ཐུགས་ཀྱི་ཐིགས་པའི་འགྲེལ་བཤད་རིན་ཆེན་སྒྲོན་མ། ནམ་མཁའ་དཔལ།

ར ཏྣ ལོ ཀེ ནཱ མ ཙི ཏྟ ཏི ལ ཀ ཊཱི ཀ བ ཧཱ བི ཧ ར ཏི སྨ།
ཐུགས་ཀྱི་ཐིགས་པའི་འགྲེལ་བཤད་རིན་ཆེན་སྒྲོན་མ་ཞེས་བྱ་བ་བཞུགས་སོ། །
ༀ་སྭ་སྟི་སིདྡྷི། བླ་མ་དང་ལྷག་པའི་ལྷ་ལ་ཕྱག་འཚལ་ལོ། །ཀུན་མཁྱེན་མཐའ་བྲལ་ཆོས་དབྱིངས་ཀུན་རིག་ཅིང་། །ཀུན་གཞིའི་ཐེག་རྒྱལ་དོན་སྟོན་ཀུན་བཟང་དང་། །རྒྱལ་ཚབ་རྒྱལ་བ་རིགས་ལྔ་གསང་བདག་སོགས། །དགོངས་པ་དབྱེར་མེད་དགོངས་རྒྱུད་རྣམས་ལ་འདུད། །ཐེག་མཆོག་བླ་མེད་ཐེག་དོན་ཐུགས་ཆུད་ནས། །རིག་པ་རང་གྲོལ་རིག་འཛིན་རྒྱལ་བའི་སྲས། །མི་ལ་བརྒྱུད་དང་མི་མིན་གཉིས་ལ་སོགས། །རིག་འཛིན་རིག་པར་བརྒྱུད་པ་རྣམས་ལ་འདུད། །གསང་སྔགས་བླ་མེད་གསང་དོན་མ་ལུས་ཀུན། །སྙན་ནས་རིམ་པར་སྙན་དུ་རབ་བརྒྱུད་པ། དོན་དམ་ཀུན་རྫོབ་དོན་རྣམས་རྟོགས་གྱུར་པའི། །བརྒྱུད་པའི་གང་ཟག་རྒྱུན་མི་ཆད་ལ་འདུད། །འཕགས་མཆོག་ཀུན་གྱི་གསང་བའི་མཛོད་འཛིན་ཅིང་། །ཟབ་དོན་དབྱེར་མེད་རང་སྣང་མངོན་བྱས་པ། །མཁྱེན་བརྩེ་ནུས་ལྡན་འགྲོ་བའི་མགོན་དང་གཉེན། །མཚུངས་མེད་དྲིན་ཆེན་བླ་མ་རྣམས་ལ་འདུད། །སྒྱུ་འཕྲུལ་མན་ངག་སྣང་བ་བཞི་ཡི་དོན། །འགྲེལ་བཤད་བདག་གིས་བརྩམ་པར་མི་འོས་ཀྱང་། །དོན་གནས་བཤེས་གཉེན་རྣམས་ཀྱིས་བསྐུལ་ཕྱིར་དུ། །བླ་མའི་གསུང་བཞིན་རིན་ཆེན་སྒྲོན་མ་བྲི། །རྒྱལ་རིགས་སུ་སྐུ་འཁྲུངས་པའི་སློབ་དཔོན་ཆེན་པོ་སངས་རྒྱས་གསང་བའི་མན་ངག་ཐུགས་ཀྱི་ཐིགས་པ་འདི་ཉིད་བཤད་པའི་དབང་དུ་བགྱི་ན་གསུམ་སྟེ། འཆད་ཉན་ཅི་ལྟར་བྱ་བའི་ཚུལ་དང་། གང་འཆད་པར་བྱ་བ་དམ་ཆོས་ཀྱི་རྣམ་བཞག་དང་། འཆད་ཉན་མཐར་ཕྱིན་པའི་དོན་ནོ། །དང་པོ་ལ་གཉིས་ཏེ། གང་ལས་ཉན་པའི་བཤེས་གཉེན་གྱི་རང་བཞིན་དང་། གང་གིས་ཉན་པ་གང་ཟག་གི་རང་བཞིན་ནོ། །དང་པོ་ལ་གསུམ་སྟེ། སློབ་དཔོན་དེའི་མཚན་ཉིད། དེས་ཆོས་བཤད་ཚུལ། དེ་ལྟར་བཤད་པའི་ཕན་ཡོན་ནོ། །དང་པོ་ལ་གཉིས་ལས། མཚན་ཉིད་དང་མི་ལྡན་པ་ནི། ཐོས་པ་ཆུང་ལ་ང་རྒྱལ་ཆེ་བའི་སློབ་དཔོན་དང་། ཐུགས་རྗེ་ཆུང་ལ་གདུག་རྩུབ་ཆེ་བའི་སློབ་དཔོན་དང་། གདམས་པ་ཆུང་ལ་འདོད་པ་ཆེ་བའི་སློབ་དཔོན་དེ་གསུམ་སྤངས་ཏེ། གཅན་འཕྲང་ལས། ལོག་པར་སྤྱོད་པའི་རྣལ་འབྱོར་ནི། །ལོག་ལྟའི་སྤྱི་བརྟོལ་ཁྲོ་གཏུམ་ཆེ། །སྡིག་སྤྱོད་དོན་དང་མི་ལྡན་ཡང་། །བདག་ཉིད་ངེས་པ་ཁོ་ན་ཞེས། །བབ་ཆོལ་བཀའ་བརྒྱུད་སླུ་བྱེད་བསླད། །ཅེས་སོ། །གཉིས་པ་བཟང་བའི་མཚན་ཉིད་ནི། ཐོས་པ་དང་གདམས་ངག་ལྡན་པའི་བླ་མ་དང་། རྟོགས་པ་དང་ཉམས་མྱོང་ལྡན་པའི་བླ་མ་དང་། ཐུགས་རྗེ་དང་བྱིན་རླབས་ལྡན་པའི་བླ་མ་དེ་གསུམ་བསྟེན་ནོ། །ཁྱད་པར་གསང་སྔགས་ཀྱི་སློབ་དཔོན་ནི། ཆོས་ཀུན་མཉམ་པ་ཉིད་ཀྱི་གནས་ལུགས་རྟོགས་ཤིང་གོམས་པས་སྤྱོད་པ་དང་འབྲེལ་བ། བླ་མ་བརྒྱུད་པའི་ཟམ་མ་ཆད་པ ། དབང་བཞིའི་ཆུ་བོ་མ་ནུབ་པ། བྱིན་རླབས་ཉམས་རྟོགས་ཀྱི་མདངས་མ་ཡལ་བ། སྙན་བརྒྱུད་གདམས་ངག་གི་གནད་མ་འཆུགས་པ། སྙིང་རྗེ་ཕན་སེམས་ཀྱིས་སློབ་མ་འཛིན་པའི་གཉེར་དང་ལྡན་པ། གསང་སྔགས་ཀྱི་རྒྱུད་གཞུང་ཕྲིན་ལས་ཆོག་འགྲིག་ཐ་དག་ལ་མཁས་པ་པ་དང་ལྡན་པ་སྟེ། ལམ་རིམ་གྱི་ལེའུ་བདུན་པ་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །ཞེས་པ་དང་། མདོ་ལས། བླ་མེད་སྙིང་པོ་སྨིན་པའི་རྐྱེན། །བློ་གྲོས་ཆེན་པོ་དྲི་བའི་ཡུལ། །ལམ་སྟོན་ས་མཁན་བཤེས་གཉེན་མགོན། །མུན་སེལ་སྒྲོན་མ་རིན་པོ་ཆེ། །མཐོང་མིག་དབང་པོ་ཡིད་རྣམ་ཤེས། །ཆུ་བོ་རབ་མེད་སྒྲོལ་བའི་གྲུ། །འཇིགས་པའི་རྫོངས་ཆེན་རྟེན་པའི་མཁར། །འཁོར་བའི་གཅོང་འབྱིན་སྨན་པའི་མཆོག །མཚོ་གླིང་རིན་ཆེན་ལེན་བྱེད་པའི། །དེད་དཔོན་དམ་པའི་བླ་མ་ལ། །སྔན་དུ་ངེས་པར་ཤེས་པར་བྱ། །ཞེས་སོ། །གཉིས་པ་འཆད་ཚུལ་ལ་གཉིས་ལས། གཞན་སེལ་ནི། ཤེས་ལོ་དང་མཁས་ལོའི་སྒོ་ནས་མི་འཆད། ཁེ་གྲགས་དང་བསྙེན་བཀུར་གྱི་སྒོ་ནས་མི་བཤད། རྒྱས་འདེབས་དང་ཟིལ་གནོན་གྱི་སྒོ་ནས་མི་བཤད་དོ། །གཉིས་པ་དོན་གཉེར་ལ་གསུམ་སྟེ། མཁས་པའི་ཤེས་རབ་དང་ལྡན་པས་གདུལ་བྱའི་ཐེ་ཚོམ་གཅོད་ཅིང་ཡིད་ཆེས་པ། བརྩེ་བའི་ཐུགས་རྗེ་དང་ལྡན་པས་གདུལ་བྱ་རྗེས་སུ་བཟུང་བ། སྦྱོར་བའི་བཟོད་པ་དང་ལྡན་པས་ཆོས་འཆད་པ་ལ་ངལ་དུབ་མེད་པའོ། །དང་པོ་ལ་གསུམ་ལས། བཤད་བྱ་ལ་མཁས་པ་ནི། སྤྱིར་ཤེས་བྱ་རབ་འབྱེད་རིག་པ་ཀུན་ལ་མཁས་ན་ལེགས་མོད་ཀྱིས། འོན་ཀྱང་རང་གི་གཞུང་ལུགས་ཁས་བླང་བ་ལ་མཁས་ཤིང་། དོན་ཁོང་དུ་ཆུད་ལ་ཐེ་ཚོམ་ཆོད་པའོ། །གཉིས་པ་འཆད་བྱེད་ལ་མཁས་པ་ནི། གང་ནས་བཤད་ཀྱང་འབྲེལ། ཅི་ཙམ་བཤད་ཀྱང་རན། ཅི་ལྟར་བཤད་ཀྱང་འཐད་པ་གསུམ་གྱིས་ངག་འབྲེལ་ཞིང་། རང་གིས་བརྗོད་བདེ་གཞན་གྱིས་གོ་སླ། གཉིས་ཀའི་རྣ་བར་སྙན་ཅིང་ཡིད་ཅགས་པའོ། །གསུམ་པ་རང་གི་ཀུན་སྤྱོད་ལ་མཁས་པ་ནི། ཚུལ་ཆོས་མ་ཡིན་པར་རང་གི་སྒོ་གསུམ་ཆོས་དང་མཐུན་པར་གནས་པའི་སྒོ་ནས་གདུལ་བྱ་དང་བ་འདྲེན་ཅིང་དད་པའི་གནས་སུ་གྱུར་པའོ། །གཞན་གྱི་ཀུན་སྤྱོད་ལ་མཁས་པ་ནི། གདུལ་བྱ་དབང་པོ་རྣོ་རྟུལ་དང་རྗེས་སུ་མཐུན་པའི་ཆོས་བསྟན་པ་ལ་མཁས་ཤིང་བཤད་པའོ། །གཞན་ཡང་སེམས་ཅན་གྱི་དོན་བྱ་བའི་ཕྱིར་བཤད་ཀྱིས། རང་གི་ཆེ་བ་འདོན་པའི་ཕྱིར་མ་ཡིན། སྙིང་རྗེ་ཆེན་པོས་བསྟན་གྱིས། ང་རྒྱལ་གྱི་ཕྱིར་མ་ཡིན། འཁོར་བ་རྒྱུན་གཅོད་པའི་ཕྱིར་བསྟན་གྱིས། ཉོན་མོངས་པ་སྤེལ་བའི་ཕྱིར་མ་ཡིན་ནོ། །གསུམ་པ་གསང་སྔགས་ཀྱི་དོན་རྟོགས་ནས་གཞན་ལ་བཤད་པའི་ཕན་ཡོན་ནི། མདོ་ལས། རྟོགས་ནས་སྨྲ་བར་གང་བྱེད་པ། །གོམས་པས་བརྗོད་དང་སྨོན་པ་ཡིས། །ཆོས་ཀྱི་རྒྱལ་པོར་དེ་འགྱུར་ཞིང་། །ཡོན་ཏན་སྤྱི་གཙུག་ཉིད་དུ་འགྱུར། །དེ་ཡང་ཅི་ལྟ་བུ་ཞེ་ན། །འདས་པའི་དུས་ན་སྔོན་བྱུང་བ། །དྲང་སྲོང་རྣལ་འབྱོར་ཀལ་ཡས་ནས། །དྲང་སྲོང་རྣམ་པ་མང་སྡེ་ལ། །ཐེག་ཆེན་གསང་བའི་བསྔགས་པ་བརྗོད། །དོན་རྣམས་ངེས་པར་བཀོད་པ་ལས། །མང་པོས་རིགས་ཆེན་འཛིན་པ་ཐོབ། །གང་དེར་བསྔགས་པ་བརྗོད་བྱེད་པ། །གསང་བདག་ཆོས་ཀྱི་རྒྱལ་པོར་འགྱུར། །དེས་ན་ཐེག་ཆེན་གསང་བ་འདི། །ཀུན་ལ་བསྔགས་པ་བརྗོད་པར་གྱིས། །དེས་ནི་ང་ཡི་དགོངས་པ་ཐོབ། །ཅེས་སོ། །གཉིས་པ་གང་གིས་ཉན་པའི་གང་ཟག་གི་རང་བཞིན་ལ་གསུམ་སྟེ། སློབ་མ་དེའི་མཚན་ཉིད། དེས་ཆོས་ཉན་ཚུལ། ཉན་པའི་ཕན་ཡོན་ནོ། །དང་པོ་ལ་གཉིས་ལས། ངན་པའི་མཚན་ཉིད་ནི། ཤེས་རབ་ཆུང་ལ་ཉོན་མོངས་པ་ཆེ་བའི་སློབ་མ་དང་། དད་པ་ཆུང་ལ་སེར་སྣ་ཆེ་བའི་སློབ་མ་དང་། བརྩོན་འགྲུས་ཆུང་ལ་འདོད་པ་ཆེ་བའི་སློབ་མ་དེ་གསུམ་སྤངས་ཏེ། ཡེ་ཤེས་ཏིང་རྫོགས་ལས། ཡང་དག་དོན་གྱི་ལྟ་བ་གསང་བ་འདི། །གང་ཟག་ཕྱིན་ཅི་ལོག་དང་ལྟ་བ་དམན། །ཐོས་པ་ཆུང་ལ་བློ་རྟུལ་ཤེས་རབ་མེད། །ནོར་ཕངས་ཁ་རལ་ལ་སོགས་སྣོད་མེད་ལ། །འདི་བསྟན་གཉིས་ཀ་བསྲེག་ཕྱིར་རབ་ཏུ་གསང་། །ཞེས་སོ། །གཉིས་པ་བཟང་བའི་མཚན་ཉིད་ནི། དད་པ་དང་ཤེས་རབ་ལྡན་པ་དང་། མོས་གུས་དང་གཏོང་ཕོད་ལྡན་པ་དང་། ངང་རྒྱུད་དང་བརྩོན་འགྲུས་ལྡན་པའི་སློབ་མར་བསྟན་པ་ཡིན་ཏེ། ཀློང་གསལ་ཉི་མའི་རྒྱུད་ལས། དད་ལྡན་སྙིང་རྗེ་གཏོང་ཕོད་ཆེ། །རྒྱུད་དུལ་སྡིག་འཛེམ་དབང་པོ་རྣོ། །གསང་ཐུབ་ཉམས་ལེན་བརྟུལ་ཞུགས་སྤྱོད། །སྐྱོ་ཤས་སྡུག་སྲན་སྙིང་རུས་ཆེ། །དེ་ནི་གསང་སྔགས་གསང་བའི་སྣོད། །ཅེས་སོ། །གཉིས་པ་ཇི་ལྟར་ཉན་པའི་ཚུལ་ལ་གཉིས་ལས། སྤང་བྱ་ནི། རྣམ་བཤད་རིག་པ་ལས། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ནང་དུ་སྡུད། །སྐྱོ་བས་ཉན་པ་དྲི་མ་ཡིན། །ཅེས་སོ། །གཞན་ཡང་ཁེ་དང་གྲགས་བློའི་སྒོ་ནས་མི་ཉན། ངོ་བསྲུང་དང་ཚུལ་ཆོས་ཀྱི་སྒོ་ནས་མི་ཉན། རང་དང་གཞན་ཁྱད་ལྟའི་སྒོ་ནས་མི་ཉན་ནོ། །གཉིས་པ་བླང་བྱ་ནི། གཞི་དང་པ་བརྟན་པོས་བཏུད། མོས་གུས་ཆེན་པོས་ཉན། རྣ་བའི་དབང་པོས་ཐོས། རིག་པའི་རྒྱུད་ལ་འགྲིམ། སེམས་ཀྱི་པདྨོ་ཕྱེ། སྙིང་གི་བུམ་པར་གསོག །དོན་གྱི་སྦྲང་རྩི་མྱོང་དགོས་པར་གསུངས་ཏེ། སྡོང་པོ་བཀོད་པའི་མདོ་ལས། རིགས་ཀྱི་བུ་བདག་ཉིད་ལ་ནད་པའི་འདུ་ཤེས་དང་། དགེ་བའི་བཤེས་གཉེན་ལ་སྨན་པའི་འདུ་ཤེས་དང་། ཆོས་ལ་སྨན་གྱི་འདུ་ཤེས་དང་། ནན་ཏན་རྗེས་སུ་བསྒྲུབ་པ་ལ་ནད་འཚོ་བའི་འདུ་ཤེས་བསྐྱེད་པར་བྱའོ། །ཞེས་སོ། །གཞན་ཡང་འཁོར་བ་སྡུག་བསྔལ་གྱི་རྒྱ་མཚོ་ལས་སྒྲོལ་བར་བྱེད་འདོད་པ་ལ་དམ་པའི་ཆོས་མིན་པ་ཅིས་ཀྱང་མི་ཕན་པ་དེའི་ཕྱིར་ཉན། ཆོས་དེ་བསྟན་པའི་བླ་མ་དེ་ཡང་དག་པར་རྫོགས་པའི་སངས་རྒྱས་དངོས་དང་འདྲ་བ་ཡིན་པས་དེའི་ཕྱིར་མཉན། དེའི་ཞལ་ནས་གསུངས་པའི་ཆོས་དེ་ཤི་སོས་ཀྱི་སྨན་པས་ཀྱང་གཅེས་པས་དེའི་ཕྱིར་མཉན་ནོ། །གསུམ་པ་དེ་ལྟར་མཉན་པའི་ཕན་ཡོན་ནི། གྷཎྜིའི་མདོ་ལས། དམ་ཆོས་བཤད་པའི་དུས་སྟོན་ཕྱིར། །རྔའམ་གྷཎྜི་བརྡུངས་པའི་སྒྲས། །ཐོས་པས་བྱང་ཆུབ་ཐོབ་གྱུར་ན། །ཉན་ཕྱིར་ལྷགས་པ་སྨོས་ཅི་དགོས། །ཞེས་པ་དང་། ཁྱད་པར་གསང་བསྔགས་ཐོས་པའི་ཡོན་ཏན་ནི། གཅན་འཕྲང་ལས། དཔེར་ན་གྱི་ལིང་སྒྲོག་བཀྲོལ་ལྟར། །རྣམ་གྲོལ་ཐོས་བསམ་སྒོ་མོ་ཡིས། །ཤེས་རྒྱུད་ཀུན་གྲོལ་ཐོགས་མེད་འགྲོ། །ཞེས་སོ། །གཉིས་པ་གང་འཆད་པར་བྱ་བ་དམ་ཆོས་ཀྱི་རྣམ་བཞག་ལ་གསུམ་སྟེ། གང་ཟག་འཇུག་ངོ་ཤེས་པར་བྱ་བའི་ཕྱིར་དམ་པའི་ཆོས་ངོས་བཟུང་བ་དང་། དེ་ཉིད་ཀྱི་དོན་མ་ནོར་བར་ཤེས་པར་བྱ་བའི་ཕྱིར་བཤད་ཐབས་བསྟན་པ་དང་། བཤད་བྱ་གཞུང་དོན་དངོས་ཀྱི་སྐབས་དང་གསུམ་མོ། །དང་པོ་ཆོས་ངོས་བཟུང་བ་ནི། སྤྱིར་འཁོར་འདས་གཉིས་ལས་འདས་པའི་ཆོས། དེ་ལ་ཐེག་པ་ཆེ་ཆུང་གཉིས་ལས་ཐེག་ཆེན། ཐེག་ཆེན་ལ་མདོ་སྔགས་གཉིས་ལས་གསང་སྔགས། སྔགས་ལ་ཕྱི་ནང་གཉིས་ལས་ནང་པ། དེ་ལ་མ་ཧཱ། ཨ་ནུ། ཨ་ཏི་གསུམ་ལས་མ་ཧཱ། དེ་ལ་ཕ་རྒྱུད། མ་རྒྱུད། གཉིས་མེད་ཀྱི་རྒྱུད་དང་གསུམ་ལས། འདིར་གཉིས་མེད་ཀྱི་རྒྱུད། དེ་ལ་རྒྱུད་དང་མན་ངག་གཉིས་ལས་འདིར་མན་ངག །མན་ངག་ལའང་རྒྱུད་ཀྱི་དོན་མངོན་པར་རྟོགས་པ་དང་། བསླབ་ཅིང་ཉམས་སུ་བླང་བའི་མན་ངག་གཉིས་ལས། འདིར་གཉིས་ཀ་བཤད་ཀྱང་སྔ་མ་གཙོ་ཆེ་བར་སྟོན། དེ་ལ་ཁོག་དབུབ། ས་བཅད། འགྲེལ་པ་གསུམ་ལས། འདི་ནི་སྤྱི་གཅོད་དོ། །གཉིས་པ་བཤད་པའི་ཐབས་ནི། འདི་ཉིད་རྒྱུད་ལ་བརྟེན་པའི་མན་ངག་ཡིན་པས། རྩིས་འགོ་ལྔས་འཆད་པར་བྱེད་དེ། ལུང་མཆོག་བླ་མ་ལས། ཐོས་ཆུང་གསར་བུ་ཡིད་ཆེས་བསྐྱེད་པའི་ཕྱིར། །མན་ངག་སྤྱི་དོན་རྩིས་འགོས་ཀླད་ནས་གཞོམ། །ཞེས་པས། རྩིས་འགོ་ལྔ་ནི། སྡེ་སྣོད་སྤྱི་བཅིང་ལས། དགོངས་པ་ཁྲོལ་བའི་སློབ་དོན་དང་། །མཚན་ལྔ་ལྡན་པའི་དམ་ཆོས་དང་། །ཐེག་པ་སྡེ་སྣོད་འབྱུང་བའི་ཁུངས། །ཉེ་བར་ཚིག་གིས་བསྡུས་གནས་དང་། །དོན་དུ་འགྱུར་བའི་དགོས་པ་རྣམས། །བསྟན་ཆོས་ཀུན་གྱི་རྩིས་མགོ་ཡིན། །ཅེས་པས་དོན་ལྔ་ལས། དང་པོ་ཁུངས་བཙུན་ཞིང་ཡིད་ཆེས་པར་བྱ་བའི་ཕྱིར་སློབ་དཔོན་གང་གིས་མཛད་པ་ནི། བརྩམ་ཚད་རབ་འབྲིང་ཐ་མ་གསུམ་དང་ལྡན་པའི་སློབ་དཔོན་ཆེན་པོ་སངས་རྒྱས་གསང་བས་མཛད་པ་ཡིན་ཏེ། རྫོགས་ཆེན་རྒྱན་ལས། ཆོས་ཉིད་མངོན་སུམ་རྟོགས་པ་རབ། །བླ་མ་ཡི་དམ་མཁའ་འགྲོ་ཡིས། །ལུང་བསྟན་ཐོབ་པ་འབྲིང་པོ་ཡིན། །ལ་ཤན་བཀའ་ལུང་ཚིག་ལ་མཁས། །བྱེ་བྲག་ཕྱེད་པ་ཐ་མ་ཡིན། །ཞེས་སོ། །གཉིས་པ་བཀའ་དང་མི་འགལ་བར་བྱ་བའི་ཕྱིར་རྒྱུད་གང་ནས་བཏུས་པ་ནི། འདི་ཉིད་ལས། སྒྱུ་འཕྲུལ་དྲྭ་བ་རྡོ་རྗེ་སེམས། །གསང་བའི་སྙིང་པོའི་རྒྱུད་དག་ལས། །ཞེས་པ་དང་། ལམ་རིམ་ལས། སྟོང་ཕྲག་བརྒྱ་པའི་རྒྱུད་དག་ལས། །ཞེས་གསུངས་པས། ཐུགས་སྒྱུ་འཕྲུལ་དྲྭ་བ་ལེའུ་སྟོང་ཕྲག་བརྒྱ་པའི་རྒྱུད་ནས་བཏུས་སོ། །གསུམ་པ་ཐེག་པའི་རང་གཞུང་ཚུགས་པར་བྱ་བའི་ཕྱིར་ཕྱོགས་གར་གཏོགས་པ་ནི་མ་ཧཱ་ཡོ་གའི་ཐེག་པར་གཏོགས་སོ། །བཞི་པ་བསྟན་པ་ལ། མཚན་ངེས་ཤིང་དོན་གྱི་མདོ་ཙམ་ཞིག་རྟོགས་པར་བྱ་བའི་ཕྱིར་མཚན་ནི། སྤྱིར་མཚན་གྱི་འདོད་ལུགས་ལ། ཡུལ་ལ་བཏགས་པ། ཞུ་བ་པོ་ལ། དཔེ་ལ། རྣམ་གྲངས་ལ། དོན་ལ་བཏགས་པ་དང་ལྔ་ལས། འདི་ནི་ཐུགས་ཀྱི་ཐིགས་པ་ཞེས་པས། དོན་རང་གི་ངོ་བོ་ལས་མཚན་དུ་བཏགས་པའོ། །ལྔ་པ་བརྩམ་པ་ལ་དོན་ཡོད་པར་བྱ་བའི་ཕྱིར་གང་ཟ ག་གང་གི་དོན་དུ་མཛད་པ་ནི། འདི་ཉིད་ལས། སྐལ་ལྡན་ཕྱིར་ཅེས་པས། སློབ་དཔོན་ཉིད་ཀྱི་དངོས་འཁོར་དང་མ་འོངས་པའི་གང་ཟག་ལས་འཕྲོ་དང་སྐལ་བར་ལྡན་པ་རྣམས་ཀྱི་དོན་དུ་མཛད་པའོ། ༈ །གསུམ་པ་བཤད་བྱ་གཞུང་དོན་དངོས་ཀྱིི་སྐབས་ལ་གསུམ་སྟེ། ཀླད་ཀྱི་དོན་དང་། གཞུང་གི་དོན་དང་། ཞབས་ཀྱི་དོན་ནོ། །དང་པོ་ལ་གསུམ་སྟེ། བགྲང་། དང་པོ་མཚན་བསྟན་པ་དང་། དྲང་། དང་པོ་ལའང་གསུམ་སྟེ། མཚན་བཀླག་པ་དང་། མཚན་བསྒྱུར་བ་དང་། མཚན་བཤད་པའོ། །དང་པོ་ནི། རྒྱ་གར་སྐད་དུ། ཙིཏྟ་བིནྡུ་ཨུ་པ་དེ་ཤ་ན་མ། བོད་སྐད་དུ། ཐུགས་ཀྱི་ཐིགས་པའི་མན་ངག་ཅེས་བྱ་བའོ། །གཉིས་པ་མཚན་བསྒྱུར་བ་ལ། སྒྲ་ཐད་ལོག་ཏུ་དང་། ཐང་ལོག་ཏུ་དང་། དཀྲུགས་ཏེ་བསྒྱུར་བ་དང་གསུམ་ལས། འདིར་ནི་གཅུས་པ་དང་བསྣོལ་བ་མི་མངའ་བས་དང་པོ་ཡིན་ཏེ། ཙིཏྟ་ཐུགས་ཀྱི། བིནྡུ་ཐིགས་པའི། ཨུ་པ་དེ་ཤ་མན་ངག །ན་མ་ཞེས་བྱ་བ་སྟེ། དེ་ཡང་སྒྱུར་མཁན་གྱི་ལོ་ཙཱ་བ་ལ། ཚིག་དོན་གཉིས་ཀ་ལ་མཁས་ཤིང་ཁོང་དུ་ཆུད་པ་ནི་ཞུས་ཆེན་གྱི་ལོ་ཙཱ་དང་། སྒྲ་རྐྱང་པ་ཙམ་ཤེས་པ་སྒྲ་སྒྱུར་ལོ་ཙཱ་དང་། རྒྱ་སྐད་ལ་བོད་སྐད་ཀྱི་མཆན་ཙམ་བཏབ་ཤེས་པ་ནི་མཆན་བུ་ལོ་ཙཱ་དང་། རྒྱ་གར་གྱི་པཎྜི་ཏ་ལ་བོད་དུ་ཆོས་ཞུས་ཤིས་བསྒྱུར་བ་ནི་གོ་ལོ་ཙཱ་དང་བཞི་ལས། གཞུང་འདི་ཉིད་སྒྱུར་མཁན་གྱི་རྨ་རིན་ཆེན་མཆོག་ནི། ཞུས་ཆེན་གྱི་ལོ་ཙཱ་དང་། གོ་ལོ་ཙཱ་གཉིས་ཀ་ཡིན་ནོ། །གསུམ་པ་མཚན་བཤད་པ་ནི། སློབ་དཔོན་ཨ་རོ་ཡེ་ཤེས་ཀྱི་ཞལ་ནས། རྒྱ་ནི་མ་ཉམས་པ། གར་གྱི་བསྒྱུར་བ། སྐད་ནི་ཐོས་པར་བྱེད་པ། དུ་ནི་འདུ་བར་བྱེད་པའོ། །ཞེས་གསུངས་སོ། །གཞན་མཁས་པ་རྣམས་མཐུན་པའི་དགོངས་པ་ནི། རྒྱ་གར་ནི་འདོད་རྒྱལ་གྱི་སྒྲ་ཡིན་ལ། འོ་ན་ཐོག་མར་སྨོས་པའི་དགོས་ཆེད་ནི། འཕགས་པ་རྣམས་ཀྱིས་བཞུགས་གནས་ཡིན་པས་ཁུངས་བཙུན་ཅིང་ཡིད་ཆེས་པའི་ཕྱིར་དང་། ལོ་པཎ་རྣམས་ཀྱིས་ཕྱི་རབས་པ་ལ་དྲིན་བཞག་པའི་ཕྱིར་རོ། །ཡུལ་པ་དེ་རྣམས་ཀྱི་སྐད་དུའམ་སྐད་ལ་ཞེས་བྱ་སྟེ། སྨྲ་སྒོ་ལས། དུ་ལ་སོགས་པ་ལ་དང་མཐུན། །ཞེས་པས། ཙིཏྟ་བིནྡུ་ཨུ་པ་དེ་ཤ་ན་མ་ཞེས་བྱ་ལ། བོད་ནི་ཁ་བ་ཅན་ཏེ་བོད་དང་བོད་ཆེན་པོ་གཉིས་སོ། །ཡུལ་དེ་ཉིད་ཀྱི་སྐད་དུའམ་སྐད་ལ། ཐུགས་ཀྱི་ཐིགས་པའི་མན་ངག་ཅེས་བྱ་བ་ཞེས་འདོགས་སོ། །དེ་ལའང་གཉིས་ཏེ། བརྗོད་བྱ་དོན་དང་། བརྗོད་བྱེད་ཚིག་གོ། །དང པོ་ནི། ཐུགས་ཞེས་པ་སེམས་ཉིད་རང་བྱུང་གི་ཡེ་ཤེས་སྤྲོས་པ་ཐམས་ཅད་དང་བྲལ་བ་དེ་ཉིད་ཀྱི་ངོ་བོ་ནི། ཉུང་ལ་འདུས་པ། མ་འཕྲོས་པ་གསུམ་གྱི་ཕྱིར་ཐིགས་པའི། དེ་ཉིད་ཚེག་ཆུང་ལ་དོན་ཆེ་བས་མན་ངག་ཅེས་བྱ་བའོ། །གཉིས་པ་ནི། ཐུགས་ཀྱི་རྒྱུད་རྒྱ་མཚོ་དང་འདྲ་བའི་ནང་ནས། ཐིགས་པ་ལྟ་བུའི་ཚིག་དོན་ཉུང་ལ་འདུས་པ་འཕྲོས་པ་གསུམ་གྱིས་བསྒྲུབ་སྟེ། དེ་ཡང་རྒྱུད་ལ་ལེའུ་སྟོང་ཕྲག་བརྒྱད་པའི་རྒྱུད་ཀྱི་ཚིག་ཚོགས་རྣམས། འདིར་ཚིག་ལེའུ་བཞིར་བྱས་པས་ཉུང་ལ། སྟོང་ཕྲག་བརྒྱའི་དོན་རྒྱས་པ་སྣང་བ་བཞི་པོ་རྣམས། འདིར་དོན་སྣང་བ་བཞིར་འདུས་ལ། གདུལ་བྱ་གཟུ་ལུམས་རས་ཆོད་ཅན་དགག་པའི་ཕྱིར་རྒྱུད་དོན་ལ་བརྡ་ཚིག་དང་། ལྡེམ་དགོངས་དང་རྒྱུད་འཁྲུགས་པ་ལ་སོགས་མར་འཕྲོས་པ་ཡིན་ལ། འདིར་བསྟན་ཆོས་འཁྲུག་པ་བསྡེབས། གཅུས་པ་བསྲངས། གབ་པ་ཕྱུང་བས་ཡར་འཕྲོས་པའོ། །ལེའུ་སྟོང་ཕྲག་བརྒྱའི་རྒྱུད་དོན་རྣམས་གཏན་ལ་ཕབ་ཅིང་ཉམས་སུ་ལེན་པ་ནི་ཤིན་ཏུ་དཀའ་ལ། འདི་སྣང་བ་བཞིའི་དོན་ལེའུ་བཞིར་བྱས་པ་གཏན་ལ་ཕབ་ཅིང་ཉམས་སུ་ལེན་པ་ནི་ཚེགས་ཆུང་ལ། འདི་ཉིད་ཀྱི་ནང་དུ་སྟོན་པའི་སྣང་བ་བཞིའི་དོན་རྟོགས་ན། སྟོང་ཕྲག་བརྒྱའི་རྒྱུད་དོན་རྣམས་ཁོང་དུ་ཆུད་པས་ན་མན་ངག་ཅེས་བྱ་བ་སྟེ། མདོ་ལས། ཐབས་ཆེན་ཚེགས་ཆུང་དོན་དཔག་མེད། །བྱ་སླ་དཔག་དཀའ་མན་ངག་གོ། །ཞེས་སོ། །གཉིས་པ་ཕྱག་འཚལ་བ་དང་། དྲང་། ཕྱག་འཚལ་ལོ་ཞེས་པ་བཤད་པའི་གཞིར་བཞག །དེའི་ཁྱད་པར་གྱི་ཆོས་ལ་ལྔ་སྟེ། གང་གིས་འཚལ། གང་ལ། ཚུལ་ཇི་ལྟར། དགོས་ཆེད་ཅིའི་ཕྱིར། བརྒལ་ལེན་ནོ། །དང་པོ་གང་གིས་ན། སྔོན་བྱུང་དུ་སློབ་དཔོན་ཆེན་པོ་སངས་རྒྱས་གསང་བས། རྗེས་འཇུག་འཆད་ཉན་པ་རྣམས་ཀྱིས་སོ། །གཉིས་པ་གང་ལ་ན་བཅོམ་ཞེས་པ་ཕྲིན་ལས་ཀྱིས་བདུད་འཇོམས་པ་སྟེ། དེ་ཡང་། ཉོན་མོངས་པ་ལྔ་ཡེ་ཤེས་ལྔར་ཡེ་ནས་གནས་ཀྱང་དེ་ངོ་མ་ཤེས་པས་ཉོན་མོངས་པའི་བདུད་བྱུང་ལ། ཉོན་མོངས་པ་ཡེ་ཤེས་སུ་གསལ་ཙམ་ན། ཉོན་མོངས་པའི་བདུད་རང་བཞིན་གྱིས་བཅོམ་པ་ནི། ཞི་བའི་འཕྲིན་ལས་སོ། །ཕུང་པོ་ལྔ་རིགས་ལྔར་ངོ་མ་ཤེས་པས་ཕུང་པོའི་བདུད་བྱུང་ལ། དེ་ཉིད་རིགས་ལྔར་གསལ་བར་རྟོགས་པས་ཕུང་པོའི་བདུད་བཅོམ་པ་ནི་རྒྱས་པའི་འཕྲིན་ལས་སོ། །སེམས་ཉིད་སྐྱེ་ཤི་གཉིས་མེད་ལ་གཉིས་སུ་བཟུང་བས། འཆི་བདག་གི་བདུད་བྱུང་ལ། སྐྱེ་ཤི་གཉིས་མེད་དུ་གསལ་ཙམ་ན་འཆི་བདག་གི་བདུད་བཅོམ་པ་ནི་དབང་གི་ཕྲིན་ལས་སོ། །དོན་ལྷ་རྟོག་གཉིས་མེད་ལ་གཉིས་སུ་བཟུང་བས་ལྷའི་བུའི་བདུད་བྱུང་ལ། ལྷ་རྟོག་གཉིས་མེད་མངོན་དུ་བྱས་ཙམ་ན་ལྷའི་བུའི་བདུད་བཅོམ་པ་ནི་དྲག་པོའི་འཕྲིན་ལས་ཡིན་ཏེ། རྒྱས་པ་ལ། བདུད་སྡེ་ཚར་གཅོད་ཅེས་བྱ་བའི་དམ་ཚིག་ནི། ཉོན་མོངས་པ་ཉིད་རྣམ་པར་དག །ཕུང་པོ་ལྔ་ཉིད་མངོན་སངས་རྒྱས། །སྐྱེ་ཤི་མེད་པའི་གཡུང་དྲུང་གནས། །བདག་ཉིད་ལྷ་ཡི་དཀྱིལ་འཁོར་ནི། །ཞེས་པ་དང་། རྡོ་རྗེ་ལམ་རིམ་ལས། བདུད་བཞི་ལ་སོགས་རིག་པའི་གདེང་གིས་བཅོམ། །ཞེས་སོ། །ལྡན་ཞེས་ཡོན་ཏན་གྱི་མཚན་ཏེ། སྐུ་གསུང་ཐུགས་ཡོན་ཏན་ཕྲིན་ལས་ལྔའམ་ཉེར་ལྔ་ལ་སོགས་པ་རྣམས་ཐུགས་རང་རིག་པའི་ཡེ་ཤེས་ལ་ལྷུན་གྱིས་གྲུབ་པ་ཡིན་སྟེ། ལམ་རིམ་ལས། སྐུ་ལྔ་ལ་སོགས་ཆེ་ཡོན་ཀུན་དང་ལྡན། །ཅེས་སོ། །ལུང་གྲྭ་ཆད་མ་ཉམས་པ་ཟུར་ལ་བསླང་བ་འཆད་པ་པོའི་གཉེར་བྱ་བ་ཡིན་པས། འདས་ཞེས་པ་མཚན་ཉིད་ཀྱི་མཚན་ཏེ། དེ་ཉིད་ཀྱི་ངོ་བོ་ལ་ཡོད་མེད་སྣང་སྟོང་རྟག་ཆད་ལ་སོགས་ཕྱོགས་རེའི་མཐའ་དང་བྲལ་བ་སྟེ། དེ་ལས། རང་གི་ངོ་བོ་འདི་ཞེས་བསྟན་དུ་མེད། །ཅེས་སོ། །དཔལ་ཞེས་པ་ཆེ་བའི་མཚན་ཏེ། དེ་ལ་གསུམ་ལས། དང་པོ་གཞི་རང་བཞིན་ལྷུན་གྱིས་གྲུབ་པའི་དཔལ་ནི། གཞི་དོན་བྱང་ཆུབ་ཀྱི་སེམས་རང་བྱུང་གི་ཡེ་ཤེས་ལ་འབྲས་བུའི་ཆེ་ཡོན་ཉེར་ལྔ་ལྷུན་གྱིས་གྲུབ་པ་སྟེ། ཏིལ་ལ་མར་ནག་ལྷུན་གྱིས་གྲུབ་པ་བཞིན་ནོ། །གཉིས་པ་རྟོགས་པ་བདག་གི་དཔལ་ནི། དོན་དེ་ཉིད་རྟོགས་ཤིང་གོམས་པས་འབྲས་བུ་སྐུ་དང་ཡེ་ཤེས་ཀྱི་དཀྱིལ་འཁོར་མངོན་སུམ་དུ་གྱུར་པ་སྟེ། ཉི་མ་ནམ་མཁའི་མཐོངས་སུ་ཤར་བ་ལྟ་བུའོ། །གསུམ་པ་ཐུགས་རྗེ་ཆེན་པོ་ཞར་ལ་བྱུང་བའི་དཔལ་ནི། དེ་ལྟར་བདག་དོན་འབྲས་བུ་ཐོབ་ཙམ་ན། གཞན་གདུལ་བྱ་ཐམས་ཅད་ལ་མཛད་པ་ཕྲིན་ལས་ངང་ངམ་ཤུགས་ཀྱིས་འབྱུང་བ་སྟེ། ཉི་མའི་འོད་ཟེར་དྲོ་འཇམ་རྩོལ་མེད་ཀྱིས་གཞན་གྱི་མུན་པ་དང་འཁྱག་པ་ཤུགས་ཀྱིས་ཞུ་བ་བཞིན་ནོ། །དེ་ལྟར་དཔལ་གསུམ་ལྷུན་གྱིས་གྲུབ་པའི་ངོ་བོ་རྡོ་རྗེའི་དོན་ནི། རང་བཞིན་དབྱེར་མེད་ཅིང་ངོ་བོ་འདུས་མ་བྱས་པས་མཚན་ཉིད་སྐྱེ་འཇིག་དང་བྲལ་བའོ། །དེ་ཉིད་ལས་མི་འདའ་པས་སེམས། དེས་ཕྱོགས་འཛིན་ཐམས་ཅད་ཕར་ལ་འཇོམས་ཤིང་ཚུར་ལ་གང་གིས་ཀྱང་མི་ཚུགས་པས་དཔའ་བོ་དེ་ཉིད་དཀྱིལ་འཁོར་གྱི་གཙོ་བོ་སྟེ། གསང་སྙིང་ལས། རིགས་ཀྱི་རིགས་ཏེ་རིགས་ཀྱི་གཙོ། །ཞེས་སོ། །དེས་ཤེས་བྱ་ཀུན་མ་འདྲེས་ལ་ཡོངས་སུ་རྫོགས་པར་མཁྱེན་པ་ནི། དེ་ཉིད་ལས། ཐུགས་ཀྱི་ཐུགས་ཏེ་ཐུགས་ཀྱི་མཆོག །ཅེས་སོ། དེའང་མཐའ་གཉིས་དང་བདུད་བཞི་ལས་རྒྱལ་བའི་དེ་བཞིན་གཤེགས་པ་ཀུན་གྱི་ཐུགས་ཀྱི་དགོངས་པ་ཆོས་ཀྱི་འཁོར་ལོ་བསྐོར་བ་ནི། འཁོར་ལོ་བསྒྱུར་རྒྱལ་གྱིས་རྒྱལ་སྲིད་ཀྱི་ཐོག་མར་གསེར་འཁོར་སོགས་བསྐོར་བ་དང་། འཁོར་བ་དང་། གཅོད་པ་དང་འདྲ་བར། ཀུན་མཁྱེན་སངས་རྒྱས་རྣམས་ཀྱིས་གདུལ་བྱ་ལ་ཆོས་གསུངས་པ་ནི། ཆོས་འཁོར་བསྐོར་བ་དང་། གདུལ་བྱའི་རྒྱུད་ལ་གོ་མྱོང་རྟོགས་གསུམ་དུ་འཆར་བ་ནི་འཁོར་བ་དང་། དཔེ་གདུལ་བྱའི་མ་རྟོགས་ལོག་རྟོག་ཐེ་ཚོམ་གྱི་དྲྭ་བ་དང་སྒྲིབ་པ་སེལ་བ་ནི་གཅོད་པ་སྟེ། དེ་ལྟར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་བསྐོར་བའི་ནང་ནས་འབྲས་བུའི་ཐེག་མཆོག་གསང་སྔགས་བླ་མེད་ཀྱི་རྒྱུད་གསང་བའི་སྙིང་པོའི་དོན་གབ་སྦས་རྣམས་མངོན་སུམ་དུ་སྟོན་པར་མཛད་པའི་སྟོན་པ་དེ་ལ། གསུམ་པ་ཚུལ་ཅི་ལྟར་དུ་འཚལ་ན་གསུམ་སྟེ། སྟོན་པ་དང་རྩོམ་པ་པོའི་དགོངས་པ་གཉིས་སུ་མེད་པ་ནི་ལྟ་བ་རྟོགས་པའམ་མི་ཕྱེད་འདྲེས་པའི་ཕྱག་ཡིན་ཏེ། པཉྩ་ཀ྄་མ་ལས། ཇི་ལྟར་ཆུ་ལ་ཆུ་བླུག་གམ། །དེ་བཞིན་མར་ལ་མར་བཞག་བཞིན། །རང་གི་ངང་གི་ཡེ་ཤེས་གང་། །ལེགས་མཐོང་གང་ཡིན་འདིར་ཕྱག་འཚལ། །ཞེས་སོ། །ཡིད་ཀྱིས་ཞེས་སྒོམ་པ་གོམ་པའི་ཕྱག་སྟེ། ཅི་སྐད་དུ། གང་ཞིག་རྟོགས་ནས་འཇུག་པ་ཡི། །བསྒྲུབས་པ་གང་ཡིན་འདིར་ཕྱག་འཚལ། །ཞེས་སོ། །ཕྱག་འཚལ་ལོ་ཞེས་པ་སྤྱོད་པ་ཡ་རབ་ཀྱི་ཕྱག་སྟེ། བཟང་སྤྱོད་སྨོན་ལམ་ལས། ལུས་དང་ངག་ཡིད་དྭངས་བས་ཕྱག་བགྱིའོ། །ཞེས་པ་དང་། ཡོ་ག་ལས། ལུས་ཀྱིས་ཕྱག་འཚལ་ཡན་ལག་ས་ལ་གཏུག །ངག་གིས་ཕྱག་འཚལ་བསྟོད་དེ་ངག་སང་སང་། །ཡིད་ཀྱིས་ཕྱག་འཚལ་དགའ་དད་ཡིད་བྲིང་བྲིང་། །སྒོ་གསུམ་དང་བའི་སྒོ་ནས་ཕྱག་འཚལ་ལོ། །ཞེས་སོ། །བཞི་པ་དགོས་ཆེད་ཅིའི་ཕྱིར་ན་གཉིས་ཏེ། སྔོན་བྱུང་གི་དགོས་ཆེད་དང་། རྗེས་འཇུག་གིས་ཡི་གེ་རིས་སུ་བཀོད་པའི་དགོས་ཆེད་དོ། །དང་པོ་ལ་བཞི་སྟེ། སྟོན་པ་ལ་དབང་མི་ཟ་ཞིང་རྟོགས་ནས་བརྩམ་པ་བྱིན་རླབས་སུ་སྣང་བའི་བརྡར་སྟོན་པ་དང་། ཆོས་ཉིད་མཉམ་པ་ཉིད་ལ་ཁུངས་དབྱུང་ཞིང་ཆོས་ཀྱི་གྲུབ་ཚུལ་མི་ཉམས་པ་དང་། ཚོགས་གཉིས་རྫོགས་ཤིང་སྒྲིབ་གཉིས་སྦྱང་བས་བར་ཆད་ཀྱི་རྐྱེན་བགེགས་ཉེ་བར་ཞི་བ་དང་། བརྩམ་པ་མཐར་དབྱུང་བའི་དགོས་ཆེད་ཡོད་དོ། །གཉིས་པ་ལ་གཉིས་ཏེ། བདག་ཉིད་ཡ་རབས་སུ་ཤེས་པའི་དང་། ཉན་བཤད་མཐར་ཕྱིན་པའི་དགོས་ཆེད་ཡོད་དོ། །ལྔ་པ་བརྒལ་ལེན་ནི། ཕྱག་འཚལ་བའི་ཡུལ་རྒྱལ་བ་རིགས་ལྔ་ལ་ཁྱད་པར་ཡོད་དམ་མེད། ཡོད་ན། སངས་རྒྱས་རིགས་ལྔ་བཟང་ངན་ཅན་དུ་འགྱུར། མེད་ན་རྡོ་རྗེ་སེམས་དཔའ་ལ་སྒོས་སུ་ཕྱག་འཚལ་བ་འགལ་ལོ་ཞེ་ན། ལན་ནི། སྤྱིར་སངས་རྒྱས་རིགས་ལྔའི་དགོངས་པ་ལ་མཐོ་དམན་དང་བཟང་ངན་མེད་ཀྱང་། བྱེ་བྲག་ཏུ་གདུལ་བྱའི་མོས་པའི་དབང་གིས་འདིར་ཐུགས་སྒྱུ་འཕྲུལ་དྲྭ་བའི་སྐབས་སུ་འཆད་པའི་སྐྱེས་བུ་དང་དཀྱིལ་འཁོར་གྱི་གཙོ་བོ་ཡིན་པའི་ཕྱིར་རྡོ་རྗེ་སེམས་དཔའ་ལ་ཕྱག་འཚལ་བ་སྟེ། རྒྱས་པ་ལས། རྡོ་རྗེ་སེམས་པ་དཀྱིལ་ཡིན་ཏེ། །རིགས་བཞི་ལྷ་དང་ལྷ་མོའི་འཁོར། །ཞེས་པ་དང་། དཀྱིལ་འཁོར་གཙོ་བོ་སྐྱེས་བུ་མཆོག །ཅེས་པ་དང་། རྡོ་རྗེ་སེམས་དཔའི་བཀས་བཤད་པའི། །ཞེས་པ་དང་། མི་བསྐྱོད་རྒྱལ་པོ་མདུན་ན་གནས། །ཞེས་སོ། །སློབ་དཔོན་ཉིད་ཀྱི་ཐུགས་དམ་གྱི་གཙོ་བོ་ཡིན་པའི་ཕྱིར་ན། རྡོ་རྗེ་སེམས་དཔའ་ཁོ་ན་ལ་ཕྱག་འཚལ་བ་ཡིན་ཏེ། སྤྱན་འབྱེད་ལས། དམ་པའི་ལྷ་ཕྱིར་ཕྱག་འཚལ་ལོ། །ཞེས་གསུངས་སོ། །གསུམ་པ་བཤད་བཤད་པར་དམ་བཅའ་བ་ལ་གཉིས་ཏེ། བགྲང་། དང་པོ་དམ་བཅའ་བ་དངོས་དང་། དྲང་། དེ་ཡང་ཕྱག་འཚལ་ནས་ཅི་བྱེད་ན། བསྟན་པར་བྱ། གང་བསྟན་ན་རིན་ཆེན་བཅུད་ཐུགས། གང་གི་དོན་དུ་བསྟན་ན་སྐལ་ལྡན་ཕྱིར། འོ་ན་རང་བཟོ་མ་ཡིན་ནམ་ཞེ་ན་སྒྱུ་འཕྲུལ་དྲྭ་བ་རྡོ་རྗེ་སེམས། གསང་བའི་སྙིང་པོའི་རྒྱུད་དག་ལ་བརྟེན་ནས། བལྡབ་པར་མི་འགྱུར་རམ་ཞེ་ན་བསྡུས་ཏེ། འོ་ན་ལྷག་ཆད་ཅན་དུ་མ་སོང་ངམ་ཞེ་ན་ལེགས་པར་ཅེས་པ་ནི་ཁོག་བསྡེབས་ནས་བསྡུས་དོན་ལྟར་བཤད་པ་ཡིན་ལ། དེ་ཉིད་རྒྱས་པར་བཤད་ན། དེའང་འབྲུའི་འདུག་ས་བསྒྱུར་དོན་གྱི་གོ་རིམ་བསྡེབ་སྟེ། སྟོན་པ་རྡོ་རྗེ་སེམས་དཔའ་དེས་གསུངས་པའི་བསྟན་པ་ནི། དཔེ་དོན་རྟགས་གསུམ་གྱིས་འཆད་དེ། དཔེ་ནི་སྒྱུ་འཕྲུལ་དྲྭ་བ། དོན་ནི་ཐབས་ཤེས་རབ་དབྱེར་མེད་པ། རྟགས་ལྷ་ཡབ་ཡུམ་འཁྲི་ལ་སྦྱོར་ཡིན་ཏེ། དེ་ཡང་འཁྲུལ་པ་ཕྱི་ནང་གི་དངོས་པོ་ཐམས་ཅད་རང་བཞིན་རང་རྒྱུད་ཅན་དུ་མ་གྲུབ་པ་སྒྱུ་མ་སྟེ། དོན་ནི་ཤེས་རབ་རང་བཞིན་མེད་པ། རྟགས་ནི་ལྷ་ཡུམ། འཕྲུལ་ཡེ་ཤེས་ཀྱི་སྣང་བ་ཅིར་ཡང་འཆར་བ་ཐབས་འགག་མེད། རྟགས་ལྷ་ཡབ་དྲྭ་བ་མདོ་མདུད་གཅིག་ནས་གཉིས་སུ་འབྲེལ་པ་ལྟར་དོན་ཐབས་ཤེས་རབ་གཉིས་མེད། རྟགས་ལྷ་ཡབ་ཡུམ་འཁྲིལ་སྦྱོར། དེ་ལྟར་བདེན་གསུམ་དབྱེར་མེད་དེ་ཉིད་ཟབ་ཅིང་རྟོགས་དཀའ་ཞིང་དོན་གྱི་བཅུད་འདུས་པས་ན་གསང་བའི་སྙིང་པོའི་རྒྱུད་དག་ལ་བརྟེན་ནས། དགོས་འདོད་ཐམས་ཅད་འབྱུང་བས་ནོར་བུ་རིན་པོ་ཆེ་དང་འདྲ་བའི་རྒྱུད་དབུ་ཞབས་ཀྱི་དོན་བཅུད་ཀྱི་ཡོན་ཏན་ཐམས་ཅད་འདུས་པའི་ཐུགས་ཀྱི་ཐིགས་པ་འདི་ཉིད། དངོས་འཁོར་དང་མ་འོངས་པའི་གང་ཟག་འདིར་འཇུག་ཅིང་གོ་རྟོགས་ཀྱི་སྐལ་བ་དང་ལྡན་པ་རྣམས་ཀྱི་དོན་བྱ་བའི་ཕྱིར་དུ། རྒྱུད་དོན་ནོར་འཁྲུལ་ལྷག་ཆད་མེད་པར་ལེགས་པར་རྒྱལ་བའི་བཀའ་དང་། བླ་མ་དམ་པའི་མན་ངག་དང་། རང་གི་རིག་པ་ཚད་མ་གསུམ་དང་མི་འགལ་བར་བྱས་ནས། གང་ཟག་གཟུ་ལུམས་དང་རས་གཅོད་ཅན་རྣམས་དགག་པར་བྱ་བའི་ཕྱིར་དུ་རྒྱུད་སྟོད་སྨད་དུ་འཐོར་བ་རྣམས་སློབ་དཔོན་སངས་རྒྱས་གསང་བའི་ཉེར་ལེན་གྱི་ཤེས་རབ་ཀྱིས་བསྡུས་ཏེ་ཐུགས་ཀྱི་དགོངས་པ་ཞལ་དུ་ཕྱུང་ནས་གཞན་དོན་དུ་བསྟན་པར་བྱ་སྟེ་ཞེས་བཤད་པར་དམ་བཅའ་བའོ། །དེའང་རྒྱུད་ལ་བརྟེན་ནས་བརྩམ་ཚུལ་དུ་དམ་བཅའ། དགོས་ཆེད་དང་ལྡན་པར་དམ་བཅའ། མདོར་བསྟན་དུ་དམ་བཅའ། ཁེངས་སྐྱུངས་དང་ལྡན་པར་དམ་བཅའ་བ་དང་བཞི་ཡོད་པ་ལས། འདིར་སྔ་མ་གསུམ་དུ་ཤེས་པར་བྱའོ། །དེ་ཡང་འགྲེལ་པ་ཚིག་གསལ་ལས། གཞན་དོན་བརྩམ་པ་ཅན་རྣམས་སྲོག་ཕྱིར་ཡང་། །རང་གི་ནུས་པ་ལྷོད་པར་མི་བྱེད་དེ། །སྐྱེས་བུ་དམ་པས་ཁུར་ཅི་ཁུར་བ་དག །ཉམ་ངའི་ལམ་དུ་ནམ་ཡང་དོར་མི་བྱ། །ཞེས་སོ། །གཉིས་པ་མན་ངག་བརྩམ་ཚུལ་དང་སྤྱིར་བསྟན་གྱི་སྒོ་ནས་བཤད་པ་དམ་བཅའ་བ་དང་འབྲེལ་ཚུལ་ལོ། །དྲང་། ཕྱིའི་རྒྱ་མཚོ་ཆེན་པོ་ལས་ནི་ཆུ་ཐིགས་པ་གཅིག་བླང་བ་ལ་ཆུའི་མཚན་ཉིད་ཚང་བ་བཞིན་དུ། སེམས་ཡེ་ཤེས་རང་སྣང་དུ་སྟོན་པའི་རྒྱུད་སྡེ་རྒྱ་མཚོ་དང་འདྲ་བའི་ཐུགས་ཀྱི་རྒྱུད་ཀྱི་ནང་ནས་ཐུགས་ཀྱི་ཐིགས་པ་འདི་ཉིད་བསྡུས་པ་ལ་རྒྱུད་ཀྱི་དོན་འདུས་ཤིང་མ་ཚང་བ་མེད་དེ། དཔེར་ན་མི་འཇིགས་པ་སེང་གེའི་ཕུང་པོ་ལ་གཅན་གཟན་གཞན་གྱི་གནོད་པས་མི་ཚུགས་པ་ཅི་ལྟ་བ་བཞིན་ཏུ། ཐུགས་ཐིགས་ཀྱི་ཚིག་དོན་འདི་ལ་སྒྲོ་སྐུར་ལུང་མ་བསྟན་གྱི་སྐྱོན་གསུམ་དང་བྲལ་བས། སེམས་ཡེ་ཤེས་རང་སྣང་དུ་སྟོན་པའི་ཐུགས་ཀྱི་བཅུད་བསྡུས་ན་གསུམ་པོ་འདི་ཉིད་ཡིན་ཏེ། གང་ཞེ་ན་གཞི་རང་བཞིན་གྱི་སྣང་བ་དང་། འབྲས་བུ་བདེ་བར་གཤེགས་པའི་སྣང་བ་དང་། གདུལ་བྱ་ཡི་ལམ་གྱི་སྣང་བ། གསུམ་གྱི་ངོ་བོ་ཡིན་པ་ལ། མཚོན་བྱེད་ཚིག་གི་རྒྱུད་ཀྱི་དབྱེ་བ་ནི་གསུམ་དུ་རྣམ་པར་བཞག་ནས་གཏན་ལ་ཕབ་པའོ། །དེ་ཡང་མཚོན་བྱ་དོན་གྱི་ངོ་བོ་གཅིག་ཡིན་པ་ལ་འོ་ན་གཞི་ལམ་འབྲས་བུ་གསུམ་གྱི་ངོ་བོ་ཐ་དད་བྱུང་བ་དེ་ཡང་གང་གིས་ཉེས་སྙམས་པ་ལ། གང་དག་རང་ངོ་མ་ཤེས་པ་བློ་འཁྲུལ་པའི་སྣང་བས་ཕྱེ་བས་གཞི་ལམ་འབྲས་བུ་གསུམ་དུ་འགྱུར་ཏེ། དེ་ཡང་གཞི་རང་ལ་གནས་ཀྱང་བློ་འཁྲུལ་པས་ངོ་མ་ཤེས་པས་དེ་ཉིད་གབ་པ་དང་། འཁྲུལ་པ་དེའི་གཉེན་པོར་ལམ་བགྲོད་པ་དང་། འཁྲུལ་པ་དེ་སངས་པའི་ཚེ་འབྲས་བུ་ཐོབ་པའོ། །གཏན་ཚིགས་དེས་ན་གཞི་ལམ་འབྲས་བུ་འཁྲུལ་པའི་སྣང་བ་དང་བཞི་པོ་དག་ཏུ་ཁོག་དབུབ་པ་ནི། རྒྱལ་བས་གསུངས་པའི་རྒྱུད་ལུང་དང་རིགས་པའི་མན་ངག་གི་བསྟན་ཆོས་ཀུན་ལ་གསུངས་པས་བདག་གིས་ཀྱང་གསལ་བར་བཤད་དོ་ཞེས་བྱའོ། །གཉིས་པ་གཞུང་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། གསང་སྔགས་རྡོ་རྗེའི་ཐེག་པ་གཏན་ལ་དབབ་པར་བྱེད་པ་ལ་རྟོགས་མ་རྟོགས་ཕྱོགས་རྟོགས་ཀྱི་ཡན་ལག་སྣང་བ་རྣམ་པ་བཞི་པོ་གསལ་བར་བཤད་པ་ནི་འདི་ལྟ་སྟེ། དེ་ཡང་སྣང་བ་བཞི་དང་རྒྱུད་གསུམ་གྱི་སྤྱིའི་གོ་དོན་བཤད་པ་ལ་གཉིས་ཏེ། གོ་དོན་བཞག་པ་དང་། བརྒལ་ལན་གྱི་སྒོ་ནས་མཐའ་ཡོངས་སུ་ཆོད་པར་བྱའོ། །དང་པོ་གོ་དོན་ནི། གཞི་རང་བཞིན་གྱི་སྣང་བའི་རྒྱུད་ཅེས་བྱ་སྟེ། གཞི་ནི་འཁོར་འདས་ཀྱི་ཆོས་ཐམས་ཅད་ཀྱི་འབྱུང་གཞི། རང་བཞིན་ནི་དབྱེར་མེད་བཅོས་སླད་དང་བྲལ་བ། སྣང་བ་ནི་རང་རིག་པ་ཐམས་ཅད་དུ་རྩལ་མ་འགགས་པར་སྣང་བའོ། །དེ་ཀ་ལ་སྐབས་ཀྱིས་རྒྱུད་ཅེས་ཀྱང་བྱ་སྟེ། གང་ཞིག་དགོས་པ་ཚང་ཞིང་འབྲེལ་པ་དང་ལྡན་པས་ན་རྒྱུད་དོ། །དེ་ཡང་གཞི་དང་ལམ་དང་འབྲས་བུའི་ཡོན་ཏན་གྱི་དགོས་པ་ཚང་ཞིང་། གཞི་དང་འབྲས་བུ་གཉིས་ངོ་བོ་ཉིད་གཅིག་ཏུ་འབྲེལ་བས་ན་རྒྱུད་དེ། གསང་སྒྲོན་ལས། འབྲེལ་དང་མ་ཚངས་མེད་པ་དང་། །དགོས་པ་ཚང་བས་རྒྱུད་ཅེས་བྱ། །ཞེས་སོ། །གདུལ་བྱ་ལམ་གྱི་སྣང་བའི་རྒྱུད་ནི། སྦྱངས་པ་དང་རང་བཞིན་གྱིས་ཐུན་མོང་དང་མཆོག་གི་སེམས་ལྔ་སྐྱེས་སམ། སྐྱེར་རུང་བས་གདུལ་བྱ། འཇུག་ཅིང་བགྲོད་པར་བྱེད་པས་ལམ། བསྟན་པ་བློ་དང་འཚམས་པར་སྣང་བས་སྣང་བ། དེ་ཀ་ལ་རྒྱུད་ཅེས་བྱ་སྟེ། ལམ་གྱིས་གཞི་གཏན་ལ་ཕབ་ཅིང་འབྲས་བུ་མངོན་སུམ་དུ་བྱེད་པའི་ཆ་ནས་ལམ་ལ་གཞི་འབྲས་ཀྱི་ཡོན་ཏན་གྱི་དགོས་པ་ཚང་བ་དེས་ན་གཞི་འབྲས་གཉིས་དང་འབྲེལ་པས་ན་རྒྱུད་ཅེས་བྱའོ། །འབྲས་བུ་བདེ་བར་གཤེགས་པའི་སྣང་བའི་རྒྱུད་ནི། གང་ཞིག་སྨིན་པ་ཞིག་འབྲས་བུ། ཟུག་རྔུ་མེད་ཅིང་ནར་སོན་པས་ན་བདེ་བར་གཤེགས། རྟོགས་པའི་རིག་པ་ལ་སྐུ་དང་ཡེ་ཤེས་ཀྱི་དཀྱིལ་འཁོར་དུ་སྣང་བས་ན་སྣང་བའོ། །དེ་ཀ་ལ་རྒྱུད་ཅེས་བྱ་སྟེ། འབྲས་བུ་ལ་ཡོན་ཏན་ཡར་ལྡན་དུ་ལམ་མཐར་ཕྱིན་ཅིང་གཞི་མངོན་དུ་བྱས་པའི་ཆ་ནས་གཞི་ལམ་གྱི་ཡོན་ཏན་གྱི་དགོས་པ་ཐམས་ཅད་ཚང་སྟེ། དེས་ན་འབྲས་བུ་དང་གཞི་ལམ་གཉིས་ངོ་བོ་ཉིད་དུ་མ་འདྲེས་ཡོངས་རྫོགས་སུ་འབྲེལ་བས་ན་རྒྱུད་དོ། །ལོག་རྟོག་འཁྲུལ་པའི་སྣང་བ་ནི། གཉིས་མེད་ལ་ལོག་ཅིང་གཉིས་སུ་རྟོག་པས་ན་ལོག་རྟོག །དེ་མ་ཡིན་ལ་དེར་འཛིན་པས་འཁྲུལ་པ། ལས་དང་ལོག་རྟོག་གི་བློ་ངོར་སྣང་བས་སྣང་བ། དེ་ལ་འབྲེལ་པ་དང་དགོས་པ་མེད་པས་ན་སྣང་བ་ཡིན་ཀྱང་རྒྱུད་མ་ཡིན་ནོ། །གཉིས་པ་བརྒལ་ལན་ནི། རིག་རྩལ་འགག་མེད་དུ་སྣང་བ་གཞི་སྣང་ཡིན་ནམ་མ་ཡིན། མ་ཡིན་ན། རང་རིག་པ་ཐམས་ཅད་དུ་རྩལ་མ་འགགས་པར་སྣང་བ་ནི་རང་བཞིན་གྱི་སྣང་བའོ། །ཞེས་གསུངས་པ་དང་འགལ་ལ། ཡིན་ན་དེའི་སྟེང་ན་སྣང་བ་གསུམ་པོ་སྣང་ངམ་མི་སྣང་། མི་སྣང་ན་རིག་རྩལ་འགག་མེད་དུ་སྣང་བ་དང་འགལ། སྣང་ན་གསུམ་དུ་དབྱེ་བ་དགོས་མེད་དུ་ཐལ། འདོད་ན་ཕྱེ་བས་གསལ་ལོ། །ཞེ་ན། ལན་ནི་སྤྱིར་གཞི་སྣང་ཡེ་ཤེས་སྒྲོན་མའི་ངོ་བོར་ལ་བཟླ་བའི་དབང་དུ། སྣང་བ་གསུམ་རིག་རྩལ་འགག་མེད་དུ་གཅིག་གིས་གཅིག་མི་སྒྲིབ་པར་མ་འདྲེས་ཡོངས་རྫོགས་སུ་སྣང་བ་ཡིན་ཏེ། གྲུབ་ཐོབ་ཉི་མའི་སྙིང་པོའི་ཞལ་ནས། སྣང་བ་བཞིའི་མེ་ལོང་དུ་འཁོར་འདས་ཀྱི་ཆོས་ཀྱི་གཟུགས་བརྙན་ཤར་ནས་ཡོད་པས་ལྟ་ན་དེ་ལ་ལྟོས། སྟོང་པ་བཞིའི་ནམ་མཁའ་ལ་འཁོར་འདས་ཀྱི་ཆོས་ཀྱི་གནས་པ་ཡོད་པས་སྡོད་ས་དེ་ལ་གྱིས། དབྱེར་མེད་བཞིའི་ནོར་བུ་ལ་དུས་གསུམ་གྱི་སངས་རྒྱས་ཀྱི་དགོངས་པའི་གཏེར་མཛོད་ཡོད་ཀྱིས་བློ་གཏད་དེ་ལ་གྱིས་ཞེས་གསུངས་སོ། །བྱེ་བྲག་ཏུ་ཤག་འབྱེད་པའི་དབང་དུ་སྣང་བ་གསུམ་བཟང་ངན་ཐ་དད་ཀྱི་སྣང་བ་མེད་པས་དེའི་སྐྱོན་ལས་གྲོལ་ལོ། །བློ་དང་འཚམ་པར་སྣང་བ་གདུལ་བྱའི་སྣང་བ་ཡིན་ནམ་མ་ཡིན་མ་ཡིན་ན། རྒྱས་པའི་རིགས་བརྒྱད་དབྱེ་བ་ལས། ཆོས་ཀྱི་དབྱིངས་ཀྱིས་ཀུན་ལ་ཁྱབ་པ་ཡི། །བླ་མེད་ཐེག་པ་བསམ་ཡས་གསུངས་པ་ཡང་། །སོ་སོར་རང་རིག་བློ་ལ་སྣང་བར་ཟད། །ཅེས་གསུངས་པ་དང་འགལ་ལ། ཡིན་ན། དེ་ཉམས་སུ་བླངས་པས་སྔགས་མཐར་ཐུག་གི་འབྲས་བུ་ཐོབ་བམ་མི་ཐོབ། མི་ཐོབ་ན་ལམ་རྣམས་ཉམས་སུ་བླངས་པ་དོན་མེད་དུ་ཐལ། འདོད་ན་བཅུ་གསུམ་པ་ལས། ཐོས་བསམ་སྒོམ་པའི་རྣལ་འབྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་གསུངས་པས་འགལ་ལོ། །ཐོབ་ན་མུ་སྟེགས་རྟག་ཆད་ཀྱིས་ཀྱང་ཐོབ་པར་ཐལ། འདོད་ན་ལམ་རིམ་ལས། རྟག་ཆད་གཉིས་སུ་གང་གིས་བློ་ཞེན་པ། །དོན་གྱི་སྙིང་པོ་ཉིད་ལས་གོལ་བར་གསུངས། །ཅེས་གསུངས་པས་གསལ་ལོ་ཞེ་ན། བསྟན་པ་བློ་དང་འཚམས་པ་ལམ་སྣང་ཡིན་པས་འབྲས་བུ་ཐོབ་ཀྱང་། མུ་སྟེགས་རྟག་ཆད་ནི་སངས་རྒྱས་ཀྱི་བསྟན་པ་ལ་གོལ་ཞིང་ལོག་པའི་ལྟ་བར་སོང་བ་ཡིན་པས་དེའི་སྐྱོན་མེད་དོ། །རྟོགས་པའི་རིག་པ་ལ་སྐུ་དང་ཡེ་ཤེས་ཀྱི་དཀྱིལ་འཁོར་དུ་སྣང་བ། འབྲས་བུའི་སྣང་བ་ཡིན་ནམ་མ་ཡིན། མ་ཡིན་ན། རྒྱས་པ་ལས། སྐུ་མཆོག་རྡོ་རྗེ་འོད་སྣང་བ། །མཐུན་པའི་ཡེ་ཤེས་རང་སྣང་ངོ་། །ཞེས་གསུངས་པ་དང་འགལ་ལ། ཡིན་ན་ལྷུན་གྲུབ་རིག་འཛིན་ཆོས་ཅན། མཐར་ཐུག་གི་འབྲས་བུ་ཡིན་པར་ཐལ། ལམ་རིམ་ལས། ཡི་གེ་འཁོར་ལོ་མངོན་གཟིགས་པ། །ཞེས་གསུངས་པའི་ཕྱིར་རོ། །འདོད་ན་ལམ་པ་བ་ཡིན་པ་གསལ་ལོ་ཞེ་ན། མཐར་ལམ་པ་དང་མཐར་ཐུག་གི་འབྲས་བུ་གཉིས་སྐུ་དང་ཡེ་ཤེས་ཀྱི་སྣང་བ་ཙམ་ལ་གཅིག་ཀྱང་། ལྷུན་གྲུབ་རིག་འཛིན་ནི་ལམ་པ་ཡིན་པས་ད་རུང་བག་ཉལ་གྱི་སྒྲིབ་པ་ཡོད་པས། སངས་རྒྱས་དང་ཁྱད་ཡོད་པ་ཡིན་ཏེ། ཉམས་སྒྲོན་ལས། ཀུན་མཁྱེན་མེ་ལོང་ཚུལ་གཟིགས་པ། །ཡུལ་དང་མཁྱེན་ཚད་རྒྱལ་བ་དང་། །འདྲ་ལ་བག་ལ་ཉལ་གྱིས་ཕྱེ། །ཞེས་གསུངས་པས་དེའི་སྐྱོན་ལས་གྲོལ་ལོ། །གཉིས་མེད་ལས་ལོག་ཅིང་གཉིས་སུ་འཛིན་པས་འཁྲུལ་སྣང་ཡིན་ནམ་མ་ཡིན། མ་ཡིན་ན། གསང་སྙིང་ལས། ཅི་ལྟར་འཇིག་རྟེན་འཁྲུལ་པའི་ཆོས། །མ་རིག་རྟོག་པའི་གཟུང་འཛིན་གྱིས། །ཕྱི་ནང་རྟེན་འབྲེལ་གཉིས་སུ་འཁོར། །མི་མཐུན་བདེ་སྡུག་མྱོང་བར་འགྱུར། །ཞེས་གསུངས་པས་འགལ་ལ། ཡིན་ན་འགྲོ་ལ་ཤེས་རྒྱུད་གཉིས་འཆང་དུ་ཐལ། འདོད་ན། འཕྲུལ་གྱི་མེ་ལོང་ལས། འགྲོ་ལ་ཤེས་རྒྱུད་གཉིས་མི་འཆང་། །ཞེས་པས་གསལ་ལོ་ཞེ་ན། ལན་ནི། སྐད་ཅིག་དང་པོ་གཉིས་མེད་ལས་ལོག་ཅིང་། སྐད་ཅིག་གཉིས་པར་གཉིས་ཅན་དུ་འཛིན་ཞིང་འཁྲུལ་པ་ཡིན་པས་ན། འགྲོ་ལ་ཤེས་རྒྱུད་གཉིས་འཆང་དུ་འགྲོ་བའི་སྐྱོན་མེད་དོ། །ཡང་སྣང་བ་བཞི་གཅིག་གམ་ཐ་དད་ཅེ་ན། ལན་ནི། སྣང་བཞི་ངོ་བོ་བདེར་གཤེགས་སྙིང་པོ་ལས་མ་གཡོས་པར་གཅིག་ལ། རང་ལྡོག་ནི། གཞི་ནི་མ་རྟོགས་ལ་མ་འཁྲུལ་བ་ཡིན་ལ། འཁྲུལ་པ་ནི་མ་རྟོགས་ལ་འཁྲུལ་པ་ཡིན་ལ་ལམ་པ་ནི་རྟོགས་བཞིན་འཁྲུལ་པ་ཡིན་ལ། འབྲས་བུ་ནི་རྟོགས་ལ་མ་འཁྲུལ་བ་ཡིན་པས་ལྡོག་པ་ཐ་དད་དོ། །དེ་ལྟར་སྣང་བ་བཞིར་གྲངས་ངེས་པའི་རྒྱུ་མཚན་ནི། སྣང་བ་བཞི་ལས་གྲངས་མང་ན་ལྷག་སྟེ། ཤེས་བྱའི་ཆོས་ཐམས་ཅད་སྣང་བ་བཞིར་མ་འདུས་ཤིང་མ་ཚང་བ་མེད་པའི་ཕྱིར་རོ། །ཡང་སྣང་བ་བཞི་ལས་གྲངས་ཉུང་ན་མི་ཆོག་སྟེ། རང་བཞིན་གྱི་སྣང་བ་མེད་ན། འཁྲུལ་གྲོལ་གཉིས་ཀྱི་སྤྱི་གཞིའི་གནས་ལུགས་མེད་པའི་སྐྱོན་ཡོད་དོ། །གདུལ་བྱའི་སྣང་བ་མེད་ན། སེམས་ཅན་ལ་ཁམས་དང་ཆ་མེད་ཅིང་ཆོས་ཀྱི་སྣང་བ་མི་འཆར་བའི་སྐྱོན་ཡོད་ལ། འབྲས་བུའི་སྣང་བ་མེད་ན། གདུལ་བྱའི་ལམ་བགྲོད་པ་དོན་མེད་དུ་འགྱུར་བའི་སྐྱོན་ཡོད་འཁྲུལ་པའི་སྣང་བ་མེད་ན། འཁོར་བའི་ཆོས་གཏིང་ནས་མེད་པའི་ཕྱིར་རོ། །གཉིས་པ་རྒྱས་པར་བཤད་པ་ལ་བཞི་སྟེ། རང་བཞིན་གྱི་སྣང་བ་དང་། འཁྲུལ་པའི་སྣང་བ་དང་། གདུལ་བྱའི་སྣང་བ་དང་། བདེ་བར་གཤེགས་པའི་སྣང་བའོ། །དང་པོ་ལ་གཉིས་ཏེ། གཞུང་དང་། མཚན་དོན། དང་པོ་ལ་བཞི་སྟེ། བགྲང་། དང་པོ་ངོ་བོ་ལྷུན་གྲུབ་ཏུ་བསྟན་པ་དང་། དྲང་སྣང་བ་བཞིའི་ཐོག་མར་བསྟན་པའི་གཞི་རང་བཞིན་གྱི་སྣང་བའི་དོན་ནི་བྱང་བ་སྟོང་པའི་རང་བཞིན་དོན་དམ་བདེན་པ་དང་། ཆུབ་པ་སྣང་བའི་རང་བཞིན་ཀུན་རྫོབ་བདེན་པ་སྒྱུ་མ་ལྟ་བུ་དང་། སེམས་དབྱེར་མེད་ཀྱི་རང་བཞིན་དེ་ཉིད་གང་ལ་གནས་ན། རྒྱུད་དྲག་ལས་ཀྱི་འགྲོ་བ་མང་པོའི་སྟེ་ཀུན་གྱི་སེམས་རྒྱུད་ལ་གནས་ཏེ། དེ་ཡང་གར་གནས་ན་ལོག་རྟོག་གི་ངོ་བོར་སྣང་བ་འདི་དང་ལྷན་ཅིག་ཏུ་གནས་ཀྱང་རྒྱུ་མ་རིག་པས་ངོ་མ་ཤེས་རྐྱེན་ལས་ཉོན་གྱིས་མཚམས་སྦྱར་ནས་འབྲས་བུ་རིགས་དྲུག་དང་འཁོར་འདས་ཐ་དད་དུ་སྣང་བའི་དུས་ཉིད་ནའང་དཔེར་ན་གསེར་ལས་བྱས་པའི་གཟུགས་ཅི་ལྟར་སྣང་ཡང་ངོ་གསེར་ལ་གཅིག་པ་བཞིན་དུ་དབྱེར་མེད་ཀྱི་དོན་དེ་རྒྱུ་རྐྱེན་དང་བྲལ་བའི་རང་བྱུང་སྒྲིབ་གཡོགས་དང་བྲལ་བས་ཡེ་ཤེས་ཀྱི་ངོ་བོ་ལ་འཁོར་འདས་ཀྱི་ཆོས་ཐམས་ཅད་གཞི་ལ་རིག་རྩལ་དུ་སྣང་བས་ན་ཐ་དད་མེད་པར་གཅིག་པ་སྟེ། རིམ་གསུམ་ལས། ངོ་བོ་ཐམས་ཅད་སེམས་ཡིན་ཏེ། །གསེར་གྱི་དཔེ་བཞིན་གཉིས་སུ་མེད། །ཅེས་སོ། །དོན་རང་བྱུང་གི་ཡེ་ཤེས་དེ་ཡང་འཁོར་བ་དང་གྲོལ་བ་མྱང་འདས་གཉིས་ཀའི་བདག་ཉིད་ཡིན་པའི་ཕྱིར། དཔེར་ན་མེ་ལོང་གྲུབ་པ་དང་ནི་གཡའ་གྲུབ་པ་ཐ་དད་མེད་པ་བཞིན་ཏུ། འཁོར་འདས་མ་རིག་ཡེ་ཤེས་ཕན་ཚུན་རིག་རྩལ་འགག་མེད་ཀྱི་སྣང་བར་སྤང་བ་དང་བླང་བ་མེད་པ་ལ། གསང་སྔགས་ཀྱི་དོན་ལ་བློ་ཤེད་མ་ཕྱེ་བས་བྱིས་སྦ་རྒྱུ་མཚན་ཉིད་པའི་ཐེག་པས་མ་རིག་པ་འདི་འཁོར་གཞི་དང་མྱང་འདས་ཀྱི་རྟེན་ཙམ་ཡིན་ཞེས་ཐ་དད་དུ་སྨྲ་ནའང་། དབྱེར་མེད་ཀྱི་དོན་ལ་མཁས་པ་གསང་སྔགས་པས་འཁོར་འདས་ཡེ་ནས་ཀ་དག་ལྷུན་གྲུབ་དབྱེར་མེད་ཀྱི་དོན་དེ་ཉིད་སྨྲ་བའི་ཚིག་དང་བསམ་པའི་བློ་ལས་འདས་པའོ། །གཉིས་པ་དེ་ལ་འཁོར་འདས་སྣང་ཚུལ་ལ་བཞི་སྟེ། བགྲང་། དང་པོ་སེམས་རིགས་རྒྱུད་མེད་པ་ལ་འཁོར་འདས་སུ་སྣང་ཞིང་ངོ་བོ་ལྷུན་གྲུབ་ཏུ་བསྟན་པ་དང་། དྲང་། འདི་སྐད་དུ་གསང་བའི་སྙིང་པོ་སྒྱུ་འཕྲུལ་རྒྱས་པའི་རྒྱུད་ཉིད་ལས་གསུངས་པ་ནི། བདེ་བར་གཤེགས་པའི་སྐུ་ཡེ་ཤེས་སྒྱུ་མའི་རང་མདངས་གཟུགས་སྐུར་སྣང་བ་དང་། ལོག་རྟོག་གི་བསམ་གཟུགས་ལ་རིགས་དྲུག་གི་ལུས་སྒྱུ་མར་སྣང་བ་གཉིས་ནི་ཡེ་ཤེས་སྒྱུ་མའི་ངོ་བོར་དབྱེར་མེད་གཅིག་པ་དེས་ན་འཁོར་འདས་ཀྱི་རིགས་ཐ་དད་དང་རྒྱུད་ཐ་དད་དུ་བློས་བརྟག་ཏུ་མེད་དེ་ཅིའི་ཕྱིར་ན་འཁོར་བ་བསྐྱེད་པའི་གཞི་དང་མྱང་འདས་བརྟེན་པའི་རྩ་བ་རང་རྒྱུད་དུ་གྲུབ་པ་མེད་དེ་རང་བཞིན་གྱིས་སྟོང་པ་དེ་ལ། ཕོ་མོ་མ་ནིང་གི་རིགས་ཐ་དད་དང་དཀར་སེར་ལ་སོགས་པའི་ཁ་དོག་དང་། ཟླུམ་པོ་གྲུ་བཞི་ལ་སོགས་པའི་དབྱིབས་ཕྱོགས་གཅིག་ཏུ་གྲུབ་པ་མེད་པ་ལས། མེད་བཞིན་དུ་རིག་རྩལ་འགག་མེད་ཏུ་ཕྱི་ནང་སྣོད་བཅུད་ཐམས་ཅད་དུ་རང་སྣང་བའོ། །ཡང་ངོ་བོ་ལྷུན་གྲུབ་ཏུ་བསྟན་པ་ནི་སྒྱུ་འཕྲུལ་དྲྭ་བ་རྩ་རྒྱུད་གསང་སྙིང་ལས། འཁོར་བའི་དུས་སུ་གཟུང་འཛིན་བཅིངས་པ་མེད། འདས་པའི་དུས་སུ་མེད་པ་ལས་རྣམ་པར་གྲོལ་བ་པོ་ཡང་མེད་པའི་ཀ་དག་གི་ངོ་བོ་ལ། ཡེ་གདོད་མ་ཉིད་ནས་སྐུ་དང་ཡེ་ཤེས་སུ་ལྷུན་གྱིས་གྲུབ་ཅིང་རྫོགས་པ་ནི་འགྱུར་བ་མེད་པའི་སངས་རྒྱས་ཡིན་ལ། དར་ནུབ་མེད་པའི་ཆོས་ཀྱང་དེ་ཡིན་པར་གསུངས་པ་དེས་ན་གཞི་རང་བཞིན་གྱི་རྒྱུད་དེ་ཉིད་ཀྱི་ངོ་བོ་ལ་ནི། མ་རིག་པ་དང་རིག་པ་ཡེ་ཤེས་གཉིས་གཞི་སྣང་ཙམ་ལ་ཐ་དད་མེད་དེ། དཔེར་ན་ནམ་མཁའ་དྭངས་པ་སྟེ་སྟོང་པ་ལ་སྤྲིན་གྱི་གནས་བཅའ་ནས་སྣང་དུས་ནམ་མཁའ་ལ་མ་གཡོས་པའོ། །གཉིས་པ་ཐ་དད་ལྷུན་གྲུབ་ཏུ་གཅིག་པའི་སེམས་ཉིད་མཐའ་ཐུག་མེད་དུ་ཅིར་ཡང་སྣང་དུ་རུང་བའི་དཔེ་དོན། དྲང་། དཔེ་ཤེལ་དྭངས་པའི་རིགས་ཅན་དེ་ལ་ཁ་དོག་གང་བསྟན་གྱི་ཁ་དོག་ཏུ་འགྲོ་ཡང་ངོ་བོ་ཤེལ་ལ་འགྱུར་བ་མེད་པ་ལྟར། རྣམ་རྟོག་བཟང་ངན་གྱི་སེམས་དང་གཟུང་འཛིན་མི་མཐུན་པ་མང་པོ་སྣང་ཡང་བྱང་ཆུབ་ཀྱི་སེམས་དེ་ཉིད་དུ་ངོ་བོ་གཅིག་ཡིན་པ་ལས་རང་གི་སེམས་བཟང་ངན་གྱི་བསམ་གཟུགས་ལ་མཐའ་ཐུག་པ་མེད་པར་ཀུན་ལ་ཤར་བ་ཡིན་ཏེ། དགོངས་པ་ཚིགས་པའི་རྒྱུད་ལས། ཤེལ་སྒོང་དྲི་མ་མེད་པ་ལ། །གང་འཕྲད་རྒྱན་གྱིས་དེ་ལྟར་སྣང་། །དེ་བཞིན་སེམས་ཉིད་དག་པ་ཡང་། །དགེ་སྡིག་གོས་པ་ལྟར་སྣང་ངོ་། །ཞེས་གསུངས་སོ། །གསུམ་པ་ཅིར་ཡང་སྣང་བ་ཡང་རྐྱེན་གྱིས་བསྒྱུར་བས་སྣང་དུ་རུང་བའི་དཔེ་དོན་དངོས་དང་། དྲང་། དེ་ཡང་དཔེར་ན་ཨར་སྟེ་འཕགས་པ་རྡོ་རྗེ་སེམས་དཔའ་དེ་ཉིད་ནོར་ལྷ་ཛཾ་བྷ་ལའི་སྐུར་སྣང་ནས། ཕྱག་གཡོན་པས་ནེའུ་ལེའི་རྐྱལ་པ་རིན་པོ་ཆེས་བཀང་བ་བསྣམས་ནས་རིན་ཆེན་གྱི་ཆར་ཕྱོགས་མེད་དུ་ཕབ་པ་ལས། འཁོར་ལོས་བསྒྱུར་བའི་རྒྱལ་པོ་དེའི་ཆོས་ལུགས་ཡང་དག་པ་པ་དང་ལྡན་ཞིང་དགེ་བཅུ་སྤྱོད་པའི་དོན་གྱི་གནས་སུ། རྒྱལ་སྲིད་རིན་པོ་ཆེ་སྣ་བདུན་བབས་པ་དང་། བྲམ་ཟེ་དམ་པ་སྟེ་ཡ་རབས་པ་དེའི་གནས་སུ་སྣ་ཚོགས་རིན་ཆེན་གསེར་དངུལ་ལ་སོགས་ཕལ་པ་ལྔ་སྣང་བ་དང་། ཙི་བི་ར་སྟེ་ཡི་དྭགས་ཀྱི་གནས་སུ་བྱེ་ཚུབ་དང་གྲམ་པར་མཐོང་བ་དང་། དབུལ་བ་ཏན་ཏྲ་སྟེ་དབུལ་པོའི་རིགས་རྒྱུད་ཀྱི་གྲོང་ཁྱེར་དུ་ཟས་ཀྱི་ལྷད་མ་དང་རས་མ་གོས་ཧྲུལ་པོར་ཤར་བ་དང་། རིགས་ངན་བཤན་པ་དང་ཤན་ཏ་རཀྴ་སྟེ་སྲིན་པའི་གནས་སུ་ཤ་དང་ཁྲག་དང་རུས་པའི་ཆར་དང་། གདོལ་པ་ཞིང་ལས་པའི་གྲོང་དུ་འབྲུ་རིན་ཆེན་སིལ་མིའི་ཆར་འབབ་པའོ། །དེ་ལྟར་རིན་པོ་ཆེའི་ཆར་གཅིག་ལ་བསོད་ནམས་ཆེ་ཆུང་གི་དབང་གིས་སོ་སོར་སྣང་བ་བཞིན་དུ། འགྲོ་དྲུག་གི་སྤྱོད་ཡུལ་བདེ་སྡུག་མི་མཐུན་པ་ཐ་དད་དུ་སྣང་བ་དེ་ཡང་། རང་གི་སེམས་ཉིད་རང་བྱུང་གི་ཡེ་ཤེས་དེ་རྟོགས་མ་རྟོགས་ཕྱོགས་རྟོགས་ཀྱི་རྐྱེན་གྱིས་བསྒྱུར་ནས་སྣང་བ་ཙམ་མིན་པ། དོན་གྱི་ངོ་བོ་ལ་འཁོར་འདས་སོ་སོའི་རིགས་རྒྱུད་དང་ཕྱོགས་ཆ་ཐ་དད་དུ་གྲུབ་པ་མེད་པ་ལས་ཐམས་ཅད་སྣང་བས་སེམས་ཉིད་དེ་ལ་རྐྱེན་བཟང་ངན་དེས་བསྒྱུར་ཅིང་ཅིར་ཡང་སྣང་དུ་བཏུབ་བོ། །དེ་ཡང་ཀློང་དྲུག་པ་ལས། བསྒྱུར་དུ་བཏུབ་པར་གནས་པ་ལས། །འབད་མེད་བློ་ཡི་སྣང་བར་སྣང་། །ཞེས་སོ། །དེ་ལྟར་ན་ལམ་བགྲོད་པ་དོན་མེད་ཅིང་། འབྲས་བུའང་སླར་སེམས་ཅན་དུ་ལོག་པར་འགྱུར་ཏེ། དེ་ཉིད་ལས། རང་གི་གནས་ལུགས་བསྒྱུར་བཏུབ་ན། །འབྲས་བུ་ཉིད་ནི་རྒྱུར་ལྡོག་ཕྱིར། །འབད་པ་རྣམས་ལ་གོམས་མེད་པས། །ཡང་དང་ཡང་དུ་ལྡོག་པས་ན། །བེམས་པོ་རྣམས་ནི་རིག་བཅས་སུ། །འགྲོ་བར་གཏུབ་པ་མ་ཡིན་བཞིན། །ཞེས་གསུངས་པའི་ཕྱིར་རོ་ཞེ་ན། དོན་གནས་ལུགས་ལ་འགྱུར་བ་མེད་ཅིང་བསྒྱུར་དུ་མི་བཏུབ་ཀྱང་། དེ་ཉིད་ངོ་མ་ཤེས་པའི་བློ་ལ་འཁྲུལ་པར་ཤར་བ་ལ་བསྒྱུར་བ་ལྟར་སྣང་བའི་ཕྱིར་འགལ་བ་མེད་དེ། རྒྱས་པ་ལས། ངན་སོང་འགྲོ་དྲུག་སྣ་ཚོགས་རྒྱུ་བ་ཡང་། །འཁྲུལ་པའི་ལོག་རྟོག་བློ་ཉིད་སྣང་བ་སྟེ། །དེ་བཞིན་ཉིད་ཀྱི་དབྱིངས་ལས་འགྱུར་བ་མེད། །ཅེས་སོ། །བཞི་པ་ལོག་རྟོག་གི་སྣང་བ་དོན་ལ་རང་རྒྱུད་དུ་མེད་པའོ། །དྲང་། སྤྱིར་བསྡུས་ཏེ་བསྟན་པ་ནི་མ་རིག་པས་བསྐྱེད་པའི་སེམས་ཅན་གྱི་གཟུང་འཛིན་གྱི་སྣང་བ་ཐམས་ཅད་ལོག་པ་སྟེ། དེ་ལ་བདེན་པར་འཛིན་པ་ནི་རྟོག་པའོ། །དེ་ཉིད་འགྲོ་བ་རིགས་དྲུག་གི་དབང་གིས་ཡུལ་སེམས་ན་རྣམ་གྲངས་བསམ་ཡས་པ་དང་། དུས་ཀྱང་ཐོག་མཐའ་མེད་པར་བསམ་ཡས་པ་སྟེ། དེ་དག་ནམ་མཁའ་གཟུགས་སུ་གྲུབ་མ་མྱོངས་པ་བཞིན། ཡེའམ་གདོད་མ་ཉིད་ནས་གཞི་སེམས་ཉིད་ཀྱི་ངང་ལ་རང་རྒྱུད་དུ་གྲུབ་ནས་ཡོད་པ་མ་ཡིན་ཏེ། དེ་ཡང་སྟེན་ཀྱང་གསུམ་སྐྱོན་དང་བསྟན་བྱ་ལྷག་མ་ཅན་གཉིས་ལས། འདི་ནི་སྔ་མ་སྟེ། དེ་དག་རང་རྒྱུད་དུ་མ་གྲུབ་ཀྱང་འགྲོ་དྲུག་སོ་སོའི་གཟུང་འཛིན་གྱི་རྟོག་པ་དགེ་སྡིག་ལུང་མ་བསྟན་གྱི་བག་ཆགས་བཟང་ངན་དང་ཕྲ་རགས་བསོགས་སད་ཀྱི་རིམ་པ་རྣམས་ཐེར་སློང་གི་དྲག་པ་བཞིན་ཏུ་ཀུན་གཞི་ལ་བསོགས་པས། དཔེར་ན་ཆུ་རྙོག་མ་ལ་གཟུགས་བརྙན་མི་འཆར་བ་ལྟར། སེམས་ཀྱི་འགྱུ་མཐས་རང་གི་མཚན་ཉིད་རང་གིས་བསྒྲིབས་ཤིང་དུས་མཐའ་མེད་པར་རྟག་ཏུ་ཁམས་གསུམ་དུ་འཁོར་བའོ། །དེའི་དོན་ནི་འདི་སྐད་དུ་རྒྱས་པའི་རྒྱུད་ལས་གསུངས་པས་དུས་ཐོག་མ་མེད་པ་ནས་འཁྲུལ་ཀྱང་། སེམས་ཉིད་རང་བྱུང་ཡེ་ཤེས་ལས་ལོགས་སུ་སྟེ་གུད་དུ་མ་འགྱུར་ཅིང་མཁའ་སྤྲིན་ལྟར་དབྱེར་མེད་དོ། །འོ་ན་ཅིའི་ཕྱིར་འཁྲུལ་ཞེ་ན། རྒྱུད་ལྷན་སྐྱེས་མ་རིག་པ་དང་ཀུན་བརྟགས་མ་རིག་གཉིས་དང་། རྐྱེན་ལས་ཉོན་གྱིས་འཁྲུལ་པར་སྣང་སྟེ། དེ་ཡང་གཤིས་ལ་མ་གྲུབ་ཅིང་དྭངས་བ་དང་སང་རྒྱུ་ཡོད་པའི་ཕྱིར་གློ་བུར་བ་ཞེས་བྱ་སྟེ། དེས་ན་འཁྲུལ་པའི་སྤྱོད་ཡུལ་ཐ་དད་པར་སྣང་བའི་དུས་ལ་ཐོག་མ་འདི་ནས་བྱུང་བ་དང་མཐའ་མ་འདིར་ཐལ་མེད་པར་སྣང་བའོ། །གསུམ་པ་དོན་རྟོགས་པར་བྱ་བའི་ཕྱིར་འཁྲུལ་པ་དང་མ་ནོར་བའི་མཚན་ཉིད་ལ་བརྒྱད་དེ། བགྲང་། དང་པོ་གཉིས་སུ་འདོད་པ་ལྷུན་གྲུབ་ལ་སྐྱོན་བརྗོད་པ་ཉིད་འཁྲུལ་པ་དང་། དྲང་། གཞི་དོན་བྱང་ཆུབ་སེམས་ཀྱི་རྒྱུད་ལ་འཁོར་འདས་གཉིས་ཀྱིས་བསྡུས་པའི་ཆོས་ཀུན་རྩལ་འགག་མེད་དུ་ལྷུན་གྱིས་གྲུབ་པར་གནས་པ་སྟེ། དཔེར་ན་ནོར་བུ་རིན་ཆེན་ལ་དགོས་འདོད་ལྷུན་གྲུབ་ཏུ་འབྱུང་བ་ལྟར་བུ་གཅིག་པ་ཡིན་པ་དེ་ལ། འཁོར་འདས་སྣང་སྟོང་ཐ་དད་འགལ་བ་ཡིན་པས། སྐྱོན་དུ་མ་འདུས་པ་ཡིན་ཞེས་ཐེག་པ་དམན་པ་མཚན་ཉིད་ལས་བརྗོད་ནའང་། འོ་ན་གཞི་སྣང་བཏགས་པའི་འཁོར་འདས་གཉིས་ལ་ཕན་ཚུན་སྤང་བླང་དུ་བྱེད་པར་གང་ཟག་གང་གིས་འདོད་པ་དེ་ལ། དཔེ་དྲེད་མོས་རྩི་ཐོག་གི་འབྲས་བུ་ཟོས་ཀྱང་ཁོང་པར་མི་སྡོད་ནས་བྱབ་པ་ལྟར། གཞི་དོན་ལ་འཁོར་འདས་ཐ་དད་དུ་འདོད་ན་གསང་བ་བླ་ན་མེད་པའི་དོན་མཆོག་ག་ལ་ཡོད་དེ་མེད་པའོ། །གཉིས་པ་འཁོར་འདས་ཐ་དད་ལ་སྐྱོན་བརྗོད་དེ་ཐ་མི་དད་དུ་བསྟན་པ་དང་། དྲང་། ཀུན་གཞིའི་ཐོག་ནས་བག་ཆགས་སད་པ་ཉོན་མོངས་གཟུང་འཛིན་འཁོར་བའི་ཆོས་དང་། དེ་དག་རྣམ་པར་བྱང་བ་མྱ་ངན་ལས་འདས་པའི་ཆོས་གཉིས་རྒྱུ་མཚན་ཉིད་ཐེག་པ་ལྟར། ཡེ་གདོད་མ་ཉིད་ནས་འཁོར་འདས་གཉིས་ཀྱི་ངོ་བོ་བདེ་སྡུག་ཐ་དད་དུ་ཡོད་པ་ཡིན་ཞེ་ན། གཟུང་འཛིན་ཉོན་མོངས་འཁོར་བའི་ཆོས་སྤང་ཞིང་ཐོབ་བྱ་འབྲས་བུ་བྱང་ཆུབ་བསྒྲུབ་ཏུ་མེད་དེ། ལམ་རིམ་ལས། ཡང་དག་གཤེགས་དང་ལོག་རྟོགས་གཉིས། །ངོ་བོ་ཉིད་དུ་གནས་གྱུར་ན། །དེ་ལ་བཅོས་ཤིང་བསྒྱུར་དུ་མེད། །མཆིང་བུ་རིན་ཆེན་བཞིན་མི་རིགས། །ཞེས་སོ། །འཁོར་འདས་གཉིས་སོ་སོའི་རང་བཞིན་སྣང་བ་དང་སྟོང་པ་ཐ་དད་དུ་ངེས་པ་ཡིན་ཞེ་ན། ཡང་དག་པ་བླ་མེད་ཀྱི་ལམ་ཐོས་བསམ་བསྒོམ་པའི་བསྐྱེད་རྫོགས་ཀྱི་སྒོ་ནས་འཁོར་བ་མྱང་འདས་སུ་བཅོས་སུ་མེད་དེ་སོལ་བ་དཀར་པོར་མི་འགྱུར་བ་བཞིན་ནོ། །དེ་ཡང་ལམ་རིམ་ལས། བྱང་ཆུབ་མཆོག་གི་ངོ་བོ་ལ། །སོ་སོར་རང་བཞིན་ངེས་ཤེ་ན། །ཡང་དག་ལམ་གྱིས་བཅོས་སུ་མེད། །ཅེས་སོ། །གང་དུ་དེ་ལྟར་འཁོར་འདས་ཐ་དད་ན་སྐྱོན་ཡོད་པར་རྒྱུད་ལས་གསུངས་པའི་ཕྱིར་ན་གསང་སྔགས་བླ་མེད་ཀྱི་གཞི་སྣང་དུ་འཁོར་འདས་ཀྱི་ཆོས་ཐམས་ཅད་ངོ་བོ་ཉིད་ཀྱི་རྒྱུར་ལྷུན་གྱིས་གྲུབ་ཅིང་གནས་པ་ལ། དེ་ལྟར་ངོ་མ་ཤེས་པ་རྒྱུའི་ཐེག་པས་ཤེས་བྱེད་ཀྱི་བློ་དང་ཤེས་བྱའི་གཞི་གཉིས་བློ་ཅན་བློ་འདས་ཞེས་ཐ་དད་གཉིས་སུ་སྨྲ་ནའང་། བླ་མེད་རང་གཞུང་གི་དགོངས་པ་ནི་བསམ་པའི་བློ་དེ་ཀ་རང་གཞི་ཆོས་ཉིད་དེ་བཞིན་ཉིད་ཀྱི་རང་སྣང་ཡིན་ཏེ། གཞན་གྱིས་འོ་ན་བློ་དེ་ལ་འཁྲུལ་རྟོག་ཡོད་པ་དེ་གཞི་དེ་ལ་མེད་པར་འདོད་པ་དེས་ན། གཞི་དང་བློ་གཉིས་ཕྱོགས་རིས་སུ་རྟོགས་ནས་ཐ་དད་པར་བདེན་པ་ཡིན་ཞེ་ན། འོ་ན་བློ་དེ་དང་གཞི་དེ་གཉིས་ལ་འབྲེལ་པ་མེད་པས་གཞི་རྟོགས་སུ་མི་བཏུབ་པའི་སྐྱོན་འདུག་པ་དེས་ན། དུས་ནམ་ཡང་སྔོན་གོང་དུ་ངོ་བོ་དང་རང་བཞིན་ཐ་དད་ལ་སྐྱོན་ཡོད་པ་བཞིན་དུ་དོན་ལ་བདེན་ཅིང་འཐད་པ་མིན་ནོ། །འོ་ན་གང་ཡིན་ཞེ་ན། ཆོས་ཉིད་རྣམ་པར་མི་རྟོག་པའི་གཞི་དོན་དེ་ཉིད་རྟོག་པ་བློའི་སེམས་རྒྱུད་ལ་དབྱེར་མེད་དུ་ལྡན་ནས་ཡོད་པའོ། །གསུམ་པ་ལོག་རྟོག་སྤང་དུ་མེད་པའི་དཔེ་དོན་དང་། དྲང་། སྣོད་བཅུད་རྒྱུད་རྣམས་ཐམས་ཅད་རིགས་ལྔ་ཡབ་ཡུམ་དང་ཡེ་ཤེས་སུ་རྣམ་པར་དག་ཅེས་བྱ་བའམ། ཡང་ན་དབྱིངས་ཀ་དག །ཡེ་ཤེས་ཀ་དག །ཀ་དག་ཆེན་པོ་བྱ་བ་དེ་ཡང་། དང་པོ་དངོས་པོ་མ་དག་པ་གཅིག་བསལ་ནས་གསར་དུ་དག་པར་འདོད་པ་ནི་མ་ཡིན་ཏེ། སྣང་བ་བདེ་བ་དང་སྤྱོད་པ་བདེ་བའི་དུས་ཉིད་ན་གཞི་སྣང་དུ་རྣམ་པར་དག །ཅེས་རྒྱས་པའི་རྒྱུད་ལས་གསུངས་པས་ན་ལོག་རྟོག་གི་ཤེས་པ་འདི་ཉིད་གཞི་ཡེ་ཤེས་རང་སྣང་ལས་མ་གཡོས་པའི་ཕྱིར་སྤང་དུ་མེད་དེ། དཔེར་ན་ནམ་མཁའ་སྟོང་པ་ལ་སྤྲིན་དང་འཇའ་ཚོན་སྣ་ཚོགས་སུ་སྣང་བའི་ཚེ་ན། རང་བཞིན་ནམ་མཁའ་སྟོང་པར་ངང་ངམ་ཤུགས་གིས་གནས་པ་ལྟར་རོ། །དེ་ཡང་མདོ་ལས། ཆོས་ཅན་མཚན་མར་སྣང་བའི་རང་བཞིན་རྣམས། །ཆོས་ཉིད་མཚན་མ་མེད་པའི་ངང་དུ་གནས། །ཞེས་སོ། །བཞི་པ་བློ་དངོས་སུ་འབྱེད་པའི་སྐྱོན་དང་། དྲང་། གསང་སྔགས་ལ་དགར་བས་གང་ཟག་དག་རྒྱུ་ཡི་ཐེག་པ་མཚན་ཉིད་པས། ཡུལ་ཡུལ་ཅན་ཀུན་ཏུ་གཟུང་འཛིན་གྱི་རྟོག་པ་ཀུན་རྫོབ་འཁྲུལ་སྣང་འདི་ཉིད་དོན་དམ་གྱི་ངོ་བོ་ལ་བདེན་པར་ཡོད་ན། དོན་དམ་སྤྲོས་བྲལ་གྱི་ངེས་ཚིག་མེད་པར་འདོགས་པས་བདེན་པ་གཉིས་སུ་དབྱེ་སྟེ། ཀླུ་སྒྲུབ་ཀྱིས་འཇིག་རྟེན་ཀུན་རྫོབ་བདེན་པ་དང་། དམ་པའི་དོན་དུ་བདེན་པའོ། །ཞེས་གསུངས་པས། དོན་དམ་གྱི་མཚན་ཉིད་ནི། ཀུན་རྫོབ་གཞིག་ཅིང་མ་གྲུབ་པས་དྭངས་ཞིང་བློའི་སྤྲོས་པ་དང་བྲལ་བས་གསལ་བ་སྣང་བ་རྣམ་པར་དག་པ་གང་ཡིན་པ་དོན་དམ་དུ་འདོད་པའོ། །བསམ་པའི་བློ་དག་ལ་ཀུན་རྫོབ་ཀྱི་སྣང་བ་དེ་དག་ཡོད་ཅེས་སྨྲ་ན། བདེན་གཉིས་སོ་སོར་དགག་བསྒྲུབ་ཅན་དུ་བསྟན་པ་ནི་རྣམ་པར་རྟོག་པའི་བློས་བརྟག་དཔྱད་བྱས་པ་ཡིན་པས་ཆོས་ཉིད་མཐའ་བྲལ་བློ་ལས་འདས་པའི་དོན་རྟོགས་པ་ནི་མ་ཡིན་ནོ། །ལྔ་པ་སྒྲ་ཅི་བཞིན་ཏུ་འཛིན་པ་འཁྲུལ་ཞིང་མི་འཛིན་པ་འཁྲུལ་པ་དང་། དྲང་། གསང་སྔགས་ཀྱི་དོན་ལ་བློ་ཤེད་མ་བྱེ་བའི་ཚིག་ཕྱིར་བློ་འབྲང་བ་དག་གིས། གསང་སྔགས་ཀྱི་རྒྱུད་གཞུང་དུ་སྣོད་བཅུད་རྒྱུད་རྣམས་རིགས་ལྔ་ཡབ་ཡུམ་ཡེ་ཤེས་སུ་དག་པ་གསུམ་དང་། ལྷག་པའི་མཉམ་པ་གཉིས་དང་འཁོར་འདས་སམ་བདེན་གཉིས་གཉིས་མེད་ཀྱི་དོན་དེ་དག་ཚིག་ཙམ་ལ་ཞེན་པས། མ་དག་པ་གསུམ་ལྡོག་པས་དག་པ་གསུམ་དང་། མི་མཉམ་པ་གཉིས་ལྡོག་པས་སྟོང་པར་འདོད་པ་དང་། གཉིས་ཅན་ལྡོག་པས་གཉིས་མེད་སྟོང་པར་འདོད་པ་དང་གསུམ་གྱིས་ཕྱེ་བས་གཞི་ཅི་བཞིན་པའི་དོན་སྒྲུབ་བྱེད་ཀྱི་གཏན་ཚིགས་སྒྲ་གང་ཅིར་ཞེན་ཅིང་བསྒྲུབ་པ་གྲུབ་མཐའི་ཕྱོགས་སུ་འདོད་པ་ནི། ཡུལ་གང་ག་དར་ཅིའི་མི་ཡི་དྭགས་བཞིིན་དུ། བསོད་ནམས་ཆུང་བས་སྤོས་དྲི་མི་གཙང་བ་དང་། དར་ཟབ་ཚེར་མ་རུ་མཐོང་ནས་ཟས་གོས་ལོངས་སྤྱོད་ཀྱི་སྤྱོད་ཡུལ་བྲལ་བ་སྟེ་བཟའ་བཏུང་གི་འདོད་པས་ནི་གདུང་བ་བཞིན་དུ། འཁོར་འདས་ཀྱི་ཆོས་ཐམས་ཅད་རང་བྱུང་ཡེ་ཤེས་ཀྱི་ངང་ཡིན་པ་ལ་བཟང་ངན་དགག་བསྒྲུབ་གཉིས་ཀྱི་རྟོག་པས་བསྡུས་པས་དབྱེར་མེད་ཀྱི་དོན་དང་བྲལ་བ་དང་། གཞི་འབྲས་དབྱེར་མེད་ལྷུན་གྲུབ་ཀྱི་ངང་ཡིན་པ་ལ། ཐེ་ཚོམ་ཡེ་རྔམ་ཟ་བ་སྟེ་ཐ་དད་འདོད་པའོ། །འཁོར་འདས་དབྱེར་མེད་ཀྱི་དོན་གང་ཟག་གང་གིས་ཤེས་པ་ནི། གང་ག་དར་ཙིའི་མི་གཙང་བར་མཐོང་བ་དེ་མི་བསོད་ནམས་ཅན་གྱིས་སྤོས་དྲིར་མཐོང་བ་དང་། ཚེར་མའི་ནང་ན་འདུག་པ་དེ་བསོད་ནམས་ཅན་དེས་ན་བཟར་མཐོང་བ་བཞིན་དུ། འཁོར་འདས་ཀྱི་ཆོས་ཐམས་ཅད་རང་རིག་པ་གཞི་དོན་བྱང་ཆུབ་ཀྱི་སེམས་སུ་དབྱེར་མེད་པ་དེ་ནི་སྒྲོ་སྐུར་ལུང་མ་བསྟན་གྱི་སྐྱོན་དང་བྲལ་བས་ལུང་གི་ཚད་མར་བཞག་པའོ། །དྲུག་པ་བརྩལ་ཐབས་ཡོད་མེད་གཉིས་ཀར་ཚོལ་བ་འཁྲུལ་བ་དང་། དྲང་། གཞི་དོན་བྱང་ཆུབ་སེམས་ཕྱོགས་མེད་ཀྱི་ངོ་བོ་ལ་སྣང་སྟོང་ཕྱོགས་རེར་གཟུང་བ་སྟེ། དེ་ཡང་གཞིའི་ངོ་བོ་ཡོད་པ་སྣང་བ་ཕྱོགས་གཅིག་ལས་བརྩལ་ན་བྱང་བ་སྟོང་པའི་རང་བཞིན་ལ་སྒྲོ་བཏགས་པ་ཡིན་ཏེ། དེ་ལྟར་མེད་པ་སྟོང་པ་ཕྱོགས་གཅིག་ལས་བརྩལ་ན་རིག་རྩལ་འགག་མེད་ཆུབ་པ་སྣང་བའི་རང་བཞིན་ལ་སྐུར་པ་བཏབ་པར་འགྱུར་བ་དང་། ཡང་ཡོད་པ་སྣང་བ་དང་མེད་པ་སྟོང་པ་གཉིས་ཐ་དད་ལས་བཙལ་བར་བྱས་ན། དེ་ནི་ལུང་མ་བསྟན་ཏེ་དབྱེར་མེད་མཉམ་པ་ཉིད་ལུང་མ་བསྟན་དུ་འགྱུར་བ་ཡིན་ནོ། །རྒྱས་པ་ལས་དེ་སྐད་གསུངས་པའི་ཕྱིར་ན་རང་རིག་པ་བྱང་ཆུབ་སེམས་དབྱེར་མེད་ལ། ཡོད་པ་བསྒྲུབ་ཅིང་མེད་པ་དགག་པ་དང་། མེད་པ་བསྒྲུབ་ཅིང་ཡོད་པ་དགག་པས་ཕྱོགས་རེར་གཟུང་བ་ནི་འདུ་ཤེས་ཕྱོགས་གཅིག་པ་སྟེ་བླུན་པོའི་བློ་ཅན་ཡིན་ནོ། །བདུན་པ་དོན་དབྱེར་མེད་ལ་ལྷུན་གྲུབ་ཕྱོགས་གཅིག་པར་འཛིན་པ་འཁྲུལ་པ་དང་། དྲང་། དགག་བསྒྲུབ་བྱས་ན་སྐྱོན་འདུག་པ་དེ་བས་ན་འཁོར་འདས་ཀྱི་ཆོས་ཐམས་ཅད་གཞི་དོན་སེམས་ཀྱི་དེ་ཁོ་ན་ཉིད་དུ་ལྷུན་གྱིས་གྲུབ་པ་ཡིན་པ་ལ། རྒྱུའི་ཐེག་པ་སེམས་ཙམ་པས་ཡུལ་ཡུལ་ཅན་ཀུན་ཏུ་བློས་བརྟགས་པ་སྟེ། མཚན་ཉིད་རྒྱ་ཆད་པའི་དང་། རྣམ་གྲངས་ཀྱི་དང་། ལྟོས་པའི་ཀུན་བརྟགས་དང་གསུམ་པོ་དེ་ཉིད། དག་མ་དག་གྱི་རྒྱུ་རྐྱེན་གཞན་གྱི་དབང་གིས་བྱས་པ་དང་། དོན་ལ་འགྱུར་བ་མེད་པའི་ཡོངས་སུ་གྲུབ་པ་གཞི་དོན་དང་། ཕྱིན་ཅི་མ་ལོག་པའི་ཡོངས་གྲུབ་ལྟ་བ་དང་གསུམ་གྱི་བྱེ་བྲག་ཏུ་ཕྱེས་ཏེ། སྤང་བླང་དགག་བསྒྲུབ་བྱེད་ནས་རང་རིག་རང་གསལ་སྟོང་ཐོག་ཏུ་ལྷུན་གྱིས་གྲུབ་པར་འདོད་པ་དང་། གསང་སྔགས་ཕྱོགས་མེད་ཀྱི་ལྷུན་གྲུབ་འདྲའམ་ཞེ་ན་མི་འདྲ་སྟེ། སྔགས་ཀྱི་གཞི་དོན་ལ། སེམས་ཙམ་ལྟར་ཀུན་བརྟགས་གཞན་དབང་ཡོངས་གྲུབ་གསུམ་གྱིས་དགག་སྒྲུབ་ཅན་གྱི་གཏན་ཚིགས་ཀྱི་བྱ་བ་དེ་དང་གྲུབ་མཐའ་རང་རིག་རང་གསལ་དུ་འདོད་པ་དེ་དག་གྲུབ་པ་མེད་དོ། །འདོད་པ་དེས་ནི་སྔགས་ཀྱི་སྨྲ་བསམ་བརྗོད་དུ་མེད་པའི་གཞི་དོན་ཕྱོགས་མེད་ལྷུན་གྲུབ་ཀྱི་དོན་ལ་མི་འཇོག་སྟེ་མི་བཞག་གོ། །དེ་ཡང་ལ་ཤན་ལས། གཞན་གྱི་དམ་པའི་དོན་དེ་ཉིད། །ཕྱོགས་གཅིག་ལ་གནས་ཡང་དག་མིན། །རྐྱེན་སྣང་སེ་གོལ་ཆ་ཡི་ཕྱིར། །གཉིས་བྲལ་སྨྲ་བའི་རིག་པས་འགལ། །ཞེས་སོ། །འོ་ན་གཞིའི་ངོ་བོ་གང་ཞེ་ན། སེམས་ཉིད་རང་བྱུང་གི་ཡེ་ཤེས་ཀྱིས་ཤེས་བྱའི་ཆོས་ཀུན་ལ་བགོས་པ་མེད་པར་ཁྱབ་པས་རྒྱས་བཏབ་ཅིང་ལྷུན་གྱིས་གྲུབ་པས་ན། སེམས་ཉིད་ཀྱི་རང་བཞིན་འཁོར་འདས་ཀྱི་ཆོས་ཀུན་དང་དབྱེར་མེད་ཀྱི་ངང་དུ་གནས་པ་ཡིན་པ་ལས་མ་གཏོགས་པ། མེད་པ་འབའ་ཞིག་གི་ཕྱོགས་མ་ཡིན་ཏེ། རྒྱས་པ་ལས། དཔེར་ན་རྒྱལ་པོས་རྒྱས་བཏབ་ན། །སེམས་ཅན་ཀུན་གྱི་ཡོངས་མི་འདའ། །དེ་བཞིན་མཉམ་ཉིད་ཕྱག་རྒྱ་ཡིས། །ཀུན་ལ་ཁྱབ་ཅིང་ཐམས་ཅད་སྣང་། །སྐུ་གསུང་ཐུགས་ཀྱིས་རྒྱས་བཏབ་ན། །ཞེས་སོ། །འོ་ན་དབུ་མའི་ལྟ་བ་དང་འདྲའམ་ཞེ་ན་མ་ཡིན་ཏེ། མེད་པར་འདོད་པའི་དཔེ་མི་སྲིད་པའི་ཆོས་བཞི་སྟེ། གླིང་བཞི་གཅིག་ལ་འཁོར་ལོ་བསྒྱུར་རྒྱལ་གཉིས་མི་སྲིད། བསྟན་པ་གཅིག་ལ་སྟོན་པ་གཉིས། གླིང་བཞི་གཅིག་ལ་ཉི་ཟླ་ཕྲུགས་གཉིས། བུད་མེད་ལ་རང་སངས་རྒྱས་མི་སྲིད་པ་ལྟར་སྟོང་ཉིད་སྤྲོས་བྲལ་དབྱེར་མེད་ཕྱོགས་གཅིག་ཙམ་དུ་གནས་པར་འདོད་པའང་མེད་དེ། ལ་ཤན་ལས། མཉམ་རྫོགས་བདག་ཉིད་ཆེན་པོའི་ཕྱིར། །བདེན་པ་གཉིས་ཀྱི་སྐད་ལས་འདས། །ཞེས་པ་དང་། ཀློང་ཆེན་ལས། ཡོད་མཐོང་གྲགས་པའི་ཆོས་རྣམས་དང་། །མེད་སྣང་བརྟགས་པའི་ཆོས་རྣམས་ཀུན། །རང་ལ་ཐ་དད་མེད་པས་ན། །གཉིས་སུ་མེད་པར་ཡེ་གནས་གསལ། །ལྟོས་པ་མེད་པར་རང་སར་གྲོལ། །ཞེས་སོ། །བརྒྱད་པ་བདེན་པ་དབྱེར་མེད་ཀྱི་དཔེ་དོན་སྒྲ་ཅི་བཞིན་དུ་རྟོག་པ་འཁྲུལ་པའོ། །དྲང་། འོ་ན་སྔགས་ཀྱི་དབྱེར་མེད་གང་ཞེ་ན། ཆུ་དང་གཟུགས་བརྙན་ལྟར་དོན་དམ་དང་ཀུན་རྫོབ་ཀྱི་བདེན་པ་རྣམ་པ་གཉིས་པོ་ཡེ་ནས་སྔ་ཕྱི་དང་བཟང་ངན་ཐ་དད་མེད་པར་དབྱེར་མེད་ཡིན་པའི་ཕྱིར་ཏེ། དེས་ན་གཞིའི་ངོ་བོ་ལ་ཀུན་རྫོབ་དགག་ནས་དོན་དམ་ཕྱོགས་གཅིག་སྒྲུབ་པ་དང་། ཡང་དོན་དམ་དགག་ནས་ཀུན་རྫོབ་བསྒྲུབ་ཏུ་མེད་པའི་ཕྱིར་ཡེ་ནས་གཉིས་མེད་ཀྱི་ངོ་བོ་སྨྲ་བའི་ཚིག་དང་བསམ་པའི་བློ་ལས་གྲོལ་བ་ཡིན་ཏེ། དེ་ཡང་འཁོར་འདས་ཀྱི་ཆོས་ཐམས་ཅད་རང་བྱུང་གི་ཡེ་ཤེས་སུ་རིག་པ་རང་སྣང་བའི་ཕྱིར། གོང་ལྟར་འཁོར་འདས་སམ་བདེན་གཉིས་མི་མཐུན་པ་གཉིས་ལྷན་ཅིག་ཏུ་འདུས་པར་བློས་བརྟག་ཏུ་མེད་དེ། དཔེར་ན་ཡིད་བཞིན་གྱི་ནོར་བུ་དང་དཔག་བསམ་གྱི་ལྗོན་ཤིང་ལ་རྟོག་མེད་དུ་དགོས་འདོད་ལྷུན་གྱིས་གྲུབ་པ་ལྟར་བྱེད་པ་པོ་མེད་པར་བདེན་གཉིས་དབྱེར་མེད་དུ་གནས་པ་ཡིན་པ་ལ། བདེན་གཉིས་ཚིག་གིས་ཐ་དད་དུ་སྒྲ་ཅི་བཞིན་པ་རུ་སོ་སོར་བཟང་ངན་ཐ་དད་དུ་རྟོག་པ་ནི་བླ་མེད་ཀྱི་གཞི་དོན་དབྱེར་མེད་ལྷུན་གྲུབ་ཀྱི་དོན་ལ་འཁྲུལ་ཏེ་མི་རྟོགས་པའོ། །བཞི་པ་ངེས་ཚིག་ལ་གསུམ་སྟེ། གཞིའི་སྣང་བའི་ངེས་ཚིག་དང་། དེ་ལྟར་སྣང་དུས་འཁོར་འདས་གཉིས་མེད་དུ་ལ་བཟླ་བའི་དཔེ་དོན་བསྟན་པ་དང་། རྒྱུད་ཀྱི་ངེས་ཚིག་གོ། །དང་པོ་གཉིས་ཏེ། དང་པོ་སྣང་བའི་ངེས་ཚིག་དང་། དྲང་། དེ་ལྟར་དོན་དམ་དང་ཀུན་རྫོབ་བདེན་པ་གཉིས་གཞི་དོན་ལ་གཉིས་སུ་མེད་པ་དེ་ཡང་། དོན་དམ་ནམ་མཁའ་སྟོང་པ་དང་འདྲ་བའི་ངང་དུ་ཀུན་རྫོབ་བདེན་པ་འཇའ་ཚོན་དང་སྤྲིན་ལྟར་དབྱེར་མེད་པར་སྣང་བ་བཞིན་དུ། སྣང་བ་ཀུན་རྫོབ་དང་སྟོང་པ་དོན་དམ་གཉིས་དུས་དང་རྣམ་པ་ཀུན་ཏུ་སེམས་ཉིད་དབྱེར་མེད་རང་དུ་གསལ་བ་དེ་བས་ན། རང་བཞིན་ངམ་ངམ་ཤུགས་ཀྱི་རང་སྣང་བའོ། །གཉིས་པ་དེ་ཉིད་ངང་སྣང་ཡིན་ཚུལ་ལུང་གིས་གསལ་བའོ། །དྲང་། དེ་ལ་བདག་སེམས་ངང་གཞན་ཡུལ་དུ་བློས་ཐ་དད་དུ་མ་རྟགས་པར། ཤེས་བྱ་མ་འདྲེས་པར་སོ་སོར་རང་སྣང་ཞིང་མཐུན་པའི་གཟུགས་སུ་རིག་རྩལ་འགག་མེད་དུ་ཤར་བ་དཔེ་དེ་ལྟ་བུ་དོན་དེ་ཡི་ངང་དུ་རང་སྣང་བའོ། །ཞེས་རྒྱས་པ་ལས་དེ་སྐད་གསུངས་པའི་ལུང་གིས་དོན་འདིར་དྲང་ཞིང་བགྲོད་དང་གོ་བ་དང་རྟོགས་པར་ཡང་སླའོ། །གཉིས་པ་དེ་ལྟར་དུ་སྣང་དུས་འཁོར་འདས་གཉིས་མེད་དུ་ལ་བཟླ་བའི་དཔེ་དོན་བསྟན་པ་དང་། དྲང་། གཟུང་འཛིན་ཕྱིན་ཅི་ལོག་པ་དེ་ཉིད་ཡང་དག་པའི་གནས་ལུགས་སུ་ལ་བཟླ་བ་ཡིན་ཏེ། ཅིའི་ཕྱིར་ན། ཁམས་གསུམ་གྱི་རྒྱུ་མ་རིག་པ་དེ་ཉིད་རང་རིག་པའི་ཡེ་ཤེས་སུ་སྒྲིབ་གཡོགས་མེད་པར་གསལ་ཞིང་། རྐྱེན་ཉོན་མོངས་ལྔ་དང་ལས་གསུམ་འབྲས་བུ་སྡུག་བསྔལ་དང་བཅས་པ་བྱང་ཆུབ་མཆོག་སངས་རྒྱས་ཀྱི་དགོངས་པ་ཡིན་པར་ཡེ་ནས་གནས་པའི་དོན་དེ་ཉིད། རྒྱས་པ་ལས་དེ་སྐད་གསུངས་པའི་དོན་གྱིས་ན་དེ་དག་ཐ་དད་དུ་བྱས་ནས་གཟུང་འཛིན་དེ་འཕོས་ནས་ཡང་དག་དང་། མ་རིག་པ་དེ་འཕོས་ནས་ཡེ་ཤེས་དང་། ཉོན་མོངས་སྡུག་བསྔལ་འཕོས་ནས་བྱང་ཆུབ་མཆོག་ཏུ་བསྒྲུབ་ཏུ་མེད་པ་ནི། དཔེར་ན་མར་མེ་གསལ་བའི་དུས་ན་མུན་པ་མ་སྤངས་ཀྱང་མུན་པ་ངོ་བོ་ཉིད་ཀྱིས་མི་ལྡན་པ་བཞིན་དུ། བླུན་པོ་མཚན་ཉིད་པས་མུན་པ་སྟེ་འཁོར་བ་སྣང་བ་དང་། སྣང་བ་སྟེ་འདས་པ་སྟོང་པ་གཉིས་རེས་མོས་ཐ་དད་དུ་མཐོང་བའོ། །དབྱེར་མེད་ཀྱི་དོན་ལ་མཁས་པ་གསང་སྔགས་པས་ནི། གཞི་སྣང་ལ་འཁོར་འདས་ཀྱི་ངོ་བོ་བཟང་ངན་ཐ་དད་ཀྱི་རིས་སུ་མི་ལྟ་སྟེ། འཁོར་བའི་ཆོས་ཐམས་ཅད་གཞི་ཆོས་ཉིད་དེ་བཞིན་ཉིད་ཀྱི་ངང་དུ་རྩལ་མ་འགགས་པར་རང་སྣང་བ་ཡིན་ནོ། །གཞི་སྣང་དུ་འཁོར་བ་བཏགས་པ་བ་སྤངས་པ་མེད་པར་འཁོར་བ་རང་རྒྱུད་ཀྱི་སྐྱོན་ཀུན་དང་བྲལ་བ་ནི། དཔེར་ན་མེ་ཏོག་པུཎྜ་རི་ཀ་དཀར་པོ་ལ་ནག་པོའི་སྐྱོན་མེད་པ་ལྟ་བུའི་གཞི་དོན་ཡིན་ཏེ། ལ་ཤན་ལས། འཁོར་བ་ཀ་དག་རིན་ཆེན་གླིང་། །ཞེས་པ་དང་། ཁོག་གཞུང་ལས། ཡེ་ནས་ཆོས་སྐུར་སངས་རྒྱས་ཏེ། །རྒྱུ་གཞི་རང་བྱུང་ཡེ་ཤེས་པས། །རྒྱུ་ཡི་ངོ་བོ་གདོད་ནས་དག །མ་རིག་པ་ཉིད་ཡེ་ཤེས་ཕྱིར། །འཁོར་རྒྱུ་མ་བཅོས་རང་བཞིན་མཉམ། །ཕྲལ་དུ་ཆགས་སྡང་ཡེ་ཤེས་ལྷར། །ཡེ་ནས་མ་བཅོས་མ་གསལ་སྟེ། །ཉོན་མོངས་རང་སྤྱི་སྐུ་གསུང་ཐུགས། །ཡིན་ཕྱིར་རྐྱེན་ཡང་སངས་རྒྱས་སོ། །རྒྱུ་རྐྱེན་འབྲས་བུའི་རང་བཞིན་བས། །མ་སྤང་འབྲས་བུ་སངས་རྒྱས་ཏེ། །རྡོ་རྗེ་ཕུང་སོགས་སངས་རྒྱས་པའོ། །ཉི་མའི་སྙིང་པོ་མུན་པ་བཞིན། །རང་བཞིན་ངང་ལ་འཁོར་བ་མེད། །ཅེས་སོ། །གསུམ་པ་རྒྱུད་ཀྱི་ངེས་ཚིག་གོ། །དྲང་། གཞི་དོན་དེ་ལ་ལམ་གྱི་ཆོས་རྣམས་དང་འབྲས་བུའི་ཆོས་ཀྱི་ཆེ་ཡོན་ཐམས་ཅད་ལྷུན་གྱིས་གྲུབ་ཅིང་ཚང་བར་གནས་པས་ན། གོང་ལྟར་གཞི་དང་ལམ་འབྲེལ། ལམ་དང་འབྲས་བུ་འབྲེལ། གཞི་འབྲས་གཉིས་ངོ་བོ་བདག་ཉིད་གཅིག་པར་འབྲེལ་པ་དང་གསུམ་གྱི་ཏནྟྲ་སྟེ་རྒྱུད་ཅེས་བྱའོ། །དེ་ཡང་ལམ་རིམ་ལས། དེ་ལས་གཞན་པའི་ཐོབ་བྱ་མེད། །ཀུན་ཀྱང་སྨིན་ཟིན་བགྲོད་པ་མེད། །དེ་ཉིད་ལམ་གྱི་ངོ་བོ་ཡིན། །ཞེས་པ་དང་། རྔམ་གློག་ལས། ཕུན་སུམ་ཚོགས་པ་ལྔ་ཚོགས་ཤིང་། །འབྲེལ་དང་མ་ཚང་མེད་པ་དང་། །ཡོངས་སུ་རྫོགས་པས་རྒྱུད་ཅེས་བྱ། །ཞེས་སོ། །སྤྱིར་གཞི་ལམ་འབྲས་བུའི་གནས་སྐབས་སུ་འཁྲུལ་པ་ཡོད་མེད་ཀྱི་བརྟགས་པ་ལ་གསུམ་ལས། དང་པོ་གཞིའི་ངོ་བོ་ལ་འཁྲུལ་པ་མེད་དེ། གཞི་དོན་བྱང་ཆུབ་ཀྱི་སེམས་རང་བྱུང་གི་ཡེ་ཤེས་ལ། ལས་ཉོན་ཤེས་བྱའི་སྒྲིབ་པ་ཀ་ནས་དག་པ་ཡིན་པའི་ཕྱིར་ཏེ། གསང་སྙིང་ལས། བཅིངས་མེད་རྣམ་པར་གྲོལ་མེད་པས། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་པ་དང་། ནམ་མཁའ་མཐའ་མཉམ་གྱི་རྒྱུད་ལས། ཐག་པའི་རང་བཞིན་སྦྲུལ་མེད་ཀྱང་། །འཁྲུལ་པའི་ངོ་ལ་སྦྲུལ་དུ་སྣང་། །རང་སེམས་མ་བཅོས་ཅི་བཞིན་ལ། །འཁྲུལ་པའི་གཉིས་སུ་རྟོག་པས་བཟུང་། །ཞེས་པ་དང་། བང་མཛོད་ལས། ཐོ་མི་ཐག་སྦྲུལ་སྨིག་རྒྱུ་ལྟར། །ལོག་པའི་ཀུན་རྫོབ་འཁྲུལ་གསུམ་ཡོན། །ཞེས་པ་དང་། འདི་ཉིད་ལས། སྤྱིར་ནི་ལོག་རྟོག་བསམ་ཡས་པ། །ཡེ་ནས་ཡོད་པ་མ་ཡིན་ཏེ། །ཞེས་སོགས་དུ་མ་གསུངས་སོ། །ཡང་བརྟགས་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དྲི་མ་དེ་བསལ་སངས་རྒྱས་ཉིད། །ཅེས་དང་། འཇམ་དཔལ་རོལ་པའི་མདོ་ལས། སྲིང་མོ་འདི་ལྟ་སྟེ། ནམ་མཁའ་ལ་མེ་འབར་ཡང་ནམ་མཁའ་ཚིག་པར་མི་ནུས་ཏེ། དེ་བཞིན་སེམས་ཉིད་རང་བཞིན་གྱི་འོད་གསལ་བ་ལ་གློ་བུར་གྱི་དྲི་མ་བྱུང་ཡང་། རང་བཞིན་གྱི་འོད་གསལ་བ་དེ་གློ་བུར་གྱི་དྲི་མས་ཀུན་ནས་ཉོན་མོངས་པ་ཅན་དུ་བྱས་པར་མི་ནུས་སོ། །ཞེས་པ་དང་། ཚད་མ་རྣམ་འགྲེལ་དུ། སེམས་ཉིད་རང་བཞིན་འོད་གསལ་བ། ཉོན་མོངས་ཅན་ནི་གློ་བུར་བ། ཞེས་པ་དང་། དམ་པ་རྒྱ་གར་གྱིས། འཁྲུལ་པ་གཞི་ལ་མེད་དེ་གློ་བུར་པ། །མཚན་ཉིད་གོ་བས་ཆོག་གོ་དིང་རི་བ། །ཞེས་སོ། །དེ་ལྟར་མ་ཡིན་ཏེ། གཞི་འཁྲུལ་ཟེར་ན། སེམས་ཅན་སངས་རྒྱས་མི་སྲིད་པ་དང་། ལམ་ཐོས་བསམ་སྒོམ་གསུམ་གྱིས་འཁྲུལ་པ་མི་སེལ་བ་དང་། གཞི་ལ་དྲི་མ་ཡོད་པའི་ཕྱིར། སོལ་བ་ལ་དུང་མི་འབྱུང་བ་བཞིན་ནོ། །གཉིས་པ་ལ་ལམ་གྱི་གནས་སྐབས་སུ་འཁྲུལ་མ་འཁྲུལ་ཡོད་དེ། དེ་ཡང་མཉམ་གཞག་ཆོས་ཉིད་ཀྱི་ངོ་བོ་ལ་འཁྲུལ་པ་མེད་དེ། འོན་ཀྱང་རྗེས་ཤེས་ལ་མཐར་ལམ་གྱི་བར་དུ་འཁྲུལ་པའི་ཐ་སྙད་ཡོད་པ་ཡིན་ཏེ། ཅི་སྐད་དུ། མ་རྟོགས་སེམས་ཅན་ཐམས་ཅད་ལ། །འཁྲུལ་པ་ཟང་མ་གནས་པ་ཡིན། །ལམ་ལ་གནས་པའི་རྣལ་འབྱོར་ལ། །འཁྲུལ་དང་ཡེ་ཤེས་དུམ་བུར་གནས། །དུམ་བུར་གནས་ཤིང་དུམ་བུར་མཐུད། །ཅེས་སོ། །གལ་ཏེ་ལམ་གྱི་ངོ་བོ་འཁྲུལ་ན། ལམ་མཐར་ཕྱིན་ཙ་ན། འཁྲུལ་པ་མཐར་ཕྱིན་པ་ལ་སོགས་པའི་སྐྱོན་དུ་མ་ཡོད་དོ། །གསུམ་པ་འབྲས་བུའི་དུས་སུ་འཁྲུལ་པ་ཀ་ནས་དག་སྟེ། སྒྲིབ་པ་ཐམས་ཅད་སངས་ཤིང་ཡེ་ཤེས་ཀྱི་ཡོན་ཏན་ཐམས་ཅད་རྒྱས་པའི་ཕྱིར་ཏེ། དེ་ཉིད་ལས། དུས་གསུམ་སངས་རྒྱས་ཐམས་ཅད་ལ། །ཡེ་ཤེས་ཟང་མར་གནས་པ་ཡིན། །ཞེས་པ་དང་། ཡིད་སྐྱོབ་ལས། རང་བྱུང་ཡེ་ཤེས་སྤྲོས་དང་བྲལ་བས་སངས། །སྤྲོས་བྲལ་རྟོགས་པའི་རིང་དུ་ཆུབ་པས་རྒྱས། །ཞེས་པ་དང་། ལམ་ཆུང་ལས། སངས་པས་ཡེ་ཤེས་ཕྱོགས་བྲལ་རྒྱས། །ཞེས་སོ། །གཉིས་པ་ལེའུའི་མཚན་ནོ། །དྲང་། ཐུགས་ཀྱི་ཐིགས་པ་ནི། མཚན་དོན་དང་འབྲུ་མཐུན་པ་ལས་རང་བཞིན་དབྱེར་མེད་བཅོས་སླད་དང་བྲལ་བ་ལས། དགོས་པ་ཚང་ཞིང་འབྲེལ་པ་དང་ལྡན་པས་ན་རྒྱུད་དེ་ཉིད་དུ་རིག་རྩལ་འགག་མེད་དུ་སྣང་བའི་གཞུང་དོན་གཅོད་ཅིང་མཚམས་འཛིན་པར་བྱེད་པས་ན་ལེའུ་ཞེས་བྱ་སྟེ། ཡས་བགྲང་དང་པོའི་དོན་དུ་གདའོ།། ༈ །།གཉིས་པ་འཁྲུལ་སྣང་ལ་གཉིས་ཏེ། གཞུང་དང་མཚན་དོན། དང་པོ་ལ་གཉིས་ཏེ། བགྲང་། དང་པོ་མདོར་བསྟན་པ་དང་། དྲང་། འཁྲུལ་པའི་གཞི་ནི་གཞི་ངོ་བོ་ཉིད་སེམས་ཀྱི་ཆོས་ཉིད་དང་། འཁྲུལ་པའི་ཚུལ་ནི། མ་རིག་པ་ལས་བྱུང་བའི་ཁམས་གསུམ་གྱི་འཁྲུལ་པའི་ངོ་བོ་དུས་ཐོག་མཐའ་ཡང་དག་པའི་སྤྱན་དང་བྲལ་བ། རང་བཞིན་ནི་འཁྲུལ་པའི་དུས་ཉིད་ནའང་གཞི་དོན་ལས་མ་གཡོས་པ་གསུམ་གྱི་སྡོམ་ཚིག་དེའི་ནང་དུ་འཁྲུལ་པའི་ཆོས་རྣམས་ངེས་པར་ཤེས་པར་བྱའོ། །གཉིས་པ་རྒྱས་བཤད་དེ་ལ་གསུམ་སྟེ། འཁྲུལ་གཞི་དང་། འཁྲུལ་ཚུལ་དང་། རང་བཞིན་ནོ། །དང་པོ་ལ་ལྔ་སྟེ། བགྲང་། དང་པོ་གཞི་སྒྲོ་སྐུར་དང་བྲལ་བར་བསྟན་པ་དང་། དྲང་། རྒྱུད་དྲུག་ལས་ཀྱི་དབང་གིས་འགྲོ་བའི་མཐོ་རིས་གནས་གསུམ་ངན་སོང་གནས་གསུམ་དང་དྲུག་གི་སེམས་ཅན་ཐམས་ཅད་ཀྱི། སེམས་ཀྱི་གནས་ལུགས་ཉིད་ནི་དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ལ་རྟོག་པ་མེད་ཀྱང་། དགོས་འདོད་སྐོང་བའི་ཡོན་ཏན་ཟད་འཕེལ་མེད་པ་དེ་བཞིན་ཏུ། སེམས་ཉིད་ཅི་ལྟར་རང་གིས་བསམ་པ་ལྟར་རིག་རྩལ་འགག་མེད་དུ་སྣང་བའི་གཞི་དོན་ལ། འཁྲུལ་གཞི་མ་རིག་པ་དངོས་པོ་རང་ཁ་མར་ཡོད་པར་སྒྲོ་འདོགས་པ་དང་། རང་བཞིན་སྟོང་པ་ཕྱོགས་གཅིག་གི་ངོ་བོ་ལ། རིག་རྩལ་འགག་མེད་སྣང་བ་མེད་པར་སྐུར་པ་བཏབ་པའི་མཐའ་གཉིས་དང་བྲལ་ཞིང་སེམས་ཉིད་མ་འདྲེས་ཡོངས་རྫོགས་སུ་གནས་པ་དེ་ལ། གཉིས་པ་འཁྲུལ་གཞི་ཡོད་པ་ལ་འཁྲུལ་པའི་སྐྱོན་དང་། དྲང་། གང་གིས་སྒྲོ་བཏགས་ན། གཞི་ལྷུན་གྲུབ་ཀྱི་ཡེ་ཤེས་ལ་རྨོངས་པས། འཁྲུལ་གཞི་མ་རིག་པ་རང་རྒྱུད་དུ་ཡོད་པར་སྒྲོ་འདོགས་པ་དེས་དབང་བསྒྱུར་ནས་འཁྲུལ་པ་འབྱུང་བར་འདོད་པའི་གང་ཟག་ཕྱོགས་གཅིག་པ་རྣམས་ཀྱིས། གང་ལ་སྒྲོ་འདོགས་ན་དེ་རྣམས་ཀྱིས། བྱང་ཆུབ་སེམས་ཀྱི་ཆོས་ཉིད་ཀྱི་ངོ་བོ་ལ་མ་རིག་པ་རང་ཁ་ལ་དམིགས་སུ་མེད་པ་ཡིན་པ་ལ་སྒྲོ་འདོགས་ཚུལ་ཅི་ལྟར་ན་མ་རིག་པའི་དངོས་པོ་སྟེ་ངོ་བོ་རང་རྒྱུད་ཅན་ཅིག་གཞིའི་ངོ་བོར་ཡོད་པར་སྨྲ་བའི་སྐྱོན་རྣམས་ནི། གང་ཟག་དེ་ཡི་ལྟ་བ་འཛིན་པའི་རིགས་རྒྱུད་ཐམས་ཅད་མུ་སྟེགས་རྟག་པར་ལྟ་བ་མ་ལྟུང་བ་དང་། སོལ་བ་ལ་དུང་མི་འབྱུང་བ་ལྟར། སེམས་ཅན་ལ་སངས་རྒྱས་མི་འབྱུང་བ་དང་། གཞི་འཁོར་བའི་མཐར་ལྟུང་བ་དང་། ལམ་ཐོས་བསམ་སྒོམ་གསུམ་གྱིས་འཁྲུལ་པ་མི་སེལ་བ་དང་། གཞི་ལ་འཁོར་འདས་ཐ་དད་དུ་ཐལ་བ་དང་། གལ་ཆུང་ན་ཐེག་དམན་ཉན་རང་དུ་གོལ་བ་ལ་སོགས་པའི་སྐྱོན་དུ་མ་ཡོད་པ་ཡིན་ཏེ། གསང་ཐིགས་ལས། ཆོས་དང་སེམས་གཉིས་སོ་སོར་མི་འགྱུར་བས། །དེ་ནི་རྟག་པའི་མཐའ་སྟོང་གྲོལ་བ་མེད། །ཅེས་པ་དང་། ནམ་མཁའ་ཀློང་ཡངས་ལས། རང་སེམས་རྒྱུན་གྱི་རྟག་པར་འདོད། །བདག་ཏུ་ཁས་ལེན་མུ་སྟེགས་དང་། །ཚིག་ལ་ཁྱད་ཡོད་དོན་ལ་མེད། །ཅེས་པ་དང་ཡེ་ཤེས་གསང་བ་ལས། ལྟ་སྤྱོད་ལོག་པའི་ང་རྒྱལ་ཅན། །མ་བཅོས་རང་གར་རོལ་པ་དང་། །རྣམ་རྟོག་ཞེན་པས་བརྟགས་པ་དག །བྱེ་བྲག་མ་ཕྱེད་རྨོངས་པའི་བློ། །རྡོ་ལ་གསེར་དུ་འཛིན་པ་བཞིན། །འོད་གསལ་ལྷུན་གྲུབ་རང་སྣང་དེ། །བརྟགས་པའི་ཞེན་པ་བསྲེས་ནས་སྨྲ། །མ་བཅོས་རིག་པ་གྲངས་མེད་པར། །ལྟ་བ་ཡ་རབས་མཐོ་འདོད་པ། །བབ་ཆོལ་འདོད་ལྔ་སྤྱོད་པས་ལོག །དེ་ཡི་དུས་ཀྱི་གང་ཟག་རྣམས། །སྦྲེལ་མ་གཡང་དུ་ལྷུང་བ་བཞིན། །རྡོ་རྗེ་ཁབ་ཏུ་ལྟུང་གྱུར་ནས། །བྱང་ཆུབ་སེམས་ཀྱི་རིགས་དང་བྲལ། །ཞེས་སོ། །གསུམ་པ་མེད་པ་འཁྲུལ་པའི་སྐྱོན་དང་དྲང་། གང་གིས་སྐུར་བས་བཏབ་ན། གང་ཟག་འགའ་ཞིག་གིས་ཆུབ་པ་སྣང་བའི་རང་བཞིན་ལ་སྐུར་པ་བཏབ་པ་ནི་འདི་ལྟ་སྟེ། གང་ལ་བཏབ་ན་གཞི་སྣང་འཁོར་འདས་ལྷུན་གྱིས་གྲུབ་པ་ལ་བཏབ། ཚུལ་ཅི་ལྟར་ན། གཞི་སྟོང་པར་འདོད་པ་དེ་དང་། བསམ་པའི་བློ་སྣང་གཉིས་ཡོད་མེད་སོ་སོར་རྟོག་ནས། འདས་པ་སྟོང་པ་དེ་ལ་འཁོར་བ་སྣང་བ་དེ་ནི་དབྱེར་མེད་དུ་མི་སྲིད་དེ། དཔེར་ན་རི་བོང་ལ་རྭ་མེད་པ་བཞིན་དུ། གཞི་སྟོང་པའི་ངོ་བོ་ལ་ཡེ་གདོད་མ་ནས་རིག་རྩལ་འགག་མེད་ཀྱི་སྣང་བ་མེད་ཅེས་སྨྲས་ནས། ཞེན་པའི་བློའི་ངོ་བོ་ལ་གཞི་སྟོང་པ་མེད་དོ་ཞེས་སྨྲ་ན་སྐྱོན་རྣམས་ནི། གཞི་ཡེ་ཤེས་རང་སྣང་ལ་སྐུར་པ་བཏབ་པའི་གང་ཟག་གང་ཡིན་པ་དེ་ཕུགས་སྟོང་པ་ཅང་མེད་དུ་འདོད་པ་ནི་མུ་སྟེགས་ཆད་ལྟ་རུ་ལྟུང་བ་དང་། གཞི་སྟོང་པ་དེ་དང་བློ་སྣང་བ་དེ་གཉིས་ཐ་དད་ཅིང་སྣང་སྟོང་སྔ་ཕྱི་ཅན་དུ་ཐལ་བ་དང་། མི་སྲིད་པའི་དཔེ་བཞིན་དུ་ཀུན་འབྱུང་འཁོར་བའི་ཆོས་ལ་ཐོག་མ་བྱུང་བ་དང་། འང་གི་སྒྲས་འཁོར་བ་ལ་ཐ་མ་འབྱུང་བའི་སྐྱོན་དང་། གོལ་ཆུང་ན་དབུ་མ་ལ་ལྟུང་བའི་སྐྱོན་ཡོད་དེ། ནམ་མཁའ་ཀློང་ཡངས་ལས། སྟོང་པར་བཏགས་པ་དོན་ལས་འཁྲུལ། །མུ་སྟེགས་ཆད་པར་ལྟ་བ་དང་། །ཚིག་ལ་ཆད་ཡོད་དོན་ལ་མེད། །ཅེས་པ་དང་། མདོ་ལས། སྟོང་པ་ཉིད་དུ་མུ་ཆད་པས། །ཆད་པའི་ཁམས་ཆེན་ཉིད་དུ་འགྱུར། །དེས་ནས་སླར་ཡང་འཕོས་པ་ཡིས། །གྲོལ་ཐར་ལམ་ནི་ཆད་པར་འགྱུར། །ཞེས་པ་དང་། གསང་ཐིག་ལས། ཐམས་ཅད་གདོད་ནས་དག་པས་བློ་ཡུལ་མིན། །དེ་ནི་ཆད་པའི་མཐའ་སྟེ་གྲོལ་བ་མེད། །ཅེས་པ་དང་། གང་ཡང་ཡོད་པ་མ་ཡིན་ཏེ། །ཅི་སྐད་སྨྲས་ཀྱང་སྒྲོ་བཏགས་ཡིན། །དོན་གྱི་ངོ་བོ་ཅི་ཡང་མེད། །ཅི་མེད་སྐྱེ་མེད་ཕྱལ་བར་ཆད། །ཅེས་སོ། །བཞི་པ་གཉིས་མེད་ཕྱོགས་གཅིག་ལས་འཁྲུལ་པའི་སྐྱོན་དང་། དྲང་། གང་ཟག་ལ་ལ་སྟེ་འགའ་ཞིག་གིས་གཞི་སྣང་ལ་མ་རིག་པ་ལ་སོགས་མ་དག་པའི་སྣང་བ་ལྡོག་ནས་དག་པའི་སྣང་བར་གཉིས་སུ་མེད་པའི་གཞི་དོན་དེ་ངོ་མ་ཤེས་པ་ལས་འཁོར་བར་སྣང་ཞེས་སྨྲ་ནའང་རྒྱུད་ལྷན་ཅིག་སྐྱེས་པའི་མ་རིག་པ་དེ་རིག་པ་དེ་རིག་རྩལ་འགག་མེད་དུ་མེད་པ་དག་པའི་སྣང་བ་ཕྱོགས་གཅིག་ཏུ་ཐལ་བ་དང་། གཞི་ལམ་རིག་པ་རིག་རྩལ་འགག་མེད་ཀྱི་སྣང་བ་མེད་ན་རྣམ་བྱང་གི་རྟེན་པའི་ཆ་མི་དགོས་ཏེ་མེད་པར་ཐལ་བ་དང་། འཁོར་བའི་འཁྲུལ་གཞིར་བརྒྱུད་རྒྱུར་མི་བཏུབ་པ་དང་། གཞི་འཁོར་འདས་དབྱེར་མེད་མ་ཡིན་པར་ཐལ་བ་དང་། གོལ་ཆེ་ན་མུ་རྟུག་ཏུ་གོལ་བ་དང་། གོལ་ཆུང་ན་སྔགས་ཕྱི་རྒྱུད་ལ་གོལ་བ་ལ་སོགས་པའི་སྐྱོན་ཡོད་པ་ཡིན་ཏེ། གཞི་སྣང་ལ་རྒྱུ་མ་རིག་པ་དང་། རྐྱེན་ལས་ཉོན་སྤང་སྟེ་བྲལ་བ་དེས་ན་འབྲས་བུ་ཁམས་གསུམ་འཁོར་བ་དང་བཅས་པ་གཞི་སྣང་བ་མེད་ན། གཉིས་མེད་ཕྱོགས་ཅིག་དེ་ཉིད་འཁོར་འདས་ཀྱི་སྤྱི་གཞིར་རིགས་ཤིང་འཐད་པ་མིན་ནོ། །དེ་ཡང་རྒྱས་པ་ལས། ཐབས་ཀྱི་ཐེག་པ་ཆེན་པོ་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོན་དམན་དེ་ཙམ་མོ། །ཞེས་པ་དང་། དཔེ་ཆུང་རང་གནས་ལས། ཐམས་ཅད་མ་ལུས་ཆོས་སོ་ཅོག །སེམས་ཉིད་ལས་ནི་གཞན་མེད་དེ། །འདི་ལྟར་སྣང་བའི་ཆོས་རྣམས་ཀུན། །གདོས་པོ་ཅན་གྱི་ཆོས་མིན་ཏེ། །རྟོག་མེད་རང་རིག་འོད་གསལ་བའི། །ཤེས་པ་འབའ་ཞིག་ཁོ་ནའི་ཕྱིར། །འཇིག་རྟེན་བརྟེན་གཡོ་ལ་སོགས་པའི། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུ་ཆེན་པོ་ཡིན། །ཞེས་སོ། །ལྔ་པ་ཐུན་མོང་མ་ཡིན་པའི་ཐུན་མོང་ལས་འཁྲུལ་བའོ། །དྲང་། གཞི་དོན་འཁོར་འདས་དབྱེར་མེད་མཉམ་པ་ཉིད་ལ་ཡོད་པ་སྣང་བ་དང་། མེད་པ་སྟོང་པ་ཕྱོགས་གཅིག་གི་རིགས་ཐ་དད་དུ་གྲུབ་པ་མེད་པ་ལས། རིག་མ་རིག་ལ་འཁོར་འདས་གཉིས་སུ་བྱུང་ཡང་འཁོར་བ་དེ་ཡི་རྒྱུ་མ་རིག་པ་དང་རྐྱེན་ལས་ཉོན་དང་བཅས་པ་ཐམས་ཅད་སྣང་ལ་རང་བཞིན་མེད་པ་ཡིན་པས། དཔེ་སྨན་ག་པུར་གྱིས་ཚ་ནད་ཅན་ལ་ཕན་གྲང་ནད་ཅན་ལ་གནོད་ཀྱང་། ག་པུར་ལ་ཕན་གནོད་མ་གྲུབ་པ་ཅི་ལྟ་བ་བཞིན་ཏུ། འཁོར་འདས་ཀྱི་ཆོས་ཐམས་ཅད་ལྷག་མ་མ་ལུས་པ་ཀུན་བྱང་ཆུབ་སེམས་སུ་རྒྱུ་གཅིག་པ་ཡིན་པ་ལས། རིག་མ་རིག་གི་དབང་གིས་འཁོར་འདས་མི་མཐུན་པའི་བདེ་སྡུག་གི་ཁྱད་པར་སོ་སོར་སྣང་བ་དེ་དག །རྒྱས་པ་ལས་གསུངས་པའི་ཕྱིར་ན་རིག་མ་རིག་གི་རྐྱེན་གྱིས་འཁོར་འདས་གཉིས་སུ་ཕྱེ་བའོ། །ཡང་རྒྱས་པའི་ལུང་ལས་ཀྱང་ནི་འོག་ནས་འབྱུང་བ་འདི་སྐད་དུ་གསུང་སྟེ། ཉོན་མོངས་པ་རྒྱུད་དྲུག་གི་འགྲོ་བ་རིགས་དྲུག་གི་འཁོར་བའི་ལུས་སྣ་ཚོགས་སུ་སྣང་བ་ནི། སེམས་འཁྲུལ་པའི་རྣམ་རྟོག་བཟང་ངན་དང་མཐུན་པའི་ལས་སྣ་ཚོགས་བསགས་པའི་དབང་གིས་ཐ་དད་པར་སྣང་ངོ་། །སྐུ་ལྔ་ལྷུན་གྲུབ་མཆོག་གི་སྐུ་རྡོ་རྗེ་འཛིན་པ་ཡེ་ཤེས་སྒྱུ་མའི་རང་འོད་དུ་སྣང་བ་ནི། རྟོགས་པའི་ངོ་ཀ་དང་མཐུན་པའི་ཡེ་ཤེས་ལྔའི་རང་འོད་ལས་སྣང་ངོ་། །གཏན་ཚིགས་དེ་བས་ན་འ ཁོར་འདས་ཀྱི་ཆོས་ཀུན་སེམས་ཀྱི་དེ་ཁོ་ན་ཉིད་དུ་གཅིག་ཀྱང་། རང་གི་སྣང་བ་མཐོང་བ་དག་པ་དང་མ་དག་པའི་དབང་གིས་ཕྱེ་བས། འཁོར་འདས་ཀྱི་སྤྱོད་ཡུལ་བཟང་ངན་སོ་སོར་སྣང་ཡང་གནས་ལུགས་ཀྱི་ངོ་བོ་དེ་ལ་འཁོར་འདས་གཞི་སྣང་དུ་མ་སྤངས་ཀྱང་འཁྲུལ་སྣང་རང་རྒྱུད་དུ་མི་དམིགས་པའི་ཕྱིར། འཁྲུལ་གཞིའི་མཚན་མ་རང་རྒྱུད་ཅན་དུ་ཡོད་པ་དང་། གཞི་སྣང་མེད་པའི་དགོས་པའང་འདིར་མེད་པ་དེས་ན། འཁོར་བའི་ཀུན་རྫོབ་ཆེད་དུ་དགག་པ་མེད་པས་མྱང་འདས་སམ་དོན་དམ་དུ་བླང་དུ་མེད་པའི་ཕྱིར་རོ། །འོ་ན་འཁྲུལ་གཞི་ཡོད་མེད་དབྱེར་མེད་གང་ལས་འཁྲུལ་ཞེ་ན། དེ་ཡང་གཞི་རང་སྣང་ལྷུན་གྲུབ་ངོ་མ་ཤེས་པ་ལས་འཁྲུལ་པ་འབྱུང་བ་ཡིན་ཏེ། ཐག་པ་ལ་སྦྲུལ་འཛིན་འབྱུང་བ་ལྟ་བུ་སྟེ། དེ་ཡང་ཨ་རོའི་ཐིག་ལེ་སྐོར་ལས། འཁྲུལ་གཞི་མེད་པར་འཁྲུལ་པ་འབྱུང་མི་འགྱུར། །ཞེས་སོ། །ལྷུན་གྲུབ་དེ་ཉིད་ཀྱི་ངོ་བོར་འཁྲུལ་གཞི་རང་རྒྱུད་ཅན་དུ་གྲུབ་པ་མེད་པར་ཀ་ནས་དག་པ་ཡིན་ཏེ། ནམ་མཁའ་ལ་སྐྲ་ཤད་ལྟར་རོ། །དེ་ཡང་གསལ་བཀྲ་ལས། ཉི་མའི་དཀྱིལ་ན་མུན་མེད་ལྟར། །ཡེ་ཤེས་རང་སྣང་མ་རྟོག་པ། །ཉོན་མོངས་འཁོར་བ་ངང་གིས་མེད། །ཅེས་སོ། །དེ་ལྟར་ཀ་དག་ལྷུན་གྲུབ་ངོ་ཤེས་མ་ཤེས་པ་ལས་འཁོར་འདས་འབྱུང་བ་ཡིན་ཏེ། ག་པུར་བཞིན་ནོ། །དེ་ཡང་རྒྱས་པ་ལས། སྨན་གྱི་ཕན་གནོད་ཅི་བཞིན་དུ། །ཐམས་ཅད་མ་ལུས་རྒྱུ་གཅིག་ལས། །མི་མཐུན་ཁྱད་པར་སོ་སོར་སྣང་། །ཞེས་པ་དང་། ཡང་། འཁྲུལ་གཞི་ཡོད་མེད་སྒྲོ་སྐུར་བྲལ། །ཞེས་སོ། །འོ་ན་འཁྲུལ་གཞི་ཞེས་བྱ་བ་དེ། བདེར་གཤེགས་སྙིང་པོ་ལ་འདོད་དམ། མ་རིག་པ་ལ་འདོད། སྔ་མ་ལྟར་ན། འཁྲུལ་པའི་ངོ་བོ་མི་རྙེད་པར་ཐལ་ཏེ། གཞི་ལ་ལྟོས་ན་རང་གྲོལ་འགྱུར། །ཞེས་སོ། །ཕྱི་མ་ལྟར་ན། སངས་རྒྱས་ཀྱི་དགོངས་པ་མི་རྙེད་པར་ཐལ་ཏེ། དེ་ཉིད་ལས། འཁྲུལ་ལ་ལྟས་ན་དག་མེད་འགྱུར། །ཞེས་གསུངས་པའི་ཕྱིར་རོ་ཞེ་ན། བརྒྱུད་པའི་རྒྱུ་བདེ་གཤེགས་སྙིང་པོ་ཡིན་ཏེ། གསང་སྙིང་ལས། བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་པ་དང་། ཨེ་མའོ་བདེ་གཤེགས་སྙིང་པོ་ལས། ཞེས་སོ། །དངོས་རྒྱུ་ལྷན་སྐྱེས་མ་རིག་པ་ཡིན་ཏེ། དེ་ཉིད་ལས། མ་རིག་རྟོག་པའི་གཟུང་འཛིན་གྱིས། །ཞེས་སོགས་གསུངས་སོ། །དེ་ལྟར་ཐེག་པ་འོག་མས་སྣང་བ་དང་སྟོང་པ་གཉིས་ཐ་དད་ཕྱོགས་རེའི་གྲུབ་མཐའ་ཡི་གཞུང་ལྟར་དུ་འཁོར་འདས་སམ་བདེན་གཉིས་དགག་བསྒྲུབ་ཅན་དུ་བྱེད་ཀྱང་། འདིར་གསང་སྔགས་འཁོར་འདས་དབྱེར་མེད་ཀྱི་གཞི་དོན་ལ་དེ་ལྟར་མི་དགོས་ཏེ་ཕྱོགས་རིས་ཀྱི་དགག་སྒྲུབ་དང་བྲལ་བའི་ཕྱིར་རོ། །གཉིས་པ་འཁྲུལ་ཚུལ་ལ་གཉིས་ཏེ། བགྲང་། དང་པོ་མ་རིག་པས་ངོ་མ་ཤེས་ཏེ་འཁྲུལ་པ་སྤྱིར་བསྟན་པ་དང་། དྲང་། གོང་ལྟར་མ་རིག་པ་དང་རིག་པའི་ཡེ་ཤེས་གཉིས་དུས་དང་གནས་སྐབས་ཀུན་ཏུ་མཚུངས་པར་ལྡན་པ་ཡིན་པའི་ཕྱིར། དེ་ཡང་འདས་མ་འོངས་པ་ད་ལྟར་དུས་གསུམ་དང་། སྤྱོད་ལམ་བཞིར་རང་བྱུང་ཡེ་ཤེས་དེ་དང་འགྲོགས་ཀྱང་རྒྱུན་དུ་ཡེ་ཤེས་དེའི་དོན་མཐོང་ཞིང་གྲོལ་བ་མེད་དེ། བཀའ་བརྒྱད་ལས། ཡེ་ནས་རང་དང་འགྲོགས་ཀྱང་ཞལ་མ་མཐོང་། །ཞེས་པས། དཔེར་ན་མིག་རང་གིས་མིག་རང་མི་མཐོང་བ་བཞིན་དུ་སེམས་ཀྱང་དེ་ལྟར་བུར་རང་གིས་རང་མི་མཐོང་བས། གཟུང་འཛིན་གཉིས་སུ་སྣང་བ་ནི་སྔ་མ་ནས་ཕྱི་མར་ལོང་བཏགས་ཤིང་ནོར་པའི་སྤྱོད་ཡུལ་སྣ་ཚོགས་སུ་རྒྱུན་མི་འཆད་པའོ། །གཉིས་པ་བྱེ་བྲག་ཕྱེས་སྟེ་བསྟན་པ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། འཁྲུལ་པ་དེའི་སྡོམ་ཚིག་ནི་འཁྲུལ་པ་འབྱུང་བའི་དུས་དང་། འཁྲུལ་པའི་རྒྱུ་དང་། འཁྲུལ་པའི་རྐྱེན་དང་། འཁྲུལ་ཚུལ་དང་། འཁྲུལ་པའི་ངོ་བོ་དང་། འཁྲུལ་པའི་རང་བཞིན་དང་། འཁྲུལ་པའི་ཉེས་པའོ། །གཉིས་པ་བཤད་པ་དེ་ལ་བདུན་ཏེ། བགྲང་། དང་པོ་དུས་དང་། དྲང་། ཏནྟྲ་སྟེ་རྒྱས་པ་ཉིད་ལས་གསུངས་པའི་དུས་ནི་འདི་ལྟ་སྟེ། ཐོག་མ་མེད་པའི་དུས་ནས་སེམས་རང་ངོ་མ་ཤེས་ཏེ་རྒྱ་ཡན་ཏུ་བཏང་བས། གཟུང་འཛིན་ཕྱིན་ཅི་ལོག་ལ་འཇོལ་ཉོག་ཏུ་སྤྱན་ཅིང་འཁྲུལ་ལོ། །གལ་ཏེ་དུས་ཐོག་མེད་ནས་མ་བྱུང་སྟེ་འཁྲུལ་པ་གསར་དུ་འབྱུང་བར་འགྱུར་ཞེ་ན། འཇིག་རྟེན་འཁོར་བ་ལ་ཐོག་མ་བྱུང་བ་དང་། འང་གི་སྒྲས་འཁོར་བ་ལ་ཐ་མ་འབྱུང་བར་འགྱུར་བའི་སྐྱོན་ཡོད་དོ། །དེ་ཡང་རིམ་གསུམ་ལས། ཐོག་མ་མེད་པའི་དུས་ནས། །ཡང་དག་དོན་མ་རྟོགས་པས་ཉམས། །ཞེས་པ་དང་། རྒྱན་ལས། ཡིན་པར་གནས་དང་མ་ཤེས་པས། །སྔ་ཕྱི་མི་གནས་ཐོག་མ་མེད། །ཚད་ལས་འདས་པས་ཐ་མ་བྲལ། །རྒྱུན་དུ་མི་སྡོད་འཁོར་ལོའང་བསྐོར། །ཞེས་པ་དང་། སྤྱི་མདོ་ལས། འཁོར་བ་ཐོག་མ་ཐ་མ་མེད་པའི་ཁམས་སུ། ཞེས་སོ། །གཉིས་པ་རྒྱུ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ངོ་བོ་ཉིད་ཀྱི་རྒྱུ་བདེར་གཤེགས་སྙིང་པོ་དང་མཚུངས་པར་ལྡན་པའི་རྒྱུ་མ་རིག་པ་དང་། ལྷན་ཅིག་བྱེད་པའི་རྒྱུ་གཟུང་འཛིན་དུག་གསུམ་དང་། ཉེ་བར་ལེན་པའི་རྒྱུ་ཉོན་མོངས་ཀྱི་བག་ཆགས་བརྟས་བསླང་དང་། འཕེན་པའི་རྒྱུ་ལས་གསུམ་བསགས་པར་མདོ་བཅད་པའོ། །གཉིས་པ་བཤད་པ་དེ་ལ་ལྔ་སྟེ། འགྲང་། དང་པོ་ངོ་བོ་ཉིད་ཀྱི་རྒྱུ་དང་། དྲང་། སེམས་ཉིད་རྒྱུ་རྐྱེན་མེད་པར་རང་བྱུང་གི་ཡེ་ཤེས་ལ་འཁོར་འདས་ཀྱི་རིགས་ཐ་དད་དང་། རྒྱུ་སྔ་ཕྱི་བཟང་ངན་ཐ་དད་ཀྱི་ངོ་བོ་གྲུབ་པ་མེད་པའི་དོན་ཉིད། ངོ་མ་ཤེས་པའི་རྐྱེན་གྱིས་ཅིར་ཡང་སྣང་བ་ན། གཞི་དོན་དེ་ཉིད་འཁོར་བ་འཁྲུལ་པའི་ཆོས་སུ་སྣང་བའི་ཕྱིར་ཏནྟྲ་སྟེ་རྒྱུད་རྒྱས་པ་ལས། སྔར་ཐུན་མོང་མ་ཡིན་པའི་འཁྲུལ་གཞིའི་སྐབས་སུ། རྒྱུད་ལས། དོན་ཉིད་ཡོད་མེད་རིས་མེད་ལས། །དེ་ཡི་རྒྱུ་རྐྱེན་རང་བཞིན་བས། །སྨན་གྱི་ཕན་གནོད་ཅི་བཞིན་དུ། །ཐམས་ཅད་མ་ལུས་རྒྱུ་གཅིག་ལས། །མི་མཐུན་ཁྱད་པར་སོ་སོར་སྣང་། །ཞེས་གསུངས་པའི་དོན་གྱི་ན། དེ་ནི་རྒྱུ་ལྔ་ལས། དང་པོའི་ངོ་བོ་ཉིད་ཀྱི་རྒྱུ་ཞེས་གསུངས་ཏེ། ངོ་བོ་ཉིད་ཀྱི་རྒྱུད་དེ་ཉིད་ཀྱང་འཁོར་བ་ལས་གཞན་དུ་ཡོད་པ་མིན་ཏེ་ཆུ་དང་གཤེར་ལྟར་དབྱེར་མེད་པའོ། །གཉིས་པ་མཚུངས་པའི་རྒྱུ་དང་། དྲང་། སྔོན་གཞི་དོན་གྱི་སྐབས་སུ་མེ་ལོང་དང་ནི་གཡའ། ནམ་མཁའ་དང་ནི་སྤྲིན་གྱི་དཔེ་རྣམ་པ་གཉིས་པོ་ལྟར་དུ། ཡེ་ཤེས་གྲུབ་པས་མ་རིག་པ་གྲུབ་སྟེ། ཡེ་ཤེས་མེད་ན་མ་རིག་པ་ཞེས་བྱ་བའི་ངེས་ཚིག་མེད་པ་དེས་ན། ཡེ་གདོད་མ་ནས་རང་བྱུང་གི་ཡེ་ཤེས་ཡོད་པ་ལྟར། ལྷན་སྐྱེས་མ་རིག་ཀྱང་ཡེ་ནས་དུས་དང་ལྟོས་པ་འགོ་མཉམ་དུ་མཚུངས་པར་ལྡན་པས་དེས་ན་གཉིས་མེད་ནི་དབྱེར་མེད་པ་སྟེ་རྟོགས་མ་རྟོགས་ཙམ་ཡིན་པའོ། །གསུམ་པ་ལྷན་ཅིག་བྱེད་པའི་རྒྱུ་དང་། དྲང་། ཀུན་བརྟགས་མ་རིག་གིས་ཡུལ་ཡུལ་ཅན་ཀུན་ཏུ་རྟོག་པའི་གཟུང་འཛིན་རྣམ་པ་གཉིས་པོ་མེ་ལོང་གི་གཟུགས་བརྙན་ཡུལ་དུ་བཟུང་བ་ལྟར། གཟུང་འཛིན་སྔ་མ་ལ་གོམས་པ་སྟོབས་སུ་གྱུར་པས་ཕྱི་མ་རྒྱུན་ཆགས་པས་ན་དུས་མཉམ་དུ་འབྱུང་བའི་ཡུལ་བཟང་པོ་ལ་བརྟག་དཔྱད་བྱས་པས་འདོད་ཆགས། ངན་པ་ལ་ཞེ་སྡང་། བཟང་ངན་མི་འབྱེད་པ་ལ་གཏི་མུག་དང་གསུམ་གྱི་འཛིན་པ་དེས། འཁོར་བའི་ཆོས་དེ་ལས་སྣང་ཞིང་བསྐྱེད་པས་ན་ལྷན་ཅིག་བྱེད་པའི་རྒྱུ་ཞེས་བྱའོ། །བཞི་པ་ཉེ་བར་ལེན་པའི་རྒྱུ་དང་། དྲང་། སྔར་གྱི་དུག་གསུམ་དེ་ཡི་རྐྱེན་གྱིས་ཕྱི་མའི་བག་ཆགས་ཀྱི་མཐུ་བརྟས་ཉེ་བར་བསླང་བས་སྟོབས་བསྐྱེད་དེ་སྔ་མའི་བག་ཆགས་ཕྱི་མས་ཉེ་བར་ལེན་པའོ། །ལྔ་པ་འཕེན་པའི་པའི་རྒྱུ་དང་། དྲང་། འོད་མའི་གཞུ་བཟང་པོ་ལ་སྐྱེས་བུ་མཐེབ་བྲག་གིས་མདའ་འཕངས་ནས་འབེན་ལ་ཚེགས་མེད་པར་ཕོག་པ་ལྟ་བུར། ལས་དཀར་ནག་གང་ཡིན་པ་བསགས་པ་མདོ་བཅད་ནས་ཕྱི་མར་འཕེན་པའི་རྒྱུ་བྱས་ནས་སྣང་ནུས་པའོ། །གཉིས་པ་རྐྱེན་ལ་གཉིས་ཏེ། བགྲང་། དང་པོ་ལས་དང་། དྲང་། འདོད་ཁམས་གཟུགས་ཁམས་གཟུགས་མེད་ཁམས་གསུམ་གྱི་འབྲས་བུ་འདི་ན་གནས་པ་ཀུན་ཏུ་སྐྱེ་བའི་རྐྱེན་ནི། ལས་དཀར་པོ་དགེ་བ་བཅུས་མཐོ་རིས་ཀྱི་གནས་བཅུ་དང་། ནག་པོ་མི་དགེ་བ་བཅུ་ཡིས་ངན་སོང་གནས་བཅུའོ། །དེས་ཁམས་གསུམ་གྱི་དང་པོའི་འདོད་ཁམས་གནས་རིས་ཉི་ཤུ་སྐྱེ་བ་ཡིན་ཏེ། དགེ་བཅུའི་སྟེང་དུ་ཚངས་པའི་གནས་ཏེ་ཚད་མེད་བཞི་དང་། གསལ་ཐོག་གི་མི་གཡོ་བའི་ལས་བསམ་གཏན་བཞི་བསྒོམ་པ་ལ། དང་པོ་རྟོགས་དཔྱོད་དང་ལྡན་པའི་དགའ་བདེའི་ཏིང་ངེ་འཛིན་གྱི་བསམ་གཏན་དང་པོ་གསུམ་དང་། གཉིས་པ་རྟོག་དཔྱོད་དང་བྲལ་བའི་དགའ་བདེའི་གཉིས་པའི་གསུམ་དང་། གསུམ་པ་བདེ་བའི་ས་མ་དྷིས་གསུམ་པའི་གསུམ་དང་། བཞི་པ་ལ་རྟོག་དཔྱོད་གཉིས། དགའ་མི་དགའ་གཉིས། དབུགས་འབྱུང་རྔུབ་གཉིས། བདེ་སྡུག་གཉིས་ཏེ་སྐྱོན་བརྒྱད་དང་བྲལ་བའི་ཏིང་ངེ་འཛིན་གྱིས་སོ་སོའི་སྐྱེ་བོའི་གནས་གསུམ་དང་། ལྷག་མཐོང་ངེས་འབྱེད་ཆ་བཞིའི་ཏིང་ངེ་འཛིན་བསྒོམས་པའི་ལས་རྣམས་ཀྱིས་འཕགས་པའི་གནས་ལྔ་ལ་སྐྱེ་བ་སྟེ། དེ་ལྟར་གཟུགས་ཁམས་གནས་རིས་བཅུ་བདུན་གྱི་ཞིང་ཁམས་ལ་ལོངས་སྤྱོད་པའི་ཡུལ་དུ་སྣང་ངོ་། །རིག་ཐོག་གིས་མི་གཡོ་བའི་ཏིང་ངེ་འཛིན་བསྒོམ་པའི་ལས་ཀྱི་གཟུགས་མེད་པའི་སྙོམས་པར་འཇུག་པ་བཞིའི་ཏིང་ངེ་འཛིན་མཐུ་དང་ལྡན་པའི་སྟོབས་ཀྱིས་སྨིན་ན་ཁམས་གསུམ་ལས་ཤེས་པ་ཟབ་པའི་སྲིད་པའི་རྩེ་མོ་སྟེ། ནམ་མཁའ་མཐའ་ཡས། རྣམ་ཤེས་མཐའ་ཡས། ཅི་ཡང་མེད་པའི། ཡོད་མིན་མེད་མིན་གྱི་སྐྱེ་མཆེད་དང་བཞི་ཡི་གནས་ལ་ལོངས་སྤྱོད་པའི་ཡུལ་དུ་སྣང་ངོ་། །གཉིས་པ་ཉོན་མོངས་པའི། དྲང་། རྒྱུར་སྤྱིར་བཏང་ན་མི། འབྲས་བུ་སྤྱིར་བཏང་ན་ལྷ་མ་ཡིན་མི་བརྩི་བས་འགྲོ་བ་ལྔའམ། ཡང་ན་ལྷ་མི་གཉིས་ངན་སོང་གསུམ་དང་ལམ་རྒྱུད་ལྔའི་སེམས་ཅན་དུ་སྐྱེ་བའི་རྐྱེན་ནི། འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་གཉིས་དང་དུག་ལྔ་ཡིན་ཏེ། དེ་ནི་ཏནྟྲ་སྟེ་རྒྱས་པའི་ལེའུ་དོན་གསུམ་པ་ས་མ་ཡ་དམ་ཚིག་གི་ལེའུ་ལས་བྱུང་བ་ལྟར་བཤད་དེ། དེ་ཉིད་ལས། ཐམས་ཅད་མཉམ་པར་མ་ཤེས་ནས། །མ་ལུས་ཀུན་ལ་ཞེ་སྡང་ཞིང་། །སྙིང་རྗེ་ཡང་དག་མང་གྱུར་ན། །འདི་ནི་མི་ཟད་ཆེན་པོ་ཡི། །དམྱལ་ཁམས་བཅུ་དྲུག་གནས་པ་ཡིན། །ཆགས་བདེ་དངོས་པོ་མི་ཤེས་ནས། །ཐམས་ཅད་ཀུན་ལ་འདོད་ཆགས་ཤིང་། །ལུས་ཀྱི་སྒྲིབ་དང་ཟས་ཀྱི་སྒྲིབ། །ཡི་དྭགས་ཆེན་པོའི་གནས་སུ་བསྐྱེད། །ང་དང་བདག་མེད་མི་ཤེས་ཤིང་། །ཆོས་རྣམས་ཀུན་ལ་རྨོངས་བྱས་ནས། །ཤེས་རབ་གསལ་དོན་མི་ཤེས་པས། །དགེ་སྡིག་གཉིས་ཀྱི་དོན་མ་རྟོགས། །འདི་ནི་བྱོལ་སོང་གནས་སུ་སྐྱེ། །ཤིན་ཏུ་ང་རྒྱལ་ཆེར་བསྐྱེད་དེ། །ཐམས་ཅད་བདག་གིར་བཟུང་བས་ན། །ཀུན་ལ་གསོད་པའི་ལས་བྱེད་ཅིང་། །ལྷ་མ་ཡིན་གྱི་གནས་སུ་སྐྱེ། །བཞི་པ་ཚུལ་དང་། དྲང་། ཕྱི་སྣོད་ཀྱི་འཇིག་རྟེན་རྒྱུ་འབྲས་ཀྱི་ཚུལ་སྟེ། དེ་ཡང་རྒྱུ་དང་འབྲེལ་བ་དྲུག །འབྲས་བུ་དང་འབྲེལ་པ་དྲུག་དང་བཅུ་གཉིས། ནང་བཅུད་ཀྱི་སེམས་ཅན་རྟེན་འབྲེལ་བཅུ་གཉིས་ཀྱི་འཁོར་ལོའི་ཚུལ་དུ། གནས་ཁམས་གསུམ་དུ་བཅུད་འགྲོ་བ་རིགས་དྲུག་ལས་ཉོན་གྱི་ཐོག་མཐའ་མེད་པ་བཀོད་པའང་། ཁམས་གསུམ་གྱི་ལུས་ཡོད་མེད་ཀྱི་ཆ་ཡིས་ཕྱེ་བས་གཅིག་ཏུ་ངེས་པ་མེད་པར་ལུས་ཅན་རྣམས་ལ་དངོས་དང་། ལུས་མེད་རྣམས་ལ་བག་ཆགས་ཀྱི་ཚུལ་དུ་འཁོར་བའམ། ཡང་ན་ཁམས་གསུམ་གྱི་ཆ་ཡིས་རྟེན་འབྲེལ་བཅུ་གཉིས་གྲངས་མཉམ་པའི་ངེས་པ་མེད་དེ། འདོད་ཁམས་པ་ལ་དབང་ཡུལ་དུ་གཡེང་བའི་ཆ་ཡིས་ཕྱི་ནང་གི་བཅུ་གཉིས་ཀུན་ཚང་བར་ཡོད། གཟུགས་ཁམས་པ་ལ་ཡུལ་ལ་གཡེང་བ་མེད་པའི་དབང་གིས་བདུན་ཡོད་དེ། མ་རིག་པ་འཁྲུལ་རྒྱུ་ཡིན་པས་ཡོད་པ་དང་། མི་གཡོ་བའི་འདུ་བྱེད་དང་གཉིས་ཡོད། རྣམ་པར་ཤེས་པས་སྐྱེ་གནས་སུ་ཁྲིད་པ་མེད་པས། མིང་གཟུགས་དང་། སྐྱེ་མཆེད་དྲུག་གི་ལུས་རྫོགས་པར་བྱེད་པའི་ཐ་སྙད་དེ་གསུམ་མེད། རེག་པས་གསུམ་གྱི་ཡུལ་ཡོངས་སུ་གཅོད་པར་བྱེད་པ་དང་། ཚོར་བས་ཡུལ་ལ་ལོངས་སྤྱོད་པར་བྱེད་པ་དང་། སྲེད་པས་ཡུལ་བདེ་བ་ལ་ཆགས་པ་ཙམ་དང་གསུམ་ཡོད། ལེན་པས་སྐྱེ་བ་དང་མཐུན་འབྱེད། སྲིད་པས་ལས་ནུས་པ་ཐོགས་མེད་དུ་གྱུར་པ་དེ་གཉིས་མེད། སྐྱེ་འཆི་འཁོར་བའི་ཐོག་མཐའ་ཡིན་པས་ཡོད་དོ། །དེས་ན་ལྔ་ནི་མེད་དོ། །གཟུགས་མེད་ལ་སྐྱེ་ཤི་དང་། མ་རིག་པའི་ཐོག་ཏུ་འགོག་པས་དེ་གསུམ་ཡོད་དོ། །གཞན་དགུ་པོ་མངོན་གྱུར་མེད་དོ། །ལྔ་པ་ངོ་བོ་དང་། དྲང་། འཁྲུལ་པའི་རྣམ་པར་རྟོག་པ་ཤིན་ཏུ་བརྟན་པའི་འཁྲུལ་སྣང་གི་སྤྱོད་ཡུལ་བཟང་ངན་སྣ་ཚོགས་སུ་ཤར་བ་ནི་འདི་ལྟ་སྟེ། སྤྱིར་འགྲོ་དྲུག་སོ་སོའི་ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་སྣ་ཚོགས་མཐའ་ཡས་པར་སྣང་བ་དང་། བྱེ་བྲག་ཏུ་རིགས་དྲུག་གི་སེམས་ཅན་རེ་རེ་ལའང་ལུས་བཟང་ངན་དང་། ལོངས་སྤྱོད་ཆེ་ཆུང་དང་། ཚེ་རིང་ཐུང་དང་། ལས་དཀར་ནག་དང་། མཐོ་རིས་བདེ་བ་དང་། ངན་སོང་གི་སྡུག་བསྔལ་དང་། བར་མ་སྟེ་བཏང་སྙོམས་ཐ་དད་པར་སྣང་ངོ་། དྲུག་པ་རང་བཞིན་དང་། དྲང་། དཔེར་ན་སྒྱུ་མ་མཁན་གྱི་འཁྲུལ་འཁོར་གྱིས་བསླུས་པའི་ལྟད་མོ་བའི་མིས་སྒྱུ་མ་ལ་བདེན་པར་བཟུང་བ་བཞིན་དུ། འཁོར་བའི་རྒྱུ་རྐྱེན་གྱི་ནོར་བའི་འཁྲུལ་སྣང་ལ་ལོངས་སྤྱོད་པའི་ཡུལ་གྱི་རང་བཞིན་དུ་དེ་མ་ཡིན་ལ་དེར་འཛིན་དུ་སྣང་བའོ། །འོ་ན་སྔར་གཞིའི་སྐབས་སུ་འཁོར་འདས་གཉིས་ཀྱི་ངོ་བོ་དང་རང་བཞིན་ཐ་དད་ན་སྐྱོན་ཡོད་ཟེར་བ་དང་འགལ་ཞེ་ན། གོང་གི་གཞིའི་སྐབས་སུ་ཡེ་ཤེས་རང་སྣང་གི་ཆ་ནས་བཏགས་པ་ཡིན་པས་ཐ་དད་པ་མིན་ལ། འདིར་འཁོར་བའི་འཁྲུལ་སྣང་རང་རྒྱུད་པའི་མཚན་ཉིད་ཀྱི་ངོ་བོ་དང་། རང་བཞིན་ཡིན་པས། གཞི་སྣང་ཐ་དད་པས་འགལ་བ་མེད་དོ། །བདུན་པ་ཉེས་པའོ། །དྲང་། སྲིད་པ་གསུམ་གྱི་རྩ་བའི་ཉེས་དམིགས་ནི་མ་རིག་པ་ལས་བྱུང་བས་བདག་འཛིན་ལས་སྣང་བའི་ཕྱིར། དེའི་དབང་གིས་འགྲོ་དྲུག་གིས་སྡུག་བསྔལ་སྣ་ཚོགས་མྱོང་ཞིང་ཡང་དག་པའི་ལམ་དང་བྲལ་བའི་ཉེས་པའོ། །སྤྱི་དོན་གསུམ་པ་རང་བཞིན་ལ་གཉིས་ཏེ། བགྲང་། དང་པོ་དེ་ཁོ་ན་ཉིད་ཀྱི་རང་བཞིན་དང་། དྲང་། གོང་དུ་བསྟན་པའི་འཁོར་བར་འཁྱམས་ཤིང་སྡུག་བསྔལ་མྱོང་བ་དེ་ཡི་དུས་ན་གཞི་དོན་ལ་མ་གཡོས་པ་ཡིན་ཏེ། རྒྱུད་རྒྱས་པ་ཉིད་ལས་གསུངས་པ་ནི་འདི་ལྟ་སྟེ། དཔེ་ནམ་མཁའ་སྟོང་པའི་དབྱིངས་ཀྱི་ངང་ལ་ནི་བསམ་ཡས་པར་སྣང་བའི་ཉི་ཟླ་གཟའ་སྐར་དང་། མཚན་མོའི་ལྟས་གློག་འགྱུ་བ་དང་། འཇའ་ཚོན་དང་། སྤྲིན་གྱི་ཁ་དོག་མང་པོ་དང་། དེ་ལྟར་བཟང་ངན་འབྲིང་གསུམ་སྣ་ཚོགས་སུ་འཁྲུགས་པར་འགྱུར་ན་ཡང་། ནམ་མཁའ་སྟོང་པའི་དབྱིངས་ལས་གཞན་དུ་འགྱུར་ཞིང་ངོ་བོ་ལ་ཉམས་པ་མེད་པ་བཞིན་དུ། དོན་སེམས་ཉིད་སྣང་སྟོང་ཕྱོགས་རེའི་མཐའ་གང་དུ་ཡང་མི་དམིགས་པ་ཆོས་ཀྱི་དབྱིངས་ལ་ནི་བསམ་ཡས་པར་སྣང་བའི་སྐུ་གསུང་ཐུགས་ཡོན་ཏན་ཕྲིན་ལས་ལྔའམ། ཉེར་ལྔ་རྨད་དུ་བྱུང་བ་འབྲས་བུའི་ཆེ་ཡོན་རྣམས་དང་། འཇིག་རྟེན་གྱི་གཙོ་བོའི་མཆོག་ཚངས་པ་བརྒྱ་བྱིན་ལ་སོགས་དང་འཁོར་བ་སེམས་ཅན་འགྲོ་དྲུག་སྣ་ཚོགས་པ་དང་། དེ་ལྟར་རྣམ་པ་བྱེ་བྲག་མང་པོར་སྣང་བ་དེ་ཡང་། སེམས་ཉིད་ཆོས་ཀྱི་དབྱིངས་ལས་གཞན་དུ་འགྱུར་ཞིང་ངོ་བོ་ལ་ཉམས་པ་མེད་དོ། །དེ་ཡང་རབ་འབྱམས་ལས། ཕྱོགས་མེད་ལྷུན་གྲུབ་སྡོང་པོ་ལ། །འཁོར་འདས་གཉིས་ཀྱི་ལོ་འདབ་རྒྱས། །བྱ་བྲལ་འཛིན་མེད་ནམ་མཁའ་ལ། །སྐུ་གསུམ་སྙིང་པོའི་ཉི་ཟླ་ཤར། །འགྲོ་དྲུག་འཁྲུལ་པའི་གྲོང་ཁྱེར་འདི། །བདེ་ཆེན་སངས་རྒྱས་ཞིང་ཁམས་ཡིན། །གཟུང་འཛིན་མཚན་མའི་མྱུ་གུ་ལ། །བདེ་ཆེན་ཆོས་སྐུའི་འབྲས་བུ་སྨིན། །ཞེས་སོ། །གཉིས་པ་རྒྱུ་ཡི་ཐེག་པས་ངོ་མ་ཤེས་པའོ། །དྲང་། གོང་གི་འཁོར་འདས་དབྱེར་མེད་ཀྱི་དོན་དེ་དང་བྲལ་བའི་སྤྱན་བཟང་སྟེ་ལོང་བ་དང་འདྲ་བའི་རྒྱུ་མཚན་ཉིད་པ་རྣམས་ཀྱིས་འཁོར་བ་དེ་དང་འདས་པ་དེ་ནི་ཐ་དད་པ་ཡིན་ཏེ། འཁོར་བ་དེ་ཉིད་འདས་པ་མིན་པར་འདོད་པ་དང་། དེ་ལས་གཞན་དུ་འདས་པ་བརྗོད་དུ་མེད་ཅེས་ཐ་དད་དུ་སྨྲ་བ་དེ་ལྟར་ཡིན་ན། སེམས་ཅན་སངས་མི་སྲིད་པའི་སྐྱོན་ཡོད་དོ། །འོ་ན་གང་ཡིན་ཞེ་ན། གསང་སྔགས་ཀྱི་འཁོར་འདས་གཉིས་སུ་མེད་པར་དུས་དང་རྣམ་པ་ཀུན་ཏུ་ངོ་བོ་བདག་ཉིད་གཅིག་པའི་འབྲེལ་ལ་བཟླ་བའོ། །གཉིས་པ་མཚན་ནོ། །དྲང་། ཐུགས་ཀྱི་ཐིགས་པ་འབྲུ་མཐུན་པ་ལས། དེ་མ་ཡིན་པ་དེར་འཛིན་པས་འཁྲུལ་པའི་ལས་དང་ལོག་རྟོག་གི་བློ་ངོར་སྣང་བའི་གཞུང་དོན་གཅོད་ཅིང་མཚམས་འཛིན་པར་བྱེད་པས་ན་ལེའུ་ཞེས་བྱ་སྟེ། ཡས་བགྲང་གཉིས་པའི་དོན་དུ་གདའོ།། ༈ །།གསུམ་པ་གདུལ་བྱའི་སྣང་བ་ལ་གཉིས་ཏེ། གཞུང་དང་། མཚོན་དོན། དང་པོ་ལ་གཉིས་ཏེ། གདུལ་བྱའི་སྣང་བ་སྤྱིར་བསྟན་པ་དང་། མཆོག་གི་ཐེག་པ་བཀར་ཏེ་བསྟན་པའོ། །དང་པོ་ལ་གསུམ་སྟེ། བགྲང་། དང་པོ་ངོ་བོའམ་ངེས་ཚིག་དང་། དྲང་། རང་བཞིན་གྱི་དབང་རྣོན་དང་། ཐེག་འོག་ལས་རིམས་ཀྱིས་སྦྱངས་པའི་དབང་རྟུལ་གཉིས་ཀྱིས་ཕྱེ་བ་ཡི་དབང་གིས་ཐེག་པ་སྣ་ཚོགས་འབྱུང་སྟེ། དེ་ཡང་རང་བཞིན་དབང་རྣོན་དེས་ཐོག་མ་ནས་སྔགས་ལ་འཇུག་ནས་ཆོས་ཉིད་མངོན་དུ་བྱེད་ལ། སྦྱང་བའི་གང་ཟག་གི་དང་པོ་ཐེག་འོག་ལས་ལྟ་བ་བློ་ངོར་མ་འཕྲོད་ཀྱི་བར་དུ་སྦྱངས་པའི་བྱ་བ་བྱེད་ནས་མཐར་སྔགས་ལ་འཇུག་ནས་ཆོས་ཉིད་རིག་དགོས་པ་ཡི་ཕྱིར། དེ་ལྟར་གདུལ་བྱ་གང་མོས་ཀྱི་སྣོད་བློ་རྣོ་རྟུལ་དང་། བཅུད་ཐེག་པ་མཐོན་དམན་མཚམས་པར་སྦྱར་བའི་གདུལ་བྱ་འདུལ་བྱེད་བསམ་ཡས་པ་གཅིག་ཡོད་ནའང་གདུལ་བྱའི་སྣང་བ་ཞེས་ཚིགས་སུ་བརྗོད་དོ། །དེ་ཡང་དབང་པོ་རྣོ་རྟུལ་གྱི་སྒྲུབ་བྱེད་ལ་གསུམ་ལས། དང་པོ་ལུང་ནི། མདོ་དགོངས་པ་ངེས་འགྲེལ་ལས། སེམས་ཅན་རྣམས་ཀྱི་ཤེས་པའི་རྒྱུད་ལ་རྣོ་རྟུལ་རང་བཞིན་གྱིས་མེད་པ་ནི་མ་ཡིན་ནོ། །ཞེས་པ་དང་། དགོངས་འདུས་ལས། རྡོ་རྗེ་སེམས་དཔའ་ཞིང་ཁམས་ན་འཁོར་བའི་སེམས་ཅན་ཆེན་པོ་དེ་དག་གི་སེམས་རང་བཞིན་སྣ་ཚོགས་པའི་ཕྱིར། བློ་ཤིན་ཏུ་ཟབ་པ་དང་། མི་ཟབ་པ་དང་། ཡངས་པ་དང་། དོག་པ་དང་། བརྟན་པ་དང་། འགྱུར་བ་དང་། རྣོ་བ་དང་། རྟུལ་བ་དང་། མྱུར་བ་དང་། བུལ་བ་ཤ་དག་པས། གསང་སྔགས་ཀྱི་ངོ་བོ་ཉིད་ཀྱི་གཏམ་རིམ་གྱིས་པ་དང་ཅིག་ཆར་བས་ཐོས་ནས། དེ་གང་ལ་ཡང་མི་སྐྲག་མི་སྔང་གི་དགའ་ཞིང་མགུ་བ་དང་། རངས་སར་འགྱུར་བའི་ཕྱིར་སྣ་ཚོགས་སུ་སྣང་ངོ་། །ཞེས་པ་དང་། ཀུན་བྱེད་ལས། ལྷ་མི་སེམས་ཅན་དབང་པོ་མི་མཐུན་ཏེ། ལ་ལ་སྦྱངས་པའི་དབང་པ་འཕྲོ་ཅན་དང་། ལ་ལ་ཡེ་ནས་དབང་པོ་གཅིག་ཆོད་ཡོད། ཅེས་པ་དང་། ཡེ་ཤེས་རྗོགས་པའི་རྒྱུད་ལས། རིགས་དྲུག་དབང་པོ་གཅིག་ཆོད་དམ། ཁ་ཅིག་སྦྱངས་པའི་འཕྲོ་ཅན་ནོ། །ཞེས་པ་དང་། ཕྱག་རྒྱ་ཆེན་པོ་ལས། སེམས་ཅན་དང་པོའི་ལས་ཅན་ལ། །ཅིག་ཆར་བ་ནི་བསྟན་པར་བྱ། །དེ་ནས་སྦྱངས་པའི་འཕྲོ་ཅན་ལ། །རིམ་གྱིས་པ་ནི་བསྟན་པར་བྱ། །ཞེས་སོ། །གཉིས་པ་མན་ངག་ནི། ཅི་སྐད་དུ། ཁ་ཅིག་ཐོག་མ་ནས་དེའི་རིགས། །ཁ་ཅིག་སྦྱངས་པ་ལས་གྱུར་པའོ། །ཞེས་སོ། །གསུམ་པ་རིགས་པ་ནི། གཞི་དོན་ངོ་མ་ཤེས་པའི་འཛིན་སྟང་ཕྲ་རགས་མཐུག་སྲབ་ཀྱི་ཁྱད་པར་ལས། ཁམས་དང་དབང་པོ་རྣོ་རྡུལ་གྱི་བྱེ་བྲག་སྣ་ཚོགས་པ་སྣང་སྟེ། གཡུ་ཐང་ལས། རང་བཞིན་གཅིག་ཏུ་མ་ངེས་པས། །རྫས་སྣང་རྣམ་པ་གཅིག་ལ་ཡང་། །ལོག་མཐོང་དྲུག་དང་ཡང་དག་དགུ། །ཅིར་ཡང་འགྱུར་བའི་ངོ་བོ་ཉིད། །ཅེས་གསུངས་པའི་ཕྱིར་རོ། །རྒྱས་པར་ནི་ལམ་རིམ་དུ་སྣོད་ཀྱི་སྐབས་སུ་ཤེས་པར་བྱའོ། །གཉིས་པ་ཐེག་པའི་ཁྱད་པར་དང་། དྲང་། བཅུད་ཐེག་མཆོག་དེ་དང་ཐེག་དམན་དེ་དག་འབྱུང་བའི་རྐྱེན་ནི་སྣོད་རང་བཞིན་གྱིས་དབང་རྣོན་དེ་དང་སྦྱངས་པའི་དབང་རྣོན་དེ་གཉིས་པོ་ཡིས་ཕྱེ་བས་རང་བཞིན་གྱི་དབང་རྣོན་གྱིས་དང་ནས་བླ་མེད་ལ་འཇུག་ནས་སྔགས་ཅི་བཞིན་པའི་དོན་མངོན་དུ་བྱེད་ལ། སྦྱངས་རྣོན་གྱིས་མཐར་སྔགས་ལ་འཇུག་ནས་ཆོས་ཉིད་དེ་བཞིན་མངོན་དུ་བྱེད་དགོས་པ་ལའང་། རིམ་པ་བཞིན་དུ་ལྷ་མི་ཉན་ཐོས་རང་རྒྱལ་བྱང་ཆུབ་སེམས་དཔའི་ཐེག་པ་དང་བཞི་ལ་བགྲོད་པ་དང་། མཐར་ལྔ་པ་གསང་སྔགས་འབྲས་བུ་ཡི་ཐེག་པར་འཇུག་པ་ལ་ངེས་འབྱུང་གི་ཐེག་པ་བཞི་ལ་རིམ་གྱིས་བརྒྱུད་དེ། ལྟ་བ་བློ་ངོར་མ་འཕྲོད་ཀྱི་བར་དུ་སྦྱངས་ནས་སྔགས་ཀྱི་ལམ་སྟེགས་ས་བགྲོད་ཅིང་མཐར་བླ་ན་མེད་པའི་ཐེག་པ་ཉིད་དུ་སྦྱོར་དགོས་པའི་ཕྱིར། འདི་སྐད་དུ་གསང་བའི་སྙིང་པོའི་རྒྱུད་ལས་གསུངས་པ་ནི། ལྷ་མི་ཉན་ཐོས་རང་རྒྱལ་བྱང་ཆུབ་སེམས་དཔའི་ཐེག་པ་དང་བཞི་ཡི་སྒོ་ནས་རང་རང་གི་གཞུང་ལུགས་མ་ནོར་བར་སྤྱོད་ན། གོ་རིམ་བཞིན་དུ་ངན་སོང་གསུམ་དང་། འཁོར་བ་དང་། མཐའ་གཉིས་ལས་ངེས་པར་འབྱུང་ལ། མཐར་ཐུག་གསང་སྔགས་ཀྱི་ཐེག་པ་གཅིག་ནི་གོང་གི་ཐེག་པ་དེ་དག་གི་འབྲས་བུ་གནས་པའོ། །དེ་ལྟར་གསང་སྔགས་རྡོ་རྗེ་ཐེག་པ་གཅིག་ལའང་དབང་པོ་རྣོ་རྟུལ་གྱིས་ཕྱེ་བས་ཕྱི་ནང་གཉིས་གསུངས་པ་ཡིན་པ་དང་གཉིས་པོ་རེ་རེ་ལ་བློ་རབ་འབྲིང་ཐ་མ་གསུམ་གྱིས་ཕྱེ་བས་ཕྱི་པ་ལ་བྱ་བ་སྤྱོད་པ་རྣལ་འབྱོར་གསུམ། ནང་པ་ལ་མ་ཧཱ་ཨ་ནུ་ཨ་ཏི་གསུམ་སྟེ་དྲུག་ཏུ་ཕྱེས་པའོ། །གསུམ་པ་གདུལ་བྱའི་སྣང་བ་བསམ་ཡས་པའོ། །དྲང་། མདོའི་དགོངས་པ་ལྟར་བསྡུས་ན་གཟུང་འཛིན་ཕྱིན་ཅི་ལོག་ལ་མོས་པའི་གདུལ་བྱ་དང་། སོགས་ཀྱི་སྒྲས་རྣལ་མ་ལ་མོས་པའི་གདུལ་བྱ་གཉིས་སོ། །དང་པོ་ལ་རང་བཞིན་གྱིས་ལོག་པ་ཕྱལ་རྒྱང་དང་། གྲུབ་མཐའ་འཇུག་པ་གཉིས་སོ། །ཐ་མ་གྲུབ་མཐར་འཇུག་པ་ལ་གཉིས་ཏེ། ལོག་པ་མུ་རྟུག་མུ་སྟེགས་དང་། མུ་སྟེགས་ལ་ལྟོས་ན་མ་ལོག་པ་ཉན་རང་ངོ་། །བྱེ་བྲག་ཏུ་རྒྱུད་ཀྱི་དགོངས་པ་ལྟར་ཕྱེ་ན། ལས་རྒྱུ་འབྲས་ལ་སོགས་པ་ཅི་ཡང་མ་རྟོགས་པ་ནི་འཇིག་རྟེན་ཕྱལ་བ་རྒྱང་འཕེན་ཏེ་གཞི་དོན་ངོ་མ་ཤེས་པ་དང་། དེ་ཡང་སྤར་ཁབ་ལས། སྣང་བ་དང་པོ་ལས་མ་གོས་མོད་ཀྱང་། ཞེན་པས་གོལ་ཞེས་བྱའོ། །ཞེས་སོ། །ལོག་པར་རྟོགས་པ་ནི་གཞིའི་དོན་སྣང་སྟོང་ཕྱོགས་རེ་ལས་གོལ་བ་སྟེ། མུ་རྟུག་དང་མུ་སྟེགས་གཉིས་མུ་སྟེགས་ལ་རྟག་ཆད་གཉིས་ཏེ། དེ་ཉིད་ལས། མུ་སྟེགས་ནི་ཕྱོགས་ལས་གོལ་བའོ། །ཞེས་སོ། །རགས་པ་གང་ཟག་གི་བདག་ཕྱོགས་ཙམ་སྟོང་པར་རྟོགས་པ་ཉན་རང་། བདེན་གཉིས་དབྱེར་མེད་ཀྱི་གནས་ལུགས་ཡང་དག་པའི་དོན་ཉིད་མ་རྟོགས་པ་དབུ་མ་དང་སེམས་ཙམ་མོ། །ལུས་ངག་གི་སྤྱོད་པ་འདུལ་བ་ཀྲི་ཡ་དང་། དགོངས་པ་ཏིང་ངེ་འཛིན་དང་སྤྱོད་པ་གཉིས་ཀ་གཙོ་བོར་བྱེད་པ་ཨུ་པ་ཡ་དང་། ཏིང་ངེ་འཛིན་གཙོ་བོ་བྱེད་པ་དེ་ཉིད་རྟོགས་དཀའ་བས་གསང་བ་སྟེ་ཡོ་ག་དང་། བསྐྱེད་རིམ་གཙོ་བོར་བྱེད་པའམ་སྤྱོད་པ་གཙོ་བོར་བྱེད་པ་སྐུའི་རྒྱུད་མ་ཧཱ་ཡོ་ག་དང་། རྫོགས་རིམ་གཙོ་བོར་བྱེད་ཅིང་དོན་གསལ་བའམ་སྒོམ་པ་གཙོ་བོར་བྱེད་པ་གསུང་གི་རྒྱུད་ཨ་ནུ་ཡོ་ག་དང་། བསྐྱེད་རྫོགས་ཟུང་འཇུག་གཙོ་བོར་བྱེད་པའམ་དབྱེར་མེད་ཀྱི་ལྟ་བ་གཙོ་བོར་བྱེད་པ་ཐུགས་ཀྱི་རྒྱུད་ཨ་ཏི་ཡོ་ག་རྣམས་སུ་སྣང་བ་ཞེས་གསང་སྙིང་ལས་གསུངས་པས་ན་སངས་རྒྱས་ཀྱི་ཐུགས་རྗེ་སྐྱེ་བའི་ཡུལ་དང་སར་མ་གྱུར་པའི་གདུལ་བྱ་ནི་གང་ཡང་མེད་དེ། དེ་བས་ན་ཐེག་པ་སོ་སོར་གདུལ་བྱ་རང་རང་གི་བློ་དང་འཚམས་པར་སྣང་བའི་རྐྱེན་གྱི་ཐིག་པ་བསམ་ཡས་པ་སྣང་ནའང་འདིར་ད་རེས་མ་ཧཱའི་ཐེག་པ་བཤད་པའོ། །གཉིས་པ་ཐེག་པ་མཆོག་ལ་གཉིས་ཏེ། བགྲང་། དང་པོ་ཐེག་མཆོག་རྒྱུད་ཀྱི་རྣམ་གྲངས་བསྟན་པ་དང་། དྲང་། གདུལ་བྱ་ཤེས་རབ་ཀྱི་དབང་པོ་མཆོག་གྲོལ་བར་བྱེད་པའི་རྐྱེན་མ་ཧཱ་ཡོ་གའི་རྒྱུད་ནི་རྣམ་པ་གསུམ་སྟེ། གང་ཞེ་ན། རྩ་རླུང་ཐིག་ལེ་སེམས་དང་བཞི་ཀ་ཡོད་ཀྱང་རླུང་གཙོ་བོར་བྱེད་པ་ཕ་རྒྱུད། རྩ་དང་ཐིག་ལེ་གཙོ་བོར་སྟོན་པ་མ་རྒྱུད་སེམས་སམ་ཡེ་ཤེས་རང་སྣང་དུ་སྟོན་པ་གཉིས་མེད་རྒྱུད་དང་གསུམ་མོ། །དེ་ཡང་གཞི་སེམས་ཅན་ནམ་གདུལ་བྱ་དང་སྦྱར་ན། གུར་ལས། སྐྱེས་པ་རྣམས་ནི་གདུལ་བའི་ཕྱིར། །རྣལ་འབྱོར་ཕ་ཡི་རྒྱུད་ཅེས་བཤད། །བུད་མེད་རྣམས་ནི་གདུལ་བའི་ཕྱིར། །རྣལ་འབྱོར་མ་ཡི་རྒྱུད་ཅེས་བཤད། །ཅེས་གསུངས་སོ། །ལམ་རྩ་ཐིག་རླུང་གསུམ་དང་སྦྱར་ན། དེ་ཉིད་ལས། རྩ་ཡི་དེ་ཉིད་རྟོགས་གྱུར་པ། །དེ་ཉིད་མ་ཡི་རྒྱུད་ཅེས་བྱ། །རླུང་གི་དེ་ཉིད་རྟོགས་གྱུར་པ། །དེ་ཉིད་རྣལ་འབྱོར་ཕ་ཡི་རྒྱུད། །ཅེས་གསུངས་སོ། །མཐར་ཐུག་གི་འབྲས་བུའམ་བརྗོད་བྱའི་གཙོ་བོ་དང་སྦྱར་ན། མ་རྒྱུད་ཡེ་ཤེས་མཁའ་འགྲོ་མ་ལས། ཕ་རྒྱུད་ཡེ་ཤེས་ཆེན་པོ་སྟེ། མ་རྒྱུད་སྟོང་པ་ཆེན་པོ་ཡིན། ཞེས་པ་དང་། སྤ་ཁབ་ལས། དཔལ་སངས་རྒྱས་འབྱུང་བ་ལ་སོགས་མ་ནིང་གི་རྒྱུད་དང་། ཞེས་པ་དང་། དཔེ་ཆུང་རང་གནས་ནས། ཐབས་དང་ཤེས་རབ་མ་ནིང་རྒྱུད། ཅེས་སོ། །འདིར་སྒྱུ་འཕྲུལ་དྲྭ་བ་གསང་བའི་སྙིང་པོ་ནི་གཉིས་མེད་མ་ནིང་ལྟ་བུ་ཟུང་འཇུག་གི་རྒྱུད་དོ། །དེ་ཉིད་གཏན་ལ་ཕབ་པ་ནི་འདི་ལྟ་སྟེ། གཉིས་པ་དེ་ཉིད་གཏན་ལ་ཕབ་པ་ནི་འདི་ལྟ་སྟེ། གཉིས་པ་དེ་ཉིད་གཏན་ལ་ཕབ་ཚུལ་བསྟན་པ་དེ་ལ་གཉིས་ཏེ། བགྲང་། དང་པོ་ལམ་རྐྱེན་གྱི་རྒྱུད་གདུལ་བྱའི་དབང་པོའི་བྱེ་བྲག་གིས་ཕྱེ་བས་གཏན་ལ་དབབ་པ་མདོར་བསྟན་པ་དང་། དྲང་། སྟོན་པ་རྡོ་རྗེ་སེམས་དཔའ་དེས་གསུངས་པའི་བསྟན་པ་ཐུགས་སྒྱུ་འཕྲུལ་དྲྭ་བ་གསང་བ་སྙིང་པོའི་རྒྱུད་དབུ་ཞབས་ཀྱི་སྤྱི་དོན་ཐམས་ཅད་གཅོད་ཅིང་ཁོག་དབུབ་པ་ནི། སྔོན་མདོར་བསྟན་དུ་བཤད་པ་བཞིན་སྣང་བ་བཞིར་བསྟན་པ་ལ་གཞི་དང་གྲུབ་པའི་སྣང་བ་གཉིས་གོང་དུ་སོང་ནས། འདིར་གསུམ་པ་གདུལ་བྱ་ལམ་གྱི་སྣང་བ་ནི། ལམ་གྱི་རྐྱེན་འདི་ཡི་གེའི་རྒྱུད་དང་སྦྱར་ནས་གཏན་ལ་དབབ་པ་ལ། གང་རུང་གིས་འཇུག་ནུས་པ་མ་ཡིན་ཏེ། ལས་དག་པ་བློ་མཆོག་གི་སྐལ་བ་བཅུད་ཐེག་མཆོག་མ་ཧཱ་དང་། སྣོད་གང་ཟག་དབང་རྣོན་གྱི་ཤེས་རབ་གཉིས་ལ་ཤེས་བྱ་ཤེས་བྱེད་དམ་སྣོད་བཅུད་དམ་བློ་དང་ཐེག་པར་འབྲེལ་པའི་གཞི་མ་ཡོད་པའི་ཕྱིར་རྒྱུད་ཀྱི་དོན་ཁོང་དུ་ཆུད་པ་ཡིན་ནོ། །དབང་རྣོན་དེ་ལ་ཡང་དབང་པོ་རབ་འབྲིང་ཐ་མ་གསུམ་གྱི་བློས་ཕྱེ་བས་གསང་བའི་སྙིང་པོའི་དོན་བཤད་ཐབས་ལ་ཐུགས་ཐིགས་འདི་ལྟར་དུ་རབ་ལ་མཚན་བསྟན། འབྲིང་ལ་དོན་རྣམ་པར་དབྱེ། ཐ་མ་འབྲུ་གཉེར་བ་དང་གསུམ་མོ། །དེ་ཡང་ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། །ཐ་མ་འབྲུ་གཉེར་དགྲོལ་བའོ། །ཞེས་སོ། །གཉིས་པ་ཡན་ལག་རྒྱས་པར་བཤད་པ་དེ་ལ་གསུམ་སྟེ། རབ་ལ་མཚན་བསྟན་པ་དང་། འབྲིང་ལ་དོན་རྣམ་པར་དབྱེ་བ་དང་། ཐ་མ་ལམ་གྱི་ཐོབ་པར་བྱེད་བ་ཤེས་རྒྱུ་འབྲུ་རེ་ནས་བསྟན་པའོ། །དང་པོ་ལ་གཉིས་ཏེ། མཚན་གྱི་ངོ་བོ་དང་། གདུལ་བྱའི་དབང་གིས་ཐབས་ལམ་གྲོལ་ལམ་དུ་བསྟན་པའོ། །དང་པོ་ལ་གསུམ་སྟེ། བགྲང་། དང་པོ་བསྟན་པ་དང་། དྲང་། ཡང་དེ་ཉིད་ལས། རབ་མཚན་ཐ་སྙད་གསུམ་དུ་གྲགས། །སྒྱུ་འཕྲུལ་སྙིང་པོ་ལུང་གི་སྤྱི། །ལག་གི་རྩ་བཞིན་དབུ་ཞབས་རྟོགས། །སྐལ་བ་ཅན་གྱི་ཆེད་ཕྱིར་རོ། །ཞེས་པས། དང་པོ་དབང་པོ་རབ་ལ་མཚན་བསྟན་པ་ཙམ་གྱིས་དོན་མཚོན་པའི་གསང་བའི་སྙིང་པོ་ལ་མིང་གི་འདོགས་ལུགས་གསུམ་དང་ལྡན་ནོ། །གཉིས་པ་བཤད་པ་དེ་ལ་གསུམ་སྟེ། བགྲང་། དང་པོ་རྒྱུད་དང་སྟོན་པའི་མཚན་ཐུན་མོང་དུ་བསྟན་པ་དང་། དྲང་། ཐེག་འོག་ནི་དྲང་ལུང་ཡིན་ལ། འདིར་ངེས་པའི་ལུང་ནི་གསང་སྔགས་ཡིན་ཏེ། དེ་ཡང་ཆོས་ཐམས་ཅད་སྣང་བཞིན་ངོ་བོ་རང་རྒྱུད་དུ་མ་གྲུབ་པས་སྒྱུ་མ་དང་འདྲ་བའི་ཕྱིར་དོན་ཤེས་རབ་རང་བཞིན་མེད་བརྟགས་ལྷ་ཡུམ། དེ་ཉིད་འཁོར་འདས་ཀྱི་དངོས་པོ་གཉིས་སུ་ཤར་བ་ལ་རིག་པ་དང་སྣང་བའི་རྩལ་དུ་ལེགས་པར་སྣང་བ་ནི་འཕྲུལ་ཏེ། དོན་མེད་ལ་ཅིར་ཡང་འཆར་བ་འགག་པ་མེད་པ་སྟེ་རྟགས་ལྷ་ཡབ། དེ་ལྟར་ཀུན་རྫོབ་དོན་དམ་གྱི་བདེན་པ་གཉིས་པོའི་དོན་དྲྭ་བ་ལྟར་འབྲེལ་བས་ན་ཐབས་ཤེས་རབ་གཉིས་སུ་མེད་དེ། རྟགས་ལྷ་ཡབ་ཡུམ་འཁྲིལ་སྦྱོར་རོ། །དེ་ཉིད་རང་བཞིན་གཉིས་སུ་མེད་ཅིང་མཚན་ཉིད་འདུས་མ་བྱས་ཤིང་སྐྱེ་འཇིགས་དང་བྲལ་བས་ན་རྡོ་རྗེ། དབྱེར་མེད་ཀྱི་དོན་དེ་སྒྲིབ་གཡོགས་མེད་པར་གསལ་བས་ན་སེམས། དེ་ཉིད་བརྟན་ཅིང་ཚུར་ལ་དངོས་པོ་གང་གིས་ཀྱང་མི་ཚུགས་ཤིང་ཕར་ལ་ཐམས་ཅད་འཇོམས་པས་ན་དཔའ་བོ། སྟོན་པ་དེས་བསྟན་པ་ཐུགས་སྒྱུ་འཕྲུལ་དྲྭ་བའི་བྱེད་ལས་ཀྱི་རིམ་པ་སྣ་ཚོགས་གསུངས་པས་ལྷ་ཡི་མིང་ལ་རྡོ་རྗེ་སེམས་དཔའ་ཞེས་བྱའོ། །གཉིས་པ་ཆེ་བའི་མཚན་དང་། དྲང་། སྟོན་པའི་དགོངས་པ་དེ་ནི་བསྟན་པ་ཐ་དག་འབྱུང་བའི་རྒྱུ་དང་། འབྲས་བུའི་དངོས་གཞི་ཡིན་པས་ན། ཐེག་པ་ཀུན་གྱི་སྤྱི་ལུང་དུ་ངེས་པས་ན་བསྟན་པས་དང་སྟོན་པའི་མཚན་ཐུན་མོང་དུ་བསྟན་པ་སོང་ནས། གཉིས་པ་ཆེ་བའི་མཚན་ཡིན་ཏེ། གསང་སྙིང་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོ་འགྲོ་བའི་ལམ། །ཞེས་པ་དང་། ཡང་དེ་ཉིད་ལས། འདུལ་བ་མདོ་སྡེ་ཆོས་མངོན་དང་། །ཞེས་པ་ནས། འབྱུང་གནས་གཏན་ལ་ངེས་པར་འབེབས། །ཞེས་གསུངས་པའི་བར་རོ། །གསུམ་པ་དོན་རང་གི་ངོ་བོའི་མཚན་ནོ། །དྲང་། གཞན་ལ་སྣང་སྟོང་ཕྱོགས་རེའི་སྒོ་ནས་བསྟན་པར་དཀའ་ཞིང་རང་གིས་ཀྱང་བརྟག་པར་དཀའ་བས་ན་གསང་བའི་མན་ངག་ཅེས་བྱ་སྟེ། དེ་ཡང་རང་བཞིན་གྱི་གསང་བ་བཞི་ཡིས་ཆོད་པ་ཡིན་ཏེ། གང་ཞེ་ན། གསང་སྙིང་ལས། ཨེ་མའོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལ་ཤིན་ཏུ་གསང་། །ཞེས་གསུངས་པས། དང་པོ་ཡེ་ནས་གསང་བ་ནི། ཡེ་ནས་འཁོར་འདས་གཉིས་སུ་མེད་པའི་རིག་པ་རང་བྱུང་གི་ཡེ་ཤེས་ལ་ཆེ་བའི་ཡོན་ཏན་ཐམས་ཅད་ལྷུན་གྱིས་གྲུབ་པའི་དོན་དེ་རང་ལ་རང་ཆས་སུ་ཡོད་ཀྱང་ངོ་མ་ཤེས་ཏེ། གང་གིས་མ་ཤེས་ན་ལྷན་ཅིག་སྐྱེས་པའི་མ་རིག་པས་ངོ་མ་ཤེས་ཏེ། སྤར་ཁབ་ལས། གཉིས་སུ་མེད་པའི་རང་བྱུང་གི་ཡེ་ཤེས་ལ་ཡོན་ཏན་རིལ་ལྷུན་གྱིས་གྲུབ་པ་དེ་རང་ཆས་སུ་ཡོད་ཀྱང་ངོ་མ་ཤེས་པ་ཁོ་ན་ལ་བྱའོ། །ཞེས་སོ། །གཉིས་པ་རང་བཞིན་གྱི་གསང་བ་ནི། དེ་ཉིད་རང་སྣང་བའི་འབྲས་བུ་སྐུ་དང་ཡེ་ཤེས་ཀྱི་དཀྱིལ་འཁོར་རང་བཞིན་གྱིས་གནས་ཀྱང་ངོ་མ་ཤེས་ཏེ། གང་གིས་མ་ཤེས་ན་ཀུན་ཏུ་བརྟགས་པའི་མ་རིག་པས་རང་སྣང་ལ་མཚན་མར་བཟུང་ནས། ཕྱིན་ཅི་ལོག་ཏུ་འཁྲུལ་པས་གསང་ངོ་། །ཡང་དེ་ཉིད་ལས། དེ་ཉིད་རང་སྣང་བའི་དངོས་པོ་རིལ་མི་ཟད་པ་རྒྱན་གྱི་འཁོར་ལོ་རང་རྒྱུད་དུ་གནས་པ་བརྟགས་པས་བསྒྲིབས་པའོ། །ཞེས་སོ། །གསུམ་པ་ངོ་བོ་ཉིད་ཀྱི་གསང་བ་ནི། རྒྱུ་འབྲས་དབྱེར་མེད་ཀྱི་བདེན་པ་རང་ཆས་སུ་གནས་ཀྱང་ངོ་མ་ཤེས་ཏེ། གང་གིས་མ་ཤེས་ན་སྣང་སྟོང་ཐ་དད་དུ་བཟུང་བས་སོ། །དེ་ཉིད་ལས། རང་བཞིན་གྱི་རྒྱུད་ཀྱི་ངོ་བོ་ཉིད་ཡུལ་སེམས་དང་རྒྱུ་འབྲས་དང་བདེན་པ་གཉིས་ལས་གྲོལ་བ་སྟེ། རང་སྣང་བའི་ཕྱིར་རང་གི་ངོ་བོ་ཉིད་ཡུལ་དུ་བྱར་མ་དམིགས་པ་ཁོ་ནའོ། །ཞེས་སོ། །བཞི་པ་ཤིན་ཏུ་གསང་བ་ནི། དབྱེར་མེད་དང་བྲལ་བའི་དོན་ཡེ་ནས་རང་ཆས་སུ་གནས་ཀྱང་ངོ་མ་ཤེས་པ་སྟེ། གང་གིས་མ་ཤེས་ན་ཡུལ་ཡུལ་ཅན་དུ་བཟུང་བས་གསང་སྟེ། དེ་ཉིད་ལས། འབྲས་པའི་རྒྱུད་བསྒྲུབ་པར་བྱ་བ་དེ་གུད་ན་མེད་ཀྱང་། ཉོན་མོངས་པ་དང་། ཤེས་བྱ་དང་། ལྟ་བའི་སྒྲིབ་པས་གཞན་དུ་ཚོལ་ཡང་། རང་རིག་པ་ལ་མི་སྣང་བ་ཁོ་ནའོ། །ཞེས་སོ། །རྒྱུད་དབུས་ཞབས་ཀྱི་དོན་གྱི་བཅུད་འདུས་པས་ན་སྙིང པོ་སྟེ། དེ་ལ་གསུམ་སྟེ། དང་པོ་རྒྱུའི་སྙིང་པོ་ནི། གདུལ་བྱ་ལས་ཐ་མའི་དོན་དུ་རྒྱུད་པ་འདི་བསྟན་པའི་བྱིན་བརླབས་ཀྱིས། གོ་ཕྱེ་ནས་བསྟན་པ་ཐམས་ཅད་འབྱུང་བ་ཡིན་ཏེ། རྒྱུད་ཀྱི་གསུམ་ལས། འདུལ་བ་མདོ་སྡེ་ཆོས་མངོན་དང་། །དམ་ཚིག་བསྒྲུབ་དང་སྒྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་ཀུན་ཏུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །རང་བཞིན་གསང་བའི་སྙིང་པོ་འདི། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་གཏན་ལ་ངེས་པར་འབེབས། །ཞེས་སོ། །གཉིས་པ་འབྲས་བུའི་སྙིང་པོ་ནི། ཐེག་པའི་སྒོ་ཀུན་ནས་བསྒྲུབ་པའི་མཐར་ཐུག་པ་རང་བཞིན་གསང་བའི་སྙིང་པོ་འདི་ཉིད་མངོན་ཏུ་བྱེད་དགོས་པ་ཡིན་ཏེ། དེ་ཉིད་ཀྱི་ཐ་མ་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོ་འགྲོ་བའི་ལམ། །ཞེས་པ་དང་། གསུམ་པ་ལས། ཐེག་པ་བཞི་ཡིས་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་སོ། །གསུམ་པ་བཅུད་འདུས་པ་དོན་གྱི་སྙིང་པོ་ནི། གཏན་ཚིགས་ཀྱིས་སྒོ་གང་ནས་སྨལ་ཡང་མཐར་ཐུག་དེ་བཞིན་གཤེགས་པའི་སྤྱོད་ཡུལ་རྟོག་ཚོགས་ཐམས་ཅད་སྐུ་དང་ཡེ་ཤེས་བཞི་བཅུ་རྩ་གཉིས་ཀྱི་དཀྱིལ་འཁོར་དུ་སངས་རྒྱས་པས་འཁོར་བ་ཀར་དག་པ་ཡིན་ཏེ། རྒྱས་པ་ལས། དོན་བསྡུས་གསུང་རབ་བཞི་བཅུ་གཉིས། །དེ་ལས་ལྷག་པའི་དོན་སྨྲ་བ། །དེ་ནི་རྣམ་དག་ལམ་མིན་ཏེ། །རང་བློ་བསམ་པས་འཁྲུལ་པ་ཡིན། །ཞེས་དང་། གསང་སྙིང་གི་བཅུ་གསུམ་པ་ལས། དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །ཞེས་སོ། །དེ་ཁོ་ན་ཉིད་ཀྱི་དོན་ནི། སྒྱུ་འཕྲུལ་རྡོ་རྗེ་ལས། རྒྱུ་འབྲས་གཉིས་སུ་མེད་པ་ཡི། །དེ་ཉིད་ངོ་བོ་སྐབས་ཀྱིས་གསུམ། །ཞེས་པས་གསུམ་ལ། དང་པོ་མ་བཅོས་པའི་དེ་ཁོ་ན་ཉིད་ནི། རྟོག་ཚོགས་ཐམས་ཅད་རང་རིག་པ་ལས་མི་གཞན་པའི་ཕྱིར། སྣང་སྟོང་གཉིས་སུ་མེད་པའི་ཡེ་ཤེས་ཀྱི་དཀྱིལ་འཁོར་ལ་བློ་མ་བཅོས་པར་བཞག་པའོ། །དེ་ལ་སྐབས་ཀྱིས་རྒྱུའི་དེ་ཁོ་ན་ཉིད་ཅེས་ཀྱང་ཐ་སྙད་དུ་འདོགས་སོ། །གཉིས་པ་མ་ནོར་བའི་དེ་ཁོ་ན་ཉིད་ནི། དེ་ཉིད་སྐུ་དང་ཡེ་ཤེས་ཀྱི་ཕྱག་རྒྱའི་དཀྱིལ་འཁོར་མང་པོར་མངོན་སུམ་དུ་སྣང་བའོ། །དེ་ལ་འབྲས་བུའི་ཐ་སྙད་དུ་འདོགས་སོ། །གསུམ་པ་གཞན་མ་ཡིན་པའི་དེ་ཁོ་ན་ཉིད་ནི། རྒྱུ་འབྲས་གཉིས་ལ་སྔ་ཕྱི་བཟང་ངན་ཐ་དད་མེད་པ་ཡིན་ནོ། །དེ་ལ་རྒྱུ་འབྲས་གཉིས་སུ་མེད་པའི་ཐ་སྙད་དུ་འདོགས་པས་དེ་ཁོ་ན་ཉིད་གསུམ་དང་ལྡན་པའོ། །དེ་ཉིད་བདེན་པ་གསུམ་དབྱེར་མེད་པའི་ཕྱིར་ངེས་པ་སྟེ། རྡོ་རྗེ་ལས། གཞི་དང་ལམ་དང་འབྲས་བུ་ཡིས། །ངེས་པ་རྣམ་པ་གསུམ་དུ་བཤད། །ཅེས་པས་གསུམ་ལས། དང་པོ་གཞིར་ངེས་པ་ནི། རང་བཞིན་གསང་བའི་སྙིང་པོ་སྟེ། རང་བཞིན་གྱི་སྒྲོ་སྐུར་དང་བྲལ་བར་ངེས་པའོ། །དེ་འདིར་ངེས་པར་སྟོན་པའི་ཕྱིར་རོ། །དེ་ཡང་རྒྱུད་ཀྱི་ཐ་མ་ལས། སྒྲོ་དང་སྐུར་པ་ཞི་བ་ཡིན། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་སོ། །གཉིས་པ་ལམ་དུ་ངེས་པ་ནི། རྒྱུད་འདི་ཉིད་ཀྱི་ལུགས་ལ་འབྲས་བུ་ཉིད་ལ་ངེས་པའི་ལམ་དུ་བྱེད་པའི་ཕྱིར་ཏེ། འདི་ཉིད་ཀྱི་བཅུ་གསུམ་པ་ལས། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །ཞེས་པ་དང་། རྒྱས་པ་ལས། འབྲས་བུ་ལམ་དུ་གྱུར་ནས་དུས་གཅིག་མཉམ་པར་སྦྱོར། ཞེས་སོ། །གསུམ་པ་འབྲས་བུར་ངེས་པ་ནི། རྒྱུད་འདིའི་རང་གི་ངོ་བོས་དེ་བཞིན་གཤེགས་པའི་དགོངས་པ་མངོན་དུ་སྟོན་པའི་ཕྱིར་ཏེ། གསང་སྙིང་ལས། རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །ཅེས་སོ། །དེ་ལྟ་བུའི་དོན་མཚོན་བྱེད་ཀྱི་མིང་གིས་མཚོན་བྱའི་དོན་མཚོན་པ་ལ། གང་གི་བསྟན་པ་དང་སྟོན་པའི་མཚན་དང་། ཆེ་བའི་མཚན་གཉིས་ཀྱིས་དོན་ཕྱོགས་རེ་ལས་མི་མཚོན་ལ། འདི་ནི་དེ་གཉིས་ལས་ལྷག་པ་སྟེ་སྣང་བ་བཞི་གཞི་ལམ་འབྲས་གསུམ་ལ་སོགས་པ་ཕྱོགས་མེད་ཐམས་ཅད་གཏན་ལ་དབབ་པའི་དོན་མཚོན་པའི་ཕྱིར་ལྷག་པའོ། །ཡང་མཚན་འདོགས་ལུགས་ལ། དཔེ། རྣམ་གྲངས། གདམ་ངག །ཡུལ། དོན་དང་ལྔ་ལས། འདིར་ནི་དོན་རང་གི་ངོ་བོའི་མཚན་ཡིན་པའོ། །གསུམ་པ་འཇུག་བསྡུ་བའོ། །དྲང་། བློ་འབྲིང་དང་ཐ་མ་ལྟར་གཞུང་ཚིག་རྒྱས་པའི་ས་བཅད་འབྲུ་གནུར་གྱིས་ཀྱང་བློ་རབ་ལ་དོན་མཚོན་ནས་ཁོང་དུ་ཆུད་མི་ནུས་ཏེ་ཚིག་མཐས་བསྒྲིབས་པ་དེ་བས་ན། དཔེར་ན་སྨན་པ་འཚོ་བྱེད་གཞོན་ནུས་ལུས་མགོ་མཇུག་གི་ནད་ཐམས་ཅད་ལག་ངར་གྱི་རྩ་གཅིག་པུའི་ནང་དུ་རྟོག་པ་བཞིན་དུ་བློ་རབ་ལ་ཡི་གེ་བསྡུས་པ་མཚན་དོན་ཙམ་གྱིས་རྒྱུད་དབུ་ཞབས་ཀྱི་དོན་རྒྱས་པར་བཤད་ཅིང་བརྡ་འཕྲད་པ་དེ་བས་ན་ཐ་སྙད་ཀྱི་ཚིག་རྣམས་ནི་འདིར་བསྡུས་པ་ཡིན་ནོ། །གཉིས་པ་གདུལ་བྱའི་དབང་གིས་ཐབས་ལམ་གྲོལ་ལམ་དུ་བསྟན་པའོ། །དྲང་། མཚན་གསུམ་པའོ། །གསུམ་པ་དོན་རང་གི་ངོ་བོའི་མིང་གིས་དོན་མཚོན་པ་ལ་གདུལ་བྱ་མོས་པའི་བློ་སོ་སོར་འདོད་པའི་དབང་གིས་ཕྱེ་བས། ཤེས་རབ་ཅན་ལ་གྲོལ་ལམ་ཕྱི་ལྟར་བཤད་པ་ནི་གོང་དུ་སོང་ནས། ཆགས་པ་ཅན་ལ་ཐབས་ལམ་དང་སྦྱར་ནས་བཤད་དེ། དེ་ཡང་སྟེང་སྒོ་དང་སྦྱར་ཏེ་ནང་ལྟར་བཤད་པ་དང་། འོག་སྒོ་དང་སྦྱར་ཏེ་གསང་བ་ལྟར་བཤད་པ་དང་གཉིས་ནི་གཞན་དུ་ཤེས་སོ། །གཉིས་པ་འབྲིང་ལ་དོན་རྣམ་པར་དབྱེ་བ་ལ་གཉིས་ཏེ། བགྲང་། དང་པོ་དཔེ་དོན་གྱིས་བློ་འབྲིང་གི་ལམ་བགྲོད་ཚུལ་སྤྱིར་བསྟན་པ་དང་། དྲང་། རིན་པོ་ཆེ་ལ་དང་པོ་ནས་འོད་ཡོད་ཀྱང་ཉི་མའི་འོད་ཕོག་པས་སྔར་བས་མཛེས་པའི་འོད་དང་ལྡན་ཞིང་རིན་ཆེན་ཆེར་གསལ་བ་ལྟར། ཚིག་གི་རྣམ་པར་དབྱེ་བ་ནི་སྒྲོན་མ་དང་འདྲ་བས་བློའི་ཤེས་རབ་ཕྱེ་བས། དབང་པོ་འབྲིང་གི་ཤེས་བྱ་གསང་བའི་སྙིང་པོ་ལ་སྣང་བ་མཆེད་པར་བྱ་བའི་ཕྱིར། རྣམ་དབྱེ་འདི་ཉིད་མཚན་བསྟན་ལ་ལྟོས་ན་རྒྱས་པའི་ཚིག་དོན་གྱི་བྱེ་བྲག་འབྲུ་གཉེར་ལ་ལྟོས་ན་ཉུང་སྟེ་ཐིགས་པར་ཤར་བ་ཙམ་ལས་མིན། དེ་ཉིད་ཀྱི་སྣོད་ནི་རང་བཞིན་གྱི་དབང་རྣོན་དང་ནས་མ་ཧཱ་ཡོ་གར་འཇུག་པ་དང་། ཐེག་འོག་ལས་རིམ་གྱིས་སྦྱངས་རྣོན་མཐར་མ་ཧཱའི་སྣོད་དུ་གྱུར་ནས་འཇུག་པ་ཡིན་ཏེ། དེ་ནས་ལམ་བགྲོད་པའི་ཐབས་ལ་རིམ་དང་ཅིག་ཆར་གཉིས་སུ་བཤད་ཅིང་དེའི་ཡན་ལག་གི་ཆ་རྐྱེན་ལ་གཉིས་ཏེ། མདོའི་དོན་བསྡུས་ལས། དེ་རྐྱེན་ཡན་ལག་རྣམ་གཉིས་ཏེ། །ཤེས་བྱེད་རྐྱེན་དང་སྒྲུབ་བྱེད་རྐྱེན། །ཅེས་གསུངས་པས། ཤེས་བྱ་ལམ་གྱི་ཆ་རྐྱེན་དང་། བསྒྲུབ་བྱ་ལམ་གྱི་ཆ་རྐྱེན་གཉིས་ནི་འདི་ལྟ་སྟེ། གཉིས་པ་བྱེ་བྲག་རྒྱས་པར་བཤད་པ་ལ་གཉིས་ཏེ། བགྲང་། དང་པོ་མདོར་བསྟན་པ་དང་། དྲང་། འདི་ལ་འབྲུའི་འདུག་ས་བསྒྱུར་ནས་དོན་གྱི་གོ་རིམ་བསྡེབ་དགོས་ཏེ། དང་པོ་ཤེས་བྱ་ལམ་གྱི་ཡན་ལག་ནི། ཐོག་མར་ཤེས་པར་བྱ་བའི་ཡུལ་ལྔ་དང་། བར་དུ་ཐུན་མོང་དང་མཆོག་གི་ལམ་གཉིས་ཉམས་སུ་བླང་བ་དང་། ཐ་མ་ཐབས་གྲོལ་གཉིས་ལ་བརྟན་པ་ཐོབ་བའི་དྲོད་ཚད་རྟགས་དང་ལྡན་པས་འབྲས་བུ་མཐོང་ལམ་ལ་སྦྱོར་བ་ཡིན་ནོ། །གཉིས་པ་རྒྱས་པར་བཤད་པ་དེ་ལ་གསུམ་སྟེ། ཐོག་མར་ཤེས་པར་བྱ་བའི་ཡུལ་ལྔ་དང་། བར་དུ་ཐུན་མོང་དུ་མཆོག་གི་ལམ་ཉམས་སུ་བླང་བ་དང་། ཐ་མ་ཚོགས་སྒྲུབ་ལ་དྲོད་ཚད་རྟགས་ཚད་རྟགས་དང་ལྡན་ནས་འབྲས་བུ་མཐོང་ལམ་ལ་སྦྱོར་བའོ། །དང་པོ་ལ་གསུམ་སྟེ། བགྲང་། དང་པོ་བསྟན་པ་དང་། དྲང་། དང་པོ་ཤེས་པར་བྱ་བའི་ཡུལ་ལ་ལྔ་སྟེ། རྒྱུ་གླེང་བཞི་དང་། རྐྱེན་གླེང་བསླང་དང་། བརྗོད་འབྲེལ་བཞི་དང་། བཤད་ཐབས་འདྲེན་པའི་ཚིག་གི་དཔེ་བཅུ་དང་རྒྱུད་གདམས་ཤིང་གཏད་པ་དང་ལྔས་རྒྱུད་ཤེས་ཐབས་ཀྱི་ཡན་ལག་དེ་རྫོགས་པ་ཡིན་ནོ། །གཉིས་པ་དེ་ལ་ལྔ་སྟེ། རྒྱུ་གླེང་གཞི་དང་། རྐྱེན་གླེང་བསླང་བ་དང་། བརྗོད་འབྲེལ་དང་། འདྲེན་པའི་ཚིག་གི་དཔེ་དང་། རྒྱུད་གཏད་པའོ། །དང་པོ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ཐབས་ལམ་གྱི་རྒྱུ་གླེང་གཞི་དང་། ཤེས་རབ་གྲོལ་ལམ་གྱི་རྒྱུ་གླེང་གཞིའི་དོན་ཡང་རྒྱས་པར་བསྟན་པ་ནི་འདི་ལྟ་སྟེ། གཉིས་པ་བཤད་པ་དེ་ལ་གཉིས་ཏེ། བགྲང་། དང་པོ་ཐབས་ལམ་གྱི་གླིང་གཞི་དང་། དྲང་། མདོར་བསྟན་གྱི་སྔ་མ་ཐབས་ལམ་བསྟན་པའི་གླེང་གཞི་ནི། སྟོན་པ་ཕུན་སུམ་ཚོགས་པ་དང་། གནས་དང་། འཁོར་དང་། སྡུད་པ་པོ་དང་། དུས་དང་། བསྟན་པ་ཕུན་སུམ་ཚོགས་པ་དང་དྲུག་གོ། །དེ་ལ་གནས་ནི། སྟེང་སྒོ་སྙིང་ཁ་ཆོས་ཀྱི་འཁོར་ལོ་ནི་ཡོན་ཏན་ཐམས་ཅད་ཀྱི་འབྱུང་ཁུངས་ཡིན་པས་རིན་པོ་ཆེའམ། རིན་ཆེན་ཟུར་བརྒྱད་དང་འདྲ་བ་རྩ་བརྒྱད་འདུས་པའི་སྒྲོམ་དཀྱིལ་འཁོར། འོག་སྒོའི་གནས་ནི་བདེ་སྟོང་གཉིས་མེད་ཀྱི་ཡེ་ཤེས་དེ་ཡོ་ག་མན་ཆད་ཀྱིས་མི་ཤེས་པས་གསང་བའི་དོན་དེ་ཤེས་བྱ་གང་གི་འོག་ཏུ་སོང་བ་མིན་པ་ནི་ཡུམ་གྱི་མཁའོ། །གནས་དེ་གཉིས་ཀྱིས་ཕྱེ་བས་སྟོན་འཁོར་ཕུན་སུམ་ཚོགས་པ་དེ་ཡི་གེ་ཨེ་ཝཾ་མ་ཡ་བཞི་ཡི་སྒོ་ནས་བསྒྲུབ་སྟེ་ཤེས་པར་བྱ་བ་ནི། གསང་བ་བླ་ན་མེད་པའི་ཐེག་པ་སྒྱུ་འཕྲུལ་རྒྱ་མཚོའི་རྒྱུད་དང་། ཐལ་བའི་རྒྱུད་ཀྱི་ལུང་ཚད་མ་གཉིས་དང་སྦྲེལ་ནས་གཏན་ལ་ཕབ་དགོས་ཏེ། དེ་ཡང་ཐབས་ལམ་སྟེང་འོག་གི་གླེང་གཞི་གཉིས་ལས། དང་པོ་རྒྱ་མཚོ་དང་སྦྱར་ནས་ནང་ལྟར་ཐབས་ལམ་སྟེང་སྒོ་ལྟར་བཤད་ན། འདི་ཞེས་པ་གནས་ཕུན་སུམ་ཚོགས་པ་སྟེ། སྒྱུ་འཕྲུལ་རྒྱ་མཚོ་ལས། དྷརྨ་ཙཀྲ་ཆོས་ཀྱི་གནས། །འོག་གཞི་ཨེ་སོགས་དབྱིབས་སུ་གནས། །ཞེས་པས། དྷརྨ་ཙཀྲ་ནི་ཆོས་ཀྱི་འཁོར་ལོ་སྟེ། སྙིང་ཁ་ཆོས་ཀྱི་འཁོར་ལོ་དོན་དམ་འོད་གསལ་གྱི་གནས་ཏེ། དེ་ན་རྩ་འདབ་བརྒྱད་ལ། རྩ་འདབ་བཞི་ནི། ལས་བཞིའི་ཁ་དོག་དང་དབྱིབས་སུ་གནས་ཏེ། དེ་ལ་གཡས་ཆོས་ཉིད་ཀྱི་རྩ་ཟླུམ་པོ་དཀར་པོ་ཞི་བའི་གནས། རྒྱབ་ཡེ་ཤེས་ཀྱི་རྩ་གྲུ་བཞི་སེར་པོ་རྒྱས་པའི་གནས། གཡོན་ཡོན་ཏན་གྱི་རྩ་ཟླ་གམ་དམར་པོ་དབང་གི་གནས། མདུན་ལས་རང་རྒྱུད་ཀྱི་རྩ་དབྱིབས་གྲུ་གསུམ་འོད་དམར་ནག་དྲག་པོའི་གནས་སོ། །དེ་ལྟར་ལས་བཞིའི་འོད་དབྱིབས་སུ་གནས་པ་དེ་ལ་གནས་ཕུན་སུམ་ཚོགས་པ་ཞེས་བྱའོ། །སྐད་ཅེས་པ་སྟོན་པ་ཕུན་སུམ་ཚོགས་པ་སྟེ། དེ་ཉིད་ལས། མི་ཤིག་ཐིག་ལེ་ཝཾ་གྱི་དབྱིབས་ཅན། རང་ལ་བདེ་བ་གསལ་བྱེད་དག །ཅེས་པས། སྲོག་མི་ཤིགས་པའི་ཐིག་ལེ་དྭངས་མ་ལྔ་འདུས་ཀྱི་ངོ་བོ་དབྱིབས་ཟླུམ་པོ་ཡི་གེ་ཝཾ་གྱི་དབྱིབས་ཅན་དེ་མར་མེ་རང་གིས་རང་གསལ་བར་བྱེད་པ་ལྟར། ཐིག་ལེ་དེ་ཉིད་རང་གིས་རང་ལ་བདེ་བ་གསལ་བར་སྟོན་པའི་ཕྱིར་སྟོན་པ་ཕུན་སུམ་ཚོགས་པའོ། །བཤད་ཅེས་པ་འཁོར་ཕུན་སུམ་ཚོགས་པ་སྟེ། དེ་ཉིད་ལས་མ་ནུ་རྣམ་ཤེས་ཡིད་སོགས་བཞི། ཡེ་ཤེས་མྱོང་བ་སྡུད་པར་བཤད། །ཅེས་པས། ཡིད་ཤེས་ལ་སོགས་པའི་སེམས་རྣམ་པར་ཤེས་པ་ཚོགས་བརྒྱད་བདེ་བའི་ཡེ་ཤེས་ལྔར་གསལ་བར་ཉམས་སུ་མྱོང་བས་བཤད་པ་དང་འདྲ་བས་འཁོར་རོ། །སྡུད་པ་པོ་ནི་ཡིད་ཀྱི་ཤེས་པའོ། །པའི་ཞེས་པ་བསྟན་པ་ཕུན་སུམ་ཚོགས་པ་སྟེ། དེ་ཉིད་ལས། ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱརྠ་དོན་ཟབ་མོ། །ཞེས་པས། པ་ར་མཱརྠའི་སྒྲ་ལས་དྲངས་ན་དོན་དམ་པ་བྱང་ཆུབ་ཀྱི་སེམས་སོ། །ཡཱ་ན་ནི་ཐེག་པ་ཆེན་པོ་སྟེ། བདེ་གསལ་མི་རྟོག་པའི་ཡེ་ཤེས་ནམ་མཁའི་གཟུགས་ལྟར་སྐྱེས་པ་ནི་དོན་ཟབ་མོ་སྟེ། བསྟན་པ་ཕུན་སུམ་ཚོགས་པའོ། །དུས་ན་ཞེས་པ་དུས་ཕུན་སུམ་ཚོགས་པ་སྟེ། དེ་ཉིད་ལས། བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་པས། བདེ་བའི་ཡེ་ཤེས་སྐྱེས་པའི་དུས་སུ་དུས་གསུམ་ཐ་དད་དུ་འཛིན་པ་མེད་ཅིང་མཉམ་པ་ཉིད་དུ་གྱུར་པ་ནི་དུས་སོ། །གཉིས་པ་སྒྱུ་འཕྲུལ་ཐལ་པའི་རྒྱུད་དང་སྦྱར་ཏེ་ཐབས་ལམ་འོག་སྒོ་ལྟར་བཤད་པ་ནི། སཾ་སྐྲྀ་ཏའི་སྐད་དུ་ཨེ་ཝཾ་མ་ཡ། བོད་སྐད་དུ་འདི་སྐད་བཤད་པའི་དུས་ན་ཞེས་བྱ་སྟེ། དེ་ཡང་འདི་ཞེས་པ་གནས་ཕུན་སུམ་ཚོགས་པ་སྟེ། ཐལ་རྒྱུད་ལས། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །ཞེས་པས། དེ་ལ་ཉེ་བར་མཚན་པ་ནི་གནས་ཏེ། ཡུམ་གྱི་མཁའ་ཕྱི་ཁྱམས་གྲུ་གསུམ་དྲག་པོའི་གནས། བར་ཁྱམས་གྲུ་བཞི་རྒྱས་པའི། སྐྱེ་གནས་ཟླ་གམ་དབང་གི། དབྱིངས་ཕྱུག་གི་སྣ་རྩེ་ཟླུམ་པོ་ཞི་བའི་གནས་སོ། །དེ་ན་དུས་གསུམ་གྱི་སངས་རྒྱས་གསང་བའི་སྐུ་ཐམས་ཅད་ཀྱི་བཞུགས་པའི་གནས་སུ་གསུངས་སོ། །སྐད་ཅེས་པ་སྟོན་པ་ཕུན་སུམ་ཚོགས་པ་སྟེ། དེ་ཉིད་ལས། སྐད་ཅེས་པ་གསལ་བྱེད་ལས་མིང་ཅན། ཝཾ་དབྱིབས་ཐིག་ལེ་བཅས་སྟོན་པ། ཞེས་པས། ཡབ་ཡུམ་རོལ་པའི་དུས་ན། ཡབ་ཀྱི་གསང་བ་རྡོ་རྗེའི་དབུ་ལ་རྩ་ས་ཡ་ཕྲག་བཅུ་གསུམ་གྱི་བཅུད་འདུས་པའི་ཀུན་རྫོབ་ཡེ་ཤེས་ཀྱི་ཐིག་ལེ་ཝྂ་གྱི་དབྱིབས་སུ་རྫོགས་པས། རྟོགས་མ་རྟོགས་ཀྱི་དབང་གིས་འཁོར་འདས་གཉིས་ཀྱི་བྱེད་པ་སོ་སོའི་ཕྱིར་སྟོན་པ་ཡིན་ཏེ། སྐབས་འདིར་བདེ་བ་མ་ལུས་པའི་སྐུ་དང་ཡེ་ཤེས་རྫོགས་པར་བྱེད་པའི་ཕྱིར་སྟོན་པའོ། །བཤད་ཅེས་པ་འཁོར་ཕུན་སུམ་ཚོགས་པའོ། །དེ་ཉིད་ལས། མ་ད་མ་ནུ་སྡོམ་བྱེད་ཡིན། །ལས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །ཅེས་པས། མ་ད་ན་སྡོམ་པ། མ་ནུ་ན་ཡིད་དེ། ཉོན་ཡིད་ལ་སོགས་པའི་རྣམ་པར་ཤེས་པ་ཚོགས་བརྒྱད་ལ་སོགས་སྐུ་དང་ཡེ་ཤེས་ཀྱི་ངོ་བོར་རྡོ་རྗེ་མཐོང་བ་ལ་སོགས་པས་ཕྱིན་ཅི་མ་ལོག་པར་བརྡའ་འཕྲོད་པའི་ཕྱིར། འཁོར་ལ་བཤད་དེ་གོ་བར་ཐ་སྙད་དུ་འདོགས་སོ། །པའི་ཞེས་པ་བསྟན་པ་ཕུན་སུམ་ཚོགས་པ་སྟེ། དེ་ཉིད་ལས། པ་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་ཆེན་འདི་ཡིན་ཏེ། །ཞེས་པས། པ་ར་མཱཪྠ་ན་དོན་དམ་པ་ཟབ་མོའི། ཡཱ་ན་ནི་ཐེག་པ་ཆེན་པོ། དགའ་བ་བཅུ་དྲུག་གི་མཐའ་མར་རང་བཞིན་ལྷན་ཅིག་སྐྱེས་པའི་ཡེ་ཤེས་ལྷངས་ཀྱིས་ཉམས་སུ་མྱོང་བ་ནི། རང་བཞིན་གསང་བའི་སྙིང་པོའི་དོན་ཡིན་ཏེ། དེ་ནི་བསྟན་པའོ། །དུས་ཞེས་པ་དུས་ཕུན་སུམ་ཚོགས་པ་སྟེ། དེ་ཉིད་ལས། དུས་ནི་བསམ་གྱིས་མི་ཁྱབ་དུས། །ཞེས་པས། དེ་ཉིད་མངོན་དུ་གྱུར་པའི་དུས་སུ་ཕྱོགས་གཅིག་ཏུ་བརྗོད་དུ་མེད་པས་བསམ་གྱིས་མི་ཁྱབ་པའི་དུས་སོ། །ན་ཞེས་པ་ཞེས་བྱ་བ་སྟེ། དེ་ཉིད་ལས། ནཱ་མ་དེ་མིང་ཞེས་གསུངས་སོ། །ཞེས་པས་ཀུན་ལ་འཇུག་པ་སྟེ། གནས་ཞེས་བྱ། སྟོན་པ་ཞེས་བྱ། འཁོར་ཞེས་བྱ། བསྟན་པ་ཞེས་བྱ། དུས་ཞེས་བྱའོ། །དེ་དག་ཐུན་མོང་མ་ཡིན་པའི་གླིང་གཞིར་འཇོག་པའི་རྒྱུ་མཚན་ནི། གདུལ་བྱ་ལས་ཐ་མ་པ་རྣམས་ཏེ། མཐར་ལམ་པ་དང་། ཀུན་ཏུ་འོད་རྣམས་ཀྱི་ཕྱིར་ཏེ། སྤར་ཁབ་ལས། དེ་ནི་གདུལ་བྱ་ལས་ཐ་མ་པ་རྣམས་ཀྱི་དོན་གྱི་ཕྱིར་ཐུན་མོང་མ་ཡིན་པའི་གླེང་གཞིའོ། །ཞེས་གསུངས་སོ། །དགོས་ཆེད་ནི། ཁོག་གཞུང་ལས། འགྲོ་བ་ཆགས་ཆེན་སྤང་མེད་པའི། །ལོངས་སྤྱོད་རྫོགས་སྐུ་བཙུན་མོ་དང་། །གཉིས་མེད་རོལ་སོགས་བསྟན་པ་སྟེ། །མཐུན་པས་མཐུན་པར་གྲོལ་བའི་ཕྱིར་རོ། །སྐྱེ་བོ་ཆགས་སོགས་ཡོངས་འདུལ་བ། །ཞེས་སོ། །གཉིས་པ་ཤེས་རབ་གྲོལ་ལམ་གྱི་གླེང་གཞི་དེ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། བློ་གྲོས་ཏེ་ཤེས་རབ་གྲོལ་ལམ་གྱི་རྒྱུ་གླིང་གཞི་ལ་གཉིས་ཏེ། ཐེག་འོག་དང་མཐུན་མོང་གཟུགས་སྐུ་རྟགས་ཀྱི་གླིང་གཞི་དང་། མཆོག་སྟེ་ཁྱད་པར་ཆོས་སྐུ་དོན་གྱི་གླེང་གཞིའོ། །གཉིས་པ་བཤད་པ་དེ་ལ་གཉིས་ཏེ། བགྲང་། དང་པོ་ཁྱད་པར་དོན་གྱི་གླེང་གཞི་དང་། དྲང་། ཤེས་བྱ་ཀུན་གྱི་བླར་གྱུར་ཅིང་ཡོན་ཏན་ཐམས་ཅད་ཀྱི་འབྱུང་ཁུངས་སུ་གྱུར་པས་ན་མ། དེའང་རང་གི་སེམས་ཉིད་རང་བྱུང་གི་ཡེ་ཤེས་ཆེན་པོ་དེ། གདོད་མ་ནས་རང་ལ་གནས་པའི་གཞི་དོན་རྟོགས་པའི་ཆ་ནས་གནས་ཕུན་སུམ་ཚོགས་པ་དང་། དེ་ཉིད་བྱེད་ལས་ཀྱི་སྣ་ཚོགས་སུ་འཆར་བ་ནི་སྟོན་པའོ། །དེ་ལ་ཡེ་ཤེས་ཀྱི་བྱེ་བྲག་ལྔའམ་བཞི་བཅུ་རྩ་གཉིས་ལ་སོགས་པ་མང་པོར་ཤར་བ་ནི་འཁོར། དེ་ལྟར་མང་པོར་ཤར་ཡང་ཡེ་ཤེས་ཐམས་ཅད་དབྱེར་མེད་པའི་བདག་ཉིད་རང་བྱུང་གི་ཡེ་ཤེས་ནི་སྡུད་པའོ། །བསྟན་པའི་ངོ་བོ་ནི་ཐམས་ཅད་ཀྱི་བཅུད་ཐུགས་རང་བྱུང་གི་ཡེ་ཤེས་སུ་བསྡུས་པའི་དངོས་པོ་དེ་བསྟན་པའོ། །ཆོས་ཐམས་ཅད་ཡོངས་རྫོགས་ལ་མ་གཡོས་བཞིན་དུ་ཤེས་བྱ་མ་འདྲེས་པར་བཀྲ་ཞིང་གསལ་བ་ལ། སྒྲོ་སྐུར་གྱི་མཐའ་དང་བྲལ་བས་ལུང་ལ་དུས་བཞི་མཉམ་པ་ནི་དུས་ཕུན་སུམ་ཚོགས་པའོ། །འཁོར་དེ་ལ་ཁྱད་པར་ཆོས་སྐུའི་གླེང་གཞི་དེ་གནས་ནས་ཡོད་པ་དེ་མཐར་མངོན་སུམ་དུ་རྟོགས་ནས་སངས་རྒྱས་པར་འགྱུར་རོ། །དེའི་དོན་ནི་གསང་སྙིང་ལེའུ་དང་པོའི་བསྡུ་བའི་དོན་དང་མཐུན་པ་ཡིན་ཏེ། བརྟག་གཉིས་ལས། གནས་ཀྱང་ང་ལ་སྟོན་པ་ང་། །འཁོར་ཀྱང་ང་ལ་དུས་ཀྱང་ང་། །ཞེས་པ་དང་། སྤར་ཁབ་ལས། རང་རིག་པ་ཉིད་ཀྱི་ཁྱད་པར་དུ་སྣང་བ་ལ་ངོམ་པ་གསུམ་མོ། །ཞེས་སོ། །གཉིས་པ་ཐུན་མོང་རྟགས་ཀྱི་གླེང་གཞི་དེ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ཐེག་འོག་གི་གདུལ་བྱ་དང་ཐུན་མོང་དུ་གྱུར་པ་ལ་མདོ་སྔགས་ཀྱི་གཟུགས་སྐུ་རྟགས་ཀྱི་གླེང་གཞི་ཤར་བ་ལའང་། གདུལ་བྱ་ལུགས་འབྱུང་ཟློག་གིས་ཕྱེ་བས་མཚན་མི་འདྲ་བ་གཉིས་ཀྱི་གཟུགས་སུ་ཤར་ནས་སྣང་བའོ། །གཉིས་པ་བཤད་པ་དེ་ལ་གཉིས་ཏེ། ཞི་བ་དང་། ཁྲོ་བོ་གང་མོས་སུ་སྣང་བའོ། །དང་པོ་ལ་དྲུག་སྟེ། བགྲང་། དང་པོ་སྟོན་པ་དང་། དྲང་། སྟོན་པའི་རྣམ་གྲངས་ནི་རྒྱུ་རྐྱེན་དང་བྲལ་བས་དོན་རང་བྱུང་གི་ཡེ་ཤེས་ཀྱི་རྟགས་སུ་རིགས་ལྔ་དབྱེར་མི་ཕྱེད་པས་རྡོ་རྗེ་སྟེ། དྲུག་པ་རྡོ་རྗེ་འཆང་ཆེན་ཀྱང་ཕྱག་དང་པོས་རྡོ་རྗེ་འཛིན་པ་སྟེ། སྒྱུ་འཕྲུལ་རྒྱ་མཚོ་ལས། ཡེ་ཤེས་རྒྱ་མཚོ་འོག་མིན་གྱི། །འཁོར་ལོ་འབར་བའི་ལྟེ་བ་ལ། །བདག་པོ་ཀུན་བཟང་འཁོར་ལོ་བསྐོར། །བཀའ་སྡོད་སྐྱེས་བུ་མདུན་ན་གནས། །བརྗོད་པ་མེད་བཞིན་གོ་བར་མཛད། །དཔག་མེད་ཡེ་ཤེས་ཡོངས་རྫོགས་པས། །ཞིང་འཁོར་ལོངས་སྤྱོད་ཕུན་སུམ་ལྡན། །ཅེས་གསུངས་སོ། །སྟོན་པ་དེའི་རྒྱལ་ཚབ་འཛིན་ཅིང་སྐུ་གསུང་ཐུགས་ཡོན་ཏན་འཕྲིན་ལས་ཀྱི་རྒྱུད་སྣ་ཚོགས་སྟོན་པ་ནི་འཆད་པའི་སྐྱེས་བུ་རིགས་ལྔ་དང་། བྱིན་རླབས་ཀྱི་སྟོན་པ་སྡུད་པ་པོ་དང་གཉིས་སོ། །བྱེ་བྲག་ཏུ་ས་ནང་ཚིགས་སུ་བཅད་ན་གཉིས་ལས། དང་པོ་སྟོན་པའི་རང་བཞིན་ནི་འདས་མ་འོངས་ད་ལྟ་དུས་གསུམ་གྱི་ཆོས་ལས་གུད་དུ་མིན་ཏེ་འཁོར་འདས་དབྱེར་མེད་པའི་རང་བཞིན་ནོ། །དེ་ཡང་གསང་སྙིང་ལས། བཅོམ་ལྡན་འདས་ཞེས་པ་ནས་རྡོ་རྗེའི་བདག་ཉིད་ཅེས་པའི་བར་མྱང་འདས་དང་དབྱེར་མེད་སྟོན་ལ། མ་ལུས་ཞེས་པ་ནས། དབྱེར་མེད་པའི་རང་བཞིན་ཏེ་ཞེས་པའི་བར་སྟོན་པ་འཁོར་བ་དང་དབྱེར་མེད་སྟོན་ནོ། །གཉིས་པ་སྟོན་པའི་ངོ་བོ་ནི་ཆགས་རྟོགས་མ་སྤངས་བདེ་སྟོང་གི་ཡེ་ཤེས་སུ་རྫོགས་པའི་རྟགས་སུ་ལོངས་སྤྱོད་རྫོགས་པ་ཆེན་པོའི་སྐུ་དོན་རང་བྱུང་གི་ཡེ་ཤེས་ཁོ་ན་ཉིད་ཡིན་པའི་ཕྱིར་རྟགས་སུ་སྐུ་མདུན་རྒྱབ་མེད་པ་ཀུན་ཏུ་ཞལ་ཐལ་ལེ་བར་གསལ་ཞིང་། གདུལ་བྱ་རང་རང་གང་ལ་མོས་པའི་སྣང་ངོར་ཐེག་པ་སྣ་ཚོགས་ཀྱི་སྟོན་པ་ལོངས་སྤྲུལ་བསམ་གྱིས་མི་ཁྱབ་པ་སྟོན་པའི་མཚན་གྱི་རྣམ་གྲངས་རྡུལ་སྙེད་དུ་གྲགས་པ་ལ། འདིར་སྐུ་གསུང་ཐུགས་བསམ་གྱིས་མི་ཁྱབ་པའི་རྣམ་ཐར་གསུམ་དང་ལྡན་པའི་རྟགས་སུ་དབུ་གསུམ། ཡེ་ཤེས་དྲུག་མཚོན་པའི་རྟགས་སུ་ཕྱག་དྲུག །དགོངས་པ་མཉམ་པ་ཉིད་ལས་མ་གཡོས་པའི་རྟགས་སུ་ཕྱག་མཉམ་པར་བཞག་ཅིང་ལོངས་སྤྱོད་རྫོགས་སྐུའི་མཚན་ཕྱི་ནང་གསང་གསུམ་དང་ལྡན་ཞིང་གཞན་དོན་དུ་བརྡའི་སྒོ་ནས་ཆོས་སྟོན་པར་མཛད་པ། ཡབ་ཀྱི་ཞབས་མཐིལ་གཉིས་བརླའི་སྟེང་དུ་བྱས་ཤིང་སོར་མོ་རྣམས་རྡོ་རྗེའི་རྭའི་ཚུལ་དུ་བྱས་པ་ནི་རྡོ་རྗེ་སྐྱིལ་ཀྲུང་དང་། དེ་ལ་ཡུམ་གྱི་ཞབས་གཉིས་ཀྱིས་འཁྱུད་དེ་ཉོན་མོངས་པ་བརྟུལ་ཞིང་བདེ་བ་ཆེན་པོའི་ཡེ་ཤེས་ཀྱི་ངང་དུ་ཞུགས་པས་བརྟུལ་ཞུགས་དང་། ཡབ་ཡུམ་གྱི་མཁའ་གསང་རྡོ་རྗེ་དང་པདྨོའི་རྩེ་མོའི་རྩ་གཉིས་སྤྲད་པའི་བདེ་སྟོང་གི་ཡེ་ཤེས་ལ། རྒྱུ་འབྲས་ཀྱི་ཆོས་ཐམས་ཅད་ཀྱི་ཡོན་ཏན་མཉམ་པར་རྫོགས་པའི་ཕྱིར་མཉམ་པ་དང་རྫོགས་པའི་མིང་བཞི་དང་ལྡན་པའི་སྐྱིལ་མོ་ཀྲུང་གིས་གནས་པར་བཞུགས་པའོ། །དེ་ཡང་གསང་སྙིང་ལས། སྐུ་མདུན་དང་རྒྱབ་མེད་པ་ཞེས་པ་ནས་དབུ་གསུམ་དང་ལྡན་པ་ཞེས་པའི་བར་གྱི་དོན་ནོ། །གཉིས་པ་གནས་དང་། དྲང་། སྟོན་པ་དེ་ཡི་རྟེན་པའི་གནས་ལ་གཉིས་ལས། དང་པོ་གནས་ཀྱི་རང་བཞིན་གཞི། །དེའི་ཤུགས་ལ་འོག་མིན་གྱི་རྣམ་གྲངས་བདུན་ཡང་འཆད་དེ། དེ་ཡང་རྒྱས་པའི་ཐུགས་རང་རིག་པའི་ཡེ་ཤེས་ཀྱི་གོང་གང་གིས་ཀྱང་མཆོད་པ་ནི་རིག་པའི་འོག་མིན་དང་། དོན་ཆོས་ཉིད་ཀྱི་གོང་གིས་ཀྱང་ཆོད་པ་ནི་དོན་གྱི་དང་། ལྷ་རྟོག་དབྱེར་མེད་ཀྱི་གོང་གང་གིས་ཀྱང་མ་ཆོད་པ་ནི་རྟོག་པའི་དང་། ཡབ་ཡུམ་གྱི་མཁའ་གསང་ལ་བདེ་བ་སྐྱེ་བའི་གོང་གང་གིས་ཀྱང་མ་ཆོད་པ་ནི་གསང་བའི་དང་། ཡོད་མིན་མེད་མིན་གྱི་སྐྱེ་མཆེད་ནི་བགྲངས་པའི་དང་། གཟུགས་ཁམས་ཀུན་གྱི་གོང་ན་གནས་པ་ནི་འཇིག་རྟེན་གནས་ཀྱི་འོག་མིན་དང་དྲུག་གོ། །དེ་ལ་འདིར་འཇིག་རྟེན་གནས་ཀྱི་འོག་མིན་དེ་ལས་གཉིས་འགྱུར་གྱིས་དཔགས་པ་སྟེ། དུས་གསུམ་གྱི་སངས་རྒྱས་ཀུན་གྱི་བཞུགས་གནས་སུ་གྲགས་པ་ཆོས་ཉིད་མཉམ་པ་ཉིད་ཀྱི་དབྱིངས་ཀྱི་གོང་གང་གིས་མ་ཆོད་པ། མ་སྤངས་རྒྱན་རྫོགས་ཀྱི་གཞལ་ཡས་ཁང་ལོངས་སྤྱོད་ཆེན་པོའོ་འོག་མིན་དེ་ཉིད་སངས་རྒྱས་ཁོ་ནའི་སྤྱོད་ཡུལ་ཡིན་ཏེ། ལམ་པའི་སྤྱོད་ཡུལ་དུ་གྱུར་པ་མིན་པས་ན་གསང་བའི་གནས་ཡིན་ཏེ། གསང་སྙིང་ལས། འོག་མིན་གྱི་གནས་མཐའ་དང་དབུས་མེད་པ་ན། ཞེས་པས། དེ་ན་སྟོན་པ་གང་བཞུགས་ཤེ་ན། སྒྱུ་འཕྲུལ་རྡོ་རྗེ་དང་། རྒྱ་མཚོ་ལས། གཙང་མའི་རིགས་དག་སྤངས་པ་ཡི། །འོག་མིན་ཆེན་པོའི་གནས་མཆོག་ན། །རིག་བདག་ཕྱག་རྒྱ་ལྷུན་གྲུབ་སྐུ། །གཅིག་དང་དུ་མ་རྣམ་སྤངས་པའི། །སངས་རྒྱས་ཀུན་གྱི་སྤྱི་གཟུགས་ཏེ། །གདོད་ནས་ཐེག་མཆོག་མཛོད་ཉིད་ཕྱིར། །སྒྲིབ་པ་མཐའ་སྤངས་གདུལ་བྱ་ལ། །སྐད་ཅིག་གཅིག་གིས་སྣང་བར་མཛད། །ཅེས་སོ། །གཉིས་པ་གནས་ཀྱི་ངོ་བོ་ནི། ལྷའི་སྐུ་དང་ལྷན་ཅིག་ཏུ་འདུས་པའི་གཞལ་ཡས་ཁང་དེའི་རྒྱུ་ནི་ཡེ་ཤེས་ཉིད་དབྱིབས་ཁ་དོག་ཏུ་སྣང་བ་ཡིན་ཏེ། དེའང་གདུལ་བྱའི་དགོས་འདོད་སྐོང་བ་དོན་ཡིན་ལ། རྟགས་རིན་པོ་ཆེ་འོད་འབར་བའི་གཞལ་ཡས་ཁང་། འཁོར་བའི་ཆོས་ཐམས་ཅད་མ་སྤངས་པར་འབྲས་བུའི་ངོ་བོར་ལྷུན་གྱིས་གྲུབ་ཅིང་ཡོན་ཏན་དཔག་ཏུ་མེད་པ་རྫོགས་པ་དོན་ཡིན་པའི་ཕྱིར། རྟགས་གཞལ་ཡས་ཁང་གི་དབྱིབས་གྲུ་བཞིར་གྱུར་པ། དེའང་ཆོས་ཀྱི་དབྱིངས་ལ་མཐའ་ཐུག་པ་མེད་པ་དོན་ཡིན་ལ། རྟགས་བུམ་པའི་མཐོ་དམན་ལ་ཚད་དཔག་ཏུ་མེད་དེ་དེ་བཞིན་གཤེགས་པའི་གཙུག་ཏོར་ལྟ་བུའོ། །སངས་རྒྱས་ཐམས་ཅད་ཀྱི་དགོངས་པ་རང་རིག་པའི་ཡེ་ཤེས་སུ་གཅིག་པ་དོན་ཡིན་ལ་རྟགས་གཞལ་ཡས་ཁང་གི་རྩེ་མོ་གུར་ལྟ་བུར་ཀུན་འཁྱིལ་པ་སྟེ། རྒྱས་པ་ལས། གཅིག་དང་དུ་མ་བྲལ་བའི་ཕྱིར། །དཀྱིལ་འཁོར་སྤྲོས་མེད་ཟླུམ་པོའི་ཚུལ། །ཞེས་སོ། །རྣམ་པར་ཐར་པ་བཞི་དང་ལྡན་པའི་རྟགས་སུ་སྒོ་བཞི་གློ་འབུར་དུ་ཡོད་པ་དང་། ཡང་དེ་ཉིད་ལས། སྟོང་སྨོན་མཚན་མེད་འོད་གསལ་འཇུག །དེ་ཕྱིར་ཡེ་ཤེས་སྒོ་བཞིར་བཤད། །ཅེས་སོ། །ཡེ་ཤེས་རེ་རེའང་ཡེ་ཤེས་བཞི་བཞི་དང་ལྡན་པའི་རྟགས་སུ་གློ་འབུར་མཁར་ཐབས་བཞིའོ། །བླ་མེད་ཀྱི་ཐེག་པ་ནི་ཐེག་པ་གཞན་ལས་འཕགས་པའི་རྟགས་སུ་གཞལ་ཡས་ཁང་གི་འོག་གཞིའི་འཕང་ལ་ཁྲུ་རེ་ཡོད་པའོ། །རྣམ་ཐར་བརྒྱད་ཀྱི་ཐེག་པའི་འཇུག་པ་མཚོན་པའི་རྟགས་སུ་ཐེམ་སྐམ་རྟ་བབ་ཕྱི་བཞི་ནང་བཞིའོ། །དེ་ཉིད་ལས། དེར་འགྲོ་ལམ་སྟེགས་བརྒྱད་དང་ལྡན། །ཅེས་སོ། །རང་སའི་འབྲས་བུ་བརྒྱད་ཐོབ་པའི་རྟགས་སུ་རྒྱན་རྟ་བབ་བརྒྱད་དང་ལྡན་པ་ནི། འོད་རིམ་ལས། རྟ་རྐང་ཆུ་སྐྱེས་རིན་ཆེན་སྒྲོམ། །མ་སྐྱེས་ཐབས་ཀྱི་ཟ་རར་ཚགས། །སྣ་འཕྱང་ཆུན་འཕྱང་ཤར་བུ་དང་། །སྣ་ཚོགས་ཁྱུང་མགོ་རིམ་པར་འཁྲིགས། །ཞེས་སོ། །ཡུལ་སེམས་དབྱེར་མེད་བདག་ཉིད་ཆེན་པོའི་དོན་མངོན་དུ་བྱས་པའི་ལྷ་ཡབ་དེ་དང་ནི་ཡུམ་རྣམས་ཀྱིས་བདག་པོ་བྱེད་པའི་གནས་ནི། གསང་སྙིང་ལས། དཀྱིལ་འཁོར་བཞི་བཅུ་གཉིས་ཀྱིས་བརྒྱན། །ཅེས་པས། ལྷའི་སྤྲུལ་པའི་འཕྲོ་འདུས་ཀྱི་གདན་བཞི་བཅུ་རྩ་གཉིས་བརྒྱན་པ་དང་། ལོགས་ཀྱི་རྒྱན་ནི། ཤར་འཁོར་ལོ། ལྷོ་རིན་པོ་ཆེ། ནུབ་པདྨ། བྱང་རལ་གྲི། སྟེང་རྡོ་རྗེ་བརྒྱན་པའོ། །མགུལ་རྒྱན་ནི། འོད་རིམ་ལས། ཐ་མའི་འདབ་མས་ཀུན་གཡོགས་པས། །ཡེ་ཤེས་རྩིག་སྟོང་སེང་མགོ་གཏམས། །མི་འཇིག་ཁ་ན་མུ་ཏིག་ཏར། །ཕ་གུ་མཛེས་པའི་བད་དང་ལྡན། །དྲྭ་བ་དྲྭ་ཕྱེད་མགུལ་འཁོར་ལྡན། །གཟུགས་སོགས་ལྷ་མོ་འཁྲིགས་པ་སྟེ། །སྣ་ཚོགས་མཆོད་བྱེད་རོལ་མོ་ཡིས། །བར་སྣང་ཁམས་ཀུན་སྤྲིན་ཕུང་བཞིན། །ཅེས་གསུངས་པས། ཐུགས་རྗེ་དང་སྤྲུལ་པའི་འཕྲོ་འདུ་རྒྱུན་མི་འཆད་པ་དང་ལྡན་པའི་རྟགས་ལ་ཕྲེང་བ། བདེན་པ་གཉིས་དབྱེར་མེད་པའི་རྟགས་སུ་རིན་པོ་ཆེའི་ཆུན་འཕྱང་། ཐབས་སྣ་ཚོགས་མ་འདྲེས་ལ་ཡོངས་སུ་རྫོགས་པའི་རྟགས་ལ་མཛེས་གདུང་ལ་རིན་པོ་ཆེའི་ཤར་བུ། འདོད་པའི་ཡོན་ཏན་ལྔ་མ་སྤངས་རྣམ་དག་རྒྱན་དུ་རྫོགས་པའི་རྟགས་སུ་འདོད་ཡོན་ལྔ་ལྷ་མོ་དཔག་ཏུ་མེད་པ་ཕྱོགས་བཅུར་འཁྲིགས་ཤིང་རྒྱུན་ཆད་མེད་པར་འབྱུང་བའོ། །སྒོ་རྒྱན་ནི། སྒོ་ཁང་ནང་གི་རྒྱན་དགུ་དང་། བཅུ་གཅིག་རྡོ་རྗེའི་འབྲེང་ར་ལ་སོགས་པའོ། །ཕྱིའི་རྒྱན་ནི། རྒྱས་པ་ལས། ཡེ་ནས་མི་ཉིད་མི་འདའི་ཕྱིར། །ཏ་ལའི་ལྗོན་ཤིང་རང་བཞིན་གནས། །རེ་བ་ཡིད་བཞིན་སྐོང་བའི་ཕྱིར། །དཔག་བསམ་ཤིང་ནི་རིན་ཆེན་འབར། །ཡིད་བཞིན་རིན་ཆེན་རྒྱན་གྱིས་བསྐོར། །ཐམས་ཅད་ལ་ནི་དབང་བསྐུར་ཕྱིར། །འཇིག་རྟེན་ལྷ་ཆེན་རྣམས་ཀྱིས་བསྐོར། །ཅེས་གསུངས་པས། ཡེ་ནས་མཉམ་པ་ཉིད་ལ་མི་འདའ་བས་ཉོན་མོངས་གཏན་ནས་མི་སྐྱེ་བའི་རྟགས་སུ་ཏ་ལའི་ལྗོན་ཤིང་བཅད་ཟིན་བརྒྱད་དམ་བཅུ་དྲུག །མན་ངག་ལྟར་ན་མཁའ་འགྲོ་སུམ་ཅུ་གཉིས་ཀྱི་གནས་ཡིན་པས་སོ་གཉིས་སུ་འདོད་སྐད་དོ། །གདུལ་བྱའི་རེ་བ་ཡིད་ལ་བསམ་པ་བཞིན་དུ་སྐོང་བའི་རྟགས་སུ་དཔག་བསམ་ཤིང་ལ་རིན་པོ་ཆེའི་ཚོང་ཚོང་གིས་སྤྲས་པ་ལ་དྲིལ་བུ་གཡེར་ཁས་བརྒྱན་པ་ཏ་ལའི་གྲངས་དང་མཐུན་པ། དེ་དག་གི་བར་བར་དུ་རིན་པོ་ཆེའི་ཕུང་པོ་དང་། ཁྲུས་ཀྱི་རྫིང་བུ་ཡང་ཏ་ལ་དང་། དཔག་བསམ་ཤིང་གི་གྲངས་ལྟར་ཡོད་དོ། །འཁོར་བའི་ཆོས་ལ་དབང་བསྒྱུར་བའི་རྟགས་སུ་འཇིག་རྟེན་གྱི་ལྷ་ཆེན་པོ་ལ་སོགས་པ་རྣམས་ཀྱིས་བསྐོར་བའི་གདན་ལ། གསེར་གྱི་ས་གཞིའི་སྟེང་། ནེལ་སེང་སྔོན་པོའི་ཐང་། དེའི་སྟེང་ན་མེ་ཏོག་ལྡེམ་གཟིང་དཀར་པོའི་ཚལ་ཡོད་དོ། །དེ་ལྟ་བུའི་གཞལ་ཡས་ཁང་གི་རྒྱན་དུ་མར་སྣང་བ་ཡང་། དཔེ་དྲི་ཟ་ཁོ་རང་གར་བསྡད་པའི་སར་གནས་ཁང་རང་ཤུགས་ཀྱིས་གྲུབ་པ་བཞིན་དུ། སྟོན་པ་ལོངས་སྐུའི་དགོངས་པ་ཡེ་ཤེས་ཀྱི་རྩལ་ལས་གཞལ་ཡས་ཁང་གི་དབྱིབས་ཁ་དོག་རྒྱན་དུ་མར་སྣང་བའོ། །དེ་ཡང་གསང་སྙིང་ལས། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་ཞེས་པ་ནས་རྣམ་པར་ཐར་པ་བརྒྱད་ཀྱི་རྟ་བབ་དང་ལྡན་པ། ཞེས་གསུངས་པའི་བར་གྱི་དོན་ནོ། །རང་རིག་པའི་ཡེ་ཤེས་རྒྱ་ཁྱོན་ཕྱོགས་རེའི་ཚད་བཟུངས་དུ་དཀའ་བ་ནི། ཐམས་ཅད་ཡེ་ཤེས་ཁོ་ན་ཡིན་པ་ལ་བློའི་སྤྱོད་ཡུལ་དང་བྲལ་བ་ཡིན་པའི་ཕྱིར་དེ་ཉིད་ལས། རྒྱ་ཕྱོགས་བཅུར་ཡོངས་སུ་མ་ཆད་པ། ཞེས་སོ། །དེ་བས་ན་དུས་དང་གནས་སྐབས་ཀུན་ཏུ་ཡེ་ཤེས་མ་གཏོགས་པ་ཕྱི་རོལ་གྱི་ཡུལ་དང་། ནང་གི་སེམས་ཐ་དད་པ་ནི་རང་རིག་པའི་ཡེ་ཤེས་དེ་ལ་མེད་དེ་ཀུན་ཏུ་ཡང་ནང་དུ་གྱུར་པའོ། །དེ་ཉིད་ལས། ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པའོ། །ཞེས་སོ། །གདན་གྱི་ནང་མཚན་ལ་ལྔ་སྟེ། འོག་གཞི་ཆོས་ཀྱི་འཁོར་ལོ་བསྐོར་པའི་གདན་དང་། ཡོན་ཏན་གྱི་ཆེ་བས་ཉེས་ཚོགས་བཅོམ་པའི་དང་། སའི་ཁྱད་པར་འགྲོད་པའི་དང་། ཐུགས་རིག་པ་རང་སྣང་གི་གདན་དང་། སྨོན་ལམ་གུས་པའི་གདན་ནོ། །དང་པོ་ནི། དེ་ཡང་སྟོན་པས་གདུལ་བྱ་བསམ་གྱིས་མི་ཁྱབ་པ་ལ་ཆོས་ཀྱི་འཁོར་ལོ་རྒྱུན་ཆད་མེད་པར་བསྐོར་བའི་རྟགས་སུ་འཁོར་ལོ་རྩིབ་བཞི་ལྟེ་བ་དང་བཅས་པ་སྟེ། དེ་ཉིད་ལས། གཞི་ཚད་མེད་པ་ཡེ་ཤེས་ཀྱི་འཁོར་ལོ་གསལ་བ་ལ། ཞེས་པ་དང་། རྒྱས་པ་ལས། ཐམས་ཅད་མཁྱེན་པའི་ཡེ་ཤེས་སྐུས། །ཆོས་ཀྱི་འཁོར་ལོ་ཡོངས་སུ་བསྐོར། །ཅེས་སོ། །གཉིས་པ་ནི། ཤེས་རབ་རང་བཞིན་མེད་པ་དོན་ཡིན་ལ་རྟགས་ཉི་མའི་དཀྱིལ་འཁོར་དང་། ཐབས་འགག་པ་མེད་པ་དོན་ཡིན་ལ་རྟགས་ཟླ་བའི་དཀྱིལ་འཁོར་དང་དེ་ཉིད་ལས། རང་བཞིན་གྱིས་འོད་གསལ་བའི་ཉི་ཟླའི་དཀྱིལ་འཁོར་དང་། ཞེས་པ་དང་། ཡང་དེ་ཉིད་ལས། རང་བཞིན་ཡེ་ནས་འོད་གསལ་ཕྱིར། །ཉི་ཟླ་བརྩེགས་པའི་གདན་ཁྲི་འབར། །ཅེས་སོ། །ཐབས་ཤེས་རབ་གཉིས་མེད་ལ་ཉེས་པའི་སྐྱོན་གྱིས་མ་ཆགས་པ་དོན་ཡིན་ལ། རྟགས་པདྨའི་གདན་དང་། དེ་ཉིད་ལས། གོས་པ་མེད་པ་པདྨ། ཞེས་པ་དང་། ཡང་། ཡེ་ནས་རྣམ་པར་དག་པའི་ཕྱིར། །མ་ཆགས་པདྨ་འབར་བའི་གདན། །ཅེས་སོ། །གསུམ་པ་ནི་གདུལ་བྱའི་རེ་བ་སྐོང་ཞིང་དགོས་འདོད་ལྷུན་གྱིས་གྲུབ་པ་དོན་ཡིན་ལ། རྟགས་རིན་པོ་ཆེའི་ཁྲི་སྟེ། དེ་ཡང་དཀར་པོ་བདུན་ངོ་བོ་ཉིད་ལྷུན་གྱིས་གྲུབ་པ་དོན་ཡིན་ལ། རྟགས་ཁྲི་རྐང་རེ་རེ་ལ་ཡང་མཛོད་མིག་བདུན་བདུན་དང་ལྡན་པའོ། །དེ་ཡང་དེ་ཉིད་ལས། རིན་པོ་ཆེའི་གདན་ལ། ཞེས་པ་དང་། ཡང་། ཟད་མེད་ཡེ་ཤེས་གཏེར་གྱུར་པས། །ཡིད་བཞིན་རིན་ཆེན་འབར་བའི་གདན། །ཅེས་སོ། །བཞི་པ་ནི། སྟོན་པའི་དགོངས་པ་ལ་འབྲས་བུའི་ཆེ་ཡོན་ཐམས་ཅད་ལྷུན་གྱིས་གྲུབ་ཅིང་། རྫོགས་པ་དོན་ཡིན་ལ། རྟགས་སེམས་ཅན་ལྔའི་གདན་དུ་སྣང་བ་ཡིན་ཏེ། དེ་ཉིད་ལས། མི་འཇིགས་པ་སེང་གེ་ཞེས་པ་ནས། ནམ་མཁའ་ལྡིང་གི་ཁྲི་དང་ཞེས་པའི་བར་དང་། དབང་བསྐུར་རྒྱལ་པོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་འཇོམས། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །སྐུ་ནི་སྟོབས་བཅུས་མི་དགེ་བཅུ་རྣམས་འཇོམས། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་སྒྲོལ། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱས་པའི་གསུང་། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་འཕྲིན་ལས་བཞི་ཡིས་ཐོགས་མེད་སྒྲོལ། །དེ་གྲུབ་རྟགས་སུ་ཤང་ཤང་ཁྲི་ལ་བཞུགས། །ཞེས་གསུངས་སོ། །ལྔ་པ་སྨོན་ལམ་གུས་པའི་གདན་ནི། འབྲས་བུའི་གདན་གྱི་ཞོར་ལ་བཤད་དེ། དེ་ཡང་ས་མཐའི་བྱང་ཆུབ་སེམས་དཔའ་སྨོན་ལམ་གྱི་དབང་གིས་ལུས་སེང་གེ་ལ་སོགས་པར་སྤྲུལ་ཏེ། སྟོན་པའི་གདན་དུ་ཕུལ་ནས་ཉོན་མོངས་པའི་སྒྲིབ་པ་སྦྱངས། རྣ་བས་ཆོས་ཉན་པས་ཤེས་བྱའི་སྒྲིབ་པ་སྦྱངས་ཏེ། རྒྱ་མཚོ་ལས། བྱང་ཆུབ་སེམས་དཔའ་སྨོན་ལམ་དབང་། །ཐོས་པ་རྒྱ་མཚོ་བསགས་པའི་ཕྱིར། །ལུས་ནི་སེང་གེའི་གདན་དུ་ཕུལ། །ཞེས་པ་དང་། སྤར་ཁབ་ལས། སེང་གེ་ལ་སོགས་པ་སྨོན་ལམ་གྱི་བྱང་ཆུབ་སེམས་དཔའ་གཅིག་བརྒྱད་དོ། །ཞེས་གསུངས་སོ། །དེ་ལ་གདན་གྱི་རིམ་པ་ནི། སྤྱན་འགྲེལ་ལས། སྐྱེས་བུ་ལྔ་ལ་ལྔ་བརྩེགས་ཏེ། སེམས་དཔའ་ལ་སུམ་བརྩེགས། སྒོ་བ་ཡབ་ཡུམ་ལ་ཉི་མ་དང་པདྨ་གཉིས་བརྩེགས། ཀུན་བཟང་ཡབ་ཡུམ་ལ་དཀྱིལ་འཁོར་ལ་འགོད་པའི་ཚེ་སུམ་བརྩེགས་དང་། ཆོས་འཆད་པའི་ཚེ་ལྔ་བརྩེགས་སུ་བཤད་དོ། །དེ་ཡང་གདན་གྱི་སྟེང་དུ་ཟླ་བ་འོང་བའི་རྒྱུ་མཚན་ནི། སྤར་ཁབ་ལས། ཐིག་ལེ་ཆེན་པོ་དང་ས་བོན་ནི་ཐམས་ཅད་ཀྱི་བྱེད་པ་པོའི་ཕྱིར་བདག་པོ་དང་རྡོ་རྗེ་སྟེ། དབུས་ན་ཟླ་བ་བླར་གནས་སོ། །ཞེས་སོ། །ཐབས་ལམ་ལྟར་ན། སྙིང་ག་ཆོས་ཀྱི་འཁོར་ལོ་ན་སྲོག་མི་ཤིགས་པའི་ཐིག་ལེ་དང་། ཀླད་པ་བདེ་ཆེན་གྱི་འཁོར་ལོ་ན་སྲོག་མི་ཤིགས་པའི་ཐིག་ལེ་ཡོད་པས། ཐབས་ཀྱིས་ཟིན་མ་ཟིན་གྱི་ཆས་ཐིག་ལེ་གཉིས་པོ་དེ་འཁོར་འདས་ཐམས་ཅད་ཀྱི་བྱེད་པ་པོའི་རྒྱུ་རུ་འགྲོ་ལ། གྲོལ་ལམ་ལྟར་ན། རྒྱུད་ཀྱི་བདག་པོ་རྒྱལ་བ་དྲུག་པ་ཀུན་ཏུ་བཟང་པོ་དང་། དཀྱིལ་འཁོར་གྱི་གཙོ་བོ་རྡོ་རྗེ་སེམས་དཔའ་གཉིས་ལ་གདན་ཟླ་བ་སྟེང་དུ་ཡོད་པའི་རྒྱུ་མཚན་དེ་ཡིན་ཅེས་གསུང་སྟེ། དེ་ཡང་སྤྱན་འགྲེལ་ལས། གཙོ་བོ་ནི་ཤེས་རབ་ལ་སྤྱོད་པའི་ཕྱིར། ནང་གི་ཆུ་སྐྱེས་ཀྱི་ལྟེ་བ་ལ་ཉི་མ་བརྟན་པའི་ཕྱིར། རི་བོང་ཅན་སྟེང་ན་གནས་སོ། །ཡུམ་རྣམས་དེ་ལས་ཟློག་གོ། །ཞེས་འཆད་ན་ཡང་། ལྷ་འཁྲིལ་སྦྱོར་རྣམས་ལ་གདན་གཅིག་པས་མི་འགལ་ལོ། །འགྲེལ་པ་མངོན་རྟོགས་ལས། ཞི་བའི་ལྷ་ཀུན་ལ་ཟླ་བ་སྟེང་དུ་འོང་ལ། ཁྲོ་བོའི་ལྷ་ཀུན་ལ་ཉི་མ་སྟེང་དུ་འོང་བར་གསུངས་སོ། །དེ་ལྟར་ཡེ་ཤེས་ཀྱིས་རྩལ་ལས་གཞལ་ཡས་ཁང་གི་གདན་དང་། རྒྱན་དུ་མར་སྣང་བས་དབྱིངས་ཕྱོགས་གཅིག་གི་མཐའ་དང་བྲལ་བས་ན། གཅིག་མ་ཡིན་ལ་ཡེ་ཤེས་སྣ་ཚོགས་སུ་སྣང་བའི་དུས་ལ་རང་བཞིན་མེད་དེ་དབྱིངས་ལས་མ་གཡོས་པས་དུ་མའི་མཐའ་དང་བྲལ་བའོ། །གསུམ་པ་འཁོར་ལ་གསུམ་སྟེ། བགྲང་། དང་པོ་རྣམ་གྲངས་དང་། དྲང་། དོན་ལ་གཙོ་འཁོར་གྱི་དགོངས་པ་དབྱེར་མེད་ཡིན་ཀྱང་། གདུལ་བྱའི་སྣང་ངོ་ལ་གཙོ་འཁོར་གྱི་ཚུལ་དུ་སྣང་སྟེ། དེ་ཡང་གནས་དེ་ན་སྟོན་པ་དེ་ལ་འཁོར་དེ་གུས་པའི་ཚུལ་དུ་སྣང་སྟེ། སྟོན་པ་ཀུན་བཟང་གི་རྒྱལ་ཚབ་ཀྱི་ཚུལ་འཛིན་ཅིང་རྒྱུད་འཆད་བྱེད་ཀྱི་སྐྱེས་བུ་རྒྱལ་བ་རིགས་ལྔ་ཡབ་ཡུམ་བཅུ་དང་། རྒྱལ་སྲས་བྱང་ཆུབ་སེམས་དཔའི་ཚུལ་འཛིན་པའི་འཁོར་སེམས་དཔའ་ཡབ་ཡུམ་བཅུ་དྲུག་དང་། གདུག་པ་ཅན་འཇིགས་པར་བྱེད་པ་ཁྲོ་བོའི་ཚུལ་འཛིན་པའི་འཁོར་ཁྲོ་བོ་ཡབ་ཡུམ་བརྒྱད་དང་། ཐུགས་རྗེའི་སྤྲུལ་པའི་འཁོར་ཐུབ་པ་དྲུག་གི་ཚུལ་འཛིན་པ་དང་། དད་པ་ཅན་གཏམ་ཉན་པའི་འཁོར་སངས་རྒྱས་ཀྱི་ཐུགས་རྗེ་དང་གདུལ་བྱའི་སྨོན་ལམ་འབྲེལ་བའི་སྟོབས་ཀྱིས་ལྷ་ཆེན་པོ་བརྒྱད་དང་། སོགས་ཀྱི་སྒྲས་དཔལ་མགོན་བདུན་ཅུ་རྩ་ལྔའི་ཚུལ་འཛིན་པ། གཞལ་ཡས་ཁང་གི་རྒྱབ་རྡོ་རྗེ་རྭ་བའི་ནང་། མེ་ཏོག་ལྡོམ་གཟིང་དཀར་པོའི་སྟེང་ན་བཞུགས་པའོ། །གཉིས་པ་བཞུགས་ཚུལ་དང་། དྲང་། འཁོར་དེ་རྣམས་ཀྱི་བཞུགས་ཚུལ་ནི། རིགས་ལྔ་ཡབ་ཡུམ་བཅུ་ནི་སྟོན་པ་ཀུན་བཟང་ཡབ་ཡུམ་དང་དགོངས་པ་དབྱེར་མེད་པས་བཞུགས་ཚུལ་གཅིག་གོ། །སེམས་དཔའ་རྣམས་ནི་ལམ་མཐར་མ་ཕྱིན་གྱི་བར་དུ་བདག་གཞན་གྱི་དོན་བསྒྲུབ་པ་ལ་མཉམ་རྗེས་ཀྱི་ཚུལ་དུ། གཡོན་བསྐུམ་གཡས་པ་གདན་ལ་འབབ་པའི་ཚུལ་དང་། ཁྲོ་བོ་རྣམས་ནི་སྒོ་བསྲུང་བའི་ཚུལ་དུ་ཟུར་གྱིས་བལྟ་བའམ། ཕྱིར་བལྟས་པའི་ཞབས་གྱད་བཀྱག་ཐབས་སུ་དང་། ཐུབ་པ་རྣམས་ནི་འགྲོ་བའི་དོན་རྒྱུན་ཆད་མེད་པར་མཛད་པའི་ཕྱིར་ཞབས་འགྲེང་བར་བཞུགས་པའོ། །དེ་ཡང་གསང་སྙིང་ལས། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། ཞེས་པ་ནས། མཚན་མར་མ་ཡིན་པ་ཞེས་པའི་བར་གྱིས་དོན་ནོ། །འོ་ན་གོང་དུ་རིགས་ལྔ་དང་སེམས་དཔའ་སྟོན་པར་མཛད་པ་དང་། འདིར་འཁོར་དུ་བཤད་པ་གཉིས་འགལ་ལོ་ཞེ་ན། འགལ་བ་མ་ཡིན་ཏེ་གོང་དུ་ཐམས་ཅད་སྟོན་པར་བཤད་པ་ནི། གདུལ་བྱ་ལྷ་མིའི་སྣང་ངོ་ལ། ལམ་རྐྱེན་ཡི་གེའི་རྒྱུད་ཀྱི་སྟོན་པ་འབྱུང་བར་བྱེད་པ་ལ། ཆོས་སྐུ་ཀུན་བཟང་གི་རྒྱལ་བ་དགོངས་བརྒྱུད། ལོངས་སྐུ་རིགས་ལྔས་རིག་འཛིན་བརྡའ་བརྒྱུད། སྤྲུལ་སྐུ་ཕྱག་རྡོར་གྱིས་དམ་པའི་རིགས་ཅན་ལྔ་ལ་ཚིག་བརྡའི་སྒོ་ནས་གསུངས་ཏེ། དེ་ནས་རྒྱལ་པོ་ཛཿམན་ཆད་དུ་གང་ཟག་སྙན་བརྒྱུད་དུ་བསྟན་པ་དར་བ་ལ། དེ་ལྟར་རྒྱལ་བ་སྐུ་གསུམ་དུ་བརྒྱུད་དགོངས་པ་ཡིན་ཏེ། ཁོག་གཞུང་ལས། སྟོན་པའི་རང་བཞིན་བརྒྱད་དང་ལྡན། །བདག་ཉིད་བྱེད་པ་ཀུན་ཏུ་བཟང་། །འཆད་པའི་སྐྱེས་བུ་རིགས་ལྔ་སྟེ། །མཚུངས་པའི་གཞི་དང་ལྡན་པའི་ཕྱིར། །ལྔས་ཀྱང་བསྟན་པ་གསུངས་མི་འགལ། །གསང་བདག་ཕྱག་ན་རྡོ་རྗེ་ཡིས། །ཐུན་མོང་མ་ཡིན་ངེས་པའི་རྒྱུད། །དྲིས་ལན་མི་མངོན་ཚུལ་གྱིས་བསྡུས། །བྱིན་རླབས་མི་ཡུལ་གྲགས་པ་ཡིན། །ཅེས་གསུངས་པའི་ཕྱིར་རོ། །འདིར་འཁོར་དུ་བཤད་པའི་རྒྱུ་མཚན་ནི། སྤྱིའི་རྒྱུད་ཀྱི་ཆོས་འཆད་པའི་སྟོན་པ་ནི། ཀུན་བཟང་ཉག་གཅིག་གིས་གསུངས་པ་ཡིན་པས། དེ་ལ་ལྟོས་ནས་རིགས་ལྔ་མན་ཆད་འཁོར་དུ་བཤད་པ་ལ་འགལ་བ་མེད་དོ། །གསུམ་པ་ཚད་གཉིས་བསྟན་པའོ། །དྲང་། དེ་ལྟ་བུའི་སྤྲུལ་པ་རང་རྒྱུད་པའི་ཚོགས་ནི་གྲངས་ཚད་ལས་འདས་པའི་དོན་གྱི་གྲངས་བརྗོད་ཀྱི་མི་ལང་ཡང་། ཆ་ལུགས་ཀྱི་རྣམ་གྲངས་ནི་གང་གི་བཞི་བཅུ་ལ་འདུས་པའོ། །དེའང་ཡབ་ཡུམ་གཙོ་འཁོར་དུ་བཞུགས་ཤིང་ཆོས་ཀྱི་དབྱིངས་མུ་མཐའ་མེད་པར་ཁྱབ་པ་ནི། རང་བཞིན་མངོན་དུ་བྱས་པའི་རྟགས་སུ་གཞལ་ཡས་ཁང་ལྷས་གང་ནས་ཀུན་ཏུ་ཁྱབ་པར་བཞུགས་སོ། །དེ་ཡང་གསང་སྙིང་ལས། དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །ཞེས་པའི་དོན་ནོ། །བཞི་པ་སྡུད་པ་པོ་དང་། དྲང་། དཔེར་ན་ནོར་བུ་རིན་པོ་ཆེ་ལ་གདུལ་བྱ་རང་རང་གི་བསམ་པ་བཞིན་དུ་དགོས་འདོད་འབྱུང་བ་ལྟར། སྡུད་པ་པོ་ཡང་གདུལ་བྱ་རང་རང་གི་མོས་པ་བཞིན་དུ་སྐུ་མངའ་བའི་གསང་བདག་ནི་སྙན་ཆ་ལྔ་ལྡན་དུ་ཡོད་པས་རྒྱུད་དེ་ཡི་བདག་པོ་ཡིན་པའི་ཕྱིར། སྡུད་པ་པོ་ཡང་གསང་བ་བདག་རང་ཡིན་ཀྱང་། ཏནྟྲ་སྟེ་རྒྱུད་ཐུགས་སྒྱུ་འཕྲུལ་དྲྭ་བ་དེའི་དོན་སྡུད་པ་པོས་བསྡུས་ནས་མི་དང་མི་མ་ཡིན་པ་ལ་སོགས་པ་ལ་བརྒྱུད་པའང་། རང་རང་གི་མོས་པ་བཞིན་དུ། ལྷ་ལ་ཀུ་མ་ར་སྟེ་འཇམ་དཔལ་དུ་སྣང་བ་དང་། ཀླུ་ལ་སྤྱན་ཚོར་ཏེ་སྤྱན་རས་གཟིགས་སུ་སྣང་བ་དང་། མི་དང་མི་མིན་གཉིས་ཀ་ལ་གསང་བདག་ཏུ་སྣང་བ་དེ་ནི་སྟོན་པ་ཀུན་བཟང་དེ་ཡི་ཐུགས་ལས་སྐྱེས་པའི་ཕྱིར། རྒྱུད་དེ་ཡི་དོན་ནི་གསང་བདག་དེས་བསྡུས་ནས་དམ་པའི་རིགས་ཅན་ལྔ་དང་། རྒྱལ་པོ་ཛཿལ་སོགས་པའི་སྐལ་ལྡན་རྣམས་ལ་གསུངས་པ་ནི་རིགས་ཏེ་འཐད་པའོ། །དེ་ཡང་གསང་འདུས་ལས། རང་གི་ལུས་ངག་ཡིད་རྡོ་རྗེ། །མི་ཕྱེད་པ་ཡི་ངོ་བོ་ཉིད། །རིག་པ་བཅས་པར་ལྡན་པ་ཉིད། །རིག་པའི་སྐྱེས་བུ་ཞེས་སུ་བརྗོད། །ཅེས་སོ། །ལྔ་པ་དུས་དང་། དྲང་། ཆོས་སྐུ་ལོངས་སྐུ། སྤྲུལ་སྐུ། རྡོ་རྗེའི་སྐུ། མངོན་པར་བྱང་ཆུབ་པའི་སྐུ་དང་ལྔ་ནི། ལམ་པའི་ས་ཚོད་མཐོ་ན་དམན་གྱི་བློ་ཡིས་ཕྱེ་བས་ཡེ་ཤེས་རྒྱ་མཚོའི་འཁོར་དང་། སྨིན་པ་རྒྱ་མཚོ་དང་། མོས་པ་རྒྱ་མཚོ་དང་། ལྷུན་གྲུབ་རྒྱ་མཚོ་དང་། རྒྱལ་བ་རྒྱ་མཚོའི་འཁོར་དང་ལྔ་པོ་རྣམས་ལ། སོ་སོར་རང་རང་གི་བློ་དང་འཚམས་པར་ཆོས་བསྟན་ཅིང་བརྡའ་སྤྲད་པའི་དུས་ཐ་དད་དུ་སྣང་ན་ཡང་། གདུལ་བྱ་གོ་ཕྱེ་བའི་འཁོར་གྱི་སྣང་ངོར་རྐྱང་བཀར་དུ་བཤད་པ་ཡིན་ལ། འདིར་ནི་སྟོན་པ་སྐུ་ལྔ་ལྷུན་གྱིས་གྲུབ་པའི་དྲུག་པ་དེས་ལྷན་ཅིག་པ་ཡི་འཁོར་རྣམས་ལ་བསྟན་པ་གསུང་ལྔ་ལྷུན་གྲུབ་དུས་གཅིག་ཏུ་སྣང་སྟེ། དེ་ཡང་ཚུལ་ཅི་ལྟར་དུ་སྣང་ན། མཐར་ལམ་པའི་འཁོར་གང་གིས་སྟོན་པ་དྲུག་པའི་ཞལ་མཐོང་བ་དང་བསྟན་པ་གསུང་ལྔ་ལྷུན་གྲུབ་ཀྱི་དོན་རྟོགས་ནས་སངས་རྒྱས་པ་དེའི་ཚེ་ན་ཡང་། དུས་བཞི་མཉམ་པ་ཉིད་ལས་མ་གཡོས་པ་ཡིན་ཏེ། དེ་ཡང་དུས་བཞི་ནི་དཔེ་མེ་ཤིང་དང་འདྲ་སྟེ། རྒྱུ་རྐྱེན་འཛོམ་པ་དེ་བྲལ་བ་ནི་འདས་པ། རྒྱུ་རྐྱེན་འཚོགས་བདོ་བ་ནི་ད་ལྟ་བ། རྒྱུ་རྐྱེན་འཛོམ་པའི་ཚེ་འབྲས་བུ་གཅིག་འབྱུང་ལ་མ་རག་པ་ནི་མ་འོངས་པ། རྒྱུ་རྐྱེན་སོ་སོར་ཡོད་ཀྱང་ལྷན་ཅིག་ཏུ་མ་འཚོགས་པ་ནི་འབྱུང་བར་མ་ངེས་པའོ། །དེ་ཡང་ཀུན་རྫོབ་ཀྱི་བདེན་པའི་ཆ་ནས་དུས་བཞིར་སྣང་ལ་མ་འགགས་ལ། དོན་དམ་གྱི་བདེན་པའི་ཆ་ནས་དུས་བཞིར་སྣང་བ་མ་དམིགས་ཏེ། དབྱེར་མེད་ཀྱི་བདེན་པའི་ཆ་ནས་དུས་བཞི་མ་འདྲེས་ལ་ཡོངས་སུ་རྫོགས་པས་མཉམ་པ་ཉིད་ཅེས་བྱ་སྟེ། དགོངས་འདུས་ལས། མ་བཅོས་དེ་བཞིན་ཉིད་འདི་ལ། །དུས་གསུམ་དུས་བཞི་མ་དམིགས་ཏེ། །ཡེ་ཤེས་རིག་པའི་ཡུལ་ཅན་ལ། །སྐད་ཅིག་བསྐལ་པ་དེ་སྐད་ཅིག །ཅེས་པ་དང་། རྒྱས་པ་ལས། འདས་དང་ད་ལྟར་འབྱུང་བ་དང་། །འབྱུང་དང་འབྱུང་བར་མ་ངེས་པ། །ཡེ་ཤེས་རྟོགས་པའི་ཁྱད་པར་གྱིས། །དུས་བཞི་སྔ་ཕྱི་མེད་པ་ཡི། ། མཉམ་པ་ཉིད་དེ་ལྷན་ནེར་སྦྱོར། །ཞེས་གསུངས་སོ། །དེ་ཡང་གསང་བའི་སྙིང་པོ་འཁོར་འདས་རང་བཞིན་མཉམ་པ་ཉིད་རྟོགས་པའི་ངང་དུ་དུས་བཞི་མ་འདྲེས་ལ་ཡོངས་སུ་རྫོགས་པར་བརྡ་འཕྲོད་པའི་འཁོར་རྣམས་ལ། རྟག་པར་རྒྱུན་དུ་བསྟན་པ་གསུང་ལྔ་ལྷུན་གྲུབ་ཏུ་བརྡ་མཇལ་བས་ན་ཐུགས་རྗེ་འཛོམ་པའོ། །དུས་ནམ་འཛོམ་ཞེ་ན་མཐར་ཕྱིན་ནས་ཤེས་བྱ་བག་ལ་ཉལ་གྱི་དྲི་མ་དག་པ་ཡི་དུས་ལ་མངོན་སུམ་དུ་འབྱུང་བར་འགྱུར་རོ། །དྲུག་པ་བསྟན་པའོ། །དྲང་། ལམ་མཐར་ཕྱིན་པ་དེའི་ཚེ་གང་སྣང་ན་རང་བཞིན་གསང་བའི་སྙིང་པོ་འབྲས་བུའི་རྒྱུད་ངེས་པའི་ལུང་དེ་མངོན་སུམ་དུ་སྣང་། ཚུལ་ཅི་ལྟར་དུ་སྣང་ན་གསུང་ལྔ་ལྷུན་གྱིས་གྲུབ་པའི་ཚུལ་གྱིས་སྣང་། གང་ལ་སྣང་ན་ལྷན་གཅིག་པའི་འཁོར་ལ་འཆར་ནས་སྣང་བའོ། །འོ་ན་ཡི་གེའི་རྒྱུད་འདི་ངེས་ལུང་མ་ཡིན་ནམ་སྙམ་ན། མཚོན་བྱེད་ཚིག་གིས་བསྟན་པར་སྣང་བའི་རྒྱུད་དེ་ཉིད་ཀྱི་དོན་བརྗོད་པ་ཡིན་ཏེ། འོ་ན་ཚིག་ཁོ་ན་དངོས་སུ་བརྗོད་དམ་ཞེ་ན། མ་ཡིན་ཏེ་མཚོན་བྱེད་ཚིག་དེ་དག་མཚོན་བྱ་མཚོན་བྱེད་མེད་པར་རང་སྒྲ་སྟེ། དཔེར་ན་ཆུ་ཟླའི་གཟུགས་བརྙན་བཞིན་དུ་སྟོན་འཁོར་གྱི་དགོངས་པ་ལ་གསུང་ལྔ་ལྷུན་གྲུབ་མཚོན་བྱ་མཚོན་བྱེད་དབྱེར་མེད་པའོ། །གཉིས་པ་ཁྲོ་བོ་གང་མོས་སུ་སྣང་བའོ། །དྲང་། དཔེར་ན་འགྲོ་བ་མི་ལ་སོགས་པ་གང་དག་གི་མིག་གི་གཟུགས་སུ་སྣང་བའི་ཡུལ་ལ་རང་རང་གི་རིགས་མཐུན་སྣང་ན་གཅིག་ལ་གཅིག་དགའ་བར་བྱེད་ལ། མི་མཐུན་པའི་དགྲ་ལ་ནི་དགའ་བ་དེ་ལས་སྒྱུར་བར་བྱེད་པ་འཇིགས་པའི་གཟུགས་སུ་སྣང་བ་ལྟར། རྒྱལ་བ་དྲུག་པའི་གླེང་གཞིའང་དེ་བཞིན་དུ་ལུགས་འབྱུང་རྣམས་ལ་ཞི་བ་དང་། ལུགས་ལྡོག་རྣམས་ལ་ཁྲོ་བོའི་གླེང་གཞིར་བསྒྱུར་བ་དེ་བཞིན་ནོ། །དེ་ཉིད་རྒྱས་པར་བཤད་པ་ནི། གསང་སྙིང་ལེའུ་བཅོ་ལྔ་པ་ལྟར་ཤེས་པར་བྱའོ། །གཉིས་པ་རྐྱེན་གྱི་གླེང་བསླང་བ་ལ་གསུམ་སྟེ། བགྲང་། དང་པོ་ངོ་བོ་དང་། དྲང་། གོང་གི་གླེང་གཞི་དེ་རྣམས་ཀྱི་རྗེས་སུ་རྐྱེན་གྱིས་གླེང་བསླང་བ་ལ་གསུམ་སྟེ་ཐུན་མོང་མ་ཡིན་པའི་གླེང་བསླང་བ་དང་། ཐུན་མོང་གི་གླེང་བསླང་བ་དང་། གླེང་ལང་བའོ། །དང་པོ་ནི། གོང་དུ་བཤད་པ་ལྟར་ཐབས་ལམ་གྱི་གླེང་གཞི་ཚོགས་ནས་འབྲས་བུ་རང་བཞིན་གསང་བའི་སྙིང་པོ་འདི་ཉིད་ཤིན་ཏུ་ཟབ་པས་ན། འཁོར་གྱིས་ཨི་ཡོད་མི་ཤེས་ཏེ་སྟོན་པས་མདུན་བསུས་ཏེ་གནང་བར་ཞལ་གྱིས་བཞེས་ནས་གླེང་བསླང་བ་སྟེ། འབྲས་བུའི་རྒྱུད་འདི་ཉིད་དང་། གཉིས་པ་ནི། དེ་ནས་རང་བཞིན་ལྷན་ཅིག་པའི་འཁོར་གྱིས་གུས་པས་གསང་བ་བཞིས་ཆོད་ཚུལ་ཞུས་ཏེ་གླེང་བསླང་བ་དང་། རྒྱུད་དེའི་ཞོར་ལ་མཚན་ཉིད་ཀྱི་བཀའ་ཕ་རོལ་ཏུ་ཕྱིན་པ་ཡང་། ཆོས་ཟབ་པས་འཁོར་གྱིས་ཨི་ཡོད་མི་ཤེས་པ་སྟོན་པའི་ཐུགས་རྗེས་གནང་བ་དང་། འཁོར་གྱིས་ཤེས་ནས་ཞུས་པ་མདོ་རྒྱུད་གཞན་རྣམས་ལྟ་བུའོ། །གསུམ་པ་ནི། བསྟན་པ་སྣང་བདོ་བའི་བར་སྐབས་དཀྱུས་ལ་ཞུས་པ་དང་། ལན་གྱི་བྱེ་བྲག་སྟེ་གླེང་དུ་ལང་བ་དང་གསུམ་མོ། །གཉིས་པ་ངེས་ཚིག་དང་། དྲང་། སྟོན་པས་གནང་བ་དང་འཁོར་གྱིས་དྲི་བ་གཉིས་ནི། རྒྱུད་དོན་བསྟན་པ་འབྱུང་བའི་རྐྱེན་དུ་གང་དང་གང་གྱུར་པའི་བསྟན་པ་དེ་སྟོན་པ་དེས་གསུང་ལ་མ་རག་པ་ནི་རྐྱེན་གླེང་བསླང་ཞེས་བྱ་བའི་ངེས་པའི་ཚིག་ཀྱང་དེ་ལྟར་དུ་འགྲུབ་ལ། གླེང་བསླང་གི་ངོ་བོ་ཡང་དེ་ཡིན་ནོ། །གནས་སྐབས་ཀྱི་འཁོར་གྱིས་དྲིས་པ་དང་། སྟོན་པས་ལན་གནང་བ་རྣམས་ཀྱང་གླེང་ལང་ཡིན་པར་སྨོས་ཅི་དགོས་ཏེ། སྟོན་འཁོར་གྱི་དྲིས་ལན་བྱེད་བདོ་བ་དེས་ནི་གླེང་ལང་ཞེས་པའི་ངེས་ཚིག་དེ་ངེས་པར་འགྲུབ་པ་ཡིན་ནོ། །གསུམ་པ་དགོས་ཆེད་དོ། །དྲང་། འདི་ལ་འབྲུའི་འདུག་ས་བསྒྱུར། དོན་གྱི་གོ་རིམ་སྡེབ་དགོས་པ་ཡིན་ཏེ། དེ་ཡང་གོང་གི་དང་པོ་ཐུན་མོང་མ་ཡིན་པ་ཐབས་ལམ་སྤྱོད་པའི་གླེང་གཞི་གང་འཚོགས་པའི་ཚེ་ན་ཡང་། སྔོན་བྱུང་གི་རྒྱུད་དོན་སེམས་ལྔ་འབྱུང་བའི་རྐྱེན་བྱེད་ཅིང་བསྟན་པ་འབྱུང་ལ་མ་རག་པ་དེ། སྔོན་བྱུང་ལྷན་ཅིག་པའི་འཁོར་གྱི་དོན་བྱ་བའི་ཕྱིར་དུ། ཐབས་ལམ་གྱི་རྒྱུད་གླེང་གཞི་འཚོགས་ནས་སྟོན་པས་བྱང་སེམས་གནང་བའི་ཐུགས་རྗེས་རྐྱེན་གླེང་བསླང་སྟེ་སྟོན་འཁོར་དགོངས་པ་དབྱེར་མེད་དུ་སངས་རྒྱས་པར་འགྱུར་ཏེ། གསང་སྙིང་ལས། ཨེ་མའོ་རྡོ་རྗེ་ཕུང་པོའི་ཡན་ལག་ནི། །ཞེས་པ་ནས། མཉེས་པར་ཁྱབ་པར་གྱུར་ཏོ། །ཞེས་པའི་བར་གྱི་དོན་ཡིན་ཏེ། རྒྱས་པ་ལས། དཀྱིལ་འཁོར་བཞི་བཅུ་རྩ་ལྔ་དང་། །ཕུན་སུམ་ཚོགས་པ་ལྷུན་གྲུབ་རྣམས། །གསང་དབང་མཆོག་གིས་འབྱིན་པར་བྱེད། །ཅེས་པ་དང་། ཁོག་གཞུང་ལས། ཐུན་མོང་མ་ཡིན་སྟོན་པ་ཉིད། །ཡབ་ཡུམ་ཆགས་བསྐུལ་རོལ་པ་དང་། །དགྱེས་གཏད་འཁོར་ལ་དབང་བསྐུར་བས། །རྒྱུད་དོན་འབྱུང་ཕྱིར་བསླང་ཞེས་བྱ། །ཞེས་གསུངས་སོ། །གཉིས་པ་རྒྱུད་ཁྱད་པར་ཅན་ཤེས་རབ་གྲོལ་ལམ་གྱི་རྒྱུད་གླེང་གཞི་འཚོགས་པ་གང་གི་ཚེ་ན་ཡང་། རྗེས་འཇུག་གི་རྒྱུད་དོན་འབྱུང་བའི་རྐྱེན་བྱེད་ཅིང་བསྟན་པ་འབྱུང་ལ་མ་རག་པ་དེ། གཞན་གོ་ཕྱེ་བའི་འཁོར་གྱི་དོན་བྱ་བའི་ཕྱིར་དུ། གྲོལ་ལམ་གྱི་རྒྱུ་གླེང་གཞི་འཚོགས་ནས་འཁོར་གྱི་ཐུགས་རྗེས་གསང་བ་བཞིས་ཆོད་ཚུལ་གྱི་དྲི་བའི་རྐྱེན་གླེང་བསླང་སྟེ། གདུལ་བྱ་ཐ་དག་གི་དོན་དུ་ལམ་རྐྱེན་ཡི་གེའི་རྒྱུད་ཀྱི་བསྟན་པ་ཐམས་ཅད་འབྱུང་བར་འགྱུར་བའི་གཞི་བྱས་པ་ཡིན་ཏེ། གསང་སྙིང་ལས། ཨེ་མའོ་ཡེ་ནས་གསང་བའི་ཆོས། །ཞེས་པ་ནས། གཞན་དུ་མིན་ལ་ཤིན་ཏུ་གསང་། །ཞེས་པའི་བར་གྱི་དོན་ནོ། །ཁོག་གཞུང་ལས། ཐུན་མོང་གླེང་བསླང་སྟོན་དང་འཁོར། །ཐ་དད་སྣང་ནས་དབང་ཐོབ་འཁོར། །ཉིད་ཀྱི་རྟོགས་ནས་འགྲོ་དོན་དུ། །བཀའ་སྩལ་དོན་གྱི་ཞུས་དང་ལན། །གནང་བར་དོན་གྱི་ཚིག་ཏུ་ཕྱུང་། །སྐུ་གསུང་ཐུགས་ཀྱིས་སྤྲོ་བ་མཛད། །དེ་ཉིད་སྐྱེ་བོ་ཕལ་པའི་དོན། །ངོ་བོ་དོན་བསླང་ཚིག་ཕྱུང་བའོ། །ཞེས་གསུངས་སོ། །གསུམ་པ་བརྗོད་འབྲེལ་དང་། དྲང་། འདི་ལ་སྔོན་གྱི་བཤད་སྲོལ་ལ་དགོས་འབྲེལ་བཞི་ལྟར་གསུངས་པ་ཡོད་ཀྱང་། གཞུང་ཚིག་རང་ལ་དངོས་སུ་བརྟགས་ན། བརྗོད་འབྲེལ་བཞི་བས་མི་གདའ་བས། །དེའི་དབང་དུ་བྱས་ན། དང་པོ་བརྗོད་བྱ་ནི་རང་བཞིན་གསང་བའི་སྙིང་པོའི་གཞི་འབྲས་ཀྱི་རྒྱུད་ཀྱི་དོན་དེ་ཉིད་ཅི་ལྟར་བ་བཞིན་དུ། མཚོན་བྱེད་ལམ་རྐྱེན་ཡི་གེའི་རྒྱུ་རྗོད་པར་བྱེད་པའི་བདག་པོ་སྟོན་པ་རྒྱལ་བ་དྲུག་པས་གསུངས་པའི་རྒྱུད་ཀྱི་དོན་དེ་ཉིད། ལམ་རྐྱེན་ཡི་གེའི་རྒྱུད་དང་ཚིག་ཚོགས་སུ་སྣང་བ་ནི་རྗོད་བྱེད་ཡིན་ཏེ། འདི་ལ་བརྩེགས་སྡེབ་གཅིག་བྱ་སྟེ། དེ་ཡང་གང་ཟག་གཟུ་ལུམས་རས་ཆོད་ཅན་དགག་པར་བྱ་བའི་ཕྱིར་དུ། རྒྱུད་དེ་ཉིད་འཆོལ་ཞིང་འཁྲུགས་ནས་ཡོད་པ་ལ། ལས་འཕྲོ་སྐལ་བ་དང་ལྡན་པ་ལ་བཤད་པའི་ཚེ། དེ་ཉིད་འབྲེལ་པ་རིམ་བཞི་དང་སྦྱར་དགོས་ཏེ། དེ་ཡང་ཐབས་གྲོལ་གྱི་རྒྱུ་གླེང་གཞི་འཚོགས་ནས་རྐྱེན་གླེང་བསླང་བ་ནི་རྒྱུད་དོན་འབྱུང་བའི་ཐབས་ཡིན་པ་དང་། ཐབས་དེ་ལས་རྒྱུད་དོན་འདི་ཉིད་འབྱུང་བ་ནི་ཐབས་དང་ཐབས་བྱུང་འབྲེལ་པ་ཡིན་ལ། དེ་ལྟར་རྒྱུད་དོན་གཏན་ལ་ཕབ་ཅིང་ཉམས་སུ་ལེན་པ་ནི་རྒྱུ། མི་ཟད་རྒྱུན་གྱི་འཁོར་ལོ་ཐོབ་པ་ནི་འབྲས་བུ་སྟེ། དེ་ནི་རྒྱུ་དང་འབྲས་བུའི་འབྲེལ་པའོ། །དེ་ཡང་གླེང་གཞི་ལ་ཐབས་གྲོལ་གཉིས་བྱུང་བ་དེའི་རྗེས་སུ་བརྗོད་འབྲེལ་བཞི་ཡང་ཐབས་གྲོལ་གཉིས་སུ་བཤད་པ་ངེས་པར་འགྲོ་བ་ཡིན་ཏེ། དེ་ཡང་གྲོལ་ལམ་གྱི་གཞི་ནི་གོང་དུ་སོང་ལ། ཐབས་ལམ་གྱི་བརྗོད་འབྲེལ་བཞི་ནི། གསང་བ་རྡོ་རྗེའི་རྩེ་མོར་བྱང་སེམས་ཐིག་ལེ་ཆེན་པོ་དབབ་བཟུང་གི་ཐབས་དང་བཅས་པ་ནི་བརྗོད་བྱེད། ཐིག་ལེ་དགའ་བ་བཅུ་དྲུག་གི་བདེ་བའི་ཡེ་ཤེས་ནི་བརྗོད་བྱ། བདེ་བ་མྱོང་བར་བྱེད་པའི་ཐིག་ལེ་རླུང་དང་བཅས་པ་ནི་ཐབས། དེས་རང་བཞིན་གསང་བའི་སྙིང་པོ་བདེ་བའི་ཡེ་ཤེས་མྱོང་བ་ནི་ཐབས་བྱུང་། ཐིག་ལེ་བཞི་བཅུ་རྩ་གཉིས་ནི་རྒྱུ། ཡེ་ཤེས་བཞི་བཅུ་རྩ་གཉིས་ནི་འབྲས་བུའོ། །དེ་ཡང་རྒྱུད་འཆོལ་ཞིང་འཁྲུགས་ནས་ཡོད་པ་ལ་རྒོལ་བ་བྱུང་ན་ལན་དེ་ལྟར་དུ་འདེབས་པ་ཡིན་ཏེ། ཁོག་གཞུངས་ལས། རྒོལ་བ་པོ་དག་ཚར་གཅོད་ཕྱིར། །ཅེས་པ་དང་། ཡང་། རྒྱུད་ལ་ལྡན་ཕྱིར་རྒོལ་བ་བཟློག །ཅེས་གསུངས་པའི་ཕྱིར་རོ། །བཞི་པ་འདྲེན་པའི་ཚིག་གི་དཔེ་ལ་གསུམ་སྟེ། བགྲང་། དང་པོ་བསྟན་པ་དང་། དྲང་། ཏནྟྲ་སྟེ་རྒྱུད་གསང་བའི་སྙིང་པོའི་དབུ་ནས་ཞབས་ཀྱི་ལེའུའི་གྲངས་རྣམས་ཀྱི་བཤད་ཐབས་མདོར་བསྡུས་པའི་སྒོ་ནས་དམིགས་ངོས་བཟུང་ན། དཔེར་ན་མེ་ལོང་ལ་གཟུགས་བརྙན་གསལ་བ་ལྟར་བཤད་ཐབས་འདྲེན་པའི་ཚིག་བཅུ་པོ་ཡི་རྒྱུད་ཀྱི་དོན་མཚོན་ནུས་པས་ན་བཤད་ཐབས་བཅུ་པོ་དང་སྦྱར་བ་ནི་འདི་ལྟ་སྟེ། གཉིས་པ་རྒྱས་པར་བཤད་པ་དང་། དྲང་། བཅུ་པོ་དེ་གང་ཞེ་ན། སྤྱི་དོན་སྡུད་པའི་ཚིག་སེང་གེ་མཆོངས་པ་ལྟར་བཤད་པ་དང་། རྣམ་པར་དབྱེ་བའི་ཚིག་སྟག་གི་མཆོངས་པ་ལྟར། རང་བཞིན་ལྟ་བའི་ཚིག་ཁྱུང་ནམ་མཁའ་ལ་ལྡིང་བ། རང་རྐྱེན་གཉེར་བའི་ཚིག་རུས་སྦལ་གནུར་འགྲོས་ཚད་མ་བཀའ་གཞུང་གི་ཚིག་དུས་ཀྱི་འབྲུག་སྒྲ། གཏར་ཁ་གེགས་སེལ་གྱི་ཚིག་གླག་མོ་གཟན་ལ་འཛུམ་པ། ལྡེམ་དགོངས་མན་ངག་གི་ཚིག་གནའ་ཕྲུག་བྲག་ལ་འཛེག་པ། འབྲེལ་མཚམས་སྦྱར་བའི་ཚིག་བྱ་ངང་མོའི་འགྲོས། མཚོན་པ་དཔེའི་ཚིག་མེ་ལོང་གཡའ་དག་པ། བསྣོལ་མཚམས་འཕེན་སྡུད་ཀྱི་ཚིག་སེང་གེའི་ཕྲུ་གུ་རྩལ་སྦྱངས་པ་ལྟར་དུ་བཤད་པ་དང་བཅུ་ཡིས་ཚིག་ཐོག་ཏུ་རྒྱུད་དོན་འདྲེན་པར་བཤད་པར་གྱིས་ལ། བཤད་ཐབས་བསྡུས་པ་བཅུ་པོ་དེ་དག་ལའང་། རྒྱུད་དོན་གྱི་བྱེ་བྲག་མི་འདྲ་བས་ཕྱེ་བས་ལེའུ་རིམ་པ་བཞིན་དུ་བདག་པོ་རང་རང་གཙོ་གང་དང་གང་ཆེ་བ་མ་གཏོགས་པ་བཅུ་པོ་གཞན་རྣམས་དགོས་པའི་ངེས་པ་མེད་དེ། དེའང་ལྟ་བ་མི་སྟོན་ན་རང་བཞིན་ལྟ་བའི་ཚིག་མི་དགོས་པ་དང་འདྲའོ། །འབྲེལ་མཚམས་སྦྱར་བ། རང་རྐྱེན་གཉེར་བ། རྣམ་པར་དབྱེ་བ་སྤྱི་འགྲོ་གསུམ་ནི་ལེའུ་ཀུན་ལ་ཤེས་པར་འགྱུར་བ་ཡིན་ནོ། །བཅུའི་དང་པོ་ནི། སེང་གེ་མཆོངས་པའི་ཆོས་གཅིག་གི་ཁ་འོག་ཏུ་ཚིགས་དུ་མ་ཆུད་པ་ལྟར་དུ། སྤྱི་དོན་སྡུད་པའི་ཚིག་གིས་རྣམ་གྲངས་ཀྱི་ཚིག་མང་པོ་ཡང་ལམ་དོན་གྱི་ངོ་བོ་གཅིག་ཏུ་ཁོག་དབུབ་ནས་སྡུད་པར་བྱེད་དོ། །གཉིས་པ་ནི་བྱཱ་ཀྲི་སྟེ་སྟག་མོ་མཆོངས་པའི་ཚེ་སེང་གེ་མཆོངས་པ་དེ་བཞིན་དུ་བགྲོད་པར་བྱ་བའི་ས་ཚིག་དུམ་བུར་བཅད་ནས་མཆོངས་པ་བཞིན་དུ། རྣམ་པར་དབྱེ་བའི་ཚིག་གིས་ཏནྟྲ་སྟེ་རྒྱུད་གསང་བའི་སྙིང་པོའི་ཚིག་དང་དོན་གྱི་དམིགས་སོ་སོར་ཕྱེ་བའི་ཐབས་སུ་ས་གཅོད་ནས་མིང་འདོགས་གསལ་བར་བསྟན་པའོ། །གསུམ་པ་ནི། ཀ་ལ་པིངྐ་སྟེ་བྱ་ཁྱུང་ལྡིང་བའི་དུས་སུ་ཆོས་བཞི་པོས་མཚོན་ཏེ། བཞི་གང་ཞེ་ན། མིག་གོང་འོག་ཏུ་མི་ལྟ་བ་དང་། གཤོག་པ་རློབ་པའི་རྩོལ་བ་མེད་པ་དང་། ངམ་འགྲོག་དང་གཡང་ཟ་ལ་ཉམ་མི་ང་བ་དང་། བྱ་ལམ་ལ་རྗེས་མེད་པ་བཞིན་དུ། རང་བཞིན་ལྟ་བའི་ཚིག་གིས་རྣལ་འབྱོར་སྤྱན་གྱི་འཕང་གཅོད་པའི་ཐེག་པ་ཐམས་ཅད་ལྟ་བའི་འོག་ཏུ་ཚུད་པ། ལམ་བགྲོད་པའི་རྩོལ་བ་མེད་པ། སྲིད་ཞི་ལ་ཉམ་ང་མེད་པ། བལྟ་བྱ་ལྟ་བྱེད་ཀྱི་སྤྱོད་ཡུལ་མེད་དོ། །བཞི་པ་ནི། རུས་སྦལ་འགྲོས་ཀྱི་ཆོས་གཉིས་ཡོད་དེ། གཉིས་པོ་གང་ཞེ་ན། གཡོ་འགུལ་མི་མངོན་པར་ཤུགས་ཀྱིས་འགྲོ་ཞིང་ས་སྟོང་མི་ལུས་པར་ཁྱབ་པ་བཞིན་དུ། རང་རྐྱེན་གཉེར་བའི་ཚིག་གིས་འབྲུ་སྟོང་མི་བཞག་པར་ཚིག་ལ་དོན་གྱི་གཟེར་བུས་གདབ་ཅིང་དོན་བརྡའ་སྤྲོད་པར་བྱེད་ཅིང་གཞུང་དོན་མཐར་ཕྱིན་པར་བྱེད་དོ། །ལྔ་པ་ནི། དུས་མིན་པར་མི་འབྱུང་དབྱར་གྱི་དུས་སུ་འབྲུག་སྒྲ་དང་ཆར་པ་འབྱུང་སྟེ། དེ་བྱུང་བ་དང་སྐྱེ་བོ་རྣམས་ཀྱིས་དེ་རིང་ནས་དབྱར་དགུན་གྱི་ཤན་ཕྲག་བྱེའོ་ཞེས་དུས་ཚོད་ཀྱི་སྤྲོས་པ་ཆོད་པའི་ཆོས་གསུམ་པ་དེས་ཡིད་ཆེས་པ་བཞིན་དུ་ཚད་མ་བཀའ་གཞུག་གི་ཚིག་གིས་གསང་སྔགས་བླ་མེད་ཀྱི་དོན་གཏན་ལ་དབབ་པར་བྱེད་པ་ཡི་ཚད་མ་ལ་དག་པ་གསུམ། མཉམ་པ་བཞི། རྟོགས་པ་བཞི་དང་གསུམ་གྱི་དོན་རང་རང་གི་སྐབས་དང་སྦྱར་ཅེས་པའམ། ཡང་ན་ཚད་མ་བཀའ་གཞུང་གི་ཚིག་གིས་བཀའ་ལུང་མན་ངག་རིགས་པ་ཡི་ཚད་མ་གསུམ་གྱི་སྐབས་དང་སྦྱར་ནས། བདེན་གསུམ་དབྱེར་མེད་ཀྱི་དོན་ལ་སྒྲོ་འདོགས་ཆོད་ནས་གྲུབ་མཐའ་མངོན་སུམ་དུ་སྣང་བ་ནི། ཐེག་འོག་གི་སྐབས་སུ་མི་འབྱུང་རང་གཞུང་གི་སྐབས་སུ་འབྱུང་། དེས་ཐེ་ཚོམ་ཆོད་ནས་ཡིད་ཆེས་པའོ། །དྲུག་པ་ནི། གླག་གི་གཟན་ལ་ཞུགས་པའི་ཚེ་མཆུ་སྡེར་གྱིས་ཕྱིའི་ཤ་དང་པགས་པ་ལ་མི་ལྟ་ནས་ནང་གི་དོན་སྙིང་འབྱིན་པར་བྱེད་པའི་ཆོས་གཉིས་དང་ལྡན་པ་ལྟར་དུ། གཏར་ཁ་གེགས་སེལ་གྱི་ཚིག་གིས་ཚིག་དང་བློ་ལ་མི་ལྟ་ནས་གྲུབ་མཐའི་དོན་གྱི་དམིགས་ངོས་བཟུང་ནས་དོན་གང་མི་གསལ་བའི་གེགས་རྣམས་བསལ་ལོ། །བདུན་པ་ནི་གནའ་བའི་ཕྲུ་གུ་བྲག་རི་ཉི་མ་ཤར་བ་ཐམས་ཅད་ལ་འཛེག་པའི་ཚེ་རི་དྭགས་གཞན་ལ་མི་འཚམ་ཡང་། གནའ་ཕྲུག་རང་ལ་འཚམས་པའི་ཆོས་གཉིས་དང་ལྡན་པ་ལྟར། དེ་ཡང་ལྡེམ་དགོངས་མན་ངག་གི་ཚིག་གིས་གསང་བ་བླ་མེད་ཀྱི་དོན་རྣམས་དགོངས་པ་བཞི་དང་། ལྡེམ་པོ་བཞི་དང་བརྒྱད་ཀྱི་དོན་དང་སྦྱར་བ་ནི་འདི་ལྟ་སྟེ། དེ་ལ་དང་པོ་དགོངས་པ་བཞི་ནི། མཉམ་པ་ཉིད་ལ་དགོངས་པ་དང་། དུས་གཞན་ལ་དང་། དོན་གཞན་ལ་དང་། གང་ཟག་གི་བསམ་པ་ལ་དགོངས་པའོ། །ཐེག་པ་འོག་མ་པ་རྒྱུ་འབྲས་སྔ་ཕྱི་ཐ་དད་དུ་ཞེན་པ་རྣམས་ཀྱིས་སངས་རྒྱས་དང་སེམས་ཅན་བཟང་ངན་ཐ་དད་དུ་འཛིན་པའི་ཞེན་པ་དགྲོལ་བའི་ཕྱིར་དུ། ཆོས་ཉིད་མཉམ་པ་ཉིད་ལ་དགོངས་ཏེ་བཟང་ངན་མེད་པར་སྟོན་པའོ། །དེ་ཡང་སྒྱུ་འཕྲུལ་འགྲེལ་བཤད་ལས། གདུལ་བྱ་བཞི་དང་ཐེག་པ་བཞི་པོ་རྣམས། །བཟང་ངན་འཛིན་པ་གསང་སྒོར་དྲང་བའི་ཕྱིར། །ཐམས་ཅད་མཉམ་པའི་དོན་ལ་རབ་དགོངས་ཏེ། །ཐམས་ཅད་བཟང་ངན་བླང་དོར་མེད་པར་བསྟན། །ཅེས་སོ། །གཉིས་པ་ནི། དུས་ཡུན་རིང་པོ་དང་བྱང་ཆུབ་ཀྱི་སྤྱོད་པ་རྒྱ་ཆེན་པོས་སྒྱིད་ལུག་པ་དག་ལ། སྔགས་ལ་མོས་པ་ཙམ་གྱིས་ཀྱང་འབྲས་བུ་འགྲུབ་ལ། དུས་ཀྱང་ཡི་དམ་གྱི་ལྷ་དྲན་པ་ཙམ་གྱིས་ཀྱང་ཚེ་འདི་ཉིད་ལ་འགྲུབ་པར་བསྟན་ཏེ། དེ་ཉིད་ལས་དུས་དང་ལས་ཀྱི་སྒྱིད་ལུག་གདུལ་བྱ་རྣམས། སྤྲོས་པ་བསྐྱེད་ཅིང་འབྲས་བུར་དྲང་བའི་ཕྱིར། །བརྒྱུད་ནས་འགྲུབ་པའི་དོན་ལ་དགོངས་པ་དང་། །གསང་བ་མོས་པ་ཙམ་གྱིས་འགྲུབ་པར་བསྟན། །ཅེས་སོ། །དེ་ཡང་གསང་སྙིང་ལེའུ་བཅུ་གསུམ་པ་ལས། གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ན་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡི། །ཉེ་བའི་སྲས་སུ་དགོངས་པར་འགྱུར། །ཞེས་པ་དང་། ཡང་དེ་ཉིད་ཀྱི་དགུ་པ་ལས། མ་ཉམས་འཇུག་ལ་རབ་བརྩོན་ན། །ཞག་ནི་སུམ་ཅུ་ཕྲག་དྲུག་ནམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པར་འགྲུབ། །ཅེས་གསུངས་པས་བསྟན་ནོ། །གསུམ་པ་ནི། བརྩོན་འགྲུས་དྲག་པོའི་སྒོ་ནས་ཡུན་རིང་པོར་ཐོས་བསམ་སྒོམ་པའི་ཤེས་རབ་གསུམ་ལ་བློ་སྦྱངས་མ་བྱས་པར། ཁ་འབྱམས་ཚིག་གི་ལྟ་བ་དང་། ཤེས་བྱ་འགའ་ཞིག་ཤེས་པའི་ཡོན་ཏན་སྣ་རེ་ཁོང་དུ་ཆུད་པའི་ཡོན་ཏན་རློམས་སེམས་དང་། ང་རྒྱལ་བྱེད་པ་དག་གིས་བདེན་པ་མ་མཐོང་བ་དང་། འབྲས་བུ་མ་ཐོབ་པ་ལ་དགོངས་ནས། དེ་དག་གསང་སྔགས་ནང་པའི་ཐེག་པ་ལ་དྲང་ཞིང་དོན་རྟོགས་པ་ལ་བསྐུལ་བའི་ཕྱིར། བྱང་སེམས་གཉིས་ནི་བསྐལ་པ་གྲངས་མེད་པར་སྦྱངས་ཤིང་། སངས་རྒྱས་མང་པོ་ལ་བསྙེན་བསྐུར་བྱས་ཤིང་སྦྱངས་པ་འགའ་ཞིག་གིས་འགྲུབ་པར་བསྟན་པ་རྣམས་ཡིན་ཏེ། འགྲེལ་བཤད་ལས། ཤེས་བྱ་འགའ་ལ་རློམས་སེམས་བྱེད་པ་དག །ཞེན་པ་བསལ་ཞིང་ཐེག་ཆེན་སྒོར་དྲང་ཕྱིར། །བདེན་པ་མ་མཐོང་འབྲས་བུ་མ་ཐོབ་པར། །དགོངས་ནས་བསྐལ་པར་སྦྱངས་པ་ཙམ་ལས་འགྲུབ། །ཅེས་སོ། །བཞི་པ་ནི། གང་ཟག་འགའ་ཞིག་གིས་ཡི་དམ་སྣ་འགས་འབྲས་བུ་ཐོབ་པར་འདོད་པ་དག་ལ། བརྗོད་པའི་དགེ་བ་དེ་གཅིག་པུས་འབྲས་བུ་མི་འགྲུབ་པར། དགེ་བའི་ཕྱོགས་གཞན་ཐམས་ཅད་ཚང་བར་བསྒྲུབས་ན་ཡོན་ཏན་རྒྱ་ཆེན་པོ་ཐོབ་པར་བརྗོད་དེ། དེ་ལ་དྲང་བ་དང་། ཁ་ཅིག་མོས་པའི་བློ་བཞིན་དུ་འཚམས་པར་བསྟན་པ་སྟེ། དེ་ཉིད་ལས། ཆོས་འགས་ཆོག་པར་འཛིན་པའི་གང་ཟག་རྣམས། །ཐེག་ཆེན་བརྗོད་པ་རྒྱ་ཆེན་བསྐུལ་བའི་ཕྱིར། །བསྒྲུབ་པའི་ཡན་ལག་ཚང་བར་སྤྱོད་ན་འགྲུབ། །རྒྱ་ཆེན་སྤྱོད་དང་མོས་དང་འཚམས་པར་བསྟན། །ཅེས་སོ། །གཉིས་པ་ལྡེམ་པོ་ལ་བཞི་སྟེ། གཞུགས་པ་ལ་ལྡེམ་པ་དང་། མཚན་ཉིད་ལ་དང་། གཉེན་པོ་ལ་དང་། བསྒྱུར་བ་ལྡེམ་པའོ། །དང་པོ་ནི། ཐེག་འོག་གི་གདུལ་བྱ་རྣམས་གསང་སྔགས་ཀྱི་དོན་ལ་སྐྲག་པ་དང་། རང་གི་གཞུག་ལ་སྤྱོད་ཀྱང་དོན་མི་འགྲུབ་པས་ཚི་ཆད་པའི་རྩོལ་བ་དང་། དེ་ལ་མངོན་པར་ཞེན་པ་དང་། ཅི་ལའང་མི་འཇུག་པ་དག་དྲང་བའི་ཕྱིར། ལྟ་བ་དང་སྤྱོད་པ་མཐུན་པར་བསྟན་ཏེ། དེ་ཉིད་ལས། སྐྲག་ཅིང་བསྔངས་ལ་ཚི་ཆད་ཚོལ། །མངོན་ཞེན་ཅི་ལའང་མི་འཇུག་རྣམས། །ངེས་པའི་དོན་ལ་གཞུག་པའི་ཕྱིར། །ལྟ་སྤྱོད་མཐུན་བསྟན་འདི་རུ་བཞུགས། །ཞེས་སོ། །དེ་ནི་གསང་སྙིང་ལེའུ་ཐ་མ་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་པས་བསྟན་ནོ། །གཉིས་པ་ནི། གདུལ་བྱ་བློ་གང་ལ་མོས་པ་ལྟར་དྲང་བའི་ཕྱིར་ཀུན་བརྟགས་ཀྱི་འཁྲུལ་སྣང་ཐམས་ཅད་མེད་པ་དང་། གཞན་དབང་གི་རྒྱུ་རྐྱེན་རྟེན་འབྲེལ་ཙམ་ཡོད་པ་དང་། འགྱུར་བ་མེད་པའི་ཡོངས་གྲུབ་སོགས་རྟག་པར་འདོད་པ་སྟོན་པའོ། །དེ་ཡང་འགྲེལ་བཤད་ལས། གང་ལ་མོས་པའི་གདུལ་བྱ་དག །མཚན་ཉིད་གསུམ་གྱི་མཐུན་དྲང་ཕྱིར། །མེད་པ་ཀུན་བརྟགས་མེད་པར་བསྟན། །ཡོད་འདོད་གཞན་དབང་མི་འགོག་ཅིང་། །རྟག་ལ་ཡོངས་སུ་གྲུབ་པར་བསྟན། །ཅེས་སོ། །དེའང་ལེའུ་གཉིས་པ་ལས། སྐྱེ་བ་མེད་ལས་ཐམས་ཅད་སྐྱེས། །ཞེས་སོགས་ཀྱིས་སྟོན་ནོ། །གསུམ་པ་ནི། སེམས་ཅན་འགའ་ཞིག་གིས་རང་རང་གི་གཟུགས་དང་། ཆོས་དང་། ལོངས་སྤྱོད་དང་། རིགས་ཀྱིས་དྲེགས་པ་ལ། མིའི་ཡོན་ཏན་ཆུང་ངུ་དེ་དག་གི་གཉེན་པོར། སངས་རྒྱས་ལོངས་སྐུའི་ཡོན་ཏན་རྒྱ་ཆེན་པོ་བཤད་པ་དེས་ང་རྒྱལ་ཞི་བར་བྱ་སྟེ། འགྲེལ་བཤད་ལས། ཡོན་ཏན་ཕྱོགས་ཀྱིས་དྲེགས་པ་དག །ཟིལ་གྱིས་མནན་པ་དྲང་བའི་ཕྱིར། །གཉེན་པོར་གྱུར་པའི་ཡོན་ཏན་རྣམས། །བརྗོད་བྱ་ཞི་བྱ་གསང་སྒོར་བྱ། །ཞེས་སོ། །དེའང་ལེའུ་གསུམ་པའི་སྟོད་བསྟན་པ་འབྱུང་བ་སྤྱིའི་གླེང་གཞི་དང་། བཅུ་གསུམ་པའི་རྒྱུད་ཀྱི་ཡོན་ཏན་དང་། བཅུ་བཞི་པ་གླུ་དྲུག་གི་ཡོན་ཏན་རྣམས་ཀྱིས་སྟོན་ནོ། །བཞི་པ་ནི། གསང་སྔགས་ལ་བློ་མ་མོས་པའི་གང་ཟག་ཁ་ཅིག་བརྟུལ་ཞུགས་ཀྱི་སྤྱོད་པ་ལ་དགའ་བ་རྣམས། དེ་དག་སྔགས་ལ་གཞུག་ཅིང་འབྲས་བུ་ཐོབ་པའི་ཐབས་ཀྱིས་འདུ་ཤེས་བསྒྱུར་བ་སྟེ། ལྟ་སྒོམ་རླང་པོའི་ཚིག་དང་། སྦྱོར་སྒྲོལ་ལ་སོགས་པའི་སྤྱོད་པ་རང་ཁ་མ་དེ་ཉིད་ཀྱིས་གྲོལ་བའི་ཐབས་ཡོད་པ་སྐད་ཀྱི་ཚིག་སྟོན་པ་ཡིན་ཏེ། འགྲེལ་བཤད་ལས། འདུ་ཤེས་ལོག་པས་ལོག་པ་རྣམས། །སྦས་པའི་ཐབས་ཀྱིས་འདུལ་བའི་ཕྱིར། །བརྡ་དང་གཅུས་ཚིག་སྣ་ཚོགས་ཀྱིས། །ཟབ་མོའི་དོན་ལ་གཟུད་པར་བྱ། །ཞེས་སོ། །དེ་ལྟར་སྔགས་ནང་གི་ལྡེམ་དགོངས་ཟབ་མོའི་དོན་རྣམས། ཡོ་ག་མན་ཆད་ཀྱི་གདུལ་བྱ་བློ་དམན་ལ་མི་འཚམས་ཀྱང་། བླ་མེད་རང་གི་གདུལ་བྱ་བློ་མཆོག་ལ་འཚམས་པའོ། །བརྒྱད་པ་ནི། བྱ་ངང་མོ་ལ་ས་ལ་འགྲོ་བའི་ཚེ་སྔ་རྗེས་དང་ཕྱི་རྗེས་དང་འབྲེལ་བའི་ཆོས་རྣམ་པ་གཉིས་དང་ལྡན་པ་ལྟར་དུ། འབྲེལ་མཚམས་སྦྱོར་བའི་ཚིག་གིས་གཞན་སློབ་མའི་དོན་བྱེད་པའི་ཚེ་བྱ་ངང་མོ་འགྲོས་པའི་ཆོས་གཉིས་ལྟར། ལེའུ་གོང་འོག་གི་མཚམས་སྦྲེལ་བ་ནི་འཁྲུགས་ཡོད་ན་འཁྲུགས་ལྟར་སྦྲེལ། འཁྲུགས་མེད་ན་གཞུང་ལྟར་ཚིག་དོན་སྦྲེལ་ནས་དྲང་པོར་བཤད་དོ། །དགུ་པ་ནི། མེ་ལོང་གི་ཆོས་ལ་གཟུགས་བརྙན་འཆར་བས་བཞིན་གྱི་སྐྱོན་ངོས་ཟིན་པ་ལྟར་མཚོན་པའི་དཔེ་གཏན་ཚིགས་ཀྱིས། གཞི་ལམ་འབྲས་བུའི་དོན་ཀུན་དང་། ལམ་ལ་རྒྱུད་དོན་དངོས་པོ་བཅུ་ལ་སོགས་པ་རྣམས་གཏན་ལ་ཕབ་པར་བྱེད་པ་ལ། ཡོད་པའི་དང་། མེད་པའི་དང་། མཐུན་པའི་དང་། མི་མཐུན་པའི་དང་། དོན་དཔེར་བླང་བའི་དང་། དོན་གྱི་ཕྱོགས་གཅིག་དཔེར་བླང་བའི་དང་། ཤིན་ཏུ་ལྐོག་གྱུར་གྱི་དཔེ་དང་བདུན་པོ་དེ་རྣམས་ཀྱིས་གང་ལ་གང་འོས་སུ་སྦྱོར་ནས། དཔེ་གཏན་ཚིགས་ཀྱིས་མཚོན་པའི་ཐོག་ཏུ་དོན་དེ་གཏན་ལ་དབབ་ནས་མི་གསལ་བ་གསལ་བར་བྱེད་དོ། །བཅུ་པ་ནི། མི་འཇིགས་པ་སེང་གེའི་ཕྲུ་གུས་རྩལ་སྦྱངས་པའི་ཚེ། ཕའི་ཡར་མར་ཕར་ཚུར་ལ་མཆོངས་ནས་དྲང་པོར་འགྲོ་བ་ལྟར་དུ། བསྣོལ་མཚམས་འཕེན་སྡུད་ཀྱི་ཚིགས་གིས་འབྲུ་དང་ཚིག་གི་འདུག་ས་བསྒྱུར། དོན་གྱི་འཁྲུགས་རྣམས་གོ་རིམ་བསྡེབས་ནས་རྒྱུད་ཀྱི་དོན་ཕྱི་ཅི་མ་ལོག་པར་སྟོན་དེ་བཤད་པའོ། །གསུམ་པ་དགོས་ཆེད་ཀྱི་མཇུག་བསྡུ་བའོ། །དྲང་། རྒྱུད་ཀྱི་ཚིག་གིས་མཚོན་པར་བྱས་ནས་ཐབས་གྲོལ་གཉིས་ཀྱི་དོན་དེ་མངོན་སུམ་དུ་སྣང་བར་བྱེད་དོ། །ལྔ་པ་རྒྱུད་གདམས་ཤིང་གཏད་པའོ། །དྲང་། རྒྱུད་གདམས་ཤིང་གཏད་པ་ལ་བཞི་སྟེ། སྟོན་པ་གང་གིས་གཏད། འཁོར་གང་ཞིག་ལ་གཏད། གདམས་ཤིང་གཏད་པའི་ངོ་བོ་བསྟན་པ་གང་ཡིན་པ་དེ་དགོས་ཆེད་ཅི་ཡི་ཕྱིར་གཏད་ཅེ་ན། དེ་ལ་སྟོན་པ་ནི་རྒྱལ་བ་དྲུག་པ་ཀུན་ཏུ་བཟང་པོ་དེས། འཁོར་ནི་རྒྱལ་སྲས་སྡུད་པ་པོ་མཛད་པའི་ཕྱག་ན་རྡོ་རྗེ་ལྷན་ཅིག་པའི་འཁོར་ལ་གཏད་དེ། གསང་སྙིང་ལས། དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་སོ། །གོ་ཕྱེ་བའི་འཁོར་མ་འོངས་པའི་གང་ཟག་ཆོས་ཀྱི་མིག་ཅན་ལ་གཏད། དེ་ཉིད་ལས། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །དེ་ནི་ངེས་པར་ལུང་བསྟན་ཏེ། །སྲས་ནི་ཐུགས་ལས་སྐྱེས་པ་ཡིན། །ས་རབ་རིག་པ་འཛིན་ལ་གནས། །ཞེས་པ་དང་། སྒྱུ་འཕྲུལ་རྡོ་རྗེ་ལས། རང་རིག་ཡེ་ཤེས་རྒྱུད་དོན་ཕྱིར། །རང་སྣང་རིག་པ་མངོན་བྱས་པས། །རིག་འཛིན་མཆོག་དེ་ལྷུན་གྲུབ་པའོ། །ཏིང་འཛིན་ནུས་པའི་མཐུ་མེད་ཀྱང་། །ས་སྦྱངས་སེམས་དཔའ་བསྐྱེད་དུ་མེད། །བདེར་གཤེགས་ཉིད་དང་སྤྱོད་ཡུལ་གཅིག །རིག་པའི་སྐྱེས་བུ་ལུང་ཐོབ་པའོ། །ཞེས་པ་དང་། རྔམས་གློག་ལས། དེ་ལྟ་བུ་ཡི་རང་བཞིན་དེ། །གཞན་ལ་མ་བརྟན་མི་འགལ་བར། །མངོན་སུམ་རིག་པ་ཐག་ཆོད་ན། །རྣལ་འབྱོར་པ་ལ་སློབ་པ་ཡིན། །ཅེས་པ་དང་། དགོངས་འདུས་ལས། རྣམ་དག་ལམ་ཆེན་ཀུན་སྒྲོལ་འདིར། །སྐལ་ལྡན་གང་ཞིག་སུ་ཞུགས་པ། །ནོར་བུ་རིན་ཆེན་འོད་འབར་བ། །ངེས་པར་འཆར་གྱི་བརྩོན་པར་གྱིས། །དེ་ཉིད་སེམས་ཀྱི་མེ་ལོང་དེ། །མངོན་སུམ་གསལ་བར་རྟོགས་མ་ཐག །འགྲོ་བའི་ལུས་ལ་སངས་རྒྱས་ཡིན། །ཅེས་གསུངས་སོ། །སོགས་ཀྱི་སྒྲས་མ་མོ་དང་མཁའ་འགྲོ་དང་། ཚངས་པ་བརྒྱ་བྱིན་ཕྱོགས་སྐྱོང་ལ་སོགས་ཏེ། སྒྱུ་འཕྲུལ་རྒྱས་པའི་ལེའུ་ཞེ་དགུ་པ་ལས། གསང་བའི་སྙིང་པོ་ངེས་པ་འདི། །གསང་སྔགས་ཀུན་གྱི་རྒྱལ་བ་ཡིན། །ཐབས་ཆེན་མཚོན་པའི་ཤེས་རབ་ཡིན། །སྒྱུ་འཕྲུལ་དྲྭ་བའི་སྙིང་པོ་དང་། །གསང་བའི་རྒྱུད་ཆེན་མང་པོ་རྣམས། །ང་ཡི་ཐུགས་ལས་སྤྲུལ་པ་རྣམས། །ཚངས་པ་དང་ནི་བརྒྱ་བྱིན་དང་། །དབང་ཕྱུག་ཆེན་པོ་ལ་སོགས་པ། །དེད་དཔོན་འཕྲོག་མའི་བུ་རྣམས་དང་། །ལུས་དང་བ་གླང་སྤྱོད་པ་དང་། །སྒྲ་མི་སྙན་དང་འཛམ་གླིང་དུ། །ང་ཡི་ཐུགས་ཀྱི་སྙིང་པོ་འདི། །ཕྱོགས་བཅུ་ཀུན་ཏུ་འཕེལ་བ་དང་། །དེ་ཡི་གཟུགས་ལ་གཏད་པ་ནི། །ཡིད་བཞིན་མཛོད་འབྱོར་བཀའ་ཡི་གནས། །བསྟན་པ་འཛིན་པར་ནུས་པ་ལ། །གསང་བའི་སྙིང་པོ་ཤིན་ཏུ་གཏད། །ཅེས་སོ། །གདམ་ཤིང་གཏད་པའི་ངོ་བོ་ལ་གཉིས་ལས། གདམས་པའི་ངོ་བོ་ནི། རང་བཞིན་གསང་བའི་སྙིང་པོ་ནི་རྩོལ་སྒྲུབ་རིལ་དང་བྲལ་བར་གདམས་པའོ། །དེའང་གསང་སྙིང་ལས། ཀྱེ་ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་སོ། །གཏད་པའི་ངོ་བོ་ནི། ལམ་རྐྱེན་ཡི་གེའི་རྒྱུད་རྣམས་གསུངས་པའོ། །དགོས་ཆེད་ཅིའི་ཕྱིར་ན། བསྟན་པ་མི་ནུབ་པར་བྱ་བའི་ཕྱིར་སྡུད་པ་པོ་ལ་གཏད། བསྟན་པ་དར་ཞིང་རྒྱས་པར་བྱ་བའི་ཕྱིར་གང་ཟག་ཆོས་ཀྱི་མིག་ཅན་ལ་གཏད། བསྟན་པ་བསྲུང་ཞིང་ཐམས་ཅད་དུ་འཕེལ་བར་བྱ་བའི་ཕྱིར་མ་དང་། མཁའ་འགྲོ་ལ་སོགས་ལ་གཏད་པའོ། །གསུམ་པ་ལམ་དང་འབྲས་བུའི་ཆོས་རྣམས་རང་གི་སྐབས་སུ་འབྱུང་བས་འདིར་མ་བསྟན་པའི་འཐད་པའོ། །དྲང་། ཤེས་པར་བྱ་བའི་ཡུལ་ལྔ་པོ་དེ་ཉིད་རྒྱུད་གསང་སྙིང་གི་ཤེས་བྱའི་ཡན་ལག་ཡིན་ཏེ། དེ་ཉིད་བསྒོམ་པར་བྱ་བའི་ཐབས་མིན་ནོ། །འོ་ན་ཉམས་ལེན་སྒོམ་ཐབས་དང་འབྲས་བུ་གར་བཤད་ཅེ་ན། ཤེས་བྱ་ལྔ་པོ་དེ་ཡི་ཕྱི་མ་ཐུན་མོང་དང་མཆོག་གི་ལམ་ཐབས་གྲོལ་གྱི་སྐབས་དང་འབྲས་བུའི་སྐབས་སུ་ཤེས་དགོས་མོད། དེ་ཡང་ལམ་བསྒྲུབ་པ་དང་། འབྲས་བུ་ཐོབ་པ་གཉིས་ནི་འོག་ཏུ་འཆད་དེ། རང་རང་གི་སྐབས་སུ་རྒྱས་པར་འབྱུང་བ་དེ་བས་ན་འདིར་ཤེས་བྱ་ཡུལ་ལྔའི་སྐབས་སུ་བསྒོམ་བྱ་བཤད་པ་མ་ཡིན་ཏེ་མ་དགོས་པའི་ཕྱིར་རོ། །གཉིས་པ་བར་དུ་ཐུན་མོང་དང་མཆོག་གི་ལམ་བགྲོད་ཚུལ་གཉིས་ཏེ། བགྲང་། དང་པོ་སྤྱིར་བསྟན་པ་དང་། དྲང་། ཤེས་བྱ་ལྔ་པོ་གོང་དུ་སོང་ནས་བར་དུ་བསྒོམ་བྱ་ལ་བློ་མོས་པ་དེས་ལམ་གཞོལ་ཏེ་བགྲོད་པའི་སྡོམ་ཚིག་ནི་འདི་ལྟ་སྟེ། ལམ་སྟེགས་སུ་ཐུན་མོང་བགྲོད་ཚུལ་ནི། ལྷ་མིའི་ཐེག་པས་དགེ་བཅུ་ལ་སྤྱོད་ཚུལ་དང་། ཉན་ཐོས་ཀྱིས་ལམ་ལྔ་ས་བརྒྱད་བགྲོད་ཚུལ་དང་། རང་སངས་རྒྱས་ཀྱིས་ལམ་ལྔ་བགྲོད་ཚུལ་དང་། བྱང་ཆུབ་སེམས་དཔའ་ལམ་ལྔ་ས་བརྒྱད་བགྲོད་ཚུལ་དང་། གསང་སྔགས་ཕྱི་རྒྱུད་སྡེ་གསུམ་གྱིས་བསྐྱེད་རྫོགས་ཀྱི་སྒོ་ནས་ལམ་བགྲོད་ཚུལ་རྣམས། རང་རང་གི་གཞུང་ལུགས་སུ་ཤེས་པར་བྱའོ། །ཁྱད་པར་དུ་ཐེག་མཆོག་མ་ཧཱའི་ལམ་བགྲོད་ཚུལ་སྟེ་གཉིས་སོ། །གཉིས་པ་ཐེག་མཆོག་གི་ལམ་ཁྱད་པར་དུ་བསྟན་པ་དེ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ཐ་མ་ཐེག་མཆོག་མ་ཧཱ་ལ་ཡང་གཉིས་ཏེ། སོ་སོ་སྐྱེ་བོས་འདོད་ཡོན་ལྔ་ལ་དངོས་སུ་སྤྱོད་པ་དེ་དང་རྗེས་སུ་མཐུན་པར་ཐབས་ལམ་གྱི་ལམ་ལ་གཞོལ་བ་སྟེ་བགྲོད་པའི་ཚུལ་དང་། རྒྱུ་མཚན་ཉིད་ཀྱི་ཐེག་པའི་ཕ་རོལ་ཏུ་ཕྱིན་པའི་ལམ་དང་རྗེས་སུ་མཐུན་པར་ཤེས་ར བ་གྲོལ་ལམ་ལ་གཞོལ་ཏེ་བགྲོད་པའི་ཚུལ་དང་གཉིས་སོ། ། དེ་ཡང་ཐབས་ལམ་དེ་དང་གྲོལ་ལམ་དེ་གཉིས་པོ་རེ་རེ་ལའང་། གདུལ་བྱ་དབང་པོ་རྣོ་རྟུལ་གྱིས་ཕྱེ་བས་ཅིག་ཆར་པ་དང་རིམ་གྱིས་པས་སྦྱོར་བར་བྱེད་པ་ལ་ཐབས་གྲོལ་གྱི་ལམ་རང་རང་དང་རྗེས་སུ་མཐུན་པར་ལུང་ནས་བཤད་པ་བཞིན་དུ་འོག་རྒྱས་བཤད་ཀྱི་སྐབས་སུ་སྟོན་པའོ། །དེ་ཡང་བདེ་བ་ཆེ་ཆུང་གི་སྒོ་ནས་ཐབས་ལམ་དང་གྲོལ་ལམ་གཉིས་སུ་དབྱེ་བ་དང་། བློ་ཆེ་ཆུང་གི་སྒོ་ནས་རིམ་དང་ཅིག་ཆར་གཉིས་སུ་དབྱེ་བ་དང་། མཚན་མ་ཆེ་ཆུང་གི་སྒོ་ནས་ལྷ་དང་མི་རྟོག་པ་གཉིས་སུ་དབྱེ་བ་དང་། གདུལ་བྱ་རྒྱུད་དྲག་ཞན་གྱི་སྒོ་ནས་ཞི་ཁྲོ་གཉིས་སུ་དབྱེ་བ་དང་། རིམ་པ་འདོར་མི་འདོར་གྱི་སྒོ་ནས་ཐོད་རྒལ་མཐར་ཆགས་གཉིས་སུ་དབྱེ་བ་ལས། འདིར་དང་པོ་སྟེ། བཤད་པ་དེ་ལ་གཉིས་ཏེ། ཐབས་ལམ་དང་། གྲོལ་ལམ་མོ། །དང་པོ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། སོ་སོ་སྐྱེ་བོས་འདོད་ཡོན་ལྔ་ཡི་བདེ་བ་དངོས་སུ་སྤྱོད་པ་དེའི་རྗེས་སུ་འབྲང་བ་ཐབས་ལམ་གྱི་ལམ་བགྲོད་པ་ལའང་། སྦྱངས་པའི་ལས་འཕྲོ་ཆེ་ཆུང་ངམ། སྣོད་ཀྱི་དབང་པོ་རྣོ་རྟུལ་དང་། བཅུད་ཀྱི་སྐལ་བ་ཡོད་མེད་ཀྱི་དབང་གིས་ཕྱེ་བ་ལས། གདུལ་བྱ་རང་རང་གི་བློ་དང་འཚམས་པར་ཐབས་ལམ་སྟེང་འོག་གི་གདམས་ངག་གིས་ལུས་སེམས་གྲོལ་བར་བྱེད་པ་ལ། སྤྱི་བོ་བདེ་ཆེན་གྱི་འཁོར་ལོ་དང་། མགྲིན་པ་ལོངས་སྤྱོད་ཀྱི་དང་། སྙིང་ཁ་ཆོས་ཀྱི་དང་། ལྟེ་བ་སྤྲུལ་པའི་འཁོར་ལོ་དང་བཞི་ལ་རང་གནས་ཀྱི་ཐིག་ལེ་བྱང་སེམས་ཡོད་པ་དང་། རང་གི་ཐིག་ལེ་བྱེད་པ་སྡོམ་པའི་ཐབས་འཁྲུལ་འཁོར་དང་བཅས་པ་བསྒོམས་པའི་སྟོབས་ལས་བདེ་སྟོང་གི་ཡེ་ཤེས་བྱུང་བ་དེ་ལ་དཔེར་ན། ཁམས་གཉིས་ཀྱི་ལུས་གྲུབ་ལུགས་ཀྱི་སྤྱོད་པ་མི་འདྲ་བ་ཡིས་ཕྱེ་བས་དང་པོ་འདོད་ཁམས་པའི་ལུས་ལྷུར་ལེན་ནས་གནས་པ་ལ། མངལ་ནས་མིང་གཟུགས་སྐྱེ་མཆེད་དྲུག་རིམ་པར་སྐྱེ་བ་དང་། གཟུགས་ཁམས་བརྫུས་སྐྱེས་དང་ནས་སྐྱེ་མཆེད་དྲུག་རྫོགས་པར་སྨིན་པའི་ཚུལ་དུ། སྟེང་སྒོ་རིམ་གྱིས་པ་དང་འོག་སྒོ་ཅིག་ཆར་དུ་སྣང་བ་ནི་འདི་ལྟ་སྟེ། གཉིས་པ་བཤད་པ་དེ་ལ་གསུམ་སྟེ། བགྲང་། དང་པོ་རིམ་གྱིས་པ་དང་། དྲང་། ཤིཿར་ནི་རྩ་ཙཀྲ་ནི་འཁོར་ལོ་ཨ་ཤ་དང་། ཡ་མོ་ཆ་ནི་དྲུག་སྟེ། རྒྱུ་འཁོར་ལོ་བཞི། རྐྱེན་འཁོར་ལོ་གཉིས་དང་དྲུག་གོ། །དང་པོ་རྒྱུའི་འཁོར་ལོ་ནི། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་གཉིས་དབུས་ན། ཐིག་ལེ་ཨ་ཐུང་ཤད་ཀྱི་དབྱིབས་སུ་གནས་པ་དང་། སྙིང་ཁ་ཆོས་ཀྱི་འཁོར་ལོ་རྩ་འདབ་བརྒྱད་ཀྱི་དབུས་ན། ཐིག་ལེ་ཝྂ་གི་དབྱིབས་སུ་དང་། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་གི་དབུས་ན། ཐིག་ལེ་ཨཱྂ་གི་དབྱིབས་སུ་དང་། ཀླད་པ་བདེ་ཆེན་གྱི་འཁོར་ལོ་རྩ་འདབས་སུམ་ཅུ་རྩ་གཉིས་ཀྱི་དབུས་ན། ཐིག་ལེ་ཧྂ་གི་དབྱིབས་སུ་གནས་སོ། །རྐྱེན་འཁོར་ལོ་གཉིས་ནི། སུམ་མདོ་མེའི་འཁོར་ལོ་ན་རྂ་དང་། སྒྲོམ་མདོའམ་གཤང་ཁ་རླུང་གི་འཁོར་ལོ་ན་ཡྂ་གནས་པའོ། །དེ་ལམ་པས་བསྒོམ་པའི་དུས་ན། འོག་རླུང་བསྡོམས་པ་ལས་རང་གནས་ཀྱི་ཡི་གེ་ཡྂ་ལས་སྒྲོལ་མ་སྟེ་རླུང་གྱེན་དུ་འགྲོ་བས། སུམ་མདོའི་རྂ་ལ་ཕོག །དེས་ཨ་ཐུང་གི་མེ་སྦར་བས། རྩ་ཨ་བ་དྷུ་ཏིའི་ནང་དུ་མེ་སྣ་ཞུགས་དེ་ལ་བརྟེན་པའི་ལྟེ་བའི་ཐིག་ལེ་དེ་རྟོག་པས་འཁྱགས་པ་རྣམས་བཞུ། དེ་ནས་རིམ་པ་རུ་སྙིང་ཁ་དང་། མགྲིན་པ་དང་། སྤྱི་བོའི་འཁོར་ལོ་རྣམས་ཀྱི་ཐིག་ལེ་རྟོག་པས་འཁྱགས་པ་རྣམས་བཞུས་ནས། ཐིག་ལེའི་འོད་ཟེར་སྤྱི་བོ་ནས་འཐོན་ཏེ། ཕྱོགས་བཅུའི་དེ་བཞིན་གཤེགས་པ་རྣམས་ལ་བདེ་སྟོང་གི་མཆོད་པ་ཕུལ་བས། དེ་བཞིན་གཤེགས་པ་རྣམས་ཀྱིས་སྦྱོར་བ་མཛད་པའི་བྱང་སེམས་ཡེ་ཤེས་ཀྱིི་བདུད་རྩིའི་ཆུ་རྒྱུན་ཚུར་འདུས་སྤྱི་བོའི་ཐིག་ལེ་ལ་ཕོག །འོད་དུ་ཞུ་བས་ལུས་ཀུན་ཁྱབ་སྟེ། རྐྱལ་པ་ཞོས་བཀང་བ་ལྟ་བུར་གྱུར་པར་བསྒོམས་པ་ཡིས། དགའ་བ་བཞི་བྱེ་བྲག་ཏུ་བསྐྱེད་པའི་ཆའམ་འོག་སྒོའི་སྔོན་འགྲོའམ་ཆ་ལག་ཡིན་ནོ། །གཉིས་པ་ཅིག་ཆར་བ་དང་། དྲང་། སྟེང་སྒོ་རིམ་གྱིས་པ་དེ་སྔོན་དུ་སོང་ནས་ཕྱི་མ་འོག་སྒོ་ཅིག་ཆར་བ་ནི། ཡབ་ཀྱི་གསང་བའི་དབང་པོ་དང་ཡུམ་གྱི་གསང་བའི་ཡུལ་གཉིས་འཛོམ་པ་སྟེ། དེ་ཡང་ཡབ་ཀྱི་རྡོ་རྗེ་ནོར་བུའི་དབྱིབས་སམ། ཡང་ན་རྡོ་རྗེ་ཐིག་ལེ་ལ་བདེ་བ་ཀུན་འབྱུང་བས་ནོར་བུ། ཡུམ་གྱི་མཁའ་པདྨའི་དབྱིབས་སམ། ཡང་ན་བདེ་བ་སྐྱེ་དུས་ཉོན་མོངས་པའི་དྲི་མས་མ་གོས་པས་ཆུ་སྐྱེས་ཏེ་པདྨ་དང་། དེ་གཉིས་ལས་སུ་རུང་བ་དང་ལྡན་པར་གྱུར་པས། རིག་མ་ལོ་བཅུ་དྲུག་ལོན་པ་དེ་ལ། ལུས་སྦྱོར་ཐབས། ངག་བརྡའ་ཐབས། ཡིད་ཏིང་ངེ་འཛིན་སྒོམས་ཐབས། སྤྱོད་ལམ་གྱི་ཡོན་ཏན་དང་བཞི་རྒྱུད་ལུང་མན་ངག་ནས་བཤད་པ་བཞིན་རྫོགས་པ་ལ། ཡབ་ཡུམ་གྱི་མཁའ་གསང་བསྣོལ་མར་བྱིན་གྱིས་བརླབ་ཅིང་། སྦྱོར་བའི་བརྡས་བསྣོལ་མར་བསྐུལ་ན། ཛཿས་དཔུང་པ་ནས་བཟུང་། ཧཱུྃ་གིས་འཁྱུད། བྂ་གྱིས་བསྡོམ། ཧཱོས་བསྐྱོད་པ་སྟེ། དེ་ལྟར་ཕྱག་རྒྱ་བཞིས་རོལ་ནས། ཡབ་ཡུམ་གྱི་དབང་པོ་ཁ་སྦྱོར་བས་བདེ་བ་གཡོ་བའི་ཚུལ་ནི། རྟེན་ཡབ་ཡུམ་གཉིས་དེ་ལས་ཡས་འབབ་དང་མས་བརྟེན་གྱི་དགའ་བཞི་སྐྱེས་པ་དེ་ཡང་། རྟེན་ཡབ་ཐབས་ཀྱི་ཆ་ཡིན་པས་བདེ་བ་དང་ཚུལ་མཐུན། ཡུམ་ཤེས་རབ་ཀྱི་ཆ་ཡིན་པས་སྟོང་པ་དང་ཚུལ་མཐུན་པའི་ཡབ་ཡུམ་ཁ་སྦྱོར་བས་ཐབས་དང་ཤེས་རབ་དབྱེར་མེད་པའི་བདེ་སྟོང་གི་དོན་རང་རིག་པའི་མངོན་སུམ་དུ་མཐོང་བ་ཡིན་ནོ། །དེ་ཡང་དགའ་བ་བཞིའི་སྐྱེ་ཚུལ་རྒྱས་པར་བཤད་ན། དང་པོ་ཡས་འབབ་ཀྱི་དགའ་བ་སྟེ། དེ་ཡང་བྱང་སེམས་ཀྱི་བདེ་བའི་ཆུ་རྒྱུན་སྤྱི་བོ་བདེ་ཆེན་གྱི་འཁོར་ལོ་ནས་མགྲིན་པར་བབས་པས་དགའ་བ། སྙིང་གར་མཆོག་དགའ། ལྟེ་བ་དགའ་བྲལ་གསང་བ་རྡོ་རྗེའི་ལམ་ནས་བྱུང་བའི་ཚེ། དགའ་བཞིའི་མཐར་ཐུག་ལྷན་ཅིག་སྐྱེས་པའི་དགའ་བ་བཞིའི་མཐར་ཐུག་ཉམས་སུ་མྱོང་ཞིང་། རྟེན་བྱང་ཆུབ་སེམས་ཀྱི་ཐིག་ལེ་ཡུམ་གྱི་པདྨ་རེག་པའི་གནས་སུ་འཁྱིལ་བ་ཡུམ་གྱི་ཉི་མ་བྱང་ཆུབ་སེམས་དང་རྩེ་འཕྲད་ནས་ཐིག་ལེ་ཕྱེད་ཤོར་ཕྱེད་མ་ཤོར་ཏེ། ཡབ་ཡུམ་གཉིས་ཀྱི་གསང་རྩར་ཕན་ཚུན་འདྲེས་པ་ནི། ཉོན་མོངས་རང་སར་གྲོལ་ནས་ཀུན་རྫོབ་བདེ་སྟོང་གི་ཡེ་ཤེས་མངོན་དུ་གྱུར་པའོ། །དེ་ནས་ལྷན་ཅིག་སྐྱེས་པའི་དགའ་བའི་ཡེ་ཤེས་ཀྱི་བདག་ཉིད་ཐིག་ལེ་ཉི་ཟླ་གཉིས་འདྲེས་ཏེ་འགྲོ་འོང་བྱང་ཆུབ་ཀྱི་སེམས་ཚུར་ལོག་ནས་གསང་བ་རྡོ་རྗེའི་བུ་གུར་བསྟིམ་ཞིང་། ཐིག་ལེ་རྡོ་རྗེའི་ལམ་ནས་ཡར་ལོག་པ་ནི་མས་བརྟན་ཟག་མེད་ཀྱི་དགའ་བ་སྟེ། ལྟེ་བར་བརྟན་པ་དགའ་བ། སྙིང་གར་མཆོག་དགའ། མགྲིན་པར་དགའ་བྲལ། སྤྱི་བོར་བརྟན་པ་ནི་ལྷན་ཅིག་སྐྱེས་པའི་དགའ་བའོ། །དེ་ཙམ་ན་བཅུ་གཅིག་ཀུན་ཏུ་འོད་ཀྱི་ས་རྫོགས་ཤིང་། དེའི་ཡོན་ཏན་གྱིས་ཐིག་ལེས་ལུས་ཐམས་ཅད་དུ་ཁྱབ་ཅིང་བརྟན་པས་འཁོར་བའི་སྐྱོན་གྱིས་མ་གོས་པས། བཅུ་གཉིས་པདྨ་སྤྱན་གྱིས་དང་། རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་སྣང་བས་བཅུ་གསུམ་ཡི་གེ་འཁོར་ལོ་ཚོགས་ཆེན་གྱིས་རྫོགས་སོ། །གསུམ་པ་ངེས་ཚིག་གོ། །དྲང་། ཐབས་ལམ་འདི་སྐབས་གར་བཤད་ན། མཆོད་པ་ལ་ཕྱི་ནང་གསང་གསུམ་ལས་གསུམ་པ་གསང་མཆོད་ཀྱི་སྐབས་སུ་བཤད། གསང་སྙིང་ལས། གསལ་ལྡན་མ་འམ་བྱིན་རླབས་ལ། །སྟོང་གསུམ་ཡུངས་འབྲུར་གཞུག་ཚུལ་དུ། །དབྱིངས་ནས་དཀྱིལ་འཁོར་སྤྱན་འདྲེན་མཆོད། །མཉེས་ནས་གྲུབ་པའི་དམ་ཚིག་མཆོག །བདག་ཉིད་ཆེན་པོ་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་འགྲོ་བ་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །ཞེས་སོ། །དཀྱིལ་འཁོར་དྲུག་པ་བྱང་ཆུབ་སེམས་ཀྱི་དཀྱིལ་འཁོར་གྱི་སྐབས་སུ་བཤད་དེ། དེ་ཉིད་ལས། ཤིན་ཏུ་ཕྲ་བའི་དམ་ཚིག་མཆོག །ཕྱག་རྒྱ་ཆེན་པོའི་ཕྱག་མཐིལ་དུ། །ཐུགས་ཀྱི་དཀྱིལ་འཁོར་དམ་པ་དེ། །སོར་ནི་བཞི་ཡི་ཚད་དུ་བྱ། །ཞེས་པ་དང་། དཀྱིལ་འཁོར་འཛུབ་གང་ཚད་དུ་བྱ། །ཞེས་སོ། །དེའང་ཆགས་པ་ཅན་ལ་ཐབས་ལམ་དེ་ཉིད་མ་གཏོགས་པ་གྲོལ་ལམ་གྱི་ཐོས་བསམ་སྒོམ་པའི་ཤེས་རབ་གསུམ་གྱིས་ཉོན་མོངས་པ་ཆགས་རྟོག་གི་བློ་དེ་ཉིད་མི་འབྱང་བ་ཡིན་ཏེ། དེ་བས་ན་དང་ནས་བདེ་བ་ལ་སེམས་བདེ་བ་མ་སྤངས་ཉོན་མོངས་པ་མ་སྤངས་ཉོན་མོངས་པ་ཆགས་རྟོག་རང་དག་ཏུ་སོང་ནས་མཐར་བདེ་སྟོང་གི་ཡེ་ཤེས་མངོན་སུམ་དུ་རྫོགས་པའི་ཕྱིར་ཐབས་ལམ་ཞེས་བྱ་བའི་ངེས་ཚིག་གི་མིང་ཐོབ་པའོ། །དེ་ཡང་ཁོག་གཞུང་ལས། འཇུག་དང་ཐོབ་ཕྱིར་ལམ་བརྗོད་དེ། །སྐྱེ་བོ་གཉིས་སྒྲོལ་ཕྱིར་བཞག་པ། །ལས་སུ་རུང་བ་ལམ་མཐར་ཕྱིར། །ཅེས་སོ། །གཉིས་པ་གྲོལ་ལམ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ཤེས་རབ་ཀྱི་ཕ་རོལ་ཏུ་ཕྱིན་པའི་ལམ་གྱི་རྗེས་སུ་སྦྱོར་བ་གྲོལ་ལམ་པ་དེའང་། ལམ་གྱི་གཙོ་བོ་དང་དེ་སྒྲུབ་ཐབས་ཀྱི་ཡན་ལག་ཆ་རྐྱེན་དུ། ལྟ་བ། སྤྱོད་པ། དཀྱིལ་འཁོར་དབང་། དམ་ཚིག །ཕྲིན་ལས། སྒྲུབ་པ་སྔགས། ཕྱག་རྒྱ། མཆོད་པ་སྟེ་རྒྱུད་དོན་རྣམ་པ་བཅུ་པོ་ཡིན་ཏེ། དེ་ཡང་གཙོ་བོ་དང་ཆ་རྐྱེན་གྱི་ཁྱད་པར་ནི། ཁོག་གཞུང་ལས། སྐབས་ཀྱི་གཙོ་དང་གྲོགས་ཀྱི་ཚུལ། །ཅེས་གསུངས་པས། གནས་སྐབས་ཀྱི་གཙོ་བོར་གྱུར་པ་གཅིག་ལམ་གྱི་ངོ་བོ། དེའི་གྲོགས་བྱེད་པའི་ངོས་ནས་ཆ་རྐྱེན་ཡིན་པར་གསུངས་སོ། །འོན་ཀྱང་ལམ་གྱི་གཙོ་བོ་ངོ་བོའི་འདོད་ལུགས་ལ་མང་སྟེ། དགའ་རབ་རྡོ་རྗེས། རྟོགས་ནས་འདྲིས་པར་གང་བྱེད་པ། །ལམ་གྱི་ངོ་བོ་བྱང་ཆུབ་སེམས། །ཞེས་པས་ལམ་གྱི་ངོ་བོ་བྱང་ཆུབ་སེམས་བཞག །ལམ་རིམ་ལས། ཀུན་ཀྱང་སྨིན་ཟིན་བགྲོད་པ་མེད། །དེ་ཉིད་ལམ་གྱི་ངོ་བོ་སྟེ། །ཞེས་པས། བགྲོད་བྱའི་དོན་གནས་པའི་ངོས་ནས་ལམ་གྱི་ངོ་བོར་བཞག །རིམ་གསུམ་ལས། ངོ་བོ་ཤེས་རབ་རྣམ་གསུམ་སྟེ། །སེམས་བཞི་ཤེས་པར་བསྟན་པ་སྟེ། །ཞེས་པས་བགྲོད་ཚུལ་གྱི་ངོས་ནས་ལམ་གྱི་ངོ་བོར་བཞག །མདོའི་དོན་བསྡུས་ནས། ངོ་བོ་ཐབས་དང་ཤེས་རབ་སྟེ། །ཞེས་པས། དབྱེ་བའི་རྣམ་གྲངས་ཀྱི་ངོས་ནས་ལམ་གྱི་ངོ་བོར་བཞག །ཁོག་གཞུང་ལ། ངོ་བོ་སེམས་ལྔ་སྐྱེས་པ་སྟེ། །ཞེས་པ་དང་། དཔེ་ཆུང་རང་གནས་ལས། འཇིག་ལྡང་ལ་སོགས་བྱང་སེམས་ལྔ ། །ངེས་པར་སྐྱེ་བའི་ངོ་བོར་འདོད། །ཅེས་པས། ལམ་གྱི་ངོ་བོ་སེམས་ལྔ་ལ་བཞག་སྟེ། དེའི་དབང་དུ་བྱས་ན། ཐུན་མོང་སེམས་ལྔ་ནི་སྦྱངས་པའི་གང་ཟག་གི་སྐབས་སུ་སྐྱེ་བས་ཞོར་ལ་བཤད་དོ། །འདིར་མཆོག་གི་སེམས་ལྔ་ལ་གཉིས་ལས། དང་པོ་གྲོལ་ལམ་གྱི་སེམས་ལྔ་ནི། སྐྱེ་བོ་དང་མུ་སྟེགས་ཅན་ཐེག་པ་འོག་མ་པ་རྣམས་ཀྱི་ཞེ་འདོད་ལས་གྲོལ་ནས། གསང་སྔགས་སུ་འགོ་གཡོ་བ་ནི། གཡོ་ལྡན་བྱང་ཆུབ་ཀྱི་སེམས་ཏེ། ལམ་རིམ་ནས། མཆོག་གི་གཡོ་བའི་སེམས་འབྱུང་འགྱུར། །ཞེས་སོ། །གཞི་དེས་དབྱེར་མེད་ཀྱི་དོན་ཁོང་དུ་ཆུད་པར་སྨོན་པ་ནི། སྨོན་པ་བྱང་ཆུབ་ཀྱི་སེམས་ཏེ། དེ་ཉིད་ལས། གཞི་དཔེ་ཁོང་དུ་ཆུད་སྨོན་པ། །ཞེས་སོ། །དེ་ནས་དཀྱིལ་འཁོར་ལ་འཇུག་པ་ནི་འཇུག་པའི་སེམས་ཏེ། དེ་ཉིད་ལས། ལྷག་པ་གཟུགས་བརྙན་འཇུག་པ་སྟེ། །ཞེས་སོ། །དེ་ནས་དབང་ཞུས་ཤིང་བསླབ་བྱ་ལ་གནས་པ་དང་ཐོས་བསམ་གནས་པ་ནི་གནས་པའི་སེམས་ཏེ། དེ་ཉིད་ལས། རིགས་ངེས་འགྱུར་ལ་ཕན་པ་བཅུ། །ནུས་པ་གཉིས་ཀྱི་བྱིན་བརླབས་བཞག །རང་གི་སྤྱན་མཆོག་འབྱེད་ལ་བརྩོན། །ཐོས་བསམ་དམ་པ་ལེན་པར་བྱེད། །ཅེས་སོ། །ཐོས་བསམ་མཐར་ཕྱིན་ནས་གོ་རྟོགས་ཀྱི་དོན་དང་ལྡན་པ་ནི། མཐར་ཕྱིན་པའི་བྱང་ཆུབ་སེམས་ཏེ། དེ་ཉིད་ལས། ཐོས་བསམ་བརྟེན་པས་ལྟ་མཐར་ཕྱིན། །ཅེས་སོ། །གཉིས་པ་ཐབས་ལམ་གྱི་སེམས་ལྔ་ནི། ཁམས་ཉེར་གཅིག་པ་ལས། འཇིག་དང་ལྡང་དང་གནས་པ་དང་། །སྨོན་པ་བྱང་ཆུབ་སེམས་ཡིན་ནོ། །གཡོ་དང་བསྐྱེད་དང་ལྡང་དང་གནས། །ཞེས་གསུངས་པའི་དོན་གྱི་ལྔ་ལས། དང་པོ་ནི། ལམ་ཐབས་ལམ་ཉམས་སུ་ལེན་པའི་དུས་སུ། རྩ་གནས་ནས་ཐིག་ལེ་འགོ་གཡོ་ཙམ་ན། བདེ་བ་འགོ་ལྡང་བའི་ཚུལ་དུ་འདུག་པས་ན། གཡོ་ལྡང་བྱང་ཆུབ་ཀྱི་སེམས་སོ། །གཉིས་པ་ནི། བདེ་བ་སྔ་མ་འཇིག་ཙམ་ན་ཕྱི་མ་ལ་འཇུག་པ་ནི། འཇིག་འཇུག་བྱང་ཆུབ་ཀྱི་སེམས་སོ། །གསུམ་པ་ནི། ལུས་ཀྱི་རྩ་དང་ཐིག་ལེ་རྣམས་རང་སར་གནས་པས། བདེ་བ་ཡང་རང་སར་གནས་པ་ནི། གནས་པ་བྱང་ཆུབ་ཀྱི་སེམས་སོ། །བཞི་པ་ནི། སྔ་མའི་བདེ་བ་ལ་དམིགས་ཤིང་ཕྱིི་མའི་བདེ་བ་ལ་སྨོན་པ་ནི་སྨོན་པ་བྱང་ཆུབ་ཀྱི་སེམས་སོ། །ལྔ་པ་ནི། ཐིག་ལེ་རྡོ་རྗེའི་རྩེ་ནས་ཕར་འགྲོ་བ་དང་། པདྨའི་ཟེ་འབྲུ་ནས་ཚུར་འོང་བ་ནི། འགྲོ་འོང་བྱང་ཆུབ་ཀྱི་སེམས་སོ། །འོ་ན་ལམ་གྱི་ངོ་བོ་སེམས་ལྔ་ཡིན་ན། ལམ་པ་རང་གང་གིས་བྱེད་ཅེ་ན། སེམས་ལྔ་སྐྱེ་བའི་གཞི་མའི་ངོས་ནས་ལམ་པ་ཡིན་ལ། སྐྱེས་པ་རང་གི་ངོས་ནས་ལམ་གྱི་ངོ་བོ་ཡིན་ནོ། །དེ་ནས་ཕྱག་རྒྱ་སྤྲོས་པ་མཐར་ཕྱིན་པའི་ཚེ། ཐབས་གྲོལ་གྱི་སེམས་ལྔ་དབྱེར་མེད་དུ་ཉམས་སུ་བླངས་ནས་ལམ་མཐར་ཕྱིན་པར་བྱེད་དོ། །གཉིས་པ་བཤད་པ་དེ་ལ་གཉིས་ཏེ། གཙོ་བོ་དང་། ཆ་རྐྱེན་ནོ། །དང་པོ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། འདིར་སློབ་དཔོན་སངས་རྒྱས་གསང་བས་ཏིང་ངེ་འཛིན་གཙོ་བོར་བཞག་སྟེ། དེ་ཡང་གསང་སྔགས་མ་ཧཱ་ཡོ་ག་གྲོལ་ལམ་གྱི་སྒོར་འཇུག་པ་ཀུན་གྱི་དོན་དུ་གཉེར་བར་བྱ་བ་ལའང་། ལམ་གྱི་གཙོ་བོའམ་མཆོག་ཏུ་གྱུར་པ་ཏིང་ངེ་འཛིན་བསྒོམ་པར་བྱ་བ་ལའང་སྔོན་ཐབས་ལམ་ལ་རིམ་ཅིག་ཆར་གཉིས་སུ་འབྱུང་བ་བཞིན་དུ། འདིར་གྲོལ་ལམ་གྱི་ཏིང་ངེ་འཛིན་ལའང་རིམ་ཅིག་ཆར་གཉིས་སུ་ཤེས་པར་བྱའོ། །གཉིས་པ་བཤད་པ་དེ་ལ་གཉིས་ཏེ། བགྲང་། དང་པོ་ལ་ཅིག་ཆར་བ་དང་། དྲང་། ཅིག་ཆར་བའི་གང་ཟག་ནི་བློའི་མཆོག་སྟེ་མ་ཧཱ་རྟོགས་པའི་སྐལ་བ་དང་ལྡན་པའི་རྣལ་འབྱོར་བ་རྣམས་ཀྱིས། གདོད་མ་ནས་བདེན་གསུམ་དབྱེར་མེད་ཀྱི་ལྟ་བ་ཅིག་ཆར་དུ་བློ་ལ་ངེས་པར་ཆུད་པར་རྟོགས་ནས་ཏིང་ངེ་འཛིན་ཡང་དེར་གནས་པ་ལ། འཁོར་འདས་གཉིས་སུ་མེད་པར་བྱང་བ་སྟོང་བ། ཆུབ་པ་སྣང་བ། སེམས་དབྱེར་མེད་པའི་དོན་དེ་ལ་རིམ་གྱིས་པའི་དེ་ཏིང་། ཀུན་ཏིང་། རྒྱུའི་ཏིང་ངེ་འཛིན་གྱི་བྱང་ཆུབ་ཀྱི་སེམས་བསྒོམ་པ་རྣམ་པ་གསུམ་དུས་གཅིག་ཏུ་རྫོགས་ཏེ་ཅིག་ཆར་སྒོམ་པའོ། །དེ་ཡང་གསང་སྙིང་ལས། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །ཅེས་པ་དང་། རྒྱས་པ་ལས། ཐིག་ལེ་ཆེན་པོའི་རང་བཞིན་ལ། །སྒོམ་པ་རྣམ་གསུམ་དུས་གཅིག་རྫོགས། །དེ་ནི་དེ་བཞིན་ཉིད་ཀྱི་དབྱིངས། །དེ་ནི་ཀུན་ཏུ་སྣང་གི་ངང་། །དེ་ནི་རྒྱུ་ཡི་རིམ་པར་ལྡན། །ཅེས་པ་དང་། ལམ་རིམ་ལས། སྒོམ་པ་རྣམ་བཞི་ཟུང་ལྡན་པ། །གདོད་མ་ཉིད་ནས་གོམས་པར་བྱེད། །ཅེས་སོ། །གཉིས་པ་རིམ་གྱིས་པའོ། །དྲང་། བློ་ཆུང་བའི་གང་ཟག་ནི་ཅིག་ཆར་བ་དེ་ལས་བཟློག་པ་སྟེ། དཔེར་ན་རྒྱུད་སྔ་མ་ལས་འབྲས་བུ་ཕྱི་མ་འབྱུང་བའི་རྟེན་འབྲེལ་བཞིན་དུ། ལྟ་བ་བདེན་པ་དབྱེར་མེད་ཀྱི་གོ་བ་ཡོད་ཀྱང་། སྒོམ་པ་ལ་དེ་ཏིང་། ཀུན་ཏིང་ཕྱག་རྒྱ་གཅིག་པ་ལ་ཕྲ་རགས་གཉིས། སྤྲོས་པ་དང་ལྔའམ། ཚོགས་སྒྲུབ་དང་ལྔ་ཡི་ལམ་ལ་རིམ་པ་ལྟར་བརྟེན་ནས་དོན་དུ་གཉེར་བས་མཐར་ཟག་བཅས་བདེན་མཐོང་ངམ། ཟག་མེད་ཀྱི་བདེན་པ་མངོན་དུ་བྱེད་དེ། དེ་ཉིད་རྒྱས་པར་ནི་འོག་ནས་འཆད་དོ། །གཉིས་པ་ཆ་རྐྱེན་ལ་དགུ་སྟེ། ལྟ་སྒོམ་ཐུན་མོང་དུ་བསྟན་པ་དང་། སྤྱོད་པ་དང་། འཕྲིན་ལས་དང་དམ་ཚིག་དང་། དཀྱིལ་འཁོར་དང་། མཆོད་པ་དང་། དབང་དང་། སྒྲུབ་པ་དང་། སྔགས་དང་། ཕྱག་རྒྱའོ། །དང་པོ་ལ་གཉིས་ཏེ། རྟོགས་པའི་ལྟ་བ་དང་། དེའི་རྗེས་སུ་སྒོམ་པ་ཏིང་ངེ་འཛིན་ནོ། །དང་པོ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། བགྲོད་བྱ་ལམ་གྱི་གཙོ་བོ་ཏིང་ངེ་འཛིན་གྱི་སྔོན་དུ་ལམ་གྱི་ཡན་ལག་རྒྱུད་དོན་བཅུའི་དང་པོ་ལྟ་བ་དེའི་སྡོམ་ཚིག་ནི། ལྟ་བའི་དགོས་ཆེད་དང་། རྟོགས་པར་བྱེད་པའི་ཐབས་དང་། ལྟ་བའི་ངོ་བོ་དང་། མ་རྟོགས་པའི་སྐྱོན་དང་། རྟོགས་པའི་ཡོན་ཏན་དང་ལྔའི་རིམ་པས་ནང་དུ་ནི། ཤེས་རབ་ཀྱི་དབང་པོ་མཆོག་གི་སྤྱོད་ཡུལ་རྣམས་ལྟ་བའི་དོན་རྣམས་ནི་རྫོགས་པར་བཤད་པ་ནི་འདི་ལྟ་སྟེ། གཉིས་པ་བཤད་པ་དེ་ལ་ལྔ་སྟེ། དགོས་ཆེད་དང་། རྟོགས་ཐབས་དང་། ངོ་བོ་དང་། མ་རྟོགས་པའི་སྐྱོན་དང་། རྟོགས་པའི་ཡོན་ཏན་ནོ། །དང་པོ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། གསང་སྔགས་ལས་གཞན་པའི་ཐེག་འོག་གི་ལྟ་བ་ངན་པའི་མིག་དེ་གསལ་བ་དང་། ཐེག་མཆོག་གསང་སྔགས་གང་གི་དགོངས་དོན་སྤྱན་ཏེ་ཤེས་རབ་མཆོག་ལྟ་བའི་དོན་དེ་མངོན་སུམ་དུ་བྱ་དགོས་པའི་ཕྱིར། དེའང་ཐེག་པ་འོག་མའི་ལྟ་བ་ངན་པ་གོ་ཆ་ངན་པ་དང་འདྲ་བ་སྟེ་རྟོལ་ཞིང་འབགས་པར་བྱེད་པའི་ཐབས་ལ་གང་གི་བདེན་པ་དབྱེར་མེད་ཀྱི་ལྟ་བ་ཐེ་ཚོམ་མེད་པའི་དོན་མདིལ་ཐུང་རྣོན་པོ་དང་འདྲ་བ་གཅིག་རྟོགས་པར་ཤིན་ཏུ་གཅེས་པ་ཡིན་ནོ། །གཉིས་པ་བཤད་པ་ལ་གཉིས་ཏེ། བགྲང་། དང་པོ་དཔེ་དང་། དྲང་། ཕྱོགས་འཛིན་གྱི་ལྟ་བས་ཕྱོགས་མེད་ལྷུན་གྲུབ་མི་རྟོགས་པའི་དཔེ་ནི། གླིང་བཞི་ནས་ལྟ་བས་ཡུལ་མཐོང་རྒྱ་ཆུང་། ཕལ་པའི་རི་ནག་པོ་དགུ་འདས་ནས་དེ་བས་རྒྱ་ཆེ། གསེར་གྱི་རི་བདུན་ནས་རིམ་པ་ལྟར་དེ་བས་རྒྱ་ཆེ་བ་དང་། རི་རབ་ལྷུན་པོའི་གནས་ནས་ལྟ་བས་ཐམས་ཅད་གསང་བའི་རིམ་པ་པ་དེ་ལྟར་ཡོད་པ་བཞིན་དུ། གཉིས་པ་དོན་དེ་ལ་གཉིས་ཏེ། གཞན་སེལ་དང་། དོན་དུ་གཉེར་བའོ། །དང་པོ་ལ་གཉིས་ཏེ། བགྲང་། དང་པོ། དང་པོ་ལྟ་བས་གཞན་སེལ་ལུགས་དང་། དྲང་། གནས་སྐབས་སུ་སངས་རྒྱས་ཀྱི་རིགས་མ་སད་པས་མེད་པ་ཕྱལ་རྒྱང་གཉིས་དང་། རང་བཞིན་གྱིས་ལོག་པ་མུ་རྟུག་མུ་སྟེགས་དང་། ཕྲ་བ་ཆོས་བདག་མཆོད་པས་ཕྱི་པ་ཡིན་ལ། རགས་པ་གང་ཟག་གི་བདག་མེད་པར་རྟོགས་པས་ན་ནང་པ་སྟེ། དེ་ལྟར་ཕྱི་ནང་གཉིས་ལྟོས་པ་ཉན་རང་གཉིས་ཀྱི་ལྟ་བ་དང་། སྣང་བའི་གསལ་ཆ་ཕྱོགས་གཅིག་སེམས་ཡིན་པར་བསྒྲུབ་སྟེ། སེམས་རང་རིག་རང་གསལ་དུ་འདོད་པ་སེམས་ཙམ་པ་དང་། དོན་དམ་སྟོང་པ་དང་ཀུན་རྫོབ་སྣང་བ་གཉིས་མི་མཐུན་པ་ཐ་དད་དུ་བྱས་ནས་ཀུན་རྫོབ་འགོགས་པ་དང་དོན་དམ་དག་པ་སྟོང་པར་འདོད་པ་དབུ་མ་པ་དང་། ལྟ་བ་ངན་པ་དེ་དག་ནི་དཔེར་ན་ཟས་ལ་དུག་བཏབ་པའི་ཆ་ཡོད་ན་ཟས་དུག་ཅན་དེ་ལ་གང་གིས་མི་རེག་སྟེ་མི་ཟ་བ་བཞིན་དུ། གསང་སྔགས་ཀྱི་ལྟ་བ་རྟོགས་པའི་གང་ཟག་གང་གིས་སྣང་སྟོང་ཕྱོགས་འཛིན་གྱི་ལྟ་བ་གོལ་བར་ཤེས་ནས་ལྟ་ངན་དེར་བློ་མི་གནས་པ་ཡིན་ནོ། །གཉིས་པ་སྒོམ་པའི་བསལ་བྱའོ། །དྲང་། ཆོས་ཉིད་བསམ་གྱིས་མི་ཁྱབ་པ་གསང་སྔགས་བདེན་གསུམ་དབྱེར་མེད་ཀྱི་ལྟ་བ་མ་ཤེས་ན། སྒོམ་པ་ནི་བསམ་པའི་འགྱུ་བ་མེད་པར་གནས་པ་ཞི་གནས་ཙམ་ལ་བརྟེན་པ་དེས་ནི། རྣལ་འབྱོར་བླ་མེད་ཀྱི་དགོངས་པ་གཉིས་མེད་ཀྱིི་དོན་ཉམས་སུ་མྱོང ཞིང་འབྲས་བུ་ཐོབ་པ་ནི་མ་ཡིན་ནོ། །དེ་བས་ནམ་མཁའ་ཀློང་ཡངས་ལས། བདེ་སྡུག་མ་དྲན་བཏང་སྙོམས་ནི། །ཞི་གནས་མ་རིག་གཏི་མུག་དེ། །གང་གི་བློ་ཡང་མ་ཞུགས་པས། །དགེ་སྡིག་གཉིས་སུ་ལུང་མ་བསྟན། །ཅེས་སོ། །གཉིས་པ་དོན་དུ་གཉེར་བ་དང་། དྲང་། གང་ཟག་གང་གིས་ལྟ་སྒོམ་ཕྱོགས་རེ་བ་ལ་སྐྱོན་དེ་ལྟར་དུ་ཡོད་པར་ཤེས་ནས་ལྟ་སྒོམ་དབྱེར་མེད་རྟོགས་པའི་ཐབས་དུ་མའི་སྒོ་ནས་འུབ་ཆུབ་པར་བྱས་པ་དེས། སྣང་སྟོང་དབྱེར་མེད་ཀྱི་དོན་རྟོགས་པས་སྒོམ་པ་ལའང་། རྣལ་མའི་དོན་ལ་རང་རིག་པ་འབྱོར་ཞིང་ཚོགས་གཉིས་རྫོགས་ཤིང་སྒྲིབ་གཉིས་བྱང་སངས་རྒྱས་ཀྱི་སར་ཆུབ་པ་ཡིན་ནོ། །གཉིས་པ་རྟོགས་ཐབས་དང་། དྲང་། གསང་སྔགས་ཀྱི་རྣལ་འབྱོར་པ་གང་གིས་ལམ་གྱི་ཐོག་མར་ལྟ་བ་འགྲོ་བས་དེའི་དོན་རང་གི་རྒྱུད་ལ་བརྟེན་ཅིང་རྟོགས་པའི་ཐབས་ལ། ཏིང་ངེ་འཛིན་གྱི་བྱེ་བྲག་མི་འདྲ་བ་བསྐྱེད་རིམ་རྣམས་དང་། རྩ་ཐིག་རླུང་གསུམ་དུ་མ་ལས་སྤྱོད་པ་དང་། གཞན་ཡང་རྟོགས་ཐབས་ཀྱི་ཡན་ལག་མང་པོ་སྟེ། ཆུ་གཏོར་དང་། ནད་གསོ། སློབ་གྲྭ་དང་སྒོམ་གྲྭ་གཙུག་ཅིང་དེ་ལ་བཀུར་ཏི་བྱ་བ་དང་། ཉ་སྟོང་དང་བརྒྱད་གསུམ་ལ་སོགས་ལ་དུས་མཆོད་བྱ་བ་དང་། ཀློག་འདོན། ཆོས་སྦྱིན་པ། ཆོས་འཁོར་བྱ་བ། ལམ་འཕྲང་བཅོས་པ། བྱམས་སྙིང་རྗེ་དགའ་བ་བཏང་སྙོམས་ཏེ་ཚད་མེད་བཞི་དང་། ཕལ་པ་ལ་སྦྱིན་གཏོང་། སཱཙྪ། བཤགས་པ། ཡིག་བརྒྱ། སྦྱིན་སྲེག །ལྷ་དང་གསུང་རབ་བྲི་བ། དགེ་བའི་དཔུང་ཚོགས་ཐམས་ཅད་ལ་འབད་པར་བྱའོ། །དེ་དག་ནི་བརྒྱུད་པ་ཡིན་ལ། དངོས་སུ་ལྟ་བ་གཏན་ལ་ཕབ་པའི་རྒྱུ་ནི་ལུང་རིགས་པ་མན་ངག་རྣམ་པར་གསུམ་གྱི་སྒོ་ནས་གཏན་ལ་ཕབ་དགོས་པ་ཡིན་ཏེ། གསང་སྒྲོན་ལས། དེ་བཞིན་བདེ་བར་གཤེགས་པའི་རྒྱུད། །བླ་མ་མཁས་པའི་མན་ངག་དང་། །རང་གི་ཉམས་ཀྱིས་བྱེ་བྲག་རྣམས། །ཚད་མ་གསུམ་ལ་བརྟེན་ནས་ནི། །ཞེས་པ་དང་། སྒྱུ་འཕྲུལ་རྡོ་རྗེ་ལས། ལུང་དང་མན་ངག་རིགས་པ་ཡི། །ཚད་མ་དག་གིས་གང་གཞལ་བ། །གཞལ་བྱེད་དེ་ཡང་ཚད་མར་འགྱུར། ཞེས་སོ། །དེ་ཡང་གཏན་ཚིགས་ལ་གཉིས་ཏེ། འདི་ལ་བརྩེགས་སྡེབ་གཅིག་བྱ་སྟེ། ཐུན་མོང་མ་ཡིན་པ་དང་། ཐུན་མོང་གི་གཏན་ཚིགས་སོ། །དང་པོ་ལ་གཉིས་ཏེ། ཚིག་དོན་མི་མཐུན་པ་དང་། ཚིག་དོན་མཐུན་པའོ། །དང་པོ་ནི་ཀུན་ཡིན་གང་མ་ཡིན་གྱི་གཏན་ཚིགས་དང་། མ་སྤངས་མི་ལྡན་གྱི་གཏན་ཚིགས་སོ། །གཉིས་པ་ཚིག་དོན་མཐུན་པ་ལ་གཉིས་ཏེ། ཚད་མ་བཀའ་གཞུང་གི་གཏན་ཚིགས་དང་། སྒྲ་མཐུན་དོན་དཔགས་ཀྱི་གཏན་ཚིགས་སོ། །དང་པོ་ལ་བཞི་སྟེ། དག་པ་གསུམ། མཉམ་པ་བཞི། རྟོགས་པ་བཞི། བདག་ཉིད་ཆེན་པོའི་དང་། རང་བཞིན་བདེན་པ་གསུམ་གྱི་གཏན་ཚིགས་སོ། །གཉིས་པ་སྒྲ་མཐུན་དོན་དཔགས་ལ་བཞི་སྟེ། རང་སྤྱིའི་གཏན་ཚིགས་དང་། མཐའ་བྲལ་གྱི་དང་། རྣམ་པར་དབྱེ་བའི་དང་། མཚོན་པ་དཔེའི་གཏན་ཚིགས་རྣམས་ཀྱིས་གཏན་ལ་ཕབ་ལུགས་ནི། རྩ་རྒྱུད་བསྡུས་པ་དང་། རྒྱས་པ་དང་། བཤད་རྒྱུན་དང་། མན་ངག་ལམ་རིམ་ལ་སོགས་པ་རྣམས་ལས་གྲགས་པ་རྣམས་ཀྱིས་ལྟ་བ་རྟོགས་པའི་རྐྱེན་བྱས་ཏེ། དཔེར་ན་རི་རྒྱལ་ལྷུན་པོའི་ཁ་ནས་ཐམས་ཅད་གསལ་བ་ལྟ་བུར་འཁོར་འདས་དབྱེར་མེད་མ་འདྲེས་ཡོངས་རྫོགས་ཀྱི་དོན་མཐོང་བ་གཅེས་སོ། །དེ་ཡང་མཐོང་བ་ལ་རྒྱུ་རྐྱེན་འཚོགས་དགོས་པས། དེ་ལ་གཉིས་ཏེ། རྒྱུ་དང་། རྐྱེན་ནོ། །དང་པོ་ལ་གཉིས་ལས། མཚུངས་ལྡན་གྱི་རྒྱུ་ནི་ཡེ་གདོད་མ་ནས་ཤེས་རབ་རང་བཞིན་མེད་པ་དང་། ཐབས་འགག་པ་མེད་པ་གཉིས་དབྱེར་མེད་དུ་རང་ལ་གནས་པ་ཡིན་ཏེ། ལམ་ཆུང་ལས། གདོད་ནས་ཤེས་རབ་ལྔ་ཡིན་མཚུངས། །ཞེས་སོ། །གཉིས་པ་ལྷན་ཅིག་བྱེད་པའི་རྒྱུ་ནི། ཡེ་ནས་གནས་པའི་དོན་དེ་ཉིད་གོང་དུ་བཤད་པའི་གཏན་ཚིགས་རྣམས་ཀྱིས་གཏན་ལ་ཕབ་ཅིང་ངོ་སྤྲོད་པ་ལ་བྱ་སྟེ། དེ་ཉིད་ལས། ཅེས་སྨོས་ལ་སོགས་ལྷན་ཅིག་བྱེད། །ཅེས་སོ། །གཉིས་པ་རྐྱེན་ལ་བཞི་སྟེ། དམིགས་པའི་རྐྱེན་དང་། བདག་པོ་དང་། རྒྱུའི་དང་། དེ་མ་ཐག་པའི་རྐྱེན་ནོ། །དང་པོ་ནི། ཆོས་རང་དང་སྤྱིའི་མཚན་ཉིད་ལ་བརྟེན་ནས་རྟོགས་དགོས་པ་དང་། གཉིས་པ་ནི། བླ་མ་རྡོ་རྗེ་སློབ་དཔོན་གྱིས་གཏན་ཚིགས་རིམ་པས་དེ་དག་ངོ་སྤྲད་པ་དང་། གསུམ་པ་ནི། རང་བཞིན་གྱི་དབང་རྣོན་དང་། སྦྱངས་པའི་དབང་རྣོན་གཉིས་ཀྱིས་རྟོགས་དགོས་པ་དང་། བཞི་པ་ནི། དམིགས་རྐྱེན། བདག་རྐྱེན། རྒྱུན་རྐྱེན་དང་གསུམ་འཛོམ་པའི་དེ་མ་ཐག་གི་སྐད་ཅིག་ལ་ངོ་འཕྲོད་དགོས་པ་ཡིན་ཏེ། དེ་ཉིད་ལས། དེས་ན་རང་སྤྱིའི་མཚན་ཡུལ་ལ། །བཤེས་གཉེན་བདག་པོ་རིམ་དེ་དག །དངས་པའི་འོད་དང་བག་ཆགས་རྒྱུས། །ཞེས་སོ། །ཡང་རྟོགས་ཐབས་རྒྱུ་རྐྱེན་དེ་དག་བསྡུས་ན། ལམ་རིམ་ལས། གང་དག་མཉན་བསམ་ཤེས་རབ་ཚེ། །ཉན་ཅིང་ཐོས་འཛིན་བསམ་པ་དང་། །བསམ་པའི་ཚེ་ན་རྟོག་དཔྱོད་པ། །གཉིས་པོ་དེ་དག་ཤེས་པའི་རྒྱུ། །མཁན་པོ་ལུང་དང་མན་ངག་བཅས། །ལྷན་ཅིག་བྱེད་པའི་རྐྱེན་དུ་འདོད། །རང་བཞིན་བདུན་དང་མཚུངས་ལྡན་པ། །གཅིག་ཤོས་རྒྱུ་རུ་ངེས་པ་ཡིན། །ཅེས་སོ། །དེ་ལྟར་གཏན་ཚིགས་རྒྱུ་རྐྱེན་གང་གི་ཐོག་ནས་གྲུབ་མཐའ་བདེན་པ་དབྱེར་མེད་ཀྱི་ངེས་ཤེས་སྐྱེས་པའང་། བདེན་གཉིས་དབྱེར་མེད་ཡིན་མིན་གྱི་ཐེ་ཚོམ་ཟ་བས་ཡིན་མིན་ལ་རྟོག་དཔྱོད་བྱས་པས་ཡིད་གཉིས་སུ་ཞུགས་པས། ཐ་དད་དུ་བྱུང་བསམ་གྱི་སོམ་ཉི་ཟ་བ་དེ་དག་མེད་པ་ལ་བདེན་པ་དབྱེར་མེད་ཀྱི་ལྟ་བར་བརྗོད་ཀྱིས། དེའང་བདེན་པ་དབྱེར་མེད་བྱུང་སེམས་ཀྱི་ངེས་འཇོག་གི་བློས་རྟོག་དཔྱོད་མེད་པ་ཡིན་ཏེ། དཔེར་ན་གསེར་གླིང་རྒྱུས་བསྟན་པ་བཞིན་ཏུ་བློ་དེ་ཉིད་རང་རིག་པའི་ཡེ་ཤེས་སུ་ཤར་བས་འཁོར་འདས་ཀྱི་ཆོས་གང་ཡང་དགག་བསྒྲུབ་དང་སྤང་བླང་མེད་པའི་རྒྱུ་གཏན་ཚིགས་དེ་ལས། གྲུབ་མཐའི་ངོ་བོ་དགག་བསྒྲུབ་དང་བྲལ་བ་འབྱུང་བའི་དོན་ཡིན་ཏེ། དེ་ཉིད་ལས། དགག་པ་མེད་པས་བླང་མེད་ཕྱིར། །མཐའ་ཡི་གཞུང་དུ་བསྒྲུབ་མི་དགོས། །ཞེས་པ་དང་། གསལ་བཀྲ་ལས། ལྟ་བ་ཕྱོགས་རིས་མི་ཕྱེད་པ། །སྤྱོད་པ་བླང་དོར་མི་བྱའོ། །ཞེས་ལྟ་སྤྱོད་འབྲེལ་པའི་ཕྱིར་རོ། །གསུམ་པ་ངོ་བོ་ལ་བཞི་སྟེ། བགྲང་། དང་པོ་ངོ་བོ་དངོས་དང་། དྲང་། གྲུབ་མཐའ་རྟོགས་པའི་ངོ་བོ་ནི། མིག་ལ་སོགས་པའི་དབང་པོ་དྲུག་གི་ཡུལ་དྲུག་ཏུ་རྣམ་ཤེས་དྲུག་འཆར་ནས་སྣང་བ་དེ་ཡང་། ལུས་སྣང་སེམས་གསུམ་ཟུང་འཇུག་ཏུ་རྟོགས་པའི་སྤྱན་ལྟ་བ་ལ་མཆོག་ཏུ་བརྗོད་པ་ནི། ཤེས་རབ་རང་བཞིན་མེད་པ་དོན་དམ་བདེན་པ་དང་། ཡུལ་དུ་ཤར་བའི་ཤེས་པ་དང་བཅས་རང་སྣང་འགག་པ་མེད་པ་ཀུན་རྫོབ་བདེན་པ་གཉིས་དབྱེར་མེད་པའི་དོན་མངོན་སུམ་དུ་རྟོགས་པ་ནི། རྗེས་དཔག་གི་རྟོགས་པ་བས་མཆོག་གི་དོན་ཡིན་ནོ། །དེ་ལྟར་མངོན་སུམ་བཞི་ལས། རང་རིག་པའི་མངོན་སུམ་དུ་རྟོགས་པའི་ཡིད་རང་བྱུང་གི་ཡེ་ཤེས་མཐོང་བའི་དུས་སུ། མདུད་པ་གཅིག་གྲོལ་བས་དོ་ཐག་ཀུན་གྲོལ་བ་ལྟར། ཚོགས་བརྒྱད་ཚོགས་དྲུག་རང་སྣང་གི་ཡེ་ཤེས་གཅིག་པོ་ལས་མ་གཡོས་ཤིང་ཡེ་ཤེས་ལྔ་མ་འདྲེས་ལ་ཡོངས་སུ་རྫོགས་པར་རྟོགས་པ་ཡིན་ཏེ། ལམ་རིམ་ལས། སྔ་མ་ཁ་ཅིག་མངོན་སུམ་ལ། །དྲུག་གམ་བརྒྱད་ཉིད་གནས་གྱུར་ཕྱིར། །ཤེས་རབ་དབང་དྲུག་ཚུལ་གནས་བརྗོད། །ངེས་པར་མ་ནོར་མཐོང་བ་ཡང་། །ཡེ་ཤེས་ལྔ་རུ་གསལ་བའི་ཕྱིར། །བརྒྱད་ཀྱི་ངོ་བོ་དེ་ཉིད་དོ། །ཞེས་གསུངས་པས། དེ་ལྟར་ཤེས་རབ་ཀྱི་སྤྱན་གྱི་ལྟ་བ་དམ་པའི་ངོ་བོ་དེ་ཁོ་ན་ཉིད་རྟོགས་པ་ཡིན་ཏེ་བས་ན། དེ་ལ་ཕྱིའི་ཡུལ་དང་ནང་གི་ལུས་སེམས་ཐ་དད་མེད་པར་ཐམས་ཅད་རིག་པ་རང་སྣང་བའི་ཕྱིར་ཏེ། དེ་ཉིད་ལས། ལྔ་པ་དམིགས་བྱེད་མེད་ཕྱིར་ཏེ། །དེ་བས་ཡུལ་མེད་རང་གསལ་བས། །དབྱིངས་དང་རིག་པ་གཉིས་མེད་པར། །དེ་བཞིན་ཉིད་དུ་རྡོ་རྗེའི་རིགས། །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་རང་སྣང་བ། །ཞེས་གསུངས་པས། གཞི་མཐའ་བྲལ་ལྷུན་གྲུབ་ཀྱི་དོན་ཆོས་ཉིད་སྤྱིའི་མཚན་ཉིད་དང་། ཁྱད་པར་རང་གི་མཚན་ཉིད་གཉིས་མ་འདྲེས་ལ་ཡོངས་སུ་རྫོགས་པར་མཐོང་བ་མེད་པའི་ཚུལ་དུ་མཐོང་བ་སྟེ། ཐབས་ཞགས་ལས། མཐོང་བ་མེད་པའི་ཚུལ་དུ་མཐོང་བའོ། །ཞེས་པ་དང་། སེང་གེ་རྩལ་རྫོགས་ལས། ང་དང་བདག་ཏུ་མེད་པས་ན། །ཆོས་ཉིད་མ་དང་འཕྲད་པ་ཡིན། །ཅེས་སོ། །དེ་ལ་མངོན་སུམ་དང་རྗེས་དཔག་གི་གོ་དོན་ནི། སྤྱིར་ཆོས་ལ་ཚད་མ་དང་ཚད་མིན་གཉིས། ཚད་མིན་ལ་འགྲོ་བ་རིགས་དྲུག་གི་འཁྲུལ་སྣང་། མུ་སྟེགས་ཀྱི་ལོག་ཤེས། དེ་མ་ཡིན་དེར་འཛིན། སྣང་བ་ངེས་པ། ཡིད་དཔྱོད་དང་ལྔའོ། །ཚད་མ་ལ་བཞི་སྟེ། ངོ་བོ་དང་། མཚན་ཉིད་དང་། ངེས་ཚིག་དང་། རྣམ་གྲངས་སོ། །དང་པོ་ནི། སྔར་མ་རྟོགས་པའི་དོན་ལ་སྒྲོ་འདོགས་ཆོད་པར་བྱེད་པའོ། །གཉིས་པ་ནི། གང་ཟག་གི་གཞལ་བྱ་བདེན་རྟོགས་དང་ལྡན་པའོ། །གསུམ་པ་ནི། བསླུ་བ་མེད་པའི་དོན་དེ་རྒྱུད་ལ་ངེས་པར་བྱས་པའོ། །བཞི་པ་རྣམ་གྲངས་ནི་གཉིས་ཏེ། མདོ་ལས། མངོན་སུམ་དང་ནི་རྗེས་དཔག་གཉིས། ཞེས་གསུངས་པས། མངོན་སུམ་དང་། རྗེས་དཔག་གོ། །དང་པོ་ལ་བཞི་སྟེ། ངོ་བོ་དང་། མཚན་ཉིད། ངེས་ཚིག་དང་། རྣམ་གྲངས་སོ། །ངོ་བོ་ནི་ཡུལ་ཤེས་འཕྲད་པའོ། །མཚན་ནི་རྟོག་བྲལ་མ་འཁྲུལ་བའོ། །ངེས་ཚིག་ནི་ཐེ་ཚོམ་མེད་པར་དོན་ངེས་པའོ། །རྣམ་གྲངས་ནི་བཞི་སྟེ། དབང་པོའི་མངོན་སུམ་དང་། ཡིད་ཀྱི་དང་། རྣལ་འབྱོར་གྱི་དང་། རང་རིག་པའི་མངོན་སུམ་མོ། །དང་པོ་ནི། སྐད་ཅིག་མ་དང་པོ་ལ་ཡུལ་ཤེས་འཕྲད་པ་ཙམ་མོ། །གཉིས་པ་ནི་དེའི་རྗེས་སུ་ཞུགས་པའི་ཤེས་པ་ལས་ཉིད་རང་གི་ངོ་བོར་ཐེ་ཚོམ་ཆོད་པའོ། །གསུམ་པ་ནི་གོམས་པ་ལས་བྱུང་བ་སྟེ་རྣམ་པར་མི་རྟོག་པའི་ཡེ་ཤེས་གསལ་སྟོང་ཉམས་སུ་མྱོང་བའོ། །དེ་ཡང་དག་པར་འཇིག་རྟེན་པའི་མཁྱེན་པའི་ཡེ་ཤེས་སོ། །བཞི་པ་ནི། བདེན་གསུམ་དབྱེར་མེད་རང་རིག་པའི་མངོན་སུམ་དུ་རྟོགས་པ་སྟེ། དབྱེ་བ་མེད་པའི་ཡེ་ཤེས་སོ། །དེ་ལྟར་གསང་སྔགས་ཀྱི་ལམ་གང་ཟག་བློ་རིམ་གྱིས་པས། ལྟ་བ་རྟོགས་ཐབས་ཀྱི་སྒོམ་པའི་སྐབས་སུ་མངོན་སུམ་བཞི་རིམ་གྱིས་རྟོགས་ཤིང་ཉམས་སུ་མྱོང་བ་ཡིན་ནོ། །ལྟ་བ་རྟོགས་པ་ངོ་བོའི་དུས་སུ། མངོན་སུམ་བཞི་ཅིག་ཆར་དུ་རྟོགས་པ་ཡིན་ནོ། །དབང་པོའི་མངོན་སུམ་རིག་པ་གཅེར་འཕྲད། ཡིད་ཀྱི་མངོན་སུམ་ཡིད་འགྱུ་བ་རང་གྲོལ། རང་རིག་མངོན་སུམ་སྣང་སྟོང་དབྱེར་མེད། རྣལ་འབྱོར་མངོན་སུམ་ཆོས་ཀུན་མ་འདྲེས་ལ་ཡོངས་སུ་རྫོགས་པ་ཡིན་ནོ། །དེ་དག་རྒྱས་པར་གཞན་དུ་ཤེས་པར་བྱའོ། །གཉིས་པ་རྗེས་དཔག་ལ་བཞི་སྟེ། ངོ་བོ་དང་། མཚན་ཉིད་དང་། ངེས་ཚིག་དང་། རྣམ་གྲངས་སོ། །ངོ་བོ་ནི་ཤེས་པ་གང་ཞིག་དོན་དང་འབྲེལ་ཞིང་དོན་གཞན་མཐོང་བ་ལས་བྱུང་བའོ། །མཚན་ཉིད་ནི་ཚུལ་གསུམ་ངེས་པ་ལས་སྐྱེས་པའི་ཤེས་པ་མ་འཁྲུལ་བའོ། །ངེས་ཚིག་ནི་རྟགས་གཟུང་ཞིང་འབྲེལ་པ་དྲན་པའི་རྗེས་སུ་དཔག་པའོ། །དབྱེ་བ་ལ་གསུམ་སྟེ། རང་བཞིན་གྱི་གཏན་ཚིགས་དང་། འབྲས་བུའི་གཏན་ཚིགས་དང་། མི་དམིགས་པའི་གཏན་ཚིགས་སོ། །དང་པོ་ནི། དེ་ལ་སྦྱོར་བ་དགོད་ན། སྣང་བ་ཆོས་ཅན། མི་རྟག་པ་སྟེ་ཞེས་དམ་བཅའ། སྐད་ཅིག་མའི་སྐྱེ་འགག་དང་བཅས་པའི་ཕྱིར། དཔེར་ན་མྱུ་གུ་སྔོན་པོ་བཞིན་ནོ། །གཉིས་པ་ནི། ལ་ཆོས་ཅན། མེ་ཡོད་དེ་ཞེས་དམ་བཅའ། རྟགས་དུ་བ་མཚན་ཉིད་པ་འདུག་པའི་ཕྱིར་དཔེར་ན་ཚང་ཁང་བཞིན་ནོ། །གསུམ་པའི་གཏན་ཚིགས་ནི། ས་ཕྱོགས་འདི་ཆོས་བུམ་པ་མེད་དོ་ཞེས་དམ་བཅའ། ཡོད་ན་སྣང་རུང་ལ་མི་དམིགས་པའི་ཕྱིར། དཔེར་ན་རི་བོང་རྭ་བཞིན་ནོ། །དེ་དག་རྒྱས་པར་གཞན་དུ་ཤེས་པར་བྱའོ། །གཉིས་པ་མཐོང་བའི་ཁྱད་པར་དང་། དྲང་། འོ་ན་ཚེ་དབང་དང་ཁྱད་མེད་དམ་ཞེ་ན་ཡོད་དེ། ཟག་བཅས་ཀྱི་མཉམ་གཞག་ཏུ་ཆོས་ཉིད་དེ་ལྟར་དུ་མཐོང་ནའང་། རྗེས་ཐོབ་ཏུ་ལོག་རྟོག་མ་ཟད་པའི་སྟོབས་ཀྱིས། དཔེར་ན་འཁོར་ལོ་སྒྱུར་རྒྱལ་གྱི་བུ་ཆུང་དེའི་ཤ་ཁྲག་དང་རིགས་ནི་རྒྱལ་པོ་ལས་འགྱུར་བ་མེད་ཀྱང་། ལུས་སེམས་སྟོབས་མ་རྫོགས་པ་དང་། གདན་སར་མ་བཞག་པས་རྒྱལ་པོའི་མངའ་ཐང་ཐམས་ཅད་ལ་དབང་བསྒྱུར་མི་ནུས་པ་བཞིན་དུ། ཕྱག་རྒྱ་སྤྲོས་བཅས་ཀྱི་སྐབས་སུ་ཆོས་ཉིད་རང་མཚན་མཐོང་ཡང་རྒྱལ་བུ་སྟོབས་མ་རྫོགས་པ་དེ་ལྟ་བུར། ལྟ་སྒོམ་སྟོབས་མ་རྫོགས་པ་དེ་བས་ན་མཉམ་རྗེས་ཀྱི་རྩོལ་བ་ཡོད་ལ། ཚེ་ལ་དབང་བསྒྱུར་བའི་རིག་འཛིན་ནི་མཉམ་རྗེས་འདྲེས་པས་ལྟ་སྒོམ་སྟོབས་རྫོགས་པ་དང་། སྤྲོས་པ་ནི་ལྟ་སྒོམ་སྟོབས་མ་རྫོགས་པས་ཁྱད་པར་དེ་ལྟར་ཡོད་པར་འགྱུར་བ་ཡིན་ཏེ། སྐབས་འགྲེལ་ལས། གསུམ་པ་བདེན་གཉིས་རང་མཚན་དུ། །འགོ་མཐོང་གཉིས་མེད་བཟོད་མ་ཐོབ། །ཅེས་སོ། །གསུམ་པ་ངེས་ཚིག་དང་། དྲང་། གསང་བའི་སྙིང་པོ་སྒྱུ་འཕྲུལ་རྒྱས་པའི་རྒྱུད་ལས་འདི་སྐད་དུ་གསུང་སྟེ། ལུས་སྣང་སེམས་གསུམ་ཟུང་འཇུག་གི་ངོ་བོ་ལ་ལྟ་བར་བྱ་བའི་ཡུལ་དང་བལྟ་བར་བྱ་བའི་མཁན་པོ་གཉིས་མེད་པའི་ངང་ལ། ཐམས་ཅད་གསལ་ཞིང་སྒྲིབ་གཡོགས་དང་བྲལ་བས་ཡེ་ཤེས། དེ་མ་འདྲེས་པར་གསལ་བས་ན་སྒྲོན་མ། དེ་རྒྱུན་ཆད་མེད་པར་སྦྲེང་བར་ཤར་བ་ནི། ཕྱོགས་བཞི་མཚམས་བརྒྱད་སྟེང་འོག་གཉིས་དང་བཅུའི་ཞིང་ཁམས་དག་མ་དག་ཐམས་ཅད་ཀུན་མ་འདྲེས་ཡོངས་རྫོགས་སུ་མཐོང་ལ། ཡུལ་ཡུལ་ཅན་གང་དུ་ཡང་མི་མཐོང་བ་ནི། ཤེས་རབ་སྤྱན་གྱི་ལྟ་བའི་མཆོག་གོ། །དེ་ཡང་རིག་པར་རང་ཤར་གྱི་རྒྱུད་ལས། ལྟ་བ་ཉིད་ལ་བལྟ་རུ་མེད། །ལྟ་བ་སེམས་ཀྱི་དྲི་མ་ཡིན། །དྲི་མ་དག་པའི་ཆོས་ཉིད་ལ། །བལྟ་བྱ་ལྟ་བྱེད་གཉིས་དང་བྲལ། །ཅེས་པ་དང་། ཁོག་གཞུང་ལས། ཡུལ་མེད་གསལ་ཕྱིར་ལྟར་ཞེས་བཤད། །ཅེས་སོ། །བཞི་པ་ཞར་ལ་སྤྱིའི་མཚན་ཉིད་དུ་འདོད་པ་ནོར་བ་དེ་ལ་གསུམ་སྟེ། བགྲང་། དང་པོ་སྤྱིའི་མཚན་ཉིད་དུ་ལྟ་བས་གསང་སྔགས་མི་རྟོགས་པ་དང་། དྲང་། ཐམས་ཅད་རང་རིག་པའི་མངོན་སུམ་དུ་རྟོགས་པ་ལྟ་བའི་ངོ་བོ་ཡིན་པ་དེ་བས་ན། སྤྱི་མཚན་གྱི་གོ་བ་ལ་ལྟ་བའི་ངོར་གང་ཟག་གང་ཞིག་ཞེན་ཏེ་མི་ཞེན་ནོ། །དེ་ཅིའི་ཕྱིར་ཞེ་ན། གསང་སྔགས་ཀྱི་དོན་ཡིད་ཡུལ་དུ་བྱས་པས་ལྟ་བའི་ངོ་བོ་གང་ཟག་གང་གིས་རྙེད་དེ། བདེན་གསུམ་དབྱེར་མེད་ཀྱི་དོན་མི་རྙེད་པའི་ཕྱིར་རོ། །གཉིས་པ་ཡིད་ཀྱི་རྟོག་པས་གཟུང་འཛིན་དུ་གོལ་བ་དང་། དྲང་། དབྱེར་མེད་སྐྱེ་འཇིག་དང་བྲལ་བ་རྡོ་རྗེའི་དོན་དེ་ཉིད་ཡིིད་ཀྱི་ཡུལ་དུ་བྱས་ནས་སྒྲ་ཙམ་ལ་བརྟེན་པས་གོལ་བ་ཡིན་པས། གོལ་ཚུལ་ནི་ཆོས་ཉིད་འདུས་མ་བྱས་པ་སྟོང་པ་ཕྱོགས་གཅིག་ཙམ་གྱི་ངོ་བོ་ལ་གཟུགས་དབྱིབས་ཁ་དོག་དང་། སྐྱེ་འཇུག་མི་སྣང་བསམ་ནས་ཡུལ་དུ་དམིགས་པ་དག་ལ་བརྟེན་ནས་གསང་སྔགས་ཀྱི་ལྟ་བའི་དོན་ནི། ངེས་པར་འདི་ཁོ་ནའོ་སྙམ་ནས་ལྟ་བ་དེའི་རྗེས་ལ་རྣལ་འབྱོར་མི་རྟོག་པའི་དོན་ལ་བསྒོམ་དགོས་ཅེས་རྒྱུད་གཞུང་ནས་བཤད་པ་ཡང་། ལྟ་བ་དེ་དང་ཕྱོགས་ནས་མཐུན་པར་སྐྱེ་བར་འདོད་པ་ནི་ཡིད་ཡུལ་གྱི་བློས་ངེས་པར་འཇོག་པས་ཆོས་ཉིད་ཡུལ་དུ་རྟོག་པའི་ཕྱིར་གཟུང་འཛིན་ཅན་དུ་གྱུར་བས་མི་གྲོལ་བའོ། །དེ་ཡང་གསང་ཐིགས་ལས། ངེས་པའི་ཤེས་པ་མ་སྐྱེས་ཕྱིར། །རང་རིག་ཚད་དང་མི་ལྡན་ཏེ། །གཟུང་འཛིན་མཚན་མ་མ་གྲོལ་བས། །རང་གིས་གར་སྐྱེས་མི་ཤེས་པས། །འོལ་ཕྱིར་ཕྱོགས་སུ་གང་བསྒོམས་ཀྱང་། །ལོང་བའི་གོམ་པ་བཞིན་ཏེ་ཕྱལ་བར་གོལ། །ཅེས་སོ། །གསུམ་པ་སྒྲ་ཅི་བཞིན་དུ་ལྡོག་པ་ཚོལ་བས་ལྟ་བ་དམ་པས་དབུལ་བའོ། །དྲང་། ཚོང་པ་ཡུལ་ཀུན་ཏུ་རྒྱུ་བས་ཐམས་ཅད་ཤེས་པ་དང་། བྱིས་པ་གཞོན་ནུ་ནི་གར་ཡང་མ་ཕྱིན་པས་ཅི་ཡང་མི་ཤེས་པས་དེ་གཉིས་ལ་ཤེས་རྒྱ་ཆེ་ཆུང་ཡོད་པ་ལྟར་དུ། སྒོམ་པ་ཏིང་ངེ་འཛིན་གོམས་མ་གོམས། མཆོག་ལྟ་བ་རྟོགས་མ་རྟོགས། གཞུང་ལས་ཐོས་པ་བྱས་མ་བྱས། དེའི་ཁྱད་པར་ནི། རིགས་བརྒྱད་ཀྱི་དབྱེ་བ་སྟོན་པ་སྒྱུ་འཕྲུལ་བརྒྱད་བཅུ་པའི་ལེའུ་ལྔ་པ་ལས་ནི་འདི་ལྟ་སྟེ། རིགས་བརྒྱད་ལས། དང་པོ་ཆོས་ཉིད་ཀྱི་རིགས་ནི། སྒྱུ་འཕྲུལ་རྒྱས་པ་ལས། ཐམས་ཅད་ཀུན་ལ་ཡང་ཁྱབ་པར་ཡོད་དེ། ནམ་མཁའ་ཀུན་ལ་ཁྱབ་པར་ཡང་གནས་སོ། །དེ་ལྟར་ཆོས་ཉིད་ཀྱི་རིགས་དང་ནམ་མཁས་ཀུན་ལ་ཁྱབ་ཀྱང་། མངོན་པར་ཐར་པའི་དོན་མ་རྟོགས་ན། མེ་ལོང་གཡས་གཡོགས་པ་དང་འདྲ་སྟེ། གཟུགས་བརྙན་སྣང་བའི་བྱ་བ་བྱེད་མི་ནུས་སོ། །ཞེས་པ་དང་། གཉིས་པ་བླ་ན་མེད་པའི་ཐེག་པའི་རིགས་ནི། དེ་ཉིད་དོན་རྟོགས་རང་རིག་རྒྱལ་པོ་ཡི། །རྒྱ་མཚོ་ཆེན་པོར་ཆུ་ཀླུང་འབབ་པར་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་པ་དང་། གསུམ་པ་བྱང་ཆུབ་སེམས་དཔའི་ཐེག་པའི་རིགས་ནི། དེ་ཉིད་ལས། བདག་མེད་གཉིས་རྟོགས་ཕ་རོལ་ཕྱིན་པ་ཡི། །ས་བཅུ་རིམ་གྱིས་སྒོམ་པའི་རྣལ་འབྱོར་པ། །སངས་རྒྱས་སར་བགྲོད་གོ་འཕང་ཐོབ་པའི་ལམ། །བདེན་པ་གཉིས་ཀྱིས་རབ་ཏུ་ཐོབ་པར་འགྱུར། །ཞེས་པ་དང་། བཞི་པ་རང་རྒྱལ་གྱི་ཐེག་པའི་རིགས་ནི། དེ་ཉིད་ལས། ཕྱི་ནང་རྟེན་འབྲེལ་སྒྱུ་མ་མིག་ཡོར་ཚུལ་ཤེས་པས། །དངོས་པོའི་གཟུགས་ལ་ཐོགས་མེད་རབ་ཏུ་འཇུག །དགེ་བཤེས་མི་སློབ་རང་གི་རིག་པས་རྟོགས། །བྱང་ཆུབ་སར་བགྲོད་ཡིད་བཞིན་བདེ་བའི་མཆོག །ཅེས་པ་དང་། ལྔ་པ་ཉན་ཐོས་ཀྱི་ཐེག་པའི་རིགས་ནི། དེ་ཉིད་ལས། བདེན་བཞིའི་དོན་རྟོགས་རབ་ཏུ་སྤང་བ་ཡི། །ཡེ་ཤེས་བཅུ་དྲུག་ཆས་སྦྱངས་རབ་ཞི་བའི། །རྒྱུན་ཞུགས་ལ་སོགས་རིམ་པར་སྦྱངས་ནས་ནི། །ཉོན་མོངས་དགྲ་རྣམས་ཞི་བའི་ས་རུ་འགྲོ། །ཞེས་པ་དང་། དྲུག་པ་རིགས་མ་ངེས་པ་ནི། དེ་ཉིད་ལས། ཐེག་པ་གང་དུ་བསྟན་པར་མ་ངེས་པའི། །ཡང་ན་ཀུན་ལ་མཐུན་བྱས་འཇམ་པར་འཇུག །ཡང་ན་ངེས་མེད་འདི་ཞེས་བསྟན་དུ་མེད། །འདི་ནི་མ་ངེས་རྡོ་རྗེ་འཆང་གིས་གསུངས། །ཞེས་པ་དང་། བདུན་པ་ལྷ་དང་མིའི་ཐེག་པའི་རིགས་ནི། དེ་ཉིད་ལས། དགེ་བཅུ་སྤྱོད་ཅིང་མི་དགེ་སྤང་བྱེད་པ། །འདོད་པའི་ཁམས་ཀྱི་ལྷ་མིར་སྐྱེ་བའི་རྒྱུ། །ཚད་མེད་བཞིར་སྤྱོད་མི་གཡོ་སྒོམ་བྱེད་པ། །ཚངས་གནས་ལ་སོགས་སྐྱེ་བའི་རྒྱུ་ཡིན་ནོ། །ཞེས་པ་དང་། བརྒྱད་པ་རིགས་ཆད་པ་ནི། དེ་ཉིད་ལས། ཆོས་ཀྱི་དབྱིངས་ཀྱིས་ཀུན་ལ་ཁྱབ་གྱུར་ཀྱང་། །རང་རིགས་རྟོགས་པའི་སྐལ་དང་མི་ལྡན་ན། །ཅི་ལྟར་དམུས་ལོངས་མདུན་དུ་མདོག་བསྟན་བཞིན། །འདི་ནི་སྐལ་མེད་རིགས་ཆད་པ་ཡིན་ནོ། །ཞེས་པས་དེ་རྣམས་ཀྱི་ལྟ་བའི་ཁྱད་པར་གསུངས་པའི་ནང་ནས་བླ་མེད་མཆོག་ཡིན་ཏེ། དེ་ཉིད་ཀྱི་ལྟ་བ་ལ་དག་པ་གསུམ། མཉམ་པ་བཞི། གཉིས་མེད་ལ་སོགས་པའི་ཚིག་གི་རྣམ་གྲངས་ཙམ་ཤེས་པ་ལ་ལྟ་བ་དམ་པའི་དོན་ཡིན་པར་འདོད་ནས་སྒྲའི་རྗེས་སུ་འབྲང་བས་གསང་སྔགས་ལྷུན་གྲུབ་ཀྱི་ལྟ་བ་ལས་གོལ་བ་སྟེ། གོལ་ལུགས་ནི་དག་མཉམ་ལ་སོགས་པ་དེ་ཡི་སྒྲ་ཙམ་ལ་བརྟེན་ནས་བརྟགས་དཔྱད་བྱས་པས་ནི་དཔེར་ན་མི་དབུལ་པོས་ཕྱུག་པོའི་ནོར་རྫས་རྣམས་བརྗོད་ཤེས་ཀྱང་ཁོ་རང་ལ་ཅི་ཡང་མེད་པ་བཞིན་དུ། གསང་སྔགས་ཀྱི་འཁོར་འདས་དབྱེར་མེད་པའི་ལྟ་བའི་དོན་མི་རྟོགས་པས་ཁ་འབྱམས་ཚིག་གི་ལྟ་བ་དེ་ཉིད་ཁོ་ནར་གོལ་བ་ཡིན་ཏེ། ལམ་རིམ་ལས། སེམས་ཀྱིས་མཉམ་པ་མ་རྟོགས་ན། །ཚིག་གི་མཉམ་པས་འཚང་མི་རྒྱ། །ཞེས་པ་དང་། སྨྲ་བསམ་ཚིག་ལ་གང་དགའ་བ། །གང་གི་དགོངས་པ་དཔོག་མི་ནུས། །ཚིག་ཚོགས་རྒྱ་མཚོ་ཐོབ་པ་མིན། །ཚིག་གཅིག་ཐོས་ན་ཐོས་པའི་མཆོག །ཅེས་པ་དང་། གཅན་འཕྲང་ལས། གང་ཞིག་མན་ངག་ཁུངས་ཆུབ་ཅིང་། །སྒྲ་ཕྱིར་ཁུངས་འབྱིན་ཆེ་ངག་ཅན། །བསྐལ་པ་བརྒྱད་ཁྲིར་སྡུག་བསྔལ་ཐོབ། །ཅེས་སོ། །བཞི་པ་མ་རྟོགས་པའི་སྐྱོན་དང་། དྲང་། བཞི་པ་སྐྱོན་ནི་སྒྱུ་འཕྲུལ་རྒྱས་པའི་ལུང་ལས་འདི་སྐད་གསུངས་ཏེ། ཐབས་སྤྱོད་པ་རྣམས་ལ་དོན་ལ་མཁས་པ་ལྟ་བའི་རྩིས་ཡི་མ་ཟིན་ན། ལམ་གྱི་རྟེན་ལ་དགེ་བ་བཅུ་སྤྱད་ཅིང་བསྒྲུབས་ནས་སྟེགས་བཅས་ཀྱང་། འབྲས་བུ་ལ་མཐོ་རིས་ཀྱི་ལྷ་དང་མི་རུ་སྐྱེ་ལ། སྐྱེ་ཤི་མེད་པའི་ས་མཐར་ཐུག་གི་འབྲས་བུ་སངས་རྒྱས་མི་ཐོབ་པ་ཡིན་ནོ། །ངེས་དོན་འདུས་པ་ལས། རང་སེམས་མ་རྟོགས་དགེ་བ་བཅུ་ལ་སོགས། །བསྐལ་པ་སྟོང་དུ་ཚོགས་བསགས་སྒྲིབ་སྦྱངས་ཀྱང་། །འབྲས་བུ་སྐུ་གསུམ་སངས་རྒྱས་འབྱུང་བ་མིན། །ཅེས་སོ། །ལྔ་པ་རྟོགས་པའི་ཡོན་ཏན་ནོ། །དྲང་། གྲངས་ཀྱི་ལྔ་པ་ཡོན་ཏན་ནི་རྒྱུད་ལས་ཇི་སྐད་འབྱུང་བ་ནི་གང་ཞེ་ན། ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་ཀྱི་སྙིང་པོ་ནི་ལྟ་བ་ཡིན་ལ། དང་པོ་ལྟ་བ་དེའི་དོན་རྟོགས་ནས་མཐར་འབྲས་བུ་མ་ཐོབ་ཀྱི་བར་དུ་ལྟ་བ་དེ་དང་མ་བྲལ་ན། བར་དུ་ལྟ་བ་དེ་དང་མ་བྲལ་ན། བར་མ་དོར་ཆུད་མི་ཟ་བའམ་ངན་སོང་དང་འཁོར་བར་མི་གཏོང་བ་སྟེ། དཔེ་ཆུ་སྲིན་གྱི་ཕྱག་རྒྱ་སྟེ་བཟུང་ནས་ཕྱིར་གཏོང་བ་མེད་པ་ཅི་བཞིན་དུའོ། །གཞན་ཡང་ཕྱི་ནང་གི་སྤྱོད་ཡུལ་ཐམས་ཅད་ཀུན་ཏུ་སྐུ་དང་ཡེ་ཤེས་སུ་ཤར་བའི་ཡོན་ཏན་ལ་ཚད་དཔག་ཏུ་མེད་པའོ། །གཉིས་པ་ནི། དེའི་རྗེས་སུ་སྒོམ་པ་ཏིང་ངེ་འཛིན་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ལྟ་བ་སྤྱིའི་ཚུལ་དུ་རྟོགས་པ་དེའི་རྗེས་སུ་ལམ་གྱི་གཙོ་བོ་ཏིང་ངེ་འཛིན་དེས་མཆོག་ལྟ་བའི་དོན་དེ་རིམ་གྱིས་གོམས་པར་བྱས་པའི་ཐབས་ནི་འདི་ལྟ་སྟེ། གཉིས་པ་བཤད་དེ་ལ་དྲུག་སྟེ། བགྲང་། དང་པོ་དེ་བཞིན་ཉིད་ཀྱི་ཏིང་ངེ་འཛིན་དང་། དྲང་། འབྱུང་བ་ས་ཆུ་མེ་རླུང་དང་། སེམས་འདུ་བའི་རྟེན་འབྲེལ་ལས་ལུས་གྲུབ་པའི་སྐྱེ་གནས་པར་དོ་དེ་ཉིད། འཆི་ཁ་བར་དོའི་སྐབས་སུ་ལུས་སེམས་འབྲལ་བའི་ཚུལ་ནི་འབྱུང་བ་རིམ་པར་འགག་སྟེ། དེ་ཡང་ཁམས་ཆུ་ལ་ཐིམ། ཆུ་མེ་ལ་ཐིམ། རླུང་ནམ་མཁའ་ལ་ཐིམ། ནམ་མཁའ་ཀུན་གཞིའི་རྣམ་ཤེས་ལ་ཐིམ་སྟེ། ཆོས་ཉིད་ངོ་མ་ཤེས་པའི་བར་དོ་ལ་རིག་པ་རྟོག་མེད་བཞིན་དུ་ཡིན་པ་སྟེ། ལམ་རིམ་ལས། ཤི་བ་དོན་དམ་བདེན་པ་སྟེ། །ཞེས་གསུངས་པས། དཔེ་དང་། སྦྱང་གཞི་དང་། བསླབ་བྱའང་ཡིན་ནོ། །དེའང་བློ་རིམ་གྱིས་པས་ཐོག་མར་དེ་བཞིན་ཉིད་ཀྱི་ཏིང་ངེ་འཛིན་རང་སྒོམ་ཐབས་གང་གི་ཡན་ལག །ལམ་རིམ་ནས་བཤད་པ་བཞིན་དུ་དོན་བཅོ་ལྔ་སྟེ། སྔོན་དགོས་ཐབས་དང་ངོ་བོ་དང་། མི་མཐུན་བཅོས་ཉམས་སྤྱོད་དམ་ཚིག །དྲོད་རྟགས་མཚན་ཡོན་འདའ་ཀ་མ། རང་གི་འབྲས་བུ་རྫོགས་པ་ཡི་སྒོ་ནས་ཉམས་སུ་ལེན་པ་ལ། ཁྱད་པར་དུ་ཏིང་ངེ་འཛིན་རང་གི་ངོ་བོ་ནི་ཚོགས་དྲུག་གི་སྣང་བ་ལ་ཡུལ་ཡུལ་ཅན་གང་དུའང་འདུ་ཤེས་མེད་པར་རང་རིག་པར་གསལ་བཞིན་དུ་སྟོང་པའི་དོན་ལ་མ་ཡེངས་པར་སྒོམ་དགོས་ཏེ། དེ་ཡང་སྒོམ་པའི་རྣལ་འབྱོར་པ་གང་ཡིན་པ་དེ་དག་གི་ལམ་རིམ་ལྟར། ཉམས་གཡོ་ཐོབ་གོམས་བརྟན་མཐར་ཕྱིན་པ་ལྔ་དང་། དྲོད་རྟགས་མཚན་མ་མེ་ལོང་རྫུ་འཕྲུལ་དང་ལྔ་སྟེ་བཅུ་མཐར་ཕྱིན་པ་དང་ལྡན་པ་ཡི་མཐུས། སྔ་མ་དེ་བཞིན་ཉིད་སྒོམ་པ་ལས་ཀྱང་ཕྱི་མ་ཀུན་ཏུ་སྣང་གི་ཏིང་ངེ་འཛིན་ལ་གནས་པར་འགྱུར་རོ། །དེ་ཡང་མདོ་སྟེ་རྒྱན་ལས། སྔ་མ་ལ་བརྟེན་ཕྱི་མ་སྐྱེ། །ཞེས་སོ། །གཉིས་པ་ཀུན་ཏུ་སྣང་གི་ཏིང་ངེ་འཛིན་དང་། དྲང་། དཔེར་ན་ཉི་མ་ལས་འཕོ་བ་མེད་པར་འོད་དུ་སྣང་བ་དང་། ས་བོན་ལས་མྱུ་གུ་དང་། སྒྱུར་ལ་འགྲམ་ཆུ་ལྡང་བ་དང་། སྒྲ་དང་བྲག་ཆར་གྲགས་པ་དང་བཞིར་སྣང་བ་བཞིན་དུ། དེ་བཞིན་ཉིད་ཀྱི་ཏིང་ངེ་འཛིན་ལ་འཕོ་བ་མེད་པར་གདངས་འགག་མེད་དུ་ཀུན་སྣང་གི་ཏིང་ངེ་འཛིན་སྒོམ་པ། དེེ་ཡི་ཡན་ལག་ལ་དོན་བཅོ་ལྔ་བསྟན་པ་ཡང་གོང་གི་དེ་བཞིན་ཉིད་ལྟར་དུ་ཡིན་པས་ན། རྒྱུ་དེ་བཞིན་ཉིད་ཀྱི་ཏིང་ངེ་འཛིན་ལ་བརྟན་པ་ཐོབ་པར་བྱས་ནས། དེ་ཉིད་ཀྱི་རྩལ་རང་ལ་གནས་པའི་ཡེ་ཤེས་འགག་པ་མེད་པར་སྣང་བ་ཀུན་ཏུ་ཁྱབ་པར་སྒོམ་པ་ནི་ངོ་བོ་ཡིན་ཏེ། དེ་ཡང་ཕྱི་སྙིང་རྗེ་དང་། འགྱུ་བ་སྐྱེ་བྱའི་ཡུལ་དང་། ནང་སྐྱེ་བྱེད་ཀྱི་མཁན་པོ་ཐ་དད་མེད་པར་ཡེ་ཤེས་སྒྱུ་མར་རང་སྣང་དུ་སྒོམ་པར་བྱེད་པ་ལ། ཉམས་ལྔ་དང་། དྲོད་རྟགས་རྣམས་ལམ་རིམ་ནས་བཤད་པ་བཞིན་དུ་དེའི་ནུས་མཐུ་རྣམས་རྫོགས་པར་བྱའོ། །གསུམ་པ་ཕྱག་རྒྱ་གཅིག་པའི་ཏིང་ངེ་འཛིན་དང་། དྲང་། ཀུན་ཏུ་སྣང་གི་ཏིང་ངེ་འཛིན་མཐར་ཕྱིན་པ་དེ་ཡི་སྟོབས་ལས་ཕྱག་རྒྱ་གཅིག་པའི་ཏིང་ངེ་འཛིན་སྐྱེས་པ་ལ་ནི་རིམ་ཅིག་ཆར་གཉིས་ལས། དང་པོ་མངལ་སྐྱེས་ནི་དཔེ་རྟེན་འབྲེལ་བཅུ་གཉིས་ཡོད་པ་ལ། བཞི་པའི་སོ་ནས་མིང་གཟུགས་དེ་ལ་སོགས་པ་ལུས་རིམ་གྱིས་འབྱུང་བའམ། གཉིས་པ་གཅིག་ཤོས་ཏེ་བརྫུས་སྐྱེས་ནི་སྐྱེ་མཆེད་དྲུག་ཅིག་ཆར་དུ་སྐྱེ་བ་ཅི་ལྟ་བ་བཞིན་དུ་ཕྱག་རྒྱ་གཅིག་པ་སྒོམ་པའང་། ཞི་བ་ཕྱག་རྒྱ་གཅིག་པ་དང་། ཁྲོ་བོ་ཕྱག་རྒྱ་གཅིག་པ་གཉིས་ལ་གདུལ་བྱ་རང་རང་གང་ལ་མོས་པའི་ཞི་ཁྲོ་གཅིག་ཉམས་སུ་ལེན་པའང་། བློ་ཆེ་ཆུང་གི་དབང་གིས། དང་པོ་ཕྲ་བ་ཡིག་འབྲུ་ལ་བསླབ་ཅིང་། དེ་ནས་ཐུགས་ཕྱག་མཚན་དང་། སྐུ་ཡོངས་རྫོགས་ཀྱི་བར་དུ་རིམ་གྱིས་བསྐྱེད་པ་རིམ་གྱིས་པ་དང་། དང་ནས་རགས་པ་ལྷ་སྐུ་བསྒོམ་པ་ཅིག་ཆར་བ་དང་གཉིས་ཀྱི་ཚུལ་གྱིས་ལྷ་བསྒོམ་པ་ལའང་། སྐུ་ཕྱག་རྒྱ་ཆེན་པོ་དེའི་ཐུགས་ཀར་རིགས་དང་རང་གི་ས་བོན་གང་ཡིན་བསྒོམ་པ་གསུང་ཆོས་རྒྱ། ཐུགས་ཀར་ཕྱག་མཚན་བསྒོམ་པ་ཐུགས་ཕྱག་མཚན་དམ་ཚིག་གི་ཕྱག་རྒྱ་འོད་ཟེར་སྤྲོ་བསྡུ་བྱ་བ་ལ་སོགས་འཕྲོ་འདུ་འཕྲིན་ལས་ཀྱི་ཕྱག་རྒྱ་དང་བཞི་དང་ལྡན་པའི་སྐུ་ལ། དབུ་རྒྱན་གྱི་ལྷ་ལྔ་སྐུ་གསུང་ཐུགས་ཀྱི་ལྷ་གསུམ། ཐུགས་ཀར་ཡེ་ཤེས་སེམས་དཔའ་སྟེ་ལྷ་དགུ་དང་ལྡན་པར་བསྒོམ་པ་དེ་ལ་ཡང་། ཕྱག་རྒྱ་གཅིག་པ་རང་གི་ཆ་རྐྱེན་ལ་ལམ་རིམ་ནས་བཤད་པ་བཞིན་དོན་བཅོ་ལྔ་ཚང་བ་ཡི་སྒོ་ནས་ཉམས་སུ་ལེན་པའི་དགོས་ཆེད་ནི། དེ་བཞིན་ཉིད་ཀྱི་ཏིང་ངེ་འཛིན་ལ་སྟོང་ཞེན་དང་། ཀུན་ཏིང་དེ་ལ་སྣང་ཞེན་ཡོད་པས་དེ་གཉིས་གྲོལ་བར་འགྱུར་བའི་ཐབས་ལ་དབྱེར་མེད་ཕྱག་རྒྱ་གཅིག་པའི་ལྷ་བསྒོམ་ཞིང་། ཕྱག་རྒྱ་བཞི་དང་། ཉམས་གཡོ་ཐོབ་གོམས་བརྟན་མཐར་ཕྱིན་པ་ལྔ་དང་ལྡན་པར་བྱས་ནས་ལམ་གོང་མ་ཕྱག་རྒྱ་སྤྲོས་པའི་ཏིང་ངེ་འཛིན་ལས་ལྡང་བར་བྱའོ། །བཞི་པ་ཕྱག་རྒྱ་སྤྲོས་པ་དང་། དྲང་། བྱིས་པ་ཆུང་ངུ་གང་ཡིན་པ་དེ་ལོ་ཉི་ཤུ་ལོན་ནས་ལུས་སེམས་སྨིན་ཅིང་སྟོབས་རྫོགས་པས་རང་དང་རིགས་མཐུན་པའི་ཁྱིམས་ཐབས་གཅིག་ལེན་པས་རྒྱུད་འཕེལ་བ་བཞིན་དུ། ཕྱག་རྒྱ་གཅིག་པ་དེ་ཡི་སྒོ་ནས་ཞི་ཁྲོ་གང་བསྒོམ་ལ་གཞི་བླང་བ་ལས། ཚངས་པ་སྟེ་ཞི་བ་དང་། ཡ་མ་སྟེ་ཁྲོ་བོའི་ལྷ་རྣམས་ཀྱི་གཟུགས་ཅན་དུ་ཤར་བ་བཞི་བཅུ་རྩ་གཉིས་སམ། ལྔ་བཅུ་རྩ་བརྒྱད་ལ་སོགས་པ་ཕྱག་རྒྱ་སྤྲོས་པར་སྒོམ་པ་དེའང་མེད་པ་ལས་ཡོད་པར་སྒོམ་པ་མ་ཡིན་ཏེ། ཡེ་གདོད་མ་ནས་རྟོག་ཚོགས་རང་ལ་གནས་པ་ལྷ་དང་ལྷ་མོའི་དཀྱིལ་འཁོར་དུ་བསྒོམ་པ་དེ་ལ་བསྐྱེད་སྔགས་བརྗོད་པ་ཙམ་གྱིས་ཅིག་ཆར་དུ་རྒྱ་མཚོའི་ནང་དུ་ཉི་ཟླ་གཟའ་དང་སྐར་མ་ཤར་བ་བཞིན་རློམས་བསྐྱེད་བྱེད་པའམ། ཡང་རྒྱུ་སྔ་མ་ལ་བརྟེན་ཅིང་འབྲས་བུ་ཕྱི་མ་དང་འབྲེལ་བ་བཞིན་ཏུ་རྡོ་རྗེ་གོ་ཆ་སྟེ་གསུང་ཡིག་འབྲུ། ཐུགས་ཕྱག་མཚན། སྐུ་ཡོངས་རྫོགས་ཀྱི་ཆོ་ག་གསུམ་གྱིས་བསྐྱེད་པས་སམ། གང་ཡིན་ན་ཡང་ཕྱག་རྒྱ་སྤྲོས་པ་རང་གི་བསླབ་པ་རང་གི་ཆ་རྐྱེན་དུ་དོན་བཅོ་ལྔ་ཚང་བའི་སྒོ་ནས་ཉམས་སུ་ལེན་པ་མཐར་ཕྱིན་པ། བློ་ཆེ་ན་ཞི་ཁྲོ་རྒྱས་བསྡུས་འབྲིང་གསུམ་གང་བསྒོམ་གྱི་ལྷ་རྣམས་ལ་ལུང་གི་ལྷ་དགུ་ཉིད་བཅུ་དང་ལྡན་པར་བྱས་ནས་དེ་ནས་ལུས་དཀྱིལ་དུ་བཀོད་ནས་སངས་རྒྱས་སྟོང་གི་དཀྱིལ་འཁོར་དུ་སྤྲོ། དེ་ནས་ཉི་ཁྲི་བཞི་སྟོང་དུ་སྤྲོ། དེ་ནས་བསམ་ཡས་ལྷུན་གྱི་གྲུབ་པའི་བར་དུ་སྤྲོ་སྟེ། གསང་སྙིང་ལས། ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་གསུམ་འཕྲོར་འགྱུར། །དེ་ལྟར་ལྡན་པའི་གཙོ་མཆོག་གིས། །རྒྱལ་བ་རྒྱལ་མཆོག་དེ་བཞིན་དུ། །བཅུ་གཉིས་དྲུག་གི་འོད་འཕྲོ་འབར། །དེ་ལ་སོགས་པ་བསམ་མི་ཁྱབ། །ཅེས་གསུངས་པ་ལྟར་སྤྲོའམ། ཡང་བློ་ཆུང་ན་ལྷ་དགུ་ཉིད་བཅུ་དང་ལྡན་པ་དེ་ནས། ཚོམ་བུ་གཅིག་གསུམ་ལྔ་པ་གང་རུང་གི་དཀྱིལ་འཁོར་བསྒོམས་ནས་ལོངས་སྤྱོད་དེ་ཡོ་བྱད་ལྔ་ལ་སྤྱོད་ནས་ཚོམ་བུ་ཚོགས་སྒྲུབ་པ་ལ་སྦྱར་བར་བྱའོ། །ལྔ་པ་བར་ཆད་མེད་པ་གཉིས་དང་། དྲང་། གྲངས་ཀྱི་ལྔ་པ་ཚོགས་སྒྲུབ་ཀྱི་རྣལ་འབྱོར་པ་རབ་ནི་ལུང་ཨ་ནུ་ཡོ་ག་དང་ལྟ་སྒོམ་མཐུན་པའི་རྣལ་འབྱོར་ཏིང་ངེ་འཛིན་འབའ་ཞིག་གི་དོན་ལ་བརྟེན་པས། དཔེར་ན་ཉན་ཐོས་ལ་ལྷག་བཅས་དང་། ལྷག་མེད་ཀྱི་མྱ་ངན་ལས་འདས་པའི་ཚུལ་གཉིས་ཡོད་པ་བཞིན་དུ། འདིར་ཡང་ཚེ་རྣམ་གཉིས་ཀྱི་རིག་འཛིན་ཐོབ་པར་འགྱུར་བའང་གི་སྒྲས་ཡོད་དོ། །ཏིང་ངེ་འཛིན་བར་ཆད་མེད་པ་དེའི་དོན་དང་མི་འཚམས་པའི་བློ་ཆུང་བ་དེས་བཟའ་བཏུང་ལ་སོགས་པའི་ལོངས་སྤྱོད་ལྔ་ལ་སྤྱོད་དགོས་ཏེ། དེ་ཡང་ཚོམ་བུ་ཚོགས་སྒྲུབ་རང་གི་བསྒྲུབ་གཞི་ཕུན་སུམ་ཚོགས་པ་བཞི་ཡིས་གཞི་བཟུང་སྟེ། བཞི་གང་ཞེ་ན། སྒྲུབ་པ་པོ། གནས། དུས། ཡོ་བྱད་ཕུན་སུམ་ཚོགས་པའོ། །དེ་རྣམས་རྒྱས་པར་ལམ་རིམ་དུ་ཤེས་པར་བྱའོ། །སྒྲུབ་ཐབས་བསྙེན་བསྒྲུབ་བཞིའི་གཞུང་བསྲང་བ་ལ་བཞི་གསུམ་སྟེ། ལམ་རིམ་འཇུག་གི་བསྙེན་བསྒྲུབ་བཞི་དང་། བསྒྲུབ་པའི་བསྙེན་བསྒྲུབ་བཞི་དང་། སྦྱོར་བའི་བསྙེན་བསྒྲུབ་བཞིའོ། །དང་པོ་ནི། དེ་ཏིང་ཀུན་ཏིང་གཉིས་བསྙེན་པ། ཕྱག་རྒྱ་གཅིག་པ་ཉེ་བསྙེན། ལོངས་སྤྱོད་ལྔས་ཚོགས་སྒྲུབ་པ་ནི་བསྒྲུབ་པ། དེ་ཡི་དུས་ཨཱ་ལི་ཀཱ་ལི་ཉམས་སུ་ལེན་པ་ནི་བསྒྲུབ་པ་ཆེན་པོ་སྟེ་བཞིའོ། །གཉིས་པ་ནི། གྲོགས་ཤོམ་ར་ནས་བཟུང་སྟེ་དཀྱིལ་འཁོར་བྲི་ཞིང་རྫས་དགོས་པ་དང་། ཕྱི་མཆོད་བྱ་ཞིང་མཚམས་བཅད་པ་རྣམས་ནི་སྔོན་དུ་འགྲོ་བ་བྱ་བ་ལས་ཀྱིས་བསྙེན་པ། སྔོན་འགྲོ་ནས་བཟུང་སྟེ་རྣལ་འབྱོར་ཕོ་མོ་རྣམས་ཀྱི་མི་གྲངས་སྤྲད་པའམ། ཡང་ན་རྣལ་འབྱོར་པ་མི་གཅིག་གིས་ལྷ་ཀུན་སྒོམ་པར་བྱེད་ནས་བསྒྲུབ་པ་ཅི་ཙམ་བྱེད་པའི་ཞག་གྲངས་ཕྱེད་ཡན་ཆད་ལ་འོད་ཟེར་དཀར་པོ་སྤྲོས་པས་ཏིང་ངེ་འཛིན་གྱི་སྣོད་དག་པར་བྱེད་པ་ནི་ཉེ་བསྙེན། ཕྱེད་མན་ཆད་ལ་འོད་ཟེར་དམར་པོ་འཕྲོ་འདུས་ཀྱི་ཏིང་ངེ་འཛིན་གྱི་བཅུད་བསྡུས་ནས་དངོས་གྲུབ་ཀྱི་སྣོད་དུ་རུང་བར་བྱེད་པ་ནི་བསྒྲུབ་པ། ནུབ་ཐ་མའི་ཞག་གཅིག་ལ་འོད་ཟེར་མཐིང་ཀ་ཕར་མི་སྤྲོས་བར་ཚུར་བསྡུ་བའི་ཏིང་ངེ་འཛིན་གྱི་དངོས་གྲུབ་སྡུད་པ་ནི་བསྒྲུབ་པ་ཆེན་པོ་དང་བཞིའོ། །གསུམ་པ་ནི། འོག་ཏུ་འཆད་དོ། །དེ་ལྟར་བསྙེན་སྒྲུབ་བཞི་དང་ལྡན་པའི་སྒོ་ནས་ཞག་གྲངས་ཀྱི་ཚད་དང་བསྙེན་པ་རྣམས་རྒྱུད་ནས་བཤད་པ་ལྟར་བསྒྲུབ་ཅིང་རྟགས་མར་མེ་རང་འབར་དང་། བདུད་རྩི་ཁོལ་བ་ལ་སོགས་པ་བྱུང་ན། དངོས་གྲུབ་བླང་བའི་ཐབས་ལ་ལྷ་དང་རྗས་གཉིས་སོ། །དང་པོ་ནི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་དཀྱིལ་འཁོར་བསྒྲུབ་པའམ། རིགས་གསུམ་མམ། རིགས་གཅིག་བསྒྲུབ་བམ། རང་རང་མཐུན་པར་སྦྱར་ཏེ་སྐུའི་དཀྱིལ་འཁོར་ཡིན་ན། སྤྱི་བོ་ལ་བསྟིམ་པ་ལ་སོགས་རང་རང་གི་གནས་སུ་བསྟིམ་ཞིང་བརྟན་པར་བྱ་བ་སྟེ། ལམ་རིམ་དང་། རྒྱས་པ་ལས། དཀྱིལ་འཁོར་མཐུན་པ་ཉིད་དུ་སྦྱར། །གནས་སུ་བསྟིམ་ཞིང་བརྟན་པར་བྱ། །ཞེས་གསུངས། གཉིས་པ་རྫས་ཀྱི་བླང་བའི་ཐབས་ལ་ཁྱད་པར་དུ་སྦྱོར་སྒྲོལ་གཉིས་པོའི་སྒོ་ནས་བླང་དགོས་ཏེ། དེའང་སྲོད་ལ་རྟོགས་པ་ནུབ་པའི་དུས་སུ་ཐབས་སྙིང་རྗེ་ཆེན་པོའི་རྩལ་རྫོགས་པར་བྱེད་པ་ལ་སྒྲོལ་བ་མཛད་པ་དང་། ཐོ་རངས་ཡེ་ཤེས་སྐྱེ་བའི་དུས་སུ་ཐབས་བདེ་བའི་ཡེ་ཤེས་རྩལ་རྫོགས་པར་བྱེད་པ་ལ་ཤེས་རབ་ཡུམ་ལ་བརྟེན་དགོས་པ་ཡིན་ཏེ། མཆོད་གཏོར་བཤགས་པ་ལས། བསྒྲུབ་པའི་བརྟེན་མཆོག་ཤེས་རབ་གཟུངས་མ་དང་། ཞེས་སོ། །དེ་ལ་སྦྱོར་བའི་དུས་ཀྱི་བསྙེན་སྒྲུབ་བཞི་ནི་ཡུམ་མཚན་ཉིད་དང་ལྡན་པ་བརྩལ་ཏེ། ཁྲུས་ཆབ་དང་། ཆོས་བཤད་ནས་སྟ་གོན་དུ་བྱས་པ་བསྙེན་པ། མཁའ་གསང་བྱིན་གྱིས་བརླབས། སྦྱོར་བའི་བརྡས་བསྐུལ། འདོད་པའི་བསྟན་ཆོས་ཀྱིས་བདེ་བ་རྒྱས་པར་བྱེད་པ་ཉེ་བསྙེན། ཕྱག་རྒྱ་བཞིའི་རོལ་པ་བསྒྲུབ་པ། ཉི་ཟླ་རྡོ་རྗེའི་ལྕེས་བླང་བ་ནི་བསྒྲུབ་པ་ཆེན་པོ། ནུབ་ཐ་མ་ལ་ཟག་མེད་མཐོང་ལམ་གྱི་ཡེ་ཤེས་རྒྱུད་ལ་སྐྱེ་བར་བྱེད་པ་དངོས་གྲུབ་ཆེན་པོ་ཡུམ་གྱི་མཁའ་ལ་བླང་བའི་ཐབས་ཏེ། དེ་ཡང་ལམ་རིམ་ལས། དངོས་སུ་མཆོད་པ་རྣམ་གཉིས་སོ། །གཙོ་རུ་དགོས་པ་གང་ཡིན་པ། །ཞེས་གསུངས་སོ། །དེ་ཡི་དུས་སུ་གསང་སྙིང་ལས། ཆོ་ག་ལྔ་ནི་རྫོགས་བྱས་ཤིང་། །སྔགས་ཀྱི་ཡན་ལག་ལྔ་རྫོགས་པས། །ཡོ་བྱད་ལྔ་ནི་རྫོགས་པར་ལྡན། །ཞེས་གསུངས་པས། ལྔ་གསུམ་བཅོ་ལྔའི་ཡན་ལག་རྣམས་ཚང་ན་ལུས་ཁམས་སྐྱེ་གནས་ཀྱི་ཟག་པ་གསུམ་མེད་པའི་འབྲས་བུ་རབ་ཀྱིས་ཚེ་ལ་དབང་བསྒྱུར་བའི་རིག་འཛིན་ཐོབ་པར་འགྱུར་རོ། །ཐ་མ་དེས་རྣམས་སྨིན་རིག་འཛིན་ཐོབ་པར་འགྱུར་རོ། །གོང་གི་དེ་ལྟར་ཚང་བ་མིན་ཏེ་ལྟ་སྒོམ་སྟོབས་ཆུང་ན་སྐྱེ་བ་ཕྱི་མའམ། ལན་གྲངས་བདུན་ནམ་སྐྱེ་བ་གཞན་ཉིད་དུ་སྟེ་སྐལ་པར་མི་འགྱང་བར་རིག་འཛིན་ཐོབ་པའོ། །དྲུག་པ་མཐར་ལམ་གྱི་ཏིང་ངེ་འཛིན་ནོ། །དྲང་། དཔེར་ན་རྒྱ་མཚོའི་ནང་དུ་ཉི་འོད་རིན་ཆེན་དང་། རླན་མེད་པ་དང་། མེ་འོད་དང་། མཐར་ཐུག་པའི་རིན་ཆེན་དང་བཞི་ཡི་འོད་རྒྱ་མཚོ་ལ་ཕོག་པས་རྒྱ་མཚོ་ཞོ་རུ་འགྱུར་བ་དང་། མར་དང་། མེ་དང་། ཐམས་ཅད་སྟོངས་པར་འགྱུར་བ་ཅི་བཞིན་དུ། གནས་སྐབས་སུ་རིག་འཛིན་ཐོབ་པ་དང་། མཐར་ཐུགས་སངས་རྒྱས་སུ་འགྱུར་བ་ལའང་ཚོགས་སྒྲུབ་ཀྱི་ལྟ་སྤྱོད་སྒོམ་གསུམ་ནུས་ལྡན་འདིས་ནི་ཟག་བཅས་མཐར་ཕྱིན་པ་འབྲས་བུ་མཐོང་ལམ་དང་། སྒོམ་ལམ་དང་། མཐར་ལམ་གྱི་བར་དུ་རིམ་པར་སྦྱར་ནས་མཐར་ཐུག་གི་འབྲས་བུ་སངས་རྒྱས་ཀྱི་ས་ཐོབ་པ་ལ་གདོན་མི་ཟ་བ་ཡིན་ཏེ། དེ་ཡང་ཚོགས་སྒྲུབ་ཀྱི་སྟེང་ནས་མཐོང་ལམ་ཚེ་རྣམ་གཉིས་ཐོབ་པ་ནི། ཉི་འོད་ཀྱིས་ཆུ་ཞོར་འགྱུར་བ་བཞིན་དུ། ཟག་བཅས་ཀྱི་ཉོན་མོངས་པ་དེ་ཉིད་ཟག་མེད་ཀྱི་ཡེ་ཤེས་སུ་འགྱུར་ལ། དེ་ནས་སྒོམ་ལམ་ཕྱག་རྒྱ་ཆེན་པོའི་རིག་འཛིན་ཐོབ་པའི་དུས་སུ་ལྟ་སྒོམ་དེ་བས་སྟོབས་སུ་ཞུགས་ཏེ། རླན་མེད་པའི་འོད་ཕོག་པས་མར་དུ་འགྲོ་བ་བཞིན་དུ། མཐོང་ལམ་ལ་ད་རུང་ཀུན་འགྲོའི་སྒྲིབ་པ་ཡོད་པ་དེ། འདིར་ཡེ་ཤེས་སུ་ཤར་ནས་དགོངས་པ་མི་གཡོ་བའི་ཏིང་ངེ་འཛིན་དུ་འགྱུར་བའོ། །མཐར་ལམ་ལྷུན་གྲུབ་རིག་འཛིན་གྱི་སྐབས་སུ་དེ་བས་ཀྱང་སྟོབས་སུ་གྱུར་ཏེ། མེ་འོད་ཀྱི་འོད་ཕོག་པས་མེ་རུ་འགྱུར་བ་བཞིན་དུ། སྒོམ་ལམ་ལ་ད་རུང་ལྷན་ཅིག་གནས་པའི་དྲི་མ་ཡོད་པ་དེ་འདིར་ཡེ་ཤེས་རྩལ་རྫོགས་སུ་ཤར་ནས་སྐུ་ལྔ་ལྷུན་གྲུབ་ཀྱི་རིག་འཛིན་དུ་འགྱུར་རོ། །སངས་རྒྱས་པའི་དུས་སུ་དེ་བས་ཀྱང་སྟོབས་སུ་གྱུར་ཏེ། མཐར་ཐུག་པའི་འོད་ཕོག་ནས་ཐམས་ཅད་སྟོང་པ་བཞིན་དུ། མཐར་ལམ་ལ་ད་རུང་ཀུན་གཞི་བག་ལ་ཉལ་གྱི་དྲི་མ་ཡོད་པ་དེ། ཐམས་ཅད་མཁྱེན་པའི་ཡེ་ཤེས་སུ་ཤར་ནས་གཟུང་འཛིན་ས་བོན་དང་བཅས་པ་བརྩལ་བས་མི་རྙེད་པས་ཐམས་ཅད་ཡེ་ཤེས་འཁོར་ཡུག་ཏུ་ཤར་བའོ། །དེའི་དཔེ་ནི། ཕལ་ཆེན་ལས། ཀྱེ་རྒྱལ་བའི་སྲས། རྒྱ་མཚོ་ཆེན་པོར་འདུས་པའི་ཆུའི་ཕུང་པོ་དག་ཀྱང་ནོར་བུ་ཉི་མའི་སྙིང་པོའི་འོད་ཕོག་ནས་ཆུའི་རང་བཞིན་སྤངས་ཏེ། འོ་མ་དང་ཞོ་རུ་འགྱུར་ཏེ་འདུག་གོ། །ནོར་བུ་རིན་པོ་ཆེ་རླན་མེད་པའི་འོད་ཕོག་ནས་འོ་མ་དང་ཞོའི་རང་བཞིན་སྤངས་ཏེ་མར་གྱི་སྙིང་ཁུ་ལྟ་བུར་འགྱུར་རོ། །མེའི་འོད་ཀྱི་ནོར་བུ་རིན་པོ་ཆེའི་འོད་ཕོག་ན། མར་གྱི་སྙིང་ཁུའི་རང་བཞིན་སྤངས་ཏེ་ལྟ་བུར་འབར་བར་འགྱུར་རོ། །ནོར་བུ་རིན་པོ་ཆེ་མ་ལུས་པ་མཐར་ཐུག་པའི་འོད་ཕོག་ན། ཐམས་ཅད་ལྷག་མ་མེད་ཅིང་མ་ལུས་པའི་སྣང་བར་འགྱུར་རོ། །ཞེས་གསུངས་སོ། །གཉིས་པ་སྤྱོད་པ་གཉིས་ཏེ། བགྲང་། དང་པོ་བསྟན་པ་དང་། དྲང་། ལམ་གྱི་ཡན་ལག་ལ་བཅུ་ཡོད་པའི་གཉིས་པ་སྤྱོད་པ་ནི་ལྟ་དོན་དེ་ཉིད་གོམས་པར་བྱེད་པའི་སྐབས་འདིར་སྤྱོད་པའི་དོན་རྣམས་ཤེས་དགོས་ཏེ། གོང་དུ་བསྟན་པའི་ལྟ་སྒོམ་དེ་དག་ལས་སུ་རུང་བ་སྟེ། ལྟ་སྒོམ་ས་བོན་དང་འདྲ་བ་ནར་སོན་ཏེ་སྟོབས་སུ་གྱུར་ཏེ་གོང་ནས་གོང་དུ་འཕེལ་བར་བྱེད་པ་ནི། སྤྱོད་པ་རླན་དང་འདྲ་བས་དེ་ཉིད་སྟོབས་སུ་གྱུར་ནས་འབྲས་བུ་ལ་སྦྱོར་བའོ། །དེ་ཡང་ལྟ་སྒོམ་གཉིས་ནི་སྤྱོད་པའི་སྲོག་སྟེ། སྤྱོད་པ་གཟུང་འཛིན་དུ་མི་འགྲོ་བ་དེ་ཉིད་ཀྱི་མཐུ་ཡིན་ཏེ། བྱ་ལམ་ལ་རྗེས་མེད་པ་བཞིན་དུ། སྤྱོད་པ་ལ་ཆགས་ཞེན་མེད་པའི་གསང་སྔགས་ཀྱི་སྤྱོད་པའོ། །དེའི་གདམ་ཚིག་ནི། སྤྱོད་པའི་དགོས་ཆེད་དང་། སྤྱོད་པའི་རྣམ་གྲངས་དང་། སྤྱོད་པ་བྱེད་པའི་དུས་དང་ནི། སྤྱོད་པ་མ་བྱས་པའི་སྐྱོན་དང་། བྱས་པའི་ཡོན་ཏན་དང་ལྔ་པོ་དེ་ཉིད་ཀྱི་ནང་དུ་སྤྱོད་པའི་དོན་རྒྱས་བཤད་དེ་རྫོགས་པ་ཡིན་ནོ། །རྒྱས་པ་དེ་ལ་ལྔ་སྟེ། བགྲང་། དང་པོ་དགོས་ཆེད་དང་། དྲང་། རྣལ་འབྱོར་བདག་ཉིད་ཀྱིས་གནས་སྐབས་དང་མཐར་ཐུག་གི་འབྲས་བུ་ལ་སྦྱོར་བ་ལ་སྤྱོད་དགོས་པ་དང་། གདུལ་བྱ་གཞན་གྱི་དོན་ལྷུན་གྱིས་གྲུབ་པའི་ཕྱིར། དང་། སྤྱོད་པའི་ངོ་བོའི་དུས་སུ་ལྟ་སྒོམ་གྱིས་ཟིན་པའི་སྟོབས་ཀྱིས། ནམ་མཁའ་རྡུལ་མི་ཆགས་པ་བཞིན་དུ་གཉིས་འཛིན་གྱི་སྒྲིབ་པ་དབྲི་བ་དང་བསོད་ནམས་དང་ཡེ་ཤེས་ཀྱི་ཚོགས་གཉིས་སོགས་ཏེ་རྫོགས་པ་དང་། ཐབས་ལམ་གྱི་སྤྱོད་པ་སོ་སོ་སྐྱེ་བོ་ལྟར་སྤྱོད་ཀྱང་བག་ཆགས་ཀྱི་དྲི་མས་མི་གོས་པ་དང་། གྲོལ་ལམ་གྱི་སྤྱོད་པས་ཏིང་ངེ་འཛིན་གོམས་པར་བྱེད་དེ་གོང་ནས་གོང་དུ་འཕེལ་བའི་ཕྱིར་སྤྱོད་པ་གལ་ཆེ་བས་གཅེས་སོ། །དེ་ཡང་ཁོག་གཞུང་ལས། མི་རྗེས་མཐུན་པའི་སྤྱོད་པ་ཡང་། །སྐབས་ཀྱི་ཏིང་འཛིན་སྟོབས་ཕྱིར་སྤྱད། །ཅེས་སོ། །གཉིས་པ་རྣམ་གྲངས་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། གསང་བའི་སྙིང་པོ་སྒྱུ་འཕྲུལ་རྒྱས་པའི་རྒྱུད་དེ་ཉིད་ལས་གསུངས་པའི་སྤྱོད་པ་རྣམས་ནི། ཡོ་ག་མན་ཆད་བློ་དམན་རྣམས་ཀྱི་སྤྱོད་ཡུལ་དུ་མ་གྱུར་པ་ཡིན་ཏེ། གང་ཞེ་ན། སོ་སོ་སྐྱེ་བོས་བརླད་པོ་རང་ཁ་མ་དང་ཚུལ་མཐུན་པར་དྲི་ཆེན། དྲི་ཆུ། རཀྟ། བྱང་སེམས། ཤ་ཆེན་ཏེ་དམ་རྫས་ལྔ་དང་། མི་གླང་ཆེན། རྟ། རྨ་བྱ། ཁྱི་སྟེ་ཤ་ལྔ་དང་། སྦྱོར་སྒྲོལ། མ་བྱིན་ལེན་པ། རྫུན་དུ་སྨྲ་བ། ངག་བརླང་པོ་སྟེ་སྤྱད་པར་བྱ་བ་ལྔ་ལ་སྤྱོད་པ་དང་། གཟུགས་སྒྲ་དྲི་རོ་རེག་བྱ་སྟེ་འདོད་ཡོན་ལྔ་དང་། འདོད་ཆགས། ཞེ་སྡང་། གཏི་མུག །ང་རྒྱལ། ཕྲག་དོག་སྟེ་ཉོན་མོངས་ལྔ་དང་། དེ་ལྟར་ཉི་ཤུ་རྩ་ལྔ་ནི་འཁོར་བ་ནག་པོའི་སྤྱོད་པ་དང་། ཚུལ་མཐུན་ཡང་། ཁྱད་པར་གསང་སྔགས་ཀྱི་ལྟ་བས་ཟིན་ནས་སྤྱད་ན་ཉོན་མོངས་པ་དེ་ཉིད་ཀྱི་དྲི་མས་མ་གོས་ནས་འདུལ་བའི་ཐབས་ཅི་སྙེད་པ་གཅིག་གསུངས་པ་ནི། སྔགས་ཕྱི་རྒྱུད་མན་ཆད་དང་ཐུན་མོང་མིན་པ་སྟེ་ཐབས་ལམ་གྱི་སྤྱོད་པ་དང་དེ་ལས་བཟློག་པ་དཀར་པོའི་སྤྱོད་པ་ནི། ཁྱད་པར་གྲོལ་ལམ་གྱི་ཏིང་ངེ་འཛིན་གྱི་སྤྱོད་པ་དེ་དང་ཐེག་པ་འོག་མའི་ས་དང་ལམ་གྱི་སྐབས་སོ་སོར་སྤྱོད་ལུགས་དང་མཐུན་པའོ། གཉིས་པ་བཤད་པ་དེ་ལ་གཉིས་ཏེ། བགྲང་། དང་པོ་ཐུན་མོང་མ་ཡིན་པ་ཐབས་ལམ་གྱི་སྤྱོད་པ་དང་། དྲང་། བདེ་བ་ལ་ཞེན་པའི་གང་ཟག་གིས་ལམ་བགྲོད་པ་ལ་བདེ་བ་དེ་ཉིད་མ་སྤངས་ལམ་དུ་ཁྱེར་བས་མཐར་ཆགས་རྟོག་དེ་ཉིད་ཡེ་ཤེས་སུ་གྲོལ་བས་ན། དེ་ལྟར་དུ་དུག་ནད་ཅན་ལ་སྨན་དུ་དུག་ཁོ་རང་བཅུད་ལེན་དུ་བཏང་བས་དུག་ནད་ལ་ཕན་པ་བཞིན་དུ། ཞེན་ཆགས་ཅན་གྱི་རྣལ་འབྱོར་པ་བདག་གྲོལ་བ་དང་། རང་གྲོལ་བའི་སྟོབས་ཀྱིས་ཞེན་ཆགས་ཅན་གྱི་གང་ཟག་གཞན་རྣམས་ཀྱི་རྒྱུད་གྲོལ་བར་ནུས་པ་ཡིན་ཏེ། དེས་བདག་གཞན་གཉིས་ཀའི་དོན་ཉམས་སུ་བླང་བ་ལ། བདེ་བ་དེ་ཉིད་སྤང་མི་དགོས་པས་ན་ཐབས་ཆེ་བ་དང་། དེ་ཉིད་ཀྱི་དྲི་མས་མི་གོས་ཤིང་ཉོན་མོངས་ཡེ་ཤེས་སུ་ཤར་བས་ན་ཐབས་མཁས་པའི་ཕྱིར་ན་ཐབས་ཀྱི་སྤྱོད་པ་ཞེས་བྱའོ། །དེ་ཡང་བརྟག་གཉིས་ལས། ཅི་ལྟར་རྣ་བར་ཆུ་ཞུགས་པ། །ཆུ་དག་ཉིད་ཀྱིས་འགུགས་པར་བྱེད། །དེ་བཞིན་དངོས་པོ་རྣམ་རྟོག་ཡང་། །རྣམ་རྟོག་ཉིད་ཀྱིས་དབྱུང་བར་བྱེད། །ཅེས་སོ། །གཉིས་པ་གྲོལ་ལམ་གྱི་ཁྱད་པར་ལམ་དང་སར་མཐུན་པར་སྤྱོད་པ་དེ་ལ་གསུམ་སྟེ། བགྲང་། དང་པོ་དཔེའི་སྒོ་ནས་མདོར་བསྟན་པ་དང་། དྲང་། གཅིག་ཤོས་ཏེ་གྲོལ་ལམ་པའི་སྤྱོད་པ་དེའི་དཔེ་ནི། དམངས་ནི་འབང་ཐ་མལ་པ་སྟེ་ལས་དང་པོ་ནམ་རྩོལ་སྒྲུབ་ཀྱིས་འཚོ་བ་དང་། རྗེ་ནི་བློན་པོ་ཡིག་ཚང་ལ་སོགས་པའི་བློ་གྲོས་ཀྱི་ཐབས་ཀྱིས་འཚོ་བ་དང་། བྲམ་ཟེ་ནི་སྔགས་ཀྱི་ནུས་པས་ཐམས་ཅད་ལ་ལོངས་སྤྱོད་པ་དང་། རྒྱལ་ཕྲན་ནི་རིན་པོ་ཆེ་ཕལ་པ་དང་། ཡོ་བྱད་ཀྱིས་ཕོངས་པ་མེད་དེ་ལོངས་སྤྱོད་འཛོམས་པ་དང་། འཁོར་ལོ་སྒྱུར་བའི་རྒྱལ་པོ་ནི། རྒྱལ་སྲིད་རིན་པོ་ཆེ་སྣ་བདུན་ལ་ལོངས་སྤྱོད་ཅིང་གླིང་བཞིའི་མི་རྣམས་ཀྱིས་བཀུར་སྟི་ཕུལ་བ་དང་། ལྔ་ལ་མཐོན་དམན་དང་བསོད་ནམས་ཆེ་ཆུང་གི་རིམ་པ་བཞིན་དུ། གཉིས་པ་དོན་གྱི་སྒོ་ནས་རྒྱས་པར་བཤད་པ་དེ་ལ་ལྔ་སྟེ། བགྲང་། དང་པོ་རྒྱུ་ཤེས་པའི་སྤྱོད་པ་དང་། དྲང་། བྲན་གྱིས་ལས་སྣ་ཚོགས་བྱེད་པ་བཞིན་དུ། ཐོས་བསམ་གྱིས་འཇིག་རྟེན་གྱི་སྣོད་བཅུད་ཀྱི་རྣམ་བཞག་དང་། མུ་སྟེགས་ཀྱི་ལོག་ལྟ་དང་། འཇིག་རྟེན་ལས་འདས་པའི་ཐེག་པ་རིམ་པ་དགུའི་ལྟ་བ་ཐམས་ཅད་ཤེས་པར་བྱ་བའི་བསླབ་བྱ་མང་པོ་དེ་དག་ལ་བསླབ་སྟེ། དེ་ཉིད་འགྲུབ་བྱེད་ཀྱི་གྲོགས་ནི་བརྩོན་འགྲུས་ཡིན་པས་ན། ཕྱི་ནང་གི་ཐེག་པ་གང་ལ་ཡང་དོར་བར་བྱ་བ་ནི་ཡོད་པ་མ་ཡིན་ཏེ། ཀུན་ལ་བསླབ་པར་བྱ་སྟེ། དེ་ཡང་གཅན་འཕྲང་ལས། དཔེར་ན་བུང་བ་ཚོང་ཚོལ་ལྟར། །ལྟ་སྤྱོད་སྒོ་ཀུན་བསྡུར་བྱས་ལ། །མ་ནོར་དོན་ཉིད་རྟོགས་བྱའི་ཕྱིར། །སྒོ་རྣམས་བསྡུར་བ་རབ་ཏུ་གཅེས། །ཞེས་སོ། །གཉིས་པ་ཏིང་ངེ་འཛིན་གསུམ་གྱི་སྤྱོད་པ་དང་། དྲང་། ལྟ་བའི་དོན་དེ་ཏིང་ངེ་འཛིན་གྱིས་གོམས་པར་བྱེད་པ་ཡང་དཔེས་དོན་མཚོན་པར་བྱེད་པ་གཉིས་པ་རྗེ་སྟེ་བློན་པོའི་སྤྱོད་པ་ལྟར་དུ། རྐྱེན་འཇུག་པའི་ཏིང་ངེ་འཛིན་ལ་དེ་ཏིང་ཀུན་ཏིང་ཕྱག་རྒྱ་གཅིག་པ་གསུམ་ལ་བློན་པོ་ཡིག་ཚང་སྟེ་ཡོན་ཏན་དང་ལྡན་པ་དེས། རྒྱལ་པོའི་མཐུན་ཕྱོགས་ཐམས་ཅད་བསྒྲུབ། མི་མཐུན་པའི་ཕྱོགས་ཐམས་ཅད་བསལ་བའི་ཐབས་ལ་བརྩོན་པ་བཞིན། དེ་བཞིན་ཉིད་ཀྱི་ཏིང་ངེ་འཛིན་གྱི་ངོ་བོ་ཤེས་རབ་རང་བཞིན་མེད་པ་དང་ཆ་མཐུན་པར་དོན་དེ་དང་ཡ་མི་བྲལ་བའི་སྤྱོད་པའི་གདམས་ངག་གི་སྒོ་ནས་བྱིང་བ་གསུམ་དང་། རྒོད་པ་གསུམ་གྱི་སྐྱོན་དེ་དག་བསལ་ནས་གསལ་སྟོང་དབྱེར་མེད་ཀྱི་དོན་དེ་དག་ཉམས་སུ་བླང་བ་དང་། ཀུན་ཏིང་གི་ཏིང་ངེ་འཛིན་གྱི་ངོ་བོ་ཐབས་འགག་པ་མེད་པ་དང་ཆ་མཐུན་པར་དོན་དེ་ཉིད་དང་ཡ་མི་བྲལ་བར་སྤྱོད་པའི་གདམས་ངག་གི་སྒོ་ནས་བྱིང་རྒོད་ཀྱི་སྐྱོན་དེ་དག་བསལ་ནས། སྟོང་ཉིད་སྙིང་རྗེ་དང་འགྱུ་སྟོང་དབྱེར་མེད་ཡེ་ཤེས་སྒྱུ་མའི་དོན་ཉམས་སུ་མྱོང་བ་དང་། ཕྱག་རྒྱ་གཅིག་པའི་རྣལ་འབྱོར་པ་བློ་ཆུང་བས། མཉམ་བཞག་ཏུ་དང་པོ་ཡིག་འབྲུ་གང་རུ་སྒོམ་པ་དང་། དེ་ནས་སོགས་ཀྱི་སྒྲས་ཐུགས་ཕྱག་མཚན་དང་། དེ་ནས་སྐུ་ཡོངས་རྫོགས་ཀྱི་བར་དུ་རིམ་གྱིས་བསྐྱེད་པ་དང་། བློ་ཆེ་བས་དེ་ལས་བཟློག་ནས་དང་ལ་ཡི་གེ་ཨ་ལ་སེམས་སྦྱངས། དེ་ནས་ལྷ་སྐུ་ཅིག་ཆར་དུ་བསྐྱེད་པ་གཉིས་ལ་བརྟེན་ནས་དོན་དེ་དང་མཐུན་པར་སྤྱོད་པར་བྱའོ། །གསུམ་པ་སྤྲོས་པའི་སྤྱོད་པ་དང་། དྲང་། སྤྲོས་པའི་དུས་སུ་བྲམ་ཟེ་གཙང་མ་རིགས་ཀྱིས་རྫས་དང་གང་ལ་སྤྱོད་པའི་དུས་སུ་སྔགས་ཀྱི་ནུས་མཐུས་སྦྱངས་ལོངས་སྤྱོད་དུ་རུང་བ་བཞིན། རིམ་གྱིས་པའི་དབང་དུ་ཐོག་མར་བདེན་པ་དབྱེར་མེད་སྤྱིའི་ཚུལ་དུ་མཐོང་ནས། དེ་ཉིད་གོམས་པར་བྱེད་པ་ལ། དེ་ཏིང་། ཀུན་ཏིང་། ཕྱག་རྒྱ་གཅིག་པ། སྤྲོས་པ་དང་། ཚོགས་ལམ་རྣལ་འབྱོར་བཞི་རིམ་པར་སྦྱངས་ནས་འདིར་མཐར་ཕྱིན་པའི་མཐུས་རྟོག་ཚོགས་སྤྱོད་ཡུལ་ཐམས་ཅད་ལྷ་དང་ལྷ་མོར་སྦྱངས་ནས་སྤྱོད་པའོ། །བཞི་པ་བར་ཆད་མེད་པའི་སྤྱོད་པ་དང་། དྲང་། གྲངས་ཀྱི་ལྔ་པ་བར་ཆད་མེད་པར་ཚོགས་སྒྲུབ་པའི་དུས་སུ། སྐྱེ་འགྲོ་ཐམས་ཅད་ཀྱི་སྲི་ཞུ་གུས་པའི་གནས་ནི་རྒྱལ་པོ་ཡིན་ལ། རྒྱལ་པོ་དེའི་ཆོས་ལུགས་ནི། གཟུགས་སྒྲ་དྲི་རོ་རེག་བྱ་ལྔ་ལ་དད་ཅིང་ལོངས་སྤྱོད་པ་བཞིན་དུ། འདིར་ཡང་ལོངས་སྤྱོད་ཡོ་བྱད་ལྔ་ལ་སྤྱོད་ཅིང་ཤིན་ཏུ་སྤྲོས་པ་སྣ་ཚོགས་ཀྱི་སྤྱོད་པ་ཉམས་སུ་བླང་བར་བྱ་སྟེ། དེ་ཡང་གྲངས་ཀྱི་ལྔ་པ་བར་ཆད་མེད་པར་ཚོགས་སྒྲུབ་པའི་དུས་སུ། བཟའ་དང་བཏུང་བའི་ཡོ་བྱད། རྒྱན་དང་བགོ་བའི། བྲོ་གར་འདུ་འཕྲོའི། གླུ་ཚིག་སྒྲའི། ཨཱ་ལི་ཀཱ་ལའི་ཡོ་བྱད་དང་ལྔ་པོ་ནི་ལྟ་སྒོམ་སྤྱོད་གསུམ་དབྱེར་མེད་པའི་སྟོབས་ཀྱིས་འདིར་སྤྱོད་པའི་གཙོ་བོར་ཉམས་སུ་བླང་བ་ཡིན་ནོ། །ལྔ་པ་རིག་འཛིན་གྱི་སྤྱོད་པའོ། །དྲང་། ཡོ་བྱད་བཞི་ལ་སྤྱོད་པ་དེ་ནས་བསྙེན་པ་དང་ཉེ་བའི་བསྙེན་པ། སྒྲུབ་པ་དང་སྒྲུབ་པ་ཆེན་པོ་བཞི་ཡི་སྒོ་ནས་བསྒྲུབས་པར་བྱས་པའི་འབྲས་བུ་ལུས་ཁམས་སྐྱེ་གནས་ཀྱི་ཟག་པ་གསུམ་དང་བྲལ་ནས་རིག་འཛིན་ཐོབ་པའི་སྤྱོད་པ་ནི། དཔེར་ན་ལྕགས་འཁོར་ཅན་གླིང་གཅིག་དང་། ཟངས་འཁོར་ཅན་གླིང་གཉིས་དང་། གསེར་འཁོར་ཅན་གླིང་བཞི་དང་། དངུལ་འཁོར་ཅན་གླིང་གསུམ་ལ་དབང་བྱེད་པའི་གདུལ་བྱ་ལ་རྒྱ་ཆེ་ཆུང་གི་གོ་རིམ་ཡོད་པ་བཞིན་དུ། རིག་འཛིན་བཞི་ལ་ཡང་བདག་དོན་ཏིང་ངེ་འཛིན་ལ་སྟོབས་ཆེ་ཆུང་དང་། གཞན་དོན་བྱེད་པའི་ཡུལ་གདུལ་བྱ་ལ་རྒྱ་ཆེ་ཆུང་གི་ཁྱད་པར་ཡོད་པར་འགྱུར་བ་ཡིན་ཏེ། དེ་ཡང་ལྕགས་འཁོར་ཅན་གླིང་གཅིག་ལ་དབྱེར་མེད་པ་བཞིན་དུ་རྣམ་སྨིན་རིག་འཛིན་གྱི་བདག་དོན་གྱི་སྤྱོད་པ་ནི། སྤྱོད་ཡུལ་ལྷ་དང་ལྷ་མོར་རོལ་པའི་ཚུལ་དུ་སྤྱོད་ལ། གཞན་དོན་དུ་ཕྲིན་ལས་རྣམ་བཞིའི་སྒོ་ནས་གླིང་བཞི་དྲུག་ཚུན་ཆད་ཀྱི་གདུལ་བྱ་ཡང་དག་པའི་ལམ་ལ་བཀོད་དོ། །ཟངས་འཁོར་ཅན་དེ་བས་སྟོབས་ཆེ་བ་བཞིན་དུ། ཚེ་དབང་རིག་འཛིན་གྱིས་རང་དོན་དུ་ལོ་སྟོང་དྲུག་བརྒྱའི་བར་དུ་ཀུན་འགྲོའི་སྒྲིབ་པ་སྦྱང་ཞིང་ལམ་གོང་མ་ལ་སྤྱོར་བར་བྱེད་དོ། །གཞན་དོན་དུ་སྟོང་གསུམ་གྱི་སྟོང་ཆེན་པོ་བརྒྱ་ཚུན་ཚད་ཀྱི་གདུལ་བྱ་རྣམས་ལ་བསྐལ་པར་གནས་ནས་ཆོ་འཕྲུལ་བཞིའི་སྒོ་ནས་དོན་བྱེད་དོ། །དངུལ་འཁོར་ཅན་དེ་བས་ཀྱང་རྒྱ་ཆེ་བ་བཞིན་དུ། ཕྱག་རྒྱ་ཆེན་པོའི་རིག་འཛིན་གྱིས་ཉི་ཁྲི་བཞི་སྟོང་ལ་སོགས་གྲངས་ཅན་གྱི་འཁོར་ལོ་མངོན་སུམ་དུ་སྣང་ཞིང་ལྷན་གཅིག་གནས་པའི་དྲི་མ་དག་པར་བྱེད་ལ། གཞན་དོན་དུ་སྟོང་གསུམ་གྱི་སྟོང་ཆེན་པོ་བརྒྱ་ཕྲག་སྟོང་དེ་འདྲ་བ་བཅུའི་རྡུལ་སྙེད་དང་མཉམ་པའི་འཇིག་རྟེན་བརྒྱ་ཕྲག་སྟོང་དེ་འདྲ་བ་བཅུའི་རྡུལ་སྙེད་ཀྱི་ཞིང་ཁམས་སུ་རྔོན་དང་སྨད་འཚོང་ལ་སོགས་པ་སྤྲུལ་པའི་ལུས་ཀྱི་སྒོ་ནས་ཆོ་འཕྲུལ་བཞིའི་འདུལ་བར་བྱེད་དོ། །གསེར་འཁོར་ཅན་དེ་བས་ཀྱང་སྟོབས་ཆེ་བ་བཞིན་དུ། ལྷུན་གྲུབ་རིག་འཛིན་གྱིས་རང་དོན་དུ་བག་ལ་ཉལ་ཕྲ་བ་སྦྱངས་ཤིང་། གཞན་དོན་དུ་ཞིང་ཁམས་མཐའ་ཡས་པར་གདུལ་བྱ་སྣ་ཚོགས་ལ་སྤྲུལ་སྐུའི་མཛད་པ་སྣ་ཚོགས་བསྟན་ནོ། །གསུམ་པ་ལམ་རང་གི་སྤྱོད་པ་ཁྱད་པར་གྱི་སྤྱོད་པའོ། །དྲང་། འོ་ན་ལམ་གོང་མའི་སྐབས་སུ་འོག་མའི་སྤྱོད་པ་དང་གཉིས་ཀ་ལ་སྤྱོད་དགོས་པས་སྤྱོད་པ་ལ་ཁྱད་པར་མེད་དམ་ཞེ་ན། ཁྱད་པར་ཡོད་དེ། ལམ་སྔ་མའི་དུས་ཀྱི་སྤྱོད་པ་དེ། ལམ་ཕྱི་མ་ལ་འཇུག་པའི་གང་ཟག་གི་རྒྱུད་ལ་རང་ཤུགས་ཀྱིས་ལྡན་ནས་ཡོད་པས་ལམ་འོག་མའི་སྤྱོད་པ་དེ་གོང་མའི་སྐབས་སུ་དངོས་སུ་སྤྱོད་པའི་རྩོལ་བ་མེད་ཅིང་། དེ་བས་ན་ལམ་རང་རང་གི་སྤྱོད་པའི་བསླབ་པ་གང་ཡིན་པ་དེ། ལམ་རང་རང་གི་སྐབས་སུ་སྤྱོད་པ་ཤིན་ཏུ་གཅེས་པས་ན། ལམ་གྱིས་ཚོད་མཐོན་དམན་གྱིས་ཕྱེ་བས་སྤྱོད་པ་ལ་ཁྱད་པར་ཡོད་པ་ཡིན་ནོ། །གསུམ་པ་དུས་དང་། དྲང་། དེ་ཡང་སྤྱོད་པ་དུས་ཚོད་དང་ལྡན་དགོས་པས། ལམ་དང་ས་ཡི་རིམ་པ་མཐོ་དམན་གྱི་སྐབས་དང་སྦྱར་ནས། སྤྱོད་པ་དགོས་པར་རྒྱུད་གཞུང་ནས་གྲགས་པ་བཞིན་དུ་བྱེད་དགོས་ཏེ། དེ་ཡང་ལམ་མཐོན་དམན་གྱི་དོན་གོ་བ་ཙམ་གྱིས་མི་ཆོག །ཏིང་ངེ་འཛིན་གྱི་རོ་རང་གིས་ཉམས་སུ་མྱོང་བའི་ཚོད་རང་གིས་བཟུང་ནས། ཏིང་ངེ་འཛིན་དང་མཐུན་པའི་སྤྱོད་པ་དགོས་ཏེ། དེ་ཡང་ལམ་སྔ་མའི་ཏིང་ངེ་འཛིན་ལ་གོམས་པ་མཐར་མ་ཕྱིན་གྱི་བར་དུ་ལམ་སྔ་མའི་སྤྱོད་པ་དགོས་ལ། ལམ་ཕྱི་མ་ལ་འཇུག་པའི་ཚེ་དེ་ནས་ལམ་ཕྱི་མ་རང་གི་སྤྱོད་ཡུལ་རྒྱུད་གཞུང་ནས་ཅི་ལྟར་བཤད་པ་བཞིན་ཉམས་སུ་བླང་བར་བྱའོ། །བཞི་པ་སྐྱོན་དང་། དྲང་། ཁྱད་པར་གྲོལ་ལམ་གྱི་རང་རང་གི་སྐབས་སུ་བཤད་པའི་སྤྱོད་པ་མ་བྱས་ནས་དོར་བར་བྱས་ན་ལམ་མཐར་ཕྱིན་ནས་འབྲས་བུ་ཐོབ་ཏུ་མེད་དོ། །ཐབས་ལམ་གྱི་སྤྱོད་པ་ཉི་ཤུ་རྩ་ལྔ་པོ་རྣམས་བརླང་པོ་རང་ཁ་མར་སྤྱོད་པ་ནི། བདག་དོན་དུ་མི་འགྱུར་བས་རང་ངན་སོང་དུ་འགྲོ། གཞན་དོན་དུ་མི་འགྱུར་བས་གཞན་གྱིས་ཐེག་ཆེན་ལ་མི་མོས་མི་དང་ནས་སྐུར་བས་བཏབ་པས་ངན་སོང་དུ་འགྲོ། གཉིས་དོན་དུ་མི་འགྱུར་བས་དོན་གཉིས་མི་འགྲུབ། ཆོས་དོན་དུ་མི་འགྱུར་བས་ཆོས་ཆུད་གསན་པ་དང་བཞིི་འབྱུང་བ་ཡིན་ཏེ། དེའི་རྒྱུ་མཚན་ནི། ཉོན་མོངས་པ་ལྔ་པོ་རྣམས་རང་ཁར་སྤྱོད་པའི་དབང་དུ་སོང་བས་ཉོན་མོངས་པ་ལྔ་ལ་སོགས་པའི་སྒོ་ནས་སོ་སོའི་རྣམ་སྨིན་ཚད་ལས་འདས་པ་ཞིག་བསགས་ནས། འབྲས་བུ་ངན་སོང་གི་སྡུག་བསྔལ་ཚད་ལས་འདས་པ་ཞིག་མྱོང་བར་བྱེད་དོ། །གཞན་ཡང་བྱང་ཆུབ་སེམས་དཔས་ལྟ་བ་ཕྱོགས་གཅིག་རྟོགས་ཀྱང་སྤྱོད་པའི་རྩལ་སྤྲུག་མ་ནུས་པས་བསྐལ་པ་གྲངས་མེད་གསུམ་ལ་སོགས་པ་ཐོགས། མུ་སྟེགས་པས་ལྟ་བ་མ་རྟོགས་པར་སྤྱོད་པ་བྱས་པས་ངན་སོང་ལ་འགྲོ་ཞེས་སྒྱུ་འཕྲུལ་རྒྱས་པ་ལས་གསུངས་སོ། །ལྔ་པ་ཡོན་ཏན་དང་། དྲང་། གོང་གི་གྲོལ་ལམ་དེ་རྣམས་རང་རང་གི་སྐབས་ལ་བདག་གཞན་གྱི་སྤྱོད་པ་དེ་ཡི་སྤྱོད་ན་དགོས་ཆེད་ཀྱི་སྐབས་ཡོན་ཏན་དེ་དག་ཡོད་པའི་ཕྱིར་ན། བདག་དོན་གྱི་སྤྱོད་པ་དེ་དང་། གཞན་དོན་གྱིས་སྤྱོད་ན། དེས་བདག་གཞན་གཉིས་པོ་འཁོར་མི་ལྟུང་ནས་འབྲས་བུ་ཐོབ་པའི་ཡོན་ཏན་དང་། ཐབས་ལམ་གྱི་སྤྱོད་པ་ཉི་ཤུ་རྩ་ལྔ་པོ་སོ་སོ་རང་ཁ་མའི་སྤྱོད་པ་བྱས་ན་ངན་སོང་དུ་ལྟུང་ལ། ལྟ་བས་ཟིན་ནས་སྤྱོད་ན་འབྲས་བུ་སངས་རྒྱས་ཐོབ་པས་བྱེད་ཅེས་རྒྱུད་གཞུང་ལས་གྲགས་པ་བཞིན་ཡིན་ལ། གཞན་ཡང་བསགས་བྱ་ཚོགས་གཉིས་རྫོགས་པ་འགྱུར་ཏེ། ཉོན་མོངས་ལ་སོགས་པ་མ་སྤངས་རང་རིག་ཏུ་གསལ་བ་ལམ་དུ་ཁྱེར་བས་བསོད་ནམས་དང་། དེའི་དུས་སུ་ཆོས་ཉིད་རང་ལས་མ་གཡོས་པས་ཡེ་ཤེས་ཀྱི་ཚོགས་རྫོགས་པ་དང་། ཉོན་མོངས་པ་ལྔ་ལ་སོགས་པ་ཉི་ཤུ་རྩ་ལྔ་པོ་ལ་སྤྱོད་ཀྱང་དྲི་མས་མ་གོས་པས་ན་སྒྲིབ་པ་དབྲི་བ་སྟེ་དག་པར་འགྱུར་རོ། །གསུམ་པ་འཕྲིན་ལས་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། གསུམ་པ་འཕྲིན་ལས་བྱ་བའི་སྡོམ་ཚིག་ནི། འཕྲིན་ལས་བྱ་བའི་དགོས་ཆེད་དང་། ངོ་བོ་ངོས་བཟུང་བ་དང་། ངེས་ཚིག་དང་། རྣམ་གྲངས་དུ་ཡོད་པ་དང་། འཕྲིན་ལས་བྱ་བའི་ཐབས་དང་། དུས་སྐབས་གར་མཁོ་བ་དང་། ཁྱད་པར་ཡོད་ཚུལ་དང་། མ་བྱས་པའི་སྐྱོན་དང་། བྱས་པའི་ཡོན་ཏན་དང་དགུ་ཡི་ནང་འཕྲིན་ལས་ཀྱི་རྒྱས་བཤད་དེ་ངེས་རྫོགས་པ་ཡིན་ནོ། །གཉིས་པ་བཤད་པ་དེ་ལ་དགུ་སྟེ། བགྲང་། དང་པོ་དགོས་ཆེད་དང་། དྲང་། རྣལ་འབྱོར་པ་བདག་དོན་དུ་བསྒྲུབ་པ་དང་། གདུལ་བྱ་གཞན་དོན་བྱེད་པ་དང་། བདག་གཞན་གཉིས་ཀའི་དོན་ལྷུན་གྲུབ་ཏུ་བསྒྲུབ་པ་དང་། དམ་པའི་ཆོས་དོན་དུ་འགྱུར་བའི་ཕྱིར་ན་ཞི་རྒྱས་དབང་དྲག་ལྷུན་གྱིས་གྲུབ་པའི་འཕྲིན་ལས་དང་རྣམ་པར་ལྔ་པོ་དེ་དཔེར་ན་ཞིང་བཟང་པོ་ལ་ས་བོན་བཏབ་ནས་རྐྱེན་ཆུ་ལུད་བྱས་པ་ཆུད་མི་ཟ་བ་བཞིན་དུ། བདག་གཞན་གྱི་དོན་བསྒྲུབས་ནས་འབྲས་བུ་ཆུད་མི་ཟ་བར་འབྱུང་བར་བྱེད་པ་ལ། འཕྲིན་ལས་རྣམ་པ་ལྔ་དང་དུ་བླང་དགོས་པ་ལ། དེའང་དབང་པོ་རབ་ཏིང་ངེ་འཛིན་ཁོ་ན། འབྲིང་གིས་ཏིང་ངེ་འཛིན་དང་སྔགས་གཉིས། ཐ་མས་མཚན་བཅས་ཀྱི་སྒོ་ནས་སྔགས་རྫས་ཏིང་ངེ་འཛིན་གསུམ་གྱི་སྒོ་ནས་ནུས་ཚད་དང་སྦྱར་བར་བྱའོ། །གཉིས་པ་ངོ་བོ་དང་། དྲང་། དེ་ཡང་འཕྲིན་ལས་རྣམ་པ་བཞིའི་གདུལ་བྱ་ལ་ཕྱི་ནང་གཉིས་གཉིས་གཅིག་ཏུ་བརྩི་བས་ཟུང་བཞི་པོ་དེ་རྣམས་འདུལ་བར་བྱེད་པའི་མཐུ་ཆེན་པོ་ཞི་རྒྱས་དབང་དྲག་གི་འཕྲིན་ལས་རྣམ་པ་བཞི་འབྱུང་བ་དང་། ལྷུན་གྲུབ་ཀྱི་ཕྲིན་ལས་གཅིག་གིས་གོང་གི་གདུལ་བྱ་ཕྱི་ནང་ཟུང་བཞི་པོ་ཀུན་འདུལ་ནུས་པའི་མཐུ་ཆེན་པོ་ཡོད་པ་དང་། སོགས་ཀྱི་སྒྲས་འདས་པའི་བྱེད་ལས་ཐམས་ཅད་འཕྲིན་ལས་ཀྱིས་བསྡུས་པས་དེ་ལྟར་ལྔ་པོ་གདུལ་བྱ་འདུལ་བྱེད་གང་ཡིན་པ་འཛོམས་པ་དེ་ཕྲིན་ལས་ཀྱི་ངོ་བོ་ཡིན་ནོ། །གསུམ་པ་ངེས་ཚིག་དང་། དྲང་། སྡུག་བསྔལ་གྱི་ཟུག་རྔུ་སྟེ་ཕྱི་ལ་ནད་བགེགས་དགྲ་དང་། ནང་དུ་ཉོན་མོངས་རྣམ་རྟོག་ཞི་བའི་ཕྱིར་ན་ཞི་བའི་འཕྲིན་ལས་ཀྱི་སྒྲ་འཇུག་པ་དང་། རྒྱས་པར་འཕེལ་བར་བྱ་བ་ལ་ཕྱི་ལ་ཤ་ནི་ལོ་ཐོག་གསོ་བ་དང་། ཚེ་དང་རིགས་རྒྱུད་ལ་སོགས་འཕེལ་བ་དང་། ནང་དུ་སྐུ་དང་ཡེ་ཤེས་ཏེ། དེ་ལྟར་གཉིས་པོ་འཕེལ་བར་བྱ་བའི་ཕྱིར་རྒྱས་པའི་སྒྲ་འཇུག་པ་དང་། གཟུངས་མ་ལ་སོགས་དགུག་པ་དང་། དགྲ་བགྲེགས་གཉིས་དབང་པོ་བསྒྱུར་བ་དང་། འབྲས་བུ་སྐུ་ལྔ་ལ་སོགས་བཞི་པོ་དབང་དུ་སྡུད་པའི་ཕྱིར་ན་དབང་གི་སྒྲ་འཇུག་པ་དང་། ཕྱི་ལ་དགྲ་བགེགས་དང་ནང་ལ་ཉོན་མོངས་པའི་གདུག་པ་རྣམ་པ་གཉིས་འཇོམས་པའི་ཕྱིར་ན་དྲག་པོའི་སྒྲར་འཇུག་པ་དང་། ལྔ་པ་ལྷུན་གྲུབ་ནི་སྔོན་ངོ་བོའི་དུས་སུ་བསྟན་པ་བཞིན་འཕྲིན་ལས་གཅིག་གི་ཀུན་འདུལ་བའི་ཕྱིར་ན་ལྷུན་གྱིས་གྲུབ་པའི་སྒྲར་འཇུག་པ་དང་། དེ་བས་ན་ཕྲིན་ལས་རྣམ་པ་ལྔའི་ངེས་ཚིག་གམ་སྒྲ་དོན་དེ་ངེས་པར་འགྲུབ་པ་ཡིན་ནོ། །བཞི་པ་ལས་བཞིའི་རྣམ་གྲངས་ལ་གཉིས་ཏེ། བགྲང་། དང་པོ་སྤྱིའི་རྣམ་གྲངས་དང་། དྲང་། འཕྲིན་ལས་ཀྱི་དོན་གྱི་དམིགས་སུ་ངོས་བཟུང་བའི་ཕྱིར་རྣམ་པར་ཕྱེ་ནས་གསུམ་སྟེ། གཞི་དང་། ལམ་དང་། འབྲས་བུའོ། །དང་པོ་ནི། གཞི་གནས་ལུགས་བྱང་ཆུབ་སེམས་ཀྱི་ངོ་བོར་ཞི་རྒྱས་དབང་དྲག་གི་ཕྲིན་ལས་བཞི་ལྷུན་གྲུབ་ཏུ་རང་བཞིན་གྱིས་གནས་པ་ཡིན་ཏེ། དེ་ལ་ཡང་གཉིས་ཏེ། དོན་དམ་སེམས་དངོས་པོའི་གནས་ལུགས་དང་། ཀུན་རྫོབ་ལུས་དངོས་པོའི་གནས་ལུགས་སོ། །དང་པོ་ནི། བྱང་བ་སྟོང་པའི་རང་བཞིན་ལ། ཉོན་ཤེས་བྱའི་སྒྲིབ་པ་ཀ་ནས་དག་པའི་ངོ་བོ་ནི་ཞི་བའི་འཕྲིན་ལས་རང་གནས་དང་། ཆུབ་པ་སྣང་བའི་རང་བཞིན་ལ་སྐུ་དང་ཡེ་ཤེས་ལྷུན་གྱིས་གྲུབ་པའི་ངོ་བོ་ནི་རྒྱས་པའི་འཕྲིན་ལས་རང་གནས་དང་། དེ་ལྟར་ཀ་དག་ལྷུན་གྲུབ་དབྱེར་མེད་ཀྱི་ངོ་བོ་ལ་ཡོད་མེད་ཐ་དད་ཀྱི་མཐའ་གཉིས་དང་བྲལ་བའི་གཉིས་མེད་ནི་དབང་གི་འཕྲིན་ལས་རང་གནས་དང་། དེས་ཡོད་མེད་སྣང་སྟོང་ཕྱོགས་རེའི་མཚན་མ་ཐམས་ཅད་འཇོམས་པའི་ཕྱིར་དྲག་པོའི་འཕྲིན་ལས་དང་བཞི་ལྷུན་གྱིས་གྲུབ་ཅིང་གནས་པའོ། །གཉིས་པ་ནི། ལུས་སྤྱི་ལ་འཕྲིན་ལས་བཞི་ལྷུན་གྱིས་གྲུབ་པར་གནས་ཏེ། སློབ་དཔོན་པདྨའི་གསུང་གིས། སྤྱི་བོར་སའི་དཀྱིལ་འཁོར་གྲུ་བཞི་སེར་པོ་རྒྱས་པའི་འཕྲིན་ལས་དང་། མགྲིན་པར་རླུང་གི་དཀྱིལ་འཁོར་ཟླ་གམ་དབང་གི་དང་། སྙིང་གར་མེའི་དཀྱིལ་འཁོར་གྲུ་གསུམ་ནག་པོའི་དང་། ལྟེ་བར་ཆུའི་དཀྱིལ་འཁོར་ཟླུམ་པོ་ཞི་བའི་འཕྲིན་ལས་དང་བཞི་རང་ལ་གནས་པ་ཡིན་པར་གསུངས་ཏེ། ལམ་རིམ་ལས། གནས་བཞིའི་འབྱུང་བའང་ལས་བཞི་སྟེ། ཞེས་པ་དང་། ཡང་ནང་སྙིང་ཁ་ཆོས་ཀྱི་འཁོར་ལོ་ལ་འཕྲིན་ལས་བཞི་ལྷུན་གྱི་གྲུབ་པར་གནས་ཏེ། དེ་ཉིད་ལས། སྣོད་ཀྱི་འོད་དབྱིབས་འཕྲིན་ལས་བཞི། །ཞེས་པ་དང་། གསང་བ་ཡུམ་གྱི་མཁའ་ལ་ཡང་། ལས་བཞི་ལྷུན་གྱིས་གྲུབ་པར་གནས་ཏེ། ཡང་དེ་ཉིད་ལས། གསང་བའི་མཁའ་ལ་རང་བཞིན་ལྡན། །ཅེས་སོ། །གཉིས་པ་ནི། ཐབས་གྲོལ་གྱི་ལམ་ཉམས་སུ་ལེན་པའི་དུས་སུ་ཕྲིན་ལས་རྣམ་པ་བཞི་ལས་མ་གཡོས་པ་ནི་འོག་ཏུ་འཆད་པ་དང་། གསུམ་པ་ནི། མཐར་ཐུག་སངས་རྒྱས་རིགས་ལྔའི་ཐུགས་རྗེས་སེམས་ཅན་གྱི་དོན་བྱེད་པ་དེ་ཡང་འཕྲིན་ལས་ལྔའི་སྒོ་ནས་མཛད་པ་དང་། དེ་ལྟར་གཞི་ལམ་འབྲས་བུ་གསུམ་དུ་ཕྱེ་བའོ། །དེ་ཡང་ལམ་རིམ་ལས། བཞི་ཕྱིར་རྣམ་བཞི་དོལ་བ་རྣམས། །གང་ལ་འཚམས་པར་འདུལ་བར་མཛད། །རྣམ་བཞིའི་བྱེ་བྲག་ཐ་དད་པ། །རེ་རེའང་ལྔ་ལྔའི་སྣང་ཚུལ་གྱིས་སྣང་། །དེ་རིགས་བཞི་ཡི་ཆ་འཛིན་པ། །ལས་ཀྱི་རིགས་ལ་ལྷུན་གྱི་གྲུབ། །རྣམ་པ་བཞི་ཡིས་འདུལ་མཛད་པ། །ཕྱག་རྒྱ་ཆེན་པོས་འདུལ་བས་རིགས་མ་ཡིན། །ཅེས་སོ། །གཉིས་པ་བྱེ་བྲག་ལམ་གྱི་རྣམ་གྲངས་དེ་ལ་གཉིས་ཏེ། ལམ་སྤྱིའི་རྣམ་གྲངས་དང་། ལས་བཞི་སོ་སོའི་རྣམ་གྲངས་སོ། །དང་པོ་ལ་གསུམ་སྟེ། བགྲང་། དང་པོ་བསྟན་པ་དང་། དྲང་། འདིར་བར་ལམ་གྱི་ཕྲིན་ལས་ཐབས་ལམ་དང་ཤེས་རབ་གྲོལ་ལམ་གཉིས་ཡིན་པ་ལས། གཉིས་པ་ཐབས་དང་ཤེས་རབ་ཀྱི་རྣམ་གྲངས་རྒྱས་པར་བཤད་པ་དང་། དྲང་། སྔ་མ་ཐབས་ལམ་ལ་སྟེང་སྒོ་དང་འོག་སྒོ་གཉིས་ཀྱང་ཕྲིན་ལས་བཞི་ཡིན་པ་དང་། ཕྱི་མ་གྲོལ་ལམ་ལ་ཡང་། ཤེས་རབ་ལྟ་བ་རྟོགས་པའི་ངོ་བོ་དང་། སྒོམ་པ་བསྐྱེད་རྫོགས་ཀྱི་ཏིང་ངེ་འཛིན་རྣམ་པ་གཉིས་ལ་ཡང་། གཞི་ལ་ཕྲིན་ལས་བཞི་ལྷུན་གྱིས་གྲུབ་པ་ལྟར། ལྟ་བ་རྟོགས་པ་དང་ཏིང་ངེ་འཛིན་གྱི་ངོ་བོ་ལ་ལས་བཞི་ཚང་བ་དང་། ཟ་ཚོགས་གཏོར་ལུང་ལྟར་ཟས་ལ་ལོངས་སྤྱོད་པ་ཡང་ལས་བཞི་ཡིན་པ་དང་། ལས་བཞི་ལྷག་པ་གཟུགས་བརྙན་མཆོད་རྟེན་གྱི་སྒོ་ནས་ལས་བཞི་བྱེད་པ་དང་། མེའི་སྒོ་ནས་ལས་བཞིའི་སྦྱིན་སྲེག་བྱེད་ཐབས་དང་གཉིས་སོ། །དེ་རྣམས་ཞོར་ལ་སྦྱིན་སྲེག་དང་སྦྱར་ནས་བཤད་ན། གྲོལ་ལམ་ལྟར། དང་པོ་ལྟ་བ་ལ་ཚང་ཚུལ་ནི། གཞི་ཆོས་ཉིད་རྟོགས་པའི་ངོ་བོ་ལ་དོན་ལས་བཞི་ཚང་བ་ནི་ཧོམ་ཁུང་། སྣང་སྲིད་ཀྱི་ཆོས་ནི་བསྲེག་རྫས་དེ་རྣམས་གང་ལ་ཡང་ཞེན་པ་མེད་པ་སྦྱིན་པ། ཡིད་འགྱུ་བ་རང་སར་གྲོལ་ནས་ཡེ་ཤེས་སུ་ཤར་བའི་མེ་དེས་ཉོན་མོངས་པ་དངོས་པོར་འཛིན་པ་ཐམས་ཅད་བསྲེགས་པའོ། །གཉིས་པ་ཏིང་ངེ་འཛིན་ལ་ཚང་ཚུལ་ནི། སྒོམ་པ་ཆོས་ཉིད་ཀྱི་ངོ་བོ་ལ་དོན་ལ་ལས་བཞི་ཚང་བ་ནི་ཧོམ་ཁུང་། རྣམ་ཤེས་ཕྲ་རགས་ནི་བསྲེག་རྫས། གང་ཤར་ཆོས་ཉིད་ཀྱི་ངོ་བོར་ཁྱེར་བས་སྦྱིན་པ། ཞེན་ཆགས་ཡེ་ཤེས་སུ་ཤར་བའི་མེ་དེས་འདོད་ཡོན་རང་རྒྱུད་དུ་ཞེན་ཅིང་ཆགས་པ་དེ་བསྲེགས་པའོ། །གསུམ་པ་འདོད་ཡོན་ཚོགས་སུ་རོལ་བ་ལ་ཡང་ལས་བཞི་ཚང་ཚུལ་ནི། ཞལ་ནི་ཧོམ་ཁུང་། ལྗགས་ནི་ཧོམ་གཟར། ཟས་ནི་བསྲེག་རྫས། འདོད་ཡོན་ཞེན་མེད་ལམ་དུ་ཁྱེར་བ་སྦྱིན་པ། ཞེན་ཆགས་ཡེ་ཤེས་སུ་ཤར་བའི་མེ་དེས་འདོད་ཡོན་རང་རྒྱུད་དུ་ཞེན་ཅིང་ཆགས་པ་དེ་བསྲེགས་པའོ། །ལྷག་པ་གཟུགས་བརྙན་ནི། འོག་བྱ་ཐབས་སྐབས་སུ་འཆད་པར་འགྱུར་རོ། །གསུམ་པ་མཇུག་གསུམ་དུ་བསྡུ་བའོ། །དྲང་། རྣམ་གྲངས་དེ་དག་ཚུར་ལ་བསྡུས་ན་ལྷག་པ་གཟུགས་བརྙན་ནི་ཕྱི་ཡིན་ལ། སྟེང་སྒོ་དང་། ལྟ་བ་དང་། ཏིང་ངེ་འཛིན་དང་། ལོངས་སྤྱོད་བཞི་ནང་ཡིན་ལ། འོག་སྒོ་གསང་བ་ཡིན་པར་བཤད་པ་དང་གསུམ་དུ་ཤེས་པར་བྱའོ། །གཉིས་པ་ལས་བཞིའི་རྣམ་གྲངས་སོ། །དྲང་། གོང་གི་ངོ་བོོ་ངོས་བཟུང་གི་སྐབས་དང་རྗེས་སུ་མཐུན་པར་ཞི་བའི་རྣམ་གྲངས་ཕྱི་ནང་གཉིས་ཏེ། ཕྱི་ལ་ནད་ཀྱི་བྱེ་བྲག་དང་། བགེགས་རྣམས་དང་། དགྲ་རྣམས་ཞི་བར་བྱེད་པའོ། །ནང་ལ་ཉོན་མོངས་པ་རྣམ་རྟོག་གི་བྱེ་བྲག་ཞི་བར་བྱེད་པའོ། །རྒྱས་པ་ལ་ཕྱི་ནང་གཉིས་པོ་ངོས་བཟུང་ན་ཕྱི་ལ་གསོ་བ་དང་འཕེལ་བ་སྟེ། གསོ་བ་ལ་ཡང་ན་བ་གསོ་བ། ཤི་བ་གསོ་བ། ལོ་ཐོག་གསོ་བ། སྲི་བུ་གསོ་བ། སོགས་ཁོང་དུ་རྟ་ཕྱུགས་གསོ་བ་སོགས་པ་རྣམས་སོ། །འཕེལ་བ་ལ་ཚེ་འཕེལ་བ་སྟེ་རིང་བ་དང་། རིགས་རྒྱུད་མང་དུ་འཕེལ་བ་དང་། ལོངས་སྤྱོད་འཕེལ་བ་སྟེ་ཆེ་བ་དང་། བསོད་ནམས་འཕེལ་བ་དང་། བཞི་བོ་ནི་ཕྱི་ཡིན་ལ། ནང་ལ་འབྲས་བུ་སྐུ་དང་ཡེ་ཤེས་འཕེལ་ཐབས་སོ། །དབང་ལ་ནི་དགུག་པ་དང་བསྡུ་བ་གཉིས་ཡོད་དེ། ཕྱི་རོལ་ལ་དྷ་ར་སྟེ་གཟུངས་མ་རིགས་ལྔ་དང་། རིགས་བཞིའི་རྣམ་པ་དགུག་པར་བྱེད་པའི་ཐབས་དང་། རང་དང་མི་མཐུན་པའི་དགྲ་བགེགས་རྣམ་པ་གཉིས་དབང་པོ་བསྒྱུར་ནས་མ་དད་པ་དད་པར་བྱ་བ་དང་། ནང་ལ་རང་གི་སེམས་ཉིད་ཀྱི་ངོ་བོ་ལ་འབྲས་བུ་སྐུ་གསུང་ཐུགས་ཡོན་ཏན་ཕྲིན་ལས་ལྔ་དབང་དུ་བསྡུ་བར་བྱ་བའི་ཐབས་སོ། །མངོན་སྤྱོད་དྲག་པོ་ལ་དགྲ་བགེགས་ཡུལ་གཞན་དུ་བསྐྲད་པའི་ཐབས་དང་། གཏན་ནས་མི་ལྡང་བར་བྱ་བའི་ཕྱིར་མནན་པ་དང་། དྲན་པ་ཉམས་ནས་སྨྱོ་བ་དང་། ཁ་ནས་ཅལ་ཅོལ་དུ་སྨྲ་ནས་འབོགས་པ་དང་། ལུས་འགུལ་མི་ཤེས་ནས་བྱད་དུ་བཅུག་པ་དང་། ལུས་དང་ཡན་ལག་གི་ཤ་མེད་ནས་བསྐོམས་པ་དང་། དྲན་པ་མི་དྲན་ནས་རྨོངས་པ་དང་། གཏན་ནས་གླིང་ཁམས་གཞན་དུ་འཕངས་ནས་སྤོ་བ་དང་། ལུས་སེམས་ཕྲལ་ནས་རྒྱུད་གཞན་གྱི་སེམས་ལ་ཞུགས་པའོ། །དེ་རྣམས་ཀྱི་སྒོ་ནས་རྣལ་འབྱོར་པ་རང་གི་ཕྱིའི་དགྲ་བགེགས་འཇོམས་པར་བྱེད་ལ། ནང་དུ་ཉོན་མོངས་པའི་དགྲ་བགེགས་འཇོམས་པར་བྱེད་པའི་ཐབས་རྣམས་སོ། །ལྔ་པ་བྱ་ཐབས་ལ་གཉིས་ཏེ། བགྲང་། དང་པོ་ཐབས་ལམ་གྱི་བྱ་ཐབས་དང་། དྲང་། ཕྲིན་ལས་ཉམས་སུ་བླང་བའི་བྱ་ཐབས་ནི་འདི་ལྟ་སྟེ། དེ་ལ་ལྷ་གསལ་བའི་ངང་ནས་ཐབས་ལམ་གྱི་བྱ་ཐབས་ལ་ཡང་གསང་བ་དང་ནང་གཉིས་སོ། །ནང་ལྟར་སྟེང་སྒོའི་རྩ་ཁམས་ཀྱི་འཁོར་ལོ་བཞིའི་གནས་སུ་བྱང་སེམས་ཐིག་ལེ་ལ་རིག་པ་གཏད་ནས་ཉམས་སུ་ལེན་པའི་དུས་སུ། བདེ་སྟོང་གི་ཡེ་ཤེས་ལ་ཞེན་ཆགས་ཀྱི་རྟོག་པ་དང་བྲལ་བ་ནི་ཞི་བའི་འཕྲིན་ལས་ཡིན་པ་དང་། དེའི་ཚེ་རྩ་དང་རླུང་དགའ་བཞིའི་ཡེ་ཤེས་སྐྱེལ་བ་ནི་རྒྱས་པའི་དང་། བདེ་སྟོང་གཉིས་མེད་ཀྱི་དོན་ཉམས་སུ་མྱོང་བ་ནི་དབང་གི་དང་། དེས་འགྱུ་བ་དང་འཛིན་ཞེན་ཆགས་གསུམ་གྱི་རྟོག་པའི་མཚན་མ་ཐམས་ཅད་འཛོམས་པ་ནི་དྲག་པོའི་ཕྲིན་ལས་དང་བཞིའོ། །ཡང་བླ་མ་དམ་པའི་གསུང་སྒྲོས་ལ་སྦྱིན་སྲེག་ལྟར་ཞོར་ལ་བཤད་ན། རྩ་འཁོར་གྱི་གནས་སུ་ལས་བཞིའི་དབྱིབས་སུ་དོད་ནས་ཡོད་པ་ཧོམ་ཁུང་། རོ་རྐྱང་གཉིས་དགང་བླུག་གཟར། སྒྲོམ་མདོའི་ཡྃ་ལས་རླུང་བྱུང་། སུམ་མདོའི་རྃ་ལ་ཕོག་ནས་མེ་སྦར་བའི་དྲོད་ཀྱིས། བསྲེག་རྫས་རྩ་གནས་ཀྱི་ཐིག་ལེ་བཞུ་ནས། རྩ་ཁམས་རྣམས་སུ་སྦྱིན་པས་བདེ་སྟོང་རྟོག་མེད་ཀྱི་ཡེ་ཤེས་སྐྱེས་པས། ཉོན་མོངས་རྣམ་རྟོག་བསྲེགས་པའོ། །ཡང་གསང་བ་འོག་སྒོ་ལྟར་ཉམས་སུ་བླངས་ན། གསང་བའི་ཡུལ་ཡུམ་དང་། དབང་པོ་རྡོ་རྗེ་རྩེའི་ཐེག་ལེ་དང་། དབང་ཤེས་བདེ་བའི་ཁམས་དང་གསུམ་ལ་སྦྱོར་ནས་ཡབ་ཡུམ་རོལ་པ་མཛད་པའི་ཚེ། །ཉི་ཟླ་གཉིས་འདྲེས་ཀྱི་དུས་སུ་བདེ་སྟོང་གཉིས་མེད་ཀྱི་ཡེ་ཤེས་ཉམས་སུ་མྱོང་བའི་ངོ་བོ་ལ། ཉོན་མོངས་ཆགས་རྟོག་གི་དྲི་མ་དང་བྲལ་བ་ནི་ཞི་བའི་ཕྲིན་ལས་ཡིན་པ་དང་། དེའི་ཚེ་ན་ཕུང་ཁམས་སྐྱེ་མཆེད་ཀྱི་རྟོག་ཚོགས་དང་། གསང་བའི་མཁའ་ལ་ལྷའི་དཀྱིལ་འཁོར་དུ་གསལ་ཞིང་། དགའ་བ་བཞི་དང་ཡེ་ཤེས་ལྔའི་དོན་སྒྲིབ་གཡོགས་མེད་པར་གསལ་བ་ནི་རྒྱས་པའི་དང་། དེ་ལྟར་བདེ་སྟོང་གཉིས་མེད་ཀྱི་དོན་མྱོང་བ་ནི་དབང་གི་དང་། དེས་ཉོན་མོངས་ཞེན་ཆགས་ཀྱི་རྟོག་པ་ཐམས་ཅད་འཇོམས་པ་ནི་དྲག་པོའི་ཕྲིན་ལས་དང་བཞི་ཞེས་བྱའོ། །ཡང་ཞོར་ལ་སྦྱིན་སྲེག་ལྟར་ན། ཡུམ་གྱི་མཁའ་ལ་ལས་བཞིའི་དབྱིབས་སུ་ཡོད་པ་ཧོམ་ཁུང་། ཡབ་ཀྱི་རྡོ་རྗེ་ཧོམ་གཟར། ཡབ་ཀྱི་ཐིག་ལེ་བསྲེག་རྫས་དེ་སྦྱིན་པས། བདེ་སྟོང་གི་ཡེ་ཤེས་སྐྱེས་པས་ཉོན་མོངས་ཆགས་རྟོག་རང་ཁ་མ་དེ་བསྲེགས་པའོ། །གཉིས་པ་གྲོལ་ལམ་གྱི་བྱ་ཐབས་དེ་ལ་གཉིས་ཏེ། བགྲང་། དང་པོ་སྤྱི་དང་། དྲང་། ཤེས་རབ་གྲོལ་ལམ་གྱི་སྒོ་ནས་ལས་བཞིའི་བྱ་ཐབས་ལ། ལྟ་བའི་རྗེས་སུ་སྒོམ་པས་ཉམས་སུ་ལེན་ཐབས་ལ་ཕྱི་ནང་གཉིས་ཀྱི་སྒོ་ནས་ཤེས་དགོས་ཏེ། དེ་ལ་ནང་ལྟར་ལས་བཞི་བྱ་ཐབས་གོང་དུ་སོང་ལ། གཉིས་པ་བྱེ་བྲག་ཏུ་ཕྱེ་བའི་ཐབས་དེ་ལ་གཉིས་ཏེ། བགྲང་། དང་པོ་ཚད་མེད་པ་དང་། དྲང་། ཕྱི་རོལ་རྗེས་ཐོབ་ཏུ་ཚད་མེད་པ་ཉིད་སྒོམ་པ་ལ་ཡང་ལས་བཞི་ཚང་སྟེ། ལྷ་རྒྱུད་ལས། ཞི་བ་སྙིང་རྗེས་དབྱིངས་སུ་འགུག་པའི་ཕྱིར། །འགུགས་བྱེད་ཆེན་པོ་བཛྲ་ཨཾ་གུ་ཤ །རྒྱས་པ་བྱམས་པས་ཡེ་ཤེས་འཕེལ་བའི་ཕྱིར། །འཕེལ་བྱེད་ཆེན་མོ་བཛྲ་པཱ་ཤ་ཧཱུྃ། །དགའ་བ་དབང་གིས་མཐའ་གཉིས་བསྡུ་བའི་ཕྱིར། །སྡོམ་བྱེད་ཆེན་མོ་བཛྲ་སྥོ་ཊ་བྃ། །བཏང་སྙོམས་དྲིལ་བུས་རྡུལ་དུ་བརླག་པའི་ཕྱིར། །རླག་བྱེད་ཆེན་མོ་བཛྲ་གྷཎྜེ་ཏོ། །ཞེས་གསུངས་ལ། ཆོས་རྗེ་རིན་པོ་ཆེའི་བཞེད་ལ། བྱམས་པ་ཞི་བ། སྙིང་རྗེ་དྲག་པོ། དགའ་བ་རྒྱས་པ། བཏང་སྙོམས་དབང་གི་འཕྲིན་ལས་སུ་འདོད་དོ། །གཉིས་པ་ལྷག་པ་གཟུགས་བརྙན་ལ་གཉིས་ཏེ། བགྲང་། དང་པོ་སྤྱི་དང་། དྲང་། ལྷག་པ་གཟུགས་བརྙན་གྱི་སྒོ་ནས་ལས་བཞི་བྱ་ཐབས་ལ་གཉིས་ཏེ། མཆོད་རྟེན་གྱི་སྒོ་ནས་ལས་བཞི་བྱ་ཐབས་དང་། སྦྱིན་སྲེག་མེའི་སྒོ་ནས་ལས་བཞི་བྱ་ཐབས་ཏེ། དེ་ལ་མཆོད་རྟེན་གྱི་སྒོ་ནས་བྱ་ཐབས་ནི། སྒྱུ་འཕྲུལ་ལེའུ་ལག་གི་ནས་ལས་བཞིའི་སཱཙྪ་བཏབ་ཐབས་དང་། རྒྱས་པའི་ལེའུ་ཉི་ཤུ་པ་ལས་ཀྱང་། ཆོས་སྐུ་ནག་པོ་འོད་འབར་གྱིས། །བགེགས་ཀྱི་ལིངྒ་མནན་པར་བྱ། །ཞེས་གསུངས་སོ། །གཉིས་པ་བྱེ་བྲག་ཏུ་བྱ་ཐབས་དེ་ལ་གཉིས་ཏེ། བགྲང་། དང་པོ་རྣམ་གྲངས་དང་། དྲང་། ཕྱི་མ་མེའི་སྒོ་ནས་སྦྱིན་སྲེག་བྱ་ཐབས་ལ། སྦྱིན་སྲེག་རྩ་བ་ལས། གནས་རྫས་ཐབས་ཀྱི་རྣམ་པ་དང་། །གཟུངས་དང་གཙོ་སེམས་བསྒྲུབ་བྱ་དང་། །ཕུར་པ་ལྷ་སེམས་དུས་རིམ་དང་། །ལྷག་མ་བཅུ་གཅིག་ཤེས་པར་བྱ། །ཞེས་བཅུ་གཅིག་གི་གོ་རིམ་དེ་ལྟར་གསུངས་ཀྱང་། འདིར་གཞུང་ལྟར་རྣམ་གྲངས་བཅུ་བཞིའམ་བཅོ་ལྔའི་གོ་རིམ་བསྒྲིག་པར་བྱ་སྟེ། དང་པོ་གནས་ནི། ཞི་བ་ལ་རི་བོ་འདུས་པའི་རྩེ། རྒྱས་པ་ལ་ནགས་ཚལ་དང་། སྨན་ལྗོངས་། དབང་ལ་སུམ་མདོ་དང་། ཆུ་བོ་འདུས་པ། དྲག་པོ་ལ་དུར་ཁྲོད་ཀྱི་གནས་སུ་བྱ་བ་དང་། དེ་ལ་ཞི་བའི་གནས་ནི། དེ་ཉིད་ལས། རི་བོ་འདུས་པའི་རྩེ་དག་དང་། །ཆུ་ཀླུང་འཛོམས་པའི་ས་ཕྱོགས་སུ། །དང་བར་བྱེད་པའི་ལས་རྣམས་བརྩོམས། །རྒྱས་པའི་གནས་ནི། ནགས་ཚལ་སྨན་ལྗོངས་མེ་ཏོག་ཚལ། །ལྷུན་སྡུག་རི་བོ་རྒྱས་པ་བྱ། །དབང་གི་གནས་ནི། སུམ་མདོ་ཆུ་བོ་འདུས་པ་དང་། །བཞི་མདོ་ཁོང་སྟོང་སྡུད་ཅེས་བྱ། །དྲག་པོའི་གནས་ནི། དུར་ཁྲོད་ངན་པའི་ས་ཕྱོགས་སུ། །ལྷག་པར་བརྩམ་ན་ངེས་པར་འགྲུབ། །ཅེས་པས། ལས་བཞིའི་གནས་དེ་དག་ཤིན་ཏུ་གལ་ཆེ་བར་བསྟན་ཏེ། དེ་ཉིད་ལས། རང་བཞིན་ནུས་མཐུ་ལྡན་པའི་ཕྱིར། །ཤིན་ཏུ་དགོས་པར་བསྟེན་པ་ཡིན། །ཅེས་གསུངས་སོ། །གཉིས་པ་སྒྲུབ་པ་པོའི་གང་ཟག་ནི། བདེན་པ་དབྱེར་མེད་ཀྱི་ལྟ་བ་གཏིང་འབྱིན་པར་རྟོགས་པ། ཏིང་ངེ་འཛིན་བསྐྱེད་རྫོགས་ཟུང་འཇུག་གིས་སེམས་ཀྱི་གནས་རྙེད་པ། སྤྱོད་པ་གཉིས་འཛིན་གྱི་རྩོལ་བ་དང་བྲལ་བ་ཉམས་སུ་ལེན་པ། ཕྲིན་ལས་ཆོག་འགྲིག་གི་ལག་ལེན་ལ་མཁས་པ་དང་། གསུམ་པ་ཐབས་ཀྱི་རྣམ་པ་ནི། དེ་ཉིད་ལས། ས་བཞི་ལེགས་པར་སྦྱངས་བྱས་ནས། །ཞེས་པས། ས་གཞི་རྣམས་ལེགས་པར་སྦྱངས་བར་བྱས་ནས། ལས་བཞིའི་ཐབས་བརྩེགས་པ་ལ། དེ་ཉིད་ལས། དཀྱིལ་འཁོར་ཟླུམ་པོ་རིམ་པ་གསུམ། །ཞེས་སོགས་གསུངས་པས། ཞི་བ་ལ་ཟླུམ་པོ་འཁོར་ལོ་རྩིབས་བཞི། རྒྱས་པ་ལ་གྲུ་བཞིའམ་རིན་ཆེན་ཟུར་བརྒྱད། དབང་ལ་ཟླ་གམ་མམ་པདྨ་འདབ་བརྒྱད། དྲག་པོ་ལ་གྲུ་གསུམ་ཁྲོ་ཞལ་སྟེ་ཐབས་བརྒྱད། ཞི་བ་ལ་འཁོར་ལོ་ༀ། རྒྱས་པ་ལ་རིན་ཆེན་ཏྲཱྂ། དབང་ལ་པདྨ་ཧྲཱིཿ དྲག་པོ་ལ་རྡོ་རྗེའམ་ཁ་ཊྂ་ལ་ཧཱུྃ་གིས་མཚན་པའོ། །དེ་ཡང་། ལས་བཞིའི་ཐབ་ཀྱི་དབྱིབས་བཞི་པོ་རེ་རེ་ལ་བང་རིམ་གསུམ་གསུམ་སྟེ། ཞི་བའི་ཟླུམ་པོ་ནང་མ་ལ་ཁྲུ་གང་། རྒྱས་པའི་གྲུ་བཞི་ལ་ཁྲུ་གང་། དབང་ཡང་དཀྱིལ་ན་ཕར་ཁྲུ་གང་ཡོད་པ། དྲག་པོ་ཡང་ངོས་རེ་ལ་ཁྲུ་གང་རེ་ཡོད་པ། བཞི་ཀ་ཟབས་སུ་ཁྲུ་ཕྱེད་བྲུས་པའོ། །ཁ་ཁྱེར་ཕར་སོར་བཞི་བསྐྱེད། ཡར་སོར་བཞི་བརྩིགས། ཡང་སོར་བཞི་བསྐྱེད། སོར་བཞི་སྨད། ཡང་སོར་བཞི་བསྐྱེད་པས་ཁ་ཁྱེར་གསུམ་གསུམ་པ་བཞི་ཀ་ལ་མཐུན་ནོ། །ཞི་བའི་གསུམ་ལ་ནང་མ་ལ་རྡོ་རྗེ། ཁ་ཁྱེར་མཐོ་བ་ལ་འཁོར་ལོ། ཕྱི་ཏ་དམའ་བ་ལ་མེ་འོད་གཏང་། རྒྱས་པའི་གསུམ་པ་ནང་མ་ལ་རྡོ་རྗེ། བར་མ་ལ་རིན་པོ་ཆེ། ཕྱི་ཏ་ལ་ཞགས་པ་གཏང་། དབང་གི་གསུམ་ལ་ནང་མ་ལ་རྡོ་རྗེ། མཐོ་བ་ལ་པདྨ། ཕྱི་ཏ་ལ་ལྕགས་སྒྲོག །དྲག་པོའི་གསུམ་ལ། ནང་མ་ལ་རྡོ་རྗེ། མཐོ་བ་ལ་ཐོད་པ། ཕྱི་ཏ་ལ་ལྕགས་ཀྱུ་གཏང་ངོ་། །དེ་ཉིད་ལས། དཀྱིལ་འཁོར་གསུམ་པོ་རིམ་པ་གསུམ། །ཁྲུ་གང་དཔངས་དང་ཞེང་དུ་ཡིན། །ཟབ་དང་གྱེན་ནི་ཕྱེད་དུ་བཤད། །འཁོར་ལོ་ༀ་གྱི་སྙིང་པོར་ལྡན། །རྡོ་རྗེ་འཁོར་ལོ་མེ་འོད་རིམ། །མདའ་བཞི་ཞགས་པ་དཀར་པོས་དཀྲིས། །གཞན་ཡང་འཁོར་ལོ་རྩིབས་བཞི་ལ། །རིགས་བཞིའི་ཕྱག་རྒྱ་རབ་ཤེས་ན། །ༀ་དང་སེང་མགོ་སྤེལ་མར་བྲི། །མུ་ཁྱུར་བསྐོར་བ་ཕྱི་རུ་བཤད། །ཐམས་ཅད་ཞི་བྱེད་དཀྱིལ་འཁོར་ཡིན། །གཉིས་པ་རྒྱས་པའི་ཐབ་ནི། ཡེ་ཤེས་ཕྱོགས་བཞི་དབུས་འོད་འབར། །གྲུ་ཆད་ལ་སོགས་རིམ་རྗེས་མཐུན། །རྡོ་རྗེ་རིན་ཆེན་ཞགས་པས་བསྐོར། །དབུས་སུ་རིན་ཆེན་ཏྲཱྂ་སྙིང་ལྡན། །གཞན་ཡང་རིན་ཆེན་དབྱིབས་གཉིས་སུ། །རིམ་པ་ལ་སོགས་རྗེས་སུ་མཐུན། །ཞགས་པ་སེར་པོ་མདའ་བཞིས་བསྐོར། །ཐམས་ཅད་སྤེལ་བྱེད་དཀྱིལ་འཁོར་ཡིན། །གསུམ་པ་དབང་གི་ཐབ་ནི། ཧོམ་ཁུང་ཟླ་གམ་གདེངས་པ་ལ། །རྡོ་རྗེ་པདྨོ་འོད་འབར་བ། །ལྕགས་སྒྲོག་གཏམས་པས་མཛེས་པར་བྱ། །པདྨ་ཏྲཱིཿཡི་སྙིང་པོར་ལྡན། །གཞན་ཡང་འདབ་བརྒྱད་དེ་བཞིན་དུ། །ཐ་མ་ལྗོན་ཤིང་མཛེས་པས་བསྐོར། །མདའ་བཞི་ཞགས་བསྡུས་དབང་གི་ཡིན། །བཞི་པ་དྲག་པོའི་ཐབ་ནི། དཀྱིལ་འཁོར་གྲུ་གསུམ་གདེང་པ་ལ། །དུར་ཁྲོད་སོལ་བས་ཁྱབ་པར་སྦྱར། །རྡོ་རྗེ་རྩེ་གསུམ་གདེངས་པ་ལ། །ཐོད་པ་ལྕགས་ཀྱུ་གཏམ་པས་བསྐོར། །ༀ་ཧཱུྃ་རྡོ་རྗེ་སྙིང་པོར་ལྡན། །མདའ་བཞི་ཞགས་པ་ནག་པོས་བསྐོར། །གཞན་ཡང་ཞལ་གདངས་སྤྱན་བགྲད་པའི། །ཁྲོ་ཞལ་ཤིན་ཏུ་འཇིགས་པ་ཡིས། །མེ་དཔུང་འབར་བས་རབ་མཛེས་པ། །འདི་ནི་གསོད་པའི་མཆོག་ཏུ་གསུངས། །ཞེས་སོ། །བཞི་པ་བྲུབ་ཁུང་ནི། ཐབ་ཁུང་དེའི་ལྷོ་ནུབ་མཚམས་སུ་ལས་བཞི་རང་རང་གི་དབྱིབས་ཅན་གྱི་ཚད་མཐོ་གང་བ་རེ་རེ་དང་བཅས་པ་ཁ་ཁྱེར་གཅིག་པ་སྟེ། ལིངྒའི་གནས་ཡིན་པ་དང་། ལྔ་པ་སྒྲུབ་པ་པོའི་ཁ་བལྟ་ཕྱོགས་ལ་གཉིས་ཏེ་གདུལ་བྱ་དང་འདུལ་བྱེད་དོ། །དང་པོ་ཡུལ་གདུལ་བྱ་དང་བསྟུན་ན། ཞི་བ་ལ་རང་ནུབ་ཏུ་འདུག་ཅིང་ཁ་ཤར་དུ་བལྟ། གསུམ་པོ་དེའི་འགྲེས་སུ་ཤེས་སོ། །གཉིས་པ་འདུལ་བྱེད་དམ་ཡེ་ཤེས་དང་བསྟུན་ན། ཞི་བ་ལ་རང་ཤར་དུ་འདུག་ཅིང་ཁ་ནུབ་ཏུ་བལྟ། གསུམ་པོ་དེའི་འགྲེས་སུ་ཤེས་སོ། །དྲུག་པ་སྒྲུབ་པ་པོའི་ཆས་གོས་དང་། ཐབ་ཁུང་གི་ཁ་དོག་ནི། ཞི་བ་ལ་དཀར་པོ། རྒྱས་པ་ལ་སེར་པོ། དབང་ལ་དམར་པོ། དྲག་པོ་ལ་མཐིང་ནག་གོ། །བདུན་པ་དུས་ཉིད་ནི། དང་པོ་ལོ་གཅིག་ལ་དབྱེ་ན། དེ་ཉིད་ལས། དབྱར་དགུན་སྟོན་དཔྱིད་ལས་རིམ་དང་། །ཞེས་གསུངས་ལས། དབྱར་ཞི་བ། སྟོན་རྒྱས་པ། དགུན་དབང་། དཔྱིད་དྲག་པོའོ། །ཞག་གཅིག་ལ་དབྱེ་ན། ཡང་། སྔ་དྲོ་གུང་དགོང་ནམ་ཕྱེད་དུས། །ལས་རིམ་བརྩམ་ན་ཤིས་པར་བཤད། །ཅེས་གསུངས་པས། སྔ་དྲོ་ཞི་བ། ཉིན་ཕྱེད་རྒྱས་པ། དགོང་མོ་དབང་། ནམ་གུང་དྲག་པོའི་སྦྱིན་སྲེག་བྱའོ། །བརྒྱད་པ་ཕུར་པ་ནི། ཞི་བ་ལ་དངུལ་ལམ་ཤིང་དཀར་པོའི་ཕུར་པ་དབལ་ཟླུམ་པོར་བྱས་པ་དྲུག །རྒྱས་པ་ལ་གསེར་རམ་ཤིང་སེར་པོའི་ཕུར་པ་དབལ་གྲུ་བཞི་བྱས་པ་བཞི། དབང་ལ་ཟངས་སམ་ཤིང་དམར་པོའི་ཕུར་པ་དབལ་ཟླ་གམ་དུ་བྱས་པ་ལྔ། དྲག་པོ་ལ་ལྕགས་སམ་ཤིང་ནག་པོའི་ཕུར་པ་དབལ་ཟུར་གསུམ་བྱས་པ་གསུམ། དེ་དག་ཀྱང་གྲུབ་ན་ལས་བྱེད་ཀྱི་ཕུར་པ་ཉི་ཤུ་རྩ་གཅིག་རེ་སྟེ། སྲས་མཆོག་ཉི་ཤུ་རྩ་གཅིག་ཏུ་གསལ་བར་བཤམ་མོ། །དེ་ཡང་དང་པོ་ཞི་བའི་ཕུར་པ་ནི། དེ་ཉིད་ལས། དངུལ་ལམ་དཀར་པོའི་ཤིང་རྣམས་ལ། །མགོ་བོ་རྒྱ་མདུད་རྩེ་ཟླུམ་པོ། །སྟེང་འོག་ལོགས་ལ་ཁྲོ་བཅུ་བསྒོམ། །འཕྲོ་འདུས་བདེ་གཤེགས་ཕུར་པ་ལ། །སྔགས་དང་ཕྱག་རྒྱས་བྱིན་བརླབས་པས། །མཐའ་བསྐོར་ཡན་ལག་སྙིང་ལ་སྦྱར། །གཉིས་པ་རྒྱས་པའི་ཕུར་པ་ནི། །གསེར་རམ་སེར་པོའི་ཤིང་རྣམས་ལ། །མགོ་བོ་རྒྱ་མདུད་རྩེ་ཟུར་བཞི། །ལྷ་རྣམས་དེ་བཞིན་རིན་ཆེན་འཕྲོ། །ཟུར་བཞི་གནས་པ་ལུས་གནས་བཞིར། །བཏབ་པས་ཡོན་ཏན་འདུ་བར་བསམ། །གསུམ་པ་དབང་གི་ཕུར་པ་ནི། །ཡང་། ཟངས་སམ་དམར་པོའི་ཤིང་རྣམས་ལ། །མགོ་བོ་རྒྱ་མདུད་རྩེ་ཟླ་གམ། །དེ་བཞིན་ཆགས་པའི་ཕུར་བུར་ཤེས། །ཟླ་གམ་མཐའ་སྐོར་དབང་ལ་སྦྱར། །དེ་དག་བསྒྱུར་ཏེ་འདུས་པར་བྱ། །བཞི་པ་དྲག་པོའི་ཕུར་པ་ནི། ཡང་། ལྕགས་སམ་ནག་པོའི་ཤིང་རྣམས་ལ། །མགོ་བོ་རྒྱ་མདུད་རྩེ་གསུམ་པ། །དེ་བཞིན་རྡོ་རྗེ་ཕུར་བརླབ་པ། །ཟུར་གསུམ་ལུས་ངག་སེམས་ལ་སྦྱར། །འགྲུབ་འགྱུར་འདི་ལ་ཐེ་ཚོམ་མེད། །ལས་བྱེད་ཉི་ཤུ་གཅིག་ཏུའང་གསུངས། །ཞེས་སོ། །དགུ་པ་ལྷ་ནི། ལས་སྦྱོར་གྱི་ལྷ་ཞི་ཁྲོའི་དཀྱིལ་ཆོག་གཞུང་བཞིན་བསྲང་ངོ་། །སྦྱིན་སྲེག་གི་ལྷ་ནི། དེ་ཉིད་ལས། སྦྱིན་དང་བསྲེག་པའི་ལྷ་གཉིས་ཏེ། །ཞེས་གསུངས་པས། མེ་ལྷ་དང་། སྲེག་ལྷ་གཉིས་སོ། །དང་པོ་མེ་ལྷ་ནི། རིགས་བཞི་སངས་རྒྱས་ཀྱི་སྤྲུལ་པ་འཕྲིན་ལས་བཞི་གང་ལ་ཐོགས་པ་མེད་པར་འཇུག་པའི་སྐུ་མདོག་ཕྱག་མཚན་ཅན་ཡིན། དེ་ཡང་རའི་གདན་ཐོག་ན། ཞི་བའི་མེ་ལྷ་ནི། ༀ་ལས་སྐུ་མདོག་དཀར་པོ་ཕྱག་གཡས་ན་རིལ་བ་སྤྱི་བླུགས་བསྣམས་པ། རྒྱས་པ་ནི། ཏྲཱྂ་ལས་སེར་པོ་གཡས་པས་རིན་པོ་ཆེའི་སྒྲོམ། དབང་ནི་ཧྲཱིཿལས་དམར་པོ་གཡས་པས་ཞགས་པ། དྲག་པོ་ནི་ཧཱུྃ་ལས་ནག་པོ་གཡས་པས་ཏྲི་ཤུ་ལ། གཡོན་བཞི་ཀས་བགྲངས་ཕྲེང་འཛིན་པ། དྲང་སྲོང་གི་ཆ་བྱད་ཅན། ར་སྐྱེས་ལ་བཅིབ་པ་སྟེ། དེ་ཉིད་ལས། སངས་རྒྱས་རིགས་ཀྱི་སྤྲུལ་པའི་ཕྱིར། །ཐམས་ཅད་ལས་ལ་ཐོགས་མེད་འཇུག །སྐུ་མདོག་ཆ་ལུགས་ལས་བཞི་མཐུན། །གྷནྡྷེ་སྒྲོམ་ཞགས་ཏྲི་ཤུལ་འཛིན། །རིགས་ཀྱི་ཕྱག་རྒྱས་གདབ་པར་བྱ། །ༀ་ཏྲཱྂ་ཧྲཱིཿཧཱུྃ་ས་བོན་སྙིང་། །ཨགྣེ་དེ་ཝ་ལས་བཞིའི་སྔགས། །འཕྲོ་འདུས་ལྡན་པའི་འཁོར་གྱིས་བསྐོར། །ཞལ་ཕྱིར་སྦྱིན་པའི་ལྷར་བཤད་དོ། །ཞེས་སོ། །གཉིས་བསྲེག་ལྷ་ནི། ཞི་ཁྲོའི་ལྷ་སྟེ། བཞི་བཅུ་རྩ་གཉིས་སམ། ལྔ་བཅུ་རྩ་བརྒྱད་ཀྱི་དཀྱིལ་འཁོར་བསྒོམ་སྟེ། དེ་ཡང་ཞི་བའི་འཕྲིན་ལས་ལ་རྣམ་སྣང་དང་། བུདྷ་ཧེ་རུ་ཀས་གཙོར་བྱས་པའི་ཞི་ཁྲོའི་ལྷ་ཀུན། སྐུ་མདོག་དཀར་པོ་འོད་ཟེར་དཀར་པོ་འཕྲོ་བ། ཕྱག་མཚན་ནི། ལྷ་ཀུན་གྱི་གཡས་དང་པོས་འཁོར་ལོ་འཛིན་པའོ། །རྒྱས་པ་ལ་རིན་འབྱུང་དང་། རཏྣ་ཧེ་རུ་ཀས་གཙོས་བྱས་པའི་ལྷ་ཀུན་སེར་པོ་འོད་ཟེར་སེར་པོ། ཕྱག་གཡས་རིན་ཆེན། དབང་ལ་སྣང་མཐའ་དང་། པདྨ་ཧེ་རུ་ཀས་གཙོར་བྱས་པའི་ལྷ་ཀུན་དམར་པོ་འོད་ཟེར་དམར་པོ། ལྕགས་སྒྲོག་འཛིན་པ། དྲག་པོ་ལ་རྡོ་རྗེ་སེམས་དཔའ་དང་། བཛྲ་ཧེ་རུ་ཀས་གཙོ་བྱས་པའི་ལྷ་ཀུན་མཐིང་ཀ །གཡས་རྡོ་རྗེ་འཛིན་པ་བསྐྱེད་དོ། །དེ་ཉིད་ལས། གཟུགས་བརྙན་ལྟ་བུའི་གཞལ་ཡས་ནི། །འོད་ཟེར་འབར་བས་ཁྱབ་པར་བྱ། །རྒྱལ་པོ་ལུས་མཛེས་འཁོར་ལོ་འཆང་། །རྒྱན་རྣམས་ཞི་ལ་དཀར་བ་དང་། །འོད་ཟེར་མཆོག་འབར་ལྷན་ནེར་བསྒོམ། །ཁྲོ་བོའི་དཀྱིལ་འཁོར་མ་ལུས་པ། །ཀུན་ཀྱང་གཏི་མུག་རྡོ་རྗེའི་ཚུལ། །འཁོར་ལོ་འོད་ཟེར་ལྡན་པ་ཡི། །ཁམས་གསུམ་ཐམས་ཅད་ཁྱབ་པ་སྦྱར། །ས་བོན་ༀ་དང་རང་སྔགས་ལྡན། །གཞན་ལའང་དེ་བཞིན་ཤེས་པར་བྱ། །རིན་ཆེན་དགའ་འཕྲོ་སེར་སྐྱ་ནི། །འོད་ཟེར་འབར་བའི་རིན་ཆེན་ཅན། །སྔགས་སོགས་གཞན་ནི་སྔ་མའི་ཚུལ། །སྤྲུལ་པའང་རྗེས་སུ་མཐུན་པ་སྟེ། །ཛཿཧཱུྃ་བྂ་ཧོ་ལྡན་པར་བྱ། །འདོད་ཆགས་རྡོ་རྗེ་ལྕགས་སྒྲོག་དང་། །མདོག་ནི་དམར་སྨུག་འོད་པོ་ཆེ། །སྔགས་ནི་ཡི་གེ་ར་དང་ཧྲཱི། །ཕྱོགས་བཅུར་ཁྱབ་ཅིང་ཧྲི་ལ་བསྡུས། །ཞེ་སྡང་རྡོ་རྗེ་གཏུམ་ཆེན་འབར། །དུད་ཀ་ནག་པོའི་མདོག་འདྲ་བ། །འབར་བ་སྔོ་དམར་མེ་སྟག་འཕྲོ། །ཉི་ཟླ་ཐོད་སྦྲུལ་གདུག་པས་བརྒྱན། །སེང་གེ་གླང་ཆེན་སྟག་རྔམ་དང་། །རྦོད་གཏོང་ལྡན་པའི་ཕྱག་རྒྱ་ལྡན། །སྒྲ་སྐད་དྲག་པོས་ཁམས་གསུམ་དཀྲུགས། །བསྒྲུབ་བྱ་ཕྱག་རྒྱ་གོམས་པ་ཡིས། །གང་ལ་དམིགས་པ་འགྲུབ་པར་འགྱུར། །ཞེས་སོ། །བཅུ་པ་སེམས་ལ་གཉིས་ཏེ། དོན་སེམས་སྤྱིར་བསྟན་པ་དང་། དོན་སེམས་བཞི་དང་གདུང་སེམས་བཞི་བྱེ་བྲག་ཏུ་བཤད་པའོ། །དང་པོ་ནི། འཁོར་འདས་ཀུན་གྱི་བདག་ཉིད་རང་རིག་པ་བྱང་ཆུབ་ཀྱི་སེམས་མངོན་དུ་བྱས་པ་ཡིན་ཏེ། དེ་ཉིད་ལས། རང་རིག་སངས་རྒྱས་ཀུན་གྱི་དངོས། །ཐམས་ཅད་རང་དབང་བདག་བསྒྱུར་ཕྱིར། །བསྒྲུབ་པའི་གཙོ་བོ་འདི་གསུངས་སོ། །ཞེས་སོ། །གཉིས་པ་བྱེ་བྲག་ཏུ་བཤད་པ་ལ་ཟུང་བཞི་ལས། དང་པོ་ཞི་བ་གཉིས་ནི། དེ་ཉིད་ལས། མ་ལུས་སེམས་ནི་མཐའ་བྲལ་ཕྱིར། །རང་བཞིན་རྣམ་དག་མངོན་དུ་བྱ། །གཉིས་པ་རྒྱས་པའི་གཉིས་ནི། སེམས་གཏེར་རྟོག་ཚོགས་དཀྱིལ་འཁོར་ཕྱིར། །བྱིན་རླབས་བསྡུས་འཕེལ་མངོན་དུ་བསྒོམ། །གསུམ་པ་དབང་གི་གཉིས་ནི། ཐམས་ཅད་བདག་ཕྱིར་ཐ་མི་དད། །ཤིན་ཏུ་ཞེན་པ་ཉིད་ཀྱིས་འགྲུབ། །ཆགས་པ་ཆེན་པོ་ཉིད་དུ་བཤད། །བཞི་པ་དྲག་པོའི་གཉིས་ནི། རང་བཞིན་གཅིག་ཕྱིར་དངོས་མེད་འཇིགས། །ལོག་རྟོག་ཁྲོས་པའི་སེམས་ཀྱིས་བསྐུལ། །ཡང་དག་ཞེ་སྡང་ཆེན་པོར་གསུངས། །ཞེས་སོ། །ཡང་ན་གདུང་སེམས་ནི། ཞི་བ་ལ་ཞི་ཞིང་དྭངས་པ། རྒྱས་པ་ལ་སྤྲོ་ཞིང་དགའ་བ། དབང་ལ་ཞེན་ཅིང་ཆགས་པ། དྲག་པོ་ལ་ཁྲོ་ཞིང་གཏུམ་པའི་སེམས་ཀྱིས་ཏེ། གསང་སྙིང་ལས། དྭངས་པ་དགའ་བ་ཆགས་པ་དང་། །ཁྲོས་པས་ཀཱ་ལི་རབ་ཏུ་བྱ། །ཞེས་སོ། །བཅུ་གཅིག་པ་ཡུམ་ནི། ཞི་བ་ལ་བོང་ཆུང་བ། བཞིན་ལུས་མཛེས་པ། མདོག་དཀར་བ། རྒྱས་པ་ལ། བཞིན་གྲུ་བཞི། ཤ་དང་ནུ་མ་རྒྱས་ཤིང་རྣ་བ་འཕྱང་བ། མདོག་སེར་པོ། སྤུན་ཟླ་མང་བ། དབང་ལ་བཞིན་ཟླ་གམ། ཤ་དམར། ལུས་མཛེས་པ། སྤུན་ཟླ་མེད་པའོ། །དྲག་པོ་ལ་བཞིན་གྲུ་གསུམ། ཤ་ནག་ལ་སྐྲ་རྩུབ་པ། ངག་གཏུམ་པའོ། །དེ་ལྟར་བཞི་ལས། དང་པོ་ཞི་བའི་གཟུངས་མ་ནི། སྒྱུ་འཕྲུལ་རྡོ་རྗེ་ལས། བོང་ཆུང་ལུས་མཛེས་ཟླ་བའི་མདོག །གཡས་འཁྱིལ་ལུས་ཀྱང་དེ་བཞིན་ཤེས། །སྐད་གསལ་སྔགས་ཟློས་ཡིད་མི་སྐྱོ། །ཁྲོ་ཡང་དེ་བཞིན་ཞི་ལ་སྦྱར། །རྒྱས་པའི་ཡུམ་ནི། ཡང་། བན་གླང་སེར་མོ་གྲུ་བཞི་མ། །རྣ་བ་འགྲམ་ཟླ་རིང་ཤ་རྒྱས། །ཡན་ལག་ཟླ་མང་ལས་ལ་མཁས། །དལ་ཞིང་བློ་གྲོས་ལྡན་པ་ནི། །འཕེལ་བའི་དུས་སུ་འདི་ཤེས་བྱ། །ཞེས་སོ། །བཅུ་གཉིས་པ་བསྒྲུབ་བྱ་ནི། ཞི་བའི་བསྒྲུབ་བྱ་ནི། བདག་གཞན་ལ་གཏུམ་ཞིང་རྔམ་པའི་དགྲ་བགེགས་དང་། རང་གི་སེམས་ཀྱི་ཉོན་མོངས་པ་རྣམ་རྟོག་ཆེ་བ་དང་། གཞན་གྱི་རྦོད་གཏོང་ངན་པ་ལ་སོགས་པ་རྣམས་སོ། །རྒྱས་པའི་བསྒྲུབ་བྱ་ནི། ཚེ་དང་བསོད་ནམས་དང་ལོངས་སྤྱོད་ལ་སོགས་པ་མི་ལྡན་པ་དེ་ལ། གཞན་ཚེ་དང་བསོད་ནམས་ལོངས་སྤྱོད་དང་ལྡན་པ་གཅིག་བཀུག་ནས། དེ་ལ་བསྟིམ་པའོ། །དབང་གི་བསྒྲུབ་བྱ་ནི། བདག་ལ་ཕོ་མོ་དགྲ་བགེགས་གང་ཡིན་པ་མི་མོས་ཤིང་མི་འདུད་པ་དེ་བཀུག་སྟེ་དབང་དུ་བསྡུ་བའོ། །དྲག་པོའི་བསྒྲུབ་བྱ་ནི། བསྒྲལ་བའི་ཞིང་བཅུ་པོ་ཚར་བཅད་པའོ། །དེ་ཡང་། སྦྱིན་སྲེག་རྩ་བ་ལས། བདག་གཞན་གནོད་པའི་སེམས་དང་ནི། །སྦྱོར་བ་ངན་པའི་རིག་སྔགས་ལས། །ཁམས་རྐྱེན་ལས་གྱུར་གནོད་མང་བ། །གསུམ་པའི་ལས་ལ་སྦྱོར་བྱ་ཞིང་། །ལྷ་ཡང་དེ་བཞིན་ཤེས་པར་བྱ། །ཞིང་བཅུར་གྱུར་པའི་སེམས་ཅན་དང་། །དམ་པའི་ཆོས་འཇིག་མ་རུང་བྱེད། །དཔའ་བོས་དགོས་པ་ཡོད་པའི་ཕྱིར། །ཀུན་ལ་ཕན་ཕྱིར་དེ་བྱའོ། །ཞེས་སོ། །བཅུ་གསུམ་པ་ལས་བཞི་སོ་སོའི་ལིངྒའི་རྒྱུ་ནི། བསྒྲུབ་རྒྱ་གང་ཡིན་པའི་དམ་རྫས། དྲི་མ། རྗེས་ཀྱི་ས། གོས་ལ་སོགས་པ་ཞི་བའི་ལིངྒའི་རྒྱུ་དང་། རྫས་དེ་ལ་གཞན་གྱི་ལོངས་སྤྱོད་རྒྱས་པའི་ཐབས་སུ་བསྡུ་བ་ནི་རྒྱས་པའི་རྒྱུ་དང་། དམ་རྫས་ཀྱི་ཐོག་ཏུ་རོ་སྒྱུར་བའི་རྫས་བསྣན་པ་ནི་དབང་གི་རྒྱུ་དང་། དེའི་ཐོག་ཏུ་དུག་དང་ཚ་བ་གསུམ་དང་ཤ་ཆེན་དང་ར་དང་བ་གླང་གི་ཤ་བསྣན་པ་ནི་དྲག་པོའི་ལིངྒའི་རྒྱུའོ། །དེ་ཡང་གསང་སྙིང་ལས། བདུད་རྩི་ལྔའམ་ཟས་ལྔ་ལ། །མཚན་མ་མིང་དང་བཅས་པར་བྱ། །ཞེས་སོ། །རྒྱུ་དེ་ལས་ལིངྒ་བྱས་ཏེ། དེའི་དབྲལ་བར་དུས། སྙིང་ཀར་སྲོག །ལྟེ་བར་མིང་། བརླ་ལ་བླ་དྭགས། འདོམས་སུ་ལས་བཞི་གང་ཡིན་གྱི་སྔགས་སྤུ་གྲི་དང་བཅས་པ་བྲིས་ལ། ལས་བཞི་གང་བྱེད་ཀྱི་བྲུབ་ཁུང་དུ་བཞག་གོ། །བཅུ་བཞི་པ་མེ་མཆོད་ཀྱི་རྫས་ལ་ཡང་། སྦྱིན་སྲེག་རྩ་བ་ལས། གཉིས་པ་རྣམ་པ་ལྔར་བཤད་དེ། །ཞེས་གསུངས་པས་རྫས་ལ་ལྔ་སྟེ། ལས་བཞི་གང་བྱེད་ཀྱི་བསྲེག་ཤིང་། ཡམ་ཤིང་དང་། ལིངྒའི་རྒྱུ་དང་། གཏོར་མ་དང་། བསྲེག་རྫས་དང་ལྔའོ། །དེ་ཉིད་ལས། མེ་ཡི་རྫས་གཉིས་བསྲེག་ཤིང་དང་། ཞེས་པས། དང་པོ་བསྲེག་ཤིང་ནི། ཤིང་གཅིག་ལ་བྱེད་ན། ཞི་བ་ལ་རྩེ་མོའི་ཆ་ལས་བྱུང་བའི་སོར་བཅུ་གཉིས་པའོ། །རྒྱས་པ་ལས། ཡལ་ག་ལས་བྱུང་བའི་སོར་བཅུ་དྲུག་པའོ། །དབང་ལ། སྡོང་པོའི་ཆ་ལས་བྱུང་བ་སོར་བཅུ་དྲུག་པའོ། །དྲག་པོ་ལ་རྩ་བའི་ཆ་ལས་བྱུང་བའི་སོར་བཞི་པའོ། །ཉིད་ལས། རྩེ་མོ་ཞི་བྱེད་ཡལ་ག་རྒྱས། །སྡོང་པོ་རྩ་བ་མངོན་སྤྱོད་དེ། །ཞེས་སོ། །ཤིང་ཐ་དད་ལ་བྱེད་ན། ཤིང་དཀར་སེར་འཇམ་པོ་ལ་ཞི་རྒྱས་གཉིས། དམར་ནག་ཚེར་མ་ཅན་ལ་དབང་དྲག་གི་བསྲེག་ཤིང་བྱ་བ་སྟེ། དེ་ཉིད་ལས། ཁ་དོག་ལས་ཀྱིས་སྦྱར་བའོ། །ཞེས་སོ། །གཉིས་པ་ཡམ་ཤིང་ནི། ཡང་། ཤུག་པ་ཙནྡན་དཀར་པོ་དང་། ཨུ་དུཾ་ཝཱ་ར་འོ་མའི་ཤིང་། ཞི་རྒྱས་ཡམ་ཤིང་ཤེས་པར་བྱ། དམར་ལ་དྲི་ཞིམ་ཤིང་རྣམས་དང་། དུག་ཤིང་ཚེར་མ་ཅན་དག་ལ། ཚིལ་བྱུག་དབང་དྲག་མེ་སྦར་རོ། །གསུམ་པ་ལིངྒའི་རྒྱུ་ནི་གོང་དུ་སོང་ལ། བཞི་པ་གཏོར་མ་ལའང་ཞི་བའི་གཏོར་མ་ནི། ཡང་། འོ་མ་འབྲས་ཆན་དངུལ་ཕྱེ་དང་། །མེ་ཏོག་དཀར་པོའི་གཏོར་མ་ཞི། །རྒྱས་པའི་གཏོར་མ་ནི། ཡང་། ལྡོང་རོས་གྲོ་ཆན་ཞོ་རྒུན་འབྲུ། །མེ་ཏོག་གསེར་ཕྱེ་རྒྱས་པའོ། །དབང་གི་གཏོར་མ་ནི། ཟངས་ཕྱེ་ནས་རམ་འབྲས་ཆེན་དམར། །བུ་རམ་པདྨ་རཀྟ་སྦྱར། །ཐམས་ཅད་སྡུད་པའི་གཏོར་མ་ཡིན། །དྲག་པོའི་གཏོར་མ་ནི། དུག་རྣམས་ལྕགས་ཕྱེ་རྡོ་ཕྱེ་དང་། །ར་ཁྱི་ཁྲག་དང་ཤ་ཆེན་དང་། །དུར་སོལ་དུར་ཁའི་ཆན་རྣམས་ནི། །གསོད་པར་བྱེད་པའི་གཏོར་མ་ཡིན། །ཅེས་སོ། །ལྔ་པ་བསྲེག་རྫས་ལའང་། ཞི་བའི་བསྲེག་རྫས་ནི། མར་དཀར་ཏིལ་དཀར་ནས་དཀར་ཆན། །དཀར་གསུམ་ཙནྡན་དཀར་པོའི་ཤིང་། །ཐམས་ཅད་ཡེ་ཤེས་བདུད་རྩི་སྟེ། །ཐ་མས་ཡེ་ཤེས་མེས་སྐྱེད་དོ། །རྒྱས་པའི་བསྲེག་རྫས་ནི། ཡང་། ཞོ་དང་མར་རྙིང་བུ་རམ་སྦྲང་། །རྒུན་འབྲུ་སྟར་རྒ་ཤང་ཙེ་དང་། །དྲི་ཞིམ་གསེར་ཕྱེ་རྒྱས་པའོ། །དབང་གི་བསྲེག་རྫས་ནི། ཡང་ཏནྟ་ལི་དང་ཤང་ཙེ་དང་། །ཀེ་ཚེ་ཚ་བའི་མར་དག་དང་། །དམར་པོའི་ཤིང་དང་འབྲས་དག་གིས། །ཐམས་ཅད་འགུག་པའི་མཆོག་ཏུ་གསུངས། །དྲག་པོའི་བསྲེག་རྫས་ནི། ཡང་། དུག་དང་ཚིལ་ཆེན་སྐེ་ཚེའི་མར། །སྲན་ཆན་ཁྲག་སྣ་ཚོགས་ཚད་དང་། །ཚེར་མ་བ་གླང་ཤ་ཡིས་གསོད། །འབྲས་བུ་གདོན་ཕྱིར་ཚོགས་པར་བྱའོ། །ཞེས་སོ། །བཅོ་ལྔ་པ་ཆ་རྐྱེན་ནི། གཞན་ཡང་རྩ་བའི་དཀྱིལ་འཁོར་ལ་མཆོད་པ་ལ་སོགས་པའི་ཡོ་བྱད་གང་མཁོ་རྣམས་ཚང་བར་སྦྱར་བར་བྱའོ། །གཉིས་པ་ལས་ཀྱི་རིམ་པའོ། །དྲང་། འཕྲིན་ལས་བྱ་བའི་ཐབས་ཀྱི་གཙོ་བོ་ནི་སྦྱིན་བསྲེག་ཡིན་པས། དེའི་འཕྲིན་ལས་ཀྱི་རིམ་པ་དང་། ཕྲིན་ལས་ཀྱི་སྐབས་སུ་དགོས་པའི་བྲུབ་ཁུང་གི་ལིང་ག་ལ་ལས་བཞི་རང་རང་གི་བསྒྲུབ་པར་བྱ་བ་དེ་བཀུག་ཅིང་བསྟིམས་ནས། དེ་ལ་ཕུར་པ་གདབ་པ་དང་། ཕྲིན་ལས་ཀྱི་མཐའ་རྫོགས་པར་བྱ་བའི་ཕྱིར་བྲོ་བསྟབ་པ་དང་བཅས་པའི་ཆ་རྐྱེན་རྣམས་ཚང་བར་བྱ་བ་ཡིན་ནོ། །བྱ་ཐབས་དེ་དག་རྒྱས་པར་བཤད་ན། ཞི་ཁྲོ་གང་ཡིན་གྱི་རྩ་བའི་དཀྱིལ་འཁོར་སྔོན་འགྲོ་ཡན་ལག་བརྒྱད་པ་ནས་བཟུང་སྟེ། མཆོད་འབུལ་བསྟོད་པ་བསྙེན་པ་མན་ཆད་ཚང་བ་དང་། དེ་ནས་ཏ་ན་སྒྲོལ་བ་སྟེ། ལིངྒ་ལ་འགུགས་གཞུག་ལ་སོགས་པ་བསྒྲལ་ལས་བྱ་བ་དང་། དེ་ནས་གྷ་ན་སྦྱོར་བ་སྟེ་རྣམ་ཤེས་སྤར་ཆོག་བྱ། དེ་དག་ཤིན་ཏུ་རྒྱས་པར་ན། སྦྱིན་བསྲེག་བྱ་ཐབས་ཀྱི་རིམ་པ་ལ་གཉིས་ཏེ། སྔོན་འགྲོའི་ཆོ་ག་དངོས་སོ། །དང་པོ་བཤམ་པ་ནི། རྫས་དང་ཡོ་བྱད་ལྡན་བྱས་ལ། །ས་གཞི་སྦྱངས་ཏེ་གཟུགས་བརྙན་སྦྱར། །སྟོང་གྱུར་མགོན་ལ་ལས་བཅོལ་ཞིང་། །ཀུན་ཀྱང་འཚམས་བྱ་བགོ་བ་བྱའོ། །ཤིང་གཉིས་མཆོད་རྫས་ལེགས་བཀོད་དེ། །ཁ་དོག་མེ་དར་ལེགས་པར་དགབ། །ལིངྒའི་གནས་ནི་གཟུགས་བརྙན་ཚུལ། །མིང་རུས་ལྡན་པའི་ཕུར་པས་བསྐོར། །གཉིས་པ་སྔོན་འགྲོའི་ཆོ་ག་དངོས་ནི། རྡོ་རྗེའི་གུར་གྱིས་ཕྱོགས་བཅིངས་ཞིང་། །ཉི་མ་ཟླ་བ་ལས་གཉིས་ཀྱིས། །གཞོང་པ་སྣོད་ཀྱི་རྫས་རྣམས་ལ། །ལས་ཀྱི་ཧཱུྃ་ལ་འབྲུ་ལྔ་དགོད། །འཕྲོ་འདུ་བདུད་རྩི་ཁ་དོག་ལྡན། །མང་ཞིང་སྣ་ཚོགས་རོར་ལྡན་བྱ། །ཞེས་སོ། །གཉིས་པ་ལས་རིམ་དངོས་ལ་གསུམ་སྟེ། ལས་སྦྱོར་གྱི་ཕྲིན་ལས་ཞི་ཁྲོ་གཞུང་བསྲང་བ་དང་། ལིངྒ་འགུགས་གཞུག་བྱ་བ་དང་། སྦྱིན་སྲེག་གི་ལས་རིམ་བྱའོ། །དང་པོ་ནི། དཀྱིལ་འཁོར་ལས་ཀྱི་གཞུང་བསྲངས་ལ། །སྣ་ཚོགས་མཆོད་དོན་རྒྱས་པར་འབུལ། །ཚོགས་ཀྱི་འཁོར་ལོ་ལེགས་པར་བརྟགས། །མཆོད་པ་ཆེན་པོའང་འབུལ་བར་བྱ། །ས་བོན་རང་གི་འབྲུ་འོད་ཟེར། །ཡེ་ཤེས་དཀྱིལ་འཁོར་བསྐུལ་བར་བྱ། །ཁམས་གསུམ་བྱིན་རླབས་དག་བསྡུས་ཏེ། །བསྒྲུབ་བྱ་ཉེ་བར་སྦྱར་བ་དང་། །སྲོག་དང་ལྡན་པའི་བཟླས་པ་ནི། །ཞལ་གྱི་རང་སྔགས་ཁྲི་འབུམ་དུ། །རྣམ་པ་གསུམ་གྱི་བྱ་བ་དག །ཤིན་ཏུ་སྟོངས་གྱུར་རྒྱས་པར་བྱ། །ཞེས་སོ། །གཉིས་པ་ནི། ཁམས་གསུམ་གང་བའི་དཀྱིལ་འཁོར་ནི། །རྔམ་ཞིང་འོད་ཟེར་འབར་བར་བྱ། །བདག་ཉིད་འཛིན་པའི་ཕྱག་རྒྱ་སྟེ། །མཚན་ལ་བཟུང་ནས་རང་སྔགས་འདོན། །རོལ་པའི་ཕོ་ཉ་བཀའ་ཉན་ཚོགས། །ཕྱག་རྒྱ་བཞི་ལྡན་སྒྲ་སྐད་གྲགས། །ཁམས་གསུམ་དཀྲུགས་ཏེ་བྲལ་བྱས་ནས། །བསྒྲུབ་བྱ་མངོན་དུ་སྦྱར་བར་བྱ། །ཞེས་པས། ཚོགས་ཐ་མ་ལ་ལིངྒ་བྱས་པས་བྲུབ་ཁུང་ནང་དུ་བྲུབ་ལ་དགུག་གཞུག་བྱ། གཏོར་བསྐུལ་བྱས་ལ་གཏོར་ཐུན་དབབ། །ཕུར་བསྐུལ་བྱས་ལ་ཕུར་པ་གདབ། །མཚོན་ཆའི་ཆར་དབབ་གྲིས་གཏུབས་ལ། །བསྲེག་རྫས་དང་བསྲེ་ལ་བཞག་གོ། །དེ་ནས་མེ་མཆོད་སྦྱིན་སྲེག་གི་རིམ་པ་ནི། མེ་ལྷ་དང་། བསྲེག་ལྷ་གཉིས་ལས། དང་པོ་ནི། མེ་མཚམས་བཅད་ཅིང་བགེགས་བསྐྲད་ལ་སོགས་བྱས་ལ། མེ་ལྷ་ནི་ལས་བཞི་གང་བྱེད་ཀྱི་མེ་ལྷའི་དམ་ཚིག་པ་བསྐྱེད། དབང་བསྐུར། བྱིན་གྱིས་བརླབས། ཡེ་ཤེས་པ་སྙན་གསན་དབབ། སྤྱན་དྲངས་ནས་དམ་ཚིག་པ་ལ་བསྟིམ། མཆོད་བསྟོད་བྱ། ལས་བཞི་གང་བྱེད་ཀྱི་སྨོན་ལམ་གདབ་བོ། །གཉིས་པ་བསྲེག་ལྷ་ནི། ལས་གཞི་གང་བྱེད་ཀྱི་དམ་ཚིག་པ་བསྐྱེད། དབང་བསྐུར་གྱིས་བརླབས། ཡེ་ཤེས་ཀྱི་ལྷ་དབབ་དྲང་བསྟིམ། དང་པོ་མཆོད་རྫས་རྣམས་འབུལ། དེ་ནས་ལས་བཞི་གང་བྱེད་ཀྱི་བསྲེག་རྫས་སྔགས་ཀྱིས་འབུལ། བདེན་པ་དང་སྨོན་ལམ་གདབ་ནས་བསྟོད་པ་བྱ། བྲོ་བྱའོ། །དེ་ཡང་དེ་ཉིད་ལས། རྗེས་སུ་མཐུན་པའི་གཞལ་ཡས་སུ། །སྦྱིན་ལྷ་སོ་སོའི་གདན་ལྟར་བསྒོམ། །མེ་དཔུང་འབར་བའི་མཚན་ཅན་དུ། །མེ་ལྷ་ཨགྣེ་ཛཿས་བཀུག་ནས། །ཕྱག་རྒྱ་བཞི་ཡིས་ངེས་བཀུག་ལ། །རྃ་ཞེས་པ་ཡིས་མེ་སྦར་ནས། །གཟར་བུ་རིགས་ཀྱི་མཚན་བཅས་པ། །མཆོད་པ་བདུད་རྩི་རྒྱས་པར་འབུལ། །དེ་དབུས་འཁོར་ལོ་གསལ་གདབ་སྟེ། །གཉིས་པའི་ལྷ་རྣམས་སྤྱན་དྲངས་བསྟིམ། །མར་དང་ཤིང་བུ་ཆན་ལ་སོགས། །མར་གྱི་ཨརྒ་རྒྱས་པར་འབུལ། །གཅིག་མིན་ཐམས་ཅད་བདུད་རྩི་སྟེ། །ཡང་ན་ལན་གསུམ་བརྒྱ་རྩ་བརྒྱད། །སྟོང་ངང་འབུམ་སོགས་ཅི་ནུས་འབུལ། །དུག་གསུམ་མཆོད་པ་དེ་བཞིན་བྱ། །དབང་མེད་ཞལ་དུ་ཐིམ་པར་འབུལ། །མིང་དང་ལས་བཞིའི་སྔགས་ཀྱིས་འབུལ། །འགྲུབ་འགྱུར་ཐེ་ཚོམ་མེད་ཅེས་བཤད། །ཅེས་དང་ཡང་། གཟུགས་བརྙན་ལུ་གུ་རྒྱུད་བསྐོར་ལ། །ཨེ་ལ་སོགས་པའི་དཀྱིལ་འཁོར་དུ། །རྗེས་སུ་མཐུན་པའི་ལྷ་བསྒོམས་ལ། །སླས་དང་བྱི་མོའི་ཚོགས་ཀྱིས་བསྐོར། །ཁམས་གསུམ་གང་བར་སྦྱར་བར་བྱ། །སྲོག་དང་ལྡན་པའི་བྲོ་སྟབས་གར། །ཕྱོགས་བཅུ་མ་ལུས་ཀུན་ནས་ནི། །བསྒྲུབ་བྱ་དབུས་སུ་ལེགས་བརྟག་སྟེ། །ས་བོན་འོད་ཟེར་ལས་བཞི་ཀུན། །བསྟིམས་ནས་བསམ་པ་འགྲུབ་པར་བྱ། །རྗེས་སུ་མཐུན་པའི་སྨོན་ལམ་གདབ། །ཅེས་སོ། །དེ་ནས་ལྷག་མའི་ལས་དག་ནི། དེ་ཉིད་ལས། བདག་ཉིད་འདུས་པའི་དབང་ཕྱུག་ཏུ། །ལས་བཞིན་མཉམ་བཞག་ཁྲོ་བོ་ཡིས། །འཁོར་གྱི་བྲན་དེ་བཞིན་ཤེས། །ཕྲ་མན་ཚོགས་རྣམས་བསྐུལ་བསྡུས་ཏེ། །ལས་བཞིའི་དཀྱིལ་འཁོར་དེ་དག་ཏུ། །ལྷག་མ་ཁ་ཆུའི་བཀོད་པ་རྣམས། །ཞེས་པས། ལྷག་མ་བཏང་། བརྟན་མ་བསྐྱངས། ཡི་གེ་བརྒྱ་པས་ལྷག་ཆད་ཁ་བསྐངས། བསྲེག་ལྷ་དང་མེ་ལྷའི་ཡེ་ཤེས་པ་གཤེགས། དམ་ཚིག་པ་རང་ལ་བསྡུ་ཚོམ་བུ་དང་དཀྱིལ་འཁོར་བསྡུ་ལ། ལས་ཀྱི་རྗེས་མི་མངོན་པར་བྱ་ཞིང་། བཀྲ་ཤིས་ཀྱི་ཚིགས་སུ་བཅད་པ་བརྗོད་པ་ཡན་ཆད་ཀྱིས་སྦྱིན་སྲེག་གི་ལས་རྫོགས་སོ། །དྲུག་པ་དུས་དང་། དྲང་། སྦྱིན་བསྲེག་བྱ་བའི་སྐབས་ནིི་དབང་བསྐུར་བའི་དུས་ས་ཆོག་གི་སྐབས་ལ་ཞི་བའི་སྦྱིན་སྲེག་དང་། སྟ་གོན་ལ་དྲག་པོའི་དང་། རབ་གནས་ཀྱི་དུས་སུ་རྒྱས་པའི་དང་། དབང་ངོ་བོའི་དུས་སུ་དབང་ངོ་། །བསྒྲུབ་པའི་དུས་སུ་ལས་སྦྱོར་ལ་ལས་བཞི་བྱ་བ་དང་། མཆོད་པ་བྱེད་པའི་དུས་དང་། དམ་ཚིག་ཆག་ཉམས་བཤགས་པའི་ཚེ་ན་དགོས་པ་དང་། ལས་བཞི་རང་རང་གིས་གདུལ་བྱ་འདུལ་བའི་དུས་ལ་བབ་པའི་ཚེ་ན་དགོས་པའོ། །བདུན་པ་ཁྱད་པར་དང་། དྲང་། ཕྲིན་ལས་ཀྱི་རིམ་པ་མཐོ་དམན་གྱི་ཁྱད་པར་ནི་ཟག་བཅས་ཚོགས་ལམ་རྣལ་འབྱོར་བཞིའི་དུས་སུ་ལྷག་པ་གཟུགས་བརྙན་ལ་བརྟེན་པས་རྒྱ་ཆུང་། བར་ཆད་མེད་པ་ཚོགས་སྒྲུབ་པའི་དུས་སུ་ཏིང་ངེ་འཛིན་ལ་བརྟེན་པས་འབྲིང་། དེ་དག་མཐར་ཕྱིན་པའི་ལམ་རིག་འཛིན་གྱི་དུས་སུ་ལས་བཞི་ལྷུན་གྱིས་གྲུབ་པས་རྒྱ་ཆེ། དེ་ལྟར་མཐོ་དམན་དང་རྒྱ་ཆེ་ཆུང་གིས་ཕྱེ་བའམ། ཡང་ན་བློའི་ཤེས་རབ་ཀྱི་དབང་པོ་རབ་འབྲིང་ཐ་མ་རྣམ་པ་གསུམ་གྱི་ཕྱེ་བས། ལས་བཞི་ལ་ནུས་མཐུ་ཆེ་ཆུང་དང་། བྱིན་རླབས་ཀྱིས་ཡུལ་གདུལ་བྱ་ལ་དོན་འགྱུར་ཆེ་ཆུང་དང་། ངོ་བོ་ལ་མོས་པ་དང་ནུས་པའི་ཁྱད་པར་དང་། ལས་བཞི་བྱ་ཐབས་ལ་སྔགས་དང་རྫས་ཏིང་ངེ་འཛིན་དགོས་མི་དགོས་དང་བཞི་ལ་ཁྱད་པར་ཡོད་པ་ནི། དཔེར་ན་སྐན་ཚའི་གདོང་བུ་ལ་མཐོན་དམན་ཡོད་པ་ཅི་ལྟ་བུ་ཡིན་པའོ། །བརྒྱད་པ་སྐྱོན་དང་། དྲང་། ལས་བཞི་ཉམས་སུ་མ་བླངས་ན་དམ་ཚིག་ཆག་ཉམས་མི་སྐོང་སྒྲིབ་པ་མི་འབྱོང་ཚོགས་མི་རྫོགས་པ་དང་། བདག་གཞན་གྱི་དོན་གཉིས་མི་འགྲུབ་པ་རྣམས་འཕྲིན་ལས་མ་བྱས་པ་དེའི་སྐྱོན་ཡིན། དགུ་པ་ཡོན་ཏན་ནོ། །དྲང་། གོང་གི་ལས་བཞི་དེ་ལྟར་བྱས་ན་སྐྱོན་དེ་ལས་བཟློག་པའི་ཡོན་ཏན་གྱི་ཚུལ་དང་ལྡན་པ་སྟེ། གང་ཞེ་ན། དམ་ཚིག་ཉམས་བསྐངས། སྒྲིབ་པ་དག །བསོད་ནམས་དང་ཡེ་ཤེས་ཀྱི་ཚོགས་རྫོགས། བདག་གཞན་གྱི་དོན་གཉིས་འགྲུབ་པ་སྟེ། དེ་ནི་ཡོན་ཏན་ཉིད་དུ་ཡིན་པར་ཤེས་པར་བྱའོ། །བཞི་པ་དམ་ཚིག་ལ་གཉིས། བགྲང་། དང་པོ་བསྟན་པ་དང་། དྲང་། ཡན་ལག་བཞི་པ་ལམ་དང་འབྲས་བུའི་གཞི་དམ་ཚིག་གིས་བཟུང་བས་ན་ས་གཞི་གཤིན་པོ་དང་འདྲ་བ་དེའི་སྡོམ་ཚིག་ནི་འདི་ལྟ་སྟེ། དམ་ཚིག་གི་ངོ་བོ་དང་། རྣམ་གྲངས་དང་། དམ་ཚིག་བསྲུང་བའི་དགོས་ཆེད་དང་། བསྲུང་བའི་དུས་ལ་རིམ་པ་ཡོད་ཚུལ་དང་། འདི་ལ་བསྲུང་བྱ་ཐམས་ཅད་རྫོགས་པའི་ཆེ་བ་དང་། དམ་ཚིག་བསྲུངས་པའི་ཡོན་ཏན་དང་། ཉམས་ན་བསྐང་བའི་ཐབས་རྣམས་དང་། མ་བསྲུངས་པའི་སྐྱོན་དང་བརྒྱད་པོ་དག་གིས་ནང་དུ་ངེས་པར་མ་ནོར་བར་འོག་རྒྱས་བཤད་ཀྱི་དམིགས་རྣམས་ཡོངས་སུ་ཤེས་པར་བྱའོ། །གཉིས་པ་བཤད་པ་དེ་ལ་བརྒྱད་དེ། བགྲང་། དང་པོ་ངོ་བོ་དང་། དྲང་། གསང་སྔགས་བླ་མེད་ཀྱི་སྒོར་ཞུགས་པའི་གང་ཟག་ཐམས་ཅད་ཀྱི། ལུས་ངག་ཡིད་གསུམ་གྱི་སྒོ་གསུམ་གྱི་བླ་མེད་རང་གཞུང་གི་རྩ་བ་དང་ཡན་ལག་གི་དམ་ཚིག་བསྲུང་བྱ་ཐམས་ཅད་ལ། དཔེར་ན་རྒྱལ་པོའི་ཁ་འོག་གི་མི་རྣམས་ཀྱིས་རྒྱལ་པོའི་བཀའ་ཤོག་གི་རྟགས་སྣང་ན་འདའ་མི་ཕོད་པ་ཅི་ལྟ་བར་ཉམས་པར་མི་བྱེད་ཅིང་མི་འབྲལ་ནས་བསྲུང་བྱར་སྡོམ་པ་དེ་དམ་ཚིག་གི་ངོ་བོ་ཡིན་ནོ། །གཉིས་པ་རྣམ་གྲངས་དང་། དྲང་། ཐུན་མོང་སྤྱིའི་རྣམ་གྲངས་ནི། ལྷ་མིའི་དགེ་བཅུ། ཉན་ཐོས་ཀྱི་འདུལ་ཁྲིམས། བྱང་སེམས་ཀྱི་སེམས་བསྐྱེད་ལ་སོགས་དོན་འགྱུར་དུ་སྣང་ན་ཉམས་སུ་བླངས་ལུགས་ཐུན་མོང་གི་གཞུང་གཞན་ནས་བཤད་པའི་བསྲུང་བྱ་རྣམས་ཀྱང་འགྲོ་བ་སེམས་ཅན་དྲང་བའི་དོན་དུ་བསྲུང་དགོས་པ་དང་། ཁྱད་པར་གསང་སྔགས་རང་གཞུང་གི་དམ་ཚིག་རྩ་བ་དང་ཡན་ལག་དེ་དག་གི་བསྲུང་བྱའི་རྣམ་གྲངས་ནི། མདོར་བསྡུས་པ་དང་། འབྲིང་པོ་དང་། རྒྱས་པ་གསུམ་མོ། །སྲུང་མཁན་གྱི་གང་ཟག་ལ་བློ་རབ་འབྲིང་ཐ་མ་གསུམ་ལས། དང་པོ་བློ་རབ་ལ་དོན་གྱི་མདོ་ནི་མཉམ་པ་ཉིད་ཀྱི་དམ་ཚིག་ཡིན་ཏེ། གསང་སྙིང་ལས། མཉམ་ལ་མཉམ་པར་སྦྱོར་བ་ཡིས། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །འདས་ན་སངས་རྒྱས་མ་ཡིན་ནོ། །ཞེས་པ་དང་། རྣམ་གྲངས་ཀྱི་མདོ་ནི་རྩ་བ་དང་ཡན་ལག་གི་དམ་ཚིག་བཅོ་ལྔ་པོ་ཡིན་ཏེ། དེ་ཉིད་ལས། བླ་མེད་མི་སྤང་བླ་མ་བསྐུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་བཅུད་མི་དོར་རོ། །ཞེས་སོ། །གཉིས་པ་བློ་འབྲིང་ལ་དམ་ཚིག་སུམ་བརྒྱ་དྲུག་ཅུར་དབྱེ་བ་སྟེ། དེ་ཉིད་ལས། རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཡན་ལག་དམ་ཚིག་ལྔ་གཉིས་ལ། །གཅིག་ལའང་བཅུ་ཕྲག་གཉིས་སུ་དབྱེ། །ཞེས་གསུངས་པའི་རྣམ་གྲངས་ཀྱི་དབྱེ་བ་ནི། ཕྲ་རྒྱས་འབྱེད་པ་ལས། ཕྱི་མ་རྩ་བ་ཡན་ལག་ལས། །ལྔ་བཅུ་བརྒྱ་དང་དྲུག་ཅུ་དང་། །གཉིས་བརྒྱའི་བསྲུང་བྱ་མ་ལུས་པ། །བཀའ་ལུང་གཉིས་ཀྱི་རྗེས་སུ་ཞུགས། །པཉྩའི་སྙིང་ལག་ཤེས་བྱ་བ། །དང་པོ་ཉིད་ལས་ཐབས་སྤྱོད་དང་། །ཤེས་རབ་ཉིད་ཀྱིས་གཉིས་འགྱུར་ཡིན། །རེ་རེའང་བསྲུང་བྱ་བཅུ་གསུམ་སྟེ། །ཞེས་གསུངས་པས། རྩ་བའི་དམ་ཚིག་གཅིག་ལ་ཡང་། ཤེས་རབ་རང་བཞིན་མེད་པའི་ལྟ་བ་དང་། ཐབས་མ་འགགས་པར་སྤྱོད་པ་གཉིས་སུ་ཕྱེ་བས་བཅུ་དང་། དེ་དག་སྤྱི་རུ་བཞག་ནས། བྱེ་བྲག་ཏུ་རྩ་བ་ལྔ་པོ་རེ་ལ་ཡང་སུམ་ཅུ་རེ་རེ་སྟེ། བརྒྱ་དང་དྲུག་ཅུ། ཡན་ལག་གི་དམ་ཚིག་བཅུ་པོ་རེ་རེ་ལ་ཉི་ཤུ་རེ་རེ་དབྱེ་བས་གཉིས་བརྒྱ་སྟེ། ཀུན་བསྡོམས་ན་སུམ་བརྒྱ་དྲུག་ཅུའོ། །གསུམ་པ་བློ་ཐ་མའི་གདུལ་བྱའི་སྣང་ངོར་དམ་ཚིག་གི་རྣམ་གྲངས་མཐའ་ཡས་པ་གསུང་སྟེ། གསང་སྙིང་ལས། དམ་ཚིག་རྣམས་ནི་རྨད་པོ་ཆེ། །འཇིག་རྟེན་དྲུག་གི་ཕྱོགས་བཅུ་ན། །སྲིད་གསུམ་འགྲོ་བ་ཅི་སྙེད་པ། །རྟོག་འདུལ་དམ་ཚིག་དེ་སྙེད་སྤྲོ། །ཞེས་གསུངས་པ་རྣམས་ཏནྟྲ་སྟེ་རྒྱུད་གསང་བའི་སྙིང་པོའི་ནང དུ་གསུངས་པས་དེར་སྙིགས་ཏེ་ཤེས་པར་བྱ་བ་རྣམས་ནི་དེ་ལྟ་བུ་ལ་བྱའོ། །གཞན་ཡང་ཐེག་ཆེན་མ་ཧཱ་རང་གཞུང་གི་ས་ལམ་གོང་འོག་ལ་བསྲུང་བྱའི་ཁྱད་པར་ཡོད་པའི་ཕྱིར། ཚོགས་ལམ་རྣལ་འབྱོར་བཞི་དང་། སྦྱོར་ལམ་ཚོགས་སྒྲུབ་དང་ལྔ་པོ་རང་རང་གི་སྐབས་ཀྱི་ལམ་གྱི་ངོ་བོའི་ཆོས་ཉིད་མཉམ་བཞག་དེ་དང་མི་མཐུན་པའི་ཕྱོགས་རྣམས་བསྲུང་བར་བྱའོ། །གསུམ་པ་དགོས་ཆེད་དང་། དྲང་། དམ་ཚིག་དེ་ཉིད་བསྲུང་བ་ཡི་དགོས་ཆེད་ནི། ཁྱད་པར་གསང་སྔགས་རང་གི་དམ་ཚིག་དང་། ཐུན་མོང་སྤྱི་ཡི་དམ་ཚིག་མ་བསྲུངས་པའི་སྐྱོན་ཆའི་ངན་སོང་དང་འཁོར་བར་ལྟུང་ལ། དེར་མི་ལྟུང་བ་ལ་དམ་ཚིག་དགོས་པ་དང་། བསྲུང་བའི་ཡོན་ཏན་གྱི་ཆ་ཡིས་མཐོ་རིས་དང་བྱང་ཆུབ་ཐོབ་པའི་དགོས་ཆེད་ཆེ་བ་དེ་བས་ན། མ་བསྲུངས་ན་ཉེས་ཆེ་བ་དེ་དང་བསྲུངས་ན་ཡོན་ཏན་ཆེ་བ་དེ་ཡིས་དམ་ཚིག་བསྲུང་བའི་དགོས་ཆེད་ཀྱི་ངེས་ཚིག་དེ་འགྲུབ་པ་ཡིན་ཏེ། ལམ་རིམ་ལས། དམ་ཚིག་ཅེས་བྱ་བ། ལོག་ན་ཡོད་པ་མ་ཡིན་ཏེ། །རང་གི་ལྟ་བ་དམ་ཚིག་ཡིན། །མི་གཏོང་ཕྱིར་ཡང་དམ་ཞེས་བྱ། །གཟུངས་སུ་གྱུར་ཀྱང་དམ་ཞེས་བྱ། །དེ་བཞིན་ཉིད་ལས་མི་བྱེད། །དེ་བཞིན་ཉིད་ལྡན་དམ་པ་སྟེ། །དེ་ལས་འདས་ན་ཚིག་པར་འགྱུར། །ཞེས་གསུངས་པས། དམ་ཞེས་པ་ཆོས་ཉིད་ལ་བྱ་སྟེ། དེས་ཁྱབ་ཅིང་མི་འདའ་བས་ན་དམ། དེ་ཉིད་ལྟ་སྒོམ་གྱིས་ཉམས་སུ་ལེན་ཅིང་མི་འདའ་བར་བསྲུངས་ན། འཁོར་བའི་རྒྱུ་ཉོན་མོངས་འབྲས་བུ་དང་བཅས་པ་ཐམས་ཅད་ཚིག་པར་འགྱུར་ལ། དེ་ལས་འདས་ན་མྱ་ངན་ལས་འདས་པའི་བདེ་འབྲས་ཐམས་ཅད་ཚིག་པར་འགྱུར་རོ། །གཞན་ཡང་ཁྱད་པར་གསང་སྔགས་རང་གི་དམ་ཚིག་དང་། ཐུན་མོང་གི་ཐེག་པ་སྤྱིའི་དམ་ཚིག་རྣམས་བདག་གཞན་གྱི་དོན་དུ་བསྲུང་བའི་གདུལ་བྱ་གང་ཡིན་པའི་སྒྲིབ་པ་སྦྱངས་བ་དང་། ཚོགས་བསགས་པའི་དགོས་ཆེད་ཡོད་པའོ། །བཞི་པ་དུས་དང་། དྲང་། ཐུན་མོང་དང་ཁྱད་པར་གྱི་བསྲུང་བྱའི་དམ་ཚིག་གི་རྣམ་གྲངས་ལས་ལམ་མཐོན་དམན་གྱི་རིམ་པ་དང་། དྲང་ངེས་ཀྱི་ཁྱད་པར་ཡོད་པའི་ཕྱིར་ན་ལས་དང་པོ་པའི་དུས་སུ་ཐུན་མོང་གི་དམ་ཚིག་རྣམས་རང་དོན་དུ་བསྲུང་བ་དང་། ཁྱད་པར་གྱི་དམ་ཚིག་རྣམས་མོས་བསྲུང་བྱེད་ལ། ཡེ་ཤེས་དང་ཏིང་ངེ་འཛིན་ལ་དབང་ཐོབ་ནས་ཐུན་མོང་གི་དམ་ཚིག་གཞན་དོན་དུ་བསྲུང་བ་དང་། ཁྱད་པར་གྱི་དམ་ཚིག་ནུས་བསྲུང་བྱེད་པ་ཡིན་པ་དེ་བས་ན། ཚོགས་སྦྱོར་གྱི་ས་ལམ་གྱི་རིམ་པ་གང་ཐོབ་པ་དེ་ཡི་ཚེ་དེ་དུས་ཀྱི་མཉམ་བཞག་ཆོས་ཉིད་དེ་ཉིད་མ་ཡིན་མི་འདའ་བའི་ཐབས་ལ་དམ་ཚིག་དེ་དགོངས་པ་དེ་བས་ན། ས་ལམ་རང་རང་གི་ཏིང་ངེ་འཛིན་དང་མཐུན་པའི་དམ་ཚིག་དེ་བསྲུང་བར་བྱེད་པའི་ཐབས་རྣམས་ཉམས་སུ་བླང་བའི་དུས་ལ་བབ་པ་ཡིན་ནོ། །དེ་ལྟར་ས་ལམ་གང་ཐོབ་པའི་སྐབས་ཀྱི་ཏིང་ངེ་འཛིན་དེ་དང་རང་རང་གི་བསྲུང་བྱའི་དམ་ཚིག་གཉིས་འབྱོར་ན་ཕན་ཡོན་ལ་གཉིས་ཏེ། སྒྲིབ་པ་བྱང་ཚོགས་གཉིས་རྫོགས་ནས་ལམ་ནར་སོན་པའོ། །ལྔ་པ་ཆེ་བ་དང་། དྲང་། སྤྱིར་ཐེག་པ་འོག་མའི་བསྲུང་བྱ་ཉན་ཐོས་ཀྱི་འདུལ་ཁྲིམས་དང་། བྱང་སེམས་ཀྱི་སྡོམ་པ་དང་། སྔགས་ཕྱི་རྒྱུད་ཀྱི་དམ་ཚིག་རྣམས། འདིར་ཐེག་མཆོག་མ་ཧཱ་ཡོ་གའི་བསྲུང་བྱའི་དམ་ཚིག་ལ་བསྐུལ་ཞིང་ཡོན་ཏན་ཡར་ལྡན་དུ་རྫོགས་པ་ཡིན་པའི་ཕྱིར་ན། རྒྱུད་གསང་སྙིང་ལ་སོགས་པའི་ནང་ནས་སྨོས་པའི་གསང་སྔགས་བླ་མེད་ཀྱི་དམ་ཚིག་རྣམས་བསྲུང་ཞིང་ཉམས་སུ་ལེན་ཐུབ་ན། ཉན་ཐོས་ཀྱི་ཚུལ་ཁྲིམས་དང་། བྱང་སེམས་ཀྱི་སྡོམ་པ་དང་། སྔགས་ཕྱི་རྒྱུད་ཀྱི་དམ་ཚིག་ཐམས་ཅད་ངོ་བོ་ཉིད་ཀྱིས་རྫོགས་པའོ། །འོ་ན་འོག་མའི་འདུལ་སྡོམ་དམ་ཚིག་རྣམས་དངོས་སུ་བསྲུང་ངམ་ཞེ་ན་མ་ཡིན་ཏེ། སྤང་བྱ་ཉོན་མོངས་པ་བདག་འཛིན་འདི། ཉན་ཐོས་ཀྱིས་སྤངས་བྱང་སེམས་ཀྱིས་སྦྱངས། གསང་སྔགས་ཕྱི་རྒྱུད་ཀྱིས་བསྒྱུར་ནས་དག་པར་བྱེད་ལ། འདིར་གསང་སྔགས་བླ་མེད་ཀྱི་སྤང་བྱ་ཉོན་མོངས་པའི་རང་བཞིན་སྐུ་དང་ཡེ་ཤེས་ཡིན་པ་དེ། ལྟ་སྒོམ་གྱིས་ཉམས་སུ་ལེན་ཞིང་མི་འདའ་བའི་ངོ་བོ་ལ། སྤང་གཉེན་ཤར་གྲོལ་དུ་རོ་གཅིག་པར་གྱུར་པའི་དུས་སུ། ཐེག་འོག་ལྟར་དམ་ཚིག་བསྲུང་བྱ་དང་སྲུང་བྱེད་མེད་པར་སྡོམ་པའི་ངོ་བོ་ཉམས་པའང་མེད་དོ། །གང་གི་རྒྱུད་ལ་སྨོས་པ་ཞེས་བྱ་བ་ནི། གསང་སྙིང་ལེའུ་བཅུ་དགུ་པ་ལས། བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་སོགས་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །བླ་མེད་མཆོག་གི་དམ་ཚིག་ཏུ། །འདུལ་བའི་དབང་གིས་ཚུལ་ཁྲིམས་དང་། །ཅི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་སོ། །དྲུག་པ་ཡོན་ཏན་དང་། དྲང་། བླ་མེད་འདི་ཉིད་ཀྱི་ལྟ་སྒོམ་ལ་སོགས་པ་རྣམས་མ་ནོར་བའི་དོན་ལ་མི་འདའ་བའི་དམ་ཚིག་ལ་གནས་པའི་ཕན་ཡོན་ནི་རྩ་བ་དང་ཡན་ལག་གི་དམ་ཚིག་གི་རྣམ་གྲངས་རྣམས་རྗེས་སུ་ཞུགས་པ་ཡིན་ལ། སྤྱིའི་ཕན་ཡོན་ནི་རྒྱུད་གསང་སྙིང་ལས་གྲགས་པ་སྟེ་གསུངས་པ་ནི། གཞན་ཡང་རྒྱལ་མཆོག་ཀུན་བཟང་གི། །ཐམས་ཅད་མ་ལུས་ཕྱག་རྒྱ་ཡིས། །བསྒྲུབ་མེད་དམ་པ་མ་ལུས་འགྲུབ། །དེ་ལ་སོགས་པ་མཐའ་ཡས་མཆོག །རྒྱལ་བའི་རིགས་མཆོག་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རློབ། །བདེར་གཤེགས་ཉིད་ཀྱི་ཡུལ་ལ་ཞུགས། །འཇིགས་མེད་ཀུན་ཏུ་བཟང་པོར་སྦྱོར། །ཅི་བཞིན་ཉིད་དཔལ་འདུལ་བའི་ཐབས། །ཅི་སྙེད་སྡོམ་པ་མཐའ་ཡས་ཀྱང་། །མ་ལུས་རྣམ་དག་ལྷུན་གྱིས་གྲུབ། །ཉམས་ན་བསྐངས་པས་རྫོགས་པ་དང་། །དེ་ལ་སོགས་མཐའ་ཡས་མཆོག །ཅེས་གསུངས་སོ། །གཞན་ཡང་དམ་ཚིག་བསྲུངས་ན་ངན་སོང་དང་འཁོར་བ་ལ་མི་ལྟུང་ནས་བཟུང་བ་དང་། འབྲས་བུ་སངས་རྒྱས་ཐོབ་པ་ཡིན་པས་ན་དེའི་དབྱེ་བའང་བྱ་སྟེ་དེ་དག་ཡོད་པས་ན། རྣལ་འབྱོར་པ་བདག་གི་དོན་དང་གདུལ་བྱ་གཞན་གྱི་དོན་གང་ལ་ཡང་དམ་ཚིག་བསྲུང་དགོས་པ་དེ་བས་ན་དམ་ཚིག་གི་རྣམ་གྲངས་ཀྱི་ཡོན་ཏན་མ་ལུས་པ་རྫོགས་པའི་ཕྱིར་བྱང་པའི་ལུག་རྫི་ལྟར་བསྲུང་བར་བྱའོ། །བདུན་པ་བསྐང་ཐབས་དང་། དྲང་། རྩ་བའི་དམ་ཚིག་དེ་དང་། ཡན་ལག་གི་དམ་ཚིག་དེ་རྩ་བ་དང་ནས་ཉམ་པ་ཞིག་པའམ། སྣ་རེ་ནས་ཉམས་པས་རལ་བ་བྱུང་བའི་ཚེ། གང་ཉམས་ཀྱི་དམིགས་དེ་ཤེས་པར་བྱས་ལ། གསོ་བའི་ཐབས་ལ་རྩ་བ་ལྔ་ནི། དགོངས་འདུས་ལས། ལས་དང་རྫས་དང་འདུན་པ་དང་། །ཏིང་ངེ་འཛིན་དང་དེ་བཞིན་ཉིད། །ཅེས་པས་ལྔ་ལས། དང་པོ་ལས་ཀྱི་བསྐང་བ་ནི། སྦྱིན་སྲེག་གི་ལས་ཏེ། རྩ་བ་ཉམས་ན་ཁྲི་ཚོ་ལྔ་དང་སྟོང་ཚོ་གསུམ་བླུག །ཡན་ལག་ཉམས་ན་སྟོང་ཚོ་ལྔ་དང་བརྒྱ་ཚོ་གསུམ་བླུག །ཟླར་ཉམས་ན་བརྒྱ་ཚོ་ལྔ་དང་བཅུ་ཚོ་གསུམ་བླུག །ཞར་ཉམས་ལ་ལྔ་བཅུ་རྩ་གསུམ་བླུག་གོ། །གཉིས་པ་རྫས་ཀྱིས་བསྐང་བ་ནི། །རིགས་གང་ཉམས་དང་མཐུན་པའི་ནོར་འབུལ་ལ་གསོའོ། །གསུམ་པ་འདུན་པས་བསྐང་བ་ལ་ཡིག་བརྒྱ་དང་བཤགས་པ་བྱའོ། །བཞི་པ་ཏིང་ངེ་འཛིན་གྱིས་བསྐང་བ་ལ། རྃ་ཡྃ་ཁྃ་གསུམ་གྱིས་བསྲེག་སྦྱང་བཀྲུ་གསུམ་བྱའོ། །ལྔ་པ་དེ་ཁོ་ན་ཉིད་ཀྱིས་བསྐང་བ་ནི། ལྟ་བ་རྟོགས་པས་གསོ་བར་བྱའོ། །དེ་ལྟར་གསོ་བའི་ཐབས་གང་ལ་ཡང་ལེ་ལོ་མེད་པར་བརྩོན་འགྲུས་ཀྱི་སྒོ་ནས་མོས་འདུན་དང་བཅས་པས་རང་རང་གི་བློས་ལྕོགས་ཚད་སྦྱར་བར་བྱའོ། །དེས་ན་ཆག་ཉམས་གསོ་བའི་ཡོན་ཏན་གྱིས་ལམ་ཆུད་མི་ཟ་བར་ངེས་པར་ཚོགས་གཉིས་རྫོགས་ནས་ངན་སོང་དང་འཁོར་བར་མི་གཏོང་ནས་གཟུངས་དམ་པ་དང་། མཆོག་ཐུན་མོང་གི་འབྲས་བུ་རྣམས་ཐོབ་པ་ཡིན་ནོ། །བརྒྱད་པ་ཉམས་པའི་རྒྱུ་དང་ཉམས་པའི་སྐྱོན་ནོ། །དྲང་། བསྲུང་བྱའི་དམིགས་མི་ཤེས་པས་ཕྱལ་བ་པ་དང་། དམིགས་ཤེས་ཀྱང་བརྩོན་འགྲུས་མེད་ནས་ལེ་ལོ་བྱེད་པ་དང་། སྔར་དམ་ཚིག་མནོས་ཀྱང་མི་བསྲུང་ནས་སྡིག་པ་བྱས་པས་ལོག་པ་དང་། གྲོགས་ངན་གྱི་ཟླར་ཉམས་པ་དང་། ཉམས་པ་ཅན་གྱི་གྲིབ་ཕོག་པས་ཞར་ལ་ཉམས་ཤོར་བ་དང་། ཉོན་མོངས་པ་ཆེ་བས་དེའི་དབང་དུ་སོང་ནས་ཉམས་པ་དང་། དངོས་སུ་བདུད་ཀྱིས་བསླུས་ཏེ་དེའི་དབང་དུ་སོང་ནས་ཉམས་པ་དང་། རང་བཞིན་གྱི་གཤིས་ངན་པས་སློབ་དཔོན་དང་གྲོགས་མཆེད་ལ་ཆག་ཉམས་ཁུར་བ་དང་། བརྒྱད་པོ་དེས་དམ་ཚིག་ཉམས་པའི་རྒྱུ་བྱས་ནས་འབྲས་བུ་དཀའ་ཐུབ་སྡོམ་པའི་དམ་ཚིག་ཉམས་ནས་རལ་པ་དག་གིས་གསོ་བ་ལ་བརྩོན་ན། དུས་འདི་ཉིད་ལ་ཉམས་པ་ཆེ་ཆུང་གིས་ཕྱི་མར་རྣམ་སྨིན་མྱོང་བ་ལ་ཡང་། ཚེ་འདིར་ཉམས་པ་ཆེ་ན་ཕྱི་མར་སྡུག་བསྔལ་དྲག །འདིར་ཉམས་པ་ཆུང་ན་ཕྱི་མར་སྡུག་བསྔལ་ཞེན་པ་ཡིན་གྱིས། དེས་ན་ཐུན་མོང་སྤྱིའི་དམ་ཚིག་ཉམས་པ་དང་། སྒོས་སུ་གསང་སྔགས་རང་གི་དམ་ཚིག་ཉམས་པའི་སྐྱོན་གྱིས་བདག་གཞན་གཉིས་ལ་གནོད་དེ། ངན་སོང་དུ་འགྲོ་ཞིང་མཆོག་ཐུན་མོང་གི་དངོས་གྲུབ་མི་མྱོང་བའོ། །འོ་ན་དམ་ཚིག་དང་སྤྱོད་པ་ལ་ཁྱད་པར་ཅི་ཡོད་ཅེ་ན། དམ་ཚིག་ནི་ད་ནས་བཟུང་སྟེ་སངས་མ་རྒྱས་ཀྱི་བར་དུ་བསྲུང་བྱའི་རྣམ་གྲངས་ཚང་དགོས་པ་ཡིན་ལ། སྤྱོད་པ་ནི་རང་རང་གི་སྐབས་ཀྱི་སྤྱོད་པ་རྣམས་མ་གཏོགས་པ་གོང་འོག་ཏུ་བསླབ་པར་མི་བྱའོ། །ཡང་ན་སྤྱོད་པ་ནི་ལྟ་སྒོམ་སྤྱོད་གསུམ་དུ་བསྲེས་ནས་ལམ་དུ་ཁྱེར་བའི་ཆ་ཡིན་ལ། དམ་ཚིག་ནི་ལྟ་སྒོམ་ལ་སོགས་སྤྱི་ལ་འཇུག་སྟེ། རང་རང་གི་དོན་ལ་མི་འདའ་བར་བསྲུང་བའི་ཕྱིར་རོ། །ལྔ་པ་དཀྱིལ་འཁོར་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ཡན་ལག་ལྔ་པ་གཙོ་འཁོར་དུ་བཀོད་པའི་ཐབས་དཀྱིལ་འཁོར་ལ་རྒྱུད་རྒྱས་པའི་ལེའུ་དགུ་པ་ལས་ནང་ཚན་བདུན་དུ་གསུངས་པ་ནི། འདིར་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་དང་། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཅེས་གསུངས་པས། དེ་རྣམས་ཀུན་གྱི་སྡོམ་ཚིག་ནི་འདི་ལྟ་སྟེ། དཀྱིལ་འཁོར་གྱི་ངོ་བོ་དང་དཀྱིལ་འཁོར་གྱི་ཁྱད་པར་དང་། རྣམ་གྲངས་དང་། སྐབས་གར་དགོས་པའི་དུས་དང་། དཀྱིལ་འཁོར་བྱ་ཐབས་དང་། དཀྱིལ་འཁོར་གྱི་ངེས་ཚིག་གམ་སྒྲ་དོན་དང་། དཀྱིལ་ཆེད་དུ་གཉེར་བའི་ཡོན་ཏན་དང་། མ་གཉེར་བའི་སྐྱོན་དང་བརྒྱད་ཀྱིས་ནང་དུ། འོག་དཀྱིལ་འཁོར་གྱི་རྒྱས་བཤད་འབྱུང་བའི་གཞི་རུ་བཞག་པའོ། །གཉིས་པ་བཤད་པ་དེ་ལ་བརྒྱད་ཏེ། བགྲང་། དང་པོ་ངོ་བོ་དང་། དྲང་། དཀྱིལ་འཁོར་རང་རང་གི་གནས་སྐབས་ཀྱི་དཀྱིལ་འཁོར་བདུན་དུ་སྙིང་པོ་ལེན་པ་སྟེ་དཀྱིལ་ཡིན་ལ། དེའི་འཁོར་དུ་བཀོད་པ་གང་དང་གང་དུ་རྫོགས་པ་དེ་དཀྱིལ་འཁོར་གྱི་ངོ་བོ་ཡིན་ནོ། །དེ་ལ་དཀྱིལ་འཁོར་གྱི་ངོ་བོ་དམིགས་ངོས་བཟུང་། དང་པོ་རང་བཞིན་གྱི་དཀྱིལ་འཁོར་ལ་གཉིས་ཏེ། རང་བཞིན་གཞི་དང་། རང་བཞིན་འབྲས་བུ་མཐར་ཕྱིན་ནོ། །དང་པོ་ལ་གཉིས་ལས། དང་པོ་རང་བཞིན་དོན་དམ་གྱི་དཀྱིལ་ནི། རྒྱས་པའི་དོན་བཞི་པ་ལས། རང་བཞིན་དཀྱིལ་འཁོར་ཡང་དག་ནི། །ཆོས་དབྱིངས་བྷ་ག་དབྱེར་མེད་པས། །མཉམ་པར་སྦྱོར་ཞིང་དག་པའོ། །ཞེས་པ་དང་། ཁོག་གཞུང་ལས། ཆོས་ཉིད་རང་བཞིན་སྤྲོས་བྲལ་ཏེ། །དངོས་པོ་ཀུན་ཀྱང་དེ་བཞིན་ཏེ། །རང་བཞིན་ཉིད་ཀྱི་དཀྱིལ་འཁོར་རོ། །ཞེས་སོ། །གཉིས་པ་ཀུན་རྫོབ་ཀྱི་དཀྱིལ་འཁོར་ནི། དོན་གཉིས་པ་ལས། ཕྱི་ནང་སྣོད་བཅུད་བདག་རྣམས་ལ། །རང་བཞིན་དཀྱིལ་འཁོར་ཡེ་ནས་གནས། །ཞེས་པ་དང་། ཁོག་གཞུང་ལས། དཀྱིལ་འཁོར་བཞི་བཅུ་རྩ་ལྔ་ཉིད། །ཁམས་དང་སྐྱེད་མཆེད་ལ་གནས་པ། །ལྷུན་གྱིས་གྲུབ་པར་རྒྱལ་བས་གསུངས། །ཞེས་པས། དེའི་དཀྱིལ་ནི་རང་རིག་པའི་ཡེ་ཤེས། འཁོར་ནི་ཡེ་ཤེས་བཞིར་ཤར་བའོ། །གཉིས་པ་རང་བཞིན་འབྲས་བུ་མཐར་ཕྱིན་གྱི་དཀྱིལ་འཁོར་ལ་གཉིས་ཏེ། ཞི་བ་དང་། ཁྲོ་བོའོ། །དེ་གཉིས་ཀ་ལ་ཡང་། སྐུ་གསུང་ཐུགས་ཡོན་ཏན་ཕྲིན་ལས་ལྔ་ལྔ་སྟེ། རྩ་རྒྱུད་ལས། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཞེས་པ་དང་། ཁོག་གཞུང་ལས། འབྲས་བུ་མཐར་ཕྱིན་འོག་མིན་ན། །བཞུགས་པའི་དཀྱིལ་དང་འཁོར་གྱི་ཚུལ། །དེ་ཡང་ཞི་ཁྲོ་རྣམ་གཉིས་ཏེ། །ངེས་པར་སྐུ་གསུང་ཐུགས་སུ་འགྱུར། །ཞེས་པས། དེའི་དཀྱིལ་ནི་འདས་པ་ཡིན་ལ། འཁོར་ནི་འཇིག་རྟེན་པའི་ཚུལ་དུ་སྣང་བའོ། །གཉིས་པ་གཟུགས་བརྙན་གྱི་དཀྱིལ་འཁོར་ནི། ལྷ་རྗེ་མདའ་ནི། དོན་དམ་པའི་གཟུགས་བརྙན་ཀུན་རྫོབ་ལྷའི་དཀྱིིལ་འཁོར་དུ་བྱུང་བ་ལ་བཞེད། ལྷ་རྗེ་གླན་གྱིས། རྟོགས་པ་ཕྲ་རགས་ཀྱི་ལྷ་ཡབ་ཡུམ་མཚོན་པ་ལ་བཞེད་དོ། །གཉིས་ཀ་མཐུན་པའི་ལུང་ནི། དོན་བཞི་པ་ལས། གཟུགས་བརྙན་དཀྱིལ་འཁོར་ཡང་དག་ནི། །ཆེན་པོ་རགས་པ་ཐབས་སུ་རྟོགས། །སོ་སོའི་མཚན་ཉིད་ཤེས་རབ་རྟོགས། །གཉིས་མེད་འབྲེལ་བས་ཐབས་ཆེན་ཡིན། །ཞེས་པས། དེའི་དཀྱིལ་འཁོར་ནི་རང་རིག་ཡེ་ཤེས་ཡིན་ལ། འཁོར་ནི་ཡེ་ཤེས་བཞིའོ། །གསུམ་པ་ལྷག་པ་གཟུགས་བརྙན་གྱི་དཀྱིལ་འཁོར་ནི། ལས་དང་བྱ་བས་ལྷག་པ་སྟེ། རྡོ་རྗེ་ལས་རིམ་ལས། ས་གཞི་མཉམ་དང་ཚད་ཐིག་དང་། །ཚོན་དང་བྲི་བའི་རྣམ་པ་དང་། །རབ་གནས་སྦྱིན་སྲེག་འཇུག་པ་དང་། །ཡོན་ཏན་རྣམ་བཅུ་རྒྱས་ཤེས་བྱ། །ཞེས་གསུངས་པ་བཞིན་ཡིན་ལ། དེའང་དགོས་ཆེད་ཀྱི་དབང་གིས་སྐབས་ལྔར་དབྱེ་སྟེ། ཞི་ཁྲོའི་ལྷ་ཚོགས་བསྒྲུབ་ཅིང་མཆོད་པས་མཆོད་པའི་དཀྱིལ་འཁོར་དང་། དབང་བསྐུར་བ་དབང་གི་དང་། སྐུ་གསུང་ཐུགས་ཀྱི་རབ་གནས་ནི་བསོད་ནམས་རྟེན་གྱི་དང་། མཆོག་དང་ཐུན་མོང་གི་དངོས་གྲུབ་བསྒྲུབ་པ་བསྒྲུབ་པའི་དང་། ཞི་རྒྱས་དབང་དྲག་གི་ཕྲིན་ལས་བསྒྲུབ་པ་ཕྲིན་ལས་ཀྱི་དཀྱིལ་འཁོར་རོ། །དེའི་དཀྱིལ་ནི་རྡོ་རྗེ་སེམས་དཔའ་ལ་སོགས་པ་རིགས་གཙོ་བོར་གང་བཞག་པ་དེ་ཡིན་ལ། འཁོར་ནི་རིགས་བཞི་ལྷ་དང་ལྷ་མོའི། བཞི་པ་ཏིང་ངེ་འཛིན་གྱི་དཀྱིལ་འཁོར་ནི། བདེན་གསུམ་དབྱེར་མེད་ལྟ་སྒོམ་གྱིས་ཉམས་སུ་ལེན་པ་ལ་བྱ་སྟེ། གསང་སྙིང་ལས། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །ཅེས་པ་དང་། རྒྱས་པའི་ཉི་ཤུ་པ་ལས། དེ་བཞིན་ཏིང་འཛིན་དཀྱིལ་འཁོར་གྱིས། །ཐམས་ཅད་དབྱིངས་སུ་བསྡུས་ནས་ནི། །ཉིད་ཀྱི་ཐུགས་ལ་ཐིམས་བྱས་ཏེ། །ཐམས་ཅད་ཆོས་སྐུའི་ཕྱག་རྒྱ་ཆེ། །ཞེས་གསུངས་པས། དཀྱིལ་ནི་རང་རིག་པའི་ཡེ་ཤེས་ཡིན་ལ། འཁོར་ནི་ཅི་ཡང་མ་འགགས་པའི་ཡེ་ཤེས་བཞིར་ཤར་བའོ། །ལྔ་པ་ལྷག་པ་ཏིང་ངེ་འཛིན་གྱི་དཀྱིལ་འཁོར་ནི། བསྒོམ་པའི་བྱ་བ་ལྷག་པ་སྟེ། ཚོགས་ལམ་སྦྱོར་ལམ་བཞི་རིམ་གྱིས་བསྒོམ་པའི་རང་རང་གི་མཉམ་བཞག་ཆོས་ཉིད་བློ་འདས་དེ་དཀྱིལ་ཡིན་ལ། རང་རང་གི་སྐབས་སུ་ཚོགས་དྲུག་གི་གསལ་སྟོང་དང་། འགྱུ་སྟོང་ཡེ་ཤེས་སྒྱུ་མ་དང་། ལྷ་དང་ལྷ་མོའི་སྐུ་མདོག་ཞལ་ཕྱག་གི་འཆར་སྣང་རྣམས་འཁོར་ཡིན་ནོ། །ཡང་བསྐྱེད་རིམ་གྱི་ལྷ་བསྒོམ་པ་ཁོ་ན་ལ་བཞེད་པ་ཡང་ཡོད། དྲུག་པ་བྱང་ཆུབ་སེམས་ཀྱི་དཀྱིལ་འཁོར་ལ་ཡང་། ཕྱི་བྱང་ཆུབ་སེམས་ཀྱི་དཀྱིལ་འཁོར་རྩའི་འདུས་མདོ་དཀྱིལ་ཡིན་ལ། ཡན་ལག་འཁོར་དང་། ནང་བྱང་ཆུབ་སེམས་ཀྱི་དཀྱིལ་འཁོར་འདུས་མདོའི་ཐིག་ལེ་དཀྱིལ་ཡིན་ལ། ཡན་ལག་གི་ཐིག་ལེ་འཁོར ། གསང་བ་བྱང་ཆུབ་སེམས་ཀྱི་དཀྱིལ་འཁོར་བདེ་བའི་ཡེ་ཤེས་ལྷན་ཅིག་སྐྱེས་པ་དེ་དཀྱིལ་ཡིན་ལ། དགའ་བ་བཅུ་དྲུག་དང་ཡེ་ཤེས་ལྔ་ནི་འཁོར་ཡིན་ཏེ། ཁོག་གཞུང་ལས། ཟབ་ཕྱིར་བྱང་སེམས་དཀྱིལ་འཁོར་ནི། །རྟེན་དང་རྟེན་ཅན་ཐ་སྙད་གཉིས། །དབྱེ་ན་ཕྱི་ནང་མཐར་ཐུག་འགྱུར། །ཞེས་སོ། །བདུན་པ་ཚོམ་བུ་ཚོགས་ཀྱི་དཀྱིལ་འཁོར་ནི། ཞི་ཁྲོ་གཉིས་ཀའི་ཚོམ་བུ་གཅིག་གསུམ་ལྔ་པའི་དཀྱིལ་ནི་རིགས་གཅིག་དང་། གསུམ་དང་། ལྔ་གང་ཡིན་པའོ། །འཁོར་ནི་རིགས་བཞི་ལྷ་དང་ལྷ་མོའོ། །དེ་ཡང་ཁོག་གཞུང་ལས། ཆོགས་ནི་འབྱོར་པ་རྣམ་པ་གསུམ། །ཚོམ་བུ་གཅིག་གསུམ་ལྔ་པའོ། །ཞེས་སོ། །གཉིས་པ་ཁྱད་པར་དང་། དྲང་། དཀྱིལ་འཁོར་བདུན་གྱི་དང་པོ་རང་བཞིན་གྱི་དཀྱིལ་འཁོར་ལ་ཡང་། རང་བཞིན་གཞིའི་དཀྱིལ་འཁོར་དང་། དེ་ཉིད་མཐར་ཕྱིན་པ་འབྲས་བུའི་དཀྱིལ་འཁོར་གཉིས། དེ་ལ་གདུལ་བྱ་ལུགས་འབྱུང་དང་ལུགས་ཟློག་གི་སྣང་བའི་ཁྱད་པར་གྱིས་ཕྱེ་བས་ཞི་བ་དང་ཁྲོ་བོའི་དཀྱིལ་འཁོར་གཉིས་སུ་བྱུང་། དེ་གཉིས་ལ་ཡང་གདུལ་བྱ་རང་རང་གི་མོས་པས་ཕྱེ་སྟེ། ལ་ལ་སྐུ། ལ་ལ་གསུང་། ལ་ལ་ཐུགས། ལ་ལ་ཡོན་ཏན། ལ་ལ་ཕྲིན་ལས་ལ་མོས་པའི་སྟོབས་ཀྱིས་འཁོར་གྱི་ལྷ་ལ་ཁྱད་མེད་ཀྱང་རིགས་ལྔ་ལ་གཙོོ་བོ་གང་བྱེད་དེས་ཕྱེ་བས། ཞི་ཁྲོའི་དཀྱིལ་འཁོར་གཉིས་པོ་རེ་རེ་ལ་ཡང་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལྔ་ཡོད་དོ། །གསུམ་པ་རྣམ་གྲངས་དང་། དྲང་། རྩ་བ་རང་བཞིན་གྱི་དཀྱིལ་འཁོར་དེ་ཡང་བྱེད་ལས་གནས་སྐབས་ཀྱི་སྒོ་ནས་རྣམ་གྲངས་རྣམ་པར་དབྱེ་ན། མཆོད་པ་དང་། དབང་དང་། ཕྲིན་ལས་དང་། བསྒྲུབ་པ་དང་བཞིའོ། །གཞིའི་དཀྱིལ་འཁོར་དང་སྦྱར་ནས་རྣམ་གྲངས་དབྱེ་བའམ། ཡང་ན་འབྲས་བུ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་གཙོ་བོས་ཕྱེ་བས་རྣམ་གྲངས་དང་རྗེས་སུ་མཐུན་པར་སྦྱར་ནས་དབྱེ་ན། མཆོད་པ་ལ་སོགས་བཞི་པོ་སྐུ་གསུང་ཐུགས་ཡོན་ཏན་ཕྲིན་ལས་ལྔ་པོ་ཀུན་གྱི་རྗེས་སུ་འཇུག་པའི་མཆོད་པ་ལྔ། དབང་ལ་ལྔ ། ཕྲིན་ལས་ལ་ལྔ། བསྒྲུབ་པ་ལ་ལྔ་སྟེ་ཉི་ཤུ་དེ་ཞི་ཁྲོ་གཉིས་ཀྱིས་ཕྱེ་བས་རྣམ་གྲངས་བཅུ་ཚན་བཞི་སྟེ་བཞི་བཅུ་དང་། རང་བཞིན་གྱི་སྒོ་ནས་དབྱེ་ན། གཞི་ལ་སྐུ་གསུང་ཐུགས་ཡོན་ཏན་ཕྲིན་ལས་ལྷུན་གྲུབ་ཏུ་གནས་པ་ལྔ། དེ་ཉིད་མཐར་ཕྱིན་པས་ཞི་ཁྲོ་གཉིས་པོ་རེ་རེ་ལ་ལྔ་ལྔ་སྟེ་བཅོ་ལྔ། དེ་བཞིན་དུ་མཆོད་པ་ལ་ལྔ ། དབང་ལ་ལྔ། ཕྲིན་ལས་ལ་ལྔ ། བསྒྲུབ་པ་ལ་ལྔ་སྟེ་ཀུན་བསྡོམས་ན་སུམ་ཅུ་རྩ་ལྔར་གྱུར་པ་ཡིན་ནོ། །རང་བཞིན་གྱི་དཀྱིལ་འཁོར་གྱི་རྣམ་གྲངས་དེ་ཡི་རྗེས་སུ་དཀྱིལ་འཁོར་དྲུག་པོའི་རྣམ་གྲངས་ཀྱང་དེ་ལྟར་དུ་སྦྱར་བར་ཤེས་པར་བྱའོ། །དེ་ཡང་རྣམ་གྲངས་བཞི་བཅུ་རྩ་ལྔ་པོ་དེ་དག །གཟུགས་བརྙན་གྱི་དཀྱིལ་འཁོར་གྱི་གཟུགས་བརྙན་ལྟར་གསལ་ལ་སྒྲིབ་གཡོགས་མེད་པའི་ངང་དུ་སྣང་བ་ཡིན་ལ། གཉིས་པོའི་དོན་དེ་དག །ལྷག་པ་གཟུགས་བརྙན་གྱི་དཀྱིལ་འཁོར་གྱི་མཚོན་བྱེད་ཀྱི་ངང་དུ་ཚང་ལ། རྣམ་གྲངས་གཉིས་པོའི་དོན་དེ་ཉིད། ཏིང་ངེ་འཛིན་གྱི་དཀྱིལ་འཁོར་གྱིས་ཅིག་ཆར་དུ་རྟོགས་ཤིང་སྒོམ་པའི་ངང་དུ་རྫོགས་ལ། ཡང་དོན་དེ་ཉིད། ལྷག་པ་ཏིང་ངེ་འཛིན་གྱི་དཀྱིལ་འཁོར་གྱིས་རིམ་གྱིས་ཉམས་སུ་ལེན་པའི་སྐབས་སུ་ཚང་ལ། དོན་དེ་དག །ཚོམ་བུ་ཚོགས་ཀྱི་དཀྱིལ་འཁོར་གྱིས་བསྒྲུབ་ཅིང་ཉམས་སུ་ལེན་པ་ཡིན་ལ། ཡང་གྲངས་གཉིས་པོ་དེ་དག །བྱང་ཆུབ་སེམས་ཀྱི་དཀྱིལ་འཁོར་གྱིས་ཐབས་ལམ་ལྟར་ཉམས་སུ་ལེན་པའོ། །བཞི་པ་དགོས་ཆེད་དང་དུས་ཐུན་མོང་དུ་བསྟན་པ་དང་། དྲང་། མཆོད་པ། དབང་། ཕྲིན་ལས། བསྒྲུབ་པ་དང་བཞི་པོའི་དུས་སུ་དཀྱིལ་འཁོར་བསྒོམས་པས་བདག་གཞན་གྱི་དོན་བསྒྲུབ་པ་ལ་མ་བསྒོམས་ན་མི་འགྲུབ། བསྒོམས་ནས་འགྲུབ་པའི་ཕྱིར། གཏན་ཚིགས་དེས་ན་ཡེ་ཤེས་ཀྱི་དཀྱིལ་འཁོར་སྤྱན་དྲང་བ་དང་། རྟེན་མི་དང་འབྲེལ་ན་དབང་བསྐུར་བ་དང་། ལྷ་དང་འབྲེལ་ན་རབ་ཏུ་གནས་པའི་དུས་དང་། མཚན་བཅས་མཚན་མེད་ཀྱི་ཏིང་ངེ་འཛིན་བསྒོམས་པ་ལ་དཀྱིལ་འཁོར་དགོས་པ་དང་། བསྙེན་བསྒྲུབ་རྣམ་པ་བཞི་དང་། འཕྲིན་ལས་རྣམ་བཞིའི་སྒོ་ནས་བདག་གཞན་གྱི་དོན་རྫོགས་པར་བྱེད་པའི་དུས་སུ་དགོས་པ་དང་། མཆོད་པ་འབུལ་ནས་ཚོགས་རྫོགས། མཆོག་ཐུན་མོང་གི་འབྲས་བུ་འགྲུབ་པའི་ཐབས་ལ་དཀྱིལ་འཁོར་དགོས་པ་དེའི་ཕྱིར་ན། གོང་གི་དཀྱིལ་འཁོར་བདུན་པོའི་དོན་རྣམས་བློས་ཤིན་ཏུ་ནན་ཏན་གྱི་སྒོ་ནས་ཉམས་སུ་བླང་བར་བྱའོ། །ལྔ་པ་འགྲུབ་པའི་ཐབས་དང་། དྲང་། འདིར་ལྷག་པ་གཟུགས་བརྙན་གྱི་ས་ཡི་ཆོ་ག་བྱ་བའི་རིམ་པ་ནས་བཟུང་སྟེ། རྡོ་རྗེ་ལས་རིམ་ལས། ས་གཞི་མཉམ་དང་ཚད་ཐིག་དང་། །ཚོན་དང་བྲི་བའི་རྣམ་པ་དང་། །རབ་གནས་སྦྱིན་སྲེག་འཇུག་པ་དང་། །ཡོན་ཏན་རྣམ་བཅུ་རྒྱས་ཤེས་བྱ། །ཞེས་གསུངས་པས། ས་ཆོག་དང་། དཀྱིལ་འཁོར་གྱི་ཚད་དང་། ཐིག་དང་། ཚོན་དང་། བྲི་ཐབས་དང་། མཚན་མ་དགོད་པ་དང་། རབ་གནས་དང་། སྦྱིན་སྲེག་དང་། འཇུག་ཆོག་དང་། ཡོན་ཏན་དང་རྣམ་པ་བཅུའི་སྒོ་ནས་ཉམས་སུ་བླང་བར་བྱའོ། །དེ་ཡང་ལྷག་པ་གཟུགས་བརྙན་དེ་ཡི་ཆོ་ག་བྱེད་ཐབས་ཅི་ལྟ་བ་དག་ན། རང་བཞིན་གྱི་དཀྱིལ་འཁོར་ལ་སོགས་པ་དཀྱིལ་བདུན་པོ་ལྷག་མ་དག་ལ་ཡང་ལྷག་པ་གཟུགས་བརྙན་གང་ལ་བྱ་ཐབས་བཅུ་པོ་ཡོད་པ་དེ། དཀྱིལ་འཁོར་ལྷག་མ་ཀུན་ལའང་བཅུ་པོ་དོན་གྱིས་ཡོད་དེ་ཚུལ་ཅི་ལྟར་དུ་དབྱེ་ན། ཐབས་ལ་མ་འགགས་པ་དང་། ཤེས་རབ་མ་དམིགས་པའི་བྱེད་ལས་ཀྱི་ཆ་ནས་ཕྱེ་བས། དེས་ན་དཀྱིལ་འཁོར་ལྷག་མ་རྣམས་ཀྱི་བྱ་ཐབས་དེ་མངོན་དུ་འགྲུབ་པར་འགྱུར་ཏེ། དེ་ཡང་། རང་བཞིན་གཞིའི་དུས་སུ་གོང་གི་བྱ་ཐབས་བཅུ་པོའི་དོན་གནས་པ་ཡིན་ལ། འབྲས་བུའི་དུས་སུ་དོན་དེ་མཐར་ཕྱིན་པ་ཡིན་ལ། ཏིང་ངེ་འཛིན་གྱིས་དེ་ཅིག་ཆར་དུ་བསྒོམ་ལ། ལྷག་པ་ཏིང་ངེ་འཛིན་གྱིས་དེ་རིམ་གྱིས་བསྒོམ་ལ། གཟུགས་བརྙན་གྱིས་དེ་རྟོག་ཚོགས་ཡེ་ཤེས་སུ་གནས་པའི་ངོས་ནས་ཚང་ལ། ཚོམ་བུ་ཚོགས་ཀྱི་དཀྱིལ་འཁོར་གྱིས་དོན་དེ་ཉིད་བསྒྲུབ་ཅིང་ཉམས་སུ་ལེན་པ་ཡིན་ལ། བྱང་ཆུབ་སེམས་ཀྱི་དཀྱིལ་འཁོར་ལ་བཅུ་ལས། དང་པོ་ས་གཞི་མཉམ་པ་ནི། རིག་མ་མཚན་ཉིད་དང་ལྡན་པ་སྟེ། ཐལ་བའི་རྒྱུད་ལས། ཕྱག་རྒྱ་ཆེན་པོ་ནམ་མཁའི་དབྱིངས། །ཞེས་སོ། །གཉིས་པ་ཚད་ནི། ཡུམ་གྱི་མཁའ་སོར་བཞི་སྟེ། དེ་ཉིད་ལས། སོར་བཞིའི་ཚད་དུ་རང་བཞིན་གནས། །ཞེས་སོ། །གསུམ་པ་ཐིག་ནི་བདེ་བའི་ཡེ་ཤེས་མི་འགྱུར་བ་སྟེ། དེ་ཉིད་ལས། བདེ་བའི་ཡེ་ཤེས་ཐུགས་དཀྱིལ་འཁོར། །ཅེས་སོ། །བཞི་པ་ཚོན་ནི། ཡུམ་གྱི་པདྨའི་ཁ་དོག་དམར་པོ། །ལྔ་པ་བྲི་བ་ནི། གྲུ་གསུམ་གྲུ་བཞི་ཟླུམ་པོ་ཟླ་གམ་གྱི་ཚུལ་དུ་ཡོད་དེ། དེ་ཉིད་ལས། ཁ་དོག་དབྱིབས་དང་ལྡན་པའོ། །ཞེས་སོ། །དྲུག་པ་རྣམ་པ་དགོད་པ་ནི། རྡོ་རྗེ་དང་སྣ་རྩེ་ལ་དགོད་པ་སྟེ། དེ་ཉིད་ལས། རྡོ་རྗེ་མཛུབ་མོའི་རྩེ་དག་ཏུ། །ཏིལ་འབྲུ་ནམ་མཁའི་གཞལ་ཡས་སུ། །རི་རབ་ཙམ་གྱི་ཕྱག་རྒྱ་དགོད། །ཅེས་སོ། །བདུན་པ་རབ་གནས་ནི། འདོད་པའི་བསྟན་བཅོས་ཀྱིས་བདེ་བ་རྒྱས་པར་བྱེད་པ་སྟེ། དེ་ཉིད་ལས། ཐབས་ཀྱི་ཆོ་ག་རབ་གནས་ནི། །ཞེས་སོ། །བརྒྱད་པ་སྦྱིན་སྲེག་ནི། མཁའ་ཧོམ་ཁུང་། སྣ་རྩེ་མེ་ལྷ། རྡོ་རྗེ་བླུག་གཟར། པདྨ་དབང་གཟར། བྱང་སེམས་མཆོད་རྫས་ཏེ། དེ་ཉིད་ལས། གསང་བའི་སྦྱིན་སྲེག་ལུགས་སུ་འབུལ། །ཅེས་སོ། །དགུ་པ་འཇུག་ཆོས་ནི། དེར་འཇུག་སྟེ། དེ་ཉིད་ལས། འཇུག་པ་པོས་ཀྱང་གསོལ་བ་གདབ། །ཅེས་སོ། །བཅུ་པ་ཡོན་ཏན་ནི་སྔོན་འོག་མིན་དུ་མཐར་ལམ་པ་ཞུགས་པ་དང་སྐལ་བ་མཉམ་པ་ཡིན་ཏེ། སྙིང་པོ་ལས། བདེ་བ་ཆེན་པོའི་དཀྱིལ་འཁོར་ནི། །སྟངས་དཔྱལ་གཉིས་སམ་ཡང་ན་ལྔ། །བྱས་ཏེ་དང་ལྡན་རབ་ཞུགས་ན། །འདོད་པ་ཡིད་འོང་མཉམ་པར་འགྱུར། །ཞེས་སོ། །དྲུག་པ་ངེས་ཚིག་དང་། དྲང་། དཀྱིལ་འཁོར་བདུན་གྱི་སྐབས་སུ་གཙོ་བོ་སྙིང་པོ་གང་དང་གང་ལྡན་པ་དཀྱིལ་འཁོར་ཡིན་ལ། དེ་ཡི་འཁོར་གང་ཡིན་དང་ལྡན་པས་ན་དཀྱིལ་འཁོར་ཞེས་བྱ་བའི་ངེས་པའི་ཚིག་གམ་སྒྲ་དོན་ཡིན་ཏེ། རྒྱས་པའི་ལེའུ་དོན་གསུམ་པའི་ལུང་ལས་གྲགས་པ་ལྟར་ཡིན་པས་ཐེ་ཚོམ་མེད་དེ། དེ་ཡང་རང་བཞིན་གྱི་དཀྱིལ་འཁོར་དང་། གཟུགས་བརྙན་གྱི་དཀྱིལ་འཁོར་དང་། ཏིང་ངེ་འཛིན་གྱི་དཀྱིལ་འཁོར་དང་གསུམ་གྱི་ངེས་ཚིག་ནི། རྒྱས་པ་ལས། རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཅེས་སོ། །རང་བཞིན་མཐར་ཕྱིན་གྱི་ངེས་ཚིག་ནི། འདས་པ་རྟག་ཏུ་དཀྱིལ་ཡིན་ཏེ། །འཇིག་རྟེན་སྣ་ཚོགས་འཁོར་དུ་གསུངས། །ཞེས་སོ། །ལྷག་པ་གཟུགས་བརྙན་དང་། ལྷག་པ་ཏིང་ངེ་འཛིན་དང་། ཚོམ་བུ་ཚོགས་ཀྱི་དཀྱིལ་འཁོར་དང་། གསུམ་གྱི་ངེས་ཚིག་ནི། དེ་ཉིད་ལས། རྡོ་རྗེ་སེམས་དཔའ་དཀྱིལ་ཡིན་ཏེ། །རིགས་བཞི་ལྷ་དང་ལྷ་མོས་འཁོར། །ཅེས་སོ། །བྱང་ཆུབ་སེམས་ཀྱི་དཀྱིལ་འཁོར་གྱི་ངེས་ཚིག་ནི། དེ་ཉིད་ལས། སྙིང་པོ་ཐམས་ཅད་དུས་སུ་དཀྱིལ། །གང་ཡང་ཡན་ལག་འཁོར་དུ་གསུངས། །བཅོ་བརྒྱད་ཁམས་སུ་སྙིང་པོ་ཉིད། །དེ་དག་འཁོར་ཏེ་བདེ་བའི་ཁམས། །བྱང་སེམས་བདེ་བའི་ཡེ་ཤེས་ཏེ། །རྟེན་ཅན་ཅི་བཞིན་རྟེན་དེ་བཞིན། །ཅེས་གསུངས་སོ། །དེ་ལྟར་གཙོ་འཁོར་དུ་ཐ་དད་པའི་དུས་ན་ཆོས་ཉིད་མཉམ་པ་ཉིད་ཀྱི་ངང་དུ་མ་གཡོས་པས་དུ་མའི་མཐའ་དང་བྲལ་ལ། མ་གཡོས་བཞིན་དུ་གཙོ་འཁོར་གྱི་ཚུལ་དུ་གསལ་བར་སྣང་བས་ཕྱོགས་གཅིག་གི་མཐའ་དང་བྲལ་ཏེ་དབྱིངས་ཕྱོགས་གཅིག་གི་འཛིན་པས་བཅིངས་པ་དང་བྲལ་བའོ། །བདུན་པ་ཡོན་ཏན་དང་། དྲང་། དེ་ལྟར་དཀྱིལ་འཁོར་གྱི་དོན་ཉམས་སུ་བླངས་པས་ཡེ་ཤེས་འཕེལ་སྒྲིབ་པ་འགྲིབ་གནས་སྐབས་དང་མཐར་ཐུག་གི་འབྲས་བུ་མི་ཐོབ། ལས་གང་བསམ་མི་འགྲུབ་པའི་སྐྱོན་ཡོད་པའོ། །དྲུག་པ་མཆོད་པ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ཡན་ལག་དྲུག་པ་མཉེས་པར་བྱེད་པ་མཆོད་པའི་སྡོམ་ཚིག་ནི་འདི་ལྟ་སྟེ། མཆོད་པའི་དགོས་ཆེད་དང་། མཆོད་པའི་ངོ་བོ་ངོས་བཟུངས་བ་དང་། མཆོད་པ་ལ་རྣམ་གྲངས་དུ་ཡོད་བསྟན་པ་དང་། སྐབས་གར་མཁོ་བའི་དུས་དང་། མ་འབུལ་བའི་སྐྱོན་དང་། འབུལ་བའི་ཡོན་ཏན་ལ་སོགས་པའི་སྤྱི་དོན་དྲུག་པོའི་འདིའི་ནང་དུ་འོག་རྒྱས་བཤད་དེ་ཅི་ལྟ་བ་བཞིན་དུ་ཤེས་པར་བྱའོ། །གཉིས་པ་བཤད་པ་དེ་ལ་དྲུག་སྟེ། བགྲང་། དང་པོ་དགོས་ཆེད་དང་། དྲང་། མཆོད་པ་ཕུལ་བས་བདག་གཞན་གཉིས་ཀྱི་སྒྲིབ་པ་དག་ཚོགས་གཉིས་རྫོགས་ལྷ་ཚོགས་མཉེས་དམ་ཚིག་ཉམས་པ་བསྐང་བའི་ཡོན་ཏན། ཚེ་འདི་དང་ཕྱི་མར་མཆོག་དང་ཐུན་མོང་གི་དངོས་གྲུབ་ཐོབ་པ་དང་། གཞན་ཡང་མཆོད་པ་ཕུལ་བའི་ཡོན་ཏན་བཅོམ་ལྡན་འདས་ཀྱིས་བཀའ་མདོ་རྒྱུད་རྣམས་ལས་གསུངས་པ་དང་། དམ་ཚིག་ཉམས་པའི་ཆད་སྐྱོན་མི་འབྱུང་བར་བྱ་བའི་ཕྱིར་མཆོད་པ་ལ་བརྩོན་པར་འགྱུར་རོ། །གཉིས་པ་ངོ་བོ་དང་། དྲང་། མཆོད་པ་ཕུལ་བྱའི་ཡུལ་དེ་ལ་ཕུལ་བྱེད་ཀྱི་མཁན་པོ་དེས་ཕུལ་བར་བྱ་བའི་རྒྱུ་དེ་ཕུལ་བར་བྱེད་པ་དང་གསུམ་འདུས་པའི་དུས་ན། མཆོད་ཡུལ་གྱི་ཞིང་དེ་དགྱེས་ཤིང་ཐུགས་ཚིམ་པར་འགྱུར་བ་ནི་མཆོད་པའི་དངོས་པོའམ་ངོ་བོ་ཉིད་ཡིན་ནོ། །གསུམ་པ་རྣམ་གྲངས་དང་། དྲང་། དཔེར་ན་འཇིག་རྟེན་ན་འབངས་ཀྱིས་རྒྱལ་པོ་ལ་གུས་པའི་སྒོ་ནས་ཞབས་ཐོག་གིས་མཉེས་པར་བྱ་བའི་སྤྱོད་པ་དེ་དང་ཆ་མཐུན་ཡིན་ཏེ། སངས་རྒྱས་ལ་མཉེས་བྱ་མཉེས་བྱེད་མེད་ཀྱང་། གདུལ་བྱ་ལམ་ལ་མོས་པའི་གང་ཟག་དེ་དྲང་བར་བྱ་བའི་ཕྱིར། ཞི་ཁྲོའི་ལྷ་གང་ཡིན་པ་ལ་གུས་པ་ཕྱག་གི་མཆོད་པ་དང་། ཕྱག་རྒྱ་གར་ཚོགས་ཀྱི་མཆོད་པ་དང་། གླུ་ཡེ་ཤེས་དང་། གར་ཡེ་ཤེས་དང་། རོལ་མོ་ཡེ་ཤེས་དང་། ཚིག་སུ་ར་ཏོ་སྟེ་ལྷ་མོ་བཅུ་དྲུག་གི་མཆོད་པ་དང་། ཕྱི་མཆོད་ལ། ཕྱག་དང་། ཀུན་བཟང་དང་། ཞབས་བསིལ་དང་། ལྷ་མོ་བཞི་བསྣོལ་ལ་སོགས་འདོད་ཡོན་རྣམས་དང་། ནང་མཆོད་སྨན་རཀ་གཏོར་གསུམ་དང་། ལྷག་པ་ཏིང་ངེ་འཛིན་ནོ། །གསང་བའི་མཆོད་པ་ལ། ཞེ་སྡང་སྒྲོལ་བའི་མཆོད་པ་དང་། འདོད་ཆགས་སྦྱོར་བའི་མཆོད་པ་དང་། གཏི་མུག་དམ་རྫས་ཀྱི་མཆོད་པའོ། །ཡང་ན་མཆོད་པ་ཐམས་ཅད་ཕྱི་ནང་གསང་གསུམ་དུ་འདུས་ཏེ། ཕྱི་འདོད་ཡོན་རྫས་ཀྱི་མཆོད་པ་ནི་དངོས་སུ་བཤམས་པ། ནང་དགོངས་པ་ཏིང་ངེ་འཛིན་གྱིས་མཆོད་པ་ནི་བསྒོམ་པ། གསང་བ་དམ་རྫས་རང་གནས་ཀྱི་མཆོད་པ་སྟེ། དེ་རྣམས་འབུལ་བའི་སྲོག་ལྷ་སྒོམ་དང་ལྡན་དགོས་པ་ཡིན་ཏེ། དེ་ལ་མཆོད་པའི་དངོས་པོ་ཅི་ལྟར་སྣང་དུས་ངོ་བོ་སེམས་ཀྱི་ཆོས་ཉིད་སྤྲོས་བྲལ་ལ་མི་གཡོ་བ་ནི་དོན་དམ་པའི་བདེན་པའི་བདེན་པ་མ་གཡོས་བཞིན་དུ་སྤྱོད་པའི་དངོས་པོ་རྣམས་ལ་འདྲེས་པར་གསལ་བ་ནི་ཀུན་རྫོབ་བདེན་པ་དེའི་དུས་སུ་ཆུ་དང་ཆུའི་རླབས་བཞིན་དུ་གཉིས་སུ་མེད་པ་ནི་དབྱེར་མེད་བདེན་པ། དེ་ལྟར་བདེན་པ་གསུམ་དབྱེར་མེད་ཀྱི་ཚུལ་དུ་བསྒོམ་མོ། །ཏིང་ངེ་འཛིན་གྱི་རྩི་ཡིས་མ་ཟིན་ན་མཆོད་པ་རང་ཁ་མར་འགྱུར་བས། དེས་ན་ཏིང་ངེ་འཛིན་གྱིས་ཟིན་པ་གལ་ཆེའོ། །བཞི་པ་སྐབས་གང་དུ་དགོས་པ་དང་། དྲང་། ཕྱི་ནང་གསང་བའི་མཆོད་པ་གསུམ་ལ་སྤྲོས་པའི་རྣམ་གྲངས་རྣམས་གོང་དུ་བཤད་པ་དེ་དག་རང་བཞིན་གྱི་དཀྱིལ་འཁོར་ལ་སོགས་པའི་དཀྱིལ་འཁོར་བདུན་གྱི་གནས་དེ་དག་ལ། མཆོད་པ་འབུལ་དགོས་པའི་ཕྱིར་དང་། གཞན་ཡང་དགོས་ཆེད་ཀྱི་རྗེས་སུ་ཞུགས་པའི་སྡིག་པ་བཤགས་པའི་དུས་དང་། ཚོགས་བསགས་པའི་དུས་དང་། ལྷ་མཉེས་པར་བྱེད་པའི་དུས་དང་། དམ་ཚིག་ཉམས་ཆག་སྐོང་བའི་དུས་དང་། ཁྱད་པར་ཕྲིན་ལས་རྣམ་བཞི་ལ་ལོངས་སྤྱོད་པའི་དུས་དང་། བསྒྲུབ་པ་བྱེད་པའི་དུས་དང་། དབང་བསྐུར་བའི་ཚེ་ན་མཆོད་པ་དགོས་པའོ། །ལྔ་པ་ཡོན་ཏན་དང་། དྲང་། སྐབས་གང་དུ་མཁོ་བའི་དུས་ཀྱི་རྗེས་སུ་ཞུགས་པ་ནི་ཡོན་ཏན་དག་ཡིན་ཏེ། དེ་ལ་སྤྱི་དང་ཁྱད་པར་གྱི་དུས་ཀྱི་སྒོ་ནས་དམིགས་ངོས་བཟུང་ན་ནི། མཆོད་པ་ཕུལ་བས་སྒྲིབ་པ་དག །ཚོགས་རྫོགས། ལྷ་ཚོགས་མཉེས། དམ་ཚིག་ཉམས་ཆག་བསྐངས་ནས་མཐར་ཐུག་སངས་རྒྱས་ཐོབ་པ་དང་། བྱེ་བྲག་ཏུ་ཕྲིན་ལས་ཀྱིས་གནས་སྐབས་དང་མཐར་ཐུག་གི་འབྲས་བུ་གཟུང་འཛིན་ཞི། སྐུ་དང་ཡེ་ཤེས་རྒྱས། མཐའ་གཉིས་དབང་དུ་འགྱུར། ཉོན་མོངས་རྣམ་རྟོག་འཇོམས། སྒྲུབ་པའི་འབྲས་བུ་ལ་གནས་སྐབས་ཐུན་མོང་དང་། མཐར་ཐུག་གི་འབྲས་བུ་སངས་རྒྱས། དབང་གི་འབྲས་བུ་གནས་སྐབས་སུ་མཐོ་རིས་དང་ཐར་པ་ཐོབ་ལ། མཐར་ཐུག་རིགས་ཐམས་ཅད་ཀྱི་བདག་པོར་འགྱུར་རོ། །དེ་ལྟར་མཆོད་པས་མཉེས་པས་དོན་གྱི་འབྲས་བུ་ལ་རེག་པའོ། །དེ་ཡང་ཚུར་བསྡུ་ན་གོང་གི་ཡོན་ཏན་རྣམས་བདག་དང་གཞན་དོན་གྱི་ཡོན་ཏན་གཉིས་སུ་འདུས་ཤིང་ཐོབ་པར་འགྱུར་རོ། །དྲུག་པ་སྐྱོན་ནོ། །དྲང་། ཡོན་ཏན་དེ་ལས་བཟློག་ཏུ་འགྲོ་སྟེ། དམ་ཚིག་ཆག་ཉམས་མི་སྐོང་བ་དང་། ཡེ་ཤེས་ཀྱི་ལྷ་དང་དམ་ཅན་སྲུང་མ་རྣམས་གཡེལ་བ་དང་། དམ་ཚིག་ཉམས་པའི་ཆད་པ་འབྱུང་བ་དང་། ཁྱད་པར་དུ་འཕྲིན་ལས། བསྒྲུབ་པ། དབང་གི་དུས་སུ་མཆོད་པ་མ་ཕུལ་ན། ཕྲིན་ལས་ལ་སོགས་གང་བྱེད་པ་ལ་མཐུ་བྱིན་རླབས་དང་བྲལ་བར་འགྱུར་ཏེ་མེད་པའོ། །བདུན་པ་དབང་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ཡན་ལག་བདུན་མ་ཐོབ་པ་ཐོབ་པར་བྱེད་པའི་དབང་གི་སྡོམ་ཚིག་ནི་འདི་ལྟ་སྟེ། དབང་བསྐུར་བ་དང་ཐོབ་པའི་དགོས་ཆེད་དང་། དབང་འགྲུབ་པའི་རྒྱུ་རྐྱེན་དང་། དབང་རང་གི་ངོ་བོ་དང་། དབང་གི་གྲངས་དང་། དབང་བསྐུར་བའི་ཐབས་དང་། དབང་ཐོབ་པའི་ཚད་དང་། དབང་བསྐུར་བའི་དུས་དང་། དབང་བསྐུར་བའི་སྣོད་ཀྱི་རིམ་པ་དང་། དབང་ཐོབ་པའི་ཡོན་ཏན་དང་། མ་ཐོབ་པའི་སྐྱོན་དང་བཅུའི་སྒོ་ནས་དཀྱིལ་འཁོར་ལས་རིམ་དང་། དབང་ལས་རིམ་གཉིས་དང་སྦྱོར་ན། དབང་དེ་རྫོགས་པ་ཡིན་ནོ། །གཉིས་པ་བཤད་པ་དེ་ལ་བཅུ་སྟེ། བགྲང་། དང་པོ་དགོས་ཆེད་དང་། དྲང་། བདག་དོན་གཞན་དོན་གཉིས་དོན་ཆོས་དོན་དུ་འགྱུར་བ་དང་། བཞི་ལས་ཁྱད་པར་དུ་བདག་དོན་དུའང་། ལམ་ལ་ཞུགས་པའི་སྔོན་དུ་དབང་ཐོབ་དགོས་པ་དང་། གཞན་དོན་དུ་སློབ་བུ་ལམ་དུ་འཇུག་ནུས་པར་བྱེད་པ་ལ་དབང་བསྐུར་དགོས་པ་དང་། དབང་ཐོབ་པས་ཚོགས་བསྒྲུབ་ན་ཐུན་མོང་དང་མཆོག་གི་དངོས་གྲུབ་འགྲུབ་པ་དང་། དེ་ཡང་གཅན་འཕྲང་ལས། རྒྱལ་བུ་རྒྱལ་སར་བཏོན་པ་ལྟར། །རིམ་པའང་དབང་གི་ཁྱད་པར་ཏེ། །ས་ལམ་རྩལ་གྱིས་བགྲོད་པ་ཡིས། །དབང་རྣམས་ཐོབ་པ་རབ་ཏུ་གཅེས། །ཅེས་སོ། །གཉིས་པ་རྒྱུ་རྐྱེན་དང་། དྲང་། ལུང་རྩ་རྒྱུད་ཀྱི་ལེའུ་བཅུ་དང་། བཤད་རྒྱུད་བླ་མ་ལ་སོགས་པ་དང་མན་ངག་ལས་རིམ་ལ་སོགས་པ་རྣམས་ཀྱི་ནང་ནས་བྱུང་བའི་མཚུངས་ལྡན་གྱི་རྒྱུའང་ལྷན་ཅིག་བྱེད་པའི་རྒྱུ་གཉིས་དང་། རྒྱུའི་རྐྱེན་དང་། བདག་པོ་དང་། དམིགས་པའི་དང་། དེ་མ་ཐག་པའི་རྐྱེན་དང་བཞིའི་སྒོ་ནས་ཕྱི་ཕན་པའི་དབང་བཅུ། ནང་ནུས་པའི་དབང་ལྔ། གསང་བ་ཟབ་མོའི་དབང་གསུམ་གྱི་ཡན་ལག་རྒྱས་པར་བསྙད་དེ་བཤད་པར་བྱ་གསུངས་པས། རྡོ་རྗེ་ལས་རིམ་ལས། རྒྱུ་གཉིས་རང་བཞིན་མཚུངས་པ་དང་། །ངོ་བོ་བཞིན་དུ་གྲངས་འཇུག་པའོ། །ཞེས་པས། མཚུངས་ལྡན་གྱི་རྒྱུ་དང་། ལྷན་ཅིག་བྱེད་པའི་རྒྱུ་དང་གཉིས་སོ། །དང་པོ་མཚུངས་ལྡན་གྱི་རྒྱུ་ནི། རྣམ་པར་ཤེས་པ་ཚོགས་བརྒྱད་ཡེ་ཤེས་ལྔའི་རང་བཞིན་དུ་ཡེ་ནས་གནས་པ་ནི་དབུ་རྒྱན་གྱི་དབང་གི་མཚུངས་ལྡན་གྱི་རྒྱུའོ། །རྩ་རོ་རྐྱང་གཉིས་གཡས་གཡོན་དུ་འཕྱང་བ་ཅོད་པན་གྱི་དང་། རྩ་དབུ་མ་སྟེ་ཨ་ཝ་དྷུ་ཏིའི་ནང་དུ་ཐིག་ལེ་སུམ་ཅུ་སོ་གཉིས་ཡོད་པ་ཕྲེང་བའི་དང་། ལུས་རྩའི་དྲྭ་བས་ཁྱབ་པ་གོ་ཆའི་དང་། ཕོ་མོའི་གསང་བའི་དབང་པོ་རྒྱལ་མཚན་གྱི་དང་། རྟོག་ཚོགས་བཞི་བཅུ་རྩ་གཉིས་ལྷའི་རང་བཞིན་དུ་གནས་པ་ཕྱག་རྒྱའི་དང་། ཀླད་པ་བདེ་ཆེན་གྱི་འཁོར་ལོ་ན་རྩ་འདབ་སུམ་ཅུ་རྩ་གཉིས་གདུག་ཕུབ་པའི་ཚུལ་དུ་ཡོད་པ་གདུགས་ཀྱི་དང་། རྩ་གནས་ཐིག་ལེས་གང་བར་གནས་པ་བུམ་པའི་དང་། ལྕེ་ལ་བཟའ་བཏུང་གི་རོ་ཆོས་ཉིད་དུ་ལོངས་སྤྱོད་ནུས་པ་བཟའ་བཏུང་གི་དང་། ཁམས་ལྔའི་བཅུད་དམ་རྫས་ལྔ་རང་ལ་གནས་པས་ནི་སྙིང་པོ་ལྔའི་དབང་གི་མཚུངས་ལྡན་གྱི་རྒྱུ་ཡིན་ནོ། །དེ་ཡང་ཐལ་བའི་རྒྱུད་ལས། ཁམས་བཅུད་བདེ་བའི་ལམ་གཉིས་དང་། །དབུ་མ་བཅུད་འདུད་ཚད་ལྡན་པ། །དྲྭ་བའི་རྩ་དང་དབང་པོ་དང་། །ཕུང་སོགས་ཡེ་ཤེས་བདེ་འཁོར་ལོ། །ཧཱུྃ་གི་བདེ་བའི་ཡེ་ཤེས་བཅས། །ཚོགས་བརྒྱད་རང་བཞིན་ཡེ་ཤེས་ལྔ། །སྔགས་རྫས་དགོངས་པས་གང་བསླང་པ། །ཀུན་ནས་ལྡང་བས་སྐྱོབ་པ་ཡིས། །སྡུག་བསྔལ་ལས་གྲོལ་རིགས་སུ་ངེས། །ཞེས་སོ། །གཉིས་པ་ལྷན་ཅིག་བྱེད་པའི་རྒྱུ་ནི། དབང་རྫས་རབ་གནས་དང་ལྡན་པ་ཡིན་ཏེ། དེ་ཡང་། དབུ་རྒྱན་རིན་ཆེན་འབྱུང་ལྡན་གྱི་རབ་གནས་བྱའོ། །དེ་བཞིན་དུ། ཅོད་པན་ལ་རྡོ་རྗེ་སེམས་དཔའ་དང་། སྣང་བ་མཐའ་ཡས་ཀྱི་རབ་གནས་བྱ། ཕྲེང་བ་ལའང་རིན་ཆེན་འབྱུང་ལྡན་གྱིས། གོ་ཆ་ལ་དོན་ཡོད་གྲུབ་པས། རྒྱལ་མཚན་ལ་རྡོར་སེམས། ཕྱག་རྒྱ་ལ་ལྷ་རང་རང་གིས། གདུག་ལ་རྡོར་སེམས། བུམ་པ་རིགས་ལྔ་ཀར་གྱིས། བཟའ་བཏུང་ལ་རྣམ་པ་སྣང་མཛད་ཀྱིས། སྙིང་པོ་ལྔ་ལ་རང་རང་གི་རིགས་ཀྱིས་རབ་ཏུ་གནས་པ་ཅན་བྱས་པ་རྣམས་ནི། ཕྱི་ཕན་པའིི་དབང་བཅུའི་ལྷན་ཅིག་བྱེད་པའི་རྒྱུའོ། །གཉིས་པ་ལྷན་ཅིག་བྱེད་པའི་རྐྱེན་ལའང་། རྐྱེན་བཞི་སྣོད་ཀྱིས་མཚན་ཉིད་གཉིས། ཞེས་པ་རྐྱེན་ལའང་བཞི་ལས། ཕྱི་ཕན་པའི་དབང་བཅུ་བསྐུར་དུ་རུང་བའི་སློབ་བུའི་རྒྱུའི་རྐྱེན། དབང་བསྐུར་ནུས་པའི་སློབ་དཔོན་བདག་པོའི་རྐྱེན། དབང་རྫས་རབ་གནས་དང་ལྡན་པ་དམིགས་པའི་རྐྱེན། དབང་སྔ་མས་གོ་ཕྱེས་ནས་ཕྱི་མ་འབྱུང་བ་དེ་མ་ཐག་པའི་རྐྱེན་ནོ། །ནུས་པའི་དབང་ལྔའི་མཚུངས་རྒྱུ་ནི། སློབ་བུའི་རྣ་བའི་འདོམ་རྩ་གཉིས་ན། སྒྲ་མཉན་པའི་རེག་ཤེས་ཀྱི་ཐིག་ལེ་གནས་པ་མཉན་དབང་གི་མཚུངས་རྒྱུ། དེ་བཞིན་དུ་སྙིང་གི་རེག་ཤེས་ཀྱི་ཐིག་ལེ་སྒོམ་དབང་གི། ལག་པའི་རྩ་ན་སྐྱོད་བྱེད་ཀྱི་ཐིག་ལེ་ཕྲིན་ལས་ཀྱི། ལྕེ་རྩ་ན་སྨྲ་བྱེད་ཀྱི་ཐིག་ལེ་འཆད་དབང་གི། ཡན་ལག་ལྔའི་ཐིག་ལེ་ལྔ་ནི། རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་གི་མཚུངས་ལྡན་གྱི་རྒྱུའོ། །ལྷན་ཅིག་བྱེད་པའི་རྒྱུ་ནི། དམ་རྫས་རབ་གནས་དང་ལྡན་པ་སྟེ། བཀའ་པོ་ཏི་གླེགས་བམ་ཅན་རིན་འབྱུང་རབ་གནས་ཅན་མཉན་དབང་། ཕྲེང་བ་ཡི་དམ་གང་ཡིན་གྱི་རབ་གནས་ཅན་སྒོམ་དབང་དང་། རྒྱ་གྲམ་དོན་གྲུབ་ཀྱི་རབ་གནས་ཅན་ཕྲིན་ལས། དུང་དང་ཕྱག་ཤིང་འཁོར་ལོ་གསུམ་སྣང་མཐའི་རབ་གནས་ཅན་འཆད་དབང་། རྡོ་རྗེ་དྲིལ་བུ་ཀུན་བཟང་ཡབ་ཡུམ་གྱི་རབ་གནས་ཅན་ནི་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་གི་ལྷན་ཅིག་བྱེད་པའི་རྒྱུའོ། །གཉིས་པ་རྐྱེན་བཞི་ནི། ནུས་དབང་ལྔ་བསྐུར་དུ་རུང་བའི་སློབ་བུ་རྒྱུའི་རྐྱེན། བསྐུར་ནུས་པའི་སློབ་དཔོན་བདག་པོའི་སྐྱེན། དབང་རྫས་རབ་གནས་དང་ལྡན་པ་དམིགས་པ་དམིགས་པའི་རྐྱེན། དབང་སྔ་མས་གོ་ཕྱེས་ནས་ཕྱི་མ་འབྱུང་བ་དེ་མ་ཐག་པའི་རྐྱེན་ནོ། །གསུམ་པ་ཟབ་པའི་དབང་གསུམ་གྱི་རྒྱུ་ལ་གཉིས་ལས། དང་པོ་མཚུངས་ལྡན་གྱི་རྒྱུ་ནི། དོན་དམ་བདེ་སྟོང་གི་ཡེ་ཤེས་རང་ཆས་སུ་གནས་པ་གསང་དབང་གི་མཚུངས་ལྡན། ཀུན་རྫོབ་བདེ་སྟོང་གི་ཡེ་ཤེས་རང་ཆས་སུ་གནས་པ་ཤེས་རབ་ཡེ་ཤེས་ཀྱི་དབང་གི་མཚུངས་ལྡན། བདེན་པ་དབྱེར་མེད་རང་ཆས་སུ་གནས་པ་དབྱེར་མེད་བདེ་ཆེན་གྱི་དབང་གི་མཚུངས་ལྡན་གྱི་རྒྱུའོ། །གཉིས་པ་ལྷན་ཅིག་བྱེད་པའི་རྒྱུ་ནི། ཕྱག་རྒྱ་མ་ལོ་ཉི་ཤུ་མ་མཚན་དང་ལྡན་པ་གསང་དབང་གི། བཅུ་དྲུག་མ་ཟླ་བ་བྱང་སེམས་ཅན་ཤེས་རབ་ཡེ་ཤེས་ཀྱི། བཅུ་གཉིས་མ་ཉི་མ་བྱང་སེམས་ཅན་དབྱེར་མེད་བདེ་བ་ཆེན་པོའི་དབང་གི་ལྷན་ཅིག་བྱེད་པའི་རྒྱུ་ཡིན་ནོ། །གཉིས་པ་རྐྱེན་བཞི་ནི། ཟབ་དབང་གསུམ་བསྐུར་དུ་རུང་བའི་སློབ་མ་རྒྱུའི་རྐྱེན། བསྐུར་ནུས་པའི་བླ་མ་བདག་པོའི་རྐྱེན། ཕྱག་རྒྱ་མོ་མཚན་དང་ལྡན་པ་དམིགས་པའི། དབང་སྔ་མས་གོ་ཕྱེས་ནས་ཕྱི་མ་འབྱུང་བ་ནི་དེ་མ་ཐག་པའི་རྐྱེན་ནོ། །གསུམ་པ་ངོ་བོ་དང་། དྲང་། རྒྱུ་རྐྱེན་དྲུག་གི་སྒོ་ནས་རང་ལ་གནས་པའི་དབང་དོན་དེ་དངོས་སུ་ཐོབ་པར་བྱ་བ་ལ་གྲངས་བཅོ་བརྒྱད་ཡོད་པ་དེ། དབང་གི་ངོ་བོ་དེ་ཉིད་ཡིན་ཅེས་ལུང་ནས་རྣམ་པར་བཤད་དོ། །བཞི་པ་རྣམ་གྲངས་ལ། དྲང་། དང་པོ་ཞི་བའི་དབང་ལ་ཕྱི་ཕན་དབང་ནང་ནུས་དབང་། གསང་བ་ཟབ་མོའི་དབང་གསུམ་དང་རྩ་བ་རྣམ་ལྔ་ལས་ཡན་ལག་བཅོ་བརྒྱད་དོ། །ཕན་པའི་དབང་བཅུ། ནུས་པའི་དབང་ལྔ་། ཟབ་མོའི་དབང་གསུམ་དང་བཅོ་བརྒྱད་དོ། །གཉིས་པ་བསྒྱུར་བ་ཁྲག་འཐུང་གི་དབང་ལ་ཕན་དབང་། ནུས་དབང་། རྒྱན་ཆའི་དབང་། སྒྲུབ་དབང་། དམ་རྫས་ཏེ་རྩ་བ་ལྔ་ལ་གྱེས་པའི་ཡན་ལག་སུམ་ཅུ་རྩ་དྲུག་སྟེ། དེ་ཡང་ཁྲག་འཐུང་རྩ་རྒྱུད་ལས། ཕྱི་དབང་ཞེས་པར་གྲགས་པ་ནི། །ཕན་པའི་དབང་བཅུ་ནུས་དབང་ལྔ། །རྒྱན་ཆ་རོལ་པའི་དབང་བརྒྱད་དང་། །བསྒྲུབ་པ་བརྒྱད་དང་དམ་རྫས་ལྔ། །མིང་གི་དབང་དང་སུམ་ཅུ་བདུན། །མིང་དབང་ཀུན་གྱི་མགོ་རུ་ཕྱུང་། །ཞེས་གསུངས་པས། མིང་དབང་མི་བརྩི་ནས་སུམ་ཅུ་རྩ་དྲུག་ཏུ་དབྱེའོ། །ཡང་ན་བླ་མ་གོང་མའི་བཞེད་དགོངས་ལྟར་ན། ཕྱི་དབང་ཅུ། ནང་དབང་ལ་བཅུ་གཅིག །བསྒྲུབ་དབང་ལ་བཅུ་གསུམ། གསང་དབང་ལ་གཉིས་དང་སུམ་ཅུ་རྩ་དྲུག་སྟེ། རྔམ་པ་གླེག་ཕྲེང་གི་ལེའུ་བཅུ་བདུན་ལས། རྣམ་གྲངས་གོ་རིམ་མཚན་ཉིད་ནི། །དང་པོ་ཕྱི་ཡི་དབང་བཅུ་བསྐུར། །དེ་ནས་ནང་དབང་བཅུ་གཅིག་བསྐུར། །དེ་ནས་བསྒྲུབ་པའི་བཅུ་གསུམ་དང་། །ཐ་མ་གསང་བའི་རྣམ་པ་གཉིས། །བཅུ་ཕྲག་གསུམ་དང་དྲུག་དག་གིས། །དབང་མཆོག་དམ་པ་བསྐུར་བར་བྱ། །དང་པོ་བཀའ་རྟགས་ཕྱག་རྒྱའི་དབང་། །གཉིས་པ་རྟགས་ཀྱི་མཚན་མའི་དབང་། །གསུམ་པ་ཤེས་རབ་གཟུངས་ཀྱི་དབང་། །བཞི་པ་བཀྲ་ཤིས་བུམ་པའི་དབང་། །ལྔ་པ་བཀྲ་ཤིས་རྫས་ཀྱི་དབང་། །དྲུག་པ་རིན་ཆེན་སྣ་བདུན་དབང་། །བདུན་པ་གདན་གྱི་དམ་པའི་དབང་། །བརྒྱད་པ་མཛེས་པ་རྒྱན་གྱི་དབང་། །དགུ་པ་གསང་བའི་མིང་གི་དབང་། །བཅུ་པ་རྒྱལ་རྟགས་འཁོར་ལོ་སྟེ། །ཕྱི་དབང་བཅུ་པོ་རྫོགས་པ་དང་། །རྡོ་རྗེ་གདན་དུ་གཞུགས་བྱ་བ། །དང་པོ་གསང་བ་ཉན་ཅིང་སློབ་པའི་དབང་། །གཉིས་པ་གླེགས་བམ་ཟབ་མོ་གཏད་པར་བྱ། །གསུམ་པ་རྣམ་བཞི་ལས་ཀྱི་རྫས་ཀྱང་སྦྱིན། །བཞི་པ་རྒྱལ་མཚན་དམ་པའི་མཆོད་གསུམ་སྦྱིན། །ལྔ་པ་སློབ་དཔོན་ཐེག་ཆེན་དགུ་ཡི་རྟགས། །དྲུག་པ་པདྨ་ཉི་ཟླ་སེམས་ཅན་གདན། །བདུན་པ་རྒྱལ་པོ་གསང་བ་རིན་ཆེན་བདུན། །བརྒྱད་པ་གཟུགས་བརྙན་སྤྱི་བོར་བཞག །དགུ་པ་གཟུགས་སྐུ་ཡེ་ཤེས་སྦྱིན། །བཅུ་པ་བཀྲ་ཤིས་ནང་རྫས་དང་། །དེ་སེལ་ལག་ཏུ་རྡོ་རྗེ་སྦྱིན། །བཅུ་དང་བཅུ་གཅིག་ནང་སྦྱིན་ནས། །སྒྲུབ་པའི་དབང་མཆོག་སྦྱིན་པར་བྱ། །དང་པོ་སེམས་ཀྱི་གཏན་ཚིགས་སྦྱིན། །གཉིས་པ་སྙིང་རྗེ་དབང་བསྐུར་སྦྱིན། །གསུམ་པ་ཡི་གེ་འཁོར་ལོ་སྦྱིན། །བཞི་པ་ཐོང་གཤོལ་འབར་བ་སྦྱིན། །བྷན་དྷ་གང་བ་སྦྱིན་དང་ལྔ། །དྲུག་པ་ཚོན་ཆ་སྣ་ཚོགས་ཏེ། །བདུན་པ་སྐྱོན་མེད་པདྨ་སྟེ། །བརྒྱད་པ་སྟི་ར་དབྱུག་པ་སྦྱིན། །དགུ་པ་སྦྲུལ་ནག་ཆུན་པོ་སྦྱིན། །བཅུ་པ་དྲི་མེད་ལྷ་མོ་སྦྱིན། །གཅིག་པ་འདོད་པའི་ལོངས་སྤྱོད་སྦྱིན། །གཉིས་པ་སྒྲུབ་རྫས་ཐམས་ཅད་སྦྱིན། །གསུམ་པ་རྡོ་རྗེ་གསང་མིང་སྦྱིན། །བཅུ་དང་གསུམ་པོ་རྫོགས་པ་དང་། །གསང་བ་དམ་པ་སྦྱིན་པ་ཡང་། །དཀར་དམར་འདྲེས་པའི་བྱང་ཆུབ་སེམས། །བུམ་པ་མཆོག་དེ་ལྕེ་ལ་བཞག །སྙིང་པོ་དོན་དམ་བྱང་ཆུབ་སེམས། །དེ་ཡི་བློ་ལ་བཞག་པར་བྱ། །ཞེས་གསུངས་སོ། །ལྔ་པ་ཐབས་དང་། དྲང་། དེ་ཡང་དང་པོ་དཀྱིལ་འཁོར་རྡོ་རྗེ་ལས་ཀྱི་རིམ་པའི་རྗེས་སུ་ཞུགས་པ་སྟེ། ས་གཞི་མཉམ་དང་ཚང་ཐིག་དང་། །ཚོན་དང་བྲི་བའི་རྣམ་པ་དང་། །རབ་གནས་སྦྱིན་སྲེག་འཇུག་པ་དང་། །ཡོན་ཏན་རྣམ་བཅུ་རྒྱས་ཤེས་བྱ། །ཞེས་གསུངས་པའི་དོན་གཞུང་བཞིན་ཉམས་སུ་བླངས་ལ། དེ་ནས་དད་བརྩོན་བརྟུལ་ཞུགས་ཀྱི་སྣོད་དང་། ཕན་ནུས་ཟབ་གསུམ་གྱི་དབང་རིམ་པ་ལྟར་སྦྱར་ནས་དབང་བསྐུར་བ་སྟེ། གསང་སྙིང་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུངས། །ཞེས་སོ། །དེའི་བསྐུར་ཐབས་ནི་དབང་རྡོ་རྗེ་ལས་རིམ་གྱི་གཞུང་ལྟར། རྒྱུ་རྐྱེན་ངོ་བོ་འབྲས་བུ་དང་། །རིམ་ལས་སྐྱོན་ཡོན་བརྒྱད་ཅེས་བྱ། །ཞེས་པས། དབང་རྫོགས་པར་བསྐུར་བར་བྱའོ། །དྲུག་པ་ཐོབ་པའི་ཚད་དང་། དྲང་། དཔེར་ན་ལྕགས་བཟང་ཞིང་རྣོན་པོ་ལ་ཏིལ་མར་བསྐུས་ནས་ངར་རིམ་པར་བླུད་ན་ཤིན་ཏུ་རྣོ་བ་བཞིན་དུ་ཤེས་བྱའི་ཆོས་ཀྱི་ནུས་མཐུ་གཞན་ལ་དེ་ལྟར་དུ་མི་སྨིན་ལ། དབང་ནི་རྒྱུ་རྐྱེན་སྣོད་བཅུད་གཉིས་འཛོམ་ན་དབང་བསྐུར་མ་ཐག་ཏུ་ངེས་པར་ནུས་མཐུ་དང་ལྡན་པ་ནི་ཐོབ་པའི་ཚད་དུ་བཞག་པ་ཡིན་ཏེ། ཁོག་གཞུང་ལས། རྣོ་ལ་ངར་བཏབ་ནུས་པ་བཞིན། །ནུས་པ་སྐྱེ་བ་ཐོབ་པའི་ཚད། །ཅེས་གསུངས་སོ། །བདུན་པ་དུས་དང་། དྲང་། སྔགས་ཀྱི་ལམ་གྱི་རྒྱུད་དུ་འཇུག་པ་ལ་དབང་དགོས་ཏེ་དེ་ཡང་ཤེས་རབ་གྲོལ་ལམ་ལ་རྒྱུད་སྨིན་པར་བྱེད་པ་ལ་སྔོན་དུ་དབང་འགྲོ་བ་ཡིན་ལ། ཐབས་ལམ་ལའང་དབང་ཐོབ་ནས་དེ་ཉིད་ཀྱི་དོན་ལ་རིམ་པར་བསླབ་དགོས་ལ། གཞན་ཡང་ཐབས་གྲོལ་གཉིས་ཀའི་ལམ་དང་ས་ཡི་རིམ་པས་མཐོ་དམན་གྱི་ཕྱེ་བས། རྒྱུ་དུས། ལམ་དུས། འབྲས་དུས་ཀྱི་དབང་དང་གསུམ་སྟེ། དེ་རེ་རེ་ལ་ཡང་སློབ་མ་ལས་དང་པོ་བ་དང་། སྔགས་ཀྱི་དྲོད་རྙེད་པ་དང་ཕྱིར་མི་ལྡོག་པའི་གང་ཟག་གསུམ་གྱི་རིག་མ་ལའང་ལས་ཀྱི་ཕྱག་རྒྱ་མོ་དང་། རིག་པའི་ཕྱག་རྒྱ་མོ་དང་ཡེ་ཤེས་ཀྱི་ཕྱག་རྒྱ་མོ་དང་གསུམ་ལས་རིམ་པར་རོལ་པས་དབང་གསུམ་ཐོབ་དགོས་ཏེ། དེ་ཡང་གསང་སྙིང་ལེའུ་དགུ་པ་དང་། བཅུ་པ་ལས་སྟོན་པའི་རྒྱུ་དུས་ཀྱི་དབང་ནི། སློབ་དཔོན་དྲོད་ཐོབ་པ་དེས། ལྷག་པ་གཟུགས་བརྙན་གྱི་དཀྱིལ་འཁོར་ལ་བརྟེན་ནས། སློབ་མ་ལས་དང་པ་དེ་ལ། རིག་མ་ལས་ཀྱི་ཕྱག་རྒྱ་མོ་མཚན་ཉིད་དང་ལྡན་པ་ལ། རོལ་ཅིང་སྦྱོར་བས། བདེ་སྟོང་གི་ངེས་ཤེས་སྐྱེ་བ་མན་ཆད་ཀྱི་གསང་སྔགས་བླ་མེད་ལ་འཇུག་ནུས་པའི་ཆོས་སྒོ་འབྱེད་པའི་དབང་ཐོབ་པའོ། །ལེའུ་བཅོ་ལྔ་པའི་ནང་དུ་སྟོན་པའི་ལམ་དུས་ཀྱི་དབང་ནི། སློབ་དཔོན་སྒོམ་ལམ་པ་དང་། མཐར་ལམ་པས་དེས། ཏིང་ངེ་འཛིན་གྱི་དཀྱིིལ་འཁོར་ལ་བརྟེན་ནས། སློབ་མ་སྦྱོར་ལམ་པ་དྲོད་ཚད་རྙེད་པའི་གང་ཟག་དེ་ལ། རིག་པའི་ཕྱག་རྒྱ་མོ་སྟེ། ཏིང་ངེ་འཛིན་གྱི་ཕྱག་རྒྱ་མོ་ལ་རོལ་ཅིང་སྦྱོར་བས། རྗེས་ཤེས་མངོན་འཛིན་གྱི་དྲི་མ་དག་ནས། ཟག་མེད་མཐོང་ལམ་གྱི་དགོངས་པ་མངོན་དུ་གྱུར་པའི་དབང་ཐོབ་པའོ། །ལེའུ་གཉིས་པའི་ནང་དུ་སྟོན་པའི་འབྲས་དུས་ཀྱི་དབང་ནི། ཞེས་གསུངས་པས། དད་པ་ཅན་དང་བརྩོན་འགྲུས་ཅན་གཉིས་ལ་གསུམ་དང་། བརྟུལ་ཞུགས་ཅན་ལའང་གསུམ་སྟེ། དེ་རྣམས་གདུལ་བྱ་གང་ལ་ཡོད་པ་དེ་དག་ཕྱི་ནང་གསང་བའི་དབང་དེ་ཡི་སྣོད་དུ་གྱུར་པ་ཡིན་ཏེ། དེ་ཡང་དད་པ་ཅན་ལ་ཕྱི་ཕན་པའི་དབང་བཅུ་བསྐུར་ལ། བརྩོན་འགྲུས་ཅན་ལ་ནང་ནུས་པའི་དབང་ལྔ་བསྐུར་ཏེ། དེ་ལ་གཉིས་ཏེ། བདག་དོན་དུ་བརྩོན་འགྲུས་ནུས་ན་ཉན་དབང་དང་། སྒོམ་དབང་གཉིས། གཞན་དོན་དུ་བརྩོན་འགྲུས་ནུས་ན། འཆད་དབང་དང་ཕྲིན་ལས་དང་། རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་དང་གསུམ་བསྐུར་ཏེ་ཞེས་སྤར་ཁབ་ལས་གསུངས་སོ། །བརྟུལ་ཞུགས་ཅན་ལ་གསང་བ་ཟབ་དབང་སྟེ། དེ་ལའང་གསུམ་སྟེ། བདུད་རྩི་ལྔ་ལ་སོགས་པ་ཡབ་ཡུམ་གྱི་བྱང་སེམས་ལ་སྤྱོད་ནུས་ན་སྤྱོད་པའི་བརྟུལ་ཞུགས་ལགས་ཏེ། དེ་ལ་གསང་དབང་། ཡུམ་ལ་སྦྱོར་བའི་དུས་སུ་བདེ་སྟོང་དེ་ཉིད་རིག་པས་ཉམས་སུ་མྱོང་ནུས་ན་རིག་པའི་བརྟུལ་ཞུགས་ཏེ། དེ་ལ་ཤེས་རབ་ཡེ་ཤེས། བདེ་སྟོང་གི་ཡེ་ཤེས་ཐ་དད་མེད་པར་དབྱེར་མེད་མཉམ་པ་ཉིད་དུ་རྟོགས་ན་མཉམ་པའི་བརྟུལ་ཞུགས་ཏེ། དེ་ལ་བདེ་བ་ཆེན་པོའི་དབང་བསྐུར་བའོ། །དགུ་པ་ཡོན་ཏན་དང་། དྲང་། དབང་བསྐུར་ཐོབ་པ་ལ་ཚེ་འདི་དང་ཕྱི་མའི་ཕན་ཡོན་གྱི་རྣམ་གྲངས་ནི། རྒྱུད་གསང་སྙིང་ལས། གསུངས་པ་ཅི་བཞིན་ཡིན་ཏེ། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་གསུངས་པ་དང་། ཁོག་གཞུང་ལས། གང་ཡང་ཕན་པའི་དབང་བསྐུར་བས། །དུས་འདི་ཕྱིན་ཆད་རྒྱལ་བའི་སྲས། །ཕྱིར་མི་ལྡོག་ཕྱིར་ཡོན་ཏན་དེ། །ལྷ་མི་ཡོན་ཏན་ཡན་ཆད་ནས། །རྡོ་རྗེ་འཛིན་པ་སྐབས་ཀྱིས་ཐོབ། །ཅེས་སོ། །བཅུ་པ་སྐྱོན་ནོ། །དྲང་། ཡོན་ཏན་དེ་ལས་བཟློག་པ་སྟེ་དབང་མ་ཐོབ་པར་རང་བྱན་གྱིས་བརྟག་དཔྱད་བྱས་ཀྱང་རང་གི་ཆོས་ཉིད་མི་རྟོགས་པ་དང་། གཞན་ལ་ཡང་ཕན་ནུས་ཟབ་གསུམ་གྱི་དབང་མ་ཐོབ་པར་ཉན་པ་དང་། འཆད་པ་དང་། བསྒོམ་པ་དང་། ཕྲིན་ལས་དང་། བསྒྲུབ་པ་ལ་སོགས་པ་རྡོ་རྗེ་སློབ་དཔོན་གྱི་ལས་བྱས་ཀྱང་འབྲས་བུ་མེད་ཅིང་། གསང་བའི་རྒྱུད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩམ་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་གསུངས་པས་དམ་ཚིག་དེ་ཉམས་པའི་དབང་གིས་ངན་སོང་གསུམ་དུ་ལྟུང་ཞིང་སྡུག་བསྔལ་གྱི་འཇིགས་པ་ཆེན་པོ་འབྱུང་སྟེ། དཔེར་ན་སོ་མ་བཏང་བའི་རྫ་མའི་ནང་དུ་ཆུ་བླུགས་ནས་སྤྱོད་ཙམ་ན་ཞིག་པ་ལྟར་འགྱུར་བ་ནི། གསང་བའི་སྙིང་པོ་རྩ་རྒྱུད་དང་བཤད་རྒྱུད་ཀུན་ལ་ལྟོས་དང་དེར་གསལ་ལོ། །དེ་ཡང་ཁོག་གཞུང་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ལས་བརྩོན་འབྲས་མེད་ལྟུང་བའོ། །ཞེས་སོ། །བརྒྱད་པ་བསྒྲུབ་པ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ཡན་ལག་བརྒྱད་པ་རྣལ་འབྱོར་པས་ལམ་དོན་དུ་གཉེར་བ་འབྲས་བུ་ཐོབ་པར་བྱ་བ་ཡི་ཐབས་ལ་བསྒྲུབ་དགོས་ཏེ། དེ་ཡང་ཐུན་མོང་མཆོག་གིས་ཕྱེ་བས་བསྒྲུབ་པ་ལ་གཉིས་ཏེ། ཁོག་གཞུང་ལས། བསྒྲུབ་པའི་འཇིག་རྟེན་པ་དང་འདས། །ཞེས་པ་ཡང་། སོགས་ཀྱིས་སྒྲས་དེ་དག་གི་སྒྲུབ་ཐབས་མི་འདྲ་བ་མང་དུ་ཡོད་པ་རྣམས་ཀྱི་སྡོམ་པའི་ཚིག་ནི་འདི་ལྟ་སྟེ། བསྒྲུབ་པའི་དགོས་ཆེད་དང་། བསྒྲུབ་པ་རང་གི་ངོ་བོ་ངོས་བཟུང་བ་དང་། རྣམ་གྲངས་དང་། བསྒྲུབ་ཐབས་དང་། དུས་ནམ་བསྒྲུབ་པ་དང་། མ་བསྒྲུབ་པའི་སྐྱོན་དང་། བསྒྲུབ་པའི་ཡོན་ཏན་དང་རྣམ་གྲངས་བདུན་གྱི་སྒོ་ནས་འོག་རྒྱས་བཤད་དེ་ཤེས་པར་བྱའོ། །གཉིས་པ་བཤད་པ་དེ་ལ་བདུན་ཏེ། བགྲང་། དང་པོ་དགོས་ཆེད་དང་། དྲང་། ཐུན་མོང་གི་བསྒྲུབ་པ་དང་། མཆོག་གི་བསྒྲུབ་པའི་དངོས་གྲུབ་ཀྱི་བྱེ་བྲག་མི་འདྲ་བ་རྣམས་འཐོབ་པར་བྱེད་པ་ལ། བདག་གཞན་གྱི་དོན་དུ་མཆོག་དང་ཐུན་མོང་གི་དངོས་གྲུབ་ཐོབ་པ་ལ་སྒྲུབ་པ་དགོས་པ་དང་། དོན་གཉིས་ལྷུན་གྱིས་གྲུབ་ནས་སངས་རྒྱས་ཐོབ་པའི་ཐབས་དང་། ཆོས་དོན་དུ་འགྱུར་བའི་ཕྱིར་སྒྲུབ་པ་དགོས་ལ། དེ་བས་ན་དོན་འགྱུར་བཞི་ཡོད་པའི་ཕྱིར་སྒྲུབ་པ་ལ་བརྩོན་པར་བྱའོ། །གཉིས་པ་ངོ་བོ་དང་། དྲང་། རྣལ་འབྱོར་པ་གང་གིས་མཆོག་ཐུན་མོང་གི་འབྲས་བུ་གང་ཐོབ་པར་འདོད་པས་དོན་དེ་བསྒྲུབ་པ་དང་ལྡན་ནས། ལམ་གྱི་ཡན་ལག་ཆ་རྐྱེན་བཅུ་དང་ལྡན་པའི་རྒྱུད་དོན་རྣམས་གཉེར་བདེ་བ་ནི་བསྒྲུབ་པའི་ངོ་བོའོ། །གསུམ་པ་རྣམ་གྲངས་དང་། དྲང་། འདི་ལ་ས་ནང་ཚིགས་སུ་བཅད་ན་གཉིས་ལས། དང་ཐུན་མོང་གི་རྣམ་གྲངས་ལས། མངོན་ཤེས་ལྔ་བསྒྲུབ་ཐབས་དང་། མིག་མཐོང་དང་། རྣམ་སྲས་དང་། རྒྱས་པའི་རེ་ལྔ་པ་ནས་བྱིས་པ་གཙང་མ་ལ་པྲ་ཕབས་ཐབས་ལ་སོགས་པ་དང་། རེ་བཞི་པ་ནས་ཚེ་བསྒྲུབ་ཐབས་དང་། རྫུ་འཕྲུལ་བསྒྲུབ་པ་ནི། རྒྱས་པའི་སོ་བརྒྱད་པ་ལས། ཡི་གེ་ཨ་ལ་ཤེས་པ་གཏད་ནས་ལུས་མི་སྣང་བར་བསྒྲུབ་པ་དང་། ཀུན་བཟང་ཡབ་ཡུམ་གྱི་གསང་བར་ཞི་བ་བཞི་བཅུ་རྩ་གཉིས་དཀྱིལ་འཁོར་རེ་རེ་བསྒོམ་ལ་སྦྱོར་བ་བྱས་ནས་འོད་དུ་ཞུ་ནས་ཀུན་ཏུ་བཟང་མོ་ལ་བསྟིམ་པ་ལ་སོགས་པའི་སྒོ་ནས་ཏེ། མི་གནས་ནམ་མཁའི་མཐའ་ཀླས་པ། །གོམས་པར་འདོད་པ་ཐོབ་པ་དང་། །ཆུ་ལ་ས་བཞིན་འགྲོ་བ་དང་། །རྩ་བ་རླུང་གིས་བཏེག་ནས་ཀྱང་། །ཕྱོགས་བཅུ་ཀུན་ཏུ་ཕྱིན་པར་བྱེད། །ཅེས་ཐོབ་པའི་ཐབས་དང་། གཞན་ཡང་རྡོ་རྗེ་བཀོད་པ་ཀུན་འདུས་ཀྱི་རྒྱུད་ནས། སྒྱུ་མ་དང་། ཡུངས་ཀར་རྒྱལ་པོ་དང་། རྡོ་རྗེ་ཐབས་ཆེན་དང་། ལུས་མང་པོ་སྤྲུལ་པ། བྱེ་མ་ལ་གསེར། སོལ་བ་ལ་ལྗོན་ཤིང་དུ་བསྒྲུབ་པ་ལ་སོགས་པ་དང་། གསེར་བསྒྲུབ་དང་། ཆང་འབེབས་རྒྱུད་གཞན་དུའང་མང་དུ་གསུངས་སོ། །གཞན་ཡང་རྒྱས་པའི་ལེའུ་བདུན་ཅུ་པ་ནས་རོ་ལང་བསྒྲུབ་པའི་སྒོ་ནས་ལྷ་སྲིན་གྱིས་བཀའ་ཉན། མ་ཧཱ་དེ་བ་ལ་སོགས་དབང་དུ་འདུས། རོ་གསེར་དུ་འགྱུར་ནས་ལོངས་སྤྱོད་ཀྱི་རྟེན་དུ་འགྱུར། རོའི་ལྕེ་བཅད་ནས་གར་བསམ་དུ་ཕྱིན་ནས་རྐང་མགྱོགས་དང་། ལེའུ་ཞེ་བདུན་པ་ནས། རྣམ་རྒྱལ། གཤིན་རྗེ། རྟ་མགྲིན། བདུད་རྩི་འཁྱིལ་པ་དང་བཞིའི་སྒོ་ནས་རོ་ལང་བསྒྲུབས་པས། རོ་ལང་པའི་ལྕེ་བཅད་པས་མཚོན་ཆ་དང་། གོ་ཆ་དང་། གསེར་དང་། རྐང་མགྱོགས་ལ་སོགས་ཀྱི་རྫུ་འཕྲུལ་བསྒྲུབ་ཐབས་རྣམས་དང་། པགས་པ་ལ་ལྷྭམ་བྱས་ན་ཆུར་མི་བྱིང་བ་ལ་སོགས་པ་རྫུ་འཕྲུལ་ཐོབ་ཐབས་རྣམས་སོ། །ལས་ནི་འཕྲིན་ལས་ཏེ། རྒྱས་པའི་ལེའུ་ང་ལྔ་པ་ནས་དྲུག་ཅུ་རྩ་གཅིག་གི་བར་དུ་ཞི་རྒྱས་དབང་དྲག་ལྷུན་གྲུབ་དང་ལྔ། མེའི་སྒོ་ནས་ལས་བཞི་བསྒྲུབ་ཐབས་དང་། ལེའུ་ཉི་ཤུ་པ་ལས་མཆོད་རྟེན་གྱི་སྒོ་ནས་ལས་བཞི་བསྒྲུབ་ཐབས་དང་། རྒྱུད་གཞན་ལས་ཀྱང་། ཞི་བ་ལ་མི་མཐུན་ཀུན་སེལ། རྒྱས་པ་ལ་འདོད་པ་ཀུན་འདུས། དབང་ལ་གསང་བ་གནད་ཀྱི་ལྕགས་ཀྱུ། དྲག་པོ་ལ་དགྲ་བགེགས་བདུད་འཇོམས། གཞན་ཡང་རྒྱས་པའི་ནང་ཚན་ལ། སྲི་བུ་དང་ལོ་ཐོག་གསོ་ཐབས་རྒྱུད་གཞན་དུ་གསལ་ལ། ཀླུའི་གེགས་སེལ་མཛེ་གསོ་ཐབས་ལེའུ་ཞེ་དྲུག་པ་ལས་སྟོན་ལ། གཞན་ཡང་དབང་གི་ནང་མཚན་ལ། རྒྱས་པའི་ལེའུ་ཞེ་གཉིས་པ་དང་། ཞེ་གསུམ་པ་ལས། འཇིག་རྟེན་ལས་འདས་པའི་གཟུངས་མ་རིགས་ལྔའི་ཡུམ་དགུག་པ་དང་། སེམས་མ་དགུག་པ་ཡང་སྟོན་ལ། འཇིག་རྟེན་པའི་གཟུངས་མ་དགུག་པ་ནི། རྒྱལ་པོ་ས་འཛིན་གྱི་ཆུང་མ་དང་། བློན་པོ་ས་འཛིན་གྱི་ཆུང་མ་དང་། ལྷ་ཆེན་པོ་གཞན་གྱི་ཆུང་མ་བཀུག་ལུགས་ལེའུ་ཞེ་ལྔ་པ་ལས་སྟོན་ལ། རྒྱུད་གཞན་དག་ལས། ལྷ་མོ། ཀླུ་མོ། རིགས་ངན་མའི་བུ་མོ་འགུགས་པ་ཡང་སྟོན་ནོ། །ཡུལ་ཁམས་དབང་དུ་བྱ་བའི་ཐབས་ལེའུ་སོ་བརྒྱད་པ་ལས་སྟོན་ལ། གཞན་ཡང་མ་ཧཱ་དེ་བ་དབང་དུ་བྱས་ནས་བསྒྲུབས་པས་གང་བསམ་བསྒྲུབ་བཅོལ་བ་དང་། རྒྱལ་པོ་ཆེན་པོ་སྡེ་བཞི་བསྒྲུབས་ནས་དབང་དུ་བྱས་པས་ལས་གང་བསམ་བསྒྲུབ་བཅོལ་བའི་ཐབས་ལེའུ་རེ་གསུམ་པ་ལས་སྟོན་ལ། དྲག་པོ་ལ་ནང་ཚན་དུ། དགྲ་བགེགས་གླིང་ཁམས་གཞན་དུ་འཕང་བའི་ཐབས་ལེའུ་སོ་བརྒྱད་པ་ལས་སྟོན་ལ། རྒྱུད་གཞན་ལས་ཀྱང་། མ་མོ་ཇག་ཆིངས། འབྱུང་པོ་ཁ་ཆིངས། དགྲ་བགེགས་དང་ཉི་ཟླ་བསད་པ་ལ་སོགས་པ་དང་། གཞན་གྱི་ཡུལ་ཁམས་འཕམ་པར་བྱེད་པ་ལ་སོགས་པ་རྣམས་སོ། །སྐུ་དེ་བཞིན་གཤེགས་རིགས་ཀྱིས་རྒྱལ་པོའི་ལུས་ལ་འཇུག་ནས་རང་རྒྱལ་པོ་རེད་ཐབས་དང་། གསུང་པདྨ་རིགས་ཀྱིས་ཞང་བློན་དབང་ཆེན་གྱི་ལུས་ལ་འཇུག་ནས་དབང་དུ་བྱ་ཐབས་དང་། ཐུགས་རྡོ་རྗེ་རིགས་ཀྱིས་ལྕགས་སྤྱང་ཀི་ལུས་ལ་འཇུག་པས་རྐང་མགྱོགས་བསྒྲུབ་ཐབས་དང་། ཡོན་ཏན་རཏྣ་རིགས་ཀྱིས་བློན་པོ་ནོར་མང་གི་ལུས་ལ་འཇུག་པས་རང་བློན་པོ་ནོར་མང་རེད་ཐབས་དང་། ཕྲིན་ལས་ཀྱིས་ལྷ་མིན་གྱི་དམག་མིའི་ལུས་ལ་འཇུག་ནས་དམག་མང་བསྒྲུབ་ཐབས་རྣམས་སོ། །ཡང་ན་སྐུ་རྫུ་འཕྲུལ་གྱི་བསྒྲུབ་པ། གསུང་པ་པྲ་ཕབ། ཐུགས་མངོན་ཤེས། ཡོན་ཏན་ཚེ། ཕྲིན་ལས་དངོས་ཏེ། དེ་ལྟར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒོ་ནས་ཐུན་མོང་དག་གི་སྒྲུབ་ཐབས་མི་མཐུན་པར་གྲགས་པ་དེ་རྣམས་ནི་ཐུན་མོང་གི་བསྒྲུབ་པའི་རྣམ་གྲངས་ཡིན་པ་དང་། གཉིས་པ་ཟག་མེད་ཀྱི་འབྲས་བུ་ཐོབ་ཐབས་མཆོག་གི་བསྒྲུབ་པ་ལ། སྐུ་རྣམ་སྣང་། གསུང་སྣང་མཐའ། ཐུགས་རྡོར་སེམས། ཡོན་ཏན་རིན་འབྱུང་། ཕྲིན་ལས་དོན་གྲུབ་དང་། ལྔ་པོའི་སྒྲུབ་ཐབས་སམ། ཡང་ན་འཇམ་དཔལ་སྐུ། པདྨ་གསུང་། ཡང་དག་ཐུགས། བདུད་རྩི་ཡོན་ཏན། ཕྲིན་ལས་ཕུར་པ་ལ་སོགས་པའི་བསྒྲུབ་ཐབས་ནི། རྒྱུད་གཞུང་སྤྱིའི་ཆིངས་ཡིན་ལ། ཁྱད་པར་དུ་སྒྱུ་འཕྲུལ་རང་གཞུང་ལ་ཞི་ཁྲོ་གཉིས་ཀྱི་སྒོ་ནས་ཆོམ་བུ་གཅིག་གསུམ་ལྔ་པ། དཀྱིལ་འཁོར་རྒྱས་འབྲིང་བསྡུས་གསུམ་གྱི་ཐོག་ནས་བསྒྲུབ་ཐབས་རྣམས་སོ། །བཞི་པ་བསྒྲུབ་ཐབས་དང་། དྲང་། གོང་གི་རྣམ་གྲངས་ཀྱི་བསྒྲུབ་ཐབས་སྐབས་སུ་བཤད་པའི་ཐུན་མོང་དང་མཆོག་གི་བསྒྲུབ་པའི་ཐབས་སུ་གྲགས་པ་ཀུན་ཚུལ་ཅི་ལྟར་དུ་བསྒྲུབ་ན། སྒྲུབ་པ་པོ། གནས་དང་། དུས་དང་། ཡོ་བྱད་དེ་ཕུན་སུམ་ཚོགས་པ་བཞི་དང་ལྡན་ནས་གཞི་བཟུང་བ་ལའང་། དང་པོ་གནས་བརྩལ་བ་ལ་ས་བརྟགས་ཤིང་བྱིན་གྱིས་བརླབས་པ་ཡན་ཆད་ཀྱི་ཆོ་ག་རྒྱས་པར་བྱེད་ལ། གནས་དེར་སྒྲུབ་ཁང་བརྩིགས་པ་ལ་བྱུག་བསྲུང་བྱ། ཆུ་གཏོར་ལ་སོགས་པ་ཚོགས་ཀྱི་དཔུང་བསྐྱེད་ལ་སྒྲིབ་སྦྱང་བྱ། དེ་ནས་བསྙེན་པ་དང་། ཉེ་བའི་བསྙེན་པ། བསྒྲུབ་པ་དང་བསྒྲུབ་པ་ཆེན་པོའི་གཞུང་བསྲངས་ལ། སྔགས་ལ་གྲངས་ཀྱི་དང་། དུས་ཀྱི་དང་། མཚན་མའི་བསྙེན་པ་སོ་སོར་ཕྱེ་བ་སྟེ། དེ་རྣམས་རྒྱུད་རྒྱས་པ་ལས་གསུངས་པ་བཞིན་དུ་བསྒྲུབ་དགོས་ཏེ། དེ་ཡང་གྲངས་བསྙེན་ནི་རྒྱུད་རང་རང་གི་ནང་དུ་བཤད་པའི་སྔགས་ཀྱི་གྲངས་ཐེམ་པའོ། །དུས་བསྙེན་ནི་ཟླ་དྲུག་བཅུ་གཉིས་བཅུ་བཞི་བཅུ་བཅུ་དྲུག་གོ། །ཕྱག་རྒྱ་སྤྲོས་པ་མཐར་ཕྱིན་པའི་དུས་སོ། །མཚན་མའི་བསྙེན་པ་ནི། རྟགས་མ་བྱུང་གི་བར་དུའོ། །ལྔ་པ་དུས་དང་། དྲང་། རྣལ་འབྱོར་པ་གང་ཞིག་གིས་ལྟ་བ་བདེན་གསུམ་དབྱེར་མེད་མངོན་སུམ་དུ་རྟོགས་ནས་ཏིང་ངེ་འཛིན་གོམས་ཤིང་འགོ་འབྱོར་པ་དང་། སྔགས་ཀྱི་ཡན་ལག་དང་ཕྱག་རྒྱ་བཞི་བཅུ་རྩ་གཉིས་སམ། ལྔ་བཅུ་རྩ་བརྒྱད་ལ་སོགས་པ་ལུས་དཀྱིལ་དུ་བཀོད་ནས་བསྒོམ་པ་ལ་བརྟན་པ་ཐོབ་པ་དང་། སྤྲོས་པ་ལ་སོགས་སྤྱོད་པའི་བྱེ་བྲག་རྣམས་མི་ལྕོག་པ་མེད་པར་གང་ཡོད་པ་དེ་དག་དང་། དེ་ལྟར་བསྒྲུབ་པའི་ཆ་རྐྱེན་བཅུ་པོ་ཚང་བར་བྱས་ཚེ་ལ་དབང་བསྒྱུར་བའི་རིག་འཛིན་མ་ཐོབ་པའི་སྔོན་དུ་ཚོགས་བསྒྲུབ་པའོ། །འོ་ན་ཐུན་མོང་གི་བསྒྲུབ་པ་འདིར་མ་སྨོས་སམ་ཞེ་ན་མ་ཡིན་ཏེ། ཐུན་མོང་བསྒྲུབ་པའི་དུས་ཀྱང་ཕྱག་རྒྱ་སྤྲོས་པ་མཐར་ཕྱིན་དགོས་ཏེ། གསང་སྙིང་ལས། གསོ་དང་གསད་དང་ཕམ་དང་རྒྱལ། །ཏིང་འཛིན་འདི་ཡིས་བྱེད་པར་འགྱུར། །ཞེས་སོ། །དྲུག་པ་སྐྱོན་དང་། དྲང་། མ་བསྒྲུབས་ན་ལྷ་ཡལ་བས་སྒྲིབ་པ་མི་འབྱོང་། འབྲས་བུ་མི་ཐོབ་སྟེ། དེ་ཡང་ཐུན་མོང་དང་མཆོག་གི་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལྔ་སྟེ་བཅུ་པོ་མི་ཐོབ་པའོ། །བྱེ་བྲག་ཏུ་བསྒྲུབ་ཐབས་མི་འདྲ་བ་རྣམས་རང་རང་མ་བསྒྲུབ་ན་མི་འགྲུབ་པས་ན་རྒྱས་པ་དེའི་དོན་ཁོང་དུ་ཆུད་ནས་བསྒྲུབ་པ་ལ་བརྩོན་པར་བྱའོ། །བདུན་པ་ཡོན་ཏན་ནོ། །དྲང་། བསྒྲུབས་ན་སྐྱོན་དེ་ལས་ཟློག་པ་ཡིན་ཏེ། ཚེ་འདི་དང་ཕྱི་མར་ཐུན་མོང་གི་འབྲས་བུ་སྐུ་གསུང་ཐུགས་ཡོན་ཏན་ཕྲིན་ལས་ལྔ་དང་། མཆོག་གི་འབྲས་བུ་སྐུ་གསུང་ཐུགས་ཡོན་ཏན་ཕྲིན་ལས་ལྔ་ཐོབ་པས་བདག་གཞན་གྱི་དོན་གཉིས་རྫོགས་པ་ཡིན་ནོ། །དགུ་པ་སྔགས་དང་ཕྱག་རྒྱ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། ཡན་ལག་དགུ་པ་སྔགས་དང་བཅུ་པ་ཕྱག་རྒྱའི་སྡོམ་ཚིག་ནི་འདི་ལྟ་སྟེ། སྔགས་དང་ཕྱག་རྒྱའི་དགོས་ཆེད་དང་། ངོ་བོ་ངོས་བཟུང་བ་དང་། རྣམ་གྲངས་ལ་དུ་ཡོད་པ་དང་། བཟླས་པ་དང་བསྒོམ་པའི་ཐབས་དང་། སྔགས་དང་ཕྱག་རྒྱའི་ངེས་ཚིག་དང་། སྐབས་གང་དུ་དགོས་པ་དང་། སྔགས་གསུམ་བཟླ་ཞིང་ཕྱག་རྒྱ་བསྒོམ་པའི་ཡོན་ཏན་དང་། བཟླས་བསྒོམ་མ་བྱས་པའི་སྐྱོན་དང་། དེ་དག་རྣལ་འབྱོར་པ་གང་གི་སྤྱོད་ཡུལ་ཡིན་པ་དང་དགུའི་སྒོ་ནས་སྔགས་དང་ཕྱག་རྒྱའི་དོན་དེ་དག་བཤད་པར་བྱའོ། །གཉིས་པ་བཤད་པ་དེ་ལ་དགུ་སྟེ། བགྲང་། དང་པོ་དགོས་ཆེད་དང་། དྲང་། གནས་སྐབས་སུ་སྒྲིབ་པ་སྦྱང་ཞིང་ཡེ་ཤེས་ཀྱི་ལྷ་ཉེ་བར་བསྙེན་པ་ལ་སྔགས་དགོས་པ་དང་། མཐར་ཐུག་ཐོབ་པར་བྱ་བའི་འབྲས་བུ་རིགས་ལྔའམ། སྐུ་ལྔ་པོ་རྫོགས་པར་བྱ་བའི་ཕྱིར་ཕྱག་རྒྱ་དགོས་པ་དེ་བས་ན། བདག་གཞན་གཉིས་ཀའི་དོན་གྲུབ་པའི་ཆེད་དུ་སྔགས་ཕྱག་རྒྱ་ཤིན་ཏུ་གཅེས་པས་ཉམས་སུ་བླང་བར་བྱའོ། །གཉིས་པ་ངོ་བོ་དང་། དྲང་། ལུས་ཀྱི་ཡི་གེ་ཀཱ་ལི་དང་། ཡན་ལག་གི་ཡི་གེ་ཨཱ་ལི་གཉིས་ལྷན་ཅིག་ཏུ་འདུས་པ་ལས་མིང་། མིང་དེ་ལས་གྲུབ་པ་བཞིས་བརྒྱན་པའི་ནུས་མཐུ་ཆེན་པོ་ཅན་དུ་རེད་པ་གང་ཡིན་པ་དེ་ནི་སྔགས་ཀྱི་ངོ་བོ་ཡིན་པ་དང་། དེ་ཡང་ཆོས་རྗེའི་བཞེད་ལ། རང་བཞིན་ཆོས་ཉིད་ཀྱི་གྲུབ་པ་དོན་ལས་མི་འདའ་བ་དང་། ཆོས་ཅན་རང་གི་མཚན་ཉིད་ཀྱི་གྲུབ་པ་ནི་མཆོག་དང་ཐུན་མོང་གི་དངོས་གྲུབ་ཐམས་ཅད་སྣང་བ་དང་། བྱིན་རླབས་ལྷའི་གྲུབ་པ་ནི་སྔགས་ཀྱི་ནུས་པ་མཐུ་ཅན་དུ་རེད་པ། མཐུས་གྲུབ་པ་ནི་སྔགས་ཀྱི་ནུས་པ་མཐུ་ཅན་དུ་ལྟ་བའི་ཐུན་མོང་དང་མཆོག་གི་དངོས་གྲུབ་སྣང་བའོ། །ཞེས་སོ། །དགོངས་འདུས་ཀྱི་གསུང་མི་ཟད་པ་རྒྱན་གྱི་འཁོར་ལོ་བཀོད་པའི་ལེའུ་སོ་བཞི་པའི་སྐབས་དང་། གསང་སྙིང་ལེའུ་བཞི་པའི་སྐབས་ལ་བརྟགས་ན། སྤྱིར་ཤེས་བྱ་འཁོར་འདས་ཀྱིས་བསྡུས་པའི་ཆོས་ཐམས་ཅད། ཡི་གེ་འདུས་པས་མིང་། དེ་ལས་ཚིག་བྱུང་། དེས་མཚོན་ནས་སྔགས་ཚིག་ཤད་གཅིག་ལའང་། གྲུབ་པ་བཞིས་བརྒྱན་པ་ཡིན་ཏེ། ཞི་བའི་སྙིང་པོ་ལ་ཡིན་ན་ཧཱུྃ་གིས་ཡེ་ཤེས་ལྔ། བཛྲ་རྡོ་རྗེ་སྟེ་སྣང་སྟོང་དབྱེར་མེད་སྐྱེ་འཇིག་དང་བྲལ་བ། དྷྲིཀ་འཛིན་པ་སྟེ་དེའི་དོན་ལ་མི་འདའ་བ་ཡིན་པས་རང་བཞིན་ཆོས་ཉིད་འགྲུབ་པས་བརྒྱད་ལ། བཛྲ་དྷྲི་ཀ་ནི་དངོས་སུ་རྡོ་རྗེ་འཛིན་པ་མཚོན་པས་ཆོས་ཅན་གྱི་གྲུབ་པས་བརྒྱན་ལ། ཧཱུྃ་བཛྲ་དྷྲིཀ་བརྗོད་པའི་བྱིན་རླབས་དེས་ལྷའི་སྐུ་ཝལ་གྱིས་གསལ་བས་བྱིན་རླབས་ལྷའི་གྲུབ་པས་བརྒྱན་ལ། ཧཱུྃ་བཛྲ་དྷྲཱིཀ་དེ་བཟླས་པས་བདག་གཞན་ཐམས་ཅད་ལ་གནས་སྐབས་ཐུན་མོང་ལ་བར་ཆད་ཞི་ལ། མཐར་ཐུག་མཆོག་གི་དངོས་གྲུབ་སངས་རྒྱས་ཐོབ་པའི་ནུས་མཐུ་ཡོད་པས་མཐུའི་གྲུབ་པས་བརྒྱན་པའོ། །སྐུ་ཕྱག་རྒྱ་ཆེན་པོ། གསུང་ཆོས་ཀྱི་ཕྱག་རྒྱ། ཐུགས་དམ་ཚིག་གི་ཕྱག་རྒྱ། འཕྲོ་འདུ་འཕྲིན་ལས་ཀྱི་ཕྱག་རྒྱ་དང་བཞི་རྫོགས་པ་དེ་ཉིད་ལ་མི་འདའ་བའི་དོན་དེ་གང་ལ་སྣང་བ་དེ་ནི་ཕྱག་རྒྱའི་ངོ་བོ་ཡིན་ནོ། །གསུམ་པ་རྣམ་གྲངས་ལ་གཉིས་ཏེ། བགྲངས། དང་པོ་སྔགས་ཀྱི་རྣམ་གྲངས་དང་། དྲང་། རིགས་སྔགས་ནི། རིགས་ཡབ་ཀྱིས་འཛིན་པས་ཡབ་སྔགས་ཡིན་ལ། གསང་སྔགས་ནི་ཐེག་འོག་ལ་གསང་བའི་བདེ་སྟོང་ཡུམ་གྱིས་འཛིན་པས་ཡུམ་སྔགས་ཡིན་ལ། གཟུངས་སྔགས་ཞེས་པ་ནི། ཡབ་ཡུམ་གཉིས་སྦྲེལ་བའི་སྔགས་ཡིན་པ་དང་། དེ་ནི་ཆོས་རྗེ་རིན་པོ་ཆེའི་བཞེད་པ་ཡིན་ལ། ཡང་ན་གསང་བ་གྲུབ་པའི་རྒྱུད་ལས། སྔགས་རྣམས་ཀུན་གྱི་དབྱེ་བ་ནི། །རིག་སྔགས་ཐབས་ཀྱི་ངོ་བོ་སྟེ། །གཟུངས་སྔགས་ཤེས་རབ་རང་བཞིན་ཏེ། །གསང་སྔགས་གཉིས་མེད་ཡེ་ཤེས་ཡིན། །ཞེས་པ་དང་། དབང་ཡོན་ཏན་རིམ་པ་ལས། སྟོང་པ་དང་ནི་སྙིང་རྗེ་ཉིད། །གཉིས་སུ་མེད་དང་གཉིས་ཚུལ་གྱིས། །གསང་སྔགས་ཞེས་ནི་དེ་ལ་བཤད། །ཅེས་གསུངས་པས། རིག་སྔགས་མཐུན་ལ། ཡུམ་གྱིས་བདེ་བ་གཟུངས་བས་གཟུངས་སྔགས། ཡབ་ཡུམ་གཉིས་མེད་ཀྱི་དགོངས་པ་ཟབ་པས་གསང་སྔགས་ཞེས་བཤད་དོ། །ཡང་རྒྱལ་པོ་ཛཿའི་དགོངས་འདུས་འགྲེལ་པར། གསང་སྔགས་ཞེས་བྱ་བ་ནི། ལྷ་མོ་རྣམས་ཤེས་རབ་ཀྱི་རང་བཞིན་ཏེ་ཟབ་པས་རྟོགས་པར་དཀའོ། །རིགས་སྔགས་ཞེས་བྱ་བ་ནི། རིག་པའི་རྒྱལ་པོ་ལྷ་ཕོའི་རང་བཞིན་ཐབས་དེས་རིག་པའི་ཕྱིར་རོ། །གཟུངས་སྔགས་ཞེས་བྱ་བ་ནི། ཐབས་དང་ཤེས་རབ་གཉིས་སུ་མེད་པའི་ཁ་སྦྱོར་གཟུངས་པའི་ཕྱིར་རོ། །ཞེས་སོ། །རྒྱུ་མ་ནོར་རྩ་བའི་སྔགས་དང་། བསྐྱེད་པ་རྐྱེན་གྱི་སྔགས་དང་། བསྐུལ་བ་ལས་ཀྱི་སྔགས་ཏེ། དེ་ལ་ཞི་བ་ལྟར་ན། ཧཱུྃ་རྩ་བའི་སྔགས། བཛྲ་དྷྲཱིཀ་ནི་བསྐྱེད་པ་རྐྱེན་གྱི་སྔགས། རྩ་སྔགས་དང་བསྐྱེད་སྔགས་དྲིལ་བ་ནི་བཟླས་པ་ལས་ཀྱི་སྔགས་སུ་ཤེས་སོ། །ཁྲོ་བོ་ལྟར་ན། ཧཱུྃ་རྩ་སྔགས། བཛྲ་མ་ཧཱ་ཤྲཱི་ཧེ་རུ་ཀ་སྐུ་བསྐྱེད་སྔགས། མ་ཧཱ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ་ནི་བཟླས་པ་ལས་ཀྱི་སྔགས་སོ། །ཞེས་སྤར་ཁབ་ལས་བཤད་དོ། །གཞལ་ཡས་ཁང་བསྐྱེད་སྔགས་ཀྱང་བསྐྱེད་པ་རྐྱེན་གྱི་སྔགས་ཡིན་ནོ། །བསྙེན་སྔགས་ལ་ཡང་། ཆེ་བའི་ཡོན་ཏན་གྱི་སྒོ་ནས་བསྟོད་པ་དང་། མིང་ནས་བོས་པ། ཐུགས་དམ་གནད་ནས་བསྐུལ་བའི་སྔགས་སོ། །ལས་རིམ་གྱི་སྔགས་ནི། དབང་བསྐུར་བ་དང་། བྱིན་གྱིས་བརླབས་པ་དང་། ཡེ་ཤེས་ཀྱི་དཀྱིལ་འཁོར་སྙན་གསན་དབབ་པ་དང་། སྤྱན་དྲང་བ་དང་། བསྟིམ་པ་དང་། བརྟེན་པར་བྱ་བ་དང་། མཆོད་པའི་སྔགས་རྣམས་དང་། རིགས་པའི་མེ་ཏོག་དོར་བ་དང་། དངོས་གྲུབ་བསྐུལ་བའི་སྔགས་རྣམས་སོ། །སྔགས་སྤྱིའི་རྣམ་གྲངས་ལ། རྩ་སྔགས། སྙིང་པོ། ཉེ་སྙིང་། བསྟོད་པ། ཕྲེང་སྔགས། མཆོད་པ། གཏོར་སྔགས། དབང་བསྒྱུར་བའི་སྔགས། ལས་ཐམས་ཅད་པའི་སྔགས་མགོ་ཅན། མགོ་མེད། མཇུག་མེད། གཉིས་ཀ་ཡོད་པ། འགྲོ་ལྡིང་ལ་སོགས་པ་རྣམས་ནི་སྔགས་ཀྱི་རྣམ་གྲངས་སོ། །གཉིས་པ་ཕྱག་རྒྱའི་རྣམ་གྲངས་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། སྐུ་ཕྱག་རྒྱ་ཆེན་པོ། གསུང་ཆོས་ཀྱི་ཕྱག་རྒྱ། ཐུགས་དམ་ཚིག་གི་ཕྱག་རྒྱ། འཕྲོ་འདུ་འཕྲིན་ལས་ཀྱི་ཕྱག་རྒྱ་དང་བཞི་ཡོད་པ་ལས། གཉིས་པ་བཤད་པ་དེ་ལ་བཞི་སྟེ། བགྲང་། དང་པོ་ཕྱག་རྒྱ་ཆེན་པོའི་རྣམ་གྲངས་དང་། དྲང་། སྐུ་ཕྱག་རྒྱ་ཆེན་པོ་ལའང་བཞི་སྟེ། རང་བཞིན་གྱི་ཕྱག་རྒྱ་ཆེན་པོ་ནི་ཕུང་ཁམས་སྐྱེ་མཆེད་ཐམས་ཅད་རྒྱལ་བའི་དཀྱིལ་འཁོར་དུ་གནས་པ་ཡིན་ཏེ། རྒྱས་པའི་ལེའུ་དོན་དྲུག་པ་ལས། རང་བཞིན་ཕྱག་རྒྱ་ཆེན་པོ་ནི། །ཕྱི་ནང་སྣོད་བཅུད་ཐམས་ཅད་ཀུན། །ཐབས་དང་ཤེས་རབ་ངང་དུ་གནས། །རིགས་ལྔ་བདེ་གཤེགས་ཡབ་ཡུམ་དང་། །མ་བཅོས་ཡེ་ནས་དེ་ལྟར་གནས། །ཞེས་པ་དང་། སྨད་འགྲེལ་དུ། རང་བཞིན་གཟུགས་ཀྱི་སྐུ་ནི་འོག་མིན་བཞུགས་པ་ཉིད་དང་། དེ་ཅིའི་ཕྱིར་ན། ཡོན་ཏན་རྫོགས་པའི་གཞིར་གྱུར་པ་དང་། ཞེས་སོ། །ཏིང་ངེ་འཛིན་གྱི་ཕྱག་རྒྱ་ཆེན་པོ་ནི། རང་གནས་དེ་ཉིད་ལྟ་བས་རྟོགས་ནས་ཏིང་ངེ་འཛིན་གྱི་ལྷའི་སྐུ་ཕྱག་རྒྱ་ཆེན་པོ་དབུའི་གཙུག་ཏོར་ནས་འོག་གདན་ཁྲིའི་བར་གསལ་བར་བསྒོམ་པ་དང་། ཡང་དེ་ཉིད་ལས། ལྷག་པའི་ཕྱག་རྒྱ་ཆེན་པོ་འདི། །ནང་གི་རྟགས་ནི་ཕྱི་རུ་སྟེ། །མདོར་བསྡུས་ཕྱག་རྒྱ་དྲུག་པ་དང་། །གཞན་ཡང་ཕྱག་རྒྱ་སྣ་ཚོགས་ཏེ། །ཞེས་སོ། །ལྷ་བསྒོམ་པ་དེ་ཉིད་དངོས་སུ་གཟུགས་བརྙན་གྱིས་མཚོན་པ་ནི་མཚན་པའི་ཕྱག་རྒྱ་ཆེན་པོ་སྟེ། རས་དང་ཤོག་གུ་ས་ཐང་དང་གྱང་ལ་རིས་སུ་བྲི་བ་དང་། རྭའམ་རུས་པ་ཤིང་དང་རྡོ་ལ་འབུར་དུ་བཏོད་པ་དང་། གསེར་དངུལ་ཟང་སོགས་ལ་ལུགས་སུ་བླུགས་པ་དང་། འཇིམ་པ་ལ་འདེར་སོ་བྱས་པ་རྣམས་སོ། །ཏིང་ངེ་འཛིན་མཐར་ཕྱིན་པའི་རྟགས་ལ་དང་མཚན་མའི་ཕྱག་རྒྱ་ཆེན་པོ་སྟེ། སྐུ་གདུང་དང་རིང་བསྲེལ་ལ་སོགས་པ་རྣམས་སོ། །གཉིས་པ་དམ་ཚིག་གི་ཕྱག་རྒྱ་དང་། དྲང་། བདེ་བ་འཛིན་པ་ལ་མི་འདའ་བས་ཡུམ་དམ་ཚིག་གི་ཕྱག་རྒྱ་དང་དགོངས་པ་ཆོས་ཉིད་ལ་མི་འདའ་བའི་རྟགས་སུ་རིགས་རང་རང་གི་ཕྱག་མཚན་འཛིན་པ་དམ་ཚིག་གི་ཕྱག་རྒྱ་དང་། གུང་མོ་ལ་སོགས་པའི་རྩེ་མོ་ལ་རྡོ་རྗེ་ལ་སོགས་པ་རང་རང་གི་ཕྱག་མཚན་བསམ་པ་ནི་བསྡམ་པ་དམ་ཚིག་གི་ཕྱག་རྒྱ་དང་། འབྲུ་བཞི་སྦས་ནས་གུང་མོ་ལ་སོགས་རིམ་པ་ལྟར་གྱེན་དུ་བསྒྲེང་བ་ཐུགས་ཀར་བཀན་ཐབས་སུ་བཅའ་བ་ནི་བཅའ་བ་དམ་ཚིག་གི་ཕྱག་རྒྱ་དང་བཞིའོ། །གསུམ་པ་ལས་ཀྱི་ཕྱག་རྒྱ་དང་། དྲང་། ཡུམ་ལ་འཁྱུད་པར་བསམ་པ་ནི་བསམ་པ་ལས་ཀྱི་ཕྱག་རྒྱ་དང་། ཡུམ་ལ་འཁྲིལ་བའི་ཚུལ་གྱིས་བརླ་གཡོན་པ་ཆོས་ཀྱི་རིགས་ལ་བརྟེན་པའི་ཕྱག་རྒྱ་དངོས་སུ་བཅའ་བ་ནི་བཅའ་བ་ལས་ཀྱི་ཕྱག་རྒྱ་དང་། འོ་ན་དེ་གཉིས་ལས་རྒྱ་ཅི་ལྟར་ཞེ་ན། སྤར་ཁབ་ལས། དེས་ཐབས་དང་ཤེས་རབ་འཁྲིལ་བར་སྦྱོར་བར་བྱེད་པའི་ཕྱིར་རོ། །ཞེས་པ་དང་། ཐལ་བའི་རྒྱུད་ལས། ཕྱེད་ཕྱུང་ཚུལ་གྱིས་གར་བསྐྱོད་པ། །ལྟུང་བ་མེད་ཕྱིར་བརྟེན་པར་བཤད། །ཅེས་པས། ཡབ་ཡུམ་འཁྲིལ་བའི་ལས་བྱས་པས། །བྱང་སེམས་ཀྱི་འཕྲོ་འདུས་འབྱུང་བར་བསྐྱེད་ནས་བདེ་སྟོང་བསྐྱེད་དོ། །རང་བཞིན་མ་བཅོས་པའི་ངོ་བོ་ཕྲིན་ལས་ཐམས་ཅད་ལྷུན་གྲུབ་ཏུ་རྫོགས་པ་ནི་རང་བཞིན་ལས་ཀྱི་ཕྱག་རྒྱ་ཡིན་པ་དང་། ཆོས་རྗེས་རང་བཞིན་ལས་ཀྱི་ཕྱག་རྒྱ་ནི། འོག་མིན་ན་བཞུགས་པའི་སངས་རྒྱས་ཀྱི་ཕྲིན་ལས་མཛད་པ་ལ་གསུངས་ཏེ། དེ་ཡང་རྒྱས་པའི་ལེའུ་སོ་དྲུག་པ་ལས། བྱ་བ་མེད་པའི་ཚུལ་གྱིས་སུ། །ལས་རྣམས་མ་ལུས་རྫོགས་པར་བྱེད། །ཅེས་སོ། །མཛད་པ་བཅུ་གཉིས་ལ་སོགས་པའི་སྒོ་ནས་སེམས་ཅན་གྱི་དོན་བྱེད་པ་ནི་ཏིང་ངེ་འཛིན་འཕྲོ་འདུ་ལས་ཀྱི་ཕྱག་རྒྱ་ཡིན་པ་དང་བཞིའོ། །བཞི་པ་ཆོས་ཀྱི་ཕྱག་རྒྱའི་རྣམ་གྲངས་སོ། །དྲང་། བདེ་སྟོང་གི་ཡེ་ཤེས་མྱོང་བ་ནི་བདེ་བ་ཆོས་ཀྱི་ཕྱག་རྒྱ་དང་། དབྱེར་མེད་མ་བཅོས་པའི་དོན་དམ་ཉམས་མྱོང་བ་ནི་རང་བཞིན་ཆོས་ཀྱི་ཕྱག་རྒྱ་དང་། སྔགས་བརྗོད་པ་ནི་བཟླས་པ་ཆོས་ཀྱི་ཕྱག་རྒྱ་དང་། ཕྱག་རྒྱའི་རྩེ་མོ་དང་ཐུགས་ཀར་ཡིག་འབྲུ་བསྒོམ་པ་ནི་བསམ་པ་ཆོས་ཀྱི་ཕྱག་རྒྱ་དང་བཞིའོ། །ཕྱག་རྒྱ་བཞི་པོ་དེ་དག་རེ་ལ་བཞི་བཞིར་བྱུང་བ་ནི་ཐབས་ལམ་དང་གྲོལ་ལམ། གྲོལ་ལམ་ལའང་བསྐྱེད་རྫོགས་རྣམས་ཀྱིས་ཕྱེ་བས་གྲངས་མང་པོ་འབྱུང་བ་ཡིན་ཏེ། དེ་ཡང་སྐུ་ཕྱག་རྒྱ་ཆེན་པོ་ལ་ཐབས་གྲོལ་མཐུན་ལ། ཐུགས་དམ་ཚིག་ལ་ཡུམ་ནི་ཐབས་ལམ་ཡིན་ལ། གསུམ་པོ་ནི་གྲོལ་ལམ་མོ། །ལས་ཀྱི་ཕྱག་རྒྱ་ལའང་། བསམ་བཅའ་གཉིས་ཐབས་ལམ་གཙོ་ཆེ་ལ། རང་བཞིན་ནི་གྲོལ་ལམ་རྫོགས་རིམ་ཡིན་ལ། འཕྲོ་འདུ་ནི་བསྐྱེད་རིམ་མོ། །ཆོས་རྒྱ་ལ། བདེ་བ་ནི་ཐབས་ལམ་ཡིན་ལ། རང་བཞིན་ནི་རྫོགས་རིམ། བཟླས་བསམ་གཉིས་ནི་བསྐྱེད་རིམ་མོ། །བཞི་པ་ཐབས་དང་། དྲང་། སྔགས་བཟླ་བའི་ཚེ་ན། སྐྱོན་བཅུ་ལ་གཉིས་ཏེ། སྔགས་བཟླས་པའི་སྒྲ་སྐྱོན་དང་། བར་ཆད་སྐྱོན་བཅུ་སྤང་བ་དང་། སྔགས་ལ་བསམ་དཔྱོད་ཀྱིས་བར་དུ་གཅོད་པའི་སྐྱོན་བཅུ་སྤང་བའོ། །དང་པོ་ལ་གཉིས་ལས། དང་པོ་སྒྲ་སྐྱོན་ལྔ་ནི། སྒྲ་ཆེ་ཆུང་གཉིས། མྱུར་བུལ་གཉིས། མེད་པ་དང་ལྔ་སྟེ། དེ་དག་སྤང་བ་ཤིན་ཏུ་གལ་ཆེ་སྟེ། དེ་ཡང་སྒྲ་ཆེ་ན་འབྱུང་པོ་དང་། སྣོད་མེད་ཀྱིས་ཐོས་ནས་བར་ཆད་འབྱུང་། ཆུང་བས་ཟུར་མི་ཕྱིན། དྲག་ན་ལྕེ་ཆད། ཞན་ན་ཟུར་མི་ཕྱིན། མྱུར་ན་ལྕེ་དུབ། ཆུང་ན་གྲངས་མི་མཐོན། སྒྲ་མེད་ན་ཚིག་ཉམས་པའོ། །དེ་ཡང་རྔམ་གློག་ལས། སྒྲ་ཆེ་བ་མ་ཡིན་ཆུང་བར་མིན། །མགྱོགས་པར་མ་ཡིན་བུལ་བར་མིན། །དྲག་པ་མ་ཡིན་ཞན་མ་ཡིན། །ཡིག་འབྲུའི་ཡན་ལག་ཉམས་མ་ཡིན། །ཡེང་བ་ང་རྒྱལ་དང་ལྡན་མིན། །རྒྱུ་བའི་སེམས་དཔའ་སྤང་བར་བྱ། །སྒྲ་ཆེ་སྐྱོན་འགྱུར་འབྱུང་པོ་དང་། །སྣོད་མེད་ཐོས་འགྱུར་བར་ཆད་འབྱུང་། །སྒྲ་མེད་བར་ཆད་མཐུ་མེད་འགྱུར། །རྐྱེན་འགྱུར་ལུས་ཀྱི་འཕྲོད་པར་ཉམས། །དེ་ལ་སྔགས་ཀྱི་ནུས་པ་མེད། །བུལ་ན་བཟླས་པའི་གྲངས་མེད་པས། །དུས་འདས་བར་ཆད་སྦྱོར་བ་འབྱུང་། །ཞེས་སོ། །གཉིས་པ་བར་ཆད་ཀྱི་སྐྱོན་ལྔ་ནི། གློ་ལུ་བ་དང་། གཏམ་དང་། སྦྲིད་པ་དང་། གཉིད་དང་བཞི་པོས་བར་ཆོད་ན་བྱིན་བརླབས་ཡལ། སེམས་ཡེངས་ན་ཏིང་ངེ་འཛིན་གྱི་སྲོག་མེད་པས་དོན་གྱི་ནུས་མཐུ་མེད་དེ། ཚིག་ཙམ་གྱིས་ནུས་པ་བས་མི་འབྱུང་སྟེ། གློ་དང་སྦྲིད་དང་གཏམ་དང་ནི། གཉིད་ལ་སོགས་པས་བར་ཆད་ན། །དེས་ནི་ཡི་དྭགས་བདུད་ལ་སོགས། །སྤྲོས་ནས་བར་ཆད་སྦྱོར་བ་བྱ། །སེམས་གཡེང་ནུས་མཐུ་མི་འབྱུང་ངོ་། །ཞེས་སོ། །གཉིས་པ་བསམ་དཔྱོད་ཀྱི་སྐྱོན་བཅུ་ནི། ཉོན་མོངས་པའི་དུག་ལྔ་བསམ་པའི་སྐྱོན་དང་། བརྩོན་འགྲུས་ཆུང་བ་བསམ་པའི་སྐྱོན་དང་དྲུག །འདོད་ཆགས་ཆེ་བ་རེ་དོགས་སྐྱོན་དང་བདུན། ཏིང་ངེ་འཛིན་དང་བྲལ་བ་གཡེང་བའི་སྐྱོན་དང་བརྒྱད། ཡིད་ཆེས་མེད་པ་ཐེ་ཚོམ་གྱི་སྐྱོན་དང་དགུ། དོན་དང་མི་ལྡན་པ་རང་རྒྱུད་པའི་སྐྱོན་དང་བཅུའོ། །དེ་ཡང་ནག་པོ་དྲུག་ཅུ་པ་ལས། སྔགས་ཀྱི་བསྙེན་པ་བྱེད་དུས་སུ། །མེ་དང་འདྲ་བའི་ཞེ་སྡང་གིས། །སྔགས་ཀྱི་འབྲས་བུ་སྲེག་པར་བྱེད། །ཀུན་ནས་འཁྲིག་པའི་ཆགས་པ་ཡིས། །ཡོན་ཏན་རྒྱུད་རྣམས་ཆིངས་བར་བྱེད། །མུན་པ་ལྟ་བུའི་གཏི་མུག་གིས། །དངོས་གྲུབ་ཉེ་བ་རྙེད་མི་འགྱུར། །གླང་བུ་ལྟ་བུའི་ང་རྒྱལ་གྱིས། །དངོས་གྲུབ་ཆུ་འདྲ་རྩེ་ནས་བསྙིལ། །སྔགས་ཀྱི་ཡོན་ཏན་སྤྲིན་འདྲ་ལ། །ཕྲག་དོག་རླུང་གིས་འཐོར་བར་བྱེད། །དངོས་གྲུབ་ཆུ་བོ་རྒྱུན་བསྡུས་ལ། །བརྩོན་འགྲུས་རྡོ་རྗེ་བྲག་མེད་ན། །ལེ་ལོའི་རྦ་རླབས་ཆེན་པོ་འཁྲུགས། །འདི་ལྟར་སིདྡྷི་ཀུན་ལྡན་པ། །སྔགས་ཀྱི་དངོས་གྲུབ་འདོད་པས་སྤོངས། །བཟླས་མེད་མེ་ཡི་རྒྱུན་འདྲ་ལ། །སྡིག་པ་ཆུ་དང་འདྲ་བ་གསོད། །ཅེས་པས། བཅུ་པོ་དེ་དག་ལེ་ལོ་མི་བྱེད་ནས་དོར་བ་དང་། ལྷ་བསྒོམ་པ་ལ་སྐྱོན་བརྒྱད་དེ་ཆེ་ཆུང་གི་ཚད་འགྱུར་བ་དང་། བཞུགས་ཚུལ་དང་། གྲངས། ཞི་ཁྲོའི་ཆ་ལུགས་དང་། སྐུ་མདོག་དང་། དབྱིབས་དང་། ཁ་དོག་འབའ་ཞིག་དང་། གཙུག་ཏོར་ནས་རིམ་པར་ནུབ་ནས་མི་གསལ་བའི་སྐྱོན་རྣམས་སྤང་བ་སྟེ་བཅོས་ནས་ལྷ་བསྒོམ་པ་ལ་ཤིན་ཏུ་བརྩོན་པར་སྦྱར་བ་སྟེ། དེ་ཡང་ལམ་རིམ་ལས། གང་ཚད་དམིགས་ལ་ཚད་དང་ཚུལ། །གྲངས་དང་ཆ་ལུགས་མདོག་དབྱིབས་དང་། །ཁ་དོག་འབའ་ཞིག་རིམ་པར་ནུས། །ཞེས་པ་དང་། ཡང་། དྲུག་ལ་རི་ལྟར་ཆེ་གདོས་བྱ། །བདུན་པ་དབྱིབས་དང་བསྲེ་བར་བྱ། །བརྒྱད་པ་སྤྱི་མིན་བྱེ་བྲག་གནས། །ཞེས་སོ། །ལྔ་པ་ངེས་ཚིག་དང་། དྲང་། ཐུན་མོང་དང་མཆོག་ལ་སོགས་གང་བསྒྲུབ་པ་ལ་བཟླས་པ་བྱས་པས་ནུས་མཐུ་བྱིན་རླབས་དང་ལྡན་ཞིང་སྐྱོབ་པའི་ཕྱིར་སྔགས་ཞེས་བྱའོ། །བསྐྱེད་རྫོགས་ཀྱི་དོན་ལ་མི་འདའ་བས་ན་ཕྱག་རྒྱ། གཏན་ཚིགས་དེའི་ཕྱིར་ན་སྔགས་ཕྱག་རྒྱ་ཞེས་མིང་གི་སྒྲ་དོན་ནམ་ངེས་ཚིག་ཏུ་འཇུག་གོ། །དྲུག་པ་སྐབས་གང་དུ་དགོས་པ་དང་། དྲང་། དཀྱིལ་འཁོར་དགོས་པའི་དུས་ལྔའི་སྐབས་ལ་སྔགས་ཕྱག་རྒྱ་དགོས་པ་དང་། དེ་ཡང་དུས་ལྔ་ནི། ཞི་ཁྲོའི་ལྷ་མཆོད་པ་ལ་དཀྱིལ་འཁོར་དགོས་པ་དང་། དབང་བསྐུར་བ་ལ་དཀྱིལ་འཁོར་དང་། མཆོག་དང་ཐུན་མོང་གི་དངོས་གྲུབ་ཐོབ་ཐབས་ལ་དཀྱིལ་འཁོར་དང་། ཞི་རྒྱས་དབང་དྲག་གང་བྱེད་ལ་དཀྱིལ་འཁོར་དགོས་པ་དང་། སྐུ་གསུང་ཐུགས་ཀྱི་རབ་གནས་ལ་བསོད་ནམས་རྟེན་གྱི་དཀྱིལ་འཁོར་དགོས་པ་དང་ལྔའོ། །གཞན་ཡང་བསྙེན་བསྒྲུབ་རྣམ་པ་བཞིའི་དོན་ཉམས་སུ་ལེན་པའི་ཚེ་ན་སྔགས་དང་ཕྱག་རྒྱ་དགོས་པའོ། །བདུན་པ་ཡོན་ཏན་དང་། དྲང་། སྔགས་གསུམ་བཟླས་པ་དང་། ཕྱག་རྒྱ་བཞི་བསྒོམས་པ་ལ་རབ་ཏུ་བརྟན་པ་ཐོབ་ནས། མཆོག་དང་ཐུན་མོང་གི་དངོས་གྲུབ་ཡ་མཚན་ཆེན་པོར་སྣང་བ་དེ་དངོས་སུ་འགྲུབ་པར་འགྱུར་ནས། ཡིད་ལ་གང་བསམ་པའི་འབྲས་བུ་ཐམས་ཅད་འགྲུབ་པ་ཡིན་ནོ། །དེ་ཡང་གསང་སྙིང་ལས། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་སོ། །བརྒྱད་པ་སྐྱོན་དང་། དྲང་། དཔེ་ན་རལ་གྲིའི་ཡུ་བ་ནས་མ་བཟུང་ནས་སོ་ལ་བཟུང་ན་ཚུར་རང་གི་ལག་པ་ཉེས་པ་ལྟར། སྔགས་བཟླ་བ་དང་ཕྱག་རྒྱ་བསྒོམ་པ་ལ་དད་པ་དང་བརྩོན་འགྲུས་ཀྱིས་ནན་ཏན་མེད་ཅིང་གཞུང་བཞིན་མ་སྤྱོད་པའི་གསང་སྔགས་པ་འགའ་ཞིག་གིས། དམ་ཚིག་ཉམས་པས་ཚེ་འདིར་ཕུང་བཞིན་ཕྱི་མར་མཐོ་རིས་དང་ཐར་པའི་འབྲས་བུ་རྣམས་མེད་པར་འགྱུར་རོ། །དེ་ཡང་སྙིང་པོ་ལས། དད་མེད་ཉམས་ན་ཕུང་བར་འགྱུར། །ཞེས་སོ། །དགུ་པ་གང་གི་སྤྱོད་ཡུལ་ཡིན་པའོ། །དྲང་། གསང་བའི་སྔགས་དང་། རིགས་སྔགས་དང་། གཟུངས་སྔགས་དང་གསུམ་པོ་གང་ལ་མོས་པའི་རིམ་པ་རྣམས་ཉམས་ལེན་གང་བྱེད་དེའི་སྤྱོད་ཡུལ་ཡིན་པ་དང་། ཕྱག་རྒྱ་བཞི་གང་ལ་སྤྱོད་པའི་གང་ཟག་ཕྱག་རྒྱ་གཅིག་པ་དང་སྤྲོས་པ་ཡན་ཆད་དེའི་སྤྱོད་ཡུལ་ལོ། །གསུམ་པ་ཐ་མ་ཚོགས་སྒྲུབ་ལ་དྲོད་ཚད་རྟགས་དང་ལྡན་ནས་འབྲས་མཐོང་ལམ་ལ་སྦྱོར་བའོ། །དྲང་། དང་པོ་ཤེས་པར་བྱ་བའི་ཡུལ་ལྔ་དང་། བར་དུ་ཐུན་མོང་དང་མཆོག་གི་ལམ་གཉིས་པོ་གོང་དུ་སོང་ནས། འདིར་ཐ་མ་རྟོགས་པའི་རིག་པ་ལ་དབྱེར་མེད་ཀྱིས་དྲོད་ཐོབ་པའི་ཚད་དང་ལྡན་པ་དེས་འབྲས་བུ་མཐོང་ལམ་ལ་ཉེ་བར་སྦྱོར་བར་བྱེད་པའི་བར་ཆད་མེད་པར་ཚོགས་སྒྲུབ་པ་དེ་ནི་འདི་ལྟ་སྟེ། རྣལ་འབྱོར་པ་རང་གི་ཉམས་སུ་ལེན་པའི་ཡི་དམ་གྱི་ལྷ་དེ་བསྒྲུབ་པ་དང་། དེ་ཡང་སྔོན་དུ་ཚོགས་ལམ་གྱི་ཏིང་ངེ་འཛིན་མཐར་ཕྱིན་པ་དང་། དམ་ཚིག་སྡོམ་པ་ལ་སེལ་མེད་པ་དང་ལྡན་ནས་ཟག་བཅས་དེ་ཉིད་ཟག་མེད་ཀྱི་ལམ་ལ་སྦྱོར་བའི་ཐབས་ལ་ཚོགས་བསྒྲུབ་དགོས་ཏེ། དེ་ཡང་ཞི་ཁྲོ་གཉིས་ཀྱི་ཚོམ་བུ་གཅིག་གསུམ་ལྔ་པའི་རྣམ་གྲངས་རྣམས་གཞུང་ནས་བཤད་པ་བཞིན་ཉམས་སུ་བླངས་པ་དང་། དང་པོ་ཚོགས་ལམ་གྱི་ཐབས་ལམ་དང་ཤེས་རབ་གྲོལ་ལམ་གྱི་ཏིང་ངེ་འཛིན་གྱི་རྣམ་གྲངས་རྣམས་ལ། རྒྱལ་བའི་བཀའ་ལུང་ཚད་མ་དང་བླ་མ་དམ་པའི་མན་ངག་ཚད་མ་གཉིས་ལས་གྲགས་པའི་དོན་དེ་དག་ལ། རིག་པ་ཚད་མས་ལེགས་པར་སྦྱངས་ནས་ཐབས་གྲོལ་ཟུང་འཇུག་གི་ཏིང་ངེ་འཛིན་ལ་བརྟན་པ་ཐོབ་ནས་སྒྲུབ་པ་བྱས་ནས་ཟག་བཅས་དེ་ཉིད་ཟག་པ་མེད་པའི་ས་ལ་སྦྱོར་བ་ཡིན་ནོ། ༈ །སྤྱི་དོན་གསུམ་པ་ཐ་མ་ལམ་གྱིས་འཐོབ་པར་བྱེད་པས་ལམ་ཤེས་པའི་རྒྱུ་འབྲུ་རེ་ནས་བསྟན་པའོ། །དྲང་། ཐུགས་ཀྱི་ཐིགས་པ་ལས། རབ་ལ་མཚན་བསྟན། འབྲིང་ལ་རྣམ་པར་དབྱེ་བ་གཉིས་གོང་དུ་སོང་ནས། འདིར་བློ་ཐ་མ་ལ་འབྲུ་རེ་ནས་གཉེར་ཞིང་བཤད་པས། ལམ་གྱི་སྔ་མ་ལྟ་བ་རྟོགས་པའི་རྒྱུ་བྱས་ནས། དེས་ལམ་མཐར་ཕྱིན་ཅིང་འབྲས་བུ་ཐོབ་པ་དེའི་སྡོམ་ཚིག་ནི་འདི་ལྟ་སྟེ། འབྲུ་གཉེར་ལ་བརྟེན་ནས་ལྟ་བ་རྟོགས། དེ་ཉིད་ཉམས་སུ་བླངས་པ་ལ་ལམ་ལྔ་རིམ་པར་བགྲོད་ནས་མཐར་ཕྱིན་པ་ལ་འབྲས་བུ་བདེ་བར་གཤེགས་པ་རྒྱལ་བ་དེ་ཉིད་དངོས་སུ་ཐོབ་པ་ཡིན་ནོ། །འབྲས་བུ་ཐོབ་པའི་ཡོན་ཏན་དེ་ཡོད་པའི་ཕྱིར་ན་བློ་ཐ་མས་རྒྱུད་དོན་གཏན་ལ་འབེབས་པར་བྱེད་པ་ལ་བཤད་ཐབས་འདྲེན་པའི་ཚིག་བཅུ་ཡི་སྒོ་ནས་འབྲུ་རེ་དང་དོན་རེ་སྦྱར་དགོས་ཏེ། ཁྱད་པར་དུ་རུས་སྦལ་གནུར་ཤུགས་ཀྱི་སྒོ་ནས་འབྲུ་གཉེར་ཉམས་སུ་བླང་བར་བྱ་སྟེ། རང་གྲོལ་ལས། རུས་སྦལ་གནུར་འགྲོས་ལྟ་བུའི་བློས། །ཡི་གེའི་འབྲུ་རྣམས་ཆུམ་པར་བཤད། །ཅེས་གསུངས་པས་ཚིག་འབྲུ་རེ་ནས་གཉེར་བས་དེ་བསམ་བྱུང་གིས་གཞལ་བའི་ཡུལ་དུ་བྱས་ནས་རྒྱུད་ཀྱི་དོན་མངོན་སུམ་དུ་རྙེད་ཅིང་རྟོགས་པའི་དོན་དེ་ལ་རྒྱུད་དབུ་ཞབས་ཀྱི་དོན་ལྷག་མ་མ་ལུས་པ་དེར་འདུས་པའོ། །གཉིས་པ་མཚན་དོན། དྲང་། ཐུགས་ཀྱི་ཐིགས་པ་ལས་ཞེས་པ་འབྲུ་མཐུན་ནོ། །རང་བཞིན་དང་སྦྱངས་པའི་སྣོད་དུ་རུང་བ་གཅིག་ལ་གདུལ་བྱ་རྒྱུད་དག་པའི་བློ་དང་འཚམས་པར་སྣང་བ་དེའི་གཞུང་དོན་གཅོད་ཅིང་མཚམས་འཛིན་པས་ན་ལེའུ་ཞེས་བྱ་སྟེ། ཡས་བགྲང་གསུམ་པའི་དོན་དུ་གདའོ།། ༈ །།བཞི་པ་འབྲས་བུ་བདེ་བར་གཤེགས་པའི་སྣང་བ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། གསང་སྔགས་རྡོ་རྗེ་ཐེག་པ་གཏན་ལ་དབབ་པར་བྱེད་པའི་ཡན་ལག་ལ་ཤེས་བྱ་རང་བཞིན་གྱི་སྣང་བ་དང་། དེ་མ་རྟོགས་པ་ལ་འགྲོ་དྲུག་འཁྲུལ་པའི་སྣང་བ་དང་། དེའི་གཉེན་པོ་ལྟ་སྒོམ་སྤྱོད་སོགས་གདུལ་བྱ་ལམ་གྱི་སྣང་བ་དང་གསུམ་པོ་གོང་དུ་སོང་ལ། འདིར་བཞི་པ་འབྲས་བུ་མཐར་ཕྱིན་པ་བདེ་བར་གཤེགས་པའི་སྣང་བའི་སྡོམ་ཚིག་ནི་འདི་ལྟ་སྟེ། དེ་ཡང་ལམ་པས་རྟོགས་ཤིང་ཉམས་སུ་བླངས་ནས་འབྲས་བུ་སྣང་བའི་བར་ལ་མཚན་ཉིད་གསུམ་སྟེ། རྒྱུ་ཤེས་པའི་མཚན་ཉིད་ལྟ་བ་རྟོགས་པ། རྐྱེན་འཇུག་པའི་མཚན་ཉིད་སྤྱོད་སྒོམ་གྱིས་ཉམས་སུ་བླང་བ། འབྲས་བུ་མངོན་དུ་གྱུར་པའི་མཚན་ཉིད་ལམ་གྱི་སྤང་གཉེན་གྱི་བྱ་བ་ཟད་པའི་ཡར་གྱི་ཐ་མ་འབྲས་བུ་ཡིན་ཏེ། དེ་ཉིད་ལས་ཀྱི་དོན་ཕྱི་ཅི་མ་ལོག་པར་གསལ་བར་ལུང་བསྟན་པ་ལ། གནས་སྐབས་ཀྱི་འབྲས་བུ་རིག་པ་འཛིན་པ་དང་མཐར་ཐུག་གི་འབྲས་བུ་རྫོགས་པའི་སངས་རྒྱས་ཐོབ་ལུགས་དང་གཉིས་སོ། །གཉིས་པ་བཤད་པ་དེ་ལ་གཉིས་ཏེ། རིག་འཛིན་དང་། སངས་རྒྱས་སོ། །དང་པོ་ལ་གཉིས་ཏེ། བགྲང་། དང་པོ་བསྟན་པ་དང་། དྲང་། འབྲས་བུ་ལ་གཉིས་སུ་ཕྱེ་བའི་སྔ་མ་རིག་འཛིན་ལའང་བཞི་སྟེ། ཟག་བཅས་ནས་ཟག་མེད་དུ་སྦྱོར་བའི་ཐོབ་ཚུལ་དང་། རིག་འཛིན་གྱི་རྣམ་གྲངས་དང་། རིག་འཛིན་ཞེས་བྱ་བའི་ངེས་ཚིག་དང་། གནས་སུ་ཞུགས་ཚུལ་དང་བཞིའི་སྒོ་ནས་རྣམ་པར་བཤད་པའོ། །གཉིས་པ་བཤད་པ་དེ་ལ་བཞི་སྟེ། བགྲང་། དང་པོ་ཐོབ་ཚུལ་དང་། དྲང་། ཉན་ཐོས་ཀྱི་ཐེག་པ་ལ་ལྷག་མའི་ལུས་དང་བཅས་པ་ཡོད་པ་དང་། མེད་པའི་མྱ་ངན་ལས་འདའ་བའི་འབྲས་བུ་ཐོབ་ཚུལ་གྱི་དཔེ་གཉིས་བཞིན་དུ། འདིར་ལྷག་བཅས་ཚེ་དབང་ཐོབ་ཚུལ་དང་ལྷག་མེད་རྣམ་སྨིན་རིག་འཛིན་ཐོབ་ཚུལ་གཉིས་ཀྱི་རབ་ཀྱིས་ཚེ་འདི་ལ་ཐོབ་པ་དང་། ཐ་མས་བར་མ་དོ་ལ་ཚེ་རྣམ་གཉིས་ཐོབ་ནས་ཕྱག་ཆེན་ལ་རྣམ་པར་སྦྱོར་ཏེ། དེ་ནས་ལྷུན་གྲུབ་ལ་རྣམ་པ་སྦྱོར་བར་བྱའོ། །གཉིས་པ་རྣམ་གྲངས་དང་། དྲང་། རྣམ་པར་སྨིན་པའི་རིག་འཛིན་ནི་དཔེ་བྱ་ཁྱུང་གི་ཕྲུ་གུའི་སྒོང་རྒྱ་དེ་བཅག་མ་ཐག་མ་དང་རྩལ་མཉམ། གཅན་གཟན་སེང་ཕྲུག་གི་མངལ་རྒྱ་ལ་མའི་མཆེ་ཟུར་གྱིས་བཀྲལ་མ་ཐག་མ་དང་རྩལ་མཉམ་པའི་ཚུལ་དུ་རྣལ་འབྱོར་པ་ལུས་རྒྱ་དང་བྲལ་མ་ཐག་ཏུ་ཕྱག་ཆེན་གྱི་སྐུར་གྱུར་ཏེ། རིན་ཆེན་འཕྲུལ་སྐབས་སུ། སྒོ་ང་ནང་དུ་འདུག་པའི་ཁྱུང་། །དེ་བཞིན་སེང་གེ་མངལ་གྱི་རྒྱ། །རྒྱ་མིག་དང་ནི་རྒྱས་པ་བཞིན། །རྣལ་འབྱོར་པ་ནི་ལུས་རྒྱས་བཏུམ། །ཡོན་ཏན་འཆར་བ་ག་ལ་ནུས། །ཕུང་པོ་བོར་བས་དབྱིངས་སུ་གྲོལ། །ཅེས་དང་། ལམ་ཆུང་ལས། ཡིད་ཀྱིས་ལྷ་ཡི་གཟུགས་བརྟེན་ཅིང་། །ཕྱག་རྒྱ་སྐུ་ཉིད་གསལ་གྱུར་པ། །ལྷག་མ་བཞག་པའི་བར་མ་ལ། །དེ་མེད་ཕྱག་རྒྱ་ཆེན་པོར་སྨིན། །ལས་ཀྱི་ལུས་སྦུབས་རྣལ་འབྱོར་ཅེས་སོ། །ལུས་ཁམས་སྐྱེ་གནས་ཀྱི་ཟག་པ་གསུམ་དང་བྲལ་བའི་མཐོང་ལམ་པ་ནི། དོན་ལ་ལུས་སྣང་སེམས་གསུམ་དབྱེར་མེད་དུ་རིག་པ་རང་སྣང་གི་སྐུ་ཡེ་ཤེས་སུ་དབང་བསྒྱུར་ཞིང་། རྟགས་ལ་ཚེ་ལ་དབང་བསྒྱུར་བ་སྟེ། བྲལ་འབྲས་ལ་ཕུང་པོ་ལྔ་ལ་འཇིག་པ་མེད་པར་འཇའ་ལུས་སུ་ལམ་གོང་མ་དང་སངས་རྒྱས་ཀྱི་ས་ལ་ཁྱེར་བ་ཡིན་ཏེ། ལམ་རིམ་ལས། ལུས་ཁམས་སྐྱེ་གནས་ཟག་པ་ཟད། །རྡོ་རྗེའི་ལུས་གྱུར་ཚེ་ཡི་རིགས། །མཐོང་བའི་ཆོས་ལ་མྱ་ངན་འདས། །ལུས་མ་བོར་བར་སངས་རྒྱས་པ། །འཇིགས་པ་ཀུན་བྲལ་ཆོ་འཕྲུལ་རྫོགས། །ཞེས་སོ། །སྒོམ་ལམ་ཕྱག་རྒྱ་ཆེན་པོའི་རིག་འཛིན་ནི་རྣལ་འབྱོར་པ་བདག་གི་ལུས་འདི་ཉིད་སྔར་ཕྱག་རྒྱ་གཅིག་པའི་སྐབས་སུ་ཡི་དམ་གྱི་ལྷ་རིགས་ལྔ་གང་བསྒོམ་གྱི་སྐུར་རྩ་ལུས་སུ་སྣང་ཞིང་གྲངས་ཅན་གྱི་འཁོར་ལོར་དགོངས་པ་མི་གཡོ་བར་བཞུགས་ཏེ། དེ་ཉིད་ལས། རང་ལུས་གདོད་ནས་ཕྱག་རྒྱ་ཆེར། །བསྒོམ་པ་མངོན་དུ་གྱུར་པའི་སྐུ། །མཚན་དཔེ་བཞི་མངོན་དྲུག་རྫོགས་པ། །ཕྱག་རྒྱ་ཆེན་པོའི་རིགས་སུ་གྲགས། །ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེའི་ལུས་ལ་གྲོལ། །གྲངས་ཅན་འཁོར་ལོ་མངོན་དུ་སྣང་། །ཟག་པ་མེད་པ་བསྒོམ་པའི་ལམ། །མི་གཡོ་རྣལ་འབྱོར་ཉིད་དུ་བརྗོད། །ཅེས་སོ། །ལྷུན་གྲུབ་རིག་འཛིན་ནི། སྐུ་གསུང་ཐུགས་ཡོན་ཏན་ཕྲིན་ལས་ལྔ་། དེ་རེ་རེ་ལའང་ལྔ་ལྔ་སྟེ་སྐུ་རིག་རྒྱན་གྱི་འཁོར་ལོ་ཉི་ཤུ་རྩ་ལྔར་ལྷུན་གྲུབ་ཏུ་རིག་པ་རང་སྣང་བའོ། །འོ་ན་སངས་རྒྱས་དང་ཁྱད་པར་མེད་དམ་ཞེ་ན། མཉམ་བཞག་ལ་སངས་རྒྱས་དང་ཁྱད་མེད་ཀྱང་། ལྷུན་གྲུབ་རིག་འཛིན་དེ་ལ་རྗེས་ཐོབ་ལ་བག་ཉལ་དེ་ཡི་དྲི་མ་ཡོད་པས་ད་རུང་མཉམ་བཞག་དང་གཉེན་པོའི་རྩོལ་བ་ཅ ན་ཡིན་ཏེ། དེ་ཉིད་ལས། བསམ་ཡས་ལྷུན་གྱི་གྲུབ་པའི་ཕྱིར། །ཐམས་ཅད་མཁྱེན་པའི་སྤྱན་མཆོག་འཆང་། །ཡི་གེ་འཁོར་ལོ་མངོན་གཟིགས་པ། །མི་གཡོ་བ་ལ་མི་རྟོག་པ། །ད་དུང་མངོན་པར་མི་རྒྱ་སྟེ། །དུས་མཐའི་སྐད་ཅིག་ཉིད་ཀྱིས་གཤེགས། །ཞེས་གསུངས་སོ། །གསུམ་པ་ངེས་ཚིག་དང་། དྲང་། མེ་ལ་གནས་པའི་སེམས་ཅན་གྱི་རིགས་ལ་དྲང་སྲོང་མེའི་རྣལ་འབྱོར་དང་། རི་དྭགས་མེ་བྱི་དཀར་པོ་གཉིས་ཀྱི་གནས་ཀྱང་མེ་ལ། ཟས་གོས་ལ་སོགས་པའི་ལོངས་སྤྱོད་རྣམས་ཀྱང་མེ་ལ་ལོངས་སྤྱོད་པས། མེ་དང་བྲལ་ན་འཆི་བས་མེ་ལས་མི་འདའ་བ་དང་། ཆུ་ལ་གནས་པའི་སེམས་ཅན་རྣམས་ཀྱི་གནས་ཀྱང་ཆུ་ལ། ཟས་གོས་ལ་སོགས་ལོངས་སྤྱོད་ཀྱང་ཆུ་ལ་བྱེད། ཆུ་དང་བྲལ་ན་འཆི་བས་ཆུ་ལས་མི་འདའ་བ་དང་། རླུང་ལ་གནས་པའི་སེམས་ཅན་དག་གི་རིགས་བྱ་མཁའ་ལྡིང་ནམ་མཁའ་ཚང་འཇུག་བྱ་བ་དེས་གནས་ཀྱང་རླུང་ལ་བརྟེན། ཟས་ལ་སོགས་པའི་ཡོ་བྱད་ཀྱང་རླུང་ལ་བྱེད་པ། རླུང་དང་བྲལ་ན་འཆི་བས་རླུང་ལས་མི་འདའ་བ་བཞིན་དུའམ། ཡང་ན་མེའི་མཚན་ཉིད་ཚ་བ་ལ། ཆུའི་མཚན་ཉིད་གཤེར་བ་ལ། རླུང་གི་མཚན་ཉིད་ཡང་ཞིང་གཡོ་བ་ལས་མི་འདའ་བ་བཞིན་དུ། རྣལ་འབྱོར་པ་གང་དག་འདི་རྣམས་སངས་རྒྱས་ཀྱི་རིགས་ཀྱིས་ཟིན་ནས་སླར་མི་གཏོང་བས་ན་རིག་འཛིན་ཞེས་བྱ་སྟེ། དེ་ཡང་དང་པོ་ལྟ་བ་རྟོགས་པ་ལས་བྱུང་བ་དང་། བར་དུ་དཔྱད་སྒོམ་གྱི་བྱ་བ་བྱེད་པ་དང་། ཐ་མར་ཟག་མེད་ཀྱི་ཆོས་ཉིད་ལ་མཐོང་ལམ་ཡན་ཆད་ནས་འདའ་ཉམས་མེད་པས་ན་སངས་རྒྱས་ཀྱི་རྒྱུད་འཛིན་པ་དང་གསུམ་གྱིས་རིག་འཛིན་ཞེས་བྱ་བའི་ངེས་ཚིག་དེ་འགྲུབ་པ་ཡིན་ཏེ། དེ་ཉིད་ལས། མཁས་རྟོགས་གོམས་སྤྱོད་རིག་པ་འཛིན། །ལྷ་ལ་སོགས་པ་རྡོ་རྗེ་འཛིན། །མི་གཏོང་གཟུངས་ལས་མིང་ཐོབ་པ། །ཞེས་པ་དང་། སེང་གེ་རྩལ་རྫོགས་ལས། དང་པོ་གནས་ས་གང་ཡིན་པར། །ཐ་མ་དེ་ཡི་གནས་སུ་འགྲོ། །ད་ལྟ་དེ་ཡི་དོན་ལ་གནས། །བར་དུ་ཡེ་ཤེས་རྒྱུད་རྩལ་སྦྱངས། །ཞེས་སོ། །བཞི་པ་གནས་སོ། །དྲང་། རིག་འཛིན་དེ་ཡི་བཞུགས་གནས་ལ་ངེས་པ་ཕྱོགས་གཅིག་ཏུ་གྲུབ་པ་མེད་དེ། ཅིའི་ཕྱིར་ཞེ་ན། ཕྱི་སྣང་སྣོད་བཅུད་ཀྱི་ཆོས་ཐམས་ཅད་སེམས་ཉིད་རིག་པ་རང་སྣང་དུ་ཤར་བས་ན་གནས་གང་ཡང་རུང་བ་ཡིན་ཏེ། ལམ་རིམ་ལས། སྣང་བ་རིག་པ་འཛིན་པའི་གནས། །རིག་སྣང་གནས་ལ་ངེས་པ་མེད། །སྐྱེ་བ་ཆ་བྱད་དོན་གྱིས་འགྱུར། །ཞེས་གསུངས་སོ། །གཉིས་པ་སངས་རྒྱས་ལ་གཉིས། བགྲང་། དང་པོ་བསྟན་པ་དང་། དྲང་། ལམ་ལྔའི་སྤང་གཉེན་གྱི་བྱ་བ་མ་ལུས་པ་ཀུན་བྱས་པའི་འབྲས་བུ་སངས་རྒྱས་གྲུབ་པ་དག་གི་རྣམ་གྲངས་ནི། འབྲས་བུ་སངས་རྒྱས་ཐོབས་ཚུལ་དང་། ཐོབ་པའི་ངོ་བོ་དང་། འབྲས་བུ་སའི་རྣམ་གྲངས་དང་གདུལ་བྱའི་སྤྱོད་ཡུལ་ལ་ཡེ་ཤེས་ཀྱི་གཟིགས་ཚུལ་དང་། བརྩེ་བའི་ཐུགས་རྗེ་སྤྲུལ་པ་འཆར་ཚུར་དང་། གཞན་དོན་མཛད་པའི་ཚུལ་དང་། དགོངས་པའི་ཡེ་ཤེས་ལ་བཞུགས་པའི་ཚུལ་དང་བདུན་གྱི་སྡོམ་ཚིག་གི་ནང་དུ་རྒྱས་བཤད་དེ་ཤེས་པར་བྱའོ། །གཉིས་པ་བཤད་པ་དེ་ལ་བདུན་ཏེ། ཐོབ་ཚུལ་དང་། ངོ་བོ་དང་། རྣམ་གྲངས། གདུལ་བྱ་ལ་གཟིགས་ཚུལ་དང་། ཐུགས་རྗེ་སྤྲུལ་པ་སྣང་ཚུལ་དང་། མཛད་པ་བྱ་བྱེད་ཀྱི་རྩོལ་བ་མེད་པར་དོན་མཛད་ཚུལ་དང་། དགོངས་པའི་གནས་ཚུལ་གཅིག་དང་དུ་མ་ལས་གྲོལ་བ་སྨྲ་བསམ་ལས་འདས་པར་བསྟན་པའོ། །དང་པོ་ཐོབ་ཚུལ་ལ་གཉིས་ཏེ། བགྲང་། དང་པོ་བདག་དོན་དུ་རང་སྣང་ཐོབ་པའི་ཚུལ་དང་། དྲང་། བདག་དོན་གི་དབང་དུ་འབྲས་བུ་ཐོབ་ཚུལ་ནི་རྒྱས་པ་ལས་འདི་སྐད་དུ་གསུང་སྟེ། དཔེར་ན་དཔག་བསམ་གྱི་ལྗོན་ཤིང་ལ་ལོ་མ་དང་འབྲས་བུའི་དགོས་འདོད་གསལ་བའི་དཔེ་དང་། ཡིད་བཞིན་གྱི་ནོར་བུ་རིན་པོ་ཆེ་ལ་གསོལ་བ་གང་བཏབ་ཀྱིས་སྣང་ངོར་དགོས་འདོད་སྣ་ཚོགས་འབྱུང་བའི་དུས་སུ་རྟོག་པ་མེད་པ་ལྟར། དཔེ་གཉིས་པོ་དེ་དག་ལ་སྣང་ཚུལ་དུ་དངོས་པོ་རྫས་གྲུབ་ལྟར་སྣང་ཡང་། དོན་ལ་དེ་དག་རང་རྒྱུད་ཀྱི་རྫས་སུ་གྲུབ་པ་རྡུལ་ཙམ་ཡང་ཡོད་པ་མ་ཡིན་ཏེ། འོ་ན་གང་ལས་བྱུང་ཞེ་ན། གདུལ་བྱ་སོ་སོ་རང་རང་གི་སེམས་ཀྱིས་བསོད་ནམས་དཔག་ཏུ་མེད་པ་བསགས་པའི་མཐུས་བརྟན་པའི་སྟོབས་ལས་དགོས་འདོད་གང་བསམ་འགྲུབ་པ་ཡིན་པ་བཞིན་དུ་གཞི་སེམས་ཉིད་མཉམ་པ་ཉིད་ཀྱི་ངང་ལ་སངས་རྒྱས་ཀྱི་ཡོན་ཏན་ཅིར་ཡང་སྣང་བས་ན་ངོ་མཚར་ཞིང་སེམས་ཀྱི་ཆོ་འཕྲུལ་སྐུ་གསུང་ཐུགས་ཡོན་ཏན་ཕྲིན་ལས་ལྔའམ། ཉི་ཤུ་རྩ་ལྔ་ལ་སོགས་པ་མཐའ་ཡས་པས་རང་བྱུང་གི་ཡེ་ཤེས་རང་ལ་བྱུང་བ་ནི་རྨད་ཀྱི་ཆོས་དེ་དག །གཞན་ནས་བཀུག་པའམ་ཡོད་པ་གཅིག་འདིར་འོང་བ་དང་། རྒྱུ་རྐྱེན་གང་གི་སྒོ་ནས་ཐོབ་པ་མ་ཡིན། ཏེ་ཡི་སྒྲས་ཚུལ་ཅི་ལྟར་དུ་བྱུང་ན། ཕུང་པོ་ལྔ་ལ་སོགས་པའི་རྟོག་ཚོགས་ལྷའི་སྐུ་གསུང་ཐུགས་ཀྱི་ཕྱག་རྒྱར་གསལ་བའི་ཐབས་སྣང་ལ་འགག་པ་མེད་པ་དང་། ཤེས་རབ་རང་བཞིན་མེད་པ་སྟེ། དེ་ལྟར་ཐབས་ཤེས་རབ་གཉིས་སུ་མེད་པ་དེ་ཉིད་རང་རིག་པར་རྒྱུན་དུ་བརྟེན་པར་སྒོམ་པ་མཐར་ཕྱིན་པ་སྟེ། དཔེ་གཉིས་པོ་དེ་ལྟ་བུ་དོན་རྒྱུ་འབྲས་གཉིས་སུ་མེད་པར་སྣང་བ་ཡི་ངང་དུ་སངས་རྒྱས་ཀྱི་ཆེ་ཡོན་ཐམས་ཅད་འབད་མེད་ལྷུན་གྲུབ་ཏུ་རང་བྱུང་བ་ཡིན་ནོ། །གཉིས་པ་གཞན་དོན་དུ་ལམ་གྱི་མཛད་པ་རྫོགས་ནས་ཐོབ་ཚུལ་ལོ། །དྲང་། གདུལ་བྱ་གཞན་གྱི་དོན་དུ་གཟུགས་སྐུའི་སངས་རྒྱས་ཐོབ་ལུགས་ནི། རྒྱས་པའི་ལུང་ལས། འདི་སྐད་དུ་གསུངས་པ་སྟེ། ཡང་ལམ་ལྔའི་བྱ་བ་མ་ལུས་པ་ཀུན་བྱས་ནས་མཐར་ཐུག་གི་འབྲས་བུ་ནི། སྐྱེ་འཇིག་མེད་པ་རྡོ་རྗེའི་སྐུ་དྲུག་པ་ཐོབ་ནས་སྤྲུལ་སྐུ་སྣ་ཚོགས་ཀྱིས་འགྲོ་བའི་དོན་མཛད་ཅེས་རྒྱུད་ལས་དེ་ལྟར་གསུང་པའི་དོན་ནི། སྲིད་པ་ཐ་མ་པ་ལྷུན་གྲུབ་རིག་འཛིན་དང་། བཅུ་གཅིག་ཀུན་ཏུ་འོད་ཀྱི་སངས་རྒྱས་དེ་ལ། སྐུ་ལྔ་ལྷུན་གྲུབ་ཀྱི་སངས་སྤྱི་གཟུགས་ཅན་དེས་དབང་བསྐུར་བས་དབང་དོན་རྫོགས་པ་དང་། སྟོན་པ་རྡོ་རྗེ་འཛིན་པའི་སྐུ་དང་དབྱེར་མེད་དུ་སངས་རྒྱས་མ་ཐག་ཏུ་གསང་སྔགས་རྟོགས་ནུས་ཀྱི་སྣང་ངོ་ལ་ལོངས་སྐུ་དང་། མི་ནུས་པ་རྣམས་ཀྱི་སྣང་ངོ་ལ་སྐུ་རྡོ་རྗེ། གསུང་རྡོ་རྗེ། ཐུགས་རྡོ་རྗེ་གསུམ་དབྱེར་མེད་པ་ལས། སྤྲུལ་པ་ཐུབ་པ་དྲུག་གི་དབང་པོ་སྟེ་གཙོ་བོར་སྣང་ནས་གང་ལ་གང་འདུལ་བ་ཡི་སྒོ་ནས་སེམས་ཅན་གྱི་དོན་མཛད་དེ། ཁྱད་པར་དུ་མིའི་ཐུབ་པས་ལམ་གྱི་མཛད་པ་རྫོགས་ནས་སངས་རྒྱས་པའི་ཚུལ་གྱིས། སེམས་ཅན་གྱི་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་ན་དོན་མཛད་པ་དེའི་རྒྱས་བཤད་ནི་གསང་བའི་སྙིང་པོ་ལེའུ་གསུམ་པའི་བསྟན་པ་འབྱུང་བ་སྤྱིའི་གླེང་གཞིའི་སྐབས་ལས་ཤེས་པར་བྱའོ། །གཉིས་པ་ངོ་བོ་དང་། དྲང་། འཁོར་འདས་གཉིས་སུ་མེད་པའི་སེམས་ཉིད་རིག་པའི་ཡེ་ཤེས་སུ་མངོན་སུམ་དུ་རྟོགས་ཤིང་གྲུབ་མཐའ་མ་ལུས་པ་རྫོགས་པར་བྱས་ནས། བདེན་གཉིས་དབྱེར་མེད་ཅིང་སྐྱེ་འཇིག་དང་བྲལ་བས་རྡོ་རྗེའི་སྐུ་ཐོབ་སྟེ། དཔེར་ན་ཆུ་ཡི་ནང་གི་ཟླ་བའི་གཟུགས་བརྙན་སྣང་དུས་ཆུ་ལས་མ་གཡོས་ནས་དབྱེར་མེད་དུ་སྣང་བ་ལྟ་བུར། དོན་ལ་ཤེས་བྱ་འཁོར་འདས་ཀྱི་ཆོས་ཀུན་མ་འདྲེས་པ་ལ་ཡོངས་སུ་རྫོགས་ཤིང་ཐམས་ཅད་དུ་རིག་པ་རང་སྣང་བ་ལ་གཞན་གྱི་ལྷད་མེད་པས་ན་རང་བཞིན་འཁོར་འདས་ཀྱི་ཆོས་ཀུན་དང་ཐ་མི་དད་ཅིང་དབྱེར་མེད་པ་སྟེ། ལམ་རིམ་ལས། བདེན་པ་གཉིས་མེད་དབང་བསྒྱུར་བ། །བདག་དང་གཞན་གྱི་གཉིས་མེད་དེ། །སོ་སོ་མེད་ཕྱིར་དེར་སོན་པ། །མཐའ་རྣམས་ཀུན་བྲལ་ཀུན་ལྡན་པར། །རང་སྣང་ཞེན་བྲལ་མངོན་བྱས་པ། །མིང་བརྗོད་འདི་འདྲར་གནས་སྨྲ་དཀའ། །ཞེས་སོ། །གསུམ་པ་རྣམ་གྲངས་དང་། དྲང་། རྟེན་བྱེད་པའི་ཆ་ནས་སྐུ་ལྔ་དང་། བརྡའ་སྤྲོད་པས་གསུང་ལྔ་དང་། དགོངས་པ་ཟབ་པས་ཐུགས་ལྔ་དང་། དགོས་འདོད་འབྱུང་བས་ཡོན་ཏན་ལྔ་དང་། བྱ་བ་བྱེད་པའི་ཆ་ནས་ཕྲིན་ལས་ལྔ་དང་། དེ་ལྟར་ཉེར་ལྔ་མ་འགགས་པ་ནི་ཆོས་སྐུའི་རྒྱན་གྱི་མཆོག་ཡིན་ཅིང་དེ་ཉིད་རྒྱུན་ཆད་མེད་པས་ན་འཁོར་ལོ། དེ་ཉིད་གསར་དུ་ཐོབ་པ་ནི་མ་ཡིན་ཏེ་ཡེ་གདོད་མ་ནས་རང་བཞིན་གྱིས་གནས་པའི་དོན་མངོན་དུ་གྱུར་པའོ། །དེ་ལ་སྐུ་ལྔ་ནི། འཁོར་འདས་ཀྱི་ཆོས་ཀུན་སྣང་ལ་རང་བཞིན་མེད་པ་དབྱེར་མེད་མངོན་དུ་གྱུར་པ་ནི་ཆོས་སྐུ་ཡིན་ཏེ། རྒྱས་པ་ལས། འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུ་ཆེན་པོ་ཡིན། །ཞེས་པ་དང་། ལམ་རིམ་ལས། འཇིག་རྟེན་འདས་དང་མ་འདས་ཀུན། །དུས་གསུམ་ཆོས་ཀུན་གཅིག་པ་ཡི། །རྒྱལ་བ་ཉིད་ཕྱིར་སྣ་ཚོགས་ཆོས། །སྣང་ལ་རང་བཞིན་མེད་པའི་ཕྱིར། །དེ་ཉིད་དྷརྨ་ཀཱ་ཡར་གནས། །ཞེས་སོ། །འཁོར་འདས་ཀྱི་ཆོས་ཐམས་ཅད་མ་འགགས་མ་དམིགས་བདག་ཉིད་ཆེན་པོར་ལོངས་སྤྱོད་པ་ནི་དྲུག་པ་སྤྱིའི་གཟུགས་ཅན་ལོངས་སྤྱོད་རྫོགས་པའི་སྐུའོ། །སྤྲུལ་སྐུ་ནི། དེ་ཉིད་གདུལ་བྱ་ལུགས་བཟློག་སྣ་ཚོགས་ལ། ཞི་ཁྲོའི་སྐུ་སྣ་ཚོགས་སུ་རང་སྣང་བའོ། །རྡོ་རྗེའི་སྐུ་ནི་དེ་ལྟར་སྐུ་གསུམ་ཆུ་དང་གཟུགས་བརྙན་ལྟར་དབྱེར་མེད་པའོ། །མངོན་བྱང་གི་སྐུ་ནི་སྐུ་བཞི་པོ་དེ་ཉིད་རིག་པ་རང་སྣང་གི་ཡེ་ཤེས་ལྔ་ལས་མ་གཡོས་པའོ། །དེ་ཡང་གསང་སྙིང་ལས། ༀ་ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས་ཧོ། ཞེས་སོ། །གསུང་ལྔ་ནི། ཆོས་སྐུ་དབྱེར་མེད་དོན་གྱི་གསུང་རྒྱལ་བ་དགོངས་བརྒྱུད་དུ་བརྡའ་འཕྲོད་པའོ། །ལོངས་སྐུའི་གསུང་ནི། སྐུ་མཐོང་བ་ཙམ་གྱིས་མེ་ལོང་གཟུགས་བརྙན་ལྟར་སྐྱོན་ཡོན་བརྡ་མཇལ་བའོ། །སྤྲུལ་སྐུ་ཚིག་གི་གསུང་ནི་ཚངས་པའི་གསུང་ལྟར་གསུང་གཅིག་གདུལ་བྱ་སྣ་ཚོགས་རང་རང་གི་བློ་དང་འཚམས་པར་གོ་བའོ། །རྡོ་རྗེའི་སྐུའི་གསུང་ནི་ཆོས་ཐམས་ཅད་དབྱེར་མེད་དུ་བརྡ་འཕྲོད་པའོ། །མངོན་བྱང་རིག་པ་བྱིན་རླབས་ཀྱི་གསུང་ནི་ཡེ་ཤེས་ལྔ་རང་དུ་བརྡ་མཇལ་བའོ། །ཡང་དེ་ཉིད་ལས། ༀ་རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོ། །ཞེས་སོ། །ཐུགས་ལྔ་ནི་ཡེ་ཤེས་ལྔ་སྟེ། རྣམ་ཀུན་མཆོག་ལྡན་གྱི་སྟོང་པ་ཉིད་ནི་ཆོས་དབྱིངས་ཡེ་ཤེས་ཏེ་ཆོས་སྐུའི་ཐུགས། གསལ་ལ་འཛིན་པ་མེད་པ་ནི་མེ་ལོང་ཡེ་ཤེས་ཏེ་མངོན་བྱང་གི་སྐུའི་ཐུགས། གསལ་སྟོང་དབྱེད་མེད་ནི་མཉམ་ཉིད་ཡེ་ཤེས་ཏེ་ལོངས་སྐུའི་ཐུགས། ཤེས་བྱ་མ་འདྲེས་པར་གསལ་བ་ནི་སོ ར་རྟོགས་ཡེ་ཤེས་ཏེ་རྡོ་རྗེའི་སྐུའི་ཐུགས། དོན་གཉིས་རང་སྣང་དུ་ལྷུན་གྱིས་གྲུབ་པ་ནི་བྱ་གྲུབ་ཡེ་ཤེས་ཏེ་སྤྲུལ་སྐུའི་ཐུགས་སོ། །ཡང་དེ་ཉིད་ལས། ༀ་སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐེག་ལེ་ཆེ་ཧོ། །ཞེས་སོ། །ཡོན་ཏན་ལྔ་ནི། སྤྱིར་གཟུང་ཡུལ་གནས་སུ་དག་ཅིང་རིག་པ་རང་སྣང་བས་སངས་རྒྱས་ཀྱི་ཞིང་ཁམས་སུ་ཤར་བ་ནི་ཞིང་ཁམས་ཡོན་ཏན་ཅན་དང་། སྣང་བ་གནས་སུ་དག་ནས་འབྲས་བུའི་ཆོས་ཐམས་ཅད་ལྷུན་གྲུབ་ཏུ་རྫོགས་པར་རང་སྣང་བ་ནི་གཞལ་ཡས་ཁང་དང་། འདོད་ཡོན་ལྔ་ལ་སོགས་པ་མ་སྤང་བར་རང་རིག་པའི་ཡེ་ཤེས་སུ་ལྷུན་གྱིས་རྫོགས་པའི་ཕྱིར་རྒྱན་ཆ་དང་། ཡེ་ཤེས་ལྔ་ཡི་དཀྱིལ་འཁོར་དུ་གསལ་ཞིང་། སྤྲོ་བ་ནི་འོད་ཟེར་དང་། འབྲས་བུའི་སྟོབས་དང་མི་འཇིགས་པ་ལ་སོགས་པ་ལྷུན་གྱིས་གྲུབ་པའི་རྟགས་སུ་སེང་གེ་ལ་སོགས་པར་སྣང་བ་ནི་གདན་ཁྲི་ཡོན་ཏན་ཅན་ནོ། །དེ་ཉིད་ལས། ༀ་མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ཏུ་སྣ་ཚོགས་འཕྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ་ཧོ། །ཞེས་སོ། །ཕྲིན་ལས་ལྔ་ནི། ཞི་རྒྱས་དབང་དྲག་ལྷུན་གྱིས་གྲུབ་པའི་ཕྲིན་ལས་དང་ལྔའི་སྒོ་ནས་གདུལ་བྱའི་བློ་དང་འཚམས་པར་དོན་མཛད་པ་ཡིན་ཏེ། དེ་ཉིད་ལས། ༀ་ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ་ཧོ། །ཞེས་གསུངས་སོ། །བཞི་པ་གདུལ་བྱ་གཟིགས་ཚུལ་དང་། དྲང་། ཤེས་བྱ་ཐམས་ཅད་མཁྱེན་པའི་སངས་རྒྱས་ཀྱི་ཡུལ་གདུལ་བྱ་སེམས་ཅན་ཐམས་ཅད་ལ་གཟིགས་ཚུལ་ནི་འདི་སྐད་དུ་གསུང་སྟེ། གཉིས་མེད་ཀྱི་ཡེ་ཤེས་རང་ངོ་མ་ཤེས་པ་ལྷན་ཅིག་སྐྱེས་པའི་མ་རིག་པ་དང་། དེར་ཡང་མ་ཟད་ལོག་པར་རྟོག་པ་གཟུང་འཛིན་ཀུན་བརྟགས་ཀྱི་མ་རིག་པ་དང་གཉིས་རྣམ་པར་དག་ཅིང་། མངོན་སུམ་དུ་རྟོགས་པའི་ཡེེ་ཤེས་ནི་རྟོགས་བྱ་དབྱིངས་མཉམ་པ་ཉིད་ལས་མི་གཞན་ཅིང་དབྱེར་མེད་ཀྱི་དོན་རྟོགས་པའི་ཕྱིར་ན། ཐུགས་སྤྲོས་པ་ཐམས་ཅད་དང་བྲལ་བ་དེས་ཤེས་བྱ་ཐམས་ཅད་ལ་ཁྱབ་པས་རྗེ་སྟེ། དེའི་ཕྱིར་སྐྱེ་བྱེད་ཀྱི་སངས་རྒྱས་དང་། སྐྱེ་བྱའི་ཡུལ་སེམས་ཅན་དང་། སྐྱེ་བདོ་བའི་ཐུགས་རྗེ་གསུམ་གཉིས་མེད་རང་སྣང་དུ་ཤར་བས་ཆེན་པོ། དེ་ཉིད་ངོ་བོ་བདག་ཉིད་གཅིག་པར་འབྲེལ་པས་ན། འགྲོ་བ་རིགས་དྲུག་གི་དུས་སྔ་ཕྱི་དང་། གནས་ལ་མཐོན་དམན་ལ་སོགས་པ་ཤེས་བྱ་མ་ལུས་པ་ཀུན་སྣང་ནས་མཁྱེན་པའོ། །དེ་ལྟར་མ་འདྲེས་ཡོངས་རྫོགས་སུ་མཁྱེན་པའི་དུས་ཉིད་ན་ཡང་། རྒྱས་པའི་ལུང་ལས་འདི་སྐད་གསུངས་ཏེ། ཡུལ་ཡུལ་ཅན་གྱི་རྣམ་པར་རྟོག་པ་མི་མངའ་བ་སྟེ་དབྱིངས་མཉམ་པ་ཉིད་ལས་མ་གཡོས། མ་གཡོས་བཞིན་དུ་དེ་ཡི་ཡེ་ཤེས་ཀྱིས་མི་མཁྱེན་པ་དང་མི་གཟིགས་པ་དང་གང་ཡང་མེད་དེ། ཚུལ་ཅི་ལྟར་དུ་མཁྱེན་ཞེ་ན། ཡང་ཀུན་བྱེད་ཀྱི་ལུང་ལས་གསུངས་པ་ནི་དཔེར་ན་མེ་ལོང་ལ་གཟུགས་བརྙན་འཆར་དུས་མེ་ལོང་ལས་མ་གཡོས་པ་ལྟ་བུའི་ཚུལ་བཞིན་དུ། དོན་དབྱིངས་ལས་མ་གཡོས་བཞིན་དུ་ཡེ་ཤེས་ཀྱི་ཤེས་བྱ་སྣ་ཚོགས་སོ་སོའི་ཁ་དོག་མི་འདྲ་བ་སྣ་ཚོགས་དབྱིབས་མི་འདྲ་བ་སྣ་ཚོགས་མ་འདྲེས་ཡོངས་རྫོགས་སུ་ཤར་ནས་སྣང་བ་སྟེ། ནམ་མཁའ་མཐའ་མཉམ་ལས། མ་བཅོས་ངང་ལ་གཉིས་མེད་ཀྱང་། །ཤེས་རབ་འོད་གསལ་ཆེན་པོ་ཡི། །མཁའ་ལ་གཟའ་སྐར་བཀྲམ་པའམ། །མེ་ཏོག་མཛེས་པའི་ཕུང་པོ་ལྟར། །སོ་སོར་གསལ་ལ་གཅིག་ཏུ་འདུས། །མ་འདྲེས་ཡོངས་སུ་རྫོགས་པར་ནི། །ཕྱོགས་མེད་དང་གསལ་ཡེ་ཤེས་སུ། །དུས་མཐའི་ཚད་ལས་འདས་པར་མཁྱེན། །ཅེས་སོ། །ལྔ་པ་ཐུགས་རྗེའི་སྤྲུལ་པ་སྣང་ཚུལ་དང་། དྲང་། འབྲས་བུ་མཐར་ཕྱིན་པའི་བདེ་བར་གཤེགས་པ་ཐམས་ཅད་ཀྱི་དགོངས་པའི་རང་བཞིན་དེ་ལ་འཁོར་བའི་ཆོས་ཐམས་ཅད་དང་དབྱེར་མེད་དུ་རང་སྣང་བའི་ཕྱིར་ན། སྤྲུལ་པ་སྣ་ཚོགས་ཀྱིས་འགྲོ་བའི་དོན་བྱེད་པའི་དུས་སུ། སཱུར་སྟེ་ཉི་མ། ཙནྡྲ་སྟེ་ཟླ་བའི་གཟུགས་བརྙན་འགྲོ་འོང་དང་ཐོགས་ཆགས་མེད་པར་ཆུ་ལ་འཆར་བ་བཞིན་དུ། དགོངས་པ་ཆོས་སྐུ་ལས་མ་གཡོས་བཞིན་དུ་གཟུགས་སྐུ་སྣ་ཚོགས་སུ་སྣང་ནས་འགྲོ་བའི་དོན་བྱེད་པ་དེ་ཡང་གཞན་དོན་དུ་གདུལ་བྱའི་དོན་བྱེད་དུ་འགྲོ་བ་དང་། དོན་བྱེད་རྫོགས་ནས་རང་གནས་སུ་འོང་བའི་བྱེད་བྱ་བྱེད་བྱེད་ཀྱི་རྩོལ་རྟོག་གི་རྣམ་པ་ག་ལ་ཡོད་དེ་མེད་དོ། །གལ་ཏེ་རྩོལ་རྟོག་གི་སྒོ་ནས་འགྲོ་འོང་དེ་ཡོད་ན་ནི་གཟུང་འཛིན་ཅན་དུ་འགྱུར་བས་སེམས་ཅན་དང་ཁྱད་མེད་དོ། །དྲུག་པ་མཛད་པ་བྱ་བྱེད་ཀྱི་རྩོལ་བ་མེད་པར་དོན་མཛད་ཚུལ་དང་། དྲང་། དཔེར་ན་སྒྱུ་མའི་འཁྲུལ་འཁོར་མཁན་གྱི་རྟ་གླང་སྣང་ཡང་བདེན་དངོས་ཀྱིས་སྟོང་པ་བཞིན་དུ། དོན་ཡེ་ཤེས་སྒྱུ་མའི་དཀྱིལ་འཁོར་གཟུགས་སྐུ་གཉིས་སུ་སྣང་ནས་འགྲོ་བ་སེམས་ཅན་རྣམས་གྲོལ་བར་བྱེད་པ་ཡི་དུས་སུ། དོན་བྱ་བའི་ཡུལ་དང་བྱེད་པའི་མཁན་པོ་དང་དོན་བྱ་བའི་དངོས་པོ་གསུམ་དུ་འཛིན་པ་མེད་པར་རང་རིག་པའི་སྐུ་དང་ཡེ་ཤེས་ཀྱི་དཀྱིལ་འཁོར་གྱི་ངང་ནས་སེམས་ཅན་གྱི་དོན་སྤྱོད་དེ་མཛད་པའོ། །བདུན་པ་དགོངས་པ་རྒྱུད་ཀྱི་གནས་ཚུལ་གཅིག་དང་དུ་མ་ལས་གྲོལ་བ་སྨྲ་བསམ་ལས་འདས་པར་བསྟན་པའོ། །དྲང་། དུས་འདས་པ་དང་། ད་ལྟར་དང་། མ་འོངས་པ་དང་གསུམ་དུ་ལམ་པ་རྣམས་རིམ་པ་ལྟར་སངས་རྒྱས་པའི་རྒྱལ་བ་རྣམས་ནི། ཁ་ཅིག་གིས་ཆོས་སྐུ་སྟོང་པའི་ངོ་བོ་ལ་ཐམས་ཅད་ཐ་དད་མེད་པར་འདོད་པ་དང་། ཁ་ཅིག་གིས་གཟུགས་སྐུའི་སངས་རྒྱས་ཙམ་དུ་འདྲ་ཡང་། སྦྱངས་པའི་ཡེ་ཤེས་མི་འདྲ་བས་མི་གཅིག་པར་འདོད་པ་དང་། དེ་དག་གི་ལོག་རྟོག་གི་བྱེ་བྲག་ཐ་དད་དག་པ་དེ་ཡང་འདི་ལྟ་སྟེ། སེམས་ཙམ་དང་སྔགས་ཕྱི་རྒྱུད་ཀྱིས་སངས་རྒྱས་ཐམས་ཅད་ཀྱི་དགོངས་པའི་ངོ་བོ་གཅིག་ཀྱང་། སྔོན་ལས་གྱིས་སྦྱངས་པ་མི་འདྲ་བའི་སྟོབས་ཀྱིས་འབྲས་བུའི་དུས་སུ་སྦྱངས་པའི་ཡེ་ཤེས་དང་གཟུགས་སྐུ་མ་འདྲེས་ཏེ། ཤིང་གི་མེ་དཔུང་ལྟར་དུ་འདོད་པ་དང་། དབུ་མས་སངས་རྒྱས་ཐམས་ཅད་དབྱིངས་སྟོང་པའི་ཆ་ནས་ཐ་དད་མེད་དེ། ཆུ་ལ་ཆུ་ཐིམ་པ་ལྟར་འདོད་པ་དེ་དག་ནི་ཐེག་འོག་དྲང་དོན་གྱི་སངས་རྒྱས་ཡིན་ལ། ཐེག་མཆོག་ངེས་དོན་གྱི་སངས་རྒྱས་ནི་ཡེ་གདོད་མ་ཉིད་ནས་ཀ་དག་ལྷུན་གྲུབ་དབྱེར་མེད་ཀྱི་དོན་མངོན་དུ་གྱུར་པའི་སངས་རྒྱས་ཀུན་གྱི་སྤྱིའི་གཟུགས་ཅན་ནི་དབྱིངས་དང་ཡེ་ཤེས་སམ། ཆོས་སྐུ་དང་གཟུགས་སྐུ་ཕྱོགས་རེར་བཟུང་བའི་མཐའ་ཐམས་ཅད་ལས་གྲོལ་བའི་ཕྱིར། དེས་ན་དབྱིངས་ཆོས་སྐུའི་ཆ་ནས་སངས་རྒྱས་ཐམས་ཅད་གཅིག་པ་དང་ཡེ་ཤེས་གཟུགས་སྐུའི་ཆ་ནས་སངས་རྒྱས་ཐམས་ཅད་མི་གཅིག་ཅེས་ངག་ཏུ་བརྗོད་པ་དང་ཡིད་ཀྱིས་བསམ་པའི་མཐའ་ཐམས་ཅད་ལས་འདས་ཏེ་ཆོས་ཀུན་མ་འདྲེས་ལ་ཡོངས་སུ་རྫོགས་པར་བཞུགས་པའོ། །དེ་ལྟར་ཕྱོགས་རེའི་གཟུང་འཛིན་ཐམས་ཅད་དང་བྲལ་བའི་དབྱེར་མེད་ཀྱི་ཡེ་ཤེས་ནི་འབྲས་བུ་མཐར་ཕྱིན་གྱི་དེ་བཞིན་གཤེགས་པ་སངས་རྒྱས་ཀུན་གྱིས་སྤྱི་གཟུགས་ཅན་གྱི་བཞུགས་གནས་ཡིན་ཅེས་རྒྱུད་རྒྱས་པ་ལས་གསུངས་པས་ན་ལུང་དེ་ཉིད་འདིར་དྲང་ཞིང་བགྲོད་པར་གྱིས་དང་གོ་བ་དང་ཐེ་ཚོམ་མེད་པར་ཡང་སླའོ། །མདོར་བསྡུས་ན་སྐུ་ལྔ་ལྷུན་གྲུབ་ཀྱི་སངས་རྒྱས་ནི་དཔེར་ན་རྒྱ་མཚོའི་ཆུ་དང་བརླབས་ལ་དབྱེ་བ་མེད་པ་བཞིན་དུ། གཟུགས་སྐུ་སྣ་ཚོགས་པ་གདུལ་བྱ་ལ་སྣང་དུས་དགོངས་པ་མཐར་འབྲས་ཆོས་སྐུ་ལས་མ་གཡོས་པ་ཡིན་ནོ། །དེ་ལྟར་སངས་རྒྱས་ཐམས་ཅད་དགོངས་པ་རྒྱུད་ཀྱི་བཞུགས་ཚུལ་ལས་དགག་བསྒྲུབ་ཀྱི་གཏན་ཚིགས་ལ་གཉིས་ཏེ། གཞན་ལུགས་དགག་པ་དང་། རང་ལུགས་བསྒྲུབ་པའོ། །དང་པོ་ལ་གཉིས་ཏེ། དབུ་མ་པས་སངས་རྒྱས་ཐམས་ཅད་སྟོང་པར་གཅིག་པར་འདོད་པ་དགག་པ་དང་། སེམས་ཙམ་དང་སྔགས་ཕྱི་རྒྱུད་པས་མ་འདྲེས་པར་འདོད་པ་དགག་པའོ། །དང་པོ་ལ་གཉིས་ཏེ། འདོད་པ་དགོད་པ་དང་། དེ་དགག་པའོ། །དང་པོ་ནི། དབུ་མས་དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་སྟོང་པ་ཉིད་དུ་རྒྱུད་གཅིག་པར་འདོད་པ་སྟེ། དཔེ་ན་ཆུ་ལ་ཆུ་ཐིམ་པའམ། མར་ལ་མར་བཞག་པ་བཞིན་དུ་འདོད་དེ། དེ་ཡང་མདོ་སྡེ་ལས། བདག་ཅག་ཅི་ལྟར་སངས་རྒྱས་པ། །དེ་ལྟར་ཁོ་ནར་སངས་རྒྱས་པས། །དཔེར་ན་མར་དང་མར་ཉིད་ཀྱི། །སྙིང་ཁུ་མཚུངས་པར་འགྱུར་བ་བཞིན། །ཅེས་པ་དང་། འཇུག་པ་ལས། འདི་ནི་སྤྲོས་དང་བྲལ་བ་རྣམས་ལ་སྣང་བར་འགྱུར། །ཞེས་སོ། །གཉིས་པ་དེ་དགག་པ་ལ་བཞི་སྟེ། རྒྱུ་རྐྱེན་གྱིས་བསྒྲུབ་པའི་འབྲས་བུ་མེད་པར་འགྱུར་བའི་སྐྱོན་དང་། འབྲས་བུ་སངས་རྒྱས་ཆད་པར་འགྱུར་བའི་སྐྱོན་དང་། མདོ་སྔགས་ཀྱི་འབྲས་བུ་ཁྱད་མེད་དུ་འགྱུར་བའི་སྐྱོན་དང་། རྒྱུ་འབྲས་མཚུངས་པའམ། ཐེག་པ་འོག་མའི་འབྲས་བུ་རྣམས་ལ་མཐོ་དམན་མེད་པར་འགྱུར་བའི་སྐྱོན་ནོ། །དང་པོ་ནི། ལམ་གྱི་དུས་སུ་ལྷ་བསྒོམ་པ་དང་། གཟུགས་སོགས་ལམ་དུ་ཁྱེར་བ་དོན་མེད་དུ་འགྱུར་བའི་སྐྱོན་དང་། རྒྱུད་རྟོག་ཚོགས་ཞེ་གཉིས་གནས་སུ་གྱུར་པ་ལས་འབྲས་བུ་སངས་རྒྱས་བཞི་བཅུ་རྩ་གཉིས་ལ་སོགས་པ་མི་ཐོབ་པར་འགྱུར་བ་དང་། རྒྱུ་རྣམ་ཤེས་ཚོགས་བརྒྱད་གནས་སུ་གྱུར་པས་འབྲས་བུ་ཡེ་ཤེས་ལྔ་མི་ཐོབ་པར་འགྱུར་ཏེ། མཐར་ཐུག་སྟོང་པ་ཕྱོགས་གཅིག་ལས་མེད་པའི་ཕྱིར་རོ། །དེ་ཡང་ཨིནྟྲ་བྷོ་དྷིས། དེ་ཐོབ་རྒྱུད་རྣམས་ཅི་ལྟ་བ། །སོ་སོ་རྣམ་པ་ཐ་དད་པས། །སྒྲུབ་པས་དེ་བཞིན་གཤེགས་པའི་ཚེ། །རྒྱུད་དག་ལྷུན་གྲུབ་རྒྱལ་བ་རྣམས། །རྒྱུད་གཅིག་འདྲེས་ན་འདི་སྐད་འབྱུང་། །ཞེས་པ་དང་། ཡང་། དེ་ཕྱིར་སངས་རྒྱས་ཐམས་ཅད་ཀྱི། །ཡེ་ཤེས་རྒྱུ་ནི་མ་འདྲེས་ཏེ། །བཞི་ན་ངེས་ལུང་འདི་དང་འགལ། །གཅིག་ལ་མཐུན་སྣང་སྒྲ་མི་འཇུག །ཅེས་པ་དང་། ལམ་ཆུང་ལས། འོན་ཏེ་ཐམས་ཅད་གཅིག་ཅེ་ན། །གནས་གྱུར་རྫུན་ཞིང་སྟོང་མཐར་འགྱུར། །ཞེས་པ་དང་། ལམ་རིམ་ལས། ཚོགས་བརྒྱད་ཡེ་ཤེས་ལྔར་རྟོགས་པ། །ཞེས་པ་དང་། ཡང་། ལམ་ཆུང་ལས། ཡེ་ཤེས་ལྔ་ཡང་རང་བྱུང་གི། །ཆ་ལྔས་བཏགས་ཀྱི་གཞན་ན་མེད། །དེ་ཕྱིར་གཅིག་མཐར་ལྟུང་བ་མེད། །ཅེས་སོ། །གཉིས་པ་ནི། རྒྱལ་བ་ཐམས་ཅད་ཀྱི་དགོངས་པ་སྟོང་པ་ཕྱོགས་གཅིག་པ་ཡིན་པར་ཐལ། འདོད་ན། འདི་ཉིད་ལས། གཉིས་མེད་སེམས་སུ་མངོན་བྱས་པ། །བདེན་གཉིས་དབྱེར་མེད་རྡོ་རྗེའི་སྐུ། །ཆུ་ཡི་ཟླ་བ་ལྟ་བུ་ལ། །རང་བཞིན་ཀུན་དང་ཐ་མི་དད། །ཅེས་གསུངས་པ་དང་འགལ་ལོ། །གཞན་ཡང་ཅི་ཡང་མེད་པ་དང་། ཉན་ཐོས་ལྷག་མེད་དང་། མུ་རྟུག་དང་། མུ་སྟེགས་རྒྱང་འཕེན་པ་དང་ཁྱད་པར་མེད་པར་འགྱུར་ཏེ། སྣང་བ་སྤངས་པའི་ཕྱིར་རོ། །དེ་ཡང་རྣམ་བཀོད་ལས། གལ་ཏེ་སྔ་ཕྱི་གཅིག་འགྲོ་ན། །སྟོང་པའི་མུར་ཐིམ་རིགས་པས་འགལ། །སྣང་བ་སྤངས་པའི་སྐྱོན་དུ་འགྱུར། །མཐའ་ལ་ཐུག་པར་ཐེ་ཚོམ་མེད། །ཅེས་སོ། །གསུམ་པ་ནི། ཉན་རང་ལྷག་མེད་དང་། དབུ་སེམས་སྔགས་ཕྱི་ནང་གི་སངས་རྒྱས་ལ་དགོངས་པ་ཁྱད་མེད་དུ་ཐལ། དགོངས་རྒྱུད་གཅིག་པའི་ཕྱིར། འདོད་ན། ཁྱད་ཡོད་པས་འགལ་ཏེ། དེ་ཉིད་ལས། སོ་སོའི་གྲུབ་མཐའི་ཁྱད་པར་ཡང་། །མི་འབྱུང་མཉམ་པའི་སྐྱོན་དུ་འགྱུར། །སོ་སོར་བསྒྲུབ་ཕྱིར་གཅིག་པ་འགལ། །གལ་ཏེ་རྒྱལ་བའང་རང་རྒྱུད་འགྱུར། །ཞེས་པ་དང་། ལམ་རིམ་ལས། གྲངས་རྫོགས་ངོ་བོ་བྱིན་རླབས་ལས། །སྣང་དང་དོན་བྱེད་ཆེ་ཆུང་གིས། །དཔགས་པས་ངོ་བོ་ཉིད་ཀྱིས་གསལ། །དེ་ཚུལ་ས་བཞི་རྒྱལ་བ་དག །རྒྱུད་གཅིག་འདྲེས་དང་གྲོལ་སྨྲ་བ། །འདིར་དྲང་ཙམ་ཡིན་བཤད་ཡིན་ཕྱིར། །རྒྱུད་ཀྱི་ཁྱད་པར་བསམ་ལས་འདས། །ཞེས་སོ། །བཞི་པ་ནི། འོག་མའི་འབྲས་བུ་ནས་གོང་མའི་འབྲས་བུར་འཇུག་པ་མེད་པར་ཐལ། སངས་རྒྱས་རྣམས་དགོངས་རྒྱུད་གཅིག་པའི་ཕྱིར། འདོད་ན། ཅི་སྐད་དུ། ཁྱོད་ཀྱིས་འབྲས་བུ་ཀུན་ཏུ་འོད། །ཐབས་ཆེན་ཐེག་པའི་བསྟི་གནས་ཡིན། །ཞེས་པ་དང་། ལམ་རིམ་ལས། ལམ་གྱི་རྩོལ་བས་ངལ་བ་རྣམས། །བྲོད་པ་བསྐྱེད་པའི་ཕྱིར་ཀུན་ཏུའོ། །རྡོར་འཛིན་སྟུག་པོ་བཀོད་པར་བསྟན། །ཅེས་པ་དང་། རང་ས་ཐོབ་ལས་ངོ་བོ་ཉིད། །གཅིག་པར་སྨྲ་བ་མུན་སྤྲལ་པའོ། །ཞེས་སོ། །གཞན་ཡང་མདོ་དགོངས་འདུས་ཀྱི་ནང་དུ་ཁྱེའུ་ལྔ་འབྲས་བུ་ལ་འཇུག་པ་དང་། གསང་སྙིང་ལེའུ་དྲུག་པ་ལས་སྤར་ཁབ་མཁན་པོས་འབྲས་འཇུག་ལྟར་བཤད་པ་དང་། ལམ་ཆུང་ལ་སོགས་པ་རྣམས་ཀྱི་ནང་དུ་བཤད་པས་སྤངས་དཀའོ། །གཉིས་པ་དགོངས་རྒྱུད་ཐ་དད་དུ་འདོད་པ་དགག་པ་ལ་གཉིས་ཏེ། གཞན་གྱི་འདོད་པ་དགོད་པ་དང་། དེ་དགག་པའོ། །དང་པོ་ནི། འབྲས་བུ་དུས་གསུམ་གྱི་རྒྱལ་བ་རྣམས་སངས་རྒྱས་ཙམ་དུ་མཚུངས་ཀྱང་། ལམ་གྱི་སྦྱངས་པའི་རྩལ་ཐ་དད་པའི་དབང་གིས། འབྲས་བུ་དགོངས་པའི་རྒྱུད་རང་མཚན་མ་འདྲེས་ཏེ། དཔེར་ན་ཤིང་དུ་མའི་མེ་བཞིན་ནོ། །གཉིས་པ་དེ་དགག་པ་ལ་ཀུན་ཁྱབ་གསུམ་ལས། དང་པོ་ལུང་ཚད་མ་ནི། མདོ་དགོངས་འདུས་ལས། ནམ་མཁའ་ཀུན་ཁྱབ་རྒྱལ་བ་དང་། །ཉག་གཅིག་སྣང་བའི་རྒྱལ་བ་གཉིས། །གདུལ་བྱའི་དབང་གི་ཁྱད་པར་ལས། །སྐུ་དང་གསུང་ཐུགས་གཅིག་ལས་མེད། །ཅེས་པ་དང་། རྩེ་མོ་བྱུང་རྒྱལ་ལས། སངས་རྒྱས་རྣམས་ཀྱི་དགོངས་རྒྱུད་ཅི་ལྟ་བུ། །རང་གི་མཚན་ཉིད་མ་བཅོས་དེ་བཞིན་ཉིད། །ཅེས་སོ། །གཉིས་པ་མན་ངག་ཚད་མ་ནི། རྣམ་བཀོད་ལས། འོན་ཏེ་དེ་ལྟར་མི་གཅིག་ནའང་། །རང་རིག་རང་བྱུང་མངོན་བྱས་ལ། །སྔ་ཕྱིའི་སངས་རྒྱས་བླ་དྭགས་བཏགས། །རང་བྱུང་རང་ལ་ཤར་བར་ཟད། །རང་བྱུང་རིགས་དང་རྒྱུད་མེད་པར། །སོ་སོ་ཐ་དད་གང་གི་རུང་། །འོན་ཏེ་རང་བྱུང་ཆ་གཉིས་འགྱུར། །དོན་མཛད་རེས་མོས་འབྱུང་བར་འགྱུར། །སྤྱན་དྲང་བྱོན་དང་མི་བྱོན་འབྱུང་། །སངས་རྒྱས་སངས་རྒྱས་ཞེས་བརྗོད་པ། །དངོས་པོ་རྣམས་ཀྱི་དེ་ཉིད་ནི། །དེ་ལ་གཉིས་པ་ཡོད་པར་འགྱུར། །དེ་ཕྱིར་གཞི་ཡི་དོན་དང་འགལ། །མི་གཅིག་གཏན་ཚིགས་རྒྱས་པར་འགྱུར། །ཞེས་པ་དང་། ལམ་ཆུང་ལས། རྒྱལ་བ་ཀུན་དང་དུས་གསུམ་ཆོས། །བདག་ཕྱིར་ཀུན་གྱི་སྤྱི་གཟུགས་ཅན། །ཆོས་གཉིས་ཡོད་པ་གང་གི་རུང་། །ཡོད་ན་བདག་ཉིད་ཆེན་པོ་རྫུན། །ཅེས་པ་དང་། ལམ་རིམ་ལས། གཅིག་ཤོས་བདེན་པར་མ་ཡིན་པས། །སོ་སོར་ཐ་དད་ཆ་རིགས་མེད། །ཅེས་པ་དང་། ངོ་བོ་གཅིག་ལ་རྒྱུད་འདྲེས་མིན། །ཤིང་གི་མེ་དཔུང་ལྟར་བརྗོད་པ། །དྲང་པ་ཙམ་སྟེ་དེ་ཉིད་མིན། །ཅེས་སོ། །གསུམ་པ་རིག་པ་ཚད་མ་ལ་དགག་པ་ལ་ལྔ་སྟེ། གཞི་ལ་བཟང་ངན་ཐ་དད་ཅན་དུ་ཡོད་པར་ཐལ་བ་དང་། འབྲས་བུ་རང་བྱུང་ཡེ་ཤེས་སུ་མི་གཅིག་པར་འགྱུར་བ་དང་། དོན་རེས་མོས་སུ་བྱེད་པར་འགྱུར་བ་དང་། ལྷ་སྤྱན་དྲང་བ་ལ་བྱོན་མི་བྱོན་ཡོད་པར་འགྱུར་རོ། །དང་པོ་ནི། སངས་རྒྱས་ཞེས་བྱ་བ་གཞི་གནས་ལུགས་ཀྱི་དོན་མངོན་སུམ་བྱས་པ་ལ་དགོངས་པ་གཅིག་ཡིན་ནམ་མ་ཡིན། ཡིན་ན་དགོངས་རྒྱུད་ཐ་དད་དུ་འདོད་པ་དང་འགལ། མིན་ན་དགོངས་པ་གང་ཡིན། ཡིན་ཀྱང་དགོངས་རྒྱུད་ཐ་དད་ན། གཞི་བཟང་ངན་ཅན་དུ་ཐལ་ཏེ། གཞི་མངོན་དུ་བྱས་པའི་སངས་རྒྱས་རྣམས་དགོངས་རྒྱུད་ཐ་དད་པའི་ཕྱིར་རོ། །དེ་ཡང་རྣམ་བཀོད་ལས། སངས་རྒྱས་སངས་རྒྱས་ཞེས་བརྗོད་པ། །དངོས་པོ་རྣམས་ཀྱི་དེ་ཁོ་ན། །དེ་ལ་གཉིས་པ་ཡོད་པར་འགྱུར། །དེ་ཕྱིར་གཞི་ཡི་དོན་དང་འགལ། །ཅེས་སོ། །གཉིས་པ་ནི། འབྲས་བུ་སྐུ་ཡེ་ཤེས་ཀྱི་དུས་སུ་རང་བྱུང་ངམ་ཅི་ལྟ་བ་མཁྱེན་པ་མི་གཅིག་པར་ཐལ། འདོད་ན། ལུང་ལས། རང་བྱུང་ཡེ་ཤེས་ཉག་གཅིག་ལ། །གདུལ་བྱའི་མོས་དང་བསམ་དབང་གིས། །ཁྱད་པར་བྱེ་བྲག་ལྔ་སོགས་སྣང་། །རིགས་རྒྱུད་དོན་ལ་གཅིག་ཏུ་གནས། །ཞེས་པ་དང་། རྣམ་བཀོད་ལས། འོན་ཏེ་དེ་ལྟར་མི་གཅིག་ན། །རང་རིག་རང་བྱུང་མངོན་བྱས་ལ། །སྔ་ཕྱིའི་སངས་རྒྱས་བླ་དྭགས་ཙམ། །རང་བྱུང་རང་ལ་ཤར་བར་ཟད། །རང་བྱུང་རིགས་དང་རྒྱུད་མེད་པར། །སོ་སོར་མ་འདྲེས་གང་གིས་རུང་། །ཞེས་པ་དང་། ལམ་རིམ་ལས། ཤིང་གི་མེ་དཔུང་ལྟར་བརྗོད་པ། །དྲང་བ་ཙམ་སྟེ་ཉི་དེ་མིན། །ཅེས་སོ། །གསུམ་པ་ནི། དགོངས་པ་ཐ་དད་ན་སྤྲུལ་པ་ཡང་ཐ་དད་པས། སྤྲུལ་སྐུ་བྱང་ཆུབ་སེམས་དཔའ་ལ་སྣང་བ་དེ་གདུལ་བྱ་ཐམས་ཅད་ལ་མཐུན་པར་སྣང་བར་ཐལ་ཏེ། སྤྲུལ་པ་གཅིག་ལ་དུ་མར་སྣང་བ་མེད་དེ། ཐ་དད་པའི་ཕྱིར། ལམ་ཆུང་ལས། ཉི་ཟེར་ཉི་མའམ་ཤིང་མེ་བཞིན། །ངོ་བོ་གཅིག་ལ་ཡེ་ཤེས་རྒྱུད། །སོ་སོ་ཡིན་ན་སྤྲུལ་པ་ཡང་། །གདུལ་བྱ་གཅིག་ལ་མཐུན་སྣང་བའང་། །སེམས་དཔའ་ཆེ་དང་ཁྱད་མེད་འགྱུར། །ཞེས་སོ། །བཞི་པ་ནི། རྒྱལ་བས་སེམས་ཅན་གྱི་དོན་བྱེད་པའི་ཚེ། བགོ་བཤའི་ཚུལ་གྱི་རེས་མོས་སུ་བྱེད་པར་ཐལ་ཏེ། དོན་བྱེད་མཁན་ཐ་དད་པའི་ཕྱིར་རོ། །འདོད་ན་ཕྱོགས་མེད་ལྷུན་གྲུབ་ཏུ་བཤད་པ་དང་འགལ་ཏེ། གསང་སྙིང་ལས། ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ་ཧོ། །ཞེས་སོ། །ལྔ་པ་ནི། རྒྱུད་ཐ་དད་ན་སྐལ་ལྡན་རྣམས་ཀྱིས་ཞི་བའི་ལྷ་སྤྱན་དྲངས་པའི་ཚེ། ཞི་བའི་ལྷ་བྱོན་ལ། ཁྲོ་བོའི་ལྷ་མི་བྱོན་པར་ཐལ་བ་ལ་སོགས་པའི་སྐྱོན་དུ་མ་ཡོད་དེ། དཔེར་ན་མགྲོན་པོ་བོས་མ་བོས་བཞིན་ནོ། །དེ་ཡང་ལམ་ཆུང་ལས། སྤྱན་དྲངས་བྱོན་དང་མི་བྱོན་འབྱུང་། །གཞི་དོན་ལུང་རིགས་ཀུན་དང་འགལ། །ཐུགས་རྗེ་ཆེ་བའི་རིགས་ཆད་འགྱུར། །ཞེས་སོ། །གཉིས་པ་རང་ལུགས་ནི། ཤེས་བྱའི་གཤིས་ལ་དོན་དམ་དང་ཀུན་རྫོབ་དབྱེར་མེད་པས། དེ་ཉིད་མངོན་དུ་བྱས་པ་མཐར་ཕྱིན་པས་སངས་རྒྱས་ཀུན་གྱི་སྤྱིའི་གཟུགས་ཅན་ཐོབ་པ་ནི་མཐར་ཐུག་གི་འབྲས་བུ་སངས་རྒྱས་ཞེས་བྱ་བར་མིང་འདོགས་ཏེ། དེ་ཡང་དགོངས་པ་གཅིག་དང་དུ་མིའི་མཐའ་ལས་གྲོལ་བའི་ཚུལ་དུ་བཞུགས་ཏེ། དཔེར་ན་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་མ་འདྲེས་པའི་ངོས་ནས་བཞུགས་པས་གཅིག་གི་མཐའ་ལས་གྲོལ་ལ། སངས་རྒྱས་ཐམས་ཅད་དགོངས་པ་མཉམ་པ་ཉིད་གཅིག་ལ་བཞུགས་པས་དུ་མའི་མཐའ་ལས་གྲོལ་བའོ། །དེ་ཡང་གསང་སྙིང་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །ཅེས་པ་དང་། ལས་རིམ་ལས། མཉམ་པ་གསུམ་པ་ཡིན་པའི་ཕྱིར། །ངེས་པར་རྒྱུད་འདྲེས་མ་འདྲེས་པའི། །ཐ་སྙད་བྲལ་བའི་ཚུལ་དུ་གནས། །ཞེས་པ་དང་། ལམ་ཆུང་ལས། འཁོར་བ་མྱ་ངན་འདས་ཀུན་དངོས། །སྨྲ་བསམ་བྲལ་བས་འདི་འདྲར་མེད། །ཅེས་པ་དང་། རྣམ་བཀོད་ལས། མཚོ་ཉིད་རླབས་ལྟར་ཐམས་ཅད་ཀུན། །གདོད་ནས་རང་བྱུང་ཡེ་ཤེས་གཅིག །ཡེ་ཤེས་དེ་ཉིད་འདི་འདྲར་དཀའ། །མཐའ་བརྗོད་མ་ལུས་དེར་སྣང་ཕྱིར། །དུ་མ་ཉིད་དུ་གཅིག་པའོ། །དུ་མར་རྒྱ་ཆད་ཡོད་གྱུར་ན། །རང་བྱུང་རང་སྣང་བདེན་མི་འགྱུར། །ཞེས་པ་དང་། དགོངས་འདུས་ལས། རྟག་པར་ཡང་ཟུངས་ཤིག །མི་རྟག་པར་ཡང་ཟུངས་ཤིག །མེད་པར་ཡང་ཟུངས་ཤིག །གཅིག་པར་ཡང་ཟུངས་ཤིག །ཐ་དད་པར་ཡང་ཟུངས་ཤིག །ཐ་དད་ཀྱི་ངོ་བོ་ལས་གྲོལ་བར་ཟུངས་ཤིག །ཅེས་པ་དང་། སྤར་ཁབ་ཀྱི་ནང་དུ་འབྲས་བུའི་སྐབས་ཐམས་ཅད་དུའང་དེ་ལྟར་དུ་གསུངས་སོ། །དེ་ལྟར་རྒྱུད་གཅིག་འདོད་པ་ནི་རྟེན་མེད་ཀྱི་དོན་བྱེད་པ་ཡིན་ལ། མ་འདྲེས་པར་འདོད་པ་ནི་རྟེན་ཅན་གྱིས་དོན་བྱེད་པར་འདོད་པ་ཡིན་ཅིང་། རང་ལུགས་ནི་དབྱེར་མེད་ངོ་བོ་ཉིད་ཀྱིས་དོན་བྱེད་པར་འདོད་པའི་ལུགས་སོ། །གཉིས་པ་མཚན་ནོ། །དྲང་། ཐུགས་ཀྱི་ཐིག་པ་ལས་འབྲུ་མཐུན་ཟུག་རྔུ་མེད་ཅིང་ནར་སོན་པས་བདེ་བར་གཤེགས་པ་རྟོགས་པའི་རིག་པ་ལ་སྐུ་དང་ཡེ་ཤེས་སུ་རང་སྣང་བའི་གཞུང་གི་ཚིག་དོན་གྱི་མཚམས་གཅོད་ཅིང་འཛིན་པས་ན་ལེའུ་ཞེས་བྱ་སྟེ་ཡས་བགྲང་བཞི་བའི་དོན་དུ་གདའོ།། ༈ །།སྤྱི་དོན་གསུམ་པ་ཞབས་ཀྱི་དོན་ནོ། །དྲང་། དཔེར་ན་ནམ་མཁའ་ལ་འཇའ་ཚོན་ཤར་བ་བཞིན་དུ་ཐུགས་སྒྱུ་འཕྲུལ་དྲ་བའི་རྒྱུད་དོན་རྣམས་མ་འདྲེས་པར་བཀྲ་ཞིང་གསལ་བར་བྱེད་པའི་མན་ངག་ཐུགས་ཐིགས་འདི་བརྩམས་པས་རྒྱུད་ཀྱི་དོན་བཤད་པ་ལ། གཞུང་འདི་བཞིན་དུ་ཆོས་སྤྱི་དང་རང་གི་མཚན་ཉིད་མི་ཤེས་པར་མཁས་པར་རློམ་པའི་ང་རྒྱལ་སྙོམས་ཤིང་ཁམས་གསུམ་གྱི་ཉོན་མོངས་ཀྱི་དགྲ་ཀུན་ལས་རྒྱལ་བ་འདི་ནི། དཔེར་ན་གཤིས་ནས་དཔའ་བོའི་རུ་མཚོན་གནམ་ལྕགས་ཤགྟི་སྟེ་རལ་གྲི་ཕྱར་བ་དང་འདྲ་བའི་ཐུགས་ཐིགས་འདི། རྩོམ་པ་པོས་རང་བཟོ་མ་ཡིན་ཏེ། ཐུགས་སྒྱུ་འཕྲུལ་དྲྭ་བའི་རྒྱུད་ཀྱི་དོན་བཅུད་སྣང་བ་བཞི་པོ་གཅིག་ཐོག་ན་གཅིག་འོང་བས་འཁོར་ལོ་དང་འདྲ་བ་འདི། དཔེར་ན་བྱ་ངང་པའི་རྒྱལ་པོའི་མཆུ་ལ་སྐྱུར་རྩི་ཡོད་པ་དེས་རྒྱ་མཚོའི་ནང་ན་འོ་མ་ཐིག་གཅིག་ཡོད་ན་སྡུད་པ་ལྟར། ཐུགས་ཀྱི་རྒྱུད་སྡེ་རྒྱ་མཚོ་དང་འདྲ་བའི་ནང་ནས་སློབ་དཔོན་སངས་རྒྱས་གསང་བའི་ཉེར་ལེན་གྱི་ཤེས་རབ་སྐྱུར་རྩི་དང་འདྲ་བ་དེས། འོ་མ་དང་འདྲ་བའི་སྣང་བ་བཞིའི་མན་ངག་འདི་ཉིད་བླངས་པའི་དགེ་བ་དེས། གསང་དོན་མི་ཤེས་ཤིང་ཉོན་མོངས་པའི་དྲ་བར་ཆུད་པའི་གང་ཟག་རྣམས་ཀྱིས་རང་བཞིན་གསང་བའི་སྙིང་པོའི། དོན་རྟོགས་ནས་སངས་རྒྱས་པར་ཤོག་ཅིག་ཅེས་སྨོན་ལམ་རྒྱ་ཆེན་པོ་བཏབ་པའོ། །ཐུགས་ཀྱི་ཐིགས་པའི་སྒྱུ་འཕྲུལ་ནི་འབྲུ་མཐུན། སྤྱི་དོན་གྱི་ཁོག་དབུབ་པ་དང་། གཞུང་དོན་གྱི་ས་གཅོད་པའི་དོན་ནོ། །རྫོགས་སོ་ནི་ཚིག་དོན་མ་ལུས་པའི་ཐ་ཚིག་གམ། གནས་སྐབས་རེ་ཞིག་རྫོགས་ནས་བཤད་དུ་མ་མཆིས་པས་དོན་དུ་གདའོ།། ༈ །།རྒྱལ་བའི་བསྟན་པ་དམ་ཆོས་བདུད་རྩིའི་བཅུད། །བཀའ་བརྒྱུད་དྲི་མེད་གཞུང་མང་རྒྱ་ཆེ་དང་། །མཁས་པའི་འགྲེལ་དང་ཊཱིཀ་བསྟན་ཆོས་དང་། །ཟབ་མོའི་གདམས་ངག་དགོངས་པའི་གཏེར་མཛོད་ལས། །ལེགས་དཔྱད་ཤེས་རབ་རྣམ་གྲོལ་ལྡེ་མིག་གིས། །དོན་གྱི་གནད་གདམས་དགོངས་པའི་བཅུད་བླངས་འདི། །རྗེ་ཡི་གསུང་དང་རང་གི་ཉམས་མྱོང་གིས། །ལུང་དང་མན་ངག་མི་འགལ་རིག་པར་སྦྱར། །འོན་ཀྱང་འགྲེལ་རྩམ་ཚད་ལྡན་ནུས་མེད་ཀྱང་། །དོན་གཉེར་གཞན་གྱིས་བསྐུལ་ཕྱིར་འདི་བརྩམ་པ། །འཁྲུལ་ན་བཟོད་གསོལ་མ་འཁྲུལ་དགེ་བ་དེས། །འགྲོ་རྣམས་ཐམས་ཅད་མཁྱེན་པའི་ས་ཐོབ་ཤོག །གསང་སྔགས་རྡོ་རྗེ་ཐེག་པའི་རྒྱུད་མཆོག་སྒྱུ་འཕྲུལ་དྲྭ་བ་སྟོང་ཕྲག་བརྒྱ་བའི་བཅུད་བསྡུས་པ། རྒྱ་གར་གྱི་མཁས་གྲུབ་ཆེན་པོ་སངས་རྒྱས་གསང་བས་མཛད་པའི་ཐུགས་ཐིགས་ཀྱི་འགྲེལ་བཤད་འདི་ཉིད། བླ་མ་བརྒྱུད་པ་མཁས་བཙུན་གོང་མ་རྣམས་ཀྱི་འགྲེལ་བཤད་གསུང་སྒྲོས་ཚད་མ་རྣམས་དང་། ཁྱད་པར་དུ་བདག་ལ་དྲིན་ཆེ་བའི་མཁས་གྲུབ་ཡབ་སྲས་ཀྱི་ཞལ་ཤེས་ངོ་སྤྲོད་ཀྱི་མན་ངག་ལ་བརྟེན་ནས། མཁས་བཙུན་རྣམས་ཀྱིས་ཡང་ཡང་བསྐུལ་བའི་ངོར། ཤཀྱཱའི་དགེ་སློང་ནམ་མཁའ་དཔལ་གྱིས་ས་ཕོ་སྤྲེལ་གྱི་ལོ་ཟླ་བ་དགུ་པའི་ཡར་ཚེས་ལ། ཀཿཐོག་རྡོ་རྗེའི་གདན་མ་ག་དྷ་གཉིས་པ་ཆོས་གླིང་དགོན་དུ་སྦྱར་བ་རེ་ཞིག་རྫོགས་སོ།། །།