སྦྱིན་སྲེག་གི་ཆོ་ག་འོད་ཀྱི་སྙེ་མ་ཞེས་བྱ་བ།
ཨ་བྷ་ཡཱ་ཀ་ར་གུ་པ།
རྒྱ་གར་སྐད་དུ། ཛྱེ་ཏི་རྨཉྫ་རི་ནཱ་མ་ཧོ་མ་བ་ཡིག །བོད་སྐད་དུ། སྦྱིན་སྲེག་གི་ཆོ་ག་འོད་ཀྱི་སྙེ་མ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་ཉིད་བསྡུས་སོགས་རྒྱུད་རྣམས་སུ། །རྡོ་རྗེ་འཛིན་པས་སྦྱིན་སྲེག་ལས། །རབ་གཏོར་འཇིགས་མེད་ཤེས་རབ་དང། །སྙིང་རྗེ་དགའ་བས་ཡང་དག་བསྡུ། །གཞན་གྱིས་བྱས་པ་ཡོད་མོད་ཀྱི། །རྒྱུ་སྐར་ཁྲོད་ན་ཟླ་བ་ཡི། །འོད་ཟེར་ལྟར་གསལ་ཁྱད་པར་དུ། །དགའ་བ་སྟེར་འདི་ལེགས་བརྟག་བྱ། །དེ་ལ་ཉི་མ་བཟང་པོ་ལ་ཇི་ལྟར་བརྗོད་པའི་ཆོ་གས་རང་གི་འདོད་པའི་ལྷའི་བདག་ཉིད་ཅན་གྱིས་མཆོད་པ་དང་གཏོར་མ་འབུལ་བ་སྔོན་དུ་འགྲོ་བས། ལག་པ་གཡས་པས་ལ་བཞག་སྟེ། ཨོཾ་ཨཱཿ་ཧཱུཾ་ཞེས་པ་འདིས་དང༌། ཨོཾ་ཧ་ན་ཧ་ན་ཀྲོདྷ་ཧཱུཾ་ཕཊ་ཅེས་པའམ། རང་གི་ལྷའི་སྔགས་བརྒྱ་རྩ་བརྒྱད་བཟླས་ཏེ། ཀུན་རྫོབ་ཀྱི་དག་པའི་ཐབ་ཀྱིས་སམ། སྟོང་པ་ཉིད་ཀྱིས་ཀྱང་རུང་སྟེ། ཐབ་ཁུང་རྣམས་བརྐོ་བར་བྱ་བའི་དོན་དུས་རྣམ་པར་སྦྱངས་ཏེ། ཡང་ན་ཡོན་བདག་གི་དབང་གིས་རྡོ་རྗེ་ཕྲེང་བར་བརྗོད་པའི་ཆོ་ག་རྣམས་ཀྱིས་ས་སྦྱང་བ་དང༌། ས་ཡོངས་སུ་གཟུང་བ་དང༌། བགེགས་ལ་ཕུར་བུས་གདབ་པ་དང༌། སའི་ལྷ་མོ་ལྷག་པར་གནས་པ་ཡང་ཇི་ལྟར་རིགས་པར་འདོད་པས། རྒྱས་པའམ་བསྡུས་པ་བྱས་ནས་ས་བདག་ཀླུའི་མཆན་ལ་ཐབ་ཁུང་རྣམས་བརྐོ་བར་བྱའོ། །དེ་ལ་ཞི་བའི་ཐབ་ཁུང་ནི་ས་དཀར་པོ་ལ་རྒྱར་ཁྲུ་གང་ཟབས་སུ་སོར་བཅུ་གཉིས་པ་ཟླུམ་པོ་སྟེ། དེའི་དབུས་སུ་སོར་བཅུ་དྲུག་པའི་པདྨའི་སྟེང་དུ་འཁོར་ལོའམ་མགོ་ཤར་དུ་བསྟན་པའི་རྡོ་རྗེ་རྩེ་ལྔ་པ་སྟེ། སོར་བརྒྱད་པའི་ཚད་ཙམ་པ་དཔངས་སུ་སོར་གཅིག་པའོ། །ཐབ་ཁུང་གི་སྟེང་དུ་སོར་བཞིའི་བར་དོར་བར་རྒྱ་དང་དཔངས་སུ་སོར་བཞི་པ་ཐབ་ཁུང་གི་དབྱིབས་ཅན་ཁ་བགས་ཀྱིས་ནང་དུ་གཞོལ་བའི་ཁ་ཁྱེར་ཁོར་ཡུག་སྟེ། ཕྱིའི་ཟུར་རྣམས་སུ་ཟུར་གསུམ་རྣམས་ལ་འཁོར་ལོའམ་རྡོ་རྗེ་རྩེ་གསུམ་པས་མཚན་པའོ། །ཐབ་ཁུང་ལས་ས་དཀར་པོ་དང་ཕྱི་རོལ་དུ་ས་གཞི་ཁྲུ་ཕྱེད་དུ་ཀུན་ནས་པའི་ལྕི་བས་ཉེ་བར་བྱུགས་ཏེ། དེ་ཉིད་ལས་བདུད་རྩི་དཀར་པོ་དང་ལྡན་པའི་དྲི་དཀར་པོས་ཉེ་བར་བྱུགས་ལ་ཐུན་གསུམ་དུ་མེ་ཏོག་དཀར་པོའི་སིལ་མ་གཅལ་དུ་དགྲམ་པར་བྱའོ། །རྒྱས་པའི་ཐབ་ཁུང་ནི་ས་གཞི་སེར་པོ་ལ་རྒྱར་ཁྲུ་དོ་ཟབས་སུ་ཁྲུ་གང་པ་གྲུ་
བཞི་པའམ་རིན་པོ་ཆེ་ཟུར་བརྒྱད་པ་ལྟ་བུ་སྟེ། དེའི་དབུས་སུ་འཁོར་ལོ་རྩིབས་བརྒྱད་པའི་ལྟེ་བ་ལ་གནས་པའི་སོར་དྲུག་པའི་རིན་པོ་ཆེ་རྡོ་རྗེས་མཚན་པའོ། ཐབ་ཁུང་གི་སྟེང་དུ་སོར་བརྒྱད་དོར་བར་རྒྱ་དང་དཔངས་སུ་སོར་བརྒྱད་པའི་ཚད་ཀྱི་ཐབ་ཀྱི་དབྱིབས་ཅན་ལ། ཕྱི་ཟུར་རྣམས་སུ་རིན་པོ་ཆེས་མཚན་པའི་ཁ་ཁྱེར་རོ། །ཐབ་ཁུང་ལས་སེར་པོ་དང་དེའི་ཕྱི་རོལ་དུ་བའི་ལྕི་བས་ཉེ་བར་བྱུགས་ནས་དེ་དག་ལ་བདུད་རྩི་སེར་པོ་དང་ལྡན་པའི་དྲི་སེར་པོས་ཉེ་བར་བྱུགས་ལ་མེ་ཏོག་སེར་པོ་དགྲམ་པར་བྱའོ། །དབང་གི་ཐབ་ནི་ས་དམར་པོའམ་གཞན་ཡང་རུང་སྟེ་བྷ་གའི་རྣམ་ལ་རྩེ་མོ་ཤར་དུ་བསྟན་པ་ལ་ཨ་ཤྭདྠའི་ལོ་མ་ལྟ་བུའམ་ཟླ་བ་ཕྱེད་པའི་རྣམ་པའི་དབུས་སུ་པདྨ་དམར་པོ་རྡོ་རྗེས་མཚན་པའོ། །དབང་གིས་དགུག་པ་ལ་ཡང་ཐབ་ཁུང་འདི་དག་གམ་ཡང་ན་རྡོ་རྗེ་རྩེ་གཅིག་པའི་རྣམ་པ་ཅན་གྱི་དབུས་སུ་པདྨ་དམར་པོ་རྡོ་རྗེའི་ལྕགས་ཀྱུས་མཚན་པ་སྟེ། ཐབ་ཁུང་གསུམ་ཀ་ལ་ཡང་གཙོ་བོའི་མཚན་མས་མཚན་པའི་ལྕགས་ཀྱུས་མཚན་པའི་ཐབ་ཁུང་གི་རྣམ་པའི་ཁ་ཁྱེར་གྱིས་བསྐོར་བའོ། །ས་དམར་པོ་བདུད་རྩི་དང་བཅས་པའི་དྲི་དམར་པོས་ཉེ་བར་བྱུགས་ལ་མེ་ཏོག་དམར་པོ་སིལ་མ་དགྲམ་པར་བྱའོ། །ཐབ་ཁུང་གསུམ་པོ་ནི་ཟབས་དང་ཁ་ཁྱེར་ལ་སོགས་པའི་ཚད་ནི་ཞི་བའི་ཐབ་ཁུང་བཞིན་དུ་ཤེས་པར་བྱའོ། །མངོན་སྤྱོད་ཀྱི་ཐབ་ཁུང་ནི་གས་པ་ཚ་སྒོ་ཅན་དང་རྩུབ་པ་དང་ནམ་མཁའ་ལྟར་ནག་པའི་ས་ལ་གྲུ་གསུམ་བྱང་དུ་ཕྱོགས་པ། ལོགས་རྣམས་ལ་སོར་ཉི་ཤུ་པ་ཟབས་སུ་སོན་བཅུ་པ་དབུས་སུ་པདྨ་ནག་པོ་ལ་གནས་པའི་སོར་བརྒྱད་པའི་ཁྲོ་བོའི་རྡོ་རྗེས་བརྒྱན་པའམ། དབུས་སུ་རྩེ་གསུམ་པ་ལ་གནས་པའི་ཁྲོ་བོའི་རྡོ་རྗེས་བརྒྱན་པའོ། །ཐབ་ཁུང་གི་སྟེང་གི་སོར་གསུམ་དོར་བར་རྒྱ་དང་དཔངས་སུ་སོར་གསུམ་པ་ཁ་ཕྱིར་གཞོལ་བའི་ཁ་ཁྱེར་ཁྲོ་བོའི་རྡོ་རྗེས་མཚན་པས་ཡོངས་སུ་བསྐོར་བའོ། །བདུད་རྩི་དང་བཅས་པའི་ས་ནག་པོ་དང་རོ་བསྲེགས་པའི་ཐལ་བ་དང༌། བོང་བུ་དང་རྔ་མོ་ལ་སོགས་པའི་སྤངས་གང་རྙེད་པས་བྱུགས་ཏེ། དྲི་ངན་པའམ་དྲི་མེད་པའི་མེ་ཏོག་སྔོན་པོའམ་དམར་པོ་དག་དང་འབྲུའི་ཕུབ་མ་ལ་སོགས་པ་གཏོར་ལ། འབར་བ་འཁྲུག་པ་འཇིགས་སུ་རུང་བ། མིའི་ཞུན་ལ་སོགས་པའི་མར་མེ་དང་ལྡན་པར་བྱའོ། །ལས་ཐམས་ཅད་པའི་ཐབ་
ཁུང་ནི། ལས་དང་རྗེས་སུ་མཐུན་པའི་ས་གཞི་ལ། ཞི་བའི་ཐབ་ཁུང་དང་མཚུངས་པ་སྟེ། འོན་ཀྱང་ཆུར་གེ་སར་དང་བཅས་པའི་ཟེའུ་འབྲུ་དང་ཁ་ཁྱེར་ལ་པདྨའི་འདབ་མ་རྣམས་སོ། །དེ་བས་ན་རབ་ཏུ་རྒྱས་པའི་པདྨའི་རྣམ་པ་ཕྱི་རོལ་གྱི་ཕྱོགས་དང་ཕྱོགས་བྲལ་དུ་རྡོ་རྗེས་མཚན་པའམ། སྣ་ཚོགས་རྡོ་རྗེའམ། རལ་གྲིས་མཚན་པའི་ཁ་ཁྱེར་གྱིས་བསྐོར་བ་དབུས་སུ་རྡོ་རྗེ་ཕྲེང་བས་བསྐོར་བའི་འདབ་མ་ལ་གནས་པའི་འདབ་མའི་ཚད་ཀྱིས་དེ་བཞིན་གཤེགས་པ་བཞིའི་མཚན་མའི་ནང་དུ་རྒྱ་དང་དཔངས་སུ་སོར་བརྒྱད་དང་སོར་གཅིག་པའི་རང་རང་གི་མཚན་མ་དང་ཡང་དག་པར་ལྡན་པའོ། །མཚན་མ་ཡང་རྣམ་པར་སྣང་མཛད་ཀྱི་འཁོར་ལོའམ། དེ་ཁོ་ན་ཉིད་བསྡུས་པར་གསུངས་པའི་རྡོ་རྗེའོ། །རིན་ཆེན་འབྱུང་ལྡན་གྱི་རིན་པོ་ཆེའོ། །འོད་དཔག་ཏུ་མེད་པའི་པདྨའོ། །མི་བསྐྱོད་པའི་ཁྲོ་བོའི་རྡོ་རྗེའོ། །དོན་ཡོད་གྲུབ་པའི་རལ་གྲི་འམ་སྣ་ཚོགས་རྡོ་རྗེའོ། །ཁ་ཅིག་ནི་ཕྱོགས་ཀྱི་རྡོ་རྗེ་དང་བྲལ་བར་ཁོར་ཡུག་ཏུ་ཕྱི་རོལ་རྡོ་རྗེའི་ཕྲེང་བས་ཀུན་ནས་བསྐོར་བའི་ཁ་ཁྱེར་ཏེ། ཐབ་ཀྱི་དབུས་སུ་རྡོ་རྗེའི་ཕྲེང་བ་མེད་དོ་ཞེས་ཟེར་རོ། །གཞན་ཡང་འདི་ལ་ཕྱོགས་གཞན་ནི་ཐབ་ཁུང་ཐམས་ཅད་ཀྱི་དབུས་ཀྱི་ཆ་རྣམས་ལ་པདྨ་ལ་གནས་པའི་རང་གི་འདོད་པའི་ལྷའི་མཚན་མས་བརྒྱན་པའོ། །དེ་ཡང་གཙོ་བོའི་མཚན་མ་ནི་སྲིད་དང་དབངས་སུ་སོར་བརྒྱད་དང་གཅིག་གི་ཚད་རྣམས་ཏེ་ཅིག་ཤོས་ཀྱི་ནི་སོར་དྲུག་པའོ། །ཞེས་སོ། །འདི་དང་སྔར་བརྗོད་པའི་ཕྱོགས་ལ་ཁྱད་པར་མ་སྨོས་པ་ལ་ཁ་ཁྱེར་ལ་གཙོ་བོའི་མཚན་མའི་ཕྲེང་བའོ། །དཀྱིལ་འཁོར་གྱི་ཁང་པ་ལ་སོགས་པའི་ཤར་གྱི་ཕྱོགས་སུ་ཞི་བའི་ཐབ་ཁུང་ངོ༌། །ལྷོར་རྒྱས་པའིའོ། །ནུབ་ཏུ་དབང་དང་དབང་གི་ས་དགུག་པའི་ཐབ་ཁུང་ངོ༌། །བྱང་དུ་མངོན་སྤྱོད་ཀྱི་ཐབ་ཁུང་ངོ༌། །དྲག་པོས་དགུག་པའི་ཡང་ངོ༌། །ཕྱོགས་གཞན་ཡང་དཔལ་སམྦུ་ཊཱི་རྒྱུད་ལས། ཤར་གྱི་ཕྱོགས་སུ་ཞི་བའོ། །དེ་བཞིན་ལྷོར་ནི་མངོན་སྤྱོད་དང༌། །ནུབ་ཏུ་དབང་དང་དགུག་པ་དང༌། །བྱང་དུ་རྒྱས་པའི་ཐབ་ཁུང་ངོ༌། །ཞེས་གསུངས་སོ། །ཡང་ན་ལས་དང་རྗེས་སུ་མཐུན་པའི་ཐབ་ཚོན་གྱིས་བྲི་བར་བྱའོ། །འདི་ནི་ཐབ་ཁུང་གི་རབ་ཏུ་བྱེད་པའོ། །པ་ལ་ཤ་དང་ཨུ་དུ་མྺཱ་ར་དང༌། ཨ་ཤྭཏྠ་དང༌། ཀཤྨ་རི་དང༌། ཨ་མྲ་དང༌། ཀ་དམྦ་དང༌། ཤ་མཱི་དང༌། བླཀྵ་དང༌། པ་ཊ་ལ་སོགས་པའི་ཤིང་ལོ་མ་ཅན་གྱི་རྩེ་མོའི་ཆ་ལས་སྐྱེས་པའོ། །
ལོ་མ་གཉིས་དང་ལྡན་པ། རླན་དང་བཅས་པ། མཉམ་པར་བཅད་པ་སོར་བཅུ་གཉིས་པ། མཐེའུ་ཆུང་ཙམ་དུ་སྦོམ་པ། རྩེ་མོ་གཉིས་སྦྲང་རྩི་དང་འོ་མ་དང་མར་དུ་བསྙུགས་པ་བདུད་རྩི་དང་དེའི་ཆུས་བྲན་པ་རྩེ་མོ་ལ་ལོ་མ་ཟུང་དང་བཅས་པའི་ཡམ་ཤིང་རྣམས་སྲིན་ལག་དང་མཐེ་བོང་གིས་བཟུང་སྟེ་རྩེ་མོ་གཅིག་སྤྱིན་སྲེག་བྱའོ། །ཀུ་ཤའི་དང་ཨ་མྲའི་ལོ་མ་དང༌། དཱུར་ཝ་སྟེ་འདི་རྣམས་ཀྱང་རྩེ་མོ་དང་བཅས་པ་གཉིས་སྦྱར་བས་སོ། །རྙིང་ལྕི་ཕྲ་དང་ཀྱོག་པ་དང༌། རིང་ཐུང་ལོ་མ་མེད་པ་དང༌། སྲོག་ཆགས་ཀྱིས་ཟོས་བྲུལ་བ་དང༌། ཤུན་བྲལ་ཆག་དང་བུ་ག་ཅན། །རྩེ་མོ་གཉིས་ལྡན་སྦོམ་པ་སྤང༌། །རྙིང་པ་ཡི་ནི་འཆི་བར་འགྱུར། །ཀྱོག་བས་སྐལ་བ་ངན་པར་འགྱུར། །རིང་ཐུང་རིག་པས་འཕྲལ་དུ་ཉམས། །ལོ་མ་མེད་པས་ན་ཚ་འབྱུང༌། །སྦོམ་པོས་ཕུན་སུམ་ཚོགས་པ་ཉམས། །སྐམ་པོས་གཞན་ཡང་མི་འདོད་པར། །ཤེས་བྱ་བསྲེག་བྱ་གཞན་བཤད་བྱ། །འབྲུ་མར་གྱིས་བྱུགས་ཀུ་ཤ་དང༌། །ཏི་ལ་ཞོའོ་མ་སཱ་ལུའི་ཟན། །དཱུར་བ་ཙནྡན་པྲི་ཡང་ཀུ། །ཐང་ཆུ་དྲི་ཞི་མ་མེ་ཏོག་དང༌། །འབྲས་ཡོས་ཨ་མྲའི་འདབ་མ་རྣམས། །རྩེ་གཉིས་སྦྲང་རྩི་སོགས་སུ་བསྙུགས། །ཇི་ལྟར་རྙེད་པས་སྦྱིན་སྲེག་བྱ། །ནང་གི་བདུད་རྩི་ཞི་བའིའོ། །ཁ་ཅིག་ཏུ་ནི་ཕྱི་རོལ་གྱི་བདུད་རྩི་ལྔའོ་ཞེས་སོ། །རྒྱས་པ་ལ་ཡང་མམ་ཤིང་ནི་དེ་རྣམས་ཉིད་དེ་དབུས་ཀྱི་ཆ་ལ་སྐྱེས་པ་ཆང་པའི་ཚད་སྲིད་དུ་ཁྲུ་གང་བ་བདུད་རྩི་དང་བཅས་པའི་དྲི་སེར་པོའི་ཆུས་བྲན་པ་ཞོ་དང་འོ་མ་དང་མར་དུ་བསྐུགས་པ་དང༌། མངར་གསུམ་དང་འདྲེས་པའི་ཟས་མཆོག་ཞོ་དང་སྦྲང་རྩི་དང་ཞུན་མར་དང་ལྡན་པ་དང་ཏིལ་ནག་པོ་དང་ཞོ་ཟན་དང༌། ཞུན་མར་དང་བཅས་པའི་ཤ་ཏ་པུཥྤ་དང༌། བིལ་པའི་འབྲས་བུ་དང༌། འབྲས་སཱ་ལུ་དང༌། པདྨ་དང༌། ནཱ་ག་གེ་སར་དང༌། ཀཱརྣི་ཀཱ་ར་དང་འབྲུ་རྣམས་སོ། །ཞིར་བཤད་སྐྱོན་མེད་ཡོན་ཏན་ཅན། །སོ་སོར་འདབ་ལྡན་པྲི་ཡང་ཀུ། །ཙམ་པ་ཀ་དང་པཱུ་ནཱ་ག །ཀླུ་ཤིང་གེ་སར་ལ་བུ་ཙ། །ཀ་ཤོ་ཀ་རྣམས་ཡམ་ཤིང་སྟེ། །དེ་བཞིན་ནགས་ལས་བྱུང་བ་དང༌། །འབྲས་བུ་མེ་ཏོག་སྐྱུར་བ་དང༌། དམར་པོ་ཡང་ན་གཞན་ཡང་ནི། །རང་གི་རྟོག་པ་ལས་གསུངས་པ། །དབང་གི་ལས་ལ་ཤེས་པར་བྱ། །དེ་རྣམས་ཉིད་ནི་ལྕགས་ཀྱུ་ལྟའི། །ཚེར་མ་ཅན་རྣམས་སྔ་མ་བཞིན། །དབང་གིས་དགུག་པ་ལའོ། །མངོན་སྤྱོད་ལ་ནི་ནིམ་པ་དང༌། །སེང་
ལྡེང་ཀུ་བི་དཱ་ར་དང༌། །བྷི་ལོ་ཊ་ཀ་དང་མྱོས་བྱེད་རྣམས་སམ། །གཞན་ཡང་ཚ་བ་དང་ཚེར་མ་ཅན་དང༌། ཁ་བའི་ཤིང་རྣམས་སམ། །རོ་བསྲེགས་པའི་མགལ་དུམ་དེ་རྩ་བའི་ཚ་ལས་བྱུང་བ། བཀས་པ་སོར་བཅུ་པའི་རྩེ་མོ་གཉིས་རྣོ་བ་ལ་དུག་དང་ཁྲག་དང་ཡུངས་ཀར་གྱིས་བསྐུས་པའི་ཡམ་ཤིང་རྣམས་སོ། །ཡུངས་ཀར་དང་ཚ་བ་དང་ཏིལ་མར་དང་ཁྲག་དང་ལན་ཚྭ་དང་སྐེ་ཚེ་དང་ནིམ་པའི་ལོ་མ་དང༌། རོ་བསྲེགས་པའི་ཐལ་བ་དང༌། རྐང་པའི་རྡུལ་དང༌། བོང་བུ་དང༌། རྔ་མོ་ལ་སོགས་པའི་སྤངས་དང༌། སྐྲ་དང་ཁྱིམ་བྱའི་ཚིལ་དང༌། ཁྭ་ཏ་ལ་སོགས་བའི་གཤོག་པ་དང༌། བཤང་གཅི་དང་ཚེར་མ་དང་རུས་ཕྱེ་དང་གླང་པོ་ཆེའི་ཤ་ལ་སོགས་པ་ལས་ཅི་ལྟར་རྙེད་པའམ། རྫས་རེ་རེ་ལ་དུག་དང་ལན་ཚྭ་དང་ཁྲག་དང་བསྲེས་པའམ་རྫས་དེ་རྣམས་ཀྱིས་སམ། ཐལ་བ་དང་སོལ་པ་དང་ཕུབ་མ་ལ་སོགས་པ་རྣམས་ལ་དགྲའི་གཟུགས་བྱས་ལ། དུག་ལ་སོགས་པས་བསྐུས་ཏེ་རྐང་པ་གཡོན་པའི་མཐེའུ་ཆུང་ནས་བརྩམས་ཏེ་མཚོན་རྣོན་པོས་བཅད་ཅིང་སྦྱིན་སྲེག་བྱའོ། །དྲག་པོའི་དགུག་པ་ལ་ནི་གཟུགས་མི་བྱའོ། །ལས་ཐམས་ཅད་པ་ལ་ནི་བཱ་ལ་ཤ་དང༌། ཨུ་དུམྺཱ་ར་དང༌། པླཀྵ་དང༌། སེང་ལྡེང་དང༌། ཨརྐ་དང༌། ནྱ་གྲོ་དྷ་དང༌། བཻ་ཀཾ་ཀ་ཏ་དང༌། ཨ་མྲ་དང༌། ཤ་མི་དང༌། ཀཱ་ཤྨ་རི་དང༌། ཨ་བ་མཱརྒ་དང༌། ཨ་ཤྭཏྠ་ལས་སྐྱེས་པ་མངོན་པར་གསར་ཞིང་མཛུབ་གང་བ་དྲང་པོ་བདུད་རྩི་དང་བཅས་པའི་དྲི་བཟང་གི་ཆུས་བྱུགས་པ། ལས་དང་རྗེས་སུ་མཐུན་པའི་སྣུམ་ལ་སོགས་པ་རྩེ་མོ་གཉིས་ལ་བྱུགས་པའི་ཡམ་ཤིང་རྣམས་སོ། །ལས་ཐམས་ཅད་ལ་ཞི་བ་ལ་སོགས་པའི་ལས་ལ་གསུངས་པའི་ནས་དང་འོ་མ་ལ་སོགས་པ་རྣམས་ཀྱང་བསྲེག་པར་བྱའོ། །ཞི་བ་དང་རྒྱས་པའི་རྫས་གང་ཅུང་ཟད་དང༌། གང་ཡང་བདག་ཉིད་ཀྱི་ཁ་ཟས་དེ་ཐམས་ཅད་དང༌། མར་གྱིས་བྱུགས་པའི་གུ་གུལ་ལམ་སཱ་ལའི་ཐང་ཆུ་ཡང་ཉིན་རེ་བཞིན་ཞི་བ་ལ་སོགས་པའི་སྔགས་ཐ་དད་པས་སྦྱིན་སྲེག་བྱའོ། །དྲི་དང་མེ་ཏོག་ལ་སོགས་པ་ཉེ་བར་སྤྱོད་པ་རྣམས་ལ་ཡང་ལས་དང་རྗེས་སུ་མཐུན་པའི་རང་རང་གི་སྔགས་ཇི་ལྟ་བ་བཞིན་བཟླས་པར་བྱའོ། །དེ་ལྟར་ཡང༌། ཨརྐ་སེང་ལྡེང་བཻ་ཀཱཾ་ཀ །ཨ་རྫུན་ཨ་པཱ་མརྒ་སོགས། །ཞིར་གསུངས་ཀ་ཏཾ་པ་དོར་ཏེ། །ཅི་ལྟར་དྲང་དང་ཅིག་ཤོས་འདོད། །ཡམ་ཤིང་ཞི་བཞིན་ཡང་དག་གཞན། །ཐུན་མོང་གི་ནི་ཆོ་ག་ལས། །ཞེས་གསུངས་སོ། །རྫས་
ཀྱི་རབ་ཏུ་བྱེད་པའོ། །བུད་ཤིང་ནི་ཞི་བ་ལ་མཆོད་སྤྱིན་གྱི་ཤིང་རྣམས་ལས། སྲོག་ཆགས་མེད་པ་ཐབ་ཁུང་བས་ཅུང་ཟད་ཀྱིས་ཐུང་བའམ་འབྲོག་དགོན་པའི་བ་ལང་གི་ལྕི་བའོ། །རྒྱས་པ་ལ་ནི་འབྲོག་དགོན་པའི་བ་ལང་གི་ལྕི་བ་མ་གཏོགས་པའི་ཅི་སྙེད་བཤད་པ་བུད་ཤིང་འབྲས་བུ་དང་བཅས་པའོ། །དབང་དུ་བྱ་བའི་བུད་ཤིང་ནི་ནིམ་པ་དང་ཤིང་སྐྱུར་བ་དང་གཞན་ཡང་མེ་ཏོག་དང་བཅས་པའོ། །དགུག་པ་ལ་ནི་ཚེར་མ་དང་བཅས་པའོ། །མངོན་སྤྱོད་ལ་ནི་ཚ་བ་དང་ཚེར་མ་ཅན་དང་ཁ་བ་དང་དྲི་ངན་པ་དང་དྲི་མ་མེད་པའི་ཤིང་རྣམས་དང༌། དུར་ཁྲོད་ཀྱི་ཤིང་ངམ་བོང་བུ་འམ་རྔ་མོ་ལ་སོགས་པའི་སྦངས་དང་ཤིང་ཤུན་སྐམ་པོས་སོ། །ལས་ཐམས་ཅད་པའི་བུད་ཤིང་ནི་ལས་དང་རྗེས་སུ་མཐུན་པས་སོ། །བུད་ཤིང་གི་རབ་ཏུ་བྱེད་པའོ། །དགང་གཟར་ནི་གསེར་རམ་ཟངས་ལས་བྱས་པ་འམ། །མཆོད་སྦྱིན་གྱི་ཤིང་ལས་བྱས་པ་སྟེ། དེའི་ཡུ་བ་ནི་སྐྱེས་བུ་ཚད་དང་ལྡན་པའི་མཐེ་བོང་གི་སོར་ཉི་ཤུ་རྩ་བཞི་པ་ལ་རྡོ་རྗེ་ལ་སོགས་པ་དང་བཅས་པའི་ཁུ་ཚུར་གྱིས་གཟུང་དུ་རུང་བའོ། །ཡུ་བ་ལས་སྟེང་དུ་རྒྱར་སོར་བཞི་གྲུ་བཞི་པ་ཟབས་སུ་སོར་གཉིས་ཀྱིས་དམའ་བ་ལ་རྡོ་རྗེ་རྩེ་ལྔ་པ་སོར་གཉིས་པས་མཚན་པ། གྲུ་བཞི་པའི་སྟེང་གི་རྒྱ་ལ་སོར་ཕྱེད་ལ་རྡོ་རྗེའི་ཕྲེང་བའོ། །གྲུ་བཞི་པའི་སྟེང་དུ་པདྨའི་འདབ་མའི་དབྱིབས་ཅན་སོར་བཞི་པ་ཟབས་སུ་མཐེའུ་ཆུང་གི་ཚད་ལ་སོར་བཞི་པའི་རྡོ་རྗེས་མཚན་པའོ། །ཡང་ན་ཡུ་བའི་སྟེང་གི་ཆར་པདྨའི་འདབ་མའི་རྣམ་པ་སྲིད་དུ་སོར་བརྒྱད་པའི་ཚད་དང་ལྡན་པ་ཇི་ལྟར་མཛེས་པ་ལ་རྒྱར་གྲུ་བཞི་སོར་བཞི་པ་ཟབས་སུ་སོར་གཉིས་ཀྱིས་དམའ་བའི་དབུས་སུ་རྡོ་རྗེ་སོར་བཞི་པ་རྩེ་གསུམ་པའམ། རྩེ་ལྔ་པས་མཚན་པའོ། །སྲིད་དུ་བཅུད་འཛག་བའི་བུ་ག་མཐེ་བོང་ངམ། ཡང་ན་མཐེའུ་ཆུང་གི་ཚད་དེ་དེའི་སྟེང་དུ་རྡོ་རྗེ་རྩེ་གསུམ་པ་སོར་བཞི་པའོ། །ཡུ་བ་ལས་འོག་ཏུ་རིན་པོ་ཆེ་སོར་གསུམ་པ་དང༌། དེའི་འོག་ཏུ་སོར་གསུམ་པའི་རྡོ་རྗེ་ནི་འདོད་པ་གཉིས་ཀ་ལ་སྟེ། བླུགས་གཟར་གྱི་ཡུ་བའི་འོག་ཏུ་འང་དེ་བཞིན་ནོ། །བླུགས་གཟར་ཀྱང་སྔར་སྨོས་པའི་རྫས་སམ་ཤིང་ལས་བྱས་པ་སྟེ། དགང་གཟར་གྱི་ཡུ་བའི་ཕྱེད་ཀྱིས་ཕྲ་བ་ཁྲུ་གང་བའི་ཡུ་བ་སྟེ། འདིའི་ཁ་པདྨའི་འདབ་མ་ལྟ་བུ་རྒྱར་སོར་གཉིས་པ་ཟབས་སུ་སོར་གཅིག་པ་དབུས་སུ་རྡོ་རྗེ་རྩེ་ལྔ་པས་མཚན་པའོ། །ཡུ་བའི་འོག་ཏུ་རྡོ་རྗེ་དང་རིན་པོ་ཆེས་ཅི་ལྟར་མཛེས་པར་བྱའོ། །དགང་གཟར་བླུགས་གཟར་མེད་ན་
སོར་མོ་ལྔ་ཡང་དག་པར་སྦྱར་བས་ཀྱང་དགང་བླུགས་དབུལ་ཞིང༌། སོར་མོ་གསུམ་སྦྱར་བས་ནི་ཅིག་ཤོས་སྲེག་བླུགས་སོ། དེ་སྐད་དུ་ཡང༌། ཡང་ན་སོར་ལྔ་ཡང་དག་པར། །སྦྱར་བས་དགང་བླུགས་དྲན་བྱ་སྟེ། །དེ་ལྟར་སོར་མོ་གསུམ་སྦྱར་བས། །གཞན་དེ་དགང་གཟར་བླུགས་གཟར་རོ། །ཞེས་གསུངས་སོ། །པི་པ་ལ་ལའི་ལོ་མས་ཀྱང་སྲེག་བླུགས་གཉིས་བྱའོ་ཞེས་གསུངས་སོ། །བླུགས་གཟར་མེད་ན་ཅིག་ཤོས་ཀྱི་སྲེག་བླུགས་ཀྱང་དགང་གཟར་གྱིས་བྱའོ། །དགང་གཟར་བླུགས་གཟར་གྱི་རབ་ཏུ་བྱེད་པའོ། །དེ་ནས་སྒྲུབ་པ་པོས་བྱམས་པ་དང་སྙིང་རྗེ་དང་ལྡན་པས་ཁྲུས་བྱ་ཞིང་ལུས་དྲི་ཞིམ་པོས་བྱུགས་ལ་གོས་དཀར་པོ་གོན་ཏེ། ལས་དང་རྗེས་སུ་མཐུན་པར་འདོད་པའི་ལྷའི་རྣལ་འབྱོར་གྱིས་སྲུང་བའི་ཆོ་ག་དང་བཟླས་པ་བྱ་ཞིང་མི་སྨྲ་བར་འཇམ་ཞིང་ཤིན་ཏུ་བདེ་བའི་སྟན་ལ་པདྨའི་འདུག་སྟངས་ཀྱིས་འདུག་ལ་སྲོད་ལ་ཁ་ཤར་དུ་བལྟས་ལ་བློས་བསྒྲུབ་བྱ་ལ་དམིགས་ནས་དཀར་པོའི་ཚེས་གཅིག་ནས་བརྩམས་ཏེ་ཞི་བའི་ཡིད་ཀྱིས་ཞི་བའི་ལས་བྱའོ། །དེ་བཞིན་དུ་རྒྱན་དང་རྗེས་སུ་བྱུག་པ་དང༌། ཕྲེང་བསེར་པོ་དང་མཐོ་ཞིང་བདེ་བའི་སྟན་ལ་འདུག་སྟེ། གོས་སྣ་ཚོགས་པ་གོན་ལ། བཟང་པོའི་འདུག་སྟངས་ཀྱིས་འདུག་ལ་དགའ་བའི་ཡིད་ཀྱིས་ཁ་བྱང་དུ་བལྟས་ཏེ་ཉ་ནས་བརྩམས་ནས་སྔ་དྲོ་རྒྱས་པ་བྱའོ། །ཆགས་པའི་སེམས་ཀྱིས་རྒྱན་དམར་པོ་ལ་སོགས་པས་བཀླུབས་ལ་ཁ་ནུབ་ཕྱོགས་སུ་བལྟ་ཞིང༌། མཐོ་ཞིང་བདེ་བའི་སྟན་ལ་འདུག་སྟེ། མཚན་ཕྱེད་དམ་གཞན་དུ་དབང་གི་ལས་བྱའོ། །དགང་གི་དགུག་པ་ལ་ཡང་དེ་བཞིན་ཏེ་འོན་ཀྱང་ཁ་གྱེན་དུ་བལྟའོ། །ལྷ་མཉེས་པར་བྱ་བ་ལ་ཡང་ཁ་ནུབ་ཏུ་ཕྱོགས་པར་བྱའོ། །ཁྲོས་ཤིང་རྒྱན་དང་གོས་སྔོན་པོའམ་ཁྲག་གམ་ཆུས་གཤེར་བའི་གོས་གོན་ཏེ། སྟན་སྲབ་པ་ལ་ལྷོ་ཕྱོགས་སུ་བལྟས་ཏེ་འདུག་པ་འམ། བསྒྲུབ་བྱའི་གཟུགས་བརྙན་གྱི་བྲང་ལ་གནས་པའམ། སྟན་མེད་པར་ཙོག་པུར་གནས་ཏེ་རྐང་པས་རྐང་པ་མནན། སོ་ཡིས་སོ་འཆའ་ཞིང་མིག་གདོང་ཚུགས་སུ་བལྟ་ཞིང་ཁྲོ་གཉེར་ཅན་སྙིང་རྗེ་ཆེན་པོ་དང་ལྡན་པས། དཀོན་མཆོག་གསུམ་ལ་གནོད་པ་བཟློག་པའི་དོན་དུ་ནག་པོའི་ཉིན་ཞག་ཡང་རུང་བའི་ཉིན་ཕྱེད་དང་མཚན་ཕྱེད་ལ་ཁྲོ་བོའི་སྐྱིལ་ཀྲུང་དང་ཁྲོ་བོའི་རྣལ་འབྱོར་གྱིས་གང་གི་ཚེ་བསྒྲུབ་བྱའི་སྙིང་གའི་པདྨའི་ནང་ན་གནས་པའི་བསྲུང་བ་དེ་རང་གི་ཧཱུཾ་ཡིག་ལས་སྐྱེས་པའི་རྡོ་རྗེའི་ལྕགས་
ཀྱུས་བཅད་དེ་ཕྱིར་བཏོན་ནས་རང་ཉིད་ལ་བསྟིམ་པའམ། །རང་གི་ཤེས་རབ་ཀྱི་པདྨར་རང་གི་རྡོ་རྗེའི་ཕུར་པས་ཡང་དག་པར་བཏབ་ནས། བསྒྲུབ་བྱ་ཡང་ལྷ་ཐམས་ཅད་ཀྱིས་སྤངས་པར་བསམས་ཏེ། དེ་ཡང་སྡིག་པ་ལས་བཟློག་པར་འདོད་པའི་བརྩེ་བས་སངས་རྒྱས་ཀྱི་ཞིང་ཡོངས་སུ་དག་པའམ། གཞན་ཡང་ཕན་པ་དང་བདེ་བ་ལ་སྤྲོ་བ་བཟང་པོའི་རིགས་སུ་སྐྱེ་བར་བྱས་པ་དེའི་ཚེ་མངོན་པར་སྤྱོད་པ་བྱའོ། དེ་བཞིན་དུ། དྲག་པོས་དགུག་པ་ལ་ཡང་ངོ༌། །རེངས་དང་རྨོངས་དང་དབང་ལྡན་ལྟ། །དེ་བཞིན་རྡོ་རྗེ་སྐྱིལ་ཀྲུང་སྟེ། བཽཥྚ་སྔགས་ཀྱི་མཐར་ལྡན་པས། །ཐབ་ཁུང་གྲུ་བཞིར་བྱས་པ་ལ། །སེར་དང་དཀར་པོའི་རྒྱན་གྱིས་སྤྲས། །རྒྱས་མཚུངས་ཆོ་གས་ཡང་དག་གནས། །བསྐྲད་ལ་དེ་བཞིན་མེར་ཕྱོགས་པས། །རྔ་མོ་ལ་སོགས་སྦངས་ཀྱིས་བྱུགས། །དཀར་ནག་གིས་བརྒྱན་དུག་གིས་བྲི། །བསྲེག་པའི་རྫས་ནི་འདི་ཡིན་ཏེ། །ཁྭ་ཏ་ལ་སོགས་གཤོག་པ་མཆོག །སྤེལ་ཚིག་དང་ནི་ཡང་དག་ལྡན། །འདིར་ནི་ཁྭ་ཏའི་གཤོག་པ་ལ་སོགས་པའི་མཐར་ཆེ་གེ་མོ་ཨུཙྪ་ཏ་ཡ་ཧཱུཾ་ཕཊ། ཅེས་པའི་སྔགས་བྲིས་པ་དང་ལྡན་པའོ། །དབྱེ་བ་དེ་ལྟར་བདེན་བྲལ་དུ། །ཕྱོགས་ཏེ་རྐང་པ་བཟློག་པས་འདུག །སེར་པོ་ནག་པོས་རྣམ་པར་བརྒྱན། །ཚ་བའི་ཏིལ་མར་དུག་གིས་བྲི། །ཐམས་ཅད་ཕྱོགས་དང་ཕྱོགས་བྲལ་གང་དུ་ཕྱོགས་པ་དེའི་ཐད་ཀའི་ཕྱོགས་དང་ཕྱོགས་བྲལ་གཞན་རྣམས་སུ་གནས་པས་སོ། །ཡང་ན་དོན་དམ་པར་ཕྱོགས་རང་རྒྱུད་པ་མ་ཡིན་པའི་ཕྱིར། ཇི་ལྟར་རྣམ་པར་གནས་པ་ཁོ་ནས་ཆེན་པོ་ཡིད་ཀྱི་ང་རྒྱལ་གྱིས་ཏིང་ངེ་འཛིན་དུ་ཞུགས་པས་དེ་ཁོ་ན་ལྟར་དེ་དག་ཐམས་ཅད་བྱའོ། །སྒྲུབ་པ་པོའི་རབ་ཏུ་བྱེད་པའོ། །གསེར་དངུལ་རྡོ་དང་ཟངས་དང་ཤིང༌། །ས་སྣོད་ཉ་ཕྱིས་དུང་དང་ནི། །འདབ་མའི་སྐྱོར་བུ་མཆོད་ཡོན་དང༌། །བསང་གཏོར་ཞལ་བསིལ་ཞབས་བསིལ་སྣོད། །དེར་ནས་དང་འོ་མ་དང་མེ་ཏོག་དཀར་པོ་དང་ཏིལ་དང་ཀུ་ཤ་དང་འབྲས་ཡོས་དང་ལྡན་པ་བདུད་རྩི་དང་བཅས་པའི་དྲི་དཀར་པོའི་ཆུ་རྣམ་པར་རྒྱལ་བའི་བུམ་པ་ན་གནས་པ་བླུགས་ལ་སྤོས་ཀྱིས་བདུག་སྟེ། རང་གི་ལྷའི་སྔགས་སམ་ལས་ཐམས་ཅད་པའི་སྔགས་ཀྱི་མཐར་སྭཱ་ཧཱ་དང་བཅས་པ་ཞི་བའི་དོན་ལན་བརྒྱར་བཟླས་པར་བྱའོ། །རྒྱས་པ་ལ་ནི་དེ་བཞིན་དུ་ཏིལ་དང་བཅས་པའི་ཞོ་དང་མེ་ཏོག་སེར་པོ་དང་དྲི་སེར་པོ་ལ་སོགས་པའི་ཆུ་ལ་ཡི་གེ་ཨོཾ་གྱི་མཐའ་ཅན་གྱིས་སོ། །དབང་
ལ་ནི་དྲི་དམར་པོ་ལ་སོགས་པའི་ཆུ་ལ་ཡི་གེ་ཧོཿའི་མཐའ་ཅན་གྱིས་སོ། །དེ་ཁོ་ན་བཞིན་དུ་དགུག་པ་ལ་མཐར་ཡི་གེ་ཛཿ་ཞེས་པས་སོ། མངོན་སྤྱོད་ལ་ལོངས་སྤྱོད་པའི་རྫ་ཕོར་གྱི་དུམ་བུ་ལ་སོགས་པའི་སྣོད་དུ་ཁྲག་དང་བཅས་པའི་ཀོ་དྲ་བ་དང་བའི་ལྕི་བ་དང་བཅས་པའི་ཆུ་དང་དྲིང་བ་དང༌། དྲི་མེད་པའི་མེ་ཏོག་ནག་པོ་ལ་སོགས་པ་དང་ལྡན་པའི་ཆུ་ལ་མཐར་ཡི་གེ་ཕཊ་ཅེས་པས་སོ། །དེ་ལྟར་དྲག་པོས་དགུག་པ་ལ་ཡང་ངོ༌། །རྒྱས་པ་ལ་སོགས་པ་ཐམས་ཅད་དུ་ལས་ཐམས་ཅད་པ་ལ་དྲི་དང༌། མེ་ཏོག་དང་ཏིལ་དང་ཀུ་ཤ་དང་འབྲས་ཡོས་དང་ཆུ་རྣམས་ལས་དང་རྗེས་སུ་མཐུན་པ་ཅི་ལྟར་རྙེད་པ་གཞུག་པར་བྱའོ། །མཆོད་ཡོན་གྱི་རབ་ཏུ་བྱེད་པའོ། །ཞི་བ་དང༌། རྒྱས་པ་དང༌། དབང་གིས་དགུག་པའི་ལས་རྣམས་ལ་བདུད་རྩི་འཁྱིལ་པའི་སྔགས་དང་ཡི་གེ་ཧཱུཾ་བཟླས་པའི་ཆུ་སྣོད་དང༌། མཆོད་ཡོན་ལ་སོགས་པའི་སྣོད་གསུམ་ཡང་རང་གི་གཡོན་དུའོ། །དེ་དག་གི་མདུན་དུ་བཟེད་ཞལ་གྱི་སྣོད་གསུམ་ཡང་མཉྗི་ལ་སོགས་པའི་སྟེང་དུ་བཀོད་ལ། དེ་ཉིད་བཟླས་པའི་ཆུ་ལག་པ་གཡས་པ་ན་གནས་པའི་ཀུ་ཤའི་རྩེ་མོས་བླངས་པས་ཡམ་ཤིང་དང་བུད་ཤིང་ལ་སོགས་པའི་སྲེག་རྫས་ཐམས་ཅད་བསང་ཞིང་རང་གི་གཡས་ཕྱོགས་སུ་དགོད་པར་བྱའོ། །རང་དང་དགང་གཟར་བླུགས་གཟར་ཡང་བསང་བར་བྱའོ། །རྣམ་པར་རྒྱལ་བ་དང་ལས་ཐམས་ཅད་པའི་བུམ་པ་ལ་སོགས་པ་ལྷག་པར་གནས་པ་ནི་རྡོ་རྗེ་ཕྲེང་བར་བརྗོད་པའི་ཆོགས་བྱའོ། །ཆོ་ག་བསྡུས་པ་ལ་དགའ་བ་ནི་བུམ་པ་མེད་དོ་ཞེས་ཁ་ཅིག་གོ །གསད་པ་དང་བསྐྲད་པ་ལ་སོགས་པའི་ལས་དང་དྲག་པོའི་དགུག་པ་ལ་ཡང་ལག་པ་གཡོན་གྱིས་བསང་གཏོར་བྱའོ། །གཡས་ཕྱོགས་སུ་ལས་ཐམས་ཅད་པ་དང་བསང་གཏོར་ལ་སོགས་པའི་སྣོད་དང་གཡོན་ལོགས་སུ་རྫས་ཐམས་ཅད་གཞག་པར་བྱའོ། །དགོད་པའི་རབ་ཏུ་བྱེད་པའོ། །ཞི་བ་ལ་ནི་ཤིང་འོ་མ་ཅན་དང་གཙུབ་ཤིང་ལས་བྱུང་བའི་མེ་དང༌། དགོན་པའི་མེ་དང་སྦྱིན་སྲེག་གི་མེ་ཡང་རུང་ངོ༌། །རྒྱས་པ་ལ་ནི་རྒྱལ་པོའམ། རྒྱལ་རིགས་ཀྱི་ཁྱིམ་ནས་བྱུང་བ་དང༌། ནགས་མེས་ཚིག་པ་དང༌། ནོར་བུ་ལས་བྱུང་བ་དང༌། དགེ་འདུན་གྱི་ཚོང་བོང་ལས་བླངས་པའི་མེས་སོ། །དབང་ལ་ནི་སྨད་འཚོང་མ་དང༌། རྗེའུ་རིགས་ཀྱི་ཁང་པ་ལས་བྱུང་བའི་མེས་སོ། །དབང་གི་དགུག་པ་ལ་གར་མཁན་དང་མགྲོན་པོས་
བུས་པའི་མེས་སོ། །དྲག་པོ་ལ་མིའི་རུས་པ་བསྲེགས་པ་དང་རྡོ་དང་གདོལ་པ་ལ་སོགས་པའི་ཁྱིམ་ནས་བྱུང་བའི་མེས་སོ། །དྲག་པོས་དགུག་པ་ལ་ཡང་མེ་དེ་དག་གཟུང་ངོ༌། །ལས་ཐམས་ཅད་ལ་ཡང་རང་རང་གི་ཅི་ལྟ་བ་བཞིན་ནོ། །མེའི་རབ་ཏུ་བྱེད་པའོ། །རྡོ་རྗེ་ཕྲེང་བར་བརྗོད་པའི་ཆོ་གས་རྡོ་རྗེ་དང་དྲིལ་བུ་གསོར་བ་དང་དཀྲོལ་བ་བྱས་ལ་གཏོར་མ་ཕུལ་ཏེ། བསྲུང་བ་དང་ལྡན་པའི་ཡི་གེ་གསུམ་གྱིས་སྣོད་ཀྱི་ནང་དུ་མེ་བཞག་ལ། དེ་ནས་བདུད་རྩི་འཁྱིལ་པའི་སྔགས་ཀྱིས་ཞུན་མར་གྱི་མར་མེ་རབ་ཏུ་སྦར་ནས་དེ་བརྗོད་པའི་ཀུ་ཤའི་རྩེ་མོས་བླངས་པས་ལན་གསུམ་དུ་གཡས་སུ་བསྐོར་བ་དང༌། དྲག་པོའི་ལས་ལ་གཡོན་དུ་བསྐོར་བས་བསང་གཏོར་བྱས་ལ། ཐབ་ཏུ་གཙང་ཞིང་ཤིན་ཏུ་སྐམ་པའི་རྩའི་ཆུན་པོ་དང་བཅས་པ་དུ་བ་མེད་པ་གཞུག་ཅིང་དྲག་པོ་ལ་བཟློག་པས་བཅུག་ནས། ཨོཾ་ཛྭ་ལ་ཛྭ་ལ་ཧཱུཾ་ཞེས་པ་འདི་དང་ཡི་གེ་ཧཱུཾ་གིས་ཀྱང་རླུང་གཡབ་ཀྱི་རླུང་གིས་མེ་རབ་ཏུ་སྦར་ནས་རིགས་ཀྱི་སྙིང་པོ་ལན་བདུན་བཟླས་པའི་བླུགས་གཟར་གྱི་མར་གྱིས་ཀྱང་རབ་ཏུ་སྦར་བར་བྱའོ། །དྲག་པོ་ལ་ཚྭ་བའི་ཏིལ་མར་གྱིས་དེ་གོང་དུ་ཡང་ངོ༌། །དེ་ནས་ཀུ་ཤ་རྣམས་ཨོཾ་བཛྲ་སཏྭ་ཨཱཿ་ཞེས་པ་འདི་བརྗོད་ནས་ཀུ་ཤ་ལྗང་གུ་གཉིས་གཉིས་རྩེ་མོ་གཤིབས་པ་དྲི་མ་མེད་པ་མ་གས་པ་མ་གྲུགས་པ་ཧ་ཅང་ཡང་རིང་བ་མ་ཡིན་པ་རྣམས་དང་པོར་སྒྲུབ་པ་པོའི་གཡོན་གྱི་ཁ་ཁྱེར་ལ་རྩེ་མོ་ཤར་དུ་བསྟན་པ་དང༌། གཤིན་རྗེར་ཕྱོགས་པ་དང་རྩེ་མོ་ནུབ་ཏུ་བལྟ་བ་དང༌། བྱང་དུ་ཕྱོགས་པས་དགྲམ་པར་བྱའོ། །དེ་ནས་ཐབ་ཁུང་དུ་རྩེ་མོ་ཤར་དུ་བསྟན་པའི་ཀུ་ཤ་བ་ལང་གི་རྣ་བ་ལྟ་བུ་ཧ་ཅང་མི་རིང་བས་གཡོགས་སོ། །རྒྱས་པ་དང་དབང་དུ་བྱ་བ་དང༌། མངོན་སྤྱོད་ཀྱི་ཐབ་ཁུང་རྣམས་སུ་རིམ་པ་བཞིན་དུ་རྩེ་མོ་བྱང་དང་ནུབ་དང་ལྷོར་བསྟན་པ་རྣམས་ཏེ་དང་པོར་གཡོན་གྱི་ཁ་ཁྱེར་ལ་ཀུ་ཤ་གཉིས་ཀྱི་རྩེ་མོ་ཡང་དེ་ལྟར་རོ། །འདིར་ཡང་སྒྲུབ་པ་པོ་གང་དུ་མངོན་དུ་ཕྱོགས་པ་དེ་ལ་ལྟོས་ནས་ཤར་ལ་སོགས་པའི་ཐ་སྙད་བྱ་སྟེ། དོན་དམ་པར་ཤར་ལ་སོགས་པའི་ཕྱོགས་མེད་པའི་ཕྱིར་རོ། །དེ་ནས་ལྷའི་བདག་ཉིད་ཅན་གྱིས་རང་གི་སྙིང་གའི་ས་བོན་གྱིས་ཐབ་བསྐྱེད་ནས་མེ་འབར་བ་རིག་ནས་དེའི་དབུས་སུ་བདག་མེད་པར་བསམས་ཏེ་རཾ་ལས་བྱུང་བའི་མེའི་དཀྱིལ་འཁོར་གྲུ་གསུམ་པ་ལ་པདྨ་དང་ཉི་མ་ལ་གནས་པའི་རཾ་ཡིག་ལས་བྱུང་བའམ་སྐད་ཅིག་གིས་རྫོགས་པ་ལྟོ་བ་འཕྱང་བ་ཤ་རྒྱས་པ་སྐུ་བོང་ཐུང་བ་ཞལ་གསུམ་པ་ཞལ་རེ་རེ་
ཞིང་ཡང་སྤྱན་གསུམ་པ་ཕྱག་གཡས་པ་གཉིས་ཀྱིས་མི་འཇིགས་པ་དང་བགྲང་ཕྲེང་བཟུང་བ། གཡོན་པ་གཉིས་ཀྱིས་དབྱུག་པ་དང་རིལ་བ་སྤྱི་བླུགས་འཛིན་པ། ཕྱག་གཙོ་བོ་གཉིས་ཀྱིས་རང་འོད་ཀྱི་ཤེས་རབ་ལ་འཁྱུད་པ་ལས་དང་རྗེས་སུ་མཐུན་པའི་སྐུ་མདོག་དང་གོས་དང་རྒྱན་དང་ལྡན་པ། རྣམ་པར་ཤེས་པའི་འོད་ཟེར་གྱི་ཕྲེང་བ་དང་རྒྱས་འདེབས་ཀྱི་རིགས་ཀྱི་བདག་པོ་ཅན་སྨ་ར་དང་སྨིན་མ་རལ་པའི་ཚོགས་དང་ལྡན་པ་མེའི་དཀྱིལ་འཁོར་ལ་གནས་པའི་ས་བོན་གྱི་སྙིང་གར་བརྒྱན་པའི་མེ་ལྷ་རྣམས་པར་བསྒོམས་ལ། དམ་ཚིག་སེམས་དཔའི་སྙིང་གའི་ས་བོན་གྱི་འོད་ཟེར་ལྕགས་ཀྱུས་ནམ་མཁའ་ལ་དམ་ཚིག་སེམས་དཔའ་དང་འདྲ་བའི་ཡེ་ཤེས་སེམས་དཔའི་མེ་ལྷ་མེ་མཚམས་ནས་བྱོན་པ་དྲང་སྲོང་གི་ཚོགས་ཀྱིས་ཡོངས་སུ་བསྐོར་བ་རྩ་བའི་ཞལ་ནི་སྐུ་མདོག་དང་མཐུན་པ་སྟེ། དེ་དཀར་པོ་ཉིད་ཡིན་ན་གཡས་དང་གཡོན་གྱི་ཞལ་ནག་པོ་དང་དམར་པོ་དང༌། སེར་པོ་དང་དམར་པོ། ལྗང་གུ་ཡིན་ན་སྔོན་པོ་དང་དཀར་པོ་སྟེ་སྔོན་པོ་ལ་ནི་དཀར་པོ་དང་དམར་པོར་རྣམ་པར་བལྟས་ནས་གཡས་པའི་མཐེ་བོང་མི་འཇིགས་པ་བསྐྱོད་པ་དང༌། སྔགས་འདིས་སྤྱན་དྲང་བར་བྱའོ། །ཨོཾ་ཚུར་སྤྱོན་ཚུར་སྤྱོན་འབྱུང་བོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །སྲེག་བླུགས་ཞལ་ཟས་བཞེས་སླད་དུ། །འདིར་ནི་ཡང་དག་བསྙེན་པར་མཛོད། །ཅེས་པ་དང༌། ཨོཾ་ཨཱགྣ་ཡེ། ཨཱ་དཱི་པྱ། ཨཱ་དཱི་པྱ་ཨཱ་བི་ཤ་ཨཱ་བི་ཤ་མ་ཧཱ་ཤྲཱི་ཡེ་ཧ་བྱ་ཀ་བྱཱ་བཱ་ཧཱ་ནཱ་ཡ་སྭཱ་ཧཱ། ཞེས་པའི་སྔགས་འདིས་སྤྱན་དྲངས་ལ་དེ་དང་ལྷན་ཅིག་ལྷགས་པའི་བགེགས་ཐམས་ཅད་གཤིན་རྗེ་གཤེད་ལ་སོགས་པས་བསྐྲད་ནས། དེ་རྣམས་ཀྱིས་ཛཿ་ཧཱུཾ་བཾ་ཧོཿ་ཞེས་པའི་སྔགས་བརྗོད་པས་གོ་རིམས་བཞིན་དུ་དགུག་པ་དང་གཞུག་པ་དང་བཅིང་བ་དང་དགྱེས་པར་བྱའོ། །ཨོཾ་ཨགྣ་ཡེ། ཨཱ་དཱི་བྱ། ཨཱ་དཱི་བྱ། ཨཱ་བི་ཤ་ཨཱ་བི་ཤམ་ཧཱ་ཤྲཱི་ཡེ་ཧ་བྱཱ་ཀ་བྱཱ་བཱ་ཧ་ནཱ་ཡ་ཨརྒྷཾ་པྲ་ཏཱི་ཙྪ་ཧཱུཾ་སྭཱ་ཧཱ། ཞེས་པའི་སྔགས་སམ། ཨོཾ་ཨཱཿཧཱུཾ་ཨརྒྷཾ་པྲ་ཏཱི་ཙྪ་ཧཱུཾ། ཞེས་པ་འདིས་སམ། ཨོཾ་ཨ་ཧྲཱིཿཔྲ་བ་ར་སཏྐ་ར་ཨརྒྷཾ་པྲ་ཏཱི་ཙྪ་ཧཱུཾ་སྭཱ་ཧཱ། ཞེས་བྱ་བས་མཆོད་ཡོན་དབུལ་ལོ། །ཨརྒྷཾ་ཞེས་པའི་གནས་སུ་པཱ་དྱཾ་དང༌། ཨཱཉྩ་མ་ནཾ་དང་ཨ་བུ་ཁྱ་ནཾ་ཞེས་པ་བཅུག་ནས། ཞབས་བསིལ་དང༌། ཞལ་བསིལ་དང་བསང་གཏོར་དབུལ་ལོ། །ལས་དང་རྗེས་སུ་མཐུན་པའི་མེ་ཏོག་ལ་སོགས་པ་དང༌། གསང་བའི་མཆོད་པ་ལ་སོགས་པ་རྣམས་ཀྱིས་ཀྱང་མཆོད་པར་བྱའོ། །ཇི་ལྟར་
རིགས་པར་ཡང༌། ཀུ་ཤའི་ཆུན་པོས་སྣོད་དང་པོར། །ལས་ཀུན་བྱེད་ལས་ཆུ་ཡིས་ནི། །བསང་གཏོར་ལན་གསུམ་དབུལ་བར་བྱ། །དེ་ཉིད་དུ་ནི་ཞལ་བསིལ་ཏེ། །མཛུབ་མོས་མེ་ཏོག་བླངས་ནས་ནི། །ཁུ་ཚུར་འོག་ཏུ་ཁ་བསྟན་ནས། །མཐེའུ་ཆུང་སྲིན་ལག་གུང་མོ་དང༌། །མཛུབ་མོ་རིམ་གྱིས་དགྲོལ་ཞིང་དབུལ། །གཉིས་པའི་དུང་གི་ཆུ་ཡིས་ནི། །མཆོད་ཡོན་བཟེད་ཞལ་གཉིས་པ་རུ། །རྡོ་རྗེའི་སྙིམ་པ་ཁ་ཕྱེ་བས། །དབུལ་ཞིང་ཞབས་བསིལ་གསུམ་པར་ནི། །ཁུ་ཚུར་བཅས་ནས་མཐེ་བ་མཛུབ་ཀྱི། །སྐམ་པས་མེ་ཏོག་བླངས་ནས་སུ། །སངས་རྒྱས་རྣམས་ཀྱི་སྤྱན་སྔར་ནི། །ལན་གསུམ་བསྐོར་བའི་སོར་མོ་ནི། །མཛུབ་མོ་གུང་མོ་མིང་མེད་དང༌། །མཐེའུ་ཆུང་རིམ་གྱིས་དཀྲོལ་བས་སོ། །ཞེས་བྱ་བའི་གདམས་པ་ཁྱད་པར་ཁོ་བོའི་བླ་མ་རྣམས་ཀྱིས་གསུངས་སོ། །ཕྱོགས་གཞན་ནི་དཔལ་སམྤུ་ཊའི་རྒྱུད་ལས། སྔོན་དུ་མཆོད་ཡོན་གྱི་སྣོད་ཅེས་གསུངས་པའི་དགོངས་པའོ། །མདོར་བསྡུས་པའི་རིམ་པའོ། །རྒྱས་པར་ནི་ཨོཾ་ཨཱཿ་ཛཿ་ཧཱུཾ་ཞེས་པ་འདིས་བཀུག་ནས་ཐབ་ཁུང་གི་མེའི་ཕྱོགས་ཀྱི་ལོགས་ན་ཀུ་ཤའི་ཆུན་པོ་ལ་འདུག་པ་ལ། མཆོད་ཡོན་ལ་སོགས་པ་ཕུལ་ཏེ། དེ་ཉིད་གསུམ་གྱིས་སྤེལ་བའི་ཛཿཧཱུཾ་བཾ་ཧོཿཞེས་བྱ་བའི་རིམ་གྱིས་རྡོ་རྗེ་དང་བཅས་པའི་རྡོ་རྗེ་དྲིལ་བུས་འཁྱུད་པའི་ཚུལ་དང་ལྡན་པའི་ཕྱག་གཉིས་ཀྱིས་སེ་གོལ་གཏོགས་པ་སྔོན་དུ་འགྲོ་བས་དམ་ཚིག་སེམས་དཔའ་ལ་རབ་ཏུ་བཅུག་ལ་བཅིང་བ་དང་དབང་དུ་བྱས་ནས་ཡང་མཆོད་ཡོན་ལ་སོགས་པ་ཐམས་ཅད་བྱའོ། །དེ་ནས་ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་ཛྭ་ལ་ཡ་སརྦ་བྷ་སྨའི་ཀུ་རུ་སརྦ་དུཥཊཱ་ན་ཧཱུཾ་ཕཊ་དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ་ས་མ་ཡ་ཧཾ་ཞེས་ལན་གསུམ་དུ་དམ་ཚིག་བསྒྲག་པར་བྱའོ། །དེའི་རྗེས་ལ་ལག་པ་གཡོན་པ་གན་རྐྱལ་དུ་བྱས་ལ་བྱང་ཆུབ་མཆོག་གི་ཁུ་ཚུར་གྱིས་མར་གྱིས་གང་བའི་དགང་གཟར་བཟུང་ནས་ལག་པ་གཡས་པ་ནི་ཁ་སྦུབ་པས་བླུགས་གཟར་གན་རྐྱལ་དུ་བྱས་པ་མར་གྱིས་གང་བ་དང༌། དེ་བཞིན་དུ་དྲག་པོའི་ལས་ལ་ནི་དུག་དང་བཅས་པའི་ཚ་བའི་མར་ནག་གིས་གང་བའི་དགང་གཟར་གཡས་ཀྱིས་བཟུང་ཞིང་གཡོན་པས་བླུགས་གཟར་ཡང་སྟེ་དགང་གཟར་བླུགས་གཟར་གྱི་ཁ་ལ་རང་གི་ལྷའི་ས་བོན། ཡི་གེ་གསུམ་གྱིས་སྤེལ་བའི་འོད་ཟེར་དང་བཅས་པ་དང༌། མེ་ལྷའི་ཞལ་དུ་རཾ་རྣམ་པར་བཀོད་ལ་དགང་གཟར་གྱི་ཁར་བླུགས་གཟར་གྱི་ཁ་བཞག་སྟེ་ལག་
པ་གཉིས་པུས་མོའི་ནང་དུ་དང༌། དྲག་པོ་ལ་ཕྱིར་བྱ་སྟེ། ཞི་བ་དང་རྒྱས་པ་དང༌། དབང་གིས་དགུག་པའི་ལས་རྣམས་ལ་སྭཱ་ཧཱ་དང་ཨོཾ་དང་ཧོཿདང་ཛཿདང་དྲག་པོ་ལ་ཧཱུཾ་ཧཱུཾ་དམ་ཕཊ་ཅེས་པ་སྔགས་ཀྱི་མཐར་བརྗོད་ཅིང་ཞལ་ཅུང་ཟད་གདངས་པ་དང༌། དྲག་པོ་དང་དྲག་པོའི་དགུག་པ་ལ་ནི་ཞལ་ཤིན་ཏུ་གདངས་པར་དགང་གཟར་གཡས་སྐོར་དང༌། དྲག་པོ་ལ་གཡོན་སྐོར་བྱས་ཏེ་ཡོན་བདག་གི་ནུས་པ་ཇི་ལྟ་བས་དགང་བླུགས་ལན་གསུམ་མམ་ལན་བདུན་དབུལ་བར་བྱ་སྟེ། ཨོཾ་ཨཱགྣ་ཡེ། ཨཱ་དཱི་བྱ། ཨ་བི་ཤ་ཨ་བི་ཤ་མ་ཧཱ་ཤྲཱི་ཡེ་ཧ་བྱ་ཀ་བྱ་བ་ཧ་ནཱ་ཡ་སྭཱ་ཧཱ། ཞེས་པ་མེ་ལྷའི་སྔགས་སམ། ཨོཾ་ན་མཿས་མནྟ་བུདྡྷཱ་ནཱཾ་ཨགྣ་ཡེ་སྭཱ་ཧཱ། ཞེས་བྱ་བས་དགང་བླུགས་ཀྱི་སྔགས་ཀྱིས་དང༌། ཨོཾ་ཨགྣ་ཡེ་སྭཱ་ཧཱ། ཞེས་པ་ཅིག་ཤོས་ཀྱི་མར་གྱི་སྲེག་བླུགས་ཀྱི་སྔགས་ཀྱིས་སོ། །དེ་ནས་མེ་ལ་བགེགས་དང་བྲལ་བ་དང་བགེགས་དང་ལྡན་པར་རྟགས་ཀྱིས་མཚོན་པར་བྱ་སྟེ། རབ་སྔགས་དགེ་བ་མི་ཡི་འོད། །དཔལ་གྱི་བེའུ་དང་རྔ་ཡབ་གདུགས། །རྒྱལ་མཚན་པདྨ་བུམ་ལྟ་བུ། །རྩེ་གསུམ་རལ་གྲི་ཉ་ལྟ་བུ། །བཀྲ་ཤིས་ཨིནྡྲ་ནཱི་ལ་དང༌། །རྡོ་རྗེ་དུང་ལ་སོགས་པ་དང༌། །དགང་གཟར་བླུགས་གཟར་རྣམ་པ་དང༌། །དཀར་དང་འཇམ་འདྲ་མདོག་སྡུག་དང༌། །གཡས་སུ་འཁྱིལ་དང་ཤིན་ཏུ་སྣུམ། །བྱི་རུ་དང་ནི་གསེར་མདོག་འདྲ། །ལུག་རུ་དངུལ་དང་བཻཌཱུཪྻ། །ཉི་འོད་འབར་མཚུངས་དྲི་མ་མེད། །དུ་བ་མེད་ཅིང་དྲི་ཞིམ་པ། །པི་ཝང་རྫ་རྔའི་སྒྲ་ལྡན་མཆོག །ཞི་བར་ཁ་དོག་དཀར་པོར་སྣང༌། །རྒྱས་པ་ལ་ནི་གསེར་དང་མཚུངས། །དབང་ལ་དམར་པོ་རྩེ་མོ་མཆོག །མངོན་སྤྱོད་ལ་ནི་སྔོ་ནག་གོ །ཞི་བའི་ལས་ལ་སོགས་པ་ལ། །གསེར་འདྲ་རྩེ་གཅིག་དམ་པ་སྟེ། །རྩེ་གཉིས་འབར་བ་འབྲིང་དུ་བསྟན། །རྩེ་གསུམ་སྤྲིན་འདྲ་ཤིན་ཏུ་དམན། །དུ་བ་ཆེ་བ་མི་དགེ་སྟེ། །འབར་དཀའ་མེ་ལྕེ་ཆད་པ་དང༌། །རྩུབ་ནག་པཱ་ལ་ཤ་ཡི་མདོག །གསལ་ཞིང་བ་ལང་མགོ་ལྟ་བུ། །མེ་སྟག་འཕྲོ་དང་དྲག་པོའི་སྒྲ། །རོ་ཡི་དྲི་ང་མི་དགེ་བ། །དྲག་པོའི་ལས་ལ་ཤིས་པ་ནི། །དེ་ལྟར་མི་དགེ་བའི་ལྟས་བགེགས་དང་བཅས་བ་ཉིད་ནི་མེ་ལ་བསང་གཏོར་དང༌། སྲུང་པ་ལས་ཐམས་ཅད་པའི་སྔགས་ཀྱིས་མར་གྱི་སྲེག་བླུགས་ལན་བདུན་བྱས་ལ། དེ་ནས་སླར་ཡང་མེ་ལྷའི་སྔགས་སམ། ལས་ཐམས་ཅད་པའི་སྔགས་ཀྱིས་བསང་གཏོར་བྱས་ནས་དགང་བླུགས་གསུམ་མམ་བདུན་ནམ་ལེན་གཅིག་གམ་ཅི་
འབྱོར་པ་མི་ལྷའི་སྔགས་ཀྱིས་བསྲེགས་ཏེ་བླུགས་གཟར་ལ་སོགས་པ་རྣམས་ཀྱིས་མར་གྱིས་སྲེག་བླུགས་གསུམ་མམ་བདུན་ནམ་གཅིག་ཅི་ལྟར་རྙེད་པ་བསྲེག་པར་བྱའོ། །དེ་ལྟར་ཡང༌། བླུགས་གཟར་གྱིས་ནི་མར་བསྲེག་ཅིང༌། །འབྲུ་རྣམས་དེ་ཉིད་ཀྱིས་དབུལ་བྱ། །ཞེས་གསུངས་སོ། དང་པོ་ཡམ་ཤིང་ལ་སོགས་པ་སྦྱང་བར་བྱ་སྟེ། དེ་ལ་ཨོཾ་ཨཱཿསྭཱ་ཧཱ། ཡམ་ཤིང་སྦྱང་བའི་སྔགས་སོ། །ཨོཾ་ཤྲཱིཿ་སྭཱ་ཧཱ། ཞུན་མར་སྦྱང་བའི་སྔགས་སོ། །ཨོཾ་ཨཱ་སྭཱ་ཧཱ། རྫས་བཀྲུ་བའི་སྔགས་སོ། །ཨོཾ་ཛི་སྭཱ་ཧཱ། འབྲུ་དག་པར་བྱ་བའི་སྔགས་སོ། །ཨོཾ་ཀུ་རུ་ཀུ་རུ་སྭཱ་ཧཱ། རྫས་གཞན་རྣམས་སྦྱང་བའི་སྔགས་སོ། །འདིར་ནི་གོ་རིམས་ཡམ་ཤིང་དག །བསྲེགས་ན་ཡམ་ཤིང་མེ་ལ་མར། །ཏིལ་དང་དཱུར་བ་འབྲས་ཞོ་ཟན། །ཀུ་ཤ་ལ་སོགས་བསྲེག་པར་བྱ། །འཆད་པར་འགྱུར་བའི་རང་རང་གི་སྔགས་ཀྱིས་ཡམ་ཤིང་དང༌། དཱུར་བ་དང་ཀུ་ཤ་མཐེ་བོང་དང་མིང་མེད་ཀྱིས་བླངས་ནས་སོ། །ཐམས་ཅད་དུ་ཁུ་བའི་རྫས་རྣམས་ནི་ཞལ་དུའོ། །ཡམ་ཤིང་དང་ནི་མི་རུས་ཀྱི་ཕྱེ་མ་ལ་སོགས་ནི་འོད་ཀྱི་དཀྱིལ་འཁོར་ལའོ། །ཞོ་ཟན་དང་བཟའ་བ་དང༌། ཞལ་བསིལ་དང༌། ཏིལ་ལ་སོགས་པ་ནི་ཕྱག་ཏུའོ། །དྲི་ནི་ཐུགས་ཀར་རོ། །མེ་ཏོག་ནི་དབུ་ལའོ། །བདུག་སྤོས་ནི་འབར་བ་ལའོ། །ཞབས་བསིལ་ནི་ཞབས་དག་ལའོ། །མར་མེ་དང་མཆོད་ཡོན་མདུན་དུ་དབུལ་བར་བྱའོ། །མཆོད་ཡོན་གྱི་ཆུ་སྣོད་དུ་ཡང་དབུལ་བར་བྱའོ། །ཁ་ཅིག་ནི། ཀུན་དུ་ལུས་ལ་བསང་གཏོར་དང༌། །མདུན་དུ་སྤོས་ཀྱིས་བདུག་པ་དང༌། །ཞལ་བསིལ་ཞལ་དུ་ལན་གསུམ་སྟེ། མཆོད་ཡོན་དབུལ་དབུལ་བར་བྱ། །ཞེས་ཟེར་རོ། དེའི་རྗེས་སུ་ཞལ་བསིལ་དང་བསང་གཏོར་བྱས་ལ། མེ་ལྷ་ཐབ་ཏུ་འབར་བའི་རྣམ་པས་སམ། རང་གི་གཟུགས་ཀྱིས་མེའི་ཕྱོགས་སུ་གཞག་པར་བྱའོ། །དེ་ནས་ཡི་གེ་ཧཱུཾ་དང་བདུད་རྩི་འཁྱིལ་པའི་སྔགས་ཀྱིས་ཀྱང་སྔར་བཞིན་དུ་ཆོ་ག་ཇི་ལྟ་བར་ཡོ་བྱད་ལ་ཡང་བསང་གཏོར་བྱས་ནས། ཞི་བ་ལ་རིགས་ཀྱི་བདག་པོ་དཀར་པོ་དང་ཤིན་ཏུ་ཞི་བ་པདྨ་དཀར་པོ་དང་ཟླ་བ་ལ་གནས་པ་རྣམ་པ་ཐམས་ཅད་དུ་གོས་དང་རྒྱན་དང་འོད་དཀར་པོ་དང་ལྡན་པ་འཁོར་ལོ་ཅན་སྙོམས་པར་འཇུག་པའམ། གཅིག་པུའི་གཟུགས་ཅན་འོད་ཟེར་སྤྲོས་པ་ལས་སྤྲུལ་པའི་སྤྱན་མ་ལ་སོགས་པའི་ལྷས་ཟླ་བ་ཤེལ་གྱི་བུམ་པ་བྱང་ཆུབ་སེམས་ཀྱི་བདུད་
རྩིས་གང་བ། ཕྱག་གིས་བཟུང་བའི་རྒྱུན་རྣམས་ཀྱིས་བསྒྲུབ་བྱ་ལ་དབང་བསྐུར་བས་དེའི་རིམས་ལ་སོགས་པ་མ་ལུས་པར་སེལ་བར་མཛད་པའོ། །རྒྱས་པ་ལ་ནི་སེར་པོ་ཤིན་ཏུ་རྒྱས་པ་གོས་དང་རྒྱན་སེར་པོ་དང་གདན་སེར་པོ་དང༌། ཤིན་ཏུ་དགྱེས་ཤིང་རངས་པ་སྟེ། སྔར་བཞིན་དུ་གསེར་གྱི་བུམ་པ་ལས་འབབ་པའི་བདུད་རྩིའམ་རཏྣའི་ཆར་པ་རྣམས་ཀྱིས་བསྒྲུབ་བྱའི་ལུས་སམ། ཁང་པ་ཡང་དག་པར་གང་བར་བྱས་ཏེ་རིད་པ་ལ་སོགས་པ་འམ་དབུལ་བ་འཇིག་པར་བྱེད་པའོ། །དབང་ལ་ནི་སྟན་དམར་པོ་ལ་སོགས་པ་དང་ལྡན་པ་སྔར་བཞིན་དུ་ཨུཏྤལ་དམར་པོ་ཁ་བྱེ་བ་ལྟ་བུའི་མདས་སྙིང་ཕུག་ནས་དབང་དུ་སྡུད་པར་བྱེད་པའོ། །དབང་གིས་དགུག་པ་ལ་ཞགས་པ་དང་ལྕགས་ཀྱུ་དག་གིས་བཅིངས་ཤིང་ཕུག་ནས་འགུགས་པའོ། །མངོན་སྤྱོད་ལ་གདན་ནག་པོ་ལ་སོགས་པ་དང་ལྡན་པ་ཁྲོས་པ་བསྒྲུབ་བྱའི་སྟེང་དུ་རྡོ་རྗེ་མེའི་ཆར་ཕབ་ནས་བསྒྲུབ་བྱ་ཐལ་བར་བྱེད་པའོ། །དྲག་པོས་དགུག་པ་ལ་ཡང་དེ་ལྟར་བསམ་པར་བྱའོ། །དེ་བཞིན་དུ་ལས་ཐམས་ཅད་པ་ཉིད་རང་གི་ལྷག་པའི་ལྷ་ཉིད་ལས་དང་རྗེས་སུ་མཐུན་པའི་རྣལ་འབྱོར་དང་ལྡན་པའམ། ཡང་ན་ཐབ་ཁུང་དུ་བཀོད་པའི་ལྷའི་རྣལ་འབྱོར་དང་ལྡན་པའོ། །ཁྱད་པར་དུ་ཞི་བ་ལ་བཅོམ་ལྡན་འདས་རྣམ་པར་སྣང་མཛད་དང༌། རྒྱས་པ་ལ་རིན་ཆེན་འབྱུང་ལྡན་དང༌། དབང་དང་དབང་གིས་དགུག་པ་ལ་འོད་དཔག་མེད་དང༌། བསད་པ་དང༌། ཡམས་དང་ཉེ་བར་འཚེ་བ་བསལ་བ་ལ་དོན་ཡོད་གྲུབ་པ་དང༌། ཡང་ན་རྣམ་པར་སྣང་མཛད་དང༌། མངོན་སྤྱོད་ལ་ནི་མི་བསྐྱོད་པ་འམ་གཤིན་རྗེ་མཐར་བྱེད་ལ་སོགས་པའི་ཁྲོ་བོ་རྣམས་ཀྱི་རྣལ་འབྱོར་དང་ལྡན་པས་སོ། །ཞི་བ་ལ་སྒྲུབ་ཐབས་དང་མངོན་པར་རྟོགས་པས་ཇི་ལྟར་གསུངས་པའི་རིམ་པས་དམ་ཚིག་སེམས་དཔའ་བསྐྱོད་པ་དང་ཡེ་ཤེས་སེམས་དཔའ་སྤྱན་དྲང་བ་ལ་སོགས་པའི་ཆོ་ག་དང་དབང་བསྐུར་བའི་མཐར་ཐུག་པ་བྱས་ལ། དྲི་བཟང་པོ་དང་མེ་ཏོག་དཀར་པོ་ལ་སོགས་པ་དེའི་སྔགས་དང་རང་གི་ལྷའི་སྔགས་ཀྱིས་མངོན་པར་བསྔགས་པ་རྣམས་ཀྱིས་མཆོད་པར་བྱའོ། །དེ་བཞིན་དུ་རྒྱས་པ་ལ་ཡང་སྟེ་ཁྱད་པར་དེ་དག་ཉིད་སེར་པོས་སོ། །དབང་དང་དབང་གིས་དགུག་པ་ལ་ཡང་དམར་པོ་རྣམས་ཀྱིས་སོ། །དྲག་པོ་ལ་ནི་དྲི་མེད་པ་དང༌། དྲི་ངན་པ་དང༌།
བིལ་པ་དང༌། ཨརྒ་དང་ཛ་བ་ལ་སོགས་པའི་མེ་ཏོག་རྣམས་དང༌། སྤོས་དཀར་ལ་སོགས་པའི་སྤོས་དག་དང༌། མི་དང་ཉ་ལ་སོགས་པའི་ཞག་གི་མར་མེ་རྣམས་དང༌། ཁ་བ་དང་ཚ་བ་ལ་སོགས་པའི་ཡིད་དུ་མི་འོང་བའི་ཟས་རྣམས་ཀྱིས་སོ། །ཞེས་པ་ཁྱད་པར་རོ། །དེ་ནས་ཨོཾ་ཨཱཿཧྲཱིཿཔྲ་བར་སཏྐཱ་རཾ་ཨརྒྷཾ་པྲ་ཏཱི་ཙྪ་ཧཱུཾ་སྭཱ་ཧཱ། ཞེས་པའི་སྔགས་ཀྱིས་སྔར་བཞིན་དུ་མཆོད་ཡོན་དང་ཞབས་བསིལ་དང་བསང་གཏོར་བྱས་ནས། ཡང་དག་པར་མཆོད་པ་ལས་དང་རྗེས་སུ་མཐུན་པའི་མདོག་ཅན་གྱི་ལྗངས་རྡོ་རྗེའི་རྣམ་པ་ལ་རང་གི་ལྷའི་ས་བོན་དུ་བཀོད་དེ་རང་གི་སྔགས་ཀྱིས་དགང་བླུགས་གོང་བཞིན་དུ་ཕུལ་ལ། མར་ལ་སོགས་པ་རྫས་རྣམས་རེ་རེའི་སྲེག་བླུགས་གསུམ་མམ་བདུན་ནམ་ཉེར་གཅིག་བསྲེགས་ཏེ་བདུད་རྩི་དང་བཅས་པ་མར་གྱི་སྲེག་བླུགས་ཅི་ལྟར་སྙེད་པ་བསྲེག་པར་བྱའོ། །དཀྱིལ་འཁོར་བྲི་བ་ལ་སོགས་པའི་ལས་ལ་དཀྱིལ་འཁོར་གྱི་གཙོ་བོའམ། རབ་ཏུ་གནས་པར་བྱ་པའམ་བསྒྲུབ་བྱའི་ལྷ་རྣམས་སམ། ཞི་བ་ལ་སོགས་པའི་ལས་ཀྱི་དབང་དུ་བྱས་པའི་ལྷ་རྣམས་སམ། རང་གི་འདོད་པའི་ལྷ་རྣམས་ཐབ་ཁུང་དུ་གོ་རིམས་ཇི་ལྟ་བ་བཞིན་དུ་བཀོད་ལ། བདག་ཉིད་ཀྱང་རང་གི་ལྷག་པའི་ལྷའི་རྣལ་འབྱོར་དང་ལྡན་པའམ་ཡང་ན་ཐབ་ཁུང་དུ་བཞུགས་པའི་ལྷའི་རྣལ་འབྱོར་དང་ལྡན་པར་བྱའོ། །དེ་ནས་ཞི་བ་ལ་རང་སྔགས་ཀྱི་མཐར་ཆེ་གེ་མོའི་ཤཱིནྟཾ་ཀུ་རུ་སྭཱ་ཧཱ། ཞེས་པ་དང༌། རྒྱས་པ་ལ་པུཥྚིཾ་ཀུ་རུ་ཨོཾ་དང༌། དབང་ལ་པ་ཤཾ་ཀུ་རུ་ཧོཿདང༌། དགུག་པ་ལ་ཨ་ཀྲིཥྚིཨཾ་ཀུ་རུ་ཛཿཞེས་པ་དང༌། དྲག་པོ་དང་དྲག་པོས་དགུས་པ་ལ་ཡང་མཱ་ར་ཡ་ཕཊ་སྟེ་ཡང་ན་ཧཱུཾ་ཧཱུཾ་དང༌། དེ་བཞིན་དུ་དགུག་པར་གྱིས་ཤིག་བསྐྲད་པར་མཛོད་ཅིག །ཅེས་པ་ལ་སོགས་པའི་ཚིག་དྲེགས་པ་དང་བཅས་ཤིང་ང་རོ་ཆེན་པོ་དང་བཅས་པ་རང་གི་སྔགས་ལ་རང་གང་འདོད་པའི་མིང་སྤེལ་བཅུག་པའམ་ཡང་ན་མ་བཅུག་པར་རང་བཞིན་གྱིས་ཞི་བ་ལ་སོགས་པའི་བསམ་པས་ལྷག་པར་མོས་པར་བཟླས་ཤིང་སྲེག་རྫས་རྣམས་བརྒྱའམ་སྟོང་ངམ་དཔག་ཏུ་མེད་པ་བསྲེག་པར་བྱའོ། །ཡང་ན་ཐབ་ཁུང་གི་དབུས་སུ་རང་བཞིན་གྱིས་གནས་པའི་དེ་བཞིན་ཉིད་ཀྱི་ཡེ་ཤེས་ཀྱི་རང་བཞིན་གྱི་མེ་ལྷའི་ཐུགས་ཀ་ཁོ་ནར་རང་གིས་བོན་ལས་བྱུང་བའི་རང་གི་འདོད་པའི་ལྷའི་བདག་ཉིད་དམ་དཀྱིལ་འཁོར་གྱི་འཁོར་
ལོའམ། ཡང་ན་སྔར་བརྗོད་པའི་དཀྱིལ་འཁོར་གྱི་གཙོ་པོ་ལ་སོགས་པའི་ལྷ་བསྒོམས་ཏེ། ཡེ་ཤེས་ཀྱི་དཀྱིལ་འཁོར་སྤྱན་དྲངས་ནས་གཞུག་པ་ལ་སོགས་བྱས་ལ་དེའི་ཞལ་དུ་སྲེག་བླུགས་བྱའོ། །ཕྱོགས་འདི་ལ་གསུངས་པ་ནི་སྡོམ་པ་འབྱུང་བར། མེ་ནི་ངེས་པར་ལྷ་ཡི་ཞལ། །སྦྱིན་སྲེག་དངོས་གྲུབ་རབ་ཏུ་སྟེར། །ཞེས་གསུངས་སོ། །དེ་ནས་མེ་ལྷ་ལ་སོགས་པའི་སྲེག་བླུགས་ཀྱི་སྔགས་ནི། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སརྦ་པཱ་པཾ་ད་ཧ་ད་ཧ་སྭཱ་ཧཱ། ཞི་བའི་དོན་དུ་ཏིལ་རྣམས་ཀྱིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། ཚེ་རིང་བའི་དོན་དུ་དཱུར་བ་རྣམས་ཀྱིའོ། །ཨོཾ་བཛྲ་པུཥྚ་ཡེ་སྭཱ་ཧཱ། རྒྱས་པར་བྱ་བའི་ཕྱིར་མ་བཙོས་ཤིང་མ་གྲུགས་པའི་འབྲས་རྣམས་ཀྱིའོ། །ཨོཾ་སརྦ་སཾ་པ་དེ་སྭཱ་ཧཱ། ཕུན་སུམ་ཚོགས་པའི་དོན་དུ་ཞོ་ཟན་དང་འབྲས་མཆོག་གིའོ། །ཨོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱ། བསྲུང་བའི་དོན་དུ་ཏིལ་མར་གྱིས་བྱུགས་པའི་ཀུ་ཤ་རྣམས་ཀྱིའོ། །ཨོཾ་བཛྲ་བཱི་ཛཱ་ཡ་སྭཱ་ཧཱ། སོ་བ་དྲི་མ་མེད་པའིའོ། །ཨོཾ་མ་ཧཱ་བི་དྱཱ་སྭཱ་ཧཱ། ནས་ཀྱིའོ། །ཨོཾ་མ་ཧཱ་བ་ལཱ་ཡ་སྭཱ་ཧཱ། སྲན་མ་ཤའིའོ། །ཨོཾ་བཛྲ་གྷ་སྨ་རཱི་སྭཱ་ཧཱ། གྲོའིའོ། །ཨོཾ་བཛྲ་ཡ་ཛྙཱ་ཡ་སྭཱ་ཧཱ། ཨུ་དུམྺཱ་རའིའོ། །ཨོཾ་བོ་ཏི་པྲིཀྵཱ་ཡ་སྭཱ་ཧཱ། ཨ་ཤྭྟྠའིའོ། །ཨོཾ་བཛྲ་ལ་ཏཱ་ཡཻ་སྭཱ་ཧཱ། པླཀྵའིའོ། །ཨོཾ་བཛྲ་ཀུ་ཕེ་རཱ་ཡ་སྭཱ་ཧཱ། ཉ་གྲོ་དྷའིའོ། །ཨོཾ་ས་ཧཱ་ཀཱ་རཱ་ཡ་སྭཱ་ཧཱ། ཨ་མྲའིའོ། །ཨོཾ་བཛྲ་ཨརྐཱ་ཡ་སྭཱ་ཧཱ། ཨརྒའི་ཡལ་གའིའོ། །ཨོཾ་བཛྲ་བྲསྨ་ཎེ་སྭཱ་ཧཱ། པཱ་ལ་ཤའིའོ། །ཨོཾ་བཛྲ་གཱ་ཏྲ་ཡ་སྭཱ་ཧཱ། སེང་ལྡིང་གིའོ། །ཨོཾ་བཛྲ་ཤྲཱ་བ་ཡ་སྭཱ་ཧཱ། བཻ་ཀཾ་ཀའིའོ། །ཨོཾ་བཛྲ་ཤྲཱི་བཱ་ཡ་སྭཱ་ཧཱ། ཤིང་ཤ་མའིའོ། །ཨོཾ་སརྦ་ཏ་བྷ་ཏྲཱ་ཡ་སྭཱ་ཧཱ། གྷཾ་བྷ་རིའིའོ། །ཨོཾ་བཛྲ་ཤི་ཁ་རཱ་ཡ་སྭཱ་ཧཱ། ཨ་པཱ་མརྒའིའོ། །ཡང་ན་སོ་བ་ལ་སོགས་པ་རྣམས་ནི་ཚིམ་པར་བྱ་བའི་ལྷའི་སྔགས་ཀྱིས་སོ། །རྫས་ལྷག་མ་རྣམས་ནི་ཚིམ་པར་བྱ་བའི་ལྷའི་སྔགས་ཁོ་ན་ས་བསྲེག་པར་བྱའོ། །བསྲེག་བྱའི་རྫས་ཐམས་ཅད་བཤད་པ་ལ་སོགས་པ་བདུད་རྩི་ལྔས་བྲན་ཅིང་བདུད་རྩིའི་དངོས་པོར་བསྒོམས་བས་སྲེག་བླུགས་བྱའོ། ཞེས་མན་ངག་རིག་ཅིང་མང་དུ་མཁྱེན་པ་རྣམས་གསུང་ངོ༌། །དེ་ལྟར་རང་དང་གཞན་གྱིས་རྟོག་པའི་ཆོ་གས་ཇི་ལྟར་རྙེད་པས་སྦྱིན་སྲེག་བྱ་སྟེ། རང་གི་རིགས་ཀྱི་སྙིང་པོ་ལན་གསུམ་མམ་ལན་བདུན་ནམ་ཉེར་
གཅིག་ཏུ་མར་གྱི་སྲེག་བླུགས་རྣམས་དབུལ་བར་བྱའོ། །དེའི་མཐར་དགང་བླུགས་ཕུལ་ནས། རིགས་ཀྱི་བདག་པོའི་སྙིང་པོ་བརྗོད་པས་མཆོད་ཡོན་དབུལ་བར་བྱའོ། །དེ་ནས་བསང་གཏོར་དང་ཞབས་བསིལ་དང་གོས་གསར་པ་དང་རྡོ་ཐལ་མེད་པའི་སོ་རྩི་དང་དྲག་པོའི་ལས་ལ་རྡོ་ཐལ་དང་བཅས་པ་ཕུལ་ལ་སྔར་བཞིན་མཆོད་ནས་ཡང་དག་པར་བསྟོད་དེ། ཕྱག་བྱས་ནས་མཆོད་ཡོན་ཕུལ་ནས་མེ་ཏོག་དང་བཅས་པའི་ཐལ་མོ་སྙིང་གར་སྦྱར་ལ་མ་ཚང་བ་ལ་སོགས་པའི་ཉེས་པ་ཞི་བར་བྱ་བའི་ཕྱིར་བཅོམ་ལྡན་འདས་ལ་བཟོད་པར་གསོལ་ཏེ། གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར། །མགོན་ཁྱེད་དེ་ཀུན་བཟོད་པར་མཛོད། །མ་རྙེད་ཡོངས་སུ་མ་ཤེས་དང༌། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་གཙོ་བོས་བཟོད་མཛད་རིགས། །ཞེས་བརྗོད་ཅིང་བཟོད་པར་གསོལ་ནས། །མངོན་པར་འདོད་པའི་དངོས་གྲུབ་ཀྱི་ཕྱིར་གསོལ་བ་བཏབ་སྟེ། ལྷག་པ་དང་ཆད་པའི་ཉེས་པ་ཞི་བར་བྱ་བའི་ཕྱིར་ཐར་པའི་སེམས་ཀྱིས་ཨོཾ་བཛྲ་སཏྭ་ཨཿཞེས་ལན་མང་དུ་བརྗོད་ནས་ཡི་གེ་བརྒྱ་པ་བཀླག་པར་བྱ་སྟེ། ཨོཾ་བཛྲ་ས་ཏྭས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏེཥྲ་དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷི་མྨེ་པྲ་ཨ་ཙྪ། སརྦ་ཀརྨ་སུ་ཙ་མི་ཙིཏྟཾ་ཤྲི་ཡ། ཀུ་རུ་ཧཱུཾ། ཧ་ཧ་ཧ་ཧ་ཧོཿ་།བྷ་ག་བཱ་ན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲི་བྷ་བ་མ་ཧཱ་ས་མ་ཡ་སཏྭ་ཨཱཿ་དེ་ནས་རྗེས་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཞེས་བྱ་བས་ཡང་དག་པར་བསྐུལ་ནས་རང་གི་སྔགས་ཡི་གེ་གསུམ་གྱི་ནང་དུ་བྱས་པའི་མཐར་ཡི་གེ་མུཿཞེས་པ་བརྗོད་ཅིང་རང་གི་བདག་པོའི་མགོན་པོ་ཡིད་ཀྱིས་ཆོ་ག་བཞིན་དུ་གཤེགས་སུ་གསོལ་བར་བྱའོ། །དེ་ནས་མེ་ལྷ་ཐབ་ཁུང་དུ་སྤྱན་དྲངས་ཏེ། སླར་ཡང་དག་པར་མཆོད་ནས་བསང་གཏོར་དང་ཞབས་བསིལ་དང་རྡོ་ཐལ་མེད་པའི་སོ་རྩི་དང༌། དྲག་པོ་ལ་རྡོ་ཐལ་དང་བཅས་པའི་སོ་རྩི་དང་གོས་གསར་པ་ཕུལ་ལ་སྲེག་
རྫས་ལྷག་མ་སྦྱིན་སྲེག་བྱས་ནས་མཐར་དྲིལ་བུ་དཀྲོལ་ཞིང་བསྟོད་པར་བྱའོ། །ཆོ་ག་འདི་ནི་ཕལ་ཆེ་བར་རང་གི་མངོན་པར་འདོད་པའི་དངོས་གྲུབ་ཀྱི་ཆེད་དུའོ། །རབ་ཏུ་གནས་པ་ལ་སོགས་གཞན་དོན་འདོད་པས། ཡོན་ཕུལ་པའི་སློབ་མའི་མཐེ་བོང་གཡས་པ་གཡོན་པའི་མཐེའུ་ཆུང་གིས་བཟུང་སྟེ། ཐབ་ཁུང་དུ་ལན་གསུམ་དུ་གཡས་སུ་བསྐོར་བ་བྱས་ལ་བླུགས་གཟར་གྱི་མགོ་ལ་གཡས་སྐོར་གྱིས་འཇུག་པས་ལན་བདུན་དུ་སྲེག་བླུགས་ཀྱང་དབུལ་དུ་གཞུག་པར་བྱའོ། །འཁྱིལ་པས་བསྔགས་པའི་སྲུང་སྐུད་དཀར་པོ་དེའི་ལག་པ་ལ་བཅིངས་ལ་བསང་གཏོར་བྱའོ། །བདག་པོར་གྱུར་ན་རྒྱལ་པོ་ལ་སོགས་པའི་དགེ་བར་དམིགས་ལ་དགང་བླུགས་དབུལ་ལོ། །དེ་ལྟར་ཡང་རྒྱལ་པོ་དང་འཇིགས་རྟེན་སྐྱོང་བ་རྣམས་དང་སེམས་ཅན་ཐམས་ཅད་དང་སློབ་མ་རྣམས་དང༌། གང་ལ་མངོན་པར་འདོད་པ་རྣམས་ཀྱི་ཡང་རེ་རེ་ཞིང་ལན་གསུམ་མམ་རེ་རེ་ཆོ་ག་སྲེག་བླུགས་དབུལ་བར་བྱའོ། །ཡོན་ཡང་དབུལ་དུ་གཞུག་གོ །ཞེས་གསུངས་སོ། །འདི་ནི་ཁྱད་པར་རོ། །དེའི་རྗེས་སུ་ཞལ་བསིལ་ཕུལ་ལ་བསང་གཏོར་བྱས་ཏེ་ཡང་དག་པར་མཆོད་ནས་མཆོད་ཡོན་ཕུལ་ཏེ་བཟོད་པར་གསོལ་ལ་མངོན་པར་འདོད་པའི་དངོས་གྲུབ་ཞུས་ནས་ཨོཾ་བཛྲ་སཏྭ་ཨཿ་ཞེས་བརྗོད་དེ་སྔར་བཞིན་གཤེགས་པའི་ཆེད་དུ་ཡང་དག་པར་བསྐུལ་ལ། ཨོཾ་བཛྲ་མུཿཞེས་བརྗོད་ཅིང་ཆོ་ག་བཞིན་གཤེགས་སུ་གསོལ་ལོ། །གང་གི་ཚེ་དེ་ལྟར་འཇིག་རྟེན་པའི་ལྷ་རྣམས་ཐབ་ཁུང་དུ་དགོད་པར་འདོད་ན་ཡང༌། །དེའི་ཚེ་དམ་ཚིག་སེམས་དཔའ་བསྐྱེད་པ་དང༌། ཡེ་ཤེས་སེམས་དཔའ་དགུག་པ་དང་དམ་ཚིག་ལ་རབ་ཏུ་གནས་པར་བྱ་བ་དང་མཆོད་པ་དང་སྦྱིན་སྲེག་ལ་སོགས་པ་མེ་ལྷའི་བཞིན་དུ་སྦྱོར་བ་ཇི་ལྟ་བར་རྗེས་སུ་བསྒྲུབ་ཅིང༌། ཕྱིས་ཀྱང་མེ་ལྷ་བཞིན་དུ་གཤེགས་སུ་གསོལ་ལོ། །དེ་ལྟར་ཉིན་རེ་བཞིན་ནམ་བཤད་པའི་དུས་སམ་ཐུན་གསུམ་མམ་ཐུན་བཞིར་བྱའོ། །དེ་ནས་འོ་མ་དང་འབྲས་མ་ཆག་པ་དང༌། མར་དང་སྦྲང་རྩི་དང་ཀ་ར་རྣམས་རང་གི་འདོད་པས་རྗེས་སུ་མཐུན་པའི་དྲིས་བྱུགས་ལ་མགུལ་པར་མེ་ཏོག་ཕྲེང་བས་བཅིངས་པས་སྣོད་ནག་པོ་མ་ཡིན་པ་མནྗིའི་སྟེང་དུ་བཞག་པའི་ནང་དུ་དགང་གཟར་རམ་བླུགས་གཟར་གྱིས་བླུགས་ཏེ། རྡོ་རྗེ་ཕྲེང་བར་བཤད་པའི་ཆོ་གས་བདུད་
རྩིའི་རང་བཞིན་གྱིའོ་ཐུག་ཐབ་ཁུང་གི་མེ་ལ་བསྒྲུབ་པར་བྱས་ནས་རང་ཉིད་ཅི་ལྟ་བ་བཞིན་དུ་རྣལ་འབྱོར་ལ་སྙོམས་པར་ཞུགས་ཏེ། དེ་བཞིན་གཤེགས་པའི་ལྷག་མ་འདི། །སྡིག་པ་རྣམ་པར་ཉམས་ཕྱིར་གསོལ། །ཞེས་པས་ལྷ་དང་འཇིག་རྟེན་སྐྱོང་བ་དང་རང་ཡང་ཚིམ་པར་བྱའོ། །ལྷག་མ་ནི་སྦྱིན་བདག་དང་ལྷག་མ་དོན་དུ་གཉེར་བ་རྣམས་ལ་བགོ་བཤའ་བྱའོ། །ཞི་བ་ལ་ནི་འོ་མས་མེ། །གཞིལ་བྱ་རྒྱས་པ་བསྒྲུབ་པ་ལ། །སེར་པོའི་ཆབ་ཀྱིས་དབང་དག་ལ། །འོ་མར་དམར་དང་ནག་པོས་སོ། །དེ་ནས་སྦྱིན་སྲེག་གི་ཐབ་ཀྱི་ཐལ་བ་དང་སོལ་བ་རྣམས་ལས་ཐམས་ཅད་པའི་བུམ་པར་བླུགས་ལ་ཆུ་བོ་ལ་སོགས་པའི་ཆུ་ལ་བསྐུར་བར་བྱའོ། །ཞེས་པ་ལྷ་ཚིམ་པར་བྱེད་པའི་རབ་ཏུ་བྱེད་པའོ། །འདི་ནི་ཕྱི་རོལ་གྱི་སྦྱིན་སྲེག་གི་ཆོ་གའོ། །འདི་རྣམས་ཐམས་ཅད་ལྷག་ཆད་མེད་པའི་སེམས་ཁོ་ནས་བྱ་སྟེ་ངེས་པར་མངོན་པར་འདོད་པ་འགྲུབ་པར་འགྱུར་རོ། །འདི་ནི་ཡིད་ཀྱི་སྦྱིན་སྲེག་གི་ཁྱད་པར་ཅིག་གོ །རྣམ་པ་གཞན་ནི་ཅི་ལྟ་བ་བཞིན་རང་གི་འདོད་པའི་ལྷའི་རྣལ་འབྱོར་དང་ལྡན་པས་བྲིས་པའི་དཀྱིལ་འཁོར་གྱི་གཙོ་བོ་ལས་དང་རྗེས་སུ་མཐུན་པའི་གདན་ལ་སོགས་པ་དང་ལྡན་པ་ཇི་སྐད་བཤད་པའི་མེ་ལ་གནས་པའི་ངོ་བོ་མདུན་གྱི་ནམ་མཁར་གནས་པའི་དཀྱིལ་འཁོར་གྱི་དབུས་སུ་གནས་པར་བྱས་ལ། རང་གི་ལོགས་སུ་རིན་པོ་ཆེ་སྣ་བདུན་གྱི་རང་བཞིན་གྱི་སྣོད་སྦྲང་དང་ཞུན་མར་གྱིས་གང་བ་ནས་རིན་ཆེན་སྣ་བདུན་གྱི་རང་བཞིན་གྱི་དགང་གཟར་དང་བླུགས་གཟར་གྱིས་དགང་བླུགས་དབུལ་བས་ཡིད་ཀྱི་སྦྱིན་སྲེག་བྱས་པ་ཡང་དེ་བཞིན་དུ་རང་གི་འདོད་པའི་ལྷའི་འཁོར་ལོ་ཡང་བསྒོམས་ནས་དགུག་པ་ལ་སོགས་པའི་ཆོ་ག་ཡིན་གྱིས་རྗེས་སུ་བསྒྲུབ་པར་བྱ་སྟེ། སྦྱིན་སྲེག་གིས་ཚིམ་པར་བྱའོ། །སྦྱིན་སྲེག་གི་ཆོ་ག་འདི་ནི་བླ་ན་མེད་པ་སྟེ་བླ་ན་མེད་པའི་ཡིད་མངོན་པར་འདུ་བྱེད་པའི་རྒྱུ་ཡིན་པའི་ཕྱིར་དང༌། ཕྱི་རོལ་གྱི་ཆོ་ག་ལ་ཡང་དོན་དེ་ཉིད་ཡིན་པའི་ཕྱིར་དང༌། སངས་རྒྱས་དང་རིག་པ་འཛིན་པ་ལ་སོགས་པའི་དངོས་གྲུབ་ཀྱང་སྣ་ཚོགས་པ་སྒྱུ་མ་ལྟ་བུའི་འོད་གསལ་བ་རྣམ་པར་དག་པའི་མཚན་ཉིད་ཡིན་པའི་ཕྱིར་རོ། །ཞེས་ཡིད་ཀྱི་སྦྱིན་སྲེག་གི་ཆོ་གའོ། །རང་གི་འདོད་པའི་ལྷའི་རྣལ་འབྱོར་དང་ལྡན་པས་དེའི་ངོ་བོའམ་རྡོ་རྗེ་སེམས་དཔའི་རང་བཞིན་རིམ་པ་ཅི་ལྟ་བར་རང་བཞིན་གྱིས་རྣམ་པར་དག་པའམ་རྣམ་པར་སྣང་མཛད་ལ་སོགས་
པའི་རང་བཞིན་གཟུགས་ལ་སོགས་པའི་འདོད་པའི་ཡོན་ཏན་རྣམས་ཅི་ལྟར་རྙེད་པ་ལ་ཐེ་ཚོམ་མེད་པར་ཉེ་བར་ལོངས་སྤྱད་པར་བྱའོ། །བཟའ་བའི་དུས་སུ་ནི་རང་གི་ཟས་ཐམས་ཅད་མཉམ་པ་ཉིད་ཀྱིས་རྣམ་པར་དག་པས་བདུད་རྩིར་བྱས་ནས་ལྟེ་བའི་ཐབ་ཁུང་གི་མེས་འཁྱུད་པའི་སྙིང་གར་སོན་པའི་རང་གི་ལྷག་པའི་ལྷའི་འཁོར་ལོ་ལ་ལག་པའི་དགང་གཟར་ལ་སོགས་པ་ཆོ་ག་བཞིན་དུ་ཡང་དག་པར་ཚིམ་པར་བྱའོ། །ཞེས་པས་ཕྱི་རོལ་གྱི་རྫས་ཀྱིས་ནང་གི་སྦྱིན་སྲེག་གོ །ཕྱི་རོལ་གྱི་རྫས་ལ་མ་ལྟོས་པའི་ནང་གི་སྦྱིན་སྲེག་མཆོག་ཏུ་དགའ་བ་ཕུན་སུམ་ཚོགས་པའི་རྒྱུ་ནི་དཔལ་ཁ་སྦྱོར་གྱི་རྒྱུད་ཀྱི་འགྲེལ་པར་ཁོ་བོས་གསལ་བར་བྱས་པས་དེར་ཤེས་པར་བྱའོ། །ཁམས་གསུམ་པ་སྟོང་པ་ཉིད་དང་སྙིང་རྗེ་གཉིས་སུ་མེད་པའི་འཁོར་ལོའི་རྣམ་པའི་ཡེ་ཤེས་ཀྱི་མེ་ལ་གདམས་པ་ཅི་ལྟ་བར་ཕུང་པོ་ལ་སོགས་པའི་བུད་ཤིང་བསྲེགས་པ་ནི་བླ་ན་མེད་པའི་སྦྱིན་སྲེག་གོ །འདི་ནི་ལྷ་ཐམས་ཅད་ཀྱི་ཆོ་ག་ཐམས་ཅད་སྤྲོས་ཏེ་བཤད་པའོ། །གང་ཡང་རྣལ་འབྱོར་དང་རྣལ་འབྱོར་མའི་རྒྱུད་ཁ་ཅིག་ཏུ་ཆོ་གའི་དབྱེ་བ་ཅུང་ཟད་ཐ་དད་པ་བསྟན་པ་དེ་ཡང་འདི་དག་གི་རྗེས་སུ་འབྲངས་ནས་ཇི་ལྟར་རིགས་པར་བྱའོ། །འདིར་བསྡུ་བ་ནི་འདི་ཡིན་ཏེ། །ལྷ་ཡི་བདག་ཉིད་ཀྱིས་མཆོད་ཅིང༌། །གཏོར་མ་ས་སྦྱངས་ཐབ་ཁུང་བྱ། །ཞི་རྒྱས་དབང་དང་མངོན་སྤྱོད་ལ། །དཀྱིལ་འཁོར་གྱི་ནི་ཤར་དང་ལྷོ། །ནུབ་དང་བྱང་དུ་ཐབ་ཁུང་རྣམས། །ཤར་བྱང་ནུབ་ལྷོར་ཁ་བལྟས་པའི། །སློབ་དཔོན་གཡོན་དུ་ཆུ་དང་ནི། །མཆོད་ཡོན་ལ་སོགས་སྣོད་རྣམས་དགོད། །གཡས་སུ་ཡམ་ཤིང་མར་ལ་སོགས། །སྲེག་རྫས་རྣམས་ཏེ་མེ་སྦར་ནས། །ཐབ་ཏུ་ཀུ་ཤ་དགྲམ་ཤིང་གཡོགས། །བུད་ཤིང་མར་གྱིས་རབ་སྦར་ཏེ། །མེ་དང་དེ་ཡི་ཡེ་ཤེས་སྐུ། །གཅིག་བྱས་མཆོད་ཡོན་སོགས་ཀྱིས་མཆོད། །དགང་གཟར་བླུགས་གཟར་ཁ་ལ་འཐོན། །མར་གྱི་དགང་བླུགས་ཀྱིས་ཚིམ་བྱ། །ཡོན་བདག་ནུས་པའི་རྗེས་མཐུན་པས། །གཡས་སུ་བསྐོར་བའི་སྦྱོར་བས་སོ། །དེ་ནས་མར་སོགས་ཀྱིས་ཀྱང་གཞན། །སྲེག་བླུགས་བླུགས་གཟར་གྱིས་ཀྱང་དབུལ། །ཞབས་བསིལ་ཞལ་བསིལ་བསང་གཏོར་ཆུ། །མཆོད་ཡོན་ཞབས་ཕྱག་སྐུ་དང་མདུན། །ཁུ་བ་ཞལ་དུ་ཡམ་ཤིང་འོད། །བཟའ་བ་ལ་སོགས་ཕྱག་ཏུ་དབུལ། །མེ་ཏོག་དབུ་ལ་
བདུག་སྤོས་དང༌། །མར་མེ་མདུན་དུ་དྲི་ཆབ་ཐུགས། །མེ་ལྷ་དང་ནི་ལྷག་པའི་ལྷ། །དེ་དག་ཚིམ་པ་ལ་སོགས་བྱ། །མར་དང་ཏིལ་དང་དཱུ་ར་བའི་རྩེ། །འབྲས་དང་བཟའ་བའོ་ཐུག་དང༌། །ཀུ་ཤ་སོ་བ་ནས་དང་ནི། །མ་ཤཱ་གྲོ་དང་ཨུ་དུམ་བཱར། །པི་པ་ལ་པླཀྵ་ནྱ་གྲོ་དྷ། །ཨ་མྲ་ཨརྒ་ཚངས་ཤིང་དང༌། །སེང་ལྡེང་པཻ་ཀཱཾ་ཀ་ཤ་མཱི། །གྷཾ་བི་ར་ཨ་པཱ་མརྒ། །རིམ་བཞིན་བསྲེགས་ནས་གོས་སྩོགས་དང༌། །ཀློག་དང་དྲིལ་བུ་དཀྲོལ་ཞིང་བསྟོད། །བཟོད་གསོལ་ལྷ་དང་མེ་ལྷ་ལ། །དངོས་གྲུབ་བླངས་ནས་གཤེགས་སུ་གསོལ། །ཞི་བ་སོགས་ལ་དགེ་བ་ནི། །བཟློག་པ་དག་ལས་མི་དགེ་བ། །ཇི་ལྟར་རིགས་པར་ཡིད་དང་ལུས། །བཀླག་དང་ལས་ལ་ཡང་དག་བརྩམས། །ཡང་ན་ཐམས་ཅད་ཡིད་ཀྱིས་སོ། །ནང་དུ་སྙིང་རྗེའི་བདག་ཉིད་དང༌། །སྟོང་ཉིད་ཡེ་ཤེས་མེ་ལ་ནི། །འགྲོ་བ་སྦྱིན་སྲེག་རྒྱལ་བ་མཆོད། །ཅེས་པའོ། །ཤེས་རབ་འོད་ཟེར་འབར་བས་ཡོད་མེད་འཛིན་པའི་རླབས་ཀྱིས་སྲེག་རྫས་ཟད་བྱེད་པ། །རབ་ཏུ་འཆར་བའི་པདྨ་ཁ་བྱེ་དགོད་པ་ཕུན་སུམ་ཚོགས་པའི་ཚུལ། །གང་གི་དེ་ཉིད་དེ་ལྟར་ལེགས་པར་བརྗོད་པའི་དགེ་བའི་བདུད་རྩི་དབང་བསྟན་ནས། །འགྲོ་བས་རྡོ་རྗེ་འཆང་གི་སྐུ་ཡི་ཕུན་སུམ་ཚོགས་པ་རབ་ཏུ་ཐོབ་གྱུར་ཅིག ། ཅེས་པ་སྦྱིན་སྲེག་གི་ཆོ་ག་འོད་ཀྱི་སྙེ་མ་ཞེས་བྱ་བ། རྗེ་བཙུན་མ་རྡོ་རྗེ་རྣལ་འབྱོར་མས་བྱིན་གྱིས་བརླབས་པའི་པཎྜི་ཏ་ཆེན་པོ་ཨ་བྷ་ཡཱ་ཀ་ར་གུ་པའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་ཆེན་པོ་ཐམས་ཅད་མཁྱེན་པའི་དཔལ་བཟད་པོས་བོད་ཡུལ་གྱི་དབུས་དྲང་སྲོང་སྲིན་བུ་རིར་རང་འགྱུར་དུ་མཛད་པ་ལ། སླད་ཀྱི་པཎྜི་ཏ་ཆེན་པོ་རིག་པའི་གནས་རྣམས་ཐུགས་སུ་ཆུད་པའི་མཁས་པ་དག་དང༌། གྲུབ་པ་བརྙེས་པའི་སྐྱེས་བུ་ཆེན་པོ་རྣམས་ཀྱི་གསུང་གི་བདུད་རྩིའི་རྒྱུན་གྱིས་ཐུགས་གཏམས་ཤིང་དེ་ཁོ་ན་ཉིད་ལ་གཞོལ་པའི་སློབ་དཔོན་ཉི་མའི་དབང་པོའི་འོད་ཟེར་དང༌། ཆག་ལོ་ཙཱ་བ་དགེ་སློང་ཆོས་རྗེ་དཔལ་གྱིས་ལེགས་པར་བསྒྱུར་ཅིང་གཏན་ལ་ཕབ་པ། དུས་ཕྱིས་ཤོང་ལོ་ཙཱ་བ་དགེ་སློང་བློ་བརྟན་གྱིས་ལེགས་པར་བཅོས་ཤིང་དག་པར་བྱས་སོ། །ཚིགས་སུ་བཅད་པ་ཉིས་བརྒྱ་བདུན་ཅུ་རྩ་ལྔ་པའོ།། །།