འཇམ་དཔལ་རྡོ་རྗེ་འཇིགས་མཛད་ཀྱི་མན་ངག་རྭ་ལོའི་སྙན་རྒྱུད།

[Full Size]

འཇམ་དཔལ་རྡོ་རྗེ་འཇིགས་མཛད་ཀྱི་མན་ངག་རྭ་ལོའི་སྙན་རྒྱུད་ཐུན་མོང་མ་ཡིན་པ་བཞུགས། ཤིན་ཏུ་གསང་བའི་བཀའ་རྒྱ་ཡོད།

[Full Size]

ཨོཾ་སྭཱ་སྟི། ཆོས་ཀུན༵་སྒྲིབ་མེད་གཟིགས་པ་མཁྱེན་པའི་གཏེར། །ལེགས་བཤད་དག༵འ་སྟོན་འགྱེད་ལ་མཐུ་གྲུབ་པས། །དམ་ཆོས་རྒྱ་མཚོའི་སྙིང༵་པོ༵་གསལ་མཛད་པ། ཁྱབ་བདག་བླ་མས་རྟག་ཏུ་ཤིས་པར་མཛོད། །འཇམ་དཔལ་ཐུགས་ཀྱི་རྡོ་རྗེ་གཤིན་རྗེ་གཤེད། །མི་བཟད་ཁྲོ་བོ་ཆེན་པོ་འཇིགས་པའི་སྐུ། །ཡེ་ཤེས་མེ་ལྕེ་འབར་བའི་འོད་དཔུང་གིས། །བདུད་སྡེ་འཇོམ་བྱེད་བྷཻ་ར་ཝ་ཡིས་སྐྱོངས། །རྟོག་བདུན་བརྗོད་བྱའི་སྙིང་པོའི་དོན། །རྭ་ལོའི་ཐུགས་བཅུད་རྨད་བྱུང་བ། །སྙན་ནས་སྙན་དུ་བརྒྱུད་པ་ཡི། །ཞལ་གདམས་བླ་མའི་གསུང་བཞིན་འབྲི། །འདིར་དཔལ་རྡོ་རྗེ་འཇིགས་བྱེད་ཆེན་པོའི་ཐུན་མོང་མ་ཡིན་པའི་ཞལ་གྱི་གདམས་པ་ལ། བསྙེན་པ་དང་རྗེས་སུ་འབྲེལ་བའི་ཞལ་གདམས་དང༌། སྒྲུབ་པ་དང་རྗེས་སུ་འབྲེལ་བའི་ཞལ་གདམས་དང༌། ལས་སྦྱོར་དང་རྗེས་སུ་འབྲེལ་བའི་ཞལ་གདམས་དང་གསུམ་མོ། །དང་པོ་ལ། ཐུན་མོང་བསྐྱེད་རིམ་གྱི་ཞལ་གདམས་དང༌། ཐུན་མོང་མ་ཡིན་པ་མཆོག་གི་བསྙེན་

[Full Size]

པའི་ཞལ་གདམས་དང་གཉིས་ལས། དང་པོ་ལ། ཚོགས་ཞིང་གི་སྐབས་སུ་དཀྱུས་ནས་འབྱུང་བ་ལྟར། བླ་མ་མི་བསྐྱོད་པས་དབུ་རྒྱན་པའི་རྡོ་རྗེ་འཇིགས་བྱེད་ཀྱི་དཀྱིལ་འཁོར་ལ། བླ་མ་སྟེང་གི་ཆ་ལ་སྒོམ་པ་དང༌། རིགས་བདག་གི་ཚུལ་དུ་བསྒོམ་པ་མ་ཡིན་པར། རྩ་བའི་བླ་མ་དང་ངོ་བོ་དབྱེར་མེད་པ་འཁོར་ལྷ་བཅུ་གསུམ་མམ་དགུའམ་བརྒྱད་ཀྱིས་བསྐཽར་བ་དང༌། གཞན་ཡང་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བཛྲ་ས་མ་ཛཿ ཞེས་སྤྱན་དྲངས། ཨ་མྲྀ་ཏའི་སྔགས་སམ། ཡ་མནྟ་ཀས༴ ཕྱིར་འབྲང་གི་བགེགས་བསྐྲད་ཅིང་བྱུར་དང་བཀྲ་མི་ཤིས་པ་ཐམས་ཅད་བསངས་ཤིང་སྦྱངས་བར་བསམ་པ་ནི། ཐུན་མོང་མ་ཡིན་པའི་ཞལ་གྱི་གདམས་པ་དང་པོའོ། །གཉིས་པ་ནི། རྒྱུན་བཤགས་ཡན་ལག་བདུན་པའི་སྐབས། དཀོན་མཆོག་གསུམ་ལ་བདག་སྐྱབས་མཆི། །ཞེས་པ་དང༌། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །ཞེས་པའི་སྐབས་སུ་ཐུན་མོང་མ་ཡིན་པའི་

[Full Size]

དཀོན་མཆོག་གསུམ་ལ་སྐྱབས་སུ་འགྲོ་བ་སྟེ། མདུན་གྱི་བཅོམ་ལྡན་འདས་རྡོ་རྗེ་འཇིགས་བྱེད་ཆེན་པོ་ནི། སངས་རྒྱས་དཀོན་མཆོག་དང༌། རྩ་སྔགས་དང་སྙིང་པོ། ཉེ་སྙིང་ལ་སོགས་པའི་སྔགས་རྣམས་ནི་ཆོས་དཀོན་མཆོག་དང༌། ཐུན་མོང་མ་ཡིན་པའི་འཁོར་རྣམས་ནི་དགེ་འདུན་དཀོན་མཆོག་སྟེ། དེ་རྣམས་ཡིད་ཡུལ་དུ་འཆར་བར་བྱས་ཏེ། དེ་རྣམས་ལ་སྐྱབས་སུ་འགྲོ་བ་ནི། ཐུན་མོང་མ་ཡིན་པའི་ཞལ་གདམས་གཉིས་པའོ། །མཐར་ཚོགས་ཞིང་རྣམས་གཤེགས་སུ་གསོལ་བ་དང༌། མི་དམིགས་པར་སྦྱངས་པ་དང༌། རང་ལ་བསྟིམ་པ་ལ་སོགས་པའི་ལུགས་དུ་མ་ཡོད་ཀྱང༌། སྐབས་འདིར་རང་ལ་བསྡུ་བ་གཙོ་ཆེ་ལ། འདི་ནི་ཐུན་མོང་མ་ཡིན་པའི་ཞལ་གདམས་མ་ཡིན་ཀྱང་འཕྲོས་དོན་གྱི་ཚུལ་དུ་གསུང་ངོ༌། །གསུམ་པ་ནི། ཐུན་མོང་པ་ལ་བསྲུང་འཁོར་གྱི་ནང་དུ་ཆོས་འབྱུང་སྒོམ་པ་ཡིན་ཀྱང༌། ཐུན་མོང་མ་ཡིན་པའི་སྐབས་འདིར་བསྲུང་འཁོར་གྱི་ཕྱི་རོལ་ཏུ་ཆོས་འབྱུང་སྒོམ་པ་ཡིན་ལ། དེ་ཡང་མཆོག་སྒྲུབ་པ་ལ་ཆོས་འབྱུང་གྲུ་གསུམ་ཕྱི་དཀར་ལ་ནང་དམར་བ། དྲག་པོའི་ལས་ལ་ཆོས་འབྱུང་གྲུ་གསུམ་ནག་པོ། མེ་རབ་ཏུ་འབར་བ་བསྒོམ་པ་ནི། ཐུན་མོང་མ་ཡིན་པའི་ཞལ་གདམས་གསུམ་པའོ། །ཆོས་འབྱུང་བསྲུང་འཁོར་ཐོད་ར་དང་བཅས་པ་བསྒོམ་པའི་ཚུལ་ནི། ཆོས་འབྱུང་གི་ཕྱི་རོལ་ཏུ་བསྲུང་འཁོར་བསྒོམ་པ་ལ་ནི། སླར་ཡང་ཆོས་འབྱུང་གི་ནང་དུ་རྡོ་རྗེའི་ས་གཞི། དེའི་སྟེང་དུ་ཕྱི་རོལ་

[Full Size]

ཏུ་དུར་ཁྲོད་དང༌། དེ་ལས་ཅུང་ཟད་ཀྱི་དམའ་བར་ཁྲག་གི་རྒྱ་མཚོ་དང༌། དེའི་དབུས་སུ་རིན་པོ་ཆེའི་རི་བོ་ཁ་དོག་ནག་པོ་ཁྲག་མཚོ་དང༌། དུར་ཁྲོད་ལས་ཅུང་ཟད་ཀྱི་མཐོ་བར་གྱུར་པའི་སྟེང་དུ་ཐོད་ར་བསྒོམ་མོ། །ཆོས་འབྱུང་གི་ནང་དུ་བསྲུང་འཁོར་སྒོམ་པའི་རིགས་ལ་དམིགས་པ་ནི། ཆོས་འབྱུང་གི་ནང་དུ་བསྲུང་འཁོར་གྱི་རྡོ་རྗེའི་ས་གཞི། ཕྱི་རོལ་ཕྱོགས་ཀུན་ཏུ་རྡོ་རྗེའི་ར་བ་ཟླུམ་པོར་བསྐོར་བའི་ནང་གི་འཁོར་ཡུག་ཏུ་དུར་ཁྲོད་ཆེན་པོ་བརྒྱད་དང༌། དེ་ལས་ཅུང་ཟད་ཀྱི་དམའ་བའི་ནང་དུ་ཁྲག་གི་རྒྱ་མཚོའི་བསྐོར་བ། དེའི་དབུས་སུ་རིན་པོ་ཆེའི་རི་བོའི་སྟེང་དུ་ཐོད་ར་བསྒོམ་མོ། །བཞི་པ་ནི། ཐོད་རའི་ནང་དུ་ཡཾ་ལས་རླུང་གི་དཀྱིལ་འཁོར་དབྱིབས་ཟླུམ་པོ། དུ་བ་འཐུལ་བར་བྱེད་པ་ཁ་དོག་ནག་པོ། རླུང་ནག་འཚུབ་མའི་རྣམ་པར་བསྒོམ་ཞིང་དེ་ལས་ཀྱང་ཕྱོགས་ཀུན་ཏུ་རླུང་ནག་འཚུབ་མའི་རྣམ་པ་དཔག་ཏུ་མེད་པ་སྤྲཽས་པས་སྡང་བར་བྱེད་པའི་དགྲ། གནོད་པར་བྱེད་པའི་བགེགས་ཐམས་ཅད་ཕྱོགས་ཀུན་ཏུ་གཏོར་ཏེ་ལྷག་མ་ཙམ་ཡང་མེད་པར་བརླག་པར་བསམ་པ་ནི། ཐུན་མོང་མ་ཡིན་པའི་ཞལ་གྱི་གདམས་པ་བཞི་པའོ། །ལྔ་པ་ནི། རྒྱུའི་འཇམ་དཔལ་སྒོམ་པའི་བར་སྒྲུབ་ཐབས་ཀྱི་དཀྱུས་ནས་འབྱུང་བ་བཞིན་བྱས་ལ། དེའི་ཐུགས་ཀ་ནས་འོད་ཟེར་འཕྲོས་པས་དེ་བཞིན་གཤེགས་པ་རིགས་ལྔ་ཁྲཽ་བོའི་རྣམ་པ་དང༌། དེ་བཞིན་གཤེགས་མ་རྣམས་ཀྱང་ཁྲོ་མོའི་ཉམས་དང་བཅས་ཤིང༌། བྱང་

[Full Size]

ཆུབ་སེམས་དཔའ་ཡང་ཁྲོ་བོའི་རྣམ་པར་སྤྱན་དྲངས་ཏེ། འཇམ་དཔལ་གདན་དང་བཅས་པ་ཉི་མ་ལ་ཐིམ་པར་སྒོམ། ཉི་མའི་དཀྱིལ་འཁོར་ལས་ཀྱང་ཚ་ཟེར་འབར་བ་དཔག་ཏུ་མེད་པ་ཕྱོགས་ཀུན་ཏུ་སྤྲོས་པས། དགྲ་བགེགས་སྤྱི་དང༌། དམིགས་གསལ་ཅན་གྱི་དགྲ་བགེགས་ཐམས་ཅད་ཐལ་བ་ཙམ་ཡང་མ་ལུས་པར་བསྲེགས་པར་བསམ་པ་ནི་ཐུན་མོང་མ་ཡིན་པའི་ཞལ་གདམས་ལྔ་པའོ། །དྲུག་པ་ནི། ཡང་དེའི་འོད་ཟེར་གྱིས། ཨཱ་ལི་ཀཱ་ལི་དང་སྔགས་འཕྲེང་རྣམས་རང་རང་གི་སྒྲ་འབྲུག་ལྟར་སྒྲོག་པ་དཔག་ཏུ་མེད་པ་སྤྱན་དྲངས་ཏེ་ཉི་མ་ལ་བསྟིམས་པས། ཧཱུཾ་ནག་པོ་འོད་ཟེར་འཕྲོས་པའི་བར་ཙམ་ཞིག་གསལ་འདེབས་པའི་བར་དཀྱུས་བཞིན་ལས། ཧཱུཾ་ཞེས་པའི་སྒྲ་འབྲུག་སྟོང་ལྡིར་བ་ལྟ་བུའི་སྒྲས་ཕྱོགས་ཐམས་ཅད་ཁྱབ་པར་བསམ་ཞིང༌། སྒྲ་དེས་བེར་ལངས་པ་ལྟ་བུར་གྱུར་ཏེ། དགྲ་བགེགས་ཐམས་ཅད་ཀྱི་གནས་རྣམས་ཞིག་ཅིང་ཤིན་ཏུ་སྐྲག་པས་བརྒྱལ་བར་གྱུར་པར་བསམ། ཡང་ཧཱུཾ་ལས་དུག་གི་སྤྲིན་ནམ་མཁའ་གང་བ་སྤྲོས་ཏེ་དེ་ལས་ནད་དང་དུག་ཆུའི་ཆར་བ་དཔག་ཏུ་མེད་པ་བྱུང་ནས་དགྲ་བགེགས་ཐམས་ཅད་རུལ་མྱགས་ཤིང་བསྔོས་པས་རྡུལ་དུ་བརླག་པར་བསམ་པ་ནི། ཐུན་མོང་མ་ཡིན་པའི་ཞལ་གདམས་དྲུག་པའོ། །བདུན་པ་ནི། འོད་ཟེར་འཕྲོས་པས་ཕྱག་མཚན་རྣམས་སྤྱན་དྲངས་ལ་བསྟིམས་པས། ཧཱུཾ་དེ་ཉིད་རྡོ་རྗེ་མཐིང་ནག་རྭ་གདེངས་པ་འོད་ཟེར་འཕྲོ་བ་སྒོམ་པའི་བར་དཀྱུས་བཞིན་ལས། རྡོ་རྗེ་དེ་ལས་ཁྲོ་ཆུང་དང༌། ཕྱག་མཚན་

[Full Size]

གྱི་ཚོགས་དཔག་ཏུ་མེད་པ་སྤྲོས་པས་ཕྱག་མཚན་མེ་འབར་བ་རྣམས་ཀྱིས་དགྲ་བགེགས་ཐམས་ཅད་ཚར་བཅད་ཅིང་ཁྲོ་ཆུང་རྣམས་ཀྱིས་སེམས་ཅན་ཐམས་ཅད་ཀྱང་རྡོ་རྗེ་འཇིགས་བྱེད་ཀྱི་སྐུའི་རྣམ་པར་བསྒྱུར་ཅིང་གོ་འཕང་ལ་བཀོད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྡོ་རྗེ་འཇིགས་བྱེད་ཀྱི་རྣམ་པར་གྱུར་ཏེ་རྡོ་རྗེ་ལ་ཐིམ་པར་བསྒོམ་པ་ནི། ཐུན་མོང་མ་ཡིན་པའི་ཞལ་གདམས་བདུན་པའོ། །བརྒྱད་པ་ནི། དེ་ནས་རང་ཉིད་འབྲས་བུ་རྡོ་རྗེ་འཇིགས་བྱེད་ཀྱི་སྐུའི་རྣམ་པར་ལམ་གྱིས་གྲུབ་པར་བསམ་སྟེ། ཉུང་མཐའ་ལ་ཡང༌། ཧྲཱིཿ ཥྟིཿ བདུན་ཙམ་གྱིས་སྔགས་ཀྱི་ལྷར་སྒྲུབ་པ་ནི། ཐུན་མོང་མ་ཡིན་པའི་ཞལ་གདམས་བརྒྱད་པའོ། །དགུ་པ་ནི། ཞལ་ཕྱག་གསལ་འདེབས་དཀྱུས་བཞིན་ལས། སྐུ་ལས་སྤྲུལ་པའི་ཕོ་ཉ་སྤྲོ་བའི་སྐབས་སུ། ངེས་པའི་འཁོར་དང༌། མ་ངེས་པའི་འཁོར་གཉིས་ལས། དང་པོ་ལ་མངགས་པ་དང༌། ཕོ་ཉ་གཉིས་ལས། དང་པོ་ནི། སྲིན་པོ་དང༌། མཁའ་འགྲོ་མ་གཉིས། གཉིས་པ་ནི། གཤིན་རྗེ་དང༌། མ་མོ་གཉིས་སོ། །དེ་རྣམས་སྤྲོ་བའི་ཚུལ་ནི། མར་མེ་ལས། མར་མེའི་འོད་བཞིན་དུ། རང་ཉིད་འཇིགས་བྱེད་ཆེན་པོའི་སྐུར་གསལ་བའི་སྣང་ཆ་ལས་དུར་ཁྲོད་ཆེན་པོ་བརྒྱད་དུ། སྲིན་པོ་དང༌། མཁའ་འགྲོ་མ་དང། གཤིན་རྗེ་དང་མ་མོ་སྟེ། དེ་རྣམས་གསལ་འདེབས་པ་ནི། སྲིན་པོ་བརྒྱད་གཡས་རལ་གྲི་དང༌། གཡོན་ཐོད་ཁྲག་འཛིན་པ། ཡང་ན་གཡས་ཀྱི་

[Full Size]

ཕྱག་མཚན་གྲི་གུག་དང་འདམ་ཁ་ཡིན་ཀྱང༌། ཕྱག་ལེན་ལ་རལ་གྲི་གཙོ་ཆེ་བར་མཛད་དེ། སྲིན་པོའི་ཞལ་དུ་དགྲ་བགེགས་ཐམས་ཅད་ཆོམ་ཆོམ་གསོལ་བས་ཞལ་མཆིལ་དམར་པོ་ཐོར་ཐོར་འཐོར་བར་བསམ། མཁའ་འགྲོ་མ་བརྒྱད་ནི། གཡས་གྲི་ཁུག་དང༌། གཡོན་ཐོད་ཁྲག་འཛིན་པ། གཤིན་རྗེ་བརྒྱད་ནི་གཡས་རལ་གྲི་དང༌། གཡོན་ཞགས་པ་འཛིན་པ། དེའི་ཡུམ་མ་མོ་བརྒྱད་ནི། གཡས་རྩེ་གསུམ་དང༌། གཡོན་ཐོད་ཁྲག་འཛིན་པ། དེ་རྣམས་ཐམས་ཅད་ཀྱང་སྐུ་མདོག་ནག་པོར་བསྒོམ་མོ། །གཉིས་པ་ནི། མ་ངེས་པའི་འཁོར་ནི། བྲན་ཕོ་མོ་སྟེ། ཐམས་ཅད་ཀྱང་སྐུ་མདོག་མ་ངེས་པ། མགོ་བརྙན་སྣ་ཚོགས་པའི་རྣམ་པ། སྐུ་དང་གཞལ་ཡས་ཁང་དང༌། དུར་ཁྲོད་ལ་སོགས་པ་གནས་མ་ངེས་པ་ནས་ཕར་འཕྲོ་བ་དང༌། ཚུར་གནས་མ་ངེས་པ་རྣམས་སུ་བསྡུ་བར་བྱེད་པ་ནི། ཐུན་མོང་མ་ཡིན་པའི་ཞལ་གདམས་དགུ་པའོ། །དེ་ནས་དམ་ཚིག་པ་བསྐྱེད་ཟིན་པའི་སྐབས་དང༌། ཡེ་ཤེས་པ་རང་ལ་བསྟིམ་པ་ལ་སོགས་པའི་སྐབས་སུ། དྲག་ཤུལ་གྱི་ཉམས་དང་ལྡན་པས། རི་རྣམས་སྙིལ་ཞིང་རྒྱ་མཚོ་དྲག་ཏུ་འཁྲུགས་པ་དང༌། གཟའ་སྐར་ཐང་ལ་ལྷུང་བ་ལ་སོགས་པ་གཟི་བྱིན་དང་མཐུ་སྟོབས་དཔག་ཏུ་མེད་པ་དང་ལྡན་པར་བསམ། མིག་ཏུ་ཀྵིཾཿ ལ་སོགས་པའི་ས་བོན་གྱི་ཡི་གེ་དེ་རྣམས་སའི་སྙིང་པོ་ལ་སོགས་པ་ལྷ་སོ་སོའི་རང་བཞིན་དུ་མོས། སྤྱི་བོར་གནས་པའི་ཨོཾ་ཡིག་རྣམ་སྣང་དང༌། རིན་འབྱུང་

[Full Size]

གཅིག་ཏུ་བསྡུས་པ་སྐུ་རྡོ་རྗེ་དང་མགྲིན་པའི་ཨཱཿ ཡིག་འོད་དཔག་མེད་དང༌། དོན་གྲུབ་གཅིག་ཏུ་འདུས་པ་གསུང་རྡོ་རྗེ་དང༌། ཐུགས་ཀའི་ཧཱུཾ་ཡིག་མི་བསྐྱོད་པ་ཐུགས་རྡོ་རྗེའི་རང་བཞིན་དུ་མོས་སོ། །བཅུ་པ་ནི། རང་གི་སྙིང་ག་ནས་འོད་ཟེར་འཕྲཽས། རྡོ་རྗེ་འཇིགས་བྱེད་སྤྲུལ་པའི་སྐུ་རི་རབ་ཀྱི་རྩེའམ། ཁོང་གསེང་ན་བཞུགས་པ་དེ་ཉིད་སྐད་ཅིག་ཉིད་ལ་མདུན་དུ་སྤྱན་དྲངས། གོང་ཚོགས་ཞིང་གི་སྐབས་ལྟར་བསངས་པ་བྱས་ལ། ཨོཾ་ཧྲཱིཿ ཥྟིཿ ཧཿ ཞེས་པའམ། ཨོཾ་བཛྲ་ལཱ་སྱ་ཧཱུཾ། ཞེས་པའམ། ཨརྒྷཾ་ལ་སོགས་པ་གང་རུང་གིས་མཆོད་པ་ལས། ཕྱག་ལེན་ལ་ཕྱི་མ་གཙོ་ཆེ་བར་མཛད་ནས། ཨོཾ་བཛྲ་ཨཾ་གུ་ཤ་ཛཿ ཞེས་སོགས་སམ། བསྡུ་ན་ཛཿ ཧཱུཾ་བཾ་ཧོཿ ཞེས་པས་རང་ལ་བསྟིམས་པས་བཀྲག་མདངས་གཟི་བྱིན་དཔག་ཏུ་མེད་པ་སྐྱེས་པར་མོས་ལ། བརྟན་པའི་ཕྱིར་དུ། ཡཱ་མནྟ་ཀ་ལན་གསུམ་སོགས་བཟླ་བ་ནི། ཞལ་གདམས་བཅུ་པའོ། །བཅུ་གཅིག་པ་ནི། ཡང་སྙིང་ག་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་བྱང་སེམས་རྣམས་རྡོ་རྗེ་འཇིགས་བྱེད་ཀྱི་སྐུའི་རྣམ་པར་གྱུར་པ་རྣམས། ཡཱ་མཱནྟ་ཀའི་སྔགས་ཀྱིས་འཇིགས་བྱེད་དུ་སྒྲུབ་ལ། སྤྱན་འདྲེན་པ། བསངས་པ། མཆོད་པ་བསྟིམ་པའི་བར་སྔར་བཞིན་ལས། རང་ཉིད་སངས་རྒྱས་བྱང་ཆུབ་སེམས་དཔའ་ཀུན་འདུས་སུ་མོས་ལ། བརྟན་པའི་ཕྱིར་དུ་ཡཱ་མནྟ་ཀ་སྔར་བཞིན་བཟླ་བ་ནི། ཞལ་གྱི་གདམས་པ་

[Full Size]

བཅུ་གཅིག་པའོ། །བཅུ་གཉིས་པ་ནི། སྔར་བཞིན་འོད་ཟེར་སྤྲོས་པས་གདོད་ནས་གྲུབ་པའི་རྡོ་རྗེ་འཇིགས་བྱེད་ཀྱི་སྐུ་ནམ་མཁའ་ཁྱབ་པར་བཞུགས་པ་དེ་ཉིད་རང་གི་མདུན་ཏུ་མངོན་དུ་གྱུར་པའི་ཚུལ་གྱིས་བཛྲ་ས་མ་ཛཿ སྤྱན་དྲངས། བསངས་པ། མཆོད་པ། བསྟིམ་པ་རྣམས་སྔར་བཞིན་བྱས། རང་ཉིད་གདོད་ནས་གྲུབ་པའི་ལོངས་སྐུ་རྡོ་རྗེ་འཇིགས་བྱེད་དངོས་ཡིན་སྙམ་དུ་མོས། ཡ་མནྟ་ཀའི་སྔར་བཞིན་བརྟན་པར་བྱེད་པ་ནི། ཞལ་གྱི་གདམས་པ་བཅུ་གཉིས་པའོ། །དེ་ཡང་ཡེ་ཤེས་སྤྱན་འདྲེན་གྱི་ཞལ་གདམས་གསུམ་པོ་འདི་རྣམས་ལ། ཐོག་མཐའ་གཉིས་ལ་སྤྱན་འདྲེན། བསངས་པ། མཆོད་པ། བསྟིམ་པ། བརྟན་པར་བྱེད་པ་སྟེ། དོན་ཚན་ལྔ་ལྔ་དང༌། བར་བ་ལ་འོད་ཟེར་གྱིས་འཇིགས་བྱེད་ཀྱི་སྐུར་བསྒྱུར་བ་སྔར་གྱིས་ལྷར་སྒྲུབ་པ། སྤྱན་འདྲེན་པ། བསངས་པ། མཆོད་པ། བསྟིམ་པ་བརྟན་པར་བྱེད་པ་སྟེ། དོན་ཚན་བདུན་ནོ། །རང་ཉིད་འཇིགས་བྱེད་དུ་གྱུར་པ་ལ། མིག་ཏུ་ཀྵིཾ་ལ་སོགས་པ་བཀོད་པའི་ཚེ་རྒྱུད་ཐ་དད་པའི་ཚུལ་གྱིས་རང་ཉིད་བསྲུང་བའི་ཕྱིར་བཀོད་པ་ཡིན་ལ། སྤྲུལ་སྐུ་རྡོ་རྗེ་འཇིགས་བྱེད་བསྟིམ་པའི་སྐབས་སུ་རང་ཉིད་འཇིགས་བྱེད་དུ་གསལ་བའི་སྤྱན་དང་ཕྱག་དང་དབུ་ལ་སོགས་པ་རྣམས། སྤྲུལ་སྐུ་རྡོ་རྗེ་འཇིགས་བྱེད་ཀྱི་དེ་དང་དེ་ཡིན་སྙམ་པའི་ང་རྒྱལ་བསྐྱེད་དོ། །སངས་རྒྱས་བྱང་སེམས་འཇིགས་བྱེད་ཀྱི་རྣམ་པར་གྱུར་པ་རྣམས་རང་ལ་བསྟིམ་པའི་སྐབས་

[Full Size]

སུ་སྤྱན་ལ་སོགས་པའི་སྐུ་ལུས་ཀྱི་ཆ་ཤས་རྣམས། སངས་རྒྱས་བྱང་སེམས་ཐམས་ཅད་ཀྱི་དེ་དང་དེ་ཡིན་སྙམ་པའི་ང་རྒྱལ་བསྐྱེད་དོ། །གདོད་ནས་གྲུབ་པའི་གནས་ལུགས་ཆོས་ཉིད་ཀྱི་ལོངས་སྐུ་རྡོ་རྗེ་འཇིགས་བྱེད་བསྟིམ་པའི་སྐབས་སུ། རང་ཉིད་རྡོ་རྗེ་འཇིགས་བྱེད་དུ་གསལ་བའི་སྐུ་གསུང་ཐུགས་རྣམས། ཆོས་ཉིད་གདོད་མའི་རྡོ་རྗེ་འཇིགས་བྱེད་ཀྱི་སྐུ་གསུང་ཐུགས་དངོས་ཡིན་སྙམ་པའི་ང་རྒྱལ་བསྐྱེད་དོ། །བཅུ་གསུམ་པ་ནི། རང་གི་སྙིང་ག་ནས་འོད་ཟེར་འཕྲོས་པས། དབང་གི་ལྷ་རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ལྷ་མོ་དྲུག་རྣམས་སྤྱན་འདྲེན་པ་ལས། ཐམས་ཅད་ཀྱང་ཁྲོ་བོའི་རྣམ་པ། རིགས་ལྔ་དང་སེམས་དཔའ་རྣམས་གཡས་རང་རང་གི་ཕྱག་མཚན་ཕྱར་བ། གཡོན་རང་རང་གི་ཕྱག་མཚན་འཛིན་པས། སོ་སོའི་ཡུམ་ཁྲོ་ཉམས་དང་བཅས་པ་ལ་འཁྱུད་པ། ཞབས་གཡས་བསྐུམ་གཡོན་བརྐྱང་གི་ཚུལ་གྱི་བཞུགས་པར་མདུན་དུ་སྤྱན་དྲངས་ཏེ་བསང་བ་བྱ་བ་ནི། ཞལ་གདམས་བཅུ་གསུམ་པའོ། །དེ་ནས་རིགས་བདག་མི་བསྐྱོད་པས་རྒྱས་བཏབ་པའི་བར་དཀྱུས་བཞིན་ནོ། །བཅུ་བཞི་པ་ནི། དབང་གི་ལྷའི་ཐུགས་ཀ་ནས་འོད་ཟེར་གཙོ་བོར་སྤྲོ་ཞིང༌། རང་གི་སྙིང་ག་ནས་ཀྱང་འོད་ཟེར་དཔག་ཏུ་མེད་པ་སྤྲོས་པས་འཁོར་འདས་ཀྱི་སྣོད་བཅུད་ཐམས་ཅད་ཀྱི་བཀྲག་མདངས་བཅུད་ཐམས་ཅད་དང་སངས་རྒྱས་བྱང་སེམས་རྣམས་ཀྱི་སྐུའི་བྱིན་རླབས་འོད་ཟེར་དཀར་པོའི་

[Full Size]

རྣམ་པར་སྤྱན་དྲངས་ཏེ། ཛཿཧཱུཾ་བཾ་ཧོཿ ཞེས་པས་རང་ལ་བསྟིམས་པས། རང་ཉིད་ལ་གཟི་བྱིན་དཔག་ཏུ་མེད་པ་སྐྱེས་པར་མོས་ལ། ཨོཾ་ཡཱ་མནྟ་ཀ་ཧཱུཾ་ཕཊ། ཨོཾ་ཨོཾ་ཨོཾ། ཞེས་བཟླ་བ་ནི། ཞལ་གདམས་བཅུ་བཞི་པའོ། །བཅོ་ལྔ་པ་ནི། དབང་ལྷ་དང༌། རང་གི་སྙིང་ག་ནས་འོར་ཟེར་འཕྲོས་པས་འཁོར་འདས་ཀྱི་སྣོད་བཅུད་ཐམས་ཅད་ཀྱི་མདངས་དང༌། ཡེ་ཤེས་མི་ཤིགས་པའི་བཅུད་རྣམས་དང༌། སངས་རྒྱས་བྱང་སེམས་ཀྱི་གསུང་གི་བྱིན་རླབས་འོད་ཟེར་དམར་པོའི་རྣམ་པར་སྤྱན་དྲངས་ཏེ། རང་ལ་བསྟིམས་པས་སྔར་བས་ཀྱང་གཟི་བྱིན་འཕེལ་བར་བསམ་ལ། ཡཱ་མཱནྟ་ཀའི་མཐར། ཨཱཿཨཱཿཨཱཿ ཞེས་བཟླ་བ་ནི། ཞལ་གདམས་བཅོ་ལྔ་པའོ། །བཅུ་དྲུག་པ་ནི། དབང་ལྷ་དང་རང་གི་སྙིང་ག་ནས་འོད་ཟེར་འཕྲོས། འཁོར་འདས་སྣོད་བཅུད་ཐམས་ཅད་ཀྱི་མདངས་དང༌། བཅུད་རྣམས་དང་སངས་རྒྱས་བྱང་སེམས་ཀྱི་ཐུགས་ཀྱི་བྱིན་རླབས་རྣམས་འོད་ཟེར་སྔོན་པོའི་རྣམ་པར་སྤྱན་དྲངས་ཏེ་བསྟིམ་པས། གཟི་བྱིན་ལྷག་པར་འཕེལ་བར་བསམ་ལ། ཡཱ་མནྟ་ཀའི་མཐར། ཧཱུཾ་ཧཱུཾ་ཧཱུཾ། ཞེས་བཟླ་བ་ནི། ཞལ་གདམས་བཅུ་དྲུག་པའོ། །བཅུ་བདུན་པ་ནི །དབང་གི་ལྷའི་ཐུགས་ཀ་ནས་དང༌། རང་གི་སྙིང་

[Full Size]

ག་ནས་འོད་ཟེར་འཕྲོས་པས། འཁོར་འདས་ཀྱི་སྣོད་བཅུད་ཐམས་ཅད་ཀྱི་བཀྲག་མདངས་སྤྱི་དང༌། ཁྱད་པར་རང་རང་སོ་སོའི་ཡོན་ཏན། དཔེར་ན་སའི་ཡོན་ཏན་སྲ་བ་དང༌། དེ་བཞིན་དུ་ཆུའི་བརླན་གཤེར་དང༌། མེའི་དྲོད་དང༌། རླུང་གི་ཡོན་ཏན་གཡོ་བ་ལ་སོགས་པ་རྣམས་དང༌། སེམས་ཅན་སོ་སོའི་ཡོན་ཏན་གྱི་ཁྱད་པར་རྣམས་དང༌། སངས་རྒྱས་བྱང་སེམས་ཀྱི་སྐུ་གསུང་ཐུགས་ཀྱི་བྱིན་རླབས་དང༌། ཡོན་ཏན་གྱི་ཁྱད་པར་སྣ་ཚོགས་པ་རྣམས་ཏེ། མདོར་ན་འཁོར་འདས་ཀྱི་བརྟན་གཡོ་ཐམས་ཅད་ཀྱི་ཐབས་སྣང་བའི་ཆ་ཐམས་ཅད་འོད་ཟེར་སེར་པོའི་རྣམ་པར་སྤྱན་དྲངས་ཤིང༌། དེ་དང་ལྷན་ཅིག་ཏུ་རྒྱན་དང༌། ན་བཟའི་ཁྱད་པར་མང་པོ་ཡང་ཚུར་བསྡུས། རང་ལ་བསྟིམས་པས་འོད་ཟེར་རྣམས་རང་ལ་ཐིམ་ཞིང༌། ན་བཟའ་རྣམས་གླང་ལྤགས་ལ་ཐིམ། རྒྱན་གྱི་ཁྱད་པར་རྣམས་སྐུའི་རྒྱན་ཆ་རྣམས་ལ་ཐིམ་པས། རྒྱན་རྣམས་ཀྱང་འོད་འབར་ཞིང་འཕྲོ་བའི་རྣམ་པ་དང༌། རང་ཉིད་ཀྱི་གཟི་བྱིན་ཡང་ལྷག་པར་རྒྱས་པར་བསམ་ཞིང༌། མཆོད་ཡོན། མེ་ཏོག །བདུག་སྤོས། སྣང་གསལ། དྲི་མཆོག །ཞལ་ཟས་སོགས་མཆོད་པའི་ཁྱད་པར་སྣ་ཚོགས་པ་རང་ཉིད་ལ་འབྱུང་བར་བསམ་ལ། ཡ་མཱནྟ་ཀའི་མཐར། སྭཱ་སྭཱ་སྭཱ། ཞེས་བཟླ་བ་ནི། ཞལ་གདམས་བཅུ་བདུན་པའོ། །བཅོ་བརྒྱད་པ་ནི། དབང་ལྷ་དང༌། རང་གི་སྙིང་ག་ནས་

[Full Size]

འོད་ཟེར་འཕྲོས་པས། འཁོར་འདས་ཀྱི་བརྟན་གཡོ་ཐམས་ཅད་ཀྱི་མདངས་དང༌། བཅུད་རྣམས་དང༌། ཁྱད་པར་དུ་ཡང་དེ་དག་གི་ཤེས་རབ་སྟོང་པའི་ཆ་རྣམས་འོད་ཟེར་ལྗང་གུའི་རྣམ་པར་སྤྱན་དྲངས་ཤིང༌། དེ་དག་དང་ལྷན་ཅིག་ཏུ་གྲི་གུག་ལ་སོགས་པ་མཚོན་ཆ་སྣ་ཚོགས་པ་ཡང་བཀུག་སྟེ། རང་ཉིད་ལ་བསྟིམས་པ་ལས། འོད་ཟེར་རྣམས་རང་གི་སྐུ་ལུས་ལ་ཐིམ་པས་གཟི་བྱིན་སྔར་ལས་ཀྱང་ལྷག་པར་རྒྱས། མཚོན་ཆ་རྣམས་ཕྱག་མཚན་སོ་སོ་ལ་ཐིམ་པས། ཕྱག་མཚན་རྣམས་ཀྱང་མེ་ལྕེ་འབར་བར་གྱུར་པར་བསམ་ལ། རང་ཉིད་ལ་ཁྲག་གི་མཆོད་ཡོན། དབང་པོ་ལྔའི་མེ་ཏོགཤ་ཆེན་གྱི་བདུག་སྤོས། ཞུན་ཆེན་གྱི་སྣང་གསལ། མཁྲིས་པའི་དྲི་ཆབ། ཤ་ཁྲག་གི་ཞལ་ཟས། ཞིང་ཆེན་གྱི་བླ་རེ། རྒྱུ་རློན་གྱི་ལྡ་ལྡི་སོགས་དྲག་པོའི་མཆོད་པ་སྣ་ཚོགས་པ་བྱུང་བར་བསམ་ལ། ཡ་མཱནྟ་ཀའི་མཐར། ཧཱ་ཧཱ་ཧཱ། ཞེས་བཟླ་བ་ནི་ཞལ་གདམ་བཅོ་བརྒྱད་པའོ། །བཅུ་དགུ་པ་ནི། དབང་གི་ལྷའི་ཐུགས་ཀ་ནས་འོད་ཟེར་དཔག་ཏུ་མེད་པ་སྤྲོས། འཁོར་འདས་སྣོད་བཅུད་རྣམས་ཀྱི་སྤྲོས་བྲལ་སྟོང་བའི་ཆ་རྣམས་འོད་ཟེར་སྔོན་པོའི་རྣམ་པར་སྤྱན་དྲངས་ཤིང༌། དེ་དང་ལྷན་ཅིག་ཏུ་ཚངས་པ་དང་བརྒྱ་བྱིན་ལ་སོགས་པ་འཇིག་རྟེན་ན་མཐུ་དང་སྟོབས་ཆེ་བར་གྱུར་པའི་སྐྱེ་འགྲོ་རྣམས་བཀུག་སྟེ། ཞབས་འོག་གི་སྲོག་ཆགས་རྣམས་ལ་བསྟིམ། འོད་ཟེར་རྣམས་རང་ལ་ཐིམ་པས་གཟི་བྱིན་དཔག་ཏུ་མེད་པ་རྒྱས་པར་མོས་ལ། ཡ་མཱནྟ་ཀའི་མཐར། ཧི་ཧི་ཧི། ཞེས་བཟླ་བ་ནི་ཞལ་གདམས་

[Full Size]

བཅུ་དགུ་པའོ། །ཉི་ཤུ་པ་ནི། དེ་ནས་རང་གི་སྙིང་ག་ནས་ཕག་མོ་དང་དབྱངས་ཅན་མ་དང༌། རོ་ལངས་མ་དང་རྡོ་རྗེ་མཁའ་འགྲོ་མ་སྟེ་བཞི་པོ་གང་རུང་ཞིག་རྗེས་ཆགས་ཀྱི་དོན་དུ་སྤྲོ་བ་ཡིན་པ་ལས། ཕག་མོ་དང༌། དབྱངས་ཅན་མ་གཉིས་དགྲ་ནག་ནས་འབྱུང་བ་ལྟར། ཞལ་གསུམ་ཕྱག་དྲུག་མ་དང༌། རྡོ་རྗེ་རོ་ལངས་མ་ཞལ་གསུམ་ཕྱག་དྲུག་མའམ། ཞལ་གཅིག་ཕྱག་གཉིས་མ་གང་རུང་དུ་བསྒོམ་ཞིང༌། རྡོ་རྗེ་མཁའ་འགྲོ་མ་ནི་དགྲ་ནག་ནས་འབྱུང་བ་ལྟར། ཞལ་གསུམ་ཕྱག་དྲུག་མར་བསྒོམ་མོ། །དེ་ལྟར་རང་གི་སྙིང་ག་ནས་ལྷ་མོ་བཞི་པོ་གང་རུང་ཞིག་འཁོར་སྒེག་སོགས་ལྷ་མོ་བརྒྱད་དང་བཅས་པ་སྤྲོས། ཐབས་ཤེས་ཀྱི་མཁའ་གསང་བྱིན་གྱིས་བརླབས་ལ། རང་ཉིད་ལ་ཡུམ་བཞི་པོ་གང་རུང་ཞིག་གིས་འཁྱུད་པར་བསམ་ལ། སྒེག་སོགས་ལྷ་མོ་བརྒྱད་པོ་རྣམས་ཀྱང༌། མཐའ་སྐོར་དུ་གླུ་དང་གར་ལ་སོགས་པ་ཆགས་པའི་རོལ་རྩེད་སྣ་ཚོགས་པ་བྱེད་པར་མོས་ལ། རང་ཉིད་ཡབ་ཡུམ་སྙོམས་པར་ཞུགས་པས་དགའ་བཞིའི་ཡེ་ཤེས་སྐྱེས་པར་མོས་ལ་ཨོཾ་ཨཱཿཧཱུཾ་ཨོཾ་སརྦ་ཏཱ་ཐ་ག་ཏ་ཨ་ནུ་རཱ་ག་ན་སོགས་བརྗོད་པ་ནི་གསང་བའི་མཆོད་པ་སྟེ། ཞལ་གདམས་ཉི་ཤུ་པའོ། །དེ་ནས་གཟུགས་སྒྲ་ལ་སོགས་དྲུག་པོ་ནི། །ཞེས་སོགས་འདོན་བཞིན་པས་རྗེས་ཆགས་ཀྱིས་བདེ་བ་དང༌། ལྷ་མོའི་རོལ་རྩེད་སོགས་སྣང་སྟོང་རྒྱུ་མ་ལྟ་བུར་ཤེས་པར་བྱས་ནས། སྙིང་ག་ནས་སྤྲོས་པ་དེ་དག་སླར་རང་གི་སྙིང་གར་བསྡུའོ། །དཀྱུས་ནས་འབྱུང་བ་

[Full Size]

བཞིན་གྱི་བསྟོད་པས་བསྟོད་ཅིང༌། རང་ཉིད་ལ་ཕྱོགས་བཅུའི་སངས་རྒྱས་བྱང་སེམས་རྣམས་ཀྱིས་བྲག་ཆ་ལྟ་བུའི་སྒྲས་བསྟོད་པར་བསམ་མོ། །བདུད་རྩི་མྱང་བ་དཀྱུས་ནས་འབྱུང་བ་ལྟར་བྱེད་དོ། །ཉེར་གཅིག་པ་ནི། རང་ཉིད་འཇིགས་བྱེད་ཆེན་པོར་གསལ་བའི་མདུན་དུ་འབྲུབ་ཁུང་ཞིག་གསལ་གདབ། ཧྲཱིཿ ཥྟིཿ འི་མཐར་དམིགས་གསལ་ཅན་གྱི་དགྲ་ཡོད་ན། མིང་ནས་སྨོས་ལ་ཨ་ཀརྵ་ཡ་ཛཿ ཞེས་པ་དང༌། དེ་ལྟ་བུར་མེད་ན་སརྦ་ཤ་ཏྲུན་ཨ་ཀརྵ་ཡ་ཛཿ ཞེས་བརྗོད་པས་ཞབས་འོག་གི་སྲོག་ཆགས་རྣམས་ལས་ཕོ་ཉའི་ཚོགས་དཔག་ཏུ་མེད་པ་སྤྲོས་ཏེ། དམིགས་ཀྱིས་གསལ་བའི་དགྲ་ཡོད་ན་དེ་ཉིད་བཀུག་ཅིང༌། དེ་ལྟ་བུ་མེད་ན་ཕྱོགས་བཅུའི་གདུག་པ་ཅན་ཀུན་བཀུག་ནས། ཐམས་ཅད་ཀྱང་གཅིག་ཏུ་འདུས་པར་གྱུར་ཏེ། འབྲུབ་ཁུང་གི་ནང་དུ་བཅུག་པར་མོས་ལ། ཛཿཧཱུཾ་བྃ་ཧོཿ ཞེས་བརྗོད་དོ། །དེ་ནས་རང་གི་སྙིང་ག་ནས་སྐུ་སྟོད་རྡོ་རྗེ་འཇིགས་བྱེད་ཕྱག་གཉིས་པའི་རྣམ་པ་ཅན་ལ། སྨད་ཕུར་བའི་དབྱིབས་ཅན་སྤྲོས་ལ། ཧྲཱིཿ ཥྟིཿ འི་མཐར་སརྦ་ཤ་ཏྲུན་ཀཱི་ལ་ཡ་ཧཱུཾ་ཕཊ། ཅེས་པ་གསུམ་བཞི་ཙམ་བརྗོད་པས། དགྲ་བོའི་ལུས་སེམས་ཕྲལ་ཞིང་དབང་ཆེན་གསེར་གྱི་ས་གཞི་ལ་སྒྲག་པར་བསམ། དེ་ནས་ཧྲཱིཿ ཥྟིའི་མཐར་སརྦ་ཤ་ཏྲུཾ་ཚིནྡྷ་ཚིནྡྷ་བིནྡྷ་བིནྡྷ་མཱ་ར་ཡ་ཧཱུཾ་ཕཊ། ཅེས་ལན་གསུམ་མམ་བཞི་ཙམ་བརྗོད་པས། མཚོན་ཆ་སྣ་ཚོགས་ཐོགས་པའི་ཕོ་ཉ་དྲག་གཏུམ་རྣམས་ཀྱི་དགྲ་བགེགས་ཀྱི་ལུས་རྣམས་དུམ་བུར་གཏུབ་པས། ཕྱི་ནང་ཐམས་ཅད་དུ་ཤ་ཁྲག་གི་ཚོགས་ཐོད་པའི་སྣོད་དང༌། མི་ལྤགས་

[Full Size]

ཀྱི་གཡང་བཞིའི་སྣོད་རྣམས་སུ་དཔག་ཏུ་མེད་པ་བྱུང་བར་བསམ། དེ་ལྟ་བུའི་ཤ་ཁྲག་གི་ཚོགས་པ་རྣམས་འཇིགས་བྱེད་ཆེན་པོའི་ཞལ་དགུ་པོ་རྣམས་ནས་འོད་ཟེར་གྱི་སྦུ་གུས་དྲངས་ཏེ། ཤ་ཆོམ་རུས་ཆོམ་དུ་གསོལ་བར་བསམ་ཞིང༌། ངེས་པ་དང་མ་ངེས་པའི་འཁོར་རྣམས་དང༌། ཞབས་འོག་གི་སྲོག་ཆགས་རྣམས་ཀྱིས་ཀྱང་ཧབ་ཐོབ་ཏུ་ཁྱེར་ཞིང་གསོལ་བར་མོས་ལ། ཧྲཱིཿ ཥྟིཿ འི་མཐར་བཛྲ་བྷཻ་ར་ཝ་ཨ་དྷི་པ་ཏི་ཨེ་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་ཧཱུཾ་ཧཱུཾ་ཕཊ། ཅེས་པ་ལན་གསུམ་བརྗོད་དོ། །དེ་ནི་དྲག་པོའི་མཆོད་པ་སྟེ། ཞལ་གདམས་ཉེར་གཅིག་པའོ། །ཉི་ཤུ་རྩ་གཉིས་པ་ནི། ཞི་ཁྲོ་སྦྲགས་སྒྲུབ་བྱེད་པ་སྟེ། དྲག་པོའི་མཆོད་པ་གྲུབ་རྗེས་སུ་རང་ཉིད་ཀྱི་ཐུགས་ཀའི་རྒྱུའི་འཇམ་དཔལ་གནས་གྱུར་ཏེ། འཇམ་དབྱངས་དཀར་པོ་ཞལ་བཞི་ཕྱག་བརྒྱད་པ་ཞལ་བཞི་ཀ་དཀར་པོ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་རལ་གྲི་དང་པོ་ཏི་འཛིན་པ། དེའི་འོག་མ་གཉིས་ཀྱིས་མདའ་དང་ཞུ་འཛིན་པ། དེའི་འོག་མ་གཉིས་ཀྱི་ལྕགས་ཀྱུ་དང་ཞགས་པ་འཛིན་པས། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་དམར་མོ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། འཇམ་དབྱངས་ཀྱི་ཐུགས་ཀར་ཟླ་བ་ལ་དྷཱིཿ དཀར་པོ། ཡུམ་གྱི་ཐུགས་ཀར་ཉི་མ་ལ་ཧྲཱིཿ དམར་པོ། དྷཱིཿ ཡི་མཐར་རྩ་སྔགས་

[Full Size]

སྙིང་པོ་ཉེ་སྙིང་རྣམས་ཀྱིས་བསྐོར་བར་དམིགས་ལ། ཧྲཱིཿ དྷཱིཿ ཞེས་པ་ལན་ཁ་ཡར་བཟླས་པའི་མཐར་ཡ་མཱནྟ་ཀ །ཧྲཱིཿ ཥྟཱིཿ ཡ་མ་ར་ཛཿ རྣམས་བཟླའོ། །སྔགས་འཕྲེང་ལས་བདུད་རྩི་དམར་པོ་རླན་གཤེར་དྲོད་ཀྱི་རང་བཞིན་ཅན་དཔག་ཏུ་མེད་པ་བྱུང༌། འཇམ་དཔལ་གྱི་སྐུ་ལུས་གང༌། བ་སྤུའི་བུ་ག་ནས་བྱུང༌། སྙིང་ག་ཆོས་ཀྱི་འཁོར་ལོ་གང་རྩ་སྟོང་ཕྲག་བདུན་ཅུ་རྩ་གཉིས་ནས་བརྒྱུད། རང་ཉིད་རྡོ་རྗེའི་འཇིགས་བྱེད་ཀྱི་སྐུ་ལུས་ཐམས་ཅད་གང༌། དྲི་ནན་ནག་པོ་དང་སྡིག་སྒྲིབ་ཐམས་ཅད་བཀྲུས་ཤིང་སྦྱངས། དྭངས་གསལ་འོད་ཀྱི་རང་བཞིན་དག་པའི་ཤེལ་ལྟར་གྱུར། བདུད་རྩི་རྣམས་རིམ་གྱི་འདུས། འཇམ་དཔལ་གྱི་བ་སྤུའི་བུ་ག་ནས་འདུས། ཐུགས་ཀའི་དྷིཿལ་ཐིམ། དེ་ལྟ་བུའི་དམིགས་པ་ལ་སེམས་གཏད་ནས་བཟླས་པ་བྱའོ། །ཞི་ཁྲོ་སྦྲགས་སྒྲུབ་ཀྱི་བསྙཻན་པ་བྱེད་པའི་སྐབས་དེ་ཁོ་ན་ལ་དམིགས་པ་གཏོད་ཅིང༌། རྒྱུན་གྱི་ཉམས་ལེན་ལ་ནི། ཐོག་མར་ཞི་ཁྲོ་སྦྲགས་སྒྲུབ་ཀྱི་དམིགས་པ་དང༌། བཟླས་པ་ཅུང་ཟད་བྱས་ལ། སེམས་དཔའ་གསུམ་བརྩེགས་དཀྱུས་བཞིན་དུ་སྒོམ་ལ་བཟླ་པར་བྱའོ། །ཞི་ཁྲོ་སྦྲགས་སྒྲུབ་ཀྱི་དམིགས་པ་དེ་ལ་བརྟེན་ནས་ཤེས་རབ་འཕེལ་བར་བྱེད་ན། འཇམ་དབྱངས་ཀྱི་ཐུགས་ཀར་ངྷཱིཿ ཡིག་མཐར། ཨོཾ་བཛྲ་ཏིཀྵ་ན་དྷིཿ ཞེས་པའི་སྔགས་ཀྱིས་བསྐོར་བར་བསམ་ཞིང༌། དེ་རྣམས་ལས་འོད་ཟེར་དཀར་པོའི་ཚོགས་དཔག་ཏུ་མེད་པ་འཕྲོས། འཇམ་པའི་

[Full Size]

དབྱངས་ཀྱི་སྐུ་ལུས་ཐམས་ཅད་གང༌། བ་སྤུའི་བུ་ག་ནས་ཕྱིར་འཕྲོས། རང་ཉིད་ཀྱི་ལུས་ཀྱི་ནང་ཐམས་ཅད་གང་བ་སྤུའི་བུ་ག་ནས་ཕྱིར་འཕྲོས་པས། མེ་རི་དང་འདྲེས་ཏེ་འོད་ཟེར་གྱི་ཚོགས་རྣམས་ཀྱིས་མི་ཤེས་པའི་མུན་པ་བསལ། ཤེས་རབ་ཀྱི་སྣང་བ་ལ་བཀོད། སངས་རྒྱས་བྱང་ཆུབ་སེམས་དཔའི་མཁྱེན་པ་རྣམས་འོད་ཟེར་གྱི་རྣམ་པར་བསྡུས་ཏེ། རང་གི་སྙིང་གའི་སྔགས་འཕྲེང་ལ་ཐིམ་པར་བསམ་ལ། གོང་གི་སྔགས་དེ་བཟླའོ། །ཡང་དབང་སྡུད་ཀྱི་དམིགས་པ་ནི། སྐུ་མདོག་དམར་པོ་བསྒྱུར། བསྡུ་ན་གཡས་ལྕགས་ཀྱུ་དང་གཡོན་ཞགས་པ་འཛིན་པ་བསྐྱེད། རྒྱན་དང་ཡུམ་སོགས་སྔར་བཞིན་བསྒོམ། འཇམ་དབྱངས་ཀྱི་ཐུགས་ཀར་དྷཱིཿཡི་མཐར། ཨོཾ་མ་ཧཱ་ར་ག་བཛྲ་ར་ག་ཡ་སརྦ་སཏྭ་ན་ཧོཿ ཞེས་པས་བསྐོར་བར་དམིགས། ཡང་ན་ཡབ་ཀྱི་ཐུགས་ཀར་ཟླ་བའི་སྟེང་དུ་དྷཱིཿ ཡིག་དམར་པོས་མཐའ་བསྐོར་དུ། ཨོཾ་མཉྫུ་ཤྲཱི་ཝ་ཤཾ་ཀུ་རུ་ཧྲཱི་ཛཿ ཞེས་པ་ཁ་དོག་དམར་པོས་བསྐོར་བར་བསྒོམ། དེ་ནས་སྔགས་བཟླས་པས་འོད་ཟེར་དམར་པོ་དཔག་ཏུ་མེད་པ་བྱུང༌། འཇམ་དཔལ་གྱྀ་སྐུ་ལུས་གང༌། བ་སྤུའི་བུ་ག་ནས་ཕྱིར་བྱུང༌། རང་ཉིད་འཇིགས་བྱེད་ཀྱི་སྐུ་ལུས་གང༌། བ་སྤུའི་བུ་ག་ནས་ཕྱིར་འཕྲོས་འོད་ཟེར་གྱི་རྩེ་མོ་ལ་ཕོ་ཉ་དྲག་གཏུམ་དཔའ་བ་རྟུལ་ཕོད་དང་བཅས་པའི་ཉམས་ཅན། ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་སྤྲོས། དབང་དུ་བསྡུ་རྒྱུའི་བསྒྲུབ་བྱ་ཕོ་མོ་གང་ཡིན་

[Full Size]

ཐམས་ཅད་ཞགས་པས་བཅིངས། ལྕགས་ཀྱུས་སྐྱེས་པའི་སྙིང་ཁ་དང༌། བུད་མེད་ཀྱི་གསང་བ་ནས་ཕུག་སྟེ་སྐད་ཅིག་ཉིད་ལ་དྲངས་ནས། རང་གི་ཞབས་གཉིས་ཀྱི་བར་རམ་མདུན་དུ་ཉི་མའི་སྟེང་དུ་བཀུག །དེ་དག་ཐམས་ཅད་གན་རྐྱལ་ནས་བརྒྱལ་བ་དང༌། མྱོས་པའི་རྣམ་པ་ཅན་གསལ་བཏབ། རང་གི་ཐུགས་ཀ་ནས་འོད་ཟེར་དམར་པོ་འཕྲོས། དེ་དག་ལ་ཕོག་པས་ལུས་ཀྱི་ནང་ཐམས་ཅད་འོད་དམར་པོས་གང་བས། རང་ལ་ཤིན་ཏུ་དགའ་བ་དང་གུས་པ་དང་དད་པའི་རྣམ་པས། ཐལ་མོ་སྦྱར་ནས་འདུག་པར་བསམ། སྔགས་བཟླས་ནས་ཐུན་འཇོག་པའི་ཚེ་དེ་དག་དེ་ཉིད་དུ་མི་དམིགས་པར་བསམ་པ་མ་གཏོགས་ཕར་སྤྲོ་བ་སོགས་མི་དགོས་སོ། །ཡང་འཇམ་དབྱངས་ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་སྦྱོར་མཚམས་ནས་བབས། སྙིང་གའི་རྩ་བཞི་ནས་རིམ་གྱིས་བརྒྱུད། ལུས་ཐམས་ཅད་ཁྲིག་མེར་ཏེ་གང་བར་བསམ་ལ་གོང་གི་སྔགས་དེ་བཟླའོ། །དེ་རྣམས་ནི་ཞི་ཁྲོ་སྦྲགས་སྒྲུབ་ཀྱི་གདམས་པ་སྟེ། ཞལ་གདམས་ཉེར་གཉིས་པའོ། །ཉེར་གསུམ་པ་ནི། སྲོག་སྒྲུབ་སྟེ། དེ་ཡང་རང་གི་སྙིང་ཁར་ལྷ་མོ་དབྱངས་ཅན་མ་སྐུ་མདོག་དམར་མོ། དམར་ནག་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་ཁྲག་གིས་གང་བའམ། མགོ་བོ་རིལ་བོ་འཛིན་པ། གཡས་གཉིས་ཀྱིས་པོ་ཏིས་མཚན་པའི་པདྨ་དང༌། འཁོར་ལོ་དང༌། གཡོན་གཉིས་ཀྱི་རི་པོ་ཆེས་མཚན་པའི་པི་ཝཾ་དང་རལ་གྲི་འཛིན་པ། ཞབས་གཡས་

[Full Size]

བསྐུམ་གཡོན་བརྐྱང་གི་སྟབས་ཀྱིས་བཞུགས་པ་སྟག་ལྤགས་ཀྱི་ཤམས་ཐབས་སོགས་ཞི་མ་ཁྲོའི་རྣམ་པར་གསལ་བཏབ། དེའི་ཐུགས་ཀར་ཉི་མ་ལ་ས་བོན་ཧྲཱིཿ ཡིག་གམ། དོ་ཡིག །དེའི་མཐར། ཨོཾ་པི་ཙུ་པི་ཙུ་པྲཛྙཱ་ཝརྡྷ་ནི། ཛྭ་ལ་ཛྭ་ལ་མེ་དྷ་ཝརྡྷ་ནི། དྷི་རི་དྷི་རི། བུདྡྷི་ཝརྡྷ་ནི་ཡེ་སྭཱཧཱ། ཞེས་པ་རྣམས་ཁ་དོག་དམར་པོར་དམིགས་ལ། དེ་ལས་འོད་ཟེར་དཀར་པོའི་ཚོགས་དཔག་ཏུ་མེད་པ་སྤྲོས། དབྱངས་ཅན་མའི་བ་སྤུའི་བུ་ག་ནས་ཐོན། རང་གི་ལུས་ཀྱི་ནང་ཐམས་ཅད་གང༌། བ་སྤུའི་བུ་ག་ནས་ཕྱིར་སྤྲོས་མེ་རི་དང་འདྲེས་པའི་མེ་འོད་ཀྱིས་སེམས་ཅན་རྣམས་ཀྱི་མི་ཤེས་པའི་མུན་པ་བསལ། སངས་རྒྱས་ཀྱི་བྱིན་རླབས་རྣམས་མཁྱེན་པའི་ངོ་བོར་སྤྱན་དྲངས་ཏེ་སྙིང་གའི་སྔགས་འཕྲེང་ལ་ཐིམ་པར་བསམ་ལ། གོང་གི་སྔགས་བཟླ་བར་བྱེད་པ་ནི། ཤེས་རབ་འཕེལ་བར་བྱེད་པའོ། །དབང་སྡུད་ཀྱི་དམིགས་པ་ནི། སྙིང་གའི་སྔགས་འཕྲེང་ལས་འོད་ཟེར་དམར་པོའི་ཚོགས་སྤྲོས། དབྱངས་ཅན་མ་དང་རང་གི་བ་སྤུའི་བུ་ག་ནས་ཕྱིར་སྤྲོས། ཁམས་གསུམ་ཐམས་ཅད་དབང་དུ་བསྡུས། སངས་རྒྱས་ཀྱི་བྱིན་རླབས་རྣམས་འོད་ཟེར་དམར་པོའི་རྣམ་པར་སྤྱན་དྲངས་ཏེ། རང་གི་སྙིང་གའི་སྔགས་འཕྲེང་ལ་ཐིམ་པར་བསམ་ལ། གོང་གི་སྔགས་བཟླའོ། །རྒྱུད་འཇམ་པར་བྱེད་པ་ནི། རང་གི་སྙིང་གར་དབྱངས་ཅན་མ་དང༌། དབྱངས་ཅན་མའི་ཐུགས་ཀའི་སྔགས་འཕྲེང་སྔར་བཞིན་གསལ་བཏབ་ལ། སྔགས་འཕྲེང་ལས་བྱང་

[Full Size]

ཆུབ་ཀྱི་སེམས་ཀྱི་རྒྱུན་བྱུང་སྐུ་ལུས་ཀྱི་ནང་ཐམས་ཅད་གང༌། གསང་གནས་ནས་ཐོན། རང་གི་ལུས་ཀྱི་ནང་ཐམས་ཅད་གང་ཞིང་བཀྲུས་པས། ཉམས་བདེ་བ་དང་ལྡན་པར་མོས་ལ། གོང་གི་སྔགས་བཟླའོ། །ཐུགས་རྒྱུད་བསྐུལ་བ་ནི། རང་གི་ལྟེ་བར་དབྱངས་ཅན་མ། དེའི་གསང་གནས་སུ་ཆོས་འབྱུང་གྲུ་གསུམ་གྱི་ནང་དུ་ཉི་མ་ལ་ཧཱུཾ་དེའི་མཐར་ཉེ་སྙིང་སྙིང་པོ་རྩ་སྔགས་རྣམས་ཀྱི་བསྐོར་བ། རང་གི་སྙིང་ཁར་ཉི་མ་ལ་དབྱངས་ཅན་མའི་ས་བོན་དང༌། སྔགས་འཕྲེང་གིས་བསྐོར་བ་ལས་འོད་ཟེར་དམར་པོའི་ཚོགས་དཔག་ཏུ་མེད་པ་བྱུང༌། ལྟེ་བ་ན་བཞུགས་པའི་དབྱངས་ཅན་མའི་གསང་གནས་ཀྱི་སྔགས་འཕྲེང་ལ་ཐིམ་པས། ཐུགས་རྒྱུད་རང་དབང་མེད་པར་བསྐུལ་བར་བསམ་མོ། །གསང་གནས་ཀྱི་སྔགས་ལས་ཀྱང་འོད་ཟེར་འཕྲོས། ཐུགས་ཀའི་ཡི་གེ་ལ་ཐིམ། དེ་རྣམས་ནི་སྲོག་བསྒྲུབ་སྟེ། ཞལ་གྱི་གདམས་པ་ཐུན་མོང་མ་ཡིན་པ་ཉེར་གསུམ་པའོ། །ཉེར་བཞི་པ་ནི། ཐུན་མོང་མ་ཡིན་པའི་བསྲུང་བ་སྟེ། དེ་ཡང་ཉིན་བསྲུང་བ་ནི་རང་ཉིད་འཇིགས་བྱེད་དུ་གསལ་བའི་ལུས་ཀྱི་གཡོན་སྐེད་པ་ཙམ། མཚེར་བའི་གནས་སུ་གཤིན་རྗེ་སྐུ་མདོག་ནག་པོ། གཡས་རལ་གྲི་དང༌། གཡོན་ཕུབ་འཛིན་པ། སྤྱན་གསུམ་སྟག་ལྤགས་དང་སྦྲུལ་རྒྱན་སོགས། ཁྲོ་བོའི་རྒྱན་དང་ཆ་ལུགས་ཡོངས་སུ་རྫོགས་པའི་སྐུ་ཅན་ཞིག་གསལ་བཏབ་ལ། ཨོཾ་ཡ་མ་མ་ཐ་ན་ཧཱུཾ་ཕཊ། ཅེས་པའི་སྔགས་འདི་མང་ཉུང་ཅི་རིགས་པ་བཟླའོ། །དུས་ཀྱི་ཁྱད་པར་

[Full Size]

སྐྱ་རེངས་ཤར་བ་ཙམ་ལ་བསྔགས་པར་བཤད་དོ། །མཚན་བསྲུང་ནི། སྔར་གྱི་གནས་སུ་གཤིན་རྗེ་སྐུ་མདོག་ནག་པོ། གཡས་རལ་གྲི། གཡོན་ཕུབ་འཛིན་པ། རྨོགས་སོག་གོ་ཆས་བརྒྱན་པ། འཇིག་རྟེན་པའི་ཆ་ལུགས་ཅན་ཞིག་དམིགས་ལ། ཨོཾ་ཧྲཱིཿཀཱ་ལ་རུ་པ་ཧཱུཾ་ཁཾ་ཞེས་པ་མང་ཉུང་ཅི་རིགས་པ་བཟླའོ། ཁྱད་པར་ཅན་གྱི་དུས་ནི་མུན་ཚབ་ཚུབ་ལའོ། །དེ་གཉིས་ཀ་ལའང་རབ་ཏུ་འབར་བའི་སྤྱན་སྟེང་འོག་ཐམས་ཅད་དུ་གཟིགས་པ། སྤྱན་གསུམ་ལས་མེ་ལྕེའི་ཚོགས་དཔག་ཏུ་མེད་པ་སྤྲོས་པས། རང་ཉིད་རྡོ་རྗེ་འཇིགས་བྱེད་ཀྱི་སྐུ་ལུས་ཀྱི་ནང་ཐམས་ཅད་གང་བར་བསམ་མོ། །དེ་གཉིས་ནི་འཇིག་རྟེན་པའི་གཤིན་རྗེ་གཤེད་ཀྱི་བསྲུང་བ་ཡིན་ལ། འཇིག་རྟེན་ལས་འདས་པའི་བསྲུང་བ་ནི། རང་གི་ལུས་ཀྱི་གཡས་ཕྱོགས། མཆིན་པའི་གནས་སུ་གཤིན་རྗེ་དེ། གཡས་རྡོ་རྗེས་མཚན་པའི་བེ་ཅོན་དང༌། གཡོན་ཞགས་པ་འཛིན་པ། སྐུ་ལས་མེ་འོད་འཕྲོས་པས། ལུས་ཀྱི་ནང་ཐམས་ཅད་གང་བར་བསམ་ལ། ཨོཾ་ཧྲཱིཿཀྲུཾ་བྲུཾ་སྲུཾ་སྟྲུཾ་ཧཱུཾ་གཞེས་པ་བརྒྱ་རྩ་ལ་སོགས་པ་ཅི་རིགས་པ་བཟླའོ། །ཞལ་གདམས་ཉེར་བཞི་པའོ། །ཉེར་ལྔ་པ་ནི། ལས་གཤིན་གྱི་སྒྲུབ་ཐབས་ནི། སྙིང་ག་ནས་སྤྲོ་བ་དང༌། སྤྱན་འདྲེན་པ་གཉིས་ལས་དང་པོ་ནི། རང་གི་སྙིང་ག་ནས་ཡི་གེ་ཡཿ གཅིག་སྤྲོས། མདུན་དུ་ལས་ཀྱི་གཤིན་རྗེ་སྐུ་མདོག་སྔོན་པོ། གཡས་དབྱུག་པ་དང༌། གཡོན་ཞགས་པ་འཛིན་པ། ཁྲོ་ཞལ་

[Full Size]

སྤྱན་གསུམ་པ། སྦྲུལ་རྒྱན་དང༌། སྟག་ལྤགས་གྲོལ་བའམ། གཅེར་བུ་ལིང་ག་གྱེན་དུ་བསྒྲེང་བའི་རྣམ་པ་ཅན་དུ་གསལ་བཏབ། དེ་གཡོན་དུ་ཡུམ་ཙ་མུན་ཊི་རྩེ་གསུམ་དང་ཐོད་ཁྲག་འཛིན་པའི་རྣམ་པ་ཅན་སྐད་ཅིག་ཙམ་གྱིས་གསལ་བཏབ་ལ། ས་མ་ཡ་སྟྭཾ། ཞེས་དམ་ལ་བཞག །མཆོད་བསྟོད་བྱ། རང་ཉིད་འཇིགས་བྱེད་དུ་གསལ་བའི་ཡི་དམ་གྱི་སྔགས་འཕྲེང་གི་མཐར། ལས་གཤིན་གྱི་སྔགས་ཀྱིས་བསྐོར་བར་དམིགས་ལ། ཐོག་མར་ཡི་དམ་གྱི་སྔགས་དང༌། དེའི་རྗེས་སུ་ཆོས་ཀྱི་རྒྱལ་པོའི་རྟོག་པ་ལས་བྱུང་བའི་སྔགས་རིང་དེ་ལན་བདུན་བརྒྱད་ཙམ་བཟླས་ལ། དེ་ནས། ཡ་མཱ་ཀཱ་ལ་རུ་པ་ཧཱུཾ་ཕཊ་ཏ་ཨ་ཞེས་པ་བཟླས་ལ། རང་གི་སྙིང་གའི་ས་བོན་སྔགས་འཕྲེང་དང་བཅས་པ་ལས་འོད་ཟེར་དཀར་པོའི་ཚོགས་དཔག་ཏུ་མེད་པ་སྤྲོས། ལས་ཀྱི་གཤིན་རྗེ་ཡབ་ཡུམ་ལ་ཕོག་པས། རང་གི་འགལ་རྐྱེན་བར་ཆད་ཐམས་ཅད་ཞི་བ་དང༌། ལས་གཤིན་འཁོར་བཅས་ཀྱི་རང་ལ་འཚུབ་པ་དང་འཁུ་ལྡོག་གི་རྣམ་པ་ཐམས་ཅད་ཞི་ཞིང་མཐུ་སྟོབས་དང་གཟི་བྱིན་དཔག་ཏུ་མེད་པ་རྒྱས་པར་བསམ་ལ། མཐའ་བསྐོར་དུ་རང་ལ་བསྐཽར་བ་བྱེད་པར་མོས་སོ། །ཡང་སྙིང་གའི་སྔགས་འཕྲེང་ལས་འོད་ཟེར་དམར་པོའི་ཚོགས་དཔག་ཏུ་མེད་པ་སྤྲོས། ལས་ཀྱི་གཤིན་རྗེ་ལ་ཕོག་པས་རང་གི་དབང་དུ་འདུས་ཤིང་བྲན་བཞིན་དུ་བཀའ་ཉན་པར་བསམ་མོ། །ཡང་སྙིང་གའི་ས་བོན་སྔགས་འཕྲེང་དང་བཅས་པ་ལས་འོད་ཟེར་སྔོན་པོའི་ཚོགས་དཔག་ཏུ་མེད་པ་སྤྲོས། ལས་

[Full Size]

ཀྱི་གཤིན་རྗེ་ལ་ཕོག་པས་རང་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས་ཐམས་ཅད་ཚར་གཅོད་པ་ལ་སོགས་པ་དྲག་པོའི་ལས་ཐམས་ཅད་ཐོགས་མེད་དུ་སྒྲུབ་པའི་ལས་མཛད་པར་བསམ་ལ་མཐའ་སྐོར་དུ་བསྐོར་བ་མཛད་པར་མོས་སོ། །དེ་ནས་ཐུན་གྱི་མཐར་ལས་གཤིན་གྱི་གཏོར་བསྔོའམ། ཡི་དམ་གྱི་གཏོར་མའི་ཞོར་ལ་གཏོར་མ་ཕུལ་ལ། རང་གི་ལྟེ་བར་ཡི་གེ་ཡཿ གཅིག་གསལ་བཏབ་ལ། དེ་ལ་ལས་གཤིན་ཡུམ་དང་བཅས་པ་བསྡུའོ། །གཉིས་པ་སྤྱན་འདྲེན་པ་ནི། རང་གི་སྙིང་ག་ནས་འོད་ཟེར་འཕྲོས་པས་ལྷོ་ཕྱོགས་རིམ་པ་བདུན་གྱི་ས་འོག་ནས་ལས་ཀྱི་གཤིན་རྗེ་སྤྱན་དྲངས་ལ། ཨ་མྲྀ་ཏས་སྔགས་སམ། ཡ་མནྟ་ཀས་བསང་བ་བྱ། གཞན་སྔར་བཞིན་ལས། མཐར་གཤེགས་སུ་གསོལ། དེ་ནི་ཞལ་གདམས་ཉེར་ལྔ་པའོ། །ཉེར་དྲུག་པ་འཁོར་ལོའི་བསྙེན་པ་ནི། རང་གི་ལྟེ་བའི་ནང་འཁོར་ལོ་རྩིབས་བརྒྱད་པ། དེའི་ཕྱི་བསྐོར་རྩིབས་བཅུ་གཉིས། དེའི་ཕྱི་བསྐོར་དུ་དྲུག་ཅུ་རེ་བཞི་རྣམས་སུ་ཡོད་པ་ལས། དེ་རྣམས་ཡོངས་སུ་གྱུར་པ་ལས། འཁོར་ལོ་ནང་བསྐོར་ལ་རེ་མིག་བརྒྱད། དེའི་ཕྱི་ལ་རེ་མིག་བཅུ་གཉིས། དེའི་ཕྱི་ལ་རེ་མིག་བཅུ་དྲུག་སྟེ། ཐམས་ཅད་ཀྱི་བར་རྣམས་རྩིག་པ་འཐེན་པ་ལྟ་བུ་ལ་ཐོག་ཕུབ་བྱེད་ན་ལྕགས་མཁར་སྒོ་མེད་དང༌། ཐོག་ཕུབ་མི་བྱེད་ན་འབྲུབ་ཁུང་ལྟ་བུའོ། །རེ་མིག་གི་དབུས་སུ་ཡཿ ཡིག་དང༌། ཤར་ནས་གཡས་བསྐོར་དུ། ཀྵེ་མ་

[Full Size]

མེ་ད་དང༌། ཕྱི་བསྐོར་གྱི་རེ་མིག་བཅུ་གཉིས་ལ། ཛཿས་དོ་རུ་ཎ་ཡོ་ནི་ར་ཡཙྪ་ནི་ར། ཞེས་པ་རྣམས་འགོད་པ་ཡིན་པ་ལས། དེ་ཡང་ལྷོ་མའི་ཐད་དུ་ར་དང་དེ་ནས་ཛཿསོགས་གཡས་བསྐོར་དུ་བཀོད། ཕྱིའི་རེ་མིག་ལ། ཨོཾ་དང་ཧྲཱིཿགཅིག་ཏུ་བྱས་ན་ན་གཉིས་གཅིག་ཏུ་བྱས་པའི་སྙིང་པོའི་སྔགས་འགོད་ཅིང༌། ཡིག་འབྲུ་མེད་པའི་རེ་མིག་སྟོང་པ་རྣམས་སུ། གཏི་མུག་གི་ས་བོན་མཾ་དང༌། སེར་སྣའི་ས་བོན་བཾ་དང༌། འདོད་ཆགས་ཀྱི་ས་བོན་ཏཾ་དང༌། ཕྲག་དོག་གི་ས་བོན་ཨི་བཾ་དང༌། ཞེ་སྡང་གི་ས་བོན་དཾ་རྣམས་ལས་བྱུང་བའི་བདུད་བཞྀའི་རྣམ་པ་ཅན་གྱི་བགེགས་དང་དགྲ་སྟེ་གནས་པར་བསམ་ལ། འཇམ་རླུང་བཟུང་ཞིང་འགོག་བཟླས་ཀྱི་ཚུལ་གྱིས། ཨོཾ་ཡ་མ་རཱ་ཛ་ས་དོ་མེ་ཡ་ཧཱུཾ་ཕཊ། ཨོཾ་ཡ་མེ་དོ་རུ་ཎ་ཡོ་ད་ཡ་ཧཱུཾ་ཕཊ། ཨོཾ་ཡ་ད་ཡོ་ནི་ར་ཡཀྵེ་ཡ་ཧཱུཾ་ཕཊ། ཨོཾ་ཡཀྵེ་ཡཙྪ་ནི་ར་མ་ཡ་ཧཱུཾ་ཕཊ། ཅེས་རྩ་སྔགས་དུམ་བུ་བཞིར་བྱས་ཏེ་བཟླ་བ་ཡིན་པ་ལས། དམིགས་པ་ནི་ཡིག་འབྲུ་རྣམས་ལས་མེ་ལྕེ་དང་ཕོ་ཉ་དཔག་ཏུ་མེད་པ་སྤྲོས། རེ་མིག་སྟོང་པ་རྣམས་ལ་ཡོད་པའི་དགྲ་བགེགས་ཐམས་ཅད་ཚར་བཅད་པར་བསམ་མོ། །གྲངས་ནི་ཁྲི་ཕྲག་ལྔ་ཙམ་ཟླ་བ་ཡིན་པ་ལས། ཐུན་རེ་ལ་སྔགས་ཚན་རེ་རེ་བྱས་ཏེ་བཟླ་བ་ནི་ཅུང་ཟད་རྩུབ་པ་ཡིན་ཞིང༌། ཐོག་མར་སྔགས་ཚན་དང་པོ་ཁྲི་ཕྲག་ལྔ་འགྲོ་བར་བྱས་ལ། དེ་ནས་རིམ་པས་ཚན་པ་རེ་རེ་བཞིན་ཁྲི་ཕྲག་ལྔ་ལྔ་བཟླ་བ་ནི་འཇམ་པ་ཡིན་ནོ། །དེ་བཞིན་དུ་ཧྲཱིཿཥྟིཿབཟླ་ཞིང་རེ་མིག་ཕྱི་མ་

[Full Size]

ལ་དམིགས་པ་སྔར་བཞིན་གཏད་དོ། །དེ་ནི་གཤིན་རྗེ་སྤྱིའི་འཁོར་ལོའོ། །རྡོ་རྗེ་འཇིགས་བྱེད་ཀྱི་ཐུན་མོང་མ་ཡིན་པའི་འཁོར་ལོ་ལ། སྤྱིར་རྟོག་བདུན་ལས་ཧྲཱིཿཥྟིཿརྐྱང་བའི་འཁོར་ལོ་དང༌། ཧྲཱིཿཥྟིཿདང་ཡ་མ་རཱ་ཛ་སྦྲགས་པའི་འཁོར་ལོ་སྟེ་གཉིས་པོ་དེ་གསལ་བར་གསུངས་ཤིང༌། ཧྲཱིཿཥྟིཿརྐྱང་བའི་འཁོར་ལོ་གསུངས་པའི་ཤུགས་ལ། ཡ་མཱནྟ་ཀ་དང༌། ཡ་མ་རཱ་ཛ་རྐྱང་བའི་འཁོར་ལོའང་བསྟན་ཅིང༌། ཧྲཱིཿཥྟིཿདང་ཡ་མ་རཱ་ཛ་སྦྲགས་པའི་འཁོར་ལོ་བསྟན་པའི་ཤུགས་ལ། ཧྲཱིཿཥྟིཿདང་ཡ་མཱནྟ་ཀ་སྦྲགས་པ་དང༌། ཡ་མ་རཱ་ཛ་དང༌། ཡ་མནྟ་ཀ་སྦྲགས་པའི་འཁོར་ལོ་དང༌། གསུམ་ཆར་སྦྲགས་པའི་འཁོར་ལོ་སྟེ་བདུན་ཡོད་པ་ལས། ནང་གི་བསྙེན་པའི་སྐབས་འདིར་ཧྲཱིཿཥྟིཿདང༌། ཡ་མ་རཱ་ཛ་སྦྲགས་པའི་འཁོར་ལོ་སྒོམ་པར་བྱེད་པ་ཡིན་ཏེ། དེ་ཡང་རང་གི་ལྟེ་བར་འཁོར་ལོ་ཕྱི་བརྒྱད་ནང་བརྒྱད། རེ་མིག་གི་བར་དང་ཕྱི་ནང་གི་མཚམས་ལ་ལྕགས་རི་འཐེན་པ་ལ། ཐོག་ཕུབ་མི་བྱེད་ན་འབྲུབ་ཁུང་དང༌། ཐོག་ཕུབ་བྱེད་ན་ལྕགས་མཁར་དུ་མོས་ལ། ལྟེ་བར་ཡཾ་ལས་རླུང་གི་དཀྱིལ་འཁོར། དེའི་སྟེང་དུ་རཾ་ལས་མེའི་དཀྱིལ་འཁོར་རཾ་གྱིས་མཚན་པ། ཆོས་འབྱུང་གཉིས་བརྩེགས་ཀྱི་རྣམ་པ་ཅན་གྱི་སྟེང་དུ། གཡས་གཡོན་དུ་རཾ་རེ་རེ། དེའི་བར་དུ་ཎི་དང་དྲི་གནོད་བྱེད་ཐམས་ཅད་ཅེས་པ་ལྟ་བུ་དང༌། དམིགས་གསལ་ཡོད་ན་དགྲ་བགེགས་འདི་ཞེས་བྱ་བ་ཞེས་པའི་མིང་དང༌། དེའི་སྟེང་དུ་ཡཿཡིག་གཤིན་རྗེ་གཤེད་ཀྱི་ངོ་བོས་མནན་པར་བསམ། རེ་

[Full Size]

མིག་ནང་མ་ལ་ཕྱོགས་བཞིར་ཧཱུཾ་ཤ་ཏྲུཾ་མཱ་ར་ཡ་ཧཱུཾ་ཞེས་པ་དང༌། མཚམས་བཞི་ལ་ཕཊ་ཤ་དྲུཾ་མཱ་ར་ཡ་ཕཊ། ཅེས་པ་དང༌། རེ་མིག་རེ་རེའི་མཐའ་སྐོར་དུ་ཧྲཱིཿཥྟིཿས་བསྐོར་བ། རེ་མིག་ཕྱི་མའི་ཕྱོགས་དང་མཚམས་ཀྱི་སྔགས་སྤྱི་གོང་དང་འདྲ་བ་ལས། རེ་མིག་རེ་རེའི་མདུན་ནས་རིམ་པ་བཞིན་དུ། ཡ་མ་རཱ་ཛ་ཞེས་པ་དང༌། དེ་བཞིན་དུ་ས་དོ་མེ་ཡ་དང༌། ཡ་མེ་དོ་རུ་དང༌། ཎ་ཡོ་ད་ཡ་དང༌། ཡ་ད་ཡོ་ནི་དང༌། ར་ཡ་ཀྵེ་ཡ་དང༌། ཡཀྵེ་ཡཙྪ་དང༌། ནི་ར་མ་ཡ་དང། ཞེས་པའི་ཡི་གེ་བཞི་བཞིས་བསྐོར་བར་བསམ་ལ། རླུང་ཅུང་ཟད་བཟུང་ལ། ལྟེ་བའི་མེ་རླུང་གི་སྟེང་ན་གནས་པའི་རཾ་གཉིས་ཀྱི་བར་གྱི་དགྲ་བགེགས་ཀྱི་མིང་དང༌། དེའི་སྟེང་གི་ཡཿཡིག་ལ་སེམས་གཙོ་བོར་གཏད་ཅིང༌། ཨོཾ་ཡ་མཱནྟ་ཀ་ཤ་ཏྲུཾ་མཱ་ར་ཡ་ཧཱུཾ་ཕཊ། ཅེས་པ་ཁྲི་ཕྲག་གཅིག་ཙམ་བཟླས་ལ། དེ་བཞིན་དུ་ཨོཾ་ཧྲཱིཿཥྟིཿབི་ཀྲི་ཏཱ་ན་ན་ཤ་ཏྲུཾ་མཱ་ར་ཡ་ཧཱུཾ་ཕཊ། ཅེས་པ་ཕྱོགས་མཚམས་ཀྱི་རེ་མིག་བརྒྱད་པོ་རྣམས་ལ་རིམ་པ་བཞིན་དུ་བཟླས་ལ། རྒྱས་པར་ན་ཐམས་ཅད་ལ་ཁྲི་ཕྲག་རེ་རེ་དང༌། བསྡུ་ན་ཐམས་ཅད་སྡོམ་པ་ལ་ཁྲི་ཕྲག་གཅིག་གོ །དེ་བཞིན་དུ་ཕྱིའི་རེ་མིག་ལ་དམིགས་ལ་ཕྱོགས་བཞི་ལ། ཨོཾ་ཡ་མ་རཱ་ཛ་ཤ་ཏྲུཾ་མཱ་ར་ཡ་ཧཱུཾ། ཞེས་པ་ལྟ་བུ་མཐར་ཧཱུཾ་ཡོད་པ་དང༌། མཚམས་བཞི་ལ། ཨོཾ་ས་དོ་མེ་ཡ་ཤ་ཏྲུཾ་མཱ་ར་ཡ་ཕཊ། ཅེས་པ་ལྟ་བུ་ཕཊ་ཐ་མར་ཡོད་པ་བྱའོ། །གྲངས་ནི་རྒྱས་པར་ན་ཁྲི་ཕྲག་རེ་རེ་དང༌། བསྡུ་ན་ཐམས་ཅད་སྡོམ་པ་ལ་ཁྲི་ཕྲག་གཅིག་བཟླ་ཞིང༌། བཟླས་པའི་དངོས་

[Full Size]

གཞིའི་དམིགས་པ། ཡིག་འབྲུ་ལས་འོད་ཟེར་འཕྲོ་བ་ལ་སེམས་གཏད་ཅིང༌། ཐུན་གྱི་མཇུག་ཏུ་དྲག་པོའི་དམིགས་པ་ནི། འཁོར་ལོའི་ལྟེ་བ་ན་གནས་པའི་གནོད་བྱེད་ཀྱི་མིང་དེ་ཉིད་དགྲ་བགེགས་ཀྱི་གཟུགས་སུ་གྱུར་པར་བསམ་ཞིང༌། ཡིག་འབྲུ་རྣམས་ལས་ཕོ་ཉ་དྲག་གཏུམ་སྣ་ཚོགས་པ་མཚོན་ཆ་ཐོགས་པས་དགྲ་བགེགས་ཀྱི་ལུས་དུམ་བུར་གཏུབ་པ་དང། མེས་བསྲེགས་པ་དང༌། དུག་དང་ནད་ཀྱི་ཆར་ཕབ་སྟེ་ལུས་རུལ་ཞིང་མྱགས་པར་བྱེད་པ་སོགས་སྔགས་བརྒྱ་ཙམ་གྱི་རིང༌། ཐུན་གྱི་ཐ་མར་དམིགས་པ་དེ་ལྟ་བུ་བྱའོ། །དེ་ལྟར་འཁོར་ལོ་གཉིས་པོའི་བསྙེན་པ་ལེགས་པར་སོང་ནས། དྲག་པོའི་དམིགས་པའི་བསྙེན་པ་ཞག་བདུན་ལ་སོགས་པ་ཅི་རིགས་པ་བྱ་བ་ལས། དེ་ཡང་རང་ཉིད་རྡོ་རྗེ་འཇིགས་བྱེད་ཀྱི་རྣམ་པར་གསལ་བའི་ཐུགས་ཀའི་རྒྱུའི་འཇམ་དཔལ་རྡོ་རྗེའི་འཇིགས་བྱེད་ཀྱི་སྐུའི་རྣམ་པར་གྱུར་པ་ལ། ཡིད་ཀྱིས་མཆོད་པ། བསྟོད་པ། གཏོར་མ་འབུལ་བ་རྣམས་བྱས་ལ། དྲག་པོའི་ལས་འགྲུབ་པར་མཛད་དུ་གསོལ། ཅེས་གསོལ་བ་བཏབ་པས་འཇིགས་བྱེད། ཀྱི་ཐུགས་ཀ་ནས་ཧཱུཾ་སྔོན་པོ་ཞིག་སྤྲོས། ལྟེ་བའི་འཁོར་ལོ་ལ་ཐིམ་པས། རླུང་དང་མེའི་དཀྱིལ་འཁོར་གྱི་སྟེང་དུ་རྡོ་རྗེ་ས་གཞིའི་སྟེང་དུ་གོང་གི་འཁོར་ལོ་གཉིས་པོ་གང་འགོད་ཞིག་གསལ་བཏབ། ཐུགས་ཀའི་འཇིགས་བྱེད་ཀྱི་སྐུ་ལས་ཧཱུཾ་ཡིག་སྔོན་པོ་དང༌། ཕོ་ཉའི་ཚོགས་དཔག་ཏུ་མེད་པ་སྤྲོས། ལྟེ་བའི་འཁོར་ལོའི་ནང་གི་ཡིག་འབྲུའམ། ཡང་ན་ཡིག་འབྲུ་རྣམས་ལྷར་གྱུར་པ་ལ་

[Full Size]

ཐིམ། དགྲ་བགེགས་ཐམས་ཅད་ཚར་གཅོད་ཅིག །ཅེས་བཀའ་བསྒོས་པས་ཡིག་འབྲུའམ་ལྷ་སྐུ་རྣམས་ལས་འཇིག་རྟེན་དང་འཇིག་རྟེན་ལས་འདས་པའི་ཕོ་ཉའི་ཚོགས་དཔག་ཏུ་མེད་པ་སྤྲོས། དམིགས་གསལ་ཅན་གྱི་དགྲ་བགེགས་ཡོད་ན་དེ་དང༌། མེད་ན་ཕྱོགས་བཅུའི་གདུག་པ་ཅན་གྱི་དགྲ་བགེགས་ཐམས་ཅད་མེ་རླུང་གི་སྟེང་དུ། ལྕགས་ཀྱུ་ཞགས་པས་སྦྱོར་བས་བཀུག་སྟེ། འཁོར་ལོའི་ལྟེ་བའི་ཡཿཡིག་གི་དབུས་ཀྱི་དགྲ་བགེགས་མིང༌། དགྲ་བགེགས་ཀྱི་གཟུགས་སུ་གྱུར་པ་ལ་ཐིམ་པར་བསམ་ཞིང༌། ཨོཾ་ཡ་མཱནྟ་ཀ་ཤ་དྲུཾ་ཨ་ཀརྵ་ཡ་ཛཿཛཿ ཞེས་པ་དང༌། དེ་བཞིན་དུ་སྙིང་པོ་དང༌། རྩ་སྔགས་ལ་ཡང་སྦྱར་བ་བཟླ་ཞིང་མཐར། ཛཿཧཱུཾ་བཾ་ཧོཿ ཞེས་བརྗོད་དོ། །དེ་ནས་ཡིག་འབྲུ་རྣམས་ལས་འཇིག་རྟེན་ལས་འདས་པའི་ཁྲོ་བོ་དཔག་ཏུ་མེད་པ་སྤྲོས། དེ་དག་གིས་དགྲ་བགེགས་ཀྱི་ལུས་མཚོན་ཆ་སྣ་ཚོགས་པས་དུམ་བུར་གཏུབས་ཤིང༌། ཤ་ཁྲག་རྣམས་ཞལ་དུ་གསོལ་བར་བསམ། ཡང་དགྲ་བགེགས་ཀྱི་ལུས་སྔར་བཞིན་གྲུབ་པ་ལ་ཡིག་འབྲུའམ་ལྷ་སྐུ་རྣམས་ལས་གཤིན་རྗེ་དང༌། སྲིན་པོ་དང༌། མཁའ་འགྲོ་མ་དང༌། མ་མོ་ལ་སོགས་པ་འཇིག་རྟེན་པའི་ལྷ་ཚོགས་སྤྲོས་ཏེ། དེ་དག་གི་མཚོན་ཆ་སྣ་ཚོགས་པས་ལུས་དུམ་བུར་གཏུབས་ཤིང་ཤ་ཁྲག་ཞལ་དུ་གསོལ་བར་བསམ། ཡང་དགྲ་བགེགས་ཀྱི་ལུས་སྔར་བཞིན་གྲུབ་པ་ལ། བྱ་དང་གཅན་ཟན་དང༌། སྦྲུལ་གདུག་པ་ཅན་དཔག་ཏུ་མེད་པ་སྤྲོས་ཏེ། དགྲ་བགེགས་ཀྱི་ཤ་རུས་རྣམས་

[Full Size]

ཟོས་པར་བསམ། ཡང་སྔར་བཞིན་གྲུབ་པ་ལ། དུག་གི་ཆར་ཕབ་སྟེ་ལུས་ཐམས་ཅད་རུལ་ཞིང་མྱགས་པར་བསམ། ཡང་ལུས་སྔར་བཞིན་གྲུབ་པ་ལ། ནད་ཀྱི་ཆར་བ་ཁྲག་གི་རྣམ་པ་ཅན་དཔག་ཏུ་མེད་པ་བབས་ཏེ་ཚར་བཅད་པར་བསམ། ཡང་ལུས་སྔར་བཞིན་གྲུབ་པ་ལ། མེས་བསྲེགས་ཤིང་མཐར་ཐལ་བ་རྣམས་ཀྱང་རླུང་གིས་ཁྱེར་བར་བསམ་མོ། །དེ་དག་གི་རིང་ལ། ཨོཾ་ཧྲཱིཿཥྟིཿབི་ཀྲིཏཱ་ན་ན་གནོད་བྱེད་དགྲ་བགེགས་ཐམས་ཅད་མཱ་ར་ཡ་ཧཱུཾ་ཕཊ། ཅེས་པ་དང༌། དེ་བཞིན་དུ་ཡ་མཱནྟ་ཀ་དང༌། ཡ་མ་རཱ་ཛ་ལ་ཡང་བཏགས་ལ་བཟླའོ། །དེ་དག་གི་སྐབས་སུ་ཡང་བུམ་པ་ཅན་གྱི་སྦྱོར་བས་འགོག་བཟླས་བྱ་ཞིང༌། ཅི་སྟེ་མི་ནུས་ན་ཡིད་ཀྱིས་བཟླས་པ་བྱའོ། །དེ་ལྟར་ན་ནང་གི་འཁོར་ལོའི་བསྙེན་པ་སྔོན་དུ་ལེགས་པར་སོང་ན་ཕྱིའི་འཁོར་ལོ་ལ་བརྟེན་པའི་ལས་ཚོགས་རྣམས་ཐོགས་མེད་དུ་འགྲུབ་པར་གྱུར་རོ། །ཞལ་གདམས་ཉེར་དྲུག་པའོ། ༈ ས་བཅད་གཉིས་པ་མཆོག་གི་བསྙེན་པ་རྫོགས་རིམ་གྱི་གདམས་པ་ལ། མཚན་མོ་རྒྱུ་བའི་རྣལ་འབྱོར། རྭ་བསྒོམ་པའི་ཞལ་ཤེས་མཚན་མ་གྱེན་བསྒྲེངས་ཏེ་གསུམ་ལས། དང་པོ་ནི། ལུས་གནད་ལེགས་པར་བཅས་ལ། ཞལ་ཕྱག་ལྷག་མ་རྣམས་རྩ་བའི་ཞལ་ཕྱག་ལ་བསྡུས་ལ། རང་ཉིད་ཞལ་གཅིག་ཕྱག་གཉིས་པར་གསལ་བའི་མ་ཧེའི་ཞལ་གྱི་སྣ་རྩེ་ལ་སེམས་གཏད་ཅིང༌། རླུང་དལ་བུས་ཕྱིར་བུས་ལ། སྣ་རྩེར་རླུང་གི་རེག་བྱ་ལ་སེམས་གཏད། ཚུལ་དེ་ལྟ་བུ་ཐུན་

[Full Size]

བཞིར་བཅད་ལ་ཟླ་ཕྱེད་ལ་སོགས་པར་བསྒོམ་ལ། དེ་ནས་རླུང་དལ་བུས་ནང་དུ་རྔུབ་ཅིང༌། སྣ་རྩེར་རླུང་གི་རེག་བྱ་ལ་སེམས་གཏད། དེ་ཡང་ཟླ་ཕྱེད་ཙམ་གྱི་བར་དུ་བསྒོམ། དེ་ནས་རླུང་དལ་བུས་ཕྱིར་བུས་ཤིང༌། དལ་བུས་ནང་དུ་རྔུབ་ལ་སྣ་རྩེར་རླུང་གི་རེག་བྱ་ལ་སེམས་གཏད་དོ། །དེ་ནས་རང་ཉིད་ཀྱི་ལུས་ནང་ནས་རླུང་རྣམས་འོད་ཟེར་སྣ་ལྔའི་རྣམ་པས་རླུང་རྣམས་ཕྱིར་འགྲོ་བ་དང༌། མཉམ་དུ་སྣ་བུག་གཉིས་ནས་ཕྱིར་སོང་བརྟན་གཡོ་སྣོད་བཅུད་ཐམས་ཅད་ལ་ཕོག་པས། ཐམས་ཅད་གདོས་བཅས་ཀྱི་རྣམ་པ་སྤངས་ཏེ་འོད་དུ་ཡལ་ཡལ་འདུག་པར་བསམ་ལ། བདེན་མེད་ཡིན། སྒྱུ་མ་ལྟ་བུ་ཡིན་སྙམ་པའི་དྲན་འདུན་དྲག་ཏུ་བྱ། དེ་ནས་རླུང་འོད་ཟེར་གྱི་རྣམ་པ་ཅན་རྣམས་ནང་དུ་དལ་བུས་རྔུབ་པ་དང་མཉམ་དུ། སྣ་བུག་གཉིས་ནས་ཞུགས་ཏེ་ལུས་ནང་ཐམས་ཅད་གང་བས། རང་ཉིད་རྡོ་རྗེ་འཇིགས་བྱེད་ཀྱི་རྣམ་པར་གསལ་བ་དེ་ཉིད་དྭངས་གསལ་འོད་དུ་ཡལ་ཡལ་བར་འདུག་པར་བསམ་ལ། བདེན་མེད་ཡིན། སྒྱུ་མ་ལྟ་བུ་ཡིན་སྙམ་པའི་དྲན་འདུན་དྲག་ཏུ་བྱའོ། །དེ་ནས་མཚན་མོ་རྒྱུ་བའི་དམིགས་པ་དངོས་གཞི་ནི། མཚན་མོ་ཡིན་ན་དེ་དང༌། ཉིན་མོ་ཡིན་ན་མུན་ཁུང་དུ་འདུག་ལ། ལུས་གནད་ལེགས་པར་བཅས། མིག་གི་ལྟ་སྟངས་སྣ་རྩེ་ལ་གཏད། སེམས་རླུང་ཕྱིར་འགྲོ་ནང་འགྲོ་ལ་ཅུང་ཟད་གཏད་ཅིང༌། གཞན་བཟོ་བཅོས་མེད་པར་ཤིག་གེ་བཞག །དེ་དག་ནི་དམིགས་ཆེན་གཅིག་ལས་ཕྱེ་བའི་དམིགས་ཕྲན་ལྔའོ། །དེ་ཡི་བོགས་འདོན་ཡན་

[Full Size]

ལག་ཏུ་འདི་ལྟར་བསྒོམ་པར་བྱ་བ་ཡིན་ཏེ། རང་དང་སྣོད་བཅུད་ཐམས་ཅད་འོད་དུ་ཡུལ་ཡུལ་བ། སྣང་ཡང་བདེན་པའི་སྟོང་པ་དེ་ལ་དམིགས་པའི་གཞི་བྱས་གནས་ལ་ཅུང་ཟད་ཅིག་བཞག་གོ །དེ་ནས་ས་རྡོ་རི་བྲག་རྩི་ཤིང་ནགས་ཚལ་ལ་སོགས་པ་གཟུགས་ཅན་དུ་སྣང་བའི་རྣམ་རྟོག་ཅི་ཤར་བ་ཐམས་ཅད་མེད་བཞིན་དུ་འཁྲུལ་བའི་སྣང་བ་སྒྱུ་མ་ལྟ་བུར་ཤེས་པར་བྱས་ལ། དེ་ནས་དབྱིངས་སུ་ཡལ་བར་བསམ་ཞིང༌། བཟོ་བཅོས་མེད་པར་བཞག །དེ་ནི་གཟུགས་ཕུང་གི་རྣམ་རྟོག་དབྱིངས་སུ་བཀོད་པ་སྟེ། ཟླ་ཕྱེད་ལ་སོགས་ཅི་རིགས་པར་བསྒོམ་མོ། །དེ་ལ་འབྱོངས་ན་དུས་གསུམ་དུ་སྣང་བའི་བདེ་སྡུག་གི་རྣམ་རྟོག་ཡིད་ལ་ཤར་བ་རྣམས་སྒྱུ་མ་ལྟ་བུར་ཤེས་པར་བྱས་ལ་དབྱིངས་སུ་ཡལ་བར་བསམ་ཞིང༌། བཟོ་བཅོས་མེད་པར་བཞག །དེ་ནི་ཚོར་ཕུང་དབྱིངས་སུ་སྐྱེལ་བ་སྟེ། སྔར་བཞིན་འབྱོངས་འབྱོངས་ཀྱི་བར་དུ་བསྒོམ་མོ། །དེ་ནས་འདི་དང་འདི་ལྟ་བུའོ་སྙམ་དུ་འཛིན་པའི་མིང་དོན་གྱི་འདུ་ཤེས་རྣམས་སྒྱུ་མ་ལྟ་བུར་ཤེས་པར་བྱས་ལ་དབྱིངས་སུ་སྐྱེལ་ཞིང༌། བཟོ་མེད་དུ་བཞག་སྟེ་འདུ་ཤེས་ཀྱི་ཕུང་པོ་དབྱིངས་སུ་སྐྱེལ་བ་སྟེ། དེ་མ་འབྱོངས་ཀྱི་བར་དུ་བསྒོམ་མོ། །དེ་ནས་འདོད་ཆགས་ཞེ་སྡང་ལ་སོགས་པ་མི་དགེ་བའི་ལས་ཀྱི་རྣམ་རྟོག་དང༌། དད་པ་ངེས་འབྱུང་ལ་སོགས་པ་དགེ་བའི་ལས་ཀྱི་རྣམ་རྟོག་སྟེ། འདུ་བྱེད་ཀྱི་རྣམ་རྟོག་ཐམས་ཅད་ཀྱང་སྒྱུ་མ་ལྟ་བུར་ཤེས་པར་བྱས་ལ་དབྱིངས་སུ་སྐྱེལ་ཞིང༌། བཟོ་མེད་དུ་བཞག་གོ །དེ་ནི་འདུ་བྱེད་ཀྱི་ཕུང་པོའི་རྣམ་རྟོག་དབྱིངས་སུ་སྐྱེལ་བ་སྟེ་མ་འབྱོངས་ཀྱི་བར་དུ་བསྒོམ་

[Full Size]

མོ། །དེ་ནས་མིག་གིས་གཟུགས་དངོས་སུ་མཐོང་བ་དང༌། དེ་བཞིན་དུ་རྣ་བས་སྒྲ་དང༌། སྣས་དྲི་དང༌། ལྕེས་རོ་དང༌། ལུས་ཀྱིས་རེག་བྱ་ལ་སོགས་པ་དངོས་སུ་མྱོང་བ་རྣམས་ཀྱང་སྒྱུ་མ་ལྟ་བུར་ཤེས་པར་བྱས་ལ། སྔར་བཞིན་དབྱིངས་སུ་ཡལ་བར་བསམ་ལ། བཟོ་མེད་དུ་བཞག།དེ་ནི་རྣམ་ཤེས་ཀྱི་ཕུང་པོ་དབྱིངས་སུ་སྐྱེལ་བ་སྟེ། མ་འབྱོངས་ཀྱི་བར་དུ་བསྒོམ་མོ། །དེ་ནས་འགྲོ་འཆག་ཉལ་འདུག་ཟས་ཟ་བ་གཏམ་སྨྲ་བ་སོགས་སྤྱོད་ལམ་ཐམས་ཅད་ལ་ཡང་སྔར་བཞིན་སྒྱུ་མ་ལྟ་བུར་ཤེས་པ་དང༌། དབྱིངས་སུ་སྐྱེལ་ཞིང་མ་བཅོས་པར་བཞག་གོ །དེ་ལྟར་དམིགས་པའི་རྣམ་གྲངས་དྲུག་ཏུ་བྱེད་པའི་རྒྱུ་མཚན་ནི། སྦྱིན་སྲེག་གི་རྟོག་པར་ཤ་དྲུག་གི་སྦྱིན་སྲེག་བྱ་བར་གསུངས་པའི་ངེས་དོན་བསྒོམ་པའི་ཚུལ་ཡིན་ནོ། །དེ་དག་ནི་མཚན་མོ་རྒྱུ་བའི་ཞལ་གྱི་གདམས་པའོ། །དེའི་ཡན་ལག་ཏུ་སྦྱོར་བ་བཅུད་ལེན་གྱི་དམིགས་པ་ལ་ནང་གི་བཅུད་ལེན་དང༌། ཕྱིའི་བཅུད་ལེན་གཉིས། དང་པོ་ནི། རང་ཉིད་རྡོ་རྗེ་འཇིགས་བྱེད་ཕྱག་གཉིས་པར་གསལ་བའི་སྨིན་མཚམས་སུ་ཧཱུཾ་ནག་པོ། སྤྱི་གཙུག་ཏུ་ཧཾ་དཀར་པོ་མགོ་བོ་ཐུར་དུ་བསྟན་པ། ལྕེ་ཆུང་དུ་སུམ་དཀར་པོ་མགོ་བོ་ཐུར་དུ་བསྟན་པ། ཀླུ་ལྷག་ལྡན་ཞེས་བྱ་བ་སྦྲུལ་གྱི་རྣམ་པ་ཞིག་སྒོམ་པ་ཡིན་པ་ལས། དེའི་མཇུག་མའི་ནང་ཙམ་དུ་སྨིན་མཚམས་ཀྱི་ཧཱུཾ་ཆུད་པ། སྦྲུལ་གྱི་བཤང་ལམ་གྱི་ཐད་དུ་ཧཱུཾ་དཀར་པོ་མགོ་བོ་ཐུར་དུ་བསྟན་པ་དེ་གནས་པ། སྦྲུལ་

[Full Size]

གྱི་མགོ་བོ་ཐུར་དུ་བསྟན་པའི་ཁ་ནང་དུ་སུཾ་དཀར་པོ་མགོ་བོ་ཐུར་དུ་བསྟན་པ་དེ་ཚུད་པར་བསམ། སྙིང་གའི་པདྨ་འདབ་བརྒྱད་ཀྱི་ལྟེ་བ་ལ་ལརྟུའི་ཨི་མགོ་བོ་ཐུར་དུ་བསྟན་པ། འདབ་མ་བརྒྱད་ལ་ཕཊ་རེ་རེར་ཡོད་པ། ཐམས་ཅད་ཀྱང་དཀར་རམ་མེ་བ་ཞིག་དམིགས་ལ། རླུང་ཕྱིར་སྣ་ནས་བུས་ལ་ནང་དུ་རྔུབ་པའི་ཚེ། སོ་བསྲེགས་ནས་སའི་སྒྲ་དང་བཅས་ཏེ་ལྕེ་སྟེང་ནས་དྲངས་ལ། སྨིན་མཚམས་ཀྱི་ཧཱུཾ་ལས་བདུད་རྩིའི་ཚོགས་དཔག་ཏུ་མེད་པ་བྱུང༌། སྦྲུལ་གྱི་མཇུག་མའི་ནང་ནས་ཞུགས་ཏེ། སྤྱི་བོར་སྦྲུལ་གྱི་བཤང་ལམ་གྱི་ཐད་དུ་སླེབས་པ་ན་ཧཾ་ལས་བདུད་རྩིའི་རྒྱུན་བྱུང་སྦྲུལ་གྱི་ལུས་ནང་ནས་བརྒྱུད་དེ་ཁ་ནང་གི་སུཾ་ལ་རེག་པས། དེ་ལས་བདུད་རྩྀ་ཚོགས་དཔག་ཏུ་མེད་པ་བྱུང༌། མགྲིན་པ་ནས་བརྒྱུད། སྙིང་གའི་པདྨ་འདབ་བརྒྱད་ཀྱི་ཡི་གེ་རྣམས་ལ་ཐིམ་པས། དེ་དག་ལས་བདུད་རྩིའི་ཚོགས་མཐའ་ཡས་པ་བྱུང་སྟེ། ལུས་ཀྱི་ནང་ཐམས་ཅད་གང་བར་བསམ་ལ། རླུང་བུམ་པ་ཅན་བཟུང་ངོ༌། །གཉིས་པ་ཕྱིའི་བཅུད་ལེན་ནི། རང་ཉིད་རྡོ་རྗེ་འཇིགས་བྱེད་ཕྱག་མང་དུ་གསལ་བའི་ཐུགས་ཀར་ཧཱུཾ་ལས་འོད་ཟེར་གྱི་ཚོགས་དཔག་ཏུ་མེད་པ་སྤྲོས་པས་བརྟན་གཡོ་སྣོད་བཅུད་ཐམས་ཅད་ལ་ཕོག་ཅིང༌། ཕྱོགས་བཅུའི་དགྲ་བགེགས་ཐམས་ཅད་ཚར་བཅད་པའི་ཤ་ཁྲག་ནམ་མཁའ་གང་བ་རྣམས་རྡོ་རྗེ་འཇིགས་བྱེད་ཀྱི་ཁྲོ་ཞལ་བརྒྱད་པོ་རྣམས་ཀྱིས་གསོལ་བར་བསམ་ཞིང༌། སྣོད་བཅུད་

[Full Size]

ཐམས་ཅད་ཀྱི་བཀྲག་མདངས་རྣམས་འཇམ་དཔལ་གྱི་ཞལ་ནས་དྲངས་ཤིང་ཐུགས་ཀར་སླེབས་པ་ན་དེ་གཉིས་དབྱེར་མེད་དུ་གྱུར་ཏེ་བདུད་རྩིར་ཞུ་ཞིང་མཐར་ལུས་ཐམས་ཅད་གང་བར་མོས་ལ་བུམ་པ་ཅན་བཟུང་ངོ༌། །མཚན་མོ་རྒྱུ་བའི་ཡན་ལག་ཏུ་སྦྱོར་བ་ནང་གི་སྦྱིན་སྲེག་ནི། རང་ཉིད་རྡོ་རྗེ་འཇིགས་བྱེད་དུ་གསལ་བའི་སྤྱི་བོར་བདུད་རྩིའི་བུམ་པ་མགོ་ཐུར་དུ་བསྟན་པ། ཞབས་ཁྲོལ་ཚགས་སུ་ཡོད་པའི་ནང་བདུད་རྩིས་གང་བ། སྙིང་གར་རྒྱུའི་འཇམ་དཔལ་ལམ་ཡང་ན་རྡོ་རྗེ་ཞིག་བསྒོམ། ལྟེ་བའི་རྩ་བདུད་གྲུ་གསུམ་གྱི་ནང་དུ་ཆོས་འབྱུང་རྩ་བ་ལྟེ་འོག་ཏུ་ཟུག་ཅིང་གདེངས་ཀ་ལྟེ་བའི་ཐད་དུ་སླེབ་པའི། མེ་ཐབ་ཀྱི་རྣམ་པ་ཅན་དུ་གསལ་བཏབ། དེའི་ནང་དུ་འཁོར་ལོ་གཉིས་པོ་གང་རུང་ཞིག་ཡིག་འབྲུ་དང་བཅས་པ་གསལ་འདེབས་པ་ལས། གཤིན་རྗེ་གཤེད་སྤྱིའི་འཁོར་ལོ་གཙོ་ཆེ་བར་མཛད་དོ། །དེ་ནས་རླུང་རོ་བསལ་ལ། གསང་གནས་ཀྱི་རླུང་འཐེན། དེ་ནས་བཤང་སྒོའི་རླུང་ཡང་འཐེན་ཞིང་ལྟེ་བར་སླེབས་པ་ན། ཆོས་འབྱུང་གི་ནང་ཐམས་ཅད་དུ་མེ་ལྕེ་འབར་ཏེ་སྙིང་གར་སླཻབས་པ་ན། ཡི་དམ་གྱི་མེ་རིའམ་འོད་ཟེར་དང་འདྲེས་ཏེ། འབར་བའི་མེ་ནང་དུ་བཞུགས་པར་བསམ་ཞིང༌། སྙིང་གའི་ཡི་དམ་གྱི་ཐུགས་ཀ་ནས་འོད་ཟེར་འཕྲོས་པས་བརྟན་གཡོ་ཐམས་ཅད་ཀྱི་བཀྲག་དང་མདངས་རྣམས་བདུད་རྩིའི་རྣམ་པར་བཀུག་ནས་རང་གི་སྤྱི་བོ་ནས་ཞུགས། བུམ་པའི་ཞབས་ནས་ཞུགས་ཏེ་བུམ་པའི་ནང་གི་བདུད་རྩི་དང་འདྲེས་ཏེ། བདུད་རྩིའི་ཚོགས་

[Full Size]

དཔག་ཏུ་མེད་པ་བབས་ཏེ། སྙིང་གར་མེ་ལྕེ་འབར་བའི་སྟེང་དུ་བབས་པས་ཚིམ་པར་བསམ་ལ། རྔུབ་ཆུང་བྱས་ལ་སྟེང་རླུང་དྲག་ཏུ་མནན། འོག་རླུང་རང་སར་གློད་ཅིང༌། ཡི་དམ་གྱི་སྔགས་གསུམ་པོ་གང་རུང་གི་མཐར། ཨོཾ་ཨགྣེ་ཡེ་ཧཱུཾ་ཕཊ་སྭཱཧཱ། ཞེས་པ་བཟླའོ། །ལས་བཞི་སོ་སོའི་ལྡེ་ཁ་བསྒྱུར་ན་གཞན་གོང་དང་འདྲ་བ་ལས། ཞི་བ་ལ་མེ་སྔགས་ཀྱི་མཐར་ཤནྟིཾ་ཀུ་རུ་སྭཱཧཱ། ཞེས་དང༌། མེ་ལྕེ་དཀར་པོ་འབར་བར་བསམ། དེ་བཞིན་དུ་དབང་ལ་བ་ཤཾ་ཀུ་རུ་ཧོཿ ཞེས་པ་དང༌། མེ་ལྕེ་དམར་པོ། རྒྱས་པ་ལ་ཚེ་དང་བསོད་ནམས་པུཥྟཾ་ཀུ་རུ་ཨོཾ་ཞེས་པ་དང༌། མེ་ལྕེ་སེར་པོ། དྲག་པོ་ལ་དགྲ་བགེགས་ཐམས་ཅད་མཱ་ར་ཡ་ཕཊ། ཅེས་པ་དང༌། མེ་ལྕེ་དམར་ནག་འབར་བར་བསམ་མོ། །དྲག་པོའི་ལས་ཀྱི་དམིགས་པ་ནི། རང་ཉིད་རྡོ་རྗེ་འཇིགས་བྱེད་ཞལ་ཕྱག་ཡོངས་རྫོགས་སུ་གསལ་བའི་སྤྱི་བོའི་བུམ་པ་མི་བསྒོམས་པ་མ་གཏོགས་གཞན་སྔར་དང་འདྲ་བ་ལས། སྙིང་གའི་ཡི་དམ་གྱི་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་དགྲ་བགེགས་བཀུག་ལ་ཞལ་དགུ་པོ་རྣམས་ཀྱིས་ཤ་ཆོམ་རུས་ཆོམ་དུ་གསོལ་བ་རྣམས་སྙིང་གར་མེ་ལྕེ་འབར་བའི་སྟེང་དུ་ཅིལ་ཅིལ་ཞུ་བར་བསམ་མོ། །འདི་ནི་ནང་གི་དྲག་པོའི་སྦྱིན་སྲེག་གོ །དེ་ནས་ཡང་གཞན་སྔར་དང་འདྲ་བ་ལས། སྙིང་གའི་

[Full Size]

ཡི་དམ་གྱི་ཐུགས་ཀ་ནས་འོད་ཟེར་འཕྲོས། བརྟན་གཡོ་ཐམས་ཅད་ཀྱི་བཀྲག་མདངས་རྣམས་བདུད་རྩིའི་རྣམ་པར་བཀུག་པ་རྣམས་རང་གི་སྒོ་དགུ་ནས་ཞུགས། སྙིང་གར་མེ་ལྕེ་འབར་བའི་སྟེང་དུ་བབས་ཤིང་ཞུ་བར་བསམ་མོ། །འདི་ནི་རླུང་སེམས་དབུ་མར་ཐིམ་པ་དང། རླུང་དུལ་བར་གྱུར་པའི་ཐབས་སོ། །དེ་དག་ནི་མཚན་མོ་རྒྱུ་བའི་མན་ངག་དང་རྗེས་སུ་འབྲེལ་བའི་མན་ངག་ཞལ་གྱི་གདམས་པའོ། །གཉིས་པ་རྭ་སྒོམ་པའི་ཞལ་ཤེས་སམ། ཞལ་དགུ་པོའི་རྫོགས་རིམ་ལ་སྔོན་འགྲོ་དང༌། དངོས་གཞི་གཉིས་ལས། དང་པོ་ནི། ལུས་གནད་བཅས་ལ་ཉིན་གཅིག་རླུང་ཕྱིར་འབུད་པ་འབའ་ཞིག་བྱས་ཤིང༌། དེ་ཡང་ཐུན་བཞིར་བཅད་དེ་གྲངས་ལྔ་བརྒྱ་ལ་སོགས་པ་བྱ། ཡང་ཉིན་གཅིག་ལུས་གནད་བཅས་ལ་རླུང་རང་བབས་སུ་བཞག་ཚུལ་དེ་ལྟ་བུ་ཟླ་གཅིག་ལ་སོགས་པ་བསྒོམས་ན། ལུས་ལྡང་བ་ཡང་བ་དང༌། ནད་བྱང་ལ་སོགས་པ་འབྱུང་ངོ༌། །དེ་ནས་འཇམ་རླུང་བཟུང་ལ་མགོ་བོ་ལ་སོགས་པ་ལུས་ཀྱི་གནད་ཐམས་ཅད་ཁུ་ཚུར་གྱིས་བརྡེག་པ་དང༌། ཤུགས་དང་ལྡན་པས་ལུས་ཐམས་ཅད་ལ་འཕུར་མཉེ་བྱེད་པ་དང༌། མགོ་དང་རྐང་ལག་ལ་སོགས་པ་སྤྲུགས་པ་དང༌། ཡན་ལག་རྣམས་བརྐྱང་བསྐུམ་བྱེད་པ་སོགས་དང༌། འཇམ་རླུང་བཟུང་སྟེ་གྱེན་ལ་རྒྱུག་པ་དང༌། ཐུར་ལ་རྒྱུག་པ་དང༌། འཁྲབ་པ་དང༌། ངག་ནས་ཧ་འདོན་ཞིང་འཁྲབ་པ་སོགས་བྱའོ། །དེ་ལྟར་བྱས་པས་འཁྲུ་སྐྱུག་དང་ནད་གཞི་ལྡང་བ་སོགས་བྱུང་ན། ཕྱིས་

[Full Size]

གེགས་མི་འབྱུང་བས་ལེགས་ཤིང༌། སྐབས་འདིར་གཞན་ནས་འབྱུང་བ་ལྟར་གྱི་ལུས་སྦྱོང་སྦྱར་ན་ཡང་ལེགས་གསུང་ངོ༌། །དངོས་གཞི་ནི། རང་ཉིད་རྡེ་རྗེ་འཇིགས་བྱེད་ཞལ་ཕྱག་ཡོངས་སུ་རྫོགས་པའམ། ཞལ་གཅིག་ཕྱག་གཉིས་པར་ཇི་ལྟར་བདེ་བར་གསལ་བའི་ལྟེ་འོག་སོར་བཞིའམ་སོར་བརྒྱད་ཙམ་དུ་མ་ཧེའི་ཞལ་རྭ་དང་བཅས་པ། དབུ་སྐྲ་དང༌། མགྲིན་པ་སོགས་མེ་འབར་བའི་བསྒྲིབས་པ། དཔེར་ན་མེ་དཔུང་གི་དབུས་ནས་མ་ཧེའི་ཞལ་འཐོན་པ་ལྟ་བུ་ཞིག་བསྒོམ། འདི་ལ་དམིགས་པ་གསལ་ན་མདུན་རྒྱབ་གཡས་གཡོན་མཚམས་བཞི་སོགས་གང་ནས་བལྟས་ཀྱང་མ་ཧེའི་ཞལ་ཡོད་པའི་ཀུན་ཏུ་ཞལ་དུ་བསྒོམ། དེ་ལྟ་བུ་ལས་དང་པོ་པ་ལ་མི་གསལ་ན། མདུན་དུ་བསྟན་པའི་མ་ཧེའི་ཞལ་གཅིག་ཀ་བསྒོམ། ལུས་ཀྱི་དབུས་སུ་རྩ་དབུ་མ་ཁ་དོག་སྔོན་པོ་ཡས་སྣ་རང་གི་སྤྱི་བོ་དང༌། མས་སྣ་ལྟེ་འོག་མ་ཧེའི་ཞལ་གྱི་སྤྱི་བོ་བརྒྱུད་དེ་རྐན་གྱི་སྦུབས་སུ་ཟུག་པ། གཡས་ཕྱོགས་ཀྱི་རྭ་ལ་དུམ་བུ་གསུམ་དུ་བྱས་པའི་སུམ་གཅིག་ཡར་སོང༌། གསུམ་གཉིས་མར་ལུས་པ་ཙམ་གྱི་མཚམས་སུ་ཐོག་མར་ཐིག་ལེ་སེར་པོ་ཞིག་རྭ་ནང་དུ་ཡོད་པ་དེ་ཕྱིར་བརྡོལ་དེ། རྭའི་ཕྱི་ངོས་ལ་ཁྲོ་ཞལ་སེར་པོ་ལྟག་པའི་ཆ་ལ་བརྟེན་པ། ཤིང་སྡོང་གི་སྦལ་ལྟ་བུ་ཞིག་གསལ་བཏབ། རང་གི་གཡས་ཕྱོགས་སུ་རོ་མ་སེར་པོ་ཡས་སྣ་སྤྱི་བོ་དང༌། མས་སྣ་ཁྲོ་ཞལ་སེར་པོའི་ཞལ་ལ་ཟུག་པར་བསམ། ལུས་གནད་རྐང་བ་སྐྱིལ་ཀྲུང༌། ལག་པ་

[Full Size]

ཁུ་ཚུར་བརླ་བཞག་བྱ། རླུང་སྦྱོར་ནི། རླུང་རོ་བསལ་ལ། རླུང་ནང་དུ་ཧཱུཾ་གི་སྒྲས་དལ་བུས་རྔུབ་ལ་ཁ་སྦྱོར་དུ་བཟུང༌། དེ་ནས་ཕྱིར་དྲག་ཏུ་བུས་ལ། ནང་དུ་དྲག་ཏུ་རྔུབ་ལ་གྲུག་ཞུད་ཀྱི་རླུང་སྦྱོར་ཅུང་ཟད་བྱ་ཞིང༌། དེ་ནས་ཕྱིར་དལ་བུས་བཏང་ངོ༌། །དེ་དག་གི་སྐབས་སུ་དམིགས་པ་ནི་རང་ཉིད་ཀྱི་ལུས་ནང་ནས་རླུང་ཐམསཅད་ཁ་དོག་སེར་པོའི་རྣམ་པས་བྱུང༌། རོ་མའི་ནང་ནས་བརྒྱུད་ནས་མར་སོང་ཁྲོ་ཞལ་གྱི་ཞལ་ནས་ཞུགས། རྭའི་ནང་ནས་མར་སོང༌། མ་ཧེའི་ཞལ་གྱི་རྐན་གྱི་སྦུབས་ཀྱི་དབུ་མའི་མས་སྣ་ནས་ཞུགས་ཏེ། སོར་བཞི་ཙམ་སོང་བ་ན་ཡལ་བར་བསམ་མོ། །དེ་ནི་ས་རླུང་འཛིན་པའི་ཐབས་སོ། །ཐུན་གྱི་མཐར་ཁྲོ་ཞལ་སེར་པོ་དེ་ཉིད་ཐིག་ལེ་སེར་པོར་གྱུར་ཏེ་རྭའི་ནང་དུ་ཞུགས། མཐར་ཡལ་བར་བསམ་མོ། །ཆུ་རླུང་འཛིན་པའི་ཐབས་ནི། ལུས་གནད་པདྨའི་སྐྱིལ་ཀྲུང་དང༌། ལག་པ་གཉིས་བརྐྱངས་ཏེ་པུས་མོའི་སྟེང་དུ་བཞག་སྟེ་ཟླ་གམ་གྱི་ཚུལ་དུ་བྱ། དམིགས་པ་ནི་ལྟེ་འོག་གི་མ་ཧེའི་ཞལ་གྱི་གཡོན་གྱི་རྭ་ཡི་རྩ་བའི་ནང་དུ་ཐིག་ལེ་དཀར་པོ་དེ་ཡོངས་སུ་གྱུར་པ་ལས། རྭའི་ཕྱི་རོལ་ཀྱི་རྩ་བར་གཡོན་ཞལ་དང་པོ་དཀར་པོ་རྨོངས་པར་བྱེད་པ་གསལ་བཏབ་པའི་ལུས་ཀྱི་གཡོན་ཕྱོགས་སུ་རྐྱང་མ་དཀར་པོ་ཡས་སྣ་སྤྱི་བོ་དང༌། མས་སྣ་ལྟེ་བའི་མ་ཧེའི་གཡོན་ཕྱོགས་ཀྱི་ཞལ་དཀར་པོའི་ནང་དུ་ཚུད་པར་བསྒོམ། རླུང་རོ་བསལ་ལ། རླུང་ནང་དུ་སྒྲ་དང་བཅས་ཏེ་རྔུབ། རྔུབ་པ་རྫོགས་མཚམས་སུ་ཁ་ནང་གི་རླུང་ཡང་སྒྲ་བཅས་སུ་རྔུབ་སྟེ་བུམ་པ་ཅན་གྱི་

[Full Size]

རླུང་སྦྱོར་བྱ། དམིགས་པ་ནི་ལུས་ཀྱི་ནང་ནས་རླུང་ཐམས་ཅད་འོད་ཟེར་དཀར་པོའི་རྣམ་པས་བྱུང༌། རྐྱང་མའི་ནང་ནས་ཤོང་ཚད་དུ་སོང་རྭའི་རྩའི་ཞལ་གྱི་ནང་ནས་ཞུགས། མ་ཧེའི་ཞལ་གྱི་རྐན་གྱི་སྦུབས་ཀྱི་དབུ་མའི་མས་སྣ་ནས་ཞུགས། སོར་བཞི་ཙམ་ནས་ཡལ་བར་བསམ། རྐྱང་མའི་ནང་ནས་ཞུགས་པ་མ་ཡིན་པའི་རླུང་ཐམས་ཅད་ཀྱང་ཁྲོ་ཞལ་དཀར་པོའི་ཞལ་གྱི་གྲྭ་ཟུར་ནས་ཞུགས་པར་མོས་སོ། །འདིའི་དམིགས་རྟེན་སྣོད་གང་རུང་ཞིག་ཆུས་གང་བ་ལ་མིག་གཏད། ཐུན་འཇོག་ཁར་ཁྲོ་ཞལ་དཀར་པོ་ཐིག་ལེ་དཀར་པོ་ཞིག་ཏུ་གྱུར་ཏེ། རྭའི་ནང་དུ་ཞུགས་པར་བསམ་ཞིང་མཐར་ཐིག་ལེར་ཐིམ་མོ། །མེ་རླུང་འཛིན་པའི་ཐབས་ནི། ལུས་གནད་སེམས་དཔའི་སྐྱིལ་ཀྲུང་དང༌། ལག་པ་གཉིས་ཁུ་ཚུར་མཁལ་ཁུང་གཉིས་ལ་བརྟེན་པའི་ལག་པ་གྲུ་མོ་ཅུང་ཟད་བརྐྱངས་ཏེ། མེའི་དཀྱིལ་འཁོར་གྲུ་གསུམ་གྱི་ཚུལ་དུ་བྱ། དམིགས་པ་ལྟེ་འོག་གི་མ་ཧེའི་ཞལ་དང༌། དབུ་མ་སོགས་སྔར་དང་འདྲ་བ་ལས། གཡས་ཕྱོགས་ཀྱི་རྭའི་རྐེད་པ་ཙམ་གྱི་ནང་དུ་ཐོག་མར་ཐིག་ལེ་དམར་པོ། དེ་ཡོངས་སུ་གྱུར་པ་ལས་རྭའི་ཕྱི་རོལ་དུ་ཁྲོ་ཞལ་དམར་པོ། རོ་མ་དམར་པོ་ཞལ་དུ་ཆུད་པར་བསམ། རླུང་སྦྱོར་ནི། རླུང་རོ་བསལ་ལ། ནང་དུ་རྔུབ་ལ་ཁ་སྦྱོར་དུ་ཅུང་ཟད་ཞིག་བཟུང་ལ། དེ་ནས་གསང་གནས་ཀྱི་རླུང་དང༌། བཤང་སྒོའི་རླུང་དྲག་ཏུ་འཐེན་ཞིང་རླུང་ཁ་སྦྱོར་སྟོད་དུ་དྲངས་ཤིང་རྐེད་པ་ཉག་ཙམ་

[Full Size]

བྱ། དེ་ནས་རླུང་ལྟེ་བར་ཕབ་ལ་སངས་ཀྱིས་བཏང་ངོ༌། །དམིགས་པ་ནི་ལུས་ནང་ནས་རླུང་ཐམས་ཅད་ཁ་དོག་དམར་པོའི་རྣམ་པས་སྟོད་སྨད་ཐམས་ཅད་ནས་བྱུང༌། རོ་མའི་ནང་ནས་ཞུགས་ཏེ། ཁྲོ་ཞལ་དམར་པོའི་ཞལ་གྱི་ནང་ནས་ཞུགས། རོ་མའི་ནང་དུ་མ་ཞུགས་པའི་རླུང་ཐམས་ཅད་ཁྲོ་ཞལ་དམར་པོའི་ཞལ་གྱི་གྲྭ་ཟུར་ནས་ཞུགས་ཏེ། ཐམས་ཅད་ཀྱང་རྭའི་ནང་དུ་བརྒྱུད་དེ་མ་ཧེའི་རྐན་སྦུབས་ཀྱི་དབུ་མའི་མས་སྣ་ནས་ཞུགས། སོར་བཞི་ཙམ་དུ་ཡལ་བར་བསམ། འདིའི་དམིགས་རྟེན་མར་མེ་ལྟ་བུ་ཞིག་ལ་མིག་གཏད། ཐུན་འཇོག་ཁར་ཁྲོ་ཞལ་དམར་པོ་དེ་ཉིད་ཐིག་ལེ་དམར་པོ་ཞིག་ཏུ་གྱུར་ཏེ་རྭའི་ནང་དུ་མི་དམིགས་པར་བསམ་མོ། རླུང་གི་རླུང་འཛིན་པ་ནི། ལུས་གནད་ཟླུམ་པོའི་འདུག་སྟངས་སུ་བྱེད་པར་བཤད་ཀྱང༌། ད་ལྟ་ལག་ལེན་ལ་རྐང་པ་རྡོ་རྗེ་སྐྱིལ་ཀྲུང་འཆུག་པར་བྱ་ཞིང་ལག་གཉིས་ཁུ་ཚུར་བྱས་ལ་འཕོང་ཚོས་གཡས་གཡོན་གྱི་ཐད་ཀྱི་གདན་སྟེང་དུ་བཞག །རླུང་སྦྱོར་ནི། རླུང་དལ་བུས་ཕྱིར་བསམ་ཞིང༌། ནང་དུ་ཡང་ཤུགས་ཆུང་ངུས་དལ་བུས་རྔུབ་ལ་ནང་དུ་ཁ་སྦྱོར་དུ་བཟུང་ལ། གསུས་པ་སྨད་ཕྱིར་ཕུལ་ལ་ལྡིར་བར་བྱ། རླུང་གཏོང་བའི་ཚེ་ལྟོ་བ་མ་ཞུམ་པར་བྱས་ལ་སངས་ཀྱིས་གཏོང༌། དམིགས་པ་ནི། ལྟེ་བའི་མ་ཧེའི་རྭ་གཡོན་ཕྱོགས་ཀྱི་རྩེ་མོའི་ཆ་ལ་ཐོག་མར་ནང་དུ་ཐིག་ལེ་ནག་པོ། དེ་ཕྱིར་ཐོན་ནས་ཡོངས་སུ་གྱུར་པ་ལས་ཁྲོ་ཞལ་ནག་པོ། དེའི་ཞལ་དུ་རྐྱང་མ་

[Full Size]

ཁ་དོག་ནག་པོའི་མས་སྣ་ཟུར་བ། གཞན་སྔར་དང་འདྲ་བ་ཞིག་བསྒོམ་ལ། རླུང་སྦྱོར་གྱི་སྐབས་སུ་ལུས་ཀྱི་ནང་ནས་རླུང་རྣམས་ཁ་དོག་ནག་པོའི་རྣམ་པས་སྟོད་སྨད་ཐམས་ཅད་ནས་བྱུང༌། རྐྱང་མའི་ནང་ནས་ཞུགས། ཁྲོ་ཞལ་ནག་པོའི་ཞལ་དུ་ཞུགས་ཤིང༌། རྐྱང་མའི་ནང་དུ་མ་ཆུད་པའི་རླུང་ཐམས་ཅད་ཞལ་གྱི་གྲྭ་ཟུར་ནས་ཞུགས་ཤིང་ཐམས་ཅད་ཀྱང་རྭའི་ལམ་བརྒྱུད། མ་ཧེའི་ཞལ་གྱི་རྐན་སྤུབས་དབུ་མའི་མས་སྣ་ནས་ཞུགས་ཏེ། སོར་བཞི་ཙམ་དུ་ཡལ་བར་བསམ་ཞིང༌། འདི་ལ་དམིགས་རྟེན་དཀར་པོ་ཁུང་ནས་རླུང་གི་རེག་བྱ་ལུས་ལ་ཕོག་པར་བྱ་ཞེས་བཤད་ཀྱང༌། སྐབས་འགར་དེ་ལྟར་བྱ་ཞིང༌། རྒྱུན་དུ་བྱས་ན་རླུང་ཁམས་ལྡང་བས་དེ་ལྟར་མི་བྱ་གསུང༌། རྣམ་ཤེས་ཀྱི་རླུང་འཛིན་པ་ནི། ལྟེ་འོག་གི་མ་ཧེའི་ཞལ་གྱི་གཡོན་ཕྱོགས་ཀྱི་རྭའི་དཀྱིལ་གྱི་ནང་དུ་ཐོག་མར་ཐིག་ལེ་དུད་ཁ། དེ་ཕྱིར་ཐོན་ཏེ་ཡོངས་སུ་གྱུར་པ་ལས་ཁྲཽ་ཞལ་དུད་ཁ་ཞིག་བསྒོམ། ལུས་ཀྱི་གཡོན་ཕྱོགས་སུ་རྐྱང་མ་དུད་ཁའི་མས་སྣ་ཁྲཽ་ཞལ་དུད་ཁའི་ནང་དུ་ཟུག་པ། གཞན་སྔར་དང་འདྲ་བ་ལས་ལུས་གནད་རྐང་པ་སེམས་སྐྱིལ་ལམ་རྡོ་རྗེ་སྐྱིལ་ཀྲུང་གང་རུང་ཞིག་བྱས་ལ། ལག་པ་མཉམ་བཞག་བྱ། རླུང་སྦྱོར་ནི། རླུང་རོ་བསལ། ནང་དུ་རྔུབ་ལ་བུམ་ཅན་བཟུང་ལ། མདུན་ངོས་སུ་ཕྱིར་ཕུལ། རྒྱབ་ངོས་སུ་ཕུལ་ལ་ལྟོ་བ་ཚིགས་པ་ལ་གཅེར་བ་བྱས་ལ་བཏང་ངོ༌། །དམིགས་པ་ནི། རླུང་དུད་ཁའི་རྣམ་

[Full Size]

པས་ལུས་ནང་ནས་བྱུང་རྐྱང་མའི་ནང་ནས་ཞུགས། ཞལ་དུད་ཁའི་ནང་ནས་ཞུགས། རྐྱང་མའི་ནང་དུ་མ་ཞུགས་པའི་རླུང་ཐམས་ཅད་ཀྱང་ཞལ་གྱི་གྲྭ་ཟུར་ནས་ཞུགས་ཏེ། མ་ཧེའི་རྐན་སྦུབས་ནས་བརྒྱུད་དེ་དབུ་མའི་མས་སྣ་ནས་ཞུགས་ཏེ། སོར་བཞི་ཙམ་དུ་ཡལ་བར་བསམ། མཐར་ཞལ་དུད་ཁ་ཐིག་ལེ་དུད་ཁར་གྱུར་ཏེ། རྭའི་ནང་དུ་ཞུགས་ལ་ཡལ་བར་བསམ་མོ། །ནམ་མཁའི་རླུང་འཛིན་པ་ནི། གཡས་ཕྱོགས་ཀྱི་རྭའི་རྩ་བར་ཁྲོ་ཞལ་སྔོན་པོ་སྒོམ་པ་དང༌། རོ་མ་ཡང་ཁ་དོག་སྔོན་པོར་བྱེད་པ་དང༌། རླུང་རྣམས་ཀྱང་ཁ་དོག་སྔོན་པོར་བྱེད་པའི་ཁྱད་པར་མ་གཏོགས་ལུས་གནད་རླུང་སྦྱོར་དམིགས་པ་ལ་སོགས་པ་བཤད་མ་ཐག་པ་དང་འདྲའོ། །སྲིན་ཞལ་དམར་པོ་བསྒོམ་པའི་ཚུལ་ནི། རང་གི་ལྟེ་འོག་གི་མ་ཧེའི་ཞལ་གྱི་སྟེང་དུ་སྲིན་ཞལ་དམར་པོ་དེའི་སྤྱི་བོ་ནས་བརྒྱུད་དེ། མ་ཧེའི་རྐན་སྦུབས་སུ་དབུ་མའི་མས་སྣ་ཟུག་པར་བསམ་ལ། རླུང་སྦྱོར་དང་ལུས་གནད་ཀྱི་ཁྱད་པར་ནི། རྐང་པའི་བྲང་ས་ལ་བཙུགས་ཤིང་རྟིང་བ་གཉིས་གྱེན་དུ་བསྟན་པའི་སྟེང་དུ་འཕོང་བཞག་པའམ། དེ་མི་བདེ་ན་རྐང་མཐིལ་ས་ལ་བཞག་པས་ཙོག་པུའི་འདུག་སྟངས་དང་རླུང་རོ་བསལ་བའི་སྐབས་སུ་ལག་པ་གཉིས་གྱེན་དུ་བརྐྱངས་ཤིང༌། འོག་རླུང་དྲག་ཏུ་འཐེན་ཞིང༌། འཕོང་ཡང་ཅུང་ཟད་བཏེག་ཅིང༌། རླུང་ཕྱི་རོལ་ཏུ་ཅུང་ཟད་བཟུང༌། ནང་དུ་རྔུབ་པ་དང་མཉམ་དུ་ལག་པ་གཉིས་ཁུ་ཚུར་བཅིངས་པ་མཆན་ཁུང་

[Full Size]

གཡས་གཡོན་གཉིས་སུ་བཅུག་ཅིང༌། པུས་མོ་གཉིས་ས་ལ་བཙུགས་ཤིང་འཕོང་ཡང་རྟིང་བའི་སྟེང་དུ་བཞགརླུང་ཁ་སྦྱོར་དུ་བཟུང་ཞིང་དེ་ནས་རླུང་ཁ་སྦྱོར་དེ་ཉིད་སྟོད་དུ་འཐེན་ཞིང༌། མགོ་དང་རོ་སྟོད་གཡས་སུ་ལན་གསུམ་བསྐོར་བ་དང༌། གཡོན་དུ་ལན་གསུམ་བསྐོར་བར་བྱ། རླུང་ཕྱིར་འབུད་པའི་ཚེ་ལག་པ་གཉིས་གྱེན་དུ་བརྐྱང་བ་སོགས་སྔར་བཞིན་བྱའོ། །དམིགས་པ་ནི། ལུས་ཀྱི་སྨད་ཀྱི་ཆ་ནས་ཐུར་སེལ་གྱི་རླུང་གཙོ་བོར་གྱུར་པའི་རླུང་རྣམས་ཁ་དོག་སྣ་ཚོགས་པའི་རྣམ་པས་བྱུང་སྟེ། སྲིན་ཞལ་གྱི་ཞལ་ནས་ཞུགས། མ་ཧེའི་དབུ་མའི་ནང་ནས་བརྒྱུད། རྐན་སྦུབས་ཀྱི་དབུ་མའི་མས་སྣ་ནས་ཞུགས་ཏེ་སོར་བཞི་ཙམ་ནས་ཡལ་བར་བསམ་མོ། །འདི་ནི་ཐུར་སེལ་གྱི་རླུང་སྟོད་དུ་འདྲེན་པའི་ཐབས་སོ། །སྲོག་གི་རླུང་སྨད་དུ་འདྲེན་པའི་ཐབས་ནི། ལུས་གནད་སེམས་དཔའི་སྐྱིལ་ཀྲུང་ལ་ལག་པ་གཡས་གཡོན་གཉིས་ཀྱིས་རྐང་བའི་བོལ་གོང་གི་སྟོད་ཙམ་ལ་འཇུ་བའམ། ཡང་ན་དེ་དང་དེའི་ཐད་ཀྱི་གདན་སྟེང་དུ་བཙུགས་ལ། རོ་སྟོད་སྒུར་བ་དང༌། དགྱེ་བ་རེ་མོས་སུ་བཤད་ཀྱང༌། རླུང་ཕྱིར་འབུད་པའི་ཚེ་སྒུར་བ་དང༌། གཞན་རོ་སྟོད་སོགས་ལུས་སྐྱེད་པར་བྱ་ཞིང༌། རླུང་སྦྱོར་ནི། རླུང་རོ་བསལ་བའི་ཚེ་ཐུར་སེལ་གྱི་རླུང་ཡང་དྲག་ཏུ་འཐེན་ནས། ཁ་སྣ་གཉིས་ཀར་ནས་རྔུབ་ལ་ནང་དུ་འཛིན་པའི་ཚེ། འོག་རླུང་རང་གནས་སུ་བཞག་ཅིང༌། སྟེང་རླུང་གསང་གནས་

[Full Size]

ཀྱི་བུ་གའི་ཕྱོགས་སུ་དྲག་ཏུ་གནོན་པ་དང༌། བཤང་སྒོའི་ཕྱོགས་སུ་འཕུལ་བ་རེ་མོས་སུ་བྱ། དེ་ནས་རླུང་ཕྱིར་འབུད་པའི་ཚེ། ཐུར་སེལ་འཐེན་ཞིང་རྔུབ་པའི་ཚེ་ཁ་སྣ་གཉིས་ཀར་ནས་དུས་གཅིག་ཏུ་རྔུབ་པ་སོགས་སྔར་བཞིན་བྱའོ། །དམིགས་པ་ནི། ལྟེ་འོག་གི་མ་ཧེའི་ཞལ་སོགས་དགུ་ཆར་ཡོད་པ་ལ་ལམ་ཙམ་དམིགས་ལ། གཙོ་བོར་སྲིན་ཞལ་གྱི་སྟེང་དུ་འཇམ་དཔལ་གྱི་ཞལ་སེར་པོ་བསྒོམ་ལ། ལུས་ཀྱི་སྟོད་ཀྱི་ཆ་མགོ་བོ་དང་ལག་པའི་སོར་མོ་ཚུན་ཆད་ཀྱི་ནང་ནས་རླུང་ཁ་དོག་སྣ་ཚོགས་པ་དཔག་ཏུ་མེད་པ་བྱུང་བ་རྣམས་འཇམ་དཔལ་གྱི་ཞལ་ནས་ཞུགས། སྲིན་ཞལ་དང་མ་ཧེའི་དབུ་གཙུག་ནས་བརྒྱུད་དེ། མ་ཧེའི་ཞལ་གྱི་ནང་ཙམ་དུ་ཡལ་བར་བསམ་མོ། །སྲོག་དང་ཐུར་སེལ་མཉམ་པར་བྱེད་པའི་ཐབས་ནི། རྩ་ཞལ་ལ་བརྟེན་ནས་སྒོམ་པ་སྟེ་ལུས་གནད་ནི་རྐང་པ་ཡ་གཅིག་གིས་བཤང་སྒོ་བཀག་ཅིང༌། ཡ་གཅིག་གིས་གསང་གནས་མནན། ལག་པ་ཁུ་ཚུར་བརླའི་སྟེང་དུ་བཞག་ཅིང༌། མིག་སྟེང་དུ་བལྟའོ། །རླུང་སྦྱོར་ནི། ཁ་སྣ་གཉིས་ཀར་ནས་རླུང་བུས་ཤིང༌། ནང་དུ་སྣ་ནས་རྔུབ་ལ་ཁ་སྦྱཽར་དུ་བཟུང་ཞིང༌། ལྟོ་བ་ཚིགས་པ་ལ་གཅེར། མིག་གྱེན་དུ་བསྒྲད་ལ། རྐང་ལག་གིས་སོར་མོ་བསྐུམས་ཤིང་ལུས་ཀྱི་ཉྭ་བཞི་བསྒྲིམ་མོ། །དམིགས་པ་ནི། ལྟེ་འོག་གི་མ་ཧེའི་ཞལ་གྱི་ནང་ཙམ་དུ། རཾ་མཾ་ཀྵ་དམར་པོ་ཞིག་གསལ་འདེབས་པ་ལས་རཾ་སྒོམ་པ་གཙོ་ཆེ། རང་གི་སྙིང་

[Full Size]

གའི་ཐད་ཀྱི་དབུ་མའི་ནང་དུ་ཧཱུཾ་སྔོན་པོ་འོད་ཟེར་འཕྲོ་བ་ཞིག་བསྒོམ། སྤྱི་བོའི་ཐད་ཀྱི་དབུ་མའི་ནང་དུ་ཧཾ་དཀར་པོ་མགོ་ཐུར་དུ་བསྟན་པ་ཞིག་དམིགས་ལ། རཾ་ལས་མེ་འབར་དབུ་མའི་ནང་དུ་བརྒྱུད་དེ། སྤྱི་བོའི་ཧཾ་ལ་རེག་པས་ཧཾ་ལས་བདུད་རྩིའི་རྒྱུན་བབས་པ། སྙིང་གའི་ཧཱུཾ་ལ་བབས་པས་ཚིམ་ཞིང་རྒྱས་པར་བསམ་ལ་གཏུམ་མོའི་མེ་རང་གནས་སུ་ལོག །ཡང་གཏུམ་མོའི་མེ་འབར་བ་སོགས་སྔར་བཞིན་བསྒོམ་མོ། །འདི་ལ་སྦྱོར་བ་དྲུག་དང་ལྡན་པ་སྟེ དབང་པོའི་མཆོག་གྱེན་དུ་བགྲད་པ་དང༌། རོ་འཛིན་རྐན་ལ་སྦྱར་བ་དང༌། རྒྱ་མཚོ་རི་རབ་ལ་གཅེར་བ་དང༌། གླིང་བཞི་དབང་དུ་བསྡུ་བ་དང༌། རླུང་ཕྱིར་འབུད་པའི་ཚེ་ཁ་སྣ་གཉིས་ཅར་ནས་བུམ་པའི་སྟོབས་ཀྱིས་ཧའི་སྒྲ་འབྱུང་བའི་ངག་གི་འགྱུར་བ་དང༌། ལུས་ཉྭ་བཞི་བསྒྲིམས་པ་དང་དྲུག །རྐང་པ་གཡས་གཡོན་གཉིས་ཀྱི་རྟིང་པས་བཤང་སྒོ་འགག་པ་དང༌། གསང་གནས་གནོད་པ་གཉིས་རེས་མོས་སུ་བྱ། དེ་དག་ནི་རྭ་སྒོམ་པའི་ཞལ་ཤེས་སམ་ཞལ་དགུའི་རྫོགས་རིམ་མོ། །༈ གསུམ་པ་མཚན་མ་གྱེན་བསྒྲེང་ལ། སྔོན་འགྲོ་དང༌། དངོས་གཞི་དང༌། རྗེས་གསུམ་ལས། དང་པོ་ནི། རང་ཉིད་རྡོ་རྗེ་འཇིགས་བྱེད་དུ་གསལ་བའི་ལུས་ཀྱི་དབུས་སུ་རྩ་དབུ་མ་ཆོས་བཞི་དང་ལྡན་པ་ཡས་སྣ་སྤྱི་གཙུག་ཏུ་ཟུག་ཅིང་མས་སྣ་གསང་གནས་སུ་ཟུག་པའི་སྤྱི་བོར་ཧཾ་དཀར་པོ། རྡོ་རྗེ་ནོར་

[Full Size]

བུར་ཐིག་ལེ་ཡུངས་འབྲུ་ཙམ་མམ་སྲན་མ་ཙམ་ཁ་དོག་དཀར་པོ་ཞིག་བསྒོམ་ལ། ལུས་གནད་ལེགས་པར་བཅས་ལ། ཧཱུཾ་གི་སྒྲས་རླུང་ཕྱིར་འབུད་པའི་ཚེ་རྡོ་རྗེ་ནོར་བུའི་ཐིག་ལེ་དབུ་མའི་ནང་ནས་ཡར་ཧྲིལ་གྱིས་སོང་སྟེ། སྤྱི་བོའི་ཧཾ་ལ་ཐིམ་པར་བསམ། ཧཾ་དེ་ཉིད་འདར་ཁྲིལ་ཁྲིལ་འདུག་པ་ལ་སེམས་གཏད་ལ། རླུང་ཕྱིར་ཐུབ་ཚད་དུ་བཟུང༌། ནང་དུ་རྔུབ་པའི་ཚེ་སྤྱི་བོའི་ཧཾ་ལས་ཐིག་ལེ་སྐྱ་ཧྲིལ་གྱིས་བྱུང་སྟེ། དབུ་མའི་ནང་ནས་མར་སོང་སྟེ་རྡོ་རྗེ་ནོར་བུར་ལྷན་གྱིས་སླེབ་པར་བསམ་ལ་དེ་ལ་སེམས་གཏད་ཅིང་རླུང་ཅུང་ཟད་བཟུང་ངོ༌། །དེའི་གོ་ཟློག་ནི། རང་གི་སྤྱི་བོར་དབུ་མའི་ནང་དུ་ཐིག་ལེ་དམར་པོ། རྡོ་རྗེ་ནོར་བུའི་རྩེ་མོར་ཨ་དམར་པོར་བསྒོམ་ལ། རླུང་རོ་བསལ། རླུང་ནང་དུ་རྔུབ་པའི་ཚེ་ཧྲཱིཿསྒྲ་ཡིད་ལ་དྲན་པར་བྱས་ཏེ་རྔུབ་ལ། རྔུབ་པ་རྫོགས་མཚམས་སུ་ཥྟིཿཞེས་པའི་སྒྲ་ཡིད་ལ་དྲན་པར་བྱེད་ཅིང༌། དེའི་སྐབས་སུ་དམིགས་པ་ནི། སྤྱི་བོའི་ཐིག་ལེ་དམར་ཧྲིལ་གྱིས་དབུ་མའི་ནང་ནས་མར་སོང་སྟེ། ནོར་བུའི་ཨ་ལ་ཐིམ་གྱིས་ཐིམ་པར་བསམ་ཞིང༌། ཨ་འདར་ཁྲིལ་ཁྲིལ་འདུག་པ་ལ་སེམས་གཏད་ཅིང༌། རླུང་ཁ་སྦྱོར་ཐུབ་ཚད་དུ་བཟུང༌། རླུང་ཕྱིར་འབུད་པའི་ཚེ་ནོར་བུ་ནས་ཐིག་ལེ་དམར་ཧྲིལ་གྱིས་བྱུང༌། དབུ་མའི་ནང་ནས་ཡར་སོང༌། སྤྱི་བོར་སླེབ་པར་བསམ་མོ། །དེ་ནས་རང་ཉིད་འཇིགས་བྱེད་དུ་གསལ་བའི་ལུས་ཀྱི་དབུས་སུ་རྩ་དབུ་མ།

[Full Size]

སྙིང་ག་དང་ལྟེ་བར་ཧཱུཾ་རེ་རེ་བསྒོམ། དེ་ནས་རླུང་ཕྱིར་ཁ་ན་ཧའི་སྒྲས་བུས་ལ། ནང་དུ་རྔུབ་པའི་ཚེ་སྣ་ནས་རྔུབ་ཅིང༌། ཧའི་སྒྲ་ཡིད་ལ་དྲན་པར་བྱ། དེ་ནས་རླུང་ཁ་སྦྱོར་དུ་བཟུང་ལ་དེ་ཉིད་ཕོ་བར་དྲངས་ཤིང༌། ཕོ་སྟོད་ཀྱི་ཆ་ལྡིར་བར་བྱ་ཞིང༌། སྙིང་གའི་ཧཱུཾ་ལ་སེམས་གཏད། ཡང་ཁ་སྦྱོར་དེ་ཉིད་རྒྱུ་ཞབས་སུ་མནན་ཞིང་ཕྱིར་བསྐྱེད་ལ་ལྡིར་བ་བྱ་ཞིང་ལྟེ་བའི་ཧཱུཾ་ལ་སེམས་གཏད་དོ། །༈ གཉིས་པ་དངོས་གཞི་ལ། དངོས་དང། བོགས་འདོན་གཉིས་ལས། དང་པོ་ནི། ལུས་གནད་སྤྱི་དང་མཐུན་པར་བཅས་ལ། ལྟ་སྟངས་སྨིན་མཚམས་ཀྱི་ཐད་ཀྱི་ནམ་མཁའ་ལ་བལྟ། རླུང་སྦྱོར་ནི། རླུང་རོ་བསལ་ལ་རླུང་ཕྱི་རོལ་ཏུ་ཐུབ་ཚད་དུ་བཟུང་ཞིང༌། མ་ནིང་གི་རླུང་གི་མིང་ཅན་ཁོག་ནང་གི་རླུང་ཤུགས་ཡང་ཁ་སྦྱོར་དུ་བཟུང༌། རླུང་བུས་ལ་ཕྱི་རོལ་ཏུ་གཞིལ་བ་ཡང་བྱའོ། །གཉིས་པ་བོགས་འདོན་ལ། རླུང་སྦྱོར་གསུམ་ལས། དང་པོ་ནི། ལུས་བསྐྱེད་ཅིང་ལག་པ་གཉིས་ཁུ་ཚུར་བཅིངས་ཏེ་བསྣོལ་བ་རྒྱབ་ཏུ་ས་ལ་བཙུགས། རླུང་སངས་ཀྱིས་བུས་ལ་ཕྱིར་ཐུབ་ཚད་དུ་བཟུང༌། ནང་གི་རླུང་གི་ཤུགས་ཁ་སྦྱོར་དུ་བཟུང་བ་དེ་ཉིད་སྟོད་དུ་འཐེན་འཐེན་བྱ་ཞིང་ཕྱིར་བུས་ལ་གཞིལ་བ་ཡང་བྱའོ། །རླུང་སྦྱོར་གཉིས་པ་ནི། ལུས་ཅུང་ཟད་སྒུར་བའི་ལག་པ་ཁུ་ཚུར། བཅིངས་པ་མདུན་དུ་ས་ལ་བཞག རླུང་རོ་བསལ་ལ་ཕྱི་རོལ་ཏུ་ཐུབ་ཚད་

[Full Size]

དུ་བཟུང༌། དེ་ནས་ནང་དུ་རྔུབ་ལ་རླུང་ཁ་སྦྱོར་དུ་བཟུང་ཞིང་སྐེད་པ་ཉག་བྱ། མི་ཐུབ་པ་ན་ཁ་ནས་གཏོང་ངོ༌། །རླུང་སྦྱོར་གསུམ་པ་ནི། ལུས་གནད་ལག་པ་ཁུ་ཚུར་བརླ་བཞག་གམ། བརླའི་རྩ་བའི་གདན་སྟེང་དུ་བཞག་ལ་རླུང་རོ་བསལ། ཕྱིར་ཐུབ་ཚད་དུ་བཟུང༌། ནང་དུ་ཁོག་ནང་གི་གསང་གནས་ཀྱི་རླུང་གི་ཤུགས་དང༌། བཤང་སྒོའི་རླུང་གི་ཤུགས་གཉིས་དུས་གཅིག་ཏུ་འཐེན། དུས་གཅིག་ཏུ་འཐེན་མི་ཐུབ་ན་རེས་མོས་ཀྱིས་འཐེན། དེ་ནས་རླུང་ནང་དུ་རྔུབ་ལ་ཁ་སྦྱོར་དུ་བཟུང༌། དེ་ཉིད་མདུན་གསང་གནས་ཕྱོགས་སུ་གནོད་པ་དང༌། རྒྱབ་བཤང་སྒོའི་ཕྱོགས་སུ་གནོན་པ་རེས་མོས་བྱ་ཞིང༌། དེ་ནས་རླུང་གཏོང༌། དངོས་གཞི་དང༌། བོགས་འདོན་གྱི་སྐབས་ཀྱི་དམིགས་པ་ནི། མི་རྟོག་པར་འཇོག་པ་ཁོ་ན་ཉིད་ཡིན་ཞིང༌། དེ་ལྟར་ཐབས་དེ་རྣམས་ལ་བརྟེན་ནས་བསྒོམས་པས་རླུང་ནང་དུ་རྔུབ་རྒྱུ་མེད་པར་ཕྱི་རོལ་ཏུ་ཡལ་བ་ལྟ་བུར་གྱུར་ན་ཅུང་ཟད་འབྱོངས་པ་ཡིན་ཞིང༌། དེ་ནས་ཡོན་ཏན་རྣམས་རིམ་གྱིས་སྐྱེའོ། །དེ་ཡང་ཡུན་རིང་དུ་དངོས་གཞིའི་རླུང་སྦྱོར་དེ་ཉིད་གོམས་པར་བྱས་ལ། དེའི་རྗེས་སུ་བོགས་འདོན་གྱི་རླུང་སྦྱོར་དང་པོ་ལྟ་བུ་ཞིག་ཐུན་གྱི་རྗེས་སུ་བཅུ་གཅིག་གམ་ཉེར་གཅིག་ལ་སོགས་པར་བསྒོམ་པ་ཞག་བདུན་ལ་སོགས་པར་བྱའོ། །དེ་བཞིན་དུ་རླུང་སྦྱོར་གཉིས་པ་དང༌། གསུམ་པ་ལ་སོགས་པ་ཡང་དེ་མཚུངས་བྱ་ཞིང༌། མཐར་གསུམ་ཆར་ཐུན་གྱི་རྗེས་སུ་གྲངས་ཇི་ལྟར་རིགས་པ་བསྒོམ་

[Full Size]

པ་ཞག་བདུན་ལ་སོགས་པར་བྱའོ། །བོགས་འདོན་གྱི་དམིགས་པ་འདི་རྣམས་སྐབས་སུ་བྱ་བ་ཡིན་གྱིས་དུས་རྒྱུན་དུ་དངོས་གཞིའི་རླུང་སྦྱོར་ཉིད་སྒོམ་མོ། །གསུམ་པ་རྗེས་ལ། འདྲེན་དང་འགྲེམ་གཉིས་ལས། དང་པོ་ལ། ཐུན་མོང་དང་ཐུན་མོང་མ་ཡིན་པ་གཉིས་ཡོད་པ་ལས། དང་པོ་ལ་ཐིག་ལེ་བཟུང་བ་ནི། མིག་སྟེང་དུ་བསྒྲད། ལག་པའི་སོར་མོ་ཤིན་ཏུ་བསྐུམ་པ་སྙིང་གའི་ཐད་དུ་བསྣོལ་བའམ། ཡང་ན་བྲང་གཡས་གཡོན་གཉིས་ཀྱི་ཐད་དུ་སྦྱར། རྐང་པའི་སོར་མོ་རྣམས་ཤིན་ཏུ་བསྐུམ་པར་བྱས་ལ། ལུས་ཉྭ་བཞི་སྒྲིམ་ཞིང་ལྟོ་བ་ཚིགས་པ་ལ་གཅེར། ཐུར་སེལ་གྱི་རླུང་བཤང་སྒོར་དྲག་ཏུ་གློད་དོ། །ཐིག་ལེ་ཟློག་པ་ནི། དུད་འགྲོའི་འགྱུར་བ་བཞི་ལས། གླང་ཆེན་ཧིཾ་ནི། ལུས་གནད་སེམས་སྐྱིལ་ལམ། པུས་མོ་གཉིས་བཙུགས་པ་ལས། ལག་པ་གཉིས་མདུན་དུ་བཙུགས་ལ་ལུས་ཅུང་ཟད་སྒུར་བར་བྱ། སྣ་ནས་ཧིཾ་གི་སྒྲས་རླུང་ཕྱིར་བསལ་ལ། ལུས་ཅུང་ཟད་སྒུར་བ་དང༌། དེ་ནས་མགོ་དང་ལྟག་པ་བསྐྱེད་བྱས་ལ། ལྟོ་བ་ཚིགས་པ་ལ་གཅེར་བར་བྱའོ། །སྟག་མོའི་ངུར་ནི། ལུས་གནད་བྱེད་ལུགས་སྤྱི་གོང་དང་འདྲ་བ་ལས། རླུང་སྣ་ནས་ངུར་སྒྲ་དང་བཅས་འབུད་པའོ། །ཅེ་སྤྱང་ཧག་ནི། གཞན་སྔར་དང་འདྲ་བ་ལས། རླུང་ཁ་ནས་ཧག་ཅེས་པའི་སྒྲས་འབུད་པའོ། །ཝ་ཡི་སྣོམ་ནི། རླུང་སྣ་ནས་བུས་ལ་འབུད་ཐག་ཆོད་པ་

[Full Size]

དང༌། སླར་ཡང་ནང་དུ་མ་རྔུབ་པར་ལན་གསུམ་ལ་སོགས་པ་འབུད་དོ། །གཉིས་པ་ཐུན་མོང་མ་ཡིན་པ་ལ་དངོས་དང༌། ཡན་ལག་གཉིས་ལས། དང་པོ་བཟུང་བ་ནི། ལུས་གནད་སྤྱི་དང་མཐུན་པར་བཅས་ལ་རླུང་རོ་བསལ། འོག་སྒོ་གློད་ནང་དུ་རྔུབ་ཅིང༌། སྟེང་རླུང་བཤང་སྒོའི་གནས་སུ་དྲག་ཏུ་མནན་ཅིང༌། དེ་ནས་རླུང་གི་ཤུགས་མདུན་ཕྱོགས་སུ་ཕུལ་ལ། གསུས་པ་ལྡིར་གྱྀས་བྱ་ཞིང་གསང་གནས་ནས་སླར་ཡང་གྱེན་དུ་ལོག་སྟེ། རྐེད་པའི་ཐད་ཙམ་དུ་སླེབ་པར་བསམ་ལ་རྐེད་པ་ཉག་བྱའོ། །དེ་ལྟ་བུ་ལན་གསུམ་བྱའོ། །ཐུན་མོང་མ་ཡིན་པའི་བཟློག་པ་ནི། ལུས་སྤྱི་གཡོན་ཕྱོགས་སུ་གཅུས་ཏེ། སོག་རྩེ་འཕྲོད་པར་བྱ། མགོ་གཡས་སུ་གཅུས་ལ་རླུང་སྣ་ནས་བུས་ལ་སྟོང་འདྲེན་བྱ། དེ་ནས་རླུང་ནང་དུ་བཟུང་ལ། ལུས་དྲང་པོར་བསྲངས་ཏེ། ལྟོ་བ་གཡོན་དུ་ལན་གསུམ་བསྐོར། དེ་རྗེས་མགོ་དང་རོ་སྟོད་ཡང་ལན་གསུམ་དུ་བསྐོར་རོ། །དེ་རྗེས་རླུང་བུས་ལ་སྟོང་འདྲེན་བྱའོ། །གཡས་ཕྱོགས་ལ་ཡང་དེ་གོ་ཟློག་པའོ། །དེ་ནི་ཐུན་མོང་མ་ཡིན་པའི་སྟོང་འདྲེན་གྱི་རླུང་སྦྱོར་དངོས་སོ། །གཉིས་པ་ཡན་ལག་ལའང་གཉིས་ལས། དང་པོ་ནི་ལག་གཉིས་བསྣོལ་བ་རྒྱབ་ཏུ་བཙུགས། རྐང་པ་སྐྱིལ་ཀྲུང་བྱ། དེ་ནས་རླུང་སངས་ཀྱིས་བུས་ལ་ཕྱི་རོལ་ཏུ་བཟུང་ཞིང༌། ལྟག་པ་སྐྱེད་ལ་སྟོང་འདྲེན་བྱ། དེ་ནས་རྔུབ་ལ་རླུང་ཁ་སྦྱོར་དུ་བཟུང་ལ་དགང་འདྲེན་བྱའོ། །གཉིས་པ་ནི།

[Full Size]

ལག་པ་གཉིས་བསྣོལ་བ་མདུན་དུ་བཙུགས། ལུས་ཅུང་ཟད་སྒུར་ལ། རླུང་རོ་བསལ་ཞིང༌། རླུང་ཕྱི་རོལ་ཏུ་བཟུང་ལ་ལྟག་པ་སྒུར་ཞིང་སྟོང་འདྲེན་བྱ། ཡང་ནང་དུ་རྔུབ་ཅིང་ཁ་སྦྱོར་དུ་བཟུང་ལ་དགང་འདྲེན་བྱའོ། །གཉིས་པ་འགྲིམས་ལ་ཐུན་མོང་དང་ཐུན་མོང་མ་ཡིན་པ་གཉིས་ལས། ཐུན་མོང་བ་ནི། སེང་གེ་རྣམ་རོལ་སྤྱི་དང་མཐུན་པ་དེ་ཡིན་ཞིང༌། ཐུན་མོང་མ་ཡིན་པ་ལ་སྡོམ་ནི། ལག་པ་ཞགས་པ་འཕང་ཞིང་དཀྲུག་སྡེབ་བྱ། ཞེས་པའི་དོན་ནི། རླུང་བཟུང་ཞིང༌། ལག་པ་གཡས་མགོ་ལ་བསྐོར་ཞིང༌། ལན་གསུམ་ཞགས་པ་ལྟར་འཕངས། དེ་བཞིན་དུ་གཡོན་པ་ལ་ཡང་བྱ། ལག་པ་གཉིས་དུས་གཅིག་ཏུ་འཕངས་ཤིང༌། མགོ་དང་ལུས་སྤྲུག་པ་དང༌། འཕོངས་ས་ལ་བསྡེབས་སོ། །དེ་བཞིན་དུ་རླུང་ཕྱིར་བཏང་ཞིང་ཧ་སྒྲ་དང་བཅས་ལ་མགོ་ལུས་སྤྲུག་ཅིང༌། འཕོང་ས་ལ་བརྡེབས་སོ། །ཡང་སྡོམ་ནི། ཁུ་ཚུར་པུས་མོར་བཞག་ལ་གཅུས་ཤིང་སྤྲུག་ཅེས་པ། ལག་པ་གཉིས་ཁུ་ཚུར་བྱས་པ་པུས་མོའི་སྟེང་དུ་བཞག །རླུང་བཟུང་ལ་རོ་སྟོད་གཡས་སུ་གཅུ་བ་དང༌། གཡོན་དུ་གཅུ་བ་བྱ་ཞིང༌། མགོ་ལུས་ཐམས་ཅད་སྤྲུག་གོ །ཡང་སྡོམ་ནི། ཁུ་ཚུར་པུས་མོ་ནས་བརྩམས་ནུ་ཐད་དྲངས།། གྲུ་མོ་བརྒྱངས་ལ་རྩིབས་ལོག་ངོས་ལ་བརྡེག །ཅེས་པའི་དོན་ནི། ལག་པ་ཁུ་ཚུར་པུས་མོ་ནས་བརྩམས་ནས་

[Full Size]

ནུ་མའི་ཐད་དུ་དྲངས། གྲུ་མོ་བརྒྱངས་ལ་རྩིབས་མའི་ངོས་ལ་ལན་གསུམ་བརྡེག་གོ །[འདིར་སྡོམ་ནི། རོ་སྟོད་སྒུར་ཞིང་ལག་གཉིས་ཆུར་བཙལ་ཏེ། གཡས་གཡོན་དབུས་སུ་དྲག་ཏུ་བརྐྱང་བ་དང༌། རླུང་ཕྱིར་བཟུང་ལ་རྡོར་བསྡམ་སྤྱི་བོར་བརྡེག །ནང་དུ་རྔུབ་ལ་མཉམ་བཞག་བྱ་བའོ། །ངག་དབང་ཚོགས་གཉིས་རྒྱ་མཚོའི་མཆན་ཡིན།] ལག་པ་གཉིས་ཤེད་བཅུག་སྟེ། རོ་སྟོད་སྒུར་ཞིང་གྱེན་ངོས་ཀྱི་གཡས་ཕྱོགས་སུ་དྲག་ཏུ་སྐྱོང་བ་དང༌། གཡོན་ཕྱོགས་སུ་ཡང་སྐྱོང་བ་དང༌། དབུས་དྲང་ཐད་མགོའི་ཐད་དུ་ཡང་དྲག་ཏུ་བརྐྱངས་ཤིང༌། རླུང་ཕྱིར་ཅུང་ཟད་བཟུང་ལ། དེ་ནས་ལག་པའི་སོར་མོ་རྣམས་ཕན་ཚུན་བསྣོལ་བའི་ལག་མཐིལ་སྤྱི་གཙུག་ལ་བརྡེག་ཅིང༌། རླུང་རྔུབ་ལ་ནང་དུ་བཟུང༌། ལག་པ་མཉམ་བཞག་བྱའོ། །དེ་ནས་རླུང་དང་བསྲེ་བ་ནི། རླུང་བུམ་པ་ཅན་འཛིན་པའོ། །དབྱིངས་སུ་སྐྱེལ་བ་ནི། དངོས་གཞིའི་རླུང་སྦྱོར་ཅི་རིགས་བསྒོམ་ཞིང༌། སེམས་མི་རྟོག་པར་བཞག་གོ །སྐབས་འདིར་གོང་གི་ཧྲཱིཿཥྟིཿཧ་ཞེས་པའི་རླུང་ཁ་སྦྱོར་ཡང་སྦྱར་རོ། །དེ་དག་གིས་ནི་མཚན་མོ་རྒྱུ་བའི་ཞལ་གདམས་རྣམས་སོང་ནས། དེའི་རྗེས་སུ་ཡན་ལག་ཕྲ་མོ་རྣམས་སྟོན་པ་ལས། དང་པོ་རྭའི་ཁྲིད་ནི། རྭ་ཞལ་མི་བྱེད་ན། རྭ་ཐུང་བ་ལ་སོར་བཅུ་དྲུག་པ་དང༌། རིང་པ་ལ་ཉི་ཤུའོ། །རྭ་ཞལ་བྱེད་ན་ཐུང་བ་སོར་ཉི་ཤུ་དང༌། རིང་པ་ཉི་ཤུ་རྩ་བཞིའོ། །དེ་ལ་ཐོག་མར་སོར་ཉི་ཤུའི་དབང་དུ་བྱས་ཏེ། རང་ཉིད་འཇིགས་བྱེད་ཆེན་པོར་

[Full Size]

གསལ་བའི་རྭ་ཤིན་ཏུ་རྣོ་བ། སོར་ཉི་ཤུའི་ཚད་དུ་ཡོད་པའི་གཡས་ཕྱོགས་ཀྱི་རྭའི་ནང་དུ་རྩེ་མོ་ནས་བརྩམས་ཏེ། ཨོཾ་ཡ་མ་རཱ་ཛ་ས་དོ་མེ་ཡ་ཡ་མེ་དོ་རུ་ཎ་ཡོ་ད་ཡ་ཧཱུཾ་ཧཱུཾ་ཕཊ། ཅེས་པའི་ཡི་གེ་ཉི་ཤུ་པ་ཁ་དོག་སྔོན་པོར་ཡོད་པ་ལ་དམིགས་ལ་སྔགས་དེ་ཉིད་བཟླའོ། །གཡོན་ཕྱོགས་ཀྱི་རྭའི་ནང་དུ་རྩེ་མོ་ནས་བརྩམས་ལ། ཨོཾ་ཡ་ད་ཡོ་ནི་ར་ཡ་ཀྵེ་ཡ་ཡ་ཀྵེ་ཡཙྪ་ནི་ར་མ་ཡ་ཧཱུཾ་ཧཱུཾ་ཕཊ། ཅེས་པ་ཁ་དོག་སྔོན་པོར་ཡོད་པ་ལ་དམིགས་ལ་སྔགས་དེ་ཉིད་བཟླའོ། །སྔགས་ཚན་གཉིས་པོ་རྭ་གཡས་གཡོན་གཉིས་ལ་ཐུན་རེ་མོས་བྱ་ཞིང༌། ཚུལ་དེ་ལྟ་བུས་ཁྲི་ཕྲག་གཅིག་གིས་བསྙེན་པ་བྱའོ། །གྲངས་བསྙེན་སོང་ནས། ཚེ་སྒྲུབ་ཀྱི་དམིགས་པ་ནི། རྭ་ནང་གི་སྔགས་རྣམས་ཁ་དོག་དཀར་པོ་བསྒོམ་ཞིང་སྙིང་གར་ཉི་མ་ལ་ཧཱུཾ་སྔོན་པོ་དམིགས་ལ། རྭ་གཡས་གཡོན་གྱི་ནང་གི་སྔགས་རྣམས་ལས་བདུད་རྩི་དཀར་པོ་དཔག་ཏུ་མེད་པ་བྱུང་རྭའི་ནང་ཁེངས་པས། རྭ་སྔོ་སངས་དུ་སོང་སྟེ། རྭའི་ཕྱི་རོལ་ཏུ་མེ་ལྕེ་ལྷབས་ཏེ་འབར། རྭ་ནང་གི་བདུད་རྩི་རྣམས་རིམ་གྱིས་ཞལ་གྱི་རྐན་སྦུབས་སུ་སླེབ་པར་བསམ། ཕྱག་གཡོན་གྱི་ཐོད་པའི་ནང་གི་བདུད་རྩི་ཡ་ཀྵེ་མ་མེ་ད་ཞེས་པའམ། བྷྲུཾ་ཨཾ་ཛྲཾ་ཁཾ་ཧཱུཾ་ཞེས་པ་ཡོངས་སུ་གྱུར་པ་ལས་བདུད་རྩི་དཔག་ཏུ་མེད་པར་གྱུར། བརྟན་གཡོ་སྣོད་བཅུད་ཐམས་ཅད་ཀྱི་བཀྲག་མདངས་ཡེ་ཤེས་མི་ཤིགས་པ་ཐམས་ཅད་བཀུག་སྟེ། དེ་ལ་ཐིམ་པ་རྩ་ཞལ་གྱིས་དྲངས་ཏེ། ཞལ་དུ་སླེབ་

[Full Size]

པ་རྭ་ནང་ནས་བྱུང་བའི་བདུད་རྩི་རྣམས་དང་འདྲེས་ཏེ། ཐུགས་ཀའི་ཧཱུཾ་ལ་ཐིམ་པས། བཀྲག་མདངས་དང་གཟི་བརྗིད་རྒྱས་པར་བསམ་ལ། རླུང་བུམ་ཅན་བཟུང་ཞིང༌། ཡིད་ཀྱིས་ཧྲཱིཿཥྟིཿཡི་མཐར། ཡ་མཱནྟ་ཀ་ཨོཾ་བྷྲཱུཾ་བཛྲ་ཨཱ་ཡུ་ཤེ་ཛཿཧཱུཾ་ཨཿཞེས་འགོག་བཟླས་ཀྱི་ཚུལ་གྱིས་བཟླ། དེ་ལྟ་བུ་མི་ཐུབ་ན་ཐོག་མར་རླུང་ཅི་རིགས་བཟུང་ལ། དེ་ནས་ངག་བཟླས་བྱའོ། །རྭ་རིང་བའི་སྒོམ་ཚུལ་ནི། སོར་ཉི་ཤུ་རྩ་བཞི་ཡོད་པའི་རྩེ་མོར་ཐིག་ལེ། ཨོཾ་ཡ་མཱནྟ་ཀ་ཡ་མ་རཱ་ཛ་ས་དོ་མེ་ཡ་ཡ་མེ་དོ་རུ་ཎ་ཡོ་ད་ཡ་ཧཱུཾ་ཧཱུཾ་ཕཊ། ཅེས་པ་དང༌། གཡོན་ཕྱོགས་སུ་ཡང་རྩེ་མོར་ཐིག་ལེ། དེ་ནས། ཨོཾ་ཡ་མཱནྟ་ཀ་ཡ་ད་ཡོ་ནི་ར་ཡ་ཀྵེ་ཡ་ཡ་ཀྵེ་ཡཙྪ་ནི་ར་མ་ཡ་ཧཱུཾ་ཧཱུཾ་ཕཊ། ཅེས་པ་བཀོད་ལ་གཞན་སྔར་དང་འདྲའོ། །རྭ་ཐུང་བར་བསྒོམ་ན་སོར་བཅུ་དྲུག་ཡོད་པའི་གཡས་ཕྱོགས་ལ་ཡ་མ་རཱ་ཛའི་ཡི་གེ་བཅུ་དྲུག་དང༌། གཡོན་ཕྱོགས་ལ་ཡང༌། ཡ་ད་ཡོ་ནི་ལ་སོགས་པའི་ཡི་གེ་བཅུ་དྲུག་དང༌། གཞན་ཐམས་ཅད་གོང་དང་འདྲའོ། །རྭ་དང་ལིང་གའི་དག་པ་སྦྱོར་ཚུལ་ནི། རྭ་སོར་བཅུ་དྲུག་གིའི་ཕྱོགས་ལ། གཡས་ལ་བཅུ་དྲུག་དང༌། གཡོན་ལ་བཅུ་དྲུག་སྟེ། སུམ་ཅུ་སོ་གཉིས་ནི། ཕྱི་རོལ་ཏུ་དཀར་ཕྱོགས་ནག་ཕྱོགས་ཟླ་བའི་འཕེལ་འགྲིབ་བྱེད་པ་དང༌། ནང་དུ་ཁམས་ཀྱི་འཕོ་བ་དང་སྦྱོར་བ་དང༌། རྭ་རིང་བའི་ཕྱོགས་ལ་གཡས་ལ་ཉེར་བཞི་དང༌། གཡོན་ལ་ཉེར་བཞི་སྟེ། བཞི་བཅུ་ཞེ་བརྒྱད་དེའི་སྟེང་དུ་ལིང་ག་སོར་བཅུ་གཉིས་

[Full Size]

བསྣན་པས་དྲུག་ཅུ་ནི། ཆུ་ཚོད་དྲུག་ཅུ་རྣམ་པར་དག་པ་དང༌། འབྲིང་པོ་རྭ་ཉི་ཤུ་ཡང་བཅུ་དྲུག་གི་སྟེང་དུ་སླར་བཞི་བཞི་བསྣན་པ་ཡིན་པས་དགའ་བ་བཅུ་དྲུག་གི་དག་པར་སྦྱོར་ཞིང༌། ལིང་ག་སོར་བཅུ་གཉིས་ནི་རླུང་འཕོ་བ་བཅུ་གཉིས་ཀྱི་དག་པར་སྦྱོར་རོ། །དེ་ནས་ལིང་ག་སྒྲུབ་པ་ནི། རང་ཉིད་འཇིགས་བྱེད་དུ་གསལ་བའི་ལིང་ག་གྱེན་དུ་བསྒྲེང་བ། གསང་གནས་ནས་བཤང་སྒོའི་ཐད་དུ་རྩེ་སོར་བཞིའམ་སོར་གསུམ་ཙམ་གྱེན་དུ་གཞལ་བའི་རྒྱབ་ངོས་ལ་ཅུང་ཟད་ཉེ་བའི་དབུས་སུ་གསང་གནས་ཀྱི་རྩིབ་བརྒྱད་པ། ཁ་དོག་དཀར་པོ་ལྟེ་བ་དབུ་མའི་མས་སྣས་ཕུག་པ། འདབ་མ་བརྒྱད་ལ་ཡ་མ་རཱ་ཛའི་སྔགས་ཀྱིས་བསྐོར་བ། ལིང་ག་སྐྱེ་མཚམས་སུ་ཉི་མའི་དཀྱིལ་འཁོར་དེའི་ལྟེ་བ་ལ་ཡང་རྩས་ཕུག་པ། མཐའ་བསྐོར་དུ་ཧྲཱིཿཥྟིཿཁ་དོག་དམར་པོས་བསྐོར་བ། རྡོ་རྗེའི་མགུལ་བར་རྡོ་རྗེ་སྔོན་པོ་རྩེ་ལྔ་པ་ཕྱེད་པ། དེའི་ལྟེ་བ་དང་དབུས་ཀྱི་རྭ་ཡང་རྩས་ཕུག་པ། ལྟེ་བའི་མཐའ་བསྐོར་དུ་ཕ་དང་ཊ་གཉིས་སོ་སོར་ཕྲལ་བའི་ཡ་མཱནྟ་ཀ་སྔོན་པོས་བསྐོར་བ། རྡོ་རྗེ་ནོར་བུར་ཐིག་ལེ་དམར་པོ་ཉི་དཀྱིལ་ལྟ་བུ་དེའི་སྟེང་དུ། ཨ་ཀརྵ་ཡ་ཧཱུཾ་ཕཊ། ཅེས་པ་ཁ་དོག་དམར་པོས་བསྐོར། འབྲས་བུ་གཉིས་ལ་སོམ་རེ་རེ་བསྒོམ། ཐོག་མར་བསྙེན་པ་བྱ་སྟེ། འཁོར་ལོ་བཞི་པོ་དེ་རྣམས་ལ་དམིགས་པ་གཏད་ལ་སྔགས་རྣམས་ཁྲི་ཕྲག་རེ་བཟླའོ། །དེ་ནས་གྲངས་བསྙེན་སོང་ནས་འདི་ལྟར་བསྒོམ་པར་བྱ་སྟེ། འབྲས་བུ་སོམ་ལས་

[Full Size]

རེག་བྱ་ཤིན་ཏུ་ཚ་བའི་འོད་ཟེར་ཁ་དོག་སྣ་ཚོགས་པ་འཕྲོས་དབུ་མའི་སྦུབས་ནས་བརྒྱུད་དེ་གསང་གནས་ཀྱི་འཁོར་ལོར་སླེབས་པས། ལུས་ཀྱི་གནས་ཐམས་ཅད་ནས་འོད་ཟེར་དཀར་པོའི་ཚོགས་དཔག་ཏུ་མེད་པ་བྱུང༌། གསང་ནས་ཀྱི་འཁོར་ལོ་ལ་ཐིམ་པས་དྲག་ཏུ་འཁོར་ཞིང་འོད་ཟེར་དཀར་པོ་འཕྲོ་བ་ལ། འབྲས་བུ་སོམ་ལས་བྱུང་བའི་འོད་ཟེར་རེག་བྱ་ཤིན་ཏུ་ཚ་བ་དེ་ཕོག་པས། འོད་ཟེར་དཀར་པོ་རྣམས་དུམ་བུར་འཐོར་ཞིང་འཁོར་བ་ལ་སེམས་གཏད་ལ། ཡ་མ་རཱ་ཛའི་ཡིད་བཟླས་ཅུང་ཟད་བྱ། དེ་ནས་གསང་གནས་ཀྱི་འཁོར་ལོ་ཡིག་འབྲུ་དང་བཅས་པ་ཐམས་ཅད་འོད་ཟེར་དང་འདྲེས་པར་གྱུར་ཏེ། དེ་རྣམས་རྩའི་བུ་ག་ནས་བརྒྱུད་དེ། རྡོ་རྗེའི་རྐེད་པའི་ཉི་དཀྱིལ་སྔགས་འཕྲེང་དང་བཅས་པ་ལ་རེག་པས་འོད་ཟེར་དམར་པོ་འབར་ཞིང་འཕྲོ་བ་དྲག་ཏུ་འཁོར་བ་ལ་སེམས་གཏད་ལ། ཧྲཱིཿཥྟིཿཡིད་བཟླས་ཅུང་ཟད་བྱ། ཉི་དཀྱིལ་སྔགས་ཕྲེང་དང་བཅས་པ་ཡང་འོད་ཟེར་དང་འདྲེས་ཏེ། དེ་རྣམས་རྩའི་བུ་ག་ནས་བརྒྱུད། རྡོ་རྗེའི་མགུལ་བའི་རྡོ་རྗེ་སྔགས་འཕྲེང་དང་བཅས་པ་རེག་པས་འོད་ཟེར་སྔོན་པོ་འབར་ཞིང་འཕྲོ་བ་དྲག་ཏུ་འཁོར་བ་སེམས་གཏད་ལ། ཡ་མཱནྟ་ཀའི་ཡིད་བཟླས་ཅུང་ཟད་བྱ། དེ་ན་རྡོ་རྗེ་སྔགས་འཕྲེང་དང་བཅས་པ་ཡང་འོད་ཟེར་དང་པོ་འདྲེས་ཏེ། དེ་རྣམས་རྩེའི་བུ་གནས་བརྒྱུད་རྡོ་རྗེ་ནོར་བུའི་ཐིག་ལེ་དམར་པོ་སྔགས་འཕྲེང་དང་བཅས་པ་ལ་རེག་པས། འོད་ཟེར་སྣ་ཚོགས་འཕྲོ་ཞིང་འཁོར་བ་ལ་སེམས་གཏད་ལ།

[Full Size]

ཨ་ཀརྵ་ཡ་སོགས་ཀྱི་ཡིད་བཟླས་ཅུང་ཟད་བྱ། དེ་ནས་ནོར་བུ་ནས་གསང་གནས་ཀྱི་བར་དུ་ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨཾ་ཨཿ ཞེས་པའི་ཡི་གེ་བཅུ་གཉིས་པོ་རྣམས་ཁ་དོག་དཀར་པོ། མུ་ཏིག་གི་འཕྲེང་བ་བསྟར་ལ་བརྒྱུས་པ་ལྟ་བུ་ཞིག་བསྒོམ། རླུང་ཕྱྀར་བུས་ལ་དབུགས་ཐེངས་གཅིག་གམ་ཡང་ན་ཡི་གེ་རེ་རེ་ལ་དབུགས་ཐེངས་རེ་རེ་ལྟ་བུ་ཡང་བྱས་ཏེ། གང་ན་ཡང་ཨ་ཡིག་ལ་སོགས་པའི་སྒྲ་དང་བཅས་ཨ་སྟོང་འདྲེན་བྱ་ཞིང༌། འོད་ཟེར་སྣ་ཚོགས་པ་ཨ་ལ་ཐིམ། ཨ་ཨཱ་ལ་ཐིམ། རིམ་པའི་གསང་གནས་སུ་ཨཾ་ཨཱཿལ་ལྷན་གྱིས་ཐིམ་པས། འོད་ཟེར་སྣ་ཚོགས་པ་འཕྲོས་ཏེ་ལུས་ཐམས་ཅད་གང་བར་མོས། དེ་ནས་རླུང་རྔུབ་ལ་ཁ་སྦྱོར་དུ་བཟུང་བས། ལུས་ཀྱི་ཕྱི་ནས་མེ་ལྕེ་ལྷབ་ཀྱིས་འབར་བར་བསམ། དེ་ནས་གསུས་པ་ཕྱིར་བསྐྱེད་ཅིང༌། རོ་སྟོད་ཀྱི་ཆ་ཡང་ལྡིར་བྱས་ལ། ལུས་གཡས་སུ་བསྐོར་བ་དང༌། གཡོན་དུ་བསྐོར་བ་དང༌། རོ་སྟོད་གཡས་སུ་གཅུ་པ་དང། གཡོན་དུ་གཅུ་པ་དང༌། ལུས་ཐམས་ཅད་སྤྲུགས་པ་སྟེ། དེ་རྣམས་ལན་གསུམ་གསུམ་བྱས་པས་མེ་ལྕེ་ཡང་ཤིན་ཏུ་འབར་བར་གྱུར་ཏེ། ལུས་ཀྱི་སྟངས་སྟབས་དང་མཐུན་པར་གཡས་སུ་ཆེས་ཆེར་འབར་བ་ལ་སོགས་པར་བསམ་མོ། །འདི་མཚན་མ་གྱེན་བསྒྲེང་གི་ཡན་ལག་ཏུ་སྦྱོར་བ་སྟེ། གསང་གནས་ལ་སོགས་པའི་གནས་བཞི་པོ་ལྟེ་བ་ལ་སོགས་པའི་འཁོར་ལོ་བཞི་དང་གནད་གཅིག་

[Full Size]

པ་ཞིག་ཡོད་པས། འཁོར་ལོ་བཞི་དང་འབྲེལ་བའི་དགའ་བཞིའི་ཡས་བབས་དང༌། མས་བརྟན་གྱི་རིམ་པས་ཡེ་ཤེས་ཡང་སྐྱེ་བར་འགྱུར་བ་ཡིན་ནོ། །༈ རྭ་སྒྲུབ་པ་ནི། རང་འཇིགས་བྱེད་དུ་གསལ་བའི་རྭ་གཉིས་ཧྲཱིཿལས་བྱུང་བའི་རྭ་རྣོ་ཞིང་མི་བཟད་པ་རི་རབ་ལ་སོགས་པ་ཡང་བཤིག་པར་ནུས་པ། མེ་ལྕེ་འབར་བ་ཧྲཱིཿས་མཚན་པ་ཞིག་ཏུ་གྱུར་པར་དམིགས་ལ། ཨོཾ་ཧྲཱིཿཀྲུཾ་བྲུཾ་སྲུཾ་སྟྲུཾ་ཧཱུཾ་གཿཞེས་པ་བཟླ། གྲངས་བསྙེན་ཁྲི་ཕྲག་གཅིག་གོ །༈ སྡིགས་མཛུབ་སྒྲུབ་པ་ནི། རང་གི་ལག་པ་གཡས་གཡོན་སྡིགས་མཛུབ་བྱས་ལ། དེ་ཉིད་ཧཱུཾ་ནག་པོ་མེ་འབར་བ་ལས་བྱུང་བའི་སྡིགས་མཛུབ་ཧཱུཾ་གིས་མཚན་པ། གཡས་པ་ལ་རྩ་བ་ནས་རིམ་པ་བཞིན་དུ་ཨོཾ་ཧི་ཧཱི་ཧ་ཧཱ་ཧི་ཧཱི་སྭཱཧཱ། ཞེས་པ་དང༌། གཡོན་པ་ལ་རྩེ་མོ་ནས་རིམ་པ་བཞིན་དུ་ཨོཾ་ཞེས་པ་ལ་སོགས་པའོ། །དེ་རྣམས་ལ་དམིགས་པ་གཏད་ལ་སྡིགས་མཛུབ་འཆའ་བཞིན་དུ། སྔགས་དེ་ཉིད་གྲངས་བསྙེན་ཁྲི་ཕྲག་གཅིག་བཟླའོ། །ཨོཾ་ཧི་ཧི་ཧ་ཧ་ཧེ་ཧེ་བཛྲ་ཏརྫ་སཱ་དྷ་ཡ་སཱ་དྷ་ཡ་སྭཱཧཱ། ཞེས་པ་ཡང་ཅི་རིགས་བཟླའོ། །༈ ལྟ་སྟངས་སྒྲུབ་པ་ནི། རང་ཉིད་འཇིགས་བྱེད་དུ་གསལ་བའི་སྤྱན་གསུམ་གྱི་འབྲས་བུ་སྟོང་པར་སྦྱངས། སྟོང་པའི་ངང་ལས་ཕཊ་ནག་པོ་ལས་བྱུང་བའི་རབ་ཏུ་འབར་བའི་སྤྱན་ཕཊ་ཀྱིས་མཚན་པ་ལ། སྤྱན་གཡས་གཡོན་གཉིས་ལ་སྔགས་འབྲུ་དྲུག་གིས་སྤྲས་པར་དམིགས་ལ། ཨོཾ་མ་མེ་མ་མི་མ་མུ་སྭཱཧཱ། ཞེས་གྲངས་བསྙེན་ཁྲི་

[Full Size]

ཕྲག་གཅིག་བཟླ། དེ་ནས། ཨོཾ་མ་མེ་མ་མི་མ་མུ་བཛྲ་ཏིཥྟི་སཱ་དྷ་ཡ་སཱ་དྷ་ཡ་སྭཱཧཱ། ཞེས་པ་ཅི་རིགས་བཟླའོ། །༈ ཞལ་དགུ་སྒྲུབ་པ་ནི། རང་ཉིད་རྡོ་རྗེ་འཇིགས་བྱེད་ཞལ་ཕྱག་ཡོངས་རྫོགས་སུ་གསལ་བའི་མ་ཧེའི་ཞལ་ཐོག་མར་སྟོང་པར་སྦྱངས། སྟོང་པའི་ངང་ལས་སླར་ཡང་བྷཾ་ལས་མ་ཧེའི་ཞལ་གྱི་དཔྲལ་བར་བྷཾ་ཡིག་གིས་མཚན་པའི་ཞིག་གསལ་བཏབ་ལ། ཨོཾ་ཡ་མཱནྟ་ཀ་བཛྲ་བྷཻ་ར་བ་བྷཾ་སྭཱཧཱ། ཞེས་པའམ། ཧཱུཾ་ཕཊ་ཅེས་ཇི་ལྟར་རིགས་པ་སྦྱོར་ལ། གྲངས་བསྙེན་ཁྲི་ཕྲག་གཅིག་གཅིག་བཟླའོ། །དེའི་རིགས་འགྲེ་བར་བྱས་ཏེ། སྲིན་ཞལ་གྱི་ས་བོན་བྷ་དང༌། སྔགས་ནི། ཨོཾ་ཡ་མཱནྟ་ཀ་བཛྲ་བྷཻ་ར་ཝ་བྷ་སྭཱཧཱ། ཞེས་པ་དང༌། སྟེང་ཞལ་གྱི་ས་བོན་བྷི། སྔགས་ཀྱང་ཧྲག་ཏུ་བཅུག་པ་མ་གཏོགས་སྔར་བཞིན། གཡས་ཞལ་སྔོན་པོའི་ས་བོན་བྷུ། སྔགས་ཀྱང་ས་བོན་གྱི་ཁྱད་པར་མ་གཏོགས་འདྲ། གཡས་ཞལ་གཉིས་པ་དམར་པོའི་ས་བོན་བྷཻ། སྔགས་ཀྱང་ས་བོན་གྱི་ཁྱད་པར་མ་གཏོགས་འདྲ། གཡས་ཞལ་གསུམ་པ་སེར་པོའི་ས་བོན་བྷོ། སྔགས་ཀྱང་ས་བོན་གྱི་ཁྱད་པར་མ་གཏོགས་སྔར་བཞིན། གཡོན་ཞལ་དང་པོ་དཀར་པོའི་ས་བོན་བྷཽ། སྔགས་ཀྱང་ས་བོན་ཧྲག་ཏུ་བཅུག་པ་མ་གཏོགས་འདྲ། གཡོན་ཞལ་གཉིས་པ་དུད་ཁའི་ས་བོན་བྷཾ། སྔགས་ཀྱང་ས་བོན་གྱི་ཁྱད་པར་མ་གཏོགས་འདྲ། གཡོན་ཞལ་གསུམ་པ་ནག་པོའི་ས་བོན་བྷཿ

[Full Size]

སྔགས་ཀྱང་ཨོཾ་ཡ་མཱནྟ་ཀ་བཛྲ་བྷཻ་ར་ཝ་བྷཿསྭཱཧཱ། ཞེས་པའམ། ཧཱུཾ་ཕཊ་ཅེས་པ་གང་རུང་ངོ༌། །ཐམས་ཅད་ཀྱང་གྲངས་བསྙེན་ཁྲི་ཕྲག་རེ་རེ་བཟླའོ། །ཞལ་དགུ་པོ་ཐམས་ཅད་ལ་ཡང་ཞལ་སོ་སོ་སྟོང་པར་སྦྱངས། སྟོང་པའི་ངང་ལས་ས་བོན་སོ་སོ་ལས། ཞལ་དེ་དང་དེའི་དཔྲལ་བ་རང་རང་གི་ས་བོན་གྱིས་མཚན་པ་ལ་དམིགས་ནས། སྔགས་སོ་སོ་བཟླ་ཞིང༌། འདི་དག་ཐམས་ཅད་ལ་སྙིང་པོའི་སྔགས་ཀྱིས་བྱིན་རླབས་བྱའོ། །དེ་ཡན་ཆད་ཀྱིས་བསྙེན་པ་དང་རྗེས་སུ་འབྲེལ་བའི་ཞལ་གདམས་མཐའ་དག་སོང་ནས། དེའི་རྗེས་སུ་ཉེར་སྒྲུབ་བམ་བསྙཻན་པ་ཆུང་ངུའི་ལག་ལེན་ནི། ཐོག་མར་བགེགས་གཏོར། དེ་ནས་སྤྱི་གཏོར་དང༌། གཞི་བདག་གཏོར་མ་རྣམས་བཏང་ལ། ས་བླང༌། དེ་ནས་མངོན་རྟོགས་བསྒོམ་ལ་བཟླས་པ་ཅི་རིགས་བྱ་ཞིང༌། ཡུངས་དཀར་དང་ཐལ་བ་ལ་ཡང་སྔགས་ཀྱིས་བཏབ་ཅིང༌། ཡ་མཱནྟ་ཀའི་སྔགས་ཀྱིས་སྣ་དྲངས་ལ། བདུད་རྩི་འཁྱིལ་བའི་སྔགས་དྲག་ཏུ་འདོན་བཞིན་པས། ས་གཞི་ལ་ཡུངས་དཀར་དང༌། ཐལ་བ་གཏོར་རོ། །དེ་ནས་སའི་ལྷ་མོ་ལྷག་པར་གནས་པར་བྱ་ཞིང༌། དེའི་རྗེས་སུ་བུམ་པ་བསྒྲུབ་པར་བྱའོ། །དེ་ནས་ཐིག་ཚོན་བྱིན་བརླབ་ནི། ཐིག་སྐུད་བསངས་སྦྱངས། སྟོང་པའི་ངང་ལས་ཡ་མཱནྟ་ཀའི་སྔགས་ཀྱི་ཕུང་པོར་གྱུར་བར་བསམ་ལ། ཡ་མཱནྟ་ཀ་མང་དུ་བཟླ་ཞིང་ཧྲཱིཿཥྟིཿཡང་ཅི་རིགས་པ་བཟླའོ། །རྡུལ་ཚོན་བསངས་སྦྱངས། སྟོང་པའི་ངང་ལས་

[Full Size]

ཡ་མ་རཱ་ཛའི་སྔགས་ཀྱི་ཕུང་པོར་གྱུར་པར་དམིགས་ལ། ཡ་མ་རཱ་ཛ་མང་དུ་བཟླ་ཞིང༌། ཧྲཱིཿཥྟིཿཡང་ཅི་རིགས་བཟླའོ། །དེ་ནས་ལས་ཐིག་དང༌། ཡེ་ཐིག་གི་དབྱེ་བ་མི་དགོས་ཤིང༌། རང་ཉིད་འཇིགས་བྱེད་དང་ལས་ཀྱི་རྡོ་རྗེ་ཡིན་ན་འཇིགས་བྱེད་ཕྱག་གཉིས་པ་དང༌། སྒྲུབ་གྲོགས་རིག་མ་ལྟ་བུ་ཡིན་ན་རྡོ་རྗེ་རོ་ལངས་མར་བསྒོམ་ལ་ལས་ཐིག་བཏབ། དེ་ནས་སྔགས་བཟླ་བཞིན་པས་དཀྱིལ་འཁོར་འབྲིའོ། །འདི་དག་གི་སྐབས་སུ་སྒྲུབ་པོ་གཅིག་གིས་སྦྱིན་སྲེག་བྱ་ཞིང་གཅིག་གིས་གཏོར་མ་གཏོང་ངོ༌། །དེ་ལྟ་བུའི་མི་འགྲུབ་ན། རང་ཉིད་ཀྱི་དྲུག་ཅུ་རྩ་བཞི་དང་བཅས་པའི་གཏོར་མ་རྒྱས་པ་ཞིག་དང༌། སྦྱིན་སྲེག་རྒྱས་པ་ཞིག་བྱའོ། །དེ་ཡང་རྡུལ་ཚོན་གྱི་རྒྱུ་ནི་དུར་ཁྲོད་ཀྱི་སོ་ཕག་ལ་སོགས་པ་ལས་འགྲུབ་ན་བྱ་བ་ཡིན་ཀྱང༌། དེ་ལྟ་བུ་འགྲུབ་དཀའ་བས་ཤ་ཆེན་དང་ཁྲག་ལ་སོགས་པ་བསྲེས། སྒྲུབ་པའི་སྐབས་འདིར་ཞག་མང་པོར་འཇོག་དགོས་པའི་ཕྱིར་རྡུལ་མཚོན་མི་གསལ་བར་འགྱུར་བས་ཆུ་ཚོན་ལྟ་བུས་བྲིས་ན་ཡང་ཤིན་ཏུ་ལེགས། དཀྱིལ་འཁོར་ནི་འགྲུབ་ན་མཚན་ཉིད་ཡོངས་རྫོགས་དང༌། མ་འགྲུབ་ན་རྩིག་པ་ཡན་ཆད་བྲིས་ལ། ནང་དུ་ལྷ་སྣམ་སོགས་ལེགས་པར་བྲིས། ཕ་གུ་དང་རྟ་བབས་ལ་སོགས་པ་དང༌། སྣ་ཚོགས་རྡོ་རྗེ་པད་རྭ་ཉི་མ་ལ་སོགས་པ་སྤངས་པའི་ཕྱི་རོལ་ཏུ་དུར་ཁྲོད་ལེགས་པར་བྲིས། དེ་ལྟར་དཀྱིལ་འཁོར་རྒྱས་བསྡུས་ཇི་ལྟར་རིགས་པ་བྲི་བ་ལས།

[Full Size]

རྒྱས་པའི་ཕྱོགས་ལ་རྩིག་པ་ཡན་ཆད་བྲིས་ཟིན་པ་དང༌། མཚན་མ་རྣམས་འགོད་དགོས་པ་ཡིན་ནོ། །དེ་ནས་དཀྱིལ་འཁོར་དང་གདན་དང་ཕྱག་མཚན་ལ་སོགས་པ་སྦྱངས་པ་བྱས་ལ། དེ་རྗེས་གདན་དང་མཚན་མ་རྣམས་དགོད་པ་ཡིན་པ་ལས། འགྲུབ་ན་ཕྱག་མཚན་མཐའ་དག་འབུར་དོད་དུ་བྲི། དེ་ལྟ་བུ་མ་འགྲུབ་ན་གཞན་རྣམས་བྲིས་མ་དང༌། གཙོ་བོ་དང༌། རོ་ལངས་བརྒྱད་ཀྱི་ཕྱག་མཚན་རྣམས་འབུར་དོད་དུ་ངེས་པར་བྱའོ། །དེ་ཡང་ཐུན་མོང་བ་ཙམ་ལ་གཙོ་བོའི་མཚན་མ་གྲི་གུག་ལགས་ཀྱང༌། ཐུན་མོང་མ་ཡིན་པའི་ཟབ་མོའི་ཕྱོགས་ལ། གཙོ་བོ་དང༌། རོ་ལངས་བརྒྱད་ཀར་གྱི་ཕྱག་མཚན་རལ་གྲིའོ། །དེ་ཡང་ལྕགས་སམ་ཤིང་ལྟ་བུ་ལ་བྱས་ཏེ། གཙོ་བོའི་དེ་ཅུང་ཟད་ཆེ་བ་དང༌། གཞན་རྣམས་དེ་ལས་ཅུང་ཟད་ཀྱིས་ཆུང་བར་བྱ་བ་ཡིན་ནོ། །གདན་ཡང་མི་རོ་ཡོངས་རྫོགས་ཀྱི་གཟུགས་བརྙན་ཤོག་བུའམ་རས་ལྟ་བུ་ལ་བྱ། ཡང་ན་བག་ཟན་ནམ་འཇིམ་པ་ལྟ་བུ་ལ་ཤ་ཆེན་དང༌། གྲི་ཁྲག་ལྟ་བུ་བསྲེས་ལ་རོའི་གཟུགས་སུ་བྱའོ། །ཨོཾ་ཧཱུཾ་ཧཱཿ ཞེས་པ་བརྒྱ་རྩ་བརྒྱད་བཟླས་ལ་གཙོ་བོའི་གདན་བཀོད། ཨོཾ་པྲེ་ཏ་ཨཱུལྐ་ཡ་ཧཱུཾ་ཕཊ། ཅེས་ཉེར་གཅིག་ཙམ་བཟླས་ལ་ཤར་གྱི་གདན་བཀོད། དེ་ནས། ཨོཾ་པྲེ་ཏ་བི་མཱནྟ་ཀ་ཧཱུཾ་ཕཊ། ཅེས་པ་ཉེར་གཅིག་ཙམ་བཟླས་ལ་ལྷོའི་གདན་བཀོད། ཨོཾ་པྲེ་ཏ་ཛྭ་ལ་ཧཱུཾ་ཕཊ། ཅེས་པ་ཉེར་གཅིག་ཙམ་བཟླས་ལ་ནུབ་ཀྱི་གདན་བཀོད། ཨོཾ་ཀྵི་པྲ་པྲེ་ཏ་ཨུཏྤ་ཊ་ཧཱུཾ་ཕཊ། ཅེས་པ་ཉེར་

[Full Size]

གཅིག་ཙམ་བཟླས་ལ་བྱང་གི་གདན་བཀོད། དེ་ནས་ཨོཾ་ཧཱུཾ་ལཾ་ཧཱ། ཞེས་པ་ཉེར་གཅིག་ཙམ་རེ་བཟླས་ཏེ། མཚམས་ཀྱི་གདན་རྣམས་བཀོད་ལ། བཀོད་གྲུབ་པ་དང༌། སླར་ཡང་བརྟན་པའི་ཕྱིར་དུ་གཙོ་བོའི་གདན་གྱི་སྔགས་བདུན་ཙམ་རེ་དང༌། འཁོར་གྱྀ་གདན་བཀོད་པའི་སྔགས་རྣམས་གསུམ་ཙམ་རེ་བཟླའོ། །ཕྱགས་མཚན་འགོད་པ་ནི། སྙིང་པོ་བརྒྱ་རྩ་དང༌། གཞན་གཉིས་ཅི་རིགས་བཟླས་ལ། གཙོ་བོའི་ཕྱག་མཚན་བཀོད། འཁོར་རྣམས་ལ། ཨོཾ་ཧཱུཾ་ཧྲཱི་ཊི་ཥཿ ཞེས་པ་ཉེར་གཅིག་ཙམ་རེ་བཟླས་ལ། ཕྱག་མཚན་རྣམས་རིམ་པ་བཞིན་དུ་བཀོད། སླར་ཡང་བྱིན་རླབས་བརྟན་པའི་ཕྱིར་དུ་གཙོ་བོ་ལ་བདུན་ཙམ་དང༌། འཁོར་རྣམས་ལ་གསུམ་ཙམ་རེ་བཟླའོ། །དེ་ནས་རྡུལ་ཚོན་ལྷག་མ་རྣམས་ལེགས་པར་བྲིས་ལ། མཆོད་གཏོར་རྣམས་བཤམ་ལ་ཐོག་མར་བདག་བསྐྱེད་དང༌། དེ་ནས་མདུན་བསྐྱེད་དཀྱིལ་འཁོར་སྒྲུབ་མཆོད་བཞིན་དུ་བྱས་ལ། ཡེ་ཤེས་སྤྱན་འདྲེན་དབང་བསྐུར་རྒྱས་བཏབ་རྣམས་གྲུབ་མཚམས་སུ་འོག་ནས་འབྱུང་བའི་སྔགས་སོ་སོས་གཙོ་བོ་ལ་ཉེར་གཅིག་ཙམ་དང༌། འཁོར་རྣམས་ལ་བདུན་ཙམ་རེ་བཟླས་ལ་བྱིན་གྱིས་བརླབས། དེ་ནས་མཆོད་འཕྲེང་སོགས་དཀྱིལ་ཆོག་ནས་འབྱུང་བ་ལྟར་བྱས་ཤིང༌། དེ་ནས་གཏོར་མ་ཕུལ་ལ་བཟླས་པ་བྱ་བ་ཡིན་པ་ལས། དེ་ཡང་འཇིག་རྟེན་པའི་ལྷོ་དཀྱིལ་འཁོར་གྱི་ཤར་ཕྱོགས་ནས། ཨོཾ་བཛྲ་ཨུངྒ་ཊ་ས་མཱ་ཡ་པྲ་བེ་ཤ་ཡ་ཧཱུཾ། ཞེས་པས་སྒོ་ཕྱེ། དེ་ནས་སྙིང་པོའི་

[Full Size]

མཐར་ཨོཾ་བཛྲ་པྲ་བེ་ཤ་ཡ་ཧཱུཾ། ཞེས་པས་དཀྱིལ་འཁོར་གྱི་ཤར་ཕྱོགས་ནས་ཞུགས་ཏེ། རེ་མིག་གི་ནང་མགོ་བོའི་མཚན་མའི་སྟེང་དུ། རང་ཉིད་འཇིགས་བྱེད་ཀྱི་རྣམ་པས་གནས་པར་བསམ་ལ་བཟླས་པར་བྱའོ། །འདི་ལ་གཤིན་རྗེ་ལྟར་སྒྲུབ་པ་དང༌། སྲིན་པོ་ལྟར་སྒྲུབ་པ་དང༌། དབང་ཕྱུག་ལྟར་སྒྲུབ་པ་དང༌། མགོན་པོ་ལྟར་སྒྲུབ་པ་སྟེ་བཞི་ཡོད་པ་ལས། གཤིན་རྗེ་ལྟར་བསྒྲུབ་པ་ལ། ཕོ་བརྒྱད་རལ་གྲི་དང་ཐོད་ཁྲག་འཛིན་པ། མོ་བརྒྱད་ཀྱི་ངོ་བོ་རོ་ལངས་ཀྱི་བཞོན་པ་ལ་བཞོན་པར་བསྒོམ་ལ། སྔགས་ནི། ཡ་མ་མེ་ད་ཀྵེ་ཨོཾ་ཧཱུཾ་ཧྲཱི་ཊི་ཤ །ཞེས་པ་ནི་གཤིན་རྗེ་ཕོ་བརྒྱད་ཀྱི་ས་བོན་དང༌། བཞོན་པ་བརྒྱད་ཀྱི་སྔགས་ནི། ཨོཾ་བཛྲ་ཙརྩ་ཡ་ཙརྩ་ཡ་ཧཱུཾ་ཕཊ། ཅེས་པའི་མཇུག་ལ་ཕྱོགས་བཞི་མཚམས་བརྒྱད་ཀྱི་གདན་འགོད་པའི་སྔགས་རྣམས་བཏགས་ལ་བཟླའོ། །སྲིན་པོ་ལྟར་སྒྲུབ་པ་ནི། སྲིན་པོ་ཕོ་བརྒྱད་ནི། རལ་གྲི་དང་ཐོད་ཁྲག་འཛིན་པ། སྲིན་མོ་བརྒྱད་ཀྱི་ངོ་བོ་ནི། རོ་ལངས་བརྒྱད་ཀྱི་བཞོན་པ་ལ་བཞོན་པར་བསྒོམ་ལ་ཨོཾ་བཛྲ་རཀྵ་ས་བྷ་ཀྵ་ཡ་ཨི་ཏི་ཧཱུཾ་ཕཊ། ཅེས་པའི་མཐར། ཨོཾ་ཧཱུཾ་ཧྲཱི་ཊི་ཥ། ཞེས་པ་བཏགས་ལ་བཟླའོ། །རོའི་བཞོན་པའི་སྔགས་ནི། ཨོཾ་རུ་རུ་རོ་རུ་ཧཱུཾ་ཕཊ། ཅེས་པའི་མཐར་ཕྱོགས་མཚམས་ཀྱི་གདན་བརྒྱད་འགོད་པའི་སྔགས་བཏགས་ལ་བཟླའོ། །དབང་ཕྱུག་ལྟར་སྒྲུབ་པ་ནི། རོ་ལངས་ཆེན་པོ་བརྒྱད་གྲྀ་ཐོད་འཛིན་པ། རོའི་གདན་ལ་གནས་པར་བསྒོམ། སྔགས་ནི། ཨོཾ་བྷ་ཧཱུཾ་ཕཊ། དེ་བཞིན་

[Full Size]

དུ། བྷི་བྷུ་བྷེ་བྷཻ་བྷོ་བྷཽ་བྷཿ ཞེས་པ་ས་བོན་གྱི་མགོ་བོར། ཨོཾ་དང་མཇུག་ཏུ་ཧཱུཾ་ཕཊ། ཞེས་པ་སྦྱར། དེ་དག་རེ་རེའི་མཐར། ཨོཾ་ཧཱུཾ་ཧྲཱི་ཊི་ཥ། ཞེས་པ་བཏགས་ལ་བཟླ་བ་ནི་ཕོ་བརྒྱད་ཀྱི་སྔགས་དང༌། མོ་བརྒྱད་ཀྱི་སྔགས་ནི། ཨོཾ་ཧྲཱིཿཧ་ཧཱུཾ་ཕཊ། ཅེས་པའི་མཐར་གདན་བརྒྱད་ཀྱི་སྔགས་རྣམས་རིམ་པ་བཞིན་བཏགས་ལ་བཟླའོ། །མགོན་པོ་ལྟར་སྒྲུབ་པ་ནི། རོ་གདན་གྱི་སྟེང་དུ་མགོན་པོ་བརྒྱད་ཀྱྀ་གྲི་གུག་དང་ཐོད་པ་འཛིན་པ། སྐུ་མདོག་ནག་པོར་བསྒོམ་ལ། སྔགས་ནི། ཨོཾ་མཧཱ་ཀཱ་ལ་ཧཱུཾ་ཕཊ། ཅེས་པའི་མཐར། ཨོཾ་ཧཱུཾ་ཧྲཱི་ཊི་ཤ །ཞེས་པ་བཏགས་ལ་བཟླའོ། །མགོན་པོ་བརྒྱད་ཡབ་རྐྱང་ཁོ་ན་ཡིན་ལ། དེ་ཡང་སྒྲུབ་ལུགས་བཞི་པོ་དེ་ཕྱིར་རང་གི་མོས་པ་དང་བསྟུན་པའམ་བརྟག་པ་ལ་ཇི་ལྟར་བབས་པ་གཅིག་བྱ་བ་ཡིན་ཀྱང་གཤིན་རྗེ་ལྟར་སྒྲུབ་པ་གཙོ་ཆེ་བར་མཛད་དོ། །དེ་ཡང་བཟླས་པའི་གཙོ་བོ། རྩ་སྔགས་དང༌། སྙིང་པོ་དང༌། ཉེ་སྙིང་རྣམས་ལ་བྱ་བ་ཡིན་ཞིང༌། མཇུག་ཏུ་འཁོར་སྔགས་རྣམས་ཀྱང་ཅི་རིགས་བཟླ་ཞིང༌། ཐུན་གྱི་མཇུག་ཏུ་གཏོར་མ་འབུལ་ལོ། །ཡང་ན་གཤིན་རྗེ་ཕོ་དང༌། སྲིན་པོ་ཕོ་དང༌། དབང་ཕྱུག་ཕོ་རྣམས་བཞོན་པའི་ཚུལ་དུ་རོ་ལངས་ཕོ་བརྒྱད་དུ་བྱས་ལ། མོའི་ཚུལ་དུ་སྒྲུབ་ན་ཡང་རུང་ངོ༌། །བཟླས་པའི་དམིགས་པ་ནི། རང་ཉིད་འཇིགས་བྱེད་དུ་གསལ་བའི་ཐུགས་ཀ་དང༌། མདུན་བསྐྱེད་ཀྱི་ཐུགས་ཀར་རྒྱུའི་འཇམ་དཔལ།

[Full Size]

དེའི་ཐུགས་ཀར་ཉི་མ་ལ་ཧཱུཾ་གི་མཐར་སྔགས་ཀྱི་འཕྲེང་བས་བསྐོར་བར་དམིགས་ལ། རང་གི་སྙིང་གའི་སྔགས་འཕྲེང་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་སེམས་རྣམས་མཆོད་པས་མཉེས་པར་བྱས། སེམས་ཅན་ཀྱི་སྡིག་སྒྲིབ་སྦྱངས། སངས་རྒྱས་ཀྱི་བྱིན་རླབས་རྣམས་འོད་ཟེར་གྱི་རྣམ་པས་སྤྱན་དྲངས་ཏེ། རང་གི་སྙིང་གའི་སྔགས་འཕྲེང་ལ་ཐིམ། ཡང་སྙིང་ཁའི་སྔགས་འཕྲེང་ལས་འོད་ཟེར་དཔག་ཏུ་མེད་པ་སྤྲོས། མདུན་བསྐྱེད་ཀྱི་ཐུགས་ཀའི་སྔགས་འཕྲེང་ལ་ཕོག་པས། འོད་ཟེར་གྱི་རྩེ་མོ་ལས་མཆོད་པ་དཔག་ཏུ་མེད་པ་སྤྲུལ་ཏེ། མཆོད་པས་མཉེས་པར་བྱས། འོད་ཟེར་རྣམས་ཚུར་འདུས་རང་གི་སྙིང་གའི་སྔགས་འཕྲེང་ལ་ཐིམ་པར་བསམ། དེ་ལྟ་བུའི་དམིགས་པ་སྔགས་བརྒྱ་ཚར་རེ་ལ་བསྐྱར་གྱིན་བྱའོ། །མཐར་ཐུན་འཇོག་ཁར། རང་གི་སྙིང་ཁའི་སྔགས་འཕྲེང་འོད་ཟེར་འབར་བ་ལས་ངོ་བོ་སངས་རྒྱས་ཀྱི་བྱིན་རླབས། རྣམ་པ་འོད་ཟེར་དཀར་པོའི་གོང་བུ་ཞིག་ཆད་དེ། སྙིང་གའི་སྟོད་ཙམ་དུ་གནས་པར་བསམ་ལ། རང་གི་སྙིང་གའི་སྔགས་འཕྲེང་གི་བྱིན་རླབས་བརྟན་པའི་ཕྱིར་ཡི་གེ་བརྒྱ་པ་ལན་གསུམ་བརྗོད། དེ་ནས་འཕྲེང་བ་དཀྱིལ་འཁོར་དབུས་སམ་མདུན་དུ་བཞག་ལ། འོད་ཟེར་གྱི་གོང་བུ་དེ་ཉིད་རང་གི་ཁ་སྒོའམ། སྤྱི་བོའམ་སྙིང་ག་གང་རུང་ནས་ཐོན་ཏེ་མདུན་བསྐྱེད་ཀྱི་ཐུགས་ཀའི་སྔགས་འཕྲེང་ལ་ཐིམ་པས་བྱིན་རླབས་ཕུལ་བར་བསམ།

[Full Size]

སྒྲུབ་པ་ཟླ་དྲུག་བྱེད་ན་ཟླ་བ་ལྔའི་རིང་ལ་དམིགས་པ་དེ་ཉིད་ཁོ་ན་བྱ་ཞིང༌། ཟླ་བ་དྲུག་པ་ལ་ཐུན་གྱི་མཇུག་ཏུ་སྔགས་འཕྲེང་སྐོར་ལྔ་ཙམ་གྱི་རང་ལ་མདུན་བསྐྱེད་ཀྱི་ཐུགས་ཀའི་སྔགས་འཕྲེང་ལས་སྐུ་གསུང་ཐུགས་ཀྱི་བྱིན་རླབས་རྣམས་འོད་ཟེར་གྱི་རྣམ་པས་བྱུང་སྟེ། རང་གི་སྙིང་གའི་སྔགས་འཕྲེང་ལ་ཐིམ་པས་བཀྲག་མདངས་གཟི་བརྗིད་རྒྱས་པར་བསམ་མོ། །སྒྲུབ་པ་ཟླ་བ་ལྔ་དང་བཞི་དང་གསུམ་ལ་སོགས་པ་བྱེད་ན་ཡང་དེའི་རིགས་འགྲེ། ཟླ་བ་ཕྱེད་གཉིས་བྱེད་ན་ཟླ་བ་གཅིག་གོང་གི་དམིགས་པ་དེ་ཀ་བྱེད་ཅིང༌། ཟླ་བ་ཕྱེད་ཀྱི་རིང་ལ་མདུན་བསྐྱེད་ལས་བྱིན་རླབས་ལེན་པའི་དམིགས་པ་དེ་བྱ་ཞིང༌། འཁོར་རྣམས་ལས་ཀྱང་དངོས་གྲུབ་ལེན་པའི་དམིགས་པ་བྱའོ། །མཐར་སྔགས་ཀྱི་ནོར་བུ་འབུལ་བ་ཡང་བྱའོ། །དངོས་གྲུབ་ལེན་པའི་དམིགས་པ་བྱེད་པའི་སྐབས་ཀྱི་བཟླ་བྱའི་སྔགས་གསུམ་པོ་གང་རུང་ཞིག་གི་མཐར། ཨོཾ་མཧཱ་བཛྲ་བྷཻ་ར་ཝ་སརྦ་སིདྡྷི་ད་ཡ་ཀ་ཊཾ་ཧཱུཾ་ཀུཾ་དྲཾ་ཊ། [དཔེ་ལ་ལར་དྷྭཾ་ཟེར་བ་ཡོད།] ཅེས་པ་བཟླ་ཞིང༌། འཁོར་རྣམས་ཀྱང་རང་རང་གི་སྔགས་ཀྱི་མཐར། ཨོཾ་ཧཱུཾ་ཙཾ་སརྦ་སིདྡྷི་ད་ཡ་ཀ་ཧཱུཾ། ཞེས་པའང་བཟླའོ། །ཐུན་གྱི་མཐར་རང་ཉིད་དཀྱིལ་འཁོར་ནས་ཕྱིར་ཐོན་ཏེ། དགེ་བ་བསྔོ་ཞིང༌། གཏོར་མ་འབུལ་ལ་སྤྱཽད་ལམ་ལ་འཇུག་གོ །དེ་ཡང་འགྲུབ་ན་ཐུན་རེ་རེ་བཞིན་སྦྱིན་སྲེག་བྱེད་པ་ཡིན་ཀྱང༌། དེ་བཞིན་མི་འགྲུབ་ན་

[Full Size]

ཐུན་ཇི་ལྟར་རིགས་པ་གཅིག་ལ་ངེས་པར་བྱ་དགོས་ཤིང༌། ཅི་སྟེ་དེ་ཡང་མ་ལྕོགས་ན་ཉེར་སྒྲུབ་གྲུབ་མཚམས་སུ་ཞག་འགའ་ཞིག་སྤྲེལ་ཏེ་བྱའོ། །ཉེར་སྒྲུབ་ཀྱི་སྐབས་འདིར་ཅི་སྟེ་རྡུལ་ཚོན་གྱི་དཀྱིལ་འཁོར་འབྲི་བ་མ་ཐུབ་ན། ཕྱག་མཚན་རྣམས་གོང་བཞིན་བཀོད་པའི་དབུས་སུ། རས་བྲིས་ཤིང་ལྟ་བུ་ཞིག་ལ་བརྟེན་ནས་བཀྲམ་མོ། །ཕྱག་མཚན་སོ་སོའི་སྔགས་ནི། དེ་ཡང་རེ་མིག་བརྒྱད་ཀྱི་ནང་གི་མགོ་བོ་ལ་སོགས་པ་བརྒྱད་ཀྱི་སྔགས་ནི། ཨོཾ་ཨཱཿཧྲཱིཿཧཱུཾ་ཕཊ། ཨོཾ་ཨཱཿཥྟིཿཧཱུཾ་ཕཊ། ཨོཾ་ཨཱཿབི་ཧཱུཾ་ཕཊ། ཨོཾ་ཨཱཿཀྲི་ཧཱུཾ་ཕཊ། ཨོཾ་ཨཱཿཏ་ཧཱུཾ་ཕཊ། ཨོཾ་ཨཱཿཨ་ཧཱུཾ་ཕཊ། ཨོཾ་ཨཱན་ཧཱུཾ་ཕཊ། ཨོཾ་ཨཱཿན་ཧཱུཾ་ཕཊ། ཤར་གྱི་ལྷ་སྣམ་གྱི་མཚན་མ་དྲུག་གི་སྔགས་ནི། ཨོཾ་ཨཱཿཡ་ཧཱུཾ་ཕཊ། ཨོཾ་ཨཱཿམ་ཧཱུཾ་ཕཊ། ཨོཾ་ཨཱཿར་ཧཱུཾ་ཕཊ། ཨོཾ་ཨཱཿཛ་ཧཱུཾ་ཕཊ། ཨོཾ་ཨཱཿས་ཧཱུཾ་ཕཊ། ཨོཾ་ཨཱཿད་ཧཱུཾ་ཕཊ། ལྷོའི་ལྷ་སྣམ་གྱི་མཚན་མ་དྲུག་གི་སྔགས་ནི། ཨོཾ་ཨཱཿཡ་ཧཱུཾ་ཕཊ། ཨོཾ་ཨཱཿམེ་ཧཱུཾ་ཕཊ། ཨོཾ་ཨཱཿདོ་ཧཱུཾ་ཕཊ། ཨོཾ་ཨཿརུ་ཧཱུཾ་ཕཊ། ཨོཾ་ཨཱཿཎ་ཧཱུཾ་ཕཊ། ཨོཾ་ཨཿཡོ་ཧཱུཾ་ཕཊ། ནུབ་ཀྱི་ལྷ་སྣམ་གྱི་མཚན་མ་དྲུག་གི་སྔགས་ནི། ཨོཾ་ཨཱཿཡ་ཧཱུཾ་ཕཊ། ཨོཾ་ཨཱཿད་ཧཱུཾ་ཕཊ། ཨོཾ་ཨཱཿཡ་ཧཱུཾ་ཕཊ། ཨོཾ་ཨཱཿནི་ཧཱུཾ་ཕཊ། ཨོཾ་ཨཱཿར་ཧཱུཾ་ཕཊ། ཨོཾ་ཨཱཿཡ་ཧཱུཾ་ཕཊ། བྱང་གི་ལྷ་སྣམ་གྱི་མཚན་མ་དྲུག་གི་སྔགས་ནི། ཨོཾ་ཨཱཿཡ་ཧཱུཾ་ཕཊ། ཨོཾ་ཨཱཿཀྵེ་ཧཱུཾ་ཕཊ། ཨོཾ་ཨཱཿཡ་ཧཱུཾ་ཕཊ། ཨོཾ་

[Full Size]

ཨཱཿཙྪ་ཧཱུཾ་ཕཊ། ཨོཾ་ཨཱཿནི་ཧཱུཾ་ཕཊ། ཨོཾ་ཨཱཿར་ཧཱུཾ་ཕཊ། ཅེས་པ་རྣམས་སོ། །རོ་ལངས་བརྒྱད་ཀྱི་སྔགས་ནི། ཨོཾ་ཨཱཿཡ་ཧཱུཾ་ཕཊ། ཨོཾ་ཨཱཿམཱན་ཧཱུཾ་ཕཊ། ཨོཾ་ཨཱཿཏ་ཧཱུཾ་ཕཊ། ཨོཾ་ཨཱཿཀ་ཧཱུཾ་ཕཊ། ཨོཾ་ཨཱཿཧཱུཾ་ཧཱུཾ་ཕཊ། ཨོཾ་ཨཱཿཧཱུཾ་ཧཱུཾ་ཕཊ། ཨོཾ་ཨཱཿཕཊ་ཧཱུཾ་ཕཊ། ཨོཾ་ཨཱཿཕཊ་ཧཱུཾ་ཕཊ། ཅེས་པ་རྣམས་སོ། །གདན་བརྒྱད་ཀྱི་སྔགས་ནི། ཨོཾ་ཨཱཿམེ་ཧཱུཾ་ཕཊ། ཨོཾ་ཨཱཿཡ་ཧཱུཾ་ཕཊ། ཨོཾ་ཨཱཿད་ཧཱུཾ་ཕཊ། ཨོཾ་ཨཱཿཡ་ཧཱུཾ་ཕཊ། ཨོཾ་ཨཱཿཀྵེ་ཧཱུཾ་ཕཊ། ཨོཾ་ཨཱཿཡ་ཧཱུཾ་ཕཊ། ཨོཾ་ཨཱཿམ་ཧཱུཾ་ཕཊ། ཨོཾ་ཨཱཿཡ་ཧཱུཾ་ཕཊ། ཅེས་པ་རྣམས་སོ། །གོང་གི་བྱིན་གྱི་བརླབས་པའི་སྐབས་དང༌། བཟླས་པའི་སྐབས་གཉིས་ཀར་དུ་རོ་ལངས་བརྒྱད་དང༌། གདན་བརྒྱད་ལ་སོགས་པ་སོ་སོའི་སྔགས་གོང་དུ་བཤད་ཟིན་པ་འདི་དང༌། འདི་སྐབས་ཀྱི་སྔགས་རྣམས་རྒྱ་ཉིས་རིམ་གྱྀ་ཚུལ་གྱིས་གཉིས་ཀར་བཟླ་བར་བྱའོ། །ཕྱག་མཚན་སོ་སོའི་སྔགས་རྣམས་ཀྱང་བྱིན་གྱིས་རློབས་པ་དང༌། བཟླས་པའི་གནས་སྐབས་གཉིས་ཀར་བཟླ་བར་བྱའོ། །དེ་ཡན་ཆད་ཀྱིས་ཉེར་སྒྲུབ་ཀྱི་སྐོར་རྣམས་སོང་ནས། །༈ ད་ནི་སྒྲུབ་པའི་རིམ་པ་རྣམས་བཤད་པར་བྱ་སྟེ། དཀྱིལ་འཁོར་འབྲི་ཚུལ་སོགས་ནས་བཟུང༌། མདུན་བསྐྱེད་ཀྱི་དཀྱིལ་འཁོར་གྱི་ནང་དུ་འཇུག་པའི་བར་ཉེར་སྒྲུབ་ཇི་ལྟ་བ་བཞི་ལས། ཡུམ་བཞི་ཁར་བསྒོམ་ན་ཕྱོགས་ཀྱི་རེ་མིག་བཞིའི་མཚན་མའི་མདུན་དུ་ཐོད་པ་བཞི་བྲི། ཡང་ན་

[Full Size]

དབྱངས་ཅན་མ་དང༌། རྡོ་རྗེ་མཁའ་འགྲོ་མ་གང་རུང་ཞིག་བསྒོམས་ན། ཤར་ཕྱོགས་ཀྱི་རེ་མིག་གི་མདུན་དུ་མཚན་མ་ཐོད་པ་གཅིག་བཀོད། དཀྱིལ་འཁོར་སྒྲུབ་པའི་གནས་སྐབས་སུ་ཡང་ཡུམ་བཞི་ཁར་བསྒོམས་ན། ཤར་དུ་ཙར་ཙི་ཀ །ལྷོར་ཕག་མོ། ནུབ་ཏུ་དབྱངས་ཅན་མ། བྱང་དུ་གོ་རི་རྣམས་དགྲ་ནག་ནས་འབྱུང་བ་བཞིན་བསྒོམ་ལ་བྱིན་གྱིས་བརླབས་པ་དང༌། བཟླས་པའི་གནས་སྐབས་སུ་ཡང༌། ཨོཾ་མོ་ཧཱ་ར་ཏི་ཧཱུཾ་ཕཊ། ཨོཾ་པི་ཙུ་ན་རཱ་ཏི་ཧཱུཾ་ཕཊ། ཨོཾ་ར་ག་རཱ་ཏི་ཧཱུཾ་ཕཊ། ཨོཾ་བཛྲ་རཱ་ཏི་ཧཱུཾ་ཕཊ། ཅེས་པ་བཟླ། དབྱངས་ཅན་མའམ་རྡོ་རྗེ་མཁའ་འགྲོ་མ་གང་རུང་ཞིག་བསྒོམས་ན། དབྱངས་ཅན་མའི་སྔགས་ཨོཾ་པུ་ཙུ་སོགས་དང༌། རྡོ་རྗེ་མཁའ་འགྲོའི་སྔགས། ཨོཾ་བཛྲ་ཌཱ་ཀི་ནཱི་ཧཱུཾ་ཕཊ། ཅེས་པ་བཟླའོ། །དེ་ནས་རང་ཉིད་གཙོ་བོ་དང་དབྱེར་མེད་དུ་གྱུར་ཏེ། རང་དཀྱིལ་འཁོར་གྱི་དབུས་ན་གཙོ་བོའི་ཚུལ་དུ་གནས་པར་མོས་ལ་བཟླས་པ་ལ་འཇུག་པར་བྱའོ། །བཟླས་པའི་དམིགས་པ་ནི། རང་ཉིད་ཀྱི་ཐུགས་ཀར་རྒྱུའི་འཇམ་དཔལ། དེའི་ཐུགས་ཀར་ཉི་མ་ལ་ཧཱུཾ་གི་མཐར་སྔགས་ཀྱིས་བསྐོར་བར་དམིགས་ལ། དེ་ལས་འོད་ཟེར་སྣ་ཚོགས་དཔག་ཏུ་མེད་པ་སྤྲོས་ཕྱོགས་བཅུའི་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་མཆོད་པས་མཉེས་པར་བྱས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། འོད་ཟེར་སླར་འདུས་རང་ལ་ཐིམ་པར་བསམ་མོ། །དེ་ལྟར་སྒྲུབ་པ་ཟླ་དྲུག་བྱེད་ན།

[Full Size]

ཟླ་བ་ལྔའི་རིང་ལ་དམིགས་པ་དེ་དག་བྱ་ཞིང༌། ཟླ་བ་དྲུག་པ་ལ་དངོས་གྲུབ་ལེན་པའི་དམིགས་པ་བྱ་སྟེ་དེ་ཡང་ཐུན་མཇུག་ལ་སྙིང་པོ་ལ་སོགས་པའི་མཐར། ཨོཾ་མཧཱ་བཛྲ་བྷཻ་ར་ཝ་སོགས་གཙོ་བོའི་དངོས་གྲུབ་ལེན་པའི་སྔགས་དང༌། འཁོར་སོ་སོའི་སྔགས་ཀྱི་མཐར་ཨོཾ་ཧཱུཾ་ཙཾ་སོགས་འཁོར་གྱི་དངོས་གྲུབ་ལེན་པའི་བཟླས་པ་ཡང་ཅུང་ཟད་བྱ་ཞིང༌། རང་གི་སྙིང་གའི་སྔགས་འཕྲེང་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་ཐམས་ཅད་སྐུ་གསུང་ཐུགས་ཀྱི་བྱིན་རླབས་ཐམས་ཅད་འོད་ཟེར་ཀྱི་རྣམ་པར་སྤྱན་དྲངས་ཏེ། རང་ཉིད་ཀྱི་ཐུགས་ཀའི་སྔགས་འཕྲེང་དང༌། འཁོར་ཐམས་ཅད་ཀྱི་ཐུགས་ཀའི་སྔགས་འཕྲེང་ལ་ཕོག་པས་བཀྲག་མདངས་གཟི་བརྗིད་རྒྱས་པར་བསམ་ལ། སྔགས་བཟླའོ། །ཐུན་མཚམས་ལ་འཇུག་པ་དང༌། དཀྱིལ་འཁོར་གྱི་གཙོ་བོའི་ཐུགས་ཀ་ནས་རང་ཉིད་རྡོ་རྗེ་འཇིགས་བྱེད་ཕྱག་གཉིས་པའི་རྣམ་པས་དཀྱིལ་འཁོར་ནས་ཐོན་ཏེ། བཅོམ་ལྡན་འདས་རྡོ་རྗེ་འཇིགས་བྱེན་ཆེན་པོས་བདག་ལ་དངོས་གྲུབ་མ་ལུས་པ་སྩལ་ཏུ་གསོལ། ཅེས་གསོལ་བ་བཏབ་ལ། གཏོར་མ་ཕུལ་ལོ། །བསྙེན་སྒྲུབ་སྦྲགས་མའི་སྐབས་འདིར་བར་ཆད་འཇུག་པའི་སྒོ་ཤིན་ཏུ་ཆེ་བས། ཨུཥྞི་ཥའི་བསྲུང་བཟློག་རང་ཉིད་ཀྱིས་སྲོད་ཐུན་ལ་བྱ་ཞིང༌། སྒྲུབ་གྲོགས་དམ་ཚིག་གཙང་བ་དག་གི་ཐུན་བཞི་ལ་སོགས་པར་བསྲུང་འཁོར་སྒོམ་དུ་འཇུག་གོ །དེ་ཡན་

[Full Size]

ཆད་ཀྱི་སྒྲུབ་པའམ། བསྙེན་སྒྲུབ་སྦྲགས་མའི་ཞལ་གདམས་རྣམས་སོང་ནས། །༈ ད་ནི་སྒྲུབ་ཆེན་གྱི་ཞལ་གདམས་རྣམས་བསྟན་པར་བྱ་སྟེ། དཀྱིལ་འཁོར་འབྲི་བ་དང༌། སྒྲུབ་ཚུལ་སོགས་གོང་བཞིན་ལས། གཙོ་བོའི་མཚན་མ་རལ་གྲིའི་མདུན་དུ་ཐོད་སྣོད་ལ་སོགས་པར་མར་ཁུའམ། ཆང་ལ་སོགས་པ་ལ་དམ་རྫས་བཏབ་པའམ་ཡང་ན་ཐོད་པ་ལ་སོགས་པའི་སྣོད་ཀྱི་ནང་དུ་བདུད་རྩི་རིལ་བུ་ལྟ་བུ་ཞིག་དངོས་གྲུབ་ཀྱི་རྫས་སུ་བཞག །བདག་བསྐྱེད་གྲུབ་མཚམས་སུ་ཐོད་པ་དང༌། དེའི་ནང་གི་རྫས་གཉིས་ཅར་ལ་བགེགས་བསྐྲད་པ་དང༌། ཨ་མྲྀ་ཏ་དང་ཡ་མཱནྟ་ཀ་ལ་སོགས་པས་མང་དུ་བསྔགས་ཤིང༌། མདུན་བསྐྱེད་སྒྲུབ་པ་ལ་འཇུག་ཅིང་ཐོད་པའི་ནང་གི་རྫས་དང་བཅས་པ་མདུན་བསྐྱེད་ཀྱི་ལྟེ་བའི་ནང་དུ་གནས་པ་ལ་བསངས་སྦྱངས། དེ་ཡང་དབུས་སུ་ཧཱུཾ་དང༌། དེའི་མཐར་ཡ་མཱནྟ་ཀས་བསྐོར་བར་བསམ། དེ་ཡོངས་སུ་གྱུར་པ་ལས། ཁུ་བ་ཡིན་ན་བདུད་རྩིའི་རང་བཞིན་དུ་གྱུར་པའི་དབུས་སུ་རྡོ་རྗེ་འཇིགས་བྱེད་བསྐྱེད་པ་ཡིན་ཞིང༌། གོང་བུའི་རྫས་ཡིན་ན་དེ་ཤིན་ཏུ་ཆེ་བར་གྱུར་པའི་གཙོ་བོའི་ཕྱོགས་སུ་ས་བོན་ཧཱུཾ་ལས་རྡོ་རྗེ་འཇིགས་བྱེད་ཕྱག་གཉིས་པ་ཆུང་ངུ་ཞིག་བསྐྱེད་དོ། །དེ་ནས་གཏོར་མ་འབུལ་བའི་བར་གོང་བཞིན་བྱས་ལ། རང་ཉིད་རྡོ་རྗེ་འཇིགས་བྱེད་ཀྱི་རྣམ་པས་དཀྱིལ་འཁོར་གྱི་སྒོ་ནས་ཞུགས་ཏེ་གཙོ་བོ་དང་རང་གཉིས་སུ་མེད་པར་གྱུར་པའི་ལྟེ་བར་ཐོད་ནང་གི་རྫས་ཀྱི་ནང་གི་འཇིགས་བྱེད་དང་བཅས་པ་གནས་

[Full Size]

པར་བསམ་ལ། སྔགས་གསུམ་པོ་གང་རུང་གི་མཐར། དངོས་གྲུབ་ལེན་པའི་སྔགས་བཏགས་ལ་བཟླ། དམིགས་པ་ནི། རང་གི་ཐུགས་ཀའི་སྔགས་འཕྲེང་ལས་འོད་ཟེར་གྱི་ཚོགས་དཔག་ཏུ་མེད་པ་འཕྲོས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱི་བྱིན་རླབས་རྣམས་སྔགས་དང༌། དེ་ཡང་འོད་ཟེར་འབར་ཞིང་བདུད་རྩི་འཛག་པའི་རྣམ་པ་ཅན་དཔག་ཏུ་མེད་པའི་རྣམ་པར་སྤྱན་དྲངས་ཏེ། རང་གི་ཐུགས་ཀའི་སྔགས་འཕྲེང་ལ་ཐིམ་བཀྲག་མདངས་རྒྱས་པར་བསམ་ཞིང༌། དེ་ལས་སྔགས་དང་འོད་ཟེར་བདུད་རྩི་འཛག་པའི་རྣམ་པ་ཅན་གྱི་བྱིན་རླབས་ཀྱི་ཆ་ཤས་ཞིག །ལྟེ་བའི་རྫས་ནང་གི་འཇིགས་བྱེད་ལ་ཐིམ་པས་བཀྲག་མདངས་རྒྱས་པར་བསམ་མོ། །ཐུན་མཚམས་ལ་འཇུག་པའི་སྐབས་སུ་རང་ཉིད་ཕྱག་གཉིས་པའི་རྣམ་པས་ཕྱིར་ཕྱུང་སྟེ། གཏོར་མ་འཕུལ་བ་སོགས་བྱའོ། །དེ་ཡང་སྒྲུབ་ཆེན་གྱི་སྐབས་འདིར་གྲུབ་ན་ཞག་བདུན་ལ་སོགས་པ་བྱེད་པའི་ཚེ། མཚན་མོ་གཉིད་མི་ལོག་པར་བཟླས་པ་བྱ་བ་ཡིན་ཀྱང༌། ཅི་སྟེ་མ་འགྲུབ་ན་ཞག་དྲུག་གི་རིང་ལ་མཚན་ཕྱེད་ཀྱི་བར་དུ་བཟླས་པ་བྱ་ཞིང༌། དེ་ནས་དཀྱིལ་འཁོར་གྱི་ནང་ནས་ཐོན་ཏེ། ཡི་དམ་གྱི་གཏོར་མ་འབུལ་བ་དང༌། ཕྱོགས་སྐྱོང་ལ་ཡང་དྲུག་ཅུ་རྩ་བཞི་ཕུལ་ལ། དེ་ནས་རང་ཉིད་འཇིགས་བྱེད་ཕྱག་གཉིས་པའི་ང་རྒྱལ་གྱིས་ལག་པ་གཡས་སུ་རལ་གྲི་དང༌། གཡོན་དུ་ཐོད་པ་ཆང་གིས་གང་བ་ཐོགས་ལ་སྒྲུབ་ཁང་གི་ཕྱི་རོལ་ཏུ་ཕྱིན་ཏེ།

[Full Size]

ཤ་ཁྲག་དང་བཅས་པའི་གཏོར་མ་དྲུག་ཅུ་རྩ་བཞི་ལ། ཐོད་པའི་ནང་གི་ཆང་ནས་བླུག་ལ་གཏོར་མ་རྒྱས་པར་བཏང་ལ། ཚམས་རྔམས་དང་བཅས་པས། ཧྲཱིཿཥྟིཿདང༌། ཧཱུཾ་ཧཱུཾ་ཧ་ཧ་ཧོ་ཧོ་ཧེ་ཧཻ་ཞེས་པ་འདོན་བཞིན་པས། དཀྱིལ་འཁོར་ལ་བསྐོར་བ་བྱས་ལ། དེ་ནས་བཛྲ་ཨུད་གྷ་ཊ་ཡ་ས་མཱ་ཡ་པྲ་བེ་ཤ་ཡ་ཧཱུཾ། ཞེས་པས་དཀྱིལ་འཁོར་གྱི་སྒོ་ནས་ཞུགས་ཏེ། གཙོ་བོའི་སྐུའི་མདུན་དུ་འདུག་པར་མོས་ལ། བདག་ལ་དངོས་གྲུབ་མ་ལུས་པ་སྩལ་ཏུ་གསོལ། ཞེས་གསོལ་བ་དྲག་ཏུ་བཏབ་བོ། །དེ་ནས་གཉིད་ལ་སོགས་པ་ལོག་ན་དཀྱིལ་འཁོར་ནས་ཕྱིར་ཐོན་ཏེ། སྒྲུབ་ཁང་ཉིད་དུ་ཉལ་ལོ། །ཞག་བདུན་པ་ལ། ནམ་གོང་གི་སྦྱིན་སྲེག་དང༌། གཏོར་མ་འབུལ་བ་དང༌། ཕྱི་རོལ་ཏུ་དྲུག་ཅུ་རྩ་བཞི་གཏོང་བ། དཀྱིལ་འཁོར་ལ་བསྐོར་བ་བྱེད་ཅིང༌། ནང་དུ་ཞུགས་ལ་དངོས་གྲུབ་སྩོལ་བར་གསོལ་བ་བཏབ་ལ། རང་ཉིད་གཙོ་བོ་དང་དབྱེར་མེད་དུ་གྱུར་པར་བསམ་ལ་བཟླས་པ་བྱ། དེ་ནས་སླར་ཡང་ནམ་ལངས་དུ་ཉེ་བ་ན་ཕྱག་གཉིས་པའི་རྣམ་པས་ཕྱིར་ཐོན་ཏེ། འགྲུབ་ན་སྦྱིན་སྲེག་དང༌། གཏོར་མ་གཏོང་བ་སོགས་བྱ། མ་འགྲུབ་ན་མཆོད་པ་གསར་བ་བཤམས་ལ་བྱིན་གྱིས་བརླབས་ལ། མཆོད་པ་རྣམས་ཕུལ་ལ། དཀྱིལ་འཁོར་གྱི་ནང་དུ་ཞུགས་ཏེ། དངོས་གྲུབ་སྩོལ་བར་གསོལ་བ་དྲག་ལ་ཡུན་རིང་བར་བཏབ་པས། མདུན་བསྐྱེད་རྡོ་རྗེ་འཇིགས་བྱེད་ཀྱིས་དངོས་གྲུབ་ཀྱི་རྫས་རང་ལ་གནང་བར་བརྩམས་པ་ན། རང་ཉིད་ཀྱིས་ཀྱང༌།

[Full Size]

ན་མཿཏེ་ཧཱུཾ། ན་མཿམེ་ཧཱུཾ། ན་མོ་ན་མཿཧཱུཾ། ཞེས་ཕྱག་འཚལ་ཞིང་ཧྲཱིཿཥྟིཿབཟླས་པས་རང་ལ་དངོས་གྲུབ་ཀྱི་རྫས་ཏེ་སྩལ་བ་ལ་ལག་པ་གཉིས་ཀྱིས་བླངས་ལ། སྐུ་གསུང་ཐུགས་ཀྱི་དངོས་གྲུབ་ཐམས་ཅད་དུ་མོས་པས་རྫས་ཏེ་བཟའ་བའམ། བཏུང་བས་དངོས་གྲུབ་ཐམས་ཅད་ཐོབ་པར་མོས། དེ་ནས་དཀྱིལ་འཁོར་གཤེགས་གསོལ་བྱ་བ་ཡིན་པ་ལས། ཉེར་སྒྲུབ་དང༌། སྒྲུབ་པའི་སྐབས་སུ་ཡེ་ཤེས་པ་གཤེགས། དམ་ཚིག་པ་རང་ལ་བསྡུ་བ་ཡིན་ལ། སྒྲུབ་ཆེན་གྱི་སྐབས་འདིར་མདུན་བསྐྱེད་ཀྱི་ལྷ་ཚོགས་ཐམས་ཅད་རང་ལ་ཨོཾ་ཨཱཿཧཱུཾ་དང་ཡོ་ག་ཤུདྡྷ་སོགས་བཟླ་བཞིན་པས་རང་ལ་བསྡུའོ། །དེ་ལ་སྒྲུབ་པ་པོ་དངོས་གྲུབ་འགྲུབ་པའི་སྐལ་བ་དང་ལྡན་པ་དག་གིས་རིལ་བུ་མིག་སྨན་རོ་ལངས་སོགས་ཀྱི་དངོས་གྲུབ་རྣམས་ཀྱང་ཚུལ་འདི་ཁོ་ནས་ཆོ་གས་སྒྲུབ་པ་ཡིན་ལ། ད་ལྟ་ལས་དང་པོ་པ་རྣམས་ཀྱིས་མོས་པ་ལམ་བྱེད་ཀྱི་ཚུལ་གྱིས་སྒྲུབ་པ་ཡིན་ནོ། །གཞན་དག་རྡོ་རྗེ་འཇིགས་བྱེད་ཀྱི་རྣལ་འབྱོར་གྱིས་རིལ་བུ་མིག་སྨན་ལ་སོགས་པའི་དངོས་གྲུབ་སྒྲུབ་པ་ཡང་དགྲ་ནག་ནས་འབྱུང་བའི་ཆོ་གས་སྒྲུབ་དགོས་སོ། །ཞེས་སྨྲ་བ་ནི་རྟོགས་བདུན་ནས་བཤད་པའི་མན་ངག་ཟབ་མོ་འདི་ལྟ་བུ་དང་མི་ལྡན་ཞིང་མ་རྟོགས་པར་ཟད་དོ། །དེ་དག་གིས་ནི་ཐུན་མོང་མ་ཡིན་པའི་ཞལ་གྱི་གདམས་པ་རྣམས་བཤད་ཟིན་ཏོ། །༈ །འདིར་སྨྲས་པ། ཟབ་ཡང་ཆོས་ཀྱི་གཏིང་མཐའ་མི་མངོན་པ། །ཐམས་ཅད་མཁྱེན་ཅིང་

[Full Size]

གཟིགས་པའི་ཡེ་ཤེས་ཡུལ། །གང་ལ་གང་དགའ་དེ་དེའི་གདུལ་བྱ་ལ། །བསྐལ་བའི་རིམ་པར་སྟོན་འདི་རྒྱལ་བའི་སྲོལ། །དེ་ཕྱིར་སྙིང་ལ་ཞེ་སྡང་མེ་འབར་བའི། །གདུག་ཅན་གང་དེ་འདུལ་བའི་ཐབས་ཀྱིས་འཕྲུལ། །བརྗོད་བྱ་རབ་ཟབ་རྗོད་བྱེད་རྡོ་རྗེའི་ཚིག །རྟོག་བདུན་འཇམ་པའི་རྡོ་རྗེས་ཉེ་བར་བསྟན། །གང་དེའི་དགོངས་དོན་བླ་མེད་པ། །མཐུ་སྟོབས་དཔའ་བོ་རྭ་ལོ་ཡིས། །མན་ངག་སྙན་ནས་སྙན་བརྒྱུད་པ། །མཁས་རློམ་ཕལ་གྱི་མིང་ཙམ་ཡང༌། །རྣ་བའི་ལམ་དུ་མ་གྲགས་པ། །ཨུ་དུམ་བ་རའི་མེ་ཏོག་ལྟར། །ཤིན་ཏུ་རྙེད་དཀའི་ལམ་བཟང་འདི། །བླ་མའི་དྲིན་ལས་ལེགས་རྙེད་པ། །བརྗེད་པ་འཇིགས་ནས་ཡི་གེར་བྲིས། །བྱིས་པའི་བློ་ནི་དོན་ལ་རྨོངས། །དེ་ཕྱིར་ནོར་དང་འཁྲུལ་བའི་ཆ། །འདི་ལ་གང་བྱུང་དེ་དང་དེ། །རྒྱལ་བ་རྒྱ་མཚོའི་ཚོགས་ལ་བཤགས། །འདིར་འབད་དགེ་བ་ཐོབ་དེ་ཡིས། །འགྲོ་རྣམས་འཇམ་པའི་རྡོ་རྗེ་ཡི། །གོ་འཕང་བླ་མེད་ཐོབ་པར་ཤོག །ཅེས་པའང་རྗེ་བཙུན་ཐམས་ཅད་མཁྱེན་པ་ཀུན་དགའ་སྙིང་པོའི་གསུང་རྒྱུད་ལས་བྱུང་བ། ཤཱཀྱའི་དགེ་སློང་ཡེ་ཤེས་རྒྱ་མཚོས་ཟིན་བྲིས་སུ་བྱས་པའོ། །དགེའོ།། །།བཀྲ་ཤིས། །དེ་ནས་ནང་མཆོད་ནི། དམིགས་པ་བྱིན་རླབས་རྣམས་རྟོགས་བདུན་ལས་མ་གསུངས་ཀྱང༌། གདོང་དྲུག་གི་རྒྱུད་ལས་དངོས་སུ་གསུངས་པས། ཐོད་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཤ་ལྔ་དབུས་དང་ཕྱོགས་བཞིར་

[Full Size]

ན་ག་ཀུ་ད་ཧ་ཤ་ལྔའི་ངོ་བོ་ཡིན་པར་བསམ། ཡ་ཀླེ་མ་མེ་ད་ལྔ་གཤིན་རྗེ་རིགས་ལྔའི་ངོ་བོར་མོས། མཚམས་བཞིར་དབུས་དང་ལྔར། བྱང་སེམས་དྲི་ཆེན། དྲི་ཆུ། ཀླད་པ། རཀྟ་རྣམས་རིམ་བཞིན། ཛ་ས་མ་རུས་ཧཱུཾ་མཚན་པ་ཡུམ་ཙར་ཙི་ཀ །ཕག་མོ། དབྱངས་ཅན་མ། གོ་རི་བཞིའི་ངོ་བོར་མོས། རང་གི་ཐུགས་ཀར་འོད་འཕྲོས། དེ་དག་ལ་ཕོག་པས་དེ་ཐམས་ཅད་ཞི་ཞིང་འདྲེས་པའི་ནང་དུ་སྣ་ཚོགས་རྡོ་རྗེའི་ལྟེ་བའི་སྟེང་མི་བསྐྱོད་པ་སྔོན་པོ་རྡོ་རྗེ་དྲིལ་བུ་འཛིན་པ་རྡོ་རྗེ་དབྱིངས་ཀྱི་དབང་ཕྱུག་མ་ལ་འཁྱུད་པ། ཤར་རྭའི་སྟེང་དུ་རྣམ་སྣང་དཀར་པོ་འཁོར་ལོ་འཛིན་པ། སྤྱན་མ་ལ། ལྷོར་རིན་འབྱུང་སེར་པོ། མཱ་མ་ཀཱི། ནུབ་ཏུ་འོད་དཔག་མེད་དམར་པོ། དབྱངས་ཅན་མ་བྱང་རྭའི་སྟེང་དུ་དོན་ཡོད་གྲུབ་པ་ལྗང་གུ་རལ་གྲི་འཛིན་པ། ཡུམ་སྒྲོལ་མ་ལ་འཁྱུད་པ། ཐམས་ཅད་གཡས་རང་རང་གི་ཕྱག་མཚན། གཡོན་པ་ཐམས་ཅད་དྲིལ་བུ་འཛིན་པའོ། །ཡབ་ཡུམ་སྙོམས་འཇུག་བྱས་པའི་སྒྲས་སངས་རྒྱས་བྱང་སེམས་ཐམས་ཅད་སྤྱན་དྲངས། ཡབ་ཀྱི་ཞལ་དུ་ཞུགས། བྱང་ཆུབ་སེམས་ཀྱི་བདུད་རྩིར་ཞུ། ཡུམ་གྱི་པདྨར་བབས། ཡབ་ཡུམ་རྣམས་རྗེས་ཆགས་ཀྱི་རོལ་པས་བདུད་རྩི་ཞུ། རྫས་རྣམས་ལ་ཐིམ་པས། བདུད་རྩིའི་རྒྱ་མཚོ་ཆེན་པོར་གྱུར་པར་བསམ། ཐམས་ཅད་ལ་དགེ་ཞིང་བཀྲ་ཤིས་པར་གྱུར་

[Full Size]

ཅིག །རབ་དཀར་འདིས་མཚོན་སྐྱེ་འཕགས་དགེ་ཆེན་གྱིས། །དུས་མཐའ་རྒྱལ་བསྟན་དབུ་འཕང་མཐོ་བ་དང་། །ཆབས་གཅིག་འགྲོ་ལ་ཕན་བདེ་ཡོངས་སྤེལ་ཞིང་། །བསྟན་འགྲོའི་བསྲུང་རིམ་རླབས་ཆེན་སྤྱོད་གྱུར་ཅིག །ཅེས་པ་འདི་ཡང་མ་ཏིས་སོ།

[Full Size]

@div1 དཔལ་རྡོ་རྗེ་འཇིགས་བྱེད་ཀྱི་བསྙེན་པ་བྱེད་ལུགས་ལག་ལེན།

[Full Size]

དཔལ་རྡོ་རྗེ་འཇིགས་བྱེད་ཀྱི་བསྙེན་པ་བྱེད་ལུགས་ལག་ལེན་ཏཱ་ར་ནཱ་ཐས་མཛད་པ་བཞུགས་སོ། །ན་མོ་གུ་རུ། ལར་བྱིན་རླབས་ཀྱི་རྩ་བ་ཡིན་པས། །བླ་མ་ལ་གསོལ་བ་ཐོབ། དངོས་གྲུབ་ཀྱིས་རྩ་བ་ཡིན་པས། ལྷ་བསྒོམ་སྔགས་བཟླས་ལ་འབུང་། གནས་ལུགས་སྤྲོས་བྲལ་ཡིན་པས། འཛིན་མེད་ལྷུག་པར་ཞོག །འཁོར་བ་སྡུག་བསྔལ་ཡིན་པས། གང་ལ་འང་སྲེད་པ་སྤོངས་ཞིང་། ཡི་བརྙིང་ལོག་པ་ཞིག་ཡོད་མོད་ཀྱིས་དམིགས་པ་གསལ་ཐེབ་པ་དཀའ་བས་ད་ལྟ་ལག་ལེན་དུ་མི་མཛད། གཞན་ཡང་དམིགས་པ་འདྲ་མིན་དུ་མ་འདུག་སྟེ། བཀྱུས་ཀྱི་ལག་ལེན་ལ་འདེབས་ཆུ། སྙིང་ཁར་འཇམ་དཔལ། དེའི་ཐུགས་ཀར་རྡོ་རྗེ་རྩེ་ལྔ་པ་གསལ་ཐེབས་ན་འདིར་རང་བསྒོམ། མི་གསལ་ན། སྙིང་ཁའི་འཇམ་དཔལ་ཞུ་བ་བསྒོམ། གང་ལྟར་ཡང་རྡོ་རྗེའི་ལྟེ་བར་ཉི་གདན་ལ་ཧཱུཾ་ཧཱུཾ། དེའི་མཐའ་བསྐོར་དུ་བཟླས་པ་གང་བྱེད་ཀྱི་སྔགས་འཕྲེང་གི་བསྐོར་བ་སྟེ། དེའི་ཡིག་འབྲུ་རྣམས་མགོ་བོ་གྱེན་བསྟན། ཁ་ནང་བལྟན། མདུན་ནས་གཡས་བསྐོར་དུ་འཁོད་པའི་མདོག་སྔོན་པོ་ཡིན། དེ་ལས་འོད་ཟེར་སྤྲོས་ལུས་གང་བ་སྤུའི་ཁུང་བུ་ནས་སོང་། སྣང་བ་ཐམས་ཅད་ཁྱབ། འཕགས་པ་རྣམས་མཆོད། སེམས་ཅན་གྱིས་དོན་བྱས། ཚུལ་འདུས་ནས་སྙིང་པའི་ས་བོན་སྔགས་འཕྲེང་དང་བཅས་པ་ལ་ཐིམ། ཞལ་དགུ་གར་ནས་སྔགས་བཟླས་ཤིང་། ཁམས་གསུམ་སྣོད་བཅུད་ཐམས་ཅད་ལ་སྔགས་ཀྱིས་སྒྲ་བྱུང་བ་ཙམ་བསྒོམ། དེ་ལྟར་ན་རང་ཉིད་ཡི་དམ་གྱི་སྐུར་གསལ་བ་ཙམ་ལ། སེམས་གཏད་

[Full Size]

ནས། སྔགས་ཉེར་གཅིག་སོགས་བརྒྱ་ཙམ་རེ་བཟླས། དེ་ནས་སྙིང་ཁའི་སྔགས་འཁོར་ལ་བཟླས་པའི་ཚུལ་གྱི་དེ་ཙམ་བཟླས། དེ་ནས་འོད་ཟེར་སྤྲོས་བསྡུས་ལ་དེ་ཙམ་རེ་བཟླས། དེ་རྗེས་ཞལ་དགུ་དང་སྣང་སྲིད་ཐམས་ཅད་ལ་རང་སྒྲ་འབྱུང་བར་བསམ་ལ་བཟླས། ཧྲཱི༔ཥྚི་ལྟ་བུ་ལ་དཔེར་མཚོན་ནས་སྔགས་འབྲེང་བསྐོར་གཅིག་ལ་དམིགས་པ་བཞི་པོ་དེ་ཚར་རེ་ཙམ་འགྲོ་བར་བྱེད། དེས་གཞན་གཉིས་ལའང་ཚོན་བྱས་བསྙེན་པོ་ནས་ཉེར་སྒྲུབ་བྱེད་ནས། སྔར་གྱི་འཕྲོ་ལ་དེ་ཀ་བྱས་ཀྱང་རུང་བ་དེར་འཚངས་སོང་ནས། སླར་ཡང་ཉེར་སྒྲུབ་ལ་ཞུགས་ཀྱང་ཆོག་པས་ཁྱད་པར་མེད་དོ་ལགས། ཅེས་ཏཱ་ར་ནཱ་ཐས་སྨྲས་པ་ཟེར། །