན། དེ་ཤར་བ་ལ་རྒྱུ་གཉིས་པ་ཚོགས་བསགས་སྒྲིབ་སྦྱོང་གནད་ཆེ། སེམས་ཅན་ཀུན་ལ་ཡོད་པའི་རིག་ཁམས་བདེ་བར་གཤེགས་པའི་སྙིང་པོའི་གློ་བུར་སྒྲིབ་བྱེད་ཀྱི་དྲི་མ་དེ་དཔེ་བཞག་ན། ནོར་བུ་འདམ། རལ་གྲི་ཤུབས་ན་ཡོད་པ་ལྟ་བུའི་སྒྲིབ་བྱེད་དེ་བསལ་བས་མ་དག་པ་དེ་ཕྱེད་དག་ཏུ་གྱུར། ཕྱེད་དག་ཐམས་ཅད་ཤིན་ཏུ་དག་པའི་སྤངས་རྟོགས་མཐར་ཕྱིན་ཏུ་གྱུར་པ་སྟེ། གྲོགས་བྱང་ཆུབ་མཆོག་ཏུ་སེམས་བསྐྱེད་པས་ཁྱད་པར་དུ་འགྱུར་བ་ཡིན་ཞིང་། དེ་ཡང་སྨོན་འཇུག་གི་བསླབ་བྱ་བཅུ་དང་ཁྱད་པར་དུ་ཕ་རོལ་དུ་ཕྱིན་པ་དྲུག་གིས་སྤྱོད་པ་རྫོགས་པ་ལ་གནད་འདུས་པ་ཡིན་པས་སྦྱིན་ཚུལ་བཟོད་བརྩོན་ལ་སོགས་པ་ལ་ཕར་ཕྱིན་གྱི་མིང་དོན་ཡོད་པའི་རྒྱུ་མཚན་དེ་འཁོར་གསུམ་མི་དམིགས་པས་ཟིན་པའི་གནད་ཀྱིས་ཡིན་པར་བཤད་དེ། གང་གིས་ཟིན་པར་བྱེད་པའི་འཁོར་གསུམ་མི་དམིགས་པ་ཤེས་རབ་ཀྱི་ཕར་ཕྱིན་དེ་ཉིད་སྲིད་པ་མཐར་བྱེད་ཅེས་པའི་འུ་ཚོར་ཚིག་གཅིག་ཡོད་པའི་སྲིད་པ་མཐར་བྱེད་ཅེས་པའི་ཚིག་དེའི་ཐོག་ནས་ད་རུང་བཤད་དགོས་ཞེས་ཁ་རྩང་འུ་ཚོས་ཆོས་ཁྲིད་གཞག་རན་པའི་ཚིག་མཚམས་དེར་ཁེལ་བ་ཡིན། ༼ཁ༽ གཞུང་དོན། ༼༦༽ ཤེས་རབ་ཀྱི་ཕར་ཕྱིན། ཤེས་རབ་ཀྱི་ངོ་བོ་དེ་ཇི་ལྟར་ཞིག་ཡིན་ཞེ་ན། འཁོར་གསུམ་མི་དམིགས་པས་ཆོས་ཐམས་ཅད་ཀྱི་རང་བཞིན་རྟོགས་པ། བྱེད་ལས་ཅི་ཞིག་ཅེ་ན། ཤེས་བྱ་རྟོགས་ཤིང་འཁོར་བ་ལས་སྒྲོལ་བ། ཤེས་བྱའི་གནས་ལུགས་ཇི་ལྟ་བ་བཞིན་རྟོགས་པ་ཤེས་རབ་ཀྱི་མཚན་ཉིད། དེ་སྦྱོར་དངོས་རྗེས་གསུམ་གྱིས་ཟིན་ན་ཤེས་རབ་ཀྱི་ཕར་ཕྱིན་ཞེས་ཟེར་ལ། དེའི་རང་བཞིན་དེ་ངེས་པར་མ་ཤེས་ན་ཤེས་རབ་ཀྱི་མིང་ཙམ་གྱིས་ཡང་དག་པའི་ཤེས་རབ་ཡིན་པའི་ངེས་པ་ཅི་ལ་ཡོད། ཤེས་རབ་ཡང་དག་གི་མི་མཐུན་ཕྱོགས་བླུན་པོ་ལྟར་དུ་ཤེས་རབ་ཀྱི་ཡོན་ཏན་མི་འཚོལ་བ་འཆལ་བའི་ཤེས་རབ་ཀྱང་ཡོད། ཤེས་རབ་ཀྱི་ཡོན་ཏན་འཚོལ་ཁུལ་བྱས་ཀྱང་ཕྱིན་ཅི་ལོག་ལ་འབད་པར་བྱེད་མཁན་མུ་སྟེགས་པ་དང་དེའི་ཕྱོགས་གཏོགས་ལྟ་བུ། ཕྱིན་ཅི་ལོག་ཏུ་མ་སོང་ཡང་དམིགས་པ་རྒྱ་ཆེ་བ་དང་། དོན་ཆེ་བ། ཟང་ཟིང་མེད་པ། མི་ཟད་པ་བཞིའི་ཡོན་ཏན་བཞི་པོ་མ་ལྡན་པས་ཉན་ཐོས་ལྟ་བུ་རྫོགས་པའི་སངས་རྒྱས་ཀྱི་རྒྱུར་མི་འགྱུར་བ་དེ་ལྟར་ཡོད་པ་ཡིན། དེ་དག་གི་ཉེས་པས་ཚེ་འདིར་མི་མཁས་པའི་སྟོབས་ཀྱིས་བྱ་བ་དང་བྱ་བ་མ་ཡིན་པ་འབྱེད་མི་ཤེས། མི་ཤེས་རྨོངས་པས་མནར་བའི་གང་ཟག་དེ་ཇི་ལྟ་བུ་ཞིག་ཡིན་ཞེ་ན། དཔེར་བཞག་ན་སེངྒེའི་ཁྱུར་ཝ་སྐྱེས་བསྡད་པ་ལྟ་བུ་མཁས་པའི་གྲལ་དུ་ཆུད་པ་མ་ཡིན། ལྷར་བཅས་འཇིག་རྟེན་གྱིས་བརྙས་བཅོས་ཀྱི་ཡུལ་དུ་གྱུར་པ། ཚེ་ཕྱི་མར་དབང་པོ་རྟུལ་བ་ཡིན་པས་སྐྱེ་བ་གཏན་གྱི་ཉེས་པར་འབྱུང་བ་ཡིན། དེ་ནས་ཤེས་རབ་འཆལ་བའི་རྒྱུ་གང་ལ་ཐུག་པ་ནི་མ་རིག་པ་ལ་ཐུག་པ་ཡིན། རྐྱེན་གང་ལ་ཐུག་པ་ནི་བཤེས་གཉེན་ངན་པ་བསྟེན་ནོར་བྱས་པ་ལས་བྱུང་བ་ཡིན། དེ་གཉིས་ཀ་ཐོས་བསམ་ལ་བསྟེན་ན་ལྡོག་ཐུབ་པས་ཐོས་བསམ་སྒོམ་པའི་ཤེས་རབ་རྣམ་པ་གསུམ་ལས་ཀྱང་དང་པོ་ཐོས་པ་གལ་ཆེ་བ། དེ་ཡང་ཇི་ལྟར་ཞེ་ན། མདོ་ལས། ཐོས་པས་དོན་མ་ཡིན་པ་སྤོང་། །ཐོས་པས་སྡིག་ལས་ལྡོག་པར་བྱེད། །ཐོས་པས་ཤེས་རབ་རྣམ་འཕེལ་ཞིང་། །ཐོས་པས་མྱ་ངན་འདས་པ་འཐོབ། །ཅེས་གསུངས་པ་ལྟར་སྡེ་སྣོད་གསུམ་དང་རྒྱུད་སྡེ་བཞི་མི་འགལ་བར་སྟོན་ཤེས་པའི་བཤེས་གཉེན་ལ་བསྟེན་དགོས། འདིའི་འབྲས་བུ་ཅི་ཞིག་ཡིན་ཞེ་ན། འཁྲུལ་བའི་ཤེས་པ་འགོག་པ་དང་། མ་འཁྲུལ་བའི་ཤེས་རབ་སྒྲུབ་པ་གནད་ཀྱི་སྙིང་པོ་ཡིན། དེས་ན་གཞན་སྡེ་དང་རང་སྡེའི་ལོག་རྟོག་བསལ་བའི་གཞུང་ཆེན་པོ་རྣམས་ཀྱི་ཐོག་ནས་ལུང་དོན་དངོས་སྟོབས་ཀྱི་རིག་པས་གཏན་ལ་ཕབ་སྟེ་ཚད་མ་གསུམ་གྱིས་ངེས་པར་བྱས་ནས་མ་འཁྲུལ་བའི་ཤེས་རབ་སྒྲུབ་པ་ལ། ཀུན་མཁྱེན་ཆོས་རྗེས་གསུངས་པ་ལྟར་ན། འཇལ་བྱེད་རིན་ཆེན་ལྡེ་མིག་གི་རྣམ་བཞག དྲང་ངེས་ལྡེམ་དགོངས་ཀྱི་དོན་སོགས་ཤེས་ཚར་རྗེས་གཞལ་བྱ་དམ་ཆོས་མཛོད་ཀྱི་རྣམ་བཞག་ཤིང་རྟ་ཆེན་པོའི་ནང་དུ་བདེན་གཉིས་དང་རྟེན་འབྲེལ་གྱི་སྒོ་ནས་བསྟན་ཡོད། འདི་དག་བཤད་ཡོང་སྐབས་མི་སྐྱ་ཕོ་མོ་ཐོས་བསམ་གྱི་སྦྱོང་བ་བྱས་མ་མྱོང་བ་དང་། མྱོང་ཡང་ལས་དང་པོ་པ་ཚོས་ཅི་ཞིག་འདྲ་ཞིག་བཤད་བྱུང་། རྒྱ་སྐད་སོག་སྐད་ནི་མ་ཡིན་ཞིང་བོད་སྐད་ཡིན་ལ། གོ་མ་སོང་ཟེར་རྒྱུ་མེད་པ་ལྟ་བུ་ཞིག་ཡིན་ཡང་འདི་གོ་སོང་ཟེར་དགོས་ན་ཡང་བཤད་མི་ཤེས་པ་ལྟ་བུ་འདི་ཅི་ཞིག་ཡིན་སྙམ་དུ་དྲན་སྲིད་ཀྱང་གཅིག་བྱས་ན་བཤད་མཁན་གྱིས་གདུལ་བྱའི་བློ་དང་འཚམས་པར་བཤད་མ་ཐུབ་པ་ཡིན་ཤས་ཆེ་ཡང་གཅིག་བྱས་ན་བཀའ་བར་ཐའི་ཆོས་འཁོར་གྱི་ཟབ་ཅིང་རྒྱ་ཆེའི་དོན་དེ་ཟ་སྐད་འཐུང་སྐད་ཁ་ཤས་ཀྱིས་བཤད་ཐུབ་རྒྱུ་ཞིག་ཡིན་ན་དབང་རྣོན་གྱི་སྤྱོད་ཡུལ་དུ་གྱུར་པའི་ཟབ་ཅིང་རྒྱ་ཆེ་ཅི་ལ་ཡིན། འདིའི་ནང་ན་མཁས་པ་ཆེན་པོ་སྡེ་སྣོད་རབ་འབྱམས་པ་ཇི་ལྟར་མང་པོ་མེད། མཁན་པོ་དང་། མཁན་པོ་སྤྲུལ་སྐུ་གཉིས་གོ་ཆོད་པ་རྐྱང་པ་བརྒྱ་ཚོ་ཡོད་འདུག་ལ། ཡིག་ངོ་ཙམ་ཡང་མི་ཤེས་པའི་གོ་ཁའི་རྒད་པོ་རྒད་མོ་ཡང་ཡོད་ཅིང་། གང་ལྟར་གང་བཤད་བྱའི་དོན་དེ་ཉིད་རང་གི་འཆད་སྲོལ་ལ་མ་བསྟུན་ཐབས་མེད་ཡིན་པས་ངེས་དོན་གྱི་ཆོས་སྒྲ་ཙམ་ཐོས་ན་ཡང་འདུན་པ་སྟོབས་སུ་གྱུར་པ་ཡིན་ཚེ་དོན་གྱི་ངེས་ཤེས་རྙེད་སྲིད་པ་དང། མ་མཐའ་ཡང་རྒྱུད་ལ་བག་ཆགས་བཟང་པོ་ཞིག་བསྒོས་ཏེ། མ་འོངས་པར་ཆགས་ཐོགས་མེད་པའི་རྣམ་དཔྱོད་ཀྱི་ཤེས་རབ་རྒྱུད་ལ་འཁྲུངས་པའི་ས་བོན་དང་། ས་བོན་སྔར་ཡོད་ཡར་འཕེལ་བའི་གསོས་བྱེད་ངེས་པར་ཡིན་སྙམ། དེ་ཡིས་ལས་དང་པོ་པ་ཚོས་འདི་གོ་སོང་བསམ་རྒྱུ་མེད་ཀྱང་ཉོན་དང་ཕན་ཐོགས་ཆེ་བ་ཡིན། དེས་ན་ཤེས་རབ་ཟབ་མོས་ཤེས་བྱའི་ཆོས་རྣམས་གཏན་ལ་འབེབས་པ་ལ། བདེན་པ་གཉིས་དང་རྟེན་འབྲེལ་གྱི་རྣམ་བཞག་ཤེས་པ་གལ་ཆེ་སྟེ། ཀུན་མཁྱེན་ཆེན་པོས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པའོ། །ཞེས་རྩ་ཤེར་གྱི་ལུང་ཞིག་དང་། ཡབ་སྲས་མཇལ་བའི་མདོ་ལུང་ཞིག་ཀྱང་དྲངས་མཛད་དེ། ཆོས་ཞེས་བྱ་བའི་རང་བཞིན་ཙམ་ཞིག་དབྱེ་གཞིར་བྱས་ཏེ། སྣང་ལུགས་ཀུན་རྫོབ་ཀྱི་བདེན་པ་དང་། གནས་ལུགས་དོན་དམ་པའི་བདེན་པ་གཉིས་སུ་དབྱེ་བར་མཛད་ལ། དེའི་དང་པོ་སྣང་ལུགས་ཀུན་རྫོབ་ཀྱི་བདེན་པ་ལ་ཡང་། ཡང་ལོག་རྣམ་པ་གཉིས་སུ་ཕྱེས་ཏེ། སྣང་ལ་དོན་བྱེད་ནུས་པ། རྒྱུ་ལས་སྐྱེས་པ། བརྟགས་པས་དབེན་པ། མཐུན་སྣང་ལ་གྲུབ་པ། ས་ཆུ་མེ་རླུང་ནང་རང་གི་ཤེས་པ་དང་བཅས་པས་བསྡུས་པ་ཡང་དག་ཀུན་རྫོབ་དང་། སྣང་ལ་དོན་བྱེད་མི་ནུས་པ། རབ་རིབ་ཅན་ལ་སྐྲ་ཤད་དང་ཟླ་བ་གཅིག་ལ་གཉིས་སུ་སྣང་བ་ལྟ་བུ་ལ་ལོག་པའི་ཀུན་རྫོབ་ཡིན་པར་གསུངས། མ་འཁྲུལ་པ་ལ་ཡང་རྣམ་པ་གཉིས་སུ་ཕྱེས་ཏེ། འབྲས་བུ་ལས་མ་འཁྲུལ་བ་ལམ་བདེན་འདུས་བྱས་ཐམས་ཅད་དང་། འབྲས་བུ་ཐོབ་པ་ལས་མ་འཁྲུལ་བ་སངས་རྒྱས་ཀྱི་གཟུགས་སྐུའི་ཡེ་ཤེས་དང་བཅས་པ་འོག་མིན་ན་བཞུགས་པ་ལ་གསུངས་ཡོད། སྣང་བའི་ཆ་ནས་ཀུན་རྫོབ་ལ་སྦྱོར་བ་ཡིན་ཡང་ངོ་བོ་ཆོས་སྐུ་དང་དབྱེར་མེད་ཡིན་པས་འགྱུར་མེད་ནམ་མཁའ་ལྟ་བུར་བཞུགས་པ་ཡིན། འོན་ཀྱང་སྣང་བའི་ཆ་དག་མ་དག་ཐམས་ཅད་ཀུན་རྫོབ་ཀྱི་བདེན་པས་བསྡུས་པ་དེ་ལྟར་བྱས་ནས་བཞེད་དུ་ཡོད། དོན་དམ་བདེན་པ་ནི་གཤིས་ཀྱི་གནས་ལུགས་གང་ཡིན་པ་དེ་ཉིད་ཡིན། སྣང་སྲིད་འཁོར་འདས་ཀྱི་ཆོས་ཐམས་ཅད་བློའི་ངོས་ནས་བཟང་ངན་ཐ་དད་དུ་བཏགས་པ་ཡིན་ཡང་གཟོད་མ་ཉིད་ནས་བསམ་བརྗོད་སྤྲོས་པའི་ཡུལ་ལས་འདས་པའི་ངོ་བོ་ཉིད་མེད་པ། ནམ་མཁའི་རང་བཞིན་ཅན་དུ་དག་པ། ཁས་ལེན་གྱི་མཐའ་ཐམས་ཅད་དང་བྲལ་བ། མཐའ་གྲོལ་ཙམ་དུ་ཡང་ཤིན་ཏུ་དག་པ་ཡིན་ཞེས་པའི་བློའི་བཀོད་པའི་ཡུལ་ལས་ཀྱང་འདས་པ་ཞིག་ཡིན། དེའི་ཕྱིར་ན་ཆོས་ཐམས་ཅད་ཀྱི་གནས་ལུགས་ནི་རང་བཞིན་གྱིས་དག་པའི་ངོ་བོ་དེར་མཐའ་ཐམས་ཅད་དང་བྲལ་བའི་ཁས་ལེན་དང་དམ་བཅའ་མེད་ཅིང་ངོ་བོ་ལ་དབྱེ་རྒྱུ་མེད་ཀྱང་བློས་སྒྲོ་བཏགས་བྱས་ནས་དབྱེ་སྐབས་སྟོང་ཉིད་བློས་བཀོད་ཅིང་དོན་སྐྱེ་མེད་ཀྱི་སྤྲོས་པ་ལས་མ་གྲོལ་བ་དེ་རྣམ་གྲངས་པའི་དོན་དམ་དང་། སྐྱེ་བ་དང་སྐྱེ་མེད་སོགས་ཀྱི་སྤྲོས་མཐའ་ཡོད་ཚད་ལས་གྲོལ་བའི་རྣམ་གྲངས་མ་ཡིན་པའི་དོན་དམ་ལ་བཞག་པ་ཡིན། གྲུབ་མཐའ་སོ་སོའི་འདོད་གཞུང་གི་བདེན་གཉིས་འཇོག་ལུགས་མི་འདྲ་བ་ཡོད་ཀྱང་རང་ལུགས་མན་ངག་གི་ལུགས་ལྟར་དུ་བྱེད་དུས་ཡུལ་ཆོས་ཀྱི་དབྱིངས་ཞེས་པ་ཙམ་ཞིག་དབྱེ་གཞིར་བཞག་ལ། སྣང་ལ་རང་བཞིན་མེད་པའི་སྣང་ཆ་འདི་དག་ཀུན་རྫོབ་བདེན་པ་ཡིན་ཞིང་། ཐ་མལ་པས་དེ་བདེན་བདེན་ལྟར་དུ་མཐོང་བ་ཡིན་ཡང་རྣལ་འབྱོར་པས་སྣང་ཡང་བརྟགས་ན་མེད་པར་ཤེས་པ་དེ་ཀུན་རྫོབ་བདེན་པ་རྟོགས་པའི་ཐ་སྙད་ཐོབ་པ་དང་། དེ་ལྟ་བུ་ལ་སྣང་བའི་རྐྱེན་གྱིས་མི་གནོད་པས་མ་ཚད་སྣང་བ་སྒྱུ་མར་འབྱོངས་ནས་སྣང་བ་འདི་དག་ཐོགས་རེག་མེད་པའི་རྫུ་འཕྲུལ་འགྲུབ་ཐུབ་པ་དང་། བདེན་གཉིས་དབྱེར་མེད་ལ་བློ་འབྱོངས་ཏེ་འཕགས་པའི་ཡེ་ཤེས་ཐོབ་པས་ཞིང་དང་གཞལ་ཡས་ཁང་ལ་སོགས་པ་སྣང་ཡང་བདེན་ཞེན་མེད་པ་ལ་ཡང་དག་ཀུན་རྫོབ་ཅེས་བཤད། ཚིག་བསྡུས་ན་བློ་བདེན་ཞེན་དང་བཅས་པའི་སྣང་ཤེས་ཐམས་ཅད་ལོག་པའི་ཀུན་རྫོབ་དང་། བདེན་ཞེན་མེད་པའི་འཆར་སྒོར་སྣང་ཚད་པོ་ཡང་དག་ཀུན་རྫོབ་ཏུ་བཞེད། དེས་ན་དོན་དམ་པ་དེ་གང་ཡིན་ཞེ་ན། འཁྲུལ་སྣང་གཞི་མེད་དུ་སྣང་བ་ཙམ་ལས་རང་བཞིན་མེད་པའི་ངོ་བོར་གནས་པ་གཤིས་དོན་དམ་པའི་གནས་ལུགས་ཡིན་ཞིང་། ཡོད་མེད་ཡིན་མིན་སོགས་ཀྱི་བློ་རྟོག་དབྱིངས་སུ་གྲོལ་བ་དོན་དམ་པའི་གནས་ལུགས་རྟོགས་པ་ཡིན་ཞེས་གསུངས། ཚིག་སྣ་བསྡུས་ནས་བཤད་ན། གཤིས་ཇི་ལྟར་ཡིན་པ་དེ་ལྟར་གནས་པ་དོན་དམ་དང་། དེ་ཉིད་ཇི་བཞིན་རྟོགས་པར་དོན་དམ་རྟོགས་པའི་བློ་སྟེ། སྒྲ་གཅན་འཛིན་གྱི་ཡུམ་བསྟོད་ལྟར་དུ་མཐར་གཏུགས་ན་སྨྲ་བསམ་བརྗོད་བྲལ་ནམ་མཁའི་ངོ་བོ། ནམ་མཁའ་ཙམ་དུ་ཡང་འདོགས་སུ་མེད་པ། སོ་སོར་རང་རིག་ཡེ་ཤེས་ཀྱི་སྤྱོད་ཡུལ་ཉག་གཅིག་ཡིན་པ། དེ་ཡང་རྟོགས་བྱ་རྟོགས་བྱེད་གཉིས་མེད་སོ་སོ་རང་གིས་རིག་པས་མངོན་དུ་གྱུར་པ་ལ་དོན་དམ་བདེན་པ་རྟོགས་པ་སྒྲས་བརྗོད་རིགས་ཀྱིས་མཚོན་པར་བྱས་པ་ཙམ་ཞིག་ཡིན། དེས་ན་བདེན་པ་གཉིས་པོ་འདི་ཟླ་བ་དང་བསིལ་ཟེར་ཅན་ལྟ་བུ་མིང་གི་རྣམ་གྲངས་ཀྱི་ཐ་དད་དང་། ཐ་སྙད་དུ་བུམ་པ་སྣམ་བུ་ལྟ་བུའི་དངོས་པོ་ཐ་དད་དང་། དངོས་དངོས་མེད་ལྟ་བུའི་གཅིག་པ་བཀག་པའི་ཐ་དད་དང་། བྱས་དང་མི་རྟག་ལྟ་བུའི་ངོ་བོ་གཅིག་ལ་ལྡོག་པ་ཐ་དད་གང་ཡིན་ཞེ་ན། འཇིག་རྟེན་གྲགས་སྡེ་སྤྱོད་པ་ལྟར་ན་གཞན་སེལ་གྱི་ངོར་ངོ་བོ་གཅིག་ལ་ལྡོག་པ་ཐ་དད་ཡིན་ཞེས་བཤད་ཀྱང་དེ་ཉིད་དང་གཞན་དུ་བརྗོད་དུ་མེད་པ་སྟེ། དོན་དམ་པར་མདོ་སྡེ་དགོངས་པ་ངེས་འགྲེལ་གྱི་ལུང་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོག་པ། །དེ་དག་ཚུལ་བཞིན་མ་ཡིན་ཞུགས་པ་ཡིན། །ཞེས་གསུངས་པ་ལྟར་ཡིན། བདེན་པ་གཉིས་ལ་གྲངས་ངེས་པའི་ཐད་ནས་དགོས་པ་ལ་ལྟོས་པའི་གྲངས་ངེས། ལོག་རྟོག་ལ་ལྟོས་པའི་གྲངས་ངེས། དངོས་པོ་ལ་གནས་པའི་གྲངས་ངེས་སོགས་ཡོད་ཀྱང་འདི་མཐའ་གཞན་བཀག་པའི་དངོས་འགལ་གྱི་མཐའ་རྣམ་པར་གཅོད་པ་ལ་གཉིས་སུ་ངེས། བློ་འཁྲུལ་བ་དང་མ་འཁྲུལ་བ་གཉིས་ཀ་དངོས་འགལ་ཡིན་པས་གཉིས་ཀ་ཡིན་པའི་སྒྲུབ་ཕྱོགས་ཤིག་དང་གཉིས་ཀ་མིན་པའི་དགག་ཕྱོགས་ཀྱི་ཕུང་གསུམ་པ་མི་སྲིད་པའི་བདེན་པ་གཉིས་སུ་གྲངས་ངེས་པ་ཡིན། མདོར་ན་རང་སྡེ་འོག་མ་དག་གི་ལུགས་སུ་སོ་སོའི་བཞེད་གཞུང་ལྟར་དུ་འདོད་ཚུལ་སྣ་ཚོགས་ཡོད་ཀྱང་ཐལ་འགྱུར་པས་སྣང་བ་ཀུན་རྫོབ་དང་། སྟོང་པ་དོན་དམ་ཞེས་པའི་གོ་བརྡ་སྤྲོད་བྱེད་ཀྱི་ཚིག་ཙམ་ལས་གཅིག་དང་ཐ་དད་ཐམས་ཅད་ལས་འདས་པའི་ཆོས་ཉིད་སྤྲོས་པའི་མཐའ་ཐམས་ཅད་དང་བྲལ་བ་དེ་སྣང་དུས་ཉིད་ནས་སྐྱེ་འགག་གནས་དམིགས་འགྲོ་འོང་དང་བྲལ་བས་ན་ཁས་ལེན་པའི་ཀུན་རྫོབ་ཙམ་ཡང་འགོག་པ་དེ་ཉིད་དབུ་མ་འཇུག་པ་ལས། ཇི་ལྟར་ཁྱོད་ཀྱིས་གཞན་དབང་དངོས་འདོད་ལྟར། །ཀུན་རྫོབ་ཀྱང་ནི་བདག་གིས་ཁས་མ་བླངས། །ཞེས་གསུངས་པ་ལྟར་ཡིན། གྲུབ་དོན་མཐར་ཐུག་གཤིས་སྨྲ་བསམ་བརྗོད་མེད་དོན་དམ་བདེན་པ་དང་། བློས་སྨྲ་བསམ་བརྗོད་པས་བརྟགས་ཤིང་སྣང་བ་ཀུན་རྫོབ་བདེན་པ་ཡིན་ལ། དོན་དམ་བདེན་པ་བློས་རྟོགས་པ་ཡིན་དང་མིན་ཞེ་ན། དོན་དམ་བདེན་པའི་ངོ་བོ་རྟོགས་བྱ་རྟོགས་བྱེད་ལས་འདས་སོང་བ་ཞིག་ཡིན་པས་ན་རྟོགས་པར་གཞག་ཏུ་མེད་དེ། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལ་སོགས་པ་ནས། ཆོས་ཉིད་ཤེས་བྱ་མ་ཡིན་ཏེ། །དེ་ནི་ཤེས་པར་ནུས་མ་ཡིན། །ཞེས་གསུངས་པའི་རྡོ་རྗེ་གཅོད་པའི་ལུང་གིས་གསལ་ལ། དོན་བསྡུས་ན། མ་དག་འཁྲུལ་བའི་ཆོས་ཀུན་རྫོབ་པ་ཐམས་ཅད་མི་བདེན་སྒྱུ་མ། རྨི་ལམ། རྫུན་པ། བསླུ་བའི་ཆོས་ཅན་དང་། དག་པ་ཆོས་ཉིད་རང་བཞིན་དོན་དམ་འོད་གསལ་ཡེ་ཤེས་ཀྱི་གནས་ལུགས་དེ་ཟབ་པ། ཞི་བ། སྤྲོས་པ་ཐམས་ཅད་དང་བྲལ་བ་ཡིན་པ། དེ་ཉིད་ནི་འགྱུར་མེད་ལྷུན་གྲུབ་བསམ་གྱིས་མི་ཁྱབ་པའི་ཆོས་ཉིད་ཡིན། གཞི་བདེན་གཉིས་ཟུང་འཇུག་ཡིན་པའི་སྟབས་ཀྱིས། ལམ་ཚོགས་གཉིས་ཟུང་འཇུག་བསགས་པས། འབྲས་བུ་སྐུ་གཉིས་ཟུང་འཇུག་ཐོབ་ལ། ཀུན་རྫོབ་བདེན་པས་བསོད་ནམས་ཀྱི་ཚོགས་རྨི་ལམ་ལྟ་བུ་བསགས་ནས། དོན་དམ་བདེན་པས་ཡེ་ཤེས་ཀྱི་ཆོས་ཉིད་ནམ་མཁའ་ལྟ་བུའི་དོན་བསྒོམས་པས། འབྲས་བུ་ཆོས་གཟུགས་ཀྱི་སྐུ་གཉིས་མངོན་དུ་བྱེད་པ་ཡོད། བདེན་གཉིས་ཀྱི་རང་བཞིན་མ་ཤེས་ན་ཟབ་མོའི་དེ་ཁོ་ན་ཉིད་ཀྱི་དོན་མི་ཤེས། དེ་ཁོ་ན་ཉིད་ཀྱི་དོན་ཤེས་ན་ཆོས་ཐམས་ཅད་མེད་ལ་སྣང་བ་སྟོང་ཉིད་ཀྱི་རོལ་བ་ཡིན་པར་ཧ་གོ་བས་སྟོང་ཉིད་ལ་ཅི་ཡང་རུང་ཞིང་གང་དུ་ཡང་སྣང་ཆོག་པས་སྣང་དུས་ཉིད་ནས་མ་དམིགས་པ་དཔེར་བཞག་ན། ནམ་མཁར་ཅི་ཡང་བྱུང་ཞིང་ནམ་མཁར་ཅི་ཡང་མ་གྲུབ་པས་ཕྱོགས་ཙམ་མཚོན་པའི་རྣམ་ཀུན་མཆོག་ལྡན་གྱི་སྟོང་ཉིད་དོན་སྤྱིའི་ཚུལ་དུ་གོ་རྒྱུ་ཞིག་ཡོད། སྟོང་ཉིད་མ་ཡིན་པའི་ཆོས་ཤིག་མེད་པས་རྟེན་ཅིང་འབྲེལ་འབྱུང་མ་ཡིན་པའི་ཆོས་མི་སྲིད་པར་དབུ་མ་རྩ་བ་ཤེས་རབ་ཀྱི་ལུང་ལས། རྟེན་ཅིང་འབྲེལ་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པས། །དེ་ཕྱིར་སྟོང་པ་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པ་དང་། དེ་ལྟ་བུའི་རྟེན་འབྲེལ་གྱི་ཚུལ་དུ་ཡང་རྣམ་པར་དབྱེ་བའི་ཐོག་ནས་བཤད་ན། སྤྱིའི་རྟེན་ཅིང་འབྲེལ་འབྱུང་ཆོས་ཅན་ཐམས་ཅད་ཆོས་ཉིད་ལ་བརྟེན་ཡོད་པས་ཆོས་ཅན་སྐྱེ་འགག་སོགས་སྣང་དུས་ཉིད་ནས་སྐྱེ་འགག་སོགས་ཀྱིས་སྟོང་པས་ཡོད་མ་མྱོང་བ། མེད་བཞིན་སྣང་པས་འཁྲུལ་བར་འཁྱམས་པ། རྟོག་བཏགས་དར་གྱི་སྲིན་བུས་རང་གིས་རང་ཉིད་འཆིང་བ་ལྟ་བུ་ཞིག་ཡིན། དེ་ལས་འཁོར་བའི་རྟེན་འབྱུང་ས་བོན་ལས་མྱུ་གུ་འབྱུང་བ་ལ་སོགས་པ་ཕྱིའི་རྟེན་འབྱུང་། མ་རིག་པ་ལས་འདུ་བྱེད་ནས་རྒ་ཤིའི་བར་གྱི་ནང་གི་རྟེན་འབྱུང་གིས་བར་མེད་སྲིད་པའི་འཁོར་ལོ་མུ་མཐའ་མེད་པར་འཁོར་བ་ཡིན་ཞིང་། མྱ་ངན་ལས་འདས་པའི་རྟེན་འབྲེལ་ཇི་ལྟར་ཡིན་ཞེ་ན། ལམ་ཐོས་བསམ་སྒོམ་པའི་ཤེས་རབ་ཀྱིས་སྲིད་རྩ་མ་རིག་པ་རིག་པའི་ཡེ་ཤེས་ཀྱིས་ལྡོག་སྟེ། སྲིད་པར་འཇུག་པའི་རྒྱུ་ཟད་པས་འབྲས་བུའི་རྟེན་འབྲེལ་དུ་གང་གྲུབ་པ་ཡིན་པ་ནི་སངས་རྒྱས་ཏེ་སེམས་ཅན་གྱི་དོན་འབད་མེད་ལྷུན་གྲུབ་ཏུ་འབྱུང་ལ། ཆོས་ཐམས་ཅད་རྟེན་ཅིང་འབྲེལ་འབྱུང་ལ་འདུས་པའི་དོན་ཤེས་ནས་ཁོང་དུ་ཆུད་དུས་མྱ་ངན་ལས་འདའ་བར་འགྱུར་བ་ཡིན། ཤེས་རབ་བསྐྱེད་པའི་ཕན་ཡོན་ལ། གནས་སྐབས་ཚེ་འདིར་ཤེས་རབ་ལེགས་པར་སྦྱངས་པའི་སྟོབས་ཀྱིས་ཤེས་བྱ་མཁྱེན་པའི་བློ་གྲོས་རྒྱས་པ། ཀུན་ལ་མི་འཇིགས་པའི་སྤོབས་པ་ཐོབ་པ་ལ་སོགས་པའི་ཡོན་ཏན་མང་པོ་དང་། ཚེ་ཕྱི་མར་ཡིན་ཡང་ཤེས་རབ་ཕུན་སུམ་ཚོགས་པ། རང་གིས་ཐོས་པ་འཛིན་ཐུབ་པ། གཞན་ལ་ཆོས་ཀྱི་འཁོར་ལོ་ཕྱིན་ཅི་མ་ལོག་པར་སྐོར་ནུས་པ་ལ་སོགས་པའི་ཡོན་ཏན་འབྱུང་བ་དང་། མཐར་ཐུག་སངས་རྒྱས་པའི་ཚེ་ན་མཁྱེན་གཉིས་ཀྱི་ཡེ་ཤེས་རྒྱས། སོ་སོ་ཡང་དག་རིག་བཞིའི་སྤོབས་པ་ཐོབ། མི་འཇིགས་པ་བཞི་དང་ལྡན། ཕས་རྒོལ་ངན་པ་ཐམས་ཅད་ཚར་གཅོད་པར་འགྱུར་བ་དེ་ལྟར་ཡིན། འཁོར་གསུམ་ཡོངས་སུ་དག་པས་ཕ་རོལ་ཏུ་ཕྱིན་པ་དྲུག་ཚང་བར་ཉམས་སུ་བླངས་ན། ཤེས་རབ་ཀྱིས་ལྟ་བ་དག ཐབས་ཀྱིས་སྤྱོད་པ་དག་ནས་སངས་རྒྱས་འགྲུབ་པར་ཚེགས་དཀའ་ལས་ཆེན་པོ་མེད། ཁ བསྡུ་དངོས་བཞི། དེ་ནས་དེ་ཡན་གྱིས་འཇུག་པའི་བསླབ་བྱ་ཕ་རོལ་ཏུ་ཕྱིན་པ་སྒྲུབ་ཚུལ་བཤད་པ་སོང་སྟེ། ད་ནི་བསྡུ་དངོས་བཞིའི་སྤྱོད་པ་ལ་མཚོན་ན། སེམས་ཅན་སྨིན་པར་བྱ་བའི་དོན་དུ་ཐབས་མཁས་ཀྱིས་འཁོར་ཡོངས་སུ་སྐྱོང་བ་བསྡུ་དངོས་བཞིའི་མཚན་ཉིད་ཡིན་ལ། དབྱེ་བ་ཕྱེས་ན། སྦྱིན་པ་དང་། སྙན་སྨྲ་དང་། དོན་མཐུན། དོན་སྤྱོད་བཞི་ཡིན། དེ་ལས་སྦྱིན་པ་ཁ་རྩང་ཕར་ཕྱིན་དྲུག་ལས་སྦྱིན་པའི་སྐབས་སུ་བཤད་པ་ལྟར་མ་དག་པའི་སྦྱིན་པ་སྤངས་ཏེ་དག་པའི་སྦྱིན་པས་གདུལ་བྱ་མགུ་བར་བྱ་བ་དེ་ཉིད་ཡིན། གཉིས་པ་སྙན་སྨྲ་ནི། སྙན་པར་སྨྲ་བ་ཞེས་པ་སྤྱིར་ངག་འཇམ། རྒྱུད་དུལ། གཏམ་བཤད་ན་སྐྱེ་བོའི་ཡིད་ལ་འཇུག་པའི་སྙན་པར་སྨྲ་བ། མི་སྙན་པར་སྒྲོག་པའི་བྱ་ཁྭ་ཏ་ལྟ་བུ་མ་ཡིན་པ་ཞིག་ཏུ་གོ་དགོས། འོན་ཀྱང་ཁ་ཞེ་མི་མཚུངས་པའི་ཁ་ཡག་ངོ་འཛུམ་དོན་ལ་མེད་པའི་ཞིམ་ཁ་བ་ཞིག་གྱིས་ཞེས་གསུངས་པ་མ་ཡིན་ཞིང་། འདི་གདུལ་བྱའི་རྒྱུད་སྨིན་པར་བྱ་བའི་ཆེད་དུ་ཆོས་བཤད་པ་གཙོ་བོ་ཡིན་པ་དང་། ཆོས་བཤད་པ་དེ་ཡང་ལུང་རིགས་དང་མ་འགལ་བ། དྲང་ངེས་མ་འཁྲུགས་པ། སློབ་མའི་རྒྱུད་ཚོད་དང་བསྟུན་ཤེས་པ། ཐེག་པ་གོང་འོག་གི་ཆོས་ལྟ་བུ་མཐུན་པ་དག་མི་འགལ་བ། མི་མཐུན་པ་རྣམས་མ་འདྲེས་པ། ཐེག་ཆེན་མདོ་སྔགས་གཉིས་ཀར་མཚོན་ཡང་དོན་གཅིག་ཏུ་བཤད་ཐུབ་པ། ཁྱད་པར་དུ་གསང་སྔགས་བཤད་དུས་རྒྱུད་སྡེའི་ཁུངས་དང་མཐུན་པར་བཤད་པ་དེ་ལྟ་བུ་ཞིག་ལ་གསུངས་ཡོད། སྦྱིན་དང་སྙན་སྨྲ་གཉིས་སོང་སྟེ། ད་ནི་གསུམ་པ་དོན་མཐུན་ཏེ། གཞན་དགེ་བར་གཞུག་པའི་ཆེད་དུ་རང་ཉིད་དགེ་བ་ལ་འཇུག་དགོས། རང་ཆོས་མེད་ཅིག་གིས་གཞན་ཆོས་སྒོར་འཛུད་ཐུབ་པ་མ་ཡིན། ཆོས་འདི་སྒྲུབས་ཞེས་ཟེར་དུས་གཞན་དེ་ཉིད་ཀྱིས་ཟེར་མཁན་ཁོ་རང་ཉིད་ཀྱིས་བསྒྲུབས་ཏེ་ཕན་ཐོགས་ཅི་བྱུང་འདུག་ལོས་བལྟ། རྒྱུ་མཚན་དེ་དག་ལ་བརྟེན་ནས་སློབ་དཔོན་གྱི་མཚན་ཉིད་མ་ཚང་། བླ་མས་གནང་བ་མ་ཐོབ་ཀྱི་བར་དུ་ཆོས་གདམས་ངག་འཆད་སྔ་མི་རུང་བ་ཡང་གནད་རྒྱུ་མཚན་དེ་དག་ལ་ཐུག་པ་ཡིན་འདུག དཔེར་ན་ཁྱོད་ཀྱིས་མཆོད་སྦྱིན་གྱིས་དང་ཕྱི་མར་སྒུག་མི་དགོས་པར་ཚེ་འདིར་སྦྱིན་འབྲས་འབྱུང་ནས་ཕྱུག་པོར་འགྱུར་འགྲོ་ཞེས་སྨྲས་ན་གཞན་དེ་ཉིད་ཀྱིས་ཟེར་མཁན་རང་གིས་བསོད་ནམས་ཅི་བསགས་འདུག སྦྱིན་འབྲས་ཅི་འབྱུང་འདུག་དེ་ལ་ངེས་པར་ལྟ་བ་ཡིན། བཞི་བ་དོན་སྤྱོད་ནི། ཕ་རོལ་པོས་ཆོས་ཉན་ཞིང་དེའི་དོན་ཉམས་སུ་ལེན་པར་འགལ་རྐྱེན་མི་ཡོང་བ་དང་། བརྩོན་པ་མི་ལྷོད་པའི་ཆེད་དུ་ཐབས་ལ་མཁས་པའི་སྒོ་ནས་དེའི་དོན་སྒྲུབ་རོགས་བྱེད་པ་དེ་ཡིན། དེ་ལྟ་བུའི་བསྡུ་བའི་དངོས་པོ་བཞི་འདི་ཕར་ཕྱིན་དྲུག་གི་ནང་དུ་འདུས་ཡོད་ཀྱང་གཙོ་བོ་རང་གིས་སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པ་ལ་ཕར་ཕྱིན་དྲུག་གི་སྤྱོད་པ་འཇོག་པ་དང་། སེམས་ཅན་གཞན་སྨིན་པར་བསྡུ་དངོས་འཇོག་པ་མི་འགལ་བ་ཡིན། བསྡུ་བའི་དངོས་པོ་གྲངས་བཞིར་ངེས་པ་དེ་ནི། སྣོད་དུ་རུང་བར་བྱ་བ་དང་གཅིག གདུལ་བྱ་མོས་པར་བྱ་བ་དང་གཉིས། བསྒྲུབ་པར་བྱ་བ་དང་། དེ་མཐར་ཕྱིན་པར་བྱ་བའི་དགོས་པ་རྣམ་པ་བཞིར་བརྟེན་ཏེ་གྲངས་བཞིར་ངེས་པ་དང་། འདིའི་གོ་རིམ་ཡང་། སྦྱིན་དང་། སྙན་སྨྲ། དོན་སྤྱོད། དོན་མཐུན་ཞེས་བཤད་ཀྱང་དོན་གཅིག་ཡིན། དེ་ཡིས་ཚོགས་བསགས་སྒྲིབ་སྦྱོང་གི་གནད་གྲོགས་བྱང་ཆུབ་མཆོག་ཏུ་སེམས་བསྐྱེད། སེམས་བསྐྱེད་པ་ཙམ་གྱིས་མ་ཚད་པར་སྐྱེས། སྨོན་འཇུག་གི་བསླབ་བྱར་བསླབས་ཏེ་དམན་ལམ་ལས་འཕགས་པའི་བསོད་ནམས་ཀྱི་ཚོགས་ཆེན་དུས་ཐུང་ཐུང་གིས་རྫོགས་པའི་ཐབས་དང་ཤེས་རབ་ཟུང་འབྲེལ་གྱི་སྟོབས་ཀྱིས་ཡེ་ཤེས་ཀྱི་ཚོགས་ཀྱང་རྫོགས་ཏེ། སྐྱེ་བ་གཅིག་གིས་ཐོགས་པའི་བདེ་བ་ཅན་གྱི་ཞིང་གི་བྱང་ཆུབ་སེམས་དཔའི་རྟེན་དེའི་སྟེང་ནས་རྫོགས་ཏེ་ས་བཅུ་ལམ་ལྔའི་ཡོན་ཏན་མཐར་ཕྱིན་ནས་སྲིད་པ་མཐར་བྱེད་ཐུབ་པས་མི་ཚད་པར་ཞི་བའི་མཐའ་རུ་ཡང་མི་ལྷུང་པ་མཐའ་གཉིས་སྤངས་པའི་བྱང་ཆུབ་དམ་པ་མངོན་དུ་འགྱུར་བར་ཤོག་ཅིག་ཅེས་པའི་དོན་ཡིན། ཤོག་ཅེས་པ་ཅིའི་དོན་ཡིན་ཞེ་ན། སྨོན་པའི་དོན་དེ་རྒྱང་ཞིག་ཏུ་ལུས་མི་འགྲོ་བར་ད་ལྟར་གམ་དུ་ཤོག་ཅེས་པ་ལྟ་བུའི་སྒྲ་དོན་ཡིན། ༼ག༽ རྒྱུ་བཞི་བ་རྐྱེན་སྨོན་ལམ་དག་པས་མཚམས་སྦྱར་བ། དེ་ཡན་གྱིས་བདེ་བ་ཅན་དུ་སྐྱེ་བའི་རྒྱུ་བཞིའི་ནང་གི་གསུམ་པ་ཡན་ཆད་བཤད་པ་སོང་སྟེ། ད་ནི་རྩ་བའི་ཆིངས་བཞི་བ་ཡིན་པའི་དབང་དུ་བཏང་ན་བདེ་བ་ཅན་དུ་སྐྱེ་བའི་རྒྱུ་བཞི་ལས་ཐ་མ་ལྷག་ཡོད། རྐྱེན་སྨོན་ལམ་རྣམ་པར་དག་པས་མཚམས་སྦྱོར་བ་ནི། ༼ཀ༽ རྩ་བའི་གཞུང་དོན་བཤད་པ། ཁྱེད་ལ་ཡང་ཡང་གསོལ་བ་བཏབ་པ་དང་། ། མངོན་རྟོགས་ཡིད་ལ་གོམས་པའི་ཏིང་འཛིན་མཐུས། ། ངེས་དོན་འོད་དཔག་མེད་པའི་ཞལ་མཐོང་ནས། ། བདེ་ཆེན་ཞིང་ཁམས་རྟག་ཏུ་འཛིན་པར་ཤོག། ཅེས་སྨྲས་པ་སྟེ། གོང་དུ་རྒྱུ་དང་པོ་རྟེན་སྣོད་ཀྱི་ཞིང་ཁམས་དང་མགོན་པོ་འོད་དཔག་མེད་པའི་སྐུའི་ཆ་བྱད་ལ་སོགས་པ་ཡུལ་དུ་གཙོ་བོར་བྱས་པའི་གསལ་འདེབས་དང་། རྒྱུ་བར་བ་གཉིས་ཀས་ཞིང་དེར་སྐྱེ་བའི་རྒྱུ་ཚོགས་བསྐྲུན་པ་ཡིན་ལ། ཐ་མའི་ཤོ་ལོ་ཀ་འདིའི་ཚིག་རྐང་སྔོན་མ་གསུམ་གྱིས་ཡུལ་ཅན་སྐུ་དང་། ཡེ་ཤེས། མཛད་པ་འཕྲིན་ལས། ཞིང་དེར་ཇི་ལྟར་སྐྱེ་བ་བླངས་ཏེ་མཐར་སངས་རྒྱས་ནས་འགྲོ་དོན་ནམ་མཁའ་དང་མཉམ་པར་རྒྱུན་མི་ཆད་པའི་འབྲས་བུའི་སྐོར་བསྟན་པ་ཡིན། ཐ་མའི་ཚིག་རྐང་གཅིག་པོ་དེས་དོན་བསྡུས་ཏེ་ཡོངས་སུ་གྲུབ་པར་བྱས་ཡོད། དེས་ན་ཚིག་རྐང་དང་པོའི་མགོ་ཡི་ཁྱེད་ཅེས་པའི་ངེས་གཟུང་གི་ཚིག་དེས་ཅི་ཞིག་བསྟན་ཞེ་ན། སྒྲ་དོན་འདྲེས་འཛིན་གྱིས་ནུབ་ཕྱོགས་བདེ་བ་ཅན་གྱི་ཞིང་ཁམས་ཀྱི་གཙོ་བོ་མགོན་པོ་འོད་དཔག་མེད་པའི་སྐུའི་སྣང་བརྙན་ཡིད་དང་མིག་གི་ལམ་དུ་འཆར་བའི་གནས་སྐབས་ན་རྒྱལ་བ་འོད་དཔག་མེད་པའི་ཐུགས་བསྐྱེད་མཛད་པ་རྨད་བྱུང་གི་རྣམ་ཐར་གྱི་སྐྱེས་རབས་ད་ལྟའི་སྐབས་སུ་ཐོས་པར་བྱས་པ་རང་ཤུགས་ཀྱིས་དྲན་ཡོང་པ་སྟེ། དེ་ཡང་སྔོན་བསྐལ་བ་དཔག་མེད་ཀྱི་གོང་རོལ་ནས་སངས་རྒྱས་འཇིག་རྟེན་དབང་ཕྱུག་རྒྱལ་པོའི་དྲུང་ནས་དགེ་སློང་ཆོས་ཀྱི་འབྱུང་གནས་ཀྱིས་ཐུགས་བསྐྱེད་སྨོན་པའི་དམ་བཅའ་བླངས་པ་ཡིན་ལ། འཁོར་སྒྱུར་རྩིབས་ཀྱི་མུ་ཁྱུད་ཀྱི་སྐྱེ་བ་བཞེས་དུས་ས་བརྒྱད་པ་ཐོབ་པའི་བྱང་ཆུབ་སེམས་དཔའ་དེས་སངས་རྒྱས་རིན་ཆེན་སྙིང་པོའི་མདུན་ནས་ཞིང་ཁམས་བཟུང་ནས་ཞིང་སྦྱོང་བའི་སྨོན་ལམ་རྒྱ་ཆེན་པོ་བཏབ་པ་ཡིན་པས་དེའི་སྐབས་སུ་རྒྱལ་པོ་ལྟོས་དང་ཞེས་གསུངས་ཏེ། ནུབ་ཕྱོགས་ཀྱི་འཇིག་རྟེན་བྱེ་བ་ཕྲག་འབུམ་འདས་པའི་ཕ་རོལ་ཞིག་ན་འཇིག་རྟེན་གྱི་ཁམས་དབང་པོ་ལྟར་ཤིན་ཏུ་མཛེས་པ་ཞེས་བྱ་བ་འདུག་པ་དེ་ཉིད་མ་འོངས་བསྐལ་བ་གྲངས་མེད་མང་པོ་འདས་པའི་དུས་ན་བདེ་བ་ཅན་ཞེས་བྱ་བར་གྱུར་ཏེ་དེའི་སྐབས་སུ་ཁྱོད་དེར་དེ་བཞིན་གཤེགས་པ་ཚེ་དཔག་མེད་ཅེས་བྱ་བར་འགྱུར་ཞེས་གསུངས་ཏེ་ལུང་བསྟན་དབུགས་དབྱུང་དེ་ལྟར་གནང་བ་ཡིན། དེའི་རྒྱུ་མཚན་གྱིས་སྨོན་ལམ་བཏབ་པ་མངོན་དུ་གྱུར་ནས་ད་ལྟའི་སྐབས་སུ་འུ་ཚོའི་བསྐལ་བ་བཅུ་ཡིན་ཞིང་། བདེ་བ་ཅན་གྱི་ཞག་མ་བཅུ་སོང་བ་ཡིན། འདི་ནས་བདེ་གཤེགས་རྒྱལ་བ་འོད་དཔག་མེད་དེ་མདུན་མཁར་མངོན་སུམ་བཞུགས་པའི་གསལ་སྣང་ཡིད་ལ་ཤར་རིམ་བཞིན་དུ་དེའི་སློབ་པ་ལམ་གྱི་གནས་སྐབས་ཀྱི་དང་པོ་ཐུགས་བསྐྱེད་པ་ནས་བྱ་དཀའི་སྤྱོད་པ་རླབས་ཆེན་གྱི་ས་ལམ་བགྲོད་ཚུལ་ཡང་ཁྱེད་ཀྱིས་མཛད་པ་ཇི་བཞིན་ཞེས་དུས་རྒྱུན་སྨོན་ལམ་འདེབས་བཞིན་ཡོད་པ་དང་། ཁྱད་པར་བྱང་སྡོམ་ལེན་པའི་སྐབས་སོགས་སུ་ཇི་ལྟར་སྔོན་གྱི་བདེ་གཤེགས་ལ་སོགས་པ་བཏོན་དང་འདོན་བཞིན་པ་ཡིན། ཐོས་བསམ་པས་ས་ལམ་གྱི་མངོན་རྟོགས་དང་སྤངས་རྟོགས་ཀྱི་ཡོན་ཏན་སྐྱེད་ཚུལ་མཁྱེན་བཞིན་པ་ཡིན་ཡང་ཁྱིམ་པ་ཕོ་མོ་ཐོས་པ་སྔོན་སོང་གི་བག་ཆགས་ཅན་ཉུང་བ་ཡིན་པས་འདི་གོ་སོང་ཟེར་རྒྱུ་མེད་ཀྱང་ལམ་ལྔ་ས་བཅུའི་བགྲོད་རིམ་དེ་ཧ་ལམ་གྱིས་རགས་བཤད་ཅིག་བྱས་ན། ས་ལམ་གྱི་ཡོན་ཏན་སྣ་རེ་དང་། གཟུངས་དང་། ཏིང་འཛིན་གྱི་སྒོ་རེ་རེའི་མཚན་ཙམ་ཐོས་ཏེ་དེའི་སྒྲ་ཡི་རྗེས་སུ་ཞུགས་པའི་དད་པ་ཙམ་བྱས་ན་འདུས་ཚོགས་འདི་ལྟ་བུའི་མང་པོས་བྱིན་རླབས་དང་བཅས་པས་བདེ་བ་ཅན་དུ་སྐྱེ་བའི་རྒྱུར་རླབས་ཆེན་སེམས་བསྐྱེད་སྐད་ཅིག་མའི་དགེ་རྒྱུན་འདིས་ཀྱང་འགྱུར་ཐུབ་པ་ཡིན་སྙམ། རྣམ་གྲོལ་ལམ་གྱི་འཇུག་ངོགས་ལ་བརྟེན་ནས་ཐར་བའི་བྱང་ཆུབ་ཏུ་བསྐྱོད་དགོས་པས་ན་ཐོག་མར་ལམ་གྱི་མཚན་ཉིད་ཞོག་ཟེར་ན། རྣམ་པར་གྲོལ་བའི་འཇུག་ངོགས་ལམ་གྱི་མཚན་ཉིད་ཅེས་ཟེར་ཆོག་ལ། དེར་དབྱེ་བ་ཕྱེས་ན། ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་པའི་ལམ་དང་ལྔ་ཡོད། ༼ཁ༽ འཕྲོས་དོན་ལམ་ལྔའི་རྣམ་བཞག་བཤད་པ། ༼ཀ ཚོགས་ལམ་བཤད་པ། འདིར་ཉན་ཐོས་དང་ཐེག་ཆེན་གྱི་ལུགས་གཉིས་ཡོད་པ་ལས་སྐབས་འདིར་ཐེག་ཆེན་གྱི་ལུགས་ཀྱིས་བཤད་དགོས་ཤིང་། ཚོགས་ལམ་ལ་རྣམ་གྲོལ་ལམ་གྱི་འཇུག་ངོགས་རྣམ་པར་རྟོག་པ་ལས་འདས་པའི་རྣམ་པར་མི་རྟོག་པ་དོན་སྤྱིའི་ཚུལ་གྱིས་ཐོག་མར་སྒོམ་པ་ཚོགས་ལམ་གྱི་མཚན་ཉིད་ཡིན། འདི་ལ་དབྱེ་ན། ཚོགས་ལམ་ཆུང་། འབྲིང་། ཆེ་གསུམ་ཡོད་པ་དང་། ཚོགས་ལམ་ཆུང་འབྲིང་ཆེ་གསུམ་གྱི་ནང་གི་དང་པོ་ཚོགས་ལམ་ཆུང་ངུ་ལ་བསམ་བློ་བཏང་ན། དྲན་པ་ཉེ་བར་བཞག་པ་བཞི་སྟེ། ལུས་དྲན་པ་ཉེར་བཞག ཚོར་བ་དྲན་པ་ཉེར་བཞག སེམས་དྲན་པ་ཉེ་བར་བཞག་པ། ཆོས་དྲན་པ་ཉེ་བར་བཞག་པ་བཞི་བོ་སྒོམ་པ་སྟེ། སྦྱོར་ལམ་ལ་ནམ་འཇུག་མ་ངེས་པ་ཚོགས་ལམ་ཆུང་ངུར་བཞག་པ་ཡིན། གཉིས་པ་ཚོགས་ལམ་འབྲིང་ལ་བསམ་བློ་བཏང་ན། དགེ་བ་མ་སྐྱེས་པ་བསྐྱེད་པ། སྐྱེས་པ་གོང་ནས་གོང་དུ་སྤེལ་བ། མི་དགེ་བ་སྐྱེས་པ་ཞི་ཞིང་། མ་སྐྱེས་པ་སླར་མི་སྐྱེ་བའི་ཡང་དག་སྤོང་བ་བཞིར་སྒོམ་པ་སྟེ། སྦྱོར་ལམ་ལ་འཇུག་པའི་དུས་ངེས་པ་ཅན་ཡིན། གསུམ་པ་ཚོགས་ལམ་ཆེན་པོ་ནི། འདུན་པ། བརྩོན་འགྲུས། སེམས་པ། དཔྱོད་པ་སྟེ་རྫུ་འཕྲུལ་གྱི་རྐང་པ་བཞིར་སྒོམ་པ་སྟེ། ཚེ་དེ་ཉིད་ཀྱི་ཐོག་ནས་སྦྱོར་ལམ་དྲོད་སྐྱེ་བ་ངེས་པ་ཅན་ཡིན། འདིར་ཚོགས་ལམ་ཞེས་ཅིའི་ཕྱིར་བཏགས་ཤེ་ན། ཚོགས་ཞེས་པ་བསོད་ནམས་དང་ཡེ་ཤེས་ཀྱི་ཚོགས་གཉིས་ཡིན་ལ། དེར་གོམས་པ་བསྐྱེད་དེ་ཐར་བ་ཆ་མཐུན་གྱི་ལམ་ལ་འཇུག་པས་ཚོགས་ལམ་ཞེས་གསུངས། ཐར་བ་ཆ་མཐུན་ཞེས་པ་ཅིའི་དོན་ཡིན་ཞེ་ན། ཐར་བ་ནི་འཁོར་བའི་སྡུག་བསྔལ་ལས་ཐར་ཏེ་མྱ་ངན་ལས་འདས་པ་ཡིན་ཞིང་། དེའི་ཆ་དང་མཐུན་པར་ཡིད་ལ་བྱེད་པས་ཐར་བ་ཆ་མཐུན་ཡིན། ༼ཁ སྦྱོར་ལམ། ལམ་ལྔའི་ནང་གི་གཉིས་པ་སྦྱོར་ལམ་སྟེ། སྦྱོར་ལམ་ནི་རྣམ་གྲོལ་ལམ་གྱི་འཇུག་ངོགས་ཚོགས་ལམ་གྱི་སྒྲུབ་པ་གང་ཡིན་པ་དེ་ཉིད་ཡིན་པས་ན་གོང་ནས་བཤད་པའི་རྣམ་པར་མི་རྟོག་པའི་ཡེ་ཤེས་དེ་ཉིད་དོན་སྤྱིའི་ཚུལ་གྱིས་སྒོམ་པ་སྦྱོར་ལམ་གྱི་མཚན་ཉིད་ཡིན། འདིར་རྟོགས་ཚུལ་གྱི་སྒོ་ནས་དབྱེ་བར་ཕྱེས་ན་བཞིར་ཕྱེ་རྒྱུ་ཡིན་པ་སྟེ། དྲོད། རྩེ་མོ། བཟོད་པ། ཆོས་མཆོག་བཞི་སྟེ། དད། བརྩོན། དྲན་པ། ཏིང་འཛིན། ཤེས་རབ་ཀྱི་དབང་པོ་ལྔ་དང་སྟོབས་ལྔའི་རང་བཞིན་སྒོམ་པ་ཡིན། དྲོད་རྩེ་མོ་གཉིས་ལ་དབང་པོ་ལྔ་སྒོམ་པ་དང་། བཟོད་པ་ཆོས་མཆོག་གཉིས་ལ་སྟོབས་ལྔ་སྒོམ་པ་ཡིན། དང་པོ་དྲོད་ཅེས་པའི་དོན་གང་ཡིན་ཞེ་ན། གཙུབ་ཤིང་གཙུབས་པས་མེ་འབྱུང་བའི་སྔ་ལྟས་སུ་དྲོད་འབྱུང་བ་ལྟར་དུ་མཐོང་ལམ་མི་རྟོག་པའི་ཡེ་ཤེས་སྐྱེ་བའི་སྔ་ལྟས་སུ་གྱུར་པ་དེ་དྲོད་ཅེས་གསུངས། གཉིས་པ་རྩེ་མོ་ནི། དགེ་རྩ་གཡོ་བ་ཐམས་ཅད་ཀྱི་རྩེ་མོར་གྱུར་པས་ན་རྩེ་མོ་ཡིན། གསུམ་པ་བཟོད་པ་ནི། སྟོང་ཉིད་ལ་མི་སྐྲག་པའི་བཟོད་པ་ཐོབ་པ་དེ་ཡིན་ཞེས་གསུངས། བཞི་བ་ཆོས་མཆོག་སྟེ་ཆོས་མཆོག་ཏུ་གྱུར་པ་ཇི་ལྟར་ཡིན་ཞེ་ན། འཇིག་རྟེན་པའི་ཆོས་ཀྱི་ནང་ནས་མཆོག་ཏུ་གྱུར་པས་ན་ཆོས་མཆོག་ཡིན། འདིས་མཐོང་ལམ་ཟག་མེད་ཀྱི་བདག་རྐྱེན་བྱེད་པ་སྟེ། མཐོང་ལམ་སྐྱེ་བར་དུས་ངེས་པ་ཡོད་མེད་ཀྱིས་སྦྱོར་ལམ་ཆུང་འབྲིང་ཆེན་པོའི་དབྱེ་བ་ཡང་ཡོད། ཐེག་ཆེན་ཐུན་མིན་གྱི་དགོངས་པ་བྱང་ཆུབ་སེམས་དཔའི་སྦྱོར་ལམ་དེ་ཆུ་བོ་ཚ་སྒོ་ཅན་གྱི་མདོའི་དགོངས་པ་ལྟར་དུ་དྲོད་སྣང་བ་ཐོབ་པའི་ཏིང་ངེ་འཛིན། རྩེ་མོ་སྣང་བ་མཆེད་པའི་ཏིང་ངེ་འཛིན། བཟོད་པ་དོན་གྱི་དེ་ཁོ་ན་ཉིད་ཀྱི་ཕྱོགས་གཅིག་ལ་ཞུགས་པའི་ཏིང་ངེ་འཛིན། ཆོས་མཆོག་དེ་མ་ཐག་པའི་ཏིང་ངེ་འཛིན་ཞེས་བཞེད་པ་ཡིན་ཡང་འཕགས་པ་ཀླུ་སྒྲུབ་ཡབ་སྲས་ཀྱིས་ཐེག་པ་གསུམ་གྱི་སྦྱོར་ལམ་ལ་ཐབས་ཀྱི་ཁྱད་པར་དང་ངེས་འབྱེད་བཞིའི་རང་རང་གི་དམིགས་པ་གསལ་མི་གསལ་མ་གཏོགས་པར་བདག་མེད་རྟོགས་པ་ལ་ཁྱད་པར་མེད་པར་ཉན་ཐོས་ཀྱི་ས་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བསླབ་བོ་ཞེས་གསུངས་པའི་ཡུམ་རྒྱས་འབྲིང་གི་དགོངས་པ་ལྟར་དུ་བཞེད་ཀྱིན་ཡོད། མཐོང་ལམ་ཆོས་ཀྱི་དབྱིངས་དོན་དམ་པ་མངོན་སུམ་དུ་མཐོང་བ་ལ་སྦྱོར་བར་བྱེད་པས་སྦྱོར་ལམ་ཞེས་གསུངས་པ་ཡིན། ༼ག མཐོང་ལམ། ལམ་ལྔའི་ནང་ནས་གསུམ་པ་མཐོང་ལམ་ཡིན་ལ། མཐོང་ལམ་དེ་ཇི་ལྟར་ཡིན་ཞེ་ན། ཆོས་ཀྱི་དབྱིངས་ཀྱི་འཇུག་ངོགས་ལ་གསལ་སྣང་དང་པོར་སྐྱེས་པ་མཐོང་ལམ་གྱི་མཚན་ཉིད་ཡིན། འདིར་ཉན་རང་བྱང་སེམས་ཀྱི་མཐོང་ལམ་གྱི་དབྱེ་བ་ཡོད། མཐོང་སྤང་སྤོང་ཚུལ། མཐོང་ལམ་སྐྱེ་བའི་རྣམ་བཞག་ལ་སོགས་པ་མང་དུ་ཡོད་ཀྱང་བྱང་ཆུབ་སེམས་དཔའི་ས་ལམ་གྱི་རྣམ་བཞག་མཚན་ཙམ་སྨོས་པས་དད་དང་ངེས་ཤེས་ཀྱི་སྨོན་པའི་ཡུལ་ཙམ་བཤད་པའི་སྐབས་ཡིན། དྲན་དང་། ཆོས་རབ་རྣམ་འབྱེད། བརྩོན་འགྲུས། དགའ་བ། ཤིན་སྦྱངས། ཏིང་ངེ་འཛིན་དང་། བཏང་སྙོམས་བདུན་ཏེ། སྡོམ་བྱས་ན། དྲན་དང་ཆོས་རབ་རྣམ་འབྱེད་དང་། །བརྩོན་འགྲུས་དགའ་དང་ཤིན་ཏུ་སྦྱངས། །ཏིང་ངེ་འཛིན་དང་བཏང་སྙོམས་ནི། །བྱང་ཆུབ་ཡན་ལག་བདུན་ཡིན་ནོ། །ཞེས་གསུངས་ལ། འདི་བདུན་པོ་ཟག་པ་མེད་པའི་མཐོང་བའི་ལམ་བྱང་ཆུབ་ཀྱི་ཡན་ལག་བདུན་ཡིན། ཆོས་བཟོད། ཆོས་ཤེས། རྗེས་བཟོད། རྗེས་ཤེས་བཞི་བདེན་བཞི་དང་སྦྱར་བའི་སྐད་ཅིག་བཅུ་དྲུག་གིས་བཤད་ཚུལ་དང་བསྟུན་ནས་ཉོན་སྒྲིབ་ཀུན་བཏགས་ཀྱི་ཆ་ཐམས་ཅད་མཐོང་སྤང་དང་། ལྷན་སྐྱེས་སྒོམ་སྤང་། ཤེས་སྒྲིབ་གཟུང་འཛིན་གྱི་རྟོག་པ་རགས་པ་མཐོང་སྤང་དང་། ཕྲ་བ་སྒོམ་སྤང་དུ་བཞེད་པ་ཡིན། སྔར་མ་མཐོང་པའི་ཆོས་ཀྱི་དབྱིངས་མཐོང་བས་མཐོང་བ་དང་། ཐར་བའི་འཇུག་ངོགས་ཡིན་པས་ན་ལམ་ཞེས་གསུངས། འདིའི་སྐབས་སུ་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ནས་དུས་སྐད་ཅིག་གཅིག་ལ་ཏིང་ངེ་འཛིན་བརྒྱ་ལ་སྙོམས་པར་འཇུག་ཅིང་ལྡང་ནུས་པ་དང་། སངས་རྒྱས་བརྒྱ་ཡི་ཞལ་མཐོང་བ་ལ་སོགས་པའི་ཡོན་ཏན་བརྒྱ་ཕྲག་བཅུ་གཉིས་ཐོབ་ཅིང་། འཛམ་གླིང་གི་རྒྱལ་པོའི་སྐྱེ་བ་འཛིན་ནུས་པ་ཡིན། རྟོགས་པའི་ཡོན་ཏན་གྱི་རྟེན་དུ་གྱུར་པ་ས་ཡིན་ལ་སའི་རྟེན་དུ་ཡང་གྱུར་པ་ལམ་ཡིན་པས་ས་ལམ་འབྲེལ་ནས་བཤད་དགོས། དེས་ན་འཕགས་པའི་ས་བཅུའི་ནང་གི་ས་དང་པོས་ཆོས་ཉིད་ཀྱི་བདེན་པ་མཐོང་བའི་གནས་སྐབས་ན་སྔར་དང་མི་འདྲ་བར་དགའ་བ་ཆེན་པོ་དང་ལྡན་པས་ན་རབ་ཏུ་དགའ་བ་ཐོབ་ཅེས་གསུངས་ཡོད། ༼ང སྒོམ་ལམ། ལམ་ལྔའི་བཞི་བ་སྒོམ་ལམ་ནི། ཏིང་ངེ་འཛིན་ཁྱད་པར་ཅན་གྱི་འཇུག་ངོགས་ལ་གོམས་པར་བྱེད་པ་སྒོམ་ལམ་གྱི་མཚན་ཉིད་ཅེས་དེ་ལྟར་གསུངས་ཡོད། ཡང་དག་ལྟ་དང་རྟོག་པ་དང་། །ངག་དང་ལས་མཐའ་འཚོ་བ་དང་། །རྩོལ་བ་དྲན་པ་ཏིང་ངེ་འཛིན། །འཕགས་ལམ་ཡན་ལག་བརྒྱད་དུ་བརྗོད། །ཅེས་གསུངས་པ་ཡིན་ལ། དེས་ན་ཡང་དག་པའི་ལྟ་བ་དང་ཡང་དག་པའི་འཚོ་བ་ལ་སོགས་པ་འཕགས་ལམ་ཡན་ལག་བརྒྱད་དེ་བསྒོམས་ནས་སེར་སྣ་དང་། འཆལ་བའི་ཚུལ་ཁྲིམས། ཁོང་ཁྲོ་ལ་སོགས་པ་མི་མཐུན་ཕྱོགས་བཅུ་དེ་སེལ་བ་ལ་ལྟོས་ནས་ས་བཅུར་ངེས་པ་ཡིན། སྒོམ་ལམ་ཆུང་འབྲིང་ཆེ་གསུམ་པོ་གསུམ་ཚན་གསུམ་གྱི་དབྱེ་བས་དགུ་ཡོད་ལ། ཆུང་ངུའི་ཆུང་ངུ་ས་གཉིས་པ་དྲི་མ་མེད་པ་ལ་ཚུལ་ཁྲིམས་ཀྱི་ཕར་ཕྱིན་མཆོག་ཏུ་གྱུར། ཆུང་ངུའི་འབྲིང་ས་གསུམ་པ་འོད་དུ་བྱེད་པ་ལ་བཟོད་པའི་ཕར་ཕྱིན། ཆུང་ངུའི་ཆེན་པོ་ས་བཞི་བ་འོད་འཕྲོ་བ་ལ་བརྩོན་འགྲུས་ཀྱི་ཕར་ཕྱིན་མཆོག་ཏུ་གྱུར་པ་སྟེ་དེ་དག་ཆུང་སྐོར་གསུམ་ཡིན། འབྲིང་གི་ཆུང་ངུ་ས་ལྔ་བ་སྦྱང་དཀའ་བ་ལ་བསམ་གཏན་གྱི་ཕར་ཕྱིན། འབྲིང་གི་འབྲིང་ས་དྲུག་པ་མངོན་དུ་གྱུར་པ་ལ་ཤེས་རབ་ཀྱི་ཕར་ཕྱིན། འབྲིང་གི་ཆེན་པོ་ས་བདུན་པ་རིང་དུ་སོང་བ་ལ་ཐབས་ཀྱི་ཕ་རོལ་ཏུ་ཕྱིན་པ་མཆོག་ཏུ་གྱུར་པ་སྟེ་འབྲིང་སྐོར་གསུམ་ཡིན། ཆེན་པོ་སྐོར་གསུམ་གྱི་ཆེན་པོའི་ཆུང་ངུ་ས་བརྒྱད་པ་མི་གཡོ་པ་ལ་སྟོབས་ཀྱི་ཕ་རོལ་ཏུ་ཕྱིན་པ་མཆོག་ཏུ་གྱུར་བ་ཡིན་ཞིང་། འདི་དག་གི་ཡོན་ཏན་གྱི་ཁྱད་པར་ས་གཉིས་པའི་སྐབས་སུ་འཆལ་བའི་ཚུལ་ཁྲིམས་དང་། རྩོལ་བའི་དྲི་མ་དག་པ། ཡོན་ཏན་སྟོང་ཕྲག་བཅུ་གཉིས་སྐད་ཅིག་ལ་ཐོབ་པ། གླིང་བཞི་ལ་དབང་པའི་འཁོར་ལོས་སྒྱུར་བའི་སྐྱེ་བ་འཛིན་ནུས་པ་དང་། ས་གསུམ་པ་ལ་ཡོན་ཏན་འབུམ་ཕྲག་བཅུ་གཉིས་ལ་སོགས་པའི་འགྱུར་ཁྱད་ཀྱིས་གོང་ནས་གོང་དུ་འཕར་རྒྱུ་ཡིན་པས་ས་བརྒྱད་པ་འདིའི་སྐབས་ཀྱི་ཡོན་ཏན། འདུ་ཤེས་གཉིས་ཀྱིས་མི་གཡོའི་ཕྱིར། །མི་གཡོ་བ་ཡི་སར་འདོད་དོ། །ཞེས་གསུངས་པ་ཡིན་པས་མི་གཡོ་བའམ་གཡོ་བ་མེད་པའི་རྣམ་པར་མི་རྟོག་པར་མངའ་བརྙེས་པ་ཡིན། སྒོ་གསུམ་གྱི་སྤྱོད་ཡུལ་ཐམས་ཅད་བསམ་གྱིས་མི་ཁྱབ་པར་གྱུར་ཏེ་ཉོན་ཡིད་གནས་གྱུར་ཏེ་རྣམ་པ་མི་རྟོག་པར་དབང་བ་དང་། འཛིན་པ་སྒོ་ལྔའི་རྣམ་ཤེས་གནས་གྱུར་ཏེ་ཞིང་ཁམས་དག་པར་དབང་ཐོབ་པ། དེའི་སྐབས་སུ་ཡེ་ཤེས་ལྔའི་ནང་གི་མཉམ་ཉིད་ཡེ་ཤེས་དང་སོར་རྟོག་ཡེ་ཤེས་ལ་དབང་འབྱོར་ཏེ་སྟོང་ཆེན་འབུམ་ཕྲག་གཅིག་གི་རྡུལ་དང་མཉམ་པའི་སངས་རྒྱས་ཀྱི་ཞལ་བལྟ་ཞིང་ཆོས་ཉན་ནས་གཞན་འཕྲུལ་དབང་བྱེད་ཀྱི་རྒྱལ་པོར་གྱུར་པས་མི་ཚད་ཚངས་པའི་གོ་འཕང་འཛིན་ནུས་པ་ཡིན། དེ་ལྟར་ན་སྐབས་དོན་དགེ་སློང་ཆོས་ཀྱི་འབྱུང་གནས་དྲན་པ་དང་། བློ་གྲོས། ཤེས་རབ་དང་། བརྩོན་འགྲུས་རྒྱ་ཆེན་པོ་གཞན་ལས་ཁྱད་པར་དུ་འཕགས་པ་དེ་ཉིད་ཀྱིས་གོང་གི་ཐུན་མོང་དང་ཐུན་མིན་གྱི་ས་ལམ་བགྲོད་པ་ཙམ་གྱིས་མི་ཚད་པར་ལོ་བྱེ་བ་གཅིག་གི་རིང་དུ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཡོན་ཏན་དང་། ཞིང་གི་རྒྱན་བཀོད་ལ་སོགས་པ་གཅིག་ཏུ་བསྡོམས་པའི་ཞིང་ཞིག་གཟུང་བའི་ཐུགས་བསྐྱེད་སྨོན་ལམ་གྱི་ཁྱད་པར་འཕགས་པ་དེའི་ཐོག་ཏུ་ས་བརྒྱད་པ་ཐོབ་པའི་བྱང་སེམས་འཁོར་སྒྱུར་རྩིབས་ཀྱི་མུ་ཁྱུད་ཀྱི་སྐྱེ་བ་བཞེས་སྐབས་སུ་སངས་རྒྱས་རིན་ཆེན་སྙིང་པོའི་མདུན་ནས་སླར་ཡང་ཞིང་ཁམས་གཟུང་བའི་སྨོན་ལམ་བཏབ་སྟེ། དག་པ་ས་གསུམ་བགྲོད་ནས་སྨོན་ལམ་བཏབ་པ་ཇི་བཞིན་དུ་སངས་རྒྱས་ཤིང་སངས་རྒྱས་པས་མ་ཚད་པར་ད་ལྟར་བདེ་བ་ཅན་གྱི་ཞིང་གི་མགོན་དུ་བཞུགས་པ་ཡིན། ས་བརྒྱད་པའི་བྱང་ཆུབ་སེམས་དཔས་སྟོང་ཆེན་འབུམ་ཕྲག་གཅིག་གི་སངས་རྒྱས་ཀྱི་ཞལ་ལྟ་བར་ནུས་པ། སངས་རྒྱས་དེ་སྙེད་ཀྱི་མདུན་ནས་ཞིང་ཁམས་ཁྱད་འཕགས་གཟུང་བའི་སྨོན་ལམ་བཏབ་པ་ཤུགས་བསྟན་གྱིས་གོ་བ་དང་། ས་བརྒྱད་པས་ཚངས་པའི་གོ་འཕང་འཛིན་ནུས་ཀྱང་གླིང་བཞིར་དབང་བའི་འཁོར་སྒྱུར་གྱི་སྐྱེ་བ་བཞེས་པ་འཇིག་རྟེན་འདི་ཉིད་ཀྱི་དབང་དུ་བྱས་ཏེ་གསུངས་པའི་གོ་བ་འབྱེད་ཤེས་དགོས། འཁོར་སྒྱུར་དང་ཚངས་པ་སོགས་ཀྱི་སྐྱེ་བ་བཟུང་ཚད་བྱང་སེམས་ས་བརྒྱད་པ་ལ་གནས་པ་ཡིན་པས་མ་ཁྱབ་ཀྱང་སྐབས་འགར་སངས་རྒྱས་བྱང་སེམས་ཀྱི་སྤྲུལ་བ་དེ་དང་དེར་སྣང་བའི་གོ་བ་ཡིན། དེ་ལྟར་ན་སྒོམ་ལམ་ཆེན་པོའི་འབྲིང་ས་དགུ་བ་ལེགས་པའི་བློ་གྲོས་ལ་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས། དེ་དུས་ཡིད་ཀྱི་རྣམ་ཤེས་གནས་གྱུར་ནས་ཡོན་ཏན་སོ་སོར་ཡང་དག་རིག་བཞི་ལ་མངའ་བརྙེས། ཕྲིན་ལས་ཕུན་སུམ་ཚོགས་པ་ལ་དབང་ཐོབ་པ་ཡིན། སྟོང་ཆེན་གྲངས་མེད་འབུམ་ཕྲག་བཅུ་ཡི་སངས་རྒྱས་ཀྱི་ཞལ་ལྟ་བ་ལ་སོགས་པའི་ཁྱད་པར་དང་། ཆེན་པོའི་ཆེན་པོ་ས་བཅུ་བ་ཆོས་ཀྱི་སྤྲིན་ལ་ཡེ་ཤེས་ཀྱི་ཕར་ཕྱིན་རྫོགས། ཏིང་ངེ་འཛིན་དང་གཟུངས་ཀྱི་སྒོ་བསམ་གྱིས་མི་ཁྱབ་པ་ཟད་པ་མེད་པའི་སྤྲིན་གྱིས་གདུལ་བྱའི་ནམ་མཁར་ཁྱབ་སྟེ་ཆོས་ཀྱི་ཆར་བས་སེམས་ཅན་ཚིམ་པར་བྱེད་པས་ན་བཅུ་བ་ཆོས་ཀྱི་སྤྲིན་ཞེས་གསུངས། མདོ་སྔགས་གང་གི་ལམ་ནས་བཤད་ཀྱང་ས་ལམ་མི་བགྲོད་པར་སངས་རྒྱས་ཟེར་བ་ཞིག་སྲིད་པ་མིན། ས་ལམ་གྱི་ཡོན་ཏན་གཅིག་ཀྱང་མེད་པའི་མཐོང་ལམ་གྱི་ཡོན་ཏན་རྒྱུད་ལ་སྐྱེ་བ་ཞིག་མདོ་རྒྱུད་བསྟན་བཅོས་ཐམས་ཅད་ནས་བཤད་ཡོད་པ་མིན་པས་དེ་ལྟར་ཡོད་པར་བསྟན་ན་དེ་ནི་སངས་རྒྱས་ཀྱི་བསྟན་པ་ལས་ཕྱི་རོལ་དུ་གྱུར་པ་ཞིག་ཡིན་རྟགས་རེད། ས་ལམ་གྱི་བགྲོད་པ་འདི་དག་དོན་དམ་སེམས་བསྐྱེད་ལ་བརྟེན་ནས་ཤེས་རབ་སྟོང་པ་ཉིད་སྒོམ་པས་ཉེར་ལེན་གྱི་རྒྱུ་བྱས། ཐབས་སྙིང་རྗེ་ཆེན་པོས་ལྷན་ཅིག་བྱེད་རྐྱེན་བྱས་ཏེ་ལམ་ལྔ་འགྲུབ་པ་དང་། ཀུན་རྫོབ་སེམས་བསྐྱེད་ལ་བརྟེན་ནས་ཐབས་སྙིང་རྗེ་ཆེན་པོས་ཉེར་ལེན་གྱི་རྒྱུ་བྱས། ཤེས་རབ་སྟོང་པ་ཉིད་ཀྱིས་ལྷན་ཅིག་བྱེད་རྐྱེན་བྱས་ཏེ་ས་བཅུ་ཐོབ་པ་ཡིན། སངས་རྒྱས་པའི་སྐབས་ཡིན་ཡང་ལམ་གྱི་མཐར་ཐུག་ཆོས་སྐུ་དང་སའི་མཐར་ཐུག་གཟུགས་སྐུར་འཇོག་རྒྱུ་ཡིན། གོང་ནས་ཀྱང་བཤད་མོད་ཀྱང་ས་དགུའི་དྲི་མ་སྤོང་བའི་གཉེན་པོའི་ཁྱད་པར་ལ་ལྟོས་ནས་སྦྱོར་དང་། བར་ཆད་མེད་ལམ། རྣམ་གྲོལ་ལམ་དང་། ཁྱད་པར་གྱི་ལམ་ཞེས་གྲངས་བཞིར་ངེས་པ་དང་། སྦྱོར་དང་བར་ཆད་མེད་ལམ་གཉིས་ཀ་སྤོང་བའི་གཉེན་པོ། རྣམ་གྲོལ་ལམ་རྟེན་གྱི་གཉེན་པོ། ཁྱད་པར་གྱི་ལམ་ཐག་སྲིང་བའི་གཉེན་པོ་ཡིན། ༼ཅ མི་སློབ་ལམ། ཐུན་མིན་ལམ་ལྔའི་ལྔ་བ་མི་སློབ་པའི་ལམ་ཡིན་ལ། བཅུ་གཅིག་ཀུན་ཏུ་འོད་ཀྱི་ས་ནི། མངོན་རྟོགས་རྒྱན་ལས། མི་གནས་མྱ་ངན་འདས་པ་དང༌། །བྱང་ཆུབ་མཆོག་དང་སྟོན་པའོ། །ཞེས་གསུངས་པ་ལྟར་ཡིན་ཞིང་། སྤངས་དང་ཡེ་ཤེས་ཕུན་སུམ་ཚོགས་པ་སངས་རྒྱས་ཀྱི་མཚན་ཉིད་ཡིན། མི་གནས་གང་ལ་མི་གནས་པ་ཡིན་ཞེ་ན། ཤེས་པས་སྲིད་ལ་མི་གནས་ཤིང་། །སྙིང་རྗེས་ཞི་ལ་མི་གནས་པ། །ཞེས་གསུངས་པ་ལྟར་ཤེས་རབ་ཀྱིས་འཁོར་བ་དང་སྙིང་རྗེས་མྱ་ངན་ལས་འདས་པ་ལ་མི་གནས་པ་ཡིན། འདིར་བྱང་ཆུབ་མཆོག་གི་ཐ་སྙད་ཇི་ལྟར་ཐོབ་པ་ཡིན་ཞེ་ན། སངས་རྒྱས་ཀྱི་ཐུན་མོང་དང་ཐུན་མིན་གྱི་ཡོན་ཏན་འདི་དག་ལྷུན་གྱིས་གྲུབ་པ་དང་། སྟོན་པ་ཞེས་པ་ཉན་ཐོས་ཀྱི་མྱང་འདས་ལྟ་བུ་ཟད་མི་སྐྱེ་ཤེས་པ་ཙམ་མིན་པའི་མྱ་ངན་ལས་འདས་ཀྱང་སེམས་ཅན་གྱི་དོན་རྒྱུན་མི་ཆད་པ་ཡིན། སྤངས་དང་ཡེ་ཤེས་ཕུན་སུམ་ཚོགས་པ་ཞེས་མཚན་ཉིད་བཞག་པ་ཡིན་ཞིང་། སྤངས་པ་ཉོན་ཤེས་ཀྱི་སྒྲིབ་པ་བག་ཆགས་དང་བཅས་པ་སྤངས་པ་དང་། ཡེ་ཤེས་ནི་ཤེས་བྱ་ཇི་ལྟ་བ་དང་ཇི་སྙེད་པ་མཁྱེན་པས་ན་དེ་ལྟར་བཞག་པ་ཡིན། འོ་ན། ས་དགུ་འདས་ནས་ཡེ་ཤེས་ནི། །གང་གིས་སངས་རྒྱས་སར་གནས་པ། །དེ་ནི་བྱང་ཆུབ་སེམས་དཔའི་ས། །བཅུ་པ་ཡིན་པར་ཤེས་པར་བྱ། །ཞེས་གསུངས་པའི་དོན་ཅི་ཞིག་ཡིན་ཞེ་ན། ཕར་ཕྱིན་ཐེག་པའི་སྐབས་སུ་བསྐལ་བ་གྲངས་མེད་མང་པོའི་འཐོབ་པར་བྱ་བའི་སངས་རྒྱས་དེ་ལ་ཉེ་བར་དགོངས་ནས་བཏགས་པ་བར་བྱེད་པའི་སངས་རྒྱས་ས་བཅུ་པ་དང་། བཅུ་གཅིག་ཀུན་ཏུ་འོད་དེ་མཚན་ཉིད་པའི་ས་དང་གཉིས་ཀའི་དབྱེ་བའི་ཐོག་ནས་བཤད་པ་ཡིན། བཅུ་གཅིག་ཀུན་ཏུ་འོད་དེ་སྟོབས་བཅུ་མི་འཇིགས་བཞི་ལ་སོགས་པ་ཟག་མེད་ཀྱི་ཡོན་ཏན་སྡེ་ཚན་ཉེར་གཅིགདེ་ཡང་རྒྱས་པར་བྱས་ཏེ་བཤད་ན། ཟག་མེད་ཀྱི་ཡོན་ཏན་བརྒྱ་དང་ཞེ་བཞི་ལ་མངའ་དབང་འབྱོར་བ་དེ་ཉིད་ཡིན། ཏིང་ངེ་འཛིན་ཐོབ་པའི་ཁྱད་པར་ལ་བསམ་བློ་བཏང་ན། སྒྱུ་མ་ལྟ་བུའི་ཏིང་ངེ་འཛིན། ཟླ་བ་དྲི་མ་མེད་པའི་ཏིང་ངེ་འཛིན། ནམ་མཁའ་ལྟར་གོས་པ་མེད་པའི་ཏིང་ངེ་འཛིན་ལ་སོགས་པ་ཀུན་མཁྱེན་ཀློང་ཆེན་པས་མང་དུ་གསུངས་ཡོད། ཏིང་ངེ་འཛིན་བརྒྱ་སྟོང་གྲངས་མེད་བསམ་གྱིས་མི་ཁྱབ་པར་སངས་རྒྱས་ཉིད་ཀྱི་སྤྱོད་ཡུལ་ལས་གཞན་གྱིས་བགྲང་བར་མི་ནུས་པ་ཐོབ་པའི་དུས་ཡིན། ཟག་མེད་ཀྱི་ཆོས་སྡེ་ཚན་ཉེར་གཅིག་དེ་གང་ཡིན་ཞེ་ན། དབང་བཅུ་སྟོབས་བཅུ་མི་འཇིགས་རྣམ་པ་བཞི། །མ་འདྲེས་བཅོ་བརྒྱད་བསྲུང་མེད་དྲན་ཉེ་གསུམ། །བསྙེལ་བ་མི་མངའ་བག་ཆགས་ཡང་དག་བཅོམ། །ཐུགས་རྗེ་ཆེ་དང་རྣམ་ཀུན་མཁྱེན་ཉིད་དེ། །ཟག་མེད་སྡེ་ཚན་ཉེར་གཅིག་ཉིད་དུ་འདོད། །ཅེས་སྡོམ་བྱང་དུ་གསུངས་ཡོད། མདོའི་སངས་རྒྱས་དང་སྔགས་ཀྱི་སངས་རྒྱས་ལ་ཁྱད་པར་ཡོད་མེད་ཀྱི་བཤད་པ་མང་ཡང་མ་རིག་བག་ཆགས་ཀྱི་སའམ་སྔགས་ཀྱི་སྐབས་སུ་སྣང་གསུམ་འཕོ་བའི་བག་ཆགས་ཞེས་གསུངས་པའི་ཤེས་སྒྲིབ་ཤིན་ཏུ་ཕྲ་བ་གཉེན་པོ་རྡོ་རྗེ་ལྟ་བུའི་ཏིང་འཛིན་གྱིས་བཅོམ་པ་དེ་མཐར་ཐུག་སྔགས་ལམ་ནས་བཅོམ་པའམ་མཐར་སྔགས་ལམ་ལ་ཞུགས་ནས་སངས་རྒྱས་ཐོབ་པར་བྱེད་པས་མདོ་རྒྱུད་ཀྱི་གནད་འགལ་མེད་གངས་ལྗོངས་འཇམ་དབྱངས་རྣམ་གསུམ་གྱི་བཞེད་གཞུང་མཐར་ཐུག་དགོངས་པ་གཅིག་ཏུ་སྒྲུབ་ཐུབ། མདོ་ལམ་ནས་སངས་རྒྱས་ཐོབ་ཟེར་ཡང་དོན་གཅིག་ཡིན་པ་སྟེ། ཐེག་ཆེན་མདོ་སྔགས་གཉིས་ཀ་ལམ་མྱུར་བུལ་གྱི་ཁྱད་པར་མ་གཏོགས་འབྲས་བུ་གཅིག་ཏུ་གཞོལ་དགོས། སྔགས་ལམ་ནས་མ་གཏོགས་སངས་རྒྱས་མི་ཐོབ་ཟེར་ཡང་དོན་གཅིག་ཡིན་པ་སྟེ། ཡིད་ཤེས་བདེ་མྱུར་དུ་སྐྱོབ་པ་སྔགས་ཀྱི་སྒྲ་དོན་ཡིན་ལ། སྒྲིབ་གཉིས་བག་ཆགས་དང་བཅས་པ་སྐད་ཅིག་ལ་བཅོམ་པའི་སྤངས་རྟོགས་ཕུན་ཚོགས་གཞི་ཡེ་དག་ལ་ཡང་དག་གི་རྣམ་པར་འཆར་ཚུལ་ཙམ་ཞིག་ཡིན་ཞིང་། འདི་ལམ་ལྔའི་ནང་གི་ལྔ་བ་འདིའི་གོང་ན་ལམ་གཞན་ལ་སློབ་དུ་མེད་པས་ན་མི་སློབ་པའི་ལམ་ཞེས་ཟེར། མདོར་ན་སངས་རྒྱས་ཀྱི་གོ་འཕང་བརྙེས་པ་ཡིན། འུ་ཅག་གིས་སྐད་ཆའི་གཞིའམ་འཕྲོས་གཞི་དངོས་དེ་གང་ཡིན་ཞེ་ན། ཁྱེད་ལ་ཡང་ཡང་གསོལ་བ་བཏབ་པ་དང་། །ཞེས་པའི་ཁྱེད་ཀྱི་ཐོག་ནས་བཤད་པ་རེད། ཁྱེད་ལ་ཡང་ཡང་གསོལ་བ་བཏབ་པ་དང་ཞེས་པའི་རྩ་བའི་ཚིག་གི་ཁྱེད་ཅེས་པའི་ཚིག་དེའི་ཐོག་ནས་འུ་ཅག་གིས་སྐད་ཆ་མང་པོ་ཞིག་འཕྲོས་པ་ཡིན་ཞིང་། ཁྱེད་ཅེས་པ་བདེ་ཆེན་ཞིང་གི་མགོན་པོ་སྟེ། རྒྱལ་བ་འོད་དཔག་མེད་ལ་གོ་བ་ཡིན། རྒྱལ་བ་འོད་དཔག་མེད་དེའི་རྟེན་སྐུ། བརྟེན་པ་ཡེ་ཤེས། མཛད་པ་འཕྲིན་ལས་སོགས་ཀྱི་ཐོག་ནས་བཤད་ཀྱིན་ཡོད་པ་ཡིན། གོང་ནས་བཤད་པ་དེ་ལྟར་ན་ཐབས་དང་ཤེས་རབ་མཐར་ཕྱིན་ནས་ལམ་གྱི་ཡོན་ཏན་རྫོགས་པས་ཁམས་དྲི་བཅས་དེ་བཞིན་ཉིད་ཀྱི་གློ་བུར་སྒྲིབ་བྱེད་དྲི་མ་མཐའ་དག་བྲལ་བ་དེ་ཉིད་ལ་སངས་རྒྱས་ཞེས་ཞུ་བ་ཡིན་ཞིང་། དེ་ཡང་གསལ་བོར་བྱས་ནས་བཤད་ན། སེམས་ཀྱི་ཆོས་ཉིད་འོད་གསལ་བ་ཉི་མའི་དཀྱིལ་འཁོར་ལྟ་བུ་ལ་གློ་བུར་འབྲལ་རུང་གི་དྲི་མ་སྤྲིན་ཚོགས་ལྟ་བུ་མཐའ་དག་དྭངས་ཏེ་སྐུ་དང་ཡེ་ཤེས་འདུ་འབྲལ་མེད་ཅིང་ལྷུན་གྱིས་གྲུབ་པ་མངོན་དུ་གྱུར་པ་ཙམ་ཞིག་ཡིན། ཁྱེད་ལ་ཡང་ཡང་གསོལ་བ་བཏབ་སྟེ་འུ་ཚོས་ཕྱག་འཚལ་གསོལ་འདེབས་བྱེད་སྐབས་ཆོས་སྐུ་འོད་དཔག་མེད་ཅེས་ཟེར་གྱིན་ཡོད་ལ། ཀུན་མཁྱེན་འོད་དཔག་མེད་ཅེས་ཞུ་བཞིན་ཡོད་པ་དང་། འདྲེན་པ་འོད་དཔག་མེད་ཅེས་ཞུ་བ་དང་། མགོན་པོ་འོད་དཔག་མེད་ཅེས་མཚན་རྗོད་ཀྱིན་ཡོད་པ་དང་། སངས་རྒྱས་འོད་དཔག་མེད་ཅེས་རྗོད་སྐབས་ཀྱང་ཡོད་པ་ཡིན། ད་རུང་བདེར་གཤེགས་འོད་དཔག་མེད་ལ་སོགས་པའི་མཚན་གྱི་རྣམ་གྲངས་གང་གི་སྒོ་ནས་ཐུགས་རྒྱུད་བསྐུལ་ཀྱང་འགའ་རེ་དབྱིངས་དང་ཡེ་ཤེས་དབྱེར་མེད་ཀྱི་ནང་གསལ་སྤྲུལ་གཞིའི་ཆ་ནས་བཤད་པ་དང་། འགའ་རེ་ཕྱི་གསལ་མཁྱེན་པའི་ཡེ་ཤེས་ཀྱི་རྣམ་འཆར་ཤར་བ་ཐུགས་རྗེའི་རྣམ་རོལ་གདུལ་བྱ་སྣང་ཚུལ་གྱི་ཐད་ནས་བཤད་པ་དང་། འགའ་རེ་དག་དང་མ་དག་ཏུ་སྣང་བའི་ཀུན་ཁྱབ་གཟུགས་སྐུའི་རྣམ་རོལ་ཏུ་ཤར་བའི་ཆ་ལ་སོགས་པ་ནས་སོ་སོར་སྨོས་པ་ཙམ་ཞིག་མ་གཏོགས་དོན་ལ་སྐུ་གསུམ་འདུ་འབྲལ་མེད་པ་ཡིན། རང་དོན་དུ་ཆོས་སྐུ་དམ་པ་བརྙེས་དུས་དབྱིངས་གདོད་མའི་ངོ་ན་སྐུ་གསུམ་འདུ་འབྲལ་མེད་པ་སངས་རྒྱས་ཉིད་ཀྱི་སྤྱོད་ཡུལ་ལས་གཞན་གྱིས་མ་ཡིན་པ་དེ་ལ་སྐུ་གསུམ་གྱི་ཚང་ཚུལ་ཚིག་གིས་ཕྱོགས་ཙམ་ཞིག་མཚོན་པར་སྦྱར་སྐབས་ཆོས་ཐམས་ཅད་མཚན་མ་མེད་པར་ཐུགས་སུ་ཆུད་པས་སྤྲོས་བྲལ་རང་བྱུང་གི་ཡེ་ཤེས་རང་གཞིན་རྣམ་དག་མངོན་གྱུར་གྱི་ཆ་དེ་ཆོས་སྐུ་དང་། དེ་གློ་བུར་རྣམ་དག་མཐར་ཐུག་གིས་ཁྱད་པར་དུ་བྱས་པའི་ཤིན་ཏུ་རྣམ་དག་གི་ཡེ་ཤེས་ཀྱིས་དག་པའི་སྣང་བ་རབ་འབྱམས་སུ་གཟིགས་པའི་ཆ་དེ་ལོངས་སྤྱོད་རྫོགས་སྐུ། དེའི་ཡོན་ཏན་གདུལ་བྱ་གཞན་སྣང་ལ་སྐུ་དང་མཛད་པའི་རྣམ་རོལ་དུ་སྟོན་པའི་ཐུགས་རྗེ་དང་ནུས་མཐུའི་ཡེ་ཤེས་ཀྱི་ཆ་དེ་སྤྲུལ་བའི་སྐུ། དེ་གསུམ་པོ་སངས་རྒྱས་རང་རྒྱུད་ཀྱིས་བསྡུས་པའི་སྐུ་གསུམ་ཡིན། དེའི་ཡེ་ཤེས་རྣམ་པ་གཉིས་དེ་གདུལ་བྱའི་སེམས་དག་པ་དང་སྨོན་ལམ་གྱི་རྐྱེན་གཉིས་ཀ་འཛོམས་པས་གདུལ་བྱ་གཞན་སྣང་གི་གཟུགས་སྐུ་ལོངས་སྤྲུལ་གཉིས་ཀ་དཔེར་བཞག་ན་ཆུ་ཟླའི་གཟུགས་བརྙན་ལྟར་འཆར་བ་སྟེ། རྒྱུད་བླ་མ་ལས། ཇི་ལྟར་བཻཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་གཙང་མའི་ས་གཞི་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་གསུངས་པ་ལྟར་ཡིན། སྔགས་ཀྱི་སྐབས་སུ་བཅུ་གཅིག་ཀུན་ཏུ་འོད་ཀྱི་ཡན་ལ་ད་རུང་བཅུ་གཉིས་མ་ཆགས་པདྨ་ཅན་དང་། བཅུ་གསུམ་ཡི་གེ་འཁོར་ལོ་ཚོགས་ཆེན་གྱི་ས་ལ་སོགས་པ་ནས་བཅུ་དྲུག་ཡེ་ཤེས་བླ་མའི་སའི་བར་དུ་བརྩི་རྒྱུ་ཡོད་པ་ཡིན་ལ། བརྩི་རྒྱུ་ཡོད་ཀྱང་དེ་ཡང་སྐུ་གསུམ་གྱི་ལྡོག་པའི་དབྱེ་བ་ཙམ་ལས་གཞན་དུ་མ་གྱུར་པ་ཞིག་ཡིན་ཞིང་། བརྟེན་པ་ཡེ་ཤེས་ཀྱི་ཐད་ནས་ཡིན་ཡང་མཚན་ཉིད་འཛིན་པའི་ཡེ་ཤེས་ཀྱི་ཆ་ནས་ཡེ་ཤེས་ལྔ་སྟེ། ཆོས་དབྱིངས། མེ་ལོང་། མཉམ་ཉིད། སོར་རྟོག བྱ་གྲུབ་ཡེ་ཤེས་བཅས་ཡིན། སྤྲོས་པའི་མཚན་མ་ཐམས་ཅད་དང་བྲལ་བ་དབྱིངས་ནམ་མཁའ་ལྟ་བུའི་རང་བཞིན་ཆོས་དབྱིངས་ཡེ་ཤེས། མེ་ལོང་ལ་གཟུགས་བརྙན་ཤར་བ་ལྟར་ཤེས་བྱའི་དཀྱིལ་འཁོར་མ་ལུས་པ་གསལ་བ་མེ་ལོང་ལྟ་བུའི་ཡེ་ཤེས། ང་དང་ང་ཡིར་འཛིན་པའི་དྲི་མ་དང་བྲལ་བ་མཉམ་ཉིད་ཡེ་ཤེས། སྟོབས་དང་མི་འཇིགས་པ་ལ་སོགས་པའི་ཡོན་ཏན་ཐམས་ཅད་ཀྱི་གཏེར་དུ་གྱུར་པ་སོར་རྟོག་ཡེ་ཤེས། རང་གཞན་གྱི་ཕྲིན་ལས་ཐམས་ཅད་ལྷུན་གྱིས་གྲུབ་པས་བྱ་བ་གྲུབ་པའི་ཡེ་ཤེས་ཡིན། དེས་ན་ཡེ་ཤེས་ལྔའི་ནང་ནས་སྔ་མ་གཉིས་ཀ་རང་དོན་དང་། ཕྱི་མ་གསུམ་གཞན་དོན་གཙོ་ཆེ་ཞེས་དེ་ལྟ་བུའི་འགྲེལ་ཚུལ་ཡོད། མཛད་པ་ཕྲིན་ལས་ཀྱི་ཐད་ནས་སྤྱིར་རྒྱལ་བའི་མཛད་པ་སེམས་ཅན་གྱི་དོན་ཡིན་པ་དང་། དེ་ཡང་གནས་སྐབས་དང་མཐར་ཐུག་གི་བདེ་བ་ལ་འགོད་པ་ཡིན་ལ། འདི་དབྱེ་བ་གསུམ་གྱི་ཁོངས་སུ་བསྡུས་ན། གདུལ་བར་བྱ་བའི་སེམས་ཅན་འདི་ཐམས་ཅད་ལམ་གྱི་རྟེན་ལ་འགོད་པ་དང་གཅིག ལམ་ལ་འགོད་པ་དང་གཉིས། འབྲས་བུ་ལ་འགོད་པ་གསུམ་གྱི་ནང་དུ་བསྡུས་ཏེ་བཤད་ཐུབ་པ་ཡིན། དེས་ན་ལམ་གྱི་རྟེན་ལ་འགོད་པ་ཞེས་པའི་དོན་གང་ཡིན་ཞེ་ན། ངན་སོང་དུ་སྐྱེས་པའི་སེམས་ཅན་གྱི་རྒྱུད་སྦྱངས་ཏེ་མངོན་མཐོ་ལྷ་མིའི་ལུས་རྟེན་ཁྱད་པར་ཅན་ཡང་དག་པའི་ཆོས་ཀྱི་སྣོད་དུ་རུང་བ་ལ་འགོད་པ་ལམ་གྱི་རྟེན་ལ་འགོད་པ་དང་། གཉིས་པ་ལམ་ལ་འགོད་པ་ནི་རིགས་ཅན་གདུལ་བྱ་རང་སྐལ་དང་མཐུན་པའི་ཐེག་གསུམ་གྱི་ལམ་ལ་འགོད་པ་དང་། གསུམ་པ་འབྲས་བུ་ལ་འགོད་པ་ནི་ལམ་དེ་དག་གི་འབྲས་བུ་མི་གནས་པའི་མྱང་གནས་བྱང་ཆུབ་ཆེན་པོར་འགོད་པ་འབྲས་བུ་ལ་འགོད་པ་ཡིན། ཕྲིན་ལས་དེ་ལྟ་བུ་དག་ཀྱང་བྱ་བ་ཡུལ་ལ་ཡོད་པའི་ཕྲིན་ལས་དང་། བྱེད་པོ་ཡུལ་ཅན་ལ་ཡོད་པའི་ཕྲིན་ལས་གཉིས་ཀྱི་དབྱེ་བ་ཕྱེ་རྒྱུ་ཡོད། བྱ་བ་ཡུལ་ལ་ཡོད་པའི་ཕྲིན་ལས་དེ་གདུལ་བྱའི་རྒྱུད་ཀྱིས་བསྡུས་པ་དང་། བྱེད་པོ་ཡུལ་ཅན་ལ་ཡོད་པའི་ཕྲིན་ལས་དེ་ལྟར་མཛད་པའི་ཐབས་སམ་ནུས་པ་སངས་རྒྱས་ཉིད་ཀྱི་ཐུགས་རྒྱུད་ཀྱིས་བསྡུས་པ་ཞིག་ཡིན། སངས་རྒྱས་ཆོས་ཀྱི་སྐུ་དེ་ལས་གཟུགས་སྐུའི་རྣམ་རོལ་མཐའ་ཀླས་པ་ནམ་མཁའི་གར་ཁྱབ་ཏུ་ཞིང་དང་། གདུལ་བྱ། འདུལ་བྱེད་ཀྱིས་ཁྱབ་ཅིང་ངོ་བོ་གཅིག་ལས་མ་གཡོས་པ་དེ་ཉིད་ནི། རྒྱལ་བ་གཅིག་བསྒྲུབ་ཐམས་ཅད་མ་བསྒྲུབས་འགྲུབ། །ཅེས་གསུངས་པ་ཡིན་པས་རྒྱལ་བ་འོད་དཔག་མེད་གཅིག་ལ་སྐྱབས་གནས་ཐམས་ཅད་འདུས་པར་མ་ཟད་འདྲེན་པ་འོད་དཔག་མེད་པ་ནི་རྒྱལ་བ་ཀུན་ལས་ཀྱང་ཐུགས་བསྐྱེད་མཛད་པ་རྨད་དུ་བྱུང་བ་ཡིན་པས་གདུལ་བྱའི་རྒྱུད་རྣམ་པར་གྲོལ་བ་ཅན་ཞིག་མིན་ཡང་ཆོས་སྤངས་དང་མཚམས་མེད་བསགས་པ་ཅན་མིན་ན་བདེ་བ་ཅན་དུ་འདྲེན་པར་མཛད་པ་སྟེ། ཉིན་ལན་གསུམ། མཚན་ལན་གསུམ། ཉིན་མཚན་དུས་དྲུག་ཏུ་སེམས་ཅན་ཀུན་ལ་བརྩེ་བ་ཆེན་པོས་གཟིགས་ཏེ་མ་བྱམས་བུ་ལ་འཁྲི་བ་ལྟར་སེམས་ཅན་སུ་ཞིག་དར་འདུག སུ་ཞིག་རྒུད་འདུག སུ་ཇི་ལྟར་བྱས་ཏེ་བདེ་བ་ལ་འགོད་པའི་ཐབས་ཚུལ་ལ་དགོངས་ཏེ་གདུལ་བྱ་དེའི་རྒྱུད་དང་། ལས་དང་། ལས་ཀྱི་མཐའ་རྣམ་སྨིན་དང་བཅས་པ་ཇི་ལྟར་ཨ་རུ་ར་རློན་པ་ལག་མཐིལ་དུ་བཞག་པ་ལྟར་ཐམས་ཅད་གཟིགས་བཞིན་ཡོད། དེ་ལྟར་གཟིགས་ཏེ་ཆོས་སྐུ་རྒྱལ་བ་ཐམས་ཅད་ཀྱི་སྤྲུལ་གཞི་ལས་གཟུགས་སྐུ་སྣང་བ་མཐའ་ཡས་རིགས་རྣམས་ཀུན་གྱི་བདག་པོར་བཞེངས་ཏེ། ཕྱག་གཡས་པའི་ཐབས་ཀྱི་འོད་ཟེར་དཀར་པོ་དེ་ལས་འཕགས་པ་སྤྱན་རས་གཟིགས་སུ་སྤྲུལ་ཏེ་དེའི་ཡང་སྤྲུལ་སྤྱན་རས་གཟིགས་དབང་མི་མཇེད་འཇིག་རྟེན་གྱི་ཁམས་འདིའི་དབང་དུ་བྱས་པའི་བྱེ་བ་ཕྲག་བརྒྱ། དེས་ཀྱང་མི་ཚད་པར་མཐའ་ཡས་འཇིག་རྟེན་གྱི་ཁམས་ཡོད་ཚད་པོར་ཁྱབ་པ་དང་། དེ་དག་རེ་རེས་ཀྱང་གང་འདུལ་དེར་སྟོན་གྱིས་སེམས་ཅན་ལ་ཕན་བདེ་སྦྱིན་པ་ཡིན། ཕྱག་གཡོན་པའི་ཤེས་རབ་ཀྱི་འོད་ཟེར་ལྗང་གུ་སྟེ་སྣ་ཚོགས་མདོག་ཅན་ལས་འོད་ཟེར་འཕྲོས་ཏེ། རྗེ་བཙུན་འཕགས་མ་སྒྲོལ་མར་སྤྲུལ། དེའི་ཡང་སྤྲུལ་དང་། ཉིང་སྤྲུལ་ལ་སོགས་པ་གང་འདུལ་གྱི་སྤྲུལ་བ་སྣ་ཚོགས་སྤྲོས་ཏེ་སེམས་ཅན་གྱི་འཇིགས་པ་ཐམས་ཅད་སྐྱོབ། འདོད་དགུ་ཐམས་ཅད་སྐོང་བ་ཡིན། ཐུགས་ལས་ཐབས་ཤེས་ཟུང་འབྲེལ་གྱི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་ནུས་པ་ཐམས་ཅད་གཅིག་ཏུ་བསྡུས་པའི་འོད་ཟེར་ཁ་དོག་ལྔ་ལྡན་ཞིག་འཕྲོས་ནས། སློབ་དཔོན་པདྨ་འབྱུང་གནས་སུ་སྤྲུལ། དེས་མི་མཇེད་འཇིག་རྟེན་གྱི་ཁམས་འདིར་ཨུ་རྒྱན་པད་འབྱུང་བྱེ་བ་ཕྲག་བརྒྱའམ་དེ་ལས་ཀྱང་མང་བའི་སེམས་ཅན་མཐའ་ཡས་ནམ་མཁས་གར་ཁྱབ་ཐམས་ཅད་ལ་པདྨ་འབྱུང་གནས་ནམ་མཁས་གར་ཁྱབ་ཏུ་སྤྲུལ་ཞིང་སྣང་བར་མཛད་པ་དང་། དེ་དག་གིས་ཀྱང་ཡང་སྤྲུལ་སྣ་ཚོགས་སྔར་བྱོན་ཕྱིས་མི་འབྱོན་པ་མིན་པར་གུ་རུ་ཉིད་ཀྱིས་གསུངས་པ་ལྟར་ཡིན་ཞིང་། ཁྱད་པར་དུ་བོད་ཡུལ་འདི་ན་དད་ལྡན་མི་རེའི་མདུན་ན་པད་འབྱུང་རེ་བཞུགས་པ་བསླུ་མེད་རྡོ་རྗེའི་བཀའ་ལུང་ཡིན་ལ། དེ་ལྟ་བུའི་མགོན་པོ་འོད་དཔག་མེད་རྒྱལ་ཀུན་འདུས་པའི་རང་གཟུགས་ཁྱེད་ལ་གསོལ་བ་ཐེངས་གཅིག་མིན་པར་ཡང་ཡང་བཏབ་པའི་མཐུ་དང་། མངོན་རྟོགས་ཡིད་ལ་གོམས་པའི་ཏིང་འཛིན་ཞེས་པ་སྟེ། སྤྱིར་ན་སྐུ་དང་། ཞིང་ཁམས། འཁོར་དང་། མཛད་པ། ཡེ་ཤེས། ཡོན་ཏན། འཕྲིན་ལས་དང་བཅས་པ་ཐམས་ཅད་ཡིད་ལ་བྱས་པའི་མཐུ་དང་། ཁྱད་པར་དུ་ད་རེས་འུ་ཅག་གིས་མདོ་སྔགས་ཟུང་དུ་འབྲེལ་བའི་དཀྱིལ་འཁོར་གྱི་ཆོ་ག་ཞིག་ཞལ་ཕྱེས་པ་ཡིན་ལ། དེའི་དཀྱིལ་འཁོར་གྱི་ཆོ་ག་དེ་ལ་བརྟེན་ཏེ་མཚན་མ་དང་བཅས་པའི་ལྷའི་སྐུ། སྟོང་ཉིད་ཡི་གེའི་སྒྲ་གཟུགས། ཕྱག་རྒྱ་མཚན་མ་དང་བཅས་པའི་སྟོང་པའི་གདངས་ལས་ཤར་བའི་སྔགས་ཕྱི་ནང་གི་བསྐྱེད་རིམ་གོང་མཐུན་པར་བྱས་ཏེ། མཚན་མེད་སྟོང་ཉིད་སྙིང་རྗེའི་སྙིང་པོ་ཅན་དོན་དམ་ལྷའི་ཕྱག་རྒྱར་ཤར་བའི་ཟབ་གསལ་གཉིས་སུ་མེད་པའི་ཡེ་ཤེས་དེའི་ངང་ལས། གཟུགས་སྐུ་གཉིས་ཀྱི་སྒྲུབ་བྱེད་ལྷ་ཡི་རྣལ་འབྱོར་དང་། དེ་ཁོ་ན་ཉིད་ཀྱི་རྣལ་འབྱོར། ལྷ་ཡི་ཐུགས་རྒྱུད་བསྐུལ་བ་བཟླས་པའི་རྣལ་འབྱོར། རྣལ་འབྱོར་དང་པོ་གཉིས་བརྟན་པར་བྱེད་པ་རླུང་གི་རྣལ་འབྱོར་དང་། ཆོས་བརྒྱུད་འདིའི་དབང་དུ་བྱས་པའི་གསུང་པདྨའི་རིགས་ཅན་ནང་རྒྱུད་ཡོ་ག་རྣམ་གསུམ་གྱི་ལྟ་དགོངས་ཏིང་འཛིན་དང་ཡང་འབྲེལ་བར་བྱས་ཏེ། ཏིང་འཛིན་ཁྱད་པར་ཅན་གྱི་སྒོམ་སྒྲུབ་བྱས་པའི་མཐུ་དེས་ངེས་དོན་འོད་དཔག་མེད་པའི་ཞལ་ཇི་ལྟར་མཐོང་བ་ནི། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་གྲུབ་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་ཡང་དག་གྲུབ་པའི་ལུང་ལས་གསུངས་པ་ལྟར་འོད་དཔག་མེད་ཕྱི་ན་མི་བཞུགས་ནང་ན་བཞུགས། ནང་རང་སེམས་གློ་བུར་གྱི་དྲི་མ་དབྱིངས་སུ་དྭངས་དུས་སེམས་ཉིད་འོད་གསལ་བའི་ཡེ་ཤེས་ངེས་དོན་འོད་དཔག་མེད་པའི་རང་ཞལ་དེ་ཡིན། རང་དང་སྐད་ཅིག་དང་འབྲལ་མ་མྱོང་བའི་ཆོས་ཉིད་དེའི་ངང་ལ་རེ་དོགས་བྲལ་བའི་བློ་བཞག་ན་སངས་རྒྱས་འོད་དཔག་མེད་པའི་ཞལ་ད་ལྟ་ནས་མཇལ་བས་མི་ཚད་སྣང་བ་དག་ན་བདེ་བ་ཅན་གྱི་ཞིང་དང་གཞལ་ཡས་ཁང་རང་གྲུབ་ཏུ་ཡོད། དེ་ལྟ་བུའི་ངེས་ཤེས་ནང་ནས་མ་སྐྱེས། རང་སེམས་ཆོས་སྐུའི་རང་ཞལ་ནང་ནས་མ་མཇལ་ནས། གཅིག་ན་བདེ་བ་ཅན་ཕྱིའི་ཐག་རིང་ཞིག་ན་ཡོད་པར་བསམ་པ་དང་། གཉིས་ན་ལར་ངོ་མས་བཤད་ན་དེ་ལྟར་བདེ་སྐྱིད་ལྡན་པའི་ཞིང་ཁམས་ཤིག་ཏུ་སྐྱེ་འགྲོ་ས་ཞིག་ཨེ་ཡོད་བསམ་པའི་ཐེ་ཚོམ་གྱིས་བདེ་བ་ཅན་དུ་སྐྱེས་ཀྱང་རྫུས་ཏེ་སྐྱེས་པའི་མེ་ཏོག་པདྨ་ཁ་མི་བྱེ་བར་ཡུན་རིང་སངས་རྒྱས་ཀྱི་ཞལ་མི་མཇལ་ཞེས་གསུངས་པ་ལྟར་ངོ་མས་པདྨའི་སྦུབས་སུ་ཡུན་རིང་དུ་ལུས་པ་ལོས་ཡིན་ཡང་གཙོ་བོའི་ཆ་ནས་ལྟ་བ་དམན་པའི་གོལ་སྒྲིབ་དང་ཐེ་ཚོམ་ཤོར་བའི་ནོར་སྒྲིབ་གཉིས་ཀས་བདེན་པ་མ་མཐོང་བ་ལ་གོ་དགོས་སྙམ། དེའི་ཤེས་བྱེད་རྒྱུ་བཞི་ལས་དམིགས་ཀྱིས་བཀར་བ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་གསུངས་པ་དེས་ཁྱད་པར་དུ་ཕྱེས་པ་ཡིན། དེའི་ཐོག་ཏུ་སྔགས་ཀྱི་བསྐྱེད་རྫོགས་ཟབ་མོ་བཅུ་དང་། ཡང་སྒོས་རྫོགས་རིམ་ཐམས་ཅད་ཀྱི་རྒྱལ་པོ་རྫོགས་ཆེན་ལྟ་བའི་གདེང་དང་ལྡན་ན་ངེས་དོན་འོད་དཔག་མེད་པའི་རང་ཞལ་ནང་ནས་མཇལ་བར་ཐེ་ཚོམ་མི་དགོས། རྒྱུའི་ཐེག་པས་ཚོགས་གཉིས་སྐུ་གཉིས་ཀྱི་སྐྱེད་བྱེད་ཀྱི་རྒྱུར་ཁས་ལེན་པ་སྟེ། བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག །ཅེས་གསུངས་པ་ལྟ་བུ་ཡིན་ལ། གསང་སྔགས་ཀྱི་སྐབས་ནས་སྐུ་གཉིས་ཀྱི་སྒྲིབ་བྱེད་སེལ་བ་ལ་ཚོགས་གཉིས་ཐབས་དང་ཤེས་རབ་ཟབ་མོས་ཉམས་སུ་ལེན་པ་རྐྱེན་དུ་ཁས་ལེན་པ་ཡིན། རྒྱུ་རྐྱེན་གང་གིས་བཤད་ཀྱང་སྟོང་ཉིད་སྙིང་རྗེའི་སྙིང་པོ་ཅན་སྒྲུབ་པ་ཡིན་པའི་ཕྱིར་ན་གཉིས་ཀ་དོན་མཐུན། བཀའ་ཐ་མའི་སྐབས་སུ་ཁམས་རང་བཞིན་གྱིས་དག་པའི་ཡོན་ཏན་ཡེ་ལྡན་དུ་བཤད་པ་ཡིན་ལ། ལམ་ཉམས་སུ་ལེན་དུས་ཡོན་ཏན་སྐྱེ་བ་ལྟར་སྣང་བ་ཞིག་ཏུ་ཁས་ལེན་ཡང་སྔགས་ཀྱི་སྐབས་སུ་རང་བཞིན་གཞི་ཡི་དཀྱིལ་འཁོར་འགྲོ་བ་ཐམས་ཅད་ལ་གནས་པ་དང་གཉིས་ཀ་གཞི་རྩ་བ་གཅིག་ལ་ཁྱད་པར་མི་འདུག་སྙམ་པ་ཞིག་ཡིན། ལམ་ཐབས་ཤེས་ཚོགས་གཉིས་ཟུང་འཇུག་ལ་གཅིག་པ་དང་། འབྲས་བུ་ཆོས་གཟུགས་ཀྱི་སྐུ་རྣམ་པ་གཉིས་ལ་ཡང་གཅིག་པས་མདོ་སྔགས་ཕྱི་ནང་གི་བཤད་པ་ལྟོ་སྦྱར་ན་གོང་འོག་མི་འགྲིག་པ་མེད། ད་ནི་ཐམས་ཅད་ཀྱི་དོན་བསྡུ་བ་ནི། བདེ་ཆེན་ཞིང་ཁམས་རྟག་ཏུ་འཛིན་པར་ཤོག། ཅེས་པའི་ཐམས་ཅད་ཀྱི་རྗེས་མའི་ཤོ་ལོ་ཀའི་ནང་གི་ཚིག་རྗེས་མ་འདིས་དོན་བསྡུས་པ་ཡིན། བདེ་བ་ཅན་གྱི་ཞིང་ཁམས་ཀྱི་རྟེན་དང་བརྟེན་པའི་བཀོད་པ་དང་ཡོན་ཏན། གོང་ནས་བཤད་པ་ལྟར་བདེ་སྐྱིད་ཕུན་སུམ་ཚོགས་པ་མི་བདེ་མི་སྐྱིད་པའི་སྒྲ་ཙམ་ཡང་མ་དགོས་མིང་ཐོས་རྒྱུ་མེད་པར་བཤད་ཡོང་སྐབས་དག་པའི་ཞིང་གི་འདོད་པའི་ཡོན་ཏན་ལ་ཆགས་ཏེ་དེར་ཡིད་གདུང་བ་གཅིག་པུས་དེར་སྐྱེ་བར་ཤོག་ཅེས་སྨོན་ལམ་འདེབས་རུང་བ་མ་ཡིན་ཞིང་། རང་འདོད་ཆགས་ཞེན་དང་འབྲེལ་བའི་མ་དག་པའི་སེམས་ཀྱིས་སྨོན་ལམ་བཏབ་ཀྱང་སངས་རྒྱས་ཀྱི་ཞིང་ཁམས་མ་དག་རྙོག་པ་བྲལ་བ་དེ་ལྟ་བུ་ཞིག་ཏུ་སྐྱེ་དཀའ་བ་ཡིན་ལ། ཡང་རང་རྒྱུད་ཀྱི་སྒྲིབ་པ་གང་འཚམས་དག་དུས་བདེ་བ་ཅན་དུ་ཇི་ལྟར་བྱས་ན་ཡང་སྐྱེ་བ་དང་། བདེ་བ་ཅན་མིན་ཡང་དག་པའི་ཞིང་གཞན་དུ་ལོས་སྐྱེ་སྙམ་ཡང་འདི་ཞིང་གཞན་དང་འདྲ་བ་མ་ཡིན། སོ་སོ་སྐྱེ་བོ་འཆིང་བ་ཀུན་ལྡན་ཡིན་ཡང་ཚོགས་བསགས་སྒྲིབ་སྦྱོང་ལ་འབད་པར་བྱས། བྱང་ཆུབ་ཀྱི་སེམས་བསྐྱེད། ཁྱད་པར་དུ་རྟེན་ཞིང་ཁམས་ཡིད་ལ་བྱེད་པ་དང་མ་འབྲལ་བར་རྐྱེན་སྨོན་ལམ་དག་པས་མཚམས་སྦྱར་དུ་ཆུག་དང་ཆོས་སྤངས་མཚམས་མེད་བྱས་པ་མ་གཏོགས་པ་བདེ་བ་ཅན་དེར་སྐྱེ་བ་ཐེ་ཚོམ་མི་དགོས་ཞེས་གསུངས་པ་ཡིན་ལ། འདི་དྲང་དོན་དགོངས་དང་ལྡེམ་དགོངས་ཀྱིས་གསུངས་པའི་དགོངས་གཞི། དགོས་པ། དངོས་ལ་གནོད་བྱེད་ཅན་དེ་ལྟ་བུས་གསུངས་པ་མིན་པར་ངེས་དོན་བསླུ་བ་མེད་པ་སྒྲ་ཇི་བཞིན་དུ་འཛིན་པ་མདོ་དང་བསྟན་བཅོས་མང་པོ་ལས་ལན་གཅིག་མིན་པར་གསུངས་པ་ལ་ཡིད་ཆེས་ངེས་ཤེས་བྱེད་ཆོག དེས་ན་རྟེན་དང་བརྟེན་པའི་ཞིང་ཁམས་ཡིད་ལ་བྱེད་དུས་དང་། རང་ནུས་གང་ཡོད་ཀྱིས་ཚོགས་བསགས་སྒྲིབ་སྦྱོང་ལ་བརྩོན་སྐབས་ལ་སོགས་པ་ལ་གནད་ཀྱི་སྙིང་པོ་ངོ་མ་གང་ཡིན་ན། དད་པ་དང་དག་སྣང་གི་རྩ་བ་བརྟན་པ་གལ་ཆེ་བ་ཡིན། གནའ་རྒད་པོ་ཞིག་གིས་འོད་དཔག་མེད་ཀྱི་སྐུ་མདོག་སྔོན་པོ་ཡིན་བསམས་ནས་དེ་བསྒོམས་ཏེ་དེར་དད་པའི་མོས་ཕྱག་རྒྱང་ནས་འཚལ་བ་དང་། གསོལ་འདེབས་སྨོན་ལམ་བྱས་པའི་རྐྱེན་གྱིས་ཤི་དུས་འོད་དཔག་མེད་སྐུ་མདོག་སྔོན་པོ་ཅན་ཞིག་གིས་ལམ་སྟོན་ལམ་སྣ་དྲངས་སོང་བ་བླ་མ་མངོན་མཁྱེན་ཅན་ཞིག་གིས་གཟིགས་རབས་གསུངས་པ་ལྟ་བུ་ཡིན། བདེ་བ་ཅན་དུ་སྐྱེ་སླ་བ་དེ་སངས་རྒྱས་འོད་དཔག་མེད་ཀྱིས་སློབ་པ་ལམ་གྱི་གནས་སྐབས་ན་གཞན་དང་མ་འདྲ་བའི་ཚོགས་ཤིག་བསགས། གཅིག་དང་མ་འདྲ་བའི་ཞིང་ཞིག་བཟུང་། སྨོན་ལམ་ཁྱད་པར་ཅན་བཏབ་པའི་འབྲས་བུ་ལ་ས་མ་ཐོབ། བདེན་པ་མ་མཐོང་ཡང་དད་པ་མོས་པ་གཙོ་བོར་བྱས་པའི་འུ་ཚོ་དུས་ཐ་མའི་སྙིགས་མ་རྩོད་ལྡན་གྱི་མི་ཚེ་ཐུང་། ནད་མང་། ཅོལ་ཆུང་། བློ་སྣ་ཐུང་ཐུང་ཅན་གྱིས་ཀྱང་བསྒྲུབས་ན་འགྲུབ་ཐུབ་པའི་ཞིང་ཁམས་དེ་གྲུབ་པ་ཡིན། སངས་རྒྱས་འོད་དཔག་མེད་སངས་མ་རྒྱས་པའི་སྔ་རོལ་ན་ཁོང་གི་ཞིང་ཁམས་དེར་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཡོན་ཏན་བཀོད་པ་ཐམས་ཅད་གཅིག་ཏུ་བསྡོམས་པས་མི་ཚད་ཞིང་དེར་སོ་སོ་སྐྱེ་བོ་སྐྱེ་ཐུབ་པ་ཞིག་མ་གྱུར་བར་དུ་ཁོང་འཚང་མི་རྒྱ་བར་ཤོག་ཅེས་གསུངས་ཏེ་སྨོན་ལམ་དང་དམ་བཅའ་ཤུགས་དྲག་མཛད་པའི་སྟོབས་ཀྱིས་རང་རེར་མཚོན་ན་ལས་དང་སྐལ་བ་དང་བསོད་ནམས་མ་དམན་པས་ཆོས་འདི་དང་འཕྲད་པ་ཡིན། རྐྱེན་སྨོན་ལམ་གྱིས་མཚམས་སྦྱར་ཏེ་བདེ་ཆེན་ཞིང་ཁམས་རྟག་ཏུ་འཛིན་པར་ཤོག་ཅེས་པའི་རྟག་ཏུ་ཞེས་པ་འདི་ལ་གོ་དོན་གཉིས་འདུག ད་ལྟར་ལམ་གྱི་སྐབས་སུ་རྟག་ཏུ་ཡེངས་པ་མེད་པར་རྒྱུ་བཞི་བསྒྲུབས་པ་ལ་བརྟེན་ཏེ་མཐའ་འབྲས་བྱང་ཆུབ་ཆེན་པོ་མངོན་དུ་བྱས་ནས་བདེ་བ་ཅན་གྱི་ཞིང་དེའི་འདྲེན་པར་གྱུར་ཏེ་རྟག་ཏུ་ཞིང་དེ་འཛིན་ནས་མཐའ་ཡས་སེམས་ཅན་གྱི་དོན་བྱེད་པའི་གོ་དོན་ཅན་ཞིག་ཡིན། འབྲས་བུ་གང་ཞིག་འགྲུབ་པར་བྱེད་པ་ལ་དེ་དང་འདྲ་བའམ་འབྲེལ་བའི་རྒྱུ་རྐྱེན་ཞིག་ཚོགས་དགོས། དེ་དགོས་ན་དགེ་སློང་ཆོས་ཀྱི་འབྱུང་གནས་ཀྱིས་ལོ་བྱེ་བ་མང་པོར་དང་པོ་ཞིང་ཁམས་བྱེ་བ་བརྒྱ་སྟོང་གི་ཡོན་ཏན་བདེ་བར་གཤེགས་པ་མང་པོའི་མདུན་ནས་ཐོས་པས་གསན། གསན་དོན་ཡིད་ལ་བྱས་པས་བསམས། བསམས་དོན་སྨོན་པས་འགྲུབ་པའི་ཆེད་དུ་སེམས་ཅན་རྒྱ་མཚོ་ལྟ་བུའི་དོན་དུ་སངས་རྒྱས་རྒྱ་མཚོ་ལྟ་བུར་མཆོད། ཚོགས་གཉིས་རླབས་ཆེན་གྱི་སྤྱོད་པ་རྒྱ་མཚོ་ལྟ་བུ་བསགས་པའི་མཐར་ཞིང་ཁམས་གཅིག་དང་མི་འདྲ་བའི་ཁྱད་འཕགས་དེ་གྲུབ་པ་ཡིན་ཞིང། འུ་ཅག་གིས་བསྐལ་བ་གྲངས་མེད་ཀྱི་མཐར་ལྟ་བའི་བྱ་དཀའ་སྤྱོད་པ་གཅིག་ཀྱང་མི་དགོས་པའི་ཕ་ཁྱིམ་བུ་འགྲོ་བྱེད་པ་དེ་ཉིད་འདུན་པ་ཞིག་དེའི་ཕྱོགས་སུ་གཏད་དེ་སྨོན་ལམ་གྱིས་མཚམས་སྦྱར་ཙམ་ཞིག་ལོས་དགོས། དེས་ན་ད་ལྟའི་གནས་སྐབས་ན་སོང་ན། བསྡད་ན། ཟོས་ན། འཐུང་ན། ཉལ་ན། ལངས་ན། གཏམ་བཤད་ན། ལས་ཀ་ལས་ན་འདྲ། གཉིད་ཐུན་གཅིག་གི་ཞབས་ཚུན་ཆད་དུ་ཞིང་ཁམས་བདེ་བ་ཅན་དང་མགོན་པོ་འོད་དཔག་མེད་ཡིད་ལ་བྱེད་པ་དང་འབྲལ་མི་རུང་། ཕྱི་མར་བདེ་བ་ཅན་གྱི་ཞིང་ཁམས་རྟག་ཏུ་འཛིན་པ་ལ་ད་ལྟ་བདེ་བ་ཅན་དུ་སྐྱེ་བའི་རྒྱུ་རྟག་ཏུ་བསྒྲུབ་དགོས། ད་ལྟའི་སྐབས་འདིར་ཉོན་མོངས་ཤུགས་དྲག་གི་དབང་དུ་མངགས། དོན་ཆུང་། དོན་མེད། དོན་ལོག་གི་བྱ་བ་ཞིག་བསྒྲུབ་བྱའི་གཙོ་བོར་བཟུང་དུས་བདེ་སྨོན་རེ་འདོན་རྒྱུ་དང་། ཚོགས་བསགས་མཆོད་འབུལ་རེ་བྱེད་རྒྱུ་ཡང་གནད་ཆུང་། མཚམས་རེ་མ་གཏོགས་མི་དྲན་པར་གྱུར་དུས་ལས་བསགས་སྟོབས་གང་གིས་ཆེ་ན་དེ་སྔོན་ལ་སྨིན་པ་ཡིན། དེ་རྒྱུ་འབྲས་ཉིད་ཀྱི་འགྲོ་སྟབས་ཡིན་ལ། འུ་ཅག་གིས་དེང་སང་གི་སྐད་ཆའི་འགྲོས་དང་བསྟུན་ནས་བརྒྱ་ཆའི་བསྡུར་ཚད་ལ་འཕངས་ན། དམྱལ་བ། ཡི་དྭགས། དུད་འགྲོ་སོགས་སུ་སྐྱེ་བྱེད་ཀྱི་རྒྱུ་དེ་བརྒྱ་ཆའི་དགུ་བཅུ་ནང་ཞིག་བཟུང་ནས་ཡོད་པ་དང་། བདེ་བ་ཅན་དུ་སྐྱེ་བའི་རྒྱུ་བཞིས་བརྒྱ་ཆའི་རྡོག་མོ་ཁ་ཤས་སམ་ཉུང་ཉུང་མ་གཏོགས་ཟིན་མེད་ན་རྒྱུ་དེ་དང་འདྲ་བའི་འབྲས་བུ་ཞིག་མི་མྱོང་པར་སངས་རྒྱས་འོད་དཔག་མེད་ཀྱིས་ཀྱང་རྒྱུ་མེད་རྐྱེན་མེད་དུ་བདེ་བ་ཅན་དུ་ཁྲིད་ཐབས་མ་ཡོད་ནས་འཁོར་བའི་སེམས་ཅན་གྱིས་ད་རུང་སྡུག་བསྔལ་མྱོང་བཞིན་ཡོད་པ་འདི་ཡིན། དེས་ན་ཁྱིམ་ན་གནས་པའི་སྐྱེ་བོ་ཕོ་མོས་ལས་ཀ་ཆེ་བཞག་ཆུང་བསྐྱུར་བྱས་ཏེ་སྒོ་གསུམ་པོ་ཆོས་ཕྱོགས་ཀྱི་བྱ་བ་འབའ་ཞིག་ལ་ཞུགས་ཟེར་ན་ག་ལ་ཡིན། འོན་ཀྱང་སེམས་རྣམ་དག་དད་པ་དང་སྙིང་རྗེའི་ངང་ནས་རྟག་ཏུ་བདེ་བ་ཅན་གྱི་ཞིང་ཁམས་མི་བརྗེད་པ་ཞིག་གྱུར་ན་ཚེ་འདིར་རྟག་ཏུ་བདེ་ཆེན་ཞིང་ཁམས་འཛིན་པ་དང་མ་འབྲལ་དུས་ཚེ་འདི་འཕོས་ནས་ལུས་འདི་བརྗེས་མ་ཐག་ཏུ་རྟག་ཏུ་ཞིང་ཁམས་དེ་འཛིན་པ་དང་། ཞིང་དེར་སྐྱེས་པས་མི་ཚད་སེམས་ཅན་དཔག་མེད་འདྲེན་པའི་སྨོན་ལམ་གྱི་མཐུ་ཡང་འགྲུབ་པ་ཡིན། སྨོན་ལམ་འགྲུབ་པ་ལ་ཅི་ཞིག་དགོས་པ་ཡིན་ཞེ་ན། སྨོན་ལམ་འགྲུབ་བྱེད་ཀྱི་རྒྱུ་དགོས་པ་ཡིན་པ་དང་། ཚོགས་བསགས་སྔོན་ལ་སོང་བ་ནི་རྟ་མཆོག་ཤུགས་དང་ལྡན་པ་རང་ལག་ན་ཡོད་པ་ལྟ་བུ་ཞིག་ཡིན་ཞིང་། སྨོན་པས་ཁ་བསྒྱུར་བ་དེ་ཉིད་ལ་སྒ་སྲབ་སྤྲས་ཏེ་ཁ་གང་དུ་འཁོར་དགོས་སྲབ་ཀྱིས་ཁ་བསྒྱུར་ནས་སོང་བ་ལྟ་བུ་ཞིག་ཡིན། དེང་སང་འགྲུལ་བཞུད་མང་ཆེ་བ་འཁོར་ལོའི་རིགས་ལ་བརྟེན་གྱིན་ཡོད་པ་ཡིན་ལ། དེས་ན་མི་ལུས་དོན་ལྡན་ཞིག་བླངས་ཡོད་པ་འདི་རླངས་འཁོར་ལྷུ་ལག་ཆ་ཚང་དང་ལྡན་པ་སྐྱོན་མེད་ལྟ་བུ་ཞིག་ཡིན་ཞིང་། ཚོགས་བསགས་སྒྲིབ་སྦྱོང་བྱེད་རྒྱུ་དེ་སྣུམ་སྣུམ་སྒམ་གང་བླུགས་ཐུབ་ཡོད་པ་ལ། འདུན་པས་དེར་ཐོན་དགོས་བསམ་པའི་རྟེན་ཞིང་ཁམས་ཡིད་ལ་བྱ་བ་སྔོན་སོང་གི་ཐོག་ནས། བསམ་པ་བཟང་པོས་བྱང་ཆུབ་མཆོག་ཏུ་སེམས་བསྐྱེད་དེ། སེམས་ཅན་འཁོར་བ་ལས་སྒྲོལ་བའི་དོན་ཆེན་ཞེ་ལ་རྣོག་བཞིན་དུ་རྐྱེན་སྨོན་ལམ་དག་པ་ཁ་འཁོར་གྱིས་ཁ་ལོ་སྒྱུར་བ་ལྟ་བུ་རླབས་ཆེན་གྱི་སེམས་བསྐྱེད་དང་ལྡན་པའི་དམ་པ་གསུམ་ཚང་བའི་སྟོབས་ཀྱིས་མྱུར་བགྲོད་མགྱོགས་ལམ་ལས་སོང་བ་ལྟ་བུ་ཞིག་ཏུ་འགྱུར་ཐུབ། སོ་སོ་སྐྱེ་བོ་ཞེས་པ་བློ་རྒྱ་ཆུང་ཡང་འདོད་པ་ཆེ་ལ། འདོད་དོན་གྱི་སྨོན་ལམ་བརྒྱབ་ཀྱང་འགྲུབ་བྱེད་ཀྱི་རྒྱུ་སྔོན་སོང་མེད་པས་འགྲུབ་ཐབས་ཡོད་པ་མ་ཡིན་ཞིང་། བསོད་ནམས་བསགས་པ་སྟོབས་ཤུགས་ཀྱི་ནུས་རྒྱུ་ཞིག་ཡིན་པ་དང་། ཆགས་བཞག་ན་གློག་འདོན་འཕྲུལ་ཆས་ཀྱིས་གློག་ཤུགས་གསོག་པ་ལྟ་བུ་ཞིག་ཡིན། དེའི་གློག་དེའི་ཤུགས་དང་ནུས་པ་བཟང་ངན་གང་གི་ཕྱོགས་སུ་བེད་སྤྱོད་བཏང་ཡང་ཆོག་པ་ལྟར་དུ་བསོད་ནམས་སྟོབས་ཆེན་བསགས་ཚར་རྗེས་སྨོན་ལམ་ལོག་འདེབས་ལྟ་བུ་བྱས་ན་ཡང་དེ་བཞིན་དུ་འགྲུབ་ལ། རྐྱེན་སྨོན་ལམ་རྣམ་པར་དག་པ་ཞེས་གསུངས་དགོས་དོན་ཡང་དེ་ཡིས་ཡིན། རྐྱེན་སྨོན་ལམ་རྣམ་པར་དག་པའི་དག་ལུགས་ཇི་ལྟར་ཡིན་ཞེ་ན། ངས་མི་ལུས་ཚེ་ཐུང་འདིའི་ཐོག་ནས་མར་གྱུར་སེམས་ཅན་ལ་ཕན་ཐོགས་འབྱུང་བའི་ནུས་པ་ཞིག་ཐོབ་མ་སོང་ཡང་རྟེན་འདིར་འཁོར་བའི་སེམས་ཅན་གྱི་ལུས་བླངས་པ་ཡོངས་ཀྱི་རྗེས་མར་བྱས་ཏེ་ཕྱི་མ་བདེ་བ་ཅན་ནས་གོང་དུ་བཤད་པའི་མཐོང་ལམ་གྱི་བདེན་པ་མཐོང་དུ་བཅུག་སྟེ་ལས་དང་སྨོན་ལམ་ཡེ་ཤེས་རྒྱ་མཚོ་ལ་སོགས་པར་དབང་འབྱོར་བའི་བྱང་ཆུབ་སེམས་དཔའ་ཆེན་པོ་སོགས་དང་སྐལ་མཉམ་གྱིས་མཐའ་ཡས་སེམས་ཅན་སྡུག་བསྔལ་གྱིས་ཉམ་ཐག་པ་འདི་དག་འཁོར་མཚོ་ལས་སྒྲོལ་བ་ཞིག་འགྱུར་བར་ཤོག དེ་ཡང་སྔར་སངས་རྒྱས་འོད་དཔག་མེད་སློབ་པ་ལམ་ལ་ཡོད་དུས་ཀྱི་ཐུགས་བསྐྱེད་མཛད་པ་ལས་མི་དམན་པ་ཞིག དེ་བས་བརྒྱ་འགྱུར་སྟོང་འགྱུར་གྱི་ཚད་ཅིག་ད་རུང་ཡོད་དར་ན་དེ་མ་འགྲུབ་ཀྱི་བར་དུ་དེའི་རྒྱུ་སྤྱོད་པ་རྒྱ་མཚོ་ལྟ་བུ་བསྐལ་ཆེན་གྲངས་མེད་ནས་གྲངས་མེད་ལ་གསོག་དགོས་ཀྱང་རང་དོན་དུ་འཚང་མི་རྒྱ་བར་ཤོག་ཅེས་བསྔོ་བ་དང་སྨོན་ལམ་སྟབས་ཅིག་ཏུ་བྱེད་དགོས། བདེ་བ་ཅན་དུ་སྐྱེ་བའི་ཉམས་ལེན་རྩལ་སྦྱོང་གི་མན་ངག་ལ་ཉིན་མཚན་གཉིས་ཀར་ཕྱེས་ནས་ཉམས་ལེན་བྱེད་པ་གསུངས་ཡོད་པས་ཉིན་མཚན་གཉིས་ཀ་སྦྲེལ་ནས་ཉམས་ལེན་དགོས་པ་ཡིན། ཉིན་དཀར་འགྲོ་འདུག་ཟ་ཉལ་ལ་སོགས་པའི་སྤྱོད་ལམ་རྣམ་བཞི་ལ་བསམ་པ་བཟང་པོ་ཞིག་གིས་ཀུན་ནས་བསླངས་ཏེ་སྙིང་རྗེས་དྲངས་པའི་བྱང་ཆུབ་ཀྱི་སེམས་མཆོག་བསྐྱེད་པ་དང་མི་འབྲལ་བས་བདེ་བ་ཅན་གྱི་ཞིང་ཁམས་རྟེན་དང་བརྟེན་པར་བཅས་པའི་ཡོན་ཏན་དང་བཀོད་པའི་གསལ་སྣང་དེ་དྲན་པའི་ཡུལ་དུ་བྱེད་པ་དང་བཅས་པས་དེར་མོས་ཤིང་འདུན་པའི་དང་བ་དང་དད་པ་དང་། དེར་སྐྱེས་ན་སྙམ་པ་འདོད་པའི་དད་པ། ཡིད་ཆེས་དེ་ཉིད་ཕྱིར་མི་ལྡོག་པའི་ཐེ་ཚོམ་མེད་པའི་དད་པ་འགྱུར་བ་མེད་པ་ཞིག་བྱས་ཏེ་ཚོགས་གསོག་སྒྲིབ་སྦྱོང་ཅི་ནུས་དང་། སངས་རྒྱས་འོད་དཔག་མེད་ཀྱི་མཚན་ནས་བརྗོད་ཅིང་གསོལ་བ་བཏབ། གཟུངས་སྔགས་བཟླས། ཞིང་ཁམས་དེར་སྐྱེ་བའི་འདུན་པ་གཏད་ནས་བསྔོ་བ་སྨོན་ལམ་བྱེད་དགོས། མཚན་མོའི་དུས་ལ་སླེབས་དུས་ཞིང་ཁམས་བདེ་བ་ཅན་ལ་སངས་རྒྱས་འོད་དཔག་མེད་པ་མངོན་སུམ་མིག་གི་ལམ་དུ་མཇལ་བཞིན་ཡོད་སྙམ་པའི་འདུན་པ་དྲག་པོ་མ་ཉམས་པར་བྱས་ནས་ཉལ་དགོས། སྨོན་ལམ་གྱི་ངོ་བོ་འདུན་པ་ཡིན་པས་སྨོན་ལམ་འདེབས་སྐབས་ཡིད་ཀྱིས་འདུན་པ་ཤུགས་དྲག་པོ་གཏད་ནས་སྨོན་ལམ་རྒྱུན་རིང་ལ་འདེབས་དགོས། འདུན་པའི་རྩ་བ་དད་པ་ཡིན་པས་དད་པ་སླུ་མེད་འདྲེན་པའི་དེད་དཔོན་ཉག་གཅིག་ཡིན་པར་ཤེས་པའི་ཡིད་ཆེས་ལ་ཐུག་ཡོད། འོན་ཀྱང་སྨོན་ལམ་འགྲུབ་པའི་རྒྱུ་ཚུལ་ཁྲིམས་རྣམ་པར་དག་དགོས། ཚུལ་ཁྲིམས་རྣམ་པར་དག་དང་མི་དག་ཅེས་པ་དེ་གྲྭ་པ་ཇོ་མོས་བསྲུང་བྱ་ཡིན་རྒྱུ་ཁོ་ནར་བསམ་བློ་གཏོང་རྒྱུ་མེད་པ་ད་ཞག་ནས་ཀྱང་བཤད་ཟིན་ལ། དཀོན་མཆོག་གསུམ་གྱི་སྐྱབས་འོག་ལ་བསྡད། སྐྱབས་གསུམ་འཛིན་པ་ནས་བརྩམས་པའི་དགེ་བསྙེན་གྱི་སྡོམ་པ་ཞིག་ཞུས། དེས་མི་ཚད་བྱང་ཆུབ་མཆོག་ཏུ་སེམས་བསྐྱེད། སྔགས་ཀྱི་དབང་རྣམས་ཞུས། དམ་ཚིག་སྲུང་བར་ཁས་བླངས་པ་འབའ་ཞིག་ཡིན་ཕྱིར་ཁས་བླངས་ཀྱི་སྡོམ་དང་དམ་ཚིག་ཡིན་གཅིག་མིན་གཉིས་སྲུང་དགོས། ཁྱིམ་ན་གནས་པ་ཚོས་མི་དགེ་བཅུ་སྤོང་བ་དང་དགེ་བཅུ་ཚུལ་བཞིན་དུ་སྒྲུབ་པར་ཁས་བླངས་པ་ཡིན་པས་བདེ་བ་ཅན་དུ་སྐྱེ་བའི་སྨོན་ལམ་འགྲུབ་དང་མི་འགྲུབ་གཞན་གནོད་གཞི་དང་བཅས་པ་སྤོང་བ་དང་། གཞན་ཕན་གཞི་དང་བཅས་པ་སྒྲུབ་ཀྱིན་ཡོད་མེད་ལ་རག་ལས། སོ་སོ་སྐྱེ་བོ་ཡིན་པའི་དབང་གིས་སྡིག་ལྟུང་འབྱུང་མི་སྲིད་པ་མིན་ཡང་དུས་ལས་མི་འགྱང་བར་བཤགས་སྡོམ་དྲག་པོར་བྱས་ཏེ་སོར་ཆུད་པར་བྱ་བ་གནད་ཀྱི་གཙོ་བོ་ཡིན། དེ་ཡིས་ད་རེས་ཀྱི་ཐེངས་འདིའི་ཆོས་ཁྲིད་བདེ་ཆེན་ཞིང་ཁྲིད་ཅིག་གི་དོད་ཐུབ་ཀྱི་ཚུལ་གྱིས་ཁྲིད་སྦྱོང་གི་ཐོག་ནས་བཤད་ན་སྔ་ཕྱི་ཐུན་བཞིར་བཅད་དེ། ཆོ་གའི་སྒོ་ནས་ཞིང་སྒྲུབ་ཀྱི་ཕྱག་ལེན་ལྟར་དུ་ཆོ་གའི་ཡན་ལག་ཚང་ཞིང་བསགས་སྦྱོང་གི་གནད་ལ་སྨིན་པ་ཞིག་གི་ཐོག་ནས་ཡོངས་སུ་གྲུབ་ལ་ཉེ་བའི་དགེ་བ་རྫོགས་བྱང་དུ་བསྔོ་རན་པ་ཡིན། སང་ནངས་མ་ཎི་འཚོགས་ཏེ་གསུར་ཆེན་ཞིག་ཕུད། ཚོགས་འཁོར་དང་དབང་སོགས་ཚར་བའི་རྗེས་སུ་ཡང་སྐབས་ཤིག་ལ་མ་ཤི་ཚེ་རིང་བྱུང་ན་ཡང་ཡང་འཛོམས་པར་སྨོན་ལམ་འདེབས་ཞེས་གྱེས་ཕྱག་འབུལ་རན་པའི་དུས་ཡིན་པས་ཁྱད་པར་དུ་ཡུལ་སྡེ་བའི་ཁྱིམ་པ་ཕོ་མོ་ཚོ་དང་གནས་སྐབས་ཡུན་རིང་པོར་ཐུག་པ་མ་ཡིན་ཡང་ས་ཁ་ཐག་རིང་པོའི་ཆུ་ཁྲི་རི་སྟོང་གིས་བཅད་པའི་རྒྱང་ཐག་བྱེ་སོང་ཡང་སེམས་བར་ཐག་ཉེ་མོ་གཅིག་སེམས་གཅིག་ལ་ཡོད་པའི་དམ་པ་ལྷ་ལུགས་ཀྱི་ཆོས་དང་དམ་ཚིག འཇིག་རྟེན་མི་ལུགས་ཀྱི་སྐྱིད་སྡུག་མཉམ་ཁུར། སེམས་མཐུན་བསམ་པ་ཕྱོགས་གཅིག་གིས་འབྲེལ་ཡོད་པ་ཡིན། འདི་ལྟ་བུའི་འདུན་མ་དེ་ཆུ་དང་འོ་མའི་འབྲེལ་བ་ལྟར་དམ་རྒྱུ་དེ་དངོས་པོ་གང་དང་ནུས་པ་གང་ཞིག་གིས་ཀྱང་སྒྱུར་ཐུབ་པ་ཞིག་དང་སྐྱེད་ཐུབ་པ་ཞིག་མ་ཡིན། འདིར་དཔེར་བཞག་པ་ལ། དཔེ་དང་པོ་བཞག་ན་ནམ་མཁའི་ཆར་བ་དང་ས་གཞིའི་ཆུ་གཉིས་ཀ་ཁ་ཐག་རིང་པོ་གནམ་སས་བརྒྱངས་ཡོད་ཀྱང་གཅིག་ཏུ་གྱུར་ཏེ་གཉིས་སུ་ཕྱེ་རྒྱུ་མེད་པ་ལྟ་བུ་དང་། དཔེ་གཉིས་པ་བཞག་ན། ཉི་མ་དང་ས་གཞི་གཉིས་ཀ་ཡོད་ས་ལེ་དབར་དུང་ཕྱུར་གྱིས་ཕྱེས་ཡོད་ཀྱང་ཉིན་རེ་བཞིན་དུ་འོད་དང་དྲོད་བཅུད་ཀྱིས་སྦྲེལ་ཡོད་པ་བཞིན་གཅིག་གིས་ཀྱང་འགོག་ཐབས་མེད་པ་ལྟ་བུ་དང་། དཔེ་གསུམ་པ་བཞག་ན་དབུགས་དང་མཁའ་རླངས་ལྟ་བུ་སྟེ། སྲོག་ལྡན་དབུགས་ལ་བརྟེན་ཚད་པོ་མཁའ་རླངས་གཙང་མ་ཞིག་གིས་འཚོ་བཞིན་ཡོད་ཅིང་། རླངས་ཁམས་དྭངས་མོའི་འཚོ་བཅུད་དེ་སྐྱེ་འགྲོ་དང་འབྲེལ་ནས་ཡོད་པ་མིན་རྒྱུར་བྱེད་ཐབས་མེད་པ་ལྟ་བུ་ཞིག་ཡིན། འགའ་རེས་བླ་མ་ཡིན་པའི་དད་པ་བཞག་ནས་ཚེ་ཕྱི་མའི་ཡུལ་ནས་མཇལ་བར་ཤོག་ཟེར་གྱིན་ཡོད་ལ། ཁྱེད་འདིར་ཡོད་ཆོས་འབྲེལ་ཐོགས་ཚད་ཀྱིས་གཙོས་པའི་བཟང་འབྲེལ་ངན་འབྲེལ་ཐོགས་པའི་སེམས་ཅན་ལ་ཕན་ཐོགས་ཡོད་ན་ང་བདེ་བ་ཅན་གྱི་ཞིང་ཁམས་སུ་སྐྱེས་ནས་ངས་བདེ་བ་ཅན་གྱི་ཞིང་ཁམས་སུ་ཁྱེད་ཚོས་གཙོས་པའི་སེམས་ཅན་དུང་ཕྱུར་མང་པོའི་ལམ་སྣ་ཁྲིད་པར་ཤོག་ཅེས་སྨོན་ལམ་རྒྱག ཁྱད་པར་དུ་བཙན་ཤུགས་འཕན་གསུམ་འཛོམས་པའི་མི་གང་ཡིན་བྱེད་ནུས་རྣམས་དང་། དེ་ཙམ་མིན་ཡང་ཁ་ཡ་ཁ་སྣུམ་དུས་ཡ་ཁར་ལྡག མ་ཁ་སྣུམ་དུས་མ་ཁར་ལྡག གཉིས་ཀ་སྣུམ་དུས་སྐོར་ལྡག་བྱེད་མི་ཤེས་པའི་ཁྱིམ་ཚང་ཉམ་ཆུང་ཕལ་བ་རྣམས་ཀྱིས་ང་པདྨ་སྐལ་བཟང་རང་གི་ཁྱིམ་གྱི་མི་ཞིག་ཡིན། ཁྱིམ་ཆུང་ཆུང་བོའི་མཆོད་ཁང་ཕུག་མའི་ནང་ན་ཡོད་སོམས་དང་། ངས་རྒྱལ་བ་གོང་མ་ཚོ་དང་བརྒྱུད་པའི་བླ་མ་གོང་མ་ཚོ་ལ་ཕག་གཡར་ནས་ཁྱི་སོའི་རིང་བསྲེལ་གྱི་དཔེ་བཞིན་དུ་ཁྱེད་ཚོའི་དད་མོས་ཀྱི་སྟོབས་ཀྱིས་དཀོན་མཆོག་གི་བྱིན་རླབས་ང་ལ་བརྒྱུད་ནས་འདྲེན་ཏེ་ཐོབ་པར་ཤོག་ཅེས་སྨོན་ལམ་རྒྱག་གིན་འདུག མཐོང་སྣང་མི་འདྲ་སྣ་ཚོགས་དང་སེམས་ཅན་མོས་པ་སྣ་ཚོགས་ཡིན་ཞིང་། འགའ་རེ་དགྲར་བརྩིས་ནས་ངན་གཤེ་བྱེད་མཁན་ཡང་ལོས་ཡོད། ང་རྫོགས་ཆེན་པདྨ་སྐལ་བཟང་མི་གྲལ་ནས་བུད་དེ་རི་ཁྲོད་ལ་བསྙེགས། གྲོགས་བྱ་དང་རི་དྭགས་བྱས་ནས་མི་ལོ་མང་པོ་ཡིན་ལ། ད་མེད་འདང་རྒྱོབ་དང་མེད་པ་དང་འདྲ་འདྲར་གྱུར་འདུག་ཟེར་རྒྱུ་དེ་ཡིན། ཡང་བར་མ་བར་གྱི་ལྟད་མོ་པ་ཡང་ལོས་མང་། ངའི་གཟུགས་མིག་གིས་རིག་མྱོང་མཁན། ངའི་མིང་དང་ལོ་རྒྱུས་རྣ་བས་ཐོས་མྱོང་མཁན་ལ་སོགས་པ་མཐོང་ཐོས་དྲན་རེག་གི་འགྲོ་བ་མཁའ་དང་ས་ལ་རྒྱུ་བའི་སྲོག་ཆགས་ཕྲ་མོ་ནས་བཟུང་སྟེ་བདེ་ཞིང་སྐྱིད་པར་ཤོག་ཅེས་ཟེར་རྒྱུ་དང་། ཐ་ན་ལམ་ཆེན་ཞིག་གི་ནང་ནས་ང་ཐེངས་གཅིག་ལ་སོང་ན་དེའི་ལམ་ཆེན་དེར་རྒྱུ་ཚད་ཚང་མ་དང་། ང་ཡུལ་གྲུ་རྒྱལ་ཁམས་གཞན་པ་ཞིག་གི་ནང་ལ་ཐོན་ན་དེའི་ཡུལ་དེའི་མངའ་ཁོངས་ཀྱིས་ཁྱབ་ཚད། ང་གནམ་གྲུར་བསྡད་དེ་མཁའ་འགྲུལ་དང་གྲུ་གཟིངས་ལ་བསྡད་དེ་མཚོ་འགྲུལ་བྱས་ན་མཐའ་མེད་ཀྱི་ནམ་མཁའ་དང་རྒྱ་མཚོས་གར་ཁྱབ་ཀྱི་སེམས་ཅན་ལ་བདེ་སྐྱིད་འབྱུང་རྒྱུ། དེ་མ་དགོས་ངའི་ལུས་ལ་ཕོག་པའི་རླུང་གིས་གར་ཁྱབ་ཀྱི་སེམས་ཅན་དང་། ང་ལ་ཟས་ཀྱི་འདུ་ཤེས་འཛིན་པའི་འབུ་སྦྲང་ཕྲ་མོ་ཚུན་ཆད་བདེ་ནས་བདེ་བར་འགྲོ་བའི་རྒྱུ་དང་། སྐྱེ་དགུའི་ཉེར་འཚོའི་གཞིར་འགྱུར་རྒྱུ་ལ་དུས་དང་རྣམ་པ་རྒྱུན་དྲུག་ལ་སྨོན་ལམ་འདེབས་ཀྱིན་ཡོད་པ་སྔར་ཡང་བཤད་མྱོང་པ་ལྟར་དུ་ཡིན། ད་དུས་ཚོད་སྐར་མ་ཁ་ཤས་ཀྱིས་རང་རང་སོ་སོའི་གནས་སུ་ཁ་ཁར་བྱས་ཏེ་འགྲོ་རན་པའི་མཐར་མཇུག་གི་སྐད་ཆ་ཚིག་གཅིག་ལ། ཐམས་ཅད་པོ་བྲེལ་ནས་མི་ཁོམ་འདུག་རྒྱུ་དེ་སྐྱིད་པོ་ཞིག་ཡོང་བའི་ཆེད་དུ་རེད། སྐྱིད་པོ་རྗེས་ནས་ཡོང་བའི་རེ་སྒུག་མ་བྱེད། ད་ལྟར་ལུས་སེམས་གཉིས་ཀའི་རང་དབང་རང་ལ་ཡོད་པ་འདི་སྐྱིད་པོ་ཡིན། ཁྱད་པར་དུ་ནད་མེད་བདེ་ཐང་ཡོང་ནས་བཟའ་ཚང་འཁོར་རུག་འཛོམས་ན་རིན་གོང་ཆེན་བྱིན་ཏེ་ཉོ་རྒྱུ་ལོན་དཀའ་བའི་སྐྱིད་པོ་རང་ལག་ལ་ཡོད་སོང་བ་ཡིན་ལ། དེ་མ་ཤེས་ཏེ་རྗེས་ནས་དེ་དུས་སྐྱིད་པོ་ཡིན་འདུག་བསམ་དུས་འཕྱིས་སོང་བ་ཡིན་ཞིང་། དེའི་ཐོག་ཏུ་ཚེ་འདི་ཕྱི་རང་གཞན་བདེ་སྐྱིད་ཀྱི་གཞི་མ་དམ་ཆོས་སེམས་ཀྱི་འཚོ་བཅུད་ཅིག་ཉམས་སུ་ལེན་སྟངས་ཤེས་ན་སྐྱིད་པོ་བརྒྱ་ཡི་ཡང་རྩེ་དེ་ཡིན། འདིའི་ཆོས་རའི་ནང་ལ་ཕྱོགས་དང་ས་ཆ་སོ་སོའི་མི་སྣ་མང་ལ། སྐད་རིགས། ཆ་ལུགས། ས་ཕྱོགས་གཅིག་དང་མི་གཅིག་གི་ཁྱད་པར་ཅུང་ཟད་རེའི་ཁྱད་པར་མ་གཏོགས་ཚང་མ་བོད་ཆོས་ལྡན་གྱི་ས་ཆའི་མི་འབའ་ཞིག་ཡིན། རང་ས་རང་ཡུལ་གྱི་ས་ཆ་རེ་ལ་དགོན་པ་རེ་དང་ཆོས་བརྒྱུད་རེ་ཡོད་རྒྱུ་རེད། ཚང་མ་རྒྱལ་བ་ཤཱཀྱ་སེང་གེའི་བསྟན་པ་གཅིག་གི་རྒྱུད་འཛིན་ཡིན་ཞིང་། ས་གཞན་དང་། ཆོས་གཞན། བླ་མ་གཞན་ཞིག་ལ་འགྲམ་ཆུ་ལྡང་མི་འདུག་པར་རང་སའི་དཀོན་མཆོག་གི་སྣང་བ་མཆོད་ཡོན་གཉིས་ཀ་མཉམ་རུབ་ཀྱིས་ཆོས་བསྟན་མི་ནུབ་དར་སྤེལ་བྱེད་དགོས། ས་ཆ་འགའ་རེའི་མི་ཡིས་ངེད་ཚང་གི་བླ་མའི་མཛད་པ་བཟང་མི་འདུག མ་བྱས་མ་འཕེར་ཚུལ་བཤད་རྒྱུ་ཡོད་པ་ཡིན། བསྟན་འཛིན་གྱི་སྐྱེས་བུའི་མིང་ཞིག་བཟུང་ནས་བསྟན་པའི་ཆུ་འགོ་སྦུག་ནས་རྙོག་དུས་སྡུག་པོ་ཡིན་ཞིང་། བསྟན་པའི་དག་ཐེར་བྱེད་དགོས་ལ། ཕས་བཞག་གནམ་ལྕགས་ཀྱི་རལ་གྲི། མས་བཞག་མར་དཀར་གྱི་ལྡག་རིལ། མི་ངོ་ཞིག་ལ་བལྟས་ནས་ལྟོགས་ཀྱང་ཤ་དང་བརྗེ་རྒྱུ་ཡོད་པ་མ་ཡིན། འོན་ཀྱང་སྤྱིར་བླ་མའི་ཕྲིན་ལས་བཟང་ངན་གདུལ་བྱའི་བསོད་ནམས་ཆེ་ཆུང་ལ་ཡང་ལྟོས་པ་ཞིག་ཡིན་ལ། ཁྱོད་ཅག་གི་སྡེ་བ་ལ་བསྐོས་ཐང་བསོད་ནམས་དེ་མ་གཏོགས་པ་མེད་པ་ཡིན་ཞེས་སྨྲས་ན་ཚིག་མི་སྙན་ཡང་དོན་གྱིས་དེ་དང་ཕྱོགས་འདྲ་བ་ཞིག་ཡིན། ཡང་བླ་མ་འགའ་རེ་ངེད་ཚང་གི་སྡེ་བ་སྡུག་ཅེས་ཟེར་མཁན་གྱི་ཚིག་ཟུར་ཅན་ཡང་ཡོད་པ་ཡིན་ཡང་ས་ཆ་གང་དུ་སོང་ཡང་སོ་སོ་སྐྱེ་བོ་ཞིག་ཡོད་ཚད་པོ་འཁོར་བའི་སེམས་ཅན་ཡིན་པ་དང་། འཁྲུལ་བའི་སྣང་བ་ཅན་གྱི་སྨྱོན་པ་ཁྱུ་གཅིག་ཡིན་ལ། སྦྲུལ་ཚང་ནང་ནས་བུད་པའི་སྦྲུལ་ཆེ་ཆུང་རགས་ཞིབ་ཚང་མ་དུག་མེད་པ་དང་གདུག་རྩུབ་མི་ཆེ་མཁན་ཡོད་པ་མིན་པས་དེ་དང་གཅིག་ཡིན་ཞིང་། གཅིག་ན་ཁྱེད་ཀྱི་སྔར་གྱི་ཐུགས་བསྐྱེད་སྨོན་ལམ་དང་སྐུ་བསོད་དབང་ཐང་གིས་གདུལ་བྱའི་བསྐོས་ཐང་དེ་ལས་མ་ཡོད་པ་ཡིན་ཞེས་མི་ཟེར་ཐབས་མེད་ལྟ་བུ་ལ་ཐུག་པ་ཡིན། འགའ་རེས་བོད་བརྒྱུད་ནང་བསྟན་གྱི་ཆོས་ལས་ས་དགེ་བཀའ་རྙིང་གང་ཟབ་པ་ཡིན་ཞེས་དྲི་བ་བྱས་ན་རང་གང་ལ་ལས་འབྲེལ་ཡོད་པ་དེ་ཟབ་པ་ཡིན་ལ། སྔོན་གྱི་སྲོལ་འབྱེད་ཀྱི་སློབ་དཔོན་རྣམ་པའི་ཆོས་བརྒྱུད་ཀྱི་ཁྱད་པར་ཞིག་མ་གཏོགས་པར་དོན་ལ་སྟོན་པ་གཅིག་གི་བསྟན་པ་མདོ་སྔགས་གཉིས་ལྡན་གྱི་རང་ལུགས་འབའ་ཞིག་སྟེ། རྒྱ་ཟངས་འོ་མ་ལ་ཁ་མཐིལ། བུ་རམ་སྒོར་མོ་ལ་དཀྱིལ་ཟུར་ཡོད་པ་མ་ཡིན་ཞིང་། མི་རང་གིས་མ་འཇོན་ན་གང་ལ་གཏད་ཀྱང་ཕག་སྣ་བྲག་ལ་ཐུག་པ་ལྟ་བུ་ཡིན། དེས་ན་རང་གང་ལ་མོས་པའི་ཆོས་དེ་གཙོ་བོར་བཟུང་སྟེ་གཞན་ཐམས་ཅད་ལ་ཡང་དད་པ་དང་དག་སྣང་བྱེད་དགོས། འཁོར་བའི་གནས་ལ་སྐྱིད་ཟེར་ཡང་སྡུག་གིས་མ་བསླད་པ་ཡོང་དཀའ་ལ། ཁྱེད་རྣམ་པ་ཁྱིམ་པ་ཕོ་མོ་ཡིན་ཞིང་། དང་པོ་གང་ནས་ཡོང་རང་གིས་ཀྱང་མི་ཤེས་པའི་རྣམ་ཤེས་འཁྱམ་པོ་ཚོ་གཅིག་དེ་ཤ་ཁྲག་དྲ་བའི་གཟེབ་ཏུ་ཚུད་དེ་རྒྱུས་མེད་འབའ་ཞིག་ལས་ཀྱིས་སྦྲེལ་ནས་བཟའ་ཚོ་གཉེན་བཤེས་སུ་འབྲེལ། ལན་ཆགས་ཀྱི་བུ་ཚ་བུ་མོ་འཁོར་ནས་ས་མདོའི་མགྲོན་ཁང་གི་འགྲུལ་བ་ལྟ་བུ་ཉི་མ་ཁ་ཤས་སུ་མཉམ་དུ་སྡོད་པའི་མི་ཚེའི་ཉི་མ་ཡུན་ཐུང་ཐུང་ཡིན་ཞིང་། དེ་ཡང་རླུང་ནང་གི་མར་མེ་ལྟ་བུར་ཤེས་པར་བྱས་ཏེ། གསོན་ཚེ་བཟའ་འཛིང་མ་བྱེད། གསོན་འཇིག་རྟེན་གྱི་ཁམས་སུ་མཉམ་དུ་འདུག་པའི་དུས་ཚོད་ཅི་ཙམ་ཡོད། སུས་སུ་ནམ་སྐྱེལ་གྱིན་ཡོད་ཅི་ཤེས། དེ་ནི་རིང་ཡང་མི་ལོ་ཁ་ཤས་ཡིན་ལ། ཤི་མིག་ཁྲ་ཆུང་གིས་གསོན་པོའི་ངོར་ལྟ་བཞིན་དུ་ཤི་གསོན་ལམ་གྱི་གྱེས་མདོ་ནས་རྒྱབ་གྱེས་བྱེད་སར་ཐུག་དུས་འགྱོད་པ་རྗེས་ནས་ཤོར་ན་འཕྱིས་སོང་བ་ཡིན། བུ་རྒྱུད་ཀྱིས་ཕ་མར་བལྟ་སྐྱོང་གྱིས། བུ་ཚ་རྒྱུད་ཀྱི་གཉོམ་ལག་ཡར་ཅི་ཙམ་རྒྱས་བཞིན་ཡོད་ན་ཕ་མ་རྒན་གསུམ་གྱི་ལོ་ཚོད་ལང་ཚོ་མར་ལ་དེ་བཞིན་དུ་རྒུད་ཀྱིན་ཡོད། བུ་ཕྲུག་ལོ་རེ་བཞིན་དུ་ན་ཚོད་སྨིན་འདུག་སྙམ་ནས་ཕ་མས་དགའ་ཚོར་བྱེད་པ་བཞིན་དུ་ཁྱོད་ཀྱིས་ཕ་མའི་སྐྲ་འདབ་སེ་དུས་དྲིན་ཕ་མའི་ཚེ་ཚད་ཅི་ཙམ་ལྷག་འདུག་བསམས་ནས་སྡུག་གསོག་གིན་ཨེ་ཡོད། རང་བྱིས་པ་རློན་པ་རང་ལུས་རང་གིས་བདག་བྱེད་མི་ཐུབ་པའི་སྐབས་སུ་ཕ་མའི་བྱམས་བརྩེའི་གཉོར་སྐྱོང་གིས་འདིར་མ་ཐུག་གི་བར་དུ་ནར་སོན་པ་ཡིན་ལ། ད་ཕ་མའི་གཟུགས་གཞི་དབང་པོ་མར་ལ་རྒུད་དེ་རྒས་སེམས་སྙིང་ཁམས་འགྱུར། ལུས་སེམས་གཉིས་ཀ་རྒུད་པའི་དུས་ལ་ཐོན་དུས། གཞན་གྱི་བྱམས་བརྩེའི་དྲོད་བཅུད་ཅིག་ལ་བརྟེན་ནས་འཚོ་དགོས་ལུགས་འདྲ་འདྲ་ཡིན་པས་མི་ཚད་རྒས་ཚེ་མཇུག་གི་རྒུད་པའི་མནར་གཅོད་དེ་སུའི་ཐོག་ཏུ་ཡིན་ཡང་ཡོང་རྒྱུ་ཡོད་པ་ཞིག་ཡིན། ཡུལ་སྡེ་བ་ཁ་སེམས་མཐུན་པོར་གྱིས། མཐུན་པ་བདེ་སྐྱིད་ཀྱི་རྩ་བ་ཡིན་ཞིང་། བུ་སྐྱེས་ན་སྐྱ་སེར་སུ་ཡིན་ཡང་ཆོག སྡེ་ཡུལ་དགོན་གསུམ་མཐུན་ཐབས་ཀྱི་ལག་རྗེས་འཇོག་དགོས། འོན་ཀྱང་ཁྱིམ་བཟའ་ཚང་གི་གོ་རུག་མི་འདུས། ལྟོ་ཕོ་བས་རྒྱག་ཚོད་མི་ཟིན་པ་ཞིག་གིས་ད་རུང་དེ་ཚོ་ཐག་རིང་ཡིན། མདོར་ན་རང་མ་ངན་ཚེ་གཞན་ངན་ཡང་རང་ལ་གནོད་པ་མིན་ཡང་གཞན་སྐྱོན་བཤད་རྒྱུ་ལོན་དུས་མཚར་སྣང་ཡག་སྣང་ཤར་བ་དེ་རང་སྐྱོན་ལྷང་ལ་བུད་པའི་ནད་རྟགས་ཡིན་ལ། གཞན་གྱི་སྡུག་བསྔལ་རང་གི་བདེ་བ་ཡིན་པར་ཤར་དུས་ཇི་ལྟར་བྱས་ཀྱང་ལུས་སྲུལ་བོ་ཅན་གྱི་སྔ་མའི་རྒྱུ་མཐུན་མིན་ཀྱང་ཕྱི་མའི་སྐྱེ་རྟགས་སུ་རང་གིས་རང་ཉིད་ངོས་འཛིན་བྱས་པས་ཆོག སུ་ཡིན་ཡང་ཁ་ནང་ལ་ཚུར་འཁོར་ཏེ་ནམ་ཡང་རང་ཉིད་ཐད་ལ་བཞག་ནས་ལན་བལྟས་ཤིག་རྒྱོབ་དང་གནས་སྐབས་ཀྱི་དུས་ཐུང་ལ་མིན་པའི་བེད་མི་ཆོད་པའི་འདུག་སའི་གནས་ཁང་དང་སྤྱོད་ཆས་ལ་ཉར་ཚགས་དང་། ཐེངས་གཅིག་གིས་རྙིང་ནས་གཡུག་རྒྱུ་ཅན་གྱི་རང་གི་ལུས་པོ་ལ་གཙང་སྦྲ་དང་བྱི་དོར་ཅི་འདྲ་དགོས་པས་དུས་གཏན་དུ་ཚེ་རབས་ཚེ་བརྒྱུད་དུ་འདིའི་རྒྱུན་འབྲལ་མེད་ཀྱིས་འགྲོགས་པའི་སེམས་འདི་ལ་གཙང་སྦྲ་བྱི་དོར་མ་བྱས་ན་ལས་བྱ་བའི་འགོ་ཞིག་དེ་ནས་འཆུག་འགྲོ་བཞིན་ཡོད་པ་ཡིན། ཆགས་སེམས་ཞེས་པ་དེ་ནད་ཆེན་ཞིག་སྟེ་དེའི་མིང་ལ་འདོད་ཆགས་ཟེར་ཞིང་། དེའི་དབང་དུ་ཤོར་བར་གྱིས་དང་འདོད་ཁ་གང་དུས་མེད་ལ། མི་བདེ་སྡུག་བསྔལ་གྱི་འབྱུང་རྩ་གཅིག་དེ་ཡིན། སྡང་སེམས་ཞེས་པ་དེ་དང་དེ་བཞིན་ཡིན་པ་སྟེ། འགྲིག་པ་མི་འགྲིག་པ་ཅུང་ཟད་ཙམ་རེས་ཁོག་དོག་པས་སྤྲོ་ལངས་པ་སྟེ་དེར་ཁོང་ཁྲོ་དང་ཞེ་སྡང་ཟེར་ཞིང་། དེར་ཚོད་འཛིན་མ་ཐུབ་པར་སྔར་བསམ་ཕྱི་འདང་གི་སྐོར་རྫོགས་བྱེད་ས་མ་ཡོད་ནས་ཕོ་ཐ་མ་འདྲ་གཉིས་ཐུག་པས་ཤ་ཕུ་ནུ་ཡུལ་སྡེ་གཅིག་པ་ཡིན་ཡང་ནང་དམེ་བྱེད་འགྲོ་བ་ཡིན། ཚར་ཡག་ཚར་དུས་འགྱོད་ཀྱང་ཕན་ཐོགས་མེད། གསོན་པོ་རྣམས་ཀྱིས་གསེར་སྐུ་མགོ་ཐོག་ཏུ་མཉམ་ལེན་གྱིས་ལྷོད་ཆགས་སེ་འདུག་ཆོག་ཀྱང་ཉམ་ཐག་ཤི་ཡུལ་ལ་འགྲོ་མཁན་དེ་སྐྱིད་ལོང་དགའ་ལོང་མ་ཡོད་པར་གསོན་དབུགས་དྲོན་པོ་མར་མེ་རླུང་གིས་བཏུལ་བ་བཞིན་དུ་བྱས་ཏེ་སོང་བའི་སྡུག་བསྔལ་སུས་འཁུར་དགོས་པ་ཡིན། དེའི་སྡུག་སྡིག་པ་སྒེར་ཁུར་བྱས་པའི་རྣམ་སྨིན་ལ་བསམ་བློ་བཏང་ན་དེ་བས་ཀྱང་ཉམ་ཐག་སྙིང་རྗེའི་ཡུལ་ཅན་ཞིག་ཡིན་ལ། གཅེས་པ་རང་སྲོག་གི་དམར་ཞིག་འཇིག་རྟེན་འདི་ན་ཅི་ཡོད། གཅེས་ཤ་དམར་ཐང་ཅན་གྱི་མི་དེ་རང་གིས་རང་ཉིད་དམར་བ་བཞིན་དུ་གཞན་གྱིས་ཀྱང་ཁོ་རང་ཉིད་ལ་དེ་བཞིན་དུ་དམར་གྱིན་ཡོད་པ་ཡིན། ཁ་རང་བསྐོར་རོགས་ལ་སྐོར་དང་། དེ་ཚང་མའི་གནད་སྐྱོན་མ་རིག་པའི་ངང་ཐུང་མུན་ནག་ནང་དུ་ལག་ཉུག་བྱས་པ་ལྟ་བུ་དེར་གཏི་མུག་ཟེར་ཞིང་། དེ་ནི་དུག་གསུམ་འཁྲུལ་བའི་གཞི་མ་ཡིན་པ་དང་། མི་བདེ་སྡུག་བསྔལ་ཐམས་ཅད་ཀྱི་རྩ་བ་ཡིན་ལ། རྩ་བ་དེ་གསུམ་ལ་ཐུག་པ་ཡིན་པ་དང་། དེ་ཡང་མཐར་གཏུགས་ནས་བཤད་ན། ང་དང་ང་ཡིར་འཛིན་པའི་བདག་འཛིན་མ་རིག་པར་ཐུག་པ་ཡིན་པས་སྲིད་རྩ་བདག་འཛིན་གྱི་རྩ་བ་གཅོད་བྱེད་ལ་སྟོན་པ་བཅོམ་ལྡན་འདས་ཀྱིས་དམ་པའི་ལྷ་ཆོས་བསྟན་པ་ཡིན་ཞིང་། ཆོས་སྒྲུབ་ཅེས་པ་ཡང་སེམས་ཀྱི་ནད་ཆེན་གསུམ་པོ་འཇོམས་བྱེད་ཀྱི་སྨན་བསྟེན་ཞེས་པའི་དོན་ཡིན་ལ། ཆོས་སྒྲུབ་ཅེས་པ་ངོར་ངོ་སྣུམ་བྱུག་པ་ལྟ་བུ་ཕྱིར་བྱུག་པས་གསེང་ལ་མ་འཛུལ་བ། ཐང་སྐུ་རི་མོ་བྲིས་པ་ཇི་བཞིན་སྔུན་དུ་ཡོད་ཅིང་རྒྱབ་ལ་མེད་པ་ཞིག་གིས་གོ་ཆོད་པ་མ་ཡིན། ཨེ་སྐྱིད་བསམས་ནས་ཆོས་བསྒྲུབས་པ་ཡིན་ཞིང་། མྱི་ཨེ་སྐྱིད་མི་སྐྱིད་སེམས་ཡིན་ལ། ལུས་བདེ་བ་ཅན་དུ་འདི་ལྟར་བྱས་ནས་མི་ཐོན་ཡང་སེམས་བདེ་བ་ཅན་གྱི་སེམས་ལྟ་བུ་ད་ནས་བྱེད་ཆོག་པ་ཡིན་ཞེས་ཞིང་ཁྲིད་ཐེངས་མ་མང་པོའི་བརྗོད་དོན་གྱི་སྙིང་པོ་དེར་བཞག་ནས་བཤད་པ་ལྟར་དུ་ཡིན། ན་གཞོན་དར་མ་ཚོས་ལུས་སེམས་གཉིས་ཀ་དར་བའི་སྐབས་སུ་ངའི་ཡན་ལ་མྱི་མེད་མ་བསམས་ཀྱང་ང་ཡང་ཆོག་ཙམ་ཞིག་ཡིན་སྙམ་ཁུལ་བྱེད་ཀྱང་རྫ་ཁྲ་ཡག་ཡན་ལ་གངས་ཡོད། གངས་དཀར་པོའི་ཡན་ལ་གནམ་ཡོད་ལ། རེ་རེའི་ཡན་ལ་རེ་རེ་ཡོད་པས་རྒྱུ་འབྱོར་བ་དང་མངའ་ཐང་ལོངས་སྤྱོད་ཀྱི་ཐད་ནས་ཡར་ལ་མ་ལྟ་མར་ལ་ལྟོས། རང་གི་མན་ན་ཡོད་པ་ལ་མར་ལྟོས་དང་ཆོག་ཤེས་ཀྱི་ནོར་རྫས་རིན་ཐང་ཅན་དེ་ལ་ལེན་རྒྱུ་ཡོད། རིག་གནས་ཡོན་ཏན་གྱི་འབྱོར་བ་དང་ཡ་རབས་བསམ་བློའི་ཀུན་སྤྱོད་ཀྱི་ཐད་ནས་མར་ལ་མ་ལྟ་ཡར་ལ་ལྟོས། ངོམ་མེད་ཀྱི་བརྩོན་འགྲུས་དེར་བསྐྱེད་ནས་ཡར་ལ་ཨེ་སླེབས་ལྟོས་དང་། འཇིག་རྟེན་ཁམས་ཀྱི་བཟང་ཆ་མཛེས་ཆ་ཚང་མ་དཀའ་ལས་བརྒྱབ་ཏེ་བརྩོན་པས་བསྐྲུན་པ་འབའ་ཞིག་ཡིན་པས་ཨེ་འགྲུབ་བལྟས་ན་བུ་འདྲ་འདྲས་ལས་པ་འདྲ་འདྲས་མི་འགྲུབ་པ་ཞིག་གང་ན་ཡོད། ཚེ་འདི་ཕྱི་གཉིས་ཀའི་རང་གཞན་གྱི་བདེ་ཐབས་ཐམས་ཅད་ཡོན་ཏན་བསླབས་པ་ལས་བྱུང་བ་ཡིན། མྱི་ལོ་ལོན་རྒན་རྒོན་རྣམས་ཀྱིས་ལུས་བདེ་སེམས་བདེ་རང་གིས་གྱིས། འཇིག་རྟེན་ཚེ་འདིའི་བྱ་བཞག་སྒྲུབ་པའི་དུས་ཚོད་ཡལ་སོང་བ་ཡིན་ལ། སྡུག་གི་མུན་ནག་དྭངས་མེད་ཀྱི་ནང་ནས་ཐར་ཏེ་ད་ནི་ཚེ་ཕྱི་མའི་འགྲོ་རྩིས་རང་གིས་སྒྲུབ་ཆོག་པའི་སྐྱིད་ཀྱི་ཉི་མ་ད་གཟོད་མགོ་ལ་ཤར་བ་ཡིན། དུས་ཚོད་སྐར་ཆ་རེ་རེར་གསེར་སྲང་འབུམ་ཕྲག་མང་པོར་རི་ཞིང་། ཆོས་སྒྲུབ་དུས་རང་རྒྱུད་ཆོས་དང་བསྲེས་ཏེ་རྐྱེན་ངན་ལམ་དུ་སློང་ཐུབ་དགོས་པས་ལུས་འབྱུང་བཞི་རྒུད་པའི་ན་ཚ་སྡུག་བསྔལ་འདི་དག་བདེ་སྡུག་གཏོང་ལེན་ལ་སོགས་པའི་ཐབས་ལ་བརྟེན་ནས་ཚོར་བ་སྡུག་བསྔལ་ཅན་འདི་གས་གོ་ཆོད་པ་ཞིག་བྱེད་དགོས། ཚེ་སྟོད་བཟའ་ངན་ཁྱིམ་ཚང་སྐྱོང་བར་བྱེད་དུས་རྡོ་རྭ་ཅོ་གཉིས་ཀ་མིན་པས་དོན་ཞིག་ཨེ་ཐོན་ལྟ་ཁུལ་བྱས་ལ། དེ་བཞིན་དུ་ཚེ་སྨད་ཆོས་སྒོར་ཞུགས་དུས་ཐམས་ཅད་ཆོས་ཀྱི་མཐུན་རྐྱེན་དུ་འགྱུར་བའི་ཐབས་ཤིག་ཚོལ། ལོ་ཉུང་དུས་ཚོང་དང་སོ་ནམ་ཞིག་བྱེད་དུས་གང་ཁེ་གང་མནོག་ལྟ་བ་ཡིན་ཞིང། མི་ཚེ་ཐུང་ཐུང་གི་ཚེ་མཇུག་གི་དུས་ཚོད་རིན་ཐང་ཅན་དེ་ཉིད་ལ་ཆོས་གང་ཟབ་རང་ཉིད་ལ་གང་འཕྲད་གདམ་ནོར་མ་ཁུར་པ་ཞིག་བྱས་ཏེ་མདོར་ཞེ་མདོ་ཏིག་ཏིག་ལ་ཚེ་ཕྱི་མའི་ཡུལ་གྱི་བྲོ་རྟེན་འདི་ཡོད་བསམ་རྒྱུ་ཞིག་གྱིས། དོན་མེད་ཁྱིམ་གྱི་འཚོ་རྩིས་དང་ཡུལ་སྡེ་སྲུང་སྐྱོབ་ཐད་ལ་ཐེ་གཏོགས་བྱེད་དུས་མ་ཡིན། དུས་རབས་ཀྱི་མིའི་ལྟ་སྟངས་ཁ་ཁ་ཡིན་ལ། གནའ་ལུས་དང་ད་སེམས་མ་འགྲིག་དུས་བཤད་ཀྱང་ཕ་ཚིག་བུ་ལ་འགྲོ་རྒྱུ་མ་རེད། རང་སེམས་བདེ་སྐྱིད་ཀྱི་ཉི་མ་ནང་ནས་ཤར་བར་གྱིས་དང་འཁོར་ཡུག་སྐྱིད་པོ་དང་ནང་དོན་ཡག་པ་དེར་ཡོད་པ་ཡིན། མདོར་ན་རྒན་གཞོན་ཐམས་ཅད་ཀྱིས་རང་ཉིད་གཞན་གྱི་བྱམས་སྐྱོང་དང་སྙིང་བརྩེ་ལ་རྟེན་ས་ཡོད་ན་སྐྱིད་པ་ལྟར་དུ་གནམ་འོག་གི་མི་མ་དགོས་དུད་འགྲོའི་རིགས་གྱུར་གྱི་སྲོག་ཆགས་ནས་བཟུང་སྟེ་སྙིང་རྗེ་དང་བྱམས་སེམས་ཀྱི་དྲོད་བཅུད་འདིར་རེ་ནས་འདིར་བསྟེན་ཏེ་འཚོ་བའི་དོན་སྙིང་འཚོལ་གྱིན་ཡོད་པ་ཡིན་པས་རང་རྒྱུད་སྙིང་རྗེའི་རླན་དང་མ་བྲལ་པ་ཞིག་གྱིས་དང་དེ་འཛམ་གླིང་ཡུལ་གྲུ་མང་པོར་ཁྱབ་པ་ཞིག་མ་ཐོན་ཡང་རང་སྐྱིད་རོགས་ཀྱང་སྐྱིད་པའི་རྒྱ་ཆེ་ཆུང་ལ་མ་ལྟོས་པའི་རང་གི་འཁོར་ཡུག་བདེ་བའི་སྐྱིད་མགོ་གང་མ་ཞིག་ཚེས་ཐབས་འགྲིགས་སོང་ན་ཚེ་འདིའི་བྱ་བའི་ལམ་འགྲོ་ཕྱི་མའིི་མཐོ་རིས་དང་ཐར་བའི་རང་གཞན་གྱི་བདེ་སྐྱིད་ཚང་མ་དེའི་ཁོངས་ནས་འབྱུང་བ་ཡིན་ཞེས་པའི་ཚིག་མཚམས་འདི་ནས་འཇོག། །།༼དེ་ཡང་རྣལ་འབྱོར་གྱི་དབང་ཕྱུག་ཆེན་པོ་རྗེ་བཙུན་མི་ལ་རས་པའི་ཞལ་ནས་མགུར་དབྱངས་འདི་གསུངས་སོ། །རྗེ་མི་བསྐྱོད་ཀྱི་ངོ་བོ་ཐུགས་རྗེ་ཅན། །སྒྲ་སྒྱུར་མར་པའི་བཀའ་ལུང་བཞིན། །ཕ་ཡུལ་བདུད་ཀྱི་བཙོན་ར་རུ། །མི་རྟག་སྒྱུ་མའི་སློབ་དཔོན་བྱུང་། །སློབ་དཔོན་བཟང་པོ་འདི་ཉིད་ལ། །ངེས་ཤེས་འདྲོང་བར་བྱིན་གྱིས་རློབས། །སྤྱིར་སྣང་ཞིང་སྲིད་པའི་ཆོས་རྣམས་ཀུན། །མི་རྟག་མི་བརྟན་འགྱུར་ཞིང་འགྲོ། །སྒོས་འཁོར་བའི་ཆོས་ལ་སྙིང་པོ་མེད། །སྙིང་པོ་མེད་པའི་བྱ་བྱེད་པས། །སྙིང་པོའི་ལྷ་ཆོས་བྱེད་དུ་འགྲོ། །ཕ་ཡོད་ཙ་ན་བུ་ང་མེད། །བུ་ཡོད་ཙ་ན་ཕ་ཡང་མེད། །གཉིས་ཀ་འཛོམས་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་སྟ་སོར་སྒོམ་དུ་འགྲོ། །མ་ཡོད་ཙ་ན་བུ་ང་མེད། །བུ་ང་སླེབས་ཚེ་མ་རྒན་གུམ། །གཉིས་ཀ་འཛོམས་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་སྟ་སོར་སྒོམ་དུ་འགྲོ། །སྲིང་མོ་ཡོད་ཚེ་མིང་པོ་མེད། །མིང་པོ་སླེབས་ཚེ་སྲིང་མོ་འཁྱར། །གཉིས་ཀ་འཛོམས་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་སྟ་སོར་སྒོམ་དུ་འགྲོ། །དམ་ཆོས་ཡོད་ཚེ་ཞབས་ཏོག་མེད། །ཞབས་ཏོག་སླེབས་ཚེ་ཐིགས་པས་གདུང་། །གཉིས་ཀ་འཛོམས་རུང་སྙིང་པོ་མེད། །བུ་ང་སྙིང་པོའི་ལྷ་ཆོས་བྱེད། །བྲག་དཀར་སྟ་སོར་སྒོམ་དུ་འགྲོ། །ཕ་ཡུལ་ཕ་ཁང་ཕ་ཞིང་སོགས། །འཁོར་བ་སྙིང་པོ་མེད་པའི་ཆོས། །སྙིགས་མའི་སེམས་ཅན་སུ་དགའ་ཁྱེར། །རྣལ་འབྱོར་ང་ཐར་བ་སྒྲུབ་ཏུ་འགྲོ། །ཕ་དྲིན་ཆེན་མར་བ་ལོ་ཙཱ་པ། །སྤྲང་རི་ཁྲོད་ཟིན་པར་བྱིན་གྱིས་རློབས། །༽ མཇུག་མཐར་པདྨ་ཐང་གི་གཡུལ་རྒྱལ་ཁང་ཚན་དུ་བཞུགས་པའི་འབར་ཆུང་མཁན་པོ་ནུས་ལྡན་རྡོ་རྗེས་མགུར་ཞིག་གསུངས། ༼དེ་ཡང་རྣལ་འབྱོར་གྱི་དབང་ཕྱུག་ཆེན་པོ་གྲུབ་དབང་ཞབས་དཀར་པ་ཚོགས་དྲུག་རང་གྲོལ་གང་ཉིད་མཚོ་སྙིང་དབེན་པའི་དགའ་ཚལ་དུ་བཞུགས་ཡོད་པའི་སྐབས་ཤིག་ན་དད་ལྡན་སློབ་ཚོགས་རྒྱུ་སྐར་གྱི་གྲངས་བཞིན་འཚོགས་པའི་དབུས་སུ་ལྷག་བསམ་དག་པའི་སྒོ་ནས་རང་གཞན་ཀུན་གྱིས་ཤིན་ཏུ་གོ་སླ་ཞིང་འཁྱེར་བདེ་བའི་སླད་དུ་ཚིགས་བཅད་ཀྱི་མགུར་དབྱངས་འདི་གསུངས་སོ། །དྲིན་ཆེན་བླ་མ་རྣམས་ལ་གསོལ་བ་འདེབས། །མི་རྟག་འཆི་བ་དྲན་པར་བྱིན་གྱིས་རློབས། །ཚེ་འདི་མི་རྟག་སྟོན་ཁའི་སྤྲིན་དང་འདྲ། །ཕ་མ་ཉེ་འབྲེལ་ཚོང་འདུས་མགྲོན་པོ་འདྲ། །ཉམ་ཆུང་ལུས་འདི་ཆུ་ཡི་དབུ་བ་འདྲ། །ནོར་རྫས་མི་རྟག་རྩྭ་མགོའི་ཟིལ་བ་འདྲ། །འཇིག་རྟེན་འཁོར་བའི་ཆོས་ལ་སྙིང་པོ་མེད། །སྙིང་པོ་ཡོད་པ་དམ་པའི་ལྷ་ཆོས་ཡིན། །དམ་ཆོས་བྱེད་པའི་དུས་ནི་ད་རེས་ཙམ། །མ་བྱེད་མ་བྱེད་ཚེ་འདིའི་བྱ་བ་ཞོག། བྱེད་ན་བྱེད་ན་དམ་པའི་ལྷ་ཆོས་གྱིས། །ཕྱུག་པོ་ཕལ་ཆེར་རང་གིས་ཟ་མི་ཕོད། །གཞན་ལ་མི་སྟེར་ཆོས་ཕྱོགས་གཏོང་མི་ནུས། །ཕྱི་དུས་ཟས་ནོར་དོན་མེད་ལག་ཏུ་འགྲོ། །ཕྱི་མར་ལག་སྟོང་འགྲོ་དུས་སྙིང་རེ་རྗེ། །མ་ཡིན་མ་ཡིན་ཕྱུག་པོའི་བྱ་བ་ནོར། །ཡིན་ན་ཡིན་ན་གསོན་དུས་མཆོད་སྦྱིན་ཐོང་། །ཚེ་འདིའི་བྱ་བ་བསམས་ན་དགོས་པ་མང་། །རྟ་གཅིག་རྙེད་ན་སྒ་གཅིག་འཚོལ་དགོས་པས། །མི་དགོས་དགུ་དགོས་འཇིག་རྟེན་འཁོར་བའི་ཆོས། །བྱས་ཀྱང་མི་ཚར་ཚར་ཡང་སྙིང་པོ་མེད། །མ་བྱེད་མ་བྱེད་ཚེ་འདི་བློ་ཡིས་ཐོང་། །བྱེད་ན་བྱེད་ན་སྡིག་སྤང་དགེ་སྒྲུབ་གྱིས། །འཇིག་རྟེན་པ་རྣམས་དགྲ་འདུལ་གཉེན་སྐྱོང་དང་། །ཡོད་པ་འཚོ་སྐྱོང་མེད་པ་བཙལ་རྙེད་དང་། །ཚོང་དང་ཞིང་ལས་ཁོ་ནས་གཡེངས་གཡེངས་ནས། །ཡོད་མེད་གཉིས་ཀས་མི་ཚེ་སྡུག་ཟད་བྱེད། །མ་ཤི་བར་དུ་ཁོམ་པའི་དུས་མི་འབྱུང་། །ཤི་ནས་ཕྱིར་ལ་འོང་བའི་མི་གཅིག་མེད། །མ་བྱེད་མ་བྱེད་ཚད་མེད་བྱ་བ་ཞོག། བྱེད་ན་བྱེད་ན་ཕྱག་སྐོར་ཁ་ཏོན་གྱིས། །ཚེ་འདིའི་ལྟོ་རྒྱབ་འདང་བ་མ་གཏོགས་པར། །གསོག་འཇོག་མང་པོ་བྱས་ནས་ནམ་ཚོད་ཟ། །མི་ཚེ་ཡུན་ཐུང་ལ་མགོའི་ཉི་ཟེར་འདྲ། །ཉི་ཟེར་ཡུན་རིང་ཨེ་སྡོད་བསམ་བློ་ཐོང་། །ཚེ་འདིའི་ཟས་ནོར་ཁོ་ནར་བསགས་བསགས་ནས། ཡུན་རིང་སྡོད་རྩིས་བྱེད་རྣམས་བློ་སྙིང་རུལ། །མ་གསོག་མ་གསོག་ཟས་དང་ནོར་མ་གསོག། གསོག་ན་གསོག་ན་འཕགས་པའི་ནོར་བདུན་སོག། ལོ་བཅུ་ནས་བཟུང་རྒན་པོ་བརྒྱད་ཅུའི་བར། །འཆི་བ་ཡོང་སྙམ་མེད་པའི་བློ་རིང་ཚོ། །དོན་མེད་ཚེ་འདིའི་ལྟོ་རྒྱབ་བསྒྲུབས་བསྒྲུབས་ནས། །ད་རེས་སྟོང་ལོག་བྱས་ན་བྱ་བ་ནོར། །འཆི་དུས་དགོས་པ་དམ་པའི་ཆོས་ཡིན་པས། །མ་ཤི་གོང་དུ་ཆོས་ཤིག་མི་བྱེད་དག། མ་རིང་མ་རིང་ཧ་ཅང་བློ་མ་རིང་། །ད་ལྟ་ད་ལྟ་འཆི་བྲོད་ལྷ་ཆོས་གྱིས། །ལོ་བརྒྱ་ཐུབ་པའི་མི་ནི་ཤིན་ཏུ་དཀའ། །ད་ལྟའི་ཚེ་ཚད་དྲུག་ཅུ་བདུན་ཅུ་སྟེ། །ཚེ་སྟོད་དམ་ཆོས་མི་དྲན་ཚེ་སྨད་ལ། །དྲན་ཡང་མི་ནུས་བར་གྱི་ཚིས་ལ་གཡེང་། །ཕྱེད་ཀ་གཉིད་དང་བཟའ་བཏུང་གཡེང་བས་ཁྱེར། །དམ་ཆོས་སྒྲུབ་སྐབས་ཅུང་ཟད་ཙམ་མིན་མེད། །ཅུང་ཟད་ཙམ་ལས་མེད་པར་མི་ཤེས་པར། །དམ་ཆོས་མི་བྱེད་ཡུན་རིང་སྡོད་གཤོམ་བྱེད། །བློ་རྒྱ་ཅན་ཚོའི་སྙིང་ལ་གདོན་གང་ཞུགས། །མ་བྱེད་མ་བྱེད་རྣམ་གཡེང་ལས་མ་བྱེད། །བྱེད་ན་བྱེད་ན་དོན་ཆེན་སྒྲུབ་སྐབས་ཡིན། །གློ་བུར་འཆི་བས་ནད་ཀྱིས་བཟུང་ཙ་ན། །སྨན་དང་རིམ་གྲོ་བྱས་ཀྱང་ཟློག་པ་དཀའ། །སྨན་པ་རིམ་གྲོ་བྱེད་རྣམས་ངོ་འཛུམ་གནག། ཁོ་བོ་འཆི་སྙམ་འཇིགས་སྐྲག་འགྱོད་པ་སྐྱེ། །བུ་དང་བུ་མོ་འདྲ་མཉམ་མཆི་མ་གཏོང་། །མིག་གིས་ཧྲིག་ཧྲིག་ལྟ་ཞིང་ཁ་ཆེམས་འཇོག། མ་བྱེད་མ་བྱེད་ཁ་ཆེམས་དགོས་པ་མེད། །བྱེད་ན་བྱེད་ན་ད་ལྟ་དགེ་རྩ་གྱིས། །ཕ་མས་བུ་ཚ་གཅེས་པར་བསྐྱངས་ན་ཡང་། །ཕ་མ་ཤི་དུས་དགེ་རྩ་བྱེད་མཁན་དཀོན། །སྙིགས་དུས་བུ་ལ་བློ་གཏད་ཅི་ཡང་མེད། །རང་དབང་རང་ལ་ཡོད་དུས་དགེ་ཕྱོགས་གྱིས། །གལ་ཏེ་གསོན་དུས་དགེ་རྩ་བྱེད་སྐབས་ནི། །མ་བྱུང་གློ་བུར་འཆི་ན་ཁ་ཆེམས་ལ། །ད་ནི་མི་རྙེད་ཡུལ་དུ་འགྲོ་བ་ཡིན། །ཁྱེད་རྣམས་རྙེད་ཀྱི་ཡུལ་ནས་འདུག་པས་ན། །ང་ལ་དགེ་རྩ་ཅི་ནུས་ཐོང་ཞེས་ཤོད། །དེ་མེད་ཁོ་བོ་ཕྱིར་ལ་འོང་བ་ལྟར། །ལབ་ལབ་མང་པོས་འཆི་ཁར་དགོས་པ་མེད། །ཁ་ཅིག་འཆི་དུས་ཁོ་ལ་དགེ་རྩ་ནི། །མི་དགོས་ཁྱོད་ཚོ་རྣམས་ཀྱི་ཁ་རྒྱབ་དགའ། །ཟེར་བ་དེ་ནི་དཔེར་ན་མུན་ནག་ཏུ། །འགྲོ་ལ་མར་མེ་མི་དགོས་དཀར་ངོགས་སུ། །འདུག་པ་རྣམས་ལ་དགོས་ཞེས་བཤད་པ་འདྲ། །མི་དེ་སྨྱོས་ཟིན་དོན་སྙིང་རུལ་བ་ཡིན། །མ་བཤད་མ་བཤད་དེ་འདྲ་མ་བཤད་པར། །བཤད་ན་བཤད་ན་དགེ་རྩ་ཐོང་ཞེས་ཤོད། །མ་ཤི་གོང་ནས་རོ་དེ་གཡོར་བ་རྣམས། །སྟ་གོན་བྱེད་ཀྱང་ཕྱི་དབུགས་ཆད་མ་ཐག། ཐ་གུས་བསྡམས་ནས་ཡོལ་བས་བསྒྲིབས་ནས་འགྲོ། །མི་རྣམས་ཐམས་ཅད་འདུས་ནས་ངུ་འབོད་བྱེད། །སྔས་མགོར་བླ་མ་གདན་དྲངས་དྲིལ་བུ་དཀྲོལ། །རོ་ཡི་དྲུང་དུ་བཟའ་བཏུང་བཀར་བ་ནི། །ཅུང་ཟད་ཙམ་རེ་འཇོག་པའི་དུས་ཚོད་དེ། །དོ་ནུབ་ནངས་པར་མི་འོང་ངེས་པ་མེད། །མ་རིང་མ་རིང་བློ་སྣ་མ་རིང་བར། །ད་ལྟ་ད་ལྟ་ཆོས་ལ་འབད་ན་ལེགས། །ཐམས་ཅད་བཞག་ནས་རང་ཉིད་གཅིག་པུ་རུ། །སྔོན་ཆད་ཐོས་ཀྱང་འགྲོ་མ་མྱོང་བ་ཡི། །རྒྱུས་མེད་ཆ་མེད་བར་དོའི་འཕྲང་རིང་འགྲིམ། །གཤིན་རྗེ་ཆོས་རྒྱལ་དྲུང་དུ་སོང་ཙ་ན། །གཤིན་རྗེ་ཆོས་རྒྱལ་ཞལ་ནས་འདི་སྐད་གསུངས། །ཁྱོད་ནི་དམ་ཆོས་དར་བའི་ཡུལ་དུ་སྐྱེས། །བླ་མའི་ཞལ་ནས་ང་ཡི་དགེ་སྡིག་ཀུན། །ཤན་ཕྱེས་དགེ་བ་བྱེད་རྣམས་ཡར་ལ་གཏོང་། །སྡིག་པ་བྱེད་རྣམས་མར་ལ་གཏོང་ངོ་ཞེས། །གསུངས་པ་གོ་ནས་དགེ་བ་བྱེད་ལུགས་ཡོད། །དཀོན་མཆོག་མཆོད་པ་དབུལ་བོ་སྦྱིན་གཏོང་དང་། །དྲིན་ཆེན་བླ་མ་ཕ་མའི་ཞབས་ཏོག་སོགས། །དགེ་བ་གང་བྱས་དྲང་པོར་ཤོད་ཅེས་ཟེར། །འཇིགས་སོ་འཇིགས་སོ་སེམས་ཡོད་སྐྱེས་བུ་རྣམས། །མ་སྒྲུབ་མ་སྒྲུབ་ངན་འགྲོའི་རྒྱུ་མ་སྒྲུབ། །ད་ལྟ་ད་ལྟ་མི་འཆི་ངེས་པ་མེད། །ཀྱེ་མ་ཀྱེ་ཧུད་ཤི་ན་དེ་རུ་འགྲོ། །རང་གིས་རང་ལ་ཤ་ཚ་བྱེད་སྙམ་ན། །མ་སྡོད་མ་སྡོད་ད་ལྟ་ལྷ་ཆོས་རེམ། །མ་ཉལ་མ་ཉལ་ཕྱག་དང་སྐོར་བ་གྱིས། །ཨེ་མ་ཨེ་མ་མཐོ་རིས་ཐར་ལམ་ལ། །མི་རྣམས་མི་རྣམས་མིག་གིས་ཡར་ལ་ལྟོས། །མྱུར་བ་མྱུར་བར་དེ་ལ་འགྲོ་ཐབས་གྱིས། །གླུ་འདི་ཐོས་ཚད་འཆི་བར་རབ་འཇིགས་ནས། །ཕྱི་མར་སྐྱིད་པའི་ལྷ་ཆོས་བྱེད་པར་ཤོག། ཅེས་པ་འདི་ནི་དད་ལྡན་ལྷུན་གྲུབ་སོགས་ཨ་རིག་ཡོན་བདག་རྣམས་ལ་ཚོགས་དྲུག་རང་གྲོལ་གྱིས་མཚོ་སྙིང་ནས་སྨྲས་པའོ། །༽ འདི་ནས་གསལ་བཤད་བྱེད་རྒྱུ་ཞིག་ལ་སང་ཉིན་མ་ཎི་འཚོག་རྒྱུ་དང་གསུར་ཆེན་ཕུད་རྒྱུ་རེད། གནངས་ཉིན་ཚོགས་འཁོར་འཚོག གཞེས་ཉིན་དབང་ཡིན། དབང་བསྐུར་རྒྱུ་དེ་སྔོན་མ་ལྟར་དུ་བདེ་ཆེན་ཞིང་དབང་ཡིན་ཞིང་། ཡིན་ན་ཡང་ད་རེས་ཀྱི་དབང་འདི་ཞིབ་ཆ་བྱས་ཏེ་བསྐུར་དགོས་སྙམ་གྱིན་ཡོད། སྤྱིར་འུ་ཚོ་བོད་ཁམས་ཁུལ་ལ་སོགས་པའི་ས་ཆ་མང་པོ་ཞིག་ནས་མང་ཚོགས་ཀྱིས་ཁྲོམ་དབང་ཞུ་ཟེར་དུས་འཚུབ་ཅིག་བརྒྱབ་སྟེ་ཆུ་ཐིགས་གཅིག་སུ་སྔ་གང་མགྱོགས་བྱས་ནས་འཐུང་རྒྱུ་ལོན་དུས་རྒྱུག་འགྲོ་བ་ཡིན་ལ། དབང་ཅི་ཞིག་གི་དབང་ཡིན། དབང་ཚིག་དང་སྦྲགས་ནས་དམིགས་པ་གཏད་རྒྱུ་མ་དགོས་དང་། དབང་གི་མཚན་ཙམ་ཞིག་འཛིན་མི་ཤེས་པ་དང་། དེའི་ཕྱོགས་ལ་སེམས་གཏན་ནས་འཁོར་མ་མྱོང་བ་ཡང་གང་མང་མང་ཡིན། དེ་ལྟར་ན་སྤྱིར་ན་གསང་སྔགས་ཀྱི་དབང་དེ་གནད་ཆེ་ཞིང་། རང་རྒྱུད་སྨིན་པར་བྱེད་པའི་ཐབས་ཁྱད་པར་ཅན་ཡིན་པས་མི་ཚད་སྔགས་ཀྱི་སྡོམ་པ་ཞེས་པ་དེ་དུས་ཐོབ་པ་ཡིན། བཏགས་པ་བ་སྡོམ་གཟུང་གི་སྐབས་དང་། མཚན་ཉིད་པ་དམ་ཚིག་ཁས་ལེན་གྱི་གནས་སྐབས་སུ་ཐོབ་པ་ཡིན་ཞེས་ཐེངས་མ་མང་པོ་བཤད་ཡོད། དེའི་ནང་ནས་རང་རེས་ཞིང་དབང་བསྐུར་རྒྱུ་འདི་ཉི་མ་བདུན་དུ་ཞིང་ཁྲིད་དང་འབྲེལ་བའི་ཞིང་སྒྲུབ་འཚོགས། ཉི་མ་བདུན་སྒྲུབ་ཀྱིས་དགེ་འདུན་པ་འདི་འདྲའི་མང་པོ་ཞིག་དབུར་བཞུགས་ས་ནས་ཆོས་པ་ཁྲི་ཁ་ལངས་པ་དེ་ཉིད་ཀྱིས་ཉི་མ་རེ་རེ་བཞིན་དུ་སྔགས་ཀྱི་དཀྱིལ་འཁོར་གྱི་ཆོ་ག་དང་སྦྲེལ་ཏེ་བསྒྲུབས་པའི་དངོས་གྲུབ་ལེན་པ་ཡང་ཡིན་པས་ཞིབ་ཆ་ཞིག་དེ་ཡིས་དགོས་འདུག་བསམ་པ་ཡིན། དབང་བསྐུར་བ་ལ་སྦྱོར་བ་སྔོན་འགྲོའི་ཆོ་ག་ཁྲུས་བྱེད་པ། བགེགས་བསྐྲད་པ། སྲུང་འཁོར་སྒོམ་པ་ལ་སོགས་པ་དང་། དངོས་གཞིའི་དབང་ལ་མཚོན་ན་བྱིན་འབེབས་དང་། དབང་དངོས་གཞི། རྗེས་གནང་། རིག་གཏད་ལ་སོགས་པའི་རང་འགྲོས་ལྟར་གྱི་དངོས་གཞི་དབང་དེ་བསྐུར་ཚར་རྗེས་སུ་སྦྱོར་དངོས་རྗེས་ཀྱི་རྗེས་ཞེས་པ་རྗེས་དབང་སྲོག་རྒྱུད་ལ་འཛིན་པ་དམ་ཚིག་སྲུང་བའི་ཁས་ལེན་དང་། ཡོན་འབུལ། ཤིས་བརྗོད། བསྔོ་བ། སྨོན་ལམ་ལ་སོགས་པ་ཡོད་པ་ཡིན། སྦྱོར་དངོས་རྗེས་གསུམ་པོ་ཚང་དུས་དབང་ཆ་ཚང་ཞིག་ཐོབ་སོང་བ་ཡིན་ཞིང་། ད་སྔོན་དབང་ཆ་ཚང་ཞིག་ཐོབ་མ་སོང་ཞེས་བཤད་ན་ཡིན་རྒྱུ་མ་རེད། ཉི་མ་མང་པོ་འཚོགས་ནས་མཇུག་གྲུབ་ལ་ཉེ་དུས་རང་གཞན་གཉིས་ཀས་བྲེལ་ལ་ཚུབ་ཚུབ་ལྟ་བུ་ཞིག་བྱས་པ་དེ་འགྲིག་མི་འདུག དབང་ཆ་ཚང་ཞིག་མ་ཐོབ་དུས་མི་ཆ་ཚང་ཞིག་མིན་པ་ལྟ་བུ་རེད། ཁོག་སྟོད་ཡན་ཆད་ཁོ་ན་མི་གསོན་པོ་མ་ཡིན་ཞིང་། ཁོག་སྨད་དང་ཡན་ལག་ཉིང་ལག་དང་བཅས་པ་ཆ་ཚང་ཡོད་དགོས་ལ། མི་ཆ་ཚང་ཞིག་ལ་མཛུབ་གུ་དང་སོར་མོ་བཅས་པ་ཆད་མི་རུང་བ་ལྟ་བུ་ཡིན། ད་རེས་དབང་གི་འགོ་བཟུང་ནས་རྗེས་ཆོག་དང་བཅས་པ་ཡོངས་སུ་མ་རྫོགས་ཀྱི་བར་དུ་འཚོག་མར་གྲོལ་མི་འགྲོ་བར་འདུག་རྒྱུ་བྱེད་དགོས། དབང་འགྲེམ་རིང་འགྲེམ་ཚེ་རང་རང་གིས་ཕྲེང་བ་བཅད་དེ་ཡིག་བརྒྱ་གསོག་དགོས། ཡིག་བརྒྱ་མི་ཤེས་པའི་བྱིས་པ་ཚོས་ཡིག་དྲུག་གསོག་ན་ཆོག ཡིག་བརྒྱ་གསོག་དགོས་པའི་རྒྱུ་མཚན་གང་ཡིན་ཟེར་ན། རྡོ་རྗེ་སེམས་དཔའ་དེ་རིགས་རྣམས་ཀུན་འདུས་ཀྱི་བདག་ཉིད་ཡིན་ལ། དངོས་གྲུབ་ཀྱི་བསྐུལ་སྔགས་ལ་དེ་ཡིས་ཡན་ཞིག་མིི་དགོས་ཤིང་། དུས་རྒྱུན་རང་གཅིག་པུས་ཁྱིམ་ནས་བཏོན་པ་བས་དགེ་འདུན་འདུས་པ་མང་ཚོགས་ཀྱི་བྱིན་རླབས་ཀྱིས་ཁྲི་འགྱུར་འབུམ་འགྱུར་གྱིས་ཡར་འཕེལ་གྱིན་ཡོད་པས་དགེ་སྦྱོར་ཆེ་བ་དེ་ཉིད་དེའི་ཉིན་པར་བསྒྲུབ་དགོས། དབང་རྫས་འགྲེམ་དུས་སུ་ཡང་དགེ་འདུན་པ་སྔོན་མ་ཡིན་པའི་ངེས་པ་མེད། དང་པོར་ས་ཕྱོགས་གཞན་ནས་ཡོང་བ་ཐམས་ཅད་སྔོན་དུ་མངགས་ཏེ་གཞིས་འགྲུལ་གྱི་ཁྱད་པར་གྱིས་དེ་རྣམས་ལ་དམིགས་བསལ་གྱི་གུས་ཞབས་དགོས། དེ་འཕྲོས་གཞི་པ་འབྲོག་རུ་ཤོག་ཁ་རྣམས་ཀྱི་རང་ཤོག་གི་རུ་བསྟར་བསྒྲིག་རྒྱུ་ཡིན། སྡེ་བ་སྡེ་བ་ནས་ཕྲེང་བསྒྲིགས་ཏེ་ཡོང་རྒྱུ་བྱེད་དགོས། དེ་ཡང་ཞིང་སྒྲུབ་ཀྱི་ཁོ་རང་གི་ལོ་རྒྱུས་ཀྱི་བྱུང་རིམ་ལྟར་སྦྱིན་བདག་སྔོན་རྗེས་ཀྱི་ཆོས་གྲོགས་རྒན་གཞོན་གྱི་གྲྭ་པས་བསླབ་གྲལ་བསྒྲིགས་པ་བཞིན་དུ་གོ་རིམ་ལྡན་པ་རྒྱུ་མཚན་ཡོད་པ་ཞིག་བྱས་ཏེ་ཡོང་རྒྱུ་བྱེད་དགོས། ཆོས་ཞུ་དང་མཆོད་མཇལ་གྱི་རིགས་འགྲོ་དུས་ཕོ་མོ་རྒན་གཞོན་སུ་ཡིན་ཡང་གྱོན་རྒྱུ་གཙང་མ་རེ་གྱིས་དང་བཟང་ཆ་ཡོད། ཁྱད་པར་དུ་གཙུག་ལག་ཁང་གཅིག་གི་ནང་དུ་འདི་ལྟར་བྱས་ནས་དགེ་འདུན་པ་མཉམ་དུ་འཚོག་དུས་གོས་རྙིང་ཏག་ཏག་གིས་དྲི་མ་ཕ་ལེ་བཙོག་བྱས་ན་ཉེས་པ་འབྱུང་རྒྱུ་རེད། དབང་འགྲེམ་དུས་ཀྱི་སྒྲིགས་ལམ་འཆར་གཞི་ཞིག་དེ་དུས་བཤད་ན་ཆོག་མ་གཏོགས་དེ་མིན་སྐད་ཆ་བཤད་པའི་དུས་ཚོད་སང་ཉིན་ཕན་ཆད་ནས་མེད་རྒྱུ་ཡིན་པས་དེ་ཡིས་བཤད་པ་ཡིན། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་དང་། ཐེངས་འདིའི་ཞིང་མཆོད་ཆེན་མོ་དང་འབྲེལ་ཏེ་ཞིང་ཁྲིད་ཞིང་སྒྲུབ་སྦྲགས་མ་འདིར་ཞུགས་ནས་བསྙེན་སྒྲུབ་མཛད་པའི་དགེ་རྩ་སྤྱིི་དང་། བྱེ་བྲག་ཏུ་ད་རེས་ཀྱི་སྦྱིན་པའི་བདག་པོ་སྔར་མིང་ལ་གཡང་འཁྱིལ་སྡེ་བ་དང་། ད་མིང་ལ་མདའ་བཞི་གཡང་སྡེ་ཕྱུག་མོས་མཆོད་པའི་ཞབས་འདེགས་ཕུལ་བ། དགེ་འདུན་པ་ལ་གསོལ་ཇ་དྲང་འདྲེན་ལ་སོགས་པ་བསྙེན་བཀུར་གྱ་ནོམ་པ་བྱས་པ་དང་། འདིའི་དགེ་རྩ་ཡོངས་རྫོགས་བསམ་པ་བཟང་པོས་ཀུན་སློང་གིས་མཐུན་འགྱུར་སྣ་རེ་བྱས་པ་ཚུན་ཆོད། དེ་མིན་གྱི་ཆོས་ཞུ་མཁན། ཐུན་ལ་ཞུགས་མཁན། ཇོ་བོ་ལ་གསེར་ཆབ་གསོལ་བ། གཤིན་གསོན་གྱི་དོན་དུ་གསེར་ཀོང་རྒྱོང་བ། ཇོ་བོ་ལ་ན་བཟའ་སྙན་ཤལ་འབུལ་བ། རྔོན་རྒྱ་རི་ཁྲིམས་ཀྱིས་སེམས་ཅན་ལ་མི་འཇིགས་པ་སྐྱབས་ཀྱི་སྦྱིན་པ་བྱས་པ། དགེ་འདུན་པ་ལ་སྐུ་འགྱེད་བཏང་བ། མར་མེའི་དཀར་བསབ། མཆོད་པ་ལ་ཞབས་ཞུ་བྱས་པ། གཙུག་ལག་ཁང་ལ་བྱི་དོར་བྱེད་མཁན། ཆོས་རའི་ཁོར་ཡུག་ལ་གཙང་སྦྲ་བྱེད་མཁན། དེ་འཕྲོས་ཕྱག་དང་། སྐོར་བ། བརྐྱངས་ཕྱག དགེ་སྒྲུབ་སྡིག་སྤང་གི་ཁས་ལེན་བྱེད་མཁན། མདོར་ན་ཆོས་རར་རྡོག་པས་བརྫིས་ཚད། ཐ་ན་མི་ངོ་མ་འདིར་མ་ཐོན་ཡང་དང་ཞིང་དགའ་བའི་སེམས་ཀྱིས་རྗེས་སུ་ཡི་རང་དང་བཅས་ཏེ་ཐལ་མོ་ཡ་གཅིག་གི་ཕྱག་རྒྱ་གཅིག་འཆའ་མཁན་ལ་སོགས་པ་ཆོས་ཚོགས་འདི་དང་འབྲེལ་བའི་དགེ་རྩ་ཅི་ཡོད་རྣམས་དང་། རང་གཞན་སེམས་ཅན་ཐམས་ཅད་ཀྱིས་དུས་གསུམ་ཀུན་ཏུ་བསགས་པའི་ཟག་བཅས་ཀྱི་དགེ་རྩ་དང་། དུས་གསུམ་རྒྱལ་བ་སྲས་དང་བཅས་པའི་ཟག་མེད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་། བཟླུམས་ཏེ། བསྡོམས་ནས་ཀུན་མཁྱེན་རྒྱལ་བ་ཤཱཀྱ་སེངྒེའི་མདོ་སྔགས་ཀྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་ཐུགས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་ཐམས་ཅད་ཀྱི་སྐུ་ཚེའིི་ཞབས་པད་མི་འགྱུར་རྡོ་རྗེའི་ཁྲི་ལ་ཡུན་རིང་དུ་བརྟན་ནས་རྨད་བྱུང་ཐུགས་ཀྱི་བཞེད་དོན་མཐའ་དག་གེགས་མེད་ལྷུན་གྱིས་འགྲུབ་པ་དང་། བསྟན་པའི་གཞི་མ་དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་ཡར་ངོའི་ཟླ་བ་ལྟར་གོང་ནས་གོང་དུ་འཕེལ། དེས་མི་ཚད་པར་འབྱོར་ལྡན་བསྟན་པའི་སྦྱིན་བདག་ཐམས་ཅད་ཀྱི་མངའ་ཐང་ལོངས་སྤྱོད་རྒྱས། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་ཐམས་ཅད་རྒྱུན་ཆད། ནད་མུག་མཚོན་འཁྲུག་དང་འབྱུང་བཞིའི་འཇིགས་པ་ཐམས་ཅད་ཞི། ཁྱད་པར་དུ་ཡངས་པའི་རྒྱལ་ཁམས་ཆེན་པོ་རྣམས་ལ་དབང་སྒྱུར་བའི་ཆེ་བཙན་དྲག་ཤུལ་ཅན་ཚང་མའི་སེམས་རྒྱུད་ལ་སྙིང་རྗེས་དྲངས་པའི་བྱང་ཆུབ་ཀྱི་སེམས་ཤིག་འཁྲུངས་ནས་གནོད་འཚེ་གདུག་པའི་བསམ་སྦྱོར་མེད་པས་མ་ཚད་པར་ཀུན་ལ་སྙོམས་པའི་བྱམས་པ་ཆེན་པོས་རིས་མེད་བུ་བཞིན་དུ་སྐྱོང་བ་དང་། ཡིད་ཅན་འགྲོ་བ་ཐམས་ཅད་ཀྱང་གཞན་ཕན་བྱང་ཆུབ་ཀྱི་སེམས་ཀྱིས་རྟག་ཏུ་འཚོས་ནས་ཕན་ཚུན་ཕ་མ་དང་སྤུན་སྲིང་ལྟ་བུའི་མཐུན་སེམས་དང་གཅེས་སེམས་ཀྱི་འདུ་ཤེས་ནམ་ཡང་མི་ལྷོད་པའི་ཐོག་ཏུ་ད་རེས་ཀྱི་སྦྱིན་བདག་སྡེ་བ་འདིས་གཙོར་བྱས་པའི་ཐེངས་འདིའི་ཚོགས་བསགས་མཆོད་འབུལ་བསྙེན་སྒྲུབ་ཆོས་ཐུན་ལ་དངོས་སུ་ཞུགས་ཚད་ཡི་རང་བྱས་ཚད་གོང་ནས་བཤད་པ་ལྟ་བུའི་མཆོད་ཡོན་ཐམས་ཅད་དང་འབྲེལ་བའི་སྔར་ཤི་རྙིང་པ། ད་ཤི་གསར་བ། ཤི་བོ་ཆོས་མེད་དགེ་མེད། དགེ་བའི་བསགས་རྒྱབ་ཆུང་བ། ཆོས་ཀྱི་ར་མདའ་ཞན་པ། དགེ་རྩ་བདུན་དེད་ཀྱིས་མ་དྲངས་ནས་ཤི་ངོ་ད་རུང་མ་ཤེས་པའི་བླ་འཁྱམ་བཞིན་པ། གདོན་བགེགས་ཀྱི་སྡོངས་ཟླ་དང་འགྲོགས་ཡོད་པ། རང་སྲོག་རང་གིས་བཅད་པ། གྲིར་ཤི་འགག་ཤིར་གྱུར་པ། ཤི་བར་དོ་མགོན་མེད་སྐྱབས་མེད་ལ་ཆོས་མེད་ལག་སྟོང་དུ་ཡོད་པ་ལ་སོགས་པ་འབྲེལ་ཐོགས་ཚེ་འདས་ཕོ་མོ་རྣམས་ཀྱིས་གཙོས་བྱས་པའི་མར་གྱུར་མཐའ་ཡས་ཀྱི་སེམས་ཅན་ཐམས་ཅད་མྱུར་དུ་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོའི་གོ་འཕང་ཐོབ་པའི་ཕྱིར་དུ་གང་བསྔོ་བྱ། སྔོ་བྱེད། བསྔོ་ཡུལ་དང་བཅས་པ་ཐམས་ཅད་གོང་ནས་བཤད་པ་ལྟར་དུ་འཁོར་གསུམ་ཡོངས་སུ་དག་པའི་བསྔོ་བ་སྔར་འཕགས་པ་འཇམ་པའི་དབྱངས་དང་། བྱང་ཆུབ་སེམས་དཔའ་ཀུན་ཏུ་བཟང་པོ་སོགས་ཀྱིས་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་ཟབ་མོ་དང་བཅས་ཏེ་བསྔོ་བ་སྨོན་ལམ་གྱི་ཞལ་འདོན་ལྷན་དུ་གསུངས་པར་ཞུ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་ཀློང་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ། །ཨེ་མ་ཧོ། ངོ་མཚར་སངས་རྒྱས་སྣང་བ་མཐའ་ཡས་དང་། །གཡས་སུ་ཇོ་བོ་ཐུགས་རྗེ་ཆེན་པོ་དང་། །གཡོན་དུ་སེམས་དཔའ་མཐུ་ཆེན་ཐོབ་རྣམས་ལ། །སངས་རྒྱས་བྱང་སེམས་དཔག་མེད་འཁོར་གྱིས་བསྐོར། །བདེ་སྐྱིད་ངོ་མཚར་དཔག་ཏུ་མེད་པ་ཡི། །བདེ་བ་ཅན་ཞེས་བྱ་བའི་ཞིང་ཁམས་དེར། །བདག་གཞན་འདི་ནས་ཚེ་འཕོས་གྱུར་མ་ཐག། སྐྱེ་བ་གཞན་གྱིས་བར་མ་ཆོད་པ་རུ། །དེ་རུ་སྐྱེས་ནས་སྣང་མཐའི་ཞལ་མཐོང་ཤོག །དེ་སྐད་བདག་གིས་སྨོན་ལམ་བཏབ་པ་ལ། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱིས། །གེགས་མེད་འགྲུབ་པར་བྱིན་གྱིས་བརླབ་ཏུ་གསོལ། །ཏདྱ་ཐཱ། པཉྩ་དྲི་ཡ་ཨ་ཝ་བོ་དྷ་ནི་སྭཱཧཱ། བསླུ་མེད་བདེ་ལྡན་ཞིང་མགོན་འོད་དཔག་མེད། །རྩེ་གཅིག་དད་པའི་ཤུགས་ཀྱིས་ཁྱེད་བསྒོམ་ན། །དང་བའི་ཡིད་ངོར་སྣང་སྟོང་སྒྱུ་མའི་སྤྲིན། །སྐུ་དང་ཞིང་ཁམས་རྟག་ཏུ་འཆར་བར་ཤོག །བརྩེ་ཆེན་སྙིང་རྗེས་དྲངས་པའི་བྱང་སེམས་ལ། །རྟག་ཏུ་གོམས་པའི་རྒྱལ་སྲས་སྤྱོད་མཆོག་གིས། །རླབས་ཆེན་ཚོགས་གཉིས་སྤྱོད་པ་མཐར་ཕྱིན་ཏེ། །དཔག་ཡས་དགེ་བའི་རྩ་བ་ཡོངས་བསྐྱེད་ཤོག །རང་དང་གཞན་གྱི་དུས་གསུམ་བསགས་པ་ཡི། །རྣམ་དཀར་བསོད་ནམས་ཕུང་པོ་ཇི་སྙེད་པ། །དམིགས་བྲལ་འཁོར་གསུམ་དག་པས་བྱང་ཆུབ་ཆེར། །ཡོངས་སུ་བསྔོ་བས་སྲིད་པ་མཐར་བྱེད་ཤོག །ཁྱེད་ལ་ཡང་ཡང་གསོལ་བ་བཏབ་པ་དང་། །མངོན་རྟོགས་ཡིད་ལ་གོམས་པའི་ཏིང་འཛིན་མཐུས། །ངེས་དོན་འོད་དཔག་མེད་པའི་ཞལ་མཐོང་ནས། །བདེ་ཆེན་ཞིང་ཁམས་རྟག་ཏུ་འཛིན་པར་ཤོག །འདི་ནས་ཉིང་མཚམས་སྦྱར་མ་ཐག། དག་པའི་ཞིང་ཁམས་བདེ་བ་ཅན། །པདྨའི་སྙིང་པོའི་ཟེའུ་འབྲུ་ལ། །བརྫུས་ཏེ་སྐྱེ་བ་ལེན་པར་ཤོག །ཧྲཱི། སྔོན་ཚེ་དེ་བཞིན་གཤེགས་པ་གཙུག་གཏོར་ཅན། །འཕགས་པའི་ཡུལ་དུ་གྲུབ་ཆེན་ཀུ་ཀུ་རི། །ཁ་བ་ཅན་དུ་དཔལ་ལྡན་ཐང་པ་ཞེས། །པདྨ་རིག་འཛིན་ཞབས་ལ་གསོལ་བ་འདེབས། །བསྟན་པ་ཡུན་རིང་གནས་པའི་བཀྲ་ཤིས་ཤོག །དཔལ་ལྡན་མཁས་གྲུབ་བྱེ་བའི་གཙུག་གི་རྒྱན། །མདོ་སྔགས་ལུང་རྟོགས་བསྟན་པའི་ཤིང་རྟ་ཆེ། །འཇིགས་བྲལ་སྔ་འགྱུར་རྒྱལ་བ་རྫོགས་ཆེན་པ། ཤྲཱི་སེང་ཆོས་གྲྭའི་བསྟན་པ་རྒྱས་གྱུར་ཅིག །གངས་རིའི་ར་བས་སོགས། སྐར་མ་རབ་རིབ་མར་མེ་དང་། །སྒྱུ་མ་ཟིལ་བ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུ། །འདུས་བྱས་ཆོས་རྣམས་དེ་ལྟར་བལྟ། ། མཇུག་བྱང་།སླར་སྨྲས་པ། ཚད་མེད་ཐུགས་ཀྱི་ཆུ་གཏེར་ཆེན་པོ་ལས།། རྣམ་དག་ལུང་དང་རྟོགས་པའི་རླབས་ཕྲེང་གཡོ།། མི་ཟད་ཆོས་ཀྱི་ཆུ་མཚོ་ཆེར་རྒྱས་པ།། ཚུར་མཐོང་བློ་ཡིས་དཔག་པའི་ཡུལ་ལས་འགོང་།། ལུགས་གཉིས་གསལ་བའི་འོད་སྟོང་ཟེགས་མ་འཕྲོ།། ཕན་བདེའི་ཆ་ཤས་རྫོགས་པའི་དཀྱིལ་འཁོར་རྒྱས།། སྐྱེ་དགུའི་ཚ་གདུང་སེལ་བའི་གཉེན་གཅིག་པུ།། སྙིགས་དུས་རྒུད་མུན་འཇོམས་པའི་ཉ་གང་ཟླ།། འདོད་དགུའི་ལེགས་ཚོགས་ཀུན་འབྱུང་ཡིད་བཞིན་ནོར།། རྣམ་གསུམ་དད་པས་བྱི་དོར་བྱས་པའི་མོད།། ཅི་བསམ་འདོད་དོན་གསོལ་བ་འདེབས་བྱོས་དང་།། མ་ལུས་རེ་བ་སྐོང་ལ་ཡིད་གཉིས་ཅི།། དེ་ལྟའི་གདམས་ཟབ་བདུད་རྩིའི་རྒྱ་མཚོ་ཆེ།། གཟུར་གནས་བློ་ལྡན་སྐལ་བཟང་སྐྱེ་བོའི་ཆེད།། འཕྲུལ་གྱི་ཡི་གེའི་གཟུགས་སུ་ཕབ་པ་ལ།། ནོངས་པ་ཅི་མཆིས་ཆོས་སྤྱན་ལྡན་ལ་འཆགས།། རྣམ་དཀར་བསོད་ནམས་ཕུང་པོ་འདིས་མཚོན་པའི།། ཕྱོགས་དུས་ཀུན་གྱི་དགེ་ཚོགས་གང་ཡོད་ཀྱིས།། ཉམ་ཐག་མར་གྱུར་སྲིད་པའི་འགྲོ་བ་ཀུན།། བདེ་ལྡན་མགོན་པོའི་གོ་འཕང་མྱུར་ཐོབ་ཤོག། ཅེས་ཤིང་ཕོ་རྟ་ཡི་ལོའི་བདེ་ཆེན་ཞིང་སྒྲུབ་ཆེན་པོའི་སྐབས་སུ་བདེ་བ་ཅན་དུ་སྐྱེ་བའི་རྒྱུ་བཞི་དང་འབྲེལ་བའི་ཞིང་སྨོན་བདེ་ཆེན་ལམ་སྟོན་གྱི་གདམས་ཁྲིད་ཟབ་རྒྱས་ཀྱི་བཀའ་དྲིན་བསྩལ་བ་ལ་ཡི་གེའི་གཟུགས་སུ་འགོད་པ་པོ་ནི་རྗེ་གང་གི་ཐུགས་རྗེའི་གྲིབ་བསིལ་གྱི་སྐྱབས་འོག་ཏུ་ཉེ་བར་གནས་པའི་སྐལ་བ་སྦམ་པོ་ཅན་གུས་འབངས་བསོད་ནམས་རྒྱ་མཚོ་ཞེས་འབོད་པས་རུ་དམ་ཡང་དབེན་པདྨ་ཐང་གི་མཁན་ཆེན་པདྨ་བཛྲའི་སྐུ་གདུང་མཆོད་རྟེན་གྱི་ཉེ་འཁྲིས་རང་སྤྱིལ་ནས་བོད་རབ་བྱུང་བཅུ་བདུན་པའི་ཤིང་ཕོ་རྟ་ཡི་ལོ་མཇུག་གཡང་མོ་ལུག་གི་གནམ་ལོ་གསར་ཚེས་ལ་ཉེ་བའི་སྐབས་སུ་གུས་པས་མཇུག་ལེགས་པར་གྲུབ་པར་བགྱིས་པའོ།། །། དགེའོ། །དགེའོ། །དགེའོ། ། |