བསྟན་འཛིན་ཆོས་ཀྱི་རྒྱལ་པོ་དུས་ཀྱི་ཆོས་ཉིད་དུ་གྱུར་པའི་ཚེ་ཆོ་འཕྲུལ་ཆེན་པོའི་དུས་འདུས་པ་རྒྱ་མཚོའི་ཞལ་འདོན་དུ་གནང་བ་སོགས།
བསྟན་འཛིན་ཆོས་ཀྱི་རྒྱལ་པོ་དུས་ཀྱི་ཆོས་ཉིད་དུ་གྱུར་པའི་ཚེ་ཆོ་འཕྲུལ་ཆེན་པོའི་དུས་འདུས་པ་རྒྱ་མཚོའི་ཞལ་འདོན་དུ་གནང་བ་སོགས། སྤངས་རྟོགས་ཡོན་ཏན་མཐར་ཕྱིན་རྫོགས་སངས་རྒྱས། །སྲིད་ཞིའི་འཇིགས་པ་ཀུན་སེལ་དམ་པའི་ཆོས། །ཐེག་གསུམ་སྐྱེ་འཕགས་དགེ་འདུན་ཚོགས་རྣམས་ཀྱིས། །མཁྱེན་བརྩེ་ནུས་པའི་མཐུ་དཔུང་སྐྱེད་དུ་གསོལ། །ས་ཆེན་ལེགས་སྐྱོང་བསྟན་འཛིན་ཆོས་རྒྱལ་གྱིས། །ཐོག་མེད་དུས་ནས་བསགས་པའི་སྡིག་པའི་ལས། །རྣམ་སྨིན་ནག་པོའི་འབྲས་འབྱིན་མུན་པའི་དཔུང༌། །ཐུགས་རྗེ་ཉི་མའི་འོད་ཀྱིས་བསལ་དུ་གསོལ། །མི་ཁོམ་གནས་ཀྱི་འཁྱོག་པོའི་ཡལ་ག་ཅན། །མ་དག་སྐྱེ་སྲིད་ནག་ཀླུང་ཡོངས་སྤངས་ནས། །དལ་འབྱོར་ཚང་བའི་འཆི་མེད་དགའ་ཚལ་དུ། །ཕན་བདེའི་དཔག་བསམ་ལྗོན་པར་སྤྱོད་གྱུར་ཅིག །གནས་སྐབས་སུ་ཡང་མངོན་མཐོའི་རྟེན་ཐོབ་ནས། །བསྟན་ལ་ལེགས་ཞུགས་དྲི་མེད་ཚུལ་ཁྲིམས་ལྡན། །ཐོས་བསམ་སྒོམ་གསུམ་ནོར་ལ་ལོངས་སྤྱད་དེ། །ངེས་པར་ལེགས་པའི་ལམ་མཆོག་(༢༡ན)
སྒྲུབ་པར་ཤོག །དགེ་བཅུའི་རྫོགས་ལྡན་ཚེ་ལོ་བརྒྱད་ཁྲིའི་དུས། །འཛམ་བུའི་གླིང་འདིར་མི་ཕམ་མགོན་ཕེབས་ཚེ། །འཁོར་གྱི་ཐོག་མར་སྐྱེས་ནས་སྲིད་པ་ལས། །ཡོངས་གྲོལ་མྱང་འདས་བདུད་རྩིར་སྤྱོད་གྱུར་ཅིག །དུས་གསུམ་བསགས་དང་བསག་འགྱུར་དགེ་ཚོགས་ཀྱིས། །ཐར་པའི་རིན་ཆེན་ཐེམ་སྐས་ལ་འཛེགས་ནས། །དཔལ་ལྡན་སྟོབས་བཅུའི་རྩལ་འཆང་སངས་རྒྱས་ཀྱི། །གོ་འཕང་བདེ་ཆེན་གནས་སུ་བགྲོད་པར་ཤོག །ཅེས་པ་འདི་ནི་གནམ་སའི་དབང་ཕྱུག་བསྟན་འཛིན་ཆོས་ཀྱི་རྒྱལ་པོ་དུས་ཀྱི་ཆོས་ཉིད་དུ་གྱུར་པའི་ཚེ་ཆོ་འཕྲུལ་ཆེན་པོའི་དུས་འདུས་པ་རྒྱ་མཚོའི་ཞལ་འདོན་དུ་ཤཱཀྱའི་བཙུན་པ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་འཇམ་དཔལ་ལོ། །ངག་དབང་བློ་གྲོས་དང་མཚུངས་ཟབ་ཅིང་ཡངས། །པད་དཀར་འཛིན་ལྟར་བཟང་པོའི་ལྷག་བསམ་ཅན། །རྒྱ་མཚོའི་རླབས་བཞིན་འཕྲིན་ལས་ཡོལ་མེད་པ། །ལག་ན་རྡོ་རྗེའི་རྗེས་འགྲོར་གསོལ་བ་འདེབས། །མི་མཐུན་ཕྱོགས་ལ་འཇིགས་མེད་གོ་ཆ་ཅན། །ཐུབ་བསྟན་ལང་ཚོ་རྒྱས་པའི་རྣམ་དཔྱོད་སྡེ། །སྐལ་བཟང་འགྲོ་བའི་ཉེར་འཚོ་བླ་ན་མེད། །རྗེ་བཙུན་བླ་མའི་ཞབས་ལ་གསོལ་བ་འདེབས། །དགེ་དེས་གནས་སྐབས་འདོད་པའི་དོན་རྣམས་འགྲུབ། །ཚེ་རབས་ཀུན་ཏུ་མགོན་ཁྱོད་ཞབས་དྲུང་དུ། །སྐྱེས་ནས་མངོན་པར་མཐོ་དང་ངེས་ལེགས་ཀྱི། །དོན་གཉིས་ལྷུན་གྱིས་གྲུབ་པར་བྱིན་གྱིས་རློབས། །སྲིད་ཞིའི་ཕུན་ཚོགས་སྩོལ་བའི་(༢༡བ)
ཡི་དམ་ལྷ། །རྒྱལ་བ་ཀུན་ཡུམ་རྗེ་བཙུན་སྒྲོལ་མ་ཡི། །རྨད་བྱུང་མཚན་གྱི་མིང་ལྡན་རྗེ་འབངས་རྣམས། །ལྷག་པའི་ལྷ་དེས་རྗེས་སུ་འཛིན་པར་ཤོག །བཅོམ་ལྡན་ལྷ་མོ་གཟུངས་ཆེན་གྲྭ་ལྔ་ཡི། །ཐུགས་རྗེའི་འོད་ཀྱིས་བར་ཆད་མུན་བསལ་ཏེ། །རིགས་བརྒྱུད་འཕེལ་ཞིང་བདེ་བར་བཙའ་བ་སོགས། །ལེགས་ཚོགས་བྱེ་བའི་སྣང་བ་འབར་གྱུར་ཅིག །ཅེས་གསོལ་འདེབས་སྨོན་ལམ་དང་བཅས་པ་ཞིག་དགོས་ཞེས་དཔོན་མོ་ཕུན་ཚོགས་སྒྲོལ་མས་སྐུལ་བའི་ངོར་ཟ་ཧོར་གྱི་བནྡེས་སྦྱར། །རྩ་བརྒྱུད་བླ་མ་ཡི་དམ་ལྷ་ཚོགས་དང༌། །དཔའ་བོ་མཁའ་འགྲོ་ཆོས་སྐྱོང་སྲུང་མ་ཡིས། །བདག་གི་ནད་གདོན་བར་ཆད་ཀུན་ཞི་ཞིང༌། །བསམ་པའི་དོན་ཀུན་ལྷུན་གྱིས་གྲུབ་པར་མཛོད། །ཅེས་པ་འདི་ནི་མདར་པ་ངག་དབང་ཕུན་ཚོགས་ལྷུན་གྲུབ་བརྡ་སྤྲོད་པ་ཙནྡྲ་པའི་སློབ་གཉེར་སྐབས་བར་ཆད་མི་འཇུག་པའི་ངག་འདོན་ཞིག་དགོས་ཚུལ་བྱུང་བ་ལྟར་བྲིས། །བཟང་པོའི་བསྐལ་པ་ཚིག་མདའི་ལམ་ཡངས་པོར། །མཛད་བཟང་ཡོངས་འདུའི་འཁྲི་ཤིང་གཡུར་ཟ་བ། །བྱམས་བརྩེའི་མཚན་གྱི་ལོ་འདབས་ཕང་ཕུང་ཅན། །མི་ཕམ་ཕན་དང་བདེ་བའི་གྲིབ་བསིལ་གནས། །མཐའ་ཡས་སྲིད་ཞི་དངས་པའི་ཉལ་འགྲོའི་མཚོར། །ཐུགས་རྗེའི་ཟླ་གཟུགས་བགྲང་ཡས་ལེགས་འཆར་བ། །རྩོལ་བྲལ་ལྷུན་གྱིས་གྲུབ་པ་སྟོབས་བཅུའི་རྩལ། །རྫོགས་པའི་གསང་གསུམ་སྒྱུ་འཕྲུལ་ཚད་བཟུང་ཅི། །འབྲུག་སྒྲ་དལ་གྱིས་རྒོད་ཚེ་གཙུག་ཕུད་ཅན། །དགའ་(༢༢ན)
བའི་སྒྲོ་གཤོག་ཟླུམ་པོར་སྒྱུར་བྱེད་ན། །བདེན་ཚིག་སྨྲེང་དུ་གསོལ་ཚེ་རྒྱལ་བ་ཀུན། །བྱིན་རླབས་འཇུག་པའི་སྣང་བ་ཅིས་མི་དཀར། །སྣ་ཚོགས་ཆུ་སྐྱེས་གྲངས་བཞིན་འགྲོ་བའི་བློ། །མཆོག་དམན་བར་མའི་ངང་ཚུལ་ཇི་སྙེད་པ། །བརྒྱད་ཁྲི་བཞི་སྟོང་ཆོས་ཀྱི་གྲུ་ཆར་ཆེས། །གཏན་བདེའི་སྣང་བ་རབ་བཀྲའི་འདབ་མ་འཛུམ། །དེ་ཕྱིར་སྲིད་མཚོ་སྒྲོལ་བའི་གྲུ་བོ་ཆེ། །ཐུབ་དབང་རྗེས་ཞུགས་རིས་མེད་གྲུབ་པའི་མཐའ། །ངེས་ལེགས་ནོར་བུ་འདྲེན་པའི་སྙིང་སྟོབས་ཅན། །མ་ལུས་ཐོས་བསམ་རིན་ཅེན་གླིང་བགྲོད་ཤོག །འཇམ་དཔལ་རྡོ་རྗེ་ཀུན་མཁྱེན་ཙོང་ཁ་པའི། །མཁྱེན་དཔྱོད་རྣམ་པར་རབ་ཡངས་མཚོན་རྣོན་པོས། །སྲིད་ཞིའི་འཆིང་རྒྱ་གཅོད་པའི་རིང་ལུགས་མཆོག །དཀར་ཕྱོགས་ཟླ་བའི་ཆ་ལྟར་འཕེལ་བར་ཤོག །ལེགས་བཤད་ནོར་བུ་སྐྱུག་ལ་འཆད་པའི་མགྲིན། །ཤེས་རབ་རྣམ་ཐོས་བུ་ཡིས་ཉེར་བཙིར་བས། །འབད་མེད་ཆར་འབེབ་ཡིད་བཞིན་དབང་གི་རྒྱལ། །མི་ཤེས་དབུལ་ཕོངས་སེལ་བའི་གན་མཛོད་ཅན། །མཁས་དབང་བིཤྭ་ཀརྨའི་ལག་ཉལ་གྱིས། །ལོག་རྟོགས་ཉི་མའི་དཀྱིལ་འཁོར་བཅུ་གཉིས་འཆར། །རྡར་བྱེད་དངོས་སྟོབས་རིགས་ལམ་རྩོད་པའི་མཚོན། །ཐུབ་བསྟན་ནི་རུ་ཀ་ཡི་འདོད་པ་འཇོ། །ངོ་མཚར་ཙྪནྡྷའི་སྲད་བུ་ལ་བརྒྱུས་པ། །གཙུག་ལག་བཻཌཱུར་སེར་པོ་སྤེལ་བའི་ཕྲེང༌། །ལེགས་བཤད་རྩོམ་ལ་སྤོབས་པ་དགེ་བ་ཅན། །བློ་བསལ་བསྟན་འཛིན་དབྱར་མཚོ་ལྟར་འཕེལ་ཤོག །ཚེ་རིང་གནམ་གྱི་ཤེ་མོང་དཔུང་པ་ཡིས། །ཡངས་པའི་ནོར་འཛིན་(༢༢བ)
ཁྱོན་ལ་དབང་བསྒྱུར་བ། །ཆོས་ལྡན་རྒྱལ་པོའི་ཆབ་སྲིད་མངའ་ཐང་ཀུན། །ཉི་མོར་བྱེད་པའི་འོད་ལྟར་གསལ་གྱུར་ཅིག །གཞུང་མང་བརྒལ་བརྟག་དཔྱད་ལ་ཉེར་བཟོད་པ། །ལུང་རིགས་སྨྲ་བ་མངའ་རིས་འདུས་པའི་གྲྭ །དགེ་འདུན་ཚོགས་བརྒྱས་ཐོས་བསམ་དཔལ་བེའུའི། །རི་མོ་སྙིང་ཁའི་ངོས་སུ་འཛིན་གྱུར་ཅིག །མཐུན་རྐྱེན་སོར་མོས་ལེགས་བསྐུལ་དགེ་བའི་རྒྱུད། །རྟག་ཏུ་སྙན་པར་སྒྲོག་པའི་གླུ་དབྱངས་ཅན། །རབ་འབྱམས་སྨྲ་བ་དགེ་ལེགས་དཔལ་ལྡན་སོགས། །ཕན་པར་སྒྲུབ་ཀུན་ཆེས་དཀར་འབྲས་སྨིན་ཤོག །ཀུན་གསལ་སྒེག་མོའི་དཀྱུས་རིང་མིག་ཟུར་གྱིས། །ཕ་མཐའ་རྙེད་མིན་བགྲང་ཡས་འགྲོ་བ་རྣམས། །ཚེ་རབ་ཀུན་ཏུ་ཕན་བདེའི་སྲོག་འཚོ་བ། །མཆོག་གསུམ་ཐུགས་རྗེའི་བདུད་རྩིས་སྦྲན་གྱུར་ཅིག །ཅེས་འོན་མདའ་སས་ཁང་རྩེའི་མངའ་རིས་གྲྭ་ཚང་གི་ཀུན་དགའ་ར་བར་ལྔ་པ་ནོ་མོན་ཁང་དགེ་ལེགས་དཔལ་ལྡན་གྱིས་བྱམས་མགོན་གྱི་སྐུ་བརྙན་བཞེངས་དུས་འདོད་གསོལ་གྱི་སྨོན་ལམ་ཤིས་བརྗོད་དང་བཅས་པ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་དེ་ཕྲལ་དུ་བྲིས། །མཆོག་གསུམ་ཐུགས་རྗེའི་སྙིང་པོ་དཔག་བསམ་ལྗོན། །དངོས་གྲུབ་འདོད་པ་འཇོ་བ་དབང་གི་རྒྱལ། །བསམ་པའི་རེ་སྐོང་ཡིད་བཞིན་ནོར་བུའི་ཆར། །རྒྱ་མཚོའི་རླབས་ལྟར་ཡོལ་བ་མེད་གྱུར་ཅིག །ཕུལ་བྱུང་ལེགས་བྱས་རླུང་གིས་ཉེར་དྲངས་པ། །ཚེ་དཔལ་སྟོབས་འབྱོར་མ་ལ་ཡ་ཡི་དྲི། །རྒུད་པའི་ཚ་གདུང་མ་ལུས་རབ་བཅོམ་ནས། །ཕན་(༢༣ན)
བདེའི་གྲིབ་སིལ་དག་ལ་ངལ་གསོར་ཤོག །མངོན་པར་མཐོ་རྟེན་རིན་ཆེན་ཐེམ་སྐས་ལ། །འཛེགས་ནས་ངེས་པར་ལེགས་པའི་ཁང་བཟང་དུ། །རབ་ཞུགས་རང་གཞན་དོན་གཉིས་ལྷུན་གྲུབ་པ། །དཔལ་ལྡན་སྟོབས་བཅུའི་གོ་འཕང་ཐོབ་པར་ཤོག །ལེགས་བྱས་རྒྱ་མཚོར་བྱིང་བ་གདེང་ཅན་དབང༌། །རྨད་བྱུང་འདོད་རྒུ་མ་ལུས་འབྱུང་བའི་གཏེར། །ལུས་སེམས་བདེ་བའི་དཔལ་ལ་ལོངས་སྤྱོད་པ། །ལེགས་ལྡན་དཔྱིད་ཀྱི་དཔལ་མོ་བཞད་པར་ཤོག །དག་པ་དོན་དམ་མཁའ་ཁྱབ་སྤྲོས་བྲལ་ཡང༌། །ཀུན་རྫོབ་རྟེན་ཅིང་འབྲེལ་འབྱུང་སླུ་མེད་པས། །བླ་མ་ཡི་དམ་ཆོས་སྲུང་བྱིན་རླབས་ཀྱིས། །སྨོན་པའི་གནས་ཀུན་ཇི་བཞིན་འགྲུབ་པར་ཤོག །ཅེས་པ་འདི་ཡང་ཡར་ཀླུངས་སྡེ་པ་བྱིང་པ་བདེ་ལེགས་ཀྱི་སྐུལ་བའི་ངོར་ཟ་ཧོར་གྱི་བནྡེས་ཆོ་འཕྲུལ་མཆོད་པའི་དུས་ཀྱི་ཐུན་མཚམས་ཀྱི་ངེས་པ་ཞིག་ལ་བྲིས། །བགྲང་ཡས་མཉམ་མེད་སངས་རྒྱས་དེའི་གསུང་ཆོས། །དགེ་འདུན་ཚངས་དབང་དྲག་པོ་གཙུག་ན་ཟླ། །ལྷ་མིའི་དྲང་སྲོང་བདེན་ཚིགས་གྲུབ་རྣམས་ཀྱིས། །སྨོན་པའི་འབྲས་བུ་ཇི་བཞིན་སྨིན་པར་མཛོད། །སྣ་མང་གྲགས་པའི་རྔ་གསང་ཆེར་སྒྲོག་པ། །ངོ་མཚར་སྤྲུལ་པའི་དབྱར་གྱི་ལང་ཚོའི་འབྲས། །འཇམ་མཉེན་ཕང་ཕུང་གཡོ་བའི་རྒྱལ་མཚན་མཆོག །སྐྱེ་སྲིད་ཟློས་གར་གཡུར་དུ་ཟ་བར་ཤོག །གཞན་ཕན་འགྲོ་ལ་རྗེས་སུ་ཆགས་པའི་འཕྲུལ། །ལེགས་བྱས་གན་མཛོད་རྣམས་ལ་དབང་བསྒྱུར་ནས། །ཡང་སྲིད་ས་(༢༣བ)
མོས་འདབ་བརྒྱ་གྲོལ་བྱེད་པ། །བདག་གཞན་དོན་གྱི་སྙིང་པོ་ལྷུན་གྲུབ་ཤོག །མོས་ལྡན་གདུལ་བྱའི་དགའ་སྟོན་རབ་འཕེལ་བ། །ཕུན་སུམ་ཚོགས་པའི་དབང་ཕྱུག་ཡོན་ཏན་མཐུས། །ཞི་བའི་ཚུལ་ལས་ཉེར་འགོང་འཕྲིན་ལས་ཀྱི། །ཀུནྡའི་ཕོན་པོའི་དོ་ཤལ་མཛེས་གྱུར་ཅིག །ཕུལ་བྱུང་རྣམ་པར་དཀར་བའི་ཀུན་གསལ་ངོས། །ངོ་མཚར་སྐྱེས་རབས་དབང་པོའི་གཞུ་རིས་ཅན། །འདྲེན་བྱེད་ཡུལ་གྱི་བདུད་རྩི་བླ་ན་མེད། །ཡིད་ཀྱི་མོས་ངོར་འགྲུབ་པའི་བཀྲ་ཤིས་ཤོག །ཅེས་སྤྲུལ་སྐུ་གྲགས་པ་རྒྱལ་མཚན་གྱི་སྐུ་སྐྱེ་མྱུར་བྱོན་གྱི་སྨོན་ལམ་ཚིགས་བཅད་འདི་ནི་བྱམས་པ་ཀུན་བཟང་གིས་ནན་གིས་སྐུལ་བའི་ངོར་ཟ་ཧོར་གྱི་བནྡེས་བྲིས། །རྒྱལ་ཀུན་གསང་གསུམ་འཁོར་ལོའི་གན་མཛོད་ནས། །རྨད་བྱུང་འཕྲིན་ལས་ཡིད་བཞིན་དབང་གི་རྒྱལ། །རིས་མེད་འགྲོ་བ་ཀུན་ལ་འཇུག་པའི་རྫས། །རྒྱ་མཚོའི་རླབས་ལྟར་ཡོལ་བ་མེད་གྱུར་ཅིག །ཁྱད་པར་སངས་རྒྱས་གཉིས་པ་པདྨ་འབྱུང༌། །བདེ་ཆེན་གར་གྱི་ཉམས་ལྡན་བཀའ་བརྒྱད་ལྷ། །སྟོང་ཉིད་སྙིང་རྗེའི་རང་གཟུགས་གནམ་ཞལ་ཡུམ། །རྩ་གསུམ་ཐུགས་རྗེའི་དངོས་གྲུབ་ཆར་ལྟར་ཕོབ། །སྐྱབས་མཆོག་ཀུན་འདུས་མཁྱེན་བརྩེ་ནུས་པའི་སྨན། །སྣ་ཚོགས་ཐབས་ཀྱི་རོ་ནུས་ལེགས་བསྡེབས་པས། །མཁའ་མཉམ་རིགས་དྲུག་སེམས་ཅན་མ་ལུས་པའི། །སྡུག་བསྔལ་གསུམ་གྱི་ནད་ཀུན་དྲུངས་འབྱིན་ཤོག །རང་བདེ་དམན་ལམ་ཞི་བའི་ཆུ་འཛིན་ཀུན། །རབ་དཀར་ལྷག་བསམ་རླུང་(༢༤ན)
གིས་མཐར་བསྐྲད་ནས། །ཚོགས་གཉིས་མཁའ་ལ་སྐུ་གསུམ་ཉི་མོར་བྱེད། དོན་གཉིས་སྣང་བ་རྒྱས་པའི་དཔལ་ཐོབ་ཤོག །དཀོན་མཆོག་རིན་ཆེན་གསུམ་གྱི་བདེན་པའི་མཐུས། །རྣམ་དཀར་འཕྲིན་ལས་སྤེལ་བའི་རིག་པ་འཛིན། །འདི་ཕྱིའི་ལེགས་ཚོགས་མདུན་མ་ལྷུན་གྲུབ་པར། །སྨོན་ལམ་ཡོངས་འདུ་གཡུར་དུ་ཟ་གྱུར་ཅིག །རེ་ཞིང་བལྟོས་བྱར་གྱུར་པའི་སྐྱེ་བོ་ཀུན། །སྲིད་ཞིའི་རྒྱ་མཚོ་ཆེ་ལས་རབ་བསྒྲལ་ནས། །ཕན་དང་བདེ་བའི་འབྱུང་གནས་སངས་རྒྱས་ཀྱི། །གོ་འཕང་རིན་ཆེན་གླིང་དུ་བགྲོད་གྱུར་ཅིག །སྨོན་ལམ་ཚིགས་བཅད་མ་འདི་ལྟ་བུ་ཞིག་དགོས་ཞེས་འབྲི་གུང་པའི་ཆོས་བརྒྱུད་འཛིན་པ་རིག་འཛིན་དཀོན་མཆོག་འཕྲིན་ལས་ཀྱིས་སྐུལ་བའི་ངོར་ཟ་ཧོར་གྱི་བནྡེས་བྲིས། །མཁྱེན་བརྩེ་ནུས་པའི་མངའ་བདག་རྫོགས་སངས་རྒྱས། །དེའི་གསུང་སྙིང་པོ་ཞི་བ་ཆགས་བྲལ་ཆོས། །རིག་གྲོལ་གཉིས་ལྡན་འཕགས་མཆོག་དགེ་འདུན་སོགས། །མཆོག་གསུམ་དམ་པའི་མ་རྨད་ཐུགས་རྗེའི་མཐུས། །ངག་གི་དབང་ཕྱུག་རྗེ་བཙུན་ཙོང་ཁ་པའི། །གདུང་འཚོབ་འཇམ་དབྱངས་བདུན་བརྒྱུད་རིམ་བྱོན་ལས། །ཆོས་ཀྱི་རྒྱལ་མཚན་རྣམ་སྤྲུལ་ཉི་མོར་བྱེད། །ཐུབ་བསྟན་མཁའ་ལ་མྱུར་དུ་འཆར་བར་ཤོག །རྒྱལ་བའི་རིང་ལུགས་འཆི་མེད་དགའ་ཚལ་གྱི། །ངོ་མཚར་རྒྱན་མཆོག་སྐྱེས་རབས་ཡོངས་འདུའི་ཕྲེང༌། །སྐལ་ལྡན་གདུལ་བྱར་དབང་ཕྱུག་ཡོན་ཏན་གྱི། །འབྲས་བཟང་དགའ་སྟོན་(༢༤བ)
སྩོལ་ཕྱིར་ཆད་མེད་ཤོག །རྒྱལ་བསྟན་འོ་མའི་ཆུ་གཏེར་བསྲུབས་པ་ལས། །དགའ་ལྡན་བཤད་སྒྲུབ་རྩི་བཅུད་སྙིང་པོའི་གཏེར། །ཐོས་བསམ་སྒོམ་པས་ལོངས་སྤྱོད་འདུས་ཚོགས་ཀྱི། །རྣམ་དག་སྨོན་པའི་རེ་བ་སྐོང་བར་ཤོག །མཆེད་ཟླ་གཉིས་མེད་ཡིད་བཞིན་དབང་གི་ནོར། །རྒྱལ་མཚན་རྩེ་མོར་བཀོད་པ་ཇི་བཞིན་དུ། །སོམ་ཉི་དབུལ་ཕོང་སེལ་བའི་ཡང་སྲིད་ཀྱི། །རྣམ་འཕྲུལ་འདོད་རྒུའི་ཆར་ཆེན་འབེབས་པར་ཤོག །ལྷག་བསམ་ཆ་ཤས་རྫོགས་པ་ཟླ་བའི་གཟུགས། །རྙོག་བྲལ་འཕྲིན་ལས་རྫིང་བུར་རབ་བསལ་བས། །ཕན་དང་བདེ་སྐྱིད་ཨུཏྤལ་དཀར་པོའི་ཚལ། །དགའ་སྟོན་བསུ་བའི་འཛུམ་རླབས་བཞད་པར་ཤོག །རྩ་རྒྱུད་བླ་མ་ཡི་དམ་དཀྱིལ་འཁོར་ལྷ། །དམ་ཅན་ཆོས་སྐྱོང་སྲུང་མའི་ཚོགས་རྣམས་ཀྱིས། །དཔལ་ལྡན་བླ་མ་སྐལ་བཟང་སྐྱེ་དགུ་ཡི། །མགོན་དུ་བྱོན་པའི་བདེན་ཚིག་འགྲུབ་གྱུར་ཅིག །ཅེས་བ་སོ་སྤྲུལ་པའི་སྐུ་ངག་དབང་ཆོས་ཀྱི་དབང་ཕྱུག་བསྟན་པའི་རྒྱལ་མཚན་དཔལ་བཟང་པོའི་སྤྲུལ་སྐུ་གསལ་པོར་བྱོན་པའི་བདེན་ཚིགས་ཏུ་བརྗོད་པ་འདི་ནི་དམ་པ་གང་དེའི་སློབ་བུ་དད་ལྡན་འགའ་ཞིག་གིས་བསྐུལ་བར་བརྟེན་ཟ་ཧོར་གྱི་བནྡེས་དགའ་ལྡན་ཕོ་བྲང་དུ་སྦྱར། །ཆུ་གཏེར་རླབས་ལྟར་དུས་ལས་ཡོལ་མེད་པ། །མཆོག་གསུམ་ཐུགས་རྗེ་ཆེན་པོའི་བྱིན་རླབས་དང༌། །གྲངས་མེད་རྣམ་དཀར་དགེ་ཚོགས་བསྐྲུན་པ་སོགས། །མ་ལུས་སྡོམས་པ་དཔྱིད་ཀྱི་མངལ་ཡངས་པོར། །ཐབས་ཤེས་ཟུང་དུ་འཇུག་པའི་ཟ་མ་(༢༥ན)
ཏོག །ལེགས་བྱས་དང་མའི་ལང་ཚོ་དར་བབ་འབྲས། །གྲངས་མེད་སྤྲུལ་སྐུའི་མྱུ་གུ་གཡུར་ཟ་བ། །རིང་མིན་དུས་སུ་སྨིན་པའི་དགའ་སྟོན་སྩོལ། །རྣམ་པར་ལེགས་སྨོན་འདོད་དོན་མཁའ་དབྱིངས་ལ། །རྒྱལ་དང་དེ་སྲས་ཉན་རང་སློབ་མར་བཅས། །ཀུན་གྱི་བདེན་ཚིགས་བསིལ་བྱིན་མཁན་པོ་ཡི། །ངལ་གསོའི་ག་བུར་གཟེགས་མ་སྤྲོ་བར་ཤོག །ཅེས་སེམས་དཔའ་ཆེན་པོ་ངག་དབང་ཕུན་ཚོགས་ཀྱི་སྤྲུལ་པའི་སྐུ་མྱུར་དུ་བྱོན་པའི་ཚིགས་སུ་བཅད་པ་འདི་ནི་གང་དེའི་གདན་ས་པ་ཏྲེ་བོ་སྐུ་སྐྱེ་དང་དབོན་པོ་རྒྱ་མཚོ་གཉིས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །འཆི་མེད་གྲུབ་པ་པདྨ་འབྱུང་གནས་དང༌། །འཁོར་ལོའི་བདག་ཉིད་བདེ་གཤེགས་ཀུན་འདུས་ལྷ། །བདུད་དཔུང་ཚར་གཅོད་ཆོས་སྲུང་གཏེར་བདག་ཚོགས། །རྨད་བྱུང་བྱིན་རླབས་ཐུགས་རྗེའི་མཐུ་དཔུང་གིས། །རིག་འཛིན་པདྨ་དབང་གི་གྲོང་ཁྱེར་མཆོག །དཔལ་འབྱོར་འཕྲིན་ལས་རབ་ཏུ་རྒྱས་པའི་སྡེར། །ཉེར་འཚེས་གླགས་ལྟའི་བར་ཆོད་ཀུན་ཆོམས་ལ། །འཆི་མེད་རྡོ་རྗེའི་སྲོག་ཤིང་བརྟན་པར་མཛོད། །མཆོག་གསུམ་ཐུགས་རྗེའི་བདུད་རྩི་གཟེགས་མ་ཡིས། །བཞི་བརྒྱ་རྩ་བཞིའི་ནད་རྣམས་ཡོངས་བཀྲུས་ནས། །ཕུན་ཚོགས་ལང་ཚོའི་གཟུགས་སྐུར་རབ་རྒྱས་པས། །དུས་ཀུན་བདེ་བའི་དཔལ་ལ་སྤྱོད་གྱུར་ཅིག །ཐུགས་རྗེའི་འོད་སྟོང་འབར་བ་གཏན་གྱི་སྐྱབས། །བདེན་ཚིག་སྨོད་པ་གྲུབ་པའི་དྲང་(༢༥བ)
སྲོང་དང༌། །མཐུ་ལྡན་སྲུང་མ་སྡེ་བརྒྱད་ཚོགས་རྣམས་ཀྱིས། །དེང་འདིར་འདོད་པའི་རེ་བ་སྐོང་བར་མཛོད། །བཀྲ་ཤིས་ཟླ་བ་རྒྱས་པ་ཡར་གྱི་ངོར། །བཟའ་སྐར་འཕྲོད་ཀྱི་དགེ་བའི་དུས་བཟང་པོར། །རྩ་གསུམ་ཐུགས་རྗེ་བསྐུལ་བའི་བདེན་ཚིགས་དབྱངས། །རབ་སྙན་ཡིད་ཀྱི་འདོད་པ་འཇོ་བར་ཤོག །དཀྱིལ་འཁོར་རྒྱ་མཚོའི་བདག་ཉིད་རིག་འཛིན་ཆེན་པོ་ཟུར་འཇམ་དབྱངས་ཀུན་དགའི་མཚན་ཅན་གཞན་སྣང་དུ་བསྙུན་པའི་ཚུལ་བསྟན་པར་བར་ཆད་ཀྱི་གཡུལ་ལས་རྒྱལ་བའི་བདེན་ཚིག་གི་སྨོན་ལམ་འདི་ནི་ཟ་ཧོར་གྱི་བནྡེས་སྒོ་གསུམ་མི་འདའ་བའི་བཅད་རྒྱའི་སྐབས་ཐུན་མཚམས་ཀྱི་ངེས་པ་ཞིག་ལ་སྦྱར་བའོ། །ཐུབ་པའི་བསྟན་ལ་འཆད་རྩོད་རྩོམ་པའི་ངག །སྨྲ་བའི་དབང་ཕྱུག་པིར་གྱི་སྒྱུ་དྲའི་གར། །ལེགས་བཤད་རི་མོ་རྣམ་བཀྲའི་དམ་ཆོས་ཀྱི། །དུས་ཀུན་དགེ་ཞིང་ཤིས་དེར་གསོལ་བ་འདེབས། །ལེགས་པར་བཤད་པ་ཆོས་འཁོར་འདུས་སྡེའི་གླིང༌། །གང་གི་དམ་པའི་ཆོས་ཀྱི་ཁྲི་ཆེན་པོར། །མགོན་ཁྱོད་ཡུན་དུ་འཚོ་ཞིང་རབ་བཞེས་ནས། །ཆོས་ཚུལ་རྒྱུན་ཆད་མེད་པར་སྤེལ་གྱུར་ཅིག །ལེགས་བཤད་ཆོས་འཁོར་གླིང་པའི་སློབ་དཔོན་ངག་དབང་བཀྲ་ཤིས་ཀྱི་གསོལ་འདེབས་བརྟན་བཞུགས་དང་བཅས་པ་འདི་ནི་གྲྭ་དམངས་གཉེར་པ་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །བློ་ཆེན་མཆོག་གིས་སྐལ་བཟང་འགྲོ་བ་ཀུན། །བྱང་གྲོལ་ལམ་དུ་འཁྲིད་པའི་གྲགས་སྙན་རྔ། །སྲིད་(༢༦ན)
རྩེར་བརྡུང་བ་འཇམ་དཔལ་སྙིང་པོ་ལ། །གསོལ་བ་འདེབས་སོ་ཐུགས་རྗེའི་ལྕགས་ཀྱུས་བཟུང༌། །ངག་གི་དབང་ཕྱུག་རྒྱལ་བ་གཉིས་པ་དེའི། །རིང་ལུགས་འཛིན་པའི་དབྱིག་གི་བློ་གྲོས་མར། །རྣམ་དཀར་བཟང་པོའི་འཕྲིན་ལས་ནོར་བུའི་དཔྱ། །རྒྱ་མཚོའི་གོས་ཅན་ཀུན་ཏུ་ཁྱབ་དེར་འདུད། །མི་ཕྱེད་དང་བས་སྙིང་ནས་གསོལ་འདེབས་ན། །གནས་སྐབས་འགལ་རྐྱེན་ཉེར་འཚེ་ཀུན་ཞི་ཞིང༌། །མཐར་ཐུག་བླ་ན་མེད་པའི་ཡེ་ཤེས་ས། །མངོན་དུ་འགྱུར་བའི་དགེ་ལེགས་འཐོབ་པར་ཤོག །ཅེས་པ་ཡང་ཇ་སག་ཐུ་ཧོང་ཐའི་ཇིས་བསྐུལ་བ་ལྟར་ངག་དབང་བློ་བཟང་རྒྱ་མཚོས་སྦྱར་བའོ། །ཁྱབ་བདག་གར་གྱི་དབང་ཕྱུག་འཆི་མེད་ལྷ། །ཚེ་མཐའ་རྣམ་པར་ཡས་པའི་མགོན་མཆོག་གི །མ་རྨད་ཐུགས་རྗེའི་ག་བུར་གཟེགས་མ་ཡིས། །འཆི་བདག་ཚ་གདུང་གཡུལ་ལས་རྒྱལ་བར་མཛོད། །བསོད་ནམས་དཔུང་གིས་ནོར་འཛིན་ཡངས་པའི་ཁྱོན། །མངོན་པར་འདེགས་ལ་རྣམ་དཔྱོད་བརྩོན་པ་ཅན། །ནམ་ཡང་གཡོ་མེད་རི་དབང་ལྷུན་པོ་ལྟར། །རབ་བརྟན་རྡོ་རྗེའི་མཆེད་ཟླར་གྲུབ་གྱུར་ཅིག །སྲིད་མུན་ཉི་ཟླས་རབ་བཅིལ་བདེ་སྐྱིད་ཀྱི། །འོད་སྣང་བསྐལ་བར་ཡོངས་གསལ་དེ་སྲིད་དུ། ཁྲིམས་གཉིས་གདུག་དཀར་འཛིན་པ་མི་ཡི་དབང༌། །འགྱུར་མེད་གཡུང་དྲུང་ཁྲི་ལ་བརྟན་གྱུར་ཅིག །ཅེས་ཕྱག་མཛོད་ས་སྐྱོང་བསོད་ནམས་རབ་བརྟན་གྱི་བརྟན་བཞུགས་ཚིགས་སུ་བཅད་པ་འདི་ནི་ངམ་རིང་མཁན་པོ་ཆོས་རྗེ་ལོ་(༢༦བ)
ཆེན་གྱིས་དོན་གཉེར་ཆེན་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །དཀོན་མཆོག་ཐུགས་རྗེ་ཆེན་པོའི་ནམ་མཁའ་ལས། །མངོན་མཐོའི་རྟེན་བཟང་རླུང་གི་རྒྱལ་མཚན་ཅན། །ཕན་དང་བདེ་ཆེན་འོད་མདངས་ཡོངས་འཚེར་བའི། །དགའ་སྟོན་མཆོག་ལ་མྱུར་དུ་སྤྱོད་པར་ཤོག །ཁྱད་པར་གར་གྱི་དབང་ཕྱུག་འོད་དཔག་མེད། །གཉིས་མེད་སྤྲུལ་པའི་རྣམ་རོལ་པད་དཀར་འཆང༌། །རྨད་བྱུང་བྱིན་རླབས་ཤིང་རྟས་ཉེར་དྲངས་ཏེ། །བདེ་བ་ཅན་དུ་སྲིད་པ་འཛིན་པར་ཤོག །ཞིང་དེར་སྐྱེས་ནས་སྣང་བ་མཐའ་ཡས་ཀྱི། །མཚན་དཔེའི་སྣང་བརྙན་མིག་གི་བདུད་རྩིར་བྱས། །དྲུག་བཅུའི་གསུང་དབྱངས་ལས་འོངས་ཐེག་པ་ཆེའི། །ཆོས་ལ་ཐོས་བསམ་སྒོམ་པས་སྤྱོད་པར་ཤོག །ཚུལ་དེས་ཁྱོད་ཐུགས་བླ་མེད་ཡེ་ཤེས་ཆེ། །རྣམ་པ་ཐམས་ཅད་མཁྱེན་པ་མངོན་བྱས་ཏེ། །འགྲོ་རྣམས་སྲིད་པའི་རྒྱ་མཚོ་ལས་སྒྲོལ་བ། །ཆོས་ཀྱི་རྒྱལ་སྲིད་ཆེན་པོ་ཐོབ་པར་ཤོག །སླུ་མེད་སྐྱབས་ཀུན་དབང་པོར་ལེགས་བཞུགས་ནས། །བདེན་པའི་ཚིགས་ཏུ་རབ་བརྗོད་ནུས་པ་དང༌། །རྟེན་ཅིང་འབྲེལ་བར་འབྱུང་བའི་རྒྱུ་འབྲས་མཐུས། །ཇི་ལྟར་སྨོན་པ་དེ་བཞིན་འགྲུབ་གྱུར་ཅིག །ཅེས་དཔོན་ནམ་མཁའ་རྒྱལ་མཚན་དག་པའི་ཞིང་དུ་སྐྱེ་བའི་སྨོན་ལམ་འདི་ནི་ཧོར་ཆོས་རྗེ་ངག་དབང་ཕུན་ཚོགས་སྤུན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཇའི་སང་སྡེ་པའོ། །ཕྱག་ན་འཆི་བ་མེད་པའི་བདུད་རྩིའི་རྒྱུན། །ལེགས་(༢༧ན)
འཁྱིལ་བུམ་པ་བཟང་པོས་འགྲོ་བ་ཀུན། །བདེ་བའི་ངལ་གསོར་དབུངས་ཕྱུང་བཅོམ་ལྡན་འདས། །ཚེ་མཐའ་ཡས་དེའི་ཐུགས་རྗེའི་བྱིན་རླབས་དང༌། །མོས་ལྡན་རྣམས་ཀྱི་བསམ་པ་རྩེ་གཅིག་ཏུ། །གདུང་ཤུགས་དྲག་པོས་བདེན་པའི་ཚིག་བརྗོད་ཅིང༌། །འདུས་སྡེའི་ཚོགས་ཀྱིས་སྨོན་ལམ་ལེགས་བཏབས་པ། །སླུ་མེད་རྟེན་ཅིང་འབྲེལ་བར་འབྱུང་བའི་མཐུས། །ངག་གི་རང་བཞིན་མཐའ་ཡས་ཆོས་ཀྱི་སྒྲར། །སྒྲོག་ལ་རབ་དབང་ཡང་དག་དགེ་བའི་བཤེས། །ལེགས་ཚོགས་ལམ་སྟོན་མི་མཐུན་ལས་རྒྱལ་བའི། །མཚན་ལྡན་མགོན་ཁྱོད་རྟག་ཏུ་ཞབས་བརྟན་ཤོག །སེང་གེས་བཏེག་པའི་འགྱུར་མེད་གཡུང་དྲུང་ཁྲི། །རྟག་བརྟན་སྣ་ཚོགས་རྡོ་རྗེས་ལེགས་མཚན་པར། །ལྷ་དབང་ཕྱོགས་ལས་རྣམ་པར་རྒྱལ་བ་ཡི། །ཡང་སྲིད་སྤྲུལ་པའི་ཟློས་གར་ཞབས་བརྟན་ཤོག །དཀོན་མཆོག་བྱིན་རླབས་ཆོས་སྐྱོང་སྲུང་མའི་མཐུ། །དྲང་སྲོང་རིག་འཛིན་གྲུབ་པའི་བདེན་ཚིགས་གིས། །འདོད་དོན་ཨ་མྲའི་འབྲས་བཟང་ཡོངས་སྨིན་པར། །སྤྱོད་པའི་བསྐལ་པ་བཟང་པོ་བདག་གྱུར་ཤོག །ཅེས་དེ་མོ་སྤྲུལ་སྐུ་ངག་དབང་དགེ་ལེགས་རྒྱལ་མཚན་གྱི་བརྟན་བཞུགས་ཤློ་ཀ་ལྔ་ཙམ་ཡོད་པ་ཞིག་དགོས་ཞེས་དེ་མོ་དབོན་པོ་ཕུན་ཚོགས་དང་ནོར་བུ་སྤུན་གཉིས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་དགའ་ལྡན་ཕོ་བྲང་དུ་སྦྱར། །མཐོང་ཐོས་དྲན་དང་རེག་པས་ཕན་བདེའི་དཔལ། །སྩོལ་མཛད་སངས་རྒྱས་དེ་གསུང་སློབ་མར་བཅས།(༢༧བ)
།བདེན་ཚིག་གྲུབ་པ་ལྷ་དང་དྲང་སྲོང་སོགས། །ཕུལ་བྱུང་ཐུགས་རྗེ་ནུས་པར་ལྡན་པའི་མཐུས། །རབ་ཡངས་ནོར་འཛིན་ཁྱོན་ལ་བསོད་ནམས་ཀྱིས། །མངོན་པར་དབང་བསྐུར་ཆོས་སྲིད་ལེགས་ཚོགས་རྣམས། །དཀར་ཆའི་ཟླ་བ་ལྟ་བུར་འཕེལ་མཛད་པ། །མི་དབང་མཆོག་དེ་ཞབས་པད་བརྟན་པར་ཤོག །རྩ་གསུམ་བྱིན་རླབས་རླུང་གིས་བགེགས་རིགས་རྣམས། །ལེགས་བསལ་ཆོས་ལྡན་རྒྱལ་པོའི་ཉི་འོད་ཀྱིས། །མངའ་འབངས་བདེ་སྐྱིད་པད་དཀར་རབ་བཞད་ནས། །ཕུན་ཚོགས་དགའ་སྟོན་སྦྲང་རྩིར་སྤྱོད་གྱུར་ཅིག །ཅེས་ཕྱག་མཛོད་ས་སྐྱོང་བསོད་ནམས་ཆོས་འཕེལ་གྱི་བརྟན་བཞུགས་ཚིགས་སུ་བཅད་པ་འདི་ནི་བོད་ཡུལ་གྱི་རྡོ་རྗེ་གདན་ཕུན་ཚོགས་འདོད་རྒུའི་འབྱུང་གནས་ཆོས་འཁོར་དཔལ་གྱི་ལྷ་ས་བ་རུ་བཞི་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །ན་མ་ཨཱཪྻ་ཛི་ཏ་ནཱ་ཐེནཱརྠཱཿསི་དྡྷི་ཀུ་རྦནྟུ། བྱམས་བརྩེའི་ས་བོན་ཡོངས་སུ་སྨིན་པ་ལས། །གསེར་སྦྱངས་ཞུན་མའི་འཁྲི་ཤིང་གཡུར་ཟ་བ། །ངོ་མཚར་མཚན་དཔེའི་མེ་ཏོག་རྣམ་བཀྲའི་གཟུགས། །སྟོན་མཛད་རྒྱལ་ཚབ་མི་ཕམ་མགོན་པོ་ཀྱེ། །འཆར་ནུབ་སྤངས་པ་ཐུགས་རྗེའི་རྟ་ལྗང་འོད། །ཉེ་རིང་དང་བྲལ་སྐྱེ་རྒུའི་པད་ཚལ་ལ། །འཇུག་པ་མ་འདྲིས་མཛའ་བའི་དམ་བཅའ་གང༌། །ནམ་ཡང་གཏོང་བ་མིན་དེ་ཕན་བདེའི་དཔྱིད། །དེ་ཕྱིར་ཟླ་འོད་པད་རྩ་གངས་ཀྱི་རིས། །བསྒྲུན་པར་ནུས་མིན་རབ་དཀར་ལྷག་བསམ་གྱིས། །ཉེར་དྲངས་སྨོན་ལམ་བཏབ་པའི་འབྲས་(༢༨ན)
བུ་ཀུན། །རེ་བ་དོན་ལྡན་མཛོད་ཅིག་ལྷ་ཡི་ལྷ། །ཚེ་རིང་གནམ་གྱི་བརྒྱུད་འཛིན་ས་སྐྱོང་རིགས། །རིན་ཅེན་མིག་གི་མཚན་པའི་ཧོང་ཐའི་ཇི། །མཐོ་རིས་རྟེན་གྱི་ཐེམ་སྐས་ལ་འཛེགས་ནས། །གནས་ངན་འབྲས་བུར་སྤྱོད་ལས་ཐར་བར་ཤོག །མི་ཁོམ་གནས་སྤངས་དལ་འབྱོར་བཅོ་བརྒྱད་ཀྱི། །དམ་ཆོས་བསྒྲུབ་པའི་རྟེན་བཟང་ལུས་རྙེད་དེ། །སྡིག་ལྟུང་དྲི་མ་དྲུངས་ནས་ཕྱུང་བྱེད་པ། །དགེ་ཚོགས་གངྒའི་རྒྱུན་ལ་སྤྱོད་པར་ཤོག །ཁྱད་པར་སངས་རྒྱས་བསྒྲུབ་པའི་རྟེན་གྱི་མཆོག །མཐོ་རིས་ཡོན་ཏན་བདུན་དང་ལྡན་པའི་ལུས། །འགྲུབ་བྱེད་རྒྱུ་ལས་སླུ་མེད་འབྱུང་བའི་འབྲས། །མི་འཛད་ཁུར་གྱིས་དུད་པའི་དཔལ་ཐོབ་ཤོག །བདེ་བར་རློམ་ཡང་འགྱུར་བའི་སྡུག་བསྔལ་ཅན། །སྲིད་པ་འཁོར་བའི་རྒྱ་མཚོ་ཆེན་པོ་ལས། །ཐབས་ཤེས་གཟིངས་ཀྱིས་བསྒྲལ་ཏེ་གཏན་བདེའི་ལམ། །ཐར་པའི་རིན་ཆེན་གླིང་དུ་བགྲོད་པར་ཤོག །ཕ་མཐའ་རྙེད་མིན་དྲིན་གྱིས་བསྐྱངས་པའི་མ། །འགྲོ་རྣམས་འདོར་བར་མ་བཟོད་ཐེག་པ་ཆེའི། །རླབས་ཆེན་རྒྱལ་སྲས་སྤྱོད་པའི་གོམ་གཅིག་གིས། །རྣམ་པ་ཐམས་ཅད་མཁྱེན་པའི་སར་བགྲོད་ཤོག །ཟབ་ཡངས་རྒྱུད་སྡེའི་མ་དྲོས་མཚོ་ཆེན་ལས། །སྨིན་བྱེད་དབང་གི་ཆུ་བོ་རྣམ་པ་བཞི། །བགྲོད་བྱེད་རིམ་གཉིས་རྒྱ་མཚོར་ལེགས་འཁྱིལ་བས། །ལྔ་ལྡན་ཡེ་ཤེས་རླབས་ཕྲེང་ཡོལ་མེད་ཤོག །ཟུང་འཇུག་ཡིད་བཞིན་ནོར་བུའི་ཟ་མ་ཏོག །སྐུ་བཞི་བདུད་རྩིའི་བཅུད་ཀྱིས་རབ་གཏམས་ནས། །རང་གཞན་དོན་གཉིས་འཆི་བ་མེད་པའི་སྲོག །ལེགས་གྲུབ་རིགས་ཀུན་བདག་པོར་(༢༨བ)
འགྱུར་བར་ཤོག །དྲི་མེད་རྣམ་པར་སྨོན་པ་དབང་གི་རྒྱལ། །མཆོག་གསུམ་ཀླུ་དབང་གདེངས་ཀར་མཛེས་པའི་ནོར། །འདོད་པའི་རེ་བ་མ་ལུས་སྐོང་བ་ཡིས། །དགའ་སྟོན་མཆོག་དེས་ནོར་འཛིན་ཁྱབ་གྱུར་ཅིག །ཅེས་རྒྱལ་བའི་བསྟན་པ་ལ་མི་ཕྱེད་པའི་དད་པ་ཅན་ནོར་འཛིན་སྐྱོང་བ་ཁར་ཁ་ཨེར་ཏི་ན་ཧོང་ཐའི་ཇི་ལྔ་པའི་ལམ་དུ་གྱུར་པའི་ཚེ་སྨོན་ལམ་ཚིགས་བཅད་བཅུ་སྐོར་ཞིག་དགོས་ཞེས་རྒྱལ་ཁང་རྩེ་སྤྲུལ་སྐུ་བློ་བཟང་བསྟན་འཛིན་རྒྱ་མཚོའི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར། །པྲ ཤྭེ ཏཱ ནྟཱ ཕ ལ པྲ ཎི དྷི། ཨ ཡཾ ཙ ནི ཛཱ ནཱཾ སུ ཁེ། པཱ ཀྭཱ ནྲ ཝ ཏི ཀྭཱ མ ཙ ། ཏྲི ར ཏྣེ ན སཽ ནྱཱ ཀུ རུ། རབ་དཀར་ཡིད་དགེའི་སྨོན་ལམ་འབྲས། །འདི་དང་གཏན་གྱི་བདེ་བ་རུ། །སྨིན་པའི་རེ་བ་དོན་ལྡན་པར། །མཛོད་ཅིག་སླུ་མེད་དཀོན་མཆོག་གསུམ།(༢༩ན)
།ཞེས་པ་འདི་ནི་སྟག་ལུང་ཕྱག་མཛོད་ངག་དབང་བཟང་སྦྱིན་གྱི་དད་རྟེན་དུ་ངེད་ཀྱི་འདྲ་འབག་སྟག་ལུང་ཞབས་དྲུང་ངག་དབང་བཀྲ་ཤིས་དཔལ་གྲུབ་ཀྱི་ཕྱག་བྲིས་མ་ཞིག་འདུག་པའི་རྒྱབ་ངོས་སུ་སྨོན་ལམ་ཚིགས་བཅད་ལག་བྲིས་མ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སུག་བྲིས་བྱས་པ་ཡིན་ནོ། །མཁྱེན་བརྩེ་ནུས་ལྡན་སངས་རྒྱས་དེ་གསུང་ཆོས། །སློབ་མར་བཅས་པའི་དཀོན་མཆོག་རིན་ཆེན་གསུམ། །སླུ་མེད་སྐྱབས་མགོན་ཐུགས་རྗེའི་བྱིན་རླབས་མཐུས། །རྣམ་དག་སྨོན་པའི་རེ་འབྲས་དོན་ལྡན་མཛོད། །དངོས་འབྱོར་གྱིས་མཚོན་དུས་གསུམ་བསགས་པ་ཡི། །རྣམ་དཀར་དགེ་ཚོགས་ས་བོན་ལེགས་སྨིན་པས། །བསོད་ནམས་མཐོ་རིས་ཚལ་དུ་མངོན་མཐོའི་རྟེན། །རབ་བརྟན་ཡོངས་འདུའི་ཁྲི་ཤིང་གཡུར་ཟར་ཤོག །ལས་ཉོན་མ་དག་དཀར་མིན་ལྕགས་ཀྱི་ཁམས། །ཐར་ལམ་གསེར་དུ་བསྒྱུར་བྱེད་དགེ་བའི་རྩིས། །གཏན་བདེ་ཟད་མི་ཤེས་པའི་འབྱོར་པའི་མཛོད། །ལོངས་སུ་སྤྱོད་པའི་སྐལ་བཟང་ཐོབ་པར་ཤོག །སྲིད་ཞིའི་མཐའ་བྲལ་སེམས་སྐྱེད་ཆུ་གཏེར་དབུས། །ཕྱིན་དྲུག་སྤྱོད་པའི་གདེངས་ཀ་གཡོ་བའི་རྩེར། །རྣམ་མཁྱེན་ནོར་བུའི་གཅོད་པན་འབར་བའི་གཟིས། །མཁའ་མཉམ་འགྲོ་ཀུན་འདོད་འཇོའི་བྱེད་པོར་ཤོག །བསོད་ནམས་དཔུང་པས་ས་ཆེན་ཆོས་བཞིན་དུ། །སྐྱོང་བའི་མཛད་བཟང་འཕེལ་ཞིང་རབ་བརྟན་པ། །གྲངས་རིང་སྐྱེ་བར་མངོན་མཐོ་ངེས་ལེགས་རྟེན། །ལེགས་བརྒྱུད་(༢༩བ)
བླ་མེད་བྱང་ཆུབ་ཐོབ་པར་ཤོག །ཅེས་པ་འདི་ཡང་ས་སྐྱོང་ཕྱག་མཛོད་བསོད་ནམས་རབ་བརྟན་དུས་ཀྱི་ཆོས་ཉིད་དུ་གྱུར་པའི་ཚེ་དབུས་གཙང་དུ་སེར་ཚོགས་ཁག་བརྒྱད་བཙུགས་སྐབས་འདུས་ཚོགས་རྣམས་ཀྱི་ཞལ་འདོན་དུ་ཟ་ཧོར་གྱི་བནྡེས་སྦྱར། །བདེ་བ་ཅན་དུ་གར་དབང་འོད་མཚན་འབར། །གྲུ་འཛིན་རྩེ་ན་འཕགས་མཆོག་འཇིག་རྟེན་དབང༌། །སིནྡྷུའི་རྒྱ་མཚོར་རིགས་འཛིན་པདྨ་འབྱུང༌། །སྐུ་གསུམ་དབྱེར་མེད་འཕྲིན་ལས་གངྒཱའི་རྒྱུན། །ཕྱག་ན་རྡོར་འཛིན་ནོར་བུའི་མཚན་འཆང་བའི། །ལྷག་བསམ་སྐལ་ལྡན་ཤིང་རྟས་ལེགས་དྲགས་པས། །སྒྲིབ་གཉིས་འབྲས་བུའི་དྲི་མ་ཀུན་བཀྲུས་ནས། །ཕན་བདེའི་རྒྱལ་མཚན་ཏོག་གི་འོད་འབར་ཤོག །རྒྱལ་དང་དེ་སྲས་སྐུ་གསུང་ཐུགས་རྟེན་བཞེངས། །འགྲོ་རྣམས་བདེ་བར་བགྲོད་བྱེད་ཟམ་པ་བཙུགས། །ཐོས་གྲོལ་ཡི་གེ་དྲུག་པའི་འཕྲིན་ལས་ཀྱི། །དགེ་དེས་མཁའ་མཉམ་འགྲོ་རྣམས་སྒྲོལ་བར་ཤོག །གནས་སྐབས་དམ་ཆོས་སྒྲུབ་པའི་མཐུན་རྐྱེན་འཕེལ། །མཐར་ཐུག་ཀ་དག་རིག་པའི་རང་ཞལ་མཐོང༌། །ལྷུན་གྲུབ་བྱ་རྩོལ་བྲལ་བའི་ཐུགས་རྗེ་ཡིས། །ཀུན་གྱི་འདོད་འཇོའི་ཡིད་བཞིན་དབང་པོར་ཤོག །དེ་ལྟར་སྒོ་གསུམ་གུས་འདུད་མཆོད་སྤྲིན་སྤྲོ། །སྡིག་བཤགས་དགེ་བ་ཀུན་ལ་རྗེས་ཡི་རང༌། །ཆོས་འཁོར་བསྐོར་བསྐུལ་རྟག་བཞུགས་གསོལ་བ་འདེབས། །དགེ་བ་མ་ལུས་རྣམ་མཁྱེན་རྒྱུ་རུ་བསྔོ། །ཞེས་པ་འདི་ནི་སྤྲུལ་སྐུ་ཕྱག་རྡོར་ནོར་བུས་བཀའ་འགྱུར་དང༌། སྤྱན་རས་གཟིགས་ཀྱི་གསེར་སྐུ་བཞེངས་ཤིང༌། མ་ཎི་དུང་(༣༠ན)
ཕྱུར་ཉི་ཤུ་རྩ་ལྔ་བཙུགས་པ། ལྕགས་ཟམ་མང་པོའི་ཞིག་གསོ་གྲུབ་པའི་དགེ་བ་རྫོགས་བྱང་དུ་སྤེལ་བའི་ཆེད་དུ་ཟ་ཧོར་གྱི་བནྡེས་སྦྱར་བའོ། །བྱིན་རླབས་འོད་དུ་འབར་བ་ཐུགས་རྗེའི་གཟིས། །འཁོར་མུན་གདུང་བ་འཕྲོག་པ་རིན་ཆེན་གསུམ། །བདེན་ཚིགས་ཆར་གྱིས་བསྐྲུན་པའི་ལེགས་བྱས་ཀྱིས། །གསེར་གྱི་མྱུ་གུ་ཡོངས་སྨིན་འབྲས་བཟང་སྩོལ། །བློ་གྲོས་རྣམ་པར་རབ་ཡངས་མངལ་ནང་དུ། །བསོད་ནམས་གསེར་སྒོང་སྦྲུམས་པའི་གདོང་བཞི་པ། །ཟླ་བ་རྒྱ་མཚོ་ལས་འཁྲུང་ཇི་བཞིན་དུ། །ཡོན་ཏན་བདུན་དང་ལྡན་པའི་སྲིད་འཛིན་ཤོག །ཁྲིམས་གཉིས་འདུས་པའི་ཚོགས་ཀྱི་རྩེ་གཅིག་ཏུ། །སྨོན་ལམ་རྣམ་དག་སྟོབས་ཀྱིས་མཚམས་སྦྱར་བ། །ཇི་བཞིན་ལྷུན་གྱིས་གྲུབ་པའི་སྐལ་བཟང་ལ། །མོས་ལྡན་སློབ་མར་བཅས་པས་སྤྱོད་གྱུར་ཅིག །ཅེས་ཆ་དཀར་ནོ་མོན་ཁང་བློ་གྲོས་རྒྱ་མཚོའི་སྤྲུལ་སྐུ་མྱུར་བྱོན་གྱི་སྨོན་ལམ་ཚིགས་སུ་བཅད་པ་འདི་ནི་དགེ་སློང་འོད་ཟེར་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །ཕྱག་ན་འཆི་བ་མེད་པའི་བདུད་རྩིའི་བཅུད། །ལེགས་འཁྱིལ་པདྨ་རཱ་གའི་བུམ་བཟང་གིས། །ཚེ་མཐའ་ཡས་པའི་དཔལ་སྟེར་བཅོམ་ལྡན་འདས། །བདེ་ལྡན་ཞིང་གི་མགོན་དེས་དགེ་ལེགས་སྩོལ། །ངག་གི་འདོད་འཇོ་དབང་ཕྱུག་ཡོན་ཏན་གྱིས། །བློ་བསལ་སྐལ་བཟང་རེ་སྐོང་ཡོངས་འཛིན་མཆོག །རྒྱ་མཚོའི་གོས་ཅན་ཉི་ཟླའི་འོད་སྣང་གིས། །(༣༠བ)
གསལ་བ་དེ་སྲིད་རྡོ་རྗེ་ལྟར་བརྟན་ཤོག །བདུད་སྡེའི་གཡུལ་ལས་རྒྱལ་བ་འཇིགས་མེད་ཀྱི། །བརྩེ་ལྡན་བྱམས་པའི་གོ་ཆ་རབ་བགོ་བ། །ཐུབ་བསྟན་བཤད་གྲུབ་ལང་ཚོ་རྒྱས་པའི་སྡེ། །རྗེ་བཙུན་བླ་མ་བསྐལ་བརྒྱར་ཞབས་བརྟན་ཤོག །དུས་དགྲའི་དབང་པོ་སྨྲ་མཁས་འཇམ་དཔལ་དབྱངས། །ཐུགས་གསང་དཔལ་གྱི་བེའུ་དགའ་བའི་ཉམས། །འཛུམ་ལྡན་ཚེམས་དཀར་མུ་ཏིག་འཕྲེང་མཛེས་པའི། །བཤེས་གཉེན་དམ་པ་ནམ་ཡང་གཡོ་མེད་ཤོག །སངས་རྒྱས་དེ་གསུང་སྲས་བཅས་བྱིན་རླབས་དང༌། །སླུ་མེད་ཕུན་ཚོགས་རྟེན་འབྲེལ་སྒོ་འཕར་ཕྱེ། །ལྷག་བསམ་དག་པའི་སྨོན་ལམ་མཚམས་སྦྱོར་གྱིས། །འདོད་པའི་འབྲས་བུ་ཡོངས་སུ་སྨིན་གྱུར་ཅིག །ཅེས་པ་འདི་ནི་གྲྭ་བསམ་དར་བ་བློ་བཟང་བསྟན་འཛིན་གྱིས་ཆེད་གཉེར་དུ་བསྐུལ་བ་ལྟར་ཟ་ཧོརགྱི་བནྡེས་པོ་ཏཱ་ལར་སྦྱར་བའི་ཡི་གེ་པ་ནི་འཇམ་དཔལ་ལོ། །ཨོཾ་ཨ་ཐ་ལཀྵྨི་སིདྡྷི་རསྟུ། བདེ་ལྡན་ངོ་མཚར་བཀོད་པའི་ཞིང་གི་མགོན། །གར་དབང་མཛོད་སྤུའི་འོད་ཟེར་སྟོང་འབར་གཟིས། །འཆི་བདག་བདུད་ཀྱི་མུན་འཇོམས་འཁོར་ལོ་གསུམ། །མི་གཤིག་རྡོ་རྗེའི་དཔལ་དུ་འགྲུབ་གྱུར་ཅིག །ངག་ལ་སྨྲ་བའི་ཆོས་ཀྱི་བཀྲ་ཤིས་དུང༌། །མགྲིན་པའི་འཁོར་ལོའི་དབུས་ན་གཡས་འཁྱིལ་བ། །དབང་ཕྱུག་བློ་བསལ་སྐལ་བཟང་རྒྱ་མཚོ་ལ། །ཐེག་གསུམ་ཆོས་འཁོར་བསྐོར་ཕྱིར་ཞབས་བརྟན་ཤོག །ཆེས་ཆེར་སྙིགས་པའི་དུས་ཀྱི་གླང་པོའི་དགྲར། །འཇིགས་མེད་ལྷག་བསམ་གདོང་ལྔའི་ང་རོའི་རྒྱུད། །ཞི་བདེའི་མཚོན་གྱིས་(༣༡ན)
གཞོམ་མིན་གོ་ཆ་མཆོག །ཐུབ་བསྟན་གངས་རིའི་སྤོ་ལ་བརྟན་པར་ཤོག །ལས་རླུང་དག་པ་དྷུ་ཏཱིའི་ལམ་ཡངས་པོར། །ཨ་ཧཾ་མི་གཤིགས་སྲོག་གི་ཀ་བ་ཅན། །འཇའ་ལུས་རྡོ་རྗེའི་ལང་ཚོ་རྒྱས་པའི་སྡེ། །གྲུབ་པའི་སྐལ་བ་བཟང་པོར་གཡོ་མེད་ཤོག །དུས་གསུམ་མ་ལ་ཡ་ཡི་ནགས་ཀླུང་ནས། །བསགས་པའི་དགེ་ཚོགས་ཀཏྤུ་ར་ཡི་དྲིས། །དཀར་མིན་འབྲས་བུའི་ཚ་གདུང་ཀུན་བཅིལ་ནས། །འགྲོ་རྣམས་བདེ་བའི་ངལ་གསོར་སྤྱོད་པར་ཤོག །ཆོས་སྲིད་ཟུང་དུ་འབྲེལ་བའི་ཉི་ཟླ་ཡི། །རྫོགས་ལྡན་སྣང་བ་གསར་པ་འོད་པོ་ཆེས། །ཡངས་པའི་ནོར་འཛིན་མ་ལུས་ཀུན་ཁྱབ་པས། །འདི་དང་གཏན་གྱི་ལེགས་ཚོགས་ལྷུན་གྲུབ་ཤོག །ཅེས་པ་འདི་ནི་དུས་ཞབས་པ་ཆེན་པོ་གྲྭ་ཕུག་པ་དཔལ་གྱི་སེང་གེའི་སྤྲུལ་པའི་སྐུ་ངག་དབང་སྙན་གྲགས་དཔལ་བཟང་པོའི་གསུང་གིས་ཉེ་བར་བསྐུལ་བ་ལ་རྟེན་ནས་ཟ་ཧོར་གྱི་བནྡེས་གཡར་ཁྲལ་ཙམ་དུ་བྲིས། །ཀུན་བཟང་སྣང་བ་མཐའ་ཡས་ཐུགས་རྗེའི་གར། །སིནྡྷུའི་རྒྱ་མཚོར་ལེགས་བསྒྱུར་པདྨ་འབྱུང༌། །རྩ་གསུམ་དཀོན་མཆོག་འདུས་པའི་བདག་ཉིད་ཀྱིས། །ཕུན་ཚོགས་སྨོན་ལམ་འབྲས་བུ་གྲུབ་པར་མཛོད། །གངས་ཅན་ལྷ་ཅིག་སྲས་པོ་ཏི་མུག་བཙན། །སྣ་ཚོགས་རང་སར་གྲོལ་བའི་ཡང་སྲིད་ཅན། །ཐེག་མཆོག་ཆོས་ཀྱི་སྙན་གྲགས་སྲིད་གསུམ་དུ། །ཁྱབ་མཛད་སྤྲུལ་སྐུའི་ཟླ་ཚེས་མངོན་གྱུར་ཤོག །བཀའ་ཕྱག་ཟུང་དུ་འཇུག་པའི་ཆུ་བོ་ཀུན། །མཁྱེན་(༣༡བ)
དཔྱོད་འཕྲིན་ལས་རྒྱ་མཚོ་ཆེར་བབས་པས། །ཡིད་སྲུབས་གཡུལ་ལས་རྣམ་པར་རྒྱལ་བའི་སྡེ། །སླར་ཡང་ཞིང་འདིར་སྲིད་པ་འཛིན་པར་ཤོག །དཀོན་མཆོག་གསུམ་དངོས་རིག་འཛིན་ཐོད་ཕྲེང་རྩལ། །འཇིག་རྟེན་གསུམ་མགོན་ཀྱུ་ར་རིན་པོ་ཆེ། །ཕུན་ཚོགས་བསྟན་པ་རིན་ཆེན་སྤེལ་བའི་ཕྱིར། །མཆོག་སྤྲུལ་གདུལ་བྱར་མངོན་སུམ་བསྟན་དུ་གསོལ། །སྙིགས་མར་སྤྱོད་པ་ལུས་མེད་གླགས་ལྟའི་དཔུང༌། །ནག་པོ་བདུད་ཀྱི་སྡེ་དང་བཅས་པ་རྣམས། །འཁོར་འདས་ཕྱག་རྒྱ་ཟིལ་གནོན་དུས་ཀྱི་དགྲར། །འཇམ་དཔལ་དྲག་པོ་ཁྲོས་པས་འཇོམ་པར་ཤོག །བླ་མ་ཡི་དམ་མཁའ་འགྲོ་ཆོས་སྲུང་དང༌། །དྲང་སྲོང་རིག་འཛིན་གྲུབ་པའི་མཐུ་སྟོབས་ཀྱིས། །སྨོན་ལམ་བཏབ་པའི་འབྲས་བུ་ཇི་བཞིན་དུ། །ལྷུན་གྲུབ་སྐལ་བ་བཟང་པོར་བདག་གྱུར་ཅིག །ཅེས་དཔལ་འབྲི་གུང་སྐྱུ་རའི་གདུང་ལས་སྐུ་འཁྲུང་ཤིང་རྒྱལ་དབང་པདྨའི་གདུང་འཚོབ་རིགས་འཛིན་ཆེན་པོ་ཆོས་ཀྱི་གྲགས་པ་འཕྲིན་ལས་རྣམ་པར་རྒྱལ་བ་དབང་པོའི་སྡེའི་མཆོག་གི་སྤྲུལ་སྐུ་མྱུར་བྱོན་གྱི་སྨོན་ལམ་ཚིགས་སུ་བཅད་པ་འདི་ནི། དམ་པ་གང་གི་ཞམ་འབྲིང་བ་ཕྱག་མཛོད་དཀོན་མཆོག་རྒྱལ་མཚན་གྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོས་པོ་ཏཱ་ལར་སྦྱར་བའོ། །དུས་གསུམ་སངས་རྒྱས་རྡོ་རྗེ་ཐོད་ཕྲེང་རྩལ། །བརྩེ་ཆེན་སྙིང་པོའི་ཞབས་དང་ཚར་པ་རྗེ། དགྱེས་མཛད་རྡོ་རྗེ་གུར་མགོན་གདོང་བཞི་པ། །(༣༢ན)
བླ་མ་ཡི་དམ་སྲུང་མར་བཅས་པ་དགོངས། འཁོར་ལོའི་མགོན་པོ་གདུལ་བྱའི་བསོད་ནམས་ཀྱི། །ཞིང་དུ་རྣམ་ཀུན་མཆོག་ལྡན་རྡོ་རྗེ་འཛིན། །མཁའ་སྤྱོད་འཆི་མེད་དགའ་མའི་གནས་ཆེན་ནས། །ཞིང་འདིར་སྲིད་པ་འཛིན་པར་བདག་བྱིན་རློབས། ཁྱད་པར་སྙན་རྒྱུད་ཟབ་མོ་སློབ་བཤད་ཆོས། ཁའུ་བྲག་རྫོང་བཞེད་སྲོལ་རིང་ལུགས་མཆོག །སྤེལ་ཕྱིར་མ་དག་འགྲོ་བ་མི་འདྲེན་ན། །ཐུགས་སྐྱེད་དམ་བཅའ་ཉམས་པར་མི་འགྱུར་རམ། །རྡོ་རྗེའི་རྣལ་འབྱོར་དབང་མོའི་ཞིང་ཁམས་དང༌། །ཟང་མདོག་དཔལ་གྱི་རི་བོའི་ཕོ་བྲང་ན། །བདེ་ཆེན་ཀློང་དུ་བཞུགས་ལས་བསྐུལ་བའི་གླུ། །གསོལ་འདེབས་དབྱངས་སུ་འཚེར་ལ་ཉེར་དགོངས་ཀྱེ། །གངས་ཅན་ཞིང་འདིར་སྤྲུལ་སྐུ་མྱུར་བྱོན་སྟེ། །སྤྱི་དང་བྱེ་བྲག་ཐུབ་བསྟན་རབ་སྤེལ་ནས། །བདག་སོགས་གདུལ་བྱའི་རེ་བ་ལེགས་སྐོང་བ། །ཡིད་བཞིན་དབང་གི་རྒྱལ་པོ་འགྲུབ་པར་ཤོག །འ་ཞའི་རིགས་ལས་ཁྱབ་བདག་རྡོ་རྗེ་འཛིན་པ་མགོན་པོ་བསོད་ནམས་མཆོག་ལྡན་ཞིང་འདིའི་སྐུའི་བཀོད་པ་ཉེ་བར་བསྡུས་པའི་དུས་འཕགས་པ་མཆེད་ཀྱི་དྲུང་དུ་སྤྲུལ་སྐུ་འབྱོན་མི་འབྱོན་གྱི་བརྟག་པ་ལན་གཉིས་སུ་བྱས་པར་མཁའ་སྤྱོད་སོགས་དག་པའི་ཞིང་ལས་བོད་ཡུལ་འདིར་འབྱོན་པའི་རྟེན་འབྲེལ་གྱི་སྒོ་ཕྱཻ་བ་ཞིག་མ་བྱུང་རུང་ཉང་སྟོན་རིགས་སྔགས་འཆང་བ་མཁས་གྲུབ་ཆེན་པོ་སྨན་ལུང་པ་བློ་གྲོས་མཆོག་གི་རྡོ་རྗེའི་གསུང་གིས་ནན་གྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་འཕགས་པ་མཆེད་དང༌། ཨྱོན་ཆེན་པོའི་(༣༢བ)
སྐུ་རྟེན་བསོད་ནམས་དཔལ་འབར་གྱི་དྲུང་དུ་གསོལ་བ་བཏབ་ཏེ་སྦྱར་བའོ། །གསུང་ངག་ཆད་མེད་དབང་བཞིའི་མཐོ་རིས་ཆབ། །རྣམ་དཔྱོད་བློ་གྲོས་ལྟོ་བར་དོག་མིན་ཀྱང༌། །སྐལ་བཟང་རྒྱ་ཆེན་གདུལ་བྱའི་མཚོར་འབབ་པ། །དྲང་སྲོང་རྡོ་རྗེ་འཛིན་པར་གསོལ་བ་འདེབས། །ཨ་ཧཾ་མི་ཤིགས་འཆི་མེད་རྡོ་རྗེའི་སྲོག །གྲུབ་པའི་རིགས་འཛིན་སྐུ་རུ་བཤེས་གཉེན་ཁྱོད། །བཞེངས་ཏེ་སྟུག་པོ་བཀོད་པའི་མགོན་པོ་བཞིན། །འཁོར་བ་མཐའ་ཅན་དེ་སྲིད་བཞུགས་གྱུར་ཅིག །ཅེས་པ་འདི་ནི་ཐུན་མོང་དང་ཐུན་མོང་མ་ཡིན་པའི་རིག་པའི་གནས་མང་པོར་བལྟ་བའི་བློ་མིག་རྣམ་པར་ཡངས་པའི་གླང་བུ་བ་དགྲ་འདུལ་ཚེ་རིང་གིས་རྒྱུན་ཁྱེར་ཉུང་ངུ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་རང་བྱུང་འཕགས་པ་མཆེད་ཀྱི་དྲུང་དུ་དགེ་སྦྱོར་གྱི་ལུགས་སུ་གནས་པའི་ཐུན་མཚམས་ཞིག་ལ་བྲིས་པ་སིདྡྷི་རསྟུ། །བདུད་བཞིའི་གཡུལ་ལས་རྣམ་པར་རྒྱལ་བ་ཡི། །ཚེ་མཐའ་ཡས་དང་ཡིད་བཞིན་འཁོར་ལོ་སོགས། །འཆི་མེད་འདོད་པའི་འབྲས་སྟེར་དཔག་བསམ་དབང༌། །ལྷ་མཆོག་རྣམས་ཀྱིས་བསམ་དོན་ལྷུན་གྲུབ་མཛོད། །ལུས་ངག་ཡིད་གསུམ་སྨིན་ནུས་དབང་གི་ཆུ། །རྒྱུན་ཆད་མེད་པས་བློ་གསལ་སྐལ་བཟང་རྣམས། །ཚིམ་བྱེད་རྣམ་དཀར་འཕྲིན་ལས་རྒྱ་མཚོ་ཡི། །རླབས་ཕྲེང་ཡོལ་བ་མེད་པར་ཞབས་བརྟན་ཤོག །རབ་བརྟན་སྣ་ཚོགས་རྡོ་རྗེ་གཡུང་དྲུང་གིས། །ལེགས་མཛེས་སེང་གེས་བཏེག་པའི་ཁྲི་ཆེན་པོར། །བསྐལ་པ་(༣༣ན)
བྱེ་བར་མི་གཡོ་རྟག་བཞུགས་ནས། །འགྲོ་ཀུན་ཕན་བདེའི་དཔལ་ལ་སྤྱོད་པར་ཤོག །ཅེས་པ་འདི་ནི་ལྷ་ལྡན་སྤྲུལ་པའི་གཙུག་ལག་ཁང་གི་བྱ་འདབས་སུ་འཁོད་པའི་ཚེས་བཅུ་མ་ཎི་དམིགས་བརྩེ་མ་བསྙེན་གནས་མ་ཁག་བཞིས་བསྐུལ་བའི་ངོར་ཟ་ཧོར་གྱི་བནྡེས་བྲིས། །སྭསྟི་པྲ་ཛཱ་བྷྱཿ མཆོག་གསུམ་རིན་ཆེན་ཐུགས་རྗེ་ཆེན་པོ་ཡིས། །འདི་ཕྱིའི་གཏན་འདུན་འགྲུབ་པའི་བསོད་ནམས་ཀྱི། །མ་རྨད་འབྱོར་བ་རབ་ཏུ་རྒྱས་གྱུར་བའི། །ཕུན་ཚོགས་དགའ་སྟོན་དཔལ་ལ་སྤྱོད་གྱུར་ཅིག །བསོད་ནམས་དབང་གི་ལྕགས་ཀྱུས་བརྟན་གཡོ་རྣམས། །བཀུག་དང་ལྷན་ཅིག་དབྱངས་ཅན་ངག་གི་དཔྱིད། །ངག་ལ་འཇུག་པའི་སྐལ་བཟང་ཉེར་འགྲུབ་པ། །སྨྲ་བ་ཀུན་ལས་རྒྱལ་བའི་དཔལ་ཐོབ་ཤོག །སྨོན་ལམ་ཚིགས་བཅད་འདི་ནི་མོན་མཁར་རྣམ་སྲས་གླིང་པ་འབྱོར་རྒྱས་དང་བསོད་དབང་སྤུན་གཉིས་ཀྱིས་ངག་འདོན་ཞིག་དགོས་ཚུལ་ལྟར་ཟ་ཧོར་གྱི་བནྡེས་སུག་བྲིས་སུ་བགྱིས་པའོ། །དཀོན་མཆོག་རིན་ཆེན་གསུམ་གྱི་བདག་ཉིད་ཅན། །དངོས་གྲུབ་འབྱུང་གནས་དཔལ་ལྡན་བླ་མ་མཆོག །ངག་གི་དབང་ཕྱུག་འཇམ་དབྱངས་དགའ་བའི་བཤེས། །བློ་བསལ་སྐལ་བཟང་རྒྱ་མཚོའི་མགོན་ཁྱོད་ཀྱིས། །བདག་སོགས་དེང་ནས་བྱང་ཆུབ་མ་ཐོབ་བར། །རྨད་བྱུང་ཐུགས་རྗེ་ཆེན་པོས་རྗེས་བཟུང་སྟེ། །འདི་དང་གཏན་གྱི་འདུན་མ་མ་ལུས་པ། །བསམ་པ་ཇི་བཞིན་ལྷུན་གྱིས་འགྲུབ་པར་ཤོག །(༣༣བ)
སྲིད་གསུམ་བདག་མོ་འདོད་ཁམས་དབང་ཕྱུག་མ། །སྟོབས་འཕྲོག་ནག་པོ་ལྷ་ཆེན་གདོང་བཞི་སོགས། །བསྟེན་ཅིང་བསྒྲུབས་པའི་ཆོས་སྲུང་ཚོགས་རྣམས་ཀྱིས། །འཕྲིན་ལས་སྒྲུབ་ལ་གཡེལ་བ་མེད་གྱུར་ཅིག །ཅེས་པ་འདི་ཡང་དེ་མོ་དབོན་པོ་ཕུན་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །བློ་གསལ་སྐལ་བཟང་འཕྲིན་ལས་ཐོས་བསམ་དང༌། །སྒོམ་པའི་ཚུལ་ལ་གེགས་བྱེད་མུན་པའི་དཔུང༌། །དཀོན་མཆོག་ཐུགས་རྗེ་ཉི་མའི་འོད་ཟེར་གྱིས། །རབ་གསལ་བརྩོན་འགྲུས་སྣང་བ་འབར་གྱུར་ཅིག །ཅེས་པ་འདི་ཡང་ཁར་ཁ་ཁུ་འདུ་ལུ་ཆུ་ཁུར་གྱི་སྐུ་སྐྱེ་བློ་བཟང་འཕྲིན་ལས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །སྣང་སྲིད་ཟིལ་གནོན་འཆི་མེད་སྐུ་བརྙེས་པ། །སངས་རྒྱས་གཉིས་པ་ཨྱོན་ཐོད་ཕྲེང་རྩལ། །འཛམ་བུ་གླིང་ན་ཆེ་བའི་རིགས་སྔགས་ཀྱི། །བརྟུལ་ཞུགས་གྲུབ་པའི་དབང་པོས་དགེ་ལེགས་སྩོལ། །ཆོས་ཀུན་གང་ཤར་དབྱིངས་ནས་རང་གྲོལ་བ། །ལྷུན་གྲུབ་འོད་ལྔའི་མདངས་གསལ་དྲག་པོ་རྩལ། །ཐུགས་རྗེའི་སྣང་བ་ཀུན་ཁྱབ་རྡོ་རྗེ་འཛིན། །བསྐལ་བརྒྱར་མི་འགྱུར་ཆོས་འཁོར་བསྐོར་དུ་གསོལ། །ན་བཟང་ཐུགས་ཀྱི་ཡང་ཏིག་རྫོགས་པ་ཆེ། །འཇིག་མེད་སྨྲ་ལ་སྤོབས་པའི་དབང་པོ་མཆོག །ངོ་མཚར་རྣམ་སྤྲུལ་སྒྱུ་འཕྲུལ་དྲ་བའི་གར། །བདུད་སྡེའི་གཡུལ་ལས་རྣམ་རྒྱལ་བརྟན་གྱུར་ཅིག །ཞི་ཁྲོ་རབ་འབྱམས་ཀུན་འདུས་བཀའ་བརྒྱད་ལྷ། །ངེས་གསང་སྙིང་པོའི་བཀའ་སྐྱོང་རལ་(༣༤ན)
གཅིག་མ། །ཟབ་དོན་གཏེར་སྲུང་རྒྱ་མཚོའི་ཚོགས་རྣམས་ཀྱིས། །འགལ་རྐྱེན་ཀུན་གསོལ་མཐུན་རྐྱེན་མ་ལུས་སྒྲུབས། །ཉན་རང་བྱང་སེམས་ཐེག་པའི་རྩ་བ་བརྟན། །ཀྲི་ཡོག་སྡེ་གསུམ་སྡོང་པོ་ཡལ་འདབ་འཕེལ། །རྣམ་གསུམ་ཡོ་གའི་འབྲས་བུ་ཁུར་དུད་པ། །ཐེག་མཆོག་ཡོངས་འདུའི་དབང་པོ་རྒྱལ་གྱུར་ཅིག །ཅེས་ངེད་རང་ཡུན་དུ་འཚོ་བ་དང་ཆོས་རྗེ་རྫོགས་ཆེན་པ་ཀུན་བཟང་རྣམ་རྒྱལ་གྱི་སྐུ་སྐྱེའི་བརྟན་བཞུགས་དང་བཅས་པ་འདི་ལྟ་བུ་ཞིག་དགོས་ཞེས་དབོན་པོ་ཆོས་དབྱིངས་ལྷུན་གྲུབ་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་སྔགས་བན་ངག་དབང་འཕྲིན་ལས་སོ། །སྭསྟི། འཆི་མེད་ཚེ་དབང་གྲུབ་པའི་རིགས་འཛིན་མཐུས། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །བསྟན་འགྲོའི་དཔྱིད་དུ་བསྐལ་བརྒྱར་འཚོ་བཞེས་ནས། །ཆོས་འཁོར་རྒྱུན་མི་འཆད་པར་སྐོར་གྱུར་ཅིག །སྡེ་བཞིའི་འཕྲིན་ལས་སྒོ་འཕར་ལེགས་ཕྱེ་ནས། །ཕུན་ཚོགས་བདེ་སྐྱིད་རྒྱ་མཚོའི་རླབས་ཀྱི་འཕྲེང༌། །ནམ་ཡང་ཡོལ་བ་མེད་པའི་ནོར་འཛིན་བདག །རྡོ་རྗེ་ལྟ་བུར་མི་འགྱུར་བརྟན་པར་ཤོག །ཅེས་ངེད་རང་དང་ཕྱག་མཛོད་འཕྲིན་ལས་རྒྱ་མཚོ་ཡུན་རིང་འཚོ་བའི་བདེན་ཚིགས་སྤེལ་བའི་ཚིགས་སུ་བཅད་པ་འདི་ནི་ལྷ་ལྡན་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་བྲིས། །ངག་དབང་རྣམ་པར་རྒྱལ་བའི་རིང་ལུགས་མཆོག །བཀྲ་ཤིས་ཐུགས་གསང་དཔལ་གྱི་བེའུ་རུ། །ལེགས་གཏམས་དཔལ་ལྡན་གྲུབ་བརྒྱུད་གཙུག་གི་རྒྱན། །བསྐལ་པ་རྒྱ་མཚོར་(༣༤བ)
ཞབས་པད་བརྟན་གྱུར་ཅིག །ཆོས་ཀུན་ཕྱག་རྒྱ་ཆེན་པོར་རྒྱས་འདེབས་པའི། །ངེས་དོན་ཆོས་ཀྱི་ཉི་མ་འོད་པོ་ཆེས། །སྐལ་ལྡན་པདྨའི་འདབ་བརྒྱ་རྣམ་གྲོལ་བ། །མཆོག་གི་དང་པོའི་སངས་རྒྱས་ལྟར་བརྟན་ཤོག །གངས་ཅན་གྲུབ་རིགས་སྨྲ་བ་ཡོངས་ཀྱི་སྡེའི། །གཙུག་རྒྱན་རྗེ་བཙུན་སྟག་ལུང་རིན་པོ་ཆེ། །དཔལ་ལྡན་ཕག་གྲུའི་རིང་ལུགས་དྲི་མེད་པ། །སྤེལ་ཕྱིར་བསྐལ་བརྒྱར་ཆོས་འཁོར་སྐོར་དུ་གསོལ། །ཞེས་རྗེ་བཙུན་སྟག་ལུང་པ་ཆེན་པོ་ངག་དབང་བཀྲ་ཤིས་དཔལ་གྲུབ་ཀྱི་བརྟན་བཞུགས་འདི་ནི་དབུ་མ་ཕྱག་མཛོད་ངག་དབང་བཟང་སྦྱིན་གྱིས་བསྐུལ་བའི་མཚམས་སྦྱར་ལས་ཟ་ཧོར་གྱི་བནྡེས་སྦྱར་བའོ། །ངག་གི་དབང་ཕྱུག་ལེགས་བྱས་ཕུན་ཚོགས་པ། །རྣམ་རོལ་བསོད་ནམས་བྱེ་བའི་མྱུ་གུ་ལས། །ངོ་མཚར་འབྲས་བུ་དཔལ་གྱི་ཡོངས་དུད་པ། །སྐལ་བཟང་གདུལ་བྱའི་ཉེར་འཚོར་བརྟན་གྱུར་ཅིག །ཕུན་ཚོགས་རྣམ་པར་དཀར་བའི་འཕྲིན་ལས་རྣམས། །ཆད་པ་མེད་པའི་གངྒཱའི་ཆུ་བོའི་རྒྱུན། །ལུས་ཅན་བསོད་ནམས་ཞིང་གི་རྒྱ་མཚོ་ཆེར། །ལེགས་འབབ་སྐལ་བ་བཟང་པོ་འགྱུར་བར་ཤོག །བསླུ་བ་མེད་པའི་དཀོན་མཆོག་རིན་ཆེན་གསུམ། །དྲང་སྲོང་རིག་འཛིན་བདེན་ཚིགས་གྲུབ་རྣམས་ཀྱིས། །མགོན་ཁྱེད་མི་འགྱུར་ཆོས་ཀྱི་ཁྲི་ཆེན་པོར། །རྡོ་རྗེ་ལྟ་བུར་བརྟན་པར་བྱིན་གྱིས་རློབས། །ཞེས་སེམས་དཔའ་ཆེན་པོ་ངག་དབང་ཕུན་ཚོགས་ཀྱི་སྤྲུལ་སྐུ་ཕུན་ཚོགས་བསོད་ནམས་དཔལ་བཟང་གི་བརྟན་བཞུགས་ཤིག་(༣༥ན)
དགོས་ཞེས་ཏྲེ་བོ་སྐུ་སྐྱེ་ནམ་མཁའ་བསམ་གྲུབ་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །རྣམ་འདྲེན་དེ་གསུང་སྲས་དང་སློབ་མར་བཅས། །སྐྱབས་མཆོག་མཁྱེན་བརྩེ་ནུས་པའི་འོད་སྟོང་གིས། །ངག་དབང་དགེ་ལེགས་རྒྱལ་མཚན་དཔལ་བཟང་པོར། །བདུད་བཞི་མུན་པའི་སྨག་རུམ་ཞི་བར་མཛོད། །ངག་གི་དབང་ཕྱུག་དགེ་ཚོགས་རྒྱ་མཚོའི་གཏེར། །ལེགས་པའི་ལམ་སྟོན་ཆོས་ཀྱི་རྒྱལ་མཚན་ཆེ། །རྨད་བྱུང་དམ་པའི་ཆོས་ཀྱི་ཁྲི་ཆེན་པོར། །མི་འགྱུར་རྡོ་རྗེ་ལྟ་བུར་བརྟན་པར་ཤོག །བསྟན་སྲུང་དམ་ཅན་རྒྱ་མཚོའི་མཐུ་སྟོབས་དང༌། །དྲང་སྲོང་རིགས་འཛིན་ཚོགས་ཀྱི་བདེན་པའི་ཚིགས། །ཁྲིམས་ལྡན་འདུས་ཚོགས་སྨོན་ལམ་རྣམ་དག་མཐུས། །ཇི་ལྟར་བསམ་པ་ཡིད་བཞིན་འགྲུབ་པར་ཤོག །དེ་མོ་སྤྲུལ་སྐུ་ངག་དབང་དགེ་ལེགས་རྒྱལ་མཚན་གྱི་བརྟན་བཞུགས་འདི་ཡང་དེ་མོ་དབོན་པོ་ཕུན་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །བཀོད་ལེགས་རིན་ཆེན་ཕྲས་མཛེས་གསེར་སྦྱངས་ཀྱི། །ཅོད་པན་ཕུལ་བས་ཐུབ་བསྟན་གནས་པའི་བར། །ཟས་གཙང་སྲས་ཀྱི་སྐུ་གཟུགས་དབང་གི་རྒྱལ། །གངས་ཅན་ལྗོངས་འདིར་བརྟན་པར་བཞུགས་གྱུར་ཅིག །སྒོ་གསུམ་འབད་དང་མཐུན་རྐྱེན་བྱེད་པོ་རྣམས། །འདི་དང་གཏན་གྱི་མདུན་མ་ལྷུན་འགྲུབ་ཅིང༌། །མཁའ་མཉམ་འགྲོ་ཀུན་སྲིད་ཞིའི་རྒྱ་མཚོ་ལས། །བསྒྲལ་ཏེ་རྣམ་པ་ཐམས་ཅད་མཁྱེན་ཐོབ་ཤོག །རྒྱ་ཧོར་བོད་སོགས་ཡངས་པའི་འཇིག་རྟེན་དུ། །(༣༥བ)
འཁྲུག་རྩོད་ནད་མུག་དུས་ཀྱི་ཆད་པ་ཀུན། །རབ་ཞི་ཆོས་དང་སྲིད་ཀྱི་བདེ་སྐྱིད་ལ། །རྫོགས་ལྡན་བཞིན་དུ་སྤྱོད་པའི་སྐལ་བཟང་ཤོག །ཅེས་ལྷ་ལྡན་སྤྲུལ་པའི་གཙུག་ལག་ཁང་དུ་ཇོ་བོ་རིན་པོ་ཆེ་ཤཱཀྱ་མུ་ནིར་དབུ་རྒྱན་གསར་བཟོས་ལྕགས་གླང་ཧོར་ཟླ་བདུན་པའི་ཚེས་ལྔའི་ཉིན་ཕུལ་སྐབས་དཔལ་ལྡན་སྟོད་རྒྱུད་གྲྭ་ཚང་པ་རྣམས་སྨོན་ལམ་གྱི་མཚམས་སྦྱོར་མཛད་བཅུག་པའི་ཚེ་ཞལ་འདོན་དུ་ཟ་ཧོར་གྱི་བནྡེས་སྦྱར། །ཕུན་ཚོགས་མཁྱེན་བརྩེ་ནུས་པ་གངྒཱའི་ཆུས། །སྙིགས་མར་སྤྱོད་པའི་ཉེས་ཚོགས་ཀུན་འཁྲུད་པར། །ཐུགས་རྗེའི་མཐུ་དཔུང་ལྷག་པར་ཆེ་བའི་མགོན། །རྣམ་འདྲེན་སྨན་གྱི་བླ་མ་མཆེད་བརྒྱད་ཀྱིས། །ངག་དབང་འཇམ་མགོན་བློ་བཟང་གྲགས་པ་ཡི། །རྒྱ་ཆེན་ཆོས་སྲིད་ཟུང་དུ་འཇུག་པའི་བསྟན། །དབྱར་མཚོ་ལྟ་བུར་ལེགས་འཕེལ་བྱེད་པོ་མཆོག །བསྐལ་བརྒྱར་གཡོ་མེད་སྨོན་ལམ་འགྲུབ་བྱིན་རློབས། །འཇིག་རྟེན་སྤྱི་དང་ཁྱད་པར་བོད་ཡུལ་འདིར། །ནད་རིམས་འཁྲུག་རྩོད་མུ་གེ་ལ་སོགས་པ། །དུས་ཀྱི་ཆད་པ་མ་ལུས་ཀུན་ཞི་ནས། །ཕན་བདེའི་དགའ་སྟོན་དཔལ་ལ་སྤྱོད་གྱུར་ཅིག །ཅེས་སྨན་བླའི་མདོ་ཆོག་གི་སྨོན་ལམ་འཇུག་ཏུ་འདོགས་རྒྱུའི་འདོད་གསོལ་འདི་ལྟ་བུ་ཞིག་དགོས་ཞེས་གཉལ་སྡེ་དྲུག་མཁན་པོ་བློ་བཟང་དར་རྒྱས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །ནོར་འཛིན་ལྟོ་བར་ལྷ་མིའི་སྣོད་བཅུད་ཀྱི། །ཕུན་ཚོགས་ངོ་མཚར་བཀོད་པའི་མཎྜལ། །ཞིང་ཁམས་རྒྱ་མཚོའི་(༣༦ན)
རྡུལ་སྙེད་རྒྱལ་བ་དང༌། །དེ་སྲས་སློབ་མར་བཅས་ལ་ལེགས་ཕུལ་བས། །ཐུབ་པའི་རིང་ལུགས་ཆོས་སྤྱོད་རྣམ་བཅུ་དང༌། །འཇིག་རྟེན་ཁམས་སུ་བདེ་སྐྱིད་དགའ་སྟོན་འཕེལ། ཁྱད་པར་ཀུན་མཁྱེན་བློ་བཟང་གྲགས་པ་ཡི། །ཆོས་སྲིད་བསྟན་པ་དར་ཞིང་རྒྱས་པར་ཤོག །དགེ་ཚོགས་ཚུལ་འདི་སྒྲུབ་ལ་གཏོགས་སོ་ཅོག །གནས་སྐབས་མཐར་ཐུག་དོན་གཉིས་ལྷུན་གྲུབ་ཅིང༌། །ནམ་མཁའི་མཐའ་མཉམ་འགྲོ་བ་མ་ལུས་པ། །བླ་མེད་བྱང་ཆུབ་ཐོབ་པའི་རྒྱུར་གྱུར་ཅིག །ཅེས་པ་འདི་ཡང་འཕྲུལ་སྣང་དུ་བསོད་ནམས་རྒྱ་མཚོའི་ཞིང་མཆོག་དམ་པར་དངུལ་གྱི་མཎྜལ་ཟུང་ལྡན་གསར་བཟོས་ཆུ་སྟག་ཧོར་ཟླ་བཅུ་པའི་ཚེས་ཉི་ཤུའི་ཉིན་ཕུལ་སྐབས་སྐྱོར་ལུང་གསུང་སྒྲོགས་པ་རྣམས་སྨོན་ལམ་གྱི་མཚམས་སྦྱོར་སྤེལ་བཅུག་པའི་དུས་ཀྱི་ཞལ་འདོན་དུ་ཟ་ཧོར་གྱི་བནྡེས་སྦྱར། །མཆོག་གསུམ་འཆི་མེད་གར་དབང་སྣང་མཐའ་ཡས། །བྱིན་རླབས་འོད་གཟིས་ངག་དབང་བློ་གསལ་བ། །སྐལ་བཟང་དགའ་བའི་བཤེས་གཉེན་རྡོ་རྗེའི་ཁྲིར། །བསྐལ་པ་རྒྱ་མཚོར་ཞབས་པད་བརྟན་པར་ཤོག །ཅེས་པ་འདི་ཡང་ཆོས་འཁོར་དཔལ་གྱི་ལྷ་ས་བ་སྤྱི་ཚོགས་ཀྱིས་བསྐུལ་བའི་ངོར་བྲིས། །ཚོགས་གཉིས་ཡོངས་སུ་རྫོགས་པའི་རྣམ་འདྲེན་དང༌། །ལུང་དང་མངོན་པར་རྟོགས་པའི་ཆོས་དཀོན་མཆོག །ཚུལ་བཞིན་སྒྲུབ་མཛད་སློབ་མར་བཅས་པ་ཡི། །ཐུགས་རྗེའི་རླུང་གི་ཤིང་རྟས་རབ་དྲངས་ཏེ། །རྨད་བྱུང་ཐུབ་བསྟན་(༣༦བ)
ལྷ་ཡི་ལམ་ཡངས་པར། །ངོ་མཚར་སྤྲུལ་སྐུའི་ཟླ་བ་ཡོངས་ཚེས་པའི། །ཟློས་གར་ལྷར་བཅས་སྐྱེ་དགུའི་ཀུནྡའི་ཚལ། །འཛུམ་པའི་རེ་བ་མྱུར་དུ་སྐོང་བར་ཤོག །བློ་བསལ་སྐལ་བཟང་གདུལ་བྱར་དམ་པའི་ཆོས། །ཟུང་འཇུག་དབང་གི་རྒྱལ་པོའི་ཟ་མ་ཏོག །ཐོས་བསམ་སྒོམ་གསུམ་རྒྱལ་མཚན་རྩེར་བསྒྲེང་བའི། །ཡང་སྲིད་བསྟན་འགྲོའི་ཉེར་འཚོར་འཛིན་པར་ཤོག །ངག་གི་དབང་ཕྱུག་འཇམ་དཔལ་གྲགས་པའི་ལྷ། །ལུས་ཅན་བསོད་ནམས་ཞིང་དུ་ངུར་མིག་གར། །རྣམ་པར་ཡོངས་བསྒྱུར་མ་སྨད་མཛད་པའི་དཔྱིད། །ལྷུན་གྲུབ་འཕྲིན་ལས་ཆད་མེད་འཇུག་གྱུར་ཅིག །མཆོག་གསུམ་མཐུ་དང་རྟེན་འབྲེལ་བསླུ་བ་མེད། །མོས་ལྡན་འདུས་པའི་ཚོགས་ཀྱིས་རྩེ་གཅིག་ཏུ། །སྙིང་ནས་གསོལ་བ་བཏབ་པའི་བདེན་ཚིག་གིས། །རེ་བའི་འབྲས་བུ་དུས་སུ་སྨིན་གྱུར་ཅིག །ཅེས་དོན་གྱི་སླད་དུ་མཚན་ནས་སྨོས་ཏེ་ཡོངས་རྫོགས་བསྟན་པའི་མངའ་བདག་མཁན་ཆེན་བློ་བཟང་ཆོས་ཀྱི་རྒྱལ་མཚན་དཔལ་བཟང་པོ་སྐུའི་བཀོད་པ་བསྡུས་པའི་གནས་ཚུལ་ཐོས་འཕྲལ་དུ་སྤྲུལ་སྐུའི་ཡང་སྲིད་མྱུར་དུ་འཛིན་པའི་གསོལ་འདེབས་སུ་ཟ་ཧོར་གྱི་བནྡེས་དང་བའི་ཡིད་ཀྱི་སྦྱར་བའོ། །རྣམ་འདྲེན་དེ་གསུང་སློབ་མར་བཅས་པ་ཡི། །རྨད་བྱུང་ཐུགས་རྗེའི་རྟེན་འབྲེལ་སླུ་མེད་མཐུས། །བློ་བཟང་དམ་པའི་ཆོས་ཀྱི་རྒྱལ་མཚན་ཆེའི། །ཡང་སྲིད་སྤྲུལ་པའི་ཟློས་གར་མྱུར་སྟོན་ཤོག །དག་པའི་ཞིང་དང་གནས་ངན་འཁོར་བའི་གྲོང༌། །འཕགས་ཆེན་དམ་པར་བདེ་སྡུག་ཡོངས་(༣༧ན)
བྲལ་ཕྱིར། །སྔོན་གྱི་ཐུགས་བསྐྱེད་ཇི་བཞིན་གངས་ཅན་འདིར། །མཆོག་སྤྲུལ་ཟླ་བ་གསར་པ་མྱུར་ཚེས་ཤོག །སྨོན་འཇུག་སེམས་ཀྱི་ཚངས་པའི་རལ་ཀླུང་ནས། །གཞན་ཕན་འཕྲིན་ལས་ཆད་མེད་གངྒཱའི་རྒྱུན། །གངས་ཅན་ར་བ་དཀར་པོའི་རྒྱ་མཚོ་ཆེར། །ནམ་ཡང་ཆད་པ་མེད་པར་འབབ་གྱུར་ཅིག །རང་དོན་ཉི་ཟླའི་འོད་ཀྱིས་ཕྱེད་མིན་པའི། །མ་འདྲིས་འགྲོ་ལ་རྗེས་བརྩེའི་བ་ཀཱུ་ལ། །ལྷག་བསམ་ལུས་ཕྲའི་སྦྲང་ཆང་དངར་པོ་ཡིས། །སྤྲུལ་པའི་འདབས་རྒྱ་ཡོངས་སུ་གྲོལ་གྱུར་ཅིག །ཕྱག་དྲུག་ལེགས་ལྡན་མ་ཧེའི་ཞལ་ཅན་སོགས། །ཞྭ་སེར་མནབས་པའི་བསྟན་སྲུང་ཚོགས་རྣམས་ཀྱིས། །འདོད་དོན་འབྲས་སུ་ཡོངས་སུ་ལེགས་ལེགས་སྨིན་པའི། །རེ་བ་ཇི་བཞིན་ལྷུན་གྲུབ་འཕྲིན་ལས་མཛོད། །ཅེས་དོན་གྱི་སླད་དུ་མཚན་ནས་སྨོས་ཏེ་ཡོངས་རྫོགས་བསྟན་པའི་མངའ་བདག་བློ་བཟང་ཆོས་ཀྱི་རྒྱལ་མཚན་དཔལ་བཟང་པོའི་སྤྲུལ་པའི་ཟློས་གར་ཞིང་འདིར་མྱུར་དུ་ཕེབས་པའི་སྨོན་ལམ་གྱི་རིམ་པ་འདི་ནི་ཆོས་སྡེ་ཆེན་པོ་བཀྲ་ཤིས་ལྷུན་པོ་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །མཆོག་དང་ཐུན་མོང་དངོས་གྲུབ་མ་ལུས་པ། །སྩོལ་མཛད་འདོད་དོན་རེ་སྐོང་ཡིད་བཞིན་ནོར། །དཀོན་མཆོག་གསུམ་དངོས་རྩ་རྒྱུད་བླ་མ་ལ། །གསོལ་བ་འདེབས་སོ་སྒོ་གསུམ་བྱིན་གྱིས་རློབས། །འཁོར་བ་སྡུག་བསྔལ་རྒྱ་མཚོ་ཆེན་པོ་ལས། །ཐུགས་རྗེའི་ལྕགས་ཀྱུས་ཉེ་བར་རབ་དྲངས་ནས། །(༣༧བ)
བདེ་ཆེན་ཐར་པའི་གྲོང་ཁྱེར་ཉམས་དགའ་བར། །བདག་སོགས་འགྲོ་ཀུན་འཇུག་པར་བྱིན་གྱིས་རློབས། །སྡུག་སྔལ་གསུམ་གྱིས་མནར་བའི་སེམས་ཅན་ལ། །ད་ལྟ་བདག་གིས་ཕན་ཐོག་མ་ནུས་པས། །རྫོགས་པའི་སངས་རྒྱས་གོ་འཕང་ཚེ་འདི་ལ། །ཐོབ་པའི་སྨོན་ལམ་ཅི་བཏབ་འགྲུབ་གྱུར་ཅིག །ཅེས་པ་འདི་ཡང་ཨེར་ཏི་ནི་ཐ་ཡན་ཕྱིས་སྙིང་ནས་གསོལ་བ་འདེབས་པ་ལ་ཐག་ཉེ་རིང་མེད་ཅིང་གོ་གསལ་བ་ཞིག་དགོས་ཞེས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དཔལ་ལོ། །ངག་དབང་བློ་གྲོས་མཆོག་གྱུར་འཇམ་དཔལ་དབྱངས། །བརྩེ་ཆེན་བཟང་པོའི་བྱམས་ལྡན་པད་དཀར་འཆང༌། །མཐུ་སྟོབས་རྒྱ་མཚོ་ལྟར་ཟབ་གསང་བའི་བདག །རིགས་གསུམ་ཀུན་གྱི་ངོ་བོར་གསོལ་བ་འདེབས། །དེ་ལྟར་གསོལ་བཏབ་བྱིན་རླབས་བདག་སྙིང་ལ། །ཞུགས་ནས་ཚེ་འདིའི་བར་ཆད་ཀུན་ཞི་ཞིང༌། །ཕྱི་མ་ངེས་ལེགས་གཏན་འདུན་ལྷུན་གྲུབ་པའི། །སྨོན་ལམ་གང་བཏབ་འབྲས་བུ་སྨིན་པར་ཤོག །ཅེས་པ་འདི་ཡང་མགོན་ཁང་བླ་མ་དཔལ་འབྱོར་རྒྱ་མཚོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །མཁྱེན་བརྩེ་ནུས་མངའ་སངས་རྒྱས་བདག་ཉིད་ཆོས། རིགས་གྲོལ་དཔལ་ལྡན་དགེ་འདུན་བྱིན་རླབས་ཀྱིས། །བདག་སོགས་འགྲོ་ཀུན་སྲིད་ཞིའི་རྒུད་པ་ལས། །ལེགས་ཐར་འདི་ཕྱིའི་གཏན་འདུན་ལྷུན་གྲུབ་ཤོག །སྨོན་ལམ་ཚིགས་སུ་བཅད་པ་འདི་(༣༨ན)
ནི་བདེ་ཆེན་ཡངས་པ་ཅན་གྱི་སྤྱན་སྔ་ཀརྨ་ཉི་མ་བྲོ་ཚལ་བའི་དུས་ངག་འདོན་དུ་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་བྲིས། །དཔལ་ལྡན་ངག་དབང་བློ་བཟང་རྒྱ་མཚོའི་སྡེ། །མཆོག་གསུམ་ཀུན་འདུས་ངོ་བོར་ཡིད་ཆེས་པས། །སྙིང་ནས་གསོལ་བ་འདེབས་ན་འདི་ཕྱིའི་དོན། །བསམ་པ་ཇི་བཞིན་འགྲུབ་པར་བདག་བྱིན་རློབས། །འདི་ལྟ་བུ་ཞིག་དགོས་ཞེས་ལྷ་ས་བ་བྱམས་རྒྱབ་གཞི་དགས་བསྐུལ་བའི་ངོར་ཟ་ཧོར་གྱི་བནྡེས་བྲིས། །ཞི་ཁྲོ་རབ་འབྱམས་འདུས་པའི་དཀྱིལ་འཁོར་ཀུན། །སྤྲོ་ཞིང་སྡུད་མཛད་རིགས་བརྒྱའི་ཁྱབ་བདག་མཆོག །དཔལ་ལྡན་ཆོས་ཀྱི་འབྱོར་པའི་འཕྲིན་ལས་རྣམས། །རབ་རྒྱས་བྱེད་པོ་རྡོ་རྗེ་སློབ་དཔོན་ཆེ། །ཆོས་སྐུ་ཀ་ནས་ཡེ་དག་དབྱིངས་ཆེན་པོར། །རང་གྲོལ་ཀུན་ཏུ་བཟང་པོའི་ཀློང་ཉིད་ནས། །ལྷུན་གྲུབ་གཟུགས་སྐུའི་བཀོད་པར་ཡོངས་བཞེངས་ཏེ། །ངོ་མཚར་སྤྲུལ་པའི་རོལ་གར་མྱུར་བསྟན་གསོལ། །སངས་རྒྱས་གཉིས་པ་པདྨ་ཐོད་ཕྲེང་གི །དྲི་མེད་རིང་ལུགས་ནོར་བུ་བསམ་འཕེལ་དབང༌། །སྤེལ་བར་གཉག་བན་སྔོན་དུས་ཐུགས་སྐྱེད་པ། །དུས་ལས་ཡོལ་མེད་ཞིང་འདིར་མངོན་གྱུར་ཤོག །རྔ་ཡབ་དཔལ་རིར་རྡོ་རྗེ་རྒྱལ་ཚབ་ཏུ། །ལེགས་བཞུགས་དག་པའི་རྣམ་རོལ་ངོ་མཚར་ཡང༌། །བཀའ་གཏེར་བཤད་སྒྲུབ་གནའ་བོའི་རིང་ལུགས་མཆོག །སྤེལ་བའི་གདུལ་བྱ་གངས་ཅན་ལྗོངས་འདིར་མང༌། (༣༨བ)
།དེ་ཕྱིར་ཡར་ཀླུང་ཤེལ་གྱི་བྲག་ཕུག་ཏུ། །མགོན་ཁྱོད་པད་འབྱུང་རྡོ་རྗེ་འཆང་གི་སྐུར། །རིག་པའི་རྩལ་དུ་རྫོགས་པར་འཛབ་བསྙེན་གྱིས། །རྒྱུད་བསྐུལ་རྟེན་འབྲེལ་བསྒྲིག་དོན་ལྟར་འགྲུབ་ཤོག །རིགས་འཛིན་བརྒྱུད་པའི་བླ་མ་དམ་པ་དང༌། །སྒྲུབ་སྡེ་བརྒྱད་སོགས་ཡི་དམ་དཀྱིལ་འཁོར་ལྷ། །མ་ནིང་དྲེགས་པའི་སྡེ་དཔོན་སྲུང་མ་ཡིས། །འགལ་རྐྱེན་ཀུན་གསོལ་མཐུན་རྐྱེན་མ་ལུས་སྒྲུབས། །པདྨ་རྒྱལ་པོའི་ཞལ་བཞེས་ཇི་བཞིན་དུ། །གསོལ་བ་གང་བཏབ་ལྷུན་གྱིས་ལེགས་འགྲུབ་པར། །རྩ་གསུམ་ཀུན་འདུས་མཚོ་སྐྱེས་རྡོ་རྗེ་ཡིས། །རྨད་བྱུང་བྱིན་རླབས་སྙིང་ལ་འཇུག་གྱུར་ཅིག །ཅེས་དཀྱིལ་འཁོར་རྒྱ་མཚོའི་ཁྱབ་བདག་ཟུར་ཀུན་མཁྱེན་ཆོས་དབྱིངས་རང་གྲོལ་གྱི་སྤྲུལ་པའི་ཟླ་ཚེས་འཆར་བའི་གསོལ་འདེབས་འདི་ནི་སྨོན་སྒོམ་འབྲང་རྒྱས་པ་དགེ་སློང་ངག་དབང་དོན་གྲུབ་ཡར་ཀླུང་ཤེལ་གྱི་བྲག་ཕུག་ཏུ་བླ་མ་དམ་པ་གང་དེའི་སྤྲུལ་སྐུ་མྱུར་ཕེབས་ཀྱི་རྟེན་འབྲེལ་སྒྲིག་པའི་གསོལ་འདེབས་བགྱིད་ཚེ་ཁ་འདོན་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །རྡོ་རྗེའི་སྐུ་བརྙེས་ཚེ་དང་ཡེ་ཤེས་རྣམས། །དཔག་མེད་ལྷུན་གྱིས་གྲུབ་པའི་མགོན་པོ་དང༌། །སངས་རྒྱས་ཀུན་གྱི་འཕྲིན་ལས་གཅིག་བསྡུས་མ། །བཅོམ་ལྡན་ཡིད་བཞིན་འཁོར་ལོའི་བྱིན་རླབས་ཀྱིས། །ངག་དབང་འཇམ་མགོན་ལྷ་ཡིས་རྗེས་བཟུང་བ། །བློ་ལྡན་སྐལ་བཟང་རྒྱ་མཚོའི་དགེ་བའི་བཤེས། །འཆི་བདག་གཡུལ་(༣༩ན)
ལས་རྒྱལ་ཏེ་ཡུན་རིང་དུ། །གནས་ཤིང་རྣམ་དཀར་འཕྲིན་ལས་རྒྱལ་གྱུར་ཅིག །བདུད་སྡེའི་དཔུང་ལ་འཇིག་པ་མེད་པ་ཡི། །མཐུ་སྟོབས་བཙན་པོའི་གོ་ཆ་རབ་བགོས་ནས། །ཐུབ་བསྟན་ལང་ཚོ་རྒྱས་པའི་སྡེ་ཆེན་པོར། །གཡུང་དྲུང་ལྟ་བུར་མི་འགྱུར་བརྟན་པར་བཞུགས། །མཆོག་གསུམ་ཐུགས་རྗེའི་རྟེན་ཅིང་འབྲེལ་འབྱུང་མཐུས། །ཟླ་བའི་མ་མ་ལས་འོངས་འཆི་མེད་ཀྱི། །མ་སྨད་བདུད་རྩི་ཐུགས་ཀྱི་ཟ་མ་ཏོག །ལེགས་པར་འཁྱིལ་བའི་དགའ་སྟོན་འགྲུབ་པར་ཤོག །ཁྲིམས་ལྡན་མང་དུ་ཐོས་པའི་འདུས་ཚོགས་ཀྱིས། །རབ་དཀར་ལྷག་བསམ་དག་པའི་རྒྱལ་མཚན་རྩེར། །རྩེ་གཅིག་སྨོན་ལམ་བཏབ་པ་ཡིད་བཞིན་ནོར། །བསམ་པའི་འབྲས་བུ་དུས་སུ་སྨིན་པར་ཤོག །འཁོར་བའི་ཡང་སྲིད་སྐྱེ་ཞིང་སྐྱེ་བ་རུ། །དམ་པའི་མགོན་མཆོག་ཁྱོད་ཀྱིས་རྗེས་བཟུང་ཞིང༌། །འདི་དང་གཏན་གྱི་འདུན་མ་མ་ལུས་ཀུན། །ཚུལ་བཞིན་སྒྲུབ་པའི་རེ་བ་སྐོང་བར་ཤོག །མཐོ་རིས་བདུན་དང་ལྡན་པའི་རྟེན་བཟང་པོར། །མངོན་པར་མཐོ་དང་ངེས་པར་ལེགས་པའི་ལམ། །རབ་ཏུ་སྒྲུབ་པས་ཕན་དང་བདེ་བ་ཡི། །རྨད་བྱུང་རོ་བརྒྱའི་དཔལ་ལ་སྤྱོད་པར་ཤོག །སྒྲིབ་བྲལ་དོན་གཉིས་ལྡན་པ་སངས་རྒྱས་དང༌། །སྤངས་རྟོགས་ཡོན་ཏན་འབྱུང་གནས་དམ་པའི་ཆོས། །རིག་དང་གྲོལ་བའི་དཔལ་ལྡན་དགེ་འདུན་ཏེ། །དཀོན་མཆོག་མཐུ་ཡིས་བདེན་ཚིགས་འགྲུབ་གྱུར་ཅིག །དུས་གསུམ་རྒྱལ་བ་སྲས་བཅས་ཐུགས་རྗེ་དང༌། །བསྟན་པ་སྐྱོང་བར་ཞལ་བཞེས་སྲུང་མའི་ཚོགས། །ཁྱད་པར་འདོད་ཁམས་དབང་ཕྱུག་(༣༩བ)
ནུས་མཐུ་ཡིས། །འདོད་པའི་དོན་རྣམས་ལྷུན་གྱི་འགྲུབ་པར་ཤོག །གསེར་མངལ་ཅན་དང་མགྲིན་སྔོན་པད་དཀར་མིག །འཆི་མེད་དབང་པོ་དྲང་སྲོང་རིག་པ་འཛིན། །བདེན་ཚིགས་གྲུབ་པ་རྣམས་ཀྱིས་དུས་ཀུན་ཏུ། །ཕུན་སུམ་ཚོགས་པའི་བཀྲ་ཤིས་སྤེལ་བར་ཤོག །ཐུབ་པའི་བསྟན་དང་བསྟན་འཛིན་དགེ་འདུན་སྡེ། །བསྙེན་བཀུར་ཕུ་དུད་སྒྲུབ་པའི་སྦྱིན་པའི་བདག །འགྲོ་བའི་བདེ་སྐྱིད་མ་ལུས་འཕེལ་བ་ཡི། །བདེ་ལེགས་ཆེན་པོས་ནོར་འཛིན་ཀུན་ཁྱབ་ཤོག །ཅེས་བརྟན་བཞུགས་དང་སྨོན་ལམ་གཉིས་ཀ་ཚང་བ་ཤློ་ཀ་བཅུ་ཙམ་ཞིག་དགོས་ཞེས་ཉུང་ཇ་ཁང་པ་རྣམས་ཀྱིས་ནན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའོ། །ངག་གི་དབང་ཕྱུག་རྗེ་བཙུན་བཙོང་ཁ་པའི། །ལུང་རྟོགས་བསྟན་པ་འཛིན་ཅིང་རབ་སྤེལ་བར། །རྨད་བྱུང་འཕྲིན་ལས་བཟང་པོའི་བཤེས་གཉེན་མཆོག །གང་དེའི་མཆེད་གྲོགས་ཟུང་དང་བཅས་པ་རྣམས། །དེང་ནས་བྱང་ཆུབ་སྙིང་པོ་མ་ཐོབ་བར། །དྲིན་ཅན་བླ་མ་མཆོག་དང་མི་འབྲལ་ཞིང༌། །རྟག་ཏུ་དགྱེས་པ་ཆེན་པོས་རྗེས་བཟུང་ཏེ། །དམ་པའི་ཆོས་ཀྱི་བདུད་རྩིས་ཚིམས་པར་ཤོག །དཀོན་མཆོག་རིན་ཆེན་གསུམ་གྱི་བྱིན་རླབས་དང༌། །རྒྱུ་འབྲས་རྟེན་འབྲེལ་བསླུ་བ་མེད་པའི་མཐུས། །ཇི་ལྟར་སྨོན་ལམ་བཏབ་པའི་འབྲས་བུ་ནི། །རེ་བ་ཇི་བཞིན་ཡོངས་སུ་སྨིན་གྱུར་ཅིག །ཅེས་པ་འདི་ཡང་སྐྱིད་ཤོད་ཆོས་རྗེའི་སྤྲུལ་པའི་སྐུ་ངག་དབང་བསྟན་འཛིན་འཕྲིན་ལས་ཀྱི་གསུང་གི་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར། །དམ་པ་ཏོག་དཀར་རྒྱལ་བའི་རྒྱལ་ཚབ་ཏུ། །རིན་(༤༠ན)
ཅེན་ཅོད་པན་བཅིངས་ཏེ་དབང་བསྐུར་བས། །དགའ་ལྡན་ཞིང་ཁམས་ཞིང་གི་གཙོར་བཞེངས་ཏེ། །ཐེག་ཆེན་ཆོས་སྒྲ་ལེགས་སྒྲོག་མི་ཕམ་པས། །བྱམས་པ་ཆེན་པོ་རྡོ་རྗེ་རྩེ་བརྒྱའི་མཚོན། །གདེངས་པས་བདུད་བཞིའི་ནུས་སྟོབས་ལྷ་མིན་མོའི། །མངལ་ལྷུང་རྣམ་པར་རྒྱལ་བའི་དགེ་ཚོགས་དར། །སྲིད་པའི་རྩེ་མོར་འཕྱར་བའི་མགོན་པོ་ཀྱེ། །ཕུན་ཚོགས་རིན་ཅེན་དངུལ་དཀར་ཞུན་མའི་ཁམས། །རྣམ་རྒྱལ་སོར་མོའི་འཕྲུལ་ལྡན་ནཻ་པ་ལས། །འདྲེན་བྱེད་བདུད་རྩིར་བསྐྲུན་པའི་སྐུ་རྙན་གྱིས། །བྱམས་མགོན་མངོན་སུམ་བལྟ་བའི་སྐལ་བཟང་བཞིན། །བསོད་ནམས་ཚོགས་འདི་མཐའ་འཁོབ་ཧོར་ཡུལ་དུ། །ཐུབ་བསྟན་ལེགས་སྤེལ་རབ་འབྱམས་ཆོས་ཀྱི་རྒྱལ། །ནམ་མཁའ་རྒྱ་མཚོ་མངོན་པར་མཐོ་བའི་རྟེན། །རིམ་བརྒྱུད་མྱུར་དུ་ཀུན་མཁྱེན་མྱུར་ཐོབ་ཤོག །དགེ་བའི་བཤེས་གཉེན་ངག་དབང་དཔལ་འབྱོར་དང༌། །གུང་ཐང་དཀའ་བཅུ་བློ་བཟང་ལ་སོགས་པ། །ཚུལ་འདིར་སྒོ་གསུམ་འབད་པར་གཏོགས་སོ་ཅོག །ཡང་སྲིད་ཀུན་ཏུ་ཁྱོད་ཀྱིས་རྗེས་འཛིན་ཤོག །ཇི་སྲིད་ཉི་ཟླའི་འོད་ཀྱིས་གླིང་བཞིའི་མུན། །སེལ་བ་དེ་སྲིད་ལུས་ཅན་བསོད་ནམས་ཀྱི། །ཞིང་དུ་རྗེ་བཙུན་སྐུ་གཟུགས་ཡིད་བཞིན་ནོར། །གཡོ་མེད་རྡོ་རྗེ་ལྟ་བུར་བརྟན་པར་ཤོག །དགའ་ལྡན་བསྟན་པ་སྤྱི་དང་ཁྱད་པར་དུ། །བཀྲ་ཤིས་སྒོ་མང་ཡར་ངོའི་ཟླ་ལྟར་འཕེལ། །མཁའ་མཉམ་འགྲོ་ཀུན་མངོན་མཐོ་ངེས་ལེགས་ཀྱི། །ཕན་བདེའི་བདུད་རྩིར་རྟག་ཏུ་སྤྱོད་གྱུར་ཅིག །ཅེས་སྔགས་པ་ནོ་མོན་ཁང་རབ་འབྱམས་(༤༠བ)
ཆོས་རྗེ་ནམ་མཁའ་རྒྱ་མཚོའི་ཕྱི་རྟེན་དུ་དངུལ་དཀར་ལས་གྲུབ་པའི་བྱམས་པའི་སྐུ་ཐོག་ཚད་མ་སྒོ་མང་སློབ་དཔོན་ཟུར་པ་ངག་དབང་དཔལ་འབྱོར་དང་གུང་ཐང་དཀའ་བཅུ་བློ་བཟང་སོགས་ཀྱིས་དོ་དམ་བྱས་ནས་བཞེངས་པའི་དུས་བརྟན་བཞུགས་འདི་ལྟ་བུ་ཞིག་དགོས་ཞེས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །མདུན་གྱི་ནམ་མཁར་རྩ་བའི་བླ་མ་དང༌། །གཉིས་སུ་མེད་པ་བཅོམ་ལྡན་སྨན་གྱི་བླ། །བདེ་བར་གཤེགས་པ་བརྒྱད་ཀྱི་ལྷ་ཚོགས་རྣམས། །ཐོགས་མེད་བརྩེ་བས་འདིར་སྤྱོན་ཉེ་བར་དགོངས། །ཐུགས་རྗེའི་མཐུ་ཡིས་སྲིད་ཞིའི་འཇིགས་པ་སེལ། །མཚན་ཐོས་ཙམ་གྱིས་ངན་སོང་ལས་སྐྱོབ་པའི། །བཅོམ་ལྡན་བདེ་བར་གཤེགས་པ་མཆེད་བརྒྱད་ལ། །གུས་པས་ཕྱག་འཚལ་སྙིང་ནས་གསོལ་བ་འདེབས། །འགྲོ་བའི་ལུས་ངག་ཡིད་གསུམ་དགེ་ཚོགས་ལ། ཁམས་དང་དབང་པོ་བློ་གྲོས་དང་མཚམས་པར། །བཀོད་དེ་སྐལ་བཟང་གདུལ་བྱ་རྒྱ་མཚོའི་མགོན། །འཇམ་དབྱངས་དགའ་བའི་བཤེས་ལ་གསོལ་བ་འདེབས། །རྣམ་བཀྲའི་མེ་ཏོག་ཆེས་དངར་བདུག་སྤོས་དང༌། །ཉི་ཟླ་ལྟར་གསལ་མར་མེ་བྱུག་པའི་དྲི། །ཕུན་ཚོགས་རོ་བརྒྱའི་དཔལ་ལྡན་ལྷ་བཤོས་སོགས། །ལུས་ངག་ཡིད་ཀྱིས་ཇི་ལྟར་ནུས་བཞིན་འབུལ། །ཐོག་མེད་དུས་ནས་ད་ལྟའི་བར་དག་ཏུ། །བསགས་པའི་མི་དགེ་བཅུ་ཡི་ལས་ངན་རྣམས། །སྔར་བྱས་ལ་འགྱོད་ཕྱིས་ནས་སྡོམ་སེམས་ཀྱི། །བསམ་པ་ཐག་པས་སྙིང་ནས་མཐོལ་ལོ་བཤགས། །སངས་རྒྱས་སྲས་བཅས་ཉན་རང་སོ་སྐྱེ་ཡིས། །བསགས་དང་(༤༡ན)
གསོག་བཞིན་གསོག་པར་ཡོངས་འགྱུར་པའི། །མཐའ་ཀླས་རྣམ་དཀར་དགེ་བའི་ཚོགས་རྣམས་ལ། །ལེགས་སྨོན་དགའ་ཞིང་སྤྲོ་བས་རྗེས་ཡི་རང༌། །མཆོག་དམན་སྐྱེ་རྒུའི་མོས་པ་དང་མཚམས་པར། །རྡོ་རྗེ་ཐེག་ནས་སོ་སོ་ཐར་པའི་བར། །ཆགས་བྲལ་རླབས་ཆེན་སྤྱོད་དང་འདོད་ཡོན་རྣམས། །ལམ་བྱེད་ཆོས་ཀྱི་འཁོར་ལོ་བསྐོར་བར་བཀུལ། །སྙིགས་མ་ལྔ་ཡི་ཆེར་སྦགས་གདུལ་དཀའ་འགྲོའི། །ཚུལ་ལ་བརྣག་ནུས་ཞུམ་མེད་སྙིང་སྟོབས་ཀྱིས། །ཆོས་དབྱིངས་ཞི་བའི་ཀློང་དུ་མི་མནལ་བར། །བསྐལ་བརྒྱར་མྱ་ངན་མི་འདའ་རྟག་བཞུགས་གསོལ། །མདོར་ན་མཐའ་བྲལ་བསོད་ནམས་ཚོགས་ཆེན་ནས། །གཟན་ཆངས་གཅིག་ཙམ་བྱིན་པ་ཡན་ཆད་ཀྱི། །བདག་གིས་བསགས་པའི་དགེ་འབྲས་མཁའ་མཉམ་གྱི། །མ་རྒན་དོན་དུ་སངས་རྒྱས་འཐོབ་ཕྱིར་བསྔོ། །ཞེས་པ་འདིའང་ཇུ་རིག་ཐུ་དབོན་པོ་ངག་དབང་བློ་གྲོས་དང་འོལ་དགའ་བ་འབྲི་ལུང་པ་བློ་བཟང་དཔལ་འབྱོར་གཉིས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །ངོ་མཚར་བདེ་ལྡན་ཞིང་ན་ཚེ་མཐའ་ཡས། །འཆི་མེད་པདྨ་ཐོད་ཕྲེང་རྣམ་རོལ་ཅན། །མཆོག་གསུམ་རྒྱ་མཚོའི་ངོ་བོར་ལྷུན་གྲུབ་པའི། །བྱིན་རླབས་ནུས་མཐུའི་ཉིན་བྱེད་འོད་དཔུང་གིས། །ཡིད་སྲུབས་ནག་པོའི་མུན་པ་མཐར་བསྐྲད་དེ། །ངག་གི་དབང་ཕྱུག་བློ་བཟང་རྒྱ་མཚོའི་དཔལ། །བསྐལ་བརྒྱར་རྡོ་རྗེས་མཚན་པའི་ཁྲི་ཆེན་པོར། །རབ་བརྟན་ཕན་བདེའི་སྣང་བ་ཆེས་དཀར་ཤོག །དཀར་(༤༡བ)
ཆ་ཡར་ལ་ཆེས་འཕེལ་བཀྲ་ཤིས་ཚེས། །མཁའ་ལ་གཟའ་སྐར་བཟང་པོའི་འཕྲོད་ཀྱི་དགེ །གནས་འདིར་རྒྱུ་རྐྱེན་འཛོམས་པའི་རྟེན་འབྱུང་གིས། །བསམ་པའི་དོན་ཀུན་ལྷུན་གྱིས་འགྲུབ་གྱུར་ཅིག །ཅེས་བརྟན་བཞུགས་ཀྱི་ཚིགས་སུ་བཅད་པ་འདི་ནི་ར་ས་འཕྲུལ་སྣང་གི་རུ་བཞི་སྤྱི་ཚོགས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར། །ཕུན་ཚོགས་བཀོད་ལེགས་བདེ་ཆེན་ཞིང་གི་གཙོ། །གར་དབང་ཚེ་དང་ཡེ་ཤེས་དཔག་ཏུ་མེད། །རྣམ་པར་རྒྱལ་མ་ཡིད་བཞིན་འཁོར་ལོ་སོགས། །འཆི་མེད་གྲུབ་པའི་ལྷ་ཚོགས་རྣམས་ཀྱིས་སྐྱོང༌། །སྲ་བརྟན་རྡོ་རྗེས་ལེགས་བསྡམས་རིན་ཆེན་ཁྲི། །མི་འགྱུར་ཚེ་ཡི་གཡུང་དྲུང་འཁྱིལ་བའི་སྟེང༌། །ངག་གི་དབང་ཕྱུག་བློ་བཟང་རྒྱ་མཚོ་དཔལ། །བསྐལ་བརྒྱར་བརྟན་བཞུགས་ཆོས་འཁོར་སྐོར་གྱུར་ཅིག །འཇིགས་མེད་དུས་དགྲའི་དབང་པོ་ཁྲོས་པའི་གར། །བདུད་བཞི་གཡུལ་ལས་རྒྱལ་བའི་དཔའ་བོའི་རྟགས། །མི་ཤིགས་ཏིང་འཛིན་གོ་ཆ་ཆེར་བགོས་ནས། །བགྲང་ཡས་སྐྱེ་རྒུའི་གཉེན་དུ་བརྟན་གྱུར་ཅིག །ཐུབ་བསྟན་ལང་ཚོ་དར་བའི་ནག་ཀླུང་སྡེར། །ཞྭ་སེར་འཆང་བའི་རིང་ལུགས་ཡོངས་འདུའི་ལྗོན། །ཐོས་བསམ་རོ་བརྒྱའི་འབྲས་བུ་སྨིན་པའི་ཆེད། །ཞིང་འདིར་རྡོ་རྗེ་ལྟ་བུར་གཡོ་མེད་ཤོག །ཨ་ཧཾ་མི་འགྱུར་ཀ་བ་དྷཱུ་ཏིའི་ལམ། །ལས་རླུང་དག་པའི་འཆི་མེད་རྡོ་རྗེའི་སྐུར། །བཞེངས་ནས་འོག་མིན་ཞིང་གི་མགོན་པོ་ལྟར། །བདག་སོགས་གདུལ་བྱའི་དཔལ་དུ་བཞུགས་གྱུར་ཅིག །དགའ་ལྡན་ཕྱོགས་ལས་རྣམ་རྒྱལ་ཕོ་བྲང་ཆེའི། །བསྟན་སྲིད་འཕྲིན་ལས་དབྱར་གྱི་རྒྱ་མཚོ་ལྟར། །ཆེས་ཆེར་རྒྱས་(༤༢ན)
མཛད་ནོར་འཛིན་སྐྱོང་བའི་དབང༌། །རྡོ་རྗེ་ལྟ་བུར་མི་འགྱུར་ཞབས་བརྟན་ཤོག །བཀའ་ཁྲིམས་གསེར་སྦྱང་ཞུན་མའི་གཉའ་ཤིང་རི། །འཛམ་གླིང་ཡོངས་ཀྱི་ཕྲག་པར་རབ་ལྕི་ཞིང༌། །འབངས་རྣམས་རྫོགས་ལྡན་དགའ་སྟོན་ལ་སྤྱོད་པ། །མང་བཀུར་རྒྱལ་པོའི་རྣམ་ཐར་འཛིན་པར་ཤོག །མཁྱེན་བརྩེ་ནུས་ལྡན་སངས་རྒྱས་བདེན་གཉིས་ཆོས། །རིག་གྲོལ་ཡོན་ཏན་གཏེར་གྱུར་དགེ་འདུན་སྟེ། །མཆོག་གསུམ་བྱིན་རླབས་བསྟན་སྲུང་རྒྱ་མཚོའི་མཐུས། །སྨོན་པ་ཇི་བཞིན་འགྲུབ་པར་བདག་བྱིན་རློབས། །རྒྱུ་འབྲས་རྟེན་འབྱུང་ནམ་ཡང་མི་བསླུ་ཞིང༌། །དྲང་སྲོང་རིག་འཛིན་གྲུབ་པའི་བདེན་ཚིག་དང༌། ཁྲིམས་ལྡན་འདུས་པས་སྨོན་ལམ་རྩེ་གཅིག་ཏུ། །བཏབ་པའི་འདོད་དོན་རེ་བ་ཡོངས་སྐོང་ཤོག །ཅེས་པ་འདིའང་ཆོས་འཁོར་རྒྱལ་ནས་ཆོས་རྗེ་ལེགས་བཤད་གླིང་པ་བློ་བཟང་ཆོས་འཛིན་གྱིས་དོན་གཉེར་ཆེན་པོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །བདེ་ལྡན་ཞིང་གི་འདབ་སྟོང་ཟིའུ་འབྲུར། །འཆི་མེད་བདུད་རྩི་བཞུ་བླུག་འཁྱིལ་བའི་ཧྲཱིཿ། །ཚེ་མཐའ་ཡས་པའི་མགོན་པོའི་བཞིན་ལག་སྐུར། །རྣམ་རོལ་ཐུགས་རྗེའི་མཐུ་དཔུང་དེང་འདིར་སྐྱེད། །མགྲིན་པའི་པད་མཚོར་ངག་དབང་དབྱངས་ཅན་ལྷས། །སྤོབས་པ་དགེ་བའི་རྒྱུད་མངས་འཁྲོལ་བ་ལས། །བློ་བསལ་སྐལ་བཟང་དགའ་བྱེད་ལེགས་བཤད་གཏེར། །རྒྱ་མཚོའི་གོས་ཅན་གཞི་འདིར་རབ་བརྟན་ཤོག །འགྲོ་ལ་རྗེས་ཆགས་སྙིང་རྗེས་སྲིད་པ་ལ། །འཇིགས་མེད་ལྷག་བསམ་(༤༢བ)
བཙན་པོའི་གོ་ཆ་ཅན། །ཡིད་སྲུབ་དཔུང་གིས་ནམ་ཡང་གཞོམ་མིན་པར། །རྡོ་རྗེའི་ཁྲི་ལ་རྟག་ཏུ་བཞུགས་གྱུར་ཅིག །ཐུབ་དབང་བསྟན་པའི་ལང་ཚོ་དར་དྲག་པ། །རྒྱ་ཆེན་ཐོས་པའི་སྡེ་སྣོད་སྡོང་པོའི་རྩེར། །བསླབ་གསུམ་སྒོམ་པའི་འབྲས་བུ་གཡུར་ཟ་བ། །བསྐལ་བ་རྒྱ་མཚོར་ཆོས་འཁོར་བསྐོར་དུ་གསོལ། །སྙིང་དབུས་དྲི་ཟའི་བུ་མོའི་འཇོ་སྒེག་ལ། །དགའ་བས་ལེགས་འཁྱུད་འཇམ་དབྱངས་མཁྱེན་པའི་འོད། །རྣམ་དཔྱོད་དཔུང་གི་རྒྱན་དུ་རབ་འཚེར་བ། །བཤེས་གཉེན་དམ་པ་གཡོ་མེད་བརྟན་གྱུར་ཅིག །བཤད་སྒྲུབ་དར་ཞིང་རྒྱས་པའི་ཁྲིམས་ལྡན་གླིང༌། །ཆ་དཀར་བྲག་དབར་གསུང་རབ་འཆད་ཉན་གྲྭ། །རྣམ་གསུམ་འཁོར་ལོའི་བྱ་བ་དབྱར་དུས་ཀྱི། །ཆུ་གཏེར་བཞིན་དུ་ཆེས་ཆེར་འཕེལ་བར་ཤོག །སླུ་མེད་རྟེན་འབྲེལ་ཆུ་འཛིན་ལང་ལོང་འཁྲིགས། །འདུས་སྡེའི་བདེན་ཚིགས་དབྱར་རྔ་ལྡིར་བ་ལས། །བྱིན་རླབས་ཆར་གྱི་འདོད་དོན་སྙེ་མ་རྣམས། །རབ་སྨིན་ཕན་བདེའི་འབྲས་བཟང་དུད་གྱུར་ཅིག །ཅེས་བརྟན་བཞུགས་ཀྱི་ཚིགས་སུ་བཅད་པ་འདི་ནི་ཆ་དཀར་བྲག་དབར་བ་གྲྭ་ཚང་བཤད་སྒྲུབ་དར་རྒྱས་གླིང་པའི་སློབ་དཔོན་ངག་དབང་ནོར་བུས་ཐོག་དྲངས་གྲྭ་དམངས་རྣམས་ཀྱིས་དོན་གཉེར་ཆེན་པོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་ངོ༌། །སྔོན་བྱོན་ད་ལྟ་བཞུགས་དང་འབྱོན་གྱུར་གྱི། །སངས་རྒྱས་བྱང་སེམས་སློབ་མར་བཅས་རྣམས་དགོངས། །བདག་སོགས་མ་རྒན་སེམས་ཅན་ཐམས་ཅད་ཀུན། །མཁྱེན་བརྩེས་ཉེར་གཟིགས་ནུས་མཐུས་(༤༣ན)
སྐྱབས་ཏུ་གསོལ། །དེང་ནས་ཚེ་རབས་ཀུན་ཏུ་མཐོ་རིས་ཀྱི། །ཡོན་ཏན་བདུན་དང་ལྡན་པའི་རྟེན་ཐོབ་ཅིང༌། །རྒྱལ་སྲས་སྤྱོད་པས་ཚོགས་གཉིས་མྱུར་རྫོགས་ནས། །རྣམ་པ་ཐམས་ཅད་མཁྱེན་པར་བདག་གྱུར་ཅིག །དགེ་བ་ཕྲ་མོ་ནས་བཟུང་ལུས་སྲོག་ཀྱང༌། །གཞན་ཕྱིར་གཏོང་བའི་བར་གྱི་རྣམ་དཀར་ཀུན། །ནམ་མཁའི་མཐའ་དང་མཉམ་པའི་སྐྱེ་རྒུ་རྣམས། །བླ་མེད་བྱང་ཆུབ་འཐོབ་པའི་རྒྱུ་རུ་བསྔོ། །ཞེས་པ་འདིའང་ར་ཁོ་ཆོས་རྗེས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཇམ་དཔལ་ལོ། །འཆི་མེད་གྲུབ་པ་མགོན་པོ་འོད་མཐའ་ཡས། །ཚེ་དབང་རིག་འཛིན་སྐུར་བསྟན་པདྨ་འབྱུང༌། །མཆོག་གསུམ་ཀུན་འདུས་ཐུགས་རྗེ་དཔག་བསམ་ལྗོན། །ཕན་བདེའི་འབྲས་བཟང་བྱིན་ཆེན་ཆར་དུ་ཕོབས། །འགྲོ་བའི་ལུས་ངག་ཡིད་གསུམ་སྨིན་བྱེད་དབང༌། །ཆད་མེད་བློ་ཡི་བུམ་བཟང་ལེགས་བཀང་སྟེ། །རྒྱ་ཆེན་མཚོ་ལྟར་གཏིང་ཟབ་གྲོལ་བྱེད་ལམ། །སྟོན་མཛད་རྡོ་རྗེའི་སློབ་དཔོན་ཞབས་བརྟན་ཤོག །དུས་ཀྱི་དགྲ་བོར་འཇིགས་མེད་འཇམ་དཔལ་དབྱངས། །མཐུ་སྟོབས་བཙན་པོའི་གོ་ཆར་འཁོར་འདས་ཀྱི། །ཕྱག་རྒྱ་མ་ལུས་ཟིལ་གནོན་བརྟུལ་ཞུགས་རྩལ། །ལྷུན་གྲུབ་གདོད་མའི་ངོ་བོར་རྟག་བཞུགས་གསོལ། །ཐུབ་བསྟན་ཡང་སྙིང་འོད་གསལ་རྡོ་རྗེའི་ཐེག །ཐོས་བསམ་སྒོམ་པའི་ལང་ཚོ་དར་དྲག་པས། །སྐལ་ལྡན་སྐྱེ་རྒུའི་འདོད་འཇོ་ཡོངས་འདུས་སྡེ། །མི་འགྱུར་རྡོ་རྗེའི་ཁྲི་ལ་བརྟན་པར་ཤོག །ཡིས་སྲུབས་ལ་ཁྲོས་གཏུམ་དྲག་རབ་འབར་བ། །ཆེ་མཆོག་འདུས་པའི་བླ་མེད་རྡོ་རྗེ་རྩལ། །(༤༣བ)
ཆོས་ཀུན་གང་ཤར་ཀ་ནས་དག་པའི་དབྱིངས། །རང་སར་གྲོལ་བའི་མགོན་ཁྱོད་རྟག་བརྟན་ཤོག །བཀའ་གཏེར་རིགས་འཛིན་རྩ་རྒྱུད་བླ་མ་དང༌། །ཡི་དམ་བཀའ་བརྒྱད་ཞི་ཁྲོ་རྒྱ་མཚོའི་ལྷ། །མ་ནིང་རལ་གཅིག་མ་སོགས་ཆོས་སྲུང་གིས། །སྨོན་པའི་རེ་བ་ཀུན་འགྲུབ་འཕྲིན་ལས་མཛོད། །རྩ་གསུམ་འདུས་པའི་ངོ་བོ་ཐོད་ཕྲེང་རྩལ། །བདག་སོགས་སྙིང་གི་ཟེའུ་འབྲུར་རྟག་བཞུགས་ནས། །མཆོག་ཐུན་དངོས་གྲུབ་གང་བསམ་ལྷུན་གྲུབ་པ། །ནོར་བུ་དབང་གི་རྒྱལ་པོའི་སྐལ་བཟང་སྩོལ། །ཞེས་བརྟན་བཞུགས་ཀྱི་ཚིགས་སུ་བཅད་པ་འདི་ནི་ཤམྦྷ་ལར་ཆོས་རྗེ་སྔགས་འཆང་བྲག་ལྷ་བ་དོན་གྲུབ་རྒྱལ་མཚན་གྱིས་ཆེད་གཉེར་དུ་བསྐུལ་བ་ལ་བརྟེན་ནས་ཟ་ཧོར་གྱི་བཙུན་པ་གང་ཤར་རང་གྲོལ་གྱིས་སྦྱར་བའི་ཡི་གེ་པ་ནི་གནས་བན་འཇམ་དབྱངས་བསྟན་འཛིན་ནོ། །ཞི་ཁྲོ་རྒྱ་མཚོའི་དཀྱིལ་འཁོར་འཁོར་ལོའི་གཙོ། །མཆོག་གསུམ་ཀུན་འདུས་པདྨ་ཐོད་ཕྲེང་རྩལ། །མགོན་ཁྱོད་ཕུལ་བྱུང་ཐུགས་རྗེའི་བྱིན་རླབས་དང༌། །རྟེན་འབྲེལ་སླུ་མེད་བདེན་པ་ཆེན་པོའི་མཐུས། །ཕྱག་ན་མཐུ་སྟོབས་རྡོ་རྗེ་འབར་བའི་མཚོན། །རྣོན་པོས་ཡིས་སྲུབས་སྡེ་ལས་རབ་རྒྱལ་ཡང༌། །ནོར་བུ་པདྨའི་འཕྲིན་ལས་འོད་དཀར་གྱིས། །འགྲོ་ལ་ཕན་བདེའི་སྣང་བ་སྟེར་མཁས་མཆོག །སླད་མར་མ་དག་ཞིང་གི་གདུལ་བྱའི་ཚོགས། །འདྲེན་ཕྱིར་ངོ་མཚར་སྤྲུལ་སྐུའི་སྲིད་འཛིན་པར། །གླགས་ལྟའི་བདུད་སྡེས་འཚེ་བར་མི་ནུས་ཞིང༌། །བཞེད་པའི་རེ་བ་ཇི་བཞིན་ལྷུན་གྲུབ་ཤོག །ལྷག་བསམ་གངྒཱའི་ཡབ་ཅིག་ལས་འོངས་པ། །གཞན་(༤༤ན)
ཕན་འཕྲིན་ལས་ཆད་མེད་ཆུ་བོའི་རྒྱུན། །རིས་མེད་སྐྱེ་རྒུའི་ཕན་བདེ་རྒྱ་མཚོ་ཆེར། །འབབ་པའི་བྱེད་པོ་ཁྱོད་བཞེད་འགྲུབ་གྱུར་ཅིག །རྩ་གསུམ་བྱིན་རླབས་ལྷ་དང་དྲང་སྲོང་སོགས། །བདེན་ཚིག་གྲུབ་པ་རྣམས་ཀྱི་སྨོན་ལམ་དང༌། །ཟབ་གཏེར་ཆོས་སྲུང་རྒྱ་མཚོའི་ནུས་མཐུ་ཡིས། །བསམ་པའི་རེ་བ་ལྷུན་གྱིས་འགྲུབ་གྱུར་ཅིག །ཅེས་སྤྲུལ་སྐུ་ཕྱག་རྡོར་ནོར་བུའི་སྤྲུལ་སྐུ་མྱུར་འབྱོན་གྱི་བདེན་ཚིགས་བརྗོད་པའི་སྨོན་ལམ་འདི་ནི་བླ་མ་མངའ་བདག་པ་དང་སྐྱི་སྟོན་པ་གཉིས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །འཆི་མེད་མཆོག་སྦྱིན་ཚེ་མཐའ་ཡས་པའི་མགོན། །མགོན་དེས་ལེགས་བསྔགས་བཅོམ་ལྡན་རྣམ་པར་རྒྱལ། །རྒྱལ་ཡུམ་སྒྲོལ་དཀར་ཡིད་བཞིན་འཁོར་ལོའི་ཞབས། །ཞབས་པད་དུས་ཀུན་བསྟེན་ནོ་དངོས་གྲུབ་སྩོལ། །ངག་ལ་དབྱངས་ཅན་ཉེར་ཞུགས་སྨྲ་བའི་དབང༌། །གྲུབ་པའི་བློ་གྲོས་རྩལ་ལྡན་ཁྲིམས་ཀྱིས་བཙུན། །བཟང་པོའི་ལྷག་བསམ་རྒྱ་ཆེན་རིས་མེད་འགྲོར། །དབྱར་མཚོ་ལྟ་བུར་སྐྱེད་མཛད་ཞབས་བརྟན་ཤོག །འཇིགས་བྲལ་སྤོབས་པས་བུ་རམ་ཤིང་པའི་གཞུང༌། །དཀའ་གནད་འཁྲུལ་མེད་གོ་རིམ་ཇི་བཞིན་དུ། །ཆ་ཤས་གང་བའི་ཟླ་ལྟར་གསལ་མཛད་པ། །རྗེ་བཙུན་བླ་མ་བསྐལ་བརྒྱར་བཞུགས་གྱུར་ཅིག །ཐུབ་པས་ལེགས་བསྟན་བདེན་གཉིས་ཟུང་འཇུག་མདས། །བདག་འཛིན་ལངྐ་རྣམ་གནོན་འཕོང་སྐྱེན་ཚོའི། །རྩེར་སོན་གཞན་ཕན་སྙིང་སྟོབས་དགའ་བྱེད་ལྷ། །སྡེ་བཞིའི་མཆོད་སྦྱིན་སྤེལ་ཕྱིར་གཡོ་མེད་(༤༤བ)
ཤོག །འཇམ་དཔལ་རྡོ་རྗེའི་ཞལ་ལུང་དབྱངས་འདུན་གླུར། །བླངས་པས་དཔྱོད་ལྡན་དགའ་བ་བསྐྱེད་པའི་བཤེས། །བསྟན་དང་ཡིད་ཅན་ཀུན་གྱི་དཔུང་གཉེན་ཤོག །མི་འགྱུར་རྡོ་རྗེའི་ཁྲི་ལ་རྟག་བཞུགས་གསོལ། །ཞྭ་སེར་ཅོད་པཎ་འཆང་བའི་ཆོས་སྲིད་ཀྱི། །བསྟན་པའི་གདུག་དཀར་གཅིག་གིས་ནོར་འཛིན་ཁྱོན། །ཀུན་ཁྱབ་ཕན་བདེའི་གྲིབ་མ་ཉེར་བསིལ་བར། །ལུས་ཅན་མཐའ་དག་ངལ་གསོར་སྤྱོད་གྱུར་ཅིག །དཀོན་མཆོག་སྲི་ཞུར་གཟུགས་ཅན་སྙིང་པོའི་གྲོགས། །དད་དང་གཏོང་བས་མགོན་མེད་ཟས་སྦྱིན་རིགས། །དཔའ་མཛངས་རྟུལ་ཕོད་ས་སྐྱོང་སྦྱིན་པའི་བདག །ཚེ་དཔལ་སྟོབས་འབྱོར་རྣམ་ཐོས་བུར་འགྲན་ཤོག །འཇིག་རྟེན་སྤྱི་དང་ཁྱད་པར་རྒྱ་ནག་ཧོར། །བོད་ཡུལ་ཀུན་ཏུ་སྡིག་ཏོའི་འབྲས་ཞི་ཞིང༌། །རྫོགས་ལྡན་དུས་ཀྱི་འཛམ་གླིང་སྐྱེ་རྒུ་དང༌། །བསོད་ནམས་མཉམ་པོར་ཐོབ་པའི་སྐལ་བཟང་ཤོག །མཁྱེན་བརྩེ་ནུས་མངའ་འགོག་ལམ་གཉིས་དང་ལྡན། །རིག་གྲོལ་རྒྱན་མཛེས་སླུ་མེད་གཏན་གྱི་སྐྱབས། །ལྷ་དང་དྲང་སྲོང་བདེན་ཚིག་ལ་དབང་མཐུས། །ལེགས་བཏབ་སྨོན་པའི་དོན་ཀུན་ལྷུན་གྲུབ་ཤོག །ཅེས་རིང་པོར་འཚོ་བའི་ཤིས་བརྗོད་ཀྱི་ཚིགས་སུ་བཅད་པ་དང་འབྲེལ་བར་རྒྱ་བོད་ཧོར་གསུམ་གྱི་སྐྱ་སེར་གང་གི་ངག་འདོན་དུ་བྱེད་ཀྱང་རིས་བཅད་ཀྱི་ཁ་གསལ་མེད་པའི་བསྟན་འགྲོ་སྤྱི་བྱེ་བྲག་གི་སྨོན་ལམ་བཅས་པ་འདི་ལྟ་བུ་ཞིག་དགོས་ཞེས་ལུགས་ཟུང་གི་ཚུལ་ལ་བལྟ་བའི་རྣམ་དཔྱོད་ཀྱི་མིག་ཡངས་པ་དཔོན་མཁའ་འགྲོ་བློ་བཟང་བསྟན་སྐྱོང་གི་དང་བའི་ཡིད་ཀྱིས་དོན་གཉེར་ཆེན་པོས་བསྐུལ་བའི་ངོར་ཤཱ་ཀྱའི་བཙུན་པ་ངག་དབང་བློ་བཟང་རྒྱ་མཚོས་ཐུན་(༤༥ན)
མཚམས་ཀྱི་ངེས་པ་ཞིག་ལ་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །མཚན་ཙམ་རྣ་བར་ཐོས་པའི་བདུད་རྩིའི་བཅུད། །སྙིང་དབུས་འཆི་མེད་དགའ་བ་གཡས་འཁྱིལ་དུང༌། །སྲིད་ཞིའི་ཕུན་ཚོགས་འབོད་བྱེད་སྒྲ་སྙན་ལྷ། །ཚེ་སྦྱིན་ཡིད་བཞིན་འཁོར་ལོས་ཤིས་པ་སྩོལ། །ངག་དབང་འཇམ་མགོན་མཁྱེན་པའི་བློ་གྲོས་རྒྱས། །བཟང་པོའི་བརྩེ་ཆེན་ཕྱག་ན་པད་མའི་གར། །རྒྱ་མཚོ་ལྟར་ཟབ་ནུས་ལྡན་རྡོ་རྗེ་འཛིན། །འོག་མིན་ཞིང་གི་མགོན་ལྟར་བརྟན་གྱུར་ཅིག །ཞྭ་སེར་འཆང་བའི་ཆོས་སྲིད་འཕྲིན་ལས་རྒྱུན། །རྒྱ་ཆེན་ནམ་མཁའི་མཐའ་ཀླས་དེ་སྙེད་དུ། །དབྱར་མཚོ་ལྟ་བུར་རབ་སྤེལ་ནོར་འཛིན་དབང༌། །འགྱུར་མེད་གཡུང་དྲུང་གཞི་ལ་བརྟན་གྱུར་ཅིག །ཅེས་བརྟན་བཞུགས་ཀྱི་ཚིགས་སུ་བཅད་པ་འདི་ནི་གོང་དཀར་རྫོང་སྡོད་སྒེམ་བུ་བ་དང་གེ་ར་བ་ཐུན་མོང་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བའོ། །མི་འགྱུར་དད་པའི་གཡུང་དྲུང་ཁམས་ལས་གྲུབ། །ཤུགས་དྲག་སྨོན་ལམ་གདན་ཁྲིའི་གཟུགས་སུ་ཤར། །བདེན་ཚིགས་རྡོ་རྗེའི་རི་བོ་བཀྲ་བའི་སྟེང༌། །རྗེ་བཙུན་བླ་མ་བསྐལ་བརྒྱར་བཞུགས་གྱུར་ཅིག །ཆོས་དབྱིངས་འགྱུར་བ་མེད་པ་གནས་ལུགས་གཤིས། །ཆོས་ཅན་རྒྱུ་འབྲས་རྟེན་འབྲེལ་མི་བསླུ་ཞིང༌། །དཀོན་མཆོག་ཐུགས་རྗེའི་མཐུ་དཔུང་འཛད་མེད་ཀྱིས། །དེང་འདིར་སྨོན་ལམ་ཅི་བཏབ་ལྷུན་འགྲུབ་ཤོག །རྩ་རྒྱུད་བླ་མ་ཡི་དམ་ཆོས་སྲུང་ཚོགས། །དྲང་སྲོང་རིགས་འཛིན་ཚིག་ལ་དབང་བ་དང༌། །དཀར་པོའི་ཕྱོགས་ལ་མངོན་པར་དགའ་བའི་ལྷས། །(༤༥བ)
འདོད་དོན་ཡོངས་འདུའི་འབྲས་བཟང་སྨིན་པར་མཛོད། །ཅེས་བདེན་ཚིགས་བརྗོད་པའི་རིམ་པ་འདི་ནི་སྤྲུལ་པའི་ཆོས་རྒྱལ་ཆེན་པོའི་གསུང་བཞིན་ཆོས་སྡེ་ཆེན་པོ་དཔལ་ལྡན་འབྲས་སྤུངས་སྤྱི་སོས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་བ་འཇམ་དབྱངས་སོ། །མཛོད་སྤུའི་ཟེར་འཕྲེང་ལས་འཕྲོས་བདུད་རྩི་ཡིས། །འཆི་མེད་མཆོག་སྦྱིན་སྤོབས་པ་སྨོན་ལམ་མཐུས། །ཐོས་པས་དཔག་མེད་ཚེ་ཡི་མགོན་པོ་ཞེས། །བདེ་ལྡན་དག་པའི་ཞིང་གི་གཙོ་དེས་སྐྱོངས། །མཆོག་གསུམ་ཐུགས་རྗེ་མཐུ་དཔུང་བསྐུལ་བའི་ཚིག །མི་ཤིགས་རྡོ་རྗེའི་དབྱངས་སུ་ཉེར་བླངས་པས། །རྒྱལ་བ་སྲས་བཅས་སློབ་མའི་ཚོགས་རྣམས་ཀྱིས། །དོན་ཀུན་འགྲུབ་པའི་བདེན་ཚིག་བརྗོད་དུ་གསོལ། །ངག་དབང་འཇམ་མགོན་བློ་གྲོས་རྩལ་ལྡན་གང༌། །བསྐལ་བཟང་འདྲེན་མཆོག་བཞི་པའི་བསྟན་པ་ལ། །རྣམ་གསུམ་འཁོར་ལོས་རི་མོར་བྱ་བའི་ཆེད། །རྒྱ་མཚོའི་གོས་ཅན་བཞིན་དུ་བརྟན་གྱུར་ཅིག །མཁའ་མཉམ་ལུས་ཅན་ཡོངས་ཀྱི་མགོན་སྐྱབས་དང༌། །དཔུང་གཉེན་གླིང་ལས་གུད་ན་མཛད་པ་གཞན། །མེད་ཕྱིར་ཆེས་ཆེར་སྙིགས་མ་ལྔ་བདོ་བའི། །འགྲོ་རྣམས་ཕན་བདེར་སྦྱོར་ཕྱིར་རྟག་བཞུགས་གསོལ། །འཇིག་རྟེན་གསུམ་མགོན་སྐྱོབ་པའི་རིང་ལུགས་སྤྱི། །ཐེག་མཆོག་དགོངས་པ་ཡང་ཟབ་རིན་ཆེན་གཏེར། །ཕུན་ཚོགས་སྨིན་གྲོལ་ཆད་མེད་གངྒའི་རྒྱུན། །སྐལ་ལྡན་ཆུ་གཏེར་གློང་དུ་རྟག་བབས་ཤོག །གངས་ཅན་ས་ལའི་འཁྲི་ཤིང་ཉེར་འཁྲིགས་པའི། །ལྗོངས་འདིའི་སྡིག་ཏོའི་རྣམ་པར་སྨིན་པའི་འབྲས། །མིག་གི་ལྷག་མར་བྱས་ནས་(༤༦ན)
རྫོགས་ལྡན་གྱི། །བདེ་སྐྱིད་དགའ་སྟོན་མཆོག་ལ་སྤྱོད་པར་ཤོག །མ་རྒན་འགྲོ་རྣམས་སྐུ་གསུམ་གྲོང་ཁྱེར་དུ། །འཁྲིད་ལ་ས་བཅུའི་ལམ་མཁན་ཅིག་པུ་བ། །རྣམ་པ་ཐམས་ཅད་མཁྱེན་པ་འཐོབ་པའི་རྒྱུར། །འདིས་མཚོན་དུས་གསུམ་བསགས་པའི་དགེ་ཚོགས་བསྔོ། །ཞེས་ཡུན་དུ་འཚོ་བའི་རྟེན་འབྱུང་གི་ཚིགས་བཅད་སྤྱི་སྒོས་དང་འབྲེལ་བའི་སྨོན་ལམ་འདི་ནི་འབྲི་གུང་ཞབས་དྲུང་སྐུ་འབྲིང་པོའི་སྤྲུལ་སྐུ་རིན་པོ་ཆེ་དཀོན་མཆོག་འཕྲིན་ལས་བཟང་པོའི་གསུང་གིས་བསྐུལ་བ་ལ་བརྟེན་ནས་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ། །