གཉིས་པ། རྡོ་རྗེའི་སྐུ་ཞེས་བྱ་བའི་ལེའུ།
དེ་ནས་བཅོམ་ལྡན་འདས་ཀྱིས་འོད་སྲུང་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་གཤེགས་པའི་སྐུ་ཞེས་བྱ་བ་ནི་རྟག་ཏུ་གནས་པའི་སྐུ། མི་འཇིག་པའི་སྐུ། རྡོ་རྗེའི་སྐུ། ཟས་རྣམས་ཀྱི་སྐུ་མ་ཡིན་གྱི་ཆོས་ཀྱི་སྐུའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་སྐུ་དེ་དག་ནི་བདག་གིས་མ་མཐོང་གི ། མི་རྟག་པ་དང་། འཇིག་པ་དང་། རྡུལ་དང་། ཟས་རྣམས་ཀྱི་སྐུར་མཐོང་ངོ་། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པར་གཤེགས་པའི་སླད་དུའོ། །བཅོམ་ལྡན་
འདས་ཀྱིས་འོད་སྲུང་ལ་བཀའ་སྩལ་པ། ཁྱོད་ཀྱིས་དེ་བཞིན་གཤེགས་པའི་སྐུ་ལ་སྙིང་པོ་མེད་པའམ། འཇིག་པ་ཅན་སྐྱེ་བོ་མ་རབས་ཀྱི་ལུས་དང་འདྲ་བར་མི་བལྟའོ། །རིགས་ཀྱི་བུ་ཁྱོད་ཀྱིས་འདི་ལྟར་རིག་པར་བྱ་སྟེ། དེ་བཞིན་གཤེགས་པའི་སྐུ་ནི་བསྐལ་པ་ཚད་མེད་པའི་བར་དུ་བརྟན་པ། སྙིང་པོ་ཅན་མི་འཇིག་པ། ལྷ་དང་མིའི་ལུས་ལྟ་བུ་མ་ཡིན་པ། འཇིག་པའི་སྐུ་མ་ཡིན་པ། ཟས་རྣམས་ཀྱི་སྐུ་མ་ཡིན་པའོ། །དེ་བཞིན་གཤེགས་པའི་སྐུ་ནི་སྐུ་མ་ཡིན་པའི་སྐུ། མི་སྐྱེ་མི་འགོག་པ། མ་བསྡུས་པ། མ་བྱས་པ། ཚད་མེད་པ། མཐའ་ཡས་པ། རྗེས་མེད་པ། ཤེས་པ་མེད་པ། གཟུགས་མེད་པ། མཐར་རྣམ་པར་དག་པ། མི་གཡོ་བ་ཚོར་བ་མེད་པ། འདུ་བྱེད་མེད་པ། མི་གནས་པ། མ་བྱས་པ། བྲོ་བ་མེད་པ། མ་འདྲེས་པ། འདུས་བྱས་པ་མ་ཡིན། ལས་མ་ཡིན། འབྲས་བུ་མ་ཡིན། སྤྱོད་པ་མ་ཡིན། འགོག་པ་མ་ཡིན། སེམས་མ་ཡིན། བགྲང་བ་མ་ཡིན། བསམ་གྱིས་མི་ཁྱབ་པ། དཔག་ཏུ་མེད་པ། རྣམ་པར་མི་ཤེས་པ། སེམས་དང་བྲལ་བ། སེམས་དང་བྲལ་བ་ཡང་མ་ཡིན་པ། སེམས་མཉམ་པ་མེད་པ། མེད་པ་ཡང་མ་ཡིན་པ། སོང་བ་དང་འོང་བ་མེད་པ། སོང་བ་དང་འོང་བ་མེད་པ་མ་ཡིན་པ། མི་འཇིག་པ། མ་ཉམས་པ། མི་ཆད་པ། མ་ཆད་པ། མ་བྱུང་བ། མི་འགོག་པ། བདག་པོ་མེད་པ། བདག་པོ་མེད་པ་ཡང་མ་ཡིན་པ། ཡོད་པ་ཡང་མ་ཡིན། མེད་པ་ཡང་མ་ཡིན། ཚོར་བ་ཡང་མ་ཡིན། རྟོག་པ་མ་ཡིན། ཡི་གེ་མ་ཡིན། ཡི་གེ་མེད་པ་མ་ཡིན། ཏིང་ངེ་འཛིན་མ་ཡིན། ཏིང་ངེ་འཛིན་མེད་པ་མ་ཡིན། བལྟར་མེད་པ། མངོན་པར་སྣང་བ། གནས་མེད་པ། གནས་མེད་པ་མ་ཡིན་པ། རྟེན་མེད་པ། རྟེན་མེད་པ་ཡང་མ་ཡིན་པ། མུན་པ་མ་ཡིན་པ། སྣང་བ་མ་ཡིན་པ། ཞི་བ་མ་ཡིན། མ་ཞི་བ་མ་ཡིན། ཅི་ཡང་མེད་པ་མི་ལེན་པ། མི་གཏོང་བ། རྣམ་པར་དག་པ། དྲི་མ་མེད་པ། རྩོད་པ་མེད་པ། རྩོད་པ་ཆད་པ། གནས་མེད་པར་གནས་པ། མི་ལེན་པ། མི་ལྟུང་བ་ཆོས་མ་ཡིན་པ། ཆོས་
མ་ཡིན་པ་ཡང་མ་ཡིན་པ། བསོད་ནམས་ཀྱི་ཞིང་མ་ཡིན་པ། བསོད་ནམས་ཀྱི་ཞིང་མ་ཡིན་པ་ཡང་མ་ཡིན་པ། མི་ཟད་པ་ཟད་པ་མེད་པ། ཟད་པ་ཐམས་ཅད་དང་བྲལ་བ། སྟོང་པ་ཉིད་སྟོང་པ་དང་བྲལ་བ། རྟག་ཏུ་གནས་པ་མ་ཡིན་པ། སྐད་ཅིག་པའི་རྒྱུན་གྱིས་འགོག་པ་མ་ཡིན་པ། རྙོག་པའི་དྲི་མ་མེད་པ། ཡི་གེ་མེད་པ། ཡི་གེ་དང་བྲལ་བ། སྒྲ་མ་ཡིན། བཤད་པ་མ་ཡིན། གོམས་པར་བསྒོམས་པ་མ་ཡིན། བརྗོད་པ་མ་ཡིན། དཔོག་པ་མ་ཡིན། གཅིག་མ་ཡིན། ཐ་དད་པ་མ་ཡིན། གཟུགས་མ་ཡིན། མཚན་མ་མ་ཡིན། མཚན་རྣམ་པས་བརྒྱན་པ། དཔའ་བ་མ་ཡིན། སྐྲག་པ་མ་ཡིན། ཞི་བ་མེད་པ། མ་ཞི་བ། མ་གདུངས་པ། མི་གདུང་བ་བལྟར་མེད་པ། མཚན་མ་མེད་པ། དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་དོན་བྱས་ཀྱང་སེམས་ཅན་གྱི་དོན་བྱས་པ་མེད་པ། སེམས་ཅན་རྣམ་པར་བཀྲོལ་ཡང་རྣམ་པར་བཀྲོལ་བ་མེད་པ། སེམས་ཅན་མངོན་པར་འཚང་རྒྱ་བར་མཛད་ཀྱང་མངོན་པར་འཚང་རྒྱ་བ་མེད་པ། གཉིས་སུ་མེད་པར་ཡང་དག་པ་ཇི་ལྟ་བ་བཞིན་དུ་ཆོས་སྟོན་པ། དཔག་ཏུ་མེད་པ། མི་མཉམ་པ་དང་མཉམ་པ། ནམ་མཁའ་དང་མཉམ་པ། གཟུགས་མེད་པ་མ་སྐྱེས་པ་ཉིད་དང་འཐུན་པ། མི་ཆད་པ། མི་རྟག་པ། རྟག་ཏུ་ཐེག་པ་གཅིག་ལ་སྤྱོད་ཀྱང་སེམས་ཅན་གྱིས་གསུམ་དུ་མཐོང་བ། མི་འགྱུར་བ་མི་ལྡོག་པ། ཀུན་ནས་ཉོན་མོངས་པ་ཐམས་ཅད་བཅད་པ། མི་རྩོད་པ། མི་གཅིག་པ། མཚན་ཉིད་མ་ཡིན་པ། མཚན་ཉིད་ལ་གནས་པ། འདུས་པ་མ་ཡིན། གྱེས་པ་མ་ཡིན། རིང་བ་མ་ཡིན། ཐུང་བ་མ་ཡིན། ཟླུམ་པོ་མ་ཡིན། གྲུ་བཞི་མ་ཡིན། ཕུང་པོ་དང་། སྐྱེ་མཆེད་དང་། ཁམས་མ་ཡིན། ཕུང་པོ་དང་སྐྱེ་མཆེད་དང་ཁམས་མ་ཡིན་པ་ཡང་མ་ཡིན། འཕེལ་བ་མ་ཡིན། འབྲི་བ་མ་ཡིན། བཟང་པོ་མ་ཡིན། ངན་པ་མ་ཡིན་ནོ། །དེ་བཞིན་གཤེགས་པའི་སྐུ་ནི་དེ་ལྟར་ཡོན་ཏན་ཚད་མེད་པ་དང་ལྡན་ཏེ། ཤེས་པ་མེད་ཅིང་མི་ཤེས་པ་ཡང་མེད། མཐོང་བ་མེད་ཅིང་མི་མཐོང་བ་ཡང་མེད། འདུས་བྱས་པ་མ་ཡིན། འདུས་མ་བྱས་པ་མ་ཡིན། འཇིག་རྟེན་མ་ཡིན།
འཇིག་རྟེན་མ་ཡིན་པའང་མ་ཡིན། བྱས་པ་མ་ཡིན། མ་བྱས་པ་འང་མ་ཡིན། གནས་མ་ཡིན། མི་གནས་པ་མ་ཡིན། ཆེན་པོ་བཞི་མ་ཡིན། ཆེན་པོ་བཞི་མ་ཡིན་པ་ཡང་མ་ཡིན། རྒྱུ་མ་ཡིན། རྒྱུ་མེད་པ་མ་ཡིན། སེམས་ཅན་མ་ཡིན། སེམས་ཅན་མེད་པ་མ་ཡིན། དགེ་སྦྱོང་མ་ཡིན། བྲམ་ཟེ་མ་ཡིན། སེང་གེ་ལྟ་བུ། སེང་གེ་ཆེན་པོ། སྐུ་མ་ཡིན། སྐུ་མ་ཡིན་པ་ཡང་མ་ཡིན་པ། བརྗོད་དུ་མེད་པ། ཆོས་གཅིག་ཙམ་གྱི་མཚན་ཉིད་དང་ཡང་བྲལ་བ། བརྩི་བའམ་བགྲང་བར་མི་རུང་བ། མྱ་ངན་ལས་འདའ་བ་ན་མྱ་ངན་ལས་མི་འདའ་བ་སྟེ། དེ་བཞིན་གཤེགས་པའི་ཆོས་ཀྱི་སྐུ་ནི་དེ་ལྟ་བུའི་ཡོན་ཏན་ཚད་མེད་པ་དམ་པ་དང་ལྡན་ནོ། །འོད་སྲུང་དེ་ནི་དེ་བཞིན་གཤེགས་པ་ཉག་གཅིག་གིས་མཁྱེན་གྱི་ཉན་ཐོས་དང་རང་སངས་རྒྱས་ཀྱིས་ཤེས་པ་མ་ཡིན་ནོ། །འོད་སྲུང་དེ་ལྟར་དེ་བཞིན་གཤེགས་པའི་སྐུ་ནི་ཡོན་ཏན་ཚད་མེད་པ་དང་ལྡན་ཏེ། ཟས་རྣམས་ཀྱིས་བསྐྱེད་ཅིང་གསོ་བའི་སྐུ་ནི་མ་ཡིན་ནོ། །འོད་སྲུང་དེ་བཞིན་གཤེགས་པའི་སྐུ་ཡང་དག་པའི་ཡོན་ཏན་ནི་འདི་ལྟ་བུ་ཡིན་ན་དེ་ལ་ན་བའམ། སྡུག་བསྔལ་བའམ། སྙིང་པོ་མེད་པའམ། མི་བརྟན་པ་རྫ་སོ་མ་བཏང་བ་ལྟ་བུ་ག་ལ་ཞིག་ཡོད། འོད་སྲུང་དེ་བཞིན་གཤེགས་པས་ན་བ་དང་སྡུག་བསྔལ་བ་བསྟན་པ་ནི་སེམས་ཅན་གདུལ་བའི་ཕྱིར་རོ། །རིགས་ཀྱི་བུ་ཁྱོད་ཀྱིས་འདི་ལྟར་རིག་པར་བྱ་སྟེ། དེ་བཞིན་གཤེགས་པའི་སྐུ་ནི་རྡོ་རྗེའི་སྐུ་ཡིན་ཏེ། དེང་ཕྱིན་ཆད་ཁྱོད་ཀྱིས་དོན་འདི་རྩེ་གཅིག་པའི་སེམས་ཀྱིས་ཡིད་ལ་བྱའི་ཟས་རྣམས་ཀྱི་སྐུར་ནི་མི་བསམ་མོ། །གཞན་ལ་ཡང་དེ་བཞིན་གཤེགས་པའི་སྐུ་ནི་ཆོས་ཀྱི་སྐུ་ཡིན་པར་སྟོན་ཅིག །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ལྟར་དེ་བཞིན་གཤེགས་པ་དེ་ལྟ་བུའི་ཡོན་ཏན་དང་ལྡན་ན་བསྙུངས་པ་དང་། མི་རྟག་པ་དང་། འཇིག་པ་ལྟ་ག་ལ་ཞིག་མཆིས་ཏེ། བདག་ནི་དེང་སླན་ཆད་དེ་བཞིན་གཤེགས་པའི་སྐུ་ནི་རྟག་པ། ཆོས་ཀྱི་སྐུ་རབ་ཏུ་བདེ་བའི་སྐུར་ཡིད་ལ་བགྱིད་དེ་གཞན་དག་ལ་ཡང་དེ་བཞིན་
དུ་བསྟན་པར་འཚལ་ལོ། །བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་ནི་རྡོ་རྗེ་ལྟ་བུར་མི་འཇིག་པ་ལགས་ན་ཅིའི་རྒྱུ་ལས་གྱུར་པ་ནི་བདག་གིས་མི་འཚལ་ཏོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དམ་པའི་ཆོས་སྲུང་ཞིང་འཛིན་པ་དེའི་རྒྱུ་དེའི་རྐྱེན་གྱིས་རྡོ་རྗེའི་སྐུ་དང་ལྡན་པར་གྱུར་ཏོ། །འོད་སྲུང་ངས་སྔོན་ཆོས་ཡོངས་སུ་བསྲུང་བའི་རྒྱུ་དང་རྐྱེན་གྱིས་རྡོ་རྗེའི་སྐུ་དང་ལྡན་ཏེ་རྟག་ཏུ་གནས་པ་དང་མི་འཇིག་པར་གྱུར་ཏོ། །རིགས་ཀྱི་བུ་དམ་པའི་ཆོས་སྲུང་ཞིང་སྲུང་བ་ནི་ཁྲིམས་ལྔ་ཡང་མི་འཛིན་ཏེ། སྤྱོད་ལམ་ཡང་མི་སྲུང་བར་མཚོན་ཆ་རལ་གྲི་དང་། མདའ་གཞུ་དང་། མདུང་ལ་སོགས་པ་ཐོགས་ཏེ་དགེ་སློང་ཚུལ་ཁྲིམས་ཡོངས་སུ་དག་པ་དག་སྲུང་བའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ཡང་བཅོམ་ལྡན་འདས་དགེ་སློང་གང་བསྲུང་བ་བཏང་སྟེ། དབེན་པའི་གནས་དུར་ཁྲོད་དམ། ཤིང་དྲུང་ན་གནས་པ་ནི་དགེ་སློང་ཡང་དག་པ་ལགས་ཀྱི་གང་སྲུང་བའི་རྗེས་སུ་སྤྱོད་པ་ནི་ཁྱིམ་བདག་མགོ་རེག་གོ་ཞེས་འབྱུང་ངོ་། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཁྱིམ་བདག་མགོ་རེག་ཅེས་མ་ཟེར་ཅིག །དགེ་སློང་གང་དུ་གནས་ཀྱང་ལུས་ཀྱི་ཡོ་བྱད་ཙམ་ཆོག་པར་ལེན་ཅིང་མདོ་སྡེ་ཀློག་པ་དང་། འདོན་པ་དང་། བསམ་གཏན་ཡིད་ལ་བྱེད་པ་དང་། ཆོས་འདྲི་བ་ཡོད་ན་དེ་ལ་སྦྱིན་པ་དང་། ཚུལ་ཁྲིམས་དང་། བསོད་ནམས་ཀྱི་ཚོགས་དང་། འདོད་པ་ཉུང་བ་དང་། ཆོག་ཤེས་པ་ལ་སོགས་པ་ཆོས་རྣམ་པ་སྣ་ཚོགས་སྟོན་ཀྱང་དེ་ནི་སེང་གེའི་སྒྲ་སྒྲོགས་པ་ཞེས་མི་བྱ། སེང་གེས་ཡོངས་སུ་བསྐོར་བ་ཞེས་ཀྱང་མི་བྱ། ཆོས་ངན་པ་སྤྱོད་པ་གདུལ་ནུས་པ་མ་ཡིན། དགེ་སློང་དེ་ནི་བདག་གི་དོན་ཀྱང་བྱེད་མི་ནུས་ལ། གཞན་གྱི་དོན་བྱེད་པ་ཡང་མ་ཡིན་ཏེ། དེ་ནི་བག་མེད་པ་ལེ་ལོ་ཅན་ཡིན་ཏེ། ཚུལ་ཁྲིམས་སྲུང་ཞིང་ཚངས་པར་སྤྱོད་ཀྱང་དེ་ནི་ཅི་ཡང་མི་ནུས་པར་རིག་པར་བྱའོ། །དགེ་སློང་གང་འཚོ་བའི་ཡོ་བྱད་ཀྱང་མང་དུ་ཡོད་ལ། ཚུལ་ཁྲིམས་ཀྱང་ཡོངས་སུ་སྲུང་ཞིང་སེང་གེའི་སྒྲ་སྒྲོགས་ཏེ། དམ་
པའི་ཆོས་མདོའི་སྡེ་དང་། དབྱངས་ཀྱིས་བསྙད་པ་དང་། ལུང་དུ་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པ་དང་། སྐྱེས་པའི་རབས་དང་། དེ་ལྟ་བུ་བྱུང་བ་དང་། གླེང་གཞི་དང་། རྨད་དུ་བྱུང་བ་དང་། རྟོགས་པ་བརྗོད་པ་དང་། ཤིན་ཏུ་རྒྱས་པ་དང་། གཏན་ལ་བབ་པར་བསྟན་པ་ལ་སོགས་པ་མདོ་སྡེ་དགུ་པོ་དག་འདོན་ཅིང་། གཞན་དག་ལ་རྒྱ་ཆེར་སྟོན་ལ། སེམས་ཅན་ལ་ཕན་པ་དང་། བདེ་བའི་ཕྱིར་འདི་སྐད་དུ་མྱ་ངན་ལས་འདའ་བའི་མདོ་ལས་དགེ་སློང་རྣམས་བྲན་ཁོལ་དང་། བ་ལང་དང་། ལུག་ལ་སོགས་པ་ཆོས་མ་ཡིན་པའི་དངོས་པོ་འཆང་དུ་མི་གནང་ངོ་ཞེས་འབྱུང་སྟེ། དགེ་སློང་མ་བརྟགས་པའི་དངོས་པོ་དེ་དག་འཆང་ན་ཆད་པས་ཆོད་ཅིག་ཅེས་སྨྲས་ལ། དེ་བཞིན་གཤེགས་པས་སྔོན་མདོ་སྡེ་གཞན་དག་ལས་ཀྱང་དགེ་སློང་མ་བརྟགས་པའི་དངོས་པོ་དེ་དག་བཅངས་པས་རྒྱལ་པོ་ཆེ་གེ་མོ་ཞིག་གིས་ཆད་པས་བཅད་དེ་ཁྱིམ་པར་ཕབ་བོ་ཞེས་དགེ་སློང་གང་འདི་སྐད་དུ་སེང་གེའི་སྒྲ་སྒྲོགས་པ་ནི་ཚུལ་ཁྲིམས་ངན་པ་ཅན་དག་དེ་སྐད་ཅེས་ཐོས་ནས་ཞེ་སྡང་སྐྱེས་ཏེ་ཆོས་སྨྲ་བ་དེ་གསོད་དོ། །ཆོས་སྨྲ་བ་དེ་ཅི་སྟེ་ཚེ་འཕོས་ནས་ཡང་ཚུལ་ཁྲིམས་འཛིན་ཅིང་བདག་དང་གཞན་གྱི་དོན་བྱེད་པ་ཞེས་བྱ་སྟེ། དེ་ལྟ་བས་ན་ངས་ནི་རྒྱལ་པོ་དང་། བློན་པོ་ཆེན་པོ་དང་། དགེ་བསྙེན་རྣམས་ཀྱིས་ཆོས་སྨྲ་བ་དག་བསྲུང་བར་གནང་ངོ་། །གང་དམ་པའི་ཆོས་བསྲུང་བར་འདོད་པ་ནི་དེ་ལྟར་བསླབ་པར་བྱའོ། །འོད་སྲུང་དེ་ལྟར་ཚུལ་ཁྲིམས་ཉམས་ཤིང་ཆོས་མི་སྲུང་བ་ནི་ཁྱིམ་བདག་མགོ་རེག་ཅེས་བྱའི། ཚུལ་ཁྲིམས་སྲུང་བ་ལ་ནི་མ་ཡིན་ནོ།། །།བམ་པོ་ལྔ་པ། རིགས་ཀྱི་བུ་སྔོན་གྱི་བསྐལ་པ་ཚད་མེད་མཐའ་ཡས་གྲངས་མེད་པ་འདས་པའི་ཕ་རོལ་ན་གྲོང་ཁྱེར་རྩྭ་མཆོག་འདི་ཉིད་དུ་སངས་རྒྱས་བཅོམ་ལྡན་འདས་རབ་ཏུ་དགའ་བ་བསྐྱེད་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ། མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་
སྟོན་པ་སངས་རྒྱས་བཅོམ་ལྡན་འདས་མངོན་པར་བྱུང་ངོ་། །དེའི་ཚེ་དེའི་དུས་ན་འཇིག་རྟེན་གྱི་ཁམས་འདི་ཡང་ཤིན་ཏུ་ཡངས་ཤིང་ཡོངས་སུ་དག་ལ་མི་རབ་ཏུ་མང་ཞིང་བདེ་སྐྱིད་པ་དང་། ཟས་དང་སྐོམ་གྱིས་མི་བྲེལ་བ་ནི་ཇི་ལྟར་རབ་ཏུ་བདེ་བ་ཅན་གྱི་འཇིག་རྟེན་གྱི་ཁམས་ཀྱི་བྱང་ཆུབ་སེམས་དཔའ་བཞིན་ནོ། །སངས་རྒྱས་བཅོམ་ལྡན་འདས་དེ་འཇིག་རྟེན་ན་ཚད་མེད་པའི་བར་དུ་བཞུགས་ནས་སེམས་ཅན་གྱི་དོན་མཛད་དེ་ཤིང་སཱ་ལ་དྲུང་གཉིས་ཀྱི་བར་དུ་ཡོངས་སུ་མྱ་ངན་ལས་འདས་སོ། །སངས་རྒྱས་དེ་མྱ་ངན་ལས་འདས་ནས་དམ་པའི་ཆོས་ལོ་ཁྲི་ཕྲག་ཚད་མེད་པ་བཞི་བཅུ་ལྷག་གི་བར་དུ་གནས་པར་གྱུར་ཏོ། །དེའི་ཚེ་ན་དགེ་སློང་ཚུལ་ཁྲིམས་ཤིན་ཏུ་སྲུང་བ་ཡོན་ཏན་བློ་གྲོས་ཞེས་བྱ་བ་ཞིག་ལ་འཁོར་ཤིན་ཏུ་མང་ཞིང་འཁོར་རྣམས་ལ་སེང་གེའི་སྒྲ་སྒྲོགས་ཏེ། མདོ་སྡེ་དགུ་ཡང་རྒྱས་པར་སྟོན་པ་ལ་ཤིན་ཏུ་མཁས་པས་དགེ་སློང་རྣམས་བྲན་ཕོ་དང་། བྲན་མོ་དང་། བ་ལང་དང་། ལུག་ལ་སོགས་པ་ཆོས་མ་ཡིན་པའི་དངོས་པོ་རྣམས་གསོར་མི་གནང་ངོ་ཞེས་བསྒོའོ། །དེའི་ཚེ་ན་དགེ་སློང་ཚུལ་ཁྲིམས་ཉམས་པ་ཤིན་ཏུ་མང་བས་དེ་དག་གིས་དེ་སྐད་ཅེས་བསྒོ་བ་ཐོས་ནས་ཐམས་ཅད་ཞེ་སྡང་གི་སེམས་སྐྱེས་ཏེ། མཚོན་ཆ་ཐོགས་ནས་ཆོས་སྨྲ་བ་དེ་ལ་བསྙེན་ཏོ། །དེའི་ཚེ་དེའི་དུས་ན་ཡུལ་དེའི་རྒྱལ་པོ་ཡོན་ཏན་ཅན་ཞེས་བྱ་བ་དེས་དེ་ལྟ་བུར་གྱུར་པ་ཐོས་ནས་ཆོས་བསྲུང་བའི་ཕྱིར་དེ་མ་ཐག་ཏུ་ཆོས་སྨྲ་བ་ག་ལ་བའི་དྲུང་དུ་སོང་སྟེ། དགེ་སློང་ཚུལ་ཁྲིམས་ཉམས་པ་མ་རུངས་པ་དག་དང་གཡུལ་བཤམས་ཏེ་འཐབས་ནས་ཆོས་སྨྲ་བའི་དགེ་སློང་དེ་བགེགས་དེ་ལས་ཐར་བར་བྱས་སོ། །དེའི་ཚེ་རྒྱལ་པོ་དེའི་ལུས་ལ་རལ་གྲི་དང་། མདའ་དང་། མཚོན་ཤག་ཏི་ལ་སོགས་པ་མཚོན་ཆའི་རྨས་ཡུངས་ཀར་ཙམ་ཡང་གསོན་པ་མེད་དོ། །དེའི་ཚེ་དགེ་སློང་ཡོན་ཏན་བློ་གྲོས་ཀྱིས་རྒྱལ་པོ་དེ་ལ་ཤིན་ཏུ་ལེགས་སོ་ཤིན་ཏུ་ལེགས་སོ། །རྒྱལ་པོ་ཁྱོད་ནི་ཡང་དག་པར་དམ་པའི་ཆོས་ཤིན་ཏུ་སྲུང་བ་སྟེ། མ་འོངས་པའི་དུས་སུ་ཚད་མེད་པའི་ཆོས་ཀྱི་སྣོད་དུ་འགྱུར་རོ་ཞེས་སྨྲས་སོ། །རྒྱལ་པོ་དེས་དེའི་ཚེ་ན་ཆོས་ཐོས་པས་སེམས་རབ་ཏུ་དགའ་བར་གྱུར་ནས་དེ་མ་
ཐག་ཏུ་ཚེ་འཕོས་ཏེ། མི་གཡོ་བ་དེ་བཞིན་གཤེགས་པའི་སངས་རྒྱས་ཀྱི་ཞིང་དུ་སྐྱེས་ནས་སངས་རྒྱས་དེའི་ཉེ་གནས་མཆོག་ཏུ་གྱུར་ཏོ། །རྒྱལ་པོ་དེའི་འཁོར་གཡུལ་དུ་ཞུགས་ཏེ་བརྒལ་བ་དང་། དགའ་སྟེ་རྗེས་སུ་ཡི་རང་བ་རྣམ་པ་ཐམས་ཅད་བྱང་ཆུབ་ཀྱི་སེམས་ལས་ཕྱིར་མི་ལྡོག་པར་གྱུར་ཏེ། ཚེ་འཕོས་ནས་ཐམས་ཅད་མི་གཡོ་བའི་སངས་རྒྱས་ཀྱི་ཞིང་དུ་སྐྱེས་སོ། །དགེ་སློང་ཡོན་ཏན་བློ་གྲོས་ཀྱང་ཕྱིས་ཚེ་འཕོས་ནས་དེ་བཞིན་དུ་མི་གཡོ་བ་དེ་བཞིན་གཤེགས་པའི་ཞིང་དུ་སྐྱེས་ཏེ། སངས་རྒྱས་བཅོམ་ལྡན་འདས་དེ་ནི་ཉན་ཐོས་ཀྱི་དགེ་འདུན་གྱི་ནང་ན་རབ་འོག་ཏུ་གྱུར་ཏོ། །དེ་བས་ན་དམ་པའི་ཆོས་ནུབ་ཅིང་ཟད་དུ་ཉེ་བ་ན་དེ་ལྟར་བསྲུང་ཞིང་བསྐྱབ་པར་བྱའོ། །འོད་སྲུང་དེའི་ཚེ་དེའི་དུས་ན་རྒྱལ་པོ་དེ་ནི་ང་ཡིན་ནོ། །ཆོས་སྨྲ་བའི་དགེ་སློང་དེ་ནི་སངས་རྒྱས་འོད་སྲུང་ཞེས་བྱ་བ་ཡིན་ནོ། །འོད་སྲུང་དམ་པའི་ཆོས་བསྲུངས་པས་དེ་ལྟ་བུ་ལ་སོགས་པ་ཚད་མེད་པའི་འབྲས་བུ་ཡང་ཐོབ་ལ། དེའི་རྒྱུ་དེའི་རྐྱེན་གྱིས་འདི་ལྟར་ང་ནི་རྣམ་པ་སྣ་ཚོགས་ཀྱི་མཚན་དང་དཔེ་བྱད་བཟང་པོ་རྣམ་པ་སྣ་ཚོགས་ཀྱིས་ཡོངས་སུ་བརྒྱན་པའི་ཆོས་ཀྱི་སྐུ་དང་། མི་ཤིགས་པའི་སྐུ་ལྷུན་གྱིས་གྲུབ་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པའི་སྐུ་རྟག་པ་ནི་རྡོ་ལ་རི་མོ་བྲིས་པ་དང་འདྲའོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་ལྟ་བས་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དག་ཤིན་ཏུ་བརྩོན་འགྲུས་བསྐྱེད་དེ། དམ་པའི་ཆོས་བསྲུང་བར་བྱའོ། །དམ་པའི་ཆོས་བསྲུངས་པའི་འབྲས་བུ་ནི་རྒྱ་ཆེ་སྟེ་ཚད་མེད་དོ། །རིགས་ཀྱི་བུ་དེ་བས་ན་ཆོས་སྲུང་བའི་དགེ་བསྙེན་དག་ལག་ན་མཚོན་ཆ་ཐོགས་ཏེ། ཆོས་སྲུང་བའི་དགེ་སློང་ལ་བསྲུང་ཞིང་བསྐྱབ་བྱའོ། །གང་ཚུལ་ཁྲིམས་ལྔ་སྲུང་བ་ཙམ་གྱིས་ཐེག་པ་ཆེན་པོའི་གང་ཟག་ཅེས་མི་བྱའི། ཚུལ་ཁྲིམས་ལྔ་མ་བསྲུངས་ཀྱང་དམ་པའི་ཆོས་སྲུང་ན་ཐེག་པ་ཆེན་
པོ་ཞེས་བྱའོ། །དམ་པའི་ཆོས་སྲུང་ན་ལག་ན་མཚོན་ཆ་ཐོགས་ཏེ། ཆོས་སྨྲ་བ་ལ་བསྲུང་བར་བྱའོ། །བཅོམ་ལྡན་འདས་ལ་འོད་སྲུང་གིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གང་དེ་ལྟར་དགེ་བསྙེན་མཚོན་ཆ་ཐོགས་པ་དང་ལྷན་ཅིག་འགྲོགས་བརྟེན་ན་དེ་ལ་སྟོན་པ་ཞེས་བགྱིའམ། སྟོན་པ་ཞེས་མི་བགྱི། དེ་ཚུལ་ཁྲིམས་བསྲུང་བ་ལགས་སམ། ཚུལ་ཁྲིམས་ཉམས་པ་ལགས། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དེ་དག་ལ་ཚུལ་ཁྲིམས་ཉམས་པའོ། །སྙམ་དུ་མ་སེམས་ཤིག །རིགས་ཀྱི་བུ་ང་ཡོངས་སུ་མྱ་ངན་ལས་འདས་ནས་རྙོག་པ་ཅན་གྱི་འཇིག་རྟེན་ན་ཡུལ་འཁྲུགས་ཏེ། གཅིག་ལ་གཅིག་འཕྲོག་པས་མུ་གེས་ཉེན་པར་འགྱུར་རོ། །དེའི་ཚེ་ན་མང་དུ་འཚོ་བས་ཕོངས་པའི་ཕྱིར་རབ་ཏུ་བྱུང་བར་རྩོལ་ཏེ་དེ་དག་ནི་མགོ་རེག་ཅེས་བྱའོ། །གང་ཟག་མགོ་རེག་དེ་དག་གང་དགེ་སློང་ཚུལ་ཁྲིམས་འཛིན་ཅིང་སྤྱོད་ལམ་དང་ལྡན་པ་ཡོངས་སུ་དག་པ་དམ་པའི་ཆོས་སྲུང་བ་ཡོད་ན་སྐྲོད་དོ། །གསོད་དོ། །གནོད་པ་བྱེད་དོ། །ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །དགེ་སློང་ཚུལ་ཁྲིམས་སྲུང་ཞིང་དམ་པའི་ཆོས་ཡོངས་སུ་འཛིན་པ་དག་ཇི་ལྟར་གྲོང་ཁྱེར་དང་ལྗོངས་སུ་སེམས་ཅན་གདུལ་བའི་ཕྱིར་རྒྱུ་ཞིང་མཆི་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བས་ན་གང་ཚུལ་ཁྲིམས་འཛིན་པ་དག་ཁྱིམ་པ་མཚོན་ཆ་ཐོགས་པ་ལ་བརྟེན་ཅིང་འགྲོགས་ཤིག་ཅེས་ངས་གནང་བ་ཡིན་ནོ། །གལ་ཏེ་རྒྱལ་པོའམ། བློན་པོའམ། ཁྱིམ་བདག་གམ། དགེ་བསྙེན་ལ་སོགས་པ་ཆོས་བསྲུང་བའི་ཕྱིར་མཚོན་ཆ་ཐོགས་ཀྱང་དེ་ནི་ཚུལ་ཁྲིམས་སྲུང་བ་ཞེས་བྱ་སྟེ། མཚོན་ཆ་ཐོགས་མོད་ཀྱི། སྲོག་མི་གཅོད་པས་དེ་ནི་ཚུལ་ཁྲིམས་སྲུང་བའི་མཆོག་ཅེས་བྱའོ། །འོད་སྲུང་གིས་ཡང་གསོལ་པ། བཅོམ་ལྡན་འདས་ཆོས་སྲུང་བ་ནི་ཡང་དག་པར་ལྟ་བ་དང་ལྡན་ཏེ། ཐེག་པ་ཆེན་པོའི་མདོ་སྡེ་རྒྱས་པར་སྟོན་པ་ནི་རྒྱལ་པོའི་རིན་པོ་ཆེའི་གདུགས་དང་། མར་སྣོད་དང་། ཁྲེ་འབྲས་
དང་། ཤིང་ཏོག་རྣམ་པ་སྣ་ཚོགས་ལ་ནམ་དུ་ཡང་དབང་མི་བགྱིད་དེ། རྙེད་པ་དང་བཀུར་སྟི་ཙམ་གྱི་སླད་དུ་རྒྱལ་པོ་དང་། བློན་པོ་དང་། ཁྱིམ་བདག་ལ་མི་བརྟེན། ཡོན་བདག་ལ་གཡོ་དང་སྒྱུས་འཚོ་བའི་སེམས་ཀྱང་མ་མཆིས་སོ། །སྤྱོད་ལམ་དང་ལྡན་པས་ཚུལ་ཁྲིམས་ཉམས་པའི་གང་ཟག་མ་རུངས་པ་དག་བཏུལ་ཀྱང་། དེ་ནི་ཚུལ་ཁྲིམས་འཛིན་ཅིང་ཆོས་སྲུང་བའི་སྟོན་པ་ཞེས་བགྱིའོ། །སེམས་ཅན་མང་པོའི་དགེ་བའི་བཤེས་གཉེན་ཡང་དག་པ་ཡིན་པས་རྒྱ་མཚོ་ལྟར་སེམས་རྒྱ་ཆེ་ཞིང་ཡངས་སོ། །འོད་སྲུང་དགེ་སློང་གང་རྙེད་པ་དང་བཀུར་སྟིའི་ཕྱིར་གཞན་ལ་ཆོས་སྟོན་ན་གང་ཟག་དེའི་འཁོར་དུ་གཏོགས་པ་ཐམས་ཅད་ཀྱང་རྙེད་པ་དང་། བཀུར་སྟིའི་ཕྱིར་ཆོས་སྟོན་ཏེ། གང་ཟག་དེས་བདག་གི་དགེ་འདུན་གྱི་འཁོར་ཡང་མ་རུང་བར་བྱེད་དོ། །འོད་སྲུང་དགེ་འདུན་ལ་རྣམ་པ་གསུམ་སྟེ། ཚུལ་ཁྲིམས་ཉམས་པ་གོ་འདུན་གྱི་དགེ་འདུན་དང་། གླེན་ཞིང་གཏི་མུག་པའི་དགེ་འདུན་དང་། ཡོངས་སུ་དག་པའི་དགེ་འདུན་ནོ། །ཚུལ་ཁྲིམས་ཉམས་ཤིང་གོ་འདུན་གྱི་དགེ་འདུན་ནི་འཇིག་ཀྱང་སླའི། ཚུལ་ཁྲིམས་འཛིན་ཅིང་ཡོངས་སུ་དག་པའི་དགེ་འདུན་ནི་རྙེད་པ་དང་བཀུར་སྟིའི་རྐྱེན་གྱིས་འཇིག་ནུས་པ་མ་ཡིན་ནོ། །དེ་ལ་ཇི་ལྟར་ན་ཚུལ་ཁྲིམས་ཉམས་ཤིང་གོ་འདུན་གྱི་དགེ་འདུན་ཞེ་ན། དགེ་སློང་གང་ཚུལ་ཁྲིམས་སྲུང་ཡང་རྙེད་པ་དང་། བཀུར་སྟིའི་ཕྱིར་ཚུལ་ཁྲིམས་ཉམས་པ་ལ་བརྟེན་ཏེ། ལྷན་ཅིག་ཏུ་འདུག་གམ། འགྲོ་འམ། སྡོད་དམ། འགྲོགས་སམ། གཅིག་ལ་གཅིག་བཤེས་པར་བྱེད་ཅིང་ལས་འཐུན་པར་བྱེད་ན་དེ་ནི་ཚུལ་ཁྲིམས་ཉམས་པ་ཞེས་ཀྱང་བྱ། གོ་འདུན་གྱི་དགེ་འདུན་ཞེས་བྱའོ། །དེ་ལ་ཇི་ལྟར་ན་གླེན་ཞིང་གཏི་མུག་པའི་དགེ་འདུན་གང་ཞེ་ན། དགེ་སློང་གང་བས་མཐར་གནས་ཤིང་དབང་པོ་མི་རྣོ་ལ། རྟུལ་བ་གླེན་པ་འདོད་པ་ཉུང་ཞིང་བསོད་སྙོམས་བྱེད་ལ། གསོ་སྦྱིན་གྱི་ཉི་མ་དང་། ཚུལ་ནས་བྱུང་བའི་དུས་སུ་ཉེ་གནས་སུ་གྱུར་པ་རྣམས་ནི་ཡོངས་སུ་དག་པར་འཆགས་ཤིང་འཐོལ་དུ་འཛུད་ཀྱི་ཉེ་གནས་མ་ཡིན་
པ་ཚུལ་ཁྲིམས་ཉམས་པ་དག་མཐོང་ན་ཡོངས་སུ་དག་པར་འཆགས་ཤིང་འཐོལ་དུ་མི་འཇུག་པར་ལྷན་ཅིག་ཏུ་གསོ་སྦྱོང་དང་ཚུལ་ནས་འབྱུང་བའི་ལས་བྱེད་པ་ནི་གླེན་ཞིང་གཏི་མུག་པའི་དགེ་འདུན་ཞེས་བྱའོ། །དེ་ལ་ཇི་ལྟར་ན་ཡོངས་སུ་དག་པའི་དགེ་འདུན་གང་ཞེ་ན། དགེ་སློང་གི་དགེ་འདུན་གང་བདུད་ཁྲི་ཕྲག་བརྒྱ་སྟོང་གིས་ཀྱང་མི་ཕྱེད་མི་ཤིགས་ན་དེ་ནི་བྱང་ཆུབ་སེམས་དཔའི་དགེ་འདུན་རང་བཞིན་གྱིས་རྣམ་པར་དག་པ་སྟེ། དགེ་འདུན་གོང་དུ་སྨོས་པ་རྣམ་པ་གཉིས་པོ་ཡང་བཏུལ་ཏེ། ཡོངས་སུ་དག་པའི་དགེ་འདུན་གྱི་ནང་དུ་བཙུད་ན་དེ་ནི་ཆོས་སྲུང་བའི་བླ་ན་མེད་པའི་སློབ་དཔོན་ཆེན་པོ་ཞེས་བྱའོ། །འདུལ་བ་ལ་མཁས་པ་ནི་སེམས་ཅན་ལ་ཕན་པ་དང་། གདུལ་བའི་ཕྱིར་ཚུལ་ཁྲིམས་ཀྱི་མཚན་ཉིད་ལྕི་བ་དང་། ཡང་བ་ལ་ཤིན་ཏུ་མཁས་ཏེ། གང་ཚུལ་ཁྲིམས་མ་ཡིན་པ་ནི་ཤེས་པར་མི་རྩོལ་ལོ། །གང་ཚུལ་ཁྲིམས་ཀྱི་ཕྱོགས་ལ་ནི་རྟོགས་ཤིང་ཤེས་པར་བྱེད་དོ། །དེ་ལ་ཇི་ལྟར་ན་སེམས་ཅན་གདུལ་བའི་ཕྱིར་བྱང་ཆུབ་སེམས་དཔའ་དག་རྟག་ཏུ་དུས་མེད་པར་གྲོང་ཁྱེར་དུ་འཇུག་ཅིང་། ཡུགས་ས་མོ་དང་། སྨད་འཚོང་མའི་གནས་སུ་འང་འཇུག་ཅིང་། ལྷན་ཅིག་ཏུ་ཡང་གནས་ལ། ལོ་མང་པོར་ཐོགས་པ་ནི་ཉན་ཐོས་དག་གིས་དེ་ལྟར་མི་བྱ་སྟེ། དེ་ནི་སེམས་ཅན་ལ་ཕན་པ་དང་བདེ་བའི་ཕྱིར་གདུལ་བ་ཞེས་བྱའོ། །ཇི་ལྟར་ན་ལྕི་བ་ཤེས་པར་བྱ་ཞེ་ན། དེ་བཞིན་གཤེགས་པས་དངོས་པོ་གཅིག་ལས་ཚུལ་ཁྲིམས་བཅས་ཏེ། ཁྱེད་དེང་ཕྱིན་ཆད་འདི་ལས་ཉམས་པར་མ་བྱེད་ཅིག་ཅེས་བྱ་བ་རྩ་བ་བཞི་ལྟ་བུ་སྟེ། རབ་ཏུ་བྱུང་བ་དག་བྱེད་དུ་མི་གནང་ངོ་ཞེས་བཅས་པ་ལས་ཆེད་དུ་བྱས་ན། དེ་ནི་དགེ་སྦྱོང་མ་ཡིན། ཤཱཀྱའི་སྲས་མ་ཡིན་ཏེ་དེ་དག་ནི་ལྕི་བ་ཞེས་བྱའོ། །དེ་ལ་ཇི་ལྟར་ན་ཡང་བ་ཞེ་ན། ཡང་བའི་དངོས་པོ་ལ་ལན་གསུམ་གྱི་བར་དུ་བསྐུལ་ཏེ་བཏང་ན་ནི་ཡང་བ་ཞེས་བྱའོ། །ཚུལ་ཁྲིམས་ལས་མི་འབྱུང་བ་ནི་གང་ཡོངས་སུ་མ་དག་པའི་དངོས་པོ་སྤྱོད་པའི་ཆ་མ་ཡིན་པར་གསུངས་པ་དང་ལྷན་ཅིག་ཏུ་མི་སྤྱོད་པའོ། །འདུལ་བ་
ལས་འབྱུང་བ་ནི་ཚུལ་ཁྲིམས་ཤིན་ཏུ་སློབ་ཅིང་། ཚུལ་ཁྲིམས་ཉམས་པ་ལ་མི་རྟེན་པ་དང་། གང་ཚུལ་ཁྲིམས་ཀྱི་རྗེས་སུ་གཞོལ་ཞིང་སྤྱོད་པ་མཐོང་ན་རབ་ཏུ་དགའ་བའི་སེམས་སྐྱེ་བ་དང་། དེ་ལྟར་སངས་རྒྱས་ཀྱི་ཆོས་སུ་བྱ་བ་ཀུན་ཤེས་ཤིང་ཤིན་ཏུ་སྟོན་མཁས་པ་ནི་ཚུལ་ཁྲིམས་ཀྱི་སློབ་དཔོན་ཞེས་བྱ་སྟེ། ཡི་གེ་འབྲུ་གཅིག་ཙམ་ལ་ཤིན་ཏུ་མཁས་པའམ། མདོ་སྡེ་ཤིན་ཏུ་འཛིན་པ་ཡང་དེ་དང་འདྲའོ། །དེ་ལྟར་ན་རིགས་ཀྱི་བུ་སངས་རྒྱས་ཀྱི་ཆོས་ཚད་མེད་དེ་བསམ་གྱིས་མི་ཁྱབ་ལ། དེ་བཞིན་གཤེགས་པ་ཡང་བསམ་གྱིས་མི་ཁྱབ་བོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་གསོལ་པ། དེ་དེ་བཞིན་ནོ། །དེ་དེ་བཞིན་ཏེ། བཅོམ་ལྡན་འདས་ཀྱིས་བཀའ་སྩལ་པ་བཞིན་ཏེ། སངས་རྒྱས་ཀྱི་ཆོས་བསམ་གྱིས་མི་ཁྱབ་ལ། དེ་བཞིན་གཤེགས་པ་ཡང་བསམ་གྱིས་མི་ཁྱབ་པས་དེ་བས་ན་དེ་བཞིན་གཤེགས་པ་ནི་རྟག་པ་དང་། མི་འཇིག་པ་མི་འགྱུར་བ་སྟེ། བདག་ཀྱང་དེ་ལ་ཤིན་ཏུ་ནན་ཏན་བགྱིད། གཞན་དག་ལ་ཡང་དོན་དེ་དག་རྒྱས་པར་བསྟན་པར་འཚལ་ལོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ཤིན་ཏུ་ལེགས་སོ་ཞེས་བྱ་བ་བྱིན་ནས་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པའི་སྐུ་ནི་རྡོ་རྗེའི་སྐུ། མི་འཇིག་པའི་སྐུ་སྟེ། བྱང་ཆུབ་སེམས་དཔའ་དག་དེ་ལྟར་ཤིན་ཏུ་བསླབ་ཅིང་མཐོང་བ་དང་ཤེས་པར་བྱའོ། །གང་གིས་དེ་ལྟར་མངོན་པར་ཤེས་ཤིང་མཐོང་བ་ནི་དེ་བཞིན་གཤེགས་པའི་རྡོ་རྗེའི་སྐུ་དང་མི་ཤིགས་པའི་སྐུ་མཐོང་བ་ཞེས་བྱ་བ་སྟེ། ཇི་ལྟར་མེ་ལོང་གི་ནང་ན་གཟུགས་བརྙན་མཐོང་བ་བཞིན་ནོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས་རྡོ་རྗེའི་སྐུ་ཞེས་བྱ་བའི་ལེའུ་སྟེ་གཉིས་སོ།། །།