མཚན་བརྗོད་འགྲེལ་པ་ཉི་ཟླ་འབར་བའི་སྒྲོན་མེའི་ལོ་རྒྱུས་ཁོག་དབུབ་བསྡུས་དོན།

མཚན་བརྗོད་འགྲེལ་པ་ཉི་ཟླ་འབར་བའི་སྒྲོན་མེའི་ལོ་རྒྱུས་ཁོག་དབུབ་བསྡུས་དོན་བཞུགས་སོ། །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་ལོ་རྒྱུས་སམ། འགྲེལ་པ་རིན་པོ་ཆེ་གསལ་བར་བྱེད་པའི་སྒྲོན་མེ་འབར་བ་ཞེས་བྱ་བ་བཤད་པར་བྱ་སྟེ། དེ་ཡང་ཐེག་པ་ཐམས་ཅད་ཀྱི་སྤྱི་རྗེ། དགོངས་པ་ཐམས་ཅད་ཀྱི་ཞེ་ཕུགས། མདོ་རྒྱུད་ཐམས་ཅད་ཀྱི་སྤྱི་ཕུད། ཐེག་པ་ཐམས་ཅད་ཀྱི་སྒོ་འབྱེད་པའི་ལྡེ་མིག །ཆོས་སྐུ་དང་སངས་རྒྱས་དངོས་སུ་སྟོན་པའོ། །འདི་ལ་བཤད་ལུགས་རྣམ་པ་བཞིས་བསྟན་པ་ལ། ནམ་མཁའ་ལྟ་བུའི་དཔེས་མཚོན་ཏེ། དོན་གྱི་ཁོག་དབུབ་པ་དང་གཅིག །ས་གཞི་ལྟ་བུའི་དཔེས་མཚོན་ཏེ། ཆོས་ཐམས་ཅད་ཀྱི་བཅའ་གཞི་བསྟན་པ་དང་གཉིས། །ཉི་ཟླ་ལྟ་བུའི་དཔེས་མཚོན་ཏེ། ཐེག་པ་ཐམས་ཅད་གསལ་བར་བཤད་པ་དང་གསུམ། ཉི་མའི་སྙིང་པོའི་དཔེས་མཚོན་ཏེ། ཆོས་ཐམས་ཅད་སྙིང་པོ་གཅིག་ཏུ་འདུས་པར་བསྟན་པ་དང་བཞིའོ། །འདིའི་ལོ་རྒྱུས་ལ་གཉིས་ཏེ། རྒྱུད་སྙན་བརྒྱུད་ཀྱིས་ཁོག་ཕུབ་པ་དང་། སྦས་པ་གཏེར་གྱི་ལོ་རྒྱུས་ཀྱིས་ཁོག་ཕུབ་པ་དང་གཉིས་ལས། དང་པོ་སྐྱེ་བ་མེད་པའི་དབྱིངས། བརྗོད་དུ་མེད་པའི་ཀློང་། རང་བཞིན་གྱིས་རྣམ་པར་དག་པའི་གནས་ནས། ཡེ་ཐོག་མའི་སངས་རྒྱས་རྒྱལ་བ་ཀུན་ཏུ་བཟང་པོས་བྱིན་གྱི་རླབས་ཀྱིས་བཤད་པ་ནི། གནས་གསལ་དག་རིན་ཆེན་སྣ་ལྔ་ལས་གྲུབ་པའི་འཇའ་ཚོན་སྣ་ལྔ་ཕྱོགས་བཅུར་འཕྲོ་བའི་དཀྱིལ་འཁོར་དུ། དཔལ་རྡོ་རྗེ་སེམས་དཔའ་ལ་ཚིག་དང་ཡི་གེས་མ་བཤད། བྱིན་གྱི་རླབས་ཀྱིས་བཤད། དེས་ཨོ་རྒྱན་དྷ་ན་ཀོ་ཤའི་གླིང་དུ། གུ་རུ་དགའ་རབ་རྡོ་རྗེ་ལ་རང་གི་ངོ་བོས་བཤད། དེས་བདེ་ལྡན་བཀྲ་ཤིས་བྲག་ཏུ། གུ་རུ་འཇམ་དཔལ་བཤེས་གཉེན་ལ་བཤད། དེས་རྒྱ་གར་རྡོ་རྗེ་གདན་དུ། གུ་རུ་ཤྲཱི་སིདྷ་ལ་བཤད། དེས་ཨོ་རྒྱན་ཡུལ་གྱི་མཚོ་དཀྱིལ་དུ་པདྨའི་སྡོང་པོ་ལ། ཕ་མེད་མ་མེད་སྐུ་འཁྲུངས་སྤྲུལ་པའི་སྐུ་པདྨ་སམ་བྷ་ཝ་ལ་བཤད། དེ་ནི་རྡོ་རྗེ་ལྟ་བུའི་སྐུ་སྟེ་འཕོ་འགྱུར་མེད། སྐུ་གསུང་ཐུགས་ཀྱི་བྱིན་རླབས་བསམ་གྱིས་མི་ཁྱབ། སྐལ་ལྡན་ཀུན་ལ་དགོས་འདོད་ཆར་ལྟར་འབེབས། གུ་རུ་དེའི་སྐུ་ཆེ་བའི་ཡོན་ཏན་ནི་སྤྲུལ་པའི་སྐུ་སྟེ། རྒྱ་གར་ཡུལ་ན། རྒྱལ་པོ་གཅིག་གདུང་ཆད་པ་ལ། བུད་མེད་གཅིག་གིས། བུ་ཆུང་གཅིག་ཁྱེར་འདུག་པས། རྒྱལ་པོས་མཉེས་ཏེ། བུ་སྐལ་བྱས་ཙ་ན། བུ་དེའི་ཕྲག་པ་ལ་སྦྲང་བུ་གཅིག་འདུག་པ་ལ། གུ་རུས་སོར་རྡོ་གཅིག་རྒྱབ་ཙ་ན་བྱིས་པ་ཤི། དེ་ནས་རྒྱལ་པོས་ཀུན་སྦྲན་ཏེ། རྒྱ་གར་ཀ་མ་ལའི་ནགས་ཚལ་ཕུ་རུ་སྤྱུགས་པས། ཟས་མེད་དེ། སེམས་ཅན་ཟོས་པས། སྲིན་པོ་ཤཱནྟ་རཀྵི་བྱ་བར་བཏགས་ཏེ། དེར་ཡུལ་མི་ལ་གྲོས་བྱས་ཏེ། ཕུར་འཕྲང་ཀུན་བཅད་བཟུང་སྟེ། ཤིང་མང་པོ་བཅེར་ཏེ་གསོན་བསྲེག་བྱས་ཏེ། ཞག་གསུམ་ན་བལྟས་ཙ་ན། པདྨའི་སྡོང་པོ་ཆེན་པོ་ཞིག་གི་དཀྱིལ་ན། སྐུ་གྲང་གྲང་བསིལ་བསིལ་འདྲ་བར་འདུག་སྟེ། །དེའི་ཚེ་དེའི་དུས་ན། པདྨ་སམ་བྷ་ཝ་བྱ་བར་བཏགས་སོ། །ཡང་ན་ནི་ནགས་ཀྱི་ཕུ་ན་ཡོད་ཙ་ན། ན་ནིང་གི་མི་དེ་ཡང་འདུག་ན་ཟེར་ཏེ། ཡང་བཟུང་སྟེ་ཆུ་འབབ་པ་ལ་བསྐུར། ཞག་གསུམ་ན་བལྟས་ཙ་ན། གུ་རུ་ཆབ་ཀྱིས་མ་གཤེར་བར་སྐམ་སེང་འདུག་པས། དེའི་དུས་སུ་མཚོ་སྐྱེས་རྡོ་རྗེར་བཏགས་སོ། །ཡང་ཡུལ་གང་གྷ་བྱ་བར་ཕྱིན་པས། འདི་ཆབ་གསོལ་བྱས་ཏེ། གྱད་རྩལ་ཅན་མང་པོས་མཚོན་ཆ་མང་པོས་མ་ཕུག་སྟེ། བལྟས་ཙ་ན། རྡོ་རྗེ་རྒྱ་གྲམ་ཞུ་བླུགས་སུ་གོན་འདུག །རྡོ་རྗེའི་ཕྲེང་བ་དབུ་ལ་བཅིངས་པ་མཐོང་སྟེ། དེའི་དུས་སུ་རྡོ་རྗེ་ཐོད་ཕྲེང་བྱ་བར་བཏགས་སོ། །ང་ལ་བུ་ཆུང་ཙམ་ན་རྒྱལ་བུ་དགེ་བ་བྱ་བར་བཏགས་སོ། །སྔགས་བཙུན་དུ་བྱུང་ནས། ཤཱཀྱ་པྲ་བྷར་བཏགས་ཏེ། ང་ལ་མཐུ་རྩལ་ཤུགས་དང་ལྡན་པས། ཤཱཀྱ་སེང་གེ་བྱ་བར་བཏགས་སོ། །དེ་ལྟར་མི་ཆོས་ཙམ་གྱིས་མཚན་བཞི། ནུས་པ་སྐྱེས་པའི་མཚན་བཞི་སྟེ། བརྒྱད་དུ་བཏགས་སོ། །དེ་ནས་གུ་རུ་པད་མས། ཨ་སུ་རའི་བྲག་ཕུག་ཏུ་སྒྲུབ་པ་མཛད་པས། འཕགས་པ་འཇམ་དཔལ་གྱིས་ཞལ་དངོས་སུ་གཟིགས་སོ། །དེའི་དུས་སུ། འཇམ་དཔལ་གྱི་མཚན་ཡང་དག་པར་བརྗོད་པའི་འགྲེལ་པ་ཉི་ཟླ་འབར་བའི་སྒྲོན་མ་འདི་མཛད་དོ། །སྒྲུབ་ཐབས་མན་ངག་ཡིག་སྣ་མ་ལུས་པ་མཛད་དོ། །དེའི་ཚེ་དེའི་དུས་ན། བོད་ཡུལ་གྱི་དབུས་ན་མངའ་བདག་ཁྲི་སྲོང་ལྡེ་བཙན་གྱིས། སྟག་གི་ལོ་ལ་བསམ་ཡས་འགྲམ་བཙུགས་པས། འཇིག་རྟེན་གྱི་ལྷ་མ་སྲིན་མི་བསྲུན་པས། བརྩིག་ཏུ་མ་སྟེར་བས། མངའ་བདག་གིས། མཐའི་བནྡེ་རྒད་པོ་དགེ་མཐོང་བྱ་བ་ལ། འོ་རྒད་པོ། འཛམ་བུ་གླིང་འདི་ན། དྲག་རྩལ་དང་མཐུ་སུ་ཆེ་བྱས་པས། དེ་ན་རེ། རྗེ་ལགས། འཛམ་བུ་གླིང་འདི་ན། གུ་རུ་པདྨ་སམ་བྷ་ཝ་ཆེའོ་ཟེར། རྗེ་ཡིས་ད་ལྟ་གང་ན་བཞུགས་བྱས་པས། རྒྱ་གར་ཨོ་རྒྱན་ཡུལ་ན་བཞུགས་སོ། །ཞེས་སྨྲས་པས། རྗེ་ཡིས་འབངས་བནྡེ་གཉིས་ལ། གསེར་བྲེ་གང་བརྫངས་ནས། སྤྱན་འདྲེན་དུ་བཏང་བས། སློབ་དཔོན་པདྨ་ཨ་སུ་རའི་བྲག་ཕུག་ན། དགོངས་པ་མཛད་པའི་ཉམས་སུ་ཤར་ནས། རྗེའི་བཀའ་དབང་ཆེ་བས་བནྡེ་བང་ཆེན་ལ་བཏང་པ་ཡིན། སྙིང་རེ་རྗེ། ལམ་ཁར་སྡུག་བསྔལ་གཅན་འཕྲང་བསྲུང་མིས་གསེར་ལ་བལྟས་ནས་གསོད། ང་འགྲོ་དགོས་གསུངས་ནས། ཆོས་བསྙེན་སྒྲུབ་རྣམ་གསུམ། སྲོག་སེར་གཏད་དང་བཞི། རྫོགས་ཆེན་འཇམ་དཔལ་མཚན་བརྗོད། རྒྱུད་འགྲེལ་མན་ངག་དང་བཅས་པ་མ་ལུས་པ་བསྣམས་ནས། བོད་ཡུལ་དུ། རྫུ་འཕྲུལ་གྱི་རྟ་ལ་ཆིབས་ནས་བྱོན་པ་དང་། གཙང་དུ་བང་ཆེན་པ་འཕྲད་ནས། ཁྱོད་ཚོ་སྔོན་ལ་སོང་དང་། གུ་རུ་འོང་གིས་ལོག་ཅིག་བྱས་ཙ་ན། བསམ་ཡས་སུ། གུ་རུས་སྔོན་ལ་བྱོན་ནས་དེར་རྗེ་དང་མཇལ། བསྐོར་བ་བྱས། ཞེ་ས་ཕུལ། ལོ་རྒྱུས་བསྙད་པ། ཨ་སུ་རའི་བྲག་ཕུག་ནས། བསྭེའི་ལྷ་མོ་བཞི་དམ་ལ་བཏགས། ཆོས་སྐྱོང་དམ་ཅན་བྲན་བཞིན་དུ་འཁོར་གྱིན་མཆིས་སོ། །དེར་སློབ་དཔོན་གྱིས་འཇིག་རྟེན་གྱི་ལྷ་མ་སྲིན་བཏུལ་ནས་དམ་ལ་བཏགས། གངས་ཀར་ཤ་མེད་མ་མ་ཐུལ་བ་ཡང་ཐུལ། ས་བདག་དང་ལྷ་མ་སྲིན་གྱིས་གྲོགས་བྱས་ནས་མོད་ལ་བཞེངས་སོ། །རྟའི་ལོ་ཡན་ཆོད་ཀྱིས་ཟིན་ནོ། །དེ་ནས་གུ་རུས་ཡོན་ཏན་ཟད་པ་མེད་པ་མཁྱེན་པ་དང་། རབ་གནས་བྱེ་མ་ལས་མཛད་དོ། །གུ་རུ་པདྨས་། ལུང་གི་རྒྱུད་དྲུག །ལོ་ཙཱ་བ་སྐ་ཅོག་གཉིས་ཀྱིས་བསྒྱུར་ཅིང་གཏན་ལ་ཕབ་སྟེ། ལྟ་བ་ཐམས་ཅད་ཀྱི་རྒྱུད་ཆེ་བ་རང་ལ་གནས་པ། ཏིང་ངེ་འཛིན་ཐམས་ཅད་ཀྱི་རྒྱུད་ཏིང་ངེ་འཛིན་མཆོག་གི་རྒྱུད། ཕྲིན་ལས་ཀྱི་རྒྱུད་སྐབས་སྦྱོར་བདུན་པ། སྤྱོད་པའི་རྒྱུད་བརྩོན་པ་དོན་ལྡན། དམ་ཚིག་གི་རྒྱུད་ས་མ་ཡ་བསྡུས་པ། དབང་གི་རྒྱུད་དབང་བསྐུར་རྒྱལ་པོའི་རྒྱུད་དང་དྲུག་བཤད་དོ། །སྐད་ཅིག་གིས་འཚང་རྒྱ་བའི་རྫོགས་ཆེན་དང་བཅས་པ་མཁྱེན་པ་ལ། དེ་ཚོའི་ནང་ནས་ཀྱང་ཐེག་པ་དགུའི་ཡང་རྩེ་སྤྱི་ཏི་བཤད་དོ། །དེ་ནས་བདེ་ལྡན་གྱི་བྲག་ལ། སློབ་དཔོན་འཇམ་དཔལ་བཤེས་གཉེན་གྱིས། འཇམ་དཔལ་གཤིན་རྗེ་ཚེ་བདག་བསྒྲུབས་པས། ཞལ་མངོན་དུ་གཟིགས་ནས། ཡི་དམ་ལྷས་ལུང་བསྟན་པ། འཇམ་དཔལ་བཤེས་གཉེན་ལ། རྒྱ་གར་གྱི་ཡུལ་དུར་ཁྲོད་བསིལ་བའི་ཚལ་གྱི་ནགས་ཚལ་མཁའ་འགྲོ་མའི་གནས་ན། བསེ་སྒྲོམ་སྨུག་པོའི་ནང་ན། འཇམ་དཔལ་ལེའུ་ཁྲི་ཕྲག་དྲུག་ཁྲི་དྲུག་སྟོང་ཡོད་ཀྱི། དེར་ཁྱོད་སོང་ལ་མཁའ་འགྲོ་མ་ལ་གཏོར་མ་འབུལ། གསོལ་བ་ཐོབ་ལ། དེ་ནས་ཐོན་ན་འཕགས་པ་འཇམ་དཔལ་གྱི་དངོས་གྲུབ་ཐོབ་བོ། །ཞེས་ལུང་བསྟན་ནོ། །དེ་ནས་གུ་རུ་འཇམ་དཔལ་བཤེས་གཉེན་དུར་ཁྲོད་བསིལ་བའི་ཚལ་དུ་བྱོན་ནས། མཁའ་འགྲོ་མ་ལ་ཚོགས་གཏོར་བཏང་གསོལ་བ་བཏབ། མཎྜལ་ཕུལ་ཏེ་དངོས་གྲུབ་ཞུ་འཚལ་བྱས་པས། མཁའ་འགྲོ་མ་ཀུན་མཉེས་ཏེ། རྣལ་འབྱོར་པ་ཁྱེད་དངོས་གྲུབ་ཅི་འདོད་ཟེར་ཏེ། དེར་གུ་རུས་འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་རྒྱུད་ཞུ་འཚལ་བྱས་པས། མཁའ་འགྲོ་མ་རྣམས་ན་རེ། འཇམ་དཔལ་གྱི་རྒྱུད་ལེའུ་ཁྲི་ཕྲག་དྲུག་ཁྲི་དྲུག་སྟོང་བཞུགས་ཏེ། རྒྱུད་ཡོ་བཏོན་ན་བདེ་བར་གཤེགས་པའི་བཀའ་ཆད་དང་། ཐུགས་ཀྱིས་བོར་བ་འོང་སྟེ་མི་རུང་བས། རྣལ་འབྱོར་པ་བསེ་སྒྲོམ་ཁ་མ་ཕྱེ་བར། ཤིང་ཁོལ་གཅིག་ཐོན་ལ། ཅི་ཙམ་རན་པ་ཞིག་ཁྱེར་ཅིག །ཐོན་ཅིག་ཅེས་བཀའ་ཡིས་གནང་ངོ་། །དེ་ནས་གུ་རུས་རིན་པོ་ཆེས་ཤེལ་གྱི་གཟོང་གིས། བསེ་སྒྲོམ་ཁོལ་བཏོན་ནས་རན་ཙམ་ཞིག་བདེ་ལྡན་བྲག་ལ་ཁྱེར་ཏེ། གཏོར་མ་བཏང་སྟེ་གཟིགས་ཙ་ན། རྒྱ་སྐད་ནས་ལེའུ་ལྔ་ཡར་ལུས་པའི། དེ་ནས་དཔལ་ལྡན་རྡོ་རྗེ་འཆང་། །ཞེས་པ་ནས་བཟུང་བའི་འཇམ་དཔལ་མཚན་བརྗོད་རྒྱུད་དང་། འཇམ་དཔལ་ཡེ་ཤེས་རྒྱན་རྒྱུད་དང་། འཇམ་དཔལ་ཉི་ཟླ་འབར་བའི་རྒྱུད་དང་། འཁོར་ལོ་བདེ་མཆོག་དང་། དགོངས་པ་འདུས་པ་དང་། འཇམ་དཔལ་ཟླ་གསང་དང་། དགྲ་རྒྱུད་དང་། ཁ་ཐུན་ཆེ་ཆུང་དང་། འཐེབ་རྒྱ་དང་། ལས་ཏིག་གསང་བ་དྲུག་ཅུ་པ་འཁོར་ལོ་དང་བཅས་པ་བསྒྱུར་རོ། །གུ་རུ་དེས་དེ་ལྟར་འཕགས་པ་འཇམ་དཔལ་བསྒྲུབ་པས་འགྲུབ་སྟེ། སྐུ་གསུང་ཐུགས་ཀྱི་དངོས་གྲུབ་ཐོབ་བོ། །དེ་ནས་གུ་རུས། རྒྱ་གར་རྡོ་རྗེ་གདན་དུ་ཤྲཱི་སིང་ཧ་ལ་སྡེ་ཚང་བར་བཤད་དོ། །དེས་ཨོ་རྒྱན་གྱི་ཡུལ་དུ། པདྨ་འབྱུང་གནས་ལ་བཤད་དེ། ཕ་མེད་མ་མེད་སྐྱེས་ཏེ་སྤྲུལ་པའི་སྐུ་དེས། བསམ་ཡས་སུ་སྣོད་དང་སྐལ་བར་ལྡན་པའི་སྐྱེས་བུ་ནི་མ་རྙེད། སློབ་དཔོན་གྱི་ཐུགས་ལ། ད་ངའི་མན་ངག་དང་ཆོས་འདི་ཚོ་གཏེར་དུ་སྦ་དགོངས་ནས། ནུབ་གཅིག་མཆིམས་ཕུའི་གནས་སུ། རྗེ་མངའ་བདག་དང་གྲོས་མཛད་པས་སློབ་དཔོན་གྱི་ཞལ་ནས། རྗེ་མངའ་བདག་ལགས། བདག་གིས་མན་ངག་སྙིང་དང་འདྲ་བ་འདི་རྣམས་གཏད་པའི་སྐལ་ལྡན་མ་རྙེད་པས། ད་ལྟ་དུས་བཟང་ཁྲིམས་ཆེ་ཡང་། ཐ་མ་དུས་སྤྱོད་ཀྱང་ཇེ་ངན་མཆི། རྗེའི་བཀའ་ཁྲིམས་ཀྱང་ནུབ་སྟེ་མཆི། རྒྱ་དང་བོད་དུ་སོ་མཚམས་ཆད། སྔགས་དང་རྒྱུད་སྡེ་ནི་བོད་ཀྱིས་དཀྲུགས། དབེན་གནས་སྒྲུབ་ཁང་ནི་འཇོམས། སྡེ་འཁྲུགས་དང་དམ་པའི་ཆོས་ལ་ནི་བླུད་མ་འབེབས། བོད་བན་དམ་ཚིག་མེད་པ་རྣམས་ལ་བཤད་ན། ཚོར་ངས་ཆེ་ལ་སུན་རྐྱེན། ལག་པ་དམ་ལ་གཡོ་སྒྱུ་ངོ་དགས་ཆོས་འབྲེལ་འབྲེལ་ནས་སློབ་དཔོན་སྤངས་ནས། མན་ངག་ཟོང་དུ་འཚོང་ལ། དམ་ཚིག་མེད། རང་ལ་རྟོགས་པ་མ་སྐྱེས་པར། མི་ལ་ཟོལ་དུ་བཤད། གཞན་ལ་སྐུར་བ་འདེབས། ཚིག་ལ་དོན་མེད་མུན་ནག་ཐོ་ཡོར་མཁན། ནག་པོ་ཁ་འབྱམས་ངོ་དགའི་གང་ཟག་ལ། སྤེལ་བའི་གནས་མེད་པར་གཏེར་དུ་སྦོས་གསུངས་པ་དང་། མཐའ་འདུལ་གྱི་གཙུག་ལག་ཁང་བཞིར། གཏེར་ཆེན་བཞི་སྦས། རུ་ནོན་གྱི་གཙུག་ལག་ཁང་བཞིར་གཏེར་ཕྲན་བཞི་སྦས་སོ། །སྤྱི་ཏི་འདི་གདམས་པ་ཕྱི་ནང་གསང་བ་མ་བུ་དང་བཅས་པ་རྣམས། བསེ་སྒྲོམ་ནང་དུ་གསེར་གྱིས་རྒྱས་བཏབ་ནས་གུ་རུས་རྒྱང་རོ་ཚལ་མའི་བྲག་ལ་བསྣམས་ནས། ལོ་བྱི་བ། ཟླ་བ་འབྲུག །སྐར་མ་རྒྱལ་གྱི་ཉིན་མོ། ཆོས་དང་བསྟན་བསྲུང་འདི་རྣམས། པདྨ་བདག་ནི་བྲག་བཙན་ཁྱོད་ལ་གཏད། ནམ་ཞིག་སྐལ་ལྡན་བྱུང་ན་རྒྱ་འདི་ཁྱོད་ཁྲོལ་ཅིག །གསུངས་ནས་བྲག་ཕུག་རང་འཁྲུངས་སུ་སྦས་སོ། །པདྨ་བདག་གི་སྨོན་ལམ་མཐུ་བཙན་ན། །ནམ་ཞིག་སྐལ་ལྡན་གཅིག་དག་ཕྲད་པར་ཤོག །ཅེས་རྒྱ་ཡིས་བཏབ་བོ། །དེ་ནས་ཞུ་ཡས་བན་ཆུང་བདེ་བ་བྱ་བ་རྒྱང་རོ་ཚལ་མའི་བྲག་ལ་སྒྲུབ་པ་བྱེད་པའི་ཉམས་སུ་ཤར་ནས། གཏེར་ཆོས་ཟབ་རྒྱས་འདུག་པ་གཟིགས་ནས། མཚན་བརྗོད་འགྲེལ་པ་གསལ་བར་བྱེད་པའི་སྒྲོན་མ་འདི་ཐོན་ནོ། །གཞན་ནི་མ་བཏོན། བྲག་བཙན་འཁྲེན་གྱིས་དོགས་ནས། བན་ཆུང་གིས། ཨི་སྟོན་ལ་བསྟན། དེ་ལས་མ་སོང་། འདི་ནས་མར། སྔོན་ཚེ་གོང་ནས་བསྐལ་པར་སྦྱངས་པ་ཡིས། །ཐེག་པ་ཐམས་ཅད་འདི་རུ་འདུས་པར་བསྟན། །ཐེག་པ་སྣ་ཚོགས་ཐབས་ཚུལ་གྱིས། །ཞེས་པ་སྟེ། གུ་རུ་པདྨ་འབྱུང་གནས་ཀྱིས། ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་བཀའ་སྩལ་པ་ཡང་། སྤྱི་དོན་རྣམ་པ་གསུམ་དུ་བཀའ་སྩལ་ཏེ། དགོངས་པའི་རྒྱུ་མཚན་དང་། བྱེ་བྲག་གི་དབྱེ་བ་དང་། རང་རང་གི་འདོད་གཞུང་དང་གསུམ་མོ། །དེ་བློ་རབ་འབྲིང་ཐ་མ་གསུམ་ལ་དགོངས་ཏེ་གསུངས་པའོ། །ཐེག་པ་དགུ་རུ་གསུངས་པ་ནི། བློ་རབ་འབྲིང་ཕྱེ་ན། རབ་ལ་གསུམ། འབྲིང་ལ་གསུམ་ཐ་མ་ལ་གསུམ་སྟེ། དགུའོ། །བློ་ཐ་མ་གསུམ་ལ་མཚན་ཉིད་སྡེ་གསུམ་བསྟན། བློ་འབྲིང་པོ་གསུམ་ལ་ཀྲི་ཡོག་སྡེ་གསུམ་བསྟན། བློ་རབ་ཀྱི་ཐ་མ་ལ་མ་ཧཱ་ཡོ་ག་བསྟན། རབ་ཀྱི་འབྲིང་ལ་ཨ་ནུ་ཡོ་ག་བསྟན། རབ་ཀྱི་རབ་ལ་ཨ་ཏི་ཡོ་ག་བསྟན་ཏེ། རྒྱུད་ནས། ཐེག་པ་གསུམ་གྱིས་ངེས་འབྱུང་ལ། །ཞེས་གསུངས་ཏེ། རེ་རེ་ལ་གསུམ་གསུམ་ཕྱེ་སྟེ་དགུའོ། །འོ་ན་ཐེག་པ་ཐམས་ཅད་འདི་རུ་བཤད་པ་མི་འགལ་ལམ་ཞེ་ན། རྒྱུད་ནས། མུ་སྟེགས་རི་དྭགས་ངན་འཇིགས་བྱེད། །ཅེས་པས། མུ་སྟེགས་རྟག་ཆད་དུ་སྣང་བ་དང་། ཀུན་བརྟག་རིམ་དགུའི་སྣང་བ་ནི། བདེན་བཞིའི་ཚུལ་གྱི་རྣམ་པ་ཅན། །ཞེས་པ་ནི། ཉན་ཐོས་རྡུལ་ཕྲ་རབ་ཏུ་སྣང་བ་བསྟན། །འདྲེན་པ་རང་རྒྱལ་བསེ་རུའི་ཚུལ། །ཞེས་པ་ནི། རང་རྒྱལ་བའི་ཐེག་པ་སྟེ། རྟེན་འབྲེལ་བཅུ་གཉིས་སྣང་བ་བསྟན། །བདེན་པ་གཉིས་ཀྱི་ཚུལ་ལ་གནས། །ཞེས་པ་ནི། དབུ་མ་དང་སེམས་ཙམ་སྟེ། སེམས་ཀྱི་སྣང་བ་ཙམ་དུ་བསྟན་པ་སྟེ། བྱང་ཆུབ་སེམས་དཔའི་ཐེག་པའོ། །རིགས་གསུམ་ལ་ནི་རྣམ་པར་གཟིགས། །ཞེས་པ་ནི། ཀྲི་ཡའི་ཐེག་པ་སྟེ། རིགས་གསུམ་ལྷ་རུ་སྣང་། དག་པར་བྱེད་ཅིང་སྡིག་སེལ་བ། །ཞེས་པ་ནི། ཨུ་པ་ཡའི་ཐེག་པ་བསྟན་ཏེ། རིགས་བཞིའི་ལྷ་རུ་སྣང་། རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་རྒྱལ་པོ་བདེ་བ་ཆེ། །ཞེས་པ་ནི། ཡོ་གའི་ཐེག་པ་སྟེ། རིགས་ལྔའི་ལྷ་རུ་སྣང་། སྒྱུ་འཕྲུལ་ཆེན་པོ་དགའ་བས་དགའ། །ཞེས་པ་ནི། མ་ཧཱ་ཡོ་གའི་ཐེག་པ་བསྟན་ཏེ། དབྱིངས་ཀྱི་སྣང་བར་འདོད། ཆོས་དབྱིངས་དམ་པ་ཟད་མི་ཤེས། །ཞེས་པ་ནི། ཨ་ནུ་ཡོ་གའི་ཐེག་པ་བསྟན་ཏེ། ཐམས་ཅད་ལྷ་དང་ལྷ་མོའི་སྣང་བར་འདོད། ཡེ་ཤེས་སྐུ་སྟེ་རང་བྱུང་བ། །ཁོང་ནས་བྱུང་བ་སྐྱེ་བ་མེད། །ཅེས་པ་ནི་ཨ་ཏི་ཡོ་གའི་ཐེག་པ་སྟེ། རྫོགས་པ་ཆེན་པོ་ཆོས་ཉིད་ཀྱི་སྣང་བར་འདོད། དོན་གཅིག་གཉིས་མེད་ཆོས་ཀྱི་དོན། །དམ་པའི་དོན་དེ་འཇིགས་པ་མེད། །སྐྱེ་མེད་ཆོས་དེ་སྣ་ཚོགས་སྟོན། །ཐེག་པ་གཅིག་གི་འབྲས་བུར་གནས། །ཚིགས་སུ་བརྗོད་པ་སྤངས་པ་སྟེ། །དཔེར་བྱ་ཀུན་ལས་འདས་པ་པོ། །ཐིག་ལེ་ཆེན་པོ་ཡི་གེ་མེད། །ཅེས་པས། ཐེག་པ་དགུའི་རྩེ་རྒྱལ་སྤྱི་ཕུད་སྤྱི་ཏི་ཡོ་ག་འདི་བསྟན་ཏོ། །རྒྱུད་དང་མི་འགལ་ཐེག་པ་བཞིན་དུ་གསུངས་སོ། །ད་ནི་བྱེ་བྲག་གི་དབྱེ་བ་འཆད་དེ། །སྤྱིར་གཉིས་ཏེ། ཕྱི་པ་མུ་སྟེགས་པ་དང་། ནང་པ་སངས་རྒྱས་པ་གཉིས་སོ། །ཕྱི་པ་མུ་སྟེགས་པ་ལ་ལྟ་ལོག་གསུམ་བརྒྱ་དྲུག་ཅུ། དེ་ལས་བསྡུས་པ་འཇིག་ཚོགས་ཀྱི་གནས་རིས་ཉི་ཤུ། དེ་ལས་བསྡུས་པ་སྡེ་ལྔ། དེ་ལས་བསྡུས་པ་རྟག་ཆད་གཉིས་སུ་ཤེས་པར་བྱའོ། །རྟག་པ་ལ་ལྟ་བའི་རི་བོ་བརྒྱ་དང་བཅུའོ། །རྒྱུར་ལྟ་བ་བཞི། ཆད་པ་ལ་མཐའ་ལ་རྟོག་པ་ཉི་ཤུ། སྤྱོད་པས་དག་པར་ལྟ་བའོ། །དེ་ལ་རྟག་པ་བ་ན་རེ། འབྱུང་བ་མི་རྟག །སེམས་རྟག་ཟེར་ཏེ། གཟུགས་ལ་བདག་ཡི། གཟུགས་ལ་བདག་གནས། སྟོན་པ་འོད་སྲུང་རྫོགས་བྱེད་ན་རེ། ལས་ནག་པོ་ཡང་མེད། ནག་པོའི་རྣམ་པར་སྨིན་པ་ཡང་མེད་ཟེར། བུ་མ་སྐད་རིངས་བྱ་བ་ན་རེ། སེམས་ཅན་ཐམས་ཅད་ཀྱི་ལུས་འདི་ཕྱོགས་ཆ་བདུན་དུ་གྲུབ་ཟེར་ཏེ། བདུ ན་གང་ཞེ་ན། ས་དང་ཆུ་དང་མེ་དང་རླུང་། སྡུག་བསྔལ་བ་དང་། བདེན་པ་འཚོ་བའི་སྲོག་གོ། །བེ་ར་ཏ་ན་རེ། སེམས་ཅན་ཐམས་ཅད་ལས་ཀྱི་དབང་གིས་ཡང་ནས་ཡང་དུ་འཁོར་བ་ཡིན་ཟེར། ཀ་ཏ་ན་རེ། ལྷོའི་སེམས་ཅན་ལ་སྦྱིན་པ་བཏང་བ་དང་། བྱང་གི་སེམས་ཅན་བསད་པ་མཉམ། སྡིག་དང་བསོད་ནམས་བྱ་བ་དྲངས་མེད་ཟེར། བྷ་ཝ ན་ཏུ་ན་རེ། དམྱལ་བ་བསད་ན་དམྱལ་བར་སྐྱེ། མི་བསད་ན་མི་རུ་སྐྱེ། དཔེར་ན་ས་བོན་གང་བཏབ་དང་འདྲ་ཟེར། སྟོན་པ་གཅེར་བུ་ན་རེ། སྦྱིན་པ་ཡང་མེད། དགེ་བ་ཡང་མེད། ད་ལྟ་ཡང་མེད། འདས་པ་ཡང་མེད། ལྷ་དབང་ཕྱུག་ཆེན་པོ་བྱ་བ་གཅིག་ཡོད་དེ། དེ་དགའ་ན་མཐོ་རིས་སུ་འདྲེན། དེ་མ་དགའ་ན་ངན་སོང་དུ་འགྲོ་ཟེར་རོ། །སེམས་བྱ་བ་གཅིག །སྙིང་གི་དཀྱིལ་ན་ཆེ་ན་སྲན་མ་ཙམ། ཆུང་ན་ཉུང་འབྲུ་ཙམ་གཅིག་ཡོད་ཟེར། དཀར་ལ་འཚེར་བ། སྣུམ་ལ་འདྲིལ་བ་གཅིག །ལུས་ཀྱི་ཚད་དང་སྦྱར་ནས་ཡོད་ཟེར། རྒྱུ་རུ་ལྟ་བ་བཞི་ནི། སེམས་ཅན་ཡང་སུས་ཀྱང་མ་བྱས། རང་བཞིན་གྱིས་བྱུང་། ང་བྱེད་པ་པོ་རྒྱུ་རུ་ལྟ་སྟེ། སྲན་མ་ཟླུམ་པོ་སུས་དྲིལ། ཚེར་མ་རྣོན་པོ་སུས་གཞོག །དབང་ཕྱུག་རྒྱུ་རུ་ལྟ་སྟེ། ལྷ་ལ་མཆོད་པ་ལེགས་ན་འདིས་འདྲེན། ཉེས་ན་འདིས་གསོད་ཟེར། འབྱུང་བ་ཁོ་རང་འོངས་པས། སུས་བསུས། དུས་ལ་བབ་ན་མི་ཁེག་ཟེར་ཏེ། རྟག་པའི་སྟོན་པ་ཤང་ཀ་དུང་འཛིན་གསུངས་སོ། །དེ་ལ་ཆད་པའི་སྟོན་པ་འབྲི་ཡ་བྲི་ཏི་ཞེས་བྱ་བ་ན་རེ། སེམས་ཅན་ཐམས་ཅད་གློ་བུར་བ་ཡིན་ཏེ། དང་པོ་སྐྱེ་བའི་ཚུལ་ནི། འབྱུང་བའི་འདུ་འཕྲོད་ལས་སྐྱེས། ཚེ་སྔ་མ་འདིར་སོང་བྱ་བ་ཡང་མེད། ཕྱི་མ་འདིར་འགྲོ་བྱ་བ་ཡང་མེད། འཆི་བའི་ཚེ་ན་ཡང་། ལུས་འབྱུང་བ་ལ་ཞ་སྟེ། རུས་པ་རྡོ་ལ་ཐིམ། ཁྲག་ཆུ་ལ་ཐིམ། དྲོད་མེ་ལ་ཐིམ། ཤ་ས་ལ་ཐིམ། དབུགས་རླུང་ལ་ཐིམ། སེམས་ནམ་མཁའ་ལ་ཐིམ། མེ་ཤི་ཐལ་བ་རླུང་ཁྱེར་འདྲ། སླར་འཚོ་བ་ནི་ག་ལ་སྲིད་ཟེར། ཚངས་པ་མཛེས་མས། མ་ཤི་བར་དུ་ཅི་བདེར་སྤྱོད། །ཤི་ནས་དེ་ཡི་སྤྱོད་ཡུལ་མིན། །འཇིག་རྟེན་འདི་ན་ཅི་དགའ་ཅི་བདེ་བ་ཆོས་ཡིན་ཟེར། ཆད་པ་ལ་དབྱེ་ན་གསུམ་སྟེ། ཚེ་སྔ་ཕྱི་ཆད་པར་འདོད་པ་ནི། སྐྱེ་བ་སྔ་མ་འདི་ནས་འོངས་བྱ་བ་ཡང་མེད། ད་ཕྱི་མ་འདི་རུ་འགྲོ་བྱ་བ་ཡང་མེད། རྐྱེན་གྱིས་གློ་བུར་དུ་བྱུང་ཟེར། མི་རྟག་པ་དང་། སྡུག་བསྔལ་དང་། ཁོ་རང་བྱུང་ཟེར། བྱུང་ན་སུ་ཡང་མི་ཁེག་ཟེར། དེས་ན་སྟོན་པའི་ཁྱད། ལྟ་སྒོམ་གྱི་ཁྱད། སྤྱོད་པའི་ཁྱད། རྟེན་ལྷའི་ཁྱད། མུ་སྟེགས་པ་རྟག་པར་ལྟ་བ་ལ། སངས་རྒྱས་པ་བདག་སྟོང་རིག་ཏུ་འདོད་པ་ཁྱད་ཆེ། ལུང་ལས། བདག་མེད་སེང་གེའི་སྒྲ་དང་ལྡན། །མུ་སྟེགས་རི་དྭགས་ངན་འཇིགས་བྱེད། །ཅེས་པས་གསལ་ལོ། །སྤྱོད་པའི་ཁྱད་ནི། མུ་སྟེགས་དཀའ་ཐུབ་དོན་མེད་དུ་སྤྱོད། སངས་རྒྱས་པ་བྱམས་སྙིང་རྗེའི་སྒོ་ནས་འཇུག །རྒྱུ་བསོད་ནམས་ཀྱི་ཚོགས་གསོག །བསོད་ནམས་ལྡན་པ་བསོད་ནམས་ཚོགས། །ཞེས་སོ། །རྟེན་ལྷ་ནི་མ་ཧཱ་དེ་བ་ལ་གསོལ། སངས་རྒྱས་པ་དཀོན་མཆོག་གསུམ་མཆོད་དེ། གཙོ་བོ་དཀོན་མཆོག་གསུམ་འཛིན་པ། །ཞེས་པས་གསལ། སྟོན་པའི་ཁྱད་ནི། མུ་སྟེགས་ལོག་པའི་སྟོན་པ་དྲུག་སྟེ། རྒྱང་འཕེན་པ། ཕྱལ་བ་པ། བྱེ་བྲག་པ། གྲངས་ཅན་པ། སྤྱོད་པ་བ། རིགས་བྱེད་པའོ། །ནང་པ་སངས་རྒྱས་པ་ནི། བཅོམ་ལྡན་འདས་ཤཱཀྱ་ཐུབ་པ་སྟེ། རྒྱུད་ལས། རྫོགས་པའི་སངས་རྒྱས་བཅོམ་ལྡན་འདས། །འགྲོ་བའི་བླ་མ་སྟོན་པ་པོ། །ཞེས་སོ། །ཕྱི་པ་མུ་སྟེགས་པ་དང་། ནང་པ་སངས་རྒྱས་པའི་ཁྱད་མདོ་ཙམ་བསྟན་པའོ། །ད་ནི་ནང་པའི་ཐེག་པ་རིམ་པ་དགུའི་བཅའ་གཞི་སྟོན་ཏེ། དེ་ཡང་ཉན་ཐོས་ལ་རྣམ་པ་གཉིས་ཏེ། མདོ་སྡེ་པ་དང་། བྱེ་བྲག་པའོ། །མདོ་སྡེ་པ་ནི། ཕྱིའི་ཡུལ་འདི་རྡུལ་ཕྲ་རབ་གོང་བུ་གཅིག་འདུས་པའི་བདག་ཉིད་དུ་འདོད་དེ། ནང་གི་སེམས་གང་ཟག་གི་བདག་མེད་པ་དང་། ཆོས་ཀྱི་བདག་ཡོད་པར་འདོད་དོ། །ཉན་ཐོས་བྱེ་བྲག་པའི་ལྟ་བ་ནི། ཕྱིའི་ཡུལ་རྡུལ་ཕྲ་རབ་རེག་ལ་མ་འབྱར་བ་བསྐོར་བ་དང་བཅས་པར་འདོད་དོ། །ནང་གི་སེམས་ནི་མདོ་སྡེ་པ་དང་མཐུན་ཅེས་སོ། །རང་སངས་རྒྱས་པ་ན་རེ། ཕྱིའི་ཡུལ་འདི་རྟེན་ཅིང་འབྲེལ་བར་འབྱུང་བ་ལ། དང་པོ་ས་བོན་ལས་མྱུ་གུ། མྱུ་གུ་ལས་སྡོང་བུ། སྡོང་བུ་ལས་ཡལ་ག །ཡལ་ག་ལས་ལོ་འདབ། ལོ་འདབ་ལས་མེ་ཏོག །མེ་ཏོག་ལས་འབྲས་བུ། འབྲས་བུ་ལས་སྙིང་པོ་དང་རིང་པའོ། །ནང་གི་རྟེན་འབྲེལ་བཅུ་གཉིས་ནི། དང་པོ་རྒྱུ་མ་རིག་པ་ནས། འདུ་བྱེད་མིང་དང་གཟུགས། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་ཤི་དང་། ཐ་མ་ངུ་འབོད་དང་། སྨྲེ་སྔགས་འདོན་པའོ། །ཕྱིའི་རྟེན་འབྲེལ་ལུགས་ནས་ཐོན་པ་དང་། ལུགས་ལས་ལྡོག་པ་ནི། ཕྱི་རྟེན་འབྲེལ་བཅུ་གཉིས་སུ་སྣང་ཡང་། ནང་གི་སེམས་ཉན་ཐོས་པ་ལྟར་གང་ཟག་གི་བདག་མེད་ལ། ཆོས་ཀྱི་བདག་དང་བྲལ་བའོ། །རྣམ་པ་རིག་བྱེད་དང་རིག་བྱེད་མ་ཡིན་པའི་ངོ་བོར་འདོད་པའོ། །ཅེས་སོ། །ཐེག་པ་ཆེན་པོ་སེམས་ཙམ་པ་ནི། རང་སངས་རྒྱས་པ་ལྟར་མིན་ཏེ། ཕྱི་ཡུལ་དུ་སྣང་བ་སེམས་ཀྱི་སྣང་བ་ཡིན་ཏེ། རྣམ་པར་ཤེས་པ་སྒོ་ང་གཤག་པ་ལྟར་འདོད་པའི་སེམས་ཙམ་དང་། རྣམ་རྫུན་ཤེས་པ་བདེན་པར་འདོད་པའི་སེམས་ཙམ་དང་། སྣང་བ་དཀར་དམར་གྱི་རྣམ་པར་སྣང་ཡང་བདེན་པ་ཤེས་པའི་ངོ་བོར་འདོད་པའི་སེམས་ཙམ་དང་། སྣ་ཚོགས་གཉིས་མེད་དུ་འདོད་པའི་སེམས་ཙམ་དང་། རྣམ་པའི་གྲངས་ཇི་སྙེད་ཡོད་པ་ཤེས་པའི་གྲངས་ཀྱང་དེ་སྙེད་དུ་འདོད་པའི་སེམས་ཙམ་དང་། ཚོགས་བརྒྱད་དུ་སྨྲ་བའི་སེམས་ཙམ་དང་། ཚོགས་གཅིག་ཏུ་འདོད་པའི་སེམས་ཙམ་དང་བདུན་ནོ། །དེ་རྣམས་ཧྲིལ་གྱིས་དྲིལ་བས་རྣམ་བདེན་དང་རྣམ་རྫུན་ནོ། །རྣམ་པ་བདེན་པར་འདོད་པའི་སེམས་ཙམ་པ་ན་རེ། སྣང་བའི་རྣམ་པ་ནི་སེམས་ཀྱི་ངོ་བོར་བདེན་ལ། སེམས་ནི་རང་རིག་རང་གསལ་གྱི་ངོ་བོར་བདེན་པར་འདོད་དེ། རྣམ་པ་རྫུན་པར་འདོད་པ་ན་རེ། རྣམ་པ་རྫུན་ཤེས་པ་ནི་བདེན་ཏེ། སྣང་བ་མི་འགོག །རྟག་པ་འགོག་སྟེ། མདོ་སྡེ་རྒྱན་ལས། མི་རྣམས་ལ་ནི་ཕྱི་རོལ་སྣང་། །འཇིག་རྟེན་པ་ཡི་སེམས་ཙམ་མོ། །སེམས་ནི་ཡང་དག་དངོས་མ་ཡིན། །སེམས་ཙམ་དུ་ནི་ངས་བཤད་དོ། །ཞེས་སྐད་ཅིག་མ་སྔ་མ་སྔ་མ་ནི་རྒྱུ་ལ། ཕྱི་མ་ཕྱི་མ་ནི་འབྲས་བུར་འདོད་དོ། །ཐེག་པ་ཆེན་པོ་དབུ་མ་པ་ལ་བཞི་སྟེ། རྣལ་འབྱོར་སྤྱོད་པའི་དབུ་མ་དང་། མདོ་སྡེ་སྤྱོད་པའི་དབུ་མ་དང་། དབུ་མ་གཞུང་ཕྱི་མོ་དང་། སྤྱི་བསྡུས་ཞལ་ཆེ་བའོ། །དེ་ཚོ་ཡོད་ཚད་ཀྱང་མདོར་བསྡུ་ན་བདེན་པ་གཉིས་ཏེ་དོན་དམ་དང་ཀུན་རྫོབ་གཉིས་སོ། །ཀུན་རྫོབ་བདེན་པ་ལ་གཉིས་ཏེ། ལོག་པའི་ཀུན་རྫོབ་དང་། ཡང་དག་པའི་ཀུན་རྫོབ་བོ། །ལོག་པའི་ཀུན་རྫོབ་ནི། རི་བོང་གི་རྭའམ། མོ་གཤམ་གྱི་བུའམ། རུས་སྦལ་གྱི་སྤུའམ། ནམ་མཁའི་མེ་ཏོག་གམ། མུ་སྟེགས་ཀྱི་བདག་ལྟ་བུའོ། །ཡང་དག་པའི་ཀུན་རྫོབ་ནི། རྒྱུ་རྐྱེན་ལས་སྐྱེད་པ། རགས་པར་སྣང་བ། བརྟགས་ན་དབེན་པ། དོན་བྱེད་ནུས་པའོ། །དོན་དམ་པའི་བདེན་པ་ལ། རྣམ་གྲངས་ཀྱི་དོན་དམ་པའི་བདེན་པ་དང་། རྣམ་གྲངས་མ་ཡིན་པའི་དོན་དམ་པའི་བདེན་པའོ། །རྣམ་གྲངས་ཀྱི་དོན་དམ་པའི་བདེན་པ་ནི། སྤྲོས་པའི་མཐའ་བརྒྱད་དང་བྲལ་བར་འདོད་པའོ། །རྣམ་གྲངས་མ་ཡིན་པའི་དོན་དམ་པའི་བདེན་པ་ནི། སྤྲོས་པའི་མཐའ་བརྒྱད་དང་ཡང་བྲལ་རང་ལ་ཡང་མི་གནས་ཏེ། དེ་ལས་འདས་སོ། །ད་ནི་གསང་སྔགས་ཀྱི་ཐེག་པ་ཀྲི་ཡའི་འདོད་པ་ནི། ཕྱི་ནང་གི་ཆོས་ཐམས་ཅད་རང་གི་མཚན་ཉིད་ཡིན་པས། དོན་དམ་དུ་ཡང་རང་བཞིན་མེད་དེ། ཀུན་རྫོབ་ཏུ་ཡང་རང་བཞིན་མེད་པ་དེ་རྟོགས་པའི་བྱིན་རླབས་ལས། རིགས་གསུམ་ལྷར་སྣང་བའོ། །དེ་ཡང་རྡོ་རྗེ་རྩེ་མོ་ལས། ཁྲུས་དང་གཙང་སྦྲ་གཙོར་བྱེད་པ། །དེ་ཕྱིར་ཀྲི་ཡ་ལས་ཀྱི་འབྲས། །ཞེས་བྱའོ། །ཨུ་པ་ཡོ་ག་ལ་ལྟ་སྤྱོད་གཞུང་ཚུགས་མེད་དེ། གོང་འོག་གི་རྗེས་སུ་འབྲང་བ་སྟེ། ལྟ་སྤྱོད་གོང་འོག་ལ་རག་ལས་པ་དང་། རང་གི་འབྲས་བུ་ཐོབ་པར་འདོད་པའོ། །དེ་ཡང་གཞུང་ལས། གཉིས་ཀའི་རྒྱུད་ཀྱིས་འདོད་པ་ནི། །ལྟ་སྤྱོད་གོང་འོག་རྗེས་སུ་མཐུན། །ཅེས་སོ། །ཡོ་གའི་འདོད་པ་ནི། འཁོར་འདས་ཀྱི་ཆོས་ཐམས་ཅད་དོན་དམ་པར་གཉིས་སུ་མེད་པའི་ཡེ་ཤེས་ལ། ཀུན་རྫོབ་གཉིས་སུ་མེད་པའི་བྱིན་རླབས་ལས། རིགས་བཞིའམ། རིགས་ལྔའམ། དེ་ཉིད་དུ་སུམ་ཅུ་རྩ་བདུན་དུ་སྣང་ངོ་། །དེ་ཡང་རྡོ་རྗེ་རྩེ་མོ་ལས། སྡོམ་པ་ཚུལ་ཁྲིམས་བཤགས་སྦྱངས་དང་། ནང་གི་རྣལ་འབྱོར་གཙོར་བྱ་བ། །དེ་ཕྱིར་ཡོ་ག་ལས་ཀྱི་འབྲས། །ཞེས་བྱའོ། །ད་མ་ཧཱ་ཡོ་གའི་འདོད་པ་སྟོན་ཏེ། སྣང་སྲིད་ཀྱི་ཆོས་ཐམས་ཅད་རང་གི་སེམས་ཡིན་ལ། སེམས་དེ་སྣང་བ་མི་འགགས་པ་ཐབས། དེ་རང་བཞིན་མེད་པ་ཤེས་རབ། ཐབས་སྣང་བ། ཤེས་རབ་སྟོང་པ། སྣང་བ་དང་སྟོང་པ་གཉིས་སུ་མེད་པའོ། །དེ་ཡང་སྒྱུ་འཕྲུལ་བརྒྱད་ཅུ་པ་ལས། སྣང་བ་མི་འགགས་ཐབས་ཡིན་ཏེ། །རང་བཞིན་མེད་པ་ཤེས་རབ་ཡིན། །གཉིས་མེད་ཟུང་དུ་འབྲེལ་བས་ན། །རྡོ་རྗེ་སེམས་དཔའ་དེ་ལ་གནས། །ཞེས་སོ། །ཨ་ནུ་ཡོ་གའི་འདོད་པ་ནི། ཡུལ་གང་སྣང་བ་སྣང་ལ་རང་བཞིན་མེད་པ་ནི་ཆོས་ཀྱི་དབྱིངས་ལ། ཤེས་པ་ཅི་སྐྱེས་པ་ནི་ཡེ་ཤེས་སོ། །ཡུལ་གང་སྣང་བ་དང་། ཤེས་པ་ཅི་སྐྱེས་པ་གཉིས་སུ་མེད་པའི་བདག་ཉིད་ལ། གཉིས་ཆོས་དང་བྲལ་བར་འདོད་པའོ། །དེ་ཡང་རྡོ་རྗེ་བཀོད་པ་ལས། ས་ཆུ་མེ་རླུང་སྣོད་བཅུད་ལས། །ཀུན་ཀྱང་རང་བཞིན་ཆོས་ཉིད་དེ། །ཆོས་ཉིད་དོན་ལས་གཞན་མེད་པས། །རང་བྱུང་ཡེ་ཤེས་གསལ་བ་ལ། །ཞེས་སོ། །ཨ་ཏི་ཡོ་གའི་འདོད་པ་ལ་ནི། ཡུལ་ཆོས་ཉིད་ཀྱི་སྣང་བ་རང་ཤར་ལ། སྣང་བ་སྐུ། གྲགས་པ་གསུང་། དྲན་རྟོགས་ཐུགས་ཏེ། སྐུ་གསུང་ཐུགས་ཀྱི་བདག་ཉིད་དུ་འདོད། རིག་པ་རང་བྱུང་གི་ཡེ་ཤེས་ཆེན་པོར་འདོད། རྒྱུས་མ་སྐྱེད། རྐྱེན་གྱིས་མི་འཇིག་པར་འདོད། ཐེག་པ་དགུའི་ཆོས་ཐམས་ཅད་གསལ་བར་བཤད་དོ། །སྤྱིར་རྒྱུད་ལ་བསམ་གྱིས་མི་ཁྱབ་པ་སྟེ། སྐུའི་རྒྱུད་དང་། གསུང་གི་རྒྱུད་དང་། ཐུགས་ཀྱི་རྒྱུད་དང་། གསལ་བ་ཉི་ཟླ་ལྟ་བུའི་རྒྱུད། ཟབ་པ་རྒྱ་མཚོ་ལྟ་བུའི་རྒྱུད། དགོས་འདོད་འབྱུང་བ་རིན་པོ་ཆེ་ལྟ་བུའི་རྒྱུད་དེ། རྒྱུད་ཀུན་གྱི་ནི་བདག་པོ་མཆོག །ནོར་བུ་ཆེན་པོ་རིན་ཆེན་ཏོག །ཅེས་སོ། །སྐྱེ་བ་མེད་པ་སྒྲ་འབྱུང་བ། །ཞེས་པས། སྒྲའི་རྒྱུད་དོ། །སྒྲ་དེའི་ཡི་གེ་གཞན་སྒྲ་སྟེ། ཨ་ནི་སྐྱེ་བ་མེད་པའི་སྒྲའོ། །དེ་ནས་བཅོམ་ལྡན་ཤཱཀྱ་ཐུབ། །ཅེས་པ་ནི། སྟོན་པ་ཕུན་སུམ་ཚོགས་པ། བསམ་པའི་ཁྱད་པར་ཇི་བཞིན་དུ། །སེམས་ཅན་ཀུན་ལ་བཤད་པར་འཚལ། །ཅེས་པས། འཁོར་ཕུན་སུམ་ཚོགས་པ་བསྟན། ཡང་དག་མཐའ་ལ་རྣམ་པར་གནས། །ཅེས་པས། གནས་ཕུན་སུམ་ཚོགས་པ་བསྟན། བཟང་ངན་ཤེས་ཤིང་དུས་ཤེས་པ། །ཞེས་པས། དུས་ཕུན་སུམ་ཚོགས་པ་བསྟན། རྒྱུད་ཆེན་སྒྱུ་འཕྲུལ་དྲྭ་བ་ལས། །ཞེས་པས། བསྟན་པ་ཕུན་སུམ་ཚོགས་པ་བསྟན་ནོ། །ད་ནི་འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་འདི་ལ། དབུ་ཞབས་སུ་བསྡུས་པའི་དོན་རྣམ་པ་གསུམ་གྱིས་བསྟན་ཏེ། ཀླད་ཀྱི་དོན། སྒྲ་སྐད་ཆམ་ལ་དབབ་ཅིང་། ལུས་རྣམ་པར་བཞག་ནས། ཕྱག་འཚལ་བསྟན་པ་དང་གཅིག །གཞུང་གི་དོན་རྒྱས་པར་བཤད་པ་དང་གཉིས། མཇུག་ཡོངས་སུ་བསྡུས་ཏེ་བསྟན་པ་དང་གསུམ་མོ། །ཀླད་ཀྱི་དོན་ལ་གསུམ་སྟེ། རྒྱ་སྐད་བོད་སྐད་མཚམས་སྦྱར་བ་དང་། ཕུན་སུམ་ཚོགས་པ་ལྔ་བསྟན་པ་དང་། མཚན་གྱི་དོན་བསྟན་པའོ། །གཞུང་གི་དོན་ལ་སྐབས་བཅུ་བཞིས་བསྟན་ཏེ། དེ་ནས་དཔལ་ལྡན་རྡོ་རྗེ་འཆང་། །བྱ་བ་ནས་བརྩིས་ཏེ། ལུས་བཏུད་ནས་ནི་སྤྱན་སྔར་འདུག །ཅེས་པའི་བར་གྱིས་ཚིགས་བཅད་བཅུ་དྲུག་གིས་ནི་ཞུས་པའི་ལེའུ་བསྟན། དེ་ནས་བཅོམ་ལྡན་ཤཱཀྱ་ཐུབ། །ཅེས་པ་ནས། བཅོམ་ལྡན་འདས་ནི་ལེགས་ཞེས་གསོལ། །ཞེས་པའི་བར་གྱི་ཚིགས་བཅད་དྲུག་གིས་སླར་གསུངས་པའི་ལེའུ་བསྟན། དེ་ནས་བཅོམ་ལྡན་ཤཱཀྱ་ཐུབ། །གསང་སྔགས་རིགས་ཆེན་ཐམས་ཅད་དང་། །ཞེས་པ་ནས། རིགས་ཆེན་གཙུག་ཏོར་ཆེར་གཟིགས་ནས། །ཞེས་པའི་ཚིགས་བཅད་གཉིས་ཀྱིས་ནི། རིགས་དྲུག་ལ་གཟིགས་པ་དང་། གསང་སྔགས་ཀྱི་རྩ་བ་གསུངས་པའི་ལེའུ་བསྟན་ཏོ། །ཚིག་གིས་བདག་པོས་ཚིགས་སུ་བཅད། །ཅེས་པ་ནས། ཨ་ར་པ་ཙ་ནཱ་ཡ་ཏེ་ན་མཿ །ཞེས་པའི་བར་གྱི་ཚིགས་བཅད་གསུམ་གྱིས། སྒྱུ་འཕྲུལ་དྲྭ་བ་མངོན་པར་བྱང་ཆུབ་པའི་ལེའུ་བསྟན། སངས་རྒྱས་དང་སེམས་ཅན་གྱི་གཞི་བསྟན་ནོ། །འདི་ལྟར་སངས་རྒྱས་བཅོམ་ལྡན་འདས། །ཞེས་པ་ནས། ཐེག་པ་ཆེན་པོའི་ཚུལ་གྱི་མཆོག །ཅེས་པའི་བར་གྱི་ཚིགས་བཅད་བཅུ་བཞིས། རྡོ་རྗེ་དབྱིངས་ཀྱི་སྒོ་ནས་བྱང་སེམས་ལག་ན་རྡོ་རྗེ་ལ་བསྟོད་པའོ། །སངས་རྒྱས་རྣམ་པར་སྣང་མཛད་ཆེ། །ཞེས་པ་ནས། རྡོ་རྗེ་ལྕགས་ཀྱུ་ཞགས་པ་ཆེ། །ཞེས་པའི་བར་གྱི་ཚིག་རྐང་གཅིག་མ་ཚང་པའི་ཚིག་བཅད་ཉི་ཤུ་རྩ་ལྔས། ཆོས་ཀྱི་དབྱིངས་ཀྱི་སྒོ་ནས་རྣམ་པ་སྣང་མཛད་ལ་བསྟོད་པའོ། །རྡོ་རྗེ་འཇིགས་བྱེད་འཇིགས་པར་བྱེད། །ཅེས་པ་ནས། སྒྲ་དང་ལྡན་པ་རྣམས་ཀྱི་མཆོག །ཅེས་པའི་བར་གྱི་ཚིག་རྐང་གཅིག་ལྷག་པའི་ཚིགས་བཅད་བཅུས། མེ་ལོང་ལྟ་བུའི་ཡེ་ཤེས་ཀྱི་སྒོ་ནས་བསྟོད་པའོ། །ཡང་དག་བདག་མེད་དེ་བཞིན་ཉིད། །ཅེས་པ་ནས། ཡེ་ཤེས་མེ་ལྕེ་འོད་རབ་གསལ། །ཞེས་པའི་བར་གྱི་ཚིགས་བཅད་བཞི་བཅུ་རྩ་གཉིས་ཀྱིས། སོ་སོར་ཀུན་ཏུ་རྟོག་པའི་ཡེ་ཤེས་ཀྱི་སྒོ་ནས་བསྟོད་པའོ། །འདོད་པའི་དོན་གྲུབ་དམ་པ་སྟེ། །ཞེས་པ་ནས། ནོར་བུ་ཆེན་པོ་རིན་ཆེན་ཏོག་ཅེས་པའི་བར་གྱི་ཚིག་བཅད་ཉི་ཤུ་རྩ་བཞིས་མཉམ་པ་ཉིད་ཀྱི་སྒོ་ནས་བསྟོད་པའོ། །འཁྲུལ་པ་ལོག་ནས་ཕྱིར་མི་ལྡོག་སྟེ། མཐར་ཕྱིན་ལུས་ཀྱི་མཐའ་རྟོགས། འཁྲུལ་པ་རྩད་ནས་ཆོད། སངས་རྒྱས་ཀུན་གྱི་རྟོགས་བྱ་བ། །ཞེས་པ་ནས། འཇམ་དཔལ་དཔལ་དང་ལྡན་པའི་མཆོག །ཅེས་པའི་བར་གྱི་ཚིགས་བཅད་བཅོ་ལྔས། བྱ་བ་ནན་ཏན་གྱི་སྒོ་ནས་བསྟོད་པའོ། །ལྷའི་སྣང་བ་བརྟག་ཅིང་། བདུད་ཡོངས་སུ་བཏུལ་ལོ། །མཆོག་སྦྱིན་རྡོ་རྗེ་མཆོག་ཁྱོད་འདུད། །ཅེས་པ་ནས། ཡེ་ཤེས་སྐུ་ཉིད་ཁྱོད་ལ་འདུད། །ཅེས་པའི་ཚིགས་བཅད་ལྔས། རིགས་ལྔའི་སྒོ་ནས་ཡེ་ཤེས་ལྔ་ལ་བསྟོད་པའོ། །དེ་ལྟར་འབྲས་བུ་ཐོབ་པའི་གདིང་གིས་ཟིན་ཅིང་། ཐེག་པ་སྣ་ཚོགས་འདུས་པར་བསྟན་ནོ། །ལག་ན་རྡོ་རྗེ་འཆང་བ་ནས། ཆོས་ཀྱི་རྒྱལ་པོ་ཐོབ་བོ། །ཞེས་པས་ཡོན་ཏན་གྱི་སྒོ་ནས་བསྟོད་པའོ། །ༀ་སརྦ་དྷརྨཱ། ཞེས་པ་ནས། དྷརྨཱ་དྷཱ་ཏུ་ཛྙཱ་ན་གརྦྷ་ཨཱཿ ཞེས་པའི་བར་གྱི་ཚིགས་བཅད་གཉིས་ཀྱིས། སྔགས་ཀྱི་སྒོ་ནས་ཆོས་ཐམས་ཅད་སྐྱེ་བ་མེད་པར་བསྟན་ཏོ། །དེ་ནས་དཔལ་ལྡན་རྡོ་རྗེ་འཆང་། །ཞེས་པ་ནས། རྫོགས་པའི་སངས་རྒྱས་ཀུན་གྱིས་བཤད། །ཅེས་པའི་བར་གྱི་ཚིགས་བཅད་ལྔས་ནི་ཉེ་བར་བསྡུ་བའི་སྒོ་ནས་བསྟོད་པའོ། །ཚིགས་བཅད་བརྒྱ་དང་དྲུག་ཅུ་རྩ་གཉིས། ཡོན་ཏན་ལྔ་བཅུ་བཞུགས་སོ། །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་ལོ་རྒྱུས་དང་། ཐེག་པའི་དབྱེ་བ་ས་བཅད་ཉེ་བར་བསྡུས་པའི་སྒོ་ནས་བཤད་པ་རྫོགས་སོ། །གསང་རྒྱ། སྦས་རྒྱ། གཏེར་རྒྱའོ། །ཨཐྎ། དེ་ལ་བློ་རབ་འབྲིང་ཐ་མ་གསུམ་ལས། རབ་ཀྱིས་ཐོད་རྒལ་སྤྱི་ཏི་ཡོ་ག་འདི་བསྟན་ཏེ། འོ་ན་གཞན་ན་རེ། ཁྱོད་ཀྱི་སྤྱི་ཏི་བྱ་བ་འདི་ག་ན་ཡོད། རྒྱུད་དང་ཡང་འགལ། ཆོས་གཞན་དང་ཡང་མི་མཐུན་པ་ཡིན། བློས་བཏགས་སམ་རྫུན་ཡིན་ཟེར་ན། ང་ཡི་སྤྱི་ཏི་འདི་མིན་ན། །ཡང་ཏི་ནག་པོ་བྱ་བ་ཡང་ཡོད། །ཁྱོད་ཀྱི་ཆོས་ཀྱང་མིན། དེ་ཅིའི་ཕྱིར་ཞེ་ན། ཐེག་པ་སྣ་ཚོགས་སུ་གསུངས་པའི་ཕྱིར་ཡིན། ང་ཡི་ཡིན་ཁྱེད་ཀྱིས་མིན་ཟེར། ཐེག་པ་སྣ་ཚོགས་སུ་གསུངས་པ་ལ་ཁྱོད་ཀྱིས་ཡིན་ན་ངའི་ཡང་ཡིན། ཐེག་པ་སྣ་ཚོགས་ཀྱིས་ཁོངས་སུ་ངའི་ཡང་མ་ཤོང་ངམ། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ཡང་ཡིན་ན། ཐེག་པ་དགུ་ཡི་ཁར། ཐེག་པ་གཅིག་པོ་འགལ་ལམ། ཡང་ན་སྤྱི་ཏི་ཡོ་ག་གཅིག་པོ་བཀོལ་ནས་མ་ཤོང་ངམ། ཐེག་པ་གཅིག་པོ་དེར་མ་འདུས་སམ། མི་བདེན་ནམ་བྱ། ཁོ་ན་རེ། ལུང་དྲོངས་དང་ཟེར། རྒྱུད་འདི་ཉིད་ནས་ཀྱང་། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོགས་པ་པོ། །མི་ཟེར་རམ། ཁྱེད་ཀྱི་ཐེག་པ་དགུ་པོ་བས་ཀྱང་ངའི་འདི་ཟབ་སྟེ། ཁྱོད་ཀྱི་ཐེག་པའི་དགོངས་པ་ཡང་དག་པ། ངའི་སྤྱི་ཏིའི་ནང་ན་ཡོད་དོ། །དེར་ཁོ་ན་རེ། ཡིན་པར་ཅི་ཡིས་ཤེས་ཟེར་ན། འདི་གས་ཤེས་བྱས་ལ་གོང་གི་ཐེག་པ་བརྗོད་དོ། །བཅུ་དྲུག་ཕྱེད་ཕྱེད་ཐིག་ལེ་ཅན་བྱ་བ་འདི། གསང་སྔགས་གསར་མར་བཤད་ན། བཅུ་དྲུག་ནི་ཤེས་རབ་མ། ལོ་བཅུ་དྲུག་ལོན་པ། གསུང་གི་རིག་མ། ཕྱེད་ཕྱེད་ནི་ཡབ་ཡུམ་གཉིས་ཀྱི་རྡོ་རྗེ་དང་པདྨའོ། །ཐིག་ལེ་ནི་བྱང་ཆུབ་སེམས་ཀྱི་ཐིག་ལེའོ། །ཐིག་ཞེས་པ་ཐབས་དང་ཤེས་རབ་བསྲུབ་པ་ལས། རྡོ་རྗེ་ནི་ནང་གིས་བུ་གའམ། ཁོང་རྡོ་རྗེ་རྩེ་མོ་ནས། བྱང་ཆུབ་སེམས་ཀྱི་ཐིག་ལེ་ལ། ཡུམ་གྱིས་པདྨར་བབ་སྟེ། ཐིག་ལེ་དེ་ཡུམ་གྱི་པདྨའི་ནང་དུ་ལྡན་པས་ན་ཅན་ཞེས་བྱའོ། །སྐྱེ་མེད། སྒྲུབ་མེད། རིག་མེད་ལ་གསུམ་སྟེ། བཙལ་ན་གང་གི་ངོ་བོར་ཡང་མ་སྒྲུབ་པའི་ཕྱིར་ཡང་། སྐྱེ་བ་མེད་པ་དང་། མི་ལ་སྒྲུབས་པའི་གཏན་ཚིགས་མེད་པའི་ཕྱིར་ཡང་སྐྱེ་བ་མེད་པ་དང་། ཡང་དག་པ་ལ་གཅིག་དང་དུ་མ་དང་བྲལ་བའི་ཕྱིར་སྐྱེ་བ་མེད་པའོ། །འགགས་མེད་སྣང་མཉམ་པའི་རིག་པ་བཞི་སྟེ། ཤེས་པ་ཐ་དད་མེད་པའི་ཕྱིར། སྣང་བ་ལ་ཐ་དད་མེད་དོ། །དོན་དམ་པའི་བདེན་པ་ལ། ཐ་དད་མེད་པའི་ཕྱིར། སྣང་བ་ལ་ཐ་དད་མེད་དོ། །བསམ་ན་སྣང་དུ་རླུང་བའི་ཕྱིར། །སྣང་བ་ལ་ཐ་དད་མེད་དོ། །བརྒྱུད་པའི་སངས་རྒྱས་ལ། ཐམས་ཅད་མཁྱེན་པའི་ཡེ་ཤེས་ཡོད་པའི་ཕྱིར། སྣང་བ་ལ་ཐ་དད་མེད་པའི་ཡིན་ནོ། །རྫོགས་པ་ཆེན་པོ་བསྒོམ་དུ་ཡོད་པ་དང་། བསྒོམ་དུ་མེད་པ་ཞེས་བྱ་བའི་གོ་བ་ནི་འདི་ཡིན་ཏེ། བསྒོམ་དུ་ཡོད་ཅེས་བྱ་བ་ནི། མཚན་མ་དང་དབྱིབས་སུ་བཅས་ཏེ། དངོས་པོ་དང་ཁ་དོག་ལ་བསྒོམ་པ་ནི་མ་ཡིན་གྱི། རྫོགས་པ་ཆེན་པོ་རང་བྱུང་གི་ཡེ་ཤེས། སྐྱེ་འགགས་མེད་པའི་དོན་རྟོགས་པ་དེ་ལ། བསྒོམ་དུ་རྡུལ་ཙམ་ཡང་མེད་ཀྱང་། ཡེང་དུ་སྐད་ཅིག་ཙམ་མེད་དེ། དེ་ལ་བརྟན་པ་ཐོབ་དགོས་པས་ན། བསྒོམ་དུ་ཡོད་ཅེས་བྱའོ། །དེ་ལ་མི་བསྒོམ་པ་བཞག་མེད་ཀྱིས་དོན་ཞེས། དེ་ལ། ཀུན་བྱེད་ལས། སེམས་ཉིད་གོམས་པར་བྱ་བ་ལས། །འདྲེས་པར་བྱ་བ་རབ་ཏུ་གཅེས། །བསྒོམ་དུ་མེད་ཅེས་བྱ་བའི་གོ་བ་ནི། ལྟ་བ་རྟོགས་པས་ཆོ་ག་སྟེ། བསྒོམ་མི་དགོས་བསྒོམ་པ་ཐམས་ཅད་རྣམ་རྟོག་གི་ཀློང་དུ་འཆོར་བས་ཀྱང་བསྒོམ་མི་དགོས། མཚན་མ་འཁྲུལ་པ་ཡིན་པའི་ཕྱིར་བསྒོམ་དུ་མེད། གང་སྣང་ཡང་འཛིན་པ་ཡིན་པའི་ཕྱིར་བསྒོམ་དུ་མེད། མཉམ་པ་ལ་བཞག་རྒྱུ་བྱུང་ན་རྟོག་པ་ཡིན་པའི་ཕྱིར་ཡང་བསྒོམ་དུ་མེད་དོ། །དཔེར་ན་ཞང་བློན་ངོ་ཤེས་པ་ལྟ་བུའོ། །རྟོགས་པ་དང་གྲོལ་ཤར་དུས་གཅིག་སྟེ། རང་བྱུང་ཡེ་ཤེས་མ་བཙལ་བར། །མཐའ་གཉིས་ཆོས་སྐུར་གསལ་བའི་ཕྱིར། །འབྲས་བུ་རྟོགས་ཐོབ་དུས་གཅིག་པའོ། །བསྒོམ་ཡོད་བསྒོམ་མེད་ཀྱི་རྣམ་པར་བཞག་པའོ། །དམ་བཅའ་དཀྲོལ་བའི་གཏན་ཚིགས་བཞི་ནི། བཀའ་ལུང་ལ་སྣང་བ། གཏན་ཚིགས་ཀྱིས་རྒྱས་པ། རིགས་པས་འཐད་པ། དོན་དང་མི་འགལ་བའོ། །རང་བཞིན་སྐྱེ་བ་མེད་པའི་ཆོས་ཐམས་ཅད་སྟོང་མཉ མ་དུ་གཏན་ལ་དབབ། བློ་ངོ་བོ་ཉིད་དུ་གྲོལ་བས། བློ་ཉིད་ལས་སྐྱེས། བློ་ཉིད་ལས་འགགས། བློ་ཉིད་གཉིས་མེད་རང་སར་རང་གྲོལ་བར་གཏན་ལ་དབབ། མཚན་ཉིད་གཉིས་མེད་ཀྱིས། སྣང་སྟོང་ཚིག་ལ་སྔ་ཕྱི་བྱུང་བ་དོན་དུ་གཅིག་སྟེ། སྣང་སྟོང་གཉིས་སུ་མེད་པ་གཏན་ལ་དབབ་བོ། །ཨེ་ཝཾ། མནྟྲ། བྷ་ཝནྟུ། བཀྲ་ཤིས་གསལ་སྟོང་འཛིན་མེད་འཆར་བར་ཤོག། །།ཨ་ར་པཱ་ཙ་ན་དྷཱི། །