རྐང་པ་བཞི་བཅུ་རྩ་བརྒྱད་པ་བསྒྱུར་བའི་བསྟོད་པ།
ཛ་ཡ་སེ་ནཱ།
༄། །རྐང་པ་བཞི་བཅུ་རྩ་བརྒྱད་པ་བསྒྱུར་བའི་བསྟོད་པ་བཞུགས་སོ།། དཔལ་རྡོ་རྗེ་མཁའ་འགྲོ་དཔའ་བོ་ཆེན་པོ་དཔའ་བོའི་དབང་ཕྱུག །ས་གསུམ་བསྐྱོད་ཅིང་གཡོ་བར་མཛད་དུ་འཇུག་པ་པོ། །མཆེ་བ་གཙིགས་པ་འཇིགས་སུ་རུང་བ་འཇིགས་པར་མཛད་པ། སྤྱན་བརྒྱ་སྟོང་ཕྲག་མངའ་བ། གློག་གི་ལྗགས་ཅན། །ཀེང་རུས་ཀྱི་ཕྲེང་བས་བརྒྱན་པའི་སྐུ་ཅན། ཕྱག་བྱེ་བ་འབུམ་མངའ་བ། འབར་བས་ཀུན་ནས་སྐོར་བས་རེག་པ། དགྲ་སྟ་དང་ཞགས་པ་དང་དཔལ་ཅན་འཕྱར་བ། བསྐལ་པའི་མཐའི་དུ་བ་དྲག་པོའི་སྐུ་ཅན། རྣམ་པར་གཙིགས་པའི་ཞལ་ཧ་ཧ་སྒྲོགས་པ། མ་མོའི་ཚོགས་ཀྱིས་ཡོངས་སུ་བསྐོར་བའི་སྔགས་ཅན། ལྷན་ཅིག་སྐྱེས་མའི་མཛེས་མ་དང་གཅུགས་པར་མཛད་པ། ཧཱུཾ་ཧཱུཾ་ཞེས་སྒྲོགས་པའི་ཞལ་ཅན། ངུར་ཁྲོད་ཆེན་པོ་ལ་དབྱེས་པ། འབྱུང་པོ་ཐམས་ཅད་ཀུན་དུ་སྐྲག་པར་མཛད་པ། །བསྐལ་པའི་མཐའ་མའི་མེའི་གཟི་བརྗིད་ཅན། རལ་པའི་ཚོགས་ཀྱི་ཅོད་པ་ན། ཁྲི་རྐང་དང་ཐོད་པ་དང་གསལ་ཞིང་གིས་ཕུག་པ་འཛིན་པ། རྒྱ་མཚོ་ཆེན་པོའི་སྐེ་རགས་ཅན། སྟག་གི་པགས་པའི་ན་བཟའ་འཚང་བ། རོ་ལངས་ཀྱི་ཚོགས་འཇོམས་པར་མཛད་པ། བགེགས་ཆེན་པོ་ལས་སྐྱོབ་པ་པོ། །དགྲ་ལ་ངེས་པར་གནོད་པ་མཛད་པ། སྟོང་གསུམ་གྱི་སྟོང་ཆེན་པོ་བ་སྤུ་འཁྱིལ་པ་གཅིག་གི་ནང་དུ་གནས་པ་པོ། །ཞལ་བརྒྱ་ཕྲག་སྟོང་མངའ་བ། ཡེ་ཤེས་ཀྱི་རྒྱ་མཚོའི་ཞལ་ཅན། ཤ་ཆེན་པོ་དང་ཁྲག་དང་ཞག་གསོལ་བ་པོ། །བདུད་ཐམས་ཅད་ཀྱི་སྟོབས་འཇོམས་པ་པོ། །འབྱིན་པ་དང་སྡུད་པ་མཛད་པ་པོ། །ཀླུ་ཐམས་ཅད་སྐེམས་པ་དང༌། རེངས་པ་དང༌། རྣམ་པར་འཇུ་བར་མཛད་པ། རྒྱུ་མའི་ཕྲེར་བ་འཛིན་པ། རི་རབ་གཡོ་གར་བྱེད་པའི་སྒྲ་ཅན། ཁྲོ་བོའི་སྐུ་འཛིན་པ། གོ་སྐབས་ཆེན་པོའི་ཐིག་ལེའི་བདག་ཉིད་ཅན། སངས་རྒྱས་བྱེ་བ་སྟོང་སྐད་ཅིག་གིས་རྫོགས་པར་མཛད་པ། ཡེ་ཤེས་ཀྱི་བདུད་རྩིའི་ཆར་འབེབས་པ། ལས་ཐམས་ཅད་རབ་ཏུ་འཇུག་པར་མཛད་པ། །འཆིང་བར་བྱེད་པ། རྣམ་པར་རྟོག་པ་ཐམས་ཅད་འཇོམས་པར་མཛད་པ། མགོ་བོས་འཁྲིགས་པས་རེག་པའི་སྐུ་ཅན། གཞན་གྱིས་བྱས་པའི་འཁྲུལ་འཁོར་
༄། །དང་སྔགས་འཇོམས་པ་པོ། །སྲུང་བ་ཆེན་པོ་བྱེད་པ། སྡང་བ་རྣམས་ཀྱི་རྣམ་པར་འཇོམས་པ་པོ། །ཆོས་འབྱུང་བར་མཛད་པ། ཁྲོ་བོ་སྤྲོ་ཞིང་སྤྲོ་བར་བྱེད་དུ་འཇུག་པ། དབང་པོའི་དྲ་བ་སེམས་ཅན་ཐམས་ཅད་ཀྱི་བདག་ཉིད་ཅན། འཐབ་པ་དང༌། རྩོད་པ་དང༌། རབ་ཏུ་རྩོད་པའི་བློ་གྲོས་ཆེན་པོ་ལ་ཕྱག་འཚལ་ལོ། །རྐང་པ་བཞི་བཅུ་རྩ་བརྒྱད་པའི་བསྟོད་པའོ། །ཤྲཱི་ཛ་ཡ་སེ་ནཱ་དང༌། དཔལ་དར་མ་ཡོན་ཏན་གྱིས་བསྒྱུར་རོ། །འདི་ལ་ཚིགས་སུ་བཅད་པར་བསྒྱུར་པའང་སྣང་ངོ༌། །དགེ་བ་འདི་ཡིས་ཉེ་བར་མཚོན་ནས་ནི། །སེམས་ཅན་རྣམས་ཀྱིས་དུས་གསུམ་བསགས་པ་ཡི། །ཟག་བཅས་ཟག་མེད་ཟུང་འཇུག་དགེ་བ་རྣམས། །བླ་མེད་བྱང་ཆུབ་ཆེན་པོར་བསྔོ་བར་བགྱི། །འགྲོ་ཀུན་ཐམས་ཅད་མཁྱེན་པ་ཐོབ་པར་ཤོག །