 ཁྱབ་བདག་པདྨ་སྐལ་བཟང་གི་གསུང་འབུམ་གླེགས་བམ་ཉེར་དགུ་པ།སྙིང་ཐིག་དུམ་གཉིས་ཀྱི་སྨིན་དབང་ཟབ་ཁྲིད་མན་ངག་ལམ་གྱི་སྒྲོན་མེ།རྫོགས་ཆེན་པདྨ་སྐལ་བཟང་། སྤྲུལ་ཐུབ་བསྟན་ཚེ་འཕེལ་གྱིས་ཡི་གེར་ཕབ།པདྨའི་འོད་སྣང་ཚོགས་པ།ཀན་སུའུ་མི་རིགས་དཔེ་སྐྲུན་ཁང་།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཐུགས་རྗེ་ཆེ་ཞུ།༈ སྐྱེ་རྒུའི་བདེ་སྐྱིད་ཀྱི་འབྱུང་གནས་རྒྱལ་བ་མཉམ་མེད་དོན་ཀུན་གྲུབ་པ་ཆེན་པོའི་གསང་གསུམ་ཡེ་ཤེས་ཀྱི་སྒྱུ་འཕྲུལ་ངོ་མཚར་ཆོས་སྐུའི་རིང་བསྲེལ་གྱི་གཟུགས་སུ་བལྟམས་པ་གསུང་རབ་རྒྱལ་བའི་བཀའ་འགྱུར་རིན་པོ་ཆེ་དང་། ཐུབ་པའི་དགོངས་པ་རང་སྟོབས་ཀྱི་བཀྲལ་ནུས་པའི་འཕགས་ཡུལ་པཎ་གྲུབ་རྣམས་ཀྱི་མཛད་པའི་བསྟན་འགྱུར་རིན་པོ་ཆེ་སྟེ་མདོ་སྔགས་གཉིས་ལྡན་གྱི་ཡོངས་རྫོགས་བསྟན་པ་རྒྱ་མཚོ་འདི་ཉིད། དེང་གི་ཆར་གངས་རིའི་ལྗོངས་ཀྱི་ཡེ་གེ་ཁོ་ནའི་གཟུགས་སུ་བཞུགས་པ་ནི་སྤྲུལ་པའི་མཁན་སློབ་ཆོས་གསུམ་གྱི་ཐུགས་བསྐྱེད་ཉག་གཅིག་ལས་བྱུང་བ་དང་། དེ་དག་མི་ནུབ་བརྒྱུད་འཛིན་ཡུན་གནས་ཀྱི་ཆེད་དུ་གངས་ལྗོངས་ཆོས་བརྒྱུད་ཁག་ལས་བྱོན་པའི་རིས་སུ་མ་ཆད་པའི་སྐྱེས་ཆེན་རྣམས་ཀྱིས་བཀའ་བསྟན་རིན་པོ་ཆེའི་དགོངས་སྙིང་ཅན་གྱི་གསང་རབ་གླེགས་བམ་སྟོང་ཕྲག་མང་པོ་མཛད་ཅིང་། དཀའ་སྤྱད་ཐུགས་བརྩོན་སྣ་ཚོགས་གྱིས་མ་ཕྱི་གསར་བསྐྲུན་དང་བསྐྱར་བསྐྲུན་སོགས་ཀྱིས་འཇིག་རྟེན་གྱི་ཁམས་སུ་བཞུགས་པ་མཛད་མུས་བཞིན། དེང་གི་ཆར་གློག་རྡུལ་འཕྲུལ་ཆ་དང་དྲྭ་རྒྱའི་དུས་རབས་ཀྱི་འགྲོས་དང་བསྟུན་ནས་རྒྱལ་སྤྱིའི་རིག་གཞུང་སྤྱི་མཚུངས་ལྟར། རྒྱལ་བའི་གསུང་རབ་རིན་པོ་ཆེ་གཙོ་བོར་གྱུར་པའི་འཕགས་བོད་མཁས་པའི་གཞུང་ལུགས་རྣམས་དྲྭ་ཐོག་ནས་བཤེར་འཚོར་དང་འདྲ་བཤུས་སྒྲིག་གཟོ་སོགས་སྟབས་བདེའི་ལམ་ནས་བཀོལ་སྤྱོད་ཐུབ་པའི་གཞི་རྒྱ་ཆེ་བའི་འཆར་འགོད་དངོས་སུ་ལས་བཞིན་པར། མཆོག་སྤྲུལ་མུ་ར་རིན་པོ་ཆེའི་གཙོས་པདྨའི་འོད་སྣང་ཚོགས་པ་ནས་༧སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་གི་གསུང་འབུམ་མཚན་བཟང་སོ་གཉིས་ཀྱི་གྲངས་ལྡན་ཅན་འདིར་གནང་འབྱོར་བྱུང་བ་ལགས་ན། ཁོང་རྣམ་པའི་རྨད་དུ་བྱུང་བའི་མཛད་རྒྱས་ལ་སྙིང་ནས་ཐུགས་རྗེ་དང་བཀའ་དྲིན་བླ་ལྷག་ཏུ་ཆེ་ཞུ་བ་དང་ཆབ་གཅིག་སླད་ནས་ཀྱང་གསུང་རབ་རིན་པོ་ཆེ་ཅི་རིགས་དཔེ་སྐྲུན་གནང་ན་འདི་གར་འདྲ་བཤུས་གནང་སྩོལ་ཡོང་བར་ཅི་ནས་ཀྱང་བཀའ་དྲིན་མི་ཆུང་བ་ཞུ། ཞེས་དྲྭ་རྒྱའི་དཔེ་མཛོད་འགན་འཛིན་པ་རྫོགས་ཆེན་བསྟན་འཛིན་རྣམ་དག་ནས་ཕུལ།། སྙིང་ཐིག་དུམ་གཉིས་ཀྱི་སྨིན་དབང་ཟབ་ཁྲིད་མན་ངག་ལམ་གྱི་སྒྲོན་མེ།སྙིང་ཐིག་དུམ་གཉིས་ཀྱི་སྨིན་དབང་ཟབ་ཁྲིད་མན་ངག་ལམ་གྱི་སྒྲོན་མེ་བཞུགས་སོ།། གླེང་གཞི།སྐུ་ཚེ་གང་པོར་འོ་བརྒྱལ་འཛེམས་མེད་ཐོས་བསམ་སྒོམ་པས་བསྟན་པ་འཛིན།། ཉམས་རྟོགས་ཡོན་ཏན་དགོངས་པའི་རྩལ་རྫོགས་མདོ་སྔགས་གཞུང་བརྒྱའི་ཆོས་གཏེར་བརྡོལ།། མཁས་བཙུན་གྲུབ་པས་ས་ཡི་སྟེང་དུ་ཡང་དར་བསྟན་པའི་རྒྱལ་མཚན་བཙུགས།། ཁྱབ་བདག་བླ་མ་པདྨའི་མཚན་ཅན་སྙིང་གི་དབུས་ནས་ལན་བརྒྱར་གུས།། རྒྱལ་བའི་བསྟན་ལ་སྟོན་པ་གཉིས་པ་མཚུངས་མེད་དྲིན་ཅན་བླ་མ་ཡིས།། ཐུགས་བརྩེས་མ་འདོར་དབང་དོན་ཟབ་ཁྲིད་སྐལ་ལྡན་བུ་ལ་སྩལ་བ་འདི།། ལས་ཉོན་ནད་ཀྱིས་ཡུན་དུ་མནར་བའི་ཁམས་གསུམ་སྐྱེ་རྒུའི་འགྲོ་བ་ལ།། ཕན་པའི་སེམས་ཀྱིས་སོར་རྩེའི་སྨྱུག་གིས་ཤོག་བུའི་ངོས་སུ་ཡི་གེར་བཀོད།། ཅེས་ཚིག་བཅད་ཐུང་ངུ་སྔོན་དུ་བཏང་ནས་གང་ཞིག་གླེང་བྱ་ནི། དེ་ཡང་རྡོ་གྲུབ་ཆེན་གྱི་འབྱུང་འགྱུར་ལུང་བསྟན་གསལ་བའི་མེ་ལོང་ལས། །མདོ་ཁམས་ཡུལ་ནས་པདྨའི་མིང་ཅན་གྱིས། །ནགས་ཁྲོད་གངས་འདབ་པདྨ་ཐང་ཆེན་དུ། །སྔར་མེད་གནས་སུ་རྟེན་བཞེངས་འགྲོ་བ་སྐྱོབས། །སོགས་འཁྲུལ་མེད་རྡོ་རྗེའི་བཀའ་ལུང་གིས་ལན་གཅིག་མིན་པར་ཡང་ཡང་བསྔགས་པ་ལྟར། ཁྱབ་བདག་གདོད་མའི་མགོན་པོ་ངུར་སྨྲིག་གར་གྱི་རྣམ་རོལ་དུ་བྱོན་པ། མཁས་བཙུན་གྲུབ་པའི་དབང་ཕྱུག ཟབ་གསང་ཐེག་དགུའི་མཛོད་འཛིན། དོན་གྱི་སླད་དུ་མཚན་ནས་སྨོས་ན་༧ཆོས་རྗེ་པདྨ་སྐལ་བཟང་ངམ་ཐུབ་བསྟན་ལུང་རྟོགས་བསྟན་པའི་རྒྱལ་མཚན་མཆོག་གིས། རྒྱལ་དབང་པདྨ་ཀ་རས་བདུད་རྩི་སྨན་གྱི་སྒྲུབ་པ་མཛད་སའི་པདྨ་ཐང་ལུང་རྟོགས་པདྨའི་དགའ་ཚལ་གྱི་ངོ་མཚར་སྟོང་ལྡན་གངས་རྒྱན་གསེར་གྱི་པདྨའི་གཙུག་ལག་ཁང་དེར། བོད་རབ་བྱུང་བཅུ་བདུན་པའི་ཤིང་མོ་ལུག་གི་ལོར། སྡོང་ལོ་རླུང་གིས་ཁྱེར་བཞིན་ས་གཞི་གསེར་མདོག་ཏུ་གྱུར་བའི་ནམ་ཟླ་སྟོན་ཀའི་དུས་སུ། ལས་ཅན་དག་པའི་འཁོར་ཚོགས། ངུར་སྨྲིག་འཛིན་པའི་དམར་སེར་འདུས་པ་དང་གོས་དཀར་ལྕང་ལོའི་སྡེ་སོགས་སྐལ་ལྡན་རྡོ་རྗེའི་མཆེད་ལྕམ་ཡོངས་ལ། ཟབ་གསང་སྙིང་ཐིག་དུམ་གཉིས་ཀྱི་དབང་ལུང་ཁྲིད་གསུམ་གནང་སྐབས། སྨིན་བྱེད་དབང་གི་དཀའ་གནས་ལ་འགྲེལ་བཤད་མཛད་པ་རྣམས་ཡིག་ཐོག་ཏུ་བཀོད་པ་ཡིན། ཡིན་ན་ཡང་། སྐྱབས་རྗེ་བླ་མ་རིན་པོ་ཆེས་གསུངས་བའི་དབང་དོན་ནི། ཟབ་ཅིང་རྒྱ་ཆེ་བ་དང་། གུས་པ་ང་ནི། བློ་གྲོས་དམན་ཞིང་སྦྱོང་བ་ཆུང་། ཐོས་རྒྱ་མེད་ཅིང་གོ་རྟོགས་ཉུང་བས། རྗོད་བྱེད་ཚིག་ལ་ཡིག་ནོར་མང་། བརྗོད་བྱ་དོན་ལ་མ་རྟོགས་ཕྱོགས་རྟོགས་སོགས་ཀྱི་ནོར་འཁྲུལ་མང་པོ་ཡོད་པས་གཟིགས་པ་པོ་ཡོངས་ཀྱིས་དགོངས་གནང་ཡོད་པར་མཁྱེན་མཁྱེན། ཉིན་དང་པོའི་དབང་དོན་ཟབ་ཁྲིད།ཉིན་དང་པོའི་དབང་ནི། ཞི་ཁྲོ་ཁྲོམ་དཀྲུགས་ངན་སོང་སྦྱོང་བ་སོགས་ཀྱི་སྟ་གོན་ཡིན། དེ་ཡང་ཇི་སྐད་དུ། གསང་སྔགས་དངོས་གྲུབ་དོན་གཉེར་ན། །འཇིག་རྟེན་ཚེ་འདིའི་ཞེན་པ་དོར། །སོགས་ཀྱི་དབང་ཆོག་སོང་མཐར་ཕེབས་པའི་འཕྲོས་དོན་ནི། འདིའི་དུམ་གཉིས་ཀྱི་ནང་གི་འདོན་ཆའི་ལུང་འདི་ཐམས་ཅད་སྔར་རྫོགས་སྤྲུལ་དྲུག་པ་འཇིགས་བྲལ་བྱང་ཆུབ་རྡོ་རྗེའི་སྐུ་མདུན་ནས་ཀྱང་ཐོབ་ཡོད། དེ་མིན་ཀུན་མཁྱེན་འཇིགས་གླིང་གི་གསུང་པོད་དགུའི་ལུང་འདི། སྔར་ར་ཆེན་མ་འདས་སྤྲུལ་སྐུ་ཟེར་རྒྱུ་ཞིག་ལ་སྲས་མཁས་པ་ཆེན་པོ་པདྨ་མདོ་སྔགས་ཟེར་བའི་སྤྲུལ་སྐུ་ཞིག་ཡོད། དེའི་མདུན་ནས་ཆ་ཚང་ཐོབ་མྱོང་ཡོད། ད་རེས་འདི་ནས་འདོན་ཆ་གཙོ་བོར་བྱས་པའི་གནད་གང་ཆེ་དག་གི་ལུང་དེ་ཚོ་ཆེ་ཐུབ་ཆུང་ཐུབ་འདོན་ཆགས་བྱེད་ཀྱིན་ཡོད། གཙོ་བོ་ད་རེས་དབང་གི་སྐབས་རེད། སྤྱིར་ན་དབང་ཞེས་པའི་ཐ་སྙད་དེ་མདོ་ལམ་ནས་ཀྱང་འབྱུང་། དཔེར་ན། འོད་ཟེར་ཆེན་པོའི་དབང་བསྐུར་གསུངས་པ་སོགས་ལས་ཀྱང་གསལ་བར་སྟོན་ཡོད་པ་ཚང་མས་མཁྱེན་བཞིན་པ་རེད། རེད་དེ། གཙོ་བོ་སྔགས་རྒྱུད་ལས་སྨིན་ཅིང་གྲོལ་བའི་རིམ་པ་གཉིས་ཀྱི་ལམ་ལ་དབང་གིས་ཁྱབ་པར་མ་ཚད་ཐོག་མའི་ལམ་གྱི་འཇུག་སྒོ་ནས་དངོས་གཞི་མཐར་ཕྱིན་པའི་བར་གྱི་གཞི་ལམ་འབྲས་གསུམ་ལ་དབང་གིས་མ་ཁྱབ་པ་མེད་པ་ལྟ་བུ་ཞིག་རེད། དེ་ཡིན་ན་མདོའི་སྐབས་ནས་འོད་ཟེར་ཆེན་པོའི་དབང་བསྐུར་གྱིས་མཐའ་འབྲས་ལ་སྦྱོར་བའི་དགོངས་དོན་དེ། ཐབས་ཀྱིས་ཁྱད་པར་དུ་བྱས་པའི་སྔགས་ལམ་ནས་གབ་དོན་ཕྱུངས་ཤིང་བསྟན་ཡོད་པས་ན། སྔགས་ལ་ཡང་ཐུན་མོང་ལྟར་ན་རྒྱུད་སྡེ་བཞི། ཐུན་མིན་སྔ་འགྱུར་རང་ལུགས་ལ་རྒྱུད་སྡེ་དྲུག་ཏུ་ཕྱེས་པའི་ནང་ནས་ཀྱང་ཇི་བཞིན་པར་འབྱུང་། དེའི་ནང་ནས་བྱ་བའི་རྒྱུད་ལ་མཚོན་ན། ཆུ་དང་དབུ་རྒྱན་གྱི་དབང་གསུངས་ཡོད་པས། མི་བསྐྱོད་པ་ཆུའི་དབང་། རིན་ཆེན་འབྱུང་ལྡན་དབུ་རྒྱན་གྱི་དབང་། མཐའ་རྟེན་རྗེས་གནང་དང་བཅས་པ་དང་ནི། སྤྱོད་རྒྱུད་ལ་མཚོན་ན། ཆུ་དང་དབུ་རྒྱན་གཉིས་ཀྱི་ཁར། སྣང་བ་མཐའ་ཡས་རྡོ་རྗེའི་དབང་དང་། དོན་ཡོད་གྲུབ་པ་དྲིལ་བུའི་དབང་། རྣམ་པར་སྣང་མཛད་མིང་གི་དབང་དང་བཅས་པའི་དབང་ལྔ་ཡིས་སྨིན་པར་མཛད་པ་རེད། དེ་བཞིན་དུ་རྣལ་འབྱོར་རྒྱུད་ཀྱི་དབང་དུ་བཏང་ན་སློབ་མའི་དབང་ལྔའི་སྟེང་ལ་རྡོ་རྗེ་སློབ་དཔོན་གྱི་དབང་དང་དྲུག་གིས་རང་རྒྱུད་སྨིན་པར་མཛད་པ་རེད། སྔགས་བླ་མེད་ནང་རྒྱུད་ཡོ་ག་རྣམ་གསུམ་གྱི། ཕ་རྒྱུད་མ་ཧཱ་ཡོ་གས་བུམ་གསང་ཤེས་རབ་ཡེ་ཤེས་ཚིག་དབང་དང་བཞི་བསྐུར་དུས། དེའི་ནང་ནས་བུམ་པའི་དབང་གིས་རྒྱུ་ཕུང་ཁམས་སྐྱེ་མཆེད། ཐ་མལ་གྱི་སྣང་བ་རགས་པ་ཐམས་ཅད། ཡེ་ནས་རྒྱལ་བའི་དཀྱིལ་འཁོར་གྱི་འཁོར་ལོ་སྣོད་བཅུད་ལྷ་དང་གཞལ་ཡས་ཁང་དུ་དག་པའི། སྐུ་རྡོ་རྗེའི་གོ་འཕང་གི་ས་བོན་བཞག་པ་རེད། དེའི་སྟེང་ལ་མཆོག་དབང་གོང་མ་གསུམ་གྱི་རྫོགས་རིམ་གྱི་ཡེ་ཤེས་སྐྱེ་བའི་སྣོད་རུང་དུ་བྱེད་པ་ཡིན་ནོ། །མ་རྒྱུད་ཨ་ནུ་ཡོ་གའི་གསང་བ་ཟབ་མོའི་དབང་གསུམ་གསུངས་ཡོད། ཁྱད་པར་དུ་གསང་དབང་དང་ཤེར་དབང་གི་སྐབས་ལ་བུམ་གསང་ཤེས་རབ་ཡེ་ཤེས་ཚིག་དབང་རིན་པོ་ཆེ་དང་བཞི་བོ་དེ་སྟབས་གཅིག་ཏུ་རྫོགས་རྒྱུ་དང་། སྟོང་བཞིས་དྲངས་བའི་དགའ་བཞིའི་ཡེ་ཤེས་ཀྱིས། སངས་རྒྱས་སྐུ་བཞིའི་གོ་འཕང་ཐོབ་རུང་གི་ས་བོན་རྒྱུད་ལ་བཞག་པའམ། ཡང་ན་ལམ་ཉམས་སུ་ལེན་པའི་སྣོད་རུང་དུ་བྱེད་པ་རེད། རྫོགས་ཆེན་ཨ་ཏི་ཡོ་གའི་ཐུན་མིན་མན་ངག་སྡེ་ཡིན་ན། དབང་བཞི་བ་ལས་ཕྱེས་པའི་སྤྲོས་བཅས་སྤྲོས་མེད་ཤིན་ཏུ་སྤྲོས་མེད་རབ་ཏུ་སྤྲོས་མེད་བཅས་བཞི་ཡི་རྣམ་བཞག་མཛད་ཡོད་པ་དེ་ཡང་གང་འདྲ་རེད་ཟེར་ན། རྡུལ་ཚོན་གྱི་དཀྱིལ་འཁོར་ལ་བརྟེན་ཏེ་སྤྲོས་བཅས་ཀྱི་དབང་བསྐུར། མཎྜལ་དང་བུམ་པ་ལ་བརྟེན་ཏེ་སྤྲོས་མེད་ཀྱི་དབང་བསྐུར། བརྡ་དང་རྟེན་འབྲེལ་ལ་བརྟེན་ནས་ཤིན་ཏུ་སྤྲོས་མེད་ཀྱི་དབང་བསྐུར། ལྟ་སྟངས་དང་གཟིགས་སྟངས་ལ་བརྟེན་ཏེ་རབ་ཏུ་སྤྲོས་མེད་ཀྱི་རིག་པ་མངོན་སུམ་གྱི་དབང་བསྐུར་བས། སྔགས་ཕྱི་ནང་གི་རྒྱུད་སྡེའི་དབང་གི་རིམ་པ་ནི་དེ་བཞིན་རེད། དེའི་ནང་ནས་སྐབས་དོན་ནང་རྒྱུད་ཡོ་ག་སྡེ་གསུམ་གྱི་བསྐྱེད་པ་མ་ཧཱ་ཡོ་གའི་ཕྱི་ཕན་པའི་དབང་བཅུ། ནང་ནུས་པའི་དབང་ལྔ། གསང་བ་ཟབ་མོའི་དབང་གསུམ་བསྐུར། རྫོགས་པ་ཨ་ནུ་ཡོ་གས་ཕྱི་དབང་རྒྱུད་ཀྱི་ཆུ་བོ་བཅུ། ནང་དབང་འབྱུང་བའི་ཆུ་བོ་བཅུ་གཅིག་གི་སྟེང་དུ་གསང་དབང་རྫོགས་པའི་ཆུ་བོ་དང་། སྒྲུབ་དབང་གྲགས་པའི་ཆུ་བོ་དང་བཅས་པའི། དབང་མཆོག་སུམ་ཅུ་རྩ་དྲུག་བསྐུར་བ་ཡིན་ན། རྫོགས་ཆེན་ཨ་ཏི་ཡོ་གས་གོང་དུ་སྨོས་པ་ལྟར་ནང་རྒྱུད་སྡེ་གསུམ་དང་ཐུན་མོང་གི་དབང་བཞི་བ་ལས་ཕྱེས་པའི་དབང་བཞི་ལ། འོག་མའི་དབང་ཐམས་ཅད་ཡར་ལྡན་དུ་རྫོགས་པ་དང་། ཁྱད་པར་དུ་རྫོགས་ཆེན་མན་ངག་སྡེས་ཤེས་རབ་རང་བྱུང་གི་སྒྲོན་མ། ནང་སྤྲོས་བྲལ་གཉུག་མའི་ཡེ་ཤེས། ཀ་དག་ཁྲེགས་ཆོད་ཀྱི་དགོངས་པའི་དབྱིངས་སྣང་འོད་གསལ་གྱི་སྣང་ཆ་ཤར་བ་ལ། རྒྱང་བཞག་ཆུའི་སྒྲོན་མའི་རིག་གདངས་འཆར་བའི་སྒོ་ཕྱེས་ཏེ། དག་པ་དབྱིངས་སྒྲོན་གྱིས་རྒྱན་བཀྲམ་དུས། ཐིག་ལེ་སྟོང་སྒྲོན་གྱིས། རྒྱུ་ཡིས་མ་བསྐྱེད་རང་བྱུང་གི་དབྱིངས་ལ། རྐྱེན་གྱིས་མ་སྒྲུབ་ཞི་ཁྲོའི་ཚོམ་བུའི་དཀྱིལ་འཁོར་ཤར་རིམ་བཞིན། སྣང་བཞི་མཐར་ཕྱིན། སྐྱེ་མེད་གཉུག་མའི་གཏན་སྲིད་ཟིན། འོད་ལུས་འཕོ་ཆེན་གྱི་སྐུར་བཞེངས་བའི་མན་ངག་བསྟན་པས། ཟབ་པ་ཀུན་གྱི་མཐར་ཐུག་ཀུན་ཏུ་བཟང་པོའི་ཐུགས་བསྐྱེད་ཡིན་པའི་ཕྱིར་ན། ལམ་དང་ཐེག་པ་མཐའ་དག་གི་ཟབ་གནད་ཐམས་ཅད་འདིར་འདུས་པས། རྫོགས་པ་ཆེན་པོའི་མཚན་དང་དོན་མཐུན་པ་ཡིན་ལ། དེ་ཉིད་ཀྱང་དབང་བཞིའི་སྒྲོམ་ནས་འཆད་ཐུབ་ཅིང་གཞི་ལམ་འབྲས་གསུམ་ཡོངས་སུ་ཚང་བ་ཞིག་རེད། འདི་བཞིན་བཤད་ཡོང་ན། སྔ་འགྱུར་རྙིང་མའི་བཀའ་གཏེར་གྱི་བརྒྱུད་པའི་བབས་སོའི་ཁྱད་པར་དེ་ཅི་འདྲ་ཞིག་ཡིན་པ་ངེས་རྒྱུ་ཧ་ཅང་གལ་ཆེན་རེད། དེའི་སྐོར་དེ་གསར་བུ་ཚོ་ལ་གསལ་འདེབས་ཤིག་བྱས་ན། བཀའ་མ་ལྟར་དུ་བྱས་ན་ཕྱི་རྒྱུད་སྡེ་གསུམ་འདི་སློབ་དཔོན་སངས་རྒྱས་གསང་བའི་ལུགས་དེ་གཙོ་ཆེ་ཞིང་། སྔོན་ཡིན་ན་བཤད་སྒྲུབ་གཉིས་ཀྱི་སྒོ་ནས་དར་སྲོལ་ཆེན་པོར་ཡོད་པ་རེད། ནང་རྒྱུད་སྡེ་གསུམ་གྱི་མ་ཧཱ་ཡོ་ག་ལྟ་བུ་ཞིག་ལ་མཚོན་ན། ཐུན་མིན་སྒྱུ་འཕྲུལ་དྲྭ་བའི་སྐོར་ཐམས་ཅད། རྒྱལ་པོ་ཛ་ནས་སྲས་མོ་གོ་མ་དེ་བའི་བར་དུ་སྤྱོད་པའི་ཉེ་རྒྱུ་ལ་བརྟེན་ཏེ་རང་རང་གི་ཚོམ་བུ་དང་བཅས་པ། རྡོ་རྗེ་འཆང་གི་སར་གཤེགས་པ་ནས་སྲས་མོའི་སློབ་མ་སངས་རྒྱས་གསང་བ་ནས་བི་མ་མི་ཏྲ་དང་ལོ་ཙ་བ་རྨ་གཉགས་སོགས་ལ་བརྒྱུད་དེ། དེ་ནས་རིམ་པ་བཞིན་དུ་གནུབས་དང་ཟུར་སོགས་ལ་བབས་པ་རེད། ཨ་ནུ་ཡོ་ག་ཐམས་ཅད་གནུབས་ཆེན་སངས་རྒྱས་ཡེ་ཤེས་ཀྱིས་རྒྱ་གར་བལ་བོ་བྲུ་ཤའི་ཡུལ་གྱི་སློབ་དཔོན་སོགས་ལས་གསོན་པ་དང་། ཨ་ཏི་ཡོ་ག་དེ་སྤྲུལ་སྐུ་དགའ་རབ་རྡོ་རྗེ་ནས་འཇམ་དཔལ་བཤེས་གཉེན་དང་ཤྲཱི་སེང་ཧ། དེ་བཞིན་ཨོ་རྒྱན་སངས་རྒྱས་གཉིས་པ་དང་བི་མ་བེ་རོ་སོགས་ནས་བརྒྱུད་ཡོང་བ་རེད། མདོར་ན་ནང་རྒྱུད་སྡེ་གསུམ་པོ་དགོངས་པ་བརྡ་དང་སྙན་བརྒྱུད་དེ་བརྒྱུད་པའི་བབ་ལུགས་རྣམ་གསུམ་ལ་བསྡུས་ནས་བཤད་རྒྱུ་རེད། གཏེར་མ་ཟེར་རྒྱུ་འདི་ནི། སློབ་དཔོན་ཆེན་པོས། ཤིན་ཏུ་ཟབ་པའི་མཐར་ཐུག་སྙིང་པོ་རྣམས། །སྤྱིེར་ཡང་བོད་རྣམས་གསར་ངེས་ཆེ་བ་དང་། །སྙིགས་མའི་འགྲོ་ལ་ལྷག་པར་སྙིང་བརྩེ་བས། །མཐའ་དབུས་ཐམས་ཅད་གཏེར་གྱིས་གང་ནས་བཞག། ལས་ཅན་བུ་དང་འཕྲད་པའི་སྨོན་ལམ་བཏབ། །ཅེས་གསུངས་པ་ལྟར། མ་འོངས་སྐལ་ལྡན་ལས་ཅན་གྱི་དོན་དུ་བླ་རྫོགས་ཐུགས་གསུམ་དང་། སྒྲུབ་སྡེ་བརྒྱད་སྤྱི་བྱེ་བྲག་གི་ཟབ་ཆོས་ཐམས་ཅད་གཏེར་གནས་སོ་སོར་གཏེར་དུ་སྦས་ནས་གཏེར་སྲུང་དག་ལ་གཉེར་དུ་གཏད་ནས་དེ་དུས་ཀྱི་རྗེ་འབངས་ལོ་པན་ས་ཆེན་གྱི་སེམས་དཔའ་དག་གིས་དབང་འབྱོར་གྱི་ཡོན་ཏན་གྱིས་གང་འདུལ་སྤྲུལ་བའི་སྐུ་རུ་བསྟན་ནས་དུས་བབས་ཀྱི་འགྲོ་དོན་མཛད་རྒྱུ་དང་། བརྒྱུད་པའི་བབས་ལུགས་ལ་ཡིན་ན། བཀའ་གཏེར་སྤྱི་མཚུངས་ཀྱི་བརྒྱུད་པ་གསུམ་གྱི་སྟེང་དེ་ན། གཏེར་མའི་སྒོས་ཆོས་ཀྱི་བཀའ་བབ་ལུང་བསྟན་གྱི་བརྒྱུད་པ། སྨོན་ལམ་དབང་བསྐུར་གྱི་བརྒྱུད་པ། མཁའ་འགྲོ་གཏད་རྒྱའི་བརྒྱུད་པ་གསུམ་བསྣན་པས་བརྒྱུད་པ་དྲུག་ལྡན་རེད། དེའི་བརྒྱུད་པ་དྲུག་ལྡན་དང་། ད་རུང་དེའི་སྟེང་དུ་ཉམས་ལེན་བྱིན་རླབས་ཀྱི་བརྒྱུད་པ། སྙན་བརྒྱུད་དམར་ཁྲིད་ཀྱི་བརྒྱུད་པ། ཕྲིན་ལས་ཕྱག་གཞེས་ཀྱི་བརྒྱུད་པ་གསུམ་པོ་བསྣན་ཡོང་ན། སྔ་འགྱུར་བརྒྱུད་པ་དགུ་ལྡན་གསུངས་པ་དེ་རེད། དེ་ལྟར་ན་ད་རེས་བཀའ་གཏེར་དག་སྣང་གི་བརྒྱུད་པ་གཅིག་འདུས་ཀྱི་སྨིན་བྱེད་ཟབ་མོའི་དབང་མཆོག་བསྐུར་བའི་སྐབས་སུ་བབས་པ་རེད། འདིར་དབང་གི་ངོ་བོ་དང་། དབང་གི་དབྱེ་བ། དབང་འདི་ཅི་འདྲ་ཞིག་བྱས་ནས་གྲུབ་ཚུལ། དབང་བསྐུར་བའི་དགོས་པ་སྟེ་རྣམ་པ་བཞིའི་སྒོ་ནས་སྤྱིར་རྒྱུད་སྒྱུ་འཕྲུལ་དྲྭ་བའི་ལུགས་ལྟར་དུ་བྱས་ནས་ཞུས་ན། དབང་གི་ངོ་བོ་དེ་ཨ་བྷི་ཥིཉྩའི་སྒྲ་ལས་དྲངས་ན། མངོན་པ་གཏོར་བའམ་བླུག་པའི་དོན་ལ་གསུངས་པ་རེད། སྔགས་ཀྱི་ཟབ་མོའི་དབང་མཆོག་ལ་བརྟེན་ནས་སློབ་མའི་སྒོ་གསུམ་ཆ་མཉམ་དང་བཅས་པའི་དྲི་མ་འཁྲུད་ཅིང་དག་པར་བྱས་ནས་གཏོར་བ་དང་། ཡེ་ནས་རང་ལ་གནས་པའི་རྡོ་རྗེ་བཞིའི་ཡེ་ཤེས་མངོན་དུ་གྱུར་བའམ་འཆར་བའི་ནུས་པ་རྒྱུད་ལ་འཇོག་པས་བླུག་པར་བྱེད་པའི་ངོ་བོ་ཅན་ཞིག་ལ་གསུངས་པའོ། །འདིའི་དབྱེ་བ་གཞི་ལམ་འབྲས་གསུམ་གྱི་ཐོག་ནས་བཤད་ན། གཞི་དུས་ཀྱི་སད་རྨི་གཉིད་འཐུག་སྙོམ་འཇུག་གི་གནས་སྐབས་གཞི་ཡི་དྲི་མ་སེལ་རྒྱུ་དང་། ལམ་དུས་ལ་ལུས་ངག་ཡིད་གསུམ་སྒོ་གསུམ་ཆ་མཉམ་དང་བཅས་པ་དང་། ཆོས་ལོངས་སྤྲུལ་གསུམ་ངོ་བོ་ཉིད་སྐུ་བཞི་དང་བཅས་པའི་དག་བྱ་དག་འབྲས་ལ་སྦྱར་ན། ལུས་དང་རྩ་སྤྲུལ་སྐུར་དག ངག་དང་རླུང་ལོང་སྐུར་དག ཡིད་དང་ཐིག་ལེ་ཆོས་སྐུར་དག སྒོ་གསུམ་ཆ་མཉམ་ངོ་བོ་ཉིད་སྐུར་དག་པ་དང་བཅས་པའི། ལམ་དུས་ལམ་བཞི་སྒོམ་པས་འབྲས་དུས་སྐུ་བཞི་དག་པར་བྱེད་པའི་དབང་བཞི་ཡིན་ན་དེའི་ནང་ནས་ཟབ་དབང་གསུམ་སྤྱོད་རིག་མཉམ་པའི་བརྟུལ་ཞུགས་ཅན་གྱི་ངོ་སྐལ་བསྐུར་རྒྱུ། གཙོ་བོའི་ཆ་ནས་དེ་ལྟར་རེད། དབང་ཟེར་རྒྱུ་འདི་ཚུལ་ཇི་ལྟར་གྲུབ་པའི་ཐད་ནས་རྒྱུད་སྨིན་པར་བྱེད་ཐབས་སམ་གསང་ཆེན་རྡོ་རྗེ་ཐེག་པའི་ལམ་ལ་ཐོག་མར་འཇུག་པའི་འཇུག་སྒོ་ཡང་རེད། དེ་ཡིན་ན་གཞི་ལ་ཡེ་ནས་གནས་པ་དེ་ལམ་གྱིས་སྨིན་པར་བྱས་ནས། རྡོ་རྗེ་བཞིའི་ཡེ་ཤེས་མངོན་དུ་བྱེད་པའི་དབང་ངམ་ནུས་པ་ཐོབ་པས་ན་དབང་ཞེས་པའི་བརྡ་ཆད་སྦྱར་བ་རེད། དེ་ཡིན་ན་རྒྱུ་གཉིས་རྐྱེན་བཞི་ཚོགས་པའི་རྒྱུ་རྐྱེན་གྱི་མཐུ་བསམ་གྱིས་མི་ཁྱབ་པ་ཞིག་ལ་བརྟེན་ནས། ཟབ་དོན་སྔགས་ཀྱི་རྟོགས་པ་ཁྱད་པར་ཅན་རྒྱུད་ལ་དངོས་སུ་དབང་དུས་སུ་སྐྱེ་བའམ་ཡང་ན་སྐྱེ་རུང་གི་ནུས་པ་རྒྱུད་ལ་འཇོག་པ་ཞིག་རེད། དེ་ཡིན་ན། རྒྱུ་གཉིས་པོ་གང་རེད་ཟེར་ན། མཚུངས་ལྡན་གྱི་རྒྱུ་དང་ལྷན་ཅིག་བྱེད་རྒྱུ་གཉིས་ཀ་རེད། མཚུངས་ལྡན་གྱི་རྒྱུ་ནི་སློབ་མའི་རྩ་ཐིག་རླུང་གསུམ་སེམས་དང་བཅས་པ་ལ་དབྱེར་མེད་པར་ཁྱབ་ཅིང་གནས་པའི་ཆོས་ཉིད་དང་། ལྷན་ཅིག་བྱེད་རྒྱུ་ནི། དབང་རྫས་སྔགས་དང་ལྟ་དགོངས་ཁྱད་པར་ཅན་གྱི་རབ་གནས་བྱིན་རླབས་དང་ལྡན་པ་གཉིས་ཀ་དང་། རྐྱེན་བཞི་ནི། དུས་རྒྱུན་ལྟར་དུ་རྒྱུའི་རྐྱེན། བདག་རྐྱེན། དམིགས་རྐྱེན། དེ་མ་ཐག་རྐྱེན་དང་བཞི་བོ་ཡིན་ན། དབང་གི་སྣོད་རུང་དུ་གྱུར་བའི་སྣོད་ལྡན་གྱི་སློབ་མ་དེ་རྒྱུའི་རྐྱེན་དང་། སློབ་མའི་རྒྱུད་བྱིན་གྱིས་རླབས་ཐུབ་པའི་དབང་བསྐུར་བའི་ནུས་པ་ལྡན་པའི་སློབ་དཔོན་མཚན་ཉིད་དང་ལྡན་པ་དེ་བདག་པོའི་རྐྱེན། དེ་དང་དེའི་ནུས་པའི་ཁྱད་པར་དང་ལྡན་པའི་རྫས་སྔགས་ཏིང་འཛིན་དེ་དམིགས་པའི་རྐྱེན། དབང་གི་སྦྱོར་དངོས་རྗེས་གསུམ་གོ་རིམ་བཞིན་དུ་འབྱུང་བའམ་དབང་གི་ཆོ་ག་སྔ་མ་སྔ་མས་ཕྱི་མ་ཕྱི་མའི་གོ་ཕྱེ་བས་ན་སྔ་མ་དག་དེ་མ་ཐག་རྐྱེན། ཆོས་ཉིད་ཀྱི་བདེན་པ་དང་། གསང་སྔགས་ཀྱི་བྱིན་རླབས་སངས་རྒྱས་ཀྱི་མཐུ་རྣམས་ནི། བསམ་གྱིས་མི་ཁྱབ་པ་རེད། དཔེར་བཞག་ན་ནོར་བུ་དང་སྨན་གྱི་ནུས་པ་བཞིན་དུ་གསང་སྔགས་ཐབས་ཀྱི་སྤྱོད་པ་ཁྱད་པར་ཅན། སྔགས་དང་ཕྱག་རྒྱ་ཏིང་ངེ་འཛིན་འདི་ཚོའི་ནུས་པ་ལ་སྙོན་དུ་མེད་པ་ཡིན་པ་དེ་གྲགས་ཤིང་དོན་ལ་གྲུབ་པ་རེད། དེ་དག་གིས་དབང་གི་ངོ་བོ་དང་། དབྱེ་བ་། དབང་འདི་ཇི་ལྟར་གྲུབ་ཚུལ་རྣམས་རགས་བསྡུས་ཙམ་ཞུས་ནས། དབང་བསྐུར་ཐབས་ཤེས་པའི་དགོས་པ་ཅི་ཞིག་ཡོད་རེད་ཟེར་ན། སྤྱིར་ན་ཐེག་ཆེན་མདོ་སྔགས་ཀྱི་ལམ་ལ་ཞུགས་རྒྱུ་དེ་སངས་རྒྱས་ཐོབ་པའི་ཆེད་དུ་རེད། དེ་ཡིན་ན། ཡིད་ཤེས་བདེ་མྱུར་དུ་སྐྱོབས་པ་སྔགས་ཀྱི་མཚན་ཉིད་ཡིན་དུས། སྨིན་བྱེད་དབང་གིས་སྨིན་པར་བྱེད་པ་གཅིག་པུ་མ་གཏོགས་གཞན་སངས་རྒྱས་ཀྱི་གོ་འཕང་བདེ་ཞིང་མྱུར་བའི་ཚུལ་གྱིས་ཐོབ་ཐབས་མེད། མདོ་ལམ་ན་བསྐལ་བ་གྲངས་མེད་མང་པོར་ཚོགས་བསགས་ནས་རང་འབྲས་ཀྱི་ཡེ་ཤེས་ལ་སོ་སྐྱེས་ལས་དང་པོའི་ས་ནས་བཙན་ཐབས་སུ་འཇུག་ཟེར་རྒྱུ་ཞིག དབང་གི་མཐུ་མིན་ན་གཞན་ན་སྲིད་རྒྱུ་ཅན་ཞིག་མ་རེད། དབང་གིས་རྒྱུད་སྨིན་པར་མ་བྱས། དམ་ཚིག་གི་སྲུང་མཚམས་དང་། སྲུང་བྱའི་རྣམ་གྲངས་ཙམ་ཡང་མི་ཤེས་པ་ཞིག་གིས། གདམས་པ་ལྐོག་གཏམ་ཚིག་ཁ་ཤས་ཀྱིས་གྲོལ་བཅུག་ཡོད་ཟེར་ན་དཀའ་མོ་རེད། གཞན་ཡང་ཐོས་པ་ཁ་ཁྱེར་གྱིས་གཞན་རྗེས་ཟློ་བ་ནེ་ཙོའི་མྱི་སྐད་འདྲ་བོས་ཀྱང་། རང་རྒྱུད་ཏིང་འཛིན་དང་ཤེས་རབ་ཀྱིས་འབྱོར་རྒྱུ་དེ་དེ་བས་ཀྱང་དཀའ་བ་རེད། དེ་ལྟར་ན་ཚུལ་གནས་ཐོས་དང་བསམ་ལྡན་གྱི་རིམ་པ་གཅིག་ལ་གཅིག་རྟེན་ཡིན་པའི་ཕྱིར་ན། སོ་བྱང་སྔགས་ཀྱི་ཚུལ་ཁྲིམས་དག་རྒྱུ་དེ། ཚེ་འདིར་གྲོལ་བ་མངོན་གྱུར་རམ་དེའི་ནུས་པ་རྒྱུད་ལ་འཇོག་རྒྱུར་མེད་ན་མི་རུང་བའི་རྒྱུ་རྐྱེན་རེད། མགོན་པོ་བྱམས་པས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མས་དུས་ཐབས་བསྟན་པ་དང་། །བདག་གི་བསོད་ནམས་ལས་ཤེས་བྱ། །ཞེས་གསུངས་པ་ལྟར། དབང་མ་ཐོབ་པའམ་ཚུལ་བཞིན་ཐོབ་མེད་པ་ཡིན་ན། གསང་བ་སྔགས་རྒྱུད་ཟབ་མོའི་ཡི་གེ་བལྟ་རྒྱུ་ཉན་རྒྱུ་ཙམ་ཡང་མི་རུང་ན། སྒྲུབ་པ་དེ་བས་ཀྱང་མི་རུང་བར་མ་ཚད། བསྒྲུབས་ཀྱང་འགྲུབ་པར་མི་འགྱུར་པ་རེད། དབང་མ་ཐོབ་ན་དངོས་གྲུབ་མེད། །བྱེ་མ་བཙིར་བས་མར་མི་འབྱུང་། །གསུངས་པ་ལྟར་དུ་རེད། དབང་སྐུར་ཚུལ་བཞིན་ཐོབ་ན། གོང་ནས་བཤད་མ་ཐག་པའི། སྐྱོན་དེ་དག་ལས་ཟློག་ནས། གསང་སྔགས་ཀྱི་ལམ་དང་དངོས་གྲུབ་ཐམས་ཅད་ལ་ཚུལ་བཞིན་འཇུག་ཐུབ་པ་རེད། ཚེ་འདིར་དབང་གི་བྱིན་རླབས་ཀྱིས་ཚེ་རིང་འབྱོར་བ་རྒྱས། བསམ་དོན་ངང་གིས་འགྲུབ་པ་ལ་སོགས་པའི་མཐོ་རིས་ཀྱི་འབྱོར་བ་རྒྱས་ཤིང་། ཕྱི་མར་ངན་སོང་མེད་ཅིང་མཐོ་རིས་ཀྱི་ལམ་ལ་བགྲོད་པ་ལ་སོགས་པའི་འདི་དང་ཕྱི་མའི་དགེ་མཚན་མང་པོ་ཞིག་མི་འདོད་ཀྱང་ངང་གིས་འབྱུང་། མདོར་བསྡུས་ན། གསང་སྔགས་རྡོ་རྗེ་ཐེག་པའི་ཐོག་མའི་ལམ་གྱི་འཇུག་སྒོ་གཅིག་པུ་དེ་དབང་ཡིན་ན། སྨིན་བྱེད་ཀྱི་དབང་འདི་བརྒྱུད་ནས་གྲོལ་བྱེད་བསྐྱེད་རྫོགས་རིམ་གཉིས་ཀྱི་ལམ་སྒོམ་རྒྱུ་དང་། འབྲས་བུ་ཟུང་འཇུག་གི་ཡེ་ཤེས་ཐོབ་རྒྱུ་ལ་ཕྱོགས་དགོས་པ་ཡིན་པས། ལྟ་བ་རྒྱུད་ལ་སྐྱེ་བ་དང་། ལྟ་དོན་ཚུལ་བཞིན་སྒོམ་པ། སྤྱོད་པའི་ནུས་པ་ཐོབ་རྒྱུ་དང་། སྔགས་དང་ཕྱག་རྒྱ་དོན་ལྡན་ལ་འགྱུར་རྒྱུ། དེའི་སྟེང་དུ་ད་རུང་སྔགས་སྡོམ་དམ་ཚིག་གིས་ཐོབ་པ་དེ་དག་ཐམས་ཅད་དབང་ལས་འབྱུང་བས། དབང་འདི་ཅི་ཞིག་ལས་ཀྱང་གནད་ཆེན་རེད། དབང་སྲོག་རྒྱུད་ལ་འཛིན་པ་དམ་ཚིག་རེད། སྔགས་རྒྱུད་སོ་སོའི་རང་ལམ་གྱི་དབང་གི་དམ་ཚིག་སྲུང་བ་སྲོག་ལས་ཀྱང་གཅེས་པར་འཛིན་རྒྱུ་གལ་ཆེ་བ་ཡིན་པ་དང་། སྲོག་གཅེས་པར་སྲུང་ཞིང་འཛིན་མ་ཐུབ་ན། མི་ཚེ་གཅིག་གི་དོན་རེད། དམ་ཚིག་གཅེས་པར་མ་སྲུང་པས་འགལ་ཉམས་འདས་རལ་ལ་སོགས་པར་གྱུར་སོང་ན། ཚེ་རབས་གཏན་དུ་ཕུང་བས། ཕུང་འཚེངས་གཉིས་ཀ་གཅིག་ལས་འགྲོ་ས་གསུམ་པ་མེད་པའི་སྔགས་ལམ་ལ་ཞུགས་ནས། དེའི་དམ་ཚིག་ཚུལ་བཞིན་སྲུང་བའི་གནད་ཆེ་བ་ཞིག་མེད་རྒྱུ་དེ་ནི་འདི་ནས་ནན་གྱིས་ཞུས་པ་ཡིན། མཐར་ཐུག་བསྐུར་ཐབས་བྲལ་བ་རྫོགས་ཆེན་ཡེ་གདལ་གཏིང་མཐའ་མེད་པའི་དོན། མེད་དང་ཕྱལ་བ་ལྷུན་གྲུབ་གཅིག་པུའི་ཡེ་ནས་ཆོས་སྐུ་ཆེན་པོའི་རྫོགས་པའི་དོན་མཐོང་སོང་ན། རང་རིག་རྩལ་གྱི་དབང་ཆེན་ཐོབ་ནས་དེ་དུས་དབང་ཐམས་ཅད་ཀྱི་མཐར་ཕྱིན་སོང་བ་རེད། དེ་ལྟར་དུ་ནང་རྒྱུད་སྡེ་གསུམ་ཐུན་མོང་ལ་སྦྱར་ནས། དབང་སྤྱིའི་གོ་དོན་གྱི་ཕྱོགས་ཙམ་ཞིག་ཞུས་པ་དང་བཅས་ཏེ། སྐབས་འདིའི་གང་ཞིག་བསྐུར་ཐབས་ལ་འཇུག་བཞིན་པ་ནི། སྔགས་རྒྱུད་སྡེ་དྲུག་གི་ནང་ཚན་ཐེག་རྩེ་རྫོགས་པ་ཆེན་པོ། དེ་ལས་རྫོགས་ཆེན་ཀློང་ཆེན་སྙིང་ཐིག་གི་ཆོས་སྡེ། གངས་ལྗོངས་རྫོགས་པ་ཆེན་པོའི་བསྟན་པའི་ཤིང་རྟ་པ། གསང་འཛིན་དགའ་རབ་དཔའ་བོ་གཉིས་པ། ཀུན་མཁྱེན་རྒྱལ་བ་ཀློང་ཆེན་པས་ཡེ་ཤེས་ཀྱི་སྐུས་ལན་གསུམ་རྗེས་སུ་བཟུང་ཞིང་སྤྲུལ་གཞི་དགོངས་རྒྱུད་གཅིག་ཏུ་བསྔགས་པའི། ཀུན་མཁྱེན་ཕྱི་མ་རིག་འཛིན་འཇིགས་མེད་གླིང་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱོན་བའི། སྨིན་བྱེད་ཀྱི་དབང་དང་གྲོལ་བྱེད་ཀྱི་ཁྲིད། ཉམས་ལེན་གདམས་པའི་མན་ངག་དང་བཅས་པ་ཡོད་པའི་ནང་གི། གྲོལ་བྱེད་ཀྱི་ཁྲིད་རྒྱུད་སྡེ་ལྟར་དུ། འདིར་བཞུགས་མང་ཆེ་བའི་དབང་དུ་བཏང་ན། སྙིང་ཐིག་གོང་མའི་ཡ་བཞི་དང་། ཀློང་ཆེན་སྙིང་ཐིག་གི་ཁྲིད་ཆེན་སོགས་སྔོན་དུ་སོང་བ་ལྟར་དུ་རེད། ཉུང་ཤས་ལའང་སྨིན་གྲོལ་གཉིས་ཀའི་འཇུག་སྒོ་གཙོར་འདོན་གྱི་ཐོག་ནས། ད་རེས་སྨིན་བྱེད་ཀྱི་དབང་སྒྲུབ་སྡེ་ལྟར་དུ་འབུལ་བའི་སྐབས་རེད། དེ་ཡིན་ན་འདི་དང་བསྟུན་ནས། རྒྱུད་སྡེ་དང་སྒྲུབ་སྡེའི་དབྱེ་རིམ་རགས་བསྡུས་ཞིག་ཞུས་ན། གསང་སྔགས་ལྷ་མིའི་འཇིག་རྟེན་འདིར་གྲགས་ཚུལ་གྱི་ཐད་ནས། སྔ་འགྱུར་རང་ལུགས་ཀྱིས་རྒྱུད་སྡེ་དང་སྒྲུབ་སྡེ་གཉིས་རེ་ཕྱེས་ནས་གསུངས་ཡོད་པ་རེད། དེའི་ནང་གི་རྒྱུད་སྡེ་ནི། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ལ་སོགས་པའི་ནང་དོན་ལྟར་དུ་བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་སྐུ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ཀྱི་མཚམས་ནས། དམ་པའི་རིགས་ཅན་དྲྭ་མ་ལྔ་ཡིས། ལངྐའི་ཡུལ་གྱི་རི་བོ་མ་ལ་ཡ་ཡི་རྩེ་མོ་ལ། མངོན་ཤེས་ཀྱིས་རིག་རྫུ་འཕྲུལ་གྱིས་འདུས་ཡོང་ནས། གདུང་ཚིག་ཉི་ཤུ་རྩ་གསུམ་བཏོན་པའི་སྐབས་སུ་གསང་བདག་མངོན་སུམ་དུ་བྱོན་ནས་རིགས་ཅན་ལྔ་སོགས་རིག་འཛིན་འདུས་པ་ཕལ་མོ་ཆེ་ལ། སྔར་འོག་མིན་དང་དགའ་ལྡན། སུམ་ཅུ་རྩ་གསུམ་སོགས་ཀྱི་ལྷ་གནས་ལ་གྲགས་པའི་གསང་བའི་ཐེག་པ་དེ་ཉིད་བསྟན་པའི་སྐབས་སུ། སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻ་ཌཱུརྱ་ཞུན་མས་ཡི་གེར་བྲིས་ནས་དགོངས་པའི་རྩལ་བདུན་གྱིས་ནམ་མཁའ་ལ་སྦས་པ་རེད་གསུངས་ཡོད་པ་རེད། དེའི་བྱིན་རླབས་ཀྱིས་ས་ཧོ་རའི་རྒྱལ་པོ་ཛ་ལ་རྨི་ལྟས་ངོ་མཚར་བ་བདུན་བྱུང་ནས་དེའི་དབང་གིས་སྒྲུབ་པ་མཛད་དུས་རྨི་ལྟས་དང་འཐུན་པར་རྒྱུད་སྡེའི་གླེགས་བམ་མི་ཡུལ་ལ་དངོས་སུ་བབ་པ་རེད། དེ་བབ་ལུགས་ནི། ཀྲི་ཡའི་རྒྱུད་ཐམས་ཅད་ཝཱ་ར་ན་སིར་ལ་བབ། ཡོ་གའི་རྒྱུད་དུར་ཁྲོད་མེ་རི་འབར་བའི་རྩེ་མོ་ལ་བབ། མ་ཧཱ་ཡོ་གའི་རྒྱུད་ནི་ས་ཧོ་རའི་རྒྱལ་པོ་ཛ་ཡི་ཁང་སྟེང་ལ་བབ། ཨ་ནུ་ཡོ་གའི་རྒྱུད་ཐམས་ཅད་ལངྐའི་ཡུལ་དུ་གྲགས་པ་སིངྒ་ལའི་ཡུལ་གླིང་གི་ནགས་ཚལ་ཞིག་ལ་བབ། ཨ་ཏི་ཡོ་གའི་རྒྱུད་ཐམས་ཅད་ནུབ་ཕྱོགས་ཨཽ་ཌཱི་ཡ་ནའི་ཡུལ་དེར་སློབ་དཔོན་དགའ་རབ་རྡོ་རྗེས་དཔལ་རྡོ་རྗེ་སེམས་དཔའ་འམ་ཕྱག་ན་རྡོ་རྗེ་ལས་དངོས་སུ་གསན་ནས་སྒྲུབ་པ་མཛད་དེ་གླེགས་བམ་དུ་བཀོད་པ་རེད། དེ་དག་ནི་རྒྱུད་སྡེའི་བྱུང་ཚུལ་མཚོན་ཙམ་ཡིན་ལ། སྐབས་སུ་བབ་པའི་སྒྲུབ་སྡེ་ནི། སྔར་འོག་མིན་གསང་ཆེན་གསང་བ་ཆེན་པོ་མཆོག་གི་གནས་དེ་ན། སྟོན་པ་ཀུན་བཟང་ཆེ་མཆོག་ཧེ་རུ་ཀས་ཆོས་ཉིད་ཀྱི་རང་སྒྲས་གསུངས་བའི་རྒྱུད་དེ་ཐམས་ཅད། གསང་བདག་རྡོ་རྗེ་ཆོས་ཀྱིས་རང་ཉིད་ཚོམ་བུ་དགུའི་དཀྱིལ་འཁོར་དུ་སྣང་བར་མཛད་ནས་ཐོག་མར་ངག་ཏུ་བསྡུས། དེ་ནས་གླེགས་བམ་ལ་བཀོད་ནས་དགོངས་འགྲེལ་ལུང་ལྔ་ཡང་མཛད་ཚུལ་གསུང་སྲོལ་ཡོད་པ་རེད། དེས་མཁའ་འགྲོ་མ་ལས་ཀྱིདབང་མོ་ཆེ་ལ་གཉེར་དུ་གཏད། དེས་སྤྱི་རྒྱུད་དང་བྱེ་བྲག་གི་རྒྱུད་ཐམས་ཅད་སོ་སོར་ཕྱེས་ནས་རིན་པོ་ཆེའི་སྒྲོམ་སོ་སོར་བཅུག་སྟེ་མཆོད་རྟེན་བདེ་བྱེད་བརྩེགས་པར་གཏེར་དུ་སྦས་པ་དག དུས་ནམ་ཞིག་གི་ཚེ་ན་གྲུབ་པའི་སློབ་དཔོན་བརྒྱད་ཀྱིས་གཏེར་སྲུང་ཐམས་ཅད་ལ་བཀའ་ཡི་བསྒོ་བ་མཛད་དུས། མཁའ་འགྲོ་མས་བྱེ་བྲག་གི་སྒྲོམ་བུ་བརྒྱད་པོ་དེ་བཀའ་བབ་པའི་སློབ་དཔོན་བརྒྱད་ལ་གཏད། སྤྱི་རྒྱུད་ཀྱི་སྒྲོམ་བུ་དེ་རྒྱ་མ་ཁྲོལ་བས་སླར་ཕྱི་རུ་སྦས་བཞག་པ་རེད། ཕྱིས་སུ་དུས་ལ་བབ་དུས་ཀུན་འདུས་རིག་འཛིན་སློབ་དཔོན་ཆེན་པོ་པདྨ་སམ་བྷ་བས་སྤྱན་དྲངས་ནས་སྐལ་ལྡན་སྙིང་གི་བུ་དགུའམ་རྗེ་འབངས་ཉི་ཤུ་རྩ་ལྔ་ལ་གདམས་པར་མཛད། དེ་ལྟ་བུའི་བརྒྱུད་ཚུལ་དང་རྗེས་སུ་འབྲེལ་བའི་རྫོགས་ཆེན་ཨ་ཏི་ཡོ་གའི་སྡེ་གསུམ་དགོངས་པའི་སྤྱི་འདུས། ཀློང་ཆེན་སྙིང་གི་ཐིག་ལེ་འདི་ལ་རྩ་གསུམ་བཀའ་སྲུང་དང་བཅས་པའི་དབང་གི་ཕྱག་བཞེས་ཡོད་པ་རེད། ཕྱག་བཞེས་དེ་ཐམས་ཅད་སྒྲུབ་སྡེའི་རང་ལུགས་ཅན་དུ་ཡོད་པའི་ནང་གི་འདི་ནས་སྐབས་སུ་བབ་པ་བགྲང་བའི་རིམ་པ་ལྟར་དུ་བྱས་ན་བླ་མ་ཡི་དམ་མཁའ་འགྲོ་སྟེ་བྱིན་རླབས་ཀྱི་རྩ་བ་བླ་མ་རིག་འཛིན་འདུས་པ་དང་ བླ་མ་དྲག་པོ་རྟ་ཁྱུང་། དངོས་གྲུབ་ཀྱི་རྩ་བ་ཡི་དམ་བཀའ་བརྒྱད་དཔལ་ཆེན་འདུས་པ། དེའི་ཡན་ལག་ལ་ཁྲག་འཐུང་རིགས་བཞི་ཡོད་པ་དང་དེ་དག་ནི། གཤིན་རྗེ་འཆི་བདག་ཟིལ་གནོན་དང་། རྟ་མགྲིན་ཁམས་གསུམ་རོལ་བ། ཡང་དག་སངས་རྒྱས་མཉམ་སྦྱོར། ཕུར་པ་བདུད་དཔུང་ཟིལ་གནོན་རྣམས་རེད། དེ་རྗེས་བླ་མ་ཡི་དམ་གཉིས་མེད་ལྟར་དུ་བསྒྲུབ་པ་ཞི་ཁྲོ་ཁྲོམ་དཀྲུགས་ངན་སོང་སྦྱོང་བ་རང་རེས་དབང་བསྐུར་བཞིན་པ་འདི་ཉིད་དང་། རྡོར་སེམས་མངོན་དགའི་ཞིང་སྦྱོང་། ད་རུང་རྩ་གསུམ་ཀུན་འདུས་ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན། ཕྲིན་ལས་ཀྱི་རྩ་བ་མཁའ་འགྲོ་ཡུམ་ཀ་བདེ་ཆེན་རྒྱལ་མོ་དང་དེའི་ནང་སྒྲུབ་སྒྲོལ་མ་ཉེར་གཅིག་གསང་སྒྲུབ་སེངྒེའི་གདོང་ཅན། དེའི་སྟེང་ན་ད་རུང་བླ་མ་ཡི་དམ་མཁའ་འགྲོ་སྟེ་རྩ་བ་གསུམ་ཡན་ལག་དང་བཅས་པ། ཐུགས་ཆེན་སྡུག་བསྔལ་རང་གྲོལ་དང་བཅས་པའི་བླ་རྫོགས་ཐུགས་གསུམ་ཚང་བ་ད་རུང་དཔག་མེད་མྱུར་ལམ་དང་། བཀའ་སྲུང་མ་མགོན་ལྕམ་དྲལ་དང་། བཀྲ་ཤིས་ཚེ་རིང་མཆེད་ལྔའི་སྲོག་དབང་དང་བཅས་པ་ད་ལྟའི་ཐེངས་འདིར་འབུལ་རྒྱུའིདབང་གི་རིམ་པ་རགས་རིམ་གྱི་ཐོག་ནས་ཞུས་ན་དེ་རེད། འདིའི་སྨིན་བྱེད་ཀྱི་དབང་གི་ཆོ་ག་དང་། སྒྲུབ་ཐབས་ཕྲིན་ལས་དང་བཅས་པ་ཚུར་བསྡུས་ཡོང་བ་ནི། གླེགས་བམ་གཉིས་སུ་བཞུགས་པ་དེ་ལ་སྙིང་ཐིག་དུམ་གཉིས་ཞེས་ཡོངས་སུ་གྲགས་པ་འདི་ཉིད་དང་། གཞན་ཡང་རྩ་བའི་སྨིན་གྲོལ་གྱི་རིམ་པ་གཉིས་ཀ་གནད་ཡིག་འདུས་པའི་དེང་སྐབས་པོད་བཞི་ལྟ་བུ་གཙོ་ཆེར་མཁྱེན་བརྩེ་དབང་པོའི་ཕྱག་གཞེས་ལྟར་དུ་བསྒྲིགས་ཡོད་པ་དེ་ལ། སྙིང་ཐིག་རྩ་པོད་ཅེས་སྨོས་ཀྱང་། མདོར་ན་ཀློང་ཆེན་སྙིང་ཐིག་གི་བསྟན་པའི་སྲོལ་འབྱེད་ཆེན་པོ། རང་བྱུང་རྡོ་རྗེ་འཇིགས་མེད་གླིང་པའམ་པདྨ་དབང་ཆེན་ཡེ་ཤེས་རོལ་བའི་རྡོ་རྗེ་འཇིགས་མེད་མཁྱེན་བརྩེའི་འོད་ཟེར་གང་ཉིད་ཀྱིས་དགོངས་ཀློང་མི་ཟད་ནམ་མཁའ་མཛོད་ཀྱི་ཆོས་སྡེ་ལས་བྱོན་པའི་སྙིང་ཐིག་པོད་དགུའི་ནང་དུ་མ་འདུས་པ་ཞིག་མེད། དེ་བཞིན་དུ་ཨ་ཏི་རྫོགས་པ་ཆེན་པོ་ལ་ཡང་སྐོར་དགུར་ཕྱེས་བའི་ལུགས་ལྟར་ནང་རྒྱུད་ཡོ་ག་གསུམ་དང་སྦྱར་ནས་བཤད་ན། རྒྱུད་ཆེན་སྒྱུ་འཕྲུལ་དྲྭ་བ་ཨ་ཏིའི་མ་ཧཱ་དང་འབྲེལ་བའི་དཔལ་ཆེན་བཀའ་བརྒྱད་རྩ་བ་ཡན་ལག་དང་བཅས་པ། ཨ་ནུའི་མདོ་ལུང་གི་སྙིང་པོ་ཞི་ཁྲོ་ངན་སོང་སྦྱོང་བ་དང་། བླ་མ་རིག་འཛིན་འདུས་པ་ཆ་ལག་དང་བཅས་པ། ཨ་ཏིའི་དགོངས་དོན་གྱི་བསྐྱེད་རྫོགས་ལྟར་དུ་སྒྲུབ་པ་རིག་འཛིན་ཡུམ་ཀ། དེ་ཡང་ཕྱི་ནང་གསང་བའི་སྒྲུབ་པ་ཐུགས་ཆེན་སྡུག་བསྔལ་རང་གྲོལ། ཁྱད་པར་དུ་གསང་བ་མན་ངག་སྡེའི་རིག་པའི་རྩལ་དབང་དང་འབྲེལ་བ་དེ་གང་ཡིན་ན། ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན་དེ་དག་རེད། འདི་དག་གི་དབྱེ་བསྡུ་དང་གོ་རིམ་རྣམས་མཐའ་གཅིག་ཏུ་ངེས་པ་མི་དགོས་པའི་དབང་གིས་སྣ་ཚོགས་པ་ཞིག་གསུངས་ཡོད་ཀྱང་། བགྲང་བའི་རིམ་པའི་ཆོས་ཚན་དེ་བཞིན་ཡིན་པ་དང་། དབང་བསྐུར་བའི་དབང་དུ་བཏང་ན་ཐོག་མར་ཞི་ཁྲོ་ངན་སོང་སྦྱོང་བའི་དབང་གི་སྒོ་འབྱེད་མཛད་རྒྱུའི་ཕྱག་སྲོལ་ཡོད་པ་རེད། དེ་ཡང་ཕྱིས་ཀྱི་རང་བཟོ་ལྟ་བུ་མ་ཡིན་པར་ཀུན་མཁྱེན་འཇིགས་གླིང་ཁོང་གིས་དབང་གི་སྤྱི་དོན་སྙིང་པོའི་དོན་གསལ་གྱི་ནང་དུ། དང་པོའི་སྨིན་བྱེད་གདན་གསུམ་ཚང་བའི་དཀྱིལ་འཁོར་ཞི་ཁྲོ་ལ་བརྟེན་པ་ཡིན་གསུངས་པ་རེད། སྤྱིར་ན་སྔགས་བླ་མེད་ཀྱི་རྒྱུད་སྡེ་སྒྲུབ་སྡེ་ཐམས་ཅད་ནས་དབང་བཞིའི་རིམ་པ་ཆ་ཚང་བ་གསུངས་ཡོད་པ་དང་། དེ་ཡང་ཁམས་དྲུག་ལྡན་གྱི་རྡོ་རྗེའི་ལུས་ལ་མ་བརྟེན་པ་གཅིག་ཀྱང་མེད་མོད། འདིར་ཁྱད་པར་དུ་ཕུང་ཁམས་གཤེགས་པ་གཤེགས་མ། དབང་ཡུལ་སེམས་དཔའ་སེམས་མ། ཡན་ལག་ཁྲོ་བོ་ཁྲོ་མོའི་མངོན་རྟོགས་རྩལ་འདོན་གྱི་བྱེད་ལས་ལྡན་པའི་དགོས་གནད་ཀྱིས་ཐོག་མའི་འཇུག་སྒོ་དེ་ཞི་ཁྲོ་ངན་སོང་སྦྱོང་བ་འཇོག་རྒྱུའི་སྨིན་བྱེད་ལ་དམ་པ་གོང་མའི་ཕྱག་བཞེས་ཡོད་པ་བཞིན་དུ། རང་རེས་ཀྱང་དེ་ནས་དབུ་བཟུང་སྟེ་འཇུག་རྒྱུ་དང་། ཐམས་ཅད་ཀྱི་མཐའ་ལ་རིག་འཛིན་ཚེ་སྒྲུབ་བདུད་རྩི་བུམ་བཅུད་ཀྱིས་དབང་སྤྱིའི་མཐའ་རྟེན་བྱ་རྒྱུའི་རིམ་པ་དེ་བཞིན་བྱས་ནས་བསྒྲིགས་ཡོད་པ་དང་། གོང་ནས་ཞུས་པ་ལྟར་སྨིན་བྱེད་ཀྱི་དབང་ཟེར་རྒྱུ་འདི་ནི། གསང་ཆེན་རྡོ་རྗེ་ཐེག་པའི་ལམ་གྱི་ལུས་ཡོངས་སུ་རྫོགས་པའི་བདག་ཉིད་ཅན་ཞིག་རེད། དེས་ན་འདི་རྒྱུད་གསུམ་གྱི་རྣམ་བཞག་གི་ཐོག་ནས་བཤད་ཡོང་ན། ལམ་རྒྱུད་སྨིན་གྲོལ་གཉིས་ཀྱི་ནང་གི་སྨིན་བྱེད་དབང་ལ་གཞི་ལམ་འབྲས་གསུམ་གྱི་དབང་ཡོད། གཞི་དབང་དུ་སློབ་མའི་རྒྱུད་ལ་རྡོ་རྗེའི་བཞིའི་ས་བོན་ཡོད་པ་ལྟར་དུ་རེད། དེ་མེད་ན་བསྐུར་ནས་ཐོབ་རྒྱུ་ཞིག་ག་ལ་ཡོད། དེ་བཞིན་དུ་འབྲས་དབང་དུ་རྡོ་རྗེ་བཞིའི་འབྲས་བུ་འགྲུབ་རྒྱུ་དེ་རེད། དེ་ལྟ་བུའི་གཞི་དེ་ཉིད་འབྲས་བུར་སྨིན་ཐབས་བྱེད་རྒྱུ་བོ་ལམ་དབང་ཡིན་ལ། དེ་ནི་བསྐུར་ཐབས་ཕྱག་ལེན་ལ་འདེབས་འདུག་རྒྱུའི་སྨིན་བྱེད་ཀྱི་དབང་ཐམས་ཅད་རེད། དེ་ཡིན་ན། སྐབས་སུ་བབ་པའི་ལམ་དབང་འདི་ལ་ཡང་ནང་གསེས་ལམ་དབང་གི་གཞི་དབང་། ལམ་དབང་གི་ལམ་དབང་། ལམ་དབང་གི་འབྲས་དབང་གསུམ་དུ་ཕྱེས་ན། གོ་བ་ལེན་བདེ། དཔེ་བཞག་ན། སློབ་མའི་རྒྱུད་དེ་ཐ་མལ་པ་ནས་རྒོད་ལྟ་བུ་ཞིག་ཡིན་ན། དེ་ལ་བླ་མ་ཆང་མ་ལྟ་བུ་དེས་ཆང་ལ་བསྒྱུར་བར་བྱེད་དགོས་དུས། དང་པོ་སྐྱབས་སེམས་སྡོམ་བཟུང་སོགས་ལེན་བཅུག་པ་དེ་ནི། ནས་བཙོས་བཞག་པ་ལྟར་རེད། དེའི་མཚམས་ནས་བླ་མས་དགོངས་པ་གཏད་སློབ་མས་མོས་གུས་བྱས། བླ་སློབ་ཐམས་ཅད་ལྷར་གསལ་བའི་གནས་གསུམ་ནས་འོད་ཟེར་འཕྲོས་ཏེ། མཁའ་ཁྱབ་ཀྱི་དེ་བཞིན་གཤེགས་པའི་ཡེ་ཤེས་སློབ་མའི་སྒོ་གསུམ་ལ་བསྟིམ་པ་ནི། ནས་བཙོས་ཟིན་པ་ལ་ཕབ་བཏབ་པ་ལྟ་བུ་ཞིག་རེད། དེའི་དུས་སུ་རབ་ལ་རྟོགས་པ་སྐྱེས། འབྲིང་ལ་སྒྲིབ་པ་འབྲལ་རུང་དང་ཡེ་ཤེས་སྐྱེ་རུང་གི་ནུས་པ་བཞག་ནས། ཉམས་ཁྱད་པར་ཅན་ཞིག་སྐྱེས། ཐ་མ་ཡིན་རུང་ཤེས་རྒྱུད་འགྱུར་རྒྱུ་དེ་འདྲ་རེད། དེ་བཞིན་དུ་དབང་བཞི་བསྐུར་དུས་ཐ་མ་ངོ་མ་ཞིག་ཡིན་ཡང་སྒོ་གསུམ་རྡོ་རྗེ་གསུམ་ཡིན་རྒྱུའི་གོ་བ་རྣམ་དག་ཞིག་མི་སྐྱེ་ཐབས་མེད་རེད། རྟགས་དེ་ཚོ་གང་ཡོང་ན་རང་སྐལ་དང་མཐུན་པའི་དབང་ཐོབ་པའི་ཚད་ཡིན། དེ་ལྟ་བུའི་དབང་དང་པོ་ནམ་ཐོབ་པ་དེ་ལ་ལམ་དབང་གི་གཞི་དབང་ཟེར། དེའི་རྗེས་དབང་ཞུས་ཚད་ཐམས་ཅད་ལམ་དབང་གི་ལམ་དབང་དང་། མཐར་རྒྱུན་མཐའི་རྡོ་རྗེ་འཆང་གི་མདུན་ནས་ཟབ་གསལ་གཉིས་མེད་ཀྱི་དབང་གསུམ་པ་ཞུ་རྒྱུ་དེ་ལམ་དབང་གི་འབྲས་དབང་རེད། དེ་ལྟ་བུའི་དབང་དེ་སྔགས་ཀྱི་སྡོམ་ཆོག་ཡང་རེད། དབང་ཐོབ་པ་ཙམ་ཞིག་གིས་མི་ཆོག་གོང་ནས་ཞུས་པ་ལྟར་དུ། དམ་ཚིག་སྲུང་དགོས་པ་རེད། དམ་ཚིག་ལ་ཡང་དབང་བཞི་རང་རང་ལ་ལྟོས་པའི་དམ་ཚིག་ཡོད་ཀྱང་། མདོར་བསྡུས་ན་རྩ་བ་ངོ་མ་དེ། བླ་མའི་སྐུ་གསུང་ཐུགས་གསུམ་ལས་དང་པོ་སྐུའི་དམ་ཚིག་ལ་བླ་མ་དང་མཆེད་ཀྱི་སྐུ་ལ་མི་བརྙས། གསུང་མི་བཅག་ཐུགས་མི་དཀྲུག གསུང་གི་དམ་ཚིག་ལྷ་སྔགས་ཏིང་འཛིན་ལ་བརྩོན་རྒྱུ། ཐུགས་ཀྱི་དམ་ཚིག་གསང་བཅུ་མི་བསྒྲག་པ་དེ་དག་རྩ་བ་རེད། སྒོ་གསུམ་རྡོ་རྗེ་གསུམ་གྱི་དག་སྣང་དང་བྲལ་སོང་ན། དམ་ཚིག་ཉམས་པ་ཡིན་གསུངས་ཡོད་པས། རང་གཞན་སུ་ཡིན་ཡང་སྔགས་ལ་ཞུགས་པའི་རྟེན་ཅན་ཞིག་ལ་དམ་ཚིག་སྲུང་རྒྱུ་དེ་སྲོག་སྲུང་རྒྱུ་བས་ཀྱང་གལ་ཆེན་རེད། དམ་ཚིག་རྣམ་པར་དག་ན་དབང་དོན་གྱི་ཡེ་ཤེས་ཞེས་བྱ་བ་ཞིག་མ་རྟོགས་ཀྱང་གྲོལ་བྱེད་ཀྱི་གདམས་པ་ཟབ་མོ་ཉམས་སུ་བླངས་ན། ནས་ལ་ཆང་ལོང་པ་ལྟར་དུ་རང་རྒྱུད་གྲོལ་ཐུབ། དམ་ཚིག་ཉམས་སོང་ན། དངོས་གྲུབ་ཀྱི་སྐལ་བ་ཆད་པར་མ་ཟད་ལྟར་སྣང་ལ་ཇི་ལྟར་བསྐྱེད་རྫོགས་ཀྱི་གདམས་པ་ལ་བརྩོན་ཁུལ་དང་འབད་ཁུལ་བྱས་ཀྱང་། སྒྲུབ་པ་ལོག་པར་གྱུར་ནས་མཐར་ཐུག་འགྲུབ་རྒྱུ་དེ་རུ་ཊ་དང་རྒྱལ་འགོང་དམ་སྲི་རྣམས་རེད། དེ་ལྟ་བུས་རང་བརླགས་པར་མ་ཟད་འོ་མ་རུལ་བའི་དཔེ་བཞིན་དུ་གཞན་གྱི་དངོས་གྲུབ་ཀྱི་གེགས་ཀྱང་བྱེད་པ་རེད། དེ་ལྟ་བུའི་ཁེ་ཉེན་ཆེ་བའི་ཚུལ་དེ་ལ་བསམ་གཞིག་མཛད་ནས། སྲུང་ཉམས་གཉིས་ཀས་ཐོབ་ཤོར་གཉིས་ཀ་བྱེད་པའི་གནད་དེ་མཁྱེན་དགོས་པ་རེད། སྔགས་ཀྱི་སྡོམ་པ་དེ་དབང་ལས་ཐོབ་པ་རེད། ཐོབ་པ་ཡོད་པའི་དབང་གིས་བསྲུང་བ་རང་ཤུགས་ཀྱིས་འབྱུང་བ་རེད། གལ་ཏེ་བླ་མ་མཚན་ཉིད་མི་ལྡན་པའམ་བླ་མ་རང་ཉིད་ལས་ཐོབ་ཡོང་རྒྱུའི་བྱིན་མཐུ་མེད་པ་དཔེར་ན་བུམ་པ་སྟོང་པ་ལྟ་བུ་ཞིག་ཡིན་ན། སློབ་མ་ལ་བྱོས་ཡོང་བ་མེད་ལ་སྲུང་ཉམས་གཉིས་ཀ་འང་མེད་པ་རེད། ང་ལ་མཚོན་ན་སོ་སྐྱེ་ཐ་མལ་པ་ཞིག་རེད། དེའི་དབང་གིས་དེ་ཉིད་བཅུ་དང་རང་བཞིན་བརྒྱད་ལ་སོགས་པ་རྒྱུད་ལས་གསུངས་པའི་བླ་མའི་མཚན་ཉིད་མི་ཚང་ཡང་། དམ་པ་གོང་མ་གྲུབ་དབང་རྒྱལ་བ་རྫོགས་ཆེན་པའི་སྔར་བྱོན་སངས་རྒྱས་མི་གཟུགས་སུ་ཕེབས་པ་བདག་ཅག་གི་རིགས་ཀྱི་བདག་པོ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨྲོས་ན། འཇིགས་མེད་རྟ་མགྲིན་ཡོན་ཏན་མགོན་པོའི་ཞལ་སྔ་ནས་དང་། རྫོགས་ཆེན་སྐུ་ཕྲེང་དྲུག་པ་འཇིགས་བྲལ་བྱང་ཆུབ་རྡོ་རྗེ། རྫོགས་ཆེན་ཨ་བུ་ལྷ་སྒང་དང་མཁན་ཆེན་ཐུབ་བསྟན་སྙན་གྲགས་དེ་ཚོའི་ཞབས་པད་བསྙེན་པའི་སྐལ་བ་བཟང་པོ་ཐོབ་པའི་དབང་གིས། དབང་ཁྲིད་ལུང་གསུམ་གྱི་རྒྱུན་ཡང་དག་ཞུས་པ་ཙམ་གྱིས་མ་ཚད། དད་སེམས་ལྷག་བསམ་མ་ཉམས་པའི་གཞི་དེའི་སྟེང་ནས། དམ་ཚིག་གཙང་བས་བྱིན་བརྒྱུད་གྱི་ཕ་ཕོགས་ཐོབ་རྒྱུ་ཡོད་པ་ཁས་རང་ཉིད་ཀྱིས་ལེན་བཞིན་ཡོད། ང་རང་ལ་དུམ་གཉིས་ཀྱི་དབང་འདི་ཐོབ་ས་ངོ་མ་དེ་འཇིགས་བྲལ་བྱང་ཆུབ་རྡོ་རྗེ་ཚང་ཡིན། དབང་འདི་སྔོན་ཞིག་ལ་མགོ་ལོག་ཨ་སྐྱོང་རྟོགས་ལྡན་དགོན་ན་ཐེངས་གཅིག་ལ་འདོན་མྱོང་། དེ་བཞིན་དུ་ཡང་རྫོགས་ཆེན་ཤྲཱི་སེང་ཆོས་གྲྭ་ཐོག་མ་དབུ་བཙུགས་ནས་རིང་པོར་མ་ལོན་པའི་དུས་ཞིག་ལ་ཡང་ཐེངས་གཅིག་འདོན་ནས་ཐེངས་གཉིས་ཡིན། ད་རུང་གཞན་ཞིག་ན་དང་གསུམ་འདོན་མྱོང་བསམ་རྒྱུ་ཞིག་ཞེ་ལ་ཡོད། ཐེངས་བཞི་བ་དེ། ན་ནིང་ས་ཆ་ག་གེ་མོ་ཞིག་ན་འདོན་འཆར་བྱས་ཀྱང་འདོན་མ་ཐུབ་མོད། ད་ལོ་གནས་འདིའི་བསོད་ནམས་ཀྱི་དཔལ་དུ་ཚོགས་ནས། ཇི་ལྟར་གྲོང་ཁྱེར་རྣམས་ཀྱི་མི་གཙང་ལུད། །དེ་ཡང་བུར་རམ་ཤིང་པའི་ཞིང་ལ་ཕ། །གསུངས་པ་ལྟར་བུའི་དཔེ་དོན་དུ་གྱུར་ནས་རྟེན་འབྲེལ་གྱི་ལེགས་ཚོགས་འདི་ན་འཛོམས་སྟོབས་ཀྱིས། ད་རེས་འདི་ན་མདོ་དབུས་ཁམས་གསུམ་གྱི་ཁྱེད་རབ་སྔགས་དགེ་འདུན་པ་སྟོང་ཚོ་ཁ་གྲངས་ཅན་དང་། དུས་འདིར་བསྟན་འགན་གལ་ཆེན་ཕྲག་ཏུ་བཞེས་པའི་མི་རབས་རྗེས་མའི་བསྟན་འཛིན་གཙོ་བོ་ལྷན་རྒྱས་ལ། འདི་བཞིན་བྱིན་རླབས་བརྒྱུད་པའི་བབ་སོ་མ་ཉམས་པར་འབུལ་རྒྱུ་བྱུང་བ་ལ། རང་ངོས་ནས་ཀྱང་དམ་པ་གོང་མས་ཐུགས་དགོངས་ང་ལ་གཏད་པའི་དགོངས་དོན་ཞིག་འགྲུབ་བཞིན་ཡོད་བསམ་རྒྱུའི་མོས་འདུན་དང་སྤྲོ་སེམས་ལྷག་ཏུ་ཡོད། གསང་ཆེན་རྡོ་རྗེ་ཐེག་པའི་དབང་འདིའི་དབང་སྲོག་རྒྱུད་ལ་འཛིན་པར་དམ་ཚིག་ཡིན་པས། གོང་ནས་ཀྱང་ནན་གྱིས་བསྐྱར་ཟློས་བྱས་ཏེ་ཞུས་པ་ལྟར། སྔགས་རྒྱུད་རྒྱ་མཚོ་ནས་གསུངས་པའི་སྤྱི་དང་བྱེ་བྲག་གི་དམ་ཚིག་རྣམ་བཞག་ཆེ་ཕྲ་ཐམས་ཅད་སྲོག་ལས་ཀྱང་གཅེས་པར་འཛིན་དགོས་པ་མང་ཆེ་བ་ལ་ལྷག་ཏུ་ཞུ་དགོས་རྒྱུ་མ་རེད། ཡིན་ན་ཡང་དུས་ཀྱི་དབང་གིས་ཤིན་ཏུ་ཉུང་ཤས་རེ་གཉིས་ཀྱིས། རང་ལ་དབང་ལུང་གི་རྒྱུན་ཐོབ་ན་དེས་རང་གི་གྲགས་པ་སྲུང་བ་དང་། རྙེད་པ་འཚོལ་བའི་ཐབས་ལ་བསམ་བློ་བཏང་ནས། བླ་མ་ལ་བླ་མར་མི་འཛིན། ཆོས་ལ་ཆོས་སུ་མི་སེམས་པའི་སོ་སོའི་སྐྱེ་བོའི་ངན་གཤིས་སྡུག་ཤོས་ནང་གི་སྡུག་ཤོས་ཅན་ཡོད་མི་སྲིད་པ་མ་རེད། དེའི་ཕྱིར་ན། བཞུགས་ཁྲི་མཐོན་པོ་ཁོ་ནར་སྐྱེས་བུ་དམ་པའི་ཡོན་ཏན་དུ་བསྙེན་པའང་གངས་ཅན་འདི་ན་ངོ་མཚར་གྱི་གནད་གཅིག་གོ་ཞེས་ཀུན་མཁྱེན་འཇིགས་གླིང་གིས་སྟིང་ཚིག་ཁྲེལ་གཏམ་མཛད་ནས་གསུངས་པ་ལྟར་རེད། ད་ལྟ་འདིར་ཡོད་ལས་སྐལ་ལྡན་པའི་རྡོ་རྗེའི་མཆེད་ལྕམ། ཁྱེད་ཆོས་གྲོགས་རྣམ་པ་ཐམས་ཅད་ཀྱིས་མ་འོངས་བསྟན་དང་འགྲོ་བར་སྨན་པའི་ཆོས་མཐུན་གྱི་ཐུགས་ཤུགས་ལྷག་བསམ་རྣམ་དག་རྒྱ་མ་ཆུང་ཞུ་རྒྱུ་དང་། འདིར་ཡོད་མང་ཆེ་བ་སྔ་འགྱུར་རྙིང་མའི་ཆོས་བརྒྱུད་འཛིན་མཁན་རེད། དེའི་ནང་ན་རིས་མེད་བསྟན་པའི་དགོངས་དོན་གཅིག་ཏུ་འབབ་རྒྱུའི་གནད་མཁྱེན་པའི་མཁས་པ་ཆེན་པོ་འགའ་ཡང་ད་རེས་འདི་ན་བཞུགས་པས། མངའ་རིས་པཎ་ཆེན་གྱིས་བཀའ་བརྒྱད་རྣམ་གསུམ་ལྷའི་ཐ་རམ་གྱི་ནང་ན། བཤད་སྒྲུབ་བྱ་བ་ཐམས་ཅད་སྟོང་ཡང་སླ། །དབང་ཁྲིད་རྒྱུད་ཀྱི་བཤད་པ་ཉམས་མ་འཇུག ། ཅེས་གསུངས་པ་དེ་ད་ལྟའི་དུས་འདིར་གསང་ཆེན་སྔ་འགྱུར་བའི་བསྟན་པ་འཛིན་སྐྱོང་སྤེལ་གསུམ་བྱེད་རྒྱུའི་དགོས་ཁུར་ཕྲག་དུ་བབ་མཁན་དག་ལ་ལུང་བསྟན་ཞལ་གདམས་གྱི་ཚུལ་གྱིས་གསུངས་པ་ལོས་ཡིན་བསམ་རྒྱུ་རེད། དེ་ནས་ཡང་སང་ཉིན་ནས་དབུ་བཟུང་སྟེ་དངོས་གཞིའི་དབང་གི་འཆར་གཞི་ནི། དུས་ཚོད་རེའུ་མིག་གི་ནང་ལ་བཀོད་པ་ལྟར་དུ་རིམ་པས་འབུལ་རྒྱུ་ཡིན། འདིའི་གཏེར་གཞུང་གི་ཚིག་ཁ་ཆ་རེ་ཤར་འདོན་ཞིག་བྱས་པ་ཙམ་གྱིས་ཡིན་རྒྱུ་བྱས་བཞག་ན་ལས་སླ་མོ་རེད། ཉིན་གཉིས་ཙམ་གྱིས་འདོན་ལོས་ཐུབ་གཅིག་གིས་ཀྱང་འདོན་ཐུབ། ང་ལྟ་བུས་དེ་འདྲ་བྱས་ན་སླ་ཆོས་མིག་ལྟོས་ངན་པ་རེད་འགྲོ་རྒྱུ་རེད་ལ། རང་བློ་རང་ལ་མ་ཁེལ་བ་ཞིག་གིས་གཞན་རྒྱུད་ལ་བྱིན་རླབས་ཅི་འདྲ་བྱས་ནས་སྨིན་ཐུབ་བསམ་གྱིན་ཡོད། དེའི་ཕྱིར། རབ་ན་འདི་རྒྱུད་དོན་སྒྲུབ་ཁོག་དང་སྦྲེལ་ནས། གནད་ཚིག་གིས་དཀྲོལ། དོན་རྡོ་རྗེའི་རང་སྒྲ་བརྒྱུད་ནས། ཚིག་རྒྱུད་མིང་དང་ཡི་གེ་ཤར་བ་དེ་དོན་རྒྱུད་སྐྱེ་བོའི་སྙིང་ལ་འབབ་པ་ཞིག་བྱས་ནས། མང་ན་ཉི་མ་ཉི་ཤུ་ཐམ་པ། ཉུང་ན་མཁྱེན་བརྩེའི་དབང་པོའི་ཕྱག་བཞེས་བཞིན་དུ་ཉིན་བཅོ་ལྔ་ལ་འདོན་དགོས་པ་རེད། དེ་ལྟར་མ་བྱུང་ནའང་། དབང་དོན་རེ་རེ་བཞིན་སློབ་དཔོན་སློབ་མ་གཉིས་ཀའི་དགོས་དོན་དམིགས་པ་དང་ཏིང་འཛིན་གྱིས་ཟིན་ནས་ཚིག་གི་མཚམས་སྦྱོར་རེ་མེད་ན། བསྐུར་ཚིག་རྡོག་མ་ཆ་རེས་རྡོ་འཕེན་འཕེན་བྱས་པ་ཙམ་གྱིས། རིག་འཛིན་བརྡ་བརྒྱུད་ཀྱི་གྲལ་ལ་ཡར་མ་ཐོན། གང་ཟག་སྙན་བརྒྱུད་ཀྱི་དོན་པོ་ཞལ་ནས་གསུང་བའི་ཁ་རླུང་དེ། གཞན་པ་དེས་ཉན་ན་སྒྲ་དོན་འདྲེས་འཛིན་གྱི་གོ་བ་ཙམ་ཡང་མ་ཆགས་པར། འཕངས་ཐལ་བསམ་རྒྱུ་ཡོད་རུང་། ཕོག་བྱུང་བསམ་རྒྱུ་མེད་ན་དབང་གི་གཟུགས་བརྙན་ཙམ་ཡིན་པས། མ་མཐའ་ཡང་ཉི་མ་བཅུ་དགོས་པ་རེད། འདི་རྒྱས་བསྡུས་འཚམ་པའི་དབང་དུ་བྱས་པས་རྒྱས་པའི་གནད་ཚང་བ། བསྡུས་པའི་སླ་ཆོས་ལ་མ་ཤོར་བ། དུས་ཡུན་རིང་ཐུང་འབྲིང་པོའི་ཚོད་ཡིན་པས། ང་འདྲ་འདྲའི་སོ་སྐྱེས་བླ་མས་དབང་བསྐུར་ལུགས་ཡིན་བསམ་གྱིན་ཡོད། རང་རེ་འདིར་བཞུགས་རྣམ་པ་མང་ཆེ་བ་ཆོས་གྲོགས་རྙིང་པ་རྐྱང་རྐྱང་རེད། འདིའི་ནང་གི་མང་པོ་ཞིག་ང་དང་པདྨའི་ཐང་འདི་ན་མཉམ་ཐོན་རེད། ད་ལོའི་ལོ་ངོ་བཅུ་བཞི་ལ་འདི་བཞིན་ཆོས་གཅིག་གི་འཚོ་བར་མཉམ་དུ་སྤྱོད་ནས་བསྡད་པ་རེད། གསར་དུ་ཕེབས་མཁན་ཡང་མང་པོ་འདུག གང་ལྟར་ཐམས་ཅད་སྟབས་ལེགས་ལྟས་དབང་གིས་བར་དོར་ལམ་ཐུག་བྱས་ཏེ་གསར་སྐྱེས་སྔར་འབྲེལ་མེད་མཁན་རྐྱང་རྐྱང་མ་རེད། སྔོན་སོང་ལས་དང་སྨོན་ལམ་གྱིས་ལྷན་དུ་འཛོམས་ཏེ། དུས་སྙིགས་མའི་ཁུག་སོ་ན་ཆོས་ཀྱི་གྲུ་ཆེན་པོ་ལ་མཉམ་དུ་ཞུགས་བཞིན། གཞན་དོན་ཐར་བ་དོན་གཉེར་གྱི་དོན་མཐུན་གྱི་ལས་ལ་འབད་པའི་ཆོས་གྲོགས་རྡོ་རྗེའི་མཆེད་ལྕམ་རེད། རང་རེ་སྐྱེ་ས་འཁྲུངས་ཡུལ་མི་གཅིག་ཀྱང་ཆོས་གཅིག་གིས་བསྡུས་ནས་ཕྱོགས་བཞི་མཚམས་བརྒྱད། ཐག་ཉེ་རིང་གཉིས་ཀ་ནས་གནས་འདིར་འདུས་པ་ཡིན་ན། གནས་འདི་སྔར་བྱོན་དམ་པ་མང་པོས་སྒྲུབ་གནས་འཇའ་ལུས་མཁའ་སྤྱོད་གྲུབ་པའི་ཕ་གཞིས་ཤིག་རེད། ཁྱད་པར་དུ་ཡང་དབེན་འདི་དག་ལ་མཚོན་ན། གནས་ཀྱིས་གང་ཟག་བྱིན་གྱིས་རླབས་པའི་ཏིང་འཛིན་རང་ཤུགས་ཀྱིས་སྐྱེ་བའི་ས་ཆ། སེམས་ཀྱི་ངལ་གསོའི་བསྟི་གནས་ཤིག་ཡིན་པས། དབང་ཁྲིད་འདི་ཚོའི་ཚེ་ལ། འདི་ན་བཞུགས་པའི་རིང་རྣམ་པ་ཚང་མས་ཐུགས་བག་ཕེབས་ཀྱི་སྒོ་ནས་ངལ་གསོའི་བསྟི་གནས་ཞིག་གི་སྤྱོད་ཡུལ་དང་མཐུན་པའི་ཉམས་བཞེས་ཀྱི་སྐུ་ངལ་སྐྱིད་པོ་ཞིག་གསོས་མཛོད། འདུས་པ་མང་ཚོགས་འདི་འདྲ་ཞིག་གི་ནང་ན་ཕྱག་གི་ཡུལ། དད་པའི་གནས། མཆོད་པའི་ཞིང་ས་ཁྱད་པར་ཅན་དགེ་འདུན་སྤྱི་ཕར་ཕུད་ཤུལ་གྱི། གང་ཟག་བྱེ་བྲག་པ་སོ་སོའི་སྐྱེ་བོའི་རྟེན་ཅན་གྱི་རང་འདྲའི་ཆོས་གྲོགས་ཀྱང་ཡོད་པས། དེ་ཚོ་ལ་རང་རྒྱུས་རོགས་ལ་བཤད་དུས། སེམས་ཅན་ཟེར་ནས་མྱིང་བཏག་ས། ང་བསམ་ནས་བདག་ཏུ་འཛིན་སའི་གདག་གཞི་ནི། ཕུང་པོ་ལྔ་ཚོགས་ཀྱི་ལུས་ངག་ཡིད་གསུམ་འདི་རེད་མོད། དེ་ཡིན་ན་འུ་ཚོ་འཇིག་རྟེན་གྱི་མྱི་ལུས་ཞིག་བླངས་པ་འདི། མཐོ་རིས་རྣམ་གསུམ་གྱི་ནང་གི་མཐོ་རིས་མིའི་འཇིག་རྟེན་རེད། རེད་དེ་མཐོ་རིས་དམའ་རིས་གང་བཤད་ཀྱང་། སྡུག་བསྔལ་རྣམ་གསུམ་གཅིག་མིན་ན་གཅིག་གིས་མི་གཏོང་བར། མནར་མནར་ཏེ་སྒོ་གསུམ་ངལ་ཞིང་དུབ་པས་དཀའ་ནས་ཐང་ཆད་ཉོན་མོངས་རྒྱ་ཡི་ཁུར་ཆེན་གྱིས་མནན་ཡོད་པ་ཤ་སྟག་ཡིན་ན། ད་རེས་ངལ་གསོའི་ངལ་སྟེགས་ཤིག་ཡོད་སར་ཐོན་དུས་ངལ་ཞིག་གསོས་ནས་སྡུག་བསྔལ་ཆུང་ཐབས་ཤིག་བྱེད་དགོས་པ་རེད། ལུས་ངག་གཉིས་ཀས་ངལ་གསོ་མ་མྱོང་པ་མ་རེད་དེ། སེམས་ཀྱིས་ངལ་གསོ་མ་ཐུབ་ན། ལུས་ངག་གཉིས་ཀས་ངལ་ཅི་འདྲ་ཞིག་གསོས་པའི་ཉམས་བསྟན་ཀྱང་། ངལ་གསོའི་བདེ་སྐྱིད་དེ་སེམས་ལ་མི་འཆར་བ་ནི་འཁོར་བའི་སེམས་ཅན་ཚང་མས་ཉམས་མྱོང་གིས་ཀྱང་ཤེས། སེམས་ཀྱིས་ངལ་གསོ་མི་ཐུབ་པའི་གནད་དེ་བཙལ་ན། སེམས་རྣམ་རྟོག་སྤྲིན་ཁ་འཚུབས་པ་བཞིན་གཅིག་འཕྲོ་ལ་གཅིག་སྦྲེལ། གཅིག་རྔ་ལ་གཅིག་མཐུད་ནས། བར་མེད་ཆུ་རྒྱུན་ཐུར་དུ་རྒྱུག་པ་ལྟར་དོན་མེད་སྡུག་བསྔལ་གྱི་བྲེལ་ཟིང་རྐྱང་རྐྱང་གི་ནང་ནས་བུད་མ་ཐུབ་པ་རེད། ལུས་ཐུབ་ན་སེམས་བུད་མི་ཐུབ་རྒྱུ་བོ་འདི་རེད་། དེའི་རྣམ་རྟོག་འཁྲུལ་འབྱམས་གཅིག་རྗེས་ལ་གཉིས་ཀྱིས་སླེབས་ནས། ཚར་རྒྱུ་མེད་པའི་དྲན་རྒྱུ་མང་པོ་ཞིག་གིས། འགྲུབ་རྒྱུ་མེད་པའི་བྱ་ལས་མང་པོ་ཞིག་གི་སྣ་དྲངས་ཡོང་དུས། རང་སེམས་འདི་ལ་བདེ་ཡོང་དུས་ཤིག་དང་རང་ལུས་འདི་ལ་སོས་དལ་དུས་ཤིག་ཡོང་རྒྱུ་མེད་མོད། དེར་བལྟས་བཞག་ན་སྲིན་འབུའི་ཁ་ཆུའི་དར་སྐུད་ཀྱིས་རང་གི་ལུས་པོ་རང་གིས་འཆིང་བ་ལྟར་ཡིན་དུས། ད་རེས་དེའི་འཆིང་རྒྱ་ཐམས་ཅད་གཅད་མ་ཐུབ་ནའང་། གནས་སྐབས་ཆེ་བཞག་ཆུང་བསྐྱུར་ཞིག་བྱས་ནས་དབེན་པའི་རི་ཁྲོད་འདི་ན་ལུས་དབེན་དང་ངག་དབེན་གྱིས་མི་ཚད་པར་གཙོ་བོ་སེམས་དབེན་ལ་བརྟེན་ནས་སེམས་འདི་ལ་ངལ་གསོ་ཞིག་བྱེད་དགོས། རྣམ་པ་ཚོ་དང་པོ་གནས་འདི་ལ་གཏད་ནས་གཡུ་འབྲུག་ཟམ་པ་བརྒྱུད་དེ་ཡར་འབྲུག་སྒོ་ནས་ཕེབས་ཡོང་དུས། སྒོ་ཆེན་ཕྱི་མའི་སྒོ་ཐོད་ལ་གནས་འདིར་ཕེབས་པར་དགའ་བསུ་ཞུ་བ་དང་ཆབ་ཅིག་ཏུ། ཡུན་རིང་ངལ་བའི་སེམས་ཀྱིས་ངལ་གསོ་ཞིག་མཛོད། ཅེས་བྲིས་ཡོད་པ་ལྟར། ཁྱེད་རྣམ་པས་སྐུ་ངལ་ཡག་པོ་ཞིག་གསོས་མཛོད། སེམས་འདི་རྒྱ་མཚོ་ཆེན་པོ་ལ་དཔེ་བཞག་ན། རྙོག་པ་མེད་པའི་རྒྱ་མཚོ་དྭངས་མོའི་ངོས་ལ་གཟའ་སྐར་ཀྱི་གཟུགས་བརྙན་གསལ་མོ་འཆར་ཐུབ་པ་ལྟར། རང་སེམས་ཀྱི་རྒྱ་མཚོ་དྭངས་བཅུག་ན་དེའི་ངོས་ལ་སྔར་མེད་ཀྱི་གཟུངས་དང་ཏིང་འཛིན་ཤེས་རབ་ལ་སོགས་པའི་ཡོན་ཏན་ངོ་མཚར་ཅན་མང་པོ་འཆར་ཐུབ། དེའི་ཚེ་ན་ཟག་བཅས་ཀྱི་བདེ་བ། དོན་དུ་འདུ་བྱེད་ཀྱི་སྡུག་བསྔལ་ལས་མ་འདས་པའི་འདི་ལྟ་བུ་མ་ཡིན་པར། ཟག་མེད་ནང་གི་བདེ་བ་བདེ་བ་ཐམས་ཅད་ཀྱི་མཆོག་ཏུ་གྱུར་པ་སེམས་ཀྱིས་ངལ་སོས་པའི་སེམས་ཉིད་དྭངས་པའི་མཁའ་རུ་གཟུང་འཛིན་རྣམ་རྟོག་གི་སྒྲིབ་གཡོག་སྤྲིན་འདྲ་བོ་དེ་དང་བྲལ་སོང་ན། དེའི་སྐབས་དེར་ངང་གིས་མངོན་ཡོང་བ་རེད། དེས་ན་རང་གི་སེམས་ལ་རང་གིས་དབང་བསྒྱུར་བྱས་ནས། བློ་ངན་གོམས་ཀྱི་གཤིས་ངན་དེ་རིམ་གྱིས་ལམ་ལ་བཞག་ན། འདི་འཁྲུལ་ཡུན་རིང་། འཁྲུལ་ཚབ་ཆེ། འཁྲུལ་ལུགས་སྡུག་ཀྱང་། འདུས་བྱས་ཡིན་པས་བསྒྱུར་ཐུབ་པར་མ་ཚད་གོམས་ཤིང་གོམས་ན་ཇེ་སླར་སོང་སྟེ་རང་སེམས་ཀྱི་སྐྱོན་དང་ཡོན་ཏན་ལ་རང་གིས་ཞུ་དག་ཐུབ་པའི་རྣམ་དཔྱོད་ཀྱི་བློ་རྒྱ་གསར་བ་རྙེད་རྒྱུ་ཡོད། སེམས་འདི་ལ་བདག་པོ་གཏན་ནས་མ་བྱས་ན། ཆུ་རྒྱུན་ཐུར་དུ་རྒྱུག་པ་འདྲ་ཡུལ་ངན་པའི་རྗེས་དེད། རྐྱེན་ངན་པས་ཁ་ལོ་བསྒྱུར་ཏེ། སེམས་རྒྱལ་པོ་འདྲ་བོས་ཇུས་འཆུགས་སོང་དུས། དེ་ཡིན་དུས། བྲན་གཡོག་ལུས་ངག་གཉིས་ཀྱིས་སྡུག་བསྔལ་བཟོད་མཐའ་མེད་པ་ཞིག་མྱོང་རྒྱུ་བོ་རང་མཐོང་མྱོང་བས་གྲུབ་པ་འདི་རེད། གཞོན་ཆུང་གསར་བུའི་རིགས་ཅན་རྣམས། རྒན་ཞུགས་ལས་དང་པོ་པ་ཚོ་ལ་བཤད་རྒྱུར། ད་རེས་ནི། གདམས་པ་ཟབ་མོའི་བྱིན་བརྒྱུད་མན་ངག་གི་མིག་གསར་བ་ཞིག་གསར་དུ་ཕྱེ་བའམ། ཡང་ཕྱེ་ཞིག་བྱས་པ་ཡིན་ན། འདིའི་ཕྱི་ནང་གསང་གསུམ་གྱི་གནད་ཀ་རིག་ཐུབ་པས། རང་གིས་རང་ལ་མ་གཅེས་ན་སུས་གཅེས། ཐར་བ་དམ་པའི་རུ་སྒོ་ཞིག་ཁྲོལ་ཆོས་བྱེད་སྐབས་འདིར་སྟེང་གི་ཤི་མེད་ཤོར་མེད་ལོང་བས་བ་རྔ་ལ་འཇུས་པ་བཞིན་བྱེད་རན་སོང་བ་རེད། ཐར་ལམ་རྣམ་དག་བསྒྲུབ་པའི་གང་ཟག་གཅིག་གིས་ཤེས་དགོས་རྒྱུར། མ་ཤེས་ཐབས་མེད། ཤེས་ནས་བསྐྱུར་མི་ཉན་རྒྱུ་ཅི་ཞིག་རེད་ཟེར་ན། ཕྱི་སོ་ཐར་གྱི་སྡོམ་པའི་ངོ་བོ་འཁོར་བར་ཞེན་ལོག་གི་ངེས་འབྱུང་ཡོད་དགོས་གཅིག་རེད། ནང་བྱང་སེམས་ཀྱི་སྡོམ་པའི་ངོ་བོ་གཞན་ཕན་དོན་གཉེར་གྱི་ལྷག་བསམ་ལྷད་མེད་ཡོད་དགོས་གཉིས་རེད། གསང་བ་གསང་སྔགས་ཀྱི་སྡོམ་པའི་ངོ་བོ་སྣང་སྲིད་རྣམ་དག་གི་དག་སྣང་ཡོད་དགོས་གསུམ་རེད། དེའི་སྟེང་དུ་རང་ཉིད་ཐར་བའི་ལམ་དུ་འཁྲིད་མཁན་གྱི་བླ་མ་དམ་པ་ལ་ཡིད་ཁྱེད་ཤེས་ཀྱི་དད་པ་ཡོད་དགོས། དེ་ཡང་མཐར་གཏུགས་ནས་བཤད་ན། བླ་མ་ཟེར་རྒྱུ་དེ་ཡང་། མཚོན་བྱེད་རྟགས་ཀྱི་བླ་མས་མཚོན་པའི་མཚོན་བྱ་དོན་གྱི་བླ་མ་གང་ཡིན་པ་དེ་ཉིད་ལ་གོ་དགོས་རེད། དེས་ན། དད་པའི་ཉེར་ལེན་གང་ལ་ཡོད་པ་དེ་ལ་རྫོགས་པའི་སངས་རྒྱས་ཀྱི་ས་བོན་སྨིན་རུང་དུ་ཡོད་པ་རེད། དེས་བཞི་རེད། ད་དུང་མེད་ན་ཐབས་མེད་ཅིག་ལ། ཆོས་གཅིག་གིས་བསྡུས་པའི་མཆེད་གྲོགས་བྱང་ཆུབ་བར་དུ་མར་མེའི་མེ་དང་སྡོང་བུ་བཞིན་དུ་མཉམ་པོར་འགྲོགས་པ་ཐམས་ཅད་དང་བརྩེ་དུང་ཡོད་རྒྱུ། དེ་ལྔ་བོ་ནི། སྤྱིར་ཐར་བ་དོན་གཉེར་གྱི་གང་ཟག ཁྱད་པར་དུ་གསང་སྔགས་རྫོགས་པ་ཆེན་པོའི་ཆོས་ལམ་ལ་ཞུགས་པ་ཚོ་ལ་མེད་ན་ཐབས་མེད་རེད། དེའང་རྩ་བ་ཚུར་བསྡུས་ན། བྱང་ཆུབ་ཀྱི་སེམས་རིན་པོ་ཆེ་དང་མི་འབྲལ་བ་གཅིག་པུའི་ནང་དུ་འདུས། ཅུང་ཟད་ཅུང་ཟད་ཉམས་ལེན་རྒྱུད་ལ་སྦྱར་ནས་ལོ་གྲངས་མང་པོར་སོང་བ་ཚོས་ཀྱང་། སྟོང་ལྟ་ཧལ་པོས་ལས་འབྲས་ཁྱད་དུ་མི་གསད་པར། ཐམས་ཅད་ཀུན་པོས་ཇི་སྲིད་གཟུང་འཛིན་སེམས་ཀྱི་འཁྲུལ་རྟོག་དབྱིངས་སུ་མ་དག་པ་དེ་སྲིད་དུ། ཀུན་རྫོབ་ལས་དང་ལས་ཀྱི་འབྲེལ་བ་སླུ་མེད་སྙོན་མེད་ཡོད་པས་ན། འཛིན་མེད་སྒྱུ་མ་ལྟ་བུས་རྩིས་ཟིན་པའི་ངང་ནས་ཐབས་ཤེས་ཟུང་འཇུག་གི་ལམ། ཐེག་པ་ཆེན་པོའི་དགེ་བའི་རྩ་བ་དམ་པ་གསུམ་ལྡན་དུ་བསྒྲུབ་པའི་བླང་དོར་ཚུལ་བཞིན་བྱེད་པ་དང་མ་འབྲལ་ཞུ་རྒྱུ་དང་། ཁྱད་པར་དུ་ལས་དང་པོ་པ་ཚོས། ཆོས་གསན་པའི་སྐབས་སུ་ཐོག་མར་ངེས་དགོས་རྒྱུ་ཞིག་ལ། སངས་རྒྱས་འཇིག་རྟེན་ལ་བྱོན་པ་ནི་བརྒྱ་ལམ་རེས་འགའ་ཡིན་རྒྱུ། དེས་གསུངས་བའི་ཆོས་དང་འཕྲད་པ་དེ་བས་ཀྱང་དཀའ་རྒྱུ། སངས་རྒྱས་བྱོན། ཆོས་གསུངས། དེའི་བསྟན་པ་གནས་ཀྱང་། རང་ཉིད་ཀྱིས་མི་ལུས་ཐོབ་རྒྱུ་དང་ནི། ད་དུང་ཆོས་དར་བའི་གནས་སུ་ཆོས་ལ་མོས་པ་དང་ལྡན་རྒྱུ་དེ་ཡང་ལས་སླ་མོ་མ་ཡིན་པ་དང་། འདི་ནི་རྙེད་དཀའ་བ་སྔར་ཚོགས་བསགས་རྒྱ་ཆེན་བྱས་པའི་མཐུ་ལས་བྱུང་བའི། དལ་འབྱོར་གྱི་རྟེན་བཟང་ལྷ་བས་ལྷག་པའི་ལུས་ཡིན་རྒྱུ། དེ་ཡིན་མིན་གྱི་ཐད་ནས་བཤད་ན། འགྲོ་བ་གཞན་གྱི་མང་ཉུང་དང་མིའི་རིགས་ཀྱི་ནང་ནས་ཡིན་ནའང་ཆོས་ཡང་དག་སྒྲུབ་མཁན་གྱི་ཁ་གྲངས་མང་ཉུང་གི་ཐད་ནས་རིག་ས་གོ་ས་ན་ཡོད་རྒྱུ། རང་ཉིད་ཀྱི་ཁོར་ཡུག་ལ་བལྟས་ནའང་ཤེས་འདུག་པ་ལྟར་རེད། འདི་འདྲ་ཡིན་པའི་སྟབས་ཀྱིས་ཆོས་ཐོས་པ་བསྐལ་བ་བརྒྱར་ཡང་རྙེད་པར་དཀའ་བ་ཡིན་པའི་ཕྱིར་ན། དེ་ཉིད་ཤེས་པའི་ཐོག་ནས་ཆོས་ཉན་པའི་དུས་སུ་ཆོས་ཀྱི་ཚིག་དོན་རྗེས་སུ་དྲན་པར་བྱ་དགོས་རྒྱུ་དང་། དེའི་ལྡོག་ཕྱོགས་ནས་ཆོས་བཤད་ཉན་གྱི་སྐབས་སུ་ཀུན་དུ་སྤྱོད་པའི་གནས་མ་ཡིན་པ་སྐྱོན་གསུམ། དྲི་མ་དྲུག མི་འཛིན་པ་ལྔ་སོགས་དུས་རྒྱུན་གསུང་བཞིན་པའི་སྤོང་དགོས་ཀྱི་སྤང་བྱ་ཐམས་ཅད་རང་གིས་སྤང་དགོས། ཁྱད་པར་དུ་གསར་བུ་ཚོ་ལ་ཐུགས་གསོས་ཞུ་རྒྱུ་ཞིག་ལ། གཙུག་ལག་ཁང་དང་ཆོས་རའི་ནང་ལ་ཞུགས་ནས་བཟུང་སྟེ། སྨྲ་འཆལ་སྤོང་དགོས་རྒྱུ་ཞུ་ཅི་དགོས་ཏེ། ཆོས་ཁྲིད་དང་དབང་གྲལ་ནས་ངེས་པར་དུ་གསུང་ངག་སྡོམ་རྒྱུ་གལ་ཆེ། དེ་ནི་སྤྱིར་བཏང་གི་སྒྲིག་ལམ་ཙམ་མ་ཡིན་པར་ཆོས་ཟབ་མོ་འཆད་ཉན་གྱི་སྐབས་སུ་གཏམ་སྣ་ཚོགས་གླེང་རྒྱུ་དེ་དམ་ཆོས་སྣུབ་པར་བརྩོན་པ་ཡིན་ཞེས་སངས་རྒྱས་ཀྱིས་གསུངས་འདུག གང་དུ་གསུངས་ཤེ་ན། ཀླུའི་རྒྱལ་པོ་རྒྱ་མཚོས་ཞུས་པའི་མདོའི་ནང་ན་གསུངས་ཡོད། ཇི་ལྟར་གསུངས་ཡོད་ཅེ་ན། འཁོར་གྱི་ནང་དུ་འོང་ནས་ཆོས་ཟབ་མོར་གཏམ་གྱིས་བར་ཆད་བྱས་ནས་གཏམ་སྣ་ཚོགས་གླེང་བ་གང་ཡིན་པ་དེ་ནི། དམ་པའི་ཆོས་སྣུབ་པར་བརྩོན་པ་ཡིན་ནོ་ཞེས་གསུངས་སོ། དེ་ཡིན་ན། དམ་ཆོས་ནུབ་པར་བརྩོན་རྒྱུ་བོ་བདུད་ལས་རེད། བདུད་ལས་བྱས་ན་བདུད་མིན་ན་བདུད་ཀྱི་ཕྱོགས་གཏོགས་ལོས་ཡིན། དེ་ལྟ་བུས་གོས་སྣེ་གསུམ་གོན་ཡང་རྐུ་ཐབས་སུ་གནས་པ་ར་སྤྲོད་རང་གིས་རང་ལ་བྱས་པ་ཞིག་རེད་འགྲོ་བས། གསུང་ངག་སྡོམ་དགོས། རང་གིས་ཆོས་ཀྱི་ཚིག་དོན་ལ་བློ་མ་ཞུགས་ན། ཆོས་ཞུས་པ་དེ། ལྟར་སྣང་ཙམ་དུ་འགྱུར་བར་མ་ཟད། གཞན་གྱིས་ཆོས་ཀྱི་ཚིག་དོན་ལ་ཐུགས་གཞོལ་བའི་བར་ཆད་རེད་ན། དོན་མེད་ཀྱི་ཉེས་པ་རེད། ཁྱད་པར་དུ་རིགས་དང་བསླབ་པ་རྒན་པའམ་མཚན་གྱིས་མངོན་པར་མཐོ་བ་དག་གི་མཛད་སྤྱོད་ནི། ཕལ་བའི་གྱེན་ལྟོས་སུའང་འགྱུར་བས་ན། ངས་ཆོས་རའི་དགེ་འདུན་པས་གསུང་ངག་སྡོམ་རྒྱུར་ཡར་སྐུལ་ཞུ་བཞིན་ཡོད་པར་མ་ཚད། ཁྱིམ་པ་ཕོ་མོ་ཆོས་རར་ཞུགས་དུས་ཀྱང་ངག་གཅད་འཇུག་གིན་ཡོད། དེས་ན་ངག་གི་སྨྲ་བ་འདིས་ངག་གི་མི་དགེ་བཞི་པོར་མ་ཟད་ལུས་ངག་གི་བདུན་པོའང་སྣ་འདྲེན་བྱེད། དེའི་ཕྱིར་ཞུ་དོན་གྱི་སྙིང་པོར། ཆོས་འཆད་ཉན་དང་དབང་བསྐུར་ལུང་ནོད་ཚང་མའི་སྐབས་སུ། སྤྱིར་ནམ་རྒྱུན་རབ་ཏུ་བྱུང་བས་དབང་པོའི་སྒོ་སྡོམ་ལོས་དགོས། ཁྱད་པར་དུ་དབང་ཆོས་གསོན་པའི་སྐབས་སུ་གསུང་ངག་ངེས་པར་དུ་སྡོམ་དགོས་ཞུས་པ་ཡིན། འོ་ན་གྲག་སྟོང་སྔགས་སུ་ཤེས་ན་ངག་གཅད་ཨེ་དགོས་ཞེས་འདྲི་ན། གྲག་སྟོང་སྔགས་སུ་ཤེས་དུས་འཁྲུལ་སྣང་ཡེ་ཟད་ཀྱི་ས་ལ་ཐོན་སོང་བ་ཡིན་པས། འཁྲུལ་བའི་ལོང་གཏམ་སྨྲ་མི་སྲིད། ལས་དང་པོ་བའི་དུས་སུ་སྣང་བ་ལྷ། གྲག་པ་གསུང་། དྲན་རྟོག་ཐུགས་ཀྱི་ལྷ་སྔགས་ཆོས་སྐུར་འཆར་ཞེས་བཤད་རུང་། སྨོན་པའི་རྗེས་འགྲོ་ཙམ་ཞིག་རེད་བསམ་རྒྱུ་དང་དེ་འདྲ་ཞིག་དགོས་རེད་ཟེར་བའི་རྗེས་འདེད་ཙམ་ཞིག་མ་གཏོགས། རང་བཞིན་ལྷུན་གྲུབ་ཀྱི་གྲག་སྟོང་སྔགས་སུ་ཤར་རྒྱུའི་གདེང་ཚད་འཇོག་དཀའ་བ་རེད། དེའི་སྟབས་ཀྱིས་ཨོ་རྒྱན་ཆེན་པོས། ལོ་གཅིག་འབག་སྙེན་བྱེད་པ་ལས། །ཟླ་གཅིག་སྨྲ་བཅད་བྱས་པ་མཆོག། ཅེས་གསུངས་བའི་གོ་བ་ལྡོག་ཕྱོགས་ནས་ཅི་ཞིག་ལེན་རྒྱུ་ཡོད་རེད་ཟེར་ན། འཆལ་བའི་ངག་གིས་རང་གི་སྔགས་དང་ཏིང་འཛིན་སོགས་ཀྱི་ནུས་པ་འཕྲོག་རྒྱུ་དང་། གཞན་གྱི་དགེ་བའི་གོ་བཀག་པའི་ཉེས་སྐྱོན་མང་པོ་བསྡུས་པ་བསྟན་པས་ན། ཡང་སྒོས་གསར་བུ་འདུས་པའི་ཚོགས་གྲལ་ལ་ཞུགས་པའི་བྱིས་གཞོན། ཅུང་ཟད་དགོད་བག་ཅན་དག་གི་ཐུགས་ལ་དེ་ལྟར་ཞོག དེས་ན་ཆོས་ཐུན་གྱི་རིགས་འདི་ཧ་ཅང་ཡུན་རིང་དྲགས་ན་མི་བཟང་། རང་གཞན་གཉིས་ཀས་ཉོབ་བཤད་རེད་བསམ་ནས་ང་ཡང་ཆོས་ཐུན་རིང་པོ་མ་ཡིན་པ་ལ་དགའ་སྣང་བྱེད་པའི་མྱི་ཡིན། དེ་ཡིན་པར་མ་ཟད། རང་གིས་ཆོས་ཐུན་ཅི་ཐུང་གང་ཐུང་བྱེད་མཁན་ཞིག་ཡིན་ཏེ། སྐབས་འདི་ལ་མཚོན་ན། དབང་གཙོ་བོར་བྱས་པའི་ཞོར་དུ་ལུང་ཡང་འགྲོ་ཅི་ཐུབ་བྱེད་བཞིན་ཡོད། མཚམས་རེར་དུས་ཚོད་ཀྱི་ཐོག་ལ་ཏག་ཏག་རེད་ཨེ་ཐུབ་མི་ཤེས། ངས་དབང་འདོན་དུས་ས་ཆ་འདིའི་སྐད་ལུགས་བྱས་ནས་འདོན་གྱིན་ཡོད། དེ་དགོས་དོན་ཅི་རེད་ཟེར་ན། གནའ་དང་པོ་ཚུར་ལ་ཐོབ་སའི་བླ་མའི་གསུང་སྒྲོས་བཞིན་དུ་འདོན་པ་འདི་ནི། བྱིན་རླབས་ཀྱི་ཚན་ཁ་མི་ཉམས་པའི་ཆེད་དུ་ཡིན། ཡང་ཆོས་ཁྲིད་བྱས་ཏེ་སྒྲོག་འགྲོལ་བྱེད་པའི་སྐབས་ལ་ལར། དེང་སང་མང་པོ་ཞིག་གིས་འབྲོག་ཁུལ་གྱི་ཁ་སྐད་བྱས་ནས་བཤད་པའི་སྲོལ་ཞིག་འདིའི་ཡར་མར་དར་བཞིན་འདུག དེའི་མཐུན་འཇུག་བྱས་ཏེ་གོ་བརྡ་ཅི་འཇགས་ཀྱིས་སྐད་སྣ་འདྲ་འདྲེས་བྱས་ནས་བཤད་ཀྱིན་ཡོད། དུས་རྒྱུན་ཆོས་གྲྭའི་ནང་ལ་མདོ་དབུས་ཁམས་གསུམ་གྱི་མི་སྣ་མང་པོ་ཡོད་པ་རེད། ད་རེས་ཀྱང་དེ་བཞིན་རེད། ལྷ་ཡི་སྐད་དང་ཀླུ་དང་གནོད་སྦྱིན་སྐད་སོགས་ལ་འགྱུར་གྱིན་ཡོད་མེད་མི་ཤེས་ཏེ། བོད་མི་མང་ཆེ་བས་གསན་འདིང་རྒྱག་བཞིན་ཡོད། དེའི་འཕྲོ་ནས་བཤད་རྒྱུ་ཞིག་ལ། ཆོས་གཅིག་ལ་མཉམ་དུ་སྤྱོད་པའི་ངོས་ནས་དང་། རང་རེ་ཚང་མ་ཆོས་གྲོགས་ཡིན་པའི་ཆ་ནས་འདྲ་མཉམ་རེད། རེད་དེ་སྐྱེ་སྔ་ཕྱིའི་དུས་རབས་ཤིག་གི་ཁྱད་པར་གྱིས་དབང་ལུང་གི་རྒྱུན་འགའ་རེ་ངས་འདི་བཞིན་འབུལ་རྒྱུ་ལ་ཁེལ་ཡོད་པ་རེད། ཁྱད་པར་དུ་དབང་རེ་འདོན་སྐབས་ལ་རྡོ་རྗེ་སློབ་དཔོན་གྱི་ཞལ་ཚབ་བྱས་ནས་འདོན་པ་ཡིན་དུས། ཆོས་ཀྱི་ཆེ་བ་འདོན་ཆེད་ལ་འདི་བཞིན་ཁྲི་རེའི་སྟེང་ལ་མི་འདུག་ཐབས་མེད་ཡིན་ན། སྤྱིར་ན་རྩ་བརྒྱུད་གྱི་བླ་མ་ཡི་དམ་མཁའ་འགྲོ་ཆོས་སྐྱོང་དང་བཅས་པ། ཁྱད་པར་དུ་ཁྱེད་དགེ་འདུན་འདུས་པ་རྒྱ་མཚོའི་གནང་བ་ཐོབ་དགོས་པ་ནི། དུས་དང་རྣམ་པ་རྒྱུན་དྲུག་ལ་ཞུས་དང་ཞུ་བཞིན་པ་ལྟར་དུ་རེད། གཞན་ཡང་ཆོས་གྲྭའི་དགེ་འདུན་པའི་གྲལ་མཐའ་ན། རབ་བྱུང་སྔགས་པ་གཉིས་ཀ་མིན་པའི་ཐེངས་འདིའི་དབང་ཐོབ་རྒྱུའི་བཀའ་ཁྲོལ་ཡང་མ་ཐོབ་པའི་མི་སྐྱ་འགའ་རེས་ཐབས་བཀོད་འཐེན་ནས་འདི་ན་ཞུགས་ཆོག་རྒྱུའི་འཛིན་བྱང་ལོན་ཡོད་མཁན་ཡོད་ན། སང་ཉིན་ནས་དངོས་གཞིའི་དབང་གྲལ་ལ་མ་ཡོང་། སྒྲིག་ཞིབ་པས་ཤིན་ཏུ་ནན་མོས་ཉམས་བཞག་གནང་གིན་ཡོད་རེད་དེ། ད་རེས་མི་ཚོགས་མང་རྒྱུ་དང་དུས་ཚོད་ཐུང་བའི་དབང་གིས་དེ་འདྲའི་མི་རེ་གཉིས་ཤོར་སྲིད་པ་རེད། འདི་ནི་དེང་སྐབས་ཀྱི་སྤྱི་ཚོགས་ལྟ་བུའི་ལྟག་སྒོ་བརྒྱུད་ནས་ཁེ་ཆེན་པོ་ཟ་རྒྱུ་ལོན་པ་ལྟ་བུ་མ་རེད། མ་གཞི་གནས་འདིར་འདུས་པ་གྲངས་མང་བ་ལས་གྲབ་བཟང་བ་གདམ་པའི་ཆོས་སྒོ་ཤིན་ཏུ་དམ་ས། ཐ་ན་རང་བྱུང་དབེན་པའི་ཁོར་ཡུག་གི་སྐྱེད་ཚལ་ལ་མི་མང་ཞིག་གིས་རྫད་མ་ཡོང་ན་བསམ་པའི་དམིགས་ཡུལ་ཡོད་ས་ཞིག་རེད། འདི་རབ་སྔགས་དགེ་འདུན་པས་རྫོགས་པ་ཆེན་པོའི་དབང་ཁྲིད་ལུང་གསུམ་ཞུ་ས་ཡིན་ན། སྡེ་གཉིས་གང་རུང་དུ་ཞུགས་པའི་འབུམ་ལྔ་སྔོན་དུ་སོང་བའམ་འགྲོ་ངེས་དང་། རྩ་གསུམ་གྱི་བསྙེན་ཚད་བཞག་རྒྱུའི་དམ་བཅའ་བྱེད་མཁན་རྐྱང་རྐྱང་རེད། གསང་སྔགས་ཀྱི་ཆོས་ལ་ཚོད་ཡོད་ཀྱིས་ཧམ་འཛུལ་བྱས་བཞག་ན། ཆོས་ལ་དབང་ཟ་བའི་ཉེས་པ་འབྱུང་བར་མ་ཚད་ད་རུང་བཀའ་སྲུང་ཆོས་སྐྱོང་གི་བཀའ་ཆད་དྲག་པོ་འབྱུང་ངེས་རེད། དེའི་ཕྱིར་ན་རང་གཅེས་པ་རྒྱུ་མཚན་དུ་བྱས་ཏེ་དེ་ལྟ་བུའི་རིགས་ཅན་གྱིས་བག་ཡོད་པར་བྱ་དགོས། ཡང་སང་ཉིན་དངོས་གཞིའི་སྐབས་ལ་རྣམ་པ་ཚང་མ་དང་མཇལ་ཡོང་། ཉིན་གཉིས་པའི་དབང་དོན་ཟབ་ཁྲིད།དེ་ནི། ཞི་ཁྲོ་ངན་སོང་སྦྱོང་བའི་དངོས་གཞིའི་དབང་ཡིན། ཀྱཻ ཁྲོ་བོ་མི་བཟད་འཇིགས་པའི་སྐུ། །བདག་ཅག་འཁོར་བ་ལས་གྲོལ་ཕྱིར། །སོགས་ཀྱི་རྗེས་ཟློས་མཛད་མཐར་བཀའ་གསུང་གནང་བ་ནི། གསང་སྔགས་རྡོ་རྗེ་ཐེག་པར་ལས་འབྲེལ་ཡོད་པའི་སྐལ་བ་མཆོག་དང་ལྡན་པའི་གང་ཟག ཚེ་ལུས་འདིའི་སྟེང་ནས་འཁོར་བར་ཕྱི་ཕྱག་འཚལ་ནས། མགོན་པོ་རྡོ་རྗེ་འཆང་གི་གོ་འཕང་བསྒྲུབ་འདོད་ཡོད་མཁན་ཞིག་གིས། དང་པོ་ལམ་ལ་འཇུག་སའི་འཇུག་སྒོ་མ་ནོར་བ་དེ་གང་རེད་ཟེར་ན། སྨིན་བྱེད་ཀྱི་དབང་ཐོབ་པར་བྱེད་རྒྱུ་འདི་རེད། དབང་གི་སྒོ་ལ་ཞུགས་མ་མྱོང་བཞིན་གོ་འཕང་མཆོག་ཅིག་ཨེ་འཐོབ་འདོད་རྒྱུ་དེ། དཔེར་ན་ཤིན་ཏུ་དམན་པ་རྡོ་སྤྱོད་མཁན་ཞིག་གིས་ཡུལ་གྱི་རྒྱལ་པོའི་ཐོབ་ཐང་ཨེ་ལོན་བསམ་པའི་རེ་བ་རྒྱག་པ་དང་འདྲ་གསུངས་ཡོད་རེད། རྒྱུད་ཀྱི་ནང་ན། དབང་མ་སྐུར་ལ་དངོས་གྲུབ་མེད། གསུངས་ཏེ་རྡོ་རྗེ་འཆང་གིས་ཐག་བཅད་པ་རེད། མེད་ལུགས་ཀྱི་དཔེ་ཡང་དེ་མ་ཐག་ཏུ། བྱེ་མ་བཙིར་ལས་ཞུན་མར་བཞིན། གསུངས་པ་ལྟར་རེད། དེ་བཞིན་དུ་རྡོ་རྗེ་ཐེག་པའི་རང་ལམ་གྱི་དབང་མ་ཐོབ་ན། ལམ་བསྐྱེད་དང་རྫོགས་པའི་རིམ་པ། གྲོགས་བསྙེན་སྒྲུབ་ཕྲིན་ལས་སོགས་ལ་ཅི་ཙམ་བསླབ་ཀྱང་དངོས་གྲུབ་འགྲུབ་རྒྱུ་ཕར་ཞོག གསང་སྔགས་རང་ཉིད་ལེན་པའི་ཆོས་ལ་དབང་ཟ་བའི་ཉེས་པ་འབྱུང་བར་མ་ཚད་མཁའ་འགྲོ་དང་། གྲུབ་པ་ཅན་ཆོས་བདག་བཀའ་ཡི་སྲུང་མ་ཐམས་ཅད་ཀྱིས་བསད་ནས། སེམས་ཅན་དམྱལ་བར་ལྟུང་བ་འགྱུར། དེ་ཡིན་ན་དབང་བསྐུར་བའི་བླ་མ་མཚན་ཉིད་དང་ལྡན་པ་ཞིག་གི་མདུན་ནས། དབང་བཞི་ཚད་དང་ལྡན་པ་ཞིག་ཐོབ་ནས་བཟུང་། གང་ཟག་དབང་པོ་རབ་འབྲིང་ཐ་མའི་ཚོད་ཀྱིས། ཁོ་རང་རབ་ཡིན་ན་དབང་དུས་དེ་ཉིད་ལ་སྨིན་པ་གྲོལ་བ་གཉིས་ཀ་ཆིག་ཆོད་དུ་གྱུར་ཏེ་མཆོག་གི་དངོས་གྲུབ་ཐོབ་པ་ཡོད་སྲིད། དབང་པོ་འབྲིང་ཞིག་ཡིན་ན་དབང་བསྐུར་ཐོབ་པ་དེ་ལ་བརྟེན་ནས་ཉམས་ལེན་བསྐྱེད་རྫོགས་ལ་འབད་པར་བྱས་ན། སྐྱེ་བ་དེའི་སྟེང་ནས་མཆོག་གི་དངོས་གྲུབ་འགྲུབ་རྒྱུ་དང་། དབང་པོ་རབ་འབྲིང་གི་མཐུན་རྐྱེན་མ་ཚོགས་པར་དབང་པོ་ཐ་མ་ཞིག་ཡིན་ཡང་། དབང་ཐོབ་དད་དང་དམ་ཚིག་མ་ཉམས་ན། ལས་དང་སྐལ་བ་བཟང་པོའི་འཕྲོ་ཅན་དུ་གྱུར་ནས། ཚེ་རབས་གཞན་དང་གཞན་དུ་སྔར་གྱི་ལས་སྐལ་གྱི་འཕྲོ་དེར་མཐུད་ནས། ཆོས་འདི་དང་མཇལ། བླ་མ་དམ་པས་རྗེས་སུ་བཟུང་སྟེ་གྲོལ་བ་འགྱུར་བར་ཐེ་ཚོམ་མི་དགོས་པ་རེད། དབང་བསྐུར་ཡང་དག་དང་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ལ་ནི། །མ་སྒོམ་པར་ཡང་དངོས་གྲུབ་ཐོབ། །ཅེས་རྒྱུད་ལས་གསུངས་ཡོད་པ་རེད། དབང་ཟེར་ཚད་གཅིག་པ་ཡིན་པའི་ངེས་པ་མེད། དེའི་རྒྱུ་མཚན་གང་རེད་ཟེར་ན། ཐེག་པའི་རིམ་པ་དང་རྒྱུད་སྡེའི་རྣམ་གྲངས་ཀྱི་ཁྱད་པར་གྱིས། གྲངས་དང་དབྱེ་སྒོ་ཡང་མི་འདྲ་བ་མང་པོ་རེད། རེད་དེ་ཐམས་ཅད་ཚུར་བསྡུས་ན། གསང་སྔགས་ཕྱི་ནང་ཐུན་མོང་གི་དབང་། ཐུན་མོང་རིག་པའི་དབང་ལྔ་དང་། ནང་རྒྱུད་བླ་མེད་ཀྱི་ཐུན་མོང་མ་ཡིན་པ་གསང་བ་ཟབ་མོའི་དབང་གསུམ་སྟེ་འདི་བརྒྱད་པོའི་ནང་ལ་མ་འདུས་པ་ཞིག་ཕལ་ཆེར་ཡོད་མ་རེད། བྱིན་རླབས་དང་རྗེས་གནང་ཟེར་བའི་ཐ་སྙད་འཇུག་ཡུལ་ཡོད་ཀྱང་། དེ་ཐམས་ཅད་འདིའི་ཡན་ལག་གམ་ཆ་ཤས་སུ་མ་འདུས་པ་ཞིག་མེད། དེ་ལྟར་བཤད་ཡོང་ན། དབང་བརྒྱད་ཀྱང་དབང་བཞིའི་ནང་ལ་འདུས་པ་རེད། དེ་ཡང་ཇི་ལྟར་འདུས་པ་རེད་ཟེར་ན། བུམ་གསང་ཤེར་དབང་ཚིག་དབང་བཞི་བོའི་ཁོངས་སུ་མ་འདུས་པའི་དབང་ཞིག རྣལ་འབྱོར་བླ་མེད་ཀྱི་དབང་ཡིན་རུང་མི་འདུག་བསམ་གྱིན་ཡོད། དེ་མེད་དོན་ནི། བུམ་དབང་ཟེར་ན་ཐུན་མོང་རིག་པའི་དབང་ལྔའི་གཞིར་བྱས་པ་ཞིག་རེད། དེར་བླ་མེད་ཐུན་མོང་མ་ཡིན་པའི་ཁྱད་ཆོས་ཇི་ལྟར་ཚང་ཞེས་དོགས་པས་དྲིས་ན། སྤྱིར་ན་བླ་མེད་དེ་བུམ་པའི་དབང་གི་དགོས་དོན་དེ་ཡི་དམ་ལྷ་ཡི་བསྐྱེད་རིམ་བསྒོམ་ཟླས་ལ་སོགས་པ། ཕྱིའི་རྣལ་འབྱོར་ལ་དབང་བར་བྱེད་པ་ཡིན་པས་རིག་པའི་དབང་ལྔ་ཟེར་རྒྱུ་འདི། ཕྱིའི་རྣམ་པའི་སྟེང་ནས་བལྟས་ན་རྒྱུད་སྡེ་ཕྱི་བ་དང་རྣམ་པར་མཚུངས་པ་ཙམ་ཞིག་རེད། རེད་དེ་དོན་ངོ་བོའི་སྟེང་ནས་མི་འདྲ། དེ་མི་འདྲ་བ་འདི་སྦྱོར་ངག་ཚིག་གི་བརྗོད་ལུགས་ཀྱིས་དབྱེ་ན། དོན་མཚུངས་ཙམ་ཡིན་ཡང་དོད་ཐུབ་མ་རེད་ཟེར་རྒྱུ་རེད། དོད་ཐུབ་མིན་པའི་རྒྱུ་མཚན་ནི། གང་དུ་དབང་བསྐུར་བའི་དཀྱིལ་འཁོར། ཚུལ་ཇི་ལྟར་དབང་བསྐུར་བའི་ཐབས། གང་ལ་དབང་བསྐུར་བའི་གནས། ཅིའི་ཕྱིར་དུ་དབང་བསྐུར་བའི་དགོས་པ་སོགས་ཀྱི་ཐད་ནས་མི་འདྲ་བ་རེད། ཡིན་ན་ཡང་གནས་སྐབས་ཀྱི་ཡི་དམ་ལྷས་ཞལ་གཟིགས་ལ་བརྟེན་ཅིང་བསྒོམ་དང་བཟླས་པ་བྱེད་རྒྱུ་ལ་དབང་བ་ཙམ་ཞིག་གི་དགོས་དོན་འདི་བུམ་དབང་གི་ཞོར་ལ་འདུས་པས། སྐབས་འདིའི་ཐུན་མོང་རིག་པའི་དབང་ལྔ་བུམ་དབང་གི་ཡན་ལག་ལྟ་བུར་འགྱུར་ཞིང་འདུས་པ་རེད། སྤྱིར་ན་གསང་སྔགས་ཀྱི་རྒྱུད་དོན་བཤད་ཡོང་དུས། རྒྱུ་རྐྱེན་འབྲས་བུ་གསུམ་གྱི་སྟེང་ནས་བཤད་དགོས་པ་རེད། དེ་ཡིན་ན། རྒྱུ་གླེང་གཞི། རྐྱེན་གླེང་སློང་། འབྲས་བུ་ཡོངས་ཤེས་དང་གསུམ་གྱི་ཐོག་ནས་བཤད་ན། རྒྱུ་གླེང་གཞི་ཇི་ལྟར་བྱུང་བ་ཕུན་སུམ་ཚོགས་པ་ལྔ་ཡི་སྟེང་ནས་བཤད། རྐྱེན་གླེང་སློང་གིས་དེ་བཞིན་གཤེགས་པ་ཉིད་ལ་ཉིད་ཀྱིས་ཆེ་བ་བརྗོད་པའི་ཚུལ་གྱིས་བདེན་གཉིས་དབྱེར་མེད་རང་བྱུང་ཡེ་ཤེས་སུ་བསྟན་པ་ཡིན་ན། འབྲས་བུ་ཡོངས་ཤེས་དེ་རྒྱུད་དོན་གཞི་ལམ་འབྲས་བུའི་རྒྱུད་གསུམ་གྱི་རྣམ་བཞག་གསུངས་ཡོད་དུས། སྐབས་དོན་ལམ་རྒྱུད་བྱེ་བྲག་ཏུ་བཤད་པ་དང་བསྟུན་ནས་བཤད་སོང་ན། འདིར་དབྱེ་སྒོ་མང་པོ་རེད། གཅིག་དང་། གཉིས་གསུམ། བཞི་དང་ལྔ་ལ་སོགས་པ་ནས་རྒྱུད་ཀྱི་དངོས་པོ་བཅུ་དང་བཅུ་གཅིག་གི་བར་གྱི་དབྱེ་རིམ་གྱི་ཞུ་ཚིག་འདུག དེ་གཅིག་ཏུ་བསྡུས་བཞག་ན། གསང་སྔགས་ཀྱི་ལམ་ཐམས་ཅད་ཐབས་ཤེས་གཉིས་མེད་ཀྱི་རྣལ་འབྱོར་གཅིག་གི་རྣམ་པར་འདུས་རྒྱུ་དང་། གཉིས་སུ་དབྱེ་ཡོང་ན། བསྐྱེད་རྫོགས་གཉིས་སམ། ཐབས་གྲོལ་གཉིས་ཀྱི་ཚུལ་གྱིས་བཤད་ཆོག་རྒྱུ། གསུམ་སྐུ་གསུང་ཐུགས་གསུམ། ལྟ་སྒོམ་སྤྱོད་གསུམ། བསྙེན་སྒྲུབ་ལས་གསུམ་ལ་སོགས་པའི་གསུམ་ཚན་གྱིས་བཤད་རྒྱུ། བཞིར་བྱས་ན། བཞི་རྡོ་རྗེ་བཞིའི་ཡེ་ཤེས། ཕྱག་རྒྱ་བཞིའི་རྣལ་འབྱོར་སོགས་བཞི་ཚན་དང་། ལྔར་བྱེད་རྒྱུའི་དབང་དུ་བཏང་ན། དབང་དང་། དམ་ཚིག ལྟ་བ་གསུམ་དང་དེའི་ཁར་བསྒྲུབ་པ་ཕྲིན་ལས་གཉིས་དང་ལྔ་བྱས་ནས་གསུངས་ས་ཡང་ཡོད་རེད། ཡང་རྫོང་འཕྲང་གི་ནང་ན་གསང་སྔགས་ཀྱི་བསླབ་པའི་མཐའ་དྲུག་གིས་བཤད་ཡོད། སྤར་ཁབ་དག་གི་ནང་ན་བདུན་ནམ་བརྒྱད་ཀྱི་འཆད་ཚུལ་དང་། རོང་ཟོམ་པས། གཞི་རྣམ་པ་ལྔའི་སྟེང་དུ་ཡན་ལག་བཞི་དང་དགུར་བྱས་ནས་གསུངས་སྲོལ་ཡོད། ཀུན་མཁྱེན་རྒྱལ་བ་ཀློང་ཆེན་པའི་རྗེས་སུ་འབྲངས་བའི་རང་ལུགས་ཀྱི་རྒྱས་པའི་དབྱེ་སྒོ་ལྟར་ན། རྒྱུད་ཀྱི་དངོས་པོ་བཅུ་གཅིག་གམ་བསླབ་པའི་མཐའ་བཅུ་གཅིག་གི་ཐོག་ནས་བཤད་པ་རེད། ང་ཚོས་འཛིན་བདེ་བའི་ཆེད་དུ་བསྡོམས་བཞག་ན། ལྟ་བ་ཏིང་འཛིན་སྤྱོད་པ་གསུམ། །དཀྱིལ་འཁོར་དབང་དང་དམ་ཚིག་གསུམ། །བསྒྲུབ་མཆོད་ཕྲིན་ལས་ཕྱག་རྒྱ་སྔགས། །གསུངས་བཞག་ན་བཅུ་གཅིག་ཚང་བ་རེད། དེས་ན། དེ་ཁོ་ན་ཉིད་ལྟ་བ། མི་གཡོ་བ་ཏིང་འཛིན། ལ་དོར་བ་སྤྱོད་པ། དེ་དག་ལྟ་བ་ཏིང་འཛིན་སྤྱོད་པ་གསུམ་རེད། དཀྱིལ་འཁོར་དབང་དང་དམ་ཚིག་གསུམ་ཟེར་ན། བཀོད་པ་དཀྱིལ་འཁོར། རིམ་པ་བགྲོད་པ་དབང་། མི་འདའ་བ་དམ་ཚིག་དང་དྲུག་རེད། ད་རུང་བཅུ་གཅིག་ཚང་བ་ལ་ལྔ་དགོས་པས། དེ་ནི་ཚིག་རྐང་རྗེས་མ་ལ་བསྒྲུབ་མཆོད་ཕྲིན་ལས་ཕྱག་རྒྱ་སྔགས། །ཞེས་གསུངས་བ་ལྟར། བསྒྲུབ་པ་དང་། མཆོད་པ། ཕྲིན་ལས། ཕྱག་རྒྱ། སྔགས། དེ་དག་རེད། དེ་བཞིན་དོན་དུ་གཉེར་བ་བསྒྲུབ་པ། གནས་སུ་བསྟབ་པ་མཆོད་པ། རོལ་བ་ཕྲིན་ལས་རེད། ཕྱག་རྒྱ་དང་སྔགས་གཉིས་ཀ་རེད། དེ་ཉིད་བཅུ་ཡི་དབང་དུ་བྱས་ན། འདི་གཉིས་ཀ་གཅིག་ཏུ་བརྩི་དགོས། མ་བྱས་ན། འཆིང་བ་ཕྱག་རྒྱ། བཟླས་པ་སྔགས་རེད། བཅའ་བ་ཕྱག་རྒྱ། བཟླ་བ་སྔགས་ཟེར་བ་དང་འདྲ། དེ་ཡིན་ན་སྐབས་སུ་བབས་པའི་གང་བཤད་བྱ་དབང་གི་སྐབས་ནས་འཕྲོས་དོན་དབང་བསྐུར་ཐབས་མཚན་ཉིད་པ་ཅི་འདྲ་དགོས་ལུགས་དང་། དབང་གི་རྣམ་བཞག་གོ་དོན་བཤད་པ་ཡིན་དུས། རྒྱུད་ཀྱི་དངོས་པོ་བཅུ་གཅིག་ཏུ། སྤྱིར་གཅིག་ལ་གཅིག་འབྲེལ་ཡིན་པའི་རྒྱུ་མཚན་གྱིས་རྣམ་གྲངས་ཙམ་ཞིག་བགྲང་བའི་སྒོ་ནས་སྨོས་པ་ཡིན་ན། གཅིག་ལ་གཅིག་ཚང་དགོས་པ་དང་། ཁྱད་པར་དུ་དཀྱིལ་འཁོར་དབང་དང་དམ་ཚིག་གསུངས་པས། དཀྱིལ་འཁོར་གང་དུ། དབང་གང་བསྐུར། དབང་སྲོག་རྒྱུད་ལ་འཛིན་པའི་དམ་ཚིག་སོགས་གང་བསྲུང་དགོས་མ་ཤེས་ན། དབང་གི་གཟུགས་བརྙན་ཙམ་ཞིག་རེད། ཆོ་གའི་ཡན་ལག་ཉམས་པ་དང་། ཚིག་ཙམ་གྱི་སྦྱོར་ཀློག་ཡང་སྒྲོས་གཙང་ཞིག་མ་རེད་ན། གཟུགས་བརྙན་བས་ཀྱང་ཡང་བརྙན་རེད་འགྲོ་བར་བསམ་བློ་བཏང་ནས། དབང་དོན་ཆ་ཚང་དབང་ཁྲིགས་བཀླག་ཆོག་ལ་བཀོད་ཡོད་པ་དང་། དེ་མིན་གཏེར་གཞུང་གི་བསྐུར་ཚིག་རྐྱང་བས་དབང་རྣོན་ངོ་མ་ཞིག་ལ་གོ་བརྡ་འཕྲོད་ཤས་ཆེ་ན་ཡང་། ཐམས་ཅད་དེ་འདྲ་མ་ཡིན་པའི་སྟོབས་ཀྱིས། གཅིག་ན། རང་འདྲའི་རིགས་མཐུན་ལ་བསམ་བློ་བཏང་ནས། གཞན་རྒྱུད་མངོན་ཤེས་ཀྱིས་བརྟག་པའི་ནུས་པ་མེད་མཁན་གྱི་མི་དེས། རང་རྒྱུད་ལ་ཚད་གཞི་མི་བྱེད་ཐབས་མེད་རེད། གཉིས་ན། ངས་ཟབ་མོའི་དབང་ཁྲིད་ཞུ་ས་དེ་ཁར་སང་ཞུས་པ་ལྟར་དུ། མཁན་ཆེན་རྡོ་རྗེ་འཆང་འཇིགས་མེད་ཡོན་ཏན་མགོན་པོ་དང་། སྔ་འགྱུར་བཀའ་གཏེར་དང་བསྒྲུབ་ཐབས་ཀུན་འདུས་ལ་སོགས་པའི་དབང་མང་པོ་ཞིག་ཞུ་ས་ནི། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཡིན། ཁོང་རྣམ་པ་གཉིས་ཀས་དབང་དོན་གལ་ཆེན་དག་དོན་འགྲེལ་མཛད་ནས་གསུངས་པ་རེད། དེ་ཡིན་ན། མ་དར་གསར་འཛུགས་མིན་པར་མ་ཚད་མི་རབས་དུས་རབས་བརྗེ་མཚམས་ཀྱི་སྐབས་འདིར། བརྡ་སྦྱོར་ཟེར་ན། དཔེ་སྟོན་ཟེར་ན་མ་རེད་དེ། ཕྱིན་ཆད་མི་བརྗེད་ཀྱི་དྲན་རྟེན་ཡོང་རྒྱུའི་ལྷག་བློའི་བསམ་པས་བསྐུལ་ཏེ་བཤད་པ་ཡིན། ད་ནི་གོང་ནས་བཤད་རྒྱུའི་བཤད་མཚམས། དཀྱིལ་འཁོར་གང་ལ་བརྟེན་ནས། དབང་ཅི་ཞིག་བསྐུར་རྒྱུའི་དཀྱིལ་འཁོར་དེ་དང་པོར་ངེས་དགོས། དེ་ཡིན་ན་དཀྱིལ་འཁོར་གྱི་ངོ་བོའི་སྒྲ་བཤད་དང་འབྲེལ་ནས་བཤད་ན། སྙིང་པོའི་ཡོན་ཏན་འཛིན་པའི་གཞི་གྱུར་པ། ཀུན་ནས་ཟླུམ་ཞིང་ཡོངས་སུ་བསྐོར་བའི་དོན་ཅན། བདེ་གཤེགས་ཆོས་ཀྱི་རྒྱལ་པོ་འཁོར་ཕོ་བྲང་དང་བཅས་པ་ལ་སྒྲ་འཇུག་གསུངས་པ་རེད། དེ་ལྟར་ན་དཀྱིལ་འཁོར་གྱི་ངོ་བོ་དེ་ཡོན་ཏན་མཆོག་གི་གཞི་འཛིན་པ་ཞིག དག་པའི་རྟེན་དང་བརྟེན་པའི་བདག་ཉིད་དུ་སྣང་བ་གང་ཡིན་པ་དེ་ཉིད་རེད། དཀྱིལ་འཁོར་འདིར་དབྱེ་བ་ནི། གཞི་ལམ་འབྲས་གསུམ་གྱི་དཀྱིལ་འཁོར་ཡོད། ཐད་ཀའི་དགོས་དོན་ལམ་སྒོམ་པའི་དཀྱིལ་འཁོར་རེད། ལམ་སྒོམ་པའི་དཀྱིལ་འཁོར་ལ་མཚོན་བྱེད་དཔེ་གཟུགས་བརྙན་གྱི་དཀྱིལ་འཁོར་དང་། མཚོན་བྱ་དོན་སྐུ་གསུང་ཐུགས་ཀྱི་དཀྱིལ་འཁོར་རྣམ་པ་གཉིས་ཡོད། དེའི་ནང་གི་སྐབས་བབ་གང་བཤད་རྒྱུའི་མཚོན་བྱེད་དཔེའི་བུམ་དབང་བསྐུར་བའི་དཀྱིལ་འཁོར་འདི་ལ་དབྱེ་ན་རྣམ་པ་གསུམ་ཡོད། བློ་རབ་འབྲིང་ཐ་གསུམ་གྱི་དབང་དུ་བྱས་ཏེ་སྤྲོས་པ་ལ་དགའ་བའི་གང་ཟག་དང་བསྟུན་ཏེ་རྒྱས་པ་རྡུལ་མཚོན་གྱི་དཀྱིལ་འཁོར། སྤྲོས་པ་འབྲིང་གི་དབང་དུ་བྱས་ན་རས་བྲིས་ཀྱི་དཀྱིལ་འཁོར། ང་ཚོས་དཀྱིལ་ཐང་ཟེར་རྒྱུ་འདི་དང་། བློ་རབ་སྤྲོས་པ་དང་བྲལ་བའི་དབང་དུ་ན་སློབ་དཔོན་གྱི་ལུས་དཀྱིལ། ལུས་ཀྱི་དཀྱིལ་འཁོར་དུ་འཇུག་པར་མ་ཚད། དེ་ཉིད་མཆོག་ཏུ་བསྔགས་པ་རེད། གྲུབ་ཆེན་དྲིལ་བུ་པས། བཅོས་མ་གཉིས་ཀྱི་ངོ་བོ་གང་། །དེ་ཉིད་གདུལ་བྱའི་དབང་དུ་འདུད། །མཁས་པས་བསྒྲུབ་བྱ་དེ་མ་ཡིན། །ཞེས་གསུངས་པས། བཅོས་མ་གང་ཡིན་ན་རྡུལ་ཚོན་དང་རས་བྲིས་གཉིས་ཀ་གདུལ་བྱ་བློ་དམན་པ་སྤྲོས་པ་ཅན་གྱི་དབང་དུ་བྱས་པ་ཡིན། མཁས་པ་བློ་རབ་ཅན་གྱིས་བརྟེན་བྱ་མིན་པར་ཡང་གསུངས་ཡོད་རེད། དེའང་རང་བཞིན་གྱི་དཀྱིལ་འཁོར་དང་། སྤྲུལ་བའི་དཀྱིལ་འཁོར། རིག་པ་ཉམས་ཀྱི་དཀྱིལ་འཁོར། ལྷག་པ་གཟུགས་བརྙན་གྱི་དཀྱིལ་འཁོར་དང་བཞིར་བྱས་པའི་དབང་དུ་བཏང་ན། རང་བཞིན་གྱི་དཀྱིལ་འཁོར་དེ་སློབ་དཔོན་རྫོགས་པའི་སངས་རྒྱས་དང་ནི། སློབ་མ་མཐར་ལམ་ལ་གནས་པའི་སྤྱོད་ཡུལ་ཡིན། སྤྲུལ་བའི་དཀྱིལ་འཁོར་དེ་སློབ་དཔོན་མཐར་ལམ་ལ་གནས་པ་དང་། སློབ་མ་མཐོང་སྒོམ་ལ་གནས་པ་ཞིག་ཡིན་དགོས་རྒྱུ། རིག་པ་ཉམས་ཀྱི་དཀྱིལ་འཁོར་དེ་སློབ་དཔོན་མཐོང་སྒོམ་ལ་གནས་པ་སློབ་མ་ཚོགས་སྦྱོར་གྱི་ཡོན་ཏན་མཐར་ཕྱིན་པ་སོགས་ལ་བསྐུར་རྒྱུ་ཡིན་པ་གསུངས་ཡོད་རེད། བཞི་བ་ལྷག་པ་གཟུགས་བརྙན་གྱི་དཀྱིལ་འཁོར་ལ། སློབ་དཔོན་ཏིང་ངེ་འཛིན་ལ་རྟན་པ་རྗེས་མཐུན་ཙམ་ཐོབ་པ་ཞིག་ཡན་ཆད་ཀྱི་མཚན་ཉིད་དང་ལྡན་པ་ཞིག་གིས། སློབ་མ་སྐལ་ལྡན་དམན་འབྲིང་རབ་གསུམ་ལ་ཕྱེས་ཏེ། གོང་ནས་བཤད་པ་ལྟར། རྡུལ་ཚོན། རས་བྲིས། ཚོམ་བུ་ཚང་མ་དམིགས་རྟེན་དུ་བྱས་ཏེ་བསྐུར་རྒྱུ་དང་། སློབ་དཔོན་ལུས་ཀྱི་དཀྱིལ་འཁོར་ལ་རྒྱལ་བའི་དཀྱིལ་འཁོར་དངོས་ཀྱི་འདུ་ཤེས་བཅོས་མིན་འཛིན་ཐུབ་པའི་གང་ཟག་གིས། ཕྱི་དཀྱིལ་རྟེན་དགོས་པའི་ངེས་པ་མེད་ལུགས་ཀྱང་གོང་ནས་དྲངས་བའི་ལུང་དོན་ལྟར་དུ་རེད། རེད་དེ་དཀྱིལ་འཁོར་དུ་འཇུག་རྒྱུ་དེ་གཙོ་བོ་ཞུགས་མཁན་གྱི་གང་ཟག་གཙོ་ཆེ་བས། ལྟོས་ས་གཉིས་ལ་ལྟོས་ནས། འཇུག་ཚུལ་གཉིས་བྱུང་བ་རེད། ཞུགས་ནས་དེ་དང་མཐུན་པའི་ལམ་སྒོམ་རྒྱུ་དང་ནི། རྒྱུད་སྨིན་ཚུལ་ལ་ལྟོས་ནས་ཐམས་ཅད་འདྲ་འདྲར་བྱས་ཏེ་བསྐུར་ན། རིམ་འཇུག་གི་གདམས་པས་ཞུགས་རྒྱུའི་དབང་དུ་བཏང་ནས་རྡུལ་ཚོན་དང་རས་བྲིས་ལ་བརྟེན་ཏེ་བསྐུར་བའི་དེང་སང་གི་ཕྱག་ལེན་འདི། ཕྱག་བསྟར་མཛད་པ་ལ་ཅི་ཞིག་གི་དགོས་པ་ཡོད་རེད་ཟེར་ན། གེགས་དང་གོལ་ས་ཆུང་བར་དགོངས་པ་རེད། རྒྱུ་མཚན་དེ་འདྲ་ལ་བརྟེན་ཏེ། གང་ལྟར་དཀྱིལ་འཁོར་དུ་མ་ཞུགས་པར་དབང་བསྐུར་མི་རུང་བས། དང་པོ་དཀྱིལ་འཁོར་དུ་འཇུག་པ་གལ་ཆེན་རེད། དེའི་རྒྱུ་མཚན་གྱིས་དབང་གི་ཐོག་མར་ཕྱི་འཇུག་དང་ནང་འཇུག་རྣམ་པ་གཉིས་འབྱུང་དོན་ཡང་དེ་རེད། དེ་ཡིན་དུས་དབང་བསྐུར་བའི་ཐོག་མར་གང་ཞུགས་སའི་དཀྱིལ་འཁོར་ཡོད་རྒྱུ་བོ་གལ་ཆེན་ཡིན་པས་དབང་གི་སྔོན་དུ་དཀྱིལ་འཁོར་བྱུང་བ་རེད། དཀྱིལ་འཁོར་དབང་དང་དམ་ཚིག་གསུངས་ཡོད་པས་ན། དཀྱིལ་འཁོར་བཞེངས་པ། སྒྲུབ་ཅིང་མཆོད་པ་དེ་དག་ཚད་ལྡན་བྱེད་རྒྱུ་ཡང་དེ་བཞིན་གལ་ཆེན་ཡིན་པ་དང་། ས་ཆོག་དང་། སྟ་གོན། དཀྱིལ་འཁོར་བསྒྲུབ་པ་སོགས་ཚད་ལྡན་ཚུལ་མཐུན་ཆོ་གའི་ཡན་ལག་ཚང་བ་ཞིག་དགོས་པ་རེད་མ་གཏོགས་སླ་ཆོས་ཀྱིས་ཆོག་རྒྱུ་བྱས་ན། སློབ་མའི་རྒྱུད་སྨིན་མི་ནུས་པར་མ་ཚད་སློབ་དཔོན་ལ་ཡང་དེ་བཞིན་དུ་ཉེས་པ་འབྱུང་བ་རེད། གོང་ནས་དཀྱིལ་འཁོར་འདི་ལ་གཞི་ལམ་འབྲས་བུའི་དཀྱིལ་འཁོར་གསུམ་ཡོད་གསུངས་པའི་ནང་གི། ལམ་བསྒོམ་པའི་དཀྱིལ་འཁོར་གཉིས་ཡོད་པའི་དང་པོ། མཚོན་བྱེད་དཔེ་གཟུགས་བརྙན་གྱི་དཀྱིལ་འཁོར་གྱི་སྐོར་ནས་དེ་འདྲ་བྱས་ན་ཕལ་ཆེར་འཐུས། གཉིས་པ་མཚོན་བྱ་དོན་སྐུ་གསུང་ཐུགས་ཀྱི་དཀྱིལ་འཁོར་རེད། སྐུ་དཀྱིལ་དེ་རང་ལུས་ལྷ་རུ་གསལ། གསུང་དཀྱིལ་དེ་མ་རྒྱུད་སྔགས་སུ་གསལ། ཐུགས་དཀྱིལ་དེ་དྲན་རྟོག་མ་སྤང་རང་གྲོལ་འཁོར་བའི་སྣོད་བཅུད་ཀྱི་སྲོག་ཏུ་ལྷ་དང་ཡེ་ཤེས་སུ་དག་སོང་དུས། འབྲས་བུ་མཐར་ཕྱིན་གྱི་དཀྱིལ་འཁོར་སྐུ་དང་ཡེ་ཤེས་འདུ་འབྲལ་མེད་པའི་དཀྱིལ་འཁོར་ལ་རྫོགས་ནས་གཞི་འབྲས་དབྱེར་མེད་པའི་ཀུན་བཟང་ཡངས་པ་ཆེན་པོའི་དཀྱིལ་འཁོར། མ་ཧཱ་ཡོ་གའི་ཆོས་སྐད་ལྟར་དུ་བྱས་ན། ངོ་བོ་དག་པ། རང་བཞིན་མཉམ་པ། དག་མཉམ་བདེན་པ་དབྱེར་མེད། ཟུང་འཇུག་སྒྱུ་འཕྲུལ་དྲྭ་བའི་ངང་དེ་ལས་རྣམ་པ་མ་འགག་གང་འདུལ་གྱི་བཀོད་པ་འཆར་བ་རེད། དབང་བསྐུར་དུས་དང་པོ་དཀྱིལ་འཁོར་ལ་འཇུག་དགོས་ན། དང་པོ་སློབ་དཔོན་རང་ཉིད་འཇུག་ནས། དེའི་འཕྲོར་སློབ་མ་ཕྱི་ནང་གི་འཇུག་པ་ཡིས་རིམ་པས་དཀྱིལ་འཁོར་ལ་ཞུགས་བཅུག་རྒྱུ་དེ་རེད། སློབ་དཔོན་རང་ཉིད་འཇུག་རྒྱུ་དེ་སློབ་མ་ལ་དབང་ཇི་ལྟར་བསྐུར་ནས་ཚུལ་དང་མཐུན་པར་བདག་འཇུག་ལེན་རྒྱུའི་ཆེད་དུ་རེད། དེ་མིན་བསྡུས་པའི་ཚུལ་དུ་བྱས་ནས་རིག་པའི་མེ་ཏོག་དོར་བ་ཙམ་གྱིས་ཀྱང་ལེན་ཆོག་པ་རེད། དེ་གང་འདྲ་རེད་ཟེར་ན། ཨཱོཾ་བཛྲ་ས་མ་ཡ་ཨཱོཾ་ཟེར་རྒྱུ་སོགས་ཀྱིས། རང་བཞིན་གྱི་དཀྱིལ་འཁོར་གྱི་ལྷའི་སྐུ་གསུང་ཐུགས་ཡོན་ཏན་ཕྲིན་ལས་དང་། ཏིང་ངེ་འཛིན་གྱི་ལྷའི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད། ལྟ་སྒོམ་གྱི་གདེང་བསྐྱེད་ནས་ལྷ་དང་རང་སེམས་རང་བཞིན་དབྱེར་མེད་དུ་རྟོགས་པར་བྱ་དགོས་པ་རེད། ཐམས་ཅད་སེམས་ཀྱི་རྣམ་འཕྲུལ་སེམས་ཉིད་ཡེ་ནས་དག་པ་ཡིན་པས་དོན་ལ་མི་གནས་པ་ཞིག་མ་རེད། འདི་ཕྱག་དང་འཇུག་པ་གཉིས་ཀའི་གོ་གཅིག་ཆོད་རེད། ལྷ་དང་རང་སེམས་ཐ་མི་དད་པའི་རིག་པའི་ཡེ་ཤེས་གཅིག་ལ་འདུན་པའི་རབ་ལྟ་བ་མཇལ་བའི་ཕྱག་ཀྱང་ཡིན་ལ། རང་སྣང་ཡེ་ཤེས་ཀྱི་དཀྱིལ་འཁོར་ལ་འཇུག་བྱ་འཇུག་བྱེད་ཐ་མི་དད་པའི་སྒོ་ནས་འཇུག་པ་ཡང་རེད། ཨོཾ་ཡེ་ཤེས་རྒྱལ་པོ་སོགས་ཀྱིས་དཀྱིལ་འཁོར་གྱི་ལྷ་ཚོགས་དངོས་གྲུབ་སྩོལ་བ་ལ་ཕྱོགས་པར་སྐུལ་ནས་ཨོཾ་བཛྲ་ས་མ་ཡ་ཧཱུྃ། ཨཱོཾ་བཛྲ་ས་མ་ཡ་སྟཾ། ཨོཾ་བཛྲ་ས་མ་ཡ་ཧོ། དེ་དག་རིམ་བཞིན་ཨོཾ་བཛྲ་ས་མ་ཡ་ཧཱུྃ་གིས་ཡེ་ཤེས་པ་དམ་ཚིག་པར་ཆུ་ལ་ཆུ་བཞག་པ་ལྟར་དུ་དབྱེར་མེད་དུ་བསྟིམས། ཨོཾ་བཛྲ་ས་མ་ཡ་སྟཾ་གྱིས་རང་ཉིད་ལྷའི་དཀྱིལ་འཁོར་སངས་མ་རྒྱས་ཀྱི་བར་དུ་བརྟན་པར་བྱས། ཨོཾ་བཛྲ་ས་མ་ཡ་ཧོས་དབང་དུ་བསྒྱུར་ཅིང་དགྱེས་པར་བསམ། དེའི་འཕྲོར་ཛ་ཧཱུྃ་བཾ་ཧོའི་ཕྱག་རྒྱ་བཞི་འབྱུང་། ཛ་ཧཱུྃ་བཾ་ཧོས་བརྟན་ཅིང་གསལ་བར་བྱས་པ་རེད། དེ་ལྟ་བུའི་ལྟ་སྒོམ་གྱི་གདེང་ཚོད་མ་ཞན་ན། ལྷས་གནང་བའི་མཚན་མ་མ་ཐོབ་ན་ཡང་། སེམས་བརྟན་པའི་མཚན་མ་རྙེད་ཅིང་རང་ཡིད་རང་ལ་ཆེས་པའི་བློ་གདེང་གིས་དབང་བསྐུར་བའི་ནུས་པ་རྙེད་པ་རེད། གཉིས་པ། སློབ་མ་དཀྱིལ་འཁོར་དུ་འཇུག་ཚུལ་ལ་ཕྱི་འཇུག་ནང་འཇུག་གཉིས་ཡོད་པ་ལས། ཕྱི་འཇུག་ལ་ཡང་སྔོན་འགྲོ་དངོས་གཞི་གཉིས་སུ་ཕྱེས་ཡོང་ན། ཁྲུས་བྱས། བགེགས་བསྐྲད། མཚམས་བཅད། ལོ་རྒྱུས་བཤད། མཎྜལ་འབུལ་བ་དག་སྔོན་འགྲོ་རེད། དེ་དག་གི་དགོས་ཆེད་གང་ཡིན་བསམ་ན། སྡིག་སྒྲིབ་སྦྱོང་བའི་ཆེད་དུ་ཡི་གེ་བརྒྱ་བ་བཏོན་ཏེ་ཁྲུས་བུམ་གྱིས་ཁྲུས་བྱེད་པ་དང་། དེང་སང་གི་ཕྱག་ལེན་ལ་འཇུག་པ་བདེ་བའི་ཆེད་དུ། ཁྲུས་བུམ་དང་ལས་བུམ་གཉིས་གཅིག་བྱས་ནས་ཆོག་རྒྱུ་རེད་འདུག་མོད་དེ། ངོ་མར་བཤད་ན་ཁྲུས་བུམ་ཁ་ཁར་བྱས་ནས་བསྒྲུབས། རྡོར་སེམས་ཀྱི་སྐུ་ཙཀ་བཙུགས། གཙོ་བུམ་གྱི་གཡས་ཕྱོགས་ལ་བཞག མགུལ་ཆིངས་དཀར་པོ་ཞིག་སྒྲོན། ལས་བུམ་དུ་བདུད་རྩི་འཁྱིལ་བ་ལ་སོགས་པ་ཆོ་ག་རང་ཉིད་སྒོས་ཆོས་ཀྱི་ལས་ལྷས་བསྒྲུབས། ལས་ལྷ་གང་ཡིན་གྱི་སྐུ་ཙཀ་བཙུགས། སྒྲུབ་པའི་དུས་སུ་གཙོ་བུམ་གྱི་གཡོན་ཕྱོགས་ལ་བཞག མགུལ་ཆིངས་ལྗང་ཁུ་སྣ་ཚོགས་འདོགས། བྱ་གྲུབ་ཡེ་ཤེས་ཀྱི་མདོག་ཅན་སྒྲོན། ད་རེས་ང་ཚོས་ཀྱང་ཕྱག་ལེན་གཞུང་དང་མཐུན་པར་བྱས་ཡོད། ཁྲུས་ནས་བཏོན་ཏེ་བར་ཆད་བསལ་བའི་ཕྱིར་དུ་བགེགས་བསྐྲད་པ་དང་། བར་ཆད་གང་གིས་ཀྱང་མི་ཚུགས་པ་བྱེད་པར་སྲུང་བའི་འཁོར་ལོས་མཚམས་བཅད། དེའི་སྟེང་དུ་ཆོས་ལ་ཡིད་ཆེས་བསྐྱེད་ཕྱིར་དུ། བརྒྱུད་པའི་ལོ་རྒྱུས་ཀྱིས་སྤྲོ་བ་བསྐྱེད། བསོད་ནམས་ཀྱི་ཚོགས་རྫོགས་ཆེད་དུ་མཎྜལ་ཕུལ་བ་དག་འབྱུང་བ་རེད། ད་རུང་དེས་མ་ཚད། སྐྱབས་འགྲོ། སེམས་བསྐྱེད། ཡན་ལག་བདུན་པའམ་ཡན་ལག་བཅུ་བ་དམ་ཚིག་ཁས་ལེན་སོགས་དགོས་པ་རེད། བསླབ་པ་ཀུན་གྱི་གཞི་འཛིན་པའི་དགོས་པས་སྐྱབས་འགྲོ་མེད་མི་རུང་བ་དང་། ཐེག་ཆེན་ལམ་གྱི་གཞུང་རྟ་ཡིན་པས་སེམས་བསྐྱེད་འབོག་རྒྱུ། བསགས་སྦྱོང་གི་གནད་ཐུན་མོང་དང་ཐུན་མོང་མ་ཡིན་པ་འདུས་པའི་རྒྱུད་སྦྱོང་བའི་ཆོ་ག་ཡན་ལག་བདུན་པའམ་བཅུ་བ་འབུལ་རྒྱུ། དེའི་རྗེས་གསོལ་བ་འདེབས་པ། དེ་དག་སྔོན་དུ་སོང་བའི་ཐོག་ནས། སླར་ཡང་གསོལ་བ་འདེབས་པ་དང་བཅས་ཏེ་ཕྱི་འཇུག་དངོས་ལ་ཞུགས་དགོས་པ་རེད། འདི་ལ་མིག་དབྱེ་བ། མེ་ཏོག་འཐོར་བ། དེ་དག་ལ་སོགས་པའི་སྒོས་ཆོས་རྣམས་སྔོན་ལ་བཏང་ནས། ནང་འཇུག་ལ་ཡེ་ཤེས་འབེབས་པ། རིགས་གང་ཡིན་ངོས་བཟུང་ནས་དེ་དང་མཐུན་པའི་གསང་མཚན་རེ་བཏགས་ཏེ་དབང་རྟགས་ཀྱི་ཅོད་པན་སྦྱིན་རྒྱུ་ལ་སོགས་པ་དེ་དག་རེད། དབང་ཚིག་སོ་སོའི་སྐབས་རེ་རེའི་དམིགས་འདུན་ཇི་ལྟར་གཏོད་ལུགས་དང་བཅས་པ་འབྱུང་བ་རེད། དེ་དག་གསལ་བཤད་དགོས་དང་མི་དགོས་དུས་སྐབས་དང་བསྟུན་ཞོར་འགྲོ་རྒྱུ་བྱེད། དབང་ཁྲིད་ལུང་གསུམ་གྱི་སོ་སོའི་རྣམ་པ་ཡང་མ་དོ་བར་བཤད་དགོས་རེད། དེ་ཡིན་ན་འདི་ནས་ཡིག་ཆུང་གི་ནང་དུ། གཉིས་པ། བགེགས་བསལ་ལོ་རྒྱུས་ཆོས་བཤད་ནི། །ཞེས་གསུངས་པ་ལྟར། བགེགས་བསལ་བ་དང་མཚམས་བཅད་གཉིས་ཀ་སོང་ནས་ད་ནི་ལོ་རྒྱུས་ཀྱི་ཆོས་བཤད་ལ་ཐུག་པ་རེད། མཚམས་འདི་ནས་། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སེམས་བསྐྱེད་དེ་གསན་འཚལ། སོགས་ལོ་རྒྱུས་དབང་ཆོག་གསུངས་རྗེས་ཀྱི་འཕྲོས་དོན། ཚིག་འདི་ཧ་ཅང་རིང་བས་ལན་གཅིག་མ་གཏོགས་རྗེས་ཟློས་ལན་གསུམ་རེ་མ་ཐུབ་ཀྱང་མཇུག་གི་ཚིག་བཞི་བོ་རྗེས་ཟློས་ལན་གསུམ་བྱས་ན་ཆོག་རྒྱུ་བྱེད། དེའི་ཡན་གྱིས་ཐུན་མོང་དང་འབྲེལ་བའི་སྐྱབས་སེམས་སྡོམ་བཟུང་སོང་བ་རེད། འོ་ན་སྔགས་ཀྱི་སྡོམ་པ་དེ་ནམ་ཐོབ་ཟེར་ན། འདིར་འདོད་ལུགས་རྣམ་པ་གསུམ་ཡོད། སྡོམ་བཟུང་གི་སྐབས་འདིར་ཐོབ་པ་འདོད་མཁན་ཞིག་དང་། བླ་མེད་ཀྱི་སྔགས་སྡོམ་ཡོངས་རྫོགས་དེ་བུམ་དབང་དངོས་གཞིའི་སྐབས་སུ་ཐོབ་གསུང་མཁན་ཞིག རྡོ་རྗེ་གསུམ་བསྐྱེད་ནས་མགོ་བཟུང་སྟེ་དབང་བཞི་ཡོངས་རྫོགས་སྐབས་སུ་སྔགས་ཀྱི་སྡོམ་པ་ཆ་ཚང་ཐོབ་གསུང་བའི་ལུགས་ཏེ་གསུམ་ཡོད་པ་ལས། དང་པོ། སྡོམ་བཟུང་གི་སྐབས་སུ་ཐོབ་གསུང་རྒྱུ་དེ་ནི། སྡོམ་བཟུང་ལ་སྡོམ་པ་ཐོབ་པའི་བྱེད་ལས་མེད་པ་མ་རེད། སྔགས་ཀྱི་ཆོ་གས་སྡོམ་པར་བགྱི་གསུངས་མ་ཐག་པ་ཡིན་པས་སྔགས་ཀྱི་ཆོ་གས་སྡོམ་རྒྱུ་དེ་སྔགས་སྡོམ་མིན་ན་གང་ཡིན། རེད་དེ་འདིའི་ཚིག་ལ་ཞིབ་ཏུ་བསམ་བློ་བཏང་ན། འདི་སྡོམ་པར་བགྱི་ཞེས་ཁས་བླངས་པའི་དམ་བཅའི་ཚིག་རེད། དེའི་ཕྱིར་ན་འདིའི་སྐབས་སུ་སྔགས་ཀྱི་སྡོམ་པ་བཏགས་པ་བ་བརྗོད་པ་ཁས་བླངས་ཀྱི་སྒོ་ནས་ཐོབ་ཟེར་རྒྱུ་རེད། གཉིས་པ། བླ་མེད་བུམ་དབང་དངོས་གཞིའི་སྔགས་སྡོམ་ཡོངས་རྫོགས་ཐོབ་པར་བཞེད་པ་ཡང་ཅུང་ཟད་རགས་པའི་དབང་དུ་བཏང་ནས་གསུངས་པ་རེད། དེ་ཚང་གིས་མཆོག་དབང་གོང་མ་གསུམ་ལ་དམ་ཚིག་གསར་ཐོབ་ཡོད་ཀྱང་། སྡོམ་པ་གསར་ཐོབ་མེད་གསུངས་པས་ཁས་བླངས་ནང་འགལ་ཅུང་ཟད་ཡོད་པ་རེད། དམ་ཚིག་དང་སྡོམ་པ་གཉིས་ཀ་གཞི་མཐུན། བསྲུང་བྱའི་དོན་ལས་ནམ་ཡང་མི་འདའ་བ་སྡོམ་པའི་སེམས་པ་ས་བོན་དང་བཅས་པ་ལ་དམ་ཚིག་གསུངས་པ་རེད། དེའི་མ་ཚད་དབང་བཞི་བླངས་པས་སྡོམ་པ་གསུམ་ལྡན་ལ་འགྱུར་ཚུལ་གྱི་ལུང་ཐམས་ཅད་དང་འགལ་བ་ཡང་སྤང་དཀའ། དེས་ན་རང་ལུགས་ལ་གསུམ་པ་ལྟར་དུ། མངའ་རིས་པཎ་ཆེན་གྱིས། དང་པོ་གནས་གསུམ་རྡོ་རྗེ་གསུམ་བསྐྱེད་ནས། །ཐ་མ་དབང་བཞི་ཡོངས་སུ་རྫོགས་པའི་ཚེ། །རིག་འཛིན་སྡོམ་པ་ཐོབ། ཅེས་གསུངས་བ་བཞིན་དུ་སློབ་མའི་སྒོ་གསུམ་ལྷའི་སྐུ་གསུང་ཐུགས་ཀྱི་རྡོ་རྗེ་གསུམ་དུ་བྱིན་གྱིས་རླབས་པའི་དུས་ནས་འགོ་བཟུང་སྟེ། རྒྱུད་སྡེ་བཞིའི་རང་རང་གི་དབང་གི་མཐའ་རྟེན་རྫོགས་པ་སྔགས་སྡོམ་སྐྱེས་ཟིན་གྱི་མཐའ་ལ་འཇོག་པ་རེད། སྔགས་སྡོམ་མཚན་ཉིད་པ་དམ་ཚིག་ཁས་བླངས་ཀྱི་མནའ་ཆུ་བཏུང་བ་ནས་དབང་གི་དངོས་གཞི་ལ་འཇོག་རྒྱུ་དེ་ ཆེས་རྒྱུ་མཚན་དང་ལྡན་པ་ཞིག་རེད། གོང་དུ་སྨྲས་མ་ཐག་པའི་སྡོམ་པ་གསུམ་ལྡན་ལ་འགྱུར་བའི་ཐད་ནས་བཤད་ན། སྡོམ་པ་གསུམ་པོ་སོར་བྱང་སྔགས་གསུམ་རེད། འདི་གདུལ་བྱ་དབང་པོ་རབ་འབྲིང་ཐ་གསུམ་ལ་ལྟོས་པ་ཅན་གྱི་ལམ་ལ་བཀྲི་ཚུལ་དང་སྡོམ་པ་ཐོབ་ཚུལ་འདུག དབང་རབ་དབང་བསྐུར་ཐོབ་དུས་སྡོམ་གསུམ་གཅིག་ཆར་སྐྱེ་བའི་མཐའ་འགོག་མི་ཐུབ། རྟོགས་གྲོལ་དུས་མཉམ་ཨིནྡྲ་བོ་དྷི་བཞིན་གསུངས་ཡོད་རེད། དེ་ཡང་རྒྱུ་མེད་རྐྱེན་མེད་ཀྱིས་རྟོགས་གྲོལ་དུས་མཉམ་རེད་སོང་བ་ཞིག་ག་ན་ཡིན། ཚེ་འདི་ལ་ཐུན་མོང་གི་ལམ་གྱིས་རྒྱུད་སྦྱོང་བ་ལ་མ་ལྟོས་པར་སྔོན་སྦྱོང་མཐར་སོན་གྱི་ལས་འཕྲོ་སད་པའི་དབང་གིས་སྔགས་སྡོམ་ཁོ་ན་ལས་ཕྱེས་པའི་སྡོམ་གསུམ་གཅིག་ཆར་དུ་སྐྱེས་པ་རེད། དེ་ཡིན་ཏེ། ཐུན་མོང་སྔགས་སྡོམ་མཚན་ཉིད་པ་གང་ཞིག་གཞན་གནོད་གཞིར་བཅས་སྤང་ལ་གཞན་ཕན་གཞིར་བཅས་སྒྲུབ་པ། དེ་ཡང་མཉམ་པ་ཆེན་པོའི་ཐབས་མཁས་ཅན་གྱིས་ཟིན་པའི་ཕྱིར་ན། དེ་ལྟར་ཐོབ་པ་དོན་ལ་དངོས་སུ་གྲུབ། རེད་དེ་དབང་པོ་འབྲིང་ཐ་གཉིས་ཀ་ལ་དེ་ལྟར་མི་ངེས་སོ། །སོ་སོར་ཐར་དང་བྱང་ཆུབ་སེམས། །ཟེར་ནས་རྗེས་ཟློས་ཤིག་བྱས་པ་ཙམ་གྱིས་སོར་བྱང་གི་སྡོམ་པ་མཚན་ཉིད་པ་ཐོབ་དཀའ་འོ། །མདོ་ཨ་ནུ་རང་ལུགས་ཀྱིས་ཐེག་པ་དགུར་བྱས་ཏེ་དབང་བསྐུར་བའི་སྐབས་སུ། སྐྲ་བྲེག་ཆོས་གོས་རྣམ་གསུམ་སྟེར་བ་སོགས་འབྱུང་ཡང་། དེ་དང་དེའི་སྨིན་བྱེད་ཀྱི་རྟེན་འབྲེལ་སྒྲིག་པ་ཙམ་ཞིག་རེད་མ་གཏོགས་དངོས་སུ་ཐོབ་པ་མ་རེད། དེ་ཡིན་དུས་དབང་གྲངས་སྡོམ་པ་གསུམ་པོ་སོ་སོའི་ཆོ་ག་ལ་བརྟེན་ནས་ཐོབ་དགོས་རྒྱུ་དང་། དབང་པོ་ཐ་མ་ནི། དེ་བས་ཀྱང་འཁོར་བའི་ཉེས་དམིགས་བསམ་པ་སོགས་བློ་སྦྱོང་ནས་འགོ་བཙུགས་སྟེ་སོ་ཐར་གྱི་དུས་ཁྲིམས་ནས་ཐེག་པ་རིམ་འཇུག་གིས་ཞུགས་དགོས། སྡོམ་པ་གསུམ་དུ། སོ་ཐར་གྱིས་སོ་ཐར་རང་གི་བསླབ་ཚིག་དགེ་བསྙེན་དགེ་ཚུལ་དགེ་སློང་གསུམ་དང་། བྱང་སེམས་ཀྱིས་ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་གསུམ། སྔགས་ཀྱིས་སྐུ་གསུང་ཐུགས་ཀྱི་དམ་ཚིག་ལ་སྡོམ་པ་གསུམ་དུ་བཞག་རྒྱུའི་རྣམ་བཞག རང་གཞུང་བྱེ་བྲག་པ་ནས། རང་དང་གཞན་དོན་ཕན་པ་ཆེ། །གསུངས་པ་ལྟར། འདུལ་བས་བསྟན་དོན་སོ་ཐར། མདོ་སྡེས་བསྟན་དོན་བྱང་སྡོམ། སྡེ་སྣོད་བཞི་བས་སྔགས་སྡོམ་བསྟན་པས། ཀུན་སློང་སྤང་བྱ་དུས་དང་ཆོ་ག་དག་གི་ཁྱད་པར་གྱིས་འབྱུང་བ་རེད། དེ་ཡིན་ན་སུམ་ལྡན་ཟེར་བའི་སྐབས་དེའི་སྡོམ་པ་དེ་གསུམ་གྱི་ལྡོག་པ་ལ་གཞི་མཐུན་མི་སྲིད་ཀྱང་། ངོ་བོ་ལ་གཞི་མཐུན་སྲིད། དེ་ཅིའི་ཕྱིར་ཞེ་ན། སུམ་ལྡན་རྡོ་རྗེ་འཛིན་པའི་རྒྱུད་ཀྱི། རང་དང་གཞན་དོན་ཕན་པ་ཆེ་གསུམ་པོ་ངོ་བོ་གཅིག་ཡིན་རྒྱུ་དང་། དེ་སྔགས་ཀྱི་དམ་ཚིག་ལ་སློབ་པ་ཡིན་པའི་ཁྱད་པར་ཡང་ཡོད་རེད། དེ་བཞིན་དུ་འོག་མའི་ཡོན་ཏན་ཐམས་ཅད་གོང་མར་འདུས་པས། དཔེ་བཞག་ན་བྲེ་གསུམ་གྱི་ནང་ལ་བྲེ་དོ་འདུས་པ་ལྟར། སྔགས་ཐབས་མཁས་ཀྱིས་སངས་རྒྱས་ཀྱི་མཛད་པ་སྒྲུབ་པའི་ནང་ལ་ཡོན་ཏན་ཡར་ལྡན་གྱིས་འདུས་པ་རེད། འདའ་བར་བྱ་བ་མ་ཡིན་པའི་ཆ་ནས་དམ་ཚིག་དང་། བྱ་བ་དང་མི་བྱ་བའི་ངེས་པའི་སྟེང་ནས་སྡོམ་པ་བཞག་པས། སྡོམ་དམ་ཚིག་འདི་གཉིས་ཀ་ངོ་བོ་གཅིག་ལ་ལྡོག་ཆས་དབྱེ་བ་རེད། རེད་དེ་སྡོམ་པ་ཡིན་ཚད་དམ་ཚིག་ཡིན་པས་མ་ཁྱབ་ཀྱང་། སྔགས་སྡོམ་ཡིན་ན་སྡོམ་དམ་ཚིག་གཉིས་ཀ་ཡིན་པས་ཁྱབ། ཅེས་སེམས་བསྐྱེད་རྗེས་ཟློས་ཀྱི་དབང་ཚིག་གསུངས་མཐར། འདི་ཐམས་ཅད་རྣལ་འབྱོར་དུ་སེམས་བསྐྱེད་པ་ཡིན་གསུངས་ནས་འདིའི་ཆོག་ཁྲིགས་ཀྱི་ནང་དུ་ཡོད་པ་ལྟར་དུ་རེད། དེ་ཡིན་ན་དུས་རྒྱུན་ཐེག་ཆེན་སེམས་བསྐྱེད་སྐབས་ཀྱི་སེམས་ཅན་ཐམས་ཅད་སངས་རྒྱས་ཀྱི་སར་འགོད་འདོད་ཀྱི་ལྷག་བསམ་དག་པའི་ཁྱད་པར་དུ་བྱས་པའི་སེམས་བྱུང་སེམས་པ་དེ་ཉིད། ད་རེས་བདེན་གཉིས་དབྱེར་མེད་ཟུང་འཇུག་གི་ཉམས་ལེན་ལ་རྟེན་དང་བརྟེན་པའི་ཟླ་བ་རྡོ་རྗེས་ཚོགས་གཉིས་ཟུང་དུ་འཇུག་པའི་ཐབས་ཁྱད་པར་ཅན་གྱི་སྔགས་ལམ་ནས། ཀུན་རྫོབ་སེམས་བསྐྱེད་དང་དོན་དམ་སེམས་བསྐྱེད་གཉིས་ཀ་སྟབས་གཅིག་ཏུ་བླངས་པ་རེད། འོ་ན་དོན་དམ་སེམས་བསྐྱེད་ཆོ་གས་ལེན་ན་མདོ་སྔགས་གཉིས་ཀ་འགལ་ལམ་སྙམ་ན་མི་འགལ་ཏེ། འདི་ཡེ་དག་སེམས་ཀྱི་ངོ་བོ་ཟླ་དཀྱིལ་དྲི་མེད་ཀྱིས་མཚོན་པའི་རྟེན་ལ། བརྟེན་པ་རྡོ་རྗེ་དཀར་པོ་རྩེ་ལྔ་བསྒོམ་རྒྱུ། རྡོ་རྗེ་ནི་སྟོང་ཉིད་ཀྱི་དོན་རེད། རྩེ་ལྔ་རིགས་ལྔ་ཡེ་ཤེས་ལྔ་མཚོན་བྱེད་ཡིན་དུས། འདི་སྔགས་ཀྱི་ཆོ་ག་ཁྱད་པར་ཅན་ལ་བརྟེན་ཏེ་དོན་དུ་དོན་དམ་སེམས་བསྐྱེད་ཆོས་ཉིད་ཀྱིས་ཐོབ་པ་རེད། འོ་ན་ཆོས་ཉིད་ཀྱི་བདེན་པ་མཐོང་བ་མཐོང་ལམ་ཐོབ་དུས་རེད། དཔེའི་ཡེ་ཤེས་མ་ཐོབ་པ་ཞིག་གིས་དོན་གྱི་ཡེ་ཤེས་ཇི་ལྟར་ཐོབ་བསམ་རྒྱུ་རེད་དེ། ཆོས་ཉིད་ཀྱི་རང་མཚན་ཇི་ལྟ་བ་གཟིགས་པ་ནི་འཕགས་ས་ཐོབ་དུས་ཡིན་ཡང་། དེའི་དོན་སྤྱི་ནི་ཚོགས་སྦྱོར་གྱི་སྐབས་ནས་ཀྱང་སྒོམ་ཆོག་པ་རེད། ཁྱད་པར་དུ་ཆོས་ཉིད་རང་གི་ངོ་བོ་དེ་གསར་བྱུང་བཅོས་མ་གཞན་ནས་འཚོལ་རྒྱུ་ཞིག་མ་ཡིན་པར། ཡེ་ནས་སེམས་ཀྱི་ཆོས་ཉིད་དུ་གནས་པའི་རྒྱུ་མཚན་དེས། རང་ལམ་རྒྱུ་ཡི་ཐེག་པ་ལས་འཕགས་པའི་མྱུར་ལམ་སྔགས་ཀྱི་ཁྱད་ཆོས་འབྲས་བུ་ལམ་བྱེད་འདི་དག་གི་ཁྱད་པར་གྱིས་ཕྱེས་པ་རེད། དེ་ལྟར་ན་སྔགས་ཀྱི་ཆོ་གས་དོན་དམ་སེམས་བསྐྱེད་ལེན་རྒྱུ་དེ་ཡང་ངེས་དོན་མ་ཡིན་པར་མཐའ་གཅིག་ཏུ་སྒྲུབ་དགོས་ན། ཨིནྡྲ་བྷུ་ཏི་མཚན་གཞིར་བཞག་ན་ཡང་སྐབས་ཐོབ་ཀྱི་གོ་བས་མ་དད་ན་སྒྲུབ་མ་བདེ་པ་ཡོང་དུས་ཀྱང་ཡོད། འདིར་ཡང་དབང་ཆོག་རྗེས་ཟློས་སོགས་བྱས་མཐར་གསུང་འཕྲོས་གནང་བ། འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ཐོབ། །དམ་ཚིག་བདུད་རྩིའི་ཆུ་ཐུངས་ཤིག། །ས་མ་ཡ་ཨི་དན་ན་ར་ཀན། །ཞེས་གསུངས་པ་རེད། འདི་ལ་དམ་ཚིག་བདུད་རྩིའི་མནའ་ཆུ་གསུངས་པ་རེད། འདིའི་དམ་ཚིག་གསུངས་རྒྱུ་འདི། དམ་ཚིག་སྤྱི་དང་ཁྱད་པར་དུ་རྩ་ལྟུང་བདུན་པ་དམིགས་ཀྱིས་བཀར་ཏེ་གསུངས་པ་ཞིག་རེད། སྔགས་བླ་མེད་ཀྱི་གསང་བའི་དཀྱིལ་འཁོར་ལ་ཞུགས་ནས་མཆོག་ཏུ་གསང་བ་ཆེན་པོའི་རང་བྱུང་གི་ཡེ་ཤེས་རང་ལ་བཞུགས་པ་དེ་ཉིད། སྔགས་ཐབས་མཁས་ཀྱིས་བཙན་ཐབས་སུ་བསྐྱེད་དགོས་དུས། སྔགས་ཀྱི་སྡོམ་པས་རྒྱུད་སྡོམ་དགོས་པ་རེད། དེ་ཡང་དབང་ཐོབ་པ་ལ་རག་ལས་པས། དབང་སྲོག་རྒྱུད་ལ་འཛིན་པ་དམ་ཚིག་རེད། ཁེ་ཆེ་སར་ཉེན་ཡོད་པ་ཆོས་ཉིད་ཡིན་དུས། འདི་ལ་རྡོ་རྗེ་བདུད་རྩིའི་མནའ་ཆུ་གསུངས་རྒྱུ་དེ། རྡོ་རྗེ་ནི་འགྱུར་བ་མེད་པ་རང་བྱུང་ཆོས་ཉིད་གསང་བའི་དོན་དེ་ཉིད་མཚོན་པ་ཡིན་ན། དེ་ལྟར་མཚོན་བྱེད་རྫས་ཀྱི་རྡོ་རྗེ་མགོ་ཐོག་ལ་བཞག རང་བྱུང་གསང་བའི་གྲོལ་བྱེད་ཀྱི་བདུད་རྩི་དམ་ཚིག་བསྲུང་བར་ཁས་ལེན་པ་མནའ་ཆུར་བྱིན་གྱིས་རླབས་པ་འདི་འཐུངས་ནས་ཁོག་ལ་སོང་དུས་དམ་སྲུང་གི་གང་ཟག་ལ་ཡེ་ཤེས་སེམས་དཔར་གྱུར་ཏེ་བྱིན་རླབས་རང་ཤུགས་ཀྱིས་འབྱུང་རྒྱུ། དངོས་གྲུབ་མ་སྒྲུབ་པ་ཡང་འགྲུབ་པ་དང་། དམ་ཉམས་ཀྱི་གང་ཟག་ལ་སྲོག་གཅོད་སྡིག་པ་མགོ་དགུར་གྱུར་ནས་ཉམས་པ་བྱེད་པ་ཡིན་རྒྱུ། འདི་ཡིན་པ་ལྕེ་ཐོག་གཞག་རྒྱུའི་ཆུ་ཐིགས་ཤིག་ཡིན་ཡང་། དོན་ལ་གསང་བའི་དཀྱིལ་འཁོར་ཆེན་པོའི་རྡོ་རྗེའི་དམ་ཆུ་ཡིན་པས་ན། འབབ་པ་སྙིང་ལ་བབས་ནས་འབྲས་བུ་བཟང་ངན་ཁེ་ཉེན་ཅན་ལ་འགྱུར་རྒྱུའི་དམ་ཚིག་རེད། དེའི་དབང་གིས་འདིའི་ལུང་དོན་སྲོག་ལ་བབས་ཀྱང་འབད་པར་བྱ་འོས་པ་ཞིག་རེད། ཡང་དབང་ཆོག་ཉུང་ཙམ་སོང་རྗེས་ཀྱི་གསུང་འཕྲོས། སྤྱིར་དབང་བསྐུར་རྒྱུ་འདིར་སྨིན་སློབ་ཞིག་དང་མོས་སློབ་ཞིག་གི་གཉིས་ཀྱི་ཁྱད་པར་ཡོད། སྤྱིར་བཏང་གི་རྐྱེན་སེལ་དང་། སྒྲིབ་སྦྱོང་ཙམ་ལ་བསྐུར་བའི་སྐབས་ལ་འདིའི་སྡོམ་བཟུང་ཁྱད་པར་བ་འདི་དག་དང་མཆོག་དབང་གོང་མ་རྣམ་གསུམ་བསྐུར་མི་ཉན། དེའི་དབང་བསྐུར་ཡུལ་གྱི་ཁྱད་པར་ཕྱེས་ནས་ཆོ་གའི་དབྱེ་བསྡུ་བྱེད་རྒྱུ་དེ་དག་དོན་ལ་སྟོན་པ་ཡིན་པས་གནད་ཤིན་ཏུ་ཆེ། སྤྱིར་བཏང་བ་ལ་གོང་གི་སྤྱིའི་སྡོམ་བཟུང་དབང་གི་སྟ་གོན་སྐབས་ལ་འབྱུང་རྒྱུ་དེ་འདྲ་ཞིག་གིས་ཆོག་པ་རེད། འདི་ལྟ་བུའི་སྨིན་སློབ་སྐབས་ལ་སྡོམ་བཟུང་ཁྱད་པར་བ་འདི་དགོས་པ་རེད། འདི་ཇི་བཞིན་དུ་བསྒྲགས་ཤིང་དེ་བཞིན་དུ་ཁས་ལེན་དགོས་པར་མ་ཚད། གོང་དུ་དམ་ཚིག་གི་མནའ་ཆུས་དམ་ལ་བཞག་པ་བཞིན་དུ། དམ་ཚིག་སྲུང་རྒྱུ་ལ་འབད་པ་ཆ་ཚང་གིས་མ་བསྐྱེད་པར་གང་བྱུང་དེས་ཆོག་བྱས་ན། ཉམས་པའི་གནས་ལ་ལྷུང་ནས་ཚེ་འདི་ལ་ནད་དང་གདོན་སོགས་མི་འདོད་ཉེར་འཚེས་མནར། ཚེ་ཕྱི་མར་དམྱལ་གནས་སུ་ལྟུང་རྒྱུ་དང་། གལ་ཏེ་འགྱོད་གདུང་གིས་ཟིན་ནས་བཤགས་སྦྱོང་བྱས་ཀྱང་རྣམ་སྨིན་གྱི་ཆ་སྦྱོང་ནུས་སྲིད་ཀྱང་། ཡོན་ཏན་དང་དངོས་གྲུབ་ཐོབ་པར་བར་དུ་གཅོད་རྒྱུ་དེ་འདྲ་ཡིན་དུས། དམ་ཚིག་འགལ། ཉམས། འདས་རལ་གྱི་དུས་ཀྱི་དབྱེ་མཚམས་ལྟར། གསོ་མི་རུང་པའི་ཚད་ལ་ཡང་སླེབ་རྒྱུ་ཡོད་པ་སོགས། སྔགས་སྡོམ་དམ་ཚིག་དང་འབྲེལ་བ་ཡིན་དུས་དམ་ཚིག་གི་ཐད་ནས་མ་གཟབ་ན། ཁེ་ཉེན་ཐོབ་ཤོར་གྱི་ཡག་ཉེས་ཆེན་པོ་ཞིག་དེ་ནས་འབྱུང་བ་རེད། དེ་ནས་བདུན་པ་དཀྱིལ་འཁོར་དུ་འཇུག་པ་ནི་གསུངས་ཏེ། དཀྱིལ་འཁོར་དུ་འཇུག་ཚུལ་གང་འདྲ་ཡིན་སྙམ་ན། འདི་བྱ་བ་ལས་ཀྱི་སྒོ་ནས་དངོས་སུ་འཇུག་ཅིང་ཕྱག་བྱ་བ་རེད། འདིའི་སྐབས་སུ་དཀྱིལ་འཁོར་གྱི་གཞལ་མེད་ཁང་དུ་ཞུགས་པའི་བརྡ་རུ་དཀྱིལ་འཁོར་གྱི་ཡོལ་བ་བསལ་ཡོང་བ་རེད། དཀྱིལ་འཁོར་གྱི་ཡོལ་བ་བསལ་རྒྱུ་འདིས་མཚོན་པར་མཛད་པའི་ཕྱག་ལེན་དེ་རེད། ནང་འཇུག་ངོ་མ་ད་དུང་མ་རེད། དབང་གི་དངོས་གཞིའི་སྔོན་ལ་དཀྱིལ་འཁོར་དུ་ངེས་པར་ཞུགས་དགོས་པ་རེད། ཅི་རེད་ཟེར་ན། དཀྱིལ་འཁོར་གྱི་ལྷ་དང་སྐལ་བ་མཉམ་པར་བྱ་བའི་དགོས་པ། མ་འོངས་ལྷའི་གཞལ་ཡས་ཁང་ལ་སོགས་པར་དངོས་སུ་ལོངས་སྤྱོད་པའི་རྟེན་འབྲེལ་ཡིན་པས་ན། དངོས་སུ་བརྡ་འཕྲོད་རྒྱུ་གལ་ཆེ་གསུངས་སོ། དབང་གི་མཚམས་སྦྱོར་འདི་དག་ཚིག་བསྡུས་ནག་འདོན་ཞིག་གིས་ཀྱང་། དོན་གསན་ཐུབ་མཁན་ཡོད་པ་རེད། འོན་ཀྱང་འགའ་རེས་སྒྲ་ཙམ་ཐོས་པ་མ་གཏོགས་དོན་ཡིད་ལ་མ་ངེས་པ་དང་། སེམས་དེའི་ཕྱོགས་ལ་མ་སོང་བར་སྣང་ལ་མ་ངེས་པ་ཡང་འབྱུང་སྲིད་པའི་ཕྱིར་ན། ངས་འདིར་ཞིབ་ཆ་བྱེད་རྒྱུའི་ཚུགས་ཀ་བྱས་ཏེ་བཤད་པ་ཡིན། འདི་དབང་གཞན་གྱི་སློབ་མ་ལྷར་བསྐྱེད་དང་གཅིག་མཚུངས་རེད། དབང་ཆོག་ཉུང་ངུར་གསུངས་མཐར། འདིའི་འོག་སྔགས་ཚིག་དང་སྦྲགས་ཡོང་དུས། ཕྱོགས་བཞིའི་སྒོ་བཞི་བོ་མཉམ་དུ་ཤག་གིས་ཕྱེ་བ་བསམ་དགོས་པ་རེད། འདིའི་ཤག་ཟེར་རྒྱུ་འདི་རོང་སྐད་ལ་སྒྲ་འདྲ་མོ་ཞིག་ཡིན་ཡང་ཕྱག་ལག་གི་ཕྱག་མ་རེད། ཐལ་གྱིས་ཕྱེས་པའི་སྒྲའི་རྣམ་པ་མཚོན་བྱེད་ཅིག་རེད། དཀྱིལ་འཁོར་ལ་སྒོ་བཞི་ཡོད་པ་དེ་ཚད་མེད་བཞི་མཚོན་པའི་དག་སྦྱོར་རེད། སྔགས་ཀྱི་སྐབས་ལ་ཚད་མེད་བཞི་གསུངས་པ་དེ། མཚན་མེད། སྨོན་མེད། སྟོང་ཉིད། འདུས་མ་བྱས་པ་དང་བཞི་རེད། འདིའི་ཨ་ཁཾ་ཝ་ར། ཞེས་པའི་སྔགས་འདི་ཚད་མེད་བཞིའི་ཕྱག་རྒྱ་དང་བཅས་ཏེ། སྒོ་དབྱེ་བར་བྱེད་པ་ཞིག་ལ་གསུངས་ཡོད་པ་རེད། རེད་དེ་སྤྱི་རྒྱུད་ཀྱི་ཕྱག་ལེན་ལ་སྒོ་དབྱེའི་རྒྱ་དང་བཅས་ཏེ་དབྱེ་རྒྱུ་ཞིག་རེད། འདིའི་སྒོ་དབྱེའི་རྒྱ་དང་། བསྒྲལ་བའི་ལྷ་དབྱེའི་རྒྱ་གཉིས་ཀ་གཅིག་ཏུ་སེམས་མི་ཉན། དཀྱིལ་འཁོར་གྱི་སྒོ་ཤག་གིས་ཕྱེས་པའི་མོས་པར་མཛོད། གསུངས་པས། དེའི་མཚམས་ནས་དཀྱིལ་འཁོར་གྱི་སྒོ་དངོས་སུ་ཕྱེ་བའི་སྔགས་འདོན་རྒྱུ་ཡིན། ཡང་དབང་ཆོག་ཉུང་ངུར་གསུངས་མཐར། འདིའི་ཕྱག་འདི་ནི། དཀྱིལ་འཁོར་དུ་འཇུག་པའི་རྡོ་རྗེའི་དམ་ཚིག་ཅིག་རེད། འདི་ཡིན་རྒྱུ་སྐུ་གསུང་ཐུགས་ཕྱག་རེད། ལན་བཞི་ལ་འཚལ་དགོས། རྒྱུ་མཚན་ནི། དཀྱིལ་འཁོར་ཆེན་པོའི་སྒོ་བཞི་ནས་རིམ་པར་ཞུགས་དགོས་པས་ཐེངས་བཞིར་འཚལ་དགོས་པ་རེད། དེ་ཡང་ནང་གི་དཀྱིལ་འཁོར་གྱི་ལྷ་ཚོགས་སྐུ་གསུང་ཐུགས་ལ་ཕྱག་འཚལ་བ་རེད། འདི་བདག་དང་ལྷ་ལ་བཟང་ངན་དུ་བལྟས་པ་མ་ཡིན། གཉིས་འཛིན་སྤྲོས་བའི་མཚན་མ་དང་བྲལ་བ་ཞིག་གི་སྒོ་ནས། རང་སྣང་དོན་གྱི་དཀྱིལ་འཁོར་ཆེན་པོར་བཞུགས་པའི་རང་རིག་ཡེ་ཤེས་ཀྱི་ལྷ་ཚོགས་རང་ངོ་ཤེས་པར་ཕྱག་འཚལ་བ་ཡིན་པས་དོན་དང་མཐུན་པའི་ཕྱག་རེད། ད་ནི་རྗེས་བཟློས་དང་བཅས་ཏེ་ཕྱག་རྒྱ་གནས་གསུམ་ལ་སྦྱར་ཏེ་ཕྱག་འཚལ་དགོས། ཞེས་གསུངས་ཏེ་ཀུན་གྱིས་རྗེས་ཟློས་དང་བཅས་ཕྱག་འཚལ་བའི་མཐར། དེའི་ཡན་གྱིས་ཕྱི་འཇུག་སོང་སྟེ། གཉིས་པ་ནང་འཇུག་ལ་བཞི་ལས་ཞེས་གསུངས་ཡོད་པས། བཞི་བོ་གང་ཡིན་ཟེར་ན། ཡེ་ཤེས་དབབ་པ། མེ་ཏོག་དོར་བ། མིག་དབྱེ། དཀྱིལ་འཁོར་བསྟན་པ། དེ་རྣམས་རེད། དབང་ཆོག་གསུངས་མཐར། དམིགས་པའི་མཚན་མ་ཞིག་ཡིད་ལ་བྱེད་དགོས་དུས་རྣམ་རྟོག་གི་འཕྲོ་འདུ་ཞིག་མིན་ན་ཐབས་མེད་རེད། མི་རྟོག་པའི་ངང་ལས་རྟོག་པ་ཅི་འདྲ་བྱས་ནས་འཆར་དགོས་རེད་བསམ་ན། རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད། །ཅེས་གསུངས་ཡོད་པས། དམིགས་བསམ་འཕྲོ་འདུ་དང་བྲལ་བའི་ཆོས་ཉིད་རྣམ་པར་མི་རྟོག་པའི་རྩལ་དེ་ཉིད། ཤེས་རབ་ཀྱི་སྣང་ཆ་ཤར་བ་དེས་མ་འགག་སྣང་སྟོང་རོལ་བའི་བསམ་ཡས་སྒྱུ་འཕྲུལ་གྱི་བཀོད་པ་ཅིར་ཡང་འཆར་ཞིང་ཅིར་ཡང་སྣང་དུ་རུང་བ་མི་རྟོག་མཁའ་ལྟར་ཡངས་པའི་ཆོས་ཉིད་ཀྱི་གོ་འབྱེད་པ། དབྱིངས་རིག་དབྱེར་མེད་གདངས་སུ་ཤར་བ་དེ་ལྷག་པར་འཐད་ཅིང་རུང་བ་ཡིན་པར་གྲུབ། དེ་ལྟར་མིན་ན་ལྟ་བ་མི་རྟོག་ཅང་མེད་ཅིག་ལ། སྒོམ་པ་མེད་སྣང་སྟོང་རྐྱང་ཞིག་ལས་མེད་དུས། འབྲས་བུ་ཐུགས་རྗེ་ཕྱོགས་མེད་དུ་འཆར་བའི་མཁྱེན་གཉིས་ཀྱི་ཡེ་ཤེས་འགྲུབ་དཀའ་བས་ན་དབྱིངས་རིག་དབྱེར་མེད་འོད་གསལ་འདུས་མ་བྱས་པའི་ཆོས་སྐུའི་དགོངས་པ་ཡང་རྙེད་དཀའ། དབང་ནི་ལྷ་ལ་མི་ཞུ་བླ་མར་ཞུ་གསུངས་བས། སློབ་དཔོན་དཀྱིལ་འཁོར་གྱི་གཙོ་བོ་དང་གཉིས་མེད་ཀྱི་འདུ་ཤེས་འཛིན་རྒྱུ་དེ་ནི་འདི་མན་ཆད་དབང་བསྐུར་ཐམས་ཅད་ཀྱི་ཁྱབ་བྱེད་རེད། འདི་དཀྱིལ་འཁོར་གྱི་ཆོ་ག་སྤྱིའི་འགྲོས་དང་བསྟུན་ན་སློབ་མ་ལྷར་བསྐྱེད་ཀྱི་དགོས་དོན་ཡང་ཚང་བས། དཀྱིལ་འཁོར་གྱི་བདག་པོའི་སྲས་སུ་བསྐྱེད་པ་སོགས་ཀྱི་དམིགས་འདུན་འདིའི་ཚིག་རྗེས་དོན་དྲན་མཛད་དགོས། འདིར་དབང་ཆོག་གསུངས་ནས། འདིའི་བྱིན་འབེབས་བྱེད་ངོ་མ་དེ་ནི། འཕགས་མཆོག་ཐུགས་རྗེ་བཞག་སྟེ་ཆོག་ཁྲིགས་མཛད་འདུག འཕགས་མཆོག་ཐུགས་རྗེ་འདི། སྔ་འགྱུར་བཀའ་མའི་ལུགས་ཀྱི་སྤྱི་འགྲོས་ལ་འབྱུང་རྒྱུ་ཞིག་རེད། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །ལ་སོགས་པ་རེད། འདི་ལ་བབ་དྲུག་མ་ཡང་ཟེར་བ་རེད། འདི་བྱིན་དབབ་པ་དང་བསྡུ་བ་གཉིས་ཀྱི་ཁོངས་སུ་བསྡུས་ནས་བཤད་དུས། ཚིག་རྐང་སྔོན་མ་དྲུག་འདིས་དུས་གསོལ་བའི་སྒོ་ནས་ཐུགས་རྒྱུད་སྐུལ་བ་རེད། དེའི་རྗེས་ཀྱི་བཅོམ་ལྡན་འདས་ཞེས་པའི་ཚིག་མཐའ་ཅན་བཞི་འདིས། ཉེ་བའི་ཚིག་དང་སྦྱར་ནས་འདོད་དོན་ཞུ་བ་རེད། ཚིག་ཐ་མ། བདག་ཅག་ལས་འབྲས་མཆིས་པར་མཛོད་གསུངས་རྒྱུ་འདིས་དོན་བསྡུས་ཏེ་གསོལ་བ་བཏབ་པ་རེད། འདིའི་འཕགས་མཆོག་འདི་གང་ལ་གོ་རྒྱུ་རེད་འཕགས་བཞིའི་ནང་གི་གང་རེད་ཟེར་ན། སངས་རྒྱས་འཕགས་པ་ལ་གོ་རྒྱུ་རེད། དེ་ཡང་མཆོག་གསུམ་རྩ་གསུམ་ཀུན་འདུས། དཀྱིལ་འཁོར་གྱི་གཙོ་བདག་དང་གཉིས་སུ་མ་མཆིས་པའི་རང་བྱུང་གཉུག་མ་དོན་གྱི་ལྷ་རེད། ཐུགས་རྗེ་ནི། མཁྱེན་བརྩེ་ཡེ་ཤེས་ལ་གོ་རྒྱུ་རེད། དེ་ལ་ཡང་དབྱེ་བ་ཕྱེས་ཡོང་ན། རྟག་པ་རྒྱུན་གྱི་ཐུགས་རྗེ། རང་བཞིན་ཤུགས་ཀྱི་ཐུགས་རྗེ། སྐུལ་ཞིང་གསོལ་བ་བཏབ་པའི་ཐུགས་རྗེ། གདུལ་བྱ་ཡུལ་དང་འཕྲད་པའི་ཐུགས་རྗེ། ཞེས་གསུངས་པ་ལྟར། རྟག་པ་རྒྱུན་གྱི་ཐུགས་རྗེ་ནི། དུས་ལས་མི་ཡོལ་བ་ཆུ་བོའི་རྒྱུན་ལྟ་བུ་ཞིག རང་བཞིན་ཤུགས་ཀྱི་ཐུགས་རྗེ་ནི། རྩོལ་མེད་ངང་གིས་འབྱུང་བ་ཆུ་བོའི་རྒྱུན་ལྟ་བུ་ཞིག སྐུལ་ཞིང་གསོལ་བ་བཏབ་པའི་ཐུགས་རྗེ་ནི། སྙིང་རྗེ་ཅན་གྱི་སྒོ་ཁ་ནས་དབུལ་བོ་ཞིག་གིས་ནོར་སློང་བ་འདྲ་ཞིག གདུལ་བྱའི་ཡུལ་དང་འཕྲད་པའི་ཐུགས་རྗེ་ནི། མ་ཡིས་བུ་ལ་བརྩེ་བ་འདྲ་འདྲ་ཡིན་ཡང་ནད་ཀྱིས་མནར་བའི་བུ་ལ་ལྷག་པར་བརྩེ་བ་བཞིན་ཡིན་གསུངས་པ་འོ། དེའི་ཕྱིར་ན། ཁྱད་པར་ཅན་གྱི་གསང་བ་ཟབ་མོའི་ལམ་གྱི་སྣོད་རུང་གི་རྣལ་འབྱོར་གྲུབ་པ་ཕོ་མོ་ལ། ཁྱད་པར་ཅན་གྱི་མཐུན་རྐྱེན་དངོས་གྲུབ་དེ་དུས་ཕྱི་མའི་མཐའ་ལ་ལྟོས་མི་དགོས་པར་ད་ལྟ་ཉིད་དུ་བསྟན་པའི་དུས་ལ་བབ། ཅེས་ཚིག་རྐང་གཉིས་པོས་ཐུགས་རྗེ་བྱེ་བྲག་ཏུ་བསྐུལ་ནས། མཐུ་རྩལ་དབྱུང་བའི་དུས་ལ་བབ། ཅེས་པས་ནུས་པ་མཐུ་ཡི་ཁྱད་པར་བསྟན། བྱིན་གྱིས་རླབས་པའི་དུས་ལ་བབ། ཅེས་པས་བྱིན་རླབས་ཀྱི་ཁྱད་པར་བསྟན། དབང་མཆོག་བསྐུར་བའི་དུས་ལ་བབ། ཅེས་པས་སྨིན་པ་དབང་གི་ཁྱད་པར་བསྟན། དེའི་འཕྲོར་དབང་མཆོག་སྩོལ་བའི་དུས་ལ་བབ། ཅེས་པས་འབྲས་བུ་དངོས་གྲུབ་ཀྱི་ཁྱད་པར་བསྟན་པ་རེད། ཚིག་ཐ་མ་དོན་བསྡུས་ཏེ་གསོལ་བ་བཏབ་པ། བདག་ཅག་ལས་འབྲས་མཆིས་པར་མཛོད་གསུངས་རྒྱུ་འདིས་བདག་ཅག་རྣལ་འབྱོར་པས་བསྒྲུབ་བའི་དཀྱིལ་འཁོར་བཤམས། མཆོད་པའི་ཡོ་བྱད་བསྒྲིགས། རིམ་གཉིས་སྨིན་གྲོལ་ལ་སྤྱོད་པའི་ལས་ཀྱི་འབྲས་བུ་ཐུན་མིན་མཆོག་གི་དངོས་གྲུབ་ད་ལྟ་ཉིད་དུ་སྩོལ། ཞེས་པའི་དོན་རེད། འདིའི་འགྲེལ་བ། པདྨ་བཛྲའི་ལེགས་བཤད་སྤྲིན་གྱི་རོལ་མོར་གཟིགས་དང་། རྒྱུད་སྒྱུ་འཕྲུལ་དྲྭ་བའི་དགོངས་དོན་མ་ཧཱ་རང་གཞུང་དང་མཐུན་ཞིང་མ་ཧཱའི་ཨ་ཏི་ལྟར་དུ་བཀྲལ་བའི་དགོངས་གནད་ཚང་བ་ཞིག་ཞིབ་རྒྱས་ཀྱིས་བཀྲལ་མཛད་ཡོད་པ་རེད། ཡང་དབང་ཆོག་སོགས་གསུངས་མཐར། འདི་ནས་སྔགས་ལ། ཨཱོཾ་བོདྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱཏུ་ཨ་སོགས་གསུངས་ཡོད་པ་རེད། འདིའི་སྔགས་འདི་བྱིན་རླབས་དངོས་གྲུབ་ཐམས་ཅད་སྡུད་པར་བྱེད་པའི་འབེབས་སྔགས་ཤིག་རེད། འདི་གསང་སྔགས་དང་རིགས་སྔགས་གཟུངས་སྔགས་གསུམ་གྱི་ནང་ནས་གཟུངས་སྔགས་རེད། ནམ་མཁའ་ལྷའི་འཁོར་ལོར་ཤར་བའི་ལྷ་ཚོགས་ཐམས་ཅད། བདག་དང་། གནས་དང་། བསྒྲུབ་རྫས་ཡོ་བྱད་དང་བཅས་པ་གོང་ནས་གསུངས་བ་བཞིན་དུ། སྐུ་ཕྱག་རྒྱ། གསུང་ཡིག་འབྲི། ཐུགས་ཕྱག་མཚན་གྱི་རྣམ་པ། འདིའི་ཆོག་ཁྲིགས་ཀྱི་ནང་ན་ཇི་ལྟར་ཡོད་པ་བཞིན་དུ་རེད། ཆོག་ཁྲིགས་ཀྱི་ནང་ན་བྱེ་ཚན་ལ་ཁ་བ་བབས་པ་གསུངས་ཡོད་ཀྱང་། ཁ་ཆར་རྒྱ་མཚོར་ཐིམ་པ་ལྟ་བུར་དམིགས་ན་ཡང་ཆོག་པ་རེད། རྫོགས་ཆེན་ཁྲིད་ཀྱི་སྐབས་ལ་ཐུགས་ཁྲིད་རང་གྲོལ་གྱི་གདམས་པ་གསུངས་དུས། རྡོ་ཚན་ལ་ཁ་བ་བབས་པ་ལྟར་གསུངས་པ་དེ་རྗེས་མེད་རང་ཡལ་འགྲོ་རྒྱུའི་དཔེ་དོན་ཞིག་དང་ཕྱོགས་ཀུན་མཚུངས་པ་ཞིག་རེད། འདི་རང་ཐུམ་ངོ་བོ་གཅིག་པ། ཆོས་ཉིད་ནང་ཁྲིད་ཀྱི་ཡེ་ཤེས། ཆར་བ་ཆུར་ཐིམ་ལ་དཔེ་བཞག་ན་གོ་བརྡ་འཇགས་སླ་བའི་དཔེ་རེད། འབེབས་སྔགས་འདི་ཚོས་མཐའ་ལ་རྒྱལ་བ་ཐམས་ཅད་ཀྱི་ཐུགས་ཀྱི་ཡེ་ཤེས་ཀྱི་སྙིང་པོ་ཡི་གེ་ཧཱུྃ་གསུམ་བསྟུད་བྱས་ནས་གསུངས་རྒྱུ་དང་། སྐྱེ་མེད་ཆོས་ཉིད་ཀྱི་ཨ་ཡིག་གཉིས་བསྟུད་གསུམ་བསྟུད་ལ་འབྱུང་རྒྱུ་དེ་ཚོའི་དང་པོས་བྱིན་རླབས་སྐུལ། གཉིས་པས་འབེབས། གསུམ་པས་བརྟན་པར་བྱེད་པའི་རྣམ་བཞག་བྱས་ཏེ་བཤད་ཆོག་པ་རེད། ཡང་དབང་ཆོག་གསུངས་མཐར། ཡི་གེ་འདིའི་ཆོག་ཁྲིགས་ཀྱི་ནང་ན་ཡིག་ནོར་ངན་པ་ཞིག་འདུག བྱིན་འབེབས་པའི་ཡེ་ཤེས་པ་རྣམ་ཤེས་རྡོ་རྗེའི་ཆོས་བདུན་གྱི་རྣམ་རོལ་དུ་བརྟན་པར་གྱུར་ཅིག་གསུངས་འདུག ངས་ནི། ཡེ་ཤེས་པ་རྣམས་རྡོ་རྗེའི་ཆོས་བདུན་གྱི་རྣམ་རོལ་དུ་བརྟན་པར་གྱུར་ཅིག ཅེས་རྣམ་ལ་ཡང་འཇུག་སྦྱར་བ་དང་ཤེས་ཕར་བསྣོགས་ཏེ་བཏོན་ཡོད། གལ་ཏེ་རྣམ་ཤེས་རྡོ་རྗེའི་ཆོས་བདུན་ལ་བརྟན་དགོས་དུས་ཕྱི་རོལ་བའི་བདག གཙང་བདེ་རྟག་བདག་ཅན་པོ་ལྟ་བུ་ཞིག་ལ་གོ་གི་ཡིན་ན། གཞན་ཡང་འདིས་རྟོན་པ་བཞི་གོ་ལྡོག་ཀྱང་བྱས་འདུག རྒྱུ་མཚན་ནི། ཡེ་ཤེས་ལ་མི་རྟོན་རྣམ་ཤེས་ལ་རྟོན། གསུངས་པ་ཐལ་བ་དང་། གཞན་ལུང་དང་ཡང་འགལ་བ་རེད། ཇི་ལྟར་འགལ་ཞེ་ན། འདིའི་ཕུག་ངོ་མ་དེ་འདིའི་ཆོག་ཁྲིགས་འདི་གྲོ་ཐིག་གི་དབང་གིས་ཚུར་བཀབ་པ་ཞིག་རེད། དེ་ཡིན་ན་བྱིན་ཕེབས་པའི་ཡེ་ཤེས་པ་རྣམས་རྡོ་རྗེའི་ཆོས་བདུན་གྱི་རྣམ་རོལ་དུ་བརྟན་པར་གྱུར་ཅིག་ཟེར་རྒྱུ་རེད། སྤྱིར་ན། དེང་སང་གི་དཔེ་ཆ་ལ་ཡིག་ནོར་རྩི་ཚོད་ཅི་ཡོད། ཉམས་ཆུང་ཡིག་ལས་པ་གླ་ཆ་ལེན་པའི་མི་ལ་ཁག་ཀྱང་མི་འདུག ཡིག་ནོར་ཆེན་པོ་འདིས་མགོ་ཆེན་པོ་གཡོག་འགྲོ་རེད། དེ་སྔོན་བླ་རྒན་བུམ་རིལ་འཛིན་མཁན་ཆ་རེ་མགོ་འཁོར་ལོས་ཡོད། ད་རུང་ཕྱིས་སུ་ཡིན་ན་བུམ་པ་ཉོ་སྤྱད་ཡོད་མཁན་འགའ་རེ་ཡང་ལམ་ལོག་ལ་གཏོང་རྒྱུ་རེད་བསམ་ནས། ངས་བཤད་པ་ཡིན། དེ་དག་སོང་ནས་ད་ནི། ཏིཥྛ་བཛྲ་གྱིས་བརྟན་པར་བྱས་པ་རེད། རྡོ་རྗེ་ལྟར་བརྟན་པར་བྱས་པའི་སྔགས་རེད། དེའི་ཡན་གྱིས་བྱིན་འབེབས་པ་སོང་སྟེ། གཉིས་པ་མེ་ཏོག་འདོར་བ་ནི་གསུངས་འདུག མེ་ཏོག་འདོར་བའི་དཀྱིལ་འཁོར་འདུ་བྱས་ལ་གསུངས་པ་རེད། ངོ་མ་བྱས་ན་དཀྱིལ་འཁོར་རང་ལ་འབུལ་རྒྱུ་རེད་དེ། འོན་ཀྱང་འཇུག་པ་བདེ་ཆེད་དུ་དེང་སང་གི་ཕྱག་ལེན་ལ་འདི་བཞིན་དར་སོང་བས། དཀྱིལ་འཁོར་མཚོན་བྱེད་རིགས་ལྔའི་རང་བཞིན་ཅན་ཚོམ་བུ་འདུ་བྱས་ཡོད་པ་ལ། རིགས་ལྔའི་དཀྱིལ་འཁོར་དངོས་ཀྱི་འདུ་ཤེས་གཟུང་དགོས་པ་རེད། རིགས་ལྔའི་དཀྱིལ་འཁོར་དངོས་ཀྱི་འདུ་ཤེས་བཟུང་སྟེ་ལྷག་པའི་ལྷ་གང་ཡིན་པ་ལ། མེ་ཏོག་འདི་འབབ་པར་ཤོག་བསམ་ནས་མེ་ཏོག་འདོར་དགོས་པ་རེད། སྤྱིར་ཡིན་ན་ལྷག་པའི་ལྷ་དང་། མོས་པའི་ལྷ། བབ་པའི་ལྷ་ཟེར་རྒྱུ་ཞིག་གི་དབྱེ་བ་ཡོད་རེད་དེ། ད་རེས་རང་ཉིད་ལས་འབྲེལ་གང་ལ་ཡོད་པའི་ལྷག་ལྷ་ལ་འབབ་པར་སྨོན་འདུན་རྩེ་གཅིག་ལ་གཏད་ནས་འཕེན་དུས། བབ་ལྷ་དང་། ལྷག་ལྷ་གཅིག་ལ་མོས་ཤིང་འདུན་པའི་ལྷ་མཆོག་རེད་འགྲོ་བ་རེད། ཡང་དབང་ཆོག་གསུངས་མཐར། སྔོན་ཡིན་ན་དབང་བསྐུར་ཡུལ་དེ་སྣོད་ལྡན་གྱི་སློབ་མ་གཅིག་གམ་བདུན་ཙམ་ཡིན་པས། དེ་ནི་ཞིབ་ཕྲའི་ཕྱག་ལེན་མཛད་ལུགས་ཡིན། དེང་སང་བརྒྱ་ཚོ་སྟོང་ཚོ་རེད། ངོ་མར་བཤད་ན། སྣོད་དང་ལྡན་མི་ལྡན་ཞིག་ཕར་ཞོག་གཅིག་ངོ་གཅིག་གིས་ཀྱང་ཤེས་དཀའ་བར་སྣང་། འོན་ཀྱང་སྡེ་སྣོད་འཛིན་པའི་སྡེ་ཆེན་པོ་འདི་ནི་ཕྱག་དང་མཆོད་པའི་ཡུལ་ཡིན་པས། དབང་རྒྱུན་རེ་མཆོད་པའི་ཚུལ་དུ་འབུལ་རྒྱུ་བྱུང་བས་སྤྲོ་བ་དང་ལྡན་ཏེ་འདོན་གྱིན་ཡོད། དེ་ནས་རྟེན་འབྲེལ་རྫས་ཀྱི་མེ་ཏོག་དེ། རྟེན་འབྲེལ་བརྡ་མཚོན་རེད་འགྲོ་རྒྱུ་ཡོངས་ཁྱབ་ཀྱི་རྒྱུན་སྲོལ། ང་ཚོ་ཐ་མལ་པ་ཞིག་གིས། ཡང་ལས་དང་དག་བཅོས་མ་མཛའ་པ་ཞིག་བྱེད་མི་འབབ་གི། ཡང་དབང་ཆོག་མཐར། འདིར་བཞུགས་ནང་གི་མང་ཆེ་བར། སྔར་གསང་སྔགས་ཀྱི་དབང་གི་དཀྱིལ་འཁོར་གོང་མ་ནས་གསང་མཚན་ཕུལ་མྱོང་བ་རེད་འདུག དེའི་ཆོག་པ་རེད། ཡང་འགའ་རེར་ཐེངས་ཆ་རེ་བཏགས་ས་ཡང་ཡོད། འདུས་པ་མང་ན་དཀྱིལ་འཁོར་གཙོ་བོའི་མཚན་ལས་བྲིས་པ་སྤྱིར་ཡོངས་ཁྱབ་ཀྱིས་བཏགས་ན་ཡང་འགལ་བ་མེད་གསུངས་ཡོད་རེད། དེ་ཡིན་དུས། རྣལ་འབྱོར་བ་ཐམས་ཅད་ལ་ཀུན་བཟང་དཔལ་གྱི་རྡོ་རྗེའམ་ཆེ་མཆོག་ཕྲིན་ལས་གྲུབ་པ་རྩལ་བཏགས། རྣལ་འབྱོར་མ་ཀུན་ལ་དབྱིངས་ཕྱུག་བདེ་ཆེན་དབང་མོའམ་ཡང་ན་གཏུམ་ཆེན་ལས་ཀྱི་ཌ་ཀཱི་སོགས་བཏགས་ན་ཆོག་པར་གསུངས་སོ། དེ་ལྟར་བཏགས་པའི་འདུན་པ་དང་བཅས་ཏེ། འདིའི་འོག་གི་མཚམས་སྦྱོར་དང་བསྔགས་བཏོན་ནས་མེ་ཏོག་ཁྱེད་རྣམ་པའི་དབུ་ཐོག་ལ་འཐོར་ཡོང་དུས། ལས་ཀྱིས་འབྲེལ་བའི་ལྷག་ལྷ་གང་ཡིན་པ་དེས་བྱང་ཆུབ་མ་ཐོབ་བར་དུ་འབྲལ་མེད་རྗེས་སུ་འཛིན་རྒྱུའི་རྟེན་འབྲེལ་ལ། དབང་རྟགས་མེ་ཏོག་གི་ཕྲེང་བ་སྤྱི་བོར་བཅིངས་ཡོང་དུས། དེའི་སྟོབས་ཀྱིས་དབང་གི་ངོ་བོ་སྔར་མེད་བདེ་སྟོང་གི་ཡེ་ཤེས་ཞིག་དང་། ཟག་མེད་ནང་གི་དགའ་བ་ཁྱད་པར་ཅན་རྒྱུད་ལ་སྐྱེ་བའི་མོས་པ་བརྟན་པོར་མཛད་དགོས་རེད། དེ་ཡིན་དུས། གསང་མཚན་རེ་རེ་བཞིན་དུ་ད་རེས་དབང་རྫས་འདྲེན་དུས་འབུལ་རྒྱུ་ཡོད་པ་རེད། ཐུན་མོང་རིག་པའི་དབང་ལྔའི་ནང་གི་མིང་དབང་ཟེར་རྒྱུ་ཞིག་ཡོད་རྒྱུ་དེ། འདི་དང་མཚུངས་པ་ཞིག་རེད། མི་འདྲ་ས་ནི། འདི་རིགས་རྟགས་པ་དང་། གཞན་དེ་མིང་གི་དབང་སྐུར་བའི་ཁྱད་པར་ཡོད་པ་ཞིག་རེད། མིང་དབང་ལ་དྲིལ་བུ་མགོ་ཐོག་ནས་རྡོ་རྗེ་དང་ལྷན་སྦྱར་གྱིས་དཀྲོལ་རྒྱུ། ནམ་མཁའ་གོང་བའི་རྒྱལ་བ་སྲས་བཅས་ཀྱིས་གསང་མཚན་དེ་མགྲིན་དབྱངས་གཅིག་གྱུར་གྱིས་བཏགས་པ་ཡིན་ན། མ་འོངས་པ་ན་དེ་དང་དེའི་མཚན་ཅན་གྱི་རྫོགས་པའི་སངས་རྒྱས་ལ་མངའ་དབང་བསྒྱུར་རྒྱུའི་རྟེན་འབྲེལ་དང་དབུགས་འབྱིན་པ་གཉིས་ཀ་རེད། དེ་བཞིན་དུ་འདིའི་དབང་དུས་སུ་ངེས་པ་རྙེད་ན། ཆོས་ཉིད་བར་དོའི་རྗེས་དྲན་དྲུག་གི་གནས་སྐབས་ལ་ད་ལྟའི་དབང་དུས་ཀྱི་མཚན་ནས་བོས་པའམ་མཚན་དེ་དྲན་སྟོབས་ཀྱིས་གདམས་ངག་ཟབ་མོ་དྲན་རྒྱུ་དང་། དབང་དུས་ཀྱི་ཡེ་ཤེས་དེ་གསལ་ཐེབས་ཏེ་དེའི་ངང་ལ་གྲོལ་བ་དབང་གི་ཆུ་བོའི་སྒོས་ཆོས་ཀྱི་ནུས་པ་སྨིན་རྒྱུ་ཡོད་པ་རེད། དེ་བཞིན་དུ་ད་ལྟའི་སྐབས་ལ་རྒྱུད་དོན་ཀྱི་བཤད་པ་འདི་དག གོ་མ་སོང་ཟེར་ན་ནི་བོད་སྐད་ཡིན་པས་གོ་འདུག་པ་འདྲ། གོ་སོང་བསམ་ན་ཡང་། ཡང་བཤད་མ་ཤེས་པ་ལྟར་གྱུར་ན་ཡང་། ཉོན་དང་ཕྱིན་ཆད་བག་ཆགས་སད་རྒྱུའི་དགོས་པ་ཁྱད་པར་ཅན་ཡོད་པ་རེད། རྗེས་དྲན་དྲུག་གི་སྐབས་སུ། བླ་མ་དྲན་ནས་གདམ་ངག་དྲན་པ་ལ་སོགས་པའི་དགོས་པ། སེམས་ཁྲིད་ཚོའི་ནང་ནས་གསུངས་པ་ལྟར་དུ་རེད། ཡང་དབང་ཆོག་གསུངས་མཐར། དེའི་ཡན་ཆད་རིག་པའི་མེ་ཏོག་འཐོར་བ་སོང་སྟེ། གསུམ་པ་མིག་དབྱེ་བ་ནི། གསུངས་འདུག སྔོན་ཆད་ཀྱི་ལུགས་སྲོལ་ཡིན་ན་སྨན་པ་མཁས་པས་གསེར་གྱི་ཐུར་མ་ལ་མིག་སྨན་བྱུགས་ནས་མིག་ནད་བསལ་དར་བ་རེད། དེ་བཞིན་དུ་འདི་ནས་མཚོན་པ་བརྡའི་མིག་ཐུར་གྱི་རྣམ་པའི་བརྡ་ཐབས་ཀྱིས། མ་རིག་པའི་མིག་ནད་བསལ་ནས་དག་པ་ཡེ་ཤེས་ཀྱི་སྤྱན་འབྱེད་པའི་རྟེན་འབྲེལ་བསྒྲིགས་པའམ། གློ་བུར་མ་དག་འཁྲུལ་བའི་མིག་དེ། མ་འཁྲུལ་དོན་གྱི་གནས་ལུགས་ཡེ་ཤེས་ཀྱི་སྤྱན་དག་པ་མངོན་དུ་འགྱུར་བའི་གསོས་འདེབས་ཤིག་བྱས་པ་རེད། ཡང་དབང་ཆོག་ཉུང་ངུ་ཞིག་གི་མཐར། དེས་གདོང་གཡོག་བསལ་ནས་མིག་དབྱེ་བའི་རྟེན་འབྲེལ་བསྒྲིགབ་པ་ཡིན། འདིའི་མཚམས་ནས་དཀྱིལ་འཁོར་བསྟན་པ་རེད། ཡང་དབང་ཆོག་མཐར། འདིའི་གཞལ་ཡས་ཁང་གི་རྟེན་དང་བརྟེན་པའི་དག་སྦྱོར་དང་བཅས་པ་ནི། ཞིབ་པར་རྩ་རྒྱུད་སྒྱུ་འཕྲུལ་དྲྭ་བའི་རང་གཞུང་གིས་ཤེས་པར་བྱ་དགོས་རེད། འདི་ནས་ལོན་དགོས་པའི་གོ་དོན་ངོ་མ་དེ་གང་ཡིན་ཟེར་ན། མཚོན་བྱེད་དཔེ་ཡི་དཀྱིལ་འཁོར། རྡུལ་ཚོན་དང་། རས་བྲིས། ཚོམ་བུ་དག་རེད། དེ་ཉིད་སྐུ་གསུམ་གྱི་དཀྱིལ་འཁོར་དུ་བྱས་པ། དེ་ཡང་ཇི་ལྟར་ཡིན་ན། དང་པོ་རྣམ་དག་སྤྲུལ་སྐུའི་དཀྱིལ་འཁོར། གཉིས་པ་རྣམ་གྲོལ་ལོངས་སྐུའི་དཀྱིལ་འཁོར། གསུམ་པ་རྣམ་མཁྱེན་ཆོས་སྐུའི་དཀྱིལ་འཁོར། དེ་ཡང་ཡིན་ཏེ། རྣམ་དག་སྤྲུལ་སྐུའི་དཀྱིལ་འཁོར་རང་ལུས་རྡོ་རྗེ་ཕུང་པོའི་གྲོང་ཁྱེར་ལས་གཞན་དུ་མེད་པ་ཤེས་པའི་སྟེང་དུ། ནང་མཚོན་བྱ་དོན་གྱི་བདག་ཉིད་རྣམ་གྲོལ་ལོངས་སྐུའི་དཀྱིལ་འཁོར་མཚན་མའི་ཆོས་ལས་རིང་དུ་འདས་སོང་བའི་གྲག་སྟོང་སྒྲ་ཚིག་གིས་མཚོན་པ་དེ་ཉིད། གསང་བ་གཤིས་ཀྱི་བཞུགས་ཚུལ་རྣམ་མཁྱེན་ཆོས་སྐུའི་དཀྱིལ་འཁོར་མ་བཅོས་རྣལ་མའི་ཆོས་ཉིད་དུ་ངོ་ཤེས་པར་བྱེད་རྒྱུ། དཀྱིལ་འཁོར་ལྷའི་ཞལ་མཇལ་ནས་དཀྱིལ་འཁོར་གཞན་དུ་མ་གྲུབ་པར་ལྷ་ངོ་རང་ལས་འཕྲོད་པའི་དགོངས་དོན་དེ་ཉིད་རྙེད་དགོས་པ་རེད། དོན་དམ་སྐོར་བདུན་གསུངས་པ་མ་ཧཱ་ཡོ་གའི་རང་ལུགས་ཀྱི་ཆོས་སྐད་རེད། སྐུ་གསུང་ཐུགས་ཡོན་ཏན་ཕྲིན་ལས་ཏེ་འབྲས་ཆོས་ལྔ་དང་དབྱིངས་རིག་གཉིས་དང་བདུན་རེད། ནང་གསལ་ཐིམ་ལ་མ་རྨུག་པ་ཨ་ཏིའི་ཆོས་སྐད་རེད། ཨ་ཏིའི་མ་ཧཱའམ་མ་ཧཱའི་ཨ་ཏིའི་དབྱིངས་རིག་དབྱེར་མེད་ཀྱི་ཟུང་འཇུག་གི་ཡེ་ཤེས་རང་བྱུང་གདོད་མའི་གནས་ལུགས་ཡེ་དག་གཤིས་ཀྱི་བཞུགས་ཚུལ་བསྟན་པ་རེད། འདི་མཚོན་བྱེད་དཔེས། མཚོན་བྱ་དོན་དང་། ཡིན་ཚུལ་གཤིས། དེའི་ཐོག་ནས་བཞུགས་ཚུལ་དོན་དང་བཅས་པའི། མི་རྟོག་རང་བྱུང་ཡེ་ཤེས་ཀྱིས་རང་ངོ་རང་ལ་སྤྲད་པ་རེད། རྟེན་རང་ལུས་རྡོ་རྗེའི་ཕུང་པོ་གདན་གསུམ་ཚང་བའི་དཀྱིལ་འཁོར་ལ། བརྟེན་པ་སེམས་དང་སེམས་བྱུང་བདེ་གཤེགས་ཞི་ཁྲོའི་དཀྱིལ་འཁོར་གྱི་ལྷ་ཚོགས་སུ་ཡེ་ནས་རང་གྲུབ་དུ་ཡོད་པའམ། རང་ངོ་ཤེས་པས་ན་ལྷ་ཉིད་རང་ལ་རང་ཉིད་ལྷ་རུ་ཚོགས་པའི་བཅོས་མིན་དོན་གྱི་ཡེ་ཤེས་རྙེད་པས་ན། གདངས་རིག་རྩལ་སྤྲོ་བསྡུའི་ཤེས་རབ་རང་ཤུགས་ཀྱིས་འབར་པ་རེད། དེའི་ཡན་གྱིས་ནང་འཇུག་གི་ཆོས་བཞི་སོང་བ་འོ། ཡང་དབང་ཆོག་གསུངས་མཐར། མཚམས་འདི་ནས་དངོས་གཞིའི་དབང་ངོ་མ་བསྐུར་རན་སོང་། དབང་གི་དངོས་གཞི་དེ་གང་རེད་ཟེར་ན་བུམ་པའི་དབང་དང་གསང་བའི་དབང་ཤེས་རབ་ཡེ་ཤེས་ཀྱི་དབང་ཚིག་དབང་རིན་པོ་ཆེ་རྣམ་པ་བཞི་པོ་རེད། དབང་བཞི་འདིའི་ནང་གི་དང་པོ་ནི་བུམ་པའི་དབང་རེད། བུམ་པའི་དབང་འདི་བུམ་དབང་འཁོར་དང་བཅས་པ་གསུངས་པས། ཐུན་མོང་རིག་པའི་དབང་ལྔ་འདི་བུམ་པའི་དབང་གི་ཁོངས་སུ་སྡུ་བ་དང་། བརྟུལ་ཞུགས་ཀྱི་དབང་། རྡོ་རྗེ་སློབ་དཔོན་གྱི་དབང་འདི་དག་ལ་སློབ་མའི་དབང་དྲུག་རྡོ་རྗེ་སློབ་དཔོན་གྱི་དབང་དང་བདུན་ཡང་ཟེར་བ་རེད། བུམ་ཆུའི་བྱ་བ་རྗེས་སུ་འགྲོ་བ་ཅན་ཡིན་པས་བུམ་དབང་གསུངས་པ་དང་རྗེས་འབྲེལ་སྐུ་ཕྱག་རྒྱའི་དབང་དང་བཅས་པ་འདི་ཐམས་ཅད། བསྐུར་བ་སྒོ་གསུམ་ལ་བསྐུར་ཡང་། རླུང་སེམས་རྩ་དང་ཐིག་ལེ་ལ་བརྟེན་པའི་ཕྱིར་དང་ནི་གཙོ་བོར་ལུས་དཀྱིལ་ཟབ་མོ་དང་འབྲེལ་བའི་ཕྱིར་ན། སྐུ་གསུང་ཐུགས་ཡེ་ཤེས་རྡོ་རྗེ་དང་བཅས་པའི་ནང་ནས་བུམ་དབང་ལུས་ལ་བསྐུར་བ་ཡིན་པའི་ཕྱིར་ན། སྐུ་ཡི་དབང་ཐོབ་པའི་འབྲེལ་བ་དེ་ལྟར་གྲུབ་པ་རེད། བླ་མེད་ཐུན་མོང་གི་རིག་དབང་ལྔ་ལ་སོགས་པ་དང་ནང་རྒྱུད་སྡེ་གསུམ་གྱི་ཕན་དབང་དང་ནུས་དབང་གི་སྐབས་ལ་འབྱུང་རྒྱུ་འདི་ཐམས་ཅད། མིང་དོན་གཉིས་ཀའི་ཆ་ནས་གཅིག་མཚུངས་ཨེ་རེད་ཟེར་ན། དེ་མ་རེད། ཞི་གནས་དང་ལྷག་མཐོང་ཞེས་པའི་སྒྲ་འདྲ་ཡང་ཐེག་པ་ཆེ་ཆུང་སྔགས་དང་བཅས་པའི་སྐབས་སུ་དོན་ལ་སྒྲ་མཐུན་དོན་འཕགས་ཁྱད་པར་མི་འདྲ་པར་ཡོད་པ་ལྟར་དུ། དེ་དང་དེའི་དོན་མཚུངས་ཡིན་ཟེར་ཆོག་ཀྱང་དོད་ཐུབ་མ་རེད། དཔེ་བཞག་ན། རྒྱུད་སྒྱུ་འཕྲུལ་དྲྭ་བའི་མ་ཧཱའི་ཨ་ཏི་ལྟར་དུ་བཀྲལ་བའི་གནས་སྐབས་ལ་མཚོན་ན། སྒྱུ་འཕྲུལ་ལམ་རིམ་གྱི་ནང་ན། གནས་རྟེན་རྩ་དང་ཐིག་ལེ་ལ། །བཅུ་དང་ལྔ་གསུམ་ལ་སོགས་པ་གསུངས་པ་ལྟར། འདོར་ན་བླ་མེད་ཐུན་མོང་བའི་ལུགས་ཀྱི་བུམ་དབང་གི་སྦྱང་བྱ་དེ་ཕུང་ལྔ་ཉོན་མོངས་ལྔ་སོགས་ཐེག་པ་སྤྱི་ལ་གྲགས་པ་ལྟར་དུ་ཡིན་ན། འདི་ནས་དེ་དང་མི་འདྲ་བ་གང་རེད་ཟེར་ན། ཕན་དབང་དང་ནུས་དབང་གཉིས་ཡིན་ཡང་ཟབ་མོའི་དབང་ལྟར་དུ་རླུང་སེམས་རྩ་དང་ཐིག་ལེ་ལ་བརྟེན་པའི་ལུས་དཀྱིལ་ཟབ་མོ་དང་འབྲེལ་བའི་ཕྱིར་ན་ཁྱད་པར་ཆེན་པོ་ཡོད། ཐུན་མོང་རིག་པའི་དབང་ལྔ་འདི། གང་དང་ཐུན་མོང་རེད་སྙམ་ན་སྔགས་ཕྱི་ནང་གཉིས་ཀའི་ཐུན་མོང་གི་དབང་ཡིན་པས་དེ་ལྟར་གྲགས་པ་རེད། ཇི་ལྟར་ཐུན་མོང་རེད་ཟེར་ན་ཡེ་ཤེས་ཐིག་ལེའི་ནང་དུ། ཆུ་ཡི་དབང་བསྐུར་དབུ་རྒྱན་དག། བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་ལ་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་ལ་གསལ་བར་བྱས། །ཞེས་གསུངས་པ་ལྟར་དུ་བྱ་རྒྱུད་ཀུན་གྱི་སྒོས་ཆོས་ཆུ་ཡི་དབང་དང་རིགས་གང་ཡིན་དམ་ཚིག་ཕྱག་རྒྱའི་ཅོད་པན་གྱི་དབང་མཐའ་རྟེན་དང་བཅས་པ་བསྐུར་རྒྱུ་དང་། སྤྱོད་རྒྱུད་ཀྱིས་ཁར་སང་བཤད་པ་ལྟར་དུ་དེའི་སྟེང་ལ་རྡོ་རྗེ་དྲིལ་བུ་མིང་དབང་རྗེས་གནང་དང་བཅས་པ་བསྐུར་བ་རེད། རྣལ་འབྱོར་རྒྱུད་ཀྱི་ཆུ་དབང་ལ་སོགས་སློབ་མའི་དབང་ལྔ་བོ་དང་། དེའི་སྟེང་ལ་ཕྱིར་མི་ལྡོག་པའི་དམ་ཚིག་གསུམ་བཟུང་བ་ལ་སོགས་པའི་སློབ་དཔོན་གྱི་དབང་དྲུག་གི་རྣམ་བཞག་དང་བཅུ་དེ་ཚིག་གི་ཐོག་ནས་བསྐུར་བ་རེད། ཐུན་མོང་རིག་པའི་དབང་ལྔ་འདི། རྣལ་འབྱོར་བླ་མེད་ཀྱི་སྐབས་སྤྲོས་བཅས་བུམ་པའི་དབང་གི་མཐའ་རྟེན་ལ་རྫོགས་ཞིང་ཚང་དགོས་ན། འདི་ལ་སྒྲ་བཤད་ཇི་ལྟར་འཇོག་ཟེར་ན། སྤང་བྱ་གློ་བུར་བའི་ཆོས་མ་རིག་པ་ཁྱབ་བྱེད་དུ་སོང་བའི་དྲི་མ་ལྔ་དག་ཅིང་། ཐོབ་བྱ་རིག་པའི་ཡེ་ཤེས་ལྔ་རང་ངོ་འཕྲོད་ཅིང་མངོན་དུ་གྱུར་པའི་ཆ་ནས་རིག་པའི་དབང་ལྔ་གསུངས་པ་རེད། དེ་ལྟ་བུའི་ཐུན་མོང་ལུགས་ལྟར་བཀྲལ་ནས་བཤད་ན་དེ་འདྲ་རེད། དེས་ན་མ་ཧཱ་ཡོ་གའི་ཕྱི་ཕན་པའི་དབང་བཅུ་གྲགས་པ་འདིས་ཀྱང་། ཕྱི་དཀྱིལ་དྲང་དོན་ཀྱི་བསྐྱེད་རིམ་ལ་ཉན་དུ་རུང་བའི་དབང་ཐོབ་པ་རེད། སྒྱུ་འཕྲུལ་ཀྱི་སྐབས་ལ་ཕན་ནུས་ཟབ་མོའི་དབང་གསུམ་གསུངས་པ་རེད་དེ། ཟབ་དབང་ཡང་ནུས་དབང་གི་ཁོངས་སུ་བསྡུས་བཞག་ན་གཉིས་དང་། ཟབ་དབང་གསུམ་བྱས་ཏེ་དབྱེ་ན་ལྔ་རེད། དེ་ལྟར་བྱས་ན་བུམ་དབང་ལ་ཕན་ནུས་གཉིས་ཕྱེས་པ་རེད། ཞི་བའི་ཕན་དབང་སྙིང་པོ་ལྔ་དང་དབུ་རྒྱན་ལྔ་སོགས་བཅུ་དང་། ཁྲོ་བོའི་ཕན་དབང་ལ་དེ་བཞིན་དུ་བདུན་དང་ཕྱག་མཚན་སོགས་ནང་གསེས་མང་པོ་ཡོད་རེད། དེ་ཐམས་ཅད་བསྐུར་ཡུལ་གྱི་རྒྱུ་དང་བྱིན་རླབས་ཀྱི་ས་བོན་འཇོག་པ་ཙམ་ལས། ད་ལྟ་ནས་འཆད་ཉན་བསྒྲུབ་པ་སོགས་ཀྱི་ལས་བྱེད་པའི་དབང་མིན་པས་ཕན་དབང་གསུངས་པ་རེད། དེས་ན། ནུས་དབང་ནི། བདག་དོན་ནུས་པའི་ཆེད་དུ་གསང་བ་ཉན་པའི་དབང་དང་དངོས་གྲུབ་སྒྲུབ་པའི་དབང་གཉིས། གཞན་དོན་ནུས་པ་ཅན་གྱི་ཆེད་དུ་གསང་བ་འཆད་པའི་དབང་དང་ཕྲིན་ལས་་སྤྱོད་པའི་དབང་གཉིས། གཉིས་དོན་ནུས་པའི་ཆེད་དུ་རྡོ་རྗེ་རྒྱལ་པོ་བཀའ་རབ་འབྱམས་གྱི་དབང་སྟེ་ནུས་དབང་ལྔ་དེ་ལྟར་འབྱུང་བ་རེད། དེ་དག་ཕན་དབང་རེད་ལ་གང་བྱེད་ཀྱི་ལས་དེ་དག་དངོས་སུ་སྒྲུབ་ནུས་པའི་ནུས་དབང་གཙོ་བོར་གྱུར་པའི་ཆ་ནས་ནུས་དབང་ལ་བཞག་མཛད་པ་རེད། དེས་ན་ཟབ་མོའི་དབང་གསུམ་གང་རེད་ཟེར་ན། སྤྱོད་རིག་མཉམ་པའི་བརྟུལ་ཞུགས་ཅན་ལ་བསྐུར་རྒྱུ་དེ་རེད། སྤྱོད་པའི་བརྟུལ་ཞུགས་ཅན་ཞེས་པ་ནི། གསང་སྔགས་ཀྱི་རྫས་ཤ་ལྔ་བདུད་རྩི་ལྔ་སོགས་ལ་གཙང་མེར་མེད་པ་རོལ་ཞིང་སྤྱོད་ནུས་པའི་བརྟུལ་ཞུགས་ཅན་ལ་གསང་དབང་། རིག་མའི་བརྟུལ་ཞུགས་ཅན་ལ་ཤེས་རབ་ཡེ་ཤེས་ཀྱི་དབང་། ཆོས་ཀུན་མཉམ་པའི་བརྟུལ་ཞུགས་ཅན་ལ་དབང་བཞི་བ་ཚིག་དབང་རིན་པོ་ཆེ་བསྐུར་རྒྱུ་དེ་འདྲ་རེད། འདི་གསུམ་ལ་ཟབ་མོའི་དབང་གསུམ་མམ་མཆོག་དབང་གོང་མ་རྣམ་གསུམ་ཟེར་ན་ཡང་གཅིག་པ་རེད། ད་ནི་སྐབས་དོན་བུམ་དབང་རེད། སྤྲོས་བཅས་བུམ་པའི་དབང་གི་མཐའ་རྟེན་ནམ་ཡན་ལག་རྫོགས་ནས་སློབ་མ་ལ་སློབ་མའི་དབང་དྲུག་གི་དང་པོ་མི་བསྐྱོད་པ་ཆུའི་དབང་འབྱུང་བ་རེད། དབང་ཚིག་གི་ནང་ནས་འབྱུང་བ་ལྟར་དུ། ལྷ་འོད་དུ་ཞུ་བའི་རང་བཞིན་རྣམ་རྒྱལ་བུམ་པའི་ཆུ་དེ། སྤྱི་བོ་ནས་བླུགས་ཏེ་ཁྲུས་བྱས་པས། ལས་ཉོན་བག་ཆགས་སྡིག་སྒྲིབ་དང་བཅས་པ་ཐམས་ཅད་དག་ནས་ཆུའི་ལྷག་མ་དེ་སྤྱི་བོར་འཁྱིལ་བ་དེ་ལས། སྤྱི་གཙུགས་ལ་རིགས་བདག་མི་བསྐྱོད་པའི་དབུ་རྒྱན་ནས་བཞུགས་པར་བསམ་དགོས་རེད། འདིས་དུག་ལྔའི་ནང་ནས་ཉོན་མོང་པ་ཞེ་སྡང་དག་པ་དང་། ཕུང་ལྔའི་ནང་ནས་རྣམ་ཤེས་ཀྱི་ཕུང་པོ་རྡོ་རྗེ་མི་བསྐྱོད་པ་དང་། འབྱུང་ལྔའི་ནང་ནས་ནམ་མཁའི་ཁམས་རྡོ་རྗེ་དབྱིངས་ཕྱུག་མའི་རང་བཞིན་དུ་སངས་རྒྱས་པར་འགྱུར་བ་དེ་འདྲ་རེད། ཡེ་ཤེས་ལྔའི་ནང་གི་མེ་ལོང་ཡེ་ཤེས་དེ་མངོན་དུ་བྱེད་པར་བསམ་དགོས། དེ་བཞིན་དུ་རིགས་ལྔའི་ནང་ནས་རིན་འབྱུང་སྣང་མཐའ་དོན་ཡོད་གྲུབ་པ་རྣམ་པར་སྣང་མཛད་དག་གིས་དབུ་རྒྱན་པ་དང་། ང་རྒྱལ་འདོད་ཆགས་ཕྲག་དོག་གཏི་མུག་ཚང་མ་དག་ནས་ཚོར་བ་འདུ་ཤེས་འདུ་བྱེད་གཟུགས་ཕུང་རྣམས་རིགས་སོ་སོའི་རྒྱལ་བ་དང་། མེ་ཁམས་གོས་དཀར་མོ་དང་། རླུང་ཁམས་དམ་ཚིག་སྒྲོལ་མ། ས་ཁམས་སངས་རྒྱས་སྤྱན་མའི་རང་བཞིན་དུ་སངས་རྒྱས། དེའི་ཐོག་ནས་ཡེ་ཤེས་ལྔ་པོའི་ནང་གི་མཉམ་ཉིད་ཡེ་ཤེས་བྱ་གྲུབ་ཡེ་ཤེས་སོར་རྟོགས་ཡེ་ཤེས་ཆོས་དབྱིངས་ཡེ་ཤེས་རྣམས་མངོན་དུ་གྱུར་པ་བསམ་དགོས། དེའི་སྟེང་ལ་རྡོ་རྗེ་བརྟུལ་ཞུགས་ཀྱི་དབང་བཞག་ན་སློབ་མའི་དབང་དྲུག་རེད། གསང་སྔགས་རྡོ་རྗེ་ཐེག་པའི་ལམ་ཉམས་ལེན་བྱེད་དུས། རྡོ་རྗེ་སེམས་དཔའི་བརྟུལ་ཞུགས་དང་མཐུན་པར་ཉམས་སུ་ལེན་དགོས་པ་རེད། རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་འདི་སུ་ཡིན་གང་ཡིན་ལ་བསྐུར་མི་ཉན་པ། འདི་གཞན་དོན་ནུས་པའི་ཕྲིན་ལས་སྒྲུབ་ཐུབ་མཁན་ཞིག་ལ་བསྐུར་རྒྱུ་ཡིན་དུས། སློབ་མ་སེངྒའི་ཁྲི་ལ་བཀོད་པར་དམིགས་ནས་དམ་ཚིག་གསུམ་སྦྱིན་དགོས་རེད། དམ་ཚིག་གསུམ་གང་རེད་ཟེར་ན། སྐུ་གསུང་ཐུགས་ཀྱི་དམ་ཚིག་གསུམ་རེད། ཕྱག་རྒྱ་སྐུ་ཡི་དམ་ཚིག དྲིལ་བུ་གསུང་གི་དམ་ཚིག རྡོ་རྗེ་ཐུགས་ཀྱི་དམ་ཚིག་དག་རེད། སྐུའི་དམ་ཚིག་གི་སྐབས་སུ་ཡི་དམ་ལྷ་ཡབ་ཡུམ་གྱི་སྐུར་བསྒོམ་དགོས། དྲིལ་བུ་ལག་གཡོན་ལ་གཏད། རྡོ་རྗེ་ལག་གཡས་ན་སྦྱིན་དུས་ཕྱི་ནང་གསང་གསུམ་མཚོན་དོན་གྱི་དམིཊ་པ་གསལ་བོར་བྱས་ནས་ངེས་དགོས་པ་རེད། རྡོ་རྗེ་དྲིལ་བུ་ཟེར་རྒྱུ་འདི་ཅ་ལག་ཅིག་ཡིན་པར་མི་སེམས་པ་རྒྱལ་བའི་སྐུ་གསུང་ཐུགས་གསུམ་གྱི་མཚོན་བྱེད། དེ་ལ་ཡང་ཕྱི་ནང་གསང་གསུམ་གྱི་རྡོར་དྲིལ་ཡོད་པ་རེད། ཕྱི་མཚན་མ་རྫས་ཀྱི་རྡོར་དྲིལ། ནང་མཚོན་བྱེད་རྟགས་ཀྱི་རྡོར་དྲིལ། གསང་བ་མཚོན་བྱ་དོན་གྱི་རྡོར་དྲིལ་གྱི་དབྱེ་བ་ཡོད་པ་རེད། ཕྱི་མཚན་མ་རྫས་ཀྱི་རྡོར་དྲིལ་དེ་དམ་ཚིག་རྫས་ལ་བཏབ་པས་རྡོ་རྗེ་གསོར་ཞིང་དྲིལ་བུ་བཀུར་བསྟན་པ། ནང་མཚོན་བྱེད་རྟགས་ཀྱི་རྡོར་དྲིལ་དེ་ཐབས་ཤེས་མཉམ་སྦྱོར་གྱི་དོན་མཚོན་པས་བདེ་བ་མཆོག་གི་ཡེ་ཤེས་བསྐྱེད་པ་ཞིག གསང་བ་མཚོན་བྱ་དོན་གྱི་རྡོར་དྲིལ་དེ་བདེ་སྟོང་གཉིས་མེད་ཀྱི་ཡེ་ཤེས་གནས་ལུགས་ཕྱག་རྒྱ་ཆེན་པོའི་ངང་ལ་མཉམ་པར་བཞག་པས། སྟོང་ཉིད་ཀྱི་ཡེ་ཤེས་བསྐྱེད་ནས་རྡོ་རྗེ་རྒྱལ་པོའི་གོ་ས་ཐོབ་པར་བྱེད་པ་ཞིག་རེད། དེའི་ཡན་ལག་ལ་རྗེས་གནང་འབྱུང་བ་རེད། ཉི་མ་དེ་རིང་ནས་བཟུང་སྟེ་ཁྱོད་ཀྱིས་གསང་སྔགས་རྡོ་རྗེ་ཐེག་པའི་སྨིན་གྲོལ་རྒྱབ་རྟེན་དང་བཅས་པས་རང་གཞན་གྱི་དོན་གྱིས་ཤིག གསུངས་ཏེ་རྗེས་སུ་གནང་བ་སྦྱིན་རྒྱུ་བོ་རེད། འདི་ལ་ལུང་བསྟན། དབུགས་དབྱུང་། གཟེངས་བསྟོད་རྣམ་པ་གསུམ་ཡོད་པ་རེད། དེའི་ནང་གི་དང་པོ་ལུང་བསྟན་དེ་གང་འདྲ་རེད་ཟེར་ན། ཉམས་ལེན་ལ་བརྩོན་འགྲུས་བྱས་ན་འདི་དང་བར་དོ་གང་རུང་དུ་མེ་ཏོག་གང་ལ་ཕོག་པའི་ལྷའི་རིགས་དང་མཐུན་པར་སངས་རྒྱས་པ་འགྱུར་རོ་གསུངས་ཏེ་ལུང་བསྟན་པ་དེའོ། དེ་ནས་དབུགས་དབྱུང་ཟེར་རྒྱུ་དེ། དམ་ཚིག་མ་ཉམས་ན་འཁོར་བའི་སྡུག་བསྔལ་ལས་གྲོལ་ནས་ངན་སོང་གསུམ་པོའི་སྐྱེ་རྒྱུན་ཆོད་པ་ཡིན་ཟེར་རྒྱུའི་དབུགས་དབྱུང་། ཡང་སངས་རྒྱས་ཐམས་ཅད་ཀྱི་སྲས་དང་བྱང་སེམས་རིག་འཛིན་ཐམས་ཅད་ཀྱི་སྤུན་དུ་འགྱུར་བར་མ་ཚད། འཁོར་བའི་སེམས་ཅན་ཐམས་ཅད་ཀྱི་མགོན་དང་དཔུང་གཉེན་དུ་འགྱུར་བས། དགའ་བ་སྒོམས་ཤིག་གསུངས་རྒྱུའི་གཟེངས་བསྟོད་པ་འབྱུང་བ་རེད། དེ་དང་མཉམ་དུ་སློབ་མ་རྡོར་སེམས་སུ་གྱུར་པ་བསམ་ནས་མཆོད་བསྟོད་དང་མངའ་གསོལ་དག་རྒྱས་བསྡུས་ཅི་རིགས་པ་འབྱུང་བ་རེད། དེས་གསང་སྔགས་རྡོ་རྗེ་ཐེག་པའི་ཐབས་ཉམས་སུ་བླངས་པའི་ཐབས་བྱུང་རིགས་ལྔའི་བདག་ཉིད་རིགས་དྲུག་པ་རྡོ་རྗེ་འཆང་གི་གོ་འཕང་ཐོབ་པའི་རྟེན་འབྲེལ་བསྒྲིགས་པའམ་དེའི་ནུས་པ་རྒྱུད་ལ་བཞག་པ་དེ་ཉིད་བསྟན་པ་རེད། འདིའི་བུམ་དབང་དངོས་གཞི་འདི་རྒྱུད་སྡེ་འོག་མ་དང་ཐུན་མོང་ཟེར་ན་ཡང་། དག་བྱ་དག་འབྲས་དང་དབང་དོན་གྱི་ཡེ་ཤེས་ངོ་སྤྲད་པ་སོགས་ཀྱི་ཕལ་ཆེ་བའི་ཐོག་ནས། རྒྱུད་སྡེ་འོག་མ་ལས་ཁྱད་པར་དུ་འཕགས་པའི་བླ་མེད་ཀྱི་ཁྱད་ཆོས་ཐུན་མིན་དང་ཡང་ལྡན་པ་རེད། ད་ལྟའི་ཕྱག་ལེན་ལ་རིགས་ལྔའི་དབང་གི་འཕྲོ་ལ་བུམ་དབང་ཟུར་དུ་འབྱུང་བ་འདིའི་རྒྱུ་མཚན་ཅི་རེད་ཟེར་ན། རིགས་དབང་ཡང་བུམ་དབང་གི་དངོས་གཞིར་གཏོགས་པས་རེ་རེ་བཞིན་དུ་བུམ་ཆུ་བླུག་པ་རྗེས་སུ་འགྲོ་རྒྱུ་ཅན་པོ་རེད། ཡིན་ན་ཡང་ཕྱག་ལེན་ཟོར་ཡང་བའི་ཆེད་དུ་བུམ་ཆུ་ཐམས་ཅད་བསྡུས་ནས་བུམ་པའི་ཆུ་དབང་གཅིག་གིས་མཐུས་པར་མཛད་པ་རེད། འདིའི་ཡན་ལག་བུམ་དབང་གི་རྗེས་ལ་ལྷ་དབང་འབྱུང་པ་རེད། ལྷ་སྐུ་ཕྱག་རྒྱའི་དབང་འདི་དཀྱིལ་འཁོར་སོ་སོའི་ལྷ་གྲངས་ལྟར་འབྱུང་རྒྱུ་དང་། དེའི་རྗེས་སྙིང་པོ་སྔགས་ཀྱི་ཟླས་ལུང་། ལོངས་སྤྱོད་རྫས་ཀྱི་དབང་བསྐུར། ཕྲིན་ལས་དྲག་པོའི་སྒྲོལ་དབང་ལ་སོགས་པ་རིམ་པ་བཞིན་དུ་འབྱུང་རྒྱུ་དེ་འདྲ་ཡིན་ཡང་། ཆོ་ག་སོ་སོའི་རང་འགྲོས་ལ་སྦྱར་རྒྱུ་དེ་གནད་ཆེན་པོ་རེད། དཔེར་ན་སང་གནངས་འབྱུང་མ་རགས་པའི་དཔལ་ཆེན་བཀའ་བརྒྱད་ཀྱི་ཁྲག་འཐུང་རིགས་བཞིའི་སྒོས་དབང་གི་སྐབས་སུ་རྟ་མགྲིན་གྱི་བསྒྲལ་དབང་དེ་ལྷ་དབང་དང་རྗེས་འབྲེལ་དུ་འབྱུང་རྒྱུ་དང་། ཕུར་པའི་བསྒྲལ་དབང་དེ་མཆོག་དབང་གོང་མ་གསུམ་གྱི་རྗེས། སྟོད་ལས་བྱང་ཆུབ་བསྒྲུབ་པ་ཆ་ཚང་སོང་མཚམས་ནས་སྨད་ལས་དགྲ་བགེགས་བསྒྲལ་བ་འབྱུང་རྒྱུ། དེ་ལྟ་བུའི་ཆོ་ག་སོ་སོའི་སྒོས་ཆོས་ཀྱི་ཁྱད་པར་ཡོད་པ་ཡིན་པས་ན། ཐམས་ཅད་ཀུན་ལ་འདྲ་མཉམ་གྱིས་ཞྭ་དཔེ་ལྷམ་ལ་མི་འགྲོ་ཞིང་། ཨུ་ཚུགས་རྐྱང་རྐྱང་གིས་ཨ་ཕའི་ཁ་ཕོར་གཙང་ཆགས་བྱས་པ་ཙམ་གྱིས་རྒྱུད་དོན་བརླིངས་ཤིང་ཟབ་མོའི་དགོངས་དོན་ལ་ཐུག་དུས། དེ་ཡང་ཕག་སྣ་བྲག་ལ་ཐུག་འགྲོ་རྒྱུ་ཡོད་པ་རེད། བུམ་པའི་དབང་འདི་གང་དུ་བསྐུར་བ་རྟགས་ཀྱི་དཀྱིལ་འཁོར་ལ། གང་གིས་བསྐུར་པ་སློབ་དཔོན་དང་དགོངས་པ་དབྱེར་མེད་པའི་མདུན་རྟེན་དཀྱིལ་འཁོར་ལ་བཞུགས་པའི་ལྷ་དང་། དེ་ལས་ལོགས་སུ་ཕྱེས་ནས་སློབ་དཔོན་དཀྱིལ་འཁོར་གྱི་གཙོ་བོ་གཉིས་པའི་རྣམ་པ་ཤར་བ་ཞིག ཤར་སྒོ་ན་བཞུགས་བསམ་དགོས་པ་དང་དེ་ཡང་སློབ་དཔོན་དངོས་ཡིན་པར་དམིགས་ནས། མདུན་རྟེན་དཀྱིལ་འཁོར་ན་བཞུགས་པའི་ལྷ་དང་གཅིག དཀྱིལ་འཁོར་གྱི་ཤར་སྒོར་བཞུགས་པའི་སློབ་དཔོན་དངོས་དང་གཉིས། སློབ་དཔོན་དང་དཀྱིལ་འཁོར་གྱི་ལྷས་དགོངས་པ་གཏད་པའི་དབྱིངས་ནས་གདན་གསུམ་ཚང་པའི་ལྷ་ཚོགས་སྤྱན་དྲངས་པ་དང་གསུམ་ཀ་ནས་དབང་ཐོབ་དགོས་པ་རེད། ཕུང་ཁམས་གཤེགས་པ་གཤེགས་མ། དབང་ཡུལ་སེམས་པ་སེམས་མ། ཡན་ལག་ཁྲོ་བོ་ཁྲོ་མོ་སྟེ་གདན་གསུམ། དེ་ནི་གདན་གཅིག་ལ་འཛོམས་པ་ལྟ་བུའི་ལྷ་ཚོགས་ལ་གོ་དགོས། རང་གི་ལག་ལེན་བྱེད་པོ་ངོ་མ་དེ་གང་རེད་ཟེར་ན། དབང་ལྷ་སྤྱན་དྲངས་ཡོད་རྒྱུ་དག་ཡིན་དགོས་རེད། དབང་ཚིག་ལྟར་དུ་གཤེགས་པ་རྣམས་ཀྱིས་དགོངས་པ་མཛད། གཤེགས་མ་རྣམས་ཀྱིས་དབང་རྫས་ཐམས་ཅད་ཐོགས་ཏེ་དབང་བསྐུར། སེམས་དཔའ་རྣམས་ཀྱིས་བཀྲ་ཤིས་བརྗོད། སེམས་མ་རྣམས་ཀྱིས་གླུ་གར་སྒྱུར། ཁྲོ་བོ་རྣམས་ཀྱིས་བགེགས་བསྐྲད་ནས་གསུངས་འདུག འོག་ནས་འབྱུང་ལ་ཉེ་བ་རེད། ཐམས་ཅད་ཀྱིས་དབང་བསྐུར་བའི་བྱ་བ་མཛད་པའི་མོས་པ་དེ་བཞིན་བྱེད་དགོས་པ་རེད། བུམ་པའི་དབང་བསྐུར་བའི་དོན་པོ་དབང་དོན་ཀྱི་ཡེ་ཤེས་དེ་གང་འདྲ་རེད་ཟེར་ན། ཕྱི་སྣོད་ཀྱི་འཇིག་རྟེན་ནང་བཅུད་ཀྱི་སེམས་ཅན་ཕུང་པོ་ཁམས་དང་སྐྱེ་མཆེད་ཐམས་ཅད་ཡེ་ནས་དཀྱིལ་འཁོར་གྱི་རང་བཞིན་ཡིན་པ་ལ་ཡིན་པ་ལྟར་དུ་ངོ་འཕྲོད་ནས་འཁོར་འདས་དབྱེར་མེད་རོ་གཅིག་ཏུ་རྟོགས་པས་ཐག་ཆོད་རྒྱུ་དང་། སྣང་སྲིད་ལྷ་རུ་ངེས་ཤེས་རྙེད་རྒྱུ་དང་། དབང་དོན་གྱི་ཡེ་ཤེས་ཡིན་པས་ན། བློ་རབ་འབྲིང་ཐ་མའི་རྟོགས་དོན་གཅིག་འདྲ་མིན་ཡང་། དེ་ལྟ་བུའི་ངེས་ཤེས་རྒྱུད་ལ་ནམ་སྐྱེ་ན་དབང་ཞུས་པ་ཐོབ་པའི་དོན་ཡོད་སོང་བ་རེད། དེའི་དབང་དེ་ཚུལ་བཞིན་དུ་ཐོབ་དུས་ལུས་དང་རྩ་ཡི་སྒྲིབ་པ་དག ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་སྐུར་འགྲུབ་པའི་སྐལ་བ་རྒྱུད་ལ་བཞག་པ་རེད། མཚམས་འདི་ནས་དངོས་གཞིའི་དབང་བསྐུར་བའི་ཡོན་ལ་དམིགས་ཏེ་མཎྜལ་འབུལ་བ་ཞུ། ས་གཞི་སྤོས་སོགས་གསུངས་སོ། འདིའི་ཡིག་ཆུང་གི་ནང་ན། སྐབས་འདིར་སློབ་དཔོན་དད་སྤྲོ་བློ་གྲོས་དང་ལྡན་ན། དབང་བཞིའི་རྣམ་དབྱེ་ངོ་བོ་ངེས་ཚིག་དགོས་པ་སོགས། རྒྱས་བསྡུས་སྐབས་ཕྱེད་པར་འཆད་ན་ལེགས་ཤིང་གསུངས་འདུག ང་སློབ་དཔོན་གྱིས་རྡོ་རྗེ་སློབ་དཔོན་གྱི་ཞལ་ཚབ་བྱས་ཡོད་པས་དད་སྤྲོ་ལོས་ཡོད། འོན་ཀྱང་བློ་གྲོས་ལྡན་པ་མ་རེད་མོད། གོང་འོག་སོ་སོར་ནས་བརྡ་འགྲོལ་གྱི་གསལ་དབྱེ་ཅུང་ཟད་ཅུང་ཟད་བྱས་པ་དག་གིས་དོད་ཐུབ་ཅིག་ཡོང་རྒྱུ་རེད་བསམ་གྱིན་ཡོད། དབང་ཆོག་རྗེས་ཟློས་བྱས་མཐར། འདིའི་གསོལ་འདེབས་རྗེས་ཟློས་ཀྱི་ཚིག་འདིའི་ནང་དོན་ནི། ནམ་མཁའི་རྡོ་རྗེ་རྒྱལ་བ་ལྔར། །དགོངས་ཤིང་ཇི་ལྟར་དབང་བསྐུར་ལྟར། །མཆོད་པ་ཆེན་པོ་བརྡ་ཡི་དབང་། །རིག་པ་འཛིན་པ་བདག་ལ་སྩོལ། །ཅེས་གསུངས་པའི་ནམ་མཁའི་རྡོ་རྗེ་ནི་རྡོ་རྗེ་འཆང་རེད། བླ་མ་ལ་རྡོ་རྗེ་འཆང་དང་མཉམ་པའི་མཚན་གྱིས་བོས་ནས། རྒྱལ་བ་ལྔ་ཟེར་ན། སངས་རྒྱས་རྡོ་རྗེ་མི་བསྐྱོད་པ་ལ་སོགས་རིགས་ལྔའི་རྒྱལ་བ་ལྔ། དགོངས་ཤིང་ཇི་ལྟར་དབང་བསྐུར་ལྟར་ཟེར་ན། དགོངས་པ་ཆིག་བརྒྱུད་ཉིད་ལས་མི་གཞན་པ། མཆོད་པ་ཆེན་པོ་བརྡ་ཡི་དབང་གསུངས་ན། མཆོད་ཆེན་ནམ་དབང་མཆོག་དམ་པ་ཇི་ལྟར་བསྐུར་བ་ལྟར། འཁོར་བ་ལས་སྐྱོབས་པའི་ཕྱིར་དུ་རིག་པ་འཛིན་པ་བདག་ལ་དེ་ལྟར་སྩོལ་ཅིག་ཅེས་སྐུལ་བ་རེད། འདི་ཚོ་རྗེས་ཟློས་ལན་གསུམ་རེ་གྱིས་གསུངས་འདུག་ཀྱང་། ང་ཚོ་ལ་འཕྲོས་དོན་བཤད་རྒྱུ་མང་ལ་རྗེས་ཟློས་ཡང་མང་སོང་ན། རྣམ་པ་ཚོ་ཐུགས་སུན་པར་དོགས་ནས་མཚོན་ཙམ་བྱས་པ་ཡིན། ཡང་དབང་ཆོག་ཉུང་ཙམ་མཐར། མི་བསྐྱོད་པ་ཆུའི་དབང་འདིས་ཕུང་ལྔའི་ནང་ནས་རྣམ་ཤེས་ཀྱི་ཕུང་པོ་རྡོ་རྗེ་མི་བསྐྱོད་པ་དང་། འབྱུང་ལྔའི་ནང་ནས་ནམ་མཁའི་ཁམས་དབྱིངས་ཕྱུག་མའི་རང་བཞིན་དུ་སངས་རྒྱས་ནས། ཉོན་མོངས་པ་ཞེ་སྡང་དག ཡེ་ཤེས་ལྔའི་ནང་ནས་མེ་ལོང་ཡེཤེས་མངོན་དུ་གྱུར་བའི་དབང་རེད། ཡིན་ན་ཡང་འདིའི་དབང་ཁྲིགས་ཀྱི་ནང་ན་ཆོས་དབྱིངས་ཡེ་ཤེས་གསུངས་ཏེ་ཡིག་ནོར་ངན་པ་ཞིག་བྲིས་འདུག་བསམ་གྱིན་ཡོད། འདི་ན། ཧཱུྃ་རྣམ་ཤེས་ཕུང་པོ་རྣམ་དག་ཅིང་། །ཉོན་མོངས་ཞེ་སྡང་འཇོམས་བྱེད་པའི། །ཆོས་ཀྱི་དབྱིངས་ཀྱི་ཡེ་ཤེས་གསུངས་འདུག་མོད། ངས་ནི། མེ་ལོང་ཡེ་ཤེས་ཟེར་ནས་འདོན་གྱིན་ཡོད། དེ་ནས་དབུ་རྒྱན་གྱི་དབང་འདིས་ཉོན་མོང་པ་ང་རྒྱལ་དག དེ་ལྟར་རིམ་པ་བཞིན་ཚོར་བ་རིན་ཆེན་འབྱུང་ལྡན་དང་། ཆུ་ཁམས་མ་མ་ཀིར་སངས་རྒྱས་ནས། མཉམ་ཉིད་ཡེ་ཤེས་མངོན་དུ་བྱེད་པའི་དབང་རེད། འདི་དག་གི་དོན་ནི། སོ་སོའི་མཚམས་སྦྱོར་གྱིས་གསལ་བ་རེད། འདིའི་མཚམས་ནས་མིང་དབང་རེད་འདུག གསང་མཚན་སྔོན་ནས་བཏགས་ཟིན་པ་རེད་མོད། ཡིན་ན་ཡང་འདི་སྦྱང་གཞི། སྦྱང་བྱ། སྦྱོང་བྱེད། སྦྱངས་འབྲས་ཀྱི་དག་སྦྱོར་ངོ་སྤྲོད་དང་། དེ་ནས་ནམ་མཁར་གང་བའི་ལྷ་ཚོགས་རྡུལ་སྙེད་སངས་རྒྱས་དང་བྱང་སེམས་ཐམས་ཅད་ཀྱིས་གསང་བའི་མཚན་བསྒྲགས་ཏེ་མཚན་དེའི་སྟེང་ནས་མངོན་འཚང་རྒྱ་བའི་དབང་བསྐུར་བ་རེད། འདིས་ནི། གཏི་མུག་ཆོས་དབྱིངས་ཡེ་ཤེས་སུ་གྲོལ་དགོས་པ་ཡིན་པས། ཆོས་དབྱིངས་ཡེ་ཤེས་འདི་ན་སྦྱར་དགོས་རེད་བསམ་གྱིན་ཡོད། འདིར་དབང་བསྐུར་མཛད་མཐར། དྲི་མ་ལྔ་དག་ཡེ་ཤེས་ལྔའི་རང་ངོ་འཕྲོད་ཅིང་རིག་པར་བྱས་པས་ན་རིག་པའི་དབང་གསུངས་པ་རེད། དེའི་ཡན་ཆད་ཀྱིས་ཐུན་མོང་རིག་པའི་དབང་ལྔ་ཕྱི་མཚན་མའི་བུམ་དབང་དང་བཅས་ཏེ་ཕྱི་ཕན་པའི་དབང་ནང་ནུས་པའི་དབང་གསང་བ་ཟབ་མོའི་དབང་གསུམ་གྱི་ནང་ནས་ཕན་དབང་སོང་བ་རེད། གཉིས་པ་ནང་ནུས་པ་འཇུག་པའི་དབང་འདི་ནི། གཞན་དོན་ནུས་པའི་སློབ་མ་ལ་བསྐུར་རྒྱུའི་དབང་ཞིག་རེད། འདི་ཡིན་རྒྱུ་སློབ་དཔོན་གྱི་དབང་རེད། ངོ་མ་བྱས་ན་སློབ་མ་སེང་ཁྲི་ལ་བཀོད་རྒྱུ་དེ་འདིའི་སྒོས་ཆོས་ལ་བབ་ཡོད་པ་རེད། རྒྱུད་རང་གཞུང་ལ་དབང་སྟེགས་པདྨ་འདབ་བརྒྱད་གསུངས་ཡོད་པས། འདི་དག་གིས་ཀྱང་རྒྱུད་སྡེ་གོང་འོག་གི་ཁྱད་འབྱེད་རྒྱུ་གལ་ཆེན་རེད། འདི་ནས་རིག་དབང་ལྔའི་འགོ་ནས་སེང་ཁྲི་ལ་འགོད་རྒྱུ་དེ་ཡང་གཙོ་བོར་མཁའ་འགྲོ་སྙིང་ཐིག་གི་དགོངས་པ་དང་བསྟུན་པ་ཞིག་རེད་འདུག འདིའི་ནུས་དབང་འདི་ལ་སྤྱི་དང་བྱེ་བྲག་ཁྱད་པར་གསུམ་གྱི་ས་བཅད་བཞག་ཡོད་པ་རེད། དེ་ཡིན་ན་སློབ་དཔོན་གྱི་དབང་བརྟུལ་ཞུགས་ཆས་དབང་དང་བཅས་པ་གཅིག་ལ་བསྡུས་ནས་ས་བཅད་དང་པོ་སྤྱིའི་ཁོངས་དང་། གཉིས་པ་བྱེ་བྲག་ཏུ་རྗེས་གནང་། གསུམ་པ་ཁྱད་པར་བ་དེ་བུམ་དབང་བཞག་འདུག་བསམ་རྒྱུ་ཞིག་རེད། འདི་ཡང་རིག་པའི་དབང་ལྔ་ཡི་སྟེང་དུ་བརྟུལ་ཞུགས་ཀྱི་དབང་དང་བཅས་སློབ་མའི་དབང་དྲུག་བྱས་ཏེ་ཕན་དབང་གི་གྲལ་ལ་བཞག་པ་རེད། སློབ་དཔོན་གྱི་དབང་ནི་ནུས་དབང་གི་དོན་ཅན་རེད། དེས་ན་གོང་ནས་རྡོར་དྲིལ་གཏད་པ་དང་འདི་ནས་རྡོར་དྲིལ་གཏད་པ་གཉིས་ལ་ཁྱད་པར་ཅི་ཞིག་ཡོད་རེད་ཟེར་ན། གོང་དེ་གཟུང་འཛིན་སེམས་ཀྱི་རྟོག་པ་ཐམས་ཅད་སྣང་སྟོང་དབྱིངས་དང་ཡེ་ཤེས་གཉིས་མེད་ཀྱི་ཉམས་ལེན་ལ་དབང་བར་བྱས་ཏེ། རྡོ་རྗེ་སེམས་དཔའི་བརྟུལ་ཞུགས་དང་མཐུན་པ་ཅན་ཞིག་རེད། འདི་སློབ་མ་སློབ་དཔོན་དུ་མངའ་གསོལ་ནས་དམ་ཚིག་གསུམ་སྦྱིན་པ་དང་། དམ་ཚིག་གང་ཡིན་ན་གོང་ནས་བཤད་པ་ལྟར། ཕྱག་རྒྱ་སྐུའི་དམ་ཚིག་ཡི་དམ་ཡབ་ཡུམ་གྱི་སྐུ་བསྒོམས། དྲིལ་བུ་གསུང་གི་དམ་ཚིག་ལག་གཡོན་ལ་བཞག རྡོ་རྗེ་ཐུགས་ཀྱི་དམ་ཚིག་ལག་གཡས་སུ་གཏད་ནས། ཕྱི་མཚན་མ་རྫས་ཀྱི་རྡོར་དྲིལ་དམ་ཚིག་གི་རྫས་ལ་གཏད་ན། རྡོ་རྗེ་གསོར་ཞིང་དྲིལ་བུ་དཀྲོལ་ནས་དཀུར་བརྟེན་པའི་འཁྱུད་རྒྱ་བྱས་པ་དེས། ནང་མཚོན་བྱེད་རྟགས་ཀྱི་རྡོ་རྗེ་མི་འབྲལ་བདེ་ཆེན་གྱི་ཕྱག་རྒྱར་སྦྱོར་བ་དང་། གསང་བ་མཚོན་བྱ་དོན་གྱི་རྡོར་དྲིལ་དེ་བདེ་བ་དང་སྟོང་པ་གཉིས་མེད་ཀྱི་ཡེ་ཤེས་རྒྱུད་ལ་སྐྱེས་རྡོ་རྗེ་རྒྱལ་པོའི་གོ་ས་སྦྱིན་པའི་དོན་ཅན་ཞིག་རེད། སྤྱིར་སློབ་མ་ལ་སློབ་མའི་དབང་དྲུག་པོ་རྫོགས་པ་བསྐུར་ཆོག་པ་ཞིག་རེད། ཁྱད་པར་དུ་བརྟུལ་ཞུགས་ཀྱི་དབང་དང་སློབ་དཔོན་གྱི་དབང་གཉིས་ཁ་ཁར་ཕྱེ་དགོས་རྒྱུ་དེ་དག་ཐུགས་ལ་ངེས་དགོས་པ་གཞི་བཞག་གི་ཐོག་ནས། སྐབས་འདིར་ཚང་མ་ནུས་དབང་སྦྱིན་ཡུལ་ཡིན་པའི་དབང་དུ་བྱས་ན། འདི་ལྟར་བསྐུར་ནས་འཐུས་རྒྱུ་རེད་འདུག ཡང་དབང་ཆོག་གསུངས་མཐར། འདི་ན་ཡིག་ཆུང་ཞིག་ཡོད་པ་འདིའི་ནང་དུ། གཉིས་པ་བྱེ་བྲག་རྗེས་སུ་གནང་བ་ལ། རྒྱལ་ཚབ་ཏུ་འོས་པའི་སློབ་བུ་ཡིན་ན། པོ་ཏི། དུང་དཀར། ཕྱག་ཤིང་། འཁོར་ལོ་ལ་སོགས་པ་སྤྲད་ཅིང་ཁྲི་ལ་མངའ་གསོལ་བ་གཞན་དང་མཐུན། ཞེས་གསུངས་འདུག འདི་སློབ་དཔོན་གྱི་དབང་གི་ཡན་ལག་ཞིག་རེད། རྗེས་གནང་ཟེར་ཡང་རང་གཞན་གྱི་དོན་ཆེན་བསྒྲུབ་དགོས་པའམ་བསྒྲུབ་ཆོག་པའི་གནང་བ་བྱིན་པ་ཞིག་རེད། དད་པ་ཅན་ལ་ཕྱི་ཕན་པའི་དབང་། བརྩོན་འགྲུས་ཅན་ལ་ནང་ནུས་པའི་དབང་། སྤྱོད་རིག་མཉམ་པའི་བརྟུལ་ཞུགས་ཅན་ལ་གསང་བ་ཟབ་མོའི་དབང་སྦྱིན། ཞེས་གསུངས་པས། འདི་ཉམས་ལེན་བརྩོན་འགྲུས་ཅན་ལ་ཕྱིན་ཆད་གསང་སྔགས་རྡོ་རྗེའི་ཐེག་པའི་སྨིན་གྲོལ་ཕྲིན་ལས་དང་བཅས་པས་རང་གཞན་གྱི་དོན་རྒྱ་ཆེན་སྒྲུབས་ཤིག་ཅེས་གསུང་གི་དབྱུགས་དབྱུང་དང་། ཉམས་ལེན་བརྩོན་འགྲུས་ཀྱི་དབང་གིས། འདི་དང་བར་དོ་གང་རུང་ཞིག་ཏུ་གང་ལ་མེ་ཏོག་ཕོག་པའི་རིགས་དེ་དང་མཐུན་པར་སངས་རྒྱས་འགྲོ་གསུངས་རྒྱུའི་ལུང་བསྟན་པ་དང་བཅས་ཏེ། སངས་རྒྱས་སྲས་དང་བྱང་སེམས་རིགས་འཛིན་ཐམས་ཅད་ཀྱི་སྲས་དང་སྤུན་ལ་འགྱུར་ཞིང་འཁོར་བའི་སེམས་ཅན་ཐམས་ཅད་ཀྱི་མགོན་ཡིན་ཟེར་བའི་གཟེངས་བསྟོད་ནས། པོ་ཏི་དུང་དཀར་འཁོར་ལོ་སོགས་སྤྲད་ནས་མངའ་གསོལ་བ་རེད། སྐབས་འདིའི་ཆོག་ཁྲིགས་ལ་བུམ་དབང་གི་རྗེས་འདི་ན་འཇོག་རྒྱུ་ཞིག་ཡིན། དེ་རགས་བཤད་བྱས་ནས་གསུངས་པ་མ་གཏོགས་ཞིབ་ཕྲའི་གོ་དོན་གོང་དུ་བཤད་མ་ཐག་པ་ལྟར་རེད། ། ཡང་དབང་ཆོག་གསུངས་མཐར། སྤྱིར་ན་རིག་པའི་དབང་ལྔ་འདི་རྒྱུད་སྡེ་འོག་མར་ཡང་འདི་དང་འདྲ་བའི་མིང་འབྱུང་བས་འདིའི་མིང་ལ་ཐུན་མོང་རིག་པའི་དབང་ལྔ་གསུངས་པ་རེད། ཐུན་མོང་དང་བསྟུན་ནས་རྗེས་འབྲེལ་གསུངས་དུས་ཡང་ཡོད། དོན་ངོ་མའི་ཐོག་ནས་བཤད་ཡོང་ན། དག་བྱ་དག་འབྲས་དང་དབང་དོན་གྱི་ཡེ་ཤེས་ངོ་སྤྲད་པ་དག་ལ་གཟིགས་དང་། བླ་མེད་ཀྱི་ཁྱད་ཆོས་ལྷག་པར་ལྡན་པ་རེད། དེས་ན་འདི་དག་བུམ་དབང་གི་དངོས་གཞི་ཡིན་པས་རེ་རེའི་རྗེས་ལ་དབང་དེ་ཉིད་བརྟན་པར་བྱ་བའི་ཆེད་དུ་བུམ་པའི་ཆུ་རེ་རེ་འགྲོ་དགོས་རྒྱུ་ཅན་རེད། ཡིན་ན་ཡང་གོང་ནས་བཤད་པ་ལྟར་དུ་ཕྱག་ལེན་ཟོར་ཡང་བའི་ཆེད་དུ་རིག་ལྔའི་བུམ་དབང་གི་ཆུ་གཅིག་ལ་འདུས་པར་བྱས་ཏེ་བསྐུར་བ་རེད། ཡང་དབང་བསྐུར་བའི་མཐར། བུམ་དབང་གི་རྗེས་འབྲེལ་ལྷ་དབང་དེ་འབྱུང་བ་རེད། བུམ་དབང་འཁོར་དང་བཅས་པ་འདི་ཐམས་ཅད་གང་དུ་བསྐུར་བའི་དཀྱིལ་འཁོར་དེ་གོང་ནས་ཀྱང་ཞུས་པ་ལྟར་རྡུལ་ཚོན་དང་རས་བྲིས་སོགས་བྲིས་པ་རྟགས་ཀྱི་དཀྱིལ་འཁོར་ཡིན་ན། གང་གིས་སྐུར་པ་པོ་དེ། སློབ་དཔོན་དང་དགོངས་པ་དབྱེར་མེད་པའི་མདུན་རྟེན་དཀྱིལ་འཁོར་གྱི་ལྷ་དང་དེ་ལས་ལོགས་སུ་ཕྱེས་པའི་སློབ་དཔོན་དཀྱིལ་འཁོར་གྱི་གཙོ་བོར་གཉིས་པའི་རྣམ་པ་ཤར་བ། གོང་ནས་ཀྱང་ཞུས་པ་ལྟར། དཀྱིལ་འཁོར་གྱི་ཤར་སྒོ་ན་བཞུགས་ཡོད་པར་མོས་རྒྱུའི་སློབ་དཔོན་དངོས་དང་། དབྱིངས་ནས་སྤྱན་དྲངས་ཤིང་གདན་གསུམ་ཚང་པའི་ལྷས་དབང་བསྐུར་བའི་མོས་པ་མཛད་རྒྱུ་རེད། འོན་ཀྱང་ལྷ་དབང་བསྐུར་རྒྱུའི་ཞི་ཁྲོ་དམ་པ་རིགས་བརྒྱའི་ལྷ་ཚོགས་དེ། མི་མངོན་དབྱིངས་ཟེར་འོང་དུས། ཐག་རིང་གཞན་ཞིག་ལ་ཡོད་རྒྱུ་ཞིག་གམ། ནམ་མཁའི་གཏིང་ཞིག་ནས་ཡོང་དགོས་རྒྱུ་ཅན་ཞིག་ཡིན་པར་མི་སེམས་པར། ཡེ་ནས་རང་ཉིད་ཀྱི་ཕུང་ཁམས་སྐྱེ་མཆེད་གདན་གསུམ་ལྷའི་རང་བཞིན་དུ་དག་པ་དེ་ཉིད། དབང་གིས་སྨིན་པར་བྱས་ཏེ་མངོན་དུ་གྱུར་པའི་ནུས་པ་བྱིན་རླབས་ཀྱི་སྟོབས་ཀྱིས་རྒྱུད་ལ་བཞག་པར་བསམ་དགོས་པ་རེད། དེ་ལྟར་བྱས་ན་ངོ་ཤེས་པ་དང་གྲོལ་བ་དུས་མཉམ་དུ་ཡོང་ཟེར་རྒྱུའི་ཀར་གླིང་ཞི་ཁྲོའི་ངོ་སྤྲོད་ལྟར་དུ་མངོན་གྱུར་ཡོང་ཐུབ་པ་ཞིག་རེད། མཚམས་འདི་ནས་ལྷ་དབང་བསྐུར་རྒྱུ་བྱེད། ཡང་དབང་བསྐུར་བའི་མཐར། ཕྱི་སྣོད་ནང་བཅུད་ཕུང་པོ་ཁམས་དང་སྐྱེ་མཆེད་ཐམས་ཅད། ཡེ་ནས་དཀྱིལ་འཁོར་གྱི་རང་བཞིན་ཡིན་པ་ལ་ཡིན་པར་ངོ་འཕྲོད་ནས་འཁོར་འདས་དབྱེར་མེད་དུ་ཐག་ཆོད་རྒྱུ་དང་། དབྱེར་མེད་གཅིག་ཏུ་རྟོགས་པ་དེ་སྣང་སྲིད་ལྷ་རུ་ལྟ་བའི་ངེས་ཤེས་རེད། དེ་ཡིན་ན། ངེས་ཤེས་དེ་དང་རྣམ་པ་མཚུངས་ལྡན་བཅོས་མིན་གྱི་ཡེ་ཤེས་དེ་ནམ་རྒྱུད་ལ་སྐྱེས་ན་དེ་དུས་དབང་ཐོབ་སོང་བ་རེད། འདི་ནས་བདེན་གཉིས་དབྱེར་མེད་དུ་ལྷག་པའི་སྒྲ་སྦྱོར་རྒྱུ་དེ་ཁྱད་པར་དུ་འཕགས་པའི་དོན་རེད། ཕར་ཕྱིན་ཐེག་པའི་སྐབས་ལ་དོན་དམ་བདེན་པའི་ངོར་འཁོར་འདས་མཉམ་ཉིད་དུ་བཞེད་པ་ཙམ་ཞིག་འདི་དང་ཕྱོགས་མཐུན་ཡང་། སྐབས་འདིར་ཀུན་རྫོབ་ཏུ་ཡང་སྣོད་བཅུད་སྐུ་དང་ཡེ་ཤེས་རྒྱལ་བའི་དཀྱིལ་འཁོར་དུ་རང་སྣང་བ་ཡིན་ན། འཁོར་འདས་བཟང་ངན་མེད་པ་མཉམ་ཉིད་དུ་རྫོགས་པའི་བསམ་བརྗོད་དང་ལྡན་པས་ན་ཁྱད་པར་དུ་འཕགས་པ་རེད། ཡང་དབང་ཆོག་སོང་མཐར། དེས་ཕྱི་སྒྲོ་འདོགས་གཅོད་པའི་བླ་མས་བསླབ་གསུམ་སྡེ་སྣོད་གསུམ་གྱི་ཉམས་ལེན་རྒྱུད་ལ་འདྲེས་པར་བྱས་ནས་བུམ་པའི་དབང་བསྐུར་བ་དེ་ཉིད་ཐོབ་པ་རེད། དེ་ཐོབ་པས་ལུས་རྩ་ཡི་སྒྲིབ་པ་དག ལམ་བསྐྱེད་རིམ་བསྒོམ་པ་ལ་དབང་། ལྟ་བ་གང་རྟོགས་ན་ངོ་བོ་ཉིད་གསུམ། གྲུབ་མཐའ་འཁོར་འདས་དབྱེར་མེད་རེད། གལ་ཏེ་རྟོགས་པས་མ་ཟིན་ན་འདའ་ཀ་འོད་ཀྱི་གོང་བུ་སྒྲ་ཡིས་འཕོ་བ། འབྲས་བུ་སྐུ་བཞི་ནང་གི་སྤྲུལ་སྐུ་ཐོབ་པའི་སྐལ་བ་ཅན་དུ་བྱས་པ་རེད། དེ་ཡན་ཆད་ཀྱིས་ཕྱི་མཚན་མ་རྫས་ཀྱི་དཀྱིལ་འཁོར་སྤྲོས་བཅས་བུམ་པའི་དབང་བསྐུར་ཟེར་བ་དེ་སོང་། ཕན་པའི་དབང་དང་ནུས་པའི་དབང་གཉིས་ཀ་ཡང་སོང་། གསུམ་པ་གསང་བ་ཟབ་མོའི་དབང་ལ། ཟབ་མོའི་དབང་གསུམ། སྦྱོར་དངོས་རྗེས་དང་གསུམ་ལ་སྦྱར་ནས་གསུངས་འདུག དེའི་ནང་གི་དང་པོ་སྦྱོར་བ་རྩ་ཁམས་བྱིན་གྱིས་རླབས་པ་གསང་དབང་གི་སླད་དུ། ཡང་དབང་ཆོག་གི་རྗེས་སུ། འདི་རྩ་ཡིག་བདུད་རྩིའི་དཀྱིལ་འཁོར་ནས་ཨེ་ཝཾ་ཐབས་ཤེས་ཟུང་འཇུག་གི་དཀར་དམར་རྫས་ཀྱི་རྟེན་འབྲེལ་ལ་བརྟེན་ནས། མ་དག་ལས་རླུང་གིས་བསྐྱོད་པའི་རྣམ་རྟོག་དེ། གཟུང་འཛིན་འཁྲུལ་བའི་ཆ་དང་བཅས་པ་རང་བཞིན་གྱིས་འགག་ནས། སེམས་གསལ་སྟོང་གཉིས་མེད་ཀྱི་ཡེ་ཤེས་བརྡ་དང་ཐབས་ཀྱིས་ངོ་སྤྲོད་པའི་བྱེད་ལས་ཅན་ཞིག་རེད། ཡང་དབང་ཆོག་གི་རྗེས་སུ། གསང་དབང་འདི་གང་འདྲ་རེད་ཟེར་ན། ནང་ཡེ་ཤེས་སྟོན་པའི་བླ་མ་ཡིས་རྩ་ཡིག་བདུད་རྩིའི་དཀྱིལ་འཁོར་ནས་དབང་འདི་ལ་བརྟེན་ཏེ་ངག་དང་རླུང་གི་སྒྲིབ་པ་སྦྱངས། ལམ་གཏུམ་མོ་དང་སྒྱུ་ལུས་བསྒོམ་པ་ལ་དབང་བར་བྱས། ལྟ་བ་རང་བྱུང་གི་ཡེ་ཤེས། གྲུབ་མཐའ་མ་འདྲེས་ཡོངས་རྫོགས་ཞེས་གསུངས་པ་རེད། གལ་ཏེ་དབང་པོ་རྟུལ་ནས་གྲུབ་མཐར་མ་སྙོག་ན། འདའ་ཀ་དཔེ་ཡི་འོད་གསལ་ལ་བརྟེན་ནས་བོགས་དབྱུང་ན། འབྲས་བུ་མཁའ་ཁྱབ་གསང་གི་རྡོ་རྗེ་ལོངས་སྤྱོད་རྫོགས་སྐུར་ཐོབ་པའི་སྐལ་བ་ཅན་དུ་བྱས་པ་རེད། ཡང་དབང་ཆོག་གི་རྗེས་སུ། དེའི་ཡན་ཆད་གསང་དབང་རྗེས་འབྲེལ་དང་བཅས་པ་སོང་ནས། གཉིས་པ་དངོས་གཞི་དཔེའི་ཡེ་ཤེས་མཚོན་པའི་སླད་དུ་གཟུགས་དང་ལང་ཚོ་མཛེས་སྡུག་ཕུལ་དུ་བྱུང་ཞིང་མཚན་ཉིད་མཆོག་དང་ལྡན་པའི་རིག་མ་ལག་གཡོན་དུ་བྱིན་པ་མོས་ཤིག་གསུངས་ནས་རིག་ཙག་སྟེར་རྒྱུའི་དབང་རེད། ཤེས་རབ་ཡེ་ཤེས་ཀྱི་དབང་འདི། ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་ལ། མཉམ་སྦྱོར་གསང་བའི་བརྡ་ཐབས་ཀྱིས་ལྷན་ཅིག་སྐྱེས་པའི་དགའ་བ་བདེ་བ་ཆེན་པོའི་ཡེ་ཤེས་ཀྱི་ངང་ལ་རང་བཞིན་རྒྱ་ཆེའི་རྟོག་ཚོགས་འགག་ནས་དགའ་བཞིས་དྲངས་བའི་བདེ་སྟོང་གཉིས་མེད་ཀྱི་ཡེ་ཤེས་ངོ་སྤྲད་ཐབས་ཞིག་རེད། དེ་ཡིན་ན། ཐབས་གྲོལ་གཉིས་ཀའི་ཉམས་ལེན་གྱི་སྙིང་པོ་ཡིན་ན། འདི་འདུས་བྱས་བཅོས་མིན་འགྱུར་བདེ་མེད་རྐྱང་སྟོང་ཉིད་རྗེས་འདེབས་ཅན་ཞིག་ལ་སྦྱར་ནས་དོན་གྱི་ཡེ་ཤེས་མཚོན་པ་བྱེད་རྒྱུ་ཡང་མ་རེད། ཡང་དབང་ཆོག་གི་རྗེས་སུ། འདི་གསང་བ་ལྷན་སྐྱེས་ཀྱི་ཡེ་ཤེས་སྟོན་པའི་བླ་མ་ཡིས། བདེ་སྟོང་ཡེ་ཤེས་ཀྱི་དཀྱིལ་འཁོར་དུ་དབང་གསུམ་པ་ཤེས་རབ་ཡེ་ཤེས་ཀྱི་དབང་འདི་བསྐུར་ནས་ཡིད་དང་ཐིག་ལེའི་སྒྲིབ་པ་དག ལམ་ཕྱག་རྒྱ་བཞི་ལྡན་གྱི་སྙོམས་འཇུག་ཁ་སྦྱོར་གྱི་ཉམས་ལེན་ལ་དབང་། ལྟ་བ་ལྷན་སྐྱེས་ཡེ་ཤེས། གྲུབ་མཐའ་བདེ་སྟོང་དབྱེར་མེད་རེད། གལ་ཏེ་རྟོག་པས་མ་སྙོག་ན། འདའ་ཀ་དོན་གྱི་རྡོར་སེམས་ཀྱི་ཉམས་ལེན་ལ་གནད་དུ་བསྣུན་དུས། འབྲས་བུ་མཁའ་ཁྱབ་ཐུགས་རྡོ་རྗེ་ཆོས་སྐུ་ཐོབ་པའི་སྐལ་བ་ཅན་དུ་རྒྱུད་ལ་བཞག་པའི་རྟེན་འབྲེལ་སྒྲིག་པ་རེད། ཡང་དབང་ཆོག་གསུངས་རྗེས། དབང་འདི་དོན་དམ་བྱང་ཆུབ་སེམས་ཀྱི་དཀྱིལ་འཁོར་ལ་རིག་པའི་ཡེ་ཤེས་ཀྱི་ཐིག་ལེ་ཆོས་ཉིད་བདེ་གཤེགས་སྙིང་པོ་རང་བྱུང་དོན་གྱི་ཡེ་ཤེས་བཞུགས་པ་དེ། དབང་སྔོན་མ་དཔེ་ཡི་ཡེ་ཤེས་ཀྱིས་མཚོན་པའི་དོན་གྱི་ཡེ་ཤེས་ཉམས་ཞེན་གྱི་སྤུན་དང་བྲལ་སོང་བའི་རང་རིག་ཟང་ཐལ་རྗེན་པ་དེ་ཉིད་མངོན་སུམ་དུ་བརྡ་ཡིས་མཚོན་པར་མཛད་དེ་ངོ་སྤྲད་པ་རེད། མཐར་ཐུག་དེ་ཁོ་ན་ཉིད་སྟོན་པའི་བླ་མ་ཡིས་དབང་བཞི་པ་ཚིག་དབང་རིན་པོ་ཆེ་འདི། དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་བསྐུར་བས། འདིས་སྒོ་གསུམ་ཆ་སྙོམས་དང་བཅས་པའི་སྒྲིབ་པ་སྦྱངས། གནས་ལུགས་ཕྱག་རྒྱ་ཆེན་པོ་བསྒོམ་པ་ལ་དབང་བར་བྱས། ལྟ་བ་ཤིན་ཏུ་རྣམ་དག་གི་ཡེ་ཤེས། གྲུབ་མཐའ་བསམ་གྱིས་མི་ཁྱབ་པའི་ཟུང་འཇུག་ཡིན། འདིའི་རྟོགས་པ་མཐར་མ་ཕྱིན། གྲུབ་མཐའ་རྫོགས་པ་མ་སྙོག་ན། འདའ་ཀ་གསང་ཆེན་ཕྱག་རྒྱ་ཆེན་པོ་ལ་བརྟེན་ནས་འབྲས་བུ་མཁའ་ཁྱབ་ངོ་བོ་ཉིད་སྐུ་ཐོབ་པའི་སྐལ་བ་རྒྱུད་ལ་བཞག་པ་རེད། འདིའི་མན་ཆད་ཀྱི་ངོ་སྤྲོད་སོགས་ཡོ་ག་རྣམ་གསུམ་པོ་འདྲ་མཚུངས་ཀྱིས་སྦྱར་ཡོད་པ་རེད། འོན་ཀྱང་འདི་དབང་རྐྱང་པའི་རང་རྐྱང་ཡོ་ག་གཞི་རྫོགས་ཀྱི་འགྲོས་ཚང་བ་བསྟན་པ་ཡིན་རྒྱུ་རེད། འདི་བཞིན། སྙིང་ཐིག་འོག་མའི་དབང་སྐལ་ཡོངས་རྫོགས་ཚང་བར་བྱས་ནས་ཐམས་ཅད་བསྐུར་དུས། གོང་འོག་སྦྱོར་མི་དགོས་རྒྱུའི་དབྱེ་བསྡུ་དེ་ཡང་ཤེས་དགོས་པ་རེད་སྙམ། རང་རེ་ཚང་མ་ལ་ཟེར་བ་མིན་ཡང་། བདག་དང་བདག་འདྲའི་ཐམས་ཅད་རོ་མཉམ་ལ་མ་འདྲེས་ཡོངས་རྫོགས་ཀྱི་གོ་དོན་གཏིང་མ་འཁྲོལ་བའི་དབང་དུ་བཏང་ནས། རིམ་འཇུག་སྐབས་བབས་ཀྱི་ལྟ་དགོངས་བསྟན་དོན་དང་སྦྲེལ་ནས་འགྲོ་རྒྱུ་བྱས་ན། དེའི་ཡན་ཆད་ཀྱིས་དངོས་གཞིའི་དབང་ཡོངས་རྫོགས་གྲུབ་པ་རེད། འདི་རྩ་རྒྱུད་སྒྱུ་འཕྲུལ་དྲྭ་བ་རང་གཞུང་དང་བསྟུན་ཡོང་ན། ཕྱི་ཕན་པའི་དབང་བཅུ་དང་། ནང་ནུས་པའི་དབང་ལྔ། གསང་བ་ཟབ་མོའི་དབང་གསུམ་དང་བཅས་པ། དོད་ཐུབ་ངན་སོང་སྦྱོང་བའི་ཆོ་ག་རང་གཞུང་དང་མཐུན་པར་སོང་ཟིན། ཁྱད་པར་དུ་འདིའི་ཟབ་དབང་གསུམ་འདི། ཤ་ལྔ་བདུད་རྩི་ལྔ་སོགས་གཙང་རྨེ་མེད་པར་སྤྱོད་པའི་བརྟུལ་ཞུགས་ཅན་ལ་གསང་དབང་དང་། རིག་མའི་བརྟུལ་ཞུགས་ཅན་ལ་ཤེར་དབང་། དངོས་རིག་ཡིད་ཀྱི་ཕྱག་རྒྱས་རྟོགས་པའི་བརྟུལ་ཞུགས་ཅན་ལ་དབང་བཞི་པ་བསྐུར་ནས། ཟབ་དབང་གསུམ་མམ་དབང་གོང་མ་གསུམ་དང་བཅས་པའི་དབང་ཚང་མ་འདི། གསང་སྔགས་ནང་རྒྱུད་ཀྱི་ཆོས་ཉམས་ལེན་བྱེད་མཁན་ཞིག་ལ་ཐོག་མའི་འཇུག་སྒོ་མེད་མི་རུང་བ་ཡིན་པ་དང་། རྡོ་རྗེ་བཞིའི་ཡེ་ཤེས་རང་རྒྱུད་ནས་སྨིན་པར་བྱེད་པའི་ཐབས་ཁྱད་པར་ཅན་ཡིན་པས་དེ་ལྟར་བསྟན་པ་རེད། སྤྱིར་བླ་མེད་ཀྱི་རྒྱུད་སྡེ་ཐམས་ཅད་དབང་བཞིས་སྨིན་པར་བྱས་ཏེ་རིམ་གཉིས་ཀྱི་ལམ་ལ་གནད་དུ་བསྣུན་པ་འདྲ་ན་ཡང་། རྒྱུད་གཞན་དག་ཕལ་མོ་ཆེས་ལྷ་སྔགས་ཀྱི་རྣལ་འབྱོར་དང་། རྫོགས་རིམ་གྱི་རྩ་རླུང་ཐིག་ལེ་གནད་དུ་བསྣུན་རྒྱུ་ཙམ་ཞིག་བསྟན་ཡོད་ན། འདི་ནས་སྣང་སྲིད་དག་མཉམ་ཆེན་པོའི་ལྟ་བ་འམ་ལྷག་པར་དུ་དབང་བཞི་བ་འདིས་མཚོན་བྱ་དོན་གྱི་ཡེ་ཤེས་ངོ་སྤྲད། དེ་ཡང་རྒྱུད་རང་གཞུང་དང་མཐུན་པ་ངོ་བོ་རང་བཞིན་ཐུགས་རྗེ་གསུམ། ངང་དང་རང་བཞིན་བདག་ཉིད་ཀྱིས་མཚོན་པའི། སྐུ་གསུམ་ཀུན་འདུས་ཡེ་ཤེས་གཅིག་ལ་ཚང་བ་རེད། ངོ་བོ་རང་བཞིན་ཐུགས་རྗེ་གསུམ། ངང་དང་རང་བཞིན་བདག་ཉིད་གསུངས་དུས། ངང་རིག་པ་བྱང་ཆུབ་སེམས་ཀྱི་ངང་དུ་ཆོས་ཀུན་འདུས་པ། རང་བཞིན་དེ་ལས་གཡོ་བ་མེད་པ། བདག་ཉིད་ཆེན་པོ་གང་ཡིན་ན། དེར་མ་ཚང་མ་འདུས་པ་མེད་པ་དུས་གསུམ་རྒྱལ་བའི་ཡུམ་གྱུར་རྫོགས་པ་ཆེན་པོའི་ལྟ་བ་ལུང་རིགས་དང་འབྲེལ་བའི་དབང་བསྐུར་བ་ཡིན་ན། འདི་ཇི་ལྟར་བསྐུར་ཐབས་བྱས་པ་ནི། རྒྱུ་གཉིས་རྐྱེན་བཞི་ཚོགས་པ་ལས་རང་གནས་ཀྱི་ཡེ་ཤེས་མངོན་དུ་འཆར་བ་སྔར་ཞུས་པ་ལྟར་དུ་རེད། ད་ནི་དབང་གི་ཆོ་ག་ཡོངས་སུ་རྫོགས་པའི་རྗེས་མཐའ་རྟེན་ལ་ཐུག་པ་རེད། རྒྱལ་སྲིད་རིན་པོ་ཆེ་སྣ་བདུན་དང་བཀྲ་ཤིས་པའི་རྟགས་རྫས་བརྒྱད་སོགས་ཀྱིས་མ་འོངས་ཆོས་ཀྱི་རྒྱལ་པོའི་རྒྱལ་སྲིད་ལ་མངའ་དབང་འབྱོར་བའི་རྟེན་འབྲེལ་རྫས་ཀྱི་དབང་གིས་མཐའ་རྟེན་བྱས་པ་རེད། ཉིན་གསུམ་པའི་དབང་དོན་ཟབ་ཁྲིད།དེ་ནི། བྱིན་རླབས་ཀྱི་རྩ་བ་བླ་མ་རིག་འཛིན་འདུས་པའི་དབང་དང་དྲག་པོ་རྟ་ཁྱུང་འབར་བའི་དབང་སོགས་ཡིན། འདིའི་དབུ་ནས་འཕྲོས་པའི་གསུང་དོན། དེ་རིང་ཡང་ང་ཚོས་རིག་འཛིན་འདུས་པའི་དབང་བསྐུར་བ་ལ་ཐུག་ནས་རིག་འཛིན་འདུས་པའི་དབང་འདོན་དུས། དང་པོ་འགོ་ནས་རིག་འཛིན་ཞེས་པའི་ཚིག་དེ་ཡོང་བ་རེད། དེང་སང་ཞིག་ལ་འགའ་རེས་རིག་འཛིན་ཟེར་ན་རབ་བྱུང་མ་ཡིན་པའི་སྔགས་པའི་གཅེས་མིང་ཡིན་པ་དང་། སྔགས་པ་ཟེར་དུས་མགོ་ལ་རལ་བ་ཡོད་པའི་ཁྱིམ་ཐབ་པ་ཁོ་ནར་ཡིན་སྣང་ཤར་ཡང་། བདག་ཅག་གི་སྟོན་པ་མཉམ་མེད་རྫོགས་པའི་སངས་རྒྱས་ཤཱཀྱ་སེངྒེས། ཞིང་འདིའི་གདུལ་བྱའི་འགྲོ་བ་ཐམས་ཅད་རིམ་དང་རིམ་མིན་གྱིས་རྣམ་པ་ཐམས་ཅད་མཁྱེན་པའི་ལམ་ལ་འགོད་པའི་ཆེད་དུ། གསུང་གི་གསང་པ་ཟབ་མོས་གདུལ་བྱའི་བློ་དང་འཚམ་པའི་ཆོས་བསྟན་པ་རེད། ཆོས་བསྟན་པ་དེ་ལ་ཡང་རྒྱུའི་ཐེག་པའི་སྡེ་སྣོད་གསུམ་དང་འབྲས་བུ་ཐེག་པའི་ཐུན་མིན་རིག་པ་འཛིན་པའི་སྡེ་སྣོད་དང་བཞིར་བྱས་ཏེ་གསུངས་པ་རེད། དེ་ཡང་ཆོས་ཕུང་བརྒྱད་ཁྲི་བཞི་སྟོང་དུ་འདུས་རྒྱུ་དང་། དེ་བཞི་བོའི་ཉམས་སུ་བླང་བྱ་ཐམས་ཅད་སྡོམ་པ་གསུམ་གྱི་ཁོངས་སུ་འདུས་པ་རེད། དེ་ཇི་ལྟར་འདུས་ཤེ་ན། ཉན་ཐོས་ཀྱི་འདུལ་བ་དང་ཐུན་མོང་དུ་བསྟན་པའི་ཉམས་ལེན་ཐམས་ཅད་སོ་ཐར་གྱི་སྡོམ་པའི་ནང་དུ་འདུས་ལ། ཐེག་ཆེན་ཕར་ཕྱིན་དང་ཐུན་མོང་པའི་ཉམས་ལེན་བྱང་སྡོམ་གྱི་ནང་དུ་འདུས། རྡོ་རྗེ་ཐེག་པ་ཐུན་མོང་མ་ཡིན་པར་བསྟན་པའི་ཉམས་ལེན་ཐམས་ཅད་རིག་འཛིན་སྔགས་ཀྱི་སྡོམ་པའི་ནང་དུ་འདུས་པ་རེད། དེའི་ཕྱིར་ན། སྡོམ་པ་གསུམ་དང་དེའི་བསླབ་བྱ་ཡོངས་སུ་རྫོགས་པ་བསླབ་རྒྱུའི་ཁོངས་སུ་ཐུབ་པའི་མདོ་དང་སྔགས་ཀྱི་བསྟན་པ་མཐའ་དག་གི་ཉམས་སུ་བླང་བྱ་ཡོངས་སུ་རྫོགས་ཤིང་ཆ་ཚང་བ་རེད། དེ་ཡིན་ན། གང་ཟག་རྒྱུད་སོ་སོར་བ་གསུམ་གྱིས་ཉམས་སུ་ལེན་པར་མ་གཏོགས་གཅིག་གི་ནང་ལ་གཅིག་འདུ་མི་རུང་བ་དང་། དེ་གསུམ་མཉམ་དུ་གང་ཟག་གཅིག་གིས་སྒྲུབ་ལུགས་མེད་པ། གཅིག་སྒྲུབ་དུས་གཅིག་ཤོས་དོར་དགོས་རྒྱུ་ཞིག་གཏན་ནས་མ་རེད། གང་ཟག་གཅིག་གི་རྒྱུད་ལ་གསུམ་པོ་ལྡན་ཞིང་སྲུང་ཆོག་པ་ཞིག་རེད། དེ་གང་འདྲ་རེད་ཟེར་ན། རང་ལྡོག་མ་འདྲེས། དགག་དགོས་ཡོངས་རྫོགས་ངོ་བོ་གནས་འགྱུར། ཡོན་ཏན་ཡར་ལྡན། སྡོམ་གསུམ་གནད་ཀྱིས་མི་འགལ་བ་རེད། དེ་ཡང་དུས་སྐབས་གང་གཙོར་བལྟས་ཏེ་ཁྱད་པར་ཕྱེ་རྒྱུ་དེ་ལྟ་བུའི་དོན་དྲུག་གིས་རང་ལུགས་ཉམས་ལེན་གྱི་གནད་ལ་བཀྲལ་བ་ཡིན་ན། སྔགས་པ་རབ་ཡིན་ན་རྟེན་དགེ་སློང་ཡིན་པ་དུས་ཀྱི་འཁོར་ལོ་ལས་ཀྱང་བསྟན་ཡོད་པ་རེད་ལ་དེ་བཞིན་དུ་སློབ་དཔོན་ཆེན་པོས་ཀྱང་། ཕྱི་ལྟར་ལག་ལེན་མདོ་སྡེའི་ལུགས་སུ་སྤྱད། །རྒྱུ་འབྲས་སྤང་བླང་ཤེས་པའི་དགོས་པ་ཡོད། །ནང་ལྟར་གསང་སྔགས་ཐུན་མོང་ལུགས་སུ་སྤྱད། །བསྐྱེད་རྫོགས་དོན་དང་ལྡན་པའི་དགོས་པ་ཡོད། །གསང་བ་གསང་ཆེན་ཨ་ཏིའི་ལུགས་སུ་སྤྱད། །ཚེ་གཅིག་འོད་སྐུར་གྲོལ་བའི་དགོས་པ་ཡོད། །ཅེས་གསུངས་པ་དང་། རྗེ་བདག་ཉིད་ཆེན་པོས་ཀྱང་། ཕྱི་རུ་ཉན་ཐོས་སྤྱོད་པས་ཞི་ཞིང་དུལ། །ནང་དུ་གསང་སྔགས་རིམ་གཉིས་གདེང་དང་ལྡན། །ལ་སོགས་པ་གསུངས་པ་ལྟར་དུ། མཐར་གསང་སྔགས་བསྐྱེད་རྫོགས་རིམ་པ་གཉིས་ཀྱི་ལམ་བརྒྱུད་དེ། ཡང་མཐར་གསང་ཆེན་ཨ་ཏི་རྫོགས་པ་ཆེན་པོའི་གསེང་ལམ་འདི་ནས། ཤིན་ཏུ་མྱུར་བའི་ལམ་ཚེ་གཅིག་འོད་སྐུར་གྲོལ་བའི་གནད་བསྟན་པ་ཡིན་ན། ཐེག་བརྒྱད་སེམས་ལ་ལམ་དུ་བྱས་པའི་མཐའ་མར་ཡེ་ཤེས་ལམ་བྱེད་རྫོགས་པ་ཆེན་པོའི་དོན་རྟོགས་ཏེ་འཚང་རྒྱ་བར་མ་གཏོགས་འཚང་རྒྱ་བའི་ལམ་གཞན་ཞིག་མེད་པ་རེད། དེ་ཡང་དབང་བཞིའི་སྒྲོམ་དུ་མ་འདུས་པ་ཞིག་མེད། དེས་ན་ཐེངས་འདིའི་ཀློང་སྙིང་རྩ་པོད་ཀྱི་དབང་འདི་ནང་རྒྱུད་ཡོ་ག་གསུམ་གྱི་མཚན་ཐོག་ནས་དཔྱད་གཞིར་བྱས་ན། རྫོགས་ཆེན་ཨ་ཏི་ཡོ་ག་ལ་ཡང་ནང་རྒྱུད་ཡོ་ག་སྡེ་གསུམ་དང་སྦྱར་ནས་གསུམ་གསུམ་དགུ་རུ་ཕྱེ་བའི་ལུགས་ལྟར་དུ་བཤད་ན་ཡང་ཆོག གང་ལྟར་ཐམས་ཅད་རྫོགས་ཆེན་སྙིང་ཐིག་གི་རྩ་བའི་རྒྱུད་སྡེ་དང་སྒྲུབ་སྡེའི་ནང་དུ་འདུས་པ་རེད། དེ་ལྟར་འདུས་པ་གང་ཞིག་ལ། འདིའི་དབང་ཁྲིགས་ཡོ་ག་སྡེ་གསུམ་གྱི་ཐེག་རིམ་དང་བསྟུན་ནས་བསྒྲིགས་མེད་པ་དང་། རྩ་གསུམ་བླ་མ་ཡི་དམ་མཁའ་འགྲོའི་རིམ་པ་ལྟར་དུ་ཡང་བསྒྲིགས་མི་འདུག འོ་ན་འདི་ཇི་ལྟར་བསྒྲིགས་འདུག་ཟེར་ན། བྱིན་རླབས་བབ་སོའི་ཚུལ་དང་། གདན་གསུམ་ཡོངས་རྫོགས་རྩ་བའི་གསལ་བྱེད་ཀྱི་ཚིག་འགྲིག་མོར་ཞིག་བྱས། དགོས་དབང་མང་པོ་ཞིག་ལ་གཟིགས་ཏེ་མ་ཧཱའི་ཨ་ཏིའམ་ཨ་ཏིའི་མ་ཧཱ་དང་ཨ་ཏིའི་ཨ་ནུར་བརྗོད་ཆོག་པའི་བསྐྱེད་རྫོགས་དང་བསྟུན་སྟེ་དབང་གི་སྒོ་མོ་ཞི་ཁྲོ་ངན་སོང་སྦྱོང་བས་ཕྱེས་ནས་བསྐུར་དགོས་རྒྱུའི་ཕྱག་ལེན་ཡོད་པ་དེ། ཁར་རྩང་ཡན་ཆད་ལ་སྟ་གོན་དངོས་གཞི་དང་བཅས་པ་སོང་མ་ཐག་པའི་མཚམས་སུ། དེ་རིང་རྩ་དབང་རྒྱལ་ཐབས་སྤྱི་བླུག་དང་འབྲེལ་བའི་རིག་འཛིན་འདུས་པ་བླ་མའི་དབང་། འདི་ཨ་ཏིའི་ཨ་ནུ་མདོ་ལུང་དང་མཐུན་པར་བསྐུར་རྒྱུ་ལ་ཐུག་པ་རེད། འདིའི་ཐུན་མོང་དང་ཐུན་མིན་གྱི་དབང་གི་སྦྱོར་བ་སྔོན་འགྲོའི་ཆོས་དེ། ཁྲུས་དང། བགེགས་བསྐྲད། སྲུང་འཁོར་སྒོམ་པ་རྣམས་སྔོན་དུ་སོང་བ་ཡིན་ན། འདི་དག་གི་དགོས་འགྲེལ་ཅི་ཡོད་གསལ་ཞུས་བྱེད་མྱོང་བསམ་པ་མེད། རང་གཞན་ཚང་མས་གཤིན་གསོན་གཉིས་ཀའི་དོན་དུ་ཁྲུས་བགེགས་བསྐྲད་མཚམས་གཅོད་སོགས་བྱས་ནས་དབང་དང་ཆོ་ག་བརྒྱ་ཚར་སྟོང་ཚར་འགྲོ་ཚར་བ་རེད་མོད། འོན་ཀྱང་དོན་གྱི་ཞིབ་ཆ་འགོ་འདི་དག་ནས་འཛིན་དགོས་རྒྱུ་ཞིག་རེད་བསམ་གྱིན་ཡོད། དེ་ཡིན་ན་ཁྲུས་འདིའི་ཐད་ནས། ཐུབ་རྣམས་སྡིག་པ་ཆུ་ཡིས་མི་འཁྲུད་ལ། །འགྲོ་བའི་སྡུག་བསྔལ་ཕྱག་གིས་མི་སེལ་ཞིང་། །ཞེས་གསུངས་པ་མིན་ནམ། ཆུ་བོ་གངྒས་ལུས་ལ་ཁྲུས་བྱས་ན་སྡིག་སྒྲིབ་དག་འགྲོ་ཟེར་མཁན་ནང་པའི་ལུགས་ཞིག་ཨེ་རེད་བསམ་སྲིད་པ་རེད། ཟེར་མཁན་ཡང་ཡོད་མྱོང་པ་རེད། རྡོ་རྗེ་རྣམ་པར་འཇོམས་པ་ཁྲུས་ཀྱི་མདོ་ལ་སོགས་པ་མདོ་ལས་ཀྱང་བསྟན་ཡོད་རྒྱུ་དང་། རྒྱུད་ལས་ཁྲོ་རྒྱལ་སྨེ་བ་རྩེག་པ་ལ་སོགས་པའི་སྒོམ་བཟླས་སྒྲུབ་ཐབས་དང་། ངན་སོང་གི་གནས་ནས་འདྲེན་པའི་སྦྱོང་བ་དང་བྱབས་ཁྲུས་ལ་སོགས་པ་མང་པོ་ཞིག་གསར་རྙིང་གི་རྒྱུད་སྡེ་སོ་སོར་ནས་འབྱུང་རྒྱུ་དེ་དག་ཆུ་རྐྱང་པས་བཀྲུས་ཏེ་དག་འགྲོ་རྒྱུ་ཞིག་མ་ཡིན་པར། གསང་སྔགས་དང་རིག་སྔགས་གཟུངས་སྔགས་སོགས་ཀྱི་ནུས་པ་དང་། ཏིང་ངེ་འཛིན་གྱི་སྟོབས་རྫས་སྔགས་ཏིང་འཛིན་གསུམ་པོ་ཚོགས་པའི་སྟོབས་ཀྱིས་སྡིག་སྒྲིབ་སྦྱངས་ཐུབ་པ་རེད། ཆུ་ཡང་དོན་དུ་དཔྱད་ན། ཡུམ་ཆེན་མ་མ་ཀིའི་རང་བཞིན་དུ་དག་པ་དབང་ཡུལ་སེམས་དཔའ་སེམས་མ་དོན་ལ་གྲུབ་པ་ཡིན་ཏེ་སྔགས་ཀྱི་གྲུབ་པ་བཞི་ལྡན་ཟེར་དུས། ཆོས་ཉིད་ངོ་བོས་གྲུབ་པ། ཆོས་ཅན་རང་བཞིན་གྱིས་གྲུབ་པ། བྱིན་གྱིས་རླབས་ཀྱིས་གྲུབ་པ། ནུས་པ་མཐུ་ཡིས་གྲུབ་པ་དེ་དག་ཚོགས་པར་མ་ཟད། སྔར་ཡང་ཞུས་པ་ལྟར་དུ། སྨན་དང་ནོར་བུ་རིག་སྔགས་འདི་དག་རེ་རེའི་ངོས་ཐད་ནས་ནུས་པ་བསམ་གྱིས་མི་ཁྱབ་པ་ཡོད་རྒྱུ་དང་། འདི་ནས་ཁྱད་པར་དུ་ལས་ཀྱི་ལྷ་མཆོག་དབང་ཆེན་ཁྲོ་རྒྱལ་རྟ་མགྲིན་དམར་པོའི་ལས་སྔགས་ཀྱིས་མ་དག་པའི་འཁྲུལ་སྣང་ཡང་བསགས་སྦྱང་གིས་དག་པར་བྱས་པའི་ཐོག་ནས། རྡོ་རྗེ་སེམས་དཔའ་བདེ་གཤེགས་ཐུགས་ཀྱི་ལྷས་ཉམས་ཆགས་ཉེས་ལྟུང་དག་པར་བྱེད་པའི་ཡི་གེ་བརྒྱ་པའི་གཟུངས་སྔགས་ཀྱི་ཁྲུས་ནས་ཕྱུང་ན། ཕྱིའི་སྡིག་པ་དང་སྒྲིབ་པ། ནང་ཉམས་ཆགས་དང་ཉེས་ལྟུང་། གསང་བ་སེམས་ཀྱི་རྟོག་སྒྲིབ། ཤེས་བྱ་ཕྲ་བའི་བག་ཆགས་ཀྱི་སྒྲིབ་པ་དང་བཅས་པ་བྱང་ཞིང་དག་པར་བྱེད་པའི་རྟེན་འབྲེལ་ནུས་ལྡན་དུ་བྱས་པ་རེད། དེའི་རྗེས་བགེགས་བསྐྲད་པ་རེད། བགེགས་བསྐྲད་རྒྱུ་འདི་ཡང་ང་ཚོ་ཡོད་ས་འདི་ན་གནོད་བསྐྱལ་འདུག་པའི་བསྟན་བཤིགས་རིག་རྒྱུ་ཡོད་ལ་མེད་འགའ་རེ་ཞིག་ཕྱི་ལ་ཕུད་ནས། ངེད་ཚོ་ཡོད་ས་འདི་ན་འདུག་མ་ཡོང་ཕར་ཕྱོགས་སོང་གཞན་སྡེ་ཡོད་ས་ན་སོང་ཟེར་ནས་མགོ་གཡོག་ཞོར་ལ། གལ་ཏེ་མ་སོང་ན་ཚབ་ཆེན་ཞིག་ལས་རྒྱུ་ཡོད་ཅན་པོས་སྡིགས་བཞིན་དེད་འདུག་པ་རྐྱང་པ་ཞིག་གིས་མ་རེད། འདི་ནི་ཕྱི་ལྟར་དགྲ་འདྲེའི་འབྱུང་པོ་གདོན་བགེགས་ལོག་པར་འདྲེན་པ་སྐྱེ་འགྲོའི་ཤེས་རྒྱུད་བརླམས་ནས་མི་བདེ་བར་བྱེད་མཁན་དག་དང་། ནང་ལྟར་དུ་ཡིན་ན་ཉོན་མོང་དུག་ལྔ་དང་དེས་བསྐྱེད་པའི་མི་འདོད་སྣ་དགུའི་གཞི་མ་རྣམས། གསང་བ་ལྟར་ན་བདག་འཛིན་གྱི་ཞེན་སྣང་གཟུང་འཛིན་འཁྲུལ་བའི་དབང་གིས་ང་དང་ང་ཡིར་འཛིན་པའི་གདོན་བགེགས་ཐམས་ཅད་དེ། བདག་མེད་གཉིས་འཛིན་ཀུན་བྲལ་གྱི་དབྱིངས་དེར་སླར་མི་ལྡང་བ་མཐར་བསྐྲད་བཏང་བ་རེད། དེའི་རྗེས་ནས་མཚམས་གཅོད་ཀྱི་དོན་ཡང་། ཁྱི་རྐུན་ཞིག་སྒོ་ཁར་ཕུད་ནས་ཕྱི་རུ་མི་ཡོང་ཐབས་སྒོ་ལྕགས་སྲ་མོར་བྱས་པ་ལྟར་བཟང་ངན་གཉིས་འཛིན་གྱི་ནང་ནས་ངན་པ་སྒོ་ལ་ཕུད་བཟང་པོ་ནང་ལ་བསྡད་ནས་རེ་དོགས་སེམས་ཀྱི་ནུས་པ་མ་ཁྲོལ་པ་ཞིག་གིས། འདྲེ་བགེགས་རང་གི་སེམས་ལ་བཞག་ནས། ད་དུང་རྔ་རོལ་རྐང་གླིང་དུང་ཆེན་སོགས་དྲག་རྡུང་དྲག་འབུད་ཇི་ལྟར་བྱས་ཀྱང་ཕྱིར་ཕུད་ཐུབ་པ་མ་རེད། འདིའི་སྒྲུབ་ཁོག་གཞུང་གི་མཚམས་གཅོད་ནང་དུ། ཧྲཱི་སྣང་སྲིད་དག་པ་རབ་འབྱམས་ལ། །བགེགས་དང་བར་ཆད་མིང་ཡང་མེད། །གློ་བུར་རྣམ་རྟོག་འཁྲུལ་བའི་གདོན། །ཆོས་དབྱིངས་ངང་དུ་མཚམས་བཅད་དོ། །ཞེས་གསུངས་པའི་དོན་བཞིན། ཕྱི་མཚམས་ལོག་འདྲེན་དགྲ་གདོན་གྱི་གནོད་པ། ནང་མཚམས་རྣམ་རྟོག་ངན་པའི་འཕྲོ་འདུ། གསང་མཚམས་གཟོད་ནས་འཁྲུལ་མ་མྱོང་ཞིང་གནོད་བྱ་གནོད་བྱེད་དང་བྲལ་བ་དག་པ་ཆོས་དབྱིངས་ཆེན་པོ་གཉིས་མེད་རོ་མཉམ་གྱི་ངང་དུ་གནས་པ་དེ། སྲུང་འཁོར་གྱི་མཆོག་རེད། བཛྲ་རཀྵ་རཀྵའི་སྔགས་ཀྱིས་རྒྱས་གདབ་ན། དེ་ནི་རྡོ་རྗེ་རྒྱ་གྲམ་གྱིས་རྒྱས་གདབ་ན་རྡོ་རྗེ་སྟོང་ཉིད་ཀྱི་དོན་རེད། མི་འགྱུར་དོན་གྱི་ཆོས་ཉིད་ལ་མཚན་མའི་ཆོས་ཀྱིས་གཞོམ་གཞིག་དང་བྲལ་བའི་དོན་དེ་ཉིད་རྡོ་རྗེས་མཚོན་པར་བྱས་པ་རེད། འདིའི་མཚམས་ནས་ལོ་རྒྱུས་འབྱུང་བའི་ཆོག་ཁྲིགས་ཤར་འདོན་བྱས་ནས་འགྲོ་ཆོག་གི། ཐོག་མར་མ་གྱུར་མཁའ་མཉམ་གྱི་སེམས་ཅན་ཐམས་ཅད་ཁྱབ་བདག་གདོད་མའི་མགོན་པོ་རིགས་ཀུན་འདུས་པའི་བདག་ཉིད་ཀྱི་གོ་འཕང་རིན་པོ་ཆེར་འགོད་པར་བྱ། དེའི་ཆེད་དུ་བདག་གིས་དབང་འདི་ཞུ་རྒྱུ་ཡིན་བསམ་པ་དང་། དེ་ཡང་གནོད་བྱེད་དགྲ་བགེགས་ནས་འགོ་བཟུང་སྟེ་སེམས་ཅན་ཐམས་ཅད་ལ་ཁྱབ་པའི་ཚད་མེད་སྙིང་རྗེས་དྲངས་པའི་བྱང་ཆུབ་སེམས་མཆོག་བསྐྱེད་དགོས་པ་རེད། འདི་སྐྱེལ་མ་དགྲ་ལ་བཅོལ་བའི་མན་ངག་དང་མཐུན་པར་མ་ཚད་ཐེག་ཆེན་མདོ་སྔགས་གཉིས་ཀའི་གཞུང་རྟ་སེམས་བསྐྱེད་དག་པའི་རྒྱུ་ཡང་རེད། ཡང་འདིར། དེ་ཡང་མཚོན་བྱ་དོན་གྱི་མན་ངག་རང་བྱུང་གི་གསང་བ་ཆེན་པོ་ལ་མཚོན་བྱེད་བརྡ་དང་ཚིག་ཏུ་ཤར་བའི་རྒྱུད་ལུང་མན་ངག་ཐམས་ཅད་རྒྱལ་བ་རྣམས་ཀྱི་ཐུགས་ནས་ཐུགས་ཀྱི་གཏེར་དུ་སྦས་པ་དང་། སོགས་གསུངས་མཐར། རིག་འཛིན་འདུས་པ་བླ་མའི་དཀྱིལ་འཁོར་འདིའི་བསྐྱེད་རིམ་དེ་གང་འདྲ་རེད་ཟེར་ན། མ་བཅོས་རིག་པ་སྟོང་གསལ་གྱི་ངང་ལས་ལྷག་མཐོང་སྐད་ཅིག་དྲན་རྫོགས་ལྷུན་གྲུབ་དག་པ་རབ་འབྱམས་ཀྱི་དཀྱིལ་འཁོར་དུ་ཤར་བ། སེམས་ཉིད་གདོད་མའི་ལྷ་སྐུར་རྫོགས་པ་ཨ་ཏི་རང་གཞུང་གི་སྐྱེད་རྫོགས་ཡ་མ་བྲལ་པ་གཞིར་བཞག་གི་ཐོག་ནས། ཕུང་པོ་ཁམས་དང་སྐྱེ་མཆེད་ལྷ་དང་ལྷ་ཡི་དཀྱིལ་འཁོར་དུ་མ་བསྐྱེད་ཡོངས་རྫོགས་ཡིན་པ་ལ། གསལ་འདེབས་སྙིང་པོ་ཙམ་ཞིག་བརྗོད་པས་ལྷ་སྐུར་རྫོགས་པ་དང་། སྣང་ཆ་ཡེ་དག་ཀུན་ཏུ་བཟང་པོ་ཡབ་ཀྱི་རང་བཞིན། སྟོང་ཆ་ཡེ་ནས་གནས་པ་ཇི་བཞིན་པ་ཀུན་ཏུ་བཟང་མོ་ཡུམ་གྱི་རང་བཞིན། དེ་འདྲའི་དབྱིངས་རིག་ཐ་མི་དད་པ་སྲས་བདེ་བ་ཆེན་པོའི་རང་བཞིན་ཡིན་ན། དེ་ལྟ་བུའི་དཀྱིལ་འཁོར་གསུམ་གྱི་འཁོར་ལོ་རྫོགས་པ་ལྷན་སྐྱེས་བདེ་ཆེན་གྱི་ཡེ་ཤེས་དེ་དགའ་བཞིའི་འགྲོས་དང་མཐུན་པ་ཨ་ནུའི་ལམ་དང་ཡང་འབྲེལ་བ་ཞིག་རེད། དེ་ལྟར་ན་རྒྱུད་སྡེའི་ཐད་ཀྱི་གཞི་ལམ་འབྲས་བུའི་རྒྱུད་གསུམ་པོ་དང་མཐུན་པའི་སྟེང་ནས། ཕྱི་ལྟར་བྱང་སེམས། ནང་རིག་འཛིན། གསང་བ་ལྟར་ན་སྒྲུབ་སྡེ་བརྒྱད་གོང་དུ་གསུངས་ཡོད་པ་རེད། དེ་ལྟར་གསུངས་བའི་དཔལ་ཆེན་འདུས་པའི་རྩ་གཞུང་གི་ལུང་དྲངས་ནས་ཆོག་ཁྲིགས་མཛད་པ་ཡིན་ན། འདི་རིག་འཛིན་བླ་མའི་སྒྲུབ་པ་ཡིན་པ་ལ་བླ་མ་ཞི་བའི་ཐུགས་ཏིག་རེད། ཕྱི་ལྟར་བྱང་སེམས་ཇི་ལྟར་ཡིན་ན། ཕྱི་ལྟར་སློབ་དཔོན་ཆེན་པོ་འདིའི་སྐུ་གསུམ་གྱི་རྣམ་རོལ་མཐའ་ཡས་པ་ཡིན་ན་ཡང་། ཞིང་འདི་ཉིད་ཀྱི་དབང་དུ་བཏང་ན་སྟོང་གསུམ་མི་མཇེད་བྱེ་བ་ཕྲག་བརྒྱ་དང་དེའི་སྟེང་འོག་ཕྱོགས་བཞི་འཇིག་རྟེན་དྲུག་ལ་གུ་རུ་རིན་པོ་ཆེའི་མཚན་དང་སྐུ་ཡི་བཀོད་པ་སྣ་ཚོགས་ཀྱིས་གདུལ་བྱའི་དོན་མཛད་པའི་ནང་ནས། རང་རེ་འཛམ་བུ་གླིང་འདིར་མཚོན་ན། སྐུ་གཅིག་མཚན་བརྒྱད་འཕྲུལ་མཚན་ཉི་ཤུ་རྩ་ལྔ་ལ་སོགས་པ་གོང་ནས་གསུངས་བ་ལྟར་དུ་བཀོད་པ་སྣང་བས། སངས་རྒྱས་ཀྱི་བསྟན་པ་སྤེལ། སེམས་ཅན་གྱི་འགྲོ་དོན་མཛད་པ་ཡིན་པས་ན། སྔར་བྱོན་ཡང་ཕྱིས་སུ་མི་འབྱོན་པའི་ཐུགས་རྗེ་ཉེ་རིང་ཅན་མ་ཡིན་པར། དད་པ་ཅན་གྱི་ངོ་སྐལ་ལ་འབྲལ་མེད་རྟག་ཏུ་བཞུགས་པ། ད་ལྟའི་དུས་འདིའི་མི་ཚད་འདས་དང་མ་འོངས་ད་ལྟའི་དུས་གསུམ་ལ་འགྲོ་བའི་དོན་དུ་དབྱེ་ཞིབ་མེད་པར་བཞུགས་པ་ཞིག་རེད། དེ་ཡང་འདུལ་ཐབས་སྣ་ཚོགས་ལ་བརྟེན་ནས་གདུལ་བྱ་ཐབས་དང་ཐུགས་རྗེས་འདུལ་བ་ཡིན་པས། སྔོན་རྒྱ་གར་འཕགས་པའི་ཡུལ་དང་། ཕྱིས་གངས་ཅན་བོད་ཀྱི་ལྗོངས་ལ་བྱོན་ནས་ཆོས་བརྒྱུད་སོ་སོའི་མཁས་པ་དང་གྲུབ་པ་མང་ཆེ་བ་གུ་རུ་རིན་པོ་ཆེའི་རྣམ་སྤྲུལ་རེད། ཆོས་བརྒྱུད་ཁག་གི་བར་ཕྱོགས་འཛིན་ཆགས་སྡང་གིས་མཆོག་དམན་ཕྱེ་བ་དེ། གནད་མི་ཤེས་པར་རང་ཉིད་ཕུང་བའི་གཞི་རེད། འོན་ཀྱང་རང་ལུགས་ལྟ་སྒོམ་སྤྱོད་པའི་གནད་འཛིན་ཤེས་རྒྱུ་དང་། ཐམས་ཅད་འགལ་མེད་གདམས་པའི་གནད་འགག་བསྡུ་ཤེས་རྒྱུ་དེ། རིས་མེད་བསྟན་པའི་སྙིང་དོན་རེད། གུ་རུ་རིན་པོ་ཆེ་མ་འོངས་པར་དྲག་པོ་ལྕགས་ཀྱི་འཁོར་ལོ་ཅན་སྤྲུལ་ནས་རིག་ལྡན་དཔུང་དང་བཅས་པས་མཐའ་དམག་འདུལ། རྒྱལ་བ་བྱམས་པ་འཇིག་རྟེན་འདིར་བྱོན་དུས་ཀྱང་། རྒྱལ་སྲས་འགྲོ་འདུལ་ལ་སྤྲུལ་ནས་གསང་སྔགས་ཀྱི་བསྟན་པ་རྒྱ་ཆེར་སྤེལ་བར་མ་ཚད། བསྐལ་བཟང་སངས་རྒྱས་སྟོང་རྩའི་དུས་སུ་པདྨ་འབྱུང་གནས་སྟོང་རྩ་བྱོན་ནས་འགྲོ་དོན་མཛད་པ་སྟེ། ཁམས་གསུམ་འཁོར་བའི་སེམས་ཅན་མ་ཟད་བར། །པདྨ་འབྱུང་གནས་ཐུགས་རྗེ་ཟད་མི་འགྱུར། །ཞེས་གུ་རུ་རིན་པོ་ཆེ་ཉིད་ཀྱི་རྡོ་རྗེའི་གསུང་ལས་བྱོན་པ་ལྟར་དུ། ཕྱི་ལྟར་བྱང་སེམས་འགྲོ་དོན་ལ་སྐྱོ་སྡུག་བྲལ་བའི་བྱང་ཆུབ་སེམས་དཔའ། ནང་རིག་འཛིན་ཨོ་རྒྱན་མཁའ་འགྲོའི་ཡུལ་གྱི་ནུབ་བྱང་དྷ་ན་ཀོ་ཤ་དྲི་མེད་མཚོ་གླིང་ནས། ཕ་ཡི་རྒྱུ་ཡིས་མ་བསྐྱེད། མ་ཡི་རྐྱེན་ལ་མ་བརྟེན་པར། རྒྱལ་ཀུན་གསང་གསུམ་འདུས་པའི་བྱིན་རླབས་སྣང་བ་མཐའ་ཡས་ཀྱི་ཐུགས་ཀའི་ཧྲཱི་ཡིག་ལས་འཕོས་པའི་ཚུལ་གྱིས། ཡ་མཚན་པདྨ་ཡེ་ཤེས་ལྔ་རྫོགས་ཀྱི་གཞལ་ཡས་ཁང་ན། མ་སྐྱེད་ཡོངས་གྲུབ་མཚན་རྫོགས་ཀྱི་ཕུང་པོ་འབར་བའི་རིག་འཛིན་མཚོ་སྐྱེས་རྡོ་རྗེ་སྤྲུལ་བའི་སྐུ་དེ། རིག་འཛིན་ཡོངས་ཀྱི་རྗེ་བོའི་སྐུར་བཞེངས། འཆི་མེད་ཚེ་ཡི་རིག་འཛིན་བརྙེས། འོད་ལུས་འཕོ་ཆེན་གྱི་སྐུ་གྲུབ། དུས་གསུམ་རྒྱལ་བ་ཀུན་དང་མི་གཉིས་པའི་རིག་འཛིན་རྣམ་བཞི་མཐར་ཕྱིན། ལྷུན་གྲུབ་རིག་འཛིན་གྱི་རྒྱལ་ས་ལ་མངའ་བརྙེས་པ་ཡིན་པས་རིག་འཛིན་ཞེས་ཞུ་བ་རེད། གསང་བ་ལྟར་ན། སྒྲུབ་སྡེ་བརྒྱད་ཀྱི་སྤྱི་བཀའ་ཡོངས་རྫོགས་དེ་ཁར་རྩང་ཞུས་པ་ལྟར་དུ། རིན་ཆེན་གྱི་སྒྲོམ་བུ་གང་ལ་བབས་པའི་སློབ་དཔོན་ཆེན་པོ་འདི་ཉིད། དོན་དུ་རིག་འཛིན་རྡོ་རྗེ་ཆོས། སྟོན་པ་པོ་རང་། སྡུད་པ་པོ་ཡང་རང་། བསྒྲུབ་བྱ་སྒྲུབ་བྱེད་རོ་གཅིག་པའི་བཀའ་བབས་ལྟར་དུ་སྣང་བའི། གསང་བ་ལྟར་ན་སྒྲུབ་སྡེ་བརྒྱད་དེ་ལྟར་གསུངས་པ་རེད། ཡེ་ཤེས་ཀློང་དགུའི་རྩལ། ཡི་དམ་སྒྲུབ་སྡེ་བརྒྱད། སྤྱི་དཔལ་གཅིག་དང་རྣམ་དགུའི་རྡོ་རྗེ་སློབ་དཔོན་གྱི་ཚུལ་དུ་བྱོན་པ་དེ། མཆོད་རྟེན་བདེ་བྱེད་བརྩེགས་པ་ན་མཁའ་འགྲོ་མ་ལས་ཀྱི་དབང་མོ་ཆེས་སྔར་འོག་མིན་གསང་ཆེན་རོལ་བའི་ཕོ་བྲང་ནས། ཀུན་བཟང་དཔལ་ཆེན་ཧེ་རུ་ཀས་རྡོ་རྗེ་ཐེག་པ་བསྟན་པའི་བཅུད་རྡོ་རྗེའི་ཚིག་གིས་གསུངས་པ་དེ་ཉིད། རྡོ་རྗེའི་ཆོས་ཀྱིས་བསྡུས་ནས་རྫུ་འཕྲུལ་གྱིས་ཡི་གེའི་བརྡ་ཐབས་ཤར་བ་དེ། ཡེ་ཤེས་རྣམ་དགུའིི་རོལ་བ་རང་སྣང་རིན་པོ་ཆེའི་སྒྲོམ་བུ་སོ་སོར་ཤར་བ་ཡིན་ན། དེ་ཉིད་དངུལ་སྒྲོམ་ཡང་དག་གི་ཆོས་སྐོར་དེ་སློབ་དཔོན་ཧཱུྃ་ཆེན་ཀ་རའི་ཕྱག་ཏུ་བབ། ལྕགས་སྒྲོམ་འཇམ་དཔལ་སྐུ་ཡི་ཆོས་སྐོར་དེ་སློབ་དཔོན་འཇམ་དཔལ་བཤེས་གཉེན་གྱི་ཕྱག་ཏུ་བབ་པ་སོགས་ནས་རིན་ཆེན་སྣ་ཚོགས་ཀྱི་སྒྲོམ་བུ་བཀའ་བརྒྱད་པོ་དཀྱིལ་འཁོར་གཅིག་ཏུ་སྒྲུབ་པའི་ཆོས་སྐོར་དེ། སློབ་དཔོན་ཆེན་པོའི་ཕྱག་ཏུ་བབས་པ་ཡིན་ན། དཀྱིལ་འཁོར་ཐམས་ཅད་ཀྱི་བཀའ་བབ་ཡིན་པའི་ནང་ནས། སྐབས་འདིའི་སྒོས་ཆོས་ཀྱི་དབང་དུ་བཏང་ན། ཚོམ་བུ་དགུའི་ནང་གི་རིག་འཛིན་བླ་མའི་སྒྲུབ་ཐབས་སུ་གཏོགས་པའི་རྩ་བའི་དབང་རེད། སྤྱིར་ཐེག་པ་ཆེ་ཆུང་གི་ཡོན་ཏན་ཐམས་ཅད། བླ་མ་དགེ་བའི་བཤེས་གཉེན་ལ་བརྟེན་ནས་འབྱུང་རྒྱུ་དང་། ཁྱད་པར་གསང་སྔགས་ཟབ་མོའི་དངོས་གྲུབ་ཐམས་ཅད་བླ་མ་ལ་བརྟེན་ནས་མ་གཏོགས་གཞན་ཞིག་ནས་ཡོང་དོན་མེད་ལ་དུས་ཅི་འདྲ་བསྐལ་བ་གང་འདྲ་ཞིག་ཏུ་འགྱུར་ཡང་ཡོད་མི་སྲིད། བླ་མས་ཀྱང་དང་པོར་དབང་བསྐུར་ནས་རྒྱུད་སྨིན་པར་བྱས། དེ་ནས་སྨིན་པ་དེ་ཉིད་ལ་གྲོལ་བའི་ཐབས་དང་གདམས་པ་བསྟན་ཏེ་གྲོལ་བ་ཐོབ་དགོས་པས། བླ་མ་ལ་མ་བསྟེན་པ་དང་དེའི་བཀའ་ལུང་མ་ནོད་ན། ཐུན་མོང་མཆོག་གི་དངོས་གྲུབ་ཐོབ་པ་ཕར་བཞག སྔགས་ཀྱི་ལས་ཐུན་མོང་བ་ཞིག་ཀྱང་འགྲུབ་མི་ཐུབ། གལ་ཏེ་སྔགས་ལ་སྤྱོད་པའི་ཁུལ་ཙམ་བྱས་ཀྱང་ཆོས་ལ་དབང་ཟ་བའི་ཉེས་པའི་རྣམ་སྨིན་མི་ཟད་པ་མྱོང་རྒྱུ། ཁྱད་པར་དུ་ལྟ་བ་ཆོས་ཉིད་ཀྱི་རྫོང་། ཚིག་དང་དཔེ་ཡིས་མཚོན་ཐབས་མེད་པའི་དོན་དམ་ལྷན་ཅིག་སྐྱེས་པའི་ཡེ་ཤེས་དེ་ནི། དོན་རྒྱུད་དགོངས་པ་འཕོས་པའི་བྱིན་རླབས་ལས་མ་གཏོགས་གཞན་གང་ལས་འབྱུང་ཐབས་མེད་པ་དེ། མདོ་མཚན་ཉིད་ཐེག་པའི་སྐབས་ནས་ཀྱང་། གཞན་གྱིས་བརྗོད་མིན་ལྷན་ཅིག་སྐྱེས། ལ་སོགས་པས་བསྟན་པ་ཡིན་པས། སྔགས་ཀྱི་སྐབས་སུ་སྨོས་ཀྱང་ཅི་དགོས། གཞི་བདེ་བཤེགས་སྙིང་པོ་རང་ལ་ཡོད་ཀྱང་། རྐྱེན་དགེ་བའི་བཤེས་གཉེན་དང་ཐབས་དེ་ཡི་གདམས་ངག་ལ་མ་བརྟེན་ན། དཔེར་ན། ཉི་མ་ནམ་མཁའ་ན་ཡོད་ཀྱང་། མཚམས་སྦྱར་བའི་རྐྱེན་མེ་ཤེལ་མེད་ན། ས་གཞིའི་སྤྲ་བ་སྐོམ་པོ་ཡིན་ཡང་མེ་རུ་འབར་ཐབས་ནམ་ཡང་མེད་པ་ལྟར་རེད། དུས་གསུམ་གྱི་སངས་རྒྱས་ཐམས་ཅད་ཀྱིས་དུས་སྐད་ཅིག་ཙམ་ལ་ཡང་སེམས་ཅན་ལ་ཐུགས་རྗེ་མ་ལྷོད་པ་ཡིན་ཡང་། བླ་མ་མེད་ན་སློབ་མ་ལ་ལྷ་ཡི་བྱིན་རླབས་དང་ཟབ་མོའི་རྟོགས་པ་སྐྱེ་ཐབས་མེད་པ་རེད། སྔར་གྱི་གྲུབ་ཐོབ་སོགས་ཡིན་ཡང་། ཡི་དམ་ལྷ་ཡི་ཞལ་དངོས་སུ་མཇལ་དུས་ཡི་དམ་གཙོ་བོར་བཟུང་བས་རྟེན་འབྲེལ་འཆུགས་ནས་དངོས་གྲུབ་ཐོབ་རྒྱུ་འགྱངས་སོང་བའི་ལོ་རྒྱུས་ཡོད་པ་ལྟར་རེད། དེ་ཡིན་ན། རིག་འཛིན་བླ་མ་སྒྲུབ་ཚུལ་སྤྱིའི་ཐད་ནས་མཚན་ཉིད་ཀུན་ལྡན་གྱི་བླ་མ་ལ་བསྟེན་ནས་དགོངས་སྤྱོད་ལོན་པ་བྱ་རྒྱུ། སྒོས་རང་སེམས་ཆོས་སྐུར་ངོ་སྤྲོད་པའི་མན་ངག་ཟབ་མོ་དེ་བླ་མའི་ཞལ་ནས་མཉན་ཏེ་དེའི་སྒྲུབ་པ་ཉམས་ལེན་ནན་ཏན་གྱིས་སྙིང་པོར་འཛིན་རྒྱུ། ཡང་སྒོས་སྐབས་འདིའི་བྱིན་རླབས་ཀྱི་རྩ་བ་བླ་མའི་སྒྲུབ་པ་འདི། གྲུབ་པའི་རིག་འཛིན་དགུ་དང་ལམ་གྱུར་གྱི་རིག་འཛིན་བཞིས་བསྡུས་པའི་རིགས་ཀུན་འདུས་པའི་བདག་ཉིད་རིག་འཛིན་མ་ཧཱ་གུ་རུའི་དཀྱིལ་འཁོར་དུ་ཚང་བ། དེ་ལྟ་བུའི་བྱིན་རླབས་ཀྱི་དབང་གི་རིམ་པ་རེད། འདིའི་བརྒྱུད་པའི་ཐད་ནས་བཤད་ན། རིང་བརྒྱུད་ཀུན་ཏུ་བཟང་པོ་ནས་ད་ལྟའི་བར་དུ་བཀའ་མ་ལྟར་ན་བརྒྱུད་པ་གསུམ་རེད། ཉེ་བརྒྱུད་གཏེར་མ་ལྟར་ན། སྔ་འགྱུར་རང་ལུགས་ཀྱི་བརྒྱུད་པ་དྲུག་ལྡན་ནམ་དགུ་ལྡན་གྱི་བརྒྱུད་པ་དང་། དེའི་སྟེང་ནས་ཤིན་ཏུ་ཉེ་བརྒྱུད་ཀྱིས་བཤད་ཡོང་ན། རྫོགས་ཆེན་ཀློང་ཆེན་སྙིང་ཐིག་གི་བཀའ་བབས་བརྒྱུད་པ་གཅིག་འདུས། རང་བྱུང་རྡོ་རྗེ་འཇིགས་མེད་གླིང་པ་ནས་ད་ལྟའི་བར་བརྒྱུད་པའི་བརྒྱུད་ཐག་ཉེ་བ། དེ་ཡང་དངོས་གྲུབ་ཀྱི་སྣ་ཁ་མ་ལོག བྱིན་རླབས་ཀྱི་དྲོད་རླངས་མ་ཡལ་བའི་བརྒྱུད་པ་བཟང་པོ་གསེར་གྱི་ཉག་ཐག་ལྟ་བུ་ལས། ཕ་ནོར་བུ་སྐལ་དུ་ལེན་རྒྱུའི་དགོངས་དོན་དང་བཅས་པས་ཐོག་མར་འདི་ནས་ཆོག་ཁྲིགས་ཀྱི་ནང་བཞིན་ཕྱག་ལེན་མི་ནུབ་པའི་ཆེད་དུ་མཎྜལ་ཞིག་འབུལ་བར་ཞུ། མཚམས་འདི་ནས། ཧོ། བདག་ནི་སྐལ་ལྡན་རིགས་ཀྱི་བུ་སོགས་སྐྱབས་འགྲོ་སེམས་བསྐྱེད་རྗེས་ཟློས་མཛད་མཐར། སྔགས་སྡོམ་བཏགས་པ་བ་དང་མཚན་ཉིད་པའི་ཐོབ་མཚམས་ལ་སོགས་སྔར་ཞུས་པ་ལྟར་རེད། འདི་ནས་སློབ་མ་ལྷར་བསྐྱེད་སྤྱི་མཚུངས་ལྟར་དུ་འབྱུང་བ་རེད། གོང་ནས་དང་པོ་ལས་སྔགས་དང་སྦྲེལ་ནས་ཨོཾ་སྭ་བྷཱ་ཝའི་སྔགས་ཀྱིས་ལས་ཆུ་འཐོར་བ་རེད། ལས་བུམ་གྱི་ཆུ་འཐོར་ཞིང་སྭ་བྷཱ་ཝ་འམ་ཡང་ན་མ་ཧཱ་ཤཱུནྱ་ཏཱའི་སྔགས་འདོན་རྒྱུ་དེ། ཆོས་ཐམས་ཅད་རང་བཞིན་གྱིས་རྣམ་པར་དག་པ་ལ་དེ་ལྟར་ཤེས་པའི་ང་རྒྱལ་འཛིན་པའི་ཐ་མལ་གྱི་སྣང་ཞེན་སྦྱངས་བའི་དོན་རེད། སྔགས་ཀྱིས་སྒྲོན་པའི་ཆབ་སོགས་འཐོར་རྒྱུ་འདི་འབག་བཙོག་སྦྱངས་པ་དང་བགེགས་སོགས་བསལ་བ། མཆོད་པ་བྱིན་བརླབས། མཆོད་པ་ཕུལ་བ། ཐུགས་རྒྱུད་སྐུལ་བ་སོགས་ཀྱི་སྔོན་དུ་འགྲོ་བའི་ཆོས་སམ་དེ་དག་གི་ནུས་པ་ཅན་ཞིག་རེད། བྱིན་འབེབས་དངོས་ཀྱི་དམིགས་རིམ་ལ། ཏིང་འཛིན་གསུམ་བསྐྱེད་མ་ཧཱའི་སྐྱེད་རིམ་གྱིས་གཞི་བཟུང་སྟེ། རླུང་སེམས་སྒྱུ་མའི་ལྷ་སྐུ་ཡེ་ཤེས་ནམ་མཁའི་གཟུགས་ཅན་ལས་ཤིན་ཏུ་ཕྲ་བའི་སྒོ་གསུམ་མི་ཤིག་རྡོ་རྗེ་གསུམ་གྱི་ངོ་བོ་ལ། ཇི་བཞིན་དུ་སྣང་བ་ཨ་ནུའི་དགོངས་སྤྱོད་དང་ཆབ་ཅིག་ཏུ། ཀ་དག་འོད་གསལ་སྟོང་བའི་རང་མདངས་ལྷུན་གྲུབ་མ་འགག་དག་པ་རབ་འབྱམས་ཀྱི་དཀྱིལ་འཁོར་དུ་ཤར་བ། རང་རིག་ཆུ་ལས་ཉ་ལྡང་བ་ལྟར་དུ་རིག་རྩལ་དཀྱིལ་འཁོར་གྱི་ལྷ་ཚོགས་གཙོ་དང་འཁོར་གྱི་རྣམ་པ་ཤར་བ་དེ། ཨ་ཏིའི་བྱར་མེད་ལྷུན་གྲུབ་སྐད་ཅིག་དྲན་རྫོགས་སུ་གསལ་ན། དེ་ཡང་སྔར་མེད་རྟོག་བཟོ་ཡིད་དཔྱོད་ཀྱི་རི་མོའི་སྣང་བརྙན་ཙམ་ཞིག་མ་ཡིན་པར། དམ་ཚིག་ཡེ་ཤེས་དབྱེར་མེད་ཡེ་ནས་ལྷུན་གྱིས་གྲུབ་པའི་ལྷ་ཉིད་དུ་ང་རྒྱལ་གྱི་གསལ་སྣང་འཛིན་པ་ཙམ་ཞིག་རེད། འདིའི་སྐབས་ལ་རྗེ་བཙུན་མ་ཧཱ་གུ་རུ་སྣང་སྲིད་ཟིལ་གནོན་གྱི་ཆ་བྱད་ཅན། སྤྱིར་སྣང་སྲིད་ཟིལ་གནོན་གྱི་ཕྱག་གཡས་པའི་རྡོ་རྗེ་དེ་བསྡིགས་པའི་ཚུལ་གྱིས་འཛིན་པ་དང་། འདི་ནས་རིག་འཛིན་འདུས་པ་ཡིས་ཟིལ་གནོན་གར་གྱི་ཕྱག་རྒྱ་དེ་ཕྱག་གཉིས་ནམ་མཁར་ལྡིང་ཞིང་གསེར་གྱི་རྡོ་རྗེ་ཕྱར་བའི་རྣམ་པ་ཅན་དང་། སྣང་སྲིད་ཟིལ་གནོན་གྱི་སྐུ་གཡོན་པའི་མཆན་ན་ཤེས་རབ་མཚོན་བྱེད་ཀྱི་ཁ་ཊཱཾ་བསྣམས་པ་ཡིན་ན། འདི་ནས་ཡུམ་ལྷ་ལྕམ་མནྡ་ར་བ་གཡོན་ནས་འཁྲིལ་ཞིང་འཁྱུད་སྟབས་ཅན་དུ་གསལ་རྒྱུ་རེད། སྣང་སྲིད་ཟིལ་གནོན་སྐུ་མདོག་དཀར་པོ་དེ། ཉེས་པའི་སྐྱོན་གྱིས་མ་གོས་པའི་རྟགས། དེ་ལ་དམར་གྱི་གཟི་མདངས་ཆགས་པ་ནི་ཐབས་ཤེས་གཉིས་མེད་བདེ་བ་ཆེན་པོ་སྐུ་ལ་རྫོགས་པའི་བརྡ། ཞི་དང་རྒྱས་པས་སྣང་བ་དབང་དུ་འདུས་ཤིང་དབང་དང་དྲག་པོས་སྲིད་གསུམ་ཟིལ་གྱིས་གནོན་པ། ཕྱག་གཡས་པས་གསེར་གྱི་རྡོ་རྗེ་ནམ་མཁར་ཕྱར་བ་རིག་ལྔའི་དབང་རྫོགས་གྱི་རྟགས་དང་། མི་འགྱུར་རྟག་པའི་ཆོས་ཉིད་དེ་མཚན་མ་རྟགས་ཀྱི་རྡོ་རྗེ་རུ་ཕྱར་བ། གཡོན་མཉམ་བཞག་གི་ཕྱག་རྒྱས་བནྡྷ་ཚེ་བུམ་བཅུད་ལྡན་བསྣམས་རྒྱུ་དེ། སྐྱེ་ཤི་རྩ་གཅོད་ཀྱི་ཀ་པ་ལར་འཆི་མེད་ཡེ་ཤེས་ཀྱི་བདུད་རྩིས་གང་བར་བྱས་པའི་ཚེ་བུམ་བཅུད་ལྡན། གང་འདོད་ལྷུན་གྲུབ་དཔག་བསམ་ཤིང་གི་ཁ་རྒྱན་བྱས་ནས་བསྣམས་ཡོད་པ། ཞབས་རྒྱལ་པོ་རོལ་སྟབས་ལ་བཞུགས་པ་ཞིག་སྒོམ་དགོས་པ་རེད། རྒྱལ་པོ་རོལ་སྟབས་བཞུགས་རྒྱུ་དེ་འཁོར་འདས་མཉམ་པ་ཆེན་པོའི་ངང་ལས་འགྲོ་དོན་ལ་སྐྱོ་དུབ་མེད་པའི་བརྡ་རེད། གུ་རུ་རིན་པོ་ཆེའི་དབུ་ཞྭ་འདི་ལ་རིགས་མང་ཡང་། སྣང་སྲིད་ཟིལ་གནོན་ཟ་ཧོར་རྒྱལ་པོའི་ཆས་ཅན་ཡིན་པས། པདྨ་མཐོང་གྲོལ་ལམ་པདྨ་འདབ་ལྡན་དང་འདབ་ལྡན་རིགས་ལྔ་ཞུ་རྒྱུ་དེ་ཡིན་དགོས་རེད། འདི་ནས་པདྨའི་མཉེན་ཞུ་གསུངས་འདུག་ཀྱང་པདྨ་མཐོང་གྲོལ་པདྨ་ཁ་འབུས། ཤྭ་བའི་མཉེན་ཞུ་གསོལ་དུས་ཀྱང་ཡོད་པ་རེད། གང་ལྟར་ལྷ་ལྕམ་མནྡ་ར་བས་གུ་རུ་ལ་བརྡ་སྟོད་མཛད་པ་ལྟར། འདབ་ལྡན་རིགས་ལྔ་དེ་སྐུ་ལྔའི་དབང་རྫོགས་དང་ཡེ་ཤེས་ལྔ་ལྡན་ཕྲིན་ལས་རྣམ་བཞི་མཆོག་དང་རྣམ་ལྔ་ཡིས་འགྲོ་དོན་མཛད་པའི་བརྡ་རྟགས་ལ་གོ་ཆོག་པ་རེད། དབུ་ཞྭའི་རྩེ་མོར་གསེར་གྱི་རྡོ་རྗེའི་ཏོག་བཙུགས་རྒྱུ་དེ། རྡོ་རྗེ་ལྟ་བུའི་ཏིང་འཛིན་བརྙེས་པའི་བརྡ་དང་། དར་སྣ་ལྔ་ཡི་ཅོད་པན་འཕུར་ལྡིང་དུ་གཡོ་བ་དེ་རིག་པའི་གནས་ལྔར་མཁས་ཤིང་གང་འདུལ་ཐབས་མཁས་ཀྱིས་འགྲོ་དོན་མཛད་པའི་རྟགས། དེའི་རྗེས་གཡས་གཡོན་དབུས་གསུམ་ལ་རྒོད་སྒྲོ་དང་རྨ་བྱའི་མཇུག་སྒྲོ་ཡིས་རྒྱན་ཡོད་པའི་གཡས་གཡོན་གྱི་རྒོད་སྒྲོ་ནི། ལྟ་བས་གནམ་འཕང་བཅད་ཅིང་ཐབས་ཤེས་ཟུང་དུ་འབྲེལ་བའི་བརྡ། དཀྱིལ་ལ་རྨ་བྱའི་སྒྲོས་རྒྱན་པ་དེ། དུག་ལྔ་ཡེ་ཤེས་ལྔར་འཆར་ཞིང་སྣང་སེམས་དབྱིངས་རིག་འོད་དུ་འཆར་བའི་བརྡ་ཡིན་པ་ལ་སོགས་པ་གསུངས་ཡོད་ན། མདོར་ན་བརྡའི་དོན་རྟགས་ཀྱིས་མཚོན་པའི་རྣམ་པ་གསལ། རྣམ་དག་དྲན། ང་རྒྱལ་བརྟན་པའི་ངང་དང་མ་བྲལ་བ་གལ་ཆེ་བ་རེད། གོང་ནས་སྔགས་དང་ཏིང་འཛིན་གྱིས་ཐ་མལ་གྱི་སྣང་ཞེན་སྦྱང་བ་བཞིན་དུ། རང་ཉིད་ཀྱི་གདོས་བཅས་ཤ་ཁྲག་གི་ལུས་འདི། དག་པ་འོད་སྐུ་སྣང་ལ་རང་བཞིན་མེད་པ་འོད་ཀྱི་ལུས་ལ་ཡེ་ཤེས་ཀྱི་སྙིང་པོ་ཅན་དུ་གསལ་རྒྱུ་དེ་ཡང་ཡིན་པ་ལ་ཡིན་པར་ཤེས་པའི་ལྷའི་ང་རྒྱལ་ལམ་ངེས་ཤེས་སྐྱེད་པ་ཙམ་ཞིག་རེད། འདིའི་འོག་ནས་གནས་གསུམ་ཡིག་འབྲུ་གསུམ་གྱིས་མཚན་པ་ལས། བྱིན་འབེབས་ཚིག་བདུན་གསོལ་འདེབས་སོགས་ཀྱི་འདོན་པ་གསུངས་རྗེས་སུ་ཕེབས་པའི་འཕྲོས་དོན། གོང་གི་བྱིན་འབེབས་ཀྱི་ཚིག་འདི་རྡོ་རྗེའི་མཁའ་འགྲོ་མ་འབུམ་ཕྲག་མང་པོས་མགྲིན་དབྱངས་གཅིག་གྱུར་གྱིས་གུ་རུ་རིན་པོ་ཆེ་ཚོགས་འཁོར་ལ་སྐུལ་ཞིང་སྤྱན་འདྲེན་པའི་ཚིག་ཅིག་རེད། འདི་ལ་ང་ཚོས་རྡོ་རྗེའི་ཚིག་བདུན་གསོལ་འདེབས་ཞུ་བ་རེད། འདི་ནས་དཀྱིལ་འཁོར་གྱི་ཞལ་ཕྱེས་ཏེ་དབང་བསྐུར་བ་སོགས་ཀྱི་ཆོ་ག་ལ་དབྱིངས་ནས་ཡེ་ཤེས་པ་སྤྱན་དྲངས་ཏེ་བདག་དམ་ཚིག་པར་གཉིས་མེད་དུ་ཐིམ་ཞིང་། བདག་གནས་ཡོ་བྱད་དང་བཅས་པར་བྱིན་གྱིས་བརླབས་ཤིང་བགེགས་དང་ལོག་འདྲེན་གྱི་བར་ཆད་སེལ་བའི་འདོད་དོན་གསོལ་བའི་ཚིག་རྗེས་མ་གསུམ་སྣོན་པ་དང་བཅས་པ། གཏེར་ཁ་སོ་སོར་ནས་འདི་བཞིན་འབྱུང་བ་རེད། འདིའི་ཐོག་མའི་ཚིག་རྐང་། སྔོན་སྐལ་མ་འདི་ཡང་དེ་བཞིན་དུ་འབྱུང་བ་རེད། ཚིག་བདུན་གསོལ་འདེབས་ནི། རང་གཞན་ཚང་མས་ཁྲི་ཚར་འབུམ་ཚར་བཏོན་ཟིན་པ་དང་འདོན་བཞིན་པ་རེད་མོད། འོན་ཀྱང་ནང་དོན་ལ་བསམ་བློ་བཏང་རྒྱུ་བརྗེད་དེ་མི་ཤེས་མཁན་ཡང་ཡོད་སྲིད་པ་རེད། དེ་རིང་བྱིན་འབེབས་སམ་ཡེ་ཤེས་དབབ་པ་འདི་དང་འབྲེལ་ནས་འདིའི་དོན་རགས་ཙམ་ཞུས་ན་བསམ། འདི་ཕྱི་ལྟར་བཤད་པ། ནང་ལྟར་བཤད་པ། གསང་བ་ལྟར་བཤད་པ། ཡང་གསང་མན་ངག་གི་ཚུལ་དང་བསྟུན་ནས་བཤད་པ་སྟེ་བཤད་ལུགས་རྣམ་པ་བཞི་ཡོད་པ་རེད། རེད་དེ་དེ་ཚང་མ་བཤད་ན་དུས་ཚོད་ཡུན་རིང་འགོར་འགྲོ། འགའ་རེས་བསམ་ན་ཚེ་གང་དུས་གཅིག་གི་ཟ་མ་ལན་གཅིག་ཡིན་པས་མ་གོ་རུང་ཉན་དགོས་ཉན་པ་ཙམ་ལ་ཡང་བག་ཆགས་བཟང་པོ་ཞིག་རྒྱུད་ལ་བཞག་འགྲོ། དེ་ཡིན་ན་འདི་དང་ཕྱི་མ་གཉིས་ཀར་རང་ཉིད་ལ་ཕན་ཐོགས་འབྱུང་བ་རེད་བསམ་མཁན་ཡོད་པ་རེད། ཡང་ལ་ལ་ཞིག་ལ་སུན་སྣང་སྟེར་བྱེད་རེད་འགྲོ་བ་འང་ཡོད། གང་ལྟར་དུས་ཚོད་ཀྱང་ཆེན་པོ་མི་འདུག སྔ་དྲོ་དབང་མ་སྒྲུབ་ན་ཆོ་གའི་ཡན་ལག་མི་ཚང་གི། ཕྱི་དྲོར་དབང་རྫས་མ་འགྲེམ་ན་དབང་བསྐུར་ཐོབ་ཀྱི་མིང་མི་འདུག དེ་ཡིན་དུས་གལ་ཏེ་སྨིན་གྲོལ་རྒྱབ་རྟེན་དང་བཅས་པ་ཚང་རྒྱུའི་ལུགས་ལྟར་བྱས་ན། མཁྱེན་བརྩེ་དབང་པོའི་ཕྱག་བཞེས་བཞིན་ཉིན་བཅོ་ལྔར་འགོར་བ་གཞི་བཞག་རེད་འདུག་བསམ་རྒྱུ་ཞིག་རེད། ད་འདི་ནས། མང་པོ་འདུས་པའི་ཚོགས་ནང་ན་དགོན་བདག་རྣམ་པས་མ་འོངས་ཕྱི་མཐའི་བསྟན་རྒྱུན་ལ་གཟིགས་ནས་སྡེ་སྣོད་འཛིན་པ་རེད་རྒྱུའི་འདིང་བརྒྱབ། ཕ་མ་དག་གིས་བུ་རྒྱུད་ཚོས་སྡིག་འཕྲོ་ཞིག་ཨེ་ཆོད་བསམ་སྟེ་གྲྭ་ཆས་རེ་གྱོན་བཅུག་ནས་མངགས་ཡོང་བ་ཡང་མང་པོ་རེད། ཡིན་ན་ཡང་དེ་དག་གི་རང་གཤིས་བྱིས་པའི་ན་ཚོད་ལས་མ་འདས་པར་མ་ཟད་ཕ་མའི་ཐལ་ལྕག་དང་ད་རུང་ཁ་འབྲལ་ཐབས་མེད་པ་ཞིག་ལ་ཁག་མེད་ཀྱང་། གསུང་ངག་སྡོམས་ཟེར་ན་གོ་རྒྱུ་མ་རེད་ལ་ངག་བཅད་གྱིས་ཟེར་ན་ཡང་དེ་བཞིན་རེད། ཁ་མ་གྲག་ཟེར་ན་གོ་འགྲོ་རྒྱུ་རེད་དེ། མང་ཆེ་བ་ཁམས་པའི་མི་ཡིན་པས། ཁ་གྲག་མི་ཆོག་པའི་རྒྱུ་མཚན་ཅི་ཡིན་ལོས་ཟེར་རེད། དེ་ནས་མི་རེ་རེ་ལ་གཏམ་ལན་རེ་རེ་སྟེར་དུས་འུར་དེ་བས་ཆེ་ཞིག་རེད་འགྲོ་རྒྱུ་གཞི་བཞག་རེད། མི་གཞིའི་སྤུས་ཚད་དེ་གློ་བུར་ལ་བསྒྱུར་རྒྱུ་གང་ན་ཡོད། ང་ཚོ་བོད་མི་རིགས་འདིའི་བསམ་སྤྱོད་ཡར་ཐོན་གྱི་རྩེ་ལ་ཡོང་རྒྱུར། ད་རུང་དུས་རབས་ཕྱེད་ཅིག་མ་སྒུག་ན་རེད་རྒྱུ་མ་རེད་བསམ་གྱིན་འདུག དུས་རབས་ཕྱེད་ཅིག་ལ་འབད་བརྩོན་བྱས་ན། ད་ལྟར་དང་མི་འདྲ་པ་ཞིག་ཡོང་ཐུབ་རྒྱུ་རེད། དེ་ཡིན་དུས། ཡུན་རིང་ངང་སྒུག་མ་བྱས་ན་སུས་ཇི་ལྟར་བཤད་ཀྱང་རང་ཉིད་ངལ་བའི་རྒྱུ་ཡིན་ཤས་ཆེ་བསམ་བཞིན་ཡོད་རེད། མར་མེ་མང་པོ་ཞིག་མ་སྦར་ན་མཆོད་པ་མེད་དུས་བློ་མི་བདེ། སྦར་ཆེ་སོང་ན་ཡང་དྲོད་ཀྱིས་འདུག་མི་ཐུབ་རྒྱུ་ཡང་རེད་རྒྱུ་ཡོད་པ་རེད། མཚམས་རེ་བཤད་རོགས་མི་བྱེད་པའི་དཀའ་ངལ་ཡོད་རེད་མོད། མཚམས་རེ་ལ་ཉན་རོགས་མི་བྱེད་པའི་གནས་ཚུལ་ཡང་ཡོད་རེད། རྗེ་བཙུན་མི་ལའི་གསུང་མགུར་ལས་གསུངས་པ་ལྟར། ཕ་ཡོད་ཙ་ན་བུ་ང་མེད། །བུ་ང་སླེབས་ཚེ་ཕ་མ་ཤི། །གཉིས་ཀ་འཛོམས་ཀྱང་སྙིང་པོ་མེད། །ཅེས་གསུངས་པ་ལྟར། འཇིག་རྟེན་གྱི་བྱ་བའི་འགལ་འདུའི་རིགས་ཐམས་ཅད་སྙོམས་སྒྲིག་སླ་མོ་ཞིག་གིས་ཐུབ་རྒྱུའི་འདིང་བརྒྱབ་ན་ཡང་། རང་ཉིད་ངལ་བྱེད་དབེན་པའི་ལྟེ་གནས་ན་ངལ་མི་སོས་རྒྱུ་ཞིག་རང་ཁོངས་ནས་ཡོང་གིན་ཡོད་མེད་ཁ་ནང་ལ་འཁོར་ནས་བསམ་གཞིག་ཡོད་དགོས་རྒྱུའི་གཞི་ཞིག་རེད། དེ་ནས་སྐབས་སུ་བབས་པའི་ཚིག་བདུན་གསོལ་འདེབས་ཀྱི་ཐོག་མའི་འགོ་ལེན་ཧཱུྃ་རྐྱང་པ་ལ་བསམ་བློ་བཏང་ན། འདིའི་ཐོག་མའི་ཚིག་འགོ་ཧཱུྃ་གིས་ལེན་དགོས་པའི་རྒྱུ་མཚན་ནི། ཐུགས་དམ་རྒྱུད་སྐུལ་གྱི་ཆེད་དུ་ཧཱུྃ་གིས་སྣ་དྲངས་པ་རེད། ཧཱུྃ་ཟེར་རྒྱུའི་ཡིག་འབྲུ་འདི། ཕྱི་ལྟར་ན་རྒྱལ་བའི་ཐུགས་ཀྱི་ས་བོན། ནང་ལྟར་ན་འཁོར་འདས་ཀུན་གྱི་གནས་ལུགས་རང་བྱུང་ཡེ་ཤེས་མཚོན་བྱེད། གསང་བ་ལྟར་ན་ལྷན་སྐྱེས་བདེ་བ་ཆེན་པོའི་ཡེ་ཤེས། ཡང་གསང་མན་ངག་ལྟར་ན་རྡོ་རྗེའི་ཡེ་ཤེས་རང་བྱུང་གི་གསང་བ་ཆེན་པོ་འོད་གསལ་ཐིག་ལེ་ཉག་གཅིག་མཚོན་བྱེད་རེད། དེ་ཡིན་ན། འདི་དེ་བཞིན་གཤེགས་པ་ཐམས་ཅད་ཀྱི་ཐུགས་སྲོག་གི་སྙིང་པོ་རེད། ཐུགས་སྲོག་ཐུགས་ནས་ཐད་ཀར་བསྐུལ་ཏེ་སྲོག་སྡོམ་གཟེར་བཞིའི་སྒོ་ནས་ལྷའི་ཐུགས་སྲོག་འཕྲོག་སྟེ་ལྷ་དང་རང་སེམས་གཉིས་མེད་དུ་གཉུགས་མ་རྡོ་རྗེའི་སྲོག་ལ་དབང་བྱེད་པ་ཡིན་དུས། འདི་འཁོར་འདས་ཡོངས་ཀྱི་སྟོང་སྲོག་དུས་གཅིག་ལ་འཕྲོག་ཅིང་དབང་བྱེད་པའི་ཐ་སྙད་དུ་མཛད་པ་ཡིན་ན། ལྟ་བའི་རྫོང་ཟིན། སྒོམ་པའི་འཕྲང་ལས་སྒྲོལ་ནས་འཁོར་འདས་ཀྱི་སྟོང་སྲོག་འཕྲོག་པས་ན། དོན་ལ་འཁོར་འདས་ཡོངས་ལ་ཁྱབ་པའི་སྲོག་གམ་ཀུན་ཁྱབ་ཆོས་དབྱིངས་ཆེན་པོ་རྒྱལ་བའི་ཐུགས་ཡེ་ཤེས་ཀྱི་རང་མདངས་སུ་ཤར་བ་དེ་ཉིད། རིག་སྟོང་གཉིས་སུ་མེད་པའི་ཡེ་ཤེས་ཆེན་པོ་ལ་བཟླ་ཞིང་གཏིང་ཁེལ་བ་ལ་ཐུགས་རྒྱུད་སྐུལ་པའི་ནང་དོན་ཚང་བ་རེད། དེའི་ཕྱིར་ན་ཐུགས་ཀྱི་ཡི་གེ་འདིས་ཐུགས་རྒྱུད་སྐུལ་བའི་ཕྱིར་དུ་ཐོག་མར་བྱུང་བ་ཡིན། དེ་བཞིན་འདིའི་རྡོ་རྗེའི་ཚིག་བདུན་ལ་བཤད་རྒྱུ་མང་པོ་ཡོད་མོད། འོན་ཀྱང་དུས་ཚོད་ཀྱི་དབང་ལ་སོགས་པས་རེ་ཞིག་བསྐྱུར་རྒྱུ་མི་བྱེད་ཐབས་མེད་ལ་ཁེལ་བ་རེད། དེ་ལྟར་ཡིན་ན། ཡང་མཚམས་འདིར་མིག་དབྱེ་བ་མེ་ཏོག་དོར་བ་སོགས་ཀྱི་དབང་བཤད་དང་རྗེས་ཟློས་མཎྜལ་སོང་མཐར། འདིའི་དབང་གི་དངོས་གཞི་བསྐུར་དུས། ཐོག་མར་སློབ་མ་དཀྱིལ་འཁོར་གྱི་དལ་དུ་ཞུགས་དགོས་པ་རེད། དེ་འཇུག་ལུགས་ལ་ཡང་། ཕྱི་འཇུག་དང་ནང་འཇུག་གཉིས་ཡོད་པའི་ནང་གི་གང་དུ་ཞུགས་སའི་དཀྱིལ་འཁོར་གྱི་གཙོ་བོ་དེ་སློབ་དཔོན་དང་གཉིས་སུ་མ་མཆིས་པར་མཎྜལ་འབུལ་བ་སྔོན་དུ་འགྲོ་བའི་ཐོག་ནས་གསོལ་བ་བཏབ་སྟེ་ཐུན་མོང་དང་ཐུན་མིན་གྱི་སྐྱབས་འགྲོ་དང་སེམས་བསྐྱེད་བརྒྱུད་ནས་འཇུག་དགོས་པ་རེད། འདི་ལ་ཕྱི་འཇུག་དང་ནང་འཇུག་གཉིས་ཀྱི་དབྱེ་བ་ཡོད་རྒྱུ་དེ། ཕྱི་ལྷག་པར་གཟུགས་བརྙན་གྱི་དཀྱིལ་འཁོར་ལ་ཞུགས་རྒྱུ་དང་། ནང་ཐུན་མིན་ཡེ་ཤེས་ཀྱི་དཀྱིལ་འཁོར་ལ་ཞུགས་རྒྱུའི་ཁྱད་པར་གྱིས་ཕྱི་འཇུག་དང་ནང་འཇུག་གི་དབྱེ་བ་ཕྱེས་པ་རེད། དེའི་ནང་གི་ཕྱི་འཇུག་ལ་བསམ་བློ་བཏང་ན། ཚིག་དང་དོན་གྱི་འཇུག་པ་ཞིག་དང་། བྱ་བའི་ལས་ཀྱི་འཇུག་པ་ཞིག་སྟེ་རྣམ་པ་གཉིས་ཡོད། ཐུན་མོང་དང་ཁྱད་པར་གྱི་སྡོམ་བཟུང་འཕྲོ་ལ་རྡོ་རྗེ་དང་བདུད་རྩིས་དམ་ལ་བཞག་ཅིང་དམ་ཚིག་སྦྱིན་པ་དེ་ཚིག་དང་དོན་གྱི་འཇུག་པ། བྱ་བའི་ལས་ཀྱི་སྒོ་ནས་འཇུག་པ་དེ་དཀྱིལ་འཁོར་གྱི་ཡོལ་བའི་ནང་ལ་ཞུགས་ཏེ་སྐུ་གསུང་ཐུགས་ཕྱག་འཚལ་ནས་རིམ་བཞིན་འཇུག་རྒྱུ་དེ་རེད། ཨ་ཁཾ་ཝ་ར་ཧཱུྃ་ཟེར་རྒྱུ་འདི་སློབ་མས་མེ་ཏོག་འབུལ་བའི་སྔགས་བྱེད་ཀྱང་གཙོ་བོར་བླ་མས་སློབ་མ་དཀྱིལ་འཁོར་དུ་བཅུག་པའི་སྔགས་རེད། མ་འོངས་ལྷའི་གཞལ་ཡས་ཁང་ལ་ལོངས་སྤྱོད་རྒྱུའི་རྟེན་འབྲེལ་བསྒྲིགས་ཤིང་སྐལ་བ་ལྷ་དང་མཉམ་པར་འགྱུར་བའི་དོན་ཅན་ཞིག་ཡིན། དེ་ནང་འཇུག་གི་སྔོན་ལ་དགོས་པར་མ་ཚད་བརྡ་འཕྲོད་ངེས་བཤད་རྒྱུ་དེ་གལ་ཆེ་གསུངས་འདུག ཕྱི་འཇུག་གི་འཇུག་ཚུལ་གཉིས་རིམ་ཅན་ལ་དེ་བཞིན་བྱས་ཏེ་འབྱུང་བ་རེད། ནང་འཇུག་དེ་སློབ་མ་དཀྱིལ་འཁོར་གྱི་ཤར་སྒོའི་དང་པོ་འཇུག་སའི་དབང་སྟེགས་སུ་འཁོད་དེ། དེའི་མཚམས་ནས་གཙོ་བོ་ཡབ་ཡུམ་གྱི་སྲས་སུ་བསྐྱེད་དགོས་པ་རེད། དེའི་རྗེས་ཡེ་ཤེས་པ་བྱིན་ཕབ་ནས་ལས་ཀྱིས་གང་ལ་འབྲེལ་བའི་རིགས་ཀྱི་ལྷ་ལ་མེ་ཏོག་ཕུལ་ནས་དབང་རྟགས་ཅོད་པན་གྱི་ཚུལ་དུ་གནང་ནས་རྡོ་རྗེ་མིང་གི་དབང་བསྐུར་བ་དང་མཉམ་དུ། རིགས་དང་མཐུན་པའི་གསང་མཚན་བཏགས། དེའི་སྐབས་སུ་བླ་མས་རྡོར་དྲིལ་སློབ་མའི་མགོ་ཐོག་ཏུ་དཀྲོལ་རྒྱུ་དེ། ཇི་ལྟར་བཏགས་པའི་གསང་མཚན་དེ་ནམ་མཁའ་གང་བའི་ཕྱོགས་བཅུའི་རྒྱལ་བ་སྲས་དང་བཅས་པས་མགྲིན་དབྱངས་གཅིག་གྱུར་གྱིས་བཏགས་པ་སོགས་ཀྱི་དོན་ནི་ཁར་རྩང་ཞུས་པ་ལྟར་དུ་རེད། དེ་ནས་མིག་དབྱེ་དཀྱིལ་འཁོར་གྱི་མཐོང་བ་བསྟན་པ་དེའི་ཡན་ཆད་ཀྱིས་ཕྱི་འཇུག་དང་ནང་འཇུག་གི་དཀྱིལ་འཁོར་ལ་ཞུགས་ནས། འཇུག་པ་མཐར་ཐུག་པ་དེ་ཡིན་དགོས་པ་རེད། རྒྱུད་རྡོ་རྗེའི་རྩེ་མོའི་ནང་ན། གལ་ཏེ་དེ་ནི་སྣོད་མིན་ན། དེ་ལ་འཇུག་པ་སྦྱིན་པར་བྱ། །གསུངས་ཡོད་རེད། ད་རུང་འདིའི་རྒྱས་བཤད་ལ་དེ་བཞིན་བཤེགས་པ་ཐམས་ཅད་ཀྱི་གསང་པའི་དཀྱིལ་འཁོར་གྱི་རྒྱལ་པོ་འདི། སེམས་ཅན་གང་གིས་མཐོང་བ་ཙམ་གྱིས་ཕྱིར་མི་ལྡོག་པ་ཡིན་པས། དད་པ་ཡོད་མེད་དང་རྒྱུད་སྨིན་དང་མ་སྨིན་ལ་མ་ལྟོས་པའི་སེམས་ཅན་ཐམས་ཅད་འཇུག་རུང་བ་གསུངས་རྒྱུ་དེ་སྒྲ་ཇི་བཞིན་ལ་འཛིན་ཆོག་པའི་ངེས་དོན་རེད། དེ་ཡིན་ན། གལ་ཏེ་དམ་ཚིག་དང་སྡོམ་པ་འཛིན་མི་ནུས་པ་སོགས་ཀྱི་རྒྱུ་མཚན་གྱིས་དབང་བསྐུར་དུ་མི་རུང་པའི་གང་ཟག་ཡིན་ན་ཡང་། དཀྱིལ་འཁོར་དུ་འཇུག་པ་ཙམ་ཞིག་བྱ་ཆོག་གསུངས་ཏེ་དགོངས་པ་རྒྱུ་མཚན་གྱིས་བཀྲལ་ནས་དཀྱིལ་འཁོར་དུ་འཇུག་པ་གནང་རྒྱུ་དེ་ཕྱི་འཇུག་འདི་ཡིན་དགོས་རེད། ཕྱི་ལྷག་པ་གཟུགས་བརྙན་གྱི་དཀྱིལ་འཁོར་དུ་ཞུགས་པ་རེད། ནང་འཇུག་ཡེ་ཤེས་ཀྱི་དཀྱིལ་འཁོར་དུ་ཞུགས་པ་ཡིན་དུས། བྱིན་རླབས་ཐོབ་བྱེད་དུ་ཡེ་ཤེས་དབབ་པ་ལ་སོགས་པ་ཙམ་མ་གཏོགས་ཁྱད་པར་དུ་དབང་བཞིའི་དང་པོ་བུམ་དབང་དང་འབྲེལ་བའི་དངོས་གཞིའི་དབང་བསྐུར་དེ་སྣོད་མིན་ལ་བསྒྲགས་ག་ལ་ཆོག དེ་ཆོག་ན་གབ་སྦས་ཀྱི་གསང་པ་ཐམས་ཅད་འཆད་མི་བདེ་པ་ཞིག་ཡོང་བ་རེད་བསམ་གྱིན་ཡོད། དེ་མི་ཆོག་པའི་རྒྱུ་མཚན་ངེས་བྱེད་དཀྱིལ་འཁོར་དུ་འཇུག་པ་ཙམ་ཞིག་གསུངས་བའི་ཙམ་སྒྲ་དེས་གོ་ཐུབ་པ་རེད། དེས་ན་དབང་གི་དཀྱིལ་འཁོར་ཞལ་ཕྱེས་ནས་ཆོ་ག་ཞིག་དང་འབྲེལ་དུས། དོན་དང་དགོས་དབང་གི་གནད་དུ་མི་བལྟ་བར་དཀྱིལ་འཁོར་ཞིག་ཞལ་མ་ཕྱེས་པའམ་མ་བཏོན་ན་མ་གཏོགས་གཅིག་བཏོན་དུས་རྒྱུ་མ་ཕུ་འདེད་བྱས་ཏེ་ནག་འདོན་བྱེད་རྒྱུ་ཞིག་ཡོད་མ་རེད། ཕན་ནུས་ཟབ་མོའི་དབང་གསུམ་གྱི་རྣམ་བཞག་ལྟར་དུ། ཕྱི་ཕན་པའི་དབང་ཙམ་ཞིག་གདུལ་བྱ་གྱུར་བ་མཆོག་ཕལ་སུ་ཡིན་ཡང་བསྐུར་བཞག་ན། གསང་བའི་རྒྱལ་པོའི་དཀྱིལ་འཁོར་འདིའི་ཚོན་རྩི་མཐོང་བ་ཙམ་གྱིས་ཀྱང་ཕན་ཡོན་ཁྱད་པར་ཅན་ཐོབ་རྒྱུ་ཡོད་པ་རེད། དཔེར་ན། མདོ་ལས་ཕག་ཅིག་ཁྱི་ཡིས་དེད་དེ་མཆོད་རྟེན་ལ་བསྐོར་བར་བྱས་པའི་ཕན་ཡོན་དང་། ཤིང་ལོའི་སྟེང་གི་སྲིན་བུ་བདུན་རླུང་གི་འཁོར་ཕྱོགས་ཀྱིས་རྒྱ་མཚོའི་ནང་གི་བདེ་བར་བཤེགས་པའི་སྐུ་གཟུགས་ལ་བསྐོར་བ་བྱས་པས་མཐོ་རིས་ཀྱི་ལུས་རྟེན་ཐོབ་པ་སོགས་དང་ཕྱོགས་འདྲ་བ་རེད། ཁྱད་པར་དུ་གསང་སྔགས་ཟབ་མོའི་ལམ་དང་འབྲེལ་བ་ཡིན་པས་ཕན་ཡོན་ལྷག་ཏུ་ཆེ། དེ་ལྟར་ན་འདིའི་ཆོག་ཁྲིགས་བཞིན། དངོས་གཞིའི་དབང་བསྐུར་ཞུ་བའི་དོན་དུ་མཎྜལ་ཞིག་འབུལ་དགོས་པ་རེད། ཡང་མཚམས་འདིར། ནམ་མཁའི་རྡོ་རྗེ་རྒྱལ་བ་སོགས་ཀྱི་རྗེས་ཟློས་དང་དབང་བསྐུར་བའི་དོན་ཚན་འགའ་སོང་མཐར། འདིའི་ཐུན་མོང་རིག་དབང་ལྔ་ལ་སོགས་པ་འདི་དག་ནི་ཆོག་ཁྲིགས་ཀྱི་ཁར་རྩང་ཞི་ཁྲོ་ངན་སོང་སྦྱོང་བའི་འགྲོས་དེ་ཚིག་ཅིག་ཀྱང་མ་བསྒྱུར་པར་འདི་ནས་འདོན་པ་རེད། འདི་ལ་དབྱེ་བསྡུ་འདྲ་མིན་ཡོད་ཀྱང་རྒྱས་པའི་ལུགས་ཀྱི་ཉམས་དང་རྣམ་པ་གཏོད་ནས་ཇི་བཞིན་དུ་འདོན་འགྲོ་རྒྱུ་བྱེད། ཅེས་གསུངས་ཏེ་དབང་ཆོག་གསུངས་མཐར། ཐུན་མོང་རིག་པའི་དབང་ལྔ་འདི་ཁར་རྩང་ཞིག་ལ་ཡང་བཤད་ཡོད་དེ། རྣལ་འབྱོར་བླ་མེད་རྒྱུད་ཀྱི་སྐབས་འདིར་སྤྲོས་བཅས་བུམ་པའི་དབང་གི་མཐའ་རྟེན་ནམ་ཡན་ལག་ལ་འཇོག་གིན་ཡོད་པ་རེད། འདི་སྔོན་དུ་མ་སོང་ཐབས་མེད་ཅིག་རེད། ཕྱི་ཕན་པའི་དབང་ལྔར་གྲགས་པ་འདི་ཙམ་ཞིག་གི་བསྐྱེད་རིམ་ཐམས་ཅད་སློབ་མ་སུ་ཡིན་ཡང་ཉན་རུང་བའི་སྣོད་དུ་བཤད་པ་རེད། འདིས་སྤང་བྱ་གློ་བུར་གྱི་ཆོས་དྲི་མ་ལྔ་དག་ཅིང་ཐོབ་བྱ་རིག་པའི་ཡེ་ཤེས་ལྔ་རང་ངོ་འཕྲོད་དེ་མངོན་དུ་གྱུར་བའི་ཆ་ནས་རིག་པའི་དབང་ལྔ་ཞེས་གོང་དུ་དབང་བཤད་ཀྱི་ནང་དུ་གསུངས་པ་ལྟར་རེད། འདིའི་ནང་གི་དང་པོ་རྣམ་རྒྱལ་བུམ་པའི་ཆུ་དབང་བསྐུར་བའི་སྐབས་ལ་རྡོ་རྗེ་མི་བསྐྱོད་པའི་ཆུའི་དབང་དེ་སྤྱི་བོར་བསྐུར་རྒྱུ་རེད། སྒྲོ་ཆབ་སྤྱི་བོར་འཐོར་བའི་ཕྱག་ལེན་ལྟར་དུ་ཡིན་ན་ཡང་། སྤྱི་བོར་བུམ་ཆུ་ཏིག་ནས་ལྕེ་ཐོག་ཏུ་བླུག་པ་བཞེས་ཆོག་རྒྱུ་ཅན་རེད། དེ་ཇི་ལྟར་རེད་ཟེར་ན། སྣོད་ཀྱི་འཇིག་རྟེན་ཕྱི་བུམ་པའི་རྣམ་པ་འོག་མིན་བདེ་བ་ཆེན་པོའི་ཞིང་ཁམས་སུ་རྫོགས་པ་གང་ཞིག་ལ། ནང་རང་བྱུང་ལྷུན་གྲུབ་ཀྱི་གཞལ་ཡས་ཁང་བཀོད་པ་ཚད་མེད་ཀྱི་དབུས་ན། བརྟེན་པ་བཅུད་ཀྱི་སེམས་ཅན་དེ་ཡི་དམ་ལྷ་ཡི་དཀྱིལ་འཁོར་གྱི་འཁོར་ལོ་རྫོགས་པའི་སྐུ་ལས་ཟག་མེད་ཡེ་ཤེས་ཀྱི་བདུད་རྩིའི་རྒྱུན་བབ་པས་ལུས་ཐམས་ཅད་བདེ་སྟོང་གི་བདུད་རྩིས་གང་ཞིང་། ཉོན་མོངས་པ་ཞེ་སྡང་གི་འཆིང་བ་དག རྣམ་ཤེས་ཀྱི་ཕུང་པོ་གནས་འགྱུར་ནས་མེ་ལོང་ཡེ་ཤེས་མངོན་དུ་འགྱུར་བའི་དོན་ཅན་ཞིག་རེད། དེ་བཞིན་དུ་རིམ་འབྱུང་གི་ངོ་བོ་དབུ་རྒྱན་གྱི་དབང་བསྐུར་ནས་ང་རྒྱལ་གྱི་འཆིང་པ་དག ཚོར་བའི་ཕུང་པོ་གནས་འགྱུར་མཉམ་ཉིད་ཡེ་ཤེས་མངོན་དུ་བྱས། སྣང་མཐའི་ངོ་བོ་རྡོ་རྗེའི་དབང་བསྐུར་ནས་འདོད་ཆགས་ཀྱི་འཆིང་པ་དག འདུ་ཤེས་ཀྱི་ཕུང་པོ་གནས་འགྱུར་ཏེ་སོར་རྟོགས་ཡེ་ཤེས་མངོན་དུ་བྱས། དོན་ཡོད་གྲུབ་པའི་ངོ་བོ་དྲིལ་བུའི་དབང་བསྐུར་ནས་ཕྲག་དོག་གི་འཆིང་བ་དག ཕུང་ལྔའི་ནང་ནས་འདུ་བྱེད་ཀྱི་ཕུང་པོ་གནས་འགྱུར་ནས་བྱ་གྲུབ་ཡེ་ཤེས་མངོན་དུ་བྱས་པ་དང་། ལྔ་བ་དེ་རྣམ་དབང་རེད། རྡོར་དྲིལ་སྣོལ་མ་སློབ་མའི་སྤྱི་བོར་དཀྲོལ་རྒྱུ་དེ་རེད། ཁར་རྩང་ཞུས་པ་ལྟར་དུ། རྣམ་པ་སྣང་མཛད་མིང་གི་དབང་བསྐུར་བ་རེད་འདི་བསྐུར་ནས་གཏི་མུག་གིས་འཆིང་པ་དག་གཟུགས་ཀྱི་ཕུང་པོ་གནས་འགྱུར་ནས་ཆོས་དབྱིངས་ཡེ་ཤེས་མངོན་དུ་བྱས་པའི་ནུས་པ་ཅན་རེད། འདི་མིང་དབང་ཡིན་པས་འདིས་དེ་སྔོན་དཀྱིལ་འཁོར་དུ་ཞུགས་མ་མྱོང་པ་ལ་གསང་མིང་གསར་དུ་འདོགས་པ་དང་ཞུགས་ཟིན་ལ་སྔར་གྱི་གསང་མིང་དྲན་པར་བྱ་བའི་ཆེད་དུ་བསྐུར་བ་རེད། འདི་དང་མཉམ་དུ་འདོད་ཡོན་མ་སྤོང་རྒྱན་དུ་རོལ་བའི་ཆས་དབང་། དུར་ཁྲོད་ཀྱི་ཆས་དང་སྨན་རཀ་གཏོར་གསུམ་དག་གི་དབང་འབྱུང་པའི་སྐབས་ཀྱང་ཡོད་པ་རེད། དེ་ལྟ་བུའི་སྤྲོས་བཅས་བུམ་པའི་དབང་དང་འབྲེལ་ནས་ཕྱི་ཕན་པའི་དབང་ལྔ་དམ་རྫས་དངོས་གྲུབ་ཀྱི་རྫས་དབང་དང་བཅས་པ་སྔོན་དུ་སོང་བའི་མཇུག་དེ་མ་ཐག་ཏུ། ནང་ནུས་པ་འཇུག་པའི་དབང་སྐུའི་ཕྱག་རྒྱའི་དབང་དེ་འབྱུང་བ་རེད། དེ་བྱུང་ན་སློབ་དཔོན་དང་མདུན་བསྐྱེད་ཐ་མི་དད་པའི་ཐུགས་ཀ་ནས་རང་འདྲ་གཉིས་པའི་ལྷ་ཚོགས་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱོན་ནས། སློབ་མ་རང་ཉིད་ཀྱི་ལུས་དཀྱིལ་གྱི་རྣམ་པའི་ལྷ་གནས་སོ་སོར་ལ་ཐིམ་པའི་མོས་པ་བྱེད་དུས། སྣང་སྟོང་ཕྱག་རྒྱའི་དཀྱིལ་འཁོར་དུ་སྐུའི་བྱིན་རླབས་འཇུག དེ་དང་རྗེས་འབྲེལ་རྩ་སྔགས་བཟླས་རུང་གི་དབང་སྦྱིན་ཚེ། བདེ་སྟོང་གཉིས་མེད་ཡེ་ཤེས་ཀྱི་གསུང་རྡོ་རྗེའི་ཆོས་སྒྲ་གསུང་གི་གསང་བ་ཆེན་པོའི་བྱིན་རླབས་ཐོབ། མདོར་ན་ཕྱི་མཚན་མ་རྟགས་ཀྱི་དཀྱིལ་འཁོར་སྤྲོས་བཅས་བུམ་པའི་དབང་རྗེས་འབྲང་དང་བཅས་པ་བསྐུར་རྒྱུ་འདིས། གཙོ་བོར་ལུས་རགས་པ་རིལ་བོར་འཛིན་པ་དང་ཕྲ་བ་ལུས་གནས་ཀྱི་རྩ་ཐམས་ཅད་སྦྱངས་ནས་ལམ་བསྐྱེད་རིམ་སྒོམ་པ་ལ་དབང་བ་དང་། ཡེ་ཤེས་བཞིའི་ནང་གི་དགའ་བའི་ཡེ་ཤེས་ལ་བརྟེན་པའི་འབྲས་བུ་སྤྲུལ་བའི་སྐུ་ཐོབ་པའི་སྐལ་བ་ཅན་དུ་བྱས་པ་དེ་ལྟ་བུ་ཞིག་རེད། འདིའི་སྐབས་ལ་བཤད་རྒྱུ་མང་ཡང་རེ་ཞིག་འཇོག་རྒྱུ་བྱེད་བཞག ཡང་མཚམས་འདིར། བླ་མ་དྲག་པོ་རྟ་ཁྱུང་གི་དབང་ཆོག་ལོ་རྒྱུས་སོང་བའི་མཐར་ཕེབས་པའི་གསུང་གི་འཕྲོས་དོན། དྲག་པོ་རྟ་ཁྱུང་འབར་བ་འདི་རིག་འཛིན་བླ་མའི་སྒྲུབ་སྐོར་ལ། ཕྱི་ནང་གསང་བ་ཡང་གསང་དྲག་པོའི་སྐོར་དང་བཞི་རུ་ཕྱེས་པའི་ནང་གི་འདི་ཡང་གསང་དྲག་པོ་ཕྲིན་ལས་ཀྱི་སྐོར་རེད། དེའི་ཕྱིར་ན་འདི་ཕྲིན་ལས་རྣོ་ལ་གཞན་ལས་མྱུར་བ་རེད། བླ་མ་དྲག་པོའི་སྐོར་འདི་ལ་གུ་དྲག་དང་རྟ་ཁྱུང་རྣམ་པ་གཉིས་སུ་སྣང་རྒྱུ་འདིའི་ངོ་བོ་གུ་རུ་དྲག་པོ་རྡོ་རྗེ་གྲོ་ལོད་གཅིག་ལ་འདུས་ཡོད་པ་རེད། དེ་ཡིན་ན། ངོ་བོ་གཅིག་རྣམ་པ་གསུམ་ལ་སྣང་དགོས་དོན་ཅི་རེད་ཟེར་ན། འདུལ་བའི་ཕྲིན་ལས་ཀྱི་དབང་གིས་རྒྱལ་པོ་པེ་ཧར་འདུལ་དུས་ཀྱི་ལོ་རྒྱུས་དང་འབྲེལ་བ་གུར་དྲག་དང་། གདུག་པ་ཀླུ་འདུལ་དང་འབྲེལ་བ་རྟ་ཁྱུང་འབར་བ། དམ་སྲི་འབྱུང་པོ་འདུལ་བ་རྡོ་རྗེ་གྲོ་ལོད་རང་སྣང་བ་རེད། རྡོ་རྗེ་གྲོ་ལོད་ཞུ་རྒྱུའི་མཚན་དེ་གང་འདྲ་བྱས་ནས་ཐོགས་པ་རེད་ཟེར་ན། ཀྲོ་དྷ་ལོ་ཀོཏྟར་ཞེས་པའི་སྔགས་སྐད་ཟུར་ཆག་སོང་བ་དེ་ཁྲོ་ལོད་རེད་སོང་བ་རེད། གྲོ་ལོད་དམ་ཁྲོ་ལོད་ཀྱང་ཟེར། འདིའི་དབང་ཁྲིགས་ཀྱི་ལོ་རྒྱུས་ལས་གོང་དུ་བྱུང་བ་ལྟར་དུ་རྟ་ཁྱུང་འབར་བའི་སྒྲུབ་སྐོར་འདི། ཀུན་མཁྱེན་འཇིགས་གླིང་དགུང་གྲངས་རེ་དྲུག་ལ་ཕེབས་སྐབས་སུ་སྟོན་པའི་གཏེར་ཆོས། དགུང་སྐག་འཕྲང་སེལ་གྱི་ལོ་རྒྱུས་དང་འབྲེལ་བ་ཡིན་པས། རང་རེའི་ཆོས་བརྒྱུད་འདིར་ཞུགས་མཁན་ཚོ་ལ་མཚོན་ན། སློབ་དཔོན་བརྒྱུད་ཀྱི་ལྷ་སྲུང་གཉེན་པོ། རྟེན་འབྲེལ་དགེ་བའི་སྔ་འབྲེལ་ཟབ་མོའི་ཆོས་ཁྱད་པར་ཅན་རེད། ཡིན་ན་ཡང་། འདིའི་ལྷ་སྔགས་ཀྱི་རྣམ་པ་འདི་དེའི་གོང་ངམ་དེའི་ཡན་ཆད་ལ་མེད་པ་ཞིག་ཀྱང་མ་རེད། བོད་དུ་ཆོས་རྟེན་འཛུགས་པའི་ཐོག་མར་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེངས་དུས། ཉིན་མོ་མིས་བརྩིགས་པ་དེ་མཚན་མོར་ལྷ་འདྲེས་བཤིགས་ཤིང་བརྩིག་ཏུ་མ་སྟེར་བར་སྣང་སྲིད་ཆ་ལང་གདབ་པ་ལྟར་བྱས་ཏེ་འཁྲུགས་པའི་སྐབས་སུ། སྡེ་བརྒྱད་སྤྱི་དང་ཁྱད་པར་དུ་གླེན་པ་ཀླུ་ཟེར་རྒྱུའི་འཛིན་ཤེས་ལ་བཏང་མི་ཤེས་པ། དྲེགས་པ་སྡེ་བརྒྱད་པོའི་ནང་ནས་ཀླུ་ཡིད་དམ་ལ་ཐོགས་པ་ཆེས་དཀའ་རབས་ཀྱི་ལོ་རྒྱུས་ཡོད་པ་རེད། སྔོན་མར་ཨཱ་རྱ་པ་ལོའི་གླིང་སེ་ཤིང་གི་ཕུང་པོར་གནས་པའི་ཀླུ་དེས་བོད་ཀྱི་ལྷ་འདྲེ་ཐམས་ཅད་བསྐུལ་ནས་མཐའ་མར་བསམ་ཡས་བཞེངས་མ་ཐུབ་པའི་སྐབས་སུ། སྔོན་གྱི་ཐུགས་བསྐྱེད་དུས་ལ་བབ་ཡོང་དུས། རྣམ་པའི་སྣང་ཚུལ་ལ་མཁན་ཆེན་བོ་དྷི་སྭ་ཏྭའི་ལུང་དོན་བཞིན་རྒྱལ་པོ་ཁྲི་སྲོང་ལྡེའུ་བཙན་གྱིས་སློབ་དཔོན་ཆེན་པོ་བོད་དུ་གདན་དྲངས་ནས། བོད་ཀྱི་ལྷ་འདྲེ་གདུག་པ་ཅན་ཐམས་ཅད་བཏུལ་ཏེ་བཀའ་བསྒོས་དམ་འོག་ལ་བཞག་མཛད་ནས། སྔར་མེད་ཆོས་ཚིགས་ཀྱི་ཡུལ་དབུས་འདིར་ཆོས་སངས་རྒྱས་ཀྱི་བསྟན་པ་དར་བ་རེད། འདི་ཆེ་མཆོག་སྒྲུབ་པ་བཀའ་བརྒྱད་ཀྱི་ནང་གི་པདྨ་དབང་གི་དཀྱིལ་འཁོར་གྱི་རྟ་མགྲིན་རོལ་བའི་ཆོས་སྐལ་ཞིག་རེད། ཀློང་ཆེན་སྙིང་ཐིག་གི་སྐབས་ལ། དྲག་མཐིང་དྲག་དམར་གཉིས་འབྱུང་བའི་ནང་གི་དྲག་མཐིང་དེ་བཀའ་བརྒྱད་ཀྱི་ཁོངས་དང་། དྲག་དམར་དེ་རྟ་ཁྱུང་དང་སྦྲགས་ནས་གསུངས་པ་རེད། ཀུན་མཁྱེན་འཇིགས་གླིང་གི་མཚན་ལ་པདྨ་དབང་ཆེན་ཞེས་ཞུ་རྒྱུ་དང་། ལུང་བྱང་གི་ནང་ན་ཐེ་བོང་ལ་རྟ་མགྲིན་གྱི་ཐུགས་སྲོག་གི་ཡི་གེ་ཧྱ་ཡིས་མཚན་པ་ཞེས་གསུངས་པ་ལྟར་དུ། ཁོང་རྟ་མགྲིན་གྲུབ་པའི་དཔའ་བོ་རེད། དེས་ཀྱང་ཆོས་སྐལ་འདི་ཐུན་མིན་བརྒྱུད་པའི་ཟབ་ཁྱད་ཁྱད་པར་ཅན་དུ་གྲུབ་ཡོད། དེས་ན་རྩ་བའི་ལྷ་དེ་གུ་དྲག རྟ་མགྲིན་རིགས་བདག བྱ་ཁྱུང་རྣམ་པར་རྒྱལ་བའི་རྒྱལ་མཚན་ནམ་གཙུག་རྒྱན་ལྟ་བུ་བྱེད་ཆོག་རྒྱུ་དང་། ཡང་འདི་བསྒྲུབ་བྱ་སྒྲུབ་བྱེད་ཀྱི་ཐོག་ནས་བཤད་ཡོང་ན། རྟ་མགྲིན་དང་རྡོ་རྗེ་ཁྱུང་ཆེན་གཉིས་ཀ་བསྒྲུབ་བྱའི་ལྷ་ཡིན་ན། གུ་རུ་སྒྲུབ་བྱེད་རིག་འཛིན་གྱི་ཚུལ་དུ་བྱས་པ་ནི། སྒྲུབ་བྱེད་བསྒྲུབ་བྱའི་ངོ་བོར་སོན་པ་དང་། བསྒྲུབ་བྱ་ཉིད་སྒྲུབ་པ་པོའི་རྣམ་པར་བཞེངས་པ་སོགས་ཁ་ཕར་སྐོར་ཚུར་སྐོར་གང་བྱས་ན་དོན་དུ་བསྒྲུབ་བྱ་སྒྲུབ་བྱེད་ཐ་མི་དད་པར་སྒྲུབ་པར་བྱ་བ་རེད། ཡང་དཔེ་ཞིག་གི་ཐོག་ནས་བཤད་རྒྱུ་ཡིན་ན། བསྒྲུབ་བྱའི་ལྷ་སྐུ་དེ་ཉི་མའི་ཚ་ཟེར་ལྟ་བུ་དང་སྒྲུབ་པ་པོ་ནོར་བུ་མེ་ཤེལ་བཞིན་ཡིན་ན། ནམ་མཁའི་ཉི་མ་དང་ནོར་བུ་མེ་ཤེལ་གཉིས་འདྲ་འདྲའི་བསྒྲུབ་བྱ་དང་སྒྲུབ་པོ་གཉིས་ཀས་གང་སྒྲུབ་ན་ཉི་ཟེར་གྱི་ཚ་དྲོད་མེ་ཤེལ་གྱིས་སྒྲུབ་ནས་མེ་བསྒྲུབས་པ་ལྟར་དུ། ཕྲིན་ལས་དྲག་པོའི་ལས་སྦྱོར་བསྒྲུབས་ནས་རྣལ་འབྱོར་དམ་ཆོས་བྱང་ཆུབ་སྒྲུབ་པའི་བགེགས་དང་བར་ཆད། བསྟན་ལ་འཚེ་བའི་དམ་སྲི་ཀླུ་གདོན་གྱི་རིགས་སུ་གྱུར་པ་རྣམས། ས་གཞིའི་སྤྲ་བ་སྐམ་པོ་བསྲེགས་པ་ལྟར་བྱས་ཏེ་དམིགས་མེད་དུ་སྦྱངས་པའི་དགོས་དོན་ཅན་རེད། དེ་ཡིན་ན། འདི་གཞན་ལས་ལྷག་པའི་ཕྲིན་ལས་ཟབ་མོའི་ལས་སྦྱོར་རྣོ་མྱུར་ཁྱད་འཕགས་ཀྱི་ཆོས་ཡིན་པ་གོང་དུ་བཤད་པས་ཀྱང་གསལ་བ་ལྟར་ཡིན། རེད་དེ་ཆོས་ཁྱད་འཕགས་ཡིན་ན་ཡང་གང་ཟག་གིས་ཚུལ་བཞིན་དུ་འབད་པས་མ་སྒྲུབ་ན་གཙུབ་ཤིང་ཡོད་ཀྱང་དེ་ཉིད་མ་གཙུབ་པ་ལས་མེ་མི་འབྱུང་བ་ལྟར། ནང་བསམ་གཏན་དང་རིགས་སྔགས་ཀྱི་མེ་ཡིས་ཕྱིའི་གནོད་བྱེད་ཀྱི་གདོན་བགེགས་གཞོལ་ཐུབ་ཏུ་སྲེག་པར་བྱེད་པ་ལ། མེ་ཡི་མཐུ་ཡང་སྟོབས་ཆེ་དགོས་པ་ཡིན་དུས། དབང་ཐོབ་པ་སྔོན་དུ་སོང་པའི་ལྷ་སྔགས་ལས་རུང་གི་དྲོད་ཚད་བརྙེས་ནས་སྒྲུབ་པ་མཛད་རྒྱུའི་དགོས་མཁོ་ལ་ཉེ་བརྒྱུད་ཐུན་མིན་གྱི་དབང་མཆོག་ཕྱག་བཞེས་བཞིན་དུ་འབུལ་གྱིན་ཡོད་པ་རེད། བདག་རྡོ་རྗེ་སློབ་དཔོན་དུ་རློམ་པའི་སྒྲུབ་འོས་ཀྱི་བྱ་བ་འགའ་ཞིག་སྔོན་དུ་སོང་ནས་ད་ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་བའི་མཎྜལ་ཕྱག་བཞེས་བཞིན་དུ་ཕུལ་མཛོད། ཡང་མཚམས་འདིར། ན་མོ་བདག་དང་མཐའ་ཡས་སེམས་ཅན་རྣམས། །སོགས་ཀྱི་སྐྱབས་འགྲོ་སེམས་བསྐྱེད་ཡན་ལག་བདུན་པ་སོགས་རྗེས་ཟློས་བྱས་མཐར། འདིའི་བླ་མ་དྲག་པོ་རྟ་ཁྱུང་འབར་བའི་སྒྲུབ་གཞུང་གི་སྐབས་སུ་འཆི་སྲིད་ཆོས་སྐུར་སྦྱོང་བའི་དེ་བཞིན་ཉིད་ཀྱི་ཏིང་ངེ་འཛིན། བར་དོར་ལོངས་སྐུར་སྦྱོང་བྱེད་ཀུན་སྣང་གི་ཏིང་ངེ་འཛིན། སྐྱེ་བ་སྤྲུལ་སྐུར་སྦྱོང་བྱེད་ལྷའི་ཕྱག་རྒྱ་ཕྲ་རགས་ཀྱི་ཏིང་ངེ་འཛིན་ཏེ། མཆོག་གི་དངོས་གྲུབ་སྒྲུབ་པའི་ཏིང་འཛིན་རྣམ་གསུམ་ཚང་བར་བྱས་ནས་གསུངས་ཡོད་པ་རེད་མོད། འོན་ཀྱང་བླ་མེད་ཐུན་མོང་ལྟར་རིམ་གྱིས་སྒོམ་རྒྱུ་ཞིག་མ་རེད། འདི་སྟོང་ཆེན་ཀ་དག་གི་ངོ་བོའི་བཞུགས་ཚུལ་དྲན་པ་ཙམ་གྱིས་དེའི་རང་མདངས་སམ་གསལ་ཆ་དེ་ཉིད་དྭངས་བའི་མཚོ་ལ་གཟའ་སྐར་རང་ཤུགས་ཀྱིས་འཆར་བ་ལྟར་དུ་རྟེན་དང་བརྟེན་པའི་འཁོར་ལོ་རྫོགས་པའི་སྒོམ་ཚུལ་རེད། དེའི་དབང་གིས། འདིར་དབང་གི་སྐབས་སུ་ཡང་ཨ་ཏིའི་མན་ངག་གི་རང་སྐད་ཐུན་མིན། ཀ་དག་སྟོང་ཉིད་ཆེན་པོའི་ངང་ལས་ལྷུན་གྲུབ་འོད་གསལ་གྱི་རང་མདངས་ཁྲག་འཐུང་བླ་མ་དྲག་པོའི་དཀྱིལ་འཁོར་སྣོད་བཅུད་དང་བཅས་པ་གསལ་བཏབ་པ་ཡིན་ན། རང་ཉིད་འཇིགས་བྱེད་པདྨ་ཧེ་རུ་ཀར་གསལ་བཏབ་དུས་བསྐྱེད་རིམ་རང་ག་བ་མ་ཡིན་པ། ཐུགས་རྗེས་སེམས་ཅན་ལ་ཁྱབ་པའི་སྐུ་མདོག་དམར་པོ། ཆོས་དབྱིངས་ཐིག་ལེ་ཉག་གཅིག་གི་རང་མདངས་དབུ་གཙུག་རྟ་ཞལ་དང་བཅས་པའི་དབང་དང་དྲག་པོའི་ཞལ་གཉིས་ཅན་ཞིག དུས་གསུམ་གཟིགས་པའི་སྤྱན་གསུམ། རྣམ་པར་མི་རྟོག་པའི་ཡེ་ཤེས་ཀྱི་རལ་བ་གྱེན་དུ་བརྫེས་བ། དེའི་ཐོག་ནས་མཆེ་བ་གཙིགས་པ་གསུངས་ཡོད་པས། སྐྱེ་ཤི་རྩ་གཅོད་ཀྱི་མཆེ་བ་བཙིགས་པ། རྒྱན་དང་ཆ་ལུགས་སྐུ་ཆས་སོགས་ཀྱི་དག་དྲན་དང་། འདིའི་ཕྱག་གི་རྡོ་རྗེ་དེ་གསེར་རྡོར་རྩེ་ལྔར་བྱས་ནས་བཤད་ས་ཡོད་རེད། ཡིན་ན་ཡང་གུ་དྲག་གི་སྐབས་མ་གཏོགས་རྟ་ཁྱུང་ལ་གནམ་ལྕགས་རྡོ་རྗེ་རྩེ་དགུ་རྭ་གདེང་བ་ཞིག་ལ་སྒོམ་ན་འགྲིགས་ཡོད་རེད། བསྐལ་བའི་མེ་དཔུང་འབར་བའི་ཀློང་ན་བཞུགས་པ་འདིའི་རྡོ་རྗེ་མེའི་ཏིང་ངེ་འཛིན་གྱིས་རང་ཉིད་ཀྱི་སྒོ་གསུམ་ནུས་སྟོབས་ལྷག་པར་འབར་བ་བྱེད་རྒྱུའི་སྒོས་ཆོས་དང་ལྡན་པ་རེད། དུག་སྦྲུལ་བཅུ་གཉིས་ཞབས་མནན་དུ་བྱས་པ་དེ། རིག་པ་ཡེ་ཤེས་ཁྲོ་བོས་མ་རིག་གཏི་མུག་ལས་གྱུར་པའི་ཀླུ་གདོན་དག་ནམ་ཡང་ལྡང་པའི་གོ་སྐབས་མེད་པར་བྱས་པས་ན། ལུས་ལྡོག་འཁོར་བའི་གཞི་རྩ་ཆོད་པ། དེ་ལྟ་བུའི་དག་ཞལ་དང་བཅས་པའི་སྐུ་གསལ་དུས། གོང་དུ་གནས་གསུམ་ཡིག་འབྲུ་གསུམ་གྱིས་མཚན་པ་གསུངས་འདུག་པས་ཡིག་འབྲུ་གསུམ་དང་། དེ་བཞིན་དུ་བླ་མ་དང་ལྷག་ལྷ་གཉིས་མེད་ཀྱི་ཐུགས་ཀ་ནས་ཀྱང་འོད་ཟེར་འཕྲོས་པས། ཕྱོགས་བཅུའི་རྩ་གསུམ་རྒྱལ་བ་རབ་འབྱམས་དང་ཁྱད་པར་དུ་མངའ་ཡབ་པདྨ་འོད་གླིང་ནས། མ་ཧཱ་གུ་རུ་པདྨ་ཐོད་ཕྲེང་རྩལ་གྱི་ཐུགས་རྒྱུད་སྐུལ་བ་དང་བཅས་ཏེ། བླ་མ་དྲག་པོ་རྟ་ཁྱུང་འབར་བའི་སྐུར་བཞེངས་ནས་ལྷ་ཚོགས་འཁོར་དང་བཅས་པ་རང་གི་སྒོ་གསུམ་དང་དབྱེར་མེད་དུ་ཐིམ་སྟེ་དེ་ཉིད་བརྟན་པར་བྱས་པའི་མོས་པ་ཅན་ཞིག་རེད། འདིའི་དམིགས་པ་འདི་ལ་ཕྱག་རྒྱ་བཞི་བོ་ཚང་། ཕྱག་རྒྱ་བཞི་གང་རེད་ཟེར་ན། ཆོས་དང་དམ་ཚིག་ལས་དང་ཡེ་ཤེས་ཀྱི་ཕྱག་རྒྱ་བཞི་བོ་རེད། དེ་ཡིན་ན་གནས་གསུམ་རྡོ་རྗེ་གསུམ་གྱི་ཡི་གེ་གསུམ་གསལ་བ་དེ་ཆོས་ཀྱི་ཕྱག་རྒྱ་དང་། ཕྱོགས་བཅུའི་ཞིང་ཁམས་རབ་འབྱམས་དང་རྔ་ཡབ་པདྨ་འོད་གླིང་སོགས་ན་བཞུགས་པའི་ལྷ་ཚོགས་སྤྱན་དྲངས་པའི་ཡེ་ཤེས་སེམས་དཔའ་དེ་ཡེ་ཤེས་ཀྱི་ཕྱག་རྒྱ་ཡིན། ཐུགས་རྒྱུད་སྐུལ་བའི་འོད་ཟེར་འཕྲོ་བ་དེ་ལས་ཀྱི་ཕྱག་རྒྱ། བདག་ཉིད་ལྷའི་རྣམ་པར་གསལ་བ་དེ་དམ་ཚིག་གི་ཕྱག་རྒྱ་ཡིན་པས་ན། དེ་ལྟ་བུའི་ཕྱག་རྒྱ་བཞི་ལྡན་གྱི་སྒོ་ནས། རྣམ་པ་གསལ་བ། རྣམ་དག་དྲན་པ། ལ་སོགས་པའི་དག་དྲན་དང་བཅས་པ་བྱེད་རྒྱུ་དེ་གལ་ཆེ་བ་རེད། མཚམས་འདིར་བླ་མ་དྲག་པོ་རྟ་ཁྱུང་འབར་བའི་དབང་དང་། རྡོ་རྗེ་སེམས་དཔའ་ལ་རྟེན་པའི་བླ་མའི་རྣལ་འབྱོར་མངོན་དགའི་ཞིང་སྦྱོང་དང་རྗེས་སུ་འབྲེལ་བའི་དབང་སོགས་མཐའ་རྟེན་དང་བཅས་པ་གནང་ནས་མཇུག་གྲོལ། ཉིན་བཞི་པའི་དབང་དོན་ཟབ་ཁྲིད།དེ་ནི། དངོས་གྲུབ་ཀྱི་རྩ་བ་ཡི་དམ་བཀའ་བརྒྱད་རིག་འཛིན་ཐུགས་སྒྲུབ་དྲག་པོ་དཔལ་ཆེན་འདུས་པ་སོགས་རེད། འདིའི་ལོ་རྒྱུས་དབང་ཆོག་སོགས་སོང་མཐར་གྱི་འཕྲོས་དོན། དེའི་ཡན་ཆད་ལོ་རྒྱུས་དང་བཅས་པ་གསུངས་འདུག གོང་དུ་འདིའི་ལོ་རྒྱུས་ཆོག་ཁྲིགས་ཀྱི་ནང་ནས་གསུངས་པ་ལྟ་བུའི་བདག་ཅག་གི་སྟོན་པ་ཐུགས་རྗེ་ཅན་གྱིས་གདུལ་བྱའི་ཁམས་དབང་བསམ་པའི་རྗེས་འགྲོའི་ཆོས་འཁོར་བསམ་གྱིས་མི་ཁྱབ་པ་བསྐོར་བ་གསུངས་འདུག དེ་ཡིན་ན་ཆོས་འཁོར་རིམ་པ་གསུམ་གཙོ་བོར་བྱས་པའི་ཆོས་འཁོར་བསམ་གྱིས་མི་ཁྱབ་པ་བསྐོར་བ་རེད། ཡོངས་ལ་གྲགས་པ་བཞིན་དུ་ཡུལ་ཝཱ་རཱ་ཎ་སཱི་དྲང་སྲོང་ལྷུང་པ་རི་དཱགས་ཅན་གྱི་ནགས་ན་བཀའ་དང་པོ་བདེན་བཞིའི་ཆོས་འཁོར་དང་། ཡུལ་རྒྱལ་པོའི་ཁབ་ནས་བར་བ་མཚན་ཉིད་མེད་པའི་ཆོས་འཁོར། ཡུལ་པདྨ་ཅན་ལ་སོགས་པ་ན་བཀའ་མཐའ་མ་ངེས་དོན་གྱི་ཆོས་འཁོར་གསུམ་པོ་བསྐོར་བར་མ་ཟད་ཡུལ་རྒྱལ་པོའི་ཁབ་ནས་ལྷ་མིར་དགེ་བཅུའི་ཆོས་འཁོར་བསྐོར་བ་དང་། ཡུལ་མ་གྷ་དྷ་ནས་རང་རྒྱལ་ལ་རྟེན་འབྲེལ་བཅུ་གཉིས་ཀྱི་ཆོས་འཁོར་བསྐོར་བ་ལ་སོཊ་པ། གང་གསུང་བྱ་ཆོས་ཀྱི་རྣམ་གྲངས་ཚད་མེད་པ་ཞིག གསུང་ཡུལ་གནས་ཀྱི་ཐད་ནས་དང་གསུང་བ་པོ་སྐུའི་རྣམ་པའི་ཐད་ནས་ཀྱང་གཅིག་ཏུ་མ་ངེས་པར་གསུངས་བ་རེད། ཡིན་ན་ཡང་གསུང་བའི་དོན་གྱི་ཐད་ནས་ཆོས་འཁོར་རིམ་པ་གསུམ་གྱི་ནང་ལ་མ་འདུས་པ་མེད། དེ་ཡང་རྒྱུ་འབྲས་ཀྱི་ཐེག་པ་གཉིས་སུ་འདུས་གསུངས་ཡོད་པ་འདི་ཁྱབ་ཆེ་བའི་དགོས་དོན་སྐབས་ཀྱི་འཆད་བྱ་དང་འབྲེལ་བ་ཡིན་དགོས་པས། དཔེར་ན། ཐེག་ཆེན་རྒྱུ་འབྲས་ཀྱི་ཐེག་པ་ཞེས་གསུངས་པ་ལྟ་བུ་རེད། འདི་ལ་ཞིབ་ཆ་བྱས་ན་དང་པོ་ཐུན་ཁྱད་གཉིས་ཕྱེ། ཐུན་མོང་པ་ལྷ་མི་ཉན་རང་གི་ཐེག་པ་དང་ཁྱད་པར་བ་ཐེག་པ་ཆེན་པོར་ངེས་པའི་སྟེང་ནས། དེ་ལ་རྒྱུ་འབྲས་གཉིས་སུ་ཕྱེས་ཏེ་དབུ་སེམས་ཀྱི་དགོངས་པའི་རྣམ་བཞག་ཅན་གྱི་བཀའ་དང་བསྟན་བཅོས་ཐམས་ཅད་རྒྱུ་ཕ་རོལ་ཏུ་ཕྱིན་པའི་ཐེག་པ། སྔགས་ཕྱི་ནང་གི་རྒྱུད་གཞུང་དགོངས་འགྲེལ་དང་བཅས་པ་ལ་འབྲས་བུ་གསང་སྔགས་ཀྱི་ཐེག་པ་གསུངས་བ་རེད། དེ་ཡིན་ན་ཐེག་པ་རིམ་དགུ་ལ་ཕྱེས་པའི་ནང་གི་ལྷ་མི་དང་ཉན་རང་གི་ཐེག་པ་གང་ཞིག་ཆོས་འཁོར་རིམ་གསུམ་གྱི་ནང་དུ་འདུས་ཟེར་མ་ཐག་ལ་ཐེག་ཆེན་རྒྱུ་ཡི་ཐེག་པ་མིན་ན། གང་ཡིན་སྙམ་ན། སྤྱིར་ན་ཐེག་པ་ཞེས་པ་འདི། ཡ་ནའི་སྒྲ་ལས་དྲངས་ཡོང་དུས་ཐེག་པའམ་བཞོན་པ་ལ་འཇུག་པའི་གོ་དོན་དང་སྦྱར་ནས་གསུངས་ཡོད་པ་རེད། ལམ་གང་ནས་གང་དུ་བགྲོད་པར་བྱ་བའི་ཆ་ནས་ཐེག་པ་ཞེས་བཏགས་པ་ཡིན་མོད། དོན་ལ་ཆོས་མི་འདྲ་བའི་རིམ་པ་དགུ་ཞིག་ཁ་ཁ་རུ་ཡོད་པ་མ་རེད། སྐས་ཐེམ་གྱི་རིམ་པ་མི་འདྲ་ན་ཡང་དོན་ཐམས་ཅད་སྐས་ཡིན་པར་འདྲ་བ་ལྟར་རེད། མཐར་འབྲས་བུ་སངས་རྒྱས་སུ་ཕྱོགས་པ་ལ་ས་གཞིའི་ཆུ་ཀླུང་ཆེ་ཆུང་ཐམས་ཅད་རྒྱ་མཚོར་འབབ་པ་དང་གཅིག་མཚུངས་ཡིན་དགོས་པས། མངོན་མཐོ་སྒྲུབ་བྱེད་གསུང་རབ་ཐམས་ཅད་ལ། ཐར་བ་སྒྲུབས་པ་ལ་ལྷ་དང་མིའི་རྟེན་བཟང་དགོས་པའི་རྒྱུ་མཚན་གྱིས་སྐྱེས་བུ་ཆུང་ངུའི་ལམ་དང་། འཁོར་བ་ལས་ཐར་བའི་ཉན་རང་སྐྱེས་བུ་འབྲིང་གི་ལམ་དེ་ཡང་ཐུན་མིན་གྱི་ལམ་སྟེགས་སུ་གྱུར་པས་ན་ཐུན་མོང་གི་ལམ་ཞེས་གསུངས་པ་རེད། རྣམ་མཁྱེན་སངས་རྒྱས་ཐོབ་པ་ལ་དེ་དག་གི་རང་འབྲས་མཐར་ཕྱིན་ནས་ཐེག་ཆེན་ལ་འཇུག་དགོས་པས་ཐེག་ཆེན་གྱི་ཁོངས་སུ་བསྡུ་རུང་ཞིང་འདུས་པ་ཞིག་ཡིན། ཉན་རང་གི་ཐེག་པས་ཐར་བའི་ཆ་ཤས་ཤིག་བསྟན་པ་ཡིན་ཡང་རྣམ་གྲོལ་གྱི་ལམ་འབྲས་རྫོགས་པར་མ་བསྟན་པས། དེ་ཉིད་རྫོགས་པར་བསྟན་པའི་ཐེག་ཆེན་ལ་ད་གཟོད་འཇུག་དགོས་པ་རེད། དེ་བཞིན་དུ་ཐེག་ཆེན་ཕ་རོལ་ཏུ་ཕྱིན་པ་དང་། སྔགས་ཕྱི་རྒྱུད་གསུམ་པོའི་སྐབས་ནས་མཐར་ཐུག་གི་འབྲས་བུའི་རྣམ་བཞག་བསྟན་ཡོད་ཀྱང་བགྲོད་བྱེད་ཀྱི་ལམ་ཁྱད་པར་བ་ཆ་ཚང་མ་བསྟན་ལ་སྔགས་བླ་མེད་ཀྱིས་དེ་དག་ཆ་ཚང་བསྟན་པས། འོག་མའི་ལམ་འབྲས་ཀྱི་རྣམ་པ་ཐམས་ཅད་གོང་མ་ལ་ཚང་ཞིང་གོང་མའི་ཐུན་མིན་གྱི་ཁྱད་ཆོས་འོག་མ་ལ་མེད་པ་དེ་ལྟར་དུ། ནང་རྒྱུད་ཡོ་ག་རྣམ་གསུམ་བསྐྱེད་དང་རྫོགས་དང་རྫོགས་པ་ཆེན་པོ་གསུམ་ལ། རྣལ་འབྱོར་ཆེན་པོ་དང་རྣལ་འབྱོར་མཆོག་གི་རྒྱུད་ཀྱི་དབྱེ་རིམ་གྱིས་ཕྱེས་ནས། འོག་མ་གོང་མར་འདུས་ཤིང་གོང་མས་འོག་མ་ལ་ཁྱབ་པའི་རྒྱུ་མཚན་དེས། ཐེག་རིམ་དགུ་རུ་དབྱེ་རུང་ཞིང་ཐེག་པ་གཅིག་གི་འབྲས་བུ་གནས་པའི་དབྱེ་བསྡུས་གནད་གཅིག་ལ་འབབ་ལུགས་ཀྱང་དེ་ལྟར་ངེས་དགོས། དེ་ལྟར་ན། རྒྱུ་ཕ་རོལ་ཏུ་ཕྱིན་པའི་ཐེག་པ་སྔགས་ཕྱི་བ་གསུམ་དང་བཅས་པ་དེ་རིང་ལམ་དང་། སྔགས་བླ་མེད་འབྲས་བུའི་ཐེག་པ་ཉེ་ལམ་མཚན་ཉིད་པ་ཡིན་པར་གྲུབ་པའི་ཞོར་ལ། དྲང་བའི་ཐབས་དང་ངེས་དོན་མཐར་ཐུག་གི་གོ་དོན་ཡང་རང་ཤུགས་ཀྱིས་རྙེད་ཡོང་། དེ་ཡིན་ན། ཐེག་པ་འདི་ཐེག་པ་འོག་མ་ལས་ཇི་ལྟར་ཁྱད་པར་འཕགས་ཚུལ་ནི། ཐབས་དང་ཤེས་རབ་ཀྱིས་འཕགས་ལ་འདིའི་མཚན་གྱི་རྣམ་གྲངས་ལྔ་ཡི་སྒོ་ནས་ཀྱང་དོན་གྱི་ཁྱད་པར་འབྱེད་ཡོད། དེ་ནི། གསང་སྔགས་ཀྱི་ཐེག་པ་གསུངས་བ་དང་གཅིག ཐབས་ཀྱི་ཐེག་པ་གསུངས་པ་དང་གཉིས། རྡོ་རྗེ་ཐེག་པ་གསུངས་པ་དང་གསུམ། འབྲས་བུའི་ཐེག་པ་གསུངས་པ་དང་བཞི། དེའི་སྟེང་ལ་མི་མཉམ་པ་དང་མཉམ་པའི་ཐེག་པ་དང་ལྔ་རེད། དེའི་ནང་ནས་གསང་སྔགས་གྱི་ཐེག་པ་གསུངས་པའི་སྐབས་སུ། གབ་སྦས་ཀྱི་གསང་བ་དེ་ཐབས་ཀྱི་ནུས་པ་ཁྱད་པར་འཕགས་པའི་སྔགས་གསུངས་བ་འདྲ་ཞིག་རེད། ཡེ་གསང་ཐབས་ཀྱིས་སྤྱོད་པའི་གབ་པ་དང་འོག་མ་ལ་ཇི་བཞིན་དུ་མ་གསུངས་པའི་སྦས་པའི་གསང་བ་དེ། ཡེ་ཤེས་བདེ་མྱུར་དུ་སྐྱོབ་པའི་སྒྲུབ་བྱེད་ཐབས་ཀྱི་མཆོག་དུ་གྱུར་བ་ཡིན་པ་དང་། འགྲུབ་སླ་བ་ཡིན་པས་སྔགས་གསུངས་པ་རེད། དེ་གསང་སྔགས་ཀྱི་ཐེག་པ་རེད། ཐབས་ཀྱི་ཐེག་པ་གསུངས་ན། ཐབས་ཀྱི་ཐད་ནས་ཐབས་ཆེ། ཐབས་སླ། ཐབས་མང་། ཐབས་མྱུར་བ་ལ་སོགས་པ་ཡིན། དེ་ཡིན་ན་ཐབས་ཆེ་སྟེ། འདིའི་ལམ་གནད་དང་ལྡན་སོང་ན་ཀུན་ཉོན་དང་རྣམ་བྱང་གི་ཆོས་ཐམས་ཅད་ཚོགས་ཆེན་རྫོགས་པའི་རྒྱུ་རུ་འགྱུར་ཐུབ་རྒྱུ། ཐབས་སླ་སྟེ། དཀའ་ཐུབ་དྲག་པོས་དུས་རིང་ལ་གཟིར་མི་དགོས་པར། ཐབས་མང་སྟེ། ཉོན་མོངས་གཉེན་པོས་ནོན་མི་ནོན་བྱེད་མི་དགོས་པར་དེ་ཉིད་ཀྱིས་དེ་ཉིད་གྲོལ་བའི་ཐངས་མང་པོ་ཡོད་པ་ཡིན། ཐབས་མྱུར་བ་ཡང་ཡིན། ཐོག་མེད་ཀྱི་དུས་ནས་གོམས་པའི་སྤྲོས་པའི་བག་ཆགས་བཟློག་རྒྱུ་ལ་མྱུར་བ་ཡིན། ཚེ་འདིའི་ཐོག་ནས་སངས་རྒྱས་ཏེ་རྣམ་སྨིན་ངན་པ་ལས་བཟློག་པས་ན་མྱུར་བ་ཡིན། དེ་དང་ཆབ་གཅིག་བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་པ་ཡིན་པས་ན་དེ་ཡང་མྱུར་བ་རེད། རྡོ་རྗེའི་ཐེག་པ་གསུངས་ན། རྡོ་རྗེ་དེ་མི་འགྱུར་མི་ཤིགས་པའི་བདག་ཉིད་ཅན་ཞིག་རེད། ཀུན་རྫོབ་སྒྱུ་མའི་ཆོས་ལ་བླང་དོར་དུ་སྤྱོད་པ་མི་གནས། དོན་དམ་རྡོ་རྗེ་གསུམ་གྱི་རང་བཞིན་དུ་མི་ཕྱེད་པར་སྦྱོར་བས་ན་རྡོ་རྗེའི་ཐེག་པ་གསུངས་བ་རེད། ད་ནི་འབྲས་བུའི་ཐེག་པ་རེད། འབྲས་བུ་ཐོབ་བྱ་ཞིག་གཞན་ནས་འཚོལ་མི་དགོས་པར་གཞི་ཉིད་འབྲས་བུའི་ངོ་བོར་གནས་པས། འབྲས་བུ་ད་ལྟ་ནས་ལམ་དུ་བྱེད་ཆོག་པས་འབྲས་བུའི་ཐེག་པ་གསུངས། རྗེས་མ་དེ་མི་མཉམ་པ་དང་མཉམ་པའི་ཐེག་པ་རེད། མི་མཉམ་པ་ནི་སངས་རྒྱས་དང་སེམས་ཅན་གཉིས་རེད། འབྲས་བུ་ལམ་བྱེད་གསང་སྔགས་འཛིན་པའི་གང་ཟག་ནི་དེ་དག་དང་དགོངས་སྤྱོད་མཉམ་པའི་ཕྱིར་ན་མི་མཉམ་པ་དང་མཉམ་པའི་ཐེག་པ་གསུངས་བ་རེད། ད་དེ་ལྟ་བུའི་ཁྱད་པར་འཕགས་པའི་འཕགས་ཆོས་དང་ལྡན་པའི་སྟབས་ཀྱིས། ཡེ་ཤེས་ཆེན་པོ་རྒྱབ་ནས་འཆར་བ་ཞིག་དང་ཡེ་ཤེས་ཆེན་པོ་མདུན་ནས་འཆར་བ་ཞིག་དང་། ཡེ་ཤེས་ཆེན་པོ་ཁོང་ནས་འཆར་བ་ཞིག་གི་གསུམ་ཡོད། དེའི་ནང་ནས་འདི་ཡེ་ཤེས་ཆེན་པོ་ཁོང་ནས་འཆར་བ་རེད། དེ་ཡིན་ན། ཁྱད་པར་དེ་ལྡན་གྱི་སྔགས་བླ་མེད་ཡིན་ན། རང་བྱུང་གི་ཡེ་ཤེས་ལ་རིམ་དང་གཅིག་ཆར་དུ་འཇུག་པའི་ཐབས་ཀྱི་ཁྱད་པར་གྱིས་བསྐྱེད་རྫོགས་རྫོགས་ཆེན་གསུམ་དུ་གྲགས་པ། དེ་ཐམས་ཅད་ཀྱི་ཐུན་མོང་ལ་སྣང་སྲིད་ཡེ་སངས་རྒྱས་པའི་རང་བཞིན་དུ་ལྟ་བའི་ལྟ་བ་དེ་དང་ཚུལ་མཐུན་པའི་སྒོམ་སྤྱོད་གཉིས་ཀ་དབང་དང་དཀྱིལ་འཁོར་སོགས་ཀྱང་དོན་གཅིག་ལ་གནད་འདུས་པ། སྣང་བ་ལྷར་སྒྲུབ། ཡུལ་ཅན་ཡེ་ཤེས་སུ་བསྒྲུབས་ནས་བསྐྱེད་རྫོགས་གང་ཉམས་ལེན་གྱི་སྒོར་ཞུགས་ན་ཡང་། ལྟ་སྤྱོད་རོལ་རྟགས་གསུམ་གསུངས་བ་རེད། ལྟ་སྤྱོད་རོལ་རྟགས་གསུམ་གསུངས་ན། ལྟ་བས་ཐག་གཅོད་སྒོམ་པས་ལ་དོར། རྡོ་རྗེ་རོལ་བའི་རྟགས་ལ་གནས་པའི་ཐབས་ཤེས་གཉིས་མེད་ཀྱི་གདིང་གིས་ས་བཟུང་ནས་དེའི་གྲུབ་མཐའ་དེ་ལས་མི་འདའ་པ་རེད། འདི་ནས་རྡོར་སེམས་སྙིང་གི་མེ་ལོང་གི་ནང་རྒྱུད་སྡེ་གསུམ་གཞི་ལམ་འབྲས་གསུམ་དང་སྦྱར་བའི་ལུང་དྲངས་པའི་དེ་མ་ཐག་ལ། མ་ཧཱ་ཡོ་ག་ནི་སྔགས་ཀྱི་ཐེག་པའི་གཞི་ལམ་འབྲས་བུའི་དོན་ཐམས་ཅད་སྟོན་པའི་ཐེག་པའི་ཕྱི་མོ་ལྟ་བུ་ཡིན་གསུངས། དེ་གསུངས་པའི་གོ་དོན། རྫོཊ་ཆེན་ཨ་ཏི་ཡོ་ག་ལ་གསུམ་གསུམ་དགུ་རུ་ཕྱེ་བའམ་ཡང་ན་མདོ་སྒྱུ་སེམས་གསུམ་ལ་ཕྱེས་སོང་ན། ཀུན་མཁྱེན་རྒྱལ་བ་ཀློང་ཆེན་པའི་དགོངས་པ་ལྟར་དུ། བསྐྱེད་རྫོགས་གཉིས་སུ་མེད་པའི་སེམས་དང་ཡེ་ཤེས་སུ་རང་སྣང་བའི་དཀྱིལ་འཁོར་བསྟན་པ་སྤྱི་རྒྱུད་དང་། བསྐྱེད་པ་དང་རྫོགས་པ་ལ་མི་ལྟོས་པའི་སེམས་ཉིད་ཡེ་ནས་སངས་རྒྱས་པའི་རང་བཞིན་དུ་བསྟན་པ་སེམས་ཀློང་གི་སྡེ་གཉིས་ཀྱི་རྒྱུད། ཡེ་ཤེས་རང་སྣང་བའི་ངོ་བོ་སངས་རྒྱས་པའིརང་བཞིན་དུ་བསྟན་པ་མན་ངག་སྡེའི་རྒྱུད་རྣམས་ཀྱི་ནང་གི། འདི་དང་པོ་བསྐྱེད་རྫོགས་གཉིས་སུ་མེད་པ་སེམས་དང་ཡེ་ཤེས་སུ་རང་སྣང་བའི་དཀྱིལ་འཁོར་བསྟན་པ་མ་ཧཱའི་ཨ་ཏི་ལྟར་དུ་བཀྲལ་བའི་སྤྱི་རྒྱུད་ལ་བཞག་ཡོད་པ་རེད། རྫོགས་ཆེན་ཀློང་ཆེན་སྙིང་ཐིག་གི་ཡི་དམ་དྲག་པོ་དཔལ་ཆེན་འདུས་པའི་སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་ནས་སྨིན་བྱེད་དབང་གི་རིམ་པ་གསུངས་པ་དང་སྦྱར་ན། འབྲེལ་བ་གྲུབ་ཡོད་པ་རེད་། འདི་རྒྱུད་སྡེ་དང་སྒྲུབ་སྡེ་གཉིས་སུ་ཕྱེས་པའི་ནང་གི་ཕྱི་མ་ལྟར་དུ་གསུངས་རྒྱུ་འདི་ཡང་། གཙོ་ཆེ་བའི་ཆ་ནས་གསུངས་པ་རེད། སློབ་དཔོན་པདྨ་ཀ་རའི་རྗེས་སུ་འབྲངས་ཡོང་དུས་བདེ་གཤེགས་སྒྲུབ་པ་བཀའ་བརྒྱད་འདི་རྒྱུད་ལུང་མན་ངག་གསུམ་ལ་གསུངས་པའི་མན་ངག་གི་སྐབས་དེར། ཕྱི་བཤད་ཐབས་གསལ་བྱེད་ཀྱི་མན་ངག་གསང་སྔགས་ལུང་གི་བང་མཛོད་དང་། གསང་སྔགས་བཀའ་ཡི་ཐ་རམ། དེའི་སྟེང་ལ་གསང་སྔགས་བཀའ་ཡི་ལྡེའུ་མིག་དང་རྣམ་པ་གསུམ། ད་རུང་ཀ་མགོ་རྣམ་པ་གཉིས་ཡོད་པ་རེད། གསང་སྔགས་ལུང་གི་བཀའ་མགོ་དང་སྒྲུབ་པ་ལུང་གི་ཀ་མགོ་རྣམ་པ་གཉིས་ཏེ་ཕྱིའི་སྡོམ་ལྔ་བོ་དེས་ཁོག་ཕུབ་དུས། རྒྱུད་ཀྱི་ཆིངས་ལྔ། ལུང་གི་སྡེབས་ལྔ། དག་ལྟོས་ནས་སྒྲུབ་ཐབས་ཀྱི་སྦྱོར་ལུགས་རྣམ་པ་ལྔ་དང་སྦྱར་ཡོང་དུས། རྒྱུད་སྡེ་དང་སྒྲུབ་སྡེ་མ་འབྲེལ་བ་ཞིག་དང་། རྒྱུད་སྡེས་སྒྲུབ་སྡེ་ལ་མ་ཁྱབ་པ་ཞིག་མེད། དེའི་ཐད་ཀྱི་ཆོས་བརྒྱུད་འདིའི་གོང་མ་རྣམ་པའི་གསུང་སྒྲོས་དང་བསྟུན་ན། རྒྱུད་སྒྲུབ་ཐབས་དང་འབྲེལ། སྒྲུབ་ཐབས་མན་ངག་དང་འབྲེལ། མན་ངག་ཆོག་ཁྲིགས་དང་འབྲེལ། ཆོག་ཁྲིགས་ཕྱག་བཞེས་དང་འབྲེལ། ཕྱག་བཞེས་ཕྲིན་སྒྲུབ་དང་འབྲེལ་བ་གསུངས་ཡོད་པ་རེད། ཕྱི་བཤད་ཐབས་གསལ་བྱེད་ཀྱི་མན་ངག་ལ་བརྟེན་ནས། ནང་སྒྲུབ་ཐབས་གསལ་བྱེད་ཀྱི་མན་ངག་འདི། ཟུག་པ་རྩ་བ་ལྟ་བུ། འདྲིལ་བ་སྡོང་བོ་ལྟ་བུ། གྱེས་པ་ཡལ་ག་ལྟ་བུ། གསལ་བ་མེ་ཏོག་ལྟ་བུ། སྨིན་པ་འབྲས་བུ་ལྟ་བུ་དང་། འབྲས་བུ་བཅུད་ཀྱི་དྭངས་མ་ལྟ་བུ་སོགས་ལ་དཔེ་བཞག་ནས། བདེ་གཤེགས་རྒྱལ་བ་ཞི་ཁྲོའི་བཅུད་དྲིལ་བྱུང་བ་དང་། གསང་བ་དེ་ཁོ་ན་ཉིད་ཡེ་ཤེས་ལྔ་སྒྲུབ་པས་རྩ་བ་དང་ཡན་ལག་ལྔ་བསྒྲུབ་ཚུལ་བསྟན་པར་མ་ཟད། ཕྱི་རྡུལ་ཚོན་གྱི་དཀྱིལ་འཁོར་ལ་བརྟེན་ནས་བསྐྱེད་པ་མ་ཧཱ་ཡོ་ག་ལྟར་དུ་སྒྲུབ་པ་དང་། ནང་ཕུང་པོའི་དཀྱིལ་འཁོར་ལ་བརྟེན་ནས་རྫོགས་པ་ཨ་ནུ་ཡོ་ག་ལྟར་དུ་སྒྲུབ་པ། གསང་བ་རིག་པ་སེམས་ཀྱི་དཀྱིལ་འཁོར་ལ་བརྟེན་ནས་རྫོགས་ཆེན་ཨ་ཏི་ཡོ་ག་ལྟར་དུ་སྒྲུབ་པ་དག་དང་། ད་རུང་དེ་ཁོ་ན་ཉིད་དང་ཕྲིན་ལས་ཡོངས་རྫོགས་གཉིས་ཀ་ཡོད་པ་རེད། དེ་ཁོ་ན་ཉིད་ལམ་གྱི་རིམ་པ་ལ་བརྟེན་ཏེ་བསྐྱེད་རྫོགས་ཟུང་འབྲེལ་དུ་སྒྲུབ་པ་དང་། ཕྲིན་ལས་ཡོངས་རྫོགས་ལ་བརྟེན་ནས་སྒྱུ་ལུས་ལྷ་སྐུར་ངོ་སྤྲོད་པའི་རྩ་བ་ལྔ་བོ་དེ་ལ་བརྟེན་ཏེ་ཡན་ལག་ལྔ་ལྔ་ཉེར་ལྔ་ལ་སོགས་པ་མང་པོར་ཡོད། དེ་ལྟ་བུའི་རྒྱུད་ལུང་མན་ངག་གི་གསང་མཛོད་བདེ་གཤེགས་སྒྲུབ་པ་བཀའ་བརྒྱད་ཀྱི་ཟབ་ཆོས་འདི། ཆོས་དབྱིངས་དོན་གྱི་འོག་མིན་ན་ཆོས་སྐུའི་སྟོན་པ་ཀུན་ཏུ་བཟང་པོ་ཉིད། རང་སྣང་ཆེ་མཆོག་ཧེ་རུ་ཀའི་སྐུར་བཞེངས་ནས། ཡོངས་སུ་དག་པའི་འཁོར་རྣམས་ལ་རྡོ་རྗེའི་ཚིག་ཏུ་གསུངས་པ་རྣམས། རྡོ་རྗེ་ཆོས་ཀྱིས་བསྡུས་པ། སྡུད་པ་པོའང་ང་ཆོས་ཀྱང་ང་། ཞེས་གསུངས་པ་ལྟ་བུའི་བརྗོད་མེད་སྒྲ་ཚིག་ལས་འདས་པའི་དོན་དེ་ཟད་མེད་སྣང་བ་ཡིད་བཞིན་རིན་པོ་ཆེའི་རྫུ་འཕྲུལ་གྱི་ཡི་གེར་ཤར་བ་དེ། རིན་པོ་ཆེ་སྣ་ཚོགས་གྱི་སྒྲོམ་དུ་བཅུག་ནས་གོང་དུ་གསུངས་བ་ལྟ་བུའི་མཆོད་རྟེན་བདེ་བྱེད་བརྩེགས་པ་ན་མཁའ་འགྲོ་མ་ལས་ཀྱི་དབང་མོ་ཆེ་འཁོར་དང་བཅས་པ་ལ་གཏད་པ་རེད། ཕྱིས་མི་ཡུལ་དུ་གདུལ་བྱའི་དུས་ལ་བབས་ཡོང་དུས་དཔལ་ཆེན་ཀུན་བཟང་ཧེ་རུ་ཀ་དང་གཉིས་སུ་མ་ཡིན་པའི་རིག་འཛིན་གྱི་རྒྱལ་པོ་ཀུ་ཛ་རཱའི་ཐུགས་ཡེ་ཤེས་ལྔ་ཡི་སྟེང་ལ། མཐའ་གྲོལ་ཡེ་ཤེས། དབྱིངས་གྲོལ་ཡེ་ཤེས། ཀློང་གྱུར་ཡེ་ཤེས་དང་། འདའ་དཀའ་ཡེ་ཤེས་བཞི་པོ་བསྣན་ན་ཡེ་ཤེས་དགུ་རེད། དེ་ལྟ་བུའི་ཡེ་ཤེས་ཀློང་དགུའི་རང་རྩལ་ཧཱུྃ་དཀར་འཇམ་དཔལ་བཤེས་གཉེན་ལ་སོགས་པའི་བཀའ་བབ་ཀྱི་རིག་འཛིན་བརྒྱད་དང་། རྒྱལ་དབང་པདྨ་ཐོད་ཕྲེང་རྩལ་དང་དགུ་རུ་སྣང་བ་ལ་སྨུག་ནག་དབང་གི་མཁའ་འགྲོ་མའམ་དབྱིངས་ཕྱུག་ཨེ་ཀཱ་ཛ་ཊྲཱི། མཁའ་འགྲོའི་གཙོ་མོ་ལས་ཀྱི་དབང་མོ་ཆེ་དང་གཉིས་སུ་མ་མཆིས་པ་དེའི་བཀའ་འབངས་ན་བཞུགས་པའི་ལས་བྱེད་མཁའ་འགྲོའི་ཚོགས་ཀྱིས་སྒྲུབ་ཆེན་བརྒྱད་ཀྱི་གཏེར་སྒྲོམ། གསེར། དངུལ། ཟངས། ལྕགས། གཟི། མཆོང་། གཡུ། བསེ་སྒྲོམ་ལ་སོགས་པར་གསུངས་པ་རེད། དེའི་བརྒྱད་པོ་དེ་སློབ་དཔོན་བརྒྱད་ལ་གཏད་ནས་ཆེ་མཆོག་སྒྲུབ་པ་བཀའ་བརྒྱད་པོའི་ཆོས་སྐོར་རེ་རེ་བཞིན་དུ་སོ་སོ་ལ་ཕུལ་བ་ཡིན། དེ་དག་ལས་རིན་ཆེན་སྣ་ལྔའི་སྒྲོམ་བུའི་ནང་གི་བཀའ་བརྒྱད་དཀྱིལ་འཁོར་གཅིག་ཏུ་གྲུབ་པའི་ཆོས་སྐོར་དེ་དཔལ་དགུ་སྤྱིའི་བཀའ་བབས་པདྨ་འབྱུང་གནས་ཀྱི་ཕྱག་ལ་ཕུལ་བ་རེད། གཞན་ཡང་འདི་ནས་བྱུང་བ་ལྟར་དུ་རྒྱལ་དབང་པདྨ་ཀ་རས་བྱེ་བྲག་གི་སྒོས་རྒྱུད་དང་སྒྲུབ་ཐབས་བྱེ་བྲག་པ་སོགས་སློབ་དཔོན་སོ་སོའི་མདུན་ནས་གསན་ཏེ་གོ་འཕང་མཐོན་པོར་གཤེགས་ཚུལ་བསྟན་པ་ཡང་ལོ་རྒྱུས་ཀྱི་ནང་ནས་གསལ་བ་ལྟར་དུ་རེད། གང་ལྟར་ཡང་འགལ་བ་མེད། སློབ་དཔོན་ཆེན་པོས་གསང་སྔགས་ཆུ་བོ་བཞིའི་དབང་གི་བཀའ་བབས་བརྙེས་ནས་རིག་འཛིན་རྣམ་བཞིའི་མྱུར་ལམ་མཐར་ཕྱིན་སོང་བ་རེད། དེའི་དབང་གིས་གུ་རུ་རིན་པོ་ཆེ་བོད་ཡུལ་མུན་པའི་གླིང་དུ་བྱོན་ནས་མདོ་སྔགས་ཆོས་ཀྱི་བསྟན་པ་དཀར་འཇམ་ཡུག་གཅིག་ཏུ་བརྡལ་བའི་སྐབས་སུ་བསམ་ཡས་མཆིམས་ཕུའི་བྲག་དམར་ཀེའུ་ཚང་ནས་སྐལ་ལྡན་སྙིང་གི་བུ་དགུ་ལ་བདེ་གཤེགས་འདུས་པའི་དཀྱིལ་འཁོར་དུ་དབང་བསྐུར་དུས། བདེ་གཤེགས་ཡོངས་རྫོགས་ཀྱི་བཀའ་མངའ་བདག་ཚངས་པ་ལྷ་ཡི་མེ་ཏོག་གམ་ཆོས་རྒྱལ་ཁྲི་སྲོང་ལྡེ་བཙན་ལ་བབས་ནས་རྒྱུད་ལུང་མན་ངག་ཐམས་ཅད་ཀྱི་བདག་པོར་གྱུར། ཕྱི་རབས་གདུལ་བྱའི་དོན་དུ་གཏེར་རིགས་བཅོ་བརྒྱད་དུ་ཕྱེས་ནས་བོད་ཡུལ་མཐའ་དབུས་ཀུན་ཏུ་སློབ་དཔོན་ཆེན་པོ་རྗེ་འབངས་གྲོགས་གསུམ་དང་བཅས་པས་གཏེར་དུ་སྦས་པ་རེད། དེ་ལྟར་གཏེར་དུ་སྦས་པའི་བཀའ་གཏེར་ཐམས་ཅད་ཀྱི་ཡང་སྙིང་བཀའ་བརྒྱད་རྣམ་གསུམ་ཞེས་གྲགས་པ་རེད། གོང་ནས་གསུངས་པ་ལྟ་བུའི་མཁས་པ་མི་བཞིའི་ཐུགས་བཅུད་བཀའ་བརྒྱད་རྫོང་འཕྲང་དང་ཉང་གི་བཀའ་བརྒྱད་སྡེ་འདུས། འགུ་རུ་ཆོས་དབང་གི་བཀའ་བརྒྱད་གསང་རྫོགས་ལ་སོགས་བཀའ་སྲོལ་རྒྱས་བསྡུས་སྣ་ཚོགས་བྱུང་བ་རེད། སྤྱིར་ན་གསང་སྔགས་གྱི་ཆོས་འདི་མུན་པ་ཅི་ཙམ་ནག་ཀྱང་མར་མེ་དེ་ཙམ་གསལ་བ་བཞིན། དུས་ཇི་ལྟར་སྙིགས་ཀྱང་བྱིན་རླབས་ཀྱི་ཚན་ཁ་ལྷག་པར་མྱུར་བ་རེད། ཁྱད་པར་ཞི་ཁྲོ་བཀའ་བརྒྱད་ཀྱི་ལྷ་ཚོགས་འདི། གོང་ནས་གསུངས་པ་ལྟར་ཤེས་པ་ཙམ་གྱིས་ཆོག་ཅིང་དྲན་པ་ཙམ་གྱིས་ལམ་སྣ་འདྲེན་པ་དེ། རྒྱུད་ཀྱི་ལུང་དྲངས་མ་ཐག་པ་ལྟར་དུ་རེད། དེ་རིང་ཁར་སང་གི་རྩོད་ལྡན་སྙིགས་མ་ལྔ་བདོ་བའི་དུས་ཚོད་ལ། རྒྱུ་ཉོན་མོང་དུག་ལྔ་ནང་ནས་བརྡོལ་བའི་དབང་གིས་འབྲས་བུ་ནད་མཚོན་ལ་སོགས་འཇིགས་ཤིང་ཉམ་ངའི་བསྐལ་བ་ཕྱི་ནས་ཚེས་དུས་དང་། ཁྱད་པར་སྨོན་ལམ་ལོག་པའི་རྒྱལ་བསེན་ནང་མིའི་སེམས་ལ་ཞུགས་ནས་སྐྱེ་འགྲོའི་ཤེས་རྒྱུད་བགེགས་ཀྱིས་རློམས། ཡང་སྒོས་བླ་དཔོན་མི་ཆེན་གྱི་ཁོག་ལ་ཞུགས་ནས་བསྟན་སེལ་སྡེ་འཁྲུགས་བསླངས། ཆོས་བཞིན་སྤྱོད་པ་ལ་བར་ཆད་བདུད་ཀྱིས་འཚེ་བ་རླུང་ལྟར་འཚུབས་དུས་བྱིན་རླབས་དང་ཐུགས་རྗེ་ལྷག་པར་མྱུར་བ་དེ། དུས་སྙིགས་མའི་སྐྱབས་གཅིག་སློབ་དཔོན་རྡོ་རྗེ་ཐོད་ཕྲེང་རྩལ་གྱི་སྔོན་ཐུགས་བསྐྱེད་ཀྱི་མཐུ་བདོ་བས་རེད། དེའི་སྟབས་ཀྱིས་དེང་གི་དུས་འདིར་རིས་མེད་བསྟན་པའི་མངའ་བདག་ཆེན་པོ་ཚོས། སློབ་དཔོན་ཆེན་པོ་དུས་ངན་གྱི་འཚེ་བ་ཞི་ཞིང་རྒྱ་བསེན་དམ་སྲིའི་ཁ་གནོན་ཡིན་དུས། ཆེད་དུ་གུ་རུ་རིན་པོ་ཆེ་ལ་གསོལ་བ་འདེབས་རྒྱུ་ལན་གཅིག་མ་ཡིན་པའི་བཀའ་ལུང་གནང་རྒྱུ་དེ་ཡང་། དུས་བབས་ཀྱི་གནད་ཁྱད་པར་ཅན་ལ་གཟིགས་ཡོད་པས་རེད། གསང་སྔགས་བཀའ་གཏེར་གྱི་རྒྱུད་ཐམས་ཅད་ལས་ཀྱང་དུས་བབས་རྫོགས་ཆེན་ཀློང་ཆེན་སྙིང་ཐིག་འདི། འཛམ་གླིང་ས་གཞིའི་ཁྱོན་ལ་མ་ཁྱབ་པར་མེད་པའི་ཕྲིན་ལས་ཀྱི་འཇུག་པ་མྱུར་བའི་དབང་གིས་བརྒྱུད་པ་ཐམས་ཅད་ལས་ཀྱང་འདི་ལྷག་པར་དུ་འགྲོ་དོན་ཆེ་བཞིན་ཡོད་པ་རེད། གྲོལ་ཐིག་དགོངས་པ་རང་གྲོལ་གྱི་ལུང་དོན་གོང་ནས་བྱུང་བ་བཞིན་དུ། མཐའ་ཡི་རྒྱ་འདྲེ་འབྱུང་པོའི་ཁ་དར། དབུས་ཀྱི་སྨོན་ལོག་དམ་སྲི་རང་ཁོང་ནས་ལྡང་། བདུད་དམ་སྲི་ཆེ་དགུའི་སྙིང་ལ་ཞུགས་ནས་ཕུང་པའི་སྐབས་སུ་གཉེན་པོ་སྟོབས་ཀྱི་ལྷ་ཕལ་བ་ཞིག་གིས་འདུལ་མི་ཐུབ། ཕྱི་ལྟར་བྱང་སེམས་ནང་རིག་འཛིན། །གསང་བ་དྲག་གཏུམ་འབར་བའི་ལྷ། །བདེ་གཤེགས་མངོན་རྫོགས་སྒྲུབ་སྡེ་བརྒྱད། །དཔལ་ཆེན་འདུས་པའི་སྒྲུབ་པ་འདིས། །ལོག་འདྲེན་འདུལ་བ་ཐེ་ཚོམ་མེད། །ཅེས་གསུངས་པ་འདི་ནི། གནད་བྱང་ཐུགས་ཀྱི་སྒྲོམ་བུའི་གཏེར་ལུང་སོགས་ལས་ཡིན་ཡང་། མགྲིན་དབྱངས་གཅིག་གྱུར་གྱིས་ལུང་བསྟན་པ་རེད། དེ་ལྟར་ལུང་བསྟན་པའི་ཆེ་མཆོག་བདུད་རྩིའི་བཀའ་བབས་པཎ་ཆེན་བི་མ་མི་ཏྲ་དང་། བདེ་གཤེགས་འདུས་པའི་བཀའ་བབ་ཆོས་རྒྱལ་ཁྲི་སྲོང་ལྡེ་བཙན་མཆོག བཀའ་འདུས་ཆོས་ཀྱི་རྒྱ་མཚོའི་བཀའ་བབ་རྒྱལ་སྲས་ལྷ་རྗེ་སོགས་ཀྱི་ཐུགས་རྗེའི་རང་གཟུགས། ཐུགས་བསྐྱེད་དང་སྨོན་ལམ་གཅིག་བསྡུས་གངས་ཅན་ཀློང་ཆེན་སྙིང་ཐིག་གི་བསྟན་པའི་ཤིང་རྟ་ཆེན་པོ་ཀུན་མཁྱེན་རིག་འཛིན་འཇིགས་མེད་གླིང་པའམ་མཚན་སྦྱར་ན་པདྨ་དབང་ཆེན་ཡེ་ཤེས་རོལ་བའི་རྡོ་རྗེའི་དགོངས་ཀློང་ནམ་མཁའ་མཛོད་ཀྱི་ཆོས་སྡེ་ལས་བྱོན་པའི། སྔ་འགྱུར་བཀའ་གཏེར་དག་སྣང་དང་བཅས་པའི་སྙིང་པོ་གཅིག་བསྡུས། དགུ་ལྡན་བརྒྱུད་པའི་བྱིན་རླབས་ཀྱི་བབས་སོ་མ་ཉམས། ཕྱི་རབས་གདུལ་བྱའི་དོན་ལ་བསྟན་པའི་བཙས་ཆེན་པོར་བཞག་པ་དེ་ཉིད་ལ། འདི་ལ་རྩ་བ་དང་ཡན་ལག་གཉིས་ཕྱེས་པའི་རྩ་བ་གང་རེད་ཟེར་ན་སྒྲུབ་པ་བཀའ་བརྒྱད་པོ་དཀྱིལ་འཁོར་གཅིག་ལ་ཆིག་སྒྲིལ་དུ་བསྒྲུབ་པའི་དེ་རིང་བསྐུར་རྒྱུའི་དབང་འདི་དང་། ཡན་ལག་རྟ་མགྲིན་ཁམས་གསུམ་རོལ་བ། གཤིན་རྗེ་འཆི་བདག་ཟིལ་གནོན། ཡང་དག་སངས་རྒྱས་མཉམ་སྦྱོར། ཕུར་པ་བདུད་དཔུང་ཟིལ་གནོན་ཏེ་ཁྲག་འཐུང་དཔལ་ཆེན་རིགས་བཞིའི་སྒོས་དབང་དང་བཅས་པའི་དབང་བསྐུར་གྱི་རིམ་པ་འབྱུང་བ་ལས། འདི་ནས་སྔ་མ་དཔལ་ཆེན་དྲག་པོ་བཀའ་བརྒྱད་ཀྱི་རྩ་དབང་བསྐུར་བའི་སྐབས་སུ་བབ་པ་རེད། འདི་ལ་ཡང་སྟ་གོན་དང་དངོས་གཞིའི་དབང་བསྐུར་གྱི་རིམ་པ་གཉིས་ཡོད་པའི་ནང་ནས་སྟ་གོན་གྱི་རིམ་པ་སྤྱི་ཁྱབ་ཀྱིས་སོང་ནས་དེ་རིང་དངོས་གཞིའི་དབང་བསྐུར་བའི་སྐབས་རེད། མཚམས་འདིར། ཨེ་མ་ཧོ་ བདེ་གཤེགས་སྙིང་པོ་ལས། །གློ་བུར་འཁྲུལ་བས་བཅིངས་བ་བདག་སོགས་དམ་ཚིག་གསང་བ། ཡན་ལག་བདུན་པ་སོགས་རྗེས་ཟློས་མཐར་གསུང་འཕྲོས། དེ་ཡན་གྱིས་ཁ་སྔོན་ཞུས་པ་ལྟར་དུ་ཕྱི་འཇུག་སོང་སྟེ་ད་ནང་འཇུག་ལ་ཐུག་པ་རེད། ནང་འཇུག་གི་དང་པོ་ཡེ་ཤེས་དབབ་པ་ཡིན་པས་འདིའི་མཚམས་སྦྱོར་གྱི་ཚིག་མར་འདོན་འགྲོ། གཙོ་བོ་བཏོན་ནས་ཁ་ཕྲལ་ཙམ་གྱིས་མི་ཆོག་པར་ཡེ་ཤེས་ཕེབས་དང་མི་ཕེབས་གྱི་དོན་དེ། གང་ལ་ཡེ་ཤེས་པའི་བྱིན་དབབ་ས་སློབ་མ་ཡིན་ན། སློབ་མས་འདིའི་གོ་དོན་ངེས་དགོས་པ་རེད་མ་གཏོགས་དམིགས་པ་ཇི་ལྟར་འཛིན། སློབ་མ་ཡང་རྒྱུད་ཐ་དད་པ་རྐྱང་རྐྱང་ཡིན་པས་འདྲ་དང་མི་འདྲ་རེད། གཙོ་བོ་རང་གིས་རང་ཉམས་དང་བསྟུན་ནས་གོ་བརྡ་རེ་སྤྲད་ན། རང་འདྲ་ཚོ་ལ་ཕན་ཐོགས་རེ་འབྱུང་སྲིད་རྒྱུ་དང་། དབང་གི་བསྐུར་ཐབས་ཀྱང་གཟུགས་བརྙན་ཙམ་ལ་མི་འགྱུར་བའི་རེ་བ་བྱེད་ཀྱིན་ཡོད་རེད། དབང་གི་མཚམས་སྦྱོར་ང་ཚོའི་དུས་རྒྱུན་གྱི་ཁ་སྐད་བྱས་ན་དབང་བཤད་ཆོག་ཁྲིགས་ལས་གསུངས་རྒྱུ་འདི་འདྲ་ཞིག་རེད། འདི་ཡང་དབང་ཆོག་རྗེས་ཀྱི་འཕྲོས་དོན་ཞིག དབང་པོ་རྣོན་པོ་ངོ་མ་ཞིག་ཡིན་ན་འདི་འདྲའི་བརྡ་ཙམ་དང་ཚིག་ཙམ་ཞིག་གིས་གོ་འགྲོ་བ་མ་གཏོགས། དབང་རྟུལ་དད་པའི་རྗེས་འབྲང་དང་དེའི་ཐོག་རྟོག་དཔྱོད་ཀྱི་རྣམ་རིག་དེ་ཙམ་མ་རྟུལ་ན་ཡང་གོ་དོན་ངོ་མའི་གདེང་མ་རྙེད་པར་དད་པའི་ཞིང་སར་དག་སྣང་གི་རླན་གཤེར་གྱིས་མ་འདང་བ། ཡང་ན་སྒྲ་ཟོར་ཡང་བའི་སྟེང་ནས་བཤད་ན། ཐེ་ཚོམ་དང་ཡིད་དཔྱོད་འཆིང་རྒྱ་གཞི་ནས་དགྲོལ་དགོས་རྒྱུ་རེད། དེའི་དབང་གིས་སྒྲ་ཅུང་ཟད་ལྕི་བའི་ཚུལ་གྱིས་བཤད་ན་རྟོག་གེའི་རིགས་པ་ཕྱོགས་གཅིག་མ་གཏོགས་འགྲོ་ལོབ་མེད་མཁན་ཚོ་ལ་ཡང་ཕན་པ་འབྱུང་ཆེད་དུ་བཤད་པ་ཡིན། འདིའི་ཐོག་མར་ལས་སྔགས་བརྗོད་དུས་ལས་སྒྲོས་བུམ་ཆུ་འཐོར་རྒྱུ་འདིས་བསང་ཞིང་སྭ་བྷ་ཝའི་སྔགས་ཀྱིས་སྦྱངས་བར་བྱས་པ་རེད། སྨན་དང་ནོར་བུའི་ནུས་པ་ལྟར་དུ། སྔགས་དང་ཏིང་འཛིན་སངས་རྒྱས་ཀྱི་མཐུ་དག་གི་ནུས་པ་བསམ་གྱིས་མི་ཁྱབ་པར་ཡིན་པར་སྔོན་ནས་ཞུས་པ་ལྟར་དུ་རེད། འདིའི་སྭ་བྷ་ཝའི་སྔགས་དོན་མ་དག་པའི་དངོས་པ་ཐམས་ཅད་བསང་ཞིང་བཀྲུས་ནས་དག་པར་བྱས་ཏེ་སྟོང་པ་ཉིད་དུ་གྱུར་ཞེས་པའི་དོན་རེད། འོ་ན། སྟོང་ཉིད་ནི། དག་དང་མ་དག་པའི་སྤྲོས་མཚན་ལས་འདས་པའི་དག་པ་ཆེན་པོ་རེད། མ་དག་པ་སྦྱོང་རྒྱུ་དེ་གང་རེད་སྙམ་ན། ཡེ་ནས་དག་པའི་ཆོས་ཉིད་ཀྱི་ངོ་ཁ་ལ་མ་དག་པ་མེད་ཀྱང་། དེ་ལྟར་མ་ཤེས་པའི་བློ་འཁྲུལ་བས་སྤྲོས་པའི་མཚན་མ་ཅན་དུ་བཟུང་བཞག་པའི་འཁྲུལ་བའི་དྲི་མ་བཀྲུས་པ་བཞིན་དུ་སྦྱངས་ནས། མ་འཁྲུལ་དོན་གྱི་གནས་ལུགས་དག་པ་ཡེ་ཤེས་ཆེན་པོའི་ངོ་བོ་ཉིད་དུ་སྦྱོར་བའི་དོན་ཅན་ཞིག་རེད། མདོའི་ནང་དུ། དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་ཆོས་རྣམས་ཀྱི་གནས་ལུགས་ནི་ཡེ་ནས་གནས་པའོ། །གསུངས་པ་ལྟར་རེད། གཞན་ཡང་ཤེར་ཕྱིན་སྟོང་ཕྲག་ཉི་ཤུ་ལྔ་པ་ལས་ཀྱང་དེ་དང་འདྲ་བར་ཆོས་ཉིད་དང་ཆོས་ཀྱི་དབྱིངས་ཡང་དག་མཐའ་སོགས་མིང་གང་བཏགས་ན་དེ་ཉིད་དེ་བཞིན་དུ་གནས་ཞེས་གསུངས་པ་རེད། སྟོང་པ་ཉིད་ལ་མཚན་མའི་དངོས་པོས་སྟོང་ཚུལ་ཞིག་གསུངས་ཡོད་པ་རེད། དེ་ཡིན་ན། ང་ཚོ་བོད་ཀྱི་ཆོས་བརྒྱུད་ཚོའི་ནང་དུ་མཚོན་ན། ཀུན་མཁྱེན་ཇོ་ནང་པའི་བཞེད་པ་ལ་གནས་ལུགས་གཞན་སྟོང་དང་སྣང་ལུགས་རང་སྟོང་དུ་ཤེས་པའི་ཟུང་འཇུག་གི་དོན་གསུངས་རྒྱུ་དེ་ཡང་། དོན་དུ་སྤྲོས་བྲལ་ཆོས་ཉིད་གནས་ལུགས་སྐྱེ་འགག་དང་བྲལ་བའི་གནད་གཅིག་ལ་བསྡུ་ཐུབ། བཀའ་བར་པའི་དགོངས་འགྲེལ་ཚོའི་ནང་ན་དངོས་ཞེན་རང་རྒྱུད་པ་འགོག་པའི་ཆེད་དུ་སྟོང་ཉིད་མེད་དགག་ཙམ་མཐར་ཐུག་གི་དོན་དུ་རྩལ་འདོན་མཛད་ནས་གསུངས་ཡོད་ན་ཡང་། བཀའ་མཐའ་མའི་དགོངས་འགྲེལ་དག་གི་ནང་དུ་བར་བ་ལས་སྦས་དོན་གྱི་ཚུལ་དུ་ཡོད་པའི་མྱ་ངན་ལས་འདས་པའི་ཆོས་ཀྱི་སྒྲུབ་གཞི་ཟུང་འཇུག་འོད་གསལ་བའི་ཡེ་ཤེས་རྩལ་འདོན་མཛད་ནས་གསུངས་ཡོང་དུས་ཐམས་ཅད་སློབ་དཔོན་ཀླུ་སྒྲུབ་ཀྱི་དགོངས་པའི་མཐིལ་དུ་བསྡུ་ཐུབ་པར་མ་ཚད། སྔགས་བླ་མེད་ཀྱི་རྫོགས་རིམ་ཟུང་འཇུག་བདེ་ཆེན་འོད་གསལ་བའི་ཀུན་ཁྱབ་མཁའ་དང་མཉམ་པའི་ཡེ་ཤེས་ལ་གནད་འདུས་པ་རེད། སྟོན་པ་བཅོམ་ལྡན་འདས་ཀྱིས་གདུལ་བྱ་འདུལ་ཐབས་སྣ་ཚོགས་ཀྱིས་ཆོས་སྟོན་པ་ཡིན་ན། གངས་ཅན་མཁས་གྲུབ་ཀྱི་དབང་པོ་ཚོས་བཞེད་གཞུང་རྩལ་འདོན་མཛད་ལུགས་ཤིག་གིས་རྣམ་པ་མི་འདྲ་བ་མང་ཙམ་ཡོད་ན་ཡང་། གངས་ཅན་འདི་ན་དེ་དག་ཕྱོཊ་རེ་འཛིན། ཞེས་གསུངས་པ་ལྟར། འགའ་རེས་སྒྲོ་སྐུར་གྱི་དབང་གིས་དེའི་བར་ན་གནད་མ་ཤེས་ཏེ་ཆོས་སྤང་བསགས་བཞག་ན། རང་དང་འབྲེལ་ཐོག་སྡུག་པ་རེད་མ་གཏོགས་རང་ལུགས་ཡང་དག་པར་མ་འཇོག་གསུངས་པ་མ་རེད། རྒྱ་ཆེའི་ལྟ་གྲུབ་ཤན་འབྱེད་པའི་སྐབས་དང་ཆོས་ཉིད་ཟབ་མོ་ལ་ཟླ་བའི་དུས་གཉིས་ཀའི་སྐབས་ཐོབ་ཀྱི་སྦྱོར་ཚུལ་མ་འབྱེད་ན། དེས་ཡང་དག་པའི་ཚད་མའི་རིགས་ལམ་མཐའ་མ་དཔོག་པ་མིན་ན་ཅི་ཡིན། དེ་ལྟར་ན་རྒྱལ་བའི་ཡུམ་ལ་སོཊ་པའི་དགོངས་འགྲེལ་དང་བཅས་པ་ནས་ཆོས་ཀྱི་དབྱིངས་དང་། དེ་བཞིན་ཉིད། ཡང་དག་མཐའ་སོགས་ཀྱི་མིང་གི་ཐོག་ནས་སྟོང་ངོས་གཙོ་བོར་བྱས་ནས་སྟོན་པ་ཡིན་ན། སྙིང་པོ་བསྟན་པའི་མདོ་བཅུ་ཡི་དགོངས་འགྲེལ་དང་བཅས་པ་ནས་འོད་གསལ་བ་དེ་བཞིན་གཤེགས་པའི་སྙིང་པོའི་སྒོ་ནས་བསྟན་པ་རེད། སྐབས་འདིའི་ནང་རྒྱུད་བླ་མེད་ཀྱི་ཐེག་པ་གོང་མའི་སྐབས་འདིར་གཞི་རང་བཞིན་གྱི་དཀྱིལ་འཁོར། བཅིང་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་གསུངས་པ་ལྟར་དུ། ཆོས་ཐམས་ཅད་ཡེ་ནས་དག་མཉམ་ཆེན་པོའི་དཀྱིལ་འཁོར་དུ་སངས་རྒྱས་པའི་དེ་བཞིན་གཤེགས་པ་ཉིད་ལ་ཉིད་ཀྱིས་ཆེད་དུ་བརྗོད་པའི་དོན། སྨྲ་བསམ་བརྗོད་བྲལ་གྱི་བདག་ཉིད་རེད། སྤྱིར་ན་སྡུག་བསྔལ་བྱང་ཆུབ་དང་། ཉོན་མོངས་རྣམ་གྲོལ་གྱི་ཡེ་ཤེས་ཆེན་པོར་རྟོགས་ནས་ལམ་སྦྱོང་ན། ལས་འབྲས་ཀྱིས་མི་གོས་གསུངས་རྒྱུ་འདི། རྣལ་འབྱོར་བླ་མེད་སྤྱིའི་གྲུབ་མཐའ་རེད། ཡིན་ན་ཡང་། འཁོར་འདས་ཀྱི་ཆོས་ཐམས་ཅད་གདོད་ནས་དག་མཉམ་ཆེན་པོར་ལྷུན་གྱིས་གྲུབ་པ་ཡིན། རྩོལ་བཅས་ཀྱི་ལམ་དང་ལས་འབྲས་ཀྱི་འཆིང་བས་ཡེ་ནས་གོས་མ་མྱོང་པར་སྟོན་པ་དེ། ཐར་ལམ་རྫོགས་པ་ཆེན་པོའི་ཐུན་མིན་གྱི་ལུགས་རེད། ལྟ་ཡུལ་ཆོས་ཀྱི་དབྱིངས་ལ་ཁྱད་པར་མེད་ཀྱང་། ལྟ་བ་ཡུལ་ཅན་གྱི་ངོས་ནས་ཁྱད་པར་ཡོད་པ་རེད། མིག་གསལ་དང་མི་གསལ་གྱི་ཁྱད་པར་གྱིས་ཐག་རིང་ཐུང་གཅིག་གི་གཟུགས་ལ་མཐོང་བ་མི་འདྲ་བའི་ཁྱད་པར་ལྟར་རེད། མདོ་དང་སྔགས་མ་ཚད་སྔགས་ནང་རྒྱུད་ལ་ཡང་སྦས་དོན་གསལ་བྱེད་ལ་ཁྱད་པར་ཆེ། འོན་ཀྱང་མདོ་སྔགས་ཀྱི་དགོངས་དོན་འགལ་འདུ་ཅན་མ་རེད། སྔགས་ནས་བསྟན་པའི་དོན་དེ་དུས་རིང་པོ་ཞིག་གི་མཐའ་ནས་རྟོགས་པ་དང་། སྔགས་ལ་རྟེན་ནས་མྱུར་དུ་སངས་རྒྱས་པ་གཉིས་པོ་མཐའ་དོན་དགོངས་པ་མི་འགལ་གནད་གཅིག་ལ་འདུས་པ་རེད། དེས་ན། འདི་ནས་སྟོང་པ་ཉིད་དུ་སྦྱོང་རྒྱུ་དེ་སྐབས་ཐོབ་མ་ཧཱའི་ཨ་ཏི་ལ་སྦྱར་ནས་བཤད་སོང་ན། དག་མཉམ་བདེན་པ་དབྱེར་མེད་ཀྱི་དགོངས་སྤྱོད་ལ་ཐུག་པ་རེད། དེ་ཡང་གོང་དུ་བཤད་པ་ལྟར་དུ་སྣང་བ་ལྷར་བསྒྲུབ། ཡུལ་ཅན་ཡེ་ཤེས་སུ་བསྒྲུབ་པའི་གནད་ལ་ཐུག་པ་ཡིན་པས། ཆོས་ཐམས་ཅད་རང་བཞིན་གྱིས་མ་གྲུབ་པའི་སྟོང་པ་དང་དབྱེར་མི་ཕྱེད་པའི་ཕྱིར་ན། ཇི་ལྟར་སྣང་བ་ཡེ་ནས་དག་པ་ཀུན་བཟང་བདེ་བ་ཆེན་པོ་ཡེ་ནས་ཡིན་པར་བསྟན་ཏེ་སྣང་བ་ལྷར་བསྒྲུབ་པ་རེད། ཡོད་མེད་ཟེར་རྒྱུ་དེ་ཡང་སྣང་སྟོང་གི་ལྡོག་པ་ནས་བཏགས་པ་ཡིན་དུས། དེ་ལྟར་བཏགས་པ་དེ་ཡང་དོན་ལ་སྣང་སྟོང་དབྱེར་མེད་སྟོང་རྟེན་འབྱུང་གཉིས་པོ་འགལ་མེད་དུ་ཤར་རྒྱུ་དེ་ཟུང་འཇུག་དག་པ་ཆེན་པོ་རེད། མཉམ་པ་ཇི་ལྟར་ཡིན་ན། དེ་ལྟ་བུའི་སྟོང་རྟེན་འབྱུང་དགག་སྒྲུབ་གསལ་བཞག་དང་བྲལ་བའི་སྤྲོལ་བྲལ་བསམ་གྱིས་མི་ཁྱབ་པའི་གནས་ལུགས་ལ་གོམས་པ་བརྒྱུད་ནས། མཉམ་གཉིས་དང་ལྷག་པའི་མཉམ་གཉིས་གཉིས་ཀྱིས་ཁྱད་པར་དུ་བྱས་པའི་མཉམ་པ་ཆེན་པོའི་དཀྱིལ་འཁོར་ཀུན་ཏུ་བཟང་པོའི་ཞིང་ཞེས་གསུངས་པས་ཡུལ་ཅན་ཡེ་ཤེས་སུ་བསྒྲུབ་པ་ཡིན་པས་ན། སྣང་ངོས་ནས་དག་པ་བསྒྲུབ་རྒྱུ་དང་སྟོང་ངོས་ནས་མཉམ་པར་བསྒྲུབས་ཏེ་དེའི་སྣང་སྟོང་གཉིས་པོ་དེ་ཆོས་ཐམས་ཅད་ལ་དབྱེར་མེད་རོ་གཅིག་ཏུ་གནས་པ་བུ་རམ་གྱི་རོ་ཐམས་ཅད་མངར་བའི་རོ་གཅིག་ལ་གནས་པ་ལྟ་བུའི་དག་མཉམ་གཉིས་ཀྱི་ཤུགས་ལས་གྲུབ་པ་ཡིན་ན། གང་དག་པར་སྣང་བ་དེ་མཐའ་ཀུན་གྱིས་སྟོང་པ་ཞིག་དང་གང་སྟོང་པ་སྤྲོས་མཐའ་ཀུན་བྲལ་མཉམ་ཉིད་ཤིན་ཏུ་རྣམ་དག་སྣ་ཚོགས་སྒྱུ་འཕྲུལ་དྲྭ་བའི་སྣང་བ་དེ་གཉིས་ཀ། དབྱེར་མེད་ཆོས་སྐུ་ཉག་གཅིག་ལ་ཟླུམ་པ་དེ། སོ་སོར་རང་གིས་རིག་པ་བྱ་བ་ཟུང་འཇུག་རྫོགས་པ་ཆེན་པོའི་ཚུལ་རེད། དེ་ལྟར་དག་མཉམ་དབྱེར་མེད་ལྷའི་རང་བཞིན་ཡེ་ནས་ཡིན་པའི་སྟབས་ཀྱིས་འདིར་རང་ཉིད་ལྷར་གསལ་ནས་དེའི་གནས་གསུམ་ལས་འོད་ཟེར་འཕྲོས་པའི་ནུས་པ་ལ་དམིགས་པ་གཏད་ཡོང་དུས། ཕྱོགས་བཅུའི་དེ་བཞིན་གཤེགས་པ་བསྒྲུབ་བྱའི་ལྷའི་དཀྱིལ་འཁོར་རམ་བསྒོམ་པ་དང་འདྲ་བའི་ཡེ་ཤེས་པ་སྤྱན་དྲངས་པའི་ཚུལ་གྱིས་གཉིས་མེད་དུ་འདྲེས་རྒྱུ་ཡོད་པ་རེད་མ་གཏོགས། ལ་ཁ་ཁ་ལུང་པ་སོ་སོ་རྫས་ཐ་དད་ཡིན་ན་འདྲེས་པར་བསམ་ཡང་སྟོང་བསམ་རེད། མིན་རྒྱུ་ཞིག་ཡིན་རྒྱུར་བསམ་ཡང་སོལ་བ་བཀྲུས་ཀྱང་དཀར་པོ་མི་འགྱུར་བ་ལྟར་རེད། ལྷ་ཟེར་ནས་བཤད་ཡོང་དུས་ཆོས་ཉིད་དོན་གྱི་ལྷ་དང་ཆོས་ཅན་རྟགས་ཀྱི་ལྷ་ཡི་དབྱེ་བ་ཡོད་པ་རེད། ཆོས་ཉིད་དོན་གྱི་ལྷ་དེ་ནི། སྣང་སྟོང་གཉིས་མེད་ཀྱི་ཡེ་ཤེས་ཆོས་ཉིད་དེ་བཞིན་ཉིད་སྒྲིབ་པའི་བག་ཆགས་ཕྲ་མོ་ཙམ་ཡང་མེད་པར་ཟད་ནས། འཁོར་འདས་མཉམ་ཉིད་དུ་རྟོགས་ནས་སངས་རྒྱས་སོང་བའི། མཚན་མའི་སྤྱོད་ཡུལ་ཐམས་ཅད་དང་བྲལ་ཡང་ཤེས་བྱའི་རྣམ་པ་ཐམས་ཅད་འཆར་བའི་བདག་ཉིད་རིག་རྣམ་ཀུན་གྱི་བདག་པོ་དེ་རེད། ཆོས་ཅན་རྟགས་ཀྱི་ལྷ་ཟེར་རྒྱུ་དེ། ཆོས་ཉིད་ཅི་ཡང་མ་ཡིན་པ་ལས་ཅིར་ཡང་འཆར་དུ་རུང་བའི་གནད་དེ་ཡིས་ཡེ་ཤེས་ཀྱི་སྐུ། མཚན་མའི་སྤྱོད་ཡུལ་ལས་འདས་སོང་བ་དེ་རྣམ་པ་རྟགས་ཀྱི་ཕྱག་རྒྱར་ཤར་བ་ཞལ་ཕྱག་མཚན་མ་ཅན་གདུལ་བྱའི་ངོ་ཁར་སྣང་བ་རེད། འདིར་དཀྱིལ་འཁོར་གྱི་ཤར་སྒོ་གསུང་ཡོང་དུས། ཤིང་གི་དཀྱིལ་འཁོར་ཆུང་ཆུང་འདི་མཚོན་བྱེད་དམིགས་རྟེན་ཙམ་ལ་བྱས་ཏེ་མཚོན་བྱ་དོན་གྱི་དཀྱིལ་འཁོར་གཞི་འབྲས་དབྱེར་མེད་རང་བཞིན་ལྷུན་གྲུབ་ཀྱི་དཀྱིལ་འཁོར་ཡིན་པས། དེ་ཉིད་མཚོན་བྱེད་གཟུགས་བརྙན་གྱི་དཀྱིལ་འཁོར་དང་ལམ་གྱི་དཀྱིལ་འཁོར་རེད། ལམ་ལས་འབྲས་དཀྱིལ་མངོན་དུ་འགྱུར་བ་ཡིན་པས། འདིར་བསྟན་མཚོན་བྱེད་རྟགས་ཀྱི་དཀྱིལ་འཁོར་གྱིས་མཚོན་བྱ་དོན་གྱི་དཀྱིལ་འཁོར་མཚོན་དགོས་པའི་གནད་ཀྱིས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་དང་། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཞེས་གསུངས་པ་ནི་སྤྱི་དང་། ཁྱད་པར་ཆོས་ཐམས་ཅད་དབྱེར་མེད་སྐུ་གསུང་ཐུགས་ཀྱི་བདག་ཉིད་དུ་གནས་པའི། རང་བཞིན་དེ་ཉིད་ཡུལ་དུ་བྱེད་པའི་སྒོམ་པ་ཏིང་ངེ་འཛིན་གྱི་དཀྱིལ་འཁོར་དང་དེ་ལས་བདུད་འདུལ་དཔལ་ཆེན་ཁྲོ་བོའི་དཀྱིལ་འཁོར། རྣམ་པ་མ་འདྲེས་ཡོངས་རྫོགས་ལ་གསལ་བའི་ལྷག་པ་ཏིང་ངེ་འཛིན་གྱི་དཀྱིལ་འཁོར་ལ་གོ་རྒྱུ་རེད། འདི་ན་དབང་སྟེགས་པདྨ་འདབ་བརྒྱད་སོགས་ཀྱི་དོན་སྔོན་ཡང་བཤད་པ་རེད། འདི་དང་བསྟུན་ན་གཙོ་བོའི་ཐུགས་ཀ་ནས་འོད་ཟེར་བྱུང་ཟེར་རྒྱུ་དེ། བླ་མ་དང་དཀྱིལ་འཁོར་གྱི་གཙོ་བོ་གཉིས་སུ་མེད་པའི་ཐུགས་ཀ་ལ་གོ་དགོས་པ་རེད། བྱིན་རླབས་ཀྱི་རྩ་བ་བླ་མ་ཡིན་པས་ན་དབང་ནི་ལྷ་ལ་མི་ཞུ་བླ་མར་ཞུ་གསུངས་པ་ལྟར། བླ་མ་རིགས་ཀུན་འདུས་པའི་ངོ་བོ་བསམ་རྒྱུའི་རྩ་གནད་དེ་ནམ་ཡང་འབོར་མི་ཉན་ཚུལ་ཁར་རྩང་སྔོན་ནས་ཞུས་པ་བཞིན་རེད། རང་གི་རྣམ་སྨིན་གྱི་ལུས་རྟེན་སྦྱངས། རྣམ་པར་ཤེས་པ་ཧཱུྃ་ཡིག་ཏུ་གྱུར་པ་དེ་ཡབ་ཀྱི་ཞལ་ནས་དྲངས་སོགས་གསུངས་རྒྱུ་དེ། བསྐྱེད་རིམ་སྐྱེ་གནས་བཞིའི་བག་ཆགས་སྦྱོང་བ་དང་སྒོ་བསྟུན་ནས་གསུངས་པ་རེད། མར་འཁོར་བའི་བག་ཆགས་སྦྱངས་ཤིང་དག ཡར་མྱ་ངན་ལས་འདས་པ་གཞི་རུ་རྫོགས། དེ་རྫོགས་རིམ་གྱི་སྨིན་བྱེད་དུ་འགྲོ་བའི་དག་རྫོགས་སྨིན་གསུམ་ལ་སྦྱར་ཆོག། དང་པོ་ལྟ་བས་ཐག་བཅད། སྒོམ་པས་ལམ་དུ་བྱེད། མཐར་ཐབས་ཤེས་ཟུང་དུ་འབྲེལ་བའི་གོ་དོན་བྱས་ནས་སོང་ན། དང་པོ་སྟོང་པ་ཆེན་པོ་དེ་བཞིན་ཉིད་ཀྱི་ཏིང་ངེ་འཛིན་གྱིས་བསྐྱེད་རྫོགས་རང་རྒྱུད་དུ་མི་ཞེན་པའིི་དགོས་པ་དང་། ཡེ་ཤེས་ཀྱི་ཚོགས་རྫོགས། འཚང་རྒྱ་བའི་སྐབས་སུ་ཆོས་སྐུའི་ངང་ནས་གཟུགས་སྐུ་འཆར་གཞི་གྱུར་པའི་རྟེན་འབྲེལ་མངོན་དུ་བྱེད་པ་དང་། བར་དུ་ཀུན་སྣང་སྙིང་རྗེ་ཆེན་པོའི་ཏིང་ངེ་འཛིན་གྱིས་སྟོང་བའི་མཐའ་ཞེན་ལས་གྲོལ་རྒྱུ་དང་། བསོད་ནམས་གྱི་ཚོགས་རྫོགས་དེའི་སྟེང་ལ་འཚང་རྒྱ་དུས་འོག་མིན་གྱི་ཞིང་དང་གཞལ་ཡས་ཁང་རྒྱ་ཁྱོན་ཚད་ལས་འདས་པ་མངོན་དུ་བྱེད་པ་རེད། མཐའ་མར་རྒྱུའི་ཏིང་ངེ་འཛིན་ཡི་གེའི་སྤྲིན་སྤྲོ་བ་རེད། འདིར་བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་ཡི་གེ་ཧཱུྃ་མཐིང་ནག་ཏུ་གྱུར་པ་གསུངས་འདུག་དེ་གཙོ་བོའི་རྣམ་པ་གཉིས་པའི་སྲས་སུ་སྨིན་པ། འདི་གཞན་སྲས་ཀྱི་གོ་དོན་དང་ཕྱོགས་མཚུངས་པ་རེད། འདི་བསྐྱེད་རྫོགས་ཚར་གཅིག་གིས་རྡོ་རྗེ་འཆང་གི་གོ་འཕང་བགྲོད་པའི་དབང་དུ་བྱས་པ་འང་། ཚོགས་སྦྱོར་མཐོང་སྒོམ་བར་ཆད་མེད་ལམ་དང་ལྔ་ཡིས་རིག་འཛིན་གྱི་སར་བགྲོད་པ་ཚེ་འདིར་མཆོག་གི་ས་ཐོབ་པའི་དོན་ཅན་ཞིག་རེད། ཁྱབ་བདག་རྡོ་རྗེ་ཐོད་ཕྲེང་རྩལ་དང་གཉིས་སུ་མེད་ཅེས་གསུངས་དུས། རིགས་རྣམས་ཀུན་གྱི་ཁྱབ་བདག་བླ་མ་རྡོ་རྗེ་ཐོད་ཕྲེང་རྩལ་དང་གཉིས་སུ་མ་ཡིན་པའི་སྤྱི་དཔལ་ཆེན་པོ་གསུངས་ན་ཁྲོ་བོ་ཀུན་གྱི་ཆེ་བཙན་ལ་གོ་དགོས། སྤྱིར་ན་དཔལ་ཞེས་པའི་ཚིག་འདི་ཐུན་མོང་ལྟར་དུ་བྱས་ན། འཇིག་རྟེན་གྱི་བཟང་དགུ་འཛོམས་པའི་ཕུན་སུམ་ཚོགས་པ་ཞིག་ལ་གོ་བ་རེད། ཐུན་མིན་ལྟར་དུ་བྱས་ན། འཇིག་རྟེན་ལས་འདས་པའི་ངོ་མཚར་གྱི་ཆོས་ཞིག་ལ་གོ་དགོས་པ་ཡིན། དེ་ཡང་རང་བཞིན་ལྷུན་གྲུབ་ཀྱི་དཔལ་དང་། རིག་པ་རང་སྣང་གི་དཔལ། ཐུགས་རྗེ་ཞོར་འབྱུང་གི་དཔལ་དང་གསུམ་ལ་ཕྱེས་ནས་གསུངས་ཡོད། འདི་ནས་ཆོས་ཀྱི་དབྱིངས་དྭངས་གསལ་དྲི་མ་དང་བྲལ་བ། དེ་བཞིན་གཤེགས་པའི་སྙིང་པོ་རང་བཞིན་ལྷུན་གྲུབ་ཀྱི་དཔལ་དུ་གྱུར་པ་གང་ཞིག་ལས། དེ་ཉིད་མངོན་འགྱུར་འབྲས་བུའི་སར་བརྙེས་པ་ཐུན་མོང་གི་ཆོས་སྐད་ལ། རྟོགས་པ་བདག་དཔལ་ཆེན་པོ་དང་། གང་འདུལ་ཁྲོ་ཆགས་ཀྱི་མཛད་པ་ཅིར་ཡང་སྟོན་པ་ཐུགས་རྗེ་གཞན་གྱི་དཔལ་ཟེར་ན་ཡང་ཆོག་རེད། དེ་ལྟ་བུའི་ཞོར་འབྱུང་གི་དཔལ་ཡང་ཚང་པའི་དཔལ་ཆེན་པོ་ཞེས་པའི་ཆེན་པོའི་སྒྲས་ཅི་ཞིག་སྟོན་སྙམ་ན། ཁྲག་འཐུང་ཁྲོ་བོ་ཀུན་གྱི་རྒྱལ་པོ་ཆེ་མཆོག་ཧེ་རུ་ཀ་ཞེས་པའི་དོན་རེད། འདིའི་སྐུ་མདོག་མཐིང་ནག་ནི་ཆོས་དབྱིངས་འགྱུར་མེད་ཀྱི་རྟགས་ཡིན། ཞལ་གསུམ་ནི་སྐུ་གསུམ་མཚོན་བྱེད་དང་། གཡས་དཀར་བཞད་པས་གདུལ་བྱ་རྗེས་སུ་འཛིན་པ་དང་། གཡོན་དམར་རྔམ་པས་སྡུག་པ་ཚར་གཅོད་པའི་རྟགས། ཕྱག་དྲུག་ཡེ་ཤེས་དྲུག་གི་དང་པོ་གཉིས་ཀྱིས་རྡོ་རྗེ་དང་དུང་ཁྲག་འཛིན་པ་ནི། ཐབས་དང་ཤེས་རབ་བདེ་བ་དང་སྟོང་པ་མཚོན་བྱེད། བར་པ་གཉིས་ཀྱིས་དུག་གསུམ་བཅོམ་ཞིང་ཉོན་མོངས་ཡེ་ཤེས་སུ་བསྒྱུར་པའི་ཁ་ཊྭྃ་ཐོང་གཤོལ་བསྣམས་པ། ཐ་མ་གཉིས་ཀྱིས་སྡུག་ཅན་སྐྲག་ཅིང་ཟ་བར་བྱེད་པའི་མེ་དཔུང་དང་ལྕགས་ཀྱི་སྡིག་པ་མགོ་དགུ་བསྣམས་པ། འདིའི་དཔལ་ཆེན་པོའི་ཕྱག་དྲུག་དེ་ཡེ་ཤེས་དྲུག་ལ་སྦྱར་ན། འོ་ན་ཡེ་ཤེས་དྲུག་ཟེར་ན་གང་རེད་ཡེ་ཤེས་ལྔ་མ་ཡིན་ནམ་སྙམ་ན། ཆོས་དབྱིངས་མེ་ལོང་མཉམ་ཉིད་སོགས་ལྔ་པོའི་སྟེང་ལ་རང་བྱུང་ཡེ་ཤེས་བསྣན་པས་ཡེ་ཤེས་དྲུག་གསུངས་པ་རེད། སྤྱིར་ན་དཀྱིལ་འཁོར་སོ་སོའི་དག་སྦྱོར་འདི་རྒྱུད་སོ་སོ་ནས་གཅིག་འདྲ་རྐྱང་རྐྱང་ཡིན་པའི་ངེས་པ་མེད་པས་མི་འདྲ་བ་ཡང་འབྱུང་། དེ་མཐའ་གཅིག་ཏུ་ངེས་པ་ཅན་ལ་འཛིན་མི་དགོས། རྒྱུ་མཚན་ནི། འཁོར་བའི་ཆོས་སྣང་བཏགས་ཙམ་འདི་ལ་གནས་སྐབས་ཀྱི་བྱ་བྱེད་ཅིར་ཡང་འཐད་པ་ལྟར་དུ། དག་པའི་ཡེ་ཤེས་ཀྱི་ངོར་རིས་སུ་ཆད་པ་མ་ཡིན་པས་དག་སྦྱོར་མི་འདྲ་བ་སྣ་ཚོགས་དགོས་པའི་དབང་གིས་འབྱུང་ཆོག་པར་མ་ཚད་དོན་ལ་ཡང་དེ་ལྟར་དུ་འཐད་པ་ཞིག་རེད། འདི་ནས་དཔལ་དང་དུར་ཁྲོད་ཀྱི་ཆས་གསུངས་དུས། སྔོན་རུ་ཏྲ་འཁོར་དང་བཅས་པ་འདུལ་བའི་སྐབས་སུ་སྐུ་ཆས་དཔའ་རྟགས་ཀྱི་ཚུལ་དུ་བཞེས་པའི་དཔལ་གྱི་ཆས་བརྒྱད། འདི་ལ་ཚིག་གིས་གསུངས་ཚུལ་འདྲ་དང་མི་འདྲ་ཡོད་ཀྱང་དོན་ལ་མི་གཅིག་པ་མེད། དབུ་སྐྲ་གྱེན་བརྫེས་འཁོར་བ་རུ་རྫོགས་ཆས། །རྡོ་རྗེའི་ཁྱུང་གཤོག་ཐབས་དང་ཤེས་རབ་ཆས། །ལ་སོགས་པ་གསུངས་བ་ལྟར་དང་དེའི་འཕྲོར་དུར་ཁྲོད་ཀྱི་ཆས་བརྒྱད་གསུངས་འདུག་དུར་ཁྲོད་ཀྱི་ཆས་བརྒྱད་དེ་བསྒོ་བའི་གོས་གསུམ། གདགས་པའི་བརྒྱན་གཉིས། བྱུག་པའི་རྩི་གསུམ་གྱིས་བརྒྱད་རེད། བགོ་བའི་གོས་གསུམ་དེ་གླང་ཆེན་ཀོ་རློན་དང་ཞིང་གི་གཡང་གཞི་སྟག་ལྤགས་ཀྱི་ཤམ་ཐབས་གསུམ་པོ་རེད། གདགས་པའི་རྒྱན་གཉིས་དེ་སྦྲུལ་རྒྱན་དང་ཐོད་རྒྱན་གཉིས་རེད། སྦྲུལ་རྒྱན་དེ་སྦྲུལ་རིགས་སྣ་ཚོགས་ཀྱི་རྒྱན་དང་ཐོད་རྒྱན་དེ་མི་མགོ་སྐོམ་རློན་རྙིད་གསུམ་གྱི་རྒྱན་དང་། མི་མགོ་རློན་རྙིང་ཞེས་འགའ་རེས་ང་བྱས་ནས་བསམ་བཞིན་བཅོས་འདུག་དར་མོད། འོན་ཀྱང་མི་མགོ་སྐོམ་རློན་རྙིད་ཟེར་དགོས་རེད། སྐམ་རློན་གཉིས་ཀའི་བར་གྱི་རྙིད་པ་ཅན་པོ་དེ་རེད། བྱུག་པའི་རྩི་གསུམ་ནི་ཐལ་ཆེན་གྱི་ཚོམ་བུ། རཀྟའི་ཐིག་ལེ། ཞག་གི་ཟོ་རིས་རྣམས་རེད། གཞན་ཡང་ཁྲོ་བོའི་རྒྱན་ཞི་བ་ལ་མི་འགྲོ་མ་གཏོགས། ཞི་བའི་རྒྱན་ཁྲོ་བོ་ལ་འགྲོ་རྒྱུ་མཐའ་གཅིག་ཏུ་བཀག་མེད། དཔལ་ཆེན་པོའི་ཞབས་བཞི་ནི་བསྡུ་བའི་དངོས་པོ་བཞི་མཚོན་བྱེད་ཡིན་པ་དང་། ཞབས་དོར་སྟབས་སུ་བསྒྲད་པ་ནི་དཔའ་བོ་གཡུལ་རྒྱལ་གྱི་གོམ་སྟབས་རེད། འགྲོ་བའི་དོན་ལ་སྙིང་རྗེ་ཁྲོས་པའི་དྲག་ཤུལ་གྱི་སྟོབས་ཀྱིས་སྐྱོད་པའི་ཉམས་མདངས་ཅན་ཞིག་རེད། ཞབས་བཞི་རྒྱལ་འགོང་དང་བདུད་བཞི་བསྣོལ་སྟབས་སུ་བརྫིས་པ་གསུངས་པའི། ཞབས་གནོན་འདི་དག་ལ་གན་རྐྱལ་དང་ཁ་སྦུབ་བསྣོལ་སྟབས་དང་བྱི་ཆིངས་སོགས་ཀྱི་རིགས་འདྲ་མི་འདྲ་ཡོད་པའི་ནང་ནས་འདི་དོར་སྟབས་རེད་འདུག ཐབས་ཤེས་དབྱིངས་དང་ཡེ་ཤེས་ཟུང་དུ་འཇུག་པའི་ཡབ་ཡུམ་ཟུང་སྦྱོར་གྱི་བདག་ཉིད་ཡུམ་དབྱིངས་ཕྱུག་མ། སྐུ་མདོག་ཡབ་དང་འདྲ་བར་སྦྱོར་སྒྲོལ་རྨད་བྱུང་གི་ཁ་ཊྭཱཾ་དང་དུང་དམར་འཛིན་པས་འཁྱུད་པ། ཡབ་ཡུམ་གཉིས་ཀའང་གར་གྱི་ཉམས་དགུ་གསུངས་དུས། གར་གྱི་ཉམས་དགུ་ནི། སྒེག་པ་དཔའ་བ་མི་སྡུག་གསུམ་སྐུ་ཡི་ཉམས་དང་། དགོད་གཤེ་དྲག་ཤུལ་གསུམ་གསུང་གི་ཉམས། སྙིང་རྗེ་རྔམ་ཞི་གསུམ་ཐུགས་ཀྱི་ཉམས་གསུམ་སྟེ་དེ་ལྟ་བུའི་གསུམ་གསུམ་དགུ་དང་ལྡན་ཞིང་ཉོན་མོངས་སྲེག་བྱེད་ཡེ་ཤེས་ཀྱི་མེ་རི་དང་མེ་དཔུང་འབར་བའི་ཀློང་ན་བཞུགས་པ། འདི་དག་ལ་དངོས་པོ་རང་མཚན་དུ་བཟུང་ནས་བདེན་པར་ཞེན་མི་རུང་པ་རེད། ཁྲོ་བོ་རང་རྒྱུད་རུ་ཏྲར་གོལ་གསུངས་པ་རེད། རང་སྣང་ཡེ་ཤེས་ཀྱི་དཀྱིལ་འཁོར་མདོག་དབྱིབས་ཞལ་ཕྱག་གི་སྤྲོས་པ་མི་མངའ་ཡང་། སངས་རྒྱས་རང་སྣང་གི་ཡོན་ཏན་འདི་གདུལ་བྱའི་བློ་ངོར་མཚོན་བྱེད་ཀྱི་ཐབས་སུ་བརྡ་དང་རྟགས་ཀྱིས་བསྟན་པ་རེད། དེ་ལྟར་མ་བསྟན་ན་གོ་བརྡ་མི་འཕྲོད། གདུལ་བྱའི་སེམས་ཅན་གྱི་ནང་ནས་ཁྱད་པར་མིའི་འགྲོ་བ་དེ་ཕོ་མོ་གཉིས་ལས་གྲུབ་པ་ཡིན་ལ་དེ་ཡང་ཆགས་སྡང་གཉིས་ལ་སྤྱོད་པ་ཞིག་ཡིན། དེ་ལྟར་ཡིན་པའི་སྟབས་ཀྱིས་དེ་དང་དེའི་རྣམ་པས་འདུལ་བྱེད་ཀྱི་ལྷའི་རྣམ་པར་ཤར་བ་རེད། གནས་གསུམ་ཡི་གེ་གསུམ་འདི་ཨོཾ་ཨཱ་ཧཱུྃ་གི་སྐུ་གསུང་ཐུགས་ཀྱི་ཡི་གེ་གསུམ་པོ་རེད། སྤྱིར་ན་ཡི་གེ་ཟེར་རྒྱ྄ུ་འདིའི་དབྱེ་བ་ལ་ལུས་གནས་རྩའི་ཡི་གེ ཕོ་བྲང་ལྷའི་ཡི་གེ ཆོ་འཕྲུལ་སྤྲུལ་པའི་ཡི་གེ མཚོན་བྱེད་སྒྲའི་ཡི་གེ་དེ་དག་གི་ནང་ནས་འདི་ཆོ་འཕྲུལ་སྤྲུལ་པའི་ཡི་གེ་ཡིན་དགོས་པ་རེད། ཕྱོགས་བཅུའི་དུས་བཞིའི་རྒྱལ་བ་སྲས་དང་བཅས་པ་གསུངས་འདུག ཕྱོགས་བཅུ་དུས་བཞི་གསུངས་ན་ཕྱོགས་བཅུ་དེ་ཤེས་བཞིན་པ་རེད། ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅུ་དེ་མུ་མཐའ་མེད་པའི་རྒྱལ་བའི་ཞིང་ཁམས་ལྔ་གསུངས་པ་དེ། དུས་བཞི་དེ་ཆོས་ཅན་འདུས་བྱས་ཀྱི་དུས་གསུམ་དང་ཆོས་ཉིད་འདུས་མ་བྱས་ཀྱི་མཉམ་ཉིད་ཀ་དག་གི་དུས་ཏེ་དུས་བཞི་གསུངས་པ་རེད། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བསྒྲུབ་བྱའི་ལྷ་དཔལ་ཆེན་འདུས་པའི་དཀྱིལ་འཁོར་གྱི་ལྷ་ཡི་རྣམ་པས་རོལ་གཅིག་དུ་འདྲེས་པར་བསམ་གསུངས་ན། རིག་པ་ཏིང་ངེ་འཛིན་གྱི་དཀྱིལ་འཁོར་བསྐྱེད་པ་དབྱིངས་རང་བཞིན་གྱི་དཀྱིལ་འཁོར་སྤྱན་དྲངས་ཞིང་བསྟུན་པས་ན། རིག་པ་དབྱིངས་ལ་ཞུགས། དབྱིངས་ཀྱིས་རིག་པར་ཁྱབ་པའི་དེ་ཁོ་ན་ཉིད་སྐུ་གསུང་ཐུགས་ཀྱི་དངོས་གྲུབ་ཐོབ་པའི་རྣམ་པ་དེ་འདྲ་ཞིག་གིས་མངོན་དུ་གྱུར་པ་བསམ་དགོས་གསུངས་པ་རེད། བསམ་རྒྱུ་དེ་ཡང་སེམས་རྣམ་རྟོག་གི་སྤྲོས་པ་ཞིག་གིས་གཟུང་འཛིན་ཞེན་ཡུལ་ཅན་བློས་བཏགས་པ་མ་ཡིན་པ་ཆོས་ཉིད་ཀྱི་རང་རྩལ་དད་དང་མོས་གུས་དག་སྣང་གི་གདངས་སུ་ཤར་བའི་སྒོ་ནས་དེའི་ངང་སྐྱོང་དགོས་པ་ཡིན། འདི་ནས་བྱིན་འབེབས་ཀྱི་ཚིག་བཀའ་མ་སྤྱི་འགྲོས་ཀྱིས་བབ་དྲུག་མ་ཆོག་ཁྲིགས་ལ་བཙུད་འདུག དེའི་དོན་སྔོན་ནས་བཤད་མྱོང་བ་རེད། ད་འདིའི་སྔོན་ལ་རིག་འཛིན་ཐུགས་སྒྲུབ་དཔལ་ཆེན་འདུས་པ་བཀའ་བརྒྱད་རང་གཞུང་གི་སྤྱན་འདྲེན་དེ་སྦྱར་ན་འབྲེལ་ཆགས་བསམ་གྱིན་ཡོད། དེ་ནི་འདི་རེད། འོག་མིན་ཆོས་དབྱིངས་བདེ་ཆེན་ཞིང་ཁམས་ནས། །ལྷུན་གྲུབ་རོལ་བ་ཡེ་ཤེས་ཀློང་དགུའི་རྩལ། །ཞི་ཁྲོ་རབ་འབྱམས་དཔལ་ཆེན་བཀའ་བརྒྱད་ལྷ། གདུག་པ་འདུལ་ཕྱིར་གནས་འདིར་གཤེགས་སུ་གསོལ། །ཨེ་ཧྱ་ཧི་ཛ་ཧཱུྃ་བྃ་ཧོ་ས་མ་ཡ་ཧྲཱིང་ཧྲཱིང་ཛ་ཛ་གསུངས་འདུག དེ་འོག་མིན་ཆོས་དབྱིངས་བདེ་ཆེན་གྱི་ཞིང་ཁམས། དོན་དམ་ཆོད་ཉིད་ཀྱི་དབྱིངས་ཀ་དག་སྟོང་པའི་ངང་དེ་ལས་ལྷུན་གྲུབ་རོལ་བ་ཡེ་ཤེས་ཀློང་དགུ་གོང་དུ་གསུངས་པ་ལྟ་བུའི་ཡེ་ཤེས་ལྔའི་སྟེང་ལ་ཀློང་འགྱུར་ཡེ་ཤེས་འདའ་དཀའ་ཡེ་ཤེས་དབྱིངས་གྲོལ་ཡེ་ཤེས་མཐའ་གྲོལ་ཡེ་ཤེས་བསྣན་པས་ཡེ་ཤེས་དགུ་ཡི་རོལ་རྩལ་དེ། ཞི་ཁྲོ་རབ་འབྱམས་གྱི་ལྷ་ཚོགས་གཅིག་འདུས་གྱི་ངོ་བོ། དཔལ་ཆེན་བཀའ་བརྒྱད་སྤྱི་དཔལ་ཆེན་པོ་ཆེ་མཆོག་ཧེ་རུ་ཀའི་ལྷ་ཚོགས་དང་བཅས་དཔལ་དགུའི་ལྷ་ཚོགས་སུ་ཤར་བ། མ་རུང་ལོག་འདྲེན་གདུག་ཅན་འདུལ་ཞིང་རྣལ་འབྱོར་སྒྲུབ་གནས་ཡོ་བྱད་དང་བཅས་པར་བྱིན་གྱིས་བརླབ་པའི་ཕྱིར་དུ་དབང་བསྐུར་བའི་གནས་འདིར་གཤེགས་སུ་གསོལ་ཞེས་གསུངས་པ་དང་། ཨེ་ཧྱ་ཧི་ཟེར་རྒྱུ་དེ་འབོད་པའི་ཚིག་ཞིག་རེད། ཛ་ཧཱུྃ་བཾ་ཧོ་དེ་འགུག་འཆིང་སྡོམ་མྱོས་བཞིའི་སྔགས་དང་ཕྱག་རྒྱ་ཡིས་གནད་ནས་བསྐུལ་ཞིང་སྤྱན་འདྲེན་པ། བཞུགས་སུ་གསོལ་ཞིང་ཕྲིན་ལས་མཛད་པ་སྐུལ་བ་དང་བཅས་བསྟན་པ་རེད། སྤྱན་དྲངས་ཤིང་བསྟིམས་ཟེར་རྒྱུ་དེ་བསྐྱེད་པ་ཏིང་ངེ་འཛིན་གྱི་དཀྱིལ་འཁོར་དང་གཞི་རང་བཞིན་ལྷུན་གྲུབ་ཀྱི་དཀྱིལ་འཁོར་གཉིས་ཀ་རང་སྣང་གི་ངོ་བོ་དབྱེར་མེད་གནས་པས་ན། རང་བཞིན་དམ་ཚིག་གི་དཀྱིལ་འཁོར་ལ་བསྐྱེད་པ་ཡེ་ཤེས་པའི་དཀྱིལ་འཁོར་སྤྱན་དྲངས་པ་དེ་ཆུ་ལ་ཆུ་བཞག་པ་ལྟ་བུའི་གཉིས་མེད་གཅིག་ཏུ་མཉམ་པར་སྦྱོར་བའི་ཚུལ་གྱིས་བསྟིམས་པ་ཞིག་རེད། གོང་དུ་བཤད་པའི་དམིགས་པ་གསལ་བཞིན་དུ་བཞུགས་སྟངས་དང་བསྟུན་དགོས་པ་ཡིན་པས་གསལ་འདེབས་ཀྱི་ཚིག་དེ་དག་ཡང་འདོན་ཞིག་བྱེད། གོང་ནས་བཏོན་ཏེ་ཡུན་རིང་རེད་སོང་། མཚམས་འདིར་མེ་ཏོག་དོར་བ་མིག་དར་བཀྲོལ་བ་སོགས་གསུངས་མཐར། དེ་ལྟར་བྱས་ཏེ་མཐོང་བ་བསྟན་པའི་དཀྱིལ་འཁོར་གྱི་དག་སྦྱར་དང་བཅས་ཏེ་གསུངས་འདུག མིག་མཁན་སྨན་པ་མཁས་པ་ཞིག་གིས་གསེར་ཐུར་གྱི་ལག་ཆ་བེད་སྤྱད་ནས་ལོང་བའི་མིག་ཕྱེས་པ་ལྟར། རང་གི་རྒྱུད་ལ་ཡེ་ཐོག་མ་ནས་བཞུགས་པའི་བདེ་གཤེགས་སྙིང་པོར་སྒྲིབ་བྱེད་གློ་བུར་གྱི་འཁྲུལ་བ་དེ་ལིང་ཐོག་དང་འདྲ་བ་རེད། དེ་མ་འཁྲུལ་བའི་ཡེ་ཤེས་ཀྱི་ཐུར་མས་བསལ་ནས། སྤྱན་ཕྱེས་བཞག་དུས། མཚོན་བྱེད་དཔེའི་དཀྱིལ་འཁོར་གྱིས་མཚོན་རྒྱུའི་མཚོན་བྱ་དོན་གྱི་དཀྱིལ་འཁོར་དེ། རང་ངོ་རང་གིས་མཐོང་བ་བྱེད་རྒྱུ་དེ་མཐོང་བ་བསྟན་པའི་དོན་ཚུར་བསྡུས་ཡོང་ན་དེ་འདྲ་ཞིག་རེད། དེ་ཡིན་ན་ཡི་དམ་ལྷ་ཡི་དཀྱིལ་འཁོར་དེ་ག་ཤེད་ཕྱི་ཞིག་ལ་ཡོད་རྒྱུ་ཅན་མ་ཡིན་པར། ནང་རང་ལུས་རྡོ་རྗེ་ཕུང་པོའི་གྲོང་ཁྱེར་ལ་བཞུགས་པར་མ་ཟད་རྒྱལ་བའི་སྐུ་གསུང་ཐུགས་གསུམ་རྡོ་རྗེ་གསུམ་དང་འབྲལ་བར་མེད་པར་ངོ་སྤྲད་ནས་དེ་བཞིན་དུ་ངོ་འཕྲོད་ཅིང་རྟོགས་ན་མཐོང་བ་ཐོབ་སོང་བ་རེད། འདིའི་དཀྱིལ་འཁོར་དང་ལྷ་ཚོགས་ཀྱི་དག་སྦྱོར་མང་ཆེ་བ་རིགས་མཐུན་གྱི་དཀྱིལ་འཁོར་སྐབས་ནས་ཞུ་མྱོང་མོད། གཙོ་བོར་སྒྲུབ་པ་བཀའ་བརྒྱད་ཀྱི་དཀྱིལ་འཁོར་སོ་སོའི་སྒྱུད་གཞུང་དང་། སྒྲུབ་ཐབས་ཀྱི་སྐོར་རགས་རིམ་འགོ་ལེན་རེ་དགོས་པའི་དབང་གིས་རྟེན་འབྲེལ་གྱི་ཆེ་བ་བྱས་ནས་ཞུས་ན། ད་ཐོག་མར་གོང་དུ་ཆེ་མཆོག་ཡོན་ཏན་གྱི་དཀྱིལ་འཁོར་སོང་བ་རེད། འདི་བདུད་རྩི་ཡོན་ཏན་གྱི་ལྷ་ཚོགས་ཡིན་པས། འདིའི་སྐོར་གྱི་རྒྱུད་སྡེ་ལ་མཚོན་ན། བདུད་རྩི་རོལ་བ་ལུང་གི་རྒྱུད། ཡེ་ཤེས་གསང་བ་འཁོར་ལོའི་རྒྱུད་ལ་སོགས་པ་མང་བ་རེད། འདིའི་སྒྲུབ་ཐབས་སྒྲུབ་པ་བྱེད་ལུགས་ཀྱི་གནད་དེ་བདུད་རྩི་རྣམ་དག་གི་དགོངས་པ་རེད། དེ་ཡང་བདུད་རྩི་རྣམ་པ་བཞི་ཡིས་བསྟན། ཁར་རྩང་འུ་ཚོས་རྡོར་སེམས་གྱི་སྨིན་དབང་བསྐུར་དུས་ཞིག་ལ་ཚིག་ཟུར་དུ་ཐོན་པའི། ཆོས་ཀྱི་བདུད་རྩི། དོན་གྱི་བདུད་རྩི། རྟགས་ཀྱི་བདུད་རྩི། རྫས་ཀྱི་བདུད་རྩི་སྟེ་དེ་བཞི་པོ་རེད། དེ་ཡང་ཞིབ་ཀྱིས་བཤད་ན། ནང་གསེས་བརྒྱད་རེ་བརྒྱད་རེ་བྱས་ནས་གསུངས་འདུག་མོད། ཆེ་ལོང་གི་རྩ་བ་ནས་བཤད་དུས། ཆོས་བདུད་རྩི་ཞེས་པ་དེ། འཆི་མེད་གཏན་གྱི་བདེ་བར་འགོད་བྱེད་ཀྱི་དམ་པའི་ཆོས། ཆོས་ཕུང་བརྒྱད་ཁྲི་བཞི་སྟོང་ངམ་ཡང་ན་ལྟ་བ་རང་བྱུང་གི་ཡེ་ཤེས་རང་ངོ་སྤྲོད་རྒྱུ་བོ་དེར་འདུས་པ་ཡིན། གཉིས་པ་དོན་གྱི་བདུད་རྩི་ནི། ཆོས་ཐམས་ཅད་དོན་དངོས་པོ་གཤིས་ཀྱི་བཞུགས་ཚུལ་ལ་ཡེ་ནས་དག་པ་ཡིན་རྒྱུ་དང་། ཁྱད་པར་དུ་དུག་ལྔ་ཡེ་ཤེས་ལྔ་ལམ་དུ་བྱེད་པའི་རྫོགས་རིམ་གྱི་ཆོས་ལ་གཙོ་བོ་གོ་ཆོག་རྒྱུ་ཞིག་རེད། གསུམ་པ་རྟགས་ཀྱིབདུད་རྩི་ནི། འདིའི་ཆོས་ཉིད་དག་པ་ཡིན་པའི་རྟགས་ཀྱིས་དེའི་ཆོས་ཅན་དུ་མཚོན་པའི་སྒོ་ཡིན་པར་གྲུབ་པ་དང་། གོང་གི་དེ་རྫོགས་རིམ་ལ་སྦྱར། འདི་བསྐྱེད་རིམ་ལ་སྦྱར་ན་འཐུས་པ་རེད། སྲོག་སྡོམ་གཟེར་བཞིའི་ཚུལ་གྱིས་རྒྱུད་སྦྱང་བ་ལ་གོ་བ་བླངས་ན་ཆོག བཞི་པ་རྫས་ཀྱི་བདུད་རྩི་ནི། འཇིག་རྟེན་གྱི་ཁམས་ན་བདུད་རྩིར་གྲགས་པའི་དངོས་པོར་ཡོད་ཚད་ཐམས་ཅད་འཆི་བ་མེད་པའི་བཅུད་ལེན་ལ་སྒྲུབ་ལུགས་དང་། ཁྱད་པར་དུ་གོང་དུ་བཤད་པ་ལྟར་གྲོལ་བ་བཞི་ལྡན་གྱི་ཐབས་ཤེས་ཀྱི་རྫས་ཤ་ལྔ་བདུད་རྩི་ལྔ་གཙོ་བོར་བྱས་པའི་རྩ་བརྒྱད་ཡན་ལག་སྟོང་སྦྱར་གྱི་རྫས་འདུ་བྱས་ཏེ། ཁྲོལ་སྒྲུབ་ཏུ་བསྒྲུབ་རྒྱུ་ལ་སོགས་པ་བསྙེན་སྒྲུབ་ཡན་ལག་བཞི་ལྡན་གྱིས་བསྒྲུབས་པ་དེ་ཡིན་པས། ལམ་འདི་ལ་བརྟེན་ནས་གནས་སྐབས་ལམ་གྱུར་གྱི་རིག་འཛིན་བཞི་དང་། མཐར་འབྲས་དཔལ་ཆེན་ཧེ་རུ་ཀའི་གོ་འཕང་བླ་ན་མེད་པ་འགྲུབ་པའི་དངོས་གྲུབ་ཐོབ་པར་བྱེད་རྒྱུ་དེ་ཡིན། བདུད་རྩི་ཡོན་ཏན་གྱི་ལྷ་ཚོགས་ཟེར་ན་གོ་དོན་དེ་འདྲ་ཞིག་རེད། འདིའི་འཕྲོར་དཔལ་ཆེན་བཀའ་བརྒྱད་ཀྱི་ནང་གི་སྐུ་འཇམ་དཔལ་གཤིན་རྗེ་གཤེད། གསུང་དབང་ཆེན་རྟ་མགྲིན་དམར་པོ། ཐུགས་དཔལ་ཆེན་ཡང་དག་ཧེ་རུ་ཀ་རེད། ཡོན་ཏན་ཆེ་མཆོག་གི་དཀྱིལ་འཁོར་དང་སྒྲུབ་ལུགས་སོགས་ད་ལྟར་གོང་དེར་བཤད་མ་ཐག་པ་ལྟར་ཡིན། ཕྲིན་ལས་ཕུར་པ་རྡོ་རྗེ་གཞོན་ནུའི་དཀྱིལ་འཁོར་གྱི་སྐུ་གསུང་ཐུགས་ཡོན་ཏན་ཕྲིན་ལས་བཞི་ཡི་སྒྲུབ་ལུགས་དེ། འདིའི་རྩ་སྒྲུབ་དཔལ་ཆེན་འདུས་པའི་དམིགས་བསལ་ཡན་ལག་གི་སྒོས་བཀའ་གོང་དུ་བཤད་པ་ལྟར་དུ། གཤིན་རྗེ་འཆི་བདག་ཟིལ་གནོན་དང་། རྟ་མགྲིན་ཁམས་གསུམ་རོལ་བ། ཡང་དག་སངས་རྒྱས་མཉམ་སྦྱོར། ཕུར་བ་བདུད་དཔུང་ཟིལ་གནོན་དང་བཞི་པོ་སོ་སོའི་སྒོས་དབང་གི་དཀྱིལ་འཁོར་མཐོང་བ་བསྟན་པའི་སྐབས་སུ་བཤད་ཆོག་གི། འདིར་ཤར་ལྷོ་མངོན་རྫོགས་རྒྱལ་པོ་གསུངས་ནས་མ་མོ་རྦོད་གཏོང་གི་དཀྱིལ་འཁོར་རམ་དེའི་ལྷ་ཚོགས་བསྟན་པ་རེད། འདིའི་རྒྱུད་སྡེ་ལ་མཚོན་ན་མ་མོ་སྲིད་པའི་བེ་བུམ་གསུངས་རྒྱུ་ཞིག་དང་མ་མོ་གསང་བའི་གཏན་ཚིག་གི་རྒྱུད་ལ་སོགས་པ་མང་པོ་རེད། མ་མོ་རྦོད་གཏོང་གི་སྒྲུབ་ལུགས་སྒྲུབ་ཐབས་ཐམས་ཅད་ཀྱི་དགོངས་དོན་ཚུར་བསྡུས་ཡོང་ན། མ་མོ་རྩ་རླུང་གི་དགོངས་པར་འདུས། མ་མོའི་དགོངས་པའི་གནད་དེ་རྩ་རླུང་ལ་འདུས་རྒྱུ་དེ། འདི་མིན་ན་ཡང་མ་རྒྱུད་སྤྱིའི་ལུགས་རེད། སྣང་སྲིད་ཀྱི་མ་མོ་ཐམས་ཅད་ཀུན་ཏུ་བཟང་མོ། ཉིད་ཞི་མུ་ཁ་ལེའི་མཁའ་དབྱིངས་ལས་ཤར་བ་ཡིན་དུས། བསྡུས་བཞག་ན་གཅིག་ལ་འདུས་ཀྱང་དབྱེ་བཞག་ན་འབུམ་ཕྲག་ཡངས་པའི་ལས་དང་ཡེ་ཤེས་ཀྱི་མ་མོ་འབུམ་ཕྲག་ཏུ་སྣང་བ་རེད། དེ་ནི་སྐྱེ་འགྲོ་སེམས་ཅན་ཐམས་ཅད་ཀྱི་ལུས་ཀྱི་རྩ་བཞི་བརྒྱ་རྩ་བཞི་ལ་གནས་ཤིང་འདུས་པ་དང་། དེ་ཡང་རྩ་ཆེན་བཞི་ལ་འདུས་པ་ནས་སྙིང་རྩ་ཆེན་ཙིཏྟ་འོད་ཀྱི་གུར་ཁང་ན་དྭངས་མ་ལྔ་འདུས་ཀྱི་ཐིག་ལེ་ལ་བརྟེན་ནས་གནས་པ་ཡིན་ན། རྣལ་འབྱོར་པས་ནང་རླུང་ཁམས་ཀྱི་བྱེད་པ་དབུ་མའི་དབྱིངས་སུ་བསྡུ་དུས། ཕྱིའི་མངོན་རྫོགས་རྒྱལ་པོའི་དཀྱིལ་འཁོར་གྱིས་མ་མོ་ཐམས་ཅད་རང་དབང་མེད་པར་དབང་དུ་བྱེད་པ་རེད། མ་མོ་རྩ་རླུང་གི་དགོངས་པ་འདི་སྒྲུབ་ལུགས་ནང་གསེས་ཀྱིས་དབྱེ་ན་དོན་བཞིའི་ཐོག་ནས་བཤད་པ་རེད། དོན་བཞི་དེ་གང་ཡིན་ན། མ་མོའི་རིགས་བརྒྱུད་ཆོ་འབྲང་དང་བཅས་པའི་བཤད་པ་དང་། མ་མོའི་སྦས་པ་མངོན་ཕྱུངས་ཀྱི་བཤད་པ། སྦྱོར་སྒྲོལ་ལམ་དུ་བྱས་ནས་བཤད་ལུགས། དྲག་པོའི་ངན་སྔགས་དང་སྦྱར་ནས་བཤད་པ་སྟེ་བཞི་རེད། དེའི་ནང་གི་མ་མོའི་རིགས་བརྒྱུད་ཆོ་འབྲང་དང་བཅས་པས་བཤད་རྒྱུ་དེ་གང་འདྲ་རེད་སྙམ་ན། མ་མོ་ཐམས་ཅད་འཇིག་རྟེན་གྱི་སྣང་ཚུལ་དང་སྦྱར་ནས་རིགས་བརྒྱུད་ཀྱིས་བཤད་དུས་ཕ་སུ་ཡིན་མ་གང་ཡིན་སྡེ་རིས་དང་ཆོ་འབྲང་གང་ལ་གཏོགས་པ་ཡིན། མིང་དང་གཟུགས་གང་འདྲ་ཡིན། དབང་གང་གི་ཆེ། འདུལ་སྐལ་སུ་ལ་ཡོད་ལ་སོགས་པ་ཕན་གནོད་ཀྱི་ཁུངས་ལུང་ཐམས་ཅད་བཤད་ནས། གནས་སྐབས་ལས་གང་ལ་གང་རྦད་བཞག་ན་དོན་གང་འགྲུབ་རྒྱུ། དེའི་གནད་ངོ་མ་མཐར་ཐུག་དབྱིངས་ཀྱི་མ་མོ་ཡུམ་ཆེན་ཤེར་ཕྱིན་གྱི་དོན་ལ་མཁས་ན། མཆོག་གི་དངོས་གྲུབ་ཐོབ་པ་སྟེ། སྲིད་པ་མ་རྒྱུད་ཀྱི་དཀྱིལ་འཁོར་ཐམས་ཅད་ཀྱི་རྩ་བ་འདི་ལ་ཐུག་པ་རེད། དེ་ནི་འཇིག་རྟེན་སྣང་ཚུལ་དང་སྦྱར་ནས་བཤད་པ་རེད། གཉིས་པ་གབ་སྦས་གཏེར་གྱི་ལུགས་མངོན་དུ་ཕྱུངས་ནས་བཤད་རྒྱུ་ཡོད་པ་རེད། དེ་ནི། དུས་གསུམ་དུས་མེད་དུས་བཞི་མཉམ་པ་ཆེན་པོའི་དུས་ན་དཔལ་ཆེན་མངོན་རྫོགས་རྒྱལ་པོས་སྣང་སྲིད་ཀྱི་མ་མོ་ཐམས་ཅད་ཡུམ་གྱི་མཁའ་དབྱིངས་ལས་དབང་དུ་བསྡུས་ནས། ཡབ་མངོན་རྫོགས་རྒྱལ་པོའི་རྩ་རླུང་གི་དཀྱིལ་འཁོར་ལ་གབ་པའི་གཏེར་དུ་སྦས་པ་དེ། སྦས་པ་མངོན་ཕྱུངས་ཀྱི་སྐབས་སུ་ཡབ་ཡུམ་གཉིས་མེད་ཀྱི་རོལ་པས་སྣང་སྲིད་ཀྱི་མ་མོ་རུ་ཤར་བ་ཡིན་ན། ཆེ་མཆོག་མངོན་རྫོགས་རྒྱལ་པོའི་ཞལ་ནས་ཧཱུྃ་སྒྲ་དང་སྤྱི་གཙུག་རྟ་ཞལ་གྱིས་ཧྲཱི་སྒྲ་རྟ་སྐད་ཐེངས་གསུམ་གྱིས་ཐམས་ཅད་དབང་དུ་བསྡུས་ནས་སྲོག་སྙིང་ཐམས་ཅད་འཕྲོག་སྟེ་མ་མོ་རྦོད་གཏོང་གི་ཕྲིན་ལས་རབ་འབྱམས་འགྲུབ་པར་མཛད་པ་ཡིན། དེའི་བཤད་ལུགས་དེ་ནི་མ་མོ་སྦས་པ་མངོན་ཕྱུངས་ཀྱི་བཤད་ལུགས་ཟེར་རྒྱུ་དེ་རེད། གསུམ་པ་ལྟ་བ་དོན་དང་སྦྱར་ནས་སྦྱོར་སྒྲོལ་ལམ་དུ་བྱས་པའི་བཤད་ལུགས་རེད། འདི་གྲོལ་ལམ་དང་སྦྱར་ནས་བཤད་རྒྱུ་ཡིན་ན་མ་མོའི་ངེས་ཚིག་ལྟར་དུ། མ་ཆོས་ཀྱི་དབྱིངས་ལས་མོ་རིག་པའི་ཡེ་ཤེས་སུ་ཤར། མ་སྐྱེ་མེད་ཀྱི་དབྱིངས་ལས་མོ་འགག་མེད་ཀྱི་རོལ་པར་ཤར་བ་སྟེ་རྣལ་འབྱོར་རང་གི་སྒོ་གསུམ་མ་མོ་རྦོད་གཏོང་གི་དཀྱིལ་འཁོར་དུ་ཤེས་ཤིང་དེའི་ཐོག་ལ་གནས་དུས། སྣང་གྲགས་དྲན་རྟོག་ཐམས་ཅད་མ་མོའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བདག་ཉིད། མི་ཟད་རྒྱན་གྱི་འཁོར་ལོ་ལ་ལོངས་སྤྱོད་རྒྱུ་དེ་རེད། དེ་ནི་མ་མོ་སྦྱོར་སྒྲོལ་ལམ་དུ་བྱས་པའི་བཤད་ལུགས་རེད། བཞི་པ་ནི་བསྟན་སྲུང་ཕྲིན་ལས་དང་སྦྱར་ནས་དྲག་པོ་ངན་སྔགས་གྱི་ལུགས་སུ་བྱས་ཏེ་བཤད་ན། དང་པོ་མ་མོའི་སྤྱི་སྔགས་གཅིག་ཏུ་དྲིལ་ནས་བསྙེན་པ་དང་སྒོས་སྔགས་སོ་སོར་ལ་ཕྱེས་ནས་བསྙེན་པའི་ལས་རིམ་སོང་དུས། མ་མོ་དམག་ལ་དྲངས་ན་དམག་དཔོན་ལས་མཁན་དེ་རེ་མ་ཏི་བསྐོས་ཏེ་དབང་དུ་བསྡུས་ནས་བསད་པ་བཞི་ཡི་ལས་སྦྱོར་རྩོམ་དགོས་པ་རེད། བསད་པ་བཞི་པོ་གང་རེད་ཟེར་ན། མདོས་དང་། ཕུར་བུ་དང་། ཉེ་འབྱེད། ཐུན་དང་བཞིས་བསད་ལུགས་བཞི་རེད། དེ་ཡིན་ན། མདོས་དང་གཏོར་བཟློག་ལ་བརྟེན་ནས་བསད་པ་ཞིག་དང་། དབང་དྲག་ཕུར་བུས་བསད་པ། ཕྲ་མེན་ཉེ་འབྱེད་ཀྱིས་བསད་པ། ནད་མཚོན་གྱི་ཐུན་ཕབས་ནས་བསད་ལུགས་ཞིག་དང་བཞི་ཡོད། དེ་བཞིའི་རྗེས་ལ་མན་ངག་མནན་སྲེག་འཕང་གཏད་བཞི་པོ་རྫོགས་ནས་ལས་ཀྱི་ལྷག་མ་བསྡུ་དགོས་པ་རེད། ད་རུང་ལས་ཀྱི་ཤི་ས་བསྟན་པ་གསུངས་རྒྱུ་ཞིག་དང་ལྟོ་དཀྲུག་གི་རིམ་པ་འབྱུང་བ་རེད། མདོར་ན་མ་མོ་རྩ་རླུང་གི་དགོངས་པ་དེ་ཕྱི་ནང་གསང་བ་གསུམ་དུ་ཕྱེས་ཡོང་དུས། ཕྱི་ལྟར་འཇིག་རྟེན་སྲིད་པའི་ཆགས་ལུགས་དང་བསྟུན་ནས་འཇིག་རྟེན་ཆགས་གནས་ཀྱི་རྩ་བ་དེ་མ་མོའི་ཐོག་མའི་སྐྱེ་རྒྱུད་ནས་ད་ལྟ་གང་ན་གནས། ལས་གང་ལ་དབང་། བསྙེན་སྒྲུབ་ལས་སྦྱོར་བྱེད་སྟངས་ཀྱི་ཚུལ་ཐམས་ཅད་ཤེས་པར་བྱས་ཏེ་ཕྱི་ལྟར་ན་སྲིད་པ་མ་མོའི་སྣང་ཚུལ་ལ་བརྟེན་ནས་སྒྲུབ་རྒྱུ་དང་། ནང་ལྟར་ན་རང་གི་རྩ་རླུང་ལས་སུ་རུང་བའི་རླུང་སེམས་དབང་དུ་འདུས་སྐབས། ནང་རང་གི་རྩ་རླུང་གི་ཆོ་འཕྲུལ་གྱིས་ཕྱིའི་མ་མོ་ཐམས་ཅད་དབང་དུ་འདུས་པར་ཤེས་རྒྱུ། གསང་བ་ལྟར་ན་སྲིད་ཞི་འཁོར་འདས་ཀྱི་ཆོས་ཐམས་ཅད་ཆོས་དབྱིིངས་ཀུན་ཏུ་བཟང་མོའི་ཀློང་ལས་མ་གཡོས་པ་མ་མོའི་ངོ་བོ་ཡིན། དེའི་རྩལ་སྣང་དུ་ཤར་བ་སྣང་ཞིང་སྲིད་པའི་ཆོས་ཐམས་ཅད་རང་སེམས་སྐྱེ་འགག་བྲལ་བའི་ཆོས་ཉིད་དུ་འདུས་པར་ཤེས་ན། མ་མོའི་དོན་རྟོགས་པ་རེད། དེ་སྒྲུབ་ལུགས་ཐམས་ཅད་ཀྱི་མཆོག་ཏུ་གྱུར་པ་ཡིན། དེའི་ཡན་ཆད་ཀྱིས་ཤར་ལྷོའི་མ་མོ་རྦོད་གཏོང་གི་ལྷ་ཚོགས་བཤད་ཟིན། སྤྱིར་ན་གསང་སྔགས་སྔ་འགྱུར་བའི་བསྟན་པ་འཛིན་སྲུང་སྤེལ་གསུམ་ཞིག་བྱེད་དགོས་དུས། སྔ་འགྱུར་བཀའ་བབས་ཀྱི་ཆུ་བོ་ཆེན་པོ་བཞིའི་སྒྲོམ་དེ་ནས། སྨིན་གྲོལ་བསྐྱེད་རྫོགས་ཀྱི་རིམ་པ་བརྒྱུད་ནས་མཐར་འབྲས་མི་ཚེ་འདིར་མངོན་དུ་བྱེད་པ་ལ། རྒྱུད་སྡེ་ཡིས་ཁོག་ཕུབ་སྒྲུབ་སྡེ་ལ་རང་བྱན་ཆུད་པ་ཁྱད་པར་དུ་སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་ཕྱག་བཞེས་ཕྲིན་སྒྲུབ་ཀྱི་ཆུ་བོ། ལས་ཀྱི་ཁ་ཚར་དང་བཅས་པ་ལ་བྱང་ཆུབ་པ་དེ། དཔེར་བཞག་ན་ཀ་ཁ་སུམ་ཅུ་བློ་ནས་འདོན་པ་ལྟ་བུ་དང་། མཚན་མོ་ཉི་ཤུ་དགུའི་སྨག་རུམ་ཡིན་ཡང་ལག་འཛུབ་མོ་ལྔ་པོ་ལ་རྩིས་གྲངས་ཐེབ་པ་ལྟར་དུ། བསྙེན་སྒྲུབ་ཏིང་འཛིན་ལས་སྦྱོར་སོགས་ལ་ཐོགས་པ་མེད་པ་ཞིག་མ་བྱས་ན། སྔ་འགྱུར་རྙིང་མ་པ་ཡིན་ཟེར་ཡང་རྙིང་མའི་སྒོ་བྱང་བཏགས་པ་ཙམ་ཞིག་དང་། རྙིང་མའི་འབག་མགོ་ཞིག་གྱོན་ནས་མིན་ན་ཡིན་མདོག་སྟོན་པའི་གཟུགས་བརྙན་ཙམ་རེད་འགྲོ་བ་རེད། དེས་ན་གསར་བུ་རྣམ་པས་རྒྱུད་དང་སྒྲུབ་ཐབས་འབྲེལ་བའི་ཕྱག་ལེན་དོན་ཐོག་ལ་ཁེལ་བ་གནང་དགོས་པ་གལ་ཆེན་རེད། དེའི་ཡན་གྱིས་སྒྲུབ་པ་བཀའ་བརྒྱད་ཀྱི་ནང་གི་མ་མོ་རྦོད་གཏོང་གི་ལྷ་ཚོགས་ཡན་ཆད་རགས་རིམ་ཞིག་ཞུས་པ་ཡིན། ལྷོ་ནུབ་ཏུ་རིག་འཛིན་རྡོ་རྗེ་ཆོས་རབ་ཡབ་ཡུམ་གསུངས་རྒྱུ་འདི་རིག་འཛིན་སློབ་དཔོན་གྱི་ལྷ་ཚོགས་ལ་གསུངས་པ་རེད། དེ་ཡང་རྒྱུད་ལུང་མན་ངག་མང་པོ་ལས་བསྟན་ཡོད་པའི་རིག་འཛིན་བླ་མའི་སྒྲུབ་ཐབས་ཀྱི་དགོངས་པ་འདི། བསྙེན་སྒྲུབ་ཡན་ལག་བཞིའམ་ཡང་ན་བསྙེན་སྒྲུབ་ལས་གསུམ་གྱི་ཐོག་ནས་བཤད་ན་ཡང་འཐུས། རིག་འཛིན་བླ་མའི་སྒྲུབ་པ་འདི་གནད་ཆེ་ལུགས་ལ་མཚོན་ན། དུས་རྒྱུན་དུ་བཤད་འདུག་པའི་དཔེར་ནམ་མཁའི་ཉི་མ་དང་ས་ཐོག་གི་སྤྲ་བ་སྐམ་པོ་གཉིས་ཀ་འཛོམས་རུང་། རྐྱེན་མེ་ཤེལ་ཞིག་གིས་དེའི་བར་ལ་མཚམས་མ་སྦྱར་ན་མེ་འབྱུང་བའི་ཐབས་མེད་པ་བཞིན། དུས་གསུམ་སངས་རྒྱས་བཞུགས་ཡོད་ཀྱང་སློབ་མའི་རྒྱུད་ལ་བྱིན་རླབས་དང་ཟབ་མོའི་རྟོགས་པ་སྐྱེ་བ་ལ་བླ་མ་མེད་ན་རང་འབྱར་རེད་ཐབས་མེད། དེའི་དབང་གིས་བླ་སྒྲུབ་འདི་ནམ་ཡང་གནད་ཆེ་བ་རེད། དེའི་ནང་ནས་རྩ་བ་གསུམ་གྱི་དཀྱིལ་འཁོར་གང་བསྒྲུབ་ན་བླ་སྒྲུབ་དང་འབྲེལ་རྒྱུ་དེ་ལྷག་པར་གལ་ཆེ། དེ་སྒྲུབ་ལུགས་ལ་དབྱེ་ན་སྤྱི་དང་ཁྱད་པར་གཉིས་ཕྱེས་ནས་བཤད་ཡོང་ན། དང་པོ་སྤྱི་ནི། བསྙེན་སྒྲུབ་ལས་གསུམ་གྱི་སྒྲུབ་ལུགས་ཡིན་ན། ཐོག་མར་མཚན་ཉིད་ཀུན་ལྡན་གྱི་བླ་མ་ཞིག་བསྟེན་ནས་སྒོ་གསུམ་གུས་པས་མཉེས་པར་བྱས། སྨིན་གྲོལ་གྱི་གདམས་པ་ཚུལ་བཞིན་ནོད་རྒྱུ་དེ་བསྙེན་པ་རེད། དེའི་ཐོག་གི་སེམས་ཉིད་ཆོས་སྐུར་ངོ་སྤྲད་པའི་མན་ངག་ཟབ་མོ་ཞིག་ཐོབ་ནས་དགོངས་རྒྱུད་རྟོགས་པར་འཕོ་བའི་བྱིན་རླབས་ཞུགས་རྒྱུ་དེ་སྒྲུབ་པ་རེད། སེམས་ཉིད་གཉུག་མའི་རང་ཞལ་དོན་གྱི་ཡེ་ཤེས་ཇི་བཞིན་རྟོགས་ནས། བསྟན་པ་དང་སེམས་ཅན་ཀྱི་དོན་བྱེད་རྒྱུ་ནི་ལས་སྦྱོར་ཡིན་པས་བསྙེན་སྒྲུབ་ལས་གསུམ་ཟེར། དེ་དག་ནི་སྤྱི་བསྙེན་སྒྲུབ་ལས་གསུམ་གྱི་བཤད་ལུགས་རེད། གཉིས་པ་ཁྱད་པར་བསྙེན་བསྒྲུབ་ཡན་ལག་བཞིའི་སྟེང་ནས་བཤད་ན། རིག་འཛིན་བླ་མའི་སྒྲུབ་ཐབས་གང་རུང་ལ་བརྟེན་ནས་དེའི་དཀྱིལ་འཁོར་བསྒྲུབ་པའི་དབང་དུ་བཏང་ན། དེ་བྱིན་རླབས་གསོལ་འདེབས་ཀྱི་ཚུལ་གྱིས་བྱེད་རྒྱུ་དེ་བསྙེན་པ་དང་ཉེ་བསྙེན། རང་དང་དབྱེར་མེད་ཐུགས་ཡིད་གཅིག་འདྲེས་ཀྱིས་རིག་འཛིན་བླ་མའི་གོ་འཕང་སྒྲུབ་པ་དེ་སྒྲུབ་པ་དང་སྒྲུབ་ཆེན་སྟེ་བསྙེན་སྒྲུབ་ཡན་ལག་བཞི་ཚང་བའི་བཤད་ལུགས་རེད། མདོར་ན་ཚིག་དང་དཔེ་ལས་འདས་པའི་དོན་གྱི་ལྷན་ཅིག་སྐྱེས་པའི་ཡེ་ཤེས་རང་རྒྱུད་ལ་སྐྱེས་ནས་ལྟ་བ་ཆོས་ཉིད་ཀྱི་རྫོང་ཟིན་དགོས་དུས། དོན་རྒྱུད་ཀྱི་བྱིན་རླབས་འཕོ་བ་ཁོ་ན་མ་གཏོགས་ཐབས་གཞན་མེད་པས་བླ་མའི་མན་ངག་གིས་ངོ་འཕྲོད་པར་བྱ་རྒྱུ་ནི་གནད་ཀྱི་ནང་ནས་གནད་ཆེན་རེད། དེའི་ཡན་ཆད་རིག་འཛིན་སློབ་དཔོན་གྱི་ལྷ་ཚོགས་སོང་པ་རེད་ད་ནི་ནུབ་བྱང་དུ་བཅོམ་ལྡན་དྲེགས་པ་ཀུན་འདུལ་གྱི་དཀྱིལ་འཁོར་དེ་རེད། འདི་ལ་འཇིག་རྟེན་མཆོད་བསྟོད་ལྷ་ཚོགས་ཀྱང་གསུངས་པ་རེད། འདི་ལ་སྐུ་གསུང་ཐུགས་ཀྱི་དྲེགས་པའི་རྒྱུད་མང་པོ་བཞུགས་ཡོད་ཀྱང་། འདིའི་སྒྲུབ་ཐབས་ཐམས་ཅད་ཀྱི་དོན་ཚུར་བསྡུས་ཡོང་ན། འཇིག་རྟེན་ཁམས་ཀྱི་དྲེགས་པ་ཡོངས་རྫོགས་རིགས་ཚུར་བསྡུ་ན་ལྷ་མ་སྲིན་སྡེ་བརྒྱད་ཀྱི་ནང་དུ་འདུས། འདུས་པ་དེ་ཡང་བརྟེན་ཐབས་རྣམ་པ་བརྒྱད་ཀྱིས་བརྟེན། སྒྲུབ་ཐབས་རྣམ་པ་བརྒྱད་ཀྱིས་བསྒྲུབ་རྒྱུ་རེད། འཇིག་རྟེན་གྱི་སྣང་སྲིད་ལྷ་མ་སྲིན་ཡོད་ཚད་སྡེ་བརྒྱད་ཀྱི་ནང་ལ་ཇི་ལྟར་འདུས་སྙམ་ན། སྡེ་བརྒྱད་ཟེར་ཡོང་དུས་འདིའི་རྩི་ལུགས་ཀྱང་མི་འདྲ་བ་ཡོད་མོད། གིང་དང་། བཙན། བདུད། གནོད་སྦྱིན། གཟའ། ཀླུ། སྲིན་པོ། མ་མོ་རྣམས་རེད། དཀར་པོ་ཡོད་ཚད་གིང་གི་ནང་དུ་འདུས། དམར་པོ་ཐམས་ཅད་བཙན་དང་ནག་པོ་ཐམས་ཅད་བདུད་སེར་པོ་ཡོད་ཚད་གནོད་སྦྱིན་དུ་འདུས། སྨུག་པོ་ཐམས་ཅད་སྲིན་པོ་དང་དེའི་སྟེང་གཟའ་ཀླུ་མ་མོ་གསུམ་གྱིས་བརྒྱད་རེད། སྟེང་ཕྱོགས་ཀྱི་དབང་ཆེན་ཡོད་ཚད་གཟའ་དང་འོག་ཕྱོགས་ཀྱི་དབང་ཆེན་ཡོད་ཚད་ཀླུ། མོ་རྒྱུད་ཡོད་ཚད་མ་མོར་བསྡུས་ན། སྣང་སྲིད་ཀྱི་ལྷ་མ་སྲིན་ཐམས་ཅད་སྡེ་བརྒྱད་ཀྱི་ནང་དུ་དེ་ལྟར་འདུས་པ་རེད། དེའི་སྡེ་བརྒྱད་པོ་དེ་འཇིག་རྟེན་མཆོད་བསྟོད་ཀྱི་དཀྱིལ་འཁོར་ནས་མཆོད་བསྟོད་བྱ་ཡུལ་རེད། དེ་ཡིན་ན་གོང་དུ་བཤད་པ་ལྟར་དུ་བརྟེན་ལུགས་བརྒྱད་ཀྱིས་བརྟེན་དགོས། སྒྲུབ་ལུགས་བརྒྱད་ཀྱིས་བསྒྲུབ་དགོས་གསུངས་པ་བཞིན། བརྟེན་ལུགས་བརྒྱད་ཀྱིས་ཇི་ལྟར་བརྟེན་དགོས་སྙམ་ན། དང་པོ་གིང་བྱུང་བ་རེད། གིང་ཐམས་ཅད་ཀྱི་བརྟེན་ལུགས་དེ་རྒྱལ་པོ་ལྟ་བུ་བརྟེན་དགོས་རེད་ལ། བདུད་བཙན་གནོད་སྦྱིན་གསུམ་གྱི་ནང་ནས་བདུད་ཐམས་ཅད་ཕ་ལྟར་དུ་བརྟེན་གསུངས་བ་དང་། བཙན་ཐམས་ཅད་གྲོགས་ལྟར་དུ་བརྟེན་པ་རེད། གནོད་སྦྱིན་ཐམས་ཅད་ལྷ་ལྟར་དུ་བརྟེན། དེའི་འཕྲོར་སྲིན་པོ་གཟའ་ཀླུ་གསུམ་ལས་སྲིན་པོ་ཐམས་ཅད་ཁོལ་བོ་ལྟར་བརྟེན། གཟའ་ཐམས་ཅད་རྗེ་བོའི་ཚུལ་དུ་བརྟེན། ཀླུ་ཐམས་ཅད་བྲན་གཡོག་གི་ཚུལ་གྱིས་བརྟེན། མ་མོ་མ་ལྟར་བརྟེན་དགོས་པ་རེད། ད་ནི་སྒྲུབ་ལུགས་བརྒྱད་རེད། དང་པོ་གིང་ཆིངས་ཀྱིས་བཅིངས་ནས་སྒྲུབ་གསུངས་པ་རེད། བདུད་བཙན་ཀླུ་གསུམ་གྱི་བདུད་བཀུག་ནས་སྒྲུབ་དགོས། བཙན་སེ་ལོང་གིས་སྒྲུབ་དགོས། གནོད་སྦྱིན་ཆུན་གྱིས་གཅུན་ནས་ཆུམ་པར་བྱས་ཏེ་སྒྲུབ་དགོས། སྲིན་པོ་གཟའ་ཀླུ་གསུམ་གྱི་སྲིན་པོ་ཨར་གཏད་ཀྱིས་སྒྲུབ་དགོས། གཟའ་རྒོད་ལྟོ་དཀྲུག་གིས་སྒྲུབ་དགོས། ཀླུ་ལོག་ནོན་གྱིས་སྒྲུབ་དགོས། མ་མོ་དབང་སྡུད་ཀྱིས་སྒྲུབ་དགོས་པ་རེད། དེ་ལྟར་བརྟེན་ལུགས་བརྒྱད་དང་སྒྲུབ་ལུགས་བརྒྱད་དེ་བཞིན་དུ་མཆོད་ལུགས་བརྒྱད་ཡོད་གསུངས་པ་རེད། མཆོད་ལུགས་རྣམ་པ་བརྒྱད་ཀྱིས་མཆོད་ནས་མཆོད་བརྟེན་སྒྲུབ་རྣམ་པ་གསུམ་པོ་དེ་ཚུལ་དང་མཐུན་པ་ཞིག་བྱས་ཏེ་སྡེ་བརྒྱད་གང་ཡིན་ཡང་། གོང་གནོན་གཉེན་པོའི་ལྷ་དང་སྔགས་གལ་ཆེ། དེའི་ལྷ་དང་སྔགས་ཀྱིས་གཟིར་ནས་སྡེ་བརྒྱད་དབང་དུ་སྡུ་དགོས་པ་རེད། མདོར་ན་སྒྲུབ་ཐབས་ཐམས་ཅད་ཀྱི་ནང་ནས་མཆོག་ཏུ་གྱུར་པ་གང་ཡིན་ཟེར་ན། ལྷ་སྲིན་རང་སེམས་སུ་ཤེས་པའི་ལྟ་བས་ཟིན་རྒྱུ་དེ་ཧ་ཅང་གལ་ཆེ། དེའི་ཡན་ཆད་ཀྱིས་འཇིག་རྟེན་མཆོད་བསྟོད་ཀྱི་ལྷ་ཚོགས་སོང་ནས། ད་ནི་བྱང་ཤར་དུ་དཔལ་ཆེན་སྟོབས་ལྡན་ནག་པོ་གསུངས་པ་དེ་རེད། འདི་འུ་ཚོས་བཤད་ན་དམོད་པ་དྲག་སྔགས་གྱི་ལྷ་ཚོགས་རེད། འདིའི་རྒྱུད་ལ་མཚོན་ན་སྐུ་གསུང་ཐུགས་གསུམ་དུ་ཕྱེས་པའི་དྲག་སྔགས་ཀྱི་རྒྱུད་སྡེ་མང་པོ་ཡོད། འདིའི་སྒྲུབ་ཐབས་ཀྱི་དགོངས་པ་དེ་རྫོང་འཕྲང་སྲོག་གསུམ་ལ་བསྡུས་ན་ཆོག་ཀྱང་གཙོ་བོའི་ཆ་ནས་འབོད་རྦད་བསད་གསུམ་དུ་བསྡུ་དགོས་རེད། དེ་ནི། དྲག་སྔགས་བསྐྱངས་བའི་ནུས་པས་དམོད་པ་སྲོག་དམར་དོང་འབྱིན་གཙོ་བོར་བརྗོད་པའི་སྐབས་རེད། དེ་ཡང་སྔགས་ཀྱི་སྤུ་གྲིའི་མན་ངག་གི་ལུགས་ལྟར་ན་དམོད་དང་དྲག་དང་སྔགས་ཟེར་རྒྱུའི་དོན་གསུམ་གྱི་ནང་དུ་འདུས། དམོད་པ་ཐམས་ཅད་ལྷ་སྲིན་སྡེ་བརྒྱད་ཀྱི་རང་སྐད་དུ་གང་འདྲ་ཡིན་ན་དེར་བསྡུས་ནས་བཤད་པ་དང་། དྲེགས་པ་ཐམས་ཅད་རྣོ་མྱུར་ཆེ་ལུགས་ཀྱིས་རྣོ་བའི་དཔེ་བརྒྱད་དུ་བསྡུས་ནས་བཤད། སྔགས་ཐམས་ཅད་མཚོན་ཆ་བརྒྱད་དང་སྒྲུབ་པ་མན་ངག་བརྒྱད་དུ་བསྡུས་ཏེ་བཤད་རྒྱུ་རེད། དམོད་པ་སྡེ་བརྒྱད་ཀྱི་རང་སྐད་ལ་ཇི་ལྟར་བཤད་དགོས་སྙམ་ན། འཆི་བདག་གཤིན་རྗེའི་དམོད་པ་ནི། ཡ་ང་འཇིགས་སྐྲག་ཅན་ཤུགས་རིང་སྨྲེ་སྔགས་འོ་དོད་ཀྱི་དམོད་པ་ཅན་ཞིག་ཡིན། ནད་བདག་མ་མོའི་དམོད་པ་ནི་སྙིང་ལ་ཚེར་མ་ཟུག་པ་འདྲ་འདྲའི་ཉམ་ཐག་མ་ཡི་ངུ་འབོད་ཀྱི་དམོད་པ། ཆེ་དྲེགས་ལྷ་ཡི་དམོད་པ་དེ་ཐོག་དམར་མགོ་ལ་བབ་པ་བཞིན་དཀའ་ཆད་དྲག་རྩལ་ཅན་དེ་འདྲ་རེད། སྡུག་རྩུབ་གནོད་སྦྱིན་གྱི་དམོད་པ་དེ་བསམ་ལོང་དྲན་ལོང་མི་སྟེར་པའི་གནོད་སྦྱིན་དྲག་པོ་ལྕེ་མདུང་གི་དམོད་པ་གསུངས་བ་རེད། མྱུར་མགྱོགས་སྲིན་པོའི་དམོད་པ་སྲིན་པོ་དུང་བ་རོ་ལེན་གྱི་དམོད་པ་དང་། ཁྱབ་འཇུག་གཟའ་ཡི་དམོད་པ་འབྲུག་སྒྲ་གློག་འབྱིན་པ་ལྟ་བུ་དང་། གླེན་པ་ཀླུ་ཡི་དམོད་པ་སྦྲུལ་ངན་དུག་ལྕེའི་དམོད་པ་དང་། ཁྲམ་བདག་བདུད་ཀྱི་དམོད་པ་མུན་གླིང་སུམ་ཁུགས་ཀྱི་དམོད་པ་སྟེ། དེ་ལྟར་བརྒྱད་དང་དེའི་ཐོག་ལ་རྣོ་བའི་དཔེ་བརྒྱད་ཡིན་ན། འཆི་བདག་གཤིན་རྗེའི་ཁྲམ་ཤིང་དེ་རི་དྭགས་རྙི་ཡིས་བཟུང་བ་ལྟ་བུའི་ཐར་བ་མེད་པ་ཞིག ནད་བདག་མ་མོའི་ནད་རྐྱལ་དེ་ནད་དྭངས་མེད་ཁོག་ལ་ཞུགས་པ་བཞིན་དུ་སོས་པའི་རེ་བ་མེད་པ་ཞིག སྣང་སྲིད་ལྷ་སྲིན་གྱི་དལ་ཡམས་དེ་མཚོན་རྣོན་པོ་ཁོག་ལ་ཤོར་བ་འདྲ་འདྲའི་གསོན་པོར་འཚོ་ཐབས་མེད་པ་ལ་སོགས་པའི་འདི་དག་གི་བཤད་པ་རེ་རེ་བཞིན་དུ་རྒྱུད་དང་སྒྲུབ་ཐབས་བསྟན་བཅོས་དག་གི་གཞུང་ན་གསལ་བ་རེད། གསུམ་པ་སྔགས་ཐམས་ཅད་མཚོན་ཆ་བརྒྱད་ལ་བསྡུས་པའི་མཚོན་ཆ་བརྒྱད་པོ་གང་ཡིན་སྙམ་ན། འཆི་བདག་གཤིན་རྗེའི་དྲག་སྔགས་དེ་མཚོན་ཆའི་འཁོར་ལོ་སྐོར་བ་འདྲ་འདྲའི་འཁོར་ཞིང་འཁོར་ལ་གཅོད། སྲིད་པ་མ་མོའི་དྲག་སྔགས་དེ་གྱད་རྩལ་ཆེན་གྱིས་མདའ་མོ་འཕངས་བ་འདྲ་འདྲའི་གར་གཏད་ས་ལ་རྒྱག ཆེ་བཙན་ལྷ་སྲིན་གྱི་དྲག་སྔགས་དེ་རྣོན་པོའི་དུག་མདུང་གཡུགས་པ་འདྲ་འདྲའི་སོ་ཁ་གར་གཏད་དུ་འབིགས། ཁྱབ་འཇུག་གཟའ་ཡི་དྲག་སྔགས་དེ་སྟོབས་ཆེན་གྱི་མགྱོགས་རྡོ་འདྲ་འདྲའི་དྲག་ལ་མྱུར། གླེན་པ་ཀླུ་ཡི་དྲག་སྔགས་དེ་ས་འོག་གི་རལ་གྲི་ལྟར་མ་གོ་མ་ཚོར་ས་ནས་གཅོད་པར་བྱེད་རྒྱུ་ལ་སོགས་པ་དང་། གཞན་ཡང་སྒྲུབ་ལུགས་བརྒྱད་ཀྱི་མན་ངག་ལ་མཚོན་ན། འཆི་བདག་གཤིན་རྗེའི་སྒྲུབ་ལུགས་ཀྱི་མན་ངག་དེ་ཕོ་སྐྱེས་དར་མའི་སྙིང་ཤུན་ལ་བརྟེན་ནས་སྒྲུབ་དགོས་གསུངས་པ་དང་། འདོད་ཁམས་མ་མོའི་དྲག་སྔགས་དེ་གྲི་ཤི་མོ་ཡི་སྙིང་ཤུན་ལ་བརྟེན་ནས་སྒྲུབ་དགོས་གསུངས་རྒྱུ། གདུག་རྩུབ་གནོད་སྦྱིན་གྱི་དྲག་སྔགས་དེ་ར་ཁམས་པ་དར་མའི་སྙིང་ཤུན་ལ་བརྟེན་ནས་སྒྲུབ་དགོས་གསུངས་རྒྱུ་སོགས། དེ་ལྟ་བུའི་སྒྲུབ་ལུགས་མང་པོས་བསྟན་ཡོད་པ་ཡིན་ན། དེ་ཚོ་དགྲ་བོའི་རང་གཤེད་རང་ལ་བབས་རང་སྲོག་རང་གིས་གཅོད་པའི་མན་ངག་རྐྱང་རྐྱང་ཡིན། དོན་ཚུར་བསྡུས་ཡོང་ན། སྡེ་བརྒྱད་ཀྱི་རང་སྐད་བརྒྱད་དེ་དྲག་སྔགས་ཀྱི་ངོ་བོ་རེད། རྣོ་བའི་དཔེ་བརྒྱད་དེ་སྔགས་ཀྱི་མཐུ་དང་། སྔགས་ཀྱི་མཚོན་ཆ་བརྒྱད་དེ་སྔགས་བདག་གི་མཐུ་རེད། སྒྲུབ་ལུགས་མན་ངག་བརྒྱད་པོ་དེ་གནད་ཀྱི་སྙིང་བསྡུས་རེད། མདོར་ན་དྲག་སྔགས་ལག་ལེན་གྱི་སྐབས་སུ། གོང་གནོན་གཉེན་པོ་སྟོབས་ཀྱི་ལྷ་ཡི་བསྙེན་སྒྲུབ་ཚད་ལྡན་ཞིག་ཡོད་བཅུག་རྒྱུ་དེ་གནད་དེ་བས་ཆེ་མེད་པ་རེད། དེའི་སྟེང་ནས་འཁོར་འདས་གཉིས་ཀྱི་སྟོང་སྲོག་འཕྲོག་ནས་ལྟ་བའི་གདེང་ཡོད་པ་ཞིག་གི་སྒོ་ནས། སྡེ་བརྒྱད་གང་། ལས་ཅི་ཞིག་གི་དོན་ལ་རྦད་དགོས་ན། ཐོག་མར་འབོད་དགོས། བར་དུ་རྦད་དགོས། མཐར་ལས་ལ་དངོས་སུ་སྦྱར་ནས་ལས་བསྒྲུབ་རྒྱུ་སྟེ་འབོད་རྦད་བསད་གསུམ་དེ་ལྟར་གོ་རིམ་བཞིན་དུ་ཚང་དགོས་པ་རེད། དེ་དག་གཅིག་ལ་ཡང་མི་ལྟོས་པའི་གློ་བུར་ཅོག་བརྡུང་ནག་པོ་ཟེར་རྒྱུ་བོ། རལ་གྲི་འཕྱར་བ་དང་གཡུགས་པ་དུས་གཅིག་གིས་དྲག་སྔགས་ལས་ལ་སྦྱར་ཚུལ་གྱི་མན་ངག་ཡང་ཡོད་རྒྱུ། འདི་ཚོ་སྐབས་སུ་བབས་དུས་སོ་སོའི་རྒྱུད་དང་མན་ངག་གི་གཞུང་བེ་བུམ་ལ་བལྟས་ནས་ཉམས་མྱོང་ལག་ལེན་གྱི་རྒྱུན་ལ་བརྟེན་རྒྱུ་དེ་གལ་ཆེན་རེད། ཉིན་ལྔ་པའི་དབང་དོན་ཟབ་ཁྲིད།དེ་ནི། གཤིན་རྗེ་འཆི་བདག་ཟིལ་གནོན། རྟ་མགྲིན་ཁམས་གསུམ་རོལ་བ་སོགས་ཀྱི་སྨིན་དབང་ཡིན། རྡོ་རྗེ་སློབ་དཔོན་སངས་རྒྱས་དཔལ་སོགས་དང་རྗེས་ཟློས་འགའ་སོང་བའི་ཟུར་འཕྲོས། འདིའི་དྲག་པོ་དུར་ཁྲོད་སྒྲོལ་བའི་ཞིང་དང་། ཁྲོ་མཁར་གཞལ་ཡས་ཁང་རྟེན་དང་བརྟེན་པར་བཅས་པའི་དག་སྦྱོར། སྤྱིར་བཏང་གི་དཔལ་ཆེན་རྩ་བའི་དཀྱིལ་འཁོར་དང་འདྲ་བ་ལས། གཤིན་རྗེ་འཆི་བདག་ཟིལ་གནོན་འདི་སྒྲུབ་པ་བཀའ་བརྒྱད་ཀྱི་ནང་ནས་འཇམ་དཔལ་སྐུ་ཡི་སྒྲུབ་པ་རེད། གཤིན་རྗེའི་དཀྱིལ་འཁོར་ཡང་གདུལ་བྱ་འདུལ་བའི་དགོས་དབང་གིས། འདུལ་ཐབས་སྣ་ཚོགས་ཀྱིས་དཀྱིལ་འཁོར་ཡང་སྣ་ཚོགས་སུ་སྣང་བ་དང་། ཐམས་ཅད་འཇམ་དཔལ་ཡེ་ཤེས་སེམས་དཔའ་གཅིག་གི་ཡེ་ཤེས་སྒྱུ་མའི་རྣམ་རོལ། གཞི་ལམ་འབྲས་བུའི་ཡོན་ཏན་མ་ལུས་པ་ལྷུན་གྱིས་གྲུབ་ཅིང་རྫོགས་པའི་བདག་ཉིད་ཆེན་པོ་ཞིག་ཡིན། དེ་ལྟར་ཡིན་པ་གང་ཞིག་གོང་དུ་སྨོས་མ་ཐག་པ་ལྟར་དུ་གདུལ་བྱ་འདུལ་བའི་དགོས་དབང་གིས། དཀྱིལ་འཁོར་དང་ལྷ་ཚོགས་ཀྱི་རྣམ་པ་དང་སྤྲོ་བསྡུ་ཚད་ཀྱིས་གཞལ་དུ་མེད་པ། སེམས་ཅན་གྱི་རྟོག་ཚོགས་མཐའ་ཡས་པ་བཞིན་དུ། རྒྱལ་བའི་ཐུགས་རྗེའི་རྣམ་པར་བཀོད་པའི་ཡེ་ཤེས་སྒྱུ་མའི་རྣམ་རོལ། སྐྱེ་བ་མེད་པའི་དབྱིངས་ལས་སྐྱེ་བའི་ཆོ་འཕྲུལ་སྣང་བའི་མཐའ་ཡང་ཚད་ཡོད་པ་མ་ཡིན། འདི་ནས་སྒྱུ་མའི་རྣམ་རོལ་ཞེས་པའི་སྐབས་སུ། དཔེ་དང་སྦྲེལ་ནས་དཔེའི་གཟུགས་ཀྱིས་དོན་བསྟན་པའི་ཚིག་ཡིན་པས། སྒྱུ་མ་དཔེ་རུ་བཀོད་པའི་དཔེ་ཅན་དེ་ཅི་འདྲ་ཞིག་རེད་ཟེར་ན། འདི་ལ་ཀུན་རྫོབ་སྒྱུ་མ། ལྷར་སྣང་སྒྱུ་མ། ལྷུན་གྲུབ་སྒྱུ་མ་གསུམ་གྱི་རྣམ་དབྱེ་དང་གོ་དོན་ཡོད། ཀུན་རྫོབ་སྒྱུ་མ་སྣང་བའི་སྣང་གཞི། གདོད་མ་ཉིད་ནས་ཡེ་དག་འཕོ་འགྱུར་དང་བྲལ་བ་ལ། ལྷར་སྣང་སྒྱུ་མ་བསྐྱེད་རིམ་གསལ་བརྟན་དག་གསུམ་གྱི་ལམ་ལ་བརྟེན་ཏེ། ལྷུན་གྲུབ་སྒྱུ་མ་དེ་རྫོགས་རིམ་གཉུག་མའི་ཡེ་ཤེས་སྟོང་གསལ་འགག་པ་མེད་པ། གཞི་འབྲས་དབྱེར་མེད་ཀྱི་ས་ལ་སྦྱོར་རྒྱུའི་གཞི་ལམ་འབྲས་གསུམ་གསང་གསུམ་རྡོ་རྗེ་གསུམ་དང་འབྲལ་མེད་ཀྱི་སྐུ་གསུམ་འདུས་པའི་གོ་དོན་ཅན་ཞིག་རེད། སྐབས་དོན་འདིའི་མཐོང་བ་བསྟན་པའི་དག་སྦྱོར་གྱི་གཤིན་རྗེ་འཆི་བདག་ཟིལ་གནོན་གྱི་དཀྱིལ་འཁོར་འདིའི་སྒོས་ཆོས་འཆི་བདག་གཤིན་རྗེའི་ལྷ་ཚོགས་བསྟན་པ་རེད། གཙོ་བོའི་ཐུགས་ཀ་གཤིན་རྗེ་ཡ་མ་ར་ཛ་དང་དེའི་ཐུགས་ཀར་ཕྱག་རྡོར་གསུངས་པ་འདི། སེམས་དཔའ་སུམ་བརྩེགས་ཀྱི་ཚུལ་ཅན་བྱས། ཡང་དེའི་ཐུགས་ཀ་རུ་རུས་སྦལ་རྔམ་པ་མི་ཟད་སོགས་རྒྱན་གྱི་ལྷ་བརྒྱད་གསལ་འདེབས་རྒྱུ་དེ་འདྲ་མ་རེད། དེ་མིན་པའི་ཐོག་ལ་སེམས་དཔའ་བཞི་བརྩེགས་ལྔ་བརྩེགས་སོགས་དེ་བས་ཀྱང་མིན་པར་བཤད་མ་དགོས་པ་རེད། དེའི་རྒྱན་བརྒྱད་དེ་ཁྲོ་བཅུའི་གོ་ཆ་དང་བཅས་པ། གཙོ་བོའི་སྤྱི་བོ་དང་ཕྲག་གོང་སོགས་ལ་གསལ་ནས་མཐའ་སྐོར་ལ་རྩ་བའི་ལྷ་གཞན་སྒོམ་ཡོང་དུས། སྤྱིར་ན་གཤིན་རྗེ་འཆི་བདག་ཟིལ་གནོན་གྱི་དཀྱིལ་འཁོར་ཕོ་བྲང་དབུས་མ་དེ་དཀྱིལ་འཁོར་གྲུ་གསུམ་རེད། ཡིན་ན་ཡང་དེའི་ཕྱི་ཡི་ཕྱོགས་བཞིའི་ལྷག་པའི་བདེ་ཆེན་གྱི་ཡེ་ཤེས་བཞི་མཚོན་པའི་ཐོད་མཁར་བཞིའམ་ཐོད་མཁར་གྱི་གློ་འབུར་བཞི་ལ་ཤར་དུ་ཡ་མ་ར་ཛ། ལྷོར་ཡ་ཝ་ཏི་ལ་སོགས་པ་གོང་ནས་གསུངས་པ་ལྟར་དུ། འདིའི་གསུངས་ལུགས་ལ་ཆ་མཚོན་ན། ཤར་དེ་དཀྱིལ་འཁོར་གྱི་མདུན་ངོས་བྱས་ནས་གོང་གི་གཙོ་བོའི་ཐུགས་ཀ་ཡ་མ་ར་ཛ། དེའི་ཐུགས་ཀར་དྲེགས་པ་ཕྱག་རྡོར། དེའི་ཐུགས་ཀར་རུ་སྦལ་གསུངས་རྒྱུ་དེ། ལ་ལས་ཐུགས་ཀའི་ཐད་ཀྱི་ཁྱམས་ལྟ་བུ་མ་གོ་ནས་དེ་ལྟར་འགྲེལ་སྲིད་མོད། འོན་ཀྱང་འདི་ནས་ཡེ་ཤེས་ལྔའི་རང་བཞིན་རྩ་བའི་ལྷ་ལྔ་གསལ་ཡོང་དུས། ལྔ་པོ་ཚང་རྒྱུ་ལ་ཐོད་མཁར་གྱི་གློ་འབུར་བཞིའི་ཤར་ཡ་མ་ར་ཛ། ལྷོའི་ཡ་ཝ་ཏི། ནུབ་ཀྱི་ཨ་ཝ་གླང་མགོ། བྱང་གི་རལ་པ་ཚར་དགུ་སྟེ་བཞི་མ་གཏོགས་མེད། དེ་མེད་ན་དབུས་ཀྱི་ཆེ་མཆོག་ཧེ་རུ་ཀ་ཟིལ་གནོན་ཕྱག་རྒྱ་ཆེན་པོ་ཡབ་ཡུམ་གཉིས་སུ་མེད་པ། དེའི་ཐུགས་ཀའི་དྲེགས་པ་འཇོམས་བྱེད་རུས་སྦལ་ལ་སོགས་རྒྱན་བརྒྱད་ཀྱིས་བརྒྱན་པའི་གཙོ་བོ་དང་། གོང་གི་རྩ་བའི་ལྷ་ལྔ་རྩིས་ཡོང་ན་ཐམས་ཅད་ཚང་ཡོད་པ་རེད། དེ་ལྟར་ན་གཙོ་བོའི་ཐུགས་ཀ་ཡེ་ཤེས་སེམས་དཔའ་ཡ་མ། དེའི་ཐུགས་ཀར་ཐུགས་སྲོག་ཏིང་འཛིན་སེམས་དཔའ་ཉི་སྟེང་ཧཱུྃ་ཡིག་གིས་མཚོན་པའི་སྔགས་ཕྲེང་འཁོར་རྒྱུ་དང་བཟླས་དམིགས་བྱ་རྒྱུ་དེ་ལྟར་ཡིན་དགོས་ཀྱང་། སྤྱིར་བཏང་སེམས་དཔའ་སུམ་བརྩེགས་ཀྱང་དངོས་པོ་གཅིག་ནང་གཅིག་བཙུད་ཕྱི་ནང་གསུམ་ལྟ་བུ་ཞིག་ཡིན་མི་དགོས། དམ་ཚིག་སེམས་དཔའ་ཟེར་རྒྱུ་དེ་རགས་པ་གནས་སྐབས་པའི་ལུགས་དང་ཆོས་མཐུན་པ་ལས། འདིའི་ངེས་ཚིག་གི་ཐོག་ནས་བཤད་ན་རང་གི་སྒོ་གསུམ་ལྷའི་སྐུ་གསུང་ཐུགས་སུ་བསྐྱེད་ཅིང་དེ་ལས་མི་འདའ་པས་དམ་ཚིག་དང་། ལྷ་གསལ་གྱི་དག་དྲན་མ་གཏོགས་ཐ་མལ་གྱི་ལོག་ལྟ་མེད་པས་སེམས་དཔའ་ཟེར། ཡེ་ཤེས་སེམས་དཔའ་དེ་ཕྲ་བ་གཉུག་མའི་ལུས་ཤིན་ཏུ་ཕྲ་བའི་རླུང་སེམས་ངོ་བོ་དབྱེར་མེད་ལ་གནས་པ་བླ་མེད་ཐུན་མོང་གི་ཆོས་སྐད་བྱས་ན་རླུང་འོད་ཟེར་ལྔ་བ་དང་ཆོས་མཐུན་པ་ཞིག་དང་། ཏིང་འཛིན་སེམས་དཔའ་ནི་དེ་ལས་ཀྱང་ཤིན་ཏུ་ཕྲ་བ་སེམས་དང་ཆོས་མཐུན་པའི་བདག་ཉིད་ཅན་ཞིག་ཡིན་པས། འདི་ལྟར་བཤད་སྐབས་བརྡ་སྤྲོད་པའི་ཐ་སྙད་ཕྲ་བ་ཟེར་རྒྱུ་འདི་ཡང་། རྡུལ་དང་སྐད་ཅིག་མས་གཞལ་རྒྱུའི་ཕྲ་བ་མ་ཡིན་པར། ཕྲ་རགས་ཟབ་ཁྱད་ཀྱིས་ཕྱེས་པ་ཞིག་རེད། ཡ་མ་ར་ཛ་གཅིག་གཙོ་བོའི་ཐུགས་ཀར་དང་གཅིག་ཐོད་མཁར་ཤར་མའི་དབུས་ལ་ཡོད་རྒྱུ་ལ་འགལ་བར་ལྟ་མི་དགོས། ང་ཚོའི་ཞི་ཁྲོའི་དཀྱིལ་འཁོར་གྱི་སྐབས་ནས་གཙོ་བོའི་ལྷར་གནས་ཀྱི་ཀུན་བཟང་དང་ཁྱམས་ཀྱི་ཀུན་བཟང་མ་ཟློས་པ་བཞིན་རེད། དཀྱིལ་འཁོར་དབུས་ཀྱི་ཐོད་མཁར་ཕྱི་ནང་ལ། རྩ་བའི་ལྷ་ལྔ་རྒྱན་དང་བཅས་པ་དེ་ལྟར་བྱས་ཏེ་གསལ་བའི་མཐའ་སྐོར་གྲུ་ཆད་དང་། འོབ་ཆེན་རྣམས་ལ་གཤེད་ཆེན་གཙོ་འཁོར་བཅུ་དྲུག ཟླ་གཤེད་འཆི་བདག་བཅུ་གཉིས། ཞག་གཤེད་སུམ་ཅུ་སོ་གཉིས། དེའི་ཐོག་ལ་ཕོ་གཤེད་མོ་གཤེད་སྒོ་བ་དང་བཅས་པ་བསྐྱེད་དགོས་པ་རེད། འདིའི་སྒོ་བ་ཡང་ལས་བྱང་གི་ནང་ལྟར་དུ། ཤར་སྒོ་དཀར་པོ་སྙིང་འབྱིན་དང་། ལྷོ་སྒོར་མགོན་པོ་ནག་པོ། ནུབ་སྒོ་བདུད་རེད། བྱང་སྒོར་གནོད་སྦྱིན་ཁྲབ་ཅན་དག་རེད། མདོར་ན་གཙོ་བོ་གཅིག་གི་ཆོ་འཕྲུལ་ལས་གཙོ་འཁོར་སྤྲུལ་པ་ཡང་སྤྲུལ་ཕོ་ཉ་ལས་མཁན་དང་བཅས་པ་ཤར་ནས། ཁམས་གསུམ་སྐྱེ་འགྲོའི་སྲོག་གི་བདག་པོ་འཇིགས་བྱེད་གཤིན་རྗེ་རོལ་པའི་ཆོ་འཕྲུལ་ལ་བརྟེན་ཅིང་། དོན་སྲིད་གསུམ་རྔམ་ཟས་སུ་ཟ་བའི་དུས་ཀྱི་དགྲ་ཆེན་སྲིད་དང་ཞི་བ་དབྱིངས་གཅིག་ཏུ་གསལ་བའི་དུས་དགྲའི་དབང་པོ་རེད། འདི་རྣལ་འབྱོར་རང་ལུས་རྡོ་རྗེ་ཕུང་པོའི་གྲོང་ཁྱེར་གྱི་རྩ་རླུང་ཐིག་ལེའི་རང་བཞིན་ལ་ཚང་བ། རང་རང་གི་བློ་ཁྱད་དང་བསྟུན་ནས། ཕྱི་རྡུལ་ཚོན་དང་རས་བྲིས་ཀྱི་དཀྱིལ་འཁོར་ལ་བརྟེན་ནས་བསྐྱེད་པ་མ་ཧཱ་ཡོ་ག་ལྟར་དུ་དང་། ནང་རང་གི་ཕུང་པོའི་དལ་ལ་བརྟེན་ཏེ་རྫོགས་པ་ཨ་ནུ་ཡོ་ག་ལྟར། གསང་བ་རིག་པ་སེམས་ཀྱི་དལ་ལ་བརྟེན་ནས་རྫོགས་ཆེན་ཨ་ཏི་ཡོ་ག་ལྟར་རམ་ཡང་ན་ཐམས་ཅད་གཅིག་ལ་ཚང་བའི་དེ་ཁོ་ན་ཉིད་ཀྱི་ལམ་རིམ་ལ་བརྟེན་ཏེ་སྒྲུབ་པ་ཕྲིན་ལས་དང་བཅས་པ་ཡོངས་སུ་རྫོགས་པའི་ཚུལ་ཅན་གང་དང་འབྲེལ་དགོས་རང་གི་བློ་དང་སྦྱར་རྒྱུ་རེད། འཇམ་དཔལ་གཤིན་རྗེ་གཤེད་སྐོར་འདིའི་རྩ་བའི་རྒྱུད་དེ་གང་ཡིན་ན་འཇམ་དཔལ་གསང་རྒྱུད་དང་མེ་ལྕེའི་ཕྲེང་རྒྱུད་ལ་སོགས་པ་རེད། དེ་ཚོ་ལ་ཕུགས་གཏུགས་ནས་ཐུན་མིན་གཞི་ལམ་འབྲས་བུ་ལྟ་སྒོམ་སྤྱོད་པ་དབང་དང་དམ་ཚིག་སྒྲུབ་པ་ཕྲིན་ལས་སྔགས་དང་ཕྱག་རྒྱ་ལ་སོགས་པའི་གོ་དོན་བརྡར་ཤ་ཞིབ་ཀྱིས་བཅད་ནས། དབང་བསྐུར་ཐབས་འདི་གནད་ལ་སྨིན་པ་ཞིག་བྱེད་དགོས། འདྲ་ལ་མ་ཡིན་སྣང་ལ་མ་ངེས་པའི་ཆོས་འཆད་ཉན་དོན་བྱེད་ནུས་སྟོང་གི་གཟུགས་བརྙན་རེད། དེ་བཞིན་དབང་བསྐུར་བའི་ཐབས་དེ་ཡང་ཡ་ལེ་ཡོ་ལེ་རེད་སོང་ན་དེ་ལས་ཀྱང་གཟུགས་བརྙན་ནང་གི་ཡང་བརྙན། ཕ་མགོ་བུས་གཡོག་བུ་མགོ་དགྲས་གཡོག་རེད་མི་འགྲོ་ཐབས་མེད་ཡིན་པས། གསང་བ་ཟབ་མོར་རིས་ཆད་གཟུ་ལུམས་དང་ཆོས་ལ་དབང་ཟའི་ཉེས་ལྟུང་རིན་གྱིས་ཉོ་དགོས་དོན་མི་འདུག དེ་བས་ཁ་རོག་བསྡད་ན་ཁེ་མེད་ཀྱང་ཉེན་ཡང་མེད་པ་རེད། དེའི་དབང་གིས་དཔྱད་པ་ཞིབ་མོར་བྱས་ཏེ་ངེས་ཤེས་བརྟན་པོར་སྐྱེ་དགོས། དཔྱད་པ་བཟང་པོས་མ་དྲངས་ན། །ངེས་ཤེས་བཟང་པོ་ག་ལ་སྐྱེ། །ངེས་ཤེས་བཟང་པོ་མ་སྐྱེས་ན། །སྒྲོ་འདོགས་ངན་པ་ག་ལ་ནུབ། །གསུངས་པ་ལྟར། ངེས་ཤེས་བཟང་པོ་སྐྱེས་པའི་མཐར་ཐུག་ལ་སྒྲོ་འདོགས་ངན་པ་ནུབ་པའི་དོན་འབྲས། འཁོར་འདས་མཉམ་ཉིད་རང་རིག་ཆེ་མཆོག་ཡ་མན་ཏ་ཀ་ཟིལ་གནོན་ཁྲོ་རྒྱལ་འབར་བའི་ངོ་བོར་རྟོགས་སོང་ན། གོང་གི་ངེས་ཤེས་སྒྲོན་མེའི་ལུང་དེའི་མཇུག་ཏུ། བཟང་ངན་མེད་པའི་མཉམ་ཉིད་དེ། །རྟོགས་པ་ངེས་ཤེས་བཟང་པོ་ཡིན། །གསུངས་པའི་ཚོད་ལ་ཐོན་སོང་བ་རེད་སྙམ། འཇམ་དཔལ་ཡ་མན་ཏ་ཀའི་སྒྲུབ་ཐབས་ཀྱི་མན་ངག་ལ་བསམ་བློ་བཏང་ན། འཇམ་དཔལ་སྐུའི་སྒྲུབ་པ་ཐམས་ཅད་འཁོར་ལོ་རྣམ་པ་བཞིའི་དགོངས་པར་འདུས། འཁོར་ལོ་རྣམ་པ་བཞི་པོ་གང་ཡིན་སྙམ་ན། གནས་པའི་འཁོར་ལོ། སྲིད་པའི་འཁོར་ལོ། སྤྲུལ་པའི་འཁོར་ལོ། གཅོད་པའི་འཁོར་ལོ་དང་བཞི་པོ་རེད། གནས་པའི་འཁོར་ལོ་དེ་ལྟ་བ་བྱས་ནས་བཤད་ཡོང་ན། ཇི་ལྟར་ཡིད་བཞིན་ནོར་བུ་རིན་པོ་ཆེ་ལྟར་དུ་འཇམ་དཔལ་ཡ་མཱན་ཏ་ཀའི་ཐུགས་ཡང་དག་ཡེ་ཤེས་ལས་ཡང་དག་པའི་ཆོས་ཐམས་ཅད་འབྱུང་ཞིང་། དེ་ཉིད་འཕོ་འགྱུར་མེད་པར་གནས་པས་ན་གནས་པའི་འཁོར་ལོ་གསུངས་པ་རེད། གཉིས་པ་སྲིད་པའི་འཁོར་ལོ་དེ་སྒོམ་པར་བཤད་ཡོང་ན། ཕྱི་ལྟར་ན་ཁམས་གསུམ་སྲིད་པ་གསུམ་པོ་འཇམ་དཔལ་ཡ་མཱན་ཏ་ཀའི་སྐུ་ལ་རྫོགས་པའམ་དབང་བྱེད་པ། སྲིད་གསུམ་སྲོག་དབུག་གི་བདག་པོ། གཤིན་གྱི་རྗེ་བོ་ཐ་མལ་པ་ཐམས་ཅད་ཀྱི་རྗེ་བོ་འང་ཡིན་པས་ན་ཆེན་པོའམ་དབང་པོ་འཁོར་འདས་ཐམས་ཅད་ཀྱི་བདག་པོ། སྲིད་གསུམ་ཟ་བའི་དུས་ཀྱང་འཇོམས་བྱེད་དུས་དགྲའི་དབང་པོ་ཟེར་བའི་མཚན་ཐོགས་རྒྱུ་དང་། ནང་ལྟར་མངལ་སྐྱེས་ཀྱི་སེམས་ཅན་ཐམས་ཅད་ལས་རླུང་འཕོ་པའི་གཞི་དེ་ལྟེ་བ་སྤྲུལ་པའི་འཁོར་ལོར་བརྟེན་ཅིང་འཆོར་མེད་དུ་འཛིན་ཏེ་འཕོ་ཞིང་འཇོམས་པར་བྱེད་པ། གསང་བ་ལྟར་དུ་བྱས་ཡོང་ན། ཡེ་རླུང་གི་བྱེད་པ་ཡིས་ལས་རླུང་གི་རྒྱུ་བ་དག་སྟེ་དུས་ཀྱི་དགྲ་ཡང་འཕོ་མེད་དུ་འཇོམས་པ་འཇམ་དཔལ་ཡ་མཱན་ཏ་ཀའི་དགོངས་པ། དེ་ལ་སྲིད་པའི་འཁོར་ལོ་ཟེར་དགོས། གསུམ་པ་སྤྲུལ་བའི་འཁོར་ལོ་རེད། སྤྲུལ་པའི་འཁོར་ལོ་འདི་ལྟ་སྒོམ་སྤྱོད་པའི་ནང་ནས་སྤྱོད་པར་བཤད་ན། གདུལ་བྱ་འགྲོ་བ་དྲུག་ལ་འདུལ་བྱེད་ཐུབ་པ་དྲུག་སོགས་དཔེ་སྒྱུ་མ་མཁན་གྱི་སྤྲུལ་པ་བཞིན་དུ། འགྱུར་མེད་བྱང་ཆུབ་སེམས་ཀྱི་དབྱིངས་ལས་འགག་མེད་ཐུགས་རྗེའི་རྩལ་སྣང་སྣ་ཚོགས་སུ་ཤར་བ་དེ་རེད། བཞི་པ་གཅོད་པའི་འཁོར་ལོ་རེད། འདི་འབྲས་བུར་བཤད་ན། སྤྱིར་འཁོར་ལོ་ཟེར་རྒྱུ་འདི་འཕར་བ་བྱེད་པའམ་གཅོད་པར་བྱེད་པ་སྟེ་ལམ་མཐོན་པོར་འདེགས་བྱེད་ཡིན་པར་མ་ཚད་གཅོད་པར་བྱེད་པའི་མཚོན་ཆ་ཞིག་ཀྱང་རེད། འཇམ་དཔལ་གཤིན་རྗེ་གཤེད་ཀྱི་ཕྱག་མཚན་གཙོ་བོར་ཡང་འཁོར་ལོ་རེད། དེས་ཞི་རྒྱས་དབང་དྲག་གི་ལས་རབ་འབྱམས་བསྒྲུབས་ཅིང་། ཁྱད་པར་བསྟན་དགྲ་ཚར་གཅོད་པར་བྱེད་པས་ན་གཅོད་པའི་འཁོར་ལོ་གསུངས་པ་རེད། འདིའི་ངོ་བོ་ཕྲིན་ལས་ཡིན་པ་ལ་རྣམ་པ་འཁོར་ལོར་ཤར་བ། དཔེ་མཚོན་ཆ་རྣོན་པོས་གང་ལ་བཏབ་ན་དེ་ཐོགས་མེད་དུ་གཅོད་པ་ལྟར་དུ། སྤྱིར་ན་ལས་རབ་འབྱམས། ཁྱད་པར་དུ་བསྟན་དགྲ་ཚར་གཅོད་ལ་བསྔགས་པ་ཡིན་པས། ཕྲིན་ལས་སྣ་ཚོགས་ལ་འཕྲུལ་ཞིང་འཁོར་བས་ན་འཁོར་ལོའི་ངེས་ཚིག་ཏུ་གྲུབ་པ་དེ་འདྲ་ཞིག་རེད། འདིའི་འཁོར་ལོ་བཞི་པོ་འདི་དོན་རྟགས་གཉིས་ལ་བསྡུས་ནས་བཤད་ན། དོན་ལྟ་བ་གནས་པའི་འཁོར་ལོ་ལ་རྟགས་ཕྲིན་ལས་འཁོར་ལོ་ཕྱི་མ་གསུམ་པོ་ཡིན་རྒྱུ་དང་། ངེས་དོན་རྫོགས་ཆེན་དང་སྦྱར་ན། གནས་པའི་འཁོར་ལོ་དེ་གནས་ལུགས་རང་བྱུང་གི་ཡེ་ཤེས། དེ་སྦྱོང་གཞི་ངོ་བོ་ཉིད་ཀྱི་གཞི་བྱས་ན། སྲིད་པའི་འཁོར་ལོ་དབྱིངས་མ་འཁྲུལ་པ་ལས་གློ་བུར་འཁྲུལ་པ་བྱུང་ནས་འཁྲུལ་པ་བཏགས་པའི་གཞི། གང་སྦྱང་བྱ་དྲི་མའི་ཆ་ལ་བཞག་དུས། སྤྲུལ་པའི་འཁོར་ལོ་དེ་མཚན་བཅས་མཚན་མ་མེད་པའི་རྫོགས་རིམ་དང་། ཁྱད་པར་འཁོར་འདས་དབྱེར་མེད་ཆེན་པོའི་ལྟ་དོན་དེ་སྒོམ་སྤྱོད་གཉིས་ཀྱིས་བསྡུས་པ་ཞིག་འཁྲུལ་པ་སྦྱོང་བྱེད་ཀྱི་ལམ། གཅོད་པའི་འཁོར་ལོ་དེ། ངེས་དོན་ཡ་མཱན་ཏ་ཀའི་གསང་གསུམ་རྒྱན་གྱི་འཁོར་ལོར་གྲུབ་ནས་སྦྱོང་འབྲས་སྒྲིབ་གཉིས་བག་ཆགས་ དེ་ལྟ་བུའི་འཇམ་དཔལ་ཡ་མཱན་ཏ་ཀ་གཤིན་རྗེ་གཤེད་ཀྱི་ཡེ་ཤེས་སྒྱུ་མའི་རྣམ་རོལ། གཞི་ལམ་འབྲས་བུའི་ཡོན་ཏན་མ་ལུས་པར་རྫོགས་པའི་བདག་ཉིད་ཆེན་པོ་གང་ཟེར་རྒྱུའི་གོ་བ་རེད། ཡང་མཚམས་འདིར། རྟ་མགྲིན་ཁམས་གསུམ་རོལ་བའི་དབང་ཡིན། དེའི་ལོ་རྒྱུས་དབང་ཆོག་ཡན་ལག་བདུན་པ་སོགས་རྗེས་ཟློས་གསུངས་མཐར། ཡེཤེས་དབབ་པ་འདི་ནང་འཇུག་རེད། ནང་གང་ལ་འཇུག་པ་རེད་ཟེར་ན། དབང་ཆེན་པདྨ་གསུང་གི་རྟ་མགྲིན་ཁམས་གསུམ་རོལ་པ་རྩ་བའི་དཀྱིལ་འཁོར་གྱི་ནང་ལ་དང་། འཇུག་སའི་སྒོ་གང་ནས་འཇུག་ན་དབུས་ཤར་གྱི་སྒོ་ནས་འཇུག་དགོས། ཡི་དམ་ལྷ་ཡི་དཀྱིལ་འཁོར་དང་སློབ་མ་རང་ཉིད་མདུན་སྤྲད་བྱས་པའི་དཀྱིལ་འཁོར་གྱི་མདུན་ཕྱོགས་རང་ལ་གཏད་ས་དེ་ཤར་དུ་བྱས་པའི་ཤར་སྒོ་ནས། དང་པོ་ཕྱི་འཇུག་གི་སྐབས་གཡས་བསྐོར་གྱི་སྒོ་རེ་རེ་ནས་ཕྱག་དང་བཅས་ཞུགས་ཏེ། སླར་ཡང་ཤར་སྒོ་ལ་ཐོན་པའི་དེ་མ་ཐག་ཏུ་ནང་འཇུག་གི་ཐོག་མ་ཡེ་ཤེས་དབབ་པའི་སྐབས་འདིར། དཀྱིལ་འཁོར་གྱི་ཤར་སྒོའི་དབང་སྟེགས་པདྨ་འདབ་བརྒྱད་ཀྱི་གདན་རེ་རེ་ལ། སློབ་མ་རང་ཉིད་འཁོད་པའི་མོས་པ་བྱས་པ་དང་མཉམ་དུ། སློབ་དཔོན་གྱི་ཞལ་འདོན་ཚིག་དོན་དང་སྦྲགས་ནས། སྔགས་དང་ཏིང་འཛིན་གྱི་གསང་གཞུང་ཤེས་པ་དང་མཉམ་དུ་བླ་མ་དང་དཀྱིལ་འཁོར་གྱི་གཙོ་བོ་གཉིས་སུ་མེད་པའི་ཐུགས་ཀ་ནས་འོད་ཟེར་ཞིག་བྱུང་། རང་གི་རྣམ་སྨིན་ལུས་རྟེན་གྱི་མ་དག་པའི་ཆ་ཐམས་ཅད་སྦྱངས། མ་དག་པའི་ཆ་སྦྱོང་རྒྱུ་དེ་ཡང་རང་གི་སེམས་རྣམ་ཤེས་སྦྱངས་པའི་འབྲས་བུ་ལ་རྣམ་ཤེས་ཧཱུཾ་ཡིག་ཏུ་གྱུར་པ་ཡབ་ཀྱི་ཞལ་ནས་དྲངས་ཡུམ་གྱིས་མཉམ་པར་སྦྱོར་བའི་རྗེས་ཆགས་བདེ་སྟོང་གི་རོལ་མོའི་ཞུ་བདེའི་ཐིག་ལེར་གྱུར་པ་ནི། ཡུམ་གྱི་མཁའ་གསང་ནས་གཙོ་བོ་རང་ཉིད་དང་རྣམ་པ་འདྲ་བར་བརྙེས་པའི་སྲས་སུ་སྨིན་པ་དེ་ཉིད། སྔར་གྱི་དབང་སྟེགས་ལ་བཞུགས་པའི་གནས་གསུམ་ཡི་གེ་གསུམ་ལས་འོད་ཟེར་ཕྱོགས་བཅུར་འཕྲོས་ནས། ཕྱོགས་བཅུའི་དེ་བཞིན་གཤེགས་པ་ཐམས་ཅད་གང་བསྒྲུབ་བྱ་རྟ་མགྲིན་ཁམས་གསུམ་རོལ་པའི་དཀྱིལ་འཁོར་གྱི་ལྷའི་རྣམ་པ་སྤྱན་དྲངས་པ་དེ། རང་དང་རོ་གཅིག་དུ་འདྲེས་པར་བསམ་ནས་དམིགས་མེད་ལྟ་བའི་ངང་མདངས་བསྐྱང་དགོས། འདིའི་སྟོད་ལས་ཐམས་ཅད་ལྟ་བ་དང་། སྨད་ལས་ཐམས་ཅད་སྤྱོད་པ་གཙོ་བོར་འདོན་པའི་མན་ངག་གནད་ལ་འཛིན་དགོས། རང་ལ་བསྟིན་བྱའི་ལྷ་ཟེར་རྒྱུ་དེ་ཡང་། དོན་ལ་དབྱིངས་དང་ཡེ་ཤེས་དབྱེར་མེད་སྟོང་གསལ་མཐའ་དབུས་དང་བྲལ་བའི་ཆོས་སྐུའི་ངང་གཅིག་ལ། ཞལ་ཕྱག་མཚན་མའི་སྤྲོས་པ་མི་མངའ་ཡང་སྟོང་པ་གསལ་བའི་སྙིང་པོ་ཅན། འོད་གསལ་ལྷུན་གྲུབ་གྱི་རང་མདངས་དེ་ལས། སྐྱེ་མེད་ཀྱི་དབྱིངས་ལས་སྐྱེ་བའི་ཆོ་འཕྲུལ། འགག་མེད་རང་རྩལ་གྱི་ཡེ་ཤེས་རོལ་བ་སྣ་ཚོགས་ལ་ཤར་བ་དེ། རྣམ་པ་རྟགས་ཀྱི་ཕྱག་རྒྱ་རིག་པའི་དཔའ་བོ་ཁྲོ་མཆོག་རྟ་མགྲིན་འབར་བའི་སྐུ་རུ་བཞེངས་པ་རེད། རྟའི་འགྲོས་དགུ་ནི་ཐེག་པ་རིམ་དགུ་ལ་སྦྱར་བ་དང་། རྟ་སྐད་བཅུ་གསུམ་ས་ལམ་གྱི་རྣམ་བཞག་དང་སྦྲེལ་ནས་གསུངས་ཡོད་པ་རེད། དབྱིངས་དང་ཡེ་ཤེས་གཉིས། སྣང་བ་དང་སྟོང་པ་གཉིས། དོན་དམ་དང་ཀུན་རྫོབ་ཐམས་ཅད་རིམ་པ་བཞིན་དུ། དབྱིངས་དང་། ཤེས་རབ། སྟོང་པ། དོན་དམ་བཞི་པོ་རང་བཞིན་ངོ་བོ་དོན་དམ་གྱི་རྟ་སྐད་དང་། ཡེ་ཤེས། ཐབས། སྣང་བ། ཀུན་རྫོབ་བཞི་པོ་རིག་པ་ངོ་བོ་དོན་གྱི་རྟ་སྐད་ལ་བཤད་ནས། ཐུན་མོང་མ་ཡིན་པའི་ཐབས་ཤེས་གཉིས་ལ་རྟ་ཞལ་དུ་གསུངས་ཡོད་པ་རེད། སྔོན་དཔལ་ཆེན་ཁྲོ་རྒྱལ་ཧེ་རུ་ཀས་བདུད་རུ་ཏྲ་འདུལ་བའི་གནས་སྐབས་ན། དཔལ་རྟ་མགྲིན་འབར་བའི་སྐུ་རུ་བཞེངས་ནས་རུ་ཏྲ་བཏུལ་བ་རེད། དམ་སྲི་མ་རུང་པའི་སྨོན་ལམ་ལོག་པའི་རྟེན་འབྲེལ་ལས་ཤར་ཞིང་། དུག་གསུམ་དུག་ལྔའི་མཐུ་བདོ་ཞིང་བསྟན་ལ་འཚེ་བ་ཅན་གྱི་བསམ་སྦྱོར་ལོག་པའི་མི་དང་མི་མ་ཡིན་པའི་གཉེན་པོ་ཡང་འདི་ཆེ་བ་རེད། འདི་ནས་ཡེ་ཤེས་དབབ་པའི་སྐབས་སུ་སློབ་མ་རང་ཉིད་རྟ་མགྲིན་སྐུ་རུ་གསལ་གདབ་རྒྱུ་དེ། མ་ཡིན་པ་ཞིག་ཡིན་པར་འདི་ཤེས་པ་ཙམ་མ་ཡིན་པར། ཡེ་ནས་ཕུང་ཁམས་སྐྱེ་མཆེད་ལྷའི་རང་བཞིན་ཡིན་པས། ཡིན་པར་ཤེས་པའི་ངེས་ཤེས་དང་ལྡན་པའི་དབང་ཆེན་རྟ་མཆོག་རོལ་པ་སྐུ་མདོག་དམར་ནག་དབང་དྲག་གཉིས་འཛོམས་ཅན། དུས་མཐའི་མེ་ཡི་ཁ་དོག་ཅན། འཇིགས་བྱེད་ཡེ་ཤེས་ཀྱི་སྐུ་ལ་རྔམ་བྱེད་དུར་ཁྲོད་ཀྱི་རྒྱན་གྱིས་སྒེག་པ། འདུལ་བྱེད་ཐབས་ཀྱི་མཚོན་ཆ་སྣ་ཚོགས་ཕྱག་ན་བསྣམས་པ་དེ་འདྲ་ཞིག་ཏུ་བསྒོམ་དགོས། དེ་ཡང་རྟ་ཞལ་གཅིག་ཏུ་རྩིས་པའི་དབུ་ལྔ། ཕྱག་བཅུ་དྲུག ཞབས་བརྒྱད་དོར་སྟབས་སུ་བགྲད་ཅིང་ཁྱུང་ཆེན་རྡོ་རྗེའི་གཤོག་པ་ནམ་མཁའ་ལ་བསྒྲེངས་པ། གཤོག་རྩེ་བྱ་ཁྱུང་དང་ཉི་མ་ཟླ་བས་མཚོན་པ། རྩ་བའི་ཞལ་གསུམ་གྱི་གཡས་ཞལ་སྔོན་པོ། གཡོན་ཞལ་སེར་པོ། རྩ་ཞལ་དམར་པོ། སྟེང་ཞལ་ཡང་རྩ་ཞལ་དང་འདྲ་བའི་དམར་ནག་ཡིན་པར་གསུངས་ཡོད། དེ་ཡང་རྔམ་ལ་གཏུམ་ཞིང་བཞད་པའི་ཉམས་དང་ལྡན་པའི་ཞལ་བརྒྱད་དེས་བདུད་བརྒྱད་འདུལ་བ། སྤྱི་གཙུག་གི་རལ་བའི་གསེབ་ནས་རྟ་མགོ་ལྗང་ཞུར་ལྔ་ཡིས་རྟ་སྐད་རྔམ་པའི་སྒྲ་དབྱངས་སུ་འཚེར་བའི་བཞད་སྒྲ་དེས། ཁམས་གསུམ་གཡོ་ཞིང་སྲིད་གསུམ་འདར་བ་བྱེད་པ་རེད། རྟ་ཞལ་ལྔས་རིགས་ལྔའི་དབུ་རྒྱན་ཡང་མཚོན་པ་ཡིན། དེ་ལྟ་བུའི་གདན་གསུམ་ཡོངས་རྫོགས་སྐུ་ལ་ཚང་བ། དཔལ་གྱི་ཆས་བཅུ་དང་དུར་ཁྲོད་ཀྱི་ཆས་བརྒྱད་སོགས་རིགས་མཐུན་གྱི་དཀྱིལ་འཁོར་གཞན་ནས་སྔོན་ཡང་ཞུས་མྱོང་བ་བཞིན་དུ་ཕྱག་མཚན་ལ་གཡས་ན་རྡོ་རྗེ་ཁ་ཊྭཱཾ་སོགས་བརྒྱད། གཡོན་ན་ཐོད་ཁྲག་པདྨ་ལ་སོགས་པ་བརྒྱད་དང་ཕྱག་བཅུ་དྲུག་ན་ཕྱག་མཚན་མཚོན་ཆ་ལ་སོགས་པ་བཅུ་དྲུག་བསྣམས་པ། ཡུམ་ཆེན་པདྨ་གཟི་ལྡན་སྐུ་མདོག་སྔོ་ནག་ཕྱག་གཡས་པས་ཡིད་བཞིན་ནོར་བུ་དང་། གཡོན་པས་རིན་ཆེན་ཟ་མ་ཏོག་བསྣམས་པས་འཁྱུད་པ་ཡབ་ཡུམ་གཉིས་མེད་མཉམ་པར་སྦྱོར་བ། འདིའི་ཞབས་གནོན་གཙོ་བོ་དེ་ཀླུ་བརྒྱད་དང་རྒྱལ་བསེན་ཕོ་མོ་རེད། སྣང་སྲིད་དྲེགས་པའི་ཚོགས་ཐམས་ཅད་དྲེགས་པ་ཕོ་རྒྱུད་མོ་རྒྱུད་གཉིས་དང་ཀླུ་རྒྱུད་གསུམ་ལ་འདུས། དེའི་ནང་གི་སྟོབས་ཆེ་ཤོས་དེ་གང་ཡིན་ཟེར་ན་ཀླུ་རྒྱུད་འདི་རེད། གླེན་པ་ཀླུ་ཡི་དམོད་པ་དེ་སྦྲུལ་ནག་དུག་ལྕེའི་དམོད་པ་སོགས་ཁ་སྔོན་བཤད་ཟིན་པ་ལྟར་རེད། ཀླུ་བདུད་ནག་པོས་དུག་རིགས་བཀྱེས་པ་དེ་སྦྱར་དུག་ཁོང་དུ་སོང་པ་ལྟ་བུ་ཡིན་པས། ཀླུ་འདུལ་གཉེན་པོ་སྟོབས་ཀྱི་ལྷ་ལ་དབང་ཆེན་རྟ་མགྲིན་དམར་པོ་འདི་བསྔགས་པ་རེད། གཉན་དང་ས་བདག་གི་རིགས་ཐམས་ཅད་ཀྱང་ཀླུ་རྒྱུད་ལ་འདུས་པ་རེད། འདིའི་དཀྱིལ་འཁོར་དེ་རྩིབས་འཁོར་བཅུ་དྲུག་ཡོད་པ་དེའི་ནང་ཁང་བརྒྱུད་དེ་མདུན་ནས་གཡས་བསྐོར་དུ་རྩོམ་པའི་གོང་དུ་གསུངས་བ་ལྟ་བུའི་གོ་ལ་མ་དྲུག གསང་བའི་ཡུམ་ཆེན་བཞི། ཁམ་བརྒྱ་མོ་དྲུག་དང་། མཁའ་འགྲོ་སུམ་ཅུ་རྩ་གཉིས་ཀྱི་སྤྲུལ་པ་ལོང་བ་རྒྱབ་འབྲེལ་སུམ་ཅུ་སོ་གཉིས་རྣམས་ཕྱོགས་བཞི་ལ་བརྒྱད་རེ་བརྒྱད་རེ་ཡོད་པ་རེད། སྒྲ་མེད་ཁོང་ནས་འབྲུག་སྟོང་ལྡིར་ཞིང་། སྙིང་མེད་དབྱིངས་ལས་ཡེ་ཤེས་གསལ་བ། ད་རུང་སྙན་མེད་ཆོས་ཉིད་ཀྱི་རང་སྒྲ་སྒྲོག་པ་ལ་སོགས་པ་མཚན་ཉིད་དང་ལྡན་པ་རྐྱང་རྐྱང་གིས། སྟག་དང་ཆུ་སྲིན་གླང་པོ་ཁྱུང་ཆེན་དག་ཆིབས་ནས་རྔམ་སྟབས་ཀྱིས་ལྡིང་བ་དེ་འདྲ་རེད། དཀྱིལ་འཁོར་གྲུ་ཆད་ཕྱི་ནང་གཉིས་ལ། ལས་མཁན་ཁྱི་བརྒྱད་དང་སྤྱང་བརྒྱད། ཐམས་ཅད་ཀྱིས་མཆེ་བ་གཙིགས་ཤིང་ང་རོ་སྒྲོག་པ། བྱུ་རུ་དམར་པོའི་ཨ་ལོང་བཅིངས་ཡོད་མཁན་ཤ་སྟག་དང་། བར་ཁྱམས་སུ་ཕོ་ཉ་སུམ་བརྒྱ་དྲུག་ཅུ་རྔམ་ཞིང་འཇིགས་ལ་ཁྲོ་ཞིང་གཏུམ་པ་གློག་ལྟར་མྱུར་བའི་རྩལ་ཤུགས་ཅན་ཡིན་པ་གོང་དུ་གསུངས་པ་བཞིན་རེད། སྒོ་བཞི་ལ་ཁྲོ་བོ་རྐང་གཅིག་བཞི་ཡོད་པ། ཤར་ཕྱོགས་ལ་མགོ་དགུ་ཅན། ལྷོ་ཕྱོགས་ལ་མགོ་བདུན་ཅན། ནུབ་ཕྱོགས་ལ་མགོ་ལྔ་ཅན། བྱང་ཕྱོགས་ལ་མགོ་གསུམ་ཅན། ཐམས་ཅད་ཀྱང་འཁོར་མང་པོས་བསྐོར་ནས་བཞུགས་ཡོད་པ། སྒོ་སྐྱོང་ཁྲོ་ཆེན་བཞི་ལ་ཕྱག་གཡས་བཞིས་དགུག་འཆིང་སྡམ་མྱོས་ཀྱི་ཕྱག་མཚན་བཞི་བསྣམས་ཤིང་། གཡོན་པས་ཐོ་ཆེན་འབར་བ་རེ་རེ་བསྣམས་པ། ལྷ་ཚོགས་དེ་དག་རེ་རེ་ལའང་སྤྲུལ་པ་ཡང་སྤྲུལ་བསམ་གྱིས་མི་ཁྱབ་པས་བསྐོར་བ། མཁའ་དང་ས་གཞིའི་ཁྱོན་ཀུན་འགེངས་ཤིང་ཁྱབ་པ། ཀུན་ཀྱང་གཙོ་བོ་གཅིག་གི་ཆོ་འཕྲུལ་ལས་ཤར་བའི། གཙོ་འཁོར་མ་འདྲེས་ཡོངས་རྫོགས་གསལ་བའི་འདུན་པ་དེ་འདྲ་མཛད་དགོས། འདིའི་གཙོ་བོའི་ཐུགས་ཀར་ཡེ་ཤེས་སེམས་དཔའ་རྒྱལ་བ་ཀུན་ཡུམ་པདྨ་གཟི་ལྡན་ཞི་མ་ཁྲོ་གསུངས་ས་དང་། ཕྱག་མཚན་མེད་དེ་འཛིན་འཛིན་འདྲ་བ་གསུངས་པ་རེད། ཡེ་ཤེས་སེམས་དཔར་རྒྱན་དང་ཕྱག་མཚན་སྤངས་པ་སྤྱིར་འགྲོས་ལྟར་རེད། འོན་ཀྱང་མཚམས་རེ་ལ་ཕྱག་མཚན་ཡོད་ས་ཡང་ཡོད་རེད། གང་ལྟར་འཛིན་འཛིན་འདྲ་གསུངས་བའི་གོ་ཕྱོགས་འདིའི་རིགས་འགྲེས་ཤེས་དགོས། ཐུགས་སྲོག་ཏིང་འཛིན་སེམས་དཔའ་རེད། སྙིང་ཁར་རིན་ཆེན་ཟུར་བརྒྱད་ཀྱི་སྟེང་དུ་ཉི་མའི་གདན་ལ་ཐུགས་སྲོག་ཧྲཱི་ཡིག་གི་མཐའ་རུ་སྔགས་ཕྲེང་གིས་བསྐོར་བ་བསམ་དགོས། སློབ་དཔོན་ཆེན་པོས། སྒྲུབ་པ་ལུང་གི་ཀ་མགོའི་ནང་ན། ལུས་དབང་ཆེན་གྱི་སྐུར་གསལ་ན། སྐུ་ལ་བགྲེས་རྒུད་མི་མངའ། རང་རིགས་པདྨ་དབང་ཆེན་གྱི་སྐུ་ཡིས་ཁམས་གསུམ་དབང་དུ་འདུས་པ་ཡིན། ངག་པདྨ་དབང་ཆེན་གྱི་གསུང་དེ་བསྒྲུབ་ན། གསུང་དྲི་མ་མེད་པ་ཆགས་ཐོགས་དང་བྲལ་བ་ཐོབ་འགྲོ། ཡིད་པདྨ་དབང་ཆེན་གྱི་ཐུགས་ལ་བསྲེ་ཐུབ་ན། ཐུགས་མི་རྟོགས་ཡེ་ཤེས་ཆེན་པོ་ལ་མངའ་བརྙེས་པ་ཡིན། དེ་བཞིན་དུ་ཡོན་ཏན་འཕེལ་འགྲིབ་མི་མངའ་བ་དང་། ཕྲིན་ལས་སྣང་སྲིད་དབང་དུ་འདུས་པར་གསུངས་པར་མ་ཟད་སྒྲུབ་པ་བཀའ་བརྒྱད་པོ་འདིའི་དཀྱིལ་འཁོར་གཅིག་ལ་འདུས་ཚུལ་ཡང་གསུངས་ཡོད། དབང་ཆེན་འདུས་པའི་རྒྱུད་ཀྱི་ནང་ན་ཡང་། ང་ནི་བདེ་གཤེགས་ཀུན་གྱི་ཡབ། །ང་ནི་གཤིན་རྗེ་ཀུན་གྱི་གཤེད། །ང་ནི་མ་མོ་ཀུན་གྱི་རྗེ། །ལ་སོགས་པ་གསུངས་ཡོད་པས། རབ་འབྱམས་དཀྱིལ་འཁོར་རྒྱ་མཚོའི་དཔལ་དབང་ཆེན་རྟ་མགྲིན་རོལ་པའི་དཀྱིལ་འཁོར་གཅིག་ལ་འདུས་པ། དོན་ལ་ཡེ་ཤེས་ཉག་གཅིག་གི་བདག་ཉིད་དུ་རྣམ་པར་དག་པ་དང་། ལྷག་པར་གཟུགས་བརྙན་གྱི་དཀྱིལ་འཁོར་འདིས་མཚོན་བྱེད་དུ་བྱས་ཏེ་དབང་བསྐུར་ཞིང་ངོ་སྤྲད་ནས་ལམ་སྦྱོང་བས། གཉུག་མའི་སྒོ་གསུམ་རྡོ་རྗེ་གསུམ་གདན་གསུམ་བཀོད་པའི་གྲོང་ཁྱེར་ཡེ་ནས་རང་ལ་ལྷུན་གྲུབ་དུ་བཞུགས་པའི་རང་ངོ་འཕྲོད་དགོས་པ་རེད། ཡང་མཚམས་འདི་ནས། ཧོ། ཕུང་པོ་ཁམས་དང་སྐྱེ་མཆེད་ནི། སོགས་དབང་དངོས་གཞི་བསྐུར་རྗེས་ཀྱི་ཟུར་འཕྲོས། འདིའི་དྲག་པོ་སྒྲོལ་བའི་དབང་འདི་དབང་དང་བྱིན་རླབས་རྗེས་གནང་གསུམ་གྱི་ནང་ནས་སྔ་མ་དབང་བྱིན་རླབས་གཉིས་ཀྱི་གནད་ཚང་བའི་ཞོར་དུ་ཕྱི་མ་རྗེས་སུ་གནང་བ་རྩལ་འདོན་གྱི་ཕྱག་སྲོལ་ཞིག་རེད། འདི་ལྟ་བ་གཏན་ཚིགས་ཀྱིས་བཤད་ན། སྒྲུབ་པ་ལག་ལེན་གྱིས་བཤད་དགོས་རེད། རྟོགས་པས་བདག་བསྒྲལ་ནས་ཐུགས་རྗེས་གཞན་སྒྲོལ་བ་ལ། རྫོང་འཕྲང་སྲོག་གསུམ་གྱི་གནད་ལ་རང་བྱན་ཆུབ་པ་ཞིག་ངེས་པར་དུ་དགོས། དང་པོར་རྫོང་གང་རེད་ཟེར་ན་ལྟ་བའི་རྫོང་རེད། འཕྲང་སྒོམ་པའི་འཕྲང་། སྲོག་འཁོར་འདས་གཉིས་ཀྱི་སྟོང་སྲོག་རང་ལག་ལ་ཡོད་པ་དེ་ཐམས་ཅད་ལ་དབང་འབྱོར་བ་ཞིག་དགོས་པས། ལྟ་བའི་རྫོང་ཟིན་པ་ལ་སྒོམ་པའི་འཕྲང་སྒྲོལ་དགོས། དེ་བཤད་ན་ཐེ་ཚོམ་སྐྱེ་རྒྱུ་ཞིག་ལ། སྒོམ་རྒྱུ་དེ་ཐོག་མར་ལྟ་བས་ཐག་ཆོད་དགོས་པ་མ་ཡིན་ནམ། རིག་པ་དང་རྐང་བར་ལྡན་གསུངས་དུས། ལྟ་བ་མིག་ལྟ་བུ་དེས་བལྟས་ནས་བལྟ་ས་དེར་སྒོམ་པ་རྐང་པ་ལྟ་བུས་གོམ་པ་བརྟན་པོར་སྤོ་དགོས་པ་མ་རེད་དམ་སྙམ་ན། དེ་དགོས་ཀྱང་ལྟ་བ་གོ་ཡུལ་བཤད་ཡུལ་ཙམ་ལ་ལུས་ནས་མྱོང་བས་དེའི་ཐོག་ལ་མ་ཕེབས་ན། སྒོམ་པའི་འཕྲང་ལས་མི་ཐར། དྲང་པོར་བཤད་ན། དེ་ལྟ་བ་ངོ་མ་མ་རེད། དཔེར་ན། མཛུབ་མོས་ཟླ་བ་སྟོན་ཚེ། དོན་གྱི་ནམ་མཁའི་ཟླ་བ་མ་རིག་སྟོན་མཁན་གང་ཟག་གི་མཛུབ་རྩེ་ལ་དོགས་དཔྱད་བྱས་པ་འདྲ་འདྲའི། ཆོས་ཉིད་དེ་བཞིན་ཉིད་ཀྱི་དོན་མ་མཇལ་བར་བཤད་པ་ཚིག་གི་སྦུན་པ་ཞིག་ལ་མགོ་འཁོར་ན། དེ་ལྟ་བུས་འཕྲང་བགྲོད་པའི་ཕྱོགས་ལ་གོམ་ཁ་གཏན་ནས་སྤོས་ཡོད་མ་རེད། དེའི་ཕྱིར་ན། སྒོམ་པའི་འཕྲང་བརྒྱུད་ནས་ལྟ་བའི་རྫོང་ཟིན་པའམ་ཡང་ན་ལྟ་དོན་བཞིན་དུ་སྒོམ་པ་ཀློང་དུ་གྱུར་རྒྱུ་དེ་གལ་ཆེན་རེད། སྒོམ་པའི་འཕྲང་བརྒྱུད་དེ་ལྟ་བའི་རྫོང་ཟིན་དུས། ལྟ་སྤྱོད་གཉིས་ཀ་ཟུང་དུ་འབྲེལ་བས་ན། སྤྱོད་པའི་སྒོ་ནས་སྲོག་འཕྲོག་སྟེ་འཁོར་འདས་ཀྱི་ཆོས་ཐམས་ཅད་དབང་བསྒྱུར་ཐོབ་པའི་རྣལ་འབྱོར་དབང་ཕྱུག་གི་དགོངས་པ་ཟེར་རྒྱུ་བོ་བརྙེས་སོང་བ་རེད། དེ་ལྟ་བུའི་བསྐྱེད་རྫོགས་སྨིན་གྲོལ་རིམ་གཉིས་ཀྱི་ལམ་མཐར་ཕྱིན་པ་ལ། གཟེར་བཞིའི་མན་ངག་གི་གནད་ཟིན་རྒྱུ་དེ་མེད་ན་ཐབས་མེད་རེད། གཟེར་བཞི་པོ་དེ། གཞི་ལམ་འབྲས་གསུམ་ལྟ་སྒོམ་སྤྱོད་གསུམ་ལ་སྦྱར་ནས་བཤད་ཡོང་ན། གཞི་ལྟ་བ་དགོངས་པ་མི་འགྱུར་བའི་གཟེར། ལམ་སྒོམ་པ་ཏིང་འཛིན་ལྷའི་གཟེར་དང་སྙིང་པོ་སྔགས་ཀྱི་གཟེར་འདི་ནི་ཏིང་འཛིན་དང་འབྲེལ་བའི་སྒོམ་པ་ཡིན་ལ་ཕྲིན་ལས་དང་འབྲེལ་བའི་སྤྱོད་པ་ཡང་ཡིན། འབྲས་བུ་ནི་འཕྲོ་འདུ་ཕྲིན་ལས་ཀྱི་གཟེར་འཇོག་པ་རེད། འདི་འབྲས་བུ་ཡིན་དོན་གང་རེད་ཟེར་ན། ཞི་རྒྱས་དབང་དང་དྲག་པོ་ལ་སོགས་པ་ལས་རབ་འབྱམས་ཐམས་ཅད་སངས་རྒྱས་ཀྱི་ཕྲིན་ལས་རེད། དེ་ཡིན་ན། དེ་ཉིད་ད་ལྟ་ནས་ལམ་དུ་བྱེད་ཀྱིན་ཡོད་པའི་ཆ་ནས་འབྲས་བུར་བཞག་ཀྱང་མི་འཐད་པ་མེད། འབྲས་བུར་བགྲོད་པའི་ལམ་འབྲས་བུ་དངོས་ལ་འཇུག་པ་ཡི་འབྲས་བུའི་ཐེག་པ་ཞེས་གསུངས་པ་བཞིན་རེད། དེ་ཡིན་དུས། དགོངས་པ་ཆོས་ཉིད་མི་འགྱུར་པའི་གཟེར་གྱིས། རང་སེམས་སྐྱེ་འགག་བྲལ་བའི་སེམས་ཉིད་རང་བྱུང་གི་ཡེ་ཤེས་རིག་སྟོང་མཚན་མ་ཀུན་བྲལ་རྒྱ་ཆད་ཕྱོགས་ལྷུང་དང་བྲལ་བ་དེ། རྒྱུད་ལུང་མན་ངག་ཐམས་ཅད་ཀྱི་གནད་འདུས་པར་ངོ་འཕྲོད་ནས། མཚན་ལྡན་བླ་མའི་དགོངས་བརྒྱུད་ཀྱི་བྱིན་རླབས་གཅིག་ཆར་འཕོས་ན་ལྟ་བའི་རྫོང་ཟིན་སོང་བ་རེད། དེའི་སྐབས་སུ་ནམ་མཁའི་ཟླ་བ་གཅིག་སྒྲ་གཅན་གྱིས་ཟིན་དུས་ས་གཞིའི་ཆུ་སྣོད་སྟོང་གི་ཟླ་གཟུགས་ཐམས་ཅད་མཉམ་གཅིག་ཏུ་ཟིན་པ་ལྟར། འཁོར་འདས་གཉིས་ཀའི་སྟོང་སྲོག་དུས་གཅིག་ལ་འཕྲོག་པའི་གནད་ཀྱི་རྩ་བ་དེ་ལ་ཐུག་ཡོད་པ་རེད། དེའི་རྒྱུ་མཚན་ནི། འཁོར་འདས་ཀྱི་ཆོས་ཐམས་ཅད་རང་སེམས་ལ་འདུས། སེམས་ཀྱི་རང་བཞིན་གཉུག་མའི་ཡེ་ཤེས་ཡིན་པས། ཀུན་ཁྱབ་མཁའ་དང་མཉམ་པའི་ཡེ་ཤེས་དེའི་ཕ་རོལ་ན། བསྒྲུབ་བྱའི་འཇིག་རྟེན་ལས་འདས་པའི་ལྷ་དང་། གོལ་བྱའི་འཇིག་རྟེན་པའི་དྲེགས་པ་ལ་སོགས་པ་མདོར་ན་སྣང་སྲིད་ཀྱིས་བསྡུས་པའི་ཆོས་གཅིག་ལ་ཆོས་ཉིད་དེ་བཞིན་ཉིད་ཉག་གཅིག་ཐིག་ལེ་ཆེན་པོའི་ཁུངས་སུ་མ་བསྡུས་པ་ཞིག་མི་སྲིད། དེ་ཡིན་ན་སྐབས་དོན་མ་ཧཱའི་ཨ་ཏིའི་སྒྲུབ་པ་ཕྲིན་ལས་དང་སྦྱར་ན། སྒོམ་པ་ཏིང་འཛིན་རྣམ་གསུམ་དང་འབྲེལ་བའི་སྲོག་སྡོམ་གཟེར་བཞི་བོས། བསྙེན་སྒྲུབ་ཡན་ལག་བཞིའི་ལམ་ལ་ཇི་ལྟར་སློབ་དགོས་ཟེར་ན། ཏིང་འཛིན་ལྷའི་གཟེར་བསྙེན་པའི་ཡན་ལག་དང་། སྙིང་པོ་བསྔགས་ཀྱི་གཟེར་ཉེ་བསྙེན་གྱི་ཡན་ལག དགོངས་པ་མི་འགྱུར་པའི་གཟེར་སྒྲུབ་པ། འཕྲོ་འདུ་ཕྲིན་ལས་ཀྱི་གཟེར་དེ། སྒྲུབ་པ་ཆེན་པོའི་ཡན་ལག་ཏུ་བཞག་ཆོག་པ་རེད། དག་རྫོགས་སྨིན་གསུམ་ཡང་དེའི་ཞོར་དུ་ཚང་། དེ་ཚང་ཚུལ་ནི། ཏིང་འཛིན་ལྷ་ཡི་གཟེར་གྱིས་བསྐྱེད་རིམ་ཏིང་འཛིན་རྣམ་གསུམ་བསྒོམས་པས། མར་འཁོར་བའི་སྐབས་ཀྱི་སྐྱེ་གནས་རྣམ་པ་བཞིའི་བག་ཆགས་སྦྱངས་ཤིང་དག ཡར་སངས་རྒྱས་ཀྱི་ཐུགས་ཀྱིས་གང་འདུལ་སྤྲུལ་སྐུའི་བཀོད་པ་སྣང་བའི་འབྲས་བུ་གཞི་ལ་རྫོགས། བར་ལམ་དུས་ཡིན་ན་རྩ་དག་པ་རྡོ་རྗེའི་ལུས་ལ་གནད་དུ་སྨིན་རྒྱུའི་རྫོགས་རིམ་གྱི་སྨིན་བྱེད་ལ་འགྲོ་བ་རེད། སྙིང་པོ་སྔགས་ཀྱི་གཟེར་ལ་མཚོན་ན། སེམས་དཔའ་སུམ་བརྩེག་བསྒོམས་ཏེ། ཐུགས་སྲོག་སྔགས་ཕྲེང་ལ་དམིགས་པ་གཏད་ནས་བཟླས་པ་བྱེད་དུས། མར་འཁོར་བའི་དུས་ཀྱི་འཁྲུལ་གཏམ་ངག་གི་བག་ཆགས་སྦྱངས་ཤིང་དག ཡར་སངས་རྒྱས་ཀྱི་དུས་ཀྱི་སྣ་ཚོགས་ཆོས་ཆར་འབེབས་པའི་འབྲས་བུ་གཞི་ལ་རྫོགས། བར་ལམ་དུས་ཡིན་ན་ངག་དག་པ་རླུང་སྔགས་ལ་བརྟེན་ནས་རླུང་ལ་བརྟེན་པའི་རྫོགས་རིམ་གྱི་སྨིན་བྱེད་ལ་འགྲོ་རྒྱུ་དེ་འདྲ་རེད། དགོངས་པ་མི་འགྱུར་པའི་གཟེར་གྱིས། སྣང་སྲིད་འཁོར་འདས་ཆོས་ཐམས་ཅད། དག་མཉམ་སྟོང་པ་ཆེན་པོ་གཉིས་མེད་མཉམ་ཉིད་གྱི་ཀློང་དུ་གདོད་ནས་ཡེ་སངས་རྒྱས་པའི་ཆོས་ཉིད་ཀྱི་ལྟ་བ་ཡིས་རྩིས་ཟིན་སོང་དུས། མར་འཁོར་བའི་འཁྲུལ་སྣང་སེམས་ཀྱི་བག་ཆགས་ཐམས་ཅད་སྦྱངས་ཤིང་དག་པ་རེད། ཡར་སངས་རྒྱས་ཀྱི་དུས་ཐུགས་རྣམ་པ་མཁྱེན་པའི་འབྲས་བུ་གཞི་ལ་རྫོགས། བར་ལམ་གྱི་དུས་སུ་སྣང་བ་སྐུ། གྲག་པ་གསུང་། དྲན་རྟོག་ཐུགས་ཀྱི་ངོ་བོར་ཤར་བའི་སྨིན་བྱེད་ཀྱི་ཆ་རྐྱེན་ལ་སོང་ནས། དམིགས་པའི་སྤྲོ་བསྡུ་སྣ་ཚོགས་ཀྱི་ཡེ་ཤེས་སྒྱུ་མའི་རོལ་པ་དེས། ཞི་རྒྱས་དབང་དྲག་ལ་སོགས་པའི་ཕྲིན་ལས་བསྒྲུབས་ཤིང་འགྲུབ་པ་ཡིན་ན། མར་འཁོར་བའི་དུས་ཀྱི་སྒོ་གསུམ་གྱི་བྱ་བཞག་དང་བྱེད་པ་ཐམས་ཅད་སྦྱངས་ཤིང་དག ཡར་སངས་རྒྱས་ཀྱི་དུས་རྒྱལ་བའི་རྣམ་པ་ཐམས་ཅད་པའི་འབྲས་བུ་གཞི་ལ་རྫོགས། བར་ལམ་དུས་མཚན་བཅས་དང་མཚན་མ་བྲལ་བའམ་སྣང་བཅས་དང་སྣང་བ་མེད་པའི་ཡེ་ཤེས་ཀྱི་དགོངས་པ་ཐམས་ཅད། འོད་གསལ་འགྲོ་འོང་དང་བྲལ་བའི་མངོན་སུམ་གྱི་རྣལ་འབྱོར། སྣང་སྲིད་ཆོས་སྐུར་བཞེངས་པའི་སྨིན་བྱེད་ལ་འགྲོ་རྒྱུ་རེད། དེ་ལྟར་ན་ཏིང་འཛིན་ལྷ་ཡི་གཟེར་གྱིས་གཟུགས་སྣང་ལྷ་རུ་དག སྙིང་པོ་སྔགས་ཀྱི་གཟེར་གྱིས་ནུས་པའི་རྩལ་ཐོབ། འཕྲོ་འདུ་ཕྲིན་ལས་ཀྱི་གཟེར་གྱིས་ལས་བཞི་ཕྲིན་ལས་ཐོགས་མེད་དུ་འགྲུབ་པའི་མཐུ་ཐོབ། དགོངས་པ་མི་འགྱུར་བའི་གཟེར་ཟེར་ན་རྫོགས་རིམ་ཆོས་ཉིད་ཀྱི་ལྟ་བས་སྒོ་གསུམ་ལྷ་སྔགས་ཆོས་ཉིད་ཀྱི་རོལ་བར་ཤར་སོང་དུས་འཁོར་འདས་ཀྱི་སྟོང་སྲོག་དངོས་སུ་འཕྲོག་པའི་དུས་ལ་ཐོན་སོང་བ་རེད། དེ་དུས་གོང་དུ་བཤད་པའི་སྒོམ་པའི་འཕྲང་ལས་བུད་ནས་ལྟ་བའི་རྫོང་ཟིན་ཏེ་ཕྱི་དགྲ་འབྱུང་བཞི་སོགས་ཀྱི་གནོད་པ་དང་། ནང་དགྲ་ནད་དང་ཉོན་མོང། གསང་དགྲ་ང་བདག་བཟུང་འཛིན་གྱི་ཞེན་པ་ཐམས་ཅད་ཆོད་ནས། གསང་བའི་དགྲ་གསུམ་སོད། འཇིགས་པའི་བདུད་བཞི་ཆོམ། འགྲོ་དྲུག་གི་གཡང་ས་ཆོད་སོང་པ་རེད། དེ་ལྟ་བུའི་རྟོགས་པས་བདག་བསྒྲལ་དེ་སྔོན་ལ་སོང་ནས། གདུལ་བྱ་ཞི་བའི་ཕྲིན་ལས་ཀྱིས་མ་ཐུལ་པ་རྣམས་དྲག་པོ་མངོན་སྤྱོད་ཀྱི་ལས་ཀྱིས་འདུལ་དགོས་པ་དག་ལ། ཚར་གཅོད་དྲག་པོའི་ལས་ཀྱིས་ཐུགས་རྗེས་གཞན་སྒྲོལ་བའི་རྗེས་སུ་གནང་བ་འདི་ལྟར་བྱིན་གསུངས་པ་རེད། ཡིན་ན་ཡང་གོང་དུ་བཤད་པ་དེ་ལྟར་ཐོག་མ་ཉིད་ནས་ཀློང་དུ་གྱུར་པ་ཤ་སྟག་ག་ལ་ཡིན་ཏེ་མིན། གལ་ཏེ་ཡིན་ན་ལམ་ལ་འབད་པས་སློབ་དགོས་དོན་མི་འདུག་མོད། འདས་པའི་སངས་རྒྱས་ཐམས་ཅད་ཀྱང་ཐོག་མར་རང་རེ་དང་སེམས་ཅན་ཡིན་པའི་ཆ་ནས་འདྲ་ཡང་སངས་རྒྱས་ཐམས་ཅད་ལམ་ལ་བསླབས་ཏེ་རྟོགས་པ་མངོན་དུ་གྱུར་སོང་བ་ཡིན་ན། རྒྱུ་འབྲས་བཤད་པ་གཅིག་མཐུན་ཡིན་དུས་འདྲ་བ་ལམ་དུ་བྱས་འབྲས་བུ་དེ་བཞིན་འཐོབ་དགོས་པ་རེད། སེམས་བསྐྱེད་རྣམ་པ་དག་པས་ཟིན་པར་བྱས་ནས། སྙིང་རྗེ་ཁྲོས་པའི་ཞེ་སྡང་གིས། སྡིག་ཅན་ཉམས་པ་བདུན་ལྡན་ནམ་ཞིང་བཅུ་ཚང་པའི་འགྲོ་བ་སྒྲོལ་བར་རྩོམ་རྒྱུ་དེ་ཡང་། སྤྱིར་ན་སྲས་བཅས་རྒྱལ་བ་སྤྱི་ཡི་བསླབ་བྱ། ཁྱད་པར་དུ་རིག་པ་འཛིན་པ་གོས་དཀར་ལྕང་ལོ་འཆང་ནས་བསྟན་པ་སྲུང་བའི་ཁུར་ཆེན་སྣོམ་མཁན་ཚོས། འདི་ལ་བསྙེན་སྒྲུབ་མཐར་ཕྱིན་གྱི་སྒོ་ནས་འབད་དགོས་པ་རེད། འབད་པར་བྱས་ན་རང་རེ་སྔ་འགྱུར་བའི་སྔོན་དུས་ཀྱི་སྔགས་པའི་རྒྱལ་པོ་སོ་ཟུར་གནུབས་གསུམ་དང་། དུས་ཕྱིའི་རང་རེའི་ཆོས་བརྒྱུད་ལ་བྱོན་མྱོང་པའི་རྡོ་རྗེའི་གདུང་ཆེན་བཞི་ལ་སོགས་པའི་རྗེས་མི་ཟིན་རྒྱུ་ཅི་ཡོད། དུས་ངན་རེད་ཟེར་ནས་ངན་སྐྱོན་ཚང་མ་དུས་ཀྱི་མགོ་ལ་བསྒྱུར་ཐུབ་རྒྱུ་མ་རེད། ལྷག་པར་ཁར་རྩང་བཤད་པ་ལྟར་མུན་པ་ནག་ཅིང་ནག་ལ་སྒྲོན་མེའི་འོད་ལྷག་པར་གསལ་བ་བཞིན་དུ་དུས་སྙིགས་མར་གྱུར་ཕྱིན་གྱུར་ལ་གསང་སྔགས་ཀྱི་བྱིན་རླབས་ལྷག་ཏུ་ཆེ་བར་མ་ཚད་བཀའ་མའི་རིང་བརྒྱུད་ཀྱི་བྱིན་རླབས་ཉམས་དང་འདྲེས་ཁྱེར་གྱིས་སླད་པའི་སྐབས་སུ་གཏེར་མའི་ཉེ་བརྒྱུད་ཀྱི་བྱིན་རླབས་ལྷག་པར་མྱུར་ལ་རྣོ་ངར་ཆེ་བ་རེད། སྔགས་པ་ལ་ནུས་མཐུ་ཡོད་མེད་དང་དམ་ཅན་སྲུང་མ་འགོ་དང་མི་འགོ་དེ་ཡང་། རྩ་བ་ངོ་མ་དམ་ཚིག་གཙང་མ་ཞིག་རང་རྒྱུད་ནས་བསྲུངས་ཡོད་མེད་ཀྱི་གནད་གཅིག་པུ་ལ་ཐུག་ཡོད། མཚམས་འདི་ནས་བསྒྲལ་བ་དངོས་ལ། མི་ལྡོག མི་རྡུགས། མི་འབྱམས་པ་གསུམ་གྱི་ཆེད་དུ་གསལ་བ་གསུམ་གྱི་ཏིང་འཛིན་དང་མ་བྲལ་པར་བསྒྲལ་བའི་ལས་ལ་འཇུག་དགོས་གསུངས་ཡོད་པས། དང་པོར་མི་ལྡོག་གསུངས་པ་ནི། དམོད་པའི་དྲག་སྔགས་དགྲ་ལ་བསྐོར་རྒྱུ་དེ་མཐུ་ཕྱིར་རུ་ལོག་མི་ཡོང་པ་ལ་གསུངས་པ་རེད། མི་རྡུགས་གསུངས་པ་ནི། རྣོ་སོ་རྡུགས་སོང་བའི་མཚོན་ཆ་ལྟ་བུ་བཏབ་པའི་མཚོན་ཆའི་རྣོ་སོ་ནུས་མེད་ལ་མི་རྡུགས་རྒྱུ་རེད། དེའི་སྟེང་དུ་མི་འབྱམས་གསུངས་པ་ནི། བཟང་མེད་ངན་མེད་རྒྱུན་འབྱམས་ལ་ལོག་ནས་ཕབ་པའི་དྲག་པོའི་ཕྲིན་ལས་རྟགས་ཐོན་རྒྱུ་མེད་པར་རེད་མི་འགྲོ་བའི་ཆེད་དུ་ཡིན། དེ་ནས་གསལ་བ་དང་པོ་ནི། སྒྲོལ་མཁན་སློབ་མ་རང་ཉིད་དབང་ཆེན་རྟ་མཆོག་རོལ་བར་དངོས་སུ་གསལ། སྒྲོལ་བྱེད་ཀྱི་ལག་གི་ཕུར་པ་དེ་སྲས་མཆོག་ཡཀྵ་ཀྲོ་དྷ་ཡིན་པར་གསལ། མདུན་དུ་ཡོད་པའི་བསྒྲལ་བྱ་མཚན་མ་རྫས་ཀྱི་རྟེན་དེ་དགྲ་བགེགས་དངོས་ལ་གསལ་ནས་དེའི་གསལ་བ་གསུམ་པོ་ཚང་དགོས། དྲག་པོ་སྒྲོལ་བའི་ལས་སྦྱོར་བྱེད་རྒྱུ་ལ་གོང་ནས་བཤད་མ་ཐག་པའི་རྫོང་འཕྲང་གཉིས་ཀའི་ལྟ་སྒོམ་དག་པའི་ཤེས་རབ་དང་ཏིང་ངེ་འཛིན་གྱི་ནུས་པ་རྫོགས་དགོས། དེ་མ་རྫོགས་ན་གསང་བའི་དགྲ་གསུམ་གྱིས་རང་རྒྱུད་ཚུར་བསྲེག འཇིགས་པའི་བདུད་བཞིས་རང་སྲོག་ལ་རྒོལ། དེའི་སྐབས་སུ་འགྲོ་དྲུག་གི་གཡང་ས་ཆོད་ཐབས་མེད་པའི་མཐའ་ལ་ལྷུང་སོང་བ་རེད། དེ་ལྟར་མ་ཡིན་པའི་རྫོང་འཕྲང་གཉིས་ཀྱི་གནད་ཟིན་དུས་འཁོར་འདས་གཉིས་ཀྱི་སྟོང་སྲོག་འཕྲོག་ཟེར་རྒྱུ་དེ་གང་འདྲ་ཞིག་རེད་ཟེར་ན། སྲོག་ཅེས་པའི་སྒྲ་གཅིག་ལ་མི་འདྲ་བའི་སྲོག་གི་དབྱེ་བ་མང་པོ་ཡོད་རེད། ཆགས་པ་ཁྲག་གི་སྲོག གནས་པ་དོན་གྱི་སྲོག འཁྲུལ་པ་ཡིད་ཀྱི་སྲོག རྩ་རླུང་ཐིག་ལེའི་སྲོག་སོགས་ཀྱི་དབྱེ་བ་མང་པོ་གསུངས་ཡོད། རྩ་རླུང་བྱང་ཆུབ་སེམས་ཀྱི་སྲོག་ལ་དབང་ཐོབ་པ་བརྒྱུད་ནས། གནས་པ་དོན་གྱི་སྲོག་གམ་གཉུག་མ་རྡོ་རྗེའི་སྲོག་ལ་དབང་འབྱོར་བ་དེ་བདེ་བར་གཤེགས་པའི་སྲོག་རེད། དེ་ཡང་ཆོས་དང་ཆོས་ཉིད་རོ་གཅིག་འཁོར་འདས་ཡོངས་ལ་ཁྱབ་པའི་ཆོས་དབྱིངས་བྱང་ཆུབ་ཀྱི་སེམས་ཡིན་ན། དེ་ནི་ལྟ་བས་གཏན་ལ་དབབ་བྱ་ཞིག་ཡིན་པས་དེ་ཉིད་ལ་འཕྲོག་བྱ་འཕྲོག་བྱེད་མི་སྲིད་པ་རེད། ཆོས་ཉིད་དེ་ལྟ་བུ་ལས་ཆོས་ཅན་འཁོར་འདས་ཀྱི་སྣང་བ་སྣ་ཚོགས་བྱུང་བ་ཡིན་ན། གཉུག་མའི་སྲོག་ལ་དབང་ཐོབ་པའི་སངས་རྒྱས་ཐམས་ཅད་ཀྱི་འཕོ་བྲལ་འཆི་མེད་རྡོ་རྗེའི་སྐུ་བརྙེས་སོང་བའི་སྟབས་ཀྱིས་སྐྱེ་འཆི་མཚན་མ་མི་མངའ་བ་རེད། ཆོས་ཉིད་ཟབ་མོའི་དོན་མ་རྟོགས་ཤིང་གདེང་དུ་མ་གྱུར་པའི་ཆགས་པ་ཁྲག་གི་སྲོག་ཅན། ལུས་ལ་ཆགས་ཤིང་དེ་ལ་སེམས་བརྟེན་པའི་སེམས་ཅན་སྲོག་ཆགས་གཟུགས་ཅན་ཐམས་ཅད་དང་། འཁྲུལ་བ་ཡིད་ཀྱི་སྲོག་ཅན་ནི། ཡིད་ལུས་ལ་བརྟེན་པའི་མི་མ་ཡིན་ཚོའི་སྲོག་དེ་རེད། དེའི་སྲོག་དེ་གཅད་རྒྱུ་དང་དབང་དུ་བྱེད་རྒྱུ་ཡོད། དེའི་ནང་གི་ཁྱད་པར་དུ་ཆགས་པ་ཁྲག་གི་སྲོག་ལྡན་རིགས་དྲུག་གང་གི་རྟེན་ཅན་ཡིན་ཡང་ཚང་མ་ཉམས་ཤིང་འཕོ་བའི་ཚེ་དང་ལྡན་པས་སྐྱེ་འཆིའི་འཇིགས་པ་ལས་མ་ཐར་པ་རེད། མི་ལ་སོགས་པའི་ལུས་ཅན་ཕལ་ཆེར་བའི་སྲོག་ནི་རང་རང་གི་སྙིང་ཁ་ལ་སྲོག་གི་ས་བོན་ཡིག་འབྲུའི་རྣམ་པར་གནས་ཡོད་པ་རེད། དེས་ན་ཤིན་ཏུ་གདུལ་དཀའི་འགྲོ་བ་ལ་ལྷག་པར་བརྩེ་བའི་སྙིང་རྗེའི་ཀུན་ནས་བསླངས་ཏེ་མཉམ་ཉིད་གདེང་དུ་གྱུར་ཅིང་རྟེན་འབྲེལ་སྒྱུ་མའི་རང་བཞིན་ལ་བློ་བྱང་ཆུབ་ནས་ཤེས་རབ་དང་ལྡན་པ་དང་། དགོངས་སྤྱོད་ཏིང་འཛིན་ཟབ་མོ་ལ་དབང་འབྱོར་བའི་ཐོག་ནས་ལས་རུང་སྔགས་ཀྱི་མཐུ་དང་། ཐབས་མཁས་ལྡན་པའི་རྣལ་འབྱོར་པས་གདུལ་བྱའི་ལས་ངན་རྒྱུན་གཅད་པའི་ཆེད་དུ། སྙིང་རྗེའི་དབང་གིས་བསྒྲལ་བའི་ལས་སྦྱོར་མཛད་པ་རེད། དེ་དུས་ལ་བབས་ཀྱང་ད་རུང་དང་དུ་མ་བླངས་ན་དམ་ཚིག་ཉམས་པའི་རྒྱུར་ཡང་འགྱུར་གསུངས་ཡོད། དྲག་པོ་བསྒྲལ་བའི་དབང་ངམ་རྗེས་གནང་འདིའི་ཐོག་མ་ཐུགས་དམ་བསྐུལ་བ་དང་གཟུ་དཔང་བསྐྱེད་པ་འབྱུང་བས་དང་པོར་དེ་འདོན་རྒྱུ་བྱེད་དགོས། མཚམས་འདིར། ཧཱུྃ། ཁྱབ་བདག་གདོད་མའི་མགོན་པོ་མན་ཆད་ནས། །མངོན་པར་བྱང་ཆུབ་དཔལ་མགོན་བླ་མའི་བར། །སོགས་གསེར་སྐྱེམས་གཟུ་དཔང་དང་བཅས་པ་གསུངས་མཐར། བསྒྲལ་བའི་ལས་ཚོགས་འདི་གདབ་ལས་དང་བསྟབ་པའི་ཆོ་ག་གཉིས་ཀྱི་ཁོངས་སུ་འདུས་པ་རེད། གདབ་ལས་ཀྱི་ཐོག་མར་གཙོ་དམིགས་འབྱུང་། གཙོ་དམིགས་དེ་ནི། ཨེ་ལས་གནམ་ལྕགས་འབར་བའི་ལྕགས་སྒྲོམ་གྲུ་གསུམ་སྒོ་མེད་མུན་པ་ཅན། ཡ་ང་འཇིགས་སྐྲག་སྐྱི་གཡའ་བ་ཞིག་གི་ནང་དུ་ནྲྀ་དང་ཡང་ན་ཏྲི་ལས་གནོད་བྱེད་ཉམས་པ་བདུན་ལྡན་གྱི་དགྲ་བགེགས་དེ་ཡན་ལག་ལྕགས་སྒྲོག་གིས་བཅིངས་བ་ཉམ་ཐག་པའི་གཟུགས་ཅན་མངོན་སུམ་བཞིན་དུ་གསལ་དགོས་པ་རེད། དེ་ཡང་དགྲ་བོའི་གཟུགས་རྟེན་མཚན་མ་རྫས་ཀྱི་འདུ་ཤེས་པ་དེ་ཉིད། འཁོར་བ་རུ་ལོག་གི་རྟེན་འབྲེལ་ལ་མགོ་བོ་རྒྱབ་བསྟན། རྐང་པ་རང་བསྟན་ལ་གན་ཀྱལ་དུ་བཞག་ནས་དགུག་འཆིང་སྡམ་མྱོས་བཞིའི་སྔགས་ཕྱག་རྒྱ་དང་བཅས་པས་ལས་ལ་སྦྱོར་དགོས་པ་རེད། མཚམས་འདི་ནས། བཛྲ་ཀྲོ་དྷའི་སྔགས་ཀྱིས་ཕུར་བསྐོར་མཛད་མཐར། གོང་དུ་བསྒྲལ་བའི་སྐབས་སུ་ཕུར་བསྐོར་བྱེད་རྒྱུ་དེ་ཨཱོཾ་བཛྲ་མ་ཧཱ་ཀྲོ་དྷ་དང་སྦྲགས་ནས་སྲུང་བའི་ཕྱིར་དུ་ལན་གསུམ་ནང་དུ་བསྐོར། དེའི་འཕྲོར་པདྨ་ཀྲོ་དྷཱི་ཤྭ་རཱི་དང་སྦྲགས་ནས་རང་ལ་མི་ལྡོག་པ་བྱ་བའི་ཕྱིར་དུ་སྐེད་པར་ལན་གསུམ་ཕྱིར་ལ་བསྐོར། བཛྲ་ཀཱི་ལི་ཀཱི་ལ་ཡ་དང་ལྷན་དུ་གཟིར་བའི་ཕྱིར་དུ་ལན་གསུམ་མདུན་དུ་སྒྲིལ། མ་ཧཱ་ཡཀྵ་དང་སྦྲགས་ནས་ཕོ་རྒྱུད་དགུག་པའི་ཕྱིར་དུ་གཡས་སུ་ཚམ་རྔམ་ལན་གསུམ་བྱས། ཀཱ་ལ་རཱུ་པ་དང་སྦྲགས་ནས་ལན་གསུམ་མདུན་དུ་སྒྲིལ། ཀརྨ་རྃ་རྃ་དང་ལྷན་དུ་མོ་རྒྱུད་དགུག་པའི་ཕྱིར་དུ་གཡོན་དུ་ཚམ་རྔམ་ལན་གསུམ་བྱས། དེའི་འཕྲོའི་ཛྭ་ལ་རྃ་དང་སྦྲགས་ཏེ་མདུན་དུ་ལན་གསུམ་སྒྲིལ། མ་ར་ཡ་ཧཱུྃ་ཡང་ན་ཧཱུྃ་ཕཊ་དང་ལྷན་དུ་གར་པད་ཀྱིས་ཕུར་དར་ནམ་མཁའ་ལ་ཡར་ཕྱར་ཏེ་ཉ་བོ་ལ་བཏབ་ནས་བསྒྲལ་བ་དངོས་ཀྱི་ལག་ལེན་ལ་འཇུག་རྒྱུ་འདི། སྔ་འགྱུར་གདན་ས་དྲུག་གི་ནང་ནས་དུས་ཕྱིས་ཀྱི་གཤིན་རྗེའི་ལས་ཚོགས་ལ་བརྟེན་ཏེ་མངོན་སྤྱོད་ཀྱི་ལས་ལ་མཐུ་གྲུབ་པའི་རིག་འཛིན་པདྨ་ཕྲིན་ལས་ལ་སོགས་པའི་ཕྱག་རྒྱུན་ལྟར་དུ་རེད། མཚམས་འདི་ནས་བསྒྲལ་དབང་བསྐུར་བ་དངོས་ལ་ཐུག་འདུག ཡང་འདི་ནས། ཁྱེད་རྣམས་དབང་ཆེན་རྟ་མཆོག་རོལ་བར་གསལ་བའི་ལག་གཉིས་རིགས་ལྔ་ཡབ་ཡུམ་གྱི་སྦྱོར་མཚམས་སུ་ཧཱུྃ་ལས་སྐྱེས་པའི་སྒྲོལ་བྱེད་ཡཀྴ་ཀྲོ་དྷ་སྐུ་སྟོད་ཁྲོ་བོ་སྐུ་སྨད་རྣོ་དབལ་ཕུར་པའི་མཚོན་ལྡན་བསྒྲིལ་ཞིང་གསུངས་པ་སོགས་ཀྱི་དབང་བཤད་མཛད་མཐར། འདི་ནས་བསྒྲལ་བའི་ལས་མཐའི་བསྒྲལ་དབང་དངོས་ལ་ཐུག་པ་རེད། ཡིན་ན་ཐོག་མ་རང་ཉིད་འཇིགས་མེད་རྡོ་རྗེ་སྲུང་བའི་གཙོ་འཁོར་ལ་ཞུགས་ནས། ཟློག་པ་ཆོས་ཉིད་ཟབ་མོའི་བདེན་མཐུའི་རྒྱབ་དཔུང་དང་བཅས་པའི་སྲུང་ཟློག་གཉིས་ཀྱི་གནད་དང་ལྡན་པའི་སྒོ་ནས། གོང་དུ་བཤད་པའི་རྫོང་འཕྲང་སྲོག་གསུམ་གྱི་སྒོ་ནས་བསྒྲལ་ལས་ལ་འཇུག་དགོས། འདིའི་སྐབས་སུ་གསལ་བ་གསུམ་གྱི་ངར་དང་ལྡན་པའི་སྒོ་ནས་རང་བཞིན་གྱིས་སྒྲོལ་བའི་ལྟ་བ་དང་། སྙིང་རྗེས་སྒྲོལ་བའི་སྒོམ་པ། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པ་སྟེ། དེ་ལྟ་བུའི་ལྟ་སྒོམ་སྤྱོད་གསུམ་དང་ལྡན་ཞིང་། ཚད་མེད་བཞིའི་བློ་དང་མ་བྲལ་བཞིན། མཚན་མ་རྫས་ཀྱི་ཕུར་པ་བྱུག་བདུག་བྲབ་གསུམ་གྱིས་གཟི་བྱིན་བསྐྱེད་པ་དེས། གང་བསྒྲལ་བྱ་དེ་ཉིད་ཚེ་ལུང་ཁྲུས་ལུང་གནས་ལུང་གསུམ་གྱི་དགོངས་པ་ཡིས་ཚར་གཅད་པར་བྱ་དགོས། ཚེ་ལུང་གང་ཡིན་ན། ཕུར་བུ་སྒྲིལ་བའི་འོད་ཟེར་གྱིས་ཕྱོགས་དུས་རྒྱལ་པའི་བྱིན་རླབས་དང་ནུས་མཐུ་ཐམས་ཅད་བཀུག་ནས་ཕུར་བར་ཐིམ་པས་ཕུར་བ་གདེང་བ་ཙམ་གྱིས་སྲིད་པ་གསུམ་ཡང་བརླག་ཐུབ་པའི་ནུས་མཐུ་ཅན་དུ་གྱུར་པར་བསམ་ནས། ཟུར་གསུམ་ཕུར་བུའི་རྩེ་དེ་དམིགས་བྱའི་སྙིང་ཁར་བསྣུན་དུས། ཁོའི་སྙིང་ཁྲག་གི་དྭངས་མའི་དཀྱིལ་གྱི་ཚེ་ཡི་རྟེན་ཨ་དཀར་འོད་ཀྱི་ཐིག་ལེའི་ནང་ན། སྲོག་གི་སྤྱི་དཔལ་ནྲི་ཡིག་ལྗང་གུ་ཡོད་པ་དེར་ཐེབས་ནས་ཕུར་རྩེའི་གཤོང་གསུམ་དུ་ཕཊ་གསུམ་དང་ཟུར་གསུམ་སུམ་འདུས་ཀྱི་རྩེ་མོ་ངོ་མ་ན་ཧཱུྃ་གསུམ་ཡོད་པ་དེས་ཁབ་ལེན་གྱིས་ལྕགས་ཕྱེ་བླངས་པ་ལྟར་བྱས་ཏེ། ཨ་དཀར་ཕུར་རྩེར་དྲངས་ནས་རང་ཉིད་ལ་བསྟིམས་པས་རང་གི་ཐུགས་སྲོག་འདྲེས་པ་དང་མཉམ་དུ་དགྲ་བོའི་བླ་ཚེ་སྲོག་གསུམ་དབང་ཐང་བསོད་ནམས་ཐམས་ཅད་རང་ལ་ཐོབ་པར་བསམ། རང་ཉིད་སྐྲག་མདངས་གཟི་བྱིན་འབར་བར་གྱུར་ནས་རྡོ་རྗེའི་སྲོག་ལ་དབང་ཐོབ་པར་བསམ་དགོས། དེ་ཚེ་ལུང་རེད། དེ་དང་ཆབས་ཅིག་ཏུ་དགྲ་བོའི་རྣམ་ཤེས་ནྲི་ཡིག་ལྗང་གུའི་རྣམ་པ་གནས་པ་དེ་ལ་ཕུར་པ་ཐེབས་སོང་དུས། དགྲ་བོའི་དྲན་པ་ནག་འཐུམ་གྱིས་ཉམས་སོང་བ་དེས་སྒོ་གསུམ་སྡིག་སྒྲིབ་བག་ཆགས་དང་བཅས་པ་ཐམས་ཅད་ཕུར་རྩེ་མཁའ་ལ་གདེང་བ་དང་བཅས་པས་ཕཊ་གསུམ་གྱིས་བསྐུལ་ཏེ་ཧཱུྃ་གསུམ་དང་དབྱེར་མེད་དུ་འདྲེས་པ་ལ་དམིགས་པ་དེ་ཁྲུས་ལུང་རེད། དེའི་མཚམས་ན་དེ་ལྟར་འདྲེས་པའི་རྣམ་ཤེས་དེ་ཉིད་མགོན་པོ་འོད་དཔག་མེད་ཀྱི་ཐུགས་ཀར་བསྟིམས་པས་བདེ་བར་གཤེགས་པའི་སྲས་སུ་བསྐྲུན་པ་དེ་གནས་ལུང་ཡིན། སླར་ཡང་གནས་སོ་སོར་ཕུར་པ་གདབ་སྟེ་ནན་གྱིས་བསྐྱར་ནས་ཕྱིར་མི་ལྡོག་པའི་འཁོར་རྒྱུན་བཅད་ནས། སྲིད་པ་རྒྱུན་གཅོད་ཀྱི་ཕྱག་རྒྱ་ཡིས་རྒྱས་བཏབ་པ། དེ་ལྟ་བུའི་བསྒྲལ་ལས་བྱེད་དུས་འཚེངས་པ་གསུམ་ལྡན་དུ་འགྱུར་དགོས། སྒྲོལ་མཁན་རྣལ་འབྱོར་པ་ཚེ་ལུང་གིས་འཚེངས། ཚེ་བསོད་ཁ་རྗེ་དབང་ཐང་རང་གི་བཅུད་དུ་བྱུང་། བསྒྲལ་བྱ་གཟས་པོ་གང་ཡིན་པ་དེ་ཉིད་ཁྲུས་ལུང་དང་གནས་ལུང་གིས་འཚེངས། མ་དག་འཁོར་བའི་སྡུག་བསྔལ་རྒྱུར་བཅས་ཀྱི་རྒྱུན་བཅད་ནས་དག་པའི་ཞིང་དུ་བདེ་བར་གཤེགས་པའི་སྲས་སུ་འགྱུར། གནས་ལུང་དང་ཁྲུས་ལུང་གིས་བསྒྲལ་བྱའི་གཟས་པོ་དེ་ཉིད་འཚེངས་པ་གྱུར། རྒྱལ་བ་སྲས་བཅས་མཆོད་པས་འཚེངས། སྦྱོར་སྒྲོལ་ཏ་ན་ག་ཎའི་མཆོད་པ་ཡེ་སྦྱོར་ཡེ་སྒྲོལ་ཆེན་པོའི་ཟག་མེད་གསང་བའི་བདེ་ཆེན་གྱིས་མཉེས་པར་གྱུར། ད་དུང་དེའི་སྟེང་དུ་དཀྱིལ་འཁོར་གྱི་ལྷ་ཚོགས་སྙིགས་མའི་ཤ་ཁྲག་གིས་འཚེངས། རགས་པའི་ཤ་ཁྲག་རུས་གསུམ་གང་འདོད་བདུད་རྩིའི་སྤྲིན་དུ་རོལ་པས་ཚིམ་པར་གྱུར། དེའི་དབང་གིས་སངས་རྒྱས་ཀྱི་བསྟན་པ་བར་ཆད་དང་བྲལ་བས་འཚེངས་པར་གྱུར་པ་རེད། དམ་དགྲ་ངན་པའི་ངང་ཚུལ་ཅན་ཕྱི་ནང་གཉིས་ཀའི་མཚམས་འདི་ནས། སྒྲུབ་ལ་བར་དུ་བཅད་ཅིང་དངོས་གྲུབ་ལ་གེགས་བྱེད་པའི་མ་རུང་གནོད་བྱེད་དེ་མེད་སོང་བས། བསྟན་པ་དཀར་འཇམ་ཡུག་གཅིག་ཏུ་སོང་བའི་ཐོག་ལ་དབང་དང་རྗེས་གནང་འདི་ལ་བརྟེན་ཏེ། རྣལ་འབྱོར་པའི་ནུས་མཐུ་བསྐྱེད་དེ། ནུས་མཐུ་གོང་ནས་གོང་དུ་སྤེལ་བའི་ཕྱིར་དུ། ཤུགས་སྒྲོལ་དྲག་པོའི་ཕྲིན་ལས་ཉམས་ང་མེད་པ་སོགས་དེ་ལྟ་བུའི་དགོས་པ་མང་པོ་དང་ལྡན་པ་རེད། བསྒྲལ་བའི་ལས་ཀྱི་མཐའ་མ་དེ་བསྟབ་པ་རེད། དེ་གང་ཡིན་ཟེར་ན། ལྷ་ཚོགས་ཀྱི་ཞལ་དུ་འབུལ་བ་གཞུང་ནས་འབྱུང་བ་ལྟ་བུ་ཡིན། ད་ནི་བསྒྲལ་དབང་དངོས་ལ་འཇུག་རྒྱུ་རེད། ཁྱེད་རྣམ་པས་ཕུར་པ་དེ་ལན་གསུམ་དུ་བསྒྲིལ་ནས་དེའི་འཕྲོའི་གཟས་པོའི་སྙིང་ཁར་གཏད་ནས་ཚེ་བསོད་ཨ་དཀར་གྱི་རྣམ་པ་རང་ལ་བསྟིམས་པའི་མོས་པ་ཡིས་ཚེ་ལུང་། སླར་ཡང་ཕུར་པ་སྙིང་ཁར་གཏད་པས་གཟས་པོའི་རྣམ་ཤེས་བདེ་བར་གཤེགས་པའི་ཐུགས་ཀར་བསྟིམས་པ་ཁྲུས་ལུང་དང་གནས་ལུང་། དེའི་མཐར་གནས་སོ་སོར་གདབ་པ་ཕྱིར་མི་ལྡོག་པའི་བྱ་བ་དང་བཅས་པའི་བསྒྲལ་ལས་མཛད་དགོས། ཉིན་དྲུག་པའི་དབང་དོན་ཟབ་ཁྲིད།དེ་ནི། ཡང་དག་སངས་རྒྱས་མཉམ་སྦྱོར་གྱི་དབང་དང་ཕུར་པ་བདུད་དཔུང་ཟིལ་གནོན་གྱི་དབང་སོགས་ཡིན། བླ་མས་ལོ་རྒྱུས་ཀྱི་དབང་ཆོག་གསུངས། རྡོ་རྗེ་སློབ་དཔོན་སངས་རྒྱས་དཔལ། །སོགས་ཀྱི་རྗེས་ཟློས་མཐར། འདི་ན་ཡང་དག་གསུངས་རྒྱུ་འདི་སྒྲིབ་པ་མི་མངའ་བའི་དོན་ཞིག་རེད། གང་ལ་སྒྲིབ་པའི་དྲི་མ་མི་མངའ་བ་དེ་སངས་རྒྱས་ཀྱི་ཐུགས་ཡང་དག་པའི་ཡེ་ཤེས་རེད། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད། གཉིས་མེད་མཉམ་ཉིད་རང་བྱུང་གི་ཡེ་ཤེས། སྤྲོས་བྲལ་མ་བཅོས་ཐིག་ལེ་ཉག་ཅིག་ཏུ་གནས་པ་དེ། དུས་གསུམ་རྒྱལ་པའི་ཐུགས་ཡིན་པས། དེ་ནི་མ་སྐྱེས་པའི་ཆོས་སྐུ། མ་འགག་པའི་ལོངས་སྐུ། སྣ་ཚོགས་འཆར་བའི་སྤྲུལ་སྐུའི་རང་བཞིན་ཅན་ཞིག་ཡིན་ན། དེ་ལྟ་བུའི་ཆོས་ཉིད་མཉམ་པ་ཆེན་པོ་ཡང་དག་པའི་ཡེ་ཤེས་ཐིག་ལེ་ཉག་ཅིག་ལ་རྫོགས་པ་ཡིན་པ་ཤེས་པར་བྱ་རྒྱུ་དེ། ངེས་པར་དོན་གྱི་དཔལ་ཆེན་པོ་ཡང་དག་ཐུགས་ཀྱི་སྒྲུབ་པ་རེད། རྣལ་འབྱོར་སྒྲུབ་པ་པོ་རང་ཉིད་ཀྱི་ལུས་ངག་ཡིད་གསུམ་དང་དཔལ་ཆེན་པོའི་སྐུ་གསུང་ཐུགས་ཡེ་ནས་གཉིས་སུ་མེད་པ་དེ་མངོན་དུ་བརྙེས་དུས་དཔལ་ཆེན་ཡང་དག་ཧེ་རུ་ཀ་འགྲུབ་སོང་བ་རེད། དེས་ན། སྨིན་པར་བྱེད་པ་དབང་ནས་བརྩམས་ཏེ་གྲོལ་བྱེད་བསྐྱེད་རྫོགས་རིམ་གཉིས་ཀྱི་ལམ་ལ་སློབ་དགོས་པ་ཡིན་ན། དབང་ཟེར་རྒྱུ་འདི་སྔར་མེད་གསར་དུ་ཐོབ་ཡོང་རྒྱུ་ཞིག་ལྷག་གི་མ་རེད། རང་གནས་རིག་པ་བྱང་ཆུབ་ཀྱི་སེམས། སྐུ་བཞི་རང་ཆས་སུ་གནས་པའི་ཡོན་ཏན་དེར་གློ་བུར་གྱི་སྒྲིབ་པས་བསྒྲིབས་ནས་མངོན་དུ་མ་གྱུར་པ་དེ། སློབ་དཔོན་མཚན་ཉིད་དང་ལྡན་པའི་ཤེས་རབ་དང་ཏིང་འཛིན་ཟབ་མོའི་སྔགས་ཀྱི་ཆོ་གས་བསྐུར་ཐབས་བྱིན་རླབས་ཀྱི་རྒྱུན་མ་ཉམས་པའི་དབང་མཆོག་ཞིག་ལ་བརྟེན་ཏེ། སློབ་མའི་རྒྱུད་ཀྱི་སྒྲིབ་པ་གློ་བུར་པ་རྣམས་དག་ཅིང་། འབྲས་བུ་ཐོབ་རུང་གི་ནུས་པ་ཁྱད་པར་ཅན་གྱི་ཡེ་ཤེས་དེ་ཉིད་ཐོབ་པའམ་མངོན་དུ་གྱུར་པ་ཞིག་ལ་དབང་གསུངས་པའོ། དབང་གསུངས་རྒྱུ་དེ་ནི། གཅིག་འབྲས་བུ་ཐོབ་པ་དང་། གཉིས་དེའི་ལམ་སྒོམ་པ་ལ་དབང་པས་ན་དབང་གསུངས་པ་རེད། དེ་ལྟར་ན་ནང་འཇུག་གི་ཐོག་མ་ལ་སློབ་མ་ལྷར་བསྐྱེད་དེ་བྱིན་འབེབ་པར་བྱས། བྱིན་ཕབ་ན་རང་འབྲས་ཡེ་ཤེས་པ་སྤྱན་དྲངས་པ་རེད། བྱིན་དབབ་ཟེར་རྒྱུ་དེ་ཡང་དོན་དམ་པར་ཆོས་སྐུའི་རང་བཞིན་དང་བདེ་བར་བཤེགས་པའི་ཡེ་ཤེས་ཀྱིས་མ་ཁྱབ་པ་མེད་ན། གཞན་ནས་གཞན་དུ་སྤྱན་དྲང་ཡོང་རྒྱུ་ཞིག་མེད་ཀྱང་། ཡེ་ཤེས་ཀྱི་ལྷ་ལ་དབང་མི་ཟ་རྒྱུ་དང་དེའི་རང་བཞིན་ཇི་ལྟར་ཡིན་པའི་ངེས་པ་སྐྱེ་ཆེད་དུ། དམ་ཚིག་པ་ལ་ཡེ་ཤེས་པ་དབྱེར་མེད་གནས་པའི་གསལ་འདེབས་སུ། སྐུལ་བ་གསུམ་གྱིས་ཐུགས་ཀྱི་རྒྱུད་བསྐུལ་ནས་སྤྱན་དྲངས་ཏེ། སྔགས་དང་ཕྱག་རྒྱར་བཅས་པའི་དམ་ཡེ་དབྱེར་མེད་དུ་བསྟིམས་པར་བྱས་པས་ན། གཟི་བྱིན་བསྐྱེད་ནས་མདངས་ཕྱུང་བ་ཞིག་རེད། དེའི་མཚམས་སུ་གསང་བའི་དེ་ཉིད་བསྟན་པ་ལ་དཀྱིལ་འཁོར་གྱི་སྒོ་ཕྱེས་པ་རེད། དཀྱིལ་འཁོར་གྱི་སྒོ་ཕྱེས་ནས་རྨོངས་པས་བསྒྲིབས་པའི་མིག་སྐྱོན་དེ་བསལ་ཏེ། ཤེས་རབ་ཀྱི་སྣང་བ་ཆེན་པོ་བྱིན་ནས་དཀྱིལ་འཁོར་གྱི་མཐོང་བ་བསྟན་པའི་སྐབས། ཧེ་རུ་ཀ་གལ་པོའི་རྒྱུད་ཀྱི་དགོངས་དོན་བཞིན་དུ། རང་སེམས་བྱང་ཆུབ་ཀྱི་སེམས་རྒྱལ་བ་ཀུན་གྱི་ཐུགས་ཀྱི་སྙིང་པོ་རུ་ལུ་འབྲུ་བརྒྱད་རིན་ཆེན་གསེར་གྱི་ཕྲེང་བ་ལྟ་བུ་དེ། གཅིག་ནས་མང་པོར་འཕྲོས་ཏེ་དགུ་རུ་སྣང་བ་དེ། ཡང་དག་ཟླ་གམ་དགུ་པའི་དཀྱིལ་འཁོར་གསུངས་པ་ཡིན་ན། དེའི་ཟླ་གམ་དབང་གི་དཀྱིལ་འཁོར་གྱི་ཕོ་བྲང་དབུས་མའི་ཙཀྲ་རྩིབས་བརྒྱད་ཀྱི་ལྟེ་བར་གསུངས་པ་རེད། དཔལ་ཆེན་བཛྲ་ཧེ་རུ་ཀ་ཡང་དག་སངས་རྒྱས་མཉམ་སྦྱོར་གྱི་ཆེ་མཆོག་ཁྲོ་བོའི་རྒྱལ་པོ་དེའི་སྐུ་མདོག་མཐིང་ནག་དབུ་གསུམ། ཕྱག་དྲུག་ཞབས་བཞི་ད་ལྟར་གོང་དུ་གསུངས་མ་ཐག་པ་ལྟར། གཡས་ཞལ་དཀར་པོ། གཡོན་ཞལ་དམར་པོ། རྩ་ཞལ་མཐིང་ནག་དབུ་སྐྲ་ཁམ་ནག་གི་རལ་བ་གྱེན་དུ་འཁྱིལ་བ། རྩེ་མོ་ན་ཡེ་ཤེས་ཀྱི་མེ་འབར་བ་རྩ་བ་ན་རཀྟའི་ཆུ་འབབ་པ། སྨིན་མ་གློག་སྟོང་དུས་གཅིག་ལ་འཁྱུག་པ་ལྟ་བུ་དང་། སྨིན་མཚམས་འཇིགས་རུང་ཁྲོ་གཉེར་གྱི་རླབས་དང་ལྡན་པའི་སྤྱན་གཡས་གསུམ་དུ་ཉི་མའི་དཀྱིལ་འཁོར། གཡོན་གསུམ་དུ་ཟླ་བའི་དཀྱིལ་འཁོར། དབུས་གསུམ་དུ་ཉི་ཟླ་ཆ་ལང་གདབ་པ་ལྟར་སྡང་མིག་གཡོ་བའི་འབྲུ་ཚུགས་ཀྱིས་གཟིགས་ནས། སྙན་ནས་འབྲུག་སྟོང་གི་སྐད་སྒྲ་ལྡིར། ཤངས་ནས་རླུང་ནག་གི་འཚུབ་མ་འཁྱིལ་བ། རྔམ་པའི་ཞལ་གསུམ་གདངས་ཏེ་ལྗགས་འདྲིལ་བ། རྐན་སྒྲ་དྲག་པོས་ཕཊ་སྒྲ་སྒྲོག་པ་དེ་འདྲ་ཞིག་ཡིན་པ་གསུངས་ཡོད། ཕྱག་དྲུག་ཡོད་པའི་དང་པོ་གཉིས་ཀྱིས་རྡོ་རྗེ་དང་དུང་ཁྲག་བསྣམས་པ། བར་མ་གཉིས་ཀྱིས་ཁ་ཊྭཱྃ་དང་རྒྱུ་ཞགས། ཐ་མ་གཉིས་ཀྱིས་གསང་བའི་རྔེའུ་ཆུང་དང་ཁྱུང་ཁྲ་བསྣམས་པ། འདི་ནས་གསུངས་པ་ལྟར་དུ་རེད། དཀྱིལ་འཁོར་མི་འདྲ་བ་སོ་སོའི་སྐབས་སུ་ཕྱག་མཚན་དང་དག་སྦྱོར་སོགས་ཁྱད་པ་སོ་སོར་ཡོད་ཀྱང་དེ་དག་འགལ་འདུ་ཅན་དུ་འཛིན་རྒྱུ་མ་རེད། ཞབས་བཞི་དེ་གཡས་བསྐུམ་གཡོན་བརྐྱངས་ཀྱི་དོར་སྟབས་ཀྱིས་བཞེངས་པའི་ཉི་མའི་གདན་ལ་ལྷ་ཆེན་ཕོ་མོ་ཞབས་འཐིལ་གྱིས་བརྫིས་ཡོད་པ། དབུ་ལ་ཐོད་པ་ཚར་གསུམ་དང་ཉི་ཟླ་སྤེལ་མ་བྱས་ཏེ་སྦྲུལ་ནག་ལ་བརྒྱུས་པའི་རྒྱན། དབུ་སྐྲའི་ཐོད་དུ་བཅིངས་པ་ལ་སོགས་པའི་དཔལ་དང་དུར་ཁྲོད་ཀྱི་ཆས་གཞན་ཐམས་ཅད་ཀྱང་མ་ཚང་བ་མེད་པ་སྐུ་ལ་གསོལ་ཞིང་རྫོགས་པ་ཡིན་པ་གསུངས་པ་ལྟར་དུ་རེད། རྡོ་རྗེའི་ཁྱུང་གཤོག་དང་། མེ་རུ་འབར་བས་ལྷག་པར་དུ་འཇིགས་རུང་རྔམ་པ་ཆེན་པོའི་མདངས་ཕྱུང་གི་ཡོད་པ་རེད། ཡུམ་ཆེན་ཀྲོ་དྷི་ཤྭ་རི་མ་མཐིང་ནག་ཞལ་གཅིག་ཕྱག་གཉིས་སྤྱན་གསུམ་པ་ཡིན་གསུངས་པ་དེ་རེད། ཕྱག་མཚན་བྷན་དྷ་འབར་བ་དམར་ཆེན་ཁྲག་གིས་གང་ཡོད་པ། བྷན་དམར་གཙོ་ལ་སྟོབས་བཞིན་དུ་ཧེ་རུ་ཀའི་སྐུ་ལ་གཉིས་མེད་དུ་འཁྲིལ་བ། ཕྱོགས་མཚམས་ཟླ་གམ་བརྒྱད་དུ་ཉི་མའི་གདན་གྱི་དབུས་ཚན་པ་རེ་རེའི་སྟེང་དུ། ཤར་ཕྱོགས་ན་འཁོར་བ་ལུགས་ལྡོག་ལ་སྦྱོར་བའི་ཀཽ་རི་མ་སྔོན་མོ་ཞིང་དབྱུག་དང་ཐོད་ཁྲག་འཛིན་པ། ལྷོ་ཕྱོགས་ན་ཀུན་འབྱུང་རྒྱུ་འབྲས་ཆོས་དབྱིངས་བདེ་བ་ཆེན་པོར་འབིགས་པར་བྱེད་པའི་ཙོ་རི་སེར་མོས་ཐབས་ཤེས་མཉམ་སྦྱོར་གྱི་མདའ་གཞུ་བསྣམས་པ། དེ་བཞིན་ནུབ་ཏུ་པྲ་མོ་ཧ། བྱང་ན་བེེ་ཏ་ལི། ཤར་ལྷོ་སོགས་ཀྱི་མཚམས་བཞི་ལ་པུཀྐ་གྷསྨ་སྨེ་ཤ་ཙཎ་ཌ་ལི་རྣམས་རང་མདོག་ཞལ་གཅིག་ཕྱག་གཉིས་སྤྱན་གསུམ་ཅན། དབུ་སྐྲ་དམར་སེར་འབར་བ་སོགས། གཙོ་འཁོར་ཡོངས་རྫོགས་འདིའི་ལས་བྱང་བཞིན། འདི་ནས་དབང་གི་ཆོག་ཁྲིགས་མཚམས་སྦྱོར་ལས་གསུངས་བ་འདི་བཞིན་དང་ཡང་དག་སངས་རྒྱས་མཉམ་སྦྱོར་འདི་སངས་རྒྱས་ཐམས་ཅད་ཀྱི་ཐུགས་ཀྱི་བདག་ཉིད་དཔལ་རྡོ་རྗེ་སེམས་དཔའ་འམ་དེ་ཉིད་ཁྲོ་བོར་སྣང་བ་བཛྲ་ཧེ་རུ་ཀ་རེད། བཛྲ་ནི་འགྱུར་བ་མེད་པ་སྟོང་ཉིད་དོན་གྱི་རྡོ་རྗེ། མཚན་མ་འཛིན་པའི་རྟོག་པ་ལ་ངང་གིས་ཁྲོ་བ་ཅན་རེད། ཧེ་རུ་ཀ་ཞེས་པའི་སྒྲ་འདི་ཐད་ཀར་བསྒྱུར་ན་ཁྲག་འཐུང་ལ་འཇུག ཁྲག་གི་ཁ་དོག་དམར་པོ་ཆགས་པའི་རང་བཞིན། ངོ་བོ་རླན་གྱིས་བརླན་པའི་མཚན་ཉིད་ཅན་ཞིག་ཡིན་པ་དེས། གདུལ་དཀའི་འགྲོ་ལ་ལྷག་པར་རྗེས་ཆགས་བརྩེ་བ་མི་འདོར་བའི་རང་བཞིན་ཅན་ཡིན་པ་མཚོན། ཁྲག་འཐུང་གསུང་དུས་འཐུང་བ་རོལ་བའི་དོན་ཅན་རེད། ཧེ་རུ་ཀའམ་ཁྲག་འཐུང་འདི་སྦྱོར་སྒྲོལ་གྱི་ཕྲིན་ལས་ཟབ་མོའི་ཤེས་རབ་དམིགས་པར་མེད་པ་དང་། ཐབས་སྙིང་རྗེ་ཆེན་པོ་སོགས་ཀྱི་རྨད་བྱུང་གི་ཡོན་ཏན་མཚོན་པའི་མིང་ཞིག་རེད། ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ངོ་བོ་ཡི། །ཁྲོ་བོར་དེ་བཞིན་གཤེགས་ཀུན་མཛད། །ཅེས་གསུངས་པ་ལྟ་བུའི་ངོ་བོ་དབྱིངས་དང་ཡེ་ཤེས་གཉིས་མེད་ཀྱི་བདག་ཉིད་དུ། རྣམ་པ་རྟགས་ཀྱི་ཕྱག་རྒྱར་བཞེངས་བ་དེ། འབར་བ་གར་དགུའི་ཉམས་དང་ལྡན་པ་སོགས་གོང་ནས་བྱུང་མ་ཐག་པ་དེ་ལྟར་ཏེ། མདོར་ན་འདི་ཉིད་དྲང་དོན་རྟགས་ཀྱི་ཧེ་རུ་ཀ་རྒྱལ་བ་ཐམས་ཅད་ཀྱི་ཐུགས་མཆོག་གི་ཡེ་ཤེས། དངོས་གྲུབ་རྣམ་པ་གཉིས་ཀྱི་གཏེར་མཛོད་དུ། འབར་བ་ཁྲོ་བོའི་རྣམ་པ་ཅན་དུ་ཤར་བ་དང་། ངེས་པ་དོན་གྱི་ཧེ་རུ་ཀ་ཆོས་ཐམས་ཅད་ཀྱི་ཆོས་ཉིད་དབྱིངས་དང་ཡེ་ཤེས་གཉིས་སུ་མེད་པ། བདེ་མཆོག་བདེ་བ་ཆེན་པོའི་བདག་ཉིད་སྐུ་གསུམ་འདུ་འབྲལ་མེད་པའི་རང་བཞིན་ཅན་དེ་ཉིད་རེད། འོ་ན་ལམ་སྦྱོང་བའི་རྣལ་འབྱོར་ལ་སྒྲུབ་པ་པོ་གང་ཟག་ཐ་མལ་པ་ཞིག་ཡིན་པའི་དབང་དུ་བཏང་ན། དེའི་རྒྱུད་ལ་སྐུ་གསུམ་འདུ་འབྲལ་མེད་པ་ཇི་ལྟར་འཇོག་ཟེར་ན། ཡུལ་དྲུག་དེ་ཤེས་པ་དྲུག་གིས་མ་བཟུང་རྟོག་མེད་སྤྲོས་བྲལ་གྱི་ངང་ལ་མ་བཅོས་མ་ལྷད་པ་མཉམ་པར་བཞག་ན། དེའི་སྐབས་སུ་གཞན་ནས་མ་ཡོང་པ་ཟབ་མོའི་ཆོས་ཉིད་རང་གི་ངོ་བོ་དེ། ནམ་མཁའ་ལྟ་བུའི་རྒྱ་ཆད་ཕྱོགས་ལྷུང་མེད་པར་གནས་པ་དེ་ཆོས་སྐུ་རེད། གང་སྣང་གང་ཤར་གྱི་སྣང་ཞིང་སྲིད་པའི་ཆོས་ཐམས་ཅད། མ་འགག་འཛིན་བྲལ་རིགས་ལྔ་དང་ཡེ་ཤེས་ལྔའི་ངོ་བོར་རང་ཤར་བས་ན། སྲིད་དང་ཞི་བའི་ཆོས་ཀུན་ལ་མངའ་དབང་བསྒྱུར་བ་དེ་ལོངས་སྤྱོད་རྫོགས་པའི་སྐུ་དང་། ངེས་མེད་རྩལ་དང་རོལ་བའི་འཆར་ཚུལ་སྣ་ཚོགས་སྣང་བ་དེ་སྤྲུལ་བའི་སྐུ་རེད། དེ་ལྟར་ཡིན་པས་གཞི་ཡེ་ཤེས་སུམ་ལྡན། ངོ་བོ་རང་བཞིན་ཐུགས་རྗེའི་བདག་ཉིད་ཅན་ཡིན་པ་གང་ཞིག རྣམ་གསུམ་དབྱེར་མེད་ངོ་བོ་ཉིད་སྐུའི་དབྱིངས་ལས་ཡེ་ནས་གཡོས་མ་མྱོང་ཡང་། རྣམ་པ་མ་འགག་ཅིར་ཡང་འཆར་བ་དོན་འོད་གསལ་ཐིག་ལེ་ཐག་ཅིག་ལ་འདུས་པ་དེ་འདྲ་ཞིག་གི་གོ་དོན་རེད། ཡང་མཚམས་འདིར། ཧཱུྃ༔ སངས་རྒྱས་རྣམས་ནི་ཐམས་ཅད་ཀྱི། །ཆོས་དབྱིངས་ཡུམ་གྱི་བུམ་པ་ནས། །ལ་སོགས་པའི་དབང་གི་དངོས་གཞི་གསུངས་མཐར། ཡང་དག་ཐུགས་ཀྱི་སྐོར་འདི་རྒྱུད་སྡེའི་ཐད་ནས་འཇིག་རྟེན་འདས་མདོ་དང་ཧེ་རུ་ཀ་གལ་པོ་ལ་སོགས་པའི་རྒྱུད་དང་། རྒྱུད་དོན་དགོངས་པ་བཀྲལ་བའི་སྔོན་གྱི་གྲུབ་པའི་སློབ་དཔོན་ཚོས་མཛད་པའི་བསྟན་བཅོས་མང་པོ་ཡོད་པ་རེད། སྒྲུབ་སྡེའི་ཐད་ཀྱི་སྒྲུབ་པ་བཀའ་བརྒྱད་ཀྱི་ནང་ཚན་ཡང་དག་ཐུགས་ཀྱི་ལྷ་ཚོགས་རེད། འདིའི་རིང་བརྒྱུད་བཀའ་མ། ཉེ་བརྒྱུད་གཏེར་མ། ཟབ་མོ་དག་སྣང་གི་བརྒྱུད་པ་སོ་སོའི་དཀྱིལ་ཆོག་གི་རྒྱས་བསྡུས་དང། དཀྱིལ་འཁོར་གྱི་སྤྲོ་བསྡུ་ཡང་རྣམ་པ་གཅིག་ཏུ་མ་ངེས་པ། དཔེར་ན་ཟླ་གམ་དྲུག་བཅུ་རྩ་བརྒྱད་ནས་དགུ་མ་དང་གཅིག་མ་སོགས་ཀྱི་རྣམ་བཞག་ཡོད་པ་ཡིན་ན། རིགས་བརྒྱ་རིག་སྟོང་བསམ་ཡས་སྒྱུ་འཕྲུལ་དྲྭ་བའི་དཀྱིལ་འཁོར་ལ་སྤྲོ་ཆོག་རྒྱུ་དང་། རིགས་གཅིག་རིགས་རྣམས་ཀུན་འདུས་གཅིག་ཏུ་འདུས་ཤིང་བསྡུ་ཆོག་པ་དེ། ཡེ་ཤེས་སྒྱུ་མའི་རྣམ་རོལ་གྱི་གོ་དོན་སྙིང་པོ་རེད། འདིའི་སྒྲུབ་ཐབས་མན་ངག་གི་ཕྱོགས་ནས་བསམ་བློ་བཏང་ན། ཡང་དག་ཐུགས་ཀྱི་སྒྲུབ་པ་ཐམས་ཅད་རུ་ལུ་འབྲུ་བརྒྱད་ཀྱི་དགོངས་པར་འདུས། རུ་ལུ་འབྲུ་བརྒྱད་འདི་རེ་རེ་ནས་ལྟ་བ་དང་གཅིག ཕྲིན་ལས་དང་གཉིས། བསྐྱེད་རིམ་དང་གསུམ། རྫོགས་རིམ་བཞི་བོ་དང་སྦྱར་ཏེ་དོན་བཞིའི་ཐོག་ནས་བཤད་རྒྱུ་ཞིག་རེད། དེ་གང་ཡིན་ན། ལྟ་བའི་ལ་ཤན་དང་སྦྱར་ཏེ་བཤད་པ། ཕྲིན་ལས་ལག་ལེན་དང་སྦྱར་ཏེ་བཤད་པ། བསྐྱེད་རིམ་བསྙེན་སྒྲུབ་དང་སྦྱར་ཏེ་བཤད་པ། དེའི་སྟེང་གི་མན་ངག་རྫོགས་རིམ་དང་སྦྱར་ཏེ་བཤད་པ་བཞི་བོ་རེད། དེའི་ནང་གི་ལྟ་བའི་ལ་ཤན་དང་སྦྱར་ཏེ་བཤད་པ་ནི། འདི་གཞི་ལམ་འབྲས་གསུམ་གྱི་ཐོག་ནས་བཤད་དགོས་པས། རུ་ལུ་འབྲུ་བརྒྱད་འདིས་གཞི་སེམས་ཀྱི་ཆོས་ཉིད་དག་པ་ཡེ་ཤེས་ཀློང་བརྒྱད་མཚོན། དེ་ཐམས་དབྱེར་མེད་གཅིག་འདུས་འདའ་དཀའ་རང་བྱུང་གི་ཡེ་ཤེས་ཡང་དག་ཧེ་རུ་ཀ་ཡིན་པ། དེའི་དཀྱིལ་འཁོར་གཅིག་པུར་ཡང་ཐམས་ཅད་འདུས་པ་དང་། དེ་བཞིན་དུ་མ་དག་འཁྲུལ་བའི་གཞི། འཁྲུལ་བ་བཏགས་པའི་ཆོས་ཀུན་གཞི་ཚོགས་བརྒྱད་དང་བཅས་པ་ཡང་དེས་མཚོན། དེ་གཞི་དུས་ཀྱི་སྐབས་རེད། ལམ་དུས་སུ་བཤད་ན། རུ་ལུ་འབྲུ་བརྒྱད་ཀྱི་ཡི་གེ་ཡིས་བསྐྱེད་རིམ་གྱི་བསྙེན་སྒྲུབ་ཡན་ལག་བཞི་དང་། རྫོགས་རིམ་གྱི་དགའ་བཞིས་དྲངས་བའི་སྟོང་བཞིའི་ཡེ་ཤེས་དང་བརྒྱད་པོ་མཚོན། དེ་ཡང་རང་བྱུང་ཡེ་ཤེས་ལྷན་སྐྱེས་ཀྱི་བདེ་ཆེན་ཉག་ཅིག་ལ་འདུས་པ་གཞི་ལམ་གཉིས་ཀ་རེད། འབྲས་དུས་ལ་བསམ་བློ་བཏང་ན། གཞི་འབྲས་དབྱེར་མེད་ཡེ་ཤེས་ཀློང་བརྒྱད། ཐུགས་ཡང་དག་ཡེ་ཤེས་འབྲས་བུ་དཔལ་ཆེན་དང་བཅས་པར་མཚོན། ལྟ་བའི་ལ་ཤན་དང་སྦྱར་ཏེ་བཤད་ན་དེ་འདྲ་བ་ཞིག་རེད། གཉིས་པ་ཕྲིན་ལས་ལག་ལེན་དང་སྦྱར་ཏེ་བཤད་ན། དཔལ་ཆེན་ཡང་དག་ཧེ་རུ་ཀའི་ཐུགས་ཡེ་ཤེས་འགྱུར་བ་མེད་པ་ཆོས་ཀྱི་དབྱིངས་ཀྱི་ངོ་བོ་དེ། ནམ་མཁའ་ལྟར་དུ་འགྱུར་བ་མེད་ཅིང་དངོས་མཚན་དང་བྲལ་བའི་བདག་ཉིད་ཅན་ཡིན་ན། དེ་སེམས་ཅན་ཐམས་ཅད་ཀྱི་སེམས་ཀྱི་ཆོས་ཉིད་དང་ཡེ་ནས་གཉིས་སུ་མེད་པར་གྲུབ་པ། དེའི་རང་རྩལ་གསང་སྔགས་ཀྱི་རྒྱལ་པོ། རུ་ལུ་འབྲུ་བརྒྱད་ཀྱི་བཟླས་སྒོམ་དམིགས་གནད་ལ་བརྟེན་ནས། ཞི་རྒྱས་དབང་དྲག་གི་ལས་བཞི་འགྲུབ་པ་ཡིན་ན། རབ་འབྱམས་ཕྲིན་ལས་ཀྱི་ལག་ལེན་ཐམས་ཅད་དེ་རུ་ལུ་འབྲུ་བརྒྱད་ལ་འདུ་བ་སྟེ། ཕྲིན་ལས་ལག་ལེན་དང་སྦྱར་ནས་བཤད་ཚུལ་ཡིན་ན་དེ་འདྲ་ཞིག་རེད། གསུམ་པ་བསྐྱེད་རིམ་བསྙེན་སྒྲུབ་དང་སྦྱར་ནས་བཤད་ན། དཔལ་ཆེན་པོའི་སྐུ་གསུང་ཐུགས་རྡོ་རྗེ་གསུམ་སྐུ་གསུམ་གྱི་ངོ་བོར་གྲུབ་པ་དེ། རིག་འཛིན་སྒྲུབ་པ་པོའི་སྒོ་གསུམ་གྱི་ཆོས་ཉིད་དང་མི་ཕྱེད་པ་ཡིན་པས། དེ་ཉིད་མངོན་དུ་འགྱུར་བའི་ཕྱིར་དུ་བསྐྱེད་རིམ་དཔལ་ཆེན་ཡང་དག་ཧེ་རུ་ཀའི་སྐུ་རུ་གསལ་བ་དེ་བསྙེན་པ། ཡུམ་ཆེན་ཀྲོ་དྷི་ཤྭ་རི་མར་གསལ་བ་དེ་ཉེ་བསྙེན། ཐབས་ཤེས་གཉིས་མེད་བྱང་ཆུབ་སེམས་སྤྲིན་ལས་ཕྲ་མེན་བཅུ་དྲུག་བྱུང་བ་དེ་སྒྲུབ་པ། དེའི་ཐོག་ན་ཀུན་ཀྱང་སྐྱེ་མེད་ཆོས་དབྱིངས་ཆེན་པོར་མཉམ་པར་ཤེས་པ་དེ་སྒྲུབ་ཆེན་རེད། དེ་བསྐྱེད་རིམ་བསྙེན་སྒྲུབ་དང་སྦྱར་ནས་བཤད་པའི་ལུགས་རེད། བཞི་པ་དེ་སྒང་སྒྲིལ་མན་ངག་རྫོགས་ཆེན་དང་སྦྱར་ཏེ་བཤད་ན། མཚན་བཅས་དབྱིབས་ཀྱི་རྣལ་འབྱོར་སྐུའི་གསལ་སྣང་ལ་སེམས་བཟུང་བའི་རྫོགས་རིམ་ཐ་མལ་པ་དང་། ཟབ་པ་སྔགས་ཀྱི་རྣལ་འབྱོར་གསུང་ཟླས་པ་རླུང་གི་རྫོགས་རིམ། མཐར་ཐུག་ཆོས་ཀྱི་རྣལ་འབྱོར་སྙིང་གའི་མི་ཤིགས་པའི་ཐིག་ལེར་སེམས་འཛིན་པ་སོགས་ཀྱི་མཚན་བཅས་ཀྱི་རྫོགས་རིམ་དང་། མཚན་མེད་དམིགས་པ་མེད་པའི་རྫོགས་རིམ་སྤྱི་དང་། ཁྱད་པར་དུ་རྫོགས་རིམ་ཐམས་ཅད་ཀྱི་རྒྱལ་པོ་རྩོལ་བྲལ་རྫོགས་པ་ཆེན་པོའི་ལམ་ལ་བརྟེན་ནས། རྒྱལ་བ་ཐམས་ཅད་ཀྱི་ཐུགས་གཉིས་མེད་ཀྱི་ཡེ་ཤེས། ཡང་དག་ཐུགས་ཀྱི་ངོ་བོར་འཚང་རྒྱ་བ་འགྱུར་པ། འདི་དབང་དང་སྦྱར་ན། གནད་ཀྱི་མན་ངག་མཐར་ཐུག་སྦྱིན་པ་འདི་ལ་རྫོགས་པའི་དབང་གསུངས་པ་རེད། འདི་སེམས་ཀྱི་སྟེང་ནས་ངོ་སྤྲད་ཡོང་ན། ཆོས་ཐམས་ཅད་སེམས་ལ་སྣང་། དེ་ལྟར་སྣང་བའི་སེམས་འདི་སྣང་བ་ཡུལ་ཐོག་ལ་མ་ལུས། འཛིན་པ་རང་སེམས་ལ་ཚུར་མ་བསྐོར་པར་བཅོས་མེད་རང་འོད་རང་སོ་ལ་བཞག་དུས། གཡོ་མེད་ནམ་མཁའ་དྭངས་གཙང་ལྟ་བུ་རྣམ་རྟོག་གི་སྤྲིན་གྱིས་མ་བསླད། དེར་འཛིན་གྱི་གདོན་གྱིས་མ་གནོན་པར་སོ་མ་རང་མདངས་ཀྱི་ངང་ལ་ལྷོད་ཅིང་ལྷོད་དེ་གསལ་ལ་གཡེང་བ་མེད་པ་དེའི་ངང་ལ་བཞག་དུས། གནས་མཉམ་ངོ་བོ་སྟོང་ལ་རང་བཞིན་གསལ་བའི་ལྷུན་གྲུབ་སྣང་སྟོང་ཟུང་འཇུག བརྗོད་བྲལ་ངག་གི་ལམ་ལས་འདས་སོང་བ། ཡོད་མེད་ཡིན་མིན་ལ་སོགས་པའི་སྤྲོས་པའི་མཐའ་ཐམས་ཅད་དང་བྲལ་པ་དེ་ནི་ཆོས་སྐུ་རེད། ཆོས་སྐུ་དེའི་ངང་ལས་འགག་མེད་རང་སྣང་གི་དཔལ་ཆེན་ཡབ་ཡུམ། ཟུང་འཇུག་ཁ་སྦྱོར་བདུན་ལྡན་བདེ་ཆེན་ཡེ་ཤེས་ཀྱི་འཁོར་ལོ་རྒྱུན་མི་ཆད་པ་ཤར་བ་དེ་ལོངས་སྤྱོད་རྫོགས་སྐུ། དེ་ལས་ཐུགས་རྗེའི་བྱེ་བྲག་སྣ་ཚོགས་ཀྱི་ཀུན་ཁྱབ་སྤྲུལ་སྐུའི་རོལ་རྩལ། སངས་རྒྱས་ཀྱི་མཛད་པ་དང་ཕྲིན་ལས་ཆ་མཐུན་པར་སྣང་བའི་སྤྲུལ་སྐུ་སྟེ། མདོར་ན་རྣལ་འབྱོར་སྐུ་གསུམ་གྱི་རྟོགས་པའི་ཉམས་རྩལ་རྫོགས་དུས། ཕྱག་རྒྱ་ཆེན་པོའི་དབང་མཆོག་བླ་མས་གནང་བ་དེ། སློབ་མས་ཉམས་སུ་མྱོང་བས་ཐོབ་པ་ཡིན། དེ་ནི་དོན་གྱིས་ཐོབ་པའི་དབང་གི་ཚད་རེད། དེ་ལྟ་བུ་ལ་མཚན་མ་རྫས་ཀྱི་དཀྱིལ་འཁོར་ལག་འཐིལ་ཙམ་དང་བུམ་རིལ་མཐེ་མགོ་འདྲ་ཞིག་མེད་ཀྱང་ཆོག་པ་རེད། འདི་རང་གི་རིག་པའི་མཐུ་ཡིས་རྟོགས་པ་མ་གཏོགས་གཞན་གྱིས་ཤེས་པར་བྱ་བ་མིན་པས་རང་རིག་རྩལ་གྱི་དབང་ཆེན་ཟེར། དེ་ལྟ་བུའི་དབང་དུས་ཀྱི་ཡེ་ཤེས་ཤར་བའི་སྟེང་དེར། སྣང་སྲིད་འཁོར་འདས་ཀྱི་ཆོས་གང་ཤར་གང་སྣང་ཐམས་ཅད་ཀྱི་ཆོས་ཉིད་དེ་ཁོ་ན་ཉིད་ཀྱང་། དེ་ལས་གཞན་དུ་མི་ལྟ་པར་ཐག་ལྟ་བས་བཅད་དེ། ཉམས་སུ་ཏིང་ངེ་འཛིན་གྱིས་བླང་བར་བྱ་བ་རེད། དེ་ལྟར་ན་རུ་ལུ་འབྲུ་བརྒྱད་ཀྱི་དོན་མན་ངག་དང་སྦྱར་དུས། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃཿཞེས་གསུངས། ཨོཾ་ཡང་དག་དོན་གྱི་ཡེ་ཤེས། རུ་མཁའ་དབྱིངས་བདེ་བ་ཆེན་པོ། ལུ་རྣམ་དག་ཡུམ་གྱི་མཁའ་ཀློང་། བྷྱོ་བྱང་ཆུབ་སེམས་ཀྱི་སྤྲིན་ཆེན། མཐའ་མའི་ཧཱུྃཿདེ་ཧཱུྃཿརང་བྱུང་འདུས་མ་བྱས་པ་ཐམས་ཅད་ཀུན་ཁྱབ་ཆོས་དབྱིངས་ཐིག་ལེ་ཉག་ཅིག་དབྱིངས་དང་ཡེ་ཤེས་དབྱེར་མེད་ལ་འདུས་པ། མདོར་ན་སྒྲུབ་ཐབས་བསྐྱེད་རྫོགས་རིམ་གཉིས་ཀྱི་རྣལ་འབྱོར་བསྙེན་སྒྲུབ་རྣམ་བཞི་ཚུལ་བཞིན་མཐར་ཕྱིན་པའི་སྒོ་ནས་གྲུབ་པའི་འབྲས་བུ་དེ་གང་ཡིན་ན། གཞི་འབྲས་དབྱེར་མེད་ཀྱི་བདག་ཉིད་སྐུ་ཐུགས་ཟུང་འཇུག་གི་ངོ་བོ་དཔལ་ཆེན་ཡང་དག་ཧེ་རུ་ཀའི་སྐུ་གསུམ་གསང་བ་གསུམ་དང་དབྱེར་མེད་པ་མངོན་དུ་བྱེད་པ་དེ་རེད། མཚམས་འདིར་ཡང་དག་སངས་རྒྱས་མཉམ་སྦྱོར་གྱི་དབང་གི་བཀྲ་ཤིས་མཐའ་རྟེན་དང་བཅས་པ་སོང་སྟེ། ཕུར་པ་བདུད་དཔུང་ཟིལ་གནོན་གྱི་དབང་རེད། དེ་ལ་ལོ་རྒྱུས་ཀྱི་དབང་ཆོག་གསུངས་རྗེས་ཀྱི་འཕྲོས་དོན་ནི། འདི་ལོ་རྒྱུས་ཀྱི་ནང་ནས་བྱུང་མ་ཐག་པའི་ནང་དོན་ལྟར་དང་། སྔར་ཡང་ཐེངས་འགའ་རེ་ལ་དབང་དང་ཁྲིད་སོ་སོའི་སྐབས་ནས་ཅི་རིགས་པར་གང་ལ་གང་འཚམ་རེ་ཞུས་མྱོང་བ་བཞིན་དུ། སྤྱིར་ན་ཆོས་ཉིད་བདེ་བ་ཆེན་པོ་དང་ཆོས་ཅན་རྟེན་འབྲེལ་བསླུ་མེད་ཀྱི་སྟོབས། དེ་བཞིན་གཤེགས་པའི་བྱིན་རླབས་ཀྱི་མཐུ། གསང་སྔགས་ཀྱི་དགོངས་སྤྱོད་ཁྱད་པར་ཅན་དང་འབྲེལ་བའི་སྔགས་དང་ཕྱག་རྒྱའི་མཐུ་རྣམས་ནི་བསམ་གྱིས་མི་ཁྱབ་པ་རེད། དེ་ཡིན་པའི་སྟོབས་ཀྱིས་སྐུ་གསུང་ཐུགས་ཡེ་ཤེས་རྡོ་རྗེ་དང་བཅས་པའི་རྡོ་རྗེ་བཞིའི་ཡེ་ཤེས་ལ། གོ་མྱོང་རྟོགས་གསུམ་ཅི་རིགས་པ་ཞིག་སྐྱེས་ནས། དེ་དོན་གོང་འཕེལ་ལ་སྤེལ་རྒྱུའི་ལམ་ལ་ཚུལ་བཞིན་དུ་འབད་ཐུབ་མཁན་ཞིག་གིས། ཚེ་འདིར་རྡོ་རྗེ་འཆང་གི་གོ་འཕང་ཐོབ་ཐུབ་པ། གལ་ཏེ་བརྩོན་འགྲུས་ཆེ་བའི་རབ་ངོ་མར་མ་གྱུར་ཀྱང་། དམ་ཚིག་མ་ཉམས་པ་གཙང་མར་རྒྱུན་དུ་སྲུང་ཐུབ་མཁན་ཞིག་ཡིན་ན་ཡང་། རིང་པོར་མི་ཐོགས་ནས་འཚང་རྒྱ་ནུས་པ་དེ། གསང་སྔགས་ནང་རྒྱུད་བླ་མེད་ཀྱི་ཁྱད་ཆོས་རེད། དེ་ལྟ་བུའི་མཐར་འབྲས་སྐུ་བཞི་ཡེ་ཤེས་ལྔའི་བདག་ཉིད་ཀྱི་གོ་འཕང་མངོན་དུ་བྱ་ཐུབ་པའི་གནད་ཀྱི་རྩ་བ་གཅིག་ལ་དྲིལ་ཡོང་ན། རྩ་བ་དབང་ལ་རག་ལས་པ་རེད། དབང་སྲོག་རྒྱུད་ལ་འཛིན་པ་ཡང་དམ་ཚིག་ཡིན་པས་དམ་ལྡན་རིག་པ་འཛིན་པའི་རྣལ་འབྱོར་པ་ལ། དམ་ཅན་སྲུང་མ་སྤྲིན་ལྟར་དུ་འདུ་ཞིང་། དངོས་གྲུབ་རྣམ་གཉིས་ཆར་བཞིན་འབབ་རྒྱུའི་དོན་ཡང་། གསང་བ་ཟབ་མོའི་དཀྱིལ་འཁོར་ལ་ཞུགས། བྱིན་རྒྱུད་ཀྱི་རྟོགས་པ་ཞིག་ནང་ནས་བརྙེས་ཏེ། བདེ་བར་བཤེགས་པའི་གདུང་འཚོབ་བའི་སྲས་བཅས་རྒྱལ་བའི་ཕྲིན་ལས་པར་གྱུར་སོང་བའི་སྟོབས་ཀྱིས་རེད། དབང་འདི་ལ་ཡང་ཐུན་མོང་ཐུན་མིན་གྱི་ཁྱད་པར་དང་དབྱེ་བསྡུ་མང་པོ་ཞིག་ཡོད་པའི་ནང་གི། སྐབས་འདིར་གངས་ལྗོངས་རྫོགས་ཆེན་བསྟན་པའི་སྔར་མེད་ཀྱི་སྲོལ་འབྱེད་ཆེན་པོ། གསང་འཛིན་དགའ་རབ་དཔའ་བོ་གཉིས་པ། རྒྱལ་བ་ཀློང་ཆེན་པའི་དགོངས་པའི་གསང་མཛོད་སླར་ཡང་གསལ་བར་འབྱེད་པའི་རྫོགས་ཆེན་ཀློང་ཆེན་སྙིང་ཐིག་གི་བསྟན་པའི་བདག་པོ། ཀུན་མཁྱེན་ཕྱི་མ་རིག་འཛིན་འཇིགས་བྲལ་གླིང་པ་ལ་བཀའ་བབས་པ། གཏེར་ལུང་མང་པོ་ནས་གསལ་བ་བཞིན་དེའི་དགོངས་ཀློང་ནམ་མཁའ་མཛོད་ཀྱི་ཆོས་སྡེ་ཆེན་པོ་ལས་བྱོན་པའི། རྩ་གསུམ་གཙོ་བོར་བྱས་པའི་དབང་མཆོག་ཕྱོགས་གཅིག་ཏུ་བསྡེབས་པ། སྙིང་ཐིག་རྩ་པོད་དམ། སྙིང་ཐིག་དུམ་གཉིས་ཀྱི་དབང་ཟེར་ནས་ཀུན་ལ་གྲགས་པ་འདི་ལྟར་ང་ཚོས་འབུལ་བཞིན་པ་ལས། ཡོངས་སུ་གྲགས་པའི་ཐ་སྙད་ལ་རྒྱུད་སྡེ་དང་སྒྲུབ་སྡེ་གཉིས་ཟེར་རྒྱུའི་རྣམ་འབྱེད་ཀྱི་སྡེ་ཚན་ལ་ཕྱེ་དར་རྒྱུ་ཞིག་ཡིན་ན། དེ་གཉིས་ཀ་ཡང་ཕན་ཚུར་གཅིག་དང་གཅིག་མ་འབྲེལ་པ་ཞིག་མ་ཡིན་པར། རྒྱུད་སྒྲུབ་ཐབས་དང་འབྲེལ། སྒྲུབ་ཐབས་མན་ངག་དང་འབྲེལ། མན་ངག་ཆོག་ཁྲིགས་དང་འབྲེལ། ཆོག་ཁྲིག་ཕྱག་བཞེས་དང་འབྲེལ། ཕྱག་བཞེས་ཕྲིན་སྒྲུབ་དང་འབྲེལ་བའི་འབྲེལ་བ་ལྔ་དེ། རང་ལུགས་བརྒྱུད་པའི་འཆད་སྲོལ་ཟུར་མ་ཉམས་པ་ཡིན་ཞེས་སྔར་ཡང་ཞུས་མྱོང་བ་ལྟར་ཡིན། རྒྱུད་དོན་ལུང་གིས་ཕྱེས། ལུང་དོན་མན་ངག་ལ་དྲིལ་ནས། སྐབས་བབས་སྒྲུབ་སྡེ་བརྒྱད་པོའི་སྒྲུབ་ཕྲིན་ཕྱག་བཞེས་ཀྱི་བར་དུ་གྲུབ་པ་རེད། དེ་ཡིན་དུས། རྒྱུད་སྡེ་སྒྲུབ་སྡེ་གང་བཤད་ཀྱང་། གཞི་ལམ་འབྲས་བུའི་རྒྱུད་གསུམ་གྱི་ནང་དུ་མ་བསྡུས་པ་ཞིག་དང་མ་འདུས་པ་ཞིག་མེད། དེ་ཡིན་སོང་ན། གཞི་རྒྱུད་བདེ་བཤེགས་སྙིང་པོ། ལམ་རྒྱུད་སྔགས་དང་ཕྱག་རྒྱ་ཏིང་འཛིན་ནམ་ལྟ་སྒོམ་སྤྱོད་པ་གསུམ། འབྲས་རྒྱུད་དངོས་གྲུབ་རྣམ་གཉིས་བསྒྲུབ་བྱའི་རྒྱུད་ལ་མངོན་དུ་འགྱུར་རྒྱུ་དེ། སྔགས་ཀྱི་སྤྱི་ཆིངས་རེད་ཟེར་ན་ཆོག་རྒྱུ་ཞིག་རེད། དེའི་ནང་དུ་འདུས་པ་རེད། སྐབས་འདིའི་སྨིན་གྲོལ་དབང་གི་རིམ་པ་འདི། རྒྱ་ཆེ་བ་རྒྱུད་སྡེ་དང་། ཟབ་པ་སྒྲུབ་སྡེའི་ལུགས་གཉིས་ཀ་མན་ངག་གིས་གཅིག་ཏུ་བསྡུས་ཡོང་པ། ཕྱི་བཤད་ཐབས་གསལ་བྱེད་ཀྱི་མན་ངག་གོང་དུ་ཞུས་པ་ལྟར་གསང་སྔགས་བཀའ་ཡི་ཐ་རམ་དང་། གསང་སྔགས་ལུང་གི་བང་མཛོད་ལ་སོགས་པ་ཕྱིའི་སྡོམ་ལྔ་ལ་གཞི་བཟུང་། དེའི་སྟེང་ལ་རྒྱུད་ཀྱི་ཆིངས་ལྔ། རྒྱུད་ཀྱི་ཆིངས་ལྔ་ཟེར་བ་གང་ཡིན་ན། ཁོག་དབུབ་སྟོང་ཐུན་གྱི་ཆིངས། ས་གཅོད་ཚོམ་གྱི་ཆིངས། འགྲེལ་བ་འབྲུ་གནོན་གྱི་ཆིངས། དེའི་སྟེང་ལ་ཊཱི་ཀ་བསྡུས་དོན་གྱི་ཆིངས་དང་། མན་ངག་ལག་ལེན་གྱི་ཆིངས་ལྔ་པོ་ཡིས་བཅིངས་ནས། ལུང་གི་སྡེབས་ལྔ། སྒྲུབ་ཐབས་ཀྱི་སྦྱོར་སོ་ལྔ་སོགས་ཚང་བའི་ཐོག་ནས། ནང་སྒྲུབ་ཐབས་གསལ་བྱེད་ཀྱི་མན་ངག་དང་གསང་བ་ཉམས་ལེན་གསལ་བྱེད་ཀྱི་མན་ངག་སོགས་དང་འབྲེལ་བའི་དབང་འདི་ཐམས་ཅད། རྒྱ་ཆེ་བ་རྒྱུད་སྡེ་དང་ཟབ་པ་སྒྲུབ་སྡེ་གཉིས་ཀའི་གབ་པ་ཕྱུང་། སྦས་པ་སྟོན། གཅུས་པ་བསྲངས་ན་ཟབ་རྒྱས་ཀྱི་ཆོས་ཚུལ་གནད་གཅིག་ལ་འདུས་པ། འབྲས་བུ་ཐུས་ཀའི་སྨན་མཆོག་ལ་དྲིལ་ཏེ་གནང་བ་རེད། དེའི་ནང་ནས་ཀྱང་རྩ་བ་གསུམ་གཙོ་བོར་བྱས་པའི་དབང་གི་ཆོ་ག་དང་དཀྱིལ་འཁོར་གྱི་འགྲོས་འདི། ནང་རྒྱུད་སྡེ་གསུམ་རེ་རེ་ལ་ཡང་དགུ་རེ་ཕྱེས་པའི་ནང་ཚན་གྱི་མ་ཧཱའི་ཨ་ཏིའམ་ཨ་ཏིའི་མ་ཧཱ་དང་མཚུངས་པའི་རྒྱུད་ཆེན་སྒྱུ་འཕྲུལ་དྲྭ་བའི་དགོངས་དོན་དང་འབྲེལ་བའི། དཔལ་ཆེན་རྩ་བ་ཡན་ལག་གི་དབང་། ཨ་ནུའི་མདོ་ལུང་གི་སྙིང་པོ་ཞི་ཁྲོ་དམ་པ་རིག་བརྒྱ་དང་རིག་འཛིན་རྩ་དབང་། ཨ་ཏིའི་དགོངས་དོན་གྱི་བསྐྱེད་རྫོགས་དང་འབྲེལ་བའི་རིག་འཛིན་ཡུམ་ཀ རྫོགས་ཆེན་མན་ངག་སྡེའི་མཐར་ཐུག་གི་རྫོགས་རིམ་དང་སྦྱར་བ། ཡང་གསང་བླ་སྒྲུབ་ལ་སོགས་པ་ཡིན་ན། སྐབས་དོན་མ་ཧཱ་ཡོ་ག་ལ་རྒྱུད་སྡེ་དང་སྒྲུབ་སྡེ་གཉིས་སུ་ཕྱེས་པའི་ནང་ཚན་གྱི་སྒྲུབ་སྡེ་ལ་སྒྲུབ་པ་བཀའ་བརྒྱད། དེ་ཡང་ཡེ་ཤེས་ལྷ་ཡི་སྒྲུབ་པའམ་འཇིག་རྟེན་ལས་འདས་པའི་སྒྲུབ་པ་ལྔ། ལྔ་པོ་གང་ཡིན་ན། འཇམ་དཔལ་སྐུ། པདྨ་གསུང་། ཡང་དག་ཐུགས། ཆེ་མཆོག་ཡོན་ཏན། ཕུར་བ་ཕྲིན་ལས་རྣམས་རེད། དེའི་ཁར་འཇིག་རྟེན་པ་གསུམ་བསྣན་པས་བརྒྱད་རེད། འཇིག་རྟེན་པ་གསུམ་པོ་ནི། མ་མོ་རྦོད་གཏོང་དང་། འཇིག་རྟེན་མཆོད་བསྟོད། དམོད་པ་དྲག་སྔགས་གསུམ་པོ་རེད། རིག་འཛིན་བླ་མའི་ལྷ་ཚོགས་ཀྱི་ཚོམ་བུ་དགུའི་དཀྱིལ་འཁོར་གྱི་དབྱེ་འབྱེད་ཡོད་པའི་ནང་གི། སྐབས་འདིར་ཕུར་བ་ཕྲིན་ལས་ཀྱི་ལྷ་ཚོགས་རྡོ་རྗེའི་ཕུར་བུའི་དཀྱིལ་འཁོར་ཞལ་ཕྱེས་ཏེ་དེའི་དབང་བསྐུར་བའི་སྐབས་ཡིན་ན། འདི་ཉིད་བཤད་དུས། སྔོན་བྱུང་བརྒྱུད་པའི་ལོ་རྒྱུས་ཤིག་དང་ཕྱིས་བྱུང་མན་ངག་གི་བབས་ཚུལ་རྣམ་པ་གཉིས་ཀྱིས་བཤད་དགོས། དེ་ཡིན་ན། སྔོན་བྱུང་བརྒྱུད་པའི་ལོ་རྒྱུས་ནི་སྔར་འོག་མིན་སྤྲུལ་བའི་གནས་མཆོག་ནས་བཅོམ་ལྡན་འདས་འཇིགས་བྱེད་ཆེན་པོའི་སྐུར་བཞེངས་ནས་འཁོར་སེམས་དཔའ་དང་སེམས་མའི་ཚོགས་ལ་དམ་ཆོས་བདུད་རྩི་ཕུར་བའི་ཆོས་བསྟན་པ་དེ། གསང་འཛིན་ཕྱག་ན་རྡོ་རྗེས་ཚུར་བསྡུས་ཏེ། ཡང་སྙིང་འབྲུ་དགུ་པའི་ཚུལ་དུ་ཐུགས་ཀར་སྦས་པ་དེ། སླར་ཡང་བཅོམ་ལྡན་འདས་རྡོ་རྗེ་སེམས་དཔས་བསྐུལ་བ་བཞིན་དུ། ཕྱག་ན་རྡོ་རྗེས་མི་ཡུལ་འདོད་ཁམས་ཀྱི་གནས་སུ་དར་བར་མཛད་པ། བརྒྱུད་གསུམ་དགོངས་པའི་བབ་ཚོད་སྤྱི་དང་མཐུན་པ་ཡིན། དེ་ནི་སྔོན་བྱུང་བརྒྱུད་པའི་ལོ་རྒྱུས་རེད། ཕྱིས་བྱུང་མན་ངག་གི་བབས་ཚུལ་དེ་གང་འདྲ་རེད་བསམ་ན། གྲུབ་པའི་རིག་འཛིན་བརྒྱད་ཀྱི་ནང་ཚན་གོང་དུ་གསུངས་པ་ལྟ་བུའི་སློབ་དཔོན་པྲ་བྷ་ཧིསྟི་དང་། པཎ་ཆེན་བི་མ་ལ། སློབ་དཔོན་ཆེན་པོ་པདྨ་སམྦྷཝ་སོགས་ཀྱིས། རྒྱུད་ལས་མན་ངག་དུ་བཏུས་པའི་ཆོས་ཀྱི་རྣམ་གྲངས་མང་པོ་བསམ་གྱིས་མི་ཁྱབ་པ་ཞིག འཇིག་རྟེན་གྱི་ཁམས་སྤྱི་དང་ཁྱད་པར་བོད་ཡུལ་ལ་སྣང་བར་མཛད་པ་རེད། དེ་ཡིན་ན་ཕུར་པ་ཕྲིན་ལས་ཀྱི་རྒྱུད་འདི་གོང་ནས་གསུངས་པའི་རྩ་བ་ལྟ་བུ་སྐུའི་རྒྱུད་སྡེ་ལས་འཕྲོས་པའི་སྡོང་པོ་ཡལ་ག་ལོ་མ་མེ་ཏོག་འབྲས་བུ་དང་བཅས་པའི་དཔག་བསམ་ཤིང་ཆེན་ཞིག་ལ་དཔེ་བླངས་པའི་རྒྱུད། མ་ཚང་བ་ཁ་སྐོང་གི་རྒྱུད་དང་བཅས་པ་མང་པོ་ཞིག་དང་། དེའི་སྟེང་ལ་བི་ཏོ་ཏ་མ་འབུམ་སྡེ་རིག་པ་མཆོག་གི་རྒྱུད། ཀི་ལ་ཡ་བཅུ་གཉིས་ཀྱི་རྒྱུད་ལ་སོགས་པ་མཐའ་ཡས་པ་ཞིག་ཡོད་ན། དེའི་རྒྱུད་སྡེ་སྒྲུབ་སྡེ་གཉིས་ཀའི་བརྒྱུད་ཚུལ། ཆོས་བཀའ་བབས་ལུགས་ཀྱིས། བོད་འདི་ནས་རྒྱལ་པོ་ལུགས་དང་། ཇོ་མོ་ལུགས། ལྕམ་ལུགས་ཟེར་རྒྱུ། འཁོན་ལུགས། སོ་ཟུར་གནུབས་གསུམ་སོ་སོར་ནས་བརྒྱུད་པའི་ལུགས་དང་། ད་རུང་རོང་ཕུར། རོག་ཕུར་ལ་སོགས་པ་མང་པོ་ཞིག་ཡོད་པའི་ནང་གི་རྒྱལ་པོ་ལུགས་དེ། སློབ་དཔོན་ཆེན་པོས་བོད་ཀྱི་རྒྱལ་པོ་ཁྲི་སྲོང་ལྡེ་བཙན་གྱི་ཐུགས་དམ་གྱི་སྐལ་བར་གནང་པ་དེ་དང་། ཇོ་མོ་ལུགས་ཞེས་པ་འདི་ཇོ་མོ་ཟེར་ན་རྗེ་མོའི་དོན་དག་རེད། ཇོ་མོ་མཚོ་རྒྱལ་ལ་སློབ་དཔོན་ཆེན་པོ་སྲིན་ཡུལ་དུ་བྱོན་རན་དུས་བསྟན་པ་དེ་རེད། ལྕམ་ལུགས་ནི། རྒྱལ་པོ་ཁྲི་སྲོང་ལྡེའུ་བཙན་གྱི་བཙུན་མོ་ཅོག་རོ་བཟའ་ལ་སློབ་དཔོན་ཆེན་པོས་གནང་བ་རེད། དེ་གནང་བའི་དབང་གི་སྐབས་སུ་སློབ་དཔོན་པདྨས་མདུན་གྱི་ནམ་མཁར་ཡི་དམ་གྱི་དཀྱིལ་འཁོར་སྤྲུལ་ནས་བསྐུར་དུས། ཅོག་རོ་གཟས་བླ་མ་ལ་ཕྱག་མ་འཚལ་ཡི་དམ་ལ་ཕྱག་འཚལ་ཏེ་དབང་ཡི་དམ་ལས་ཞུ་གྲབས་བྱས་པས། རྟེན་འབྲེལ་མ་འགྲིག་པར་དེ་མ་ཐག་ཡི་དམ་སློབ་དཔོན་གྱི་སྐུར་བསྡུས་ནས་དབང་བསྐུར་མ་ལོན། དེའི་རྗེས་ནས་ཇོ་མོ་མཚོ་རྒྱལ་ལ་གནང་། མཚོ་རྒྱལ་གྱིས་ཅོག་རོ་བཟའ་ལ་གདམས་པ་གནང་སྟེ་དེ་ནས་བརྒྱུད་པ་དེ་ལ་ལྕམ་ལུགས་ཟེར་རྒྱུ་འདི་རེད། དེ་བཞིན་དུ་བཀའ་གཏེར་གྱི་བརྒྱུད་ཚུལ་མང་པོ་ཡོད་པའི་ནང་གི་འདི་ནི། ཕུར་པ་རྒྱལ་པོ་ལུགས་རྡོ་རྗེ་བཀོད་པ་རྣལ་འབྱོར་ཆེན་པོའི་རྒྱུད་ལེའུ་བཅོ་ལྔ་པའི་བཅུད་བསྡུས་རེད། ཕུར་པ་རྣལ་འབྱོར་ཆེན་པོའི་རྒྱུད་ཕྱི་མའི་ནང་ན། ལུང་བསྟན་གསལ་བོར་བྱས་ནས་ཡོད་པ་ལྟར་དུ། འདིའི་ཆོས་སྐལ་དང་པོ་དེ་བི་མ་མི་ཏྲ་ལ་བབས། དེ་ནས་ཀུན་མཁྱེན་འཇིགས་མེད་གླིང་པ་ལ་བབས་པ་རེད། དེ་ལྟར་ཡིན་པས། ཕུར་པ་རྣལ་འབྱོར་ཆེན་པོའི་རྒྱུད་ཀྱི་ནང་ན་འདི་ལྟར་གསུངས་ཡོད། འདི་ནི་ཀོ་ས་ལ་ཡི་གླིང་། །དེ་རིང་རིགས་ཅན་དེ་ལ་བབས། །གསུངས་ནས་དེས་བི་མ་མི་ཏྲ་བསྟན། སྤྲུལ་པ་འཇིག་རྟེན་མི་གནས་ཚེ། །གསུངས་ཏེ་བི་མ་དངོས་སུ་ཐུན་མོང་གི་ངོ་སྐལ་དུ་མི་སྣང་པར་གྱུར་སོང་དུས་གསུངས་པ་རེད། ཁྱོད་ཀྱི་སྤྲུལ་པ་པདྨའི་རྒྱལ། །དེ་ཡི་ནུས་པ་དོན་བྱེད་འགྱུར། །ཞེས་གསུངས་པ་ལྟར་དུ་པདྨ་ནི་པདྨ་དབང་ཆེན་ཡེ་ཤེས་རོལ་བའི་རྡོ་རྗེ་འཇིགས་མེད་གླིང་པ་ལ། མོན་གྱི་སྤ་གྲོ་སྟག་ཚང་ནས་རླངས་ཆེན་དཔལ་གྱི་སེངྒེ་སྐུ་དངོས་ཀྱིས་རྡོ་རྗེ་ཕུར་བུའི་དབང་རྫོགས་པར་བསྐུར་ནས་ཕྱི་མའི་དུས་འདིའི་ཕུར་བའི་བཀའ་བབས་ཀྱི་རིག་འཛིན་ཆེན་པོར་གྱུར་སོང་བ་རེད། ཁོང་རང་གིས་གསུངས་བ་བཞིན་བྱས་ན། ཚོགས་བདུན་རོལ་བའི་སྣང་ཆ་ན། མོན་གྱི་སྤ་གྲོ་སྟག་ཚང་ཡིན་རྒྱུའི་ཕུག་པ་ཁ་ཤར་ལྷོར་བསྟན་པ་ཞིག་གསུངས་ཡོད། ཁ་ཤར་ལྷོར་བསྟན་པ་ཞིག་གི་ནང་ནས། རླངས་དཔལ་སེང་གོས་དཀར་ཆས་ཞུགས་ཀྱི་ཚུལ་ཅན་ཞིག་མཛད་ནས་རྡོ་རྗེ་ཕུར་བའི་དབང་བསྐུར་ཆ་ཚང་ཡོངས་སུ་རྫོགས་པ་གསན་པ་ལ་སོགས། ཚིག་ངོ་མ་དེ་ལྟར་མིན་ཡང་། མདོར་ན་དོན་དེ་འདྲ་བ་ཞིག་གསུངས་འདུག་མོད། གང་ལྟར་དུས་བབས་རྟེན་འབྲེལ་མངོན་དུ་གྱུར་དུས་ཁོང་གིས་བཀའ་ཡི་བསྡུ་བ་བྱས་གསུངས་ཡོད། དེ་ལྟ་བུའི་བཀའ་བབ་ཉེ་བརྒྱུད་ཀྱིས་བརྒྱུད་པའི་རྫོགས་ཆེན་ཀློང་ཆེན་སྙིང་ཐིག་གི་དྲག་པོ་དཔལ་ཆེན་འདུས་པའི་ཕྲིན་ལས་ཀྱི་སྒོས་བཀའ། ཕུར་པ་བདུད་དཔུང་ཟིལ་གནོན་གྱི་ཕྱི་ཕན་པའི་དབང་གི་སྐབས་ནས། མཚམས་འདིར། ཨེ་མ་ཧོ། བདེ་གཤེགས་སྙིང་པོ་ལས། །སོགས་རྗེས་ཟློས་དང་ཡན་ལག་བདུན་པ་སོགས་སོང་མཐར། ཤར་དུ་རྣམ་རྒྱལ་ལ་སོགས་པ་ཁྲོ་བོ་བཅུའི་རིམ་པ་རིམ་བཞིན་དུ་གསུངས་ཡོད། དེ་ནས་ནང་འཇུག་གི་ཐོག་མར་ཡེ་ཤེས་པ་དབབ་པ་དེ། རིགས་ཀྱི་མེ་ཏོག་དཀྱིལ་འཁོར་གྱི་ལྷ་ལ་ཕུལ། དེའི་མཚམས་སུ་མིག་ཕྱེས་ཏེ་དཀྱིལ་འཁོར་གྱི་མཐོང་བ་བསྟན་པའི་སྐབས་འདིའི། གོང་ནས་གནམ་ལྕགས་ཀྱི་ཙཀྲ་རྩིབས་བཅུ་གསུངས་རྒྱུ་དེ། འཁོར་ལོ་ལེབ་མོའི་དབྱིབས་ཅན་གདན་ཐབས་སུ་བཀོད་པ་ལྟ་བུ་ཞིག་གི་དོན་མ་རེད། ཙཀྲ་རྩིབས་བརྒྱད་པ་སྟེང་འོག་གི་རྩིབས་གསུམ་ལྟེ་བ་གཉིས་དང་བཅུ་བྱས་ཏེ་གསལ་འདེབས་དགོས་པ་རེད། སྲུང་འཁོར་སྐབས་ཀྱི་གཙུག་ཏོར་འཁོར་ལོའི་བསྒྱུར་བ་གསུངས་རྒྱུ་ཞིག་ཡོད། བསྐྱེད་རྫོགས་ཀྱི་སྐབས་ཤིག་ལ་ཞིབ་ཏུ་བཤད་མྱོང་བ་རེད། བྷྲཱུཾ་ཡིག་གནས་འགྱུར་གྱི་སྐབས་དང་གཅིག་པ་རེད། སྟོང་ཁམས་ཟད་མཐའ་མེད་པའི་མུ་དང་མཉམ་པ་ནམ་མཁའི་རྒྱ་ཁྱོན་ཙམ་ལ་བསྐྱེད་རྒྱུའི་ཏིང་འཛིན་ཡིད་ཀྱི་སྒྱུ་འཕྲུལ་ལ། ལོ་དང་མི་ལོ་དང་ཤོང་དང་མི་ཤོང་གི་གུ་དོག་མི་དགོས། མ་ཧཱ་ཡོ་ག་བས་བསྐྱེད་རིམ་གཙོ་བོར་བྱས་པའི་ཏིང་འཛིན་གྱི་རྩལ་རྫོགས་ཡོང་དུས། མཚན་བཅས་ཀྱི་རྫོགས་རིམ་དང་བཅས་པས་དྲངས་ཏེ་མཚན་མེད་རྫོགས་པ་ཆེན་པོར་འཇུག་དགོས་པ་རེད། བདེ་ཆེན་ཀུན་ཏུ་བཟང་མོའི་ཨེ་ཀློང་། རྣམ་ཐར་གསུམ་ལྡན་གྲུ་གསུམ་མཐིང་ནག་འབར་བའི་དཀྱིལ་འཁོར་གྱི་རྡོ་རྗེ་རྩེ་མོའི་མཁའ་ན། ཞེ་སྡང་ཚུལ་གྱིས་ཞེ་སྡང་འཇོམས་པའི་བརྡ་རུ། སྲ་འཐས་རྡོ་རྗེའི་བྲག་ཆེན་གྱི་སྟེང་དུ། མ་ཆགས་པདྨ་དང་ཐབས་ཤེས་ཉི་ཟླ། བདག་འཛིན་མཚོན་པའི་རུ་ཏྲ་ཕོ་མོ་བྱི་ཆིངས་སུ་བསྣོལ་བའི་སྟེང་ན། འདི་སྐུ་ཞི་བ་ལྟར་ན། རིག་འདུས་རྡོ་རྗེ་སེམས་དཔའ་རིག་ཀུན་འདུས་པའི་བདག་པོ། ཁྲོ་བོ་ལྟར་ན། འཇིགས་མཛད་ཀརྨ་ཀཱི་ལ་ཡ་ལ་སྣང་བ་དེ། དཔལ་ཆེན་རྡོ་རྗེ་གཞོན་ནུ། སྙིང་རྗེ་རྔམ་དང་ཞི་བའི་ངང་ལས་མ་གཡོས་བཞིན་དུ། སྒེག་པ་དང་དཔའ་བ་འཇིགས་སུ་རུང་བ་དྲག་པོའི་སྐུ། ཆོས་ཉིད་འགྱུར་བ་མེད་པའི་སྐུ་མདོག་མཐིང་ནག་ཞལ་གསུམ་ཕྱག་དྲུག་ཞབས་བཞི། ཞལ་ཡང་གཡས་ཞལ་དཀར་ལ་བཞད་པ། གཡོན་ཞལ་དམར་ལ་གཤེ་བ། དབུས་ཞལ་མཐིང་ནག་ཁྲོ་ལ་གཏུམ་པས་ཚར་བཅོད་རྗེས་འཛིན་སྤེལ་མ་དང་གསུམ་གྱི་ཕྲིན་ལས་ལ་མངའ་མཛད་པ་རེད། ཕྱག་དྲུག་གི་དང་པོ་གཉིས་ཀྱིས་རྡོ་རྗེ་རྩེ་དགུ་དང་མེ་དཔུང་། བར་བ་གཉིས་ཀྱིས་རྡོ་རྗེ་རྩེ་ལྔ་དང་ཁ་ཊྭཱཾ་བསྣམས་པ། ཐ་མ་གཉིས་ཀྱིས་རི་རབ་ཀྱི་ཕུར་བུ་འདྲིལ་བ། ཞབས་བཞི་དེ་དྲག་པོའི་དོར་སྟབས་ཀྱིས་བགྲད་པ། སྐུ་ལ་དཔལ་གྱི་ཆས་བཅུ། དུར་ཁྲོད་རོལ་བའི་ཆས་བརྒྱད་ཀྱིས་བརྒྱན་པ། སྦྱོར་ཡུམ་འཁོར་ལོ་རྒྱས་འདེབས་དང་སྒྲོལ་ཡུམ་ཨེ་ཀ་ཙ་ཏི་གཉིས་ལས་ཡུམ་འཁོར་ལོ་རྒྱས་འདེབས་ཀྱིས་ཕྱག་ན་དྲིལ་བུ་དང་ཐོད་ཁྲག་གམ་དུང་དམར་འཛིན་པ། སྐུ་མདོག་སྔོ་སྐྱ་ཞལ་གཅིག་ཕྱག་གཉིས་ཐོད་སྦྲུལ་གྱིས་བརྒྱན་པ་ཡབ་ལ་འཁྲིལ་ནས་ཡོད་པ། ཡབ་ཡུམ་གཉིས་མེད་ཀྱི་ཚུལ་ཅན། ཡེ་ཤེས་བསྐལ་པའི་མེ་དཔུང་འབར་བའི་དབུས་ན། གཙོ་མཆོག་ཁྲོ་རྒྱལ་ཀཱི་ལ་ཡ་རྡོ་རྗེ་ཁྱུང་གཤོག་རྒྱངས་ཤིང་འགྱིང་པའི་གཡོན་ཕྱོགས་ན། སྒྲོལ་ཡུམ་ཨེ་ཀ་ཛ་ཏི་དེ་གྲི་ཐོད་བསྣམས་ཤིང་རེ་འགར་ཁ་ཊྭཱཾ་རྩེ་གསུམ་བསྣམས་པའི་སྐབས་ཀྱང་ཡོད། མ་མོ་དྲུག་བཅུའི་ཕོ་ཉ་འབྱེད་མཁན། བུདྡྷ་བཛྲ་རཏྣ་པདྨ་ཀརྨ་སྟེ་སྲས་མཆོག་ཀཱི་ལ་ཡ་རིགས་ལྔ། ད་རུང་ཕྱི་རོལ་གྱི་རྩིབས་བཅུ་ལ་ཁྲོ་བོ་བཅུ་ཡུམ་དང་བཅས་པ་དེ་ལྟ་བུའི་དཀྱིལ་འཁོར་ཆེན་པོའི་ཕྱི་ནང་ཀུན་ཏུ། ཁྲོ་ཆེན་ཡབ་ཡུམ་སྲས་འཁོར་ཕྱག་བརྙན་སྤྲུལ་བ་ཡང་སྤྲུལ་ཕྲ་ཐབས་དང་བཅས་པ་མཆེ་བ་ཅན་དང་གཤོག་པ་ཅན། ཕྲ་མེན་མགོ་བརྙན་སྣ་ཚོགས་ཅན། སྒོ་བཞིར་སྒོ་སྐྱོང་སྒོ་མ་རྣམ་བཞི་དང་བཅས་པ་ཕྱོགས་མཚམས་སོ་སོར་རྔམ་པའི་སྟབས་ཀྱིས་འགྱིང་ནས་བཞུགས་ཡོད། དཀྱིལ་འཁོར་ཁྱམས་ཀྱི་མུ་རན་ལ་ཕུར་བའི་སྲུང་མ་བཅུ་གཉིས་ཏེ། ཤྭ་ན་མ་བཞི། ས་བདག་མ་བཞི། བདག་ཉིད་མ་བཞིའི་བཅུ་གཉིས་དང་བཅས་པ། དེ་ཐམས་ཅད་གཙོ་བོ་གཅིག་གི་ཆོ་འཕྲུལ་ལས་གཙོ་འཁོར་ཉི་མའི་ཟེར་བཞིན་དུ་ཡང་སྤྲུལ་འབུམ་ཕྲག་གྲངས་མེད་དང་བཅས་པ་གསལ་བ་འདི་ནས་གསུངས་པ་ལྟར་རེད། མཚམས་འདིར། སྨད་ལས་དགྲ་བགེགས་སྒྲོལ་བའི་དབང་ཆོག ཇི་ལྟར་བརྩམ་པའི་ཕྲིན་ལས་དམིགས་པའི་རིམ་པ་གསལ་འདེབས་གནང་བར་ཞུ། ཞེས་པའི་མཚམས་ནས། གསང་བ་སྔགས་ཀྱི་ལམ་ཐམས་ཅད་གསང་སྔགས་རང་གི་སྡེ་སྣོད་ལས་འབྱུང་བ་ཡིན་རྒྱུ་དང་། དེ་ཡང་སྔགས་ཀྱི་སྟོན་པ། རྒྱལ་བ་རྡོ་རྗེ་འཆང་གིས་གསུངས་པའི་རྒྱུད་ལ་མ་བརྟེན་ན་མི་འབྱུང་རྒྱུ་ཞིག་རེད། རྒྱུད་ཟེར་དུས་གཞི་རྒྱུད། ལམ་རྒྱུད། འབྲས་རྒྱུད་ཀྱིས་བསྡུས་པའི་རྒྱུད་ཡིན། དབང་འདི་ཡང་གཞི་དབང་དང་། ལམ་དབང་། འབྲས་དབང་གི་རྣམ་བཞག གཞི་ལམ་འབྲས་བུའི་རྒྱུད་ཀྱི་རྣམ་བཞག་ལས་རང་ཤུགས་ཀྱིས་འབྱུང་། དེ་ཡིན་ན། གཞི་དབང་རང་ལ་ཡོད་པའི་གཞི་རྒྱུད་བདེ་བཤེགས་སྙིང་པོ་རང་བཞིན་ཇི་ལྟ་བ་བཞིན་དུ་གདམས་པ་ཟབ་མོའི་མན་ངག་དང་བླ་མ་དམ་པའི་ངོ་སྤྲོད་ཀྱིས་གནས་ལུགས་རྟོག་དཔྱོད་ཀྱིས་གཏན་ལ་ཕབ་ནས་དེ་དོན་སྤྲོས་པ་ཉེ་བར་ཞི་བ་མ་བཅོས་སྤྲོས་མེད་ཀྱི་རང་ངོ་ཤེས་པ་དེ་ཉིད་ཡིན། ལམ་དབང་ནི། ལྟ་སྒོམ་སྤྱོད་གསུམ་དང་འབྲེལ་བ། རྫས་སྔགས་ཏིང་འཛིན་ཚོགས་པའི་བྱེད་པ་ཞིག་གིས། ཕན་ནུས་ཟབ་མོའི་དབང་བསྐུར་ཐམས་ཅད་ནོད་པའི་དབང་སྲོག་དམ་ཚིག་དག་པ་དེ་དང་། འབྲས་དབང་ནི། ཐུན་མོང་མཆོག་གི་དངོས་གྲུབ་བརྙེས་ཏེ་རིག་འཛིན་རྣམ་བཞིའི་མྱུར་ལམ་མིག་འཕྲུལ་ལྟ་བུར་བགྲོད་ནས། ཟུང་འཇུག་གདོད་མའི་མགོན་པོའི་གོ་འཕང་མངོན་དུ་བྱེད་རྒྱུ་དེ་ཡིན། དབང་ཟེར་རྒྱུ་འདི་ནི། རྡོ་རྗེ་ཐེག་པའི་ལམ་གྱི་འཇུག་སྒོ་ཡིན། དེ་ཇི་ལྟར་ཡིན་ཟེར་ན། དབང་མ་ཐོབ་ལ་དངོས་གྲུབ་མེད་པས་ལམ་གྱི་འཇུག་སྒོ་དབང་ལ་ལྟོས་དགོས། དབང་ཐོབ་ན་དེ་དང་དེའི་སྒོམ་སྒྲུབ་ཉམས་ལེན་བྱེད་པ་ལ་དབང་བ་ཡིན། དབང་ནི་མཐར་གྱི་སྐྱེལ་སོ་ཡིན་ལ་དབང་ནི་མཐར་འབྲས་བླ་མེད་བྱང་ཆུབ་ཐོབ་བྱེད་ཡིན། ལམ་གྱི་མཐར་ཐུག་དབང་ལས་འབྱུང་བ་ཡིན། དེའི་ཕྱིར་ན་གསང་ཆེན་རྡོ་རྗེའི་ཐེག་པའི་གཞི་ལམ་འབྲས་བུའི་གནད་ཐམས་ཅད་དབང་གི་སྒྲོམ་ལ་མ་འདུས་པ་ཞིག་མེད། དབང་མེད་ན་བྱང་ཆུབ་ཆེན་པོར་སྒྲུབ་པའི་ཐབས་མེད་པས་མེད་ན་མི་འབྱུང་གི་རྒྱུ་རྐྱེན་ཡང་འདི་ལ་ཚང་བ་རེད། དེ་ལྟར་ན་སྐབས་དོན་ནི། རྡོ་རྗེ་ཕུར་བའི་ཆོས་སྐད་ལྟར་དུ་བྱས་ཏེ་བཤད་ཡོང་ན། ཡུལ་སྣང་ཆོས་དབྱིངས་ནམ་མཁའ་ལྟ་བུའི་ངང་ལ། སེམས་སྣང་རིག་པ་ཡེ་ཤེས་ཀྱི་དེ་ཉིད། དབྱེར་མེད་མཉམ་ཉིད་གཅིག་ལ་འདུས་པ་དེ་ཕུར་བའི་ལྟ་བ་རེད། ལྟ་བ་དེའི་སྟེང་ལ་བཙལ་དུ་མེད་པའི་ཆོས་ཉིད་དང་སྒོམ་དུ་མེད་པའི་མ་བཅོས་སྤྲོས་མེད་དུ་བཞག་པ་ནི་ཕུར་བའི་སྒོམ་པ། གདོད་ནས་མ་བཅོས་ཡེ་ནས་ལྷུན་གྲུབ་ཀྱི་སྤྲོས་མེད་རང་བྱུང་དོན་གྱི་འོད་གསལ། གཡོ་མེད་མི་འགྱུར་ཟང་ཐལ་ཐིག་ལེ་ཉག་གཅིག་ལ་དབང་འབྱོར་པ་ཕུར་བའི་འབྲས་བུ། བསྐྱེད་རྫོགས་བསྙེན་སྒྲུབ་ཀྱི་ལམ་ལ་དྲོད་རྟགས་གང་འཚམ་ཞིག་བརྙེས་དུས། སྣང་སྲིད་ཁྲོ་བོ་ཁྲོ་མོར་ཤར་བས་གང་འདོད་ལས་ཀུན་འགྲུབ་ཅིང་སྒྲུབ་ནུས་པ་དེ་ཕུར་བུའི་སྤྱོད་པ་རེད། དེ་ཡིན་སོང་ན། སྒྲུབ་པ་སྟོད་ལས་དང་སྨད་ལས་སུ་ཕྱེས་ཡོང་དུས། དེ་ཡང་དབང་དང་སྦྲེལ་ཏེ་སྟོད་ལས་བྱང་ཆུབ་སྒྲུབ་པ་ལྟ་བ་དང་རྗེས་སུ་འབྲེལ་བས་དབང་ལ་བཞག སྨད་ལས་དགྲ་བགེགས་སྒྲོལ་བ་དེ་སྤྱོད་པ་དང་འབྲེལ་བས་རྗེས་གནང་ལ་བཞག་པ་རེད། རེད་དེ་ལམ་རྒྱུད་ཐབས་ཀྱི་མཆོག་ཏུ་གྱུར་པ། དཀྱིལ་འཁོར། ཕྱག་རྒྱ། སྔགས་དང་མཆོད་པ་ལ་སོགས་པ་རྒྱུད་ཀྱི་དངོས་པོ་ཐམས་ཅད་ཀུན་ཀྱང་སྒོམ་མེད་སྒོམ་པ་ཀུན་གྱི་མཆོག་གྱུར། མི་འགྱུར་ཆོས་དབྱིངས་བདེ་ཆེན་གྱི་ཡེ་ཤེས་ལ་རང་བྱན་ཆུབ་པའི་དགོངས་པ་མི་འགྱུར་པའི་གཟེར་གྱི་དབང་དུ་མ་གྱུར་པ་ཞིག་མེད་པའི་རྒྱུ་མཚན་གྱིས། ཁམས་གསུམ་སྲིད་པ་གསུམ་པོ་དེ་བཅོམ་ལྡན་འདས་དཔལ་ཆེན་རྡོ་རྗེ་གཞོན་ནུའི་རྟེན་དང་བརྟེན་པའི་དཀྱིལ་འཁོར་གྱི་ཡེ་ཤེས་ཆེན་པོའི་རོལ་བར་དག་སོང་བའི་དོན་དེ་ཉིད་ཕུར་བའི་ངོ་བོ་ཉིད་དུ་གྲུབ་པ་རེད། དེ་ཇི་ལྟར་རེད་ཟེར་ན། ཁམས་གསུམ་སྲིད་པ་གསུམ་པོ་དཔལ་ཆེན་རྡོ་རྗེ་གཞོན་ནུའི་རྟེན་དང་བརྟེན་པའི་དཀྱིལ་འཁོར། ཡེ་ཤེས་ཆེན་པོའི་རོལ་བར་དག་པའི་ཚུལ་དེ་ངོ་བོ་ཉིད་དུ་གྲུབ་པ་རེད་གསུངས་པ་རེད། སྣང་བ་འདོད་ཁམས་ཀྱི་སྲིད་པ་སྐུའི་ཕྱག་རྒྱ་ཆེན་པོ། ཕྱེད་སྣང་གཟུགས་ཁམས་ཀྱི་སྲིད་པ་གསུང་གྲག་སྟོང་རྡོ་རྗེའི་རོལ་མོ། མི་སྣང་གཟུགས་མེད་ཁམས་ཀྱི་སྲིད་པ་ཐུགས་རང་བཞིན་རྣམ་པ་མི་རྟོག་པའི་ཡེ་ཤེས། དེ་ལྟ་བུའི་རྡོ་རྗེ་གསུམ་གྱི་གསང་བ་ལས་མི་འདའ་པའི་ཡེ་ཤེས་ཆེན་པོ་གཅིག་ཏུ་གྱུར་སོང་དུས། འཁོར་འདས་མཉམ་ཉིད་དེ་ཁོ་ན་ཉིད་དོན་གྱི་ཕུར་བ་གྲུབ་སོང་བ་རེད། དེ་ལྟ་བུའི་ལམ་ལ་གོམས་པ་དེས་སྟོད་ལས་བྱང་ཆུབ་སྒྲུབ་པ་མཚན་ཉིད་པ་ཞིག་དང་། དེ་དང་རྗེས་སུ་འབྲེལ་བའི་སྨད་ལས་དགྲ་བགེགས་བསྒྲལ་བ་ཡང་མིང་དོན་མཚུངས་པ་གཟུགས་བརྙན་ཙམ་དུ་འགྱུར་མི་འགྲོ་པ་ཞིག་རེད་པ་ཡིན། འདིར་ལྟ་སྒོམ་སྤྱོད་པ་གསུམ་གྱི་ཐོག་ནས་བཤད་ན། ལྟ་བ་ཆོས་ཉིད་ཀྱི་རྫོང་ཟིན། སྒོམ་པ་ཏིང་ངེ་འཛིན་གྱི་འཕྲང་གི་གོལ་ས་ལས་གྲོལ། སྤྱོད་པ་སྙིང་རྗེའི་སྲོག་དང་ལྡན་པ་ཞིག་གི་ཐོག་ནས་དགྲ་བགེགས་བསྒྲལ་བའི་མངོན་སྤྱོད་ཀྱི་ལས་རྩོམ་དགོས་པ་ཞིག་རེད། དེ་ཡང་ཚིག་ཚུར་བསྡུས་ཡོང་ན་རྟོགས་པས་བདག་རྒྱུད་གྲོལ་ནས་ཐུགས་རྗེས་གཞན་རྒྱུད་སྒྲོལ་རྒྱུའི་གནད་དེ་ལ་ཐུག དེས་ན། དཀྱིལ་འཁོར་གསུམ་གྱིས་མཚོན་པའི་གང་ཞིག་བསྒྲུབས་ཤིང་གང་དུ་དབང་སྐུར་བ་རྡོ་རྗེ་ཕུར་བ་ཞེས་གསུངས་པའི་སྒྲ་ཐད་འཇུག་གི་སྐབས་ཀྱི་གོ་དོན་དེ་ཇི་ལྟར་རེད་སྙམ་ན། སྤྲོས་མཐའ་བཞིའམ་བརྒྱད་དང་བྲལ་བའི་སྟོང་པ་ཉིད། འདུས་མ་བྱས་པའི་ཆོས་ཉིད་དུ་ཡེ་ནས་འགྱུར་བ་མེད་པ་རྐྱེན་གང་གིས་ཀྱང་འཇིག་འབྲལ་བྱར་མི་ཐུབ་པས་ན་ཕུར་བ་ཕྲིན་ལས་ཀྱི་རྒྱུད་རྡོ་རྗེ་ཁྲོས་པའི་སྤྱི་སྡོམ་གྱི་ནང་ན། རྣམ་པ་ཀུན་མཆོག་ལྡན་པ་ཡི། །སྟོང་པ་ཉིད་ལ་རྡོ་རྗེར་བརྗོད། །ཅེས་གསུངས་པས་དེ་ལྟ་བུའི་རྡོ་རྗེའི་མིང་གིས་མཚོན་པའི་དོན་རྟགས་སུ་བྱུང་བ་དེ། དེ་ཉིད་ཤེས་པའི་ཤེས་རབ་ལ་སྒྲས་བསྙད་ཅིང་བཏགས་པ་ལ། དེ་བཞིན་ཉིད་ཀྱི་ཏིང་ངེ་འཛིན་ཞེས་བརྗོད་པ་རེད། སྟོང་ཉིད་སྙིང་རྗེ་ཟུང་འཇུག་ཆུ་དང་རླན་བཞིན་འབྲལ་མི་ཤེས་པའི་ངོ་བོ་དེར་གཟུང་དང་འཛིན་པའི་རྟོག་པ་ཐམས་ཅད་བཅད་ཅིང་འཇོམས་པའི་རང་བཞིན་དུ་ངང་གིས་ལྡན་པ་ནི། ཁྲོས་པའི་སྒྲ་རུ་བྱུང་ནས། རྡོ་རྗེ་ཁྲོས་པས་ཞེ་སྡང་གཅོད། ཅེས་གསུངས་ཡོད་པ་རེད། སངས་རྒྱས་ཀྱི་སའི་སྒྲིབ་པ་སྤངས་པའི་སེམས་བསྐྱེད་ཀྱི་གདངས་དེ་སྨོན་ལམ་གྱི་དབང་གིས་མ་རྟོགས་གདུལ་དཀའི་སེམས་ཅན་ལ། སྙིང་རྗེའི་རང་བཞིན་དུ་སྣང་བ་དེར་ཀུན་སྣང་གི་ཏིང་ངེ་འཛིན་གསུངས་པ་རེད། དེ་ལྟར་ལྷག་བསམ་དག་པའི་སེམས་བསྐྱེད་དང་། མོས་པས་སྤྱོད་པའི་སེམས་བསྐྱེད་ཡིན་རུང་བྱང་ཆུབ་འཇུག་པའི་སྤྱོད་པ་ལ་ཞུགས་ནས་གཞན་དོན་རྒྱ་ཆེན་ལ་དམིགས་པའི་སྙིང་རྗེ་ཆེན་པོར་འཆང་དུས། དེའི་ལྡོག་ཟླ་ཞེ་སྡང་དངོས་མཚན་པའི་སེམས། སྣང་མུན་ལྷན་ཅིག་ལ་འདུ་མི་ཤེས་པ་བཞིན་ཡིན་པས་ན། སྟོང་ཉིད་སྙིང་རྗེ་དབྱེར་མེད་ཀྱི་རྡོ་རྗེ་ཁྲོས་པས་ཞེ་སྡང་གཅོད་པའི་སྒྲ་དེ་བྱུང་བ་རེད། ཁྲོས་གསུངས་པ་འདི། ཁྲོས་པ་རང་ག་བ་མིན། བདུད་དང་སྲིན་པོའི་ང་རྒྱལ་མ་ཡིན་ཏེ། །འདུལ་བའི་དབང་གིས་རབ་རྔམ་མཆེ་བ་གཙིགས། ཞེས་གསུངས་པ་རེད། དེའི་ཀུན་སྣང་གི་ཏིང་ངེ་འཛིན་དེ་མཆེད་པའམ་ཕྲ་བ་རགས་པའི་རྣམ་པར་ལྡང་ནས་བསྐྱེད་པ་རྒྱུའི་ཡི་གེའི་རང་བཞིན་དུ་བྱུང་བ་དེ་ནི་རྒྱུའི་ཏིང་ངེ་འཛིན་ཏེ། སངས་རྒྱས་ཐམས་ཅད་ཀྱི་ཐུགས་རྡོ་རྗེ་མཚོན་བྱེད། ཆོས་ཉིད་མི་འགྱུར་བའི་ཁ་དོག་ཅན་གྱི་ཧཱུྃ་ཡིག་སྔོན་པོར་ཤར་བ་ལ། མཚོན་ཆེན་སྔོན་པོ་འབར་བ་ཡི། །ཞེས་གསུངས་པ་རེད། དེ་ཇི་ལྟར་ཤར་ན། ནམ་མཁའི་དཀྱིལ་ནས་ཐིགས་པ་ཤར། །ཞེས་གསུངས་པས་བསྟན། ཆོས་ཉིད་ཅི་ཡང་མ་ཡིན་པ་ནམ་མཁའ་ལྟ་བུ་ལས་ཆོས་ཅན་ཅིར་ཡང་འཆར་བ་ནམ་མཁའ་ནས་ཆུ་ཐིགས་རྡོལ་བ་ལྟར་དུ། ཆོས་ཀྱི་དབྱིངས་ལས་ཆོས་ཅན་འཁྲུལ་བ་དུམ་བུར་ཞུགས་པ་ལ་ཉམས་ང་མེད་པ། དེ་ཉིད་འབར་བའི་སྒྲ་ཡིས་བསྟན་ཏེ། སྐུ་གསུམ་གསང་བ་གསུམ་དང་དབྱེར་མི་ཕྱེད་པའི་བསྐྱེད་རྫོགས་གཉིས་ཀྱི་གོ་དོན་བསྡུས་ཏེ་བསྟན་པ་རེད། སྲོག་གི་གོ་རུ་ཤར་བ་དང་། །ཞེས་གསུངས་བ་དེ་ནི། དེ་ལྟ་བུའི་ཧཱུྃ་ཡིག་མི་འགྱུར་ཐུགས་ཀྱི་ཡི་གེ་དེ་ཉིད། དྲོད་དང་རྣམ་ཤེས་ཀྱི་རྟེན་བྱས་པའི་སྲོག་གི་ངོ་བོའི་གོ་ས་རུ་ཐུགས་སྲོག་གི་སྙིང་པོར་ཤར་བ་དང་ཞེས་པའི་དོན་དང་། ད་རུང་ཕུང་པོ་རྡོ་རྗེར་གཏམ་བྱས་ལ། །གསུངས་པ་ཞིག་ཀྱང་ཡོད་མོད། ཕུང་པོ་རྡོ་རྗེར་ཇི་ལྟར་གཏམ་སྙམ་ན། རང་ལུས་རྡོ་རྗེ་ཕུང་པོའི་གྲོང་ཆེར་ཡེ་ནས་ལྷུན་གྲུབ། རྡོ་རྗེ་ཕུར་བ་གདན་གསུམ་ཚང་བའི་དཀྱིལ་འཁོར་དུ་ཤར་བས། བདེ་ཆེན་ལྷན་ཅིག་སྐྱེས་པའི་ཡེ་ཤེས་ཞེས་རྩ་རླུང་ཐིག་ལེས་ཁམས་ཀུན་ཏུ་ཁྱབ་ནས་རྒྱས་བཏབ་སོང་དུས། སྣང་སྲིད་བདེ་ཆེན་གདལ་བ་སྲིད་པ་ཕུར་བ་སྒྲུབ་པ་གོང་དུ་བཤད་མ་ཐག་པ་ལྟ་བུའི་གྲུབ་པ་རེད། དེ་ལྟ་བུའི་ཕུར་བ་ཕྲིན་ལས་ཀྱི་སྒྲུབ་པ་ཐམས་ཅད་དེ། ཐལ་འབྱིན་རྣམ་པ་བཞིའི་དགོངས་པའི་སྒྲོམ་དུ་འདུས་པར་བསྟན་ཡོད། ཐལ་འབྱིན་ཞེས་གསུངས་པ་དེ། རིག་པ་ཡེ་ཤེས་ཀྱི་ཕུར་བས་འཁྲུལ་སྣང་ཐལ་འབྱིན་ལ་ཐད་ཀར་ཕུག་ཅིང་གཞོམ་ནས་གཉིས་འཛིན་གྱི་འཁྲུལ་བ་གཉིས་མེད་དུ་ལ་བཟླ་བའི་དོན་ཞིག་རེད། འདིའི་དོན་འདི་མཐར་ཕྱིན་པའི་བཤད་པ་བྱས་ན། དབྱེ་བསྡུའི་རྣམ་བཞག་ཧ་ཅང་མང་པོ་རེད། དོན་བསྡུས་ཏེ་སྐབས་དང་བསྟུན་ནས་བཤད་ན། དེའི་ནང་གི་ཕུར་བའི་མཚན་ཉིད་རྣམ་པ་བཞིས་དོན་གྱི་ལ་ཤན་ཕྱེད་པ་རེད། མཚན་ཉིད་རྣམ་པ་བཞི་གང་ཡིན་ཟེར་ན། རིག་པ་ཡེ་ཤེས་ཀྱི་ཕུར་བ་དང་། གསང་བ་བྱང་ཆུབ་སེམས་ཀྱི་ཕུར་བ་དང་གཉིས། ཚད་མེད་སྙིང་རྗེའི་ཕུར་བ་དང་གསུམ། འདུས་བྱས་རྫས་ཀྱི་ཕུར་བ་དང་བཞིར་བྱས་ཏེ་དབྱེ་ཆོག་པ་རེད། དེའི་ནང་གི་དང་པོ། རིག་པ་ཡེ་ཤེས་ཀྱི་ཕུར་བ་དེ་དབྱིངས་སྤྲོས་མེད་དང་རིག་པ་རང་གསལ་གཉིས་ཀ་གཉིས་མེད་རང་བྱུང་གི་ཡེ་ཤེས་ཆེན་པོར་རང་ཤར་བ་དེ་ལ་གསུངས་པ་རེད། དེའི་ཐོག་གི་བྱང་ཆུབ་སེམས་ཀྱི་ཕུར་བ་དེ་གང་ཡིན་ན། ཐབས་ཤེས་མཉམ་སྦྱོར་ཞུ་བདེས་དྲངས་པའི་ལྷན་སྐྱེས་ཡེ་ཤེས་ཀྱི་བདེ་ཆེན་གྱིས་རྩ་རླུང་ཐིག་ལེའི་གྲོང་ཆེར་རྒྱས་གདབ་ནས་དག་པའི་ཡེ་ཤེས་མངོན་དུ་འཆར་བར་བྱེད་རྒྱུ་དེ་ལ་གསུངས་པ་རེད། གསུམ་པ་ཚད་མེད་སྙིང་རྗེའི་ཕུར་བ་ནི། སྙིང་རྗེ་ཆེན་པོས་རིགས་དྲུག་གི་སེམས་ཅན་མི་གཏོང་བ་འཁོར་བའི་གནས་ལས་སྒྲོལ་བར་བྱེད་རྒྱུ་དེ་རེད། འདི་གསུམ་པོས་རིམ་པ་བཞིན་དུ་ཆོས་སྐུ། ལོངས་སྐུ། སྤྲུལ་སྐུ་གསུམ་པོ་ཐོབ་པར་བྱེད། བཞི་པ་འདུས་བྱས་རྫས་ཀྱི་ཕུར་བ་རེད། འདི་ནི་བསྒྲལ་བ་ལས་ལ་སྦྱར་བའི་སྐབས་ཀྱི་སྒྲོལ་བྱེད་ཀྱི་ཕུར་བ་འདི་རེད། འདི་ལ་ཡང་ནང་གསེས་ཀྱི་དབྱེ་བ་ཕྱེས་ན། སྐུ་ཕྱག་རྒྱའི་ཕུར་བུ། ཕྲིན་ལས་ལས་བཞིའི་ཕུར་བུ། སྒྲོལ་བྱེད་སྲས་མཆོག་གི་ཕུར་བུ་དང་གསུམ་ཡོད། དེའི་ནང་གི་སྐུ་ཕྱག་རྒྱའི་ཕུར་བུ་ལ་ཡང་རང་བཞིན་གྱི་ཕུར་བུ་དང་ཏིང་ངེ་འཛིན་གྱི་ཕུར་བུ་གཉིས་སུ་ཕྱེས་ན། འོག་མིན་གྱི་ཞིང་ན་བཞུགས་པའི་ཕུར་བུའི་ལྷ་ཚོགས་རྟེན་བརྟེན་པ་བཅས་པ་དེ་བསྒོམ་དང་བསྒྲུབ་པ་བྱ་ཡུལ་རང་བཞིན་གྱི་ཕུར་བུ་རེད། བསྙེན་སྒྲུབ་ཡན་ལག་རྣམ་བཞིས་བསྐྱེད་རིམ་སྣང་སྲིད་ཕུར་བུའི་ལྷ་ཚོགས་སུ་ཤར་བའི་དངོས་གྲུབ་འགྲུབ་པའི་རྒྱུ་གང་ཡིན་པ་དེ་ཏིང་ངེ་འཛིན་གྱི་ཕུར་བུ་གསུངས་པ་རེད། དེ་ཡིན་ན། འདི་གཉིས་ཀ་འདུས་བྱས་རྫས་ཀྱི་ཕུར་བུའི་ཁོངས་སུ་བསྡུ་དོན་ཅི་ཞིག་ཡིན་སྙམ་ན། འདུས་བྱས་མཚན་མ་རྫས་ཀྱི་ཕུར་བུ་ལྷ་སྒྲོམ་ལ་བཀོད་ནས་དེ་ལ་དམིགས་རྟེན་བྱས་ཏེ། དམ་ཡེ་དབྱེར་མེད་ཀྱི་དཀྱིལ་འཁོར་སྒྲུབ་པ་ཡིན་པས། འདུས་བྱས་རྫས་ཀྱི་ཕུར་བུའི་ཁོངས་སུ་གཏོགས་པ་རེད། དེའི་ཡན་ཆད་ཀྱིས་སྐུ་ཕྱག་རྒྱའི་ཕུར་བ་བཤད་པ་རེད། ཕྲིན་ལས་ལས་བཞིའི་ཕུར་བ་གསུངས་པས། ལས་བཞིའི་ཕུར་བུ་དེ་རིགས་བཞིའམ་བསྡུ་ན་གཅིག་གི་ནང་ལ་འདུས་པ། འདི་སྒྲོལ་བྱེད་མཚོན་ཆའི་ཕུར་བུ་ངོ་མ་དེ་རེད། དེ་ནི་སྐུ་སྟོད་ལ་སྟོང་ཉིད་མཚན་མེད་སྨོན་མེད་གསུམ་མཚོན་པའི་ཁྲོ་ཞལ་གསུམ་ཡོད་པ། དེའི་འོག་ཏུ་ཕྱོགས་བཞི་དབུས་ལྔ་ལ་རིགས་ལྔ་ཡེ་ཤེས་ལྔ་ཡི་མཚོན་བྱེད་ཀྱི་རྒྱ་མདུད་ཅན། དེའི་འོག་ཏུ་རྣམ་ཐར་བརྒྱད་ཀྱི་རང་བཞིན་ལ་ལྕུམ་གཞོག་བརྒྱད། རྡོ་རྗེའི་དབྱིབས་ཅན་གྱིས་ཀྱང་ཆོག དེའི་འཕྲོར་ཚད་མེད་བཞི་མཚོན་གྱི་རྒྱ་མདུད་འོག་མ། དེའི་འོག་ལ་ཐུགས་རྗེས་འཛིན་པ་མི་ལྷོད་པའི་བརྡ་རུ། ཆུ་སྲིན་གྱི་ཁ་ནས་བྱུང་བའི་སྐུ་གསུང་ཐུགས་རྡོ་རྗེ་གསུམ་གྱི་རང་བཞིན་མཚོན་པའི་དབལ་གསུམ་ཟུར་གསུམ་རྩེ་རྣོན་པོ་ཅན་ཞིག་ དེ་སྲས་མཆོག་ཀཱི་ལ་ཡ་དངོས་སུ་ལྷ་སྔགས་ཏིང་འཛིན་གྱིས་བྱིན་གྱིས་རླབས་ནས་གང་ལ་གདབ་པའི་དགྲ་བོའི་སྙིང་དཀར་ནག་གཉིས་ཀྱི་མཚམས་སུ་བཏབ་པས་འགྲུབ་པར་བྱེད་པ། འདི་ལ་བྱིན་རླབས་རྟགས་ཀྱི་ཕུར་བ་ཡང་ཟེར། སྟོད་ཁྲོ་བོ་འོག་གི་ཁྲོ་ཞལ་མིན་ཡང་རྒྱ་མདུད་ཅན་དུ་བྱས་ཀྱང་རུང་བ་རེད། འདིར་གང་ལ་མངོན་སྤྱོད་དྲག་པོའི་ཕྲིན་ལས་བརྩམས་ཏེ་བསྒྲལ་བ་བྱ་བའི་ཡུལ་དེ་ནི། ཉམས་པ་བདུན་ལྡན་ཞིག་ཡིན་དགོས། དཀོན་མཆོག་སྤྱི་དགྲ་དང་སློབ་དཔོན་གྱི་སྐུ་དགྲ། དམ་ཉམས་ལོག་ལྟ་འཁུ་བ་སོགས་ཀྱི་དགྲ་བའི་ཞིང་བཅུའི་ནང་གི་ད་རེས་ཀྱི་སྐབས་སུ་ཆེད་དུ་བྱ་བའི་གདུལ་བྱའི་ཡུལ་དེ་གང་ཡིན་ཟེར་ན། ངན་སོང་གསུམ་པོ་ཕར་ཕུད་ཤུལ་གྱི་སྔ་མ་བདུན་པོ་ཉམས་པ་བདུན་ལྡན་གསུངས་པ་དེ་རེད། བསྒྲལ་བྱའི་རྣམ་པ་ཤེས་པ་ཚོགས་བརྒྱད་དུ་ཚར་བཅད་པས། འཁོར་བ་མྱང་འདས་སུ་བསྒྲལ་བ་རེད། འདིའི་དཔལ་ཆེན་ཕུར་བུའི་བདག་རང་བཞིན་གྱི་དཀྱིལ་འཁོར། མཚན་མ་རྫས་ཀྱི་དཀྱིལ་འཁོར། ཕྱོགས་བཅུ་ཁྲོ་བོའི་དཀྱིལ་འཁོར་ཏེ་དཀྱིལ་འཁོར་གསུམ་བསྙེན་སྒྲུབ་ལས་གསུམ་བྱས་པའི་སྙིང་པོ་ལ། རྩ་སྔགས་ཡི་གེ་འབྲུ་བཅུ་དྲུག་པ་ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣན་བཾ་ཧཱུྃ་ཕཊ་གསུངས་རྒྱུ་འདི་རེད། འདིའི་སྔགས་དོན་ནི། ཨོཾ་བཛྲ་གསུངས་བ་དེ་དཔལ་ཆེན་ཡབ་ཡུམ་རེད། ཀཱི་ལི་ཀཱི་ལ་ཡ་གསུངས་པའི་ཀཱི་ལི་དེ་ཡེ་ཤེས་ཀྱི་ཁྲོ་བོ་དང་དབྱིངས་ཀྱི་ཁྲོ་མོ་རེད། ཀཱི་ལ་ཡ་ཕྱག་བརྙན་ཕྲ་ཐབས། ཟ་བྱེད་ཐབས་ཀྱི་མཆེ་བ་ཅན་དང་། གསོད་བྱེད་ཤེས་རབ་ཀྱི་གཤོག་པ་ཅན། སྒྲོལ་བྱེད་སྲས་མཆོག་ཆེན་པོ་རྣམས་རེད། ཧཱུྃ་ཕཊ་གསུང་རྒྱུའི་ཧཱུྃ་དེ་སྒོ་སྲུང་སྒོ་མ་བཞི། སརྦ་ནི་ཐམས་ཅད་འདུས་པ་རེད། བིགྷྣན་དགྲ་བགེགས་གནན་པ་རེད། བཾ་གྱིས་དབང་དུ་སྡུད་པ་ཧཱུྃ་གིས་བརླག་པར་བྱེད་པ། མཐའ་མའི་ཕཊ་ཀྱིས་སྒྲོལ་བའི་ཕྲིན་ལས་མཛད་པའི་དོན་རེད། སྤྱིར་ན་བསྟན་པ་སྲུང་བའི་ཕྱིར་དུ་བསྟན་དགྲ་སྒྲོལ་བ་སྔགས་པའི་ལས་རེད། ཡིན་ན་ཡང་། སྔགས་པའི་ལས་བྱེད་པ་ལ་ལས་བྱེད་མཁན་དེ་སྔགས་པ་ངོ་མ་ཡིན་དགོས་པ་རེད། སྔགས་པ་ཞིག་གི་མཚན་ཉིད་ཚང་དགོས་ན་ཁར་སང་རྟ་མགྲིན་གྱི་སྐབས་སུ་བཤད་པ་ལྟར། རྫོང་འཕྲང་སྲོག་གསུམ་གྱི་ཉམས་ལེན་ལ་རང་བྱན་གང་འཚམ་ཞིག་ཆུབ་པ་མིན་ན། སྔགས་པའི་མིང་ཡོད་ཀྱང་དོན་མེད་པ་རེད། རྫོང་ཟེར་རྒྱུ་དེ་ཡང་ལྟ་བའི་གདེང་དང་ལྡན་པ་ཞིག་ལ་གསུངས་སོ། ལྟ་བའི་རྫོང་དེ་ཟིན་ན་གང་ལ་ཡང་འཇིགས་པ་མེད་པའི་གཏན་སྲིད་ཟིན་སོང་བ་རེད། འཁོར་འདས་ཀྱི་ཆོས་ཐམས་ཅད་རང་སེམས་སུ་འདུས་རང་སེམས་སྐྱེ་འགག་གནས་གསུམ་དང་བྲལ་བ་ཆོས་ཉིད་གདོད་མའི་ཡེ་ཤེས་དེ་ཐེ་ཚོམ་དང་བྲལ་བར་ངོ་འཕྲོད་པ་ལ་རྫོང་གསུངས་པ་རེད། ངོ་འཕྲོད་དུས་རྫོང་ཟིན་པ་རེད། ལྟ་ཐོག་ལ་མྱོང་བས་མ་སླེབས་ན་གོ་ཡུལ་ཚིག་གི་བཤད་པ་ཙམ་ཞིག་ཤེས་ཀྱང་གོང་དུ་བཤད་པ་ལྟར་དེས་གནས་ལུགས་དོན་གྱི་རང་བཞིན་མཇལ་བ་ལ་ཕན་ཐོགས་མི་འབྱུང་། དེ་ཡིན་ན་ལྟ་བའི་རྫོང་ཟིན་པ་ལ་སྒོམ་པའི་འཕྲང་བརྒྱུད་དགོས། སྒོམ་པའི་འཕྲང་ནི། གོལ་ཤོར་ནོར་གསུམ་སྒོམ་པའི་འཕྲང་རེད། དེ་ལྟ་བུའི་གོལ་ཤོར་ནོར་གསུམ་གྱི་འཕྲང་སྒྲོལ་ནས་ལྟ་བའི་རྫོང་དེ་ངོ་མ་ཟིན་ན། སྤྱོད་པའི་སྟེང་ནས་འཁོར་འདས་ཀུན་གྱི་སྟོང་སྲོག་ལ་དབང་ཐོབ་ཏེ། རྫོང་འཕྲང་སྲོག་གསུམ་གྱི་ཉམས་ལེན་རང་བྱན་ཆུད་ཟེར་རྒྱུ་དེ་རེད་སོང་བ་རེད། རྫོང་འཕྲང་སྲོག་གསུམ་ནི་རྣལ་འབྱོར་པ་ཞིག་གི་ལམ་ཡོངས་རྫོགས་ཀྱི་ཆིངས་ཡིན། འདི་བསྐྱེད་རྫོགས་ལ་སྦྱར་ནས་བཤད་ཡོང་ན། བསྐྱེད་རིམ་གྱི་རྫོང་། རྫོགས་རིམ་གྱི་སྲོག བྱིང་རྒོད་དང་རྔམ་སེམས་ཀྱི་འཕྲང་ལས་གྲོལ་བ་ཞིག་ཡིན་དགོས་པ་རེད། དེ་ཡང་ཚུར་བསྡུས་ཏེ་བཤད་ན་སེམས་ཉིད་རང་བྱུང་གི་ཡེ་ཤེས་མ་བཅོས་ཐིག་ལེ་ཉག་གཅིག་གི་གནད་ཟིན་པ་ལ་ཐུག་ཡོད། འདིའི་སྐབས་དོན་བསྒྲལ་བའི་ཕྲིན་ལས་རེད། འདི་ལ་མཉམ་བཞག་གཡོ་མེད་ཆོས་སྐུའི་ངང་ཆེན་པོ་རྟོགས་པའི་སྒོ་ནས། གོང་དུ་ཞུས་པ་ལྟར་དུ་མཉམ་བཞག་གཡོ་བ་མེད་པ་རྟོགས་པས་བདག་སྔོན་ལ་བསྒྲལ། རྗེས་ཐོབ་སྙིང་རྗེའི་རྩལ་གྱི་ཐུགས་རྗེས་གཞན་སྒྲོལ་བ་དེ། གསང་སྔགས་རྡོ་རྗེ་ཐེག་པའི་སྒྲོལ་བའི་དགོངས་པ་བླ་ན་མེད་པ་རེད། དེ་མིན་པའི་ལྟ་སྒོམ་ཏིང་འཛིན་གཅིག་ཀྱང་མེད་པ་ཞིག་གིས་ཁོག་པ་གཟེར་གྱིས་གང་། སྙིང་རླུང་སྟོད་དུ་འཚང་སྟེ་རྔ་དྲག་རྡུང་། རྐང་གླིང་དྲག་འབུད། ཛྭ། བྷྱོ། ཕཊ་སོགས་ཀྱིས་འུར་འབོད་ཇི་ལྟར་བྱས་ཀྱང་བསྟན་དགྲ་སྒྲོལ་བ་ནི་ཕར་ཞོག དགྲ་བོའི་ལྷ་སྲུང་ཁ་མགོན་བྱེད་མཁན་ཚོའི་བ་སྤུ་ཙམ་ཡང་གཡོ་མི་ཐུབ། ཁྱད་པར་དུ་གསང་སྔགས་ཀྱི་ཕྲིན་ལས་ཟབ་མོ་ཐམས་ཅད་ཀྱི་རྩ་བ་དེ་དམ་ཚིག་གཉན་པོ་ཡིན་ན། རྣལ་འབྱོར་དམ་ཚིག་མ་གཙང་ན། སྲུང་མའི་ལྷ་ཡང་རང་གཤེད་ལ་བབས་ནས་བདུད་དུ་འགྱུར་བ་རེད། དམ་ཚིག་སྲོག་ལྟར་སྲུང་ནས་ཉམས་མ་ཤོར་ན། དེ་གཅིག་པུས་ཀྱང་རྔ་མ་བརྡུང་ན་ཡང་དམ་ཅན་རང་འཁོར་རེད། དངོས་གྲུབ་མ་བསྒྲུབས་ན་ཡང་རང་ཤུགས་ཀྱིས་འགྲུབ་ནས་གྲུབ་པའི་རྟགས་དང་མཚན་མ་མངོན་དུ་འགྱུར་བ་རེད། བསྟན་དགྲ་དྲག་པོས་སྒྲོལ་བའི་ཕྲིན་ལས་ཀྱི་དམིགས་པའི་རིམ་པ་གསལ་འདེབས་གནང་རྒྱུ་དང་། འདི་ནས་ཆོག་ཁྲིགས་ཀྱི་མཚམས་སྦྱོར་འདི་རེད། མཚམས་འདིར། ཕྱི་སྣོད་ཀྱི་འཇིག་རྟེན་ཐམས་ཅད་ཨེ་ཁྲོམ་འབར་བའི་རང་བཞིན། སོགས་ཀྱི་དབང་གི་མཚམས་སྦྱོར་གྱི་ཟུར་འཕྲོས། འདི་ནས་ཐོག་མར་ཐུགས་དམ་བསྐུལ་བ་དང་། གསེར་སྐྱེམས། གཟི་དཔུང་། དགུག་གཞུག དེའི་འཕྲོར་སྒྲོལ་ཕུར་བྱུག་བདུག་བྲབ་གསུམ་སྔོན་དུ་སོང་ནས་ལྷ་དབྱེ་དང་གཅིག གཟུགས་ལ་དབབ་པ་དང་གཉིས། བྱད་གཞུག་དང་གསུམ། སྨྱོར་གཞུག་དང་བཞི། རྡུལ་དུ་བརླག་པ་དང་ལྔ། ཞལ་བསྟབས་དང་རྣམ་པ་དྲུག་གི་གདབ་ལས་དྲུག་པོ་རེ་རེ་བཞིན་འགྲོ་དགོས་མོད། འོན་ཀྱང་འདི་ནས་རྗེས་གནང་གི་དགོས་པ་གཙོ་བོར་བྱེད་སྐབས་ཕྱག་ལེན་ཟོར་ཡོང་བའི་ཆེད་དུ་གདབ་དྲུག་གི་སྔགས་ཚིག་ཁོལ་ཕྱུང་ཞིག་འོག་ནས་འབྱུང་བ་དེའི་འཐུས་རྒྱུ་བྱེད་དགོས། དེའི་འཕྲོར་ཁར་རྩང་ང་ཚོས་སྒྲུབ་དབང་དང་མཐུན་པའི་ཕྱག་ལེན་དང་བསྟུན་དུས་དུས་ཚོད་ཡུན་རིང་ཞིག་འགོར་སོང་བས། དེ་རིང་དབང་རྐྱང་གི་ལུགས་ལྟར་ཤར་འདོན་བྱེད་རྩིས་ཡིན། ཡང་མཚམས་འདིར། འགུག་པ་དང་། ཧཱུྃཿ དམ་ཚིག་ཆེན་པོའི་དུས་ལ་བབ། །སོགས་ཀྱི་ཟུར་འཕྲོས། འདིའི་སྐབས་ལ་གདབ་ཕུར་དང་། དེའི་འཕྲོར་དབྱེ་བྱེད་བྱ་འུག་གི་སྒྲོ། གཟུགས་ལ་དབབ་པའི་ཐུན་རྫས། བྱད་བཅིང་འཆིང་བའི་བྱད་ཐག སྨྱོ་རུ་འཇུག་པའི་དུག་ཁྲག རྡུལ་དུ་བརླག་པར་བྱེད་པའི་ཐོ་བ། དེ་དག་སྔགས་པས་རྒྱུན་དུ་འཆང་དགོས་པའི་སྒྲུབ་རྫས་རེད། བསྟན་དགྲ་དྲག་པོའི་ཕྲིན་ལས་ཀྱིས་སྒྲོལ་བ་ལ་ཁར་རྩང་བཤད་པ་ལྟར་དུ། ཚེ་ལུང་ཁྲུས་ལུང་གནས་ལུང་གསུམ་གྱི་གནད་དང་ལྡན་དགོས། བསྒྲལ་བྱའི་ཚེ་བསོད་བཀྲག་མདངས་ཐམས་ཅད་ཀྱི་རྟེན་ལ་ཨ་དཀར་འོད་དུ་འཚེར་བ་ཞིག་གསལ་བདབ་ནས། ཕུར་རྩེའི་རྡོ་རྗེ་ཟུར་གསུམ་མཚོན་པའི་ཧཱུྃ་གསུམ་གྱིས་བསྡུས་ནས། རང་གི་ཐུགས་སྲོག་ལ་ཚེ་དཔལ་བསོད་ནམས་དབང་ཐང་གི་བཅུད་དུ་བསྟིམས་པ་དེ་ཚེ་ལུང་རེད། བསྒྲལ་བྱའི་རྣམ་ཤེས་ཉོན་ཡིད་ཀྱི་རྟེན་ནྲྀའམ་ཏྲི་ལ་གསལ་བ་དེར་ཕུར་རྩེ་གདབ་དུས་དྲན་མེད་དུ་རྒྱལ་བ་དང་མཉམ་དུ། རྟོག་ཚོགས་ཆོས་ཉིད་ལ་ཐིམ་ནས་ས་བོན་དེ་འོད་ཀྱི་ཐིག་ལེ་ཞིག་ཏུ་གྱུར་བ་ནི་ཁྲུས་ལུང་རེད། དེའི་ཐིག་ལེ་དེ་ཉིད་ཕུར་རྩེའི་ཧཱུྃ་གསུམ་ལ་བསྡུས་ཏེ་ཕཊ་གསུམ་གྱིས་འཕངས་ནས་ཧེ་རུ་ཀའི་ཐུགས་ཀར་བསྟིམས་ཏེ་རྒྱལ་བའི་སྲས་སུ་བསྐྲུན་པ་དེ་གནས་ལུང་རེད། དེ་ལྟར་ན་ཡུལ་གསུམ་གསལ་བ། དགྲ་གསུམ་བསད་པ། བདུད་བཞི་སྒྲོལ་བ། འཕྲང་གསུམ་བསལ་བ་བཅས་ཀྱི་བྱད་ལུགས་མངོན་དུ་གྱུར་རྒྱུ་དེ་བསྒྲལ་དབང་གི་ངོ་བོ་རེད། ཡུལ་གསུམ་པོ་ནི། ཕྱི་ཡུལ། ནང་ཡུལ། གསང་ཡུལ་གསུམ་ལ་མི་འབྱམས་མི་རྡུག་མི་ལྡོག་པ་བཅས་ཀྱིས་མི་འབྱམས་པའི་ཕྱིར་དུ་ཕྱིའི་སྣང་བ་རུ་ལོག་གི་ཚུལ་དུ་གན་རྐྱལ་ལ་བཞག་པའི་སྣང་བ་རུ་ཏྲ་རུ་གསལ། མི་རྡུགས་པའི་ཆེད་ནང་ཡུལ་ཕུར་བ་བདེ་གཤེགས་འདུས་པའི་ངོ་བོར་གསལ། མི་ལྡོག་པའི་ཆེད་དུ་གསང་ཡུལ་རྣམ་རྟོག་ལྷའི་ཕྱག་རྒྱར་གསལ་རྒྱུ་དེ་ཐུན་མིན་གྱི་ཡུལ་གསུམ་གསལ་ལུགས་རེད། དགྲ་གསུམ་གསད་པ་ནི། ཕྱི་དགྲ་ནང་དགྲ་གསང་དགྲ་གསུམ་ཚད་མེད་སྙིང་རྗེའི་ཕུར་བ་དང་། བྱང་ཆུབ་སེམས་ཀྱི་ཕུར་བ། རིག་པ་ཡེ་ཤེས་ཀྱི་ཕུར་བ་དག་གིས་ཕྱི་གཟུང་འཛིན་གྱི་དགྲ་བོ་དེ་ཚད་མེད་སྙིང་རྗེའི་ཕུར་བུས་སྤྲུལ་སྐུའི་དབྱིངས་སུ་བསད། ནང་དགྲ་ཉོན་མོངས་དུག་གསུམ་གྱི་ངོ་བོ་དེ་བྱང་ཆུབ་སེམས་ཀྱི་ཕུར་བུས་ལོངས་སྐུའི་དབྱིངས་སུ་བསད། གསང་དགྲ་བདག་འཛིན་གྱི་རྣམ་རྟོག་རིག་པ་ཡེ་ཤེས་ཕུར་བུས་ཆོས་སྐུའི་དབྱིངས་སུ་བསད་ན། དེའི་སྐབས་སུ་བདུད་བཞི་སྒྲོལ་བ་རང་ཤུགས་ཀྱིས་ཡོང་བ་རེད། དེ་ཇི་ལྟར་ཡོང་སྙམ་ན། ཕུང་པོ་དུར་ཁྲོད་དུ་བསྒྲལ་བས་ན་ཕུང་པོའི་བདུད་བཅོམ། ཡུམ་གྱི་མཁའ་ལ་བསྒྲལ་བས་ན་ཉོན་མོངས་པའི་བདུད་བཅོམ། རྡོར་སེམས་མཚན་རྫོགས་ཀྱི་ས་ལ་བསྒྲལ་བས་ན་ལྷའི་བུའི་བདུད་བཅོམ། རྣམ་ཤེས་འོག་མིན་དུ་བསྒྲལ་བས་འཆི་བདག་གི་བདུད་བཅོམ་པ་ཡིན། དེ་དང་མཉམ་དུ་འཕྲང་གསུམ་བསལ་བ། ལྟ་བ་ཐེ་ཚོམ་གྱི་འཕྲང་དང་། སྒོམ་པ་བྱིང་རྒོད་ཀྱི་འཕྲང་། སྤྱོད་པ་ཚུལ་འཆོས་ཀྱི་འཕྲང་རྣམས་ལས་གྲོལ་ཏེ་རྫོང་འཕྲང་སྲོག་གསུམ་གྱི་གནད་ལ་བོགས་ཐོན་ཆེན་པོ་ཐོབ་པ་རེད། དེ་ལྟ་བུའི་ཚུལ་ཤེས་པ་དང་མི་འབྲལ་བཞིན་འདི་ནས་གསེར་སྐྱེམས་གཟི་དཔུང་ཞིག་འདོན་དགོས། མཚམས་འདིར། བདག་ཉིད་དཔལ་ཆེན་པོ། ཕུར་བུ་སྲས་མཆོག ལིངྒ་དགྲ་བགེགས་ཀྱི་སྙིང་གར་ཚེ་སྲོག་གི་རྟེན་སོགས་གསུངས་རྗེས་ཀྱི་ཟུར་འཕྲོས། དེའི་ཡན་ཆད་ཀྱིས་བསྒྲལ་བ་མངོན་སྤྱོད་ཀྱི་ལས་སོང་། དབང་རྫས་འགྲིམ་རྒྱུ་རྗེས་ནས་ཡོང་རྒྱུ་རེད། གོང་ནས་ཞུས་པ་ལྟར་དུ། ཕུར་བུ་རྒྱུད་གསུངས་པ་འདི་བཅོམ་ལྡན་འདས་སྟོན་པ་རྡོ་རྗེ་ཆོས་དང་དབྱེར་མི་ཕྱེད་པ་ཟག་མེད་ནང་གི་བདེ་ཆེན་གྱི་ཡེ་ཤེས་ལ་མཉམ་པར་བཞག་པའི་ཚེ་ན། རྡོ་རྗེ་འཛིན་པས་བསྐུལ་ཏེ་ལོངས་སྤྱོད་རྫོགས་པ་འཇིགས་བྱེད་ཆེན་པོའི་སྐུར་བཞེངས་ནས་དག་པའི་འཁོར་ཚོགས་ལ་ཕུར་བུའི་ཆོས་སྐོར་གསུངས་བ་རེད། དེ་ཕྱག་ན་རྡོ་རྗེས་བསྡུས་མཛད་དེ་ཐུགས་ལ་སྦས་པ་དེ་ཉིད། དུས་ལ་བབས་པའི་ཚེ་ན་རྡོ་རྗེ་སེམས་དཔའི་བཀའ་ཡིས་བསྐུལ་ནས་ཕྱག་ན་རྡོ་རྗེས་འདོད་ཁམས་ཀྱི་གནས་སུ་དར་བ་མཛད་པར་མ་ཟད། གྲུབ་པའི་སློབ་དཔོན་ཆེན་པོ་རྣམས་དང་ཁྱད་པར་དུ་སློབ་དཔོན་པདྨ་འབྱུང་གནས་ལས་བོད་འདིར་གཙོ་བོར་བརྒྱུད་པ་ཡིན། དེ་ཡིན་ན་རྒྱུད་སྡེའི་རང་ལུགས་ཟབ་ལ་རྒྱ་ཆེ་རྣམ་གྲངས་མང་པ་ཡིན་རྒྱུ་དང་། བརྒྱུད་ཚུལ་གྱི་རིམ་པ་ཡང་དེ་བཞིན་དུ་མང་པོ་རེད། དེ་ལས་གོང་དུ་ཞུས་པ་ལྟར། ཕུར་པ་རྒྱལ་པོ་ལུགས་འདི་གྲུབ་པ་ཐོབ་པའི་བརྒྱུད་པ་བར་མ་ཆད་པ་ཡིན་པ་དང་། འདི་དང་བརྒྱུད་པ་ཆུ་བོ་གཅིག་འདྲེས་སུ་ཀུན་མཁྱེན་འཇིགས་གླིང་ནས་བརྒྱུད་པའི་ཇོ་ལྕམ་གྱི་ལུགས་ལ་སོགས་པ་ཐམས་ཅད། བྱིན་རླབས་ཀྱི་ཚན་ཁ་གཅིག་ལས་གཅིག་ཆེ་ཡིན་པར་མ་ཟད། ཇོ་མོ་ལུགས་ཞེས་པ་འདི་ཚིག་ཉུང་ལ་དོན་འདུས་པ་མན་ངག་གནད་དུ་དྲིལ་བའི་གདམས་པ་ཡིན་པར་གསུངས་སོ། སྔགས་གསར་མ་མ་དར་གོང་གི་བོད་སྤྱིའི་ཡི་དམ་དེ་གང་ཡིན་སྙམ་ན། ཡང་དག་དང་ཕུར་བ་གཉིས་ཀ་རེད། ཁྱད་པར་དུ་ཡི་དམ་ཕུར་བ་འདི་སངས་རྒྱས་ཐམས་ཅད་ཀྱི་ཕྲིན་ལས་ཀྱི་བདག་ཉིད་ཡིན་པས། ཕུར་བ་མཁན་པོ་ཚེ་རིང་། ལོངས་སྤྱོད་ལྡན། མཐུ་ཆེ་ཟེར་སྲོལ་ཡོད། ཙནྡན་གྱི་ནགས་ཚལ་ཆེན་པོ་ཞིག་མེ་ཡིས་འཚིག་བཞིན་པའི་ཚེ། གུ་རུ་རིན་པོ་ཆེས་སྡིག་མཛུབ་བསྟན་ཙམ་གྱིས་མེ་བསད་དེ་ནགས་ཚལ་སྔར་བཞིན་དུ་གྱུར་པ་དང་། བཱི་མ་མི་ཏྲས་ཕུར་བ་གདེངས་ནས་ཆུ་བོ་གངྒཱ་ཡར་བཅད་མར་བཅད་བཏང་བ་དང་། བལ་བོ་ཤི་ལ་མཉྫུ་ཡིས་ཕུར་བ་བཏབ་ཙམ་ཞིག་གིས་བྲག་རི་དུམ་བུ་དུམ་བུར་བྱས་ཏེ་འཐོར་སོང་བ། དེའི་ཐོག་ཏུ་ཇོ་མོ་མཁར་ཆེན་གཟའ་ཡེ་ཤེས་མཚོ་རྒྱལ་གྱིས་སྤྱང་ཀིའི་རྗེས་ཞིག་ལ་ཕུར་བ་བཏབ་པས་སྤྱང་ཀི་མངོན་སུམ་དུ་རྦབ་ཏུ་འདྲིལ་བ་ལ་སོགས་པ། ཕུར་བུའི་སྒོ་ནས་གྲུབ་པ་ཐོབ་པའི་གྲུབ་ཆེན་རྣམས་ཀྱིས་གྲུབ་རྟགས་བསྟན་པའི་གྲངས་ཀ་གླེང་ཚོད་མེད་པ་ཞིག་ཡོད། ད་རུང་གྲུབ་རྟགས་ཀྱི་མཆོག་ངོ་མ་དེ་གང་ཡིན་ཟེར་ན། ཆོས་ཉིད་དོན་གྱི་ཕུར་བ་དེ། ནང་རང་རྒྱུད་ཀྱི་ཉོན་མོང་དུག་ལྔ་ལ་ཐེབས་ནས་འཁྲུལ་སྣང་དབྱིངས་སུ་ཞི། མ་འཁྲུལ་དོན་གྱི་ཡེ་ཤེས་མངོན་དུ་གྱུར་ཏེ་རྟོགས་པ་མངོན་གྱུར་ས་ལམ་ཆིག་ཆོད། མཆོག་གི་དངོས་གྲུབ་ཐོབ་པ་སོགས་ཅི་འདྲའི་གྲུབ་ཆེན་གོང་མ་དམ་པ་ཡོད་རྒྱུ་རེད། གནའ་དང་པོར་ཕུར་བའི་གླེགས་བམ་དེ་བོད་ལ་སྤྱན་དྲང་བའི་སྐབས་སུ། གླེགས་བམ་བོད་ཀྱི་ས་སྣེ་ལ་ཕེབས་མ་ཐག་ཏུ། གདོན་བགེགས་དང་བར་ཆད་ཞི་སྟེ་དུས་འཁྲུགས་མང་པོ་རང་བཞིན་གྱིས་བཟློག་སོང་བའི་ལོ་རྒྱུས་ཀྱང་ཆོས་འབྱུང་དག་གི་ནང་དུ་གསུངས་ཡོད་པ་རེད། འདི་ཆོས་ཟབ་མོ་གཞན་ལས་ཁྱད་འཕགས། སྒྲུབ་ལ་བར་ཆད་མེད་ཅིང་མཆོག་ཐུན་གྱི་དངོས་གྲུབ་ཐོབ་སླ་བའི་ཆོས་ཞལ་དྲོན་པོ་ཡིན་པ་དང་། ཆོས་གཞན་སྒྲུབ་པ་ལ་ཡང་བར་ཆད་བཟློག་བྱེད་ཕུར་བ་འདི་སྐྱེལ་མ་ལྟ་བུར་ཡིན་གསུངས་སོ། དེ་ལྟ་བུའི་ཕྱི་ཡུལ་ཀུན་གྱི་མཐུན་སྣང་ལ་མངོན་སུམ་དབང་པོའི་ཡུལ་དུ་མཐོང་ཐུབ་པའི་མཐུ་རྩལ་ནུས་པ་ལ་དབང་ཐོབ་པ་དང་། ཡུལ་ཅན་ཆོས་ཉིད་དུ་བཙན་གྱིས་གྲོལ་བའི་ཆོས་བྱིན་རླབས་ཁྱད་པར་དུ་འཕགས་པ་ཅན་ཡིན་པས། སློབ་དཔོན་ཆེན་པོ་པདྨས་ཀྱང་ཐུགས་དམ་གྱི་སྙིང་པོ་ངོ་མ་ཕུར་བ་འདི་ཉིད་མཛད་པའི་ལོ་རྒྱུས་ཡོད་དོ། ཕྱི་མའི་དུས་འདི་ན་བརྒྱུད་གསུམ་ཀུན་འདུས་ཀུན་མཁྱེན་འཇིགས་མེད་གླིང་པ་ལ་འདིའི་བཀའ་བབས་ནས་བཀའ་བསྡུ་མཛད་པའི་སྐབས་སུ། ས་སྐྱའི་བདག་ཆེན་གོང་མ་དབང་སྡུད་སྙིང་པོ་ཁོང་གི་གཟིམས་ལམ་ལ། གཟིམས་ལྟས་རྟགས་ཆེན་ཡ་མཚན་ཅན་ཞིག་ཡོང་ནས་ཕྱི་ཉིན་བང་ཆེན་པ་རྫོང་སྟེ། ད་རེས་ས་སྐྱའི་ཕུར་ཁང་གི་ནང་དུ་བླ་མ་རྫོགས་ཆེན་པའི་མདུན་ནས་ཡང་ཕུར་གྱི་དབང་ཞུ་དགོས་གསུངས་པ་སོགས། རྟགས་དང་ལྟས་བཟང་པོ་མང་པོ་ལ་བརྟེན་ཏེ་འདིའི་དབང་གི་སྒོ་འཕར་དང་པོ་དེ་དུས་ཕྱེས་ཚུལ་གྱི་ལོ་རྒྱུས་ཡོད། ད་དུང་དེ་ཙམ་གྱིས་མ་ཚད་བསྟན་སྲིད་ཀྱི་བདེ་ཐབས་རྒྱ་ཆེན་འགྲུབ་པའི་རྟེན་འབྲེལ་གྱི་ཐོག་མར་དེ་ནས་བྱུང་གསུངས་པ་རེད། དུམ་གཉིས་རྒྱུད་ཕུར་དང་བཅས་པའི་དབང་འདི་རྫོགས་སྤྲུལ་དྲུག་པ་ཨོ་རྒྱན་འཇིགས་བྲལ་བྱང་ཆུབ་རྡོ་རྗེའི་མདུན་ནས་ང་ལ་ཐོབ་ཚུལ་ཁར་རྩང་སྔོན་དུ་ཞུས་པ་ལྟར། འདི་ཉེ་བརྒྱུད་ཁྱད་པར་ཅན་རེད། ཐེངས་འདིའི་ཕུར་བུའི་དབང་འདི་ཅུང་རྒྱས་པར་བྱེད་དོན་ཅི་ཞིག་ཡིན་སྙམ་ན། སྤྱིར་ན་པདྨ་བཛྲ་ལ་མཚོན་ན་དཔལ་ཆེན་གྱི་གྲུབ་ཐོབ་ཡིན་པ་ཡོངས་ལ་གྲགས་པ་རེད། ཆིབས་པ་ལ་བཅིབ་གྲབས་མཛད་ནས་ཞབས་གཅིག་ཆིབས་ཡོབ་ཀྱི་ནང་དུ་བཞག་པའི་དུས་ཡུན་ཙམ་ལ། དཔལ་ཆེན་སྒྲུབ་པ་བཀའ་བརྒྱད་བདུན་བརྒྱ་ཉེར་གཉིས་ཀྱི་ལྷ་ཚོགས་དག་གི་སྤྱན་གྱི་དཀར་ནག་ཚུན་ཆད་མ་འདྲེས་པར་གསལ་ཐུབ་གསུངས་པས། བསྐྱེད་རིམ་ལ་དབང་འབྱོར་བ་ཞིག་རེད། རྫོགས་རིམ་ལ་ཡང་དེ་བཞིན་མངའ་བརྙེས་པ་ཞིག་རེད། སྐབས་ཤིག་ཏུ་སྦྱིན་བདག་གིས་ཚོགས་འཁོར་ལ་བཤས་ཤ་མང་པོ་ཞིག་ཁྱེར་ཡོང་བ་ལ། ཁོང་གིས་ངན་སོང་སྦྱོང་པའི་ཐུགས་མོས་མཛད་དེ་ཟག་མེད་ཡེ་ཤེས་ཀྱི་བདུད་རྩི་རུ་བསྒྱུར་ཏེ། དེའི་བཅུད་ནི་རྩ་གསུམ་གྱི་ལྷ་ཚོགས་ལྷག་སྡུད་དང་བཅས་པ་ལ་མཉེས་ཟས་སུ་ཕུལ་ཟིན་པས། རྗེས་མར་ཚོགས་ཤ་ལ་རོ་བཅུད་མེད་པ་ཞིག་ཏུ་གྱུར་པ་ན། ཐམས་ཅད་ཡིད་མ་ཆེས་པར་ཅིའི་ཕྱིར་འདི་འདྲ་ཞིག་ཏུ་གྱུར་སོང་བ་རེད་ཞུས་པས། ཁོང་གིས་དེའི་སྔོན་ནས་ངས་བཅུད་ཐམས་ཅད་མཆོད་ཚར་གསུངས་བ་རེད་ཟེར། དེ་དག་ནི་ས་འདིའི་རྫོགས་ཆེན་པའི་གནའ་མྱི་བན་རྒན་དག་གི་ངག་རྒྱུན་ལ་ཡོད། ཡང་སྐབས་ཤིག་ལ་ཡུལ་ཁམས་གཞན་གྱི་རྒྱལ་འཁྱམ་སྡུག་རྩུབ་ཅན། ཐམས་ཅད་ལ་གནོད་སྐྱེལ་མཁན་ཞིག་ཡོད་པ་དེ་བྱ་ཆེན་ཞིག་ལ་སྤྲུལ་ཏེ་པདྨའི་ཐང་འདི་ན། པདྨ་བཛྲར་ཉམས་ཚོད་ལེན་དུ་ཡོང་ནས་མདུན་གྱི་ཇོ་ཤིང་རྩེ་ལ་བབས་ཏེ་ཟིལ་ཤུགས་བསྐྱེད་ཡོང་དུས། པདྨ་བཛྲས་བསྐྱེད་རིམ་གྱི་ཏིང་ངེ་འཛིན་གྱིས་དཔལ་ཆེན་པོའི་སྐུ་རི་བོའི་གཏོས་དང་མཉམ་པ་གཅིག་ལ་གསལ་མཛད། ཡང་ཁོས་ཡི་དམ་གྱི་སྐུ་དེ་ལས་ཀྱང་ཆེ་བ་ཞིག་བསྐྱེད་དེ་ཚུར་རྔམ་ཟིལ་བསྟན་པས། ཁོང་གི་ཐུགས་དགོངས་ལ་སྙིང་རྗེ་ཤས་མི་བཟོད་པ་ཞིག་སྐྱེས་ནས། འདི་འདྲའི་བསྙེན་སྒྲུབ་ཀྱི་བཟླས་གྲངས་མང་པོ་སོང་ཡང་བསྐྱེད་རིམ་ཨ་འཐས་ལ་གོལ་སོང་བའི་ལས་ངན་འདི་འདྲ་འདུག་དགོངས་ཏེ། རྫོགས་རིམ་སྟོང་ཉིད་སྙིང་རྗེ་ཟུང་འཇུག་ངང་དུ་བཞུགས་ཚེ། དེ་ཁོ་ལ་མེད་ཟེར་ནས་ཉམས་ཞུམ་སྟེ་ཁ་ཕྱིར་བལྟས་ཙམ་ཡང་མ་བྱས་པར་འབྲོས་སོང་བ་སོགས་ཀྱི་ལོ་རྒྱུས་མང་པོ་ཡོད། དེ་དག་ནི་པདྨའི་ཐང་འདི་ནས་བྱུང་བའི་ལོ་རྒྱུས་དངོས་རེད། མཁན་ཆེན་པདྨ་བཛྲ་ས་ཐོབ་ཀྱི་སེམས་དཔའ་ཡིན་ན་ང་ལ་དེའི་མཚན་བཏགས་པ་དེ་དུས་ལ་དགོངས་ནས་ཕྱི་རབས་དེ་དང་དེ་ལྟ་བུར་འགྱུར་རྒྱུའི་ཐུགས་བསྐྱེད་དང་། ཁོང་ཚོགས་སྦྱོར་གྱི་ལམ། ཁྱད་པར་དུ་ཚོགས་ལམ་པ་འདྲ་ཡིན་ན་ཅི་འདྲ་ཡིན་ན་སྟེ། ཡང་ན་ལམ་མ་ཞུགས་པའི་གང་ཟག་ལས་ཅན་ཞིག་ཡིན་ན། ང་དེའི་སྐྱེ་བ་གསུམ་པ་ཡིན་མི་ཆོག་རྒྱུ་མེད་པ་རེད། དེ་དག་བཤད་པའི་གཏམ་གྱི་འཕྲོས་གཞི་གང་ནས་བྱུང་བ་ནི། ངས་དཔལ་ཆེན་གྱི་བསྙེན་ཚད་ལས་རུང་ཞིག་བཞག་མྱོང་ལ། ཕུར་བུའི་བསྙེན་ཚད་འདི་ཚད་ལྡན་ཞིག་རེད་ཡོད་བསམ་པ་ཡིན། གནའ་སྔ་མོ་ང་དགུའི་དུས་འགྱུར་གྱི་རྗེས་རིག་གསར་མཇུག་རྫོགས་པའི་རྗེས་ཤིག་ནས་རེད། ཤྲཱི་སེང་གི་བཞེངས་བསྐྲུན་ལ་མ་འཐམ་པའི་སྔོན། ས་ལས་རྡོ་ཁུར་གྱི་ངལ་རྩོལ་སྒྱུར་བཀོད་དང་ཁ་བྲལ་མ་ཐག་ལ། དེ་དུས་རྫོགས་ཆེན་དགོན་ཤུལ་གྱི་ཨ་ཐུབ་བླ་བྲང་གི་གྱང་ཆག་ཤིང་ཁང་ཐབས་ཆག་ཅིག་གི་ནང་ནས། ཕུར་བུ་བསྙེན་ཚད་ཚད་ལྡན་ཞིག་བཞག་པ་དེ་དང་། སྔོན་རྗེས་ཚང་མ་བསྡོམས་ན་འཇམ་དཔལ་ཞི་བ་དང་ཕུར་བསྙེན་གཉིས་ཀ་ང་རང་གི་ཚོད་ཀྱིས་སྐྱོན་མེད་ཅིག་ལ་བརྩིས་ཡོད། བསྙེན་སྒྲུབ་ཀྱི་སྐོར་འདི་གསང་དགོས་པའི་དམ་རྒྱ་ཅན་རེད་མོད། འོན་ཀྱང་སྐལ་ལྡན་རྡོ་རྗེའི་མཆེད་ལྕམ་རྐྱང་རྐྱང་གི་ནང་ནས་དེའི་ལྷག་མཆོག་དབང་གོང་མ་རྣམ་གསུམ་ལ་དོན་འགྲེལ་བྱེད་པའི་ཉམས་ཤིག་སྟོན་བཞིན་ཡོད་པས། དེའི་ཞོར་དུ་ལོ་རྒྱུས་དང་འབྲེལ་ནས་ཞུས་པ་ཙམ་ཡིན། དེའི་ཡན་ཆད་ཀྱིས་ཕུར་བ་བདུད་དཔུང་ཟིལ་གནོན་གྱི་དབང་བསྐུར་རྒྱས་པའི་ལུགས་བཞིན་དུ་དངོས་གཞི་སོང་སྟེ། སང་ཉིན་ཞིག་ལ་འདིའི་མཚམས་ནས་ཐུགས་ཆེན་སྡུག་བསྔལ་རང་གྲོལ་གྱི་དབང་བསྐུར་དགོས་རྒྱུ་ཡིན་མོད། འོན་ཀྱང་དབང་བཅུའི་དུས་ཚོད་ཉིན་བཅུར་བྱས་ན། ཉིན་བཅུ་དེ་ལ་སྙོམས་སྒྲིག་བྱེད་དུས། ཡང་གསང་བླ་སྒྲུབ་དེ་སྔོན་ལ་འདོན་དགོས་པ་ཞིག་ཏུ་གྱུར་འདུག འདིའི་མཚམས་ནས་དབང་གི་མཐའ་རྟེན་འདོན་དགོས། དེ་རིང་ཚེས་པ་དགུ་དང་སང་ཉིན་ཚེས་པ་བཅུ་ཡིན་ས་ཡོད། ད་རེས་ཚེས་བཅུའི་ཚོགས་འཁོར་རྒྱས་པ་ཞིག་འཚོགས་རྒྱུའི་དུས་ཚོད་མ་བྱུང་བ་རེད། གཙོ་བོར་དབང་འདོན་རྒྱུ་གལ་ཆེན་བྱས་ན་ཉིན་བཅུས་འདང་མི་འདང་ས་ལ་ཐུག་འདུག དེ་ཡིན་ན་སང་ཉིན་གྱི་ཚེས་བཅུའི་དུས་ཆེན་དང་བསྟུན་ནས་མི་འཇིགས་པ་སྐྱབས་ཀྱི་སྦྱིན་པའི་དགེ་ལས་ཤིག་སྒྲུབ་མཛད་ན་བསམ། ང་ཚོའི་ཁོར་ཡུག་གི་ནགས་རིའི་གསེང་ལ་བྱ་དང་། རི་དྭགས། རི་ཁྲོད་མཚམས་པའི་ཁྱིམ་མཚེས་ཀྱི་གྲོགས་པོ། འགྲོགས་ན་མི་མཐུན་པ་མེད་པ། རྩྭ་གཙང་ཆུ་གཙང་གིས་འཚོ་བའི་བག་ཕེབས་ལ་རྒྱུ་བཞིན་ཡོད་པ་འདི་ཐམས་ཅད་ལ། མཚམས་རེར་རྔོན་པས་དགྲ་ཆེན་པོ་ཞིག་ལྐོག་ནས་བྱེད་ཡོང་གིན་ཡོད་རེད། སྤྱིར་ན་ས་འདིའི་འབྲོག་རུ་བསོད་ནམས་ལྷ་སྡེའི་ཚོ་ཁག་བཅུ་གསུམ་གྱིས་རི་རྒྱ་རྔོན་ཁྲིམས་བཞག་ཡོད་པ་རེད། དེའི་ཐོག་ཏུ་ངས་ཀྱང་ལོ་རྟག་པར་ཆོས་ཁྲིད་ཀྱི་བར་གསེང་ནས་དགེ་འདུན་པ་ལ་ཐེངས་རེར་ལྟ་རུ་འཇུག་གི་ཡོད། ཡིན་ན་ཡང་། དབྱར་ལོ་གསུམ་ལ་ང་འདི་ན་མ་བསྡད་པ་རེད། དེའི་དབང་གིས་དེང་སང་བལྟས་ན། རི་དྭགས་རྣམས་ཅུང་ཇེ་ཉུང་ལ་འགྲོ་གི་ཨེ་ཡོད་སྙམ་པའི་ཚུགས་ཀ་ཞིག་འདུག་པས། སང་ཉིན་གནམ་གཤིས་ཡག་བཞག་ན། སྔ་དྲོའི་དུས་ཚོད་དགུ་པ་ཙམ་ཞིག་ནས་ཉིན་གུང་གི་གུང་ཚིགས་གསོལ་མ་རན་གྱི་བར་དུ། གཙོ་བོར་པདྨའི་ཐང་གི་གཡས་གཡོན་ན་བཞུགས་ཡོད་པའི་དགུང་ལོ་གཞོན་པ་ཚོ། ནགས་གསེང་དང་རྫ་ཁྲོད་གངས་ཁྲོད་ལ་རི་གཟིགས་སྤྲོ་གསེང་མཛད་ཞོར་ལ། ལྕགས་རྙི་བཞག་ཨེ་ཡོད་གཟིགས་ཡོང་ན་བསམ། ཡང་ཕྱོགས་གཅིག་ནས་སང་ཉིན་ཡང་གསང་བླ་སྒྲུབ་ཀྱི་གསང་བ་མན་ངག་སྡེའི་ཐོད་རྒལ་གྱི་དབང་ཡང་བསྐུར་རན་པ་ཡིན་པས། ཉམས་ལེན་པ་རྙིང་པ་ཞིག་ལ་མཚོན་ན་སྔོན་འགྲོ་རི་ཤན་གྱི་སྤྱོད་པ་ཞིག་ལམ་དུ་བྱེད་ཆོག་གི་ཡོད། རི་དྭགས་གསོད་ཆེད་ཀྱི་ལྕགས་རྙི་དེ། རོང་ཁུལ་ནས་ཕེབས་པ་ཚོར་ཐུགས་རྒྱུས་ཡོད་རྒྱུ་རེད་མོད། འོན་ཀྱང་འབྲོག་ཁུལ་ནས་ཕེབས་མཁན་ཚོ་ལ་ཆ་རྒྱུས་དེ་ཙམ་མེད་ན་ཐང་། ལྕགས་སྐུད་ཕྲ་བའི་ཨ་ལོང་ཞིག་གཙོ་བོར་གླ་བ་དང་ཤ་བ་སོགས་འགྲོ་ལམ་ལ་བཞག་དར་བ་རེད། ཁྱེད་རྣམ་པས་ལྕགས་རྙི་ལོན་པའི་གྲངས་ཀ་ལྟར་ངས་དམ་རྫས་ཨ་ཐམ་ཅན་གྱི་དཔའ་དར་འདོགས་རྒྱུ་ཡིན། དེ་ཡང་ཨང་དང་འབྲིང་ཕྱེས་ཏེ་ཚོགས་ཐོག་ནས་མར་ཁྱབ་བསྒྲགས་བྱེད་པའི་སྲོལ་ཞིག་སྔོན་ནས་ཡོད། དེའི་ཐད་ནས་ཚོགས་གཙོ་རྣམ་པ་ལ་ཕྱག་ལས་འཕར་མ་ཞིག་རེད་ཀྱང་ཐབས་མེད་ཡིན་པས་ཐུགས་ཁུར་མཛད་རོགས། དེ་བཞིན་ཕྱོགས་སོ་སོར་འགྲོ་ལུགས་སོགས་ཀྱི་བཀོད་སྒྲིག་ཇི་ལྟར་དགོས། ཚོགས་གཙོ་རྣམ་པས་མ་མཁྱེན་པ་མེད། དེའི་འཕྲོར་ཞུ་འོས་པ་ཞིག་ལ། ད་རེས་དབང་འདིར་ཕྱོགས་ནས་ཕེབས་པའི་འདུས་པ་མང་ཚོགས་ཀྱིས་འོ་བརྒྱལ་བྱས་པ་དེ་སྟོང་པར་མི་འགྲོ་པའི་ཆེད་དུ་ངས་གཟབ་རྒྱུ་ཡོད་ཚད་གཟབ་ནས་ནན་ཏུར་ཆེན་པོས་དབང་འདོན་ཁུལ་ཡིན། རེད་དེ་ཉི་མའི་རྗེས་སུ་ཉིན་མ་མཐུད་ནས་འདོན་དགོས་དུས། ལོ་ཉུང་སྐབས་དང་མི་འདྲ་པ་གཟུགས་པོས་ཐུབ་མི་ཐུབ་ཀྱི་ཚོར་སྣང་ཅུང་ཟད་རེ་ཡོང་གི་འདུག་པས། དེའི་བབས་བསྟུན་རེ་བྱེད་དགོས་ཐུག་པ་ཨེ་ཡིན་ན་བསམ་གྱིན་ཡོད། གཙོ་ཆེར་ལུང་འདོན་རྒྱུའི་ཕྱོགས་ནས་རེད། ངས་དུམ་དགུའི་ལུང་འདི་སྔར་ཡང་ཐེངས་གཉིས་ལ་འདོན་མྱོང་། དེའི་རྒྱུན་ཡོད་མཁན་མང་པོ་ཞིག་ཡོད་ས་ཡོད། དེ་མིན་ན་ཡང་འདིའི་ལུང་འདི་ཡོད་མཁན་མང་རྒྱུ་རེད། དེའི་འཕྲོར་བཤད་རྒྱུ་ཞིག་ལ། དེང་སང་ནམ་ཟླ་སྟོན་མཇུག་རེད། སྟོན་དགུན་མཚམས་སུ་སླེབ་པར་ཐག་རིང་པོ་མ་རེད། དེ་ཡིན་དུས་གནམ་གཤིས་ཇེ་འཁྱགས་ལ་འགྲོ་བཞིན་ཡོད་པས། རྣམ་པ་ཐམས་ཅད་ཀྱིས་སྐུ་འཚོའི་འཕྲོད་བཞེས་ཀྱི་ཕྱོགས་ལ་རང་རང་གིས་ལྷོད་གཡེང་མ་ཤོར་ཟེར་རྒྱུ་ཡིན། དེ་ནས་མཚམས་འདིར་དབང་རྫས་འབུལ་རྒྱུ་བྱེད། ཉིན་བདུན་པའི་དབང་དོན་ཟབ་ཁྲིད།དེ་ནི། ཡང་གསང་བླ་མའི་སྒྲུབ་པ་ཐིག་ལེའི་རྒྱ་ཅན་གྱི་དབང་སོགས་ཡིན། དབང་གི་ལོ་རྒྱུས་མཚམས་སྦྱོར་མཛད། སྐྱབས་སེམས་སོགས་རྗེས་ཟློས་སྐབས་ཀྱི་ཟུར་འཕྲོས། ཡང་གསང་བླ་མའི་སྒྲུབ་པ་འདི་ཨ་ཏིའི་བསྐྱེད་རྫོགས་ཀྱི་དགོངས་དོན་དང་འབྲེལ་བ་བསྟན་པ་རེད། སྤྱིར་ན་གོང་ནས་གསུངས་པ་ལྟར་བླ་སྒྲུབ་འདི་ལ་ཕྱི་ལྟར་དུ་སྒྲུབ་པ་སྐྱབས་འགྲོའི་ཚོགས་ཞིང་གི་གཙོ་བོར་གསལ་བ་ཞིག་དང་། ནང་ལྟར་དུ་སྒྲུབ་པར་སངས་རྒྱས་ཀུན་འདུས་སུ་སྤྱི་གཙུག་ཏུ་སྒོམ་རྒྱུ། གསང་བ་ལྟར་དུ་བྱིན་རླབས་གཅིག་ཆར་འཇུག་བྱེད་སྙིང་ཁར་སྒོམ་རྒྱུ། ཡང་གསང་ལྟར་ན་བླ་མ་རྩ་གསུམ་ཀུན་འདུས་སུ་བཞེངས་པ་དང་ཐུགས་ཡིད་དབྱེར་མེད་དུ་སྒོམ་པ་དག་གི་ནང་ནས། འདི་ཨ་ཏི་རྫོགས་པ་ཆེན་པོའི་སྡེ་གསུམ་ཐུན་མོང་གི་དགོངས་པ་དང་མཐུན་ཞིང་། ཡང་གསང་མན་ངག་སྡེའི་འབད་མེད་རང་གྲོལ་རིག་པ་རྗེན་ཅེར་མ་སྒོམ་པར་འཚང་རྒྱ་བ་ཀ་དག་ཁྲེགས་ཆོད་ཀྱི་དགོངས་པ་དང་། འབད་བཅས་བརྩོན་འགྲུས་ཅན་གྱི་འོད་གསལ་སྣང་བཞིའི་ཉམས་ལེན་ལ་བརྟེན་ནས། ཚེ་འདིའི་སྟེང་གི་གདོས་བཅས་འོད་ལུས་སུ་དག་པ་ཐོད་རྒལ་གཉིས་ཀྱི་ཁྱད་པར་དུ་བྱས་པའི་ཀ་དག་ལྷུན་གྲུབ་ཟུང་འཇུག་གི་གནད་དང་བསྟུན་ནས་གསུངས་པ་ཞིག་རེད། འདི་ནས་དབང་གི་ཆོག་ཁྲིགས་ཀྱི་ནང་དུ། འདི་ལྟར་རང་ངོ་ཉམས་སུ་མྱོང་ཡང་། བསམ་བརྗོད་ཀྱི་སྤྲོས་པ་ལས་འདས་པའི་རིག་སྟོང་རྗེན་པ་སྐད་ཅིག་མའི་གསུངས་བ་འདིས་ཁྲེགས་ཆོད་སྟོང་བའི་ཡེ་ཤེས་བསྟན་པ་ཡིན། དེའི་མཚམས་ཀྱི་རང་རྩལ་འོད་གསལ་སྒྲོན་མ་དྲུག་ལྡན་གྱི་སྣང་བའི་ཉམས་ཀྱི་འཕེལ་ཁ་ཡོངས་སུ་རྫོགས་པས་གསུངས་རྒྱུ་འདིས། ཐོད་རྒལ་སྣང་བའི་འོད་གསལ་བསྟན་པ་རེད། རང་ངོར་ཉམས་སུ་མྱོང་ཡང་གསུངས་པའི་རང་ངོ་ཞེས་པའི་ཚིག་འདི་ནུས་པ་ཆེན་པོ་འདུག་བསམ་གྱིན་ཡོད། ཨ་ཏིའི་བསྐྱེད་རྫོགས་ཀྱི་དགོངས་དོན་ཞེས་པའི་སྐབས་སུ། འབྲས་བུའི་ཐེག་པ་ཀུན་བཟང་ཆོས་སྐུའི་དགོངས་པའི་ཀློང་ལ་ཐད་ཀར་འཇུག་པ་ཡིན་པས། རྒྱལ་བའི་དགོངས་པ་དེ་སོ་སོ་རང་གི་རིག་བྱ་ཡེ་ཤེས་ཀྱི་སྤྱོད་ཡུལ་དུ་གྱུར་བ་ཡིན་པས། དེ་ཉིད་མྱ་ངན་ལས་འདས་པའི་མཚན་ཉིད་མཐའ་ཐུག་ཡིན་པར་མ་ཟད། དུས་གསུམ་བྱ་བཞག་འབྱོན་འགྱུར་སངས་རྒྱས་ཐམས་ཅད་ཀྱི་དགོངས་པ་དང་བླ་མའི་ཐུགས་ཀྱང་རེད། དེ་ལྟར་ཡིན་པ་གང་ཞིག་རང་རྒྱུད་ལ་ཡོད་པའི་གཞི་རྒྱུད་བདེ་གཤེགས་སྙིང་པོའི་ངོ་བོ་དང་ཐ་མི་དད་པ་ཡིན་པས། དེ་ནི་དབྱིངས་དང་ཡེ་ཤེས་གཉིས་མེད་དེའི་ངོར་སྒྲིབ་པའི་གཤིས་སླེབས་མ་མྱོང་བ་ཡིན་ན། དེ་མངོན་དུ་གྱུར་དུས་དག་པ་གཉིས་ལྡན་གྱི་མཐར་ཐུག་སངས་རྒྱས་ཞེས་མཚན་གསོལ་ས་ཡང་དེ་རེད། སྨྲ་བསམ་བརྗོད་མེད་སོ་སོར་རང་གི་རིག་པའི་ཡེ་ཤེས་དེ་ཉིད་ཀྱི་སྤྱོད་ཡུལ། ཡུམ་དོན་མཐའ་ཐུག་གི་དགོངས་པ་དང་གཅིག་ཡིན་པས། དེ་ནི་རྣམ་རྟོག་དང་རྫས་འགལ་བ་ཞིག་རེད། དེའི་ཕྱིར་ན་ཉམས་སུ་མྱོང་ཡང་གསུངས་རྒྱུ་འདིས། ཉམས་སུ་མྱོང་བྱ་ཞིག་ཡོད་དུས་མྱོང་བྱེད་མྱོང་མཁན་ཞིག་ཡོད་དགོས་རྒྱུ་ཡིན་ན། སེམས་ཀྱིས་ནི་ཡེ་ཤེས་མི་རིག སྣང་མུན་གཉིས་ཀ་ལྷན་གཅིག་ཏུ་མི་གནས་པ་ལྟ་བུ་རེད། དེའི་སྟབས་ཀྱིས་བསམ་བརྗོད་ཀྱི་སྤྲོས་པ་ལས་འདས་གསུངས་རྒྱུའི་ཚིག་དེ་བསྣན་པ་རེད། ཡེ་ཤེས་རང་གིས་རང་རིག་ཟེར་ན་རང་གིས་རང་ལ་བྱ་བྱེད་འགལ་བ་རེད། རལ་གྲིས་རང་གི་སོ་རང་ཉིད་ཀྱིས་མི་གཅོད་པ་ལྟ་བུ་དང་། གཟུང་འཛིན་གཉིས་སྟོང་གི་ཤེས་པ་རང་རིག་རང་གསལ་ལ་སོགས་པ་ཐེག་པ་འོག་མའི་བློ་སྐྱོན་རྣམས་ལ་ཡང་སྒོས་གོལ་མི་རུང་བ་རེད། དེས་ན་རང་ངོ་ཉམས་སུ་མྱོང་མཁན་དེ་སུ་དང་གང་རེད་ཟེར་ན། གཞི་ངོ་བོའི་རིག་པ་མ་ལྟ་བུ་དེ་ལས་རྩལ་ཐུགས་རྗེའི་རིག་པ་བུ་ལྟ་བུ་དེ་ཤར་ཡོང་དུས། རང་གི་རྩལ་གྱིས་རང་གི་ངོ་བོ་མཐོང་བ་རེད། མཐོང་ལུགས་ཅི་འདྲ་བྱས་ནས་མཐོང་ཟེར་ན། མཐོང་བྱ་མཐོང་བྱེད་གཉིས་མེད་ཀྱི་ཚུལ་གྱིས་མཐོང་ཞིང་། མ་མཐོང་སྒྲིབ་པའི་ཆ་དང་བྲལ་བ་དེ་ལ་མཐོང་བ་ཞེས་པའི་བརྡ་ཆད་སྦྱར་མཛད་པ་ཙམ་ཞིག་རེད། དེས་ཕྱིར་ན་ཡིད་དཔྱོད་དང་བྲལ་བའི་སྒོམ། མ་བཅོས་ཟོལ་མེད་རང་བབ་ལ་ད་ལྟ་ནས་ལྷོད་ཅེས་ནན་གྱིས་བསྐྱར་ཟློས་འདུག་རྒྱུ་འདི། མན་ངག་གནད་དུ་དྲིལ་བའི་ཟབ་གནད་ཀྱི་གདམས་པ་རེད། འདི་ཡང་བསྐྱར་བཤད་ན། སྟོང་བའི་གདངས་ཀྱིས་ཡེ་ཤེས་ཀྱི་གོ་འབྱེད་པའི་ངོས་ནས། འདི་སོ་སོ་རང་གི་རིག་པ་གསུངས་པ་རེད་ལ་འདི་དྲན་བསམ་རང་རྒྱུད་པར་གནས་པ་ཞིག་མ་ཡིན་པས་ན། རྟོག་པ་དང་གཉིས་ཀ་རྫས་འགལ་བ་ཞིག་རེད། དེའི་རྒྱུ་མཚན་ནི། རྣམ་པར་རྟོག་པའི་རང་བཞིན་ཅན་གྱི་གསལ་ཞིང་རིག་པ་རྣམ་ཤེས་ཀྱི་མཚན་ཉིད་དང་། རྣམ་པ་མི་རྟོག་པའི་གནས་ལུགས་སོ་སོ་རང་གི་རིག་པའི་རང་བཞིན་འོད་གསལ་བ་ཡེ་ཤེས་ཀྱི་མཚན་ཉིད་རེད། དེ་ཡིན་ན། དེ་གཉིས་ཀ་རྫས་འགལ་བ་གནམ་ས་འདྲ་ཞིག་གི་ཁྱད་པར་ཕྱེས་སོང་བས། འཁོར་བ་མྱང་འདས་སུ་གྲོལ་བ་མི་འཐད་དོ་བསམ་ན། རྣམ་ཤེས་ཀྱི་ཆོས་ཉིད་ཡེ་ཤེས་རེད། མདོ་དགོངས་པ་འགྲེལ་པ་ལས། འདུ་བྱེད་ཁམས་དང་དོན་དམ་མཚན་ཉིད་ནི། གཅིག་དང་ཐ་དད་བྲལ་བའི་མཚན་ཉིད་དེ། གཅིག་དང་ཐ་དད་ཉིད་དུ་གང་རྟོགས་པ། དེ་དག་ཚུལ་མིན་ལྟ་ལ་ཞུགས་པ་ཡིན། ཞེས་གསུངས་པ་རེད། གཉིས་འཛིན་འཁྲུལ་རྟོག་དག་ནས་གཉིས་མེད་ཆོས་ཉིད་ཀྱི་གནས་ལུགས་ཡང་དག་མངོན་དུ་གྱུར་བའི་ཡེ་ཤེས་མཐར་ཐུག་སངས་རྒྱས་ཀྱི་མཚན་ཉིད་རེད། འོ་ན་དེ་སོ་སོའི་སྐྱེ་བོའི་སྤྱོད་ཡུལ་དུ་ཅི་འདྲ་བྱས་ཏེ་འགྱུར་བ་རེད་ཟེར་ན། བདེ་བར་གཤེགས་པའི་སྙིང་པོའི་ཚུལ་ངོ་མ་དེ་ནི་ས་བཅུའི་སེམས་དཔའ་ཆེན་པོ་ཡིན་ཡང་མཚན་མོའི་གཟུགས་ལ་སྤྱོད་པ་ལྟ་བུ་མ་གཏོགས་ཇི་བཞིན་མཐོང་བ་མིན་ཡང་། བླ་མའི་མན་ངག་སྙིང་པོར་བྱས་ན་སོ་སོའི་སྐྱེ་བོའི་ས་འདི་ནས་ཀྱང་ཡིད་ཆེས་པའི་ཐོག་ཏུ་རྣལ་འབྱོར་དུ་བྱེད་རྒྱུ་ཡོད་པ་རེད། འདི་ཡང་གསང་སྔགས་ཀྱི་ཁྱད་ཆོས་རེད། དེ་བཞིན་དུ། སྔགས་ལམ་ཟབ་ཅིང་མྱུར་བ་འགྲུབ་བར་མ་ཟད་དབང་རྣོན་གཅིག་ཅར་པས་བརྡ་ཙམ་གྱིས་སམ་ཡང་ན་དབང་དུས་སུ་གྲོལ་བའི་འཐད་པ་ཡང་རང་ཤུགས་ཀྱིས་གྲུབ་པ་རེད། ཡང་གསང་བླ་མའི་སྒྲུབ་པ་འདི་ཨ་ཏིའི་བསྐྱེད་རྫོགས་ཀྱི་དགོངས་པ་དང་འབྲེལ་བ་རེད་ཅེས་སྨྲས་པ་རེད། ཨ་ཏིའི་སྐབས་སུ། བསྐྱེད་པའི་ལྷ་མེད། སྒོམ་བྱའི་ཆོས་ཀྱང་མེད་གསུངས་པ་མིན་ནམ་བསམ་ན། མ་བསྐྱེད་རང་བྱུང་ཡང་གྲུབ། སྐད་ཅིག་དྲན་རྫོགས་ཀྱི་གསལ་སྣང་ལ་ཨ་ཏིའི་བསྐྱེད་རིམ་གསུངས་བ་རེད། དེ་ཡིན་ན། འོད་གསལ་རིག་པའི་ཡེ་ཤེས་ལ་གནད་དུ་བསྣུན་ན་རིག་སྟོང་ཟུང་འཇུག་ཡིན་པའི་དབང་གིས། སོ་སྐྱེ་ལའང་རིག་གདངས་དངོས་སུ་འཆར་རྒྱུ་ཡོད་པ་དེ་ནི། མཐོང་ཆོས་རེད། ཡིན་ན་ཡང། འདི་ཉམས་སུ་ལེན་པ་པོ་སོ་སོས་ཞིབ་ཅིང་ཕྲ་བའི་རྣམ་འབྱེད་བྱེད་དགོས་པ་ཞིག་ཡིན། སྣང་བཞིའི་ནང་གི་སྣང་བ་དང་པོ་གཉིས་ཀ་སོ་སྐྱེས་རྟེན་ལ་མཐོང་ཐུབ། འོན་ཀྱང་ནང་ཤེས་རབ་རང་བྱུང་གི་སྒྲོན་མའི་ངོ་བོའི་ངང་ལས་གཡོས་ནས་ཡིད་དཔྱོད་ཀྱི་ཞེན་འཛིན་ལ་ཞུགས་སོང་ན། ས་རྡོ་མཐོང་བ་དང་ཁྱད་པར་མེད་པར་ངོ་ཤེས་པའི་ཐོག་ནས། སྣང་བ་ཕྱི་མ་ཚད་ཕེབས་དང་ཆོས་ཟད་གསུངས་ཡོང་དུས། འཕགས་ས་མ་ཐོབ་པས་མཐོང་དཀའ་བ་ཡིན་པས། ངའི་མིག་སྔར་ཤར་འདུག་གི་ཟེར་བ་ཙམ་གྱིས་གང་ཡང་མི་ཕྱིན། ལོངས་སྐུའི་ཞིང་སྣང་འཆར་དུས་དག་སྣང་འབའ་ཞིག་འབྱམས་ཀླས་འགྲོ་བ་རེད། ཡོན་ཏན་བརྒྱ་ཕྲག་བཅུ་གཉིས་ལ་སོགས་པའི་རྟགས་ཚད་ལ་བསམ་བློ་བཏང་ནའང་ཤེས་རྒྱུ་ཡོད། ཁྱད་པར་དུ་བསྐྱེད་རྫོགས་ཐུན་མོང་གི་ལམ་ལ་བརྟེན་ནས་ལྷ་སྐུ་རེ་ཤར་ན་ཡང་། དེ་རླུང་སེམས་ཀྱི་ལྷ་སྐུ་ཙམ་ཡིན་རྒྱུའི་ངོས་འཛིན་ཆོག་དང་མི་ཆོག་ཐེ་ཚོམ་རེད་སྙམ། འོ་ན། ཀ་དག་སྟོང་བའི་ཡེ་ཤེས་དང་ལྷུན་གྲུབ་སྣང་བའི་འོད་གསལ་གཉིས་ཀ་ཐ་མི་དད་པའི་ཐོག་ནས་འདི་ན་སྒྲོན་མ་དྲུག་གསུངས་འདུག་མོད། འདིའི་ཆོག་ཁྲིགས་ཀྱི་ཚིག་དོན་མང་པོ་ཞིག་གྲོལ་ཐིག་གི་དགོངས་པ་རེད། སྒྲོན་བཞི་དང་ཁྱད་པར་ཅི་ཡོད་སྙམ་ན། བཤད་པའི་སྐབས་ན་སྒྲོན་མ་དྲུག་གི་མི་ཚད་དགུར་བྱས་ཏེ་བཤད་ཆོག རེད་དེ་ཉམས་ལེན་དངོས་ལ་སྒྲོན་མ་བཞིའི་ནང་དུ་འདུས་པ་རེད། འདིའི་སྐབས་ལ་ཙིཏྟ་ཤ་ཡི་སྒྲོན་མས་གཞིར་བྱས། དཀར་འཇམ་རྩ་ཡི་སྒྲོན་མས་ལམ་བྱས། རྒྱང་ཞག་ཆུ་ཡི་སྒྲོན་མས་སྒོ་བྱས། དག་པ་དབྱིངས་ཀྱི་སྒྲོན་མ་ཞིང་ཁམས་ཀྱི་སྣང་བ་དང་། ཐིག་ལེ་སྟོང་སྒྲོན་གཞལ་ཡས་ཁང་དང་ཤེས་རབ་རང་བྱུང་གི་སྒྲོན་མ་རིག་གདངས་རྡོ་རྗེའི་ལུ་གུ་རྒྱུད། ནང་དབྱིངས་རིག་གི་གོམས་པ་བརྟན་ཕྱིན་བརྟན་ལ་འགུལ་འཕྲིག་མེད་པར། དབྱིངས་ཐིག་གི་ར་བར་ཚུད་ནས་ལྷག་མཐོང་གསལ་བའི་ཡེ་ཤེས་ཀྱི་སྟོབས་ཀྱིས་ཤེས་རབ་སྐུ་རུ་སྨིན་པའི་རང་རྩལ་རྫོགས་པ་ཡིན་ན། རྣམ་པར་འོད་སྐུའི་རྟགས་ཀྱི་ཕྱག་རྒྱར་ཤར་བ་རེད། སྐབས་འདིར་བསྟན་རྒྱལ་ཀུན་འདུས་པའི་ངོ་བོ་པཎ་ཆེན་བི་མ་མི་ཏྲ་དང་གཉིས་སུ་མེད་པའི་ཀུན་མཁྱེན་ཆེན་པོ་གསུངས་འདུག་མོད་དེ། འདིའི་འཕྲོ་འདི་ནས་གནས་གསུམ་ཡིག་འབྲུ་གསུམ་གྱིས་མཚན་པ་གསུངས་རྒྱུའི་མཚན་བཅས་ཀྱི་བསྐྱེད་རིམ། མ་ཧཱ་ཡོ་གའི་ཏིང་འཛིན་གསུམ་བསྐྱེད་དང་འབྲེལ་བ་ཞིག་འབྱུང་རྒྱུ་འདི་ཅི་ཞིག་རེད་སྙམ་ན། སྤྱིར་རྒྱུད་སྒྱུ་འཕྲུལ་དྲྭ་བ་འདི་རྒྱུད་སྡེ་ཐམས་ཅད་ཀྱི་སྤྱིའི་ཁོག་དབུབ་རེད། མ་གཞི་ཐེག་མཆོག་ཐེག་པའི་རྒྱལ་པོ་འདི་ལ་འོག་མའི་ཡོན་ཏན་ཐམས་ཅད་ཡར་ལྡན་ནམ། འོག་མར་དགོས་པའི་དབང་གིས་གབ་པའི་སྦས་དོན་མཐའ་དག་དང་། གནད་ཟབ་མོ་ཁྱད་འཕགས་བསྟན་པ་ཐམས་ཅད་གོང་མའི་ཁྱད་ཆོས་ཀྱང་ཡིན་རྒྱུ་དང་། འོག་མ་ཡོད་པའི་ལྟོས་འཇོག་གི་དབང་གིས་གོང་མ་ཞེས་གྲུབ་པ་དེ་འབྲས་བུ་ལ་ཉེ་རིང་གི་ལམ་ཁྱད་ཙམ་ཞིག་རེད། བསྐྱེད་རིམ་ཏིང་འཛིན་རྣམ་གསུམ་ཟེར་བ་ཙམ་གྱིས་ཨ་ཏི་ནས་མར་མ་ཧཱ་ལ་ལྷུང་ཨེ་ཐལ་བསམ་དགོས་མ་རེད། སྐབས་འདིའི་བསྟན་བྱ་དེ་རྫོགས་ཆེན་མན་ངག་སྡེ་དང་བསྟུན་ཡོང་ན། དེ་བཞིན་ཉིད་ཀྱི་ཏིང་ངེ་འཛིན་ངོ་བོ་ཀ་དག་གཞིའི་སྐབས་དང་། ཀུན་སྣང་རང་བཞིན་ལྷུན་གྲུབ་གཞན་སྣང་གི་ཡེ་ཤེས། རྒྱུའི་ཏིང་ངེ་འཛིན་ཀ་དག་ལྷུན་གྲུབ་ཟུང་འཇུག་ཐུགས་རྗེའི་རིག་པ་ཤེས་རབ་ཀྱི་ཆ་ཐོད་རྒལ་གྱི་སྣང་ཆ་ལུག་རྒྱུད་གཡོ་མེད་དུ་འཆར་བ་དེ་རེད། དཀྱིལ་འཁོར་དང་ལྷར་བསྐྱེད་རྒྱུ་དེ་ཤེས་རབ་སྐུ་རུ་སྨིན་པ། ཞིང་ཁམས་དང་གཞལ་ཡས་ཁང་ལྷ་ཚོགས་གཙོ་འཁོར་ལ་སྦྱར་ཆོག་རྒྱུ་ནི་གོང་ནས་བཤད་མ་ཐག་པ་ལྟར་རེད། མཚན་བཅས་བསྐྱེད་རིམ་དང་མཚན་མེད་རྫོགས་རིམ་ཟེར་རྒྱུ་ཞིག་སྤྱིར་བཤད་དར་བ་རེད། རེད་དེ་སྒོམ་མཁན་རྣལ་འབྱོར་བའི་བློས་དངོས་པོ་དང་མཚན་མ་འཛིན་པའི་སྐབས་སུ་གང་ཅན་པོ་བསྒོམས་ཀྱང་མཚན་བཅས་ལས་མི་འདའ་བ་ཡིན་ཤས་ཆེ་བ་དང་། རྟོགས་པ་མཆོག་ལྡན་གྱི་གང་ཟག་ཞིག་གིས་ནི་བསྐྱེད་རིམ་གྱི་སྤྲོས་པ་བསྒོམས་ཀྱང་ཡེ་ཤེས་ཀྱི་རང་རྩལ་ལས་མི་འདའ་བ་རེད། སྐུ་སྒོམ་པ་བསྐྱེད་རིམ་གྱི་མདོ་ཆིངས་དང་། རིག་པའི་ངོ་བོར་སྒོམ་པ་རྫོགས་རིམ་གྱི་སྤྱི་ཆིངས་རེད། ཡུལ་སྣང་ཐམས་ཅད་སྒྱུ་མ་ལྟ་བུའི་བསྐྱེད་རིམ་གསལ་སྟོང་འཛིན་བྲལ་དུ་ཤར་བ་དང་། སྒོམ་བྱའི་ལྷ་དང་བླ་མའི་ཐུགས། རང་གི་སེམས་ཀྱི་ངོ་བོ་གསུམ་པོ་དབྱེར་མེད། བསྐྱེད་རྫོགས་ཟུང་དུ་འབྲེལ་བའི་གནད་དང་མ་བྲལ་པར་མཛད་ན། གང་ལྟར་བྱས་ཀྱང་གཡེང་པ་མེད་པའི་ལྟ་སྒོམ་ཟུང་འབྲེལ་ལས་འདའ་བ་མི་འདུག དེའི་ངང་སྐྱོང་ན། གོ་མྱོང་རྟོགས་པ་ཅི་རིགས་པ་ཉམས་སུ་མྱོང་བ། ཉིན་མོར་མིག་ལྡན་གྱིས་གཟུགས་ལ་བལྟས་པ་ཇི་བཞིན་དུ། རང་མྱོང་གིས་མཐོང་ཡོང་བ་རེད། དེ་མཐོང་ཡོད་མེད་ནི་རྟགས་སྤྱོད་པས་འཛིན་ཆོག་རྒྱུ་དང་། སྔགས་ཀྱི་སྐབས་ནས་ལྟ་བ་རྟོགས་ཟེར་རྒྱུ་དེ་ཡང་། མཚན་ཉིད་ཐེག་པའི་ནང་ནས་ཐོས་བསམ་གྱིས་གཏན་ལ་ཕབས་པའི་གོ་ལྟ་དང་མི་འདྲ། ཉམས་མྱོང་ཏིང་ངེ་འཛིན་གྱི་ལྟ་བར་དབང་ཐོབ་པ་ལ་གོ་དགོས་པ་ཡིན་པས། ཞི་གནས་དང་ལྷག་མཐོང་གསུངས་རྒྱུ་འདི་ཡང་ལམ་མངོན་རྟོགས་ཀྱི་རིམ་པ་རེད་ཟེར་ན་མ་རེད་ཀྱང་། བཤད་པའི་གོ་རིམ་རིམ་ཅན་དུ་མི་བྱེད་ཐབས་མེད་ཀྱིས་སོ་སོའི་ལྡོག་པ་ནས། ཐ་སྙད་ཚིག་མི་འདྲ་བ་གཉིས་ཀྱིས་བཤད་ན་ཡང་། དོན་ལ་ཞི་ལྷག་ཟུང་འཇུག་གསལ་སྟོང་རྣམ་པར་མི་རྟོག་པའི་ཡེ་ཤེས་ལ་ངོས་གཟུང་དགོས། ཡིན་ན་ཡང་། སེམས་རྣམ་པར་མི་རྟོག་པ་རིག་པའི་གསལ་ངར་མེད་པ་ལ་ཞི་གནས་དང་། གསལ་ཆའི་ངར་ཡོད་པ་དེ་ལྷག་མཐོང་དུ་བཤད་ན་ཡང་མི་འགྲིག་ས་ཡོད། རྒྱུ་མཚན་ནི། ཏིང་ངེ་འཛིན་ལ་བྱིང་རྒོད་ཡོད་མེད་ཡོང་ཆོག་ཀྱང་། ཞི་ལྷག་ཟེར་ཚོད་དེ་གཅིག་མིན་པར་ཤེས་དགོས། ཐུན་མོང་ཕྱི་ནང་གི་ལམ་ཐམས་ཅད་ཞི་གནས་དང་ལྷག་མཐོང་གི་མིང་ཙམ་མེད་རྒྱུ་ཞིག་མ་རེད། སྟོང་ཉིད་རྟོགས་པའི་ཞི་གནས་ཡོད་ཆོག་ལ་སྟོང་ཉིད་མ་རྟོགས་པའི་ལྷག་མཐོང་ཡང་ཡོད། འོ་ན་དེའི་ཁྱད་པར་དེ་ཇི་ལྟར་འབྱེད་དགོས་སྙམ་ན། སྟོང་ཉིད་ལ་དམིགས་པའི་ཏིང་འཛིན་དང་ཤེས་རབ་ཡིན་མིན་དེ། ཡུལ་བདག་མེད་གང་ཡང་རུང་བ་བློ་དེས་རྟོགས་དང་མ་རྟོགས་ཀྱིས་ངོས་གཟུང་དགོས་པ་ལས། ཡུལ་དེ་བཞིན་ཉིད་དང་དེ་ཁོ་ན་ཉིད་ལ་བློ་ཁ་ཙམ་ཡང་ཕྱོགས་མ་མྱོང་པའི་བདེ་གསལ་མི་རྟོག་གི་ཏིང་འཛིན་ཙམ་ཞིག་ནི། མུ་སྟེགས་པ་དང་འཇིག་རྟེན་པའི་ལམ་ལ་ཡང་ཡོད་པ་ཞིག་རེད། རྗེ་བཙུན་བྱམས་མགོན་གྱིས། ཡང་དག་པའི་ཏིང་ངེ་འཛིན་ལ་བརྟེན་ནས་སེམས་འཇོག་པ་ཞི་གནས་དང་། ཆོས་རབ་རྣམ་འབྱེད་ཀྱི་ཤེས་རབ་ལ་ལྷག་མཐོང་གསུངས་པ་དག་ལ་གཞིར་བཟུང་ནས། མདོ་སྔགས་གང་དང་སྦྱར་ནས་བཤད་ན་དམ་བཅའ་ཚུགས་བརྟན་པ་རེད་སྙམ། རེད་དེ། རང་གི་མྱོང་བ་ངེས་པའི་རྟགས་མེད་ན། མཐོ་ས་དམའ་ས་གང་ནས་བཤད་ཀྱང་ཁ་བའི་འོག་གི་འབར་འབུར་ལ་ལྟས་པ་འདྲ་ཞིག་ལོས་ཡིན། དོན་ལ་བླ་མ་རང་སེམས་གཉིས་མེད་ཀྱི་ཤེས་པ་རིག་རྩལ་ཤེས་རབ་ཀྱི་རྣམ་མཁྱེན་ཤར་བ་དེའི་ངང་ལ། སྤྲོ་བསྡུ་བྲལ་བར་བཞག་ན་བླ་སྒྲུབ་ཐམས་ཅད་ཀྱི་རྒྱལ་པོ་བྱིན་འབེབས་ཀུན་གྱི་མཆོག་ཡིན། བསྐྱེད་རིམ་ཀྱི་གནད། རྫོགས་རིམ་ཀྱི་བཅུད། གནས་ལུགས་ཀྱི་འཚང་། མན་ངག་གི་མདུད་དེ་ཡིན་པས། སྔགས་ཀྱི་ཉེ་ལམ་ཁྱད་འཕགས། དབང་བསྐྱེད་རྫོགས། བཤད་པ་དང་བཅས་སྔ་འགྱུར་བཀའ་བབས་ཀྱི་ཆུ་བོ་ཆེན་པོ་བཞི་ཡི་ཐུན་མིན་ཉེ་བརྒྱུད་ཁྱད་པར་བ་འདི། རྒྱུན་མ་ཆད་པར་དམ་པ་གོང་མའི་བྱིན་རླབས་ཀྱི་བབས་སོ་རུ་རང་གཞན་ཚང་མས་ཡིད་རྟོན་མཛད་ཆོག་པ་རེད་སྙམ། འདིའི་དབང་གི་ཆོག་ཁྲིགས་ཀྱི་བྱིན་འབེབས་མཚམས་སྦྱོར་དངོས་འགོ་ནས་མར་བསྐྱར་འདོན་ཞིག་བྱེད། མཚམས་འདིར། ཧཱུཾ༔ རྣམ་རྟོག་བྲལ་བའི་ཕོ་བྲང་སོགས་ཀྱི་སྤྱན་འདྲེན། རྣམ་བུམ་དབང་བསྐུར་རྗེས་ཀྱི་ཟུར་འཕྲོས། སྤྱིར་རྫོགས་ཆེན་ཨ་ཏི་ཡོ་གའི་གསང་བ་མན་ངག་སྡེའི་ལུགས་འདི་ལ། དབང་དང་བྱིན་རླབས་ཆུ་བོའི་རྒྱུན་ལྟར་སྟོན་པ་ཆུ་བོ་ལྟ་བུའི་རྒྱུད། རྫོགས་པ་རང་བྱུང་གི་དགོངས་པ་དང་བསྟུན་པ་རེད། དེའི་རྩ་བའི་ལུང་བརྒྱད་ལ་བརྟེན་ནས། དབང་བཞི་སྤྲོས་བཅས། སྤྲོས་མེད། ཤིན་ཏུ་སྤྲོས་མེད། རབ་ཏུ་སྤྲོས་མེད་བཞི་བོའི་ཁོངས་སུ། འོག་མའི་བླ་མེད་ཐུན་མོང་གི་བུམ་གསང་ཤེར་དབང་ཚིག་དབང་དང་བཅས་པ་ཡོངས་རྫོགས་འདུས་པར་མ་ཟད། དབང་བཞི་བའི་ཡེ་ཤེས་ལས་འཕྲོས་པའི་འོག་མའི་ཐེག་པར་མིང་ཙམ་ཡང་མི་གྲགས་པའི། སྐལ་ལྡན་དབང་རྣོན་གྱི་སྤྱོད་ཡུལ་དུ་གྱུར་བའི་ཐུན་མོང་མ་ཡིན་པའི་ངོ་སྤྲོད་ཀྱི་དོན་དབང་། འོག་མར་གབ་ཅིང་གསང་བའི་དོན་གྱི་ཡེ་ཤེས་ཇི་བཞིན་མ་འདྲེས་ཐད་ཀར་སྟོན་ཡོད་པ་རེད། དེ་ལྟར་བསྟན་ཅིང་མན་ངག་སྡེའི་སྐོར་ཚོ་སྔ་མ་གསུམ་ལས་ཀྱང་རྫོགས་པར་མ་བསྟན་པའི། འོད་གསལ་སྣང་བཞི་མཐར་སོན་པའི་དབང་དང་གདམས་པས་རླུང་ལྔ་ཡི་གཡོ་གཟིར་ཟད་ནས་ནམ་ཡང་འཁྲུལ་མི་ཤེས་པའི་ནང་དབྱིངས་ལ། གཞི་ཉིད་འབྲས་བུར་སྨིན་པའི་རང་གསལ་ཡེ་ཐོག་དང་པོའི་མགོན་དང་སྐལ་བ་མཉམ་པ་བྱེད་པ་རེད། དེ་ཡིན་ན་སྐབས་འདིར་ནང་རྒྱུད་ཡོ་ག་སྡེ་གསུམ་གྱི་ཟླས་ཕྱེས་པའི། ཨ་ཏིའི་རང་ལམ་གྱི་བུམ་གསང་ཤེར་དབང་བཞི་བའི་དབང་དང་བཅས་པའི། ཕྱིའི་སྒྲོམ་གཞི་དེའི་སྟེང་ནས་གོང་མའི་གནད་ཚང་བར་བྱས་ནས་སྟོན་ཡོད་པ་རེད། དེ་ཡིན་ན་སྐུ་རྡོ་རྗེ་བུམ་པའི་དབང་། གསུང་རྡོ་རྗེ་གསང་བའི་དབང་། ཐུགས་རྡོ་རྗེ་ཤེས་རབ་ཡེ་ཤེས་གྱི་དབང་། ཡེ་ཤེས་རྡོ་རྗེ་ཚིག་དབང་རིན་པོ་ཆེ་དང་བཅས་པའི་བཞི་བོ་དེས། འདག་བྱ་སྒོ་གསུམ་ཆ་སྙོམ་བཞི་དང་། སད་རྨི་གཉིད་འཐུག་སྙོམས་འཇུག་སྟེ་གནས་སྐབས་བཞིའི་སྒྲིབ་པ་དང་བཅས་པ་ཐམས་ཅད་སྦྱོང་། དེ་དང་ཆབ་ཅིག་ཏུ་བདུད་བཞི་དབྱིངས་སུ་ཆོམ། སྒྲིབ་གཉིས་བག་ཆགས་དང་བཅས་པ་དག་ནས། ད་ལྟ་ལྟར་མི་མངོན་པའི་རང་གནས་ཀྱི་ཡེ་ཤེས་སྒྲིབ་ཆ་མཐའ་དག་ལས་གྲོལ་ཏེ། གཞི་འབྲས་དབྱེར་མེད་གདོད་མའི་མགོན་པོའི་ས་ལ་སྐྱེལ་བར་བྱེད་པའི་དབང་གི་གནད་དེ་ཉིད་ཟིན་པའི་ཐོག་ནས། སྤྱི་རྒྱུད་སྒྱུ་འཕྲུལ་དྲྭ་བ་ཆེན་པོའི་དབང་བཞི་ཚིག་འགྲོས་དང་སྦྲེལ་ཏེ་གསུངས་ཡོད་པ་ཞིག་རེད། དེ་ཡང་སྒྲ་མཐུན་དོན་གྱིས་འཕགས་པའི་བརྗོད་ཚུལ། གོང་ནས་ཀྱང་བཤད་པ་ལྟར་རེད། དེའི་ནང་གི་བུམ་པའི་དབང་འདི་རྣམ་རྒྱལ་བུམ་པའི་དབང་རྗེས་འབྲེལ་དང་བཅས་པ་གསུངས་པ་རེད། དེ་ཡང་ཕྱི་རྫས་དབང་བུམ་པ་སྐུ་ལྔ་ཡོངས་རྫོགས་ཡེ་ཤེས་ལྔ་ལྡན་གྱི་དཀྱིལ་འཁོར་ནས། ནང་སྒོ་གསུམ་ཡེ་ནས་དག་པ་གདན་གསུམ་ཚང་བའི་ངོ་བོ་ལ། གསང་བ་ནང་གསལ་ཀ་དག་ལྷུན་གྲུབ་དབྱེར་མེད། ཟུང་འཇུག་སྣང་སྟོང་གི་རོལ་བ་མ་འགག་བླ་མའི་དཀྱིལ་འཁོར་དུ་ཤར་བ། བྱིན་རླབས་ཀྱི་བདུད་རྩིའི་རྒྱུན་དང་འགྲོགས་པའི་དབང་བསྐུར་བ་འདི་ཐོབ་པས། གཙོ་བོ་སྐུ་ཡི་བྱིན་རླབས་ཐོབ་པ་རེད། སྐུ་ཡི་བྱིན་རླབས་ཐོབ་པས་ལུས་རགས་པ་བསྐྱེད་བྱེད་རྩ་ཡི་འགྲོས་འདི་དག་ནས། བསྐྱེད་རིམ་སྒོམ་པ་ལ་དབང་བའི་གོ་དོན། འདི་ནས་ཨ་ཏིའི་དགོངས་པ་རྩལ་འདོན་གྱིས་རིག་འཛིན་བླ་མའི་དཀྱིལ་འཁོར་གྱི་གཙོ་བོ་དེ་ཀུན་མཁྱེན་ཆེན་པོའི་གསལ་སྣང་ལ་སེམས་འཛིན་རྒྱུ་ནི། བླ་སྒྲུབ་དང་བསྟུན་པའི་སྐུའི་དབང་གི་སྒོས་ཆོས་རེད། གསང་གསུམ་བླ་མའི་རོལ་བ་ལས་མི་འདའ་བའི་དོན་དབང་། སྨིན་དང་གྲོལ་བ་གཉིས་ལྡན་གྱི་ངོ་སྤྲོད་དང་བཅས་པས་རྫོགས་པར་ཆ་ཚང་བར་བསྟན་ཡོད་པ་རེད། ཆོས་ཅན་སྤྲོས་པ་ཅན་གྱི་མཚན་འཛིན་གྱི་སྣང་བ་ཐམས་ཅད་དེ། ཆོས་ཉིད་སྤྲོས་པ་ཀུན་བྲལ་ཀ་དག་སྟོང་གསལ་གྱི་ནང་དབྱིངས་ལ་ཐིམ་པའི། སྣང་ཆ་མ་འགག་ལྷུན་གྲུབ་སྣ་ཚོགས་ཀྱི་རོལ་བར་ཤར་བ་དེ། ད་ལྟར་རྣལ་འབྱོར་ལམ་དུས་ཡིན་ཡང་བཞུགས་སྟངས་གསུམ་དང་གཟིགས་སྟངས་རྣམ་གསུམ་གྱིས་གཅུན་པའི། གཞི་སྣང་སྒྲོན་དྲུག་གི་འཆར་སྒོའི་ངོ་བོ་གདངས་སུ་ཤར་བ་དེ་ཉིད་མངོན་སུམ་དབང་པོའི་སྒོར་སྣང་བ་འདི་ཉིད། ཤེས་ཉམས་ཀྱི་བློ་ཡིས་མ་སྦག་པར། སྣང་ཉམས་གོང་འཕེལ་དུ་གྱུར་བ་དང་བསྟུན་ཏེ། སྣང་བའི་འཕེལ་དེ་ཉིད་ཡར་ཚད་ལ་ཕེབས་ཏེ་མཐའ་རུ་འཁྱོལ་བ་དེ། རིག་པ་སྐུ་རུ་སྨིན་པའི་ཚུལ་ཅན་ལ་སྦྱར་ནས་གསུངས་འདུག། འདི་རེད། སྣང་སྲིད་སྣོད་བཅུད་ཐམས་ཅད་དཔལ་མགོན་རིག་འཛིན་བླ་མའི་རྡོ་རྗེ་གསུམ་གྱི་དཀྱིལ་འཁོར་དུ་གསུངས་རྒྱུ་འདིས། སྣང་གྲག་རིག་གསུམ་གསང་གསུམ་རྒྱལ་བའི་དཀྱིལ་འཁོར་དུ་ཡེ་ནས་གྲུབ་པའི་དག་མཉམ་ཆེན་པོ་སྤྱི་རྒྱུད་ཀྱི་དགོངས་པ་ལྟར་དུ་བསྟན་པའི་གཞི་དེའི་སྟེང་ནས། སྐུ་དང་ཐིག་ལེ་ལུ་གུ་རྒྱུད་འཇའ་འོད་ཟེར་སྤྲིན་འཁྲིགས་པའི་དབུས་སུ་གསུངས་རྒྱུ་འདིས། གསང་བ་མན་ངག་གི་སྡེའི་ཡང་གསང་བླ་ན་མེད་པའི་བསྟན་དོན་གྱི་སྣང་བ་སྔ་མ་གསུམ་དེ་བསྟན་པ་རེད། དེ་ཡིན་ན། ཐོད་རྒལ་རང་གི་འཆར་སྣང་གི་རིམ་པ་ལ་དང་པོ་ཆོས་ཉིད་མངོན་སུམ་གྱི་འཇའ་འོད་དང་ཐིག་ལེ་སུམ་སྦྲེལ་ཚུན་ཆད། དེའི་འཕྲོར་གོང་འཕེལ་དག་པ་དབྱིངས་ཀྱི་སྒྲོན་མའི་གཞི་དེར་ཐིག་ལེ་སྟོང་སྒྲོན་གྱི་ར་བ་ལ། ལུག་རྒྱུད་འགུལ་འཕྲིག་མེད་པར་བརྟན་པ་ནས་ཚད་ཕེབས་ཚོམ་བུ་དང་དཀྱིལ་འཁོར་ཡོངས་རྫོགས་ཀྱི་སྣང་བ་འབྱུང་རྒྱུ་དེ་རེད། ཡིན་ན་ཡང་། རྫོགས་པ་ཆེན་པོ་མན་ངག་སྡེའི་སྐུ་གསུམ་ལམ་སྣང་ལ་འཆར་ཚུལ་དང་། ཁྲེགས་ཆོད་ཐོད་བརྒལ་གཉིས་ཀ་ལ་ལུགས་འབྱུང་ལྡོག་གི་ཁྱད་པར་མཛད་པ་བཞིན་དུ། འདིའི་གོ་རིམ་འགལ་མེད་དུ་བཀྲལ་ཆོག་རྒྱུ་དང་ནི། སྐབས་འདིར་རང་རྒྱུད་ཀྱི་བདེ་བར་གཤེགས་པའི་ས་བོན་ལ་གསོས་འདེབས་པ་སྨིན་བྱེད་དབང་བསྐུར་གྱི་སྐབས་ཡིན་ན། རྟེན་འབྲེལ་ལུས་ལ་བསྒྲིགས་ན་རྟོགས་པ་སེམས་ལ་འཆར་བར་མི་བསླུ་པའི་དགོས་དོན་གྱིས། སྣང་བཞིའི་ཕ་མཐར་སོན་པའི་བརྡ་དང་རྟགས་ཀྱི་རྣམ་པ་ཡིས། ཚད་ཕེབས་སྐུའི་སྣང་བ་གསལ་བཞིན་པར་སྣང་བ་སྔ་མ་གཉིས་ཀྱི་འཇའ་འོད་ཐིག་ལེ་ལུག་རྒྱུད་དང་བཅས་པ་གསལ་ཆོག་རྒྱུ་གོང་གི་ཡེ་ཤེས་རོལ་བའི་སྒྲོན་མེའི་སྤྲིན་ཕུང་འབྱམས་ཀླས་པ་གསུངས་རྒྱུ་འདིས་གོ་ཐུབ་སྙམ། རིག་སྟོང་སྐད་ཅིག་མ་དྲན་རིག་འཛིན་མེད་ཁྱབ་བརྡལ་དུ་གྲོལ་ཏེ་གསུངས་རྒྱུ་ཞིག་ཡོད་པ་འདིས་ཆོས་ཟད་ཀྱི་སྣང་བ་བསྟན་པར་གོ་དགོས། ཆོས་ཅན་གྱི་སྣང་བ་ཐམས་ཅད་ཆོས་ཉིད་ཀྱི་ཀློང་དུ་ཐིམ་པ་ལ་ཟབ་པ་ཞེས་པའི་བརྡ་ཆད་སྦྱར་རྒྱུ་འདི་ནི། གང་བ་མེད་ཅིང་བྲི་བ་མེད་པ་ཐ་སྙད་ལས་འདས་པ་སྟོན་པའི་ཚིག་རེད། རིག་སྟོང་འཕོ་འགྱུར་དང་བྲལ་བ་སྐད་ཅིག་རང་ངོ་ཤེས་པའི་ཟག་མེད་ཀྱི་དགེ་ཚོགས་དེས་ལྟ་སྒོམ་ཆིག་ཆོད་དུ་སོང་། ཡེངས་ཡུལ་ཆོས་ཉིད་དུ་གྲོལ་ནས། དྲན་རིག་འཛིན་མེད་གསུངས་རྒྱུ་འདི་བློ་ཟད་ཆོས་ཟད་ལ་གོ། ཁྱབ་བརྡལ་དུ་གྲོལ་གསུངས་རྒྱུ་འདི། རྒྱ་ཆད་ཕྱོགས་ལྷུང་དང་བྲལ་བའི་གདོད་མའི་ནང་དབྱིངས་ཀྱི་བཙན་ས་ཟིན་པར་གོ་དགོས་སྙམ། རྫོགས་ཆེན་མན་ངག་སྡེའི་སྐུ་གསུམ་ལམ་སྣང་དུ་བཞེད་པ་འདིས་རང་སྣང་ཡེ་ཤེས་ཀྱི་ལམ་དེ་ལུགས་ལྡོག་ལ་སྣང་ན། གཞན་སྣང་ཐུགས་རྗེའི་ངོས་ནས་ལུགས་འབྱུང་དུ་འཆར་བ་གསུངས་པའི་ཚུལ་ལྟར་དུ། ཀ་དག་ཐིམ་ལ་མ་རྨུག་ཆོས་སྐུའི་དབྱིངས་ལས། མདངས་ནང་གསལ་ལོངས་སྐུར་ཤར་བ་དེ་ཉིད། གདངས་བྱ་རྩོལ་སྤྲུལ་སྐུའི་རོལ་རྩལ། སྐུ་གསུམ་ངོ་བོ་གཅིག་ལ་ལྡོག་ཆས་བསྟན་པའི་གོ་དོན་ཚགས་སུ་ཚུད་པའི་སྟེང་ནས། བདག་ཉིད་རིག་འཛིན་བླ་མའི་སྐུ་རུ་སྨིན་པ་ཡིན་རྒྱུ་དེ་འདྲ་ཞིག་གི་གོ་དོན་ལ་འབྱོར་དགོས། སྤྱིར་ན་དབང་འདོན་དུས། དཀའ་གནད་འགྲོལ་བའི་བཤད་པ་མང་པོ་ཞིག་རྒྱ་ཆེར་འགྲེལ་ནས་བཤད་པའི་དུས་མ་རེད། གཙོ་བོར་བརྒྱུད་པའི་བྱིན་རླབས་དང་། སྔགས་དང་། ཏིང་འཛིན་དག་པའི་བྱིན་རླབས་འཕོ་བའི་དགོས་དོན་ཅན་ལོས་ཡིན་ཏེ། མཚམས་རེ་རྒྱུད་ཚིག་བརླིང་པ་སྲ་མོ་མང་པོ་ཞིག་ནག་བསྒྲིག་བྱས། དེའི་སྟེང་ལ་ཆོས་སྐད་གོང་འོག་འདྲེས་མ་ཆ་རེ་བསྣན་བཞག་དུས་ཅི་གོ་འདི་གོ་མེད་ཀྱང་། ནང་དོན་ཚབ་ཆེན་ཞིག་ལོས་ཡོད་ཅན་པོ་བྱས་ཏེ་ལྟ་འདུག་རྒྱུ་མ་གཏོགས་མེད་པ། ཡང་བསམ་མ་དགོས་ཡང་ཟེར་མི་བདེ་པ་ཞིག་ལ་ལོག་འགྲོ་བས་ན། རྒྱུ་མཚན་དེ་དག་ལ་བརྟེན་ནས་ཡང་འདོན་ཡང་ཟེར་བྱས་པ་ཡིན། འོག་ནས་འབྱུང་མ་རག་པའི་དབང་བཞི་པ་ཚིག་གིས་མཚོན་དུ་མེད་པས། སྨྲ་བསམ་བརྗོད་བྲལ་ཡིན་ཡང་དེའི་དོན་ཚིག་གིས་མཚོན་པར་མཛད་པའི་རྒྱུ་མཚན་གྱིས་ཚིག་དབང་རིན་པོ་ཞེས་བཏགས་པ་རེད། དེ་སྔོན་རང་གཞན་མང་པོ་ཞིག་གིས་ནང་རྒྱུད་བླ་མེད་ཀྱི་དཀྱིལ་འཁོར་གཉེན་པོའི་ཞལ་རེ་ཕྱེས། དབང་ཆོག་རྟ་རྒྱུག་མ་རེ་བློ་ཕྱེད་ཡིག་ཕྱེད་ལ་བྱང་སོང་བས་ངག་འགུག་ཞོར་ལ་བུམ་རིལ་ཙཀ་ལི་མང་པོ་ཞིག་གཡུགས་མྱོང་བ་རེད། ཡིན་ན་ཡང་། དེ་ལ་དེ་ཙམ་བློ་མ་ཁེལ་བར་དབང་དོན་བཤད་པ་འདི་ལ། དབང་འདོན་པའི་བླ་མ་མང་པོ་ཞིག་རིག་མྱོང་ཡང་སུས་ཀྱང་དབང་འགྲེལ་མི་དར། མི་དར་ཀོ་བའི་ཇོ་དར་རེད་བསམ་མཁན་ཡང་ཡོད་སྲིད་རྒྱུ་རེད། དབང་འདོན་ཟེར་ན་དོན་ལ་མི་འབྱོར་རྒྱུ་མི་འདུག སྒྲ་ལོག་མི་ཟེར་བར་སྒྲའི་སྦྱོར་ལུགས་ཀྱི་གོ་དོན་ཕྱིན་ཅི་ལོག་ལ་བསྒྱུར་མ་བཏང་ན། འདོན་རྒྱུ་ངོ་མ་འདོན་འགྲོ་བ་རེད་མོད། འོན་ཀྱང་འདོན་ཚད་དེ་དབང་བསྐུར་ཟེར་རྒྱུའི་དབང་བསྐུར་མཚན་ཉིད་པའི་བརྡ་ཆད་སྦྱར་ཆོག་མིན་དང་། བསྐུར་ཚད་དག་སློབ་མའི་ངོས་ནས་ཐོབ་པའི་ཐ་སྙད་སྦྱར་ཆོག་མིན་མི་ཤེས་པས། ཚིག་དོན་གྱི་སྒྲོག་མ་འཁྲོལ་ན། དབང་བསྐུར་བའི་མྱིང་ཡོད་ཀྱང་དོན་མེད་པ་རེད། དཔེར་ན། སྐད་བརྡ་ཚིག་གཅིག་མི་འཇག་པའི་ས་ཆ་ཞིག་ལ་ཐོན་སོང་ན་ཇ་དཀར་ཡོལ་གང་ཙམ་འཐུང་རྒྱུ་ལ་ཡང་དཀའ་ངལ་ཧ་ཅང་ཆེ་བ་རེད། དེ་བཞིན་དུ། དབང་ཚིག་གི་ནང་དོན་སྣེ་གཅིག་མ་གོ་ན། རྒྱུད་སྨིན་པར་བྱེད་པའི་དབང་དོན་གྱི་ཡེ་ཤེས་བརྙེས་ཟེར་རྒྱུ་དེ་དཀའ་བར་མ་ཟད་སྨིན་གྲོལ་གཅིག་ཆར་དུ་འབྱུང་བ་དེ་བས་ཀྱང་དཀའ། འབྲུག་པ་ཀུན་ལེགས་ཀྱིས་འདི་འདྲ་ཞིག་གསུངས་འདུག བླ་མས་དབང་བསྐུར་ཆོས་བཤད་བྱེད། །ཐུགས་ལ་མེད་དོ་སཱ་མཱ་ཡཱ། །སློབ་མས་མིག་བཙུམ་ཐར་མོ་སྦྱར། ། ཡིད་ལ་མེད་དོ་སཱ་མཱ་ཡཱ། །གསུངས་པ་ལྟ་བུའི་ཕྱོགས་ལ་བུད་ཨེ་འགྲོ་བསམ་ནས་བཤད་འདུག་པ་ཡིན། ཁྱད་པར་དུ་འདི་ལྟར་ཆོས་གྲོགས་སྡེ་སྣོད་འཛིན་པ་མང་པོ་ཞིག་ལོའི་ལོ་གྲངས་ལ་ཆོས་གྲྭ་འདིར་བཞུགས་འདུག་དུས། རང་ཉམས་དང་བསྟུན་ནས་རང་འདྲའི་གྲོགས་ལ་འདི་འདྲ་ཨེ་རེད་ཞུ་རྒྱུའི་ཚིག་འགོ་རེ་མ་བསྟན་ན། མིན་ན་ཡིན་མདོག་མེད་ན་ཡོད་མདོག་རྐྱང་རྐྱང་བསྟན་ན་ཡང་། རྨོངས་པ་འགའ་རེ་མགོ་གཡོག་ཐུབ་ཀྱང་། དེ་ནི་ཕ་མགོ་བུས་གཡོགས། བུ་མགོ་དགྲས་གཡོག། མཐའ་དོན་རང་མགོ་རང་གིས་གཡོགས་པ་ཞིག་ལ་འགྱུར་སྲིད་པ་རེད་བསམ་ནས་ཞུས་བསྡད་པ་ཡིན། གཞན་ཡང་སྔ་འགྱུར་རིག་འཛིན་བརྒྱུད་པའི་ཕྱག་སྲོལ་བཀའ་བབས་ཆུ་བོ་རྣམ་བཞིའི་འགྲོས་དང་བསྟུན་ན་ཡང་། ཚིག་ཆ་རེའི་མན་ངག་གི་གནད་གྲོལ་རེ་བསྣན་བཞག་ན་ཡང་འགལ་བ་ཅི་ཡོད་བསམ་ས་ནས། ང་དང་ང་འདྲའི་རྟ་ཐོག་གི་བླ་མ་ཚོས་དབང་བསྐུར་བ་ནི་རྟ་རྒྱུག་མ་རེད་མ་གཏོགས། ངའི་བླ་མ་འཇིགས་མེད་ཡོན་ཏན་མགོན་པོ་ཚང་དང་། ཡང་ངས་བཀའ་གཏེར་གཉིས་ཀྱི་སྨིན་དབང་མང་ཆེ་བ་ཞིག་ཞུ་ས་ནི། འཇམ་དབྱངས་མཁྱེན་བརྩེ་དབང་པོ་ཆོས་ཀྱི་བློ་གྲོས་ཡིན། ཁོང་རྣམ་པས་དབང་ཁྲིད་སྦྲགས་མ་མཛད་དེ་གལ་ཆེ་ས་ཐམས་ཅད་ཞིབ་འགྲེལ་དང་རྒྱས་འགྲེལ་མཛད་སྲོལ་ཡོད། རིས་ཆོད་དང་གཟུ་ལུམ་གྱི་དབང་དུ་མི་འགྲོ་བའི་གདེང་ཚད་དང་ལྡན་པར་བཤད་པའི་ཚུགས་ཀ་ཡིན། སྒྲ་ཐལ་འགྱུར་རྩ་བའི་རྒྱུད་ཀྱི་ནང་ན། རང་རིག་གསལ་བའི་རང་ངོ་སྤྲད། །བརྡ་འགྲོལ་མན་ངག་མཁས་པས་བསྒྱུར། །གསུངས་བ་རེད། མན་ངག་དུམ་བུའི་ལུགས་བྱས་ན། མན་ངག་སྡེའི་དབང་བཞི་རེ་རེའི་བར་ན་ལོ་དང་ཟླ་བས་བཅད་དེ་སྨིན་གྲོལ་གཉིས་ལྡན་གྱི་དབང་ཁྲིད་སྦྲགས་མ་མཛད་པའི་ཕྱག་སྲོལ་ཡང་ཡོད། མཚམས་འདི་ནས་ཨ་ཏིའི་བསྐྱེད་རིམ་དང་སྦྲེལ་ནས་གསུངས་པ་ཡིན་པས་འདི་རེད། མཚམས་འདིར། རྡོ་རྗེ་ནམ་མཁའི་ཡེ་ཤེས་ཀྱི་ཞིང་ཁམས་རབ་འབྱམས་སུ་ཁྱབ་པ་ཅན་དུ་གསལ་ཐོབ་ལ་སེམས་འཛིན་གནང་མཛོད། གསུངས་སའི་ཟུར་འཕྲོས། རྡོ་རྗེ་ནམ་མཁའི་ཡེ་ཤེས་ཟེར་དུས་ངས་ཡག་པོ་ཞིག་གོ་མི་ཐུབ་གི། ཡེ་ཤེས་རྡོ་རྗེ་ནམ་མཁའི་མཐའ་ཁྱབ་ཀྱི་ཞིང་ཁམས་ཟེར་བཞག་དུས་ང་རང་གིས་གོ་མོ་འདྲ་ཞིག་རེད། གཞན་ཡང་འདི་ནས་སེམས་འཛིན་ཞེས་པའི་བརྡ་ཆད་ཀྱིས། གསལ་སྟོང་འཛིན་པ་དང་བྲལ་བའི་ཨ་ཏིའི་བསྐྱེད་རྫོགས་གང་ཞིག་གི་ངང་ལ་དལ་གྱིས་བཞག་དགོས་པ་ཡིན་ས་རེད། དར་ཅིག་སེམས་བཟུང་དུ་གཞུག་གསུངས་འདུག་གསུངས་ཏེ། བླ་མས་ཀྱང་མཉམ་པར་ཅུང་ཙམ་བཞག་ནས། དེ་ལྟ་བུའི་བསྐྱེད་རིམ་གསལ་བརྟན་དག་གསུམ་དང་ལྡན་པས་རིམ་པ་དང་པོའི་ཏིང་ངེ་འཛིན་མཐར་ཕྱིན་པར་བྱས་ཤིང་། སོགས་གསུངས་རྗེས་ཀྱི་འཕྲོས་དོན། བསྐྱེད་རིམ་གསལ་བརྟན་དག་གསུམ་དང་ལྡན་པའི་རིམ་པ་དང་པོའི་ཏིང་ངེ་འཛིན་མཐར་ཕྱིན་པ་བྱ་དགོས་ཤིང་སོགས་གསུངས་འདུག སྔགས་བླ་མེད་ཐུན་མོང་བསྐྱེད་རིམ་གྱི་སྐབས་འདིར་གསལ་བརྟན་གྱི་ཚད་བརྒྱད་གསུངས་ཡོད། སལ་ལེ། སེང་ངེ་། ལྷག་གེ། ལྷང་ངེ་། སྟེ་གསལ་བའི་ཚད་བཞི། མི་གཡོ། མི་འགྱུར། མངོན་པར་མི་འགྱུར། ཀུན་ཏུ་མི་འགྱུར་བ། ཡང་ན་རབ་ཏུ་བརྟན་པས་ཅི་ཡང་བསྒྱུར་དུ་བཏུབ་པ་ལ་སོགས་གསལ་བརྟན་གྱི་ཚད་བརྒྱད། དེའི་ཐོག་ལ་ཕྱི་ནང་སྣོད་བཅུད་ལྷ་དང་གཞལ་ཡས་ཁང་སོགས་སུ་དག་པའི་དག་སྦྱོར་དང་བཅས་པ། གསལ་བརྟན་དག་གསུམ་དང་ལྡན་པས་འདི་ནས་རིམ་པ་དང་པོའི་བསྐྱེད་རིམ་མཐར་ཕྱིན་པ་བྱ་གསུངས་རྒྱུ་འདི། ཕ་རྒྱུད་གསང་བ་འདུས་པའི་རིམ་ལྔའི་ཆོས་སྐད་དང་སྦྱར་བའི་ཚིག་ཅིག་རེད་སྙམ། འདིའི་ཁོངས་དེད་ཡོང་ན། པྲཛྙ་རསྨྲིས་ལས། བསྐྱེད་རིམ་ཚོགས་སྦྱོང་སྲུང་འཁོར་སྔོན་འགྲོ་བས། རིམ་པ་ལྔ་དང་རྗེས་མཐུན་ལམ་གྱི་འགྲོས། །གསུངས་བ་དག་ལ་གཞི་བཅོལ་བ་ཞིག་རེད་སྙམ། རིམ་པ་ལྔ་ནི། རྡོ་རྗེ་གསུམ་དང་བདེན་གཉིས་ཀྱིས་བསྡུས་པའི་སྒྱུ་ལུས། འོད་གསལ་དང་ལྔ་བོ་རེད། ལུས་ལྷ་རུ་གསལ་བ་སྐུ་རྡོ་རྗེ། ངག་སྔགས་སུ་ཤེས་པ་གསུང་རྡོ་རྗེ། སེམས་དེ་ཁོ་ན་ཉིད་ལ་སྦྱོར་བ་ཐུགས་རྡོ་རྗེ་སྟེ་སྒོ་གསུམ་རྡོ་རྗེ་གསུམ་དང་། ཀུན་རྫོབ་བདེན་པ་སྒྱུ་ལུས། དོན་དམ་བདེན་པ་འོད་གསལ་དང་ལྔ་རེད། དེས་ན་རིམ་པ་དང་པོའི་བསྐྱེད་རིམ་སྐུའི་གསལ་སྣང་ཡིན་པས། དེ་དང་སྦྲེལ་ནས་སྦྱང་གཞི་སྣང་སྟོང་སྒྱུ་འཕྲུལ་དྲྭ་བ་སྐུ་རྡོ་རྗེའི་དཀྱིལ་འཁོར་དེ་ཉིད། སྦྱོང་བྱེད་ཐུན་མོང་ཁྱད་པར་གཉིས་བསྟན་པ་ལས། ཐུན་མོང་ལ་ཡོངས་གྲུབ་གདན་གསུམ་ཚང་པའི་བསྐྱེད་རིམ་སྤྱི་རྒྱུད་སྒྱུ་འཕྲུལ་དང་སྒོ་བསྟུན་པ་དང་། ཁྱད་པར་བ་གང་ཡིན་ན། ཡང་གསང་མན་ངག་སྡེའི་ཆོས་ལོངས་སྤྲུལ་སྐུའི་བཞུགས་སྟངས་རྣམ་གསུམ་གྱི་གནད་གཅུན་ཡོང་དུས། ལུས་ཡོང་ལ་ཁྱབ་པའི་རྩ་གནད་དུ་གཅུན། རྩ་གནད་དུ་ཆུན་དུས་རྩ་དེའི་ནང་ནས་རྒྱུ་བའི་རླུང་གནད་དུ་ཆུན། དེ་ཆུན་པ་ན་རླུང་རིག་གཉིས་གནད་གཅིག་པས་རིག་པ་གནད་དུ་ཆུན། ཡང་འདི་ནས་རླུང་རིག་གཉིས་གནད་གཅིག་དང་ཁ་ཁར་བྱས་ཏེ་རྩི་སྲོལ་འདྲ་མི་འདྲ་ཡོད་ཀྱང་། དོན་ལས་རླུང་རང་སར་དག་པའི་ཡེ་རླུང་དབྱིངས་སུ་འཁྱིལ་ནས། རིག་པ་རང་ངོའི་གནད་དང་མི་འབྲལ་བར་ཡིན་པས་ན། གནས་ལུགས་དོན་གྱི་འོད་གསལ་འཆར་ནུབ་རྙོག་པ་དང་བྲལ་བ་རེད། སྦྱངས་འབྲས་མཐར་ཐུག་དེ་གང་ཡིན་ན། ཆོས་དབྱིངས་ཐིག་ལེ་ཉག་གཅིག དབྱིངས་དང་ཡེ་ཤེས་གཉིས་མེད་ཀྱི་སྐུ་གསུམ་དགོངས་པའི་རྒྱལ་ས་ཟིན་པ་དེ་ཡིན། དེའི་རྟེན་འབྲེལ་དེ་ལུས་ལ་བསྒྲིག་པའི་ཆེད་དུ། འདི་ནས་ཆོས་སྐུའི་བཞུགས་སྟངས་མཛོད་གསུངས་ཡོད་པ་འདི་རེད། ཆོས་སྐུའི་བཞུགས་སྟངས་སེང་གེ་ལྟ་བུར་མཛོད་ཅིག ལོངས་སྐུའི་བཞུགས་སྟངས་གླང་ཆེན་ཉལ་བ་ལྟ་བུར་མཛོདཅིག སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ལྟ་བུར་མཛོད་ཅིག་གསུངས་པ་རེད། ད་འདི་ནས་ང་ཚོས་ཀྱང་བཞུགས་སྟངས་རྣམ་པ་གསུམ་པོ་མཛད་དགོས་རེད། དང་པོར་རྣམ་པ་ཐམས་ཅད་ཀྱིས་ཆོས་སྐུའི་བཞུགས་སྟངས་མཛད་རྒྱུ་བྱེད། ཆོས་སྐུའི་བཞུགས་སྟངས་སེང་གེ་ལྟ་བུར་གསུངས་རྒྱུ་འདི། སེང་གེ་དཀར་མོ་གངས་ནས་འགྱིང་བའི་ལུས་ཚུགས་ལྟ་བུས་འཁྲུལ་བའི་འཇིགས་པ་རྩད་ནས་གཞོམ་ཞིང་། ཆོས་སྐུ་བདེ་ཆེན་གྱི་རྣལ་འབྱོར་ལ་ཉམས་ང་མེད་པ་སྤྱོད་པའི་དོན་ཅན་ཞིག་རེད། འཕང་ས་ལ་བཞག་བཞིན་པ་དེའི་ཐོག་ནས་འགྱིང་ཚུགས་བྱས་ཏེ་བསྡད། ཙོག་པུར་བྱས་ཏེ་བཞུགས། རྐང་མཐིལ་གཉིས་ཀ་མདུན་དུ་སྤྲད་པའམ་ས་ལ་ཕབ། དེ་ནི་འཕྲོ་བ་ལས་ཀྱི་རླུང་ལྡོག་པའི་ཆེད་དུ་རྐང་མཐིལ་གཉིས་ས་ལ་ཕབ་དགོས་རེད། མགོ་རྩལ་མཇིང་པ་ལ་བསྐུར་གསུངས་ཡོད་པས། སྐེ་ཡར་ཅུང་ཟད་དགྱེ་དགོས། ལག་སོར་གཉིས་ནང་དུ་བསྒོངས་ཏེ་རྐང་མཐིལ་གཉིས་སྤྲད་པའི་ནང་དུ་བཙུགས་དགོས། མགོ་རྩ་འགྱིང་པ་དེ་དབྱིངས་རིག་འདུ་འབྲལ་མེད་པའི་གནད། རོ་སྟོད་ཡར་སྲིང་རྒྱུ་དེ་ཉམས་སྣང་མྱུར་དུ་འཆར་བའི་གནད། དེ་ནི་ཆོས་སྐུའི་བཞུགས་སྟངས་རེད། འདིའི་མཚམས་ནས་ལོངས་སྐུའི་བཞུགས་སྟངས་བྱེད་དགོས་གསུངས་པ་རེད། ལོངས་སྐུའི་བཞུགས་སྟངས་དེ་གླང་ཆེན་ཉལ་བ་ལྟ་བུ་རེད། ཚང་མས་ལོངས་སྐུའི་བཞུགས་སྟངས་མཛོད། ཁ་སྦུབ་ཏུ་ཉལ་ནས་པུས་བྲང་གཉིས་སྦྱར། གྲུ་མོ་གཉིས་ཀ་ས་ལ་བཙུགས། ལག་པའི་ཐལ་མོ་གཉིས་ཀས་ཨོལ་ཀོ་ཡར་བརྟེན། རྐང་པའི་སོར་མོ་ཕྱིར་འཕུལ་ཏེ་བསྐུམ་དགོས། མཇིང་བ་ཡང་ཡར་གྱེན་དུ་བཏེག པུས་བྲང་སྦྱར་བ་དེས་འབྱུང་བའི་དྲོད་འབེབས་པ་ཡིན་གསུངས། རྐང་པའི་སོར་མོ་ཕྱིར་ཕུལ་པས་གཡོ་བ་ལས་ཀྱི་རླུང་འཛིན་གསུངས། མཇིང་བ་སྐེ་ཡར་ཅུང་ཟད་བཀྱགས་པ་དེས། དབྱིངས་རིག་གཉིས་ཀ་མི་འབྲལ་བའི་གནད་ལ་སོགས་པ་ཡོད་གསུངས་སོ། ད་ནི། སྤྲུལ་སྐུའི་བཞུགས་སྟངས་མཛད་དགོས། སྤྲུལ་སྐུའི་བཞུགས་སྟངས་ཀྱང་འཕང་ས་ལ་བཞག་ནས་དྲང་སྲོང་ཙོག་པུར་བཞུགས་སྟངས་རེད། ལུས་ཙོག་པུར་བཞུགས། རྐང་མཐིལ་གཉིས་ཀ་ས་ལ་ཕབ། སྒལ་ཚིགས་མདའ་ལྟར་དྲང་། རྒྱུ་ཞབས་ཡིད་ཙམ་ནང་ལ་འཐེན་ནས་སྒལ་བར་བཅར་དགོས། ལག་པ་རེའུ་མིག་ལྟར་བསྣོལ་ཏེ་པུས་མོའི་སྟེང་དུ་འགེབས་དགོས། འདི་ལ་མཇིང་བ་དགྱེ་མི་དགོས་ཐད་ཀར་བསྲང་ན་ཆོག་པ་རེད། རྐང་མཐིལ་གཉིས་ཀ་ས་ལ་ཕབ་པ་དེས་ཉོན་མོངས་དང་ལས་ཀྱི་རླུང་གཉིས་ཀ་ནོན། པུས་བྲང་སྦྱར་བ་དེས་ལུས་ཀྱི་འབྱུང་བ་ཆ་སྙོམ་པར་བྱེད། ལུས་སྤྱི་དྲང་མོར་བྱས་ནས་བསྡད་པ་དེས་རྩ་མི་འཆུག་པའི་ཕན་ཐོགས་ཡོད་གསུངས་ཡོད། ལག་པ་བསྣོལ་རྒྱུ་དེ་དབྱིངས་རིག་འདྲེས་པའི་གནད་དང་། མཇིང་བ་ཐད་ཀར་བསྲང་པ་དེས་སྒྲོན་མ་བཞི་རང་ཡུལ་ལ་འཕུལ་བའི་གནད་སོགས་ཡོད་གསུངས་སོ། འདིའི་མཚམས་ནས་སྔར་བཞིན་བདེ་ལུགས་སུ་བཞུགས་མཛོད། ཡང་མཚམས་འདིར། ཨོྃཿ རིག་པ་ཆོས་ཉིད་མངོན་སུམ་གཞལ་ཡས་སུ། སོགས་ཀྱི་ཟུར་འཕྲོས། བུམ་པའི་དབང་འདི་ལུས་ལ་བསྐུར་བ་རེད། བུམ་དབང་ལུས་ལ་བསྐུར་བ་དེས་རྟེན་ལུས་ཀྱི་མཚན་འཛིན་བག་ཆགས་དང་བཅས་པ་དག་སྟེ། སྣང་སྲིད་གཞིར་བཞུགས་ཡེ་ནས་ཆོས་ཉིད་དོན་གྱི་ལྷ། སྣང་སྟོང་གཉིས་མེད་འཕོ་ཆགས་དང་བྲལ་བ་དེ་ཉིད། སྣང་སྲིད་གཞིར་བཞེངས་དག་པ་ལྷ་ཡི་འཁོར་ལོ་ལ། འཁོར་འདས་མཉམ་ཉིད་དུ་སངས་རྒྱས་པ་དང་མངོན་དུ་གྱུར་པའི་མཐུ་དང་། འོད་གསལ་རྫོགས་པ་ཆེན་པོའི་ལྷུན་གྲུབ་ཐོད་རྒལ་གྱི་གསང་ལམ་ནས་རྩ་རླུང་དག་པ་ལམ་དུ་བྱས་ཏེ། རྡུལ་བྲལ་སྒྱུ་མའི་འཁོར་ལོ་འོད་ལུས་འཕོ་ཆེན་གྱི་སྐུ་ཐོབ་པའི་རྟེན་འབྲེལ་མཐུ་ཅན་དུ་བྱས་པ་རེད། འདིའི་མཚམས་ནས་གསང་བའི་དབང་རེད། མཚམས་འདིར། གཉིས་པ་གསང་བའི་དབང་གི་སླད་དུ་བླ་མ་ཧེ་རུ་ཀ་དཔལ་དུ་གནས་གྱུར་བའི་རང་འོད་དབྱིངས་ཀྱི་ཕྱག་རྒྱ་དང་སོགས་གསུངས་བའི་ཟུར་འཕྲོས། གསང་དབང་གསུངས་རྒྱུ་འདི། སྣོད་མིན་ལ་གསང་བར་འོས་པས་ན་གསང་དབང་རེད། གསང་དབང་འདི་ངག་ལ་བསྐུར་བས་གསང་བའི་བདུད་རྩིས་མགྲིན་པར་བརྒྱུད་ནས་ལུས་གང་སོང་དུས། ཆང་ལ་ཕབས་བཏབ་པ་ལྟར། བྱིན་རླབས་ཐོབ་ནས་ངག་གི་དྲི་མ་རགས་པ་སྦྱངས་གསུང་རྡོ་རྗེའི་སྤང་རྟོགས་ཀྱི་ནུས་པ་ཁྱད་པར་ཅན་རྒྱུད་ལ་བཞག་པའི་དབང་རེད། བླ་མ་དང་དཀྱིལ་འཁོར་གྱི་གཙོ་བོ་གཉིས་མེད་བརྟུལ་ཞུགས་སྤྱོད་པའི་རྟགས་ཀྱི་ཕྱག་རྒྱས་སྤྲས་པའི་རང་འོད་དབྱིངས་ཀྱི་ཕྱག་རྒྱ་གསུངས་དུས། ཕྱག་རྒྱ་འདི་བདེ་བ་ཆེན་པོའི་དཔེའི་ཡེ་ཤེས་བསྒྲུབ་རྟེན་དུ་གསུངས་བའི་ལས་ཀྱི་ཕྱག་རྒྱ་ལ་ཡང་སྒྲ་འཇུག་པ་རེད། རེད་དེ། དབྱིངས་ཀྱི་ཕྱག་རྒྱ་ཞེས་པ་ནི། ཆོས་ཐམས་ཅད་ཀྱི་རང་བཞིན་སྟོང་ཉིད་ཡུམ་ཆེན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གོ་རྒྱུ་དང་། མཉམ་སྦྱོར་བྱང་སེམས་ཀྱི་བདུད་རྩི་གསུངས་དུས། མཚོན་བྱེད་རྟགས་ཀྱི་བདུད་རྩི་འདིས་བགྲེས་རྒུད་འཆི་བའི་སྡུག་བསྔལ་སེལ་བ་བཞིན་དུ། མཚོན་བྱ་དོན་གྱི་བདུད་རྩི་ཆོས་ཐམས་ཅད་ཡེ་ནས་རྣམ་དག་བདུད་རྩི་རང་བྱུང་གི་ཡེ་ཤེས་ཐབས་ཤེས་འདུ་འབྲལ་མེད་པ་ལ་མཉམ་སྦྱོར་ཞེས་གསུངས་པ་རེད། བྱང་སེམས་ཞེས་པའི་སྒྲ་ནི། སྐབས་འདིར་བདེ་བ་ཆེན་པོའི་ཡེ་ཤེས་ཀྱི་རང་བཞིན་ལ་གོ་ཆོག་གི། འདི་ནས་རང་བཞིན་བརྒྱད་ཅུའི་རྟོགས་ཚོགས་དབྱིངས་སུ་ཐིམ་གསུངས་རྒྱུ་འདི། སྣང་མཆེད་ཐོབ་པའི་ཡེ་ཤེས་ཀྱི་རིམ་པ་བཞིན་དུ། རྫོགས་རིམ་པའི་དགའ་བཞི་སྟོང་བཞི་དང་སྦྱར་བའི་ཡེ་ཤེས་སྐྱེ་པའི་རིམ་པ་ལྟར། མཆོག་དབང་གོང་མ་གསུམ་པོ་དང་སྦྱར་རྒྱུ་བྱེད་དགོས་སྙམ། གོང་ལྟར་གསང་དབང་བྷནྡྷའི་བདུད་རྩི་ལ་མྱོང་བའི་སྐབས་སུ་ཐུགས་མོས་འདི་བཞིན་མཛད་དགོས། མཚམས་འདིར་ཡང་། ཧྲཱིཿ ཕྱི་སྣོད་རྩ་གསུམ་འཁོར་ལོའི་བྷནྡྷ་རུ། །ནང་བཅུད་བདེ་ཆེན་བྱང་སེམས་བདུད་རྩི་བསྐྱིལ། །སོགས་ཀྱི་ཟུར་འཕྲོས། གསང་བའི་དབང་འདིས་ངག་གི་སྒྲིབ་པ་དག་ཅིང་གསུང་གི་བྱིན་རླབས་ཐོབ། རླུང་སྔགས་ཀྱི་རྣལ་འབྱོར་ལམ་དུ་བྱེད་པའི་མཐུ་ཅན་དུ་བྱས་པ་ཡིན་གསུངས་བ་རེད། དེ་ཡིན་ན་རླུང་ཟེར་རྒྱུའི་གཡོ་ཞིང་འཕོ་བར་བྱེད་པའི་བྱེད་ལས་ཅན་འདིས། ཡེ་ཤེས་བླ་མའི་ནང་ན་གསུངས་ཡོད། བདེ་གཤེགས་སྙིང་པོའི་ཆོས་ཉིད་ཀྱི་གདངས་ཡང་བསླུས་ནས། རྩལ་འཁྲུལ་བའི་རྣམ་རྟོག་ལ་གཡོ་བར་བྱེད་པ་ཞིག་ཡིན་ན། འདིས་སྦྱང་གཞི་གསུང་རྡོ་རྗེའི་དཀྱིལ་འཁོར། སྦྱང་བྱ་ལས་ཀྱི་རླུང་ལས་ཉོན་གྱི་བྱེད་ལས་ཅན་དེ་ཉིད། སྦྱོང་བྱེད་གང་ཡིན་ན། ཐུན་མོང་ཐུན་མིན་ཁྱད་པར་གསུམ་འདི་ནས་གསུངས་བ་ལྟར་དུ་རེད། དེའི་ལམ་གསུམ་གྱི་སྦྱངས་འབྲས་དེ། མཐར་ལས་རླུང་དབྱིངས་སུ་དག་པར་བྱས་ནས། ཡེ་ཤེས་ཀྱི་དབྱིངས་ན་དཱ་བདེ་སྟོང་གསུང་རྡོ་རྗེ་མི་ཤིགས་པའི་དྲ་བར་བསྡོམས་པར་བྱེད་པ་རེད། དེ་ཡང་ཐུན་མོང་པས་ཡེ་ཤེས་སེམས་པའི་ཐུགས་ཀར་སྔགས་ཕྲེང་འཁོར་བ་སོགས་ཀྱི་དམིགས་པས་བསྙེན་བསྒྲུབ་ཡན་ལག་བཞི་ལྡན་གྱི་བཟླས་པར་བྱ་བ་དང་ནི། ཐུན་མིན་པས་སྲོག་ཚོར་རྡོ་རྗེའི་བཟླས་པ། འབྱུང་འཇུག་གནས་གསུམ་རླུང་སྔགས་དབྱེར་མེད་ཀྱི་བཟླས་དམིགས་བྱ་རྒྱུ། ཁྱད་པར་ཅན་གྱིས་རྫོགས་རིམ་ཀུན་གྱི་རྒྱལ་པོ། རླུང་འཕེལ་བ་ལམ་དུ་མི་བྱེད་པར་དག་པ་ལམ་དུ་བྱས་ཏེ། འབྱུང་བ་རང་སར་དག་པའི་བྱར་མེད་རྫོགས་ཆེན། འོད་སྐུ་འཕོ་ཆེན་དུ་འགྲུབ་པར་བྱེད་པའི་མན་ངག་དང་གསུམ་པོའི་ནང་འདི་ནས། ཐོག་མར་འབྲས་བུའི་ཐེག་པའི་བསྟན་དོན་ལྟར་དུ་འདི་ནས་བསྟན་པ་རེད། བརྩོན་འགྲུས་ཅན་ལམ་ཐོག་ནས་གྲོལ་བར་བྱེད་པ། ཐོད་རྒལ་གྱི་ལམ་དེ་ནས། མན་ངག་ཁྲིད་སྦྱོང་དང་སྒོ་བསྟུན་ཡོང་ན། འདི་མི་འགུལ་པ་གསུམ་ལ་གཞི་བཅའ། སྡོད་པ་གསུམ་གྱིས་ཚད་བཟུང་། ཐོབ་པ་གསུམ་གྱིས་གཟེར་གདབ་ནས་ཟག་བཅས་ཀྱི་ཕུང་པོ་མི་སྣང་བར་བྱེད་ན། གོང་ནས་བུམ་དབང་དང་འབྲེལ་ཏེ་ཁྱད་པར་བཞུགས་སྟངས་ཀྱི་མི་འགུལ་བ་གསུམ་གྱིས་ལས་རླུང་གི་འགྲོ་འོང་འགག་པ་དང་། འདི་ནས་གསང་དབང་གི་སྐབས་འདིར་འཆར་བྱེད་གཟིགས་སྟངས་ཀྱི་མི་འགུལ་བ་གསུམ་གྱིས། ལས་རླུང་ཡེ་ཤེས་ཀྱི་རླུང་དུ་དག་སྟོབས་ཀྱིས། སྒྲོན་མ་རྣམ་བཞིའི་རྩལ་རྫོགས་ནས། འབྲས་བུ་སྐུ་གསུམ་ལམ་སྣང་དུ་བྱེད་པའི་གནད་ཟབ་མོ་བསྟན་ཡོད་པ་རེད། འདིའི་འོག་ནས་འབྱུང་བ་ལྟར། དབང་གོང་མ་གཉིས་ཀྱིས་སྡོད་པ་གསུམ་གྱི་ཚད་དང་ཐོབ་པ་གསུམ་གྱི་གཟེར་ལ་སོགས་པ་མན་ངག་ཟབ་མོའི་ཉམས་ལེན་ལ་དབང་བར་བྱེད་པའི་རྟེན་འབྲེལ་གྱི་བྱེད་པ་ཅན། དབང་རྣོན་ཞིག་ཡིན་ན། དབང་དུས་དེ་ཉིད་དུ་ཅིག་ཆར་གྲོལ་བ་འགྱུར་བ། དགོངས་བརྒྱུད་རྟོགས་པའི་ཕ་ཕོག་འཕོ་བར་བྱེད་ཅིང་ཐོབ་པར་བྱེད་པ་རེད། འདི་ནས་དང་པོར་ཆོས་སྐུའི་གཟིགས་སྟངས་མཛད་དགོས། སྤྱིར་བཞུགས་སྟངས་གསུམ་དང་གཟིགས་སྟངས་གསུམ་པོ་འབྲེལ་མར་གནང་ན་བཟུང་བ་རེད་དེ། དུས་རྒྱུན་གྱི་མཉམ་བཞག་ཐུན་ལ་བཅད་ནས་བཞུགས་དུས་ལུས་མི་གཡོ་བར་རི་རྒྱལ་ལྟར་བུར་བཞུགས་སྟངས་གྱིས་གཟིགས་སྟངས་གང་འོས་བབས་བསྟུན་མཛད་ན་ཆོག་རྒྱུ་ཞིག་རེད། ཁྱད་པར་དུ་འཆར་སྣང་ཐམས་ཅད་རང་བྱན་ཆུད་ནས་སྡོད་པ་གསུམ་གྱི་ཚད་ལ་ཐོན་དུས། བཞུགས་སྟངས་གཟིགས་སྟངས་ལུས་ངག་གི་རྩོལ་བར་མི་ལྟོས་པའི་དུས་ཀྱང་ཡོད། དེ་དུས་བུམ་པའི་དབང་གིས་ལུས་དག རྫོགས་ཆེན་བྱ་རྩོལ་དང་བྲལ་བ་དེ་ལུས་ཀྱི་ཡན་ལག་ལ་ཞུགས་གསུངས་ཡོད་པ་དང་། གསང་དབང་དང་ཤེར་དབང་གིས་ངག་དག་བརྗོད་ཚིག་རང་དག་ལ་སོང་ནས། རྫོགས་ཆེན་སྨྲ་བསམ་ལས་འདས་པའི་དོན་ངག་ལ་ཞུགས་པ་ཡིན། ཚིག་དབང་གིས་སེམས་དག རྫོགས་ཆེན་སྐད་ཅིག་མྱུར་བྱེད་ཀྱི་ཚད་སེམས་ཀྱི་འགྲོས་ལ་ཞུགས་པ་ཡིན་གསུངས་སོ། ཐུན་མོང་དབང་བཞིའི་འགྲོས་དང་མཐུན་པ། སྤྲོས་བཅས་སྤྲོས་མེད་ཤིན་ཏུ་སྤྲོས་མེད་རབ་ཏུ་སྤྲོས་མེད་ཀྱི་དབང་བཞི་རྫོགས་པ་དང་ཆབ་ཅིག་ཏུ་སྣང་བཞི་ཚད་དུ་ཕྱིན་པ་རེད། དེའི་སྐབས་སུ་རྟགས་སྒོ་གསུམ་ལ་འཆར། ཚད་རྨི་ལམ་གྱིས་འཛིན་ཐུབ་པའི་དུས་ལ་ཐོན་པ་ཡིན། དེ་དུས་སྐྱེ་འཇུག་གཉིས་རླུང་སེམས་ལ་དབང་ཐོབ་པའི་ཐོབ་པ་གསུམ་གྱི་གཟེར་བརྟན་པོ་ཡིས་ཐེབས་ནས། ཁམས་གསུམ་དུ་རྟོག་པ་མི་སྲིད་པའི་གཏན་སྲིད་ཟིན་པ་ཡིན་ནོ། གཞི་སྣང་ཐུགས་རྗེའི་ངོས་ཀྱི་སྐུ་གསུམ་ལུགས་ལྡོག་གི་ཚུལ་གྱིས། འགྲོ་དོན་འཁོར་བ་ཇི་སྲིད་ལ་འབྱུང་བ་རེད། བསྒྲུབ་བྱ་དེ་དང་མཚུངས་པའི་སྒྲུབ་བྱེད་ཐབས་ཀྱི་ལམ། རང་ནུས་ཀྱི་ཡེ་ཤེས་རང་གདངས་འོད་གསལ་གྱི་འཆར་སྣང་བརྒྱུད་ནས། གཞི་འབྲས་གཉིས་ཀྱི་བར་ཐག་དེ་ལམ་གྱིས་སྦྲེལ་ཏེ། རླུང་ལྔའི་གཡོ་ཟོལ་ཟད་དེ་ཆོས་སྐུ་སྣང་མེད་རོལ་གཅིག་ལ་བཞུགས་དུས། ནམ་ཡང་འཁྲུལ་མི་ཤེས་པའི་གཞི་ཉིད་འབྲས་བུར་སྨིན་པའི་རང་ས་ཟིན་པ། གཞི་འབྲས་དབྱེར་མེད་དག་ཆེན་ཡེ་ཤེས་ཀྱི་གཟིགས་པ་མངོན་དུ་གྱུར་དགོས་པ་ཡིན་དུས། དེའི་ཆེད་དུ་འདི་ནས་གཟིགས་སྟངས་རྣམ་གསུམ་ལ་བསླབ་དགོས་པ་རེད། དེས་ན་རྣམ་པ་ལྷན་རྒྱས་ཀྱིས་བཞུགས་སྟངས་ཆོས་བདུན་དང་མི་འབྲལ་བར་བདེ་ལུགས་སུ་རང་བབས་ཀྱིས་བཞུགས་བཞིན་དུ། དང་པོ་ཆོས་སྐུའི་གཟིགས་སྟངས་མཛད་རྒྱུད་བྱེད། འདི་རེད། ཆོས་སྐུ་ལ་ཆོས་ཉིད་ཀྱི་སྤྱན་ཡོད་པས་མིག་གཉིས་གཟིགས་སྟངས་གྱེན་ལ་ལྡོག་པས་གཙུག་ཏོར་རྣམ་པར་བལྟ་བའི་ཚུལ་གྱིས་ལྟོས་ཤིག་གསུངས་འདུག ཆོས་ཐམས་ཅད་ཀྱི་ཆོས་ཉིད་དབྱིངས་སྟོང་ཉིད་ཀ་དག་སྤྲོས་བྲལ་སྤྲོས་མཚན་ཀུན་དང་བྲལ་བ་རེད་མོད། དེ་མཁའ་ལྟར་རྣམ་དག་རྒྱ་ཆད་ཕྱོགས་ལྷུང་དང་བྲལ་བ་ཞིག་ཡིན་པས། མིག་གཉིས་གཟིགས་སྟངས་གྱེན་ལ་གཏད་པ། ཕྱོགས་བྲལ་མཁའ་མཉམ་གྱི་གཟིགས་ཚུལ་ཟེར་ཆོག་པ་རེད། འདིའི་སྐབས་སུ་མིག་གཉིས་མཉམ་པོར་ཡོད་པ་དེ། ཡུད་ཙམ་གྱེན་ལ་རང་ཉིད་ཀྱི་སྨིན་མཚམས་རྫི་མ་གཉིས་ཀའི་བར་སངས་རྒྱས་ཀྱི་མཛོད་སྤུ་ཡོད་སའི་ཕྱོགས་ལ་ཡར་གཏད་ནས། གཟིགས་ས་ནམ་མཁའི་མཐོངས་ལ་གཟིགས་དགོས་པ་རེད། གཙུག་ཏོར་རྣམ་པར་ལྟ་བའི་ཚུལ་གསུངས་བ་དེ་མིང་བཏགས་ལུགས་ཤིག་རེད། ངས་གོང་ནས་ཕྱོགས་བྲལ་མཁའ་མཉམ་གྱི་གཟིགས་ཚུལ་ཟེར་ཆོག་ཟེར་བ་དང་གཅིག་མཚུངས་རེད། གཟིགས་སྟངས་གྱེན་ལ་ལྡོག་པས་ངན་སོང་གསུམ་གྱི་སྐྱེ་རྒྱུན་ཆོད་པའི་རྟེན་འབྲེལ་གྱི་སྒོ་མོ་དང་། སྨིན་མཚམས་ལ་བསྐྱོད་པས་རིག་པ་ལ་འཁྱོར་ས་མེད། ནམ་མཁའི་མཐོངས་ལ་བལྟས་པས་དབྱིངས་རིག་འདུ་འབྲལ་མེད་པའི་དགོས་པ་དེ་དག་ཡོད། དེ་ལྟར་དལ་གཅིག་ཆོས་སྐུའི་གཟིགས་སྟངས་གྱིས་གཟིགས་རྒྱུ་མཛད། གཉིས་པ་ལོངས་སྐུའི་གཟིགས་སྟངས་གྱིས་གཟིགས་དགོས། ཆོག་ཁྲིགས་ནང་འདིར་འདི་ལྟར་གསུངས་འདུག ལོངས་སྐུ་ལ་ཡེ་ཤེས་ཀྱི་སྤྱན་ཡོད་པས་གཟིགས་སྟངས་ཟུར་ལ་གཏད་པ་མདའ་མཁན་སྙུག་མ་བསྲངས་བ་བཞིན་དུ་ལྟོས་ཤིག་གསུངས་འདུག ལོངས་སྐུའི་ཡེ་ཤེས་ཀྱི་སྤྱན་དེ་གཟིགས་པ་དག་པའི་སྤྱན་རེད། གོང་གི་ཆོས་སྐུའི་སྤྱན་ལ་གཟིགས་པ་མི་དག་པ་མ་རེད་ཀྱང་། དག་མ་དག་གི་མཐའ་ལས་འདས་པ་སྟོང་ཉིད་བསམ་ངོ་དང་བྲལ་བའི་ཆོས་ཉིད་ཀྱི་རང་ངོར་གནས་པའི་རང་ཚུལ་ལ་སྤྱན་ཞེས་བཏགས་བཞག་པ་རེད། ལོངས་སྐུའི་དག་པའི་གཟིགས་ངོ་ལ་མ་དག་པའི་འཁྲུལ་བ་མེད་པས་དེ་ཉིད་མངོན་དུ་འགྱུར་ཆེད་དང་འཁྲུལ་སྣང་འགག་ཐབས་ལ་ལུས་པོ་མི་ཀྱུ་མིག་གཉིས་ཀྱི་ཟུར་གྱིས་མདའ་མཁན་གྱི་སྙུག་མ་བསྲངས་བ་ལ་དཔེ་བཞག་དུས། གཡས་གཡོན་གང་ལ་བལྟས་ན་མིག་གཉིས་ཀྱིས་མཉམ་པོར་བལྟ་རྒྱུ་དང། ཡང་དབྱིངས་ཐིག་གི་གནད་ལ་བསྣུན་ནས་བཅུད་དུ་དྲིལ་བའི་སྐབས་སུ་ཡིན་ན། མདུན་དང་ཟུར་གཉིས་གཅིག་དུ་དྲིལ་བའི་མདུང་ཚུགས་ཀྱིས་མཉམ་པོར་བལྟ་རྒྱུ་ཡང་རིག་པ་རང་སྣང་སྤྱི་དྲིལ་གྱི་གནད་ཀྱི་ཞལ་ཕྱེས་རེད། སྐུ་ལུས་མི་དཀྱུ་ཞིང་དབུ་ཡང་མི་འགུལ་བའི་ཟུར་གྱི་གཟིགས་སྟངས་ཀྱིས་དལ་ཅིག་གཟིགས་མཛོད། མཚམས་འདི་ནས་སྤྲུལ་སྐུའི་གཟིགས་སྟངས་མཛད་དགོས། སྤྲུལ་སྐུ་ལ་ཤེས་རབ་ཀྱི་སྤྱན་ཡོད་པས་གཟིགས་སྟངས་ཐུར་ལ་ཕབ་ནས་དྲང་སྲོང་བསམ་གཏན་སྒོམ་པ་བཞིན་དུ་ལྟོས་ཤིག་གསུངས་འདུག འདི་བཞིན་གསུང་པའི་སྐབས། ཆོས་སྐུས་གྱེན་ལ་གཟིགས། ལོངས་སྐུས་ཐད་ལ་གཟིགས སྤྲུལ་སྐུས་ཐུར་དུ་གཟིགས་ཡོད་པས་དེའི་ལད་མོར་གྱིས་གསུངས་པའི་དོན་མ་རེད། སྐུ་གསུམ་གྱི་དགོངས་པ་དང་འབྲེལ་བའི་འོད་གསལ་གྱི་འཆར་སྣང། ཤར་བདེ་ཞིང་ངོས་ཟིན་བདེ་ཆེད་ལ་གསུངས་བ་རེད། གཞི་ལས་གཞིར་སྣང་ཤར་ལྷུན་གྲུབ་སྒོ་བརྒྱད་ཀྱི་སྣང་བ་ཤར་དུས། སྟེང་ན་ཀ་དག་གི་སྣང་བ་ནམ་མཁའ་དྲི་མེད་ལྟ་བུ། བར་ན་ལོངས་སྐུའི་ཞིང་སྣང་དག་པ་སྐུ་དང་ཞིང་ཁམས་ཀྱི་རྒྱན་བཀྲམ་པ། འོག་ན་འགྲོ་དྲུག་གི་སྣང་བ་འདུལ་བྱེད་སྟོན་པ་དང་བཅས་པ། འཆར་ལུགས་དྲུག་དང་སྒོ་གཉིས་ཀྱི། དང་པོ་འཆར། ཐ་མར་ཐིམ་དུས་ཀྱི་བར་དུ། གྲོལ་ལུགས་ཀྱི་ཁྱད་པར་འཁོར་འདས་བར་ལག་འགྱེལ་བའི་གནད་ཀྱི་སོ་མཚམས་ཐུན་མིན་གྱི་གདམས་པ། རང་ལུགས་སྙིང་ཐིག་བརྒྱུད་པའི་གཞན་ལ་མེད་པའི་ཁྱད་ནོར་ཡིན། འདིའི་གཟིགས་སྟངས་གསུམ་པོའི་གནད་ཀྱང་དེ་ལ་འབྲེལ་བ་ཞིག་རེད། སྤྲུལ་སྐུའི་གཟིགས་སྟངས་ཐུར་ལ་གཟིགས་པ་འདི། སྤྲུལ་སྐུའི་བཞུགས་སྟངས་དྲང་སྲོང་ཙོག་པུའི་སྐབས་ལ་ལྷག་པར་བདེ་བ་རེད། ལས་དང་པོ་པས་ཐོད་རྒལ་གྱི་འཆར་སྣང་གཟིགས་དུས། སྤྲུལ་སྐུའི་བཞུགས་སྟངས་མཛད་རྒྱུའི་ཕྱག་ལེན་ཡང་རེད། འདིའི་སྐབས་ལ་མིག་གཡོ་འགུལ་མེད་པར་ཅུང་ཟད་ཐུར་ལ་ཕབ་ནས་གཟིགས་ན། མཚན་མའི་རྣམ་རྟོག་གིས་མི་གཡོ་བ་དང་། མཉམ་པར་གཟིགས་པས་ཡང་སྒོས་ཉོན་མོངས་ཀྱི་དབང་དུ་མི་འགྱུར་བའི་དགོས་པ་སོགས་ཡོད་པར་གསུངས་ཡོད། མཚམས་འདི་ནས་སྤྲུལ་སྐུའི་གཟིགས་སྟངས་ཀྱིས་ཐུར་ལ་གཟིགས་ཀྱིན་དལ་ཅིག་བཞུགས་མཛོད། དེ་ནས་འདིའི་ཡིག་ཆུང་གི་ནང་ན། ཅེས་བལྟ་སྟངས་བྱར་གཞུག་གསུངས་འདུག མཚམས་འདིར། རང་ཉིད་ཀུན་མཁྱེན་བླ་མ་འོད་གསལ་མའི་སྐུ་འཇའ་ཚོན་སྒྲིབ་གཡོགས་དང་བྲལ་བ་ལྟ་བུའི་ཐུགས་ཀར་ཡེ་ཤེས་སེམས་དཔའ་ཀུན་བཟང་ཡབ་ཡུམ་གསལ་བའི་ཐུགས་ཙིཏྟ་རིན་པོ་ཆེའི་སྦུབས་སོགས་གསུངས་སྐབས་ཀྱི་ཟུར་འཕྲོས། གསང་བའི་དབང་འདི་ཁྱད་པར་དང་ཐུན་མིན་ཐུན་མོང་གསུམ་གྱི་ལམ་གྱིས་རིམ་བཞིན་གསུངས་པའི་ནང་གི། དང་པོ་ཁྱད་པར་གྱི་ལམ་རེད། གང་ལས་ཁྱད་པར་འཕགས་ཟེར་ན་སྔགས་བླ་མེད་ཐུན་མོང་ལས་འཕགས། འཕགས་ཆོས་གང་གིས་འཕགས་ན། རྫོགས་པ་ཆེན་པོའི་འོད་གསལ་ཐོད་རྒལ་གྱིས་འབྲས་བུ་ལམ་དུ་བྱེད་པའི་ཁྱད་ཆོས་ཀྱིས་འཕགས། དེ་ལྟ་བུའི་ཁྱད་པར་གྱི་ལམ་བཤད་པ་གོང་ནས་སོང་མ་ཐག་པའི་མཚམས། གཉིས་པ་ཐུན་མིན་གྱི་ལམ་འདི་གང་དང་ཐུན་མིན་རེད་ཟེར་ན། སྔགས་གོང་འོག་སྤྱི་དང་ཐུན་མོང་མ་ཡིན་པ། བླ་མེད་ཀྱི་རྫོགས་རིམ་རྡོ་རྗེའི་བཟླས་པ་སྲོག་རྩོལ་གྱི་མན་ངག་དང་སྒོ་མཐུན་པ་ཞིག་རེད། འདི་ནས་རང་ཉིད་ཀུན་མཁྱེན་བླ་མ་འོད་གསལ་མའི་སྐུ་གསུངས་དུས། སྣང་སྟོང་སྒྱུ་འཕྲུལ་དྲྭ་བའི་ཡེ་ཤེས་ཀྱི་རོལ་བ། དྭངས་མ་འོད་གསལ་གྱི་ལུས། སྐུ་སྣང་ལ་རང་བཞིན་མེད་པ་འཇའ་ཚོན་ལྟར་དུ་སྒྲིབ་གཡོག་བྲལ་བའི་ཐུགས་ཀ་ན། ཡེ་ཤེས་སེམས་དཔལ་ཀུན་བཟང་ཡབ་ཡུམ། དེའི་ཐུགས་ཀ་རུ་ཐུགས་སྲོག་གི་སྙིང་པོ་པདྨ་ཉི་ཟླའི་གདན་སྟེང་ལ། སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེ་གསུམ་གྱི་ས་བོན། ཡི་གེ་ཨཱོཾ་ཨཱ་ཧཱུྃ་གསལ་བ་ལ། རིག་པ་གཡོ་མེད་དུ་གཏད་དེ་རླུང་རོ་སུམ་ཕྲུག་ཏུ་གསལ་བའི་རྗེས་འབྲུ་གསུམ་རྡོ་རྗེའི་བཟླས་པ་མཛོད་ཅིག་གསུངས་ཡོད་པས། འདིའི་སེམས་དཔའ་སུམ་བརྩེག་གི་ཚུལ་གསུངས་བ་འདི་ཡང་། ཁར་རྩང་སྔོན་ནས་ཀྱང་འདིའི་སྐོར་ནས་ཞུས་ཟིན་ཡང་། གཅིག་གི་ནང་ལ་གཅིག་སྐུ་འདྲའི་ནང་ལ་གཟུངས་གཞུག་བཞག་པ་ལྟར་བུའི་ལྷ་དང་སྔགས་ཕྱི་ནང་གསུམ་ཅན་ཞིག་གཟུགས་ཅན་དུ་སྒོམ་རྒྱུ་མ་རེད། རགས་པ་གནས་སྐབས་ཀྱི་ལུས་དང་ཆོས་མཐུན་པ་ཞིག་ལ། རང་ཉིད་ཀུན་མཁྱེན་བླ་མའི་སྐུ། འོད་གསལ་དྭངས་མའི་ལུས་ཅན་ལ་བསམ་པ་དེ་དམ་ཚིག་སེམས་དཔར་ཆགས་བཞག་ན། ཕྲ་བ་གཉུག་མའི་ལུས་དེ་ཤིན་ཏུ་ཕྲ་བའི་རླུང་སེམས་ངོ་བོ་དབྱེར་མེད་དུ་གནས་པ་ཀུན་ཏུ་བཟང་པོའི་རང་བཞིན་ལ། ཡེ་ཤེས་སེམས་དཔའི་བརྡ་ཆད་སྦྱར། དེ་ལས་ཀྱང་ཤིན་ཏུ་ཕྲ་ཞིང་ཟབ་པའི་སེམས་ཉིད་སྐུ་གསུང་ཐུགས་རྡོ་རྗེ་གསུམ་གྱི་རང་བཞིན་ཡི་གེའི་རྣམ་པ་ཤར་བ། ཨཱོཾ་ཨཱ་ཧཱུྃ་གསུམ་གྱི་ངོ་བོར་གནས་པ། དེ་ཇི་བཞིན་ཤེས་པ་ལ་གསལ་འདེབས་ཀྱི་མིང་གི་ཐོག་ནས་ཏིང་འཛིན་སེམས་དཔའི་དོན་མཚོན་པར་བྱས་པའི་གོ་རིམ་ཙམ་ཞིག་རེད། རྡོ་རྗེ་གསུམ་མཚོན་གྱི་ཡི་གེ་འབྲུ་གསུམ་འདི། སྣང་དང་སྟོང་དང་སྣང་སྟོང་གཉིས་སུ་མེད་པའི་རང་བཞིན་དུ་གནས་པ། སྣང་བ་ཨཱོཾ༔ སྟོང་བ་ཨཱ༔ གཉིས་མེད་ཧཱུྃ༔དུ་གནས་པ། ཡང་ཨཱ༔སྟོང་བ་ཆོས་སྐུ། ཨཱོཾ༔སྣང་བ་ལོངས་སྐུ། ཧཱུྃ༔སྣ་ཚོགས་སྤྲུལ་སྐུའི་རང་བཞིན། སྣང་བཞིན་སྟོང་ལ་སྟོང་བཞིན་སྣང་བ། སྣང་དང་སྟོང་བ་གཉིས་མེད་ཀྱི་བདག་ཉིད། སྐུ་གསུམ་ངོ་བོ་དབྱེར་མེད་ཀྱི་དོན་ཅན་རེད། དེ་ཡང་། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་རླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །གསུངས་བ་ལྟར་དུ། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད། ཡེ་ནས་སྟོང་བ་གཅིག་གི་ངང་ལས་བྱུང་བ་དེ་རྒྱུ་གཅིག་པ་ཞེས་གསུངས་པ་དང་། ཡིག་འབྲུའི་ཚུལ་དུ་རང་བཞིན་གྱིས་མ་སྐྱེས་པའི་ངོ་བོ་སྣང་སྟོང་གཉིས་མེད་ལ་གནས་པ་ཡིན་པས་ཡིག་འབྲུའི་ཚུལ་གསུངས་སོ། མེའི་རང་བཞིན་ནི་ཚ་བའི་བྱིན་བརླབས་དང་མི་འབྲལ་བ་ལྟར། ཆོས་རྣམས་ལ་དག་པ་འབའ་ཞིག་གིས་མ་ཁྱབ་པ་མེད་པས་ན་བྱིན་གྱིས་བརླབས་གསུངས་པ་རེད། གཟུགས་སྒྲ་དྲན་རྟོག་ཐམས་ཅད་དང་པོ་མ་དག་པ་ཞིག་གསང་བ་གསུམ་གྱི་དཀྱིལ་འཁོར་དུ། རྗེས་ཤིག་ནས་དག་པར་གྱུར་སོང་བ་མ་ཡིན་པར། སྣང་དུས་ཉིད་ནས་མཉམ་ཉིད་དག་པའི་དགོངས་པ་ལས་མི་འདའ་བས་མངོན་སུམ་པ་གསུངས། འདི་བསྐྱེད་རྫོགས་སོ་སོ་དང་སྦྱར་ནས་བཤད་རྒྱུ་ཡོད་ཀྱང་། བསྐྱེད་རྫོགས་ཟུང་འཇུག་ལྟར་དུ་རགས་རིམ་ཙམ་ཞིག་ཞུས་ན། རྒྱུ་གཅིག་པ་བསྐྱེད་རྫོགས་དང་བདེན་གཉིས་སུ་གཅིག་པ། ཡིག་འབྲུའི་ཚུལ་ངོ་བོ་རྟག་ཆད་ལས་འདས་པ། བྱིན་གྱིས་རླབས་པ་དབྱིངས་རང་བཞིན་གྱིས་དག་པའི་ངང་ལས་བསྐྱེད་རྫོགས་རང་སྣང་བ། རྒྱུ་གཅིག་པ་དང་ཡིག་འབྲུའི་ཚུལ་། །བྱིན་གྱིས་རླབས་དང་མངོན་སུམ་པ། །ཞེས་གསུངས་པས་མངོན་སུམ་པ་ཟེར་ན། དེའི་སྟེང་ལ་རིག་པས་ཐག་བཅད་ཅིང་བསྐྱེད་རྫོགས་འགལ་མེད་རྟོགས་ནས་དེར་བརྩོན་པ་དེ་ཉིད་རེད། རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །གསུངས་ན། དེ་ལྟ་བུའི་གོང་དུ་བཤད་པའི་རབ་ཏུ་རྟོགས་པ་རྣམ་པ་བཞི་བོ་དེ་ཡིས། ཆོས་ཐམས་ཅད་ཡེ་ནས་མངོན་པར་རྫོགས་པ་བྱང་ཆུབ་པ། མ་གྲོལ་པའི་ཆོས་མེད་པའི་བྱང་ཆུབ་མཆོག་གི་རྒྱལ་པོར་གྱུར་པ་ལ་ཆེན་པོའི་སྒྲས་བསྟན་པ་ཡིན། སྣང་སྲིད་འཁོར་འདས་ཀྱི་ཆོས་ཐམས་ཅད་ཡེ་ཤེས་ཀྱི་རོལ་བར་འཆར་དུས། གསང་ཆེན་དོན་གྱི་གནས་ལུགས་རྟོགས་སོང་བ་རེད། དེ་ལྟར་གཞི་ལྷུན་གྲུབ་ཀྱི་དཀྱིལ་འཁོར་ཤེས་པར་བྱས་ནས། ལམ་ཐབས་དང་ཤེས་རབ་ཀྱིས་ཉམས་སུ་ལེན་པ་ལས། སྐབས་འདིའི་རྡོར་བཟླས་བྱ་དགོས་རྒྱུ་ལ། ཐོག་མར་རླུང་གི་རྣལ་འབྱོར་ལ་རང་བྱན་ཆུབ་པའི་ཐོག་ནས། སྲོག་རྩོལ་གཉིས་ཀ་དང་འོད་གསལ་ཕྱག་རྒྱ་ཆེན་པོའི་རྣལ་འབྱོར་ལ་གནད་དུ་བསྣུན་ནས། སེམས་དང་སེམས་བྱུང་གི་སྤྲོས་པ་ཐམས་ཅད་དབྱིངས་སུ་ཞི་བའི་ལམ། ཆོས་སྐུ་ཕྱག་རྒྱ་ཆེན་པོ་རང་བྱུང་གི་ཡེ་ཤེས་ངོ་འཕྲོད་ན། སྦྱོར་དྲུག་ཞི་བྱེད་དང་བཅས་པའི་མིང་དོན་ཚང་པར་མ་ཟད། གནས་ལུགས་དོན་གྱི་ཤེར་ཕྱིན་རྫོགས་པ་ཆེན་པོའི་སྒྲས་སྙད་པ་ཡང་དེ་ཡིན་གསུངས་ཡོད། སྤྱིར་བཏང་རྡོར་བཟླས་དང་འབྲེལ་བའི་རླུང་བྱིན་རླབས་ཙམ་ཞིག་ལ། རྩ་འཁོར་ལོ་བཞིའི་དམིགས་པ་སྲོག་རྩོལ་གྱི་སྦྱོར་བ་ལྷག་གིས་མ་བཤད་ན་ཡང་ཆོག་ཀྱང་། འདི་ནས་འདི་ལྟར་འབྱུང་འཇུག་གནས་གསུམ་དང་སྦྱར་བ་བུམ་ཅན་དང་སྦྲགས་པའམ། གང་ཤེས་ལན་བདུན་ནམ། གསུམ་བྱར་གཞུག་ཅེས་ཆོག་ཁྲིགས་མཁན་པོས་འདིའི་དབང་གི་ཆོག་ཁྲིགས་ཀྱི་དབུས་སུ་ཕྱག་མཆན་བཏབ་འདུག་པ་འདི་ཡང་། གྲོལ་ཐིག་གི་དགོངས་པ་ཡིན་རྒྱུ་རེད་བསམ་ནས་གལ་ཆེན་རྩི་བཞིན་ཡོད། སྤྱིར་ན་སྔགས་བླ་མེད་ཀྱི་གསར་རྙིང་ལ་མ་ལྟོས་པའི་ཐུན་མོང་གི་རྫོགས་རིམ་ལ། ཕ་རྒྱུད་ཀྱི་རིམ་གཉིས། མ་རྒྱུད་ཀྱི་ཕྱག་རྒྱ་བཞི། གཉིས་མེད་རྒྱུད་ཀྱི་སྦྱོར་དྲུག་ལ་སོགས་པ་དང་། ཁྱད་པར་གྱི་རྫོགས་རིམ་ལྔ་སོགས་བཤད་པའི་སྐབས་འདིར། བསྐྱེད་རིམ་ལ་བརྟེན་པ་ལྷའི་རྫོགས་རིམ། དེའི་འཕྲོར་བྱང་ཆུབ་སེམས་ཀྱི་རྫོགས་རིམ། རྩའི་རྫོགས་རིམ། རླུང་གི་རྫོགས་རིམ་དེ་དག་ཡོད་པ་རེད། སེམས་ཉིད་ལ་བརྟེན་པ་བྱང་ཆུབ་སེམས་ཀྱི་རྫོགས་རིམ། ལུས་ལ་བརྟེན་པ་རྩའི་རྫོགས་རིམ། དབུགས་ལ་བརྟེན་པ་རླུང་གི་རྫོགས་རིམ། བཅུད་ལ་བརྟེན་པ་ཐིག་ལེའི་རྫོགས་རིམ་སོགས་བཤད་པའི་རྣམ་གྲངས་མང་པོ་ཡོད་ཀྱང་། སྐབས་འདིར་འབྱུང་འཇུག་གནས་གསུམ་དང་སྦྱར་དགོས་པས། སྦྱོར་དྲུག་གི་ནང་ནས་སྲོག་རྩོལ་གྱི་གནད་དང་མ་བསྟུན་ཐབས་མེད་ཅིག་ཡིན། དེའི་ཞོར་ལ་སྦྱོར་དྲུག་ཟེར་བ་གང་དག་ཡིན་སྙམ་ན། སོར་སྡུད་བསམ་གཏན་གཉིས། སྲོག་རྩོལ་གཉིས་ཀ་གཅིག་ལ་རྩིས་པའི་སྲོག་རྩོལ་འཛིན་པ་གཉིས་ཀྱིས་བཞི། རྗེས་དྲན་དང་ཏིང་འཛིན་གཉིས་ཀྱིས་དྲུག་རེད། འདི་གསར་རྒྱུད་རྐྱང་པའི་ལུགས་སྲོལ་མ་རེད། ཧེ་རུ་ཀ་གལ་པོའི་དགོངས་དོན་ཡང་རེད། ད་ནི་སྐབས་དོན་སྲོག་རྩོལ་བཤད་རྒྱུ་བྱེད། སྲོག་ཟེར་ན་རླུང་ཞིག་རེད། རླུང་ཟེར་ན་གཡོ་བའི་རང་བཞིན་ཅན་ཞིག་ཡིན་པ་ནམ་རྒྱུན་དུ་ཞུ་མྱོང་། རླུང་བཅུ་རགས་པའི་རྩ་བ་གྱུར་པ་སྲོག་གི་རླུང་ཤིན་ཏུ་ཕྲ་བ་དེ་ཉིད། དབུ་མར་འཕོ་མེད་དུ་བཅིང་ཞིང་ཐིམ་པའི་སྟོབས་ཀྱིས་ལས་རླུང་གི་འཕོ་བ་ཐམས་ཅད་འཕོ་བྲལ་གཞོམ་མེད་ཀྱི་དབྱིངས་སུ་ཐིམ་ནས། ཤིན་ཏུ་རྣམ་དག་ཡེ་ཤེས་ཀྱི་སྐུ་ནམ་མཁའ་ལྟར་འཕོ་འགྱུར་མེད་པ་དེ་ཐོབ། ལུས་ཟེར་རྒྱུ་འདི་དང་པོར་ཆགས་དུས། ཀུན་གཞི་སྲོག་གི་རླུང་དང་བཅས་པ་མ་ཡི་མངལ་དུ་ཞུགས་ཏེ་ཐོག་མར་ལུས་འཕེལ་བ། བར་དུ་ལུས་གནས་པ། མཐར་རྩ་ཐམས་ཅད་རླུང་གིས་དོར་ཞིང་སྐྱུར་ནས། དབུ་མའི་སྲོག་རླུང་ཉིད་དུ་བསྡུས་སོང་བའི་རྐྱེན་གྱིས་སྲོག་དེས་ལུས་བཏང་སྟེ་སྲིད་པ་གཞན་དུ་འཕོ་བར་བྱེད་པ་སྟེ་བརྒྱུད་རིམ་དེ་ལྟ་བུ་ཞིག་རེད། རྣལ་འབྱོར་བས་འདི་ལམ་དུ་བྱས་ན། འཕོ་མེད་ཡེ་ཤེས་ཀྱི་སྐུ་ཐོབ་པ་གོང་ནས་བཤད་མ་ཐག་པ་ལྟར་ཡིན། འདི་དུས་འཁོར་གྱི་ཆོས་སྐད་དང་བསྟུན་ན་ཡང་། སྲིད་པ་གསུམ་གྱི་སྐྱེ་འཇིག་ལས་རྒྱལ་བ་ཕྱི་ནང་གཞན་གསུམ་གྱི་ནང་ནས་གཞན་དུས་ཀྱི་འཁོར་ལོ། ཐབས་རྡོ་རྗེའི་རྣལ་འབྱོར་ལ་གོམས་པའི་སྟོབས་དེས། ཐབས་ཤེས་ཉི་ཟླའི་བགྲོད་པ་ཁུ་རྡུལ་ལྟར་སྲོག་ཐར་གྱི་འཕོ་བ་ཐམས་ཅད་གཞོམ་མེད་དྷུ་ཏུའི་དབྱིངས་སུ་རྫོགས་པར་བྱས་ནས། འཆི་བའི་སྒྲ་ལས་གཏན་དུ་སྒྱུལ་བ་དེ། དེ་ཁོ་ན་ཉིད་དུས་ཀྱི་འཁོར་ལོའི་གོ་འཕང་རེད། རྡོ་རྗེ་ལུས་ཀྱི་དབུས་ན་རྩ་དབུ་རྐྱང་རོ་གསུམ་གསལ་ཡོད་པ། ལྟེ་བ་སྤྲུལ་བའི་འཁོར་ལོའི་སྟེང་ཕྱོགས་ལ་སྲོག་གི་རླུང་གནས་པ། ལྟེ་བའི་འོག་ཏུ་ཐུར་སེལ་གྱི་རླུང་གནས་པ་རེད། སྟེང་ནས་སྲོག་གི་རྒྱུ་བ་དབུ་མར་འགོག་རྒྱུ་དང་། འོག་ནས་ཐུར་སེལ་གྱི་རྒྱུ་བ་དུང་ཅན་ལ་འགོག་རྒྱུའི་རྩ་ལ་བརྟེན་པའི་རླུང་གི་སྦྱོར་བ་དེ་སྲོག་རྩོལ་གྱི་དོན་རེད། སྲོག་དང་ཐུར་སེལ་གྱི་རྒྱུ་བ་དེ་སྲོག་རྩོལ་འཛིན་པའི་སྦྱོར་བའི་སྟོབས་དེ་ལ་བརྟེན་ཏེ། ལྟེ་བ་སྤྲུལ་བའི་འཁོར་ལོའི་བདེ་ཆེན་མཆོག་གི་གནས་ལ་བུམ་ཅན་བཟུང་བཞག་ན། སྦྱོར་དྲུག་དང་བསྟུན་ན་རྗེས་དྲན་དང་ཏིང་འཛིན་གྱི་སྟོབས་ཀྱིས་ཁུ་རྡུལ་རླུང་གསུམ་འགག་པའི་རྣམ་ཤེས་ཡེ་ཤེས་འདྲེས་པ་དེ་ལས། འཕོ་ཆགས་འཁོར་བའི་རྩ་བ་འགོག་པ་དང་ཆབ་ཅིག་ཏུ། འཁོར་བའི་ཡན་ལག་བཅུ་གཉིས་ལོག་ནས་བདེན་དོན་རྣམ་པ་བཅུ་གཉིས་ཀྱིས་སྒྲིབ་བྲལ་གྱི་ཡེ་ཤེས་མངོན་དུ་བྱེད་པ་རེད། སྤྱིར་རྫོགས་རིམ་གྱི་ངོ་བོ་དེ་རྣམ་རྟོག་གི་རང་བཞིན་ཤེས་ནས་དེ་ཉིད་མི་རྟོག་པའི་ལམ་དུ། དམིགས་པ་དང་བཅས་པའམ་དམིགས་པ་མེད་པའི་ཤེས་རབ་ཀྱིས་འགོག་པ་ཞིག་ཡིན། འདི་བླ་མེད་ཕ་རྒྱུད་ཀྱིས་གསལ་སྟོང་རྣམ་པར་མི་རྟོག་པའི་ཡེ་ཤེས་ལ་དམིགས་རྒྱུ་དང་། མ་རྒྱུད་ཀྱིས་བདེ་སྟོང་རྣམ་པར་མི་རྟོག་པའི་ཡེ་ཤེས། གཉིས་མེད་རྫོགས་ཆེན་གྱིས་ཆོས་ཉིད་མི་རྟོག་པའི་ཡེ་ཤེས་ལ་གཙོ་བོར་དམིགས་ནས། མཆོག་ཐུན་གྱི་དངོས་གྲུབ་བསྒྲུབ་པ་རེད། རླུང་གི་གནད་འདི་ཕར་ལ་མདའ་ལྟར་འཕངས་པ། ཚུར་ལ་གཞུ་ལྟར་དགུག་པ། ནང་དུ་རྫོང་ལྟར་བསྐྱིལ་བ་གསུམ་ལ་འདུས་པ་རེད། དམིགས་པའི་གནད། ལུས་དབུས་ན་རྩ་དབུ་མ་ཁ་དོག་མཐིང་སྐྱ་ཞིག་ལ། ཁོག་སྟོང་ཡེ་ཤེས་ཀྱི་རྩ་ཡོད་པ། དེའི་གཡས་ན་སྐྱེས་པ་ལ་རོ་མ་དཀར་མོ། གཡོན་ན་རྐྱང་མ་དམར་པོ། བུད་མེད་ལ་དེ་གཉིས་ཀ་གོ་ལྡོག་ནས་ཡོད་རྒྱུ། སྤྱི་བོ་བདེ་ཆེན་གྱི་འཁོར་ལོ། མགྲིན་པ་ལོངས་སྤྱོད་ཀྱི་འཁོར་ལོ། སྙིང་ག་ཆོས་ཀྱི་འཁོར་ལོ། ལྟེ་བ་སྤྲུལ་བའི་འཁོར་ལོ་ཡི་རྩ་འཁོར་བཞི་པོ་ཡང་རོབ་ཙམ་ཞིག་གསལ་མཛད་ན། གཙོ་བོར་འདི་ནས་དབང་གི་རྗེས་འབྲེལ་གྱི་ཕྱག་ལེན་ལ། དང་པོར་རྣམ་པ་ཚོས་བཞུགས་སྟངས་ཆོས་བདུན་བདེ་ལུགས་སུ་བཅས་ཏེ་བཞུགས་ཡོད་པ་བཞིན་ལ། རླུང་རོ་སུམ་ཕྲུག་གམ་དགུ་ཕྲུག་ཏུ་བསལ་མཛད་དགོས། ཕྱག་གཉིས་ཀྱི་སྲིན་མཛུབ་ཀྱི་རྩ་གཉིས་ཀ་མཐེ་མོས་གནོན་པའི་ཁུ་ཚུར་གྱིས་བརླ་རྩ་གཉིས་ཀའི་སོ་སོའི་རྩ་མནན་ནས་བཞུགས། འདིའི་སྐབས་ལ་དབུགས་སྣ་ནས་རྒྱུ། ཐོག་མར་ཕོའི་ལག་གཡས་སྲིན་མཛུབ་ཀྱིས་སྣ་ཁུང་གཡས་པ་འདན་ནས་སྣ་བུག་གཡོན་ནས་འདོད་ཆགས་ཀྱི་རླུང་དམར་པོ་ཁ་དོག་མི་གཙང་བའི་རྣམ་པ་ཅན་གྱི་རླུང་རོ་ཐེངས་གསུམ་ལ་འབུད། བུད་མེད་ལ་གཡས་གཡོན་གོ་ལྡོག་རེད། དེ་བཞིན་དུ་གཡོན་ཞེ་སྡང་དང་དབུས་གཏི་མུག་གི་རླུང་རོ་བསལ་དགོས་པ་མཁྱེན་བཞིན་པ་ལྟར་དུ་རེད། དང་པོར་རླུང་རོ་མཉམ་དུ་བསལ་རྒྱུ་བྱེད། འདིའི་མཚམས་ནས་འབྲུ་གསུམ་རྡོ་རྗེའི་བཟླས་པར་བྱེད་རྒྱུ་ལ། ཡིག་འབྲུ་ༀ་དཀར་པོ། ཨཱ་དམར་པོ། ཧཱུྃཿམཐིང་ག་གསུམ་པོ་དེ། དབུགས་ནང་དུ་ཡར་འབྱིན་དུས། ཨོཾ་དཀར་པོ། ཁོག་པོའི་ནང་དུ་གནས་དུས་ཨཱ་དམར་པོ། ཕྱི་ར་འབྱིན་དུས་ཧཱུྃ་སྔོན་པོར་སྒོམ་ནས། དེ་ཡང་གོང་ནས་ཞུས་པ་ལྟར་དུ་བུམ་ཅན་དང་སྦྲགས་དགོས་པ་རེད། སྟེང་རླུང་གིས་མར་མནན། འོག་རླུང་གིས་ཡར་སྡོམ། རླུང་ཁ་སྦྱོར་གྱི་ལྟེ་བར་བུམ་ཅན་འཛིན་དགོས། དེས་ན་འབྲུ་གསུམ་རྡོ་རྗེའི་བཟླས་པ་དེ་ཚར་ཉེར་གཅིག་ཙམ་མཛད་རྒྱུ་བྱེད། ད་འདི་ནས་རྟེན་འབྲེལ་ལུས་ལ་བསྒྲིགས་ན་རྟོགས་པ་སེམས་ལ་འཆར་བའི་དགོས་དོན་རེད་མ་གཏོགས་དུས་ཚོད་ཀྱིས་འདང་དཀའ་འདུག སྤྱིར་རླུང་གི་གྲངས་དང་ཁ་དོག་རེག་བྱ་སོགས་ལ་བསླབ་དུས། རླུང་ཐུབ་ཐང་དུ་འཛིན་དགོས་པ་རེད། བུམ་ཅན་འཛིན་དུས་ཁ་སྣའི་དབུགས་དང་མཉམ་དུ་བུམ་ཅན་མི་ཟིན་པར་ཤོར་འགྲོ་རྒྱུ་ཅན་རྐྱལ་བ་ཁ་ཞིག་སོང་བ་འདྲ་ཞིག་མ་ཡིན། གཙོ་བོ་དམིགས་པའི་ཞི་གནས་ཅན་ཞིག་རེད། རླུང་ལ་བྱང་སོང་ན་མི་ཕལ་བ་ཞིག་གིས་དབུགས་ཀྱི་རྒྱུ་བ་བརྒྱ་ཕྲག་མང་པོའི་ཚེ་ལ། དབུགས་ཀྱི་རྒྱུ་བ་རེ་རེས་ཆོག་རྒྱུ་དང་དབུགས་ཀྱི་རྒྱུ་བ་མི་ཚོར་རྒྱུ་སོགས་ཀྱི་རྟགས་ཡོང་བ་རེད། འདི་ནས་གཙོ་ཆེ་བར། བུམ་ཅན་གྱི་དམིགས་པ་བཟུང་ནས་རྩ་འཁོར་ལོ་བཞི་དང་བཅས་པ་ཡེ་ཤེས་ཀྱི་རླུང་གིས་གང་བར་བསྒོམས། ཁྱད་པར་ལྟེ་བའི་ནང་དུ་བསྐྱོད་དུས་ནང་དུ་འཛུལ་ཡུན་ཇེ་རིང་བྱས། ཕྱིར་འཕེན་དུས་ལྷག་མོར་ཅུང་ཟད་འཛིན་དགོས། དགུག་དུས་ཤིན་ཏུ་དལ་མོར་བྱེད་རྒྱུ་ནི་མན་ངག་གི་གནད་དམ་པ་རེད། འབྱུང་འཇུག་གནས་གསུམ་ལ་རྡོ་རྗེའི་བཟླས་པ་ཚར་གཅིག་ཡིན་པས། རང་རང་ལ་བྱང་ཆ་ཡོད་མེད་དང་བསྟུན་ནས་ཚར་གསུམ་རེ་ལས་མི་ཉུང་བ་མཛད་བཞག་ཡོད་པ་རེད། འདི་བཞིན་ཞིབ་ཆ་བྱས་ཏེ་འདོན་དུས། དུས་ཚོད་ཡུན་རིང་འགོར་ཡང་ཐབས་མི་འདུག ཁྱེད་རྣམ་པ་ནི་ཆོས་འདོད་དོན་གཉེར་ཅན་མ་འོངས་བསྟན་རྒྱུན་འཛིན་མཁན་རེད། ང་ལ་མཚོན་ན་ལོ་གྲངས་བདུན་ཅུ་དོན་གྲངས་ཀྱི་རིང་ལ། འདི་དག་གི་མང་དང་མང་གི་དུས་ཚོད་སྟོང་ཟད་དུ་བྱས་པ་རེད། ད་ལྟའི་ཐེངས་འདི་ཚོ་ནི་བྱས་པ་དོན་ལྡན་དང་ངལ་བ་འབྲས་ཅན་ཞིག་རེད་བསམ་ནས། སྤྲོ་བཞིན་དུ་གཟབ་གཟབ་བྱས་ཏེ་འདོན་གྱིན་ཡོད་པར་མ་ཚད། འདི་བཞིན་དུ་བྱེ་བ་ཕྲག་བརྒྱའི་འཇིག་རྟེན་ན། སྨིན་གྲོལ་དབང་གི་དཀྱིལ་འཁོར་བྱེ་བ་ཕྲག་བརྒྱའི་ཞལ་ཕྱེས་ཤིང་། སྐལ་ལྡན་འདུས་པའི་འཁོར་ཚོགས་དེ་བས་མང་བ་ལ་སྨིན་ཅིང་གྲོལ་བ་བྱེད་པའི་འདུན་པ་སྨོན་ལམ་ཡང་བྱེད་ཀྱིན་ཡོད། འདི་ལ་བསྙེན་སྒྲུབ་ཡན་ལག་བཞི་ལྡན་སོགས་མང་པོ་ཞིག་གསུང་རྒྱུ་ཡོད་ཀྱང་། དུས་ཚོད་མི་འདུག མཚམས་འདིར། ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སིདྡྷི་ཧཱུྃ༔ སོགས་རྗེས་ཟློས་དང་མིག་དར་བསལ་རིག་ཙཀ་ཀྱི་དབང་བསྐུར་བ་སོགས་ཀྱི་ཟུར་འཕྲོས། ཤེས་རབ་ཡེ་ཤེས་ཀྱི་དབང་འདི་བླ་མེད་ཐུན་མོང་གི་གོང་མའི་དབང་ཐམས་ཅད་ལ་འབྱུང་བ་རེད། མཆོག་དབང་གོང་མ་གསུམ་གྱི་ནང་ནས་གཅིག་ཡིན། ཤེས་རབ་ཡེ་ཤེས་ཀྱི་དབང་འདི། རྟེན་ལས་རིགས་ཆོས་དང་ཡེ་ཤེས་ཀྱི་ཕྱག་རྒྱ་ལ་ཤེས་རབ་མའི་སྒྲ་ཡིས་མཚོན་པ་རེད། དེ་ལྟར་མཚོན་པ་ལས་བརྟེན་པ་དགའ་བཞིའི་ཡེ་ཤེས་བསྐྱེད་པའི་དབང་ཡིན་པས་ན། ཤེས་རབ་ཡེ་ཤེས་ཀྱི་དབང་གསུངས་སོ། འདི་མཚོན་བྱེད་དཔེ་ཡི་ཡེ་ཤེས་ལ་བརྟེན་ཏེ་མཚོན་པར་བྱ་བ་དོན་གྱི་ཡེ་ཤེས་རྟོཊ་པའི་ཐབས་སམ་ལམ་དུ་གྱུར་བ་ཞིག་རེད། གསང་སྔགས་བླ་མེད་ཀྱི་ལམ་འདི། ངོ་བོའི་ཆ་ནས་བསྐྱེད་རྫོགས་གཉིས། ཉམས་ལེན་ཚུལ་གྱི་སྒོ་ནས་ཐབས་གྲོལ་གྱི་ལམ་གཉིས་ལ་འདུས་གསུངས་བ་ནི། ཐབས་ཀྱིས་ངེས་པའི་ལམ་དང་ཤེས་རབ་ཀྱིས་རྣམ་པར་གྲོལ་བའི་ཐབས་གྲོལ་གྱི་ལམ་གཉིས་ཀ་ནི། དཔེ་བཞག་ནས་གསུང་དུས། མཀྵི་ཀའི་སྦྱོར་བས་ལྕགས་ཁམས་ཡུད་ཙམ་གྱིས་གསེར་དུ་བསྒྱུར་བ་དང་རིན་པོ་ཆེ་ཀོ་སྟུ་བྷ་དང་ལྷན་ཅིག་བཞག་པའི་རྡོ་ཁམས་རིམ་གྱིས་གསེར་དུ་འགྱུར་བའི་དཔེ་དེ་གཉིས་ཀྱིས། རིམ་དང་གཅིག་ཆར་གྱི་དབྱེ་བ་ཕྱེས་ནས་གསུངས་ཡོད་པ་རེད། དེ་ཡིན་ན། ཐབས་གྲོལ་གྱི་ལམ་ཟེར་དུས། ཐབས་ཤེས་ཀྱི་བྱེད་པ་གཙོ་ཆེ་ཆུང་གིས་དེ་ལྟར་བཞག་པ་མ་གཏོགས། གཅིག་ཤོས་ལ་གཅིག་གི་གནད་མ་ཚང་པ་མིན་གསུངས་ཡོད། སྤྱིར་རྫོགས་རིམ་འདི་ལ་རྣམ་གྲངས་མང་ཡང་། ཉམས་སུ་ལེན་ལུགས་ཀྱི་ཐད་ནས་ཡིད་ཀྱི་དམིགས་པ་དང་། ལུས་ངག་གི་རྩོལ་བ་ལ་བརྟེན་ནས་མཚན་བཅས་ཀྱི་རྫོགས་རིམ་ཞིག་དང་། དེ་ལྟ་བུའི་རྩོལ་བ་མི་དགོས་པའི་མཚན་མེད་ཀྱི་རྫོགས་རིམ་གཉིས་སུ་འདུས། ཉམས་སུ་བླང་བྱའི་ཐད་ནས་ཡིན་ན། འོད་གསལ་སྒྱུ་ལུས་ཟུང་འཇུག་གསུམ་ཡིན་པས། རྟེན་རྩ་རླུང་ཐིག་ལེ་ལ་གནད་དུ་སྨིན་པའི་བུམ་ཅན་དང་། ཕྲ་མོའི་ཐིག་ལེ་ཞི་བདེ་འབར་འཛག་ལ་སོགས་དང་། བརྟེན་པ་འོད་གསལ་གྱི་ཐིག་ལེ་ལ་གནད་དུ་སྣུན་པ་ནི། སྟོང་གཟུགས་དང་ཐོད་རྒལ་སོགས་ཐམས་ཅད་པོས་མཐར་རྡོ་རྗེ་བཞི་ཡི་ཡེ་ཤེས་མངོན་དུ་བྱས་ནས། ལས་ཀྱི་རླུང་དེ་ཉིད་དབུ་མར་སྟིམ་སྟེ། དག་པའི་ཡེ་ཤེས་མངོན་དུ་བྱེད་པ་ལ་དངོས་རྒྱུད་ཐམས་ཅད་ནས་འཇུག་གིན་ཡོད་པ་རྐྱང་རྐྱང་རེད། དེ་ཡིན་ན། ཐིག་ལེ་འཇུ་འདུལ་གྱི་ཐད་འདི་ནས། ཀུན་རྫོབ་རྒྱུའི་ཐིག་ལེ་ལ་བརྟེན་ནས་ཐུན་མོང་གི་དངོས་གྲུབ་ཕྲན་ཚེགས་རེ་དང་། སེམས་གནས་ཀྱི་ཏིང་འཛིན་རེ་ལམ་དུ་བྱེད་ཐུབ། དེ་ནི་དེའི་ཐབས་ཙམ་ཞིག་བསྟན་པ་ཡིན་རྒྱུ་དང་། དོན་དམ་འོད་གསལ་གྱི་ཐིག་ལེ་དེ་ཡིས་མཆོག་གི་དངོས་གྲུབ་ཐོབ། དེ་ནི་དེའི་ལམ་ཡིན་པས་རེད། མཆོག་གི་དངོས་གྲུབ་ཟེར་བ་དེ་གང་རེད་སྙམན། འབྲས་བུ་ཆོས་སྐུ་དང་ནི་ཡེ་ཤེས་རང་བབ་ཀྱི་བསམ་གཏན་མངོན་དུ་གྱུར་རྒྱུ་དེ་རེད། རྫོགས་ཆེན་མན་ངག་སྡེ་ལས། ཀུན་རྫོབ་ཀྱི་ཐིག་ལེའི་བྱེད་པ་ལམ་གྱི་ངོ་བོར་མི་འཛིན། ལམ་གྱི་ངོ་བོ་ནི་དོན་དམ་གྱི་ཐིག་ལེ་ལ་བརྟེན་ནས་འོད་གསལ་སྒོམ་པ་དེ་ལམ་གྱི་ངོ་བོ་ལ་འཛིན་པ་རེད། དེས་ན་ཐབས་ལམ་གྱི་སྐབས་སུ་རིག་མར་བསྟེན་རྒྱུ་ལ་སོགས་པ་ཅིའི་ཕྱིར་གསུངས་བ་རེད་བསམ་ན། འདི་ཀུན་རྫོབ་ཀྱི་ཐིག་ལེ་ལ་ཞེན་པ་ཆེ་བའི་གང་ཟག་དེ། ཐབས་དེ་ལ་བརྟེན་ནས་འདུལ་བའི་སྒོ་མ་འགག་ཙམ་མམ། སྐལ་བ་མ་ཆད་ཙམ། སྐལ་དམན་ནམ་སྐལ་ཆད་རྗེས་འཛིན་ཙམ་གྱི་ཆེད་དུ། ཐབས་ཀྱི་བྱེ་བྲག་གི་ནང་དུ་ཚུད་ཙམ་ཞིག་ལ་གསུངས་པ་རེད། དེ་ཙམ་མ་གཏོགས་ལམ་བཟང་ཆེ་ནས་བདམས་ཡོང་བ་མ་རེད། དེ་མིན་དོན་གང་ཡིན་ཟེར་ན། ཤེས་ནས་དོན་དམ་གྱི་ཐིག་ལེ་ལ་འཇུག་པའི་རིམ་པར་བརྟེན་པས་ཀྱང་གསལ་བོར་ངེས་ཐུབ་རྒྱུ་ཞིག་ཡིན། འདི་ཀུན་མཁྱེན་ཆེན་པོས་སྒྲ་ཐལ་འགྱུར་གྱི་ལུང་དྲངས་ནས། ཚིག་དོན་མཛོད་ཀྱི་རྡོ་རྗེའི་གནས་ལྔ་བའི་ནང་གསུངས་ཡོད་པ་དེར་ཞིབ་པར་གཟིགས་དང་མཁྱེན་ཡོང་། དེས་ན་འདི་གཅིག་ཆར་བའི་ལམ་རེད་དཔེ་མཀྵིའི་སྦྱོར་བ་ལ་བཞག་ནས་གོང་དུ་བཤད་མ་ཐག་པ་ལྟར་དུ། ལྕགས་ཡུད་ཙམ་གསེར་དུ་བསྒྱུར་བ་ལྟ་བུ་འདི་ལམ་མཆོག་མིན་དོན་ཅི་རེད་བསམ་ན། གང་ཟག་དབང་རྣོན་ཅིག་ཆར་བས་དེ་ལྟར་འགྲུབ་ཐུབ། རྨ་བྱར་དུག་གིས་གཟི་མདངས་བསྐྱེད་པ་ཅན་པོ། གོང་ནས་ཐབས་གྲོལ་གྱི་ལམ་གཉིས་གཅིག་ལ་ཅིག་ཤོས་ཀྱི་གནད་མ་ཚང་པ་མིན་ཟེར་མ་ཐག་པ་ལྟར་དུ། ཀུན་རྫོབ་ལ་བརྟེན་ཏེ་དོན་དམ་གྱི་ཡེ་ཤེས་མངོན་དུ་བྱས་པས་ན་ཅིག་ཆར་བ་གསུང་པ་རེད། བརྩོན་འགྲུས་ཅན། དབང་རབ། རྟོགས་སྒོམ་ཆིག་ཆོད་ཅན་གྱི་ཅིག་ཆར་བའི་ལམ། ཐབས་ཀྱི་སྤྱོད་པ་རྨད་བྱུང་གིས་རང་གནས་ཀྱི་ཡེ་ཤེས་བཙན་ཐབས་སུ་འཆར་ཏེ། བདེ་ཆེན་རྡོ་རྗེའི་སྐུ་འགྲུབ་སོང་བའི་དཔལ་ས་ར་ཧ་པ་དང་སློབ་དཔོན་པད་མ་འབྱུང་གནས་ལྟ་བུ་ཡིན་ན། སྨྲོས་མ་དགོས་པ་རེད། དེ་ཙམ་མིན་རུང་། རིག་འཛིན་འཇིགས་མེད་གླིང་བ་ལྟ་བུ་ཀུན་རྟོག་བཞོན་པ་ལས་རླུང་དང་བཅས་པ་བདེ་སྟོང་དྷུ་ཏུའི་དབྱིངས་སུ་སིམ་པའི་སྣང་ཆ་གསུངས་ཡོད་པ་ལྟར། རྩ་ཡི་འགྲོས་དག་རླུང་སེམས་ལས་སུ་རུང་། མགྲིན་པའི་རྩ་མདུད་གྲོལ། གང་སྣང་བརྡ་དང་དཔེ་ཆར་ཤར་པ་དེ་འདྲ་ཡིན་ན་མ་གཏོགས། མཀྵི་ཀིའི་སྦྱོར་བ་བྱེད་ཁུལ་བྱས་ཀྱང་སྦྱོར་སྟངས་མ་ཤེས། ལྕགས་གསེར་དུ་བསྒྱུར་རྒྱུ་ཕར་ཞོག ལྕགས་ནག་བཙའ་ཁོ་མ། སྔར་བས་ཇེ་ངན་དུ་སོང་སྟེ་གྲོང་མཐའི་ཉོབ་ལུད་ཀྱི་ནང་ན་གཡུག་འཇོག་རྒྱུ་ཅན་པོ་རེད་ན། འཇིག་རྟེན་པའི་རྒན་པོ་རྒན་མོ་བཟང་བ་དག་གི་ངོ་ཡ་མི་ཡོང་པ་ཞིག་ཀྱང་རེད་མི་སྲིད་པ་མ་རེད། དེ་དུས་མིང་དང་རུས་སོགས་ཀྱིས་མི་སྐྱོབས། དེ་བས་རིམ་གྱིས་པ་བརྟན་ཤག་ཤག་ཡིན་པས། རིན་པོ་ཆེ་ཀོ་སྟུ་བྷ་དང་ལྷན་ཅིག་ཏུ་བཞག་པའི་རྡོའི་ཁམས་རིམ་གྱིས་གསེར་དུ་འགྱུར་ཐབས། ཤེས་རབ་ཅན་གྱིས་ཐོག་མར་ཐོས་པ་ནས་འགོ་བཟུང་སྟེ་ཚུལ་གནས་ཐོས་དང་བསམ་ལྡན་གྱིས་སྒོམ་པ་ལ་སྦྱོར་བ། ལྟ་བས་གཏན་ལ་ཕབ། ལྟ་དོན་ཏིང་འཛིན་གྱིས་རྩལ་སྦྱང་རྒྱུ་སོགས་ལ་གོམས་པར་བྱས་ན། མཉམ་བཞག་དང་རྗེས་ཐོབ་ཀྱི་རྣལ་འབྱོར་ལ་བརྟེན་ནས་འཁྲུལ་རྟོག་རང་ཞིག་ལ་འགྲོ། ཀུན་རྟོག་གི་སེམས་གྲོལ་རིམ་བཞིན། དེ་དང་མཉམ་པོར་འགྲོགས་ནས། རླུང་ཁམས་ཀྱི་འཕོ་བ་ཐམས་ཅད་ཡེ་ཤེས་ཀྱི་དབྱིངས་སུ་གྲོལ་བ་ཆོས་ཉིད་ཡིན་པས་མཐར་གྱིས་མཐར་བྱུང་འཕོ་བའི་བག་ཆགས་མ་ལུས་ལོག་པ་འབྲས་བུའི་མཐར་ཐུག་ལ་གནད་གཅིག་ཏུ་འདུས་པར་བཞག་ཐུབ། འོད་གསལ་དོན་གྱི་ཡེ་ཤེས་ད་ལྟར་ངོས་ཟིན་ཐབས་བྱེད་པ་ལྟ་བ་མ་རྨོངས་བའི་ཁྱད་པར་རེད། ད་ལྟ་ནས་ངོས་འཛིན་པ་རྫོགས་ཆེན་ཁོ་ནའི་ཁྱད་ཆོས་རེད། མཚན་བཅས་མཚན་མེད་ཀྱི་རྫོགས་རིམ་གཉིས་ཀ་མཐར་ཐུག་མཚོན་བྱ་དོན་གྱི་ལྷན་སྐྱེས་ལ་ཐུག་ཀྱང་། གོལ་ས་ཡོད་མེད། དཀའ་སླ། མྱུར་བ་སོགས་ཀྱི་ཁྱད་པར་ཧ་ཅང་ཆེ། དེ་ལྟར་རིང་ལམ་ཞིག་ལ་བཟུང་ནས་རྩ་ཐིག་ལམ་དུ་བྱེད་པ་མཚོན་བཅས་དཔེའི་ཡེ་ཤེས་མྱུར་ལམ་དུ་འཛིན་པ་ནི། ཡུམ་གྱི་ནང་ན། གླང་པོ་རྙེད་ནས་གླང་རྗེས་འཚོལ། །ནོར་བུ་བཞག་ནས་འཆིང་བུར་རེ། །ཞེས་གསུངས་བ་དང་གཅིག་མཚུངས་རེད། སྣང་གསུམ་འཕོ་བའི་བག་ཆགས་སྦྱང་རྒྱུ་དེ་ཡང་། མཐའ་ཅིག་ཏུ་ཐབས་ལམ་ཕྱོགས་གཅིག་པ་ཁོ་ནར་ལ་ལྟོས་པ་ཞིག་མ་རེད། མཚན་མེད་ཀྱི་འོད་གསལ་དོན་གྱི་ཡེ་ཤེས་ལམ་དུ་བྱེད་དུས་མཚན་བཅས་ཀྱི་ལམ་མི་དགོས། རིག་པའི་ཡེ་ཤེས་གདོད་ནས་འཕོ་འགྱུར་བྲལ་བ་དེའི་ངང་ལ་གོམས། གོམས་པ་ཀློང་དུ་གྱུར་སོང་ན་སྣང་བ་གསུམ་གྱི་འཕོ་བ་ཐམས་ཅད་རང་དག་ལ་སོང་ནས་འཕོ་མེད་དོན་གྱི་ཡེ་ཤེས་ཀྱི་སྐུ་འགྲུབ་པ། བསྐྱེད་རྫོགས་ཐབས་གྲོལ་མཚན་བཅས་མཚན་མེད་སོགས་ལམ་ཐམས་ཅད་ཀྱི་གནད་དེར་འདུས། འདི་ནས་དམིགས་བསལ་བོག་འབྱིན་ལས་ཀྱི་ཕྱག་རྒྱའི་ལམ་དང་སྦྱར་ཏེ་འདུ་ཤེས་གསུམ་ལྡན་གྱི་སྙོམས་འཇུག་གསུངས་པའི་སྐབས་འདི་ལ། འདོད་ཆགས་ཆེན་པོ་ཞེས་པའི་སྒྲ་ཡིས་བདེ་བ་དང་སྟོང་པ་དབྱེར་མེད། མཐའ་བཞི་གྲོལ་བའི་དེ་ཁོ་ན་ཉིད། སོ་སོར་རང་གི་རིག་པས་མྱོང་བྱ་དེ་བསྟན་པ་རེད། དེ་འདུས་བྱས་འགྱུར་བདེ་ཞིག་དང་ཕུང་པོ་རྣམ་དཔྱད་ཀྱིས་སྟོང་པ་ཞིག་དང་གཉིས་སྦགས་ཨེ་ལོ་ལྟས་པ་དང་མི་འདྲ་བར། འདི་ཡས་བབས་དང་མས་བརྟན་གྱི་རྒྱུ་འབྲས་གཉིས་སུ་ཕྱེས་ཏེ་ལུགས་འབྱུང་ལྡོག་གི་དགའ་བཞིའི་གནས་ཀྱི་ཆ་ནས་ངོས་བཟུང་བའི་སྟོང་བཞི་དང་རེ་རེ་བཞིན་དུ་སྦྱར་བ་བརྒྱད་ཉིས་བཅུ་དྲུག དེ་ཉིད་རྣམ་པ་བཅུ་དྲུག་གི་རང་བཞིན། ཐིག་ལེ་བཅུ་དྲུག་དང་དགའ་བ་བཅུ་དྲུག་ལ་ཤར་བ། རྡོ་རྗེའི་ལུས་ཀྱི་གནས་ཡུལ་ཉེར་བཞིའི་དཔའ་བོ་མཁའ་འགྲོའི་གྲོང་ཁྱེར་ལ་འཇུག་པའི་ཆ་དེ། སྲོག་རྩོལ་གྱི་ནུས་པས་འཆིང་ཡོང་དུས། ཏིང་འཛིན་གྱི་སྟོབས་ཀྱིས་རྩ་འཁོར་ལོ་སོ་སོ་ལས་གྱེས་པའི་རྩ་ཕྲན་བདུན་ཁྲི་ཉིས་སྟོང་གསུངས་པ་རེད། དེའི་རྩ་ཕྲན་མང་པོ་དེ་རླུང་ཟིན་པ་དང་མཉམ་དུ་དྭངས་མ་གསུམ། དྭངས་མ་གསུམ་པ་དང་མཉམ་དུ་བདེ་བ་ཟིན་ནས་འཕོ་བྲལ་ཟག་མེད་ཀྱི་བདེ་བ་མངོན་དུ་གྱུར་ནས། འཁོར་ལོ་སོ་སོའི་གནས་ཐམས་ཅད་འཕེལ་ཞིང་གང་བས། ལམ་རྟགས་ཀྱི་ཡོན་ཏན་ཡང་དེ་བཞིན་མངོན་དུ་གྱུར། རེད་དེ་དགའ་བ་བཅུ་དྲུག་ཉམས་སུ་མྱོང་བ་ལྷན་སྐྱེས་འཕོ་མེད། ཀུན་རྟོག་བརྒྱད་བཅུའི་རྣམ་རྟོག་ཐམས་ཅད་འགག་པའི་མཐའི་འོད་གསལ། སྟོང་ཉིད་དོན་གྱི་ཡེ་ཤེས་དངོས་སུ་བརྙེས་པ་དེ། དབང་བཞི་བའི་སྐབས་སུ་རེད། དེས་ན་དབང་གསུམ་པའི་དཔེའི་ཡེ་ཤེས་འདིས། དབང་བཞི་བའི་དོན་གྱི་ཡེ་ཤེས་མཚོན་དགོས་པས། དཔེ་དོན་རྣམ་པ་འདྲ་རུང་གི་ཐོག་ནས་འདི་ན་དོན་གྱི་ཡེ་ཤེས་ཇི་བཞིན་མངོན་དུ་གྱུར་བའི་མོས་པ་མཛོད་གསུངས་པ་རེད། དབང་གསུམ་པ་ཤེས་རབ་ཡེ་ཤེས་ཀྱི་དབང་འདིའི་དབང་རྟེན་ལས་ཀྱི་ཕྱག་རྒྱ་སྒྲ་ཇི་བཞིན་པ་ལ། ཚངས་པར་སྤྱོད་པའི་རྟེན་ཅན་ཞུགས་རུང་མི་རུང་གི་བཞེད་ཚུལ་མང་ན་ཡང་། གང་ལྟར་གྲོལ་བ་དོན་གཉེར་གྱི་གང་ཟག་ཡིན་ཕྱིན་རྟེན་ཁྱིམ་སྔགས་པ་ཡིན་ཡང་ཐབས་ཀྱིས་མ་ཟིན་པའི་ཉོན་མོངས་རང་གར་སྤྱད་ན་ནི། མིང་ལ་སྔགས་པ་ཐོགས་བྱེད་སྔགས་སྡོམ་དབང་གི་སྐབས་ནས་ཞུས་པ་ཡིན་དུས། དབང་གི་སྔོན་འགྲོའི་སྡོམ་བཟུང་གི་སྐབས་ནས་རྩོམ་སྟེ་སྡོམ་གསུམ་ཡར་ལྡན་དུ་སྒྲུབ་པ་ཡིན་ན། གང་ཞིག་ཉམས་ཀྱང་སྡོམ་པ་དེ་ཚོའི་རང་བཞིན་ཡེ་ཉམས་ལ་འགྱུར་མི་སྲིད་རྒྱུ་མ་རེད། སྡོམ་པ་ཞུ་རྒྱུའི་ཐད་ནས་ཐ་མལ་པ་ཞིག་དང་མ་འདྲ་བའི་སྔགས་ཀྱི་སྡོམ་པ་སྡོམ་གསུམ་ཡར་ལྡན་ཞིག་ཞུས་ན་ཡང་། སྤྱོད་པ་ཐ་མལ་པ་དང་འདྲ་འདྲ་བྱས་ཏེ་སྔགས་པའི་བསྲུང་བྱ་གཅིག་ཀྱང་མ་སྲུང་ན། ཉེས་ལྟུང་ལ་རིན་པ་བྱིན་ནས་རང་གིས་ཉོས་པ་དང་གཅིག་མཚུངས་རེད། དེས་ན་རྟེན་ཁྱིམ་པ་སྔགས་པ་ཡིན་ཆོག་དུས། རབ་བྱུང་སྨོས་མ་དགོས་པ་རེད། གལ་ཏེ་གསེར་འགྱུར་གྱིས་ལྕགས་གསེར་ལ་དེ་མ་ཐག་བསྒྱུར་བའི་ནུས་པ་མེད་ན། མིང་ལ་ཅིག་ཆར་ཟེར་ཡང་། མཐར་དགོས་རྒྱུའི་དོན་ལ་དེ་ལྟར་མིན་པས་ན། བརྟན་ཤག་ཤག་རིམ་གྱིས་པ་མང་ཆེ་བའི་ཚོད་རེད་ཟེར་བ་ཡིན། འཁོར་འདས་མཉམ་ཉིད་ལ་རྟོགས་པའི་ལྟ་བས་ཐག་ཆོད། སྒོམ་པས་འདུ་ཤེས་གསུམ་ལྡན་གྱི་ཏིང་འཛིན་གནད་ཐོག་ལ་ཕེབས། སྤྱོད་པ་བླང་དོར་དྲིལ་བའི་རྨད་བྱུང་བརྟུལ་ཞུགས་ཀྱི་སྤྱོད་པ་གཏན་འགན་ལམ་དུ་བླངས་ཏེ། གོང་ནས་བཤད་པ་ལྟར་དུ་ས་ར་ཧ་པ་དང་པདྨ་ཀ་ར་སོགས་མཚན་གཞིར་བཞག་པ་ཅན་པོ་འདྲ་འདྲ་ཡིན་ན་ནི། ཕྱི་རོལ་ངུར་སྨྲིག་རྟགས་ཀྱི་ཆ་ལུགས་ཙམ་འཆང་བའི་རྟེན་ལ་ལྟོས་ནས། དེ་ཟབ་ལམ་བསྒྲུབ་སར་ཞུགས་པའི་སྐལ་བ་མེད་པ་ཞིག་ལ་གོ་སོང་ན། གོ་ནོར་རེད། ལམ་གོང་འོག་ཐམས་ཅད་ཉོན་མོངས་རང་མཚན་སྤོང་བར་མཁས་གྲུབ་ཐམས་ཅད་ཞལ་མཐུན་པ་ཡིན་པས་ན། དེ་ནི་ཐབས་ཀྱི་མཐར་ཕྱིན་པའི་ཚངས་སྤྱོད་ཀྱི་རྒྱལ་པོ་ཡང་ཡིན་པ་དེ་འདྲ་ཞིག་རེད། མཚམས་འདིར། ཧྲཱིཿ གཞི་དབྱིངས་ཀ་དག་གཉུག་མའི་དྭངས་ཤེལ་ལས། །སོགས་ཚིག་དབང་རིན་པོ་ཆེ་གཙོས་པའི་དངོས་གཞིའི་དབང་བསྐུར་གྱི་ཟུར་འཕྲོས། ཉམས་སུ་ལེན་པ་ལ་དབང་ཞིང་སྣང་བཞི་མཐར་ཕྱིན་ནས་འཇའ་ལུས་འཕོ་ཆེན་གཞོན་ནུ་བུམ་པའི་སྐུར་བྱང་ཆུབ་པའི་རྟེན་འབྲེལ་བསྒྲིགས་པ་ཡིན་ནོ། གསུངས་པ་དེས་ཅི་ཞིག་བསྟན་ཡོད་ན། དབང་བཞི་བ་ཚིག་དབང་རིན་པོ་ཆེ་རང་གཞུང་ཆོག་ཁྲིགས་ཀྱི་ངོ་སྤྲོད་དང་བཅས་པ་སོང་བ་རེད། འདིའི་དབང་བཞིའི་ནང་གི་དང་པོ་བུམ་པའི་དབང་དེ། སྐུ་རྡོ་རྗེ་སྤྲུལ་སྐུའི་ངོ་བོ་བླ་མ་དང་གཉིས་སུ་མེད་པའི་དཀྱིལ་འཁོར་གྱི་ལྷ། གདན་གསུམ་ཚང་པའི་རྣམ་པར་བཞུགས་པའི་མདུན་ནས་ཞུས་པ་ཡིན། གཉིས་པ་གསང་བའི་དབང་ནི། གསུང་རྡོ་རྗེ་ལོངས་སྐུའི་ངོ་བོ། བླ་མ་ཡབ་ཡུམ་གྱི་སྐུ་ལས་སམ། རྩ་ཡིག་བདུད་རྩིའི་དཀྱིལ་འཁོར་ནས་ཞུས་པ་དང་། གསུམ་པ་ཤེས་རབ་ཡེ་ཤེས་ཀྱི་དབང་ནི། གོང་དུ་སོང་མ་ཐག་པ་ཐུགས་རྡོ་རྗེ་ཆོས་སྐུའི་ངོ་བོ། ལྷ་དང་བླ་མའི་རྣམ་པར་ཤར་བ་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་ལས་ཞུས་པ་ཡིན། དབང་བཞི་བ་འདི། ཡེ་ཤེས་རྡོ་རྗེ་ངོ་བོ་ཉིད་སྐུའི་བདག་ཉིད་ཅན་གྱི་བླ་མ་ལས། དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ། བསྐུར་ཐོབ་བྲལ་བའི་གནས་ལུགས་དོན་གྱི་དབང་དེ། མ་སྩལ་རང་ལ་རྫོགས་པའི་དབང་རང་རྫོགས་སུ་ངོ་སྤྲད་ནས་ཐོབ་དགོས་རྒྱུ་ཞིག་རེད། འདིའི་དབང་བཞི་བ་ཚིག་དབང་རིན་པོ་ཆེ་འདི་ལ་ནང་གསེས་ཀྱི་དབྱེ་བ་ཕྱེས་ནས་ཞིབ་ཏུ་བཤད་ཡོང་ན། འདི་ལ་དབྱེ་བའི་རྣམ་པ་འགའ་ཞིག་ཡོད། ཚིག་གི་བཞི་པ། དོན་གྱི་བཞི་པ། རྟེན་ཅན་གྱི་བཞི་པ། ལམ་གྱི་བཞི་པ། ད་དུང་དེའི་ཐོག་ཏུ་འབྲས་བུའི་བཞི་པ་ཟེར་རྒྱུ་ཞིག་དང་རྣམ་པ་ལྔ་ཡོད། དེའི་ནང་ནས་ཚིག་གི་བཞི་པ་གསུངས་པ་དེ། སྔར་དབང་གསུམ་པ་ཤེས་རབ་ཡེ་ཤེས་ཀྱི་དབང་གི་ཡས་བབས་ཀྱི་དགའ་བཞི་རྫོགས་པའི་མཐའ་དེར། ཐབས་ཀྱིས་ལྡོག་པའི་མས་བརྟན་གྱི་དགའ་བཞི་རྫོགས་པའི་མཐའ་མར་ཉམས་སུ་མྱོང་བའི་དཔེའི་ཡེ་ཤེས་དེ་དང་། རང་སེམས་ལྷན་ཅིག་སྐྱེས་པའི་དོན་གྱི་ཡེ་ཤེས་དེ་གཉིས་ཀ་རོ་གཅིག་གཉིས་མེད་དུ་མངོན་དུ་གྱུར་བ་དེ་ཉིད། ཚིག་གིས་བརྡ་འམ་ངོ་སྤྲད་པ་རེད། དེ་ལ་ཚིག་གི་དབང་བཞི་པ་གསུངས་སོ། དེའི་འཕྲོར་རྟེན་ཅན་གྱི་བཞི་པ་གསུངས་རྒྱུ་དེ། གལ་ཏེ་རང་བབ་ཀྱི་ཡེ་ཤེས་ངོས་མ་ཟིན་ཐབས་ཟད་ན། ལས་རྒྱར་རྟེན་པའི་ཐབས་ལམ་དང་འབྲེལ་བ་དེ་རྟེན་ཅན་གྱི་བཞི་པ་ཡིན། གང་ལྟར་ཡང་བརྩོན་པའི་ཤུགས་ཀྱིས་ཚོགས་སྦྱོར་ལ་སོགས་པའི་ལམ་གྱིས་གོམས་པར་བྱེད་པ་དེ་ལམ་གྱི་བཞི་པ་རེད། འབྲས་བུའི་བཞི་པ་ནི། མས་བརྟན་དགའ་བ་བཅུ་དྲུག་གི་མཐའ་ལ་ས་ལམ་རྫོགས་པའི་སྐད་ཅིག་ལ་སྐུ་བཞི་ཡེ་ཤེས་མངོན་དུ་བྱེད་པ་དེ་ཡིན། འདི་ནས་ཚིག་གི་བརྡ་ཡིས་དོན་གྱི་ཡེ་ཤེས་ལ་སྦྱོར་བ་འམ་དབང་རྣོན་གཅིག་ཆར་པ་དབང་དུས་འདི་ཉིད་ལ། ས་ལམ་གདན་ཐོག་གཅིག་ཏུ་ཆོད་ཅིང་གྲོལ་བ་བྱེད་པ་ཡོད་དགོས་པ་ཡིན་པས། འདི་རིག་པ་རྩལ་གྱི་དབང་ཆེན་ནམ་ཡེ་ཤེས་རྒྱལ་ཐབས་ལུགས་ཀྱི་དབང་ཡང་རེད། འདིའི་དབང་གི་ངོ་བོ་དེ་གང་ཡིན་ན། རང་གི་སེམས་ཉིད་ངོས་བཟུང་དང་བྲལ་བའི་སེམས་ཀྱི་རང་ངོ་མཐོང་བ་དེ་ཉིད་རེད། ཇི་ལྟར་བསྐུར་བ་དེ། ཐབས་ལ་བརྟེན་པའི་ཤེས་རབ་ཁྱད་པར་ཅན་གྱིས་ངོ་སྤྲད་པ་སྟེ་བརྡ་རྡོ་རྗེ་སེམས་དཔའི་མེ་ལོང་གིས་མཚོན་པར་བྱས་ཏེ། ཆོས་དབྱིངས་བློ་འདས་ཁྱབ་གདལ་ཆེན་པོའི་དོན་དབང་དེ་བསྐུར་བ་ཡིན་པས། བརྡ་རྡོ་རྗེ་སེམས་དཔའི་མེ་ལོང་གིས་དོན་ཆོས་དབྱིངས་སྐྱེ་འགག་བྲལ་བ་ཇི་ལྟར་མཚོན་ཟེར་ན། དབྱིངས་ཀ་དག་དྭངས་ཤེལ་ལྟ་བུ་ལ། འོད་གསལ་ལྷུན་གྲུབ་རང་ཆས་སུ་ཡོད་པ་དེ་རང་མདངས་འཇའ་ཟེར་གྱིས་མཚོན་པར་བྱས་པ་རེད། འདིར་རྡོ་རྗེ་སེམས་དཔའ་ཞེས་པའི་སྒྲ་དོན་ཇི་ལྟར་འབྱོར་སྙམ་ན། དབྱིངས་ཀ་དག་གི་གདོད་མའི་གནས་ལུགས་གང་དུ་ཡང་འགྱུར་བ་མེད་པས་ན་རྡོ་རྗེ་དང་། དེ་ཉིད་ནང་གསལ་ཐིམ་ལ་མ་རྨུགས་པའི་ཡེ་ཤེས་དྭངས་ལ་སྒྲིབ་པ་མེད་པས་ན་སེམས་དཔའ་གསུངས་པ་རེད། ཡེ་ཤེས་ཀྱི་རང་མདངས་སྣ་ཚོགས་འཆར་ནུབ་ལ་འགག་པ་མེད་པར་མེ་ལོང་ལྟ་བུ་ཞིག་ཡིན་པས་ན་མེ་ལོང་སྟེ། དཔེ་གཅིག་དང་བརྡ་གཅིག་གིས་མཚོན་པའི་རང་བྱུང་རྡོ་རྗེ་སེམས་དཔའི་མེ་ལོང་། ཡེ་ཤེས་མིག་གཅིག་དྲི་མ་མེད། །གསུངས་རྒྱུའི་དོན་དང་ལྡན་པའི་ངོ་སྤྲོད་མཛད་ན། གཞི་དབྱིངས་ཀ་དག་གཉུག་མའི་ཡེ་ཤེས། གཞི་གནས་ཡེ་ཤེས་གསུམ་ལྡན་དུ་བཞུགས་པ། མན་ཤེལ་རིན་ཆེན་ཟུར་བརྒྱད་གསུངས་པ་རེད། རང་བཞིན་གྱིས་དག་ཅིང་སྒྲིབ་གཡོག་བྲལ་བ། ཕྱི་ནང་མེད་པར་གསལ་བ་འདིས། ནང་གསལ་སྐུ་གསུམ་འདུས་པའི་ཆོས་སྐུ་དེ་མཚོན་པ་རེད། དེའི་ནང་གསལ་གྱི་རང་མདངས་ཤེས་རབ་སྲོག་ཏུ་གྱུར་བའི་རླུང་ཡན་ལག་བཞི་ལྡན་ལ། གདངས་ཕྱི་གསལ། གཞི་སྣང་ལྷུན་གྲུབ་རིག་པའི་འཇའ་ཟེར་ཤར་ཡོང་དུས། གཟུགས་སྐུ་གཉིས་གདུལ་ཞིང་དང་བཅས་པ་སྣང་བའི། མཚན་ཉིད་འཛིན་པའི་ཡེ་ཤེས་དང་། ཡུལ་ལ་ཁྱབ་པའི་ཡེ་ཤེས། དེ་རྐྱེན་ལས་ཤར་བའི་འཇའ་འོད་ཁ་དོག་ལྔ་ལྡན་དུ་སྣང་བ་འདིས་མཚོན་པ་ཡིན་ན། གཞི་ཀ་དག་དང་ལྷུན་གྲུབ། ལམ་ཁྲེགས་ཆོད་དང་ཐོད་རྒལ། འབྲས་བུ་སྐུ་དང་ཡེ་ཤེས་ཀྱི་བདག་ཉིད་དུ། འདི་བླ་མེད་ཐུན་མོང་དང་སྒོ་བསྟུན་ཡོང་ན། སྦྱང་གཞི་བདེ་གཤེགས་སྙིང་པོ་ཡེ་ནས་དྲི་མས་མ་གོས་པ་ཀ་དག་ཁྲེགས་ཆོད་ཀྱི་དགོངས་པའི་ཀློང་དུ། སྦྱང་བྱ་གློ་བུར་གྱི་འཁྲུལ་རྟོག་བག་ཆགས་དང་བཅས་པ། སྦྱོང་བྱེད་ཀ་དག་སྟོང་བའི་འོད་གསལ་དང་། ཐོད་རྒལ་སྣང་བའི་འོད་གསལ་ལ་བརྟེན་ནས། སྦྱངས་འབྲས་སྐུ་གསུམ་ལྷུན་རྫོགས་ཀྱི་གདོད་མའི་གཞི་ཀློང་གཞི་འབྲས་དབྱེར་མེད་ཀྱི་ངོ་བོར། སྐད་ཅིག་གཅིག་གིས་ཀུན་བཟང་ཆོས་དྲུག་གི་སངས་རྒྱས་པ་དེ་རེད། འདི་བཤད་ཚུལ་གཞན་ཞིག་ནི། གཞི་ཀ་དག་གིས་བྱས་ན། ལམ་ཁྲེགས་ཆོད་ཀྱིས་བསྐྱོང་པས་འབྲས་བུ་རགས་ལུས་རྡུལ་ཕྲན་དུ་དེངས་རྒྱུ་ཞིག་དང་། གཞི་ལྷུན་གྲུབ་གྱིས་བཟུང་ན། ལམ་ཐོད་རྒལ་ལ་བརྟེན་ནས་འབྲས་བུ་འོད་ལུས་འཕོ་ཆེན་གྱི་སྐུར་བཞེངས་བ། མདོར་ན་སྟོང་བའི་འོད་གསལ་དང་། སྣང་བའི་འོད་གསལ་གྱི་ལྡོག་ཆའི་ཕྱེས་པའི་ཉམས་ལེན་རྩལ་འདོན་དང་ནི། སྣང་བཞིའི་བགྲོད་པ་ལུགས་འབྱུང་ལྡོག་གི་ཁྱད་པར་མ་གཏོགས། སྐུ་གསུམ་ལམ་སྣང་དུ་ཤེས་ཏེ་སེམས་ཉིད་ཆོས་སྐུར་དྲིལ་བ་ངོ་བོ་གཅིག་གི་སྣང་ཚུལ་ཙམ་ཞིག་རེད། ཀ་དག་དང་ལྷུན་གྲུབ་གཉིས་ཀ་ཡང་། གདུལ་བྱར་བསྟན་དུས་སྣང་སྟོང་གི་ཆ་ནས་ཕྱེས་པ་ལས། ཀ་དག་སྟོང་བ་ཆེན་པོའི་དགོངས་པ་ངོ་མའི་ཆ་ནས་གཞལ་ཡོང་ན། ལྷུན་གྲུབ་དེ་ལོགས་སུ་ཐ་དད་པ་ཞིག་མེད། དེས་ན་གཞི་ཀ་དག་ལྷུན་གྲུབ་ཐ་དད་མ་ཡིན་དབྱེར་མེད་ཡིན་པས། ལམ་ཁྲེགས་ཆོད་ཐོད་རྒལ་ཟུང་དུ་འབྲེལ་བས། འབྲས་བུ་གང་ཞིག་མངོན་དུ་གྱུར་བྱ། རིག་པ་གསལ་སྟོང་བརྗོད་མེད་ཡུལ་དང་ཡུལ་ཅན་གཉིས་མེད་ཆོས་དབྱིངས་ཐིག་ལེ་ཉག་གཅིག་ཡིན་པས། འདི་ལ་སྐུ་བཞི་བོ་ཚང་ཞིང་། རྫོགས་པ་ཆེན་པོའི་གཞི་ལམ་འབྲས་གསུམ། ལྟ་སྒོམ་སྤྱོད་གསུམ་གྱི་གནད་ཐམས་ཅད་མ་ཚང་བ་མེད་པར་འདུས་པ་རེད། འདི་གཞི་ལམ་འབྲས་གསུམ་དུ་ཕྱེས་ཡོང་ན། འོད་གསལ་གཉུག་མ་འཕོ་འགྱུར་དང་བྲལ་བའི་ཡེ་ཤེས་དེ་ཉིད། ཡེ་ནས་སྐད་ཅིག་ཀྱང་འབྲལ་མ་མྱོང་པ་རང་རྒྱུད་ལ་བཞུགས་པས་གཞི་དང་། དེ་ཉིད་མཚན་ལྡན་བླ་མས་རྒྱུད་ལུང་མན་ངག་གི་ཉེར་མཁོའི་གདམས་པས་གནད་བཀྲོལ་ནས། ངོ་སྤྲད་པ་ཇི་བཞིན་དུ་ཉམས་སུ་བླངས་བའི་ཆ་ནས་ལམ། ཉམས་སུ་བླངས་ཏེ་འཁྲུལ་བ་རང་དག་ལ་སོང་། སྒྲིབ་གཉིས་གཞི་ཀློང་ལ་ཐིམ། འོད་གསལ་མ་དང་དབྱེར་མེད་དུ་གྱུར་པ་ལ་འབྲས་བུར་བཞག་པ་རེད། འདི་ལ་དགའ་རབ་རྡོ་རྗེའི་མན་ངག་ཚིག་གསུམ་གནད་བརྡེག ཛྙ་ན་སུ་ཏྲའི་བཞག་ཐབས་བཞི། ཤྲཱི་སེང་ཧའི་གཟེར་བུ་བདུན་པ་དང་བཅས་པ། སློབ་དཔོན་པདྨ་ཀ་རས་ངོ་བོ་རང་བཞིན་ཐུགས་རྗེ་གསུམ་གྱིས་མཚོན་པར་ངོ་སྤྲད་པ། རྒྱལ་བ་ཀློང་ཆེན་པས་གནད་འགྲོལ། འགག་སྡོམ། ཆིངས་སུ་བཅིངས་པ་དང་། ལ་བཟླ་བ་གང་ནས་གསུངས་ཀྱང་དགོངས་པ་གཅིག་གྱུར། མ་བཅོས་བཟོ་མེད། སྣང་སྟོང་མཐའ་བྲལ་གྱི་རིག་པ་རྗེན་པའི་རང་ངོ་རང་བབ་ཀྱིས་སྐྱོང་རྒྱུ་ལ་གནད་འདུས་པ་རེད། དེའི་མ་ཚད་དབུ་ཕྱག་རྫོགས་གསུམ་གང་ནས་བཤད་ཀྱང་། མཐར་འབབ་ས་རྫོགས་པ་ཆེན་པོར་ཡིན་པ་ནི་རྒྱལ་བ་ཀློང་ཆེན་པས་ཐེག་མཆོག་མཛོད་ཀྱི་ནང་ན། གང་ན་སངས་རྒྱས་ཐོབ་པ་དེ་ཐམས་ཅད། གསང་ཆེན་འདིའི་སྒོ་ནས་སངས་རྒྱས་པ་ཡིན་ཏེ། ཅིའི་ཕྱིར་ཞེ་ན། རིག་པ་མངོན་སུམ་གྱི་ཆོས་ཉིད་གཟིགས་ནས་སངས་རྒྱས་ཀྱི་དེ་ལས་གཞན་གྱིས་མ་རྒྱས་པའི་ཕྱིར་རོ། གསུངས་སོ། དེའི་འཕྲོ་ཞིག་ལ་སྤྲོ་བ་བསྐྱེད་པའི་ཆེད་དུ་ཡང་འདི་སྐད་དུ། དེ་ཡང་སྔོན་བསྐལ་བ་དུ་མ་ནས་ཚོགས་བསགས་པའི་མཐུས་བསྟན་པ་འདི་དང་གདོད་འཕྲད་ནས་རིང་པོར་མི་ཐོགས་པ་འཚང་རྒྱ་བ་ལ་འབྲས་བུའི་ཐུས་ཀ་ཟེར་བས། བསྟན་པ་འདི་དང་འཕྲད་པ་ཐམས་ཅད་མྱུར་དུ་སངས་རྒྱས་ཐོབ་སྟེ་གསུངས་ནས། འབྲས་བུའི་ཐུས་ཀ་དང་འཕྲད་པའི་ཕྱིར་རོ་ཞེས་རྟགས་བཀོད་ཡོད། ཐུན་མོང་གི་ཐེག་པ་དང་འཕྲད་པ་ཙམ་ལ་ཡང་། སངས་རྒྱས་མཆོད་པ་ལ་སོགས་པའི་དགེ་རྩ་སྔོན་ལ་སོང་ཡོད་ངེས་པ་ཡིན་ན། ཐུན་མིན་ཚེ་འདིར་མངོན་འཚང་རྒྱ་བའི་སྨིན་གྲོལ་གྱི་ལམ་འདི་འདྲའི་ཟབ་མོ་དང་འཕྲད་པ་ལ། སྔོན་བསགས་བསོད་ནམས་ཁྱད་པར་ཅན་ནམ་སྔོན་སྦྱོང་གི་ལས་འཕྲོ་ཡོད་པར་སྨོས་མ་དགོས་པ་རེད། དེའི་ཕྱིར་ན་རྫོགས་ཆེན་གྱི་གདུལ་བྱ་ཡིན་ན་དབང་རྣོན་ཡིན་པས་ཁྱབ་གསུངས་པ་ཡང་དོན་ལ་གྲུབ་པ་རེད། དེ་ལྟ་ན་གོང་དུ་སྒྲ་གཅན་འཛིན་གྱི་ཡུམ་སྟོད་དུ་ལུང་འདི་དྲངས་པ་ལྟར། རྒྱལ་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་དང་ངོ་བོ་གཅིག་ཅིང་། སྦས་དོན་ཡང་འབྱེད་ཀྱི་མན་ངག་གིས་གསལ་བར་བྱས་པའི། སྨྲ་བསམ་བརྗོད་བྲལ་བློ་འདས་རྫོགས་པ་ཆེན་པོ་སོ་སོར་རང་རིག་ཡེ་ཤེས་ཀྱི་སྤྱོད་ཡུལ་དུ་གྱུར་བ་དེ་ཉིད། ལྟ་བ་ལུང་རིགས་དང་འབྲེལ་བས་གཏན་ལ་ཕབ། སྒོམ་པ་ཅོག་བཞག་བཞིས་ངང་སྐྱོང་། འབྲས་བུ་སྐུ་དང་ཡེ་ཤེས་མངོན་དུ་བྱ་བ་ལ། ཁྲེགས་ཆོད་ཐོད་རྒལ་ཟུང་འཇུག་གི་ལམ་ནས་སྣང་བཞི་མཐར་ཕྱིན། ཟག་པ་དབྱིངས་སུ་ཟད། སྐུ་གསུམ་ལམ་སྣང་ལ་རྫོགས། གདོས་བཅས་འོད་དུ་དག་སྟེ། འཕོ་ཆེན་འཇའ་ལུས་རྡོ་རྗེའི་སྐུར་བཞེངས་ནས། ཀུན་བཟང་ཆོས་དྲུག་དང་། རྒྱུ་ལས་མ་བྱུང་བའི་འབྲས་བུ། ལུང་ལས་མ་བྱུང་བའི་མན་ངག སེམས་ལས་མ་བྱུང་བའི་སངས་རྒྱས་ཏེ་རང་བྱུང་གི་ཆོས་གསུམ་གྱིས། ཟག་མེད་རང་ངོ་ཤེས་པའི་དགེ་ཚོགས་ཀྱིས། ཚོགས་ཆེན་ཡེ་རྫོགས་ལ་གྱུར་ནས་སངས་རྒྱས་པ་རེད། སངས་རྒྱས་ཏེ་སླར་ཡང་འགྲོ་དོན་འཁོར་བ་མ་སྟོང་གི་བར་དུ། ཡིད་བཞིན་གྱི་ནོར་བུ་དང་བུམ་པ་བཟང་པོ་ལྟར། རྒྱ་ཆེ་ལ་རྒྱུན་མི་ཆད་པར་མངོན་སུམ་དུ་འགྲོ་བའི་དོན་ལ་སྤྲུལ་བ་སྣ་ཚོགས་ཀྱི་བྱིན་རླབས་བྱུང་ནས་དབུགས་མ་ཕྱིན་པ་དབུགས་འབྱིན་པར་མཛད། མ་གྲོལ་པ་གྲོལ་བར་མཛད། མ་བསྒྲལ་པ་བསྒྲལ་བར་མཛད་པ་རེད། དེ་ཡིན་ན། དབང་བཞི་བ་ཚིག་དབང་འདི་ནི། རྟོགས་པ་ཡེ་ཤེས་ཀྱི་དབང་རེད། དེ་ཡང་ཕྱི་ལྟ་བ། ནང་སྒོམ་པ། གསང་བ་རིག་པ་གསུམ་གྱི་ནང་ནས་རིག་པ་རྩལ་འདོན་གྱི་དབང་བསྐུར་བ་རེད་ཟེར་ན་ཡང་ཆོག་པ་ཞིག་རེད། ངོ་སྤྲོད་ཀྱིས་རང་ངོར་སྤྲད། མངོན་སུམ་གྱིས་དོན་ལ་བལྟ། ཤར་གྲོལ་གྱིས་གནད་ལ་བརྒལ་བ་སྟེ་གསུམ་ལ་ཕྱེ་ནས་ངོ་སྤྲད་པ་འདི་ལ། རིག་པའི་རྩལ་དབང་ཡང་ཟེར་བ་རེད་ལ། མན་ངག་ཆིག་ཆོད་ཆིག་རྫོགས་ཀྱིས་བྱིན་རླབས་བཙན་ཐབས་ཀྱིས་འཕོ་བའི་ཆ་ནས། རིག་པ་ཡེ་ཤེས་སྤྱི་བླུག་གི་དབང་གི་གོ་དོན་ཡང་འདི་ལ་ཚང་བ་རེད། མཚམས་འདི་ནས་རྣམ་པ་ཚང་མས་ལུས་གནད་སྐྱིལ་ཀྲུང་དྲང་པོར་མཛད་ནས་བཞུགས། རླུང་གི་གནད་དབུགས་ཁ་ནས་སོ་མཆུ་མ་རེག་གི་བར་དུ་འབྱིན་འཇུག་དལ་མོར་མཛད་དགོས། གོང་དུ་དབུགས་སྣ་ནས་མངགས་རྒྱུ་དེ་བླ་མེད་སྤྱི་འགྲོས་ལྟར་དུ་རེད། འདི་ནས་ཐུན་མིན་རྫོགས་པ་ཆེན་པོའི་ལུགས་ཀྱི་དབུགས་ཁ་ནས་འབྱིན་འཇུག་དལ་མོས་ཐད་ཀར་གློ་བའི་ནང་དུ་རླུང་འཇུག་དགོས་པ་རེད། ཕྱག་གཉིས་ཀས་གསལ་མཉམ་གཙོ་འདོན་གྱི་ཆེད་དུ་ངལ་གསོ་ཡེ་ཤེས་ཀྱི་བཞུགས་སྟངས་ཀུན་མཁྱེན་ཀློང་ཆེན་པའི་ཕྱག་སྟབས་མཛད་རྒྱུ་དང་ནི། མིག་མི་གཡོ་བ་ཐད་ཀའི་བར་སྣང་ལ་གཏད་མེད་དུ་བཞག་ནས། ཚོགས་དྲུག་གང་ཤར་བཟོ་མེད་ལ་བཞག་སྟེ་དབང་པོའི་དུང་སྟོན་ནས། སེམས་ཀྱི་གནད་མ་བཅོས་རིག་པ་སྟོང་གསལ་མཁའ་ལྟར་སྒྲིབ་གཡོག་དང་བྲལ་བའི་ངང་ལ། བཅས་བཅོས་མེད་པར་དལ་ཅིག་མཉམ་པར་བཞག་ནས་བཞུགས་མཛད་དགོས་པ་རེད། ཅེས་བླ་མས་ཨ་ཨ་ཞེས་དལ་གྱིས་གསུངས་མཐར། ཕཊ ཞེས་ཧིག་ཀ་བརྗོད། སེམས་གང་ཡིན་སོགས་གསུངས་ཟིན་རྗེས་ཀྱི་འཕྲོས་དོན། སྨིན་གྲོལ་གཉིས་ཀ་བཤད་པ་གཅིག་མཚུངས་རེད། གང་སྨིན་པར་བྱེད་པ་དེ་ཉིད་གྲོལ་བའི་ཆེད་དང་ནི། གྲོལ་བའི་ཆེད་དུ་སྨིན་པར་བྱ་དགོས་པར་མ་ཟད། དབང་དུས་སུ་གྲོལ་བ་ཅིག་ཆར་བས་ཀྱང་ལྟ་བ་ལུང་རིགས་དང་འབྲེལ་བའི་དོན་ལ། ཐོས་བསམ་སྒོམ་པར་བརྒྱུད་མི་དགོས་མཁན་ཞིག་མིན་པ། རྟོགས་པ་མངོན་གྱུར། ས་ལམ་བགྲོད་པ་མྱུར་བའི་རྩལ་གྱིས་ཆིག་ཆོད་སྐད་ཅིག་གིས་གྲོལ་བ་ཡིན། དེས་ཀྱང་མངོན་སུམ་རིག་པའི་རང་ངོ་རྗེན་ཅེར་དུ་ཡོད་པ་དེ། སྒྲིབ་མེད་མངོན་སུམ་མཐོང་བ་ལས་ལྷག་གང་ཡང་མེད། དེ་ཡིན་ན་ཐོག་མའི་ཉམས་ལེན་གྱི་སྒོ་ཆེན་ལ་ཞུགས་པའི་གང་ཟག་སྤྱིར་བཏང་པ་ཞིག་ལ་མཚོན་ནས་བཤད་ན། རྣམ་རྟོག་ངོ་ཤེས་པ་དང་ནི། རིག་པ་ངོ་ཤེས་པ་གཉིས་ཀ་ཁ་ཁ་རེད། སེམས་དང་ཡེ་ཤེས་གཉིས་ཀ་ཡང་དེ་བཞིན་དུ་སོ་སོར་ཡིན། ཡིན་ན་ཡང་སེམས་ཀྱི་ཆོས་ཉིད་ཡེ་ཤེས། སེམས་དང་རིག་པ་གཉིས་ཀ་གང་ཞིག་གང་གི་ཁྱབ་བྱེད་དུ་འགྲོ་མི་འགྲོའི་ཐད་ནས་ཡིན་ན། རིག་པ་ལ་སེམས་ཀྱི་སྒྲིབ་བྱེད་ཡོད་དུས་སེམས་ཅན་རེད། སེམས་དེ་ཉིད་རིག་པར་གྲོལ་དུས་སངས་རྒྱས་ཟེར་བ་རེད། གཞི་གཅིག་ལམ་གཉིས་འབྲས་བུ་གཉིས་གསུངས་པ་ལྟར། གཞི་མཐུན་པར་གནས་པས། རིག་པས་མ་རིག་པ་ལ་ཕར་ཁྱབ་སྟེ། སེམས་ཀྱི་རང་བཞིན་མ་རིག་པ་ཅན་ལ་ཡང་ཆོས་ཉིད་ལྡང་དུ་རུང་བ་ཡིན་པས་སོ། འོན་ཀྱང་མ་རིག་པས་རིག་པ་ལ་ཚུར་ཁྱབ་པ་ཞིག་མི་སྲིད། དེ་ཡིན་པ་མི་སྲིད་པའི་ཤེས་བྱ་རེད། མ་རིག་པ་གློ་བུར་གྱི་དྲི་མ་ཡིན་པས། དེ་ཉིད་སྤངས་ཟིན་པའི་སངས་རྒྱས་ལ་དེ་ཡོད་མི་སྲིད་པ་རེད། དེས་ན་སེམས་འགག་དུས་རང་དང་ངོ་བོ་རྫས་གཅིག་པའི་མ་རིག་པ་ཆ་དང་བཅས་པ་འགགས་ཀྱང་། རིག་པ་ནི་འགག་གཞི་ཡིན་པའི་དབང་གིས་ནམ་ཡང་མི་འགག མ་རིག་པ་སེམས་ཀྱི་ཆ་དང་བཅས་པ་འགག་པས། རིག་པའི་ཆ་སྐུ་དང་ཡེ་ཤེས་སུ་རང་ཤུགས་ཀྱིས་རྒྱས་ཏེ། ཇི་ལྟ་ཇི་སྙེད་ཀྱི་མཁྱེན་པ་གཉིས་ལ་ལོངས་སྤྱོད་པ་རེད། གཉིས་ཆོས་ཀྱི་འཁྲུལ་བ་སངས་ནས། གཉིས་མེད་ཀྱི་ཡེ་ཤེས་རྒྱས་པ་ལ་སངས་རྒྱས་ཞུ་བ་ལས་དེ་མིན་པའི་ཁ་ཁ་ཞིག་ན་སངས་རྒྱས་ཟེར་རྒྱུ་ཞིག་མེད་དོ། དེ་ཡང་འཁྲུལ་བ་ཟེར་བའི་ཡོད་པ་ཞིག་མེད་པར་གྱུར་ཏེ་སངས་སོང་བ་དང་། གཉིས་མེད་ཟེར་བའི་མེད་པ་ཞིག་གསར་དུ་ཡོད་པ་རེད་ནས་རྒྱས་སོང་བ་ཞིག་ག་ན་ཡིན། གཤིས་ལ་འཁྲུལ་བ་མ་གྲུབ་པ་གང་ཞིག་ངོ་བོ་གཉིས་མེད་ཡེ་ཤེས་སུ་ཡེ་ནས་རྒྱས་ཏེ་ཡོད་པ་ལ་ཡེ་ནས་སངས་རྒྱས་པ་གསུངས་པ་རེད། གཤིས་ལ་འཁྲུལ་བ་མེད་པ་ལ་སྤང་བ་ཕུན་ཚོགས་དང་། ངོ་བོ་གཉིས་སུ་མེད་པ་ལ་རྟོགས་པ་ཕུན་ཚོགས་ཞེས་བརྗོད། དེ་བཞིན་དུ་ཡེ་ནས་སངས་རྒྱས་པ་མིན་ན་བསྒོམས་ཀྱང་སངས་རྒྱས་འགྲུབ་པའི་ཐབས་མེད། དཔེར་ན། ས་ལེ་སྦྲམ་ཡེ་ནས་གསེར་མིན་ན་གསེར་ཡིན་ཟེར་བ་ཙམ་གྱིས་གསེར་དུ་མི་འགྲོ་བ་བཞིན་ནོ། ཞེས་གུ་རུ་རིན་པོ་ཆེས་གསུངས་སོ། ཁྲེགས་ཆོད་སྟོང་བའི་འོད་གསལ་རྩལ་འདོན་གྱིས་བཤད་ན་དེ་འདྲ་ཞིག་རེད། ཐོད་རྒལ་སྣང་བའི་འོད་གསལ་ལ་བསམ་བློ་བཏང་ན། གནས་ལུགས་རང་བྱུང་གི་ཡེ་ཤེས་དེ་ཏིལ་ལ་མར་གྱིས་ཁྱབ་པ་ལྟར་དུ་སེམས་ཀྱི་ཆོས་ཉིད་ལ་གཞོན་ནུ་བུམ་སྐུའི་ཚུལ་དུ་བཞུགས་པ་རེད། ཡིན་ན་ཡང་ཐ་མལ་ཕུང་ཁམས་སྐྱེ་མཆེད་ཀྱིས་སྒྲིབ། ཟག་བཅས་ལས་ཉོན་གྱི་འཆིང་བས་བཅིངས་ནས། ཡེ་ཤེས་དང་ཆོས་ཉིད་ལྐོག་གྱུར་བག་ལ་ཞ་བར་གྱུར་ཏེ། ཡེ་ཤེས་རང་འོད་ཀྱི་སྐུ་དང་ཁ་དོག་གི་སྣང་བའི་རང་ཞལ་མཐོང་མི་ཐུབ་པ་རེད། རྫོགས་པ་ཆེན་པོའི་མན་ངག་གིས་སོ་སྐྱེས་ཐ་མལ་པས་ལྷུན་གྲུབ་འོད་གསལ་གྱི་སྦུབ་ནས་རང་བྱུང་ཡེ་ཤེས་ཀྱི་རང་ཞལ་དེ་མཐོང་བྱེད་དུ་ལྷུན་གྲུབ་ཐོད་རྒལ་གྱི་གནད་འདི་ལ་ཐུག་ཡོད་པ་རེད། མདོར་ན་མ་དག་ལས་རླུང་གིས་བསྐྱེད་པའི་སྣང་བ་ཐམས་ཅད་གཞོམ་མེད་ཡེ་ཤེས་ཀྱི་ཀློང་དུ་སྦྱངས་ནས་འཇའ་ལུས་འཕོ་ཆེན་གྱི་སྐུ་འགྲུབ་པ་རེད། རིག་པ་ཀུན་ཏུ་བཟང་པོ་དེ་ཐོག་མའི་སངས་རྒྱས་ཡིན་ཞིང་། དེ་རང་ལ་ཡོད་པའི་གདངས་རང་སྣང་རྡོ་རྗེ་ལུ་གུ་རྒྱུད་དངོས་སུ་མཇལ་བ་དེ། ཐོག་མའི་ཀུན་ཏུ་བཟང་པོ་དང་སྐལ་བ་འདྲ་འདྲ་བྱས་ཏེ་མཉམ་སོང་བ་ཡིན། ཀུན་ཏུ་བཟང་པོས་ཀྱང་རང་ངོ་མཐོང་། དེ་ལ་གནས་པ་ལས་ལྷག་གི་མགྱོགས་དར་བླངས་བཏང་བ་ཞིག་གང་ཡང་ཡོད་པ་མ་རེད། སུ་ཡིན་རུང་མ་འཁྲུལ་གཞིའི་གནས་ལུགས་མངོན་དུ་གྱུར། གཞི་འབྲས་དབྱེར་མེད་རེད་དུས་སངས་རྒྱས་སོང་བ་ཡིན། ཡང་གསང་བླ་སྒྲུབ་ཀྱི་སྨིན་བྱེད་ཡེ་ཤེས་རྒྱ་ཅན་འདི་ནི། རྫོགས་ཆེན་གསང་བ་མན་ངག་སྡེའི་ཡང་གསང་བླ་མེད་ལྟར་དུ་བསྟན་པས་ན། བསྟན་དོན་ཇི་བཞིན་དུ་མ་བཀྲལ་ཐབས་མེད་པ་ཞིག་ཏུ་གྱུར་ཡོད། རྫོགས་རིམ་ཐམས་ཅད་ཀྱི་མཐར་ཐུག ཆོས་ཉིད་རྣམ་པར་མི་རྟོག་པའི་ཡེ་ཤེས་ལ་རྣལ་དུ་འབྱོར་རྒྱུ་དེ་ཡིན་ན། དེ་རྟོགས་ལྡན་བླ་མའི་ཐུགས་ཀྱི་ངོ་བོ་ཡིན་པས། བླ་མ་དང་ཐུགས་ཡིད་དབྱེར་མེད་དུ་འདྲེས་པ་གཅིག་པུས་རྟོགས་པའི་ཡོན་ཏན་རྒྱུད་ལ་སྐྱེ་པ་རེད། བླ་མའི་རྣལ་འབྱོར་བསྒོམས་ཤིང་སྒྲུབ་པས་བསོད་ནམས་དམ་པའི་ཚོགས་རྫོགས། ཐུགས་ཡིད་འདྲེས་པའི་ཆོས་ཉིད་ལ་མཉམ་པར་བཞག་པས་ཡེ་ཤེས་ཀྱི་ཚོགས་རྫོགས་པ་ཡིན་པས་ན། ཚོགས་གཉིས་ནི་འབྲས་བུའི་ཐུས་ཀ་འམ་ངོ་བོ་ཡིན་པའི་ཕྱིར་ན། འདི་ལ་བརྟེན་པ་མྱུར་ལམ་ཁྱད་པར་བ་ཡིན་པའི་རྒྱུ་མཚན་དེ་དག་རེད། དབང་བཞི་བ་ཚིག་དབང་རིན་པོ་ཆེ་འདི་གདོད་མའི་གྲོལ་ཚུལ་མཐར་ཐུག་གི་དབང་ཞིག་རེད། རྟོགས་པ་སྐྱེ་བ་བླ་མའི་བྱིན་རླབས་དང་ནི། བྱིན་རླབས་འཇུག་པ་མོས་གུས་ཀྱི་རྟེན་འབྲེལ་ལ་རག་ལས་པ་ཡིན་པས། དད་པའི་ཉེར་ལེན་སུ་ལ་ཡོད་ན། དེ་ལ་རྫོགས་པའི་བྱང་ཆུབ་ཀྱི་ས་བོན་ཡོད་པ་ནི་མཚན་ཉིད་ཐེག་པ་ལས་ཀྱང་གསུངས་ཡོད་དེ། སོ་སོའི་སྐྱེ་བོའི་དུས་ནའང་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་བརླན་ཞིང་། །ལུས་ཀྱི་བ་སྤུ་ལྡང་བ་འགྱུར་བ་གང་ཡིན་པ། །དེ་ལ་རྫོགས་པའི་སངས་རྒྱས་བློ་ཡི་ས་བོན་ཡོད། །དེ་ཉིད་ཉེ་བར་བསྟན་པའི་སྣོད་ནི་དེ་ཡིན་ཏེ། །དེ་ལ་དམ་བའི་དོན་གྱི་བདེན་པ་བསྟན་པར་བྱ། །ཞེས་གསུངས་སོ། དེ་བཞིན་དུ། བླ་མ་ཟེར་ཚད་བླ་མ་མིན་ཡང་སློབ་མ་ཟེར་ཚད་ཀྱང་སློབ་མ་མ་རེད། རྒྱལ་བའི་ཡུམ་ལས། ཕྱིར་མི་ལྡོག་པའི་བྱང་སེམས་ཕྱིར་མི་ལྡོག་པའི་ཆོས་བརྗོད་པའི་ངག་ལས་དཔོག་གསུངས་བས། ངག་ལས་བརྗོད་པ་ཙམ་གྱིས་མ་ཚད། ངག་ལས་བརྗོད་པ་ཇི་བཞིན་དོན་མཐུན་དོན་སྤྱོད་ཀྱི་མཛད་པ་མངའ་བས་དཔོག་རྒྱུ་ཡང་ཤུགས་བསྟན་ལོས་ཡིན་རེད། དེའི་མ་ཚད་བཅོམ་ལྡན་འདས་ཀྱིས། མ་འོངས་ཕྱི་མའི་དུས་ན་ཁོང་དགེ་བའི་བཤེས་གཉེན་གྱི་ཚུལ་བཟུང་ནས་བྱོན་ཡོང་། དེ་ཡང་ད་ལྟ་ང་དང་ཚུལ་མཐུན་པ་ཡོད་གསུངས་པ་རེད། དེའི་དབང་གིས་ཕྱི་ཚུལ་གྱི་རྣམ་པ་བཟང་ངན་དང་འཇིག་རྟེན་མཐུན་འཇུག་ལ་མཁས་དང་མི་མཁས་ལ་མ་ལྟོས་པར། སངས་རྒྱས་ཀྱི་བཀའ་བཞིན་བསྒྲུབས་ཤིང་དེ་བཞིན་སྲུང་པ་ཞིག་ཡིན་ན་བླ་མ་ངོ་མ་ཡིན་པ་དང་། དེ་ལྟ་བུའི་བླ་མ་དེའི་གསུངས་བཞིན་སྒྲུབ་མཁན་ཞིག་ལ་སློབ་མ་ངོ་མ་ཟེར་བ་དང་། དེའི་མཐུན་རྐྱེན་སྦྱར་མཁན་དེ་ལ་བསྟན་པའི་སྦྱིན་བདག་ཟེར་བ་རེད། དེ་ལྟ་བུ་དག་གང་དུ་ཡོད་ན་གནས་དེར་སངས་རྒྱས་ཀྱི་བསྟན་པ་ངོ་མ་ཡོད་རྟགས་རེད། དེས་ན་དཀོན་མཆོག་གི་སྣང་བ་ཡོད་པའི་ས་ཕྱོགས་སུ་གནས་པའི་སྐྱེ་བོ་ཚོས་འབད་པར་བྱས་ན། འདི་ཕྱི་རང་གཞན་འཕྲལ་ཡུན་ལ་བདེ་བའི་ལམ་རྙེད་ཐུབ་པ་རེད། བསྟན་པའི་དཔལ་གྱུར་བླ་མའི་ཞབས་པད་བརྟན། །སོགས་ཀྱི་སྨོན་ལམ་ས་དེ་དག་ནས་འདོན་ན་དམིགས་གཏད་ཅན་གྱི་སྨོན་ལམ་ལ་འགྲོ་བ་རེད་སྙམ། དེ་སྔོན་ཡན་ཆད་ལ་རང་གཞན་མང་ཆེ་བ་ཞིག་གིས་ཆོས་ཁ་ནས་བཤད་རྒྱུ་དང་། རྣ་བས་ཉན་རྒྱུ་ཁོ་ནར་རེད་སོང་བ་ཡིན་ན་ཡང་། ད་ནི་སེམས་ཀྱིས་བསམ་ནས་ཡིད་ཀྱིས་སྒོམ་རྒྱུ་ཞིག་བྱེད་དགོས། ཆོས་ཉིད་མངོན་སུམ་གྱི་གནད་དེ། བླ་མས་བསྟན་ཅིང་རང་གིས་ཉམས་སུ་མ་བླངས་ན། བེད་མེད་ཚུལ་གོང་ནས་ཞུས་མ་ཐག་པ་ལྟར་ཡིན། ད་ལྟར་འུ་ཚོ་ལ་མཚོན་ན། ང་བླ་མ་ཡིས་བརྩོན་འགྲུས་ཅན་གྱི་སློབ་མ་ལ་ཉམས་མྱོང་སྒོམ་པའི་སྟེང་ནས་ངོ་སྤྲད་རྒྱུ་ཞིག་མ་ཡོད་པ་རེད། རེད་དེ་ཁྱེད་སློབ་མ་རྣམ་པ་བཟང་བའི་དབང་གིས་དད་པ་ཅན་ལ་བྱིན་རླབས་འཕོ་བའི་སྟོབས་ཀྱིས་ངོ་སྤྲད་པ་དང་། ཤེས་རབ་ཅན་ལ་གནས་ལུགས་ལྟ་བའི་ཐོག་ནས་ངོ་སྤྲད་པའི་ཕྱག་ལེན་དེ་བརྒྱུད་དོན་བླ་མས་མཛད་སྲོལ་ཇི་བཞིན་དུ་ཉམས་སུ་བཏབ་པ་བྱས་དང་བྱེད་བཞིན་པའི་ཁུལ་རེད། ཉམས་ལེན་སྤྱིར་བཏང་པ་རིམ་འཇུག་རྩོལ་བ་ཅན་གྱི་གང་ཟག་ཞིག་ཡིན་ན། སེམས་ཉིད་གནས་ལུགས་ཀྱི་དོན་དེ་གོ་མྱོང་རྟོགས་གསུམ་གྱི་རིམ་པ་བརྒྱུད་དགོས་པ་རེད། གོ་མྱོང་རྟོགས་གསུམ་པོ་ཅི་འདྲ་ཞིག་ལ་ཟེར་སྙམ་ན། སྤྱི་མཚན་མ་ནོར་པ་ཇི་བཞིན་དུ་གོ་བ་ལ་གོ་དང་། རང་མཚན་མངོན་སུམ་དུ་མྱོང་བ་ལ་མྱོང་བ། མྱོང་ཞེན་ཉམས་ཀྱི་དྲི་མ་དང་ངེས་ཤེས་ཡུལ་འཛིན་གྱི་དྲི་མ་ཐམས་ཅད་དག་ནས་རང་མཚན་མ་གྲུབ་པ་མངོན་སུམ་དུ་རྟོགས་པ་ལ་རྟོགས་ཟེར་བ་རེད། འདི་ཡང་ཤེས་བྱ་ཤེས་བྱེད་ཀྱི་ཐོག་ནས་བཤད་སོང་ན། ཤེས་བྱ་ཤེས་བྱེད་གཉིས་མེད་དུ་གོ་བ་གོ་དང་། གཉིས་མེད་མངོན་སུམ་དུ་མྱོང་བ་དེ་མྱོང་། དེའི་མྱོང་ཞེན་དེ་དག་ནས་གཉིས་མེད་མཉམ་ཉིད་དུ་སོང་བ་དེ་རྟོགས་པ་ཡིན་དགོས་པ་རེད། འདི་རྣམས་ལ་ནོར་ས་ཡོད་ཀྱང་མི་ནོར་བའི་ཐབས་སུ། གོ་བ་ཡིན་པའི་རྟགས་ལ་ཉམས་ལེན་གཏན་ལ་ཕབ་དཀའ་བ་སོགས་དང་། མྱོང་བ་ཡིན་པའི་རྟགས་ལ་ཉམས་ལེན་འཕེལ་འགྲིབ་ཅན། རྟོགས་པ་ཡིན་པའི་རྟགས་ལ་འཕེལ་འགྲིབ་མེད་པར་འཕེལ་མེད་འགྲིབ་མེད་རྒྱ་ཆད་ཕྱོགས་ལྷུང་དང་བྲལ་བ། ནམ་མཁའི་དཀྱིལ་ནས་མདུང་སྐོར་བྱས་པ་དང་། བྱ་ཁྱུང་ཆེན་གྱིས་མཁའ་ལམ་བཅད་པ་ལྟར་དུ། ཐོགས་ས། ཁེན་ས། ལྷུང་ས། འཐོར་ས་སོགས་གང་ཡང་མེད། གང་ལྟར་ཇི་སྲིད་གཟུང་འཛིན་སེམས་ཀྱི་འཁྲུལ་རྟོག་དབྱིངས་སུ་མ་ཡལ་པ་དེ་སྲིད་དུ་ཀུན་རྫོབ་ལས་དང་ལས་ཀྱི་འབྲས་བུ་བསླུ་མེད་སྙོན་མེད་དུ་ཡོད་པས། འཛིན་མེད་སྒྱུ་མ་ལྟ་བུས་རྩིས་ཟིན་པའི་ངང་ནས། ཐབས་ཤེས་ཟུང་འཇུག་གི་ལམ། ཐེག་པ་ཆེན་པོའི་དགེ་རྩ། དམ་པ་གསུམ་ལྡན་གྱིས་བསྒྲུབ་པ་སོགས་བླང་དོར་ཚུལ་བཞིན་དུ་མཛད་པ་མ་གཏོགས། སྟོང་ལྟ་ཧད་པོས་ལས་འབྲས་ཁྱད་གསོད་མི་བྱེད་པར། ཧ་ཅང་གལ་ཆེན་ཚིག་གིས་ནན་ཞུས་ཡིན་ལ། མཐའ་མའི་གཏམ་ལ་ཡང་སྐྱོར་བྱས་ནས་ཞུས་པ་ཡིན། མཚམས་འདིར། ཨོཾ་ཨཱ་ཧཱུྃ༔ ཀུན་བཟང་རྡོ་རྗེ་སེམས་དཔའ་དགའ་རབ་རྗེ། །འཇམ་དཔལ་བཤེས་གཉེན་ཤྲཱི་སི་ཧ་དང་། །འོད་གསལ་སྙིང་པོའི་ཤིང་རྟ་བཱི་མ་ལ། །སོགས་དབང་བསྐུར་རྗེས་ཀྱི་ཟུར་འཕྲོས། ད་ལྟར་ང་ཚོས་དབང་བསྐུར་རྒྱས་པའི་ལུགས་ལྟར་བྱེད་ཀྱིན་ཡོད་པ་རེད། འདིའི་འཕྲོ་དེ་མ་ཐག་ཏུ་མཐའ་རྟེན་མྱོང་གྲོལ་དམ་རྫས་རིལ་བུའི་དབང་དང་། རིག་འཛིན་སྲོག་འཁོར་དཔལ་གྱི་གདུ་བུའི་བཏགས་གྲོལ་གྱི་དབང་གཉིས་ཀ་འབྱུང་བ་རེད། ད་རེས་ཤིན་ཏུ་རྒྱས་པའི་ལུགས་བྱས་ཏེ་བསྐུར་བའི་སྐབས་ཡིན་པས། འདི་གཉིས་ཀ་ཡང་རིམ་པ་བཞིན་དུ་འབུལ་རྒྱུ་བྱེད་དགོས། སྤྱིར་ན་རིལ་བུམ་གྱི་དབང་འདི་བུམ་དབང་གི་རྗེས་འབྲེལ་དང་། བཏགས་གྲོལ་གྱི་དབང་འདི་དབང་བཞི་བ་དང་འབྲེལ་ནས་བསྐུར་བའི་གོ་དོན་ཡོད་ཀྱང་། རིལ་བུམ་འདི་ཀུན་གྱི་མཐའ་རྟེན་གྱི་བྱིན་རླབས་རྗེས་གནང་གི་ཚུལ་དང་། བཏགས་གྲོལ་ནི། དབང་བཞི་པ་དང་བཀའ་ལུང་ཡོངས་རྫོགས་གཏད་རྒྱ། འདིའི་གླེགས་བམ་གྱི་དབང་དང་རིམ་ཅན་བསྐུར་ན་ཡང་དོན་དང་མི་འབྲེལ་པ་ཞིག་མ་རེད། ཡང་མཚམས་འདིར། དབྱིངས་ཀྱི་བུམ་པ་རིག་པའི་ལྷ་ཚོགས་རྣམས། །ཡེ་ཤེས་ཐུགས་རྗེའི་གཟི་བྱིན་རབ་འབར་བས། །སོགས་ཀྱི་དབང་བསྐུར་རྗེས། དེའི་ཡན་ཆད་ཀྱིས་དམ་རྫས་མྱོང་གྲོལ་མཐའ་རྟེན་རིལ་བུའི་དབང་སྦྱིན་པ་སོང་ནས། ད་ནི་རིག་འཛིན་སྲོག་འཁོར་དཔལ་གྱི་གདུ་བུའི་དབང་བསྐུར་བྱེད་པ་ལ་འདི་ནས་ཐོག་མར། ན་རག་སྐོང་བཤགས་སམ་བརྗོད་མེད་དོན་བཤགས་གང་རུང་སྔོན་དུ་འགྲོ་བས་ཡིག་བརྒྱ་བཟླ་བ་དང་བཅས་གསུངས་འདུག་ཀྱང་ཡིག་བརྒྱ་ཚར་གསུམ་གསུངས་ན་འཐུས་རྒྱུ་བྱེད། ཅེས་ཀུན་གྱིས་ཡིག་བརྒྱ་ཚར་གསུམ་གསུངས་མཐར་བླ་མས་རིག་འཛིན་སྲོག་འཁོར་དཔལ་གྱི་གདུ་བུའི་དབང་མཐའ་རྟེན་དང་བཅས་པ་བསྐུར་ནས་འཚོགས་གྲོལ་ལོ།། ཉིན་བརྒྱད་པའི་དབང་དོན་ཟབ་ཁྲིད།དེ་ནི། ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་དབང་དང་། སངས་རྒྱས་སྟོང་དབང་། དཔག་མེད་མྱུར་ལམ་གྱི་དབང་། ཡུམ་ཀ་བདེ་ཆེན་རྒྱལ་མོའི་དབང་སོགས་ཡིན། དབང་ཆོག་ལོ་རྒྱུས་གསུངས་རྗེས་ཀྱི་ཟུར་འཕྲོས་འདི་ལྟར་གནང་པ། འཕགས་པ་སྤྱན་རས་གཟིགས་དབང་ཕྱུག་འདི་ནི། བསྐལ་བ་དཔག་མེད་མཐའ་ཡས་པའི་སྔོན་རོལ་ཞིག་ནས་མངོན་པར་རྫོགས་པར་སངས་རྒྱས་སུ་ཟིན་པ་ཡིན་ཡང་། གདུལ་བྱའི་སེམས་ཅན་འདུལ་བྱེད་དུ་འགྲོ་དོན་ལ་སྐྱོ་དུབ་མེད་པར། སྐུ་གསུམ་གྱི་ཞིང་ཁམས། སྟོན་པ་འཁོར་དང་གདུལ་བྱར་བཅས་པ་བཀོད་ནས་གསང་བ་གསུམ་གྱི་སྒྱུ་འཕྲུལ་སྣ་ཚོགས་པ་བསྟན་པ་ཡིན་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་གའི་ཀླུང་གི་བྱེ་མ་སྙེད་དང་མཉམ་པར་སངས་རྒྱས་སྟོང་རྩ་གཉིས་སུ་སྤྲུལ་བ་ལ་སོགས་པ། ཆུ་ཀླུང་སྣ་ཚོགས་པའི་མདོ་དང་། པུཎྜརི་ཀའི་མདོ། པདྨ་དཀར་པོའི་མདོ། སྙིང་རྗེ་རྣམ་པར་རོལ་བའི་མདོ་ལ་སོགས་པའི་མདོ་ཉི་ཤུ་ཐམ་པ་དང་། པདྨ་ཅོད་པན་གྱི་རྒྱུད་དང་བཅས་པའི་ཐུགས་རྗེ་ཆེན་པོའི་མདོ་རྒྱུད་ཉེར་གཅིག སྟོན་པ་ཤཀྱཱའི་རྒྱལ་པོས་བཀའ་འཁོར་ལོ་ཐོག་མཐའ་བར་གསུམ་གྱི་སྐབས་སོ་སོ་ནས་གསུངས་པ་ལྟར་དང་། དེ་ལས་སངས་རྒྱས་སྣང་བ་མཐའ་ཡས་སོགས་ཀྱིས་ཕྱག་སྟོང་སྤྱན་སྟོང་དུ་ཇི་ལྟར་བྱིན་གྱིས་རླབས་ནས། བསྐལ་བ་འདིར་སངས་རྒྱས་སྟོང་དང་། རྒྱལ་པོ་སྟོང་། སྒྲོལ་མ་དཀར་སྔོན། ཨོ་རྒྱན་པདྨ་འབྱུང་གནས་ལ་སོགས་པ་ནས་དེང་གི་ཆོས་བརྒྱུད་ཁག་གི་བསྟན་འཛིན་གྱི་སྐྱེས་བུ་རྣམས་ཀྱི་བར་དུ་སྤྲུལ་བ་མཛད་ནས། འགྲོ་དོན་མཛད་ཚུལ་གོང་དུ་དབང་གི་ཆོག་ཁྲིགས་ཀྱི་མཚམས་སྦྱོར་ལས་གསུངས་པ་ལྟར་ལགས། ལྷག་པར་དུ་བོད་འདི་འཕགས་པའི་གདུལ་ཞིང་གྱུར་ཚུལ་གྱི་ཐད་ནས་ཡིན་པས་ན། དུས་གདུལ་བྱ་འདུལ་བའི་སྐབས་ལ་བབས་པའི་དུས་ཤིག་ལ། བཅོམ་ལྡན་འདས་སྣང་བ་མཐའ་ཡས་ཀྱིས། འཕགས་པ་སྤྱས་རས་གཟིགས་ལ། བཅོམ་ལྡན་འདས་ཤཀྱཱ་ཐུབ་པའི་ཞིང་ཁམས་ཀྱི་རི་ཁ་བ་ཅན་གྱི་ས་ཆ་ན། བཅོམ་ལྡན་ཤཀྱཱའི་རྒྱལ་པོའི་སྐུ་དངོས་ཀྱི་གདུལ་བྱར་མ་གྱུར་ཀྱང་། ཁྱོད་ཀྱི་འདུལ་སྐལ་ཡོད་པས་ཞིང་དེར་སོང་ནས། ཁྱོད་ཀྱིས་གནས་དེའི་སེམས་ཅན་ཐམས་ཅད་དང་པོར་ཟང་ཟིང་གིས་བསྡུས། དེ་ནས་ཆོས་ཀྱི་སྦྱིན་པས་རྒྱུད་བསྐུལ་ཏེ། འདུལ་བ་མཛད་ནས་སྨིན་པར་མཛོད་གསུངས་བ་ལྟར་དུ། འཕགས་པ་སྤྱན་རས་གཟིགས་ནི། ཁོང་རང་གི་ཞིང་ཁམས་རི་བོ་ཏ་ལའི་རྩེ་མོ་རིན་ཆེན་སྣ་ཚོགས་ཀྱི་ཁང་བར་བྱོན་ནས། བོད་ལ་ཐུགས་རྗེའི་སྤྱན་གྱིས་རྒྱང་ནས་གཟིགས་ཡོང་དུས། སངས་རྒྱས་བསྟན་པའི་སྣང་བ་མེད་པར་མུན་པ་མུན་ནག་གི་གནས་དེ་ན། སེམས་ཅན་སྐྱེས་ཚད་ཐམས་ཅད་མཚོ་ཐོག་ལ་ཁ་བ་བབ་པ་བཞིན་དུ། ངན་སོང་ངན་འགྲོར་མར་ཐིམ་འགྲོ་བ་མ་གཏོགས་ཡར་ཐར་དཀའ་བ། དཔེར་ན། ལྕགས་ཀྱི་ཟ་མ་ཏོག་ཁ་ལེབ་བཀབ་པ་ལྟར་གྱུར་ཡོད་པར་གཟིགས་སོ། དེ་བཞིན་དུ་སྟོན་པའི་དམ་ཆོས་དར་ན་ཡང་། དེའི་བསྟན་ལ་ཞུགས་མཁན་དེ་ཕྱི་མའི་མཐར་ཐོན་དུས་མདོ་སྔགས་ཀྱི་གཞུང་ལ་འཆད་ཉན་མི་བྱེད་པར། མན་ངག་ཐ་རེ་ཐོ་རེ་གཙིགས་སུ་བྱེད་པ་ཙམ་དང་། ཆོས་ལ་གསར་འགྲོགས་ཀྱི་ཨ་གསར་ཆེ་བའི་དབང་གིས། དང་པོའི་སྣ་ལ་དར་སླ་བའི་རྣམ་པ་ཞིག་ཡོད་ཀྱང་སྒྲུབ་པ་ཉམས་ལེན་ལ་བརྩོན་པ་ཆུང་བས་ནུབ་མགྱོགས་པ། ཆོས་བརྒྱུད་རང་རང་གི་སྙིང་པོ་མི་ཤེས་པའི་ཐོག་ཏུ་ཕྱོགས་འཛིན་དང་ང་ཁྱོད་ཀྱི་འཐེན་ཁྱེར་བྱེད་དགའ་ཆེ་བ། བསྟན་འཛིན་སློབ་དཔོན་གྱི་མིང་རེ་ཐོག་མཁན་ཚོའི་སྙིང་ལ་བདུད་ཞུགས་ནས་གཅིག་གིས་གཅིག་ལ་སྨོད། གཅིག་ལ་གཅིག་གིས་རྩོད། སྔགས་པའི་སྙིང་ལ་དམ་སྲི་ཞུགས། བཙུན་པའི་སྙིང་ལ་རྒྱལ་འགོང་ཞུགས། བུད་མེད་སྙིང་ལ་འདྲེ་མོ་དང་། བྱིས་པའི་སྙིང་ལ་ཐེའུ་རང་ཞུགས། དེའི་སྐབས་སུ་ལྷ་ཀླུ་གཉན་གསུམ་པོ་འཁྲུགས་ཏེ་འབྱུང་བཞིའི་དགྲ་ཡོང་། མུ་གེ་ནད་མཚོན་དར་ནས་དུས་ངན་འབྱུང་རྒྱུ་ལ་སོགས་པའི་སྔོན་མཐའ་ཕྱི་མཐར་ཐམས་ཅད་གཟིགས་ནས། ཐོག་མར་སྤྲེལ་རྒན་བྱང་ཆུབ་སེམས་དཔས་མི་བརྒྱུད་སྤེལ་བ་ནས། བར་དུ་དམ་ཆོས་འཆད་ཉན་བསྒྱུར་གསུམ་དང་། རྒྱལ་བསྟན་འཛིན་སྐྱོང་སྤེལ་གསུམ། ཐ་མར་དུས་ངན་སྙིགས་མའི་སྐབས་འདི་ལ་མ་ཐུག་གི་བར་དུ། སྤྱིར་ན་རིགས་གསུམ་སེམས་དཔའི་སྒྱུ་འཕྲུལ། ཁྱད་པར་དུ་ཐུགས་རྗེ་ཆེན་པོའི་སྤྲུལ་བ་རྒྱུན་མི་འཆད་པ་ཞིག་གིས་བོད་ཡུལ་ཉིད་ཀྱི་གདུལ་ཞིང་འདི་ཉིད་ད་ལྟའི་བར་དུ་སྐྱོང་མཛད་པ་ཡིན་ན། ལྷ་གཅིག་ཆོག་སྤྱན་རས་གཟིགས་དབང་གི། ཆོས་གཅིག་ཆོག་སྙིང་པོ་ཡི་གེ་དྲུག་མ་འདིས། ཚེ་འདིའི་དགོས་འདོད་འབྱུང་། ཕྱི་མར་བྱང་ཆུབ་ཐོབ་པ་སོགས། འདི་ཕྱི་རང་གཞན་གཉིས་དོན་འགྲུབ་པའི་འདོད་འབྱུང་གི་ནོར་བུ་འདི་གནང་བ་རེད། སྤྱིར་ན་ཐུགས་རྗེ་ཆེན་པོའི་སྒྲུབ་སྐོར་འདི་མདོ་རྒྱུད་ཐམས་ཅད་ན་མང་། ཁྱད་པར་དུ་སྔགས་རྒྱུད་སྡེ་བཞི་དྲུག་གི་སྐབས་ནས་འབྱུང་བ་མང་ཡང་། འདི་ནས་འཕགས་པའི་དགོངས་གཏེར་རྫོགས་ཆེན་ཀློང་ཆེན་སྙིང་ཐིག་གི་ཆོས་སྡེ་ལས་བྱོན་པའི། ཀུན་མཁྱེན་ཕྱི་མ་རིག་འཛིན་འཇིགས་མེད་གླིང་པའམ་མཁྱེན་བརྩེའི་འོད་ཟེར། སློབ་དཔོན་པདྨ་ཡབ་ཡུམ་གྱིས་མཚན་གསོལ་བ་ནི། པདྨ་དབང་ཆེན་ཡེ་ཤེས་རོལ་བའི་རྡོ་རྗེ་དེ་ཉིད་ཀྱི་དགོངས་ཀློང་ནམ་མཁའ་མཛོད་ཀྱི་ཆོས་གཏེར་ལས་བྱོན་པའི། འཕགས་མཆོག་ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་དབང་ཆོག་འདིའི་མཚན་ལ། འོད་དཀར་མཐས་ཡས་ཞུ་བ་རེད། དེ་ཉིད་བསྐུར་བའི་སྐབས་ཡིན་ན། འཕགས་པ་བཅུ་གཅིག་ཞལ། ཕྱག་སྟོང་སྤྱན་སྟོང་། འཕགས་མཆོག་ཁ་སར་པ་ཎི། སེང་གེའི་སྒྲ། འཕགས་པ་སེམས་ཉིད་ངལ་གསོ། ནམ་མཁའི་རྒྱལ་པོ། སྡུག་བསྔལ་རང་གྲོལ་ལ་སོགས་པ་མཚན་གྱི་རྣམ་གྲངས་མཐའ་ཡས་པ་ཐམས་ཅད། དགོས་པ་དང་འགྲོ་དོན་གྱི་ཆ་ནས་གསོལ་བར་མ་ཟད། ཞི་དང་ཁྲོ་དང་ཞི་མ་ཁྲོ་བོའི་དཀྱིལ་འཁོར་གྱི་རྣམ་པར་ཤར་བའང་མང་པོ་ཡོད་ཀྱང་། མཚན་ཅི་འདྲ་གསོལ། རྣམ་པ་ཇི་ལྟར་སྣང་ཡང་དོན་འཕགས་པ་སྤྱན་རས་གཟིགས་རེད། སྤྱན་རས་གཟིགས་ཞེས་པའི་མཚན་གྱི་སྒྲ་བཤད་བྱས་ན། ཇི་ལྟར་མཁྱེན་པའི་སོར་རྟོག་ཡེ་ཤེས་ཀྱི་སྤྱན་གྱིས། རང་བཞིན་དག་པའི་ཆོས་ལ་རྟག་ཏུ་གཟིགས་པས་ན་སྤྱན་རས་གཟིགས་དང་། ཇི་སྙེད་མཁྱེན་པ་ཐུགས་རྗེ་ཆེན་པོའི་སྤྱན་གྱིས་འཇིག་རྟེན་ཐམས་ཅད་ལ་གཟིགས་བཞིན་དུ། འགྲོ་བའི་སྡུག་བསྔལ་སེལ་བ་ལྷུར་ལེན་པས་ན་ཡང་སྤྱན་རས་གཟིགས་གསུངས་ནས་འགྲེལ་ཚུལ་རྣམ་པ་གཉིས་ཡོད། མཚན་འདི་ནི། སྙིང་རྗེ་ཆེན་པོའི་ཡོན་ཏན་གྱི་སྒོ་ནས་སྔོན་གྱི་རྒྱལ་བ་ཐམས་ཅད་ཀྱིས་བཏགས་པ་རེད། སྤྱིར་ན་རྒྱལ་བ་ཐམས་ཅད་ཀྱི་དམིགས་མེད་ཐུགས་རྗེ་དེ་མཁའ་དང་ཆོས་དབྱིངས་ལྟར་རྒྱ་ཆེ་བ་ཡིན། འཕགས་པ་འདི་ཉིད་ཀྱང་རྒྱལ་བ་ཐམས་ཅད་ཀྱི་སྙིང་རྗེའི་རང་གཟུགས་གཅིག་ཏུ་བསྡུས་ཏེ་མཚོན་པ་རྟགས་ཀྱི་ཕྱག་རྒྱ། རྟག་ཏུ་བྱང་ཆུབ་སེམས་དཔའི་སྐུར་སྣང་བ་ཡིན་པས་ན་སངས་རྒྱས་ཀྱི་སྲས། དེ་བཞིན་སྟོབས་བཅུ། མི་འཇིགས་པ་བཞི། མ་འདྲེས་བཅོ་བརྒྱད། དབང་བཅུ་སོགས་རྫོགས་པར་མ་ཚད་སོ་རིག་བཞི་ལ་དབང་ཐོབ་པའི་འདྲེས་ཆོས་ཐམས་ཅད་པོའི་གནད་སྲོག་གང་ལ་ཐུག་ས་ཐུགས་རྗེ་ཆེན་པོ་ཡིན་པ་དང་། འབྲས་ཆོས་དེ་ཐམས་ཅད་སྙིང་རྗེ་ཆེན་པོའི་དབང་དུ་བྱས་ནས། གཞན་དོན་ཁོ་ནས་བསྒྲུབ་པ་ཡིན་པའི་ཕྱིར་ན། སྙིང་རྗེའི་རང་གཟུགས་ཀྱི་ལྷ་འཕགས་མཆོག་དེ་ལ་ཐུགས་རྗེ་ཆེན་པོ་ཞུ་བ་རེད། འདིའི་གསང་གསུམ་གྱི་སྒྱུ་འཕྲུལ་གཞན་ཡང་། བརྒྱ་བྱིན་དང་། ཁྱབ་འཇུག དྲག་པོ་དང་ཚངས་པ། ས་དང་། རྒྱ་མཚོ། ཉི་ཟླ། རླུང་གི་ལྷ་ལ་སོགས་པའི་གཟུགས་ཅན་གྱི་འཕགས་པའི་སྤྲུལ་པ་གྲངས་ཀྱིས་མི་ཆོད་པ་ཞིག་ཡོད་པས། འཕགས་པ་འཇིག་རྟེན་དབང་ཕྱུག་ཅེས་པའི་མཚན་དེ་ཡང་དེ་ལྟ་བུའི་ཐོག་ནས་ཞུ་བ་རེད། གཉུག་མ་མི་ཤིགས་པའི་སྒོ་གསུམ་འདི་གདོད་ནས་ཐུགས་རྗེ་ཆེན་པོའི་ངོ་བོར་བཞུགས་པ་དེ། ཡོངས་སུ་དག་པ་གཉུག་མའི་སྒྲུབ་གཞི་རེད། དེ་སེམས་ཅན་ཐམས་ཅད་ལ་ཁྱད་མེད་དུ་ཡོད་ཀྱང་། ཐ་མལ་པ་རགས་ཕུང་གི་ལུས་རྟེན་འདིའི་སྟེང་ནས་བཤད་ཡོང་ན། བོད་ཀྱི་མི་ཡི་སྒོས་ཆོས་ལ། ང་ཚོ་བོད་འབངས་ཐམས་ཅད་ཀྱི་ལུས་ཀྱི་རྫས་རྒྱུན་འདིའི་བྱུང་ཁུངས་ཡར་ཕུགས་གཏུགས་ན། འཕགས་པའི་སྤྲུལ་བ་སྤྲེལ་རྒན་དང་། ཇོ་མོ་ཁྲོ་ཉེར་ཅན་གྱི་སྤྲུལ་པ་བྲག་སྲིན་མོ་གཉིས་ཀྱི་རྒྱུ་རྐྱེན་ལ་ཐུག་ཡོད་པ་རེད། ལུས་འདིའི་སྐྲ་དང་། སེན་མོ། ཤ་རུས་པགས་གསུམ་གྱི་རྡུལ་ཕྲན་རེ་རེ་ནས། ནོར་བུ་པདྨོའི་དོན་ཅན་གྱི་མ་ཎི་པདྨེའི་རིགས་སྔགས་ཀྱི་བདུད་རྩིའི་རྒྱུན་ལས་བྱུང་བ་རེད། དེ་ལྟ་བུའི་སྔོན་འབྲེལ་གྱིས་རྒྱུ་བྱས། འཕགས་པའི་ཐུགས་བསྐྱེད་རང་གཙང་དུས་སྨིན་གྱིས་ད་ལྟའི་རྐྱེན་བྱས་ཏེ། རིགས་བརྒྱུད་འདི་ལ་སྐྱེས་པས། རང་གི་རིགས་ཆོས། ལས་དབང་བསོད་ནམས་ཀྱིས་བསྐོས་པ་འདིས་བསྒྲུབ་ན་འགྲུབ་ཐག་ལྷག་ཏུ་ཉེ་བ་རེད། སློབ་དཔོན་ཆེན་པོས། བོད་ཀྱི་བླ་མའི་སྐལ་བ་གུ་རུ་ཉིད། །ལྷ་སྐལ་ཇོ་བོ་ཐུགས་རྗེ་ཆེན་པོ་ཡིན། །གསུངས་པ་རེད། ད་དུང་གུ་རུ་རིན་པོ་ཆེས། མཚན་མོ་བྱུང་དུས་པདྨ་ང་ཉིད་སྒོམས། །རང་གི་དོན་དུ་བཛྲ་གུ་རུ་བགྲོངས། །ཉིན་མོ་འཕགས་པ་ཐུགས་རྗེ་ཆེན་པོར་སྒོམས། །སེམས་ཅན་དོན་དུ་མ་ཎི་ཡིག་དྲུག་བགྲོངས། །ཞེས་གསུངས་ཡོད་པ་རེད། བདེ་གཤེགས་སྒྲུབ་པ་བཀའ་བརྒྱད་དང་། ཡན་ལག་ལས་ཚོགས་རབ་འབྱམས་ཀྱི་སྙིང་པོ་བླ་རྫོགས་ཐུགས་གསུམ་ཡོངས་སུ་རྫོགས་པ་ཚང་བ་ཞིག་མིན་ན་ཁོང་གི་སྤྲུལ་བའི་གཏེར་ཆེན་ཚད་མ་མིན་གསུངས་ནས། གཏེར་ཆོས་ཐམས་ཅད་ཀྱི་སྲོག་གི་དབང་པོ་ལྟ་བུ་ལ་འདི་ཉིད་བསྔགས་པར་མཛད་པ་དང་། ཡང་སྒོས་ཟབ་པ་ལས་ཀྱང་ཆེས་ཟབ་པའི་གནད་བསྡུས། འཕགས་མཆོག་སྡུག་བསྔལ་རང་གྲོལ་གྱི་སྒྲུབ་ཐབས་དབང་ཆོག་དང་འབྲེལ་བ་འདི་ཉིད། གནས་བར་ཁང་གཡུ་ཞལ་འབར་བ་ནས། དུས་བོད་ཡུལ་གསང་ཆེན་གྱི་བསྟན་པ་དར་བའི་དུས། སྟོན་པ་རྗེ་བཙུན་མ་ཧཱ་གུ་རུས། འཁོར་མངའ་བདག་ཆོས་རྒྱལ་ཡབ་སྲས་ལ། ཆོས་གདམས་པ་སྙིང་མཛོད་ཀྱི་སྒྲོམ་བུར་སྩལ་བ་ཡིན་ན། གཏེར་སྟོན་སྤྲུལ་སྐུ་བརྒྱུད་པའི་བླ་མ་ལ། བརྒྱུད་པ་དྲུག་ལྡན་གྱི་སྒོ་ནས་བརྒྱུད་པའི་སྨོན་ལམ་གཏད་རྒྱའི་མཐུ་བཙན་པོས། དུས་བབ་ས་ཕོ་སྟག་གི་ལོར་གསུངས་བ་རེད། ཐུགས་རྗེ་ཆེན་པོའི་ཞལ་མཇལ་ཞིང་འོད་གསལ་སྒྱུ་འཕྲུལ་དྲྭ་བའི་དག་གཟིགས་ཀྱི་ངང་ན་ཡོད་པའི་དུས་སུ། གཏེར་བདག་ཡེ་ཤེས་དབྱིངས་ཀྱི་མཁའ་འགྲོ་མས། ཀློང་གསལ་བརྡ་རྟགས་ཀྱི་རི་མོ་བཀྲ་བའི་ཤོག་དྲིལ་སྤྲད་པ་དེ། རིག་འཛིན་འཇིགས་མེད་གླིང་པས་ཕ་ནོར་བུ་སྐལ་ལ་བླངས་ནས་བརྡ་དོན་གབ་སྦས་མེད་པར་བཀོད་དེ། ལོ་བདུན་གསང་རྒྱ་བྱས་ནས་སྐབས་དང་བསྟུན་ཏེ་གཏན་ལ་ཕབ་པ་ཡིན་གསུངས་པ་དེ་འདི་རེད། མཚམས་འདིར། ན་མོ། མཐའ་མེད་འཁོར་བ་སྡུག་བསྔལ་རང་བཞིན་ལ་སོགས་སྐྱབས་འགྲོ་དང་སེམས་བསྐྱེད་སོགས་རྗེས་ཟློས་མཛད་རྗེས་ཀྱི་ཟུར་འཕྲོས། འདི་བླ་མེད་ཐུན་མོང་གི་དབང་སྤྱི་འགྲོས་ལྟར་སློབ་མ་ལྷར་བསྐྱེད་ཀྱི་མཚམས་འདིར། དབྱིངས་ནས་ཡེ་ཤེས་པ་སྤྱན་དྲངས་ཏེ་བྱིན་འབེབ་པ་ཞིག་རེད། བླ་མ་དང་དཀྱིལ་འཁོར་གྱི་གཙོ་བོ་གཉིས་སུ་མ་མཆིས་པའི་ཐུགས་ཀ་ནས་འོད་ཟེར་བྱུང་སྟེ། སློབ་མ་རང་ཉིད་རྣམ་སྨིན་གདོས་བཅས་ཀྱི་ཤ་ཁྲག་གི་ལུས་རྟེན་འདི་སྦྱངས། རྣམ་པར་ཤེས་པ་དེ་ཧྲཱི་ཡིག་དཀར་པོར་གནས་གྱུར་པ་གསུངས་ན། ཡི་གེ་ཧྲཱི་ཡིག་འདི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་དམ་ཚིག་གི་སྙིང་པོ། ཡི་གེའི་གཟུགས་སུ་བྱུང་བ། འདིས་ཁྱད་པར་དུ་པདྨའི་རིགས་ཐམས་ཅད་ལ་སྤྲུལ་ནས་རང་གི་རིགས་དང་མཐུན་པའི་ལས་མཛད་པ་ཡིན་པས། ཆོས་ཐམས་ཅད་ཀྱི་ཆོས་ཉིད་སྤྱན་རས་གཟིགས་དབང་ཕྱུག་གི་ཡེ་ཤེས་ཀྱི་ཕྱག་རྒྱ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་དུ་ཐམས་ཅད་བསྡུས་ཡོང་ན་པདྨའི་གཟུགས་སྣ་ཚོགས་པའི་སྙིང་པོ་དེ་ཧྲཱི༔ཡིག་འདི་ཡིན་གསུངས་ཡོད་པ་རེད། དེའི་དོན་ནི། འཕགས་པ་སྤྱན་རས་གཟིགས་སྙིང་རྗེའི་དབང་ཕྱུག་འགྲོ་ལ་བརྩེ་ཞིང་འགྲོ་བའི་སྡུག་བསྔལ་སེལ་ཆེད་ལ་འགྲོ་བ་སྣ་ཚོགས་ཀྱི་གཟུགས་སུ་སྣང་བ་ཡིན་ན་ཡང་། པདྨ་འདམ་ལས་སྐྱེས་ཀྱང་འདམ་གྱི་དྲི་མས་མ་གོས་པ་བཞིན་དུ། འཁོར་བའི་ཉེས་པས་མ་གོས་པས་ན་པདྨ་དང་། དེ་ལྟ་བུ་སྣང་བའི་སྙིང་པོའམ་ངོ་བོ་ཉིད་ནི་དག་པའི་ཆོས་ཉིད་དམ་ཡེ་ཤེས་ཡིན་པས། དེ་མཚོན་པར་བྱེད་པ་ལ་ཧྲཱི་ཡིག་བྱུང་བ་ཡིན་གསུངས་སོ། འཕགས་མཆོག་སྡུག་བསྔལ་རང་གྲོལ་གྱི་དཀྱིལ་འཁོར་གྱི་གཙོ་བོའི་ཤར་དུ་རྗེ་བཙུན་སྒྲོལ་མ། ལྷོ་རུ་འོད་ཟེར་ཅན་མ། ནུབ་ཏུ་ཀུ་རུ་ཀུ་ལླེ། བྱང་དུ་ནོར་རྒྱུན་ལྷ་མོ་བཅས་རིགས་བཞིའི་མཁའ་འགྲོས་བསྐོར་བར་གསལ་བའི་རང་ཉིད་ཧྲཱི་ཡིག་དཀར་པོ་གྱུར་པ་དེ་ཉིད། གཙོ་བོའི་ཞལ་ནས་དྲངས་སྐུའི་དབྱིབས་བརྒྱུད་ནས། ཤར་མདུན་གྱི་སྒྲོལ་མའི་མཁའ་གསང་དུ་བབས་པ་བདེ་སྟོང་དགའ་བཞིའི་ཡེ་ཤེས་ལས་བསྐྱེད་པའི་སྲས་ཀྱི་རྣམ་པར་གྱུར་པ། སྔར་གྱི་དབང་སྟེགས་པདྨ་འདབ་བརྒྱད་ལ་འཁོད་ནས། རང་ཉིད་ཐུགས་རྗེ་ཆེན་པོར་གསལ། དེ་ཙམ་ཞིག་ལས་གསལ་བོར་མ་གསུངས་ཀྱང་། འདི་ཇི་ལྟར་གསལ་ཚུལ་ནི། ཐུགས་རྗེ་ཆེན་པོས་རིགས་མི་གཅིག་པའི་འགྲོ་བ་འདུལ་བའི་དོན་དུ་གཟུགས་སྣ་ཚོགས་ཀྱི་སྤྲུལ་བ་ཅིར་ཡང་སྟོན་པར་མ་ཟད། སྔགས་ཀྱི་དཀྱིལ་འཁོར་དང་ཆོ་ག་སོ་སོའི་སྐབས་སུ། སྤྱན་རས་གཟིགས་ཀྱི་སྐུ་མདོག་ལ། དཀར་པོ། དམར་པོ། དེ་བཞིན་དུ་ཕྱག་གི་པདྨ་དང་ཐུགས་སྲོག་གི་ཧྲཱི་ཡིག་ལ་དཀར་པོ་དམར་པོ་གཉིས་ཀ་བསྟན་པ་ཡོད། དཀར་པོར་སྣང་རྒྱུ་དེ་ནི། ལས་བཞིའི་ནང་གི་ཞི་བ་དང་། དམར་པོ་སྣང་རྒྱུ་དེ་དབང་གི་ཁ་དོག་རེད། ལས་བཞི་དེ་གསུམ་ལ་ཚུར་བསྡུས་ན། བྱ་བ་གྲུབ་པའི་ཕྲིན་ལས་དེ་དབང་གི་ནང་དུ་བསྡུ། གར་དབང་ཐུགས་རྗེ་ཆེན་པོའི་དཀྱིལ་འཁོར་ལ་སོགས་དབང་སྡུད་དང་འབྲེལ་ན་དམར་པོ་སྣང་བ་དང་། ནད་གདོན་ཞི་ཞིང་སྡིག་སྒྲིབ་འཇོམས་པ་ངན་སོང་གནས་འདྲེན་སོགས་ལ་དཀར་པོ་སྣང་། དཀར་པོས་རང་བཞིན་དག་པའི་ཆོས་ལ་གཟིགས་པས་སོར་རྟོག་གི་ཡེ་ཤེས་མཚོན་པ་རེད། རྒྱུ་མཚན་དེའི་དབང་གིས། ཁྲུས་བྱས། གོས་དཀར་གྱོན་པ་གངས་རི་དཀར་པོར་འཛེག་པ་ལ་སོགས་པ་ནི། ཐུགས་རྗེ་ཆེན་པོར་འགྲུབ་པའི་ལྟས་དང་སྡིག་སྒྲིབ་འདག་པའི་ལྟས་ཡིན་གསུངས་ཡོད་པ་རེད། ད་རེས་འཕགས་མཆོག་སྡུག་བསྔལ་རང་གྲོལ་སྐུ་མདོག་དཀར་པོར་གསལ་བའི་དུས་ཡིན་ཡང་། རང་ཉིད་ཐུགས་རྗེ་ཆེན་པོར་གསལ་བ་དེ་སྐུ་མདོག་དཀར་དམར་དང་རྒྱན་ཆ་ལུགས། ཕྱག་སྟབས་ཕྱག་མཚན་ལ་སོགས་པའི་མཚན་མ་ཅན་ཞིག་བསྒོམས་ནས། དེ་ལ་དག་གྲོལ་དུ་འཛིན་རྒྱུ་གཙོ་བོ་མ་རེད། འདི་སྔགས་བླ་མེད་སྤྱི་མཚུངས་སློབ་མ་ལྷར་བསྐྱེད་མཚམས་ཀྱི་བྱིན་འབེབས་ཤིག་ཡིན་ན་ཡང་། ཐུན་མིན་ཨ་ཏིའི་སྒོམ་པ་བསྐྱེད་རྫོགས་ཟུང་དུ་འབྲེལ་བའང་ཡིན་པ་དང་། འཕགས་པ་སྤྱན་རས་གཟིགས་སྙིང་རྗེའི་རང་གཟུགས་ཡིན་པས་སྙིང་རྗེ་སྟོབས་ལྡན་རླབས་ཆེ་པའི་མངོན་རྟོགས་བསྒོམས་ནས་གོམས་པར་བྱ་བ་དེ་ནི་མ་ཧཱའི་ཆོས་སྐད་དང་བསྟུན་ན། ཏིང་འཛིན་རྣམ་གསུམ་དབྱེར་མེད་པའི་ཨ་ཏི་ཡི་ཀྲུང་བསྐྱེད་ཆོས་ཉིད་དོན་གྱི་ལྷའི་ང་རྒྱལ་འཛིན་པ་དེ་ཉིད་གནད་ཆེན་རེད། དེ་ཡིན་ན། དེ་ལས་ཀུན་སྣང་སྙིང་རྗེར་ཤར་བ་རྩལ་འདོན་བྱེད་རྒྱུ་འདི། འཕགས་པ་སྤྱན་རས་གཟིགས་སྒོམ་ལུགས་དང་། འཕགས་པ་ཐུགས་རྗེ་ཆེན་པོ་བསྒྲུབ་སྟངས་ངོ་མ་དེ་རེད། དྲང་དོན་ལ་འཕགས་པ་སྤྱན་རས་གཟིགས་སློབ་ལམ་པ་ཞིག་གིས། དང་པོར་འགྲོ་བ་བསྒྲལ་ནས་འཁོར་བ་སྟོང་པར་ཐུགས་ཤིག་བསྐྱེད། བར་དུ་སེམས་ཅན་ལ་མཐའ་མེད་པར་སྐྱོ་བས་སེམས་བསྐྱེད་ཉམས་ནས་སྔར་གྱི་དམ་བཅའ་བཞིན་དུ་སྐུ་ལུས་ཚལ་བ་སྟོང་དུ་གས་སོང་བའི་ཚེ་ན། སངས་རྒྱས་སྣང་བ་མཐའ་ཡས་ཀྱིས་ཕྱག་སྟོང་སྤྱན་སྟོང་དུ་བྱིན་གྱིས་བརླབས་ཚུལ་གསུངས་ཡོད་ཀྱང་། ངེས་པའི་དོན་ལ་ནི། རྒྱལ་བ་ཐམས་ཅད་ཀྱི་སྙིང་རྗེའི་གཟུགས་སུ་ཤར་བ། དཔེར་ན་སྲས་བཞི་བསྐྱེད་པའི་རྒྱལ་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་ཉིད། རྣམ་པ་རྟགས་ཀྱི་ཕྱག་རྒྱར་གསེར་མདོག་ཕྱག་བཞི་མར་སྣང་བའི་མངོན་རྟོགས་དང་། འདི་ནས་ཀྱང་ཐུགས་རྗེ་ཆེན་པོའི་རང་བྱུང་གི་དཀྱིལ་འཁོར་གཞན་ནས་ཡུམ་ཡི་གེ་དྲུག་མ་ནོར་པད་འཛིན་པའི་རྣམ་པར་སྣང་བ་དག་གཅིག་མཚུངས་རེད། སྙིང་རྗེ་དེའང་བརྩེ་བ་ཙམ་དང་སྙིང་རྗེ་ཉི་ཚེ་བ་ཙམ་མིན་པར། མཐའ་ཡས་གྲངས་མེད་ཚད་མེད་པའི་སེམས་ཅན་ལ་སྙིང་རྗེ་ཡང་ཚད་མེད་པ་ཡོད་དགོས་པ་རེད། སྙིང་རྗེ་ཚད་མེད་སྟོབས་ལྡན་ཟེར་ན། འགྲོ་བ་སེམས་ཅན་གྱི་སྡུག་བསྔལ་ལ་དམིགས་ནས། མ་ལག་ཆད་མའི་བུ་ཆུས་ཁྱེར་བ་ལྟ་བུའི་སྐྱབས་དགོས་སུ་མཐོང་བ་ཙམ་གྱིས་མི་ཆོག་པར། ཕ་དཔའ་བོའི་བུ་དགྲ་སྔོན་ལ་ལུས་པ་ལྟར། སྐྱབས་གནས་སུ་མཐོང་བའི་སྟོབས་དང་ལྡན་པ་ཞིག་དགོས་པ་རེད། སྟོབས་དང་ལྡན་ཟེར་བ་དེའང་ཐབས་སྙིང་རྗེ་ཆེན་པོ་དང་ཤེས་རབ་སྟོང་པ་ཉིད་གཉིས་ཀ་ཟུང་དུ་འབྲེལ་བ་ཞིག་དགོས། སྟོང་ཉིད་ཉན་རང་གིས་ཀྱང་རྟོགས་ཡོད་པས། སྟོང་ཉིད་རྟོགས་པའི་ཤེས་རབ་དེ་བདུད་རྩི་ལ་དཔེ་བཞག་ན། དེ་ཉན་རང་གི་ངེས་འབྱུང་དང་འདྲེས་སོང་ན་རང་དོན་གཏན་བདེ་འགྲུབ་པ། ཞི་བ་ཕྱོགས་གཅིག་པར་འགྱུར་རྒྱུ་དང་། རྒྱལ་སྲས་བྱང་ཆུབ་སེམས་དཔའི་སྙིང་རྗེ་ཆེན་པོ་དང་འདྲེས་སོང་ན། གཞན་དོན་འགྲུབ་པ་ཡིད་བཞིན་ནོར་མཆོག་ལྟ་བུ་ཞིག་ཡིན་པ་རེད། དཔེར་ན། ཀེ་ཏ་ཀ་ཡི་མེ་ཏོག་དེ་སྤོས་ཀྱི་གླང་པོའི་དྲོད་ཀྱིས་སྐྱོང་ན་གླ་རྩི་ལྟ་བུར་འགྱུར་བ་དང་། རྒྱ་མཚོའི་ཀླུ་མཁའ་ལྡིང་གི་ལྟོ་བའི་མེ་དྲོད་ཀྱིས་སྐྱོང་བཞག་ན་ནོར་བུ་ཏོག་གི་བློ་གྲོས་ལ་འགྱུར་ཡང་། གཞན་གྱིས་དེ་ལྟར་མ་ཡིན་པ་ལྟ་བུ་ཞིག་རེད། དེ་ཡིན་ན་སྟོང་ཉིད་སྒོམ་དུས་སྙིང་རྗེའི་རྩི་དྲག་པོས་ཟིན་པ་ཞིག་དང་། སྙིང་རྗེ་སྒོམ་དུས་སྙིང་རྗེ་ཕལ་བ་དམིགས་མེད་ཀྱི་སྙིང་རྗེ་མ་ཡིན་པ་ཞིག་འགྱུར་མི་ཉན། སྟོང་ཉིད་རྟོགས་པ་དེ་རིམ་བཞིན་དུ་སྙིང་རྗེའི་སྲོག་ལ་ཇེ་འགྲོ་དང་། སྙིང་རྗེ་དེའང་སྟོང་བའི་གྲོགས་ལ་ཇེ་འགྲོ་ཡིན་པ་ཞིག་དགོས། དེ་ནི་རིང་དུ་སོང་བ་བློ་ཡང་ལྷག་གྱུར་པས། །གསུངས་བ་ནི་སྟོང་ཉིད་སྙིང་རྗེར་འབྲེལ་བའི་ལག་རྗེས་རེད། དེ་ཡིན་ན་སྟོང་ཉིད་སྙིང་རྗེའི་སྙིང་བོ་ཅན་ཡིན་པར་མ་ཟད། སྙིང་རྗེ་སྟོང་ཉིད་ཀྱི་སྙིང་བོ་ཅན་དུ་གྱུར་ན། ཤིན་ཏུ་ཕྲ་བའི་སྟོང་ཉིད་ལ་དམིགས་པའི་ཤེས་རབ་དང་། ཆེས་རགས་པ་སྲིད་པའི་སྡུག་བསྔལ་ལ་དམིགས་པའི་སྙིང་རྗེ་གཉིས། གཅིག་གིས་ཟབ་པ་དང་། ཅིག་ཤོས་ཀྱིས་གསལ་བ་མཚོན་ཏེ་ཟབ་གསལ་གཉིས་སུ་མེད་པའི་ཡེ་ཤེས་དེ་གསང་སྔགས་སྤྱི་ཡི་དགོངས་དོན། རང་སེམས་འདོད་དགུར་དབང་གྱུར་བའི་ཏིང་འཛིན་ཟབ་མོའི་དམིགས་གནད་ཀྱང་རེད། དེ་ཡིན་ན། གཞན་དོན་དེ་བྱ་བའི་ཁོག་གཞུང་ཞིག་དང་། རྫོགས་བྱང་སྒྲུབ་པའི་ལམ་ཐམས་ཅད་ནི་དེའི་ཆ་ལག་ཡིན་པ་དང་། དེ་བཞིན་དུ། ཐེག་ཆེན་མདོ་སྔགས་གཉིས་ཀ་འགལ་མེད་ལ་བཤད་ཆོག་པ་རེད། རྒྱལ་སྲིད་རིན་ཆེན་བདུན་གྱི་བདག་པོ་དེ་འཁོར་བསྒྱུར་ཡིན་པ་ལྟར། ཡོན་ཏན་ཐམས་ཅད་ཀྱི་རྩ་བའི་བདག་པོ་དེ་སྙིང་རྗེ་ཆེན་པོ་ཡིན་པ་རེད། དེ་ལྟ་བུའི་གོ་དོན་གྱི་གཞི་རྩར་གནས་པའི་སྟེང་ནས། གསང་སྔགས་ཀྱི་བསྐྱེད་རྫོགས་དང་སྦྲེལ་ནས། འཕགས་མཆོག་སྡུག་བསྔལ་རང་གྲོལ་རྣམ་པ་རྟགས་ཀྱི་ཕྱག་རྒྱར་སྒོམ་དུས། གསལ་བརྟན་དག་གསུམ་ཚང་བའི་སྒོ་ནས། འདིའི་དབང་གི་ཆོག་ཁྲིགས་ཀྱི་ནང་ལ་གསལ་བོར་མེད་ཀྱང་། སྒྲུབ་གཞུང་ལྟར་དུ། སྐུ་མདོག་དཀར་པོ། ཞལ་གཅིག་པ། ཕྱག་བཞི་པ། ཞབས་གཉིས་མཉམ་པའི་སྟབས་ཀྱིས་བཞེངས་པ། རྩ་བའི་ཕྱག་གཉིས་ཀྱིས་ཐུགས་ཀར་ཐལ་སྦྱར་མཛད་པ། ལྷག་མ་གཉིས་ཀས་ཤེལ་དཀར་གྱི་བགྲང་ཕྲེང་དང་པདྨ་དཀར་པོ་བསྣམས་པ། ལོངས་སྐུའི་ཆ་ལུགས་ཅན། དར་དང་རིན་པོ་ཆེའི་རྒྱན་ཆས་བཅུ་གསུམ་གྱིས་མཛེས་ཤིང་མཛེས་པར་སྤྲས་པ། འཕགས་པ་སྤྱན་རས་གཟིགས་ཀྱི་སྐུ་དེ། ཤིན་ཏུ་ཞི་བའི་ཉམས་འགྱུར་ཅན་ཞིག དམིགས་བསལ་སྙིང་རྗེ་ཚད་མེད་ཀྱི་རྟགས་ལ་རི་དྭགས་ཨེ་ན་ཡའི་པགས་པའི་སྟོད་གཡོག་ཅན། སྐུ་མདོག་དཀར་པོ་ཡིན་པ་འདི་ནི་ཆོས་སྐུ་དྲི་མ་མེད་པའི་བརྡ། ཕྱག་བཞིའི་དང་པོ་གཉིས་ཀྱིས་སྟོང་ཉིད་ཀྱི་ཕྱག་རྒྱ་ཐལ་མོ་ཁོག་སྟོང་སྦྱར་མཛད་པ། འོག་མ་གཉིས་ཀས་གྲགས་སྟོང་སྔགས་སུ་སྒྲོགས་པའི་ཤེལ་ཕྲེང་དང་། སྐྱོན་གྱིས་མ་གོས་སྒྱུ་འཕྲུལ་དྲྭ་བར་འབྱེད་པའི་པད་དཀར་བསྣམས་པ། ཞབས་གཉིས་གོང་ནས་བཤད་པ་ལྟ་བུའི་མཉམ་པའི་ཚུལ་གྱིས་བཞེངས་པ་དེ་ཅི་ཞིག་གི་དོན་རེད་ཟེར་ན། དབྱིངས་དང་ཡེ་ཤེས་གཉིས་མེད་ཀྱི་དོན་ལ་རྟག་ཏུ་མཉམ་བཞག་ལས་མི་གཡོ་བ། དར་དང་རིན་པོ་ཆེའི་རྒྱན་ཆ་ནི་དགོས་འདོད་རེ་སྐོང་གི་བརྡ་དོན་ཡིན་པ། ཤིན་ཏུ་འཛུམ་ཞིང་ཞི་བའི་སྐུ་དེ་ནི་བྱམས་པས་འགྲོ་བ་སྐྱོང་བ་དང་། སྤྱན་མི་འཛུམ་པ་ཡོད་པ་དེ་ཉིད། འགྲོ་བ་སེམས་ཅན་ཀུན་ལ་སྐད་ཅིག་ཀྱང་གཡེལ་བ་མེད་པ་དུས་རྟག་ཏུ་གཟིགས་པ་ལ་སོགས་པའི་དག་དྲན་དང་བཅས་ཏེ། གཙོ་བོ་གཅིག་གི་ཆོ་འཕྲུལ་ལས་འཁོར་གྱི་ལྷ་ཚོགས་ཐམས་ཅད། ཉི་མ་ལས་འོད་ཟེར་བཞིན་དུ། གནས་གསུམ་རྡོ་རྗེ་གསུམ་གྱི་ཡིག་འབྲུས་མཚན་པ་ལས་འོད་ཟེར་འཕྲོས་ནས། བསྒོམ་པ་དང་འདྲ་བའི་ཡེ་ཤེས་པའི་ཕྱོགས་བཅུའི་དེ་བཞིན་གཤེགས་པ་སྲས་དང་བཅས་པ་སྤྱན་དྲངས་ཏེ། རང་ལ་ཐིམ། མཆོག་ཐུན་མོང་གི་དངོས་གྲུབ་ཐོབ་པའི་དམིགས་འདུན་དེ་ཉིད། ངས་འདོན་པ་དང་སྦྲགས་ནས་ཁྱེད་རྣམ་པས་གསལ་འདེབས་དེ་ལྟར་མཛོད། ཡང་མཚམས་འདིར། ཧཱུཾ། རྣམ་ཤེས་ཕུང་པོ་རྣམ་དག་ཅིང་། །སོགས་ཀྱི་དངོས་གཞིའི་དབང་བསྐུར། དེའི་རྗེས་ནས་སངས་རྒྱས་སྟོང་དབང་དང་དཔག་མེད་མྱུར་ལམ་གྱི་དབང་བསྐུར། དེ་ནས་ཡུམ་ཀ་བདེ་ཆེན་རྒྱལ་མོའི་དབང་གི་ལོ་རྒྱུས་ཀྱི་ཟུར་འཕྲོས་འདི་ལྟར་གནང་པ། སྤྱིར་མ་བརྒྱུད་མཁའ་འགྲོའི་ལྷ་ཚོགས་འདི་ཐམས་ཅད། ཆོས་དབྱིངས་ཀུན་ཏུ་བཟང་མོ་ཆོས་སྐུ་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མ། རབ་འབྱམས་དཀྱིལ་འཁོར་རྒྱ་མཚོའི་འབྱུང་གནས་དེའི་ཀློང་ནས་ཤར་བ་རྐྱང་རྐྱང་རེད། དབྱིངས་ལས་ཡེ་ཤེས་ཤར་བ་ལོངས་སྐུའི་ཞིང་ན་ཝཱ་རཱ་ཧཱི། དེ་ལས་ཡེ་ཤེས་ཀྱི་རང་རྩལ་སྤྲུལ་སྐུའི་མཁའ་འགྲོ་བདེ་ཆེན་རྒྱལ་མོར་སྣང་བ་ཡིན་ན། མཁའ་འགྲོ་མ་ཀུན་དགའ་མོའམ་མཁའ་འགྲོ་མ་ཉི་མ་དངོས་གྲུབ་ཅེས་གྲགས་པའི་མཁའ་འགྲོ་མ་གསང་བ་ཡེ་ཤེས་ཀྱང་འདི་ཉིད་ཡིན་པ་དང་། གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ན་སངས་རྒྱས་ཤིག་འབྱུང་བ་ཡོད་ཚད་པོའི་སྤྱི་ཡུམ། ཡུམ་སྒྱུ་འཕྲུལ་ལྷ་མོ་ཡང་འདི་ཉིད་ཡིན། དེ་ཐམས་ཅད་ཀྱང་འདི་ལས་གཞན་དུ་མ་གྱུར་བ་གཏེར་ལུང་མང་བོ་ལས་བསྔགས་པ་ལྟར་དུ་རེད། སྤྱིར་ན་ཕྲིན་ལས་ཀྱི་རྩ་བ་མཁའ་འགྲོ། དེའི་ནང་ནས་གངས་ཅན་ས་ལའི་སྨན་ལྗོངས་འདི་ན། ངོ་མཚར་སྤྲུལ་བའི་སྒྱུ་འཕྲུལ་ལ་ཤར་བ་དེ་ནི། མཁའ་ཆེན་རིགས་ཀྱི་ཐིག་ལེ་བདེ་ཆེན་རྡོ་རྗེ་རྣལ་འབྱོར་མ། གཟུགས་སྐུ་མི་མོའི་རྣམ་པར་བཞེངས་པའི་མཁའ་འགྲོ་ཡེ་ཤེས་མཚོ་རྒྱལ་དེ་བསམ་བཞིན་སྐྱེ་སྲིད་བཞེས་པ་རེད། གངས་ཅན་བོད་ཀྱི་ཡུལ་དབུས་ན་བོད་མོ་པདྨ་ཆེ་མཆོག་གི་གཟུགས་སུ་བཞུགས་དུས། མཚན་ལ་མཁའ་འགྲོ་ཡེ་ཤེས་མཚོ་རྒྱལ་དང་། དཔལ་རི་པདྨ་འོད་ཀྱི་ཕོ་བྲང་ན་རིག་འཛིན་རྒྱལ་མོའི་རྣམ་པར་བཞུགས་དུས་དབྱིངས་ཕྱུག་བདེ་ཆེན་རྒྱལ་མོ། སྲིན་པོའི་ཡུལ་གྱི་ཁ་གནོན་མཛད་དུས་མཁའ་འགྲོ་མཐིང་འོད་འབར་མ། ཞེས་སྐུ་གཅིག་ལ་མཚན་གྱི་རྣམ་གྲངས་ཐ་དད་པས་འགྲོ་བ་འདྲེན་པ། སྔོན་གྱི་ཐུགས་བསྐྱེད་དང་སྨོན་ལམ་གྱི་དབང་གིས། བོད་ཡུལ་འདིར་སྐྱེ་བ་བཞེས་པར་མ་ཚད་སྔོན་གྱི་སྐུ་རགས་པ་དེ་ཉིད་མ་བོར་པར། བོད་ཀྱི་སེམས་ཅན་ལ་དུས་གསུམ་ཀུན་ཏུ་གཟིགས་བཞིན་པ་ཡིན་པས་ན། ང་ཚོ་བོད་མིས་བསྒྲུབ་ན་གཞན་དང་མི་འདྲ་བའི་སྒྲུབ་ཐག་ཤིན་ཏུ་ཉེ་བ་རེད། དེ་ལྟ་བུའི་སྤྲུལ་སྐུ་ཡེ་ཤེས་ཀྱི་མཁའ་འགྲོ་མ་དེ་ཉིད་ཀྱིས་བོད་ཀྱིས་གཙོས་པའི་འཇིག་རྟེན་གྱི་ཁམས་འདི་ན། རྗེ་བཙུན་མ་ཧཱ་གུ་རུའི་ཐུགས་རྒྱུད་དགོངས་པའི་བྱིན་རླབས་ཉེ་བརྒྱུད་ཀྱིས་ཐོབ་པའི། བསྟན་ཞབས་གཏེར་གྱིས་གདམས་པའི་བཀའ་དྲིན་གུ་རུ་ཉིད་དང་མཚུངས་པ་ཞིག་ཡིན། མཆོག་བརྙེས་ཀྱི་རིག་འཛིན་ཐམས་ཅད་བྱིན་རླབས་ཆེ་ལུགས་འདྲ་ན་ཡང་། བཀའ་བབས་ཀྱི་ཁྱད་པར་ཐ་དད་ཡིན་པའི་དབང་གིས། མཁའ་འགྲོ་ཡེ་ཤེས་མཚོ་རྒྱལ་འདིས་གསང་སྔགས་ཀྱི་ཆོས་ཐོག་མར་གསུང་བར་བསྐུལ། བར་དུ་གཟུངས་ཀྱིས་གཟུངས། མཐའ་མར་བཀའ་ཡི་བསྡུ་བ་མཛད། ཡང་མཐར་གཏེར་དུ་སྦས་པར་མ་ཟད་ཀུན་མཁྱེན་འཇིགས་མེད་གླིང་པ་ལྟ་བུ་ཐུན་མིན་མཆོག་གི་སྐབས་བབ། གཏེར་སྟོན་སྤྲུལ་སྐུར་བརྒྱུད་པའི་བླ་མ་ལ། སྐུ་དངོས་ཀྱི་གཏེར་བྱང་གཏད་པའི་རྣམ་ཐར་མང་པོ་ཡོད་ལ། མཚོ་རྒྱལ་ཉིད་ཀྱི་སྒྲུབ་ཐབས་དང་། སྐུ་ཚབ་ཕྱག་བྲིས། ཕྱག་བཟོ། གཏེར་དཔེ། སྒྲུབ་རྫས་བྱོན་པ་སོགས་མང་པོ་ཡོད། མཁའ་འགྲོ་བདེ་ཆེན་རྒྱལ་མོ་ནི། པདྨའི་རིགས་ཀྱི་རྒྱལ་མོར་ངེས་པར་གཞིར་བཞག་གི་སྟེང་དུ། མཁའ་འགྲོ་སྙིང་ཐིག་གི་ནང་ནས་མཁར་ཆེན་གཟའ་དེ། རྟ་ཕག་པདྨའི་རིགས་ཀྱི་བཀའ་བབས་མཆོག་ཏུ་ཡང་བསྔགས་ཡོད་པ་རེད། རིགས་ལྔ་རིགས་གསུམ་གྱི་ནང་དུ་བསྡུས་ན། ལས་ཀྱི་རིགས་དེ་པདྨའི་རིགས་ཀྱི་ནང་ལ་བསྡུ་དགོས། འཕགས་ཡུལ་རིག་འཛིན་བརྒྱད་ལས་གུ་རུ་རིན་པོ་ཆེ་དང་བོད་ཡུལ་རིག་འཛིན་བརྒྱད་ལས་མཚོ་རྒྱལ་གཉིས་ཀ་ནི། ཕྲིན་ལས་ཕུར་བའི་བཀའ་བབས་ཀྱི་གཙོ་བོ་ཡིན་པ་རེད། རྗེ་འབངས་ཉི་ཤུ་རྩ་ལྔས་གྲུབ་རྟགས་བསྟན་ཡོང་དུས། མཁའ་འགྲོ་ཡེ་ཤེས་མཚོ་རྒྱལ་གྱིས་བསད་པའི་མི་རོ་བསླངས་པ་དེ། ཕྲིན་ལས་ཕུར་བ་གྲུབ་པའི་དངོས་གྲུབ་ཀྱི་མཆོག་གྲུབ་པའི་རྟགས་རེད། དེ་བཞིན་དུ་གསང་འཛིན་གསང་བའི་བདག་མོ་མཁའ་འགྲོ་ཡེ་ཤེས་མཚོ་རྒྱལ་མཆོག་ལ་བརྟེན་ཏེ། མཆོག་དང་ཐུན་མོང་གི་དངོས་གྲུབ་བསྒྲུབས་པའི་སྒྲུབ་ཐབས། ཟབ་མོ་ལམ་གྱི་རིམ་པ་རྩོད་མེད་སྤྲུལ་བའི་གཏེར་སྟོན་མི་ཉུང་བ་ཞིག་གི་གཏེར་ཁ་སྔོན་རྗེས་མང་པོ་ནས་བྱོན་པ་རེད། དེ་ལས་གཏེར་ཁ་འགའ་རེའི་ནང་ལ་ཕྱི་མཚོ་རྒྱལ། ནང་སྒྲོལ་མ། གསང་བ་ཁྲོས་ནག་ལྟར་དུ་སྒྲུབ་ལུགས་དང་། ཡང་ལ་ལའི་ནང་དུ་ཁྲོས་ནག་རྐྱང་བ་ལྟར་དུ་སྒྲུབ་ལུགས། རྒྱལ་དབང་ལྔ་བ་ཆེན་པོས་ཀུན་འདུས་ནོར་བུའི་ལུགས་གསུངས་ནས། མཚོ་རྒྱལ་ཁོ་ནས་སྒྲུབ་པ་དང་དབང་བསྐུར་དུས་ཕྱི་ནང་གསང་གསུམ་སོགས་གསུངས་ཡོད་པ་རེད། འདི་ན་སྦྲགས་སྒྲུབ་བྱས་ནས་གསུངས་འདུག བསྙེན་པ་བྱེད་དུས་ཐུན་མིན་མཆོག་སྒྲུབ་ལ་ཟབ་པའི་རྡོ་རྗེ་ཕག་མོ་དང་སྦྲགས་ནས་སྒྲུབ་པ་དང་། འོད་གསལ་བསམ་གྱིས་མི་ཁྱབ་པའི་ཡེ་ཤེས་བཙན་ཐབས་ལ་འབད་དུས་དང་། ཕྲིན་ལས་ཀྱི་ཁ་བསྒྱུར་དགོས་དུས། ཐུན་མོང་ལས་སྒྲུབ་ལ་མྱུར་བའི་ཐད་ཀྱི་འཕགས་མ་སྒྲོལ་མ་དང་སེང་གེའི་གདོང་ཅན་དང་སྦྲགས་ནས་སྒྲུབ་པ། བྱིན་རླབས་དབང་བསྐུར་གྱི་སྐབས་སུ་ཕྱི་ནང་གསང་གསུམ་དང་སྦྲགས་ཏེ་བསྒྲུབས་ནས། གསུམ་ཀའི་བཀའ་དབང་དུས་གཅིག་ལ་རྫོགས་པའི་ཆེ་བ་དང་ལྡན་པར་མཛད་དོ། སྐབས་སུ་བབ་པ་རྫོགས་ཆེན་ཀློང་ཆེན་སྙིང་ཐིག་གི་བཀའ་བབ་ཤིང་རྟ་ཆེན་པོ་རིག་འཛིན་འཇིགས་མེད་གླིང་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་ཇི་ལྟར་བྱོན་པ་ནི། འདི་ནས་གསུངས་རྒྱུར། སྒྲགས་མདའ་མཚོ་རྒྱལ་བླ་མཚོ་ནས། མཁའ་འགྲོའི་ཚོགས་ཀྱི་རྗེ་མོ་ཉིད་ཀྱིས། ཡེ་ཤེས་ཀྱི་སྐུ་དངོས་སུ་བསྟན་ནས་གདམས་པར་མཛད་པ་གསུངས་པ་འདིས་ཕྱོགས་ཙམ་མཚོན་པར་བྱས་ནས་སྟོན་འདུག རང་རེ་རྗེས་འཇུག་གི་དད་པས་མོས་པའི་རྟེན་ལ་དེ་བས་གསལ་ཙམ་ཞིག་ཞུས་ན། བོད་ཡུལ་འདིར། ཨོ་རྒྱན་ཆེན་པོས་སྐུ་དངོས་ཀྱི་ཞབས་ཀྱིས་བཅགས་ཤིང་བྱིན་གྱིས་རླབས་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་གནས་ཆེན་ལྔ་ཡི་ནང་ནས། སྐུའི་དབེན་གནས་སྒྲགས་ཀྱི་ཡོངས་རྫོང་ནས། ཀུན་མཁྱེན་འཇིགས་མེད་གླིང་པས་ཚོགས་ཀྱི་འཁོར་ལོ་སྟོང་རྩ་ཞིག་དང་། མཁའ་འགྲོའི་མེ་མཆོད་ཆེན་མོ་ཞིག་མཛད་རྒྱུ་ཐུགས་འདུན་བསྐྱངས་ནས་བྱོན་བཞིན་པའི་སྐབས་སུ། སྒྲགས་མདའ་མཚོ་རྒྱལ་བླ་མཚོ་ལ་ཕེབས་དུས་མྱོང་གྲོལ་བདུད་རྩིའི་ཕུར་མ་དང་མཚོ་དར་ཞིག་ཁོང་གིས་ཕུལ་གསུངས་ཡོད་པ་རེད། དེ་འབུལ་བའི་སྐབས་ངོ་མཚར་གྱི་ལྟས་དང་བཅས་ཏེ་ཐ་མལ་གྱི་སྣང་བ་ལས་འདས་པའི་དག་སྣང་ཞིག་ལྷན་སྐྱེས་ཀྱིས་ཤར་ནས། བླ་མཚོ་རུ་གྲགས་པའི་བཀོད་མའི་ཆུ་དེ་ལས་ཉེ་རེག་གི་བྱིན་རླབས་ཤིག་ཞུ་བཞིན་ཡོད་པའི་སྐབས་སུ་གསུངས་འདུག གནག་སྣུམ་བུང་བ་གཞོན་ནུ་མེ་ཏོག་ཨུཏྤལའི་མདངས་འདྲེན་པ་ཞིག་གིས་འཕུར་ལྡིང་གཡོ་བའི་གར་སྟབས་དང་ལྷན་དུ། སྒྲ་སྐད་སྦོམ་ལ་འགྱུར་བའི་གླུ་དབྱངས་རྒྱུད་མང་གི་སྒྲ་ལྟ་བུ་ཞིག་ལན་གསུམ་གྲགས་པའི་རྐྱེན་གྱིས། ཁོང་གི་ཐ་མལ་གྱི་སྣང་བ་གཏན་མེད་ལ་སོང་ནས། ཀུན་མཁྱེན་འཇིགས་གླིང་ཁོང་རང་གིས་གསུངས་ལྟར་བྱས་ན། སྣང་སེམས་ཆོས་ཉིད་གསུམ་པོ་འདྲེས་པའི་ཀློང་ནས་ཡེ་ཤེས་ཀྱི་མཁའ་འགྲོ་མ་སྐུ་མདོག་དམར་གསལ། རིན་པོ་ཆེ་དང་རུས་པའི་རྒྱན་དྲུག་གསོལ་བ། མེ་ཏོག་གི་དོ་ཤལ་འཕྱང་འཕྲུལ་དུ་གཡོ་བ་ཞིག་གིས། རང་གི་མངོན་པར་རྟོགས་པའི་སྙིང་པོ་དང་བཅས་པ་ལེགས་པར་བསྟན་ནས་ཞེས་གསུངས་ཡོད་པ་རེད། མངོན་རྟོགས་ཇི་བཞིན་དུ་གབ་སྦས་གསང་བའི་ཚིག་དང་སྦྲགས་ནས་རིམ་བཞིན་གསུངས་ཡོད། དེའི་འཕྲོར་མཁའ་འགྲོ་མ་དེའི་ཞལ་ནས། མཁའ་འགྲོ་ང་ནི་ཆོས་སྐུའི་ཀློང་ནས་ཡོང་། །འགྲོ་དང་འོང་བའི་རྣམ་རྟོག་ཡོད་མ་ཡིན། །བུ་མོ་ང་ནི་གནས་ཡུལ་ཉེར་བཞིའི་བདག། རྔ་ཡབ་དཔལ་རིའི་སྤྲུལ་བའི་ཞིང་ནས་ཡོང་། །ལ་སོགས་པ་དང་དེའི་འཕྲོ་ཞིག་ཏུ་ཡང་འདི་ལྟར་གསུངས་ཡོད། མཁའ་འགྲོ་ང་བསྒྲུབ་སྐུ་གསུམ་དངོས་གྲུབ་ཐོབ། །གདུལ་བྱའི་འགྲོ་དོན་ལྷོ་ནུབ་ཕྱོགས་ལ་ཡོད། །རྟེན་འབྲེལ་མ་འཆོལ་ལས་ཅན་སྐྱེས་བུ་ཚོ། །ཐིག་ལེ་དྲུག་གི་ཀློང་དུ་ངལ་གསོས་བཏབ། །ཅེས་གསུངས་པ་དང་མཉམ་དུ། མཁའ་འགྲོ་གསང་བའི་ཡི་གེ་རྫུ་འཕྲུལ་གྱིས་བཀོད་པ་ཟད་མི་ཤེས་པ་དང་གཉིས་སུ་མེད་པ་འདྲེས་ནས་སྙིང་དབུས་སུ་ཐིམ་པར་བྱས་བྱུང་གསུངས་ཡོད་པ་རེད། དེ་ནས་གསང་བའི་དམ་ཚིག་གི་ཞག་གྲངས་ཚང་པ་དང་ལྷན་དུ། དམར་ཕྱོགས་མཁའ་འགྲོ་འདུ་བའི་དུས་ཚེས་ཤིག་ལ། ཡང་རྫོང་དུས་སྒྲའི་དབང་པོའི་ཕོ་བྲང་ནས་རྟེན་འབྲེལ་ཟབ་མོའི་མཚམས་སྦྱོར་དང་བཅས་ཏེ། མཁའ་འགྲོ་གསང་བའི་སྒྲུབ་ཐབས་ལས་ཚོགས་དང་བཅས་པ་འདི་ཉིད་རྒྱ་ཁྲོལ་བ་ཡིན་གསུངས་པ་རེད། སྤྱིར་ན་གཏེར་ཞེས་པའི་ཐ་སྙད་འདི་ལ་དཔྱད་པར་བྱས་ན། ནོར་གཏེར། རྫས་གཏེར། ཆོས་གཏེར་ལ་སོགས་པ་ནང་གསེས་ཀྱི་དབྱེ་བ་མང་པོ་ཡོད། རེད་དེ་སྐབས་བབ་ཆོས་གཏེར་བཤད་པའི་དུས་ཡིན་དུས། ཆོས་གཏེར་སོགས་ཀྱི་གཏེར་གྱི་ཐ་སྙད་འདི་མདོ་སྔགས་གཉིས་ཀ་ནས་འབྱུང་བར་མ་ཚད། བོད་ཀྱི་གསར་རྙིང་གི་མཁས་གྲུབ་དམ་པ་མང་པོ་ཞིག་གིས་གཏེར་རིགས་བཞེས་མྱོང་བའི་ལོ་རྒྱུས་ཡོད་པའི་ནང་ནས་གཏེར་སྟོན་དང་གཏེར་ཆོས་མང་ཤོས་དེ་སྔ་འགྱུར་རྙིང་མ་པ་རེད། སྔ་འགྱུར་ཐུན་མིན་གྱི་ཆོས་སྐད་ལ། བཀའ་གཏེར་དག་སྣང་གི་བབ་སོ་ཆེན་པོ་གསུམ་དུ་གྲགས་པའི་ནང་ནས། ད་ལྟའི་དུས་འདིར་བྱིན་རླབས་ཀྱི་ཚན་ཁ་ཆེ་ཞིང་ཕྲིན་ལས་ཀྱི་དར་ཁྱབ་ཆེ་བའི་ཆོས་སྐལ་དེ་གང་ཡིན་ཟེར་ན། གཏེར་ཆོས་ལ་བཞག་ཅིང་གཏེར་ཆོས་ལ་བབ་པ་རེད། འདིའི་ཟབ་མོ་གཏེར་གྱི་བརྒྱུད་པ་འདི་ནི། བརྒྱུད་པ་དྲུག་ལྡན་ནམ་དགུ་ལྡན་གྱིས་ད་ལྟའི་བར་དུ་བརྒྱུད་པ་ཡིན། དེ་ཡང་ཀུན་བཟང་རྡོ་རྗེ་སེམས་དཔའ་ནས་སློབ་དཔོན་ཆེན་པོ་པདྨ་འབྱུང་གནས་ཀྱི་བར་དགོངས་བརྡ་སྙན་བརྒྱུད་གསུམ་གྱིས་བརྒྱུད། དེ་ལྟར་བརྒྱུད་པའི་དབང་གི་ཆུ་བོ་ཐམས་ཅད་ཨོ་རྒྱན་པདྨ་ལ་བབ་སྟེ། དེ་ལས་རྒྱུན་མི་འཆད་པ་སྐབས་བབ་ལུང་བསྟན། སྨོན་ལམ་དབང་སྐུར། མཁའ་འགྲོ་གཏད་རྒྱའི་བརྒྱུད་པ་དང་བཅས་པས་བརྒྱུད་ནས་བཀའ་གཏེར་ཐུན་མོང་གི་བརྒྱུད་པ་གསུམ་དང་། གཏེར་གྱི་སྒོས་ཆོས་ཀྱི་བརྒྱུད་པ་གསུམ་མམ་དྲུག་བསྣན་ནས་བརྒྱུད་པ་དྲུག་ལྡན་ནམ་དགུ་ལྡན་ཞུ་བ་རེད། ཁྱད་པར་དུ་དགོངས་གཏེར་དག་གི་ཁྱད་ཆོས་ནི། གུ་རུ་རིན་པོ་ཆེའི་ཐུགས་ནས་དག་པའི་འཁོར་རམ་ལས་ཅན་སྐྱེ་བོའི་ཐུགས་ལ་བརྒྱུད་པའི་ཐུགས་བརྒྱུད་དེ། ལས་རླུང་གི་གཞན་དབང་ལ་བརྟེན་པའི་སེམས་ལ་ཆོས་ཀྱི་ཚིག་དོན་གྱིས་རྗེས་བཏབ་པ་ཞིག་མ་རེད། འོད་གསལ་གཉུག་མའི་རིག་པའམ་སེམས་ཉིད་མི་ཤིགས་པའི་ཐིག་ལེའི་དབྱིངས་སུ། ཆོས་ཀྱི་དངོས་གྲུབ་དེ་དག་ཅིས་ཀྱང་མི་འཕྲོག་པ་བརྟན་པར་མཛད་པ་ལ། དོན་བརྒྱུད་སྙིང་ལ་འཕོས་པ་ཐུན་མིན་གྱི་གཏད་རྒྱ་ཁྱད་པར་ཅན་ཞིག་རེད། ཡང་བརྡ་དང་མཚན་མར་བརྟེན་ནས་ངེས་པ་རྙེད་རྒྱུ། སྔོན་བྱུང་གི་མཚན་མས་ཐུགས་གཏེར་གྱི་སྒོ་འབྱེད་རྐྱེན་བྱས་པའང་ཡོད་དོ། དེ་བཞིན་བརྡ་ཡིག་འདི་དག་ལ་མཚོན་ན། སྔོན་འོད་གསལ་ཀློང་ཆེན་དགོངས་པའི་དབྱིངས་རིམ་ལ་སྦས་པའི་ཟབ་ཆོས་དེ་ཉིད། དུས་ལ་བབ་དུས་འདོན་རྒྱུ་ཅན་གྱི་གཏེར་བདག་མཁའ་འགྲོའི་ཡི་གེ་ཡིན་མིན་སྣ་ཚོགས་པ་བརྡ་རྟགས་ཡི་གེ་གཟུགས་ཀྱིས་མཚོན་པར་བྱེད་པ་ཞིག་རེད། གཏེར་ཆོས་འདི་ལ་ཐུན་མིན་གྱི་དགོས་པ་བཞི་ཡོད་པ་ནི། དམ་ཆོས་མི་ནུབ་པ། གདམས་ངག་མི་འཆུག་པ། བྱིན་རླབས་མི་གཡེལ་པ། བསྒྱུད་ཐག་ཉེ་བ་དང་བཞི་རེད། མདོར་ན། གཏེར་གནས་གསང་བའི་མཛོད་མཐར་ཐུག་པ་དེ་གང་ཡིན་ན། གཏེར་སྟོན་དག་གི་སེམས་ཉིད་འགྱུར་མེད་ཀྱི་དབྱིངས་དེ་རེད། དེ་ན་བཞུགས་པའི་གཏེར་ཆོས་དེ་ཉིད། སློབ་དཔོན་ཆེན་པོའི་གསང་གསུམ་འདུས་པའི་བྱིན་རླབས། བརྒྱུད་གསུམ་དགོངས་པའི་སྙིང་བཅུད། གསང་རྡོ་རྗེ་ཡེ་ཤེས་ཀྱི་ནུས་པས་སྦས་བཞག་པ་དེ་ཚོ། ཇི་ལྟར་གཏེར་ནས་གཏོན་པ་རེད་ཟེར་ན། འོད་གསལ་གཉུག་མའི་རིག་ཆ་ཕྱི་གསལ་སོ་སོར་རྟོགས་པའི་ཤེས་རབ་ཀྱིས་རྗེན་པར་བསྐྱོང་བ་དེ་ཀུན་མཁྱེན་འཇིགས་གླིང་གིས་སྣང་སེམས་ཆོས་ཉིད་གསུམ་འདྲེས་པའི་ཀློང་ནས། མཁའ་འགྲོ་མའི་ཡེ་ཤེས་ཀྱི་སྐུ་དངོས་སུ་མཇལ་ནས། རང་གི་མངོན་པར་རྟོགས་པའི་སྙིང་པོ་བསྟན་གསུངས་པ་འདིས། བརྡ་ཚིག་བློ་ལས་འདས་པའི་སྙན་རྒྱུད་ཤོག་སེར་ཆེན་པོའི་དགོངས་དོན་དུ། རིག་རྩལ་ཤེར་རབ་ཀྱི་སྣང་ཆ་མངོན་སུམ་བཀྲ་ལམ་དུ་བྱུང་བ་དེ་བསྟན་ཡོད་པ་རེད། ད་རུང་མཁའ་འགྲོ་ཡེ་ཤེས་མཚོ་རྒྱལ་གྱིས་ཞལ་གཟིགས་དུས། མཁའ་འགྲོ་ང་ནི་ཆོས་སྐུའི་ཀློང་ནས་འོང་། ལ་སོགས་པའི་ཚིག་རྐང་བཞི་པོས། ཀ་དག་ཆོས་སྐུ་སྐྱེ་མེད་ཀྱི་ཀློང་ནས་ལྷུན་གྲུབ་འགག་མེད་ཀྱི་རང་མདངས་ལོངས་སྐུར་ཤར་བ་འདི། སྣ་ཚོགས་གང་འདུལ་སྤྲུལ་སྐུའི་སྒྱུ་འཕྲུལ་མཛད་ཀྱང་། དོན་ལ་གཤེགས་བཞུགས་འགྲོ་འོང་གི་རྣམ་རྟོག་མཚན་མ་མི་དམིགས་ན་ཡང་། རྟེན་རང་ལུས་རྡོ་རྗེའི་ཕུང་པོའི་གྲོང་ཁྱེར་གྱི་གནས་ཡུལ་ཉི་ཤུ་རྩ་བཞི། བརྟེན་པ་རྩ་རླུང་ཐིག་ལེའི་འགྲོས་དག་པ་དེ་ཉིད། གང་ལས་མཆེད་པའི་མཆེད་གཞི། ཡེ་ཤེས་ནམ་མཁའི་གཟུགས་ཅན། མཁའ་ཁྱབ་མཁའ་དང་མཉམ་པའི་སྐུ་མངའ་བ། སྟོང་ཆེན་དབྱིངས་ཀྱི་བདག་མོའམ་རྗེ་མོ་ཁོང་ཉིད་ཀྱིས། རང་སྣང་རྔ་ཡབ་དཔལ་རི་སྤྲུལ་པའི་ཞིང་ནས། ལས་ཅན་དག་པའི་སྣང་ངོ་ལ། བརྡ་དང་རྟགས་ཀྱིས་མཚོན་པའི་ཆོས་གཏེར་ཟབ་མོའི་སྒོ་ནས། དབང་གི་ཆུ་བོ་རྒྱུན་མ་ཆད་པའི་བྱིན་རླབས་སུ་འཕོས་པར་མཛད་པའི་དོན་དེ་འདྲ་བ་ཞིག་རེད། ད་རུང་དེའི་འཕྲོར། མཁའ་འགྲོ་ང་སྒྲུབ་སྐུ་གསུམ་དངོས་གྲུབ་ཐོབ། །གདུལ་བྱའི་འགྲོ་དོན་ལྷོ་ནུབ་ཕྱོགས་ལ་ཡོད། །ལ་སོགས་པས་མཁའ་འགྲོའི་སྒྲུབ་པ་འདི་ཉིད། གཏེར་ཆོས་གཞན་ལས་ཀྱང་ཁྱད་པར་དུ་འཕགས་པའི་ཆོས་ཀྱི་ཆེ་བ། ཚིག་ཕྱི་མ་གསུམ་གྱིས་དགོངས་གཏེར་ནམ་མཁའི་མཛོད་ཅན་བདག་གིར་བྱེད་པའི་ཀུན་མཁྱེན་མཁྱེན་བརྩེའི་འོད་ཟེར་ལ། དབུགས་དབྱུང་ལུང་བསྟན་གྱི་རྟེན་འབྲེལ་མ་འཆུག་བཞག་ན། ཁྱེད་ལས་ཅན་སྐྱེས་བུ་སྐུ་ཚེ་མི་ཤིགས་ཐིག་ལེ་དྲུག་གི་ཀློང་དུ་རྒྱས་བཏབ་ནས། ཕྲིན་ལས་ཁྱད་པར་ཅན་གྱིས་འབྲེལ་མཐུད་གསོས་བཏབ་བྱས་ནས། ཆོས་འདི་མི་ནུབ་མཐའ་རྒྱས་ཡོང་བའི་བདེན་ཚིག་དེ་ལྟར་མི་འགྱུར་རླུང་ལྔ་འདུས་པའི་དབྱིངས་ཆེན་པོར་མི་ཤིགས་སྟོང་བའི་ཐིག་ལེ་གཅིག་ལ་འདུས་སོང་པ་དེ། དབྱིངས་ཀྱི་མཁའ་འགྲོའི་བརྡ་ལུང་གིས་བསྒྲགས་པའི་སྟབས་ཀྱིས། དེ་རིང་ཁར་རྩང་དེའི་མཐུ་གྲུབ་སྟེ་རྫོགས་ཆེན་ཀློང་ཆེན་སྙིང་ཐིག་གི་ཆོས་འདི། འཛམ་གླིང་ཡངས་པའི་ཡུལ་གྲུ་མང་བོ་ཞིག་ལ། དཀར་འཇམ་ཡུག་གཅིག་ཏུ་བརྡལ་བ་མཐོང་ཆོས་ཡིན་པ་འདིས་ཀྱང་། རྟེན་འབྲེལ་གྱི་སྣ་ཁ་མ་ལོག་པར་བྱིན་རླབས་ཀྱི་ཚན་ཁ་གཞན་ལས་ཁྱད་འཕགས་ཡོད་པའི་འཕགས་ཆོས་རང་ཤུགས་ཀྱིས་མཐོང་ཐུབ། ཡེ་ཤེས་མཁའ་འགྲོས་རྗེས་བཟུང་གི་རྟོགས་བརྗོད་འདི་མ་ཡིན་པར། དུས་གཞན་ཞིག་ལ་རྔ་ཡབ་དཔལ་རི་སྤྲུལ་བའི་ཞིང་ཁམས་ལ་མངོན་སུམ་དུ་ཕེབས་ནས། གུ་རུ་ཡབ་ཡུམ་གྱིས་རྗེས་སུ་བཟུང་། བྱིན་གྱིས་བརླབས་ཏེ། དབུགས་དབྱུང་། ལུང་བསྟན་གནང་བ་སོགས་ཀྱང་འདི་དང་རིགས་འདྲ་བ་ཡོད། དེ་ལྟ་བུའི་རིག་འཛིན་ཡུམ་ཀ་མཁའ་འགྲོ་བདེ་ཆེན་རྒྱལ་མོའི་དཀྱིལ་འཁོར་དེར། དབང་དང་བྱིན་རླབས་རྗེས་གནང་གསུམ་པོ་དབང་ཆོག་གི་སྒྲོམ་གཞི་གཅིག་ལ་འདུས་སོང་བའི་སྨིན་བྱེད་ཀྱི་ཆོ་ག་སྒྲུབ་པ་ལ། ཐོག་མར་འདི་ནས་དབང་ཆོག་སྤྱི་འགྲོས་ལྟར་དུ་བླ་མ་དང་དཀྱིལ་འཁོར་གྱི་ལྷ་ཚོགས་གཉིས་སུ་མེད་པ་ལ་མཎྜལ་ཞིག་ཕུལ། མཚམས་འདིར། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་པ། །སོགས་དང་། གཞན་ཡང་སྐྱབས་འགྲོ་སེམས་བསྐྱེད་སོགས་རྗེས་ཟློས་མཛད་ནས་ཟུར་འཕྲོས་ཀྱི་བཀའ་གསུང་། འདི་དམིགས་པ་གསལ་འདེབས་པ་རེད། དམིགས་པ་གསལ་འདེབས་འདི་མཁའ་འགྲོའི་ལས་བྱང་གི་བསྐྱེད་ཆོག་དང་སྦྲེལ་བ་ཞིག་འདི་ནས་མར་གསུངས་འདུག སྤྱན་འདྲེན་འབེབས་སྔགས་དང་བཅས་པས་བསྟན་པ་རེད། དང་པོར་དམིགས་པ་ལ། ངས་དལ་མོ་བྱས་ནས་འདོན་ཡོང་དུས་དེ་བཞིན་དུ་ཁྱེད་རྣམས་པས་ཐུགས་དམིགས་མཛོད། འདི་ནས་ཨ་ཏི་རྫོགས་པ་ཆེན་པོ་ལ་ཡང་གོང་ནས་ཞུས་པ་ལྟར་དུ། ནང་ཚན་དགུ་རུ་ཕྱེས་ཏེ་དཔེར་ན། ཨ་ཏིའི་ཨ་ནུའམ་ཨ་ནུའི་ཨ་ཏི་ལའང་འབྲེལ་སྦྱར་ཆོག་པའི་ནང་ལུང་ཨ་ནུ་ཡོ་གའི་ལྟ་སྒོམ་སྤྱོད་འབྲས་དང་བསྟུན་དགོས་པ་རེད། དེ་ཡིན་ན་ཨ་ནུ་ཡོ་གའི་ལྟ་བ་དེ་སྣང་ཆ་ཡེ་ནས་དག་པ་ཀུན་ཏུ་བཟང་པོ་རང་བྱུང་ལྷུན་གྲུབ་ཀྱི་དཀྱིལ་འཁོར་དང་། སྟོང་ཆ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར་གཉིས། སྲས་བདེ་བ་ཆེན་པོ་དབྱིངས་དང་རིག་པ་སོ་སོ་མ་ཡིན་ཐ་མི་དད་པའི་བྱང་ཆུབ་སེམས་ཀྱི་དཀྱིལ་འཁོར་ཡིན་དུས། གནས་ལུགས་དག་མཉམ་བདེ་བ་ཆེན་པོའི་ངང་དེ་ལས་ཕྱིའི་སྣང་བ་ཇི་ལྟ་བ་དེ་བཞིན། ནང་རྣལ་འབྱོར་ལུས་ཀྱི་ཆ་ལ་ཚང་པའི་ནང་གི་རྩ་རླུང་ཐིག་ལེ་འདི་དག་ལམ་དུ་སློང་ཐུབ་པ་ཡིན་ན། དག་པ་ཡེ་ཤེས་ཀྱི་སྣང་བ་འཆར་བ་དང་། ལམ་དུ་སློང་མ་ཐུབ་ན། མ་དག་འཁྲུལ་བའི་སྣང་བ་འཆར་བས་ཕྱི་སྤྲོས་བཅས་ཀྱི་བསྐྱེད་རིམ་སོགས་ལ་མི་ལྟོས་པར་རྡོ་རྗེ་ལུས་ཀྱི་རྩ་རླུང་ཐིག་ལེ་ལ་གནད་དུ་སྣུན་པའི་ཐོག་ནས། རགས་སྣང་ཐམས་ཅད་འགྱུར་མེད་ཡེ་ཤེས་ཀྱི་དབུ་མའི་དབྱིངས་སུ་བསྟིམས་ཏེ་གཉུག་མ་བྱང་ཆུབ་སེམས་ཀྱི་དཀྱིལ་འཁོར་དུ་འཇུག་པ་རེད། དེ་ཇི་ལྟར་ཡིན་ན། རྩ་གསུམ་འཁོར་ལོ་ལྔ་ལ་བརྟེན་པའི་ལུས་དབུས་དྭངས་མ་ལྔ་འདུས་ཀྱི་སྙིང་པོ་ན། ཆོས་ཀྱི་དབྱིངས་ཀྱི་ཡེ་ཤེས་སམ་མི་ཤིགས་པའི་བདེ་བ་ཆེན་པོའི་ཐིག་ལེ། ཡེ་ཤེས་ནམ་མཁའི་གཟུགས་ཅན་ཀུན་ཁྱབ་ཆོས་སྐུའི་རང་བཞིན་དུ། ལུས་གནས་ལུས་ལས་མ་སྐྱེས་པར་བཞུགས་པ་ཡིན་ན། འདི་ལ་རྫོགས་ཆེན་གྱི་རྒྱུད་དག་གི་ནང་ལ་གཞི་འཛིན་པའི་ཐིག་ལེའམ་ཀུན་ཏུ་བཟང་པོའི་ཐིག་ལེ་གསུངས་པ་རེད། འོད་ལྔའི་མུ་ཁྱུད་ལ་སྣང་བས་ན་རང་བཞིན་འོད་ཀྱི་ཐིག་ལེ་གསུངས་ས་ཡང་ཡོད། དཔལ་ལྡན་གསང་བ་འདུས་པའི་ནང་ནས་མི་ཤིགས་པའི་ཐིག་ལེ་དང་། དཔལ་བདེ་མཆོག་གི་སྐབས་ལ་མི་འགྱུར་བའི་ཐིག་ལེ་གསུངས་པ། ལམ་ཐབས་ཤེས་ཟུང་འབྲེལ་གྱི་སྒོ་ནས། བརྟེན་པ་རྩ་ཡི་རྫོགས་རིམ་དང་གཡོ་བ་རླུང་གི་རྫོགས་རིམ། བཀོད་པ་ཐིག་ལེ་བྱང་ཆུབ་སེམས་ཀྱི་རྫོགས་རིམ་རྣམས། མཚན་བཅས་མཚན་མ་མེད་པའི་ལམ་ལ་བརྟེན་ཏེ། དྭངས་མ་ཆེན་པོ་དྲུག་སྟེ། ས་ཆུ་གཉིས་ཀ་ཟུང་དུ་འཇུག་པ་སྐུ་རྡོ་རྗེ། མེ་རླུང་གཉིས་ཟུང་དུ་འཇུག་པ་གསུང་རྡོ་རྗེ། མཁའ་སེམས་གཉིས་ཀ་ཟུང་དུ་འཇུག་པ་ཐུགས་རྡོ་རྗེ་ཡིན་ན། དེ་ལྟ་བུ་ཤིན་ཏུ་ཕྲ་བའི་སྒོ་གསུམ་མི་ཤིགས་རྡོ་རྗེ་གསུམ་གྱི་མཆེད་གཞི་དེ་ཉིད། གནས་ཚུལ་ལ་ངོ་བོ་འཇིག་འབྲལ་མེད་པ། དུས་གསུམ་མཉམ་ཉིད་རང་བྱུང་གི་ཡེ་ཤེས་ཉིད་ལས་མ་གཡོས་ཀྱང་། སྣང་ཚུལ་ལ་ཆོས་ཅན་སེམས་ཀྱི་ཆོས་ཉིད་དུ་བཞུགས་པ་དང་ནི། ཀུན་རྫོབ་རྒྱུའི་ཐིག་ལེ་དང་དོན་དམ་འོད་གསལ་གྱི་ཐིག་ལེ་གཉིས་ཀ་རྟེན་དང་བརྟེན་པའི་ཚུལ་གྱིས་འབྲེལ་བ་ཡིན་པས། ཁམས་དྲུག་ལྡན་པའི་མིའི་ལུས་རྟེན་འདི། རྡོ་རྗེ་ཐེག་པའི་ཉམས་ལེན་གྱི་རྟེན་མཆོག་ཡིན་པའི་རྒྱུ་མཚན་དེ་རེད། དེའི་དབང་གིས་ཕུང་ཁམས་གྱི་འགྱུར་བ་ཐམས་ཅད་འགྱུར་མེད་བདེ་ཆེན་གྱི་དབྱིངས་སུ་བསྡོམས་པ་དེ། ཕྱི་ནང་གཞན་གསུམ་དེ་ཁོ་ན་ཉིད་དང་བཅས་པའི་ཉམས་ལེན་གྱི་གནད་འདུས་རེད། དེ་ལྟ་བུའི་འགལ་མེད་དོན་གཅིག་ལ་བསྡུས་པའི་ཉམས་ལེན་གྱི་གནད་དེ་ཟིན་པའི་སྟེང་ནས། སྤྱོད་པ་རང་ལུས་དང་གཞན་ལུས་ལ་བརྟེན་པའི་རྗེས་ཆགས་ཞུ་བདེའི་ཉམས་ལེན་གཙོ་བོར་བྱས་པའི་ཐབས་མཁས་ཟབ་མོ་དང་ལྡན་པས། འབྲས་བུ་སྙིགས་དུས་ཀྱི་ཚེ་ཐུང་འདིའི་རིང་ལ། ཚོགས་ལམ་འདུན་པ་སེམས་པ། སྦྱོར་ལམ་རིགས་ཆེན་འབྱེད་པ་ལ་སོགས་པའི་ལམ་ལྔ་དང་། ས་དང་པོ་འགྱུར་བ་མ་ངེས་པ་སོགས་ས་བཅུ་གཅིག་པོ། ནང་གི་ཐབས་མཁས་ཀྱིས་མྱུར་བར་བགྲོད་ནས། སྐུ་བཞིའི་ཡེ་ཤེས་ལྔ་ཡི་བདག་ཉིད་བདེ་བ་ཆེན་པོ་རྡོ་རྗེ་འཆང་གི་སྐུ་འགྲུབ་པར་བྱེད་པ་དེ། ཨ་ནུའི་ལྟ་སྒོམ་སྤྱོད་འབྲས་རེད། དེ་ལྟ་བུའི་གོ་དོན་ངེས་པའི་སྟེང་ནས། དབྱིངས་ནས་ཡེ་ཤེས་འབེབས་པའི་དམིགས་གནད་ཇི་ལྟར་འཛིན་དགོས་ཟེར་ན། དོན་དམ་འོད་གསལ་བྱང་ཆུབ་སེམས་ཀྱི་ཐིག་ལེ་ལ་བརྟེན་པའི་སྙིང་ཁའི་ཕྲ་མོའི་ཐིག་ལེ་ལ་བརྟེན་ནས། སྣང་སེམས་ལུས་ལྡོག་གི་ཤར་རིམ་དང་མཐུན་པའི་རང་བཞིན་བརྒྱད་ཅུའི་རྟོག་ཚོགས་འགགས་ཏེ་སློང་བྱེད་སྐྱོན་གསུམ་བྲལ་བའི་ནམ་མཁའ་ལྟ་བུ། ཤིན་ཏུ་མཚོན་པར་དཀའ་བའི་འོད་གསལ་བྱང་ཆུབ་སེམས་ཀྱི་གནས་ལུགས་ཀྱི་ཐོག་ལ་མཉམ་པར་བཞག་པ་དེའི་ངང་ལས། རང་རིག་ཆུ་ལས་ཉ་ལྡིང་པ་ལྟར་དུ། སྣང་སེམས་ལུགས་འབྱུང་དུ་ཤར་བའི་ཉེར་ལེན་གྱིས་རྒྱུ་བྱས། རླུང་འོད་ཟེར་ལྔ་བས་ལྷན་ཅིག་སྐྱེས་པའི་རྐྱེན་བྱས་ནས། སྒྱུ་མའི་ལྷ་སྐུར་ལྡང་བའི་ཚུལ་དང་མཐུན་པ་ཞིག་གིས། མཁའ་འགྲོ་ཡེ་ཤེས་མཚོ་རྒྱལ། ངོ་བོ་ཆོས་སྐུའི་ཡུམ་ཆེན་རྣམ་པ་བདེ་ཆེན་རྒྱལ་མོ་ཉིད་དུ་གསལ་བ། ཞལ་གཅིག་པ་ཆོས་སྐུ་འགྱུར་མེད། ཕྱག་གཉིས་པ་ཐབས་དང་ཤེས་རབ་དབྱེར་མེད། སྐུ་མདོག་དམར་བ་ཆགས་མེད་བདེ་ཆེན་མཚོན་བྱེད། སྐུ་གཅེར་མོ་འཁོར་བའི་སྐྱོན་གྱིས་མ་གོས་པའི་བརྡ། ཟུང་འཇུག་མཉམ་པའི་དོར་སྟབས་ཀྱིས་འགྲོ་དོན་ལ་སྐྱོ་དུབ་མེད་པའི་ཚུལ་གྱིས་བཞེངས་ཏེ་ཡོད་པ། ཤིན་ཏུ་ཆགས་དང་བཞད་པའི་ཞལ། ཞེས་གསུངས་འདུག་མོད། དེ་ནི། ཆགས་པ་ཉིད་ནས་ཆགས་པ་མེད་པའི་འདོད་ཆགས་ཆེན་པོས་འགྲོ་ལ་བརྩེ་བས་ཡོངས་སུ་མི་འདོར་བའི་སོ་སོར་རྟོགས་པའི་ཡེ་ཤེས་མངའ་བ། བཞད་འཛུམ་དགྱེས་པའི་རྣམ་འགྱུར་ཅན། ཕྱག་གཡས་ན་བདེ་སྟོང་ཟག་མེད་མཚོན་པའི་ཐོད་པའི་ཅང་ཏེའུ་སྙན་པའི་དབྱངས་ཀྱི་ཆོས་སྒྲ་སྙན་གྱི་ཐད་ཀར་གཏོད་ཅིང་འཁྲོལ་བ་དང་། ཕྱག་གཡོན་ན་གཟུང་འཛིན་རྩད་ནས་གཅོད་པའི་གྲི་གུག་གི་ཡུ་བ་ནས་འཛིན་ཅིང་དཀུར་བརྟེན་པ། སྣང་སྲིད་དབང་དུ་སྡུད་བའི་བརྡ་རྟགས་སུ་མཆོག་ཏུ་འགྱིང་ཞིང་ཟིལ་གྱིས་གནོན་པའི་ཉམས་འགྱུར་དང་ལྡན་པ། དེའི་ཐོག་ཏུ་ལྷན་སྐྱེས་བདེ་བ་ཆེན་པོ་དང་ཞུམ་མེད་འདོད་དགུར་མངའ་དབང་བསྒྱུར་བའི་ཉམས་རྒྱས་པ། ལྷ་དང་མི་ཡི་རིན་པོ་ཆེའི་བརྒྱན་དང་མཚར་སྡུག་གཞོན་ནུའི་རྒྱན་ཆ། པུནྜ་རི་ཀའི་དོ་ཤལ་ཅན་གསུངས་ཡོད་པ། པུནྜ་རི་ཀ་ལྷའི་རིན་པོ་ཆེ་མཛེས་སྡུག་གི་མེ་ཏོག་ཏུ་སྣང་བའི་དོ་ཤལ་འཆང་ཞིང་། བརྟུལ་ཞུགས་རིག་པའི་རྒྱན་དྲུག་སྐུ་ལ་གསོལ་བས་མཛེས་པར་བརྒྱན་པ་དང་། གནག་སྣུམ་དབུ་སྐྲའི་ལན་ཚར་ཅན་གསུངས་པ་རེད། རབ་འབྱམས་ཞི་ཁྲོའི་དཀྱིལ་འཁོར་གྱི་ལྷ་ཚོགས་བཀྲ་ཞིང་། འགྲོ་བའི་རྒུད་པ་སེལ་ཕྱིར་དབུ་སྐྲ་ཐུར་དུ་འཕྱང་བ། དབུ་ལ་རིགས་ལྔའི་མཚོན་རྟགས་ཀྱི་རཏྣའི་རྩེ་བྲན་བརྗིད་པ། སྤྱན་གསུམ་གྱི་ནང་ནས་དབུ་མའི་སྤྱན་གྱིས་གྱེན་དུ་ཆོས་སྐུའི་དབྱིངས་ལ་གཟིགས་ཤིང་། ལོངས་སྐུའི་སྤྱན་གྱིས་འགྲོ་བ་འདུལ་བར་གཟིགས་སྟངས་སྙོམས་པ་དང་ནི། སྤྲུལ་སྐུའི་སྤྱན་གྱིས་ཁམས་གསུམ་འགུགས། ཞེས་གསུངས་པ་རེད། ཁམས་གསུམ་འགུགས་པ་དེ་རྗེས་སུ་ཆགས་པའི་མདངས་ཀྱིས་གཟིགས་པ། སྐུ་གཅིག་སྐུ་གསུམ་ཀུན་འདུས། རྩ་གསུམ་ཞི་ཁྲོའི་རང་བཞིན། རྒྱུད་སྡེ་བཞི་དྲུག་གི་དཀྱིལ་འཁོར་ཐམས་ཅད་སྐུ་ལ་རྫོགས་ཤིང་། སྒྲུབ་གཞུང་བདེ་ཆེན་དཔལ་ཕྲེང་གི་ནང་ནས་འབྱུང་བ་བཞིན་དུ། སྤྱི་བོ་ཛ་ལནྡྷ་ར་དང་། སྨིན་མཚམས་པུལླི་ར་མ་ཡ། སོགས་ཉེ་བའི་གནས་བརྒྱད། ཞིང་དང་ཉེ་བའི་ཞིང་། འདུ་དང་ཉེ་བའི་འདུ་བའོ། ཚནྡྷོ་ཉེ་བའི་ཚནྡྷོ་སྟེ། ད་དུང་འཐུང་སྤྱོད་ཉེ་བའི་འཐུང་སྤྱོད་ཀྱིས་བསྡུས་པའི་གནས་ཡུལ་ཉེར་བཞིའི་མཚོན་པའི་གནས་གསུམ་མ་ཚོགས་མཁའ་འགྲོའི་འཁོར་གྱིས་སྐོར་བ། དེ་ལྟ་བུའི་དམ་ཚིག་སེམས་དཔའི་ཐུགས་ཀ་རུ། ཡེ་ཤེས་སེམས་དཔའ་རྗེ་བཙུན་ཨཱརྱ་ཏཱ་རེ་གསུངས་འདུག་པས་རྗེ་བཙུན་སྒྲོལ་མ་ལས་བཞི་ལྷུན་གྲུབ། འཇིགས་བརྒྱད་སྐྱོབས་པའི་སྐུ་མདོག་ལྗང་སྔོན། ཞལ་གཅིག་ཕྱག་གཉིས། ཕྱག་གཡས་པས་མཆོག་སྦྱིན་མཛད་པ། གཡོན་དཀོན་མཆོག་གསུམ་མཚོན་གྱི་ཕྱག་རྒྱ་ཅན། དེའི་ཐུགས་ཀར་ཏིང་འཛིན་སེམས་དཔའ་རྡོ་རྗེ་ཕག་མོ་གསལ་དགོས་པ། གནག་སྣུམ་གྲི་ཐོད་ཅན་སེམས་དཔའ་སུམ་བརྩེག་གི་གོ་དོན་སྔར་ཡང་ཞུས་པ་རེད། རྒྱན་དང་ཕྱག་མཚན་སྤངས་པ་གསུངས་འདུག་བསམ་ནས་འདིའི་ཕྱག་མཚན་འགལ་བ་ཅན་དུ་འཛིན་མི་དགོས། ཕྱག་མཚན་མཚན་མ་ཅན་མ་ཡིན་པར། ཡེ་ཤེས་ཀྱི་རང་མདངས་ཐབས་ཤེས་ཟུང་འབྲེལ་རང་འོད་ཀྱིས་མཚོན་པའི་རྣམ་པ་ཙམ་ཞིག་རེད། རང་ཉིད་དེ་ལྟ་བུའི་བདེ་ཆེན་རྡོ་རྗེ་རྣལ་འབྱོར་མ། མཁའ་འགྲོ་བདེ་ཆེན་རྒྱལ་མོའི་རྣམ་པར་ཤར་བ། སྣང་སྟོང་སྒྲིབ་གཡོགས་དང་བྲལ་བ་ཞིག་ཏུ་བསྒོམས། གནས་ལྔར་ཕྱག་མཚན་ལྔའམ་ཡིག་འབྲུ་ལྔས་མཚོན་པ་དེ་ལས་འོད་ཟེར་ཁ་དོག་སྣ་ལྔ་འཕྲོས་པས། འོག་མིན་གནས་དང་མཁའ་སྤྱོད་ཞིང་། །གཡུ་ལོ་བཀོད་དང་པདྨ་འོད། །ལ་སོགས་པ་གསུངས་པ་ལྟར། ཆོས་སྐུ་རྒྱལ་བ་ཡུམ་ཆེན་མོ་བཞུགས་པའི་འོག་མིན་ཆོས་ཀྱི་དབྱིངས་ཀྱི་གནས་དང་། རིག་འཛིན་དཔའ་བོ་མཁའ་འགྲོའི་བཞུགས་གནས་མཁའ་སྤྱོད་ཞིང་ཁམས། རྗེ་བཙུན་འཕགས་མ་སྒྲོལ་མའི་གཡུ་ལོ་བཀོད་པའི་ཞིང་ཁམས། མཁའ་འགྲོའི་གཙོ་མོ་ཡེ་ཤེས་མཚོ་རྒྱལ། སྲིན་མོའི་རྒྱལ་མོ་མཐིང་འོད་འབར་མ་བཞུགས་པའི། ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་སོགས། ཕྱི་བསམ་ཡས་སྣོད་བཅུད་ཀྱི་བཀོད་པ། ནང་རང་ལུས་རྡོ་རྗེ་ཕུང་པོའི་གྲོང་ཁྱེར་དུ་འདུས་པའི་གནས་ཡུལ་རབ་འབྱམས་སོགས་རང་བཞིན་གར་བཞུགས་ཀྱི་གནས་ནས། བསྒོམ་པ་དང་འདྲ་བའི་ཡེ་ཤེས་པ་སྤྱན་དྲངས་ནས། བདག་དམ་ཚིག་པ་དང་ཇི་ལྟར་ཆུ་ལ་ཆུ་བཞག་དང་མར་ལ་མར་བཞག་པ་བཞིན་དུ། གཉིས་མེད་གཅིག་ཏུ་འདྲེས་པར་བསམ་ནས། སྣང་སྟོང་སྐྱེ་འགག་བྲལ་བའི་ངང་ལ་དལ་ཅིག་མཉམ་པར་བཞག་བཞིན་དུ། རྩལ་སྣང་དབྱིངས་ནས་ཐུགས་རྒྱུད་བསྐུལ་བའི་དབྱངས་རྟ། སྤྱན་འདྲེན་གཏེར་གཞུང་གི་ཚིག་འདི་ལ་གསོན་བཞིན་ཐུགས་དམིགས་དང་ལྷན་དུ། ཁྱད་པར་དུ་མཇུག་གི་འབེབས་སྔགས་ཀྱི་དུས་ལ་མཆོག་དང་ཐུན་མོང་གི་དངོས་གྲུབ་ཐོབ་སྟེ་བྱིན་ཕེབས་པའི་ཐུགས་མོས་མཛད་དགོས། ཡིག་ཆུང་དུ་ཐོད་རྔ་བརྡུང་བའི་དབྱངས་ཀྱིས་སྐུལ་ཏེ། ཞེས་གསུངས་འདུག ཡང་མཚམས་འདིར། ཡུལ་གྱི་མིང་ནི་རྒྱ་གར་ཡུལ། །གནས་ཀྱི་མཆོག་གྱུར་ཨོ་རྒྱན་གནས། །སོགས་སྤྱན་འདྲེན་དང་། མེ་ཏོག་དོར། དངོས་གཞིའི་དབང་བསྐུར་སྐབས་ཀྱི་ཟུར་འཕྲོས། འདིའི་ཐུགས་ཀའི་ས་བོན་དེ་གང་ཡིན་ཟེར་ན། ཡི་གེ་བཾ་ཡིག་རེད། ཡེ་ཤེས་སེམས་མའི་ཐུགས་ཀར་དགའ་འཁྱིལ་དམར་པོ་ཡན་ལག་བཞི་བ་ཞིག་གཡོན་སྐོར་ལ་འཁོར་བའི་དབུས་ན་བཾ་ཡིག དེའི་མཐའ་སྐོར་རྩ་སྔགས་འགལ་མེའི་འཁོར་ལོ་ལྟར་འཁོར་གྱིན་ཡོད་པ། མདུན་བསྐྱེད་ཀྱི་ཐུགས་ཀ་ནས་སྔགས་ཕྲེང་བྱུང་ནས་སློབ་མ་རང་ཉིད་ལྷར་གསལ་བའི་ཞལ་དུ་ཞུགས། ཐུགས་ཀའི་ས་བོན་ལ་འཁོར་བར་བསམ་ནས་རྩ་སྔགས་བཟླ་དགོས། འདིའི་རྩ་སྔགས་དེ་པདྨོ་ཡོ་གི་ནི་ཛྙཱན་ཝཱ་རཱ་ཧཱི་ཧཱུྃ་རེད་མོད། འདིའི་བར་ན་ཏཱ་རེ་ཏུཏྟཱ་རེ་ཏུ་རེ་སྦྱར་ཡོད་པ་འདི་ནི། གོང་ནས་ཞུས་པ་ལྟར་དུ་སྦྲགས་སྒྲུབ་རེད། སྣ་ཚོགས་ལས་ཀྱི་དངོས་གྲུབ་ཐོགས་མེད་དུ་བྱེད་པ་ལ་དགོངས་ནས་རྗེ་བཙུན་སྒྲོལ་མ་དང་སྦྲགས་ནས་སྒྲུབ་པའི་ཚུལ་མཛད་པ་རེད། འདིའི་རྩ་སྔགས་ཀྱི་ཐོག་མར་ཨོཾ་ཡིག་ཡོད་རྒྱུ་འདི་ནི། སྔགས་ཀྱི་འགོ་འདྲེན་མཆོག་གི་དངོས་གྲུབ་སྟེར་བའི་དོན་ལ་བསྒྱུར་ཆོག་པའི་ཡི་གེ་རེད། དཔལ་དང་གཡང་་སྟེར་བ་བྱེད་པས་ན་ནོར་བུ་འཛིན་པའི་སྔགས་ཡིན་གསུངས་ས་ཡང་ཡོད། པདྨོ་ཡོ་གི་ནི་ཞེས་གསུངས་པ་ནི། པདྨའི་རྣལ་འབྱོར་མ་ཞེས་པའི་དོན། བདེ་ཆེན་འགྱུར་མེད་རྡོ་རྗེ་རྣལ་འབྱོར་མ་གསུངས་ཡོད་པ་ལྟར། མི་འགྱུར་པའི་བདེ་བ་ཆེན་པོ་སྟོང་ཉིད་དང་རོ་གཅིག་པ་མངོན་དུ་གྱུར་ཅིང་། པདྨ་ཆུ་དང་འདམ་ལས་སྐྱེས་ཀྱང་ཆུ་དང་འདམ་གྱི་དྲི་མས་མ་གོས་པ་བཞིན་དུ། ཟག་བཅས་འཕོ་བའི་བག་ཆགས་མཐའ་དག་སྤངས་བའི་བདེ་སྟོང་འབྱེར་མེད་ཀྱི་རྣལ་འབྱོར་ལས་སྐད་ཅིག་ཀྱང་གཡོ་བ་མེད་པར། འགྲོ་ཀུན་བདེ་ཆེན་དགའ་བཞིའི་ཡེ་ཤེས་ཀྱིས་བླ་མེད་རྫོགས་བྱང་ལ་སྦྱོར་བ། ཀུན་ཏུ་བཟང་པོའི་སྤྱོད་པ་ལས་གཞན་དུ་མི་འགྱུར་པ་དེ་ལ་གསུངས་པ་རེད། ཛྙཱ་ན་ཡེ་ཤེས། ཝཱ་རཱ་ཧཱི་གསུངས་པ་ནི། ཡེ་ཤེས་ཀྱི་ཕག་མོའི་དོན། འདིའི་རྒྱུན་འདེབས་ཀྱི་ནང་ན་གསུངས་པ་ལྟར། སྐྱེ་མེད་དབྱིངས་ཀྱི་མཁའ་འགྲོ་ཀུན་ཏུ་བཟང་། །འགག་མེད་ལོངས་སྐུའི་མཁའ་འགྲོ་ཝཱ་རཱ་ཧཱི། །གང་འདུལ་སྤྲུལ་སྐུའི་མཁའ་འགྲོ་མཚོ་རྒྱལ་མ། །སོགས་ངོ་བོ་གཅིག་ལ་གདུལ་བྱ་འདུལ་ཐབས་ཕྲིན་ལས་ཀྱི་དབྱེ་བའམ་ངོ་བོ་དང་གདངས་རྩལ་གྱིས་ཕྱེས་པའི་སྐུ་གསུམ་གྱི་རྣམ་པ་སྣང་ཚུལ་ཙམ་ཞིག་རེད། ཕག་མོའི་དབུ་གཙུག་གི་རལ་བའི་གསེབ་ནས་ཕག་ཞལ་ནག་པོ་བྱུང་སྟེ་གྱེན་དུ་གཟིགས་པ་དེ། རྟོག་མེད་ནམ་མཁའ་ལྟ་བུའི་དགོངས་པ་ལ་དུས་རྟག་ཏུ་བལྟས་པའི་བརྡ་རྟགས། དོན་དམ་འོད་གསལ་རྟོག་མེད་མི་འགྱུར་རྟགས་ཀྱི་ཕྱག་རྒྱར་སྣང་བ་ལ་སོགས་པས་མཚོན་པ་ཞིག་ཡིན། གནས་ལུགས་དོན་གྱི་ཕག་མོ་ནི། རྟོག་ཚོགས་ཐམས་ཅད་སྙིང་དབུས་མི་ཤིགས་པའི་ཐིག་ལེས་ཟོས་པའི་འོད་གསལ་བསམ་གྱིས་མི་ཁྱབ་པའི་ཡེ་ཤེས་གང་ཡིན་པ་དེ་ཉིད་རེད། མཐའ་མར་ཧཱུྃ་ཞིག་ཡོད་པ་དེ། རྒྱལ་ཀུན་ཐུགས་ཀྱི་ཡི་གེ་ཡིན། ཧཱུྃ་འདི་འཇོམས་པར་བྱེད་པའི་དོན་ལ་འཇུག་དུས་ཀྱང་ཡོད་པས། འདི་ནས་རྒྱལ་ཐབས་སྤྱི་བླུགས་ཀྱི་དབང་། རང་བྱུང་འོད་གསལ་གྱི་དབྱིངས་ནས། སངས་རྒྱས་ཀུན་གྱི་གསང་གསུམ་ཡེ་ཤེས་ཐུགས་ཀྱི་སྙིང་པོར་བསྡུས་ཏེ། ཡེ་ཤེས་ཆེན་པོའི་དབང་བསྐུར་ཅིག་གམ་ཡང་ན་དངོས་གྲུབ་སྩོལ་ཞེས་པའི་དོན་རེད། འདི་ནས་སྤྱི་དྲིལ་གྱི་སྔགས་ནི། ཨོཾ་གུ་ཧྱ་ཛྙཱན་བོ་དྷི་ཙིཏྟ་མ་ཧཱ་སུ་ཁ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ་རེད། མ་ཧཱ་སུ་ཁ་ཡན་ཆད་དེ་ཞི་བའི་སྔགས། རུ་ལུ་ཁྲོ་བོའི་སྔགས་རེད། འདི་སྣང་སྲིད་ཡེ་རྫོགས་དཀྱིལ་འཁོར་གསུམ་དུ་ཕྱེས་པའི་ངང་ནས་བཟླ་རྒྱུ་རེད། འདིའི་སྔགས་དོན་རེ་རེ་བཞིན་མ་ཞུས་ན་ཡང་ཚང་མས་ཤེས་གསལ་རེད། འདི་ནས་གསང་བའི་དབང་གི་རྗེས་འབྲེལ་བཟླས་ལུང་ལ་སྔགས་ཀྱི་བགྲང་ཕྲེང་འདི་འདྲེན་བཞིན་རྩ་སྔགས་ལན་གསུམ་རེ་རྗེས་ཟློས་མཛོད། རྩ་སྔགས་རྗེས་ཟློས་ལན་གསུམ། བཅོམ་ལྡན་བདག་གིས་བཟུང་ལགས་ཀྱིས། །སོགས་རྗེས་ཟློས་མཐར་གསུང་འཕྲོས་འདི་ལྟར་ཕེབས་པ། དབང་གསུམ་པ་འདི་ཤེས་རབ་ཡེ་ཤེས་ཀྱི་དབང་རེད། འདི་ནས་ཆོག་ཁྲིགས་ཀྱི་ནང་དུ་གསལ་ཁ་ཆེར་བྱས་མེད་ཀྱང་། སློབ་མ་དཔའ་བོའི་ང་རྒྱལ་དུ་གོ་འཕོ་དགོས་པ་རེད། སྒྲུབ་པ་པོ་ལྷར་གསལ་བ་ལྷ་མོའི་རྣམ་པར་སྔོན་ནས་འཆང་བཞིན་དུ་ཡོད་པས། ལྷ་མོའི་གཟུགས་ཀྱིས་སྙོམས་འཇུག་གི་བདེ་བ་སྟེར་ཚུལ་ལ། རྒྱས་པ་ནི་རྡོ་རྗེ་བྱིན་རླབས་སོགས་ཀྱི་སྔགས་དང་། མཚོ་རྒྱལ་ཉིད་ཀྱིས་སམ་སློབ་མ་རང་ཉིད་དང་། རིགས་བདག་ཨརྱ་དཔའ་བོའི་གཟུགས་སུ་བསྒྱུར་བར་མོས་པའི་གོ་དོན་ཅན་ཞིག་རེད། གང་ལྟར་ཕྱག་རྒྱ་བཞི་ཡི་སྙོམས་པར་ཞུགས་པར་བསམ་ནས། དགའ་བ། མཆོག་དགའ། ཁྱད་པར་ཅན་གྱི་དགའ་བ། ལྷན་སྐྱེས་ཀྱི་དགའ་བ་སྟེ་དགའ་བཞིའི་ཡེ་ཤེས་ཀྱི་རྟོགས་པ་ཐོབ་པར་བསམ་དགོས། ཡང་མཚམས་འདིར། ཧོ ཡེ་ཤེས་རྣམ་པ་ཐམས་ཅད་པ། །དགའ་བ་བཞི་ལ་ཡང་དག་བརྟེན། ། སོགས་ཤེས་རབ་ཡེ་ཤེས་ཀྱི་དབང་བསྐུར་སྐབས་ཀྱི་གསུང་འཕྲོས། གང་ཟག་རིམ་གྱིས་པ་ཞིག་ལ་མཚོན་ན། འདིའི་དབང་བཞིའི་ཡེ་ཤེས་སྔ་ཕྱི་རྒྱུ་འབྲས་ཀྱི་ཚུལ་དུ་འབྱུང་བས་དབང་གསུམ་པའི་ལམ་གྱི་དཔེའི་ཡེ་ཤེས་ཟེར་རྒྱུ་བོ་དེ། ཆོས་ཐམས་ཅད་བསམ་དུ་མེད་པ་དེ་ཁོ་ན་ཉིད་ཀྱི་གཟུགས་བརྙན་ཡིན་པ་གང་ཞིག བདེ་བས་ཐབས་བྱས་པའི་ལྷན་ཅིག་སྐྱེས་པའི་ཤེས་རབ་ལ་གོམས་པར་བྱས་པས་མཚོན་ནས། གང་མཚོན་བྱ་ནི་དབང་བཞི་བའི་སྐབས་སུ་དེའི་རང་བཞིན་ཇི་ལྟར་ཡིན་པ་མངོན་སུམ་དུ་མཐོང་བའི་ཐབས་བྱུང་འབྲས་བུའི་ལྷན་སྐྱེས་དངོས་སུ་སྐྱེ་པ་དེ་རེད། འདི་ཡང་ཞིབ་ཏུ་ཞུས་ན། ཡས་བབས་མས་བརྟན་གཉིས་ཀའི་ནང་གི་ཡས་བབས་ཀྱི་དགའ་བ་བཅུ་དྲུག་པོའི་མཐར་ཐུག་པའི་གནས་སྐབས་དེ་ཉིད། དབང་གསུམ་པའི་ཡེ་ཤེས་ལ་འདོད་དགོས། དེའི་རྒྱུ་མཚན། མས་བརྟན་གྱི་ཡེ་ཤེས་ལུགས་ལྡོག་ཏུ་ཉམས་སུ་མྱོང་བས་དཔེ་ལ་བརྟེན་ནས་དོན་འགྱུར་མེད་ཀྱི་བདེ་ཆེན་ཤེས་པའི་དགའ་བཞིའི་དོན་འོད་གསལ་ལ་ལྟ་བ་ཡིན་པས། ཡས་བབས་ཀྱི་མཐར་ཐུག་ལྷན་ཅིག་སྐྱེས་པའི་ཡེ་ཤེས་ལ་གོམས་པར་བྱེད་པ་ནི། དབང་གསུམ་པའི་དོན་པོར་ཡིན་དགོས་པ་རེད། མས་བརྟན་དགའ་བ་བཅུ་དྲུག་གི་མཐའ་མའི་རང་བཞིན་མི་ཤིགས་ཀྱི་དྭངས་མ་ཡིས། རྣམ་སྨིན་གྱི་ལུས་ཐམས་ཅད་ལ་ཁྱབ་པའི་རྐྱེན་གྱིས། སེམས་ལས་འདས་པའི་ཡེ་ཤེས་རྣམ་ཐར་བཞི་ལྡན་གྱི་བདེ་བ་ཆེན་པོའམ། བསམ་གྱིས་མི་ཁྱབ་པའི་ཡེ་ཤེས་དེ་ཁོ་ན་ཉིད་ཀྱི་ལྷུམས་སུ་ཞུགས་པ་ནི། དབང་བཞི་པའི་ངོ་བོ་ངོ་མ་དེ་ཡིན་དགོས་པ་རེད། འདིའི་ནང་ནས་དབང་གི་ཆོག་ཁྲིགས་ཀྱི་ཚིག་དེ་བསྡུས་པ་ངོ་མ་ཞིག་རེད། དེ་ཡིན་ན། དབང་བཞི་པ་དོན་དབང་འདི་ལ་ཡོངས་ཁྱབ་ཀྱིས་ཚིག་དབང་རིན་པོ་ཆེ་གསུངས་དར་བ་རེད། ཚིག་གིས་མཚོན་པ་དོན་དམ་གྱི་དབང་ཡིན་པས་ན་དེ་ལྟར་ཚིག་དབང་རིན་པོ་ཆེ་གསུངས་པ་རེད། ཞིབ་ཀྱིས་ཕྱེས་ན་འདི་ལ་ཚིག་གི་བཞི་པ། དོན་གྱི་བཞི་པ། རྟེན་ཅན་གྱི་བཞི་པ། ལམ་གྱི་བཞི་པ། འབྲས་བུའི་བཞི་པ་སོགས་ཀྱི་དབྱེ་བ་ཡོད་ཚུལ་གོང་ནས་ཞུས་པ་ལྟར་རེད། སྐབས་ཀྱི་དོན་ཞུ་བདེ་ལ་བརྟེན་ནས་ཡེ་ཤེས་འདྲེན་པའི་ཁྱད་པར། གནས་ཀྱི་སྒོ་ནས་ངོས་བཟུང་བ་འདི་ལ་བསམ་བློ་ཞིག་གཏོང་པ་ཡིན་ན། སྤྱིར་སྔགས་བླ་མེད་ཀྱི་རྫོགས་རིམ། དུས་འཁོར་དང་ཕྱག་ཆེན་ཐིག་ལེ་ལ་སོགས་པའི་སྐབས་ཀྱི་ངོས་འཛིན་སྟངས་ལ་ཁྱད་པར་ཅུང་ཟད་རེ་ཡོད་མོད། གཙོ་ཆེར་རྣམ་རྟོག་རགས་པ་དེ་ཉིད་ཆོད་པས་ན་དགའ་བ་གསུངས། རྣམ་རྟོག་ཆེན་པོ་ཆོད་པས་ན་མཆོག་དགའ། འབྲིང་པོ་ཆོད་པས་ཁྱད་པར་གྱི་དགའ་བ། རགས་པའི་ཆ་མེད་པས་ན་ལྷན་སྐྱེས་ཀྱི་དགའ་བར་འཇོག་པ་དེ་འདྲ་བ་ཞིག་རེད། འདི་དག་དབང་བཞི་དང་སྦྱར་དུས། དབང་སྔ་མ་གསུམ་རྟོག་བཅས་ཀྱི་དགའ་བ་དང་། ཕྱི་མ་རྟོག་མེད་ལ་འཇོག་དགོས་པ་རེད། འདིའི་དགའ་བཞིའི་འགྲོས་རེ་རེ་ལ་དགའ་ཆུང་བཞི་རེ་ཕྱེས་ན་དགའ་བ་བཅུ་དྲུག་རེད། དེ་ཡང་ཡས་བབས་རྒྱུ་དང་མས་བརྟན་འབྲས་བུའི་ས་ལ་སྦྱར་རྒྱུ། མས་བརྟན་གྱི་དགའ་བ་བཅུ་དྲུག་པོའི་དཀར་དམར་ཐུག་པའི་སྐད་ཅིག་ལ་རླུང་འགག་པས། འགྱུར་བ་ཉུང་པའི་ཤེས་རིག་ཀྱང་རྒྱུན་ཆད་ནས། སྐུ་བཞི་མངོན་དུ་བྱས་པའི་འབྲས་བུ་བཞི་བ་ལ་ངོས་འཛིན་པ་རེད། དེ་ལ་རྒྱུད་ཁུངས་མའི་ལུང་གིས་རྒྱབ་སྐྱོར་ཡོད་པ་རེད། རེད་དེ་གོ་བ་ཞིབ་ཆ་བྱས་ན། དོན་གྱི་ཡེ་ཤེས་བརྙེས་པའི་ཐ་སྙད་ཅན་གྱི་བདེན་མཐོང་སྔགས་ཀྱི་མཐོང་ལམ་ལ་འཇོག་པ། ས་དང་པོའི་ཡོན་ཏན་བརྙེས་པ་སོགས་ཀྱི་ཐད་ནས་སྒྲ་ཇི་བཞིན་པ་འཛིན་ཆོག་རྒྱུའི་ངེས་པ་མེད་པའི་འཐད་པ། དབང་བཞིའི་གོ་དོན་དང་སྦྲགས་ཏེ་བཤད་ཡོང་ན། ཁང་བུ་རྩེགས་པའི་རྒྱུད་ཀྱི་ནང་ན། བཞི་བ་ཉུང་བས་ལྷན་ཅིག་སྐྱེས། །ལྔ་བ་སྟོང་པ་ཉིད་ཀྱིས་སོ། །གསུངས་བས། དབང་བཞི་པོ་དཔེའི་ཡེ་ཤེས་སུ་བཞག་ནས་དེ་མཚོན་པའི་དོན་གྱི་ཡེ་ཤེས་དེ་གང་ལ་ངོས་འཛིན་པ་རེད་ཟེར་ན། དབང་བཞི་བའི་དུས་ན་སེམས་དང་ཡེ་ཤེས་གང་དུའང་མ་ཕྱེད་མི་འབྱེད། མཐའ་གཉིས་ལས་འདས་པར་སྦྱོར་བའི་ཆ་དེ་ལ་ལྔ་བའི་ཐ་སྙད་ཅེས་བསྟན། ཆོས་ཐམས་ཅད་ཀྱི་ཆོས་ཉིད་མཐར་ཐུག་དེ་ཁོ་ན་ཉིད་དབང་བཞི་བའི་བླ་དྭགས་ལ་བཏགས་པ་དེ་གནས་སྐབས་ཚིག་གིས་མཚོན་ནས། སྨིན་པ་ལས་རུང་གི་རྟེན་འབྲེལ་ཞིག་སྒྲིག་པ་ཡིན་ན། མཐར་ཐུག་དེའི་དོན་དུ་གཉིས་སུ་མེད་པའི་ཡེ་ཤེས་ངོ་མ་དེ། དད་དང་བྱིན་རླབས་ཀྱིས་གྲོལ་བྱེད་ཁྲིད་ཀྱི་རིམ་པ་ལས་རྟོགས་དགོས་པ་ནི། ས་ར་ཧ་བའི་གསུང་གི་ནང་ན། བླ་མའི་བྱིན་རླབས་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་འདྲ། །གསུངས་པ་ལྟར་རེད། འོན་ཀྱང་སྔོན་བྱུང་གི་བློ་མཐུ་ཅན་གཅིག་ཆར་པ་དབང་དུས་སུ་སྨིན་གྲོལ་གཉིས་ལྡན་དུ་གྱུར་པ་ཡང་བྱུང་དང་འབྱུང་སྲིད་པ་རེད། འདི་དག་ཟབ་མོ་འབྱེད་པའི་ཤེས་རབ་ཀྱིས་ངེས་པའི་རང་སྐད་མིན་ན་ཡང་། ཀུན་མཁྱེན་ཡབ་སྲས་ཀྱི་གཞུང་ལ་ངེས་ཤེས་འདྲོངས་པའི་དད་པའི་མངོན་རྟོགས་ཙམ་ཞིག་ཡིན་དགོས་པ་རེད། དབང་གིས་སྨིན་པར་བྱེད་ཟེར་རྒྱུ་འདིའང་། གཅིག་གིས་བལྟས་ན། འདི་སྔར་ཡར་ནང་དུ་འཛུལ་དུས་དང་། ད་ལྟར་དབང་ཐོབ་སྟེ་ཕྱིར་ཡོང་དུས་གཉིས་ཀ་འདྲ་འདྲ་རེད་བསམ་པའི་མངོན་སུམ་ལྟར་མི་མངོན་པ་ཡིན་ཡང་། ཡེ་ཤེས་སྐྱེ་བའི་སྣ་འདྲེན་དེ་དབང་གི་ཐབས་ལ་བརྟེན་ནས་སྡོམ་དམ་ཚིག་རྣམ་དག་གིས་སྲུང་ན། ལམ་རིམ་པ་གཉིས་ཀྱི་རྟེན་འབྲེལ་ལས་འབད་པ་ཆུང་ཆུང་གིས་དོན་འབྲས་ཆེན་པོ་ཐོབ་སྟེ་ཚེ་འདི་སོགས་ལ་གྲོལ་བ་ཐོབ་ཆོག་པ་རེད། སྔགས་ཀྱིས་བཏབ་པའི་ས་བོན་དེ་ཡུད་ཙམ་གྱིས་སྨིན་པ་དཔེར་བཞག་ནས་གསུངས་ཡོད། རྒྱུད་སྨིན་པའི་ཚད་ནི་རང་ལུགས་ཕར་ཕྱིན་ཐེག་པའི་སྐབས་ནས་ཀྱང་། རྟེན་གང་ཞིག་ལ་མཐོང་སྤང་སྤང་རུང་དང་མཐོང་ལམ་སྐྱེ་རུང་ལ་སྨིན་པའི་འཐད་པ་བཞག་པ། མདོ་སྡེ་རྒྱན་གྱི་ལུང་། ཇི་ལྟར་རྨ་དང་ཟས་ལ་སོགས་ཀྱིས་བསྒྲུབས་ཡོད་པ་ལྟར་ཤེས་དགོས། ཡང་མཚམས་འདིར། བཀྲ་ཤིས་བརྗོད་དེ་ཡུམ་བཀའ་བདེ་ཆེན་རྒྱལ་མོའི་དབང་དང་། གསང་སྒྲུབ་སེངྒེའི་གདོང་ཅན་གྱི་དབང་སོང་མཐར་ཕེབས་པའི་གསུང་འཕྲོས། སང་ཉིན་ཆོས་སྐྱོང་གི་སྲོག་གཏད་བྱེད་རྒྱུ་རེད། རྫོགས་ཆེན་ཨ་ཏི་ཡོ་གའི་གསང་བ་མན་ངག་སྡེའི་སྨིན་གྲོལ་ཟབ་དབང་གི་གདམས་པ་བས་ཀྱང་བཀའ་གཉན་རེད་ཟེར་ན་མིན་ཡང་། སྲོག་གཏད་ཞུས་ཟིན་རྗེས་སྲུང་མའི་གསོལ་ཀ་ཆགས་སོང་ན། ཡེ་ཤེས་པའི་ལྷ་ལ་ཐུགས་ཁྲོ་བ་མེད་ཀྱང་། འཁོར་གྱི་འཇིག་རྟེན་པའི་མ་མོ་དང་དྲག་ཚོགས་ཀྱིས་བཀའ་ཆད་འབྱུང་རྒྱུ་ཡོད་པས། བྱིས་པ་ཆུང་ཆུང་གསོལ་ཀ་འདོན་མི་ཐུབ་མཁན་གྱི་རིགས་དག་ཡོང་དགོས་ཡོད་མེད་རང་རང་གིས་བལྟ་རྒྱུ་དང་། བདག་བྱེད་མཁན་ཚོས་དེ་བཞིན་དུ་ལག་ལེན་མཛོད། ཉིན་དགུ་བའི་དབང་དོན་ཟབ་ཁྲིད།དེ་ནི། བཀའ་སྲུང་མ་མགོན་ལྕམ་དྲལ་གྱི་དབང་དང་། སྨན་བཙུན་ཚེ་རིང་མཆེད་ལྔའི་དབང་སོགས་ཡིན། དབང་དེ་དག་མཇུག་ཡོངས་སུ་རྫོགས་མཐར་ཟུར་འཕྲོས་འདི་ལྟར་ཕེབས་པ། ད་ཞག་སྔོན་མ་ཚེས་པ་བཅུ་ཡི་ཉིན་མོར། མི་འཇིགས་པ་སྐྱབས་ཀྱི་སྦྱིན་པའི་དགེ་ལས་མཛད་སྐབས་ཀྱི་ལྕགས་རྙི་ལོན་མཁན་ཨང་དང་པོ་དེ། འབའ་གླིང་དཀར་གཤིས་པའི་ལོ་གསུམ་མཚམས་པ་བསམ་གཏན་ཚང་རེད། ཁོང་གིས་དཔལ་སྤྲུལ་སྒྲུབ་ཕུག་གི་རི་ངོས་ནས་ལྕགས་རྙི་ཉི་ཤུ་རྩ་གསུམ་ལོན་འདུག ཁོང་ཨང་དང་པོ་རེད། ཁོང་ལ་དཔའ་དར་དུ། ཨ་ཐམ་རིལ་བུ་གསུམ་དང་ནི། དཔེ་ར་གཅིག བདུད་རྩི་རིལ་བུ་སྒམ་ཆུང་གཅིག དེ་བཞིན་ངས་བཤད་པའི་དེབ་ཆ་ཚང་ཞིག་དང་། ངས་ལག་བྲིས་བྱས་པའི་གསེར་ཡིག་གི་ཤོག་བྱང་ཞིག་འབུལ་རྒྱུ་ཡིན། དེའི་འཕྲོར་ཨང་གཉིས་པ་དཔོན་རུའི་མཁན་པོ་འཆི་མེད་བཟོད་པ་རེད། ཁོང་གིས་ལྕགས་རྙི་གསུམ་ལོན་འདུག དེ་ལ་ཨ་ཐམ་རིལ་བུ་གཉིས་དང་། བདུད་རྩི་རིལ་བུ་གཅིག་འབུལ་རྒྱུ་རེད། ཨང་གསུམ་པ་ལ་རྣམ་པ་དྲུག་ཡོད་པས་རེ་རེས་ལྕགས་རྙི་གཉིས་རེ་ལོན་འདུག དེ་རྣམས་ནི། ཉག་རོང་ཨ་སེའི་གྲྭ་བསོད་ནམས་སྦྱིན་པ་དང་གཅིག རྫ་རྒྱལ་དགོན་པའི་ཉི་མ་ཚེ་རིང་དང་གཉིས། རྟའུ་རང་ཤར་དགོན་པའི་བསོད་ནམས་དཔལ་འཕེལ་དང་གསུམ། དེའི་འཕྲོར་མཁར་འདའ་དགོན་པའི་བྱང་ཆུབ་རང་གྲོལ་དང་བཞི། རྫོགས་ཆེན་དགོན་པའི་མཆོད་ཆེན་བསོད་ནམས་ཆོས་འཕེལ་དང་ལྔ། དཀར་མཛེས་གླང་སྣ་དགོན་པའི་དབང་དྲག་ཚེ་རིང་དང་དྲུག་པོ་རེད། ཁོང་རྣམ་པ་ལ་བདུད་རྩི་རིལ་བུ་རེ་རེ་འབུལ་རྒྱུ་ཡིན། དེ་མ་ཡིན་པའི་རེ་རེ་ལོན་མཁན་དྲུག་ཅུ་ལྷག་འདུག་པས། དེ་རྣམས་ལ་བདུད་རྩི་རིལ་བུ་སྒམ་ཆུང་རེ་འབུལ་རྒྱུ་ཡིན། འདིའི་ཕྱག་རྟགས་འདི་ཐམས་ཅད་གཞུང་ལས་ཁང་ནས་མེ་ཉག་གི་སྟག་རོང་མཁན་པོ་པདྨ་གཞན་ཕན་གྱི་ཕྱག་བརྒྱུད་ནས་བཞེས་རྒྱུ་ཡིན། གཞན་ཡང་རྫོགས་གྲྭ་སྐལ་བཟང་རྣམ་གྲོལ་གྱིས་ལྕགས་རྙི་བཞི་བཅུ་ཞེ་བཞི་ཁུག་མ་དང་བཅས་པ་དེའི་ཅུང་ཟད་སྔོན་ཞིག་ནས་རྙེད་དེ་བསྣམས་ཡོང་པ་རེད། དེ་དག་གི་དཔའ་དར་ཞིང་སྒྲུབ་ཀྱི་སྐབས་ནས་གཞན་དེའི་རིགས་འབྲེལ་ཚོ་དང་མཉམ་དུ་འབུལ་རྒྱུ་བྱས་པ་ཡིན། ཞེས་དབང་བསྐུར་ལུང་གསུངས་ཏེ་འཚོགས་གྲོལ་ལོ།། ཉིན་བཅུ་བའི་དབང་དོན་ཟབ་ཁྲིད།དེ་ནི། རིག་འཛིན་ཚེ་སྒྲུབ་བདུད་རྩིའི་བུམ་བཅུད་ཀྱི་དབང་ཡིན། བླ་མས་དངོས་གཞིའི་དབང་གསུངས་མཐར་མཇུག་མཐའི་ཞལ་གདམས། དེའི་ཡན་གྱིས་དངོས་གཞིའི་དབང་ཕུལ་གྲུབ་པ་རེད། དུས་ཚོད་ཟེར་རྒྱུ་དེ་འགྲོ་མགྱོགས་པ་ཡིན་ཞིང་། དུས་གསུམ་གྱི་དུས་ཀྱི་འཁོར་ལོ་འདི་སྐད་ཅིག་སྐར་མའི་ཡུན་དུ་མི་འདུག་པར། སྣོད་བཅུད་ཀྱི་འགྱུར་འགྲོས་དང་བསྟུན་ཏེ་མདུན་ཕྱོགས་སུ་སྐྱོད་བཞིན་ཡོད་ན། མིག་གཅིག་གིས་ལྟ་བསྒྱུར་འདྲ་བོའི་སྣང་བ་ལ། རང་རེ་ཆོས་གྲོགས་རྡོ་རྗེའི་མཆེད་ལྕམ་འདི་ན་མཉམ་དུ་འཚོགས་ནས་ཉི་མ་བཅུ་པོ་དེ་ཙམ་གྱིས་ཚང་སོང་པ་རེད། ཡིན་ན་ཡང་། རང་གཞན་ཐམས་ཅད་ཀྱི་མི་ཚེའི་ནང་ནས་ཉི་མ་བཅུ་ཅན་མང་པོ་སོང་ཚར་བར་མ་ཟད། ཉི་མ་བཅུ་མ་དགོས་ལོ་བཅུ་ལ་རང་གཞན་འཕྲལ་ཡུན་གཉིས་ཕན་གྱི། རླབས་ཆེན་དོན་ལྡན་གྱི་བྱ་ལས་བསྒྲུབ་པ་དང་འགྲུབ་པ་ནི། འདས་དོན་ལོ་རྒྱུས་ཀྱི་ཕྱོགས་བསྡོམ་བྱེད་དགོས་ནའང་ལས་སླ་མོ་མ་རེད། གནས་དུས་སྐལ་བའི་གཞན་དབང་ལ་བསྟུན་ན། ད་རེས་ཀྱི་ཉི་མ་བཅུ་འདི། བརྗེད་དུ་མེད་བའི་ཉི་མ་བཅུ། རིན་ཐང་ཅན་གྱི་ཉི་མ་བཅུ་ཡིན་པར་མ་ཟད། འདིར་བཞུགས་དགེ་འདུན་པ་སྟོང་ཕྲག་མང་པོས། ཡང་དར་བསྟན་པའི་ལོ་རྒྱུས་ཀྱི་ཐོག་ལ་བཞག་པའི། མི་ནུབ་དོན་གྱི་བསྟན་པའི་རྒྱལ་མཚན་བསྒྲེངས་པའི་ཟིན་ཐོ་གསར་བ་ཞིག་ཡིན་པའི་ངོས་ནས་ཞལ་ངོ་གནོང་མི་དགོས་རྒྱུ་ཞིག་རེད། དེ་ཡིན་ན་གསང་སྔགས་དབང་ཁྲིད་མན་ངག་གི་སྐོར་འདི་ཐོབ་སོང་པའི་མིང་གི་ཐོབ་ཡིག་གསོགས་པ་རྐྱང་པས་མི་ཆོག་པར། ཉམས་ལེན་ཚད་དུ་འཁྱོལ་བ་མཛད་རྒྱུ་དེ་དབང་ཁྲིད་གསན་པའི་དོན་གོ་ཡིན་པ་རེད། དེ་རིང་ཁར་རྩང་འཛམ་གླིང་ས་འདིའི་སྟེང་ན་ཆེའི་རིན་ཐང་ཅན་གཞན་ལ་མེད་པའི་ནོར་བུའི་གཏེར་མཛོད་ཅིག་ཡོད་པ་དེ་གང་ཡིན་ཟེར་ན། བོད་དུ་དར་ཞིང་ད་ལྟར་ཉམས་མེད་དུ་གནས་བཞིན་པའི་མདོ་སྔགས་གཉིས་ལྡན་གྱི་རང་ལུགས། ཐུབ་པའི་ལུང་རྟོགས་ཀྱི་བསྟན་པ་དྲི་མ་མེད་པ་འདི་རེད། འདི་ནི། ཕྱི་ན་མི་བཞུགས་ནང་ན་བཞུགས། ནང་གང་ཟག་རང་རྒྱུད་ལ་བཞུགས་པ་ཞིག་ཡིན་དུས། རྣམ་པ་རེ་རེའི་ངོས་ནས་རང་རྒྱུད་ཀྱི་བསྟན་པའི་བྱི་དོར། སོར་བྱང་སྔགས་གསུམ་གྱི་སྡོམ་དང་དམ་ཚིག་དང་། ཁྱད་པར་དུ་གསང་སྔགས་ངེས་དོན་གྱི་ཉམས་ལེན། རང་བློ་རང་ལ་ཁེལ་བ་ཞིག་མཛད་ནས། རང་དོན་ཚགས་སུ་ཚུད་པའི་རྗེས་ཐོག་ལ། ཕྱིས་ནས་རླབས་ཆེན་གཞན་དོན་གྱི་མཛད་སྤྱོད་ལ་ཞུམ་པ་མི་དགོས་པ་ཞིག་གིས། དོན་གྱི་བསྟན་འཛིན་རེ་མཛད་གལ་ཆེ། ཡང་སྒོས་དེང་གི་དུས་འདིར། བོད་རང་གི་བསྟན་སྲིད་ཀྱི་དགོས་མཁོ་ཐུན་མོང་མ་ཡིན་པ་ནི། ཐུགས་མཐུན་གོང་བུ་གཅིག་གྱུར་གྱིས་རིས་མེད་བསྟན་པའི་སྙིང་པོ་ཕྱར་བ་གྲུ་འདེགས་ཀྱིས་འཛིན་ཐུབ་པར་བྱེད་རྒྱུ་དེ་རེད། དེ་ཡང་གང་ལ་མེ་ཏོག་ཕོག་པའི་ལྷ་སྐལ་དང་ཆོས་སྐལ་ཆོས་བརྒྱུད་གང་གི་བསྟན་ཞབས་སུ་སྐྱེས་ཡོད་ན། དེའི་རང་ལུགས་འཁྲུལ་མེད་འཛིན་ཐུབ་པའི་སྟེང་ནས་ཆོས་བརྒྱུད་གཞན་གྱི་གཞུང་དང་མན་ངག་གི་སྙིང་དོན་ཤེས་པར་བྱས་ཏེ། ཕྱོགས་མེད་དད་དང་དག་སྣང་གིས་ཐམས་ཅད་འགལ་མེད་གདམས་པའི་གནད་གཅིག་ལ་བསྡུས་ནས་རང་རྒྱུད་ཉོན་མོངས་པའི་ནད་ལ་ཕན་ཐོགས་ཅན་གྱི་སྨན་དུ་རང་གིས་བཟུང་། གཞན་ལ་ཡང་དེ་ལྟར་སྟོན་ཤེས་པར་བྱེད་རྒྱུ་དེ། རིས་མེད་ཀྱི་བསྟན་པ་འཛིན་ཟེར་བ་རེད། དེས་ན་རིས་མེད་ལ་རང་ལུགས་བོར་དགོས་པ་མ་རེད། རང་ལུགས་འཛིན་མི་ཤེས་མཁན་གྱིས་རིས་མེད་དེ་བས་མི་ཤེས་པས། ངས་ནམ་རྒྱུན་བཤད་ཀྱིན་ཡོད། བོད་དུ་དར་བའི་ཆོས་བརྒྱུད་ཆེན་མོ་ཁག་གི་ནང་ནས། གང་གི་བཟང་བ་རེད་ཟེར་ན། ཐམས་ཅད་བཟང་བ་རེད། ཐམས་ཅད་ལ་རང་རང་རང་གི་ཁྱད་ཆོས་ཕུལ་དུ་བྱུང་བ་རེ་ཡོད་པ་རེད། སྟོན་པ་གཅིག་གི་བསྟན་པ། མདོ་སྔགས་གཉིས་ལྡན་གྱི་རང་ལུགས་རྐྱང་རྐྱང་རེད། བརྒྱ་ཟོམ་འོ་མ་ལ་ཁ་མཐིལ་དང་། བུ་རམ་གོར་མ་ལ་དཀྱིལ་ཟུར་ཡོད་མ་རེད། ཡིན་ན་ཡང་རང་གང་ལ་མོས་ཤིང་ལས་ཀྱིས་འབྲེལ་བ་དེར་ཞུགས། དེའི་ཉམས་ལེན་གནད་ལ་སྨིན་པ་ཞིག་གྱིས་དང་། བྱིན་རླབས་དེའི་ཆེ་བ་རེད། དེ་རིང་ཁ་རྩང་ང་བཟང་ཁྱོད་ངན་གྱིས་ཕྱོགས་ཞེན་འཐེན་ཁྱེར་བྱེད་དུས་མ་རེད། ཁྱོད་ཀྱི་བཟང་དེ་ཁྱོད་ཀྱི་ལག་ནས་མ་ཤོར་དང་། ངའི་བཟང་དེ་ངའི་ལག་ནས་མི་མངགས་ཟེར་ནས། ལྷག་བསམ་དམ་བཅའི་མདུད་པ་གཅིག་ལ་དྲིལ་དགོས་དུས་རེད། ད་ཡང་བསྐལ་བ་རྟ་རྒོད་ཀྱི་འདྲེ་ལོག དུས་འགྱུར་ཡོ་ལང་གི་ཁུགས་སོ་གཅིག་ཐོན་ནས། ང་མ་གཏོགས་ཆོས་བཤད་པ་ཁེ་རུ་ཞིག་ས་འདིའི་སྟེང་ན་མ་ལྷག་ནའང་། དེའི་སྐབས་སུ་བསྟན་པ་ཆ་ཚང་ངས་འཛིན་ཐུབ་བསམ་པ་ཞིག་བྱེད་རྒྱུ་དེ་ནི། སྤྱིར་ཐུབ་པའི་བསྟན་པའི་རྗེས་ཞུགས། ཁྱད་པར་དུ་གངས་ཅན་བོད་ལ་སྐྱེས་པའི་མྱི། རིགས་ཀྱི་རུས་པ་དཀར་པོའི་རང་ཚུགས་ཡོད་པ། ཡང་སྒོས་མི་རབས་གསར་བའི་གཞོན་ཆུང་སྡེ་སྣོད་འཛིན་པ་ཚོའི་ཕྲག་ལ་བབ་པའི་དུས་རབས་ཀྱིས་སྤྲད་པའི་ལས་ཁུར་གཡོལ་ཐབས་མེད་པ་ཞིག་རེད། མདོར་ན་མཆོག་ཕལ་ཐམས་ཅད་ཀྱིས། དམ་པའི་ཆོས་ཕྱོགས་ནས། མདོ་སྔགས་ལམ་གྱི་གཞུང་རྟ། ཕན་དང་བདེ་བའི་གཞི་མ། འཇིག་རྟེན་མི་ལུགས་ནས། ཡ་རབས་བཟང་པོའི་བསམ་སྤྱོད། རང་གཞན་གཉིས་ཀ་བདེ་བའི་འབྱུང་རྩ། སྙིང་རྗེས་དྲངས་བའི་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེ་ཐབས་དང་ནི། སྐྱེས་ནས་དེ་དང་མི་འབྲལ་བ་བྱེད་རྒྱུའི་དམིགས་འདུན་འཛིན་པ་གནད་ཆེ། དེ་ཡང་བསམ་སྤྱོད་ཆོས་དང་མཐུན་པའི་ཡ་རབས་བཟང་པོའི་མིག་ལྟོས་ཤིག་ཡོང་དགོས་པ་རེད། ཡ་རབས་བཟང་པོའི་མིག་ལྟོས་ཡོང་རྒྱུ་དེ་ཡང་ཁ་ནས་ཁ་བཤད་མི་གཙོ་ལག་ལེན་གཙོ། བྱ་བ་དངོས་ཀྱི་དཔེ་སྟོན་གྱིས། རང་རྩིབས་ནས་འགོ་བཟུང་སྟེ་རྒྱ་བསྐྱེད་ལ་གཏོང་རྒྱུ་དེ། མི་རིགས་ཀྱི་ལ་རྒྱ་རེད་ལ། བསྟན་སྲིད་ཀྱི་དགོས་མཁོ་ཡང་ཡིན། གོང་ནས་ཀྱང་བཤད་ཡོད། དབང་ཁྲིད་ཀྱི་རྒྱུན་བླངས་བ་དེ། དང་པོར་རང་གིས་ཉམས་ལེན་ཞིག་བྱས། སྒྲུབ་པ་ཚད་དུ་འཁྱོལ་བའི་སྐབས་སུ། དེ་ནས་གཞན་ལ་སྤེལ་རྒྱུ་རེད། དམ་པའི་སྐྱེ་སྤྲུལ་གྱི་མིང་ཆེ་ཆུང་ལ་མ་ལྟོས་པར་ཡོད་ཀྱང་། དེ་རིང་ཐོབ་ཅིང་སོང་ཉིན་ནས་ཚོང་འདུས་ཀྱི་ཁྲོམ་ཅོག་ཐོག་གི་ཅ་ལག་འདྲ་ཞིག་བཟུང་ནས་ཁེ་བཟང་འཚོལ་སྤྱད་མ་བྱེད། དེས་ཁེ་མི་ལོན་པར་མ་ཟད། དོན་གྱིས་ཕམ་ཁ་ཉོས་པ་རེད། ཀ་ཁ་ག་ང་སྦྱོང་དགོས་ཐུག་ཨེ་ཐལ། གཞུང་སྡེ་སྣོད་རྒྱུད་སྡེ་ཚང་མ་མ་ཨ་མའི་པང་ན་ཐོན་མ་ཐག་སྦྱོང་མི་དགོས་ཤེས་ཤེས་ཁ་ཨེ་ཡོད། དེ་མེད་དུས་སྒྲུབ་པ་ཉམས་ལེན་གཞི་ནས་མ་བྱས་ན། མིང་རྐྱང་པས་འགྲིག་མེད་པའི་རྟགས་མཚན་རེད། འདུས་པ་མི་རྟག་འབྲལ་བའི་ཆོས་ཅན་ཡིན་པས། ད་སྟེ་ཡུན་རིང་མི་འགོར་ནས། རང་རེ་ཆོས་གྲོགས་ཐམས་ཅད། དང་པོ་གང་ནས་ཕེབས་པའི་རང་རང་གི་ས་ཕྱོགས་ལ་ཞལ་གྱེས་རྒྱུ་ཡིན་ན། ས་མདོ་དབུས་ཁམས་གསུམ་སྤྱི་ལེ་བརྒྱ་ཕྲག་དང་སྟོང་ཕྲག་གི་ས་ཐག་གིས་རྒྱང་། རི་ཆུ་ལ་ལུང་ཁྲི་སྟོང་མང་པོས་རང་རེའི་བར་དུ་ཆོད་ཡོད་ན་ཡང་། སེམས་བསམ་པ་འབྲལ་མེད་གམ་ན་གནས་པ་ཇི་བཞིན་དུ། ཆོས་དམ་གཅིག་གིས་སྦྲེལ་བའི་འདུན་མ་ལ་ཉེ་རིང་མེད་པར། མྱི་གཅིག་གི་ངོ་ལ་བལྟས། གནས་གཅིག་ལ་མཉམ་པོར་འདུས་བསྡད་པ་ཙམ་གྱིས་གང་ཡང་མི་ཕན། ནམ་ཞིག་ཤ་ཁྲག་གི་ལུས་ཀྱང་མི་བརྟན་འབྲལ་བའི་རང་བཞིན་རེད། དེ་བས་བོད་དང་བོད་ཆེན་པོའི་མཐོ་སྒང་གི་ལྗོངས། འཛམ་གླིང་ས་གཞིའི་རྩེ་མོའི་ཡང་ཐོག་ན་ཆགས་པའི། སྔར་གྱི་དུས་རབས་རིམ་བྱུང་ལ། དམ་པའི་སྐྱེས་བུ་གོང་མ་ཚོས་ཕྱག་བཏབས་པའི་རང་ས་རང་ཡུལ་གྱི་དགོན་པ་དང་གྲྭ་ཚང་། ཆོས་ཀྱི་བསྟི་གནས་ཡོད་ཚད་པོ་རང་ས་ནས་ཉམས་མ་འཇུག དགོས་པའི་དབང་གིས་ཕྱི་མཐར་གཟིགས་ནས། བསྟན་དང་འགྲོ་བར་ཕན་པའི་ཆེད་དུ་ས་གནད་ཀྱི་མེ་རྩར་བཏབ་པ་རྐྱང་རྐྱང་རེད། འདིའི་འཁོར་ཡུག་རང་བྱུང་གི་སྐྱེད་ཚལ་ལ་མི་མང་ཞིག་སྤུངས་ནས། དབེན་གནས་མི་དབེན་པ་ཞིག་ལ་བསྒྱུར། དགོན་གྲོང་འདྲེས་མའི་གྲོང་ཉོབ་ཅིག་ལ་ལོག་ནས། ཉིན་གཅིག་ཕུད་རྒྱུ་སྣུད་རྒྱུ་མི་ལོན་པ་ཞིག་ཡོང་དོགས་ཀྱིས་བཤད་འདུག་པ་མིན་ཡང་། གནས་གཅིག་གང་ནས་ཕུན་སུམ་ཚོགས་ཀྱང་། ཕྱོགས་གཞན་མང་པོ་ཞིག་ནས་སྟོང་སོང་ན། རྗེས་འགྱོད་ཕྱིས་ནས་རིག་རྒྱུ་ཅན་ཞིག་ཡིན་པས། མདོར་ན་ཚིག་གི་རྩ་བ་ཚུར་བསྡུས་ཡོང་ན། རྣམ་པ་ཐམས་ཅད་ཀྱིས། སྐྱེ་དགུའི་བདེ་སྐྱིད་ཀྱི་གཞི་རྩ། རང་རིགས་མེས་པོས་བཞག་པའི་ཕ་ནོར། རིན་བྲལ་ཆོས་དང་རིག་གཞུང་རང་ལག་ཏུ་ཡོད་རྒྱུ་འདི། གང་ཟག་རང་རྒྱུད་ནས་བྱི་དོར་གྱི་ཐོག་ཏུ། ཞུམ་མེད་སྤོབས་པའི་ཐུགས་སྟོབས་བཅངས་ཏེ། མིའི་རིགས་ནས་མཐའ་ཡས་འགྲོ་བའི་ཚོགས་ལ་ཕན་དང་བདེ་བའི་གཞི་རྩ་བསྐྲུན་རྒྱུ་དེ། འདིར་བཞུགས་མདོ་དབུས་ཁམས་གསུམ་གྱི་ཆོས་གྲོགས་ཡོངས་དང་། བོད་མི་བསམ་ཤེས་བློ་གཟུ་བོར་གནས་པ་ཐམས་ཅད། ཁྱད་པར་དུ་མ་མཐོང་འབྱུང་འགྱུར་ཕྱི་རབས་ཀྱི་རིགས་མཐུན་གྲོགས་པོ་ཚོ་ལ། ལྷག་བསམ་དཀར་པོའི་དྲོད་ཐིགས་མ་ཉམས་པའི་ལེགས་སྐྱེས་ཀྱི་ཆ་འཕྲིན་ཞིག གསོན་པོའི་གཟུགས་ཅན་ལ་བཞག་པ་ཡིན། ཐེངས་འདིའི་དབང་ལུང་ཁྲིད་གསུམ་སྨིན་གྲོལ་རྒྱབ་རྟེན་དང་བཅས་པ། ཐོག་མའི་འཆར་འགོད་ཀྱི་དུས་སྐབས་དེའི་སྟེང་ལ། འདི་བཞིན་བར་ཆད་ཅི་ཡང་མེད་པ་རྣམ་པར་རྒྱལ་བའི་ངང་ནས་ཡོངས་སུ་འགྲུབ་ལ་ཉེ་བ་རེད། འདི་ནི་འདིའི་ཚོགས་པའི་ཚོགས་གཙོ། མདོ་ཁམས་གཉིས་ཀྱི་བསྟན་འཛིན་གྱི་སྐྱེས་བུ་བླ་ཆེན་རྣམ་པའི་ཐུགས་སྟོབས་དང་ནི། པདྨ་ཐང་གི་གཉུག་མར་གནས་པའི་གྲྭ་ཇོ་སེར་ཚང་མས་འབད་པ། ས་འདིའི་རྫོགས་ཆེན་ཚང་གི་བསྟན་པའི་བདག་པོ་ལྷན་རྒྱས་ཀྱིས་གཙོར་མཛད་པའི་བཤད་སྒྲུབ་ལས་གསུམ་གྱི་འགན་བཞེས་པ། སྡེ་དགོན་ཡུལ་གཉིས་ཀྱི་སེར་སྐྱ་ཐམས་ཅད་བློ་སེམས་བསམ་པ་གཅིག་སྒྲིལ་གྱིས་རམ་འདེགས་བྱས་པའི་ནུས་པ། ཁྱད་པར་དུ་ཁྱེད་རབ་སྔགས་འདུས་པ་སྟོང་ཕྲག་མང་པོའི་དད་དམ་འགྱུར་མེད་དང་། རྩ་གསུམ་སྲུང་མ་བཅས་པས་མཐུན་འགྱུར་གྱི་ཐོག་ནས། ཐེངས་འདིའི་ཆོས་ཕྱོགས་ཀྱི་མཛད་པ་དེ་གེགས་མེད་དུ་འགྲུབ་པ་ཡིན། དེ་བཞིན་སང་གནངས་ནས་ངས་ཀྱང་ངག་བཅད་རེད། འགའ་རེ་མཉམ་འཚོགས་བྱས་ཀྱང་གཏམ་བཤད་པའི་གོ་སྐབས་མེད་པས། མཇུག་མཐར་གཞིས་པ་བཀྲ་ཤིས། བྱེས་པས་དོན་འགྲུབ། གཞི་ལམ་བྱེས་གསུམ་བདེ། རྣམ་པ་ལྷན་རྒྱས་སྐུ་ཁམས་ཡུན་དུ་བརྟན་པའི་སྨོན་འདུན་ཚིག་གཅིག་དང་བཅས་ཏེ། དབང་ཐམས་ཅད་ཀྱི་མཐའ་རྟེན་བཀྲ་ཤིས་པའི་རྟགས་རྫས་བརྒྱད་དང་། རྒྱལ་སྲིད་རིན་པོ་ཆེ་སྣ་བདུན་གྱི་མངའ་དབུལ་གྱིས་ཐེངས་འདིའི་བཀྲ་ཤིས་རྟེན་འབྲེལ་བཟང་པོའི་མཇུག་བསྡོམས་བྱེད་རྒྱུ་ཡིན། ཞེས་གསུངས་ཏེ་དབང་བསྐུར་བསྔོ་བ་དང་སྨོན་ལམ་གྱིས་མཐའ་བརྒྱན་ནས་འཚོགས་གྲོལ་ལོ།། སླར་སྨྲས་པ། དབང་དོན་ཟབ་ཁྲིད་གནད་ཀྱི་སྒྲོན་མེ་འདི།། མདོ་རྒྱུད་རྒྱ་མཚོའི་སྙིང་བཅུད་ངོ་མ་དང་།། དྲིན་ཅན་བླ་མའི་ཐུགས་ཀྱི་བདུད་རྩི་ཡིན།། ལས་ཅན་དག་པའི་འཁོར་རྣམས་བརྩོན་པར་རིགས།། འདི་ན་ཡང་ཟབ་ཐེག་པའི་ཉམས་ལེན་དང་།། བརྒྱུད་གསུམ་བླ་མའི་གཅེས་ནོར་བགྲང་ཡས་པས།། ཕ་ཆོས་སེངྒེའི་འོ་མ་འཐུང་འདོད་ན།། དད་སྟོང་འཛུམ་པས་སྙིང་གི་རྒྱན་དུ་ལོངས།། ཐུབ་པའི་མིང་ཅན་ཤེས་རིག་ན་ཕྲ་ཞིང་།། སྐྱབས་མཆོག་བླ་མའི་བཀའ་ཆོས་གཏིང་ཟབ་པས།། མ་ཤེས་མ་རྟོགས་ནོར་འཁྲུལ་གང་ཡོད་རྣམས།། དམ་པའི་སྤྱན་སྔར་བཟོད་པ་སྙིང་ནས་གསོལ།། འདི་ལས་བྱུང་བའི་དགེ་མཚན་འོད་དཀར་གྱིས།། སྲིད་པའི་འགྲོ་ཀུན་གཏན་གྱི་བདེ་བ་ཐོབ།། ཁྱབ་བདག་བླ་མས་དྲིན་གྱིས་སྐྱོང་བ་ང་།། ཚེ་རབས་ཀུན་ཏུ་འཁོར་གྱི་ཐོག་མར་སྨོན།། དེ་ལྟར་ཡང་གསང་བསྟན་པའི་ཤིང་རྟ་ཆེན་པོ། བཀའ་དྲིན་སུམ་ལྡན་གྱི་༧ཁྱབ་བདག་བླ་མ་རིན་པོ་ཆེས། བོད་རབ་བྱུང་བཅུ་བདུན་པའི་ཤིང་མོ་ལུག་གི་ལོ་སྟེ་སྤྱི་ལོ་༢༠༡༥ལོར་སྙིང་ཐིག་དུམ་གཉིས་ཀྱི་དབང་གི་དོན་ཟབ་ཁྲིད་གནང་བ་རྣམས་ཡིག་ཐོག་ཏུ་བཀོད་པའི་མན་ངག་ལམ་གྱི་སྒྲོན་མེ་འདི། དམ་པ་གོང་གི་ཞབས་སློབ་གུས་དམན་ཐུབ་བསྟན་ཚེ་འཕེལ་གྱིས་ཡི་གེར་བཀོད་པ་འདིས་ཀྱང་རྒྱལ་བསྟན་དར་ཞིང་འགྲོ་ཀུན་བདེ་བའི་རྒྱུར་གྱུར་ཅིག། |