དཔལ་ཕྱག་རྒྱ་ཆེན་པོའི་ཐིག་ལེ་ཞེས་བྱ་བ་རྣལ་འབྱོར་མ་ཆེན་མོའི་རྒྱུད་ཀྱི་རྒྱལ་པོའི་མངའ་བདག

[Full Size]

རྒྱ་གར་སྐད་དུ། ཤྲཱི་མ་ཧཱ་མུ་དྲཱ་ཏི་ལ་ཀཾ་ནཱ་མ་མ་ཧཱ་ཡོ་གི་ནཱི་ཏནྟྲ་རཱ་ཛ་ཨ་དྷི་པ་ཏི། བོད་སྐད་དུ། དཔལ་ཕྱག་རྒྱ་ཆེན་པོའི་ཐིག་ལེ་ཞེས་བྱ་བ་རྣལ་འབྱོར་མ་ཆེན་མོའི་རྒྱུད་ཀྱི་རྒྱལ་པོའི་མངའ་བདག། དཔལ་ཕྱག་རྒྱ་ཆེན་པོའི་ཐིག་ལེ་ལ་ཕྱག་འཚལ་ལོ། །བཅོམ་ལྡན་མཁའ་འགྲོ་ཡེ་ཤེས་ཉིད། །གསང་པད་སྙིང་པོའི་ཁ་འབྱེད་པ། །གསང་པད་ལྟེ་བའི་ནང་ན་བཞུགས། །བདག་གིས་ཞུ་བ་ཁྱོད་གསོན་ཅིག། ཡེ་ཤེས་རྒྱ་མཚོའི་ཀྱེ་རྡོ་རྗེ། །འབུམ་ལྔ་ཡི་ནི་བདག་ཉིད་རྒྱུད། །གང་ཞིག་ཁྱོད་ཀྱིས་དེ་ཉིད་གསུངས། །སྦྱོར་དྲུག་རྣལ་འབྱོར་མ་ཡི་གཞུང་། །ཐམས་ཅད་མཁྱེན་པ་དབང་ཕྱུག་མཆོག། དེ་ནི་དཔའ་བོ་བདག་གིས་ཤེས། །དོན་དམ་པ་ནི་ཇི་ལྟ་བུ། །དེ་རུ་བདག་ནི་ཐེ་ཚོམ་སྐྱེས། །ཆར་དང་ཐིག་ལེ་ཚུལ་དང་ནི། །ཚུལ་ཙམ་མཆོག་གི་མཆོག་གཞན་ཡིན། །སྦྱོར་བ་དྲུག་གིས་རྣམ་པར་ཤེས། །དེ་ཡི་གནས་ནི་གང་ན་ཡོད། །སྲོག་ནི་གང་ནས་འབྱུང་བ་ཡིན། །རྡོ་རྗེ་འཛིན་པ་གང་དུ་བརླག། རྡོ་རྗེ་མཚན་མོ་གང་ཉིད་ཅི། །མཚམས་གང་ཤར་བ་གང་ཞིག་ལགས། །གང་དུ་ནུབ་པའི་དུས་དང་རྩ། །མཆོག་གི་དབང་ཕྱུག་དུ་ཙམ་མཆིས། །དུས་ཀྱི་མཚན་ཉིད་གང་ལགས་གསུངས། །དེ་ཡི་དུས་ཀྱིས་དོན་ཅི་བྱེད། །ཨཱ་ལི་ཀཱ་ལི་བྱ་བ་གང་། །མངའ་བདག་གང་ནས་འབྱུང་བ་ལགས། །རོ་ཡི་བྱེ་བྲག་དུ་ཞིག་བསྟན། །དགའ་བ་ཡང་ནི་དེ་བཞིན་ནོ། །གང་གི་དུས་ཀྱི་དགའ་བ་རྣམས། །རྡོ་རྗེ་དབང་ཕྱུག་འབྱུང་བ་གསུངས། །ཆོས་ཀྱི་དབྱིངས་ནི་ཇི་ལྟར་བཤད། །རྡོ་རྗེ་ཡང་ནི་ཇི་ལྟར་བསྟན། །བདག་གི་སྒྲ་ནི་ཇི་ལྟར་གསུངས། །གསང་བ་ཞེས་བགྱི་ཇི་ལྟར་ལགས། །མཆོག་ཅེས་བགྱི་བ་ཇི་ལྟར་བཤད། །དགྱེས་པའི་དོན་ནི་གསལ་བར་མཛོད། །རིགས་ཀྱི་བྱེ་བྲག་དུ་ཙམ་བསྟན། །ཕུང་པོ་ལ་སོགས་སྐྱེ་མཆེད་ཅི། །ཚངས་དང་ཁྱབ་འཇུག་དྲག་པོ་དང་། །དབང་ཕྱུག་རྟག་ཏུ་ཞི་བ་དང་། །གང་ནས་འབྱུང་ཞིང་གང་དུ་གནས། །ཆེན་པོའི་ཆེན་པོ་དེ་ཇི་ལྟར། །ཕྱག་རྒྱའི་བྱེ་བྲག་དུ་ཞིག་བཤད། །ཕྱག་རྒྱ་ཆེན་པོ་ཇི་ལྟར་ལགས། །མགོན་པོ་མཆོད་པའི་བྱེ་བྲག་ཅི། །དེ་རུ་མེ་ཏོག་ཇི་ལྟར་ཡིན། །མགོན་པོ་ཆེན་པོ་མཆོད་སྦྱིན་ནི། །ཇི་ལྟ་བུ་ཞིག་འཚལ་བ་ལགས། །མཆོག་གི་དངོས་པོའི་དཀྱིལ་འཁོར་ནི། །བཅོམ་ལྡན་འདས་དེ་ཇི་ལྟ་བུ། །

[Full Size]

དེ་རུ་ལྷ་མོ་ཅི་འདྲ་བ། །ལྷ་མོ་བགྱི་བ་གང་ལ་གསུངས། །བཅོམ་ལྡན་དུར་ཁྲོད་དུ་ཞིག་མཆིས། །དེ་རུ་ཤིང་ནི་ཇི་ལྟར་བཤད། །དུར་ཁྲོད་དང་ནི་ཤིང་རྣམས་ནི། །རྒྱལ་བའི་དབང་ཕྱུག་དེ་དག་གསུངས། །མགོན་པོ་ནང་གི་སྦྱིན་སྲེག་དང་། །བདུད་རྩི་ལྔ་ཡི་ཆོ་ག་དང་། །རྣལ་འབྱོར་མ་ཡི་འདུས་གནས་དང་། །དེ་རུ་སྐད་ནི་ཇི་ལྟ་བུ། །བདག་ཉིད་ཀྱི་ནི་རང་ངོ་བོ། །མགོན་པོ་ཆེན་པོ་ཁྱོད་ཀྱིས་གསུངས། །དཔལ་ཕྱག་རྒྱ་ཆེན་པོའི་ཐིག་ལེ་ལས་རྒྱུད་ཐམས་ཅད་ཀྱི་རྒྱུ་ཞེས་བྱ་བའི་ལེའུ་སྟེ་དང་པོའོ།། །།བཅོམ་ལྡན་འདས་ཀྱིས་བཀའ་སྩལ་པ། །དྲིས་པ་ཡང་དག་གཏིང་དཔག་དཀའ། །སྙིང་པོ་ཡི་ནི་སྙིང་པོ་མཆོག། སངས་རྒྱས་ཀུན་གྱི་གསང་ཆེན་པོ། །མཆོག་ལས་མཆོག་གི་ཡང་དག་མཆོག། ལྷ་ཆེན་པོ་ནི་ལ་སོགས་པ། །བཟང་མོ་དེ་རུ་བྱོལ་སོང་ཡིན། །དོན་དམ་དེ་ནི་ཁྱོད་གཅིག་པུ། །ཞལ་བཟང་མོ་ནི་སྣོད་ཡིན་ནོ། །གསང་བའི་གསང་བ་ཡང་དག་རབ། །ཉོན་ཅིག་ཡང་དག་བདག་གིས་བཤད། །དང་པོ་རེ་ཞིག་སློབ་མ་ལ། །དབང་རྣམས་ལན་ཅིག་བསྐུར་བ་ཡིས། །དེ་ཚེ་གསང་ཆེན་བཤད་པ་ཡི། །ངེས་པར་སྣོད་དུ་གྱུར་པའོ། །དབང་མེད་ན་ནི་དངོས་གྲུབ་མེད། །བྱེ་མ་བཙིར་ཡང་མར་མེད་ལྟར། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་ལ་གསལ་བྱེད་པ། །སློབ་དཔོན་སློབ་མ་ཤི་མ་ཐག། དངོས་གྲུབ་ཐོབ་ཀྱང་དམྱལ་བར་འགྲོ། །དེ་བས་འབད་པ་ཐམས་ཅད་ཀྱིས། །བླ་མ་ལ་ནི་དབང་དོན་ཞུ། །དབང་བསྐུར་ཡོད་དང་དེ་ཉིད་ཤེས། །ཡེ་ཤེས་དང་ནི་ཐུགས་རྗེ་ཆེ། །ཡང་དག་རླབས་ཆེ་དཔའ་བོ་དང་། །སེར་སྣ་མེད་དང་རང་བཞིན་བཟང་། །སྐལ་ལྡན་མཚན་ཉིད་ཐམས་ཅད་རྫོགས། །ཕྲག་དོག་ཡུལ་ནི་རྣམ་པར་སྤངས། །རྟག་ཏུ་དགའ་བའི་ཡིད་ལྡན་པ། །འདོད་ཆགས་ཆེན་པོ་གཅིག་པུའི་ཡིད། །སྡོམ་པ་དེ་ནི་ཤེས་པ་ན། །བླ་མ་དེ་ལྟ་བུ་ལ་བྱ། །དེ་ལྟ་བུ་ཡི་བླ་མ་ཡིས། །འབད་པས་སློབ་མ་བརྟག་པར་བྱ། །ཇི་ལྟར་བསྲེགས་ལ་སོགས་པས་གསེར། །ཇི་ལྟར་མཁས་པས་རིན་པོ་ཆེ། །ཇི་ལྟར་བདེ་ལྡན་བུ་མོ་ནི། །དེ་ལྟར་སློབ་མ་བརྟག་པར་བྱ། །དེ་བས་ཐམས་ཅད་རབ་འབད་དེ། །ཕན་ཚུན་སོ་སོར་བརྟག་པར་བྱ། །དེ་ལྟ་མིན་ན་སྐྱོན་དུ་འགྱུར། །ནམ་ཡང་དངོས་གྲུབ་ཐོབ་མི་འགྱུར། །ཇི་ལྟར་དུག་ལ་རབ་སྔགས་ཀྱིས། །དག་པ་བྱས་ན་

[Full Size]

བདུད་རྩིར་འགྱུར། །དེ་བཞིན་སློབ་མ་དབང་སོགས་ཀྱིས། །ལུས་ནི་དྲི་མ་མེད་པར་འགྱུར། །གང་ཞིག་དབང་བསྐུར་སྦྱིན་བྱེད་པ། །དེ་ནི་རྡོར་སེམས་ལྟ་བུར་བལྟ། །བླ་མ་སྦྲུལ་རྒྱལ་ལྟ་བུར་བལྟ། །དཔལ་ལྡན་བླ་མ་མེ་འདྲར་བལྟ། །བླ་མ་སྟོན་པ་བས་ལྷག་བལྟ། །ཡིད་བཞིན་རིན་ཆེན་མཉམ་པར་བལྟ། །ཇི་ལྟར་རབ་སྦྱོར་དང་སྔགས་ཀྱིས། །སྦྲུལ་གྱི་རྒྱལ་པོའི་སྤྱི་བོ་ལས། །ཚད་མེད་པ་ཡི་རིན་ཆེན་རྙེད། །དབུལ་བ་ཐམས་ཅད་མེད་པར་བྱེད། །རབ་སྦྱོར་ལོག་དང་སྔགས་ལོག་གིས། །དགའ་མོ་ངེས་པར་ཚིག་པར་བྱེད། །དེ་ལྟ་བུ་ཡི་ཆོ་ག་ཡིས། །ཁྲིམས་ལ་སོགས་པའི་སྤྱོད་པ་ཡིས། །དཔལ་ཞལ་དེ་ཉིད་རིན་དབང་ཕྱུག། ཚེ་འདི་ཉིད་ཀྱིས་རྙེད་པར་འགྱུར། །དེ་ལྟར་མིན་ཏེ་མ་གུས་ན། །གསུང་གི་མེ་ཡིས་ངེས་ཚིག་བྱེད། །ཇི་ལྟར་མེ་ཡིས་ཤིང་ཚིག་པ། །སྐད་ཅིག་གིས་ནི་ཐལ་བར་བྱེད། །གལ་ཏེ་དེ་བཞིན་དཔལ་བླ་མ། །མཉེས་ན་སྐད་ཅིག་གིས་སྡིག་ཚིག། རྒྱུད་འདི་ལ་ནི་མཆོག་གི་ནི། །བཅོམ་ལྡན་དབང་བསྐུར་དུ་ཞིག་མཆིས། །བཅོམ་ལྡན་འདས་ཀྱིས་བཀའ་སྩལ་པ། །དབང་བསྐུར་བཞི་ཡི་རིམ་པ་ལ། །འབྲས་བུ་ཡིས་ནི་གསུམ་དུ་བསྟན། །དང་པོར་སློབ་དཔོན་དབང་དང་གཅིག། གཉིས་པ་གསང་བའི་དབང་ནི་མཆོག། གསུམ་པ་ཤེས་རབ་ཡེ་ཤེས་དབང་། །དེ་ལྟར་དེ་བཞིན་བཞི་པའོ། །སློབ་དཔོན་དབང་ལ་བཅུ་གཅིག་དབྱེ། །གསང་བའི་དབང་དང་བཅུ་གཉིས་མཆོག། ཤེས་རབ་ཡེ་ཤེས་བཅུ་གསུམ་པ། །དེ་ལྟར་དེ་བཞིན་བཅུ་བཞིའོ། །དབང་རེ་ལ་ནི་ས་རེ་སྟེ། །དེ་རྣམས་ས་ཡི་དབང་ཕྱུག་བདག། རྒྱུ་རྩ་གསུམ་གྱིས་ཤེས་པར་བྱ། །དེ་ཡི་འབྲས་བུ་བཞི་པའོ། །ཡང་ན་འབྲས་བུ་གསུམ་དང་བྲལ། །ཡང་ན་བདག་ཉིད་གསུམ་པོ་ཡིན། །དགའ་བའི་བྱེ་བྲག་ཤེས་པར་བྱ། །འཁོར་ལོ་རྣམས་ཀྱི་རིམ་པས་སོ། །ཡར་ངོ་ཡི་ནི་གསུམ་པའི་ཚེ། །སློབ་མ་རབ་ལ་དབང་བསྐུར་བྱ། །བཞིན་བཟངས་མིག་གི་དཀྱུས་རིང་བ། །གཟུགས་བཟང་ལང་ཚོས་བརྒྱན་པ་ཡིས། །བཅུ་གཉིས་ཡང་ན་བཅུ་དྲུག་གམ། །མ་རྙེད་ཉི་ཤུ་ལོན་པའང་རུང་། །ཉི་ཤུ་ཡན་ཆད་ཕྱག་རྒྱ་གཞན། །དེས་ནི་དངོས་གྲུབ་ཐག་རིང་བྱེད། །སྲིང་མོ་ཡང་ན་བུ་མོ་འམ། །ཆུང་མ་བླ་མ་ལ་དབུལ་བྱ། །དེ་ནས་སྣ་ཚོགས་རྫས་ཀྱིས་ནི། །བླ་མ་དད་པས་མཆོད་

[Full Size]

པར་བྱ། །སྣ་ཚོགས་རས་ནི་བརྒྱ་སོགས་དང་། །རིན་ཆེན་སྣ་ཚོགས་རྒྱལ་མཚན་མཆོག། མུ་ཏིག་ཕྲེང་བ་རིན་ཐང་མེད། །གྲངས་མེད་གསེར་གྱིས་མཆོད་བྱའོ། །དེ་རིང་ཕན་ཆད་བདག་ནི་འབངས། །ཆེན་པོའི་ཆེན་པོ་མཆོད་པ་བཞིས། །དེ་ལྟ་བུ་ཡི་ཆོ་ག་ཡིས། །འབད་དེ་བླ་མ་མཆོད་པར་བྱ། །བླ་མའི་གཟུགས་ནི་བདག་རང་ཡིན། །བདག་མཆོད་བྱས་ན་དངོས་གྲུབ་འཐོབ། །དེ་ཡིས་སྐད་ཅིག་ཕྱག་རྒྱ་ཆེ། །མཆོད་པ་བྱས་ནས་བསྙེན་པར་བྱ། །བསྙེན་པ་ལས་ནི་གང་ཞིག་འབྱུང་། །སློབ་མའི་ཁ་རུ་དབབ་པར་བྱ། །སྦོམ་པོ་མཐའ་ལྟག་སྦྱར་བ་ཡིས། །ལོངས་སྤྱོད་ནང་དུ་གཞུག་པར་བྱ། །དེ་ཚེ་ཡང་དག་ཡེ་ཤེས་སྐྱེ། །བུ་མོའི་བདེ་བ་ཇི་ལྟ་བུ། །སྲོག་དང་རྩོལ་བ་མཉམ་བྱས་ནས། །ཤིན་ཏུ་ལེགས་དགྱེས་ཀྱིས་མཆོད་བྱ། །རིན་ཆེན་ཁ་ལ་ཧཱུཾ་ཕཊ་སྔགས། །བཀོད་ནས་མདའ་ལ་བསྐྱོན་པར་བྱ། །དེ་ཡི་དུས་སུ་དགའ་སྐད་ཅིག། ཅི་ལྟར་རང་བཞིན་སྐྱེ་བར་འགྱུར། །དེ་ལྟར་ཕྱག་རྒྱ་ལ་བཤད་བྱ། །འདི་ནི་དགའ་བའི་མཚན་ཉིད་དོ། །དེ་ནས་སློབ་མའི་ལག་ཏུ་ནི། །བྱིན་ནས་འདི་སྐད་སྨྲ་བར་བྱ། །ང་ཡི་བཀའ་ལུང་རྟོག་མེད་པས། །པདྨའི་དོན་ལ་ཇི་བཞིན་གྱིས། །པདྨའི་སྙིང་པོའི་དབུས་ན་ནི། །རྡོར་དབྱིངས་དབང་ཕྱུག་མ་ནི་བཞུགས། །དེ་མ་རྙེད་པའི་བར་དུ་ནི། །ཐབས་གཞན་ལ་ནི་བྱང་ཆུབ་མེད། །དེ་ནི་རང་བཞིན་དགའ་བའི་གཟུགས། །ཕྲ་མོའི་ཕྲ་མོ་ཡང་དག་མཆོད། །དཔལ་ཕྱག་རྒྱ་ཆེན་པོའི་ཐིག་ལེ་ལས་སློབ་དཔོན་དང་སློབ་མ་བརྟག་པ་དང་། ཡོན་དབུལ་བ་དང་། དབང་བསྐུར་བ་ཞེས་བྱ་བའི་ལེའུ་སྟེ་གཉིས་པའོ།། །།དེ་ནས་གསང་བ་བཤད་པར་བྱ། །མཆོག་དང་རབ་མཆོག་མཆོག་གི་མཆོག། ཕུང་པོ་ལྔ་ཡི་བདག་ཉིད་སྐུ། །ལེགས་དགྱེས་དབང་པོའི་འཁོར་ལོ་དྲུག། ཟླ་ཕྱེད་བྱད་གཟུགས་ཆར་ཡང་ནི། །རླུང་གི་འཁོར་ལོའི་ནང་ན་བཞུགས། །ཕྱེད་མིན་གང་བ་ཡང་མ་ཡིན། །ཆུ་ཡི་ཟླ་བ་བཞིན་དུ་མཐོང་། །སྒྱུ་འཕྲུལ་ཆེན་པོ་འགྲོ་བའི་མ། །ཆར་ཡང་གྲངས་མེད་བསྟེན་པ་ཡིན། །དེ་ནི་མཆོག་དང་གཞན་མཆོག་ཕྲ། །སྐྱེ་མེད་གཉིས་མེད་བསམ་དུ་མེད། །རླུང་གི་འཁོར་ལོ་སྐྱེད་བྱེད་མ། །སངས་རྒྱས་ཀྱིས་ཀྱང་རྙེད་དཀའ་བའོ། །མེ་ཡི་འཁོར་ལོའི་ནང་ན་ནི། །ཐིག་ལེ་གཅིག་པ་ཡི་གེ་མེད། །ཐམས་ཅད་ནང་ཡོད་ཡིག་ཀུན་ཡིན། ཐམས་ཅད་ཁྱབ་

[Full Size]

དང་བདེ་བ་འབྱུང་། །བདེ་བ་འཕེལ་བར་བྱེད་པའོ། །དབྱངས་དང་དཔེ་བྱད་དང་བྲལ་ལོ། །གྲངས་མེད་པ་ཡི་ཁམས་གསུམ་ནི། །རྒྱུ་དང་སྐྱེ་བར་བྱེད་པའོ། །ཚུལ་ནི་གློ་བུར་བ་ཡི་གནས། །རྣམ་པ་ཐམས་ཅད་དང་བྲལ་བ། །དངོས་པོ་སྦྲུལ་ལྕེ་འདྲ་བ་ཡིན། །མཐོ་རིས་ས་ནི་སྐྱེད་པའོ། །ཡི་གེ་མ་ཡིན་ཁམས་ཀྱང་མེད། །ཟླ་ཚེས་ཐིག་ལེ་རྒྱན་དང་བྲལ། །སྐྱེ་མེད་གྲངས་མེད་མི་ཟད་པ། །དེ་ནི་དོན་དམ་ཚུལ་ཡིན་ནོ། །སྤྲུལ་པ་ཡི་ནི་འཁོར་ལོའི་གནས། །ལྟེ་བའི་སྙོམས་པ་ཞེས་སུ་གྲགས། །ཆོས་ཀྱི་འཁོར་ལོའི་ཚུལ་ཙམ་ནི། །དྲི་མ་མེད་པ་སྤྲུལ་མིག་འདྲ། །དྲི་མེད་མ་བཅོས་པ་ཡི་གནས། །གནས་མེད་རྣམ་པ་མེད་པའོ། །གཡོ་བ་མེད་དང་བརྗོད་དུ་མེད། །དབུགས་ཀྱི་རྒྱུ་བ་མེད་པའོ། །མཆོག་གི་ཡེ་ཤེས་ཚུལ་ཅན་ནི། །བཅུ་གསུམ་དབང་ཕྱུག་གིས་མི་ཤེས། །མཆོག་གི་ལོངས་སྤྱོད་འཁོར་ལོར་གནས། །མཆོག་གི་རྣམ་པ་བདུད་རྩི་མཆོག། ཐེག་པ་མཆོག་གི་མཐའ་ན་ཡོད། །ཇི་ལྟར་ཆང་གི་མཐུ་བཞིན་ནོ། །ཐམས་ཅད་བདག་ཉིད་བྱད་གཟུགས་བྲལ། །གཟུགས་མེད་བདག་ཉིད་ཀྱིས་བཞུགས་སོ། །གཞན་མཆོག་བདེ་ཆེན་འཁོར་ལོ་ལ། །ཐམས་ཅད་མཐའ་ཡི་མཐའ་ན་བཞུགས། །ལྟ་བར་བྱེད་དང་བལྟ་བྱ་མེད། །མཚན་ངན་ཐམས་ཅད་མེད་པའོ། །བརྗོད་མེད་མི་ཟད་ཞི་བ་སྟེ། །རང་དགའ་ཉམས་མྱོང་རྣམ་པའོ། །བླ་མ་ཡི་ནི་བཀའ་དྲིན་གྱིས། །ལེགས་དགྱེས་དབང་པོ་རྙེད་པར་འགྱུར། །དེ་ལྟ་བུ་ཡི་ཡེ་ཤེས་ཆེ། །རྣམ་པར་ཤེས་དྲུག་རང་བཞིན་ཅན། །འཁོར་ལོ་དྲུག་གི་དབུས་སུ་ནི། །དོན་དམ་པར་ནི་བཤད་པའོ། །སྟེང་དང་འོག་གི་སྦྱོར་བ་ཡིས། །ཁ་སྦྱར་བྱད་གཟུགས་ཀྱིས་ནི་ཡོད། །བཅུ་གཉིས་ཕྱེད་དང་དྲུག་གི་ཕྱེད། །དྲུག་ཅུ་རྩ་བཞི་དེ་བཞིན་བརྒྱད། །བརྒྱད་གཉིས་དང་ནི་བརྒྱད་བཞི་ནི། །འདི་ནི་འཁོར་ལོ་ཆུ་སྐྱེས་དྲུག། དཔལ་ཕྱག་རྒྱ་ཆེན་པོའི་ཐིག་ལེ་ལས་སྦྱོར་བ་དྲུག་གི་མཚན་ཉིད་དང་འཁོར་ལོ་དྲུག་གི་རང་གི་ངོ་བོ་ཞེས་བྱ་བའི་ལེའུ་སྟེ་གསུམ་པའོ།། །།ཉོན་ཅིག་ལྷ་མོ་སྐལ་ཆེན་མོ། །རྩ་ཡི་འཁོར་ལོ་འབྱུང་བ་མཆོག། སྟོང་ཕྲག་བདུན་ཅུ་རྩ་གཉིས་ཏེ། །རྩ་རྣམས་ཀྱི་ནི་རིགས་བཤད་དོ། །རིགས་ཆེན་པོ་ཡི་རྒྱུད་ཆེན་པོར། །རྒྱས་པར་བདག་གིས་གསལ་བར་བྱས། །འདི་རུ་འཁོར་ལོ་དྲུག་གི་གྲངས། །མདོར་བསྡུས་པ་ནི་བཤད་པར་

[Full Size]

བྱ། །རླུང་གི་འཁོར་ལོའི་རྩ་དྲུག་ནི། །གཡོ་བ་ནམ་མཁའ་མེ་དང་སྦུབས། །རབ་བསྐོར་དང་ནི་འཇིགས་ཆེན་པོ། །རྩ་དེ་རླུང་གི་འཁོར་ལོའི་གནས། །འཛིན་མ་དང་ནི་རོ་མ་དང་། །རྟོག་མེད་མ་ནི་གྲུ་གསུམ་གནས། །མེ་ཡི་འཁོར་ལོའི་ནང་དུ་ནི། །རྩ་ཡི་དབང་པོ་ལྔར་ཤེས་བྱ། །མགྱོགས་མ་དང་ནི་ཡང་དག་མགྱོགས། །ཤིན་ཏུ་བཟང་དང་བཟང་འགྲོ་དང་། །སྟོབས་ཆེན་མ་དང་འཇིགས་ཆེན་མ། །ང་རྒྱལ་ཆེ་དང་འཇིགས་བྱེད་ཆེ། །མཐུས་མྱུར་མ་དང་མཐུ་ཡི་ཆ། །མཐུ་ཡི་ཆུ་དང་མཐུ་དྲི་དང་། །མཐུ་མ་དང་ནི་མཐུས་འབབ་མ། །གཙུབ་དང་ནུར་དང་མཐུ་དུ་མ། །རྔམ་པ་ཟ་བ་ནམ་མཁར་འགྲོ། །བྱ་ཡི་ཡན་ལག་བྱ་འགྲོ་མ། །ཕྱུག་མོ་འཇིགས་མ་ང་རོ་དང་། །བརྟུལ་མ་མཆོད་མ་མྱོས་མ་དང་། །སྒྲ་མ་སྒྲ་འབྱུང་སྡིག་ཅན་མ། །པདྨའི་སྡོང་བུ་མ་སྔོན་མོ། །ཟིལ་པ་ཟིལ་འབྱུང་སྐྲ་མ་དང་། །ཕྱིན་ཕྱོགས་ཁ་དང་དབྱུག་པ་དང་། །དབྱུག་པའི་ང་རྒྱལ་དང་པོ་མ། །ཚེའུ་ལྟོ་མ་དང་ཚེའུ་གྲུག་མ། །ཚེའུ་བདུན་མ་དང་བརྩོན་འགྲུས་མ། །ཚེའུ་ཁྱིམ་མ་དང་ཚེའུ་ཁ་མ། །ཚེའུ་འོད་མ་དང་ཚེའུ་ལུག་རྒྱུད། །འབུད་མ་བདག་མ་འོད་མ་དང་། །དྲི་མེད་དང་ནི་དྲི་སྲེག་དང་། །ཐག་ལྟོ་མ་དང་ཐག་དགའ་མ། །ཐག་མོ་དང་ནི་ཐག་དུས་མ། །ཕུག་རོན་ཕུམ་སྐྱེ་ཕྲ་མ་དང་། །ལོ་མ་དང་ནི་ཚེར་ལོ་དང་། །གོས་གྱོན་མ་དང་གསལ་བྱེད་མ། །རྩ་འདི་བརྒྱད་པོ་བརྒྱད་དུ་དྲན། །དྲུག་ཅུ་རྩ་བཞིའི་ཆུ་སྐྱེས་ནི། །ལྟེ་བའི་སྤྲུལ་པའི་འཁོར་ལོར་གནས། །རིན་ཆེན་མ་དང་པད་ཆེན་མོ། །གཤེ་ཆེན་མ་དང་སྟོབས་ཆེན་མོ། །མགོ་ཆེན་མ་དང་མྱོས་ཆེན་མ། །དགའ་ཆེན་མ་དང་མི་དགའ་ཆེ། །དེ་བརྒྱད་ཆོས་འཁོར་འདམ་སྐྱེས་ནི། །ཞལ་བཟང་སྙིང་གའི་རྒྱ་མཚོར་རོ། །ཆགས་མ་ལོངས་སྤྱོད་ལོངས་སྤྱོད་མིན། །ཉི་འོད་འོད་མ་བྷ་ག་དང་། །ལུ་མ་དང་ནི་ཐལ་གདོང་མ། །བཟའ་སྟེར་རང་ཟ་ལྟོགས་མ་དང་། །ར་ས་ཡ་ན་རོ་སྐྱུར་མ། །རོ་འཛག་དང་ནི་རོ་མ་དང་། །སྒུར་མ་ལོངས་སྤྱོད་འཁོར་ལོའི་གནས། །བརྒྱད་གཉིས་འདམ་སྐྱེས་འདབ་མ་ནི། །མགྲིན་པ་ཡི་ནི་རིམ་པའི་རིགས། །འདོད་མ་འདོད་སྤྱོད་ཚེའུ་ལུས་མ། །ཟླ་འཐུང་ཟླ་ལྟོ་མཛོད་མ་དང་། །སྐད་སྙན་ལྐུགས་མ་དུར་བ་མ། །ཅེ་སྤྱང་བརྒྱ་མ་སྐམས་པ་མ། །མེ་མ་རྔོན་མ་ཟླ་བ་མ། །གང་བ་

[Full Size]

གཉིད་མ་གཉིད་སྐྱེས་མ། །ཆང་འཚོང་ཆང་སྟེར་བདུད་རྩི་མ། །དུང་མ་དང་ནི་དུང་རྣ་མ། །དུང་མིག་མ་དང་དུང་སྣ་མ། །མཐུས་ཕྱུག་མ་དང་མཐུ་སེར་མ། །མཐུ་རྨོངས་མ་དང་མཐུ་རྔམ་མ། །འགྱིང་མ་དང་ནི་རི་རྟེན་མ། །སུམ་ཅུ་རྩ་གཉིས་ཐོད་པའི་གནས། །བདེ་ཆེན་འཁོར་ལོའི་རྒྱལ་པོ་འདི། །དེས་ནི་འཁོར་ལོ་རྣམས་ལ་ཁྱབ། །ཐམས་ཅད་ཕྲ་མོ་རེག་བྱ་མེད། །གཟུང་དང་འཛིན་པ་རྣམ་པར་སྤངས། །བདེ་ཆེན་བདེ་བའི་རྣམ་པ་ཅན། །བདེ་ཆེན་ལ་སོགས་སྦྱིན་པར་བྱེད། །དེ་ཡི་རྩ་བའི་འབྱུང་བ་ཡི། །ཡང་དག་ཐར་འདོད་པས་ཤེས་བྱ། །ལྷ་མོ་རྩ་བྱུང་མེད་གྱུར་ན། །ཕུང་པོའི་འབྱུང་བ་ཇི་ལྟར་འགྱུར། །ཕུང་པོ་མེད་ན་ཡེ་ཤེས་ཆེ། །རྣལ་འབྱོར་རྣམས་ཀྱིས་ཇི་ལྟར་རྙེད། །ཕུང་པོ་ལྔ་ནི་བདག་ཉིད་སྐུ། །མཁའ་འགྲོ་ལྔར་ནི་རབ་ཏུ་གྲགས། །མཁའ་འགྲོ་ལྔ་ནི་ཡེ་ཤེས་ལྔ། །འབྱུང་བ་ལྔ་ཡི་རང་བཞིན་ཅན། །རྩ་ཉིད་འབྱུང་བ་མེད་འགྱུར་ན། །ཕུང་པོ་རྣམས་ནི་འབྱུང་བ་མེད། །ཕུང་པོ་མེད་ན་དངོས་གྲུབ་ནི། །་རྣལ་འབྱོར་ཆེན་པོས་རྙེད་མི་འགྱུར། །དེ་བས་འབད་པ་ཐམས་ཅད་ཀྱིས། །རྩ་ཡི་འཁོར་ལོ་བཙལ་བར་བྱ། །ཇི་ལྟར་སྤྲིན་གྱི་ཆར་གྱིས་ནི། །རྟག་པར་དེ་ནི་ཆེ་བར་འཕེལ། །འབྲས་བུ་མང་ཞིང་མཐའ་ཡས་ནི། །ཐེ་ཚོམ་མེད་པར་སྦྱིན་པར་བྱེད། །དེ་ལྟར་ཕུང་པོའི་ཤིང་ཞེས་བྱ། །རྩ་ཡི་ཆུ་ཡིས་ཆེ་བར་འཕེལ། །ཆེར་གྱུར་འབྲས་བུ་ཐར་པ་ནི། །ཐེ་ཚོམ་མེད་པར་སྦྱིན་པར་བྱེད། །ལྷ་མོའི་དངོས་པོ་གཟུགས་སུ་ནི། །རྩ་ཡི་བྱད་གཟུགས་ཡིན་པར་འགྱུར། །རེག་ཁམས་རྒྱལ་མཚན་སྦྱོར་བ་ཡིས། །མེ་འཁོར་ནང་དུ་ཆུ་སྐྱེས་ནི། །གང་ཚེ་རྡོ་རྗེས་སྐྱོད་པར་བྱེད། །དེ་ཚེ་མེ་ནི་ཁོང་དུ་ཆུད། །འཁོར་ལོ་ཆུ་སྐྱེས་ཐམས་ཅད་ནི། །ཇེ་གསལ་ཇེ་གསལ་ཁ་འབྱེར་འགྱུར། །དེ་ནས་རྩ་ཀུན་འཛག་འགྱུར་ཏེ། །སྣོད་འཛག་པ་ཡི་ཆུ་ཐིགས་བཞིན། །དེ་ནས་སྤྲུལ་པའི་འཁོར་ལོར་ནི། །འདུས་ནས་གཅིག་ཏུ་གྱུར་པའོ། །རྩ་གཉིས་ཁ་ཡི་རྩེ་མོ་ལས། །ཟླ་བ་དང་ནི་ཉི་མ་འཛག། མངལ་གྱི་དབུས་ན་རྩ་གནས་པ། །ཐག་པའི་རྣམ་པའི་གཟུགས་སུ་ཡོད། །དེ་ནི་གཅིག་ཏུ་རྒྱུ་ཞེས་བྱ། །འབྲས་བུའི་བྱེ་བྲག་གཉིས་སུ་འགྱུར། །གཡོན་ནས་ཁུ་བ་འབྱུང་བ་དང་། །གཡས་ནས་ཁྲག་ནི་འབྱུང་བའོ། །གང་ཚེ་གཡས་ཕྱོགས་ཉི་མ་ནི། །དེ་ཚེ་བདེ་བ་དམར་པོར་འགྱུར། །གཡོན་ནས་ཟླ་བ་འབྱུང་བའི་ཕྱིར། །དེ་ནི་བདེ་བ་དཀར་

[Full Size]

པོར་འགྱུར། །དེ་གཉིས་ནང་ན་མེ་གནས་པ། །སྒོང་སྐྱེས་གཉིས་ལོག་ཇི་བཞིན་ནོ། །སྔོན་གྱི་ལས་རླུང་རྣམ་ཤེས་ནི། །གང་ཚེ་འཁོར་བར་གྱུར་པ་ན། །དེ་ཡི་ཚེ་ན་བྷ་གའི་ནང་། །འདོད་ཆགས་ཆེན་པོས་ཡིད་འགྱུར་རོ། །གང་ཚེ་མ་ཡི་ཟླ་མཚན་འབྱུང་། །མེ་དང་ཉི་མ་གསལ་བར་འབྱུང་། །དེ་ཚེ་འདོད་ཆགས་ཆེན་པོའི་ཡིད། །རེག་བྱ་འདུན་པ་མཆོག་ཏུ་འགྱུར། །བོལླ་ཀཀྐོ་ལ་ཞུགས་ནས། །ཇི་ལྟར་ཆུ་ལ་ཆུ་བཞག་བཞིན། །དེ་ཚེ་ས་བོན་འབྱུང་བ་ཡིན། །ས་བོན་ལས་ནི་གོང་བུ་འབྱུང་། །ལྷ་མོ་དེ་ལས་རྩ་རྣམས་འབྱུང་། །འབྲས་བུ་ངེས་པར་འབྱུང་བའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་འཁོར་ལོ་དྲུག་གི་རྩ་འབྱུང་བ་ཞེས་བྱ་བའི་ལེའུ་སྟེ་བཞི་པའོ།། །།སྲོག་ནི་འབྱུང་བར་ཐིམ་པའི་ཚུལ། །ཉོན་ཅིག་ལྷ་མོ་བདག་གིས་བཤད། །མ་སྐྱེས་པ་ཡི་ཆར་ཡང་ནི། །གསང་བའི་མངལ་གྱི་ནང་དུ་བཞུགས། །དེ་ནི་རྣམ་ཤེས་མེད་པ་དང་། །བདག་ཉིད་མེད་པའི་ཡེ་ཤེས་སྐུ། །དེ་ཡི་གནས་ནས་སྲོག་འབྱུང་སྟེ། །སྲོག་ཅན་རྣམས་ཀྱི་སྲོག་ནི་མཆོག། རྟག་ཏུ་བདག་ཉིད་སྲོག་ཆེན་པོ། །གནས་ལྔའི་གནས་ན་བཞུགས་པའོ། །ནམ་མཁའ་ལྔ་ཞེས་བྱ་བར་གྲགས། །ནམ་མཁའ་ལྔ་ཡི་ནང་དུ་ཐིམ། །འབྱུང་བ་ཆེན་པོ་བཞི་པོ་ནི། །སྲོག་གི་རྟེན་དུ་ཤེས་པར་བྱ། །ཡང་ན་སྲོག་ནི་དེ་རྣམས་རྟེན། །ལེགས་དགྱེས་དབང་མོ་ཤེས་པར་འགྱུར། །རྣམ་ཤེས་ལས་ནི་རླུང་སྐྱེའོ། །དེ་ལས་མེ་ནི་སྐྱེ་བར་འགྱུར། །དེ་ལས་ཆུ་ནི་སྐྱེ་འགྱུར་ཏེ། །དེ་ལས་ས་ནི་སྐྱེ་བའོ། །དེ་རྣམས་ཀུན་ལས་ཕུང་པོར་འབྱུང་། །དེ་ནས་སྐྱེ་མཆེད་འབྱུང་བར་འགྱུར། །དེ་ནས་ཡེ་ཤེས་རང་བཞིན་སྐྱེ། །བརྒྱ་རྩ་བརྒྱད་ཀྱི་རིམ་པས་སོ། །རྡོ་རྗེ་ཕྲེང་བའི་རྒྱུད་ཆེན་ལས། །སྔར་ནི་བདག་གིས་བསྟན་པའོ། །མཚན་མོ་གང་ཡིན་ཉིན་གང་ཡིན། །མཚན་མོ་བདག་གིས་བཤད་པར་བྱ། །མཚན་མོ་ཤེས་རབ་ཏུ་ནི་གྲགས། །ཤེས་རབ་མཚན་མོ་ཡིན་པར་འགྱུར། །མཚན་མེའི་རྣམ་པ་ཟླ་བར་འགྱུར། །ཟླ་བ་མྱ་ངན་འདས་རང་བཞིན། །ཀུན་རྫོབ་དང་ནི་དོན་དམ་པར། །ཤེས་རབ་གཉིས་ཀྱིས་ཤེས་པར་བྱ། །ཀུན་རྫོབ་རེག་བྱར་ཤེས་པར་བྱ། །གང་ཞིག་རེག་བྱ་མེད་པར་བདེ། །བལྟ་བར་དཀའ་བའི་མཚན་ཉིད་དོ། །རང་བཞིན་མེད་པའི་རང་བཞིན་ཅན། །དེ་ནི་བདག་གིས་མཚན་མོར་བཤད། །ཉིན་མོ་ཐབས་སུ་གྲགས་པ་སྟེ། །ཐབས་

[Full Size]

ནི་ཉི་མ་ཡིན་པར་འགྱུར། །བྷ་གའི་འབྱུང་བ་ཉི་མ་ཡིན། །ཉི་མ་བྷ་གའི་བདག་པོར་འགྱུར། །སྲིད་པའི་རྣམ་པ་ཉི་མ་ཡིན། །ཟླ་བ་མྱ་ངན་འདས་པའི་གཟུགས། །སྲིད་པ་དེ་ནི་རིགས་ཞེས་བསྟན། །ཉི་ལས་འབྱུང་བ་ཟླ་བའི་རིགས། །དྲི་མ་མེད་ཕྱིར་ཉི་མ་སྟེ། །རྟོག་པའི་དྲ་བ་མེད་པའོ། །དྲི་མ་མེད་པ་མཆོག་ཕྲ་བ། །ཤིན་ཏུ་གསལ་བ་སྟོང་སྐུའོ། །ཡང་དག་དྲི་མེད་གནས་ཞི་བ། །ཐམས་ཅད་ཀུན་ན་བཞུགས་པའོ། །རྒྱུད་རྣམས་ཀུན་དུ་སྦས་པ་ཡི། །དེ་ལྟའི་ཉིན་མོ་བདག་གིས་བཤད། །མཚམས་ནི་གཉིས་ཀ་ཕྲད་པ་སྟེ། །རྡོ་རྗེ་པདྨ་ཉི་ཟླ་འབྱུང་། །ལྟེ་བ་གཉིས་ཀ་ཕྲད་པ་ནི། །ཕྲ་ལྟར་སྐད་ཅིག་མཚན་ཉིད་དོ། །ཉོན་མོངས་ལས་གྲོལ་མཚམས་ཡིན་ཏེ། །རྣམ་པ་མེད་པ་མཆོག་གི་མཆོག། སྦྱོར་གཉིས་དབུས་ན་ཡོད་པ་སྟེ། །བྱུག་པ་དང་ནི་སྲེད་པ་མེད། །དེ་མཚམས་སེམས་ཅན་ཐམས་ཅད་ཀྱི། །འཁོར་བའི་ལམ་རབ་དག་པར་བྱེད། །ཤར་ནི་མཆོག་ཏུ་གྲགས་པ་སྟེ། །དགའ་བྲལ་ལ་སོགས་དང་བྲལ་བ། །མདུད་པའི་རྩེ་མོ་མཆོག་གི་གནས། །ཙ་ན་ཀ་ཡི་རུས་རྣམས་གཟུགས། །དེ་ཡི་ཁ་ནི་གཉིས་ཡོད་དོ། །ཤར་ནི་ཟླ་བའི་བདག་པོར་ཤེས། །ཟླ་བ་གྱེན་དུ་འགྲོ་བའི་ཕྱིར། །ཟླ་བའི་ཐིག་ལེ་མཉམ་པར་གྲགས། །ཐིག་ལེ་བཞིར་གྱེས་བསྟན་པའོ། །ཐོག་མ་ཐ་མའི་དབུས་གནས་ན། །བཞི་པ་གང་ནའང་མེད་པའོ། །རང་རིག་པ་ཡི་བདག་ཉིད་ཕྱིར། །དེ་བས་བརྗོད་དུ་མེད་པའོ། །དེ་ནི་གསང་བར་བསྟན་པ་སྟེ། །ཤར་བའི་དོན་ནི་འདུས་པའོ། །ཉོན་ཅིག་ལྷ་མོ་བདེ་སྦྱིན་མ། །ནུབ་པའི་ཡང་དག་བདག་གིས་བསྟན། །གང་ཚེ་སེམས་ནི་ནུབ་པ་ན། །སྔར་ནི་ཟླ་བའི་རྣམ་པར་འགྱུར། །དེ་ཚེ་ནུབ་པའི་གནས་སུ་འགྲོ། །མི་འགྲོ་བ་ནི་འགྲོ་བར་འགྱུར། །གང་ཚེ་ཐོག་མ་ཐ་མར་འགྲོ། །དེ་ཚེ་ནུབ་པར་བསྟན་པའོ། །ཐ་མ་ནུབ་པར་བསྟན་པ་ནི། །རྟེན་པའི་གནས་ལ་རྟེན་མེད་གནས། །རྟེན་པ་ཡིས་ནི་མཆོག་བདེ་ལ། །རྟེན་མེད་བདེ་བ་ག་ལ་ཡོད། །དཔལ་ཕྱག་རྒྱ་ཆེན་པོའི་ཐིག་ལེ་ལས་སྲོག་དང་མཚན་མོ་དང་། ཉིན་མོ་དང་མཚམས་དང་། ཤར་བ་དང་ནུབ་པ་བསྟན་པ་ཞེས་བྱ་བའི་ལེའུ་སྟེ་ལྔ་པའོ།། །།རྩ་ཡི་འབྱུང་བ་ཐོག་མར་བསྟན། །དུས་ནི་ཉོན་ཅིག་བདག་གིས་བཤད། །དུས་ནི་ཚོད་ཅེས་བསྟན་པ་སྟེ། །དུས་ལ་བྱེ་བྲག་གཉིས་སུ་དབྱེ། །དུས་ནི་བསམ་དུ་མེད་པ་དང་། །ཤིན་ཏུའི་དུས་ནི་དུས་ཡིན་ནོ། །ཤིན་

[Full Size]

ཏུ་དུས་དང་ངན་དུས་དང་། །སྣ་ཡི་འཕར་མ་བུ་ག་གཉིས། །འོང་བ་དེ་ནི་བཟང་དུས་བསྟན། །་འགྲོ་བ་བཟང་མིན་དུས་སུ་བཤད། །བཟང་བ་མིན་དུས་ཆད་ཅེས་བྱ། །བཟང་བ་དེ་ནི་མཆོག་ཏུ་དྲན། །གཉི་ག་དང་བྲལ་དེ་ཁོ་ཉིད། །དེ་ནི་སྔར་མེད་འདི་རུ་འདུས། །ལྟ་བ་མེད་དང་བལྟ་རུ་མེད། །མཚན་ངན་ཐམས་ཅད་དང་བྲལ་ལོ། །དེ་ལྟའི་དུས་ནི་བདག་གིས་གཞན། །ཞལ་བཟང་ཡང་དག་བཤད་པ་ཡིན། །དེ་ཡི་དུས་སུ་གཞན་དུ་ཡིད། །རྣལ་འབྱོར་པ་དེ་མི་བགྱིད་ན། །དམ་ཚིག་དབང་མོ་བདག་ཇི་ལྟར། །གཞན་མིན་རྡོ་རྗེ་འཛིན་པར་འགྱུར། །ཨཱ་ལི་ཀཱ་ལི་གང་ནས་འབྱུང་། །ཉོན་ཅིག་དེ་ནི་བདག་གིས་བཤད། །ཡང་དག་དྲི་མེད་གནས་ནས་འབྱུང་། །སྣང་བ་མཆེད་པའི་གཟུགས་ཅན་ནོ། །དཔེ་བྱད་སུམ་ཅུ་གསུམ་དང་ལྡན། །ཀཱ་ལིའི་དཀྱིལ་འཁོར་ཤིན་ཏུ་གསལ། །སྣང་བ་མཆེད་པའི་གནས་ནས་ཏེ། །སྣང་བ་དེ་ནི་གསལ་བར་འབྱུང་། །དབྱངས་ཀྱི་ཡི་གེ་བཅུ་དྲུག་ལྡན། །རྒྱས་པ་ཨཱ་ལིའི་དཀྱིལ་འཁོར་རོ། །དེ་གཉིས་མཉམ་པར་སྦྱོར་བ་ཡིས། །དལ་བུས་རོ་ཆེན་སྐྱེ་བར་འགྱུར། །མཆོག་གི་བདུད་རྩི་རྣམ་པ་ནི། །བདེ་བ་ཆེན་པོའི་བདེ་བའི་གནས། །རིག་མའི་སྣ་རྩེའི་གནས་ན་བཞུགས། །ཆུ་སྐྱེ་འཁོར་ལོ་དྲུག་གསལ་བྱེད། །དེ་ཡི་རེག་བྱ་བདེ་སྦྱིན་པ། །རོ་ཆེན་བརྒྱད་ནི་ཤེས་པར་བྱ། །འདར་དང་རྡུལ་དང་བ་སྤུ་ལངས། །སྐད་འགག་པ་དང་མདོག་གསལ་དང་། །ཁ་དོག་འགྱུར་ཞིང་མཆི་མ་མྱོས། །དེ་ནི་སྙིང་པོའི་རོ་བརྒྱད་དོ། །རོ་ཡིས་དགུག་བྱས་དགའ་བ་རྣམས། །ཤིན་ཏུ་བཟང་པོ་སྐྱེ་བར་འགྱུར། །དགའ་དང་མཆོག་གི་དགའ་བ་དང་། །དགའ་བྲལ་ལྷན་སྐྱེས་དེ་བཞིན་ནོ། །དགའ་བ་ཞེས་བྱ་སྣང་བ་ཡིན། །མཆོག་དགའ་སྣང་བ་མཆེད་པར་བསྟན། །དགའ་བྲལ་སྣང་བ་ཐོབ་ཅེས་བྱ། །ལྷན་སྐྱེས་དེ་ནི་ཡང་དག་འོད། །དེ་ཡི་དུས་ན་སྐད་ཅིག་སྐྱེ། །སྣ་ཚོགས་ལ་སོགས་མཚན་ཉིད་དོ། །སྣང་བ་ཟླ་བ་ཞེས་སུ་བསྟན། །སྣང་བ་མཆེད་པ་ཉི་མའོ། །མཚམས་ནི་སྣང་བ་ཐོབ་པར་གྲགས། །གསུམ་དང་བྲལ་བ་ཡང་དག་འོད། །གང་ཚེ་མདུད་པའི་ནང་དུ་སེམས། །དེ་ཚེ་དགའ་བ་འབྱུང་བར་འགྱུར། །མདུད་པའི་མཚམས་ནས་ནས་གསུམ་ཙམ། །མཆོག་གི་དགའ་བ་འབྱུང་བར་འགྱུར། །གསུམ་གྱི་གནས་ནས་གསུམ་དུ་འགྲོ། །དགའ་བྲལ་འབྱུང་བར་འགྱུར་བའོ། །གང་ཞིག་

[Full Size]

གསུམ་དང་གསུམ་སྤངས་པ། །དེ་ཁོ་ན་ཉིད་རང་བཞིན་ཤར། །དེ་ནི་གསང་བ་ཆེན་པོའི་མཆོག། གསང་བའི་གསང་བ་ཡང་དག་མཆོག། འདུས་པ་ལ་སོགས་རྒྱུད་རྣམས་སུ། །ལེགས་དགྱེས་དབང་མོ་སྦས་པ་བྱ། །སྡོམ་པ་འམ་ནི་ཀྱེའི་རྡོ་རྗེ། །དེར་ཡང་གསལ་བར་མ་བྱས་སོ། །ཁྱོད་ཀྱི་ངོར་མཛད་མཆོག་དེ་ནི། །གསང་ཆེན་བདག་གིས་གསལ་བར་བྱས། །སངས་རྒྱས་བྱང་ཆུབ་སེམས་དཔའ་དང་། །གཞན་མ་ཤི་མེད་ཀུན་ཉོན་མོངས། །དེ་ལྟའི་མཆོག་གི་དེ་ཁོ་ན། །བདག་མིན་ན་ནི་དེ་མི་ཤེས། །གཞན་ཡང་ཆོས་ཀྱི་དབྱིངས་གྲགས་པ། །དེ་ཉིད་ཉོན་ཅིག་བདག་གིས་བཤད། །ནམ་མཁའ་ཆོས་ཀྱི་དབྱིངས་ཡིན་ཏེ། །དབྱིངས་ནི་ས་བོན་ཞེས་སུ་དྲན། །ཆོས་རྣམས་ཀུན་གྱི་ནང་ན་ཡོད། །རྒྱུ་དང་མཆོག་གི་གནས་ཡིན་ནོ། །ཇི་ལྟར་ཏིལ་ལ་མར་ཡོད་དང་། །ཇི་ལྟར་ཤིང་ལ་མེ་ཡོད་པ། །དེ་བཞིན་ཆོས་རྣམས་ཀུན་ལ་ཡང་། །ཆོས་ཀྱི་དབྱིངས་ཀྱིས་ཁྱབ་པར་ནི། །ཡོད་ན་ཡང་ནི་མཐོང་མི་འགྱུར། །ཆོས་ཀྱི་དབྱིངས་ནི་བྷ་གར་གྲགས། །བྷ་ག་རིན་ཆེན་སྣོད་ཡིན་ནོ། །དབང་ཕྱུག་ལ་སོགས་ཡོན་ཏན་ལྡན། །དེ་ནི་བྷ་གར་ཀུན་ཏུ་གྲགས། །ཆོས་ནི་བྷ་ག་ཞེས་བྱར་བསྟན། །དབྱིངས་ནི་སེམས་སུ་ཤེས་པར་དྲན། །ཁམས་གསུམ་གྱི་ནི་མཐའ་ཡས་ལ། །སེམས་ནི་དེ་ཡི་རྒྱུ་ཡིན་ནོ། །ཀུན་རྫོབ་རྣམ་པའི་གཟུགས་སུ་ནི། །ཆུ་ཟླ་ལྟ་བུ་མཐོང་བར་འགྱུར། །དོན་དམ་དེ་ནི་མཐོང་བ་མེད། །མཐོང་མེད་མ་ཡིན་དངོས་མེད་མིན། །རང་རིག་པ་ནི་མཆོག་ཞི་བ། །དངོས་དང་དངོས་མེད་དང་བྲལ་བ། །དེ་ནི་མཆོག་གི་དེ་ཁོ་ན། །ཆོས་ཀྱི་དབྱིངས་བདག་ཞི་བའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ཨཱ་ལི་ཀཱ་ལི་འབྱུང་བ་དང་དུས་ཀྱི་མཚན་ཉིད་དང་། ཆོས་ཀྱི་དབྱིངས་བསྟན་པ་ཞེས་བྱ་བའི་ལེའུ་སྟེ་དྲུག་པའོ།། །།གཞན་ཡང་ཉོན་ཅིག་བདག་གིས་བཤད། །ཇི་བཞིན་རྡོ་རྗེའི་མཚན་ཉིད་ཅན། །མི་ཕྱེད་རྡོ་རྗེ་ཞེས་སུ་བསྟན། །ཡེ་ཤེས་ལྔ་ཡི་བདག་ཉིད་མཆོག། ནམ་མཁའ་ལྔ་ཡི་དབུས་སུ་ཐིམ། །ནམ་མཁའ་ལྔ་ཡི་བདག་ཉིད་དོ། །པདྨའི་ལྟེ་བའི་ནང་ན་བཞུགས། །ཐིག་ལེ་གཅིག་པུ་ཡི་གེ་མེད། །རྣམ་པ་ཐམས་ཅད་རྣམ་པ་མེད། །དེ་ནི་རྡོ་རྗེར་ཀུན་ཏུ་གྲགས། །བདག་གི་སྒྲ་ཡི་ངེས་པའི་དོན། །ཉོན་ཅིག་བདག་གིས་དེ་ཉིད་བཤད། །

[Full Size]

ཨ་ནི་ཡིག་འབྲུ་གཟུགས་ཀྱི་མཆོག། ཐམས་ཅད་ཀུན་གྱི་ལུས་ནང་ཡོད། །རྣམ་པ་ཐམས་ཅད་མཆོག་ནི་རྫོགས། །ཀུན་ཡོད་མ་སྐྱེས་ཐམས་ཅད་མཁྱེན། །རྟག་ཏུ་སྟོང་པ་ཐམས་ཅད་ཁྱབ། །ཐམས་ཅད་ཀུན་གཅིག་བྱེད་པའི་རྒྱུ། །སྲིད་པ་སྲིད་མཆོག་ཉིན་མོ་ནི། །སྤྲུལ་པའི་སྐུ་ཡི་བདེ་བའོ། །ལུས་ནི་དེ་བཞིན་གཤེགས་སྐྱབས་སྦྱིན། །ཐམས་ཅད་དོན་ནི་བྱེད་ནུས་པའོ། །ཧྃ་གི་ཡིག་འབྲུ་གཟུགས་དང་བྲལ། །ལུས་གནས་ལུས་ལས་མ་སྐྱེས་པའོ། །རྣམ་པ་ཀུན་ལས་རྣམ་པར་གྲོལ། །བྱད་གཟུགས་དཔེ་བྱད་ཀུན་དང་བྲལ། །དངོས་པོ་དངོས་མིན་རྣམ་པར་གྲོལ། །སྐྱེ་དང་འཇིག་པའི་བྱེད་པ་པོ། །དངོས་པོ་ཐམས་ཅད་ནུབ་པ་པོ། །ཆོས་ཀྱི་སྐུ་ཡི་རང་བཞིན་ཅན། །སེམས་ནི་རྡོ་རྗེ་འཛིན་སྐྱབས་སྦྱིན། །ཡི་གེ་ཐམས་ཅད་དང་བྲལ་ལ། །སྟོང་པའི་རྣམ་པ་མྱ་ངན་འདས། །ཡེ་ཤེས་སྐུ་ཡི་རང་བཞིན་ཅན། །དྲི་མེད་བརྗོད་མེད་ཞི་བ་སྟེ། །དེ་ནི་ཧྃ་དུ་ཀུན་ཏུ་གྲུབ། །བདག་ནི་ཐམས་ཅད་ཀུན་གྱི་ནང་། །ཐམས་ཅད་བདག་ཉིད་རྟག་ཏུ་བཞུགས། །དངོས་པོ་ཀུན་གྱི་བདག་ཉིད་ལ། །དེ་ནི་ཁྱབ་པར་ཡོད་པ་སྟེ། །བདག་ནི་མེད་ན་འགྲོ་བ་ཀུན། །ཇི་ལྟར་རྩ་བཅད་ཤིང་བཞིན་ནོ། །ཧྃ་གི་ཡིག་འབྲུ་མཚམས་ཀྱི་མཐར། །ཨ་ནི་ཡིག་འབྲུ་མགོ་བོའི་རྩེར། །ཨ་ནི་ཡིག་འབྲུ་ཟླ་བ་དག། ཧྃ་གི་ཡིག་འབྲུ་ཉི་མའི་འོད། །ཨ་ནི་ཡིག་འབྲུ་རྟེན་ཡིན་ཏེ། །ཧྃ་གི་ཡིག་འབྲུ་བརྟེན་པའོ། །ཨ་ཡི་ཡིག་འབྲུ་སྲོག་ཅེས་བཤད། །ཧྃ་གི་ཡིག་འབྲུ་རྩོལ་བར་དྲན། །གང་ཞིག་གནས་སུ་དེ་གཉིས་སྦྱར། །དེ་ནི་བདག་ཉིད་གསལ་བར་འགྱུར། །རྒྱུད་རྣམས་ཀུན་ལས་རྙེད་དཀའ་བ། །དེ་ནི་ཡང་དག་བདག་སྒྲར་བཤད། །དཔལ་ཕྱག་རྒྱ་ཆེན་པོའི་ཐིག་ལེ་ལས་རྡོ་རྗེའི་མཚན་ཉིད་དང་། བདག་སྒྲའི་ངེས་པའི་དོན་ཞེས་བྱ་བའི་ལེའུ་སྟེ་བདུན་པའོ།། །།གསང་བའི་དོན་ནི་བཤད་བྱ་བ། །གསང་བ་ཞེས་བྱ་ཅི་ཞེས་བརྗོད། །གསང་བ་ཞེས་བྱ་དགའ་བར་བསྟན། །མཆོག་ཅེས་བྱ་བ་མཆོག་ཡིན་ནོ། །དགྱེས་པ་ཞེས་བྱ་དགའ་བྲལ་བསྟན། །ཐམས་ཅད་བདག་ཉིད་ལྷན་སྐྱེས་དྲན། །གསང་བ་ཉིད་ནི་གསང་བ་ཡིན། །གསང་བ་ཁུ་བར་བསྟན་པའོ། །ཁུ་བ་སྲོག་ཅེས་བསྟན་པ་སྟེ། །སྲོག་ནི་རྟེན་དུ་དྲན་པའོ། །རྟེན་ནི་སར་ནི་ཤེས་པར་བྱ། །ཁམས་གསུམ་ཀུན་ནི་འབྱུང་བའོ། །མཆོག་ནི་ཆུ་ཞེས་བསྟན་པ་སྟེ། །ཆུ་ནི་སྲོག་

[Full Size]

གི་ཚེ་ཡིན་ནོ། །ཆ་དལ་དེ་ནི་འོད་ཅེས་བསྟན། །འོད་ནི་རྣམ་པར་དག་ཅེས་དྲན། །རྣམ་པར་དག་པ་བདེ་ཆེན་དངོས། །དེ་ནི་རང་བཞིན་བསྟན་པའོ། །རྣམ་པར་དག་པ་འབྱུང་མིན་གནས། །བབས་པ་རྣམ་དག་བརྗོད་པ་ཡིན། །བབས་པ་དངོས་མིན་ཞེས་བྱར་བསྟན། །དངོས་མིན་རྣམ་དག་བརྗོད་མ་ཡིན། །རྣམ་དག་ཕྲ་བའི་ཕྲ་མོ་སྟེ། །ཕྲ་མོའི་རྣམ་དག་གཞན་ན་གནས། །ཕྲ་མོའི་རང་བཞིན་ཞེས་བྱར་བསྟན། །གཟུང་དང་འཛིན་པ་རྣམ་པར་སྤངས། །རང་དངོས་བདེ་བ་ཆེན་པོ་ནི། །ཡེ་ཤེས་རླུང་དུ་རབ་ཏུ་གྲགས། །དེ་ནི་ནམ་མཁའ་ཞེས་སུ་བཤད། །ནམ་མཁའ་སྟོང་པར་བསྟན་པའོ། །སྟོང་པ་ལས་ནི་ཐམས་ཅད་འབྱུང་། །སྟོང་པའི་ནང་དུ་ཐམས་ཅད་ཐིམ། །སྟོང་པ་ཡང་དག་དྲི་མེད་གནས། །རྣམ་པ་ཐམས་ཅད་དང་བྲལ་བ། །མཆོག་གི་རྣམ་པ་སྐྱེ་མེད་དག། རང་དགའ་ཉམས་སུ་མྱོང་བ་དངོས། །དེ་ནི་རང་བཞིན་ཞེས་སུ་བཤད། །ཐམས་ཅད་བདག་ཉིད་རྟག་ཏུ་བཞུགས། །རིགས་ལྔ་ཡི་ནི་མཚན་ཉིད་དེ། །ཉོན་ཅིག་བདག་གིས་བཤད་པར་བྱ། །རིགས་ནི་ཀ་པཱ་ལ་ཞེས་བརྗོད། །ཀ་པཱ་ལ་ནི་ཀ་རུ་བཤད། །ཀ་ནི་རྩ་བ་ཞེས་བྱར་གྲགས། །རྩ་བ་བྱེ་བྲག་ལྔ་རུ་དྲན། །དེ་བཞིན་གཤེགས་པ་ལྔ་ཡི་སྐུ། །དེ་ནི་ཕུང་པོ་ལྔ་ཞེས་དྲན། །ཕུང་པོ་ལྔ་ནི་གྲུབ་པའི་སྐུ། །འབྱུང་བ་ལྔ་ཡི་རང་བཞིན་ཅན། །ཚངས་པ་ཁྱབ་འཇུག་དྲག་པོ་དང་། །དབང་ཕྱུག་རྟག་ཏུ་ཞི་བ་ལ། །ལྔ་ལ་ཁྱབ་པ་གཅིག་པུ་སྟེ། །བདག་ནི་དོན་དམ་པ་ཡི་ཕ། །ཐམས་ཅད་ཁྱབ་པའི་སྟོང་ཆེན་པོ། །བདག་ནི་འཕོ་མེད་མ་སྐྱེས་པའོ། །ཀ་ནི་གང་ཞིག་ཐུགས་རྗེ་འཐུང་། །པཱ་ནི་དམ་ཚིག་སྐྱོང་བ་ཡིན། །ལ་ནི་ངན་འགྲོའི་ཕ་རོལ་ཕྱིན། །དེ་ནི་ཀ་པཱ་ལ་རུ་བཤད། །ཀ་ཡི་སྒྲ་ནི་རང་བཞིན་ཡིན། །ཀ་ནི་གང་དུའང་མི་གནས་པའོ། །དངོས་པོ་ཐམས་ཅད་ཁྱབ་པའོ། །དེ་ནི་ཀ་ཞེས་བསྟན་པའོ། །དེ་བདག་ཧེ་རུ་ཀ་ཡི་དངོས། །ཆོས་ཀྱི་འཁོར་ལོའི་གནས་ན་བཞུགས། །རྟག་ཏུ་ཞི་བ་ལོངས་སྤྱོད་འཁོར། །དབང་ཕྱུག་བདེ་ཆེན་འཁོར་ལོའོ། །དྲག་པོ་ལྟེ་བའི་འཁོར་ལོར་གནས། །ཁྱབ་འཇུག་མེ་ཡི་འཁོར་ལོའོ། །ཚངས་པ་རླུང་གི་འཁོར་ལོར་ཏེ། །རླུང་ནི་ཐམས་ཅད་ནང་ཡོད་ཚེ། །བདག་ནི་འཁོར་ལོ་དྲུག་གི་དབུས། །ཀུན་ལ་དེ་ནི་ཁྱབ་པར་བཞུགས། །སྟོང་ཉིད་གཞན་མཆོག་སྟོང་པ་ཉིད། །བདག་དཔལ་

[Full Size]

ཧེ་རུ་ཀ་ཡི་མཆོག། མཁའ་འགྲོ་ལྔ་ཡི་གཙོ་བོ་སྟེ། །ཡེ་ཤེས་མཁའ་འགྲོ་དབང་ཕྱུག་བདག། འབྱུང་བ་ལྔ་ཡི་རང་བཞིན་ཅན། །མཁའ་འགྲོ་མ་ཡིས་ཀུན་དུ་བསྐོར། །དཔལ་ཕྱག་རྒྱ་ཆེན་པོའི་ཐིག་ལེ་ལས། གསང་བ་དང་དགའ་བ་བཞི་དང་། རིགས་ལྔའི་མཚན་ཉིད་ཅེས་བྱ་བའི་ལེའུ་སྟེ་བརྒྱད་པའོ།། །།དེ་ནས་གཞན་ཡང་བཤད་བྱ་བ། །ཕྱག་རྒྱའི་བརྡ་ནི་རབ་ཡིན་ཏེ། །རྣ་ཆ་གདུ་བུ་འཁོར་ལོ་དང་། །མགུལ་དེ་དེ་བཞིན་ཐལ་བ་དང་། །ཚངས་པའི་སྐུད་པ་ཕྱག་རྒྱ་དྲུག། ཕ་རོལ་ཕྱིན་དྲུག་དྲན་པའོ། །སྦྱིན་པ་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་དྲུག་ཡིན་ནོ། །སྦྱིན་པ་ཆོས་ཞེས་བསྟན་པ་སྟེ། །ཚུལ་ཁྲིམས་ལས་ཞེས་དྲན་པའོ། །བཟོད་པ་དམ་ཚིག་ཅེས་སུ་དྲན། །བརྩོན་འགྲུས་ཏིང་འཛིན་ཤེས་པར་བྱ། །བསམ་གཏན་ཡེ་ཤེས་ཞེས་བྱར་དྲན། །ཤེས་རབ་ཅེས་བྱ་ཕྱག་རྒྱ་ཆེ། །དོན་དམ་པར་ནི་ཤེས་པར་བྱ། །སྐྱེ་མཆེད་དྲུག་ནི་དག་པར་བྱ། །ཕྱག་རྒྱ་དྲུག་ཏུ་རབ་ཏུ་གྲགས། །རིགས་དྲུག་རིམ་པར་ཤེས་པར་བྱ། །ལྷ་མོའི་བདག་ཉིད་ཕྱག་རྒྱ་དྲུག། ཡྃ་རྃ་ལྃ་བྃ་ཨྃ་ཧྃ་སྟེ། །ལྷ་མོ་ཡི་ནི་རིམ་པས་སོ། །དེ་རུ་མཆོད་པ་རབ་ཏུ་བྱ། །མཆོད་པ་རོ་མཉམ་རིམ་པའོ། །ཐིམ་དང་ལོངས་སྤྱོད་དབང་གིས་ནི། །གནས་ཀུན་གྱི་ནི་དེ་བཞིན་ནོ། །གཏུམ་མོ་བཙོ་བླག་ཌོམ་བི་དང་། །གར་མཁན་ཐོད་པ་བྲམ་ཟེ་མོ། །གཏུམ་མོ་པདྨའི་རིགས་ཡིན་ཏེ། །བཙོ་བླག་རིན་ཆེན་རིགས་སུ་དྲན། །ཌོམ་བི་རྡོ་རྗེའི་རིགས་ཞེས་བྱ། །གར་མཁན་རལ་གྲིའི་རིགས་སུ་དྲན། །ཐོད་པ་ཅན་ནི་འཁོར་ལོའི་རིགས། །དེ་ལྔ་དག་པ་ཕྱག་རྒྱའོ། །ཡེ་ཤེས་ཕྱག་རྒྱ་བྲམ་ཟེ་མོ། །རྡོ་རྗེ་སེམས་དཔའི་རིགས་སུ་དྲན། །བྲམ་ཟེ་མོ་ནི་མ་ཡིན་ཏེ། །ཐོད་པ་མ་ནི་སྲིང་མོར་དྲན། །གར་མཁན་བུ་མོར་ཤེས་པར་བྱ། །ཌོམ་བི་ཆུང་མར་རབ་ཏུ་གྲགས། །བཙོ་བླག་མཁན་ནི་མནའ་མ་ཡིན། །གཏུམ་མོ་སྒྱུག་མོར་དྲན་པའོ། །ཤེས་རབ་ཐབས་ཀྱི་ཆོ་ག་ཡིས། །རྟོག་པ་མེད་པས་མཆོད་པར་བྱ། རྣམ་རྟོག་མེད་པས་དངོས་གྲུབ་འགྲུབ། །ཇི་ལྟར་བསྙེན་པ་སྐད་ཅིག་གིས། །མ་ནི་སེམས་ཞེས་བསྟན་པ་སྟེ། །གསུང་ནི་འདི་རུ་སྲིང་མོར་དྲན། །བུ་མོ་སྐུ་རུ་རྣམ་པར་གྲགས། །ཆུང་མ་སྲོག་ཅེས་བྱ་བར་དྲན། །མནའ་མ་རྩོལ་བར་དྲན་པ་སྟེ། །སྒྱུག་མོ་མཉམ་པར་དྲན་པའོ། །མ་ནི་མཐུ་ཡི་རྩ་

[Full Size]

ཡིན་ཏེ། །སངས་རྒྱས་རིན་པོ་ཆེ་ཡི་སྣོད། །སྲིང་མོ་ཁུ་བའི་རྩ་ཡིན་ཏེ། །མཚོག་མའི་གནས་ན་ཡོད་པའོ། །བུ་མོ་ཁྲག་གི་རྩ་ཡིན་ཏེ། །ཁུ་བའི་རྩ་ཡི་འོག་ན་ཡོད། །ཆུང་མ་དྲི་ཆུའི་རྩ་ཡིན་ཏེ། །གཉིས་ཀྱི་བར་ན་ཡོད་པའོ། །མནའ་མ་མཆི་མའི་རྩ་ཡིན་ཏེ། །མགྲིན་པའི་གནས་ན་ཡོད་པའོ། །སྒྱུག་མོ་སྣབས་ཀྱི་རྩ་ཡིན་ཏེ། །དཔྲལ་བའི་གནས་ན་ཡོད་པའོ། །མ་ནི་ས་རུ་ཤེས་པར་བྱ། །སྲིང་མོ་ཆུ་རུ་དྲན་པའོ། །བུ་མོ་མེ་ནི་ཡིན་པར་དྲན། །ཆུང་མ་རླུང་དུ་རབ་ཏུ་གྲགས། །མནའ་མ་དེ་ནི་ནམ་མཁའ་སྟེ། །སྒྱུག་མོ་ནམ་མཁའ་མ་ཡིན་ནོ། །མ་ནི་མངར་བ་ཡིན་པར་འགྱུར། །སྲིང་མོ་དེ་ནི་སྐྱུར་བར་དྲན། །བུ་མོ་ཁ་བར་ཤེས་བྱ་སྟེ། །ཆུང་མ་ལན་ཚྭར་འདི་རུ་དྲན། །ཚ་བ་དེ་ནི་མནའ་མ་སྟེ། །སྒྱུག་མོ་བསྐ་བར་དྲན་པའོ། །དེ་རྣམས་འབད་པས་མཆོད་པར་བྱ། །མྱུར་དུ་དངོས་གྲུབ་ཐོབ་པར་འགྱུར། །རྣལ་འབྱོར་རྒྱུད་ལས་རྙེད་དཀའ་བ། །ཕྱག་རྒྱའི་རིགས་སུ་བདག་གིས་བཤད། །དཔལ་ཕྱག་རྒྱ་ཆེན་པོའི་ཐིག་ལེ་ལས་ཕྱག་རྒྱའི་བརྡ་དང་མཆོད་པའི་ཆོ་ག་ཞེས་བྱ་བའི་ལེའུ་སྟེ་དགུ་པའོ།། །།དེ་ནས་མཆོད་པའི་ཆོ་ག་ནི། །ཕྱི་དང་ནང་ནི་བདག་གིས་བསྟན། །ས་རྡོ་ལ་སོགས་མཆོད་རྟེན་ལ། །ནམ་ཡང་དེ་ལ་ཕྱག་མི་བྱ། །རབ་གནས་དཀྱིལ་འཁོར་སྦྱིན་སྲེག་རྣམས། །ནམ་ཡང་དེ་ནི་མི་བྱའོ། །དྲི་ཆེན་རྡོར་ཆུ་ས་བོན་སོགས། །རྟག་ཏུ་བདག་ཉིད་མཆོད་པར་བྱ། །འགྲོ་དང་མི་འགྲོ་གང་ཞིག་ནི། །དེ་ནི་ཐམས་ཅད་སེམས་ཡིན་ནོ། །དེ་ཡི་གཟུགས་གྲུབ་སེམས་མ་ཡིན། །སེམས་ནི་སྟོང་པའི་རང་བཞིན་ནོ། །ངོ་བོ་ཉིད་བྲལ་སྟོང་པ་སྟེ། །དེ་བས་འགྲོ་བ་སེམས་སུ་གྲུབ། །དེ་ལྟ་བུ་ཡི་དག་བྱས་ན། །རྩ་སོགས་ལ་ཡང་མཆོད་པ་བྱ། །ཉིད་ནི་མངའ་བདག་རྡོ་རྗེ་སེམས། །སེམས་ནི་བདག་ཉིད་དྲན་པའོ། །སེམས་མ་ཡིན་པ་ལྷ་ཡི་དངོས། །ཕྱི་རོལ་གཞན་མ་མེད་པའོ། །དེ་ལྟར་ཤེས་ནས་བདག་ཉིད་ནི། །དང་པོ་དེ་ཉིད་མཆོད་པར་བྱ། །རིགས་ལྔ་དག་ཏུ་ཀུན་སྤྱོད་པ། །རིགས་གཅིག་ཏུ་ནི་རྣམ་པར་བརྟག། བྱམས་དང་སྡང་བའི་བྱེ་བྲག་དང་། །བཏུང་དང་མི་བཏུང་སྤང་བར་བྱ། །བུད་མེད་གང་ཡང་སྣོད་མིན་མེད། །དགེ་དང་མི་དགེ་སྨྲ་མི་བྱ། །དངོས་གྲུབ་རྣལ་འབྱོར་མེད་པ་དང་། །སྔགས་མེད་སྔགས་པ་མེད་པར་ནི། །དངོས་གྲུབ་ཆེན་པོ་ཐོབ་འདོད་ན། །དེ་ལྟ་བུ་ཡི་སེམས་མི་

[Full Size]

བྱ། །རླབས་ཆེ་གཏིང་རིང་ཡང་དག་པའི། །སྐྱེས་བུ་ཆེན་པོས་སེམས་དེ་བྱ། །ཉན་ཐོས་རྣམས་དང་མཉམ་པའི་སེམས། །ནམ་ཡང་དེ་ལྟར་མི་བྱའོ། །བརྟན་མེད་ཉན་ཐོས་སྐལ་ལྡན་མིན། །ལོག་པའི་མུན་པས་ཡེ་ཤེས་གཡོགས། །དེ་རྣམས་ལ་ནི་གཏམ་ཙམ་ཡང་། །སྐྱེས་བུ་ཆེན་པོས་མི་སྦྱིན་ནོ། །སྨད་པར་ཡང་ནི་ཡོང་མི་བྱ། །དེ་ལ་ནམ་ཡང་ཕྱག་མི་བྱ། །ཕྱི་དང་ནང་གི་སྦྱོར་བ་ཡི། །འདི་རུ་གནས་ནི་བདག་གིས་བཤད། །རྡོ་རྗེའི་གནས་ནི་ཨུ་རྒྱན་དང་། །གནས་ནི་ཛཱ་ལན་དྷ་རར་དྲན། །གནས་ནི་པཱུལླི་ར་མ་དང་། །གནས་ནི་ཀཱ་མ་རཱུ་པའོ། །ཉེ་བའི་གནས་ནི་མཱ་ལར་བསྟན། །སིན་དྷུ་ན་གར་སིང་གྷ་ལ། །ཞིང་ནི་མུྃ་མུ་ནི་རུ་གྲགས། །དེ་བཞིན་དེ་ཝི་ཀོ་ཊ་དང་། །ཉེ་བའི་ཞིང་ནི་ཀུ་ལུ་ཏ། །ཨར་བུ་དར་ནི་དེ་བཞིན་དྲན། །ཧ་རེ་ཀེ་ལ་ཙྪན་དོ་ཧར། །གོ་དཱ་བ་རི་དེ་བཞིན་ནོ། །ལམ་པ་ཀ་དང་ཀཱཾ་ཙི་སྟེ། །ཉེ་བའི་ཙྪན་དོར་བསྟན་པའོ། །འདུས་པ་དེ་ནི་ཀར་མར་ཏེ། །དེ་བཞིན་དུ་ནི་གསེར་གླིང་ངོ་། །ཀོང་ཀ་དང་ནི་བིན་དྷ་སྟེ། །ཉེ་བའི་འདུས་པར་དྲན་པའོ། །ཡི་དགས་འདུས་པའི་དུར་ཁྲོད་དང་། །དུར་ཁྲོད་རྒྱ་མཚོའི་ངོགས་སུའོ། །ཉེ་བའི་དུར་ཁྲོད་ཙཱ་རི་ཏྲ། །དེ་བཞིན་ཀཽ་མཱར་པ་རའོ། །ཀ་སྨཱིར་པི་ལ་ཝ་རུ་གྲགས། །དེ་བཞིན་ཀེ་རད་ཡུལ་ཡིན་ནོ། །ཉེ་བའི་པཱི་ལ་ནེ་པ་ལ། །ཉེ་བའི་པཱི་ལ་ཀར་ནོ་ཛོ། །ཨུ་ཌི་ཡ་ན་སྤྱི་བོའི་གནས། །ཛཱ་ལན་དྷ་ར་སྤྱི་གཙུག་དྲན། །པཱུལླི་ར་ནི་མཚོག་མ་སྟེ། །ཀཱ་མ་རཱུ་ནི་སྨིན་ཕྲག་དབུས། །མཱ་ལ་བ་ནི་སྣ་རྩེ་སྟེ། །སིན་དྷུ་མིག་གཉིས་ཡིན་པར་གྲགས། །ན་གར་རྣ་བ་གཉིས་སུ་དྲན། །སིང་གྷ་མཁའ་ཡི་པད་མར་གནས། །མུམྨུ་ནི་ནི་ཀོསྐོའོ། །དེ་བཱི་ཀོ་ཊ་མགྲིན་གླིང་དུ། །ཀུ་ལུ་ཏ་ནི་རྒྱབ་གླིང་དུ། །ཨར་བུ་ད་ནི་ནུ་གཉིས་སུ། །ཧ་རི་ཀེ་ལ་སྙིང་གའོ། །གོ་དཱ་བ་རི་ལྟེ་བའི་གནས། །ལམ་པ་ཀ་ནི་གསང་བར་རོ། །ཀཱྃ་ཙི་ལིང་གའི་དབུས་སུ་གནས། །ཀར་མ་ལིང་ཀའི་རྩེ་མོར་རོ། །གསེར་གླིང་གཞང་ཁའི་གནས་སུ་སྟེ། །ཀོང་ཀ་ན་ནི་བརླ་གཉིས་དྲན། །བིན་དྷ་པུས་མོ་གཉིས་ཡིན་ནོ། །ཡི་དགས་འདུས་པ་བྱིན་པ་སྟེ། །རྐང་བོལ་གཉིས་སུ་རྒྱ་མཚོ་ངོགས། །ཀཽ་མཱ་རཱི་ནི་མཐེ་བོང་སྟེ། །ཙཱ་རི་ཏྲ་ནི་སོར་མོར་རོ། །ཁ་ཆེའི་ཡུལ་ནི་ལུས་རྣམས་ཀུན། །ཀེ་ར་ཏ་ནི་རྐང་མཐིལ་ལོ། །ནེ་པ་ལ་ནི་ལྟག་པ་སྟེ། །ཀཾ་པོ་ཛི་ནི་རྐེད་པའོ། །དེ་ནི་དོན་དམ་པ་ཡི་གནས། །རི་བོང་ཅན་

[Full Size]

འོད་མེ་ཏོག་དང་། །མེ་ཏོག་དམར་པོ་ཉི་མཉམ་གྱིས། །མཆོད་པའི་དུས་སུ་མཆོད་པར་བྱ། །སྲོག་གཅོད་པ་ཡི་མཆོད་སྦྱིན་ནི། །འབད་པས་དེ་རུ་དབུལ་བར་བྱ། །པད་མ་ཆེན་པོའི་མཚོ་གནས་སུ། །སྲོག་ནི་གཅད་པར་བྱ་བའོ། །ཆད་པ་ནམ་ཡང་མི་བྱ་སྟེ། །དེ་ལ་བརྩོན་འགྲུས་ཆེན་པོ་བྱ། །སྲོག་གཅོད་པ་ཡི་བསོད་ནམས་བྱ། །མཆོག་གི་མཆོག་ནི་ཡང་དག་རྙེད། །གྲུ་གསུམ་དྲི་མེད་དག་པར་ནི། །དེ་རུ་དཀྱིལ་འཁོར་འཕར་མ་གཉིས། །ནང་གི་འཕར་མར་དཔལ་བཅོམ་ལྡན། །བྱང་ཆུབ་སེམས་ཉིད་ལྡན་པའོ། །ཕྱི་རོལ་རིགས་གསུམ་རྣལ་འབྱོར་མ། །འཛིན་མ་ལ་སོགས་མཆོག་ཆེན་ནོ། །ལུས་ཀྱི་ནང་ནས་འབྱུང་བའི་ཕྱིར། །དེ་ནི་ལྷ་མོ་ཞེས་སུ་བསྟན། །དཀྱིལ་འཁོར་ལུས་སུ་བསྟན་པ་དང་། །བྷ་ག་དཀྱིལ་འཁོར་ཡིན་པར་བཤད། །དཀྱིལ་འཁོར་བྱང་ཆུབ་ཀྱི་ནི་སེམས། །དཀྱིལ་འཁོར་གསུམ་ནི་རྟོགས་པའོ། །དུར་ཁྲོད་བརྒྱད་ཀྱི་དབུས་གནས་སུ། །དཀྱིལ་འཁོར་གསུམ་ནི་བསྒོམ་པའོ། །དབུགས་འབྱུང་དུར་ཁྲོད་ཅེས་སུ་བཤད། །སྒོ་དགུ་དང་ནི་ལྡན་པའོ། །ཡང་དག་ཉོན་ཅིག་ཞལ་བཟང་མོ། །དེ་ཡི་འབྱུང་བ་བདག་གིས་བཤད། །གཏུམ་དྲག་གཞང་ཁའི་དབྱིབས་ཅན་ནི། །གསང་བའི་ཚང་ཚིང་ཁ་རུའོ། །འབར་བ་ཞེས་བྱའི་དུར་ཁྲོད་ནི། །སྣ་ཡི་བུ་ག་གཉིས་ན་གནས། །དམྱལ་སོགས་དེ་བཞིན་མི་བཟད་པ། །མིག་གཉིས་ལ་ནི་གནས་པའོ། །ཧ་ཧ་རྒོད་དང་གཡེར་ཁ་ཅན། །རྣ་བ་གཉིས་ལ་གནས་པའོ། །དུར་ཁྲོད་རེ་རེའི་ཤིང་རེ་ནི། །དབང་བྱེད་པ་ནི་དེ་ན་ཡོད། །གཏུམ་དྲག་པ་ཏ་ལ་ཡི་ཤིང་། །དབྱིབས་ཅན་ནང་ན་ཤི་ཀ་རའོ། །ཚང་ཚིང་ས་ལི་ཤིང་ཡིན་ནོ། །འབར་བ་ཞེས་བྱ་སོ་རི་ཤའོ། །དམྱལ་སོགས་ཨུ་དུམ་བཱ་ར་སྟེ། །མི་བཟད་པ་ནི་བ་ཏའི་ཤིང་། །ཧ་ཧ་རྒོད་ན་ཨ་ཤྭཏྠ། །གཡེར་ཁའི་ནང་ན་གེ་སར་ཤིང་། །ཤིང་གི་རྣམ་པ་རྩ་བརྒྱད་ནི། །ཡན་ལག་མང་པོ་ཡོད་པའོ། །གཞང་མཐུ་རྩེ་མེ་མཐུས་བྱེད་མ། །རི་ཡི་རྩེ་མོ་རོ་ལུས་མ། །ནམ་མཁའ་མ་དང་ཆར་སྦྱིན་མ། །རུལ་པ་མ་དང་ལྟོགས་མ་སྟེ། །བྱེ་བྲག་བརྒྱད་དུ་གྱེས་པར་དྲན། །ཤིང་གི་སྒྲ་ནི་རྩ་ཡིན་ཏེ། །ཤིང་ནི་མེ་ཏོག་ཡོད་ཕྱིར་རོ། །མཆོག་གི་དཀྱིལ་འཁོར་སྟེང་དུ་ནི། །མེ་ཏོག་མེད་ན་ཇི་ལྟར་མཆོད། །དཔལ་ཕྱག་རྒྱ་ཆེན་པོའི་

[Full Size]

ཐིག་ལེ་ལས། དཀྱིལ་འཁོར་དང་། ལྷ་མོ་དང་། གནས་དང་། དུར་ཁྲོད་དང་། ཤིང་དང་། མཆོད་པ་ཞེས་བྱ་བའི་ལེའུ་སྟེ་བཅུ་པའོ།། །།ཉོན་མོངས་ཐམས་ཅད་མེད་བྱེད་པ། །ཉོན་ཅིག་སྦྱིན་སྲེག་བདག་གིས་བཤད། །ལྟེ་བའི་གནས་ན་ཚུལ་ཡོད་པ། །ཚུལ་གྱིས་མཐའ་ན་གསང་པད་དོ། །དེ་རུ་རང་འབར་གྱི་ནི་རླུང་། །བསྐོར་བ་བྱས་ནས་ངལ་སོ་སྟེ། །དབང་པོ་གཉིས་ཤིང་སྦྱོར་བ་ཡིས། །རླུང་གིས་མེ་ནི་སྦར་བའོ། །མར་ཡོད་པ་ནི་སྟེང་འཁོར་ལོ། །དེ་ནི་མར་སྣོད་ཅེས་སུ་དྲན། །ཧ་ནི་བླུགས་གཟར་ཞེས་སུ་བཤད། །དགང་གཟར་འདི་རུ་རྡོ་རྗེར་བསྟན། །ཧོམ་ཁུང་བྷ་ག་ཞེས་སུ་བཤད། །འབྲུ་ནི་དབང་པོ་ལྔ་རུ་དྲན། །ཡམ་ཤིང་ཕུང་པོ་ཞེས་བྱར་བསྟན། །བྱང་ཆུབ་སེམས་ནི་མར་དུ་བསྲེག། མར་ངོ་ཡི་ནི་མན་ཆད་དུ། །ཉ་ལ་ཐུག་ནས་གཤེགས་སུ་གསོལ། །ཐིག་པ་ཕྱེད་ཙམ་དགང་གཟར་ལས། །ཧོམ་ཁུང་ཕྱི་རོལ་ཡང་མི་བྱ། །སངས་རྒྱས་བྱང་ཆུབ་སེམས་དཔའ་དང་། །ལྷ་དང་ལྷ་མིན་སྲིན་པོ་དང་། །འཇིག་རྟེན་སྐྱོང་བ་བརྒྱད་རྣམས་ལ། །བསྲེག་བྱ་ཡིས་ནི་རབ་ཚིམ་བྱ། །མཆོད་པ་གང་ཞིག་རྡོར་སེམས་ལ། །བསྲེག་རྫས་གང་བས་དབུལ་བར་བྱ། །ཧཱུཾ་ཕཊ་རྣམ་པའི་སྔགས་ཀྱིས་ནི། །མཁས་པས་བསྲེག་རྫས་སྦྱིན་པར་བྱ། །དེ་ཡིས་མཁའ་འགྲོ་མ་རྣམས་དང་། །གཞན་ཡང་རྣལ་འབྱོར་མ་མོ་མཉེས། །གང་ཞིག་ཡིད་ལ་ཅི་བསམས་པ། །དངོས་གྲུབ་ཆེན་པོ་མཐའ་ཡས་སྟེར། །རེ་བ་ཐམས་ཅད་འགྲུབ་བྱེད་པ། །དེ་ལྟའི་སྦྱིན་སྲེག་བདག་གིས་བཤད། །དཔལ་ཕྱག་རྒྱ་ཆེན་པོའི་ཐིག་ལེ་ལས་དོན་དམ་པའི་སྦྱིན་སྲེག་གི་ཆོ་ག་ཞེས་བྱ་བའི་ལེའུ་སྟེ་བཅུ་གཅིག་པའོ།། །།བདུད་རྩི་ལྔ་ཡི་ཆོ་གའི་རབ། །མདོར་བསྡུས་པ་ནི་བདག་གིས་བཤད། །རྣམ་སྣང་མི་བསྐྱོད་དོན་ཡོད་གྲུབ། །དཔག་མེད་རིན་འབྱུང་ཞེས་ལྔར་བསྟན། །རིན་ཆེན་འབྱུང་ལྡན་ཁྲག་ཅེས་བསྟན། །སྣང་བ་མཐའ་ཡས་ཁུ་བར་བརྗོད། །དོན་ཡོད་གྲུབ་པ་ཤ་ཆེན་ཏེ། །མི་བསྐྱོད་པ་ནི་རྡོ་རྗེ་ཆུའོ། །རྣམ་པར་སྣང་མཛད་དྲི་ཆེན་བཤད། །དེ་ནི་བདུད་རྩི་ལྔ་ཡིན་ནོ། །དབེན་དང་མི་མེད་དགྱེས་པ་ཡི། །གནོད་པ་ཐམས་ཅད་དང་བྲལ་བའི། །དེ་རུ་ཁང་པ་རབ་ཏུ་བྱ། །ཉིས་བརྩེགས་དང་ནི་སྒོ་དང་ལྡན། །གཅིག་ནི་ས་ཡི་འོག་ཏུ་བྱ། །དེ་ཡི་སྟེང་ནི་གཉིས་པའོ། །འཇིག་རྟེན་པ་ཡིས་གཅིག་ཏུ་ཤེས། །དེ་ལྟར་མཁས་པས་ཁང་པར་བྱ། །རེ་ཞིག་བསྒྲུབ་

[Full Size]

དབང་སྐལ་ལྡན་པ། །ཐོས་པ་ཆེ་ཞིང་སེར་སྣ་མེད། །སྙིང་རྗེ་ཆེན་པོའི་རླན་དང་ལྡན། །ཞེ་སྡང་ཕྲག་དོག་བྲལ་བ་དང་། །དཔའ་བ་ཆེ་དང་རླབས་ཆེ་བ། །སྒྲུབ་པའི་གྲོགས་དང་དེ་བཞིན་ཏེ། །འདོད་ཆགས་དང་བྲལ་གཉིས་མེད་པ། །སེར་སྣ་མེད་ཅིང་བརྩོན་འགྲུས་ལྡན། །ཁྲོ་བ་མེད་ཅིང་དཔའ་ཆེན་པོ། །བླ་མ་ལ་གུས་ཐོས་པ་ཆེ། །འབྲས་བུ་གསུམ་ལ་སོགས་པས་ལུས། །དང་པོར་ཡང་དག་དེས་དག་བྱ། །དེ་ནས་སྔགས་པས་འབུམ་ཕྲག་གཅིག། སུམ་བྷའི་སྔགས་ནི་གསལ་བར་བཟླས། །ཨོཾ་སུམ་བྷ་ནི་སུམ་བྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་བཱན་བཛྲ་བིདྱཱ་རཱ་ཛ་ཧཱུཾ་ཧཱུཾ་ཕཊ། དེ་ནས་ཡི་གེ་གསུམ་གྱི་སྔགས། །སྒྲུབ་པའི་དབང་པོས་ཡིད་ཀྱིས་བཟླས། །རྨི་ལམ་ན་ནི་འདི་ལྟར་མཐོང་། །རྣལ་འབྱོར་མ་ཡི་ཚོགས་ཀྱི་འདུས། །དེ་ཡི་གསུང་གི་སྦྱིན་པ་ནི། །ཡིད་འཕྲོག་མ་ཡི་བུ་མོ་ཁྱེར། །སེམས་ཅན་དོན་ནི་ཚད་མེད་ཀྱིས། །ཇི་ལྟར་རྡོ་རྗེ་འཛིན་པས་མཛད། །མིག་མཛེས་བུ་མོ་རྙེད་པ་ནི། །གཟུགས་དང་ལང་ཚོ་རྒྱན་དང་ལྡན། །འདོད་ཆགས་ཆེན་པོས་རྒྱགས་པ་དང་། །ལེགས་དགྱེས་རིངས་པར་གཡོ་བ་དང་། །སྔོ་བསངས་ནུ་སྲ་དཔའ་མོ་དང་། །རྟོག་མེད་པ་དང་ཐོས་པ་ཆེ། །དེ་འདྲའི་བུ་མོ་ཆེན་མོ་ལ། །གང་ཚེ་ཟླ་མཚན་འབྱུང་བར་འགྱུར། །དེ་ལ་གྲོང་པའི་སྦྱོར་བ་ཡིས། །ཤེས་རབ་ཐབས་ཀྱི་ཆོ་ག་བྱ། །གང་ཚེ་རོ་ནི་འབྱུང་བར་འགྱུར། །དེ་ཙམ་དེ་ཙམ་རབ་ཏུ་བྱ། །དེ་ཚེ་ཁ་ཡི་པདྨ་ཡིས། །ཞག་བདུན་བར་དུ་བླང་བར་བྱ། །ཤིན་ཏུ་གསལ་བའི་པད་སྣོད་དུ། །རིན་ཆེན་འདྲ་བའི་རཀྟ་བཞག། ཉི་མ་གསུམ་དུ་ཁ་ཡིས་ནི། །དག་པའི་པད་རྒྱལ་གཞིབ་པར་བྱ། །ཤེས་རབ་ཐབས་ཀྱི་ཆོ་ག་ནི། །ཡང་ནི་རྣལ་འབྱོར་པ་ཡིས་བརྩམ། །དེ་རུ་ཆང་ནི་བཏུང་བར་བྱ། །སྟོབས་ཀྱི་སཱ་ལུ་བཟའ་བར་བྱ། །ཡང་ན་ར་ཡི་འོ་མ་འམ། །ཡང་ན་ནམ་མཁའི་སྟོབས་བཟའོ། །མཚན་མོ་ཉིན་མོ་སྦྱོར་བ་ཡིས། །བསྲུབ་ཐབས་ཆེན་པོ་དཔྱད་པར་བྱ། །གང་ཚེ་ཁུ་ཆེན་འོང་འགྱུར་བས། །བུ་མོ་མྱོས་པར་གྱུར་པ་ན། །དེ་ཚེ་ཁ་ཡིས་བླང་བར་བྱ། །ལྕེ་ལ་སོགས་པའི་གཙགས་བུ་ཡིས། །སྐྱོན་མེད་པ་ཡི་གནས་སུ་ནི། །པདྨའི་སྣོད་དུ་གཞག་པར་བྱ། །བརྒྱད་དང་ཡང་ན་བཅུ་བཞི་

[Full Size]

དང་། །ཡང་ན་བཅུ་ནི་མར་གྱི་ངོ་། །མདུང་རྩེ་ཡང་ན་རལ་གྲིས་བསད། །རིགས་ལྔའི་ནང་ན་རིགས་གཅིག་གོ། །ན་ཚ་མེད་དང་བདེ་བ་འགྲུབ། །གཟུགས་དང་ལང་ཚོ་ལྡན་པ་དང་། །སྐྱེ་བ་བདུན་ནམ་ཡང་ན་གསུམ། །སྒྲུབ་པའི་གྲོགས་ཀྱིས་ཁྱེར་ནས་འོང་། །སྣ་ཚོགས་མཆོད་སྦྱིན་མཆོད་པ་ཡིས། །རྩེ་གཅིག་གིས་ནི་མཆོད་པར་བྱ། །དེ་ཡི་ཡན་ལག་རབ་ནི་བླང་། །པདྨའི་སྣོད་ནི་དེ་ལ་བྱ། །ཤེས་རབ་དང་ལྡན་ཐབས་ཀྱིས་ནི། །དེ་ཡི་སྣོད་དུ་ཆང་བཏུང་བྱ། །སྟོབས་ཆེན་རང་ཉིད་ཅུང་ཟད་ཙམ། །དངོས་གྲུབ་འགྲུབ་ཕྱིར་བཟའ་བར་བྱ། །པདྨའི་སྣོད་དུ་བསྲུབས་པ་ལས། །ཅུང་ཟད་འབད་དེ་གཞག་པར་བྱ། །གཞན་མ་སྨན་གྱིས་འབད་དེ་ནི། །གྲོགས་ཀྱི་དབང་པོས་བཙོ་བར་བྱ། །ར་ཡི་འོ་མ་ཏིལ་མར་དང་། །མར་ནི་ཤ་ཀ་ར་དང་བཅས། །ཁ་ར་ལ་སོགས་མཉམ་པའི་ཆ། །སྟོབས་ནི་ལྔ་རུ་གྱུར་དྲན་པའོ། །ཁ་རུ་ཚ་དང་ཚ་བ་གསུམ། །སུག་སྨེལ་ནཱ་ག་གེ་སར་དང་། །ཛཱ་ཏི་ཕ་ལ་དྭ་ཚ་དང་། །ག་བུར་རིམ་པར་ཆེ་བར་བྱ། །ཤིན་ཏུ་འཇམ་པའི་དྲི་མེད་སྣོད། །ཨ་ག་རུ་སོགས་ཀྱིས་བདུག་བྱ། །འབད་དེ་གཞན་གྱི་སྣོད་དུ་བཙོ། །བདུག་པ་བྱས་པར་གཞག་པར་བྱ། །ཉི་མ་བདུན་གྱི་བར་དུ་ནི། །སྟོབས་ཆེན་སཱ་ལུ་བཟའ་བར་བྱ། །དེ་ནི་ཟོས་པ་ཙམ་གྱིས་ནི། །གང་ཞིག་མི་བསྐྱོད་སྔར་འོང་འགྱུར། །དེ་ནི་པདྨའི་སྣོད་དུ་བླང་། །སྟེང་དང་འོག་ནི་མཁས་པས་བོར། །ཐོ་རངས་ཅུང་ཟད་ཙམ་ནི་བཏུང་། །ཅུང་ཟད་ཙམ་ནི་སྣོད་དུ་བཞག། ཤེས་རབ་ཐབས་ཀྱི་གཉིས་འབྱུང་བ། །དེ་ཡི་སྣང་མཛད་འདུས་པ་ནི། །རྣལ་འབྱོར་པ་ཡིས་རྩེ་གཅིག་བྱ། །རྣལ་འབྱོར་གྲོགས་པོའི་སྒྲུབ་པའོ། །འབྲས་བུ་ཨུར་ཤིང་མན་ཤིང་དང་། །ཏི་ཀར་ཀུ་ཏ་པུས་ཀར་མ། །འོ་མ་དང་ནི་ཆང་རོར་ལྡན། །རྩེ་གཅིག་གིས་ནི་བཙོ་བ་ནི། །ལྕགས་ཀྱི་སྣོད་དུ་བཙོ་བར་བྱ། །མ་རྙེད་ན་ནི་རྫ་སྣོད་དུ། །དག་པའི་རིགས་ཀྱི་མེ་ཏོག་གིས། །ཉི་མ་བདུན་དུ་བདུག་པར་བྱ། །དེ་ནས་སྙིང་པོའི་སྨན་དེ་ནི། །རིམ་པས་ཆེ་བར་བླུག་པར་བྱ། །ལི་ཤི་ག་བུར་ལ་ཏ་དང་། །གླ་རྩི་ཙནྡན་ཛཱ་ཏི་དང་། །ཛཱ་ཏི་ཕ་ལ་སུག་སྨེལ་དང་། །དྭ་ཚ་ཚ་བ་གསུམ་དང་རོ། །དཀར་པོའི་ཤ་ཀར་དང་ལྡན་པའི། །མར་དང་བཅས་ནས་བཙོ་བར་བྱ། །མེ་ནི་འཇམ་པར་སྨིན་པ་ཡིས། །གྲོགས་ཀྱི་དབང་པོས་བཙོ་བར་བྱ། །ཨ་ག་རུ་སོགས་ཀྱིས་བདུག་གིས། །རྡོ་ཡི་སྣོད་དུ་གཞག་པར་

[Full Size]

བྱ། །ཉིན་རེ་ཞིང་ནི་ཞོ་གཉིས་ནི། །ཞུ་བ་ཡིན་ན་བཟའ་བར་བྱ། །ཞུ་བ་ཡིན་ན་ཞོ་བཞི་དང་། །དེ་ནས་ཞོ་དྲུག་རྟག་ཏུ་བཟའ། །བདུད་རྩི་ལྔ་ཡི་ཆོ་ག་དེ། །གསང་ཆེན་བདག་གིས་བཤད་པའོ། །གཞན་ཡང་ཡན་ལག་ལྔ་ཡི་སྨན། །མཁས་པས་དེ་ལ་རིལ་བུ་བྱ། །སྐྱུ་རུ་ར་ཙམ་དུ་བྱས་ཏེ། །གྲིབ་མ་ལ་ནི་བསྐམ་པར་བྱ། །རས་དང་ཡན་ལག་བཀྲུ་བྱས་ནས། །དེ་བཞིན་ཐིག་ལེ་བྱ་བའོ། །འབད་དེ་ཁ་ལ་གཞག་པར་བྱ། །ཚོགས་ཀྱི་དཀྱིལ་འཁོར་སྤོས་ཀྱང་བྱ། །ཞི་དང་རྒྱས་དང་དབང་བྱེད་དང་། །དྲག་པོ་དྲེགས་ལ་སོགས་པ་ཡིན། །རིལ་བུ་ཡིས་ནི་བྱས་ཙམ་ན། །ཐེ་ཚོམ་མེད་པར་འགྲུབ་པར་འགྱུར། །དཔལ་ཕྱག་རྒྱ་ཆེན་པོའི་ཐིག་ལེ་ལས་བདུད་རྩི་ལྔ་བསྟན་པ་ཞེས་བྱ་བའི་ལེའུ་སྟེ་བཅུ་གཉིས་པའོ།། །།་ཨཽ་དྱན་གནས་ལ་སོགས་པར་ནི། །རྣལ་འབྱོར་མ་ནི་འདུས་པའོ། །དེ་ཡི་གནས་སུ་སྐད་སྨྲ་བ། །གསང་བའི་སྒྲ་ནི་ཡོད་པའོ། །ཉོན་ཅིག་སེམས་ནི་རྩེ་གཅིག་གིས། །དེ་ནི་ཡང་དག་བདག་གིས་བཤད། །མ་ད་ན་ཆང་བ་ལ་ཤ། མ་ལ་ཨ་ཙ་འདུས་པར་དྲན། །འགྲོ་བ་ཁེ་ཊ་རོ་ཤྲཱ་བ། །ནི་རྃ་ཤུ་ཀ་རུས་པའི་རྒྱན། །ཕྲེང་ཁ་ན་ནི་འོང་བ་ཡིན། །ཀུན་ཏུ་རུ་ནི་དབང་པོ་སྦྱོར། །དུ་དུར་སྐལ་ལྡན་མིན་པར་བཤད། །ཀ་ལིན་ཛ་ར་སྐལ་ལྡན་གཞུག། ཌིཎ་ཌི་རེག་བྱ་མིན་པར་བསྟན། །ཐོད་པ་པདྨ་བྷཉྫ་ན། །དྲི་ཆེན་བཞི་མཉམ་ཡིན་པར་བསྟན། །དྲི་ཆུ་གླ་རྩི་དྲན་པའོ། །ཁུ་བ་ག་བུར་བསྟན་པ་སྟེ། །ཤ་ཆེན་སཱ་ལི་ཛ་རུ་དྲན། །བྷ་ཧ་ཀ་ནི་ཆུ་ཞེས་བྱ། །སྒྲོ་ནི་ཡན་ལག་ཅེས་བྱར་དྲན། །ཤ་ཀ་བཟང་པོ་ཞེས་སུ་བཤད། །ཧོ་ཞེས་བྱ་བ་འགྲངས་པར་བཤད། །ཛེ་ཌྱཱ་ཀྵ་བ་ལཾ་ཀར་བཀྲེས། །དབྱུང་མ་གྷ་ན་ཚོགས་འཁོར་ལོ། །ཀ་པེ་ལམ་ནི་གྱིས་སུ་གྱུར། །ན་ག་རཾ་ནི་བདག་བྱིན་བཤད། །བྷ་ཏ་ཀ་ནི་ཁྱོད་ཁྱེར་འགྱུར། །ཨག་ནི་བོར་བ་ཞེས་སུ་བསྟན། །གསང་བ་རིན་ཆེན་ཞེས་སུ་དྲན། །བཟའ་བ་དུད་དུ་ཤེས་པར་བྱ། །ཤ་དག་བཟའ་བ་མིན་དུ་དྲན། །དག་པ་ཞེས་བྱ་སྔགས་སུ་བཤད། །དག་པ་མིན་པ་ཉི་མར་བརྗོད། །རྃ་པ་ཚངས་པ་གྲགས་པ་སྟེ། །རྒྱལ་རིགས་ལུས་སུ་བསྟན་པའོ། །ཆགས་བྲལ་རྗེ་ཞེས་བསྟན་པ་སྟེ། །ཆགས་པ་དམངས་རིགས་ཞེས་བྱར་དྲན། །ཙཎྜ་ལཱི་ནི་གཞུ་ཞེས་བཤད། །ཤྭ་པ་ཙ་ན་

[Full Size]

མདའ་རུ་བཤད། །ཙར་མ་ཀ་ར་སྲིད་འཁོར་ལོ། །པུཀྐ་སཱི་ནི་རལ་གྲིར་བསྟན། །འདའ་བ་ཀ་ནི་སྟོང་ཞེས་བཤད། །ཧ་རི་ཀ་ནི་ཐལ་བར་བཤད། །ར་ཙ་རྒྱ་མཚོ་ཞེས་སུ་བཤད། །མི་ནྃ་ཤི་བར་བསྟན་པའོ། །རྒྱས་པ་ཕག་ཅེས་བྱ་བར་དྲན། །ཕག་ནི་བྲམ་ཟེར་བསྟན་པའོ། །ཉ་ནི་པ་ལ་ཤ་ཞེས་བསྟན། །ར་ནི་ཉིན་མོར་བསྟན་པའོ། །ལུག་ནི་མཚན་མོར་ཤེས་པར་བྱ། །བྱ་ལ་སོགས་པ་ཉི་མ་ཕྱེད། །མེ་ཏོག་གསེར་ནི་ཞེས་སུ་བསྟན། །སྤོས་ནི་ཤར་དུ་ལ་རུ་བརྗོད། །དྲི་ནི་མ་ལ་ཏི་རུ་བཤད། །མེ་མར་ཤ་ཀོ་ནི་ཀར་དྲན། །གོས་ནི་ཀ་ཤི་ཀ་རུ་བཤད། །བདེ་བ་ཀཱ་མ་ལ་རུ་བསྟན། །དཔྲལ་བ་ཆུ་ཞེས་བྱ་བར་བརྗོད། །སྨིན་མ་ཕྲེང་བ་ཞེས་སུ་དྲན། །མིག་ནི་ཨུཏྤལ་ཤེས་པར་བྱ། །སོ་ནི་ཨ་ད་ན་རུ་བསྟན། །མཆུ་ནི་པ་ལ་ཝ་རུ་ཤེས། །མགྲིན་པ་གླིང་བུར་བསྟན་པའོ། །ཕུང་པོ་ང་པ་ཞེས་སུ་བསྟན། །ལག་ངར་མྱུ་གུར་བསྟན་པའོ། །ལག་པ་མཚོ་སྐྱེས་བསྟན་པར་གྲགས། །ནུ་མ་དཔལ་འབྲས་བརྗོད་པའོ། །དབུས་ནི་རི་འབྱུང་ཤེས་པར་བྱ། །ལྟེ་བ་མ་ད་ན་རུ་བསྟན། །བརླ་ནི་ཀ་ཏམ་པ་རུ་གྲགས། །པདྨ་ཛ་ག་ན་རུ་དྲན། །བྱིན་པ་ཛ་ན་བི་རུ་བརྗོད། །རྐང་པ་ཨ་ཙ་ཤི་རར་དྲན། །སེན་མོ་ཡན་ལག་གེ་སར་རབ། །སྣ་ནི་མ་ད་ཤ་བ་རི། །སྟན་ནི་ཤ་ཏ་ཀུ་སུམ་སྟེ། །ནུས་པ་བུ་ནི་ཞེས་སུ་དྲན། །མི་ནུས་པ་ནི་པདྨའི་སྡོང་། །ཐམས་ཅད་མིང་གིས་རྫ་མར་དྲན། །གཞོན་ནུ་རྫིང་ཞེས་བྱ་བར་གྲགས། །འབར་མ་མཚོ་ཞེས་བྱ་བར་དྲན། །རྒན་པོ་རྒྱ་མཚོ་ཞེས་པར་དྲན། །མྱོང་བ་མི་སྨྲ་ཞེས་སུ་འགྱུར། །མྱོང་བ་མ་ཡིན་གསལ་བར་དྲན། །མི་སྨྲ་རི་དགས་ཞེས་སུ་བརྗོད། །གླུ་ནི་བག་ཆགས་ཞེས་སུ་བཤད། །གར་ནི་གྲོགས་པོ་ཞེས་པར་དྲན། །སྒྲ་ནི་ཚུལ་འཆོས་ཞེས་སུ་བཤད། །རེག་བྱ་ཞགས་པ་ཞེས་སུ་དྲན། །རོ་ནི་སྒེག་པོ་ཞེས་སུ་བསྟན། །གཟུགས་ནི་རི་ཞེས་བརྗོད་པའོ། །གསོད་པ་སྒྲ་ནི་ཞེས་སུ་བརྗོད། །ཚེ་ནི་ཕུག་རོན་དྲན་པའོ། །གྲོང་ནི་ཏཱ་ལའི་མེ་ཏོག་སྟེ། །གྲོང་ཁྱེར་འབྲས་བུ་ཡིན་པར་བརྗོད། །ལྗོངས་ནི་འདོད་པ་ཞེས་བྱར་བསྟན། །འདོད་པ་སྲོག་ཅེས་བྱ་བར་དྲན། །མི་ཤེས་དེ་ནི་འདུལ་བར་དྲན། །ཤེས་པ་སྤང་བར་ཤེས་པར་བྱ། །རྒོད་པ་ཞེས་བྱ་བྱིས་པར་བསྟན། །དུ་བ་ཁྲག་ཏུ་དྲན་པའོ། །ཉིན་མོ་གཞོན་ནུར་ཤེས་པར་བྱ། །མཚན་མོ་བུ་མོར་རབ་ཏུ་གྲགས། །མཚམས་ནི་

[Full Size]

བུད་མེད་ཤེས་པར་བྱ། །ཉིན་ཕྱེད་བྲན་དུ་བསྟན་པའོ། །འདུས་པ་ཡི་ནི་དབུས་གནས་སུ། །རྣལ་འབྱོར་མ་ནི་རྟག་ཏུ་བརྗོད། །དཔལ་ཕྱག་རྒྱ་ཆེན་པོའི་ཐིག་ལེ་ལས་རྣལ་འབྱོར་མ་འདུས་པའི་གནས་སུ་གསང་བའི་སྐད་བསྟན་པ་ཞེས་བྱ་བའི་ལེའུ་སྟེ་བཅུ་གསུམ་པའོ།། །།དེ་ནས་གཞན་ཡང་བཤད་བྱ་བ། །ཡན་ལག་ཕྱག་རྒྱ་སོགས་མཚན་ཉིད། །གང་ཞིག་སོར་མོ་གཅིག་ནི་སྟོན། །བསྙུན་རྨེད་པ་ཞེས་སྤྱན་འདྲེན་ནོ། །སོར་མོ་གཉིས་ནི་བསྟན་པ་ཡིས། །ལེགས་པར་བསྙུན་ལན་ལྡོན་པ་ཡིན། །གང་ཞིག་གུང་མོ་སྟོན་བྱེད་པ། །དེ་ལ་སྲིན་ལག་བསྟན་པར་བྱ། །གང་ཞིག་སྲིན་ལག་སྟོན་བྱེད་པ། །དེ་ལ་ལྕེ་ནི་བསྟན་པར་བྱ། །གང་ཞིག་གཞིབས་པ་སྟོན་བྱེད་པ། །དེ་ལ་རྩེ་གསུམ་བསྟན་པར་བྱ། །གང་ཞིག་གཙུག་ཕུད་སྟོན་བྱེད་པ། །དེ་ལ་མཚོག་མ་བསྟན་པར་བྱ། །གང་ཞིག་དཔྲལ་བ་སྟོན་བྱེད་པ། །དེ་ལ་མཁུར་ཚོས་བསྟན་པར་བྱ། །གང་ཞིག་ལྟག་ཁུང་སྟོན་བྱེད་པ། །དེ་ལ་ས་གཞི་བསྟན་པར་བྱ། །གང་ཞིག་ལག་གཉིས་སྟོན་བྱེད་པ། །དེ་ལ་ལག་ངར་བསྟན་པར་བྱ། །གང་ཞིག་མགྲིན་པ་སྟོན་བྱེད་པ། །དེ་ལ་ལྟོ་བ་བསྟན་པར་བྱ། །གང་ཞིག་མ་མཆུ་སྟོན་བྱེད་པ། །དེ་ལ་ཀོས་ཀོ་བསྟན་པར་བྱ། །གང་ཞིག་སོ་ནི་སྟོན་བྱེད་པ། །དེ་ལ་ལྕེ་ནི་བསྟན་པར་བྱ། །གང་ཞིག་ནུ་མ་སྟོན་བྱེད་པ། །དེ་ལ་ཀོས་ཁུར་བསྟན་པར་བྱ། །གང་ཞིག་ལྟོ་བ་སྟོན་བྱེད་པ། །དེ་ལ་ལྟེ་བ་བསྟན་པར་བྱ། །གང་ཞིག་གསང་བ་སྟོན་བྱེད་པ། །དེ་ལ་ལིང་ག་བསྟན་པར་བྱ། །གང་ཞིག་བརླ་ནི་སྟོན་བྱེད་པ། །དེ་ལ་གཞང་ནི་བསྟན་པར་བྱ། །གང་ཞིག་རྐང་པ་སྟོན་བྱེད་པ། །དེ་ལ་རྐང་མཐིལ་བསྟན་པར་བྱ། །གང་ཞིག་སོར་མོ་སྟོན་བྱེད་པ། །དེ་ལ་སེན་མོ་བསྟན་པར་བྱ། །གང་ཞིག་གཙང་པོ་སྟོན་བྱེད་པ། །དེ་ལ་རྒྱ་མཚོ་བསྟན་པར་བྱ། །གང་ཞིག་ནམ་མཁའ་སྟོན་བྱེད་པ། །དེ་ལ་ཉི་མ་བསྟན་པར་བྱ། །གང་ཞིག་ས་ནི་སྟོན་བྱེད་པ། །དེ་ལ་ནམ་མཁའ་བསྟན་པར་བྱ། །གང་ཞིག་ཁྲོ་གཉེར་སྟོན་བྱེད་པ། །དེ་ལ་མཚམས་ནི་བསྟན་པར་བྱ། །གང་ཞིག་སོ་ནི་སྟོན་བྱེད་པ། །དེ་ལ་མཆུ་ནི་བསྟན་པར་བྱ། །གང་ཞིག་མགྲིན་པ་སྟོན་བྱེད་པ། །དེ་ལ་ཁ་ནི་བསྟན་པར་བྱ། །གང་ཞིག་དཔྲལ་བ་སྟོན་བྱེད་པ། །དེ་ལ་རྒྱབ་ནི་བསྟན་པར་བྱ། །

[Full Size]

འདི་ནི་ཐམས་ཅད་རྣལ་འབྱོར་མའི། །ཡན་ལག་རྒྱ་སོགས་མཚན་ཉིད་དོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་རྣལ་འབྱོར་མ་ཐམས་ཅད་ཀྱི་ཡན་ལག་གི་ཕྱག་རྒྱ་ལ་སོགས་པ་ཞེས་བྱ་བའི་ལེའུ་སྟེ་བཅུ་བཞི་པའོ།། །།དེ་ནས་གཞན་ཡང་བཤད་བྱ་བ། །གཟུགས་དང་རྟགས་སོགས་མཚན་ཉིད་ནི། །དམར་ཞིང་སེར་བའི་བུད་མེད་གང་། །པདྨའི་དྲི་ནི་རྣམ་པར་གཏོང་། །ལྟ་སྟངས་རང་བཞིན་ཞི་བ་དང་། །ཞེན་པས་ལྟ་བའི་རྗེས་འགྲོ་བ། །སེན་མོ་དམར་པོ་པདྨ་འདྲ། །མིག་ནི་ཉི་མའི་འོད་དང་ལྡན། །དེ་ལ་ཁྱིམ་ན་པདྨ་ཡོད། །རྟག་ཏུ་མཆོད་པའི་ཆོ་ག་བྱེད། །པདྨ་གར་གྱི་དབང་ཕྱུག་རིགས། །པདྨའི་གཙོ་མོར་དེ་ཤེས་བྱ། །སྨིན་མཚམས་བར་ན་རྩེ་གསུམ་ཡོད། །ལུས་ནི་སྔོ་བསངས་སྐྱ་བ་དང་། །དེ་ཡི་ཁྱིམ་ན་རྡོ་རྗེ་ཡོད། །ཏང་ཀུ་དམར་པོས་མཆོད་པར་བྱ། །ཧེ་རུ་ཀ་དཔལ་རིགས་འབྱུང་བའི། །ཀུན་གྱི་མ་མོར་ཤེས་པར་བྱ། །རྩེ་གསུམ་གང་གི་དཔྲལ་བ་འམ། །ཡང་ན་ཤག་ཏི་གསལ་འགྱུར་བ། །མིག་དམར་གདོང་ནི་དམར་བ་དང་། །དེ་བཞིན་རྐང་པ་ལག་པ་དམར། །རྟག་ཏུ་ཕུག་རོན་ལ་རྩེད་རྩེ། །དེ་བཞིན་ཁྱི་དང་ཁྱིམ་བྱའོ། །དེ་ཡི་ཁྱིམ་དུ་རྡོ་རྗེའི་མཚན། །རྟག་ཏུ་གང་ཞིག་མཆོད་བྱེད་པ། །དཔལ་ལྡན་རྡོ་རྗེའི་རིགས་སུ་བྱུང་། །མཁའ་འགྲོ་མ་ཡིན་དཔའ་བོའི་གཅེས། །སྤྲིན་སྔོན་དག་དང་འདྲ་བ་ནི། །རྟག་ཏུ་དཔྲལ་བར་ཐོད་ཡོད་པ། །ཁྱིམ་དུ་འཁོར་ལོ་འདྲི་བྱེད་ཅིང་། །རྟག་ཏུ་དེ་ལ་མཆོད་བྱེད་པ། །རྡོ་རྗེ་ཕག་མོའི་རིགས་འབྱུང་བའི། །མཁའ་འགྲོ་མ་ནི་སྟོབས་ཀྱིས་དྲེགས། །མིག་སྨན་ནམ་མཁའ་སྔོན་པོའི་མདོག། སོ་ནི་མཐོ་བ་དྲག་མོ་དང་། །རྟག་ཏུ་ཁྲུས་ལ་དགའ་བ་དང་། །མང་དུ་སྨྲ་བར་མི་བྱེད་ཅིང་། །ཁྱིམ་དུ་རྡོ་རྗེ་འདྲི་བ་དང་། །མཚན་མོ་ཕྱེད་ན་མཆོད་པར་བྱེད། །རྡོ་རྗེ་ཕག་མོའི་རིགས་འབྱུང་བའི། །དཔལ་ལྡན་རྡོ་རྗེ་མཁའ་འགྲོ་མ། །བཙོ་མ་གསེར་དང་མཉམ་པའི་འོད། །མིག་མི་གཡོ་ཞིང་བ་སྤུ་མང་། །རྡོ་རྗེ་གང་གི་དཔྲལ་བ་འམ། །ཁྱིམ་དུ་ཡང་ནི་གསལ་འགྱུར་བ། །རྒྱལ་པོའི་བཙུན་མོ་རྟག་ཏུ་སྒེག། སྐལ་ལྡན་མཆོག་ནི་བདེན་སྨྲ་དང་། །མཱ་ལི་ཀཱ་ཡི་དྲི་འབྱུང་ཞིང་། །ཁྱིམ་དུ་རྡོ་རྗེ་མཆོད་བྱེད་པ། །ཁཎྜ་རོ་ཧའི་རིགས་འབྱུང་བའི། །མཁའ་འགྲོ་མ་ནི་ཡེ་ཤེས་རྒྱལ། །ཤིན་ཏུ་ཤ་ལ་དགའ་བ་དང་། །མིག་

[Full Size]

སྨན་ནག་པོའམ་ནམ་མཁའ་འདྲ། །རྩེ་གསུམ་རྣམ་པ་ཕྲ་བ་རུ། །གདུག་པའི་ལས་ལ་རྟག་ཏུ་དགའ། །དུར་ཁྲོད་རྟག་ཏུ་འགྲོ་བ་དང་། །འཇིགས་པ་མེད་ཅིང་སྙིང་བརྩེ་མེད། །དེ་ལ་ཁྱིམ་དུ་མཆོད་པ་ནི། །ཆང་ལ་སོགས་པས་མཆོད་བྱེད་པ། །ཧེ་རུ་ཀ་དཔལ་རིགས་འབྱུང་བའི། །མཁའ་འགྲོ་ཡིན་པར་གདོན་མི་ཟ། །སར་པ་སྤྲིན་གྱི་མདོག་འདྲ་བ། །གཡོན་གྱི་མཆེ་བ་གཙིགས་པ་དག། དེ་ཡི་ཁྱིམ་དུ་དགྲ་སྟ་ནི། །འདྲི་ཞིང་རྟག་ཏུ་མཆོད་བྱེད་པ། །ཧེ་རུ་ཀ་དཔལ་རིགས་འབྱུང་བའི། །མཁའ་འགྲོ་མར་ནི་ཐེ་ཚོམ་མེད། །མཁའ་འགྲོ་མ་ནི་ཐམས་ཅད་ཀྱི། །མདོག་དང་མཚན་མ་རིགས་འབྱུང་བ། །མདོར་བསྡུས་པ་ནི་འདི་རུ་བཤད། །རྒྱས་པར་ཡེ་ཤེས་སྙིང་པོར་རོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་མཁའ་འགྲོ་མའི་གཟུགས་དང་། མཚན་ཉིད་དང་། རིགས་འབྱུང་བ་ཞེས་བྱ་བའི་ལེའུ་སྟེ་བཅྭ་ལྔ་པའོ།། །།གང་ཞིག་གཞན་མིན་བདག་ཉིད་བཞུགས། །ཉོན་ཅིག་དཀྱིལ་འཁོར་རྒྱལ་དབང་པོ། །ཧཱུྃ་གི་རྣམ་པའི་རྣམ་པ་ཅན། །བདག་ཉིད་ཧཱུྃ་གི་དངོས་པོ་ཡིན། །ཧཱུྃ་གི་རྣམ་པ་ལས་གཟུགས་འབྱུང་། །མཚན་དང་དཔེ་བྱད་ལྡན་པ་དག། ཉི་མའི་དཀྱིལ་འཁོར་སྟེང་ན་བཞུགས། །ཉི་མ་བྱེ་བའི་འོད་དང་མཉམ། །ཁྱོད་དང་ལྷན་ཅིག་སྦྱོར་བ་ཡིས། །ཆུ་སྐྱེས་སྔོན་པོའི་གཟུགས་དང་ལྡན། །ཞལ་བཞི་སྤྱན་གསུམ་ཕྱག་བརྒྱད་དེ། །གཡས་བརྐྱང་བས་ནི་གནས་ན་བཞུགས། །རྡོ་རྗེ་དྲིལ་བུ་ཉི་ཟླ་དང་། །མདའ་གཞུ་དག་ནི་འགེངས་པ་དང་། །ཁ་ཊྭཱྃ་ག་དང་ཀ་པཱ་ལ། །ཁྲག་ཆེན་པོ་ཡིས་གང་བའོ། །བདེ་བའི་གནས་སུ་བདག་དང་ཁྱེད། །ལེགས་དགྱེས་དགྱེས་པར་རོལ་བགྱིད་དེ། །དེ་ནས་དང་པོའི་རོ་ལས་ནི། །སྤྲོས་ནས་རྡོ་རྗེ་རོ་ལངས་མ། །གཟུགས་གནག་པ་ལ་ཕྱག་བཞི་པ། །མདའ་གཞུ་ལག་ན་འགེངས་པ་དང་། །ཆུ་སྲིན་གཡས་ན་ཐོགས་པ་དང་། །ཀ་པཱ་ལ་དང་ཁ་ཊྭཱྃ་ག། གཡོན་གྱི་ལག་ན་ཐོགས་པ་སྟེ། །ཤར་གྱི་སྒོ་ན་གནས་པ་སྟེ། །ཡང་ནི་བསྲུབ་ཐབས་སྦྱོར་བ་ཡིས། །གཉིས་པ་ཡི་ནི་རོ་ལས་ནི། །རྡོ་རྗེ་དྲ་བ་འཕྲོས་པ་ནི། །གཅེར་བུ་དང་ནི་སྤྱན་གསུམ་པ། །མདོག་དམར་ལག་ན་ཉ་ཐོགས་ཏེ། །བྱང་གི་སྒོ་ཡི་གནས་ན་བཞུགས། །ཡང་ནི་རོ་ནི་གསུམ་པ་ལས། །རྡོ་རྗེ་རྩེ་མོ་སྤྲོས་པ་ནི། །

[Full Size]

མདོག་སེར་ལག་ན་སེང་གེ་ཐོགས། །ནུབ་སྒོ་ཡི་ནི་གནས་ན་བཞུགས། །ཡང་ནི་རོ་ནི་བཞི་པ་ལས། །རྡོ་རྗེ་ཟླུམ་པོ་འཕྲོས་པ་ནི། །མདོག་དཀར་ལག་ན་བྱ་ཁྱུང་སྟེ། །ལྷོ་ཡི་སྒོ་ན་བཞུགས་པའོ། །རོ་ལྔ་དེ་ནི་རྙེད་པ་ཡིས། །རྡོ་རྗེ་སྐ་རགས་མ་ནི་སྤྲོས། །རྫ་རྔ་གླིང་བུ་ལག་ན་ཐོགས། །ཤར་ལྷོ་མཚམས་ན་གཟུགས་གཉིས་པའོ། །ཡང་ན་དྲུག་པའི་འབྱུང་བ་ལས། །རྡོ་རྗེ་སོར་མོ་སྤྲོ་བ་ནི། །རྒྱུད་མངས་རྔ་ཆེན་ལག་ན་ཐོགས། །ལྷོ་ནུབ་མཚམས་ན་བཞུགས་པའོ། །ཡང་དག་བདུན་པས་རྙེད་པ་ནི། །རྡོ་རྗེ་རྒོད་མ་འཕྲོ་བ་སྟེ། །རྫ་རྔ་དང་ནི་ཆ་ལང་ཐོགས། །ནུབ་བྱང་མཚམས་ན་བཞུགས་པའོ། །རོ་བརྒྱད་པ་ནི་རྙེད་པ་ཡིས། །རྡོ་རྗེ་ཉི་མ་སྤྲོས་པ་ནི། །ཏམྦུ་ར་དང་ཀ་ར་ཐོགས། །ཕྱག་གཉིས་རྟག་ཏུ་འཛིན་པ་ལས། །སྤྲོས་ནས་བྱང་ཤར་མཚམས་སུ་ནི། །བདུད་ཀུན་བཅོམ་ནས་བཞུགས་པའོ། །ཡང་ནི་བསྲུབ་དང་བསྲུབ་ཐབས་ལས། །དང་པོ་དགའ་བ་འབྱུང་བ་ཡིས། །རྡོ་རྗེ་ལེགས་དགྱེས་འཕྲོས་པ་ནི། །རོ་ཡི་སྣོད་ནི་ལག་ན་འཛིན། །སྤྲོས་ནས་ཤར་གྱི་ཕྱོགས་ཀྱི་གྲྭར། །ཆོས་འབྱུང་གི་ནི་གྲྭ་ན་བཞུགས། །བྷ་གའི་ཕྱག་རྒྱ་སྤྱི་བོར་ནི། །མཛུབ་མོ་ཚངས་པའི་བུ་གའི་གནས། །ཡང་ན་མཆོག་གི་དགའ་བ་ལས། །རྡོ་རྗེ་མཚོ་མ་འཕྲོས་པ་ནི། །ཁྲག་གི་སྣོད་ནི་ལག་ན་བྲེལ། །ལྷོ་ནུབ་གྲྭ་ན་བཞུགས་པའོ། །ཡང་ན་དགའ་བྲལ་འབྱུང་བ་ལས། །རྡོ་རྗེ་གླང་ཆེན་མ་འཕྲོས་པ། །ཁུ་བའི་སྣོད་ནི་ལག་ན་ཐོགས། །ནུབ་བྱང་ཕྱོགས་ཀྱི་གྲྭ་ན་བཞུགས། །དེ་རྣམས་གནག་དང་སེར་དང་དམར། །གཡོན་བརྐྱང་པས་ནི་བཞུགས་པའོ། །ཡང་ནི་ཡང་དག་བསྲུབ་ཐབས་ལས། །ལྷན་ཅིག་སྐྱེས་དགའ་འབྱུང་བ་སྟེ། །ལྷན་ཅིག་སྐྱེས་དགའ་འདོད་ཆགས་ཆེ། །མེ་ཆེན་རབ་ཏུ་འབར་བའོ། །ཁྱོད་དང་ལྷན་ཅིག་དེ་རུ་བདག། རང་བཞིན་གྱིས་ནི་ཡོངས་སུ་འགྱུར། །དངོས་པོ་མེད་པར་བདག་མི་འགྱུར། །བདག་ནི་རང་བཞིན་གནས་སུ་བཞུགས། །བདག་གི་ངོ་བོ་བརྗོད་མི་ནུས། །སངས་རྒྱས་ཀུན་གྱིས་ཀྱང་རྙེད་དཀའ། །ཡང་དག་རྫོགས་པའི་སངས་རྒྱས་ཀྱིས། །གལ་ཏེ་ཀུན་རྫོབ་གཟུགས་སུ་རྙེད། །འཇིག་རྟེན་ཁམས་ནི་གྲངས་མེད་པ། །གཞན་ནི་མ་ཡིན་བདག་གིས་ཁྱབ། །ཁྱོད་དང་ལྷན་ཅིག་ཀུན་རྫོབ་ཏུ། །འབྱུང་བའི་རྒྱུ་ཕྱིར་རོལ་པ་བྱེད། །བདག་ནི་རོལ་པ་མི་བྱེད་ན། །སངས་རྒྱས་ཐམས་

[Full Size]

ཅད་འབྱུང་མི་འགྱུར། །འདི་ནི་ཐམས་ཅད་མི་གཡོ་བར། །འགྲོ་འགྱུར་བར་ནི་ཐེ་ཚོམ་མེད། །རང་བཞིན་ལས་ནི་མཆོག་གནས་སུ། །དེ་དུས་བདག་ནི་ཅང་མི་སྨྲ། །བདེ་ཆེན་ལེགས་དགྱེས་མགོན་པོ་བཞེངས། །རྡོ་རྗེ་བཟང་དགྱེས་བདག་དགའ་མཛོད། །མགོན་པོ་ཁྱོད་མིན་བདག་རོ་འདྲ། །ཐུགས་རྗེ་རོ་ཡིས་བདག་སྐྱེ་མཛོད། །ཀྱེ་མགོན་ཆད་པའི་སྟོང་པའི་མིན། །མགོན་པོ་སྟོང་པའི་རང་བཞིན་མིན། །རྡོ་རྗེ་མཚོ་མ་བདག་དགའ་མཛོད། །པདྨ་ཁ་ཕྱེ་རོལ་ཅིག་རོལ། །ཨ་ལ་ལ་ལ་ཨ་ལ་ལ། །ཨ་ལ་ལ་ལ་ལེགས་དགྱེས་མགོན། །རྡོ་རྗེ་གླང་ཆེན་མ་དགའ་མཛོད། །ཁྱེད་རང་གིས་གསུངས་བདག་མིན་ན། །སངས་རྒྱས་འབྱུང་བར་མི་འགྱུར་རོ། །ཡེ་ཤེས་སྐུ་ལས་ཨོཾ་ཧཱུྃ་འདིར། །བདག་དང་ཁྱོད་ནི་ལྷན་ཅིག་བཞེངས། །འཁོར་ལོ་དང་བཅས་ཁྲོ་སྐུ་མཆོག། སུམ་ཅུ་རྩ་གཉིས་ཡན་ལག་ལྡན། །བདེ་བའི་གནས་སུ་བདག་དང་ཁྱོད། །དུར་ཁྲོད་བརྒྱད་ཀྱི་དབུས་སུ་ནི། །སྐྱེ་བའི་རྒྱུ་ཡི་དོན་ཕྱིར་རོལ། །བསྐྱེད་པའི་རིམ་པ་ཡི་ནི་ཕྱོགས། །མདོག་གནག་པ་ལ་འོད་ཆེ་བ། །དབུ་སྐྲ་མེ་བཞིན་འབར་བ་དང་། །ཞལ་ནི་བཅུ་དྲུག་སྤྱན་གསུམ་པ། །ཕྱག་ནི་བཅུ་དྲུག་ལྡན་པ་དང་། །ཞབས་ནི་རྣམ་པ་བཞི་ཡིས་ནི། །བདུད་བཞི་ཡི་ནི་སྟེང་ན་བཞུགས། །ལེགས་དགྱེས་དབང་ཕྱུག་མ་ཁྱོད་བཅས། །ཡེ་ཤེས་མཁའ་འགྲོ་དབང་ཕྱུག་བདག། ཁྱོད་ཀྱང་ང་ཡི་གཟུགས་དང་མཉམ། །འཇིགས་བྱེད་ཆུང་མར་བཅས་པའི་སྟེང་། །གྲུ་གསུམ་དབུས་སུ་ཉི་མའི་གདན། །གྱེན་དུ་ཞབས་ནི་གར་དང་ལྡན། །འཇིགས་མ་དཔའ་མོ་ཆང་འཐུང་མ། །འཇིགས་བྱེད་ཕོ་ཉ་སྟོབས་མ་དང་། །རྟ་མགྲིན་མ་དང་རྟ་རྣ་མ། །གླང་ཆེན་སྣ་དང་ལྟོ་བ་མ། །མེ་མ་དང་ནི་ཆུ་རྒྱུན་མ། །ཟླ་བ་མ་དང་ཉི་འོད་མ། །དུང་སྣ་མ་དང་དུང་གཙུག་མ། །དུང་ལྟེ་མ་དང་སྟོབས་ཆེན་མ། །བྱ་རྒོད་རྒོད་ཁ་ཧོར་པ་མ། །ཧོར་མིག་མ་དང་ཧོར་མགོ་མ། །མིག་དམར་སྐྲ་དམར་རིན་ཆེན་མ། །ཕུག་རོན་དམར་མོ་ནག་མོ་མ། །རི་བོང་རི་དགས་ར་མ་མོ། །ཕྱག་བཞི་མ་ལ་སྣ་ཚོགས་གཟུགས། །སྤྱན་གསུམ་པ་ལ་བཞིན་ཡང་འཇིགས། །ཕྱག་གཉིས་མདའ་གཞུ་འགེངས་པར་ལྡན། །གཞན་གྱིས་གྲི་དང་ཐོད་པ་འཛིན། །རྡོ་རྗེ་ཕྲེང་བ་དཔྲལ་བ་རུ། །ཕྱག་རྒྱ་ལྔ་ཡིས་ཡན་ལག་བརྒྱན། །དེ་ལྟ་བུ་ཡི་འཁོར་ལོ་

[Full Size]

ཆེ། །ཁྱོད་དང་བཅས་པ་བདག་གི་གནས། །གང་ཞིག་ཉི་ཤུ་རྩ་བརྒྱད་གནས། །དེ་ནི་ཚོགས་ཀྱི་གནས་སུ་དྲན། །རྡོར་དྲིལ་རིན་ཆེན་འཁོར་ལོ་དང་། །རལ་གྲི་རྩེ་གསུམ་མདའ་ཉི་མ། །ཟླ་བ་དགྲ་སྟ་ཌ་མ་རུ། །གཞུ་དང་ཐོ་བ་ཀ་པཱ་ལ། །བྷཱུ་ཏིའི་པགས་པ་གྱེན་དུ་འཕྱར། །གཤིན་རྗེའི་པགས་པ་རྐེད་ལ་དཀྲིས། །ཞལ་གཅིག་པ་ལ་ཕྱག་གཉིས་ཏེ། །ཁྱོད་ཀྱང་བདག་གི་མདོག་ཡིན་ནོ། །ཐམས་ཅད་རྒྱན་གྱིས་བརྒྱན་པ་དང་། །ཕྱག་གཉིས་མདའ་གཞུ་འགེངས་པའོ། །དེ་ནས་རྫོགས་པའི་རིམ་པ་ནི། །རྩ་ཡི་འབྱུང་བ་རིམ་པ་མཆོག། ལྷ་མོ་རེ་རེ་རྩ་རེ་སྟེ། །དེ་ཡི་བདེ་བ་བདག་དང་ཁྱོད། །འཛུམས་པ་དང་ནི་འབྱེད་པ་ཡིས། །རླུང་གིས་མེ་ནི་ཁོང་དུ་ཆུད། །ཡང་དག་པ་ཡི་དབང་པོའི་ཤིང་། །དེ་ཡིས་གཏུམ་མོ་འབར་བའོ། །རྣམ་པར་རྟོག་པའི་ཕུང་པོའི་གཟུགས། །ཐམས་ཅད་ལུས་ནི་སྲེག་པའོ། །དེ་ཡི་མེ་འབར་ཡང་དག་གིས། །བདེ་ཆེན་འཁོར་ལོ་བཞུ་བར་འགྱུར། །བཞུ་བས་རྩ་ནི་ཐམས་ཅད་ལས། །མཆོག་གི་བདུད་རྩི་འཇག་པའོ། །ཡང་ནི་ལུས་ནི་སོས་འགྱུར་ཏེ། །ལྷ་ཡི་སྐུ་ནི་ཐོབ་པར་འགྱུར། །དེ་ནི་གོམས་པའི་སྦྱོར་བ་ཡིས། །རྩེ་གཅིག་གིས་ནི་གོམས་པར་བྱ། །ཕྱི་ཡི་ཕྱག་རྒྱ་མེད་ན་ཡང་། །བདེ་བ་འབྱུང་བར་འགྱུར་བ་ཡོད། །བལྟ་བ་ཙམ་ནི་དགོས་པ་སྟེ། །དེ་བཞིན་ཐམས་ཅད་ཐམས་ཅད་མིན། །ཕྱི་ནས་རྣམ་པར་རྟོག་པ་སྐྱེ། །དེ་ལ་དངོས་གྲུབ་མེད་པར་འགྱུར། །ཇི་ལྟར་མུན་པའི་སྣོད་རྣམས་ནི། །མར་མེ་མེད་ན་མཐོང་མི་འགྱུར། །མར་མེས་མཐོང་བར་གྱུར་ཙམ་ན། །ཕྱི་ནས་མར་མེ་དོར་བར་བྱ། །སྣོད་ནི་འབད་དེ་བསྲུང་བྱ་སྟེ། །མར་མེས་དོན་བྱ་མི་དགོས་སོ། །མར་མེའི་མཚན་ཉིད་འདི་རུ་རྩ། །རྩ་ནི་ཤེས་རབ་མཚན་ཉིད་དོ། །ཐབས་ནི་བདེ་བ་ཞེས་སུ་བསྟན། །བདེ་བ་ཡེ་ཤེས་ཞེས་བྱར་དྲན། །བདེ་བའི་ཡེ་ཤེས་རང་བཞིན་ནི། །གང་ཞིག་ཤེས་རབ་མ་ལས་རྙེད། །དེ་ནི་ཤེས་རབ་ཡེ་ཤེས་དབང་། །དེ་ནི་རྫོགས་པའི་རིམ་པའོ། །དེ་དངོས་བདེ་ཆེན་ཡེ་ཤེས་ནི། །དཀྱིལ་འཁོར་ནང་དུ་ཡང་དག་བཞུགས། །བདེ་བ་ཆེན་པོ་གཉིས་སུ་གྱིས། །ཀུན་རྫོབ་དང་ནི་དོན་དམ་མོ། །དགའ་བ་ལ་སོགས་ཉིད་ལས་ནི། །བདེ་བ་གཉིས་གྱེས་ཤེས་པར་བྱ། །དེ་ཡི་རིམ་པ་ཡང་དག་

[Full Size]

གཉིས། །དད་པས་ཉོན་ཅིག་བདག་གིས་བཤད། །སྣང་བ་རེག་བྱ་སྦྱོར་བ་དང་། །འགྲོ་བ་དེ་ནི་བཞི་པའོ། །རིམ་པ་ཡིས་ནི་ཤེས་པར་བྱ། །བསྐྱེད་པའི་རིམ་པའི་ཕྱོགས་ཀྱི་ནི། །ཤེས་རབ་མ་ཡི་ལྟ་བ་ཡིས། །གཉིས་ཀའི་འདོད་ཆགས་འབྱུང་བར་འགྱུར། །དེ་ཚེ་དགའ་བ་འབྱུང་བ་སྟེ། །རྣམ་པ་སྣ་ཚོགས་སྐད་ཅིག་ལྡན། །གང་ཚེ་དེ་དང་ལྷན་ཅིག་ཏུ། །དད་པས་རེག་བྱ་ཡོད་གྱུར་ན། །དེ་ཚེ་མཆོག་གི་དགའ་བ་ནི། །དྲི་མ་མེད་པ་འབྱུང་བར་འགྱུར། །ཡང་ནི་དབང་པོ་གཉིས་ཕྲད་ལས། །གང་ཚེ་དེ་དང་ལྷན་ཅིག་སྦྱོར། །དེ་ཡི་ཚེ་ན་དགའ་བྲལ་ནི། །གསལ་བར་འབྱུང་བར་འགྱུར་བའོ། །གང་ཚེ་དབང་པོ་གཉིས་ཤིང་ལས། །ཡང་དག་པ་ཡི་མེ་འབར་ན། །དེ་ཚེ་ལྷན་ཅིག་སྐྱེས་དགའ་ནི། །སྲིད་པ་མེད་པ་འབྱུང་བར་འགྱུར། །ནུ་མས་རེག་པས་བལྟ་བ་ནི། །འདོད་པ་དེ་ནི་དང་པོར་དགའ། །ཕྱི་ནས་དེ་དངོས་རྒྱས་པ་ནི། །གང་ཚེ་ངེས་པར་ཡིན་པར་འགྱུར། །དེ་ཚེ་སྐད་ཅིག་གིས་དེ་རྒྱས། །མཆོག་གིས་དགའ་བ་བྱེད་པའོ། །གང་ཚེ་དེ་ཉིད་ཤིན་ཏུ་ཡིས། །འདོད་ཆགས་མེ་ནི་འབར་འགྱུར་ན། །དེ་ཚེ་འབར་བའི་ཐིག་ལེ་ནི། །དགའ་བྲལ་དགའ་བ་འབབ་པའོ། །རྡོ་རྗེ་པདྨ་རོལ་བྱེད་པ། །དེ་བཞིན་དགའ་བྲལ་དགའ་བའོ། །དེ་ནི་བསྐྱེད་པའི་རིམ་པ་ཡིན། །ཨུ་ཏའི་ཡེ་ཤེས་དང་བྲལ་ལོ། །ཡང་ནི་གང་ཚེ་ཨུ་ཏ་ནི། །སྐད་ཅིག་ཉིད་ལས་གཅིག་ཏུ་འགྲོ། །དེ་ཚེ་ཨུ་ཏའི་ཐིག་ལེ་ནི། །གསུམ་གྱི་རྣམ་པར་དག་པར་འགྲོ། །དེ་ནས་དེར་ནི་ལྷན་ཅིག་སྐྱེས། །རྡོ་རྗེ་ལྟ་བུའི་བདེ་བ་བྱེད། །དེ་ནི་བཅོམ་ལྡན་ཤེས་རབ་མ། །རྫོགས་པའི་རིམ་པའི་ཕྱོགས་ཡིན་ནོ། །ཨུ་ཏའི་སྒྲས་ནི་བདེ་བར་བསྟན། །ལེགས་དགྱེས་དབང་མོ་དེ་ནི་བདག། དེ་རུ་སྦྱོར་བ་བཞི་རྣམས་ནི། །རྒྱས་པར་བདག་གིས་བཤད་པར་བྱ། །འདོད་དང་འདར་དང་འགྲོ་བ་དང་། །དགའ་བ་དང་ནི་བཞི་ཡིན་ཏེ། །དེ་ནི་དང་པོའི་སྦྱོར་བ་ཡིན། །དེ་ནི་དགའ་བའི་དོན་ཡིན་ནོ། །རྒྱས་དང་འདུན་དང་འབྱུང་བ་དང་། །མཆོག་གི་དགའ་བ་བཞི་ཡིན་ཏེ། །དེ་ནི་སྦྱོར་བ་གཉིས་པ་ཡིན། །མཆོག་གི་དགའ་བའི་དོན་ཡིན་ནོ། །འབར་དང་ཐིག་ལེ་མྱོས་པ་དང་། །དགའ་བྲལ་དང་ནི་བཞི་ཡིན་ཏེ། །དེ་ནི་སྦྱོར་བ་གསུམ་པ་ཡིན། །དགའ་བྲལ་

[Full Size]

དགའ་བའི་དོན་ཡིན་ནོ། །ཨུ་ཏ་དང་ནི་ཚུལ་དང་གཉིད། །ལྷན་ཅིག་སྐྱེས་དགའ་བཞི་པའོ། །དེ་ནི་སྦྱོར་བ་བཞི་པ་ཡིན། །དགའ་བའི་བྱེ་བྲག་བཅུ་དྲུག་གོ། །བཞི་རྣམས་གཞན་མིན་འདི་རུ་ནི། །རབ་ཀྱི་དོན་ནི་འདི་ལྟར་འགྱུར། །འདོད་པ་འདུན་པ་ཡིན་པར་བཤད། །དཔལ་ལྡན་ཤེས་རབ་མས་སྤྲུལ་ལོ། །དེ་ནི་འདུན་པ་ལས་ནི་དཀྲུག། རང་གི་ཡིད་ཀྱིས་བྱེད་པའོ། །འདོད་པའི་སྒྲས་ནི་དགའ་བ་ཡིན། །མཐོང་བ་ལས་ནི་བྱེད་པའོ། །དེ་ཉིད་བཅོམ་ལྡན་ཤེས་རབ་མ། །འདོད་ཆགས་ཆེན་པོས་རྒྱས་པ་ན། །དེ་ཚེ་རྒྱས་པ་ཡིན་པར་འགྱུར། །མཆོག་གི་དགའ་བ་གཉིས་པའོ། །རྒྱས་པའི་དུས་སུ་ཕྱི་དང་ནང་། །གང་ཚེ་ཤིན་ཏུ་འབར་འགྱུར་ན། །དེ་ཚེ་ཡན་ལག་རབ་དེ་ནི། །སྐད་ཅིག་གིས་ནི་ཞུ་བར་འགྱུར། །ད་ནི་འབར་བའི་ཐིག་ལེས་ནི། །མིང་ནི་གསལ་བར་གྱུར་པའོ། །དེ་ནི་དགའ་བྲལ་དགའ་བ་སྟེ། །གསུམ་པ་ཞེས་བྱ་བཤད་པའོ། །ཡང་ན་དེ་ཉིད་གཙོ་མོ་ནི། །མཆོག་གི་རྣམ་པ་རབ་བདེ་བ། །དེ་ཚེ་ཨུ་ཏའི་དགུག་པ་ནི། །སྲིད་པ་དང་བྲལ་བྱེད་པའོ། །དེ་ནི་བཞི་པ་ཡང་དག་མཆོག། ལྷན་ཅིག་སྐྱེས་དགའ་བསྟན་པའོ། །དེ་ནི་ཨུ་ཏའི་དགུག་པ་ནི། །ཐིག་ལེའི་ཐར་པ་གསུམ་གྱི་མཐར། །ལྷན་སྐྱེས་ཀྱི་ནི་གནས་སུའོ། །དགའ་བ་ལ་སོགས་བྱེ་བྲག་གིས། །ལྷན་ཅིག་སྐྱེས་རིམ་ཤེས་པར་བྱ། །བདེ་བ་ཆེན་པོའི་གཙུག་ཏོར་ནས། །སྨིན་ཕྲག་འཁོར་ལོའི་དབུས་ཡན་ཆད། །དེ་ཙམ་དགའ་བའི་གནས་ཡིན་ཏེ། །ཐིག་ལེ་གཅིག་པུའི་མཚན་ཉིད་དོ། །སྨིན་ཕྲག་འཁོར་ལོས་མགྲིན་འཁོར་ལོ། །དེ་ཙམ་མཆོག་གི་དགའ་བའོ། །མགྲིན་པའི་གནས་ནས་སྙིང་འཁོར་ལོ། །དེ་ཙམ་དགའ་བྲལ་དགའ་བའོ། །དེ་ནས་ཡང་ནི་རིམ་པ་ཡིས། །རིམ་པའི་གནས་ནི་རབ་ཏུ་བཤད། །ལྟེ་བའི་འཁོར་ནས་རྒྱུ་ཞབས་སུ། །དེ་ཙམ་དུ་ནི་དགའ་བ་ཡིན། །རྒྱུ་ཞབས་སུ་ནི་མདུད་པའི་རྩར། །དེ་ཙམ་མཆོག་གི་དགའ་བའོ། །མདུད་པའི་གནས་ནས་རིན་ཆེན་ཁར། །དེ་ཙམ་དགའ་བྲལ་དགའ་བའོ། །རྡོ་རྗེ་རིན་ཆེན་རྩེ་ནང་ཡོད། །ལྷན་སྐྱེས་དེ་ནི་དོན་དམ་པའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་དཀྱིལ་འཁོར་དང་། དགའ་བའི་བྱེ་བྲག་དང་། ཐིག་ལེའི་མཚན་ཉིད་དང་། བསྐྱེད་པ་དང་། རྫོགས་པའི་རིམ་པ་ཞེས་

[Full Size]

བྱ་བའི་ལེའུ་སྟེ་བཅུ་དྲུག་པའོ།། །།ཡེ་ཤེས་མཁའ་འགྲོ་བཅོམ་ལྡན་འདས། །བདག་ནི་ཐེ་ཚོམ་ཅུང་ཟད་སྐྱེས། །ཆར་ཡང་དང་ནི་ཐིག་ལེའི་ཚུལ། །ཡེ་ཤེས་གང་ནས་ཤེས་པར་བྱ། །བཅོམ་ལྡན་འདས་ཀྱིས་བཀའ་སྩལ་པ། །ཚུལ་ནི་དཔྲལ་བའི་གནས་སུ་སྟེ། །ཐིག་ལེ་མགྲིན་པའི་གནས་སུ་བཞུགས། །ཆར་ཡང་སྙིང་གའི་གནས་སུ་ཤེས། །ཡེ་ཤེས་ལྟེ་བའི་གནས་སུ་བཞུགས། །རྟོག་པ་ལས་ནི་རྟོག་པ་མེད། །གང་དུ་ཕྱིན་ནས་འགྲོ་བ་ན། །དེ་ནི་དེ་རྣམས་རང་བཞིན་གནས། །ལྟེ་བའི་གནས་སུ་རབ་ཏུ་གྲགས། །གང་ཚེ་བདུད་རྩི་གནས་སུ་འགྲོ། །དེ་ཚེ་ཡེ་ཤེས་ཞེས་སུ་དྲན། །བདུད་རྩི་བྱང་ཆུབ་སེམས་སུ་གྲགས། །ཚུལ་ལ་སོགས་པའི་ཐིག་ལེ་བཞི། །དེ་ཡི་གནས་ནི་བཞི་ཡིན་ཏེ། །དགའ་བའི་བྱེ་བྲག་འགྲོ་བར་འགྱུར། །དཔྲལ་བར་དགའ་བའི་ཐིག་ལེ་དང་། །མགྲིན་པར་མཆོག་ཏུ་དྲན་པའོ། །སྙིང་ག་རུ་ནི་དགའ་བྲལ་ཏེ། །ལྟེ་བ་རུ་ནི་ལྷན་ཅིག་སྐྱེས། །རྩ་ཡི་ཀུན་སྤྱོད་སྦྱོར་བ་ཡིས། །དགའ་བ་ལ་སོགས་རྙེད་པར་འགྱུར། །དཔྲལ་བའི་སྟེང་ན་པདྨ་ཡོད། །དེ་ཡི་སྟེང་ན་གཙུག་ཏོར་རོ། །དེ་ནི་གསང་ཆེན་ཡེ་ཤེས་ཏེ། །རྒྱལ་བ་ཡིས་ཀྱང་མི་ཤེས་སོ། །ལྟེ་བའི་འོག་གི་གསུམ་གནས་སུ། །དེ་ཡི་སྟེང་དུ་རྒྱུ་ཞབས་སོ། །གསུམ་དངོས་འོག་གི་ལྟེ་བའི་དབྱིབས། །དེ་རུ་རྡོ་རྗེ་བྱད་གཟུགས་གསལ། །གསུམ་དངོས་གནས་ན་རྩ་རྣམས་ཀྱི། །ཡང་དག་མཆོག་གི་གནས་ཡིན་ནོ། །རོ་མ་འཛིན་མ་གཉིས་ཡིན་ཏེ། །གསུམ་པ་དེ་ནི་རྟོག་མེད་ན། །རྟོག་མེད་དེ་ནི་གཅིག་པུ་སྟེ། །ཀུན་རྫོབ་ཏུ་ནི་གསུམ་དུ་འགྱུར། །དེ་ནི་གཅིག་ཏུ་ལུ་གུ་རྒྱུད། །ཇི་ལྟར་སྦྲུལ་འཁྱིལ་བཞིན་དུའོ། །སྐུ་གསུང་ཐུགས་ཀྱི་དབྱེ་བ་ཡིས། །རྩ་ནི་བྱེ་བྲག་གསུམ་དུ་འགྱུར། །རྡོ་རྗེ་རྩེ་མོ་ཐུགས་རྡོ་རྗེ། །གསུམ་གྱི་དངོས་པོ་གསུང་ཡིན་ནོ། །ལྟེ་བ་སྐུ་ཞེས་བྱ་བར་གྲགས། །དེ་ནི་རྡོ་རྗེ་གསུམ་ངེས་དོན། །སྙིང་གར་ཐུགས་ཀྱི་རྡོ་རྗེ་སྟེ། །མགྲིན་པ་གསུང་གི་རྡོ་རྗེའོ། །དཔྲལ་བ་སྐུ་ཡི་རྡོ་རྗེ་སྟེ། །རྒྱས་པར་བདག་གིས་རབ་ཏུ་གསལ། །དེ་ཡི་དབུས་སུ་སྲོག་ཡོད་པ། །དེ་བཞིན་དུ་ནི་ཉེ་བའི་སྲོག། སྙིང་གའི་སྟེང་ལས་སྲོག་གི་རླུང་། །ལྟེ་བའི་འོག་ལས་གསོ་བའི་རླུང་། །གང་ཚེ་རྐང་མཐིལ་ལས་གསོ་རླུང་། །གལ་ཏེ་འབྱུང་བ་

[Full Size]

ཡིན་པར་འགྱུར། །དེ་ཡི་ཚེ་ན་སྲོག་གི་རླུང་། །གྱེན་དུ་ལམ་དུ་འགྲོ་བའོ། །གསོ་རླུང་ལྟེ་བའི་གནས་སུ་ནི། །ངེས་པ་ཡི་ནི་གནས་བྱེད་དོ། །ཡང་ན་གང་ཚེ་སྲོག་གི་རླུང་། །གཙུག་ཏོར་ལས་ནི་ཕྱིར་འགྲོ་ན། །དེ་ཚེ་གསོ་བའི་རླུང་དེ་ནི། །རང་གི་གནས་སུ་འགྲོ་བའོ། །དེ་ནི་སྲོག་གི་རླུང་ཡིན་ཏེ། །ལྟེ་བའི་གནས་སུ་འདུག་ས་བྱེད། །དཔལ་ཕྱག་རྒྱ་ཆེན་པོའི་ཐིག་ལེ་ལས་ཚུལ་དང་། ཆར་ཡང་དང་། ཐིག་ལེ་དང་། ཡེ་ཤེས་ཀྱི་གནས་དང་། རྩའི་ཀུན་སྤྱོད་ཅེས་བྱ་བའི་ལེའུ་སྟེ་བཅུ་བདུན་པའོ།། །།བཅོམ་ལྡན་དེ་རུ་བདག་ཞུ་སྟེ། །དེ་ཡི་བསམ་གཏན་ཇི་ལྟ་བུ། །ཁ་སྦྱར་རྣམ་པའི་སྦྱོར་བ་ཡིས། །པད་རྣམས་འདུག་སའི་མཚན་ཉིད་དོ། །རིམ་པ་གང་གིས་སེམས་དེ་ནི། །འགྲོ་དང་འོང་བ་ཇི་ལྟར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། །དྲིས་པ་ཡང་དག་གསང་བ་སྟེ། །འདི་ནི་སུས་ཀྱང་མི་ཤེས་སོ། །གང་གིས་ཁྱོད་ཀྱིས་གསལ་བར་ཤེས། །ཉོན་ཅིག་ཡང་དག་བདག་གིས་བཤད། །གང་ཚེ་ལེགས་དགྱེས་ཤིན་ཏུ་བདེ། །ཤེས་རབ་ཐབས་ཀྱི་སྦྱོར་བ་ལས། །དེ་ཚེ་རྟོག་པ་མེད་པའི་ལམ། །བྱང་ཆུབ་སེམས་ནི་འབྱུང་བར་འགྱུར། །ལྟེ་བའི་རྩ་བར་སྲོག་རླུང་ནི། །སྐད་ཅིག་ཙམ་ཡང་མི་བྱེད་ན། །གང་ཞིག་པདྨ་ཁས་སྦུབ་འདི། །སྐད་ཅིག་གིས་ནི་གྱེན་དུ་འགྱུར། །དེ་ཡི་ལྟེ་བའི་དབུས་སུ་ནི། །སེམས་ནི་བརྟན་པར་འགྱུར་བའོ། །དེ་ཚེ་ཐུར་དུ་འགྲོ་མི་འགྱུར། །ཇི་ལྟར་མ་རྡོལ་སྣོད་དུ་ནི། །ཆུ་ནི་འཛག་པ་མེད་པར་གནས། །དེ་བཞིན་ངེས་པར་སེམས་འགྱུར་རོ། །དེ་ནི་སྐད་ཅིག་སྒོམ་བྱེད་དོ། །སངས་རྒྱས་ཉིད་འགྱུར་ཐེ་ཚོམ་མེད། །དཔལ་ཕྱག་རྒྱ་ཆེན་པོའི་ཐིག་ལེ་ལས་བྱང་ཆུབ་ཀྱི་སེམས་བརྟན་པར་བྱེད་པ་དང་། བསམ་གཏན་བརྟན་པ་ཞེས་བྱ་བའི་ལེའུ་སྟེ་བཅྭ་བརྒྱད་པའོ།། །།དབང་བསྐུར་ཡེ་ཤེས་མཚན་ཉིད་ནི། །བཅོམ་ལྡན་དེ་ཉིད་དོན་ནི་གསུངས། །བཅོམ་ལྡན་འདས་ཀྱིས་བཀའ་སྩལ་པ། །དབང་བསྐུར་བ་ཡི་ཡེ་ཤེས་དོན། །ཉོན་ཅིག་ཡང་དག་བདག་གིས་བཤད། །གཟུགས་བཟང་བཅུ་དྲུག་ལོན་པ་དང་། །སིཧླ་ག་བུར་ཡོད་པ་ཡི། །ཕྱག་རྒྱ་གཅེར་བུར་བྱས་ནས་ནི། །ལེགས་དགྱེས་ཀྱིས་ནི་མཆོད་པར་བྱ། །པདྨ་ཁ་སྦྱར་སྦྱོར་བྱ་ཡིས། །ཡང་དང་ཡང་དུ་

[Full Size]

འདོད་པ་བྱ། །རིམ་པ་ཡིས་ནི་བསྐྱོད་པར་བྱ། །ཁུ་བ་ཇི་ལྟར་འབྱུང་འགྱུར་བ། །ཐམས་ཅད་འབྱུང་བར་གྱུར་པ་ན། །པདྨའི་ནང་དུ་སྤང་བར་བྱ། །ལེགས་དགྱེས་ཀྱི་ནི་དབང་ཕྱུག་མ། །འདི་ནི་སློབ་དཔོན་དབང་གི་རབ། །ཡང་ནི་གསང་བའི་དབང་འདི་ནི། །དད་པས་ཉོན་ཅིག་བདག་གིས་བཤད། །གང་ཚེ་གསང་གནས་ན་སེམས་ཡོད། །དེ་ནི་གསང་བར་རབ་ཏུ་གྲགས། །གསང་བ་པདྨའི་ཁུ་བ་ཡིན། །མདུད་པའི་ནང་དུ་གསང་བའོ། །དེ་ཡི་གནས་སུ་བརྟན་པར་བྱ། །སེམས་ནི་ནམ་མཁའི་པདྨར་མིན། །ཐམས་ཅད་རྒྱུད་ལས་རྙེད་དཀའ་བའི། །ཤེས་རབ་ཡེ་ཤེས་བདག་གིས་བཤད། །ཤེས་རབ་མྱ་ངན་འདས་ཞེས་བཤད། །ཡེ་ཤེས་སྲིད་པ་ཞེས་བྱར་དྲན། །འཁོར་བ་དེ་ནི་མཆོག་དགའ་བ། །མྱ་ངན་འདས་པ་དགའ་བྲལ་དྲན། །ཡང་ན་མྱ་ངན་འདས་གྲགས་པ། །སངས་རྒྱས་རིན་ཆེན་པདྨའི་སྣོད། །བུད་མེད་བྷ་གའི་ཕྱག་རྒྱའོ། །དེ་ནི་ཤེས་རབ་ཅེས་བྱར་དྲན། །ཡེ་ཤེས་སྣོད་ནི་ཡིན་པར་གྲགས། །ཐམས་ཅད་བདེ་བའི་མཆོག་གི་གནས། །ཁུ་བ་ཤེས་རབ་ཅེས་སུ་ཤེས། །ཡེ་ཤེས་བདེ་བ་ཞེས་སུ་དྲན། །དབང་བསྐུར་འོད་དུ་ཞུ་བར་འགྱུར། །ཡེ་ཤེས་དུས་ལས་གཞན་པའོ། །དེ་ནི་འགོག་པ་བཞི་པ་སྟེ། །རང་བཞིན་ཡེ་ཤེས་མཚན་ཉིད་དོ། །འོད་དང་སྟོབས་དང་སྤྲིན་དང་ཚུལ། །དབུགས་དང་ཨུཏྤལ་ས་དང་ཡིད། །སྙིང་པོ་ཟླ་ཉི་མུན་པ་དང་། །མཆོག་དང་སྒྲ་དང་རོ་དང་གློག། དེ་ནི་བཅུ་དྲུག་ཤེས་པར་བྱ། །བདེ་བའི་ཐིག་ལེ་དྲི་མེད་དོ། །ཚངས་བུག་ནས་ནི་མགྲིན་གནས་སུ། །དེ་ཙམ་དུ་ནི་ཐིག་ལེ་བཞི། །དེ་ཡི་གནས་སུ་དགའ་བ་བཞི། །རོ་གཉིས་དང་ནི་ལྡན་པའོ། །མགྲིན་པ་ནས་ནི་སྙིང་གར་གནས། །ཡང་ནི་དེ་ཙམ་བཞི་ཡིན་ནོ། །མཆོག་གི་དགའ་བའི་བཞི་ཡིན་ཏེ། །རོ་གཉིས་དང་ནི་ལྡན་པའོ། །སྙིང་གའི་གནས་ནས་རིན་ཆེན་སྐེར། །ཡང་ནི་དེ་ཙམ་བཞི་ཡིན་ནོ། །དགའ་བྲལ་དགའ་བའི་བཞི་ཡིན་ཏེ། །རོ་གཉིས་དང་ནི་ལྡན་པའོ། །རིན་ཆེན་སྐེ་ནས་སྟེང་གི་གནས། །ཡང་ནི་དེ་ཙམ་བཞི་ཡིན་ནོ། །ལྷན་ཅིག་སྐྱེས་དགའ་བཞི་ཡིན་ཏེ། །རོ་གཉིས་དང་ནི་ལྡན་པའོ། །དགའ་བ་བཅུ་དྲུག་ཐིག་ལེ་སྟེ། །ཟླ་བའི་ཆ་རུ་རབ་ཏུ་དྲན། །ཨཱ་ལི་ཐིག་ལེར་ཤེས་པར་

[Full Size]

བྱ། །འཁོར་ལོ་བཞི་ཡི་རིམ་པས་སོ། །ཚངས་པ་ཡི་ནི་ཞལ་དང་བྲལ། །རོ་དང་བཅས་པ་བདག་གི་ཞལ། །བཅུ་གཉིས་དེ་ནི་ཉི་ཞེས་ཤེས། །ཀཱ་ལི་ཐིག་ལེར་རབ་ཏུ་གྲགས། །བཅུ་གཉིས་ཕྱེད་ནི་བདེ་ཐིག་ལེ། །དགའ་དང་མཆོག་གི་དགའ་བར་དྲན། །དགའ་བྲལ་དགའ་བའི་ཐིག་ལེ་གསུམ། །རང་བཞིན་གསུམ་དང་བྲལ་བའོ། །ཡང་ནི་ཐམས་ཅད་བདག་ཉིད་ཉིད། །བཞི་པོའི་དོན་ནི་བདག་གིས་བཤད། །གནས་བཞི་ལ་ནི་དབང་བཞི་སྟེ། །ལེགས་དགྱེས་དབང་མོར་ཤེས་པར་བྱ། །རྒྱུ་དང་འབྲས་བུའི་རིམ་པ་ཡིས། །མདོར་བསྡུས་པ་ནི་བཞི་ཡིན་ཏེ། །སྤྲུལ་དང་ཆོས་དང་ལོངས་སྤྱོད་དང་། །བདེ་བ་ཆེན་པོ་བཞི་པའོ། །དེ་དག་སྐུ་ནི་བཞི་ཡིན་ཏེ། །དོན་དམ་པར་ནི་ཤེས་བྱའོ། །སུམ་ཅུ་གཉིས་ཕྱེད་རྩ་ནང་དུ། །ཨཱ་ལི་ཐིག་ལེ་བཅུ་དྲུག་གོ། །གཞན་ཕྱེད་ཀཱ་ལི་ཐིག་ལེ་སྟེ། །རྟག་ཏུ་ལམ་ནས་འབབ་པའོ། །ཨཱ་ལི་ཡེ་ཤེས་སེམས་སུ་འགྱུར། །ཀཱ་ལི་ཡེ་ཤེས་སེམས་ལས་འབྱུང་། །བདེ་བ་ཆེན་པོ་གཅིག་པུ་སྟེ། །ཀུན་རྫོབ་གཉིས་སུ་འབྱེད་པར་འགྱུར། །ཤེས་རབ་རང་བཞིན་ཟླ་བ་སྟེ། །ཐབས་ནི་ཉི་མའི་རང་བཞིན་ནོ། །ཟླ་རྒྱུ་ཨཱ་ལི་འབྲས་བུ་སྟེ། །ཨཱ་ལི་རྒྱུ་སྟེ་ཟླ་འབྲས་བུ། །ཉི་མ་རྒྱུ་སྟེ་ཀཱ་ལི་འབྲས། །ཀཱ་ལི་རྒྱུ་སྟེ་ཉི་འབྲས་བུ། །ཉི་མའི་དབུས་ལས་ཟླ་འབྱུང་སྟེ། །ཁུ་བའི་གཟུགས་ནི་བདེ་ཆེན་པོ། །ཀཱ་ལི་བདེ་བའི་གསང་བའི་དབང་། །ཨཱ་ལི་ཤེས་རབ་ཡེ་ཤེས་དབང་། །དེ་གཉིས་དབུས་སུ་བདེ་ཆེན་པོ། །རང་བཞིན་དེ་ལྟར་དྲན་པའོ། །རེག་བྱ་འཁྱུད་པ་ལ་སོགས་པས། །སློབ་དཔོན་གྱིས་ནི་དབང་བསྐུར་རོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་དབང་གི་ཡེ་ཤེས་དང་། ཨཱ་ལི་ཀཱ་ལིའི་རྒྱུ་འབྲས་དང་། ཟླ་བ་འབྱུང་བ་དང་། རྩ་དང་། ཐིག་ལེ་དང་། དགའ་བ་བསྟན་པ་ཞེས་བྱ་བའི་ལེའུ་སྟེ་བཅུ་དགུ་པའོ།། །།རྣལ་འབྱོར་དབང་ཕྱུག་སྤྱོད་པ་ནི། །ཡང་ནི་བཅོམ་ལྡན་བཀའ་སྩོལ་ཅིག། བཅོམ་ལྡན་འདས་ཀྱིས་བཀའ་སྩལ་པ། །རྣལ་འབྱོར་དབང་ཕྱུག་སྤྱོད་པ་ནི། །སྐལ་བ་ལྡན་མ་ཁྱོད་ཉོན་ཅིག། ཟླ་བ་གཅིག་ཏུ་གསང་བ་སྤྱོད། །ཡུལ་གྱི་མཐའ་འམ་ཡང་ན་ཚལ། །ཐམས་ཅད་དོན་འགྲུབ་འགྱུར་བ་ཡིས། །སྔགས་འདི་རྟག་ཏུ་བཟླས་པར་བྱ། །ཧཱ་སྭཱ་ཀ་རོ་རོ་ར་ཏ་ཏྃ་པ་དེ་

[Full Size]

རོ་དྷ་ན་ལ་མ་ཏྟ་ཙི་ཀོ་ར་དྷ་ཏ་མྲེ་དེ་ནས་མཁའ་ལ་རྣལ་འབྱོར་མ། །འདུས་ནས་བཀའ་སྩལ་སྦྱིན་པར་བྱ། །བུ་ཀྱེ་བུ་མོ་འདི་ཁྱོད་ཁྱེར། །སྤྱོད་པ་རབ་ནི་ཁྱོད་ཀྱིས་གྱིས། །བུ་མོ་བཅུ་དྲུག་ལོན་པ་དང་། །སིཧླ་ག་བུར་ཡོད་པ་དང་། །ཨུཏྤལ་སྔོན་པོའི་མདོག་འདྲ་བ། །ཙནྡན་སར་པའི་དྲི་ཡོད་ཅིང་། །སྒེག་པ་ཡི་ནི་རྒྱན་དང་ལྡན། །ལས་རྣམས་ཀུན་ལ་མཁས་པའོ། །འབད་དེ་གསང་བའི་གཟུགས་སུ་ནི། །དེ་དང་ལྷན་ཅིག་བདེ་བར་སོང་། །དོན་ཟིན་ནས་ནི་སོ་སོར་ནི། །སྣ་ཚོགས་ཀྱི་ནི་གཟུགས་ཉིད་ཀྱིས། །ལ་ལར་འདོད་ཆགས་སྤྱོད་པ་དང་། །ལ་ལར་འདོད་ཆགས་བྲལ་བའི་ཡིད། །ལ་ལར་ཞི་བའི་གཟུགས་དང་ནི། །ལ་ལར་ང་རྒྱལ་ལྡན་པའི་ཡིད། །ལ་ལར་ན་བས་ཟོས་པ་དང་། །ལ་ལར་བདེ་བའི་ལུས་ནི་རབ། །ལ་ལར་སློངས་མོ་བྱེད་པ་དང་། །ལ་ལར་རྒྱལ་པོ་ཆེན་པོ་རྒྱལ། །ལ་ལར་གཅེར་བུ་དྲི་མ་ཅན། །ལ་ལར་དག་པ་གཙང་སྦྲ་ཅན། །ལ་ལར་ཅུང་ཟད་ཙམ་གྱིས་འགྲངས། །ལ་ལར་མང་པོས་འགྲངས་པར་བྱེད། །ལ་ལར་ངོ་ཚར་བྱེད་པ་དང་། །ལ་ལར་ངོ་ཚ་མེད་པའི་ཡིད། །ལ་ལར་ལྐུགས་པར་འདུག་པ་དང་། །ལ་ལར་སྒྲ་ཆེན་སྒྲོགས་པ་དང་། །ལ་ལར་དྲི་ཆེན་ཟ་བ་དང་། །ལ་ལར་འོ་མ་འཐུང་བར་བྱེད། །ལ་ལར་སྡིག་པ་བྱེད་པ་དང་། །ལ་ལར་བསོད་ནམས་ཆེན་པོར་བྱེད། །ལ་ལར་ངུ་བར་བྱེད་པ་དང་། །ལ་ལར་དགོད་ལ་གཅིག་ཏུ་དགའ། །ལ་ལར་ཆོ་ལོང་རྩེ་བ་དང་། །ལ་ལར་གར་ནི་གཅིག་པུ་བྱེད། །ལ་ལར་ཆང་གིས་ར་རོ་དང་། །ལ་ལར་བྲམ་ཟེའི་སྤྱོད་པ་དང་། །ལ་ལར་ཐོད་པའི་སྤྱོད་པ་དང་། །ལ་ལར་གཏུམ་པའི་བྲན་བྱེད་དང་། །ལ་ལར་ཆོས་ནི་སྟོན་པ་དང་། །ལ་ལར་ཆོས་ནི་ཉན་པ་དང་། །ལ་ལར་སྒྱུ་མ་བྱེད་པ་དང་། །ལ་ལར་སྒྱུ་མ་བྲལ་བ་དང་། །ལ་ལར་བརྫུན་ནི་སྨྲ་བ་དང་། །ལ་ལར་བྱིས་པའི་གཟུགས་ནི་སྟོན། །ལ་ལར་རྒན་པོ་ལོ་མང་དང་། །ལ་ལར་སྨད་འཚོང་མ་ཡི་གཟུགས། །ལ་ལར་འདོད་པ་མཆོག་སྤྱོད་དང་། །ལ་ལར་སེར་སྣ་ཡིས་ནི་འགུགས། །ལ་ལར་སེར་སྣ་དང་བྲལ་ཡིད། །ལ་ལར་བྱོལ་སོང་ཡན་ལག་ཉིད། །ལ་ལར་རྣམ་ཤེས་མེད་པ་དང་། །ལ་

[Full Size]

ལར་བརྗོད་དུ་མེད་པ་དང་། །ལ་ལར་ཡང་དག་གཟུགས་ཅན་སྟོན། །དེ་ལྟར་རྣལ་འབྱོར་དབང་ཕྱུག་ནི། །རང་དབང་གིས་ནི་ཀུན་ཏུ་སྤྱོད། །དཔལ་ཕྱག་རྒྱ་ཆེན་པོའི་ཐིག་ལེ་ལས། རྣལ་འབྱོར་གྱི་དབང་ཕྱུག་ཆེན་པོའི་སྤྱོད་པ་ཞེས་བྱ་བའི་ལེའུ་སྟེ་ཉི་ཤུ་པའོ།། །།བཅོམ་ལྡན་ཡེ་ཤེས་རྒྱ་མཚོ་ཁྱེད། །བདག་ལ་ཐེ་ཚོམ་སྐྱེས་པ་མཆིས། །སྔར་གསུངས་པ་ཡི་འཁོར་ལོ་དྲུག། དེ་ཡི་ས་བོན་ཇི་ལྟ་བུ། །གང་གི་སྔགས་ཀྱིས་བདུད་རྩི་ལྔའི། །བཟའ་བ་དང་ནི་སྤྱོད་པའོ། །ཁྱོད་དང་བདག་གི་སྙིང་པོ་ནི། །ཇི་ལྟར་དེ་ནི་ངེས་པར་ཡོད། །སེམས་ཅན་རྣམས་ནི་བསྲུང་དོན་དུ། །འདུས་པའི་གནས་ཀྱི་དབུས་སུ་ནི། །ཚོགས་ཀྱི་འཁོར་ལོ་ཇི་ལྟ་བུ། །བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་ལྷ་མོ་སྤྱན་བཟངས་མོ། །འཁོར་ལོ་དྲུག་གི་ས་བོན་ནི། །ཡུཾ་ཐྱཱ་པྱཱ་ཕྱཱ་མྱཱ་ཎྜཱྀ་ནི་། །དབུས་སུ་རེ་རེ་དགོད་པར་བྱ། །ཁྃ་རྃ་ཤྃ་བྃ་སྃ་མྃ་པྃ་ནི། །རླུང་གི་འཁོར་ལོའི་ས་བོན་དྲུག། ཝྱཱ་ཀླིཾ་ཡྱཱ་མེ་འཁོར་ལོ། །མཁས་པས་གྲུ་གསུམ་དགོད་པར་བྱ། །ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས། སྤྲུལ་པའི་འཁོར་ལོའི་འདབ་མ་ལ། །གཉིས་སུ་བྱས་པའི་ས་བོན་གདབ། །ཏྲཱྃ་ཧྲཱིཾ་ཨཱྃ་ཁྃ་དང་། ལཱྃ་མཱྃ་པཱྃ་། ཆོས་ཀྱི་འཁོར་ལོའི་ས་བོན་བརྒྱད། །ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨྃ་ཨཿལོངས་སྤྱོད་འཁོར་ལོ་བརྒྱད་གཉིས་འདི། །གཡོན་སྐོར་དུ་ནི་བྲི་བར་བྱ། །དེ་ནི་གཉིས་སུ་བྱས་པ་ནི། །བདེ་ཆེན་འཁོར་ལོའི་ས་བོན་ནོ། །མཉམ་པ་ཡི་ནི་ས་ཡི་ཆ། །ཆང་ལ་སོགས་པས་བྱུག་པ་བྱ། །ཙནྡན་དང་ནི་གུར་གུམ་མཆོག། སྣ་ཚོགས་མཆོག་གི་མེ་ཏོག་དང་། །སྣ་ཚོགས་མཆོད་པ་ལ་སོགས་ཀྱིས། །མཁས་པས་ས་ལ་མཆོད་པར་བྱ། །བུ་མོ་ཡིད་འཕྲོག་ལྷ་ཡི་གཟུགས། །ཉི་ཤུ་ལོན་པ་གཡོ་བ་མེད། །གནས་ནི་གང་དུ་སྔགས་རྒྱལ་བཏུ། །རེ་ཞིག་དང་པོ་དེ་རུ་གཞུག། མཆོག་གི་དགའ་བའི་སྦྱོར་བ་ཡིས། །རྩེ་གཅིག་གིས་ནི་བསྙེན་པར་བྱ། །བསྙེན་པའི་ལས་ནི་རྫོགས་པ་དང་། །དེ་ནས་ས་ལ་བསང་གཏོར་

[Full Size]

བྱ། །སློབ་མ་དེ་ཡི་ཐིག་ལེ་བྱ། །བུ་མོ་ལ་ཡང་དེ་ལྟར་རོ། །ཤ་ཆེན་ལ་སོགས་ཀྱིས་གང་བའི། །གཏོར་མ་ཕྱོགས་བཞིར་གཏང་བར་བྱ། །ཚོགས་ལ་འབད་དེ་མཆོད་པ་བྱ། །མེད་ན་ཡང་ནི་འབད་པས་སོ། །སྔགས་བཏུ་བ་ཡི་དུས་སུ་ནི། །འབད་དེ་བླ་མ་མཆོད་པར་བྱ། །བླ་མ་དགྱེས་ན་སྔགས་རྒྱལ་ནི། །ཐེ་ཚོམ་མེད་པར་ཐོབ་པར་འགྱུར། །དེ་ལྟར་མིན་ན་སྐྱོན་ཡོད་དེ། །སྔགས་ཀྱང་ཐོབ་པར་མི་འགྱུར་རོ། །རྡོ་རྗེ་ཕྲེང་བས་བསྐོར་བ་ཡིས། །འདབ་མ་བརྒྱད་པའི་པདྨ་བྲི། །དབུས་སུ་ཀྵ་ཡི་ས་བོན་ནི། །རྡོ་རྗེ་སེམས་དཔའི་རང་བཞིན་ཅན། །ཨཱ་ལི་ཀཱ་ལི་མཉམ་སྦྱར་ནས། །ཐུབ་པ་བདུན་ནི་བཏུ་བར་བྱ། །དང་པོར་རྣམ་པར་སྣང་མཛད་བྲི། །ལྔ་པ་ཡི་ནི་ལྔ་པ་དང་། །ཨུཥྨ་ཡི་ནི་བཞི་པ་དང་། །བཅུ་དྲུག་པ་ཡི་གཉིས་པར་ལྡན། །དང་པོ་ཡི་ནི་དང་པོ་དང་། །མེ་ཡིས་འོག་ཏུ་བརྒྱན་པའོ། །དབྱངས་ཡིག་བཅུ་གསུམ་པ་དང་ལྡན། །གཏི་མུག་ཐམས་ཅད་མཚོན་ཆའོ། །བཞི་པ་ཡི་ནི་བཞི་པ་དང་། །དབྱངས་ཡིག་བཅུ་གཅིག་པ་དང་ལྡན། །ཨུཥྨ་ཤ་ཡི་དང་པོ་དང་། །ཨནྟསྠ་ཡི་བཞི་པར་ལྡན། །དེ་ནས་མེ་ཡི་ས་བོན་དང་། །གཉིས་པ་ཡི་ནི་གསུམ་པ་དང་། །ཨནྟསྠ་ཡི་དང་པོ་དང་། །ཨནྟསྠ་ཡི་བཞི་པ་དང་། །དབྱངས་ཡིག་གསུམ་པ་དང་ལྡན་པ། །ཐམས་ཅད་ཀྱི་ནི་སྙིང་པོ་བཅོམ། །གཉིས་པ་ཡི་ནི་གསུམ་པ་དང་། །དེ་ནས་བརྒྱད་པའི་དང་པོ་དང་། །དབྱངས་ཡིག་གཉིས་པ་དང་ལྡན་པ། །ཡི་གེ་མཆོག་ཉིད་གནས་ཡིན་ནོ། །གསུམ་པ་ཡི་ནི་དང་པོ་དང་། །དེ་ཉིད་ཀྱི་ནི་འོག་ཏུ་བརྒྱན། །ཡང་ན་དེ་ཉིད་བྲི་བར་བྱ། །ཨུཥྨ་ཡི་ནི་བཞི་པ་དང་། །དབྱངས་ཡིག་གཉིས་པ་དང་ལྡན་པ། །རྡོ་རྗེ་སེམས་དཔའི་རང་བཞིན་ཅན། །ཨུཥྨ་ཡི་ནི་གསུམ་པ་དང་། །ལྔ་པ་ཡི་ནི་ལྔ་པ་དང་། །ཨུཥྨ་ཡི་ནི་བཞི་པ་དང་། །དབྱངས་ཡིག་གཉིས་པས་བརྒྱན་པའོ། །དང་པོ་ཡི་ནི་དང་པོ་དང་། །ཨནྟསྠ་ཡི་གསུམ་པ་དང་། །ལྔ་པ་ཡི་ནི་དང་པོ་དང་། །དབྱངས་ནི་གཉིས་པས་བརྒྱན་པའོ། །དང་པོ་ཡི་ནི་གསུམ་པ་དང་། །ཉི་ཤུ་པ་ཡིས་བརྒྱན་པའོ། །དབྱངས་ཡིག་གསུམ་པ་དང་ལྡན་པ། །ཁྲོ་བོ་ཡི་ནི་

[Full Size]

གཟུགས་ཆེན་ཆེ། །ཨུཥྨ་ཡི་ནི་གསུམ་པ་དང་། །བཞི་པ་ཡི་ནི་ལྔ་པ་དང་། །དེ་ཉིད་འོག་ཏུ་ལྡན་པར་བྱ། །དབྱངས་ཡིག་གསུམ་པས་བརྒྱན་པ་སྟེ། །ལྷ་རྣམས་ཀུན་གྱི་བྱེད་པའོ། །ལྔ་པ་ཡི་ནི་བཞི་པ་དང་། །དབྱངས་ཡིག་གཉིས་པས་བརྒྱན་པའོ། །བརྒྱད་པ་ཡི་ནི་དང་པོ་དང་། །ཐམས་ཅད་ཀུན་གྱི་ཕ་ཡིན་ནོ། །ཨུཥྨ་ཡི་ནི་བཞི་པ་དང་། །དབྱངས་ཡིག་དྲུག་པས་བརྒྱན་པ་ནི། །ཟླ་ཚེས་ཐིག་ལེ་དང་ལྡན་པ། །སེམས་ཀྱི་དབང་ཕྱུག་ཡི་གེ་མཆོག། དེ་ཉིད་ཡང་ནི་བྲི་བར་བྱ། །དེ་ནས་ལྔ་པའི་གཉིས་པ་དང་། །གསུམ་པ་ཡི་ནི་དང་པོ་དང་། །ཨུཥྨ་ཡི་ནི་གསུམ་པ་དང་། །ཨནྟསྠ་ཡི་བཞི་པར་ལྡན། །དབྱངས་ཡིག་གཉིས་པས་བརྒྱན་པའོ། །ཡ་ཡི་སྡེ་ཚན་བརྒྱད་པ་དང་། །དབྱངས་ཡིག་གཉིས་པ་དང་ལྡན་པ། །ཐམས་ཅད་དོན་གྲུབ་མཆོག་ཡིན་ཏེ། །བདག་གི་སྙིང་པོའི་སྔགས་རྒྱལ་ལོ། །དབང་པོ་གཟུགས་ཀྱི་བདག་པོ་དང་། །ཨནྟསྠ་ཡི་བཞི་པ་དང་། །གཉིས་པ་ཡི་ནི་གསུམ་པ་དང་། །མེ་ཡིས་འོག་ཏུ་བརྒྱན་པའོ། །བཞི་པ་ཡི་ནི་དང་པོ་དང་། །དབྱངས་ཡིག་བཅུ་གཅིག་དང་ལྡན་པ། །གཉིས་པ་ཡི་ནི་གསུམ་པ་དང་། །དབྱངས་ཡིག་བཅུ་གསུམ་པས་བརྒྱན་པ། །དང་པོ་ཡི་ནི་གསུམ་པ་དང་། །མེ་ཡིས་འོག་ཏུ་བརྒྱན་ལྡན་པ། །ཨུཥྨ་ཡི་ནི་བཞི་པ་དང་། །རི་ཡིག་འོག་ཏུ་བརྒྱན་པ་ནི། །དབྱངས་ཡིག་བཞི་པ་དང་ལྡན་པ། །སེམས་ཅན་ཐམས་ཅད་དབང་དུ་བྱེད། །ཡང་ན་དེ་ཉིད་བྲི་བར་བྱ། །དེ་བཞིན་ལྔ་པའི་གཉིས་པ་དང་། །གསུམ་པ་ཡི་ནི་དང་པོ་དང་། །ཉེ་བའི་སྙིང་པོ་མཆོག་གི་སྔགས། །དང་པོར་རྣམ་པར་སྣང་མཛད་དང་། །དེ་ནས་ཨུཥྨའི་གསུམ་པ་དང་། །དབྱངས་ཡིག་ལྔ་པ་དང་ལྡན་པ། །ལྷ་རྣམས་ཀྱི་སེམས་གཏི་མུག་བྱེད། །དེ་ནས་མེ་ཡི་ས་བོན་དང་། །དེ་ནས་བཞི་པའི་དང་པོ་དང་། །ཨུཥྨ་ཡི་ནི་གསུམ་པ་དང་། །དེ་ནས་ཉི་ཤུ་རྩ་ལྔ་པ། །དེ་ནས་རླུང་གི་ས་བོན་བྲི། །དབྱངས་ཡིག་བཅུ་གཅིག་པ་དང་ལྡན། །གཞན་གྱི་ཕྱག་རྒྱ་རབ་ཏུ་འཇོམས། །ཨུཥྨ་ཡི་ནི་དང་པོ་དང་། །ཨནྟསྠ་ཡི་བཞི་པར་ལྡན། །དེ་ནས་ཉི་མའི་ས་བོན་དང་། །དབྱངས་ཡིག་གསུམ་

[Full Size]

པས་བརྒྱན་པའོ། །ཨུཥྨ་ཡི་ནི་བཞི་པ་དང་། །དབྱངས་ཡིག་དྲུག་པ་དང་ལྡན་པ། །ཟླ་ཚེས་ཐིག་ལེས་བརྒྱན་པའོ། །ཡང་ན་དེ་ཉིད་བྲིས་པ་ནི། །གཞན་གྱི་སྔགས་ནི་འཇོམས་པའོ། །ལྔ་པ་ཡི་ནི་གཉིས་པ་དང་། །དེ་ནས་གསུམ་པའི་དང་པོ་དང་། །ཨུཥྨ་ཡི་ནི་གསུམ་པ་དང་། །ཨནྟསྠ་ཡི་བཞི་པར་ལྡན། །དབྱངས་ཡིག་གཉིས་པར་ལྡན་པ་ནི། །སྡུག་བསྔལ་ཐམས་ཅད་མེད་བྱེད་པ། །ཡ་ཡི་སྡེ་ཚན་བརྒྱད་པ་དང་། །དབྱངས་ཡིག་གཉིས་པ་དང་ལྡན་པའོ། །དངོས་གྲུབ་ཐམས་ཅད་འགྲུབ་པ་སྟེ། །ཁྱོད་ཀྱི་སྙིང་པོའི་སྔགས་རྒྱལ་ལོ། །དང་པོ་ལྷ་ཡི་བདག་པོ་དང་། །དེ་ནས་དང་པོའི་དང་པོ་དང་། །འོག་ཏུ་ས་ཡིག་དང་ལྡན་པ། །དབྱངས་ཡིག་གི་ནི་བཞི་པས་བརྒྱན། །ཟླ་ཚེས་ཐིག་ལེ་ཡིས་ནི་བརྒྱན། །ཐམས་ཅད་ཀུན་གྱི་བྱེད་པ་པོ། །ཨནྟསྠ་ཡི་བཞི་པ་དང་། །ས་ཡི་འོག་ཏུ་ལྡན་པ་དང་། །དབྱངས་ཡིག་གི་ནི་བཞི་པ་ལྡན། །ཟླ་ཚེས་ཐིག་ལེ་ཡིས་ནི་བརྒྱན། །གཉིས་པ་ཡི་ནི་གསུམ་པ་དང་། །ས་ཡི་ཡི་གེ་འོག་ཏུ་ལྡན། །དབྱངས་ཡིག་བཞི་པ་དང་ལྡན་པ། །ཟླ་ཚེས་ཐིག་ལེས་བརྒྱན་པའོ། །ལྔ་པ་ཡི་ནི་གཉིས་པ་དང་། །གསུམ་པ་ཡི་ནི་དང་པོ་དང་། །སྭཱ་ཧཱ་ཐ་མར་ལྡན་པ་ནི། །ཁྱོད་ཀྱི་ཉེ་བའི་སྙིང་པོའོ། །དེ་ནི་སྔགས་ཀྱི་གསང་ཆེན་པོ། །སུ་ལ་ཡང་ནི་མི་སྦྱིན་ཏེ། །ལྷ་མོ་དེ་བཞིན་མན་ངག་འདི། །སུ་ལ་ཡང་ནི་མི་སྦྱིན་ནོ། །བྱེ་བ་འབུམ་གྱི་ནང་ནས་གཅིག། དེ་ནི་མན་ངག་གི་ནི་སྣོད། །སྔགས་སམ་ཡང་ན་མན་ངག་འདི། །བརྟག་པར་བྱས་ཏེ་དེ་ནས་སྦྱིན། །བསྐལ་པ་བྱེ་བ་བརྒྱ་ཡིས་ཀྱང་། །དེ་ལྟར་མིན་ན་འགྲུབ་པ་མེད། །བླ་མའི་ཁ་ལས་མན་ངག་འདི། །ལེགས་དགྱེས་དབང་མོ་རྙེད་པར་འགྱུར། །བསྟན་བཅོས་ལུང་ལས་ཡང་དག་ནི། །ནམ་ཡང་རྙེད་པར་མི་འགྱུར་རོ། །མན་ངག་དོན་དུ་བླ་མ་མཆོག། ཡང་དང་ཡང་དུ་ཞུ་མི་བྱ། །བླ་མ་མཉེས་ན་ཡང་དག་ཉིད། །མན་ངག་དེ་ལ་སྦྱིན་པར་བྱེད། །ཇི་ལྟར་བུ་མོ་ལང་ཚོ་བབ། །ཕ་ལ་ཞུ་བར་མི་བྱེད་ན། །ཕ་རང་ཉིད་ཀྱིས་ཤེས་ནས་ནི། །ད་ནི་བུ་མོ་སྦྱིན་དུས་སྙམ། །

[Full Size]

ཏྲཱྃ་ཧྲཱྀཿཁྃ་གི་སྔགས་རྒྱལ་གྱིས། །བདུད་རྩི་ལྔ་ནི་སྤྱད་པར་བྱ། །ས་ཆུ་མེ་རླུང་རྣམས་ཀྱི་ནི། །ས་བོན་གྱིས་ནི་བཟའ་བར་བྱ། །དཔལ་ཕྱག་རྒྱ་ཆེན་པོའི་ཐིག་ལེ་ལས་འཁོར་ལོ་དྲུག་གི་ས་བོན་དང་། སྔགས་བཏུ་བ་དང་། བདུད་རྩི་ལྔ་བཟའ་བ་དང་། སྤྱད་པ་ཞེས་བྱ་བའི་ལེའུ་སྟེ་ཉི་ཤུ་རྩ་གཅིག་པའོ།། །།འབྱུང་པོ་རྣམས་ནི་བསྲུང་དོན་དུ། །ཉོན་ཅིག་གཏོར་མ་བདག་གིས་བཤད། །དུར་ཁྲོད་ཡང་ན་ཆུ་ངོགས་སམ། །ཡུལ་གྱི་མཐའ་འམ་ཡང་ན་ནི། །ཤིང་གཅིག་དང་ནི་ཁང་སྟོང་དུ། །གཏོར་མ་འབད་དེ་སྦྱིན་པར་བྱ། །ཚངས་པ་མ་དང་། དྲག་མོ་དང་། དབང་ཕྱུག་ཆེན་མོ་དང་། ཁྱབ་འཇུག་མ་དང་། ཕག་མོ་དང་། མིའི་སེང་གེ་མོ་དང་། བརྒྱ་བྱིན་མོ་དང་། མེ་མོ་དང་། ཆུ་ལྷ་མོ་དང་། རླུང་ལྷ་མོ་དང་། གཞོན་ནུ་མོ་དང་། གནོད་སྦྱིན་མོ་དང་། མཁའ་ལྡིང་མོ་དང་། སྤྲུལ་མོ་དང་། གླང་ཆེན་མོ་དང་། གཤིན་རྗེ་མོ་དང་། ནོར་སྦྱིན་མོ་དང་། ཉི་མ་མོ་དང་། གཏུམ་མོ་དང་། དེ་ལྟ་བུའི་རྣལ་འབྱོར་མ་འཁོར་དང་བཅས་པ་ཐམས་ཅད་རྣལ་འབྱོར་པས་འདིར་ཕྱག་རྒྱ་འདིས་དགུག་པར་བྱའོ། །རྡོ་རྗེ་ཁུ་ཚུར་གཉིས་བྱས་ཏེ། །རྒྱབ་དང་རྒྱབ་ཏུ་བསྣོལ་བར་བྱ། །མཐེའུ་ཆུང་ལུ་གུ་རྒྱུད་དུ་སྦྲེལ། །མཛུབ་མོ་དྲང་པོར་བསྒྲེང་བྱས་ཏེ། །གཡས་དང་གཡོན་གྱི་ཕྱག་གཉིས་ནི། །ཅུང་ཟད་ཙམ་ནི་དགུག་པར་བྱ། །རྣལ་འབྱོར་མ་ཐམས་ཅད་དང་། མཁའ་འགྲོ་མ་ཐམས་ཅད་དང་། འབྱུང་པོ་དང་། ཡི་དགས་དང་། ཤ་ཟ་དང་། དྲག་པོ་ཆེན་པོ་དང་། བརྗེད་བྱེད་རྣམས་ཚུར་ཤོག་ཚུར་ཤོག། ཉ་དང་། ཤ་དང་། ཁྲག་ཆེན་པོ་དང་། བཟའ་བ་སྣ་ཚོགས་དང་ལྡན་པ། མེ་ཏོག་དང་། སྤོས་དང་། མར་མེ་དང་། དྲི་དང་། བདུད་རྩི་ལྔ་དང་། ཆང་དང་། རྒྱལ་མཚན་དང་། བ་དན་ལ་སོགས་པ་དང་། གདུགས་དང་། རྔུལ་ཡབ་ཀྱིས་བརྒྱན་པའི་གཏོར་མ་འདི་སྣོམས་ཤིག། དམ་ཚིག་འདི་སྲུངས་ཤིག། བདག་གི་དོན་ཐམས་ཅད་ཀྱི་གྲོགས་གྱིས་ཤིག། རྒྱུད་འདི་ལ་གང་ཞིག་དད་པ་ཡོད་པ་དེ་རྣམས་བསྲུང་བའི་དོན་དུ་གསོལ་ཅིག། འཐུང་ཤིག། རོལ་ཅིག། ཧཱུྃ་ཧཱུྃ་ཕཊ་ཕཊ་སྭཱ་ཧཱ། བྷ་གའི་ཕྱག་རྒྱ་མགོ་སྟེང་བཅའ། །ཕྱག་རྒྱ་འདི་ཡིས་གཏོར་

[Full Size]

མ་སྦྱིན། །རྐང་པ་མནན་ཅིང་སྟེང་དུ་བལྟ། །ཧ་ཧའི་སྒྲ་ནི་སྒྲོགས་བྱེད་ཅིང་། །རུས་པའི་རྒྱན་དང་ལྡན་པ་ཡི། །ཧེ་རུ་ཀར་ནི་བདག་ཉིད་བསམ། །བརྒྱ་བྱིན་འདྲ་བའི་ལྷ་མ་ཡིན། །མདུན་དུ་བྱུང་བར་གྱུར་ན་ཡང་། །དེ་ལ་འཇིགས་པར་མི་བྱ་སྟེ། །གཞན་རྣམས་སྨོས་ཀྱང་ཅི་ཞིག་དགོས། །དཔལ་ཕྱག་རྒྱ་ཆེན་པོའི་ཐིག་ལེ་ལས་གཏོར་མའི་ལས་ཞེས་བྱ་བའི་ལེའུ་སྟེ་ཉི་ཤུ་རྩ་གཉིས་པའོ།། །།ཚོགས་ཀྱི་འཁོར་ལོའི་ཆོ་ག་ནི། །ཉོན་ཅིག་ལྷ་མོ་སྤྱན་བཟངས་མོ། །གསང་བ་མཆོག་གི་དགྱེས་པ་ཡི། །དེ་རུ་འཁོར་ལོ་རབ་ཏུ་བསྐོར། །ཐམས་ཅད་དམ་ཚིག་གཅིག་པ་དང་། །ཐམས་ཅད་རྟོག་པ་མེད་པ་དང་། །སེར་སྣ་ང་རྒྱལ་སྤངས་པ་དང་། །འདོད་ཆགས་ཞེ་སྡང་བྲལ་བ་དང་། །བླ་མ་ལ་གུས་བསམ་གཏན་ལྡན། །ཕྲག་དོག་མེད་ཅིང་རྩེ་གཅིག་པ། །དེ་ལྟར་དགྱེས་པ་ཚོགས་འཁོར་ལོ། །མཁས་པས་འབད་དེ་གཞུག་པར་བྱ། །དེ་ལྟར་མིན་ན་སྐྱོན་ཡོད་དེ། །འཁོར་ལོ་ཡང་ནི་འགྲུབ་མི་འགྱུར། །ཐབས་དང་མཉམ་པའི་ཤེས་རབ་མ། །ཉི་ཤུ་རྩ་ལྔ་ཡན་ཆད་སྤངས། །ཐབས་རེ་ཤེས་རབ་རེ་རེར་ལྡན། །ཀུན་ལ་གཅིག་ནི་མི་མཛེས་སོ། །དང་པོ་ཡིད་འཕྲོག་དགྱེས་པ་ཡིས། །མེ་ཏོག་དཀྱིལ་འཁོར་བྲི་བར་བྱ། །དེ་རུ་སྣ་ཚོགས་མཆོད་པ་ནི། །རྩེ་གཅིག་གིས་ནི་ལེགས་པར་བྱ། །བླ་མ་དངོས་པོ་ཐམས་ཅད་ཀྱིས། །དད་པ་ཡིས་ནི་མཆོད་པར་བྱ། །ཚོགས་པ་ལ་ཡང་འབད་དེ་མཆོད། །མཉམ་ཉིད་བལྟ་བ་སེམས་ཀྱིས་སོ། །ཇི་ལྟར་བླ་མས་ཕྱག་རྒྱ་འཛིན། །ཚོགས་ཀྱིས་ཀྱང་ནི་དེ་ལྟར་རོ། །རྩེ་གསུམ་ཡང་ན་རལ་གྲིས་བསད། །ནམ་ཕྱེད་ན་ནི་བླང་བར་བྱ། །སྣ་ཚོགས་མཆོད་པའི་མཆོད་སྦྱིན་གྱིས། །མཆོད་ནས་བླ་མའི་གདན་བྱའོ། །དབུས་སུ་བདག་ཉིད་ཧེ་རུ་ཀར། །ཕྱག་རྒྱ་ཆེན་པོ་དང་ལྡན་པ། །དེ་ནི་བླ་མ་ཞེས་སུ་བསྟན། །ལེགས་དགྱེས་དབང་མོ་བདག་ཉིད་དོ། །ཚོགས་ཀྱི་འཁོར་ལོའི་དབུས་སུ་ནི། །མཆིལ་མ་ལ་སོགས་དོར་མི་བྱ། །གཏམ་ཀྱང་སྨྲ་བར་མི་བྱ་སྟེ། །རྐང་པ་ལ་སོགས་བརྐྱང་མི་བྱ། །ཕྱག་རྒྱའི་བརྡ་དང་གསང་བའི་སྐད། །དེ་ལ་འབད་པས་བྱ་བའོ། །བཀའ་ལུང་མེད་ན་གར་དང་གླུ། །ནམ་

[Full Size]

ཡང་ཚོགས་ཀྱིས་མི་བྱའོ། །དུམ་བུ་གཅིག་པའི་མཚན་ལྡན་སྣོད། །བླ་མའི་མདུན་དུ་གཞག་པར་བྱ། །ཡང་ན་དུམ་བུ་གསུམ་པ་ནི། །ལྷ་ཡི་ཆང་གིས་བཀང་བར་བྱ། །སྣ་ཚོགས་མཆོད་པའི་མཆོད་སྦྱིན་གྱིས། །སྣོད་དེ་ལ་ནི་མཆོད་པར་བྱ། །ཚོགས་ཀྱི་འཁོར་ལོར་སྣོད་གཞན་ནི། །མེ་ཏོག་རྒྱན་གྱིས་བརྒྱན་པའོ། །བཟའ་བ་སྣ་ཚོགས་དང་ལྡན་པའི། །དང་པོར་གཏོར་མ་ཆེན་པོ་ནི། །ཇི་ལྟར་དགའ་བ་མེད་མི་འགྱུར། །ཇེ་མང་ཇེ་མང་བཏུང་བར་བྱ། །ཡང་དང་ཡང་དུ་ཕྱག་བྱ་ཞིང་། །ཕྱག་རྒྱ་བཅིངས་ལ་བཏུང་བར་བྱ། །དེ་ནས་བཟའ་བ་ཐམས་ཅད་ཀུན། །དག་པར་བྱས་ནས་བཟའ་བར་བྱ། །ལྟེ་བའི་རི་བོང་འཛིན་དཀར་དང་། །རྟ་མགྲིན་མཆོག་དང་ལྡན་པ་དང་། །ཧཱུྃ་གིས་རྡོ་རྗེ་དཀར་ལེགས་སྤྱད། །ཨཱཿཡིས་རབ་ཏུ་རྟོགས་བྱས་ཤིང་། །ཨོཾ་ཀྱི་འོད་ཀྱིས་འབར་འགྱུར་བར། །བྱིན་གྱིས་བརླབས་ནས་མངོན་པར་བཟའ། །རང་ལྕེ་པད་འདབ་དབུས་མ་རུ། །ཧཱུྃ་བྱུང་རྡོ་རྗེ་དཀར་པོ་དགོད། །ཕྱི་ནང་བདག་ཉིད་ཐམས་ཅད་ཀུན། །འཁོར་ལོ་དེ་ཡིས་རབ་ཚིམ་བྱ། །འཁོར་ལོ་བཞི་ཡི་དབྱེ་བ་ཡིས། །འཁོར་ལོ་མ་ལུས་ཀུན་སྦྱང་བྱ། །དཔའ་བོའི་ལྕེ་ལ་དཔའ་བོ་ནི། །དཔའ་བོའི་དཔའ་བོ་དབུས་སུའོ། །དཔའ་བོའི་ཁ་ལ་དཔའ་བོ་ནི། །མཆོད་པའི་དུས་སུ་མཆོད་པར་བྱ། །ལྟེ་བ་གཉིས་ཀྱི་དབུས་སུ་ནི། །དཔའ་བོ་ཀུན་གྱི་མཆོག་གི་གནས། །དཔའ་བོ་རྣམས་ཀྱི་མཆོག་གི་དོན། །དཔའ་བོ་དེ་ཀུན་མི་ཤེས་ན། །དེ་ཡིས་ཚོགས་ཀྱི་འཁོར་ལོ་ནི། །ནམ་ཡང་ཐོབ་པར་མི་འགྱུར་རོ། །གང་ཅི་དེ་ལྟའི་རིམ་པ་ཡིས། །ཕྱི་དང་ནང་གི་བྱ་བའོ། །དེ་ལྟར་བྱས་ན་དངོས་གྲུབ་འཐོབ། །མཁའ་འགྲོ་མ་ཡང་ལྷན་ཅིག་འདུས། །གལ་ཏེ་གཞན་མའི་རྣལ་འབྱོར་མ། །བརྟག་པའི་དོན་དུ་འོང་འགྱུར་ན། །དེ་ལ་རེ་ཞིག་ཐེ་ཚོམ་ནི། །མཁས་པས་ནམ་ཡང་མི་བྱའོ། །གཏམ་ནི་སྨྲ་བར་མི་བྱ་སྟེ། །ཕྱག་རྒྱས་བསྙུན་ནི་གསོལ་བར་བྱ། །གང་ཞིག་དེ་རུ་བླ་མ་ཡིས། །གསུང་བ་དང་ནི་མཛད་པའང་དེ། །ཡང་ན་ལས་ཀྱི་རྡོ་རྗེ་ནི། །ཐམས་ཅད་དོན་ཀུན་བྱེད་པའང་རུང་། །ཇི་ལྟར་རྡོ་རྗེ་སེམས་དཔས་རོལ། །ལས་ཀྱི་རྡོ་རྗེས་དེ་ལྟར་རོ། །སྣ་ཚོགས་གཟུགས་ཀྱིས་རྣལ་འབྱོར་མ། །ཡང་དང་ཡང་ནི་འོང་འགྱུར་ན། །དེ་རུ་རེ་ཞིག་འཇིགས་མི་བྱ། །དཔའ་བོ་ཡི་ནི་གཟུགས་སུ་སྤྱོད། །བསྡམས་

[Full Size]

པ་ལ་ལར་བྱེད་པ་ན། །དེ་ལ་ཆད་པ་རབ་རྟོགས་བྱ། །ཡང་དག་དགའ་བ་བྱུང་གྱུར་ན། །ཐར་པའི་རྒྱུ་ཕྱིར་གར་བྱའོ། །འོན་ཀྱང་རྡོ་རྗེ་རྐང་པའི་གར། །ཇི་ལྟར་རྣལ་འབྱོར་མ་མཉེས་འོད། །མ་འམ་སྲིང་མོ་ཆུང་མ་དང་། །སྒྱུག་མོ་དང་ནི་མནའ་མ་ལ། །ཤེས་རབ་ཐབས་ཀྱི་ཆོ་ག་ཡིས། །འབད་དེ་དེ་ལ་མཆོད་པར་བྱ། །དེ་རྣམས་མཆོད་པས་དངོས་གྲུབ་ནི། །གང་ཞིག་སེམས་ལ་བསམས་པ་ཡོད། །ལྷག་མའི་གཏོར་མ་བཟུང་ནས་ནི། །དགོན་པ་ཆེན་པོར་གཏང་བར་བྱ། །གལ་ཏེ་དེ་རུ་རྣལ་འབྱོར་མ། །བལྟ་བ་དེ་ནི་སྟོན་བྱེད་ན། །དེ་རྣམས་མཚན་ཉིད་འདི་ལྟ་བུ། །མཁས་པས་འབད་པས་ཤེས་པར་བྱ། །གང་ཞིག་བཞིན་གྱི་དཀྱིལ་འཁོར་ནི། །ཀུན་དུ་ཟླུམ་པོར་སྣང་འགྱུར་ཞིང་། །ཁ་ནི་སྨ་ར་རྟག་པར་ཡོད། །སྤུ་དང་སྨིན་མ་རིང་བ་དང་། །གོས་བཟང་གཙང་ཞིང་ཞི་བ་དང་། །མི་གཡོ་བདེན་པར་སྨྲ་བ་དང་། །རྟག་ཏུ་དམ་པའི་ཆོས་ལ་དགའ། །དཔའ་བོའི་སྲིང་མོ་དེ་ནི་དྲན། །པདྨའི་ཕྱག་རྒྱ་སྦྱིན་པར་བྱ། །དེ་བཞིན་རུས་སྦལ་ཕྱག་རྒྱའོ། །པགས་པ་བུམ་པ་སྤྱི་བླུགས་ཉིད། །ཕྱག་རྒྱའི་ལན་དུ་ཤེས་པར་བྱ། །དེ་ནི་ཚེས་བཅུའི་རེས་དག་ལ། །ཁྱིམ་དུ་པདྨ་འདྲི་བར་འགྱུར། །ལཱ་མ་ཡི་ནི་བུད་མེད་ཀྱི། །མཚན་ཉིད་གྱུར་པ་འདི་ཉིད་ནི། །མ་མཆུ་འཕྱང་ཞིང་མིག་དཀྱུས་རིང་། །མིག་ནི་དམར་ཞིང་སེར་སྐྱ་གནས། །ཕྱུག་ཅིང་སྐལ་བཟང་ཡོན་ཏན་ཅན། །སེར་ཞིང་ཙམ་པ་ལྟ་བུར་སྣང་། །ཤིན་ཏུ་རིང་མིན་ཐུང་བའང་མིན། །སྣ་ཚོགས་པ་ཡི་གོས་ལ་དགའ། །དཔྲལ་བར་རི་མོ་གསུམ་ཡོད་ཅིང་། །མཚན་ངན་གྱེན་དུ་བལྟས་པ་ལས། །རྒོད་ཅིང་དགའ་བ་ཉིད་དག་དང་། །ལམ་ནི་རྣམ་པར་མནན་ཅིང་གནས། །གཡུལ་དུ་ཤི་བ་རྣམས་ཀྱི་ནི། །གཏམ་དག་ལ་ནི་རྟག་ཏུ་དགའ། །དེ་ལྟར་རབ་དྲེགས་མཐོང་ན་ནི། །རྩེ་གསུམ་ཕྱག་རྒྱ་བསྟན་པར་བྱ། །རྐང་པ་གཡས་པ་བསྐུམ་པ་ཡིས། །གར་ཉིད་ཀྱང་ནི་བསྟན་པར་བྱ། །གཡོན་པ་དག་ནི་ཡོངས་བཟློག་པ། །ཕྱག་རྒྱའི་ལན་ནི་ཡིན་པར་བཤད། །ཚེས་བཅུ་དང་ནི་བཅྭ་བརྒྱད་ནི། །དེ་ཡི་དུས་ཚིགས་ཡིན་པར་བསྟན། །ཁྱིམ་དུ་མདུང་རྩེ་གསུམ་པ་ཡང་། །བྲིས་ནས་དེ་ནི་རྟག་ཏུ་མཆོད། །འཇིག་རྟེན་དབང་ཕྱུག་ལཱ་མ་ཡི། །མཚན་ཉིད་གྱུར་པ་འདི་དག་ཡིན། །གང་གི་མཁུར་ཚོས་དག་ཏུ་ནི། །ཁུང་བུར་སྣང་བར་གནས་གྱུར་ཅིང་། །དེ་བཞིན་

[Full Size]

དམར་སེར་ལག་པ་དམར། །མིག་ནི་ལྗང་སེར་དག་ཏུ་སྣང་། །སྐྲ་ནི་དེ་བཞིན་འཁྱིལ་པ་དང་། །མགོ་ལ་དར་ནི་བཅིངས་པ་དང་། །དཔྲལ་བ་ལ་ནི་གསལ་བར་ནི། །གཞུ་ཡི་དངོས་པོར་རབ་ཏུ་གནས། །དེ་བཞིན་མགྲིན་རིང་སྣ་རིང་བ། །རྟག་ཏུ་གོས་དམར་ལ་དགའ་ཞིང་། །རྒོད་ཅིང་གླུ་ནི་ལེན་པ་དང་། །ལན་འགའ་ཞིག་ནི་ཁྲོ་བ་དང་། །སེམས་ནི་རྣམ་པར་གཡོ་བ་དང་། །རྩོད་པ་ལ་ནི་དགའ་བ་སྟེ། །འདི་འདྲའི་རབ་དྲེགས་མཐོང་ནས་ནི། །ཤག་ཏིའི་ཕྱག་རྒྱ་བསྟན་པར་བྱ། །གཉིས་པ་ཉིད་ནི་འབད་པ་ཡིས། །དྲིལ་བུའི་ཕྱག་རྒྱ་བསྟན་པར་བྱ། །གཡོན་གྱི་ཕྱོགས་སུ་ལྡོག་པ་ནི། །ཕྱག་རྒྱའི་ལན་ནི་ཡིན་པར་བསྟན། །ཐུང་ཞིང་བྱིན་པ་སྦོམ་པ་དང་། །རྟག་ཏུ་གོས་སེར་ལ་དགའ་ཞིང་། །ཕྲག་པ་དག་ནས་གོས་ཀྱང་འཕྱང་། །དེ་འདྲའི་བུད་མེད་མཐོང་ནས་ནི། །འཁོར་ལོའི་ཕྱག་རྒྱ་བསྟན་བྱ་ཞིང་། །འབད་པ་ཡིས་ནི་གཉིས་པ་ཡང་། །དུང་གི་ཕྱག་རྒྱ་བསྟན་པར་བྱ། །གཡོན་ནས་ཡོངས་སུ་བཟློག་པ་ནི། །ཕྱག་རྒྱའི་ལན་ནི་ཡིན་པར་བཤད། །བཅུ་བཞི་དེ་ཡི་དུས་ཡིན་ཏེ། །དེ་ཡི་ཁྱིམ་དུ་རྡོ་རྗེ་འདྲི། །ཧེ་རུ་ཀ་དཔལ་ལཱ་མ་ཡི། །མཚན་ཉིད་གྱུར་པ་འདི་དག་ཡིན། །ལུས་ཀུན་ལ་ནི་བ་སྤུ་ཡོད། །མིག་ནི་གནག་ཅིང་སེར་བ་དང་། །སྦོམ་ཞིང་རྣམ་འགྱུར་མི་བཟད་པ། །བཞིན་འཕེལ་ཆེ་ཞིང་ཁ་ཆེ་ལ། །མཆུ་ནི་འཕྱང་ཞིང་ཁ་དོག་གནག། མིག་ཟླུམ་སྣ་ནི་ཉམས་པ་དང་། །རྟག་ཏུ་གླུ་དང་གར་ལ་མཁས། །སྤྲིན་གྱི་གཟུགས་ཅན་གསུས་པ་ཆེ། །འདི་འདྲའི་རབ་དྲེགས་མཐོང་ནས་ནི། །གླུ་ཡི་ཕྱག་རྒྱ་བསྟན་པར་བྱ། །གཉིས་པ་ཡང་ནི་འབད་པ་ཡིས། །མདུང་གི་ཕྱག་རྒྱ་བསྟན་པར་བྱ། །གཡོན་ནས་ཡོངས་སུ་བཟློག་ན་ནི། །ཕྱག་རྒྱའི་ལན་ནི་ཡིན་པར་བཤད། །ཚེས་གྲངས་བཅུ་གཅིག་དེ་ཡི་དུས། །ཁྱིམ་དུ་མཆེ་བ་འདྲི་བྱེད་པ། །རྡོ་རྗེ་ཕག་མོ་ལཱ་མ་ཡི། །མཚན་ཉིད་གྱུར་པ་འདི་དག་ཡིན། །མཚན་མོའི་དུས་སུ་ལམ་དུ་ནི། །དེ་ལྟར་འབད་དེ་ཤེས་པར་བྱ། །དེ་ཀུན་འཇིགས་པར་ཡོང་མི་བྱ། །ཕྱག་རྒྱ་རྣམས་ཀྱིས་མཉེས་པར་བྱ། །ཇི་ལྟར་བསམས་པ་བཞིན་དུ་ནི། །མཉེས་ནས་དངོས་གྲུབ་སྟེར་བའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་ཚོགས་ཀྱི་འཁོར་ལོའི་ཆོ་ག་དང་། མཁའ་འགྲོ་མའི་ཡན་ལག་གི་མཚན་ཉིད་ཅེས་བྱ་བའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་གཞན་ཡང་བཤད་བྱ་བ། །དེ་རུ་ལས་

[Full Size]

ནི་རབ་ཡིན་ཏེ། །གང་ཞིག་བསྟེན་པ་ཙམ་གྱིས་ནི། །མྱུར་དུ་དངོས་གྲུབ་ལ་འཇུག་པ། །ཡན་ལག་དྲི་ཞིམ་ཤིན་ཏུ་འཇམ། །རྡུལ་ནི་དྲི་ཞིམ་གྱུར་པ་དང་། །ངོ་ཚ་ཆེ་ཞིང་བདེན་པར་སྨྲ། །ཡུན་རིང་མིག་ནི་མི་འཛུམས་པ། །ཁྲོ་བ་མེད་ཅིང་སྙིང་རྗེ་ཆེ། །སྐད་ཅིག་འཇམ་པར་སྨྲ་བ་དང་། །སྐྱེ་བ་བདུན་ནམ་ཡང་ན་གསུམ། །འབད་པ་ཡིས་ནི་བཙལ་བར་བྱ། །བསོད་ནམས་དང་ལྡན་སེམས་པ་ཡི། །དེས་ནི་ལག་ཏུ་རྙེད་པར་འགྱུར། །དེ་ཡང་ཟོས་པར་བྱས་ནས་ནི། །དེ་ཡི་སྙིང་གར་རོ་ཙ་ན། །རྩེ་གཅིག་པ་ཡི་སེམས་ཀྱིས་ནི། །ཧེ་རུ་ཀ་ཡི་སྔགས་ལན་བདུན། །བཟླས་ནས་འབད་པས་ཐིག་ལེ་བྱ། །འཕྲལ་དུ་སྟེང་དུ་ལྡིང་འགྱུར་ཞིང་། །དཔག་ཚད་བྱེ་བར་འགྲོ་བའོ། །དེ་ནི་ཟོས་པ་ཙམ་གྱིས་ནི། །ཁམས་གསུམ་ཡེ་ཤེས་ཅན་དུ་འགྱུར། །དཔག་ཚད་བྱེ་བ་ལྔ་བཅུར་ནི། །ཉིན་མཚན་ཀུན་ཏུ་འགྲོ་བའོ། །ལྷ་ཡི་ལུས་ཀྱང་ཐོབ་འགྱུར་ཏེ། །བསྐལ་པ་སྟོང་དུ་གནས་པར་འགྱུར། །བརྒྱ་བྱིན་གྱི་ནི་སྟོབས་འདྲའོ། །བུད་མེད་བལྟས་པ་ཙམ་གྱིས་ནི། །ཇི་ལྟར་མེ་ཡིས་མར་བཞུ་ལྟར། །དཔལ་ཕྱག་རྒྱ་ཆེན་པོའི་ཐིག་ལེ་ལས་ལས་ཀྱི་ཆོ་ག་ཞེས་བྱ་བའི་ལེའུ་སྟེ་ཉི་ཤུ་རྩ་བཞི་པའོ།། །།བཅོམ་ལྡན་ཡེ་ཤེས་རྒྱལ་དབང་པོ། །བདག་ལ་ཐེ་ཚོམ་སྐྱེས་པ་མཆིས། །སྔགས་པས་སྔགས་རྣམས་འགྲུབ་དོན་དུ། །བཟླས་བརྗོད་དེ་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །རྣལ་འབྱོར་རྣམས་ཀྱིས་བཟླས་དང་བསྒོམ། །ཉོན་ཅིག་ལྷ་མོ་འགྲོ་བ་མ། །སྲོག་དང་རྩོལ་བ་མཉམ་བྱས་ནས། །སྲོག་དང་རྩོལ་བ་བཟའ་བར་བྱ། །སྲོག་དང་རྩོལ་བ་འགོག་བྱས་ཏེ། །སྲོག་དང་རྩོལ་བ་ལ་བལྟའོ། །པདྨའི་ཁ་སྦྱར་སྦྱོར་བ་ལས། །ཤེས་རབ་ཐབས་ནི་སྤྱད་པར་བྱ། །ལྟེ་བ་གཉིས་ཀྱི་ནམ་མཁའ་ལས། །ཁབ་རྩེ་དབྱེ་བ་མེད་པ་ཡི། །ཡི་གེ་ཤེལ་གྱི་འོད་ལྡན་པ། །ཨཱ་ལིའི་ཕྲེང་བ་དྲན་པར་བྱ། །ཡི་གེ་རེ་རེ་ཡིད་ཀྱིས་ནི། །རྟག་ཏུ་རྒྱུན་མི་འཆད་པར་བཟླས། །འཁོར་ལོ་རྣམས་ཀྱི་ལྟེ་བའི་ནང་། །བཟློག་པ་བྱས་ནས་དྲང་བར་བྱ། །ཧ་ཧའི་སྒྲ་ནི་འཇམ་པ་ཡིས། །མགྲིན་པ་ཡ་རྐན་འགུལ་མེད་པས། །ནང་གི་རེག་བྱ་འཇམ་པ་ཡི། །སྙིང་ག་ཁོ་ནའི་གནས་སུ་བྱ། །ཤེས་རབ་གཏུམ་

[Full Size]

མོའི་གཟུགས་སུ་གྲགས། །རྣམ་པ་དང་བྲལ་བདེ་སྦྱིན་མ། །རེག་བྱ་མེད་པའི་རེག་སྐྱེད་མ། །དེ་ལྟའི་ཤེས་རབ་དང་ལྷན་ཅིག། རྡོ་རྗེ་སྐྱིལ་ཀྲུང་སེམས་ཀྱིས་ནི། །སེམས་ནི་གཡོ་བ་མེད་པར་བྱ། །ཐིག་ཚུལ་ཆར་ཡང་དང་བྲལ་བ། །ཐིག་ཚུལ་ཆར་ཡང་དག་ཉིད་དང་། །ཐིག་ལེ་ཚུལ་དང་ཆར་ཡང་ནང་། །རྣལ་འབྱོར་གྱིས་ནི་དེར་སེམས་བྱ། །ཆར་ཡང་གི་ནི་ནང་དུ་སེམས། །ཡང་ནི་ཚུལ་གྱི་ནང་དུ་སེམས། །ཚུལ་ནི་ཐིག་ལེར་འགྲོ་བར་བསྒོམ། །ཐིག་ལེ་ཡང་ནི་སྟོང་པར་འགྲོ། །སྟོང་པ་རང་བཞིན་ཞེས་སུ་བསྟན། །གསུམ་དང་བྲལ་བ་མ་སྐྱེས་མཆོག། དེ་ལྟ་བུ་ཡི་ཆོ་ག་ཡིས། །འདི་ཡི་ཆོ་གའི་ཐབས་ཀྱིས་ནི། །གང་ཞིག་རྩེ་གཅིག་གིས་ནི་བཟླས། །དེས་ནི་དངོས་གྲུབ་ཆེན་པོ་འཐོབ། །ཟླ་བ་གཅིག་གིས་གདོན་མི་ཟ། །དཔལ་ཕྱག་རྒྱ་ཆེན་པོའི་ཐིག་ལེ་ལས་རང་བཞིན་གྱི་བཟླས་པ་ཞེས་བྱ་བའི་ལེའུ་སྟེ་ཉི་ཤུ་རྩ་ལྔ་པའོ།། །།བཅོམ་ལྡན་དཔའ་བོ་དཔའ་དབང་ཕྱུག། སྔར་ནི་ཁྱོད་ཀྱིས་དུས་བཀའ་སྩལ། །ཐམས་ཅད་མཁྱེན་པ་མཆོག་དབང་ཕྱུག། དེ་ཡི་དོན་ནི་བཤད་དུ་གསོལ། །དེ་ཡི་དུས་ཀྱི་དོན་འདི་ནི། །སྤྱན་རིང་ལྷ་མོ་ཁྱོད་ཉོན་ཅིག། དུས་ནི་ཆར་ཡང་ཞེས་སུ་བཤད། །དེ་རྣམས་ཀྱི་ནི་སྦྱོར་བའི་དོན། །སྦྱོར་བ་བཞི་ཡང་བཞི་བཞིར་གྱིས། །ཡན་ལག་གཅིག་ནི་སྤངས་པའོ། །རྒྱལ་བ་རྣམས་ཀྱིས་རྙེད་དཀའ་བ། །དེ་ཡི་སྐྱེ་བ་བདག་གིས་བཤད། །རྟེན་གྱི་སྲོག་གི་དབྱུག་པ་ལ། །དེ་རུ་སྦྱོར་བ་བསྟན་པའོ། །སྲོག་གི་དབྱུག་པ་དབུས་ན་གནས། །ཕྲ་བའི་ཕྲ་བ་ཡང་དག་མཆོག། སུམ་ཅུ་རྩ་གཉིས་མདུད་དང་ལྡན། །དེ་ནི་ཕྱི་རོལ་ནང་དུ་མིན། །མདུད་པ་ཡི་ནི་གནས་སུ་སྦྱོར། །དེ་ནི་ཆར་ཡང་རྣམས་ཀྱི་དོན། །ཆར་ཡང་སྦྱོར་བ་ནང་དུ་མིན། །ནང་དུ་དེ་ནི་རྟོག་མེད་མ། །མདུད་པའི་ནང་དུ་གཡས་དང་གཡོན། །རོ་མ་དང་ནི་བརྐྱང་མ་གནས། །མདུད་པ་གཉིས་དབུས་གཅིག་གཅིག་སྟེ། །སུམ་ཅུ་གཉིས་ཀྱིས་བཅུ་དྲུག་དྲན། །བདེ་ཆེན་འཁོར་ལོ་མགྲིན་པ་གནས། །ལྟེ་བའི་སྟེང་ནི་ཡན་ཆད་དོ། །སོར་བཅུ་གཉིས་ཀྱི་སྐུད་པ་ནི། །

[Full Size]

མདུད་པ་མེད་པ་གཅིག་པུའོ། །དེ་འོག་མདུད་པ་དང་ལྡན་པ། །རླུང་གི་འཁོར་ལོ་ཡན་ཆད་དོ། །སྤྱི་བོ་ནས་ནི་མགྲིན་ཡན་ཆད། །དེ་ཙམ་སྦྱོར་བ་བཞི་ཡིན་ནོ། །མགྲིན་པའི་འོག་ནས་སྙིང་གའི་གནས། །དེ་ཙམ་གཞན་ནི་བཞི་ཡིན་ནོ། །སྙིང་གའི་གནས་ནས་ལྟེ་བའི་བར། །དེ་ཙམ་གཞན་ཡང་བཞི་ཡིན་ནོ། །ལྟེ་བ་ནས་ནི་ནོར་བུའི་མགྲིན། །དེ་ཙམ་གཞན་ནི་བཞི་ཡིན་ནོ། །དེ་ནི་སྦྱོར་བ་བཞི་རུ་བཤད། །ཆར་ཡང་དགའ་བ་དང་བྲལ་བ། །འདོད་དང་རྡུལ་དང་འདར་དང་སྟོབས། །འགྲོ་དང་བདུད་རྩི་ཡང་ཡིན་ཏེ། །དགའ་དང་པདྨ་དེ་བཞིན་ཏེ། །དེ་ནི་དང་པོའི་སྦྱོར་བ་བཞི། །རྒྱས་དང་རྡུལ་དང་མདུད་དང་མྱོས། །འབྱུང་བ་དང་ནི་མཚན་མོ་དང་། །མཆོག་གི་དགའ་དང་རོ་ཡིན་ཏེ། །དེ་ནི་གཉིས་པའི་སྦྱོར་བའོ། །འབར་དང་ཞི་དང་ཐིག་ལེ་གནས། །མྱོས་དང་འོག་མ་དེ་བཞིན་ནོ། །དགའ་བྲལ་དགའ་བ་འགུག་པ་སྟེ། །དེ་ནི་གསུམ་པའི་སྦྱོར་བའོ། །ཨུ་ཏ་འདབ་མ་ཚུལ་རླུང་མ། །གཉིད་དང་མེ་མ་དེ་བཞིན་ནོ། །ལྷན་ཅིག་སྐྱེས་དགའ་མ་སྐྱེས་པ། །དེ་ནི་སྦྱོར་བ་བཞི་པའོ། །རིན་ཆེན་སྐེ་རུ་ཕྱིན་ཙམ་ན། །དེ་ནི་ཟླ་བ་གང་བར་དྲན། །དགའ་བ་ཡོད་པའི་སྦྱོར་བ་ནི། །དེ་ནི་ཤར་བར་ཤེས་པར་བྱ། །བཅྭ་ལྔ་པ་ནི་འབྱུང་བའི་རྒྱུ། །བཅུ་དྲུག་པ་ལ་རྟོག་མི་བྱེད། །སྐྱེ་དང་འཇིག་པ་མེད་པའི་ཕྱིར། །དེ་ལ་སྦྱོར་བ་མེད་པའོ། །ཆར་ཡང་རྣམ་སྐྱེད་སྦྱོར་བ་ནི། །རྩེ་གཅིག་གིས་ནི་ཁྱོད་ཉོན་ཅིག། བཅུ་དྲུག་དེ་བཞིན་ཉི་མ་དང་། །གང་དུ་གཉི་ག་སྦྱོར་བར་འགྱུར། །དེ་ལ་མ་སྐྱེས་ཆ་ཞེས་བྱ། །དེ་རང་ངོ་བོ་རང་བཞིན་ནོ། །བཅུ་དྲུག་དེ་བཞིན་ཉི་མ་དང་། །ཆར་ཡང་འབྱུང་བའི་རྒྱུན་ཡིན་ནོ། །དེ་ནི་འབྱུང་བ་ཀུན་གྱི་ཕ། །ཐབས་དང་ཤེས་རབ་མཉམ་པར་ལྡན། །བཅུ་དྲུག་པ་ནི་ཤེས་རབ་ཡིན། །ཉི་མ་ཐབས་སུ་བསྟན་པའོ། །བཅུ་དྲུག་ཕན་ཆད་ཤེས་པར་བྱ། །ཉི་མ་མཆོག་ཏུ་དྲན་པའོ། །དེ་གཉིས་དབུས་བཞུགས་རང་བཞིན་ནི། །ངག་གི་ལམ་གྱིས་རྙེད་པར་དཀའ། །དེ་ལྟ་བུ་ཡི་དུས་ཀྱི་དོན། །ཡང་དག་པར་ནི་བདག་གིས་བཤད། །འདི་ལས་གཞན་མཆོག་གསང་བ་ནི། །ཞལ་

[Full Size]

བཟང་ཡང་དག་མེད་པའོ། །འབད་པ་ཡིས་ནི་སྦ་བར་བྱ། །སུ་ལ་ཡང་ནི་མི་སྦྱིན་ནོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་དུས་ཀྱི་དོན་གྱི་རང་བཞིན་གྱི་དོན་ཞེས་བྱ་བའི་ལེའུ་སྟེ་ཉི་ཤུ་རྩ་དྲུག་པའོ།། །།སྔར་སྦས་སྔགས་ཀྱིས་གསལ་བ་དེ། །ཉོན་ཅིག་ལྷ་མོ་བདག་གིས་བཤད། །དད་ལྡན་རྣམས་ཀྱིས་ཤེས་དོན་དུ། །དད་པ་མེད་ལ་ནམ་ཡང་མིན། །ཧཱ་སྭཱ་ཊཕ་ཧཱུྃ་ཧཱུྃ་ཡ་བྷཱ་ནྣིས་གྣི་པཱ་ལ་ཀཱ་ཧཱ་མ་ས་ཧ་ཊྚཱ་ཊྚཱ་ཡ་ཛ་བི་ཡ་ཛ་ར་ཤྭ་དྷི་ཀྲོ་ཧཱ་མ་ཨོཾ། གསང་ཆེན་པོ་ཡི་སྔགས་འདི་ནི། །ཐམས་ཅད་དོན་ཀུན་གྲུབ་བྱེད་པ། །ཊཕ་ཧྲཱིཾ་ཧྲཱིཾ་གྲི་ཛོ་ཏེ་ཛྲ་བ་ཨོཾ། ཉེ་བའི་སྙིང་པོའི་སྔགས་ཆེན་པོ། །ཐམས་ཅད་ཀུན་གྱི་དབང་དུ་བྱེད། །ཧཱ་སྭཱ་ཊཕ་ཧཱུྃ་ཧཱུྃ་རི་ཤྭ་ཡེ་མ་ས་ཏ་ར་སུ་ཨོཾ། ཁྱོད་ཀྱི་སྙིང་པོའི་སྔགས་དབང་པོ། །གྲངས་མེད་ཡོན་ཏན་དང་ལྡན་ནོ། །སྔགས་པའི་ཡེ་ཤེས་གྲུབ་དོན་དུ། །གསང་བའི་སྔགས་ནི་གསལ་བྱས་སོ། །ཧཱ་སྭཱ་ཊཕ་ཡྱཱ་ཝྱཱ་ཨྱཱཨོཾ། ཁྱོད་ཀྱི་ཉེ་བའི་སྙིང་པོ་འདི། །སངས་རྒྱས་ཀྱིས་ཀྱང་རྙེད་དཀའ་བ། །བདག་གིས་དེ་ཡི་སྔགས་ཀྱིས་ནི། །གྲངས་མེད་དབང་དུ་བྱས་པའོ། །དཔལ་ཕྱག་རྒྱ་ཆེན་པོའི་ཐིག་ལེ་ལས་སྦས་པའི་སྔགས་གསལ་བ་ཞེས་བྱ་བའི་ལེའུ་སྟེ་ཉི་ཤུ་རྩ་བདུན་པའོ།། །།ཡང་དམ་དུ་འཁྱུད་པ་བྱས་ནས་སྐད་སྙན་པ་ཡིས། བཅོམ་ལྡན་འདས་མ་ལེགས་དགྱེས་དབང་ཕྱུག་མས་འདི་སྐད་ཅེས་ཞུས་སོ། །བཅོམ་ལྡན་འདས་ཡེ་ཤེས་མཁའ་འགྲོ་ཉི། །མི་ཤེས་མུན་པ་འཇིག་བྱེད་པ། །གསང་བ་ཀུན་ནི་གསུངས་པ་ལས། །ཕྱག་རྒྱ་ཆེན་པོ་དེ་མ་གསུངས། །ཕྱག་རྒྱ་ཆེན་པོ་ཇི་ལྟར་ལགས། །རྒྱལ་བའི་དབང་ཕྱུག་ཡང་དག་གསུངས། །བཅོམ་ལྡན་འདས་ཀྱིས་བཀའ་སྩལ་པ། །རབ་ཏུ་བདེ་བའི་རྣམ་པ་མཆོག། ཉོན་ཅིག་ལྷ་མོ་ཕྱག་རྒྱ་ཆེ། །ཕྱག་རྒྱ་ཆེན་པོ་གསང་བ་ཆེ། །བརྗོད་མེད་མི་ཟད་མ་སྐྱེས་པ། །ཐམས་ཅད་གཟུགས་ཅན་གཟུགས་དང་བྲལ། །གཟུགས་མེད་གཟུགས་ཀྱི་བདག་ཉིད་མཆོག། སྦོམ་ཕྲ་ལ་སོགས་དང་བྲལ་བ། །གཞལ་དུ་མེད་པའི་རང་བཞིན་ནོ། །ཡང་དག་དྲི་མེད་རྣམ་པའི་འོད། །གང་དུ་ཡང་ནི་གནས་མེད་པ། །ཤར་བ་མ་ཡིན་ནུབ་པ་མིན། །རྟག་ཏུ་ཤར་བ་ཆར་ཡང་མཆོག། དུས་དང་གནས་

[Full Size]

སྐབས་གྲོལ་བ་སྟེ། །སྐྱེ་དང་འཇིག་པར་བྱེད་པའོ། །རྣལ་འབྱོར་མ་རྣམས་རྙེད་མི་དཀའ། །རྣལ་འབྱོར་ཅུང་ཟད་རྙེད་དཀའ་བ། །ཐབས་མཆོག་གིས་ནི་རྙེད་འགྱུར་ཏེ། །ཐབས་མཆོག་མེད་ན་ནམ་ཡང་མིན། །དཔའ་བོ་ཆེན་པོ་བཅོམ་ལྡན་འདས། །དེ་ལ་ཐབས་ནི་བཀའ་སྩོལ་ཅིག། བཅོམ་ལྡན་འདས་ཀྱིས་བཀའ་སྩལ་པ། །རྩ་ཡི་ཀུན་སྤྱོད་སྦྱོར་བ་ཡིས། །སློབ་དཔོན་ཁ་ལས་རྙེད་པར་འགྱུར། །རླུང་འཁོར་ཆར་ཡང་གནས་ན་ནི། །རླུང་མ་གཉིད་མ་ཡོད་པའོ། །གཡས་པ་དང་ནི་གཡོན་གྱི་ཆ། །ཆར་ཡང་ལ་ནི་ཤིན་ཏུ་བསྐོར། །དེ་གཉིས་ཁོང་དུ་ཆུད་པ་ཡིས། །དེ་ལས་མཆོག་གི་བདེ་བ་འབྱུང་། །བདེ་བའི་ནང་ནས་ཕྱག་རྒྱ་ཆེ། །ཐེ་ཚོམ་མེད་པར་རྙེད་པར་འགྱུར། །ཆར་ཡང་དབུས་ན་རྩ་ཡི་གནས། །ཕྲ་མོའི་ཕྲ་མོ་ཡང་དག་མཆོག། རྩ་ཡི་གནས་ན་རྩ་ཡི་གནས། །དེ་ཙམ་ལ་ནི་ངེས་ཁྱབ་བོ། །ཕྱག་རྒྱ་ཆེན་པོའི་རང་བཞིན་ནི། །ལྷ་མོ་ཆེན་མོ་དེ་ནི་ཁྱོད། །ང་ཡི་འོད་ནི་ཡང་དག་ཁྱོད། །ཕྱི་དང་ནང་ནི་ཡོད་པའོ། །གང་ཞིག་ཕྱག་རྒྱ་ཆེ་མི་ཤེས། །སངས་རྒྱས་ཡིན་ཡང་རྣལ་འབྱོར་མིན། །ཕྱག་རྒྱ་ཆེན་པོའི་ཐིག་ལེ་འདི། །གང་ཞིག་དྲི་མེད་ཤེས་པ་མིན། །རྣལ་འབྱོར་རྣལ་འབྱོར་མ་ཡི་རྒྱུད། །འབུམ་གཅིག་རྣལ་འབྱོར་ངེས་ཤེས་ཀྱང་། །དེ་ལྟ་མོད་ཀྱི་འབྲས་རབ་ངེས། །ནམ་ཡང་འབྱུང་བར་མི་འགྱུར་རོ། །ཐམས་ཅད་ཆོས་ཀུན་རབ་ཤེས་ན། །དེ་ནི་ངེས་པར་སངས་རྒྱས་ཡིན། །ཕྱག་རྒྱ་ཆེན་པོ་རབ་ཤེས་ན། །དེ་ནི་དཔལ་རྡོར་སེམས་དཔར་འགྱུར། །དེ་ཡི་རང་བཞིན་ཡེ་ཤེས་ནི། །ཕྱག་རྒྱ་ཆེན་པོའི་མཚན་ཉིད་དོ། །དེ་སྐད་ཅེས་ཐོས་ནས་བཅོམ་ལྡན་འདས་མ་བྱེ་བ་འབུམ་ཕྲག་བདུན་ཅུ་རྩ་གཉིས་ཀྱི་མཁའ་འགྲོ་མ་དང་བཅས་པས་བསྐོར་བ་ལན་གསུམ་བྱས་ནས་ཕྱག་འཚལ་ཏེ་ཁྲག་དྲོན་མོས་མཆོད་དོ། །བཅོམ་ལྡན་འདས་ལ་མཁའ་འགྲོ་མ་ཐམས་ཅད་ཀྱིས་ཕྱག་རྒྱ་ཆེན་པོ་ཐིག་ལེའི་རྒྱུད་ཐོས་ནས་དགའ་མགུ་ཡི་རངས་ཏེ་ཅང་མི་སྨྲ་བར་ཞུགས་སོ། །ཡང་དམ་དུ་འཁྱུད་པ་བྱས་ནས་འདི་སྐད་ཅེས་

[Full Size]

གསོལ་ཏོ། །བཅོམ་ལྡན་རྣལ་འབྱོར་མ་ཡི་བདག། ཅུང་ཟད་བདག་ལ་ཐེ་ཚོམ་སྐྱེས། །གང་ཞིག་དཀྱིལ་འཁོར་ཆོ་ག་ནི། །རྩ་བ་ཡི་ནི་རྒྱུད་དུ་བཤད། །བདག་དང་གཞན་གྱི་གནས་དེ་ནི། །སྔར་ནི་བདག་གིས་མ་ཤེས་སོ། །བཅོམ་ལྡན་འདས་ཀྱིས་བཀའ་སྩལ་པ། །བདག་གི་གནས་དང་གཞན་དེ་བཞིན། །ཉོན་ཅིག་ཡང་དག་བདག་གིས་བཤད། །གཞན་གྱི་གནས་ནི་བྷ་གར་བརྗོད། །བདག་གི་གནས་ནི་སྙིང་པོའོ། །སྒོ་ཡི་ཕྱི་རོལ་གཞན་གྱི་གནས། །བདག་གི་གནས་ནི་དཀྱིལ་འཁོར་རོ། །ཡང་ན་གཞན་གནས་སྦྱོར་བ་ཡིན། །ཉེ་བའི་སྦྱོར་བ་བདག་གནས་སོ། །སྦྱོར་བ་མཐོ་རིས་ཞེས་སུ་བསྟན། །དེ་བཞིན་དུ་ཡང་མི་ཡུལ་སྦྱོར། །ཉེ་བའི་སྦྱོར་བ་ས་འོག་སྟེ། །མཐོ་རིས་ཆོས་ཀྱི་སྙིང་པདྨ། །ཉེ་བའི་སྦྱོར་བ་རི་རབ་རྩེ། །མི་ཡུལ་ལྟེ་བའི་ལྟེ་བའོ། །ས་འོག་སྤྲུལ་པའི་སྙིང་པོ་སྟེ། །རི་རབ་རྩེ་མོ་གསང་སྣའོ། །དེ་ལྟར་གཞན་ནི་གསང་ཆེན་པོ། །ཡང་དག་གཞན་དུ་ངས་མ་བཤད། །འབད་དེ་དེ་ནི་བསྲུང་བྱ་སྟེ། །སུ་ལ་ཡང་ནི་མི་སྦྱིན་ནོ། །རྣལ་འབྱོར་མ་རྒྱུད་དབང་ཕྱུག་རྒྱལ། །རྣལ་འབྱོར་མ་ལ་བཤད་པར་བྱ། །ཡང་ན་སེམས་དཔའ་ཆེན་པོ་འདི། །ལེགས་པར་བརྟགས་ནས་གསལ་བར་བྱ། །དཔལ་ཧེ་རུ་ཀ་ཆེན་པོའི་དང་པོའི་དང་པོ་གྲུབ་པ། དེ་བཞིན་གཤེགས་པ་ཐམས་ཅད་ཀྱི་གསང་བ་ལས་ཀྱང་ཆེས་གསང་བའི་རྒྱུད་ཕྱི་མ་དཔལ་ཕྱག་རྒྱ་ཆེན་པོའི་ཐིག་ལེ་རྣལ་འབྱོར་མ་ཆེན་པོའི་རྒྱུད་ཀྱི་རྒྱལ་པོའི་མངའ་བདག། ཐམས་ཅད་མཁྱེན་པས་ཀྱང་རྙེད་པར་དཀའ་བ། རྨད་དུ་བྱུང་བའི་རྨད་དུ་བྱུང་བ་ཞེས་བྱ་བའི་ལེའུ་སྟེ། ཉི་ཤུ་རྩ་བརྒྱད་པའོ།། །།དཔལ་ཕྱག་རྒྱ་ཆེན་པོའི་ཐིག་ལེ་རྣལ་འབྱོར་མ་ཆེན་མོའི་རྒྱུད་ཀྱི་རྒྱལ་པོའི་མངའ་བདག་ཅེས་བྱ་བ་རྫོགས་སོ།། །།རྒྱ་གར་གྱི་སློབ་དཔོན་རྣལ་འབྱོར་གྱི་དབང་ཕྱུག་ཆེན་པོ་དཔལ་ཤེས་རབ་གསང་བའི་ཞལ་སྔར། ཀ་མ་ཆོས་ཀྱི་ཡེ་ཤེས་དང་། ཕྱུག་མཚམས་དགྲ་བཅོམ་གྱིས་དད་ཅིང་གུས་པས་ཞུས་ཏེ་བསྒྱུར་ཅིང་གཏན་ལ་ཕབ་པ།། །།