རྒྱུད་རྒྱལ་གསང་བ་སྙིང་པོའི་འགྲེལ་པ།

རྒྱུད་རྒྱལ་གསང་བ་སྙིང་པོའི་འགྲེལ་པ་རོང་ཟོམ་ཆོས་བཟང་གིས་མཛད་པ་བཞུགས་སོ། །དཀོན་ཅོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བླ་མ་དེ་རྒྱ་ལྷག་པའི་ལྷ། །དེ་དབང་སྤྲུལ་པའི་དཀྱིལ་འཁོར་བཅས་པ་ལ། །ཕྱག་འཚལ་དེ་གསུང་ལམ་དང་སྒྲུབ་བཅས་ལའོ། །སེམས་ཀྱི་རང་བཞིན་བྱང་ཆུབ་རིན་པོ་ཆེ། །རྒྱལ་དང་གྲོལ་རྣམས་དབྱེར་མེད་ཚུལ་གཅིག་ཀྱང་། །འཁྲུལ་སྣང་དབང་ལ་དོན་ལྟར་མ་གྲུབ་སྟེ། །ཐུགས་རྗེ་སྐྱབས་ལྡན་རྣམས་ཀྱིས་གཟུང་དུ་གསོལ། །དུས་ཀྱི་མནར་བའི་གང་ཟག་བདག་ལྟ་བུས། །དཀའ་དོན་ཟབ་མོ་གཞིག་པར་མི་འོས་ཀྱང་། །བདག་རྗེས་འབྲང་བའི་དོན་ཕྱིར་གསོལ་བཏབ་པས། །དཔྱད་པར་ཤེས་བཞིན་ནན་གྱིས་བྲིས་པ་ཡིན། །གདམས་ངག་བརྗེད་དང་ལོག་པར་རྟོགས་པ་དང་། །གཞུང་སྒོ་སོ་སོའི་ལྟ་བ་འཛིན་པ་ཡིས། །སྒྲོ་དང་སྐུར་བའི་གནས་སུ་གྱུར་ཏོ་འཚལ། །འཕགས་དང་མཁས་པས་བཟོད་པ་བཞེས་པར་མཛོད། །རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལེའུ་སྟོང་ཕྲག་བརྒྱ་པ་ལས། མཚན་ཉིད་དང་རྒྱུད་དང་ལུང་ཐམས་ཅད་ཀྱི་སྤྱི། དེ་བཞིན་གཤེགས་པ་ཐམས་ཅད་ཀྱི་གསང་བ། གསང་བའི་སྙིང་པོ་དེ་ཁོ་ན་ཉིད་ངེས་པ་ལས། ཐམས་ཅད་མ་ལུས་པར་འཕྲོས་ཏེ། འཁོར་ལོ་བསྐོར་བ་དེ་དག་གི་ཚུལ་ནི། སྟོན་པ་སངས་རྒྱས་བཅོམ་ལྡན་འདས་ལོངས་སྤྱོད་ཆེན་པོ། ཕྱོགས་བཅུའི་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད། མ་ལུས་མི་ལུས་ལུས་པ་མེད་པའི་ཆོས་ཐམས་ཅད་ཀྱི་རང་བཞིན་གཅིག་དང་དུ་མ་མེད་པའི་བདག་ཉིད་ཆེན་པོའི་ངང་ལས། གཡོ་བའི་རྩོལ་བ་དང་རྣམ་པར་རྟོག་པ་མི་མངའ་བཞིན་དུ། སྔོན་གྱི་སྨོན་ལམ་དང་ཐུགས་རྗེ་ཆེན་པོ་ལྷུན་གྱིས་གྲུབ་པའི་ཤུགས་དང་ཤེས་རབ་ཆེན་པོའི་སྟོབས་ཀྱིས། ཆོས་ཀྱི་དབྱིངས་རྣམ་པར་དག་པར་གྱུར་པའི་དབང་དང་། གདུལ་བྱ་རྣམས་ཀྱི་དཀར་པོའི་ལས་ཀྱི་བག་ཆགས་ཀྱི་རྒྱུ་ལས། སྐུ་གསུང་ཐུགས་ཀྱི་སྤྲུལ་པ་སྣ་ཚོགས་པ་གདུལ་བྱ་སོ་སོའི་ངོ་གང་ལ་སྣང་བ་ནི། དཔེར་ན་ལྷའི་རྒྱལ་པོ་དབང་སྒྱུར་གྱི་གནས་མན་ཆད་ནས། འཛམ་བུའི་གླིང་ཡན་ཆད། མཐོ་རིས་ཀྱི་གནས་རྣམས་སུ། འདོད་པའི་ཡོན་ཏན་གྱི་རྐྱེན་ཆར་སོ་སོར་འབབ་པ་ཡང་། རྒྱ་མཚོའི་ལྷའི་དབང་དང་། གནས་སོ་སོའི་ནམ་མཁའི་དབང་དང་། འགྲོ་བ་སོ་སོའི་ལས་ཀྱི་རྒྱུ་ལས། ཆར་སོ་སོར་འབབ་པ་འགྲུབ་པ་ཡིན་ཡང་། རྒྱ་མཚོའི་ལྷ་ཡང་འདི་སྙམ་དུ་བདག་གིས་ནི་གནས་འདི་རྣམས་སུ་སོ་སོའི་ལས་ཀྱི་སྐལ་བ་དང་འཚམས་པར་སྤྲིན་འདི་ལྟ་བུ་བསྡུ་བར་བྱའོ། །གློག་འདི་ལྟ་བུ་དབྱུང་བར་བྱའོ། །འབྲུག་འདི་ལྟ་བུ་བསྒྲག་པར་བྱའོ། །ཆར་འདི་ལྟ་བུར་དབབ་པར་བྱའོ་སྙམ་དུ་མི་རྟོག་རྣམ་པར་མི་རྟོག །མངོན་པར་མི་རྩོལ། ནམ་མཁའ་ཡང་འདི་སྙམ་དུ་བདག་གིས་འགྲོ་བ་འདི་དག་གི་འདོད་པའི་ཡོན་ཏན་འབྱུང་བའི་ཆར་འབབ་པའི་གོ་སྐབས་དབྱེའོ་སྙམ་དུ་མི་རྟོག །རྣམ་པར་མི་རྟོག །མངོན་པར་མི་རྩོལ། འགྲོ་བ་སོ་སོའི་ལས་ཀྱི་བག་ཆགས་ཀྱང་འདི་སྙམ་དུ་བདག་གིས་ལས་ཀྱི་སྐལ་བ་དང་འཚམས་པའི་ཆར་དབབ་པར་བྱའོ་སྙམ་དུ་མི་རྟོག །རྣམ་པར་མི་རྟོག །མངོན་པར་མི་རྩོལ་བཞིན་དུ། རྒྱུ་རྐྱེན་འཚོགས་པའི་དབང་གིས་གནས་དེ་རྣམས་སུ་སོ་སོའི་ལས་ཀྱི་སྐལ་བ་དང་འཚམས་པའི་སྤྲིན་འདུ་བ་ནས་ཆར་འབབ་པའི་བར་དུ་སོ་སོར་འབྱུང་བ་ནི། ལྷའི་དབང་པོ་དབང་སྒྱུར་གྱི་གནས་སུ་གསེར་གྱི་སྙིང་པོ་ལྟ་བུའི་སྤྲིན་འདུ་བ་དང་། དེ་བཞིན་དུ་གློག་དང་འབྲུག་རྣམས་ཀྱང་ཐ་དད་དུ་འབྱུང་ཞིང་ཆར་ཡང་རང་བཞིན་ཐ་དད་དུ་འབབ་པ་ནས། འཛམ་བུ་གླིང་གི་བར་དུ་ཡང་དེ་བཞིན་ཏེ། སྤྲིན་རྣམས་ཀྱང་མུ་ཏིག་དམར་པོ་ལྟ་བུ་ནས། རི་ནག་པོ་བརྩེགས་པ་ལྟ་བུའི་བར་དང་། གློག་ཀྱང་གསེར་ཁ་སྦྱངས་པ་ནས། རིན་པོ་ཆེ་ཨནྡ་རྙིལ་འོད་འཕྲོ་བ་ལྟ་བུའི་བར་དང་། འབྲུག་ཀྱང་ཀ་ལ་པིང་ཀའི་དབྱངས་ལྟ་བུ་དང་། རོལ་མོའི་སྒྲ་དབྱངས་ལྟ་བུ་ནས། རྒྱ་མཚོ་འཁྲུག་པ་ལྟ་བུའི་སྒྲའི་བར་དང་། ཆར་ཡང་རིན་པོ་ཆེ་སྣ་ཚོགས་ཀྱི་ཆར་ནས། མཚོན་ཆའི་ཆར་དང་། ཆུ་དང་བའི་ཆར་གྱི་བར་དུ་སོ་སོའི་ལས་ཀྱི་སྐལ་བ་དང་འཚམས་པར་སོ་སོ་ཐ་དད་དུ་འབྱུང་བ་བཞིན་དུ། གདུལ་བྱ་སོ་སོའི་ངོ་གང་ལ་བྱིན་རླབས་ཐ་དད་པར་སྣང་ཞིང་། དཀོན་ཅོག་གསུམ་གྱི་རང་བཞིན་ཐ་དད་དུ་མཐོང་བ་ནི་འདི་ལྟ་སྟེ། ཐེག་པ་ཐུན་མོང་དུ་གྲགས་པའི་སངས་རྒྱས་དཀོན་ཅོག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བ་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་ཞེས་བྱ་བའི་ཡོན་ཏན་གྱི་རྣམ་གྲངས་ཀྱི་མཚན་གྱིས་བརྗོད་པ། རྣམ་པར་གྲོལ་བའི་ཡེ་ཤེས་ཀྱི་སྐུ་དང་བདག་ཉིད། །རྩ་བའི་སྐུ་དང་འཕྲུལ་པ་སྤྲུལ་པའི་སྐུ་དང་བཅས་པ། ཡང་དག་པར་རྫོགས་པའི་སངས་རྒྱས་ཀྱི་རིགས་ཀྱིས་བསྡུས་པ། རབ་ཏུ་བྱུང་བའི་ཆ་བྱད་འཆང་བ། སྐྱེས་པའི་གཟུགས་སུ་བཞུགས་པ། གཙོ་བོ་གཅིག་པུ་པ། མཛད་པ་ཡོངས་སུ་རྫོགས་པ་དང་། ཡོངས་སུ་རྫོགས་པའི་རྒྱུད་ཀྱིས་བསྡུས་པ་ནི། སངས་རྒྱས་དཀོན་ཅོག་གོ་ཞེས་འདོད་དོ། །ཆོས་དཀོན་ཅོག་ཀྱང་། དམ་པའི་ཆོས་ཐོག་མར་དགེ་བ། བར་དུ་དགེ་བ། མཐའ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་དག་པ། ཡོངས་སུ་བྱང་བ། བཅོམ་ལྡན་འདས་ཀྱིས་ཆོས་འདུལ་བ་ལ་ལེགས་པར་གསུངས་པ། ལམ་དང་བཅས་པ། མྱ་ངན་ལས་འདས་པ་དང་བཅས་པ་ནི། ཆོས་དཀོན་ཅོག་ཅེས་འདོད་དོ། །དགེ་འདུན་ལ་ཡང་འཕགས་པའི་དགེ་འདུན་ལེགས་པར་ཞུགས་པ། རིག་པར་ཞུགས་པ། དྲང་པོར་ཞུགས་པ། ལྟ་བ་དང་དད་པ་མི་ཕྱེད་པ། མཆོད་གནས་ཀྱི་དཔལ་གྱི་ཞིང་། བཀུར་བའི་འོས། ཕྱག་གི་གནས། སྐྱེས་བུ་ཟུང་བཞི་དང་གང་ཟག་ཡ་བརྒྱད་ཀྱིས་བསྡུས་པ་ཞེས་འདོད་དོ། །ཐེག་པ་ཆེན་པོ་ཐུན་མོང་མ་ཡིན་པའི་གཞུང་ལས་གྲགས་པ་ནི། སངས་རྒྱས་དཀོན་ཅོག་ཡོན་ཏན་གྱི་མཚན་གོང་དུ་སྨོས་པ་ལྟ་བུས་བརྗོད་པ། ཡེ་ཤེས་བཞི་དང་ཆོས་དབྱིངས་རྣམ་པར་དག་པའི་དབང་གིས་ཆོས་ལྔའི་བདག་ཉིད་ལོངས་སྤྱོད་རྫོགས་པ་དང་། འཕྲུལ་བའི་སྐུ་དང་བཅས་པ་དེ་བཞིན་གཤེགས་པ་ཞེས་བྱ་དང་། སངས་རྒྱས་ཞེས་བྱ་བ་དང་། བདེ་བར་གཤེགས་པ་ཞེས་བྱ་བས་བསྡུས་པ་འཁོར་ལོ་སྒྱུར་བའི་རྒྱལ་པོའི་ཆ་བྱད་དང་། རབ་ཏུ་བྱུང་བའི་ཆ་བྱད་འཆང་བ། སྐྱེས་པའི་གཟུགས་སུ་བཞུགས་པ། གཙོ་བོ་གཅིག་པུ་དང་། གཙོ་བོ་དུ་མ་པ་སངས་རྒྱས་ཀྱི་ཞིང་ཆེན་པོ་དང་། ཆུང་ངུའི་རྒྱུད་ཀྱིས་བསྡུས་པ་ནི། སངས་རྒྱས་དཀོན་ཅོག་ཅེས་འདོད་དོ། །ཆོས་དཀོན་ཅོག་ཀྱང་ཇི་སྐད་སྨོས་པ་དང་། ཐེག་པ་ཆེན་པོའི་གཞུང་དང་ལམ་དག་མྱ་ངན་ལས་འདས་པ་དང་བཅས་པའོ་ཞེས་འདོད་དོ། །འཕགས་པའི་དགེ་འདུན་ཡང་། ཉན་ཐོས་ཀྱི་དགེ་འདུན་དང་། བྱང་ཆུབ་སེམས་དཔའི་དགེ་འདུན་དང་བཅས་པའོ་ཞེས་འདོད་དོ། །གཞན་ཡང་གསང་བ་བླ་ན་མེད་པའི་ཐེག་པ་ཐུན་མོང་དུ་གྲགས་པའི་སངས་རྒྱས་དཀོན་ཅོག །ཇི་སྐད་སྨོས་པའི་ཡོན་ཏན་གྱི་མཚན་གྱིས་བརྗོད་པ། ཡེ་ཤེས་ལྔ་དང་སྐུ་གསུམ་མམ་བཞིའི་བདག་ཉིད་ཆོས་ཉིད་དག་པ་དང་། རྣམ་པར་འཕྲུལ་པ་དང་། བྱིན་གྱིས་བརླབས་པའི་ལྷ་དང་བཅས་པ། དེ་བཞིན་གཤེགས་པ་དང་། པདྨ་དང་། རྡོ་རྗེའི་རིགས་གསུམ་གྱིས་བསྡུས་པ། ལོངས་སྤྱོད་རྫོགས་པ་དག་སྤྲུལ་པ་དང་ཞི་བ་དང་ཁྲོ་བོའི་ཆ་བྱད་འཆང་བ་རིག་སྔགས་དང་གསང་སྔགས་ཀྱི་གཟུགས་སུ་བཞུགས་པ། གཙོ་བོ་དང་འཁོར་དང་གཅིག་དང་དུ་མ་དང་། རྩ་བའི་དཀྱིལ་འཁོར་དང་སྙིང་པོའི་དཀྱིལ་འཁོར་ལ་སོགས་པའི་བྱེ་བྲག་གིས་དཀྱིལ་འཁོར་ཆེ་ཆུང་རྣམས་སུ་ཡོངས་སུ་དག་པ་ཆེན་པོའི་ལྷ་རྒྱུད་དུ་གཏོགས་པ་ནི་སངས་རྒྱས་དཀོན་ཅོག་ཅེས་འདོད་དོ། །ཆོས་དཀོན་ཅོག་ཀྱང་ཇི་སྐད་སྨོས་པའང་། གསང་བ་བླ་ན་མེད་པའི་གཞུང་དང་ལམ་དང་བཅས་པའོ་ཞེས་འདོད་དོ། །འཕགས་པའི་དགེ་འདུན་ཡང་ཉན་ཐོས་ཀྱི་དགེ་འདུན་དང་། བྱང་ཆུབ་སེམས་དཔའི་དགེ་འདུན་དང་། རིག་པ་འཛིན་པའི་དགེ་འདུན་དང་བཅས་པའོ། །ཞེས་འདོད་དོ། །གཞན་ཡང་རྣལ་འབྱོར་གྱི་རྒྱུད་ཀྱི་གཞུང་ལས་གྲགས་པའི་སངས་རྒྱས་དཀོན་ཅོག་གོང་དུ་སྨོས་པའི་ཡོན་ཏན་གྱི་མཚན་གྱིས་བརྗོད་པ། ཡེ་ཤེས་ལྔ་དང་གསུམ་དང་བཞིའི་མཚན་ཉིད་ཆོས་ཉིད་དག་པ་དང་། རྣམ་པར་འཕྲུལ་པ་དང་། བྱིན་གྱིས་བརླབས་པའི་དབང་གིས་རང་བཞིན་ཁྱད་པར་ཅན་དང་། ཁྱད་པར་ཅན་མ་ཡིན་པའི་ལྷ་དང་བཅས་པ། དེ་བཞིན་གཤེགས་པ་རྣམས་དང་། དེ་དག་གི་རིགས་དང་། རྡོ་རྗེ་དང་པདྨ་དང་ནོར་བུའི་རིགས་ཀྱི་དབང་གིས་རིགས་བཞིའམ་ལྔས་བསྡུས་པ་ལོངས་སྤྱོད་རྫོགས་པ་དང་། སྤྲུལ་པ་དང་ཞི་བ་དང་ཁྲོ་བོའི་ཆ་བྱད་འཆང་བ། སྙིང་པོ་དང་ཕྱག་རྒྱ་དང་གསང་སྔགས་དང་རིག་སྔགས་ཀྱི་གཟུགས་སུ་བཞུགས་པ། གཙོ་བོ་དང་འཁོར་དང་གཅིག་དང་དུ་མ་ལ། རྩ་བའི་དཀྱིལ་འཁོར་ཆེན་པོ་དང་། དམ་ཚིག་དང་། ཆོས་དང་ལས་ཀྱི་དཀྱིལ་འཁོར་དང་། ཕྱག་རྒྱ་བཞི་པ་དང་གཅིག་པ་ལ་སོགས་པའི་བྱེ་བྲག་གིས་དཀྱིལ་འཁོར་ཆེན་པོ་དང་ཆུང་ངུ་རྣམས་སུ་ཡོངས་སུ་དག་པ་ཆེན་པོའི་ལྷ་རྒྱུད་དུ་གཏོགས་པ་ནི་སངས་རྒྱས་དཀོན་ཅོག་ཅེས་འདོད་དོ། །ཆོས་དང་དགེ་འདུན་གྱི་ཚུལ་ཡང་གསང་བ་སྤྱིའི་ཚུལ་བཞིན་ནོ། །གཞན་ཡང་རྣལ་འབྱོར་ཆེན་པོའི་ཚུལ་ལ་གྲགས་པའི་སངས་རྒྱས་དཀོན་ཅོག །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ལོངས་སྤྱོད་ཆེན་པོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད་མ་ལུས་མི་ལུས་ལུས་པ་མེད་པ་ཐམས་ཅད་དང་སོ་སོ་མ་ཡིན་ཐ་མི་དད་དབྱེར་མེད་པའི་རང་བཞིན་གཅིག་དང་དུ་མ་མེད་པའི་བདག་ཉིད་ཆེན་ཞེས་བྱ་བ་ལ་སོགས་པ་ཡོན་ཏན་གྱི་མཚན་གྱིས་བརྗོད་པ་ཡེ་ཤེས་ཆེན་པོ་དྲུག་དང་སྐུ་ལྔའི་བདག་ཉིད། ཟག་པ་དང་བཅས་པ་ཟག་པ་མེད་པའི་ཆོས་ཐམས་ཅད་དབྱེར་མེད་པར་སྐུ་གསུང་ཐུགས་རྡོ་རྗེ་ལྟ་བུའི་དཀྱིལ་འཁོར་དུ་ཡེ་ནས་ལྷུན་གྱིས་གྲུབ་པའི་ལྷ་དང་བཅས་པ། སྐུ་གསུང་ཐུགས་ཡོན་ཏན་ཕྲིན་ལས་ལྔ་དང་། བྱང་ཆུབ་སེམས་ཀྱི་དབང་གིས་རིགས་དྲུག་གིས་བསྡུས་པ་ལོངས་སྤྱོད་རྫོགས་པ་དང་སྤྲུལ་པ་དང་ཞི་བ་དང་ཁྲོ་བོའི་ཆ་བྱད་འཆང་བ། ཐབས་དང་ཤེས་རབ་གཉིས་སུ་མེད་པའི་རྒྱན་ཆེན་པོ་ལ་རོལ་པ་ཆེན་པོའི་གཟུགས་སུ་བཞུགས་པ། གཙོ་བོ་དང་འཁོར་དང་གཅིག་དང་དུ་མ་དང་སྐུ་དང་གནས་དང་སྤྱོད་ཡུལ་ལྟ་བུ་ལ། ཆོས་ཐམས་ཅད་ཡེ་ནས་མངོན་པར་རྫོགས་པ་སངས་རྒྱས་པའི་རང་བཞིན་དབྱེར་མེད་ཅིང་གཅིག་དང་དུ་མ་མེད་པའི་བདག་ཉིད་ཀྱིས་དུས་བཞི་མཉམ་པ་ཉིད་ཀྱི་དབྱིངས་ནས་སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་པ་ནི་སངས་རྒྱས་དཀོན་ཅོག་གོ་ཞེས་འདོད་དོ། །ཆོས་དང་དགེ་འདུན་གྱི་ཚུལ་ཡང་ཐུན་མོང་དུ་བསྟན་པ་ནི། ཇི་ལྟར་གསང་བ་སྤྱིའི་སྐབས་སུ་བཤད་པ་བཞིན་ནོ། །ཐུན་མོང་མ་ཡིན་པར་བསྟན་པ་ནི། ཇི་ལྟར་སངས་རྒྱས་ཀྱི་རང་བཞིན་གང་ཡིན་པ་དེ་ཉིད་ཆོས་ཏེ། དགེ་འདུན་གྱི་རང་བཞིན་ཡང་དེ་ཉིད་དོ། །དེས་ན་རྒྱུ་དང་འབྲས་བུ་དང་ལམ་དང་སྒྲུབ་པ་རྣམས་དབྱེར་མེད་པ་ནི་ཀུན་ཏུ་བཟང་པོ་བྱང་ཆུབ་སེམས་ཞེས་བྱ་སྟེ། དེ་ཉིད་བཅོམ་ལྡན་འདས་རྡོ་རྗེ་འཆང་ཆེན་པོ་རྡོ་རྗེ་སེམས་དཔའ་གདོད་མ་ནས་སངས་རྒྱས་པ། ཆོས་ཀྱི་སྙིང་པོ། རྣལ་འབྱོར་ཐམས་ཅད་ཀྱི་གཙོ་བོ་ཞེས་གྲགས་པ་གང་ཡིན་པའོ། །རྣམ་པར་འཕྲུལ་པའི་དབང་དུ་བཤད་ན། སངས་རྒྱས་ཆོས་དང་དགེ་འདུན་དུ་སྤྲུལ་པའང་ཡོད་དེ། འདི་ལྟར་ཕྱག་རྒྱར་སྤྲུལ་པ་དང་། གང་ཟག་ཏུ་སྤྲུལ་པ་རྣམས་སོ། །ཆོས་དགེ་འདུན་དང་སངས་རྒྱས་སུ་འཕྲུལ་པའང་ཡོད་དེ། ས་དང་ཕ་རོལ་ཏུ་ཕྱིན་པ་དང་གཟུངས་རྣམས་སངས་རྒྱས་དང་བྱང་ཆུབ་སེམས་དཔའ་ལེགས་པར་སྤྲུལ་པ་ལྟ་བུའོ། །དགེ་འདུན་ཆོས་དང་སངས་རྒྱས་སུ་འཕྲུལ་པ་ཡང་ཡོད་དེ། སློབ་པའི་ས་ལ་གནས་པ་དག་གིས་སངས་རྒྱས་ཀྱི་མཛད་པ་བསྒྲུབ་པ་ལྟ་བུའོ། །འདི་ལྟ་བུ་ལ་སོགས་པ་དག་བསྟན་པ་ནི། ཐེག་པ་ཆེན་པོ་ཐུན་མོང་མ་ཡིན་པའི་གཞུང་བཟུང་ནས་སངས་རྒྱས་རྣམས་ཀྱི་འཕྲུལ་པ་གདུལ་བྱ་ལ་ཇི་ལྟར་སྣང་བའི་ཚུལ་ཐེག་པ་སོ་སོའི་གཞུང་ལས་གྲགས་པ་མདོ་ཙམ་བསྟན་པའོ། །དེ་ལྟར་སྐུ་གསུང་ཐུགས་ཀྱི་བྱིན་རླབས་སྤྱིར་སྣང་བ་དེ་དག་གི་གཞི་ཡང་རྣམ་པར་བཞི་སྟེ། དེ་ཡང་གཞུང་ཁ་ཅིག་ནི་རྩོད་གཞི་མེད་པའོ། །ཁ་ཅིག་ནི་རྩོད་གཞི་དང་བཅས་པའོ། །དེ་ལ་གཞི་རྣམ་པ་བཞི་ནི། དང་པོ་དེ་བཞིན་གཤེགས་པ་ཉིད་ལ་གོང་དུ་བསྟན་པའི་ཚུལ་ལྔ་པོ་དེ་དག་ཇི་ལྟར་སྨོས་པ་བཞིན་དུ་ལྡན་པ་ཡིན་ཏེ། གདུལ་བྱའི་དབང་ལ་སྣང་བ་ཙམ་ཡང་མ་ཡིན་ནོ་ཞེས་འདོད་དོ། །གཉིས་པ་ནི་དེ་བཞིན་གཤེགས་པ་ཉིད་ལ་ནི་ལུས་དང་གནས་དང་སྤྱོད་ཡུལ་དུ་སྣང་བ་ནི་མི་མངའ་འོ། །དེེ་དག་ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་དོན་དམ་པ་དང་ཀུན་རྫོབ་ཀྱི་བདེན་པའི་ཡུལ་ཅན་རྣམ་པར་མི་རྟོག་པའི་ཡེ་ཤེས་དང་དག་པ་འཇིག་རྟེན་པའི་ཡེ་ཤེས་མངའོ་ཞེས་འདོད་དོ། །གསུམ་པ་ནི་དེ་བཞིན་གཤེགས་པ་ལ་དག་པ་འཇིག་རྟེན་པའི་ཡེ་ཤེས་ཀྱང་མི་མངའོ་ཞེས་འདོད་དོ། །དེ་ལ་རྩོད་གཞི་མེད་པ་ནི་ཐེག་པ་ཆུང་ངུའི་གཞུང་འཛིན་པ་རྣམས་ནི་བྱང་ཆུབ་སེམས་དཔའ་སྲིད་པ་ཐ་མ་པའི་ལུས་ནི་བདག་ཏུ་ལྟ་བ་དང་སྲིད་པས་བསྐྱེད་པའི་སོ་སོའི་སྐྱེ་བོའི་ལུས་ཡིན་ལ། དེས་སྲིད་པ་དེ་ལ་མངོན་པར་རྫོགས་པར་སངས་རྒྱས་ནས། སངས་རྒྱས་ཀྱི་མཛད་པ་བསྒྲུབས་ཏེ་མྱ་ངན་ལས་འདའ་བར་འདོད་པས། འདི་ཡང་ཇི་ལྟར་བསྟན་པ་བཞིན་འདོད་པ་ལ་རྩོད་གཞི་མེད་དོ། །ཐེག་པ་ཆེན་པོ་ཉན་ཐོས་དང་ཐུན་མོང་གི་ཚུལ་ལྟར་ན་ཡང་། བྱང་ཆུབ་སེམས་དཔའི་སྲིད་པ་ཐ་མ་པའི་ལུས་ནི་སྨོན་ལམ་གྱིས་བསྒྲུབ་པའི་ལུས་ཡིན་ཏེ། ལུས་འདི་ལྟ་བུ་ལེན་པའི་རྒྱུ་ཡང་བདག་ཏུ་ལྟ་བའི་བག་ཆགས་དང་། གནས་ཀྱིས་སའི་མ་རིག་པས་བསྐྱེད་པར་འདོད་པ་ཡིན་པས། ཇི་སྐད་བསྟན་པ་བཞིན་སངས་རྒྱས་ཉིད་ལ་ལྡན་པར་འདོད་པའི་ཕྱིར་རྩོད་གཞི་མེད་དོ། །རྣལ་འབྱོར་སྤྱོད་པ་རྣམ་པ་དང་བཅས་པར་སྨྲ་པའི་གཞུང་ལྟར་ན་ཡང་། ཕྱི་རོལ་གྱི་དོན་སེམས་ལས་གུད་ན་མེད་ན་ཡང་སེམས་ཉིད་ལས་དང་གནས་དང་སྤྱོད་ཡུལ་ལྟ་བུའི་རྣམ་པར་སྣང་བར་སྐྱེ་བ་ཡིན་ལ། མངོན་པར་རྫོགས་པར་སངས་རྒྱས་ནས་ཀྱང་ཉོན་མོངས་པ་དང་མི་ཤེས་པ་དང་། མངོན་པར་ཞེན་པར་དང་བྲལ་བའི་ཡེ་ཤེས་གཟུགས་ཀྱི་སྐུ་དང་། སངས་རྒྱས་ཀྱི་ཞིང་དང་། དེའི་རྒྱན་ལ་སོགས་པར་ཡོད་པར་སྣང་བར་འདོད་ལ་རྩོད་པའི་གཞི་མེད་དོ། །རྣལ་འབྱོར་སྤྱོད་པ་རྣམ་པ་མེད་པར་སྨྲ་བའི་གཞུང་ལྟར་ན་ཡང་ཁམས་གསུམ་པའི་སེམས་ཀྱང་དོན་ལྟར་སྣང་བའི་རྣམ་པ་དང་བྲལ་བ་ཡིན་ལ། སྣང་བ་ནི་སེམས་དེ་ཉིད་དང་གཞན་དུ་བརྗོད་དུ་མེད་པའི་བག་ཆགས་ཏེ། མངོན་པར་རྫོགས་པར་སངས་རྒྱས་པའི་དུས་ན་བག་ཆགས་ཡོངས་སུ་དག་ནས་ཡེ་ཤེས་རྣམ་པ་དང་བྲལ་བ་སྐད་ཅིག་མའི་མཚན་ཉིད་རྒྱུན་འབྲེལ་པར་སྐྱེ་བར་འདོད་ཅིང་། གཟུགས་ཀྱི་སྐུ་ལ་སོགས་པའི་ཡོན་ཏན་གྱི་ཁྱད་པར་ཡང་སྔོན་གྱི་སྨོན་ལམ་དང་ཐུགས་རྗེ་ཆེན་པོའི་ཤུགས་དང་། ཡེ་ཤེས་ཆེན་པོའི་དབང་གིས་དཔག་བསམ་གྱི་ཤིང་དང་ཡིད་བཞིན་གྱི་ནོར་བུ་རིན་པོ་ཆེ་ལྟར་འགྲོ་བའི་དོན་ཡོན་ཏན་འབྱུང་བར་འདོད་པས་འདི་ལའང་རྩོད་པའི་གཞི་མེད་དོ། །རྩོད་གཞི་དང་བཅས་པ་ནི། གང་དག་དབུ་མ་དང་གསང་སྔགས་ཀྱི་གཞུ་འཛིན་པ་རྣམས་དོན་དམ་པར་ཆོས་ཐམས་ཅད་སྤྲོས་པ་ཞི་བར་ཡང་འདོད་ཅིང་། ཀུན་རྫོབ་ཙམ་དུ་སྒྱུ་མའི་མཚན་ཉིད་མི་འགོག་པར་ཡང་སྨྲ་བས་ཚུལ་འདི་དག་ལ་བརྟེན་ནས། སངས་རྒྱས་ཀྱི་སའི་གནས་ལུགས་ཀྱང་ཐ་དད་པར་སྨྲ་སྟེ། དེའི་གཞི་ལའང་ཐ་དད་པར་སྨྲའོ། །དེ་ལ་མདོ་སྡེ་དབུ་མ་པའི་ཚུལ་ནི་ཀུན་རྫོབ་ཉན་ཐོས་མདོ་སྡེ་པ་དང་ཚུལ་མཐུན་པར་སྨྲ་བས་འདིའི་རྩོད་པ་ནི་མི་དཔྱད་དོ། །རྣལ་འབྱོར་སྤྱོད་པའི་དབུ་མ་དང་། གསང་སྔགས་ཀྱི་ཚུལ་འཛིན་པ་དག་གི་རྩོད་གཞི་དང་པོ་ནི། དེ་བཞིན་གཤེགས་པ་རྣམས་ལ་ནི། ཚུལ་ལྔའི་སྐབས་སུ་ཇི་སྐད་བསྟན་པ་བཞིན་དུ་ཉིད་ཀྱི་རྒྱུད་ལ་ལྡན་པ་ཡིན་ཏེ། དེ་ལ་ཁ་ཅིག་ནི་གསང་སྔགས་ལ་གྲགས་པའི་གཞུང་བཟུང་ནས། སངས་རྒྱས་ལ་ཆོས་འདི་ལྟར་ལྡན་པར་སྨྲ་སྟེ། ཇི་སྐད་དུ། བདེ་བ་ཀུན་གྱི་མཆོག་རིགས་མཉམ་མེད་ཡེ་ཤེས་གཟུགས། །འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་མིན། །བདག་ཉིད་ཀུན་ཏུ་རྟག་གནས་སྲིད་གསུམ་མཆོག་གསུམ་གཟུགས། །དཔལ་ལྡན་ཚད་མེད་བདེ་བའི་རྒྱ་མཚོ་མི་འགྱུར་བས། །བདེ་ཆེན་བདེ་སྐྱེད་རྡོ་རྗེ་སེམས་དཔའ་མགོན་པོ་ལ། །འགྲོ་བ་གསུམ་གྱི་གཉེན་འགྱུར་ཕྱོགས་པས་ཕྱག་འཚལ་ཏེ། །ཞེས་གསུངས་པ་ལྟ་བུར། སངས་རྒྱས་རྣམས་ནི་ཀུན་ཏུ་བཟང་པོ་བྱང་ཆུབ་ཀྱི་སེམས་རྡོ་རྗེ་རྡོ་རྗེ་འཆང་ཆེན་པོ་རྡོ་རྗེ་སེམས་དཔའ་ཞེས་བྱ་བ་ཡེ་ཤེས་ལྔ་དང་དྲུག་གི་བདག་ཉིད་ཅན། རྟག་ཏུ་ད་ལྟར་བྱུང་བ་ལྟ་བུའི་སྐུ་མངའ་བ་ལོངས་སྤྱོད་རྫོགས་པ་ཆེན་པོ་འཕྲུལ་པ་ཐམས་ཅད་ཀྱི་འབྱུང་གནས། རྟག་ཏུ་ཡོངས་སུ་དག་པའི་ཞིང་ཁམས་ན་མི་འགྱུར་བར་བཞུགས་པ། བཙུན་མོའི་འཁོར་དཔག་ཏུ་མེད་པའི་དཀྱིལ་འཁོར་ན་བདེ་བ་ཐམས་ཅད་དང་མི་འབྲལ་བར་བཞུགས་ཏེ། བདེ་བ་དེ་ཡང་འདི་ལྟར་ཆོས་ཀྱི་དབྱིངས་རྟོགས་པ་དེ་ཁོ་ན་ཉིད་ཀྱི་དོན་ལ་དམིགས་པའི་ཏིང་ངེ་འཛིན་གྱི་དབང་གིས་མཉེས་པའི་བདེ་བ་དང་། ཡིད་བདེ་བ་དང་ལྡན་པ། གཟུགས་ལ་སོགས་པའི་སྤྱི་རོལ་གྱི་འདོད་པའི་བདེ་བ་དང་། གཟུགས་དང་མཉམ་པར་སྦྱོར་བའི་བདེ་བ་ལ་སོགས་ཏེ་འདི་ལྟར་བདེ་བ་མཆོག་དང་ལྡན་པ། བདེ་བ་ཟག་པ་མེད་པ་དང་ལྡན་པ། བདེ་བ་ཚད་མེད་པ་དང་ལྡན་པ། བདེ་བ་མི་འགྱུར་བ་དང་ལྡན་པ། བདེ་བ་ཆེན་པོ་དང་ལྡན་པ། གདུལ་བྱ་ཐམས་ཅད་ལ་བདེ་བ་སྐྱེད་པ་དང་ལྡན་པ་སྟེ། དེ་བས་ན་བདེ་བ་ཆེན་པོ་པ་ཞེས་བྱའོ་ཞེས་ངེས་པར་འཛིན་ནོ། །ཁ་ཅིག་ནི་ཕ་རོལ་ཏུ་ཕྱིན་པའི་གཞུང་བཟུང་ནས་བཙུན་མོའི་འཁོར་ལ་ལོངས་སྤྱོད་པ་ནི་སྨད་པའི་གནས་ཡིན་པས། སངས་རྒྱས་རྣམས་ལ་མི་མངའ་ཡི་བསོད་ནམས་ཀྱི་ཚོགས་ཚད་མེད་པ་ལས་བསྒྲུབས་པའི་རྣམ་པར་སྨིན་པའི་སྐུ་ཡེ་ཤེས་ཆེན་པོའི་རྟེན་གྱི་བདག་ཉིད་ཡོངས་སུ་དག་པའི་ཞིང་དང་བཅས་པ་ཉིད་རྫོགས་པར་ལོངས་སྤྱོད་པའི་བདེ་བ་དང་བཅས་པ། ཇི་ལྟར་འདུལ་བའི་འཁོར་གྱི་དཀྱིལ་འཁོར་ན་བཞུགས་པ་འདི་ལྟ་བུ་ངེས་པར་འཛིན་ཏོ། །འདི་གཉིས་ཀ་ཡང་ཀུན་རྫོབ་ཏུ་རྣལ་འབྱོར་སྤྱོད་པ་བ་རྣམ་པ་བདེན་པར་སྨྲ་བའི་གཞུང་ལ་བརྟེན་པ་ཡིན་ཏེ། འདི་ལྟར་སེམས་ཅན་གྱི་དུས་ན་ཡང་ཕྱི་རོལ་གྱི་ཡུལ་ལ་སྐྱེ་བའི་དོན་གྱི་གཟུང་འཛིན་མེད་ཀྱང་སེམས་ཉིད་གཟུང་བ་དང་འཛིན་པ་ལྟ་བུའི་རྣམ་པར་སྐྱེ་བ་ཡོད་པས། དེ་བཞིན་དུ་གནས་གྱུར་པའི་གནས་སྐབས་ན་ཡང་ཡེ་ཤེས་རང་སྣང་བའི་སྐུ་དང་ཞིང་གི་བཀོད་པ་དག་ཡོད་དོ་སྙམ་དུ་རྟོག་གོ། །རྩོད་གཞི་གཉིས་པ་ནི། དེ་བཞིན་གཤེགས་པ་རྣམས་ལ་གཟུགས་ཀྱི་སྐུ་དག་ནི་མི་མངའ་སྟེ། འོན་ཀྱང་དོན་དམ་པ་དང་ཀུན་རྫོབ་ཀྱི་བདེན་པའི་ཡུལ་ཅན་གྱི་ཡེ་ཤེས་རྣམ་པ་གཉིས་མངའ་ཞེས་རྟོག་གོ། །ཁ་ཅིག་ནི་ཡེ་ཤེས་དེས་ཀྱང་ཏིང་ངེ་འཛིན་གྱི་བ དེ་བའི་བདག་ཉིད་ཉམས་སུ་མྱོང་ངོ་ཞེས་ཀྱང་འདོད་དོ། །ཚུལ་འདི་རྣལ་འབྱོར་སྤྱོད་པ་བ་རྣམ་པ་བརྫུན་པར་སྨྲ་བའི་གཞུང་ལ་བརྟེན་པ་ཡིན་ཏེ། འདི་ལྟར་སེམས་ཅན་གྱི་དུས་ན་ཡང་སེམས་གཟུང་འཛིན་གྱི་རྣམ་པར་སྐྱེ་བའི་དེ་ལྟར་བདེན་པ་ནི་མ་ཡིན་ནོ། །སངས་རྒྱས་ཀྱི་གནས་སྐབས་ན་ཡང་དག་པ་འཇིག་རྟེན་པའི་ཡེ་ཤེས་མངའ་ཡང་དེ་ལྟར་བདེན་པ་ནི་མ་ཡིན་ནོ་ཞེས་རྟོག་གོ། །གསུམ་པ་ནི། སངས་རྒྱས་ནི་རྣམ་པར་མི་རྟོག་པའི་ཡེ་ཤེས་ཙམ་སྟེ། ཡོན་ཏན་སྣང་བ་ཐམས་ཅད་དེའི་དབང་གིས་འབྱུང་ངོ་ཞེས་ངེས་པར་འཛིན་ཏེ། ཚུལ་འདི་ཡང་རྣལ་འབྱོར་སྤྱོད་པ་བ་རྣམ་པ་མེད་པ་ལ་བརྟེན་པ་ཡིན་ནོ། །དེ་ལྟར་རྩོད་གཞི་གསུམ་པོ་འདི་དག་ནི། ཆོས་ཐམས་ཅད་ལ་བདེན་པ་གཉིས་ཀྱི་མཚན་ཉིད་དུ་འཛིན་པ་ལས་འབྱུང་བ་ཡིན་ཏེ། འདི་ལྟར་སེམས་ཅན་གྱི་དུས་ན་སྣང་བའི་དངོས་པོ་རྣམས་ཀྱང་བདེན་པ་གཉིས་ཀྱི་མཚན་ཉིད་ཙམ་ཡིན་ལ། སངས་རྒྱས་ཀྱི་ས་ན་ཡང་བདེན་པ་གཉིས་ཀྱི་ཚུལ་དང་ལྡན་ནོ་ཞེས་རྟོག་གོ། །བཞི་པ་ནི། སངས་རྒྱས་ཀྱི་ས་ནི་ཆོས་ཀྱི་དབྱིངས་རྣམ་པར་དག་པ་ཙམ་སྟེ། སྐུ་དང་ཡེ་ཤེས་ཀྱི་བཀོད་པ་ཐམས་ཅད་ནི་སྔོན་གྱི་སྨོན་ལམ་དང་། ཐུགས་རྗེ་ཆེན་པོའི་ཤུགས་དང་། ཆོས་ཀྱི་དབྱིངས་རྣམ་པར་དག་པར་གྱུར་པའི་དབང་དང་། གདུལ་བྱ་རྣམས་ཀྱི་དཀར་པོའི་བག་ཆགས་ཀྱི་ས་བོན་གྱི་དབང་ལས་བྱུང་བ་རྟེན་མེད་པར་འབྱུང་སྟེ། དཔེར་ན་དྲང་སྲོང་སྨོན་ལམ་གྲུབ་པས་མ་འོངས་པའི་དུས་ན་སྨོན་ལམ་བཏབ་པ་རྣམས། དྲང་སྲོང་ཤི་ནས་དུས་ཡུན་རིང་མོ་འདས་ཀྱང་སྨོན་ལམ་གྲུབ་པར་གྱུར་པ་ལ་བརྟེན་མི་དགོས་པ་བཞིན་ནོ་ཞེས་འདོད་དོ། །ཚུལ་འདི་ཡང་བདེན་པ་རྣམ་པ་གཉིས་དབྱེར་མེད་པར་འདོད་པའི་གཞུང་ཐུན་མོང་མ་ཡིན་པ་ལ་བརྟེན་པ་སྟེ། འདི་ལྟར་སངས་རྒྱས་ཀྱི་ས་ལ་རྟེན་མེད་པར་མ་ཟད་སེམས་ཅན་གྱི་དུས་ན་ཡང་དངོས་པོ་སྣ་ཚོགས་སུ་སྣང་བ་ལ་རྟེན་མེད་དེ། འདི་ལྟར་དྲི་མ་མེད་པར་གྲགས་པས་བསྟན་པའི་མདོ་ལས། སྡུག་བསྔལ་གྱི་རྒྱུ་ཡང་དག་པ་མ་ཡིན་པའི་ཀུན་ཏུ་རྟོག་པ་ཡིན་པར་བསྟན་པའི་སྐབས་སུ་དྲིས་པ། ཡང་དག་པ་མ་ཡིན་པའི་ཀུན་ཏུ་རྟོག་པའི་རྒྱུ་གང་ཡིན། སྨྲས་པ་འཇིག་ཚོགས་ལ་ལྟ་བའོ། །སྨྲས་པ་དེའི་རྒྱུ་གང་ཡིན། སྨྲས་པ་འདོད་ཆགས་སོ། །སྨྲས་པ་འདོད་ཆགས་ཀྱི་རྒྱུ་གང་ཡིན། སྨྲས་པ་ཕྱིན་ཅི་ལོག་གི་འདུ་ཤེས་སོ། །སྨྲས་པ་དེའི་རྒྱུ་གང་ཡིན། རྟེན་མེད་པའོ། །སྨྲས་པ་རྟེན་མེད་པའི་རྒྱུ་གང་ཡིན། སྨྲས་པ་བཙུན་པ་རྟེན་མེད་པ་ལ་ནི་རྒྱུའི་གནས་མེད་དོ་ཞེས་གསུངས་པ་ལྟ་བུ་སྟེ། འཁོར་བའི་ཆོས་ཀྱང་རྟེན་མེད་པར་འབྱུང་ངོ་། །སྡུད་པ་ཚིགས་སུ་བཅད་པ་ལས་ཀྱང་། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན། །སེམས་ཅན་ལས་ལ་སྤྱོད་པའི་རྒྱུ་ནི་དེ་འདྲ་ཞེས། །ནམ་མཁའ་གང་ལ་གནས་ཞེས་དོན་འདི་བརྟགས་པར་བགྱི། །ཞེས་གསུངས་བ་ལྟ་བུའོ། །དེ་ལ་རྟེན་མེད་པ་དེ་ལས་འབྱུང་བ་ནི་དངོས་པོ་ཡོད་པའང་མ་ཡིན་ཏེ། ཇི་ལྟར་སྨིག་རྒྱུའི་ཆུ་སྔོ་བ་དང་གཡོ་བ་དག་ལ་རྟེན་གྱི་འབྱུང་བ་ཆེན་པོ་མེད་པར་མ་ཟད་ཀྱི། ཇི་ལྟར་སྣང་བ་དེ་ལྟ་བུའི་རང་གི་ངོ་བོ་འབྱུང་བའང་ཡོད་པ་མ་ཡིན་ཏེ་ལོང་བ་རྣམས་ཀྱི་མུན་པའང་དེ་དང་འདྲ་སྟེ། དེ་བས་ན་འཁོར་བ་དང་མྱ་ངན་ལས་འདས་པའི་ཆོས་སྣ་ཚོགས་སུ་སྣང་བའང་རྟེན་དང་རང་གི་ངོ་བོ་གཉིས་ཀ་མ་གྲུབ་པའི་ཕྱིར། སེམས་ཅན་དང་སངས་རྒྱས་གཉིས་ཀའང་རང་བཞིན་མཉམ་པར་སྨྲའོ། །འདི་ནི་ཐེག་པ་ཆེན་པོ་ཐུན་མོང་མ་ཡིན་པའི་ཚུལ་ཡིན་ཏེ། དེ་ཡང་མཚན་ཉིད་ཐུན་མོང་མ་ཡིན་པ་ནི་ཆོས་ཐམས་ཅད་རྣམ་པར་བསྒྲུབ་པ་ཉེ་བར་གཞག་པའི་མཚན་ཉིད་ཙམ་དུ་འདོད་དོ། །གང་བདེན་པ་གཉིས་ཀྱི་མཚན་ཉིད་རྣམ་པར་གཞག་པ་དང་། ངོ་བོ་ཉིད་གསུམ་གྱི་མཚན་ཉིད་རྣམ་པར་གཞག་པ་དང་། ཕྱི་དང་ནང་གི་སྐྱེ་མཆེད་རྣམ་པ་གཉིས་ཀྱི་མཚན་ཉིད་རྣམ་པར་གཞག་པ་དང་། བརྫུས་ཏེ་འབྱུང་བའི་སེམས་ཅན་གང་ཟག་གི་མཚན་ཉིད་རྣམ་པར་གཞག་པ་འདི་རྣམས་སྣང་བ་ཙམ་ལ་བརྟེན་ནས་རྣམ་པར་བསྒྲུབ་པ་ཉེ་བར་གཞག་པའི་མཚན་ཉིད་ཙམ་ཡིན་པར་བྱེ་བྲག་མེད་དོ་ཞེས་འདོད་དོ། །དེ་བཞིན་དུ་རྣམ་པར་གྲོལ་བ་ཡང་ཐུན་མོང་མ་ཡིན་ཏེ། ཉོན་མོངས་པའི་རང་བཞིན་ཉིད་རྣམ་པར་གྲོལ་བའོ། །རྣམ་པར་གྲོལ་བའི་ཡེ་ཤེས་མཐོང་བ་ཡང་ཐུན་མོང་མ་ཡིན་ཏེ། ཁམས་གསུམ་པའི་སེམས་དང་སེམས་ལས་བྱུང་བ་ཉིད་རང་བྱུང་གི་ཡེ་ཤེས་སོ། །ཞིང་དང་སྤྱོད་ཡུལ་ཡང་ཐུན་མོང་མ་ཡིན་ཏེ། བཅོམ་ལྡན་འདས་ཤཱཀྱ་ཐུབ་པའི་ཞིང་ཁམས་ཡོངས་སུ་དག་པ་འདི་ཉིད་ཀྱང་ཡོངས་སུ་དག་པའི་ཞིང་ཁམས་སོ། །དེ་ཡང་ཇི་ལྟར་ཞེ་ན་དཔེར་ན་ཡི་དྭགས་ཀྱིས་ཆུ་ཀླུང་ལ་རྣག་ཁྲག་ཏུ་མཐོང་བ་དེའི་ཚེ། ཆོས་ཅན་ས་ཕྱོགས་ན་མཁའ་དང་བཅས་པའི་ཕྱོགས་ཤིག་ན་བརླན་ཞིང་གཤེར་བའི་བྱ་བ་བྱེད་པར་སྣང་བའི་ཐུན་མོང་གི་སྣང་བ་མ་ལོག་པར་མཚུངས་མོད་ཀྱི། འོན་ཀྱང་སྣང་བ་དེ་དག་པ་དང་མ་དག་པའི་ཚུལ་སོ་སོར་སྣང་བ་སྟེ། འདི་ལྟར་ཡི་དྭགས་རྣམས་ལ་ནི་ཤིན་ཏུ་མ་དག་པར་སྣང་སྟེ་བརླན་པའི་བྱ་བ་ཡང་བྱེད་ལ། དབང་པོའི་རྒྱུན་ཉམས་པར་བྱེད་པའི་དྲི་དང་རོ་ཡང་སྣང་ངོ་། །མི་ལ་སོགས་པ་ལ་ནི་ཅུང་ཟད་མ་དག་པར་སྣང་སྟེ་བརླན་པའི་བྱ་བ་ཡང་བྱེད་ལ་དབང་པོའི་རྒྱུན་ལ་ཡང་མི་གནོད་དོ། །ཞིང་དག་པ་ན་གནས་པའི་གང་ཟག་རྣམས་ལ་ནི་དག་པར་སྣང་སྟེ་བརླན་པའི་བྱ་བ་ཡང་བྱེད་ལ་དབང་པོའི་རྒྱུན་རྒྱལ་པར་བྱེད་པའི་དྲི་དང་རོ་དང་ཡོན་ཏན་ཕུན་སུམ་ཚོགས་པ་དང་ལྡན་པའི་བདུད་རྩི་བཏུང་བར་ཡང་སྣང་ལ། ཁ་ཟས་ཀྱི་བྱ་བ་ཡང་བྱེད་ཅིང་དམ་པའི་ཆོས་རྒྱུད་ལ་སྐྱེད་པར་ཡང་བྱེད་དེ་སངས་རྒྱས་ཀྱི་མཛད་པ་ཡང་བྱེད་དོ། །ཆོས་ལ་དབང་ཐོབ་པའི་རིག་འཛིན་དག་ལ་ནི་ཤིན་ཏུ་དག་པར་སྣང་སྟེ་ཆུ་དེ་ཉིད་ཡུམ་མཱ་མ་ཀཱིའི་སྐུར་སྣང་སྟེ། དེ་ལ་རེག་པས་བརླན་པས་ཚིམ་པའི་བྱ་བ་ཡང་བྱེད་ལ། རོལ་པའི་བདེ་བ་ཡང་ཉམས་སུ་མྱོང་བར་ཡང་བྱེད་ཅིང་། རྣམ་པར་མི་རྟོག་པའི་ཏིང་ངེ་འཛིན་རྒྱུད་ལ་སྐྱེད་པར་ཡང་བྱེད་དོ། །བག་ལ་ཉལ་ཡོངས་སུ་ཟད་པ་རྣམས་ལ་ནི། སྣང་བ་ཐམས་ཅད་དང་བྲལ་ཏེ་སྤྲོས་པ་ཐམས་ཅད་ཡོངས་སུ་ཞི་བར་ཡང་འགྱུར་རོ། །དེ་བས་ན་འདི་དག་ཀྱང་རྣམ་པར་སྒྲུབ་པ་ཉེ་བར་གཞག་པའི་མཚན་ཉིད་ཙམ་ཡིན་ཏེ། རང་རང་གི་བྱ་བ་བྱེད་པར་སྣང་བ་ཙམ་ཡང་མི་བསླུ་ལ། གཟུ་བོའི་བློས་གཞལ་ན་སྣང་བ་དེ་དག་ཀྱང་ཇི་ལྟ་ཇི་ལྟར་དག་པ་དེ་ལྟ་དེ་ལྟར་བདེན་པར་ཤེས་པར་བྱའོ། །དོན་འདི་དག་ལ་འཇུག་པའི་གང་ཟག་གི་བློ་ཡང་ཐུན་མོང་མ་ཡིན་ཏེ། ཁ་ཅིག་ནི་ཉན་ཐོས་ཆེན་པོ་རྣམས་ཀྱི་བསླབ་ལུགས་བཞིན་རྗེས་སུ་སློབ་བོ། །ཁ་ཅིག་ནི་ས་ཆེན་པོ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་རྗེས་སུ་སློབ་བོ། །ཁ་ཅིག་ནི་སངས་རྒྱས་རྣམས་ཀྱི་རྗེས་སུ་སློབ་སྟེ། འདི་ལྟར་གཉིས་སུ་མེད་པའི་ཚུལ་ལ་འཇུག་པར་བྱེད་དོ། །དེ་དག་ལ་སོགས་པ་ཐུན་མོང་མ་ཡིན་པའི་ཆོས་རྣམས་ལ་སློབ་ཅིང་སྦྱོང་བ་ཚུལ་བཞི་པ་ཡིན་པར་ཤེས་པར་བྱའོ། །དེ་དག་ནི་དཀོན་ཅོག་གི་ཚུལ་ལྔ་བསྟན་པའི་གཞིའི་རྣམ་པ་བཞི་བརྗོད་པ་ཡིན་ནོ། །ད་ནི་འཁོར་ལོ་བསྐོར་བ་དེ་དག་ཉིད་བརྗོད་པར་བྱ་སྟེ། དེ་ལྟར་ཚུལ་སྣ་ཚོགས་ཀྱི་ཆོས་ཀྱི་འཁོར་ལོ་བསྐོར་བ་དེ་དག་ཀྱང་། འདུལ་བའི་དབང་གིས་ཐེག་པ་ལྔ་ཡི་སྒོ་ནས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་ཤིང་གསུང་བར་འགྱུར་ལ། དེ་དག་ལས་ཀྱང་གྲུབ་པའི་མཐའ་ལྔ་ཞིག་སྟོན་ཏེ། དེ་དག་གི་མཐར་ཐུག་པ་ནི་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པ་འདི་ཉིད་ཡིན་ནོ་ཞེས་ཤེས་པར་བྱའོ། །དེ་ལ་འདུལ་བའི་དབང་གིས་ནི་གསུང་གིས་འདུལ་བའི་བྱེ་བྲག་གོ། །ཐེག་པ་ལྔ་ནི། ལྷ་དང་མིའི་ཐེག་པ་དང་། ཉན་ཐོས་ཀྱི་ཐེག་པ་དང་། རང་བྱང་ཆུབ་ཀྱི་ཐེག་པ་དང་། བྱང་ཆུབ་སེམས་དཔའི་ཐེག་པ་དང་། གསང་བ་བླ་ན་མེད་པའི་ཐེག་པའོ། །དེ་ལ་མི་དང་ལྷའི་ཐེག་པ་ནི། འདི་ཉིད་ཀྱི་རྒྱུད་ཕྱི་མ་ལས། དགེ་བཅུ་སྤྱོད་ཅིང་མི་དགེ་སྤོང་བྱེད་པ། །འདོད་ཁམས་ལྷ་དང་མི་རུ་སྐྱེ་བའི་རྒྱུ། །ཚད་མེད་བཞི་སྤྱོད་མི་གཡོ་སྒོམ་བྱེད་པ། །ཚངས་གནས་ལ་སོགས་སྐྱེ་བའི་རྒྱུ་ཡིན་ནོ། །ཞེས་གསུངས་པ་འདི་ཉིད་ཡིན་ནོ། །དེ་ལ་མི་ཞེས་བྱ་བའི་ངེས་ཚིག་ནི་མ་ནུ་ཤ་ཞེས་བྱ་བ་བསྐལ་བ་དང་པོའི་མི་ལྷ་ལས་བབས་པའི་ཚེ་སྐྱེ་རྒུའི་བདག་པོ་མ་ན་ཞེས་བྱ་བ་ཞིག་བྱུང་སྟེ། གཞན་རྣམས་ཀྱང་དེའི་དབང་གི་བྱུང་བས་མ་ནུ་ཤ་ཞེས་བྱ་སྟེ། ཚུལ་འདིའི་ནི་ཤེད་ལས་སྐྱེས་པའི་ཕྱིར་མི་ཞེས་བྱའོ། །རྣམ་པ་གཅིག་ཏུ་ཤ་མ་ན་ཀར་ཞེས་བྱ་སྟེ། ཚུལ་བཞིན་དུ་སྤྱོད་པར་བྱེད་པ་ལ་བྱ། ཡང་ན་ཤ་མ་ནི་འདུལ་བའམ་ངེས་པ། ན་ནི་ཚིག་གི་རྐྱེན་ཏེ་ངེས་པའི་ཕྱིར་མི་ཞེས་བྱའོ། །ཡང་མ་ན་ནི་རློམ་སེམས་པའི་བདག་ཉིད་དེ་ང་རྒྱལ་དང་བཅས་པའམ་ང་རྒྱལ་འདུལ་བར་བྱེད་པས་མི་ཞེས་བྱའོ། །ལྷ་ཞེས་བྱ་བའི་ངེས་ཚིག་ནི་དེ་བ་ཞེས་བྱ་བ་དེ་བ་ས་སྟེ་ཉིན་བར་གྱི་མཚན་མ་རིང་བས་ལྷ་ཞེས་བྱ། དེ་བཞིན་དུ་སྒྲ་དེ་ཉིད་ཀྱིས་ཞི་བ་དང་། སྣང་བ་ཆེན་པོའི་སྒྲོན་མེར་གྱུར་བ་དང་བཀྲ་ཤིས་པ་དང་ཉི་མ་སྟེ་དེའི་ཕྱིར་ལྷ་ཞེས་བྱའོ། །ཡང་དེ་བྷི་ཧ་ཡ་སྟེ། ནམ་མཁའ་ལ་བྱ་བས་མཐོ་རིས་པའི་ལྷ་རྣམས་ཕལ་ཆེར་གྱི་ཁྱིམ་ནམ་མཁའ་ལ་གནམ་པའི་ཕྱིར་ལྷ་ཞེས་བྱའོ། །གཞན་ཡང་ཨ་མ་ར་སྟེ། བདུད་རྩིའི་ཟས་ལ་ལོངས་སྤྱོད་པས་བར་མ་དོའི་འཆི་བའི་རྐྱེན་ཉུང་བ་དང་། ཚེ་རིང་བར་ཡང་འདྲེན། སུ་ར་ཞེས་བྱ་སྟེ། ལྷ་མ་ཡིན་ལ་སོགས་པ་བགེགས་ཀྱི་རིགས་ཀྱིས་ཐུབ་པར་དཀའ་བས་དཔའ་བོ་ཞེས་ཀྱང་འདྲེན། ཏྲིང་ཤི་ཁ་ཞེས་བྱ་སྟེ། ལྷ་རྣམས་ལོ་སུམ་ཅུའི་ཚད་ལས་རྒན་པར་མི་འགྱུར་བས་སུམ་ཅུ་པ་ཞེས་བྱའོ། །ལྷག་པར་བསྟན་པའི་ཚིག་ལ་སོགས་པ་དེ་དག་གིས་ལྷ་ཞེས་བྱ་བའི་ངེས་པའི་ཚིག་བཤད་པར་བྱའོ། །ཉན་ཐོས་ཀྱི་ཐེག་པ་ནི། དེ་ཉིད་ལས། བདེན་བཞི་དོན་རྟོགས་རབ་ཏུ་སྤོང་བ་ཡི། །ཡེ་ཤེས་བཅུ་དྲུག་ཆ་སྦྱངས་རབ་ཞི་བའི། །རྒྱུན་ཞུགས་ལ་སོགས་རིམ་པས་སྦྱངས་ནས་ནི། །ཉོན་མོངས་དགྲ་རྣམས་ཞི་བའི་ས་རུ་འགྲོ། །ཞེས་གསུངས་པའོ། །འདི་ལ་ཡང་ཉན་ཐོས་བྱེ་བྲག་ཏུ་སྨྲ་བའི་ལྟ་བ་ནི། དབང་པོ་དང་ཡུལ་འཕྲད་པ་ལས་སྐྱེས་པའི་བློ་རྣམ་པ་མེད་པར་སྐྱེ་བར་འདོད་ཅིང་། དབང་པོ་དང་དོན་ཡང་གོང་བུ་དང་མཐུན་པའི་རྡུལ་ཕྲ་རབ་རྫས་སུ་ཡོད་པ་དང་། འདུས་བྱས་ཐམས་ཅད་བདག་མེད་ཅིང་མི་རྟག་པ་དང་། མྱ་ངན་ལས་འདས་པ་རྟག་པར་ཡོང་པར་ལྟ་བ། སྡུག་བསྔལ་གྱི་རྒྱུ་ཉོན་མོངས་པའི་གཉེན་པོ་ལམ་བསྒོམས་པས། རྒྱུན་དུ་ཞུགས་པ་ལ་སོགས་པའི་འབྲས་བུ་རྣམ་པ་བཞི་འགྲུབ་སྟེ། ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་དང་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འགྱུར་བར་འདོད་དོ་ཞེས་འབྱུང་ངོ་། །མདོ་སྡེ་པ་ནི་དབང་པོ་དང་ཡུལ་ལས་བྱུང་བའི་བློ་རྣམ་པ་དང་བཅས་པར་སྐྱེ་བར་འདོད་ལ། དབང་པོ་དང་ཡུལ་ཡང་ཁ་དོག་དང་མཐུན་པའི་རྡུལ་ཕྲ་རབ་རྫས་སུ་འདོད་ལ། འདུས་མ་བྱས་རྣམས་ཀྱང་མོ་གཤམ་གྱི་བུ་དང་འདྲ་བར་འདོད་ཅིང་། ཇི་ལྟར་བྱེ་བྲག་ཏུ་སྨྲ་བ་བས་རྫས་སུ་འདོད་པའི་ཆོས་ཕལ་ལ་རྫས་མེད་པར་རྟོགས་སོ་ཞེས་འབྱུང་ངོ་། །ཅིའི་ཕྱིར་ཉན་ཐོས་ཞེས་བྱ་ཞེ་ན། པྲ་བ་ཀ་ཞེས་བྱ་བ། པྲ་བ་ནི་ཉན་པའི་ཚིག་སྟེ། རང་སངས་རྒྱས་ལྟར་དགེ་བའི་བཤེས་གཉེན་གྱི་བཀའ་ལ་མི་བརྟེན་པ་མ་ཡིན་གྱི། འབྲས་བུ་ཐོབ་ཀར་ཡང་སངས་རྒྱས་ཀྱི་ལུང་ལ་བསྟན་ཅིང་ཉན་པར་བྱེད་པས་ན་པྲ་བ་ཀ་ཞེས་བྱའོ། །ཡང་པྲ་བ་ཀ་ནི་སྒྲོག་ཅིང་ཐོས་པར་བྱེ་པའི་ཚིག་སྟེ། རང་སངས་རྒྱས་ལྟར་ངག་གི་སྒོ་ནས་ཆོས་མི་སྟོན་པ་མ་ཡིན་གྱི། རང་གིས་ཐོབ་པའི་འབྲས་བུ་གཞན་ལ་སྒྲོག་ཅིང་ཐོས་པར་བྱེད་པས་པྲ་བ་ཀ་ཞེས་བྱ་སྟེ། འདི་ལྟར་དོན་གཉིས་མིང་གཅིག་ལ་འདུ་རུ་མི་རུང་བས་མིང་གཉིས་ཀྱི་སྒོ་ནས་གཞག་སྟེ་ཉན་ཐོས་ཞེས་བྱའོ། །རང་སངས་རྒྱས་ཀྱི་ཐེག་པ་ནི། དེ་ཉིད་ལས། ཕྱི་ནང་རྟེན་འབྲེལ་སྒྱུ་མ་མིག་ཡོར་ཚུལ་ཤེས་ཤིང་། །དངོས་པོ་གཟུགས་ལ་ཐོགས་མེད་རབ་ཏུ་འཇུག །དགེ་བཤེས་མི་སློབ་རང་གི་རིག་པས་རྟོགས། །བྱང་ཆུབ་སར་འགྲོ་ཡིད་བཞིན་བདེ་བའི་མཆོག །ཅེས་འབྱུང་ངོ་། །འདི་ཡང་ལྟ་བ་ནི། ཉན་ཐོས་ལས་ཁྱད་པར་དུ་གཟུགས་ཀྱི་ཕུང་པོ་ལས་བདག་མེད་པར་རྟོགས། ཚུལ་ཁྲིམས་ཀྱི་གཞི་ནི་མཐུན། འབྲས་བུ་ནི་ཚོགས་ན་སྤྱོད་པ་དང་། བསེ་རུ་ལྟ་བུར་ཞུགས་པ་དང་འབྲས་བུར་ཅས་པའི་བྱེ་བྲག་འཐོབ་བོ་ཞེས་འབྱུང་ངོ་། །ཅིའི་ཕྱིར་རང་སངས་རྒྱས་ཞེས་བྱ་ཞེ་ན། པྲ་ཏ་ཀ་བུདྡྷ་ཞེས་བྱ་བ། པྲ་ཏ་ཀ་ནི་སོ་སོ་རང་རང་ལ་བྱ། བུདྡྷ་ནི་སངས་རྒྱས་ཏེ། དེའི་ཕྱིར་ཉན་ཐོས་ལྟར་དགེ་བའི་བཤེས་གཉེན་ལ་མི་བརྟེན་གྱི། རང་གི་བྱང་ཆུབ་རང་གིས་རྟོགས་པས་རང་སངས་རྒྱས་ཞེས་བྱ། ཡང་ན་ཉན་ཐོས་ལྟར་རང་གིས་ཐོབ་པའི་འབྲས་བུ་གཞན་ལ་ཐོབ་པར་མི་བྱེད་ཀྱི། ངག་གི་སྒོ་ནས་ཆོས་མི་སྟོན་པས་རང་སངས་རྒྱས་ཞེས་བྱའོ། །ཡང་ན་བྱང་ཆུབ་སེམས་དཔའ་ལྟར་སེམས་ཅན་མང་པོའི་དོན་དུ་བྱང་ཆུབ་ཏུ་སེམས་མི་བསྐྱེད་ཀྱི། རང་འབའ་ཞིག་ཐར་བར་བྱ་བའི་ཕྱིར་སེམས་བསྐྱེད་པས་དེ་སྐད་ཅེས་བྱའོ། །ཡང་རྣམ་པ་གཅིག་ཏུ་པྲ་ཏ་ཡ་ནི་རྐྱེན། བུདྡྷ་ནི་རྟོགས་པའི་ཚིག་སྟེ། རང་སངས་རྒྱས་བསྐལ་པ་དུ་མར་ཚོགས་བསགས་པའི་ལས་ཀྱི་མཐའ་ལ་བབས་པ་ན། རྐྱེན་ཞིག་གི་དབང་གིས་བྱང་ཆུབ་རྟོགས་པར་འགྱུར་བ་དང་། དེས་རྟེན་ཅིང་འབྲེལ་བར་འབྱུང་བའི་རྒྱུ་རྐྱེན་རྣམས་རྟོགས་པར་འགྱུར་པས་རྐྱེན་རྟོགས་ཞེས་བྱའོ། །བྱང་ཆུབ་སེམས་དཔའི་ཐེག་པ་ནི། དེ་ཉིད་ལས། བདག་མེད་གཉིས་རྟོགས་ཕ་རོལ་ཕྱིན་རྫོགས་པའི། །ས་བཅུ་རིམ་གྱིས་བགྲོད་པའི་རྣལ་འབྱོར་པ། །སངས་རྒྱས་སར་འགྲོ་གོ་འཕང་ཐོབ་པའི་ལམ། །བདེན་པ་གཉིས་ཀྱིས་རབ་ཏུ་ཐོབ་པར་འགྱུར། །ཞེས་གསུངས་པའོ། །ཅིའི་ཕྱིར་བྱང་ཆུབ་སེམས་དཔའི་ཞེས་བྱ་ཞེ་ན། བོདྷི་ས་ཏྭ་ཞེས་བྱ་བ། བོདྷི་ནི་ཨ་བ་བོ་དྷི་སྟེ། ཁོང་དུ་ཆུད་ཅིང་རྟོགས་པའི་ཚིག་གོ། །ཡང་བོ་དྷི་ནི་སྐྱོན་དག་ཅིང་བྱང་བ་ལ་ཡང་བྱ་བས་དོན་དེས་ན་བྱང་ཆུབ་ཞེས་བྱའོ། །སཏྭ་ནི་སྒྲ་དོན་དྲུག་ལ་འཇུག་སྟེ། སྙིང་སྟོབས་སྟེ་ཞེ་སྡང་དང་། དཔའ་ཞིང་བརྟན་པ་དང་། འདུན་པ་དང་། ཤེས་རིག་དང་། སྲོག་ཆགས་དང་། བསྡུས་པ་རྣམས་ལ་འཇུག་གོ། །དེ་ལས་འདིར་ཡང་བྱང་ཆུབ་ཀྱི་ཕྱིར་བསམ་པ་བརྟན་ཞིང་མི་ནུར་བ་ཡོད་པས་བྱང་ཆུབ་འདོད་པ་དང་། བྱང་ཆུབ་དང་སེམས་ཅན་ལ་དམིགས་པ་ཡོད་པས་བྱང་ཆུབ་སེམས་དཔའ་ཞེས་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལས་ནི། སེམས་ཅན་བྱང་ཆུབ་པས་བྱང་ཆུབ་སེམས་དཔའ་ཞེས་བྱའོ། །གསང་བ་བླ་ན་མེད་པའི་ཐེག་པ་ནི། དེ་ཉིད་ལས། མཉམ་ཉིད་དོན་རྟོགས་རང་རིག་རྒྱལ་པོ་དང་། །བླ་མེད་དོན་རྟོགས་ཐབས་ཆེན་འདི་དག་ཏུ། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །རྣམ་ཐར་ཤེས་པ་བསམ་ཡས་མ་ལུས་འདུས། །ཞེས་གསུངས་པ་སྟེ། འདིར་ནི་མཉམ་པ་ཉིད་རྟོགས་པའི་བློ་དང་། དེ་སྟོན་པའི་གཞུང་གི་ཚིག་གཉིས་ཀ་ལ་ཐེག་པའི་སྒྲར་བཤད་དོ། །སྤྱིར་ཐེག་པ་ཞེས་བྱ་བའི་ངེས་ཚིག་ནི། ཡ་ན་ཞེས་བྱ་བ་འགྲོ་བའི་བྱ་བ་སྟོན་པའི་ཚིག་ཡིན་པས་ཚིག་གཟུགས་པོར་ལམ་ལ་བྱའོ། །བརྒྱུད་ནས་ནི་མྱ་ངན་ལས་འདས་པ་དང་། གཞུང་གི་ཚོགས་དང་། བརྗོད་བྱ་ལྟ་བུ་ལ་ཡང་འཇུག་པར་ཤེས་པར་བྱའོ། །ཐེག་པ་ལྔར་རྣམ་པར་གཞག་པ་འདི་ནི། དཔལ་གསང་བའི་སྙིང་པོ་འདི་ཉིད་ཀྱི་དབང་དུ་བཤད་པར་ཟད་ཀྱི། བཀའ་སྤྱིའི་གཞུང་ལ་གྲགས་པ་ལྟར་ན་ཐེག་པ་ལ་ནི་གྲངས་ངེས་པ་ཁོ་ན་གཟུང་དུ་ཡོད་པ་མ་ཡིན་ཏེ། འདི་ལྟར་འཕགས་པ་རྟོགས་ཆེན་ཕྱག་རྒྱ་པ་ལས། ཐེག་པ་ནི་གཅིག་ཏུ་བས་ཏེ། གཉིས་དང་གསུམ་དུ་མ་མཆིས་སོ། །ཞེས་གསུངས་པ་ལྟ་བུ་སྟེ། འདི་ལྟར་ཡང་དག་པར་རྫོགས་པའི་སངས་རྒྱས་གཅིག་ཁོ་ནའོ། །ཐེག་པ་གཉིས་སུ་ཡང་བསྟན་ཏེ། ཐེག་པ་ཆུང་ངུ་དང་། ཆེན་པོའི། ཡང་གཉིས་ཏེ། མཚན་ཉིད་ཀྱི་ཐེག་པ་དང་། རྡོ་རྗེའི་ཐེག་པ་གཉིས་སོ། །ཐེག་པ་ནི་གསུམ་དུ་ཡང་བསྟན་ཏེ། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། བླ་ན་མེད་པའི་ཐེག་པའོ། །ཐེག་པ་བཞིར་ཡང་བསྟན་ཏེ། གསང་བའི་ཐིག་ལེ་ནོར་བུའི་རྒྱུད་ལ་སོགས་པའི་པདྨའི་རིགས་ཀྱི་སྡོམ་པ་གཟུང་བའི་སྐབས་ལས། ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ཀྱང་རབ་ཏུ་གཟུང་། །ཞེས་གསུངས་པ་ལྟ་བུ་སྟེ། ཕྱིའི་ཐེག་པ་ནི། མཚན་ཉིད་ཀྱི་ཐེག་པར་བསྡུས་པ་མཐའ་དག་གོ། །གསང་བའི་ཐེག་པ་གསུམ་ནི། བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དེ། འདི་གསུམ་ནི་སྐུ་གསུང་ཐུགས་ཀྱི་གསང་བ་བསྟན་པ་ཡིན་ཏེ། འདི་དག་གི་དོན་ནི་འོག་ནས་རྒྱུད་ཀྱི་དབྱེ་བ་བསྟན་པའི་སྐབས་སུ་འཆད་པས་དེར་རིག་པར་བྱའོ། །ཐེག་པ་ནི་རྣམ་པ་དགུར་བསྟན་པ་ཡང་ཡོད་དེ། མན་ངག་ལྟ་བའི་ཕྲེང་བ་ལས་གསུངས་པ་ལྟར། མཚན་ཉིད་སྡེ་གསུམ་དང་། ཕྱི་རྒྱུད་སྡེ་གསུམ་དང་། ནང་རྒྱུད་སྡེ་གསུམ་མོ། །ཐེག་པ་མཐའ་ཡས་པར་བསྟན་པ་ཡང་ཡོད་དེ། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་དང་། བསམ་གྱིས་མི་ཁྱབ་པ་དང་། གཞན་ཡང་གསང་སྔགས་ཀྱི་གཞུང་ལས་ཀྱང་། འདི་ཉིད་ལས། སྲིད་གསུམ་འགྲོ་བ་ཇི་སྙེད་པའི། །རྟོག་འདུལ་དམ་ཚིག་དེ་སྙེད་སྤྲོ། །ཞེས་གསུངས་པ་ལྟ་བུ་དང་། མདོ་སྡེ་ལངྐར་གཤེགས་ལས་ཀྱང་། ཇི་སྲིད་སེམས་འཇུག་གནས་པའི་བར། ཐེག་པའི་མཐའ་ལ་ཐུག་པ་མེད། ཅེས་གསུངས་པ་ལྟ་བུའོ། །ཐེག་པ་མེད་པར་ཡང་བསྟན་ཏེ། མདོ་སྡེ་དེ་ཉིད་ལས། འདུ་ཤེས་མེད་པར་གྱུར་པ་ན། །ཐེག་པ་མེད་ཅིང་འགྲོ་བའང་མེད། །ཅེས་གསུངས་པ་ལྟ་བུ་དང་། ཡང་མདོ་སྡེ་དཀོན་ཅོག་བརྩེགས་པ་ལས། དེ་བཞིན་གཤེགས་པ་དགེ་ཆོས་ཟག་མེད་ནི། །ཆོས་ཀྱི་སྐུ་མཆོག་ཡིན་ཏེ་དེ་ལ་ནི། །དེ་བཞིན་ཉིད་མེད་དེ་བཞིན་གཤེགས་པ་མེད། །འཇིག་རྟེན་དག་ན་གཟུགས་བརྙན་ཀུན་ཏུ་སྣང་། །ཞེས་གསུངས་པ་ལྟ་བུ་དང་། གསང་སྔགས་ཀྱི་གཞུང་ལས་ཀྱང་། བགྲོད་དུ་མེད་པ་ལམ་གྱི་མཆོག །ཅེས་གསུངས་པ་ལྟ་བུ་སྟེ། ཚུལ་འདི་ལྟ་བུའི་དོན་གྱིས་ན། །ཐེག་པ་དང་། འགྲོ་བ་པོ་དང་། བགྲོད་པར་བྱ་བའི་གནས་རྣམས་ཐ་དད་དུ་གཞག་ཏུ་མེད་དོ། །ཚུལ་འདིས་ནི་ཐེག་པ་མེད་པར་ཡང་འདོད་པའོ། །ད་ནི་ཐེག་པའི་ཁྱད་པར་ཅུང་ཟད་བརྗོད་པར་བྱ་སྟེ། དེ་ལ་སྤྱིའི་ཁྱད་པར་ནི། གོང་དུ་ཐེག་པ་ལྔ་ཡི་སྐབས་སུ་ཅུང་སྨོས་པར་ཟད་དོ། །ཕྱིའི་ཐེག་པ་ལས་གསང་བའི་ཐེག་པ་ཅིས་འཕགས་པའི་ཁྱད་པར་ནི། མདོར་བསྡུ་ན་ཚུལ་རྣམ་པ་གཅིག་གིས་འཕགས་ཏེ། འདི་ལྟར་རྡོ་རྗེ་ཐེག་པའི་ཚུལ་ཉིད་དོ། །ཇི་ལྟར་ཞེ་ན། མཚན་ཉིད་ཀྱི་ཐེག་པ་ནི། ཆོས་རྣམས་ཀྱི་མཚན་ཉིད་ཇི་ལྟ་བ་དང་ཇི་སྙེད་པ་དག་གཙོ་བོར་སྒྲུབ་ཅིང་བྱེ་བྲག་ཕྱེད་པར་སྟོན་ཏོ། །ཚུལ་གཉིས་ཀྱིས་འཕགས་པར་ཡང་བསྟན་ཏེ། ལྟ་བ་ཕུལ་དུ་བྱུང་སྟེ་གཏན་ལ་དབབ་པ་དང་། མཛད་སྤྱོད་རྨད་དུ་བྱུང་བའོ། །ཡང་གཉིས་ཏེ་ཤེས་རབ་ཆེན་པོ་དང་། ཐབས་ཆེན་པོའི། ཡང་གཉིས་ཏེ་ཐབས་ཆེ་བ་དང་། སྒོ་ཡངས་པའོ། །ཡང་གཉིས་ཏེ་རྒྱུས་འཕགས་པ་དང་། འབྲས་བུས་འཕགས་པའོ། །དེ་ལ་རྒྱུ་ནི་མཚན་ཉིད་ཀྱི་ཐེག་པ་ཡུན་རིང་པར་བསྒྲུབ་པ་ལས་འཕགས་སོ། །འབྲས་བུ་ནི་ཉན་ཐོས་དགྲ་བཅོམ་པའི་འབྲས་བུ་ཙམ་ལས་མི་འགྲུབ་པ་ལས་འཕགས་སོ། །ཚུལ་འདི་དག་ནི་འཕགས་པ་ཐབས་ཀྱི་ཞགས་པ་ལས་གསུངས་པ་ལྟ་བུའོ། །གསུམ་གྱིས་འཕགས་པར་བསྟན་པའི་ཚུལ་ཡང་སྣང་སྟེ། འདི་ལྟར་ཐེག་པ་གསུམ་རྣམ་པར་གཞག་པ་ལས། དམིགས་པ་རྣམ་པར་དག་པ་དང་། གྲོགས་ཀྱི་མཐུ་དང་སྤྱོད་པའི་ས། །སློབ་ལྡན་རྣམས་ཀྱི་ཐེག་པ་ནི། །ཆེན་པོའི་ཆེན་པོ་ཉིད་དུ་བསྒྲགས། །ཞེས་གསུངས་པ་ལྟ་བུ་དང་། ལྷ་རྒྱུད་ཀྱི་རྟོག་པ་ལས། དབུ་གསུམ་དུག་གསུམ་སྐུ་གསུམ་ལྷུན་གྱིས་གྲུབ། །ལྟ་སྤྱོད་རྣམ་པ་གསུམ་གྱི་གྲུབ་པའི་རྟགས། །ཞེས་གསུངས་པ་ལྟ་བུ་སྟེ། ལྟ་སྤྱོད་གསུམ་ནི་དེའི་གྲོགས་དང་གསུམ་མོ། །དེ་ལྟར་ཁྱད་པར་རྣམ་པར་གསུམ་ནི་དམིགས་པའི་སྒོ་ནས་ཆོས་ཐམས་ཅད་དབྱེར་མེད་པར་དཀྱིལ་འཁོར་གསུམ་གྱི་རང་བཞིན་ཞིང་དང་སྤྱོད་ཡུལ་ཡོངས་སུ་དག་པར་ལྟ་བས་དམིགས་པ་རྣམ་པར་དག་པར་ལྟ་བ་དང་། དེའི་གྲོགས་ཐུན་མོང་མ་ཡིན་པའི་དམ་ཚིག་གི་སྡོམ་པ་དང་ལྡན་པའི་མཐུ་དང་། དེ་བཞིན་གཤེགས་པའི་མཛད་སྤྱོད་ཉམས་སུ་ལེན་པས་འཕགས་པར་བསྟན་ཏོ། །ཡང་རྣམ་པ་བཞིའི་ཚུལ་གྱིས་འཕགས་པ་ཡོད་དེ། ཚུལ་གསུམ་པའི་སྒྲོན་མ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་ཕྱིར་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་བསྟན་བཅོས་ཁྱད་པར་འཕགས། །ཞེས་གསུངས་པ་ལྟ་བུའོ། །ཡང་རྣམ་པ་བཞིའི་ཚུལ་གྱིས་འཕགས་པ་ཡོད་དེ། འཕགས་པ་ཐབས་ཀྱི་ཞགས་པ་ལས། དམིགས་པ་ཆེན་པོའི་ཡང་ཆེན་པོ་དང་། དེ་བཞིན་དུ་སྒྲུབ་པ་དང་། ཡེ་ཤེས་དང་། ཐབས་རྣམས་ཆེན་པོའི་ཡང་ཆེན་པོར་གྱུར་པས་འཕགས་པར་སྟོན་ཏེ། དེ་ལ་དམིགས་པ་ཆེན་པོའི་ཡང་ཆེན་པོ་ནི། དོན་དམ་པ་རྒྱུར་བལྟ་བ་དང་། ཀུན་རྫོབ་འབྲས་བུར་བལྟ་བ་དང་། རྒྱུ་གནས་སུ་བལྟ་བ་དང་། འབྲས་བུ་རོལ་པའི་དཀྱིལ་འཁོར་དུ་བལྟ་བ་དང་། བྱེད་སྤྱོད་ཚོགས་སུ་བལྟ་བ་དང་། དོན་བསྡུས་ནས་རྒྱུ་འབྲས་དབྱེར་མེད་པར་བལྟ་བའོ། །སྒྲུབ་པ་ཆེན་པོའི་ཡང་ཆེན་པོ་ནི། ཕ་རོལ་ཏུ་ཕྱིན་པ་དྲུག་དང་བཅུའི་སྒོ་ནས་བདག་དང་གཞན་གྱི་དོན་སྒྲུབ་པ་དེ་ཡང་ཀུན་ནས་ཉོན་མོངས་པ་དང་། རྣམ་པར་བྱང་བ་དབྱེར་མེད་པར་སྦྱོར་བས་ཚུལ་ཆེན་པོ་དང་། རིག་པ་སྐད་ཅིག་མ་ལ་ཚངས་པར་སྤྱོད་པས་དུས་ཆེན་པོ་དང་། ཆེད་དུ་མ་སྤྱད་པར་ཡང་ལྷུན་གྱིས་གྲུབ་པར་སྦྱོར་བས་རྫོགས་པ་ཆེན་པོའོ། །ཡེ་ཤེས་ཆེན་པོའི་ཡང་ཆེན་པོ་ནི། ཆོས་དང་གང་ཟག་གཉིས་ཀ་ལ་བདག་མེད་པར་རྟོགས་པ་དེ་ཡང་། དོན་དམ་པ་དང་ཀུན་རྫོབ་ཀྱི་བདེན་པའི་ཡུལ་ཅན་དུ་ཡང་མི་བལྟ་ཞིང་བླང་དོར་མེད་པས་ཡེ་ཤེས་ཀྱི་ཡུལ་ཆེན་པོ་དང་། ཀུན་ནས་ཉོན་མོངས་པ་དང་། རྣམ་པར་བྱང་བའི་ཆོས་དབྱེར་མེད་པར་དུས་གཅིག་ཏུ་མཉམ་པ་ཉིད་དུ་སྦྱོར་ཞིང་འཇོམས་པས་ཡེ་ཤེས་ཀྱི་ལས་ཆེན་པོའོ། །ཐབས་ཆེན་པོའི་ཡང་ཆེན་པོ་ནི། ཐབས་དང་ཤེས་རབ་ཟུང་དུ་འབྲེལ་བས་མཐའ་རྣམ་པ་གཉིས་གང་ལའང་མི་གནས་པའི་ཐབས་དང་ལྡན་པ་དེ་ལ། འདིར་ཐབས་མཁས་པ་དང་། ཐབས་དཀའ་བ་མེད་པ་དང་། ཐབས་མང་བ་དང་། ཐབས་མྱུར་བ་རྣམས་ཀྱིས་འཕགས་སོ། །དེ་ཡང་མི་དགེ་བཅུ་དང་མཚམས་མེད་པ་ལྔ་ལ་རོལ་ཡང་། བདག་ཉིད་ལ་མི་གོས་པར་འགྲོ་བ་འདྲེན་པས་ཐབས་མཁས་པའོ། །དཀའ་ཐུབ་དང་སྡོམ་པ་རྣམས་ཀྱིས་མི་གཟིར་བས་ལུས་དང་སེམས་ཇི་ལྟར་བདེ་ཞིང་དགའ་བས། བདག་དང་གཞན་གྲོལ་བར་བྱེད་པའི་ཐབས་ཡོད་པས་དཀའ་བ་མེད་པའོ། །ཐེག་པ་འོག་མ་ལྟར་མི་དགེ་བ་ནི་མི་རུང་ཞེས་སྒོ་དོགས་པ་ལྟ་བུ་མ་ཡིན་གྱི། རང་རང་གི་ཞེན་པའི་སྤྱོད་པ་ལ་གནས་བཞིན་དུ་དེ་ཉིད་ལ་ཐབས་ཀྱི་སྤྱོད་པས་ཟིན་པས་གྲོལ་བའི་ཐབས་ཡོད་པས་མང་བའོ། །དུས་ཡུན་རིང་མོ་ལྟ་བུར་བསྒྲུབ་དགོས་པ་མ་ཡིན་གྱི་མཐོང་བའི་ཆོས་ལ་སོགས་པ་མྱུར་དུ་བསྒྲུབ་པའི་ཐབས་ཡོད་པས་ཐབས་མྱུར་བའོ། །དེ་ཡང་དམིགས་པ་དང་སྤྱོད་པས་མྱུར་ཏེ། དེ་ལ་དམིགས་པ་ཡོངས་སུ་དག་པས་བསམ་པ་མྱུར་བ་ནི། ཐོགས་པ་མེད་པ་སྤྲོས་པའི་བག་ཆགས་ཀྱི་རྒྱུན་མྱུར་དུ་ལྡོག་པར་ནུས་པ་དང་། ལས་ཀྱི་རྣམ་པར་སྨིན་པ་ལྡོག་པར་ནུས་པ་དང་། བསོད་ནམས་ཀྱི་ཚོགས་ཆེན་པོ་སྐྱེ་བ་དང་། ཆོས་མཉམ་པ་ཉིད་ལ་རང་བཞིན་གྱིས་བློ་འཇུག་པར་ནུས་པའི་ཕྱིར་རོ། །སྤྱོད་པའི་སྒོ་ནས་ཀྱང་དཀའ་ཐུབ་དང་སྡོམ་པས་མ་གཟིར་བས་བསམ་པ་ལས་སུ་རུང་བར་གྱུར་པ་དང་། མཉམ་པ་དང་མཐུན་པའི་སྤྱོད་པ་བརྟུལ་ཞུགས་ཀྱི་སྤྱོད་པས་བསམ་པ་མི་མཉམ་པའི་གཉའ་གནོན་དུ་འགྱུར་བ་དང་། ཆོས་སྤྱོད་ཀྱི་སྒོ་འདུས་པ་ལ་སྤྱོད་པས་གཅིག་ལ་གཅིག་མི་སྒྲིབ་པ་དང་། ཆོ་ག་ལྟག་ཆད་ལ་སྐྱོན་དུ་མི་ལྟ་བས་ཐེ་ཚོམ་གྱི་གེགས་མི་ལྡང་སྟེ། དེ་དག་ལྟ་བུའི་ཕྱིར་ན་ཐབས་མྱུར་བ་ཞེས་བྱ་བ་ཡིན་ནོ། །ད་ནི་ཐེག་པ་སྣ་ཚོགས་ཀྱི་སྒོ་ནས་ཆོས་ཀྱི་སྒོ་མོ་བསམ་གྱིས་མི་ཁྱབ་པ་ཞིག་བསྟན་པ་དེ་ཡང་། གྲུབ་པའི་མཐའ་ལྔར་འདུས་པར་བསྟན་པ་དེའི་ཚུལ་དུ་ཅུང་ཟད་བརྗོད་པར་བྱ་སྟེ། དེ་ཡང་གྲུབ་པའི་མཐའ་ཁ་ཅིག་ནི་གཟུང་བ་དང་འཛིན་པར་སྣང་བའི་ཕྱི་རྟེན་ཅིང་འབྲེལ་བར་འབྱུང་བ་ནི། ས་བོན་ནས་འབྲས་བུའི་བར་གྱིས་བསྡུས་པ་ལྟ་བུར་སྣང་བ་དང་། ནང་རྟེན་ཅིང་འབྲེལ་བར་འབྱུང་བ་མ་རིག་པ་ནས་རྒ་ཤིའི་བར་གྱིས་བསྡུས་པ་ལྟ་བུར་སྣང་བ་ནི། སེམས་ལས་གུད་ན་ཡོད་པ་མ་ཡིན་ཏེ་རང་གི་སེམས་ཉིད་འཁྲུལ་པའི་དབང་གིས་གཟུང་བ་དང་འཛིན་པ་གཉིས་སུ་སྣང་བ་ལ། གཟུང་བ་དང་འཛིན་པའི་དངོས་པོར་འདོགས་སོ་ཞེས་སྟོན་ལ། དེ་ཡང་འདི་ལྟར་རྣལ་འབྱོར་སྤྱོད་པ་བ་དང་། རྣལ་འབྱོར་སྤྱོད་པའི་དབུ་མ་པ་དག་གོ། །གྲུབ་མཐའ་གཉིས་པ་ནི་བསོད་ནམས་དང་བསོད་ནམས་མ་ཡིན་པའི་ལས་དང་། མི་གཡོ་བའི་ལས་དག་གི་རྣམ་པར་སྨིན་པའི་འབྲས་བུ་དང་། བདག་པོའི་འབྲས་བུ་ནི་ངན་སོང་གི་གནས་དང་། མཐོ་རིས་ཀྱི་གནས་དང་། ཡོངས་སུ་དག་པའི་ཞིང་ཁམས་དག་ན་ཡང་ཆུད་མི་ཟ་བར་ཡོད་དེ། དེ་ཡང་སེམས་དང་སེམས་ལས་བྱུང་བ་ཉིད་མ་ཡིན་ནོ་ཞེས་སྟོན་པ་སྟེ། དེ་ཡང་འདི་ལྟར་ཉན་ཐོས་བྱེ་བྲག་ཏུ་སྨྲ་བ་དང་། མདོ་སྡེ་པ་དང་། མདོ་སྡེ་དབུ་མ་པ་དག་གོ། །གསུམ་པ་ནི་ལས་དང་ལས་ཀྱི་འབྲས་བུ་དང་། འཁྲུལ་པ་སྣང་བའི་དབང་དག་མེད་པར་སྐུར་པ་གདབ་ཏུ་རུང་བ་མ་ཡིན་མོད་ཀྱི། འོན་ཀྱང་རིག་སྔགས་དང་གསང་སྔགས་མཉེས་པའི་བྱ་བའི་ཐབས་བྱང་ཆུབ་ཀྱི་སེམས་དང་། དེ་ཉིད་གསུམ་དང་ལྡན་པ་དག་ལ་དེ་དག་གིས་མི་གོས་སོ་ཞེས་སྟོན་པ་སྟེ། དེ་ཡང་འདི་ལྟར་བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་ཕྱི་པ་ཐུབ་པ་རྒྱུད་ཀྱི་གཞུང་འཛིན་པ་དག་གོ། །བཞི་པ་ནི་ལས་ཉིད་ཡེ་ཤེས། སྡུག་བསྡལ་ཉིད་བྱང་ཆུབ། ཉོན་མོངས་པ་ཉིད་གྲོལ་བ་ཆེན་པོའི་རང་བཞིན་ལ། དེ་དག་གོས་པར་ལྟ་ག་ལ་འགྱུར་ཏེ་གོས་པར་མི་འགྱུར་ཞེས་སྟོན་པ་སྟེ། འདི་ལྟར་རྣལ་འབྱོར་ཆེན་པོའི་རྒྱུད་ཀྱི་གཞུང་འཛིན་པ་དག་གོ། །ལྔ་པ་ནི་སྡུག་བསྔལ་དང་བྱང་ཆུབ་ལ་སོགས་པ་ཆོས་ཐམས་ཅད་གདོད་མ་ནས་མཉམ་པ་ཆེན་པོའི་རང་བཞིན་དབྱེར་མེད་པར་ལྷུན་གྱིས་གྲུབ་པ་ལ། གང་ཞིག་གིས་གང་ཞིག་ལ་བསྒོམས་པས་གང་ཞིག་འགྲུབ་པར་འགྱུར་ཏེ། འདི་ལྟ་བུའི་གནས་མེད་པར་སྟོན་པ་སྟེ། གྲུབ་མཐའ་ཐམས་ཅད་ཀྱི་མཐའ་འདིར་ཐུག་པའོ། །དེ་ཡང་འདི་ལྟར་དཔལ་རྡོ་རྗེ་སེམས་དཔའི་སྒྱུ་འཕྲུལ་དྲྭ་བའི་གཞུང་དཔལ་གསང་བའི་སྙིང་པོ་འདི་ཉིད་དོ། །དེ་བས་ན་མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་ཐམས་ཅད་མ་ལུས་པར་འཕྲོས་ཏེ་འཁོར་ལོ་བསྐོར་བ་དེ་དག་གི་ཚུལ་བརྗོད་པ་འཁྲུལ་བའི་འཁོར་ལོ་སྤྱིའི་ཚུལ་དང་། གསུང་གི་འཁོར་ལོ་ཐེག་པ་སྣ་ཚོགས་སྒོ་ནས་གྲུབ་མཐའ་སྣ་ཚོགས་སུ་བསྟན་པ་དེ་དག་གི་འབྲས་བུའི་མཆོག་ནི་འདི་ཉིད་དོ་ཞེས་ཤེས་པར་བྱའོ། །དེ་ལ་རྒྱུད་ཐམས་ཅད་བཤད་པའི་སྒོ་དང་ཚུལ་རྣམ་པར་གཞག་པ་མང་ན་ཡང་། རྟོགས་པར་བདེ་བའི་ཕྱིར་མདོར་བསྡུས་ན། སྤྱི་དང་ཁྱད་པར་གྱི་རྒྱུད་གྱི་མཚན་བསྟན་པ་དང་། དེ་བཞིན་དུ་རྒྱུད་ཀྱི་དབྱེ་བ་དང་། ལྡང་ཚད་དང་། དངོས་པོ་དང་། དགོས་འབྲེལ་རྣམས་ཀྱིས་དོན་རྒྱས་པར་བསྟན་པ་མཐའ་དག་འདུས་པར་ཤེས་པར་བྱའོ། །གཞུང་འཆད་པའི་སྐབས་མ་ཡིན་པ་རྒྱུད་ཅེས་བྱ་བའི་མཚན་ཙམ་སྟོན་པའི་ཚེ་ནི། དངོས་པོ་དང་། ངོ་བོ་ཉིད་དང་། དབྱེ་བ་དང་། ངེས་ཚིག་དང་། ལྡང་ཚད་ལྟ་བུའི་སྒོ་ནས་བསྟན་ན་ཚིག་འབྲེལ་བར་འགྱུར་རོ། །འདིར་ནི་གཞུང་འཆད་པས་དང་པོར་མཚན་བསྟན་པར་བྱ་སྟེ། དེ་ཡང་སྤྱིར་ནི་སྒྲར་སྣང་བའི་བདག་ཉིད་ནི་རྒྱུད་དོན་ཞེས་གྲགས་སོ། །དེ་ཡང་སྟོན་པ་ཐམས་ཅད་ཀྱི་བདག་ཉིད་ཆེན་པོའི་སྔོན་གྱི་སྨོན་ལམ་དང་། ཐུགས་རྗེ་ཆེན་པོ་ལ་སོགས་པའི་དབང་དང་། གདུལ་བྱའི་དཀར་པོའི་བག་ཆགས་ཀྱི་རྒྱུ་ལས་སངས་རྒྱས་ཀྱི་སྐུ་གསུང་ཐུགས་ཀྱི་འཁྲུལ་པ་སྣང་བ་ན། སྒྲར་སྣང་བའི་བདག་ཉིད་ནི་རྒྱུད་དུ་འདོད་དོ། །དེ་ཡང་རྣལ་འབྱོར་གྱི་དབང་ཕྱུག་ཆེན་པོའི་བསླབ་པར་གྱུར་པ་དཀྱིལ་འཁོར་ལ་སོགས་པའི་དངོས་པོ་རྣམས་སྟོན་པས་ཁྱད་པར་དུ་བྱས་པ་ཡིན་གྱི་ཕ་རོལ་ཏུ་ཕྱིན་པའི་ཚུལ་ལ་སོགས་པ་བཟུང་བར་མི་བྱའོ། །དེ་ལ་རྒྱུད་ཅེས་བྱ་བའི་སྒྲ་བཤད་པ་ནི། ཏནྟྲ་པྲ་བན་ཏ་ཞེས་བྱ་སྟེ། སྔགས་ཀྱི་རྒྱུད་རྣམས་ཞི་བ་ལ་སོགས་པའི་ལས་ཕྲ་མོ་བསྒྲུབ་པའི་ཆོ་ག་དང་། མངོན་པར་ཤེས་པ་དང་རྫུ་འཕྲུལ་ལ་སོགས་པ་ཐུན་མོང་གི་དངོས་གྲུབ་ཆེན་པོ་སྒྲུབ་པའི་ཆོ་ག་དང་། ཐར་པ་མི་གནས་པའི་མྱ་ངན་ལས་འདས་པ་བསྒྲུབ་པའི་ཆོ་གའི་བྱེ་བྲག་ཏུ་གྱུར་པ་རྩ་བ་དང་སྙིང་པོ་ལ་སོགས་པའི་སྔགས་དང་། སྔགས་དེ་དག་གི་དཀྱིལ་འཁོར་དང་། ཕྱག་རྒྱ་དང་། མཆོད་པ་དང་། སྦྱིན་སྲེག་དང་། ལས་སྦྱོར་དང་། བརྟུལ་ཞུགས་ལ་སོགས་པ་ཆོ་ག་སྣ་ཚོགས་འབྲེལ་བར་བསྟན་པས་རྒྱུད་ཅེས་བྱའོ། །དེ་ནི་རྒྱུད་ཐམས་ཅད་ཀྱི་སྤྱིའི་མཚན་བསྟན་པའོ། །ཁྱད་པར་གྱི་མཚན་བསྟན་པ་ནི། འཕགས་པ་རྟོགས་པའི་རྒྱལ་པོ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་བྱ་བ་ཡིན་ཏེ། དེ་ལ་འཕགས་པ་ནི་ཐབས་ཀྱི་ཐེག་པའི་གཞུང་འདི་ཉིད་ཡིན་ཏེ། གང་ལས་ཅིས་འཕགས་པ་ནི། གོང་དུ་བསྟན་པའི་ཐེག་པའི་ཁྱད་པར་ལས་ཤེས་པར་བྱའོ། །རྟོག་པའི་རྒྱལ་པོ་ཡང་ཐབས་ཀྱི་ཐེག་པ་འདི་ཉིད་ཡིན་ཏེ། དེ་ལ་རྟོག་པ་ཞེས་བྱ་བའི་སྒྲ་འཇུག་པ་ནི། རྣམ་པར་མི་རྟོག་པའི་དོན་མཚོན་པའི་མཚན་མའི་ཐབས་ལ་བྱ་སྟེ། དེ་ཡང་རྒྱལ་བ་རྣམས་ཀྱིས་རྟོག་པའི་ཐབས་ཀྱི་མཚན་མར་སྤྲུལ་པའི་ཕྱིར་རོ། །དེས་ན་རྒྱུད་དང་ལྷ་དང་དངོས་གྲུབ་དང་དེའི་ཐབས་རྣམས་ལ་འཇུག་པ་ལས་འདིར་ནི་གཞུང་ཉིད་རྟོག་པ་ཡིན་ནོ། །གཞུང་རྣམས་ཀྱི་ནང་ན་གོང་དུ་བསྟན་པ་ལྟར་འབྲས་བུ་མཆོག་འདི་ཉིད་ཡིན་པས་རྟོག་པའི་རྒྱལ་པོའོ། །རྡོ་རྗེ་སེམས་དཔའ་ནི་བྱང་ཆུབ་སེམས་ཀྱི་རང་བཞིན་ཡིན་ཏེ། དེ་ཡང་རིགས་ཀྱི་སེམས་དང་། རྒྱུའི་གནས་སྐབས་ཀྱི་སེམས་དང་། འབྲས་བུའི་ངོ་བོ་རྣམས་དབྱེར་མེད་པར་བྱང་ཆུབ་ཀྱི་རང་བཞིན་ཡིན་པས། ཀུན་ཏུ་བཟང་པོ་བྱང་ཆུབ་ཀྱི་སེམས་ཞེས་བྱ་སྟེ། དེ་ནི་འཇིག་རྟེན་དང་འཇིག་རྟེན་ལས་འདས་པའི་སེམས་དཔའ་ཐམས་ཅད་ཀྱི་རྒྱལ་པོ་ལྟ་བུར་དེ་བཞིན་གཤེགས་པ་རྣམས་ཀྱིས་བསྟན་ཏོ། །དེ་ཡང་རྡོ་རྗེ་ནི་མི་ཕྱེད་པའི་བདག་ཉིད་ཡིན་ལ། སེམས་དཔའི་སྒྲ་གོང་དུ་བསྟན་པ་བཞིན་དུ་དུ་མ་ལ་འཇུག་ཀྱང་། འདིར་བརྟན་པ་དང་། རྟོགས་པ་དང་། བསྡུས་པ་ལ་འཇུག་སྟེ། དེ་ལ་བརྟན་པ་ནི་བྱང་ཆུབ་ཀྱི་སེམས་རྡོ་རྗེ་ལྟར་བརྟན་པས་རྡོ་རྗེ་སེམས་དཔའ་སྟེ། དེ་ཡང་རིགས་ཀྱི་སེམས་ཀྱི་གནས་སྐབས་སུ་དེ་ལྟར་གསུངས་པ་ནི། སེམས་ཅན་ཀུན་གྱི་སེམས་གང་ནི། རྡོ་རྗེ་ཞེས་སུ་བཤད་པ་ཡིན། །བརྟན་པའི་ཕྱིར་ན་སེམས་དཔར་བརྗོད། །ཅེས་པ་ལྟ་བུའོ། །འབྲས་བུའི་དུས་ན་ཡང་དེ་ལྟར་བསྟན་པ་ནི། རྣམ་པ་ཀུན་མཁྱེན་ཡེ་ཤེས་ནི། །དེང་འདིར་རྡོ་རྗེ་སེམས་དཔའ་སྟེ། །བརྟན་པའི་ཕྱིར་ན་དཔའ་ཞེས་བྱ། །ཞེས་གསུངས་པ་ལྟ་བུའོ། །རྒྱུ་དང་འབྲས་བུ་དབྱེར་མེད་པར་རང་བཞིན་དེ་ལྟ་བུ་ཡིན་པར་བསྟན་པ་ནི། སེམས་དཔའ་སྔོན་དང་མཐའ་མེད་པ། །རྡོ་རྗེ་སེམས་དཔའ་དེ་བཞིན་གཤེགས། །འདི་ནི་རང་བྱུང་བཅོམ་ལྡན་འདས། །གཅིག་པུ་རབ་ཏུ་ཆེ་བའི་ལྷ། །ཞེས་གསུངས་པ་སྟ་བུའོ། །རྡོ་རྗེ་ལྟར་བརྟན་པ་དེ་ཡང་སེམས་ཉིད་རྡོ་རྗེ་ལྟ་བུར་བརྟན་པ་ཡིན་པར་གསུངས་ཏེ། ཆོས་ཉིད་དང་ཆོས་ཅན་དུ་ཕྱེ་ནས་ཕྱོགས་གཅིག་གི་ཚུལ་ནས་བརྟན་པར་གསུངས་པ་ནི་མ་ཡིན་ནོ། །དེ་ཡང་འདི་ལྟར། སེམས་བརྟན་ཉིད་ཀྱིས་སེམས་དཔའ་སྟེ། །སེམས་དཔའ་བརྟན་པ་རང་བྱུང་ངོ་། །ཞེས་གསུངས་པ་ལྟ་བུའོ། །རྡོ་རྗེ་ལྟ་བུར་རྟོགས་པས་རྡོ་རྗེ་སེམས་དཔའ་ཞེས་བྱ་བ་ནི། འདི་ལྟར་རྡོ་རྗེ་ནི་འདུས་མ་བྱས་པའི་དོན། སེམས་དཔའ་ནི་སྙིང་པོ་བྱང་ཆུབ་ལ་དགོངས་པ་ངེས་པར་འགྲེལ་བ་སྟེ། ཞེས་གསུངས་པ་ལྟ་བུའམ། སྐྱེ་མེད་ཡེ་ཤེས་རང་གི་དབྱིངས། །མི་འགྱུར་མི་ཤིགས་རྡོ་རྗེའི་དོན། །སེམས་དཔའ་ཡེ་ཤེས་རྡོ་རྗེ་སྟེ། །ཞེས་གསུངས་པ་ལྟ་བུ་སྟེ། ཆོས་ཐམས་ཅད་རྡོ་རྗེ་ལྟར་དབྱེར་མི་ཕྱེད་བའི་དོན་རྟོགས་པའི་ཡེ་ཤེས་དེ་ཡང་རྡོ་རྗེ་ལྟར་གཉིས་སུ་མེད་པར་གྱུར་པའོ། །འདི་ནི་རེ་ཞིག་འབྲས་བུའི་ཚུལ་བཟུང་སྟེ་བཤད་པའོ། །སེམས་དཔའི་སྒྲ་བསྡུས་པ་ལ་འཇུག་པའི་ཚུལ་ནི། འཁོར་བ་དང་མྱང་ངན་ལས་འདས་པའི་ཆོས་ཐམས་ཅད་རྡོ་རྗེ་ལྟར་དབྱེར་མེད་པར་བསྡུས་པས་རྡོ་རྗེ་སེམས་དཔའ་སྟེ། འདི་ལྟར། རྡོ་རྗེ་སེམས་དཔས་བསྡུས་པས་ན། །ཞེས་གསུངས་པ་ལྟ་བུའམ། མི་ཕྱེད་རྡོ་རྗེ་ཞེས་བརྗོད་དེ། །སེམས་དཔའ་སྲིད་གསུམ་གཅིག་པའོ། །འདི་ནི་ཤེས་རབ་ལྡན་པ་ཡིས། །རྡོ་རྗེ་སེམས་དཔའ་ཞེས་སུ་བཤད། །ཅེས་གསུངས་པ་སྟེ། འདི་དག་ལྟ་བུ་ནི་རྡོ་རྗེ་སེམས་དཔའ་ཞེས་བྱ་བའི་དོན་གྱི་རང་གི་ངོ་བོ་ཡིན་པར་ཤེས་པར་བྱའོ། །དེའི་རྟགས་ཀྱི་ཕྱག་རྒྱར་སྣང་བ་ནི་རྣལ་འབྱོར་ཆེན་པོའི་གཞུང་ལས། བཅོམ་ལྡན་འདས་དཔལ་ཀུན་ཏུ་བཟང་པོ་བྱང་ཆུབ་ཀྱི་སེམས་རྡོ་རྗེ། རྡོ་རྗེ་འཆང་ཆེན་པོ། རྡོ་རྗེ་སེམས་དཔའ་བདེ་བ་ཆེན་པོ་ནི་སྤྱོད་ཡུལ་ཡོངས་སུ་དག་པའི་དཀྱིལ་འཁོར་ཆེན་པོར་ན་རྟག་ཏུ་ད་ལྟར་བྱུང་བ་ལྟ་བུའི་སྐུ་ངོ་བོ་ཉིད་ཀྱིས་འདའ་བར་དཀའ་བ། ཡེ་ཤེས་ལྷ་མོའི་ཚོགས་ཀྱི་དཀྱིལ་འཁོར་ན་ལོངས་སྤྱོད་ཆེན་པོའི་ལྷུན་ལ་རོལ་པ་མཛད་ཅིང་། ཐུགས་རྗེ་ཆེན་པོས་གདུལ་བྱ་ཐམས་ཅད་ཇི་ལྟར་འདུལ་བ་བཞིན་དུ་ཆུད་མི་གསོན་པ། སངས་རྒྱས་ཐམས་ཅད་ཀྱི་བདག་པོ་ཆོས་ཐམས་ཅད་ཀྱི་རང་བཞིན་འདི་ལྟ་བུ་ནི་རྡོ་རྗེ་སེམས་དཔའི་སྐུའོ་ཞེས་འདོད་དོ། །རྣལ་འབྱོར་གྱི་རྒྱུད་ཀྱི་ཚུལ་ལས་ནི། སྲས་ཀྱི་དང་པོ་རྡོ་རྗེ་སེམས་དཔའ་ཀུན་ཏུ་བཟང་པོ་ཕྱག་ན་རྡོ་རྗེ་དེ་ཉིད། བྱང་ཆུབ་སེམས་ཀྱི་རང་བཞིན་སངས་རྒྱས་ཀྱི་བདག་ཉིད་ཆོས་ཀུན་གྱི་རང་བཞིན་ཏེ། བྱང་ཆུབ་སེམས་དཔའི་ཚུལ་འཛིན་པ་འདི་རྡོ་རྗེ་སེམས་དཔའི་སྐུ་ཡིན་ནོ་ཞེས་འདོད་དོ། །བྱ་བའི་རྒྱུད་ལས་ནི། བཅོམ་ལྡན་འདས་ཀྱི་པདྨའི་དྲུང་པ་ལས་སྤྲུལ་པའི་ཁྲོ་བོ་རྡོ་རྗེའི་རིགས་གནོད་སྦྱིན་གྱི་བུ་ཀུན་ཏུ་བཟང་པོ་ལས་ཕྱག་ན་རྡོ་རྗེར་དབང་བསྐུར་བ་གང་ཡིན་པ་དེ་ཉིད་ལ་རྡོ་རྗེ་སེམས་དཔའ་ཞེས་བྱ་སྟེ། འདི་ལྟར་བཅོམ་ལྡན་འདས་ཀྱི་བྱང་ཆུབ་སེམས་དཔའ་ཀུན་ཏུ་བཟང་པོ་དེ་དབང་བསྐུར་བར་དུས་ལ་བབ་པར་མཁྱེན་ནས་བསྐུལ་བའི་ཚེ་འདི་སྐད་དུ། དུས་གསུམ་མཉམ་པ་ཉིད་ལ་རྟག་གནས་པ། །རྡོ་རྗེ་སེམས་དཔའ་རྡོ་རྗེ་མཆོག་ཚུར་ཤོག །ཅེས་མཚན་ནས་བོས་པ་གང་ཡིན་པ་ལྟ་བུའོ། །དེ་བཞིན་དུ་མཚན་ཉིད་ཀྱི་ཐེག་པ་ལས་ཀྱང་བྱང་ཆུབ་སེམས་དཔའ་ཕྱག་ན་རྡོ་རྗེར་གྲགས་སོ། །དེ་ལས་འདིར་ནི་ཐབས་ཀྱི་ཐེག་པའི་གཞུང་འདི་ཉིད་ལ་རྡོ་རྗེ་སེམས་དཔའ་ཞེས་བྱ་སྟེ། གང་གི་ཕྱིར་དོན་གང་སྟོན་པའི་གཞུང་དེ་ཉིད་ཀྱང་དེའི་སྒྲར་བཤད་དོ། །ཞེས་སྤྱིར་གྲགས་པས་སོ། །ཐུན་མོང་མ་ཡིན་པའི་ཚུལ་དུ་ནི། གསང་བ་བླ་ན་མེད་པའི་ཐེག་པའི་གཞུང་གིས་རྒྱུད་དང་སྟོན་པའི་མཚན་ཐུན་མོང་དུ་བསྟན་པར་བཞེད་དོ། །གང་གི་ཕྱིར་རྒྱུད་དང་སྟོན་པ་རང་བཞིན་དབྱེར་མེད་པ་ཡིན་ལ་དེའི་ཕྱིར་སྒྲ་གཅིག་གིས་བརྗོད་དོ། །དབྱེར་མེད་པ་ཡ ང་རང་བཞིན་དབྱེ་བ་མི་དམིགས་པ་དང་། སྒྱུ་མ་ཙམ་དུ་ཡེ་ཤེས་ཆེན་པོ་དེ་ཉིད་གསུང་གི་ཕྱག་རྒྱར་བྱིན་གྱིས་བརླབ་པ་ཡིན་པའི་ཕྱིར་རོ། །སྒྱུ་འཕྲལ་དྲྭ་བ་ཞེས་བྱ་བ་ནི་སྤྱིར་ཐབས་དང་ཤེས་རབ་ཟུང་དུ་འབྲེལ་བ་ལ་འཇུག །བྱེ་བྲག་ཏུ་ཡི་གེ་སྒྱུ་འཕྲུལ་ལ་ཡང་འཇུག །འཇིག་རྟེན་གྱི་གཙུག་ལག་ལས། རྒྱུ་ཐབས་ཀྱི་རིག་བྱེད་ལ་ཡང་མ་ཡ་ཛ་ལ་ཞེས་ཟེར་ཏེ། སྤྱིར་མ་ངེས་པའི་འཕྲུལ་པ་སྣ་ཚོགས་སུ་སྟོན་པ་ལ་བྱ་བར་བཤད་དོ། །འདིར་ནི་ཐབས་དང་ཤེས་རབ་ཐུན་མོང་མ་ཡིན་པའི་ཟུང་དུ་འབྲེལ་བའི་སྒྲར་བཤད་དོ། །དེ་ཡང་ཆོས་ཐམས་ཅད་ཅི་ཡང་མ་ཡིན་པ་ལས་འགྲོ་བའི་དོན་དུ་བདག་ཉིད་ཆེན་པོ་རྣམས་ཀྱི་ཐབས་ཀྱི་འཕྲུལ་པ་ཅིར་ཡང་མ་ངེས་པ་ལྟར་སྣང་བ་ནི་སྒྱུ་འཕྲུལ་ལོ། །དེ་ཉིད་དྲྭ་བ་ཡིན་ཏེ་བསླུ་བའི་ཕྱིར་རོ། །རྣམ་པ་གཅིག་ཏུ་ཐུགས་རྗེ་ཆེན་པོས་འགྲོ་བ་འཛིན་ཅིང་མི་གཏོང་སྟེ་འབྲེལ་བའི་ཕྱིར་རོ། །གཞུང་སྤྱིར་གྲགས་པ་ནི། ཇི་ལྟར་དྲྭ་བ་འབྲེལ་བ་ཡིན་པ་བཞིན་ཐབས་ཀྱི་འཕྲུལ་པ་ཇི་སྙེད་པ་ཡང་མཚན་མ་མེད་པའི་ཤེས་རབ་ཀྱིས་མ་ཟིན་ཅིང་མ་འབྲེལ་བ་མེད་པས་སྒྱུ་འཕྲུལ་དྲྭ་བ་ཞེས་བྱའོ། །དེ་ལས་ཀྱང་རྟོག་པ་སྐོའི་མཚན་དུ་སྨོས་པ་ནི་གསང་བའི་སྙིང་པོ་དེ་ཁོ་ན་ཉིད་ངེས་པ་ཞེས་བྱ་སྟེ། དེ་ལ་གསང་བའི་དོན་ནི། སྤྱིར་རྟོགས་པར་དཀའ་བ་དང་རྟོགས་སུ་མི་རུང་བ་ལའང་འཇུག་སྟེ། འདིར་ཡང་དེ་བཞིན་ནོ། །དེ་ལ་རྟོགས་པར་དཀའ་བ་ནི། དུས་གསུམ་གྱི་སངས་རྒྱས་རྣམས་ཀྱི་དགོངས་པ་ནི་དམ་པར་གྱུར་པ་འདི་ལྟ་བུ་གང་ཟག་སྐལ་བ་མེད་ཅིང་བློ་མ་སྦྱངས་པ་རྣམས་ཀྱི་བློས་རྟོགས་པར་དཀའ་བས་གསང་བ་ཞེས་བྱའོ། །རྟོགས་སུ་མི་རུང་བ་ནི་འདི་ལྟ་བུའི་དོན་དང་རྨད་དུ་བྱུང་བའི་སྤྱོད་པ་དག་འཇིག་རྟེན་པ་དང་ཐེག་པ་འོག་མ་རྣམས་ཀྱི་སྤྱོད་ཡུལ་དུ་མི་རུང་བས། གསང་བར་བྱ་བ་ཡིན་པའི་ཕྱི་ཡང་གསང་བའི་ཐེག་པ་ཞེས་བྱའོ། །དེ་བས་ན་གསང་བ་ཐམས་ཅད་འདི་དག་ཙམ་དུ་འདུས་པ་ལས། གསང་བ་ནི་གབ་པའི་གསང་བ་དང་སྦས་པའི་གསང་བ་རྣམ་པ་གཉིས་ཡིན་ཏེ། དེ་ལྟར་ཡིན་པས་གཞུང་འདི་ཉིད་ལས། ཁོང་ནས་གབ་སྦས་དོན་འབྱིན་པ། །ཞེས་གསུངས་པ་ལྟ་བུའོ། །དེ་ལ་གབ་པའི་གསང་བ་ཡང་ཕུལ་དུ་བྱུང་བའི་ལྟ་བ་ཡིན་ལ། སྦས་པའི་གསང་བ་ཡང་རྨད་དུ་བྱུང་བའི་སྤྱོད་པའི་སྒོ་ཡིན་པར་མངོན་ཏེ། འདི་ཉིད་ལས། གབ་པའི་གསང་བ་མ་རྟོགས་པར། སྦས་པའི་གསང་བ་ལ་མངོན་པར་འཆེལ་ནས་ཞེས་གསུངས་པའི་ཕྱིར་རོ། །སྔོན་གྱི་མཁན་པོ་རྣམས་ཀྱིས་གསུངས་པའི་རང་བཞིན་གྱི་གསང་བ་དང་། གབ་པའི་གསང་བ་དང་། སྦས་པའི་གསང་བ་དང་། གཞན་ལ་མི་བསྟན་པའི་གསང་བ་ཞེས་བྱ་བ་རྣམ་པ་བཞིར་ཕྱེ་ནས་གསུངས་པའང་དེར་འདུས་པའི་ཕྱིར་རོ། །རང་བཞིན་གྱི་གསང་བ་ལ་ཡང་། ཡེ་ནས་གསང་བ་དང་། ངོ་བོ་ཉིད་ཀྱི་གསང་བ་དང་། གུད་ན་མེད་པའི་གསང་བ་རྣམས་སུ་ཕྱེ་སྟེ། གབ་པའི་གསང་བ་ལ་ཡང་དཔོན་སློབ་ཀྱི་དགོངས་པ་དང་། ཡི་གེ་དཀྱུས་ཀྱི་དབང་གི་སྒོ་གཉིས་སུ་ཕྱེ་བ་དང་། སྦས་པའི་གསང་བ་ལ་ཡང་། ཚིག་སྦས་དང་ཡིག་སྦས་ཀྱི་ཚུལ་རྣམ་པ་གཉིས་དང་། གཞན་ལ་མི་བསྟན་པའི་གསང་བ་ལ་ཡང་། གསང་བའི་ཡུལ་དམ་མེད་པ་དང་། དམ་མ་འདྲེས་པ་དང་། དམ་ཉམས་པ་རྣམས་ལ་གསང་བའི་དམིགས་སྤྱི་གསང་བཞི། བར་གསང་བཞི་སྟེ་བརྒྱད། གསང་བར་འོས་པ་དང་། གསང་བར་གཉེར་གཏད་པ་གཉིས་ཏེ་རྣམ་པ་བཅུ་པོ་འདི་དག་མི་བསྟན་པ་སྟེ། འདི་དག་ནི་གཞན་ལ་མི་བསྟན་པའི་གསང་བའོ། །ཞེས་གསུངས་པ་དེ་དག་སྟེ། དེ་དག་དོན་ལ་འགལ་བ་ཡོད་པ་མ་ཡིན་ན་ཡང་། བསྡུས་ན་གབ་སྦས་གཉིས་སུ་འདུས་པར་སྣང་ལ། འདི་ཉིད་ཀྱི་གཞུང་ལས་ཀྱང་དེ་ལྟར་འབྱུང་བ་དང་། བླ་མས་ཀྱང་དེ་ལྟར་གསུངས་པས་དེ་དག་ཙམ་དུ་ཤེས་པར་བྱའོ། །སྙིང་པོ་ཞེས་བྱ་བ་ནི། སྤྱིར་ན་གརྦྷ་ས་ར་སྟེ། འཕྲོ་བའི་གཞིར་གྱུར་པས་སྙིང་པོ་ཞེས་བྱ། གརྦྷ་ཧྲི་ད་ཡ་སྟེ། དཀྱིལ་ན་གནས་པའམ་བཅུད་དུ་གྱུར་པས་སྙིང་པོ་ཞེས་བྱ། གརྦྷ་པ་ར་མ་པྲ་སྟེ། དམ་པའི་མཆོག་ཏུ་གྱུར་པས་སྙིང་པོ་ཞེས་བྱའོ། །དེ་ལས་འདིར་ཡང་ཚུལ་དེ་དག་དང་མཐུན་པའི་སྒྲར་བཤད་དེ། དེ་ལས་འཕྲོ་བའི་གཞིར་གྱུར་པས་སྙིང་པོའི་དོན་དུ་བཤད་པ་ནི། བཅོམ་ལྡན་འདས་དཔལ་ཀུན་ཏུ་བཟང་པོའི་དགོངས་པ་རྫོགས་པ་ཆེན་པོའི་དོན་འདི་ནི། སྐུ་གསུང་ཐུགས་ཀྱི་འཕྲུལ་པ་ཐམས་ཅད་ཀྱི་གཞིར་གྱུར་ཅིང་། གསུང་གི་འཕྲུལ་པ་ཐམས་ཅད་ཀྱི་འཕྲུལ་པ་ཐེག་པ་ཐམས་ཅད་ཀྱི་འཕྲོ་བའི་གཞིར་གྱུར་པར་བསྟན་ཏེ། དེའི་ཡུལ་ཡང་གོང་དུ་ཇི་སྐད་བསྟན་པའི་ཚུལ་བསྟན་པ་དང་། དེ་དང་མཐུན་པར་རྒྱུད་འདི་ཉིད་ལས་ཀྱང་། འདུལ་བ་མདོ་སྡེ་ཆོས་མངོན་དང་། །དམ་ཚིག་བསྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་ཀུན་ཏུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །ཞེས་བྱ་བ་ལ་སོགས་པ་གསུངས་པའི་ཚུལ་ལྟ་བུར། འཕྲུལ་པ་ཐམས་ཅད་ཀྱི་འཕྲོ་གཞིར་གྱུར་བ་ལས་ཀྱང་སྙིང་པོའི་དོན་ཡིན་པར་རིག་པར་བྱའོ། །དཀྱིལ་ན་གནས་པའམ་བཅུད་དུ་གྱུར་པའི་དོན་ནི་ཡོངས་སུ་མཉམ་པ་ཆེན་པོའི་དགོངས་པའི་དོན་འདི་ལྟ་བུ་ནི་ཆོས་ཐམས་ཅད་ཀྱི་རང་བཞིན་ཀུན་ལ་ཁྱབ་པས། དཀྱིལ་ན་གནས་པ་ལྟ་བུའང་ཡིན་ལ་དེ་ཉིད་ཆོས་རྣམས་ཀྱི་བཅུད་དུ་གྱུར་པའང་ཡིན་ཏེ། འདི་ལྟར་གཞུང་གཞན་ལས་ཀྱང་། ཆོས་ལ་ཆོས་ཀྱི་སྙིང་པོར་གྱུར་པ་འཇམ་དཔལ་གཞོན་ནུ་ཉིད། ཅེས་གསུངས་པའམ། གཞན་ལས་ཀྱང་། ཀུན་ཁྱབ་གདལ་བའི་སྙིང་པོར་འདུས། །ཞེས་གསུངས་པ་ལྟ་བུའམ། འདི་ཉིད་ལས། མཉམ་དང་མི་མཉམ་ཀུན་ཁྱབ་ཁྱབ་མེད་ཁྱབ་པའི་དབྱིངས། །ཞེས་གསུངས་པའོ། །དམ་པའི་མཆོག་ཏུ་གྱུར་པའི་དོན་ནི། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀྱི་དམ་པའམ་མཆོག་ནི་ཆོས་མཉམ་པ་ཉིད་ཡིན་ལ། དེ་སྟོན་པར་བྱེད་པའི་གཞུང་ཡང་བསྟན་པ་རྣམས་ཀྱི་མཆོག་ཡིན་ནོ། །དེའི་ཚུལ་ཡང་གཞུང་འདི་ཉིད་ལས། རྣམ་དག་བླ་མེད་ཐེག་པའི་མཆོག །ཅེས་གསུངས་པའམ། བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་ཤིང་། །དཀྱིལ་འཁོར་མ་ལུས་བསྙེན་པ་ཡི། །འབྲས་བུ་གསང་ཆེན་འདི་ཡིན་ཏེ། །ཞེས་གསུངས་པ་ལྟ་བུའོ། །དེ་ཁོ་ན་ཉིད་ཅེས་པ་ནི། །སྤྱིར་དོན་ལ་ཕྱིན་ཅི་མ་ལོག་པས་དེ་ཁོ་ན་ཉིད་ཅེས་བྱ་སྟེ། དེ་ཡང་མི་འགྱུར་བ་དང་། དོན་ལ་མི་བསླུ་བའོ། །དེ་ལ་མི་འགྱུར་བའི་སྒོ་ནས་ནི། ཆོས་ཐམས་ཅད་ཀྱི་དེ་བཞིན་ཉིད་ནི་རྟག་ཏུ་ཇི་ལྟ་བ་བཞིན་ཉིད་དེ། འདི་ལ་འགྱུར་བ་མེད་པས་དེ་ཁོ་ན་ཉིད་ཅེས་བྱའོ། །དེ་རྟོགས་པའི་ཡེ་ཤེས་ཀྱང་དོན་མཐུན་པར་སྐྱེ་སྟེ། འདི་ལ་བསླུ་བ་མེད་པས་དེ་ཁོ་ན་ཉིད་ཅེས་བྱའོ། །དེའི་དབང་གིས་བྱུང་བའི་སྐུ་ལ་སོགས་པའི་འཕྲུལ་པ་རྣམས་ཀྱང་། ནམ་ཡང་འགྲོ་བ་རྣམས་ཆུད་མི་གསོན་ཏེ། དོན་ཆེན་པོ་ལ་བརྒྱུད་ནས་སམ། གཟུགས་པོར་སྦྱོར་བར་བྱེད་པས་དེ་ཁོ་ན་ཉིད་ཅེས་བྱ་སྟེ། སྐབས་སྐབས་སུ་རང་རང་གི་དོན་ལ་ཕྱིན་ཅི་མ་ལོག་ཅིང་མི་བསླུ་བ་ཙམ་ལ་ཡང་དེ་ཁོ་ན་ཉིད་ཅེས་པའོ། །གཞུང་འདི་ཉིད་ཀྱི་རང་སྐད་ནི། རྒྱུའི་དེ་ཁོ་ན་ཉིད་དང་། འབྲས་བུའི་དེ་ཁོ་ན་ཉིད་དང་། རྒྱུ་འབྲས་རོ་གཅིག་པའི་དེ་ཁོ་ན་ཉིད་དོ། །དེ་ལ་རྒྱུའི་དེ་ཁོ་ན་ཉིད་ཐུན་མོང་མ་ཡིན་པའི་གཞུང་བསྟན་པ་ལྟར། ཆོས་ཐམས་ཅད་ངོ་བོ་ཉིད་མེད་ཅིང་གཞི་མ་གྲུབ་པ་ལས་ཅིར་ཡང་འཕྲུལ་པ་འབྱུང་བའི་ངོ་བོ་ཉིད་མེད་པ་འདི་ཉིད་རྒྱུའི་དེ་ཁོ་ན་ཉིད་དོ། །འབྲས་བུའི་དེ་ཁོ་ན་ཉིད་ནི། དེ་ལས་ཆོ་འཕྲུལ་སྣ་ཚོགས་སུ་སྣང་བ་ཡང་སྐུ་དང་ཡེ་ཤེས་ཀྱི་དཀྱིལ་འཁོར་ཉིད་དེ། འདི་ལ་ཕྱིན་ཅི་ལོག་དོར་ཞིང་བསལ་དུ་མེད་པས་འབྲས་བུའི་དེ་ཁོ་ན་ཉིད་དོ། །རྒྱུ་འབྲས་རོ་གཅིག་པའི་དེ་ཁོ་ན་ཉིད་ནི། དེ་ལྟར་རྒྱུ་དང་འབྲས་བུར་རྣམ་པར་གཞག་པ་དེ་ཡང་མ་སྐྱེས་པ་ཉིད་ཆུ་ཟླ་ལྟར་སྒྱུ་མ་སྣ་ཚོགས་སྣང་ཞིང་བྱ་བ་བྱེད་ལ། སྒྱུ་མ་ཉིད་ལ་ངོ་བོ་ཉིད་མེད་དེ་མ་སྐྱེས་པས་བདེན་པ་གཉིས་ཀྱི་མིང་ཙམ་དུ་ཡང་བརྗོད་དུ་མེད་དེ། དབྱེར་མེད་པའི་ཚུལ་འདི་ལ་ཕྱིན་ཅི་ལོག་མེད་པས་རྒྱུ་འབྲས་རོ་གཅིག་པའི་དེ་ཁོ་ན་ཉིད་ཅེས་བྱའོ། །ངེས་པ་ཞེས་བྱ་བ་ངེས་པའི་དོན་ཏེ། འདི་ལྟར་རྒྱལ་བ་རྣམས་ཀྱི་དགོངས་པ་བརྒྱུད་དེ་དྲང་པའི་ཚུལ་གྱིས་འགྲོ་བ་ཆུད་མི་གསོན་པའི་ཐབས་སུ་གསུངས་པ་ལྟ་བུ་ཙམ་མ་ཡིན་གྱི། ཉིད་ཀྱིས་ཇི་ལྟར་ཐུགས་སུ་ཆུད་པའི་དོན་སྐལ་པ་དང་ལྡན་པ་རྣམས་ལ་ཚིག་གཟུགས་པོར་བསྟན་པ་ཡིན་པས་ངེས་པ་ཞེས་བྱའོ། །དེ་ལྟར་ཚིག་རྣམ་པ་བཞི་པོ་འདིའི་ཡུལ་ཡང་གཅིག་གམ་ཐ་དད། ཚིག་སྔ་མ་དང་ཕྱི་མ་དང་བར་མ་དག་གང་རུང་གཅིག་གི་དོན་སྟོན་ནམ། ཐམས་ཅད་ཀྱི་སྟོན་ནམ། དོན་གཞན་ཞིག་སྟོན་པར་བྱེད་སྙམ་པ་ལ། འདི་ནི་དེ་དག་ཀུན་ཀྱང་མ་ཡིན་ཏེ། གཞི་གཅིག་ཡོན་ཏན་གྱི་སྒོ་སོ་སོ་ནས་བསྟན་པས་ཡུལ་གཅིག་དང་ཐ་དད་པར་ཡང་མི་འགྱུར་རོ། །གཞིའི་དོན་གང་ཡང་རུང་བ་ཞིག་གཙོ་བོར་ཆེད་དུ་བསྟན་པར་བྱ་བ་མ་ཡིན་པས་ཚིག་སྔ་མའམ་ཕྱི་མའམ་བར་མ་དག་གི་དོན་གཅིག་སྟོན་པ་མ་ཡིན་ནོ། །སྤྱི་གཞི་ཆོས་ཅན་ཐ་དད་མི་སྟོན་པས་དོན་སོ་སོ་བ་མ་ཡིན་ནོ། །མིང་འདི་དག་གིས་བསྟན་པར་བྱ་བ་བརྒྱུད་ནས་དོན་གཞན་ཞིག་སྟོན་པ་མ་ཡིན་པས། དོན་གཞན་སྟོན་པ་མ་ཡིན་ནོ། །ཚུལ་འདི་ནི་དཔེར་ན་ལྷའི་དབང་པོ་ལ་བརྒྱ་བྱིན་དཔའ་བོ་གྲོང་ཁྱེར་འཇིག་ཅེས་བསྟན་ན། འདི་ནི་ལྷའི་དབང་པོ་གང་ཟག་གཅིག་སྟོན་པའི་མིང་ཡིན་པས་དོན་ཐ་དད་པར་སྟོན་པ་མ་ཡིན་ནོ། །འོན་ཀྱང་བརྒྱ་བྱིན་ཞེས་བྱ་བས་སྤྱིན་དག་ཏུ་སྟོན། དབང་པོ་ཞེས་བྱ་བས་ནི་རྒྱལ་པོར་སྟོན། གྲོང་ཁྱེར་འཇིག་ཅེས་བྱ་བས་ནི་དམག་དཔོན་དུ་སྟོན། དེའི་ཕྱིར་མཚན་ཉིད་གཅིག་སྟོན་པའང་མ་ཡིན་ནོ། །མིང་དེ་གསུམ་གང་ཡང་རུང་བ་ཅིག་སྟོན་པའང་མ་ཡིན་ནོ། །ཚ་བ་དང་གྲང་བ་ལྟར་སོ་སོར་སྟོན་པ་ཡང་མ་ཡིན། ཤིང་ལ་བྱ་ལྡང་ཞེས་སྟོན་པ་ལྟར་བརྒྱུད་ནས་གཞན་བསྟན་པ་ཡང་མ་ཡིན་ནོ། །འདི་ནི་ལས་ཀྱི་གཞིར་བསྟན་པ་ཞེས་བྱ་སྟེ། ལས་དང་ཡོན་ཏན་སོ་སོར་བསྟན་པར་བྱ་བའི་གཞི་ཆོས་ཅན་གཅིག་ཏུ་བསྡུས་པའོ། །དེ་བས་འདི་སྐད་བསྟན་པར་འགྱུར་ཏེ། དཔལ་ཀུན་ཏུ་བཟང་པོའི་དགོངས་པའི་དོན་མཐར་ཐུག་པས་འདི་ནི་གསང་བའམ་སྙིང་པོའང་ཡིན། དེ་ཁོ་ན་ཉིད་ཀྱང་ཡིན། ངེས་པའང་ཡིན་ནོ་ཞེས་སྟོན་པར་ཤེས་པར་བྱའོ། །འདི་དག་ཙམ་ནི་རྒྱུད་ཀྱི་མཚན་སྤྱི་དང་ཁྱད་པར་གྲགས་པ་བསྟན་པ་སྟེ། འདི་དག་ནི་གང་ཟག་འགོ་སྨོས་པས་གོ་བ་རྣམས་ཀྱི་དོན་ཡིན་པར་གྲགས་པ་ཡིན་ལ། ཕལ་པ་རྣམས་ལ་ཡང་སྤྱིའི་དོན་ཁོང་དུ་ཆུ ད་པར་ཕན་པ་ཡིན་ནོ། །རྒྱུད་རྣམས་ཀྱི་དབྱེ་བ་ནི། མིང་གི་སྒྲ་འཇུག་པའི་ཡུལ་གྱི་སྒོ་ནས་དབྱེ་བ་ནི། དོན་དང་ཚིག་གི་སྒོ་ནས་དངོས་པོ་དྲུག་ལ་འཇུག་སྟེ། དེ་ལ་དོན་གྱི་སྒོ་ནས་ནི་གཞིའི་རྒྱུད་ཅེས་བྱ་བ་རིགས་ལ་འཇུག་པ་དང་། ཐབས་ཀྱི་རྒྱུད་ཅེས་བྱ་བ་སྔགས་དང་ཕྱག་རྒྱ་ལ་སོགས་པ་བསླབ་པའི་དངོས་པོ་ལམ་གྱི་མཚན་ཉིད་དང་། འབྲས་བུའི་རྒྱུད་ཅེས་བྱ་བ་ཐུན་མོང་བ་དང་མཆོག་གི་དངོས་གྲུབ་ཀྱི་མཚན་ཉིད་རྣམས་གང་ཟག་གཅིག་གིས་ཤེས་པའི་རྒྱུད་ལ་རྒྱུ་རྐྱེན་འབྲས་བུའི་ཚུལ་དུ་འབྲེལ་བར་གནས་པས། རྒྱུད་ཅེས་བྱ་བ་འབྲེལ་བའི་དོན་དུ་གྲུབ་པ་ཡིན་མོད་ཀྱི། འོན་ཀྱང་སྤྱི་མིང་ཡན་ལག་ལ་འཇུག་པས་དངོས་པོ་གསུམ་དུ་འགྱུར་རོ། །རྗོད་པར་བྱེད་པའི་སྒོ་ནས་ནི། གོང་དུ་བརྟན་པའི་སྒྲར་སྣང་བ་དང་། དེ་ཉིད་སྐལ་བ་མཉམ་པའི་རྒྱུར་བྱས་པ་སྒྲར་གྲགས་པའི་མཚན་ཉིད་དང་། དེའི་བརྡར་གྱུར་པ་གླེགས་བམ་དུ་གཏོགས་པ་རྣམས་ཏེ། དེ་བས་ན་མིང་གདགས་པའི་ཡུལ་རྣམ་པ་དྲུག་ཡིན་ནོ། །ལྟ་སྤྱོད་ཀྱི་ཁྱད་པར་གྱི་སྒོ་ནས་རྣམ་པར་དབྱེ་བ་ནི། རྣམ་པ་གཉིས་ཏེ། བྱ་བའི་རྒྱུད་དང་། རྣལ་འབྱོར་གྱི་རྒྱུད་དོ། །དེ་ལ་བྱ་བའི་རྒྱུད་ལ་ཡང་རྒྱུད་ཁ་ཅིག་ལས་དང་བྱ་བ་ཅུང་ཟད་སྨད་དེ་སྟོན་པས་བྱེ་བྲག་གི་རྒྱུད་ཅེས་ཀྱང་གྲགས། གཉིས་ཀའི་རྒྱུད་ཅེས་ཀྱང་གྲགས་སོ། །དེ་ལ་བྱ་བའི་རྒྱུད་ཅེས་བྱ་བ་ནི། བྱ་བ་གཙོར་སྟོན་པའོ་ཞེས་བཤད་དེ། ཕྱིར་རོལ་གྱི་ལུས་ཀྱི་བྱ་བ་ཁ་ཟས་བསྐྱུང་ཞིང་སྨྱུང་བ་ལ་གནས་པ་དང་། དུས་ཀྱི་ཁྲུས་ཆེན་པོ་གསུམ་ཁྲུས་ཕྲ་མོ་དང་བཅས་པ་དང་། གོས་གསུམ་བརྗེ་བ་དང་། དཀྱིལ་འཁོར་གྱི་བྱ་བ་ལ་སོགས་པ་གཙང་སྦྲ་དང་། དཀའ་ཐུབ་དང་བརྟུལ་ཞུགས་དྲག་པོ་སྤྱད་པ་ལས། རིག་སྔགས་དང་གསང་སྔགས་རྣམས་བྱིན་གྱིས་རློབ་པར་འགྱུར་རོ། །ཞེས་འདོད་པའི་ཕྱིར། ལུས་ཀྱི་བྱ་བ་གཙོར་ལེན་པ་དང་། བྱ་བ་ཆེན་བས་བྱ་བའི་རྒྱུད་ཅེས་བྱ་བ་ནི། ཙ་རྒྱ་ཞེས་བྱ་བ། ས་ན་ཙ་ར་སྟེ། གཞི་ལས་འཕགས་པ་ལ་བྱ་བས། སྤྱིའི་རྒྱུད་ལས་བྱེ་བྲག་ཏུ་གྱུར་པ་ཉིད་ལ་བྱའོ། །ཞེས་ཀྱང་བཤད། ཨུ་ད་ཙ་ར་སྟེ་ངག་ལ་བྱ་བས་ལུས་ཀྱི་བྱ་བ་རྣམས་ཀྱི་གོ་ངག་གི་གསང་སྔགས་ཀྱིས་བྱེད་པར་ཡང་བཤད་དེ། སྤྱིར་ན་བྱ་བ་ཅུང་ཟད་ཤས་ཆུང་བས་སྤྱོད་པའི་རྒྱུད་ཅེས་བྱའོ། །རྣལ་འབྱོར་གྱི་རྒྱུད་ནི། ཕྱིར་རོལ་གྱི་བྱ་བ་ལ་མ་བརྟེན་པར་འགྱུར་ཡང་སེམས་ཀྱི་རྣལ་འབྱོར་དང་ལྡན་པས་གྲུབ་པར་སྟོན་པའོ། །རྣལ་འབྱོར་གྱི་རྒྱུད་འབའ་ཞིག་ལ་ཡང་དབྱེ་བ་རྣམ་པ་གཉིས་སམ་གསུམ་དང་བཞི་ལ་སོགས་པར་གྲགས་ཏེ། དེ་ལ་གཞུང་ཁ་ཅིག་ལས་ནི་རྣལ་འབྱོར་ཕྱི་ནང་ཞེས་ཀྱང་གྲགས། ཁ་ཅིག་ལས་རྣལ་འབྱོར་དང་རྣལ་འབྱོར་ཆེན་པོ་ཞེས་གྲགས་སོ། །དེ་ལ་ཕྱི་པ་ནི་ཚངས་པར་སྤྱོད་པའི་དཀའ་ཐུབ་དང་བཅས་པ་ཡིན་ལ། །ནང་པ་ནི་མཉམ་པ་ཆེན་པོའི་དཀའ་ཐུབ་དང་ལྡན་པས་སྤྱོད་པས་བྱེ་བྲག་ཏུ་ཕྱེ་བས་བདག་གིས་དེ་ཁོ་ན་ཉིད་སྒྲུབ་པ་དང་མི་སྒྲུབ་པའི་སྒོ་ནས་དམིགས་པས་བྱེ་བྲག་ཏུ་ཕྱེ་བའོ་ཞེས་གྲགས་སོ། །རྣལ་འབྱོར་ཆེན་པོའི་ཚུལ་འབའ་ཞིག་ལ་ཡང་། བསྐྱེད་པ་དང་རྫོགས་པའི་རིམ་པའི་ཚུལ་གཉིས་སུ་གྲགས་པ་དང་། བསྐྱེད་པ་དང་རྫོགས་པ་དང་རྫོགས་པ་ཆེན་པོའི་ཚུལ་ཞེས་གསུམ་དུ་གྲགས་པའང་། དཔལ་གསང་བ་འདུས་པ་དང་སྒྱུ་འཕྲུལ་དྲྭ་བ་ལ་སོགས་པའི་རྒྱུད་ཀྱི་གཞུང་ལ་ཡང་སྣང་ལ། མཁན་པོ་རྣམས་ཀྱིས་མཛད་པའི་སྒྲུབ་ཐབས་རྣམས་སུ་ཡང་དེ་བཞིན་དུ་གྲགས་སོ། །ཚུལ་འདི་ཉིད་ལ་རྣལ་འབྱོར་གྱི་རྒྱུད་ཀྱི་དབྱེ་བར་གྲགས་པ་རྣམས་ཀྱང་འདུས་པར་ཤེས་པར་བྱའོ། །རྩ་བ་དང་ཡན་ལག་གི་སྒོ་ནས་དབྱེ་བ་ནི་རྣམ་པ་བཞི་སྟེ། འདི་ལྟར་རྩ་བའི་རྒྱུད་དང་། ཕྱི་མའི་རྒྱུད་དང་། བཤད་པའི་རྒྱུད་དང་། རྟོག་པའི་རྒྱུད་དོ། །དེ་ལ་དང་པོ་ཉིད་དུ་གཞན་ལ་མ་བརྟེན་པར་གཞུང་ཚུགས་པ་ནི་རྩ་བའི་རྒྱུད་ཅེས་བྱའོ། །དེའི་དཀའ་བ་གཅོད་པ་དང་། མ་ཚང་བ་ཁ་བསྐང་བ་དང་། དོན་བསྡུས་པ་དང་། དེ་དག་གི་བྱེ་བྲག་མཆོག་བཤད་པ་ནི། ཕྱི་མའི་རྒྱུད་ཅེས་བྱ་སྟེ་འདི་ལྟར། ཨུད་ཏ་ར་ཏནྟྲ་ཞེས་བྱ་བ། རྩེ་མོའི་དོན་དང་བླ་མར་གྱུར་པ་ལྟ་བུ་ལ་ཡང་སྙེག །ཕྱིས་འབྱུང་བ་ལ་ཡང་བྱ་སྟེ། དོན་གྱི་གནས་སྐབས་ཀྱིས་རྒྱུད་ཕྱི་མ་ཞེས་པའམ། རྒྱུད་བླ་མ་ཞེས་སྦྱར་རོ། །བཤད་པའི་རྒྱུད་ནི། རྒྱུད་གང་གིས་རྒྱུད་དག་བཤད་པ་གང་ཡིན་པའོ། །རྟོག་པའི་རྒྱུད་ནི། དེ་དག་དུ་མ་བསྟན་པའི་ལས་དང་དངོས་གྲུབ་ཀྱི་ཆོ་ག་ཞིབ་མོ་བཤད་པའོ། །ཁ་ཅིག་ན་རེ་རྒྱུད་ནི་མདོར་བསྡུས་ཏེ་བསྟན་པའི་ཚུལ་ཡིན་པས་རྟོག་པ་ཞིབ་མོ་རྣམས་ནི་རྒྱུད་དུ་མི་བསྡུའོ་ཞེས་ཟེར་རོ། །ཁ་ཅིག་ན་རེ་གཞི་དེ་ལྟར་གྲགས་པ་ཡིན་མོད་ཀྱི། དཔེར་ན་ཤིན་ཏུ་རྒྱས་པའི་མདོ་སྡེ་ཞེས་བརྗོད་པ་བཞིན་རྟོག་པ་ཞིབ་མོ་རྣམས་ལ་ཡང་རྒྱུད་ཅེས་བྱས་པ་ལ་ཉེས་པ་མེད་དོ་ཞེས་ཟེར་རོ། །དེ་དག་ནི་རྒྱུད་ཀྱི་དབྱེ་བ་བསྟན་པའོ། །དེ་ལས་དཔལ་གསང་བ་སྙིང་པོ་འདི་ནི་རྣལ་འབྱོར་ཆེན་པོའི་རྒྱུད་དུ་གཏོགས་སོ། །དེའི་ཚུལ་ལས་ཀྱང་རྫོགས་པའི་ཚུལ་གཙོ་བོར་སྒྲུབ་པར་བྱེད་པ་རྩ་བའི་རྒྱུད་དུ་གྲགས་སོ། །ད་ནི་གཞུང་གི་ལྡང་ཚད་བསྟན་པར་བྱ་སྟེ། དེ་ཡང་གླེང་གཞི་དང་། གླེང་བསླང་བ་དང་། ཡོངས་སུ་ཤེས་པར་བྱ་བའི་དངོས་པོ་དང་། ཡོངས་སུ་གཏད་པ་རྣམས་ཚང་བ་ནི། སྤྱིའི་གཞུང་ཚད་དོ། །འདིར་ཡང་དེ་བཞིན་དུ་ཤེས་པར་བྱ་སྟེ། དེ་ལ་གླེང་གཞི་ནི་ཕུན་སུམ་ཚོགས་པ་ལྔའི་ལོ་རྒྱུས་བརྗོད་པ་སྟེ། གཞི་ཅི་ལས་གླེང་བསླང་བའི་བཅས་རྒྱུད་སྟོན་པས་གླེང་གཞི་ཞེས་བྱའོ། །ཡང་རྣམ་པ་གཅིག་ཏུ་ནི། ད་ན་ཞེས་བྱ་སྟེ། ངེས་པར་སྦྱིན་པར་བྱེད་པ་སྟེ། གང་དག་ཕྱིར་གྱུར་པ་རྣམས་བཀའ་མ་ཡིན་པར་ཐེ་ཚོམ་ཟ་བ་དག་ལ། དཔང་པོ་དང་དོན་རྟགས་བརྗོད་པས་ཡིད་ཆེས་པར་འགྱུར་ཞིང་བློ་ལ་ངེས་པ་སྦྱིན་པར་བྱེད་པས་དེ་སྐད་ཅེས་བྱའོ། །དེ་ལ་ཕུན་སུམ་ཚོགས་པ་ལྔ་ནི། སྟོན་པ་དང་། གནས་དང་། འཁོར་དང་། དུས་དང་། རྒྱུད་རྣམས་རང་རང་གི་ཡོན་ཏན་རྫོགས་པའམ། སྦྱིར་རྒྱུ་རྐྱེན་ཚང་བའི་ཕྱིར་ཕུན་སུམ་ཚོགས་པ་ཞེས་བྱའོ། །དེ་ཡང་ཐུན་མོང་དང་ཐུན་མོང་མ་ཡིན་པའི་སྒོ་རྣམ་པ་གཉིས་ཡིན་ཏེ། དེ་ལ་ཐུན་མོང་དུ་ནི། འདི་སྐད་བདག་གིས་ཐོས་པའི་དུས་གཅིག་ན། སྟོན་པ་གང་ཞིག །གནས་གང་ན། འཁོར་གང་དང་གང་བཞུགས་པ་དེའི་ཚེ་ཐོས་སོ་ཞེས་མཚམས་སྦྱོར་བར་བྱེད་དོ། །རྒྱུད་འདིར་ནི་ཐུན་མོང་མ་ཡིན་པའི་གླེང་གཞི་སྟོན་ཏེ། དེ་ལ་སྟོན་པ་ཐུན་མོང་མ་ཡིན་པ་ནི། དཔལ་ཀུན་ཏུ་བཟང་པོ་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་པོ་ཆོས་ཐམས་ཅད་ཀྱི་རང་བཞིན་སྟོན་པར་འདོད་ཀྱི། གང་ཟག་གི་རྒྱུད་གཅིག་མངོན་པར་རྫོགས་པ་སངས་རྒྱས་པའི་ཡེ་ཤེས་ཀྱི་རྒྱུད་ཀྱིས་བསྡུས་པའི་གཟུགས་ཀྱི་སྐུ་ལྟ་བུ་གཅིག་སྟོན་པར་འདོད་པ་ནི་མ་ཡིན་ནོ། ༈ །གནས་ཐུན་མོང་མ་ཡིན་པ་ནི། འོག་མིན་གྱི་གནས་མཐའ་དང་དབུས་མེད་པ། ཆོས་ཀྱི་དབྱིངས་ཀྱི་ཕོ་བྲང་ཐམས་ཅད་སྙིང་པོ་བྱང་ཆུབ་ཀྱི་རང་བཞིན་གང་ཡིན་པ་དེ་ཉིད་གནས་སུ་འདོད་ཀྱི། དག་པ་དང་མ་དག་པའི་ཞིང་ཁམས་ཕྱོགས་ཀྱི་ཆས་ཕྱེ་བ་ཞིག་གནས་སུ་འདོད་པ་ནི་མ་ཡིན་ནོ། །འཁོར་ཐུན་མོང་མ་ཡིན་པ་ནི། ཡེ་ཤེས་ཆེན་པོ་རང་སྣང་བའི་འཕྲུལ་པ་གང་ཟག་དང་བཅས་པའི་ཆོས་དང་། ཟག་པ་མེད་པའི་ཆོས་དབྱེར་མེད་པའི་རང་བཞིན་བྱང་ཆུབ་ཆེན་པོ་ལས་མི་གཞན་པ་གང་ཡིན་པ་དེ་ཉིད་འཁོར་དུ་འདོད་ཀྱི། རང་གི་རྒྱུད་དག་པའམ་དད་པས་འདུས་པ་ལ་སོགས་པ་ལྟ་བུ་ནི་མ་ཡིན་ནོ། །དུས་ཐུན་མོང་མ་ཡིན་པ་ནི། དུས་བཞི་མཉམ་པ་ཉིད་ཀྱི་དབྱིངས་ན་སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་པ་ཉིད་ཡིན་གྱི་སྐད་ཅིག་ཐང་ཅིག་ལ་སོགས་པའི་དུས་ཀྱི་ཕྱེ་བའམ། བསམ་པའི་དུས་དང་། མི་བསམ་པའི་དུས་དང་། བསམ་པ་ལས་འདས་པ་ལ་སོགས་པའི་དུས་ཀྱིས་ཕྱེ་བ་ནི་མ་ཡིན་ནོ། །རྒྱུད་ཀྱི་གཞུང་ཕུན་སུམ་ཚོགས་པ་ཐུན་མོང་མ་ཡིན་པ་ནི། འཁོར་བ་དང་། མྱ་ངན་ལས་འདས་པས་བསྡུས་པའི་ཆོས་ཐམས་ཅད་གདོད་མ་ནས་དབྱེར་མེད་པར་མངོན་པར་རྫོགས་པར་སངས་རྒྱས་པའི་རང་བཞིན་ཡིན་པར་སྟོན་གྱི། རིགས་དང་བཤེས་གཉེན་གྱི་སྟོབས་ལ་བརྟེན་ནས་རྒྱུ་སྒྲུབ་པས་འབྲས་བུ་འབྱུང་བའི་དུས་ལ་ལྟོས་པ་ནི་མ་ཡིན་ནོ། །འདི་དག་ཀྱང་འདི་སྐད་བཤད་པའི་དུས་ན་ཞེས་བྱ་བ་ལ་སོགས་པ་ཇི་སྐད་གསུངས་པ་ལས་ཤེས་པར་བྱའོ། །རྒྱུ་འབྱུང་བའི་རྐྱེན་ནི་གླེང་བསླང་ཡིན་ཏེ། དེ་ཡང་སྤྱིར་ཐུན་མོང་དང་ཐུན་མོང་མ་ཡིན་པའི་སྒོ་ནས་རྣམ་པ་གཉིས་སོ། །དེ་ལ་ཐུན་མོང་ནི་རྒྱུད་དང་མདོ་སྡེ་སྤྱི་ལས་འབྱུང་བ་བཞིན། སྟོན་པས་གླེང་བསླང་བ་ཞིག་ན་ཡང་། འོད་ཟེར་འགྱེད་པ་དང་། ཞལ་འཛུམ་པ་དང་། ལྗགས་ཀྱི་དབང་པོ་བརྐྱང་བ་ལ་སོགས་པའི་སྒོ་ནས་བསྐུལ་བར་མཛད་པ་དང་། གཞན་ལ་ཆེད་དུ་བརྗོད་པ་ལྟ་བུ་དང་། འཁོར་གྱི་གླེང་བསླང་བ་ཞིག་ན་ཡང་། ཞུ་བའི་སྦྱོར་བ་དང་། ཞུས་པའི་ཚིག་དག་གི་སྒོ་ནས་གླེང་སློང་བར་བྱེད་དོ། །ཐུན་མོང་མ་ཡིན་པ་ནི། འདིའི་སྐབས་སུ་ཆོས་ཐམས་ཅད་ཡེ་ནས་དཀྱིལ་འཁོར་ཆེན་པོའི་རང་བཞིན་མི་ཟད་རྒྱན་གྱི་འཁོར་ལོའི་གནས་ཆེན་པོར་སངས་རྒྱས་པའི་དོན། སངས་རྒྱས་ཉག་གཅིག་གི་དགོངས་པ་ལ་གསལ་བའི་དོན་གང་ཡིན་པ་དེར་ངམ་ཞིང་ངོ་མཚར་བའི་ཚུལ་གྱིས་དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་ཆེད་དུ་བརྗོད་པའི་ཚུལ་གྱིས་གླེང་བསླང་བའོ། །དེ་ཡང་སྐུ་དང་ཡེ་ཤེས་སྤྲུལ་པའི་བདག་ཉིད་ཀྱིས་མངོན་པར་སངས་རྒྱས་པའི་ཆེ་བ་དང་། དེ་ཉིད་མཚན་མ་མེད་པའི་ངང་དུ་ལྷུན་གྱིས་གྲུབ་པས་ཆོས་ཀྱི་དབྱིངས་སུ་སངས་རྒྱས་པའི་ཆེ་བའི་སྒོ་ནས་ཀུན་ཏུ་བཟང་པོས་གླེང་བསླང་བ་དང་། ཀུན་ཏུ་བཟང་མོས་གླེང་བསླང་བ་གཉིས་སུ་བསྟན་ནོ། །ཡོངས་སུ་ཤེས་བར་བྱ་བའི་དངོས་པོ་ནི། སྤྱིར་རྒྱུད་ཐབས་ཅད་ཀྱིས་བསྟན་པར་བྱ་བའི་དངོས་པོ་མདོར་བསྡུ་ན་རྣམ་པ་དགུ་ཡིན་ཏེ། འདི་ལྟར་དཀྱིལ་འཁོར་དང་། དམ་ཚིག་དང་། སྒྲུབ་པ་དང་། དབང་དང་། ཕྲིན་ལས་ཏེ་གཞི་རྣམ་པ་ལྔ། སྔགས་དང་། ཕྱག་རྒྱ་དང་། ཏིང་ངེ་འཛིན་དང་། མཆོད་པ་སྟེ་དེ་ལྟར་ཡན་ལག་བཞིའོ། །དེ་ལ་དཀྱིལ་འཁོར་གྱི་སྒྲ་འཇུག་པའི་ཡུལ་ནི། སྐབས་ཀྱི་བྱེ་བྲག་གིས་མང་མོད་ཀྱི། རྒྱུད་ཀྱི་དངོས་པོ་སྟོན་པའི་སྐབས་འདིར་ནི་ཆོས་ཀྱི་རྒྱལ་པོ་སངས་རྒྱས་བཅོམ་ལྡན་འདས་ཕོ་བྲང་འཁོར་དང་བཅས་པ་ལ་བྱའོ། །དེ་ལ་དེ་སྐད་ཅེས་ཅིའི་ཕྱིར་བྱ་ཞེ་ན། མཎྜལ་ཞེས་བྱ་བ། མཎྜ་ནི་སྙིང་པོའི་ཉིང་ཁུའམ་དཀྱིལ་འཁོར་ལྟ་བུ་ལ་བྱ་ལ། ལ་ནི་ལེན་ཅིང་འཛིན་པ་སྟེ་གཞིའི་དོན་ནོ། །དེ་བས་ན་ཆོས་ཀྱི་རྒྱལ་སྲིད་བསྒྲུབ་པར་བྱ་བ་ལ་སྙིང་པོ་གཞི་འཛིན་དུ་གྱུར་པའི་ཕྱིར་སྙིང་པོ་ལེན་པས་དཀྱིལ་འཁོར་ཞེས་བྱའོ། །རྣམ་པ་གཅིག་ཏུ་ཡི་གེ་འབྲེལ་བར་བརྗོད་ན། ཀུན་ནས་ཟླུམ་ཞིང་ཡོངས་སུ་བསྐོར་བའི་དོན་ཏེ། དེ་ལྟ་ན་ཡང་གང་ན་གཙོ་བོ་ལ་འཁོར་གྱི་དཀྱིལ་འཁོར་གྱིས་བསྐོར་བའི་དོན་གྱིས་དཀྱིལ་འཁོར་ཞེས་བྱའོ། །ཡང་མ་ད་ནི་མཛེས་པའི་དོན། ལ་ནི་བརྒྱན་པའི་དོན་ཏེ། འདི་ལྟར་བཅོམ་ལྡན་འདས་ལ་གནས་དང་འཁོར་ལ་སོགས་པས་བརྒྱན་པའི་ཕྱིར་ཡང་དེ་སྐད་ཅེས་བྱའོ། །ཡང་ན་མ་ད་ནི་མནན་པའམ་བརྗིད་ཕབ་པ། ལ་ནི་གཞི་འཛིན་པ་སྟེ། དོན་འདིས་ན་བཞུགས་པའི་གནས་ཉིད་ལ་ཡང་དཀྱིལ་འཁོར་ཞེས་བྱའོ། །དཀྱིལ་འཁོར་གྱི་དབྱེ་བ་བསྟན་པ་ནི། གཞུང་སོ་སོ་ནས་གྲགས་པ་རྣམས་ནི་རང་རང་གི་སྐབས་བཞིན་དབྱེ་བར་བྱའོ། །གཞུང་འདིར་གྲགས་པ་ནི་འདི་ཉིད་ཀྱི་རྒྱུད་ཕྱི་མ་ལས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་དཀྱིལ་འཁོར་གསུམ། །ཏིང་འཛིན་ལྷག་པའི་དཀྱིལ་འཁོར་དག །བྱང་ཆུབ་སེམས་དང་ཚོགས་མཆོག་བསྟན། །ཞེས་གསུངས་ཏེ། དེ་ལྟར་ན་དཀྱིལ་འཁོར་བདུན་དུ་དབྱེ་བར་བསྟན་ཏོ། །དེ་ལ་རང་བཞིན་གྱི་དཀྱིལ་འཁོར་ནི་ཆོས་ཐམས་ཅད་ཀྱི་རང་བཞིན་ཡེ་ནས་རྣམ་པར་དག་པ་ཇི་ལྟ་བ་ཡིན་པ་དང་། དོན་དེ་ལྟ་བུ་དགོངས་པ་ལྷུན་གྱིས་གྲུབ་པར་གྱུར་པའི་སངས་རྒྱས་བཅོམ་ལྡན་འདས་གོང་དུ་དཀོན་ཅོག་བསྟན་པའི་སྐབས་སུ་ཇི་སྐད་བཤད་པ་ལྟ་བུའོ། །གཟུགས་བརྙན་གྱི་དཀྱིལ་འཁོར་ནི། སེམས་ཅན་རྣམས་ཀྱི་དབང་པོའི་སྤྱོད་ཡུལ་དུ་ཇི་ལྟར་སྣང་བ་ཐམས་ཅད་ལྷུན་གྱིས་གྲུབ་པའི་དཀྱིལ་འཁོར་དུ་འདོད་དོ། །ལྷག་པ་གཟུགས་བརྙན་ནི། དེ་ལས་ཀྱང་ཁྱད་པར་དུ་གཟུགས་སྐུ་དང་མཆོད་རྟེན་ལ་སོགས་པ་ཕྱག་རྒྱའི་མཚན་མར་གྱུར་པ་གང་ཡིན་པའོ། །ཏིང་ངེ་འཛིན་ཡི་དཀྱིལ་འཁོར་ནི། ཆོས་ཐམས་ཅད་དབྱེར་མེད་པར་སྐུ་གསུང་ཐུགས་ཀྱི་དཀྱིལ་འཁོར་དུ་རྟོགས་ནས་དེ་ཉིད་ཏིང་ངེ་འཛིན་གྱི་ཡུལ་དུ་བྱས་པའོ། །ལྷག་པ་ཏིང་ངེ་འཛིན་ནི། གཞི་དེ་ལས་བྱེ་བྲག་ཏུ་ལྷ་སོ་སོའི་རིགས་དང་། སྐུ་མདོག་དང་ཕྱག་མཚན་ལ་སོགས་པ་སོ་སོར་གསལ་བར་བྱས་པའོ། །གསང་བ་བྱང་ཆུབ་སེམས་ཀྱི་དཀྱིལ་འཁོར་ནི། བྱང་ཆུབ་ཀྱི་སེམས་བདེ་བ་ཆེན་པོ་ཉིད་དཀྱིལ་འཁོར་གྱི་དམ་པ་ཡིན་ཏེ། དེ་ཉིད་རྟོགས་པ་དང་སྒོམ་པའི་མན་ངག་སྟོན་པའོ། །ཚོགས་ཀྱི་དཀྱིལ་འཁོར་ནི་འདི་ལྟར། ལྷ་རྣམས་ཐམས་ཅད་འཚོགས་པ་དང་། །སྐྱེ་བོ་དམ་པ་ཀུན་འཚོགས་པས། །ཚོགས་ཀྱི་དཀྱིལ་འཁོར་དམ་པ་ནི། །དེ་བཞིན་མཛའ་བ་འདུས་པར་གསུངས། །ཞེས་བྱུང་བ་ལྟ་བུའོ། །རྩ་བའི་རྒྱུད་འདིར་ནི། ལྷག་པར་དཀྱིལ་འཁོར་གྲངས་ཀྱིས་ཕྱེ་བའང་མེད་ལ། དོན་གྱིས་ན་རང་བཞིན་གྱི་དཀྱིལ་འཁོར་དང་། དེ་བཞིན་དུ་ཏིང་ངེ་འཛིན་དང་། གཟུགས་བརྙན་དང་། ཚོགས་དང་། བྱང་ཆུབ་སེམས་ཀྱི་དཀྱིལ་འཁོར་རྣམས་སྟོན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ཀྱི་སྐུ་གསུང་ཐུགས་ཀྱི་རང་བཞིན་དང་འཕྲུལ་པ་སྟོན་པ་རྣམས་ནི་རང་བཞིན་གྱི་དཀྱིལ་འཁོར་ཡིན་པར་མངོན་ནོ། །གང་ཏིང་ངེ་འཛིན་གྱི་དཀྱིལ་འཁོར་བསྒོམ་པར་གསུངས་པ་ནི་ཏིང་ངེ་འཛིན་ནོ། །གང་རྡུལ་ཚོན་ལ་སོགས་པ་མཚན་མའི་ཕྱག་རྒྱར་གྱུར་པ་ནི་གཟུགས་བརྙན་ནོ། །གང་སྐྱེ་བོ་དམ་པ་འདུས་ནས་དཀྱིལ་འཁོར་ཚང་བར་སྤྱོད་པ་ན ི་ཚོགས་སོ། །གང་བྱང་ཆུབ་སེམས་བདེ་བ་ཆེན་པོའི་མན་ངག་ཏུ་སྟོན་པ་ནི་བྱང་ཆུབ་སེམས་ཀྱི་དཀྱིལ་འཁོར་རོ། །ཅིའི་ཕྱིར་རྒྱུད་རྣམས་སུ་ཕལ་ཆེར་དཀྱིལ་འཁོར་གཙོར་སྟོན་པར་མཛད་ཅེ་ན། བདག་ཉིད་ཆེན་པོ་རྣམས་ཀྱི་ཆོས་ཀྱི་རྒྱལ་སྲིད་བསྒྲུབ་པར་བྱ་བ་ལ་རྒྱུའི་གཙོ་བོ་ཆོས་ཀྱི་རྒྱལ་པོ་ཉིད་ཡིན་པའི་ཕྱིར་རོ། །གཉིས་པ་དམ་ཚིག་ནི། བདག་ཉིད་ཆེན་པོ་རྣམས་ཀྱི་བཀའ་བཞིན་བྱེད་པའི་མཚན་ཉིད་དེ། དེ་ཡང་བྱ་བ་དང་བྱ་བ་མ་ཡིན་པ་ལ་འཇུག་པ་དང་ལྡོག་པའི་མཚན་ཉིད་ཡིན་ནོ། །དེ་ཡང་རྒྱལ་བ་རྣམས་ཀྱིས་བཀས་བཅད་པ་དང་། རྣལ་འབྱོར་གྱི་དབང་ཕྱུག་ཆེན་པོའི་བསླབ་པར་གྱུར་པ་དང་། འདའ་རུ་མི་རུང་བའི་མཚན་ཉིད་གསུམ་དང་ལྡན་པ་སྟེ། འདི་དག་གིས་ནི་ཐ་མལ་པའི་ལེགས་པར་སྤྱད་པ་དང་། ཐེག་པ་ཐུན་མོང་གི་སྡོམ་པ་དང་། འདས་པར་གྱུར་ཡང་ཉེས་པ་ཆེན་པོ་མེད་པར་གྱུར་པ་རྣམས་ལས་བྱེ་བྲག་ཏུ་བྱས་པའི་མཚན་ཉིད་ཅན་ཡིན་ནོ། །དེ་ལ་ཅིའི་ཕྱིར་དམ་ཚིག་ཅེས་བྱ་ཞེ་ན། ས་མ་ཡ་ཞེས་བྱ་བའི་སྒྲ་སྤྱིར་དོན་དུ་མ་ལ་འཇུག་སྟེ། རེ་ཞིག་ཅུང་ཟད་བསྡུས་ནས་ཚིགས་སུ་བཅད་པ། ཀུན་ཐོབ་འགྲོ་དང་རྟོགས་པ་དང་། །ཡང་དག་ཐོབ་སོགས་གསུམ་དེ་བཞིན། །རྫོགས་ཐོབ་དུས་དང་མཉམ་པར་སྦྱོར། །གསང་བ་བསྟེན་པ་བཟའ་བ་དང་། །མནའ་དང་སྡོམ་པ་ཡལ་གམ་བཅས། །དམ་པར་གྱུར་དང་དམ་པ་མཚོན། །དམ་པར་གསུངས་དང་དམ་དུ་འཛིན། །འདས་ན་སྲེག་པར་བྱེད་པ་དང་། །ཀུན་ཀྱང་འདའ་བ་མ་ཡིན་པས། །ས་མ་ཡ་ཞེས་བྱ་བ་ཡིན། །ཞེས་ཤེས་པར་བྱའོ། །དེ་ལས་འདིར་ནི་མཉམ་པར་སྦྱོར་བ་བྱེད་པ་དང་། མཉམ་རྫོགས་ཆེན་པོ་ཐོབ་པ་དང་། འདའ་བར་བྱ་བ་མ་ཡིན་པས་དམ་ཚིག་ཅེས་བྱའོ། །རྒྱུད་ཕྱི་མ་ལས་ནི། རྣམ་གྲངས་གོང་དུ་བསྟན་པ་ལྟ་བུར་ཕྱོགས་གཞན་ཡང་གསུངས་སོ། །དམ་ཚིག་གི་དབྱེ་བ་ནི། སྤྱི་དང་ཁྱད་པར་ལྷག་པའི་དམ་ཚིག་ཅེས་སྤྱིར་གྲགས་ཏེ། དེ་ལ་སྤྱིའི་སྡོམ་པ་ནི། ཐེག་པ་ཐུན་མོང་གི་སྡོམ་པར་གྲགས་པའི་སོ་སོར་ཐར་པའི་སྡོམ་པ་དང་། བྱང་ཆུབ་སེམས་དཔའི་སྡོམ་པ་དག་ཀྱང་གསང་སྔགས་ཀྱི་སྡོམ་པའི་གཞིར་གྲགས་སོ། །ལྷ་སྤྱིའི་སྡོམ་པར་གྱུར་པ་རིགས་ལྔའི་སྡོམ་པ་ལྟ་བུའང་རིགས་གཅིག་གི་ལྷ་མཉེས་པར་བྱེད་པའི་ཚེའང་གཞན་ཐུན་མོང་གི་བསྲུང་བྱར་གྲགས་སོ། །རྣལ་འབྱོར་པ་རྣམས་ཀྱིས་དུས་དང་གནས་སྐབས་སྤྱིར་བསྲུང་བར་བྱ་བའི་སྡོམ་པ་ནི། རྩ་བ་དང་ཡང་ལག་ཏུ་གཏོགས་པའི་སྤྱད་པར་བྱ་བའི་དམ་ཚིག་རྣམས་དང་། བརྟུལ་ཞུགས་ཀྱི་དམ་ཚིག་དང་། རྒྱུན་གྱི་དམ་ཚིག་ལ་སོགས་པའོ། །དེ་དག་ནི་སྤྱིའི་དམ་ཚིག་ཏུ་གཏོགས་པའི་དབྱེ་བའོ། །ཁྱད་པར་གྱི་དམ་ཚིག་ནི། རྣལ་འབྱོར་པ་རྣམས་ཀྱི་བློ་རྩལ་གྱི་ཁྱད་པར་ལས་སོ་སོའི་བསྲུང་བའི་དམ་ཚིག་དང་། སྤྱོད་པའི་དམ་ཚིག་དང་། ལྟ་བའི་དམ་ཚིག་དང་། ཡེ་ཤེས་ཀྱི་དམ་ཚིག་དང་། དེ་བཞིན་དུ་ཚོགས་དང་། སངས་རྒྱས་ཀྱིས་དང་། ཕྲིན་ལས་དང་། སྒྲུབ་པ་དང་། རིག་འཛིན་གྱིས་དང་། ཚངས་པའི་གནས་རྣམས་ཁྱད་པར་རིམ་པ་བཞིན་གནས་ཏེ། འདི་ལྟ་བུ་ནི་ཁྱད་པར་རྩལ་འཕང་གི་དམ་ཚིག་ཅེས་བྱའོ། །ལྷག་པའི་དམ་ཚིག་ནི། སྤྱིའི་སྡོམ་པ་ལ་གནས་པའི་རྣམ་འབྱོར་པས་སྒྲུབ་པ་ཆེན་པོ་ལ་སོགས་པའི་དུས་སྐབས་སུ་བསྲུང་བ་ལྷག་པར་བསྟན་པ་སྟེ། འདི་ལྟར་སེང་གེའི་ཁོག་པ་མི་བཤིག་པ་དང་། སྟག་གཟིག་གོལ་བའི་གོད་ལྷག་མི་བསྡུ་བ་དང་། གངས་ཀྱི་ཞུན་ཆུ་མི་བཏུང་བ་དང་། རྡོ་རྗེའི་གོ་ཆ་མི་གདལ་བ་ལ་སོགས་པ་གཞུང་སྤྱི་ལས་གྲགས་པ་རྣམས་སོ། །དེ་ལས་རྒྱུད་འདིར་ནི། བསྲུང་བ་དང་སྒྲུབ་པར་གྱུར་བའི་རྩ་བའི་དམ་ཚིག་ལྔ་དང་། མི་སྤང་བ་མི་དོར་བར་གྱུར་པའི་ཡན་ལག་བཅུ་སྟེ། དེ་ལྟར་དམ་ཚིག་བཅོ་ལྔའོ། །འདི་ནི་ཡིད་བཞིན་གྱི་ནོར་བུ་རིན་པོ་ཆེ་ལྟར་དགོས་པ་ཐམས་ཅད་ཀྱི་འབྱུང་གནས་སུ་གྱུར་པ། བསླབ་པ་ཐམས་ཅད་ཀྱི་གཞི་འཛིན་པའི་ས་གཞི་ལྟ་བུ། དགེ་བའི་དབང་པོ་ཐམས་ཅད་ཀྱི་སྲོག་ལྟ་བུར་བཤད་དོ། །གང་གི་ཕྱིར་རྒྱུད་རྣམས་སུ་རྒྱལ་བ་རྣམས་ཀྱིས་དམ་ཚིག་བསྟན་ཅེ་ན། བདག་ཉིད་ཆེན་པོ་རྣམས་ཀྱི་ཆོས་ཀྱི་རྒྱལ་སྲིད་བསྒྲུབ་པར་བྱ་བ་ལ་གཞི་འཛིན་པ་ཡིན་པའི་ཕྱིར་དེ་བསྟན་ཏོ་ཞེས་ཤེས་པར་བྱའོ། །སྒྲུབ་པ་ནི། སྔགས་ཀྱི་ལྷ་རྣམས་མཉེས་པར་བྱས་པའི་མཚན་ཉིད་ཀྱི་སྒོ་ནས། ཐུན་མོང་དང་མཆོག་གི་དངོས་གྲུབ་བསྒྲུབ་པའི་ཐབས་སུ་གྱུར་པ་བསྙེན་སྒྲུབ་གཉིས་དང་ཡན་ལག་བཞིས་བསྡུས་པའོ། །སྒྲུབ་པར་བྱེད་པས་སྒྲུབ་པ་སྟེ། དོན་ལེན་ཅིང་ཐོབ་པར་བྱེད་པ་ལ་བཤད་དོ། །འདིའི་དབྱེར་བ་ནི། ཏིང་ངེ་འཛིན་དང་། ཟླས་བརྗོད་དང་། སྦྱིན་སྲེག་ལ་སོགས་པ་ཐབས་ཀྱི་ཆོ་གའི་དབྱེ་བ་དང་། རྟེན་གྱི་བྱེ་བྲག་དམ་ཚིག་གི་ཕྱག་རྒྱ་དང་། ཕྱི་རོལ་གྱི་ཕྱག་རྒྱ་ཆེན་པོ་དང་། ནང་གི་གཟུངས་མ་དང་། དམ་ཚིག་གི་རྫས་ལ་སོགས་པའི་སྒོ་ནས་རྟེན་གྱི་དབྱེ་བ་དང་། ལས་ཕྲ་མོ་དང་། ཐུན་མོང་གི་དངོས་གྲུབ་ཆེན་པོ་དང་། མཆོག་གི་དངོས་གྲུབ་ཀྱི་སྒོ་ནས་དབྱེ་བ་ལ་སོགས་པ་རྣམས་ནི་རྒྱུད་སྤྱིར་བཤད་པར་བྱའོ། །འདིར་ནི་ཡི་གེ་སྒྱུ་འཕྲུལ་གྱི་ཏིང་ངེ་འཛིན་གྱི་སྒོ་ནས་ལས་ཕྲ་མོ་དང་། ཐུན་མོང་དང་མཆོག་གི་དངོས་གྲུབ་བསྒྲུབ་པའི་ཐབས་དང་། ཚོགས་ཀྱི་དཀྱིལ་འཁོར་གྱི་སྒོ་ནས་འདོད་པའི་ཡོན་ཏན་ལྔ་ལ་རོལ་ཅིང་དངོས་གྲུབ་བསྒྲུབ་པའི་ཐབས་རྣམས་གསུངས་ཏེ། དེར་ནི་ནང་གི་གཟུངས་ཀྱི་ཕྱག་རྒྱ་ལ་བརྟེན་པ་དང་། དམ་རྫས་བདུད་རྩི་ལ་བརྟེན་པའང་འདུས་པར་ཤེས་པར་བྱའོ། །རྒྱུད་ཕྱི་མ་ལས། འཇིག་རྟེན་གྱི་ལྷ་ཆེན་པོ་བསྒྲུབ་པ་དང་། ཚེ་བསྒྲུབ་པ་དང་། རོ་ལངས་བསྒྲུབ་པ་དང་། པྲ་དབབ་པ་ལྟ་བུ་འཇིག་རྟེན་གྱི་སྒྲུབ་པ་ཕྲ་མོའང་གསུངས་སོ། །ཅིའི་ཕྱིར་བདག་ཉིད་ཆེན་པོ་རྣམས་ཀྱིས་རྒྱུད་རྣམས་སུ་སྒྲུབ་པ་རྣམས་བསྟན་ཅེ་ན། དཀྱིལ་འཁོར་དང་དམ་ཚིག་རྣམས་ཀྱི་དགོས་པ་ཡང་འགྲོ་བ་རྣམས་ཀྱི་ཐར་པ་དང་བདེ་བ་བསྒྲུབ་པའི་ཕྱིར་ཡིན་ནོ། །དབང་བསྐུར་བ་ནི། བཀའ་ཐོབ་པར་བྱེད་པའི་མཚན་ཉིད་དེ། དེ་ཡང་དབང་ཐོབ་པའི་རྒྱུ་དང་ལྡན་པ། དཀྱིལ་འཁོར་ལ་བརྟེན་ནས་གོ་འཕང་གི་ཆོས་གཞན་གྱི་རྒྱུད་ལ་འགོད་པར་བྱེད་པའི་ལས་ཀྱི་བདག་ཉིད་དོ། །འདི་ནི་གསང་བའི་རྒྱུད་ཀྱི་སྐབས་སུ་སྦྱིན་པ་རྣམ་པ་བཞིར་གྲགས་པ་ལས། དབང་བསྐུར་སྦྱིན་པ་ཞེས་བྱ་བ་རིན་པོ་ཆེའི་རིགས་ཀྱི་དམ་ཚིག་ཏུ་གཏོགས་པའོ། །དེ་ལ་ཅིའི་ཕྱིར་དབང་བསྐུར་བ་ཞེས་བྱ་ཞེ་ན། ཨ་བྷི་ཥིཉྩ་ཞེས་བྱ་བའི་སྒྲ་མངོན་པར་གཏོར་བའམ་ཆུས་བརླན་པར་བྱས་པའི་ཚིག་སྟེ། སྒྲ་འདི་དངོས་སུ་ན་དྲི་མ་དག་པར་བྱེད་པ་ཙམ་ལ་འཇུག་ལ། བརྒྱུད་ནས་ནི་གོ་འཕང་གི་ཆོས་ཐོབ་པར་བྱེད་ཅིང་དབང་བསྐུར་བ་ལ་འཇུག་སྟེ། ཅིའི་ཕྱིར་ཞེ་ན་འཇིག་རྟེན་དུ་འཁོར་ལོས་སྒྱུར་བའི་རྒྱལ་པོ་བྱུང་བ་ན། ས་སྲུངས་ཀྱི་བུས་སུམ་ཅུ་རྩ་གསུམ་གནམ་གྱི་གནས་ནས་རིན་པོ་ཆེའི་སྣོད་བདུད་རྩིའི་ཆུས་བཀང་བ་བླངས་ཏེ། རྒྱལ་པོའི་སྤྱི་བོར་བླུག་ཅིང་ཁྲུས་བྱས་པས་འཁོར་ལོས་སྒྱུར་བའི་རྒྱལ་པོར་དབང་ཐོབ་པར་བྱས་པས་དེ་ལ་ཨ་བྷི་ཥིཉྩ་ཞེས་གྲགས་སོ། །དེ་བཞིན་དུ་ཆོས་ཀྱི་རྒྱལ་པོ་སངས་རྒྱས་བཅོམ་ལྡན་འདས་འབྱུང་བ་ན། ལྷ་དང་ཀླུའི་རྒྱལ་པོ་རྣམས་ཀྱིས་དག་པ་ལྷའི་ཆུས་ཁྲུས་གསོལ་བས་ཆོས་ཀྱི་རྒྱལ་པོ་འཇིག་རྟེན་དུ་འབྱུང་བར་འགྱུར་ཏེ། ཁྲུས་དེ་ལ་ཨ་བྷི་ཥིཉྩ་ཞེས་གྲགས་སོ། །དེ་བཞིན་དུ་ཕྱིས་རྗེས་སུ་འབྱུང་བ་རྣམས་ཀྱང་ནམ་གོ་འཕང་བསྒོ་བར་བྱེད་པའི་ཚེ་བུམ་པ་ལ་བརྟེན་ནས་ཁྲུས་གསོལ་བས་དབང་ཐམས་ཅད་ཀྱི་རྒྱ་རྟགས་ཡིན་པའི་ཕྱིར། མངོན་པར་གཏོར་བའི་ཕྱིར་དབང་བསྐུར་བ་ཞེས་བྱའོ། །འདིའི་དབྱེ་བ་ནི། ཕྱི་ནང་གི་རྒྱུད་སོ་སོ་ལས་རང་རང་གི་གཞུང་སོ་སོར་གྲགས་མོད་ཀྱི། འདིར་ནི་ཕན་པའི་དབང་དང་། ནུས་པའི་དབང་གཉིས་སུ་གྲགས་སོ། །ཕན་པ་ནི་དབུ་རྒྱན་ཕྲེང་བ་ཅོད་པན་ལ་སོགས་པ་རྒྱུད་ལས་གསུངས་པའི་དབང་བཅུ་པོ་དག་ད་ལྟ་ཉིད་ནས་ནུས་པ་སོ་སོ་ལ་བསྒོ་བ་མེད་པས་དེ་སྐད་ཅེས་བྱའོ། །གསང་བ་ཉན་པའི་དབང་དང་། དངོས་གྲུབ་བསྒྲུབ་པའི་དབང་དང་། ལས་རྣམ་བཞི་སྤྱོད་པའི་དབང་དང་། གསང་བ་འཆད་པའི་དབང་དང་། རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་རྣམས་ཕན་པའང་ཡིན་ལ། ད་ལྟ་ཉིད་དུ་ནུས་པ་སོ་སོ་ལ་བྱ་བར་གནས་པས་བསྒོས་པ་ཡིན་པས་དེ་སྐད་ཅེས་བྱའོ། །ཅིའི་ཕྱིར་བདག་ཉིད་ཆེན་པོ་རྣམས་ཀྱིས་རྒྱུད་རྣམས་སུ་དབང་བསྟན་ཅེ་ན། གོ་འཕང་གི་ཆོས་རིམ་པར་ཐོབ་པར་བྱ་བ་འདི་ལ་རག་ལས་པའི་ཕྱིར་རོ། །ཕྲིན་ལས་ནི། སངས་རྒྱས་ཀྱི་མཛད་པ་བསྒྲུབ་པའི་ཕྱིར་བྱང་ཆུབ་ཀྱི་སེམས་ལ་བརྟེན་ནས་འགྲོ་བའི་དོན་སྤྱོད་པའི་མཚན་ཉིད་དེ་ཚད་མེད་པ་བཞིའི་རྒྱུ་ལས་བྱུང་བ་ཡིན་ནོ། །བྱེད་པ་པོ་རྣམས་ཀྱི་ཉེ་བར་འདོད་པ་ནི་ལས་ཞེས་ཟེར་ཏེ་སྒོ་གསུམ་གྱི་བྱ་བའི་མཚན་ཉིད་དོ། །འདིའི་དབྱེ་བ་ནི། རིགས་ཀྱི་སྒོ་ནས་ཚར་གཅོད་པ་དང་། ཕན་འདོགས་པ་གཉིས་ཀྱི་བྱེ་བྲག་ལས། ཞི་བ་ལ་སོགས་པས་ལས་རྣམ་པ་བཞི་ལྟ་བུ་ལས་རབ་ཏུ་དབྱེ་བའི་སྤྲོས་པ་གྲངས་ཆད་པ་དང་། གྲངས་ཆད་པ་མེད་པར་གསུངས་པ་རྣམས་སོ། །ཐབས་ཀྱི་སྒོ་ནས་དབྱེ་བ་ནི། རྫས་ལ་བརྟེན་པ་དང་མ་བརྟེན་པའི་བྱེ་བྲག་གིས། བསམ་གཏན་དང་། བཟླས་བརྗོད་དང་། སྦྱིན་སྲེག་ལ་སོགས་པའི་སྒོ་ནས་ཐབས་ཀྱི་ཆོ་ག་ཇི་སྙེད་གསུངས་པ་རྣམས་སོ། །ཅིའི་ཕྱིར་བདག་ཉིད་ཆེན་པོ་རྣམས་ཀྱིས་རྒྱུད་རྣམས་སུ་ཕྲིན་ལས་བསྟན་ཅེ་ན། སངས་རྒྱས་ཀྱི་མཛད་པ་བསྒྲུབ་པ་ལ་ཐབས་འདི་དག་ཙམ་ཡིན་པའི་ཕྱིར་རོ། །འདི་དག་ནི་གཞི་ལྔ་ཞེས་བྱ་སྟེ། སྔགས་ལ་སོགས་པའི་ཡན་ལག་བཞིའང་འདི་དག་གི་བྱ་བ་བསྒྲུབ་པའི་ཐབས་ཀྱི་ཡན་ལག་ཡིན་པའི་ཕྱིར་རོ། །དེ་བས་ན་དངོས་པོ་དེ་དག་གང་གཙོ་བོར་བྱེད་ཀྱང་སྔགས་ལ་སོགས་པའི་ཡན་ལག་བཞི་པོ་འདི་ལས་ཐབས་ལྷག་པ་གཞན་མེད་དེ་བྱ་བ་ཐམས་ཅད་ལ་འདི་དག་ཚང་བའི་ཕྱིར་རོ། །དེ་ལ་སྔགས་ཞེས་བྱ་བ་ནི། སྤྱིར་ཤེས་པ་དང་དཔུང་གཉེན་དུ་ལྡན་པའི་དོན་ལ་བཤད་དེ། འདི་ལྟར་མན་ཏྲ་ཞེས་བྱ་བའི་སྒྲ། མ་ནཱ་ཨ་བཱ་བོ་ད་ན་ཞེས་བྱ་སྟེ། རྟོགས་ཤིང་ཁོང་དུ་ཆུད་པ་ལ་བྱ་བར་སྐད་ཀྱི་བྱིངས་ལས་བཤད། ཏྲ་ནི་སྐྱོབ་པ་སྟེ། སྐྱབས་དང་དཔུང་གཉེན་དུ་གྱུར་པ་ལ་འཇུག་པས་སྤྱིར་ན་ཐབས་དང་ཤེས་རབ་ཟུང་དུ་འབྲེལ་བའམ། འབྲས་བུ་དང་བཅས་པ་ལ་འཇུག་པར་གཞུང་ཕལ་མོ་ཆེ་ན་གྲགས་སོ། །གཞུང་སོ་སོ་ནས་གྲགས་པ་ནི། སྤྲོས་པ་མེད་པའི་དོན་ལ་ཡང་གསང་སྔགས་ཞེས་བྱ་སྟེ། འདི་ལྟར་རྣམ་པར་སྣང་མཛད་མངོན་པར་བྱང་ཆུབ་པ་ལས་འདི་སྐད་དུ། སྤྲོས་པ་མེད་པའི་དོན་གསང་སྔགས་ཀྱི་དངོས་པོ་དེ་ཉིད་ཚུལ་སྣ་ཚོགས་ནས་ཞེས་པ་ལ་སོགས་རྒྱ་ཆེར་གསུངས་པ་ལྟ་བུ་འོ། །གཉིས་སུ་མེད་པའི་ཡེ་ཤེས་ལ་ཡང་གསང་སྔགས་ཞེས་གསུངས་ཏེ། དེ་ཉིད་ལས། གཉིས་མེད་ཡེ་ཤེས་འདི་ཉིད་ནི། །ཐུབ་པས་སྔགས་ཞེས་གསུངས་པ་ཡིན། །ཞེས་གསུངས་པ་ལྟ་བུ་དང་། གཞན་ལས། གཉིས་མེད་ཡིད་ནི་སྐྱོབ་པ་ན། །གལ་ཏེ་དེ་ལྟར་ན་ཡང་སྔགས། །ཞེས་གསུངས་པ་ལྟ་བུ་སྟེ། ཚུལ་འདི་དག་གིས་ན་ཤེས་པ་ཉིད་སྐྱོབ་པ་ཡིན་པས། ཤེས་སྐྱོབ་ཞེས་བཤད་དོ། །དཔལ་གསང་བ་འདུས་པའི་རྒྱུད་ཕྱི་མ་ལས་ནི། སེམས་སྐྱོབ་པས་ཤེས་སྐྱོབ་ཞེས་བཤད་དེ། འདི་ལྟར་གསང་སྔགས་ཀྱི་སྤྱོད་པ་བཤད་པའི་སྐབས་ནས། གང་གང་རྟེན་ཅིང་འབྲེལ་འབྱུང་བ། །ཡུལ་དང་དབང་པོ་རྣམས་ཀྱི་སེམས། །དེ་ནི་མན་ཞེས་བཤད་པ་ཡིན། །ཏྲ་ཞེས་བྱ་བ་སྐྱོབ་པའི་དོན། །འཇིག་རྟེན་སྤྱོད་ལས་རྣམ་གྲོལ་བའི། །སྡོམ་པ་ཀུན་ནས་གང་གསུངས་པ། །སྐྱོབ་པ་རྡོ་རྗེ་ཐམས་ཅད་ཀྱི། །སྔགས་ཀྱི་སྤྱོད་པར་བསྟན་པ་ཡིན། །ཞེས་གསུངས་པ་ལྟ་བུའོ། །དོན་དེ་ལྟ་བུའི་རྟགས་སུ་གྱུར་པ་ལྷ་རྣམས་ཀྱི་སྐུ་ལ་ཡང་སྔགས་ཞེས་བྱའོ། །དེ་ཉིད་ལས། སྔགས་རྣམས་ཐམས་ཅད་ཉིད་ལ་ཡང་། །རྨད་དུ་བྱུང་བའི་གཏོར་མ་དབུལ། །བཤང་གཅི་ཤ་དང་འབྲུ་མར་དང་། །སེམས་ལས་བྱུང་བའི་ཙནྡན་དང་། །ཁུ་བ་དག་གིས་སྔགས་རྣམས་ཀུན། །ཚིམ་པར་འགྱུར་བར་ཀུན་ཏུ་བཤད། །ཅེས་གསུངས་པ་ལྟ་བུའོ། །དེ་དག་གི་སྒོར་གྱུར་པ་ༀ་དང་ཧཱུཾ་ལ་སོགས་པའི་ཡི་གེའི་སྔགས་ཚིག་དང་། གཞུང་གི་ཚོགས་དང་སྦྱིན་སྲེག་ལ་སོགས་པའི་ཐབས་ཀྱི་ཆོ་ག་རྣམས་ལ་ཡང་སྔགས་ཞེས་བྱའོ། །དེ་བཞིན་རིག་པ་དང་གཟུངས་རྣམས་ལ་ཡང་སྦྱར་བར་བྱ་སྟེ། ཤེས་རབ་དང་ཡེ་ཤེས་ཀྱི་བདག་ཉིད་ནི་རིགས་སྔགས། དྲན་པ་དང་ཤེས་རབ་ཀྱི་བདག་ཉིད་ལ་ནི་གཟུངས་སྔགས་ཞེས་བྱ་སྟེ། དེ་གཉིས་ཀྱི་རྟགས་སུ་གྱུར་པ་ནི་ལྷ་མོའི་དབྱིབས་དང་གཟུགས་སུ་གྱུར་པ་དག་གོ། །སྒོ་ནི་སྔ་མ་བཞིན་ཤེས་པར་བྱའོ། །སྤྱིའི་མཚན་ཉིད་འདི་ལྟ་བུ་ལ་འཇུག་པ་ལས། ཡན་ལག་བཞི་བསྟན་པའི་སྐབས་འདིར་ནི། ངག་གི་བརྗོད་པའི་མཚན་ཉིད་ལ་སྔགས་ཞེས་བྱ་སྟེ། འདི་ལྟར་འདུས་པ་ལས། འདའ་བར་བྱ་བ་མ་ཡིན་ཞིང་། །དབྱེ་བར་དཀའ་ལ་གསང་བ་ཉིད། །གསང་སྟེ་བསྒྲུབ་ཕྱིར་བརྗོད་པས་ན། །དེ་ཕྱི་སྔགས་ཞེས་བརྗོད་པ་ཡིན། །ཞེས་གསུངས་པ་ལྟ་བུ་སྟེ། གསང་བའི་དངོས་གྲུབ་བསྒྲུབ་པའི་ཕྱིར་བརྗོད་པའི་གསང་ཚིག་ལྷ་དང་བགེགས་རྣམས་ཀྱིས་ཀྱང་བཟླར་མི་རུང་ཞིང་མི་ཕྱེད་པའི་མཚན་ཉིད་ཀྱི་ཕྱག་རྒྱ་གསང་སྟེ་ངག་ཏུ་བསྔགས་ཤིང་བརྗོད་པར་བྱ་བ་ཡིན་པའི་ཕྱིར་གསང་སྔགས་ཞེས་བྱའོ། །འདིའི་ལས་ནི་མཚན་མ་དང་མཚན་མ་མེད་པའི་ཏིང་ངེ་འཛིན་ཐམས་ཅད་རྒྱུད་ལ་སྐྱེད་པར་བྱེད་པ་དང་། ལྷ་ལ་སོགས་པ་ཐམས་ཅད་ཀྱི་མཚན་མའི་སྤྲུལ་པ་ཐམས་ཅད་ཀྱི་ས་བོན་དང་། རྐྱེན་གྱི་བྱེད་པ་དང་ཐུན་མོང་དང་མཆོག་གི་དངོས་གྲུབ་ཀྱིས་བསྡུས་པའི་འདོད་པའི་དོན་ཐམས་ཅད་གྲུབ་ཅིང་ཐོབ་པར་བྱེད་པ་དང་། ཆོས་ཀྱི་ཕྱག་རྒྱར་གྱུར་པས་ལྷ་རྣམས་མཉེས་པར་བྱེད་པ་སྟེ། འདི་ལྟ་བུའི་ནུས་པ་དང་ལྡན་པའི་ཕྱིར། ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བར་དོན་ཐམས་ཅད་སྒྲུབ་ཅིང་དེ་ཡང་ལྷ་རྣམས་ཉིད་གསང་སྔགས་ཀྱི་གཟུགས་སུ་སྤྲུལ་ཞིང་བྱིན་གྱིས་བརླབས་པའོ་ཞེས་ཀྱང་གྲགས་སོ། །འདི་ལྟ་བུ་ལ་ནི་བརྟགས་པ་གཞན་ཡང་སྣང་སྟེ། ཕྱག་རྒྱའི་སྐབས་སུ་མགོ་དྲིལ་ཏེ་བཤད་པར་བྱའོ། །ཕྱག་རྒྱ་ཞེས་བྱ་བ་ནི། བདག་ཉིད་ཆེན་པོ་རྣམས་ཀྱི་སྐུ་གསུང་ཐུགས་མཚོན་པའི་མཚན་མར་གྱུར་པ་ལ་བྱ་སྟེ། འདི་ལས་བརྒྱུད་ནས་ནི་མཚན་མ་མེད་པའི་དོན་དང་། བདག་ཉིད་ཆེན་པོ་ཉིད་ཀྱི་སྐུ་གསུང་ཐུགས་ལ་ཡང་ཕྱག་རྒྱ་ཞེས་བྱ་བའི་སྒྲ་འཇུག་གོ། །མཚོན་པའི་ཕྱག་རྒྱ་དེ་ཡང་མཚོན་པའི་མཚན་ཉིད་བཞི་དང་ལྡན་པ་སྟེ། བདག་ཉིད་ཆེན་པོ་རྣམས་ཀྱི་མཚན་མར་གྱུར་པ་དང་གང་གིས་ཀྱང་འདའ་ཞིང་གཞིག་ཏུ་མི་རུང་བ་དང་། ཆོས་ཀྱི་རྒྱལ་པོ་ཉག་གཅིག་གིས་ཡིན་གྱི་ཐུན་མོང་མ་ཡིན་པ་དང་། སངས་རྒྱས་ཀྱི་མཛད་པ་ཐམས་ཅད་བསྒྲུབ་པར་ནུས་པའོ། །ཡང་གསུམ་སྟེ་ཆོས་ཀྱི་དབྱིངས་རྣམ་པར་དག་པ་དང་། ཡེ་ཤེས་ཆེན་པོའི་གཟུགས་བརྙན་དུ་གྱུར་པ། རྣམ་པར་ཐར་པའི་སྒོ་མཐའ་ཡས་པ་མཚོན་པའི་གནས་སུ་གྱུར་པ་ལས་དང་དངོས་གྲུབ་ཐམས་ཅད་པའོ། །དེ་ལ་ཅིའི་ཕྱིར་ཕྱག་རྒྱ་ཞེས་བྱ་ཞེ་ན། མུ་དྲ་ཞེས་བྱ་བ། མུ་དྲ་ན་ད་མུ་དྲ་སྟེ། འདེབས་ཤིང་མཚོན་པས་ན་ཕྱག་རྒྱ་ཞེས་བྱའོ། །གང་ལ་ཇི་ལྟར་འདེབས་ཤེ་ན། རྣལ་འབྱོར་ཕྱི་པའི་ཚུལ་ལས་ནི། །ཇི་ལྟར་རྒྱལ་པོ་རང་རིག་རྒྱས། །རྒྱལ་པོ་རྩིགས་ནི་བཏབ་པ་ལྟར། །བདག་ཉིད་ཆེན་པོ་མཚན་མའི་གཟུགས། །སྐྱེ་བོ་ཀུན་ལ་དེ་བཞིན་འདེབས། །ཞེས་གསུངས་ཏེ། བདག་གི་དེ་ཁོ་ན་ཉིད་ལ་ལྷའི་མཚན་མས་གདབ་བོ་ཞེས་འབྱུང་ངོ་། །རྣལ་འབྱོར་ཆེན་པོའི་ཚུལ་ལས་ནི། །ཐམས་ཅད་ཀུན་ལ་དེ་བཞིན་འདེབས། །ཞེས་གསུངས་ཏེ། ལྷུན་གྱིས་གྲུབ་པའི་ཕྱག་རྒྱ་ལས་ལྷག་པའི་ཕྱག་རྒྱ་འཕྲུལ་པ་ཙམ་ལ་བྱ་བར་བཞེད་དོ། །རྒྱུ་ཅིའི་ཕྱིར་འདེབས་པ་ནི། བདེ་བར་གཤེགས་པ་དང་འགྲོ་བ་ཐམས་ཅད་དབྱེར་མེད་པས་བྱང་ཆུབ་ཀྱི་སེམས་བདེ་བ་ཆེན་པོ་སྙིང་ལ་གནས་པ་དང་། མངའ་དབང་ཆེན་པོ་བརྙེས་པའི་ཕྱིར་དང་འགྲོ་དོན་འདི་ལ་བརྩོན་པ་རྣམས་ཀྱི་ཕྱིིར་འདེབས་པར་བྱེད་དོ་ཞེས་ནང་པའི་ཚུལ་ལས་བཞེད་དོ། །རྣམ་པ་གཅིག་ཏུ། མུ་དྲ་ན་ད་མུ་དྲ་སྟེ། དགྱེས་པ་བསྐྱེད་པས་ན་ཕྱག་རྒྱ་ཞེས་བྱ་སྟེ། བྱ་བ་དང་རྣལ་འབྱོར་ཕྱི་པའི་ཚུལ་ལྟར་ན་ཡང་། ཕྱག་རྒྱ་ནི་མོའི་རྟགས་དང་ཡང་ལྡན་པ་ཡིན་པས། ལྷ་མོ་རྣམས་སྦས་པའི་སྐུ་སྟེ། གང་ཞིག་ལ་འདི་བསྟན་པར་གྱུར་ན་དམ་ཚིག་གི་ངོ་བོ་ཉིད་ཀྱིས་དགྱེས་པ་བསྐྱེད་པར་བཤད་དོ། །རྣལ་འབྱོར་ཆེན་པོའི་ཚུལ་ལྟར་ན་ཡང་བུད་མེད་ཉིད་ལ་ཕྱག་རྒྱའི་སྒྲར་བཤད་དེ། དེ་ལྟར་ན་ཕྱག་རྒྱ་བུད་མེད་ཀྱི་སྒྲར་བཤད་པ་དང་། འདི་གཉིས་ལ་དགྱེས་པ་བསྐྱེད་པའི་མཚན་ཉིད་དུ་རང་བཞིན་བྱེ་བྲག་ཏུ་གྱུར་པ་མེད་དེ། འོན་ཀྱང་འཇིག་རྟེན་ན་ས་བླ་དང་ས་སྟེང་ན་གནས་པའི་ཚུལ་གཟུང་ནས། ཕྲ་བ་དང་དྭངས་མ་ལ་སྤྱོད་པ་དང་། རགས་པ་དང་སྙིགས་མ་ལ་སྤྱོད་པའི་ཚུལ་བཟུང་ནས་བསྟན་པ་ཙམ་དུ་ཟད་དོ། །ཡང་མུ་ནི་གྲོལ་བ་དང་། ད་ར་ནི་བཅིངས་པ་སྟེ། བདག་དང་གཞན་འཆིང་བ་དང་གྲོལ་བའི་ལས་བྱེད་པའམ། སོ་སོར་བཅིངས་པ་ལས་འགྲོལ་བར་བྱེད་པའི་ལས་བྱེད་པས། བཅིངས་གྲོལ་གྱི་དོན་གྱིས་ཕྱག་རྒྱ་ཞེས་བྱའོ། །ཡང་མུ་ནི་ཆེན་པོ། ད་ར་ནི་འཇོམས་པ་སྟེ། དོན་ཆེན་པོ་ལ་གེགས་བྱེད་པ་རྣམས་འཇོམས་པའམ། བགེགས་ཆེན་པོར་གྱུར་པ་མི་ཤིགས་པའི་གྲོང་ཁྱེར་ཆེན་པོ་འཇོམས་པར་བྱེད་པས་འཇོམས་པས་ན་ཕྱག་རྒྱ་ཞེས་བྱའོ། །ཡི་གེ་གསུམ་པོ་སོ་སོར་ཕྲལ་ཏེ་བཤད་ན། མུ་ནི་མུ་ལ་སྟེ་རྩ་བ་ལ་འཇུག་པས་ཕྱག་རྒྱས་བསྲུང་ན་དམ་ཚིག་མི་ཉམས་པས་དམ་ཚིག་གི་རྩ་བ་ཞེས་བཤད་དོ། །ད་ནི་ཧེ་དུ་སྟེ་དབུ་རྒྱན་ལ་སོགས་པའི་རྒྱས་བཏབ་ན་དབང་དང་ལྡན་པར་འགྱུར་བས་དབང་བསྐུར་བའི་རྒྱུ་ཞེས་བཤད་དོ། །ར་ནི་སྠི་ར་སྟེ་བརྟན་པའི་དོན་ལ་འཇུག་པས་ཕྱག་རྒྱས་བྱིན་གྱིས་བརླབས་ན་ལུས་བརྟན་ཞིང་བགེགས་ལ་སོགས་པས་མི་ཕྱེད་པར་འགྱུར་བས་ལུས་བརྟན་པར་བྱེད་པའི་ཕྱིར་ཕྱག་རྒྱ་ཞེས་བྱའོ། །དེ་ལྟར་ཡང་གསུངས་པ། འདི་ནི་དམ་ཚིག་རྩ་བ་སྟེ། །དབུ་རྒྱན་བཅིངས་པ་རྒྱུ་ཡི་མཆོག །གང་གི་ལུས་ཀུན་བརྟན་པས་ན། །ཕྱག་རྒྱ་ཞེས་ནི་བྱ་བ་ཡིན། །ཞེས་གསུངས་པ་ལྟ་བུའོ། །འདི་ནི་ཕྱག་རྒྱ་སྤྱིའི་ངེས་པའི་ཚིག་གོ། །དབྱེ་བ་ནི། མཚོན་པར་བྱ་བ་དང་བྱེད་པའི་སྒོ་ནས་དབྱེ་བ་བྱས་ན་ནི། དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོ་ཞེས་བྱ་བར་ཕྱེ་བ་ནི་མཚོན་པར་བྱེད་པའི་སྒོ་ནས་རྣམ་པར་གཞག་པའོ། །རང་བཞིན་གྱིས་གྲུབ་པའི་ཕྱག་རྒྱ་ཞེས་པའམ། ལས་ཀྱི་ཕྱག་རྒྱ་ཞེས་བྱ་བར་གྲགས་པ་བུད་མེད་ཀྱི་ལུས་ལ་འཇུག་པ་དང་། ཡེ་ཤེས་ཀྱི་ཕྱག་རྒྱ་ཞེས་བྱ་བ་ཡིད་ཀྱིས་སྤྲུལ་པའི་ལྷ་མོ་ལ་གྲགས་པ་དང་། ཕྱག་རྒྱ་ཆེན་པོ་ཞེས་བྱ་བ་ཆོས་ཀྱི་དབྱིངས་མཚན་མ་མེད་པ་ལ་འཇུག་པ་རྣམས་ནི། མཚོན་པར་བྱ་བའི་སྒོ་ནས་རྣམ་པར་གཞག་པའོ། །དེ་ལ་སོ་སོའི་ངེས་པའི་ཚིག་ནི་དམ་ཚིག་གི་ཕྱག་རྒྱ་ཞེས་པའམ། དམ་ཚིག་ནི་བདག་ཉིད་ཆེན་པོ་རྣམས་ཀྱི་ཐུགས་གསང་བ་ཡེ་ཤེས། ཕྱག་རྒྱ་ནི་དེའི་མཚན་མར་གྱུར་པ་རྣམས་ཏེ། དེ་བས་ན་འདི་ནི་ཕན་ཚུན་ཐ་དད་པའི་དོན་དུ་བཤད་པའོ། །ཡང་ན་འདི་ལ་ལྷ་མི་འདའ་བའི་མཚན་ཉིད་ཀྱི་དམ་ཚིག་དང་ལྡན་པ་ཡིན་པས། འདི་གཉིས་ཆོས་དང་ཆོས་ཅན་དུ་བཤད་པའོ། །ཡང་ཕྱག་རྒྱ་གང་ཡིན་པ་དེ་ཉིད་མི་འདའ་བའི་མཚན་ཉིད་ཀྱང་དེ་ཡིན་པས་དེ་སྐད་ཅེས་བྱ་སྟེ། བདག་ཉིད་གཅིག་པར་བཤད་པའོ། །ཚུལ་འདི་ལྟར་ཆོས་ཀྱི་ཕྱག་རྒྱ་ལ་སོགས་པ་ལ་ཡང་སྦྱར་བར་བྱའོ། །དབྱེ་བ་གཞན་ཡང་མཚན་མ་མེད་པའི་ཕྱག་རྒྱ་དང་། མཚན་མ་དང་བཅས་པ་ཞེས་བྱ་བའམ། ཇི་སྐད་དུ་གྲགས་པའི་ཕྱག་རྒྱ་རྣམས་དང་། ལྷུན་གྱིས་གྲུབ་པའི་ཕྱག་རྒྱ་ཞེས་པའམ། ཀུན་ཏུ་བཟང་པོ་ཞེས་བྱ་བར་གྲགས་པའི་ཕྱག་རྒྱ་རྣམས་ཀྱང་གཞུང་སོ་སོའི་སྐད་དུ་དབྱེ་བར་བྱའོ། །ཅིའི་ཕྱིར་བདག་ཉིད་ཆེན་པོ་རྣམས་ཀྱིས་རྒྱུད་རྣམས་སུ་ཕྱག་རྒྱ་བསྟན་པར་མཛད་ཅེ་ན། སངས་རྒྱས་ཀྱི་མཛད་པ་བསྒྲུབ་པ་ལ་སངས་རྒྱས་བས་ཀྱང་ཕྱག་རྒྱ་ལྷག་པར་བསྟན་པའི་ཕྱིར་རོ། །སྔགས་དང་ཕྱག་རྒྱ་ཞེས་བྱ་བ་རྣམ་པ་འདི་གཉིས་ཀྱང་གཅིག་གིས་ཁྱབ་པར་བསྟན་པ་ཡིན་མོད་ཀྱི། ཁྱད་པར་ཅུང་ཟད་ཙམ་དུ་ན་ཕྱག་རྒྱ་ནི་གཟུགས་ཀྱི་མཚན་མ་གཙོར་བྱེད་པ་ཡིན་ལ། གསང་སྔགས་ནི་ངག་གི་བདེན་ཚིག་གཙོར་བྱས་ཏེ་བསྟན་པ་ཡིན་ནོ། །འདི་གཉིས་ཀ་ལ་ཡང་གཞུང་དང་གང་ཟག་སོ་སོའི་རྟོག་པའི་དབང་གིས་བརྟག་པ་རྣམ་པ་དུ་མ་ལ་འཇུག་པར་བསྟན་ཏེ། དེ་ལ་དང་པོ་ནི་རྣམ་པར་སྨིན་པའི་ལུས་དང་ངག་གི་ཕྱེ་བའི་བྱེ་བྲག་ཞིག་གོ་ཞེས་བརྟག་པ་འཇུག་ཏུ་རུང་ངོ་། །དེ་བཞིན་དུ་གཉིས་པ་ནི་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་མཚན་མ་དང་བརྡར་གྱུར་པའོ། །ཞེས་བརྟག་པ་འཇུག་ཏུ་རུང་ངོ་། །གསུམ་པ་ནི་མཚན་མ་འདི་ཉིད་ལས་དང་དངོས་གྲུབ་ཐོབ་པར་བྱེད་པའི་ནུས་པ་ཅན་ནོ་ཞེས་བྱའོ། །བཞི་པ་ནི་འདི་ཉིད་ལ་དེ་བཞིན་གཤེགས་པའི་བྱིན་གྱིས་བརླབས་ཀྱིས་འཕྲུལ་པ་དང་། ལས་ཀྱི་དབང་གིས་སྣང་བ་གཉིས་འདྲེས་ནས་སྣང་བའོ། །ཞེས་བྱའོ། །ལྔ་པ་ནི་མཚན་མ་བྱིན་རླབས་དང་ལྡན་པ་འདི་ཉིད་ལ་དམ་ཚིག་ཅན་གྱི་སྐྱེ་བོ་རྣམས་ཀྱིས་ལྷ་ཉིད་དུ་ཀུན་ཏུ་བརྟག་པ་ཞེས་བྱའོ། །དྲུག་པ་ནི་རྒྱལ་བ་རྣམས་ཀྱི་ཡེ་ཤེས་ཆེན་པོ་དེ་ཉིད་ཐུགས་རྗེ་དང་སྨོན་ལམ་གྱི་དབང་གིས་མཚན་མར་བྱིན་གྱིས་བརླབས་ཤིང་གྱུར་པ་སྟེ། དཔེར་ན་བག་ཆགས་ཀྱི་དབང་གིས་སེམས་ཉིད་ཡུལ་དང་ལུས་སུ་སྣང་བ་ལྟ་བུ་ཞེས་བྱ་བའི་བརྟག་པ་འཇུག་ཏུ་རུང་ངོ་། །ཚུལ་འདི་ལྟ་བུ་རྣམས་ལས་མཆོག་ཏུ་གྱུར་པ་ནི་དྲུག་པ་འདི་ཉིད་ཡིན་པར་ཤེས་པར་བྱའོ། །ཏིང་ངེ་འཛིན་ནི། སྔགས་ཀྱི་སྐབས་སུ་ལྷའི་རྣལ་འབྱོར་བསྒོམ་པ་ལ་བྱ་སྟེ། དེ་ཡང་ཆོས་དབྱིངས་རྣམ་པར་དག་པ་དང་། དོན་ལ་ཕྱིན་ཅི་མ་ལོག་པའི་ཡེ་ཤེས་དང་། དེ་དག་གི་དབང་གིས་སྣང་བའི་གཟུགས་ཀྱི་སྐུ་ཆ་ཤས་དང་བཅས་པ་ལ་ལྷ་ཞེས་བྱ་བའི་སྒྲར་བརྗོད་པ་ཡིན་ལ། དེ་ལྟ་བུའི་དོན་ལ་སེམས་རྩེ་གཅིག་ཏུ་བྱེད་པའི་མཚན་ཉིད་ནི་ཏིང་ངེ་འཛིན་ཏེ། དེ་བས་ན་མཚན་མ་མེད་པའི་དོན་ལ་སེམས་རྩེ་གཅིག་པའང་རུང་། མཚན་མ་དང་བཅས་པའི་དོན་ལ་རྩེ་གཅིག་ཀྱང་རུང་། ལས་དང་དངོས་གྲུབ་འགྲུབ་པར་འགྱུར་བའི་རྒྱུའི་གཙོ་བོ་ཡིན་པར་བཤད་དོ། །མཚན་མ་དང་བཅས་པའི་རྣལ་འབྱོར་ཡང་དོན་བསྡུ་ན། བྱིན་གྱིས་བརླབས་པའི་རྣལ་འབྱོར་དང་། ཡོངས་སུ་བརྟགས་པའི་རྣལ་འབྱོར་དང་། རྫོགས་པའི་རྣལ་འབྱོར་དང་གསུམ་དུ་འདུས་པར་བཤད་དེ། འདི་གསུམ་ཡང་ལྷ་རྒྱན་གཅིག་པའི་རྣལ་འབྱོར་ཅིག་ལ་ཡང་ཚང་ལ། རྒྱུད་སོ་སོའི་གྲུབ་པའི་མཐའ་ཡིས་དམིགས་པ་སོ་སོར་འདོད་པ་ཡིན་ནོ། །དེ་ལ་བྱིན་གྱིས་བརླབས་པའི་རྣལ་འབྱོར་ནི་བདག་གི་དེ་ཁོ་ན་ཉིད་ལ་ལྷའི་དེ་ཁོ་ན་ཉིད་ཀྱིས་བྱིན་གྱིས་བརླབས་ཤིང་བསྒོས་ན། ལྕགས་ཀྱི་རིགས་ལ་གསེར་འགྱུར་གྱི་རྩི་བཏང་བ་བཞིན་དུ་འགྱུར་རོ། །ཡོངས་སུ་བརྟགས་པའི་རྣལ་འབྱོར་ནི་གསེར་ལ་སོགས་པ་ལེགས་པར་བཞུ་བ་ལས་སྐུ་གཟུགས་ལ་སོགས་པ་བྱེད་པ་བཞིན། བྱང་ཆུབ་ཀྱི་སེམས་དག་པ་ལས་གཟུགས་ཀྱི་སྐུར་བསྐྱེད་པར་འདོད་དོ། །རྫོགས་པའི་རྣལ་འབྱོར་ནི་ཆུ་དྭངས་པའི་ནང་དུ་གཟུགས་བརྙན་འཆར་བ་རྩོལ་བ་མེད་པ་བཞིན། རང་བཞིན་དག་པའི་རྟོགས་པའི་རྣལ་འབྱོར་པས་ཏིང་ངེ་འཛིན་སྐད་ཅིག་མས་རྫོགས་པར་འཕྲུལ་ལོ། །རྣལ་འབྱོར་འདི་གསུམ་གྱིས་ནི་གསང་སྔགས་མཐའ་དག་བསྡུས་པར་ཤེས་པར་བྱའོ། །འདིའི་གཞིས་ནི་མཚན་ཉིད་ཀྱི་ཐེག་པ་གསུམ་ཡང་བསྡུས་པ་ཡིན་ཏེ། འདི་ལྟར་རྣམ་པར་སྣང་མཛད་སྒྱུ་འཕྲུལ་དྲྭ་བ་ལས། དང་པོ་དམ་ཚིག་བྱིན་བརླབ་པ། །བརྟགས་པ་རྣལ་འབྱོར་སྤྱོད་པའོ། །དབུ་མ་རྫོགས་པར་བྱ་བ་དག །འདི་ནི་རྣལ་འབྱོར་ཆོ་གར་བཤད། །ཅེས་གསུངས་སོ། །དེ་ལ་དང་པོའི་ཚིག་ནི་གཞུང་ལུགས་ལ་འཇུག་པས་གཞུང་ལུགས་དང་པོ་སྟེ། ཉན་ཐོས་པའི་གཞུང་ངོ་། །དེ་དང་མཐུན་པ་བྱིན་གྱིས་བརླབས་པའི་རྣལ་འབྱོར་ཏེ། ཇི་ལྟ་ཞེ་ན། འདིར་བདག་གི་དེ་ཁོ་ན་ཉིད་ལ་བདག་ནི་ཕུང་པོ་ལྔ་བློས་རྣམ་པར་མ་ཕྱེ་བའོ། །དེ་ཁོ་ན་ཉིད་ནི་མུ་སྟེགས་ཅན་གྱིས་བདག་དང་བདག་གི་ལ་སོགས་པ་ཀུན་ཏུ་བརྟགས་པས་སྟོང་པ། ཕུང་པོ་ཁམས་དང་སྐྱེ་མཆེད་ཀྱི་ཆོས་ཙམ་མེད་པར་སྐུར་པ་གདབ་ཏུ་མི་རུང་བ་འདི་ནི་བདག་གི་དེ་ཁོ་ན་ཉིད་དོ། །དེ་ནི་བྱིན་གྱིས་བརླབ་ཏུ་རུང་བའི་གཞི་སྟེ། དེ་ལ་བྱིན་གྱིས་རློབ་པར་བྱེད་པ་ནི་ལྷའི་དངོས་པོའོ། །དེ་ཡང་ཆོས་ཉིད་དག་པ་དང་། རྣམ་པར་མི་རྟོག་པའི་ཡེ་ཤེས་དང་། རྣམ་པར་རྟོག་པ་དང་བཅས་པའི་ཡེ་ཤེས་དང་། སྒྲ་དང་། ཡི་གེ་དང་། གཟུགས་ལ་སོགས་པའི་ལྷར་རྟོགས་པ་རྣམས་སོ། །འདིར་ཕྱི་རོལ་གྱི་གཟུགས་ཀྱི་བློ་མི་གཏོང་བས་གཞུང་ལུགས་དང་པོ་ཉན་ཐོས་དང་མཐུན་པ་ཡིན་ཏེ། དེ་ལྟ་བུས་འདུལ་བའི་གང་ཟག་གི་དབང་དུ་གསུངས་པའི་ལྷའི་རྣལ་འབྱོར་སྒོམ་པའི་ཐབས་ཡིན་ནོ། །ཡོངས་སུ་བརྟགས་པའི་རྣལ་འབྱོར་ནི་རྣལ་འབྱོར་སྤྱོད་པ་བ་དང་སྒོ་མཐུན་པ་ཡིན་ཏེ། འདི་ལྟར་བདག་གི་དེ་ཁོ་ན་ཉིད་ཀྱང་གཟུང་བ་དང་འཛིན་པར་ཀུན་ཏུ་བརྟགས་པས་སྟོང་པ་སེམས་དང་སེམས་ལས་བྱུང་བ་རང་རིག་པ་གང་གིས་ཀྱང་གཟུང་བར་བྱ་བ་མ་ཡིན་པ་གང་ལ་ཡང་འཛིན་པར་བྱེད་པ་མ་ཡིན་པ། སྐད་ཅིག་མ་རྒྱུན་འབྲེལ་པར་གནས་པ་འདི་ཙམ་མེད་པར་སྐུར་པ་གདབ་ཏུ་མི་རུང་སྟེ། དེ་ཡང་འདི་ལྟར་གྱུར་ན་ནི་འཕགས་པ་ཉིད་དང་ཁྱད་མེད་པ་ཡིན་མོད་ཀྱི། འོན་ཀྱང་སོ་སོའི་སྐྱེ་བོའི་སྐབས་སུ་ཡང་འདི་ལྟར་རྟོགས་ཤིང་གོམས་པ་ལས་རིམ་གྱིས་ལྷའི་སྐུར་བསྐྱེད་པར་བྱའོ། །འདི་སེམས་དང་ཡེ་ཤེས་རང་སྣང་བ་མ་གཏོགས་པར་ཡུལ་གུད་དུ་མི་དམིགས་པས་རྣལ་འབྱོར་སྤྱོད་པ་དང་མཐུན་པ་སྟེ། དེ་ལྟར་འདུས་པའི་དབང་དུ་གསུངས་པ་ནི་སྔ་མ་བཞིན་ནོ། །རྫོགས་པའི་རྣལ་འབྱོར་ནི་དབུ་མ་དང་སྒོ་མཐུན་པ་སྟེ། བདག་གི་དེ་ཁོ་ན་ཉིད་ཀྱང་བརྟགས་པ་ཙམ་སྟེ། དེ་ལ་བདག་ནི་ཕུང་པོ་ལྔ་ལ་བློས་མ་ཕྱེ་བ་ཙམ་མོ། །དེའི་དེ་ཁོ་ན་ཉིད་ནི་སྤྲོས་པ་ཐམས་ཅད་ཡོངས་སུ་ཞི་བ་ཙམ་སྟེ། འདི་ལྟར་རྟེན་གང་ཡང་དམིགས་པ་མེད་དོ། །དེ་ལས་སྐུ་དང་ཡེ་ཤེས་ཀྱི་དཀྱིལ་འཁོར་སྣ་ཚོགས་སུ་འཕྲུལ་ཡང་རྟེན་མེད་ཅིང་ངོ་བོ་ཉིད་མེད་པ་སྟེ། འོན་ཀྱང་གདུལ་བྱ་རྣམས་ཀྱི་དབང་ལ་སྣང་བ་ནི་ཆུ་ཟླ་དང་འདྲ་སྟེ། ཆུ་ཟླ་ནི་ཆུ་ལ་ཟླ་བའི་རང་བཞིན་ཡོད་པ་མ་ཡིན། ཟླ་བ་ཉིད་ལས་འོངས་པ་མ་ཡིན་ཏེ། འོན་ཀྱང་འཇིག་རྟེན་པའི་མིག་གི་བློ་ལ་ཆུ་དྭངས་པར་སྣང་བ་དང་། ནམ་མཁའ་ལ་ཟླ་བ་གསལ་བ་གཉིས་ཡོད་ན། དེའི་དབང་གིས་ཆུའི་ནང་ན་ཟླ་བ་ཡོད་པ་དང་འདྲ་བར་སྣང་ངོ་། །དེ་བཞིན་དུ་གདུལ་བྱ་རྣམས་ཀྱི་བློ་ལ་འཁྲུལ་པའི་བག་ཆགས་མ་ཟད་ཀྱི་བར་དུ་སྣང་བ་མི་ལྡོག་སྟེ། དེའི་དབང་གིས་དཀར་པོའི་བག་ཆགས་སྒྲིབ་པ་རིམ་གྱིས་དག་པའི་མཚན་ཉིད་རྒྱུད་དང་བ་དང་། དད་པས་དཀོན་ཅོག་བསྟེན་པར་སྣང་བའི་དབང་དང་། རྒྱལ་བ་རྣམས་ཀྱིས་ཀྱང་སྨོན་ལམ་དང་ཐུགས་རྗེ་ལྷུན་གྱིས་གྲུབ་པར་མཛད་པར་སྣང་བ་མངའ་བའི་དབང་གིས་གདུལ་བྱ་རྣམས་ཀྱི་རྒྱུད་ལ་ཇི་ལྟར་འཚམས་པ་བཞིན་དུ་སྣང་བ་འབྱུང་ངོ་། །འདི་ལྟར་ལྷུན་གྱིས་གྲུབ་ན་ནི་སངས་རྒྱས་ཉིད་དང་ཁྱད་པར་མེད་པར་གྱུར་པ་ཡིན་མོད་ཀྱི། འོན་ཀྱང་ལས་དང་པོ་པའི་རྣལ་འབྱོར་པས་ཀྱང་དོན་འདི་ལྟ་བུ་རྟོགས་ཤིང་བསྒོམས་པའི་ངང་ལས་སྤྲུལ་པ་སྣ་ཚོགས་འགྲོ་བའི་དོན་དུ་ཇི་ལྟར་འཚམས་པ་བཞིན་དུ་སྤྲུལ་པར་བྱ་སྟེ། དེ་ལ་རྟེན་དང་ངོ་བོ་ཉིད་གང་ཡང་གཟུང་བར་མི་བྱའོ། །འདི་དག་ནི་གྲུབ་པའི་མཐས་ཕྱེ་བའི་ཏིང་ངེ་འཛིན་གྱི་བྱེ་བྲག་ཡིན་ནོ། །དགོས་པ་སོ་སོའི་སྐབས་ཀྱི་དབྱེ་བ་ནི། ཚུལ་བཞིན་དུ་སྒྲུབ་པའི་གང་ཟག་གཅིག་ལ་ཡང་སྤྱོད་པ་གསུམ་གྱིས་བསྡུས་པ་དང་། ཐ་ལམ་པའི་སྤྱོད་ལམ་གྱི་བྱེ་བྲག་གིས་དེ་དག་གི་ཏིང་ངེ་འཛིན་ཡང་སོ་སོ་ཡིན་ཏེ། དེ་ལ་སྤྱོད་པ་གསུམ་ནི་དང་པོ་འཇུག་པའི་སྤྱོད་པ་དང་། བར་དུ་དངོས་གྲུབ་སྒྲུབ་པའི་སྤྱོད་པ་དང་། མཐའ་མར་གྲུབ་པའི་སྤྱོད་པའོ། །དེ་ལ་འཇུག་པའི་སྤྱོད་པ་ནི། དང་པོ་རྡོ་རྗེ་སློབ་དཔོན་ཡོངས་སུ་གཟུང་བ་དང་། དེས་བསྟན་པའི་གསང་བའི་དཀྱིལ་འཁོར་དུ་འཇུག་ཅིང་དབང་ནོད་པ་དང་། དེའི་ཚེ་ཐེག་པ་ཆེན་པོའི་དམ་ཚིག་གི་སྡོམ་པ་བཟུང་སྟེ་དམ་ཚིག་ཅན་དུ་བྱས་པ་དང་། ཇི་ལྟར་བསྒོམ་ཞིང་བསྒྲུབ་པ་ལ་སོགས་པའི་མན་ངག་ཐམས་ཅད་མནོས་ཏེ་མན་ངག་ཅན་དུ་བྱ་བ་དང་། དེ་ནས་ཀྱང་བརྩོན་པ་མི་འདོར་བར་བཀའ་བཞིན་བྱེད་པའི་མཚན་ཉིད་རྣམས་ཡིན་ནོ། །སྒྲུབ་པའི་སྤྱོད་པ་ནི་བསྙེན་སྒྲུབ་ཀྱི་ཡན་ལག་ཏུ་གཏོགས་པ་རྣམས་སོ། །གྲུབ་པའི་སྤྱོད་པ་ནི་ལས་ཀྱི་སྤྲོས་པ་ཐམས་ཅད་དོ། །དེ་དག་གི་དབང་གིས་ཕྱེ་བའི་ཏིང་ངེ་འཛིན་སྣ་ཚོགས་སུ་ཤེས་པར་བྱའོ། །ངེས་པའི་ཚིག་ནི། ས་མ་དྷི་ཞེས་བྱ་བ་མཚུངས་པའི་བློ་སྟེ་སེམས་རྩེ་གཅིག་པའི་མཚན་ཉིད་དོ། །མཆོད་པ་ཞེས་བྱ་བ་ནི། བཀུར་བའི་གནས་སུ་གྱུར་པ་རྣམས་ལ་སྒོ་གསུམ་ནས་བཀུར་ཞིང་མཆོད་པ་དང་། རྫས་ཀྱི་སྒོ་ནས་ཀྱང་མཉེས་པར་བྱས་པའི་ལས་ཀྱི་བདག་ཉིད་དེ། འདིའི་དབྱེ་བ་ནི། འཇིག་རྟེན་དང་འཇིག་རྟེན་ལས་འདས་པའམ། དོན་དམ་པ་དང་ཀུན་རྫོབ་བམ། བླ་ན་ཡོད་པ་དང་བླ་ན་མེད་པའམ། རང་གི་ཡན་ལག་ཏུ་གཏོགས་པའི་ཕྱི་རོལ་གྱིའམ། ནང་དང་ཕྱི་ལ་སོགས་པའི་དབྱེ་བས་སྤྱིར་དུ་མར་གྲགས་མོད་ཀྱི། རྒྱུད་འདི་ལས་ནི། རྫས་ཀྱི་མཆོད་པ་དང་། ལས་རྣམ་བཞིའི་སྦྱིན་སྲེག་གི་མཆོད་པ་དང་། ཏིང་ངེ་འཛིན་དང་། སྦྱོར་སྒྲོལ་བདུད་རྩི་དང་བཅས་པའི་མཆོད་པ་དང་། རྡོ་རྗེ་གླུའི་སྒོ་ནས་བསྟོད་པའི་མཆོད་པ་ཙམ་དུ་གསུངས་ཏེ། དེ་དག་འདིར་བསྟན་པའི་ནང་འདུས་པར་ཤེས་པར་བྱའོ། །ངེས་པའི་ཚིག་ནི། པཱུ་ཛ་ཞེས་བྱ་བ་པཱུ་ར་ན་ར་པཱུ་ར་ན་ར་པྲི་ཡང་ཛ་ཏ་སྟེ་ཡང་དང་ཡང་དགྱེས་པ་བསྐྱེད་པས་མཆོད་པ་ཞེས་བྱའོ། །པུར་བ་ཛ་ཏ་སྟེ་སྔོན་དུ་བསྐྱེད་པར་བྱ་བའི་དོན་ནོ། །དེ་ནི་དགེ་བའི་ལས་ཐམས་ཅད་ཀྱི་སྔོན་དུ་འགྲོ་བའི་ཕྱིར་རོ། །པཱུ་ཛ་རྦ་གོ་ར་རྦ་རྠ་སྟེ། མཆོད་པའི་དོན་ནི་བཀུར་བའི་དོན་ནོ། །དེ་ལྟར་བསྟན་པའི་དངོས་པོ་དགུ་པོ་འདི་དག་གིས་ནི་རྒྱུད་ཐམས་ཅད་ཀྱང་བསྡུས་པ་ཡིན་ལ། འདི་ནས་ཀྱང་འདི་དག་ཙམ་སྟོན་པར་ཤེས་པར་བྱའོ། །མཐའ་མ་རྒྱུད་ཡོངས་སུ་གཏད་པ་ནི། རྒྱུད་ཡུན་དུ་གནས་པར་བྱ་བའི་ཕྱིར་ཏེ། དེ་ལྟར་ན་གླེང་གཞི་ནི་རྒྱུ། གླེང་བསླང་བ་ནི་རྐྱེན། གང་བཤད་པའི་ཆོས་ཀྱི་དངོས་པོ་ནི་འབྲས་བུ། ཡོངས་སུ་གཏད་པ་ནི་དེ་ཡོངས་སུ་མི་ཉམས་པར་ཡོངས་སུ་བསྲུང་བའི་མཚན་ཉིད་དེ་འདི་ཙམ་གྱིས་གཞུང་ཡོངས་སུ་རྫོགས་པའི་ཕྱིར་རྒྱུད་ཀྱི་ལྡང་ཚད་བསྟན་པ་ཡིན་པར་ཤེས་པར་བྱའོ། །ད་ནི་རྒྱུད་ཀྱི་དགོས་འབྲེལ་བཤད་པར་བྱ་སྟེ། དེ་ཡང་ཉན་པ་པོ་རྟོགས་པའི་བློ་སྔོན་དུ་གཏོང་བ་དག །དགོས་འབྲེལ་ཡོད་པར་མཐོང་ན་ནི་ཉན་ཅིང་བསྒྲུབ་པའི་ཡན་ལག་ཏུ་འགྱུར་ལ། མ་མཐོང་ན་ནི་མི་འགྱུར་རོ། །དེ་ཡང་ལེགས་པར་བསྒྲུབས་པས་ཁོང་དུ་ཆུད་པར་འགྱུར་ཏེ། དེ་བས་ན་དེ་དག་ལེགས་པར་བསྙད་པ་བྱའོ། །དེ་ཡང་འབྲེལ་བ་བསྒྲུབ་པར་བྱ་བ་ཡང་བསྒྲུབ་ཐབས་ལ་སོགས་པ་གཞུང་ཚད་མ་ཡིན་ནམ་མ་ཡིན་ཐེ་ཚོམ་ཟ་བ་རྣམས་ལ་ནི། བཀའ་དང་འབྲེལ་བར་བསྒྲུབ་པར་བྱ་བ་ཡིན་ནོ། །གཞུང་གིས་དགོས་པ་བསྒྲུབ་པར་མི་ནུས་སམ་ཞེས་ཐེ་ཚོམ་ཟ་བ་རྣམས་ལ་ནི། དགོས་པ་དང་འབྲེལ་བ་བསྒྲུབ་པར་བྱ་བ་ཡིན་ནོ། །དོན་གྱི་ནུས་པ་ལ་ཐེ་ཚོམ་ཟ་བ་རྣམས་ལ་ནི། དོན་གྱི་དགོས་འབྲེལ་བསྒྲུབ་པར་བྱ་བ་ཡིན་ནོ། །གཞུང་དབུ་ཞབས་ཀྱིས་དོན་ཇི་ལྟར་སྟོན་ཅིང་བསྒྲུབ་པ་ལ་ཐེ་ཚོམ་ཟ་བ་རྣམས་ལ་ནི། རྒྱུད་ཀྱི་འབྲེལ་བ་བསྒྲུབ་པར་བྱ་བ་ཡིན་ནོ། །གཞུང་ཉིད་ཐམས་ཅད་མཁྱེན་པས་གསུངས་པའི་བཀའ་ཡིན་ནམ་མ་ཡིན་ཐེ་ཚོམ་ཟ་བ་རྣམས་ལ་ནི། གཞུང་སྤྱིའི་འབྲེལ་བ་བསྒྲུབ་པར་བྱ་བ་ཡིན་ནོ། །སྟོན་པ་དང་དེའི་ཞལ་ནས་གསུངས་པའི་རྒྱུད་གཉིས་གཅིག་པའམ་ཐ་དད་པ་ལ་ཐེ་ཚོམ་ཟ་བ་རྣམས་ལ་ནི། སྟོན་པ་དང་རྒྱུད་དུ་འབྲེལ་བ་བསྒྲུབ་པར་བྱ་བ་ཡིན་ནོ། །དེ་ལྟར་འབྲེལ་པ་དེ་རྣམས་ཀྱིས་དོན་ཕྱིན་ཅི་མ་ལོག་པའི་བློ་བསྐྱེད་པ་ནི་དེ་དག་རང་རང་གི་དགོས་པ་ཡིན་ནོ། །མཐར་ཕྱིན་པའི་འབྲས་བུ་ནི་དགོས་པའི་ཡང་དགོས་པ་ཡིན་ཏེ། དེ་དག་གིས་དགོས་འབྲེལ་ལེགས་པར་ཁོང་དུ་ཆུད་པར་བྱའོ། །དེ་ལ་བཀའ་དང་འབྲེལ་པ་ཁོང་དུ་ཆུད་པར་བྱེད་པའི་ཚེ་ནི་དེ་ཉིད་ཀྱི་ཁུངས་སུ་གྱུར་པའི་ལུང་གང་ཡིན་པ་དང་མཐུན་པར་བཤད་ཅིང་ངོ་བསྟན་པས་ཐེ་ཚོམ་སེལ་བར་འགྱུར་རོ། །དགོས་པ་དང་འབྲེལ་པ་བསྒྲུབ་པའི་ཚེ་ན་ནི། གཞུང་གི་བརྗོད་བྱ་དང་གཞུང་ནི་བརྗོད་བྱ་བརྗོད་བྱེད་ཀྱིས་འབྲེལ་བ་ཡིན་ལ། བརྗོད་བྱའི་དོན་རྟོགས་པ་ནི་བརྗོད་པའི་དགོས་པ་ཡིན་པས་དེས་མི་ནུས་པ་ལ་ཐེ་ཚོམ་ཟ་བ་སེལ་ལོ། །དོན་རྟོགས་པའི་སྒོ་ནས་འབྲས་བུ་ཇི་ལྟར་སྒྲུབ་པར་བྱེད་པ་བསྒྲུབ་པའི་ཚེ་ན་ནི། ཕྱིན་ཅི་མ་ལོག་པར་དོན་རྟོགས་པ་ཤེས་པའི་མཚན་ཉིད་ནི་འབྲེལ་བ་སྟེ་རྒྱུའོ། །ཤེས་ནས་གོམས་པར་བྱེད་པ་ནི་དགོས་པ་སྟེ་འཇུག་པའི་མཚན་ཉིད་རྐྱེན་ནོ། །གོམས་པའི་མཐུས་མངོན་དུ་གྱུར་པ་ནི། དགོས་པའི་ཡང་དགོས་པ་སྟེ་འབྲས་བུའི་མཚན་ཉིད་དོ། །འདི་དག་ནི་དོན་གྱི་དགོས་འབྲེལ་བཤད་པའོ། །རྒྱུད་ཀྱི་འབྲེལ་བ་ནི་གསང་བ་འདུས་པ་ལས། ལེའུ་བཅུ་བདུན་པ་ནི་བསྙེན་སྒྲུབ་ཡན་ལག་བཞིས་བསྡུས་ནས་གང་ཟག་གཅིག་གི་ཆ་རྐྱེན་དུ་རུང་བར་འབྲེལ་པར་བཤད་ལ། དེ་ཡང་སློབ་དཔོན་སྤྱིའི་ལས་སུ་གྱུར་བ་རྡུལ་ཚོན་གྱི་དཀྱིལ་འཁོར་གྱི་བྱ་བ་ཡོངས་སུ་རྫོགས་པ་དང་། ཐུན་མོང་དང་མཆོག་གི་དངོས་གྲུབ་བསྒྲུབ་པའི་ཐབས་ཀྱི་ཆོ་ག་དང་སངས་རྒྱས་དང་བྱང་ཆུབ་སེམས་དཔའི་མཛད་པ་དང་ལས་ཀྱི་སྤྲོས་པ་རྣམས་ལ་བསྙེན་སྒྲུབ་བཞིར་འབྲེལ་ཏེ་གསུངས་སོ། །རྒྱུད་ཀྱི་འབྲེལ་པ་དངོས་སུ་མ་བཤད་པའི་རྒྱུད་གཞན་ལས་ཀྱང་དང་པོར་འཇུག་པའི་སྤྱོད་པས་བསྡུས་པ་གཞན་གྱི་དོན་དུ་གཏོགས་པ། སློབ་དཔོན་སྤྱིའི་ལས་སུ་གྲགས་པ། རྡུལ་ཚོན་གྱི་དཀྱིལ་འཁོར་ལ་བརྟེན་ནས་སློབ་མ་དབང་བསྐུར་ཞིང་དམ་ཚིག་དཔོག་པའི་ཆོ་གས་བསྡུས་པའི་འབྲེལ་པ་བསྒྲུབ་པ་དང་། དངོས་གྲུབ་བསྒྲུབ་པའི་སྤྱོད་པས་བསྡུས་པ་རང་གི་དོན་དུ་གཏོགས་པ། སློབ་དཔོན་དང་སློབ་མ་སྤྱིའི་ལས་སུ་གྲགས་པ་རྡུལ་ཚོན་གྱི་དཀྱིལ་འཁོར་ལ་བརྟེན་ཡང་རུང་མ་བརྟེན་ཡང་རུང་སྟེ། བསྙེན་སྒྲུབ་ཀྱི་ཡན་ལག་གི་སྒོ་ནས་ཐུན་མོང་དང་མཆོག་གི་དངོས་གྲུབ་བསྒྲུབ་པའི་ཐབས་ཀྱི་ཆོ་གས་བསྡུས་པའི་འབྲེལ་པ་བསྒྲུབ་པ་དང་། གྲུབ་པའི་སྤྱོད་པས་བསྡུས་པ་ཕལ་ཆེར་གཞན་གྱི་དོན་དུ་གཏོགས་པ་སློབ་དཔོན་དང་སློབ་མ་གང་ཡང་རུང་བ་སྟེ། ཚུལ་བཞིན་དཔྱོད་པ་རྣམས་ཀྱི་མཐའི་ལས་སུ་གྱུར་པ་སངས་རྒྱས་དང་བྱང་ཆུབ་སེམས་དཔའི་མཛད་སྤྱོད་དང་། ལས་རབ་ཏུ་སྤྲོས་པ་ཇི་ལྟར་བསྒྲུབ་པའི་འབྲེལ་བ་རྣམས་སྟོན་ཏེ། དེར་མ་གཏོགས་པའི་འབྲེལ་པ་གཞན་བསྒྲུབ་པ་ནི་མེད་དོ། །རྒྱུད་འདི་ཉིད་ལས་ཀྱང་འབྲེལ་བ་འདི་དག་བསྒྲུབ་པར་བྱ་བ་ཡིན་ཏེ། དེ་དག་ཇི་ལྟར་བསྒྲུབ་པར་བྱ་བ་ནི། འོག་ནས་དེ་དག་སོ་སོའི་སྒོམ་ཁོག་དང་། ལས་ཀྱི་གོ་རིམ་སྟོན་པའི་སྐབས་ནས་ཤེས་པར་བྱའོ། །ད་ནི་གཞུང་ཉིད་ཐམས་ཅད་མཁྱེན་པས་གསུངས་པའི་བཀའ་མ་ཡིན་པར་ཐེ་ཚོམ་ཟ་བ་རྣམས་ལ་ལུང་སྤྱིའི་འབྲེལ་པ་བསྒྲུབ་པར་བྱ་སྟེ། དེ་ལ་དང་པོ་ཉིད་དུ་མུ་སྟེགས་ཅན་ཕྱི་རོལ་གྱི་རིག་བྱེད་སྤྱོད་པ་བ་རྣམས་ན་རེ། དགེ་སྦྱོང་ག་ཏ་མས་བཤད་པའི་ཆོས་ནི་ཐམས་ཅད་མཁྱེན་པས་གསུངས་པ་ཡིན་པར་ངེས་པ་མེད་དོ་ཞེས་རྒོལ་བར་བྱེད་དོ། །དེ་ལ་དཔང་པོ་རྣམ་པ་གསུམ་བརྗོད་པར་བྱ་སྟེ། འདི་ལྟར་ལུང་བསྟན་པའི་དཔང་པོ་དང་། གང་ཟག་གི་དཔང་པོ་དང་། ལུང་འབྲེལ་བ་ཞེས་བྱ་བའི་སྒོ་ནས་རིག་པའི་དཔང་པོའོ། །དེ་ལ་སྤྱིར་དཔང་པོ་ཞེས་བྱ་བ་ནི་ཡིད་ཆེས་པའི་གང་ཟག་གི་སྒོ་ནས་བརྗོད་པ་ཡིན་མོད་ཀྱི། འོན་ཀྱང་གཏན་ཚིགས་གཞན་ཡང་ཡིད་ཆེས་པར་བྱེད་ནུས་ན་དཔང་པོའི་སྒྲས་བརྗོད་པ་ལ་ཉེས་པ་མེད་དོ། །དཔང་བོ་དེ་དག་ཀྱང་རྒོལ་བ་ཉིད་ལ་གྲུབ་པ་ཡིན་ཏེ། དེ་བས་ན་ཡིད་ཆེས་པའི་རྒྱུར་རུང་ཉིད་དོ། །དེ་ལ་དང་པོ་ལུང་བསྟན་པའི་དཔང་པོ་ནི། བྲམ་ཟེ་རྣམས་ཀྱི་རིག་བྱེད་ལས། ཨུ་དུམ་ཝཱ་རའི་མེ་ཏོག་དང་འདྲ་བར་རྒྱ་ལམ་རྒྱ་ལམ་ན། ལྷ་དང་མི་རྣམས་ཀྱི་སྟོན་པ་ཐམས་ཅད་མཁྱེན་པ་འཇིག་རྟེན་དུ་རྒྱལ་རིགས་དང་བྲམ་ཟེའི་རིགས་ལས་འབྱུང་བར་བསྟན་ཏེ། དེའི་ཚེ་ཡུམ་གྱི་ལྷུམས་སུ་འཇུག་པའི་ཚེ་ན་ནི། གླང་པོ་ཆེ་ཐལ་དཀར་མཆེ་བ་དྲུག་པ། སྲོག་ཆགས་ལྷམ་བུ་ཆུར་གཤེར་བ་ལྟར་མགོ་དམར་ལ་འདྲིལ་བ་ཅིག་ཡུམ་གྱི་གློ་གཡས་ནས་འཇུག་པར་ཡུམ་གྱི་རྨི་ལམ་དུ་བྱུང་ལ། བལྟམས་ནས་ཀྱང་མཚན་དང་དཔེ་བྱ་བཟང་པོས་བརྒྱན་པ་ཞིག་བྱུང་སྟེ། དེ་རབ་ཏུ་མ་བྱུང་ན་ནི་འཁོར་ལོས་སྒྱུར་བའི་རྒྱལ་པོར་འགྱུར་ལ། གལ་ཏེ་རབ་ཏུ་བྱུང་ན་ནི་ལྷ་དང་མི་རྣམས་ཀྱི་སྟོན་པ་ཐམས་ཅད་མཁྱེན་པར་འགྱུར་རོ་ཞེས་ལུང་བསྟན་པའི་དཔང་པོ་ཡོད་པ་ཡིན་ནོ། །དགེ་སྦྱོང་ག་ཏ་མ་ཡང་དེ་བཞིན་དུ་བྱུང་བ་ཡིན་ཏེ། དེའི་ཕྱིར་ཐམས་ཅད་མཁྱེན་པ་ཡིན་ནོ། །གང་ཟག་གི་དཔང་པོ་ཡང་ཡོད་པ་ཡིན་ཏེ། དེ་ཡང་ལྷ་དང་བདུད་ལ་སོགས་པ་རྫུ་འཕྲུལ་ཆེ་བ་རྣམས་ལ་ནི་དེ་དག་གི་ཡིད་བརྟན་དུ་རུང་བའི་ཚད་མ་སའི་ལྷ་མོ་བརྟན་མས་དཔང་པོ་བྱས་པ་ཡིན་ལ། དགེ་སྦྱོང་དང་བྲམ་ཟེ་ལ་སོགས་པ་མཐུ་དང་རྫུ་འཕྲུལ་ཆུང་བ་རྣམས་ཀྱི་དཔང་པོ་ནི་དེ་དག་ཡིད་ཆེས་པའི་ཚད་མར་གྱུར་པ། རིག་བྱེད་སྤྱོད་པའི་བྲམ་ཟེ་དམ་པ་རྣམས་ཀྱིས་བྱས་ཏེ། འདི་ལྟར་བལྟམས་པའི་ཚེ་མཚན་རྟགས་ནི་འདི་སྐད་དུ། རྟོག་གེ་བ་རྣམས་ཐམས་ཅད་བློ་འཁྲུལ་ཏེ། །རྩོད་པའི་དུས་སུ་འཁོར་ལོས་སྒྱུར་མི་འབྱུང་། །འདི་ནི་སངས་རྒྱས་བཅོམ་ལྡན་འདས་ཡིན་ངེས། །ཞེས་སྨྲས་ཏེ། དེའི་ཕྱིར་གང་ཟག་གི་དཔང་པོ་ཡོད་ངེས་ཉིད་དོ། །ལུང་འབྲེལ་བའི་དཔང་པོ་ནི། མུ་སྟེགས་ཅན་རིག་བྱེད་སྤྱོད་པ་ཁྱེད་རང་གི་གཞུང་ལས་ཀྱང་། གང་ཟག་གི་བདག་རྫུས་ཏེ་སྐྱེས་པའི་སེམས་ཅན་གང་ཡིན་པ་དེ། ཡོངས་སུ་དག་པར་བྱ་བའི་ཕྱིར་བློ་གྲོས་དང་། བསམ་གཏན་དང་། སྙོམས་པར་འཇུག་པའི་ཏིང་ངེ་འཛིན་དང་། དེའི་གྲོགས་སུ་གྱུར་པ་ལུས་ངག་གི་ཚངས་པར་སྤྱོད་པའི་སྒོ་ནས་གང་ཟག་ཡོངས་སུ་དག་པར་བྱས་ཏེ། ཐར་པ་བསྒྲུབ་པར་འདོད་པའི་མ་ཡིན་ནམ། ཁོ་བོ་ཅག་བྱེ་བྲག་ཏུ་སྨྲ་བ་དང་པོའི་ལྟ་བ་ཡང་། གང་ཟག་ཡོངས་སུ་དག་པར་བྱ་བའི་ཕྱིར་ཤེས་རབ་དང་། ཏིང་ངེ་འཛིན་དང་། དེའི་གྲོགས་ཚུལ་ཁྲིམས་བདག་གིས་ཐར་པ་བསྒྲུབ་པར་འདོད་པ་ཡིན་པས། རང་བཞིན་འབྲེལ་པ་སྟེ། ཁྱེད་གང་ཟག་རྟག་པར་འདོད་པ་དང་། ཁོ་བོ་ཅག་མི་རྟག་པར་འདོད་པའི་བྱེ་བྲག་ནི་དེ་དང་འདྲ་བ་ཁྱེད་ཀྱི་ལྟ་བའི་བྱེ་བྲག་ནང་མི་མཐུན་པ་ཡོད་པ་དང་འདྲའོ། །དེ་ནི་དཔེར་ན་དཔག་བསམ་ནི་ཤིང་དུ་འདྲ་བའི་ཕྱིར། ཤ་བ་ལ་སོགས་པ་ཤིང་གཞན་བཞིན་དུ་རྐང་པས་འཐུངས་པས་བསྐྱེད་པ་ཡིན་པར་གདོན་མི་ཟའོ། །དཔག་བསམ་འབྲས་བུ་དང་ལོ་མ་དང་། དྲི་ལ་སོགས་པ་ཅུང་ཟད་མི་འདྲ་བ་ནི་ནང་གི་བྱེ་བྲག་སྟེ། ཤ་བ་དང་ད་བ་དང་ཁ་ཏེ་ར་ལ་སོགས་པ་ཡང་ནང་གི་བྱེ་བྲག་ཅུང་ཟད་མི་འཐུན་པ་བཞིན་ནོ། །དཔང་པོ་འདི་དག་གིས་བསྒྲུབས་ན་མུ་སྟེགས་ཅན་གྱིས་སངས་རྒྱས་པའི་ཆོས་ཐམས་ཅད་མཁྱེན་པས་མ་གསུངས་པར་བསྒྲུབ་པའི་རིག་པ་གཞན་ཡང་མི་རྙེད་ལ། དཔང་པོ་འདི་རྣམས་ཁོ་བདག་ཉིད་ལ་གྲུབ་པས་ཐེ་ཚོམ་ཟ་བའི་གནས་ཀྱང་མི་རྙེད་དོ། །འདི་ནི་ལུང་འབྲེལ་བའི་དཔང་པོ་བསྒྲུབ་པ་ཡིན་ནོ། །ཡང་ཉན་ཐོས་པ་ན་རེ། ཐེག་པ་ཆེན་པོ་སངས་རྒྱས་ཀྱི་བཀའ་ཡིན་པས་ངེས་པ་མེད་དོ་ཞེས་རྒོལ་བར་བྱེད་དོ། །དེ་ལ་ཡང་སྔ་མ་བཞིན་དུ་བརྗོད་པར་བྱ་སྟེ། འདི་ལ་ལུང་བསྟན་པའི་དཔང་པོ་ནི་ཁྱེད་ཉིད་ཀྱི་མདོ་ལས་བྱང་ཆུབ་སེམས་དཔའ་རྣམས་ཀྱིས་བསྐལ་པ་གྲངས་མེད་པ་གསུམ་དུ་དཀའ་བ་སྣ་ཚོགས་སྤྱད་ཅིང་སེམས་སྟོབས་ཆེན་པོ་དང་ལྡན་པས་སེམས་ཅན་ཐམས་ཅད་ཀྱི་དོན་ཉམས་སུ་ལེན་པ་དང་། ཤེས་རབ་ཆེ་བས་སློབ་དཔོན་རྒྱུད་དུ་བྱུང་བ་དང་། མཐར་སངས་རྒྱས་སུ་འགྱུར་བར་གསུངས་པ་མ་ཡིན་ནམ། ཐེག་པ་ཆེན་པོ་ཡང་དེ་བཞིན་དུ་བྱུང་བ་ཡིན་ཏེ། དེ་ཇི་ལྟར་བསྒྲུབ་པ་འབྲས་བུ་དང་བཅས་པ་ལེགས་པར་གཏན་ལ་ཕབ་སྟེ་བསྟན་པ་ཙམ་དུ་ཟད་དོ། །དེའི་ཕྱེར་ལུང་བསྟན་པའི་དཔང་པོ་དང་བཅས་པའོ། །གང་ཟག་གི་དཔང་པོ་ཡང་ཡོད་པ་ཉིད་དེ། འདི་ལྟར་འཕགས་པ་ཉན་ཐོས་ཆེན་པོ་རྣམས་ཀྱིས་བྱང་ཆུབ་སེམས་དཔའི་ལམ་བསྟན་པ་མཛད་དོ། །ལུང་དུ་འབྲེལ་བའི་དཔང་པོ་ཡང་ཡོད་པ་སྟེ། འདི་ལྟར་ཁྱེད་ཀྱི་ལུང་ལས་བདེན་པ་བཞི་ལ་དམིགས་ནས་ཤེས་རབ་ཀྱི་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པའི་རྣམ་པར་རྟོགས་པ་དང་། བསམ་གཏན་དང་རྣམ་པར་ཐར་པ་ལ་སོགས་པའི་ཏིང་ངེ་འཛིན་དང་། དེའི་གྲོགས་སུ་གྱུར་པ་སོ་སོར་ཐར་པའི་སྡོམ་པའི་སྒོ་ནས་ཐར་པ་མྱ་ངན་ལས་འདས་པ་བསྒྲུབ་པར་འདོད་པ་མ་ཡིན་ནམ། ཐེག་པ་ཆེན་པོ་ཡང་དེ་དང་མཐུན་པར་འབྱུང་སྟེ། ཆོས་ལ་བདག་མེད་པར་སྨྲ་བ་དང་། བྱང་ཆུབ་སེམས་དཔའི་སྡོམ་པ་ལ་སོགས་པ་ཅུང་ཟད་མི་འདྲ་བ་ནི་ནང་གི་བྱེ་བྲག་སྟེ། འདི་ལྟ་བུ་ནི། ཁྱེད་ཅག་ཉིད་ལ་ཡང་མདོ་སྡེ་པ་དང་། བྱེ་བྲག་ཏུ་སྨྲ་བ་དང་། ཁ་ཆེ་བྱེ་བྲག་ཏུ་སྨྲ་བ་དང་། ཡུལ་དབུས་ཀྱི་བྱེ་བྲག་ཏུ་སྨྲ་དང་། སྡེ་པ་སོ་སོར་ལྟ་བ་དང་། སྡོམ་པ་ནང་མི་མཐུན་པ་ཡོད་པ་དང་འདྲའོ། །དེ་བས་ན་ཁྱེད་རྣམས་ཀྱིས་ཐེག་པ་ཆེན་པོ་སངས་རྒྱས་ཀྱི་བཀའ་མ་ཡིན་པར་ཐེ་ཚོམ་ཟ་བར་མི་བྱའོ། །འདི་ནི་ལུང་འབྲེལ་པ་གཉིས་པ་བསྒྲུབ་པའོ། །ཡང་ཐེག་པ་ཆེན་པོ་ཕ་རོལ་ཏུ་ཕྱིན་པ་འཛིན་པ་རྣམས་ན་རེ། གསང་སྔགས་ཀྱི་ཐེག་པ་ཐམས་ཅད་མཁྱེན་པའི་བཀའ་ཡིན་པའི་ངེས་པ་མེད་དོ་ཞེས་ཟེར་རོ། །དེ་ལ་ཡང་སྔ་མ་བཞིན་དུ་བརྗོད་པར་བྱ་སྟེ། དེ་ལ་ལུང་བསྟན་པའི་དཔང་པོ་ནི་ཁྱེད་ཉིད་ལ་གྲུབ་པའི་མདོ་སྡེ་གདམས་ངག་འབོག་པའི་རྒྱལ་པོ་ལས། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །བསྟན་པའི་སྙིང་པོ་དམ་པ་ཞིག །འཛམ་གླིང་ལྷོ་ཡི་ཕྱོགས་ངོས་ཀྱི། །རྒྱལ་པོ་ཛཿཞེས་བྱ་བ་ལ། །ཐུགས་རྗེ་མཐུན་པའི་བྱིན་རླབས་ཀྱིས། །ལག་ན་རྡོ་རྗེས་སྣང་བར་བྱེད། །ཅེས་ལུང་བསྟན་པ་ཡིན་ཏེ། ལུང་བསྟན་པ་དང་མཐུན་པར་ཐུན་མོང་དུ་གྲགས་པ་ནི། གསང་སྔགས་ཀྱི་ཐེག་པ་ཡིན་པའི་ཕྱིར་ལུང་བསྟན་པའི་དཔང་པོ་དང་བཅས་པའོ། །གང་ཟག་གི་དཔང་པོ་ནི་བྱང་ཆུབ་སེམས་དཔའ་ཕྱག་ན་རྡོ་རྗེ་རྟག་ཏུ་བཅོམ་ལྡན་འདས་ཀྱི་མདུན་དུ་འགྲོ་ཞིང་། ཐེག་པ་ཆེན་པོ་ཐམས་ཅད་ཀྱི་སྡུད་པ་པོ་ཡིན་པར་མདོ་སྡེ་ཉིད་ལས་གྲགས་ལ། དེ་ཡང་ལྷོ་ཕྱོགས་གྱད་ཀྱི་ཡུལ་ལྷ་མ་སྲིན་སྡེ་བརྒྱད་དང་བཅས་པའི་འཁོར་གྱི་དཀྱིལ་འཁོར་དུ། བཅོམ་ལྡན་འདས་ཤཱཀྱ་ཐུབ་པས་དབང་བསྐུར་བས་ཐུན་མོང་དུ་གྲགས་པ་ཡིན་ནོ། །བྱང་ཆུབ་སེམས་དཔའ་ཕྱག་ན་རྡོ་རྗེ་ཀྱང་གསང་སྔགས་ཐམས་ཅད་བསྡུས་ནས། མཁན་པོ་ཀུ་ཀུ་ལ་སོགས་པ་སྐལ་པ་དང་ལྡན་པ་རྣམས་ལ་བཤད་པས་གང་ཟག་གི་དཔང་པོ་དང་བཅས་པའོ། །ཕྱག་ན་རྡོ་རྗེ་མཐོང་བའི་སྐལ་བ་དང་མི་ལྡན་པ་རྣམས་ལ་མཁན་པོ་ཀུ་ཀུ་ཡང་གསང་སྔགས་ཐུན་མོང་དུ་མ་གྲགས་པའི་གོང་དུ་སྡེ་སྣོད་གསུམ་པོ་འཛམ་བུ་གླིང་ན་ཤེས་ཉེན་ཆེ་བར་ཐུན་མོང་དུ་གྲགས་པ་སྟེ། དེས་དཔལ་ཕྱག་ན་རྡོ་རྗེའི་ཞལ་མཐོང་ནས་དངོས་གྲུབ་ཆེན་པོ་ཕུལ་དུ་བྱུང་བ་བརྙེས་པ་ཡང་ཐུན་མོང་དུ་གྲགས་པ་ཡིན་ནོ། །དེའི་ཕྱིར་གང་ཟག་གི་དཔང་པོ་དང་བཅས་པའོ། །ལུང་འབྲེལ་པའི་དཔང་པོ་ཡང་ཡོད་དེ། དེ་ཡང་ཕ་རོལ་ཏུ་ཕྱིན་པའི་མདོ་སྡེ་ཉིད་ལས། བདག་དང་སངས་རྒྱས་རང་བཞིན་མཉམ་པར་གནས་པ་དང་། ཕུང་པོ་ལྔ་གྲངས་མེད་པའི་དེ་བཞིན་གཤེགས་པ་ཡིན་པ་དང་། ཉོན་མོངས་པ་དེ་བཞིན་གཤེགས་པའི་རིགས་ཡིན་པ་དང་། ཉོན་མོངས་པའི་རང་བཞིན་རྣམ་པར་གྲོལ་བ་ཡིན་པ་དང་། སེམས་ཅན་གྱི་སེམས་རང་བྱུང་གི་ཡེ་ཤེས་ཀྱི་སྙིང་པོ་ཅན་ཡིན་པ་དང་། ཆོས་ཐམས་ཅད་རྣམ་པར་བསྒྲུབ་པ་ཉེ་བར་གཞག་པའི་མཚན་ཉིད་ཅན་ཡིན་པ་དང་། བཅོམ་ལྡན་འདས་ཤཱཀྱ་ཐུབ་པའི་ཞིང་ཁམས་ཡོངས་སུ་མ་དག་པར་སྣང་བ་འདི་ཉིད་ཀྱང་ཡོངས་སུ་དག་པའི་ཞིང་ཁམས་ཡིན་པ་དང་། འཇུག་པ་དམ་པ་གཉིས་སུ་མེད་པའི་ཚུལ་ལ་འཇུག་པ་ཡིན་པ་དང་། དེ་བཞིན་གཤེགས་པ་མཆོད་པའི་དམ་པ་བུད་མེད་ཀྱིས་མཉེས་པར་བྱས་པ་ལ་སོགས་པ་ཡིན་པ་ནི། ཁྱེད་ཀྱི་ལུང་ཕ་རོལ་ཏུ་ཕྱིན་པའི་ཚུལ་གྱི་མདོ་སྡེ་ཉིད་ཀྱིས་གསུངས་པ་ཡིན་ལ། གསང་སྔགས་ཀྱི་ཚུལ་ལས་ཀྱང་། དོན་དེ་དག་ཉིད་ཇི་ལྟར་བསྒྲུབ་པའི་ཐབས་ལེགས་པར་གཏན་ལ་ཕབ་པ་ཙམ་དུ་ཟད་པས་ལུང་འབྲེལ་བའི་དཔང་པོ་གྲུབ་པ་ཡིན་ནོ། །དོན་དེ་དག་ཉིད་མདོ་གང་ལས་ཇི་སྐད་གསུངས་པ་ལ་ཐེ་ཚོམ་ཟ་བ་རྣམས་ལ་ཁུངས་ཅུང་ཟད་བསྟན་པ་ནི། བདག་དང་སངས་རྒྱས་མཉམ་པར་གནས་པ་དང་། ཕུང་པོ་ལྔ་སངས་རྒྱས་སུ་སྟོན་པའི་ཁུངས་ནི། སྡོང་པོ་བཀོད་པའི་མདོ་ལས། གང་ཞིག་བདག་དང་སངས་རྒྱས་རྣམས། །རང་བཞིན་མཉམ་པར་རབ་གནས་ཤིང་། །མི་གནས་ལེན་པ་མེད་པ་དེ། །དེ་དག་བདེ་བར་གཤེགས་པས་གསུངས། །གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་དང་སེམས་པ་དག །གྲངས་མེད་དེ་བཞིན་བཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་གསུངས་པ་ལྟ་བུའོ། ཉོན་མོངས་པ་དེ་བཞིན་གཤེགས་པའི་རིགས་དང་། རང་བཞིན་ཡིན་པ་ལ་སོགས་པ་ནི། དྲི་མ་མེད་པར་གྲགས་པས་བསྟན་པའི་མདོ་ལས། ཉོན་མོངས་ནི་དེ་བཞིན་གཤེགས་པའི་གདུང་ངོ་ཞེས་བྱ་བ་དང་། གང་འདོད་ཆགས་དང་ཞེ་སྡང་དང་གཏི་མུག་དང་བྲལ་བས་རྣམ་པར་གྲོལ་བའོ་ཞེས་བྱ་བ་ནི། ང་རྒྱལ་བ་རྣམས་ལ་བསྟན་པ་སྟེ། ང་མེད་པ་རྣམས་ཀྱིས་ནི་འདོད་ཆགས་དང་ཞེ་སྡང་དང་གཏི་མུག་གི་རང་བཞིན་རྣམ་པར་གྲོལ་བའོ་ཞེས་བྱ་བ་དང་། གསོག་དང་གསོབ་དང་སྙིང་པོ་མེད་པ་ཡིན་ཡང་། བསོད་ནམས་གསོག་མ་ཡིན་པ་དང་། ཡེ་ཤེས་གསོབ་མ་ཡིན་པ་དང་། རང་བྱུང་གི་ཡེ་ཤེས་སུ་དབང་བསྐུར་བའི་སྙིང་པོ་མེད་པ་མ་ཡིན་པར་གསུངས་པ་ལྟ་བུ་དང་། ཆོས་ཐམས་ཅད་རྣམ་པར་བསྒྲུབ་པ་ཉེ་བར་གཞག་པའི་མཚན་ཉིད་དུ་གསུངས་པ་དང་། གང་ཉི་མ་དང་ཟླ་བ་ཡོངས་སུ་མ་དག་གམ། དམུས་ལོང་རྣམས་ཀྱིས་མི་མཐོང་། དེ་བཞིན་དུ་ངའི་སངས་རྒྱས་ཀྱི་ཞིང་འདི་ནི། སངས་རྒྱས་རིན་པོ་ཆེའི་རྒྱན་བཀོད་པའི་ཞིང་ཁམས་བཞིན་དུ་རྟག་ཏུ་འདི་འདྲ་སྟེ། ཁྱེད་རྣམས་ཀྱིས་ནི་མི་མཐོང་ངོ་། །ཞེས་ཤཱ་རི་བུ་ལ་གསུངས་པ་ལྟ་བུ་དང་། གཉིས་སུ་མེད་པའི་ཚུལ་ལ་འཇུག་པ་གསུངས་པ་ལྟ་བུའོ། །བུད་མེད་ཀྱི་ལུས་ཀྱིས་སངས་རྒྱས་མཉེས་པར་བྱ་བ་ཡང་མདོ་གཞན་ལས། བྱང་ཆུབ་སེམས་དཔའ་དེ་བཞིན་གཤེགས་པ་ཡོངས་སུ་མཉེས་པར་བྱ་བའི་ཕྱིར་རང་གི་ལུས་བུད་མེད་ཀྱི་ལུས་སུ་མངོན་པར་སྤྲུལ་ནས་དེ་བཞིན་གཤེགས་པའི་མདུན་དུ་རྟག་ཏུ་གནས་སོ། །ཞེས་གསུངས་པ་ལྟ་བུའོ། །དེ་ལྟ་བས་ན་སངས་རྒྱས་བཅོམ་ལྡན་འདས་རྣམས་ནི་དཔང་པོ་དང་བྲལ་བར་གཟུགས་ཀྱི་སྐུ་མི་སྟོན་ཞིང་། དམ་པའི་ཆོས་མི་སྟོན་ཏེ། ཐེ་ཚོམ་གྱི་གནས་མི་སྟོན་ནོ། །གང་དག་ཐེ་ཚོམ་ཟ་བ་རྣམས་ནི་ང་རྒྱལ་གྱི་དབང་གིས་གང་ཟག་ཁྱད་པར་ཅན་ལ་ཡང་མོས་པ་མི་སྐྱེད་ལ། གཏི་མུག་གིས་དཔང་པོ་ཚོལ་བའི་བློ་ཡང་མི་སྐྱེ། ཐོས་པ་ཆུང་བས་རྒྱལ་བས་དཔང་པོ་རྣམ་པ་གསུམ་གཞག་པ་ཡང་། མ་ཐོས་པའི་བླུན་པོ་མ་རབས་རྣམས་ཡིན་ཏེ། འབྲེལ་བ་བསྒྲུབ་པ་འདི་ལྟ་བུ་ཡང་དེ་ལྟ་བུ་དག་སྲིད་པའི་ཕྱིར་ཡིན་ནོ། །གཞན་ཡང་ཁ་ཅིག་འདི་སྐད་ཟེར་ཏེ། གསང་སྔགས་ཀྱི་རྒྱུད་དུ་གྲགས་པ་འདི་དག་ལ་ཡང་། ལྡབ་བུ་དང་ཟློས་བུར་བསྟན་པ་མང་དུ་བསྟན་ཏེ། དེ་བས་ན་འདི་དག་རྒྱུད་ཡིན་པར་ཁུངས་ཕྱུང་ཡང་། ཁ་ཅིག་སྔོན་གྱི་མཁན་པོ་རྣམས་ཀྱིས་གཞུང་ལས་བསྡུས་པ་ལ་སོགས་པ་རང་གིས་སྦྱར་བ་ཡིན་པར་ཐེ་ཚོམ་ཟ་སྟེ། དེ་བས་ན་དད་པའི་ཡུལ་དུ་མི་འགྱུར་བ་དང་། ལས་དང་དངོས་གྲུབ་ཀྱི་རྒྱུར་ཡང་མི་རུང་ངོ་སྙམ་དུ་ཐེ་ཚོམ་ཟ་བ་སྟེ། འདི་ལྟར་གསང་བ་འདུས་པ་ལས་གསུངས་པའི་བྱང་ཆུབ་སེམས་ཀྱི་ལེའུ་དང་། རིགས་ཀྱི་ཡུམ་དང་ཁྲོ་བོ་བཅུའི་སྔགས་དང་། ལས་དང་དྲག་པོའི་ལས་ཀྱི་བརྟུལ་ཞུགས་དང་ཕུར་པ་བྱིན་གྱིས་བརླབ་པའི་ཆོ་ག་ལྟ་བུ། སྒྱུ་འཕྲུལ་དྲྭ་བའི་རྒྱུད་ལས་ཀྱང་། དེ་བཞིན་དུ་ཟློས་བུར་གསུངས་པ་དང་། གསང་བ་སྙིང་པོ་དང་བརྒྱད་ཅུ་པ་ལྟ་བུ་མང་ཉུང་ཟློས་བུར་གསུངས་པ་དང་། དེ་བཞིན་དུ་རྡོ་རྗེ་གདན་བཞི་ཆེ་ཆུང་དང་། ཀྲིཥྞ་ཡ་མ་རི་ཆེ་ཆུང་ལ་སོགས་པ་འདི་དག་སྟོན་པས་དེ་བཞིན་དུ་གསུངས་སོ་ཞེས་བྱ་བ་ནི། ཟློས་བུར་བཤད་པ་དོན་མེད་པར་འགྱུར་ལ། གལ་ཏེ་གང་ཟག་གཅིག་གིས་སྡེབས་པ་ཞིག་ཡིན་ན་ཡང་། གོང་དུ་བསྟན་པ་ལྟ་བུའི་སྐྱོན་དུ་འགྱུར་ལ། གང་ཟག་གི་དཔང་པོ་ཡང་མེད་དེ། དེ་བས་ན་འདི་ལྟ་བུའི་འབྲེལ་པ་བསྒྲུབ་པར་མི་ནུས་སོ་ཞེ་ན། དེ་ལ་འདི་བརྗོད་པར་བྱ་སྟེ། དེ་བཞིན་གཤེགས་པ་རྣམས་ཀྱི་བྱིན་གྱིས་བརླབས་གདུལ་བྱ་རྣམས་ཀྱི་རྒྱུད་ལ་སྣང་སྟེ། ཕན་པ་དང་ཆོས་ཉིད་སྟོན་པ་ན། གཟུགས་ཀྱི་སྐུ་ཁྱད་པར་ཅན་དུ་སྣང་བ་འབའ་ཞིག་ཏུ་རིས་སུ་ཆད་པ་མེད་དེ། འདི་ལྟར་དུ་ཐུན་མོང་དང་ཁྱད་པར་དུ་སྣང་ཡང་རུང་། དམན་པ་དང་དམ་པར་ཡང་རུང་། ཐ་ན་བདུད་བཞི་པོ་དག་དང་ཉོན་མོངས་པ་སྟོང་ཕྲག་བརྒྱད་ཅུ་པོ་དག་གིས་སེམས་ཅན་རྣམས་ཉོན་མོངས་པར་བྱེད་པ་དག་གིས་སངས་རྒྱས་རྣམས་སངས་རྒྱས་ཀྱི་མཛད་པ་མི་བྱེད་པ་གང་ཡང་མེད་དོ། །དེ་བས་ན་དེ་བཞིན་གཤེགས་པའི་བྱིན་གྱིས་བརླབས་འབྱུང་བ་ཡང་རྣམ་པར་རྟོག་པའི་སྣང་བ་དང་འདྲེས་ནས་འབྱུང་སྟེ། དེའི་ཕྱིར་གང་ཟག་ལ་ངན་སེམས་མི་བསྐྱེད་དོ། །དད་པ་དང་ཤེས་རབ་དང་ཏིང་ངེ་འཛིན་དང་དེའི་གྲོགས་སུ་གྱུར་པའི་སྡོམ་པ་དང་ལྡན་ན་དགེ་བའི་བཤེས་གཉེན་ཡང་སངས་རྒྱས་ཉིད་དང་འདྲ་སྟེ། མདོ་སྡེའི་གཞུང་ལས་ཀྱང་སློབ་དཔོན་བརྟགས་པའི་སངས་རྒྱས་སུ་གསུངས་པ་བཞིན་ནོ། །དེ་ལྟ་བུའི་ཡོན་ཏན་དང་ལྡན་ན་སངས་རྒྱས་ལ་བརྟེན་ནས་མཚམས་མེད་པའི་ལས་གསོག་པ་དེ་བཞིན་གཤེགས་པ་ལ་ངན་སེམས་ཀྱི་ཁྲག་ཕྱུང་བ་བཞིན་ནོ། །དེ་བས་ན་ལུང་འབྲེལ་པ་ཡོད་ན་ད་ལྟ་གང་ཟག་གི་དཔང་པོ་མེད་ཀྱང་ཐེ་ཚོམ་གྱི་གནས་སུ་བྱ་བ་ཡང་མ་ཡིན་ན་དངོས་སུ་སྐུར་པ་གདབ་པ་ལྟ་ཅི་སྨོས་ཏེ། འདི་ལྟ་བུ་ལ་སོགས་པ་ནི་ཤིན་ཏུ་བཟོད་པར་དཀའོ། །ལས་དང་དངོས་གྲུབ་ཀྱི་རྒྱུར་མི་རུང་བ་ནི། རྒྱལ་བའི་བཀའ་དམ་པ་ཉིད་ཡིན་དུ་ཟིན་ཀྱང་། སློབ་དཔོན་དམ་ཚིག་ཉམས་པར་གྱུར་པ་དང་། བཀའ་ཆད་ཀྱི་གནས་སུ་གྱུར་པ་རྣམས་ཀྱི་ལག་ནས་བརྒྱུད་པའི་གཞུང་གི་ཚོགས་དང་། ཁ་ལས་བརྒྱུད་པའི་མན་ངག་གི་ཚོགས་ཀྱིས་ལས་དང་དངོས་གྲུབ་འགྲུབ་པ་འགྱུར་བ་ནི། སྐལ་བ་དང་དད་པ་དང་མཉམ་པར་བཞག་པ་རྣམས་ཤིན་ཏུ་ཕུལ་དུ་གྱུར་པ་འགའ་ཞིག་ལས་མ་གཏོགས་པ། གཞན་རྒྱུར་རུང་བ་མ་ཡིན་ནོ། །དེ་བས་ན་ཤེས་བྱ་ལ་ཕྱིན་ཅི་མ་ལོག་པར་སྨྲ་བ་རྣམས་ཀྱི་ཆེད་དུ་ནི་གཞུང་འབྲེལ་བའི་རིག་པ་གྲུབ་པ་ཁོ་ནས་ཆོག་པར་ཤེས་པར་བྱའོ། །ལས་དང་དངོས་གྲུབ་མྱུར་དུ་ཐོབ་པར་བྱ་བ་ལ་ནི་བླ་མ་དམ་པ་རྣམས་ཀྱི་བཀའ་ཐོབ་པ་ཁོ་ན་བདག་པོའི་རྐྱེན་ཡིན་ཏེ། འདི་དག་ཙམ་གྱིས་གང་ཟག་གི་བྱ་བ་ཡོངས་སུ་རྫོགས་པར་འགྱུར་རོ། །གཞན་དུ་རྒྱུད་ཀྱི་གཞུང་ལ་གང་ཟག་གིས་བསླད་པ་ལ་སོགས་པར་ཐེ་ཚོམ་ཟ་བས་ནི་སྐྱོན་གྱི་གཞི་མང་པོར་འགྱུར་ཏེ། དད་པ་ཙམ་གྱིས་རབ་ཏུ་འཇུག་བྱའི་ཕྱིར། །རྣམ་པར་དཔྱད་པ་འདི་ནི་མིང་ཙམ་སྟེ། །གང་ཞིག་སྒོམ་པ་དེ་ནི་ཡང་དག་བྲལ། །ཞེས་གསུངས་པ་ལྟ་བུ་སྟེ། བཀའི་སྤོང་ལེན་བྱེད་པ་ཐེག་པ་ཆེན་པོའི་སྤྱིའི་དམ་ཚིག་ཉམས་པའི་རྒྱུར་བཤད་དོ། །གཞན་ཡང་ཆོས་ལ་བརྟེན་ནས་ལས་ཀྱི་སྒྲིབ་པ་གསོག་པའི་རྒྱུར་འགྱུར་བ་དང་། གང་ཟག་ལ་བརྟེན་ནས་དེ་བཞིན་དུ་འགྱུར་པ་ནི་སངས་རྒྱས་ལ་བརྟེན་ནས་ལས་ཀྱི་སྒྲིབ་པ་གསོག་པ་ཉིད་དང་འདྲའོ། །དེ་བས་ན་རྒྱུད་ཀྱི་གཞུང་ལྡབ་བུ་ལ་སོགས་པར་སྟོན་པ་དང་། གལ་ཏེ་མཁན་པོ་རྣམས་ཀྱིས་བསྡུས་ཤིང་སྦྱར་བ་སྲིད་ན་ཡང་། དེ་བཞིན་གཤེགས་པའི་བྱིན་གྱིས་རླབས་འབྱུང་བ་ལ་ཚུལ་ངེས་པ་མེད་པ་ཡིན་པས་ཐེ་ཚོམ་གྱི་ཡུལ་དུ་བྱ་བ་མ་ཡིན་ནོ། །ཡང་གལ་ཏེ་ལྟ་བ་མཐོ་དམན་ལ་རྩོད་པ་འདི་ནི་སེམས་ཅན་གྱི་དོན་དུ་འགྱུར་པ་ཡིན་པས་རྒྱལ་བས་ཀྱང་གནང་བ་ཡིན་ལ། སྔོན་གྱི་མཁན་པོ་རྣམས་ཀྱིས་ཀྱང་དེ་ལྟར་བཤད་པས། ལྟ་བ་དམན་ལ་སྨད་པ་འདི་ལ་ཉེས་སྐྱོན་མེད་དོ་ཞེ་ན། འདི་ལྟ་བུ་ནི་གོང་དུ་ལུང་སྤྱིའི་འགྲེལ་པ་བསྒྲུབ་པ་དང་འདྲ་སྟེ། མུ་སྟེགས་ཅན་གྱིས་ལེགས་པར་བཤད་པའི་གཞུང་ཡང་སངས་རྒྱས་རྣམས་ཀྱིས་བྱིན་གྱིས་བརླབས་པ་དང་སྤྲུལ་པས་བཤད་པ་ཡིན་པ། སངས་རྒྱས་ཉིད་ཀྱིས་ལུང་བསྟན་པ་ཡིན་ན། དེ་བཞིན་གཤེགས་པ་ཉིད་དུ་སྣང་བས་གསུངས་པའི་ལུང་ལྟ་སྨོས་ཀྱང་ཅི་དགོས་ཏེ། རྒྱལ་བ་རྣམས་ཀྱིས་འགྲོ་བའི་དོན་དུ་གསུངས་པ་འདྲ་བས། ཐེག་པ་ཆུང་ངུ་རྣམས་ལ་ཡང་སྤང་ཞིང་སུན་དབྱུང་བར་མི་བྱའོ། །ལྟ་བ་མཐོ་དམན་དང་ཐབས་ཆེ་ཆུང་ཡང་ཡོད་པ་ཡིན་པས་ཐེག་པ་གོང་མ་པ་ལ་ཡང་སྐུར་པ་གདབ་ཏུ་ག་ལ་རུང་སྟེ། རང་རང་གི་སྐལ་བ་དང་མོས་པ་ཇི་ལྟར་འཚམས་པ་བཞིན་སོ་སོར་སྤྱད་པར་བྱའོ། །རྒྱུད་འདི་ཉིད་ལས་ཀྱང་། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཡེ་ཤེས་ངོ་མཚར་རབ་འབྱམས་ཀྱིས། །དོན་དུ་མི་འགྱུར་ཡོངས་མ་གསུངས། །ཞེས་གསུངས་པ་ལྟ་བུའོ། །དེ་བས་ན་སངས་རྒྱས་ཀྱི་བསྟན་པ་རྣམས་ནི་འགྲོ་བ་ཆུད་མི་གསོན་པ་ལ་སོ་སོ་རང་བདེན་པ་ཡིན་པས། ལྟ་བ་མཐོ་དམན་རྩོད་པའི་སྐབས་སུ་ཡང་གཅིག་ལ་གཅིག་སྨད་ཅིང་རྩོད་པའི་ཕྱིར་སྐུར་པ་མི་བྱའི། ངེས་པའི་དོན་ལ་གང་ཉེ་བའི་རིག་པ་འགྲན་པ་ཙམ་ལ་ཉེས་སྐྱོན་མེད་དོ། །འདི་དག་ནི་གཞུང་འབྲེལ་པ་བཤད་པའོ། །སྟོན་པའི་ཞལ་ནས་གསུངས་པའི་བཀའ་ཡིན་པས་ཡིད་ཆེས་པ་ཡོད་ཀྱང་། སྟོན་པ་དང་རྒྱུད་གཉིས་གཅིག་གམ་ཐ་དད་པར་ཐེ་ཚོམ་ཟ་བ་རྣམས་སྟོན་པ་དང་རྒྱུད་ཀྱི་འབྲེལ་པ་བསྒྲུབ་པ་ནི། གོང་དུ་སྔགས་དང་ཕྱག་རྒྱ་བཤད་པའི་སྐབས་སུ་བརྟག་པ་རྣམ་པ་དྲུག་ཏུ་བཤད་པ་བཞིན་ཏེ། རྒྱུད་ཉིད་ཀྱང་ཆོས་ཀྱི་ཕྱག་རྒྱའི་ཁོངས་སུ་འདུས་པས་དེ་བཞིན་ཅི་རིགས་སུ་སྦྱར་བར་བྱའོ། །དེ་དག་ནི་རྒྱུད་ཀྱི་དགོས་འབྲེལ་བཤད་པའོ། །དེ་ལྟར་ན་ཏནྟྲའི་མཚན་བཤད་པ་ལ་སོགས་པ་འདི་རྣམས་ཙམ་གྱིས་རྒྱུད་ཐམས་ཅད་ཀྱི་སྤྱི་དོན་ཁོང་དུ་ཆུད་པར་ནུས་པ་ཡིན་ནོ། །ད་ནི་དེ་ལྟར་སྤྱི་དོན་བསྡུས་པ་ཡིན་ཡང་མཁན་པོ་རྣམས་ཀྱི་མན་ངག་རྣ་བརྒྱུད་རྣམས་ཀྱི་སྒོ་ཅུང་ཟད་ཙམ་གྲུབ་ཅིང་ཤེས་པར་བྱ་བའི་ཕྱིར་བཞེད་པ་སོ་སོ་ཅུང་ཟད་ཙམ་བརྗོད་པར་བྱ་སྟེ། དེ་ལ་སྔོན་གྱི་མཁན་པོ་ཡོངས་གྲགས་པ་ཕྱོགས་གཅིག་ནི། རྒྱུད་ཐམས་ཅད་ཀྱི་དོན་བཤད་ལུགས་རྣམ་པ་གསུམ་དུ་གསུང་སྟེ། འདི་ལྟར་དབང་པོ་རབ་འབྲིང་རྣམ་པ་གསུམ་དང་མཐུན་པར་ཏནྟྲའི་མཚན་བཤད་པ་དང་། རྒྱུད་དབུ་ཞབས་ཀྱི་དབྱེ་བ་བསྟན་པ་དང་། ཚིག་འབྲུ་རེ་རེ་ནས་རྒྱས་པར་བཤད་པ་དང་། གཞན་ཡང་སྒྲུབ་པ་པོ་རྣམས་སྒྲུབ་པའི་ཆ་རྐྱེན་དང་མཐུན་པར་དམིགས་པའི་ཡུལ་དང་ཐབས་འབྲས་བུ་དང་བཅས་པར་བསྟན་པ་དང་། རྒྱུད་ཀྱི་བབས་དང་མཐུན་པར་རྒྱུད་ཀྱི་འཕྲོས་གཞི་རྩ་བ་དང་ཡན་ལག་ཏུ་བཅས་པར་བཤད་པ་དང་། ཚུལ་རྣམ་པ་གསུམ་ཡིན་ནོ་ཞེས་གསུངས་སོ། །དེ་ལ་དོན་རྣམ་པར་དབྱེ་བ་བཤད་པའི་སྐབས་སུ་ཡང་གླེང་གཞི་དང་། གླེང་བསླང་བ་དང་། ཡོངས་སུ་ཤེས་པར་བྱ་བའི་དངོས་པོ་དང་། རྒྱུད་ཀྱི་དགོས་འབྲེལ་བསྟན་པ་རྣམས་སུ་འབྱེད་དོ། །དངོས་པོའི་སྐབས་སུའང་དཀྱིལ་འཁོར་དམ་ཚིག་སྒྲུབ་པ་དབང་ཕྲིན་ལས་ཏེ་གཞི་རྣམ་པ་ལྔར་ཕྱེ་ནས་རྒྱུད་སོ་སོའི་གཞུང་དང་སྦྱོར་བར་བྱེད་དོ། །རྩ་བའི་རྒྱུད་འདི་ཉིད་ཀྱི་སྐབས་སུ་ཡང་དཀྱིལ་འཁོར་ལ་རང་བཞིན་དང་། ཏིང་ངེ་འཛིན་དང་། གཟུགས་བརྙན་དང་། ཚོགས་དང་། གསང་བ་བྱང་ཆུབ་སེམས་ཀྱི་དཀྱིལ་འཁོར་རྣམས་སུ་ཕྱེ་ནས་རང་བཞིན་ལ་ཡང་སྐུ་རྣམ་པ་ལྔ་ལེའུ་དང་པོ་དང་། གསུམ་པས་བསྡུས་པ་དང་། དེ་བཞིན་དུ་ཐུགས་རྣམ་པ་ལྔ་ལེའུ་གཉིས་པས་བསྡུས་པ་དང་། གསུང་རྣམ་པ་ལྔ་ལེའུ་བཞི་པའི་ཡི་གེ་བཞི་བཅུ་རྩ་གཉིས་ཀྱིས་བསྡུས་པ་དང་། གཞན་ཡང་ཏིང་ངེ་འཛིན་སྐུའི་དཀྱིལ་འཁོར་ལེའུ་བཞི་པ་དང་ལྔ་པའི་ཡི་གེ་སྒྱུ་འཕྲུལ་བསྒོམ་པའི་ཐབས་ཀྱིས་བསྡུས་པ་དང་། ལེའུ་དྲུག་པ་དཀྱིལ་འཁོར་གྱིས་བསྡུས་པ་དང་། ཏིང་ངེ་འཛིན་གསུང་དང་ཐུགས་བདུན་པ་དང་བརྒྱད་པའི་སྔགས་དང་ཕྱག་རྒྱས་བསྡུས་པར་བྱེད་དེ། དེ་བཞིན་དུ་དགུ་པ་གཟུགས་བརྙན་གྱི་དཀྱིལ་འཁོར། བཅུ་པ་ནི་དབང་བསྐུར་བ། བཅུ་གཅིག་པ་དང་བཅུ་གཉིས་པ་ཚོགས་ཀྱི་དཀྱིལ་འཁོར། བཅུ་གསུམ་པ་ནི་གསང་བ་བྱང་ཆུབ་སེམས་ཀྱི་དཀྱིལ་འཁོར། བཅུ་བཞི་པ་ནི་དཀྱིལ་འཁོར་ལ་བསྟོད་པའོ། །དེ་བཞིན་དུ་ཁྲོ་བོའི་དཀྱིལ་འཁོར་ལ་ཡང་སྦྱར་བར་བྱ་སྟེ། དམ་ཚིག་དང་ཕྲིན་ལས་ནི་ལེའུ་བཅུ་དགུ་པ་དང་ཉི་ཤུ་པས་དངོས་སུ་བསྟན་པར་ཟད། སྒྲུབ་པ་ནི་ཡི་གེ་སྒྱུ་འཕྲུལ་གྱི་ཏིང་ངེ་འཛིན་གྱི་སྒོ་ནས་སྒྲུབ་པ་ལེའུ་ལྔ་བ་ནས་གསུངས་པ་དང་། ཚོགས་ཀྱི་དཀྱིལ་འཁོར་གྱི་སྒྲུབ་པ་རྣམས་སུ་འདུས་པར་སྟོན་ནོ། །སྔོན་གྱི་མཁན་པོ་དབུས་ལུགས་པ་ནི། རྣལ་འབྱོར་ཆེན་པོའི་རྒྱུད་ཐམས་ཅད་ཀྱང་བཤད་ཐབས་རྣམ་པ་ལྔས་འཆད་དེ། ཆོས་ཐམས་ཅད་འབྲས་བུའི་ཆོས་སུ་སངས་རྒྱས་པའི་ཕྱིར་དོན་སྤྱི་རྒྱ་རླབས་ཀྱིས་བཅད་དེ་འཆད་པ་དང་། གཞུང་གི་འབྲེལ་པ་ཤེས་པར་བྱ་བའི་ཕྱིར་ཚིག་གི་སྡེབ་སྦྱོར་ལེགས་པར་བཤད་པ་དང་། དོན་སྦས་པའི་དགོངས་པ་ཐོན་པར་བྱ་བའི་ཕྱིར་གབ་པའི་སྦས་ཐབས་འབྱིན་པ་ལ་མཁས་པར་བཤད་པ་དང་། ཐེག་པ་ཆེན་པོའི་ལྟ་བ་ཟབ་མོ་དང་། སྤྱོད་པ་རླབས་པོ་ཆེས་གདུལ་བྱ་རྣམས་མི་སྐྲག་པར་བྱ་བའི་ཕྱིར་དོན་མི་འཚམས་པ་འཚམས་པར་བཤད་པ་དང་། གང་ཟག་རྣམས་ཀྱིས་བསྒྲུབ་པ་ཉམས་སུ་ལེན་ཤེས་པར་བྱ་བའི་ཕྱིར་རྒྱུད་དཀྲུགས་པ་རྣམས་སྐབས་སྦྱར་ཏེ་བཤད་པའོ། །དེ་རྣམས་ཀྱང་དཔེ་དང་སྦྱར་ཏེ་ཚིགས་སུ་བཅད་པ། ཁྱུང་ཆེན་ནམ་མཁར་ལྡིངས་པ་སྤྱི་རྒྱ་རླབས་ཀྱིས་གཅོད། །གསལ་ལ་མ་འདྲེས་དོན་གྱི་ཆེ་བ་སྟོན། །ཞེས་བྱ་བ་དང་། ངང་པའི་རྒྱལ་པོ་མི་འགྱོགས་སྟབས་སུ་འགྲོ། །ཚིག་གི་སྡེབ་སྦྱོར་ལེགས་པས་དོན་དམ་བསེགས་སུ་གཅོད། ཅེས་པ་དང་། རུས་སྦལ་གབ་པ་ལྟ་བུའི་བློ་ཤེས་པ། །གབ་པའི་སྦས་ཐབས་འབྱིན་ཤེས་སློབ་དཔོན་ཡིན། །ཞེས་བྱ་བ་དང་། སྨད་ཀྱི་རྣ་བུ་བྲག་ལ་འཛེག་པ་ལྟར། ། མི་འཚམས་འཚམས་བཤད་སྐྱོན་མེད་ཡོན་ཏན་བསྔགས། །ཞེས་བྱ་བ་དང་། ཇི་བཞིན་དོན་གྱི་བསྣོལ་མཚམས་མ་ཤོར་བར། །སྟེང་འོག་འཕེན་སྡུད་འཚོལ་བའི་སྐབས་སྦྱོར་བ། །མན་ངག་ཡོད་པའི་སློབ་དཔོན་དེ་ལྟར་འཆད། །ཅེས་བྱ་བ་རྣམས་ཀྱིས་ཁོག་དབུབ་པར་བཞེད་དོ། །དེ་ལ་རྒྱུད་འདིའི་སྐབས་སུ་དོན་སྤྱི་རྒྱ་རླབས་ཀྱིས་གཅོད་པ་ནི། ཕྱག་རྒྱ་ཆེན་པོ་ལྔའི་ཚུལ་གྱིས་ཆོས་ཐམས་ཅད་རིགས་ལྔ་ཡེ་ཤེས་ལྔའི་ངང་དུ་སངས་རྒྱས་པར་སྟོན་པར་བཞེད་དེ། དེ་ལ་ཕྱག་རྒྱ་ཆེན་པོ་ལྔ་ནི། རྡོ་རྗེ་གསོར་བ་ལྟ་བུ་ནས། རལ་གྲི་བསྐོར་བའི་བར་དག་སྟེ། ཇི་ལྟར་ཕྱག་རྒྱ་དེ་དག་ལ་ལས་དང་ཡོན་ཏན་བྱེ་བྲག་མེད་པར་སྣང་བ་བཞིན། རྒྱུད་འདིའི་དབུ་ཞབས་ནས་ཀྱང་ཆོས་ཐམས་ཅད་འབྲས་བུའི་ཆོས་སུ་སངས་རྒྱས་པར་སྟོན་པར་བྱེ་བྲག་མེད་དོ། །ཞེས་གསུངས་སོ། །དེ་ལས་ཀྱང་ཁྱད་པར་དུ་དབུས་ལུགས་བཀའ་ཕྱོགས་པ་ནི། ཕྱག་རྒྱ་སོ་སོ་དང་རིགས་དང་ཡེ་ཤེས་སོ་སོར་སྦྱར་ཏེ་བསྟན་ནོ། །ཚིག་གི་སྡེབ་སྦྱོར་ལེགས་པར་བཤད་པའི་སྐབས་སུ་ཡང་། དབང་པོ་རབ་ཀྱི་དོན་དུ་ཏནྟྲའི་མཚན་བཤད་པ་དང་། དབང་པོ་འབྲིང་གི་དོན་དུ་རྒྱུད་དབུ་ཞབས་ཀྱི་དོན། གླེང་གཞི་དང་། གླེང་བསླང་བ་དང་། ཡོངས་སུ་ཤེས་པར་བྱ་བའི་དངོས་པོ་དང་། དེ་ཇི་ལྟར་ཡོངས་སུ་ཤེས་པར་བྱ་བ་དང་། རྒྱུད་ཡོངས་སུ་གཟུང་བ་རྣམས་སུ་ཕྱེ་སྟེ་སྟོན་ནོ། །ཡོངས་སུ་ཤེས་པར་བྱ་བའི་དངོས་པོ་ལ་ཡང་ལེའུ་ཉི་ཤུ་རྩ་གཉིས་ལ་རེ་རེ་ལའང་། རྒྱུད་ཀྱི་ཆེ་བ་དང་ལེའུ་རང་གི་མཚམས་སྦྱོར་དང་། ལེའུ་སོ་སོའི་སྒོ་བརྩེགས་ཀྱི་དོན་རྣམས་སུ་ཕྱེ་སྟེ་སྟོན་ནོ། །དེ་ཇི་ལྟར་ཡོངས་སུ་ཤེས་པར་བྱ་བ་ནི་གསང་སྔགས་སྤྱིར་བཏང་བའི་མན་ངག་སྟེ། ཐམས་ཅད་ཀུན་ཏུ་བཟང་པོ་དང་བཟང་མོ་དབྱེར་མེད་པར་ཤེས་པར་བྱ་བར་སྟོན་ནོ། །གབ་པའི་སྦས་པ་འབྱིན་པའི་སྐབས་སུ་ཡང་ཚིག་བྱིངས་ཆེ་བ་རྣམས་ལ་ཕྱི་ནང་གསང་བ་གསུམ་གྱིས་རྒྱུད་ཀྱི་དགོངས་པ་དབྱུང་བར་སྟོན་ནོ། །དོན་མི་འཚམས་པ་འཚམས་པར་བཤད་པའི་སྐབས་སུ་ཡང་རང་བཞིན་དང་། དགོངས་རྒྱུད་དང་། དོན་རྟགས་ཀྱི་སྒོ་ནས་དོན་མི་འགལ་ཞིང་འཚམས་པར་སྟོན་ནོ། །འཕེན་སྡུད་སྐབས་སྦྱར་ཏེ་བཤད་པའི་སྐབས་སུ་ཡང་སྒྲུབ་པ་པོ་རྣམས་ཀྱིས་ཉམས་སུ་བླང་བའི་ལས་ཀྱི་གོ་རིམ་འབྲེལ་བར་བཞེད་དོ། །སྤྱིར་སྔོན་གྱི་མཁན་པོ་རྣམས་ཀྱིས་བཤད་པའི་གཞུང་འདི་དག་ཀྱང་དོན་ག ཅིག་གི་ནང་དུ་གཅིག་འདུས་པར་སྣང་སྟེ། འོན་ཀྱང་གཞུང་སོ་སོར་ཇི་སྐད་གསུངས་པ་བཞིན་བྲིས་པ་ནི་མན་ངག་སྲོལ་མི་ནུབ་པར་བྱ་བའི་ཕྱིར་སྨོས་པ་ཙམ་ཡིན་ནོ། །དེ་ཡན་ཆད་ནི་རྒྱུད་སྤྱི་དང་གཞུང་འདི་ཉིད་ཀྱི་སྤྱིའི་དོན་ཡོངས་སུ་ཤེས་པར་བྱ་བའི་ཕྱིར་སྤྱིའི་དོན་བརྗོད་པའོ། །ད་ནི་གཞུང་འདི་ཉིད་ཀྱི་ཡན་ལག་གི་དོན་ཁོང་དུ་ཆུད་པར་བྱ་བའི་ཕྱིར་གཞུང་གི་ཚོགས་ལ་འཇུག་པར་བྱ་སྟེ། དེ་ཡང་དང་པོ་ཉིད་དུ་གཞུང་འདི་ཉིད་ཀྱི་ལེའུ་དང་འབྲེལ་པ་ཁོང་དུ་ཆུད་པར་བྱ་བའི་ཕྱིར་གཞུང་གི་བབས་ཁོང་དུ་ཆུད་པར་བྱའོ། །དེ་ལ་སྟོན་པ་དཔལ་ཀུན་ཏུ་བཟང་པོ་སངས་རྒྱས་ཐམས་ཅད་ཀྱི་བདག་ཉིད་ཆོས་ཐམས་ཅད་ཀྱི་རང་བཞིན་ཏེ། གནས་འོག་མིན་ཆོས་དབྱིངས་ཀྱི་ཕོ་བྲང་ན་ཉིད་ལས་མི་གཞན་པའི་འཁོར་གྱི་དཀྱིལ་འཁོར་དང་དབྱེར་མེད་པར་དུས་བཞི་མཉམ་པ་ཉིད་དབྱིངས་ན་སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་ཞུགས་པའི་དགོངས་པ་ལ། ཆོས་ཐམས་ཅད་ཀྱི་རང་བཞིན་ཇི་ལྟར་ཐུགས་སུ་ཆུད་པའི་དོན་གསལ་བ་ནི། དེ་བཞིན་ཉིད་ཀྱི་དབྱིངས་ཉིད་དབང་སྒྱུར་ཡེ་ཤེས་དཀྱིལ་འཁོར་ཐུགས་རྗེའི་ངང་། ཞེས་བྱ་བ་ལ་སོགས་པ་རྡོ་རྗེ་སེམས་དཔའི་གསང་ཚིག་རྣམས་ཡིན་ནོ། །དེ་ལྟར་ཉིད་ཀྱི་ཆེ་བའི་དཀྱིལ་འཁོར་གྱི་དགོངས་པ་ལ་ཐམས་ཅད་ཆེ་བའི་དཀྱིལ་འཁོར་ཡོན་ཏན་གྱི་ཚོགས་འབྲས་བུའི་ཆོས་སུ་སངས་རྒྱས་པའི། ཆོས་བཤད་པར་བྱ་བའི་གནས་གདུལ་བྱ་གུད་དུ་མི་དམིགས་ཀྱང་། ཉིད་ཀྱི་ཆེ་བའི་དཀྱིལ་འཁོར་ངམ་པའི་ཚུལ་གྱིས་གླེང་བསླང་བ་ནི། ཀུན་ཏུ་བཟང་པོས་གླེང་བསླང་བ་དང་། ཀུན་ཏུ་བཟང་མོས་གླེང་བསླང་བའོ། །སངས་རྒྱས་ཀྱི་དགོངས་པ་དེ་ལྟར་ཡིན་མོད་ཀྱི། འགྲོ་བ་རྣམས་ཀྱིད་དེ་ལྟར་མ་རྟོགས་པས་དོན་དམ་པ་དང་། ཀུན་རྫོབ་ཀྱི་བྱང་ཆུབ་ཏུ་སེམས་བསྐྱེད་པར་མཛད་དོ། །བྱང་ཆུབ་ཀྱི་སེམས་ཐུགས་རྗེ་ཆེན་པོའི་བྱིན་རླབས་ཐུབ་པ་རྣམ་པ་དྲུག་འཐོན་ནས་འདུལ་བ་རྣམ་པ་བཞིའི་སྒོ་ནས་འགྲོ་བ་ལྔའི་དོན་མཛད་པའི་ཚུལ་ནེ་ལེའུ་གསུམ་པ་སྟེ། དེ་ཡན་ཆད་ཀྱིས་ནི་སྟོན་པའི་ཐུགས་རྗེ་དང་བྱིན་རླབས་ཇི་ལྟར་ཆར་བའི་ཚུལ་བསྟན་ནོ། །ལེའུ་བཞི་པ་མན་ཆད་ནི་རྒྱུད་ཀྱི་དངོས་པོ་ལ་འཇུག་པ་སྟེ། དེ་ལ་ཐོག་མ་ཉིད་དུ་ཡི་གེ་སྒྱུ་འཕྲུལ་བསྟན་པ་ནི། སངས་རྒྱས་ཀྱི་འཕྲུལ་བ་འབྱུང་བ་ན་ཆོས་མཚན་མ་མེད་པ་ལས་མཚན་མར་འཕྲུལ་པའི་དངོས་པོ་ཡི་གེ་ཡིན་ཏེ། དཔེར་ན་མི་དང་ལྷའི་གནས་སུ་རིན་པོ་ཆེའི་ཆར་རམ་ཆུ་དྭངས་པའི་ཆར་ལ་སོགས་པ་འབབ་པར་གྱུར་པ་ན། ནམ་མཁའ་དྭངས་པ་ལས་རླུང་གཡོས་པའི་དབང་གིས་སྤྲིན་འབྱུང་བར་འགྱུར་ཏེ། སྤྲིན་ལས་ནི་གོང་དུ་བརྗོད་པ་བཞིན་དུ་གློག་སྣ་ཚོགས་དང་། འབྲུག་སྣ་ཚོགས་དང་། ཆར་སྣ་ཚོགས་འབབ་པར་འགྱུར་རོ། །དེ་བཞིན་དུ་ཆོས་ཀྱི་སྐུ་མཚན་མ་མེད་པ་ལས་ཐུགས་རྗེ་ཆེན་པོའི་རླུང་གིས་བསྐྱོད་ན་སྤྲུལ་པའི་དང་པོ་ཡི་གེའི་སྤྲིན་འབྱུང་བར་འགྱུར་ཏེ། རིན་པོ་ཆེའི་སྤྲིན་དེ་ནི་དགོས་པ་ཐམས་ཅད་ཀྱི་གཞི་བྱེད་པ་དེ་བཞིན་དུ་ཡི་གེ་རིན་པོ་ཆེའི་སྤྲིན་གྱིས་ཀྱང་ལས་དང་དངོས་གྲུབ་ཀྱི་དགོས་པ་ཐམས་ཅད་བསྒྲུབ་པའི་ཕྱིར། ཡི་གེ་སྒྱུ་འཕྲུལ་གྱི་ལེའུ་དང་། སྒྱུ་འཕྲུལ་བསྒྲུབ་པའི་ལེའུ་བསྟན་ནོ། །དེ་ལྟར་སྒྱུ་འཕྲུལ་གྱི་ཏིང་ངེ་འཛིན་དང་ལྡན་པ་རྣམས་ཀྱིས་དངོས་གྲུབ་ཆེན་པོ་བསྒྲུབ་པའི་རྟེན་དང་ཐབས་ཀྱང་ཏིང་ངེ་འཛིན་གྱི་དཀྱིལ་འཁོར་དང་སྔགས་དང་ཕྱག་རྒྱ་ཡིན་པས། ལེའུ་དྲུག་པ་དང་བདུན་པ་དང་བརྒྱད་པས་བསྟན་ནོ། །སྒྲུབ་པ་པོ་རྣམས་ཀྱི་དང་པོ་འཇུག་པའི་སྒོ་ཡང་རྡུལ་ཚོན་གྱི་དཀྱིལ་འཁོར་ལ་བརྟེན་ནས་དབང་ཐོབ་པར་བྱས་ན། དངོས་གྲུབ་སྒྲུབ་པའི་ཐབས་ཀྱི་ཆོ་ག་ཡིན་པས་ལེའུ་དགུ་པ་དང་བཅུ་པས་བསྟན་ནོ། །འདོད་པའི་ཡོན་ཏན་ལ་ལྷག་པར་སྤྱད་པས་འདུལ་བ་རྣམས་ཀྱི་ལམ་ནི་ཚོགས་ཀྱི་དཀྱིལ་འཁོར་ཡིན་པས། ལེའུ་བཅུ་གཅིག་པ་དང་བཅུ་གཉིས་པས་བསྟན་ནོ། །སྤྱིར་རྣལ་འབྱོར་པ་དམ་པ་རྣམས་ཀྱིས་ཐམས་ཅད་མན་ངག་གིས་གདེང་བཅད་དགོས་པས། ལེའུ་བཅུ་གསུམ་པས་སྟོན་ནོ། །ལེའུ་བཅུ་བཞི་པའི་གླུ་ནི་གོང་དུ་བསྟན་པ་ཉིད་ཀྱི་ཆེ་བའི་དཀྱིལ་འཁོར་ལ་ངམ་པའི་ཚུལ་གྱིས་བསྟོད་པས་ཏེ། འདི་དག་གིས་ནི་ཞི་བའི་དཀྱིལ་འཁོར་ཡོངས་སུ་རྫོགས་པའོ། །ལེའུ་བཅོ་ལྔ་པ་མན་ཆད་ཀྱིས་ནི་ཁྲོ་བོའི་དཀྱིལ་འཁོར་ཕྲིན་ལས་དང་བཅས་པ་དང་། སྤྱིའི་དམ་ཚིག་བསྟན་པའོ། །རྒྱུད་ཀྱི་ཆེ་བ་བསྟན་པ་ནི། སྤྱིའི་ཆེ་བ་ནི་གོང་དུ་བསྟན་པ་ཉིད་དུ་འདུས་ལ། ཡན་ལག་གི་ཆེ་བ་ནི་སྐབས་སྐབས་ཀྱི་དོན་བཤད་པ་ཉིད་ལས་ཤེས་པར་བྱའོ། །དེ་ལ་རྒྱུད་དང་མདོ་སྡེ་ཕལ་མོ་ཆེ་ནས། ཐོག་མར་འདི་སྐད་བདག་གིས་ཐོས་པའི་དུས་གཅིག་ན་ཞེས་འབྱུང་བ་ལས། རྒྱུད་འདིར། འདི་སྐད་བཤད་པའི་དུས་ན། ཞེས་གསུངས་པའི་དོན་གྱི་དབང་ཅི་ལས་དགོངས་ཤེ་ན། འདི་ནི་ཐུན་མོང་དང་ཐུན་མོང་མ་ཡིན་པའི་ཁྱད་པར་སྟེ། འདི་ལྟར་བདག་གིས་ཐོས་པ་ཞེས་སྨོས་པས་ནི། ཡང་དག་པར་སྡུད་པར་བྱེད་པས་རང་གི་བློའི་སྣང་བ་འཛིན་པར་བྱེད་པས་ན། འདི་སྐད་ཅེས་བྱ་བའི་དོན་ཡང་རང་གི་བློའི་སྣང་བ་ལ་འཇུག་གོ། །སྟོན་པས་ཇི་ལྟར་གསུངས་པ་ཁས་ལེན་པར་མི་བྱེད་དེ། དོན་འདི་དག་གིས་ན་རང་བློའི་སྣང་བ་འཛིན་པ་དང་། སྟོན་པ་དང་སྡུད་པ་པོའི་ཁྱད་པར་འཛིན་པ་འདིར་འགྱུར་རོ། །དུས་གཅིག་ན་ཞེས་བྱ་བ་ཡང་། རྒྱུད་དང་མདོ་སྡེ་འབྱུང་བར་དཀོན་པའམ། སྟོན་པ་ཐུགས་རྗེ་ཆེ་བའམ། སྡུད་པ་པོ་ཤེས་རབ་མཆོག་ཏུ་གྱུར་པར་སྟོན་པས་དུས་ཡོངས་སུ་ཆད་པར་སྟོན་པར་གྱུར་རོ། །དེ་བས་ན་དོན་འདིར་འགྱུར་ཏེ། ཡང་དག་པར་སྡུད་པར་བྱེད་པས་རྒྱུད་ཀྱི་དོན་སྒྲོ་སྐུར་དང་བྲལ་བར་བློ་ལ་ཡོངས་སུ་བཀོད་ནས། འདི་སྐད་བདག་གིས་ཐོས་པ་ཞེས་མ་བརྒྱུད་པ་དང་། འཆད་པ་པོ་མ་ཡིན་པར་ཁས་བླངས་ནས་བརྗོད་པ་དང་། དུས་གཅིག་ན་ཞེས་པ་སྟེ། འདི་ལྟར་དུས་གཅིག་གི་ཚེ་འདི་གསུངས་ཤིང་ཐོས། གཞན་དུ་གཞན་གསུངས་ཤིང་ཐོས་ཞེས་སྟོན་པ་ཐུགས་རྗེ་ཆེ་བ་དང་། བདག་ཉིད་ཐོས་པ་མང་བ་དང་། ཡང་གཞན་དུ་འདི་མ་གསུངས་ཤིང་མ་ཐོས་སོ་ཞེས། རྒྱུད་དང་མདོ་སྡེ་འབྱུང་བ་དཀོན་པར་སྟོན་པ་དང་། ཡང་དུས་གཅིག་སྟེ། རིམ་གྱིས་འཇུག་པ་མ་ཡིན་པར་སྐད་ཅིག་གཅིག་ལ་ཐོས་ཤིང་བཟུང་ངོ་ཞེས་ཤེས་རབ་མཆོག་ཏུ་གྱུར་པར་སྟོན་པ་དང་། ཡང་དགའ་བ་ལ་སོགས་པ་སྤྲོས་པའི་དུས་ཀྱི་བློ་དང་། རྨུགས་པ་ལ་སོགས་པ་ཉམ་ཆུང་བའི་དུས་ཀྱི་བློའི་བསམ་པ་གཉིས་དང་བྲལ་བའི་བློ་གྲོས་རྩེ་གཅིག་ཏུ་བྱེད་པའི་དུས་ན་ཐོས་ཞེས། བདག་ཉིད་ཤེས་རབ་དང་ཏིང་ངེ་འཛིན་དང་ལྡན་པས་ཐོས་པར་སྟོན་པ་རྣམས་སུ་འགྱུར་རོ། །རྒྱུད་འདིར་ནི་དོན་འདི་ལྟ་བུ་དག་སྒྲུབ་པར་བྱེད་པ་མ་ཡིན་ཏེ། དེའི་ཕྱིར་འདི་སྐད་བཤད་པ་སྨོས་པ་ནི་ཡང་དག་པར་སྡུད་པར་བྱེད་པ་སྟོན་པའི་དགོངས་པ་དང་མི་གཉིས་པར་ཁས་བླངས་ནས་འདི་སྐད་བཤད་པའི་ཞེས་སྨོས་ཏེ། དོན་འདི་ཉིད་ཀྱིས་ནི་གཞུང་འདི་ཡང་བཅོམ་ལྡན་འདས་ཀྱི་དགོངས་པ་དམ་པ་ངེས་པའི་དོན་མཐར་ཐུག་པ་བསྟན་པ་ཡིན་པར་གྱུར་ལ། སྡུད་པ་པོ་ཡང་དེ་བཞིན་གཤེགས་པ་ཉིད་ཡིན་པར་ཁས་བླངས་པར་འགྱུར་རོ། །དུས་གཅིག་མ་སྨོས་པས་ཀྱང་དུས་བཞི་མཉམ་པ་ཉིད་དུ་གསུངས་ཡིན་ནོ། །འདི་ཉིད་ཀྱིས་ནི་རྒྱུད་ཀྱི་ཆེ་བ་དང་། ཡང་དག་པར་སྡུད་པར་བྱེད་པའི་ཆེ་བ་དང་། དུས་ཀྱི་ཆེ་བ་རྣམས་བསྟན་པ་ཡིན་ནོ། །སྐབས་འདིར་སྔོན་གྱི་སློབ་དཔོན་དག་ན་རེ། རྒྱུད་གཞན་གྱི་ལུགས་ཀྱིས་ནི། ཡི་གེ་ཨེ་བཾ་མ་ཡཱ་བཞིས་འགྲེལ་པ་ཡིན་ལ། འདིར་ནི་ཡི་གེ་ༀ་གྱིས་བསྡུས་ཏེ་འགྲེལ་པས་འཕགས་སོ་ཞེས་གསུངས་སོ། །རྒྱུད་འདི་ལ་ཡི་གེ་མ་ཡ་གཉིས་མེད་པས། འདི་ཉིད་ནས་ནི་བསྡུས་པའི་གཞི་མེད་དོ། །ཡི་གེ་ༀ་གྱི་གཞི་ཡང་འདི་ལས་མི་འབྱུང་སྟེ། དེའི་ཕྱིར་དཀྱུས་ལ་སྦྱར་བ་ནི་མི་བསྙད་དོ། །སྤྱིར་ཤེས་པར་བྱ་བར་འཆད་ན་ནི། ཡི་གེ་ཨ་དང་ཨུ་དང་མ་གསུམ་བསྡུས་པ་ནི། ༀ་ཡིན་ལ་ཡི་གེ་གསུམ་ནི་ལུས་ངག་ཡིད་གསུམ་དང་ལྷ་གསུམ་གྱི་ས་བོན་ཡིན་པར་བྲམ་ཟེ་རྣམས་ཀྱི་རིག་བྱེད་ལས་ཀྱང་གྲགས་ལ། ལྷ་གསུམ་སྐུ་གསུང་ཐུགས་ཀྱི་རང་བཞིན་ཡིན་པར་ཡང་གསང་སྔགས་ཀྱིས་ཚུལ་ལས་གྲགས་ཏེ། དེའི་ཕྱིར་ཡི་གེ་ༀ་ནི་སྐུ་གསུང་ཐུགས་རྡོ་རྗེའི་རང་བཞིན་ཡིན་པར་འབྱུང་བས་སྤྱིའི་དོན་དུ་སྦྱར་བ་ལ་ཉེས་སྐྱོན་མེད་དོ། །ད་ནི་སྟོན་པ་ཕུན་སུམ་ཚོགས་པ་བསྟན་པའི་ཕྱིར། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ལོངས་སྤྱོད་ཆེན་པོ་ཞེས་བྱ་བ་ལ་སོགས་པ་སྨོས་ཏེ། དེ་ལ་ཡོན་ཏན་གྱི་མཚན་གྱི་ཁྱད་པར་འདི་དག་ནི་ཆོས་ཀྱི་སྐུ་དང་གཟུགས་ཀྱི་སྐུ་གཉིས་ཀའི་ཐུན་མོང་གི་མཚན་དུ་སྤྱིར་གྲགས་པ་ཡིན་མོད་ཀྱི། འདི་ནི་ཀུན་ཏུ་བཟང་པོ་བྱང་ཆུབ་སེམས་ཀྱི་རང་བཞིན་སྟོང་པའི་སྐབས་ཡིན་པས་ཆོས་ཀྱི་སྐུའི་ཡོན་ཏན་གྱི་མཚན་དུ་ཤེས་པར་བྱའོ། །དེ་ལ་དེ་བཞིན་གཤེགས་པ་ཞེས་བྱ་བ་ནི་དེ་བཞིན་ཉིད་ཐུགས་སུ་ཆུད་པའི་དོན་ཏེ། རྟག་ཏུ་དེ་བཞིན་དུ་རྟོགས་པའམ། ཡང་ན་ཕྱིན་ཅི་མ་ལོག་པའི་ཡེ་ཤེས་ཀྱིས་ཚུལ་དེ་ལྟ་བུར་རྟོགས་པས་དེ་སྐད་ཅེས་བྱ་སྟེ། དེ་བཞིན་ཉིད་དང་ཡེ་ཤེས་ཆེན་པོ་གཉིས་ཀ་ལ་འཇུག་པར་ཤེས་པར་བྱའོ། །ཡང་བྷྱ་ག་ཏ་ནི་གསུངས་པའི་དོན་ཏེ། དེ་བཞིན་གསུངས་པས་དེ་སྐད་ཅེས་བྱའོ། །ཡང་གྷ་ཏ་ནི་འགྲོ་བའི་དོན་ཏེ་སྔོན་གྱི་སངས་རྒྱས་རྣམས་ཇི་ལྟར་བྱང་ཆུབ་ཀྱི་སྤྱོད་པའི་སྒོ་ནས་གཤེགས་པ་དེ་ལྟར། ལམ་མཐུན་པར་གཤེགས་པས་དེ་སྐད་ཅེས་བྱའོ། །ཡང་གསང་སྔགས་ཀྱི་ཚུལ་གྱི་སྐབས་སུ། དཔེར་ན་ཟངས་ལ་སོགས་པའི་དངོས་པོ་ཞིག་ལ། ཆོལ་ཟངས་སུ་བྱས་པའི་དུས་ན་ནི་སྨེ་བའི་གནས་སུ་བྱེད་ལ། དེ་ཉིད་ལས་གཞོང་པར་བྱས་པའི་དུས་ན་ནི་གཙང་བའི་གནས་སུ་བྱེད། དེ་ཉིད་ལས་སྐུ་གསུང་ཐུགས་སུ་བྱས་པའི་དུས་ན་ནི་མཆོད་པའི་གནས་སུ་བྱེད་དོ། །དེ་བཞིན་དུ་འདོད་ཆགས་ལ་སོགས་པའི་སྤྱོད་པ་འདི་དག་ཀྱང་། གཟུང་བ་དང་འཛིན་པ་ལ་ཞེན་པའི་བློས་སྦྱང་ན་ནི། སྲིད་པ་འཁོར་བའི་གནས་སུ་འགྱུར་རོ། །དེ་ཉིད་ཐབས་དང་ཤེས་རབ་ཀྱིས་ཟིན་པའི་བློས་སྦྱང་ན་ནི། རྣལ་འབྱོར་གྱི་ལོངས་སྤྱོད་ཀྱི་རྐྱེན་བྱང་ཆུབ་ཀྱི་ལམ་དུ་འགྱུར་རོ། །ཐབས་དང་ཤེས་རབ་ཀྱི་བློ་མངོན་དུ་གྱུར་ན་ནི། སྐུ་གསུང་ཐུགས་རྡོ་རྗེ་ལྟ་བུའི་དངོས་གྲུབ་ཏུ་འགྱུར་རོ། །དེ་བས་ན་སངས་རྒྱས་རྣམས་ཀྱི་ལམ་ནི་ཉོན་མོངས་པ་སྤངས་ཏེ་གྲོལ་བ་མ་ཡིན་གྱི། གནས་སུ་དག་པའི་ཐབས་ཀྱིས་གྲོལ་བས་དེ་བཞིན་གཤེགས་པ་ཞེས་བྱའོ། །རྣམ་པ་གཅིག་ཏུ་སེམས་ཅན་རྣམས་སྐྱེས་པ་དེ་ལྟར་སྐྱེས་པས་དེ་སྐད་ཅེས་བྱའོ། །སེམས་ཅན་རྣམས་ནི་སྐྱེ་བ་རྣམ་པ་བཞིའི་ཚུལ་གྱིས་སྐྱེ་སྟེ། དེ་ལ་སེམས་ཅན་མངལ་ནས་སྐྱེས་པ་དང་མཐུན་པར་སངས་རྒྱས་རྣམས་ཀྱང་ལྷུམས་ནས་བལྟམས་པ་ལ་སོགས་པ་སྟོན་པ་དང་། གཉིས་སུ་མེད་པར་རོལ་པའི་མཁའ་ལས་དཀྱིལ་འཁོར་སྤྲུལ་པ་ལ་སོགས་པ་བསྟན་པའོ། །དེ་བཞིན་དུ་དྲོད་ལས་སྐྱེས་པ་དང་མཐུན་པ་ནི། སྣ་ཡི་དབུགས་རིང་དྲོ་བ་ལས། །རྒྱལ་བས་ཕྱག་རྒྱའི་སྦྱོར་བ་ཕྱུང་། །ཞེས་གསུངས་པ་ལ་སོགས་པ་ལྟ་བུའོ། །སྒོ་ང་ལས་སྐྱེས་པ་ལྟ་བུ་དང་མཐུན་པར། ཡི་གེ་དང་ཐུགས་ཕྱག་མཚན་དང་སྐུ་ལ་སོགས་པའི་སྒོ་དུ་མའི་རིམ་པ་མི་འདྲ་བར་གྱུར་ཅིང་སྨིན་པས་རྒྱལ་བའི་སྐུ་གྲུབ་པར་འདོད་དོ། །རྫུས་ཏེ་སྐྱེ་བ་དང་མཐུན་པར་རིག་པ་སྐད་ཅིག་མའི་བྱིན་རླབས་ལས་སྤྲུལ་པར་འདོད་པ་སྟེ། དེ་བས་ན་དེ་བཞིན་གཤེགས་པ་ཞེས་བྱའོ། །ཡང་དག་པར་རྫོགས་པའི་སངས་རྒྱས་ཞེས་བྱ་བ་ལ། སངས་རྒྱས་ནི་སད་པའི་དོན་ཏེ། མི་ཤེས་པའི་གཉིད་ལས་སད་པར་གྱུར་པ་ལ་བྱ། རྣམ་པ་གཅིག་ཏུ་རྒྱས་པའི་དོན་ཏེ། མེ་ཏོག་རྒྱས་པ་ལྟ་བུར་བློ་རྒྱས་པའི་དོན་ཏོ། །དེ་ཡང་གསང་སྔགས་ཀྱི་ཚུལ་ལྟར་ན། འདི་སྐད་དུ། མ་རིག་པ་ཉིད་ཡེ་ཤེས་གསལ། །ཉོན་མོངས་སྡུག་བསྔལ་བྱང་ཆུབ་མཆོག །ཅེས་གསུངས་པ་ལྟ་བུ་སྟེ། མི་མཐུན་པ་དང་གཉེན་པོ་དབྱེར་མེད་པའི་དོན་གྱིས་སངས་རྒྱས་པའོ། །སངས་རྒྱས་ཞེས་བྱ་བའི་སྒྲ། རང་སངས་རྒྱས་དང་བྱང་ཆུབ་སེམས་དཔའ་ས་བཅུ་པ་ལ་ཡང་འཇུག་པས་དེ་ལས་དབྱེ་བའི་ཕྱིར། རྫོགས་པའི་སངས་རྒྱས་ཞེས་སྨོས་སོ། །སྒྲ་དེ་ཡངས་བཅུ་པའི་ཡེ་ཤེས་མཐར་ཕྱིན་པའི་རྫོགས་པའི་སངས་རྒྱས་ཞེས་བྱ་བར་གྲགས་པའང་ཡོད་དེ། འདི་ལྟར། ཆོས་ཀུན་ནམ་མཁའི་མཚན་ཉིད་དེ། །གཉིས་སུ་མེད་པའི་མཚན་ཉིད་གཅིག །སྟོབས་བཅུ་རྫོགས་པ་སངས་རྒྱས་པ། །དེ་ནི་རྫོགས་སངས་རྒྱས་ཞེས་བྱ། །ཞེས་གསུངས་པ་ལྟ་བུ་དང་། བདུད་སྡིག་ཅན་རྫོགས་པའི་སངས་རྒྱས་སུ་འཕྲུལ་པ་ལྟ་བུའང་ཡོད་པར་གྲགས་པས། དེའི་ཕྱིར་ཡང་དག་པར་རྫོགས་པའི་སངས་རྒྱས་ཞེས་བྱའོ། །བཅོམ་ལྡན་འདས་ཞེས་བྱ་བ་ལ་བྷ་ག་ནི་བཅོམ་པའི་དོན་ཏེ། སངས་རྒྱས་རྣམས་ཉོན་མོངས་པ་ལ་སོགས་པ་བཅོམ་པའི་ཡོན་ཏན་དང་ལྡན་པས་དེ་སྐད་ཅེས་བྱའོ། །རྣམ་པ་གཅིག་ཏུ་ན་བྷ་ག་ནི་སྐལ་པ་སྟེ། སངས་རྒྱས་རྣམས་དབང་ཕྱུག་ཕུན་སུམ་ཚོགས་པ་ལ་སོགས་པ་དང་ལྡན་པས་ལེགས་ལྡན་ནམ་སྐལ་ལྡན་ཞེས་བཤད་དོ། །ཡང་ན་བྷ་ག་ནི་སྲིད་པར་འགྲོ་བ་སྟེ། དེ་ལས་འདས་པ་ལ་བྷ་ག་ཝན་ནོ། །ཡང་བྷ་ག་ནི་སྲིད་པ་དང་མྱ་ངན་ལས་འདས་པས་དེ་སྐད་ཅེས་བྱའོ། །རྣམ་པ་གཅིག་ཏུ་བྷ་ག་ནི་འཇིགས་པར་འགྲོ་བ་ལས་འདས་པ་སྟེ། སངས་རྒྱས་རྣམས་མི་འཇིགས་པ་བཞི་བརྙེས་པས་འཇིགས་པ་མ་ལུས་པ་ལས་འདས་པའི་ཕྱིར་བྷ་ག་ཝན་ནོ། །གསང་སྔགས་ཀྱི་ཚུལ་ལྟར་ན། བྷ་ག་ནི་རྡོ་རྗེ་བཙུན་མོ་རྣམས་ཀྱི་བྷ་ག་སྟེ། ཆོས་ཀྱི་འབྱུང་གནས་སོ། །ཝན་ནི་ལྡན་པ་སྟེ། དེ་དང་གཉིས་སུ་མེད་པར་བཞུགས་པའི་དོན་ནོ། །མདོར་ན་འདུ་འབྲལ་མེད་པའི་གཟུངས་དང་ལྡན་པའི་ཕྱིར་བྷ་ག་ཝན་ནོ། །ལོངས་སྤྱོད་ཆེན་པོ་ཞེས་བྱ་བ་ལ། ཡོན་ཏན་དུ་བྱ་བའི་ཆོས་ཐམས་ཅད་ལ་བག་འཁུམས་པ་མེད་པར་ལོངས་ཤིང་ཀུན་ལ་སྤྱོད་པས་ལོངས་སྤྱོད་དེ། ཆོས་ཀྱི་སྐུ་བདེ་བ་ཆེན་པོའི་ལོངས་སྤྱོད་ནི་ལོངས་སྤྱོད་ཆེན་པོའོ། །དེ་ལྟར་ཡོན་ཏན་གྱི་མཚན་རྣམ་པ་བཞིའི་སྒོ་ནས་སྟོན་པ་རང་གི་ངོ་བོ་བརྗོད་ནས། དེའི་མཚན་ཉིད་བསྟན་པའི་ཕྱིར་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད་ཅེས་བྱ་བ་སྨོས་ཏེ། འདིས་ནི་བྱང་ཆུབ་སེམས་ཀྱི་རང་བཞིན་བསྟན་ཏེ། འདི་ལྟར་གོང་དུ་བསྟན་པ་དེ་ནི་སྟོན་པ་བྱང་ཆུབ་སེམས་ཀྱི་ངོ་བོ་ཡིན་ལ། བྱང་ཆུབ་ཀྱི་སེམས་དེའི་མཚན་ཉིད་ནི་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེ་ཡང་ཡིན་ལ། སྐུ་གསུང་ཐུགས་ཀྱི་བདག་པོ་ཡང་ཡིན་ནོ་ཞེས་བྱ་བ་འདིར་འགྱུར་རོ། །ཡང་དཔལ་ཀུན་ཏུ་བཟང་པོ་བྱང་ཆུབ་སེམས་ཀྱི་རང་བཞིན་དེ་སངས་རྒྱས་རྣམས་ཀྱི་བདག་ཉིད་ཁོ་ན་ཡིན་ནམ། འོན་ཏེ་ཆོས་ཐམས་ཅད་ཀྱི་རང་བཞིན་ཡང་ཡིན་སྙམ་དུ་རྟོག་པ་ལ། འདི་བསྟན་པའི་ཕྱིར་མ་ལུས་མི་ལུས་ལུས་པ་མེད་པ་ཐམས་ཅད་དང་སོ་སོ་མ་ཡིན་ཐ་མི་དད་དབྱེར་མེད་པའི་རང་བཞིན་ཏེ་ཞེས་བྱ་བ་སྨོས་ཏེ། བྱང་ཆུབ་ཀྱི་སེམས་དེ་ནི་རིགས་ཀྱི་སེམས་དང་། རྒྱུའི་གནས་སྐབས་ཀྱི་སེམས་དང་། འབྲས་བུའི་སེམས་ཀྱི་བར་དུ་དབྱེར་མེད་པར་བྱང་ཆུབ་ཀྱི་རང་བཞིན་ཡིན་པས་ཀུན་ཏུ་བཟང་པོ་བྱང་ཆུབ་ཀྱི་སེམས་རྡོ་རྗེ་ཞེས་བྱ་སྟེ། དེ་བས་ན་འགྲོ་བ་དང་ཆོས་ཐམས་ཅད་ཀྱི་རང་བཞིན་ཡང་དེ་ཡིན་ནོ་ཞེས་ཤེས་པར་བྱའོ། །དེ་བས་ན་འདི་སྟོན་པ་ཆོས་ཀྱི་སྐུའི་ངོ་བོ་བྱང་ཆུབ་ཀྱི་སེམས་ཀྱི་རང་བཞིན་གཙོ་བོར་བརྗོད་པ་ཡིན་མོད་ཀྱི། འོན་ཀྱང་དེའི་ཕྱག་རྒྱར་གྱུར་པའི་རིགས་དྲུག་པ་མ་བསྡུས་པའང་མ་ཡིན་ནོ། །དེ་བས་ན་སྟོན་པ་ཕུན་སུམ་ཚོགས་པ་གཟུགས་ཀྱི་སྐུ་འབའ་ཞིག་འཛིན་པར་མི་བྱེད་ཅིང་། འགྲོ་བ་དང་སངས་རྒྱས་གཉིས་སུ་མི་འབྱེད་པས་ཐུན་མོང་མ་ཡིན་པའི་སྟོན་པ་ཡིན་པར་ཤེས་པར་བྱའོ། །གནས་ཕུན་སུམ་ཚོགས་པ་བསྟན་པའི་ཕྱིར་འོག་མིན་གྱི་གནས་མཐའ་དང་དབུས་མེད་པ་ན་ཞེས་སྨོས་ཏེ། དེ་ལ་སངས་རྒྱས་ཀྱི་ཞིང་ཡོངས་སུ་དག་པ་ནི་ཆོས་ཀྱི་དབྱིངས་རྣམ་པར་དག་པ་ཡིན་ཏེ། འདི་ནི་ངེས་པ་དོན་གྱི་མདོ་སྡེ་ལས་ཀྱང་གསུངས་ལ། གསང་སྔགས་ཀྱི་ཚུལ་ལས་ཀྱང་བཞེད་དེ། ཞིང་རྣམས་ཀྱི་ཡོན་ཏན་སོ་སོ་སྣང་བ་ཡང་གདུལ་བྱའི་སྐལ་བ་དང་། སངས་རྒྱས་ཀྱི་ཐུགས་རྗེའི་དབང་གིས་ཕྱོགས་དང་རིས་སུ་ཆད་པ་མེད་དོ། །དེ་ཡང་འདི་ལྟར། སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། །ཅེས་གསུངས་པ་ལྟ་བུ་སྟེ། བཅོམ་ལྡན་འདས་ཤཱཀྱ་ཐུབ་པའི་ཞིང་འདིའི་གོང་ན་ཡང་སངས་རྒྱས་གཞན་གྱི་ཞིང་ཁམས་གཞན་མེད་དོ་ཞེས་བརྗོད་པར་མི་བྱའོ། །བཅོམ་ལྡན་འདས་ཀྱི་ཞིང་འདི་ཉིད་ཀྱང་ཡོངས་སུ་མ་དག་པའི་ཞིང་ཁམས་ཡིན་ནོ་ཞེས་ཀྱང་བརྗོད་པར་མི་བྱ་སྟེ། གོང་དུ་བསྟན་པ་བཞིན་དུ་ཉི་མ་དང་ཟླ་བའི་དཀྱིལ་འཁོར་མ་དག་པ་མ་ཡིན་མོད་ཀྱི། དམུས་ལོང་རྣམས་ཀྱིས་མི་མཐོང་བ་བཞིན་དུ། སངས་རྒྱས་ཀྱི་ཞིང་ཡོངས་སུ་མ་དག་པ་མ་ཡིན་ཀྱང་། སྐལ་བ་མེད་པ་རྣམས་ཀྱིས་དག་པར་མི་མཐོང་བ་དང་། སངས་རྒྱས་ཀྱི་ཐུགས་རྗེའི་སེམས་ཅན་ཁེངས་པ་རྣམས་ལ་ངན་ཅིང་དབུལ་བར་སྣང་སྟེ། དག་པར་སྣང་བས་སངས་རྒྱས་ཀྱི་མཛད་པ་མི་འགྲུབ་བའི་ཕྱིར་རོ། །དེ་བས་ན་འོག་མིན་གྱི་གནས་ཞེས་བྱ་བ་འདི་ཡང་གནས་ཀྱི་ཕྱོགས་བློས་བཙལ་མི་དགོས་ཏེ། ཆོས་ཀྱི་དབྱིངས་རྣམ་པར་དག་པའི་དབང་ལས་ཡོན་ཏན་གྱི་ཁྱད་པར་གང་དུ་སྣང་བ་དེ་ཉིད་རྒྱལ་བའི་དཀྱིལ་འཁོར་དུ་ཤེས་པར་བྱའོ། །དེ་ལྟ་བུའི་གནས་ན་ཆོས་ཀྱི་རྒྱལ་པོའི་ཕོ་བྲང་གི་ཁྱད་པར་ཇི་ལྟ་བུ་ཞིག་གི་ཡོན་ཏན་གྱི་ཁྱད་པར་དང་ལྡན་པར་སྣང་ཞེ་ན། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བྱ་ལ། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་ཞེས་བྱ་བ་ལ་སོགས་པ་སྨོས་ཏེ། གཞལ་ཡས་ཁང་ཡེ་ཤེས་ལས་སྤྲུལ་པའི་རིན་པོ་ཆེའི་རྒྱུ་ལས་གྲུབ་པ། གྲུ་བཞི་གློ་འབུར་མཁར་ཐབས་དང་ལྡན་པ། སྒོ་དང་ཁྱམས་དང་ཕོ་བྲང་དུ་བཅས་པ། རྩེ་མོ་བུམ་པ་ཟླུམ་པོ་ཀུན་ཏུ་འཁྱིལ་བ། ཕྱོགས་ཐམས་ཅད་དུ་ཚད་རྒྱ་ཡོངས་སུ་མ་ཆད་པ། རིན་པོ་ཆེའི་རྒྱན་གྱི་ཁྱད་པར་དང་། འདོད་པའི་ཡོན་ཏན་གྱི་རྟགས་ཀྱི་ལྷ་མོ་ལ་སོགས་པ་རྣམས་ཀྱིས་ཕྱོགས་བཅུ་ཀུན་ནས་འཁྲིགས་པ། ཉིད་ཀྱི་ཆེ་བའི་ཡོན་ཏན་ལས་རང་སྣང་བའི་གདན་གྱི་ཁྱད་པར་དང་ལྡན་པ། ཐེག་པ་ཆེན་པོའི་རང་བཞིན་བྱང་ཆུབ་ཆེན་པོའི་གཟུགས་བརྙན་དུ་གྱུར་པའོ། །དེ་ལས་གཞལ་ཡས་ཁང་གི་སྒོའི་ཡན་ལག་ཏུ་གཏོགས་པ་ལ་ལྷ་དང་མིའི་རྒྱལ་པོ་རྣམས་ཀྱི་ཕོ་བྲང་གི་སྒོ་ཇི་ལྟར་དུ་གནས་པ་དང་། ཡོངས་སུ་དག་པའི་ཞིང་ཁམས་རྣམས་ཀྱི་ཕོ་བྲང་གི་སྒོ་ཇི་ལྟར་གནས་པ་དང་། མདོ་སྡེ་ལས་འབྱུང་བ་མཁན་པོ་རྣམས་ཀྱིས་བཤད་པ་ནི་ཐོག་མར་དུག་སེལ་གསེར་སྒོ་ཞེས་བྱ་བའི་མཆོད་རྟེན་དང་། དེ་ལ་རྟ་བབས་དང་། སྒོ་སྐྱབས་དང་། སྟེགས་བུ་དང་། ཁོར་སྟེགས་དང་། ཕྱི་རོལ་གྱི་སྒོ་བ་གླང་སེང་དང་། ཐེམ་སྐས་དང་། སྒོ་དང་། སྒོ་གླེགས་དང་། སྒོ་ཁང་དང་། སྒོ་ཁྱུད་དང་། ནང་གི་སྒོ་སྲུང་རྣམས་དང་། ཕྱི་རོལ་གྱི་རྩིག་སྐྱབས་རིན་པོ་ཆེ་སྣ་ལྔ་ལས་གྲུབ་པ་དང་། པུ་ཤུ་དང་། མདའ་ཡབ་དང་། སྒོའི་བསིལ་ཁང་རྣམས་དང་ལྡན་པར་གྲགས་པས། གཞལ་ཡས་ཁང་གི་སྒོ་ཐམས་ཅད་ལ་སྤྱིར་ཤེས་པར་བྱ་བ་ཡིན་ནོ། །དེ་ལ་སྒོ་བཞིའི་དོན་རྣམ་པར་ཐར་པ་བཞི་ཡང་། གསུམ་ནི་ཐུན་མོང་དུ་བསྟན་པ་སྟེ། འདི་ལྟར་དངོས་པོ་ལས་འབྱིན་པར་བྱེད་པ་སྟོང་པ་ཉིད་ཀྱི་ཏིང་ངེ་འཛིན་རྣམ་པར་ཐར་པའི་སྒོ་དང་། དེ་བཞིན་དུ་རྣམ་པར་རྟོག་པ་ལས་འབྱིན་པར་བྱེད་པ་མཚན་མ་མེད་པའི་ཏིང་ངེ་འཛིན་དང་། འདོད་ཆགས་ལས་འབྱིན་པར་བྱེད་པ་སྨོན་པ་མེད་པའི་ཏིང་ངེ་འཛིན་དུ་རྣམ་པར་ཐར་པའི་སྒོ་སྟེ། འདི་དག་མི་མཐུན་པ་དང་གཉེན་པོ་དབྱེར་མེད་པའི་སྦྱོར་བ་ནི་མངོན་པར་འདུས་མ་བྱས་པའི་རྣམ་པར་ཐར་པ་སྟེ། འདི་ནི་ཐུན་མོང་མ་ཡིན་ནོ། །དེ་ཉིད་ལ་རང་བཞིན་གྱིས་འོད་གསལ་བའི་སྒོ་དང་། ཐབས་ལ་མཁས་པའི་རྣམ་པར་ཐར་བའི་སྒོ་ཞེས་ཀྱང་གྲགས་སོ། །དེ་ལྟར་ཏིང་ངེ་འཛིན་འདི་དག་ནི་བྱང་ཆུབ་ཆེན་པོར་ལྷུན་གྱིས་འཇུག་པའི་སྒོ་ཡིན་པས་དེའི་ཕྱིར་སྒོ་བཞིར་བསྟན་ནོ། །རྣམ་པར་ཐར་པ་བརྒྱད་ནི། ཇི་སྐད་དུ་གྲགས་པའི་གཟུགས་ཅན་གཟུགས་ལ་ལྟ་བ་ལ་སོགས་པའི་ཏེང་ངེ་འཛིན་རྣམས་ལ། ཐབས་ལ་མཁས་པའི་རྣམ་པར་ཐར་པས་ཟིན་པར་གྱུར་ན། བྱང་ཆུབ་ཆེན་པོའི་ལམ་སྟེགས་སུ་འགྱུར་བས་དེའི་ཕྱིར་རྟ་བབས་བརྒྱད་དོ། །ཅིའི་ཕྱིར་རྟ་བབས་ཞེས་བྱ་ཞེ་ན། ཏྭ་ར་ན་ཞེས་མངོན་པར་འཕྱང་བ་ཞེས་ཟེར་ཏེ། རྒྱན་འདི་དག་ངོས་ལ་བརྟེན་པ་མ་ཡིན་གྱི་ནམ་མཁའ་སྟོང་པ་ལས་དཔྱངས་པ་ལྟར་གནས་པས། དཔྱངས་པའི་ཕྱིར་རྟ་བབས་ཞེས་བྱའོ། །རྣམ་པ་གཅིག་ཏུ་ཉོན་མོངས་པ་མེད་པ་ཞེས་ཟེར་ཏེ། འདི་དག་ཉོན་མོངས་པ་མེད་པའི་རྟགས་སུ་བསྟན་པའི་ཕྱིར་དེ་སྐད་ཅེས་བྱའོ། །རྣམ་གཅིག་ཏུ་ཏྭ་རིང་ཏ་འགམ་མན་ན་ཞེས་བྱ་སྟེ། རྟ་ལ་བྱ་བས། གང་ཞིག་ཕོ་བྲང་དུ་འཇུག་པ་ན་འདི་དག་རྟ་བབས་པའི་སྟེགས་ཡིན་པས་རྟ་བབས་ཞེས་བཤད་དོ། །གདན་ཁྲིའི་ཁྱད་པར་འདི་དག་ཀྱང་ཐེག་པ་ཆེན་པོའི་རང་བཞིན་དུ་བཤད་དེ། འདི་ལྟར་མདོ་སྡེ་ཚུལ་ལས་ཀྱང་། དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། །ཞེས་བྱ་བ་དང་། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །ཞེས་གསུངས་པ་ལྟ་བུའོ། །གཞུང་ཁ་ཅིག་ལས། བཅོམ་ལྡན་འདས་རྣམ་པར་སྣང་མཛད་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལུས་ཀྱི་སེང་གེའི་ཁྲི་ལ་བཞུགས་པར་བསྟན་པ་ཡོད་དོ། །སྐབས་འདིར་ནི་ཐམས་ཅད་ཉིད་ལས་མི་གཞན་པའི་དཀྱིལ་འཁོར་དུ་འདོད་པས། གཞུང་དེ་ལྟ་བུར་བསྟན་པའི་སྐབས་མ་ཡིན་ནོ། །ཐེག་པ་ཆེན་པོའི་སྒྲ་ཡང་། ལམ་དང་འབྲས་བུ་དང་དོན་དམ་པར་དང་གཞུང་གི་ཚོགས་དང་བཅས་པ་ལ་འཇུག་པས་རྟགས་ཀྱང་དེ་ལྟ་བུར་སྦྱར་བར་བྱའོ། །དེ་ལ་ཐེག་པ་ཆེན་པོ་ནི། ཐེག་པ་འོག་མ་པ་ཐམས་ཅད་ཟིལ་གྱིས་གནོན་ཞིང་། དེ་དག་གི་རྒོལ་བས་ཉམ་ང་བ་མེད་པས། དེའི་རྟགས་སུ་གྱུར་པ་ནི་མི་འཇིགས་པའི་སེང་གེའི་ཁྲིའོ། །གཞན་ཡང་ཐེག་པ་ཆེན་པོ་ནི་ཐེག་པ་གཞན་དུ་མི་ཚུད་པ་ཐམས་ཅད་འདིར་ཤོང་ཞིང་ཐེག་པར་བྱེད་པས་གླང་པོ་ཆེའི་ཁྲིའོ། །དེ་བཞིན་དུ་འདིས་གདུལ་བྱ་ཐམས་ཅད་མྱུར་མགྱོགས་སུ་སྨིན་ཅིང་གྲོལ་བར་བྱེད་པས་རྟའི་ཁྲིའོ། །འདིས་ཉོན་མོངས་པ་དང་ལས་ལ་སོགས་པ་མ་སྤངས་པར་དབང་དུ་བྱེད་པས་རྨ་བྱའི་ཁྲིའོ། །གདུལ་བྱ་ཐམས་ཅད་ཕྲིན་ལས་སྣ་ཚོགས་ཀྱིས་ཆགས་པ་དང་ཐོགས་པ་མི་མངའ་བར་འདུལ་བས་ནམ་མཁའ་ལྡིང་གི་ཁྲིའོ། །ཡང་གསང་སྔགས་ཀྱི་ཚུལ་གྱིས་གོ་འཕང་དབང་གིས་བགྲོད་པ་ཡིན་པ་ལ། གོ་འཕང་ཐོབ་ནས་ཀྱང་དབང་རྫོགས་པའི་ངོ་བོར་གནས་ཏེ། དེ་བས་ན་དབང་གི་ཕྱག་རྒྱར་གྱུར་པ་ནི་གདན་ཁྲིའོ། །དབང་བསྐུར་བའི་དུས་སུ་གདན་ཁྲི་རིམ་པར་ཤོམ་པ་དང་། ཚོགས་ཀྱི་དཀྱིལ་འཁོར་གྱི་དུས་སུ་དབང་ལྡན་མི་ལྡན་གྱི་རིམ་པས། ལ་ལ་དག་ལ་སེང་གེ་རྡོ་རྗེས་མཚན་པའི་གདན་དང་། དེ་བཞིན་དུ་རིམ་པས་པདྨ་དང་། རིན་པོ་ཆེ་དང་། ཉི་མ་དང་། ཟླ་བ་ཕྱེད་པ་དང་། གང་ཟག་གི་སྟན་ནང་མ་ལ་སོགས་པ་སྟན་རིམ་པར་གདིང་བར་བཤད་པ་ཡང་། དབང་གི་རིམ་པས་གདིང་བར་གསུངས་པ་དང་། རྣལ་འབྱོར་པ་བདེ་བར་གཤེགས་པ་ཉིད་ཀྱིས་དབང་བསྐུར་བའི་དུས་སུ་ཡང་། འདི་སྐད་དུ། རབ་དགྱེས་རྒྱལ་པོ་བདེ་ཐོབ་ཏུ། །སེང་གེའི་གདན་རབ་འཇོག་བྱེད་ཅིང་། །བཞི་དང་བཞི་ཡི་མཆོག་ཉིད་ཀྱིས། །དེ་ཡི་ཁྲིད་པར་དབང་བསྐུར་རོ། །ཞེས་གསུངས་པ་ལྟ་བུ་དབང་གི་ཕྱག་རྒྱ་གདན་ཁྲིར་བསྟན་ཏེ། དེ་ལ་ཉན་པའི་དབང་ཐོབ་པས་བཀའ་རབ་འབྱམས་ཐོས་པའི་སྐལ་བ་དང་ལྡན་པར་གྱུར་པ་ན། ཐེག་པ་མཐའ་དག་གི་ལྟ་བ་དང་། སྤྱོད་པ་དང་དེའི་གྲོགས་སྡོམ་པ་དག་ལ་མི་སྐྲག་ཅིང་མི་འཇིགས་པ་ཐོབ་པས། དེའི་ཕྱིར་ཕྱག་རྒྱར་གྱུར་པ་ནི་མི་འཇིགས་པ་སེང་གེའི་ཁྲིའོ། །དེ་བཞིན་དུ་སྒོམ་ཞིང་སྒྲུབ་པའི་དབང་ཐོབ་པས། སྒྲུབ་པར་བྱ་བའི་ཆོས་ཐམས་ཅད་འགྲུབ་བའི་ནུས་པའི་སྟོབས་དང་ལྡན་པས་གླང་པོ་ཆེའི་ཁྲིའོ། །འཆད་པའི་དབང་ཐོབ་པས། གདུལ་བྱའི་རྒྱུད་གྲོལ་བར་བྱེད་ཅིང་ཆོ་འཕྲུལ་དང་ལྡན་པས་རྟའི་ཁྲིའོ། །རྡོ་རྗེ་རྒྱལ་པོའི་དབང་ཐོབ་པས། ཐམས་ཅད་ལ་མངའ་བརྙེས་པའི་ཕྱིར་རྨ་བྱའི་ཁྲིའོ། །ལས་ཀྱི་དབང་ཐོབ་པས། འགྲོ་བའི་དོན་བྱ་བ་ལ་ཐོགས་པ་མེད་པའི་ཕྱིར་ནམ་མཁའ་ལྡིང་གི་ཁྲིའོ། །འབྲས་བུ་ཆེ་བའི་ཡོན་ཏན་གྱི་རྟགས་སུ་བསྟན་པ་ནི། ཇི་སྐད་དུ། སྐུ་ནི་མི་འཇིགས་བཞི་ཡིས་བདུད་བཞི་འཇོམས། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། ཐུགས་ནི་སྟོབས་བཅུས་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་འགྲོ། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་ཕྱུག་མཐར་ཕྱིན་རྒྱལ་བའི་ཚུལ། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་ཕྲིན་ལས་རྣམ་བཞིས་སྐྱེ་བཞི་སྒྲོལ། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །ཞེས་གསུངས་པ་ལྟ་བུ་སྟེ། དེར་ནི་སྐུ་གཙོ་བོར་བསྟན་པའི་སྐབས་ཡིན་ལ། འདིར་ནི་ཐུགས་གཙོ་བོར་སྟོན་པས་རྡོ་རྗེའི་རིགས་དང་སེང་གེའི་ཁྲིར་སྦྱར་རོ། །འཁོར་ལོ་དང་པདྨ་དང་ཉི་ཟླའི་གདན་དུ་བསྟན་པ་རྣམས་ནི། སྲིད་པའི་འཁོར་ལོ་ཟིལ་གྱིས་གནོན་པ། ཆོས་ཀྱི་འཁོར་ལོ་གཞུང་སྤྱི་ལས་གྲགས་པ་ཡིན་ལ། སྐུ་གསུང་ཐུགས་མི་ཟད་རྒྱན་གྱི་འཁོར་ལོ་འབྲས་བུའི་ཆོས་སུ་གྲགས་ཏེ། འཁོར་ལོ་ནི་དཀྱིལ་འཁོར་གྱི་ཕྱག་རྒྱར་གྲགས་སོ། །པདྨ་ནི་འཕགས་པ་ཐམས་ཅད་ལ་འཁོར་བའི་སྐྱོན་གྱིས་མ་གོས་པ་དང་། ཐེག་པ་ཆེན་པོ་པ་རྣམས་ཀྱང་མཐའ་རྣམ་པ་གཉིས་ཀྱི་སྐྱོན་གྱིས་མ་གོས་པའི་ཕྱག་རྒྱར་བཤད་དོ། །ཉི་ཟླ་ནི་ཐབས་དང་ཤེས་རབ་རང་བཞིན་གྱིས་འོད་གསལ་བའི་ཕྱག་རྒྱའོ། །རིན་པོ་ཆེ་ཞེས་བྱ་བ་ནི་གདན་ཁྲི་དེ་དག་ཉིད་ཡེ་ཤེས་རིན་པོ་ཆེའི་རྒྱུ་ལས་གྲུབ་པའི་རང་བཞིན་དུ་བཤད་དེ། རིན་པོ་ཆེའི་གདན་ཉིད་གུད་དུ་བསྟན་པ་ནི་མེད་དོ། །སྒྱུ་འཕྲུལ་ལེ་ལག་ལས་ཀྱང་། རེ་བ་ཡིད་བཞིན་སྐོང་བའི་ཕྱིར། །ཡིད་བཞིན་རིན་ཆེན་འབར་བའི་གནས། །ཞེས་བཤད་ཀྱི་གདན་ཞེས་ནི་མ་བཤད་དོ། །མདོ་སྡེ་ལས་ཀྱང་། རྡོ་རྗེའི་རིན་པོ་ཆེའི་ཁྲིལ་ཞེས་བཤད་དེ་ནོར་བུ་རིན་པོ་ཆེ་ཟུར་དུ་གདིང་བར་ནི་མ་བཤད་དོ། །འདི་དག་ནི་གནས་ཕུན་སུམ་ཚོགས་པ་ཞེས་བཤད་པ་སྟེ། དེ་ཡང་གཞུང་ཕལ་པ་ལྟར་མཐུན་སྣང་ཕྱོགས་གཅིག་གི་དབང་དུ་བྱས་པའི་ལྷ་དང་མིའི་འཇིག་རྟེན་དུ་གྲགས་པའི་ཕྱོགས་ཤིག་བཟུང་བ་མ་ཡིན་གྱི། མཐའ་དང་དབུས་མེད་པ་ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ། ཆོས་ཀྱི་དབྱིངས་ཀྱི་གཟུགས་བརྙན་དུ་གྱུར་པ་ཡེ་ཤེས་ཆེན་པོའི་འཕྲུལ་པར་སྟོན་པས་ཐུན་མོང་མ་ཡིན་པའོ། །ད་ནི་སྟོན་པ་འདི་ལྟ་བུ་གནས་འདི་ལྟ་བུ་ན་ཚུལ་འདི་ལྟར་བཞུགས་སོ་ཞེས་བསྟན་པའི་ཕྱིར། སྐུ་མདུན་དང་རྒྱབ་མེད་པ་ཐམས་ཅད་དུ་ཞལ་ཐལ་ལེ་བར་གསལ་ཞིང་། ཞེས་བྱ་བ་ལ་སོགས་པ་སྨོས་ཏེ། དེ་ལ་སྐབས་འདིར་རིགས་ཐམས་ཅད་ཀྱི་སྤྱིའི་རིགས་དྲུག་པར་གྲགས་པ། ཀུན་ཏུ་བཟང་པོ་བྱང་ཆུབ་ཀྱི་སེམས་ཀྱི་རིགས་དེ་ཉིད་འགྲོ་བ་འདུལ་བའི་ཐབས་ཀྱིས་རིགས་རྣམ་པ་ལྔ་ལྟ་བུར་སྣང་བར་འདོད་དེ། ཇི་ལྟར་དཔལ་སངས་རྒྱས་མཉམ་སྦྱོར་ལས། སེམས་དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་བདེ་བའི་མཆོག །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་བྱང་ཆུབ་སེམས་ཀྱི་རིགས་དང་པོར་གསུངས་ནས། དེ་ནས་འགྲོ་བ་འདུལ་བའི་ཐབས་ཀྱིས་དེ་ཉིད་རིགས་ལྔར་སྣང་བ་ཡང་། ཡང་དག་གྲུབ་པ་གཅིག་པུ་ཉིད། །ཇི་ལྟར་འདོད་པ་བཞིན་དུ་སྦྱར། །ཞེས་བྱ་བ་ལ་སོགས་པ་གསུངས་པ་ལྟ་བུ་སྟེ། དེ་བས་ན་གཟུགས་ཀྱི་སྐུའི་མཚན་མ་བསྟན་པའི་སྐབས་འདིར། ཀུན་ཏུ་བཟང་པོའི་སྐུའི་མཚན་མ་ཞིག་མ་སྨོས་པས། སྟོན་པའི་བདག་ཉིད་ཀྱང་རིགས་རྣམ་པ་ལྔ་ཡིན་ནམ་སྙམ་དུ་ཐེ་ཚོམ་ཟ་བར་མི་བྱའོ། །གང་གི་ཕྱིར་སངས་རྒྱས་ཐམས་ཅད་བདག་ཉིད་ཐ་མི་དད་པར་ཡོད་ཀྱང་། ཞིང་དང་སྤྱོད་ཡུལ་ཇི་ལྟར་སྟོན་པ་དེ་ལྟར་སྟོན་པའི་བདག་ཉིད་ཀྱང་མཚན་དང་ཡོན་ཏན་དེ་ལྟ་སྟོན་ཏེ། དཔེར་ན་སངས་རྒྱས་ཀྱི་ཞིང་འདིར་བཅོམ་ལྡན་འདས་ཤཱཀྱ་ཐུབ་པར་གྲགས་པ་དེ་ཉིད་ཀྱི་མཚན་གྱི་ཁྱད་པར་དོན་ཡོད་གྲུབ་པ་དང་། རྣམ་པར་སྣང་མཛད་ཅེས་བྱ་བ་ལ་སོགས་པའང་ཡིན་མོད་ཀྱི། གང་གི་ཚེ་སངས་རྒྱས་ཀྱི་ཞིང་སྙིང་པོ་བྱང་ཆུབ་ཀྱི་གཞི་དང་། སྙིང་པོ་མེ་ཏོག་གིས་བརྒྱན་པའི་ཞིང་ཁམས་ན་བཞུགས་པར་སྟོན་ཅིང་། སངས་རྒྱས་ཀྱི་ཞིང་གི་བཀོད་པ་རྒྱ་མཚོ་དང་། བྱང་ཆུབ་སེམས་དཔའི་སྤྱོད་པ་རྒྱ་མཚོ་ལ་སོགས་པ་བསམ་གྱིས་མི་ཁྱབ་པའི་ཆོས་སྟོན་པ་དེའི་ཚེ། སྟོན་པའི་བདག་ཉིད་ཀྱང་བཅོམ་ལྡན་འདས་རྣམ་པར་སྣང་མཛད་ཆེན་པོ་ལོངས་སྤྱོད་རྫོགས་པའི་སྐུ་ཡིན་པར་སྟོན་ནོ། །དེ་བཞིན་དུ་རྣམ་པར་སྣང་མཛད་ལ་སོགས་པའི་རིགས་ལྔ་དང་། ཀུན་ཏུ་བཟང་པོའི་རང་བཞིན་དབྱེར་མེད་པ་ཡིན་ཡང་། གང་གི་ཚེ་ཆོས་ཀྱི་དབྱིངས་ཀྱི་ཞིང་ཁམས་ན་ཐམས་ཅད་ཀྱི་བདག་ཉིད་དུ་བཞུགས་པར་སྟོན་ཅིང་། ཆོས་ཐམས་ཅད་དབྱེར་མེད་པར་འབྲས་བུའི་ཆོས་སུ་སངས་རྒྱས་པར་སྟོན་ཅིང་དེའི་མཛད་པ་སྟོན་པའི་ཚེ། ཀུན་ཏུ་བཟང་པོ་བྱང་ཆུབ་ཀྱི་སེམས་རྡོ་རྗེའི་རིགས་སྟོན་པའི་བདག་ཉིད་ཡིན་པར་རིག་པས་འོས་ཤིང་བཀའ་ལས་ཀྱང་འབྱུང་བ་ཡིན་ནོ། །དེ་ལ་སྐུ་མདུན་དང་རྒྱབ་མེད་པར་ཐམས་ཅད་དུ་ཞལ་ཐལ་ལེ་བར་གསལ་ཞིང་ཞེས་བྱ་བ་ནི། སངས་རྒྱས་ཐམས་ཅད་ཀྱི་རང་བཞིན་ཡང་རྒྱབ་ཀྱིས་ཕྱོགས་པར་མི་བཞུགས་པ་ཡིན་མོད་ཀྱི། འདིར་ནི་ཕྱོགས་དང་དུས་ཆད་པ་མེད་པར་ཀུན་ཏུ་ཞལ་གྱི་རང་བཞིན་དུ་བཞུགས་པའི་དོན་ནོ། །མཚན་དང་དཔེ་བྱད་དུ་བསྟན་པ་ཞེས་བྱ་བ་ནི། ཕྱག་དང་ཞབས་འཁོར་ལོའི་མཚན་དང་ལྡན་པ་ལ་སོགས་པ་ཐུན་མོང་དུ་གྲགས་པ་རྣམས་དང་། ཡེ་ཤེས་ཆེན་པོའི་རྟགས་སུ་གྱུར་པའི་སེམས་དཔའ་དང་སེམས་མའི་ཕྱག་རྒྱར་སྣང་བའོ། །ཅིའི་ཕྱིར་མཚན་དང་དཔེ་བྱད་ཅེས་བྱ་ཞེ་ན། དགེ་ཤིས་ཀྱི་རྟགས་སུ་གྱུར་པ་དང་། གསལ་བར་སོ་སོར་འབྱེད་པའི་ཕྱིར་རྒྱན་དུ་འགྱུར་བས་དེ་སྐད་ཅེས་བྱའོ། །དེ་ཡང་མེ་ཏོག་དང་ཟེའུ་འབྲུ་ལྟ་བུ་སྟེ། ཟེའུ་འབྲུ་ཉིད་ཀྱང་མེ་ཏོག་གི་ཁོངས་སུ་འདུས་པ་ཡིན་མོད་ཀྱི། མེ་ཏོག་གི་བྱེ་བྲག་ཏུ་གྱུར་བ་ཟེ་འབྲུ་དེ་ཉིད་ཀྱིས་མེ་ཏོག་གི་སྤྱི་གསལ་ཞིང་འབྱེད་པ་བྱེད་པ་བཞིན་ནོ། །བསམ་གྱིས་མི་ཁྱབ་པ་ཐམས་ཅད་དུ་སྐུ་གསུང་ཐུགས་སྣ་ཚོགས་པར་ཀུན་ཏུ་སྣང་བ་ཞེས་བྱ་བ་ནི། སྤྲུལ་པ་ཐམས་ཅད་ཀྱི་འབྱུང་གནས་སུ་སྟོན་པའོ། །ཐབས་དང་ཤེས་རབ་ཀྱི་ཞབས་གཉིས་མཉམ་པའི་བརྟུལ་ཞུགས་ཀྱི་སྐྱིལ་མོ་ཀྲུང་དུ་བཞུགས་པ་ཞེས་བྱ་བ་ནི། ཐབས་དང་ཤེས་རབ་ནི་བགྲོད་པར་བྱེད་པའི་ཕྱིར་ཞབས་སོ། །དེའི་ཕྱག་རྒྱ་ཡང་ཞབས་གཉིས་ཉིད་ཡིན་ནོ། །བརྟུལ་ཞུགས་ནི་སྐྱིལ་མོ་ཀྲུང་སྟེ་མཉམ་པ་ཉིད་ལ་བཞུགས་པའི་བརྟུལ་ཞུགས་སོ། །ཡེ་ཤེས་དྲུག་གི་ཕྱག་ཅེས་སྨོས་པ་ལ། །ཐུན་མོང་དུ་གྲགས་པའི་ཡེ་ཤེས་བཞི་ཆོས་ཀྱི་དབྱིངས་རྣམ་པར་དག་པ་དང་ལྔ་ནི་སངས་རྒྱས་ཀྱི་སའི་ཆོས་ལྔར་གྲགས་སོ། །རྒྱུད་ཁ་ཅིག་ལས། དབྱིངས་ཉིད་ཀྱང་ཡེ་ཤེས་སུ་གྲགས་པས་ཡེ་ཤེས་རྣམ་པ་ལྔའོ། །རྒྱུད་ཁ་ཅིག་ལས། ཡུལ་དང་ཡུལ་ཅན་གཉིས་དབྱེར་མེད་པའི་ཚུལ་གྱིས་དབྱིངས་རྣམ་པར་དག་པའི་ཡེ་ཤེས་དང་དྲུག་ཏུ་གྲགས་སོ། །ཡེ་ཤེས་དེ་དག་ཉིད་དོན་འཇལ་བར་བྱེད་པའི་ཕྱིར་དང་། བདག་དང་གཞན་གྱི་དོན་སྒྲུབ་པར་བྱེད་པའི་ཕྱིར་དང་། ཀུན་ཏུ་སྤྱོད་པའི་ཕྱིར་ཕྱག་ཡིན་ཏེ། དེའི་རྟགས་ཀྱང་ཕྱག་ཉིད་དོ། །ཡེ་ཤེས་རིན་པོ་ཆེའི་ཕྱག་རྒྱ་འབར་བ་ཅན་ཞེས་བྱ་བ་ནི། ཕྱག་རྒྱ་ནི་མཚོན་པར་བྱེད་པ་སྟེ། ཞིབ་ཏུ་གོང་དུ་ཕྱག་རྒྱ་བསྟན་པའི་སྐབས་སུ་བཤད་པ་བཞིན་ནོ། །དེ་དག་གང་ཡིན་པ་ནི། རྡོ་རྗེ་དང་འཁོར་ལོ་ལ་སོགས་པའི་རིགས་ལྔ་ཡེ་ཤེས་ལྔའི་མཚན་མར་གྱུར་པ་རྣམ་པ་ལྔ་དང་། ཆོས་ཀྱི་དབྱིངས་ཀྱི་ཕྱག་རྒྱ་སྟེ་དྲིལ་བུ་རྣམས་སོ། །འདི་དག་ཀྱང་ཡེ་ཤེས་ཆེན་པོ་ཉིད་རིན་པོ་ཆེ་ལས་གྲུབ་པའི་མཚན་མ་རྣམས་སུ་བྱིན་གྱིས་རླབ་པའོ། །སྐུ་གསུང་ཐུགས་བསམ་གྱིས་མི་ཁྱབ་པའི་དབུ་གསུམ་དང་ལྡན་པ་ཞེས་བྱ་བ་ལ། གདུལ་བྱའི་དབང་གིས་རང་བཞིན་སྣ་ཚོགས་སུ་སྣང་བས་བསམ་གྱིས་མི་ཁྱབ་པའོ། །རྣམ་པ་གཅིག་ཏུ་སྐུ་ནི་སྟོང་པ་ཉིད་དང་གསུང་ནི་མཚན་མ་མེད་པ། ཐུགས་ནི་སྨོན་པ་མེད་པ་སྟེ། འདི་དག་མངོན་པར་འདུ་མི་བྱེད་པས་བསམ་པའི་ཡུལ་ལས་འདས་པས་སྐུ་གསུང་ཐུགས་བསམ་གྱིས་མི་ཁྱབ་པའོ། །དེ་ཉིད་ཡོན་ཏན་གྱི་དབང་པོ་ཐམས་ཅད་ཀྱི་སྒོ་དང་གཞིར་གྱུར་པས་དབུ་ཡིན་ཏེ། དེའི་རྟགས་སུ་གྱུར་པ་ཡང་དབུ་ཉིད་དེ། དེ་ལྟ་བུ་དང་ལྡན་པ་ཡང་འདི་ལྟ་སྟེ། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། དེ་བཞིན་གཤེགས་པ་གཟུགས་ཀྱི་རྒྱལ་པོ་དང་ཞེས་བྱ་བ་ལ་སོགས་པ་ཇི་སྐད་གསུངས་པ་རྣམས་སོ། །དེ་ལ་བཅོམ་ལྡན་འདས་དང་དེ་བཞིན་གཤེགས་པའི་སྒྲ་ནི་སྔར་བཤད་ཟིན་ཏོ། །རྣམ་པར་ཤེས་པའི་རྒྱལ་པོ་ནི། རྡོ་རྗེ་མི་བསྐྱོད་པའོ། །དེ་བཞིན་དུ་གཟུགས་ཀྱི་རྒྱལ་པོ་ལ་སོགས་པ་དང་རྣམ་པར་སྣང་མཛད་ལ་སོགས་པ་ལ་ཡང་ཇི་ལྟར་གྲགས་པ་བཞིན་སྦྱར་བར་བྱའོ། །དེ་ལ་ཡང་དག་པར་རྫོགས་པའི་སངས་རྒྱས་རིགས་ལྔ་པོ་རྣམས་སྟོན་པར་བྱེད་པ་ལ་ཕུང་པོ་ལྔའི་མཚན་ནས་བརྗོད་པ་འདི་ཅི་ཞིག་ཅེ་ན། འདི་ནི་འགྲོ་བ་རྣམས་ཀྱི་ཕུང་པོ་ལྔ་ཉིད་རྒྱལ་བ་རིགས་ལྔ་པོ་ཡེ་ནས་ཡིན་ཏེ། ཆོས་ཀྱི་རང་བཞིན་དེ་ལྟ་བུ་ཡིན་ཡང་ཐུན་མོང་གི་མདོ་རྣམས་སུ་ནི། ཕུང་པོ་སངས་རྒྱས་ཀྱི་རྒྱུ་ཅན་དུ་བཤད་པ་དང་། ཕུང་པོའི་དེ་བཞིན་ཉིད་སངས་རྒྱས་སུ་བཤད་པའོ། །གསང་སྔགས་ཀྱི་ཚུལ་ཁ་ཅིག་ཏུ་ཡང་ཐ་མལ་པའི་རྣམ་པར་རྟོག་པ་བཟློག་པར་བྱ་བའི་ཕྱིར། ཕུང་པོ་སངས་རྒྱས་སུ་ཤེས་ཤིང་བསྒོམ་པར་བྱ་བར་བསྟན་པ་དག་ཀྱང་ཡོད་དོ། །ངེས་པའི་དོན་གྱི་མདོ་སྡེ་དང་གསང་སྔགས་ཀྱི་ཚུལ་ཟབ་མོ་དག་ལས་ནི། སེམས་ཅན་དང་སངས་རྒྱས་དབྱེར་མེད་ཅིང་ཕུང་པོ་ལྔ་སངས་རྒྱས་གྲངས་མེད་པ་ཡིན་པར་བསྟན་ཏེ། ཇི་སྐད་དུ་སྡོང་པོ་བཀོད་པའི་མདོ་ལས། གང་ཞིག་བདག་དང་སངས་རྒྱས་རྣམས། །རང་བཞིན་མཉམ་པར་རབ་གནས་ཤིང་། །མི་གནས་ལེན་པ་མེད་པ་དེ། །དེ་དག་བདེ་བར་གཤེགས་པར་འགྱུར། །གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་པ་སེམས་དཔའ་དག །གྲངས་མེད་དེ་བཞིན་གཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་བྱ་བ་དང་། སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། །ཅེས་བྱ་བ་ལ་སོགས་པ་ལྟ་བུའོ། །གསང་སྔགས་ཀྱི་རྒྱུད་དང་སྒྲུབ་ཐབས་རྣམས་ལས་གསལ་བར་གསུངས་ཏེ། འདི་ནི་ལུང་དང་མན་ངག་གིས་གྲུབ་པའོ། །རིག་པས་ཀྱང་ལེགས་པར་གྲུབ་སྟེ། དེ་ལ་རིག་པ་ཞེས་བྱ་བ་ནི་ནྱ་ཡ་ཞེས་བྱ་བ་ནྱ་ཡ་སྟེ། རང་བཞིན་ནམ་ངང་ཚུལ་ལ་ཡང་འཇུག་པས་དངོས་པོའི་རང་བཞིན་ཇི་ལྟར་གནས་པ་ལ་རིག་པ་ཞེས་བྱའོ། །ཡང་ཡུག་ཏི་ཞེས་བྱ་བ་ཡང་ཡུག་ཏ་སྟེ། ཆོས་དང་ལྡན་པས་རིག་པ་ཞེས་བྱའོ། །དེ་ལྟར་ན་དོན་རང་རང་གི་ངང་ཚུལ་ཇི་ལྟར་གནས་པ་དང་། དེ་དང་མཐུན་པའི་བློ་གཉིས་ཀ་ལ་ཡང་རིག་པའི་སྒྲ་འཇུག་པས། ཆོས་རྣམས་ཀྱི་མཚན་ཉིད་དང་དེ་དང་མཐུན་པའི་བློ་གཉིས་ཀ་ལ་ཡང་འཇུག་པར་ཤེས་པར་བྱའོ། །སྐད་ཀྱི་བྱིངས་དང་སྦྱར་ན་ནྱ་ཡ་ནི་ཐོབ་པར་བྱེད་པ་སྟེ། མི་འཇིགས་པ་ཐོབ་པའི་ཕྱིར་རིག་པ་ཞེས་བྱའོ། །ཡུག་ཏི་ནི་སྤྱོད་པ་ལེགས་པ་སྟེ། ཚིག་གི་སྦྱོར་བ་ལེགས་པའི་དོན་ལ་འཇུག་གོ། །ནྱ་ཡ་ནི་གནོད་པ་མེད་པ་ལ་ཡང་འཇུག་པ་སྟེ། པྲ་ཏི་བ་ད་ཅེས་བྱ་བ་ཡང་གནོད་པ་མེད་པའི་དོན་ཡིན་པས། བློ་དང་སྒྲ་གང་ལ་ཡང་དོན་དང་འགལ་བའི་གནོད་པ་མེད་པ་དང་། དོན་ལེགས་པར་སྒྲུབ་པར་བྱེད་པའི་ནུས་པ་དང་ལྡན་པ་གང་ཡིན་པ་དེ་ནི་རིག་ཞེས་བྱའོ། །དེ་ལྟ་བུ་ཤེས་པ་གང་གི་དོན་གང་མཚན་མ་དང་རྟགས་སུ་བྱས་པ་དེ་ལ་ཡང་རིག་པ་ཞེས་བྱ་བའི་སྒྲ་འཇུག་སྟེ། འདི་དག་ནི་རིག་པ་ཐམས་ཅད་ཀྱི་སྤྱིར་ཤེས་པར་བྱའོ། །དེ་ལས་འདིར་ནི་ཆོས་ཉིད་དང་བྱ་བ་བྱེད་པ་དང་ལྟོས་པ་དང་འཐད་པ་བསྒྲུབ་པའི་རིག་པ་ཞེས་བྱ་བ་རྣམ་པ་བཞི་ཅར་གྱིས་ཀྱང་སྒྲུབ་ཏུ་རུང་བ་ཡིན་མོད་ཀྱི། ཐོས་པ་ཆུང་ཞིང་བློ་དམན་པ་རྣམས་ཀྱིས་བདེ་བླག་ཏུ་རྟོགས་པར་བྱ་བའི་ཕྱིར་ཆོས་ཉིད་དང་མཐུན་པའི་གཏན་ཚིགས་འགའ་ཞིག་བརྗོད་པར་བྱའོ། །དེ་ལ་རིག་པ་རྣམས་ཀྱི་སྤྱིའི་འཇུག་ཚུལ་ཡང་ཕལ་ཆེར་རྒྱུད་ནས་འཇུག་པར་ཤེས་པར་བྱ་སྟེ། རྣམ་པར་བཞག་པ་དང་པོ་ཁོ་ནས་གྲུབ་པ་མེད་པར་ཤེས་པར་བྱའོ། །དེ་ཡང་རིག་བྱེད་ཀྱི་གནས་ལས། ཇི་ལྟར་སྐྱེས་བུ་གནས་སུ་བགྲོད་པར་འདོད་པ་ཡིས། །མཁས་པ་གོམ་པ་སྔ་མ་མ་བརྟན་པར་དུ་གཞན་མི་འདོར། །དེ་བརྟན་གྱུར་ནས་དེ་བཞིན་རིམ་པས་བརྟན་བྱེད་པ། །རྣམ་པར་ལྟུང་བར་དཀའ་ཞིང་བདེ་བར་གནས་སུ་ཕྱིན་པར་འགྱུར། །དེ་བཞིན་བློ་ལྡན་རིག་པ་སྔ་མ་མ་བརྟན་བར་དུ་གཞན་མི་སྒྲུབ། །དེ་བརྟན་གྱུར་ནས་དེ་བཞིན་རིམ་པས་བརྟན་པར་སྒྲུབ་བྱེད་པ། །སྐྱོན་གྱི་གཡང་སར་མི་ལྟུང་བདེ་བར་དོན་རྣམས་རྟོག་པར་འགྱུར། །ཞེས་བཤད་པ་ལྟ་བུའོ། །དེ་ལ་རིག་པ་དག་པར་བྱེད་པའང་། རིག་བྱེད་ལས། རྫས་ལ་ཆུ་ཡིས་དག་པར་བྱེད། །དེ་ཡང་སྔགས་ཀྱི་རྣམ་པར་དག །དེ་ཡང་དུས་ཚོད་མཉམ་པས་འདག །དེ་བཞིན་རིག་པ་ལུང་གིས་ཏེ། །ལུང་ནི་ལྟོས་པས་དག་པར་འགྱུར། །ཞེས་གསུངས་པ་ལྟ་བུ་སྟེ། དཔེར་ན་རྫས་དག་པར་བྱེད་པ་ཆུ་ཡིན་ཡང་། ཆུ་ཉིད་དག་པར་བྱེད་པ་སྔགས་ཡིན་ནོ། །སྔགས་ཉིད་དག་པར་བྱེད་པ་དུས་ཚོད་མཉམ་པ་ཞེས་བྱ་བ་རྫས་ཉིད་ལ་བརྟེན་པའི་ཆོ་ག་ཉམས་པ་མེད་པ་དེ་བཞིན་དུ། དོན་ལ་འཇུག་པའི་བློ་དག་པར་བྱེད་པ་རིག་པ་ཡིན་ཀྱང་། རིག་པ་དག་པར་བྱེད་པ་ལུང་ཡིན་ནོ། །ལུང་ཉིད་དག་པར་བྱེད་པའང་ལུང་རྣམས་ལྟོས་པ་ལས་གྲུབ་ཅིང་སྐྱེས་པའི་རིག་པའི་བློ་མ་ཉམས་པ་ཉིད་ཡིན་ནོ། །འདི་ལྟ་བུ་ཡང་རིག་པ་ཐམས་ཅད་ཀྱི་དག་བྱེད་ཡིན་པར་ཤེས་པར་བྱའོ། །ད་ནི་སྐབས་ཀྱི་གཞུང་ཉིད་བརྗོད་པར་བྱ་སྟེ། དེ་ལ་རེ་ཞིག་ཐུན་མོང་དུ་ན་འགྲོ་བ་རྣམས་ཀྱིས་མཐུན་པར་མངོན་དུ་བྱས་པའི་ཆུ་ཀླུང་ཞིག་ལ། གཤེར་བར་འབབ་པར་མཐོང་བར་མཐུན་ཡང་། ཡི་དྭགས་རྣམས་ཀྱིས་ནི་རྣག་ལ་སོགས་པ་ཡོངས་སུ་མ་དག་པའི་ཆུ་ཀླུང་ཞིག་ཏུ་འབབ་པར་མཐོང་ངོ་། །མི་རྣམས་ཀྱིས་ནི་དག་ཅིང་དང་ལ་དྲི་མ་མེད་ཅིང་ལྟོ་བ་དང་མགྲིན་པ་ལ་མི་གནོད་ལ་དབང་པོའི་རྒྱུན་རྒྱས་པར་བྱེད་པ་ཞིག་ཏུ་མཐོང་ངོ་། །ཞིང་དག་པ་ན་གནས་པའི་འགྲོ་བ་རྣམས་ཀྱིས་ཤིན་ཏུ་རྣམ་པར་དག་པའི་བདུད་རྩིའི་ཆུ་བོ་དབང་པོའི་རྒྱུན་ཤིན་ཏུ་ཡང་རྒྱས་པར་བྱེད་ཅིང་ནད་རྣམས་ཀྱང་མེད་པར་བྱེད་ལ། སྒྲིབ་པ་མ་ཟད་ཀྱི་བར་དུ་འཇུ་བར་ཡང་མི་འགྱུར་ཞིང་། ནམ་སྒྲིབ་པ་ཟད་པར་བྱས་ནས་སངས་རྒྱས་ཀྱི་མཛད་པ་ཡོངས་སུ་གྲུབ་སྟེ་འཇུ་བར་མཐོང་ངོ་། །འདི་རྣམས་རྩོད་པ་འགྱེད་པ་ན། ཀུན་གྱིས་གཤེར་བར་མཐོང་བ་མཐུན་པའི་ཕྱིར། ཆུ་ཡིན་ནམ་མ་ཡིན་པའི་རྩོད་པའི་གཞི་མེད་དོ། །མ་དག་པའི་ཆུ་དང་དག་པའི་ཆུ་དང་ཤིན་ཏུ་རྣམ་པར་དག་པའི་ཆུ་རྣམས་མཐོང་བ་ཐ་དད་པས། དེའི་ཕྱིར་སོ་སོ་རང་རང་གི་མངོན་སུམ་གྱིས་གྲུབ་པ་ཚད་མར་བྱས་ནས་མཚན་ཉིད་གཞན་དུ་འགལ་བར་རྒོལ་བར་བྱེད་དོ། །དེ་རྣམས་ལ་གཟུ་བོའི་བློས་གཞལ་བར་བྱས་ན། ཇི་ལྟ་ཇི་ལྟར་མཐོང་བ་དག་པ་དེ་ལྟ་དེ་ལྟར་བདེན་པ་ཡིན་ཏེ། སྒྲིབ་པའི་དྲི་མ་དག་པ་རྣམས་ཀྱི་དབང་པོ་རྣམས་ཀྱི་ཡུལ་ཡིན་པའི་ཕྱིར་དང་། ལྟོས་ཏེ་རྣམ་པར་བཞག་ན་བརྟན་ཞིང་མི་བསླུ་བའི་ཕྱིར་རོ། །དེ་བཞིན་དུ་བཅོམ་ལྡན་འདས་ཤཱཀྱ་ཐུབ་པའི་ཞིང་འདི་ཡང་བཙུན་པ་ཤཱ་རིའི་བུ་ན་རེ། བདག་གིས་ས་ཆེན་པོ་འདི་མཐོ་དམན་དང་གཡང་ས་དང་ལྗན་ལྗིན་གྱིས་གང་བར་མཐོང་ངོ་ཞེས་ཟེར་རོ། །སངས་རྒྱས་མྱ་ངན་མེད་པའི་ཞིང་ཁམས་ནས་འོངས་པའི་ཚངས་པ་རལ་བ་ཅན་ན་རེ། བདག་གིས་ནི་བཅོམ་ལྡན་འདས་ཀྱི་ཞིང་འདི་གཞན་འཕྲུལ་དབང་བྱེད་ཀྱི་ལྷའི་གནས་ཀྱི་བཀོད་པ་ཕུན་སུམ་ཚོགས་པ་བཞིན་དུ། ཡོངས་སུ་དག་པར་མཐོང་ངོ་ཞེས་ཟེར་ཏེ་དེ་གཉིས་རྩོད་པར་བྱེད་དོ། །དེ་ནས་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་རྣམས་ལ། སངས་རྒྱས་ཀྱི་ཞིང་འདིའི་རང་བཞིན་བསྟན་པ་མཛད་པས། ཐམས་ཅད་ཀྱིས་ཤར་ཕྱོགས་ཀྱི་སངས་རྒྱས་རིན་ཆེན་རྒྱན་བཀོད་པའི་ཞིང་ཁམས་བཞིན་དུ། ཤིན་ཏུ་རྣམ་པར་དག་པར་མཐོང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ང་ཡི་སངས་རྒྱས་ཀྱི་ཞིང་འདི་ནི་རྟག་ཏུ་འདི་འདྲ་སྟེ་ཁྱེད་རྣམས་ཀྱིས་མི་མཐོང་ངོ་ཞེས་གསུངས་སོ། །འདི་ལྟར་རྩོད་པའི་དུས་ན་ཡང་། བཅོམ་ལྡན་འདས་ཤྭཀྱ་ཐུབ་པའི་ཞིང་ཁམས་གླིང་བཞི་པའི་འཇིག་རྟེན་ཡིན་པ་ནི་མཐོང་བ་མཐུན་པས་འདི་ལ་རྩོད་པ་མི་བྱེད་དོ། །ཞིང་དག་པ་ཡིན་པ་དང་མ་ཡིན་པ་ལ་རྩོད་པ་ན། བཅོམ་ལྡན་འདས་ཀྱིས་ཤིན་ཏུ་དག་པ་ཡིན་པར་བསྟན་ནོ། །དེ་བཞིན་དུ་ཕུང་པོ་དང་ཁམས་དང་སྐྱེ་མཆེད་ཀྱི་དངོས་པོ་འདི་ཉིད་དག་ལ་ཡང་། སེམས་ཅན་དམྱལ་བ་ཡན་ཆད་ནས། ས་ཆེན་པོ་ལ་དབང་སྒྱུར་བའི་བྱང་ཆུབ་སེམས་དཔའ་དང་། རིག་པ་འཛིན་པ་མན་ཆད་ཀྱང་ཐུན་མོང་དུ་ལུས་དང་གནས་དང་སྤྱོད་ཡུལ་དུ་སྣང་བ་མ་ལོག་པར་སྣང་བས། འདི་ལ་ནི་རྩོད་པར་མི་བྱེད་དོ། །མ་དག་པ་དང་དག་པ་དང་ཡོངས་སུ་དག་པ་རྣམས་སུ་སྣང་བ་ལ་མི་མཐུན་པས། རང་རང་གིས་མངོན་སུམ་གྱིས་གྲུབ་པ་ཚད་མར་བྱས་ནས། མཚན་ཉིད་གཞན་དུ་འགལ་བར་རྩོད་པར་བྱེད་དེ། དེ་ཡང་གཟུ་བོའི་བློས་རྣམ་པར་གཞག་ན། ཇི་ལྟར་དག་པ་ལྟར་རིག་པ་ཆེ་བ་ནི་སྔ་མ་བཞིན་ནོ། །དེ་ལ་མ་དག་པའི་ལུས་ནི་ལས་ཀྱི་རྣམ་པར་སྨིན་པའི་ལུས་དང་ངག་དང་ཡིད་དུ་སྣང་བའོ། །དག་པའི་ལུས་ནི་ལས་ལ་དབང་ཐོབ་པ་རྣམས་ཀྱི་སྨོན་ལམ་ལས་གྲུབ་པའི་ལུས་དང་ངག་དང་ཡིད་དུ་སྣང་བའོ། །ཤིན་ཏུ་རྣམ་པར་དག་པ་ནི་རྒྱལ་བ་རྣམས་ཀྱི་སྐུ་དང་ཡེ་ཤེས་ཀྱི་དཀྱིལ་འཁོར་དུ་སྣང་བའོ། །འདི་རྣམས་ནི་ཕྱི་རོལ་གྱི་དོན་ཡོད་པར་སྨྲ་བ་དང་མཐུན་པར་རིག་པ་གཞག་པའོ། །རྣལ་འབྱོར་སྤྱོད་པ་བ་ལ་སོགས་པ་ཐམས་ཅད་སེམས་སྣང་བར་འདོད་པ་དང་མཐུན་པར་བསྒྲུབ་པར་བྱས་ན། ལུས་དང་གནས་དང་སྤྱོད་ཡུལ་དུ་སྣང་བ་ཐམས་ཅད་ཀྱང་དོན་གུད་ན་རྫས་སུ་མེད་དེ། སེམས་ཉིད་སྣང་བ་ཡིན་པར་ཐུན་མོང་དུ་གྲུབ་པ་ཡིན་ནོ། །རིག་པ་དེ་བརྟན་པར་གྲུབ་པ་རྣམས་ལ་སེམས་ཀྱང་ཀུན་གཞིའི་རྣམ་པར་ཤེས་པ་ཉིད་དོ། །དམིགས་པ་དང་རྣམ་པ་ཡོངས་སུ་མ་ཆད་པ་ས་བོན་ཐམས་ཅད་པ་རྐྱེན་སྣ་ཚོགས་དང་མཐུན་པ་ཡིན་པར་གྲུབ་བོ། །དེ་བརྟན་པར་གྲུབ་པ་རྣམས་ལ་དེ་ཡང་ཀུན་གཞི་སྐད་ཅིག་མའི་རྒྱུན་གྱི་དབང་དུ་བྱས་ཏེ། ཆོས་ཐམས་ཅད་དུ་སྣང་བ་དང་ས་བོན་ཐམས་ཅད་པ་ཡིན་པར་བསྒྲུབ་པ་ནི་མ་ཡིན་གྱི། ཀུན་གཞི་སྐད་ཅིག་མ་བྱུང་ལ་མ་འགགས་པའི་སྐད་ཅིག་མ་སྣང་བ་ཐམས་ཅད་པ་ས་བོན་ཐམས་ཅད་པ་ཡིན་ཏེ། འདི་ལྟར་གཞུང་ལས་ཀྱང་། རྣམ་ཤེས་དེ་ཡང་འདུ་བྱེད་རྒྱུན་ལ་མཚན་མ་ཐ་དད་འཛིན་པས་ན། །ལས་ཀྱི་ཁྱད་པར་དག་གིས་བརྒྱད་དུ་སྣང་གི་རིགས་ལ་དུ་མ་མེད། །དེ་ཕྱིར་སེམས་ཀྱི་སྐད་ཅིག་དང་པོ་དེ་ལ་ལུས་དང་ཆོས་ཀུན་གནས། །དེ་ལ་བསམ་པ་ཞེན་ཕྱིར་ཕྱི་མ་དེ་འབྱུང་དེ་ལ་སྣང་། །ཞེས་གསུངས་པ་ལྟ་བུ་དང་། དེ་ཉིད་ལས། དེ་ལ་ཕྱོགས་མེད་ཕྱིར་ན་མཐའ་ཡས་ཞིང་རྣམས་བདག་གི་ལུས། །བདག་གི་ལུས་ནི་མཐའ་ཡས་ཞིང་དང་སྐྱེ་བོའི་ལུས་སུ་རབ་སྣང་ཡང་། །སེམས་དང་བག་ཆགས་གཅིག་མིན་ཐ་དད་མ་ཡིན་བརྟག་པར་རབ་ཏུ་དཀའ། །ཞེས་གསུངས་པ་ལྟ་བུ་སྟེ། དེ་ལ་རྣམ་པར་ཤེས་པ་ཐམས་ཅད་ནི་རིགས་གཅིག་པ་སྟེ། འདི་ལྟར་ཀུན་གཞིའི་རྣམ་པར་ཤེས་པའི་རིགས་སོ། །ལང་ཀར་གཤེགས་པ་ལས། བློ་གྲོས་ཆེན་པོ་རྣམ་པར་ཤེས་པ་ཐམས་ཅད་རིགས་གཅིག་པ་མ་ཡིན་ན་ནི། འདི་ལྟར་ཀུན་གཞིའི་རྣམ་པར་ཤེས་པར་རྒྱུ་ལས་འབྱུང་བར་མི་འགྱུར་རོ། །ཞེས་གསུངས་པ་ལྟ་བུའོ། །དེ་བས་ན་དམིགས་པ་དང་རྣམ་པར་ཡོངས་སུ་ཆད་པའི་རྣམ་པར་ཤེས་པ་ཐམས་ཅད་ཀུན་ཀྱང་ཀུན་གཞིའི་རྣམ་པར་ཤེས་པའི་རིགས་ལས་གུད་ན་མེད་པའི་ཕྱིར་ཡུལ་ཡོངས་སུ་ཆད་པའི་སྣང་བ་ཐམས་ཅད་ཀྱང་དམིགས་པ་དང་རྣམ་པ་ཡོངས་སུ་མ་ཆད་པའི་ཀུན་གཞིའི་རྣམ་པར་ཤེས་པའི་སྣང་བ་ལས་གུད་ན་མེད་དོ། །ཕྱོགས་དང་དུས་ཡོངས་སུ་ཆད་པར་སྣང་བ་རྣམས་ཀྱང་། དཔེར་ན་མེ་ལོང་གི་གཟུགས་བརྙན་ཡུལ་ཕྱོགས་ཡོངས་སུ་ཆད་པར་སྣང་བ་དང་། རྨི་ལམ་གྱི་དུས་སྔ་ཕྱི་ཡོངས་སུ་ཆད་པར་སྣང་བ་ཡིན་ནོ། །དེ་བས་ན་དོན་འདིར་འགྱུར་ཏེ། འགྲོ་བ་མིར་འགྱུར་པའི་ཀུན་གཞིའི་རྣམ་པར་ཤེས་པའི་སྣང་བ་ནི་རང་གི་དབང་པོས་མངོན་སུམ་དུ་བྱས་པའི་ཡུལ་འབའ་ཞིག་ཏུ་མ་ཟད་ཀྱི། སེམས་ཅན་དམྱལ་བའི་གནས་དང་། དེ་བཞིན་དུ་ཡི་དྭགས་དང་། དུད་འགྲོ་དང་། ལྷ་ལ་སོགས་པའི་སྤྱོད་ཡུལ་ཐམས་ཅད་ཀྱང་དེའི་སྣང་བའི་ཡིན་ནོ། །ཞེས་བྱ་བར་འགྲུབ་བོ། །རིག་པ་དེ་བརྟན་པར་གྱུར་པ་ན་དག་པ་དང་མ་དག་པ་དང་ཤིན་ཏུ་དག་པའི་ལུས་དང་གནས་དང་སྤྱོད་ཡུལ་དུ་སྣང་བ་ཐམས་ཅད་ཀུན་གཞིའི་རྣམ་པར་ཤེས་པ་སྐད་ཅིག་མ་གཅིག་གི་སྣང་བ་ཡིན་པར་མི་འགྲུབ་པའི་གནས་མེད་དེ། གྲུབ་པར་མ་གྱུར་ན་རིག་པ་སྔ་མ་ཐམས་ཅད་ཐུན་མོང་དུ་འཇིག་པར་འགྱུར་བའི་ཕྱིར་རོ། །གཞུང་ལས་ཀྱང་། དག་པ་དང་མ་དག་པའི་ཞིང་ཁམས་ཐམས་ཅད་ཀུན་གཞིའི་རྣམ་པར་ཤེས་པའི་ལུས་ཀྱི་བདག་ཉིད་ཡིན་ཏེ། གང་གི་ཕྱིར་ཀུན་གཞིའི་སྐད་ཅིག་མ་གཅིག་ལ། དབང་པོ་དང་བཅས་པའི་ལུས་དང་མ་ལུས་པའི་ཆོས་ཐམས་ཅད་གནས་པའི་ཕྱིར་རོ་ཞེས་གསུངས་པ་ལྟ་བུ་སྟེ། དེ་ལྟར་ན་ལུང་དང་མན་ངག་འབྲེལ་བའི་རིག་པས་གཞལ་ན། ཇི་སྲིད་དུ་དག་པ་དང་མ་དག་པས་བསྡུས་པའི་ལུས་དང་གནས་དང་སྤྱོད་ཡུལ་དང་བཅས་པ། ནམ་མཁའི་དབྱིངས་ཀྱི་མཐས་ཀླས་པས་བསྡུས་པ། ཐོག་མ་དང་ཐ་མ་མེད་པའི་དུས་ཀྱིས་བསྡུས་པ་ཐམས་ཅད་ཀྱང་། གང་ཟག་གཅིག་གི་ཀུན་གཞིའི་རྣམ་པར་ཤེས་པ་སྐད་ཅིག་མ་བྱུང་ལ་མ་འགགས་པ་གཅིག་གི་སྣང་བ་ཡིན་ནོ། །གཅིག་པོ་དེ་ཉིད་ཀྱང་དེ་ལྟ་བུར་སྣང་བ་ཙམ་ཡིན་གྱིས་ངོ་བོ་ཉིད་ཡོངས་སུ་གྲུབ་པ་མེད་དོ། །ཀུན་གཞིའི་རྣམ་པར་ཤེས་པ་ས་བོན་ཐམས་ཅད་ཡིན་ཞིང་། ཀུན་གཞིའི་སྣང་བ་ཁམས་ཐམས་ཅད་པ་ཡིན་ཡང་དབང་པོའི་སྤྱོད་ཡུལ་ལ་ཁམས་སོ་སོར་སྣང་བ་དང་། རྒྱུ་དང་འབྲས་བུར་སྣང་བ་དང་། སྐབས་སོ་སོར་སྣང་བ་དང་། ཡིད་ཀྱི་རྣམ་པར་ཤེས་པའི་ཡུལ་དུ་ཐམས་ཅད་འཇུག་ཏུ་རུང་བར་སྣང་བ་ནི། དཔེར་ན་གསེར་གྱི་རིས་སུ་གྱུར་པ་ས་ལས་བྱུང་བ་དང་། ལྗགས་ཀྱི་གསེར་དང་། འཛམ་བུ་ཆུ་བོའི་གསེར་ལ་སོགས་པ་དུ་མ་ལེགས་པར་སྦྱར་བའི་ཕྱེ་མ་རྣམས་དངུལ་ཆུའི་རིས་སུ་གྱུར་པ་བཟང་ངན་སྣ་ཚོགས། འདི་ལྟར་རྡོ་སོལ་ལས་བྱུང་བའི་དངུལ་ཆུ་དང་། དེ་བཞིན་དུ་ཆུ་ལས་བྱུང་བ་དང་། སྨན་ལས་བྱུང་བ་དང་། གསེར་དུ་སྣང་བ་ལ་སོགས་པས་བསྡུས་པར་གྱུར་ན། དེ་མར་གསར་པའི་གོང་བུ་ལྟ་བུ་གཅིག་ཏུ་འགྱུར་ཏེ། མིག་དང་ལུས་ལ་སོགས་པའི་དབང་པོའི་སྤྱོད་ཡུལ་དུ་ནི། ཁམས་སྣ་ཚོགས་སུ་མི་སྣང་སྟེ་རང་བཞིན་གཅིག་ཏུ་སྣང་ངོ་། །ཡིད་ཀྱི་རྣམ་པར་ཤེས་པའི་སྤྱོད་ཡུལ་དུ་ནི། རང་བཞིན་ཇི་ལྟར་གནས་པ་བཞིན་ཐམས་ཅད་ལ་བློ་འཇུག་ཏུ་རུང་ངོ་། །དེ་ལ་འཁྲུལ་བའི་གང་ཟག་རྣམས་ནི། ཁ་ཅིག་ནི་མར་དང་ཞག་ལ་སོགས་པའི་གོང་བུར་འཛིན་ཏོ། །ཁ་ཅིག་ནི་དངུལ་གྱི་གོང་བུར་འཛིན་ཏོ། །ཁ་ཅིག་ནི་དངུལ་ཆུའི་གོང་བུར་འཛིན་ཏོ། །གཞན་ཁ་ཅིག་ནི་དུས་ནམ་ཞིག་ན་མེས་ཉེན་པ་ལས་གསེར་དུ་འགྱུར་བ་མཐོང་ནས་གསེར་གྱི་རྒྱུ་ཡིན་པར་འཛིན་ཏོ། །མཁས་པ་རྣམས་ནི་ཁམས་སྣ་ཚོགས་པ། རྐྱེན་སྣ་ཚོགས་ཉེ་བར་གནས་པ་ལ་བརྟེན་པ་ཅན་རྐྱེན་གང་དང་འཕྲད་པར་གྱུར་པ་དེ་ལྟར་རང་བཞིན་དེ་དང་འདྲ་བར་སྣང་ནུས་པ་ཅན་དུ་འཛིན་ཏོ། །དེ་ལྟར་ཁམས་སྣ་ཚོགས་ཀྱི་གོང་བུ་དེ་ཡང་གྲང་བའི་རྐྱེན་དང་ལྡན་ན། དུས་ཡུན་རིང་མོ་བསྐལ་པའི་མཐར་ཐུག་པར་འདུག་ཀྱང་མར་གསར་པའི་གོང་བུ་ལྟར་འདུག་གོ། །མེའི་རེག་པས་ཅུང་ཟད་གདུངས་པར་གྱུར་ན་ནི། ཟངས་དང་འཁར་བ་དང་ར་གན་གྱི་ཁ་དོག་ཏུ་གནས་སོ། །དེ་བཞིན་དུ་ཆེས་གདུངས་པར་གྱུར་ན་ནི། གསེར་ཐ་མལ་པའི་རང་བཞིན་དུ་གནས་སོ། །ཤིན་ཏུ་ཆེར་གདུངས་པར་གྱུར་ན་ནི། འཛམ་བུ་ཆུ་བོའི་གསེར་གྱི་རང་བཞིན་དུ་གནས་ཏེ། དེ་ཕན་ཆད་ནི་ཚ་བའི་རྐྱེན་དང་ཕྲད་ཀྱང་རུང་། གྲང་བའི་རྐྱེན་དང་འཕྲད་ཀྱང་རུང་སྟེ། རང་བཞིན་གཞན་དུ་གནས་པར་སྣང་བ་མི་འགྱུར་རོ། །དེ་བཞིན་དུ་ཀུན་གཞིའི་རྣམ་པར་ཤེས་པ་ས་བོན་ཐམས་ཅད་པ་ཡིན་ཞིང་། ཀུན་གཞིའི་སྣང་བ་རང་བཞིན་ཐམས་ཅད་པ་ཡིན་ཡང་། དབང་པོའི་སྤྱོད་ཡུལ་དུ་ཉེ་བར་གནས་པའི་རྐྱེན་ཇི་ལྟ་བ་བཞིན་དུ། དག་པ་དང་མ་དག་པ་དང་ཤིན་ཏུ་དག་པའི་ལུས་དང་གནས་དང་སྤྱོད་ཡུལ་རྣམས་སུ་དུས་དང་གནས་སྐབས་སོ་སོར་སྣང་བར་འགྱུར་རོ། །ཡིད་ཀྱི་རྣམ་པར་ཤེས་པ་ནི། སྣང་བ་དང་མི་སྣང་བ་གཉིས་ཀ་ལ་འཇུག་ཏུ་རུང་བར་འགྱུར་རོ། །དེ་ལ་གང་ཟག་འཁྲུལ་བ་རྣམས་ཀྱིས་བདག་ལ་སོགས་པའི་དངོས་པོར་འཛིན་པ་དང་ཆོས་སྣ་ཚོགས་སུ་འཛིན་པའི་གཞིར་འགྱུར་ཏེ། དེའི་དབང་གིས་ཁ་ཅིག་ནི་ཕུང་པོ་ལྔ་པོ་འདི་ལས་ཀྱི་རྣམ་པར་སྨིན་པའི་བདག་ཉིད་སྡུག་བསྔལ་གྱི་ཆོས་སུ་འཛིན་ཏེ། དེ་ནི་དངུལ་ཆུ་ཉིད་ཀྱི་གོང་བུར་འཛིན་པ་ལྟ་བུའོ། །ཁ་ཅིག་ནི་ཕུང་པོ་འདི་ཉིད་ཀྱང་ཞིང་དག་པ་ན་གནས་པ་རྣམས་ཀྱི་ལུས་དང་སྤྱོད་ཡུལ་ཡོངས་སུ་དག་པའི་རྒྱུ་ཉིད་དུ་རུང་བར་འཛིན་ཏེ། དེ་ནི་གོང་བུ་དེ་གསེར་གྱི་རྒྱུར་འཛིན་པ་ལྟ་བུའོ། །མཁས་པ་རྣམས་ནི་གོང་བུ་དེ་གསེར་ཉིད་དུ་མི་སྣང་ཡང་གསེར་གྱི་རང་བཞིན་དང་བྲལ་བ་མ་ཡིན་ཏེ། དངུལ་ཆུ་ཉིད་དུ་སྣང་ཡང་། གསེར་དངུལ་ཆུར་གནས་གྱུར་པ་ཡང་མ་ཡིན། དངུལ་ཆུའི་རང་བཞིན་མེད་པའང་མ་ཡིན་མོད་ཀྱི། དངུལ་ཆུའི་རང་བཞིན་མི་བརྟན་པ་སྣ་ཚོགས་སུ་འགྱུར་བ་སླ་བས་ཟད་པར་འགྱུར་བར་ཡང་སླའོ། །གསེར་གྱི་རང་བཞིན་ནི་དེ་བས་ཆེས་བརྟན་པ་འགྱུར་བར་དཀའ་བ་སླར་ངན་པར་མི་འགྱུར་བ། བསྐལ་པའི་མེ་འབར་བའི་དུས་ན་ཡང་ཟད་པར་དཀའ་བ་ཡིན་ནོ། །དེ་བཞིན་སྣང་བ་མ་དག་པ་རྣམས་ནི་མི་བརྟན་པ་ཤིན་ཏུ་བསླུ་བའི་ཆོས་ཅན་སྐྱེ་བ་སྔ་མ་དང་ཕྱི་མ་དག་ལ་ཡང་སྣང་བ་འགྱུར་བར་དཀའ་བ་མེད་དོ། །སྣང་བ་དག་པར་གྱུར་བ་རྣམས་ནི། ལུས་དང་སྤྱོད་ཡུལ་དག་པ་ལ་སྤྱོད་པར་དབང་བར་གྱུར་ཕན་ཆད། སླར་མ་དག་པ་ལ་སྤྱོད་པར་ཡང་མི་འགྱུར་ལ། ཕྱིར་ཞིང་ཆེས་ཤིན་ཏུ་དག་པར་འགྱུར་ཏེ། སྡུག་བསྔལ་བསྐྱེད་པའི་རྒྱུར་མི་འགྱུར་ལ། བདེ་བ་དང་གྲོལ་བ་སྐྱེད་པའི་རྒྱུར་འགྱུར་རོ། །དེ་བས་ན་འདི་ལྟར་འགྱུར་ཏེ། ཁམས་སྣ་ཚོགས་ཀྱི་གོང་བུ་དེ་ཡང་ཕན་ཚུན་ལྟོས་ན་གསེར་གྱི་རང་བཞིན་ལྟར་བདེན་པར་འགྱུར་རོ། །དེ་བཞིན་དུ་ཀུན་གཞི་རྣམ་པར་ཤེས་པའི་སྣང་བ་ཁམས་སྣ་ཚོགས་པ་དེ་ཡང་སྣང་བ་དག་པའི་སྤྱོད་ཡུལ་ལྟར་བདེན་པར་འགྱུར་རོ། །ཇི་ལྟར་དངུལ་ཆུ་དང་གསེར་གཉིས་ཀ་ཡང་རྟག་ཏུ་བརྟན་པ་མ་ཡིན་པ་དེ་བཞིན་དུ། དག་པ་དང་མ་དག་པའི་སྣང་བ་ཐམས་ཅད་ཀྱང་འཁྲུལ་པའི་བག་ཆགས་ཀྱི་དབང་གིས་སྣང་བ་ཡིན་ཏེ། ཡང་དག་པར་གྲུབ་པ་མེད་དོ། །འཁྲུལ་པ་ཐམས་ཅད་ཡོངས་སུ་ཆད་པའི་སངས་རྒྱས་ཀྱི་ས་ལ་ནི། སྣང་བ་མངའ་འམ་མི་མངའ་བ་ནི་རྩོད་པའི་གཞི་ཅན་ཡིན་ཏེ། ཅུང་ཟད་གོང་དུ་བསྟན་པར་ཟད་དོ། །དེ་བས་ནས་ཕུང་པོ་ལྔ་རིགས་ལྔར་བསྟན་པའི་སྐབས་འདིར་ཡང་། ཁ་ཅིག་ན་རེ་དོན་དམ་པར་རང་བཞིན་མེད་པས་སངས་རྒྱས་ཡིན་པ་དང་། ཀུན་རྫོབ་ཏུ་སངས་རྒྱས་སུ་འགྱུར་དུ་རུང་བའི་རྒྱུ་ཡིན་པས་སངས་རྒྱས་སུ་གཞག་གི། དངོས་པོའི་མཚན་ཉིད་ནི་མ་དག་པའི་སྣང་བ་ལྟར་བདེན་ནོ་ཞེས་ཟེར་རོ། །དེ་ལྟར་བསྒྲུབ་པར་མི་བྱའི་ཀུན་རྫོབ་ཙམ་དུ་ཡང་ཕུང་པོ་ལྟ་བུར་སྣང་ཙམ་ཉིད་ནས་སངས་རྒྱས་གྲངས་མེད་པ་ཡོངས་སུ་དག་པའི་ཞིང་ཁམས་དང་བཅས་པའི་རང་བཞི་ཉིད་ཀྱང་ཡིན་ལ། སྣང་བ་དེ་གཉིས་ཀྱང་ཕན་ཚུན་ལྟོས་ན་ཡོངས་སུ་དག་པའི་སྣང་བ་ལྟར་བདེན་པར་གྲུབ་བོ་ཞེས་གཞག་པར་བྱའོ། །དེ་ལྟ་བས་ན་ཕུང་པོའི་བྱེ་བྲག་ཏུ་གྱུར་པ་མིག་གི་ཡུལ་ཁ་དོག་ལྟ་བུ་གཅིག་ཀྱང་སངས་རྒྱས་གྲངས་མེད་པའི་རང་བཞིན་ནོ། །འོ་ན་ཕུང་པོ་ཁམས་དང་སྐྱེ་མཆེད་རྣམས་ལྷ་སོ་སོར་སྦྱར་ཏེ་བཤད་པ་འདི་ཅི་ཞེ་ན། དེ་ནི་དེའི་རང་བཞིན་ཡིན་པའི་ཕྱིར་འགལ་བའི་སྐྱོན་མེད་པ་དང་། བྱེ་བྲག་གསལ་བར་སོ་སོར་གོམས་པར་བྱས་ན། མྱུར་དུ་སྣང་བ་དག་པར་འགྱུར་བ་དེ་བས་ན་དེ་ལྟར་བསྟན་ནོ། །འོ་ན་རྒྱུད་དང་སྒྲུབས་ཐབས་རྣམས་ལས་ཆོས་མཐུན་པར་བཤད་པ་འདི་ལ་དགོས་པ་ཅི་ཞིག་ཡོད་ཅེ་ན། འདི་ནི་ཐ་མལ་པ་སྣང་བའི་དངོས་པོ་ལ་མངོན་པར་ཞེན་པའི་གང་ཟག་རྣམས་དྲང་བའི་ཕྱིར། མཚན་ཉིད་མཐུན་པ་དང་རྒྱུ་འབྲས་མཐུན་པ་དག་གི་སྒོ་ནས་བསྟན་ན་རང་བཞིན་དབྱེར་མེད་པའི་བློ་སྐྱེ་བར་འགྱུར་བས་དེའི་ཕྱིར་དེ་དག་ལྟར་བསྟན་ནོ། །དེ་ལ་རིགས་ལྔའི་སངས་རྒྱས་ཉོན་མོངས་པ་ལྔའི་རིགས་ཡིན་པར་བསྟན་པ་ནི། གསང་བ་འདུས་པ་ལས། འདོད་ཆགས་ཞེ་སྡང་གཏི་མུག་དང་། །ཡིད་བཞིན་ནོར་བུ་དམ་ཚིག་སྟེ། །རིགས་ལྔར་རྟོགས་པ་འདི་རྣམས་ཀྱིས། །འདོད་དང་ཐར་པ་རབ་བསྒྲུབ་པའོ། །ཞེས་གསུངས་པ་ལྟ་བུའོ། །གཞན་ཡང་། འདོད་ཆགས་ཞེ་སྡང་གཏི་མུག་དང་ང་རྒྱལ་ཕྲག་དོག་ཆེན་པོ་རྣམས། །གང་ཕྱིར་བྱང་ཆུབ་སེམས་དེ་ནི། རྡོ་རྗེ་དེ་བཞིན་གཤེགས་པར་གསལ། །ཞེས་གསུངས་པ་ལྟ་བུ་དང་། དྲི་མ་མེད་པར་གྲགས་པས་བསྟན་པའི་མདོ་ལས། སྐམ་ས་ལས་པདྨ་མི་སྐྱེ་འདམ་ནས་སྐྱེ་བ་དང་འདྲ་བར། འདུས་མ་བྱས་མངོན་དུ་བྱས་པ་རྣམས་ལས་བླ་ན་མེད་པའི་བྱང་ཆུབ་ཀྱི་སེམས་མི་སྐྱེ། འཇིག་ཚོགས་ལ་ལྟ་བ་རི་རབ་ལྟ་བུ་བསྐྱེད་ན་བླ་ན་མེད་པ་བྱང་ཆུབ་ཀྱི་སེམས་སྐྱེ་བར་འགྱུར་བས། དེ་བས་ན་ཉོན་མོངས་པ་ནི་དེ་བཞིན་གཤེགས་པའི་གདུང་ངོ་ཞེས་བཤད་དོ། །ཐབས་ཀྱི་ཞགས་པ་ལས། བསྲུང་བ་མེད་པའི་དམ་ཚིག་བཤད་པའི་སྐབས་ནས། ཉོན་མོངས་པ་ལྔའི་མཚན་ཉིད་དང་། རིགས་ལྔའི་མཚན་ཉིད་མཐུན་པར་བཤད་ནས། དེ་གཉིས་དབྱེར་མེད་པར་ངོ་བོ་ཉིད་ཀྱིས་མི་འདའ་བའི་དམ་ཚིག་ཏུ་བཤད་དེ། འདི་ལྟར་གཏི་མུག་ནི་རྣམ་པར་མི་རྟོག་པའི་ཁོངས་སུ་འདུས་པས་སྤང་བླང་མེད་པའི་མཚན་ཉིད་ཀྱི་སྐུ་དེ་བཞིན་གཤེགས་པའི་རིགས་སོ། །ཞེ་སྡང་ནི་ཆོས་ཀྱི་དབྱིངས་ལས་མ་གཡོས་བཞིན་དུ་གདུག་པ་འདུལ་བའི་མཚན་ཉིད་རྡོ་རྗེའི་རིགས་སོ། །ང་རྒྱལ་ནི་ཆོས་མཉམ་པ་ཉིད་ལ་སྲན་ཚུགས་པའི་མཚན་ཉིད་རིན་པོ་ཆེའི་རིགས་སོ། །འདོད་ཆགས་ནི་ཆོས་ཐམས་ཅད་ལ་མངའ་བརྙེས་པའི་མཚན་ཉིད་པདྨའི་རིགས་སོ། །ཕྲག་དོག་ནི་ཆོས་མཉམ་པར་མ་རྟོགས་པ་རྣམས་ལ་ལས་དགེ་སྡིག་ཡོད་པའི་ཕྱིར་འགྲོ་བའི་དོན་བྱེད་པའི་མཚན་ཉིད་ལས་ཀྱི་རིགས་སོ། །འདི་དག་ནི་ཉོན་མོངས་པ་ཆེན་པོ་རྣམས་ཏེ། ཐ་མལ་པའི་ཉོན་མོངས་པ་རྣམས་དང་རང་རང་གི་མཚན་ཉིད་མཐུན་པར་འགྱུར་གྱི། ཡུལ་དང་ཡིད་ལ་སོགས་པའི་བྱེད་པའི་སྒོ་ནས་མི་མཐུན་པར་འགྱུར་རོ། །དེ་བས་འདི་དག་ཀྱང་ཇི་ལྟར་སྣང་བ་དེ་ལྟར་བདེན་པའི་དབང་དུ་བྱས་ན་ཆོས་མཐུན་པ་ཙམ་དུ་བསྟན་པར་འགྱུར་རོ། །དངོས་པོའི་གནས་ལུགས་ཀྱི་དབང་དུ་བྱས་ན་ནི་གོང་དུ་བསྟན་པ་བཞིན་དུ་སངས་རྒྱས་ཉིད་འགྲུབ་བོ། །ཉོན་མོངས་པ་ལྔ་རིགས་ལྔའི་སངས་རྒྱས་དང་ཕུང་པོ་ལྔར་ཆོས་མཐུན་པར་སྦྱར་བ་ནི་མཚན་ཉིད་ཀྱི་སྒོ་ནས་ཆོས་མཐུན་པ། གསང་བ་འདུས་པ་ལས། གཟུགས་ནི་གཏི་མུག་ཏུ་བསྟན་པ། །བླུན་པས་བཅིངས་པས་ངོ་བོའོ། །ཚོར་བ་འདོད་པས་མྱོས་བསྟན་པ། །ང་རྒྱལ་གྱི་ནི་ངོ་བོའོ། །འདུ་ཞེས་འདོད་ཆགས་བདག་ཉིད་ནི། །དངོས་པོ་ལ་ནི་ཆགས་པའི་མཚན། །འདུ་བྱེད་རྟག་ཏུ་ཕྲག་དོག་སྟེ། །རྩེ་གཅིག་བདག་ཉིད་གཏོད་པའོ། །རྣམ་ཤེས་ཞེ་སྡང་ཞེས་བསྟན་ཏེ། །རྒྱུ་དང་འབྲས་བུར་རབ་ཏུ་གྲགས། །ཞེས་གསུངས་པ་སྟེ། འདི་ཡང་སྔ་མ་བཞིན་དུ་ཤེས་པར་བྱའོ། །རྒྱུ་དང་འབྲས་བུར་ཆོས་མཐུན་པར་བཤད་པ་ནི། གཟུགས་ཀྱི་ཕུང་པོ་གནས་འགྱུར་ཚུལ་ཁྲིམས་སྐུ། །ཚོར་བ་གནས་འགྱུར་ཏིང་འཛིན་འབུམ་ཕྲག་བརྙེས། །འདུ་ཤེས་གནས་འགྱུར་ཤེས་རབ་ཕུང་པོ་སྟེ། །འདུ་བྱེད་གནས་འགྱུར་རྣམ་པར་གྲོལ་བའོ། །སེམས་འགྱུར་ཡེ་ཤེས་དེ་ནི་རྣམ་གྲོལ་མཐོང་། །ཞེས་གསུངས་པ་ལྟ་བུ་སྟེ། ཉེ་བར་ལེན་པའི་ཕུང་པོ་ལྔ་གནས་འགྱུར་བ་ནི་རྣམ་པར་གྲོལ་བའི་ཕུང་པོ་ལྔ་ཡིན་ལ། དེ་ནི་འཕགས་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་བདག་ཉིད་དང་གཞིར་གྱུར་པ་ཡིན་ཏེ། དེ་ལ་དེ་བཞིན་གཤེགས་པའི་སྐུ་ནི་དྲི་མ་དག་པའི་སྐུ་སྟེ་ཁྲིམས་ཀྱི་རང་བཞིན་ནོ། །དེ་བཞིན་དུ་ཏིང་ངེ་འཛིན་ནི་ཡོན་ཏན་གྱི་བདག་ཉིད་དང་གནས་སུ་གྱུར་པའོ། །ཤེས་རབ་ནི་རྟོགས་པའི་ཆོས་དང་ལུང་གི་ཆོས་བདག་ཉིད་དང་གཞིར་གྱུར་པའོ། །རྣམ་པར་གྲོལ་བ་ནི་མཛད་པ་ཡོངས་སུ་རྫོགས་པའི་བདག་ཉིད་དང་གཞིར་གྱུར་པའོ། །རྣམ་པར་གྲོལ་བའི་ཡེ་ཤེས་མཐོང་བ་ནི་ཐུགས་ཀྱི་བདག་ཉིད་དེ། དེ་ལྟར་སྐུ་གསུང་ཐུགས་ཡོན་ཏན་ཕྲིན་ལས་ལྔའི་དབང་གིས་རིགས་ལྔའི་སངས་རྒྱས་ཡིན་པར་འགྱུར་རོ། །དེ་བས་ན་སངས་རྒྱས་གྲངས་མེད་པ་ཐམས་ཅད་ཀྱང་ཆོས་འདི་ལྔ་ཙམ་དུ་འདུས་པས། ལོངས་སྤྱོད་རྫོགས་པར་དང་སྤྲུལ་པའི་སྐུ་མཐའ་དག་ཀྱང་རིགས་རྣམ་པར་ལྔར་བསྡུས་པ་ཡིན་ནོ། །དེ་ལྟར་ཡང་རྡོ་རྗེ་བཀོད་པ་ལས་ཀྱང་། སྐུ་ནི་མ་བཅོས་དེ་བཞིན་ཉིད། །ཐུགས་ནི་མི་འགྱུར་རྡོ་རྗེའི་རིགས། །ཡོན་ཏན་ཀུན་འབྱུང་རིན་ཆེན་རིགས། །གསུང་ནི་ཆགས་མེད་པདྨའི་རིགས། །དོན་གྲུབ་སྤྱོད་པ་ལས་ཀྱི་རིགས། །ཞེས་གསུངས་པས་ན། རིགས་རྣམ་པ་ལྔ་ཁོ་ནར་བསྡུས་པའི་དོན་ཡང་གོང་དུ་མདོར་བསྟན་པ་བཞིན་དུ། རྒྱུད་དེ་ཉིད་ལས་རྒྱས་པར་གསུངས་སོ། །འོ་ན་ཕུང་པོ་ལྔ་དང་སྐུ་གསུང་ཐུགས་ཡོན་ཏན་ཕྲིན་ལས་ལྔར་རང་བཞིན་ཇི་ལྟར་མཐུན་ཞེ་ན། གཟུགས་དང་སྐུ་ནི་དངོས་སུ་ཟད་དོ། །ཚོར་བ་ནི་འདོད་པའི་ཡོན་ཏན་ལ་ལོངས་སྤྱོད་དུ་ལྟ་བའི་གཞི་ཡིན་ལ། དེ་ཡོངས་སུ་དག་པའི་མཚན་ཉིད་གཟུངས་དང་ཏིང་ངེ་འཛིན་ཡང་ཡོན་ཏན་གྱི་གཞི་ཡིན་ཏེ། དེའི་ཕྱིར་རང་བཞིན་མཐུན་པའོ། །འོ་ན་ཚོར་བ་ནི་སྡུག་བསྔལ་གྱི་བདག་ཉིད་དུ་བཤད་དེ། སྡུག་བསྔལ་གྱི་ཡན་ལག་ཏུ་མ་གྱུར་པའི་ཉེས་སྐྱོན་གྱི་ཆོས་ནི་གཞན་མེད་དོ། །དེ་བས་ན་འདི་གཉིས་ནི་ཤིན་ཏུ་ཟློག་པ་ཉིད་ཡིན་པས་མཐུན་པར་སྦྱར་དུ་མི་རུང་ངོ་ཞེ་ན། འདི་ནི་ཤིན་ཏུ་འཐད་པ་ཉིད་ཡིན་ཏེ། དཔེར་ན་ཉོན་མོངས་པ་ཅན་གྱི་ཡིད་མཉམ་པ་ཉིད་ཀྱི་ཡེ་ཤེས་སུ་གནས་འགྱུར་བར་བཤད་པ་ན། གཅིག་ནི་བདག་ཏུ་ལྟ་བ་ཅན་ཡིན་ལ། གཅིག་ནི་བདག་མེད་པར་གཟིགས་པས་མི་མཐུན་པ་ཡིན་ཡང་། བདག་ཏུ་ལྟ་བ་དག་པ་ཉིད་ཀྱིས་བདག་མེད་པར་གཟིགས་པ་འགྲུབ་པ་ཡིན་ནོ། །དེ་བཞིན་དུ་ཚོར་བ་ཡང་སེམས་ཅན་གྱི་དུས་ན་ཡོན་ཏན་ཐམས་ཅད་ཚོར་བ་བདེ་བ་ཡན་ལག་དང་བཅས་པ་ལ་བཤད་ལ། དམ་པ་རྣམས་ཀྱིས་གང་ཅི་ཚོར་ཡང་རུང་སྟེ། དེ་དག་ཐམས་ཅད་སྡུག་བསྔལ་ལོ་ཞེས་བཤད་པ་ན་ཡང་། ཚོར་བ་དང་བྲལ་བ་ཉིད་བདེ་བའི་ལམ་དང་། མྱ་ངན་ལས་འདས་པའི་མཚན་ཉིད་ཡིན་པས་འདི་ཉིད་འཐད་པ་ཡིན་ཏེ། དྲི་མ་མེད་པར་གྲགས་པས་བསྟན་པའི་མདོ་ལས་ཀྱང་། ཐུབ་དབང་ཁྱོད་ཀྱིས་བདུད་དཔུང་སྟོབས་ཅན་རབ་བཏུལ་ནས། །བྱང་ཆུབ་མཆོག་རབ་ཞི་བ་མི་འཆི་བདེ་བ་སྙེམས། །དེ་ལ་ཚོར་བྱེད་ཡིད་དང་སེམས་ཀྱི་དཔྱོད་པ་མེད། །ཅེས་གསུངས་པ་དང་། ཡང་དེ་ཉིད་ལས། སངས་རྒྱས་ཀྱི་ཆོས་ཀྱི་ཆོས་ཡོངས་སུ་རྫོགས་པ་ལ། ཚོར་བ་གཉིས་པོ་སྤངས་པ་ཡིན་ཡང་ཞེས་བྱ་བ་ལ་སོགས་པ་གསུངས་པ་ལྟ་བུའོ། །དེ་ལ་འདུ་ཤེས་ཇི་ལྟར་གསུང་དང་མཐུན་ཞེ་ན། སེམས་ཅན་གྱི་དུས་ན་འདུ་ཤེས་ནི་མཚན་མར་འཛིན་པའི་བདག་ཉིད་ཐ་སྙད་འདོགས་པའི་ལས་ཅན་ཡིན་པས། སྒྲ་སྤྱིའི་རྣམ་པའི་ཡུལ་ཅན་བརྗོད་པའི་ཐ་སྙད་སྐྱེད་པར་བྱེད་པ་ཡིན་ནོ། །འཕགས་པའི་དུས་ན་ཡང་དེ་གནས་འགྱུར་བའི་མཚན་ཉིད། དག་པ་འཇིག་རྟེན་པའི་ཡེ་ཤེས་ནི་ཆོས་ཐམས་ཅད་སྟོན་པའི་གཞིར་གྱུར་པའོ། །འདུ་བྱེད་ལས་ཀྱི་བདག་ཉིད་ཡིན་པ་དང་། རྣམ་པར་ཤེས་པ་ཐུགས་ཀྱི་བདག་ཉིད་ཡིན་པ་ནི་དངོས་སུ་ཟད་དོ། །དེ་བས་ན་ཆོས་མཐུན་པར་བསྟན་པ་འདི་དག་ཀྱང་། སྣང་བ་མ་དག་པ་མ་ལོག་ཅིང་དེ་ཉིད་ཀྱི་དངོས་པོ་ལ་ཆེར་ཞེན་པ་རྣམས་ལ། སྣང་བ་དག་པའི་རང་བཞིན་ཡིན་པའི་གཏན་ཚིགས་སུ་འགྱུར་ཞིང་། ནམ་ཞིག་མ་དག་པ་རྣམས་ཀྱི་ཆོས་ཅན་མ་གྲུབ་པའི་བློ་སྐྱེས་པ་དེའི་ཚེ། གཏན་ཚིགས་དེ་ཉིད་ཇི་ལྟ་བ་བཞིན་དུ་མངོན་དུ་རྟོགས་པར་འགྱུར་བས་དེ་ལྟ་བུར་གསུངས་པ་ཡིན་ནོ། །ཡང་གང་ཟག་ཁ་ཅིག་འདི་སྙམ་དུ། ཉོན་མོངས་པ་ལྔའི་རིགས་ཀྱི་སྒོ་ནས་ཕུང་པོ་ལྔ་དང་སྦྱར་བའི་ལུང་གི་ཁུངས་དང་། རྒྱུ་དང་འབྲས་བུའི་སྒོ་ནས་སྦྱར་བའི་ཁུངས་དང་། ཆོས་མཐུན་པའི་རིགས་པ་དག་ཀྱང་ཡོད་མོད་ཀྱི། སངས་རྒྱས་ལྔ་དང་ཕུང་པོ་ལྔ་ཡོངས་སུ་ཆོས་མཐུན་པར་སྦྱར་བའི་ལུང་གི་ཁུངས་མེད་ན་ཐེ་ཚོམ་ཟ་བ་སྲིད་དེ། དེ་བས་ན་ཅུང་ཟད་བསྟན་པར་བྱའོ། །དེ་ཡང་གསང་བ་འདུས་པ་ལས། རིགས་ལྔའི་སྙིང་པོ་བཤད་པའི་སྐབས་ནས་གསལ་བར་གསུངས་ཏེ། དེ་ཡང་རྡོ་རྗེ་རིགས་ཀྱི་སྙིང་པོ། བཛྲ་དྷྲི་ཀ྄་ཅེས་བཤད་པའི་སྐབས་ནས། རྒྱུད་ལྔ་དག་གི་སེམས་དག་ནི། །རྡོ་རྗེ་ཞེས་སུ་བཤད་པ་ཡིན། །དྷྲིཀྲ་ཅེས་བྱ་འཛིན་པར་བཤད། །རྣམ་ཤེས་རྡོ་རྗེ་འཛིན་པར་འདོད། །ཅེས་གསུངས་ཏེ། འགྲོ་བ་རྣམས་ཀྱི་སེམས་ཀྱི་རང་བཞིན་ནི་དབྱེར་མི་ཕྱེད་པའི་ཕྱིར་རྡོ་རྗེའོ། །དེ་གང་ལ་ཡོད་པ་དེ་ནི་འཛིན་པ་སྟེ་རྣམ་པར་ཤེས་པའོ། །དེ་བས་ན་རྣམ་པར་ཤེས་པའི་ཕུང་པོ་ནི་རྡོ་རྗེ་འཛིན་པའོ། །དེ་བཞིན་གཤེགས་པའི་སྙིང་པོ་ནི་ཛིཀ྄་ཅེས་པ་སྟེ། དེ་ཡང་། ཡོད་མེད་དབུས་ལས་འདས་པ་ལས། །འབྱུང་དང་འབྱུང་ལས་གྱུར་པ་འབྱུང་། །སེམས་ཅན་ཐམས་ཅད་ཀུན་གྱི་གཟུགས། །སྐྱེས་པས་རྒྱལ་བ་ཛི་ན་ཛིཀ྄ །ཞེས་གསུངས་ཏེ། དེ་ལ་ཛི་ན་ཞེས་བྱ་བ་ནི་སྤྱི་ལ་འཇུག་སྟེ་རྒྱལ་བ་ཞེས་བྱའོ། །ཛིཀ྄་ཅེས་བྱ་བ་ནི་ཡོན་ཏན་སྟོན་པ་སྟེ་རྒྱལ་བ་ཞེས་བྱའོ། །དེ་བས་ན་དོན་འདིར་འགྱུར་ཏེ། ཡོད་མེད་ཀྱི་སྤྲོས་པ་ལས་འདས་པའི་དོན་ནི། སྡིག་ཏོ་མི་དགེ་བའི་ཆོས་ལས་རྒྱལ་བས་རྒྱལ་ཞེས་བྱའོ། །དེ་ལས་འབྱུང་བ་དང་འབྱུང་བ་ལས་གྱུར་པའི་སེམས་ཅན་ཐམས་ཅད་ཀྱི་གཟུགས་གྲུབ་པའང་རྒྱལ་བ་ཉིད་དུ་ལྷག་པར་གྱུར་བས་རྒྱལ་བའི་རྒྱལ་ཞེས་ཏེ་གཟུགས་ཀྱི་ཕུང་པོའོ། །རིན་པོ་ཆེའི་རིགས་ཀྱི་སྙིང་པོ། རཏྣ་དྷྲི་ཅེས་བྱ་བ་ནི་འདི་སྐད་དུ། ཐམས་ཅད་དོན་ཀུན་འབྱུང་བས་ན། རིན་ཆེན་རིགས་སུ་བསྟན་པ་ཡིན། །ཚོར་བས་ངེས་ཚོར་འཛིན་པས་ན། །ཚོར་བ་རིན་ཆེན་འཛིན་པར་གསུངས། །ཞེས་གསུངས་ཏེ། དེ་ལ་སེམས་ཀྱི་རང་བཞིན་ཡོན་ཏན་རིན་པོ་ཆེ་འབྱུང་བའི་གནས་སུ་གྱུར་པས་རིན་ཅེན་ནོ། །དེ་འཛིན་པར་བྱེད་པ་ནི་ཚོར་བ་སྟེ། འདི་ལྟར་ཚོར་བས་སེམས་ཀྱི་ཉམས་སུ་མྱོང་བྱ་འཛིན་པར་བྱེད་པས་ཚོར་པའི་ཕུང་པོ་ནི་རིན་ཅེན་འཛིན་ནོ། །པདྨའི་རིགས་ཀྱི་སྙིང་པོ་ཨ་རོ་ལི་བསྟན་པ་ནི། འདི་སྐད་དུ། འདོད་པའི་མཚན་ཉིད་མཚོན་པ་དང་། །ཐམས་ཅད་ནས་ནི་ཐམས་ཅད་དུ། །བརྩེན་པའི་མཚན་ཉིད་མཚོན་པས་ན། །ཨ་རོ་ལིཀ྄་ཅེས་བྱ་བར་བཤེད། །ཅེས་གསུངས་ཏེ། དེ་ལ་ཨ་རོ་ནི་འདོད་པ་དང་བརྩེན་པའི་སྒྲ། ལིཀ྄་བྱ་བ་ནི་ལིན་ག་ཏི་ཞེས་བྱ་སྟེ། མི་གསལ་བ་རྟོགས་པར་བྱས་པས་རྟགས་སམ་མཚན་མའོ། །དེ་བས་ན་དོན་འདིར་འགྱུར་ཏེ། སེམས་ཀྱི་མཚན་ཉིད་ནི་འདོད་པའི་མཚན་ཉིད་དང་བརྩེན་པའི་མཚན་ཉིད་དོ། །མཚན་ཉིད་དེ་མཚོན་པར་བྱེད་པའི་མཚན་མར་འཛིན་པ་ནི་འདུ་ཤེས་ཡིན་ཏེ། དེ་བས་ན་འདུ་ཤེས་ཀྱི་ཕུང་པོ་ནི་ཨ་རོ་ལི་གོ། ལས་ཀྱི་རིགས་ཀྱི་སྙིང་པོ་ནི། པྲ་ཛྙཱ་དྷྲི་ཀ྄་སྟེ། དེ་ཡང་འདི་སྐད་དུ། རྣམ་ཤེས་རབ་ཏུ་གསལ་བྱེད་པ། །ཇི་བཞིན་ཤེས་རབ་ཅེས་སུ་བཤད། །འདུ་བྱེད་སེམས་ཀྱི་གཞི་ཡིན་ཏེ། །ཤེས་རབ་འཛིན་པ་ཞེས་སུ་བཤད། །ཅེས་གསུངས་ཏེ། དེ་ཡང་རྣམ་པར་ཤེས་པ་དོན་ལ་ཕྱིན་ཅི་མ་ལོག་པར་སྐྱེས་པའི་བློ་ནི་ཤེས་རབ་ཅེས་བྱའོ། །དེ་འཛིན་པར་བྱེད་པ་ནི་འདུ་བྱེད་རྣམས་ཡིན་ཏེ། འདི་ལྟར་འདུ་བྱེད་རྣམས་གསལ་བའི་ཕ་རོལ་ན་གཙོ་བོ་རྣམ་པར་ཤེས་པ་ཉིད་ཀྱང་མི་འགྲུབ་ལ། དེ་མ་གྲུབ་ན་དོན་ལ་ཕྱིན་ཅི་མ་ལོག་པའི་ཡེ་ཤེས་ཀྱང་མི་འགྱུར་བས། དེ་བས་ན་ཤེས་རབ་འཛིན་པ་ནི་འདུ་བྱེད་ཀྱི་ཕུང་པོ་ཡིན་ནོ། །དེ་དག་ལྟར་ན་ཕུང་པོ་ལྔ་ཉིད་དེ་བཞིན་གཤེགས་པ་རྣམས་ཀྱི་སྙིང་པོར་གྱུར་པ་ཡིན་ཏེ། དེའི་ཕྱིར་ཕུང་པོ་ལྔ་ཉིད་རིགས་ལྔའི་སངས་རྒྱས་ཀྱི་ཆོས་སོ། །དོན་འདི་ལྟ་བུ་དག་རྒྱུད་ཉིད་ལས་གསལ་བར་གསུངས་པས། ཕུང་པོ་ལྔ་དང་རིགས་ལྔ་སོ་སོར་སྦྱར་བའི་ལུང་དང་རིག་པ་འདི་དག་ཀྱང་ངེས་པར་ཁས་བླང་བར་བྱའོ། །འོ་ན་འཁོར་བའི་ཆོས་ཀྱང་ཕུང་པོ་ལྔ་ལས་གུད་ན་མེད་ན། གཞི་གཅིག་ལ་འགལ་བ་གཉིས་ཇི་ལྟར་བཞག་ཏུ་རུང་ཞེ་ན། དེ་ཉིད་ལས། སྲིད་པ་ཞི་བ་འབྱུང་བ་ཀུན། །ཐམས་ཅད་སེམས་ཀྱི་རང་བཞིན་ནོ། །ཞེས་གསུངས་པ་ལྟ་བུའོ། །སེམས་ཀྱི་རང་བཞིན་ཐ་དད་དུ་གཞག་པ་དང་བྲལ་བ་ཉིད། རང་བཞིན་སྣ་ཚོགས་སུ་སྣང་ཞིང་གྲུབ་ཏུ་རུང་བ་ནི་གོང་དུ་བསྟན་པ་ཉིད་དུ་ཟད་དོ། །དེ་བས་ན་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་སྟེ་རྡོ་རྗེ་མི་འཁྲུགས་པ་དང་། དེ་བཞིན་གཤེགས་པ་གཟུགས་ཀྱི་རྒྱལ་པོ་སྟེ་རྣམ་པར་སྣང་མཛད་ལ་སོགས་པ་ཇི་སྐད་དུ་གྲགས་པ་རྣམས་སུ་སྦྱར་བར་བྱའོ། །དེ་ལ་རྒྱལ་པོ་ཞེས་བྱ་བ་ནི། དཔེར་ན་ལྷ་དང་མིའི་རྒྱལ་པོ་རྣམས་རང་རང་གི་འཁོར་གྱི་དཀྱིལ་འཁོར་ན་རྒྱལ་སྲིད་ལ་ལོངས་སྤྱོད་ཅིང་ཕྱིར་རྒོལ་བ་རྣམས་འདུལ་བར་བྱེད་པ་དེ་བཞིན་དུ། བདེ་བར་གཤེགས་པ་འདི་དག་ཀྱང་ཆོས་ཀྱི་རྒྱལ་པོ་ཆེན་པོའི་མཛད་པ་ཉེ་བར་བཟུང་ནས་ཆོས་ཀྱི་ལོངས་སྤྱོད་ཆེན་པོ་ལ་རོལ་ཞིང་། ཆོས་ཀྱི་རྒྱལ་སྲིད་བསྐྱངས་པས་འདུལ་བའི་འགྲོ་བ་ཡོངས་སུ་སྨིན་པར་མཛད་པ་དང་། བདུད་ལ་སོགས་བའི་རྒོལ་བ་རྣམས་ཚར་གཅོད་པར་མཛད་པས་རྒྱལ་པོའོ། །དེ་ལ་དེ་བཞིན་གཤེགས་པ་སོ་སོའི་མཚན་ནི། འདི་ལྟར་འཇིག་རྟེན་གསུམ་པོའི་སེམས་ནི་རྣམ་པར་རྟོག་པའི་གཡོ་བ་དང་བཅས་པའོ། །དེ་གཞིན་གཤེགས་པ་ཐམས་ཅད་ཀྱི་ཐུགས་ཡེ་ཤེས་ནི། ཕྱི་རོལ་དང་ནང་གིས་རྐྱེན་གང་ཀྱང་མི་གཡོ་བས་ན་རྡོ་རྗེ་མི་བསྐྱོད་པའོ། །དེ་ཉིད་ཐབས་ལ་མཁས་པའི་ཐུགས་རྗེ་དང་སྨོན་ལམ་གྱི་དབང་གིས་གདུལ་བྱ་སྐལ་བ་དང་ལྡན་པ་རྣམས་ལ་ཐབས་ཀྱི་ཕྱག་རྒྱར་འཕྲུལ་བས་དེ་སྐད་ཅེས་བྱ་སྟེ། འོག་མ་རྣམས་ལ་ཡང་དེ་བཞིན་སྦྱར་རོ། །དེ་བཞིན་དུ་དེ་བཞིན་གཤེགས་པའི་སྐུ་ནི་དེ་བཞིན་ཉིད་ལས་མ་གཡོས་བཞིན་དུ། ཆགས་པ་དང་ཐོགས་པ་མི་མངའ་བར་རྣམ་པ་སྣ་ཚོགས་སུ་སྣང་བར་མཛད་པས་རྣམ་པར་སྣང་མཛད་དོ། །དེ་བཞིན་གཤེགས་པ་རྣམས་ཀྱི་ཡོན་ཏན་ནི། བདག་དང་གཞན་གྱི་དོན་ཐམས་ཅད་འགྲུབ་པར་བྱེད་པའི་ཡོན་ཏན་རིན་པོ་ཆེའི་གནས་སུ་གྱུར་པས་རིན་ཅེན་འབྱུང་གནས་སོ། །སངས་རྒྱས་ཀྱི་གསུང་ནི། ཆོས་ཀྱི་སྣང་བ་ཆེན་པོས་ནམ་མཁའི་དབྱིངས་ཀྱི་མཐའ་ཀླས་པའི་འཇིག་རྟེན་དུ་རྒྱས་པར་མཛད་པས་སྣང་བ་མཐའ་ཡས་སོ། །མཛད་པ་རྣམས་ནི་གདུལ་བྱ་རྣམས་ཀྱི་དོན་མཐར་ཕྱིན་པར་མཛད་པས་གདོན་མི་ཟ་བར་གྲུབ་བ་སྟེ། དེ་དག་གི་རྟགས་ཀྱི་ཕྱག་རྒྱ་རྣམས་ཀྱང་སྔ་མ་བཞིན་སྦྱར་རོ། །བཙུན་མོ་དམ་པ་སྣང་བའི་དབྱིངས་དང་། ཞེས་བྱ་བ་ལ་སོགས་པ་སྨོས་པ་ནི། འབྱུང་བ་ཆེན་པོ་ལྔ་དང་ཐ་མི་དད་པའི་ཡུམ་ཆེན་མོ་ལྔ་སྟེ། དབྱིངས་ཀྱི་དབང་ཕྱུག་མ་དང་། སངས་རྒྱས་སྤྱན་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་རྣམས་སོ། །དེ་ལ་ཡང་དེ་བཞིན་ཉིད་ལ་མངའ་བརྙེས་པས་དབྱིངས་ཀྱི་དབང་ཕྱུག་མ་སྟེ། མི་དམིགས་པའི་ཤེས་རབ་ཆེན་པོ་ནམ་མཁའ་ལྷ་བུའི་བདག་ཉིད་རྡོ་རྗེའི་རིགས་ཀྱི་ཡུམ་དུ་འཕྲུལ་བའོ། །འདི་ལ་སྤྱན་རྒྱས་པ་མངའ་བས་སངས་རྒྱས་སྤྱན་ཏེ། དངོས་པོ་མེད་པའི་སའི་བདག་ཉིད་དེ་བཞིན་གཤེགས་པའི་རིགས་ཀྱི་ཡུམ་མོ། །ཐམས་ཅད་བདག་གིར་བྱེད་པས་བདག་ཉིད་མ་སྟེ། ཡོན་ཏན་ཐམས་ཅད་སྡུད་པར་བྱེད་པའི་ཆུའི་བདག་ཉིད་རིན་པོ་ཆེའི་རིགས་ཀྱི་ཡུམ་མོ། །ཁ་ཅིག་ལས་ནི་རིགས་གཉིས་བརྒྱུད་པའི་ཡུམ་དུ་བཤད་དོ། །འདི་ལ་དྲི་མས་གོས་པ་མེད་པས་ན་བཟའ་དཀར་མོ་སྟེ། ལྷག་མཐོང་ཆེན་པོའི་མེས་དག་པར་གྱུར་པའི་བདག་ཉིད་པདྨའི་རིགས་ཀྱི་ཡུམ་མོ། །འདིས་སེམས་ཅན་ཐམས་ཅད་སྒྲོལ་བར་བྱེད་པའི་ངང་ཚུལ་ལས་མི་འདའ་བས་དམ་ཚིག་སྒྲོལ་མ་སྟེ། ཤེས་བྱ་ལ་ཆགས་ཐོགས་མི་མངའ་བའི་རླུང་གིས་གནས་ནས་སུ་བསྐྱོད་པར་བྱེད་པའི་བདག་ཉིད་ལས་ཀྱི་རིགས་ཀྱི་ཡུམ་མོ། །དེ་དག་དང་ཉིས་སུ་མེད་པར་གྱུར་པ་ནི་རིགས་ལྔས་བདེ་བར་གཤེགས་པ་སྟེ། དེ་ཡང་རང་བཞིན་གཉིས་སུ་མེད་པ་དང་། གཉིས་སུ་མེད་པར་འཁྱུད་པ་ལ་སོགས་པའི་ཚུལ་དུ་བཞུགས་པ་དང་། འདུལ་བའི་འགྲོ་བ་རྣམས་ཀྱི་སྣང་བ་ལ་རྟག་ཏུ་ལྷན་ཅིག་ཏུ་བཞུགས་པར་སྣང་བའི་ཕྱིར་གཉིས་སུ་མེད་པ་བཞུགས་སོ་ཞེས་བྱའོ། །རིགས་ལྔ་ཡབ་ཡུམ་འདི་རྣམས་ཀྱང་ཐུན་མོང་གི་སྟོན་པ་ཡིན་ལ། ཁྱད་པར་གྱི་འཁོར་ཡིན་ནོ་ཞེས་ཡོངས་གྲགས་པ་ཁ་ཅིག་གསུང་ངོ་། །སྟོན་པ་བྱེ་བྲག་ཏུ་བསྟན་པ་ཡིན་ནོ་ཞེས་དབུས་ལུགས་པ་གསུང་ངོ་། །ཡོངས་ནི་སྟོན་པའི་བདག་ཉིད་རིགས་ཐམས་ཅད་ཀྱི་བདག་པོ་བྱང་ཆུབ་སེམས་ཀྱི་རིགས་སུ་འདོད་པར་མཐུན་པས། འདི་གཉིས་ལ་ཉེས་པ་མེད་པར་ཤེས་པར་བྱའོ། །ད་ནི་འཁོར་ཕུན་སུམ་ཚོགས་པ་བསྟན་པའི་ཕྱིར། དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་དང་། ཞེས་བྱ་བ་ལ་སོགས་པ་རྒྱ་ཆེར་སྨོས་ཏེ། དེ་ལ་འཁོར་གྱི་དཀྱིལ་འཁོར་འདི་དག་དང་ཁམས་དང་སྐྱེ་མཆེད་ཀྱི་ཆོས་མཐུན་པ་སོ་སོར་སྦྱར་བ་ནི། གཞུང་རྣམས་ནས་གསལ་བར་མ་སྨོས་ཏེ། དེ་མི་བརྩམ་མོ། །ཁམས་དང་སྐྱེ་མཆེད་ཕུང་པོའི་ཡན་ལག་དང་བྱེ་བྲག་ཡིན་པས། ཕལ་ཆེར་ཕུང་པོར་འདུས་ལ། འཁོར་གྱི་དཀྱིལ་འཁོར་རྣམས་ཀྱང་རིགས་ལྔའི་ཡོན་ཏན་གྱི་བྱེ་བྲག་ཡིན་པས། རིགས་ལྔ་དང་བཞིར་འདུས་པ་ནི་གོང་དུ་བཤད་པ་བཞིན་དུ་འདི་དག་ལ་ཡང་ཤེས་པར་བྱའོ། །དེ་ལ་བྱང་ཆུབ་ཆེན་པོ་བྱ་བ་ནི། བྱང་ཆུབ་ཀྱི་རང་བཞིན་ཡིན་པས་དེ་སྐད་ཅེས་བྱ་སྟེ། བྱང་ཆུབ་ཀྱང་ཡིན་ལ་ཆེན་པོ་ཡང་ཡིན་པའི་ཕྱིར་བྱང་ཆུབ་ཆེན་པོ་ཞེས་བྱའོ། །སེམས་དཔའི་སྒྲ་མི་སྨོས་པ་ནི། གཞུང་ཕལ་དག་ལྟར་བྱང་ཆུབ་རྟོགས་པར་འདོད་པ་དང་། བྱང་ཆུབ་ཀྱི་ཕྱིར་བསམ་པ་བརྟན་པ་དང་། བྱང་ཆུབ་ཀྱི་ཕྱིར་དང་། སེམས་ལ་དམིགས་པའི་ཕྱིར། བྱང་ཆུབ་སེམས་དཔའོ་ཞེས་སྟོན་པར་མི་བྱེད་ཀྱི། ཐམས་ཅད་ཀུན་ཏུ་བཟང་པོ་ཉིད་དང་དབྱེར་མེད་པར་སྟོན་པས། འཁོར་ཕུན་སུམ་ཚོགས་པ་ཕལ་དང་ཐུན་མོང་མ་ཡིན་ཞིང་ཁྱད་པར་དུ་འཕགས་པ་སྟོན་ནོ། །ཐམས་ཅད་ལ་རྡོ་རྗེའི་སྒྲ་བརྗོད་པ་ནི། ཁམས་དང་སྐྱེ་མཆེད་དུ་གྲགས་པ་དང་། ལྷའི་དཀྱིལ་འཁོར་དུ་གྲགས་པ་རྣམས་མི་ཕྱེད་པར་བསྟན་ནོ། །དེ་ལ་རྣམ་པར་ཤེས་པའི་བྱང་ཆུབ་སེམས་དཔའ་བཞི་ནི། སའི་སྙིང་པོ་དང་། ནམ་མཁའི་སྙིང་པོ་དང་། སྤྱན་རས་གཟིགས་དབང་ཕྱུག་དང་། ཕྱག་ན་རྡོ་རྗེ་རྣམས་ཏེ། དེ་ཡང་བྱང་ཆུབ་ཀྱི་སེམས་བསྐྱེད་པའི་མཚན་ཉིད། ཡོན་ཏན་ཐམས་ཅད་ཀྱི་གཞིར་གྱུར་པས་འགྲོ་བ་འཛིན་པའི་ཕྱིར་སའི་སྙིང་པོ་སྟེ། དེ་བཞིན་དུ་རིན་པོ་ཆེའི་མྱུ་གུས་མཚན་པའོ། །བདག་མེད་པར་ཆོད་པའི་ཤེས་རབ་ཀྱིས་ཡོན་ཏན་གྱི་གནས་སུ་གྱུར་པས་ནམ་མཁའི་སྙིང་པོ་སྟེ། རལ་གྲིས་མཚན་པའོ། །ཐུགས་རྗེས་ཆེན་པོས་དམ་པའི་ཆོས་བསྟན་པས་རྣམ་པར་དག་པར་མཛད་པའི་བདག་ཉིད་སྤྱན་རས་གཟིགས་དབང་ཕྱུག་སྟེ། པདྨས་མཚན་པའོ། །མཐུ་སྟོབས་ཆེན་པོས་གདུག་པ་ཅན་འདུལ་བའི་ཕྲིན་ལས་མཛད་པའི་བདག་ཉིད་ཕྱག་ན་རྡོ་རྗེ་སྟེ། རྡོ་རྗེ་གནམ་ལྕགས་ཀྱི་མེ་ལྟར་འབར་བས་མཚན་པའོ། །དེ་བས་ན་འདི་རྣམས་ཀྱང་རིགས་རྣམ་པ་བཞིའི་ཡོན་ཏན་གྱི་བྱེ་བྲག་མཚོན་པའི་སྒོར་རིམ་པ་བཞིན་དུ་སྦྱར་བར་བྱའོ། །བཙུན་མོ་མཐོང་བར་བྱ་བ་ཞེས་བྱ་བ་ལ་སོགས་པ་ཡང་སྤྱིར་གྲགས་པ། གཟུགས་ཐམས་ཅད་རྡོ་རྗེ་སྒེག་མོ། སྒྲ་ཐམས་ཅད་རྡོ་རྗེའི་དབྱངས། དྲི་ཐམས་ཅད་རྡོ་རྗེའི་ཕྲེང་བ། རོ་ཐམས་ཅད་རྡོ་རྗེའི་གར་ཞེས་འབྱུང་ལ། འདི་ནས་ནི་རིམ་པ་འགའ་བསྣོལ་ནས་འབྱུང་སྟེ། གང་ལྟར་སྦྱར་ཡང་འགལ་བ་མེད་དོ། །དེ་ལ་བྱང་ཆུབ་ཀྱི་སེམས་ཀྱི་མཚན་ཉིད་འདོད་པར་བྱ་བའི་དམ་པ་ཡིན་པས། དེའི་མཚན་མ་ནི་རྡོ་རྗེ་སྒེག་མོའོ། །དེ་བཞིན་དུ་གཟུངས་དང་ཏིང་ངེ་འཛིན་རྣམས་ཀྱི་ཡོན་ཏན་རིན་པོ་ཆེའི་བདག་ཉིད་པས་རྡོ་རྗེའི་ཕྲེང་བའོ། །དམ་པའི་ཆོས་ཀྱི་བདག་ཉིད་ནི་རྡོ་རྗེའི་གླུའོ། །མཛད་པ་སྣ་ཚོགས་ཀྱི་བདག་ཉིད་ནི་རྡོ་རྗེའི་གར་ཏེ། འདི་རྣམས་ཀྱང་རིགས་བཞིའི་ཡོན་ཏན་གྱི་བྱེ་བྲག་ཏུ་མཚུངས་པ་ལས་ཁྱད་པར་དུ་སྤྱོད་ཡུལ་དུ་བསྟན་པའི་དབང་དུ་བྱས་ནས། ལྷ་མོའི་ཕྱག་རྒྱར་བསྟན་ནོ། །རྡོ་རྗེ་མཐོང་བྱེད་ལ་སོགས་པའི་བྱང་ཆུབ་སེམས་དཔའ་བཞི་ནི། བྱམས་པ་དང་། སྒྲིབ་པ་རྣམ་པར་སེལ་བ་དང་། ཀུན་ཏུ་བཟང་པོ་དང་། འཇམ་དཔལ་རྣམས་ཏེ། དེ་ཡང་བྱམས་པ་ཆེན་པོས་སེམས་ཅན་ལ་ཕན་འདོགས་པར་མཛད་པའི་བདག་ཉིད་པས་བྱམས་པ་སྟེ། ཀླུ་ཤིང་གི་མེ་ཏོག་གིས་མཚན་པའོ། ། སྙིང་རྗེས་གདུང་བ་སེལ་བའི་བདག་ཉིད་པས་སྒྲིབ་པ་རྣམ་པར་སེལ་བ་སྟེ། ཆོས་ཀྱི་འཁོར་ལོས་མཚན་པའོ། །སྨོན་ལམ་ཆེན་པོས་སངས་རྒྱས་ཀྱི་ཞིང་ཡོངས་སུ་དག་པའི་བདག་ཉིད་པས་ཀུན་ཏུ་བཟང་པོ་སྟེ། རིན་པོ་ཆེའི་སྙེ་མས་མཚན་པའོ། །བློ་གྲོས་ཡོངས་སུ་དག་པས་སེམས་ཅན་གྱི་བློ་ཡོངས་སུ་རྒྱས་པར་མཛད་པས་འཇམ་དཔལ་ཏེ། ཨུཏྤལ་གྱིས་མཚན་པའོ། །འདི་རྣམས་ཀྱང་རིགས་བཞིའི་ཡོན་ཏན་གྱི་བྱེ་བྲག་སྟེ། དེ་ཡང་གཞུང་ཁ་ཅིག་ལས་ནི། སྒྲིབ་པ་རྣམ་པར་སེལ་བ་ལས་ཀྱི་རིགས་སུ་བཤད་དེ། འདི་ལྟར་སྦྱར་ན་ཡང་དོན་བདེ་བར་སྣང་སྟེ། འོན་ཀྱང་གཞུང་འདི་ཉིད་ནས་རིམ་པ་འདི་ལྟར་མི་འབྱུང་བས། རང་བཞིན་ཐམས་ཅད་པ་ཡིན་པས་ཇི་ལྟར་སྦྱར་ཡང་འགལ་བ་མེད་དོ། །དབང་པོ་དང་རྣམ་པར་ཤེས་པ་དང་ཡུམ་གྱི་སྐབས་སུ་ཡང་ཡུལ་གྱི་དབང་གིས་སོ་སོར་ཕྱེ་ནས། གཟུགས་ཀྱིས་བསྡུས་པ་རྣམས་ནི་བྱང་ཆུབ་ཀྱི་རིགས། སྒྲས་བསྡུས་པ་རྣམས་ནི་ཆོས་ཀྱི་རིགས། དྲིས་བསྡུས་པ་རྣམས་ནི་ཡོན་ཏན་གྱི་རིགས། རོས་བསྡུས་པ་རྣམས་ནི་ལས་ཀྱི་རིགས་ཏེ། འདི་ལྟ་བུར་བསྟན་པ་རྣམས་ནི་ཡོན་ཏན་གྱི་མཚན་ཉིད་སྦྱར་བདེ་བར་འགྱུར་རོ། །བདེ་བར་མི་སྣང་བ་རྣམས་ཀྱང་རང་བཞིན་འགལ་བ་མེད་པ་ནི་སྔ་མ་བཞིན་ནོ། བཙུན་མོ་འདས་པ་དང་ཞེས་བྱ་བ་ལ་སོགས་པ་ནི། དུས་བཞིའི་ལྷ་མོ་སྟེ། མེ་ཏོག་མ་ལ་སོགས་པའོ། །དེ་ཡང་བྱམས་པ་ཆེན་པོས་ཕན་འདོགས་པའི་བདག་ཉིད་ནི་མེ་ཏོག་མའོ། །སྙིང་རྗེ་ཆེན་པོས་རྒྱུད་ཚིམ་པར་བྱེད་པའི་བདག་ཉིད་ནི་བདུག་སྤོས་མའོ། །དགའ་བ་ཆེན་པོས་མ་དད་པ་ལ་སོགས་པའི་སྒྲིབ་པ་སེལ་བའི་བདག་ཉིད་ནི་མར་མེད་མའོ། །བཏང་སྙོམས་ཆེན་པོས་རྒྱུད་མཉེས་པར་བྱེད་པའི་བདག་ཉིད་ནི་དྲི་ཆབ་མའོ། །འདི་བཞི་ཡང་རིགས་བཞིའི་ཡོན་ཏན་གྱི་བྱེ་བྲག་ཡིན་པར་མཚུངས་མོད་ཀྱི། བྱེ་བྲག་ཏུ་ནི་ཚད་མེད་པ་རྣམས་སྤྱད་པར་བྱ་བའི་ཡུལ་ཡིན་པ་དང་། ཡུལ་དང་དུས་ཀྱང་སྤྱོད་ཡུལ་ཡིན་པས་ལྷ་མོའི་ཕྱག་རྒྱར་བསྟན་ནོ། །འཇོམས་པ་ཆེན་པོ་རྡོ་རྗེ་རིག་པ་དང་ཞེས་བྱ་བ་ལ་སོགས་པ་སྒོ་བཞིའི་ཁྲོ་བོ་སྟེ། དེ་ཡང་གཞུང་ཕལ་དུ་གྲགས་པ་ནི། མི་འཇིག་རྣམ་པར་མི་ཤེས་དང་། །བརྗོད་མེད་རྣམ་པར་མི་རྟོག་པ། །སངས་རྒྱས་བྱང་ཆུབ་ཡེ་ཤེས་འདི། །ཤེས་ན་བདེ་བ་ཐོབ་པར་འགྱུར། །ཞེས་གསུངས་ཏེ། འཇིག་པ་ནི་ལུས་ཀྱི་ཆོས། །ཤེེས་པ་ནི་སེམས་ཀྱི་ཆོས། །བརྗོད་པ་ནི་ངག་གི་ཆོས། །དེ་ལྟ་བུའི་རྣམ་པ་ནི་སྤྱིའི་ཆོས་ཏེ། དེ་བས་ན་ཆོས་དེ་དག་ལ་གཤིན་རྗེ་དང་ཤེས་རབ་དང་པདྨ་དང་བགེགས་ཅེས་བྱའོ། །ཡེ་ཤེས་གང་གིས་སྐྱེ་འཇིག་མེད་པར་རྟོགས་པ་དང་། ཤེས་རིག་མེད་པར་རྟོགས་པ་དང་། བརྗོད་པ་མེད་པར་རྟོགས་པ་དང་། དེ་དག་གི་རྣམ་པ་མེད་པར་རྟོགས་པ་ནི། གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། པདྨ་མཐར་བྱེད་དང་། བགེགས་མཐར་བྱེད་དུ་གྲགས་སོ། །འདིར་ནི་གཤིན་རྗེ་གཤེད་ཐུགས་ཀྱི་རིགས་སུ་བསྟན་པས་ཅུང་ཟད་བསྣོལ་བར་བྱུང་ན་ཡང་རང་བཞིན་འགལ་བ་མེད་པ་སྔ་མ་བཞིན་ནོ། །ལུས་ཀྱི་རྣམ་པར་ཤེས་པ་དང་། དབང་པོ་དང་། ཡུལ་རྣམས་ནི་དངོས་སུ་བསྟན་པར་ཟད། རེག་ཤེས་ཞེས་བྱ་བ་ནི། མན་ངག་ལྟ་ཕྲེང་ལས། དེ་ལས་བྱུང་བའི་བྱང་ཆུབ་ཀྱི་སེམས་ཞེས་བཤད་དེ། དེ་གསུམ་ལས་སྐྱེས་པའི་སེམས་སུ་བཤད་པས། ཁམས་དང་སྐྱེ་མཆེད་དུ་སྦྱར་ན་ཡིད་ཀྱི་དབང་པོ་ལ་སྦྱར་བར་རིགས་སོ་ཞེས་ཡོངས་གྲགས་པ་ཁ་ཅིག་གསུང་ངོ་། །སློབ་དཔོན་དབུས་ལུགས་པ་རྣམས་ནི། ཀུན་ལ་ཁྱབ་པའི་སྤ་རི་ཤ་ཞེས་བྱ་སྟེ། ལུས་ཀྱི་འདུས་ཏེ་རེག་པའི་རྐྱེན་གྱིས་ཚོར་བ་ལ་སྦྱར་བར་བྱ་བ་ཡིན་ལ། དེ་ཡང་གཙོ་བོར་གྱུར་པ་ཐབས་དང་ཤེས་རབ་གཉིས་སུ་མེད་པར་སྦྱོར་བའི་བྱང་ཆུབ་ཀྱི་སེམས་བདེ་བ་ཆེན་པོ་ཉམས་སུ་མྱོང་བ་ཉིད་ཡིན་ནོ་ཞེས་གསུང་ངོ་། །ཡོངས་ནི་འདི་ལྟ་བུ་དག་ནི་གང་ལྟར་སྦྱར་ཡང་ལྟག་པར་འགལ་བ་མ་མཐོང་ངོ་། །བཙུན་མོ་རྟག་པར་མ་ཡིན་པ་ཞེས་བྱ་བ་ལ་སོགས་པ་ནི། སྒོ་མ་བཞི་སྟེ་ལྕགས་ཀྱུ་མ་ལ་སོགས་པའོ། །དེ་ཡང་བསྡུ་བའི་དངོས་པོ་བཞི་དང་། ཚད་མེད་པ་བཞིས་སེམས་ཅན་ཐམས་ཅད་བསྡུས་ནས་གྲོལ་བར་བྱེད་པ་དང་། དེ་བཞིན་གཤེགས་པ་རྣམས་སྤྱན་དྲངས་ནས་མཉེས་པར་བྱེད་པའི་མངགས་གཞུག་གི་ལས་ཀྱི་བདག་ཉིད་རྣམས་ཡིན་ཏེ། དེ་ལ་སྦྱིན་པ་དང་སྙིང་རྗེས་སེམས་ཅན་རྣམས་སྡུད་ཅིང་། དེ་བཞིན་གཤེགས་པ་རྣམས་སྤྱན་དྲང་བའི་ལས་ཀྱི་བདག་ཉིད་ནི་ལྕགས་ཀྱུ་མའོ། །དོན་སྤྱོད་པ་དང་བྱམས་པས་སེམས་ཅན་རྣམས་བསྡུད་ཅིང་དེ་བཞིན་གཤེགས་པ་རྣམས་བཞུགས་པའི་ལས་ཀྱི་བདག་ཉིད་ནི་ཞགས་པ་མའོ། །དོན་མཐུན་པ་དང་དགའ་བས་སེམས་ཅན་རྣམས་སྡུད་ཅིང་དེ་བཞིན་གཤེགས་པ་རྣམས་བརྟན་པར་བཞུགས་པར་བྱེད་པའི་ལས་ཀྱི་བདག་ཉིད་ནི་ལྕགས་སྒྲོག་མའོ། །སྙན་པར་སྨྲ་བ་དང་བཏང་སྙོམས་ཀྱིས་སེམས་ཅན་རྣམས་སྡུད་ཅིང་དེ་བཞིན་གཤེགས་པ་རྣམས་མཉེས་པར་བྱེད་པའི་ལས་ཀྱི་བདག་ཉིད་ནི་དྲིལ་བུ་མའོ། །དེ་བས་ན་མངག་གཞུག་གི་ལས་ཀྱི་བདག་ཉིད་ཡིན་པས་སྒོ་སྲུང་དུ་བསྟན་པ་ཡིན་ལ། ཁྲོ་བོ་རྣམས་ཀྱང་གོང་དུ་བསྟན་པ་སྟར། ལུས་ངག་ཡིད་ཀྱི་སྒྲིབ་པ་སེལ་བར་བྱེད་པས་སྒོ་སྲུང་དུ་བསྟན་པ་ཡིན་ནོ། །བྱེ་བྲག་ཏུ་ན་བསྡུ་བའི་དངོས་པོ་དང་། ཚད་མེད་པ་རྣམས་སྤྱད་པར་བྱ་བའི་ཡུལ་ཡིན་པ་དང་། རྟག་པར་མ་ཡིན་པ་ལ་སོགས་པ་སྤྲོས་པ་དང་བྲལ་བའི་ཆོས་ཉིད་ཀྱང་ཡེ་ཤེས་ཀྱིས་དམིགས་ཤིང་སྤྱད་པར་བྱ་བའི་ཡུལ་ཡིན་པས། དེ་ལྟ་བས་ན་ལྷ་མོའི་ཕྱག་རྒྱར་བསྟན་ནོ། །དེ་ལྟ་བུའི་ཚོགས་དང་ཡང་གཉིས་སུ་མེད་པར་བཞུགས་ཞེས་གོང་དུ་བསྟན་པ་བཞིན་དུ་སྦྱར་བར་བྱའོ། །འདི་དག་ནི་རྒྱུད་གཅིག་གི་དབང་དུ་བྱས་པའི་ལྷའི་ཚོགས་ཙམ་སྨོས་པ་སྟེ། དེ་བཞིན་གཤེགས་པ་རྣམས་ལ་ནི་འདུལ་བའི་དབང་གིས་སྣང་བའི་སྐུ་དང་ཞིང་ལ་གྲངས་དང་ཚད་གཟུང་བ་མེད་དེ། འདི་ལྟར་གང་ཟག་གཅིག་གི་སྤུའི་རྩེ་མོ་གཅིག་ལ་ཡང་དེ་བཞིན་གཤེགས་པ་སངས་རྒྱས་ཀྱི་ཞིང་དང་བཅས་པ་གྲངས་མེད་པ་བཞུགས་སུ་རུང་སྟེ། འདི་ལྟར་གོང་དུ་བསྟན་པ་ལྟར། སྤུའི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་བ་མེད། །ཅེས་གསུངས་པ་ལྟ་བུའོ། །ཞིང་དེ་དག་ན་ཡང་སངས་རྒྱས་མི་བཞུགས་པས་འདུལ་ན་ནི་སངས་རྒྱས་མེད་པར་སྣང་ངོ་། །གཅིག་གིས་འདུལ་ན་ནི་གཅིག་བཞུགས་པར་སྣང་ངོ་། །མང་པོས་འདུལ་ན་ནི་མང་པོ་བཞུགས་པ་སྣང་སྟེ། ཇི་སྐད་དུ། ཞིང་རྣམས་ལ་ལར་སངས་རྒྱས་མེད། །ལ་ལའི་ཞིང་ན་སངས་རྒྱས་གཅིག །ལ་ལར་སངས་རྒྱས་མང་པོའོ། །ཞེས་གསུངས་པ་ལྟ་བུའོ། །དེ་བཞིན་གཤེགས་པའི་འཕྲུལ་པ་སྣང་བའི་དབང་དུ་བསྟན་པ་མ་ཡིན་པར། ཕུང་པོ་དང་ཁམས་དང་སྐྱེ་མ ཆེད་ཀྱི་དངོས་པོ་ཇི་ལྟ་བའི་དབང་དུ་བྱས་ན་ཡང་། གོང་དུ་བསྟན་པ་བཞིན་དུ་ཐམས་ཅད་ལྷའི་དཀྱིལ་འཁོར་ཉིད་ཡིན་པས། དེའི་ཕྱིར་ཆོས་ཀྱི་དབྱིངས་ཀུན་ཏུ་མཐའ་ཡས་པར་ཀུན་ཏུ་ཁྱབ་པ་ནི། དཔེར་ན་ཏིལ་གྱི་གོང་བུ་བཞིན་གང་ནས་ཁྱབ་པར་བཞུགས་སོ། །ཞེས་བསྟན་པ་ཡིན་ནོ། །དེ་ལྟར་བཞུགས་པའི་དེ་བཞིན་གཤེགས་པ་ཐམས་ཅད་ཀྱི་དགོངས་པ་ལ། ཆོས་ཐམས་ཅད་ཡེ་ནས་ལྷུན་གྱིས་གྲུབ་པའི་དཀྱིལ་འཁོར་དུ་སངས་རྒྱས་པ་ཡིན་ལ། དེ་ཡང་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཡོན་ཏན་རིན་པོ་ཆེའི་འབྱུང་གནས་ཡིན་པར་ཤར་བའི་དོན་སྟོན་པ་ནི། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ལ་སྐུ་གསུང་ཐུགས་ཡོན་ཏན་ཕྲིན་ལས་ལས་ཕྱུང་ངོ་ཞེས་བྱ་བ་ནི། དགོངས་པ་ལ་ཤར་རོ་ཞེས་བྱ་བའི་དོན་ནོ། །ཨེ་ཨེ་མ་ཨེ་མའོ་ཞེས་བྱ་བ་ངམ་པ་རྣམ་གསུམ་རྗེས་སུ་ཟློས་པ་ནི། ཤིན་ཏུ་ངམ་པར་སྟོན་པའི་ཚིག་ཙམ་དུ་ཟད་དེ། ངན་སོང་སྦྱོང་བ་ལས། ཀྱེ་མ་སངས་རྒྱས་ཀྱེ་སངས་རྒྱས། །ཀྱེ་མ་སངས་རྒྱས་མཛད་པ་ལེགས། །ཞེས་གསུངས་པ་ལྟ་བུ་སྟེ། ངམ་པའི་ཡུལ་སོ་སོར་སྦྱར་བ་ཉིད་དོན་ཆུང་བར་འགྱུར་རོ། །དེ་བཞིན་ཉིད་ཀྱི་དབྱིངས་ཉིད་དབང་སྒྱུར་ཡེ་ཤེས་དཀྱིལ་འཁོར་ཐུགས་རྗེའི་ངང་། །རང་སྣང་བ་ཉིད་ཏིང་འཛིན་གཟུགས་བརྙན་སྒྱུ་མ་རྣམ་དག་གསལ་བ་ནི། །ཞེས་བྱ་བ་ནི་ཆོས་ཐམས་ཅད་ལྷུན་གྱིས་གྲུབ་པའི་དཀྱིལ་འཁོར་དུ་སྟོན་པ་སྟེ། དེ་ཡང་དཀྱིལ་འཁོར་བཅུ་གཉིས་དང་། གསུམ་དང་། གཅིག་གི་རང་བཞིན་དུ་སངས་རྒྱས་པར་སྟོན་ནོ། །དེ་ལ་དཀྱིལ་འཁོར་བཅུ་གཉིས་ནི། འགྱུར་བ་མེད་པའི་དེ་བཞིན་ཉིད་ཀྱི་དཀྱིལ་འཁོར་དང་། ཡོན་ཏན་འབྱུང་བས་དབྱིངས་ཀྱི་དཀྱིལ་འཁོར་དང་། དབང་སྒྱུར་བས་ཐབས་ཀྱི་དཀྱིལ་འཁོར་དང་། ཡེ་ཤེས་ཀྱི་དཀྱིལ་འཁོར་དང་། ཐུགས་རྗེའི་དཀྱིལ་འཁོར་དང་། རང་སྣང་བའི་དཀྱིལ་འཁོར་དང་། ཉིད་ཀྱི་དཀྱིལ་འཁོར་དང་། ཏིང་ངེ་འཛིན་གྱི་དཀྱིལ་འཁོར་དང་། གཟུགས་བརྙན་གྱི་དཀྱིལ་འཁོར་དང་། སྒྱུ་མའི་དཀྱིལ་འཁོར་དང་། རྣམ་པར་དག་པའི་དཀྱིལ་འཁོར་དང་། གསལ་བའི་དཀྱིལ་འཁོར་རྣམས་ཏེ། དཀྱིལ་འཁོར་འདི་དག་གི་མིང་གདགས་པ་ནི། རྒྱུད་མ་བུ་ཉིད་ལས་མིང་འདི་རྣམས་ཀྱང་འབྱུང་ལ། འདི་བས་ཀྱང་ལྷག་པར་མིང་གྲགས་པ་འབྱུང་ངོ་། །དཀྱིལ་འཁོར་གསུམ་དུ་བསྡུ་བ་ནི། ཚིག་གོང་མ་ནི་རང་བཞིན་གྱི་དཀྱིལ་འཁོར། འོག་མ་ནི་ཏིང་ངེ་འཛིན་དང་གཟུགས་བརྙན་གྱི་དཀྱིལ་འཁོར། དཀྱིལ་འཁོར་གཅིག་ཏུ་བསྡུ་བ་ནི། རང་སྣང་བའི་དཀྱིལ་འཁོར་ཏེ་དེ་ལ་གང་ཞིག་སྣང་ཞེ་ན། དེ་བཞིན་ཉིད་ཀྱི་དབྱིངས་ཉིད་དབང་སྒྱུར་ཡེ་ཤེས་དཀྱིལ་འཁོར་སྣང་ངོ་། །རྒྱུ་ཅི་ལས་སྣང་ཞེ་ན། ཐུགས་རྗེ་ཆེན་པོའི་ངང་ལས་སམ་ངང་གིས་སྣང་སྟེ་དེའི་དབང་ཡིན་པའི་ཕྱིར་རོ། །གང་ལ་སྣང་ན་ཏིང་ངེ་འཛིན་ལ་སྟེ་གདུལ་བྱ་རྣམས་ཀྱི་རྒྱུད་ལ་སྣང་ངོ་། །ཇི་ལྟར་སྣང་ན་གཟུགས་བརྙན་སྒྱུ་མ་ལྟར་རང་བཞིན་རྣམ་པར་དག་ཅིང་གསལ་བར་སྣང་ངོ་། །དེ་ལྟར་དཀྱིལ་འཁོར་དུ་གསལ་བ་དེ་ནི་ཡོན་ཏན་རིན་པོ་ཆེའི་གནས་ཞེས་འབྲེལ་ལོ། །ཡོན་ཏན་དེ་དག་གང་ཞེ་ན། སྐུ་གསུང་ཐུགས་དང་ཡོན་ཏན་ཕྲིན་ལས་སེལ་མེད་པ་ཡི་ཡོན་ཏན་ཡིད་བཞིན་རིན་པོ་ཆེ། མི་ཟད་པར་ལྡན་རྒྱན་གྱི་འཁོར་ལོ་རྡོ་རྗེ་མཆོག་གི་གནས་ཉིད་དོ། །འདི་ལྟར་སྐུ་ལྔ་དང་གསུང་ལྔ་དང་ཐུགས་ལྔ་དང་ཡོན་ཏན་ལྔ་དང་ཕྲིན་ལས་ལྔ་ནི། རེ་རེ་ལ་ཡང་ཡོན་ཏན་རྩིས་ལས་འདས་པས། གདུལ་བྱ་ཇི་སྲིད་དེ་སྲིད་དུ་ཡོན་ཏན་མཐར་ཐུག་པ་མེད་པར་སྣང་བས། མི་ཟད་རྒྱན་གྱི་འཁོར་ལོ་ཞེས་བྱ་སྟེ། འདི་དག་ལ་ཡང་ཉོན་མོངས་པ་དང་ལས་དང་སྡུག་བསྔལ་གྱི་སྐྱོན་གྱི ས་མ་གོས་པས། སེལ་མེད་པའི་ཡོན་ཏན་རིན་པོ་ཆེ་ཞེས་བྱའོ། །མི་ཟད་རྒྱན་གྱི་འཁོར་ལོ་དེ་དག་ཀྱང་རང་བཞིན་དབྱེར་མེད་པས་རྡོ་རྗེ་མཆོག་ཅེས་བྱ་སྟེ། ཡོན་ཏན་དེ་དག་གི་གནས་ནི་གོང་དུ་སྨོས་པའི་དཀྱིལ་འཁོར་ཡིན་ཏེ། དེ་བས་ན་དོན་འདིར་འགྱུར་ཏེ། ཆོས་ཐམས་ཅད་ལྷུན་གྱིས་གྲུབ་པའི་དཀྱིལ་འཁོར་དུ་སངས་རྒྱས་པ་དེ་ཡང་། ཉོན་མོངས་པ་ལ་སོགས་པའི་སྐྱོན་གྱིས་མ་གོས་པས་སྐུ་གསུང་ཐུགས་རྡོ་རྗེ་འབྲས་བུའི་ཆོས་སུ་གནས་པ། མི་ཟད་རྒྱན་གྱི་འཁོར་ལོ་ཡོན་ཏན་རིན་པོ་ཆེའི་གནས་སུ་གྱུར་པའོ། །ཞེས་རྡོ་རྗེ་གསང་བའི་ཚིག་ཏུའོ་ཞེས་སྦྱར་རོ། །དེ་ལ་རྡོ་རྗེ་གསང་བའི་ཚིག་ཅེས་བྱ་བ་ནི། སྐབས་ཀྱི་དབང་གིས་མདོའི་དོན་གཞིག་པར་དཀའ་བ་ལ་གསུངས་པ་དང་། གསང་བའི་བརྡ་ཚིག་ལ་གསུངས་པ་དང་། ཡིད་ལ་གསལ་བ་རྣམས་ལ་འཇུག་པ་ཡོད་དེ། འདིར་ནི་ཐུགས་ལ་གསལ་བ་ཙམ་ལ་རྡོ་རྗེ་གསང་བའི་ཚིག་ཅེས་བྱའོ། །གླེང་བཞིའི་ལེའུ་ཞེས་བྱ་བ་ལ། གླེང་གཞི་ནི་གོང་དུ་བསྟན་པ་བཞིན། ལོ་རྒྱུས་བརྗོད་པ་དང་། ངེས་པ་སྦྱིན་པ་བྱེད་པའོ། །ལེའུ་ཞེས་བྱ་བ་ནི། པ་ཏ་ལ་ཞེས་བྱ་བའི་སྒྲ་བཤད་ན། པ་ཏ་ནི་གོས་ཀྱི་དོན་ཏེ་སྐྱོབ་པའི་མཚན་ཉིད་དོ། །ལ་ནི་འཛིན་པའི་དོན་ཏེ་སྐྱབས་འཛིན་པའི་ཕྱིར་ལེའུ་ཞེས་བྱ་སྟེ། གཞུང་དོན་དག་བཅས་པ་ལ་འཇུག་གོ། །རྣམ་པ་གཅིག་ཏུ་ན། པ་ཏ་ལ་ཞེས་དྲིལ་ཏེ་བརྗོད་ན་རིས་སུ་བཅད་པ་ལ་འཇུག་སྟེ། དེའི་ཕྱིར་རིས་དང་ལེའུར་བཅད་པའི་ཕྱིར་ལེའུ་ཞེས་བྱའོ། །ཐམས་ཅད་དུ་ཡང་དེ་བཞིན་དུ་སྦྱར་རོ། ༈ །ད་ནི་གླེང་བསླང་བ་སྟོན་ཏེ། དེ་ལ་གོང་དུ་བསྟན་པའི་གླེང་གཞི་བསྡུས་པ་ཉིད་ཀྱང་དོན་གྱི་གླེང་བསླང་བའི་ཁོངས་སུ་འདུས་མོད་ཀྱི། ཚིག་ཏུ་བརྗོད་པ་མ་ཡིན་པས་ཐུགས་ལ་དགོངས་པ་ཙམ་ནི་བཅས་རྒྱུད་བསྟན་པའི་ཁོངས་སུ་འདུས་པས། གླེང་གཞི་བསྡུས་པ་ཞེས་བྱའོ། །གླེང་གཞི་ཡང་ཕུན་སུམ་ཚོགས་པ་ལྔས་བརྗོད་པ་ཡིན་མོད་ཀྱི། དེ་མདོར་བསྡུས་ན་དཀྱིལ་འཁོར་ཙམ་དུ་འདུས་ཏེ། ཚིག་འདི་ནི་སྟོན་པ་འདི་ནི་གནས་འདི་ནི་འཁོར་འདི་ཞེས་སོ་སོར་ཐ་སྙད་གདགས་པ་ནི་མེད་དོ། །དེ་བས་ན་ཚིག་ཏུ་བརྗོད་པ་ཙམ་གླེང་བསླང་བར་གཟུང་བར་བྱ་སྟེ། དེ་བསྟན་པའི་ཕྱིར། དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོ་ཐམས་ཅད་མ་ལུས་པའི་རང་བཞིན་གྱི་ཚུལ་རྡོ་རྗེ། བཙུན་མོ་བྱ་བ་མོ་ཆོས་ཀུན་ཏུ་བཟང་མོ་ལ་འཇུག་པར་གྱུར་ཏོ། །ཞེས་བྱ་བ་ལ་སོགས་པ་སྨོས་ཏེ། དེ་ལ་ཡིད་ནི་བདག་ཏུ་ལྟ་བ་རྣམས་ཀྱི་བྱེད་པ་པོ་ལྟ་བུ་མེད་ཀྱང་། འཁོར་བར་འཇུག་པ་དང་ལྡོག་པ་རྣམས་ལ་འདིས་དབང་བྱེད་པས་བྱེད་པ་པོ་ཞེས་བྱའོ། །དེ་རང་བྱུང་གི་ཡེ་ཤེས་སུ་འདོད་པའི་གཞུང་ལྟར་ན་ཡང་། ཆོས་ཐམས་ཅད་ལ་དབང་སྒྱུར་བས་དེ་སྐད་ཅེས་བྱའོ། །དེ་ཉིད་བྱང་ཆུབ་སེམས་དང་དབྱེར་མེད་པས་རྡོ་རྗེ་ཡིད་ཀུན་ཏུ་བཟང་པོའོ། །དེ་ཉིད་སྟོན་པའི་བདག་ཉིད་བསྟན་པའི་སྐབས་སུ། སངས་རྒྱས་ཐམས་ཅད་ཀྱི་བདག་ཉིད་ཆོས་ཐམས་ཅད་ཀྱི་རང་བཞིན་ཡིན་ཏེ། དབྱེར་མེད་པའི་ཕྱིར་ཐམས་ཅད་མ་ལུས་པའི་རང་བཞིན་གྱི་ཚུལ་རྡོ་རྗེའོ། །དེ་ཆོས་ཀྱི་དབྱིངས་སྤྲོས་པ་དང་བྲལ་བ་ལ་ཞུགས་པར་གྱུར་པས་ཆོས་ཀུན་ཏུ་བཟང་མོ་ལ་འཇུག་པར་གྱུར་ཏོ་ཞེས་བྱའོ། །ཞུགས་པར་ཅིས་འགྱུར་ཞེ་ན། ཐམས་ཅད་དབྱེར་མེད་པར་གྱུར་ཏོ་ཞེས་སྦྱར་རོ། །དེ་ལྟར་དབྱེར་མེད་པའི་ཕྱིར་སྟོན་པ་དང་འདུལ་བྱ་གཉིས་སུ་དམིགས་སུ་མེད་པས། དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་དམ་པར་བརྗོད་པའི་ཚུལ་གྱིས་ཆེད་དུ་བརྗོད་པ་མཛད་དེ། གཞན་ལས་འབྱུང་བ་ལྟར། གདུལ་བྱ་ཁ་ཅིག་ལ་ཉིད་ཀྱིས་ཆེད་དུ་བརྗོད་པ་མཛད་པས། འདུལ་བར་གཟིགས་ནས་ཆེད་དུ་བརྗོད་པ་མཛད་དོ་ཞེས་གྲགས་པ་ལྟ་བུ་ནི་མ་ཡིན་ནོ། །དེ་བས་ན་གོང་དུ་བསྟན་པའི་དོན་དེ་ཉིད་དམ་པའི་ཚུལ་དུ་བརྗོད་པར་མཛད་པ་ནི། ཨེ་མའོ་རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །ཞེས་བྱ་བ་ལ་སོགས་པ་གསུངས་ཏེ། འདིར་ནི་ཐབས་ཀྱི་ཆ་བཟུང་ནས་ཕྱག་རྒྱའི་དཀྱིལ་འཁོར་དུ་སངས་རྒྱས་པར་གླེང་བསླང་བའོ། །དེ་ལ་ཕུང་པོ་ལྔ་ཉིད་སངས་རྒྱས་ལྔ་དང་མི་ཕྱེད་པས་རྡོ་རྗེའི་ཕུང་པོའོ། །ཡན་ལག་ནི་དེའི་བྱེ་བྲག་སྟེ། དེ་ཡང་སངས་རྒྱས་སུ་གྲགས་པའི་སྒྲ་ནི་གྲུབ་པའི་སྒྲའོ། །དེ་བཞིན་གཞན་ལ་ཡང་སྦྱར་རོ། །ཀུན་ཏུ་བཟང་མོས་གླེང་བསླང་བ་ནི། ཤེས་རབ་ཀྱི་ཆ་གཟུང་ནས་ཟབ་མོའི་དོན་དུ་གླེང་བསླང་བ་སྟེ། དེ་བས་ན་རྫོགས་པའི་སངས་རྒྱས་ཞེས་མི་སྨོས་པར། མངོན་སངས་རྒྱས་ཞེས་གསུངས་པ་ཡང་། ཇི་ལྟར་སྣང་བ་དེ་ལྟ་བ་ཉིད་དུ་སངས་རྒྱས་པའོ། །དེ་བས་ན་གླེང་བསླང་བའི་སྐབས་སུ་ཡང་། ཞུ་བ་པོ་དང་བཀའ་སྩལ་བའི་ཚུལ་གྱིས་གླེང་བསླང་བ་མ་ཡིན་པས། ཐུན་མོང་མ་ཡིན་པའོ། །དོན་དེ་དག་ལྟ་བུའི་ཚུལ་གྱིས་སངས་རྒྱས་ཉིད་ལས་གཞན་པའི་ཆོས་མི་མངའ་བར་མཁྱེན་ཡང་། དེ་ལྟར་མ་རྟོགས་པའི་འགྲོ་བ་རྣམས་ལ་བྱང་ཆུབ་ཀྱི་སེམས་རྣམ་པ་གཉིས་སུ་བསྐྱེད་པར་བསྟན་པའི་ཕྱིར། དེ་ནས་གཉིས་སུ་མེད་པའི་བདག་ཉིད་ཆེན་པོས་ཡེ་ནས་སངས་རྒྱས་པའི་སེམས་ཡེ་ཤེས་སུ་བསྐྱེད་འདི་གསུངས་སོ། །ཞེས་བྱ་བ་ལ་སོགས་པ་སྨོས་ཏེ། དེ་ཡང་ཐུན་མོང་དུ་གྲགས་པ་ནི་རིགས་དང་བཤེས་གཉེན་གྱི་སྟོབས་ལ་བརྟེན་ནས། ཤེས་རབ་དང་སྙིང་རྗེ་རྒྱུད་ལ་བསྐྱེད་པ་ནི་བྱང་ཆུབ་ཀྱི་སེམས་བསྐྱེད་པ་ཞེས་འདོད་དེ། འདིར་ནི་ཡེ་ནས་ཡིན་པའི་དོན་གསལ་བར་བྱེད་པའི་རྐྱེན་ཙམ་དུ་འདོད་དེ། དེའི་ཕྱིར་ཡེ་ནས་སངས་རྒྱས་པའི་སེམས་ཞེས་སྨོས་པ་ཡིན་ནོ། །སྐྱེ་འགག་གནས་དམིགས་འགྲོ་འོང་ལྔ་དང་བྲལ་བར་སྟོན་པའི་ཚིག་འདི་དག་གིས། ཆོས་ཐམས་ཅད་སྤྲོས་པ་ཉེ་བར་ཞི་བ་ཙམ་དུ་སྟོན་པར་ཟད་དེ། དེ་ཉིད་ཡེ་ཤེས་ཞེས་པའམ་དེ་ལྟར་རྟོགས་པ་ནི་ཡེ་ཤེས་སོ་ཞེས་སྦྱར་བར་བྱའོ། །དེ་ལྟར་ན་སྤྱིའི་དོན་དུ་ཡེ་ཤེས་ཐམས་ཅད་ཀྱིས་ཀྱང་། སྤྲོས་པ་དང་བྲལ་བའི་དོན་རྟོགས་པར་འདྲའོ་ཞེས་སྦྱར་རོ། །ཡན་ལག་གི་དོན་དུ་ན་ཚིག་འདི་དག་ཡེ་ཤེས་ལྔ་དང་རིམ་པ་བཞིན་སྦྱར་བར་བྱ་སྟེ། དེ་ལ་སྐྱེ་བ་མེད་པ་ནི་བག་ཆགས་གནས་སུ་དག་པའི་མཚན་ཉིད་སྟོང་པ་ཉིད་ཀྱི་ཡེ་ཤེས་ཏེ། དེ་ཡང་ཐུན་མོང་གི་དབང་དུ་ནི་ཕྱི་རོལ་གྱི་དོན་ཡོད་པར་སྨྲ་བའི་དབང་དུ་བཤད་པ་ལྟར་ན། ཤེས་པའི་སྤྱོད་ཡུལ་དུ་དངོས་པོ་སྣ་ཚོགས་པའི་སྐྱེ་བ་མངོན་པར་འགྲུབ་པ་འདི་ནི། བག་ཆགས་ཀྱི་དབང་གིས་ཤེས་པ་ལས་གུད་ན་མངོན་པར་གྲུབ་པ་ཉིད་ཡིན་ནོ་ཞེས་ཟེར་རོ། །དོན་གུད་ན་མེད་པར་སྨྲ་བ་ཁ་ཅིག་ནི། བག་ཆགས་ཀྱི་དབང་གིས་སེམས་ཉིད་གཟུང་བ་དང་འཛིན་པ་ལྟ་བུར་སྐྱེའོ་ཞེས་ཟེར་རོ། །རྣམ་པ་མེད་པར་སྨྲ་བ་ཁ་ཅིག་ནི། ཕྱི་རོལ་གྱི་དོན་གུད་ན་གྲུབ་པ་ཡང་མ་ཡིན། སེམས་ཉིད་གཟུང་བ་དང་འཛིན་པ་གཉིས་སུ་སྐྱེ་བ་ཡང་མ་ཡིན་མོད་ཀྱི། གཉིས་སུ་སྣང་བ་ནི་སེམས་དང་དེ་ཉིད་དང་གཞན་དུ་བརྗོད་དུ་མེད་པའི་བག་ཆགས་ཡིན་ལ། དེ་ཉིད་གཟུང་འཛིན་ཞེས་བརྗོད་དེ། རི་བོང་གི་རྭ་དང་འདྲ་བར་བརྗོད་དོ། །གསང་སྔགས་ཀྱི་གཞུང་ཡང་ཕལ་ཆེར་དེ་ལྟ་བུར་སྟོན་ཏེ། དེ་བས་ན་དེ་དག་གང་གི་གཞུང་ལྟར་ན་ཡང་བག་ཆགས་ངོ་བོ་མེད་པར་རྟོགས་ན་དངོས་པོ་རྣམས་མངོན་པར་མི་འགྲུབ་པས་དེའི་ཕྱིར་དངོས་པོ་ཐམས་ཅད་ནི་གདོད་མ་ནས་སྐྱེ་བ་མེད་བཞིན་དུ་འཁྲུལ་པའི་བློ་ལ་སྐྱེ་བ་ལྟ་བུར་སྣང་ལ། དེ་ལྟར་དངོས་པོར་སྣང་ཙམ་ཉིད་ན་ཇི་ལྟར་སྣང་བ་དེ་ལྟ་བུར་གྲུབ་པ་གང་ཡང་མེད་པས། ཆོས་ཀྱི་དབྱིངས་ལ་སྒྲིབ་པ་གདོད་མ་ནས་དག་པའི་ཕྱིར་རང་བཞིན་གྱིས་འོད་གསལ་བ་ཡིན་པས་ཆོས་ཀྱི་དབྱིངས་ཀྱི་ཡེ་ཤེས་སོ། །དེ་ལྟར་ཡུལ་དང་ཡུལ་ཅན་གྱི་དངོས་པོ་སྐྱེ་བ་མ་གྲུབ་ན། ཀུན་གཞིའི་རྣམ་པར་ཤེས་པ་ཉིད་ཀྱི་རྒྱུན་སྐད་ཅིག་མ་འགག་པ་ཡང་མི་འགྲུབ་སྟེ། རང་གི་ངོ་བོས་སྟོང་ཞིང་དག་པས་ནམ་མཁའ་དཀྱིལ་ལྟར་གྱུར་པ་ཡིན་ལ། དེའི་ཚེ་ཐུན་མོང་དུ་གྲགས་པ་ལྟར་ན། ཀུན་གཞི་དོན་དང་སེམས་ཅན་སྣ་ཚོགས་སུ་སྣང་བ་ལོག་ནས། སྣང་བ་ཐམས་ཅད་དང་བྲལ་བར་གནས་འགྱུར་པ་ཞེས་བྱའོ། །བག་ཆགས་ཀྱི་དྲི་མ་དང་བྲལ་བས་བྲལ་བའི་ཐོབ་པ་ཞེས་བྱའོ། །ཟག་པ་མེད་པའི་ཆོས་ཐམས་ཅད་ཀྱི་གཟུགས་བརྙན་སྣང་བས་གནས་འགྱུར་བ་མེད་དེ་རང་བྱུང་གི་ཡེ་ཤེས་ཞེས་བྱའོ། །དེ་ནི་མེ་ལོང་གཡའ་དག་པ་དང་འདྲ་བས་མེ་ལོང་ལྟ་བུའི་ཡེ་ཤེས་སོ། ། གནས་པ་མེད་པ་ནི་མཉམ་པ་ཉིད་ཀྱི་ཡེ་ཤེས་ཏེ། དེ་ཡང་ཉོན་མོངས་པ་ཅན་གྱི་ཡིད་ནི། བདག་ཏུ་ལྟ་བ་དང་བཅས་པ་གནས་པར་འཛིན་ཅིང་ཕྱོགས་དང་རིས་སུ་བྱེད་པའོ། །དེ་ཡང་ཀུན་གཞི་བག་ཆགས་དང་བཅས་པའི་རྒྱུན་ལ་ནང་དུ་དམིགས་པའི་ཚུལ་གྱིས་བདག་ཏུ་ལྟ་བར་བྱེད་དོ། །དེ་ཡང་ཀུན་གཞི་དང་བག་ཆགས་གཉིས་ཀ་མ་གྲུབ་ན། གནས་དང་རྒྱུ་དང་དམིགས་པ་མེད་པའི་ཕྱིར། ཉོན་མོངས་པའི་ཡིད་ཀྱང་སྐྱེ་རུ་མི་རུང་ངོ་། །དེ་མ་སྐྱེས་ན་གནས་སུ་འཛིན་པའི་ཤེས་པ་གཞན་མེད་དེ། དེ་བས་ན་གནས་པ་མེད་པའི་མཚན་ཉིད་རང་བཞིན་གྱིས་མཉམ་པ་ཉིད་ཀྱི་ཡེ་ཤེས་སོ། །ཐུན་མོང་བ་ལྟར་ན། ཉོན་མོངས་པ་ཅན་གྱི་ཡིད་རྟག་ཏུ་བདག་ཏུ་ལྟ་བ་མགོ་ནས་བདག་དང་གཞན་དུ་མི་འབྱེད་ཅིང་མཉམ་པ་ཉིད་དུ་གྱུར་པས་གནས་གྱུར་ཞེས་བྱའོ། །བདག་ཏུ་ལྟ་བ་དང་བདག་ཏུ་རྨོངས་པ་ལ་སོགས་པའི་དྲི་མ་དང་བྲལ་བས་ཐོབ་པའོ། །མེ་ལོང་ལྟ་བུའི་ཡེ་ཤེས་ལ་བདག་མེད་པར་རྟོགས་པའི་ཚུལ་གྱིས་ནང་དུ་མཉམ་པར་གཟིགས་པས་གནས་འགྱུར་བ་མེད་དེ། རང་བྱུང་གི་ཡེ་ཤེས་ཞེས་བྱའོ། །དམིགས་པ་མེད་པ་ནི་སོ་སོར་རྟོག་པའི་ཡེ་ཤེས་ཏེ། འདི་ལྟར་ཀུན་གཞི་དང་བག་ཆགས་དང་ཉོན་མོངས་པ་ཅན་གྱི་ཡིད་རྣམས་མ་གྲུབ་སྟེ། རྒྱུ་དང་གནས་དང་དམིགས་པ་ཐམས་ཅད་དང་བྲལ་བའི་ཕྱིར། གང་ཞིག་གིས་གང་ལ་དམིགས་ཏེ། རང་བཞིན་གྱིས་དམིགས་པ་མེད་པ་ཡིན་པས་སོ་སོར་རྟོག་པའི་ཡེ་ཤེས་སོ། །ཐུན་མོང་བ་ལྟར་ན་ཡིད་ཀྱི་རྣམ་པར་ཤེས་པ་ཆོས་ཐམས་ཅད་ལ་གཟུང་བ་དང་འཛིན་པའི་དངོས་པོར་དམིགས་པ་ལས་ལོག་ནས། ཆོས་ཐམས་ཅད་ཀྱི་མཚན་ཉིད་ཇི་ལྟ་བ་བཞིན་ཐུགས་སུ་ཆུད་པས་གནས་འགྱུར་བ་ཞེས་བྱའོ། །གཟུང་བ་དང་འཛིན་པའི་དངོས་པོར་ཞེན་པའི་དྲི་མ་དང་བྲལ་བས་བྲལ་བའི་ཐོབ་པའོ། །ཡིད་ཀྱི་རྣམ་པར་ཤེས་པས་ཆོས་ཐམས་ཅད་ལ་དམིགས་པ་བཞིན། སོ་སོར་རྟོག་པའི་ཡེ་ཤེས་ཀྱང་དོན་དམ་པ་དང་ཀུན་རྫོབ་ཀྱི་ཡུལ་ཅན་པས་གནས་འགྱུར་བ་མེད་པས་རང་བྱུང་གི་ཡེ་ཤེས་ཞེས་བྱའོ། །འགྲོ་འོང་མེད་པ་ནི་བྱ་བ་གྲུབ་པའི་ཡེ་ཤེས་ཏེ། དེ་ཡང་གོང་དུ་བསྟན་པའི་དེ་ནི་ཐམས་ཅད་མ་གྲུབ་ན། སྒོ་ལྔའི་རྣམ་པར་ཤེས་པ་སྐྱེ་བ་མི་སྲིད་དེ། དེའི་ཕྱིར་ཕྱི་རོལ་གྱི་དོན་ལ་འགྲོ་བ་དང་འོང་བའི་མཚན་ཉིད་མེད་པས་བྱ་བ་གྲུབ་པའི་ཡེ་ཤེས་སོ། །ཐུན་མོང་བ་ལྟར་ན་སྒོ་ལྔའི་རྣམ་པར་ཤེས་པ་ཕྱི་རོལ་གྱི་ཡུལ་ལ་འཇུག་པ་ལོག་ནས། མི་དམིགས་པའི་ཐུགས་རྗེ་ཆེན་པོར་ལྷུན་གྱིས་གྲུབ་པས་གནས་གྱུར་བ་ཞེས་བྱའོ། །ཕྱིར་རོལ་གྱི་ཡུལ་ལ་གཡེང་བའི་དྲི་མ་དང་བྲལ་བས་བྲལ་བའི་ཐོབ་པའོ། །ཇི་ལྟར་སྒོ་ལྔ་ཁ་ཕྱིར་བལྟས་པ་བཞིན། བྱ་བ་གྲུབ་པའི་ཡེ་ཤེས་ཀྱང་གདུལ་བྱའི་རྒྱུད་ལ་གཟིགས་ཏེ་གནས་གྱུར་པ་མེད་པས་རང་བྱུང་གི་ཡེ་ཤེས་ཞེས་བྱའོ། །རང་བྱུང་གི་ཡེ་ཤེས་འདི་དག་ཀྱང་ཤེས་པ་དང་རང་གི་ཡུལ་ལ་སྐྱེ་བའི་མཚན་ཉིད་མ་བཏང་བར། ཡེ་ཤེས་ཀྱི་དུས་ན་ཡང་རྒྱུན་དེ་བཞིན་དུ་གྲུབ་པས་གཞག་པའི་ཕྱོགས་སྨྲས་པ་ཡིན་ཏེ། འདི་ཙམ་དུ་མ་ཟད་ཀྱི་གཟུང་འཛིན་གཏན་མེད་པའི་ཕྱིར། ཤེས་པ་ཐམས་ཅད་རང་རིག་པ་ཙམ་ཡིན་པར་གྲུབ་པ་ཡང་རང་བྱུང་གི་ཡེ་ཤེས་ཡིན་ནོ། །རང་རིག་པ་ཉིད་ཀྱང་སྤྲོས་པ་ཡིན་པས། སྤྲོས་པ་ཐམས་ཅད་གདོད་མ་ནས་མ་གྲུབ་པ་ཉིད་སྒྲིབ་པ་གདོད་མ་ནས་དག་པ་ཡིན་པས། རང་བཞིན་གྱིས་འོད་གསལ་བའི་ཕྱིར་རང་བྱུང་གི་ཡེ་ཤེས་ཞེས་བྱའོ། །དེ་ལ་ཡེ་ནས་སངས་རྒྱས་པའི་སེམས་ཞེས་བྱ་བ་ནི། ཐུན་མོང་མ་ཡིན་པའི་ཕྱོགས་བཟུང་ནས་བཤད་དོ། །བདག་གིས་ནི་ཡེ་ཤེས་ཀྱི་མཚན་ཉིད་ཐོས་པ་དང་། ཤེས་རབ་ཞེན་པ་རྣམས་ཀྱིས་ཀྱང་བདེ་བར་རྟོགས་པར་བྱ་བའི་ཕྱིར་ཐུན་མོང་དུ་གྲགས་པ་དང་བཅས་ནས་བསྡུས་ཏེ་བསྟན་པའོ། །སྐབས་འདིར་སློབ་དཔོན་དབུས་ལུགས་པ་རྣམས་སྐུ་ལྔ་ཡེ་ཤེས་ལྔ་སྦྱར་ཏེའང་འཆད་ལ། དབུས་ལུགས་བཀའ་ཕྱོགས་པ་རྣམས། འབྲས་བུ་མཐར་ཕྱིན་པ་སངས་རྒྱས་ཀྱི་གནས་སྐབས་དང་། གང་ཟག་རྣལ་འབྱོར་པའི་གནས་སྐབས་གཉིས་སུའང་སྦྱར་ཏེ་འཆད་པར་བྱེད་ན། ཡོངས་སེམས་ཡེ་ནས་ཡེ་ཤེས་ཇི་ལྟར་ཡིན་པ་དང་། མངོན་པར་སྒྲུབ་པ་རྣམས་ལ་ཇི་ལྟར་གྲུབ་པ་འདི་ཙམ་བཤད་པས་དེ་དག་ཐམས་ཅད་འདུས་པར་སྣང་བས་གཞུང་དེ་དག་མ་བྲིས་སོ། །ད་ནི་ཀུན་རྫོབ་བྱང་ཆུབ་ཀྱི་སེམས་བསྐྱེད་པ་བསྟན་པར་འདོད་པ་ལས། དང་པོར་ཆོས་ཡེ་ནས་སངས་རྒྱས་པའི་དོན་རྟོགས་པར་དཀའ་བས། དེ་མ་རྟོགས་པའི་དབང་གིས་འཁོར་རོ་ཞེས་བསྟན་པའི་ཕྱིར། ཨེ་མ་ཧོ་ཡེ་ནས་གསང་བའི་ཆོས། །ཞེས་བྱ་བ་སོགས་པ་སྨོས་ཏེ། ཡེ་ནས་སངས་རྒྱས་པའི་དོན་ཡིན་ཡང་། ཐོག་མ་ཉིད་ནས་མ་རྟོགས་པས་ཡེ་ནས་གསང་བའི་ཆོས་སོ། །དེ་ཡང་སྦས་པ་མ་ཡིན་ཏེ། དབང་པོ་དྲུག་གི་སྤྱོད་ཡུལ་དུ་སྣ་ཚོགས་སུ་སྣང་བ་ཉིད་ལ་རང་གི་རང་བཞིན་མ་རྟོགས་པས། སྣ་ཚོགས་སྣང་ལ་རང་བཞིན་གསང་ངོ་། །ཆོས་ཐམས་ཅད་ངོ་བོ་ཉིད་ཀྱིས་སྟོང་པ་ཡིན་པ་ལ། གཞན་གྱིས་སྟོང་པར་མཐོང་ནས་ཇི་ལྟར་སྣང་བ་རང་གི་ངོ་བོ་ཉིད་ཀྱིས་སྟོང་པར་མ་རྟོགས་པས་ངོ་བོ་ཉིད་ཀྱིས་རབ་ཏུ་གསང་ངོ་། །དེ་ཡང་གུད་ན་ཡོད་པ་མ་ཡིན་ཏེ། གཞན་དུ་བཙལ་དུ་མེད་བཞིན་དུ་རྙེད་པར་དཀའ་བས། གཞན་དུ་མིན་ལས་ཤིན་ཏུ་གསང་ཞེས་གསུངས་པ་ཡིན་ནོ། །དེ་བས་ན་ཆོས་ཐམས་ཅད་ཡེ་ནས་སངས་རྒྱས་པའི་དོན་ཡིན་པས་ཐམས་ཅད་དབྱེར་མེད་ནའང་དེ་མ་རྟོགས་པའི་དབང་གིས་འགྲོ་བ་ལྔའི་རིས་བསམ་གྱིས་མི་ཁྱབ་པར་སྨིན་པ་ལ། ཐུགས་རྗེ་ཆེན་པོ་སྐྱེས་སོ་ཞེས་སྦྱར་རོ། །དེ་ཉིད་བསྟན་པའི་ཕྱིར། ཨེ་མ་ཧོ་བདེར་གཤེགས་སྙིང་པོ་ལས། ཞེས་བྱ་བ་ལ་སོགས་པ་སྨོས་ཏེ། དེ་ལ་བདེ་བར་གཤེགས་པའི་སྙིང་པོ་ཞེས་བྱ་བ་ནི། ཐུན་མོང་དུ་གྲགས་པ་སེམས་ཅན་རྣམས་བྱང་ཆུབ་ཀྱི་རྒྱུ་ཅན་ཟག་མེད་ཀྱི་ས་བོན་དང་ལྡན་པའོ། །ཞེས་འདོད་དོ། །ཟབ་མོ་ལྟར་ན་སེམས་ཀྱི་རང་བཞིན་ཉིད་བྱང་ཆུབ་ཡིན་པས་བྱང་ཆུབ་ཀྱི་སྙིང་པོའོ། །དེ་ལྟར་ཡིན་པ་ལས་བཅིངས་པར་སྣང་ཞིང་དེའི་དབང་གིས་གྲོལ་བར་ཡང་སྣང་སྟེ། བཅིངས་གྲོལ་མེད་པའི་དོན་མ་མཐོང་བས་དེ་བསྟན་པའི་ཕྱིར། ཐུགས་རྗེ་ཆེན་པོའི་སྤྲུལ་པ་སྤྲོ་བ་སྣ་ཚོགས་མཛད་དོ་ཞེས་གསུངས་སོ། །དེ་ཇི་ལྟར་སྤྲོ་པ་བསྟན་པ་ནི་ལེའུ་གསུམ་པ་དང་འབྲེལ་ལོ། །དོན་དམ་པ་དང་ཀུན་རྫོབ་ཀྱི་བྱང་ཆུབ་ཀྱི་སེམས་བསྐྱེད་པ་ཞེས་བྱ་བ་ནི། སྤྲོས་དང་བྲལ་བའི་དོན་དང་འགྲོ་བའི་དོན་གྱི་དབང་དུ་བྱས་པའོ། །ལེའུ་གཉིས་པའོ།། ༈ །།ད་ནི་ཐུགས་རྗེ་སྤྲོས་པ་དེ་ཉིད་ཇི་ལྟར་སྤྲོ་བ་བསྟན་པའི་ཕྱིར། དེ་ནས་དེ་བཞིན་གཤེགས་པ་ཐམས་ཅད་ལས་ཐུགས་རྗེ་ཆེན་པོའི་བྱིན་གྱིས་རླབས་ཞེས་བྱ་བའི་རིག་པའི་སྐྱེས་བུ་ཐུབ་པ་དྲུག་འཐོན་ནོ། །ཞེས་བྱ་བ་ལ་སོགས་པ་གསུངས་ཏེ། དེ་ལ་རིག་པའི་སྐྱེས་བུ་ཞེས་བྱ་བ་ནི། གཞུང་ཁ་ཅིག་ལས་སྔགས་ལས་བྱུང་བའི་སྐུ་ནི་རིག་པའི་སྐྱེས་བུ་ཞེས་བཤད་དོ། །ཁ་ཅིག་ལས་རིག་སྔགས་ནི་མི་ཕྱེད་པའི་དོན་ཏེ། སྐུ་གསུང་ཐུགས་རྡོ་རྗེ་ལྟར་དབྱེར་མི་ཕྱེད་པའི་དོན་ནི་རིག་པའི་སྐྱེས་བུ་ཞེས་བཤད་དོ། །ཁ་ཅིག་ལས་རིག་སྔགས་ནི་ལྷ་མོ་སྟེ། དེ་དང་ལྡན་པའི་རིག་པའི་སྐྱེས་བུ་ཞེས་བཤད་དོ། །ཡེ་ཤེས་ལ ས་འཕྲུལ་པའི་སྐུ་ལ་ཡང་རིག་པའི་སྐྱེས་བུ་ཞེས་པ་བཤད་དོ། །འདིར་ནི་དེ་ཉིད་དང་མི་ཕྱེད་པའི་དོན་གཟུང་བར་བྱའོ། །ཐུབ་པ་དྲུག་ཅེས་བྱ་བ་ནི། འགྲོ་དྲུག་གི་དབང་དུ་བྱས་པའོ་ཞེས་དབུས་ལུགས་པ་གསུང་ངོ་། །ཡོངས་གྲགས་པ་ཁ་ཅིག་ན་རེ། སྤྱིར་དེ་ལྟར་ཡིན་མོད་ཀྱི་སྐབས་འདིར་འཇིག་རྟེན་དྲུག་གི་དབང་དུ་བྱས་པ་ཡིན་ཏེ། དེ་ལྟར་མ་ཡིན་ན་འོག་ནས། འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར་ཐུབ་པ་ཆེན་པོ་རེ་རེས་འགྲོ་བ་ལྔའི་དོན་མཛད། ཅེས་བསྟན་པ་འབྲེལ་མེད་པར་འགྱུར་རོ་ཟེར་རོ། །ཡོངས་ནི་འགྲོ་བ་དྲུག་གི་དབང་དུ་བྱས་ཀྱང་སྟོང་གསུམ་རེ་རེར་ཞེས་བྱ་བའི་སྐབས་སུ་ཐུབ་པ་དྲུག་པོ་རེ་རེར་ཞེས་བྱ་བར་མི་སྦྱར་བར། སྤྱིར་གཅིག་གིས་དོན་མཛད་པར་སྣང་ངོ་ཞེས་སྦྱར་ན། འདི་ལ་ཡང་འགལ་བ་མ་མཐོང་ངོ་། །དེ་ལ་སྟོང་གསུམ་རེ་རེར་ཐུབ་པ་རེ་རེར་ཞེས་བྱ་བ་ནི་ཐེག་པ་ཐུན་མོང་གི་དབང་དུ་བཤད་ན། སྲིད་པ་མཐའ་མ་པའི་བྱང་ཆུབ་སེམས་དཔའ་གཅིག་མངོན་པར་རྫོགས་པར་སངས་རྒྱས་པའི་ཚེ། སྟོང་གསུམ་གཅིག་ཏུ་སངས་རྒྱས་ཀྱི་མཛད་པ་བྱེད་དོ་ཞེས་བཤད་དོ། །ཐེག་པ་ཆེན་པོ་ཐུན་མོང་མ་ཡིན་པ་ལྟར་ན། འཛམ་བུ་གླིང་བྱེ་བ་ཕྲག་བརྒྱར་སངས་རྒྱས་ཐམས་ཅད་ཀྱི་བྱིན་རླབས་ལས། སྤྲུལ་པ་བྱེ་བ་ཕྲག་བརྒྱ་འབྱུང་བ་ཡང་ཚུལ་གཅིག་ཏུ་འབྱུང་བས་ཐུབ་པ་རེ་རེས་ཞེས་བཤད་དོ། །འདུལ་བ་རྣམ་པ་བཞིས་འགྲོ་བ་རྣམ་པ་ལྔའི་དོན་མཛད་དེ་ཞེས་བྱ་བ་ལ། འདུལ་བ་རྣམ་པ་བཞི་ནི། བསོད་ནམས་ཀྱིས་འདུལ་བ་དང་། རྫུ་འཕྲུལ་གྱི་འདུལ་བ་དང་། རིག་པས་འདུལ་བ་དང་། མངོན་སུམ་པས་འདུལ་བ་ཞེས་སྤྱིར་གྲགས་སོ། །འདི་ཉིད་ལས་ནི་མཛད་པ་ཆེན་པོ་བརྒྱད་དང་། མངོན་པར་ཤེས་པ་ཆེན་པོ་དྲུག་དང་། བསམ་གྱིས་མི་ཁྱབ་པ་བཞི་དང་། ཐེག་པ་ལྔའི་སྒོ་ནས་འདུལ་བར་གསུངས་ཏེ། དེ་ཡང་སྤྱིར་དོན་མཐུན་པར་སྣང་སྟེ། མཛད་པ་བརྒྱད་ཀྱིས་འདུལ་བ་ནི། བསོད་ནམས་ཐུན་མོང་མ་ཡིན་པར་འཕགས་པར་བསྟན་པ་ཡིན་ནོ། །མངོན་པར་ཤེས་པ་དྲུག་ནི། དོན་ཐམས་ཅད་མངོན་སུམ་དུ་གྱུར་པས་འདུལ་བའོ། །བསམ་གྱིས་མི་ཁྱབ་པ་བཞི་ནི། རྫུ་འཕྲུལ་སྣ་ཚོགས་སུ་བསྟན་པས་འདུལ་བའོ། །ཐེག་པ་ལྔ་ནི་རིག་པ་དང་ལྡན་པའི་ཆོས་བསྟན་པ་སྟེ། དེ་བས་ན་དེ་དག་ཀྱང་གཞི་མཐུན་པར་འགྱུར་རོ། །དེ་ལ་ཐེག་པ་ལྔ་དང་། གྲུབ་མཐའ་རྣམ་པ་ལྔ་ནི་གོང་དུ་བསྟན་ཟིན་ཏོ། །ཇི་སྙེད་འཇིག་རྟེན་འཁྲུལ་པའི་ཆོས། །ཞེས་བྱ་བ་ལ་སོགས་པ་ནི། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀྱི་རང་བཞིན་གཏན་ལ་འབེབས་པར་བྱེད་པ་སྟེ། དེ་ཡང་། རང་བཞིན་ཉིད་ལས་ཉམས་པ་མེད། །ཅེས་བྱ་བ་ཡན་ཆད་ཀྱིས་འཁྲུལ་པས་རང་བཞིན་བསླད་པ་མེད་པར་དམ་བཅས་པ་སྟོན་ནོ། །ཡང་དག་སྒྱུ་མའི་ཚུལ་གཉིས་སུ། །བདག་དང་བདག་གི་གཞན་མེད་དེ། །རྣམ་དག་དབྱིངས་ཉིད་ཚུལ་གཅིག་གོ། །ཞེས་བྱ་བ་ནི། ཇི་ལྟར་ཉམས་པ་མེད་པའི་ཚུལ་མདོར་བསྟན་པ་སྟེ། དེ་ལ་ཡང་དག་པ་སྟེ་འཕགས་པའི་ཡེ་ཤེས་ཀྱི་སྐབས་ན་ཡང་། བདག་ཏུ་ལྟ་བའི་རྣམ་པར་ཤེས་པ་དང་བཅས་པ་དང་། བདག་གི་སྟེ་དབང་པོ་དང་། གཞན་ཏེ་ཡུལ་རྣམས་གྲུབ་པ་མེད་དོ། །ཞེས་བྱ་བ་དང་། སྒྱུ་མ་སྟེ་འཁྲུལ་པའི་ཤེས་པ་རང་ཁ་མའི་གནས་སྐབས་ན་ཡང་། དེ་བཞིན་དུ་བདག་དང་བདག་གི་དང་གཞན་རྣམས་གྲུབ་པ་མེད་དེ། དེ་ལྟར་ན་ཚུལ་གཉིས་ཀའི་ཚུལ་ལྟར་ན་ཡང་། དེ་རྣམས་མ་གྲུབ་པའི་ཚུལ་རྣམ་པ་གཉིས་ཉིད་ཀྱང་དབྱེར་མེད་དེ། རྣམ་པར་དག་པའི་དབྱིངས་སུ་ཚུལ་གཅིག་གོ་ཞེས་སྦྱར་རོ། །ད་ནི་ཚུལ་འདི་ཉིད་རྒྱས་པར་སྦྱར་བའི་ཕྱིར། དང་པོ་སྒྱུ་མའི་ཚུལ་ལས་བསྩམས་ནས། དེ་རྣམས་ལས་མ་གྲུབ་པར་བསྟན་པ་ལ། དང་པོར་དེ་ལྟར་སྣང་བའི་ཡུལ་མ་གྲུབ་པར་བསྟན་པའི་ཕྱིར། བདག་དང་བདག་གི་གཞན་རྣམས་ནི། །ཞེས་བྱ་བ་ནས། གཞན་དུ་གཡོ་བ་ཅི་ཡང་མེད། །ཅེས་བྱ་བའི་བར་དུ་གསུངས་ཏེ། དེ་ཡང་འདི་ལྟར་སེམས་ལ་བདག་ཏུ་བཟུང་བ་དང་། དབང་པོ་ལ་བདག་གིར་བཟུང་བ་དང་། ཡུལ་ལ་གཞན་དུ་བཟུང་བ་རྣམས་ནི། ལོག་པར་རྟོག་པ་ཙམ་ཉིད་ལས། ཕྲ་ཞིང་ཟབ་པའང་ཡོད་མ་ཡིན། །ཞེས་པ་སྟེ་དེ་དག་ཀྱང་ལོག་རྟོག་ཙམ་ཉིད་ཡིན་གྱི། དེ་ལས་གུད་ན་ཕྲ་སྟེ་མ་མཐོང་བའམ། ཟབ་སྟེ་མ་རྟོགས་པའང་ཡོད་པ་མ་ཡིན་ནོ། །འོ་ན་ད་ལྟ་ཉིད་ནས་མངོན་སུམ་ན་ཡུལ་དང་ཡུལ་ཅན་དུ་སྣང་བ་འདི་དག་ཅི་ཞེ་ན། ལོག་རྟོག་ཉིད་ལ་ཉིད་སྤྱོད་དེ། །གཞན་དུ་གཡོ་བ་ཅི་ཡང་མེད། །ཅེས་སྨོས་ཏེ། ལོག་རྟོག་ཉིད་ཆ་གཅིག་བཟུང་བར་སྣང་བ་ལ། འཛིན་པར་སྣང་བ་ཉིད་སྤྱོད་པ་ལྟ་བུར་སྣང་སྟེ། ཡུལ་གཞན་ཞིག་གི་ཤེས་པ་གཞན་ཞིག་གཡོ་ཞིང་འཇུག་པ་ནི་ཅི་ཡང་མེད་དོ། །འོ་ན་སྣང་བའི་གཞི་པོ་རྣམ་པར་ཤེས་པ་ཉིད་ཀྱི་མཚན་ཉིད་ཇི་ལྟ་བུ་ཡིན་ཞེ་ན། ལོག་རྟོག་རྒྱུ་འབྲས་རྒྱུན་ཉིད་ཀྱང་། །གཞི་རྩ་མེད་དབྱིངས་སྐད་ཅིག་མ། །ཞེས་སྨོས་ཏེ། དེ་ལ་ལོག་རྟོག་ནི། ཁམས་གསུམ་པའི་སེམས་དང་སེམས་ལས་བྱུང་བའོ། །དེའི་རྒྱུ་ནི་རྐྱེན་རྣམས་སོ། །འབྲས་བུ་ནི་སེམས་དང་སེམས་ལས་བྱུང་བ་རང་གི་ངོ་བོར་མངོན་པར་གྲུབ་པའོ། །རྒྱུན་ནི་རྒྱུ་དང་འབྲས་བུ་རྣམས་རྒྱུན་མ་ཆད་པར་མཚུངས་པར་འབྱུང་བའོ། །དེ་དག་ཀྱང་མཚན་ཉིད་ཇི་ལྟ་བུ་ཡིན་ཞེ་ན། གཞི་རྩ་མེད་དབྱིངས་སྐད་ཅིག་མ། །ཞེས་པ་སྟེ། བློས་གཞིགས་ན་གཞི་དང་རྩ་བ་མི་འགྲུབ་པས་ཆོས་ཀྱི་དབྱིངས་ཉིད་ཡིན་ཏེ། གང་གི་ཕྱིར་སྐད་ཅིག་མ་ཡིན་ཏེ། དེའི་ཕྱིར་གཞི་དང་རྩ་བ་བསྙད་པར་འོས་པ་མ་ཡིན་ནོ། །དེ་ལྟ་བས་ན་སྒྱུ་མ་འཁྲུལ་པའི་དབང་དུ་བྱས་ན་ཡང་བདག་དང་གཞན་མི་འགྲུབ་བོ། །ད་ནི་འཕགས་པའི་ཡེ་ཤེས་ཀྱི་དུས་ན་ཡང་བདག་དང་གཞན་དུ་སྣང་བ་དང་། སྣང་བའི་གཞི་པོ་ཤེས་པ་ཉིད་མི་འགྲུབ་པར་བསྟན་པའི་ཕྱིར། རྣམ་པར་དག་པའི་དབྱིངས་ཉིད་ཚུལ། །ཉིད་ལ་དབང་སྒྱུར་ཉིད་སྤྱོད་ཕྱིར། །བདག་དང་གཞན་དང་རྟོག་པའི་རྒྱུན། །རྣམ་དག་ཅེས་བྱ་བ་སྨོས་ཏེ། །འདི་ལྟར་འཁྲུལ་པའི་དྲི་མ་རྣམ་པར་དག་པའི་དབྱིངས་སུ་གྱུར་པའི་ཚུལ་ལྟར་ན་ཡང་ཡེ་ཤེས་རང་སྣང་བ་ཙམ་ཉིད་ལ། ཡེ་ཤེས་ཉིད་དབང་སྒྱུར་ཞིང་སྤྱོད་པའི་ཕྱིར། བདག་དང་གཞན་དུ་སྣང་བ་དང་། སྣང་བའི་གཞི་པོ་རྟོག་པའི་རྒྱུན་ཉིད་ཀྱང་རྣམ་པར་དག་པས། དེ་ལྟར་ན་སེམས་དང་སེམས་ཀྱི་སྣང་བ་གཉིས་ཀ་དངོས་པོར་མ་འགྲུབ་པ་བཞིན་དུ། ཡེ་ཤེས་དང་ཡེ་ཤེས་ཀྱི་སྣང་བ་གཉིས་ཀ་ཡང་དངོས་པོར་མ་གྲུབ་པས་བླང་དོར་མེད་ཅིང་རྣམ་པར་དག་གོ། །དེ་ལྟར་ན་བླང་དོར་མེད་པ་ཉིད་ལམ་གྱི་མཆོག་ཡིན་པས། བླ་མེད་ཐེག་པའི་མཆོག་ཅེས་སྨོས་པ་ཡིན་ནོ། །དེ་ཉིད་བགྲོད་ཅིང་སྦྱང་དུ་མེད་པའི་ཕྱིར་གནས་པའི་ས་ཡང་ཡིན་ལ་འབྲས་བུ་ཡང་ཡིན་ནོ། །གང་འདིས་ངེས་པར་འབྱུང་བ་རྣམས་ནི་འབྲས་བུ་དང་གནས་མ་ཡིན་པས། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས་པ་ཡིན་ནོ། །དེ་ལྟ་བས་ན་སྣ་ཚོགས་སུ་སྣང་བ་ལ་གཞི་དང་རྟེན་དགོས་པ་མ་ཡིན་ལ། ཕྱིན་ཅི་མ་ལོག་པའི་ལྟ་བ་དང་ལྡན་ན་ཐབས་རྒྱ་མཚོ་ཐམས་ཅད་ཀྱང་ཅུད་ཟ་བ་མ་ཡིན་པས། ཡང་དག་རྟོགས་པས་རབ་བརྟགས་ན། །རང་བཞིན་མེད་ལས་ཅིར་ཡང་འགྲུབ། །ཅེས་གསུངས་པ་ཡིན་ནོ། །ད་ནི་གོང་དུ་ཚུལ་གཅིག་པའི་དོན་དུ་བསྟན་པ་ལས་དེ་ལྟར་ཡིན་པའི་ཕྱིར་སངས་རྒྱས་མྱ་ངན་ལས་མི་འདའ་ཞིང་། ཆོས་མི་ནུབ་པར་བསྟན་པ་དང་། ཆོས་ཐམས་ཅད་བྱུང་ཡང་རྫོགས་པ་ཆེན་པོ་ལས་བྱུང་ལ། གཏན་ལ་ཡང་དེར་ཕབ་པར་བསྟན་པ་དང་། ཆོས་ཐམས་ཅད་བཏགས་པ་ཙམ་སྟེ། རང་རང་གི་ངོ་བོ་མི་འགྲུབ་པར་བསྟན་པའི་ཕྱིར། སངས་རྒྱས་མྱ་ངན་ཡོངས་མི་འདའ། །ཞེས་བྱ་བ་ལ་སོགས་པ་སྨོས་ཏེ། དེ་ལ་སངས་རྒྱས་ཀྱང་ཕལ་ཆེར་སྐུ་གསུམ་དུ་གྲགས་པ་ལས། ཆོས་ཀྱི་སྐུ་དང་ལོངས་སྤྱོད་རྫོགས་པའི་སྐུ་མྱ་ངན་ལས་འདའ་བ་ནི་གཞུང་ཕལ་མོ་ཆེ་ཡང་མི་འདོད་དོ། །སྤྲུལ་པའི་སྐུ་ནི་ཐུན་མོང་གི་གཞུང་ཁ་ཅིག་ལས། སྲིད་པ་མཐའ་མ་པའི་རྒྱུད་གཅིག་མངོན་པར་རྫོགས་པར་སངས་རྒྱས་ནས་མཛད་པ་རྫོགས་པར་མཛད་ནས་དེ་ནས་མྱ་ངན་ལས་འདའ་བར་འདོད་དོ། །ཐུན་མོང་མ་ཡིན་པའི་མདོ་དང་། གསང་སྔགས་ཀྱི་ཚུལ་ལས་ནི། སྤྲུལ་པའི་སྐུ་ཡང་སངས་རྒྱས་ཐམས་ཅད་ཀྱི་མཛད་པ་ཐུན་མོང་གི་འཕྲུལ་པ་ཡིན་པས་ཆུ་ཟླ་ལྟ་བུ་སྟེ། ཇི་ལྟར་ཆུ་ཟླ་ནི་སྣང་བའི་ཚེ་ན་ཡང་གཞན་ནས་འཕོས་པ་དང་། དེ་ཉིད་དུ་སྐྱེ་བ་མངོན་པར་གྲུབ་པ་མ་ཡིན། མི་སྣང་བའི་ཚེ་ན་ཡང་གཞན་དུ་འཕོས་པ་དང་། དེ་ཉིད་ཀྱི་རང་བཞིན་ཞིག་པར་གྱུར་བ་མེད་དེ། དེ་བཞིན་དུ་སྤྲུལ་པའི་སྣང་བ་དང་། དམ་པའི་ཆོས་གནས་པ་ཡང་ཤེས་པར་བྱའོ། །ཐེག་པ་ཐམས་ཅད་རྫོགས་པ་ཆེན་པོ་ལས་བྱུང་ཞིང་དེར་གཏན་ལ་ཕབ་པར་སྟོན་པའི་ཕྱིར། འདུལ་བ་མདོ་སྡེ་ཆོས་མངོན་དང་། །ཞེས་བྱ་བ་ལ་སོགས་པ་སྨོས་ཏེ། དེ་ལ་ཇི་ལྟར་འཕྲོས་པ་ནི། མཚན་ཉིད་ཀྱི་ཐེག་པ་ལས་ཀྱང་། ཆོས་ཉིད་རྒྱུ་མཐུན་གསུང་རབ་བཅུ་གཉིས་ཞེས་སྨོས་ཏེ། གསུང་རབ་ཡན་ལག་བཅུ་གཉིས་ནི་ཆོས་ཀྱི་དབྱིངས་དང་རྒྱུ་མཐུན་པའོ་ཞེས་བཤད་ལ། ཐབས་ཀྱི་ཞགས་པ་ལས་ཀྱང་། མཉམ་པ་ལས་འཕྲོས་ཏེ་འབྱུང་བའི་དོན། ཞེས་གསུངས་ཏེ། སངས་རྒྱས་ཀྱི་ཐེག་པ་ཐམས་ཅད་ནི་ཆོས་མཉམ་པ་ཉིད་དང་མཐུན་པའི་འབྲས་བུ་ཡིན་པར་བཤད་དོ། །དེ་ཡང་ཆོས་ཉིད་ལས་བྱུང་བ། ཆོས་ཉིད་དང་མཐུན་པར་སྐྱེས་པ། ཆོས་ཉིད་ཀྱིས་བྱིན་གྱིས་བརླབས་པ་ཡིན་པས། ཆོས་ཉིད་བསྟན་པའི་ཆེད་དུ་ཉེ་བར་གནས་པ་ཡིན་པའི་ཕྱིར། མཉམ་པ་ཆེན་པོའི་དོན་རྫོགས་པ་ཆེན་པོ་ལས་འཕྲོས་པར་བསྟན་ནོ། །དེ་ཇི་ལྟར་གཏན་ལ་ཕབ་ཅེ་ན། གྲུབ་པའི་མཐའ་ཐམས་ཅད་ཀྱང་ཕྱིན་ཅི་མ་ལོག་པར་མཐར་ཐུག་པ་ནི་རྫོགས་པ་ཆེན་པོ་ཡིན་ཞིང་དེ་ལས་བོགས་དབྱུང་དུ་མེད་པའི་ཕྱིར་རོ། །ཆོས་ཐམས་ཅད་བཏགས་པ་ཙམ་སྟེ་རང་བཞིན་མ་གྲུབ་པར་བསྟན་པའི་ཕྱིར། ཆོས་རྣམས་མིང་དུ་བཏགས་པ་ཙམ། །ཞེས་བྱ་བ་ལ་སོགས་པ་སྨོས་ཏེ། དེ་ལ་བཏགས་པ་ཙམ་ཞེས་བྱ་བ་ནི། ཚིག་གི་དོན་དགག་པ་སྟེ། འདི་ལྟར་བུམ་པ་བུམ་པ་ཞེས་བརྗོད་པའ་ིཚིག་གི་དོན་ནི། བུམ་པའི་ཁ་དོག་དང་དབྱིབས་དང་ཆུ་འཛིན་པའི་རེག་བྱ་ལ་སོགས་པ། ཚོགས་པ་གཅིག་པས་བསྡུས་པ་བློས་རྣམ་པར་མ་ཕྱེ་བ་ཙམ་ལ་བུམ་པའི་རྫས་སུ་འཛིན་ཏེ་ངེས་ཚིག་གི་དོན་བྱེད་དོ། །དེ་ཉིད་ལ་བློ་དང་ལྡན་པས་བལྟས་ན། གཟུགས་དང་དྲི་དང་རོ་དང་རེག་བྱའི་ཆོས་ཙམ་ལས་མ་གཏོགས་པ་བུམ་པའི་ཚིག་གི་དོན་མེད་དེ། གཟུགས་ལ་སོགས་པ་དེ་དག་ཀྱང་བུམ་པ་ཞེས་བྱ་བའི་ཚིག་གི་དོན་མ་ཡིན་ཏེ། དེ་བས་ན་མིང་དེ་ནི་དོན་མེད་པ་ཡིན་པས། མིང་ཉིད་ཀྱང་དོན་རྗོད་བྱེད་དང་ཁྲིད་བྱེད་དང་མཚོན་བྱེད་དུ་མི་རུང་བའི་ཕྱིར་མིང་ཉིད་ཀྱང་མ་ཡིན་ཏེ། དཔེར་ན་རི་བོང་གི་རྭ་ཞེས་བྱ་བའི་ཚིག་གི་དོན་མེད་པའི་ཕྱིར་མིང་དེ་ཡང་རྗོད་བྱེད་དུ་མི་རུང་སྟེ། རྫུན་པ་ཡིན་པ་བཞིན་ནོ། །འོ་ན་སྟོན་པས་ཆོས་སྣ་ཚོགས་སུ་བསྟན་པ་ཅི་ལ་དགོངས་ཤེ་ན། དེ་ནི་རེ་ཞིག་རྫུན་པ་ཉིད་ཀྱི་དབང་དུ་མཐུན་ཕྱོགས་ཙམ་དུ་སྣང་བས། དེ་ལ་བརྟེན་ནས་རིམ་གྱིས་ཟབ་མོའི་དོན་ལ་འཇུག་པར་འགྱུར་བའི་ཕྱིར། དེ་ཙམ་གྱི་དབང་དུ་ཡང་བསྟན་པར་ཟད་མོད་ཀྱི། ཚིག་དང་ཚིག་གི་དོན་ལ་བློ་བརྟན་པར་མི་བྱའོ། །ཞེས་བསྟན་པ་ཡིན་ནོ། །ད་ནི་བསྡུས་པའི་དོན་བཤད་པའི་ཕྱིར། ཨ་ཧོཿ སྲིད་རྩའི་ཉེས་དམིགས་བདག་ཏུ་རྟོག་ལས་འཕྲོས། ཞེས་བྱ་བ་ལ་སོགས་པ་གསུངས་ཏེ། འདི་དག་ཀྱང་འཁོར་བའི་ཆོས་ཐམས་ཅད་ནི་སེམས་རང་སྣང་བ་ཡིན་ལ། མྱ་ངན་ལས་འདས་པའི་ཆོས་ཐམས་ཅད་ཡེ་ཤེས་རང་སྣང་བར་བསྟན་པའོ། །དེ་ལ་ཨ་ཧོཿཞེས་བྱ་བ་ནི་སྐད་སོར་བཞག་པ་སྟེ། ཨེ་མ་ཧོཿཞེས་བྱ་བའོ། །འབྱུང་བར་གྱུར་པས་སྲིད་པ་སྟེ་ཉེ་བར་ལེན་པའི་ཕུང་པོ་ལྔ་ཉིད་དོ། །དེ་ཉིད་འཁོར་བ་སྟེ་དེའི་ཉེས་དམིགས་ཐམས་ཅད་ཀྱི་རྩ་བ་ནི། བདག་ཏུ་རྟོག་ལས་འཕྲོས་སོ་ཞེས་བྱའོ། །དེ་ཡང་འཇིག་ཚོགས་ལ་ལྟ་བའི་དབང་གིས་ཡང་དག་པ་མ་ཡིན་པའི་ཀུན་ཏུ་རྟོག་པ་སྐྱེའོ། །དེའི་དབང་གིས་ལས་དང་ཉོན་མོངས་པ་མངོན་པར་འདུ་བྱེད་དོ། །འདུ་བྱེད་སྣ་ཚོགས་ཀྱི་བག་ཆགས་སྨིན་པའི་དབང་གིས། སྐྱེ་བ་སྣ་ཚོགས་སུ་ལུས་དང་གནས་དང་། ལོངས་སྤྱོད་དང་སྡུག་བསྔལ་ལ་སོགས་པ་མངོན་པར་གྲུབ་པར་སྣང་སྟེ། དེ་དག་ཀྱང་ལོག་རྟོག་ཉིད་དེ་ལྟ་བུར་གྲུབ་པར་སྣང་བ་ཙམ་དུ་ཟད་ཀྱི། ཇི་ལྟར་སྣང་བ་དེ་ལྟར་གྲུབ་པ་ནི་ཡོད་པ་མ་ཡིན་ནོ། །འཕགས་པའི་གནས་སྐབས་ན་ཡང་ཡེ་ཤེས་རང་སྣང་བ་ཙམ་སྟེ། དེ་ཉིད་བསྟན་པའི་ཕྱིར། སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་སྒྱུར། །ཞེས་བྱ་བ་ལ་སོགས་པ་སྨོས་ཏེ། དེ་ལ་སྟོང་པ་ཉིད་བདག་མེད་པའི་དོན་མཁྱེན་ཅིང་ཐུགས་སུ་ཆུད་པ་ནི་ཡེ་ཤེས་རང་རིག་པ་སྟེ། དེས་དམིགས་པར་བྱ་བའི་ཆོས་ཉིད་དང་། དམིགས་པར་བྱེད་པའི་ཡེ་ཤེས་གཉིས་དབྱེར་མེད་པར་རྟོགས་ཤིང་དབང་དུ་གྱུར་པའི་ཚེ་དེས་བྱིན་རླབས་ལས། ངོ་མཚར་སྐུ་གསུམ་ཡོན་ཏན་ཞིང་ཁམས་ལས། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་པ་སྟེ། ཡེ་ཤེས་དེ་ཉིད་དེ་ལྟ་བུར་སྣང་བའམ། དེའི་བྱིན་རླབས་སོ་ཞེས་བཤད་པར་བྱའོ། །ཆོས་ཐམས་ཅད་གཏན་ལ་ཕབ་པའི་ལེའུ་ཞེས་བྱ་བ་ནི། ལེའུ་འདིར་གཞིའི་ཆོས་དང་། ལམ་གྱི་ཆོས་དང་། འབྲས་བུའི་ཆོས་དང་། དོན་དམ་པའི་ཆོས་དང་། བཤད་ཅིང་བསྟན་པའི་ཆོས་ཐམས་ཅད་ཀྱི་ཚུལ་མ་བསྟན་པ་མེད་དེ། རང་བཞིན་མཐར་མ་གཏུགས་པ་མེད་དེ། དེའི་ཆོས་ཐམས་ཅད་གཏན་ལ་ཕབ་པ་ཞེས་བྱའོ། །ཆོས་ཞེས་བྱ་བའི་ངེས་ཚིག་ནི། དྷརྨ་ཞེས་བྱ་བའི་སྒྲ་འཛིན་པའི་དོན་ལ་འཇུག་སྟེ། དེ་ཡང་ཤེས་བྱ་ཐམས་ཅད་ལ་ཆོས་ཞེས་བརྗོད་པའི་སྐབས་སུ་ནི་མཚན་ཉིད་འཛིན་པའི་ཆོས་ཞེས་བྱའོ། །ལམ་དང་འབྲས་བུ་དང་དོན་དམ་པ་ལ་འཇུག་པའི་ཚེ་ན་ནི་ལྟུང་བ་ལས་འཛིན་པའི་ཕྱིར་ཆོས་ཞེས་བྱའོ། །བཤད་ཅིང་བསྟན་པའི་གཞུང་ལ་འཇུག་པའི་ཚེ་ན་ནི་རིག་པ་འཛིན་པའི་ཕྱིར་ཆོས་ཞེས་བྱའོ། །ཡུལ་གྱི་འཇོག་ལུགས་ལ་འཇུག་པའི་ཚེ་ཡང་རིག་པ་འཛིན་པར་སྦྱར་རོ། །ཆོས་དང་ཆོས་ཅན་དུ་ཕྱེ་བའི་ཚེ་ན་ནི་འདི་ཉིད་གཞན་གྱིས་འཛིན་པའི་ཕྱིར་ཆོས་ཞེས་བྱའོ། །འདི་དག་ནི་ཆོས་ཀྱི་སྒྲ་འཇུག་པའི་ཚུལ་སྦྱར་བར་བྱའོ། །དེ་ཡན་ཆད་ནི་རྒྱལ་བ་རྣམས་ཀྱི་ཐུགས་རྗེ་ཆེན་པོའི་བྱིན་རླབས་ཇི་ལྟར་འཆར་བའི་ཚུལ་བསྟན་པའོ། །ལེའུ་གསུམ་པའོ།། ༈ །།ད་ནི་རྒྱུད་ཀྱི་དངོས་པོ་ལ་འཇུག་པ་སྟོན་ཏེ། དེ་ལ་དང་པོ་ཡི་གེ་སྒྱུ་འཕྲུལ་བསྟན་པ་ནི། གོང་དུ་བསྟན་པ་བཞིན་དུ་བྱ་བ་ཐམས་ཅད་ཀྱི་གཞིར་གྱུར་པ་ཡིན་པས། དང་པོ་ཡི་གེ་སྒྱུ་འཕྲུལ་ལས་བརྩམས་ཏེ་བསྟན་ནོ། །དེ་བསྟན་པའི་ཕྱིར། དེ་ནས་དེ་བཞིན་གཤེགས་པ་ཐམས་ཅད་དགོངས་པ་གཅིག་ཏུ་གྱུར་ནས། ཞེས་བྱ་བ་ལ་སོགས་པ་སྨོས་ཏེ། དེ་ལས་སངས་རྒྱས་ཐམས་ཅད་ལ་དགོངས་པ་ཐ་དད་མི་མངའ་མོད་ཀྱི། འོན་ཀྱང་སྐབས་འདིར་ཐམས་ཅད་ཡི་གེ་སྒྱུ་འཕྲུལ་གྱི་རང་བཞིན་དུ་སངས་རྒྱས་པར་བསྟན་པའི་ཕྱིར། དགོངས་པ་གཅིག་ཏུ་གྱུར་ཏོ་ཞེས་སྦྱར་རོ། །མཉམ་པ་ཆེན་པོའི་ཚུལ་རྡོ་རྗེ་དབྱིངས་སུ་ཞེས་བྱ་བ་ནི། སྐབས་འདིར་ཆོས་ཐམས་ཅད་དབྱེར་མེད་པའི་དགོངས་པའོ། །གཞན་དུ་ནི་སྐུ་དང་གསུང་དང་ཐུགས་རྡོ་རྗེའི་ཞིང་ཁམས་སུ་གྱུར་པ་དང་། ཐབས་དང་ཤེས་རབ་ཟུང་དུ་འབྲེལ་བ་ལྟ་བུ་ལ་འཇུག་གོ། །ཆོས་ཐམས་ཅད་མིང་ཙམ་དུ་གནས་པའི་ཞེས་བྱ་བ་ནི། གོང་དུ་ཆོས་རྣམས་མིང་དུ་བཏགས་པ་ཙམ་ཞེས་བྱ་བ་བཞིན་ནོ། །ཡི་གེ་དེ་ནི་སྐུ་གསུང་ཐུགས་རྡོ་རྗེ་ལས་ཕྱུང་བ་སྟེ་སྙིང་པོར་བསྟན་པའོ། །དེ་ལ་ཡི་གེ་ཞེས་བྱ་བའི་རང་གི་ངོ་བོ་ཅི་ཞིག་ཡིན་བརྟག་པ་ཡང་། གོང་དུ་སྔགས་དང་ཕྱག་བཤད་པའི་སྐབས་སུ་བསྟན་པ་བཞིན་ཏེ། བརྟག་པ་རྣམ་པ་དྲུག་ཏུ་འཇུག་གོ། །དེ་ཡང་འདི་ལྟར་ཐ་སྙད་ཀྱི་གནས་སྐབས་ལས་མི་ལྡན་པའི་འདུ་བྱེད་ཡིན་ནོ། །ཞེས་བརྟག་པ་དང་། རྒྱལ་བ་རྣམས་ཀྱི་ཆོས་ཀྱི་ཕྱག་སྟེ་དེའི་བརྡ་དང་མཚན་མར་གྱུར་པའོ་ཞེས་བརྟག་པ་དང་། དམ་ཚིག་ཅན་གྱི་སྐྱེ་བོས་ལྷར་བརྟགས་པའོ་ཞེས་བརྟག་པ་དང་། མཚན་མ་འདི་ཡང་བྱིན་རླབས་དང་ནུས་པ་ཅན་ཏེ། འདིས་སྐྱེ་བོ་རྣམས་ལ་མཚོན་ན་དེ་བཞིན་གཤེགས་པ་ཉིད་དུ་བྱིན་གྱིས་རློབ་པར་བྱེད་པའི་ཡི་གེ་ནི་སངས་རྒྱས་སོ་ཞེས་བརྟག་པ་དང་། དེ་བཞིན་གཤེགས་པའི་བྱིན་རླབས་དང་རྣམ་པར་སྨིན་པའི་ཆོས་འདྲེས་པའི་སྣང་བ་ཡིན་ནོ་ཞེས་བརྟག་པ་དང་། སངས་རྒྱས་ཀྱི་ཡེ་ཤེས་ཆེན་པོ་ཉིད་ཡི་གེར་བྱིན་གྱིས་བརླབས་པ་ཡིན་ཏེ། དེའི་ཕྱིར་སངས་རྒྱས་ཉིད་དོ་ཞེས་བརྟག་པ་སྟེ། བརྟག་པ་རྣམ་པ་དྲུག་གོ། །འདི་དག་ནི་ཁྱད་པར་དུ་བསྟན་པའི་དབང་དུ་བྱས་ནས། ཆོས་སོ་སོ་ནས་གྲགས་པའི་གཞུང་བརྟག་ཏུ་རུང་བ་རྣམས་བཀོད་པ་སྟེ། ཐུན་མོང་དུ་ནི་ཕུང་པོའི་སྐབས་སུ་བཤད་པ་བཞིན་ཆོས་ཐམས་ཅད་སངས་རྒྱས་གྲངས་མེད་པ་ཡིན་པས། མི་ལྡན་པའི་འདུ་བྱེད་དུ་གཏོགས་པའི་ཡི་གེ་ཉིད་ཀྱང་སངས་རྒྱས་ཡིན་པར་ཤེས་པར་བྱའོ། །དེ་ལ་དང་པོ་ཡི་གེ་བསྒོམ་པའི་ཐབས་བསྟན་པའི་ཕྱིར། ཨ། རབ་ཏུ་བརྟན་འགྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཞེས་བྱ་བ་ལ་སོགས་པ་གསུངས་ཏེ། འདི་ཡང་གནས་སྐབས་གཉིས་སུ་ཤེས་པར་བྱ་སྟེ། ལྷའི་སྐུ་བསྐྱེད་པའི་རྒྱུ་དང་ཐབས་སུ་བསྟན་པ་དང་། དངོས་གྲུབ་སྣ་ཚོགས་བསྒྲུབ་པའི་ཕྱིར་ཏིང་ངེ་འཛིན་སྦྱངས་པའི་ཐབས་སུ་བསྟན་པའོ། །དེ་ལ་ལྷའི་སྐུ་སྐྱེད་པར་བྱེད་པའི་ཚེ་ན་དང་པོ་རྣམ་པར་མི་རྟོག་དང་། སྙིང་རྗེ་ཆེན་པོའི་ཏིང་ངེ་འཛིན་ལས་བྱང་ཆུབ་སེམས་ཀྱི་གཟུགས་བརྙན། ཡི་གེ་ཨ་དཀར་པོ་ལས་གྱུར་པའི་ཟླ་བའི་དཀྱིལ་འཁོར་གྱི་སྟེང་ན། ཨཱ་ལ་སོགས་པ་སྒྲའི་ཡི་གེ་བཅུ་དྲུག་གིས་རིམ་པ་གཉིས་བསྐོར་བར་བསྒོམས་ཏེ། སྤྲོ་བ་དང་བསྡུ་བའི་སྦྱོར་བ་དང་ལྡན་པས་ཅུང་ཟད་གནས་པར་བྱའོ། །དེ་ནས་ཡི་གེ་ཨཱ་ལས་མིང་གི་ཡི་གེ་ཀ་ལ་སོགས་པ་འཕྲོས་ཏེ་འབྱུང་ནས། སྤྲོ་བ་དག་བསྡུ་བའི་སྦྱོར་བས། ཟླ་བའི་དཀྱིལ་འཁོར་གྱི་སྟེང་ན་ཉི་མའི་དཀྱིལ་འཁོར་ལ་ཀ་ལ་སོགས་པའི་མིང་གི་ཡི་གེའི་ཕྲེང་བ་རིམ་པ་གཉིས་ཀྱིས་བསྐོར་བས་མཚན་པ། ཨཱ་བཅུ་གཉིས་ཀྱི་སྙིང་པོ་ཅན་བསམས་ཏེ། དེ་དག་གི་སྙིང་པོའང་ཨཱ་དང་ཀྵ་ཉིད་དོ། དེ་ནི་མེ་ལོང་ལྟ་བུའི་ཡེ་ཤེས་ཀྱི་རང་བཞིན་ལས་ཐབས་དང་ཤེས་རབ་ཟུང་དུ་འབྲེལ་ཞིང་། སངས་རྒྱས་ཀྱི་ཆོས་ཐམས་ཅད་ཀྱི་གཟུགས་བརྙན་སྣང་བ། མཚན་དང་དཔེར་བྱད་བཟང་པོའི་ས་བོན་དང་བཅས་པ། ལྷའི་སྐུ་བསྐྱེད་པའི་གཞིར་གྱུར་པའོ། །དེ་ལས་སྐུ་ཇི་ལྟར་བསྐྱེད་པའི་ཚུལ་ནི། ལེའུ་བདུན་པའི་སྒོམ་ཁོག་གི་སྐབས་ལས་ཤེས་པར་བྱའོ། །གཉིས་པ་ཏིང་ངེ་འཛིན་སྦྱོང་བའི་ཚུལ་འདི་ཡིན་ཏེ། དང་པོར་བདག་ཉིད་ལྷའི་དཀྱིལ་འཁོར་བསྒོམ་པ་དང་། མཆོད་པའི་ཆོ་ག་དག་སྔོན་དུ་བྱས་ནས་དེའི་རྗེས་སུ་བདག་ཉིད་རང་གི་ལྷར་བསྒོམ་པའི་སྙིང་གར། ཉི་མ་དང་ཟླ་བའི་དཀྱིལ་འཁོར་གྱི་སྟེང་དུ་སྒྲའི་ཡི་གེ་དང་མིང་གི་ཡི་གེ་བསྒོམ་པ་སྔ་མ་བཞིན་དུ་གོམས་པ་བྱས་ཏེ། དེ་ཡང་རིམ་པ་ནི་དང་པོར་ཡི་གེ་ཨཱ་དཀར་པོ་ཕྲ་མོ་བརྟན་པར་གོམས་པར་བྱས་ནས། ཤིན་ཏུ་བརྟན་ཞིང་གསལ་བར་གྱུར་པ་དང་། དེ་ནས་སྤྲོ་བ་དང་བསྡུ་བའི་སྦྱོར་བ་སྔ་མ་བཞིན་དུ་བྱའོ། །དེ་བརྟན་པར་གྱུར་ནས། དེ་ལས་མིང་གི་ཡི་གེ་སྤྲོ་བསྡུ་སྔ་མ་བཞིན་དུ་བྱས་ཏེ། དེ་དག་ཤིན་ཏུ་གོམས་ཞིང་བརྟན་པར་གྱུར་པ་དང་། ལེའུ་ལྔ་པ་ནས་གསུང་པའི་དངོས་གྲུབ་སྣ་ཚོགས་ལ་སྦྱར་བར་བྱའོ། །དེ་ལ་དེ་བཞིན་གཤེགས་པ་རྣམས་ཀྱི་སྙིང་པོར་གྱུར་པ་ཐུགས་ལས་བྱུང་བ་ནི་འདི་རྣམས་ཏེ། ཨཱ་དང་ཀ་ལ་སོགས་པ་ཇི་སྐད་དུ་སྨོས་པ་རྣམས་སོ། །དེ་ལ་ཡི་གེ་ལྔ་བཅུ་ཐམ་པ་ལ། འདིར་ཡི་གེ་བཞི་བཅུ་རྩ་གཉིས་སུ་བསྡུས་པ་ནི་ལྷའི་དབང་དུ་གསུངས་པའོ། །དེ་ཇི་ལྟར་བསྡུས་ཤེ་ན། ཨཱ་རིང་པོ་ཤད་དུ་བསྡུས་སོ། །ཨཱཿརྣམ་པར་བཅད་པ་ནི་ཚེག་ཏུ་བསྡུས་སོ། །ཨྂ་སྣ་དང་ལྡན་པ་ནི་ཨཱོ་ལ་སྦྱར་ནས་ཨཱོྂ་དུ་བསྡུས་སོ། །མ་ནིང་གི་ཡི་གེ་བཞི་ནི་ར་དང་ལར་བསྡུས་ཏེ། ཡི་གེ་བཞི་བཅུ་རྩ་གཉིས་སུ་བསྡུས་སོ། །གཅིག་ལྷག་པ་ནི་ཡི་གེ་བསྡུས་པའི་དབང་དུ་གསུངས་པ་ཡིན་པས། ཨཱོྂ་སྔ་མའི་གྲོགས་སུ་སྦྱར་བར་བྱའོ། །ཨི་ལ་སོགས་པའི་རིམ་པ་འོག་ཏུ་བཀོད་པ་ནི་ལྷའི་དབང་དུ་གསུངས་པའོ། །འདི་དག་ཕྱུང་བས་ཞེས་བྱ་བ་ལ་སོགས་པ་ནི། ཡི་གེའི་མཐུ་བསྟན་པ་སྟེ། སངས་རྒྱས་རྣམས་ཀྱིས་ཏིང་ངེ་འཛིན་ཉིད་དེར་འཕྲུལ་པའི་ཕྱིར་རོ། །ད་ནི་ཡི་གེའི་དོན་བསྟན་པར་བཞེད་པ་ལས། དང་པོ་ཡི་གེའི་རང་བཞིན་དེ་བཞིན་གཤེགས་པ་ཉིད་དུ་བསྟན་པའི་ཕྱིར། ཨ་ནི་སྟོང་དང་མི་སྟོང་གི། །དབུ་མའང་དམིགས་སུ་ཡོད་མ་ཡིན། །ཐམས་ཅད་མིང་ཙམ་སངས་རྒྱས་ཀུན། །ཡི་གེ་ཕྲེང་བ་ཉིད་ལ་གནས། །ཞེས་གསུངས་ཏེ། དེ་ལ་ཡི་གེ་ཨ་ནི་ཆོས་ཐམས་ཅད་མ་སྐྱེས་པ་སྟོན་པའི་སྒོ་སྟེ། འདི་ལྟར་བཀའ་ཕལ་མོ་ཆེ་ནས། ཨཱོྂ་ཨ་ཀ་རོ་མུ་ཁཾ་སརྦ་དྷརྨ་ནཱཾ་ཨཏྱ་ནུ་ཏ་པ་ན་ཏ་ཞེས་གསུངས་པ་ནི། གཟོད་མ་ནས་མ་སྐྱེས་པའི་ཕྱིར་ཨ་ནི་ཆོས་ཐམས་ཅད་ཀྱི་སྒོའོ་ཞེས་བསྟན་པ་སྟེ། དེ་བས་ན་ཆོས་ཐམས་ཅད་སྐྱེ་བ་མེད་པར་བསྟོན་པའི་སྒོ་ཡིན་ཏེ། མཚན་ཡང་དག་པར་བརྗོད་པ་ལས་ཀྱང་། ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་སྟེ། །ཁོང་ནས་འབྱུང་བ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཚིག་ཀུན་རབ་ཏུ་གསལ་བར་བྱེད། །ཅེས་གསུངས་པ་ལྟ་བུའོ། །དེ་བས་ན་ཡི་གེ་ཨ་ནི་ཆོས་སྐྱེ་བ་མེད་པའི་དོན་དང་སྒོ་ཡིན་པས། དེ་ནི་དངོས་པོ་ཡོད་པ་དང་མེད་པ་དང་དབུ་མ་རྣམས་ལས་འདས་པའི་ཕྱིར། རང་གི་ངོ་བོ་མི་གྲུབ་པས་མིང་ཙམ་མོ། །སངས་རྒྱས་ཐམས་ཅད་ཀྱང་མཚན་ཉིད་མེད་པའི་མིང་ཙམ་སྟེ། མཚན་ཉིད་དབྱེར་མེད་པའི་ཕྱིར་སངས་རྒྱས་ཐམས་ཅད་ཡི་གེ་ཕྲེང་བ་ལ་གནས་སོ། །སངས་རྒྱས་རྣམས་མཚན་ཉིད་མེད་པ་ཡང་། སྡོང་པོ་བཀོད་པའི་མདོ་ལས། ཇི་སྙེད་མཚན་ཉིད་རྣམ་བཞག་པ། །དེ་དག་བྱིས་པའི་སྤྱོད་ཡུལ་ཏེ། །གང་ཞིག་མཚན་ཉིད་ཀུན་མེད་པའི། །སངས་རྒྱས་རྣམས་ནི་མི་མཐོང་ངོ་། །ཞེས་གསུངས་པ་ལྟ་བུའོ། །ད་ནི་ཡི་གེ་ཨའི་སྒོ་ནས་སངས་རྒྱས་ཐམས་ཅད་ཀྱང་ཡི་གེ་ལ་གནས་པར་བསྟན་པ་སྟེ། ཡི་གེ་ཨ་ཙམ་སངས་རྒྱས་པས་ཡི་གེ་གཞན་སངས་རྒྱས་སུ་ཇི་ལྟར་གྲུབ་སྙམ་དུ་རྟོག་པ་དག་གསལ་བའི་ཕྱིར་ཡི་གེ་ཨ་ཉིད་སངས་རྒྱས་པས་ཡི་གེ་ཐམས་ཅད་སངས་རྒྱས་སུ་བསྟན་པའི་ཕྱིར། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་ཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །ཞེས་གསུངས་ཏེ། དཔེར་ན་འབྱུང་བ་ལས་གྱུར་པའི་གཟུགས་ཐམས་ཅད་འབྱུང་བ་ཆེན་པོའི་རྣམ་པ་སྐྱེ་བ་བཞིན། ཡི་གེ་ཐམས་ཅད་ཨ་ལས་གྱུར་པ་ཨའི་རྣམ་པར་སྐྱོ་བ་སྟེ། འདི་ལྟར་ངག་གི་གཞི་མོ་ནི་ཨའོ། །དེ་ཡང་ངག་གི་འདུ་བྱེད་ཀྱི་དབང་གིས། ཨ་ཉིད་བཀུག་པ་ནི་ཨི། སྨད་པ་ནི་ཨུ། དེ་ལྟར་རྩ་བ་གསུམ་མོ། །ཨ་དང་ཨི་སྦྱར་བ་ནི་ཨེ། ཨ་དང་ཨུ་སྦྱར་བ་ནི་ཨོ། བསྒྲིམས་པས་རྀ། གློད་པས་ལྀ། དེ་དག་རེ་རེ་ལའང་རིང་ཐུང་གི་དབང་གིས་ཕྱེ་བས་སྒྲའི་ཡི་གེ་བཅུ་བཞི། སྣ་དང་ལྡན་པ་ཨྂ། རྣམ་པར་བཅད་པ་ཨཿསྟེ། དེ་ལྟར་བཅུ་དྲུག་ཏུ་འགྱུར་རོ། །ཡང་ཨའི་སྒྲ་དེ་ཉིད་མགུལ་བའི་གནས་དང་འཕྲད་པར་གྱུར་པ་ལས་ཀ །དེ་ཅུང་ཟད་ཞུམ་ཞིང་སྤྱི་བོའི་གནས་སུ་འཕྲད་པར་གྱུར་བ་ལས་ཁ། དེ་ཅུང་ཟད་ཞུམ་པ་ག །དེ་ཁོག་སྦུགས་ཀྱི་གནས་སུ་འཕྲད་པར་གྱུར་པས་གྷ། དེ་སྣ་དང་ལྡན་པས་ང་སྟེ། །དེ་བཞིན་དུ་གཞན་ལ་ཡང་ཤེས་པར་བྱའོ། །དེ་ལ་ཙ་ཚ་ཛ་ཛྷ་ཉ་རྣམས་ནི་ཨ་དེ་ཉིད་རྐན་གྱི་དབུས་དང་ལྕེའི་དཀྱིལ་དུ་འཕྲད་པར་གྱུར་པའོ། །ཊ་ཋ་ཌ་ཌྷ་ཎ་རྣམས་ནི་ཨ་དེ་ཉིད་ལྕེའི་རྩེ་མོར་ཉེ་བར་གྱུར་པ་དང་རྐྱེན་གྱིས་མཐར་ཉེ་བར་འཕྲད་པ་ལས་སྤྱི་བོའི་སྒྲ་ཕྱུང་བའོ། །ཏ་ཐ་ད་དྷ་ན་རྣམས་ནི་ཨ་དེ་ཉིད་ལྕེའི་རྩེ་མོ་དང་སོ་འཕྲད་པ་ལས་གྱུར་པའོ། །པ་ཕ་བ་བྷ་མ་རྣམས་ནི་ཨ་དེ་ཉིད་མཆུ་དང་འཕྲད་པ་ལས་གྱུར་པའོ། །ནང་ཚིགས་ཀྱི་བྱེ་བྲག་ནི་ཀ་ལ་སོགས་པ་བཞིན་ནོ། །ཡ་དང་ས་ནི་རྐན་གྱི་སྡེའོ། །ཝ་ནི་མཆུའི་སྡེའོ། །ར་དང་ཤ་ནི་སྤྱི་བོའི་སྡེའོ། །ཧ་ནི་མགུལ་བའི་སྡེའོ། །ཀྵ་ནི་མགུལ་བ་དང་སྤྱི་བོའི་ཆར་གཏོགས་པ་སྟེ། དེ་བས་ན་ཨ་ལས་གྱུར་པའི་ཡི་གེ་འདི་དག་ཐམས་ཅད་ཀྱང་ཨའི་སྒྲ་ལས་མ་འདས་ཤིང་དེས་ཁྱབ་པ་སྟེ། པི་ཝཾ་གི་རང་བཞིན་གྱི་སྒྲས། པི་ཝཾ་གི་དེའུ་མཐོ་དམན་དྲག་ཞན་ཐམས་ཅད་ལ་ཁྱབ་ཅིང་བསྡུས་པ་བཞིན་ནོ། །དེ་བས་ན། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་གཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །ཞེས་གསུངས་པ་ཡིན་ནོ། །གང་གི་ཕྱིར་ན་ཡི་གེ་ཐམས་ཅད་ཨའི་སྒྲ་ཉིད་ཀྱིས་བསྡུས་པ་དེ་ཉིད་ཀྱི་ཕྱིར་རོ། །ཡི་གེ་ཨ་སངས་རྒྱས་པའི་རང་བཞིན་དུ་ངེས་པར་གྱུར་ན། ཡི་གེ་ཐམས་ཅད་སངས་རྒྱས་སུ་མི་འགྱུར་བའི་གནས་མེད་པས། མངོན་རྫོགས་རྒྱལ་པོ་དེ་ཉིད་ངེས། །ཞེས་གསུངས་པ་བཞིན་ནོ། །ད་ནི་ཡི་གེའི་ལས་དང་ཡོན་ཏན་གྱི་རྩལ་བསྟན་པའི་ཕྱིར། ཨེ་མ་ཧོ་ངོ་མཚར་ཡ་མཚན་གྱི། །འཕྲུལ་ཆེན་བཞི་བཅུ་རྩ་ལྔའི་མིང་། །ཚིག་རྣམས་མ་ལུས་འཛིན་པའི་གནས། །སྣ་ཚོགས་དོན་ཆེན་སྨྲ་ཞིག་སྟོན། །ཞེས་གསུང་པ་སྟེ། ཡི་གེ་བཞི་བཅུ་རྩ་ལྔ་ནི། རྫུ་འཕྲུལ་བསམ་གྱི་མི་ཁྱབ་པས་ངོ་མཚར་ཆེ་བའི་དོན་ནོ། །དེ་ལ་བཞི་བཅུ་རྩ་ལྔ་ནི། མགོ་ཨི་གླང་པོ་ཆེའི་སྣ་འདྲ་བ། ཤད་དེ་ཨཱ་རིང་པོ་མདའ་ལྟ་བུ་དང་། ཚེག་སྟེ་ཨཱཿདབང་ཕྱུག་ཆེན་པོའི་མིག་ལྟ་བུ་སྟེ། སྔ་མ་ལས་དེ་གསུམ་ལས་ལྷག་པར་བསྟན་པའོ། །ཚིག་རྣམས་མ་ལུས་འཛིན་པའི་གནས། །ཞེས་བྱ་བ་ནི། དཔེར་ན་གཟུགས་ཀྱི་མཐར་ཐུག་པ་རྡུལ་ཕྲ་རབ་ཡིན་པས། རྡུལ་འདུས་པ་ནི་གོང་བུ་ཡིན་ཏེ། དེ་བས་ན་རྡུལ་ཕྲ་རབ་ནི་གོང་བུ་འཛིན་པའི་གནས་ཡིན་ནོ། །དེ་བཞིན་དུ་མིང་གི་མཐར་ཐུག་པ་ནི་མིང་གི་མཐའི་ཡི་གེ་ཡིན་པས། དེ་བས་ན་མིང་གི་མཐའི་ཡི་གེ་འདུས་པ་ལས། དབྱངས་ཡིག་གཅིག་གིས་བཅིངས་པའི་ཡི་གེ་འགྲུབ་བོ། །དེ་འདུས་པར་གྱུར་པས་ཀ་བ་དང་བུམ་པ་ལ་སོགས་པའི་དངོས་པོ་རྣམས་ཀྱི་མིང་འགྲུབ། དེ་འདུས་པ་ལས་ཚིག་གི་ཚོགས་མ་ལུས་པ་འགྲུབ་སྟེ། དེའི་ཕྱིར་ཡི་གེ་རྣམས་ཚིག་མ་ལུས་པར་འཛིན་པའི་གནས་ཡིན་ནོ། །དེ་ཉིད་ཀྱིས་ན། སྣ་ཚོགས་དོན་ཆེན་སྨྲ་ཞིང་སྟོན། །ཞེས་བྱ་སྟེ། མིང་དང་ཚིག་གསལ་བར་བྱེད་པའི་དོན་བརྗོད་པའི་ཕྱིར། ཆོས་ཉིད་དང་ཕན་པས་བསྡུས་པའི་དོན་ཆེན་པོ་ཐམས་ཅད་སྟོན་པར་བྱེད་པའི་གནས་ཡིན་ནོ། །དེ་ཉིད་ཇི་ལྟར་སྟོན་པར་བྱེད་པ་བསྟན་པའི་ཕྱིར། དངོས་མེད་ཡི་གེའི་རང་བཞིན་སེམས། །བདག་མེད་མཐའ་བྲལ་མི་དམིགས་ཀྱང་། །དབྱིབས་དང་ཁ་དོག་མིང་ཚོགས་ཀྱི། །རོལ་པ་ཅིར་ཡང་སྤྲུལ་ཞིག་སྟོན། །ཞེས་བྱ་སྟེ། འདི་ལྟར་ཡི་གེའི་རང་བཞིན་སེམས་ཉིད་ཡིན་པས། སེམས་ཀྱི་རང་བཞིན་ཇི་ལྟ་བ་བཞིན་ཡི་གེའི་རང་བཞིན་ཡང་སྤྲོས་པ་དང་བྲལ་མོད་ཀྱི། འོན་ཀྱང་འཕྲུལ་པ་ཙམ་དུ་དབྱིབས་དང་ཁ་དོག་དང་མིང་གི་སྒོ་ནས། སངས་རྒྱས་ཀྱི་མཛད་པ་སྒྲུབ་པར་བྱེད་དོ། །ཅེས་པའོ། །དེ་ལྟར་ཚིགས་སུ་བཅད་པ་སྔ་མ་གཉིས་ཀྱིས་ནི། ཡི་གེ་སངས་རྒྱས་ཀྱི་རང་བཞིན་དུ་བསྟན་ལ། ཕྱི་མ་གཉིས་ཀྱིས་ནི་ཡི་གེ་རྣམས་ཀྱིས་སངས་རྒྱས་ཀྱི་མཛད་པ་ཇི་ལྟར་སྒྲུབ་པར་བྱེད་པའི་ཚུལ་བསྟན་ནོ། །དེ་ལ་ཡི་གེ་རྣམས་ཀྱི་དབྱིབས་དང་ཁ་དོག་དང་མིང་གི་སྒོ་ནས་སངས་རྒྱས་ཀྱི་མཛད་པ་བསྒྲུབ་པ་ཡང་། ཐུན་མོང་དུ་ནི་གླེགས་བམ་ལ་བརྟེན་ནས་མཛད་པ་བསྒྲུབ་པ་ཐམས་ཅད་དོ། །བྱེ་བྲག་ཏུ་ནི་དཔའ་བོ་ཆེན་པོའི་ཏིང་ངེ་འཛིན་ཡན་ལག་ལྔ་དང་ལྡན་པ་དེ་ཉིད། ཐབས་ལ་མཁས་པས་གསང་སྔགས་སུ་བྱིན་གྱིས་བརླབས་ཏེ། འདི་ལྟར་ཨ་བྷི་ར་ཧཱུཾ་ཁཾ་ཞེས་བྱིན་གྱིས་བརླབས་ཏེ། དེ་ཡང་རང་ཐད་དུ་ན་ཨ་བྷི་ར་ཞེས་བྱ་བ་ནི། དཔའ་བོ་ཆེན་བོ་སྟེ་མིང་ངོ་། །ཧཱུཾ་ཁཾ་ཞེས་བྱ་བ་ནི། དེ་བྱིན་གྱིས་རློབ་པར་བྱེད་པའི་སྙིང་པོའོ། །ཡི་གེ་ཡན་ལག་སྔ་སོ་སོར་ཕྱེ་ནས། དཔའ་བོ་ཆེན་པོའི་ཏིང་ངེ་འཛིན་ཡན་ལག་ལྔ་དང་ལྡན་པར་སྟོན་པར་བྱེད་ལ། དེ་ཡང་བདུད་བཞི་ལས་རྒྱལ་བས་དཔའ་བོ་ཆེན་པོ་ཞེས་བྱ་བའི་མིང་ཡང་གྲུབ་པར་བྱེད་དོ། །དེ་ལ་ཡན་ལག་ནི་ཨ་ནི་སྐྱེ་བ་མེད་པའི་སྒོ་སྟེ། ཏིང་ངེ་འཛིན་གྱི་ཡན་ལག་སྐྱེ་བ་མེད་པས་ནི་འཆི་བདག་གི་བདུད་ལས་རྒྱལ་ལོ། །དེ་བཞིན་དུ་བྷི་ནི་མི་རྟོག་པའི་སྒོ་སྟེ། ཡན་ལག་དེས་ལྷའི་བུ་བདུད་ལས་རྒྱལ་ལོ། །ར་ནི་བདུད་དང་བྲལ་བའི་སྒོ་སྟེ། ཡན་ལག་དེས་ཉོན་མོངས་པའི་བདུད་ལས་རྒྱལ་ལོ། །ཧཱུྂ་ནི་མི་ཤིགས་པའི་སྒོ་སྟེ། ཡན་ལག་དེས་ཕུང་པོའི་བདུད་ལས་རྒྱལ་ལོ། །ཁཾ་ནི་ནམ་མཁའ་ལྟ་བུའི་མཚན་ཉིད་གྱི་སྒོ་སྟེ། བདུད་བཞི་ལས་རྒྱལ་བའི་ཏིང་ངེ་འཛིན་དེ་ཉིད་ཀྱི་སྤྱིའི་མཚན་ཉིད་དོ། །འདི་ལྟ་བུ་ནི་དཔའ་བོ་ཆེན་པོའི་ཏིང་ངེ་འཛིན་དེ་ཉིད་ཡི་གེའི་མིང་དུ་བྱིན་གྱིས་བརླབས་ཏེ། མིང་གི་སྒོ་ནས་སངས་རྒྱས་ཀྱི་མཛད་པ་སྒྲུབ་པར་བྱེད་པའོ། །དབྱིབས་དང་ཁ་དོག་གི་སྒོ་ནས་བྱེད་པའི་ཚུལ་ནི། ཨ་ནི་ཨ་ལ་ཡང་སའི་དཀྱིལ་འཁོར་ཏེ། ཁ་དོག་སེར་པོ་དང་དབྱིབས་གྲུ་བཞིར་བྱིན་གྱིས་བརླབས་ནས། རྒྱས་པའི་ལས་དང་དངོས་གྲུབ་ལ་སྦྱར་རོ། །དེ་བཞིན་དུ་བྷི་ནི་བ་རུ་ན་ཆུའི་དཀྱིལ་འཁོར་ཏེ། ཁ་དོག་དཀར་པོ་དང་དབྱིབས་ཟླུམ་པོའི་ཚུལ་གྱིས་འགྲོ་བའི་དོན་བྱེད་དོ། །ར་ནི་ར་བི་མེའི་དཀྱིལ་འཁོར་ཏེ། གྲུ་གསུམ་དམར་པོའི་ཚུལ་གྱིས་སོ། །ཧཱུྂ་ནི་བ་ཡུ་རླུང་གི་དཀྱིལ་འཁོར་ཏེ། ཟླ་གམ་ནག་པོའི་ཚུལ་གྱིས་སོ། །ཁཾ་ནི་ནམ་མཁའི་རང་བཞིན་གྱི་ཚུལ་གྱིས་ཏེ། འདི་ལྟ་བུ་ནི་ཏིང་ངེ་འཛིན་དེ་ཉིད་དབྱིབས་དང་ཁ་དོག་ཏུ་བྱིན་གྱིས་བརླབས་ཏེ། སངས་རྒྱས་ཀྱི་མཛད་པ་གྲུབ་པར་བྱེད་པའི་ཚུལ་ཡིན་ནོ། །དེ་བཞིན་དུ་གསང་སྔགས་ཀྱི་ཡི་གེ་ཐམས་ཅད་ལ་ཡང་སྦྱར་ཏེ། རྟོག་པ་ཞིབ་མོ་རྣམས་ནས་ཇི་སྐད་དུ་བཤད་པ་ལྟ་བུའོ། །དེ་ལྟར་ཡི་གེའི་ལས་དང་ཡོན་ཏན་གྱིས་སངས་རྒྱས་ཀྱི་མཛད་པ་སྒྲུབ་པ་ཡིན་པས། ཡི་གེ་རྣམས་སངས་རྒྱས་ཡིན་དུ་ནི་རུང་ན། ཡི་གེ་བཞི་བཅུ་རྩ་གཉིས་ལ་སངས་རྒྱས་གྲངས་མེད་པ་ཇི་ལྟར་རྫོགས་སུ་རུང་ཞེ་ན། དེའི་ཕྱིར། ཕྱོགས་བཅུ་དུས་བཞིར་གཤེགས་པ་ཡི། །ཡེ་ཤེས་སེམས་དཔའི་སྐུ་གསུང་ཐུགས། །དཀྱིལ་འཁོར་བཞི་བཅུ་རྩ་ལྔ་ཉིད། །ཡི་གེ་མགོ་ནས་ཀྵ་ལ་རྫོགས། །ཞེས་གསུངས་ཏེ། ཕྱོགས་བཅུའི་འཇིག་རྟེན་གྱི་ཁམས་ན་འགྲོ་བ་སྣ་ཚོགས་བསམ་གྱིས་མི་ཁྱབ་པ། ལུས་སྣ་ཚོགས་པ། གནས་སྣ་ཚོགས་པ། སྤྱོད་ཡུལ་སྣ་ཚོགས་པ། ཁམས་དང་བག་ལ་ཉལ་དང་བསམ་པ་སྣ་ཚོགས་པ་ཐམས་ཅད་ཀྱང་། ཕུང་པོ་ཁམས་དང་སྐྱེ་མཆེད་ཙམ་དུ་འདུས་ལ། དེ་བཞིན་དུ་སངས་རྒྱས་བསམ་གྱིས་མི་ཁྱབ་པ་ཐམས་ཅད་ཀྱང་རིགས་དྲུག་གིས་བསྡུས་པའི་དཀྱིལ་འཁོར་བཞི་བཅུ་རྩ་གཉིས་དང་། ཐབས་དང་ཤེས་རབ་དང་། དེ་གཉིས་སུ་མེད་པས་བསྡུས་པ་འདི་དག་ཙམ་དུ་འདུས་པས། ཡི་གེ་མགོ་ནས་ཀྵ་ལ་རྫོགས། །ཞེས་སྨོས་སོ། །ད་ནི་ཡི་གེའི་ངེས་ཚིག་བསྟན་པའི་ཕྱིར། སེམས་ཀྱི་རང་བཞིན་ཡི་གེ་ཞེས་བྱ་བ་ནས། དབྱིངས་ལ་དབྱིངས་ཀྱིས་བྲིས་པས་ན། །ཡི་གེ་ཞེས་ནི་དེ་ཕྱིར་བརྗོད། །ཅེས་བྱ་བའི་བར་དག་གསུངས་ཏེ། དེ་ལ་གཙུག་ལག་ཐུན་མོང་དུ་གྲགས་པ་ནི། ཨཀྵ་ར་སྟེ། ཡི་གེ་རྣམས་ལ་མིང་རེ་རེ་ལས་མ་གཏོགས་པ་དངོས་པོ་རྣམས་ཀྱི་མིང་བཞིན་དུ། མིང་གི་རྣམ་གྲངས་དུ་མར་མི་འགྱུར་བའི་ཕྱིར་ཡི་གེ་ཞེས་བྱའོ། །ཡང་བྷྱ་ཛ་ན་གསལ་བྱེད་དང་ཁྲིད་བྱེད་ཀྱི་དོན་ཏེ། མིང་དང་ཚིག་གསལ་བར་བྱེད་པའི་ཕྱིར་རོ། །བརྣ་ནི་བརྗོད་པ་སྟེ། མིང་དང་ཚིག་ལ་བརྟེན་ནས་དོན་བརྗོད་པར་བྱེད་པའི་ཕྱིར་རོ། །སྐབས་འདིར་ནི་སེམས་ཀྱང་ཡི་གེ་བཞིན་རང་བཞིན་དམིགས་སུ་མེད་པ་ལས་སྒྱུ་མའི་ཆོ་འཕྲུལ་དངོས་གྲུབ་སྣ་ཚོགས་འབྱུང་ཞིང་འགྲུབ་པར་བྱེད་པ་ནི་དོན་གསལ་བའི་ཤེས་རབ་དང་ཏིང་ངེ་འཛིན་ཡིན་ཏེ། དེ་ལྟར་ན་དེའི་ཡུལ་དུ་ཡེ་ཤེས་རང་སྣང་བའི་ཡི་གེ་རྣམས་གསལ་བར་གྱུར་པ་ཉིད་ལ། དབྱིངས་ལ་དབྱིངས་ཀྱིས་བྲིས་པས་ན། །ཡི་གེ་ཞེས་ནི་དེ་ལ་བརྗོད། །ཅེས་བྱའོ། །ད་ནི་ལྷ་དང་ཡིག་འབྲུ་སྦྱོར་བ་སྟོན་ཏེ། དེ་ཡང་དང་པོར་སྤྱིར་འཇུག་པའི་ཡི་གེ་དང་དཀྱིལ་འཁོར་གསུམ་བསྟན་པའི་ཕྱིར། མགོ་ནི་མ་ནོར་ལམ་ཡིན་ཏེ། །ཏིག་ནི་ཤེས་རབ་མིང་དུ་སྨྲ། །ཤད་ནི་ཐབས་ཆེན་ཚིགས་སུ་གཅོད། །ཅེས་སྨོས་ཏེ། འདིར་ཡི་གེ་གསུམ་གྱི་མིང་དང་དོན་དང་ལས་སྟོན་ཏེ། དེ་ལ་མིང་གསུམ་ནི། མགོ་ནི་ཏིག་ནི་ཤད་ནི་ཞེས་བྱ་བ་སྟེ། དེ་ལ་མགོ་ནི་ཨི་གླང་པོ་ཆེའི་སྣ་འདྲ་བའོ། ཏིག་ནི་ཨཱཿདབང་ཕྱུག་ཆེན་པོའི་མིག་འདྲ་བའོ། །ཤད་ནི་ཨཱ་རིང་པོ་མདའ་ལྟ་བུའོ། །དེ་ལྟར་མིང་གསུམ་པོ་དེའི་དོན་གསུམ་ནི་མ་ནོར་ཞེས་བྱ་བ་དང་། ཤེས་རབ་ཅེས་བྱ་བ་དང་། ཐབས་ཆེན་ཞེས་བྱ་བ་སྟེ། དེ་ལ་ཨི་གླང་པོ་ཆེའི་སྣ་ལྟ་བུའི་དོན་ནི། ཨ་སྟྲི་ལིངྒ་གཟུངས་ཀྱི་རང་བཞིན་ཏེ། ཐབས་དང་ཤེས་རབ་ཟུང་དུ་འབྲེལ་བ་མ་ནོར་བའི་དོན་ཡིན་པར་མིང་གི་སྒོ་ནས་ཀྱང་སྟོན་པར་བྱེད་ལ། གླང་པོ་ཆེའི་སྣ་ཡི་ལྕགས་ཀྱུ་ལྟ་བུའི་དབྱིབས་ཀྱི་སྒོ་ནས་ཀྱང་གཟུངས་ཀྱི་ཕྱག་རྒྱར་བསྟན་ཏོ། །ཨཱཿདབང་ཕྱུག་ཆེན་པོའི་མིག་ལྟ་བུའི་དོན་ནི། ཨཱཿམྱ་ངན་ལས་འདས་པ་རྣམ་པར་བཅད་པ་སྟེ། མཚན་མ་ལས་འདས་པར་སྟོན་ལ་དབྱིབས་ཀྱི་སྒོ་ནས་ཀྱང་སྤྲོས་པ་དང་བྲལ་བར་སྟོན་ཏེ། དེའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཨཱ་རིང་པོའི་དོན་ནི་ཨ་སྐྱོབ་པ་སྟེ་ཐུགས་རྗེ་ཆེན་པོ་ཞེས་ཀྱང་བྱའོ། །དབྱིབས་ཀྱང་རིང་དུ་འདྲེན་པ་སྟེ། དེའི་ཕྱིར་ཐབས་ཆེན་པོའོ། །དེ་ལྟར་ཐབས་དང་ཤེས་རབ་དང་དེ་གཉིས་སུ་མེད་པའི་དོན་གསུམ་པ་འདི་རྣམས་དཀྱིལ་འཁོར་ཐམས་ཅད་ཀྱི་སྤྱིའི་དོན་དུ་ཤེས་པར་བྱའོ། །ཡི་གེ་གསུམ་གྱི་ལས་གསུམ་ནི། ལམ་ཡིན་ཏེ། མིང་དུ་སྨྲ། ཚིགས་སུ་གཅོད་ཅེས་སྨོས་པ་ཡིན་ནོ། །དང་པོར་འཇུག་པའི་སྒོར་གྱུར་པ་ལམ། ཨ་རེ་རེས་མ་བཅིངས་ན་དབྱངས་གཅིག་གིས་བཅིངས་པའི་ཡི་གེ་རྣམས་ཀྱི་མིང་མི་འགྲུབ་ལ། དེ་མ་གྲུབ་ན་ཀ་བ་དང་བུམ་པ་ལ་སོགས་པ་དངོས་པོ་རྣམས་ཀྱི་མིང་མི་འགྲུབ་པས་མིང་དུ་སྨྲ་ཞེས་བྱའོ། །ཚིགས་སུ་གཅོད་པ་དངོས་སུ་ཟད་དོ། །ད་ནི་ལྷ་དང་ཡིག་འབྲུ་སོ་སོར་སྦྱར་བ་སྟོན་ཏེ། དེ་ལ་ཡང་ཤེས་བྱའི་ཡུལ་རྣམ་པ་གསུམ་མོ། །དེ་ལ་དང་པོ་ནི་ཡི་གེ་རྣམས་ཀྱི་སྤྱི་དང་ཡན་ལག་སོ་སོའི་སྒོ་ནས་ལྷའི་དཀྱིལ་འཁོར་དུ་སྦྱར་ཏེ་བསྟན་པ་ནི་རྒྱུའམ་གཏན་ཚིགས་ཅིའི་ཕྱིར་ཞེས་རྒོལ་བའི་ལན་ཤེས་པར་བྱའོ། །གཉིས་པ་ནི་ཡབ་རྣམས་ལ་སྒྱུ་འཕྲུལ་གྱི་སྒྲས་བསྟན་པ་དང་། ཡུམ་རྣམས་ལ་དྲྭ་བའི་སྒྲས་བསྟན་པ་དང་། རྣམ་པར་ཤེས་པ་ཐུགས་ཀྱིས་སྒྲས་བསྟན་པ་དང་། ཡུལ་སྐུའི་སྒྲས་བསྟན་པ་དང་། དབང་པོ་གསུང་གི་སྒྲས་བསྟན་པ་ལ་སོགས་པ་སྤྱིའི་ཡོན་ཏན་ཡན་ལག་ལ་བསྟན་པ་འདི་དག་ནི་དོན་ཇི་ལྟར་ཤེས་པར་བྱ་བའོ། །གསུམ་པ་ནི་སྤྱིའི་ཡི་གེ་གསུམ་གྱི་སྐབས་སུ་བསྟན་པ་ལྟར། ཐབས་དང་ཤེས་རབ་ཟུང་དུ་འབྲེལ་བའི་རིག་པ་སྐད་ཅིག་མ་གཅིག་ལ་དཀྱིལ་འཁོར་ཐམས་ཅད་ཇི་ལྟར་རྫོགས་པར་ཤེས་པར་བྱའོ། །དེ་ལ་དང་པོ་ཇི་ལྟར་ཡི་གེ་ལྷའི་དཀྱིལ་འཁོར་ཡིན་པའི་ཚུལ་ནི་སྤྱི་དང་བྱེ་བྲག་གཉིས་སུ་བསྟན་པ་ལས། སྤྱིར་ཡི་གེ་ཐམས་ཅད་སངས་རྒྱས་ཡིན་པའི་ཚུལ་ནི། གོང་དུ་ཕུང་པོ་ལྔ་ཇི་ལྟར་སངས་རྒྱས་ཡིན་པའི་གཏན་ཚིགས་བསྟན་པའི་སྐབས་དང་། ཡི་གེ་བརྟག་པ་རྣམས་བསྟན་པའི་སྐབས་དང་། ཡི་གེའི་རང་བཞིན་ལས་དང་ཡོན་ཏན་གྱི་རྩལ་བསྟན་པའི་སྐབས་སུ་ཞིབ་ཏུ་བཤད་པས། འདིར་བཟླས་ཏེ་བསྟན་མི་དགོས་ཏེ་དོན་དེ་དག་ཉིད་འདིར་ཡང་སྦྱར་བར་བྱའོ། །དེ་ལ་ཡི་གེ་སོ་སོར་ལྷ་སོ་སོ་དང་སྦྱར་བ་ནི། ཇི་ལྟར་བསྟན་པ་དེ་ལྟ་བུའི་རང་བཞིན་ཡིན་པ་དང་། དེ་བཞིན་དུ་བསྒོམ་ན་ཏིང་ངེ་འཛིན་མྱུར་དུ་འཐོབ་པ་དང་། མཆོག་གི་དངོས་གྲུབ་ཉིད་ཀྱང་མྱུར་དུ་འགྲུབ་པར་འགྱུར་བས་དེའི་ཕྱིར་ལྷག་པ་ཏིང་ངེ་འཛིན་གྱི་དབང་དུ་ཡང་གསུང་བ་ཡིན་ནོ། །ཡི་གེ་སོ་སོའི་རྣམ་པར་ཐར་པའི་སྒོ་ནི། ཨ་ནི་ཆོས་ཐམས་ཅད་མ་སྐྱེས་པའི་སྒོ་སྟེ། ཡུམ་ཀུན་ཏུ་བཟང་མོའི་རྣམ་པར་ཐར་པའོ། །ཏ་ནི་དེ་བཞིན་ཉིད་ཁོང་དུ་ཆུད་པའི་སྒོ་སྟེ། དེ་བས་ན་གོང་དུ་བསྟན་པ་བཞིན་ཏའི་སྒྲ་ཡི་ཆར་གཏོགས་པའི་ཡི་གེ་རྣམས་ཀྱང་དེ་བཞིན་ཉིད་རྟོགས་པའི་སྒོར་གྱུར་པས་དེ་བཞིན་གཤེགས་པ་རྣམས་ཀྱི་རྣམ་པར་ཐར་པ་སྟེ། དེ་བཞིན་དུ་གཞན་ལ་ཡང་སྦྱར་རོ། །ཀ་ནི་ཐུགས་རྗེ་པོའི་སྒོ་སྟེ། སྙིང་རྗེ་བྱང་ཆུབ་སེམས་ཀྱི་རྣམ་པར་ཐར་བའོ། །ཙ་ནི་སྤྱོད་ཡུལ་གྱི་སྒོ་སྟེ། གཟུགས་དང་སྒྲ་ལ་སོགས་པའི་རྣམ་པར་ཐར་པའོ། །པ་ནི་དོན་དམ་པའི་སྒོ་སྟེ། སྟོང་པ་ཉིད་བྱང་ཆུབ་སེམས་ཀྱི་རྣམ་པར་ཐར་པའོ། །ང་ཉ་མ་ནི་ཀླད་ཀོར་གྱི་ཡི་གེ་སྟེ་རྫོགས་པའི་སངས་རྒྱས་ཀྱི་སྒོ་སྟེ། མི་རྟོག་པའི་ཡེ་ཤེས་ཀྱི་རྣམ་པར་ཐར་པའི་སྒོའོ། །ཡ་ནི་སྐྱེ་འཇིག་དང་བྲལ་བའི་སྒོ་སྟེ། དུས་བཞི་མཉམ་པ་ཉིདཀྱི་རྣམ་པར་ཐར་པའོ། ཤ་ནི་ཞི་བ་ཆེན་པོའི་སྒོ་སྟེ། སྤྲོས་པ་ཞི་བའི་རྣམ་པར་ཐར་པའོ། །ཀྴ་ནི་མཐར་ཟད་ཀྱི་སྒོ་སྟེ། ཡེ་ཤེས་ཆེན་པོའི་རྣམ་པར་ཐར་པ་ཨི་ལ་སོགས་པའི་དབྱིངས་ཡིག་རྣམས་ནི་ཚངས་པའི་དབྱངས་ཀྱི་སྒོ་སྟེ། ཐུགས་རྗེ་ཆེན་པོའི་རྣམ་པར་ཐར་པའོ། །ཨོ་ནི་ཆོ་འཕྲུལ་སྟོན་པར་དང་ཆུ་བོ་ལས་བརྒལ་བའི་སྒོ་སྟེ། མཚན་མ་ཐམས་ཅད་རྣམ་པར་འཇིག་པའི་རྣམ་པར་ཐར་པའོ། །ཨཱོྂ་ནི་ཨ་དང་མུཾ་སྦྱོར་བ་སྟེ། དེ་ལ་ཨ་ནི་སྐྱེ་བ་མེད་པའི་དབྱིངས། མུཾ་ནི་ངོ་བོ་ཉིད་ཀྱི་མཁའ་སྟེ། ལྷ་དང་ཡི་གེའི་ཚོགས་དེ་དག་ཐམས་ཅད་ཀྱང་རྩོལ་བ་མེད་པར་ལྷུན་གྱིས་གྲུབ་པའི་དོན་ནོ། །དེ་ལ་ཨཱོྂ་གྱི་དོན་ཡང་དེར་འདུས་ཏེ། དེ་བས་ན་ཡི་གེ་རྣམས་ཀྱི་རྣམ་པར་ཐར་པའི་སྒོ་འདི་དག་ནི་དེ་བཞིན་གཤེགས་པ་ཐམས་ཅད་ཀྱི་རྣམ་པར་ཐར་པ་དང་དབྱེར་མེད་པ་ཡིན་པས། ཡི་གེ་འཁོར་ལོ་ཚོགས་ཆེན་འདིས། །སྐུ་གསུང་ཐུགས་ཀྱི་ཕྲེང་བ་བསྡུས། །ཞེས་གསུངས་པ་ཡིན་ནོ། །ད་ནི་གཉིས་པ་སྤྱིའི་ཡོན་ཏན་ཡན་ལག་ལ་སྦྱར་བའི་དོན་བསྟན་པར་བྱ་སྟེ། དེ་ལ་ཡབ་རྣམས་སྒྱུ་འཕྲུལ་གྱི་སྒྲས་བསྟན་པ་ནི། ཐབས་ཀྱི་ཕྱག་རྒྱ་ཡིན་པའི་ཕྱིར་སྒྱུར་འཕྲུལ་གྱི་སྒྲས་བསྟན་པའོ། །དེ་བཞིན་དུ་ཡུམ་རྣམས་ཤེས་རབ་ཀྱི་ཕྱག་རྒྱ་ཡིན་པས་དྲྭ་བའི་སྒྲས་བསྟན་ནོ། །རྣམ་པར་ཤེས་པ་ཐུགས་ཀྱི་རང་བཞིན་ཡིན་པར་ཐུགས་ཀྱི་སྒྲས་བསྟན་ནོ། །དབང་པོ་གསལ་ཞིང་རྟོགས་པར་བྱེད་པའི་བདག་ཉིད་ཡིན་པས་གསུང་གི་སྒྲས་བསྟན་ནོ། །ཡུལ་རྣམས་གཟུགས་རགས་པ་ཡིན་པའི་ཕྱིར་སྐུའི་སྒྲས་བསྟན་ནོ། །གཞན་རྣམས་ནི་སྒྱུ་འཕྲུལ་དྲྭ་བ་ཟུང་དུ་འབྲེལ་བའི་ཡོན་ཏན་གྱི་ཆོས་སུ་བསྟན་ནོ། །གསུམ་པ་ཐབས་དང་ཤེས་རབ་གཉིས་སུ་མེད་པའི་རིག་པ་སྐད་ཅིག་མ་གཅིག་ལ་དཀྱིལ་འཁོར་ཐམས་ཅད་ཇི་ལྟར་རྫོགས་པར་ཤེས་པར་བྱ་བ་ནི། དོན་ཆོས་ཅི་ཡང་མ་ཡིན་པ་ལས་སྒྱུ་མ་སྣ་ཚོགས་སུ་འཕྲུལ་པ་ནི་ཐབས་ཀྱི་རང་བཞིན་ཏེ་རིགས་ལྔའོ། །དེ་ཉིད་མཚན་མ་མེད་པ་ལྷུན་གྱིས་གྲུབ་པ་ནི་ཤེས་རབ་ཀྱི་རང་བཞིན་ཏེ་ཡུམ་ལྔའོ། །དེ་ལྟར་འབྲེལ་བའི་དུས་ཉིད་ན་སྒྱུ་འཕྲུལ་དྲྭ་བར་འབྲེལ་བར་རིག་པ་ནི་ཐུགས་ཀྱི་རང་བཞིན་ཏེ་རྣམ་པར་ཤེས་པའི་བྱང་ཆུབ་སེམས་དཔའོ། །སྒྱུ་འཕྲུལ་དྲྭ་བར་གསལ་བ་ནི་གསུང་གི་རང་བཞིན་ཏེ་དབང་པོའི་བྱང་ཆུབ་སེམས་དཔའོ། །སྒྱུར་འཕྲུལ་དྲྭ་བར་སྣང་བ་ནི་སྐུའི་རང་བཞིན་ཏེ་ཡུལ་གྱི་སེམས་མའོ། །དེ་ལྟར་ཐམས་ཅད་སྒྱུ་འཕྲུལ་དྲྭ་བར་འབྲེལ་པ་སྐུ་གསུང་ཐུགས་ཀྱི་བདག་ཉིད་པས་དུས་བཞི་མཉམ་པ་ཉིད་ཀྱི་རང་བཞིན་དུ་གྱུར་པ་ནི་དུས་བཞིའི་སེམས་མའོ། །དེའི་ངང་ལས་ཐུགས་རྗེ་ཆེན་པོ་རྒྱུན་མི་འཆད་པ་ནི་ཐུབ་པ་ཆེན་པོ་རྣམས་སོ། །དེ་ལྟར་སྒྱུ་འཕྲུལ་དྲྭ་བ་ཟུང་དུ་འབྲེལ་བའི་སྐུ་གསུང་ཐུགས་ཀྱི་མཚན་མ་ཙམ་ཡང་དམིགས་སུ་མེད་པར་རྟོགས་པ་ནི་ཁྲོ་བོ་རྣམས་སོ། །དེ་ལྟར་རྟོགས་པའི་ཡེ་ཤེས་ཉིད་ཀྱང་སྤྲོས་པ་དང་བྲལ་བ་ནི་ཁྲོ་མོ་རྣམས་སོ། །དེ་དག་ཐམས་ཅད་ཀྱང་དབྱིངས་དང་ཡེ་ཤེས་གཉིས་སུ་མེད་པའི་ངང་ལས་མ་གཡོས་ཤིང་དེར་འདུས་པ་ནི་ཀུན་ཏུ་བཟང་པོ་དང་བཟང་མོ་སྟེ། དེ་བས་ན་དཀྱིལ་འཁོར་དེ་དག་ཐམས་ཅད་ཀྱང་ཐབས་དང་ཤེས་རབ་གཉིས་སུ་མེད་པའི་རིག་པ་སྐད་ཅིག་མ་གཅིག་གི་ཆོས་ཙམ་མོ་ཞེས་ཤེས་པར་བྱའོ། །ད་ནི་བསྡུས་པའི་དོན་བསྟན་པའི་ཕྱིར། ཐབས་དང་ཤེས་རབ་དགྱེས་སྤྲིན་བྱང་ཆུབ་སེམས་ཚོགས་རྒྱུ་འཁོར་ལོ། །ཞེས་བྱ་བ་ལ་སོགས་པ་གསུངས་ཏེ། དེ་ལ་སྐབས་འདིར་ནི་ཡི་གེ་རྣམས་ལྷག་པ་བྱང་ཆུབ་སེམས་ཀྱི་རང་བཞིན་ལྷའི་དཀྱིལ་འཁོར་གྲུབ་པར་བྱེད་པའི་རྒྱུའི་འཁོར་ལོར་བཤད་དེ། དེ་ལ་སྤྱིར་བྱང་ཆུབ་སེམས་ཞེས་བྱ་བ་སྟོང་པ་ཉིད་དང་སྙིང་རྗེ་འབྲེལ་བ་ལ་ཡང་འཇུག །དབྱིངས་དང་ཡེ་ཤེས་གཉིས་སུ་མེད་པའི་དོན་མ་ནོར་བ་རྟོགས་པའི་རིག་པ་འབྱུང་བ་ལ་ཡང་འཇུག །སེམས་ཀྱི་རང་བཞིན་ཇི་བཞིན་པ་ལ་ཡང་འཇུག་སྟེ། དེའི་རྟགས་ཀྱི་ཕྱག་རྒྱ་དང་སྒོར་གྱུར་པ་ནི་ལྷག་པའི་བྱང་ཆུབ་སེམས་སོ། །ཡི་གེ་རྣམས་ཀྱང་བྱང་ཆུབ་ཀྱི་སེམས་དེ་དག་གི་འཕྲུལ་དང་ཕྱག་རྒྱར་གྱུར་པ་སྟེ། དེ་བས་ན་འདིར་ཡང་བྱང་ཆུབ་ཀྱི་སེམས་དེ་དག་ཐམས་ཅད་ཀྱི་འཕྲུལ་པའི་ཕྱག་རྒྱ་ཡི་གེ་རྣམས་ཀྱི་རང་བཞིན་དུ་གཉིས་སུ་མེད་པའི་ལྷག་པའི་བྱང་ཆུབ་ཀྱི་སེམས་འཕྲོས་པ་ལས་ལྷའི་དཀྱིལ་འཁོར་དུ་གྲུབ་པ་ནི། དཔེར་ན་རྒྱུར་དྲི་ཟ་ཉེ་བར་འཁོར་བ་དང་། རྐྱེན་ཕ་མའི་དབང་པོ་རྣམས་དང་སྐལ་བ་མཐུན་པར་ཚོགས་པར་གྱུར་ན་སེམས་ཅན་གྱི་ལུས་འགྲུབ་པར་འགྱུར་བ་ནི་རང་དབང་ཐོབ་པའི་བྱེད་པ་པོ་མེད་པ་བཞིན། རྒྱུ་ཆོས་རང་བཞིན་གྱིས་རྣམ་པར་དག་པ་དང་། རྐྱེན་ཐབས་དང་ཤེས་རབ་ཟུང་དུ་འབྲེལ་བར་གྱུར་ན་འབྲས་བུ་ལྷའི་དཀྱིལ་འཁོར་འབྱུང་བའང་བྱེད་པ་པོ་མེད་པ་ཉིད་དུ་འགྲུབ་པར་འགྱུར་རོ། །དེ་བཞིན་གཤེགས་པ་ཐམམས་ཅད་ཡི་གེ་འཁོར་ལོར་གྱུར་ཏོ་ཞེས་བྱ་བ་ནི། གཞུང་གཞན་ལས་འདི་སྐད་དུ། ཆོས་ཀུན་ཐ་དད་རྗེས་འཇུག་ཅིང་། །ཆོས་ཀུན་ཕན་ཚུན་རྗེས་སུ་འཇུག །ཆོས་ཀུན་རྗེས་སུ་འཇུག་པ་སྟེ། །མཐའ་བྲལ་རྗེས་སུ་འགྲོ་བའོ། །ཞེས་གསུངས་པ་ལྟ་བུ་སྟེ། ཇི་ལྟར་ཐ་དད་དུ་བཞག་པའི་ཆོས་སྣམས་ཀྱང་ཕན་ཚུན་རྗེས་སུ་མི་འགྲོ་བ་མེད་དེ། གང་གི་ཕྱིར་རང་བཞིན་གཅིག་ཏུ་མ་ངེས་པ་དེའི་ཕྱིར་མཚན་ཉིད་ཐམས་ཅད་ཀྱང་སྤྲོས་པ་དང་བྲལ་བའི་རྗེས་སུ་འགྲོ་བ་ཁོ་ནའོ། །དེ་བས་ན་དེ་བཞིན་གཤེགས་པ་རྣམས་ཡི་གེ་འཁོར་ལོར་གྱུར་པ་ལས་གནས་བསྒྱུར་ཅིང་སྤྲུལ་མི་དགོས་སོ། །དེ་བཞིན་དུ་དཀྱིལ་འཁོར་དུ་གསལ་བར་གྱུར་ཏོ་ཞེས་བྱ་བ་ལ་སོགས་པ་གཞན་ལ་ཡང་ཤེས་པར་བྱའོ། །ལེའུ་བཞི་པའོ།། ༈ །།ད་ནི་ཡི་གེ་སྒྱུར་འཕྲུལ་གྱི་སྒོ་ནས་ཐུན་མོང་དང་མཆོག་གི་དངོས་གྲུབ་དང་ལས་ཕྲ་མོ་རྣམས་བསྒྲུབ་པར་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ལ་དང་པོར་ཡི་གེ་སྒྱུ་འཕྲུལ་དངོས་གྲུབ་སྣ་ཚོགས་ཀྱི་གཞིར་བསྟན་པའི་ཕྱིར། རྩ་བ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཞེས་བྱ་བ་གསུངས་ཏེ། དེ་ལ་ཆོས་ཐམས་ཅད་ཀྱི་རྩ་བ་ནི་སེམས་ཡིན་པས་ཡི་གེའང་སེམས་ཉིད་དུ་སྣང་བའོ། །སེམས་ལའང་ངོ་བོ་ཉིད་མེད་དེ། དེའི་ཕྱིར་སེམས་ལ་སྣང་བ་ཐམས་ཅད་ཀྱང་ངོ་བོ་ཉིད་མེད་པའོ། །མཚན་ཉིད་དེ་ལྟ་བུའི་ཡི་གེ་དེ་ནི་རིན་པོ་ཆེའི་སྤྲིན་དང་འདྲ་སྟེ། དཔེར་ན་གཞན་འཕྲུལ་དབང་བྱེད་ཀྱི་གནས་ལ་སོགས་པ་མཐོ་རིས་ཀྱི་གནས་རྣམས་སུ་རིན་པོ་ཆེའི་རང་བཞིན་གྱི་སྤྲིན་ལས་རིན་པོ་ཆེ་སྣ་ཚོགས་ཀྱི་ཆར་འབབ་པར་འགྱུར་རོ། །དེ་བཞིན་དུ་ཡི་གེ་སྒྱུ་འཕྲུལ་གྱི་ཏིང་ངེ་འཛིན་ལས་ཀྱང་དངོས་གྲུབ་སྣ་ཚོགས་སུ་འགྱུར་རོ། །དེ་ཡང་དང་པོ་ཡི་གེ་ཇི་ལྟ་བ་བཞིན་བརྟན་པར་གྱུར་ནས། དེ་ནས་འདོད་པའི་དོན་སྣ་ཚོགས་སུ་བསྒྱུར་བས་དེ་ལྟར་འགྲུབ་པར་འགྱུར་རོ། །དེ་ལ་དང་པོར་མཆོག་གི་དངོས་གྲུབ་རྒྱལ་བའི་དཀྱིལ་འཁོར་ཉིད་དུ་གྲུབ་པར་བསྟན་པའི་ཕྱིར། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །ཞེས་བྱ་བ་ལ་སོགས་པའོ། །དེ་ཉིད་ཀྱིས་ཐུན་མོང་གི་དངོས་གྲུབ་ཆེན་པོ་འགྲུབ་པར་བསྟན་པ་ནི། བདུད་རྩིར་འགྱུར་ཞིང་འབྱུང་བ་དང་། ཞེས་བྱ་བ་ལ་སོགས་པའོ། །དེ་བཞིན་དུ། དགུག་དང་གཏང་དང་ཞེས་བྱ་བ་ལ་སོགས་པ་ནི་ལས་ཕྲན་ཚེགས་སོ། །དེ་ཉིད་ཡེ་ཤེས་རང་སྣང་བ། །ཞེས་བྱ་བ་ལ་སོགས་པ་ནི་དངོས་གྲུབ་ཇི་ལྟར་འགྲུབ་པའི་ཚུལ་སྟོན་པ་སྟེ། དཔེར་ན་སྣང་བ་དང་གསེར་འགྱུར་གྱི་རྩི་དང་སྨན་གྱི་བཅུད་ལེན་རྣམས་ཀྱིས་མུན་པ་དང་། ལྕགས་ཀྱི་རིགས་སྣ་ཚོགས་དང་དུག་རྣམས་བསལ་ནས། དངོས་པོ་དམ་པ་རྣམས་སུ་འགྱུར་བར་བྱེད་པ་ནི། དངོས་པོ་ངན་པ་རྣམས་དོར་བ་མེད་པ་བཞིན་དུ། སྡུག་བསྔལ་གྱི་གནས་སུ་གྱུར་པའི་ཆོས་རྣམས་མ་བསལ་བར་དངོས་གྲུབ་སྣ་ཚོགས་སུ་འགྱུར་བར་བསྟན་ནོ། །ཡོངས་ནི་དངོས་པོ་སྣ་ཚོགས་སུ་སྣང་བ་རྣམས་ཀྱང་སེམས་ཀྱི་རྣམ་པ་ཙམ་ཡིན་པས་ངོ་བོ་ཉིད་བསྒྱུར་ཞིང་བྱིན་གྱིས་བརླབ་མི་དགོས་པར་ཤེས་པར་བྱའོ། །སྟོན་པ་མཆོད་བརྩོན་ཞེས་བྱ་བ་ལ་སོགས་པས་ནི་གྲུབ་པའི་ཚད་བསྟན་པའོ། །དུས་གསུམ་རྒྱལ་བས་ཞེས་བྱ་བ་ལ་སོགས་པས་ནི་དངོས་གྲུབ་ཀྱི་མཆོག་བྱང་ཆུབ་ཀྱི་སེམས་རྟོགས་པ་ཡིན་པར་བསྟན་ནོ། །དངོས་པོ་མེད་ལས་ཞེས་བྱ་བ་ལ་སོགས་པས་ནི་དངོས་གྲུབ་ཀྱི་རྒྱུའི་གཙོ་བོ་ཏིང་ངེ་འཛིན་ཡིན་པར་བསྟན་ནོ། །གང་གིས་དམིགས་མེད་མི་ཤེས་པ། །ཞེས་བྱ་བ་ལ་སོགས་པས་ནི་དངོས་གྲུབ་ཀྱི་གཙོ་བོ་བྱང་ཆུབ་ཀྱི་སེམས་དེ་ཉིད་ལེགས་པར་བསྟན་པའི་ཕྱིར། བྱང་ཆུབ་ཀྱི་སེམས་རྣམ་པ་བཞིའི་ཚུལ་བསྟན་ནོ། །དེ་ཡང་དང་པོ་སེམས་ཅན་གྱི་དོན་དུ་བྱང་ཆུབ་འདོད་པའི་མཚན་ཉིད་སྨོན་པ་བྱང་ཆུབ་ཀྱི་སེམས་དང་། སྒོ་གསུམ་ནས་ཕ་རོལ་ཏུ་ཕྱིན་པ་རྣམས་ཡོངས་སུ་སྤྱོད་པའི་མཚན་ཉིད་འཇུག་པ་བྱང་ཆུབ་ཀྱི་སེམས་དང་། མོས་པ་བརྟན་པས་གནས་པ་དང་དེ་ཁོ་ན་ཉིད་ཀྱི་དོན་མངོན་དུ་བྱེད་པས་གནས་པའི་མཚན་ཉིད་གནས་པ་བྱང་ཆུབ་ཀྱི་སེམས་དང་། སྙིང་རྗེ་ཆེན་ཆེན་པོ་འབྱུང་བའི་མཚན་ཉིད་དང་ལྡན་པ་བྱང་ཆུབ་ཀྱི་སེམས་ཞེས་གྲགས་སོ། །འདིར་ནི་དང་པོ་བྱང་ཆུབ་ཀྱི་སེམས་རྟོགས་པར་བྱེད་པའི་མཚན་ཉིད་འཇུག་པར་བྱང་ཆུབ་ཀྱི་སེམས་དང་། བྱང་ཆུབ་སེམས་ཀྱི་རང་བཞིན་ཇི་ལྟར་ཡིན་པ་བསྟན་པའི་མཚན་ཉིད་གནས་པ་བྱང་ཆུབ་ཀྱི་སེམས་དང་། བྱང་ཆུབ་སེམས་ཀྱི་ཡོན་ཏན་བསྟན་པའི་མཚན་ཉིད་དང་ལྡན་པ་བྱང་ཆུབ་ཀྱི་སེམས་དང་། བྱང་ཆུབ་ཀྱི་སེམས་དེ་ཉིད་ཇི་ལྟར་མངོན་དུ་གྱུར་བར་བྱ་བའི་མཚན་ཉིད་སྨོན་པ་བྱང་ཆུབ་ཀྱི་སེམས་རྣམས་བསྟན་ནོ། །དེ་ལ་དང་པོ་རྟོགས་པའི་ཐབས་བསྟན་པ་ནི། གང་གིས་དམིགས་མེད་མི་ཤེས་པ། །ཞེས་བྱ་བ་ལ་སོགས་པ་སྟེ། འདི་ལྟར་གང་ཟག་གང་གིས་ཆོས་རྣམས་ལ་དམིགས་པ་དང་བྲལ་བའི་བློ་འཇུག་པ་མི་ཤེས་པའི་གང་ཟག་དེ་ཡིས་ཆོས་ཀྱི་དབྱིངས་རྣམ་པར་དག་པའི་དོན་མི་ཤེས། དེས་ན་བློ་གང་གིས་དངོས་པོར་བལྟ་བ་དང་དངོས་པོ་མེད་པར་བལྟ་བ་རྣམས། དེ་ལྟར་མ་གྲུབ་ཅིང་འཇིག་པའི་བློ་དེ་ཡིས་དམིགས་པ་མེད་པའི་དོན་ཤེས་པར་གྱིས་ཤིག་པའི་དོན་ནོ། །གཉིས་པ་བྱང་ཆུབ་ཀྱི་སེམས་ཀྱི་རང་བཞིན་ཇི་ལྟར་ཡིན་པ་ནི། གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །ཞེས་བྱ་བ་ལ་སོགས་པ་སྟེ། སེམས་ཀྱི་ངོ་བོ་ཉིད་ཡོངས་སུ་མ་གྲུབ་པའི་ཕྱིར་མཚན་ཉིད་གང་ཡང་ཡིན་པར་མི་འགྱུར་ཏེ། ཅི་ཡང་མ་ཡིན་ནོ་ཞེས་བྱ་བའི་དོན་ནོ། །གསུམ་པ་ཡོན་ཏན་བསྟན་པ་ནི། དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །ཞེས་བྱ་བ་ལ་སོགས་པ་སྟེ། ཆོས་རྣམ་པར་དག་པ་ལས་མ་གཡོས་བཞིན་ཁམས་དང་སྐྱེ་མཆེད་སྣ་ཚོགས་སུ་བསྟན་པ་ཐམས་ཅད་ཡེ་ཤེས་རོལ་པའི་དཀྱིལ་འཁོར་དུ་རང་ཤར་ཏེ། ཀུན་ཏུ་བཟང་པོའི་ཕྱག་རྒྱས་མ་བཏབ་པ་འགའ་ཡང་མེད་པས། སྤང་བར་བྱ་བའི་ཆོས་གང་ཡང་མེད་དོ་ཞེས་བྱ་བའི་དོན་ནོ། །དེ་ལྟར་ན་དངོས་པོར་ལྟ་བའི་མཐའ་དང་ཆད་པར་ལྟ་བའི་མཐའ་ཡང་བསལ་བ་ཡིན་ནོ། །བཞི་པ་ཇི་ལྟར་མངོན་དུ་གྱུར་པར་བྱ་བ་ནི། གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱས་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་གསུངས་ཏེ། དཔེར་ན་གླང་པོ་ཆེ་མ་ཐུལ་བ་མྱོས་པ་རྣམས་ནི་མི་འདོད་པའི་གནས་སུ་ཚང་འཆའ་ཞིང་། མི་འདོད་པའི་ཡུལ་དུ་རྒྱུ་སྟེ། མི་འདོད་པའི་ལས་སུ་གྱུར་པ་རང་གི་ཕྱོགས་ཀྱི་རྩིག་ཁྱིམ་གཞོན་པ་དང་སེམས་ཅན་གསོད་པ་ལ་སོགས་པའི་ལས་བྱེད་དེ། སེམས་ཅན་རྣམས་ཀྱི་སེམས་ཀྱང་དེ་དང་འདྲ་སྟེ། མི་འདོད་པའི་གནས་བདག་ཏུ་ལྟ་བའི་གནས་ལ་རྟེན་འཆའ་ཞིང་། མི་འདོད་པའི་ཡུལ་མཚན་མར་འཛིན་པའི་སྤྱོད་ཡུལ་དུ་རྒྱུ་སྟེ། །མི་འདོད་པའི་ལས་འཁོར་བ་དང་ངན་སོང་གི་སྡུག་བསྔལ་གྱི་ལས་མངོན་པར་འགྲུབ་པར་བྱེད་དོ། །གླང་པོ་ཆེ་དེ་ཡང་ཐབས་ལ་མཁས་པའི་གླང་རྫི་ན་ཚོད་མཐུན་པས་ལེགས་པར་བཏུལ་ནས། ཐོབ་དང་ལྕགས་ཀྱུས་གྲོགས་བྱས་ན་གླང་པོ་ཆེ་འདུལ་བར་འགྱུར་ཏེ། རང་གི་གཡུལ་བརྟན་པར་བྱ་བ་དང་ཕ་རོལ་གྱི་དགྲ་སྡེ་འཇོམས་པར་བྱེད་པའི་ཡོན་ཏན་ཆེན་པོ་དང་ལྡན་པར་འགྱུར་རོ། །དེ་བཞིན་དུ་སེམས་དེ་ཡང་གཞི་གནས་དང་ལྷག་མཐོང་ཟུང་དུ་འབྲེལ་བའི་ཏིང་ངེ་འཛིན་གྱིས་བཏུལ་ཏེ། སྔགས་དང་ཕྱག་རྒྱ་ལ་སོགས་པ་བཟླས་བརྗོད་ཡན་ལག་ལྔ་དང་ལྡན་པས་བརྟན་པའི་གྲོགས་བྱས་ན། སྐུ་གསུང་ཐུགས་ཀྱི་དངོས་གྲུབ་ཏུ་འགྱུར་རོ་ཞེས་བྱ་བའི་དོན་ནོ། །དེ་ལ་བཟླས་བརྗོད་ཀྱི་ཡན་ལག་ལྔ་ནི། བདག་གི་དེ་ཁོ་ན་ཉིད་དང་། ལྷའི་དེ་ཁོ་ཉིད་དང་། གསང་སྔགས་ཀྱི་དེ་ཁོ་ན་ཉིད་དང་། བཟླས་བརྗོད་ཀྱི་དེ་ཁོ་ན་ཉིད་དང་། འཕྲོ་འདུའི་དེ་ཁོ་ན་ཉིད་དོ། །དེ་ཡང་བྱ་བ་དང་རྣལ་འབྱོར་ཕྱི་པ་ལྟར་ན་ནི། བདག་དང་ལྷ་ཡང་གཉིས་སུ་འདོད་ལ། བྱང་ཆུབ་ཀྱི་སེམས་དེ་ཉིད་གསུམ་གྱིས་བསྡུས་པའི་དམིགས་པ་དང་ཡན་ལག་ཏུ་བཅས་པའི་བཟླས་བརྗོད་དོ། །འདིར་ནི་ཏེང་ངེ་འཛིན་གྱིས་འཕྲུལ་བ་ཙམ་སྟེ། རང་བཞིན་ཐ་དད་དུ་མི་འཛིན་ནོ། །དེ་རྣམས་ཀྱང་མཆོག་གི་དངོས་གྲུབ་ཀྱི་སྐབས་སུ་བསྟན་ནོ། །ལེའུ་ལྔ་པའོ།། ༈ །།ད་ནི་དངོས་གྲུབ་ཀྱི་རྟེན་དང་ཐབས་སུ་གྱུར་པ་དཀྱིལ་འཁོར་ཡིན་པས་དེ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་སྨོས་ཏེ། འཇིག་རྟེན་དྲུག་གི་ཕྱོགས་བཅུ་ཐམས་ཅད་ལ། ཉིད་ཀྱི་ཆེ་བའི་དཀྱིལ་འཁོར་དབྱུང་བར་བཞེད་ནས་ཞེས་བྱ་བ་ནི། དཀྱིལ་འཁོར་གྱི་རང་བཞིན་མ་ཡིན་པ་ཞིག་བྱིན་གྱིས་བརླབས་ཏེ། རང་བཞིན་གཞན་དུ་གྱུར་པར་བྱས་པ་ཞིག་གམ། རང་བཞིན་དེ་དག་ཡོངས་སུ་གསལ་ཏེ་དེའི་ཡུལ་དུ་འོངས་པ་ཞིག་གམ། དེའི་རྒྱུ་ལས་སྐྱེས་པ་ནི་མ་ཡིན་ཏེ། ཡེ་ནས་ལྷུན་གྱིས་གྲུབ་པའི་དཀྱིལ་འཁོར་དུ་སངས་རྒྱས་པར་བསྟན་པའོ། །དེའི་ཚུལ་བསྟན་པ་ནི། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྱིས་གྲུབ། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །ཅེས་གསུངས་པ་ཡིན་ཏེ། འདི་ལྟར་རྫོགས་པ་ཆེན་པོའི་དོན་རྟོགས་པའི་རྣལ་འབྱོར་པས་ཀུན་འབྱུང་གི་ཆོས་སུ་གྲགས་པ་ཐམས་ཅད་ལྷུན་གྱིས་གྲུབ་པའི་དཀྱིལ་འཁོར་ཆེན་པོར་སྤྱོད་ཅིག་པའོ། །དེ་ལ་ཀུན་འབྱུང་གི་ཆོས་ནི་ཉེ་བར་ལེན་པའི་ཕུང་པོ་ལྔས་བསྡུས་པ་ཟག་པ་དང་བཅས་པའི་ཆོས་སུ་གྲགས་པ་རྣམས་སོ། །དེ་ཉིད་དཀྱིལ་འཁོར་ཆེན་པོ་ཇི་ལྟར་ཡིན་པ་བསྟན་པ་ནི་གོང་དུ་བསྟན་པ་བཞིན་ནོ། །དེ་ལ་དཀྱིལ་འཁོར་གྱི་ཁ་དོག་དང་དབྱིབས་ལ་སོགས་པའི་ཚུལ་ནི། འཁོར་ལོ་རྩིབས་བཞི་མུ་ཁྱུད་བཅས། །ཞེས་པ་ལ་སོགས་པའོ། །ལྷ་རྣམས་ཀྱི་བཞུགས་ཚུལ་ནི། གདན་ལ་རྫོགས་དང་སེམས་དཔའི་ཚུལ། །ཞེས་སྨོས་པ་སྟེ། དེ་ལ་གཙོ་བོ་དང་གཙོ་མོ་ནི་རྫོགས་པའི་སྐྱིལ་མོ་ཀྲུང་དུ་བཞུགས་ཏེ། རྒྱལ་པོ་ཆེན་པོའི་ཚུལ་དུ་ཅི་ཡང་མི་མཛད་དོ། །སེམས་དཔའ་དང་སེམས་མ་ནི་སེམས་དཔའི་སྐྱིལ་མོ་ཀྲུང་དུ་བཞུགས་ཏེ། བློན་པོ་ཆེན་པོའི་ཚུལ་དུ་ཀུན་ལ་བུ་གཅིག་པ་བཞིན་དུ་བྱམས་སོ། །ཁྲོ་བོ་དང་ཁྲོ་མོ་ནི་གྱད་ཀྱི་དོར་ཐབས་སུ་བཞུགས་ཏེ། དམག་དཔོན་དང་འདྲ་བར་ཕྱི་ནང་གི་དངོས་པོ་ལ་རྔོན་པས་རི་དྭགས་མཐོང་བ་ཞིན་དུ་འདུལ་བར་མཛད་དོ། །ཐུབ་པ་ཆེན་པོ་རྣམས་འགྲེང་བུར་བཞུགས་ཏེ། སྐད་ཅིག་ཀྱང་མི་གནས་པར་འགྲོ་བའི་དོན་མཛད་པའི་མཚན་མར་འགྱུར་བའོ། །དེ་དག་ཀྱང་གནས་གང་ན་བཞུགས་བསྟན་པའི་ཕྱིར། འཁོར་ལོ་རྒྱལ་པོ་རྒྱལ་མོ་དང་། །ཞེས་བྱ་བ་ལ་སོགས་པ་སྨོས་སོ། །མདུན་དང་རྒྱབ་ཏུ་བྱེད་པ་དང་། །ཞེས་བྱ་བས་ནི་ཀུན་ཏུ་བཟང་པོ་དང་བཟང་མོ་དཀྱིལ་འཁོར་གྱི་བྱེད་པ་པོ་ཡིན་ཡང་ཕྱ་མཁན་གྱི་ཚུལ་དུ་བར་ཁྱམས་ལ་བཞུགས་སོ་ཞེས་ཡོངས་གྲགས་དབུས་ལུགས་པ་གསུང་ངོ་། །ཕོ་བྲང་གི་དབུས་ཉིད་ན་བཞུགས་སོ་ཞེས་ཡོངས་གྲགས་ཁམས་ལུགས་པ་དང་བདག་ཅག་གི་བླ་མ་གསུང་ངོ་། །རྡོ་རྗེ་འཁོར་ལོ་རིན་པོ་ཆེ། །ཞེས་བྱ་བ་ལ་སོགས་པའི་ཕྱག་མཚན་རྣམས་ནི་གཡས་དང་པོ་ན་རང་རང་གི་མཚན་མ། གཡོན་དང་པོ་ན་དྲིལ་བུ་སྟེ་གཞན་རིམ་བཞིན་དུ་སྦྱར་བར་བྱའོ། །ཡུམ་རྣམས་ནི་དྲིལ་བུ་ཁོ་ནའོ། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །ཞེས་བྱ་བ་ལ་སོགས་པ་ནི་ལྷ་རྣམས་ཀྱི་ཚུལ་བསྟན་པ་སྟེ། དེ་ཡང་མཉེན་པ་ལ་སོགས་པའི་ཚུལ་ལྔ་པོ་འདི་དག་ནི་ལྷ་མོ་རྣམས་ཀྱི་ཚུལ་ཏེ། དེ་ཡང་ཕྱི་རོལ་གྱི་རྫས་ཀྱི་དངོས་པོ་ལ་མཉེན་པ་ཡིན་ལ། ལྕུག་པ་མ་ཡིན་པ་ལ་སོགས་པ་ཡང་ཡོད་པ་དེ་དག་ལས་ཁྱད་པར་དུ་བྱས་པའོ། །གསལ་འཚེར་ལྷུན་སྟུ ག་གཟི་བྱིན་ལྡན་པ་ནི་ཡབ་རྣམས་ཀྱི་ཚུལ་ལོ། །འབར་བའི་འཕྲེང་བས་འཁྲིགས་པ་ནི་ཁྲོ་བོ་དང་ཁྲོ་མོའོ། །དེ་ལྟ་བུའི་རང་བཞིན་དུ། མཐའ་དབུས་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་པའོ། །སྐུ་ཡི་ཕྱག་རྒྱ་ཆེ་མཆོག་ནི། །ཞེས་བྱ་བ་ལ་སོགས་པ་ནི་འཕྱོང་དུ་གྲགས་པ་སྟེ། སློབ་དཔོན་རིན་ཅེན་མཆོག་གིས་སྒྱུར་འཕྲུལ་གཞན་ནས་ཕྱུང་སྟེ། སྐབས་སྐབས་སུ་བཅུག་པ་ལས་གཙུག་རུ་རིན་ཅེན་གཞོན་ནུས་འཕྱོང་ཡོན་པ་དང་མེད་པའི་དཔེ་རིས་གཉིས་སུ་ཕྱེ་སྟེ་དེ་བཞིན་དུ་གྲགས་སོ་ཞེས་ཟེར་རོ། །དེ་ལ་གདུལ་བྱ་རྣམས་ལ་སངས་རྒྱས་ཀྱི་སྐུ་ཇི་ལྟར་སྣང་བའི་ཚུལ་ནི། དེ་ཚེ་འགྲོ་དྲུག་ཐམས་ཅད་ལ། །སྡིག་སྤོང་གཟུགས་སུ་རྣམ་པར་བསྟན། །ཞེས་བྱ་བ་ལ་སོགས་པ་སྟེ། དེ་ལ་འགྲོ་བ་ཕལ་པ་རྣམས་ཀྱིས་ནི་དགེ་སྦྱོང་དང་བྲམ་ཟེ་ལ་སོགས་པ་སྡིག་པ་སྤོང་བའི་གཟུགས་སུ་མཐོང་ངོ་། །ཉན་ཐོས་རྣམས་ཀྱིས་ནི་དགྲ་བཅོམ་པ་དང་སྤངས་པ་མཚུངས་པར་མཐོང་ངོ་། །རང་རྒྱལ་རྣམས་ཀྱིས་ནི་བསེ་རུ་ལྟ་བུའི་ཚུལ་དུ་མཐོང་ངོ་། །འོ་ན་དགེ་བའི་བཤེས་གཉེན་ལ་མི་བརྟེན་པར་ཇི་ལྟར་འགྱུར་ཞེ་ན། གྲོགས་པོ་ཙམ་དུ་མཐོང་བའི་ཕྱིར་རང་རང་གཙོ་བོ་ཡིན་ནོ། །ཐེག་པ་ཆེན་པོ་བྱང་ཆུབ་སེམས་དཔའ་རྣམས་ལ་ནི་འོག་མིན་གྱི་གནས་ན་དཔལ་རྣམ་པར་སྣང་མཛད་ཀྱི་སྐུར་སྣང་སྟེ། སྐུའི་སྒོ་ནས་ཆོས་སྟོན་པར་སྣང་ངོ་། །སྐུས་ཆོས་སྟོན་པའི་ཚུལ་ཡང་སངས་རྒྱས་ཀྱི་མཛད་པ་བསམ་གྱིས་མི་ཁྱབ་པ་ཡིན་ཏེ། དཔེར་ན་སྤོས་བརྩེགས་པའི་ཞིང་ཁམས་ན་བྱང་ཆུབ་སེམས་དཔའ་རྣམས་སྤོས་ཀྱི་ཤིང་ཆེན་པོའི་དྲུང་ན་གནས་པ་ན། ཤིང་དེའི་དྲི་ཚོར་བ་ཙམ་གྱིས་བྱང་ཆུབ་སེམས་དཔའི་རྒྱུད་ལ་རྣམ་པར་ཐར་པའི་སྒོ་ཏིང་ངེ་འཛིན་སྐྱེ་བར་འགྱུར་བ་དང་། དེ་བཞིན་དུ་ཡུལ་ལ་ལ་ན་ཁ་ཟས་ཟོས་པས། ལ་ལ་ན་ཆོས་གོས་གྱོན་པས། ལ་ལ་ན་སྐུ་ལ་བལྟས་པས། ལ་ལ་ན་རྨི་ལམ་རྨིས་པ་ལ་སོགས་པས་སངས་རྒྱས་ཀྱི་མཛད་པ་ཉེ་བར་སྒྲུབ་པ་ཡོད་དེ། དེ་བས་ན་ཚུལ་གཅིག་བསམ་དུ་མི་རུང་ངོ་། །ལོངས་སྤྱོད་རྫོགས་པའི་སྐུ་སྣང་བ་དེའང་ས་དང་པོ་ནས་བཅུ་པའི་བར་དག་ཏུ་གྲགས་སོ། །སྤྲུལ་པའི་སྐུ་སྣང་བར་གྱུར་པའང་ཉན་ཐོས་དང་མོས་པ་སྤྱོད་པ་ནས་ས་བདུན་པ་མན་ཆད་ལ་སྣང་བར་གྲགས་སོ། །ལས་དག་པའི་སེམས་ཅན་ཕལ་པ་ལ་ནི་ཐ་མལ་པའི་གཟུགས་སུ་སྣང་བར་གྲགས་སོ། །ད་ནི་བསྡུས་པའི་དོན་བསྟན་པའི་ཕྱིར། དེ་ནས་ཞེས་པ་ལ་སོགས་པ་སྨོས་ཏེ། དེ་ལ་དམིགས་བྱ་དམིགས་བྱེད་མི་དམིགས་དཔག་མེད་བསམ་མི་ཁྱབ་ཅེས་བྱ་བ་ནི་ཆོས་ཀྱི་དབྱིངས་བསམ་གྱིས་མི་ཁྱབ་པའོ། །ཡེ་ཤེས་རང་རིག་དཀྱིལ་འཁོར་སྣ་ཚོགས་བརྗོད་མི་ལང་། །ཞེས་བྱ་བ་ནི་ཡེ་ཤེས་ལས་སྤྲུལ་པའ་ིདཀྱིལ་འཁོར་ཡང་གྲངས་མེད་པ་སྟེ། དེ་ལྟར་དབྱིངས་དང་ཡེ་ཤེས་གཉིས་སུ་མེད་པའི་དཀྱིལ་འཁོར་གྱིས་ཆོས་ཐམས་ཅད་ལ་ཁྱབ་པར་བསྟན་པ་ནི། མཉམ་དང་མི་མཉམ་ཀུན་ཁྱབ་ཁྱབ་མེད་ཁྱབ་པའི་དབྱིངས། །ཡེ་ནས་ཀུན་གསལ་དཀྱིལ་འཁོར་རྣམ་སྤྲོས་སྤྲོས་པ་མེད། །ཅེས་གསུངས་པ་སྟེ། ཇི་ལྟར་ཁྱབ་པའི་ཚུལ་ནི། སངས་རྒྱས་མཉམ་སྦྱོར་ལས། ཆོས་དབྱིངས་མཉམ་དང་མི་མཉམ་པ། །ནམ་མཁའ་དབྱིངས་ཀྱི་མཐའ་ཀླས་པའི། །ནམ་མཁའ་ཀུན་གྱི་སྐབས་ན་དཔལ། །རྡོ་རྗེ་སེམས་དཔའ་རབ་ཏུ་གནས། །ཞེས་གསུངས་པ་ལྟར་ཆོས་ཐམས་ཅད་དཀྱིལ་འཁོར་གྱི་རང་བཞིན་གྱིས་ཁྱབ་ཅིང་། རྫས་ཀྱི་དངོས་པོས་ཀྱང་ཁྱབ་པ་མེད་དེ་ཞེས་བྱ་པའི་དོན་ནོ། །ལེའུ་དྲུག་པའོ།། ༈ །།ད་ནི་གསང་སྔགས་རྣམས་སྟོན་ཏེ། དེ་ཡང་གསང་སྔགས་ཀྱི་དངོས་པོ་དང་བྱ་བ་རྣམས་ནི་གོང་དུ་བསྟན་ཟིན་ཏོ། །ཁྱད་པར་གྱི་བྱ་བ་ཅུང་ཟད་བརྗོད་པར་བྱ་སྟེ། ཇི་སྲིད་དུ་ཏིང་ངེ་འཛིན་ཇི་ལྟ་ཇི་སྙེད་གནས་པ་དེ་དག་སྔགས་དང་ཕྱག་རྒྱ་བྱིན་གྱིས་རློབ་པར་བྱེད་དེ། དེ་ཡང་ཕལ་ཆེར་ཕྱག་རྒྱ་ནི་སྔགས་དང་ལྡན་པས་བྱིན་གྱིས་རློབ་པར་བྱེད་ལ། སྔགས་ནི་ཕྱག་རྒྱ་མེད་པར་ཡང་བྱིན་གྱིས་རླབ་བོ་ཞེས་གྲགས་སོ། །འདི་ཡང་ལྷ་རྣམས་བསྐྱེད་པ་དང་མཉེས་པར་བྱེད་པའི་མཚན་ཉིད་བསྙེན་པ་ལ་སོགས་པའི་བཟླས་བརྗོད་དུ་བྱ་བ་དང་། ལས་རྒྱ་མཚོ་སྒྲུབ་པའི་མཚན་ཉིད་རྣམས་ལ་སྦྱར་དུ་རུང་བར་ཤེས་པར་བྱའོ། །ད་ནི་བ སྒོམས་པའི་རིམ་པ་བརྗོད་པར་བྱ་སྟེ། དེ་ཡང་རྣལ་འབྱོར་གྱི་སྤྱོད་པ་རྣམ་པ་གསུམ་གྱིས་བསྡུས་པ་ན། དང་པོ་འཇུག་པའི་སྤྱོད་པའི་དབང་དུ་ནི་རྡོ་རྗེ་སློབ་དཔོན་གྱི་ལས་སུ་གྱུར་པའི་དཀྱིལ་འཁོར་བྲི་ཞིང་བྱིན་གྱིས་བརླབ་པ་དང་། མཆོད་ཅིང་དཀྱིལ་འཁོར་དུ་འཇུག་པ་སྟེ། སློབ་མ་ལ་དབང་དང་དམ་ཚིག་དང་མན་ངག་དཔོག་པའི་ཆོ་ག་རྣམས་ཀྱི་བྱ་བ་བསྟན་པ་སྟེ། ལེའུ་དགུ་པ་དང་བཅུ་གཅིག་པའི་སྐབས་སུ་རིགས་པར་བྱའོ། །མཐའ་མ་གྲུབ་པའི་སྤྱོད་པ་ལས་སྣ་ཚོགས་ནི་ཕལ་ཆེར་གཞན་གྱི་དོན་དུ་གཏོགས་པ་སྟེ། ལེའུ་ཉི་ཤུ་པར་བསྟན་ནོ། །བར་དུ་དངོས་གྲུབ་སྒྲུབ་པའི་སྤྱོད་པ་ནི་ཡི་གེ་སྒྱུ་འཕྲུལ་གྱི་ཏིང་ངེ་འཛིན་དང་། ཚོགས་ཀྱི་དཀྱིལ་འཁོར་རྣམས་ཡིན་ཏེ། དེ་ཡང་གསང་སྔགས་དང་ཕྱག་རྒྱ་དང་ལྡན་པའི་ཏིང་ངེ་འཛིན་གྱིས་སྒྲུབ་པར་བྱེད་པས། དེ་བས་ན་གསང་སྔགས་ཀྱི་སྐབས་སུ་བསྒོམ་པ་ལ་སོགས་པ་ལས་ཀྱི་རིམ་པ་བསྟན་པའི་གནས་ཡིན་ནོ། །དེའི་རིམ་པ་ནི་འདི་ཡིན་ཏེ། དང་པོར་འཇུག་པའི་སྤྱོད་པ་ཡོངས་སུ་རྫོགས་པའི་སྔགས་པས་ཚོགས་གསོག་པའི་ཕྱིར་རྟག་ཏུ་རང་གི་ལྷ་མཉེས་པར་བྱེད་པར་འདོད་པར་དང་། ཐུན་མོང་དང་མཆོག་གི་དངོས་གྲུབ་སྒྲུབ་པར་བྱ་བའི་ཕྱིར་དམ་བཅས་པའི་བསྙེན་སྒྲུབ་ལ་སྦྱོར་བར་འདོད་པ་དང་ལས་ཕྲ་མོ་ལ་སྦྱོར་བར་འདོད་ཀྱང་རུང་སྟེ། གནས་ལ་སོགས་པའི་ཡོ་བྱད་ཚོགས་པར་བྱས་ནས། མཚམས་བཅད་པ་ལ་སོགས་པའི་ཡན་ལག་སྔོན་དུ་འགྲོ་བས་དང་པོར་སེམས་བསྐྱེད་པར་བྱ་སྟེ། ཨེ་མ་ཧོཿངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་ཙམ་ཉིད་ན་སྐྱེ་བ་མེད། །ཅེས་བྱ་བ་ལ་སོགས་པའི་ཚིགས་སུ་བཅད་པ་ལྔ་བརྗོད་པས། ཆོས་ཐམས་སྤྲོས་པ་དང་བྲལ་བར་རྟོགས་པ་རང་གི་རྒྱུད་ལ་བསྐྱེད་པར་བྱའོ། །དེ་ལྟར་སེམས་བསྐྱེད་ནས་ཏིང་ངེ་འཛིན་རྣམ་གསུམ་རིམ་པར་བསྒོམ་པར་བྱ་སྟེ། དེ་ཡང་། ལུས་ངག་སེམས་དང་ཆོས་ཐམས་ཅད། །གང་ནའང་མི་གནས་དམིགས་པ། །མིག་ཡོར་ཚུལ་དུ་སྦྱོར་བ་ཡིས། །ནམ་མཁའ་ལ་ནི་ནམ་མཁའ་བསྒོམ། །ཞེས་བརྗོད་པས། དེ་བཞིན་ཉིད་ཀྱི་ཏིང་ངེ་འཛིན་མི་དམིགས་པའི་ངང་ལས་ཀུན་སྣང་གི་ཏིང་ངེ་འཛིན་སྒྱུ་མ་དང་མིག་ཡོར་ཙམ་ལ་དམིགས་པའི་ཁྱབ་པའི་སྙིང་རྗེ་ཆེན་པོ་བསྐྱེད་པར་བྱའོ། །དེ་ནས་སྙིང་རྗེ་ཆེན་པོའི་བྱིན་རླབས་རྒྱུའི་ཏིང་ངེ་འཛིན་བསྒོམ་པར་བྱ་སྟེ། རྩ་བ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཨ་ཞེས་བརྗོད་པས་བྱང་ཆུབ་སེམས་ཀྱི་རང་བཞིན་ཨ་དཀར་པོར་གསལ་བར་བྱའོ། །དེ་ཅུང་ཟད་བརྟན་པར་གྱུར་ནས། །ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་མའི་ཨ་རྣམས་སྤྲོས། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །ཞེས་བརྗོད་པས་བྱང་ཆུབ་ཀྱི་སེམས་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། མཚན་བཟང་པོའི་ས་བོན་སྒྲ་ཡིག་བཅུ་དྲུག་གི་ཕྲེང་བ་རིམ་པ་གཉིས་སུ་བསྐོར་བ་ཨའི་སྙིང་པོ་ཅན་བསམ་པར་བྱའོ། །དེ་ལ་སྒྲའི་ཡི་གེ་ནི་འདི་རྣམས་ཡིན་ནོ། །ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལི་ལཱི། ཨེ་ཨཻ། ཨོ་ཨ། ཨཾ་ཨཿ དེ་ནས་ཨ་དེ་ལས་མིང་གི་ཡི་གེ་རྣམས་འཕྲོས་ཤིང་འདུས་པས་ཉི་མའི་དཀྱིལ་འཁོར་དུ་གྱུར་པའི་སྟེང་ན། དཔེར་བྱེད་བཟང་པོའི་ས་བོན་དུ་གྱུར་པ་མིང་གི་ཡི་གེ་སུམ་ཅུ་རྩ་བཞི་ཕྲེང་བའི་རིམ་པ་གཉིས་སུ་བསྐོར་བ། ནང་རིམ་ཨ་བཅུ་གཉིས་ཀྱི་ཕྲེང་བ་ཅན་སྙིང་པོ་ཡི་གེ་ཀྵའོ། །དེ་ལྟར་ཅུང་ཟད་གསལ་བར་བྱས་ཏེ། ཐམས་ཅད་ཀྱང་འོད་ཀྱི་གོང་བུ་གཅིག་ཏུ་འདྲིལ་བ་ལས་ཧཱུྂ་དང་ལྡན་པའི་རྡོ་རྗེར་གྱུར་པར་བྱའོ། །དེ་ཡོངས་སུ་གྱུར་པ་ལས་ཀུན་ཏུ་བཟང་པོའི་སྐུར་གྱུར་ཏེ། འདི་ནི་སངས་རྒྱས་ཐམས་ཅད་མངོན་པར་བྱང་ཆུབ་པ་ཐུགས་སུ་ཆུད་པའི་མཚན་ཉིད་སྐུ་ལྔ་ཡེ་ཤེས་ལྔའི་རང་བཞིན་འབྲས་བུའི་ངོ་བོར་སངས་རྒྱས་པའི་ཚུལ་བདག་དང་གཞན་གྱི་དོན་ཡོངས་སུ་གྲུབ་པའི་བདག་ཉིད་དོ། །དེ་ལ་དེ་བཞིན་ཉིད་དང་ཀུན་ཏུ་སྣང་བ་ནི་སྟོང་པ་ཉིད་ཀྱི་ཡེ་ཤེས་ཀྱི་བདག་ཉིད་དེ་བཞིན་གཤེགས་པའི་རིགས་སོ། །ཉི་མ་དང་ཟླ་བའི་དཀྱིལ་འཁོར་ནི་མེ་ལོང་ལྟ་བུའི་ཡེ་ཤེས་དང་རྡོ་རྗེའི་རིགས་སོ། །དེ་བཞིན་དུ་འོད་ཀྱི་གོང་བུ་ནི་མཉམ་པ་ཉིད་དང་རིན་པོ་ཆེའི་རིགས་སོ། །རྡོ་རྗེ་ཧཱུཾ་གིས་མཚན་པ་ནི་སོ་སོར་རྟོགས་པ་དང་པདྨའི་རིགས་སོ། །སྐུ་ནི་བྱ་བ་གྲུབ་པ་དང་ལས་ཀྱི་རིགས་སོ། །དེ་དག་ཙམ་གྱིས་སངས་རྒྱས་ཀྱི་ཆོས་ཡོངས་སུ་རྫོགས་པར་འགྱུར་རོ། །འདི་ལྟར་རྡོ་རྗེ་སྙིང་པོ་རྒྱན་གྱིས་རྒྱུད་ལས། སངས་རྒྱས་ཀྱི་ས་བཅུ་གཉིས་གསུངས་པ་ཡང་རིགས་ལྔ་དང་ཡེ་ཤེས་ལྔ་དང་། ཐབས་དང་ཤེས་རབ་ཀྱི་བདག་ཉིད་དུ་གསུངས་པ་ལྟ་བུའོ། །དེ་ལ་དབྱངས་དང་མིང་གི་ཡི་གེ་མཚན་དང་དཔེ་བྱད་ཀྱི་ས་བོན་དུ་ཇི་ལྟར་རུང་བའི་ཚུལ་ནི་སྤྱིར་ཡི་གེ་ནི་ཡེ་ཤེས་ཀྱི་ཕྱག་རྒྱ་ཡིན་ལ། མཚན་དང་དཔེ་བྱད་ཀྱང་ཡེ་ཤེས་ཀྱི་ཡོན་ཏན་ཡིན་ཏེ། དེའི་ཕྱིར་དེའི་རིགས་དང་ས་བོན་དུ་རུང་ངོ་། །དེ་ལ་དབྱངས་ཡིག་མཚན་དུ་འགྱུར་བ་དང་མིང་ཡིག་དཔེ་བྱད་དུ་འགྱུར་བ་ནི་རིགས་མཐུན་པ་ཡིན་ཏེ། ཡི་གེ་ཡང་དབྱངས་ཀྱི་གཞི་མ་ལ་མིང་གི་འབྲས་བུ་གསལ་བར་འབྱེད་པ་ཡིན་ནོ། །དེ་བཞིན་དུ་མཚན་གྱི་མེ་ཏོག་ལ་དཔེ་བྱད་ཀྱི་འབྲས་བུ་གསལ་བར་བྱེད་པ་ཡིན་ཏེ། བྷྱ་ཛ་ན་ཞེས་བྱ་བའི་མིང་ཡང་གསལ་བྱེད་ཀྱི་ཡི་གེ་དང་མཚན་གྱི་མིང་ཐུན་མོང་བ་ཡིན་ནོ། །དེ་དག་ནི་ཤེས་པར་བྱ་བའི་དོན་ཅུང་ཟད་རྣམས་པར་སྤྲོས་པ་སྟེ་ཆོག་གོ། །གཞུང་ལ་འཇུག་པར་བྱ་སྟེ། དེ་ལྟར་གཙོ་བོ་བསྐྱེད་ནས་དཀྱིལ་འཁོར་བསྐྱེད་པར་བྱ་སྟེ། དེ་ཡང་དབང་ཆེན་གྱི་དཀྱིལ་འཁོར་རིམ་པ་བཞིན་བསྐྱེད་ཀྱང་རུང་མ་བསྐྱེད་ཀྱང་རུང་སྟེ། བྷྲུྂ་བི་ཤྭ་བི་ཤུདྡྷེ། ཞེས་བརྗོད་དོ། །ཡེ་ཤེས་ཀྱི་གཞལ་ཡས་ཁང་གླེང་གཞིའི་ལེའུ་ནས་གསུངས་པ་ལྟ་བུར་བསྐྱེད་པར་བྱའོ། །དེ་ཡང་ཤིན་ཏུ་གསལ་བར་བྱ་བའི་ཕྱིར། ཡེ་ཤེས་ཕྱོགས་བཞི་དབུས་བརྟགས་ཏེ། །ཞེས་བྱ་བ་ནས། ཉི་ཟླ་པདྨ་རིན་པོ་ཆེ། །ཞེས་བྱ་བའི་བར་དག་བརྗོད་པས་ཤིན་ཏུ་གསལ་བར་གྱུར་པར་བྱའོ། །ད་ནི་འཁོར་གྱི་དཀྱིལ་འཁོར་བསྐྱེད་པར་བྱ་སྟེ། དེ་ཡང་བདག་སྔོན་གྱི་སངས་རྒྱས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པར་བྱ་བ་དང་། རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར་དེ་བཞིན་གཤེགས་པའི་སྲས་སུ་བདག་བྱ་བའོ། །དེ་ལ་བདག་ཅེས་བྱ་བ་ཡང་བྱང་ཆུབ་ཀྱི་སེམས་ཀྱི་རང་བཞིན་ཏེ། དེ་ནི་ཐོག་མ་དང་མཐའ་མ་མེད་པའི་སངས་རྒྱས་ཡིན་པའི་ཕྱིར་སངས་རྒྱས་ཐམས་ཅད་དེ་ལས་སྤྲུལ་པར་བྱད་སྟེ། དེའི་ཕྱིར་གཡོན་ཕྱོགས་སུ་ཡུམ་ཀུན་ཏུ་བཟང་མོ་སྐད་ཅིག་མའི་ཏིང་ངེ་འཛིན་གྱིས་ཡི་གེ་ཨ་ལས་བསྐྱེད་དེ། ཨ་ནི་སྐྱེ་མེད་དེ་བཞིན་ཉིད། །ཀྵ་ནི་ཡེ་ཤེས་ཐུགས་ཀྱི་ཐུགས། །ཞེས་བརྗོད་པས་ཡབ་ཡུམ་ཤིན་ཏུ་གསལ་བར་བྱའོ། །དེ་ནས་ཐབས་དང་ཤེས་རབ་གཉིས་སུ་མེད་པར་རོལ་པ་ལས་བྱང་ཆུབ་ཀྱི་སེམས་ཡི་གེའི་ཚོགས་སུ་གྱུར་ཏེ། ཚིག་འདིས་ཀྱང་རྗེས་སུ་བསྐུལ་བར་བྱའོ། །ཐབས་དང་ཤེས་རབ་དགྱེས་སྤྲིན་བྱང་ཆུབ་སེམས་ཚོགས་རྒྱུ་འཁོར་ལོ། །འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །འདུས་མ་བྱས་ཉིད་འདུས་བྱས་རྡོ་རྗེ་དཀྱིལ་འཁོར་འབྱིན་པའི་དམ། །འདའ་བར་མི་མཛད་དབང་མེད་རྒྱུ་རྐྱེན་འཚོགས་པའི་མཐུ་ཆེན་ཡིན། །ཨ་ཧོཿ ཞེས་བརྗོད་པས་ཡི་གེའི་ཚོགས་དེ་དག་འཕྲོས་ཏེ། ལྷའི་དཀྱིལ་འཁོར་དུ་གྱུར་ནས་སངས་རྒྱས་ཀྱི་མཛད་པ་བསྒྲུབས་ཏེ། སླར་འདུས་ནས་དཀྱིལ་འཁོར་ཆེན་པོར་བཞུགས་པར་བསམ་ཞིང་། དེ་དག་ཤིན་ཏུ་གསལ་བར་བྱ་བའི་ཕྱིར། ཋ་ནི་སྒྱུ་འཕྲུལ་རྡོ་རྗེ་ཉིད། །ཊ་ནི་སྣང་བའི་སྒྱུར་འཕྲུལ་ཉིད། །ཅེས་བྱ་བ་ནས། ཨོ་ནི་ཐམས་ཅད་འཇིགས་པར་བྱེད། །ཨཱོྂ་ནི་ཐམས་ཅད་ཞིག་པ་ཡིན། །ཞེས་བྱ་བའི་བར་དུ་བརྗོད་པས་ཤིན་ཏུ་གསལ་བར་གྱུར་ཏེ། མི་བསྐྱོད་པ་ཡབ་ཡུམ་ནི་ཀུན་ཏུ་བཟང་པོ་ཡབ་ཡུམ་ལ་ཐིམ་པར་གྱུར། གཞན་ནི་རང་རང་གི་གནས་སུ་བཞུགས་པར་བྱའོ། །ད་ནི་དེ་བཞིན་གཤེགས་པའི་སྲས་སུ་བདག་བྱ་སྟེ། དེ་ཡང་བྱང་ཆུབ་སེམས་ཀྱི་རང་བཞིན་ཡེ་ནས་སངས་རྒྱས་པ་ཡིན་ཀྱང་དགེ་བའི་བཤེས་གཉེན་གྱི་བྱིན་གྱིས་མ་བརླབས་ཤིང་། རང་རིག་པའི་ཡེ་ཤེས་ཅན་དུ་མ་གྱུར་ན་སངས་རྒྱས་ཉིད་དུ་སྣང་བར་གྲུབ་པར་མི་འགྱུར་བས། དེའི་ཕྱིར་གཙོ་བོའི་ཐུགས་ཀ་ནས་ཀུན་ཏུ་བཟང་པོ་བྱང་ཆུབ་སེམས་ཀྱི་བདག་ཉིད་འཁོར་གྱི་ལུས་འཛིན་པ་ཞིག་ཏུ་འཕྲུལ་ནས་བྱུང་སྟེ། དཀྱིལ་འཁོར་གྱི་ལྷ་རྣམས་ལ་བསྐོར་བ་བྱས་ཏེ་ནུབ་སྒོ་ནས་རིག་པའི་མེ་ཏོག་དོར་ཏེ་གསོལ་བ་གདབ་པར་བྱའོ། །ཨཱོཾ། སྔོན་གྱི་ཐུགས་དམ་ཆེན་པོ་ནི། །འཇིག་རྟེན་མ་ལུས་ཐམས་ཅད་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་བརྗོད་པས། ལྷ་རྣམས་ཀྱི་གནང་སྟེ། ཐབས་དང་ཤེས་རབ་ཀྱི་འོད་ཟེར་བདག་ལ་འཕྲོས་པས་སེམས་ཀྱི་རྟོག་པ་དང་དེ་ལས་གྱུར་པའི་ལུས་རྣམས་སྦྱངས་ཏེ། གཉིས་སུ་མེད་པའི་ཡེ་ཤེས་གཟུང་འཛིན་དང་བྲལ་བའི་རང་བཞིན་འོད་ཀྱི་གོང་བུ་གཅིག་ཏུ་གྱུར་པར་བྱའོ། །དེ་ལྟར་དྲི་མའི་ཕྱོགས་དག་པར་བྱས་ནས་ཡོན་ཏན་གྱི་ཚོགས་བསྒྲུབ་ཅིང་བྱིན་གྱིས་བརླབ་པར་བྱ་བའི་ཕྱིར། ཡང་ལྷ་རྣམས་ཀྱི་འོད་ཟེར་ཡི་གེ་འབྲུ་གསུམ་གྱི་རྣམ་པར་འཕྲོས་ཏེ་ཐིམ་པས། སྐུ་གསུང་ཐུགས་ཀྱི་ཡོན་ཏན་དང་ལྡན་པའི་ཡི་གེ་ཧཱུཾ་དུ་གྱུར་ནས་གཙོ་བོའི་ཐུགས་ཀར་ཐིམ་པར་གྱུར་ཏེ་སྐུའི་དབྱིག་དང་བཅུད་དུ་གྱུར་པར་བྱའོ། །དེ་ནས་གཙོ་གཟུངས་གཉིས་སུ་མེད་པའི་བྱང་ཆུབ་ཀྱི་སེམས་སུ་གྱུར་ཏེ་ཡུམ་གྱི་མཁའ་ལ་གནས་པ་ལས། ལྷ་རྣམས་ཐམས་ཅད་རང་རང་གི་གསང་སྔགས་ཀྱི་སྒྲ་དང་བཅས་ནས་བྱང་ཆུབ་ཀྱི་སེམས་ལ་ཐིམ་པར་གྱུར་ཏེ། དཀྱིལ་འཁོར་གྱི་དབུས་ཀྱི་གདན་སྟེང་ན་བྱང་ཆུབ་སེམས་ཀྱི་རང་བཞིན་འོད་ཀྱི་གོང་བུ་ཙམ་ཞིག་དམིགས་པ་ལས། ཐུགས་རྗེ་ཆེན་པོའི་ཤུགས་ཀྱིས་བསྐྱོད་ནས་ཡི་གེ་ཧཱུཾ་དང་མཱུཾ་དུ་གྱུར་ཏེ། དེའི་འཕྲོ་འདུ་ལས་ཐུགས་ཀྱི་མཚན་མ་རྡོ་རྗེ་དང་དྲིལ་བུར་གྱུར་པ་དང་མི་བསྐྱོད་པ་ཡབ་ཡུམ་གྱི་སྐུར་གྱུར་པར་བྱའོ། །དེ་ལ་ཨཱོྂ་མ་ཧཱ་ཤུ་ནྱ་ཏཱ་ཛྷཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བྱ་བ་ལ་སོགས་པ་ཡེ་ཤེས་ལྔ་ཡིས་དབང་བསྐུར་བ་དང་། སྐུ་གསུང་ཐུགས་ཡོན་ཏན་ཕྲིན་ལས་རྣམ་པ་ལྔ་ཡིས་བྱིན་གྱིས་བརླབ་པར་བྱའོ། །དེ་ནས་གཙོ་གཟུངས་ཀྱི་མཁའ་རྣམ་གཉིས་བྱིན་གྱིས་བརླབ་པ་དང་། གཉིས་སུ་མེད་པར་བརྡས་བསྐུལ་བ་དག་བྱས་ཏེ། བྱུང་ཆུབ་ཀྱི་སེམས་ཡུམ་གྱི་མཁའ་ལ་འཕྲོས་པས་གཞལ་ཡས་ཁང་དུ་བྱིན་གྱིས་བརླབ་པ་དང་། ལྷ་རྣམས་ཀྱི་སྙིང་པོ་ཧཱུཾ་དང་ཨཱོྂ་ལ་སོགས་པ་སོ་སོའི་ས་བོན་གྱི་ཡིག་འབྲུ་རྣམས་སུ་གསལ་བ་ལས། ལྷ་སོ་སོའི་གསང་སྔགས་བརྗོད་པ་ཙམ་གྱི་སོ་སོའི་སྐུར་གྱུར་ཏེ། ཛཿས་མདུན་གྱི་ནམ་མཁའ་ལ་བཏོན། འབྲུ་གསུམ་གྱིས་སྐུ་བརྟས་པར་བྱས་ནས། སྤྲོ་བ་དང་བསྡུ་བའི་སྦྱོར་བས་སངས་རྒྱས་ཀྱི་མཛད་པ་བསྒྲུབས་ཏེ་རང་རང་གི་གནས་སུ་བཞུགས་པར་བྱའོ། །མི་བསྐྱོད་པ་ཡབ་ཡུམ་གྱི་སྙིང་པོ་ནི་སྐུ་བསྐྱེད་པའི་སྐབས་སུ་བརྗོད་པ་བྱའོ། །ཀུན་ཏུ་བཟང་པོ་ཡབ་ཡུམ་ནི་མདུན་རྒྱབ་ཏུ་བཞུགས་པར་བྱའོ། །ཐུབ་པ་དྲུག་ནི་སློབ་དཔོན་ཁ་ཅིག་ན་རེ། འདོད་ཡོན་སྤངས་པའི་ཚུལ་ཡིན་པས་ཡུམ་གྱི་མཁའ་ལས་མི་བསྐྱེད་དེ། རིགས་ལྔ་བསྐྱེད་པའི་དུས་སུ་ལོངས་སྤྱོད་རྫོགས་པའི་སྐུའི་ཚུལ་གྱིས་མི་འདུལ་བ་རྣམས་ལ་ཐུབ་པ་དྲུག་གི་སྤྲུལ་པར་གྱུར་ཏེ། མཛད་པ་བསྒྲུབས་ནས་སླར་འདུས་པ་ལས་རང་རང་གི་གསང་སྔགས་བརྗོད་པ་ཙམ་གྱིས་སྐུ་རེ་རེར་གྱུར་ཏེ། དཀྱིལ་འཁོར་དུ་བཞུགས་པར་བྱའོ་ཞེས་ཟེར་རོ། །ལ་ལ་ནི་བཙུན་མོ་དང་ལྡན་པར་བྱས་པ་མ་ཡིན་བསྐྱེད་པའི་ཡུམ་ཙམ་ལ་འགལ་བ་མེད་དོ་ཞེས་ཟེས་རོ། །དེ་ཡན་ཆད་ཏིང་ངེ་འཛིན་གྱི་དཀྱིལ་འཁོར་བསྒོམ་པའི་ཚུལ་བསྟན་པའོ། །ད་ནི་རང་བཞིན་གྱི་དཀྱིལ་འཁོར་སྤྱན་དྲངས་ཤིང་མཆོད་པའི་ཆོ་ག་ལ་འཇུག་པར་བྱེད་སྟེ། དེ་ཡང་ཚིགས་སུ་བཅད་པ་དང་གསང་སྔགས་ཀྱི་སྒོ་ནས་སྤྱན་དྲང་བ་ནི། ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ནས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །ཨཱོྂ་ཨེ་ཧྱེ་ཧི་བྷ་ག་ཝཱན་མ་ཧཱ་ཀ་རུ་ཎི་ཀ་དྲི་ཤྱ་ཧོཿ ས་མ་ཡ་སྟྭཾ། ཛཿཧཱུཾ་བཾ་ཧོཿ ཞེས་བརྗོད་པས་སྤྱན་དྲང་བར་བྱའོ། །དེ་ནས་གཉིས་སུ་མེད་པར་བསྟིམ་ཞིང་དཀྱིལ་འཁོར་དུ་འཇུག་པའི་ཕྱིར་རིག་པའི་མེ་ཏོག་དོར་བར་བྱ་སྟེ། ཨཱོྂ་བཛྲ་ས་མ་ཡ་ཨཱོཾ། ཨཾ་བཛྲ་ས་མ་ཡ་ཨཾ། ཧཱུཾ་བཛྲ་ས་མ་ཡ་ཧཱུཾ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་བརྗོད་པས། རང་བཞིན་གྱི་དཀྱིལ་འཁོར་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་། ཏིང་ངེ་འཛིན་གྱི་དཀྱིལ་འཁོར་གྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་རང་བཞིན་དབྱེར་མེད་པར་རྟོགས་པར་བྱ་སྟེ། འདི་ནི་རིག་པའི་མེ་ཏོག་དོར་བ་ཞེས་ཀྱང་བྱ། སོ་སོ་མ་ཡིན་པ་རིག་པར་འདུན་པའི་ཕྱག་ཅེས་ཀྱང་བྱ། རང་སྣང་བའི་དཀྱིལ་འཁོར་དུ་འཇུག་པའི་ཚུལ་ཞེས་ཀྱང་བྱའོ། །དེ་ལྟར་དབྱེར་མེད་པའི་རྟོགས་པ་དང་ལྡན་པས་ལྷའི་སྐུ་རྣམས་དབྱེར་མེད་པར་བསྟིམ་པའི་ཕྱིར། དངོས་གྲུབ་གསོལ་བའི་དབྱངས་ནི། ཨཱོཾ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་བརྗོད་པས་ལྷ་རྣམས་དངོས་གྲུབ་བསྩོལ་བ་ལ་ཕྱོགས་པར་གྱུར་པ་དང་། ཨཱོྂ་བཛྲ་ས་མ་ཡ་ཧཱུཾ། ཞེས་བརྗོད་པས་ཆུ་ལ་ཆུ་བཞག་པ་བཞིན་དུ་དབྱེར་མེད་པར་ཐིམ་པར་གྱུར་ཏོ། །ཨཱོྂ་བཛྲ་ས་མ་ཡ་སྟྭཾ། ཞེས་བརྗོད་པས་ནམ་མཁའ་ལྷའི་དཀྱིལ་འཁོར་ཉིད་དུ་གྲུབ་པར་མ་གྱུར་གྱི་བར་དུ་བརྟན་པར་བཞུགས་པར་བྱའོ། །ཨཱོྂ་བཛྲ་ས་མ་ཡ་ཧོཿ ཞེས་བརྗོད་པས། དེ་ཡང་ཤིན་ཏུ་དབང་དུ་གྱུར་ཏེ་དགྱེས་པ་ཆེན་པོས་རྗེས་སུ་ཆགས་པར་བྱའོ། །ཛཿཧཱུཾ་བཾ་ཧོ་ཞེས་བརྗོད་པས་བརྟན་ཞིང་གསལ་བ་ཉིད་དུ་བྱའོ། །དེ་ནས་ཤིན་ཏུ་གསལ་བར་བྱ་བའི་ཕྱིར། གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །ཞེས་བྱ་བ་ནས། དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་བྱ་བའི་བར་དག་བརྗོད་པས་ཤིན་ཏུ་གསལ་བར་བྱའོ། །དེ་ནས་མཆོད་པ་བྱ་སྟེ། དེ་ཡང་མཆོད་པའི་སྔོན་དུ་འགྲོ་བ་ནི་ཕྱག་གི་མཆོད་པ་ཡིན་པར་གྲགས་ཏེ། གོང་དུ་མེ་ཏོག་དོར་བ་ཉིད་རྣལ་འབྱོར་མཆོག་གི་ཕྱག་ཡིན་པས་འདིར་ལྷག་པར་མ་སྨོས་ཀྱང་ཉེས་པ་མེད་དོ། །གལ་ཏེ་གཞུང་གཞན་ནས་འབྱུང་བ་བཞིན་སྐབས་འདིར་ཕྱག་བྱས་པར་གྱུར་ན་ཡང་། བསམ་པ་མཉམ་པའི་དགོངས་པས་ཟིན་ན་འགལ་བ་མེད་དོ། །མཆོད་པའི་བསམ་པ་ཡང་། རྣལ་འབྱོར་ཆེན་པོའི་རྒྱུད་ལས་ཚུལ་རྣམ་པ་གསུམ་སྣང་སྟེ། དེ་ལ་གཅིག་ནི་འཕྲུལ་དགའི་ལྷ་རྣམས་ལོངས་སྤྱོད་ལ་རྩེ་བའི་ཚུལ་དུ་བདག་ཉིད་གཙོ་བོར་གསལ་བ་ལ་སོགས་པའི་ལྷ་རྣམས་ཀྱི་ཐུགས་ཀ་ནས་འདོད་པའི་ཡོན་ཏན་གྱི་ལྷ་མོ་རྣམས་སྤྲོས་ཏེ། དེ་དག་གིས་མཆོད་པ་སྣ་ཚོགས་ཀྱི་སྒོ་ནས་ཉིད་ཀྱི་དཀྱིལ་འཁོར་ལ་མཆོད་པར་བསམ་ཞིང་མཆོད་པར་བྱའོ། །གཉིས་པ་ནི་མཆོད་པའི་ཕྱག་རྒྱ་ཆེན་པོའི་ཏིང་ངེ་འཛིན་གྱི་མཆོད་པའི་སྐབས་ནས་འབྱུང་བ་བཞིན་ཕྱོགས་བཅུ་ཐམས་ཅད་སངས་རྒྱས་ཀྱི་ཞིང་ཡོངས་སུ་དག་པར་བསམ་ཞིང་། ལོངས་སྤྱོད་ཆེན་པོའི་རྒྱན་གྱི་རོལ་པ་ལ་མཆོད་པ་ཆེན་པོ་རྒྱུན་མི་འཆད་པར་ལྷུན་གྱིས་གནས་པའམ། ཏིང་ངེ་འཛིན་གྱི་སྒོ་མཐའ་ཡས་པས་ཀུན་ཏུ་བཟང་པོའི་མཆོད་སྤྲིན་བསམ་གྱིས་མི་ཁྱབ་པ་འཕྲུལ་པས་ལྷ་ལ་ལྷ་རོལ་པའི་ཚུལ་གྱིས་མཆོད་པར་བྱའོ། །གསུམ་པ་ནི་ཕྱི་པ་རྣམས་དང་ཚུལ་ཅུང་ཟད་མཐུན་པར་མཆོད་པའི་སྐབས་སུ་བདག་དང་ལྷའི་དཀྱིལ་འཁོར་གཉིས་སུ་དམིགས་ཏེ། ཕྱག་བྱ་བ་དང་མཆོད་པ་དང་བསྟོད་པ་དང་བཤགས་པ་དང་དངོས་གྲུབ་སྩོལ་བར་བསྐུལ་བ་དང་། སྨོན་ལམ་གདབ་པ་ལ་སོགས་པའང་བྱེད་ལ། དོན་ནི་འདི་དག་སེམས་ཀྱི་འཕྲུལ་པ་ཙམ་སྟེ། རང་བཞིན་དབྱེར་མེད་པར་རྟོགས་པར་བྱས་པས་ཕྱི་པའི་ཚུལ་ཡང་མི་འགྱུར་རོ། །དེ་བས་ན་དམིགས་པ་རྣམ་པ་གསུམ་པོ་འདི་དག་ཇི་ལྟར་བློ་ལ་འཚམས་པ་བཞིན་སྦྱར་བར་བྱའོ། །དེ་ལ་མཆོད་པའང་རྒྱུད་འདི་ཉིད་ལས་གསུངས་པའི་ཕྱག་རྒྱའི་མཆོད་པ་དང་། མཆོད་པའི་ཕྱག་རྒྱ་ཆེན་པོའི་ཏིང་ངེ་འཛིན་གྱི་མཆོད་པ་དང་། སྒྲོལ་བའི་མཆོད་པ་དང་། སྦྱོར་བའི་མཆོད་པ་དང་། སྦྱོར་བའི་ཞར་ལ་དམ་རྫས་བདུད་རྩིའི་མཆོད་པ་དང་། འདོད་པའི་ཡོན་ཏན་ལྔའི་མཆོད་པ་དང་། གླུ་ཡེ་ཤེས་ཀྱི་ཕྱག་རྒྱའི་མཆོད་པའམ་བསྟོད་པ་རྣམས་སུ་ཤེས་པར་བྱའོ། །དེ་ལ་བསྟོད་པ་འདི་ཡང་སྒྲུབ་ཐབས་རིན་པོ་ཆེའི་དྲྭ་བ་ལས་ནི་སྔོན་ལ་བྱ་བར་འབྱུང་སྟེ། དེ་ལྟ་ན་ཡང་བསྟོད་པ་དང་ཕྱག་གོ་ཆུ་རུབ་ཡིན་པས་འགལ་བ་མེད་དོ། །རྒྱུད་ལས་ནི་སངས་རྒྱས་ཀྱི་མཛད་པ་རྫོགས་ནས་དགྱེས་པ་ཆེན་པོའི་གླུ་བླངས་པར་འབྱུང་བ་དང་། གསང་སྔགས་ཀྱི་ཚུལ་སྤྱི་ལས་ཀྱང་བསྟོད་པ་མཇུག་ཏུ་བྱ་བར་ཕལ་ཆེར་ལ་གྲགས་པས། དེ་ལྟར་བྱའོ་ཞེས་བདག་གི་བླ་མ་གསུང་ངོ་། །བཟླས་བརྗོད་ཀྱི་ཚུལ་འདི་ནི་རྒྱུན་འདི་ལས་གསལ་བར་མ་གསུངས་ཀྱང་། དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །ཞེས་བྱ་བ་ལྟ་བུ་དང་། སྔགས་དང་ཕྱག་རྒྱས་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་བྱ་བ་ལྟ་བུ་གསུངས་ལ། དམ་ཚིག་གི་སྐབས་ལས་ཀྱང་། སྔགས་དང་ཕྱག་རྒྱ་རྒྱུན་མི་བཅད། །ཅེས་གསུངས་པས། བཟླས་བརྗོད་ཀྱང་བྱ་བ་ཡིན་ནོ། །དེའི་ཚུལ་ནི་བཟླས་བརྗོད་ཀྱི་སྐབས་སུ་དམ་ཚིག་གི་དཀྱིལ་འཁོར་དང་། ཡེ་ཤེས་ཀྱི་དཀྱིལ་འཁོར་གཉིས་སུ་དམིགས་ཏེ་བྱའོ། ། ཞེས་དབུས་ལུགས་བཀའ་ཕྱོགས་པ་གསུང་ངོ་། །བདག་ཅག་གི་བླ་མ་ནི་ནམ་མཁའ་དབྱིངས་ཀྱི་མཐའ་ཀླས་པའི་སངས་རྒྱས་ཀྱི་ཞིང་ཁམས་རྣམས་དང་། སེམས་ཅན་གྱི་རིས་རྣམས་ནི་སྤྲོ་བསྡུའི་ཡུལ་ཡིན་ནོ། །བདག་གི་ཏིང་ངེ་འཛིན་གྱི་དཀྱིལ་འཁོར་ནི་སྤྲོ་བསྡུའི་གནས་ཡིན་ནོ་ཞེས་གསུང་ངོ་། །ཁ་ཅིག་ན་རེ། གཙོ་བོའི་ཏིང་ངེ་འཛིན་དང་འཁོར་གྱི་དཀྱིལ་རྣམས་སུ་སྤྲོ་བསྡུ་བྱས་ཀྱང་སངས་རྒྱས་རྣམས་ལ་རང་བཞིན་བྱེ་བྲག་ཏུ་གྱུར་པ་མེད་པས་ཐམས་ཅད་འདྲ་ཞེས་ཀྱང་ཟེར་རོ། །ཡོངས་ནི་བཟླས་བརྗོད་ཇི་ལྟར་བྱས་ཀྱང་ཆོས་ཀྱི་ཕྱག་རྒྱ་ཡིན་པས་ལྷ་མཉེས་པའི་ཐབས་སུ་འགྱུར་ཏེ། དམིགས་ཀྱིས་འགལ་བའི་ཉེས་པ་མ་མཐོང་ངོ་། །དོན་ཟབ་ཅིང་རྒྱ་ཆེ་བ་ནི་བླ་མའི་གཞུང་ཉིད་ཡིན་པར་མཐོང་ངོ་། །ཕྱི་པའི་གཞུང་ལས་གྲགས་པ་རྣམས་ནི་འདིར་མ་སྨྲས་སོ། །ད་ནི་གསང་སྔགས་རྣམས་སོ་སོའི་དོན་ཅུང་ཟད་བརྗོད་པར་བྱ་སྟེ། དེ་ལ་གཞལ་ཡས་ཁ ང་བསྐྱེད་པའི་སྔགས་ནི། སྤྱིར་ཆོས་ཀྱི་དབྱིངས་ཀྱི་སྔགས་དང་མཆོད་སྤྲིན་གྱི་སྔགས་དང་། འཁོར་ལོའི་ཡིག་འབྲུ་རྣམས་ཀྱིས་བསྐྱེད་པར་འབྱུང་སྟེ། གཙུག་ཏོར་གྱི་སྙིང་པོ་ཡང་འཁོར་ལོའི་ཡིག་འབྲུར་འདུས་སོ། །དེ་ལ་འདིར་འཁོར་ལོའི་ཡིག་འབྲུ་དང་ཆོས་ཀྱི་དབྱིངས་ཀྱི་སྔགས་སོ། །ཧཱུཾ་བཛྲ་དྷྲིཀ྄་ཅེས་པ་ལ་སོགས་སྔགས་ནི། རྡོ་རྗེ་འཛིན་དང་རྒྱལ་བའི་རྒྱལ། །རིན་ཆེན་འཛིན་དང་ཆགས་ཆེན་མཚོན། །ཤེས་རབ་འཛིན་ཅེས་བྱ་བ་སྟེ། །འདི་རྣམས་ཀྱི་དོན་ནི་གོང་དུ་རིགས་ལྔའི་སྐབས་སུ་བཤད་ཟིན་ནོ། །མཱུཾ་དྷ་ཏུ་ཤྭ་ཞེས་བྱ་བ་ལ་སོགས་པ། མཱུཾ་ནི་མོཀྵ་སྟེ་ངོ་བོ་ཉིད་ཀྱི་མཁའ་རང་བཞིན་གྱི་རྣམ་པར་ཐར་པའོ། །ལཱཾ་ནི་ལོ་ཙ་ན་སྟེ་སྤྱན་ནོ། །མཱཾ་ནི་མཱ་མ་ཀཱི་སྟེ་བདག་ཉིད་མའོ། །པཱཾ་ནི་པན་དར་སྟེ་དཀར་མོའོ། །ཏཱཾ་ནི་ཏ་ར་སྟེ་སྒྲོལ་མའོ། །ཀླད་ཀོར་རྣམས་ནི་བྱང་ཆུབ་སེམས་ཀྱི་ཐིག་ལེ་སྟེ་ས་བོན་གྱི་དོན་ནོ། །གཞན་ལ་ཡང་དེ་བཞིན་དུ་ཤེས་པར་བྱའོ། །དྷ་ཏུ་ཤྭ་རི་ནི་དབྱིངས་ཀྱི་དབང་ཕྱུག་མའོ། །དྭེ་ཥ་ར་ཏི་ཞེས་བྱ་བ་ལ་སོགས་པ་ནི་ཞེ་སྡང་དགའ་མ། གཏི་མུག་དགའ་མ། འདོད་ཆགས་དགའ་མ། རྡོ་རྗེ་དགའ་མ་སྟེ། ཞེ་སྡང་གི་རིགས་ལ་སོགས་པའི་གཙོ་བོ་རྣམས་མཉེས་པར་བྱེད་པས་ཞེ་སྡང་དགའ་མ་ལ་སོགས་པའོ། །རྣམ་པ་གཅིག་ཏུ་མི་གཉིས་པའི་ཤེས་རབ་ཆེན་པོ་ཉིད་དུག་གསུམ་རྡོ་རྗེའི་སྒྲས་བརྗོད་པ་ཡིན་ལ། དེ་ཉིད་དགའ་མ་སྟེ་ཤེས་རབ་མ་ཡིན་པའི་ཕྱིར་རོ། །ཇི་སྐད་དུ་གསང་བ་འདུས་པ་ལས། གཉིས་མེད་ཆོས་ཀྱི་ཡེ་ཤེས་ལས། །ཕྱིར་རོལ་ང་རྒྱལ་རྨོངས་ཞེས་བྱ། །དེ་ལ་ཕན་ཚུན་ཐུག་པ་ནི། །ཞེ་སྡང་ཞེས་ནི་བསྟན་པ་ཡིན། །མཚན་ཉིད་འདོད་ཆགས་ཀུན་ཞེན་པ། །ཡེ་ཤེས་འདི་ནི་རྡོ་རྗེའོ། །གཏི་མུག་ཞེ་སྡང་འདོད་ཆགས་དང་། །རྡོ་རྗེ་རྟག་ཏུ་དགའ་མར་སྦྱར། །ཞེས་གསུངས་པ་ལྟ་བུའོ། །ཀྵིཾ་ཧི་རཱ་ཛ་ཡ་ཞེས་བྱ་བ་ལ་སོགས་པ་ནི་སེམས་དཔའ་རྣམས་ཀྱི་གསང་སྔགས་ཏེ། དེ་ལ་ཀྵིཾ་ཞེས་བྱ་བ་སའི་ས་བོན་ནོ། །དེ་བཞིན་དུ་ཏྲཾ་ནི་རིན་པོ་ཆེའིའོ། །ཧྲཱི་ནི་པདྨའིའོ། །ཛིཾ་ནི་རྒྱལ་བའི་ས་བོན་ནོ། །སྔགས་ཀྱི་དོན་ནི་སའི་རྒྱལ་པོ། སྟོང་པའི་སྙིང་པོ། པདྨའི་ཕྱག །རྒྱལ་བྱེད་ཕྱག་ཅེས་ཟེར་ཏེ། སེམས་དཔའ་བཞིའི་དོན་དང་སྔར་བཤད་པ་བཞིན་དུ་སྦྱར་རོ། །ཧཱུཾཾ་ལ་སྱ་ས་མ་ཡ་སྟྭཾ། ཞེས་བྱ་བ་ལ་སོགས་པ་ནི་ཡུལ་བཞིའི་སེམས་མ་རྣམས་ཀྱི་སྙིང་པོ་སྟེ། དེ་ལ་རིགས་བཞི་དང་། ནང་གི་སེམས་མ་བཞི་དང་། སྦྱོར་བའི་བརྡ་བཞི་རྣམས་དང་སྦྱར་ནས་སེམས་མ་བཞིའི་རང་བཞིན་དུ་སྟོན་ཏེ། དེ་ལའང་ཧཱུཾ་ཏྲཱཾ ཿཧྲཱིཿཨཱཿབཞི་ནི་རིགས་བཞིའི་དོན་ནོ། །ལ་སྱ་མ་ལེ་གཱིརྟི་ནཱིརྟི་བཞི་ནི་ནང་གི་ལྷ་མོ་བཞི་སྟེ། དེ་ཡང་སྒེག་མོ་ནི་འདོད་ཆགས་ཀྱི་ཡུལ། ཕྲེང་བ་ནི་འཁྱུད་པ། གླུ་ནི་དགའ་བར་གྱུར་པ། གར་ནི་བསྐྱོད་པར་གྱུར་བའོ། །ས་མ་ཡ་སྟྭཾ་ཞེས་བྱ་བ་ལ་སོགས་པའི་སྦྱོར་བའི་བརྡ་བཞི་སྟེ། དེ་ཡང་ས་མ་ཡ་སྟྭཾ་ནི་ཡུམ་གྱིས་བསྐུལ་བ་སྟེ། དུས་ལ་བབ་བོ་ཞེས་པའམ། དམ་ཚིག་མའོ་ཞེས་བྱའོ། །ས་མ་ཡ་ཧོཿལན་བྱིན་པ་སྟེ། དུས་ཡིན་ནོ་ཞེས་པའམ། དམ་ཚིག་གི་མཉེས་པར་བྱའོ། །ཞེས་པའོ། །རཱ་གོ྅་ཧཾ་ནི་ཉེ་བར་བསྐུལ་བ་སྟེ། བདག་ཆགས་སོ་ཞེས་པའོ། །རཱ་ག་ཡ་མི་ལན་བྱིན་པ་སྟེ། ཆགས་པར་བྱའོ། །ཞེས་པའོ། །འདི་བཞི་ཡང་ནང་གི་བྱང་ཆུབ་སེམས་དཔའ་བཞི་སྨོན་འཇུག་ལྡང་གནས་བཞི་དང་སྦྱར་ཏེ། ལྷ་མོ་བཞིའི་རང་བཞིན་དུ་སྦྱར་རོ། །མཻ་དྷ་ར་ནི་སྭཱ་ཧཱ་ཞེས་བྱ་བ་ལ་སོགས་པ་ནི་དབང་པོའི་སེམས་དཔའ་རྣམས་ཀྱི་སྔགས་ཏེ། དེ་ལ་མཻ་ཤི་བྱམས་པ་ཆེན་པོའི་སྙིང་པོའོ། །ཐླྷིཾ་ནི་སྒྲིབ་པ་སེལ་བའི་སྙིང་པོའོ། །ཧཱུཾ་ནི་བྱང་ཆུབ་སེམས་ཀྱི་སྙིང་པོའོ། །མུཾ་ནི་གྲོལ་བའི་སྙིང་པོའོ། །ལྷག་མ་རྣས་ནི་སེམས་དཔའ་རྣམས་ཀྱི་གསང་སྔགས་ཏེ། དེ་ཡང་སྔར་བཤད་པ་བཞིན་དུ་སྦྱར་བར་བྱའོ། །ཛ་དྷུ་པེ་པྲ་བེ་ཤ་ཡ་ཞེས་བྱ་བ་ལ་སོགས་པ་ནི་དུས་བཞིའི་སེམས་མ་བཞིའི་གསང་སྔགས་ཏེ། དེ་ཡང་མངག་གཞུག་གི་ཕྱག་རྒྱ་བཞི་དང་། དུས་བཞིའི་ལྷ་མོ་བཞི་དང་། སྦྱོར་ཚད་བཞི་རུ་སྦྱར་ཏེ་བསྟན་ནོ། །དེ་ལ་ཛཿཧུྂ་བཾ་ཧོཿབཞི་ནི་ཕྱག་རྒྱ་བཞི་སྟེ། བཟུང་བ་དང་། འཁྱུད་པ་དང་། བསྡམ་པ་དང་། མཉེས་པའོ། །དྷཱུ་པེ་པུཥྤེ་དཱི་པ་གནྡྷེ་བཞི་ནི་ལྷ་མོ་བཞི་སྟེ། བྱང་ཆུབ་ཀྱི་སེམས་འཕྲོ་བ་དང་འབབ་པ་དང་གསལ་བར་གྱུར་པ་དང་རེག་པའོ། །པྲ་བེ་ཤ་ཨ་བེ་ཤ་སུ་ཀི་ནི་ཙི་ཏ་ཞེས་བྱ་བ་ནི་སྦྱོར་བའི་ཚད་བཞི་སྟེ། ཞུགས་པ་དང་འབབ་པ་དང་བདེ་བ་དང་འཕྲོས་པའོ། །དེ་བཞི་ལྷ་མོ་བཞིའི་རང་བཞིན་ཉིད་དུ་སྦྱར་རོ། །ཧཱུཾ་ཡ་མཱནྟ་ཀྲྀཏ་ཕཊ་ཅེས་བྱ་བ་ལ་སོགས་པའི་ཁྲོ་བོ་བཞིའི་སྙིང་པོ་ནི་གོང་དུ་བཤད་པ་བཞིན་ནོ། ། ཨཱོྂ་བཛྲ་མ་ཧཱ་དྷ་ར་ཀྲོ་ཏི་ཤྭ་རི་ཛཱ་ལི་ནི་ཧཱུཾ་ཕཊ་ཅེས་བྱ་བ་ལ་སོགས་པ་ནི་ཁྲོ་མོ་རྣམས་ཀྱི་སྔགས་ཏེ། རྡོ་རྗེ་འཛིན་པ་ཆེན་པོའི་ཁྲོ་མོ་དབང་ཕྱུག་མ་ཆེན་མོ་འབར་མ་ཞེས་བྱ་བ་ལ་སོགས་པར་སྦྱར་རོ། །ཧཱུཾ་ཧཱུཾ་ཧཱུཾ་ཞེས་བྱ་བ་ནི་ཡེ་ཤེས་ཀྱི་སྙིང་པོའོ། །བཛྲ་ཙིཏྟ་ནི་རྡོ་རྗེ་ཐུགས་ཏེ། ཀུན་ཏུ་བཟང་པོའི་སྙིང་པོ་དང་སྔགས་སོ། །ཨ་ཨ་ཨ་ཞེས་བྱ་བ་ནི་ཆོས་ཀྱི་དབྱིངས་ཀྱི་སྙིང་པོའོ། །བཛྲི་བྷ་དྲ་ས་མ་མནྟ་ཞེས་བྱ་བ་ནི་རྡོ་རྗེ་ཀུན་ཏུ་བཟང་མོ་སྟེ། དེ་བཞིན་དུ་སྦྱར་རོ། །ཨཱོྂ་མུ་ནེ་ཀྲིཾ་སྭཱ་ཧཱ་ཞེས་བྱ་བ་ལ་སོགས་པ་ནི་ཐུབ་པ་རྣམས་ཀྱི་སྔགས་ཏེ། དེ་ལ་ཨཱོྂ་དང་སྭཱ་ཧཱ་ནི་སྔགས་ཀྱི་མགོ་དང་མཇུག་མ་སྟེ། དེ་ལ་ཨཱོྂ་ནི་རབ་སྔགས་ཏེ། གསང་སྔགས་ཀྱིས་ཕྱག་བཙལ་བའོ། །སྭཱ་ཧཱ་ནི་གཞི་འཇུགས་པ་སྟེ། གཞི་མི་འཇིག་པ་དང་གཞི་འཕེལ་བ་ལ་སོགས་པ་ལ་སྦྱར་བ་བཞིན་ནོ། །མུ་ནེ་ཞེས་བྱ་བ་ནི་མི་སྨྲ་བ་ལ་སོགས་པའི་དཀའ་ཐུབ་དང་ལྡན་པ་སྟེ་ཐུབ་པ་ཞེས་བྱའོ། །ཀྲིཾ་ནི་སྲིན་པོ་རྣམས་ཀྱི་སྙིང་པོ་སྟེ། ལྷ་མ་ཡིན་ལ་སོགས་པ་རྣམ་པར་ཞི་བ་རྣམས་ཀྱི་སྙིང་པོའོ། །ཧཱུཾ་ཏྲུཾ་ནི་མི་ལ་སོགས་པ་སྲེད་པས་ཆགས་པ་རྣམས་ཀྱི་སྙིང་པའོ། །སྲུཾ་ནི་སྲུ་སར་ཞེས་བྱ་སྟེ། དུད་འགྲོ་ལ་སོགས་པ་བློ་གྲོས་ཟླུམ་པོར་གནས་པ་རྣམས་ཀྱི་སྙིང་པོའོ། །བྲཾ་ནི་སྐོམ་པ་དང་བཀྲེས་པ་ལ་སོགས་པས་གདུངས་པས། དེ་སེལ་བར་བྱེད་པས་ཆུ་ལ་སོགས་པ་འདོད་པའི་སྙིང་པོའོ། །ཀྵཾ་ནི་ལྷ་ལ་སོགས་པ་བཟོད་ལྡན་གྱི་སྙིང་པོའོ། །ཡེ་ནས་གང་ཡང་རུང་བར་ཁྲིད་པར་བྱེད་པ་སྟེ། དམྱལ་བ་ལྟ་བུ་སྨད་པའི་གནས་སུ་གྱུར་པའོ། །དེ་དག་ནི་ལྷ་སོ་སོའི་གསང་སྔགས་སོ། །སྤྱན་དྲང་བའི་སྔགས་སུ་གྱུར་པ། ཨཱོྂ་ཨེ་ཧྱེ་ཧི་བྷ་ག་ཝཱན་ནི་ཀྱེ་ཚུར་སྤྱོན་བཅོམ་ལྡན་འདས་ཞེས་བྱའོ། །མ་ཧཱ་ཀ་རུ་ཎི་ཀ་དྲྀ་ཤྱ་ཧོཿཞེས་བྱ་བ་ནི་ཐུགས་རྗེ་ཆེན་པོ་སྤྱན་རས་གཟིགས་ཞེས་པའོ། །ས་མ་ཡ་སྟྭཾ་ནི་དུས་ལ་བབ་བོའམ། ཁྱེད་དམ་ཚིག་ལས་མ་འདའ་ཞིག་པའོ། །གཞན་ནི་བཤད་ཟིན་ཏོ། ཨཱོྂ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཞེས་བྱ་བ་ནི་སྟོང་པ་ཉིད་ཀྱི་ཡེ་ཤེས་རྡོ་རྗེ་ཆེན་པོའི་ངོ་བོ་ཉིད་ཀྱི་བདག་ཉིད་ནི་ངའོ་ཞེས་པ་སྟེ། དེ་ལ་སྭ་བྷཱ་ཝ་ནི་རང་གི་ངོ་བོའམ་ངོ་བོ་ཉིད། ཨཱཏྨ་ཀོ་ནི་བདག་ཉིད། ཨ་ཧཾ་ནི་ང་སྟེ། དེ་ལ་ཚིག་རྣམ་པར་སྦྱར་ན། ཨཏྨ་ཀོ྅ཧཾ་ཞེས་བྱ་བར་འགྱུར་རོ། །གཞན་ལ་ཡང་དེ་བཞིན་དུ་སྦྱར་བར་བྱའོ། །རྒྱུད་མཆོག་སྒྱུ་འཕྲུལ་དྲྭ་བ་ལས། །ཞེས་བྱ་བ་ལ་སོགས་པ་ནི་འཕྱོང་ཡིན་ཏེ་སྔ་མ་བཞིན་ནོ། །ཡི་གེ་མེད་དང་རིག་པའི་གསུང་། །ཞེས་བྱ་བ་ལ་ཡི་གེ་མེད་པ་ནི་དོན་དམ་པའོ། །རིག་པའི་ཡེ་ཤེས་ཏེ་དེ་དག་ཀྱང་ཡུལ་དང་ཡུལ་ཅན་དུ་རང་གསལ་བས་གསུང་གི་སྒྲས་བཤད་དོ། །དཀྱིལ་འཁོར་བསྡུས་པ་གསང་སྔགས་ཀྱི་ལེའུ་ཞེས་བྱ་བ་ལ། དཀྱིལ་འཁོར་བསྡུས་པ་ནི་བྱེད་པ་པོ་རྡོ་རྗེ་དང་བྱ་བ་མོ་གཉིས་སུ་མེད་པའི་དཀྱིལ་འཁོར་ལ་ཐིམ་པར་མཛད་དོ་ཞེས་བྱ་བའི་དོན་ཉིད་ཡིན་ནོ། །ལེའུ་བདུན་པའོ།། ༈ །།ད་ནི་ཕྱག་རྒྱ་སྟོན་ཏེ། དེ་ལ་ཕྱག་རྒྱ་སྤྱིའི་དོན་ནི་གོང་དུ་བཤད་ཟིན་ཏོ། །གཞུང་འདི་ཉིད་ལས་ནི་ལྷུན་གྱིས་གྲུབ་པའི་ཕྱག་རྒྱ་དང་། ཕྱག་རྒྱ་འབྱུང་བའི་རྒྱུ་རྡོ་རྗེ་ཐལ་མོ་དང་། སྤྱིར་དམ་ཚིག་གི་ཕྱག་རྒྱ་དང་། ལྷ་སོ་སོའི་ཕྱག་རྒྱ་རྣམས་སྟོན་ཏེ། དེ་ལ་སོ་སོའི་ཕྱག་རྒྱ་དེ་དག་ཀྱང་དམ་ཚིག་དང་ལས་ཀྱི་ཕྱག་རྒྱ་ཐུན་མོང་དུ་བསྟན་པ་ཡིན་ནོ། །དེ་ལ་སྤྱིར་དམ་ཚིག་གི་ཕྱག་རྒྱའི་ལས་ནི་ལྷ་རྣམས་དམ་ཚིག་ལས་མི་འདའ་བར་བྱེད་པ་ཡིན་ལ། ལས་ཀྱི་ཕྱག་རྒྱའི་ལས་ནི་ལྷ་རྣམས་རང་རང་གི་མཛད་པ་ལ་འཇུག་པར་བྱེད་པའོ་ཞེས་གཞུང་ཕལ་ཆེར་ལ་གྲགས་སོ། །དེ་ཉིད་འདུས་པའི་རྒྱུད་ཆེན་པོ་ལས་ནི། ལས་ཀྱི་ཕྱག་རྒྱ་མཆོག་ཆེན་པོས། །དམ་ཚིག་རྣམས་ནི་གཞུག་པར་བྱ། །ཞེས་གསུངས་ཏེ། ལས་ཀྱི་ཕྱག་རྒྱས་ཡེ་ཤེས་ཀྱི་ལྷ་རྣམས་དམ་ཚིག་སེམས་དཔའི་དཀྱིལ་འཁོར་ལ་གཞུག་པའི་ལས་བྱེད་པར་སྟོན་ཏོ། །འདིར་ནི་བྱ་བ་སོ་སོར་ཕྱེ་བ་ལྷག་པར་མེད་དེ། སྔགས་དང་ཕྱག་རྒྱ་དང་ལྡན་པས་ལྷའི་དཀྱིལ་འཁོར་བསྒོམ་པ་དང་། ཚོགས་ཀྱི་མཆོད་པ་བྱིན་གྱིས་བརླབ་ཅིང་དཀྱིལ་འཁོར་ཆེན་པོ་ལ་མཆོད་པ་དབུལ་དང་། བཟླས་བརྗོད་ཀྱིས་ལྷ་མཉེས་པར་བྱ་བ་ལ་སོགས་པ་རྣམས་ལ་ཕྱག་རྒྱ་དང་ལྡན་པར་བྱ་བ་ཙམ་དུ་ཟད་དོ། །དེ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ལ་ཡན་ལག་ཐམས་ཅད་ལྷུན་གྱིས་གྲུབ་པའི་དཀྱིལ་འཁོར་དུ་བྱིན་གྱིས་རློབ་པ་ཞེས་བྱ་བ་ནི། སྤྱིར་ཕྱག་རྒྱས་ལུས་ལྷར་བྱིན་གྱིས་རློབ་པར་བྱེད་པར་གྲགས་པ་དང་། འདིར་ལྷུན་གྱིས་གྲུབ་པར་འདོད་པས་དེ་སྐད་བྱའོ། །ལྷུན་གྱིས་གྲུབ་པའི་ཕྱག་རྒྱ་བརྟན་པའི་ཕྱིར། སྒྱུ་འཕྲུལ་དྲྭ་བ་མངོན་རྫོགས་པའི། །ཐམས་ཅད་བྱང་ཆུབ་མཆོག་གི་རྒྱུ། །གསང་བ་དེ་ཉིད་ངེས་པ་ཡི། །སྙིང་པོ་ཕྱག་རྒྱ་འདའ་དཀའོ། །ཞེས་གསུངས་ཏེ། གོང་དུ་བསྟན་པ་བཞིན་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པའི་ཆོས་ཐམས་ཅད་སྒྱུ་འཕྲུལ་དྲྭ་བའི་དཀྱིལ་འཁོར་དུ་ཡེ་ནས་མངོན་པར་རྫོགས་པར་སངས་རྒྱས་པས་བྱང་ཆུབ་མཆོག་གི་ཕྱག་རྒྱ་སྟེ། ཐམས་ཅད་ཀུན་ཏུ་བཟང་པོའི་ཕྱག་རྒྱ་ཡིན་པས། གསང་བ་དེ་ཉིད་ངེས་པའི་ཕྱག་རྒྱ་ཞེས་བྱའོ། །འདའ་དཀའ་ཞེས་བྱ་བ་ནི་སྐབས་འདིར་ལྷ་རྣམས་དམ་ཚིག་ལས་མི་འདའ་བའི་མཚན་ཉིད་དང་། བདུད་ལ་སོགས་པའི་ཕྱིར་རྒོལ་བ་རྣམས་ཀྱིས་གླགས་མི་རྙེད་པ་ལ་སོགས་པས་འདའ་བར་དཀའ་ཞེས་གསུངས་པ་ལྟ་བུ་ནི་མ་ཡིན་གྱི། དངོས་པོ་རྣམས་ཀྱི་རང་རང་གི་ཆོས་ཉིད་ཀྱིས་སངས་རྒྱས་པ་ཡིན་པས་འདར་མི་རུང་སྟེ། དཔེར་ན་མེ་ནི་ཚ་བའི་མཚན་ཉིད་དང་ནམ་ཡང་མི་འབྲལ་ཏེ། ནམ་ཞིག་ཚ་བའི་མཚན་ཉིད་མེད་པར་གྱུར་པ་དེའི་ཚེ་མེ་ཉིད་ཀྱང་མ་ཡིན་ནོ། །ཆོས་ཐམས་ཅད་ཀྱི་རང་བཞིན་ཡང་དེ་དང་འདྲ་སྟེ། ནམ་ཡང་ཆོས་ཉིད་དེ་ལས་མི་འདའོ། །མི་བསྐྱོད་ཉི་མའི་དཀྱིལ་ཡི་གེ། ཞེས་བྱ་བ་ལ་སོགས་པ་སྨོས་ཏེ། ཕྱག་རྒྱ་འབྱུང་བའི་རྒྱུ་རྡོ་རྗེ་ཐལ་མོ་སྟོན་པ་སྟེ། སྐབས་འདིར་ཡན་ལག་ལྔ་རྒྱུད་སྤྱིར་གྲགས་པ་དང་མཐུན་པར་རིགས་ལྔའི་བྱིན་གྱིས་བརླབས་སུ་འདོད་དེ། དེ་ཡང་ལག་པ་གཡས་པ་ནི་མི་བསྐྱོད་པའི་བྱིན་རླབས་སོ། །གཡོན་པ་ནི་རིན་ཆེན་འབྱུང་ལྡན་གྱི་བྱིན་རླབས་སོ། །རྐང་པ་གཡས་པ་ནི་དོན་ཡོད་གྲུབ་པའི་བྱིན་རླབས་སོ། །གཡོན་པ་ནི་སྣང་བ་མཐའ་ཡས་ཀྱི་བྱིན་རླབས་སོ། །དབུ་ལ་སོགས་པའི་ལུས་ཀྱི་གཞི་ནི་རྣམས་པར་སྣང་མཛད་ཀྱི་བྱིན་རླབས་སོ། །དེ་ལྟར་འབྱོར་ཅིང་རེག་པ་ལས་མི་བསྐྱོད་པའི་བྱིན་རླབས་ལག་པ་གཡས་པའི་མཐིལ་དུ་ཐབས་ཀྱི་བདག་ཉིད་ཉི་མའི་དཀྱིལ་འཁོར་ལ་ཐབས་ཀྱི་ཡི་གེ་ཧཱུཾ་ཨཱོྂ་སྭཱ་ཨཱཾ་ཧཱ་རྣམས་གསལ་བ་ནི་ཐབས་ཀྱི་ཆ་རིགས་ལྔའི་རང་བཞིན་ནོ། །རིན་ཅེན་འབྱུང་ལྡན་གྱི་བྱིན་རླབས་ལག་པ་གཡོན་པ་ཤེས་རབ་ཀྱི་རང་བཞིན་ཟླ་བའི་དཀྱིལ་འཁོར་ལ་ཤེས་རབ་ཀྱི་ཡི་གེ་མཱུཾ་ལཱཾ་མཱཾ་པྱཾ་ཏཱཾ་རྣམས་གསལ་བ་ནི་ཤེས་རབ་ཀྱི་ཆ་ཡུམ་ལྔའི་རང་བཞིན་ནོ། །དེ་གཉིས་རྡོ་རྗེ་ཐལ་མོ་ཅུང་ཟད་སྦྱར་བ་ནི་ཐབས་དང་ཤེས་རབ་ལ་འཇུག་པར་ཕྱོགས་པས་དགྱེས་པ་བསྐྱེད་པ་དང་། ཐབས་དང་ཤེས་རབ་ཟུང་དུ་འབྲེལ་བའི་སྒོ་ནས་འགྲོ་བའི་དོན་མཛད་པ་ལ་ཕྱོགས་པས་དགྱེས་པ་བསྐྱེད་པའི་བདག་ཉིད་དོ། །དེ་ནས་རྡོ་རྗེ་ཐལ་མོ་དེ་ལེགས་པར་སྦྱར་ནས་ཐབས་དང་ཤེས་རབ་གཉིས་སུ་མེད་པར་གྱུར་པས། དོན་དམ་པའི་བདེ་བ་ཆེན་པོ་བསྙེམས་པ་དང་། དེའི་དབང་གིས་འགྲོ་བའི་དོན་མཛད་པ་ལ་ཞུགས་པའི་དགྱེས་པ་བསྐྱེད་པ་སྟེ། དེའི་ཕྱིར་རྡོ་རྗེ་ཐལ་མོ་ནི་དོན་དང་རྟོགས་གཉིས་ཀའི་སྒོ་ནས་ཕྱག་རྒྱ་འབྱུང་བའི་རྒྱུར་གྱུར་ཏོ། །ཨཱོྂ་དང་མཱུྂ་གཉིས་རྩེ་སྦྱར་ཏེ། །ཞེས་བྱ་བ་ལ་སོགས་པ་ནི། སྤྱིར་དམ་ཚིག་གི་ཕྱག་རྒྱ་སྟེ། དེ་ལ་ཨཱོྂ་ནི་གཡས་པའི་མཛུབ་མོ། མཱུཾ་ནི་གཡོན་པའི་གུང་མོ་སྟེ། དེ་གཉིས་རྩེ་སྦྱར་ནས་ལྷག་མའི་ཡི་གེ་འབྲུ་བརྒྱད་ཀྱི་སོར་མོ་རྣམས་ཕན་ཚུན་བསྣོལ་ཏེ་རྩེ་སྤྲད་པ་ནི། ཐབས་ཀྱི་ཞགས་པ་ལས། སོར་མོ་ནང་དུ་བསྣོལ་ནས་བཀན། །གུང་མཛུབ་མཐེ་བོང་མཐེའུ་ཆུང་རྣམས། །སོ་སོར་རྩེ་སྤྲད་ཕྱིར་བསྐྱེད་དེ། །སྲིན་ལག་གཤིབས་བསྒྲེངས་དམ་ཚིག་རྒྱ། །ཞེས་འབྱུང་བ་དང་མཐུན་པར་སྦྱར་རོ། །ཕྱག་རྒྱ་དེ་ཡི་ཡོན་ཏན་ནི། རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །ཞེས་སྨོས་ཏེ། རྒྱལ་བ་རྣམས་དང་དབྱེར་མེད་པར་གྱུར་ནས། དེ་དག་གི་བདེ་བ་ཆེན་པོ་ཐོབ་པར་བྱེད་དོ། །སོར་མོ་རྣམས་ལ་ཡིག་འབྲུ་ཇི་ལྟར་དགོད་པ་ནི། འདི་ཉིད་ནས་གསལ་བར་མི་འབྱུང་ལ། རྒྱུད་གཞན་ལས་འབྱུང་བའང་ཅུང་ཟད་མི་མཐུན་ཏེ། རྒྱུད་ལ་ལ་ནས་གྲགས་པ་གུང་མོ་ནི་དབུ་མ་ཞེས་བྱ་སྟེ། དེ་བཞིན་གཤེགས་པའི་རིགས་སུ་གྲགས་སོ། །མཛུབ་མོ་ནི་ཁྲོ་མོའམ་སྡིགས་མོ་ཞེས་བྱ་སྟེ་རྡོ་རྗེའི་རིགས་སོ། །མཐེ་བོང་ནི་སྦོམ་པོ་ཞེས་བྱ་སྟེ་རིན་པོ་ཆེའི་རིགས་སོ། །སྲིན་ལག་ནི་དབང་མོ་ཞེས་བྱ་སྟེ་པདྨའི་རིགས་སོ། །མཐེའུ་ཆུང་ནི་མཐའ་མའམ་ཆུང་ངུ་ཞེས་བྱ་སྟེ་ལས་ཀྱི་རིགས་སུ་གྲགས་སོ། །རྒྱུད་གཞན་ལས་གཞན་དུའང་གྲགས་ཏེ། དེ་ལས་རྒྱུད་འདིར་ཐུགས་གཙོ་བོར་གྲགས་པས། གཡས་པའི་གུང་མོ་ལ་ཧཱུཾ་བཀོད་ལ། གཞན་མ་རིམ་པ་བཞིན་སྦྱར་བ་དང་། གཡོན་པའི་གུང་མོ་ལ་མཱུཾ། སྲིན་ལག་ལ་མཱུཾ། མཛུབ་མོ་ལ་ལཱཾ། མཐེའུ་ཆུང་ལ་ཏཱཾ། མཐེ་བོང་ལ་པྱཾ་དགོད་པར་བྱའོ། །ཞེས་ཡོངས་གྲགས་དབུས་ལུགས་པ་གསུང་ངོ་། །ཐབས་ཀྱི་ཞགས་པའི་གཞུང་ལྟར་སྦྱར་ཞེས་ཡོངས་གྲགས་ཁམས་ལུགས་པ་གསུང་ངོ་། །ཡོངས་ནི་གསལ་བར་སྨོས་པ་མེད་པ་རྣམས་སྤྱིར་གྲགས་པ་དང་མཐུན་པར་སྦྱར་བ་ལ་ཉེས་པ་མེད་དོ། །རིགས་ལྔ་ཡབ་ཡུམ་སོ་སོའི་ཕྱག་རྒྱ་ནི། ཡབ་རྣམས་ཀྱི་ནི་གཡས་པའི་ཡིག་འབྲུ་སོ་སོའི་སོར་མོའི་རྩེ་མོ་ལ་རང་རང་གི་ཐུགས་ཕྱག་མཚན་རྣམས་ཐུགས་ཀར་བཀན་ཏེ། གཡོན་པའི་ཡིག་འབྲུ་ལྔ་གཟུངས་མ་ལ་འཁྲིལ་བས་ཆོས་སྣང་བ་མཐའ་ཡས་ཀྱི་བྱིན་རླབས་རྐང་པ་གཡོན་པ་ལ་བརྟེན་ཏེ་བཞུགས་སོ། །ཡུམ་རྣམས་ནི་ལག་པ་གཡོན་པའི་རང་རང་གི་ཡིག་འབྲུ་རྣམས་ཀྱི་སོར་མོའི་རྩེ་མོར་དྲིལ་བུ་འབར་བ་ཐུགས་ཀར་བཀན་ཏེ། གཡས་པའི་ཡི་གེ་འབྲུ་ལྔ་གཙོ་བོ་ལ་འཁྲིལ་བས་ལས་ཀྱི་རིགས་ཀྱི་བྱིན་རླབས་རྐང་པ་གཡས་པ་ལ་རེག་པར་བྱའོ། ། སེམས་དཔའ་རྣམས་ནི་གཡས་པ་རང་རང་གི་མཚན་མ་ཐུགས་ཀར་འཛིན། གཡོན་པ་གཙོ་བོ་རྣམས་དང་མཐུན། སེམས་མ་རྣམས་ནི་གཡོན་པ་རང་རང་གི་མཚན་མ་ཐུགས་ཀར་འཛིན། གཡས་པ་གཙོ་མོ་རྣམས་དང་མཐུན། སྒོ་བ་དང་སྒོ་མའང་ཚུལ་དེ་བཞིན་ནོ། །ཐུབ་པ་དྲུག་གི་ཕྱག་རྒྱ་བསྟན་པའི་སྐབས་སུ། ཡུམ་ནི་མི་དམིགས་ཆོས་ཀྱི་དབྱིངས། །ཞེས་གསུངས་པའི་དགོངས་པ་ནི། ཕྱག་རྒྱ་ཐམས་ཅད་ཀྱང་ལྷ་མཉེས་པར་བྱེད་པའི་མཚན་ཉིད་དུ་བཤད་ལ། འདིར་ཡང་ཐབས་དང་ཤེས་རབ་ཟུང་དུ་འབྲེལ་བ་ཉིད་དགྱེས་པ་བསྐྱེད་པར་བྱེད་པ་རྣམས་ཀྱི་དམ་པ་ཡིན་པས་ཕྱག་རྒྱ་ཡིན་པར་བཤད་པ་ལས། ཐུབ་པ་དྲུག་ནི་འདོད་པའི་ཡོན་ཏན་ལྔ་སྤངས་པའི་ཚུལ་ཡིན་པས། གཟུགས་ཀྱི་སྐུར་བསྟན་པའི་ཡུམ་མི་བཞུགས་པའི་ཕྱིར། ཐབས་དང་ཤེས་རབ་ཟུང་དུ་འབྲེལ་བས་མཉེས་པར་བྱེད་པའི་ཕྱག་རྒྱ་མེད་དམ་སྙམ་དུ་རྟོག་པར་བྱེད་པར་བྱེད་པ་ལ། ཡུམ་ནི་དམིགས་མེད་ཆོས་ཀྱི་དབྱིངས། །ཞེས་སྨོས་ཏེ། ཆོས་ཀྱི་དབྱིངས་ཉིད་ཕྱག་རྒྱ་ཆེན་པོའི་ཆེན་པོ་ཡིན་པའི་ཕྱིར་དེས་མཉེས་པར་བྱེད་དོ་ཞེས་བྱ་བའི་དོན་ནོ། །ཀུན་བཟང་མཉམ་གཞག་ཡེ་ཤེས་འཕྲོ། །ཞེས་བྱ་བ་ནི། ཀུན་ཏུ་བཟང་པོའི་ཕྱག་རྒྱ་མཉམ་པར་གཞག་པ་ཉིད་དེ། དེ་ཉིད་ལས་ཡེ་ཤེས་ཀྱི་འོད་ཟེར་འཕྲོ་བའོ། །ཀུན་ཏུ་བཟང་མོའི་ཕྱག་རྒྱ་ནི། ཡུམ་འགྱུར་མཉམ་རྫོགས་པདྨོའི་སྐྱིལ། །ཞེས་རྗོད་པ་སྟེ། མཉམ་པ་ཉིད་དུ་ལྷུན་གྱི་གྲུབ་པས་མཉམ་རྫོགས་ཏེ། ཕྱག་རྒྱ་ནི་ཡབ་དང་མཐུན་ནོ། །ཅུང་ཟད་བྱེ་བྲག་ཏུ་ཕྱེ་ན་བཞུགས་ཐབས་ནི་པདྨའི་སྐྱིལ་མོ་ཀྲུང་དུ་བཞུགས་པའོ། །དེ་དག་ལ་སོགས་པ་གདུལ་བྱའི་དབང་གིས་ཕྱག་རྒྱ་ཡང་གྲངས་མེད་པས། གཞན་ཡང་ཕྱག་རྒྱ་སྣ་ཚོགས་ཏེ། །ཞེས་གསུངས་སོ། །མདོར་བསྡུ་བ་ལ་དགའ་བ་རྣམས་ཀྱི་ཕྱིར་ཕྱག་རྒྱ་མང་པོ་ལ་སྦྱོར་བར་མི་འདོད་ན། དེ་བཞིན་གཤེགས་པ་ལྔའི་སྤྱིའི་དམ་ཚིག་གི་ཕྱག་རྒྱ་འབའ་ཞིག་བཅས་ཀྱང་རུང་། རྡོ་རྗེ་ཐལ་མོའི་ཕྱག་རྒྱ་འབའ་ཞིག་བཅས་ཀྱང་རུང་སྟེ་འགལ་བ་མེད་པར་བསྟན་པའི་ཕྱིར། ཡང་ན་དེ་བཞིན་གཤེགས་པ་ཉིད། །ཡང་ན་རྡོ་རྗེ་ཐལ་མོ་ཉིད། །ཅེས་གསུངས་པ་ཡིན་ནོ། །ཕྱག་རྒྱ་ཆེན་པོའི་ཚོགས་མཆོག་ནི། །ཞེས་བྱ་བ་ལ་སོགས་པ་ནི་འཕྱོང་ཡིན་ནོ། །དེ་ལ། ཡན་ལག་བཞི་བཅུ་རྩ་གཉིས་ལྡན། །ཞེས་བྱ་བ་ལ་སོགས་པ་ནི་ཕྱག་རྒྱ་སྤྲོས་པ་སྟོན་པ་སྟེ། དེ་ཡང་ཕྱག་རྒྱ་ཆེན་པོའི་བདག་ཉིད་གཅིག་ལ་ལྷ་བཞི་བཅུ་རྩ་གཉིས་ཀྱི་ཡན་ལག་དང་ལྡན་པས། དེ་ཉིད་ཡན་ལག་སྤྲོས་བདག་སྟེ། །ཞེས་སྨོས་སོ། །དེ་དག་རེ་རེ་ཡང་སྐུ་གསུང་ཐུགས་ཀྱི་ཕྱག་རྒྱ་དང་ལྡན་པས། བཞི་བཅུ་རྩ་གཉིས་གསུམ་འཕྲོར་འགྱུར། །ཞེས་སྨོས་སོ། །དེ་ལྟ་བུར་ལྡན་པ་དེས་ཕྱག་རྒྱ་ཇི་སྙེད་འཕྲོ་ཞིང་སངས་རྒྱས་ཀྱི་མཛད་པ་ཇི་ལྟར་འགྲུབ་པར་བྱེད་ཅེ་ན། དེ་ལྟར་ལྡན་པའི་གཙོ་མཆོག་གིས། །རྒྱལ་བ་རྒྱལ་མཆོག་དེ་བཞིན་དུ། །བཅུ་གཉིས་དྲུག་གི་འོད་འཕྲོ་འབར། །ཞེས་བྱ་བ་ལ་སོགས་པ་གསུངས་ཏེ། དེ་ལ་རྒྱལ་བ་རྒྱལ་མཆོག་ཅེས་བྱ་བ་ནི་བདག་ཉིད་རིགས་ཀྱི་གཙོ་བོ་གང་ཡང་རུང་བའི་ཕྱག་རྒྱ་གང་ཡང་རུང་བའི་གཙོ་གཟུངས་ཀྱི་ཕྱག་རྒྱར་གནས་པའོ། །གཙོ་བོ་ལ་སྐུ་གསུང་ཐུགས་ཀྱི་ཕྱག་རྒྱ་ཇི་ལྟར་ལྡན་པ་དེ་བཞིན་དུ། ཡན་ལག་གི་ལྷ་རྣམས་ལ་ཡང་ལྡན་པར་བརྩིས་ན་ཕྱག་རྒྱ་བརྒྱ་ཉི་ཤུར་འགྱུར་པས། བཅུ་གཉིས་དྲུག་གི་འོད་འཕྲོ་འབར། །ཞེས་གསུངས་ཏེ། དེ་ལ་སྤྱིར་གྲངས་ཀྱི་རྩིས་ཀྱང་རྣམ་པར་གསུམ་སྟེ། འགྱུར་དང་སྣོན་དང་དེ་གཉིས་བསྲེས་པའོ། །དེ་ལ་འགྱུར་དུ་བརྩིས་ན་ནི་བརྒྱ་ཉི་ཤུའོ། །སྣོན་དུ་བརྩིས་ན་ནི་བཅོ་བརྒྱད་དོ། །བསྲེས་པའི་གྲངས་ལ་ནི་ངེས་པ་མེད་དེ་ཉི་ཤུ་རྩ་དྲུག་གམ་ཉི་ཤུ་རྩ་གཉིས་སུ་འགྱུར་རོ། །གྲངས་ཀྱི་རྩིས་འདི་དག་སློབ་དཔོན་རྣམས་ཀྱིས་སོ་སོར་སྦྱར་བ་སྣང་ཡང་འགྱུར་དུ་བརྩིས་པ་ཉིད་དོན་དང་ལྡན་པར་མཐོང་ངོ་། །ཕྱག་རྒྱ་ཆེན་པོའི་ངང་དུ་གནས། །ཞེས་བྱ་བ་ནི་སྤྱིར་ཕྱག་རྒྱ་ཆེན་པོའི་སྒྲ་འཇུག་པ་རྣམ་པ་གསུམ་སྟེ། ཕྱག་རྒྱ་སོ་སོའི་ཡོན་ཏན་སྟོན་པའི་དུས་ན་ཕྱག་རྒྱ་ཐམས་ཅད་ལ་ཡང་ཆེན་པོའི་སྒྲ་འཇུག་གོ། །སྐུ་གསུང་ཐུགས་ཀྱི་མཚན་མའི་སྒྲ་འདོམ་པའི་དུས་ན་སྐུ་ཡོངས་སུ་རྫོགས་པའི་མཚན་མ་ལ་ཕྱག་རྒྱ་ཆེན་པོའི་སྒྲ་འཇུག་གོ། །སྐབས་ལ་ལར་ནི་ཆོས་ཀྱི་སྐུ་མཚན་མ་མེད་པ་ལ་ཕྱག་རྒྱ་ཆེན་པོའི་སྒྲ་འཇུག་སྟེ། སྐབས་ཀྱིས་ནི་ཅི་རིགས་སུ་སྦྱར་བར་བྱའོ། །ལེའུ་བརྒྱད་པའོ།། ༈ །།ད་ནི་གཟུགས་བརྙན་གྱི་དཀྱིལ་འཁོར་ལ་བརྟེན་ནས་སློབ་མ་ལ་དབང་བསྐུར་བ་ལ་སོགས་པའི་ཆོ་ག་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ལ་རྡོ་རྗེ་གསང་བའི་དམ་ཚིག་བཀོད་པ་ཞེས་བྱ་བ་ལ། འདིར་དམ་ཚིག་གི་སྒྲས་དཀྱིལ་འཁོར་སྟོན་ཏེ། དེ་ཉིད་བསྟན་པ་ནི། ཤིན་ཏུ་ཕྲ་བའི་དམ་ཚིག་མཆོག །ཕྱག་རྒྱ་ཆེན་པོའི་ཕྱག་མཐིལ་དུ། །ཐུགས་ཀྱི་དཀྱིལ་འཁོར་དམ་པ་དེ། །སོར་ནི་བཞི་ཡི་ཚད་དུ་བྱ། །ཞེས་བྱ་བ་ལ་སོགས་པ་སྨོས་ཏེ། དེ་ལ་གཟུགས་བརྙན་གྱི་དཀྱིལ་འཁོར་ཆུང་ཚད་ནི་སོར་བཞི་པའི་ཚད་དུ་བྱས་ལ། སློབ་དཔོན་ལྷའི་སྐུ་ཕྱག་རྒྱ་ཆེན་པོར་གསལ་བའི་ཕྱག་མཐིལ་དུ་བཞག་སྟེ། འབྲུ་ལྔ་དང་སྤོས་ལྔ་ལ་སོགས་པ་ཉི་ཤུ་རྩ་ལྔའི་ཚོགས་ཀྱིས་གོ་མ་ཡེ་བཏང་སྟེ། ལག་གིས་འབྲི་བར་ནུས་པ་རྣམས་ནི་ལག་གིས་བྲིས། ཤིན་ཏུ་ཕྲ་བ་རྣམས་ནི་ཡིད་གྱིས་བྲིས་ཏེ། དཀྱིལ་འཁོར་བྱིན་གྱིས་བརླབ་པ་དང་། ཕྱི་ནང་གི་མཆོད་པ་དབུལ་བ་བྱས་ལ། དེ་ནས་སློབ་དཔོན་དང་སློབ་མ་འཇུག་པའི་ཆོ་ག་བྱས་ཏེ། དབང་བསྐུར་བ་དང་། དམ་ཚིག་དཔོག་པ་དང་། མན་ངག་སྦྱིན་པ་རྣམས་བྱའོ་ཞེས་བྱ་བའི་དོན་ནོ། །དེ་བཞིན་དུ་མཛུབ་གང་བ་ནས་རྒྱང་གྲགས་དང་དཔག་ཚད་ཀྱི་བར་དུ་ཚད་ཀྱི་བྱེ་བྲག་གསུངས་པ་རྣམས་དང་། ནམ་མཁའི་དབྱིངས་ཀྱི་མཐའ་ཀླས་པ་ལ་སོགས་པ་རྣམས་སུ་ཡང་སངས་རྒྱས་ཀྱི་དཀྱིལ་འཁོར་བསྒོམ་སྟེ། མཆོད་པ་དང་འཇུག་པའི་ཆོ་ག་དེ་བཞིན་དུ་བྱའོ། །ཞེས་བྱ་བའི་དོན་ནོ། །དེ་ལ་སྐབས་ལ་ལར་ནི་ཐིག་གདབ་པའི་ཆོ་ག་གསུངས་པ་དང་། དེ་བཞིན་དུ་ཚོན་འགྱེད་པ་དང་། ལ་ལར་ཕྱག་རྒྱར་དགོད་ཅིང་དཀྱིལ་འཁོར་བྱིན་གྱིས་བརླབ་པར་གསུངས་པ་ཡང་དཀྱིལ་འཁོར་ཐམས་ཅད་ཀྱི་ཐུན་མོང་དུ་ཤེས་པར་བྱའོ། །དེ་ལ་འདིའི་རིམ་པ་ནི་དང་པོར་དཀྱིལ་འཁོར་བྲི་བའི་ཆོ་ག་ལ་སྟ་གོན་གྱི་ཆོ་ག་དག་ནི་འདིར་གསལ་བར་མ་གསུངས་པས་སྤྱི་ལ་ལྟོས་ཀྱང་འགལ་བ་མེད་ལ། དཀྱིལ་འཁོར་བྲིས་པ་དང་བསྒོམ་པ་ཉིད་ཀྱིས་ཀྱང་བྱིན་གྱིས་རློབས་པར་འགྱུར་རོ། །དེ་བས་ན་དང་པོ་དཀྱིལ་འཁོར་བྲིས་ཏེ། དེ་ནས་དཀྱིལ་འཁོར་བྱིན་གྱིས་བརླབ་པའི་ཆོ་ག་ལེའུ་བདུན་པར་བཤད་པ་བཞིན་དུ་ཤེས་པར་བྱའོ། །མཆོད་པ་རྣམས་ཀྱིས་མཉེས་པར་བྱས་ནས་དེ་ནས་བདག་དང་སློབ་མ་འཇུག་པའི་ཆོ་ག་བྱའོ། །དེ་ལས་འདིར་མཆོད་པ་གསུངས་པ་ནི། བཅོས་བུའི་རས་ནི་སྣ་ཚོགས་དང་། ཞེས་བྱ་བ་ལ་སོགས་པ་ནི་རྫས་ཀྱི་མཆོད་པའོ། །ཡུམ་དང་འཇོ་མ་སེམས་མ་ཡིས། །ཞེས་པ་ལ་སོགས་པ་ནི། ལས་རྣམ་བཞིའི་སྦྱིན་སྲེག་གི་མཆོད་པ་སྟེ། དེ་ལ་གཟུངས་མ་སྨོས་པ་ནི། འདི་རུ་གཟུངས་དང་ལྡན་པས་ལས་བྱ་བར་གསུངས་པའི་ཕྱིར་རོ། །ཞལ་དུ་གྱུར་པའི་མེ་ཞེས་བྱ་བ་ནི། སྤྱིར་མེ་ལྷ་བརྟག་པ་རྣམ་པ་བཞིར་གྲགས་ཏེ། དེ་ལ་ཁ་ཅིག་ལས་ནི། མེ་ལྷ་མེ་འབར་བའི་རྣམ་པར་་གྱུར་པ་བྱས་ཏེ། དེར་ལྷ་རྣམས་སྤྱན་དྲངས་ནས་མཆོད་པར་འབྱུང་ངོ་། །ཁ་ཅིག་ལས་ནི། མེ་ལྷ་མེ་འབར་བའི་རྣམ་པར་གྱུར་པའི་དཀྱིལ་དུ་གཞལ་ཡས་ཁང་བསམས་ཏེ། དེར་དམ་ཚིག་སེམས་དཔའི་དཀྱིལ་འཁོར་བསྐྱེད་ནས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ། དབྱེར་མེད་པར་བསྟིམས་ནས་མཆོད་པར་འབྱུང་ངོ་། །ཁ་ཅིག་ལས་ནི་འབྱུང་བའི་མེའི་དཀྱིལ་དུ་མེ་ལྷ་བཞུགས་པར་བསམས་ཏེ། དེའི་ཐུགས་ཀར་གཞལ་ཡས་ཁང་བསམས་ཏེ། དེར་ལྷ་རྣམས་བཞུགས་པར་བསམས་ནས་དེར་མཆོད་པར་འབྱུང་ངོ་། །ཁ་ཅིག་ལས་ནི་མེ་ལྷ་ཕྱོགས་གཅིག་ཏུ་བཞག་པར་གསུངས་ཏེ། འདི་ལྟར་ཞལ་དྲུག་ཁྲོའི་རྒྱལ་པོའི་རྒྱུད་ལས། ཕྱོགས་གཅིག་ཏུ་བཞག་ནས་ནི་ཞེས་བྱ་བ་ལ་སོགས་པ་གསུངས་པ་ལྟ་བུའོ། །དེ་ལྟར་བརྟག་པ་རྣམ་པ་བཞི་པོ་གང་ཡང་རུང་སྟེ། དེ་དག་གི་སྒོ་མེ་ཡིན་ལ་མེའི་སྒོ་ནས་མེ་ལྷ་ཚིམ་པར་འགྱུར་བ་དང་། མེ་ལྷའི་སྒོ་ནས་ལྷ་རྣམས་ཚིམ་པར་འགྱུར་བ་ནི། དཔེར་ན་ཁ་ཟས་ཀྱིས་ལུས་ཀྱི་འབྱུང་བ་ཆེན་པོ་རྒྱས་པའི་སྒོ་ནས། དེ་ལ་བརྟེན་པའི་དབང་པོ་རྒྱས་པར་འགྱུར་ལ། དེ་རྒྱས་པས་དེ་ལ་བརྟེན་པའི་རྣམ་པར་ཤེས་པ་རྒྱས་པར་འགྱུར་བ་བཞིན་ནོ། །དེའི་ཕྱིར་མེ་ལྷ་ནི་ལྷའི་ཞལ་དུ་བཞེད་དོ། །མཆོད་པའི་ཕྱག་རྒྱ་ཆེན་པོ་ནི། །ཞེས་བྱ་བ་ལ་སོགས་པ་ནི། མཆོད་པའི་ཕྱག་རྒྱ་ཆེན་པོ་ཏིང་ངེ་འཛིན་གྱི་མཆོད་པ་ཆེན་པོ་སྟེ། འདི་དག་ཇི་ལྟར་དབུལ་བ་ནི་གོང་དུ་བཤད་དོ། །རེ་ཞིག་ཡི་གེ་ལས་སྤྲོ་བར་འདོད་ན་ཞིང་དང་གཞལ་ཡས་ཁང་དང་བཅས་པ་ནི་ཡི་གེ་བྷྲཱུྃ་ལས་སྤྲོས་ཏེ་དབུལ། རིན་པོ་ཆེའི་རྒྱན་གྱི་བྱེ་བྲག་རྣམས་ནི་ཡི་གེ་ཏྲཾ་ལས་སྤྲོས་ཏེ་དབུལ། ཁྲུས་ཀྱི་རྫིང་བུ་ལ་སོགས་པ་ནི་ཡི་གེ་ཁཾ་ལས་སྤྲོས་ཏེ་དབུལ། སྒྲའི་བྱེ་བྲག་ནི་ཡི་གེ་ཧྲཱིཿལས་སྤྲོས་ཏེ་དབུལ། བདུད་རྩི་ལ་སོགས་པའི་ཞལ་ཟས་ཀྱི་བྱེ་བྲག་ནི་ཡི་གེ་ཨ་ལས་སྤྲོས་ཏེ་དབུལ། བྲོ་གར་གྱི་འདུ་འཕྲོ་རྣམས་ནི་ཡི་གེ་ཧཾ་ལས་སྤྲོས་ཏེ་དབུལ་ཞེས་ཀྱང་བཤད་དོ། །དབུལ་བའི་རིམ་པའང་གནས་སྐབས་ཀྱི་བྱེ་བྲག་དང་། ཏིང་ངེ་འཛིན་གསལ་མི་གསལ་གྱི་བྱེ་བྲག་གིས་རིམ་པའམ་ཅིག་ཅར་དུ་དབུལ་བར་བྱའོ། །གསལ་ལྡན་མའམ་བྱིན་རླབས་ལ། །ཞེས་བྱ་བ་ལ་སོགས་པ་ནི་སྦྱོར་བའི་མཆོད་པ་སྟེ། དེ་ལ་གསལ་ལྡན་མ་ནི་ཤེས་རབ་དང་ཏིང་ངེ་འཛིན་ལྡན་པའི་གཟུངས་མའོ། །དེ་དང་མི་ལྡན་པ་ནི་བྱིན་གྱིས་བརླབས་པའོ། །ལ་ལ་ན་རེ་གསལ་ལྡན་མ་ནི་ཡེ་ཤེས་ཀྱི་ཕྱག་རྒྱའོ། །བྱིན་གྱིས་བརླབ་པ་ནི་ལས་ཀྱི་ཕྱག་རྒྱའོ་ཞེས་ཟེར་རོ། །ལུས་ངག་སེམས་དང་ཆོས་ཐམས་ཅད། །ཅེས་བྱ་བ་ལ་སོགས་པ་ནི། དཀྱིལ་འཁོར་དུ་འཇུག་པའི་མཚམས་སྦྱོར་ཡིན་ཏེ། དང་པོར་དེ་བཞིན་ཉིད་ཀྱི་ཏིང་ངེ་འཛིན་ནས་བཟུང་ནས་མཆོད་པའི་ཆོ་ག་ཡན་ཆད་རྫོགས་པར་བྱས་པ་ལ་ནི་ཀུན་བྱས་ཞེས་བྱའོ། །དེ་ནས་རྡོ་རྗེ་སློབ་དཔོན་འཇུག་པར་བྱ་བས། དབང་ཕྱུག་རིག་པས་འཇུག་ཅེས་ཏེ། ལྷ་དང་དབྱེར་མེད་པར་བསྒོམ་པ་ཉིད་རིག་པས་འཇུག་པ་ཡིན་ནོ། །དེ་ནས་སློབ་མ་གཞུག་པར་བྱ། །ཞེས་ཏེ། སེམས་བསྐྱེད་པའི་ཆོ་ག་དང་། མིག་དགབ་པ་དང་། བརྟན་པར་དམ་བཅའ་ཞིང་དམ་ཆུ་བླུད་བ་དང་། མེ་ཏོག་དོར་བ་དང་། ལྷར་བྱིན་གྱིས་བརླབས་ཅིང་དཀྱིལ་འཁོར་བསྟན་པ་རྣམས་སོ། །དེ་ལ་ཕན་པའི་དབང་དང་། ནུས་པའི་དབང་རིམ་པ་བཞིན་དུ་སྦྱིན་ཞིང་། དམ་ཚིག་དཔོག་པ་དང་མན་ངག་སྦྱིན་པ་རྣམས་བྱའོ། །དེ་ནས་སློབ་མས་ཀྱང་སློབ་དཔོན་དང་དཀྱིལ་འཁོར་དང་གྲོགས་པོ་རྣམས་ལ་ཅི་ནུས་ཀྱིས་མཆོད་པར་བྱའོ། །དེ་ལ་ཕན་པའི་དབང་ནི་དབུ་རྒྱན་གྱི་དབང་ལ་སོགས་པའོ། །ནུས་པའི་དབང་ནི་ཉན་པ་ལ་སོགས་པའི་དབང་སྟེ། འདི་དག་ཀྱང་ཕན་པའི་དབང་ཡིན་མོད་ཀྱི། བྱེ་བྲག་ཏུ་སོ་སོའི་ནུས་ཚད་ལ་རག་ལུས་པས་དེ་སྐད་ཅེས་བྱའོ། །དེ་བས་ན་དབང་དང་དམ་ཚིག་དང་མན་ངག་རྣམས་ལ་སོ་སོའི་ཐིག་ཚད་ཡོད་པས། སྙིང་རྗེས་ཆུད་མ་ཟོས་པར་གཟུང་། །ཞེས་བསྟན་པ་ཡིན་ནོ། །དེ་ལ་དཀྱིལ་འཁོར་མཛུབ་གང་པ་ལ་སོགས་པའི་སྐབས་སུ་ཐིག་གདབ་པའི་ཆོ་ག་གསུངས་སོ། །བཅུ་དྲུག་པ་ལ་སོགས་པའི་སྐབས་སུ་ཕྱག་རྒྱ་དགོད་པ་གསུངས་སོ། །རྒྱང་གྲགས་ལ་སོགས་པའི་སྐབས་སུ་ཚོན་དགྱེ་བར་གསུངས་ཏེ། དེ་ལ་ཚོན་གྱི་ངེས་ཚིག་ནི་རཱ་ཛ་ཞེས་བྱ་བ་མཆོད་པ་དང་རོ་བཅུད་དང་མཚན་མ་ལ་འཇུག་སྟེ། འདིར་ནི་མཚན་མར་གྲགས་པའོ། །གཞན་ཡང་ར་ག་ཞེས་བྱ་བའི་སྒྲའི་དོན་ནི། ར་ན་རག་ཏི་རང་ག་ཞེས་བྱ་སྟེ། དེ་ལ་ར་ན་ཞེས་བྱ་བ་ནི། ཀླེ་ཤ་ཨ་ག་ཉ་ན་ར་ཎ་ཞེས་བྱ་སྟེ། ཉོན་མོངས་པ་དང་མི་ཤེས་པའི་ཀུན་ནས་དཀྲུགས་པ་ལ་བྱ། རྣམ་པ་གཅིག་ཏུ་ཨ་པ་ར་ནར་ཞེས་བྱ་བ་སྟེ། སྒྲིབ་པ་ལ་བྱ། གཏི་ནི་རྟོགས་ཤིང་ཁོང་དུ་ཆུད་པ་ལ་བྱ་སྟེ། སྒྲིབ་པ་རྣམ་པ་གཉིས་ཀྱིས་དཀྲུགས་ཤིང་བསྒྲིབས་པ་རྣམས་ལ་རྟོགས་པ་བསྐྱེད་པར་བྱེད་པས་དེ་སྐད་ཅེས་བྱའོ། །ཏིང་འཛིན་རོལ་མོ་མཐའ་ཡས་མཆོག །ཅེས་བྱ་བ་ལ་སོགས་པ་ནི། དཀྱིལ་འཁོར་བྱིན་གྱིས་བརླབ་པ་སྟོན་ཏེ། དེ་ལ་ཏིང་ངེ་འཛིན་གྱི་འཕྲུལ་པས་འདི་ལྟར་ཡི་གེ་བྲིས་པ་དང་། དེ་བཞིན་དུ་གདན་དང་སྙིང་པོ་དང་ཕྱག་རྒྱ་བྲིས་ཤིང་བཀོད་པ་རྣམས་ལ་སྐུ་གསུང་ཐུགས་དང་ལྡན་པར་བྱིན་གྱིས་བརླབ་ན་དངོས་གྲུབ་འགྲུབ་པར་ངེས་སོ་ཞེས་བྱ་བའི་དོན་ནོ། །གང་གི་ཕྱིར་ཞེ་ན། ས་ལ་སོགས་པས་ཕྱག་རྒྱར་བྱས། །ཞེས་བྱ་བ་ལ་སོགས་པ་གསུངས་ཏེ། ཇི་ལྟར་འབྱུང་བ་ཆེན་པོའི་རྒྱུད་ལས། ཕྱག་རྒྱའི་མཚན་མར་བྱས་པ་ཙམ་གྱིས་ཀྱང་རྒྱུའི་བྱེ་བྲག་དང་བསམ་པའི་བྱེ་བྲག་གི་དབང་གིས་རྣམ་པར་གྲོལ་བ་རིམ་པ་ཐོབ་པའི་རྒྱུར་འགྱུར་ན། གཟུང་འཛིན་གྱི་དངོས་པོ་ལ་ཞེན་པའི་དྲི་མ་དག་པའི་ཡེ་ཤེས་ཀྱི་མཚན་མའི་ཕྱག་རྒྱ་དེ་དག་ཡེ་ཤེས་ཀྱི་དཀྱིལ་འཁོར་དུ་བྱིན་གྱིས་བརླབས་ཤིང་སྦྱངས་པ་ལས་གྲུབ་པར་འགྱུར་བ་ལྟ་ཅི་སྨོས་ཏེ། ཤེས་རབ་དང་ཏིང་ངེ་འཛིན་དེ་ཉིད་དངོས་གྲུབ་ཆེན་པོ་ཡིན་ནོ། །ད་ནི་གོང་དུ་བསྟན་པའི་དཀྱིལ་འཁོར་བྱིན་གྱིས་བརླབས་པ་དེ་དག་ཏུ་སྤྱན་དྲངས་པ་ལ་སོགས་པ་བསྟན་པའི་ཕྱིར། ཕྱོགས་དུས་དཀྱིལ་འཁོར་བདག་ཉིད་ཆེ། །ཞེས་བྱ་བ་ལ་སོགས་པ་སྨོས་ཏེ། དེ་ལ་ཕྱོགས་དུས་དཀྱིལ་འཁོར་ནི། ཕྱོགས་བཅུ་དུས་བཞིས་བསྡུས་པའི་སངས་རྒྱས་ཀྱི་དཀྱིལ་འཁོར་རྣམས་སོ། །བདག་ཉིད་ཆེ་ཞེས་བྱ་བ་ནི་སྤྱིར་གྲགས་པ་སངས་རྒྱས་ཀྱི་མཚན་གྱི་རྣམ་གྲངས་འདྲེན་པ་རང་བྱུང་བདག་ཉིད་ཆེན་པོ་ལ་སོགས་པའོ། །ལ་ལ་དག་ན་རེ་བྱང་ཆུབ་སེམས་ཀྱི་མཚན་ཉིད་དུ་ཆོས་ཐམས་ཅད་དབྱེར་མེད་པ་ནི་བདག་ཉིད་ཆེན་པོ་ཞེས་བྱ་སྟེ། དེ་ཉིད་མི་དམིགས་ཐུགས་ཀྱི་དཀྱིལ་འཁོར་ཡིན་ནོ་ཞེས་ཟེར་རོ། །མདོར་ན་ཆོས་ཀྱི་སྐུས་ཀུན་ཏུ་ཁྱབ་པར་ཐུགས་རྗེ་དང་སྤྲུལ་པ་དག་གིས་ཀྱང་ཁྱབ་སྟེ། དེ་བས་ན་གང་ནས་གང་དུ་སྤྱན་དྲངས་པ་མི་དམིགས་ཀྱང་ཏིང་ངེ་འཛིན་གྱིས་དམིགས་ཤིང་འཕྲུལ་པ་ཉིད་ཀྱིས་སྤྱན་དྲངས་པར་འགྱུར་རོ། །ད་ནི་དཀྱིལ་འཁོར་དུ་འཇུག་པའི་མཚན་ཉིད་ལྷ་རྣམས་དང་གཉིས་སུ་མེད་པར་བྱ་བ་སྟོན་ཏེ། དེའི་ཕྱིར། རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཞེས་བྱ་བ་ལ་སོགས་པ་གསུངས་ཏེ། དེ་ལ་ཡེ་ཤེས་ཀྱི་དཀྱིལ་འཁོར་ཐམས་ཅད་ཀྱང་རིག་པ་རང་སྣང་བ་ཙམ་ཡིན་པའི་ཕྱིར་བདག་དང་རང་བཞིན་དབྱེར་མེད་དེ། དེ་ལྟ་བུའི་དཀྱིལ་འཁོར་དེར་རྣལ་འབྱོར་བ་འཇུག་པའི་མཚན་ཉིད་དམ་ལུགས་ཀྱང་། བདག་ལ་བསྟིམས་ཤིང་མཉམ་པར་སྦྱར་བས་འགྲུབ་པར་འགྱུར་རོ། །ཅི་ཞིག་འགྲུབ་པར་འགྱུར་ཞེ་ན། ཕྱོགས་དུས་ཀུན་ནས་གཤེགས་པ་ཡི། །ཞེས་བྱ་བ་ལ་སོགས་པ་གསུངས་ཏེ། ཕྱོགས་བཅུ་དུས་བཞིའི་རྒྱལ་བ་རྣམས་ཀྱིས་སྔོན་བྱང་ཆུབ་ཀྱ ི་སྤྱད་པ་སྤྱོད་པའི་ཚེ། ཉིད་ཀྱི་དཀའ་བ་སྣ་ཚོགས་པའི་སྒོ་ནས་བསྙེན་པའི་དངོས་གྲུབ་སྣ་ཚོགས་པ་དག་དེ་ལ་རྫོགས་པར་འགྱུར་རོ། །གཞན་ཡང་ཉེ་བའི་སྲས་སུ་དགོངས་པར་འགྱུར་རོ། །དེ་བས་ན། ཉེ་བར་གྱུར་པའི་དམ་ཚིག་མཆོག །ཅེས་གསུངས་པ་ཡིན་ནོ། །ད་ནི་དངོས་གྲུབ་དེ་དག་ཇི་ལྟར་འགྲུབ་པའི་ཚུལ་སྟོན་སྟེ། དེ་ལ་དངོས་གྲུབ་གཞན་དང་གཞན་ན་ཡོད་པ་ཞིག་གཞན་གྱིས་ཐོབ་པར་འགྱུར་བ་ནི་མ་ཡིན་གྱིས། རང་རིག་པའི་ཡེ་ཤེས་ཉིད་དངོས་གྲུབ་སྣ་ཚོགས་སུ་སྣང་བ་བརྒལ་བ་ལན་དང་བཅས་པར་སྟོན་ཏེ། དེ་ལ་དང་པོར་དཔེ་དགོད་པ་བསྟན་པའི་ཕྱིར། དཔག་བསམ་ཤིང་དང་ཡིད་བཞིན་གྱི། །རིན་པོ་ཆེ་དང་འབྱུང་བ་ཀུན། །དེ་དག་རྫས་ཡོད་མ་ཡིན་ཏེ། །རང་སེམས་བསོད་ནམས་བརྟན་པ་ཡིན། །ཞེས་གསུངས་པ་སྟེ། དཔེར་ན་ལྷའི་གནས་ལ་སོགས་པ་ན་དཔག་བསམ་གྱི་ཤིང་གི་གྲིབ་མ་ལ་གནས་པ་རྣམས་ལ་རེ་བ་བསྐོང་བར་ནུས་པ་དང་། ཡིད་བཞིན་གྱི་ནོར་བུ་རིན་པོ་ཆེ་ལ་མཆོད་པ་བྱེད་པ་རྣམས་ལ་རེ་བ་སྐོང་བར་བྱེད་པ་ལ་སོགས་པ་དང་། གཞན་འདོད་པ་འབྱུང་བའི་གནས་སུ་གྱུར་པ་ཀུན་དེ་དག་སེམས་ལས་གུད་ན་རྫས་སུ་ཡོད་ནས་དེ་ལ་སྤྱོད་པ་མ་ཡིན་ཏེ། རང་རང་གི་སེམས་བསོད་ནམས་ཀྱི་མཐུས་བརྟས་ཤིང་བརྟན་པར་གྱུར་པ་དེ་ཉིད་དེ་ལྟ་བུར་སྣང་བ་ཡིན་ནོ། །དེ་བཞིན་དུ་སྐུ་གསུང་ཐུགས་ཀྱི་དངོས་གྲུབ་ཀྱང་དེ་དང་འདྲ་སྟེ། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོངས་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་སྦྱར་བར་བྱ་སྟེ། དེ་ལ་ངོ་མཚར་ཆོ་འཕྲུལ་རྨད་ཀྱི་ཆོས་ནི་སྐུ་དང་ཡེ་ཤེས་ཀྱི་དཀྱིལ་འཁོར་རོ། །དེ་དག་གུད་ན་མེད་དེ་ཐབས་ཞེས་བྱ་བ་གསང་སྔགས་ཀྱི་བསླབ་པར་གྱུར་པ་མཐའ་དྲུག་དང་བཅུས་བསྡུས་པ་ལ་བརྟེན་ནས། ཕྱིན་ཅི་མ་ལོག་པར་སྐྱེས་པས་ཤེས་རབ་ཉིད་དངོས་གྲུབ་དེ་ལྟ་བུའི་ངང་དུ་འབྱུང་ངོ་ཞེའོ། །འདིར་བརྒལ་བ། འབྱུང་ཞེས་བྱ་བའི་སྒྲ་རྒྱུ་དང་འབྱུང་ཁུངས་དག་ལས་བྱུང་ཞིང་སྐྱེས་པ་ལ་བྱ་ན། འདིར་གང་ལས་གང་འབྱུང་ཞེས་ན། ལན་དུ་དེ་དག་གཉིས་སུ་མེད་པར་བསྟན་པའི་ཕྱིར། ཤེས་རབ་དབྱིངས་ཀྱི་དེ་བཞིན་ཉིད། །ཐབས་ཀྱི་ཕྱག་རྒྱར་གྱུར་པའི་ཕྱིར། །ཞེས་སྨོས་ཏེ། ཕྱིན་ཅི་མ་ལོག་པའི་ཤེས་རབ་ཀྱི་ངང་ཉིད་ཐབས་ཀྱི་ཕྱག་རྒྱ་སྐུ་དང་ཡེ་ཤེས་སུ་གྱུར་པའི་ཕྱིར་དབྱེར་མེད་དེ། དེ་བས་ན། ཡེ་ཤེས་ལ་ནི་ཡེ་ཤེས་རོལ། །ཞེས་སྨོས་སོ། །འོ་ན་ཤེས་རབ་ཀྱི་རང་བཞིན་དང་བྲལ་བར་མི་འགྱུར་རམ་ཞེ་ན། ཡེ་ཤེས་རོལ་པ་ཉིད་ཀྱང་གསོག །ཅེས་སྨོས་ཏེ། དེ་ཉིད་ཀྱང་དངོས་པོར་མ་གྲུབ་བོ་ཞེས་བྱ་བའི་ཐ་ཚིག་གོ། །ཡེ་ཤེས་ཅི་འདྲ་བར་སྐུ་ཡང་དེ་འདྲ་སྟེ། དེ་བས་ན། རྒྱལ་བ་མངོན་བྱུང་སྐྱོབ་པ་དང་། །བྱིན་རླབས་སྟོན་པའང་དེ་བཞིན་ཏེ། །ཞེས་བྱ་བ་སྨོས་ཏེ། རྒྱལ་བ་འཇིག་རྟེན་དུ་སྐུ་མངོན་དུ་བྱུང་ནས་འགྲོ་བ་ལ་སྐྱོབ་པའི་བྱིན་གྱི་རླབས་སྟོན་པ་རྣམས་ཀྱང་ཡེ་ཤེས་ལ་བརྗོད་པ་བཞིན་དུ། རང་རིག་པའི་ཤེས་རབ་ཉིད་སྐུ་སྣ་ཚོགས་སུ་སྣང་བས་སྐུ་ལ་སྐུ་རོལ་ཞིང་། དབྱེར་མེད་པ་ཡིན་ལ། དེ་ཉིད་རང་བཞིན་མེད་པས་གསོག་ལྟ་བུར་ཤེས་པར་བྱའོ་ཞེའོ། །འོ་ན་སྐུ་དང་ཡེ་ཤེས་ཀྱི་དཀྱིལ་འཁོར་དེ་དག་ཀྱང་གསོབ་ཡ་མ་བརླ་སྒྱུ་མ་ལྟ་བུ་ཡིན་པས། དོན་གྱིས་དགོས་པ་ཅི་ཡང་མེད་པ་ཞིག་ཡིན་ནམ་ཞེ་ན། བྱ་བྱེད་ནུས་པའི་གཟི་བརྗིད་ཀྱིས། །སྒྱུ་མ་རྡོ་རྗེ་མཚན་པོ་མཆོག །ཅེས་སྨོས་ཏེ། དེ་ལྟ་བུ་མ་ཡིན་ཏེ། ཡེ་ཤེས་ཀྱང་དོན་ལ་ཕྱིན་ཅི་མ་ལོག་པར་རྟོགས་པ་དང་། སྐུ་དག་གིས་ཀྱང་འགྲོ་བ་ཆུད་མི་གསོན་པའི་ནུས་པ་དག་མངའ་སྟེ། དེ་ལྟ་བས་ན་སྒྱུ་མ་ལྟ་བུ་ཡིན་མོད་ཀྱི། བདུད་ཐམས་ཅད་ཀྱིས་མི་ཤིགས་པའི་ནུས་མཐུ་མངའ་བས། རྡོ་རྗེ་བཙན་པོ་མཆོག་ཅེས་གསུངས་སོ། །ད་ནི་དངོས་གྲུབ་དེ་དག་རྒྱུ་གང་གིས་འགྲུབ་པ་དང་། གཞན་གྱི་རྒྱུད་ལ་ཇི་ལྟར་སྣང་བ་རྣམས་བརྒལ་བ་ལན་དང་བཅས་པར་བསྟན་པའི་ཕྱིར། ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པས། །ཞེས་བྱ་བ་ལ་སོགས་པ་གསུངས་ཏེ། དེ་ལ་སྐབས་འདིར་ནི་དངོས་གྲུབ་ཀྱི་རྒྱུ་དང་ཐབས་སུ་གྱུར་པ། དང་པོ་འཇུག་པའི་སྤྱོད་པ་དང་། དངོས་གྲུབ་སྒྲུབ་པའི་སྤྱོད་པ་དག་གསུངས་ཏེ། དེ་ལ་ཐེག་པ་ཆེན་པོ་མ་ནོར་བར་སྟོན་པའི་དགེ་བའི་བཤེས་གཉེན་ཡོངས་སུ་བཟུང་བ་ནི་དངོས་གྲུབ་སྒྲུབ་པའི་ཐབས་ཀྱི་ཆོ་ག་དང་པོའོ། །དེ་ནས་དེས་བསྟན་པའི་གསང་བའི་དཀྱིལ་འཁོར་དུ་འཇུག་ཅིང་དབང་ནོད་པ་ནི་དེ་བཞིན་དུ་གཉིས་པའོ། །དེའི་ཚེ་ཐེག་པ་ཆེན་པོའི་དམ་ཚིག་གི་སྡོམ་པ་ནོས་ཏེ་བདག་དམ་ཚིག་ཅན་དུ་བྱ་བ་ནི་གསུམ་པའོ། །དེ་ནས་སྒྲུབ་པ་ལ་སོགས་པའི་མན་ངག་ཐམས་ཅད་ནོས་ཏེ་མན་ངག་ཅན་དུ་བྱ་བ་ནི་བཞི་པ་སྟེ། དེ་ཕན་ཆད་ཀྱང་སྤྲོ་བ་མི་ལྷོད་ཅིང་བརྩོན་པ་མི་འདོར་བས་བཀའ་བཞིན་དུ་བྱེད་པ་ནི་ལྔ་པ་སྟེ། འདི་དང་ལྡན་ན་དངོས་གྲུབ་ཀྱི་རྒྱུ་ཡོད་པ་ནི་འོ་མ་ལས་མར་བཞིན་ནོ། །ཡོ་བྱད་ལྔ་ཞེས་བྱ་བ་ནི་རྐྱེན་དང་ལྡན་པ་སྟེ། འདི་ལྟར་སྒྲུབ་པའི་གནས་བར་ཆད་དུ་མི་འགྱུར་བ་དང་། སྒྲུབ་པའི་གྲོགས་མཆོག་བར་ཆད་དུ་མི་འགྱུར་བ་དང་། འཚོ་བའི་ཡོ་བྱད་བར་ཆད་དུ་མི་འགྱུར་བ་དང་། དངོས་གྲུབ་ཀྱི་རྫས་ཚང་ཞིང་ཚོགས་པ་དང་། དམ་ཚིག་གི་རྫས་ཚང་ཞིང་ཚོགས་པ་སྟེ། འདི་རྣམས་དང་ལྡན་ན་དངོས་གྲུབ་ཀྱི་རྐྱེན་དང་ལྡན་པར་བྱའོ། །སྔགས་ཀྱི་ཡན་ལག་ལྔ་ནི་སྒོ་གསུམ་ནས་བཟླས་བརྗོད་ཀྱི་ཡན་ལག་ལྔ་དང་ལྡན་པའི་ཏིང་ངེ་འཛིན་རྩེ་གཅིག་པ་ཡོད་པ་སྟེ། དེ་ཡང་གོང་དུ་བསྟན་པ་བཞིན་དུ་བདག་གི་དེ་ཁོ་ན་ཉིད་དང་། ལྷའི་དེ་ཁོ་ན་ཉིད་དང་། གསང་སྔགས་ཀྱི་དེ་ཁོ་ན་ཉིད་དང་། བཟླས་བརྗོད་ཀྱི་དེ་ཁོ་ཉིད་དང་། འཕྲོ་འདུའི་དེ་ཁོ་ན་ཉིད་རྣམས་ཏེ། འདི་རྣམས་དང་ལྡན་ན་སྦྱོར་བ་ལ་མཁས་པ་ཞེས་བྱ་སྟེ། དེ་རྣམས་ཀྱིས་དངོས་གྲུབ་འགྲུབ་པར་བྱེད་དོ་བར་བསྟན་ནོ། །དེ་ལ་འགྲུབ་པའི་དུས་ནི། མ་ཉམས་འཇུག་ལ་རབ་བརྩོན་ན། །ཞག་ནི་སུམ་ཅུ་ཕྲག་དྲུག་གམ། །ཞེས་བྱ་བ་ལ་སོགས་པ་སྨོས་ཏེ། དེ་ལ་འཇུག་པ་ཞེས་བྱ་བ་ནི་སྒྲུབ་པ་སྟེ། བསྙེན་པའི་ཚེ་ན་ནི་ལྷག་པར་དུས་ལ་དམ་བཅས་པ་ཁོ་ནར་ངེས་པ་མེད་དེ། ཁ་ཅིག་བཟླས་བརྗོད་ཀྱི་གྲངས་ཀྱི་ངེས་པ་སྨོས་ཏེ། འདི་ལྟར་རྒྱུད་སྤྱི་ལས་འབུམ་ཕྲག་གསུམ་ནས་བྱེ་བ་ཕྲག་ལྔའི་བར་དག་སྨོས་སོ། །ཁ་ཅིག་ཏུ་ནི་མཚན་མའི་སྒོ་ནས་དམ་བཅས་པ་དག་སྨོས་སོ། །དུས་ཀྱང་ལོ་བཅུ་གཉིས་སུ་དམ་བཅས་པ་ཡན་ཆད་སྨོས་ཏེ། དེ་བས་ན་ཟླ་བ་དྲུག་ཅེས་བྱ་བ་ནི་ཕལ་ཆེར་སྒྲུབ་པའི་དུས་སུ་གསུངས་པ་ཡིན་པས། འདིར་ཡང་དེ་བཞིན་དུ་ཤེས་པར་བྱའོ། །སྤྱིར་ལུང་རྣམས་ལས་གྲུབ་པའི་ཚད་ངེས་པར་བསྟན་པ་འདི་དག་ཀྱང་སེམས་དང་པོ་བསྐྱེད་པ་ཁོ་ནས་བཟུང་བ་ཡང་མ་ཡིན། སྲིད་པ་མཐའ་མ་ཁོ་ནས་བཟུང་བ་ཡང་མ་ཡིན་ཏེ། ཐེག་པ་ཆུང་ངུའི་གཞུང་གིས་གང་ཟག་ཁ་ཅིག་ཚེ་གཅིག་གིས་དགྲ་བཅོམ་པའི་འབྲས་བུ་འགྲུབ་པར་གསུངས་པ་ཡང་རྒྱུན་ཏུ་ཞུགས་པ་དང་། གལ་ཏེ་སོ་སོའི་སྐྱེ་བོ་ཞིག་ན་ཡང་སྲིད་པ་མཐའ་མ་པའི་དབང་དུ་བྱས་ཞེས་གྲགས། ཐེག་པ་ཆེན་པོ་ཕ་རོལ་ཏུ་ཕྱིན་པའི་ཚུལ་ལས་ནི། བཟང་དང་སྨོན་པའི་སྟོབས་ཅན་ལ་སོགས་པ་བསམ་པ་ངེས་པ་ནས་ཚད་གཟུང་ཞེས་གྲགས། གསང་སྔགས་ཕྱི་པའི་ཚུལ་ལས་ནི། སྐལ་པ་རབ་དང་མོས་པ་རབ་དང་མཉམ་པར་གཞག་པ་རབ་ཏུ་གྱུར་པ་ལས་བསྙེན་པ། མཚན་མ་བསྙེན་པར་གྱུར་པ་ལས་མཐོང་བའི་ཆོས་ལ་དངོས་གྲུབ་ཆེན་པོ་ཐོབ་པར་འགྱུར་ལ། དེས་སངས་རྒྱས་ཀྱི་ཞལ་མཐོང་བར་ནུས་ནས། དེ་ནས་ཚེ་གཅིག་གམ་གཉིས་སམ་གསུམ་ལ་སོགས་པའི་རིམ་གྱིས་མྱུར་དུ་བླ་ན་མེད་པའི་བྱང་ཆུབ་ཏུ་འགྲུབ་པར་འགྱུར་ཞེས་གྲགས། རྣལ་འབྱོར་ཆེན་པོའི་ཚུལ་ལས་ནི། སྐལ་བ་ཆུང་བར་གྱུར་ཀྱང་མོས་པ་དང་བརྩོན་འགྲུས་དང་དགེ་བའི་བཤེས་གཉེན་གྱི་སྟོབས་ཀྱིས་མཐོང་བའི་ཆོས་ལ་ཚེ་ལ་དབང་བ་ཐོབ་པར་འགྱུར་ལ། ཚེ་དེས་ཀྱང་མྱུར་དུ་སངས་རྒྱས་ཀྱིས་ཐོབ་པར་འགྱུར་རོ་ཞེས་གྲགས་སོ། །འདི་དག་ནི་སོ་སོའི་སྤྱིའི་གཞུང་ཙམ་དུ་གྲགས་པ་སྟེ། ངེས་པའི་དོན་དུ་ན་ཚད་ངེས་པར་གཟུང་དུ་མི་རུང་སྟེ། གང་གི་ཕྱིར་དུས་ནི་སེམས་ཀྱི་སྣང་བ་ཡིན་ལ། སེམས་ལ་དབང་མ་ཐོབ་ཀྱི་བར་དུ་ནི་ཡུལ་དང་དུས་རྣམས་ཀྱང་སོ་སོར་བསྟན་པར་ངེས་པར་སྣང་ལ། སེམས་ལ་དབང་ཐོབ་ཕན་ཆད་ནི་ཡུལ་དང་དུས་ལ་ཅི་དགར་སྣང་ངོ་། །འདི་ལྟར་དགོངས་པ་ངེས་པར་འགྲེལ་པ་ལས་ཀྱང་། སྔོན་གྱི་ལས་ཀྱི་སྒྲིབ་བ་སྦྱོང་བའི་ཚད་ངེས་པ་མེད་དེ་ཞེས་རྒྱ་ཆེར་གསུངས་པ་དང་། དྲི་མ་མེད་པར་གྲགས་པས་བསྟན་པའི་མདོ་ལས་ཀྱང་། དུས་ཐུང་བར་འདོད་པ་རྣམས་ལ་བསྐལ་པ་མང་པོ་ཞག་བདུན་གྱིས་འདའ་བར་བྱིན་གྱིས་རློབ་བོ་ཞེས་གསུངས་པ་ལྟ་བུ་སྟེ། འདི་ལྟར་སེམས་ལ་དབང་ཐོབ་པས་ཇི་ལྟར་འདོད་པ་བཞིན་སྣང་བའི་རྒྱུ་དང་། འཕགས་པ་རྣམས་ཀྱི་ཐུགས་རྗེ་དང་སྨོན་ལམ་གྱི་མཐུ་ཡང་དེ་བཞིན་དུ་བྱིན་གྱིས་རློབས་པར་འགྱུར་བ་དེའི་ཕྱིར་ཚད་ངེས་པར་གཟུང་བར་མི་བྱའོ། །འདིར་དཀྱུས་ཀྱི་འབྲེལ་པ་བསྒྲུབ་པ་ནི། ཆོ་ག་ཡན་ལག་རྫོགས་པའི་རྣལ་འབྱོར་པས་སྒྲུབ་པ་ལ་སོགས་པའི་ཆོ་ག་དང་བཅས་པས་གང་དག་བསམ་པ་མ་ངེས། རྐྱེན་སྣ་ཚོགས་ཀྱི་དབང་དུ་འགྱུར་བཞིན་དུ་ལུང་བསྟན་དུ་མི་རུང་སྟེ། དེ་བས་ན་བཀའ་ཐམས་ཅད་ཀྱང་ཇི་ལྟར་གསུངས་པ་བཞིན་བདེན་པ་ཡང་མ་ཡིན་ལ། འདི་ཁོ་ན་བདེན་གྱི་གཞན་ནི་བདེན་པ་མ་ཡིན་ནོ་ཞེས་དགག་པར་གསུངས་པ་ཡང་མ་ཡིན་ནོ། །དེ་དག་ནི་སྤྱིར་ཤེས་པར་བྱའོ། །ཆོས་ལ་དབང་སྒྱུར་བ་རྣམས་ཀྱིས་རིག་འཛིན་རྣམས་ཀྱི་དམ་པ་གྲུབ་ནས་སྐྱེ་རྒུའི་ཚེ་ལོ་བརྒྱ་པའི་དབང་དུ་བྱས་པའི་མི་ཚེ་བཅུ་དྲུག་ཙམ་གྱིས་ཀྱང་འབྲས་བུ་སྐུ་ལྔ་ལྷུན་གྱིས་གྲུབ་པར་འགྱུར་རོ། །དེ་ལྟར་གྱུར་པའི་ཡེ་ཤེས་སྤྲོས་པ་དང་བྲལ་བ་དེ་ཉིད་ལ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཡོངས་སུ་དག་པའི་ཞིང་ཁམས་སངས་རྒྱས་ཀྱི་ཞིང་གི་རྒྱན་ཕུན་སུམ་ཚོགས་པ་ལ་སོགས་པ་སྣང་ཞིང་མཐོང་བ་དང་མཐོང་བས་ཕན་ཚུན་མཉེས་པ་ལ་སོགས་པ་ནི། དཔེར་ན་ལས་མཐུན་རྣམས་ལ་ལུས་དང་གནས་དང་ལོངས་སྤྱོད་རྣམས་ཕན་ཚུན་ཐུན་མོང་དུ་སྣང་བ་བཞིན་དུ་སངས་རྒྱས་རྣམས་ཀྱང་། མཐུན་པའི་ཡེ་ཤེས་རང་རྣང་བའོ། །ཞེས་སྦྱར་རོ། །འོ་ན་དུད་འགྲོ་དང་ཡི་དྭགས་ཕལ་པ་དག་གིས་དེ་བས་ཆེས་བསོད་ནམས་ཀྱིས་འཕགས་པའི་མི་རྣམས་མཐོང་བ་དེ་བཞིན་དུ། རྒྱལ་བ་རྣམས་དང་ཡེ་ཤེས་མཐུན་པར་མ་གྱུར་ཀྱང་མཐོང་དུ་ཅིས་མི་རུང་ཞེ་ན། ལན་དུ། གཅིག་དང་དུ་མར་བྲལ་བ་ཡིས། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །ཞེས་སྨོས་ཏེ། སངས་རྒྱས་ནི་སྤྲོས་པ་དང་བྲལ་བ་ཡིན་པའི་ཕྱིར་མཚན་ཉིད་མེད་པས་ཤེས་བྱེད་གང་གིས་ཀྱང་མཐོང་དུ་མི་རུང་ངོ་ཞེས་གསུངས་པ་སྟེ། འདི་ལྟར་སྡོང་པོ་བཀོད་པ་ལས་ཀྱང་། ཇི་ལྟར་མཚན་ཉིད་སྣ་ཚོགས་པ། །དེ་དག་བྱིས་པའི་སྤྱོད་ཚུལ་ཏེ། །གང་ཞིག་མཚན་ཉིད་ཀུན་མེད་པའི། །སངས་རྒྱས་རྣམས་ནི་མི་མཐོང་ངོ་། །ཞེས་གསུངས་པ་དང་མཐུན་ནོ། །འོ་ནས་སངས་རྒྱས་རྣམས་ཀྱིས་སངས་རྒྱས་རྣམས་མཐོང་བ་ཡེ་ཤེས་མཐུན་པར་སྣང་བས་སོ་ཞེས་བཤད་པ་དེ་ཇི་ལྟར་སྣང་ཞིག་མཐོང་བར་འགྱུར་ཞེ་ན། རང་བྱུང་ཡེ་ཤེས་གནས་མེད་སྣང་། །ཞེས་གསུངས་ཏེ། དེ་ལ་རང་བྱུང་གི་ཡེ་ཤེས་གོང་དུ་བསྟན་པ་བཞིན། སེམས་དང་ཡེ་ཤེས་ཀྱང་གདོད་མ་ནས་གཟུང་བ་དང་འཛིན་པས་སྟོངས་པས་མཚན་མ་དེ་ཡང་གཞན་ལ་ལྟོས་པ་མེད་ལ། རང་རིག་པ་ཙམ་དེ་ཉིད་ཀྱང་ཤེས་རིག་གི་ཆོས་ཀྱིས་སྟོང་པས་གདོད་མ་ནས་འོད་གསལ་བའི་ཕྱིར་རང་བྱུང་གི་ཡེ་ཤེས་ཞེས་བྱ་སྟེ། འདི་ལ་ཡང་རྟེན་གང་ཡང་ཡོད་པ་མ་ཡིན་ནོ། །འདི་ལྟར་རྟེན་མེད་ཅིང་བདག་ཉིད་ཐོབ་པ་མེད་བཞིན་དུ། བྱིན་གྱིས་བརླབས་ཡོངས་སུ་དག་པའི་ཞིང་ཁམས་ན་སྐུ་དང་ཡེ་ཤེས་ཀྱི་བཀོད་པ་སྣ་ཚོགས་སྣང་བས། རང་བྱུང་ཡེ་ཤེས་གནས་མེད་སྣང་། །ཞེས་བྱའོ། །འོ་ན་རྒྱལ་བ་རྣམས་ཀྱིས་སེམས་ཅན་མི་མཐོང་བར་འགྱུར་རོ་ཞེ་ན། རྒྱུ་གསུམ་གྱིས་གཟིགས་པར་བཤད་དུ་རུང་བར་བསྟན་པའི་ཕྱིར། མ་རྟོགས་ལོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་གསུངས་ཏེ། དེ་ལ་རྒྱུ་དང་པོ་ནི་འགྲོ་བ་རྣམས་ཀྱི་ལོག་པར་རྟོག་པ་ཇི་སྐད་དུ་དངོས་པོ་གང་དང་གང་རྣམ་པར་བརྟགས་པའི་སྒྲིབ་པ་དེ་དག་ཐམས་ཅད་སངས་རྒྱས་རྣམས་ཀྱི་རྣམ་པར་དག་པར་གྱུར་བ་ཡིན་པས། ཆོས་དང་ཆོས་ཉིད་རང་བཞིན་གྱིས་འབྲེལ་བ་ཡོད་པའི་ཕྱིར་དང་། གཉིས་པ་ནི་སངས་རྒྱས་རྣམས་ཀྱི་ཡེ་ཤེས་ཆོས་ཐམས་ཅད་ཀྱི་ཆོས་ཀྱི་དབྱིངས་ལས་གུད་ན་མེད་པའི་ཕྱིར། ཡུལ་དང་ཡུལ་ཅན་རང་བཞིན་ཐ་མི་དད་པའི་འབྲེལ་བ་ཡོད་པའི་ཕྱིར་དང་། སངས་རྒྱས་རྣམས་ཀྱིས་སྔོན་བྱང་ཆུབ་ཀྱི་སྤྱད་པ་སྤྱོད་པ་ན། ཐུགས་རྗེ་ཆེན་པོས་ཁམས་གསུམ་གྱི་སེམས་ཅན་ཐམས་ཅད་ཡོངས་སུ་བཟུང་བས་ལས་དང་ཐུགས་རྗེ་ཡོངས་སུ་བཟུང་བའི་འབྲེལ་བ་ཡོད་པའི་ཕྱིར། འགྲོ་བ་དྲུག་གི་དུས་དང་གནས་ཐམས་ཅད་དུ་དེ་བཞིན་གཤེགས་པའི་བྱིན་རླབས་འབྱུང་ཞིང་སྣང་བར་འགྱུར་རོ་ཞེས་པའམ། རྣམ་པ་གཅིག་ཏུ་རྒྱལ་བ་རྣམས་ལ་དག་པ་འཇིག་རྟེན་པའི་ཡེ་ཤེས་མངའ་བར་འདོད་པ་རྣམས་ཀྱི་གཞུང་ལྟར་ན་འབྲེལ་བ་འདི་གསུམ་གྱི་སྒོ་ནས། རྒྱལ་བ་རྣམས་ཀྱིས་ནི་སེམས་ཅན་ལ་འབྲེལ་བའི་ཡུལ་དུ་བྱས་ལ། སེམས་ཅན་རྣམས་ཀྱི་སྒོ་ནས་ནི་འབྲེལ་བའི་ཡུལ་དུ་མ་བྱས་པས། སངས་རྒྱས་རྣམས་ཀྱིས་ནི་གཟིགས་སོ། །སེམས་ཅན་རྣམས་ཀྱིས་ནི་མཐོང་ངོ་ཞེས་སྦྱར་རོ། །ད་ནི་དཀྱིལ་འཁོར་ཆེན་པོ་འབྲི་བར་མི་ནུས་ན་སྙིང་པོའི་དཀྱིལ་འཁོར་ཙམ་ཞིག་བྱས་ཏེ། དེར་དད་པ་དང་ལྡན་པའི་སློབ་མ་ཞུགས་པར་གྱུར་ན་ཡང་དངོས་གྲུབ་རྩ་བའི་དཀྱིལ་འཁོར་ཆེན་པོ་དང་ཁྱད་མེད་པར་འཐོབ་བོ་ཞེས་བསྟན་པའི་ཕྱིར། བདེ་བ་ཆེན་པོའི་དཀྱིལ་འཁོར་ནི། །སྟངས་དཔྱལ་གཉིས་སམ་ཡང་ན་ལྔ། །བྱས་ཏེ་དད་ལྡན་རབ་ཞུགས་ན། །འདོད་པ་ཡིད་འོང་མཉམ་པར་འགྱུར། །ཞེས་གསུངས་པ་ཡིན་ནོ། །དངོས་གྲུབ་བསྒྲུབ་པའི་ལྷ་ཡང་སྐལ་བ་མཐུན་པའི་ལྷ་ལས་དངོས་གྲུབ་ཉེ་བར་བསྟན་པའི་ཕྱིར། སྐལ་བ་མཉམ་པའི་ཡེ་ཤེས་དེ། །ཉེར་ན་ཉེ་བར་འབྱུང་བ་ཡི། །ཡ་མཚན་ཆེན་པོ་འབྱུང་བར་ངེས། །ཞེས་གསུངས་ཏེ། དཀྱིལ་འཁོར་ཆེ་ཆུང་གང་དུ་ཞུགས་ཀྱང་མེ་ཏོག་དོར་བར་གྱུར་བའི་ལྷ་དེ་ནི་སྐལ་བ་མཉམ་པའི་ལྷར་གྲགས་སོ། །དེ་བཞིན་དུ་བུ མ་པའི་ནང་ནས་གསང་སྔགས་གཟུང་བར་གསུངས་པ་ལ་སོགས་པ་ལ་ཡང་སྦྱར་རོ། །གཞན་ཡང་སློབ་དཔོན་གྱི་རིག་པས་བྱིན་པའི་ལྷ་དག་དང་། སློབ་མའི་དད་པས་བླངས་པའི་ལྷ་དག་ཀྱང་སྐལ་བ་མཉམ་པའི་ལྷ་ཡིན་ནོ་ཞེས་སློབ་དཔོན་དག་གསུང་ངོ་། །དངོས་གྲུབ་མི་འགྲུབ་པའི་རྒྱུ་བསྟན་པའི་ཕྱིར། དད་མེད་ན་ཉམས་ཕུང་བར་འགྱུར། །ཞེས་གསུངས་པ་སྟེ། དད་པ་དང་དམ་བཅས་པའི་དམ་ཚིག་ནི་དངོས་གྲུབ་ཀྱི་རྒྱུའི་གཙོ་བོ་ཡིན་ལ། དེ་དག་དང་མི་ལྡན་ན་དངོས་གྲུབ་མི་འགྲུབ་ཅིང་སྡུག་བསྔལ་གྱི་རྒྱུར་བཤད་དོ། །ཚུལ་འདི་ལྟ་བུ་ནི་གཞུང་གཞན་ལས་ཀྱ ང་འདི་སྐད་དུ། བྱང་ཆུབ་སེམས་ནི་མ་བསྐྱེད་དང་། །ཐེ་ཚོམ་ཡོད་པ་ཉིད་དང་ནི། །གང་ཞིག་བཀའ་སྩལ་མི་བྱེད་དང་། །མ་དད་པས་ནི་མི་འགྲུབ་བོ། །ཞེས་གསུངས་པ་ལྟ་བུའོ། །ལེའུ་དགུ་པའོ།། ༈ །།ད་ནི་དབང་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་སྨོས་སོ། །དེ་ལ་དབང་སྤྱིའི་དོན་ནི་སྔར་བཤད་ཟིན་ཏོ། །རྒྱལ་པོ་སྦྱིན་པ་ཞེས་བྱ་བ་ནི། དབང་བསྐུར་བ་ནི་ཆོས་ཀྱི་རྒྱལ་པོའི་གོ་འཕང་སྦྱིན་པ་ཡིན་པའི་ཕྱིར་རོ། །དེ་ལ་དབང་གི་བྱེ་བྲག་ཀྱང་སྔོན་གྱི་སློབ་དཔོན་དག་ན་རེ། རྡོ་རྗེ་སེམས་དཔའི་སྒྱུ་འཕྲུལ་གྱི་དབང་ནི་སྤྱིའི་དབང་ཡིན་ལ། རྒྱུད་གཞན་གྱི་དབང་ནི་བྱེ་བྲག་གི་དབང་ཡིན་ནོ་ཞེས་གསུངས་སོ། །དེ་ཡང་ཡོ་ག་ཕྱིའི་དབང་བཅུ་དང་བཅུ་གསུམ་ལ་སོགས་པར་གྲགས་པ་དང་། དཔལ་གསང་བ་འདུས་པ་དང་ཟླ་གསང་ཐིག་ལེ་ལ་སོགས་པ་ནས། བུམ་པ་དང་གསང་བ་དང་ཤེས་རབ་ཡེ་ཤེས་ཞེས་བྱ་བར་གྲགས་པ་དང་། སངས་རྒྱས་མཉམ་སྦྱོར་ལས། སློབ་དཔོན་དང་སློབ་མའི་དབང་གིས་བསྡུས་པ། གསང་བ་བྱང་ཆུབ་སེམས་དང་། དབུ་རྒྱན་དང་། ཕྱག་རྒྱ་དང་། མིང་གི་དབང་རྣམས་སུ་གསུངས་པ་ལ་སོགས་པ་རྒྱུད་སོ་སོའི་གཞུང་ལས་གྲགས་པ་རྣམས་ནི། འདི་ལས་ཕན་པའི་དབང་དང་ནུས་པའི་དབང་རྣམ་པ་གཉིས་སུ་གསུངས་པའི་གཞུང་འདིར་འདུས་པར་སྣང་སྟེ། དེ་ལ་རྣལ་འབྱོར་ཕྱི་པ་ལས་གསུངས་པའི་བུམ་པ་དང་། དབུ་རྒྱུན་དང་། ཅོད་པན་དང་། ཕྲེང་བ་དང་། ཕྱག་རྒྱ་དང་ལྔ་ནི་དངོས་སུ་འདུས་སོ། །གཟུངས་ཀྱི་དབང་ནི་ཉན་པའི་དབང་ཡིན་ནོ། །དེ་བཞིན་དུ་གསང་བའི་དབང་ནི་སྒོམ་ཞིང་བསྒྲུབ་པའོ། །ལས་ནི་ལས་ཉིད་དོ། །འཁོར་ལོ་སྒྱུར་བ་ནི་བཤད་པའོ། །འཁོར་ལོ་སྒྱུར་བ་ཆེན་པོ་ནི་རྡོ་རྗེ་རྒྱལ་པོ་སྟེ་དེ་ལྟར་འདུས་པར་ཤེས་པར་བྱའོ། །དེ་ལས་བྱེ་བྲག་ཏུ་ནི་ནུས་པའི་དབང་རྣམ་པ་ལྔ། གསང་བའི་བྱང་ཆུབ་སེམས་ཀྱི་དབང་བསྐུར་བའི་བྱེ་བྲག་ཏུ་བསྟན་ནོ། །ཕྱིའི་གསང་བ་ཞེས་བྱ་བ་སྨོས་པས་ནི། སྤྱིར་སྐུ་གསུང་ཐུགས་ཀྱི་གསང་བ་གསུམ་ལ་སྤྱོད་པའི་དབང་དུ་བསྟན་པའོ། །རྣལ་འབྱོར་ཆེན་པོའི་རྒྱུད་གཞན་ལས་གསུངས་པ་ཡང་བུམ་པ་དང་གསང་བའི་དབང་དུ་འདུས་ཏེ། ཤེས་རབ་ཡེ་ཤེས་ཀྱང་གསང་བའི་དབང་དུ་གཏོགས་པའང་ཡིན་ལ། དེ་དང་ཐུན་མོང་ཁོ་ན་ཡང་མ་ཡིན་པ་དང་། དབང་བཞི་པ་ཞེས་གྲགས་པའང་ཤེས་རབ་ཡེ་ཤེས་ཀྱི་དབང་གི་ཁོངས་སུ་གཏོགས་པའང་ཡིན་ལ། དེ་དང་ཐུན་མོང་ཁོ་ནའང་མ་ཡིན་པ་ནི། དཔེར་ན་བདུད་སྡིག་ཅན་གཞན་འཕྲུལ་དབང་བྱེད་ཀྱི་ལྷའི་ཁོངས་སུ་གཏོགས་པའང་ཡིན་ལ། ལྷ་གཞན་དང་ཡང་ཐུན་མོང་མ་ཡིན་པ་བཞིན་ནོ། །དེ་བས་ན་མདོར་བསྡུ་ན་བུམ་དབང་དང་གསང་དབང་གཉིས་སུ་འདུས་ཏེ། དེ་ཡང་རྒྱུད་འདིར་གསུངས་པའི་ཕན་པ་དང་ནུས་པའི་དབང་རྣམ་པ་གཉིས་ཡིན་ནོ། །ཇི་ལྟ་ཞེས་ན། ཕན་པའི་དབང་ཡང་བུམ་པའི་དབང་གི་བྱེ་བྲག་ཡིན་ལ། ནུས་པའི་དབང་རྣམས་ཀྱང་གསང་བའི་དབང་གི་བྱེ་བྲག་ཡིན་ནོ། །དེ་ལ་གོ་ཆ་དང་རྒྱལ་མཚན་དང་གདུགས་གསུམ་ནི་ལྷ་དང་མིའི་རྒྱལ་པོ་ཐུན་མོང་གི་དབང་ངོ་། །བཟང་བཏུང་ནི་འདོད་པའི་ཡོན་ཏན་ལ་རོལ་པའི་དབང་ངོ་། །སྙིང་པོ་ལྔ་ནི་བདེ་བར་གཤེགས་པའི་སྙིང་པོའི་དབང་སྟེ། དུག་ལྔ་རྣམ་པར་ཤེས་པའི་ཚོགས་བརྒྱད་དང་བཅས་པ་ཡེ་ཤེས་ལྔའི་སྙིང་པོ་ཅན་ཡིན་པའི་ཕྱིར་ཡེ་ཤེས་ལྔའི་དབང་སྟེ། འདི་དག་ཀྱང་བུམ་དབང་དུ་འདུས་སོ། །དེ་ལ་ནུས་པའི་དབང་རྣམས་ཇི་ལྟར་བསྐུར་ཞེ་ན། ཤེས་རབ་ཐབས་ཀྱི་ཕྱག་རྒྱ་ལས། །བདེ་བའི་འབྲུ་ཚོགས་གསལ་བའི་རྒྱུན། །རྡོ་རྗེའི་ལམ་ནས་པདྨོར་འཁྱིལ། །རྩེ་ནས་བསྟིམ་ཞིང་དཀྱིལ་འཁོར་སྒྱུ། །ཞེས་གསུངས་ཏེ། གོང་དུ་དཀྱིལ་འཁོར་བྲི་བའི་ཆོ་ག་དང་། དཀྱིལ་འཁོར་བྱིན་གྱིས་བརླས་པའི་ཆོ་གའི་ལེའུ་བདུན་པའི་སྐབས་སུ་བསྟན་པ་བཞིན་ལྷའི་དཀྱིལ་འཁོར་བསྒོམ་སྟེ། དེ་ནས་སྤྱན་དྲང་བ་དང་མཆོད་པའི་ཆོ་ག་ལེགས་པར་བྱས་ནས། བདག་གཉིད་འཇུག་པ་དང་། སློབ་མ་དཀྱིལ་འཁོར་དུ་གཞུག་པ་བྱས་ཏེ། དང་པོར་ཕན་པའི་དབང་རྣམས་བསྐུར་བའི་རྗེས་ལ་གཟུངས་མ་བྱིན་གྱིས་བརླབས་ཏེ། གཉིས་སུ་མེད་པའི་བྱང་ཆུབ་ཀྱི་སེམས་མཁའ་ལ་བསྟིམས་པ་ལས་སློབ་མའི་ལྕེ་རྩེར་བཞག་སྟེ། དེ་ལ་སོ་སོའི་གནས་སུ་ཡི་གེ་བྷྲཱུྂ་ལས་གཞལ་ཡས་ཁང་དུ་གྱུར་པའི་ནང་དུ། ཉི་མའི་གདན་སྟེང་དུ་རིགས་སོ་སོའི་ཡིག་འབྲུ་ལ་སོགས་པ་ཆོ་ག་གསུམ་གྱི་ཚུལ་གྱིས་རིགས་སོ་སོའི་ལྷར་བསྐྱེད་དེ། དེ་དག་གི་འཕྲོ་འདུས་སོ་སོའི་བྱིན་རླབས་བསྡུས་ཏེ། གནས་གནས་སུ་ཐིམ་པས་སོ་སོའི་དབང་ཐོབ་པར་སྒོམ་ཞིང་སོ་སོའི་སྔགས་བརྗོད་དོ། །ཏྲཱཾ། གསང་བ་གསང་ཆེན་གསང་མཆོག་གང་། །ཞེས་བྱ་བ་ལ་སོགས་པའི་ཚིགས་སུ་བཅད་པ་ཇི་སྐད་སྨོས་པ་རྣམས་སོ། །དེ་ལ་ཉན་པའི་དབང་ནི་རིན་པོ་ཆེའི་རིགས་ཀྱིས་དབང་བསྐུར་བ་ནི་གཟུངས་ཀྱི་དབང་སྟེ། ཚིག་གི་གཟུངས་དང་། དོན་གྱི་གཟུངས་དང་། སྔགས་ཀྱི་གཟུངས་ཟ་མ་ཏོག་ལ་སོགས་པའི་ཡོན་ཏན་རིན་པོ་ཆེའི་གཏེར་འཛིན་པའི་ཕྱིར་རོ། །ལས་ཀྱི་དབང་ནི་ལས་ཀྱི་རིགས་ཀྱི་བདག་ཉིད་དོ། །བསྒོམ་ཞིང་བསྒྲུབ་པ་ནི་རིགས་སོ་སོའི་ལྷ་གང་ཡིན་པའོ། །བཤད་པ་ནི་པདྨའི་རིགས་ཆོས་ཀྱི་རྒྱལ་པོ་ཡིན་པའི་ཕྱིར་རོ། །རྡོ་རྗེ་རྒྱལ་པོ་ནི་རིགས་ཐམས་ཅད་ཀྱི་བདག་པོ་ཆེན་པོ་ཡིན་པའི་ཕྱིར་རིགས་ཀྱི་སྤྱིའི་དབང་བསྐུར་རོ། །དབང་ཐོབ་པའི་ཡོན་ཏན་ནི། དུས་འདི་ཕྱིན་ཆད་རྒྱལ་བའི་སྲས། །ཞེས་བྱ་བ་ལ་སོགས་པ་སྟེ། འདི་ཡང་ཡོན་ཏན་གྱི་ཐོག་མ་སྨོས་པ་ཡིན་ཏེ། དེ་ལ་རྒྱལ་བའི་སྲས་ཞེས་བྱ་བའི་མིང་གང་དུ་ཐོབ་པ་ནི། ཐེག་པ་ཆེན་པོ་སྤྱི་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་རྒྱལ་བའི་སྲས་སུ་མིང་འཐོབ་བོ་ཞེས་གྲགས་སོ། །བདེན་པ་མཐོང་ནས་དངོས་གཞི་འཐོབ་བོ་ཞེས་གྲགས་སོ། །དེ་བཞིན་དུ་གསང་སྔགས་ཀྱི་ཚུལ་ལས་ཀྱང་། དབང་ཐོབ་ནས་རྒྱལ་བའི་སྲས་ཞེས་བྱ་བའི་མིང་འཐོབ་པས། རིག་པ་འཛིན་པར་གྱུར་ནས་རྒྱལ་བའི་སྲས་ཉིད་དུ་གྱུར་པ་ཡིན་ནོ། །ལེའུ་བཅུ་པའོ།། ༈ །།ད་ནི་ཚོགས་ཀྱི་དཀྱིལ་འཁོར་སྟོན་ཏེ། དེ་ཡང་འདིའི་སྒོ་ནས་ཆོས་ཀྱི་རྒྱལ་པོ་ཉིད་དུ་མངོན་པར་འགྲུབ་པར་བྱ་བའི་ཕྱིར། རྒྱལ་པོར་གྱུར་པ་ཞེས་སྨོས་སོ། །འདིར་ཚོགས་ཀྱི་དཀྱིལ་འཁོར་ཡང་བསམ་པ་དང་། སྤྱོད་པ་དང་། ཚད་དང་། ཇི་ལྟར་བྱ་བའི་ཚུལ་རྣམས་ཀྱིས་སྟོན་པར་བྱེད་པ་ལས། དེ་ལ་དང་པོ་བསམ་པ་བསྟན་པའི་ཕྱིར། རྒྱུ་གཅིག་པ་དང་ཡིག་འབྲུའི་ཚུལ། །ཞེས་པ་ལ་སོགས་པ་སྨོས་ཏེ། དེ་ཡང་རྟོགས་པ་རྣམ་པ་བཞིའི་ལམ་གྱིས་ཡིད་ཆེས་པ་དང་། རང་གི་ཡན་ལག་ཏུ་གཏོགས་པ་ཡེ་ཤེས་དང་ཡེ་ཤེས་ཀྱི་ཁྱད་པར་ཤེས་པ་དང་། ཕྱིར་རོལ་གྱི་ཡུལ་རྣམས་དབྱིངས་དང་དབྱིངས་ཀྱི་ཡུལ་དུ་ཤེས་པ་དང་། ཡོ་བྱད་རྣམས་གཉིས་སུ་མེད་པའི་བྱང་ཆུབ་སེམས་སུ་ཤེས་པའོ། །དེ་ལ་རྟོགས་པ་བཞིའི་ཚུལ་གྱིས་ཆོས་ཐམས་ཅད་སངས་རྒྱས་པར་ཤེས་པར་བྱ་སྟེ། དེ་ལ་རྟོགས་པ་རྣམ་པ་བཞི་ནི། རྒྱུ་གཅིག་བར་རྟོགས་པ་དང་། ཡིག་འབྲུའི་ཚུལ་གྱིས་རྟོགས་པ་དང་། བྱིན་གྱིས་བརླབ་པར་རྟོགས་པ་དང་། མངོན་སུམ་པར་རྟོགས་པའོ། །དེ་ལ་རྒྱུ་ཞེས་བྱ་བ་ནི་སྤྱིར་སྐྱེད་པར་བྱེད་པའི་ས་བོན་དང་། རྟེན་གྲོགས་དང་། གཏན་ཚིགས་དང་། མཚན་ཉིད་རྣམས་ལ་འཇུག་གོ། །དེ་ལས་འདིར་མཚན་ཉིད་ལ་གཟུང་བར་བྱའོ། །གཅིག་ཅེས་བྱ་བ་ཡང་སྤྱིར་མཚུངས་པ་དང་གྲངས་དང་དབྱེར་མེད་པ་རྣམས་ལ་འཇུག་སྟེ། འདིར་དབྱེར་མེད་པ་ལ་གཟུང་བར་བྱ་སྟེ། དེ་བས་ན་ཆོས་ཐམས་ཅད་མཚན་ཉིད་དབྱེར་མེད་པར་རྟོགས་པས། ཆོས་དང་ཆོས་ཅན་མི་དམིགས་པ་ནི་རྒྱུ་གཅིག་པར་རྟོགས་པ་ཞེས་བྱའོ། །དེ་ཡང་ཐེག་པ་ཆེན་པོ་སྤྱིའི་ཐུན་མོང་མ་ཡིན་པའི་སྒོ་ནས་རྟོགས་པ་རྣམ་པ་གསུམ་སྟེ། དེ་ལ་ཆོས་ཐམས་ཅད་དོན་དམ་པར་མ་སྐྱེས་པའི་མཚན་ཉིད་ཀྱིས་སོ་སོ་མ་ཡིན་པ་དང་། ཀུན་རྫོབ་སྒྱུ་མའི་མཚན་ཉིད་ཀྱིས་སོ་སོ་མ་ཡིན་པར་རྟོགས་པ་གཉིས་ནི་ཐེག་པ་ཆེན་པོ་ཐུན་མོང་དུ་གྲགས་པའོ། །མ་སྐྱེས་པ་ཉིད་སྒྱུ་མ་སྣ་ཚོགས་སུ་སྣང་ཞིང་བྱ་བ་བྱེད་པར་སྣང་ལ། སྒྱུ་མ་ཉིད་ཇི་ལྟར་སྣང་བ་དེ་ལྟ་བུའི་ངོ་བོ་ཉིད་མེད་དེ་མ་སྐྱེས་པས། ཀུན་རྫོབ་དང་དོན་དམ་པ་དབྱེར་མེད་པར་རྟོགས་པ་ནི་ལུང་ཟབ་མོ་ལས་གྲགས་པའི་ཐུན་མོང་མ་ཡིན་པའོ། །ཡིག་འབྲུའི་ཚུལ་གྱིས་རྟོགས་པ་ནི་ཚུལ་སྔ་མ་དེ་ཉིད་ཀྱང་སྐུ་གསུང་ཐུགས་འབྲས་བུའི་ཆོས་སུ་སངས་རྒྱས་པར་རྟོགས་པ་སྟེ་ཐུན་མོང་མ་ཡིན་པའོ། །ཇི་ལྟ་ཞེ་ན། མ་སྐྱེས་པ་ནི་ཡི་གེ་ཨ་སྟེ། ཨ་ནི་བརྗོད་དུ་མེད་པའི་གསུང་རྡོ་རྗེའོ། །སྒྱུ་མ་སྣ་ཚོགས་སུ་སྣང་བ་ནི་ཡི་གེ་ཨོའི་རང་བཞིན་ཏེ། ཨོ་ནི་ཆོ་འཕྲུལ་གྱི་བདག་ཉིད་སངས་རྒྱས་ཀྱི་བདག་ཉིད་ཀྱི་འཕྲུལ་པ་སྒྱུ་མ་དང་ཆུ་ཟླ་ལ་སོགས་པ་ལྟར་གཉེན་པོས་མི་ཕྱེད་པའི་སྐུ་རྡོ་རྗེའོ། །སྣང་བ་དང་མ་སྐྱེས་པ་གཉིས་སུ་མེད་པ་ནི་ཡི་གེ་ཨཱོྂ་སྟེ། ཨཱོྂ་ནི་ཆོས་ཐམས་ཅད་གཉིས་སུ་མེད་པར་རིག་པའི་མཚན་ཉིད་ཀྱི་འཕྲུལ་པ་ཐུགས་རྡོ་རྗེའོ། །བྱིན་གྱིས་བརླབས་པར་རྟོགས་པ་ནི། རྟོགས་པ་རྣམ་པ་གཉིས་པོ་དེའི་མཐུ་དང་བྱིན་རླབས་ཤེས་པ་སྟེ། དེ་ལ་ཆོས་ཐམས་ཅད་ནི་ཡེ་ནས་སངས་རྒྱས་པ་ཡིན་མོད་ཀྱི། འོན་ཀྱང་རྟོགས་པ་རྣམ་པ་གཉིས་པོ་དང་མི་ལྡན་པའི་འགྲོ་བ་རྣམས་ལ་ནི། དེས་ཕན་འདོགས་པར་མི་འགྱུར་རོ། །དེ་གཉིས་དང་ལྡན་ན་ནི་ཕན་ཐོགས་པར་སྣང་བར་འགྱུར་ཏེ། དེ་བས་ན་རྟོགས་པ་རྣམ་པ་གཉིས་ཀྱིས་མཐུས་ཆོས་ཐམས་ཅད་སངས་རྒྱས་པར་བྱིན་གྱིས་རློབ་པ་ལྟ་བུར་སྣང་བར་འགྱུར་བས། བྱིན་གྱིས་བརླབས་པར་རྟོགས་པ་ཞེས་བྱའོ། །མངོན་སུམ་པར་རྟོགས་པ་ནི། སྤྱིར་དབང་པོའི་མངོན་སུམ་ལ་སོགས་པར་གྲགས་པའང་ཡོད་ཀྱི། འདིར་ཤེས་རབ་ཀྱི་དབང་པོའི་མངོན་སུམ་སྟེ། དེ་ཡང་སོ་སོར་རྟོག་པའི་ཤེས་རབ་ཉིད་ལ་ཤེས་པར་བྱའོ། །དེ་ཡང་རྟེན་དང་ལྡན་པ་སྟེ། དཔེར་ན་གསེར་ནི་བསྲེགས་བཅད་བདར་བ་གསུམ་གྱིས་རྟོགས་པར་བྱེད་པ་དེ་བཞིན་དུ། ཕྱིན་ཅི་མ་ལོག་པའི་དོན་གང་ཡིན་པ་དེ་ཡང་ངེས་པའི་ལུང་དང་། དངོས་གྲུབ་ཐོབ་ཅིང་མཁས་པར་གྱུར་པའི་བླ་མ་རྣམས་ཀྱི་མན་ངག་དང་། དེ་གཉིས་དང་མཐུན་པར་ཞུགས་པའི་སོ་སོར་རྟོག་པའི་ཤེས་རབ་རྣམས་ཀྱིས་དོན་གཏན་ལ་དབབ་པར་བྱ་བ་སྟེ། དེ་ལ་བསྲེགས་པས་ནི་གསེར་ཡིན་ནམ་མ་ཡིན་ཤེས་པར་འགྱུར་རོ། །བཅད་པས་ནི་གསེར་གྱི་གསོག་ཤེས་པར་འགྱུར་རོ། །བདར་བས་ནི་བསླད་པས་ངན་པ་དང་རང་བཞིན་ངན་པ་ལ་སོགས་པའི་བཟང་ངན་གྱི་བྱེ་བྲག་ཤེས་པར་འགྱུར་རོ། །དེ་བཞིན་དུ་ངེས་པའི་ལུང་དང་མཐུན་པས་ནི་དོན་གྱི་སྤྱི་ཕྱིན་ཅི་མ་ལོག་པ་ཤེས་པར་འགྱུར་རོ། །མན་ངག་དང་མཐུན་པས་ནི་ལུང་གི་དགོངས་པའི་དོན་གཞན་དུ་འདྲེན་པ་གཅོད་པར་འགྱུར་རོ། །དེ་གཉིས་དང་མཐུན་པར་སྐྱེས་པའི་སོ་སོར་རྟོག་པའི་ཤེས་རབ་ཀྱིས་མངོན་དུ་དེ་ལྟར་རྟོགས་པ་ནི། ཐོས་པ་ཙམ་ལ་སོགས་པ་ལ་རྟོགས་པ་ཉིད་དུ་ཞེན་པ་སེལ་ཞིང་གཅོད་པར་བྱེད་དོ། །གཞུག་འདིར་ནི་འདི་ལྟ་བུ་ལ་མངོན་སུམ་དུ་རྟོགས་པ་ཞེས་བྱའོ། །ཐུན་མོང་དུ་གྲགས་པ་ནི། མངོན་སུམ་དང་རྗེས་སུ་དཔག་པ་ལ་སོགས་པའི་སྒོ་ནས་དོན་གཏན་ལ་འབེགས་པ་ཉིད་གསེར་བསྲེགས་པ་དང་བཅད་པ་ལ་སོགས་པའི་དཔེ་སྦྱར་བ་དང་བཤད་པ་ལྟ་བུ་ནི་མ་ཡིན་ཏེ། གང་གི་ཕྱིར་ལས་ཀྱི་སྒྲིབ་པ་མ་དག་པ་རྣམས་ལ་སྣང་བའི་མངོན་སུམ་ཉིད་སུན་འབྱིན་པར་བྱེད་པ་ཡིན་པས། དེ་ལྟ་བུ་ལ་བརྟེན་པའི་རྗེས་སུ་དཔག་པ་ཡང་གཏན་ཚིགས་སུ་མི་རུང་སྟེ། དེ་བས་ན་འདི་ལྟ་བུ་ནི་འདིར་སྦྱར་དུ་མི་རུང་ངོ་། །དེ་ལྟར་རྟོགས་པ་རྣམ་པ་བཞིའི་ཚུལ་གྱིས་ཆོས་ཐམས་ཅད་ཡེ་ནས་སངས་རྒྱས་པར་རྟོགས་པ་ནི་སྤྱིའི་དོན་ཤེས་པའི་བསམ་པ་ཡིན་ནོ། །ད་ནི་བྱེ་བྲག་གི་བསམ་པ་སྟོན་ཏེ། དེའི་ཕྱིར་ཡན་ལག་དབང་པོ་རྣམ་ཤེས་ཀུན། །རྣམ་སྨིན་ཨཱོྂ་དུ་ཤེས་པར་བྱ། །རྫོགས་པའི་དཀྱིལ་འཁོར་ཉིད་དུ་སྒོམ། །ཡང་ན་ཁྲོ་བོའི་དཀྱིལ་འཁོར་བསྒོམ། །ཞེས་གསུངས་ཏེ། དེ་ལ་ཡན་ལག་ནི་དབང་བོའི་རྟེན་ཁོག་པའོ། །དེ་བས་ན་ཡན་ལག་ལ་བརྟེན་པའི་དབང་པོ་དང་། དེ་ལ་བརྟེན་པའི་རྣམ་པར་ཤེས་པ་ནི་མདོར་བསྡུ་ན་ལུས་ཞེས་བྱ་སྟེ། ལུས་ཉིད་ཇི་ལྟར་སྣང་བ་དེ་ལྟར་མ་ཡིན་ཏེ། ཡེ་ཤེས་ཡིན་ཏེ། རྣམ་སྨིན་ཨཱོྂ་དུ་ཤེས་པར་བྱ། །ཞེས་སྨོས་ཏེ། དེ་ལ་ཨཱོྂ་ནི་ཡི་གེ་གསུམ་འདུས་པ་སྟེ། གོང་དུ་བཤད་པ་བཞིན་དུ་ཨ་ཨུ་མ་རྣམས་ལས་ཨཱོྂ་གྲུབ་པར་འགྱུར་ལ། ཡི་གེ་གསུམ་ཡང་སྐུ་གསུང་ཐུགས་ཀྱི་རང་བཞིན་ཏེ། དེ་གསུམ་དབྱེར་མེད་པ་ཉིད་ཐུགས་རྡོ་རྗེའི་རང་བཞིན་ནོ། །དེ་ལྟ་བུའི་རང་བཞིན་ལས་མ་གཡོས་བཞིན་དུ། ཡེ་ཤེས་ཀྱི་སྤྲུལ་པ་རྒྱལ་བ་ཡབ་ཀྱི་དཀྱིལ་འཁོར་དུ་བསྒོམ་ཞིང་བསམ་པར་བྱ་བ་ཡིན་པས། རྫོགས་པའི་དཀྱིལ་འཁོར་ཉིད་དུ་བསྒོམ། །ཞེས་གསུངས་སོ། །གང་གི་ཚེ་གདུག་པ་ཅན་འདུལ་བའི་སྐབས་བབ་པར་གྱུར་པ་དེའི་ཚེ། ཁྲོ་བོའི་ཚུལ་དུ་བསྒོམ་པར་བྱ་བ་ཡིན་པས། ཡང་ན་ཁྲོ་བོའི་དཀྱིལ་འཁོར་བསྒོམ། །ཞེས་གསུངས་པ་ཡིན་ནོ། །དེ་ལྟར་ལུང་བསྟན་ནས་སྤྱོད་ཡུལ་བསྟན་པའི་ཕྱིར། གཟུགས་སྒྲ་དྲི་རོ་རེག་ལ་སོགས། ཞེས་བྱ་བ་ལ་སོགས་པ་སྨོས་ཏེ། དེ་ལ་ཕྱིའི་སྤྱོད་ཡུལ་ཐམས་ཅད་ནི་ཇི་ལྟར་སྣང་བ་དེ་ལྟ་བུའི་རྣམ་པ་མ་ཡིན་ཏེ། རང་བཞིན་སྤྲོས་པ་ཉེ་བར་ཞི་བས་ན། རྣམ་སྨིན་མཱུཾ་དུ་ཤེས་པར་བྱ། །ཞེས་སྨོས་ཏེ། དེ་ལ་ཡི་གེ་མཱུཾ་ནི་མུཀ་ཏ་མོཀྵ་སྟེ། གྲོལ་ཞིང་ཐར་པའི་དོན་ཏོ། །ཐིག་ལེ་ནི། མ་ཞེས་མཉམ་དག་མི་མཉམ་མེད། ཅེས་གསུངས་ཏེ། མདོར་ན་ཡི་གེ་མཱུཾ་ནི་ཆོས་གཉིས་སུ་མེད་པའི་ཕྱག་རྒྱའོ། །དེའི་ངང་ལས་ཞི་བ་དང་ཁྲོ་བོས་བསྡུས་པའི་ལྷ་མོ་རྣམས་ཀྱི་དཀྱིལ་འཁོར་དུ་བསྒོམ་ཞིང་ཤེས་པར་བྱ་བ་ཡིན་པར་བསྟན་པའི་ཕྱིར། ཡུམ་གྱི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་མོའི་དཀྱིལ་འཁོར་བསྒོམ། །ཞེས་གསུངས་པ་ཡིན་ནོ། །ད་ནི་ཉེ་བའི་ལོངས་སྤྱོད་རྣམས་ཀྱི་བསམ་པའི་ཚུལ་བསྟན་པའི་ཕྱིར། གོས་རྒྱན་བཟའ་བཏུང་གླུ་དང་ཚིག །བྲོ་གར་ཚོགས་ཀྱི་སྤྲིན་ཕུང་ལ། ཞེས་བྱ་བ་ལ་སོགས་པ་སྨོས་ཏེ། ཉེ་བའི་ལོངས་སྤྱོད་འདི་རྣམས་ཀྱང་དབྱིངས་དང་ཡེ་ཤེས་གཉིས་སུ་མེད་པའི་རིག་པ་བྱང་ཆུབ་སེམས་ཀྱི་རང་བཞིན་དང་། ཡབ་ཡུམ་གཉིས་སུ་མེད་པའི་ལྷག་པ་བྱང་ཆུབ་སེམས་ཀྱི་རང་བཞིན་དུ་ཤེས་ཤིང་བསམ་པར་བྱ་བ་ཡིན་པས་ན། ཧཱུཾ་དུ་ཤེས་པས་རབ་སྤྱད་ན། །ཞེས་སྨོས་ཏེ། དེ་ལ་ཡི་གེ་ཧ་ནི་ཨ་ཧ་ད་སྟེ་མི་ཤིགས་པའོ། །ཨུ་ནི་འདུས་པའོ། །ཐིག་ལེ་ནི་མཉམ་པ་ཉིད་དེ། དེ་བས་ན་གཉིས་སུ་མེད་པའི་བྱང་ཆུབ་སེམས་སུ་ཆོས་ཐམས་ཅད་འདུས་ཤིང་མཉམ་པ་ཉིད་དུ་རྟོགས་པ་ནི་མཆོད་པའི་མཆོག་ཡིན་པས། ངོ་མཚར་འབྱུང་བའི་དཀྱིལ་འཁོར་མཉེས། །ཞེས་གསུངས་པ་ཡིན་ནོ། །ད་ནི་ཚོགས་ཀྱི་དཀྱིལ་འཁོར་གྱི་སྤྱོད་པ་བསྟན་པའི་ཕྱིར། ལྷ་མོ་ཀླུ་མོ་རིགས་ངན་མོ། །ཞེས་བྱ་བ་ལ་སོགས་པ་སྨོས་ཏེ། དེ་ལ་སྤྱོད་པའང་མདོར་བསྡུ་ན། སྦྱོར་བ་དང་སྒྲོལ་བའོ། །དེ་ལ་སྦྱོར་བ་ནི་ཤེས་རབ་ཀྱི་སྤྱོད་པའོ། །སྒྲོལ་བ་ནི་ཐབས་ཀྱི་སྤྱོད་པ་སྟེ། དེ་ལྟར་ཐབས་དང་ཤེས་རབ་ཀྱི་སྤྱོད་པ་གཉིས་སུ་ནི་ཐེག་པ་ཆེན་པོའི་སྤྱོད་པ་ཐམས་ཅད་ནི་དངོས་སུ་འདུས་པ་ཡིན་ལ། ཐེག་པ་ཆུང་ངུའི་སྤྱོད་པ་རྣམས་ཀྱང་དེའི་ཆར་གཏོགས་པ་ཡིན་ནོ། །དེ་ལ་སྦྱོར་བ་ཇི་ལྟར་ཤེས་རབ་ཀྱི་སྤྱོད་པ་ཡིན་ཞེ་ན། ཤེས་རབ་ནི་ཤེས་རབ་ཀྱི་ཕ་རོལ་ཏུ་ཕྱིན་མའོ། །དེ་ཡང་རྣམ་པ་གསུམ་སྟེ། ལས་ཀྱི་ཕྱག་རྒྱ་དང་། ཡེ་ཤེས་ཀྱི་ཕྱག་རྒྱ་དང་། ཕྱག་རྒྱ་ཆེན་པོའོ། །དེ་ལ་ལས་ཀྱི་ཕྱག་རྒྱ་ནི་རྣམ་པར་སྨིན་པའི་ལུས་ཀྱི་བདག་ཉིད་བུད་མེད་རྣམས་སོ། །ཡེ་ཤེས་ཀྱི་ཕྱག་རྒྱ་ནི་ཡེ་ཤེས་ལས་སྤྲུལ་པའི་ལྷ་མོ་རྣམས་སོ། །ཕྱག་རྒྱ་ཆེན་པོ་ནི་ཆོས་ཀྱི་སྐུ་མཚན་ཉིད་མེད་པའོ། །འདི་རྣམས་ནི་ཤེས་རབ་ཀྱི་རང་བཞིན་ཡིན་པ་དང་། འདི་རྣམས་ལ་བརྟེན་ནས་གཉིས་སུ་མེད་པའི་ཡེ་ཤེས་སྐྱེ་བར་འགྱུར་བའི་གནས་ཡིན་པས། ཤེས་རབ་ཀྱི་སྤྱོད་པའི་དམ་ཚིག་ཡིན་པའི་ཕྱིར་ཐུན་མོང་མ་ཡིན་པའི་ཤེས་རབ་ཀྱི་སྤྱོད་པའོ། །སྒྲོལ་བའང་ཐབས་ཀྱི་སྤྱོད་པ་སྟེ། སྙིང་རྗེ་ཆེན་པོས་སེམས་ཅན་རྣམས་ཐར་པ་དང་བདེ་བ་ལ་འགོད་པ་ཙམ་ལས་མ་གཏོགས་པའི་ཐབས་གཞན་མེད་པའི་ཕྱིར་རོ། །དེ་ལ། ལྷ་མོ་ཀླུ་མོ་རིགས་ངན་མོ། །ཞེས་བྱ་བ་ནི་གཟུགས་དང་མཚན་རབ་འབྲིང་རྣམ་པ་གསུམ་སྟེ། དེ་ལ་རབ་ནི་འདོད་ཆགས་ཀྱི་ཡུལ་གསུང་གི་ཡུམ་མོ། །འབྲིང་ནི་གཏི་མུག་གི་ཡུལ་སྐུའི་ཡུམ་མོ། །ཐ་མ་ནི་ཞེ་སྡང་གི་ཡུལ་ཐུགས་ཀྱི་ཡུམ་སྟེ། སྒྲུབ་པའི་སྐབས་ཀྱི་རིགས་སོ་སོར་དབྱེ་བའམ། ཡང་ན་མི་དབྱེ་བ་སྟེ། གང་གི་ཕྱིར་གཟུངས་མ་ཐམས་ཅད་ཀྱང་དད་པས་ཆགས་པ་ཅན་ཞིག་ན། སྙིང་རྗེ་ཆེན་པོའི་ཡུལ་དུ་མཉམ་པར་གཟུང་བར་བྱ་བ་ཡིན་པ་དང་། ཤེས་རབ་ཀྱི་རང་བཞིན་དང་གནས་ཡིན་པས་བུད་མེད་ཐམས་ཅད་ཀྱང་མི་སྨད་ཅིང་མི་སྤང་བའི་དམ་ཚིག་ཏུ་གསུངས་པས། དབྱེ་བའམ་ཡང་ན་མི་དབྱེ་བར། །ཞེས་གསུངས་པ་ཡིན་ནོ། །ཇི་སྐད་བསྟན་པའི་གཟུངས་འདི་རྣམས་ལ་བརྟེན་ནས་ཤེས་རབ་ཀྱི་སྤྱོད་པར་གྱུར་པ་གཉིས་སུ་མེད་པའི་སྦྱོར་བ་བརྩམས་པའི་དུས་ན་ཡང་བསྙེན་སྒྲུབ་རྣམ་པ་བཞིའི་ཏིང་ངེ་འཛིན་དང་ལྡན་པར་བྱ་དགོས་ཏེ། དེ་བསྟན་པའི་ཕྱིར། བསྙེན་པ་དང་ནི་ཉེ་བསྙེན་དང་། །བསྒྲུབ་པ་དང་ནི་སྒྲུབ་ཆེན་པོས། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །ཞེས་བྱ་བ་གསུངས་ཏེ། དེ་ལ་བསྙེན་སྒྲུབ་ནི་གསང་སྔགས་སྤྱིའི་ཚུལ་ལས་འདོད་པའི་དངོས་གྲུབ་བསྒྲུབ་པར་བྱ་བ་ལ། དང་པོར་བསྙེན་པའི་མཚན་ཉིད་མཚན་མ་དང་དུས་དང་གྲངས་རྣམས་ལ་དམ་བཅས་པའི་བདག་ཉིད་ནི་བསྙེན་པ་ཞེས་གྲགས་སོ། །དམ་བཅས་པ་རྫོགས་ནས་དངོས་གྲུབ་བསྒྲུབ་པའི་མཚན་ཐོག་མཐའ་དང་བཅས་པ་ནི་སྒྲུབ་པ་ཞེས་གྲགས་སོ། །རྒྱུད་ཁ་ཅིག་ལས་དེ་ཉིད་ཀྱི་ཡན་ལག་གི་དབྱེ་བས་བསྙེན་སྒྲུབ་ཡན་ལག་བཞིར་གྲགས་ཏེ། དེ་དག་གིས་ནི་དངོས་གྲུབ་བསྒྲུབ་པའི་སྤྱོད་པ་ཐམས་ཅད་བསྡུས་སོ། །གསང་བ་འདུས་པ་ལྟ་བུ་ལས་ནི། བསྙེན་སྒྲུབ་ཡན་ལག་བཞིས་རྒྱུད་ཀྱི་གཞུང་བསྡུས་པ་དང་། སྦྱོར་བ་དང་པོའི་ཏིང་ངེ་འཛིན་ལ་སོགས་པ་ཏིང་ངེ་འཛིན་ཆེ་འབྲིང་བྱེ་བྲག་དང་བཅས་པ་བསྡུས་པ་དང་། ཡབ་ཡུམ་གཉིས་སུ་མེད་པའི་སྦྱོར་བའི་སྐབས་བསྡུས་པ་ལ་སོགས་པ་ལྟ་བུའང་ཡོད་མོད་ཀྱི། འདིར་ནི་དེ་ལྟ་བུ་དག་སྔོན་གྱི་སློབ་དཔོན་དག་གིས་དེ་ལྟ་བུར་མ་བཤད་པས་དེ་དག་ལྟར་སྦྱར་བར་མི་བྱའོ། །འདིར་གྲགས་པ་ནི། བསྙེན་པ་ནི་བྱང་ཆུབ་ཀྱི་སེམས་ཤེས་པ། ཉེ་བའི་བསྙེན་པ་ནི་བདག་ཉིད་ལྷར་ཤེས་པ། སྒྲུབ་པ་ནི་ཡུམ་བསྐྱེད་པ། སྒྲུབ་པ་ཆེན་པོ་ནི་ཐབས་དང་ཤེས་རབ་ཟུང་དུ་འབྲེལ་བ་སྟེ། འདི་ལྟ་བུའི་ཚུལ་གྱིས་སྦྱོར་བ་བརྩམ་མོ་ཞེས་བྱ་བའི་དོན་ནོ། །དགྱེས་མཉམ་མཆོག་གི་སྦྱིན་པ་ཞེས་བྱ་བ་ནི་ཐམས་ཅད་དབྱེར་མེད་པར་ལྟ་བ་དང་། དེ་ལྟ་བུར་བསྒོམ་པའི་ཏིང་ངེ་འཛིན་གྱི་མཐུས་ལོངས་སྤྱོད་ཆེན་པོ་མཉམ་དུ་རོལ་པའི་བསམ་པས་ཟིན་པའོ། །མཆོག་གི་སྦྱིན་པ་ཞེས་བྱ་བ་ནི་དོན་ཆེན་པོ་དང་ལྡན་པ་སྟེ། འདི་ལྟར་གཉིས་སུ་མེད་པར་སྦྱོར་བའི་བྱང་ཆུབ་ཀྱི་སེམས་བདེ་བ་ཆེན་པོ་ལ་གནས་པའི་ཚེ་ཕ་རོལ་ཏུ་ཕྱིན་པ་བཅུ་དང་། སངས་རྒྱས་ཀྱིས་གསུམ་ལ་སོགས་པ་ལམ་དང་འབྲས་བུའི་ཆོས་ཐམས་ཅད་ཡོངས་སུ་རྫོགས་པ་དང་། ཕྱི་ནང་གི་མཆོད་པར་གཏོགས་པ་ལོངས་སྤྱོད་ཆེན་པོའི་རྒྱན་དུ་གྱུར་པ་ཐམས་ཅད་ཡོངས་སུ་རྫོགས་པར་ཤེས་པ་དང་། སེམས་ཅན་རྣམས་ཀྱི་ཡོངས་སུ་རྫོགས་པར་འགྱུར་བའི་ལས་བསམ་སྦྱོར་དང་དངོས་དང་མཇུག་ལ་སོགས་པ་ཡོངས་སུ་དག་པར་ཤེས་པར་གྱུར་པས་མཆོག་གི་སྦྱིན་པ་ཞེས་སྨོས་སོ། །དེའི་ཞར་ལ་བདུད་རྩིའི་མཆོད་པ་དང་དངོས་གྲུབ་བླང་བར་བསྟན་པའི་ཕྱིར། སྒྲུབ་པ་ཉི་ཟླའི་སྙིང་པོ་སྟེ། །ཞེས་བྱ་བ་ལ་སོགས་པ་གསུངས་པ་ཡིན་ནོ། །ད་ནི་སྒྲོལ་བ་བསྟན་པའི་ཕྱིར། ཞིང་གྱུར་མཆོག་དང་མཆོག་ཕྲན་རྣམས། །ཞེས་བྱ་བ་ལ་སོགས་པ་གསུངས་པ་སྟེ། འདི་དག་ཀྱང་ཁ་ཅིག་ནི་གདུལ་བྱའི་ཞིང་དང་སྦྱར། ཁ་ཅིག་ནི་བླ་མའི་ཁྱད་པར་དང་སྦྱར་རོ་ཞེས་གྲགས་སོ། །དེ་དག་མི་དམིགས་པའི་ཏིང་འཛིན་ནི། ཡེ་ནས་སྐྱེ་མེད་དེ་བཞིན་ཉིད། །ཅེས་བྱ་ལ་སོགས་པའོ། །ད་ནི་ཚོགས་ཀྱི་དཀྱིལ་འཁོར་དུ་ཚུད་བསྟན་པའི་ཕྱིར། སྣོད་བཅུད་རྒྱུད་རྣམས་དག་རྟོགས་ཤིང་། །ཞེས་བྱ་བ་ལ་སོགས་པ་གསུངས་ཏེ། དེ་ལ་སྣོད་དག་པ་ནི་གནས་འབྱུང་བ་ཆེན་པོ་ལྔ་ཡུམ་ལྔའི་རང་བཞིན་དུ་དག་པར་རྟོགས་པའོ། །བཅུད་དག་པ་ནི་ཕུང་པོ་ལྔས་བསྡུས་པ་རིགས་རྣམ་པ་ལྔར་དག་པར་རྟོགས་པའོ། །རྒྱུད་དག་པ་ནི་རྣམ་པར་ཤེས་པའི་ཚོགས་བརྒྱད་ཡེ་ཤེས་ལྔར་དག་པར་རྟོགས་པ་སྟེ། དེ་ལྟར་དག་པ་རྣམ་པ་གསུམ་མོ། །མཉམ་གཉིས་ནི་དོན་དམ་པར་མ་སྐྱེས་པར་མཚུངས་པ་དང་། ཀུན་རྫོབ་ཏུ་སྒྱུ་མར་མཉམ་པ་ནི་ཐེག་པ་ཆེན་པོ་ཐུན་མོང་གི་ཚུལ་ལོ། །ལྷག་པའི་མཉམ་གཉིས་ནི་ཕུང་པོ་ལྔ་རིགས་ལྔའི་སངས་རྒྱས་སུ་མཉམ་པ་དང་། རྣམ་པར་ཤེས་པ་ཡེ་ཤེས་སུ་མཉམ་པ་སྟེ། མཉམ་པ་རྣམ་པ་བཞིའོ། །དེ་ལྟར་ན་དག་པ་རྣམ་པ་གསུམ་དང་། མཉམ་པ་རྣམ་པ་བཞིའི་ཚུལ་གྱིས་ཡོངས་སུ་དག་པའི་ཞིང་ཁམས་དང་། ཡོངས་སུ་མ་དག་པའི་ཞིང་ཁམས་གཉིས་སུ་དབྱེར་མེད་དེ། ཐམས་ཅད་ཀྱང་ཀུན་ཏུ་བཟང་པོའི་ཞིང་གི་རང་བཞིན་ཡིན་པས། དཀྱིལ་འཁོར་ཀུན་ཏུ་བཟང་པོའི་ཞིང་། །ཞེས་གསུངས་པ་ཡིན་ནོ། །དེ་ལྟ་བུའི་ཚུལ་རྟོགས་ན་སྒོ་གསུམ་གྱི་སྤྱོད་པ་ཐམས་ཅད་ཀྱང་སྒྲིབ་པར་མི་འགྱུར་ཏེ། རང་བཞིན་མེད་པར་རིག་པས་ནི་ཡེ་ཤེས་ཀྱི་ཚོགས་སུ་འགྱུར་ལ། འཕགས་པ་ཐམས་ཅད་དང་མི་གཉིས་པའི་ཚུལ་གྱིས་སྤྱོད་པས་མཆོད་པ་དང་འགྲོ་བའི་དོན་བྱེད་པ་རྒྱུན་མི་འཆད་པའི་ཕྱིར། བྱེད་སྤྱོད་ཚོགས་ཆེན་གཉིས་འགྱུར་བས། །ཞེས་གསུངས་པ་ཡིན་ཏེ། དེ་དག་གིས་ནི་ལྟ་བ་དང་ཏིང་ངེ་འཛིན་བསྟན་ནོ། །ད་ནི་དེའི་གྲོགས་བསྟན་པའི་ཕྱིར། ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ཤེས་པ་ཡི། །ཞེས་བྱ་བ་གསུངས་ཏེ། དེ་ལ་སྤྱིར་ནི་དམ་ཚིག་ལ་སོགས་པའི་བསླབ་པའི་ཡན་ལག་ཀྱང་ཆོ་གའི་ཡན་ལག་ཏུ་གཏོགས་པ་ཡིན་མོད་ཀྱི། མདོར་བསྡུ་ན། གོང་དུ་བསྟན་པའི་སྔགས་ཀྱི་ཡན་ལག་ལྔ་དང་། ཡོ་བྱད་ལྔ་དང་། ཆོ་ག་ལྔ་རྣམས་སུ་གྲོགས་ཐམས་ཅད་འདུས་པ་ཡིན་ནོ། །དེ་ལྟ་བུའི་ཚད་དང་ལྡན་པ་རྣམས་ཀྱིས་དངོས་གྲུབ་འགྲུབ་པར་བསྟན་ནོ། །དེ་ལྟ་བུའི་རྒྱུ་རྐྱེན་དང་ལྡན་པའི་རྣལ་འབྱོར་བས་ཚུལ་ཇི་ལྟར་བསྒྲུབ་པར་བྱ་བ་ནི། ལྔ་དང་ལྔ་ཡི་སྦྱོར་བ་ཡིས། །ཚོམ་བུ་ལྔ་ཡི་ལྷ་ཚོགས་ལ། །ཞེས་བྱ་བ་ལ་སོགས་པ་སྟེ། འདི་ལྟར་ཚོམ་བུ་ལྔ་དང་གསུམ་དང་གཅིག་གི་དཀྱིལ་འཁོར་ཁྲོ་བོའི་ཚོགས་ཀྱིས་བསྐོར་བའམ། ཡང་ན་ཁྲོ་བོ་འབའ་ཞིག་གི་དཀྱིལ་འཁོར་གྱི་སྒོ་ནས་བསྒྲུབ་པར་བྱའོ་ཞེས་ཤེས་པར་བྱའོ། །རྣལ་འབྱོར་སྔགས་འཆང་དངོས་གྲུབ་ནི། ཞེས་བྱ་བ་ལ་སོགས་པ་ནི་འཕྱོངས་ཡིན་ཏེ། འདི་ལས་ནི་ཏིང་ངེ་འཛིན་གྱི་འཇུ་འདུལ་ལ་སོགས་པ་ཅུང་ཟད་གསལ་བར་བསྟན་པར་ཟད་དོ། །ལེའུ་བཅུ་གཅིག་པའོ།། ༈ །།ད་ནི་ཚོགས་ཀྱི་དཀྱིལ་འཁོར་དེ་ཉིད་ཇི་ལྟར་བསྒྲུབ་པའི་ཐབས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ལ་དངོས་གྲུབ་བསྒྲུབ་པའང་ལེའུ་ལྔ་པ་ལ་སོགས་པར་གསུངས་པའི་ཏིང་ངེ་འཛིན་བརྟན་པར་གྱུར་པ་རྣམས་ཀྱིས། འདི་ལྟ་བུའི་རོལ་པ་ཆེན་པོའི་ལོངས་སྤྱོད་ལ་རྣམ་པར་རྩེན་པའི་ཚུལ་གྱིས་ཐུན་མོང་དང་མཆོག་གི་དངོས་གྲུབ་སྣ་ཚོགས་བསྒྲུབ་པར་བསྟན་པའི་ཕྱིར། སྒྱུ་འཕྲུལ་དྲྭ་བས་མངོན་རྫོགས་པའི། །དཀྱིལ་འཁོར་བརྟན་པའི་ཏིང་ངེ་འཛིན། །བྲོ་གར་ཕྱག་རྒྱའི་འདུ་འཕྲོ་ཡིས། །འཛུལ་ལམ་ནམ་མཁར་འགྲོ་བར་འགྱུར། །ཞེས་བྱ་བ་ལ་སོགས་པ་གསུངས་ཏེ། དེ་ལ་བྲོ་གར་ཉིད་ཕྱག་རྒྱ་སྟེ། ལྷུན་གྱིས་གྲུབ་པའི་ཕྱག་རྒྱ་ཡིན་པ་དང་། སྒྱུ་འཕྲུལ་དྲྭ་བའི་ཏིང་ངེ་འཛིན་དང་ལྡན་ན་ཐམས་ཅད་ལྷའི་བྱིན་རླབས་མ་གྱུར་པ་མེད་པའི་ཕྱིར་ཏེ། ཕྱག་རྒྱ་འོག་མ་རྣམས་ལ་ཡང་དེ་བཞིན་དུ་སྦྱར་རོ། །འདི་ལྟར་བྲོ་གར་གྱི་འདུ་འཕྲོ་ལས་འོད་ཟེར་སྣ་ཚོགས་སུ་འཕྲོས་པས། སངས་རྒྱས་ཀྱི་མཛད་པ་བསྒྲུབས་ཏེ་སླར་འདུས་པས་བདག་ཉིད་ཀྱི་དཀྱིལ་འཁོར་ཡང་འོད་ཕུང་དུ་གྱུར་ཏེ། དེ་ལ་སྙིང་རྗེ་ཆེན་པོའི་བློ་ཡིས་བསྐྱོད་པས་རིམ་གྱིས་སམ་ཅིག་ཅར་གྱི་ཚུལ་གྱིས་ལྷའི་སྐུར་གསལ་བར་བསྐྱེད་ལ། བྲོ་གར་གྱི་སྒོ་ནས་བསྒྲུབས་ན་དངོས་གྲུབ་ཀྱི་མཆོག་ཏུ་འགྱུར་རོ། །གཞན་ཡང་རྐང་པའི་གར་གྱིས་ས་ལ་འཛུལ་བ་དང་། ལག་པའི་གར་གྱིས་ནི་ནམ་མཁའ་འགྲོ་བར་འགྱུར་བའམ། ཡང་ན་ཐུན་མོང་དུ་ཡང་འགྱུར་ཏེ། འདི་ལྟ་བུ་དག་བསྒྲུབ་པར་འདོད་ན། ས་གཞི་ཡི་གེ་སྒྱུ་འཕྲུལ་དུ་བསྒོམས་ཏེ། དེ་ལ་ལྷ་མ་ཡིན་གྱི་གནས་ལ་སོགས་པའི་ལམ་དུ་བསྒོམས་ཏེ། དེར་ཞུགས་ནའང་ས་དང་ཆུ་ལ་བྱ་བཞིན་འཛུལ་བར་འགྱུར་བ་དང་། དེ་བཞིན་དུ་ནམ་མཁའ་ལ་ཡང་སྦྱར་བར་བྱ་སྟེ། འདི་ནི་དངོས་གྲུབ་ཆེན་པོའོ། །གླུ་ཚིག་སྒྲའི་ཕྱག་རྒྱ་ནི། དེའི་ཚེ་གསུང་ཡན་ལག་བསམ་གྱིས་མི་ཁྱབ་པའི་སྒོ་ནས་གདུལ་བྱ་རྣམས་ལ་སོ་སོའི་སྐད་དུ་ཆོས་རྣམས་ཚོགས་སྒྲོགས་པ་དང་། བདུད་དང་མུ་སྟེགས་ཟིལ་གྱིས་མནན་པ་ལ་སོགས་པ་མཛད་པ་ཡོངས་སུ་བསྒྲུབ་པར་བསྒོམས་ན་དངོས་གྲུབ་མཆོག་ཏུ་འགྱུར་རོ། །ཡང་ན་ལྕེའི་པདྨ་ལ་ཡི་གེ་ཧྲཱིཿབསྒོམས་ཏེ། དེའི་འོད་ཟེར་གྱི་འཕྲོ་འདུས་སྔ་མ་བཞིན་སངས་རྒྱས་ཀྱི་མཛད་པ་བསྒྲུབ་པ་དང་། སངས་རྒྱས་རྣམས་ཀྱི་གསུང་གི་ཡོན་ཏན་གྱི་ཚོགས་བསྡུས་ཏེ། སླར་བདག་གི་ལྕེ་ལ་ཐིམ་པར་བསྒོམས་ན་ཆོས་སྨྲས་བ་ལ་དབང་ཐོབ་པའི་དངོས་གྲུབ་ཐོབ་པར་འགྱུར་རོ། །རྒྱན་དང་བགོ་བ་དང་བཟའ་བ་དང་བཏུང་བའི་ཕྱག་རྒྱ་ལ་ནི། ལྷ་སོ་སོའི་རིགས་ཀྱི་སྔགས་དང་ཕྱག་རྒྱ་དང་ཏིང་ངེ་འཛིན་དུ་ལྡན་པས་བྱིན་གྱིས་རློབ་ཅིང་། རིགས་ཀྱི་ལྷའི་རང་བཞིན་ནི་བྱིན་རླབས་སུ་མོས་པ་བསྐྱེད་པའམ། ཡང་ན་ལྷ་ཐམས་ཅད་ཀྱི་སྔགས་དང་ཕྱག་རྒྱས་དེ་བཞིན་དུ་བྱིན་གྱིས་བརླབས་པའམ། ཡང་ན་རིགས་ཀྱི་བདག་པོས་བྱིན་གྱིས་བརླབས་ཀྱང་རུང་སྟེ། དང་པོར་ཆོས་ཉིད་ཡེ་ཤེས་ཀྱི་རྐྱེན་དུ་གྱུར་པའི་ཕྱིར། རྣལ་འབྱོར་མ་རྣམས་ཀྱིས་ཕ་རྣམས་ལ་གསོལ་ཞིང་བཏབ། དེ་ནས་ཡེ་ཤེས་ནི་དབྱིངས་ལ་བརྟེན་ཏེ་སྐྱེ་ཞིང་འཇུག་པའི་ཕྱིར། རྣལ་འབྱོར་ཕ་རྣམས་ཀྱིས་མ་རྣམས་ལ་གསོལ་ཞིང་བཏབ་ན་དངོས་གྲུབ་མཆོག་ཏུ་འགྱུར་རོ། །ཡང་ན་རྒྱུད་སྤྱི་ལས་འབྱུང་བ་བཞིན་དུ། དབུ་རྒྱན་དང་དོ་ཤལ་དང་གདུ་བུ་དང་སོར་གདུབ་ལ་སོགས་པ་ལ་དངོས་གྲུབ་ཀྱི་རྫས་སུ་བྱས་ཏེ། སྔགས་དང་ཕྱག་རྒྱ་དང་ཏིང་ངེ་འཛིན་དུ་ལྡན་པས་བསྒྲུབས་ཏེ། ནམ་གྲུབ་པའི་མཚན་མ་ཐོབ་པ་དང་། དཀོན་ཅོག་ལ་བསྔོ་བ་དང་། བདག་ཉིད་སྤྱད་པ་དང་། ཚོགས་ལ་གནས་པའི་འཁོར་རྣམས་ལ་སྦྱིན་པར་བྱ་སྟེ། སོ་སོའི་ལུས་ལ་བརྒྱན་ན་དངོས་གྲུབ་ཆེན་པོར་འགྱུར་ཏེ། གྲུབ་རྟགས་ཆེ་ཆུང་ཇི་ལྟར་ཐོབ་པ་བཞིན་དངོས་གྲུབ་རིམ་པར་འབྱུང་བ་དང་། ཁྱད་པར་དུ་ཡང་རྒྱན་གྱིས་ནི་གཟི་བྱིན་ཐོབ་པར་འགྱུར་ཏེ། སྒྲུབ་པ་པོ་གཟི་བྱིན་མཐའ་ཡས་པ་དེ་ལ་སྔོན་གྲུབ་པའི་རིག་འཛིན་རྣམས་ཀྱིས་དབང་བསྐུར་བར་འགྱུར། ལྷ་མ་ཡིན་གྱི་བུ་མོ་ལ་སོགས་པ་འཇིག་རྟེན་གསུམ་གྱི་བུད་མེད་ཀྱིས་བརྩེན་ཞིང་འདུ་བའི་གནས་སུ་གྱུར་ནས་མྱུར་དུ་བྱང་ཆུབ་ཐོབ་པར་འགྱུར་ཞེས་གྲགས་སོ། །རས་ལ་སོགས་པའི་བགོ་བ་རྣམས་ལ་ནི་སྤྱིའི་དངོས་གྲུབ་ཐུན་མོང་དུ་གནས་པ་ལས། ཁྱད་པར་དུ་མི་ཚུགས་པ་བསྲུང་བའི་གོ་ཆར་འགྱུར་རོ། །ཡན་ལག་བཞི་དཔུང་དང་བཅས་པས་ཀྱང་ཚུགས་པར་མི་འགྱུར་རོ་ཞེས་གྲགས་སོ། །དེ་བཞིན་དུ་བཟའ་བ་དང་བཏུང་བ་དག་ལ་ཡང་སྤྱི་ཐུན་མོང་དུ་གནས་པ་ལས། ཁྱད་པར་དུ་ཡིད་བཞིན་གྱི་སྐུ་བཟང་པོ་འདོད་དགུར་བསྒྱུར་བའི་གཟུགས་ཅན་འཐོབ་པ་དང་། བཏུང་བས་ཀྱང་བདུད་རྩི་བཅུད་ཀྱིས་ལེན་ཞེས་བྱ་བ་དངོས་གྲུབ་སྣ་ཚོགས་སུ་འགྱུར་པ་ཅན་འཐོབ་བོ་ཞེས་སྦྱར་རོ། །ཚོགས་ཀྱི་དཀྱིལ་འཁོར་གྱི་སྐབས་འདིར་ནི་དཀྱུས་ལས་ཡོན་ཏན་སོ་སོར་སྨོས་པ་དང་། བཤད་པ་འདི་དག་རྫས་སོ་སོ་བའི་ཁྱད་པར་གྱིས་ནུས་པ་དང་ལྡན་པའི་དངོས་གྲུབ་ཀྱི་བྱེ་བྲག་ཙམ་བཤད་པར་ཟད་ཀྱི། ལྷག་པར་རྫས་དང་ལོངས་སྤྱོད་ལ་རྟེན་སོ་སོར་བཅས་ནས། སྒྲུབ་ཐབས་སོ་སོར་ཕྱེ་བ་མེད་དེ། སྤྱིར་ཤེས་རབ་དང་ཏིང་ངེ་འཛིན་དང་། སྔགས་དང་ཕྱག་རྒྱ་དང་། ལོངས་སྤྱོད་ཀྱི་མཆོད་པ་ཐམས་ཅད་མ་བཀག་པར་སྤྱོད་པའི་རྣལ་འབྱོར་པས། འདོད་པའི་ཡོན་ཏན་རྣམས་ལ་བརྩེན་བཞིན་དུ་ཐུན་མོང་དང་མཆོག་གི་དངོས་གྲུབ་ཐམས་ཅད་འགྲུབ་པར་བསྟན་པ་ཡིན་པར་ཤེས་པར་བྱའོ། །ཨཱ་ལི་ཀཱ་ལིའི་ཕྱག་རྒྱ་ཞེས་བྱ་བ་ལ། ཨཱ་ལི་ཀཱ་ལི་ཞེས་བྱ་བ་ནི་བརྡའི་ཚིག་སྟེ། ཁ་ཅིག་ཏུ་ནི་ཨ་ལ་སོགས་པའི་དབྱངས་ཡིག་བཅུ་དྲུག་དང་། ཀ་ལ་སོགས་པའི་གསལ་བྱེད་ཀྱི་ཡི་གེ་རྣམས་ལ་འཇུག་སྟེ། དེ་ལ། ལ་ནི་འཛིན་པའི་དོན། ཨ་ནི་ལྡན་པའི་དོན་ཏེ་ཡི་གེ་རྣམས་ཀྱི་བརྡར་གྲགས་སོ། །ཁ་ཅིག་ཏུ་ཨཱ་ལི་ནི་འཆི་བ། ཀཱ་ལི་ནི་སྐྱེ་བ་སྟེ། འདུ་བྱེད་ཀྱི་ཆོས་ཐམས་ཅད་སྐྱེ་འགག་དང་བཅས་པ་ལ་དེ་སྐད་ཅེས་གྲགས་སོ། །དེ་བཞིན་དུ་ཁ་ཅིག་ཏུ་ནི་ཨཱ་ལི་ནི་མོའི་རྟགས་སོ། །ཀཱ་ལི་ནི་ཕོའི་རྟགས་སོ། །ཁ་ཅིག་ཏུ་ཨཱ་ལི་ནི་བྱ་བ་མེད་པ། ཀཱ་ལི་ནི་བྱ་བ་དང་བཅས་པ་ཞེས་གྲགས་སོ། །དེ་བཞིན་དུ་ཤེས་རབ་དང་། སྙིང་རྗེ་དང་། ཀུན་ཏུ་བཟང་པོ་དང་། བཟང་མོ་ཞེས་བྱ་བ་ལ་སོགས་པ་སྒོ་དུ་མར་གྲགས་པ་ལས། འདིར་ནི་ཡབ་ཡུམ་ཐབས་དང་ཤེས་རབ་གཉིས་སུ་མེད་པར་རོལ་པ་ལས་དངོས་གྲུབ་ཐམས་ཅད་འབྱུང་བར་བསྟན་པའོ། །ད་ནི་གྲུབ་པའི་འབྲས་བུ་རིག་འཛིན་གྱི་ཁྱད་པར་ཡོན་ཏན་དང་བཅས་པ་སྟོན་ཏེ། དེའི་ཕྱིར། ཤེས་འཇུག་མཚན་ཉིད་སྦྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་བྱ་བ་ལ་སོགས་པ་སྨོས་ཏེ། དེ་ལ་ཤེས་པའི་མཚན་ཉིད་དང་། འཇུག་པའི་མཚན་ཉིད་དང་། འབྲས་བུའི་མཚན་ཉིད་གསུམ་གྱིས། གསང་སྔགས་ཀྱི་གཞུང་དུ་གྲགས་པའི་ཤེས་བྱའི་ཆོས་དང་ལམ་གྱི་ཆོས་དང་། འབྲས་བུའི་ཆོས་ཐམས་ཅད་བསྡུས་པ་ཡང་ཡིན་ལ། དེ་དག་ཀྱང་རང་བཞིན་དབྱེར་མེད་པར་གསུངས་པ་ཡང་ཡིན་ནོ། །དེ་ཉིད་ཀྱིས་རིག་འཛིན་གྱི་ས་ཡོན་ཏན་དང་བཅས་པ་བསྡུས་པར་ཡང་གསུངས་པ་ཡིན་ནོ། །དེ་ལ་ཤེས་པའི་མཚན་ཉིད་ནི། རྟོགས་པ་རྣམ་བཞིའི་ཚུལ་རིག་པ་སྟེ་རྒྱུའོ། །འཇུག་པའི་མཚན་ཉིད་ནི། ཇི་ལྟར་ཤེས་པ་དེ་བཞིན་དུ་སྒོ་གསུམ་གྱི་སྤྱོད་པས་ཉམས་སུ་བླངས་ཏེ་འཇུག་པ་རྐྱེན་ནོ། །འབྲས་བུའི་མཚན་ཉིད་ནི། གོམས་པ་དེ་མངོན་དུ་གྱུར་པའོ། །དེ་ལ་མཚན་ཉིད་གསུམ་གྱི་མཚན་གཞིའི་ནི་རྟོགས་པ་རྣམ་པ་བཞི་ཉིད་དོ། །དེ་ཉིད་ལ་ཤེས་པ་ཙམ་གྱི་ཚུལ་དང་། དེ་ཉིད་གོམས་པར་བྱེད་པའི་ཚུལ་དང་། གོམས་པའི་མཐུས་མངོན་དུ་གྱུར་པའི་ཚུལ་དང་། རྣམ་པ་གསུམ་ལ་མཚན་ཉིད་གསུམ་ཞེས་བྱའོ། །དེ་ལ་ཤེས་པ་དང་འཇུག་པའི་མཚན་ཉིད་རྣམ་པ་གཉིས་ནུས་པ་ཅན་དུ་གྱུར་ནས་རིག་པ་འཛིན་པ་ཞེས་བྱ་བའི་དངོས་གཞི་ཐོབ་སྟེ། དེ་ཕན་ཆད་འབྲས་བུ་མཐར་ཕྱིན་པར་མ་གྱུར་གྱི་བར་དུ་རིག་པ་འཛིན་པ་ཞེས་བྱའོ། །མཐར་ཕྱིན་ནས་ཀྱང་རིག་པ་འཛིན་པ་ཞེས་བྱ་བའི་མིང་ཕྱོགས་གཅིག་འཛིན་པ་ལ་ཉེས་པ་མེད་དོ། །དེ་ནི་འདི་ལྟར་ཤེས་པར་བྱ་སྟེ། ཤེས་པ་དང་འཇུག་པའི་མཚན་ཉིད་གཉིས་ནི་འབྲས་བུ་ལ་སྦྱོར་བར་བྱེད་པ་ཉིད་ལས་མི་འདའ་བ་ཡིན་པས་ན་གཟུངས་ཀྱང་ཡིན་ལ། འབྲས་བུ་སྨིན་པར་བྱེད་པ་ཡིན་པས་ན་རྒྱུ་དང་རྐྱེན་ཡང་ཡིན་ཏེ། རྒྱུ་རྐྱེན་ནུས་པ་ཅན་དུ་གྱུར་ནས་འབྲས་བུ་འབྱིན་པའི་མཐུ་དང་ལྡན་པ་ཉིད་དུ་གྱུར་བ་ཡིན་ལ། འབྲས་བུ་མངོན་དུ་མ་ཕྱུང་ཡང་རིག་འཛིན་པ་ཞེས་བྱ་བའི་དངོས་གཞི་ཐོབ་པ་ཡང་ཡིན་ལ། སངས་རྒྱས་ཀྱི་ཞིང་རྣམས་སུ་ལུང་བསྟན་པ་འཐོབ་པ་ཡང་ཡིན་ཏེ། འདི་ལྟར་འཇིག་རྟེན་གྱི་ཁམས་ཆེ་གེ་མོ་ཞིག་ན། རིག་འཛིན་ཆེ་གེ་མོ་ཞིག་གནས་ཏེ། འདི་ལྟར་དུས་འདི་ཞེས་བྱ་བ་ལ་སངས་རྒྱས་ཀྱི་མཛད་པ་བསྒྲུབ་པར་འགྱུར་རོ། །ཞེས་ལུང་སྟོན་ཅིང་ཡོན་ཏན་བརྗོད་པ་གྲགས་པར་མཛད་དོ། །འོ་ན་རིག་འཛིན་དེ་སྐྱེ་བ་དང་འགྲོ་བ་གང་གི་རྒྱུད་ཀྱིས་བསྡུས་པ་ཡིན། ས་གང་གིས་བསྡུས་པ་ཡིན་ཞེ་ན། མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱི། །ཁྱད་པར་ས་ལ་གནས་འགྱུར་ཡིན། །ཞེས་བྱ་བ་སྨོས་ཏེ། དེ་ལ་སྐྱེ་འགྲོ་གང་གི་རྒྱུད་ཀྱིས་བསྡུས་པ་ནི། འདོད་པའི་ཁམས་ཀྱི་མི་དང་ལྷ་དང་དང་ཚངས་པ་ལ་སོགས་པ་གཟུགས་ཀྱི་ཁམས་ཀྱི་སྐྱེ་བོ་དང་འགྲོ་བ་རྣམས་ཀྱི་རྒྱུད་རྣམ་པར་དག་པ་རྣམས་འཛིན་པར་བྱེད་དོ། །གཟུགས་མེད་པའི་ཁམས་སུ་ནི་སྐྱེ་བ་དོན་དུ་གཉེར་བར་མི་བྱེད་དེ་དགོས་པ་མེད་པའི་ཕྱིར་རོ། །ས་གང་གིས་བསྡུས་པ་ཡིན་ཞེ་ན། སྲིད་པས་བསྡུས་པའི་ས་རྣམས་ནི་འདིར་དགོས་པ་མེད་པས་མ་གསུངས་སོ། །ཡེ་ཤེས་ཀྱི་ས་ནི། ཁྱད་པར་ས་ལ་གནས་འགྱུར་ཡིན། །ཞེས་གསུངས་ཏེ། དེ་ལ་ཁྱད་པར་གྱིས་ནི། གསང་སྔགས་ཀྱི་ཚུལ་ལས་སངས་རྒྱས་ཀྱི་ས་བཅུ་གསུམ་པ་ཞེས་གྲགས། དེ་བཞིན་དུ་རྡོ་རྗེ་འཛིན་པའི་ས་ཞེ་འམ། ཡི་གེ་འཁོར་ལོ་ཚོགས་ཆེན་གྱི་ས་ཞེའམ། རིག་པ་འཛིན་པའི་ས་ཞེས་བྱ་བ་ལ་སོགས་པར་གྲགས་ཏེ། ས་འདི་དག་གིས་བསྡུས་པའི་ཚུལ་ནི། དཔེར་ན་ཉ་མཆིལ་པས་ཟིན་པ་ནི་ཆུའི་ཁམས་དང་མ་བྲལ་བཞིན་དུའང་སྐམ་སར་གཏོགས་པས་བསྡུ་བ་དེ་བཞིན་དུ། རྒྱུ་རྐྱེན་ནུས་པ་ཅན་དུ་གྱུར་པ་དེ་དག་ནི་སྲིད་པའི་ས་དང་མ་བྲལ་བཞིན་ཡང་། ཡེ་ཤེས་ཀྱི་ས་ཟིན་པར་གྱུར་པར་ཡེ་ཤེས་ཆེན་པོ་ཉིད་ཀྱི་སར་གཏོགས་པར་བསྡུའོ། །རིག་འཛིན་གྱི་བྱེ་བྲག་ནི་གཞུང་ཁ་ཅིག་ལས། གཞུང་སྤྱི་ལས་གྲགས་པའི་ལམ་རྣམ་པ་ལྔ་དང་སྦྱར་བ་དག་ཀྱང་སྣང་ངོ་། །སྔོན་གྱི་སློབ་དཔོན་རྣམས་ཀྱི་གདམས་ངག་ལས། སར་ཆུད་པ་དང་། ས་ལ་གནས་པ་དང་། སར་སྨིན་པ་ཞེས་ཀྱང་གསུངས་སོ། །གཞན་ཡང་རྣམ་པར་སྨིན་པའི་རིག་འཛིན་དང་། ཚེའི་རིག་འཛིན་དང་། ཕྱག་རྒྱ་ཆེན་པོའི་རིག་འཛིན་ཞེས་ཀྱང་གསུངས་སོ། །ཕྱག་རྒྱ་ཆེན་པོའི་རིག་འཛིན་ལ་ཡང་། གཞུང་ཁ་ཅིག་ལས་ནི་འདི་སྐད་དུ། རང་ལུས་རྒྱལ་བའི་ཕྱག་རྒྱ་ཆེ། །བསྒོམས་པས་མངོན་དུ་གྱུར་པའི་ལྷ། །མཚན་དང་དཔེ་བྱད་མངོན་ཤེས་ལྡན། །ཕྱག་རྒྱ་ཆེན་པོའི་རིག་འཛིན་གྲགས། །ཞེས་གསུངས་སོ། །ཁ་ཅིག་ལས། ཕྱག་རྒྱ་ཆེན་པོ་ནི་མཚན་མ་མེད་པ་ཆོས་ཀྱི་སྐུའོ་ཞེས་ཀྱང་གྲགས་ཏེ། འོན་ཀྱང་འདིར་ནི་རྒྱུ་རྐྱེན་ནུས་པ་ཅན་དུ་གྱུར་པ་དེ་ཉིད་རིག་འཛིན་ཞེས་སངས་རྒྱས་ཀྱི་ཞིང་རྣམས་སུ་གྲགས་ལ། ཁྱད་པར་གྱི་སས་བསྡུས་པའོ་ཞེས་གསུངས་སོ། །རིག་འཛིན་གྱི་ངེས་པའི་ཚིག་ནི། བི་ད་དྷ་ར་ཞེས་བྱ་བ་ནི། བི་ད་ནི་རིག་སྔགས་ཏེ། ཤེས་རབ་དང་ཡེ་ཤེས་ཀྱི་བདག་ཉིད། དྷ་ར་ནི་འཛིན་པ་སྟེ། དེ་དང་ལྡན་པའི་འགྲོ་བའི་རྒྱུད་ཀྱི་བསྡུས་པའོ། །འདི་ལྟ་བུའི་ཤུགས་ཀྱིས་སངས་རྒྱས་ཀྱི་ས་བཅུ་གསུམ་པ་ཡང་ས་རབ་རིག་པ་འཛིན་པའི་ས་ཞེས་གསུངས་སོ། །སྐབས་ཁ་ཅིག་ཏུ་ནི། རིག་སྔགས་གྲུབ་པ་རྣམས་ལ་ཡང་བི་ད་དྷ་ར་ཞེས་གྲགས་སོ། །ད་ནི་རིག་འཛིན་གྱི་ཡོན་ཏན་བསྟན་པའི་ཕྱིར། ཕ་རོལ་ཕྱིན་པ་ཀུན་ཏུ་རྫོགས། །ཐབས་དང་ཤེས་རབ་ཐབས་ཀྱི་མཆོག །ཤེས་རབ་མཆོག་གི་མཆོག་གྱུར་པ། །ས་ཡི་ཁྱད་པར་བཅུ་དང་གསུམ། །རྒྱུ་འབྲས་ཁྱད་པར་ལྷུན་གྱིས་རྫོགས། །ཞེས་གསུངས་ཏེ། དེ་ལ་མཚན་ཉིད་ཀྱི་ཐེག་པ་ཆེན་པོ་སྤྱི་ལ་གྲགས་པ་ནི། ཕ་རོལ་ཏུ་ཕྱིན་པ་བཅུའི་སྒོ་ནས་ས་བཅུའི་རིམ་གྱིས་རྫོགས་པའི་མཐར་བླ་ན་མེད་པའི་བྱང་ཆུབ་ཏུ་འགྲུབ་པར་འགྱུར་བར་གསུངས་པ་སྟེ། འདིར་རྒྱུ་དང་འབྲས་བུར་བཅས་ནས་བཙལ་བ་མེད་པར་ལྷུན་གྱིས་རྫོགས་པར་གསུངས་ཏེ། དེ་ཡང་ཇི་ལྟར་ཞེ་ན། ཆོས་ཐམས་ཅད་ལ་ཡོངས་སུ་འཛིན་པ་མེད་པ་དང་བཀག་པ་མེད་པར་སྤྱོད་པ་ནི། སྦྱིན་པའི་ཕ་རོལ་ཏུ་ཕྱིན་པའི་འབྲས་བུ་དང་བཅས་པ་བཙལ་བ་མེད་པར་ལྷུན་གྱིས་རྫོགས་པར་བསྟན་ནོ། །དེ་བཞིན་དུ་མཉམ་པ་ཉིད་དུ་རིག་པས་གོས་པ་མེད་པ་དང་། བླ་ན་མེད་པ་ནི་ཚུལ་ཁྲིམས་སོ། །འཁྲུག་པ་མེད་པ་དང་ཡེ་ཤེས་ཀྱི་མཚན་མ་ཡོངས་སུ་རྫོགས་པ་ནི་བཟོད་པའོ། །ཉམས་པ་མེད་པ་དང་བྱེད་སྤྱོད་ཚོགས་སུ་འགྱུར་བ་ནི་བརྩོན་འགྲུས་སོ། །དབང་པོ་ཡུལ་ཀུན་ལ་འཇུག་ཀྱང་མཉམ་ཉིད་ལས་མི་གཡོ་བར་རིག་པ་དང་ཆོས་ཐམས་ཅད་ཀྱི་རང་བཞིན་མངོན་པར་རིག་པ་ནི་བསམ་གཏན་ནོ། །རང་བཞིན་ཕྱིན་ཅི་མ་ལོག་པར་རྟོགས་པས་ཆོས་ཐམས་ཅད་ཀྱི་ཡོངས་སུ་མ་ཟིན་ཡོངས་སུ་འདས་པ་ནི་ཤེས་རབ་བོ། །དེ་ལྟར་གྱུར་ན་ཤེས་རབ་ཀྱི་ཆར་གཏོགས་པའི་ཕ་རོལ་ཏུ་ཕྱིན་པ་ལྷག་མ་རྣམས་ཀྱང་ལྷུན་གྱིས་རྫོགས་པར་འགྱུར་ཏེ། བདག་དང་གཞན་གྱི་དོན་དུ་འགྱུར་བ་ཐབས་སོ། །ཞིང་དང་སྤྱོད་ཡུལ་ཡོངས་སུ་དག་པར་འགྱུར་བ་སྨོན་ལམ་མོ། །མི་མཐུན་པའི་ཕྱོགས་ཀྱིས་ཡོངས་སུ་མི་བརྫི་བ་སྟོབས་སོ། །དོན་ཇི་ལྟ་བ་བཞིན་རྟོགས་པ་ནི་ཡེ་ཤེས་ཏེ། དེ་ལྟར་ན་ཕ་རོལ་ཏུ་ཕྱིན་པ་བཅུ་དུས་གཅིག་ཏུ་ལྷུན་གྱིས་རྫོགས་པར་འགྱུར་བ་དེ་བཞིན་དུ། ས་བཅུ་ཡང་དུས་ཡུན་རིང་མོས་རིམ་གྱིས་སྦྱང་མི་དགོས་ཏེ། མྱུར་དུ་ལྷུན་གྱིས་རྫོགས་པར་འགྱུར་རོ་ཞེས་བྱའོ། །ཐབས་དང་ཤེས་རབ་ཐབས་ཀྱི་མཆོག །ཅེས་པ་ནི་ཀུན་ཏུ་འོད་ཀྱི་ས་སྟེ། འདི་ལྟར་ཕ་རོལ་ཏུ་ཕྱིན་པ་བཅུ་དང་ས་བཅུ་ནི་ཐབས་དང་ཤེས་རབ་ཀྱིས་བསྡུས་པ་ཡིན་ལ། ས་དེ་དག་གི་ཐབས་ཀྱི་འབྲས་བུ་ནི་ཀུན་ཏུ་འོད་ཀྱི་ས་སྟེ། འོད་ཟེར་མང་པོ་བཀྱེ་བས་འདུལ་བའི་འགྲོ་བ་སྣོད་དུ་རུང་བར་མཛད་པའི་ཕྱིར། སངས་རྒྱས་ཀྱི་ས་ཀུན་ཏུ་འོད་ཅེས་ཐུན་མོང་དུ་གྲགས་སོ། །ཤེས་རབ་མཆོག་ཅེས་བྱ་བ་ནི་པདྨ་ཅན་གྱི་ས་སྟེ། འདི་ནི་ཐུན་མོང་མ་ཡིན་པའི་གཞུང་ཁ་ཅིག་ལས། ཆོས་ཀྱི་སྐུ་ཀུན་ཏུ་འོད་ཀྱི་ས་ལས་མ་གཡོས་བཞིན་དུ། མ་ཆགས་པའི་ཤེས་རབ་དང་མི་དམིགས་པའི་ཐུགས་རྗེ་དང་ལྡན་པ་ལ་བྱའོ། །ཞེས་ཟེར་རོ། །མཆོག་གྱུར་པ་ཞེས་པ་ནི། ཐབས་དང་ཤེས་རབ་མཆོག་གི་ས་སྟེ། དེ་ལྟ་བུའི་བྱིན་རླབས་ཀྱིས་རྒྱལ་བའི་དཀྱིལ་འཁོར་མཐའ་ཡས་པ་རྩོལ་བ་མེད་པར་ལྷུན་གྱིས་འབྱུང་བས། ཐབས་དང་ཤེས་རབ་མཆོག་གིས་ཞེས་པའམ་ཡི་གེ་འཁོར་ལོ་ཚོགས་ཆེན་གྱི་ས་ཞེས་གྲགས་སོ། །རྡོ་རྗེ་སྙིང་པོ་རྒྱན་གྱི་རྒྱུད་ལས། སངས་རྒྱས་ཀྱི་ས་བཅུ་གཉིས་སུ་གྲགས་པའང་ཐབས་དང་ཤེས་རབ་གཉིས་རིགས་ལྔ་དག་ཡེ་ཤེས་ལྔ་ལ་གྲགས་ཏེ། དེ་བས་ན་འབྲས་བུའི་ཆོས་ཐམས་ཅད་ཀྱང་འདི་དག་ཙམ་དུ་འདུས་པར་མངོན་ནོ། །ད་ནི་ལྷ་མང་མོ་བསྒོམ་མི་ནུས་པ་རྣམས་ཀྱི་དོན་དུ་ལྷ་གཅིག་བསྒོམས་པས་ཀྱང་སངས་རྒྱས་ཐམས་ཅད་བསྒོམས་པར་བསྟན་པའི་ཕྱིར། མཁའ་དཀྱིལ་དག་པའི་དབྱིངས་ཉི་ཟླ། །ཡེ་ཤེས་རྒྱལ་པོའི་སྟངས་དཔྱལ་བསྒོམ། །རྒྱལ་བའི་དཀྱིལ་འཁོར་ཐམས་ཅད་ཀུན། །མ་ལུས་བར་ནི་སྒོམ་པར་འགྱུར། །ཞེས་གསུངས་ཏེ། ཐུན་མོང་མ་ཡིན་པའི་ཐེག་པའི་གཞུང་གིས། སངས་རྒྱས་བཅོམ་ལྡན་འདས་རྣམས་ལ་རྒྱུད་ཐ་དད་པ་དང་། ཞིང་ཐ་དད་པ་དང་། དུས་ཐ་དད་པ་དང་། ཚུལ་ཐ་དད་པ་རྣམས་ཀྱི་སྒོ་ནས། རང་བཞིན་དང་མཛད་པ་ཐ་དད་པ་མེད་པའི་ཕྱིར་རོ། །ད་ནི་སངས་རྒྱས་རང་གི་ངོ་བོ་བསྟན་པའི་ཕྱིར། དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་འཚོལ་ཞིག །ཅེས་གསུངས་ཏེ། འདི་ལྟར་སངས་རྒྱས་ཞེས་བྱ་བ་ནི། སེམས་ཀྱི་རང་བཞིན་ཇི་ལྟར་གནས་པ་དེ་ཉིད་སངས་རྒྱས་ཡིན་གྱི། ཡུལ་དང་དུས་ཀྱི་གནས་སྐབས་ཀྱིས་རྣམ་པར་ཕྱེ་སྟེ། འཇིག་རྟེན་གྱི་ཁམས་ཆེ་གེ་མོ་ཞིག་ན་ལྷ་དང་མི་རྣམས་ཀྱི་སྟོན་པ་སངས་རྒྱས་ཆེ་གེ་མོ་ཞིག་འཚོ་སྐྱོང་ཞེས་བྱ་བ་ལྟ་བུ་དང་། གང་ཟག་གི་ཤེས་པའི་རྒྱུད་ལ་བྱང་ཆུབ་སྙིང་པོ་ཅན་ཡིན་པ་ལས། དགེ་བའི་བཤེས་གཉེན་གྱི་སྟོབས་ལ་བརྟེན་ནས་བྱང་ཆུབ་ཀྱི་སྤྱོད་པར་སྤྱད། དུས་ནམ་ཞིག་ན་རྒྱུ་ལས་འབྲས་བུ་སངས་རྒྱས་སུ་འགྱུར་རོ། །ཞེས་ཡུལ་དང་དུས་ཀྱིས་རྣམ་པར་ཕྱེ་སྟེ་སངས་རྒྱས་འཚོལ་བ་རྣམས་ཀྱིས་ནི་རྙེད་པར་མི་འགྱུར་ཏེ། གང་གི་ཕྱིར་སེམས་ཅན་གྱི་རང་བཞིན་ཉིད་སངས་རྒྱས་ཡིན་པའི་ཕྱིར་རོ། །དེ་ནི་འདི་ལྟར་ཐེག་པ་ཆེན་པོ་བདེན་པ་གཉིས་ཀྱི་གཞུང་འཛིན་པ་ལྟར་ན་ཡང་སེམས་ཀུན་རྫོབ་སྒྱུ་མ་ལྟ་བུར་སྨྲ་ལ། དེ་ཡང་རྣལ་འབྱོར་སྤྱོད་པ་རྣམས་གཟུང་བ་དང་འཛིན་པ་གཉིས་སྟོང་པར་འདོད་དེ། དེ་ལྟར་ན་རང་རིག་པ་ཙམ་སྒྱུ་མ་ཙམ་དུ་གནས་པ་འདི་དང་། འཕགས་པ་རྣམས་ཀྱི་ཡེ་ཤེས་ལ་ཡང་རང་བཞིན་བྱེ་བྲག་ཏུ་གྱུར་པ་མེད་ལ། བག་ཆགས་ཀྱི་དབང་གིས་སྣང་བའི་དབང་དུ་བྱས་ན་ཡང་སེམས་ཀྱི་སྐད་ཅིག་གཅིག་གི་སྣང་བ་ལས་མ་གཏོགས་པའི་ཆོས་ཐོབ་པར་བྱར་མེད་པར་གྲགས་པ་དང་། ཁ་ཅིག་ལྟར་ན་རྣམ་པར་དག་པ་ཙམ་ལས་སངས་རྒྱས་ཀྱི་ས་གཞན་དུ་མི་འཚོལ་བས། སངས་རྒྱས་གཞན་དུ་མ་འཚོལ་ཞིག །ཅེས་གསུངས་པ་སྟེ། སེམས་ཅན་སངས་རྒྱས་ཀྱི་རྒྱུ་ཅན་ལ་དགོངས་ཏེ་གསུངས་པ་ནི་མ་ཡིན་ནོ། །སེམས་ཉིད་སངས་རྒྱས་ཡིན་པ་དེ་ཐབས་གང་གི་མངོན་དུ་འགྱུར་ཞེ་ན། དཀྱིལ་འཁོར་དུ་ནི་རབ་སྦྱོར་བས། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་གསུངས་ཏེ། གོང་དུ་བསྟན་པ་ལྟར་ཡེ་ནས་ལྷའི་དཀྱིལ་འཁོར་ཡིན་པའི་ཕྱིར། ཤེས་རབ་དང་ཏིང་ངེ་འཛིན་གྱིས་དེ་ལྟར་སྦྱར་བས་འགྲུབ་པར་འགྱུར་བའོ། །དཔེར་ན་ཐག་པ་ཁྲ་བོ་ལ་སྦྲུལ་དུ་འཁྲུལ་བའི་ཚེ། སྦྲུལ་དུ་འཛིན་པའི་བློ་བཏང་ནས་ཐག་པ་ཉིད་དུ་བཟུང་སྟེ་བླངས་ཤིང་སྤྱད་ན་རང་གི་དོན་བྱེད་པ་ལ་མི་བསླུ་བར་འགྱུར་བ་བཞིན་ནོ། །འདི་ལྟ་བུ་དང་ལྡན་ན་ཆོ་ག་ཕྲ་མོ་རྣམས་ལ་ལྷག་ཆད་དུ་གྱུར་ཀྱང་དངོས་གྲུབ་ལ་སྒྲིབ་པར་མི་འགྱུར་ཏེ། དེ་བས་ན། ཆོ་ག་ལྷག་གམ་མ་ཚང་ནའང་། །སྐྱོན་ཉིད་དག་སྟེ་ཉེས་པ་མེད། །ཅེས་གསུངས་པ་ཡིན་ནོ། །ལེའུ་བཅུ་གཉིས་པའོ།། ༈ །།ལེའུ་བཅུ་གསུམ་པ་ལ་ནི། གསང་བ་མན་ངག་གི་ལེའུ་ཞེས་བྱ་སྟེ། རྒྱུད་ཀྱི་དངོས་པོ་དགུ་ལས་ནི། གསང་བ་བྱང་ཆུབ་སེམས་ཀྱི་དཀྱིལ་འཁོར་དུ་བསྡུའོ། །བསླབ་པའི་མཐའ་རྣམས་ལས་དོན་མན་ངག་ཏུ་བསྡུ་བ་ཉིད་བསླབ་པའི་མཐའ་གཅིག་ཡིན་ནོ། །རྩལ་འཕང་གི་ཁྱད་པར་ལྟར་ན་ནི། རྫོགས་པ་ཆེན་པོ་ལྷུན་གྱིས་གྲུབ་པའི་དཀྱིལ་འཁོར་དང་ཆོ་གར་བཅས་པ། ཡོན་ཏན་དང་བཅས་པ། གཏད་རྒྱ་དང་བཅས་པར་བསྟན་པའོ། །དེ་ཉིད་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ལ་གཅིག་ཏུ་འདུས་ཞེས་བྱ་བ་ནི། སངས་རྒྱས་ཐམས་ཅད་ཀྱི་མན་ངག་གི་སྙིང་པོ་བསྟན་པའི་ཕྱིར། ཆོས་ཐམས་ཅད་ཡེ་ནས་རྫོགས་པ་ཆེན་པོར་ལྷུན་གྱིས་གྲུབ་པ་ཞེས་བྱ་བ་ནི། ལམ་དང་གཉེན་པོས་བཅོས་ཤིང་བསྒྲུབ་ཏུ་མེད་པར་ཡེ་ནས་སངས་རྒྱས་པའི་རང་བཞིན་གང་ཡིན་པའོ། །དམ་ཚིག་ཤིན་ཏུ་གསང་བ་ནི་མན་ངག་འདི་ཉིད་སངས་རྒྱས་རྣམས་ཀྱི་སྤྱོད་ཡུལ་ཡིན་པས་སོ། །སྤྲིན་བཀོད་པ་ནི་དེ་ཉིད་ཡོན་ཏན་རྒྱན་གྱི་དཀྱིལ་འཁོར་ཡིན་པས་སོ། །དེ་ལ་དང་པོ་མན་ངག་གི་སྤྱིའི་དོན་བསྟན་པའི་ཕྱིར། མ་རྟོགས་པ་དང་ལོག་པར་རྟོགས། །ཕྱོགས་རྟོགས་ཡང་དག་ཉིད་མ་རྟོགས། །འདུལ་བ་དགོངས་པ་གསང་བ་དང་། །རང་བཞིན་གསང་བའི་དོན་རྣམས་ནི། །ཞེས་གསུངས་ཏེ། རྩལ་འཕང་མཐོ་དམན་གྱི་ཁྱད་པར་གྱིས། སོ་སོའི་བློའི་རྟོགས་ཚོད་ཀྱི་དོན་འདི་རྣམས་ཀྱང་ཕྱིན་ཅི་མ་ལོག་པའི་དོན་རྟོགས་པའི་མན་ངག་གི་གཞི་ཡིན་པས། དེ་བས་ན་མན་ངག་གི་སྤྱིའི་དོན་ཞེས་བྱའོ། །དེ་ལ་མ་བརྟགས་པས་མ་རྟོགས་པ་ནི་འཇིག་རྟེན་ཕྱལ་པ་དང་རྒྱང་འཕེན་ཏེ། ཆོས་རྒྱུ་འབྲས་ཀྱི་མཚན་ཉིད་དག་ལ་མན་དཔྱད་པའི་ཕྱིར་རོ། །ལོག་པར་རྟོག་པ་ནི་མུར་རྟུག་པ་དང་མུ་སྟེགས་པ་སྟེ། ཆོས་རྟེན་ཅིང་འབྲེལ་བར་འབྱུང་བའི་མཚན་ཉིད་ལ་ལོག་པར་རྟོགས་ཏེ། རྟག་པ་དང་ཆད་པར་ལྟ་བའི་ཕྱིར་རོ། །ཕྱོགས་རྟོགས་པ་ནི་ཉན་ཐོས་དང་རང་སངས་རྒྱས་དག་སྟེ། ཆོས་ཐམས་ཅད་ལ་བདག་མེད་པར་མ་རྟོགས་པའི་ཕྱིར་རོ། །ཡང་དག་ཉིད་མ་རྟོགས་པ་ནི་ཐེག་པ་ཆེན་པོ་ཕ་རོལ་ཏུ་ཕྱིན་པའི་ཚུལ་ཏེ། ཆོས་ཐམས་ཅད་ལ་བདག་མེད་པར་རྟོགས་པར་འདོད་ཀྱང་། བསམ་པ་མཉམ་པ་དང་། སྤྱོད་པ་མཉམ་པ་དང་། དོན་བསྡུས་ནས་གཉིས་སུ་མེད་པའི་བྱང་ཆུབ་ཀྱི་སེམས་སུ་མཉམ་པ་ཉིད་དུ་མ་རྟོགས་ཏེ། ཕྱོགས་གཅིག་གི་སྒོ་ནས་ཆོས་བླང་དོར་དུ་སྤྱོད་པའོ། །ཚུལ་འདི་ལ་ནི་གཞུང་ལས་ཀྱང་། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་ཕྱིར་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་བསྟན་བཅོས་ཁྱད་པར་འཕགས། །ཞེས་གསུངས་པ་ལྟ་བུ་སྟེ། ཕ་རོལ་ཏུ་ཕྱིན་པའི་ཚུལ་ལ་རྨོངས་པའི་སྒྲིབ་པ་ཕྱོགས་གཅིག་ཡོད་པར་བཤད་དོ། །གཞན་ལས་ཀྱང་། དམིགས་པ་རྣམ་པར་དག་པ་དང་། །གྲོགས་ཀྱི་མཐུ་དང་སྤྱོད་པའི་ས། །བློ་ལྡན་རྣམས་ཀྱི་ཐེག་པ་ནི། །ཆེན་པོའི་ཆེན་པོར་ཡོངས་སུ་གྲགས། །ཞེས་གསུངས་ཏེ། འདི་ལྟར་ན་ཡང་ཕ་རོལ་ཏུ་ཕྱིན་པའི་ཚུལ་ལ་དམིགས་པ་ཡོངས་སུ་མ་དག་པ་ཡོད་པར་བཤད་དོ། །གཞན་ལས་ཀྱང་། ལམ་གྱི་ནང་ནས་ཉེ་ལམ་ཆེན་པོ་སྟེ། །ཐབས་ཀྱི་ནང་ནས་མ་ནོར་དམ་པ་སྟེ། །ཤེས་རབ་ནང་ནས་ཤེས་རབ་ཁྱད་པར་ཅན། །ཞེས་གསུངས་ཏེ། འདི་ལྟར་གང་ཡང་གསང་སྔགས་ཀྱི་ཚུལ་ནི་ཐབས་དང་ཤེས་རབ་ཆེན་པོའི་ཡང་ཆེན་པོ་ཡིན་པར་གསུངས་པས། དེ་བས་ན་ཡང་དག་ཉིད་མ་རྟོགས་པ་ཞེས་གསུངས་པ་འདི་ནི་ཤེས་རབ་དང་ཐབས་གཉིས་ཀའི་སྒོ་ནས་སྒྲིབ་པའི་ཕྱོགས་ཡོད་པར་བཤད་པ་ཡིན་ནོ། །ཕྱོགས་གཅིག་གི་ཡན་ལག་གི་སྒོ་ནས་གསུངས་པ་ནི་མ་ཡིན་པར་མངོན་ནོ། །འདུལ་བ་ནི་བྱ་བའི་རྒྱུད་དེ། འདི་ལྟར་ལུས་དང་ངག་གིས་བསྡུས་པའི་བྱ་བ་དང་། བྱ་བ་མ་ཡིན་པ་ལ་འཇུག་པ་དང་། ལྡོག་པའི་མཚན་ཉིད་གཙོ་བོར་བྱས་པའི་འདུལ་བའི་མིང་ཐོབ་པའང་ཡིན་ལ། རྒྱུད་འདི་ཉིད་ལས་ཀྱང་ཚོན་བཀྱེ་བའི་སྐབས་སུ། འདུལ་བའི་ཆོ་ག་བཞིན་དུ་བྱ། །ཞེས་གསུངས་པས། བྱ་བའི་རྒྱུད་ལ་བྱ་བར་མངོན་ནོ། །དགོངས་པ་ནི་རྣལ་འབྱོར་རྒྱུད་དེ། གང་གི་ཕྱིར། ཨ་བཱི་པྲ་ཡཾ་ཞེས་བྱ་བ་བསམ་པ་སྟེ། སེམས་ཀྱི་ལས་སོ། །བསམ་པ་རྩེ་གཅིག་པ་ནི་ཏིང་ངེ་འཛིན་ཡིན་ཏེ། དེ་བས་ན་རྣལ་འབྱོར་རྒྱུད་ཀྱི་སྐབས་སུ་ཡང་། ཕྱག་རྒྱ་ཐམས་ཅད་ལ་ཡིད་འབྱོར་བ་ནི་རྣལ་འབྱོར་ཞེས་གསུངས་པས། དགོངས་པ་ཉིད་རྣལ་འབྱོར་དང་ཐ་མི་དད་དོ། །གསང་བ་ནི་རྣལ་འབྱོར་ཆེན་པོ་སྟེ། སྐུ་གསུང་ཐུགས་ཀྱི་གསང་བ་གཟུགས་པོར་བསྟན་པ་དང་། དངོས་པོར་ལྟ་བ་རྣམས་དང་ཞེན་པའི་ཆ་ཤས་ཆེ་བ་རྣམས་ཀྱི་ཡུལ་མ་ཡིན་པའི་ཕྱིར། ཤིན་ཏུ་གསང་བ་ཡིན་པས་དེ་སྐདཅེས་བྱའོ། །རྣལ་འབྱོར་ཆེན་པོའི་ཚུལ་གྱིས་སྤྱིར་བསྡུས་པ་ཡིན་ན་ཡང་། རྩལ་འཕང་གི་བྱེ་བྲག་གི་དབང་གིས་ཡེ་ནས་རྫོགས་པ་ཆེན་པོར་ལྷུན་གྱིས་གྲུབ་པའི་དོན་ལ་འཇུག་པའི་ཚུལ་ཡང་། ལྷུན་གྱིས་འཇུག་པའི་ཚུལ་དམ་པ་རྣམས་ཀྱི་སྤྱོད་ཡུལ་དུ་གསུངས་པ་ཡང་ཡོད་པས། རང་བཞིན་གསང་བའི་དོན་རྣམས་ནི། །ཞེས་གསུངས་པ་ཡིན་ནོ། །ད་ནི་མན་ངག་གི་ཁུངས་བསྟན་པའི་ཕྱིར། ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པའི་རྡོ་རྗེ་ཐུགས་ལ་གནས། །ཞེས་གསུངས་ཏེ། འདིར་མན་ངག་གི་ཁུངས་ནི་རྡོ་རྗེ་སློབ་དཔོན་ཡིན་ལ། དེས་ཀྱང་ཡི་གེ་དང་མིང་དང་ཚིག་གི་ཚོགས་ལ་བརྟེན་ནས། དེ་ཉིད་ལ་གནས་པའི་དོན་སྟོན་ཅིང་འབྱིན་པར་བྱེད་དོ་ཞེས་སྦྱར་ཏེ། དེ་ལྟར་འདིར་མན་ངག་སྟོན་ཅིང་འབྱིན་པར་བྱེད་པའི་བྱེད་པ་པོ་ནི་ཐུགས་ཀྱི་མན་ངག་དང་ལྡན་པའི་རྡོ་རྗེ་སློབ་དཔོན་ནོ། །བྱེད་པ་ནི་ཡི་གེ་དང་མིང་དང་ཚིག་གི་ཚོགས་སོ། །འབྱུང་ཁུངས་ཀྱང་དེ་དག་གི་བདག་ཉིད་གཞུང་གི་ཚོགས་སོ། །འབྱིན་ཅིང་བསྟན་པར་བྱ་བའི་དོན་ནི་གབ་པ་དང་སྦས་པ་སྟེ། དེ་ལ་གོང་དུ་བསྟན་པའི་སྤྱིའི་དོན་ལས་བསྡུས་ནས། དོན་གང་རང་བཞིན་གྱིས་རྟོགས་པར་དཀའ་བ་རྣམས་ནི་གབ་པའི་གསང་བའོ། །དོན་ཐ་མལ་པའི་སྤྱོད་ཡུལ་དུ་བསྟན་ཅིང་བསྒྲགས་སུ་མི་རུང་བ་དེ་ནི་སྦས་པའི་གསང་བའོ། །མདོར་ན་ཡི་གེ་དང་མིང་དང་ཚིག་ལ་བརྟེན་ནས། གཞུང་གི་དོན་བླ་མས་བསྟན་ཅིང་དབྱུང་བར་བྱའོ་ཞེས་སྦྱར་རོ། །དེ་ལ་ཡི་གེ་ནི་མིང་རྣམས་ཀྱི་ཆ་ཤས་བྱ་བའི་མཐར་ཐུག་པ་ཨ་ཐུང་ངུ་ལ་སོགས་པའོ། །སྒྲ་བཏགས་ནི་ཡི་གེ་ཐམས་ཅད་ལ་ཡང་ཨའི་གསལ་བྱེད་ཀྱིས་ཁྱབ་པས། ཨ་དང་ཀ་ལ་སོགས་པའི་ཡི་གེས་མིང་འགྲུབ་བོ། །མིང་གི་ཡི་གེ་འདུས་པས་ཆོས་རྣམས་ཀྱི་དོན་གྱི་ངོ་བོ་ཙམ་མཚོན་པར་བྱེད་ཅིང་དེར་ཁྲིད་པར་བྱེད་པ་སྟེ། ཀ་བ་དང་བུམ་པ་ལ་སོགས་པའོ། །ཚིག་དེ་དག་འདུས་པས་ཆོས་རྣམས་ཀྱི་ཁྱད་པར་རྗོད་པར་བྱེད་ཅིང་གསལ་ཞིང་འབྲུ་ཆགས་པར་བྱེད་པ་སྟེ། གསེར་གྱི་བུམ་པ་ཞེས་བྱ་བ་ལ་སོགས་པ་ལྟ་བུའོ། །ཁོངས་ནས་ཞེས་བྱ་བ་ནི། དེ་རྣམས་འདུས་པའི་བདག་ཉིད་གཞུང་གི་ཚོགས་ཀྱི་ཁོངས་ནས་ཞེས་བྱ་བའོ། །སློབ་དཔོན་ཁ་ཅིག་ནི། སློབ་དཔོན་གྱི་ཐུགས་ལ་གབ་ཅིང་སྦས་པ་དང་། ཡི་གེ་དཀྱུས་ལ་གབ་ཅིང་སྦས་པ་གཉིས། ཕན་ཚུན་གཅིག་གིས་གཅིག་གབ་པ་འབྱིན་པར་བྱེད་པའི་བྱེད་པ་པོ་ནི་རྡོ་རྗེ་སློབ་དཔོན་ཡིན་ནོ་ཞེས་གསུངས་ཏེ། ཡང་བྱཱ་ཀ་ར་ཎའི་གཞུང་ལས། ཡི་གེའི་ཁོངས་ནས་མིང་དབྱུང་སྟེ། །མིང་གི་ཁོངས་ནས་ཚིག་ཕྱུང་ནས། །ཚིག་གི་དོན་རྣམས་སྟོན་པར་བྱེད། །ཅེས་གསུངས་ཏེ། དེ་བས་ན་སྔ་མ་ལྟར་རིགས་པར་མངོན་ནོ། །ད་ནི་མན་ངག་རང་གི་ངོ་བོ་བསྟན་ཏེ། དེ་ཡང་དང་པོར་མན་ངག་མདོར་བསྟན་པ་ནི། དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །གསང་བའི་ཐིག་ལེ་དཀྱིལ་འཁོར་དབྱིངས། །ཞེས་གསུངས་པའོ། །གཞུང་འདི་དག་ལས་ཀྱང་། སློབ་དཔོན་པདྨ་འབྱུང་གནས་ཀྱིས་རྫོགས་པ་ཆེན་པོ་ལྷུན་གྱིས་གྲུབ་པའི་མན་ངག་ཏུ་བཀོད་པ་ནི་མན་ངག་ལྟ་བའི་ཕྲེང་བ་ཡིན་ཞེས་གྲགས། སློབ་དཔོན་ཉིན་བྱེད་སེང་གེས། །རྣལ་འབྱོར་པ་ཆེན་པོའི་ཚུལ་ལ་བརྟེན་ནས་ཡབ་ཡུམ་གཉིས་སུ་མེད་བར་སྦྱོར་བའི་བྱང་ཆུབ་སེམས་ཀྱི་བདེ་བ་ཆེན་པོ་བསྐྱེད་པའི་ཐབས་སུ་གྱུར་པ། བདེ་བ་ཆེན་པོའི་མན་ངག་ཞེས་བྱ་བ་ཞིག་ཡོད་པར་གྲགས། སློབ་དཔོན་བི་མ་ལ་མི་ཏྲས། སྲོག་གི་དབུགས་དང་རྩ་ལ་བརྟེན་ནས་བསྐྱེད་རྫོགས་རྣམ་པ་གསུམ་གྱི་གཞུང་བསྟན་པ་འཆི་ཁ་མའི་མན་ངག་ཞེས་བྱ་བ་ཞིག་ཡོད་པར་གྲགས་ནའང་། འདིར་ཡི་གེ་གཞུང་གི་དོན་དང་མཐུན་པར། རྫོགས་པ་ཆེན་པོའི་ཚུལ་ཙམ་བརྗོད་པར་བྱའོ། །དེ་ལ་དཀྱིལ་འཁོར་ལྡན་པའི་ཞེས་བྱ་བ་ནི། ཐུན་མོང་དུ་གྲགས་པའི་ཕུང་པོ་དང་ཁམས་དང་སྐྱེ་མཆེད་ཀྱིས་བསྡུས་པ། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་དབྱེར་མེད་པར་སྐུ་གསུང་ཐུགས་ཀྱི་དཀྱིལ་འཁོར་གྱི་རང་བཞིན་དུ་ཡེ་ནས་མངོན་པར་རྫོགས་པར་སངས་རྒྱས་པ་ཡིན་གྱི། ལམ་གྱིས་བསྒྲུབ་པ་ནི་མ་ཡིན་ནོ། །ཆོས་རྣམས་ཀྱི་རང་བཞིན་དེ་ལྟ་བུ་ཡིན་ཀྱང་། ཡིན་པ་ཙམ་གྱིས་གང་ཟག་རྣམས་ལ་ཕན་ཐོགས་པར་སྣང་བར་མི་འགྱུར་ཏེ། དེ་ཡང་རྟོགས་པ་རྣམ་པ་བཞིའི་ལམ་གྱིས་ཡིད་ཆེས་པར་བྱས། དེ་ཉིད་ལ་མཚན་ཉིད་གསུམ་གྱིས་དོན་མཐར་དབྱུང་། བསྙེན་སྒྲུབ་ཡན་ལག་བཞིས་དོན་ལྷུན་གྱིས་གྲུབ་པར་བྱས་ནས། དེ་ལྟ་བུར་སྣང་བར་གྱུར་བས། །དེའི་ཕྱིར། དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །ཞེས་གསུངས་པ་ཡིན་ཏེ། དཀྱིལ་འཁོར་ལྡན་པ་དེ་ཉིད་ཀྱིས། །ཡེ་ནས་ཡིན་པའི་དོན་ལ་ཡེ་ནས་ཡིན་པར་རིག་པས་རྣལ་འབྱོར་དུ་བསྒོམ་པར་བྱའོ་ཞེས་སོ། །དེས་ཅིར་འགྱུར་ཞེ་ན། དཀྱིལ་འཁོར་དཀྱིལ་འཁོར་ལས་བྱུང་བ ། །ཐུགས་ཀྱི་དཀྱིལ་འཁོར་མཆོག །ཅེས་གསུངས་ཏེ། ཡེ་ནས་ཡིན་པའི་དཀྱིལ་འཁོར་དང་། དེ་བཞིན་དུ་མཉམ་པའི་སྦྱོར་བའི་དཀྱིལ་འཁོར་ལས་འབྱུང་བ་ནི་དོན་མ་ནོར་བར་རྟོགས་པ་རིག་པ་བྱང་ཆུབ་སེམས་ཀྱི་དཀྱིལ་འཁོར་ཡིན་ཏེ། དེ་ཉིད་དཀྱིལ་འཁོར་ཐམས་ཅད་ཀྱི་མཆོག་ཏུ་བཤད་དོ། །དེ་ལྟར་གཞི་དང་ལམ་དང་འབྲས་བུ་གསུམ་དུ་བཤད་ཀྱང་། བྱང་ཆུབ་ཀྱི་སེམས་ཀྱི་རང་བཞིན་ཡེ་ནས་སངས་རྒྱས་པའི་དོན་ལ་ནི་གཡོས་པ་དང་གཞན་དུ་གྱུར་པ་ཅུང་ཟད་ཀྱང་མེད་དེ། ཐམས་ཅད་སེམས་ཀྱི་དབྱིངས་སུ་ཟད་པས། གསང་བའི་ཐེག་ལེ་དཀྱིལ་འཁོར་དབྱིངས། །ཞེས་གསུངས་པ་ཡིན་ནོ། །ད་ནི་དོན་དེ་དག་རྒྱས་པར་སྟོན་པ་ལ། དང་པོ་དཀྱིལ་འཁོར་ཇི་ལྟར་ལྡན་པར་བསྟན་པའི་ཕྱིར། འབྱུང་བ་ཤེས་རབ་རིགས་ཀྱི་ཡུམ། །ཆེན་པོ་རིགས་ཀྱི་དེ་བཞིན་ཏེ། །བྱང་ཆུབ་སེམས་ནི་རྡོ་རྗེའི་ཚོགས། །དབང་པོ་ཡུལ་དུས་རིག་པ་རྣམས། །ཞེས་གསུངས་ཏེ། འདི་ལྟ་བུའི་རང་བཞིན་ཡེ་ནས་སངས་རྒྱས་པ་ཡིན་པས་དཀྱིལ་འཁོར་ལྡན་པ་ཡིན་ནོ། །དེ་ལྟ་བུ་དེས་དཀྱིལ་འཁོར་ལ་དཀྱིལ་འཁོར་ཇི་ལྟར་བསྒོམ་ཞེ་ན། ཀུན་ཏུ་བཟང་པོའི་དཀྱིལ་འཁོར་ལ། །བདག་ཉིད་ཆེན་པོ་ལྷག་པ་ཡི། །ཐུགས་ཀྱི་ཡེ་ཤེས་ལྔས་བལྟ་ཞིང་། །ཞེས་གསུངས་ཏེ། དེ་ལྟར་ཡེ་ནས་ཀུན་ཏུ་བཟང་པོའི་དཀྱིལ་འཁོར་དུ་སངས་རྒྱས་པའི་དོན་ལ། དེ་ལྟར་རིག་པ་ཉིད་བདག་ཉིད་ཆེན་པོའི་ཡེ་ཤེས་ཡིན་ཏེ། ཡེ་ཤེས་གཅིག་དང་དུ་མ་དང་མཐའ་དང་དབུས་ལ་སོགས་པའི་ཕྱོགས་ཆ་དབྱེར་མེད་མོད་ཀྱི། འོན་ཀྱང་ཀུན་ཏུ་བཟང་པོའི་རོལ་པ་དང་ཆོ་འཕྲུལ་ཙམ་དུ་ཡེ་ཤེས་རྣམ་པ་ལྔར་གྲགས་ཏེ། འདི་ལྟར་སྒྲིབ་པ་ཉིད་གདོད་མ་ནས་དག་པས་རང་བཞིན་གྱིས་འོད་གསལ་བའི་ཕྱིར་ཆོས་ཀྱི་དབྱིངས་ཀྱི་ཡེ་ཤེས་སོ། །སྒྲིབ་པ་དག་པའི་བྱང་ཆུབ་སེམས་ནི། རྣམ་པར་རྟོག་པ་མེད་བཞིན་དུ་ཆེ་བའི་ཡོན་ཏན་ཐམས་ཅད་གཟུགས་བརྙན་གྱི་ཚུལ་དུ་རང་སྣང་བས་མེ་ལོང་ལྟ་བུའི་ཡེ་ཤེས་སོ། །དེ་ལྟར་གསལ་ཡང་ཡེ་ཤེས་ལ་བདག་ཉིད་མེད་ཅིང་ཡོན་ཏན་གཞན་དུ་བསྟན་པ་མེད་དེ། ཐམས་ཅད་ནམ་མཁའི་དཀྱིལ་ལྟར་རྟོགས་པས་མཉམ་པ་ཉིད་ཀྱི་ཡེ་ཤེས་སོ། །དེ་ལྟར་གཉིས་སུ་མེད་ཀྱང་ཡེ་ཤེས་རོལ་པའི་སྐུ་དང་ཡེ་ཤེས་ཀྱི་དཀྱིལ་འཁོར་དུ་མ་གྱུར་པའམ་མ་གཟིགས་པ་མེད་དེ། དོན་ཇི་ལྟ་བ་དང་ཇི་སྙེད་པ་ཐུགས་སུ་ཆུད་པས་སོ་སོར་རྟོག་པའི་ཡེ་ཤེས་སོ། །དེའི་ངང་ལས་ཐུགས་རྗེ་མཛད་པ་དང་བཅས་པ་ལྷུན་གྱིས་གྲུབ་བཞིན་དུ་འབྱུང་བས་བྱ་བ་གྲུབ་པའི་ཡེ་ཤེས་ཏེ། འདི་དག་ལྟ་བུའི་ཚུལ་དུ་ཆོས་ཐམས་ཅད་རིག་པ་ནི་སྒོམ་པ་ཆེན་པོ་ཡིན་པས། ལྷག་པའི་ཐུགས་ཡེ་ཤེས་ལྔས་བལྟ་ཞིང་ཞེས་གསུངས་སོ། །དེ་ལྟར་ཡེ་ནས་ཡིན་པའི་དཀྱིལ་འཁོར་དང་སྒོམ་པའི་དཀྱིལ་འཁོར་ལས་ཅིར་འགྱུར་ཞེ་ན། སྙིང་པོ་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ཡིས། །ཡེ་ཤེས་དགྱེས་ལ་མཆོད་པ་འབུལ། །ཞེས་གསུངས་ཏེ། འདི་སྐད་དུ་སྙིང་པོ་མེད་པ་ཡིན་ཀྱང་རང་བྱུང་གི་ཡེ་ཤེས་སུ་དབང་བསྐུར་བའི་སྙིང་པོ་ཅན་ཡང་ཤེས་པར་བྱ་ཞེས་གསུངས་པ་ལྟ་བུའོ། །ཐིག་ལེ་ནི་ཆོས་ཀྱི་དབྱིངས་ཏེ། གཉིས་སུ་མེད་པར་མཉམ་པར་སྦྱོར་བ་ལས་དོན་མ་ནོར་པར་རྟོགས་པའི་རིག་པ་འབྱུང་བ་ནི་སེམས་བདེ་བ་ཆེན་པོ་ཞེས་བྱ་སྟེ། དེ་ནི་དཀྱིལ་འཁོར་ཐམས་ཅད་ཀྱང་ཡིན་ལ། དཀྱིལ་འཁོར་ལ་ཡང་མཆོད་པ་དེ་དག་ཐམས་ཅད་ཀྱི་མཆོག་ཀྱང་ཡིན་པས། བདེ་བའི་ཡེ་ཤེས་རོལ་མོ་ཡིས། །ཡེ་ཤེས་དགྱེས་ལ་མཆོད་པ་འབུལ། །ཞེས་སྦྱར་རོ། །དེ་ལྟར་གཞི་དང་ལམ་དང་འབྲས་བུ་སྣ་ཚོགས་སུ་བསྟན་ཀྱང་རྩ་བ་བྱང་ཆུབ་སེམས་ཀྱི་རང་བཞིན་ལས་མ་གཡོས་པར་བསྟན་པའི་ཕྱིར། ཟག་མ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མར་སྣང་བ་ཡི། །རོལ་མོའི་དཀྱིལ་འཁོར་མཐའ་ཡས་མཆོག །གསང་བའི་ཐིག་ལེ་ཉིད་ཀྱི་དབྱིངས། །ཞེས་གསུངས་ཏེ། ཟག་པ་མེད་པའི་བསོད་ནམས་ཀྱི་གྲོགས་བྱས་པའི་ཡེ་ཤེས་སྒྱུ་མ་ལྟ་བུར་སྣང་བའི་དཀྱིལ་འཁོར། ཀུན་ཏུ་བཟང་པོའི་རོལ་པ་ཇི་ལྟར་འཕྲུལ་ཡང་རྩ་བ་བྱང་ཆུབ་ཀྱི་སེམས་གཡོས་པ་མེད་པས། གསང་བའི་ཐིག་ལེ་ཉིད་ཀྱི་དབྱིངས། །ཞེས་བསྟན་པ་ཡིན་ནོ། །ད་ནི་མན་ངག་དང་མན་ངག་ཅན་གྱི་ཡོན་ཏན་སྟོན་ཏེ། དེ་ལ་འདི་ནི་སངས་རྒྱས་ཀུན་གྱི་དངོས། །ཞེས་བྱ་བ་ནི་མན་ངག་གི་ཡོན་ཏན་ཡིན་ཏེ། མན་ངག་གི་དོན་ནི་སེམས་ཀྱི་རང་བཞིན་ཇི་ལྟ་བ་བཞིན་ལ། དེ་ཉིད་སངས་རྒྱས་ཐམས་ཅད་ཀྱི་དངོས་གཞི་ཡིན་པའི་ཕྱིར་དེ་སྐད་ཅེས་བྱའོ། །དེ་ལ་མན་ངག་ཅན་གྱི་ཡོན་ཏན་བསྟན་པ་ནི། ཕྱོགས་བཅུ་དུས་བཞི་རྫོགས་པ་ཡི། །ཞེས་བྱ་བ་ལ་སོགས་ཏེ། འདི་ལྟར་མན་ངག་འདི་ལྟ་བུ་དང་ལྡན་པ་ནི་སངས་རྒྱས་ཐམས་ཅད་ཀྱི་ཞལ་མཐོང་བ་ཡིན་ལ། ཆོས་ཐམས་ཅད་ལ་དབང་སྒྱུར་བ་ཐོབ་པ་ཡིན་ནོ་ཞེས་སྦྱར་རོ། །ཡོན་ཏན་གཞན་ཡང་བསྟན་པ། དཀྱིལ་འཁོར་ལ་གནས་དཀྱིལ་འཁོར་ཉིད། །རྫོགས་པའི་སངས་རྒྱས་ལྷུན་གྱིས་གྲུབ། །རྒྱན་གྱི་དཀྱིལ་འཁོར་མ་ལུས་ཐོགས། །ཞེས་གསུངས་ཏེ། དེ་ལ་དཀྱིལ་འཁོར་ཞེས་བྱ་བ་ནི། སྐབས་འདིར་བསོད་ནམས་དང་ལྡན་པའི་གང་ཟག་སངས་རྒྱས་རྣམས་ཀྱི་ཞལ་མཐོང་བའི་སྐལ་བ་དང་ལྡན་པ་རྣམས་ཀྱི་ཤེས་པའི་རྒྱུད་དོ། །དེ་ལ་གནས་པའི་དཀྱིལ་འཁོར་ནི། དེ་ལ་སྣང་བའི་དཀྱིལ་འཁོར་དེ། བསོད་ནམས་དང་ཡེ་ཤེས་ཚོགས་ཡོངས་སུ་རྫོགས་ཤིང་འབྲས་བུ་མཐར་ཕྱིན་པའི་ཕྱོགས་བཅུ་དུས་བཞིའི་སངས་རྒྱས་རྣམས་སོ། །འདི་ལྟ་བུའི་དཀྱིལ་འཁོར་དེ་དག་ཀྱང་མན་ངག་ཅན་དེ་ལ་ལྷུན་གྱིས་གྲུབ་པ་ཡིན་པས། དེ་བས་ན་དུས་དང་གནས་སྐབས་ཐམས་ཅད་དུ་དཀྱིལ་འཁོར་ཆེན་པོའི་རྒྱན་གྱིས་གཤེགས་ཤིང་བཞུགས་སོ་ཞེའོ། །ད་ནི་རྫོགས་པ་ཆེན་པོའི་ངང་ལས་ཐུགས་རྗེ་ཆེན་པོའི་མཛད་པ་ཇི་ལྟར་འབྱུང་བའི་ཚུལ་བསྟན་པའི་ཕྱིར། རྫོགས་པའི་དཀྱིལ་འཁོར་མཉམ་སྦྱོར་བས། །ཐུགས་རྗེའི་དཀྱིལ་འཁོར་ཡོངས་ཀྱིས་འབྱུང་། །ཕྱོགས་དུས་དཀྱིལ་འཁོར་འདུལ་བའི་མགོན། །སྒྱུ་མའི་དཀྱིལ་འཁོར་སྒྲོལ་བ་ཡིས། །བྱ་བྱེད་མེད་པར་དཀྱིལ་འཁོར་སྤྱོད། །ཅེས་གསུངས་པ་སྟེ། ཆོས་ཐམས་ཅད་ཡེ་ནས་རྫོགས་པ་ཆེན་པོའི་ངང་དུ་མཉམ་པར་སྦྱོར་མོད་ཀྱི། དེ་ལྟར་མ་རྟོགས་པའི་འགྲོ་བ་རྣམས་ལ་ཐུགས་རྗེ་ཆེན་པོའི་མཛད་པ་འབྱུང་བ་ཡང་བཙལ་བ་མེད་པར་འབྱུང་སྟེ། འགྲོ་བའི་དོན་མཛད་པའི་ཚུལ་ཡང་། དཔེར་ན་སྒྱུ་མའི་སྐྱེས་བུས་སྒྱུ་མའི་སྐྱེ་བོ་མང་པོ་སྒྱུ་མའི་སྡུག་བསྔལ་གྱི་ནང་ནས་བཏོན་ནས། སྒྱུ་མའི་བདེ་བ་ལ་བཀོད་པར་སྒྱུ་མས་མིག་འཕྲུལ་བ་ལ་སྣང་བ་བཞིན་དུ། སྤྲུལ་པ་སྒྱུ་མ་ལྟ་བུས་སེམས་ཅན་སྒྱུ་མ་ལྟ་བུ་རྣམས་སྒྱུ་མ་ལྟ་བུའི་འཁོར་བ་ལས་བཏོན་ནས། བྱང་ཆུབ་སྒྱུ་མ་ལྟ་བུ་ལ་བཀོད་པར་སྐྱེ་བོ་འཁྲུལ་པའི་བློ་ལ་སྣང་སྟེ། འདི་ལྟ་བུར་ལམ་སྣང་བ་ཙམ་ལ་ཐུགས་རྗེ་ཆེན་པོས་སེམས་ཅན་བསྒྲལ་ཞེས་བྱའོ། །འདི་ལྟར་གཞན་ལས་ཀྱང་གསུངས་པ། །སེམས་ནི་སྒྱུ་མའི་རྣམ་པ་སྟེ། །བྱང་ཆུབ་ཀྱང་ནི་སྒྱུ་མ་འདྲ། །དཔེར་ན་སྒྱུ་མའི་མཁན་པོ་འགས། །གྱོ་མོ་ལ་ནི་སྔགས་བཟླས་ཏེ། །ལེགས་པར་བྱས་པའི་གཟུགས་དག་ལ། །སྦྱོར་བ་གོམས་པས་བསྣུན་ན་ནི། །རྐང་བཞི་པ་ལ་སོགས་པའི་གཟུགས། །ཞེན་པའི་སེམས་ལ་སྣང་བར་འགྱུར། །དེ་བཞིན་བསོད་ནམས་ཡེ་ཤེས་ལས། །འབྱུང་བའི་ཚོགས་ཀྱིས་བསྒོས་པའི་སེམས། །སེམས་ཅན་རྣམས་ཀྱི་བསམ་པ་ལ། བླ་མེད་བྱང་ཆུབ་སྣང་བར་བྱེད། །ཅེས་གསུངས་པ་ལྟ་བུ་ཡིན་ནོ། །དེ་ལ་ཐུགས་རྗེ་དང་མཛད་པ་འབྱུང་བའི་གཞི་གང་ཡིན་ཞེ་ན། གོང་དུ་བསྟན་པ་བཞིན་དུ། ཁ་ཅིག་ནི་གཞི་མི་འདོད་དོ། །ཁ་ཅིག་ནི་མི་རྟོག་པའི་ཡེ་ཤེས་ཀྱི་དབང་གིས་གདུལ་བྱ་ལ་སྣང་ངོ་ཞེའོ། །ཁ་ཅིག་ནི་མཉམ་པར་གཞག་པ་ཉིད་ཀྱི་མཐུས་མངོན་པར་ཤེས་པ་ཆེན་པོ་དྲུག་འབྱུང་ངོ་ཞེས་ཟེར་རོ། །ད་ནི་རྫོགས་པ་ཆེན་པོ་ལྷུན་གྱིས་གྲུབ་པའི་དཀྱིལ་འཁོར་དུ་འཇུག་པའི་ཐབས་བསྟན་པའི་ཕྱིར། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་བསྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །འདི་ནི་སངས་རྒྱས་ཐམས་ཅད་ཀྱིས། །འདའ་བར་མི་མཛད་དམ་ཚིག་མཆོག །ཅེས་གསུངས་ཏེ། དེ་ལ་གསང་བའི་དཀྱིལ་འཁོར་དུ་འཇུག་པའི་ཚུལ་ཡང་། གསང་སྔགས་སྤྱིའི་ཚུལ་ལས་ནི། དང་པོ་རྡོ་རྗེ་བླ་མ་ཡོངས་སུ་གཟུང་བ་དང་། དེས་བསྟན་པའི་གསང་བའི་དཀྱིལ་འཁོར་དུ་འཇུག་པས་ཕྱི་ནང་གསང་བའི་དབང་ཐོབ་པར་བྱ་བ་དང་། དེའི་དུས་སུ་གསང་བ་བླ་ན་མེད་པའི་དམ་ཚིག་གི་སྡོམ་པ་ཚུལ་བཞིན་དུ་མནོས་ཤིང་བླངས་ཏེ། བདག་དང་དམ་ཚིག་ཅན་དུ་བྱ་བ་དང་། དེ་ནས་དངོས་གྲུབ་ཇི་ལྟར་བསྒྲུབ་པའི་མན་ངག་མ་ནོས་ཏེ་མན་ངག་ཅན་དུ་བྱ་བ་དང་། དེ་ཕྱིན་ཆད་ཀྱང་སྤྲོ་བ་མི་ལྷོད་ཅིང་བརྩོན་པ་མི་འདོར་བས་བཀའ་བཞིན་དུ་བྱེད་པའི་མཚན་ཉིད་རྣམས་ནི། དང་པོ་འཇུག་པའི་སྤྱོད་པར་གསུངས། དེ་ནས་བསྙེན་སྒྲུབ་ཀྱི་སྒོ་ནས་ཐུན་མོང་དང་མཆོག་གི་དངོས་གྲུབ་བསྒྲུབ་པའི་ཐབས་ནི། གཉིས་པ་སྒྲུབ་པའི་སྤྱོད་པར་གསུངས། མཐའ་མ་དངོས་གྲུབ་ཆེ་ཆུང་གང་ཡིན་པ་ཐོབ་པའི་མཚན་ཉིད་བདག་དང་གཞན་གྱི་ཕུན་སུམ་ཚོགས་པར་སྤྱོད་པ་ནི་གྲུབ་པའི་སྤྱོད་པར་བསྟན་པ་ཡིན་ནོ། །རྫོགས་པ་ཆེན་པོ་ལྷུན་གྱིས་གྲུབ་པའི་མན་ངག་བསྟན་པའི་སྐབས་འདིར། དེ་དག་ལྟར་མི་བྱར་མི་རུང་བ་མེད་དེ། རང་བཞིན་ལྷུན་གྱིས་གྲུབ་པར་བསྟན་ནོ། །ཇི་ལྟར་ཞེ་ན། ཆོས་ཐམས་ཅད་ཡེ་ནས་སངས་རྒྱས་པ་རང་བྱུང་གི་ཡེ་ཤེས་ཆེན་པོ་ལྷུན་གྱིས་རྫོགས་པའི་དཀྱིལ་འཁོར་དུ་འཇུག་པ་ཡང་། དང་པོར་དགེ་བའི་བཤེས་གཉེན་དམ་པ་ལས་ལྷུན་གྱིས་གྲུབ་པའི་མན་ངག་གི་གཞུང་ཐོས་པ་ནི་མིག་ཕྱེ་ནས་དཀྱིལ་འཁོར་བསྟན་པ་ཡིན་ནོ། །དེ་ནས་བསམ་པའི་ཤེས་རབ་ཀྱིས་དེ་ལྟ་བུའི་དོན་རྟོགས་པ་ནི། དཀྱིལ་འཁོར་མཐོང་ནས་ལྷའི་མཚན་ཉིད་དང་དཀྱིལ་འཁོར་དང་གསང་སྔགས་རྣམས་ཀྱི་མཚན་ཉིད་ཤེས་པ་ཡིན་ནོ། །དེ་ནས་བསྒོམ་པའི་ཤེས་རབ་ཀྱིས་རྟོགས་ནས་གོམས་པར་བྱེད་པ་ནི། ལྷས་བྱིན་གྱིས་བརླབས་ཤིང་དབང་བསྐུར་བ་ཡིན་ནོ། །གོམས་པའི་མཐུས་མངོན་དུ་གྱུར་པ་ནི། བསྙེན་སྒྲུབ་ཀྱི་སྒོ་ནས་དངོས་གྲུབ་ཐོབ་པ་ཡིན་ཏེ། དེ་བས་ན་ཚུལ་འདི་ནི་ལྷུན་གྱིས་གྲུབ་པའི་དཀྱིལ་འཁོར་ལ་འཇུག་པའི་ཐབས་ཏེ་མ་ཐོབ་པའི་ཆོས་ཐོབ་པར་བྱར་མེད་པས་དབང་ལྷག་པར་ནོད་དུ་མེད་དོ། །བྱ་བ་དང་བྱ་མ་ཡིན་པ་གཉིས་སུ་དབྱེར་མེད་པས། དེ་ལ་འཇུག་པ་དང་ལྡོག་པའི་མཚན་ཉིད་དམ་ཚིག་ལྷག་པར་བསྲུངས་དུ་མེད་དོ། །སེམས་གཡོས་ཀྱང་མཉམ་པ་ཆེན་པོའི་དོན་ལས་མ་གཡོས་པར་རིག་པས། ཞི་གནས་ཀྱི་མཚན་ཉིད་ཏིང་ངེ་འཛིན་ལ་ལྷག་པར་བསླབ་ཏུ་མེད་དོ། །སྒོ་གསུམ་གྱི་སྤྱོད་པ་ལ་བཀག་པ་དང་མ་བཀག་པ་མེད་པས་སྤྱོད་པ་ལྷག་པར་བཙལ་དུ་མེད་དེ། དེ་བས་ན་ཤེས་རབ་རྣམ་པ་གསུམ་པོ་འདི་ཡང་མ་ཐོབ་པའི་ཆོས་ཐོབ་པར་བྱ་བའི་ཚུལ་ནི་མ་ཡིན་གྱི་ཡེ་ནས་ཡིན་པའི་ཆོས་ཤེས་པར་བྱ་བ་དང་། གོམས་པར་བྱ་བ་དང་། ཀློང་དུ་གྱུར་པ་ཙམ་དུ་ཟད་ལ། ཤེས་པ་དང་མ་ཤེས་པ་དང་། དེ་བཞིན་དུ་ཀློང་དུ་གྱུར་པ་དང་མ་གྱུར་པའི་བར་དག་ཀྱང་རང་བཞིན་བྱེ་བྲག་ཏུ་གྱུར་པ་མེད་དེ། དེ་ལྟར་སྟོན་པའི་སློབ་དཔོན་དང་མན་ངག་རྣམས་ནི་རྫོགས་པ་ཆེན་པོའི་གཞུང་གིས་ཀྱང་། རེ་ཞིག་ཙམ་དུ་བླང་བར་བྱ་བ་ཙམ་དུ་གསུངས་ཏེ། བསླབ་པ་གཞན་ནི་བཀག་པ་ཡང་མེད་ལ། མེད་དུ་མི་རུང་བ་ཡང་མེད་པར་གསུངས་སོ། །ཡོངས་ནི་ལྷུན་གྱིས་གྲུབ་པའི་དཀྱིལ་འཁོར་དུ་འཇུག་པའི་ཚུལ་འདི་ལྟ་བུ་ནི་གང་ཟག་དམ་པ་རྣམས་ཀྱི་སྤྱོད་ཡུལ་ཡིན་ཏེ། འོན་ཀྱང་གཞུང་འདི་ཉིད་དུ་མུ་སྟེགས་ཡ་ཀ་ཤའི་སྤྱོད་པའང་མ་བཀག་པར་གསུངས་ན། ཐེག་པ་ཆེན་པོ་ཐབས་ཀྱི་སྤྱོད་པ་ལྟ་ཅིའི་ཕྱིར་དགག་སྟེ། དེ་བས་ན་སྒོ་འདིར་མོས་ཤིང་འཇུག་པ་རྣམས་ཀྱིས་ཀྱང་། རྒྱུད་སྡེ་སྤྱིའི་ཚུལ་ལས་གསུངས་པའི་དབང་དང་དམ་ཚིག་ཀྱང་ཚུལ་བཞིན་དུ་མ་ནོས་ཤིང་བསྡུ་བར་རིགས་སོ། །སྤྱིའི་ཚུལ་ལ་མོས་པའི་གང་ཟག་རྣམས་ཀྱིས་ཀྱང་ལྷུན་གྱིས་གྲུབ་པའི་མན་ངག་གི་གཞུང་ལས་འབྱུང་བ་ལྟར། མ་དག་པའི་སྣང་བ་ཞེན་པ་དང་བཅས་པ་དང་། དག་པའི་སྣང་བ་རྣམས་ཀྱི་ཡང་མཚན་མ་ཞེན་པ་དང་བཅས་པ་ཡོངས་སུ་བཏང་བར་རིགས་སོ། །ད་ནི་དོན་འདི་ལ་མོས་པའི་ཡོན་ཏན་བསྟན་པའི་ཕྱིར། གང་ཞིག་འདི་ལ་མོས་འགྱུར་པ། །ཞེས་བྱ་བ་ལ་སོགས་པ་གསུངས་ཏེ། འདི་ལ་མོས་པ་ནི་སངས་རྒྱས་ཐམས་ཅད་ཀྱི་ཉེ་བའི་སྲས་སུ་དགོངས་པར་འགྱུར་རོ། །ཞེས་སྦྱར་རོ། །དེ་ལ་ཉེ་བའི་སྲས་སུ་ཞེས་བྱ་བ་ནི། དཔེར་ན་འཁོར་ལོས་བསྒྱུར་བའི་རྒྱལ་པོའི་བུ་ནི་བཙུན་མོ་ལས་སྐྱེས་པས་སྲས་ཙམ་ཡིན་ལ། མཚན་དང་མི་ལྡན་པས་ཉེ་བའི་སྲས་མ་ཡིན་ཏེ། གང་འཁོར་ལོས་སྒྱུར་བ་ཉིད་དུ་འགྱུར་བའི་མཚན་དང་ལྡན་པ་དེ་ནི་ཉེ་བའི་སྲས་སུ་དགོངས་སོ། །དེ་བཞིན་དུ་ཉན་ཐོས་རྣམས་ནི་ཤེས་རབ་ཙམ་གྱི་ཕྱོགས་ལས་སྐྱེས་པས་ཉེ་བའི་སྲས་སུ་དགོངས་པའི་ཡུལ་མ་ཡིན་ན། བྱང་ཆུབ་སེམས་དཔའ་དང་རིག་པ་འཛིན་པ་ཐབས་ལ་མི་མཁས་པ་དག་ཀྱང་ཐབས་དང་ཤེས་རབ་གཉིས་ཀ་ལས་སྐྱེས་ཀྱང་སངས་རྒྱས་ཉིད་ཀྱི་དགོངས་པ་དང་མཐུན་པར་སྐྱེས་པ་མ་ཡིན་པས། ཉེ་བའི་སྲས་སུ་དགོངས་པའི་ཡུལ་མ་ཡིན་ནོ། །སངས་རྒྱས་རྣམས་ཀྱི་དགོངས་པ་དམ་པ་དང་མཐུན་པའི་ཐབས་ལ་མཁས་པ་རྣམས་ནི་ཉེ་བའི་སྲས་སུ་དགོངས་པའི་ཡུལ་ཡིན་ནོ་ཞེས་སྦྱར་རོ། །བསྐལ་པ་ཞིང་གི་རྡུལ་སྙེད་དུ། །ཞེས་བྱ་བ་ལ་སོགས་པ་ནི། སྔོན་གྱི་སློབ་དཔོན་ཁ་ཅིག་གསང་བའི་མན་ངག་རྙེད་པར་དཀའོ་ཞེས་གསུངས་སོ། །ཁ་ཅིག་ན་རེ། མན་ངག་འདི་ནི་ཐེག་པ་ཐམས་ཅད་ཀྱི་འབྲས་བུ་ཡང་ཡིན་ལ། ལམ་གྱི་མཆོག་ཡིན་པས་འབྲས་བུའི་ཐེག་པ་བསྟན་པ་ཡིན་པས་སོ། །ཡོངས་ནི་གཞུང་ཉིད་དང་སྦྱར་ན་ཐེག་པ་ཐམས་ཅད་ཀྱི་འབྲས་བུར་གྲགས་པ་ཡོན་ཏན་གྱི་ཆོས་སུ་བསྙད་པ། སངས་རྒྱས་ཀྱིས་སའི་ཆོས་ཐམས་ཅད་ཀྱང་འདིའི་གནས་སྐབས་སུ་གཞི་དང་ལམ་དང་འབྲས་བུའི་ཆོས་རྣམས་རང་བཞིན་བྱེ་བྲག་ཏུ་གྱུར་པ་མེད་དེ། གཞི་ཉིད་ལམ་དུ་བྱས་པ་ཡིན་ལ། འབྲས་བུ་གཞི་ལས་ཁྱད་པར་འཕགས་པ་མེད་པས། འདི་ནི་སངས་རྒྱས་ཐམས་ཅད་ཀྱི་གསང་བའི་མན་ངག་ངེས་པའི་དོན་མཐར་ཐུག་པ་ཡིན་ནོ་ཞེས་བསྟན་ནོ། །འོ་ན་དུས་ཡུན་རིང་མོ་འདི་སྙེད་དུ་སྦྱངས་ནས་མཐའ་མ་འབྲས་སུ་འདི་ལྟ་བུ་ཞིག་འཐོབ་བོ་ཞེས་གསུངས་ན། ཇི་ལྟར་ན་གསང་སྔགས་ལམ་ཉེ་བར་འགྱུར་ཞེ་ན། འདི་ནི་གསང་སྔགས་ཀྱི་ཚུལ་དང་དང་པོར་འཕྲད་ཅིང་ཚུལ་བཞིན་དུ་ཞུགས་པ་རྣམས་ཀྱིས་ཀྱང་། དུས་འདི་སྙེད་དུ་བསྒྲུབ་དགོས་ཞེས་གསུངས་པ་ཡང་མ་ཡིན། ཐེག་པ་གཞན་གྱི་སྒོ་ནས་དུས་ཡུན་རིང་མོ་འདི་ཙམ་དུ་སྦྱངས་ནས། དེ་ནས་གདོད་གསང་སྔགས་པའི་གནས་དང་འཕྲད་པའི་སྐལ་བ་ཅན་ཡིན་གྱིས། དེ་ཡི་གོང་དུ་གསང་སྔགས་ཀྱི་ཚུལ་དང་འཕྲད་པའི་སྐལ་བ་མེད་དོ། །ཞེས་གསུངས་པ་ཡང་མ་ཡིན་ཏེ། འདིར་ནས་དུས་ཡུན་རིང་མོར་དགེ་བའི་རྩ་བ་ཇི་ལྟར་བསྐྱེད་ཀྱང་། མཉམ་པ་ཆེན་པོའི་དོན་འདི་ལྟ་བུ་མ་རྟོགས་པར་སངས་རྒྱས་སུ་མི་འགྱུར་བས། དེ་བས་ན་ཐེག་པ་ཐམས་ཅད་ཀྱི་འབྲས་བུ་ཡང་ཡིན། སངས་རྒྱས་ཐམས་ཅད་ཀྱི་ལམ་ཡང་ཡིན། ལམ་འདི་ཉིད་འབྲས་བུ་ལམ་དུ་གྱུར་པའང་ཡིན། སངས་རྒྱས་ཐམས་ཅད་ཀྱི་ངེས་པའི་དོན་གྱི་མན་ངག་ཀྱང་ཡིན་ནོ་ཞེས་བསྟན་པ་ཡིན་ནོ། །ད་ནི་མན་ངག་གཟུང་བར་བསྟན་པའི་ཕྱིར། ཀུན་གྱི་ཕྱག་རྒྱ་ཆེན་པོ་མཆོག །ཅེས་བྱ་བ་ལ་སོགས་པ་གསུངས་ཏེ། དེ་ལ་ཡང་སངས་རྒྱས་ཀུན་གྱི་བཀའ་རྟགས་ཀྱི་ཕྱག་རྒྱ་དམ་པ་ནི་མན་ངག་འདི་ཡིན་ཏེ། དེ་བས་ན་འདི་ནི་ཤེས་རབ་རྣམ་པ་གསུམ་གྱི་མིག་དང་ལྡན་པ་རྣམས་ཀྱིས་གཟུང་བར་བྱ་ཞེས་སྦྱར་རོ། །དེ་ལ་གཟུང་བ་ཞེས་བྱ་བ་ནི་མི་ནུབ་པར་བྱེད་པ་སྟེ། ཚུལ་བཞིན་དུ་གཞན་ལ་སྟོན་པར་ནུས་པ་རྣམས་སོ། །ད་ནི་མན་ངག་སྦྱིན་པའི་སྣོད་དང་། སྣོད་མ་ཡིན་པ་ལ་བྱིན་པའི་སྐྱོན་རྣམས་བསྟན་པའི་ཕྱིར། སྣོད་ལྡན་ངང་ཚུལ་བཟང་ལ་བསྟན། །ཞེས་བྱ་བ་ལ་སོགས་པ་གསུངས་ཏེ། དེ་ལ་སྦྱིན་པའི་སྣོད་ཅེས་བྱ་བ་ནི། མོས་པ་ཡོད་པ་དང་གསང་ཐུབ་པར་གྱུར་ན་འཛིན་པར་མི་ནུས་པ་རྣམས་ཀྱང་མན་ངག་གི་སྣོད་དུ་རུང་སྟེ། རྩིང་ཆོས་དང་ང་རྒྱལ་རིམ་གྱིས་ཞི་བར་བྱ་ཞིང་མན་ངག་བསྟན་པར་བྱའོ། །དཀྱུས་ལ་སྨོས་པའི་སྣོད་རྣམས་ནི་སྣོད་དམ་པར་གསུངས་པ་ཡིན་ནོ། །མན་ངག་སྙིང་པོའི་ལེའུ་ཞེས་བྱ་བ་ལ། མན་ངག་ཅེས་བྱ་བ་ནི། ཨུ་པ་དྷེ་ཤ་ཞེས་བྱ་བའི་སྒྲས་དོན་ཕྱིན་ཅི་མ་ལོག་པར་གཏན་ལ་འབེབ་པ་ལ་ཡང་བྱ། རྣམ་པ་གཅིག་ཏུ་ཨུ་པ་ནི་ཉེ་བ། དྷེ་ཤ་ནི་བསྟན་པ་སྟེ། དོན་ཆེན་པོ་བསྒྲུབ་པ་ལ་ཐབས་ཉེ་བར་བསྟན་པ་ནི་མན་ངག་ཅེས་བྱའོ། །ལེའུ་བཅུ་གསུམ་པའོ།། ༈ །།ད་ནི་ཞི་བའི་དཀྱིལ་འཁོར་ཆེན་པོའི་མཛད་པ་རྫོགས་ནས། དཀྱིལ་འཁོར་ཆེན་པོར་དགྱེས་པ་ཆེན་པོའི་གླུ་བླངས་པར་སྟོན་ཏེ། དེ་ཡང་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒོ་རེ་རེ་ལ་ཡང་། སྐུ་གསུང་ཐུགས་གསུམ་གྱི་ཡོན་ཏན་དང་ལྡན་པའི་སྒོ་ནས་བསྟོན་པར་སྟོན་ནོ། །དེ་ལ་སྤྱིར་གྲགས་པ་ནི། སྣང་བ་སྐུ། སྒྲ་ཚིག་གསུངས། མཁྱེན་པ་ཐུགས། བྱ་བ་ཡོན་ཏན། མཛད་པ་ཕྲིན་ལས་སོ། །ཡོན་ཏན་གྱི་ཚུལ་ལས་སྐུ་གསུང་ཐུགས་སུ་བཞག་པ་ནི་ཐམས་ཅད་དུ་སྤྲུལ་བ་འཕྲོ་བས་ཁྱབ་པ་སྐུ། མ་སྐྱེས་པ་ལས་སྒྲ་སྣ་ཚོགས་འབྱུང་བ་གསུང་། དེ་ཉིད་གཉིས་སུ་དབྱེར་མེད་པར་འདུས་པ་ཐུགས། སྐུ་གསུང་ཐུགས་གང་ཡང་རུང་སྟེ། རང་རང་ག ི་ཡོན་ཏན་གྱི་ཆ་འཛིན་པ་ལ་བཞག་པ་ནི། གཅིག་ལ་ཡང་གཞན་གྱི་ཡོན་ཏན་གྱིས་སྟོངས་པ་མ་ཡིན་པས། གང་གཙོ་བོར་བྱས་པ་དེ་ལ་གཞན་དག་རྒྱན་གྱི་དཀྱིལ་འཁོར་དུ་ལྡན་པར་བཤད་དེ། དེ་ལ། ཨཱོཾ། ཕྱོགས་བཅུ་དུས་བཞི་རྫོགས་པ་ཡི། །ཞེས་བྱ་བ་ལ་སོགས་པ་ནི་སྐུ་ལ་བསྟོད་པ་སྟེ། དེ་ལ་ཨཱོྂ་ཞེས་བྱ་བ་ནི་གླུའི་ཡན་ལག་ཐམས་ཅད་རྫོགས་པ་སྟེ། དེ་ལ་ཡན་ལག་རྣམས་ནི་གླུ་ལེན་པའི་མཁན་པོ་དང་། གླུའི་དབྱངས་དང་། གླུའི་ཚིག་དང་། གླུའི་རྒྱན་དང་། གླུ་བྱིན་གྱིས་རློབ་པར་བྱེད་པ་རྣམས་སོ། །དེ་ལ་ཡི་གེ་ཨཱོྂ་ནི་རྒྱལ་བའི་དཀྱིལ་འཁོར་ཆེན་པོ་དང་ཐ་མི་དད་པས་གླུ་ལེན་པའི་མཁན་པོ་ཡིན་ནོ། །དེ་བཞིན་དུ་ཚངས་པ་དབྱངས་ཀྱིས་འདྲེན་པ་ཡིན་པས་གླུའི་དབྱངས་ཡིན་ནོ། །དོན་ཆེན་པོ་སྟོན་པའི་ཚིག་ཡིན་པས་གླུའི་ཚིག་ཡིན་ནོ། །དེའུ་མཐོ་དམན་གསལ་བར་བྱེད་པས་གླུའི་རྒྱན་ཡིན་ནོ། །ཡི་གེ་ཨཱོྂ་གྱིས་དྲངས་ན་གླུ་དང་ཚིག་ཐམས་ཅད་ཀྱང་། གསང་སྔགས་བདེན་པའི་ངག་ཏུ་བྱིན་གྱིས་རློབ་པར་བྱེད་པ་ཡིན་པས་གླུ་བྱིན་གྱིས་རློབ་པ་ཡིན་ནོ། །དེའི་ཕྱིར་ཡང་ཡི་གེ་ཨཱོྂ་གྱིས་གྲངས་པ་ཡིན་ནོ། །དེ་ལ་ཕྱོགས་བཅུ་དུས་བཞི་རྫོགས་པ་ཡི། །ཞེས་བྱ་བ་ནི་སྤྱི་ལ་འཇུག་གོ། །ཡེ་ཤེས་དཀྱིལ་འཁོར་ཐིག་ལེ་ཆེ། །ཞེས་བྱ་བ་ནི་ཆོས་ཀྱི་སྐུ་སྟེ་སྐུའི་ཐུགས་སོ། །བསོད་ནམས་དཀྱིལ་འཁོར་སྐུ་ཡི་ཚོགས། །ཞེས་བྱ་བ་ནི་ལོངས་སྤྱོད་རྫོགས་པའི་སྐུ་སྟེ། བསོད་ནམས་ལས་གྲུབ་པར་སྣང་བ་དང་ཕན་འདོགས་པའི་གཞིར་སྣང་བས། བསོད་ནམས་ཀྱི་སྐུ་ཞེས་བྱ་སྟེ་སྐུའི་སྐུའོ། །སྣང་སྟོང་ཐིག་ལེ་ཀུན་ཏུ་རྫོགས། །ཞེས་བྱ་བ་ནི་སྤྲུལ་པའི་སྐུ་སྟེ། ཀུན་ཏུ་ཁྱབ་པར་འཕྲོ་བས་སྐུའི་གསུང་ངོ་། །ཧོ་ཞེས་བྱ་བ་ནི་རྗེས་སུ་ཆགས་པའི་དོན་དང་མཉེས་པའི་དོན་ཏེ། དེ་ཡང་རྗེས་སུ་མཉེས་པའི་དོན་ལ་བྱེ་བྲག་མེད་པས་རྗེས་སུ་ཆགས་པའི་སྔགས་དང་ཕྱག་གི་བརྡའོ། །རྡོ་རྗེ་བསོད་ནམས་ཐིག་ལེ་ཆེ། །ཞེས་བྱ་བ་ལ་སོགས་པ་ནི་གསུང་ལ་བསྟོད་པ་སྟེ། །དེ་ལ་རྡོ་རྗེ་ཞེས་བྱ་བ་ནི་སྤྱིར་མི་ཕྱེད་པའི་སྒྲར་བཤད་དེ། འདིར་ཡང་སྐྱེ་བ་མེད་པ་གསུང་གི་རང་བཞིན་དུ་བཤད་པས་རྡོ་རྗེའི་སྒྲས་ཁྱད་པར་དུ་བྱས་སོ། །དེ་ལ་བསོད་ནམས་ཐིག་ལེ་ཆེན་ཞེས་པ་ནི། མ་སྐྱེས་པ་ལ་སེམས་ཅན་ལ་ཕན་འདོགས་པའི་མཚན་ཉིད་མངའ་བས། བསོད་ནམས་ཐིག་ལེ་ཆེ་ཞེས་གསུང་གི་སྐུའོ། །རྡོ་རྗེ་ཡེ་ཤེས་དཀྱིལ་འཁོར་ལྡན། །ཞེས་བྱ་བ་ནི། མ་སྐྱེས་པར་རང་རིག་པར་གསལ་བས་རིག་པའི་གསུང་སྟེ། གསུང་གི་ཐུགས་སོ། །རྡོ་རྗེ་སྒྲ་ཆེན་མཐའ་ཡས་པ། །ཞེས་པ་ནི། མ་སྐྱེས་པ་ལས་སྒྲ་སྣ་ཚོགས་འབྱུང་བ་སྟེ་གསུང་གི་གསུང་ངོ་། །རྡོ་རྗེ་རྒྱལ་པོ་ནི། དེ་དག་གི་ཡོན་ཏན་དང་ལྡན་པས་སྤྱིར་འཇུག་གོ། །སྐུ་གསུང་ཐུགས་ཀྱི་རྫོགས་པ་ཆེ། །ཞེས་བྱ་བ་ལ་སོགས་པ་ནི་ཐུགས་ལ་བསྟོད་པ་སྟེ། དེ་ལ་རྫོགས་པ་ཆེ་ཞེས་པ་དང་། ཀུན་ཏུ་རྫོགས་ཞེས་པ་ནི། ཐམས་ཅད་ཐུགས་ལ་རྫོགས་པའི་བདག་ཉིད་སྟོན་པ་སྟེ་ཐུགས་ཀྱི་སྐུའོ། །ཡེ་ནས་ལྷུན་རྫོགས་ཀུན་ཏུ་བཟང་། །ཞེས་པ་ནི། བཙལ་བ་མེད་པར་ལྷུན་གྱིས་ཁྱབ་པ་སྟེ་ཐུགས་ཀྱི་གསུང་ངོ་། །འདུས་པའི་རྫོགས་ཆེན་ཐིག་ལེ་ཆེ། །ཞེས་པ་ནི། དེ་དག་དབྱེར་མེད་པར་འདུས་པ་སྟེ་ཐུགས་ཀྱི་ཐུགས་སོ། །མི་དམིགས་སྒྱུ་འཕྲུལ་མཉམ་པའི་དབྱིངས། །ཞེས་བྱ་བ་ལ་སོགས་པ་ནི། ཡོན་ཏན་ལ་བསྟོད་པའོ། །དེ་ལ་མི་དམིགས་སྒྱུ་འཕྲུལ་ནི་ཐབས་དང་ཤེས་རབ་ཀྱི་རང་བཞིན་གྱི་ལྷའི་དཀྱིལ་འཁོར་གྱི་ཚོགས་ཐམས་ཅད་དེ། མདོར་ན་སྒྱུ་འཕྲུལ་དྲྭ་བའི་དཀྱིལ་འཁོར་རོ། །དེ་ལྟར་ཐབས་དང་ཤེས་རབ་གཉིས་སུ་མེད་པའི་དཀྱིལ་འཁོར་ནི་ཡོན་ཏན་གྱི་བདག་ཉིད་པས་ཡོན་ཏན་གྱི་སྐུའོ། །མཐའ་ཡས་ཀུན་ནས་སྣ་ཚོགས་འཕྲོ་བ་ནི་ཡོན་ཏན་གྱི་གསུང་ངོ་། །མཐའ་ཡས་ཀུན་ནས་ལྷུན་གྱིས་ཐིམ། །ཞེས་པ་ནི། དབྱེར་མེད་པར་འདུས་པ་སྟེ་ཡོན་ཏན་གྱི་ཐུགས་སོ། །སྣ་ཚོགས་སྐུ་གསུང་ཐུགས་ཆེན་པོ། །ཞེས་པ་ནི། སྤྱིར་འཇུག་པའོ། །ཕྱོགས་བཅུ་འཇིག་རྟེན་རྡུལ་སྙེད་དུ། །ཞེས་བྱ་བ་ལ་སོགས་པ་ནི་ཕྲིན་ལས་ལ་བསྟོད་པ་སྟེ། དེ་ཡང་ཚིག་དང་པོ་ནས་ཕྲིན་ལས་ཀྱི་ཡུལ་ཡིན་པས་སྤྱིར་འཇུག་གོ། །རྒྱལ་བའི་དོན་རྣམས་རྡུལ་ཕྲན་སྙེད། །ཞེས་བྱ་བ་ནི་མཛད་པ་རང་གི་ངོ་བོ་ཡིན་ཏེ་ཕྲིན་ལས་ཀྱི་སྐུའོ། །སྤྲུལ་པ་རྡུལ་ཕྲན་བསམ་ཡས་ཀྱིས། །ཞེས་བྱ་བ་ནི་སྤྲུལ་པ་འཕྲོ་བ་སྟེ་ཕྲིན་ལས་ཀྱི་གསུང་ངོ་། །སྐད་ཅིག་ཡུད་ལ་ལྷུན་གྱིས་གྲུབ། །ཅེས་བྱ་བ་ནི་བཙལ་བ་མེད་པ་སྟེ་ཕྲིན་ལས་ཀྱི་ཐུགས་སོ། །ད་ནི་སྤྱིར་བསྟོད་པ་སྟོན་ཏེ། ཐམས་ཅད་མ་ལུས་སྐུ་གསུང་ཐུགས། །ཞེས་བྱ་བ་ནི་སྤྱིའི་སྤྱིའོ། །སྐུ་གསུང་ཐུགས་ཀྱི་བདག་ཉིད་ཆེ། །ཞེས་བྱ་བ་ནི་སྤྱིའི་སྐུའོ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །ཅེས་བྱ་བ་ནི་སྤྱིའི་གསུང་ངོ་། །སྐུ་གསུང་ཐུགས་ཀྱི་ཐིག་ལེ་ཆེ། །ཞེས་བྱ་བ་ནི་སྤྱིའི་ཐུགས་ཏེ། འདི་ལྟ་བའི་མཉེས་པ་ཆེན་པོའི་གླུས་ཉིད་ཀྱི་དཀྱིལ་འཁོར་ལ་བསྟོད་ནས་ཞི་བའི་མཛད་པ་ཡོངས་སུ་རྫོགས་པར་མཛད་དོ། །ལེའུ་བཅུ་བཞི་པའོ།། ༈ །།ད་ནི་ཁྲོ་བོའི་མཛད་པ་བསྟན་པའི་ཕྱིར། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ། སངས་རྒྱས་ཐམས་ཅད་ཀྱི་ངོ་བོ་ཉིད་ཀྱིས། ཁྲོ་བོའི་དཀྱིལ་འཁོར་དུ་མངོན་པར་འདུ་མཛད་དེ། ཞེས་སྨོས་ཏེ། དེ་ལ་འདིར་སྔར་ཞི་བའི་མཛད་པ་ཡོངས་སུ་རྫོགས་ནས། ཕྱིས་དེའི་རྗེས་སུ་ཁྲོ་བོའི་མཛད་པ་སྟོན་པ་ལྟར་བྱུང་ན་ཡང་། ངེས་པའི་དོན་དུ་དུས་ཡོངས་སུ་ཆད་པ་མི་མངའ་སྟེ། གདུལ་བྱ་ལ་ལའི་སྐད་ཅིག་ལ། ལ་ལའི་བསྐལ་པ་དུ་མར་འདས་པར་སྣང་བའི་ཕྱིར། ཞི་བ་དང་ཁྲོ་བོའི་ཚུལ་ཐ་དད་དུ་བསྒྱུར་བ་ཡང་མི་མངའ་སྟེ། སྤུའི་རྩེ་མོ་གཅིག་གི་གོ་སྐབས་ལ་སངས་རྒྱུས་ཀྱི་ཞིང་མཐའ་ཡས་པར་སྣང་བའི་ཕྱིར་རོ། །དེ་ལ་ཁྲོ་བོའི་དཀྱིལ་འཁོར་ཞེས་བྱ་བ་ལ། ཁྲོ་བོ་ཞེས་བྱ་བ་ནི་རང་གི་ངོ་བོ་ཅི་ཞིག་སྐུ་གསུམ་མམ་བཞི་ལ་སོགས་པར་གྲགས་པ་ལས་གང་དུ་བསྡུ། སངས་རྒྱས་ཀྱི་མཛད་པ་ནི་ཇི་ལྟ་བུ་ཞིག་སྒྲུབ་ཅེ་ན། དེ་ལ་རང་གི་ངོ་བོ་ནི་ཡང་དག་པར་རྫོགས་པའི་སངས་རྒྱས་ཉིད་དོ། །གང་དུ་བསྡུ་བ་ནི་སྐུ་གསུམ་དང་བཞི་ལ་སོགས་པ་ཐམས་ཅད་དུ་གཏོགས་པ་སྟེ། འདི་ལྟར་ཐབས་ཀྱི་ཞགས་པ་ལས། མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། །ཁྲོ་བོ་ལོངས་སྤྱོད་མཛད་ལ་ཕྱག་འཚལ་ལོ། །རྡོ་རྗེ་འདུ་འཕྲོ་མཛད་ལ་ཕྱག་འཚལ་ལོ། །ཞེས་བྱ་བ་ལ་སོགས་པ་གསུངས་པ་ལྟ་བུ་སྟེ། རྒྱུད་ཁ་ཅིག་ལས་གྲགས་པ། ཁྲོ་བོ་རྣམས་ནི་སྤྲུལ་པའི་སྐུ་དང་ཕོ་ཉར་བསྟན་པའོ། །ཞེས་གྲགས་པ་ལྟ་བུ་ནི་མ་ཡིན་ནོ། །དེ་དག་ལ་ཅིའི་ཕྱིར་ཁྲོ་བོ་ཞེས་བྱ་ཞེ་ན། འདི་ལྟར་སངས་རྒྱས་རྣམས་ཀྱང་ཆོས་བཞིའི་བདག་ཉིད་དེ། བཞི་གང་ཞེ་ན། ཆོས་ཉིད་དང་། ཡེ་ཤེས་དང་། ཐུགས་རྗེ་དང་། མཛད་པའོ། །དེ་ལ་ཆོས་ཉིད་ནི་རང་བཞིན་གྱི་ཁྲོ་བོར་བཅས་པ་སྟེ། མཚན་མའི་གནས་མེད་པའི་ཕྱིར་རོ། །ཡེ་ཤེས་ནི་རྟོགས་པ་ངང་གིས་ཁྲོ་སྟེ། བསྐལ་བའི་མེ་འབར་བ་ལ་མངོན་པར་འདུ་བྱེད་པའི་གནས་མེད་པ་བཞིན་ནོ། །ཐུགས་རྗེ་ནི་ཤུགས་ཀྱིས་ཁྲོ་བོ་སྟེ། དེའི་དབང་གིས་འགྲོ་བ་སྐྱོབ་པ་ལ་ཆེད་དུ་རྩོལ་མི་དགོས་སོ། །མཛད་པ་ནི་འདུལ་བའི་དབང་གིས་ཁྲོ་བར་བཅོས་པ་སྟེ། ཇི་ལྟར་འཚམས་པར་འབྱུང་བའོ། །མཛད་པ་ཇི་ལྟར་སྒྲུབ་ཅེ་ན། དགོས་པ་ནི་འདི་སྐད་དུ། འཛིན་པའི་དབང་གིས་སྡུག་བསྔལ་ཞིང་། །གདུག་པ་སྲིད་གསུམ་འདུལ་བ་ཡི། །ང་རྒྱལ་ཆེན་པོ་བརྟན་པའི་ཕྱིར། །ཞེས་གསུངས་པ་ལྟ་བུའོ། །དེ་དག་ཇི་ལྟར་བཏུལ་བ་ནི། བཅོམ་ལྡན་འདས་དཔལ་ཆེན་པོའི་སྐུ་སྨུག་ནག་ཅིར་ཡང་འགྱུར་བ། དབུ་དང་ཕྱག་དང་ཞབས་སྟོང་ཁམས་ཀྱི་རྡུལ་སྙེད་ཀྱིས་མཚོན་ཆ་སྣ་ཚོགས་འཛིན་པར་སྣང་བས། དེ་བཞིན་ཉིད་ཀྱི་དབྱིངས་ནས་ཁྲོ་མོའི་དབང་ཕྱག་མ་ཆེན་མོ་སྤྲུལ་ཏེ། གཉིས་སུ་མེད་པའི་བྱང་ཆུབ་སེམས་ལས་ཁྲོ་བོ་འཆོལ་བ་འཐོན་ནས། དེའི་མཐུ་བྱིན་གྱིས་གདུག་པ་ཅན་ཐམས་ཅད་བརྒྱལ་བར་བྱས་སོ། །དེ་ནས་ཁྲོ་བོའི་ཚོགས་དེ་དག་རིགས་ལྔའི་འཇིགས་བྱེད་ཆེན་པོར་སྣང་བར་མཛད་ནས། གདུག་པའི་ཚོགས་དེ་དག་གདན་དུ་བྱས་ཏེ་བཞུགས་སོ། །དེ་ནས་གདུག་པ་རྣམས་ཀྱིས་ཁྲོས་ཏེ་རྔམ་པའི་ཚིག་སྨྲས་པ་ལས། རྡོ་རྗེ་སྲིན་པོར་སྣང་བར་མཛད་ནས་གདུག་པའི་ཚོགས་དེ་དག་བསྒྲལ་ཏེ། དེ་དག་གི་ཆུང་མའི་ཚོགས་དབང་དུ་བསྡུས་སོ། །དེ་ནས་ཡང་རིགས་ལྔའི་འཇིགས་བྱེད་ཆེན་པོར་སྣང་བར་མཛད་ནས། དབང་ཕྱུག་མ་དང་གཉིས་སུ་མེད་པར་རོལ་པ་ལས། ཀེའུ་རི་ལ་སོགས་པའི་འཁོར་གྱི་དཀྱིལ་འཁོར་སྤྲུལ་པར་མཛད་དེ། དཀྱིལ་འཁོར་གྱི་བྱ་བ་ཡོངས་སུ་རྫོགས་ནས་མ་མོ་རྣམས་ཀྱང་རང་རང་གི་གནས་སུ་བཀྱེའོ། །དེ་ནས་བདུད་རྩིའི་ཏིང་ངེ་འཛིན་གྱིས་སླར་གསོས་ཏེ། སྐུ་འབར་བ་ཆེན་པོ་རབ་ཏུ་མི་བཟད་པར་མཐོང་བ་ལ་ལུས་དང་འཁོར་དུ་བཅས་པ་ཕུལ་ཏེ། དཀྱིལ་འཁོར་ཆེན་པོའི་ཅི་བགྱི་དང་བཀའ་ཉན་དུ་བྱས་སོ། །ལེའུ་བཅོ་ལྔ་པའོ།། ༈ །།ད་ནི་གསང་སྔགས་ཀྱི་ལེའུ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་སྨོས་ཏེ། དེ་ལ་དམ་ཚིག་གིས་བསྒྲུབ་པར་བྱ་བའི་ཕྱིར། ཞེས་བྱ་བ་ནི་མ་འོངས་པ་ནི་རྣལ་འབྱོར་པ་རྣམས་ཀྱིས་དཀའ་བཞིན་སྤྱོད་པའི་མཚན་ཉིད་ཀྱིས་འགྲུབ་པའི་ཕྱིར་རོ། །སྐུ་དང་གསུང་དང་ཐུགས་རྡོ་རྗེ་ཡེ་ཤེས་རྔམ་པ་ལས་ཕྱུང་ངོ་། །ཞེས་བྱ་བ་ནི་འགྲོ་བ་འདུལ་བའི་དབང་གིས་ཐུགས་རྗེ་ཡེ་ཤེས་དེ་ཉིད་གསང་སྔགས་ཀྱི་ཚོགས་སུ་བྱིན་གྱིས་བརླབས་ཏེ་བསྟན་པ་ཡིན་པས་ཐུགས་ལས་ཕྱུང་ངོ་ཞེས་བསྟན་ནོ། །གསང་སྔགས་འདི་དག་ཀྱང་ལྷ་བསྐྱེད་པ་དང་། དེ་བཞིན་དུ་མཉེས་པར་བྱེད་པ་དང་། ལས་ལ་བསྐུལ་བ་ལ་སོགས་པ་བྱ་བ་སྣ་ཚོགས་པར་འགྱུར་བ་ནི་སྔ་མ་བཞིན་ནོ། །དེ་ལ་འདིར་གསང་སྔགས་ཀྱི་ལས་བསྐྱེད་པའི་རིམ་པ་ལ་སོགས་པ་བསྟན་པ་ནི་སྣང་བ་དམ་པའི་རྒྱན་ལས་ལེགས་པར་གསུངས་ཏེ། འོན་ཀྱང་འདིར་དམན་པ་རྣམས་ལ་ཕན་པའི་ཕྱིར་མདོ་ཙམ་བརྗོད་པར་བྱའོ། །དང་པོར་སྙིང་རྗེ་ཆེན་པོའི་ཤུགས་ཀྱིས་འཕངས་པའི་ཕྱིར། འཛིན་པའི་དབང་གིས་སྡུག་བསྔལ་ཞིང་། །གདུག་པ་སྲིད་གསུམ་འདུལ་བ་ཡི། །ང་རྒྱལ་ཆེན་པོ་བརྟན་པའི་ཕྱིར། །སྒྱུ་འཕྲུལ་དྲྭ་བའི་ཏིང་འཛིན་བསྒོམ། །ཞེས་བྱ་བ་ལ་སོགས་པའི་དོན་གྱིས། སྙིང་རྗེ་ཆེན་པོས་གདུལ་བྱ་གདུག་པ་ཅན་འདུལ་བའི་སྒོ་ནས་སངས་རྒྱས་ཀྱི་མཛད་པ་བསྒྲུབ་པར་བྱའོ་སྙམ་དུ་གོ་ཆ་བགོ་བར་བྱའོ། །དེ་ལྟར་མཛད་པ་བསྒྲུབ་ན་ཡང་། སངས་རྒྱས་རྣམས་ནི་ས་གསུམ་ལ་གནས་པའི་ཚུལ་གྱིས་དོན་ཐམས་ཅད་ལྷུན་གྱིས་གྲུབ་པར་མཛད་པ་བཞིན་དུ། དེ་དང་རྗེས་སུ་མཐུན་པར་འཇུག་པའི་རྣལ་འབྱོར་པས་ཀྱང་ཏིང་ངེ་འཛིན་རྣམ་པ་གསུམ་དང་། ཆོ་ག་རྣམ་པ་ལྔའི་སྒོ་ནས་དཔལ་ཆེན་པོའི་སྐུ་བསྐྱེད་ལ། དེའི་ཁྱད་པར་ལས་གཞལ་ཡས་ཁང་བསྐྱེད་པ་དང་། འཁོར་གྱི་དཀྱིལ་འཁོར་བསྐྱེད་པར་བྱའོ། །དེ་ལ་གཞལ་ཡས་ཁང་བསྐྱེད་པའི་གསང་སྔགས་ནི། བྷྲཱུཾ་བི་ཤྭ་བི་ཤུདྡྷེ། ཞེས་གསུངས་པ་ཉིད་ཡིན་ནོ། །གཞལ་ཡས་ཁང་གི་མཚན་ཉིད་རྒྱུད་ལས་གསལ་བར་བྱེད་པའི་རྐྱེན་དུ་གྱུར་པའི་ཚིག་གི་ཚོགས་ནི། ཕྱིའི་དོན་གླེང་གཞིའི་ལེའུ་ནས་གསུངས་པ་དང་། ལེའུ་ལྔ་པ་དང་བཅུ་བདུན་པ་རྣམས་ནས་གསུངས་པའི་ཁྲ་བོའི་བྱེ་བྲག་གི་ཡོན་ཏན་དུ་གྱུར་པ་རྣམས། ཇི་ལྟར་སྣང་བ་དམ་པའི་རྒྱན་ནས་གསུངས་པ་ལྟར་ཤེས་པར་བྱའོ། །འཁོར་གྱི་དཀྱིལ་འཁོར་བསྐྱེད་པ་ཡང་། བདག་སྔོན་གྱི་སངས་རྒྱས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པ་བྱ་བ་དང་། རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར། དེ་བཞིན་གཤེགས་པའི་སྲས་སུ་བདག་བྱ་བའི་སྒོ་ནས་དཀྱིལ་འཁོར་བསྐྱེད་པར་བྱའོ། །དེ་ནས་དཀྱིལ་འཁོར་སྤྱན་དྲངས་ཤིང་མཆོད་པར་བྱ་སྟེ། ཇི་སྐད་དུ་གསུངས་པའི། ཕྱོགས་དུས་དཀྱིལ་འཁོར་བདག་ཉིད་ཆེ། །ཞེས་བྱ་བ་ལ་སོགས་པའི་ཚིག་དང་། རུ་ལུ་རུ་ལུ་ཧཱུཾ་ཨེ་ཧྱེ་ཧི་ཨ་ན་ཡ་ཛཿཧཱུཾ་བཾ་ཧོཿཞེས་བྱ་བས་སྤྱན་དྲང་བར་བྱའོ། །དེ་ནས་ཉེ་གནས་སུ་བྱོན་པ་དང་། རཾ་ཞེས་བརྗོད་པས། རིག་པའི་མེ་ཏོག་དོར་བར་བྱའོ། །དེ་ཉིད་ནི་འདྲེས་པ་ནན་ཏན་གྱི་ཕྱག་གི་དོན་ཡང་ཡིན་པར་ཤེས་པར་བྱའོ། །དེ་ནས་ཨཱོྂ་བཛྲ་ཀྲོ་ཏ་ས་མ་ཡ་ཧཱུཾ། ཞེས་བྱ་བའི་སྔགས་དང་། ཨཱོཾ། ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམ་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ཞེས་བྱ་བ་དངོས་གྲུབ་གསོལ་བའི་གླུ་དབྱངས་ཀྱི་ཚིགས་སུ་བཅད་པས་བསྐུལ་བས་དབྱེར་མེད་པར་ཐིམ་པར་བྱའོ། །ཨཱོྂ་བཛྲ་ཀྲོ་དྷ་ས་མ་ཡ་སྟྭྂ། ཞེས་བརྗོད་པས་བརྟན་པར་བྱའོ། །ཨཱོྂ་བཛྲ་ཀྲོ་དྷ་ས་མ་ཡ་ཕཊ། ཅེས་བརྗོད་པས་དམ་ཚིག་རྗེས་སུ་བསྒྲུབ་པར་བྱའོ། །ཨཱོྂ་བཛྲ་ཀྲོ་དྷ་ས་མ་ཡ་ཧོཿ ཞེས་བརྗོད་པས་དབང་དུ་བྱ་བ་སྟེ། ལྷ་རྗེས་སུ་ཆགས་ཤིང་མཉེས་པའི་དོན་ནོ། །ཨ་ལི་ཨུ་ལི་ཏཱ་ལི་ཏ་པཱ་ལི་དཾཥྚ་གོ་ན་ར་ཏྲི། ཁ་རཾ་ཡོ་གི་ནཱི་ཁཱ་ཧི་ཧོཿ ཞེས་བྱ་བ་ནི་ལོངས་སྤྱོད་ཀྱི་མཆོད་པ་ལ་མཉེས་པ་ཆེན་པོས་མཆོད་པའི་གླུ་སྟེ། ཨ་བ་བྲཾ་ཤའི་སྐད་དོ། །དེ་ནས་ཧཱུཾ་ཧ་ཧེ་ཕཊ། ཅེས་ཏིང་ངེ་འཛིན་གསལ་བར་བྱ་ཞིང་། ལེའུ་བཅུ་གདུན་པ་ནས་གསུངས་པའི། སྨུག་ནག་སྔོ་ནག་སེར་ནག་དང་། །ཞེས་བྱ་བ་ལ་སོགས་པའི་ཚིག་གིས་ཀྱང་རྗེས་སུ་གསལ་བར་བྱའོ། །ཏིང་ངེ་འཛིན་གཙོ་བོར་བྱེད་པ་རྣམས་ཀྱིས་ནི། འདི་ཉིད་ཀྱི་རྗེས་སུ་ཁྲོ་བོའི་གླུའི་བསྟོད་པ་བྱས་པ་ཙམ་གྱིས་ཀྱང་ཆོག་པར་ཤེས་པར་བྱའོ། །ཚོགས་ཀྱི་མཆོད་པ་ལ་གཙོ་བོར་བྱེད་པ་རྣམས་ཀྱིས་ནི། སྐབས་འདིར་ལེའུ་བཅོ་བརྒྱད་པ་ལས་གསུངས་པའི་སྒྲོལ་བའི་མཆོད་པ་དང་། སྦྱོར་བའི་མཆོད་པ་དང་། བདུད་རྩིའི་མཆོད་པ་དང་། ཐུན་མོང་གི་འདོད་ཡོན་ལྔའི་མཆོད་པ་རྣམས་དབུལ་བ་དང་། བཤགས་པ་དང་། སྨོན་ལམ་རྣམས་ཀྱང་བྱས་ཏེ། དཀྱིལ་འཁོར་བསྡུ་བར་བྱའོ། །གལ་ཏེ་ལས་ཀྱི་དགོས་པ་ཞིག་བསྒྲུབ་ཏུ་ཡོད་ན་ཚོགས་ལ་རོལ་བའི་རྗེས་ལ་ཕྲིན་ལས་བརྩམས་ཏེ། ལྷག་མ་དང་བཅས་པའི་གཏོར་མ་གཏོང་བའི་ཚེ་ན་ཡང་། གཏོར་མའི་མགྲོན་དུ་གྱུར་པ་རྣམས་སྤྱན་དྲང་བ་དང་། མཆོད་པ་འབུལ་བ་དང་། ཕྲིན་ལས་མནན་ཏེ་བཅོལ་བ་དང་། བཤགས་པ་དང་སྨོན་ལམ་གདབ་པ་ལ་སོགས་པ་ལས་ཀྱི་ཡན་ལག་ཅི་རིགས་སུ་བྱའོ། །ཞེས་མན་ངག་གིས་བཤད་དོ། །དེ་དག་ཙམ་གྱིས་ནི་ལེའུ་བཅོ་ལྔ་པ་ཁྲོ་བོ་རང་བཞིན་གྱི་ལེའུ་དང་། བཅུ་དྲུག་པ་ཁྲོ་བོ་གསང་སྔགས་ཀྱི་ལེའུ་དང་། བཅུ་བདུན་པ་ཁྲོ་བོའི་དཀྱིལ་འཁོར་གྱི་ལེའུ་དང་། བཅོ་བརྒྱད་པ་མཆོད་སྦྱིན་དམ་པའི་ལེའུ་དང་། ཉི་ཤུ་པ་ཕྲིན་ལས་ཀྱི་ལེའུ་དང་། ཉི་ཤུ་གཅིག་པ་ཁྲོ་བོ་གླུའི་ལེའུ་རྣམས་དཀྱིལ་འཁོར་གཅིག་གི་ཆ་རྐྱེན་དུ་གྱུར་པ་དང་། རིམ་པ་ཇི་ལྟར་འབྲེལ་བ་དང་། དགོས་པའི་སྐབས་ཀྱི་ཆོ་ག་ཇི་ལྟར་བསྒྲུབ་པར་བྱ་བ་རྣམས་བསྟན་པ་ཡིན་ནོ། །ད་ནི་སོ་སོའི་ཡན་ལག་རྣམས་བརྗོད་པར་བྱ་སྟེ། དེ་ལ་གསང་སྔགས་འདི་དག་གི་དོན་ནི་མ་བཤད་ཀྱང་ཉེས་པ་མེད་དེ། གང་གི་ཕྱིར་གསང་སྔགས་རྣམས་ནི་དགོས་པའི་དོན་ལ་འཇུག་པའི་གནས་སྐབས་ཙམ་དུ་ཤེས་པར་བྱ་སྟེ། དད་པ་དང་མོས་པ་ཡིད་རྩེ་གཅིག་ཏུ་བསྡུས་ཏེ་བཟླས་ན་དངོས་གྲུབ་ཏུ་འགྱུར་ཏེ་དོན་ཤེས་པ་ལ་རག་ལུས་པ་མེད་དོ། །སྒྲ་འགྱུར་ནས་བཟླས་ན་ནི་དེ་ལ་དངོས་གྲུབ་མེད་དོ། །དེ་གྲུབ་པ་རྣམས་ཀྱིས་བྱིན་གྱིས་མ་བརླབ་པའི་ཕྱིར་རོ། །དོན་ཤེས་པ་ལ་ཡང་ཕན་པ་ནི་ཡོད་དེ། བྱ་བ་ལ་སྦྱོར་བ་ལ་མི་རྨོངས་པ་དང་། དོན་གྱི་གཟུངས་ཤེས་པའི་རྒྱུད་ལ་སྐྱེ་བར་འགྱུར་རོ། །དེ་བས་ན་འདི་དག་གི་རང་ཐད་དུ་བསྒྱུར་བའི་དོན་ཅུང་ཟད་ཙམ་བརྗོད་པར་བྱའོ། །དེ་ལ་ཨཱོྂ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་ཞེས་བྱ་བ་ནི་རྩ་བའི་གསང་སྔགས་སོ། །སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཞེས་བྱ་བ་ནི་ལས་ཀྱི་སྔགས་སོ། །ཧཱུཾ་ཧཱུཾ་ཧཱུཾ་ཕཊ་ཅེས་བྱ་བ་ནི་སྤྱིར་འཇུག་པ་སྟེ། འོག་མ་རྣམས་ལ་ཡང་དེ་བཞིན་དུ་ཤེས་པར་བྱའོ། །ཡི་གེ་ཨཱོྂ་གྱི་དོན་ནི་གསང་སྔགས་ཀྱི་མགོ་སྟེ། ཕྱག་འཚལ་བ་དང་བྱིན་གྱིས་རློབ་པ་སྟེ་རབ་སྔགས་ཀྱི་དོན་ཡིན་ནོ། །རྒྱས་པར་ནི་གོང་དུ་བཤད་པ་བཞིན་ནོ། །ཏ་ཐཱ་ནི་དེ་བཞིན། ག་ཏ་ནི་རྟོགས་པ་དང་སྨྲ་བ་དང་གོ་བ་ལ་སོགས་པའི་དོན་ལ་འཇུག་སྟེ། དེ་བས་ན་དེ་བཞིན་གཤེགས་པ་སྟེ་རིགས་མཚོན་པའི་ཚིག་གོ། །ཤྲཱི་ཧེ་རུ་ཀ་ནི་སྒྲ་མང་དུ་འཇུག་མོད་ཀྱི། ཉེ་བར་དཔལ་ཁྲག་འཐུང་ཞེས་བྱ་བའི་སྒྲར་བཤད་དོ། །ཇི་ལྟར་ཞེ་ན། ཤྲཱི་དཔལ་དང་གཡང་ངམ་དགེ་ཤིས་ཀྱི་ཚིག་གོ། །ཧེ་ནི་ཧེ་ཧེ་ཀྲི་ར་ཐ་སྟེ་སྤྱོད་ཅིང་བརྩེན་པའི་དོན། རུ་ནི་རུ་ཏི་ར་སྟེ་ཁྲག་གི་སྒྲ། ཀ་ནི་བདག་པོའི་རྐྱེན་ཏེ། བསྡུས་ན་ཁྲག་ལ་རོལ་པས་ཧེ་རུ་ཀ་ཞེས་བཤད་དོ། །ཡང་གཞན་གྱིས་བཤད་པ། ཀ་ནི་ཀ་པཱ་ལ་སྟེ། ཐོད་པའི་བརྟུལ་ཞུགས་དང་ལྡན་པའོ། །དེ་ལྟར་ན་ཐོད་པ་ཁྲག་གིས་བཀང་བ་ལ་རོལ་པའི་བརྟུལ་ཞུགས་དང་ལྡན་པས་ཧེ་རུ་ཀ་ཞེས་བཤད་དོ། །ཡི་གེ་ཡན་ལག་གི་དོན་བཤད་ན། ཤྲཱི་ནི་ཨ་དམ་ཤྲཱི་དང་པ་ར་ཤྲཱི་སྟེ། བདག་དང་གཞན་གྱི་དཔལ་དུ་བཤད་དོ། །ཧེ་ནི་ཧེ་རུ་ཞེས་བྱ་སྟེ་རྒྱུའི་དོན་དང་། ཧེ་ཀ་ཞེས་བྱ་སྟེ་དགྱེས་པའི་དོན་ནོ། །དབྱིངས་ཀྱི་དོན་ཕྱིན་ཅི་མ་ལོག་པར་རྟོགས་པ་ལ་བཤད་དོ། །རུ་ནི་ར་ག་སྟེ་ཆགས་པ་དང་། རུ་རུ་ཏྲ་སྟེ་ཁྲོ་བོའི་དོན་ལ་འཇུག་པས་དེ་ལྟ་བུའི་ངང་ལས་ཐུགས་རྗེ་ཆེན་པོས་ཁྲོ་བར་སྟོན་པ་ལ་བཤད་དོ། །ཀ་ནི་ཀརྨ་སྟེ་ཕྲིན་ལས་དང་། ཀ་རུ་ན་སྟེ་སྙིང་རྗེ་ལ་འཇུག་པས་ཁྲོ་བོའི་ཕྲིན་ལས་དེ་དག་ཀྱང་སྙིང་རྗེས་མཉམ་སྙོམས་སུ་མཛད་དོ་ཞེས་སྦྱར་རོ། །དེ་ལྟར་ན་ཡི་གེ་འབྲུ་བཞི་སྒྲ་བརྒྱད་ཀྱི་དོན་དང་ལྡན་པ་ལ་ནི་ཧེ་རུ་ཀ་ཞེས་བྱའོ། །ཞེས་ཁ་ཅིག་གི་གཞུང་ལས་གྲགས་སོ། །གཞན་ཡང་ཧེ་གཟུང་བའི་ཡུལ་མ་སྐྱེས་བ། རུ་འཛིན་པའི་སེམས་མི་རྟོག་པ། ཀ་ཡུལ་སེམས་གཉིས་སུ་མེད་པ་སྟེ། ཆོས་ཀྱི་སྐུ་ལ་འཇུག་པར་ཡང་བཤད། ཧེ་བྱམས་པ། རུ་སྙིང་རྗེ། ཀ་དགའ་བ་དང་བཏང་སྙོམས་ཏེ། ཚད་མེད་པ་བཞི་དང་ལྡན་པར་ཡང་བཤད་དོ། །གཞན་ལས། ཧེ་ཧེ་རུ་རུ་ཀ་ཞེས་བྱ་སྟེ། རྟ་སྐད་དྲག་པོས་གདུག་པ་ཅན་ཐམས་ཅད་རླག་པར་བྱེད་ཅིང་། རང་གི་ཚོགས་ཀྱི་དཀྱིལ་འཁོར་དགའ་བར་བྱེད་པར་བཤད། གཞན་ལས། ཧེ་ནི་ཧེ་དུ་སྟེ་རྒྱུ་ལ་འཇུག །རུ་ནི་རུ་ཏྲ་སྟེ་བསྐྱེད་པ་ལས་རྐྱེན་ཚོགས་པ་ལ་འཇུག །ཀ་ཀཱ་ཙིཏྟ་གང་ཡང་རུང་བ་ལ་འཇུག་ལ། ཡི་གེ་དེ་རྣམས་ཀྱི་གཞི་ནི་ཨ་སྟེ། མ་སྐྱེས་པའི་སྒོ་ཡིན་ཏེ། ཆོས་གང་རྒྱུ་དང་བྲལ་བ། ཚོགས་པ་དང་བྲལ་བ་གང་དུ་མི་གནས་པའི་དོན་ནི་ཧེ་རུ་ཀ་ཞེས་བཤད་དོ། །བཞན་ལས། ཤྲཱི་ནི་སྐལ་པ་སྟེ་བཙུན་མོའི་བདག་གོ། །ཧེ་རུ་ཀ་ནི་བདེ་བ་ཆེན་པོའི་བྱང་ཆུབ་སེམས་ཏེ། ཤྲཱི་ལ་གནས་པའི་ཧེ་རུ་ཀ་ཞེས་བཤད་དོ། །སློབ་དཔོན་དཔེ་མེད་པའི་རྡོ་རྗེ་ཡིས་ཡི་གེ་འབྲུ་དྲུག་ཨའི་སྒྲས་ཕྱེ་ནས་ཆོས་སྐྱེ་བ་མེད་པའི་དོན་རྟོགས་པའི་སྒྲར་བཤད་དེ། དེ་དག་ལ་སོགས་པ་གཞུང་སོ་སོ་ལས་སྒྲ་མང་པོར་བཤད་མོད་ཀྱི། སྔོན་གྱི་མཁན་པོ་རྣམས་ཀྱིས་ཉེ་བའི་སྒྲ་ཁྲག་འཐུང་དུ་བཤད་དོ། །མ་ཧཱ་ཙཎྜ་ཞེས་བྱ་བ་ནི་ཁྲོ་གཏུམ་ཆེན་པོའོ། །སརྦ་དུཥྚཱན་ཞེས་བྱ་བ་ནི་གདུག་པ་ཐམས་ཅད་དེ་དྲག་པོའི་བསྒྲུབ་བྱར་གྱུར་པ་རྣམས་སོ། །ཏ་ཀའམ་ཨ་ན་ཏ་ཀ་ནི་འཇོམས་པའམ་མཐར་བྱེད་པའོ། །ཧ་ན་ད་ཧ་པ་ཙ་ཞེས་བྱ་བ་ནི་རྒྱོབ་ཅིག་སྲེགས་ཤིག་ཆོམས་ཤིག་པའོ། །ཧཱུཾ་ནི་ཕྱག་འཚལ་བ་དང་། སྔགས་བྱིན་གྱིས་རློབ་པ་དང་། ཐུགས་ཀྱི་སྙིང་པོ་དང་། ཁྲོ་བོ་ཐམས་ཅད་ཀྱི་སྙིང་པོ་དང་། དྲག་པོའི་ལས་བསྐུལ་བ་དང་། སྡུད་པའི་སྔགས་ལ་སོགས་པར་གྲགས་སོ། །ཕཊ་འབར་བའི་སྔགས་ཞེས་གྲགས་ཏེ། གསད་དང་བསྐྲད་པ་ལ་སོགས་པ་དྲག་པོའི་ལས་ཁ་ཅིག་ལ་བསྔགས་པ་སྟེ། སྤྱིར་ན་ཧཱུཾ་ཕཊ་ཞེས་འབྲེལ་ན་དྲག་པོའི་སྔགས་ཀྱི་མཇུག་ཏུ་བཤད་དོ། །རིགས་གཞན་ལ་ཡང་དེ་བཞིན་དུ་སྦྱར་རོ། །ཁྲོ་བོ་རྣམས་ནི། མ་ཧཱ་ཀྲོ་ཏི་ཤཱ་རི་ཞེས་བྱ་བ་ནི་ཁྲོ་མོ་དབང་ཕྱུག་མ་ཆེན་མོའོ། དེ་ལ་དབང་ཕྱུག་མ་ཞེས་བྱ་བ་ནི་ཤེས་རབ་ཀྱི་ཆ་སྟེ། དབྱིངས་ཀྱི་ཕྱག་རྒྱར་བསྟན་པའོ། །བཛྲ་དྷ་ར་ནི་རྡོ་རྗེ་འཆང་ངོ་། །ཛྭ་ལ་ནི་འབར་མའོ། །བི་ཏ་མ་རི་རིག་མའོ། །ཧྲཱཾ་ཤྲུ་ཏྟ་ས་མནྟ་ནི་ཀུན་ཏུ་རྒོད་པའོ། །ཁཱ་ཧི་ནི་གསོལ་ཅིག་པའོ། སརྦ་ཨ་མོ་གྷ་ནི་དོན་ཐམས་ཅད་ཡོད་མའོ། །འཁོར་གྱི་མ་མོ་རྣམས་ཀྱི་སྔགས་ལ། བཛྲ་ཀ་རཱི་ཧ་ཞེས་བྱ་ལ་སོགས་པ་ནི་བསྐྱེད་པ་ཙམ་གྱི་སྔགས་སོ། །ཨཱོྂ་བཛྲ་ཀ་རཱི་ཧ། ཆྒཻ་མོ་ཞིག་ཧཱུཾ་ཛ་ཛ་ཞེས་བརྗོད་པས་ནི་ལས་ལ་བསྐུལ་བའི་སྔགས་སུ་འགྱུར་རོ། །ཛ་ཛ་ཧཱུཾ་བསལ་ན་ནི། མཉེས་པར་བྱེད་པའི་སྔགས་སུ་འགྱུར་རོ། །དེ་ལ་ཡི་གེ་སྒྲ་ནི། ཀ་ཞེས་བྱ་བའི་སྒྲ་མཛོད་ལྡན་དང་མཁས་པ་དང་པདྨ་ལ་དགའ་བ་དང་། འུག་པ་ལ་སོགས་པ་ལ་འཇུག་པ་ལས། སྔོན་ཀྱི་སློབ་དཔོན་རྣམས་ཀྱིས་མཛོད་ལྡན་དུ་བཤད་དོ། །ར་ནི་ལྡན་པའི་རྐྱེན། ཨི་ནི་མོའི་རྟགས་སུ་བཤད་དོ། །ཁ་ཅིག་ནི་བཤད་པ་གོ་བོ་ར་བ་ཞེས་བྱ་སྟེ། ཁ་དོག་དཀར་བ་ལ་བྱ། ཨི་ནི་མོའི་རྟགས་ཏེ་དཀར་མོ་ཞེས་བཤད། ལྷ་མོ་འདི་དག་ལ་མང་པོའི་སྒྲ་ཡོད་དེ། དེ་བས་ན་དཀར་མོའི་ཚོགས་ཞེས་བཤད་དེ། གཅིག་ལ་མང་པོའི་ཚིག་ཇི་ལྟར་འགྱུར་ཞེ་ན། བྱཱ་ཀ་ར་ཎ་ལས། ཤིན་ཏུ་བཟང་མོའི་བུད་མེད་ལ་ནི་མང་པོའི་ཚིག་སྟེ། བཙུན་མོ་རྣམས་ཞེས་བྱའོ། །འདི་ནི་མཆོག་ཏུ་བསྟན་པའི་ཚིག་གོ་ཞེས་འབྱུང་ངོ་། །ཁ་ཅིག་ན་རེ། བུད་མེད་ལ་མང་པོའི་ཚིག་འཇུག་པ་ནི་ཆོས་ཀྱི་འབྱུང་གནས་དང་ལྡན་པས་སོ་ཞེས་ཟེར་རོ། །སྔ་རབས་ཀྱི་སློབ་དཔོན་རྣམས་ན་རེ། དང་པོ་སྤྲུལ་པ་སྤྲོ་བའི་དུས་ན་མང་པོའི་སྤྲུལ་པ་ལས་འདུས་པ་ཡིན་པའི་ཕྱིར་རོ་ཞེས་ཀྱང་གསུངས་ཏེ། ཡོངས་ནི་མང་པོའི་ཚིག་འདི་ལྟ་བུ་ཡོངས་སུ་མ་དག་པའི་ལྷར་གཏོགས་པའི་འཁོར་ན་གནས་པའི་མ་མོ་བརྒྱད་ལྟ་བུ་ཡང་མང་པོའི་ཚིག་འཇུག་པར་སྣང་བས། དེ་བས་ན་འཇིག་རྟེན་པ་དག་མཐུན་པ་ཉིད་དུ་མངོན་ནོ། །ཧ་ནི་ས་བོན་ནོ། །དེ་བཞིན་དུ་གཞན་ལ་ཡང་ཤེས་པར་བྱའོ། །བྱེ་བྲག་གི་དོན་ནི། ཙ་རཱི་ནི་ཆོམ་རྐུན། ཨི་ནི་མོའི་རྟགས། པྲ་མོ་ཧ་ནི་རབ་རྨོངས། རིང་དུ་འདྲེན་པ་ནི་མོའི་རྟགས། བེ་ཏ་ལཱི་ནི་རོ་ལངས། ཨི་ནི་མོའི་རྟགས་ཏེ། དེ་ལྟར་ན་ལྷ་མོ་བཞི་པོ་འདི་ཡང་རིགས་བཞིའི་ཡོན་ཏན་གྱི་ཆ་སྟེ། བྱང་ཆུབ་ཀྱི་སེམས་རྣམ་པར་དག་པ་ནི་དཀར་མོ། ཡོན་ཏན་བསྡུས་པ་ནི་རྐུན་མོ། ཟིལ་གྱིས་གནོན་པའི་གསུང་ནི་རབ་རྨོངས། གདུག་པ་འདུལ་བའི་ཕྲིན་ལས་ནི་རོ་ལངས་ཐལ་བྱེད་མའོ། །དེ་བཞིན་དུ་པུཀྐ་སཱི་ལ་སོག་པ་ནི་དུས་བཞི་ཡེ་ཤེས་བཞིའི་རང་བཞིན་ཏེ། པུཀྐ་སཱི་ནི་སྦོས་མོའོ། །གྷསྨ་རཱི་ནི་གཏུམ་མོའོ། །ཙཎྜ་ལཱི་ནི་སྨེ་ཤ་ཅན་ནོ། །སྨ་ཤ་ནཱི་ནི་དུར་ཁྲོད་མའམ་མ་ཚོགས་མ་ཞེས་བྱ་སྟེ། མི་རྟོག་པའི་གཏི་མུག་ནི་མི་འཕྲོག་པའི་ཕྱིར་སྦོས་མོའོ། གདུག་པ་འདུལ་བའི་ཞེ་སྡང་ནི་གཏུམ་མོའོ། །ཐུགས་རྗེ་ཆགས་པས་གང་ཡང་མི་གཏོང་བ་ནི་སྨ་ཤ་ཅན་ནོ། །དུག་གསུམ་དབྱེར་མེད་པ་ནི་མ་མོ་ཐམས་ཅད་ཀྱི་གཞིར་གྱུར་པ་སྟེ་མ་ཚོགས་མའོ། །དེའི་དབང་གིས་སྐབས་སུ་མ་མོ་བདུན་ཡང་གྲགས་སོ། །སིང་ཧ་མུ་ཁཱ་ཞེས་བྱ་བ་ལ་སོགས་པ་ལ། མགོ་བརྙན་མ་འདི་དག་ཀྱང་གཅན་གཟན་ཁྲོ་བོའི་མགོ་བརྙན་བཞི་ནི། རིགས་བཞིའི་ཕྲིན་ལས་བདུད་བཞི་འཇོམས་པའི་ཕྱག་རྒྱར་བཤད་དོ། །འདབ་ཆགས་ཀྱི་མགོ་བཞི་ནི། ཡེ་ཤེས་བཞིའི་སྒོ་ནས་འགྲོ་བའི་དོན་མཛད་པའི་ཕྱག་རྒྱར་བཤད་དོ། །བཛྲ་ཨཱརྱ་ཏེ་ཛ་ཏེང་ཛ་ཞེས་བྱ་བ་ལ་སོགས་པ་སྒོ་མ་བཞི་རྣམས་ནི་ཚད་མེད་པ་དང་བསྡུ་བའི་དངོས་པོ་བཞིའི་སྒོ་ནས་དོན་མཛད་པའི་མ ངག་གཞུག་གི་ཕོ་ཉར་བཤད་དོ། །དེ་ལ་དང་པོ་ནི། འཕགས་མ་སྲིངས་འགྲོ་མ་ཞེས་བྱ་བ་སྟེ། དྷ་ད་བུའི་དོན་ནོ། །བཛྲ་ཨ་མུ་ཁཱ་ཧཱུཾ་ཞེས་པ་ནི། རྡོ་རྗེ་དོན་ཡོད་མའམ་རྡོ་རྗེ་གདོང་མའོ། །བཛྲ་ལོ་ཀ་བཾ་ཞེས་པ་ནི། རྡོ་རྗེ་འཇིག་རྟེན་མའམ་རྡོ་རྗེ་སྣང་མའོ། །བཛྲ་བྷསྨི་པ་ལ་ཡ་བ་ཏུ་ཞེས། རྡོ་རྗེ་ཐལ་བྱེད་མ་ལ་བྱའོ། །དབང་ཕྱུག་མ་རྣམས་ཀྱི་སྙིང་པོ་ཡི་གེ་བྷྱོ་ཞེས་བྱ་བར་བསྟན་པ་ནི། བྷྱོ་ནི་མ་མོའི་ཚོགས་ཀྱི་དོན་ཡིན་པས། བུད་མེད་ཀྱི་སྙིང་པོ་ཡང་ཡིན། འབོད་པ་ཡང་ཡིན། བསྐུལ་བ་ཡང་ཡིན་པའི་ཕྱིར་རོ། །སྤྱན་དྲངས་པའི་སྔགས་ལ་རུ་ལུ་བསྟན་པ་ནི། རུ་ལུའི་བྱེ་བྲག་བཅུ་ལ་སོགས་པར་བསྟན་པ་ལས། འདིར་རུ་ལུ་སྤྱན་དྲང་བར་ཤེས་པ་སྟེ། གང་གི་ཕྱིར་དང་པོར་ལས་ཀྱི་སྲིན་པོའི་རྔམ་ཚིག་གི་གདུག་པའི་གླུ་དཔལ་ཆེན་པོས་བྱིན་གྱིས་བརླབས་པ་ཡིན་པའི་ཕྱིར་རོ། །རུ་ལུའི་བྱེ་བྲག་གཞན་དུ་སྦྱར་བ་ལ་ཡང་རང་རང་གི་ཡོན་ཏན་དེ་བཞིན་དུ་སྦྱར་བར་ཤེས་པར་བྱའོ། །ཨེ་ཧྱེ་ཧི་ནི་ཀྱེ་ཚུར་སྤྱོན་པའོ། །ཨཱ་ན་ཡ་ནི་འགུགས་པའོ། །ཛཿཧཱུཾ་བཾ་ཧོཿནི་མངག་གཞུག་གི་ལས་བཞིའོ། །རཾ་ནི་རིག་པའི་མེ་ཏོག་དོར་བ་སྟེ། བདག་དང་ལྷ་རང་བཞིན་དབྱེར་མེད་པར་རྟོགས་ནས་གཉིས་སུ་མེད་པར་བསྟིམ་པ་ལ་ཕྱོགས་པར་གྱུར་པའི་གཉིས་སུ་མེད་པའི་ཡེ་ཤེས་ཀྱི་རང་བཞིན་ནོ། །ཨཱོྂ་བཛྲ་ཀྲོ་ཏ་ས་མ་ཡ་ཧཱུཾ་ཞེས་བྱ་བ་ནི། ལྕགས་ཀྱུ་དང་ཞགས་པའི་ལས་ཀྱི་མཚན་ཉིད་དོ། །གཞན་ནི་གོང་དུ་བཤད་དོ། །ཨ་ལི་ཨུ་ལི་ཞེས་བྱ་བ་ལ་སོགས་པ་ལ། འདི་ཡང་ཨ་བ་བྲཾ་ཤའི་སྐད་ཀྱིས་ཚོགས་ཀྱི་མཆོད་པ་གླུ་བླངས་པ་སྟེ། དེ་ལ་ཨ་ལི་ནི་ཆང་ངོ་། །ཨུ་ལི་ནི་ཤའོ། །ཏཱ་ལི་ཏ་པཱ་ལི་ཞེས་བྱ་བ་ནི། དེ་ལ་སོགས་པའི་དམ་ཚིག་གི་མཆོད་རྫས་སྣ་ཚོགས་པའོ། །དཾཥྚ་ནི་ཞལ་མཆེ་བ་བགྲད་པ། གོ་ནཱ་ཞེས་པ་ནི་རྡོ་རྗེ། ར་ཏྲི་ནི་དྲག་པོའམ་ཁྲོ་བ་སྟེ། ཚིག་བསྡུས་ན་རྡོ་རྗེ་ཁྲོ་བོ་མཆེ་བ་བགྲད་པའི་ཞལ་དུ་ཁ་རཾ་ཞེས་བསྟབ་པའོ། །ཡོ་གི་ནཱི་ཞེས་བྱ་བ་ནི་རྣལ་འབྱོར་མ་སྟེ། རྡོ་རྗེ་ལྷ་མོའི་ཚོགས་ཐམས་ཅད་ལ་བསྟབ་པའོ། །ཁཱ་ཧི་གསོལ་ཅིག་བའོ། །ཧོཿནི་མཆོད་པ་བསྟབ་པའི་བརྡ་ཕྱག་གོ། །ཧཱུཾ་ཧ་དེ་ཕཊ་ཞེས་པ་ནི། སྤྱིར་དཀྱིལ་འཁོར་གདོན་པའི་རྒྱུ་ས་བོན་གྱི་ཡི་གེ་ཡིན་ཡང་། སྐབས་འདིར་ནི་དཀྱིལ་འཁོར་གསལ་ཞིང་བརྟན་པར་བསྒོམ་པའོ། །ལེའུ་བཅུ་དྲུག་པའོ།། ༈ །།ལེའུ་བཅུ་བདུན་པ་ལས། ཐོད་སྦྲུལ་སྣ་ཚོགས་ཉི་མས་བརྗིད། །ཅེས་བྱ་བ་ནི་ཐོད་པ་སྐམ་རློན་གྱི་རྩིག་པ་ལ་སྦྲུལ་ནག་གི་གཅུན་བཏབ་པ་ནི་ཐོད་པ་སྦྲུལ་གྱི་ཟ་ར་ཚགས་དང་། ཉི་མ་དང་ཟླ་བའི་མཐོང་ཁུང་དང་། ཀ་ལོ་དང་ཀ་རྒྱན་ལ་སོགས་པས་རྒྱན་ནོ་ཞེས་གྲགས་སོ། །སྐུའི་རྒྱན་གྱི་སྐབས་སུ། སྦྲུལ་དང་ཐོད་ཕྲེང་ཉི་ཟླར་བཅས། །ཞེས་གསུངས་པ་ནི་སྦྲུལ་གྱི་ཆུན་པོ་དང་། ཐོད་སྐམ་གྱི་དབུ་རྒྱན་དང་། ཐོད་རློན་གྱི་ཕྲེང་བ་དང་། ཉི་ཟླའི་ཕྲེང་བས་སེ་རལ་ཁ་ཐོགས་སོ་ཞེས་གྲགས་སོ། །ཁྱུ་མཆོག་མ་ཧེ་གཟིག་དང་སྟག །གཏུམ་པ་དོན་གྱི་སྤར་བས་ནི། །ཞེས་བྱ་བ་ནི། གདན་ཁྲི་འདི་རྣམས་ནི་དུད་འགྲོ་གདུག་པ་ཅན་ཡིན་པས་ཁྲོ་བོ་རྣམས་ཀྱི་གདན་དུ་འོས་པ་དང་། སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཡོན་ཏན་གྱི་ཆ་མཚོན་པའི་ཆོས་དང་ལྡན་པ་རྣམས་ཏེ་དེ་ལྟར་བསྟན་ནོ་ཞེའོ། །དེ་ལ་ཁྱུ་མཆོག་གི་ལྕེ་འབབ་པའི་འཇིགས་པ་དང་བྲལ་བ་དང་། ཁྱུས་འགྲོ་ཟིལ་གྱིས་གནོན་པས་འཇིགས་བྱེད་ཁྱུ་མཆོག་ཅེས་བྱ་སྟེ། ཐུགས་ཀྱི་ཕྱག་རྒྱའོ། །མ་ཧེ་ནི་གཟི་བྱིན་ཆེ་བས་བརྗིད་པའི་མ་ཧེ་ཞེས་བྱ་སྟེ་སྐུའི་ཕྱག་རྒྱའོ། །གཟིག་ནི་གདུག་པ་ཆེ་བས་མི་གཏོང་བའི་ཕྱིར་གཟུངས་དང་ཏིང་ངེ་འཛིན་ལ་སོགས་པའི་ཡོན་ཏན་གྱི་ཕྱག་རྒྱའོ། །སྟག་ནི་དཔའ་རྟུལ་ཆེ་བས་ཐུགས་རྗེ་ཆེན་པོའི་མཚན་ཉིད་པདྨའི་རིགས་ཀྱི་ཕྱག་རྒྱའོ། །དོམ་ནི་གཏུམ་པའི་ཕྱིར་ལས་ཀྱི་རིགས་ཀྱི་ཕྱག་རྒྱའོ། །དེ་བས་ན་རྒྱུད་གཞན་ལས་ཀྱང་། འཇིགས་བྱེད་ཁྱུ་མཆོག་བརྗིད་པའི་མ་ཧེ་གདུག་པའི་གཟིག །དཔའ་རྟུལ་སྟག་དང་གཏུམ་པའི་དོམ་ཞེས་གྲགས་སོ། །ཕྱག་མཚན་རྣམས་ནི་གཡས་དང་པོ་རང་རང་གི་མཚན་མ་བསྣམས། གཡོན་དང་པོ་ན་བྷནྡྷ་དམར་གྱིས་བཀང་བ་བསྣམས། གཞན་རིམ་བཞིན་སྦྱར་རོ། །གནས་དང་ཡུལ་གྱི་ཕྱག་རྒྱ་ཞེས་བྱ་བ་ལ། མ་མོ་བརྒྱད་ལ་ཅིའི་ཕྱིར་གནས་ཀྱི་ཕྱག་རྒྱ་ཞེས་བྱ་ཞེ་ན། རྒྱུད་གཞན་ནི་རྣམ་ཤེས་གནས་ཀྱི་མ་བརྒྱད་ཅེས་གྲགས་ཏེ། རྣམ་པར་ཤེས་པ་ཉིད་གནས་ཞེས་གྲགས་སོ། །འདིར་ནི་དབང་པོ་དང་རྣམ་པར་ཤེས་པར་བཅས་པ་ལ་གནས་ཞེས་གྲགས་ཏེ། དེ་ཡང་ཁ་ཅིག་ཏུ་གནས་ཞེས་བྱ་བ་དབང་པོ་ལ་གྲགས། ཁ་ཅིག་ཏུ་བདག་ཏུ་ལྟ་བ་ལ་གྲགས། ཁ་ཅིག་ཏུ་སྣོད་ཀྱི་འཇིག་རྟེན་ལ་གྲགས་ཏེ། དེ་ལས་འདིར་ནི་རྣམ་པར་ཤེས་པའི་གནས་སུ་གཟུང་བའོ། །དབང་པོ་དང་རྣམ་ཤེས་བཅས་ཏེ་གནས་ཞེས་བྱའོ། །ཡུལ་དང་དུས་ཀྱང་ཡུལ་དུ་བསྡུས་ཏེ། དེ་བས་ན་དེ་དག་གི་རང་བཞིན་གྱི་ཕྱག་རྒྱར་གྱུར་པ་རྣམས་ལ་དེ་སྐད་ཅེས་བྱའོ། །ལེའུ་བཅུ་བདུན་པའོ།། ༈ །།ལེའུ་བཅོ་བརྒྱད་པ་ལས། དཀྱིལ་འཁོར་ལ་ནི་དཀྱིལ་འཁོར་ཐིམ། །ཞེས་གསུངས་པ་ནི། མཆོད་པའི་ཚོགས་རྣམས་ཀྱང་ལྷ་རྣམས་ཀྱི་རང་བཞིན་དང་བྱིན་རླབས་ཡིན་པར་ཤེས་བྱ་སྟེ། མཆོད་ཀྱང་རུང་། མཆོད་པའི་ལྷ་མོར་སྤྲུལ་པ་ལས་དེའི་ཕྱག་རྒྱ་ལས་འཕྲོས་པའི་མཆོད་པའི་སྤྲིན་ཆེན་པོར་སྤྲུལ་ཏེ། ལྷ་རྣམས་ཀྱི་དབང་པོ་ལ་ཐིམ་པར་བསམས་ནས་མཆོད་ཀྱང་རུང་སྟེ། དེ་སྐད་བསྟན་པར་འགྱུར་རོ། །ཕྱག་རྒྱ་ཆེན་པོར་རྫོགས་འགྱུར་ཞིང་། །ཞེས་བྱ་བ་ནི། མཚན་མ་མེད་པའི་ཕྱག་རྒྱ་ཆེན་པོ་དང་། མཚན་མ་དང་བཅས་པའི་ཕྱག་རྒྱ་ཆེན་པོའི་ཚིག་ཟུར་གཉིས་སུ་དྲངས་ཀྱང་འགལ་བ་མེད་དོ། །མཆོད་པ་འདི་དག་ཀྱང་ཁྲོ་བོའི་དཀྱིལ་འཁོར་གྱི་སྐབས་སུ་བསྟན་ལ། ཞི་བའི་སྐབས་སུ་ནི་གོང་དུ་ཚང་བར་བསྟན་པས། འདིར་ཁྲོ་བོའི་མཆོད་པའོ་ཞེས་གསུངས་པ་དག་ཡོད་ན། ཡོངས་རང་བཞིན་བྱེ་བྲག་ཏུ་གྱུར་པ་མ་མཐོང་ངོ་། །ལེའུ་བཅོ་བརྒྱད་པའོ།། ༈ །།ད་ནི་དམ་ཚིག་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ལ་དོན་ཡོད་པར་བྱ་བའི་ཕྱིར་ཞེས་བྱ་བ་ནི། བསླབ་པ་ཐམས་ཅད་ཀྱི་གཞི་ནི་དམ་ཚིག་ཡིན་ཏེ། དཔེར་ན་སྐྱེས་བུའི་སྲོག་གི་དབང་པོ་འགགས་ན་དབང་པོ་ཐམས་ཅད་འགག་པར་འགྱུར་བ་བཞིན། རྣལ་འབྱོར་དམ་པ་རྣམས་ཀྱིས་དམ་ཚིག་གི་བསླབ་པ་མེད་པར་གྱུར་ན་དབང་པོ་ལ་སོགས་པའི་བསླབ་པ་ཐམས་ཅད་ཀྱང་དོན་མེད་པར་འགྱུར་བས། དེའི་ཕྱིར་དེ་སྐད་ཅེས་བྱའོ། །དེ་ལ་དམ་ཚིག་གི་སྤྱིའི་དོན་ནི་གོང་དུ་བཤད་ཟིན་ནོ། །འདིར་གཞུང་ཙམ་བརྗོད་པར་བྱ་སྟེ། དེ་ཡང་དང་པོར་དམ་ཚིག་གི་ཆེ་བ་བསྟན་པའི་ཕྱིར། བླ་མེད་ཐེག་པར་རབ་ངེས་ན། །ཞེས་བྱ་བ་ལ་སོགས་པ་གསུངས་ཏེ། ཆེ་བ་བསྟན་པའི་ཚུལ་ཡང་། གསང་སྔགས་རྡོ་རྗེ་ཐེག་པའི་དམ་ཚིག་དང་ལྡན་ན་ཉོན་མོངས་པ་དང་འདོད་པ་ལྔ་ལ་སྤྱད་པའི་སྐྱོན་གྱིས་མི་གོས་ཤིང་། ཉན་ཐོས་དང་བྱང་ཆུབ་སེམས་དཔའི་གཞུང་དུ་གྲགས་པའི་ཚུལ་ཁྲིམས་དང་སྡོམ་པ་ཐམས་ཅད་ཀྱང་འདུས་ཤིང་ཕུན་སུམ་ཚོགས་པར་འགྱུར་རོ། །ཞེས་བསྟན་པ་དང་། དེ་དག་ཅིའི་ཕྱིར་འདུས་པར་བསྟན་པ་དང་། དེ་དག་ཚུལ་ཇི་ལྟར་འདུས་པ་རྣམས་ཀྱིས་སྟོན་པར་ཤེས་པར་བྱའོ། །དེ་ལ་དང་པོ་ནི། བླ་མེད་ཐེག་པར་རབ་ངེས་ན། །ཉོན་མོངས་འདོད་ལྔ་ཀུན་སྤྱོད་ཀྱང་། །བྱས་ལ་མི་གསོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་གསུགས་པ་ཡིན་ཏེ། དེ་ལ་བླ་མེད་མཆོག་གི་དམ་ཚིག་ནི་ཆོས་མཉམ་པ་ཆེན་པོའི་དམ་ཚིག་ཡིན་ཏེ། ཆོས་མཉམ་པ་ཆེན་པོ་ལ་ནི་བླ་ན་མེད་པའི་ཐེག་པ་ཞེས་བྱའོ། །རབ་ངེས་ན་ཞེས་བྱ་བ་ནི། དེ་ཉིད་ཉམས་སུ་ལོན་ཅིང་རྟོགས་པའི་གདེང་དང་ལྡན་པ་སྟེ། དེ་ཡང་རྣལ་འབྱོར་ཆེན་པོའི་གཞུང་ལས་ནི། ཤེས་རབ་ཀྱི་སྟེང་དུ་གྱུར་པ་གཙོ་ཞེས་འབྱུང་། རྣལ་འབྱོར་ཕྱི་པའི་གཞུང་ལས་ནི། ཏིང་ངེ་འཛིན་གྱི་སྟེང་དུ་གྱུར་པ་གཙོ་ཞེས་འབྱུང་སྟེ། ཡོངས་ནི་ཤེས་རབ་དང་ཏིང་ངེ་འཛིན་གཉིས་ཀ་དང་བྲལ་དུ་མི་རུང་བས། དེ་གཉིས་ཀའི་སྟོབས་ཀྱི་རིམ་པ་དང་ལས་ལྕི་ཡང་གི་རིམ་པས་གོས་པ་དང་མི་གོས་པ་ཡང་རིམ་པ་བཞིན་དུ་སྦྱར་བར་བྱའོ། །དེ་ལྟ་བུའི་ཉམས་དང་ལྡན་ན་ཉོན་མོངས་པ་ལྔ་དང་འདོད་པ་ལྔ་སྤྱད་ཀྱང་བག་ཆགས་གསོག་པར་མི་འགྱུར་ཏེ། བསོད་ནམས་དང་ཡེ་ཤེས་ཀྱི་ཚོགས་གཉིས་སུ་འགྱུར་བ་དང་། སོ་སོར་ཐར་པ་དང་བྱང་ཆུབ་སེམས་དཔའི་ཚུལ་ཁྲིམས་དང་སྡོམ་པ་ཐམས་ཅད་ཀྱང་མ་ལུས་པར་ཕུན་སུམ་ཚོགས་པ་ཡིན་ནོ། །དེ་ཅིའི་ཕྱིར་ཞེ་ན། བླ་མེད་མཆོག་གི་དམ་ཚིག་ཏུ། །འདུལ་བའི་དབང་གི་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་གསུངས་ཏེ། གསང་སྔགས་ཀྱི་དམ་ཚིག་འདིའི་ནང་དུ་འགྲོ་བ་འདུལ་བའི་དབང་དུ་གསུངས་པའི་ཉན་ཐོས་ཀྱི་ཚུལ་ཁྲིམས་ཇི་སྙེད་གསུངས་པ་དང་། བྱང་ཆུབ་སེམས་དཔའི་སྡོམ་པ་མཐའ་ཡས་པ་རྣམས་ཀྱང་འདུས་ཤིང་རྣམ་པར་དག་པའི་ཕྱིར་རོ། །དེ་ལ་འདུས་པ་དང་རྣམ་པར་དག་ཅེས་པ་ནི། ཚང་བ་དང་གནས་གྱུར་པའོ། །ཉན་ཐོས་ཀྱི་སོ་སོར་ཐར་པའི་སྡོམ་པར་གྲགས་པ་ཕས་ཕམ་པ་བཞི་ལ་སོགས་པ་བྱ་བ་མ་ཡིན་པ་ལ་སོགས་པ་ལས་ལྡོག་པའི་མཚན་ཉིད་དང་། བྱང་ཆུབ་སེམས་དཔའི་སྡོམ་པར་གྲགས་པ་སེམས་ཅན་ལ་གནོད་པར་སྦྱོར་བ་ལས་ལྡོག་པ་ཙམ་དུ་མ་ཟད་ཀྱི། སེམས་ཅན་ལ་ཕན་འདོགས་པའི་མཚན་ཉིད་རྣམས་ཀྱང་། གསང་སྔགས་ཀྱི་དམ་ཚིག་སེམས་ཅན་ལ་གནོད་པར་སྦྱོར་བ་ལས་ལྡོག་པའི་ཕན་འདོགས་པར་ཞུགས་པའི་སྟེང་དུ། སངས་རྒྱས་ཀྱི་མཛད་པ་ཉམས་སུ་བླངས་ཏེ་མཉམ་པ་ཆེན་པོའི་ངང་ལས་མི་གཡོ་བཞིན་དུ་ཡང་། སེམས་ཅན་གྱི་དོན་ཡིད་བཞིན་དུ་མཛད་ཅིང་བྱ་བ་མ་ཡིན་པ་ལ་འཇུག་པའི་སྤྱོད་པ་སྒོ་གསུམ་ནས་རྡུལ་ཕྲ་མོ་ཙམ་ཡང་མི་མངའ་བས། ཐམས་ཅད་ཚང་བའི་ཕྱིར་འདུས་པ་ཞེས་བྱའོ། །གནས་གྱུར་པས་རྣམ་པར་དག་བས་ནི། དཔེར་ན་ཟངས་སམ་འཁར་བ་ལྟ་བུའི་རྫས་ཀྱི་དངོས་པོ་གཅིག་ལ་ཆོལ་ཟངས་སུ་བྱས་པའི་དུས་ན་ནི་བཙོག་པའི་སྣོད་ཅེས་བྱའོ། །དེ་ཉིད་ལས་གཞོང་པར་བྱས་པའི་ཚེ་ན་ནི་གཙང་མའི་སྣོད་ཅེས་བྱའོ། །དེ་ཉིད་ལས་འཕགས་པའི་སྐུ་གཟུགས་བྱས་པའི་དུས་ན་ནི་ཕྱག་གནས་དང་མཆོད་གནས་ཀྱི་དཔལ་ཞིང་ཞེས་བྱའོ། །དེ་བཞིན་དུ་ལུས་དང་ངག་དང་ཡིད་ཀྱི་ལས་རྣམས་ལ་མ་རིག་པ་དང་བཅས་པའི་ཉོན་མོངས་པ་དང་མཚུངས་པར་ལྡན་པས་བསམ་པས་སྤྱད་ན་ནི་འཆིང་བའི་རྒྱུར་བཤད་དོ། །དེ་ཉིད་ཤེས་རབ་དང་སྙིང་རྗེ་ཕྱོགས་གཅིག་གིས་བཟུང་ནས་བྱ་བ་མ་ཡིན་པ་ལ་འཇུག་པ་ནི་བསྡམས་པར་གནས་པ་ལ་ཞུགས་པར་གྱུར་ན་བདེ་འགྲོ་དང་ཐར་པའི་རྒྱུར་བཤད་དོ། །དེ་ཉིད་ཐབས་དང་ཤེས་རབ་ཆེན་པོ་དང་ལྡན་པའི་བསམ་པས་ཟིན་པར་སྤྱད་ན་ནི་བླ་ན་མེད་པའི་བྱང་ཆུབ་ཆེན་པོའི་ཉིད་དུ་གྲོལ་བའི་རྒྱུར་བཤད་དོ། །དེ་ཉིད་ཐབས་དང་ཤེས་རབ་ཆེན་པོའི་ཡང་ཆེན་པོས་ཡོངས་སུ་ཟིན་པར་སྤྱད་པ་ནི་བྱང་ཆུབ་ཆེན་པོར་རྩོལ་བ་མེད་པར་ལྷུན་གྱིས་གྲུབ་པའི་རྒྱུར་བཤད་དོ། །དེ་བས་ན་གནས་གྱུར་པའི་ཚུལ་གྱིས་རྣམ་པར་དག་པ་ཡིན་པས། མཉམ་པ་ཆེན་པོའི་དམ་ཚིག་ཏུ་ཚུལ་ཁྲིམས་དང་སྡོམ་པ་ཐམས་ཅད་ཕུན་སུམ་ཚོགས་པ་ཡིན་ནོ། །ད་ནི་ཚུལ་ཇི་ལྟར་རྫོགས་པ་སྟོན་ཏེ། དེ་ཡང་དང་པོར་སོ་སོར་ཐར་པའི་སྡོམ་པ་ལས། ཕས་ཕམ་པ་བཞི་བྱུང་ན་རྩ་བ་བཞི་ཞིག་པར་གསུངས་ཏེ། དེ་ཡང་ལུས་ཀྱི་སྡིག་ཏོ་མི་དགེ་བ་གསུམ་རྫུན་དུ་སྨྲ་བ་དང་བཅས་པ་རྣམས་ལ་ཤིན་ཏུ་ལྕི་བར་གྱུར་པའི་ཡན་ལག་ཚང་བ་རྣམས་ནི་རྩ་བའི་སྡོམ་པ་འཇིག་པར་བྱ་བ་བཤད་དེ། དེ་ཡང་སྲོག་གཅོད་པའི་སྐབས་སུ་ཤེས་པ་འཁྲུལ་བ་མེད་པས་ཉོན་མོངས་པ་ཞེ་སྡང་སྐྱེས་པ་དང་། དེ་ལ་གསོད་པའི་བསམ་པས་གསད་པའི་སྦྱོར་བ་བྱས་པ་དང་། སྦྱོར་བ་དེ་ཉིད་ཀྱིས་ཤི་བར་གྱུར་པ་དང་། སྲོག་ཆགས་དེ་ཡང་འགྲོ་བ་མིར་གྱུར་པ་གཞན་གྱི་རྒྱུད་དུ་གཏོགས་པ་ཞིག་ཡིན་པ་སྟེ། དེ་ལྟ་བུ་བདག་གི་ཡན་ལག་ཚང་བའི་སྲོག་གཅོད་པས་ནི་རྩ་བ་འཇིག་པར་བཤད་དོ། །དེ་བཞིན་དུ་མ་བྱིན་པར་ལེན་པའང་། ཤེས་པ་འཁྲུལ་པ་མེད་པས་ཉོན་མོངས་པ་འདོད་ཆགས་སྐྱེས་པ་དང་། དེ་ལ་མ་བྱིན་པར་ལེན་པའི་བསམ་པས་བླངས་པའི་སྦྱོར་བ་བྱས་པ་དང་། མཚམས་ལས་འདས་པར་གྱུར་པ་དང་། རྫས་དེ་ཡང་རིན་ཐང་ཚང་བ་ཞིག་ཏུ་གྱུར་པ་སྟེ། དེ་ལྟ་བུ་ལ་སོགས་པའི་ཡན་ལག་ཚང་བ་དང་། མི་ཚངས་པར་སྤྱོད་པའི་སྐབས་སུ་ཡང་། ཤེས་པ་འཁྲུལ་པ་མེད་པས་ཉོན་མོངས་པ་འདོད་ཆགས་སྐྱེས་པ་དང་། དེའི་དབང་གིས་མི་ཚངས་པར་སྤྱོད་པའི་བསམ་པས་དེའི་སྦྱོར་བ་བྱས་པ་དང་། མཚན་དུ་ནོར་བུ་འདས་པ་དང་། བདེ་བ་ཉམས་སུ་མྱོང་བ་དང་། །ལུས་དེ་ཡང་ཡན་ལག་ཚང་བ་ཞིག་སྟེ། དེ་ལྟ་བུ་ལ་སོགས་པའི་ཡན་ལག་ཚང་བ་དང་། རྫུན་དུ་སྨྲ་བའང་ཤེས་པ་འཁྲུལ་པ་མེད་པས་གཞན་བསླུ་བའི་བསམ་པ་སྐྱེས་པ་དང་། དེའི་དབང་གིས་རྫུན་དུ་སྨྲ་བའི་སྦྱོར་བ་བྱས་པ་དང་། ཕ་རོལ་གྱི་འདུ་ཤེས་གཞན་དུ་གྱུར་པ་དང་། རྫུན་དེ་ཡང་བདག་གིས་ལྷ་མཐོང་ངོ་། །འདྲེ་མཐོང་ངོ་ཞེས་བྱ་བ་ལ་སོགས་པ་རླབས་ཆེ་བ་ཞིག་སྟེ། འདི་ལྟ་བུ་ལ་སོགས་པ་ཡན་ལག་ཚང་བ་རྣམས་ནི་སྡོམ་པའི་རྩ་བ་འཇིག་པར་བཤད་དོ། །བྱང་ཆུབ་སེམས་དཔའི་སྡོམ་པའི་སྐབས་སུ་ནི། སེམས་ཅན་ལ་གནོད་པར་སྦྱོར་བ་ལས་ལོག་པའི་སྟེང་དུ། སེམས་ཅན་ལ་ཕན་འདོགས་པ་ལ་ཞུགས་པ་ཡིན་པས་ཡན་ལག་དེ་ལྟ་བུ་དང་ལྡན་པའི་སྡིག་ཏོ་མི་དགེ་བ་ནི་སྤྱོད་མི་སྲིད་མོད་ཀྱི། འོན་ཀྱང་སྙིང་རྗེ་ཆེན་པོའི་དབང་གིས་བཞན་ལ་ཕན་འདོགས་པ་ཉིད་ཀྱི། གཞན་ལ་ཕན་འདོགས་པའི་སྤྱོད་པར་གྱུར་པ་དངོས་གཞི་ཙམ་ནི་མ་བཀག་གོ་ཞེས་བཤད་དོ། །གཞུང་ཁ་ཅིག་ལས་བྱང་ཆུབ་སེམས་དཔའ་རབ་ཏུ་བྱུང་བ་ལ་མི་ཚངས་པར་སྤྱོད་པ་བཀག་གོ་ཞེས་བཤད་དོ། །བྱང་ཆུབ་སེམས་དཔའི་སྡོམ་པ་ཉིད་ཀྱི་སྐབས་སུ་ཕས་ཕམ་པ་དང་འདྲ་བར་གསུངས་པ་ནི། རྙེད་དང་བཀུར་སྟིར་ཆགས་པ་ཡིས། །བདག་བསྟོད་གཞན་ལ་སྨོད་པ་དང་། །སྡུག་བསྔལ་མགོན་མེད་གྱུར་པ་ལ། །སེར་སྣས་ཆོས་ནོར་མི་སྟེར་དང་། །གཞན་གྱིས་བཤགས་ཀྱང་མི་ཉན་པར། །ཁྲོས་ནས་གཞན་ལ་འཚོག་པ་དང་། །ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲར་སྣང་སྟོན་པའོ། །ཞེས་གསུངས་པ་ལྟ་བུ་སྟེ། དེ་ལ་བྱང་ཆུབ་སེམས་དཔས་སོ་སོར་ཐར་པའི་སྡོམ་པ་ལས་གསུངས་པའི་ཡན་ལག་ཚང་པའི་ཆགས་པ་སྤྱོད་པ་ནི་མི་སྲིད་ཀྱི། འོན་ཀྱང་གཞན་གྱི་དོན་དུ་དངོས་གཞི་ཙམ་སྤྱོད་པས་ནི་སྡོམ་པ་ཉམས་པར་མི་འགྱུར་གྱི། རྙེད་པ་དང་བཀུར་སྟི་ལ་ཆགས་པའི་དབང་གིས་བྱང་ཆུབ་སེམས་དཔའ་བདག་ཉིད་ལ་བསྟོད་ཅིང་། བྱང་ཆུབ་སེམས་དཔའ་གཞན་ལ་སྨོད་པར་བྱེད་ན་སྡོམ་པའི་རྩ་བ་ཞིག་པར་གསུངས་སོ། །མ་བྱིན་པའི་ལེན་པའི་སྐབས་སུ་ཡང་སོ་སོ་ཐར་བའི་སྡོམ་པ་ལས་ཇི་སྙེད་གསུངས་པའི་ཡན་ལག་ཚང་བའི་མ་བྱིན་པར་ལེན་པ་ནི། བྱང་ཆུབ་སེམས་དཔའ་རྣམས་ལ་མི་སྲིད་མོད་ཀྱི། འོན་ཀྱང་གཞན་གྱི་དོན་གྱི་དབང་དངོས་གཞི་ཙམ་སྤྱད་པས་ནི་སྡོམ་པ་ཉམས་པར་མི་འགྱུར་གྱི། གང་དག་སྡུག་བསྔལ་གྱིས་གདུངས་པ་མགོན་མེད་པར་མཐོང་བཞིན་དུ་ཡང་སེར་སྣའི་དབང་གིས་ཆོས་དང་ནོར་ཟས་དག་སྟེར་བར་མི་བྱེད་ཅིང་། སྐྱོབ་པར་མི་བྱེད་ན་ཡང་སྡོམ་པའི་རྩ་བ་ཞིག་པར་གསུངས་སོ། །ཁ་ཅིག་ལས། བྱང་ཆུབ་སེམས་དཔའ་རབ་ཏུ་བྱུང་བ་ལ་ཟང་ཟིང་གི་སྦྱིན་པ་མ་གནང་ཞེས་གསུངས་པ་ཡང་ཡོད། ཆོས་གོས་གསུམ་མ་གཏོགས་པ་སྦྱིན་ཞེས་གསུངས་པ་ཡང་ཡོད་དེ། དེ་དག་གི་དགོངས་པ་བཤད་པ་ཡང་ཡོད་ན། ཡོངས་སྙིང་རྗེ་ཉིད་མཚན་པར་བྱའོ། །སྲོག་གཅོད་པའི་སྐབས་སུ་ཡང་ཇི་སྐད་གསུངས་པའི་ཡན་ལག་ཚང་བའི་སྲོག་གཅོད་པ་ནི་བྱང་ཆུབ་སེམས་དཔའ་ལ་མི་སྲིད་དེ། འོན་ཀྱང་གང་དག་བསད་པར་གྱུར་ན་ནི། སྡུག་བསྔལ་གྱི་ཁུར་ཆེན་པོ་དང་བྲལ་བར་ངེས་ཤིང་། མ་བསད་ན་ནི་ལྡན་པར་ངེས་ལ། བསད་པ་མ་ཡིན་པ་ཐབས་གཞན་གྱིས་ཀྱང་ཕན་པར་མི་འགྱུར་བ་དག་མཐོང་ནས། དེའི་དོན་དུ་བདག་གིས་དེའི་སྡིག་པའི་ཁུར་ཐམས་ཅད་བླངས་ཏེ། དེའི་སྲོག་བཅད་པར་གྱུར་པས་ནི་སྡོམ་པ་ཉམས་པར་མི་འགྱུར་གྱི། གང་ཞིག་ལ་ཁྲོས་ཏེ་གཞན་གྱིས་བཤགས་ཀྱང་མི་ཉན་པར་སེམས་ཁྲོས་ཤིང་འཁྲུགས་པས་གཞན་ལ་རྡེག་ཅིང་འཚོག་པར་བྱེད་པ་ནི། སྡོམ་པའི་རྩ་བ་འཇིག་པར་གསུངས་སོ། །རྫུན་དུ་སྨྲ་བའི་སྐབས་སུ་ཡང་ཇི་སྐད་གསུངས་པའི་ཡན་ལག་དང་ལྡན་པའི་རྫུན་ནི་བྱང་ཆུབ་སེམས་དཔའ་ལ་འབྱུང་མི་སྲིད་དེ། འོན་ཀྱང་འགྲོ་བ་འདུལ་བའི་ངེས་པ་དག་མཐོང་ན་བདག་གམ་གཞན་སུ་ཡང་རུང་བས་ལྷ་མཐོང་ངོ་། །འདྲེ་མཐོང་ངོ་། །དེའི་གཏམ་དག་ཀྱང་ཐོས་སོ། །ཞེས་སྨྲས་པ་ལྟ་བུ་ནི་སྡོམ་པ་ཉམས་པར་མི་འགྱུར་གྱི། གང་དག་ཐེག་པ་ཆེན་པོའི་གཞུང་སྤོང་བར་བྱེད་ཅིང་། དམ་པའི་ཆོས་ཡང་དག་པ་མ་ཡིན་པའི་གཞུང་དག་གཞན་ལ་འཆད་ཅིང་སྟོན་པར་བྱེད་པ་ནི། རྩ་བའི་སྡོམ་པ་འཇིག་པར་གསུངས་སོ། །དེ་བས་ན་བྱང་ཆུབ་སེམས་དཔའི་སྡོམ་པའི་སྐབས་སུ་ཡང་སོ་སོར་ཐར་པའི་སྡོམ་པ་དག་ཚང་ཞིང་རྫོགས་པའམ་འདུས་པ་ཡང་ཡིན་ལ། གནས་འགྱུར་བའམ་རྣམ་པར་དག་པ་ཡང་ཡིན་ནོ། །དེ་བཞིན་དུ་གསང་བའི་ཐེག་པའི་སྐབས་སུ་ཡང་དེ་དང་ཚུལ་མཐུན་པ་ཡིན་ཏེ། དེ་ལ་སྲོག་གཅོད་པ་སྤོང་བ་ཇི་ལྟར་འདུས་ཤིང་ཇི་ལྟར་རྣམ་པར་དག་པར་གསུངས་པ་ནི། ཡོན་མེད་དབུ་མ་མི་དམིགས་ཤིང་། །སྒྱུ་མ་མིག་ཡོར་ལྟ་བུའི་ཚུལ། །སྲོག་མེད་སྲོག་ཀྱང་གཅད་དུ་མེད། །སྲོག་དང་སྐྱེས་བུ་ལོག་རྟོག་ཙམ། །ཞེས་པ་སྟེ། དེ་ལ་བྱང་ཆུབ་སེམས་དཔའི་སྐབས་སུ་རྣམ་པ་དཀར་བའི་ཆོས་རྣམས་སྙིང་རྗེ་ཆེན་པོར་འདུས་ཤིང་རྣམ་པར་དག་པར་བཤད་དོ། །གསང་སྔགས་ཀྱི་ཚུལ་ནི། དེ་གཉིས་ཀྱང་མཉམ་པ་ཆེན་པོར་འདུས་ཤིང་རྣམ་པར་དག་པར་བཤད་ཅིང་། ཇི་ལྟ་ཞེ་ན། སོ་སོར་ཐར་པའི་སྡོམ་པ་ལས་སྲོག་གཅོད་པ་ཡན་ལག་ཚང་བར་བཤད་པ་དེ་དག་ནི། དངོས་པོར་ལྟ་བ་ཁོ་ནའི་དབང་ལས་གྱུར་པ་ཡིན་ལ། གང་དངོས་པོར་ལྟ་བ་དང་བྲལ་ཞིང་མཚན་མར་མ་ཞེན་པ་རྣམས་ལ་དེ་ལྟ་བུའི་ཡན་ལག་འབྱུང་ཡང་མི་སྲིད་ལ། སྙིང་རྗེ་ཆེན་པོ་ལ་སོགས་པའི་བློས་བསྐྱོད་པ་རྣམས་ལ་ཡན་ལག་དེ་ལྟ་བུ་མེད་དེ། དེ་བས་ན་མཉམ་པ་ཉིད་དུ་རྟོགས་པ་རྣམས་ལ་ཡོན་ཏན་དེ་དག་ཚང་ཞིང་འདུས་པ་ཡང་ཡིན་ལ། གནས་གྱུར་ཞིང་རྣམ་པར་དག་པ་ཡང་ཡིན་ནོ། །དེ་ལ་ཡོད་མེད་དབུ་མ་མི་དམིགས་ཤིང་། །ཞེས་བྱ་བ་ནི། དོན་དམ་པའི་དབང་དུའོ། །སྒྱུ་མ་མིག་ཡོར་ལྟ་བུའི་ཚུལ། །ཞེས་བྱ་བ་ནི། ཀུན་རྫོབ་ཀྱི་བདེན་པའི་དབང་དུའོ། །དེ་གཉིས་ཀའི་ལྟར་ན་སྲོག་མེད་ཅེས་ཏེ། རང་གི་ངོ་བོ་མ་གྲུབ་པའོ། །སྲོག་གཅད་པ་མེད་ཅེས་ཏེ་ལས་མ་གྲུབ་པའོ། །གཅད་དུ་མེད་ཅེས་ཏེ་གཞི་མ་གྲུབ་པ་སྟེ། འོ་ན་ཅི་ཞེ་ན། སྲོག་དང་སྐྱེས་བུ་ལོག་རྟོག་ཙམ། །ཞེས་གསུངས་ཏེ། བྱེད་པ་པོ་དང་ལས་གཉིས་ཀ་ཡང་འཁྲུལ་པའི་རྟོག་པ་ཙམ་སྣང་བ་སྟེ། རང་བཞིན་མེད་དོ། །འདི་ལྟ་བུའི་དོན་རྟོགས་པ་རྣམས་ལ་ནི། སྲོག་གཅོད་པ་སྤོང་པའམ། དེ་ལ་འཇུག་པའི་རྩོལ་བདག་ཀྱང་ཉམས་སུ་ལེན་པར་མི་འགྱུར་ལ། སྒྱུ་མ་ཙམ་དུ་སྣང་བའི་དབང་དུ་དེ་ལྟར་མ་རྟོགས་པའི་འགྲོ་བ་རྣམས་ལ། མཉམ་པ་ལ་མ་གཡོས་པའི་སྙིང་རྗེ་ཆེན་པོས་སངས་རྒྱས་ཀྱི་མཛད་པ་སྟོན་ཀྱང་། ཚུལ་ཁྲིམས་དང་སྡོམ་པ་འདུས་ཤིང་རྣམ་པར་དག་པ་ཡིན་ནོ། །མ་བྱིན་པར་ལེན་པ་སྤོང་བ་འདུས་ཤིང་དག་པའི་སྐབས་སུ། བདེན་པ་གཉིས་ཀ་དབྱེར་མེད་པས། །འཕྲུལ་དགའི་ཚུལ་ཏེ་ཐ་དད་མིན། །གཞན་དང་མ་བྱིན་མེད་པའི་ཕྱིར། །བླང་མེད་ཐམས་ཅད་ཉིད་ཀྱི་དབྱིངས། །ཞེས་གསུངས་ཏེ། དེ་ལ་ཆོས་ཐམས་ཅད་ལ་ནི་བདེན་པ་གཉིས་ཀྱི་ཚུལ་ཙམ་ལས་མ་གཏོགས་པ་དངོས་པོ་གཞན་མེད་ལ། དེ་ལ་དོན་དམ་པ་སྤྲོས་པ་དང་བྲལ་བའི་ཚུལ་དང་། ཀུན་རྫོབ་སྒྱུ་མ་ཙམ་གྱི་ཚུལ་གཉིས་ཀ་ལ་བདག་དང་གཞན་ཞེས་དབྱེར་མེད་དེ། འདི་ལྟར་བདག་དང་གཞན་ཞེས་བྱ་བ་ནི་བདག་ཏུ་ལྟ་བའི་བག་ཆགས་ཀྱི་དབང་གིས་གཉིས་སུ་སྣང་བ་ལ་བདག་ཏུ་རྟོགས་པས་ཞེན་པར་ཟད་དོ། །དེ་ལས་ཀྱང་བདག་དང་གཞན་ནི་ཡུལ་དང་གྲངས་ཡིན་ཏེ། དེ་ལྟར་རྫས་སུ་ཡོད་པ་མ་ཡིན་ནོ། །དེ་བས་ན་གཉིས་སུ་མེད་པ་ལ་ནི་གཞན་མི་དམིགས། མ་བྱིན་པ་མི་དམིགས། དེ་ལས་བླངས་པ་མི་དམིགས་ཏེ། ཅིར་སྣང་ཡང་མཉམ་པ་ཉིད་ཀྱི་རང་བཞིན་ལས་མ་གཡོས་སོ། །དེ་ལྟ་བུའི་ཚུལ་རིག་ན་འདོད་པ་ལྔ་ལ་ཇི་ལྟར་སྤྱད་ཀྱང་མ་བྱིན་པར་ལེན་པའི་དྲི་མས་མི་གོས་ཏེ། དཔེར་ན་འཕྲུལ་དགའི་ལྷ་རྣམས་འདོད་པའི་ཡོན་ཏན་ལ་སྤྱོད་པའི་ཚུལ་འདོད་པ་རང་རང་གིས་འཕྲུལ་ཞིང་དེ་ལ་སྤྱོད་པ་དེ་དག་གི་ཤེས་པ་ལ་སྣང་བས། གནས་དེ་ན་མ་བྱིན་པར་ལེན་པའི་ཉེས་པ་མེད་དོ། །དེ་བཞིན་དུ་བདེན་པ་གཉིས་ཀའི་ཚུལ་ལྟར་ན་ཡང་བདག་དང་གཞན་གྱི་རྒྱུད་དབྱེར་མེད་པར་ཤེས་ཤིང་སྟེང་དུ་གྱུར་པ་རྣམས་ལ་ནི། དེའི་དྲི་མས་མི་གོས་མཉམ་པའི་ལྟ་བ་ལས་མ་གཡོས་པའི་སྙིང་རྗེའི་དབང་གིས་ཐབས་ཀྱིས་ཟིན་པ་ཅི་རིགས་སུ་བླངས་ན་དེ་བཞིན་དུ་འདུས་ཤིང་རྣམ་པར་དག་པར་འགྱུར་རོ། །རྫུན་དུ་སྨྲ་བ་སྤང་བ་ཇི་ལྟར་འདུས་ཤིང་དག་པར་གསུངས་པ། ཆོས་རྣམས་སྒྱུ་མ་ལྟ་བུ་དང་། །མིང་དུ་ཚིག་ཏུ་བཏགས་པ་རྫུན། །རྫུན་ཉིད་ལ་ནི་རྫུན་སྤྱོད་པ། །རྫུན་ཞེས་བཏགས་པའང་ཡོད་མ་ཡིན། །ཞེས་གསུངས་ཏེ། དེ་ལ་དབང་པོ་དྲུག་གི་སྤྱོད་ཡུལ་དུ་ཇི་ལྟར་དམིགས་ཤིང་སྣང་བའི་ཆོས་རྣམས་ནི། ཇི་ལྟར་སྣང་བ་དེ་བཞིན་དུ་ཡོད་པ་མ་ཡིན་པས་སྒྱུ་མ་ལྟ་བུ་སྟེ་རྫུན་ཙམ་མོ། །དེ་ལྟར་ཚིག་གི་དོན་མ་གྲུབ་བཞིན་དུ། དེ་རྗོད་པར་བྱེད་པའི་བུམ་པ་དང་ཀ་བ་ལ་སོགས་པའི་མིང་དང་ཚིག་ཏུ་བཏགས་པ་ཐམས་ཅད་བརྗོད་བྱ་མ་གྲུབ་པའི་ཕྱིར། །མོ་གཤམ་གྱི་བུ་དཀར་རམ་སྔོ་ཞེས་བརྗོད་པ་དང་འདྲ་སྟེ། རྗོད་བྱེད་དུ་མི་རུང་བས། མིང་དང་ཚིག་ཐམས་ཅད་ཀྱང་རྫུན་ཙམ་མོ། །དེ་ལྟ་བས་ན་བརྗོད་བྱ་དང་ཤེས་བྱ་རྣམས་རྫུན་པ་ཉིད་ལ། རྗོད་བྱེད་དང་ཤེས་བྱེད་རྣམས་རྫུན་པ་ཉིད་སྤྱོད་པས་ཆོས་གང་ལ་ཡང་བདེན་པའི་དངོས་པོར་མ་གྲུབ་བོ། །དེ་ལྟར་བདེན་ཀྱང་མ་གྲུབ་ན། དེ་ལ་ལྟོས་པའི་རྫུན་པ་ཡང་མི་འགྲུབ་པས། རྫུན་ཞེས་བྱ་བའི་མིང་བཏགས་པ་ཙམ་ཡང་མི་འགྲུབ་པས། དོན་འདི་ལྟ་བུའི་དབང་གིས་རྫུན་དུ་སྨྲ་བའི་ཉེས་པ་མི་འབྱུང་སྟེ། རྫུན་སྤང་བའང་འདུས་ཤིང་རྣམ་པར་དག་པ་ཡིན་ནོ། །རྫུན་གྱི་དབང་དུ་གཏོགས་པའི་སྙིང་རྗེ་ཆེན་པོས་སེམས་ཅན་སྐྱོབ་པའི་རྫུན་དུ་སྨྲ་བ་ལ་སོགས་པ་ཇི་ལྟར་འདུས་ཤིང་དག་པ་ཡང་སྔ་མ་བཞིན་ནོ། །མི་ཚངས་པར་སྤྱོད་པ་སྤོང་བ་ཇི་ལྟར་འདུས་ཤིང་དག་པར་གསུངས་པ། མ་ཆགས་པ་ལ་ཆགས་པ་དང་། །ཆགས་པ་ཉིད་ན་ཆགས་པ་མེད། །དེ་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །ཞེས་གསུངས་ཏེ། དེ་ལ་ཆོས་གཉིས་སུ་མེད་པར་མཉམ་པ་ཆེན་པོ་ལ། དེ་དང་མཐུན་པའི་བློ་གནས་པ་ནི། མ་ཆགས་པ་ལ་ཆགས་པ་དང་། །ཞེས་བྱའོ། །དེ་ལྟར་གནས་པ་དེ་ཡང་དམིགས་ཤིང་མངོན་དུ་བྱ་བའམ། རྟེན་པར་བྱེད་པའི་བློ་དང་བྲལ་ཏེ་ཅིར་ཡང་མི་ལྟ་བ་ལ་ཆགས་ཞེས་བཤད་པ་ཡིན་པས། ཆགས་པ་ཉིད་ན་ཆགས་པ་མེད། །ཅེས་བཤད་དོ། །དེ་ལྟར་ན་ལྟ་བར་འཛིན་པ་ཐམས་ཅད་དང་བྲལ་བ་དེ་ལ་ནི། ཚངས་པར་སྤྱོད་པ་ཐམས་ཅད་ཀྱི་མཆོག་གམ་རྒྱལ་པོ་འགྱུར་ཏེ། དེས་ན་འདི་ལྟ་བུ་ནི་གསང་སྔགས་ཀྱི་ཚུལ་རྣམས་ལས་ཀྱང་། ཆགས་པ་ཆེན་པོ་བཅོམ་ལྡན་འདས། །ཞེས་བྱ་བ་ལ་སོགས་པ་གསུངས་སོ། །དོན་འདི་ལྟ་བུ་ལ་མི་ཚངས་པར་སྤྱོད་པའི་དྲི་མ་མེད་དོ། །འདི་ལྟ་བུའི་ཤེས་རབ་དང་ལྡན་ཞིང་སྙིང་རྗེ་ཆེན་པོས་བསྐྱེད་པའི་ཐབས་ཀྱིས་ཟིན་པའི་སྦྱོར་བ་ལ་ཡང་མི་ཚངས་པར་སྤྱོད་པའི་དྲི་མ་མེད་པར་གསུང་ཏེ། ཚུལ་འདི་ལ་སྔོན་གྱི་མཁན་པོ་རྣམས་ཀྱིས་བཤད་པ། དཔེར་ན་རྨི་ལམ་གྱི་བུད་མེད་དང་འཕྲད་པས་བདེ་བ་ཉམས་སུ་མྱོང་ཞིང་། ཁུ་བ་འབྱིན་པའི་བྱ་བ་བྱས་ཀྱང་སྡོམ་པའི་རྩ་བ་ཞིག་པར་མི་འགྱུར་བ་བཞིན་དུ། དང་པོར་བུད་མེད་དེ་ཉིད་དམ་དེ་ལ་བརྟེན་ནས་འདུལ་བའི་འགྲོ་བ་གཞན་ཞིག་གི་ཆེད་དུ་བརྩམས་ཀྱང་རུང་སྟེ། གཞན་གྱི་དོན་གྱི་བསམ་པར་འཕངས་པའམ། གསང་བའི་དཀྱིལ་འཁོར་དུ་འཇུག་ཅིང་བདེ་བ་ཆེན་པོའི་མན་ངག་མནོས་པའི་བསམ་པར་འཕངས་པའམ། དེ་བཞིན་དུ་ཚོགས་ཀྱི་དཀྱིལ་འཁོར་ཆེན་པོར་འཕགས་པ་མཆོད་པའི་བསམ་པ་དང་། ཐུན་མོང་དང་མཆོག་གི་དངོས་གྲུབ་བསྒྲུབ་པའི་བསམ་པ་ལྟ་བུ་ལ་སོགས་པས་འཕངས་པ་ཡིན་པས། ཤེས་པ་མ་འཁྲུལ་པས་ཉོན་མོངས་པ་འདོད་ཆགས་སྐྱེས་པར་གྱུར་པ་ཞེས་བྱ་བའི་ཡན་ལག་དང་མི་ལྡན་ཏེ། གང་གི་ཕྱིར་ཤེས་པ་མ་འཁྲུལ་བ་ཞེས་བྱ་བ་ནི། དངོས་པོ་རྣམས་ཇི་ལྟར་སྣང་བ་དེ་ལྟར་འཛིན་པའི་བློ་ལ་བྱ་བ་ཡིན་ལ། འདིར་ཐམས་ཅད་སྒྱུ་མ་ལྟ་བུར་རྟོགས་པའི་བློ་ཡིན་པས་མ་འཁྲུལ་བའི་བློ་ཆེན་པོ་ཡིན་པའི་ཕྱིར། ཡན་ལག་དེ་དང་ཡང་མི་ལྡན་ལ་རྣམ་གྲངས་གོང་མ་ལྟ་བུས་བསྐྱོད་པའི་བློ་ཡིན་པའི་ཕྱིར། འདོད་ཆགས་སྐྱེས་པའི་ཡན་ལག་དང་ཡང་མི་ལྡན་ནོ། །གཙོ་གཟུངས་ཀྱི་ལུས་ཕྱག་རྒྱ་ཆེན་པོར་བྱིན་གྱིས་བརླབས་པས། ལུས་ཇི་ལྟ་བ་བཞིན་མཐོང་བའི་ཉེས་པ་མེད་པ་དང་། མཁའ་གསང་རྣམ་གཉིས་དམ་ཚིག་དང་ཆོས་ཀྱི་ཕྱག་རྒྱ་གཉིས་སུ་བྱིན་གྱིས་བརླབས་པས། ལུས་ཚང་ཞིང་ཉམས་པ་མེད་པའི་ཡན་ལག་དང་ལྡན་པ་ཡང་མ་ཡིན་ནོ། །གཟུངས་ནི་ཤེས་རབ་ཀྱི་རང་བཞིན་ཡིན་ལ་གཙོ་བོ་ནི་ཐབས་ཀྱི་རང་བཞིན་ཏེ། ཐབས་ལ་ཡང་ཤེས་རབ་ཚང་ལ། ཤེས་རབ་ལ་ཡང་ཐབས་ཚང་སྟེ། མེ་ནི་ཚ་བའི་མཚན་ཉིད་དང་ངང་ཚུལ་ལས་མི་འདའ་བ་བཞིན་ཐབས་དང་ཤེས་རབ་ཀྱང་གཉིས་སུ་མེད་པའི་ངང་ཚུལ་ལས་ནམ་ཡང་མི་འདའ་བས། མཚན་ནོར་བུ་འདས་པ་ཞེས་བྱ་བའི་ཡན་ལག་དང་ལྡན་པ་མ་ཡིན་ནོ། །དེ་ལྟར་ཐབས་དང་ཤེས་རབ་ཟུང་དུ་འབྲེལ་བ་ཇི་སྲིད་དེ་སྲིད་བར་དུ་གཉིས་སུ་མེད་པའི་བྱང་ཆུབ་ཀྱི་སེམས་བདེ་བ་ཆེན་པོ་དང་རང་བཞིན་གྱིས་ལྡན་ཏེ། དེ་ལྟར་ན་ཁམས་གསུམ་གྱི་སེམས་ཅན་ཐམས་ཅད་དང་། དུས་གསུམ་གྱི་འཕགས་པ་ཐམས་ཅད་ཀྱང་གཉིས་སུ་མེད་པའི་བྱང་ཆུབ་ཀྱི་སེམས་བདེ་བ་ཆེན་པོའི་ངང་ལ་རྟག་ཏུ་མི་གནས་པ་མེད་པས་བདེ་བ་ཉམས་སུ་མྱོང་བ་ཞེས་བྱ་བའི་ཡན་ལག་དང་ལྡན་པ་མ་ཡིན་ནོ། །དེ་དག་ལྟར་ན་མི་ཚངས་པར་སྤྱད་པ་མེད་པས་ཚུལ་ཁྲིམས་དང་སྡོམ་པ་རྣམས་དངོས་སུ་འདུས་ཤིང་ཚང་བ་ཡིན་ནོ། །ཞེས་གསུང་ངོ་། །ཁ་ཅིག་ནི་སྡིག་པས་མི་གོས་པ་དག་ཡོན་ཏན་དང་འབྲས་བུ་ཐོབ་པར་འདྲ་བས་ཚང་ཞིང་འདུས་པར་བཤད་དོ་ཞེས་ཟེར་རོ། །གནས་འགྱུར་བའི་ཚུལ་གྱིས་རྣམ་པར་དག་པར་བཤད་པ་ནི་རྩོད་པའི་གཞི་མེད་དོ། །གོང་མ་གོང་མའི་སྡོམ་པ་མ་ཉམས་པར་གྱུར་ན། འོག་མ་འོག་མའི་སྡོམ་པའི་དངོས་པོ་དང་འགལ་བ་འདུ་བར་གྱུར་ཀྱང་འོག་མའི་ཉེས་པས་གོས་པར་མི་འགྱུར་བས། གོང་མའི་སྡོམ་པར་གནས་གྱུར་པ་ཡིན་ལ། སྡོམ་པ་དག་པར་གྱུར་པ་ཡང་ཡིན་ནོ། །དེ་དག་ནི་དམ་ཚིག་གི་ཆེ་བ་བསྟན་པ་སྟེ། ཆེ་བའི་ཡོན་ཏན་གྱི་ཕྱོགས་མཐའ་དག་ནི། འོག་ནས་ཡོན་ཏན་བསྟན་པའི་སྐབས་ནས་འཆད་དོ། །དེ་ལྟར་དམ་ཚིག་དང་སྡོམ་པ་ཐམས་ཅད་ནི་ཕུན་སུམ་ཚོགས་པར་གྱུར་པ། ཉོན་མོངས་པ་དང་ལས་ཀྱི་སྐྱོན་གྱིས་མ་གོས་ཤིང་ཅི་སྤྱད་ཀྱང་ཚོགས་ཆེན་པོར་འགྱུར་བའི་དམ་ཚིག་གི་དངོས་གཞི་ཉིད་གང་ཞེ་ན། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །ཞེས་བྱ་བ་ལ་སོགས་པ་གསུངས་ཏེ། དེ་ལ་ཐེག་ཆེན་སྤྱིའི་གཞུང་ལས། བྱང་ཆུབ་ཀྱི་སེམས་མི་བཏང་བ་དང་། དཀོན་ཅོག་གསུམ་ལ་རྟག་ཏུ་མཆོད་པར་གསུངས་ལ། གསང་སྔགས་ཕྱི་པའི་ཚུལ་ཁ་ཅིག་ལས་ཀྱང་དེ་དག་གི་སྟེང་དུ་རང་གི་ལྷག་པའི་ལྷ་མཆོད་ཅིང་སྒོམས་པར་གསུངས་སོ། །འདིར་ནི་དེ་དག་ཐམས་ཅད་ལྷར་སྒོམ་པ་གཅིག་པུར་འདུས་པར་གསུངས་ཏེ། ཇི་ལྟར་ཞེས་ན། དཀོན་ཅོག་གསུམ་ལ་ཡང་འདི་ཉིད་ཀྱི་དབུར་བཤད་པ་བཞིན་དུ། ཚུལ་ཐ་དད་དུ་བསྟན་པའི་དཀོན་ཅོག་དང་། ཚུལ་གཅིག་ཏུ་བསྟན་པའི་དཀོན་ཅོག་ཀྱང་ཡོད་དེ། དེ་ཡང་ཚུལ་གཅིག་ཏུ་བསྟན་པའི་དཀོན་ཅོག་ཏུ་འདུས་པར་ཤེས་པར་བྱ་སྟེ། འདི་ལྟར་སངས་རྒྱས་དང་དགེ་འདུན་ནི་ཡེ་ཤེས་ཀྱི་བྱེ་བྲག་ཡིན་ལ། ཆོས་ནི་དེའི་ཆོས་ཉིད་ཡིན་ལ། དེ་བས་ན་ཡེ་ཤེས་དང་ཆོས་ཉིད་ནི་ཀུན་རྫོབ་ཙམ་དུ་ཆོས་དང་ཆོས་ཅན་བདག་ཉིད་གཅིག་པ་ཡིན་པ་དང་། དོན་དམ་པར་སྤྲོས་པ་ཞི་བའི་ཕྱིར་གཉིས་སུ་མེད་དེ། དེ་ལྟ་བུའི་དོན་གྱིས་བྱང་ཆུབ་ཀྱི་སེམས་ཡིན་ནོ། །དེའི་རྟགས་ཀྱི་ཕྱག་རྒྱ་ནི་ལྷའི་སྐུ་སྟེ། དེ་བས་ན་ལྷའི་སྐུ་གཅིག་པུ་བསྒོམས་པས་གཞུང་ལས་གསུངས་པའི། དཀོན་ཅོག་གསུམ་དང་བྱང་ཆུབ་སེམས། །ལྷ་དང་བླ་མ་དེ་བཞིན་ཏེ། །ཞེས་གང་གསུངས་པའི་བླ་མ་མ་གཏོགས་པ་གསུམ་འདུས་པར་གྱུར་པ་ཡིན་ནོ། །ཇི་ལྟར་སྒོམ་ཞེ་ན། བདག་དང་གཞན་བྱང་ཆུབ་ཀྱི་རང་བཞིན་དབྱེར་མེད་པའི་ཕྱིར། བདག་པོའི་རྣལ་འབྱོར་དུ་བྱའོ། །ཞེས་གསུངས་པས། བདག་དང་འགྲོ་བ་ཐམས་ཅད་དང་སངས་རྒྱས་ཐམས་ཅད་ནི་རང་བཞིན་དབྱེར་མེད་པ་ཡིན་ལ། དེ་ལྟར་རྟོགས་པའི་སངས་རྒྱས་རྣམས་ཀྱིས་དེ་ལྟར་མ་རྟོགས་པའི་སེམས་ཅན་ཐམས་ཅད་སྐྱོབ་པའི་ཕྱིར་ཆོས་ཀྱི་དོན་དེ་ཉིད་མཚན་མར་བྱིན་གྱིས་བརླབས་པ་ནི་ལྷའི་སྐུ་ཡིན་ཏེ། དེ་བས་ན་བདག་གིས་ཀྱང་རང་གི་རང་བཞིན་ཇི་ལྟ་བ་ཡིན་པ་བཞིན་གོམས་ཤིང་ཀློང་དུ་གྱུར་པར་བྱ་བའི་ཕྱིར་དང་། སངས་རྒྱས་ཀྱི་མཛད་པ་ཉམས་སུ་བླངས་ཏེ་སེམས་ཅན་ཡོངས་སུ་སྨིན་པར་བྱ་བའི་ཕྱིར། བདག་ཉིད་མ་ནོར་བའི་རྣལ་འབྱོར་གྱི་དབང་ཕྱུག་ཆེན་པོར་མཉམ་པར་གཞག་པར་བྱ་བ་ཡིན་གྱི། ཕལ་པ་ལྟར་མ་ཐོབ་པའི་ཆོས་ཐོབ་པར་བྱ་བ་དང་། གཞན་གྱི་རྒྱུད་དུ་གཏོགས་པའི་ལྷ་མཉེས་པའི་བྱ་བའི་ཕྱིར་ཙམ་དུ་སྤྱོད་པ་ནི་མ་ཡིན་ནོ། །བླ་མ་བཀུར་བའང་ཐེག་པ་ཆེན་པོ་ཕ་རོལ་ཏུ་ཕྱིན་པའི་ཚུལ་ལས་ཀྱང་། དགེ་བའི་བཤེས་གཉེན་སངས་རྒྱས་དང་འདྲ་བར་བལྟའོ། །ཞེས་མི་གསུངས་ན། འཕགས་པ་དཀོན་ཅོག་ཉིད་དུ་ནི་མ་བཤད་དོ། །གསང་སྔགས་ཀྱི་ཚུལ་ལས་ནི། རྡོ་རྗེ་སློབ་དཔོན་དཀོན་ཅོག་བཞི་པར་བཤད་པ་ཡང་ཡོད། སངས་རྒྱས་དང་མཉམ་པར་བཤད་པ་ཡང་ཡོད། ལྷག་པར་བཤད་པར་ཡང་ཡོད་དེ། དེ་ལ་དཀོན་ཅོག་བཞི་པར་བཤད་པ་ནི། འདི་སྐད་དུ། སངས་རྒྱས་ཆོས་དང་དགེ་འདུན་དང་། །སློབ་དཔོན་ཡང་ནི་ཕྱི་མ་ཡིན། །དཀོན་ཅོག་བཞི་ཡི་སྦྱོར་བ་ཡིས། །ཞེས་གསུངས་པ་ལྟ་བུའོ། །མཉམ་པར་གསུངས་པའང་། བླ་མ་སངས་རྒྱས་ཀུན་དང་མཉམ། །ཞེས་གསུངས་པ་ལྟ་བུའོ། །ལྷག་པར་གསུངས་པའང་། ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱི་བསོད་ནམས་ཀྱི་ཕུང་པོས་ནི། རྡོ་རྗེ་སློབ་དཔོན་གྱི་བ་སྤུའི་བུ་ག་གཅིག་གི་གྲངས་སུ་ཡང་ཉེ་བར་མི་འགྲོའོ། །ཞེས་བྱ་བ་ལ་སོགས་པ་གསུངས་པ་ལྟ་བུ་སྟེ། དེ་ལྟར་ཚུལ་གསུམ་གྱི་སྒོ་ནས་བཀུར་བའི་ཚུལ་ཡང་རྣམ་པ་གསུམ་དུ་གྲགས་པ་ལས། གང་རུང་གཅིག་དགོས་ཏེ་བསྲུང་བར་བྱ་བ་ཡིན་ནོ། །བཀུར་བའི་ཡོན་ཏན་ཡང་གསང་སྔགས་ཀྱི་ཚུལ་ལས་ནི། ཞིང་དག་པ་རྣམས་ཀྱི་དམ་པ་རྡོ་རྗེ་སློབ་དཔོན་ཡིན་པར་གསུངས་སོ། །ཐེག་པ་ཆེན་པོ་ཕ་རོལ་ཏུ་ཕྱིན་པ་ལས་ནི། ཞིང་དག་པའི་དམ་པ་བྱང་ཆུབ་སེམས་དཔའ་དམ་པ་རྣམས་ཡིན་པར་གསུངས་སོ། །ཐེག་པ་ཐུན་མོང་ལས་ནི། ཞིང་དག་པའི་དམ་པ་འཕགས་པ་དཀོན་ཅོག་གསུམ་ཡིན་ཏེ། དེའི་འོག་ཏུ་ཕ་དང་མ་དང་ནང་བ་དང་ཆོས་སྨྲ་བའི་མཁན་པོ་དང་། སྐྱེ་མཐའི་བྱང་ཆུབ་སེམས་དཔའ་རྣམས་ཡིན་པར་གསུངས་ཏེ། འདི་ལྟ་བུ་ལ་སོགས་པ་ནི་གཞུང་སོ་སོ་ལས་བསོད་ནམས་ཀྱི་ཞིང་སོ་སོར་གྲགས་པ་ཡིན་ནོ། །སྔགས་དང་ཕྱག་རྒྱ་རྒྱུན་མི་གཅད། །ཅེས་བྱ་བ་ནི། འདིར་ཡང་ཡན་ལག་ལྔ་དང་ལྡན་པའི་བཟླས་བརྗོད་ཕྱག་རྒྱ་བསྲུང་བ་དང་བཅས་པ་སྟེ། དེ་ལ་ཡན་ལག་ལྔ་ནི་ལྷའི་དེ་ཁོ་ན་ཉིད་ལ་སོགས་པ་གོང་དུ་སྨོས་པར་ཟད་དོ། །ཟླ་གསང་ཐིག་ལེ་ལས་ནི། བདག་གི་དེ་ཉིད་མཉམ་བཞག་དང་། །དེ་བཞིན་ལྷའི་དེ་ཉིད་དང་། །སྔགས་དང་ཕྱག་རྒྱའི་དེ་ཉིད་ནི། །དེ་ཡིས་དཀྱིལ་འཁོར་མཆོག་ཏུ་འགྱུར། །ཞེས་དེ་བཞིན་ཉིད་རྣམ་པ་བཞིར་གསུངས་སོ། །གཞན་ལས་བདག་དང་ལྷ་དང་བཟླས་བརྗོད་གསུམ་དུ་ཡང་གསུངས་ཏེ། སྤྱིར་དེ་ཁོ་ན་ཉིད་ཀྱིས་བསྡུས་པའི་ཡན་ལག་དང་བཅས་པའི་བཟླས་བརྗོད་ལ་ཕྱག་རྒྱ་ཡང་ཚང་བར་ཤེས་པར་བྱའོ། །ཕྱག་རྒྱ་ཡང་བསམ་པ་དང་བཅས་པས་བསྡུས་པའི་ཕྱག་རྒྱ་རྣམས་ཡིན་ཏེ། དེ་བས་ན་ཕྱག་རྒྱ་དང་བཅས་པའི་བཟླས་བརྗོད་རྒྱུན་དུ་བྱ་བ་ནི། བརྩོན་པ་རབ་དང་ལྡན་པ་རྣམས་ཉིན་ཞག་གཅིག་ལའང་དུས་བཞི་དང་གསུམ་ལ་སོགས་པར་རྒྱུན་མི་གཅོད་པ་དང་། དེ་བཞིན་དུ་བརྩོན་པ་རབ་འབྲིང་གི་དབང་གིས། ཉིན་ཞག་རེ་རེ་ལའམ། དུས་བཟང་པོ་རྣམས་ལའམ། ཉ་སྟོང་གི་གསོ་སྦྱོང་གི་དུས་དང་། མཐའ་ན་ཡང་མཆོད་པ་ལོ་ཟླ་ལས་མི་འདའ་བར་བྱ་སྟེ། བདུད་རྩི་རྣམ་པ་ལྔ་དང་ལྡན་པའི་མཆོད་པའམ། བཟླས་བརྗོད་ཀྱི་དུས་སུ་འབྱོར་ཚད་དུ་བྱའོ། །ཕྱག་རྒྱ་བསྲུང་བའི་སྐབས་སུ་བླ་མེད་མི་སྤང་བའང་འདུ་རུ་རུང་ལ། དེ་བཞིན་དུ་གཅིག་ཤོས་སུའང་འདུ་རུ་རུང་སྟེ། འོན་ཀྱང་འདིའི་བྱེ་བྲག་ནི། ལྷ་མི་སྤང་བ་ནི། བྱང་ཆུབ་ཀྱི་སེམས་དང་། སྤྱིར་འཕགས་པ་དཀོན་ཅོག་གསུམ་དང་། རང་གི་ལྷག་པའི་ལྷར་གཅས་པ་རྣམས་སྤྱིར་བསྟེན་ཅིང་བསྙེན་པར་བྱ་བ་ཡུལ་དུ་གཟུང་བའི་དབང་དུ་གསུངས་པ་ཡིན་ལ། སྔགས་དང་ཕྱག་རྒྱ་ནི་ལྷ་དེ་མཉེས་པའི་ཐབས་སུ་གསུངས་པའི་དབང་ཡིན་ནོ། །རྣལ་འབྱོར་ཆེན་པོའི་གཞུང་ལས། མཉེས་པར་བྱ་བའི་ལྷ་དང་། མཉེས་པར་བྱེད་པའི་ཐབས་དང་། བྱེད་པ་པོའི་རྣལ་འབྱོར་པ་རྣམས་རང་བཞིན་ཐ་མི་དད་པར་འདོད་ཀྱི། ཐབས་ལ་མཁས་པའི་འཕྲུལ་པ་ཙམ་ལས་ལྷག་པར་བཀག་པ་མེད་དེ། ཀུན་ཏུ་བཟང་པོའི་རོལ་པ་ཙམ་དུ་ཤེས་པར་སྤྱད་ནའང་ཚོགས་ཆེན་པོར་འགྱུར་བར་ཟད་དོ། །ཡང་དག་ལམ་དུ་ཞུགས་ལ་བྱམས། །ཞེས་བྱ་བ་ནི། སྤྱིར་སངས་རྒྱས་ཀྱི་ཐེག་པ་ལ་ཞུགས་པ་ཐམས་ཅད་ཀྱང་བརྩེ་བས་གཟུང་བའི་གནས་ཀྱང་ཡིན་ལ། འཇིག་རྟེན་པའི་ལྷ་དང་མུ་སྟེགས་ཅན་དག་ཀྱང་སྨད་པར་མི་བྱ་སྟེ། བཏང་སྙོམས་ཀྱི་ཡུལ་དུ་གསུངས་པ་ཡིན་མོད་ཀྱི། ཁྱད་པར་དུ་ནི་ཐེག་པ་ཆེན་པོ་པ་རྣམས་ལ་མཐུན་པར་གནས་ཤིང་བརྩེ་བས་གཟུང་བར་བྱའོ། །ཞེས་པ་ཐེག་པ་ཆེན་པོའི་མདོ་སྡེ་དང་གསང་སྔགས་ཀྱི་ཚུལ་གཉིས་ཀ་ལས་གསུངས་སོ། །ཐེག་པ་ཆུང་ངུ་བ་རྣམས་ནི་སྤྱིར་བརྩེ་བས་བཟུང་བར་བྱ་བ་ཡིན་ཡང་། ལྷན་ཅིག་གནས་པར་མི་བྱ། ཞེས་བྱང་ཆུབ་སེམས་དཔའི་སྡོམ་པ་ལས་ཀྱང་འབྱུང་སྟེ། དགེ་སློང་དུལ་དང་ལུང་གནས་པ། །དགྲ་བཅོམ་སྙམ་དུ་སེམས་བྱེད་པ། །དེ་དང་ལྷན་ཅིག་མནལ་མི་བྱ། །ཞེས་གང་གསུངས་པ་ལྟ་བུའོ། །དགེ་སློང་རྣམས་ལ་ཐེག་པ་ཆེན་པོའི་བྱང་ཆུབ་སེམས་དཔའ་ཁྱིམ་པ་རྣམས་ཀྱིས་ཕྱག་བྱ་ཞིང་མཆོད་པའི་གནས་སུ་བྱ་བར་ནི་གསུངས་ཏེ། ཇི་ལྟར་དགེ་བསྙེན་ཆེན་པོ་ལི་ཙ་བྱི་དྲི་མ་མེད་པར་གྲགས་པ་ལྟ་བུ། སངས་རྒྱས་མ་གཏོགས་པར་སློབ་པ་གཞན་གྱིས་གླགས་མི་ཆོད་པ་ཁྱིམ་ན་གནས་པར་སྟོན་ཀྱང་། ཚང་པར་སྤྱོད་པ་ཕུན་སུམ་ཚོགས་པ། དེ་བཞིན་དུ་ཚུལ་ཁྲིམས་དང་ཤེས་རབ་དང་ཏིང་ངེ་འཛིན་དང་སྤངས་པ་ཕུན་སུམ་ཚོགས་པར་གྱུར་པ་ཡིན་ཡང་། དགེ་སློང་ཀུན་དགའ་བོ་ལ་སོགས་པ་སློབ་པ་རྒྱུན་དུ་ཞུགས་པ་ཡན་ཆད་ལ་ཕྱག་འཚལ་བར་བྱེད་པ་བཀུར་བར་བྱེད་བར་གསུངས་པ་ལྟ་བུའོ། །བྱ་བ་རྒྱུད་ཀྱི་ཚུལ་ལས་ཀྱང་། ཐེག་པ་ཆུང་ངུ་བ་རྣམས་དང་ལུང་པ་གཅིག་གི་ཆུ་ལ་ཡང་མི་བཏུང་ངོ་། །ཞེས་ལྷན་ཅིག་མི་གནས་བར་གསུངས་པ། སྔགས་པ་ཁྱིམ་པ་རྣམས་ཀྱིས་ཕྱག་བྱ་བར་གསུངས་ཏེ། འདི་སྐད་དུ། མཆོད་རྟེན་མཐོང་ན་བསྐོར་བ་བྱ། །དགེ་སློང་མཐོང་ན་ཕྱག་ཀྱང་འཚལ། །ལྷ་རྣམས་མཐོང་ན་མཆོད་པར་བྱ། །སློབ་དཔོན་མཐོང་ན་བཀུར་བར་བྱ། །ཞེས་གསུངས་པ་ལྟ་བུའོ། །རྣལ་འབྱོར་ཆེན་པོའི་རྒྱུད་དུའང་ཐེག་པ་ཆུང་ངུ་བ་དང་ཡུན་རིང་དུ་ལྷན་ཅིག་མི་གནས་པར་གསུངས་ཏེ། འདི་ལྟར་སྦོམ་པོའི་ལྟུང་བར་བཤད་པ་རྣམས་ཀྱི་ནང་ཉན་ཐོས་རློམ་སེམས་བྱེད་པའི་ནང་དུ་ཞག་བདུན་གནས་པ་དང་ཞེས་གསུངས་པ་ལྟ་བུ་སྟེ། དེ་དག་ལྟར་ན། ཡང་དག་ལམ་དུ་ཞུགས་ལ་བྱམས། །ཞེས་གང་གསུངས་པ་འདི་ནི། གཙོ་བོར་ཐེག་པ་ཆེན་པོ་ལ་ཞུགས་པ་ཡིན་ཏེ། དཔལ་གྱི་ཕྲེང་བའི་མདོ་ལས། བྱང་ཆུབ་སེམས་བརྟན་ཐེག་ཆེན་ཞུགས་ལ་བྱམས། །ཞེས་གསུངས་པ་ལྟ་བུའོ། །དེ་ལས་ཀྱང་གསང་སྔགས་རྡོ་རྗེ་ཐེག་པ་ལ་ཞུགས་པ་རྣམས་ནི་ཁྱད་པར་དུ་བརྩེ་བས་གཟུང་བའི་གནས་ཡིན་ལ། དེའི་ནང་རིམ་ནས་ཀྱང་བླ་མ་རྡོ་རྗེ་སློབ་དཔོན་གཅིག་གིས་བསྡུས་པ་རྣམས་ཡིན་ལ། ལྷག་པར་ཡང་དཀྱིལ་འཁོར་གཅིག་ཏུ་དབང་དང་དམ་ཚིག་ལྷན་ཅིག་མནོས་པ་རྣམས་ནི་ཁྱད་པར་དུ་གཉན་པ་ཡིན་ཏེ། འདི་དག་ལ་མིག་དང་འདྲ་བས་བརྩེགས་པས་གཟེམ་པར་བྱའོ། །ཞེས་གསུངས་སོ། །གསང་བའི་དོན་ཕྱིར་སྨྲ་མི་བྱ། །ཞེས་བྱ་བ་ནི། སྤྱིར་གསང་སྔགས་ཀྱི་ཚིག་ཐམས་ཅད་ཀྱང་ཕྱིར་གྱུར་པ་རྣམས་ལ་སྨྲ་བར་བྱ་བ་མ་ཡིན་མོད་ཀྱི། ཁྱད་པར་དུ་ནི་སྤྱི་གསང་བཞི། བར་གསང་བཞི་སྟེ་བརྒྱད། གསང་བར་འོས་པ་དང་། གཉེར་གཏད་པ་གཉིས་ཏེ་གསང་བའི་དམིགས་རྣམ་པ་བཅུ་ནི་ཤིན་ཏུའང་གསང་བར་བྱའོ། །ཞེས་བླ་མ་རྣམས་ཀྱི་མན་ངག་ནས་གསུངས་སོ། །དེ་ཡང་ཡུལ་དང་དུས་ཀྱི་དབང་གིས་བསྲུང་བའི་ཡུལ་དུ་མི་འགྱུར་བའང་ཡོད་དེ། དེ་ལ་སྤྱི་གསང་བཞིར་གྲགས་པའི་ཚོགས་ཀྱི་དཀྱིལ་འཁོར་དུ་ཚུལ་བཞིན་དུ་བསྒྲུབ་པ་གསང་བའི་ཕྱིར། ཚོགས་ཀྱི་རྡོ་རྗེ་སློབ་དཔོན་གསང་། འདུ་བའི་མཆེད་དང་ལྕམ་དྲལ་གསང་། འདུ་བའི་གནས་གསང་། འདུ་བའི་དུས་གསང་། ཞེས་གསུངས་པའང་ཚོགས་ཀྱི་དཀྱིལ་འཁོར་གསང་བ་ལ་སྤྱོད་པའི་ཡུལ་དང་དུས་ཀྱིས་ཕྱེ་བ་ཡིན་ཏེ། བསྒྲགས་པ་ལ་སྤྱོད་པས་ཕྱེ་བ་ནི་མ་ཡིན་ནོ། །བར་གསང་དུ་གྲགས་པའི་རང་གི་ལྷག་པའི་ལྷ་དང་། ལྷག་པའི་ལྷའི་སྔགས་དང་ཕྱག་རྒྱ་ལྷ་བུ་ནི་ཐམས་ཅད་དུ་ཡང་གསང་བར་བྱ་བ་ཡིན་ནོ། །སྤྱིའི་ལྷ་དང་་སྔགས་དང་ཕྱག་རྒྱ་ནི་གཞུང་འཆད་པའི་ཚེ་དེ་དག་ཀྱང་བཤད་པར་བྱ་བ་ཡིན་ནོ། །གཞུང་འཆད་པ་ཉིད་ཀྱང་དམ་ཚིག་མེད་པ་དང་། དམ་ལས་ལོག་པ་དང་། དམ་ཚིག་ཉམས་པ་རྣམས་ལ་སྨྲ་བར་བྱ་བ་མ་ཡིན་ནོ། །དམ་མ་འདྲེས་པ་རྣམས་ལ་བསྲེ་བར་བྱ་སྟེ་སྨྲ་ཞེས་གསུངས་སོ། །དེ་ཡང་ལོ་རྒྱུས་ལ་སོགས་པས་ཡིད་ཆེས་པ་ཞིག་ན་ནི་དོན་དང་བརྡ་ཞེས་བྱ་སྟེ། ལྷག་པར་བསྲེ་མི་དགོས་ཞེས་གྲགས་སོ། །དངོས་སུ་བསྲེ་དགོས་པ་ཞིག་ན་ཡང་གནས་དང་དུས་གཅིག་ཏུ་ལྷན་ཅིག་མང་པོ་བསྲེ་བ་བྱས་ན་ནི། གསང་བའི་དམ་ཚིག་སྤྱི་དང་འགལ་བས་གནས་དང་དུས་ཀྱིས་བར་ཆོད་པར་བྱས་ཏེ། ཁད་ཀྱིས་རིམ་པས་བསྲེ་ཞེས་འབྱུང་སྟེ། སློབ་མའི་དཀྱིལ་འཁོར་དུ་འཇུག་པའི་སྐབས་རྣམས་ནས་སློབ་མའི་གྲངས་ཀྱི་ངེས་པ་ཡང་དགོས་པ་འདི་ཉིད་ཡིན་པར་ཤེས་པར་བྱའོ། །གཞན་ཡང་ལྟ་བ་ཟབ་མོ་གསང་བ་དང་། སྤྱོད་པ་རླབས་པོ་ཆེ་གསང་བར་གསུངས་པ་ཡང་། ལྟ་བ་ཟབ་མོ་ནི་བློ་དམན་པ་རྣམས་ལ་གསང་བར་བྱ་བ་ཡིན་ལ། སྤྱོད་པ་རླབས་པོ་ཆེ་ནི་གསར་དུ་ཞུགས་པ་རྣམས་ལ་གསང་བར་བྱ་བ་ཡིན་ནོ། །དེ་ལྟར་དམ་ཚིག་ལྔ་པོ་འདི་ནི་ལྗོན་ཤིང་གི་རྩ་བ་དང་འདྲ་སྟེ། འདི་རྣམས་མེད་པར་གྱུར་ན་བྱང་ཆུབ་ཀྱི་རིགས་མེད་པར་འགྱུར་བས། འདི་ནི་རྩ་བ་ལྔ་རྣམས་ཏེ། །ཞེས་གསུངས་པ་ཡིན་ནོ། །དེ་ཡང་མདོར་བསྡུ་ན། ལྷ་མི་སྤང་བ་དང་། སྔགས་དང་ཕྱག་རྒྱ་རྒྱུན་མི་གཅད་པ་ནི། ཡོན་ཏན་ཁྱད་པར་ཅན་བསྒྲུབ་པའི་དམ་ཚིག་ཡིན་ལ། རྡོ་རྗེ་སློབ་དཔོན་དང་མཆེད་ལྕམ་དྲལ་ལ་བཀུར་སྟི་བརྩེ་བར་བྱ་བ་དང་། ཐུགས་དང་འགལ་བ་བསྲུང་བ་དང་། གསང་བ་གཞན་ལ་མི་སྨྲ་བ་རྣམས་ནི་དེའི་གྲོགས་སུ་གྱུར་པའི་སྒོ་གསུམ་ནས་བྱ་བ་མ་ཡིན་པ་བསྲུང་བར་བྱ་བ་གཙོ་བོར་བྱས་པ་ཡིན་པས་བསྲུངས་བའི་དམ་ཚིག་ཡིན་ཏེ། དེའི་ཕྱིར། བསྒྲུབ་དང་བསྲུང་བའི་དམ་ཚིག་མཆོག །ཅེས་གསུངས་པ་ཡིན་ནོ། །གཞུང་ཁ་ཅིག་ལས་ནི། དམ་ཚིག་རྩ་བ་ལྔ་པོ་དེ་སྐུ་གསུང་ཐུགས་ཀྱི་དམ་ཚིག་གསུམ་དུ་འདུས་པ་ཡང་ཡོད་དེ། རྡོ་རྗེ་སློབ་དཔོན་དང་མཆེད་ལྕམ་དྲལ་བཀུར་ཞིང་བརྩེ་བ་དང་མི་སྨད་པ་ནི། ཕན་འདོགས་པའི་དངོས་གཞི་ལུས་ཡིན་པ་དང་། གནོད་པ་བསྲུང་བའི་གཞི་ཡང་ལུས་ཡིན་ཏེ། དེ་ལྟར་ཡུལ་གྱི་གཙོ་བོ་ལུས་ཡིན་པས་སྐུའི་དམ་ཚིག་ཏུ་བསྡུའོ། །ལྷ་བསྒོམ་པ་དང་སྔགས་དང་ཕྱག་རྒྱ་རྒྱུན་མི་འཆད་པ་ནི་བཟླས་བརྗོད་ཀྱི་ཡན་ལག་ཏུ་གཏོགས་པ་ཡིན་པས་གཙོ་བོ་ངག་ཡིན་པའི་ཕྱིར་གསུང་ཕྱིར་གསུང་གི་དམ་ཚིག་ཏུ་བསྡུའོ། །གསང་བ་གཞན་ལ་མི་སྤེལ་བ་ནི་ཉེ་བར་བསྡམ་པར་བྱ་བ་ངག་ཡིན་ཡང་། གསང་བ་ཐུགས་ལ་གནས་པར་བྱ་བ་ཡིན་པས་ཡུལ་གྱི་གཙོ་བོ་སེམས་ཀྱི་ཆོས་ཡིན་པའི་ཕྱིར་ཐུགས་ཀྱི་དམ་ཚིག་ཏུ་བསྡུའོ། །སྤྱིར་རྩ་བའི་དམ་ཚིག་འདི་དག་ནི། དབང་པོ་ཐམས་ཅད་ཀྱི་རྩ་བ་སྲོག་གི་དབང་པོ་ཡིན་པ་བཞིན། དམ་ཚིག་འདི་དག་མ་ཉམས་ན་ཡན་ལག་ཉམས་པ་རྣམས་རིམ་གྱིས་སོར་ཆུད་པར་འགྱུར་རོ། །དེ་ལ་ཡན་ལག་གི་དམ་ཚིག་ནི་བཅུ་སྟེ། དེ་བསྟན་པའི་ཕྱིར། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་དོར་རོ། །ཡན་ལག་བཅུ་ཡི་དམ་ཚིག་མཆོག །ཡེ་ནས་དག་མཉམ་རྟོགས་པས་སྤྱད། །ཅེས་གསུངས་ཏེ། དེ་ལ་ཉོན་མོངས་པ་མི་སྤང་བའི་སྒོ་མང་དུ་གསུངས་པ་ཡང་ཡོད་མོད་ཀྱི། མདོར་བསྡུ་ན། རང་བཞིན་ཡོངས་སུ་ཤེས་པས་མི་སྤང་བ་དང་། ཐབས་ལ་མཁས་པས་ཟིན་པས་མི་སྤང་བ་དང་། ཉོན་མོངས་པ་ཆེན་པོ་མི་སྤང་བ་རྣམས་སུ་འདུས་པར་ཤེས་པར་བྱའོ། །དེ་ལ་རང་བཞིན་ཡོངས་སུ་ཤེས་པས་མི་སྤང་བ་ནི། ཉོན་མོངས་པའི་རང་བཞིན་ཉིད་རྣམ་པར་གྲོལ་བ་ཡིན་པ་དང་། ཉོན་མོངས་པ་དེ་བཞིན་གཤེགས་པའི་གདུང་ཡིན་པའི་ཕྱིར་སྤང་བའི་གནས་མ་ཡིན་ནོ། །ངེས་པའི་དོན་གྱི་མདོ་སྡེ་ལས་ཀྱང་འདི་ལྟར་གསུངས་ཏེ། དྲི་མ་མེད་པར་གྲགས་པས་བསྟན་པའི་མདོ་ལས་ཀྱང་། འདོད་ཆགས་དང་ཞེ་སྡང་དང་གཏི་མུག་རྣམས་སྤངས་པས་རྣམ་པར་གྲོལ་བ་མ་ཡིན་ནམ། སྨྲས་པ། གང་འདོད་ཆགས་དང་ཞེ་སྡང་དང་གཏི་མུག་སྤངས་པས་རྣམ་པར་གྲོལ་བའོ། །ཞེས་བསྟན་པ་ནི་ང་རྒྱལ་རྣམས་ལ་སྟེ། གང་ཡང་མེད་པ་རྣམས་ཀྱི་དོན་དུ་ནི་འདོད་ཆགས་དང་ཞེ་སྡང་དང་གཏི་མུག་གི་རང་བཞིན་ཉིད་རྣམ་པར་གྲོལ་བའོ། །ཞེས་གསུངས་པ་ལྟ་བུའོ། །ཉོན་མོངས་པ་དེ་བཞིན་གཤེགས་པའི་གདུང་དུ་བསྟན་པའང་། དེ་ཉིད་ལས། པདྨ་ནི་སྐམ་ས་དང་དགུན་དུག་ལས་མི་སྐྱེ་ཡི། ཆུ་དང་འདམ་ལས་སྐྱེའོ། །དེ་བཞིན་དུ་བླ་ན་མེད་པ་ཡང་དག་རྫོགས་པའི་བྱང་ཆུབ་ནི། ཉན་ཐོས་ཉོན་མོངས་པ་སྤངས་ཤིང་འདུས་མ་བྱས་མཐོང་རྣམས་ལ་མི་སྐྱེ་ཡི། འཇིག་ཚོགས་ལ་ལྟ་བ་རི་རབ་ལྟ་བུ་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བས། དེའི་ཕྱིར་ཉོན་མོངས་པ་ནི་དེ་བཞིན་གཤེགས་པའི་གདུང་ངོ་། །ཞེས་གསུངས་པ་ལྟ་བུའོ། །གསང་སྔགས་ཀྱི་ཚུལ་ལས་ཀྱང་། ཉོན་མོངས་པ་ཉིད་རང་བཞིན་གྱིས་རྣམ་པར་དག་པ་ཡིན་པས་སྤང་དུ་མེད་པ་དང་། ཉོན་མོངས་པ་ལྔ་པོ་ཉིད་རིགས་ལྔའི་སངས་རྒྱས་ཀྱི་རིགས་དང་རང་བཞིན་དང་མཛད་པ་ཡིན་པ་དང་། དེ་བཞིན་དུ་སངས་རྒྱས་ལྔ་ཡང་ཉོན་མོངས་པ་ལྔའི་རིགས་དང་རང་བཞིན་ཡིན་པས། ཉོན་མོངས་པ་སྤངས་ནས་སངས་རྒྱས་བསྒྲུབ་ཏུ་མེད་དེ། ཉོན་མོངས་པ་ལྔ་ཉིད་གདོད་མ་ནས་སངས་རྒྱས་ལྔ་ཉིད་ཡིན་པ་ནི། གོང་དུ་རིགས་ལྔའི་སངས་རྒྱས་ཀྱི་སྐབས་སུ་རྒྱས་པར་བཤད་པ་བཞིན་ནོ། །དེ་བས་ན་ཉོན་མོངས་པའི་རང་བཞིན་ཤེས་པར་བྱས་ན། དོན་དམ་པ་དང་ཀུན་རྫོབ་ཀྱི་བདེན་པ་གཉིས་ཀའི་ཚུལ་དུ་སངས་རྒྱས་ཉིད་ཡིན་པས་སྤང་བར་བྱ་བ་གང་ལ་ཡོད་ཀྱི་རྟག་ཏུ་བསྟེན་ཅིང་བསྒྲུབ་པར་བྱ་བ་ཉིད་ཡིན་ནོ། །ཐབས་ལ་མཁས་པས་ཟིན་པས་མི་སྤང་བ་ནི། ཕ་རོལ་ཏུ་ཕྱིན་པའི་ཐེག་པའི་ཚུལ་ལས་ཀྱང་གསུངས་ཏེ། འདི་ལྟར་ཞིང་པ་རྣམས་ཀྱི་ཐལ་བ་དང་ལུད་དང་ལྗན་ལྗིན་རྣམས་ནི་འབྲས་ཀྱི་ཞིང་ངམ་ཏིལ་གྱི་ཞིང་རྣམས་ལ་ཕན་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་རྣམས་ཀྱི་ཉོན་མོངས་པ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཕན་པར་འགྱུར་རོ། །ཞེས་གསུང་པ་ལྟ་བུ་སྟེ། འདི་ལྟར་འདོད་ཆགས་ནི་ཉེ་བར་ལེན་པའི་ཕུང་པོ་ལྔ་ལ་ཞེན་ཅིང་ལྷག་པར་ཆགས་པའི་མཚན་ཉིད་དེ། འདི་མེད་པར་གྱུར་ན་སྦྱིན་པ་བཏང་བས་ཀྱང་བསོད་ནམས་ཀྱི་ཚོགས་སུ་མི་འགྱུར་། དེ་བཞིན་དུ་ཚུལ་ཁྲིམས་དང་བཟོད་པས་ཀྱང་ཚོགས་ཆེན་པོར་མི་འགྱུར་ཏེ། འདི་ལྟར་སྦྱིན་པ་ཡང་། གང་ལ་ཡོངས་སུ་བཏང་དཀའ་བ། །དེ་ནི་མཆོག་ཏུ་བཤད་པ་ཡིན། །ཞེས་བྱ་བ་ལ་སོགས་པ་ལྟ་བུ་ནས། བཟོད་པའང་། ཆགས་བཅས་ཡན་ལག་བཅད་ཀྱང་ནི། །མི་འཁྲུག་བཟོད་པ་ཡོངས་སུ་རྫོགས། །ཞེས་གསུངས་པ་ལ་སོགས་པ་ལྟ་བུའོ། །གཞན་ཡང་། འདོད་ཆགས་མེད་ན་འཇིག་ཚོགས་ལ་ལྟ་བ་མི་འབྱུང་ངོ་། །བདག་དང་བདག་གིར་ལྟ་བ་མེད་ན་སྙིང་སྟོབས་མི་འབྱུང་སྟེ། དེ་བས་ན་འཇིག་ཚོགས་ལ་ལྟ་བ་རི་རབ་ལྟ་བུ་ཡོད་པ་རྣམས་ལ་སྙིང་སྟོབས་རི་རབ་ལྟ་བུ་སྐྱེ་བར་འགྱུར་ཏེ། སྙིང་སྟོབས་རི་རབ་ལྟ་བུ་བསྐྱེད་པའི་གང་ཟག་རྣམས་ཀྱིས་ནམ་མཁའི་དབྱིངས་ཀྱི་མཐའ་ཀླས་པའི་སེམས་ཅན་ཐམས་ཅད་བདག་གཅིག་པུས་གྲོལ་ཞིང་ཐར་བར་བྱའོ། །དབུགས་དབྱུང་བར་བྱའོ། །ཡོངས་སུ་མྱ་ངན་ལས་བཟླ་བར་བྱའོ། །ཞེས་སེམས་བསྐྱེད་པར་ནུས་པར་འགྱུར་རོ། །གཞན་ཡང་བྱང་ཆུབ་སེམས་དཔའ་རྣམས་སྲིད་པ་ཐམས་ཅད་དུ་སྨོན་ལམ་གྱིས་ལུས་གྲུབ་པར་བྱས་ནས། སེམས་ཅན་ཐམས་ཅད་ཀྱི་དོན་བྱེད་པ་ན་ཉོན་མོངས་པའི་བརླན་གྱིས་མ་བརླན་ན། སྲིད་པའི་མྱུ་གུ་མངོན་པར་འགྲུབ་པའི་ཐབས་མེད་པས་དེ་བས་ན་འདི་སྤང་བར་མི་བྱ་སྟེ། ཐེག་པ་ཆེན་པོ་ལ་ཞུགས་པ་རྣམས་ཀྱིས་ཉོན་མོངས་པ་རྣམས་ནི། ཕ་མ་དང་དགེ་བའི་བཤེས་གཉེན་ལྟ་བུར་བལྟ་བར་བྱ་བ་ཡིན་ནོ། །གསང་སྔགས་ཀྱི་ཚུལ་ལས་ཀྱང་འདི་སྐད་དུ། སྔགས་ཀྱིས་ཡོངས་སུ་ཟིན་པའི་ནད། །ཀུན་ལ་གནོད་པར་བྱེད་མི་ནུས། །དེ་བཞིན་ཐབས་ཀྱིས་ཟིན་པ་ཡིས། །དུག་གསུམ་སྡུག་བསྔལ་གདོད་མི་འགྱུར། །ཞེས་བྱ་བ་ལ་སོགས་པ་གསུངས་པ་ལྟ་བུའོ། །དེ་ལ་ཉོན་མོངས་པས་གནོད་པར་མི་འགྱུར་བ་འདི་ལྟ་བུ་ནི་བྱང་ཆུབ་སེམས་དཔའ་རྣམས་ལ་ཐུན་མོང་དུ་གྱུར་པ་ཡིན་ནོ། །དེ་ལ་གསང་སྔགས་ཀྱི་ཚུལ་དུ་ཇི་ལྟར་ཉོན་མོངས་པ་རྣམས་ཀྱིས་ཕན་འདོགས་པར་བྱེད་ཅེ་ན། འདི་སྐད་དུ། འཇིག་རྟེན་ཆགས་པ་མེད་པས་འདུལ། །ཕྱག་རྒྱ་གྲུབ་པ་ཆགས་ལས་བྱུང་། །ཞེས་གསུངས་པ་ལྟ་བུ་དང་། དེ་བཞིན་གཤེགས་པ་རྣམས་མཉེས་པར་བྱེད་པའི་ཚེ་ཡིད་ལ་བྱེད་པ་ནི་འདོད་པ་ཡིན་པར་གསུངས་པ་དང་། དེ་བཞིན་གཤེགས་པའི་རིགས་མཉེས་པར་བྱེད་པའི་ཚེ་ཆགས་པ་ཡིན་པར་གསུངས་པ་ལྟ་བུའོ། །དེ་ལ་ཇི་ལྟར་ན་ཕྱག་རྒྱ་གྲུབ་པ་ཆགས་ལས་བྱུང་ཞེ་ན། ཕྱགས་རྒྱའི་དངོས་གྲུབ་ཀྱང་རྣམ་པ་གཉིས་ཡིན་ཏེ། རྣལ་འབྱོར་ཕྱི་པའི་ཚུལ་དུ་གྲགས་པ་དང་། ནང་པའི་ཚུལ་དུ་གྲགས་པའོ། །དེ་ལ་ཕྱིའི་ཚུལ་ལྟར་ན་ཡང་། དམ་ཚིག་ཅན་གྱི་སྐྱེ་བོས་བརྟགས་པའི་ལྷར་བཤད་པ་ཕྱག་རྒྱ་རྣམས་ལ་ཡིད་ཆགས་པར་མ་གྱུར་ན་དངོས་གྲུབ་ཐོབ་པར་མི་འགྱུར་རོ། །ནང་གི་ཚུལ་ལྟར་ན་ཡང་། གཟུངས་ཀྱི་ཕྱག་རྒྱ་ལ་ཡིད་ཤིན་ཏུ་ཆགས་པར་མ་གྱུར་ན། ཡེ་ཤེས་དང་དངོས་གྲུབ་ཀྱི་བྱེད་པོ་འགྲུབ་པར་མི་འགྱུར་ཏེ། དེ་བས་ན་ཆགས་པ་ཉིད་མི་བསྟེན་དུ་མི་རུང་བའི་སྐབས་ཀྱང་ཡོད། དེ་དག་ལ་སོགས་པའི་ཉོན་མོངས་པ་རྣམས་ཀྱང་ཡོན་ཏན་གྱི་ཆོས་ཀྱི་རྐྱེན་དུ་གནས་པ་ཡང་ཡིན་ལ། ཉེས་སྐྱོན་གྱི་ཆོས་ཀྱི་རྐྱེན་དུ་ཡང་གནས་པ་ཡིན་པས། རྐྱེན་ཐུན་མོང་བ་འདི་ལ་མཚན་ཉིད་བྱེ་བྲག་ཏུ་གྱུར་པ་མེད་དེ། དེ་བས་ན་ཐབས་ལ་མཁས་པས་ཟིན་པ་ཙམ་དུ་ཟད་ཀྱི། རང་བཞིན་བྱེ་བྲག་ཏུ་གྱུར་པ་མེད་པ་ལ་སྤང་བར་བྱ་བའི་ཕྱོགས་ཀྱི་ཉོན་མོངས་པའི་རིགས་གུད་ཞིག་ན་ཡོད་པ་ཡང་མ་ཡིན་ནོ། །དེ་ལ་ཉོན་མོངས་པ་ཆེན་པོ་མི་སྤང་ཞེས་བྱ་བ་ནི། གཏི་མུག་ནི་རྣམ་པར་སྣང་མཛད་ཀྱི་དམ་ཚིག་སྟེ། ཆོས་ཀྱི་དབྱིངས་ཀྱི་ངང་དུ་ཤེས་རབ་ཉིད་གྲུབ་པ་མེད་པས་རིག་པ་མེད་པར་རོ་གཅིག་པའི་ཕྱིར་རོ་། །ཞེ་སྡང་ནི་མི་འཁྲུགས་པའི་དམ་ཚིག་སྟེ། གདུག་པ་ཅན་འདུལ་བའི་བདག་ཉིད་དོ། །ང་རྒྱལ་ནི་རིན་ཅེན་འབྱུང་ལྡན་གྱི་དམ་ཚིག་སྟེ། ཆོས་ཉིད་མཉམ་པ་ཉིད་ལ་བསྲན་འཛུགས་པའི་བདག་ཉིད་དོ། །འདོད་ཆགས་ནི་སྣང་བ་མཐའ་ཡས་ཀྱི་དམ་ཚིག་སྟེ། ཆོས་ཐམས་ཅད་ལ་དབང་སྒྱུར་བའི་བདག་ཉིད་དོ། །ཕྲག་དོག་ནི་གདོན་མི་ཟ་བར་གྲུབ་པའི་དམ་ཚིག་སྟེ། ཆོས་མཉམ་པ་ཉིད་དུ་མ་རྟོགས་ཤིང་དངོས་པོར་ལྟ་བ་ལ་ཆེར་ཞེན་པ། འཁོར་བའི་གཡུལ་ལས་རྒྱལ་བར་བྱེད་པས་བདུད་སྡིག་ཅན་དང་། མ་ཏང་ཀ་རུ་ཏྲ་ལ་སོགས་པའི་མཐུ་དཔུང་ཕུན་སུམ་ཚོགས་པ་རྣམས་ལ་ཐུགས་རྗེ་ཆེན་པོས་མི་བཟོད་པའི་བདག་ཉིད་དོ། །འདི་དག་ནི་འབྲས་བུའི་ཆོས་ཏེ། ཡོན་ཏན་ཆེན་པོའི་བདག་ཉིད་ཡིན་པའི་ཕྱིར་མི་སྤང་བའི་དམ་ཚིག་གོ། །མདོར་བསྡུ་ན་གཞི་དང་ལམ་དང་འབྲས་བུ་གསུམ་གྱི་སྒོ་ནས་མི་སྤང་བའི་དམ་ཚིག་ཏུ་བསྟན་པ་སྟེ། དེ་གསུམ་ཡང་རང་བཞིན་བྱེ་བྲག་ཏུ་གྱུར་པ་མེད་དེ། དཔེར་ན་སྔ་དྲོའི་དུས་ཀྱི་སྨིག་སྒྱུ་དང་། ཉི་མ་གུང་གི་སྨིག་སྒྱུ་ལ་སྣང་བ་ཐ་དད་ཀྱང་རང་བཞིན་བྱེ་བྲག་ཏུ་གྱུར་པ་མེད་ལ། རང་བཞིན་དེ་ཡང་ཉི་མ་མ་ཤར་བ་དང་། ཉི་མ་ནུབ་པའི་གནས་སྐབས་དག་ལ་ཡང་རང་བཞིན་བྱེ་བྲག་ཏུ་གྱུར་པ་མེད་དེ། གང་གི་ཕྱིར་སྨིག་སྒྱུ་ལ་རྟེན་གྱི་འབྱུང་བ་ཆེན་པོ་མེད་པས། ཇི་ལྟར་སྣང་བ་དེ་ལྟར་རྫས་སུ་མེད་པ་དེའི་ཕྱིར་རང་བཞིན་ཏུ་བྱེ་བྲག་ཏུ་གྱུར་པ་མེད་དོ། །དེ་བཞིན་དུ་ཉོན་མོངས་པ་ཐམས་ཅད་ཀྱང་རྟེན་མེད་པའི་ཕྱིར་ཇི་ལྟར་སྣང་བ་དེ་ལྟར་རྫས་སུ་མེད་དེ། རྫས་སུ་མེད་པ་ནི་བླང་བ་དང་དོར་བར་བྱ་བ་མ་ཡིན་པས་མི་སྤང་བའི་དམ་ཚིག་ཅེས་གསུངས་པ་ཡིན་ནོ། །བདུད་རྩི་རྣམ་པ་ལྔ་དང་དུ་བླང་བར་གསུངས་པ་ཡང་ཆོས་ཐམས་ཅད་མཉམ་ཉིད་ཀྱི་རང་བཞིན་ཡིན་པས། གཙང་སྨེ་གཉིས་སུ་མེད་པས་དོར་བར་བྱ་བ་མ་ཡིན་པ་དང་། གོང་དུ་བསྟན་པ་བཞིན་དུ་ཇི་ལྟར་སྣང་བ་ཐམས་ཅད་སངས་རྒྱས་ལྔའི་རང་བཞིན་ཡིན་པས་དང་དུ་བླང་བར་བྱ་བ་ཡིན་པ་དང་། གཙང་སྨེ་གཉིས་སུ་མ་ཕྱེ་བས་ཆོས་མཉམ་པ་ཉིད་ཉམས་སུ་མྱོང་བའི་གཉའ་གནོན་དུ་འགྱུར་ཞིང་བརྟུལ་ཞུགས་ཀྱི་སྤྱོད་པས་དངོས་གྲུབ་མྱུར་དུ་ཐོབ་པའི་རྒྱུར་འགྱུར་བ་དང་། དངོས་པོ་རྣམས་ཀྱི་ངོ་བོ་ཉིད་ཀྱིས་ཐབས་ལ་མཁས་པས་ཟིན་ན་འཇིག་རྟེན་གྱི་བདུད་རྩིར་འགྱུར་བའི་ནུས་པ་ཡོད་པས། དེ་བས་ན་རང་བཞིན་གྱིས་གྲུབ་པའི་རྫས་སུ་གྱུར་པ་སྟེ། དཔེར་ན་སྐྱེ་བ་བདུན་པའི་ཤ་བཞིན་ནོ། །གཞན་ཡང་དངོས་གྲུབ་ནི་བཀའ་བཞིན་བྱས་པའི་མཚན་ཉིད་ལས་འབྱུང་བས། དེའི་ཕྱིར་བདུད་རྩི་རྣམ་པ་ལྔ་དང་དུ་བླང་བར་བྱ་སྟེ། ཐ་ན་ཡང་ཉ་སྟོང་གི་གསོ་སྦྱོང་དུས་དང་ལོ་ཟླའི་དུས་སུ་མཆོད་པ་ལ་བདུད་རྩིའི་མཆོད་པ་མི་གཅག་གོ། །ཡེ་ནས་དག་མཉམ་རྟོགས་པས་སྤྱད། །ཅེས་པ་ནི། རྟོགས་པ་ཀློང་དུ་གྱུར་ནས་ནི་སྤྱད་ཀྱང་མི་དགོས་ལ། མ་རྟོགས་པར་སྤྱད་ན་ནི་འགྲོ་བ་ཆུད་ཟ་སྟེ། དེ་བས་རྟོགས་པའི་ཉམས་དང་སྦྱར་ནས་དེའི་གྲོགས་སུ་ཅི་རིགས་སུ་བསྟེན་པར་བྱ་བ་ཡིན་ཏེ། དཔེར་ན་རལ་གྲིའི་གར་ཐབས་སློབ་པ་དང་པོ་ཤིང་ལ་སློབ། དེ་ནས་ཞ་ཉེའི་རལ་གྲི་ལ་སློབ། དེ་ནས་རལ་གྲི་ཉིད་ལ་སློབ་པ་བཞིན་དུ་ལས་དང་པོ་པའི་རྣལ་འབྱོར་པས་མཉམ་པའི་མཛད་སྤྱོད་ཉམས་སུ་བླང་བ་ཡང་། ལས་ཡང་བ་རྣམས་ལས་རིམ་གྱིས་སློབ་པའི་དོན་ནོ། །དམ་ཚིག་ཉམས་པའི་སྐྱོན་མདོར་བསྟན་པའི་ཕྱིར། སྲུང་ཞིང་བསྒྲུབ་པའི་དམ་ཚིག་ལྔ། །རྩ་བ་ཡིན་ཏེ་རིགས་མེད་འགྱུར། །ཞེས་བྱ་བ་ལ་སོགས་པ་སྨོས་ཏེ། དེ་ལ་རྩ་བའི་དམ་ཚིག་སྟེ། འདས་ན་ནི་བྱང་ཆུབ་ཀྱི་རིགས་རྒྱུན་འཆད་པར་འགྱུར་པས་རྩ་བ་ཞེས་གསུངས་པ་ཡིན་ལ། ཡན་ལག་ཉམས་ན་ནི་འབྲས་བུ་མྱུར་དུ་མི་འབྱུང་བས་ཡན་ལག་ཅེས་གསུངས་པ་ཡིན་ནོ། །ད་ནི་དམ་ཚིག་གི་ཡོན་ཏན་བསྟན་པའི་ཕྱིར། མཉམ་ལ་མཉམ་པར་སྦྱོར་བ་ཡིས། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །འདས་ནས་སངས་རྒྱས་མ་ཡིན་ནོ། །ཞེས་གསུངས་ཏེ། འདིས་ནི་ཡོན་ཏན་བསྟན་པའི་ཤུགས་ཀྱིས་ངེས་པའི་ཚིགས་ཀྱང་བརྗོད་པ་ཡིན་ཏེ། འདི་ལྟར་ས་མ་ཡ་ཞེས་བྱ་བའི་སྒྲས། ས་མ་ནི་མཉམ་པ། ཡ་ནི་སྦྱོར་བ་སྟེ། ཆོས་མཉམ་པ་ཉིད་ཀྱི་དོན་ལ་འདིས་སྦྱོར་བར་བྱེད་པས་ན་དམ་ཚིག་ཅེས་བྱའོ། །ཡང་ན་ས་མ་ནི་མཉམ་པའམ་རྫོགས་པ། ཡ་ནི་ཐོབ་པ་སྟེ། ཆོས་མཉམ་པ་ཆེན་པོ་དང་རྫོགས་པ་ཆེན་པོའི་དོན་འདིས་ཐོབ་པར་བྱེད་པར་འགྱུར་བས་དམ་ཚིག་ཅེས་བྱའོ། །དེ་བས་ན་འདི་ལྟ་བུའི་ངང་ལ་གནས་ན། མི་ཞེས་བྱ་བ་སངས་རྒྱས་ཡིན། །བཅོམ་ལྡན་འདས་ནི་གུད་ན་མེད། །ཅེས་གསུམ་པ་ལྟ་བུ་ཡིན་ལ། འདས་ནས་སངས་རྒྱས་མ་ཡིན་ནོ། །ཞེས་གསུངས་པ་ཡིན་ནོ། །ད་ནི་དམ་ཚིག་ཉམས་པ་དང་ལྷན་ཅིག་འགྲོགས་པའི་སྐྱོན་སྟོན་ཏེ། དེ་ལ། རྩ་བ་ཉམས་པའི་འཆལ་པ་དག །གསོ་ལ་ཉེ་བར་མི་བརྩོན་དང་། །ཞེས་གསུངས་པ་ལ། ཉམས་པ་གསོ་བའི་ཐབས་ནི། སྐུའི་དམ་ཚིག་ཉམས་ན་མཐོང་བའི་ཆོས་ལ་སོར་བཞུགས་པར་གསུངས་ཏེ། སྐྱེ་ཤིས་བར་ཆོད་ཕན་ཆད་ནི་སྡིག་པ་ཅུང་ཟད་འབྲེལ་བའི་ཐབས་ནི་ཡོད་ཀྱི། རྩ་བ་ནས་དབྱུང་བའི་ཐབས་ནི་མེད་ཅེས་གསུངས་སོ། །གསུང་གི་དམ་ཚིག་ཉམས་པར་གྱུར་ན་ནི། ཇི་ལྟར་ཉམས་པ་སོར་གཞུག་པར་གསུངས་སོ། །ཡང་ན་ཤེས་རབ་དང་ཏིང་ངེ་འཛིན་གྱིས་སྨྲ་གསུང་ཐམས་ཅད་ནི་གསང་སྔགས་ཀྱི་ཚིག་ཏུ་རྟོགས་ཤིང་བསྒོམ་པར་བྱའོ། །ཐུགས་ཀྱི་དམ་ཚིག་ཉམས་པར་གྱུར་ན་ནི། དངོས་གྲུབ་བསྐང་བའི་ཐབས་ནི་མེད་དེ། འོན་ཀྱང་ཤེས་རབ་དང་ཏིང་ངེ་འཛིན་གྱིས་ཆོས་ཐམས་ཅད་གཉིས་སུ་མེད་པར་རྟོགས་ཏེ་དེ་ལ་གོམས་པར་བྱས་པ་དང་། སྙིང་རྗེ་ཆེན་པོས་སེམས་ཅན་ཐམས་ཅད་བྱང་ཆུབ་ཀྱི་སྙིང་པོ་ཅན་དུ་བརྟགས་ཏེ་སྙིང་རྗེའི་ཞིང་དུ་མ་གྱུར་པ་མེད་པར་ཡུན་རིང་དུ་དམིགས་པས་བསྐང་ངོ་། །བདག་ཉིད་ཉམས་པར་འགྱུར་བཞིན་འདི་ལྟ་བུ་གསོ་བའི་ཐབས་ལ་ཡང་བརྩོན་པར་མི་བྱེད་པ་རྣམས་དང་ནི་སྐད་ཅིག་ཙམ་ཡང་སྨྲ་བར་བྱ་བ་མ་ཡིན་ན། དེའི་མགོན་བྱ་ཞིང་དེ་དང་ལྷན་ཅིག་མནལ་བ་ལྟ་ཅི་སྨོས་ཏེ། འདི་ནི་ཟླས་ཉམས་པའི་སྐྱོན་ཕོག་པ་ཞེས་བྱ་སྟེ། ཇི་ལྟར་སྤྲང་པོ་བསོད་ནམས་བརླག་པ་གཅིག་གིས་ལྷན་ཅིག་གནས་པའི་སྤྲང་པོ་ཐམས་ཅད་ཀྱི་འཚོ་བའི་སྒོ་བཀག་པར་མདོ་ལས་གསུངས་པ་བཞིན་ནོ། །དེ་ལ་སོགས་པ་ནི་དམ་ཚིག་ཉམས་པའི་སྐྱོན་རྣམས་རྒྱས་པར་བསྟན་པ་ཡིན་ནོ། །དམ་ཚིག་འདི་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །ཞེས་བྱ་བ་ནི་དམ་ཚིག་གི་རང་བཞིན་བསྟན་པ་ཡིན་ཏེ། ཇི་ལྟར་ཞེ་ན། དམ་ཚིག་རྣམས་ཀྱི་རང་བཞིན་ནི་སྐུ་གསུང་ཐུགས་རྡོ་རྗེ་ལྟ་བུ་རྣམ་པ་གསུམ་གྱི་རང་བཞིན་ཏེ། དེ་ནམ་ཡང་ངང་ཚུལ་འདི་ལས་མི་འདའོ། །དེ་བཞིན་དུ་ཚུལ་ཁྲིམས་དང་སྡོམ་པ་ཐམས་ཅད་ཀྱང་ལུས་ངག་ཡིད་གསུམ་གྱི་བྱ་བ་དང་བྱ་བ་མ་ཡིན་པ་ལ་འཇུག་པ་དང་ལྡོག་པའི་མཚན་ཉིད་ཙམ་དུ་འདུས་པ་ཡིན་ཏེ། དེ་དག་ཐམས་ཅད་ཀྱང་བྱ་བ་ཆེན་པོ་འདིར་འདུས་པ་ཡིན་པས། དེ་བས་ན་རྡོ་རྗེ་ལྟ་བུ་རྣམ་པ་གསུམ་གྱི་མཚན་ཉིད་འདི་ནི་ལུས་ངག་ཡིད་གསུམ་གྱི་རང་བཞིན་ཡང་ཡིན་ལ། དེ་ལ་གནས་པའི་མཚན་ཉིད་ཀྱང་ཡིན་ནོ། །དུས་གསུམ་གྱི་སངས་རྒྱས་ཐམས་ཅད་ཀྱང་སྐུ་གསུང་ཐུགས་རྡོ་རྗེ་ལྟ་བུའི་མཚན་ཉིད་ཙམ་ལས་གུད་ན་མེད་དེ། དེ་བས་ན་དམ་ཚིག་འདི་ནི་སེམས་ཅན་རྣམས་ཀྱི་ལུས་ངག་ཡིད་གསུམ་གྱི་རང་བཞིན། སངས་རྒྱས་ཐམས་ཅད་ཀྱི་བདག་ཉིད། ཆོས་ཐམས་ཅད་ཀྱི་སྲོག །བསླབ་པ་ཐམས་ཅད་ཀྱི་དམ་པར་བསྟན་པ་ཡིན་ནོ། །དམ་ཚིག་གི་རང་བཞིན་བསྟན་པ་དེ་ཉིད་ཀྱང་དམ་ཚིག་གི་ཡོན་ཏན་རྒྱས་པར་བསྟན་པའི་ཁོངས་སུ་འདུའོ། །ད་ནི་དམ་ཚིག་གི་རབ་ཏུ་དབྱེ་བའམ། རབ་ཏུ་སྤྲོས་པའི་དགོས་པ་དང་བཅས་པར་བསྟན་པའི་ཕྱིར། རྩ་བའི་དམ་ཚིག་ལྔ་ལ་ནི། གཅིག་ལའང་གཉིས་དང་བཅུ་ཕྲག་གསུམ། །ཞེས་བྱ་བ་ལ་སོགས་པ་སྨོས་ཏེ། དེ་ལ་རྩ་བའི་དམ་ཚིག་གཅིག་ལའང་སུམ་ཅུ་རྩ་གཉིས་སུ་ཕྱེ་བས་བརྒྱ་དྲུག་ཅུར་འགྱུར་ལ། ཡན་ལག་གི་དམ་ཚིག་གཅིག་ལའང་ཉི་ཤུར་ཕྱེ་བས་ཉིས་བརྒྱར་འགྱུར་ཏེ་བསྡོམས་ན་སུམ་བརྒྱ་དྲུག་ཅུར་འགྱུར་བས། སྤྱིར་དམ་ཚིག་སུམ་བརྒྱ་དྲུག་ཅུ། རྩ་བ་བཅོ་ལྔ་ཞེས་བསྟན་པའི་དབང་དུ་གསུངས་པ་ཙམ་ཡིན་ནོ། །དེ་ལ་རྣམ་གྲངས་འདི་དག་ཀྱང་མཚན་ཉིད་སོ་སོའི་དབྱེ་བའི་རྣམ་གྲངས་གཞག་པ་ནི་མ་ཡིན་གྱི། ཡོན་ཏན་རྩིས་ལས་འདས་པའི་རྣམ་གྲངས་ཡིན་པས་ལྷག་པར་མཚན་ཉིད་གུད་དུ་དབྱེ་བ་མེད་དོ། །དེ་ལ་སྔོན་གྱི་སློབ་དཔོན་དབུས་ལུགས་པའི་བཤད་པ་དམ་ཚིག་ཐམས་ཅད་ནི་ལྷའི་རང་བཞིན་ཡིན་ལ། ལྷ་ཐམས་ཅད་ཀྱི་རྩ་བ་ནི་ཐབས་དང་ཤེས་རབ་གཉིས་ཡིན་པས་དེ་ལྟར་རྩ་བ་གཉིས། དེའི་ཡོན་ཏན་ནི་སྐུ་གསུང་ཐུགས་རྡོ་རྗེ་ལྟ་བུ་རྣམ་པ་གསུམ་ཡིན་པས་དེ་ལྟར་ཡན་ལག་དྲུག །དེའི་ཆ་ཤས་ནི་སྐུ་གསུང་ཐུགས་ཡོན་ཏན་ཕྲིན་ལས་རྣམ་པ་ལྔ་ཡིན་པས། རྣམ་གྲངས་ཀྱི་བྱེ་བྲག་སུམ་ཅུ་རྩ་གཉིས་སུ་དབྱེ་བའོ། །ཡན་ལག་གི་དམ་ཚིག་ནི། ཡན་ལག་ཉི་ཤུར་དབྱེ་པར་བྱ་སྟེ། གཅིག་ལ་ཡང་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཡན་ལག་རྣམ་པ་ལྔ། སྐུ་གསུང་ཐུགས་ཀྱི་དངོས་གཞི་གསུམ་ཡང་དེ་ཉིད་དུ་ཞིག་སྟེ་ཡན་ལག་གི་གཞི་མེད། རྩ་བ་ཐབས་དང་ཤེས་རབ་གཉིས་ཀྱང་ཐབས་ཤེས་རབ་དང་ལྡན། ཤེས་རབ་ཐབས་དང་ལྡན་པས་རྩ་བ་གཉིས་པོ་ཞིག་སྟེ་ཡན་ལག་བཞིར་འགྱུར་བས། དེ་ཡང་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ཆ་ཤས་སུ་འགྱུར་བས་རྩ་བའི་འཕྲོ་གཞི་མེད་དེ། ཡན་ལག་དང་ཆ་ཤས་ཉི་ཤུ་ཉི་ཤུར་འགྱུར་རོ། །མདོར་ན་རྩ་བའི་དབྱེ་བའི་སྐབས་སུ་ནི་རྩ་བ་དང་བཅས་པ་སྙིང་པོ་དང་བཅས་པ་ཡོན་ཏན་དང་བཅས་པ། ཡན་ལག་དང་ཉིང་ལག་དང་བཅས་པར་བཤད་དོ། །ཡན་ལག་གི་དབྱེ་བའི་སྐབས་སུ་ནི། རྩ་བ་མེད་པ་སྙིང་པོ་མེད་པ་འཕྲོ་གཞི་མེད་པ། ཡན་ལག་དང་ཆ་ཤས་ཙམ་དུ་ཟད་པ་འདི་ཙམ་བསྟན་ཏེ། དེ་ཡང་ཆོས་ཀྱི་དབྱིངས་རྟོགས་པའི་ཐབས་སུ་གྱུར་པ་ཡིན་ནོ། །དེ་ལྟར་དམ་ཚིག་རྣམ་པར་སྤྲོས་པའི་དགོས་པ་ནི། འཇིག་རྟེན་དྲུག་གི་ཕྱོགས་བཅུ་ན། །སྲིད་གསུམ་འགྲོ་བ་ཇི་སྙེད་པའི། །རྟོག་འདུལ་དམ་ཚིག་དེ་སྙེད་སྤྲོ། །ཞེས་གསུངས་པ་སྟེ། ཁམས་གསུམ་གྱི་སེམས་ཅན་གྱི་རྣམས་པར་རྟོག་པའི་སྤྲོས་པ་མཐའ་ཡས་པའི་ཕྱིར། དེའི་གཉེན་པོ་དམ་ཚིག་གི་སྤྲོས་པ་ཡང་མཐའ་ཡས་པར་བསྟན་པ་ཡིན་ནོ་ཞེས་བྱ་བའི་དོན་ནོ། །ད་ནི་དམ་ཚིག་གི་ཡོན་ཏན་མདོར་བསྡུས་པ་བསྟན་པའི་ཕྱིར། གཞན་ཡང་རྒྱལ་མཆོག་ཀུན་བཟང་གི། །ཞེས་བྱ་བ་ལ་སོགས་པ་གསུངས་ཏེ། དེ་ལ་གཞན་ཡང་ཞེས་བྱ་བ་ནི། དམ་ཚིག་རྣམ་པར་སྤྲོས་པའི་དགོས་པ་དང་བཅས་པ་དང་། དམ་ཚིག་གི་རང་བཞིན་དག་ཀྱང་ཡོན་ཏན་གྱི་ཁོངས་སུ་གཏོགས་པ་ཡིན་ལ། གོང་དུ་བསྟན་པའི་དམ་ཚིག་གི་ཆེ་བ་དང་། དམ་ཚིག་བསྲུང་བའི་ཡོན་ཏན་བསྟན་པ་རྣམས་ཡོན་ཏན་གྱི་ཁོངས་སུ་གཏོགས་པ་ཡིན་མོད་ཀྱི། འོན་ཀྱང་རང་རང་གི་དགོས་པའི་སྐབས་ལ་སོ་སོར་བརྗོད་པ་ཡིན་པས། དེ་ལྟ་བུའི་དབང་དུ་བརྗོད་པ་མ་ཡིན་པར་ཡོན་ཏན་གྱི་དབང་དུ་མདོར་བསྡུས་ཏེ་བསྟན་པར་འདོད་པས་ཕྱོགས་གཅིག་བསྣན་པར་འགྱུར་བའི་ཕྱིར་གཞན་ཡང་ཞེས་སྨོས་པ་ཡིན་ནོ། །དེ་ལ་འདིར་ཡང་ཅིས་འཕགས་པའི་ཁྱད་པར་སྟོན་ཏེ། མདོར་བསྡུས་ནས་སྒོ་རྣམ་པར་བདུན་གྱིས་འཕགས་པར་སྟོན་ནོ། །དེ་ལ་ཐེག་པ་སྤྱིར་གྲགས་པ་ལྟ་སྤྱོད་གྲོགས་དང་གསུམ་ཞེས་གྲགས་ཏེ། དེ་ཡང་ལྟ་བ་ནི་ཤེས་རབ་ཀྱི་བསླབ་པའོ། །སྤྱོད་པ་ནི་སེམས་ཀྱི་བསླབ་པའོ། །གྲོགས་ནི་ཚུལ་ཁྲིམས་ཀྱི་བསླབ་པའོ། །དེ་དག་ལ་ཡང་ཐེག་པའི་བྱེ་བྲག་གིས་ཆེས་ཁྱད་པར་དུ་འཕགས་པ་ཡོད་དེ། དེ་ལ་ལྟ་བ་དང་སྤྱོད་པའི་དབང་དུ་བསྟན་པའི་ཁྱད་པར་དག་ནི་གོང་དུ་ཅུང་ཟད་བསྟན་ཟིན་ཏོ། །གྲོགས་ཀྱི་ཁྱད་པར་ཙམ་ཞིག་འདིར་བརྗོད་པར་བྱ་སྟེ། དེ་ལ་མཚན་ཉིད་ཀྱི་ཐེག་པའི་གནས་སྐབས་སུ་ཉན་ཐོས་ཀྱི་སོ་སོར་ཐར་བའི་སྡོམ་པ་ལས། བྱང་ཆུབ་སེམས་དཔའི་སྡོམ་པ་ཇི་ལྟར་འཕགས་པ་ནི། སྒོ་མཐའ་ཡས་ཀྱང་ཆེན་པོ་རྣམ་པ་བདུན་གྱི་སྒོ་ནས་འཕགས་པར་གྲགས་པ་དེ་བཞིན་དུ་འཕགས་པ་སྟེ། འདི་ལྟར་དམིགས་པ་ཆེན་པོ་ཟབ་ཅིང་རྒྱ་ཆེ་བའི་དོན་ལ་དམིགས་པ་བཞིན་དུ། དེའི་གྲོགས་སུ་གྱུར་པ་བྱང་ཆུབ་སེམས་དཔའི་སྡོམ་པའང་ཟབ་ཅིང་རྒྱ་ཆེ་བ་ཡིན་ཏེ། རྟོག་གེ་བ་རྣམས་ཀྱི་ཡུལ་མ་ཡིན་ཞིང་གྲངས་ཀྱི་སྤྱོད་ཡུལ་ལས་འདས་པ་ཡིན་ནོ། །སྒྲུབ་པ་ཆེན་པོ་བདག་དང་གཞན་གྱི་དོན་སྒྲུབ་པར་བྱེད་པ་བཞིན་དུ། གྲོགས་ཀྱི་སྡོམ་པའང་དོན་མ་ལུས་པ་སྒྲུབ་པར་བྱེད་པ་ལ་ཕན་པར་བྱེད་པ་རྣམས་ཡིན་ནོ། །ཡེ་ཤེས་ཆེན་པོ་ཆོས་ཐམས་ཅད་ལ་བདག་མེད་པར་རྟོགས་པ་བཞིན་དུ། གྲོགས་ཀྱི་སྡོམ་པའང་ཆོས་བདག་མེད་པ་དང་མི་འགལ་བ་ཁོ་ན་ཡིན་ནོ། །ཐབས་ཆེན་པོ་འཁོར་བ་དང་མྱ་ངན་ལས་འདས་པ་གཉིས་ཀ་ལ་མི་གནས་པ་ཡིན་པ་བཞིན་དུ། གྲོགས་ཀྱི་སྡོམ་པའང་མཐའ་གཉིས་ལ་མི་གནས་པའི་ཡན་ལག་སྒྲུབ་པ་ཉིད་ཡིན་ནོ། །ལས་ཆེན་པོ་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་དང་། སེམས་ཅན་ཡོངས་སུ་སྨིན་པར་བྱེད་པ་དེ་བཞིན་དུ། གྲོགས་ཀྱི་སྡོམ་པའང་དེ་དག་ལས་ཡོངས་སུ་ཉམས་པར་མི་འགྱུར་བ་ཡིན་ནོ། །བརྩོན་འགྲུས་ཆེན་པོ་སེམས་ཅན་གཅིག་གི་དོན་ཆེད་དུ་ཡང་འཁོར་བ་ཇི་སྲིད་བར་བརྩོན་པ་མི་འདོར་བ་ཡིན་པ་བཞིན་དུ། གྲོགས་ཀྱི་སྡོམ་པའང་དེ་ཉིད་ཀྱིས་ཡོངས་སུ་ཟིན་པ་ཡིན་ནོ། །ཡང་དག་པར་གྲུབ་པ་ཆེན་པོ་སངས་རྒྱས་ཀྱི་ཆོས་ཡོངས་སུ་རྫོགས་པ་ཡིན་པ་བཞིན་དུ། གྲོགས་ཀྱི་སྡོམ་པའང ཡོན་ཏན་གྱི་ཆོས་ཇི་སྙེད་པ་མངོན་པར་སྒྲུབ་པར་བྱེད་པའི་རྐྱེན་ཉེ་བར་གནས་པ་ཤ་སྟག་སྟེ། དེའི་ཕྱིར་བྱང་ཆུབ་སེམས་དཔའི་སྡོམ་པ་ནི་ཟབ་ཅིང་གཏིང་དཔག་དཀའ་བའོ། །རྒྱ་ཆེ་ཞིང་གྲངས་ལས་འདས་པའོ། །བློ་གྲོས་ཆུང་བ་དང་སྙིང་སྟོབས་ཆུང་བ་རྣམས་ཀྱི་ཡུལ་མ་ཡིན་ནོ། །དེ་བས་ན་བྱང་ཆུབ་སེམས་དཔའི་ཡོན་ཏན་ཉན་ཐོས་ལས་ཁྱད་པར་དུ་འཕགས་པའི་གྲངས་དང་ཚད་གཟུང་བར་མི་ནུས་མོད་ཀྱི། རེ་ཞིག་ཡུལ་གྱི་སྒོ་ནས་མདོར་བསྡུ་ན་འདི་དག་ཙམ་དུ་འདུ་རུ་རུང་བར་ཤེས་པར་བྱའོ། །དེ་བཞིན་དུ་བྱང་ཆུབ་སེམས་དཔའི་སྡོམ་པ་ལས་གསང་སྔགས་ཀྱི་དམ་ཚིག་ཅིས་འཕགས་པའི་ཁྱད་པར་རྣམས་ཀྱང་བགྲང་ཞིང་བརྗོད་པར་མི་ནུས་ཏེ། དེ་ལས་ཀྱང་ཆེས་ཟབ་ཅིང་རྒྱ་ཆེ་བའི་ཕྱིར་རོ། །དེ་ལ་རེ་ཞིག་མདོར་བསྡུ་ན་ཁྱད་པར་རྣམ་པར་བདུན་གྱིས་འཕགས་པར་བསྟན་ཏེ། བདུན་གང་ཞེ་ན། ཀུན་ཏུ་བཟང་པོའི་ཕྱག་རྒྱས་བཏབ་པས་ཡོན་ཏན་བཙལ་བ་མེད་པར་ལྷུན་གྱིས་གྲུབ་པ་དང་། འཇིག་རྟེན་གྱི་གཙོ་བོ་ལྷ་ཆེན་པོ་རྣམས་དང་དེའི་འཁོར་མ་མོ་དང་། མཁའ་འགྲོ་མ་རྣམས་ཀྱིས་བཀུར་གནས་དམ་པར་མཐོང་བས་མཐུ་དང་བྱིན་རླབས་ཁྱད་པར་དུ་འཕགས་པ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཉེ་བའི་སྲས་དང་སྤུན་དུ་དགོངས་པས་ཐུགས་རྗེའི་བྱིན་རླབས་མྱུར་དུ་འབྱུང་བ་དང་། དེ་བཞིན་གཤེགས་པ་ཉིད་དང་སྤྱོད་ཡུལ་མཐུན་པས་སྤྱོད་ཡུལ་ཁྱད་པར་དུ་འཕགས་པ་དང་། ཆོས་ཐམས་ཅད་ཀུན་ཏུ་བཟང་པོའི་ཞིང་དུ་སྦྱོར་བས་འཇིགས་པ་དང་བག་ཚ་བ་ཐམས་ཅད་མེད་པ་དང་། བཀྲི་བ་དང་ངེས་པའི་དོན་དུ་གསུངས་པའི་སྡོམ་པ་ཇི་སྙེད་པ་ཐམས་ཅད་ཀྱང་རང་བཞིན་ལྷུན་གྱིས་གྲུབ་པར་འདུས་པ་དང་། ཉམས་པར་གྱུར་ཀྱང་བསྐང་བའི་ཐབས་ཡོད་པ་སྟེ། དེ་ལྟར་རྣམ་པ་བདུན་ལ་སོགས་པའི་ཡོན་ཏན་མཐའ་ཡས་པས་ཁྱད་པར་འཕགས་པ་ཞེས་སྦྱར་རོ། །དེ་ལ་ཇི་ལྟར་ཀུན་ཏུ་བཟང་པོའི་ཕྱག་རྒྱས་བཏབ་ཅེ་ན། དེ་ལ་ཉན་ཐོས་རྣམས་ནི་དེ་བཞིན་གཤེགས་པའི་ཞལ་ལས་སྐྱེས་པ་སྟེ། ཡང་དག་པར་རྫོགས་པའི་སངས་རྒྱས་རྣམས་སུ་འགྱུར་བའི་རིགས་མ་ཡིན་པས་སངས་རྒྱས་ཉིད་ཀྱི་ཕྱག་རྒྱ་མ་བཏབ་ཀྱི། བྱིན་གྱི་རླབས་ཀྱི་ཕྱག་རྒྱས་བཏབ་པ་ཙམ་མོ། །བྱང་ཆུབ་སེམས་དཔའ་རྣམས་ནི་དེ་བཞིན་གཤེགས་པ་ཉིད་དུ་འགྱུར་བའི་ཕྱིར། ཕྱག་རྒྱ་གཅིག་དང་གསུམ་གྱིས་བཏབ་པར་མདོ་སྡེ་ཉིད་ལས་གསུངས་མོད་ཀྱི། འོན་ཀྱང་ལྷུན་གྱིས་གྲུབ་པའི་ཕྱག་རྒྱ་ཐུན་མོང་དུ་མ་གྲགས་པས། རིགས་ལས་རྩོལ་བས་འབྲས་བུ་མངོན་པར་གྲུབ་པར་འདོད་པ་ཡིན་ནོ། །གསང་སྔགས་བླ་ན་མེད་པའི་ཆོས་ཐམས་ཅད་ཡེ་ནས་སྐུ་གསུང་ཐུགས་རྡོ་རྗེའི་དཀྱིལ་འཁོར་དུ་སངས་རྒྱས་པ་འགའ་ཡང་མེད་པས་ཀུན་ཏུ་བཟང་པོའི་ཕྱག་རྒྱས་བཏབ་ཅེས་བྱ་སྟེ། དེ་བས་ན་འབྲས་བུ་ཆེ་བའི་ཡོན་ཏན་ཐམས་ཅད་རྩོལ་བ་མེད་པར་ལྷུན་གྱིས་གྲུབ་པ་ཡིན་ནོ། །གཉིས་པ་འཇིག་རྟེན་པའི་གཙོ་བོ་དང་འཁོར་རྣམས་ཀྱིས་བཀུར་གནས་དམ་པར་གྱུར་པ་ནི། ཉན་ཐོས་རྣམས་ཀྱང་ཚངས་པ་དང་བརྒྱ་བྱིན་ལ་སོགས་པ་རྣམས་ཀྱི་བཀུར་གནས་ཡིན་ཡང་སངས་རྒྱས་བཞིན་དུ་བཀུར་བ་ནི་མ་ཡིན་ནོ། །བྱང་ཆུབ་སེམས་དཔའ་རྣམས་ཀྱང་དེ་བས་ཆེས་བཀུར་བ་ཡིན་མོད་ཀྱི་སངས་རྒྱས་བཞིན་དུ་ནི་བཀུར་བ་མ་ཡིན་ནོ། །ཡང་དག་པར་རྫོགས་པའི་སངས་རྒྱས་རྣམས་ནི་མཆོག་ཏུ་བཀུར་བར་བྱ་བ་ཡིན་ཏེ། དེ་བཞིན་དུ་དེ་རྣམས་ཀྱི་སྤྱོད་ཡུལ་ལ་ཞུགས་པའི་སྡོམ་པ་ཅན་གྱི་སྐྱེ་བོ་རྣམས་ལ་ཡང་། ཆོས་སྐྱོང་བའི་སྲུང་མ་རྣམས་ཀྱིས་བཀུར་གནས་རིམ་པར་མཐོང་བར་འགྱུར་ཏེ། ཉན་ཐོས་ཀྱི་སྤྱོད་ཡུལ་ལ་ཞུགས་པའི་སྡོམ་པ་འཛིན་པ་རྣམས་ལ་ཡང་བཀུར་གནས་སུ་བྱེད་ཀྱང་དམ་པར་ནི་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའི་སྤྱོད་ཡུལ་ལ་ཞུགས་པའི་སྡོམ་པ་འཛིན་པ་རྣམས་ལ་ཡང་དེ་བས་དམ་པར་བྱེད་ཅིང་། ཆོས་དམ་པར་བྱེད་པ་ནི་མ་ཡིན་ནོ། །དེ་བཞིན་དུ་སངས་རྒྱས་ཀྱི་སྤྱོད་ཡུལ་ལ་ཞུགས་པའི་སྡོམ་པ་འཛིན་པ་རྣམས་ལ་ནི་ཆེས་དམ་པར་བྱེད་པར་འགྱུར་བས། ཀུན་ཀྱང་བཀའ་ཉན་ཅིང་སྤྱི་གཙུག་རྒྱན་དུ་བཀུར་བར་དམ་བཅས་པས། དེ་བས་ན་དེ་དག་གི་སྟོང་གྲོགས་ཀྱི་དབང་གིས་མཐུ་དང་བྱིན་རླབས་ལྷག་པར་འཕགས་པར་འགྱུར་རོ། །གསུམ་པ་སངས་རྒྱས་དང་བྱང་ཆུབ་སེམས་དཔའི་ཉེ་བའི་སྲས་དང་སྤུན་དུ་དགོངས་པ་ནི། ཇི་ལྟར་འཁོར་ལོས་སྒྱུར་བའི་རྒྱལ་པོ་ལ་མཚན་དང་དཔེ་བྱད་དང་ལྡན་པའི་བུ་སྐྱེས་པར་གྱུར་ན། འདི་ལས་འཁོར་ལོས་སྒྱུར་བའི་རྒྱལ་པོ་ཉིད་འབྱུང་ངོ་འབྱུང་དུ་དགོངས་པ་བཞིན་དུ། སངས་རྒྱས་ཉིད་ཀྱི་དགོངས་སྤྱོད་དང་མཐུན་པའི་བསླབ་པའི་མཚན་དང་ལྡན་པའི་གང་ཟག་བྱུང་ན་འདི་ནི་དེ་བཞིན་གཤེགས་པ་ཉིད་ཀྱི་གདུང་ཉེ་བར་འཛིན་པའོ། །ཞེས་དགོངས་པའི་དབང་གིས་བྱིན་རླབས་མྱུར་དུ་འབྱུང་ངོ་། །རྣམ་པ་གཅིག་ཏུ་ཆུ་དྭངས་པ་ལ་གཟུགས་བརྙན་འབྱུང་བ་ཞིན་དུ། དམིགས་པ་དང་སྤྱོད་པ་འཕགས་པ་དང་། གྲོགས་ཀྱི་སྡོམ་པ་ནུས་པ་དང་ལྡན་པ་ཅན་ལ་རང་བཞིན་གྱིས་སངས་རྒྱས་དང་བྱང་ཆུབ་སེམས་དཔའི་བྱིན་རླབས་མྱུར་བ་ཉིད་དུ་འབྱུང་བས་འདི་སྐད་ཅེས་བྱའོ། །བཞི་པ་སྤྱོད་ཡུལ་ཁྱད་པར་དུ་འཕགས་པ་ནི། གསང་སྔགས་ཀྱི་སྤྱོད་ཡུལ་དང་དམིགས་པ་ནི་དེ་བཞིན་གཤེགས་པ་ཉིད་ཀྱི་སྤྱོད་ཡུལ་ཏེ། འདི་ལྟར་ཆོས་ཐམས་ཅད་གདོད་མ་ནས་རྣམ་པར་དག་པས་བླང་དོར་མེད་པའི་སྤྱོད་པ་ལ་གནས་བཞིན་དུ། སེམས་ཅན་གྱི་དོན་ཡང་གཟུགས་ཀྱི་སྐུ་རྣམ་པ་གཉིས་ཀྱི་སྒོ་ནས་མཛད་པ་རྒྱུན་མི་གཅོད་པ་འདི་ནི་སྤྱོད་ཡུལ་གཅིག་ལ་མཐུན་པར་ཞུགས་པ་ཡིན་ནོ། །སྡོམ་པ་གཞན་ནི་དེ་ལྟར་མ་ཡིན་ཏེ། སྔོན་གྱི་འཕགས་པ་དགྲ་བཅོམ་པ་རྣམས་ཀྱི་རྗེས་སུ་སློབ་པ་དང་། ས་ཆེན་པོ་ལ་གནས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱི་རྗེས་སུ་སློབ་པ་ཡིན་ནོ། །ལྔ་པ་ཆོས་ཐམས་ཅད་ཀུན་ཏུ་བཟང་པོའི་ཞིང་དུ་སྦྱོར་བས་བག་ཚ་བ་མེད་པ་ནི། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ནི་གདོད་མ་ནས་རྣམ་པར་དག་པས་སྤང་ཞིང་དོར་བར་བྱ་བ་མེད་པའི་ཕྱིར་ཀུན་ཏུ་བཟང་པོའི་ཞིང་ཡིན་ནོ། །འདི་ལྟར་རྟོགས་ཤིང་བློ་གྲོས་འདི་ལས་མི་གཡོ་བ་ནི་འཁོར་བའི་སྡུག་བསྔལ་གྱིས་བག་ཚ་བར་མི་འགྱུར་ཏེ། དཔེར་ན་ཆུ་ཀླུང་ཆེན་པོས་ཁྱེར་བའི་མི་དག་གྲུ་གཟིངས་དང་འཕྲད་པར་གྱུར་ན་ད་ནི་བདག་གིས་སྐབས་ལ་ཕྱིན་པའི་ལམ་རྙེད་དོ་སྙམ་སྟེ། ཆུས་འཇིགས་པ་མེད་ཅིང་དབུགས་ཕྱིན་པར་འགྱུར་ལ། གང་ཞིག་རྨི་ལམ་ན་ཆུས་ཁྱེར་བ་རྨིས་པ་ལས། གཉིད་ཅུང་ཞིག་སྲབ་པར་གྱུར་ཏེ། དེ་ཉིད་རྨི་ལམ་ཡིན་པར་ཤེས་པའི་བློ་བྱུང་ན་ཆུར་སྣང་བ་མ་ལོག་ཀྱང་འདི་སྙམ་དུ་འདི་ནི་རྨི་ལམ་ཡིན་ཏེ་དངོས་སུ་ཁྱེར་བ་མེད་དོ། །སྣང་བ་འདི་ཡང་གཉིད་སད་པའི་དུས་ན་མི་འབྱུང་སྟེ། དེ་བས་ན་བདག་ཆུས་འཆི་བའི་དུས་བྱེད་པའི་འཇིགས་པ་ལས་ལོག་ནས། གཉིད་སངས་པར་བྱ་བའི་སྦྱོར་བ་ཙམ་ལ་སྙིང་སྟོབས་བསྐྱེད་པར་འགྱུར་རོ། །དེས་གཉིད་སད་པར་གྱུར་བ་དེའི་ཚེ་ཆུས་ཁྱེར་བ་མེད་ཅིང་ཆུ་ལས་ཐར་པ་མེད་པ་ཡང་ཤེས་ལ་ཆུ་ཡང་མི་སྣང་ངོ་། །དེ་བཞིན་དུ་ཉན་ཐོས་ཀྱི་ལམ་དུ་ཞུགས་པ་ནི་གྲུ་ཆུང་ངུ་དང་འཕྲད་པ་ལྟ་བུ་སྟེ། གང་ཟག་འགའ་ཞིག་དངོས་པོ་ཆུང་ངུ་ཙམ་དང་འགྲོགས་ནས་ཕྱོགས་གཅིག་ཏུ་ཐར་བར་བྱས་ཏེ་གནས་པ་ལྟ་བུའོ། །བྱང་ཆུབ་སེམས་དཔའི་ལམ་དུ་ཞུགས་པ་ནི་གྲུ་གཟིངས་ཆེན་པོ་དང་འཕྲད་པ་དང་འདྲ་སྟེ། འགྲོ་བ་མང་པོ་དང་བཅས་དོན་ཆེན་པོ་དང་བཅས་ནས་ཡུལ་ཁམས་བདེ་བས་རྒྱས་པར་སྤྱོད་དོ། །གསང་སྔགས་ཀྱི་ཚུལ་གྱི་ལམ་ལ་ཞུགས་པ་ནི་རྨི་ལམ་ན་ཆུས་ཁྱེར་བ་གཉིད་ཅུང་ཟད་སྲབས་པར་འགྱུར་བ་དང་འདྲ་སྟེ། འཁོར་བ་དང་མྱ་ངན་ལས་འདས་པ་གཉིས་སུ་མེད་པར་རྟོགས་པས་འཁོར་བའི་འཇིགས་པ་ལས་དབུགས་ཕྱིན་ཏེ། ཤེས་རབ་ཆེན་པོས་གཉིད་སད་པ་ཙམ་ལ་རྩོལ་བ་ཙམ་བྱེད་དོ། །དེ་ལ་མི་མཐུན་པ་དང་གཉེན་པོ་སྤོང་བ་དང་བསྟེན་པའི་རྩོལ་བ་ནི་མི་བྱེད་ཀྱི། ཤེས་བཞིན་ཆེན་པོ་ལས་མི་ཉམས་པ་ཙམ་དུ་གནས་སོ། །དྲུག་པ་སྡོམ་པ་ཇི་སྙེད་པ་ཐམས་ཅད་འདུས་པ་ནི། ཉན་ཐོས་ཀྱི་སོ་སོར་ཐར་པའི་སྡོམ་པའི་ནང་དུ་ནི་བྱང་ཆུབ་སེམས་དཔའི་སྡོམ་པ་མ་འདུས་ཤིང་མ་དག་གོ། །བྱང་ཆུབ་སེམས་དཔའི་སྡོམ་པའི་ནང་དུ་ནི་སོ་སོར་ཐར་པའི་སྡོམ་པ་འདུས་ཤིང་རྣམ་པར་དག་སྟེ། དེ་བཞིན་དུ་གསང་སྔགས་ཀྱི་དམ་ཚིག་ལ་ཡང་སྦྱར་བར་བྱའོ། །དེ་དག་ཇི་ལྟར་འདུས་ཤིང་རྣམ་པར་དག་པའི་ཚུལ་ནི་གོང་དུ་ཆེ་བ་བསྟན་པའི་སྐབས་སུ་རྒྱས་པར་བཤད་པ་ཉིད་དོ། །བདུན་པ་ཉམས་པ་བསྐང་ན་རྫོགས་པའི་ཡོན་ཏན་ནི། ཉན་ཐོས་ཀྱི་སོ་སོར་ཐར་པའི་སྡོམ་པ་ནི་ཆོས་རྣམས་ལ་དངོས་པོར་ཞེན་པའི་དབང་དང་། ལུས་ངག་གི་ལས་ཀྱི་དངོས་པོ་ལ་གཙོ་བོར་གཟུང་བ་ཡིན་པས་ཉམས་པ་རྣམས་སླར་གསོ་བའི་ཐབས་མེད་དེ། རྫ་གྱོ་མོ་ཆག་པ་དང་འདྲ་བར་འབྱུང་ངོ་། །བྱང་ཆུབ་སེམས་དཔའི་སྡོམ་པ་ནི་ཆོས་རྣམས་ལ་དངོས་པོར་མ་ཞེན་པའི་དབང་དང་། སེམས་གཙོ་བོར་སྟོན་པའི་ཉམས་པ་རྣམས་ཀྱང་དགེ་བའི་བཤེས་གཉེན་ལ་བརྟེན་ནས་ཤིན་ཏུ་ལྷག་པར་བྱར་རུང་སྟེ། དཔེར་ན་གསེར་དངུལ་གྱི་སྣོད་ཆག་རལ་དུ་གྱུར་ན་མགར་བ་མཁས་པས་སྔ་མ་ལས་ཁྱད་པར་དུ་འཕགས་པའི་སྣོད་དག་ཀྱང་བྱར་བཏུབ་པ་ལྟ་བུའོ་ཞེས་འབྱུང་ངོ་། །གསང་སྔགས་ཀྱི་དམ་ཚིག་ནི་ཆོས་ཐམས་ཅད་མཉམ་པ་ཆེན་པོར་རྟོགས་པའི་དབང་དང་། སྒྱུ་མ་ལྟ་བུའི་རོལ་པ་ལ་རིག་པ་རང་དབང་སྒྱུར་བ་གཙོ་བོ་ཡིན་པས་དམ་ཚིག་ཉམས་པ་རྣམས་ཀྱང་དགེ་བའི་བཤེས་གཉེན་ལ་བརྟེན་མི་དགོས་པར་བདག་ཉིད་ཀྱིས་གསོས་པས་སྐོང་བར་འགྱུར་ཏེ། དཔེར་ན་གསེར་དངུལ་གྱི་སྣོད་ཞོམ་པ་ནི་མགར་བས་གཞི་ནས་བྱ་མི་དགོས་ཏེ། ཞོམ་པ་ཆེ་ཆུང་དང་སྦྱར་ནས་བདག་ཉིད་ཀྱིས་རྩོལ་བས་རིམ་པ་བཞིན་བཅོས་པས་ཇི་ལྟ་བ་བཞིན་སྲོངས་པར་འགྱུར་བ་བཞིན་ནོ་ཞེས་འབྱུང་ངོ་། །གསང་སྔགས་ཀྱི་ཚུལ་ཁ་ཅིག་ལས་ནི་བྱང་ཆུབ་སེམས་དཔའ་དང་མཐུན་པར་ཉམས་པ་རྣམས་དགེ་བའི་བཤེས་གཉེན་ལས་དཀྱིལ་འཁོར་དུ་ཞུགས་ཤིང་དབང་དང་དམ་ཚིག་ནོད་པར་འབྱུང་སྟེ། འདི་ལྟ་བུའང་གདུལ་བྱ་ལ་ལའི་དབང་དུ་གསུངས་པར་ཟད་དོ། །འདིར་ནི་དོན་སྔ་མ་ཉིད་དེ། དེ་བས་ན་ཉམས་པ་བསྐང་ན་རྫོགས་པའི་ཡོན་ཏན་རྣམས་པ་བདུན་ཙམ་ནི་མདོར་བསྡུས་པ་སྟེ། དེེ་ལ་སོགས་པ་ཡོན་ཏན་རྒྱས་པ་ནི་མཐའ་ཡས་ཞེས་སྦྱར་རོ། །འདི་དག་གི་དཀྱུས་ཀྱི་ངོ་སྤྲད་པ་ནི། དོན་འདི་རྣམས་ཉིད་ཀྱིས་རིམ་པ་བཞིན་སྦྱར་བར་བྱའོ། །དེ་བཞིན་གཤེགས་པ་ཉིད་དེ་བཞིན་གཤེགས་པ་ཉིད་ལ་འདུལ་བར་གྱུར་ཏོ་ཞེས་བྱ་བ་ནི། ཡེ་ནས་སངས་རྒྱས་པ་མ་ཡིན་པའི་གདུལ་བྱ་མེད་པ་སྟེ། དོན་འདི་ལྟ་བུའི་དབང་གིས་དེ་བཞིན་གཤེགས་པ་ཉིད་ལ་ཉིད་འདུལ་བར་འགྱུར་ཞེས་བྱ་བ་དང་། དེ་བཞིན་དུ་ལེའུ་གཞན་ལས་ཉིད་ལ་ཉིད་སྤྱོད་པར་གྱུར་ཏོ་ཞེས་བྱ་བ་དང་། དེ་བཞིན་གཤེགས་པ་ཉིད་ལ་སྔགས་ཀྱི་རྒྱལ་པོར་བརྟན་པར་བཟུང་བ་འདི་ཚད་དུ་བརྗོད་དོ་ཞེས་བྱ་བ་དང་། ལེའུ་བཅུ་གསུམ་པ་ལས། དེ་བཞིན་གཤེགས་པ་ཉིད་དེ་བཞིན་བཤེགས་པ་ཉིད་ལ་ཆེད་དུ་གླེང་སླང་ངོ་ཞེས་བྱ་བ་དང་། ལེའུ་གསུམ་པས་ལས། དེ་བཞིན་གཤེགས་པ་ཐམས་ཅད་ཀྱིས་གསུངས་པ་ཡང་དེ་དག་ཏུ་འདུས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ་ཞེས་བྱ་བ་དང་། ལེའུ་གཉིས་པ་ལས། ཐམས་ཅད་ཡེ་ནས་སངས་རྒྱས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ་ཞེས་བྱ་བ་དང་། ལེའུ་དེ་ཉིད་ལས། དེ་བཞི་གཤེགས་པ་ཉིད་དེ་བཞིན་གཤེགས་པ་ཉིད་ལ་ཆེད་དུ་བརྗོད་པ་ཉིད་མཛད་དོ། །ཞེས་བྱ་བ་ལྟ་བུ་ཐམས་ཅད་ཀྱང་ཡེ་ནས་ལྷུན་གྱིས་གྲུབ་པའི་དཀྱིལ་འཁོར་དུ་སངས་རྒྱས་པ་ཡིན་པས། སངས་རྒྱས་ཉིད་ལས་གཞན་པའི་གདུལ་བྱ་མེད་པར་གསུངས་པ་ཡིན་པས་འཁོར་གྱི་དཀྱིལ་འཁོར་དེ་ཉིད་དུ་སངས་རྒྱས་ཉིད་ལ་གསུངས་ཤིང་མཁྱེན་པ་དང་འདུལ་བ་དང་སྤྱོད་པ་དང་། གཏད་པར་མཛད་པ་ཡིན་གྱི། ཇི་སྐད་དུ། བསྟན་པ་དེའི་ཚེ། བྱང་ཆུབ་སེམས་དཔའ་ལ་སོགས་པའི་དཀྱིལ་འཁོར་ལ་ཆེད་དུ་བརྗོད་པ་མ་མཛད་དོ། །དེ་བཞིན་དུ་དེ་དག་གིས་མ་མཁྱེན་ཏོ། །དེ་དག་མི་གླེང་ངོ་། །དེ་དག་འདུལ་བར་མ་གྱུར་ཏོ། །དེ་དག་ལ་སྤྱོད་པར་མ་གྱུར་ཏོ། །དེ་དག་ལ་རྒྱུད་ཡོངས་སུ་མ་གཏད་དོ་ཞེས་སྦྱར་བར་མི་བྱ་ཏེ། གལ་ཏེ་དེ་ལྟར་སྦྱོར་བར་བྱེད་ན་དགོས་པ་དང་འབྲེལ་བ་ཐམས་ཅད་ཞིག་པའི་ཕྱིར་སྨྱོན་པ་རྣམས་ཀྱི་བསྙོན་ཚིག་དང་འདྲ་བར་འགྱུར་དུ་ཟད་དོ། །ལེའུ་བཅུ་དགུ་པའོ།། ༈ །།ད་ནི་ཕྲིན་ལས་ཀྱི་ལེའུ་བཤད་དེ། དེ་ལ་ཕྲིན་ལས་སྤྱིའི་དོན་དང་། གོ་རིམ་གྱི་ཚུལ་དག་ནི་ཅུང་ཟད་སྔར་བཤད་ཟིན་ནོ། །འདིར་ཡན་ལག་ལ་སོགས་པ་ཅུང་ཟད་བརྗོད་པར་བྱ་སྟེ། དེ་ལ་ལས་ཀྱི་ཡན་ལག་ནི་རྣམ་པ་བཞི་སྟེ། ཕྲིན་ལས་ཀྱི་དཀྱིལ་འཁོར་གྱི་མཚན་ཉིད་དང་། དེ་བཞིན་དུ་ལྷ་དང་། སྔགས་མཁན་དང་། རྫས་རྣམས་སོ། །དེ་ལ་དཀྱིལ་འཁོར་ནི། ཨེའི་ཚོགས་ཀྱི་དཀྱིལ་འཁོར་མཆོག །ཅེས་བྱ་བ་ལ་སོགས་པ་སྟེ། ཡི་གེ་འབྲུ་བཞིའི་དབྱིངས་དང་ཁ་དོག་དོན་གྱིས་བསྡུས་པའོ། །ལྷ་ནི་འབར་བ་གཏུམ་ཆེན་རྔམ་པ་ལ། ཞེས་བྱ་བ་ལ་སོགས་པ་སྟེ། རིགས་བཞིའི་ཁྲོ་བོ་ལ་སོགས་པ་སོ་སོའི་ལྷར་གཏོགས་པའོ། །སྔགས་མཁན་གྱི་མཚན་ཉིད་ནི། ཁྲོས་པའི་ཡིད་ཀྱིས་ཞེས་པ་ལ་སོགས་པ་སྟེ། སྤྱིར་སྔགས་པ་སྤྱིའི་ཡོན་ཏན་གྱི་མཚན་ཉིད་དང་། བཟླས་པ་ལ་སོགས་ཏེ་བསྙེན་བསྒྲུབ་ཀྱི་ཡོན་ཏན་གྱི་མཚན་ཉིད་དང་། གཞན་ཡང་ལུས་ངག་གི་བྱ་བར་གཏོགས་པ་ལ་ལུས་ཀྱི་བྱ་བར་གཏོགས་པ་ཆས་གོས་དང་། ལྟ་སྟངས་དང་། འདུག་སྟངས་དང་། ཁའི་ལྟ་ཕྱོགས་དང་། དབུགས་འབྱིན་པ་ལ་སོགས་པའོ། །ངག་གི་བྱ་བར་གཏོགས་པ་སྔགས་ཀྱི་རིང་ཐུང་དང་དྲག་ཞན་དང་། དབྱངས་ཀྱི་འགྱུར་སྟངས་ལ་སོགས་པའོ། །ཡིད་ཀྱི་བྱ་བར་གཏོགས་པ་ཁྲོས་པའི་ཡིད་དང་། ཆགས་པའི་ཡིད་ལ་སོགས་པའོ། །རྫས་ནི་ལྷ་མཆོད་པའི་རྫས་དང་། ལས་གྲུབ་པའི་རྫས་སུ་གཏོགས་པ་སྤྱིར་འདོད་པ་ལྔ་ཡིས་བསྡུས་པ་ཐམས་ཅད་དང་། དམ་ཚིག་གི་རྫས་རྣམས་དང་། ལིངྒའི་རྒྱུའི་རྫས་དང་། ཕུར་བུ་དང་རལ་གྲི་དང་འཁོར་ལོ་ལ་སོགས་པ་རྟེན་གྱི་རྫས་ལ་སོགས་པའོ། །སྤྱིར་ལས་དང་སྒྲུབ་ཐབས་ཐམས་ཅད་ཀྱི་ཕུན་སུམ་ཚོགས་པ་ནི་སྒྲུབ་པ་པོ་དང་གནས་དང་དུས་དང་རྫས་རྣམས་སོ། །དེ་དག་གི་ཡན་ལག་གིས་བསྡུས་པ་དང་ཕུན་སུམ་ཚོགས་པས་བསྡུས་པས་བཤད་པ་སྟེ་ཕྲིན་ལས་ཀྱི་ཆ་རྐྱེན་ཡིན་ནོ། །ཕྲིན་ལས་ཀྱི་གོ་རིམ་ནི། བདུད་རྩི་ལྔའམ་ཟད་ལྔ་ལ། མཚན་མ་མིང་དུ་བཅས་པ་བྱས། །བཀུག་ནས་རྡོ་རྗེ་ཕུར་བུས་གདག །རྡུལ་དུ་བྱས་ན་ཚོགས་ལ་དབུལ། །ཞེས་གསུངས་པ་ཡིན་ཏེ། དེ་ལ་དང་པོར་སྒོམ་པ་དང་མཆོད་པ་དང་བཟླས་པ་དག་བྱས་པའི་རྗེས་ལ། བདུད་རྩི་ལྔའམ་ཤ་ལྔ་ལ་སོགས་པ་ལ་བསྒྲུབ་བྱའི་གཟུགས་བརྙན་བྱས་ཏེ། ལྷ་རྣམས་ཀྱི་ཐུགས་དམ་བསྐུལ་ཞིང་། བསྒྲུབ་བྱ་དགུག་ཅིང་བསྟིམས་ལ་བསྡམས་ཤིང་དབང་དུ་བྱས་ནས་རྡོ་རྗེ་ཕུར་བུས་བཏབ་སྟེ། འཁོར་ལོ་དང་རལ་གྲི་ལ་སོགས་པའི་མཚོན་གྱིས་དུམ་བུར་གཏུབས། དམར་གྱི་ཨརྒྷཾ་དང་བསྲེས་ཏེ་ཁྲོ་བོ་དང་ཁྲོ་མོ་རྣམས་ཀྱི་ཞལ་དུ་བསྟབས་ན་དྲག་པོའི་ལས་འགྲུབ་པར་འགྱུར་ཏེ། སངས་རྒྱས་བསོད་ནམས་སྐུ་ཡང་འཇིག །ཅེས་གསུངས་པ་ཡིན་ནོ། །དེ་ལྟར་ལས་བྱས་ཟིན་ནས་རྡོ་རྗེ་ཁྲོ་བོའི་མནན་པའི་ལས་བྱས་ལ་གསོར་མི་རུང་བར་བྱ་སྟེ། དེ་བསྟན་པ། ཨེ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དང་སྦྲེལ་བསྡམས་ནས། །བཅིང་འགྱུར་བསྐྱོད་ནས་ཕྱོགས་བཅུར་གཡོ། །མྱོས་ནས་གས་ཏེ་འཚིག་པར་འགྱུར། །ཞེས་གསུངས་ཏེ། ལས་ཟིན་པ་དང་ས་གཞི་ལེགས་པར་བསྙོམས་ལ། དེའི་སྟེང་དུ་རྣལ་འབྱོར་ཕ་དང་རྣལ་འབྱོར་མ་རྣམས་སོར་མོ་ལུ་གུ་རྒྱུན་དུ་སྦྲེལ་ནས་གྲུ་གསུམ་དུ་བདར་ཏེ་བྲོ་བརྡུང་བ་ནི། ལུ་གུ་རྒྱུད་དུ་སྦྲེལ་བསྡམས་ནས། །ཁྲག་འཐུང་ཆེན་པོ་ལ་སོགས་པའི། །བྲོ་གར་གླུ་ཚིག་ཆེན་པོས་ནི། །ཐམས་ཅད་ཐམས་ཅད་ཅི་འདོད་པ། །ཐམས་ཅད་ཐམས་ཅད་བྱེད་པ་ཡིན། །ཞེས་བྱ་བ་ལ་སོགས་པར་བྲོ་བརྡུང་བར་བྱའོ། །དེ་ལྟར་ལས་ཐམས་ཅད་ལ་ཡང་སྦྱར་བ་བྱའོ། །དེ་ལ་དབང་གི་དཀྱིལ་འཁོར་ཡི་གེ་བཾ་གྱི་རྣམ་པར་བཤད་པ་དང་། ཞི་བ་ཡའི་རྣམ་པར་བཤད་པ་ནི། དབྱིབས་དང་ཁ་དོག་གི་རྣམ་པས་མི་མཐུན་ཡང་ཡི་གེ་སྒྲའི་དོན་དང་སྦྱར་ན་བཾ་བྷནྡྷ་ན་སྡུད་པའམ་བཅིངས་པ། ར་ཡ་བ་ཏི་ནི་ཞི་བ་སྟེ། འདིའི་དབང་དུ་གསུངས་པ་ཡིན་པར་མངོན་ནོ། །སླས་དང་བྱི་མོ་བྲན་མོའི་ཚོགས། །ལྷག་མའི་མཆོད་སྦྱིན་འདོད་པ་སྦྱིན། །རང་གི་དམ་ཚིག་རབ་བསྒྲགས་ནས། །གང་འདོད་ལས་དེ་བྱེད་པར་བསྒོ། །ཞེས་བྱ་བ་ནི། ལས་རྣམ་པ་བཞི་གང་བྱེད་ཀྱང་རུང་སྟེ། ཚོགས་ཀྱི་མཆོད་པ་ལ་རོལ་པའི་རྗེས་སུ་ཆད་པ་དང་། ལྷག་མ་ཕྱག་དར་ཐམས་ཅད་བསྡུས་ཏེ་ཚུལ་བཞིན་དུ་བྱིན་གྱིས་བརླབས་ནས། སྔར་གྱི་དཀྱིལ་འཁོར་ཆེན་པོ་མཆོད་པ་དང་མཐུན་པར་འདིར་ཡང་བྱ་བར་གཞུང་དག་ལས་གསལ་བར་འབྱུང་སྟེ། དེའི་རྗེས་སུ་རྣལ་འབྱོར་གྱི་འཁོར་ན་གནས་པའི་ལྷག་མ་དང་ཁ་ཆུ་ལ་དབང་ཞིང་དགའ་བ་རྣམས་ལ་ལྷག་མའི་མཆོད་སྦྱིན་བྱིན་ཏེ། སྔོན་གྱི་དམ་ཚིག་བསྒྲགས་ནས་ལས་བྱེད་དུ་གཉེར་འཚལ་བ་རྣམས་མནན་ཏེ་ལས་བཅོལ་བར་བྱའོ་ཞེས་གསུངས་སོ། །དམ་ཚིག་ཇི་ལྟར་བསྒྲགས་པ་ནི། དམར་གྱི་ཨརྒྷཾ་སྦྲེང་ཞིང་སྔོན་ཚེ་དཔལ་ཆེན་ཧེ་རུ་ཀ་ཞེས་སོགས་པའི་དབང་ཕྱུག་མའི་འཕྱོང་རྣམས་བསྒྲགས་ཤིང་བསྒོའོ། །ལས་རྣམ་བཞིའི་གནས་བསྟན་པ་ནི། ལྗོན་པ་དང་ནི་ལྕུག་ཕྲན་ཚལ། །སྡོང་གཅིག་དང་ནི་མེས་རེག་དྲུང་། །ཞེས་བྱ་སྟེ། དེ་ལ་ཕྱིའི་གནས་ནི་ཇི་སྐད་གསུངས་པའི་ཤིང་རྣམ་པ་བཞིས་བྱེད་བྲག་ཏུ་བྱས་པའི་ས་ཕྱོགས་ཉིད་དོ། །གསང་བའི་གནས་ནི། གཟུངས་མའི་བྱེ་བྲག་སྟེ་ལྗོན་པ་མའི་རིགས་ལ་སོགས་པ་རྣམས་ཏེ། དེ་དག་ལ་བརྟེན་ནས་ལས་གྲུབ་པར་འགྱུར་བ་ཉིད་གནས་སུ་བཤད་དོ། །དང་བས་དགའ་བས་ཆགས་པས་དང་། །ཁྲོས་པས་ཞེས་པ་ནི། ཡིད་ལ་བྱེད་པའི་བྱེ་བྲག་སྟེ་གོང་དུ་བསྟན་པར་ཟད་དོ། །ཀཱ་ལི་ཞེས་བྱ་བ་ནི་སྐབས་འདིར་ཐབས་ཀྱི་མཛད་སྤྱོད་ལ་བྱའོ། །ལེའུ་ཉི་ཤུ་པའོ།། ༈ །།ད་ནི་ཁྲོ་བོའི་མཛད་པ་རྫོགས་ནས་དཀྱིལ་འཁོར་ཆེན་པོར་དགྱེས་པའི་གླུ་འདི་བླངས་པར་སྟོན་ཏེ། ཧཱུཾ། གཏུམ་ཆེན་དུས་མཐའི་མེ་ལྟར་འབར། །ཞེས་བྱ་བ་ལ་སོགས་པའོ། །དེ་ལ་ཧཱུྃ་གི་དོན་ནི་གོང་དུ་བསྟན་པའི་ཨཱོྂ་གྱི་དོན་དང་མཐུན་པར་སྦྱར་རོ། །ཅུང་ཟད་དུ་ནི་ཨཱོྂ་ནི་ཚངས་པའི་དབྱངས་ཀྱི་འདྲེན་སྟངས་ཡིན་པས་ཞི་བའི་སྐབས་སུ་སྦྱར་བ་ཡིན་ལ། ཧཱུཾ་ནི་ཁྲོ་བོའི་སྣང་གླུ་ཡིན་པས་ཁྲོ་བོ་ལ་སྦྱར་བ་ཙམ་གྱིས་ཕྱེ་བར་ཟད་དོ། །མཇུག་གི་ཧོཿཡི་དོན་ཡང་སྔ་མ་བཞིན་ནོ། །ཚིག་གི་དོན་ནི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་སྒོ་ནས་རིམ་པ་བཞིན་བསྟོད་པར་བྱའོ། །འདི་ལ་སྐུ་གསུང་ཐུགས་ནང་གི་ཡོན་ཏན་གྱི་བྱེ་བྲག་ནི་མེད་དེ། སྤྱིར་བསྟོད་དེ་ཞེས་ཀྱང་གསུང་ངོ་། །རང་བཞིན་དང་། ཡོན་ཏན་དང་། མཛད་པ་དང་། གསུམ་གསུམ་དང་ལྡན་ནོ་ཞེས་ཀྱང་འདོད་དོ། །མཇུག་གི་འབྱུང་བ་ཆེན་པོ་བཞིའི་སྒོ་ནས་བསྟོད་པ་ནི། ཡོངས་གྲགས་དབུས་ལུགས་པ་ནི། ཡུན་གྱི་ཡོན་ཏན་གྱི་ཆ་ལ་བསྟོད་ཅེས་གསུང་ངོ་། །ཁམས་ལུགས་པ་ནི་འབྱུང་བ་ཆེན་པོ་བཞི་ཉིད་རིགས་བཞིའི་ཧེ་རུ་ཀའི་རང་བཞིན་དང་མཛད་པ་དང་བྱིན་རླབས་ཡིན་པར་སྟོན་ནོ་ཞེས་གསུང་ངོ་། །ལེའུ་ཉི་ཤུ་གཅིག་པའོ།། ༈ །།ད་ནི་དོན་མཐའ་མ་རྒྱུད་ཡོངས་སུ་གཟུང་བ་སྟོན་ཏེ། དེ་བསྟན་པའི་ཕྱིར། དེ་ནས་བཅོམ་ལྡན་འདས་དགྱེས་པ་ཆེན་པོས། དེ་བཞིན་གཤེགས་པ་ཉིད་ལ་སྔགས་ཀྱི་རྒྱལ་པོ་བརྟན་པར་གཟུང་བ་འདི་ཆེད་དུ་བརྗོད་དོ་ཞེས་གསུངས་ཏེ། དེ་ལ་དགྱེས་པ་ཆེན་པོ་ཞེས་བྱ་བ་ནི། ཀུན་ཏུ་བཟང་པོ་བྱང་ཆུབ་ཀྱི་སེམས་རྡོ་རྗེའི་མཚན་གྱི་ཁྱད་པར་ནི་དགྱེས་པ་ཆེན་པོ་ཞེས་བྱ། བདེ་བ་ཆེན་པོ་ཞེས་བྱ། དེ་བཞིན་དུ་རྡོ་རྗེ་རྙིང་པོ་དང་། དམ་པ་དང་པོ་དང་། རྡོ་རྗེ་འཛིན་པ་དང་། རྡོ་རྗེ་འཆང་ཆེན་པོ་ལ་སོགས་པ་ཇི་སྐད་གྲགས་པ་རྣམས་ཡིན་པའི་ཕྱིར་རོ། །དེ་བཞིན་གཤེགས་པ་ཉིད་ལ་ཞེས་བྱ་བ་ནི། ཡོངས་སུ་གཏད་པ་ཐུན་མོང་མ་ཡིན་པ་སྟེ། འཁོར་གྱི་བྱང་ཆུབ་སེམས་དཔའ་འགའ་ཞིག་ལ་གཏད་པ་ནི་མ་ཡིན་གྱི། སེམས་ཅན་ཐམས་ཅད་ཡེ་ནས་སངས་རྒྱས་པ་ཡིན་པས་མ་འོངས་པའི་གང་ཟག་ཏུ་གཏོགས་པ་ལ་གཏད་དོ་ཞེས་བྱ་བའི་དོན་ནོ། །ཀྱེ་ཀྱེ། ཕྱོགས་བཅུ་དུས་བཞིའི་རང་བཞིན་འདི། །ཞེས་བྱ་བ་ལ་སོགས་པ་ནི། ཡོངས་སུ་གཏད་པའི་བཀའ་ཉིད་ཡིན་ཏེ། དེ་ཡང་དང་པོ་དཔལ་གསང་བ་སྙིང་པོ་ལས་ཐེག་པ་སྣ་ཚོགས་བསྟན་པའི་དགོས་པ་བསྟན་པའི་ཕྱིར། དོན་དུ་མི་འགྱུར་ཡོངས་མ་གསུངས། །ཞེས་བྱ་བའི་བར་དག་སྨོས་སོ། །དེ་ལ་ཀྱེ་ཀྱེ་ཞེས་བྱ་བ་ནི་ཡོངས་སུ་བཏད་པའི་ཕྱིར་བོས་པའོ། །ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་བྱ་བ་ནི། དང་པོ་དགོས་པའི་གཞི་བསྟན་པའི་ཕྱིར། ཆོས་ཐམས་ཅད་རང་བཞིན་ཡེ་ནས་སངས་རྒྱས་པའི་ངོ་བོ་ཉིད་ཡིན་ནོ་ཞེས་བསྟན་ནོ། །དེ་ལྟར་ན་སེམས་ཅན་རྣམས་ཅིའི་ཕྱིར་འཁོར་ཞེ་ན། གཟུང་འཛིན་སྤྲོས་ལ་འཆེལ་བ་ཡིས། །རྣམ་རྟོག་ཞགས་པས་སོ་སོར་བཅིང་། །ཞེས་གསུངས་ཏེ་དེའི་དབང་གིས་འཁོར་ཞེས་སྦྱར་རོ། །དེ་ལྟར་ན་རྒྱུ་ལས་འབྲས་བུ་བསྒྲུབ་པ་མ་ཡིན་ཡང་། ལོག་རྟོག་གི་སྤྲོས་པ་ཞི་བར་བྱ་བ་ཙམ་གྱི་ཕྱིར་ཐེག་པའི་བྱེ་བྲག་ལམ་གྱི་རིམ་པ་སྣ་ཚོགས་ཤིག་གསུངས་པ་ཡིན་ལ། དེ་ལྟར་གསུངས་པ་དེ་དག་ཐམས་ཅད་ཀྱང་ཆོས་ཐམས་ཅད་ཀྱི་རང་བཞིན་དེ་བཞིན་གཤེགས་པའི་ངོ་བོ་ཉིད་མཉམ་པ་ཆེན་པོའི་དོན་ཉིད་གསང་བའི་སྙིང་པོར་འགྲོ་བའི་ལམ་དང་རྟེན་ཙམ་དུ་ཡང་གསུངས་པ་ཡིན་པས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་གསུངས་པ་ཡིན་ནོ། །དེ་ལྟ་བས་ནས་ཐེག་པ་ཐམས་ཅད་ཀྱང་སངས་རྒྱས་ཀྱིས་སྣོད་ཀྱི་རིམ་པ་དང་སྦྱར་ཏེ་འགྲོ་བའི་དོན་དུ་གསུངས་བར་འདྲ་བས། ཐེག་པ་ཐམས་ཅད་ལ་ཡང་སྨད་པའི་བློ་མི་བསྐྱེད་དེ། འགྲོ་བ་ཆུད་མི་གསོན་པ་ཙམ་གྱི་བྱ་བ་བྱེད་པར་འདྲ་བས། སྒྲོ་སྐུར་མི་གདབ་བོ་ཞེས་བསྟན་པའི་ཕྱིར། ཡེ་ཤེས་ངོ་མཚར་རབ་འབྱམས་ཀྱིས། ། དོན་དུ་མི་འགྱུར་ཡོངས་མ་གསུངས། །ཞེས་གསུངས་པ་ཡིན་ནོ། །དེ་ལྟར་དགོས་པ་བསྟན་ནས། ད་ནི་དགོས་པ་དང་བཅས་པ་ཡིན་པའི་ཕྱིར་དེ་ཡོངས་སུ་མི་ཉམས་པར་བསྲུང་དགོས་པས་དེའི་ཕྱིར་ཡོངས་སུ་གཏད་པ་མཛད་པ་ནི། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །ཞེས་གསུངས་པ་སྟེ། དེ་ལ་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ནི་དཔལ་གསང་བ་སྙིང་པོ་འདི་ཡིན་ཏེ། ཕྱག་རྒྱའི་དོན་ཡང་འདི་སྐད་དུ། འདའ་དཀའ་དེ་བཞིན་མི་ཤིགས་པ། །རྒྱལ་པོའི་ཕྱག་རྒྱ་མཆོག་གི་རྟགས། །བདག་ཉིད་ཆེན་པོའི་མཚན་མའི་གཟུགས། །དེ་བས་ཕྱག་རྒྱ་ཞེས་བྱའོ། །ཞེས་གསུངས་པ་ལྟ་བུ་སྟེ། གཞུང་འདི་ཉིད་དེ་བཞིན་གཤེགས་པ་ཐམས་ཅད་ཀྱི་བཀའ་ཉིད་ཡིན་པས། དེ་བས་ན་འདའ་བར་དཀའ་བ་ལ་སོགས་པའི་ཡོན་ཏན་གྱི་བདག་ཉིད་ཅན་ཡིན་ནོ་ཞེས་སྦྱར་རོ། །ཡང་ན་ཡི་གེ་དང་མིང་དང་ཚིག་གི་ཚོགས་ལ་དེ་བཞིན་གཤེགས་པའི་ཕྱག་རྒྱས་བྱིན་གྱིས་བརླབས་པ་ཡིན་པས་རྒྱ་རྟགས་ཡིན་ནོ་ཞེས་ཀྱང་བཤད་དོ། །དེ་ལྟ་བུའི་མཚན་ཉིད་ཀྱི་གཞུང་འདི་ལ་མ་འོངས་པའི་རྣལ་འབྱོར་པ་གང་ཞིག་གིས་ཚུལ་བཞིན་རྟོགས་ནས་གཞན་ལ་མ་ནོར་བར་ཡང་སྨྲ་བར་བྱེད་པ་དེ་ནི། ཀུན་ཏུ་བཟང་པོ་ཉིད་དང་ཐ་མི་དད་པ་ཡིན་ཞིང་། དབང་ཡང་རང་བཞིན་གྱི་རྫོགས་པ་ཡིན་པས། དེ་དག་གིས་གཞུང་འདི་ཡོངས་སུ་ཟུངས་ལ་མི་ནུབ་པར་གྱིས་ཤིག་ཅེས་ཡོངས་སུ་གཏད་པ་མཛད་པ་ཡིན་ནོ། །ད་ནི་གཞུང་དང་དེ་རྟོགས་པའི་གང་ཟག་གི་ཡོན་ཏན་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ལ། །ཞེས་བྱ་བ་ལ་སོགས་པ་གསུངས་ཏེ། དེ་ལ་གཞུང་གི་ཡོན་ཏན་ནི། དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །ཞེས་གསུངས་པ་སྟེ། མཉམ་པ་ཆེན་པོའི་དོན་མ་རྟོགས་པའི་ངེས་པའི་དོན་གྱི་མདོ་སྡེ་དང་། གསང་སྔགས་ཀྱི་ཚུལ་ཀུན་ལས་མ་གསུངས་ཏེ། དེའི་ཕྱིར་འདི་ལས་གཞན་མི་མངའ་བ་ཉིད་དུ་ངེས་སོ། །སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་བྱ་བ་ནི། སློབ་དཔོན་དབུས་ལུགས་པ་རྣམས་ཀྱིས་བཤད་པ་ནི། རྒྱུད་འདི་ཉིད་དཔལ་ཀུན་ཏུ་བཟང་པོའི་ཐུགས་ཀྱི་དབྱིངས་རུམ་ནས་ཕྱུང་བ་ཡིན་པས་སྙིང་པོ་ཞེས་བྱ་སྟེ། ཧྲི་ད་ཞེས་བྱ་བ་ནི། སྙིང་ལ་བྱ་སྟེ། ཀུན་ཏུ་བཟང་པོ་ཉིད་ཀྱི་ཐུགས་སོ། །དེ་ནི་གསང་བའང་ཡིན་དེ་ཁོ་ན་ཉིད་ཀྱང་ཡིན་ངེས་པའང་ཡིན་པས། ཀུན་ཏུ་བཟང་པོའི་སྙིང་ཉིད་ལ་གསང་བ་སྙིང་པོ་དེ་ཁོ་ན་ཉིད་ངེས་པ་ཞེས་བྱའོ། །རྒྱུད་འདི་ཡང་ཐུགས་ཉིད་ལས་བྱུང་བས་དེ་སྐད་ཅེས་བྱའོ། །དཔེར་ན་སྙིང་ལས་བཀོགས་པའི་བུ་ཞེས་བརྗོད་པ་ལྟ་བུའོ། །དེ་བས་ན་ཚིག་འདི་དག་ནི་རྒྱུད་ཀྱི་ཡོན་ཏན་དུ་སྦྱར་རོ་ཞེས་གསུང་ངོ་། །སློབ་དཔོན་ཁམས་ལུགས་པ་རྣམས་ནི། ཚིག་འདི་དག་གཏད་པར་བྱ་བའི་གང་ཟག་གི་ཡོན་ཏན་དུ་བཞེད་དེ། སྟོན་པ་ཀུན་ཏུ་བཟང་པོའི་ཐུགས་ནི་སྤྲོས་པ་ཐམས་ཅད་ཡོངས་སུ་ཞི་བའི་ཕྱིར་སྒྲོ་དང་སྐུར་པ་ཞི་བ་ཡིན་ལ། གསང་བའི་སྙིང་པོ་དེ་ཁོ་ན་ཉིད་ངེས་པ་ཡང་ཡིན་ཏེ། དེ་ལྟ་བུའི་ཐུགས་ཀྱི་དབྱིངས་རུམ་ནས་ཕྱུང་ཞིང་སྐྱེས་པ་ནི། རྟོགས་པའི་གང་ཟག་དེ་ཉིད་ཡིན་པས་ངེས་པར་ཐོབ་པ་ཡིན་ནོ། །དེ་ལྟར་ན་ཐུགས་ལས་ཕྱུང་བ་ཡིན་པས། སྲས་ནི་ཐུགས་ལས་སྐྱེས་པ་ཡིན། །ཞེས་གསུངས་ཏེ། ཐུགས་ཀྱི་སྲས་ཡིན་ནོ། །ལུང་གང་དུ་བསྟན་ཞེ་ན། ས་རབ་རིག་པ་འཛིན་ལ་གནས། །ཞེས་གསུངས་ཏེ། ས་ཐམས་ཅད་ཀྱི་མཆོག་ནི་རིག་པ་འཛིན་པའི་ས་ཞེས་བྱ་སྟེ། རྡོ་རྗེ་འཛིན་པའི་ས་ཞེས་བྱ། ཐབས་དང་ཤེས་རབ་མཆོག་གི་ས་ཞེས་བྱ། སངས་རྒྱས་ཀྱི་ས་བཅུ་གསུམ་པ་ཞེས་ཀྱང་བྱ་སྟེ། ས་འདི་ལ་གནས་པར་འགྱུར་རོ་ཞེས་ལུང་བསྟན་པ་ཡིན་ནོ། །དེ་ལ་སངས་རྒྱས་ཀྱི་སའི་བྱེ་བྲག་འདི་ལྟ་བུ་ཡང་། རྡོ་རྗེ་སྙིང་པོ་རྒྱན་གྱི་རྒྱུད་ལས། སངས་རྒྱས་ཀྱི་ས་བཅུ་གཉིས་སུ་གསུངས་པར་མཐོ་དམན་གྱི་བྱེ་བྲག་ཏུ་མ་གསུངས་ཏེ། སྟོང་པ་ཉིད་དང་སྙིང་རྗེ་གཉིས་ཡེ་ཤེས་ལྔ་དང་། རིགས་ལྔ་སྟེ་བཅུ་གཉིས་སུ་གསུངས་སོ། །གཞན་ཡང་སངས་རྒྱས་ཀྱི་ས་གསུམ་དུ་གསུངས་པའང་ཆོས་ཀྱི་སྐུ་དང་ཤེས་རབ་དང་སྙིང་རྗེ་འབྲེལ་བའི་མཚན་ཉིད་དང་། དེའི་བྱིན་གྱིས་རླབས་སྐུ་དང་ཡེ་ཤེས་ཀྱི་ཡོན་ཏན་གྱི་བདག་ཉིད་ལ་གསུངས་ཏེ། རིམ་པར་མཐོ་དམན་དུ་ནི་མ་བཤད་དོ། །དཔལ་ཐབས་ཀྱི་ཞགས་པ་ལས། ཀུན་ཏུ་འོད་ཀྱི་ས་ལས་འདས། །ཞེས་གསུངས་པ་ཡང་། ཆོས་ཀྱི་སྐུ་མཚན་མ་མེད་པའི་དབྱིངས་ལས་མི་གནས་པའི་ཤེས་རབ་དང་། ཐུགས་རྗེའི་བྱིན་རླབས་སྐུ་དང་ཡེ་ཤེས་ཀྱི་དཀྱིལ་འཁོར་རྩོལ་བ་མེད་པར་རང་བྱུང་བ་ལ་གསུངས་ཏེ། རིམ་པ་གོང་དུ་འདས་བར་ནི་མ་གསུངས་སོ། །གཞན་ལས་ཀུན་ཏུ་བཟང་པོ་དབྱེ་བ་མེད་པའི་ས་ཞེས་ཡེ་ནས་དག་པ་ཆེན་པོའི་རང་བཞིན་དུ་བསྟན་གྱི་ཐེག་པ་འོག་མ་བ་ལྟར། བགྲོད་ཅིང་བསགས་པས་ཐོབ་པ་མ་ཡིན་ནོ་ཞེས་གསུངས་ཡང་། ངེས་པའི་དོན་གྱི་མདོ་སྡེ་རྣམས་ལས་ཀྱང་། མཚན་ཉིད་ཐུན་མོང་མ་ཡིན་པ་དང་། རྣམ་པར་གྲོལ་བ་ཐུན་མོང་མ་ཡིན་པ་དང་། རྣམ་པར་གྲོལ་བའི་ཡེ་ཤེས་མཐོང་བ་ཐུན་མོང་མ་ཡིན་པ་དང་། ཞིང་དང་སྤྱོད་ཡུལ་ཡོངས་སུ་དག་པ་ཐུན་མོང་མ་ཡིན་པ་དང་། གཉིས་སུ་མེད་པར་འཇུག་པའི་ཚུལ་ཐུན་མོང་མ་ཡིན་པ་ལ་སོགས་པ་གསུངས་ཏེ། དེ་བས་ན་སངས་རྒྱས་ཀྱིས་ཉིད་ལ་ཡང་མཐོ་དམན་གྱི་བྱེ་བྲག་ཡོད་དོ་ཞེས་ནི་རྣམ་པར་གཞག་པར་མི་བྱ་སྟེ། ལུང་དང་ཡང་འགལ་ལ་རིག་པས་ཀྱང་འགལ་ཏེ། འབྲས་བུ་ལ་བྱེ་བྲག་ཡོད་ན་ནི། ཐེག་པ་གསུམ་དུ་བསྡུ་རུ་མི་རུང་སྟེ། །འདི་ནི་སྔོན་གྱི་མཁན་པོ་རྣམས་ཀྱི་མན་ངག་གིས་མ་བཤད་དོ། །ལེའུ་ཉི་ཤུ་གཉིས་པའོ།། ༈ །།ད་ནི་རྒྱུད་བཤད་པ་རྫོགས་ནས། དཀྱིལ་འཁོར་ཆེན་པོར་ཇི་ལྟར་བཞུགས་པའི་ཚུལ་སྟོན་ཏེ། དེ་ལ་རྒྱུད་དང་མདོ་སྡེ་ཁ་ཅིག་གི་ཚུལ་ལས་ནི། ཆོས་བཤད་པ་རྫོགས་ནས་འཁོར་རྣམས་རྗེས་སུ་ཡི་རང་ཞིང་། མངོན་པར་བསྟོད་པ་ཙམ་དུ་གསུངས་ཏེ། དེ་ནས་སྤྱོད་ལམ་གཞན་གྱིས་བཞུགས་པར་མངོན་ནོ། །རྒྱུད་ལ་ལ་ལས་ནི་རྒྱུད་བཤད་པ་རྫོགས་ནས་དཀྱིལ་འཁོར་བསྡུས་ཏེ་མི་སྣང་བར་གསུངས་སོ། །འདིར་ནི་དུས་བཞི་མཉམ་པ་ཉིད་ཀྱི་དབྱིངས་ན་སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་པར་གསུངས་ཏེ། དེ་བཞིན་གཤེགས་པ་ལ་དུས་ཐ་དད་དུ་འབྱུང་བའམ། འགགས་པའམ་སྤྱོད་ལམ་སྣ་ཚོགས་མཛད་པའམ། ཡོན་ཏན་གྱི་ཆོས་སྣང་བ་རྣམས་ལ་ཟད་པའམ་འཕེལ་བའམ། བདག་ཉིད་གནས་པའམ། གནས་པ་ལས་གཞན་དུ་འགྱུར་པའམ། རྣམ་པར་བརྟག་པར་བྱ་བར་རུང་པ་གང་ཡང་མ་ཡིན་པས། འདི་ལྟ་བུའི་རང་བཞིན་ཡིན་པ་ཉིད་ལ་བཞུགས་སོ་ཞེས་བྱ་སྟེ། དཔེར་ན་ནམ་མཁའ་ནི་མཚན་ཉིད་མེད་པར་གནས་སོ་ཞེས་བྱ་བ་ལྟ་བུ་སྟེ། འདི་ལྟར་མཚན་ཉིད་མེད་པ་ཞེས་བྱ་བའི་གཞི་གཅིག་ལ། ནམ་མཁའ་ཞེས་བྱ་བ་ཞིག་གནས་པ་ནི་མེད་ཀྱི། རང་གི་རང་བཞིན་དེ་ལྟ་བུ་ཡིན་པ་ལ་དེར་གནས་སོ་ཞེས་བརྗོད་པ་བཞིན་ནོ། །འཕགས་པ་རྟོག་པའི་རྒྱལ་པོ་སྒྱུ་འཕྲུལ་དྲྭ་བ་ལེའུ་སྟོང་ཕྲག་བརྒྱ་པ་ལས། མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི། དེ་བཞིན་གཤེགས་པ་ཐམས་ཅད་ཀྱི་གསང་བ། གསང་བའི་སྙིང་པོ་དེ་ཁོ་ན་ཉིད་ངེས་པའི་ལེའུ་ལས་ཐམས་ཅད་མ་ལུས་པར་འཕྲོས་ཏེ། འཁོར་ལོ་བསྐོར་བ་དེ་དག་གི་འབྲས་བུ་མཆོག་ཅེས་བྱ་བའི་མཚན་གྱི་ཁྱད་པར་སྨོས་པ་འདི་དག་གི་སྤྱི་དང་བྱེ་བྲག་གི་དོན་རྣམས་ནས་གོང་དུ་རྒྱས་པར་བཤད་ཟིན་ཏོ། །མདོར་བསྡུ་ན། ལུང་གི་སྤྱི་འཕྲོས་པའི་གཞི་འབྲས་བུའི་མཆོག་ཡིན་པས་དེ་བས་ན་འདི་བཤད་པའི་ཚུལ་ཡང་། གཞི་དང་ལམ་དང་འབྲས་བུ་བསྟན་པ་རྣམས་ཀྱི་ཡན་ལག་གི་སྒོ་ནས། གྲུབ་པའི་མཐའ་སྤྱི་ལ་འཇུག་པའི་ཚུལ་བཤད་པ་དང་། རྒྱུད་ཀྱི་སྐབས་རྣམས་ཀྱིས་བསྟན་པར་བྱ་བའི་དགོས་པ་དང་། བསླབ་པའི་གཞི་དང་ཐུན་མོང་དང་ཁྱད་པར་གྱི་བྱེ་བྲག་དང་། བཤད་ལུགས་རྣམས་ཀྱི་ཡན་ལག་གི་སྒོ་ནས་རྒྱུད་སྤྱི་ལ་འཇུག་པའི་ཚུལ་བཤད་པ་དང་། ཁོག་དབུབ་པ་དང་། ཆེ་བ་དང་། བབས་དང་། འབྲུའི་དོན་རྣམས་ཀྱི་ཡན་ལག་གི་སྒོ་ནས་གཞུང་ཉིད་ལ་འཇུག་པའི་ཚུལ་བཤད་པ་དང་། དཀྱིལ་འཁོར་རྣམ་པ་གཉིས་ལ་བརྟེན་ནས་འཇུག་པའི་སྤྱོད་པར་གཏོགས་པ་སློབ་དཔོན་གྱི་ལས་སུ་གྲགས་པ། དབང་དང་དམ་ཚིག་སྦྱིན་པའི་ཆོ་ག་ཇི་ལྟར་བྱ་བའི་རིམ་པ་བསྟན་པ་དང་། དེ་བཞིན་དུ་དཀྱིལ་འཁོར་གཉིས་ལ་བརྟེན་ནས་སྒྲུབ་པའི་སྤྱོད་པར་གཏོགས་པ་རྣལ་འབྱོར་སྤྱིའི་བྱ་བར་གསུངས་པ། བསྙེན་སྒྲུབ་ཀྱི་སྒོ་ནས་ཐུན་མོང་དང་མཆོག་གི་དངོས་གྲུབ་བསྒྲུབ་པའི་ཐབས་ཀྱི་བྱ་བའི་རིམ་པ་དང་། དེ་བཞིན་དུ་གྲུབ་པའི་སྤྱོད་པར་གཏོགས་པ་ལས་རྣམ་པ་བཞི་ཇི་ལྟར་བསྒྲུབ་པའི་ཡན་ལག་གི་སྒོ་ནས་བྱ་བའི་ཆོ་གའི་རིམ་པར་གཏོགས་པའི་ཚུལ་བཤད་པ་སྟེ། དེ་ལྟར་ན་ཚུལ་བཞི་ཡན་ལག་བཅོ་ལྔའི་སྒོ་ནས་ལུང་གི་སྤྱི་འཕྲོ་བའི་གཞི་འབྲས་བུའི་མཆོག་ལེགས་པར་བསྟན་པ་ཡིན་ནོ། །བླ་མ་དམ་པ་ཚུལ་ཁྲིམས་བཟང་། །དེ་སོགས་ཞབས་ལ་ཕྱག་བཙལ་ནས། །དཔལ་ལྡན་སྙིང་པོའི་དཀའ་འགྲེལ་དུ། །འདི་ནི་ཆོས་ཀྱི་བཟང་པོས་བྱས། །ཡུལ་དུས་གང་ཟག་དམན་བཞིན་བདག་གིས་ནི། །དམ་པས་མཛད་ཅེས་ཁུངས་ཕྱུང་མ་བྱས་པས། །མ་བསླུས་ཕྱིར་དང་གཞན་གྱིས་གསོལ་བཏབ་ཕྱིར། །སྒྱུ་སོགས་རློམ་སོགས་སྒྲིབ་པར་མི་འགྱུར་གྲང་། །གང་ཟག་རྣམས་ནི་ལྟ་བ་སྣ་ཚོགས་དབང་གིས་ན། །འཕགས་དང་མཁས་པ་རྣམས་ཀྱི་མཛད་པའི་གཞུང་ལ་ཡང་། །མཐུན་པར་སྤོང་མིན་མཚུངས་པར་བསྔགས་པ་བརྗོད་མིན་ཞིང་། །སྒྲོ་སྐུར་དཔྱ་བར་བྱེད་ན་བདག་གཞུང་ཅིས་མི་སྨོད། །དེ་ཕྱིར་བསྔགས་ཤིང་གཞན་དོན་འགྱུར་ཞེས་སྤྲོ་བ་མེད། །འོ ན་ཀྱང་གང་ཞིག་ཆོས་དང་རིགས་ཀྱི་བརྒྱུད་འཛིན་རྣམས། །བདག་གི་ཚིག་ལ་རྒྱལ་བའི་བཀའ་ལྟར་གུས་བྱེད་པ། །དེ་ཡིས་ཡོན་ཏན་གྲུབ་བཅས་ཐོབ་པར་འབྱུང་བས་ན། །དེ་དག་རྒྱུད་ལ་ཅིས་རྟོགས་གཞག་སྙམ་དགའ་བ་སྐྱེས། །དེ་དོན་ཕྱིར་ན་གཞན་གྱིས་བསྐུལ་བས་འདི་བློ་སྐྱེ། །རྨོངས་པས་འཁྲུལ་སྲིད་གདམས་ངག་དབང་གིས་མ་འཁྲུལ་སྲིད། །འཁྲུལ་པར་གྱུར་ན་ལྷ་དང་བླ་མས་བཟོད་པར་མཛོད། །མ་འཁྲུལ་གྱུར་ན་དགེ་བ་བདག་གཞན་དོན་དུ་བསྔོ། །དཔལ་གསང་བའི་སྙིང་པོའི་དཀའ་འགྲེལ་ཚུལ་བཞི་ཡན་ལག་བཅོ་ལྔས་ལུང་གི་སྤྱིར་བཤད་པའོ། །རྫོགས་སོ།། །།