༄༅། ། འཇམ་དཔལ་གྱི་ཚོགས་མཆོད་བཞུགས་སོ། །
འཇམ་དཔལ་ལས་ཐམས་ཅད་གྲུབ་པའི་ཚོགས་མཆོད་ནི། ཤ་ཆང་སོགས་ཚོགས་རྫས་ཅི་འབྱོར་པ་འདུ་བྱས་ལ། ཐོག་མར་མཚམས་བཅད་པ་ནི། ཧཱུྃ་ཧཱུྃ། གང་དག་གསང་བའི་འདུ་བར་མི་འོས་པ། ། ཐམས་ཅད་འདའ་མེད་རྡོ་རྗེ་སྲུང་བའི་གུར། ། ཕྱི་དང་ནང་དང་གསང་བ་དེ་ཁོ་ནའི། ། མཚམས་ཀྱི་དཀྱིལ་འཁོར་རང་བཞིན་ལྷུན་གྱིས་གྲུབ། ། ཨོཾ་ཨཱཿབཛྲ་རཀྵ་རཀྵ་མུ་ཧཱུྃ་བྷྲཱུྃ། དེ་ནས་མཆོད་རྫས་བྱིན་གྱིས་བརླབས་པ་ནི། ཧཱུྃ་དམར་པོ་ལས་ཁྲོ་མོ་དབྱིངས་ཕྱུག་མ་བསྐྱེད་བཟླས་ཞུ་བ་ལས་བསངས་ཆུ་ནུས་ལྡན་དུ་བསྒྲུབས་ལ། བདག་གནས་ཡོ་བྱད་ཐམས་ཅད་ལ་འཐོར་ནས། ཨོཾ་བཛྲ་མ་ཧཱ་ཀྲོ་དྷི་ཤྭ་རི་སརྦ་དྲ་བྱམ་ཤོ་དྷ་ནེ་ཧཱུྃ་ཕཊ༔ རྃ་ཡྃ་ཁྃ། ཡེ་ཤེས་སྒྱུ་མར་རོལ་པའི་མདངས། ། རིག་པའི་ཡེ་ཤེས་མེ་ང་ཆུས། ། ཚོགས་ཀྱི་དངོས་པོ་བསྲེག་གཏོར་བཀྲུས། ། ཨཱཿལས་རིན་ཆེན་སྣོད་ཡངས་སུ༔འབྲུ་གསུམ་ཨོཾ་ཨཱཿཧཱུྃ་མཆན་འོད་དུ་ཞུ་བ་ལས། ། ཕྱི་ནང་གསང་བའི་ཚོགས་མཆོད་སྤྲིན། ། ཀུན་ཏུ་བཟང་པོའི་རྣམ་རོལ་ནི། ། ཟག་མེད་ཡེ་ཤེས་བདུད་རྩིར་གྱུར། ། ཨོཾ་ཨཱཿཧཱུྃ་ཧ་ཧོ་ཧྲཱིཿ ཚོགས་ལ་སྤྱན་འདྲེན་པ་ནི། ཧཱུྃ་ཧྲཱིཿ ཚོགས་ཁང་ཡེ་ཤེས་རོལ་པའི་གཞལ་མེད་ཁང༌། ། ཚོགས་ཀྱི་དམ་རྫས་ཡེ་ཤེས་བདུད་རྩིའི་སྤྲིན། ། ཚོགས་མཆོག་འདུ་བ་ཆེན་པོའི་དཀྱིལ་འཁོར་འདིར། ། འཇིག་རྟེན་ལྷ་མིར་བཅས་ལ་སྨན་སླད་དུ། ། ཕྱོགས་བཅུ་མཐའ་ཡས་སངས་རྒྱས་ཞིང་བཞུགས་པའི། ། དེ་
བཞིན་གཤེགས་དང་རྡོ་རྗེ་རིན་པོ་ཆེ། ། པདྨ་དང་ནི་ལས་ཀྱི་རིགས་ཀུན་དང༌། ། རིགས་རྣམས་ཀུན་གྱི་ཁྱབ་བདག་མཉྫུ་ཤྲཱིཿ རང་གི་ལྷ་མོ་དག་དང་འཁོར་དུ་བཅས། ། བདག་ཅག་དད་པས་མཆོད་ཕྱིར་སྤྱན་འདྲེན་ན། ། ཀུན་ཏུ་བཟང་པོའི་སྨོན་ལམ་རྗེས་དགོངས་ནས། ། ཐུགས་རྗེ་ཐུགས་དམ་དབང་གིས་གཤེགས་སུ་གསོལ། ། དམིགས་མེད་མཁའ་ལྟར་ཁྱབ་ཅིང་དག་པའི་སྐུ། ། སྤྱན་འདྲེན་གཤེགས་སུ་གསོལ་བར་མི་དམིགས་ཀྱང༌། ། ཐུགས་རྗེའི་ངང་ཉིད་ཆོས་དབྱིངས་དག་པ་ལས། ། ཡེ་ཤེས་སྒྱུ་མར་རོལ་ཞིང་གཤེགས་སུ་གསོལ། ། ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང༌། ། བྱམས་པའི་ཞགས་པས་གནས་ནས་སྤྱན་དྲངས་ཏེ། ། དགའ་བའི་ལྕགས་སྒྲོག་ཕོ་ཉས་གནས་སྟོབ་ལ། ། བཏང་སྙོམས་དྲིལ་བུས་རྣམ་གྲོལ་དགྱེས་པ་བསྐྱེད། ། ཨོཾ་མཉྫུ་ཤྲཱི་ས་པཱ་རི་ཝཱ་ར་བཛྲ་ས་མ་ཡ་ཛཿ ཛཿཧཱུྃ་བཾ་ཧོཿ ཞེས་སྤྱན་དྲངས་ནས་བཞུགས་སུ་གསོལ་བ་ནི། ཧཱུྃ། རྒྱལ་བའི་སྐུ་ལ་བཞེངས་བཞུགས་མི་མངའ་ཡང༌། ། ཡེ་ཤེས་ངང་དུ་མི་གཉིས་གཅིག་པས་ན། ། ཐབས་དང་ཤེས་རབ་ཏིང་འཛིན་དཀྱིལ་འཁོར་འདིར། ། མི་གཡོ་དགྱེས་ཤིང་བརྟན་པར་བཞུགས་སུ་གསོལ། ། བཛྲ་ས་མ་ཡ་ཏིཥྛ་ལྷན། ཕྱག་འཚལ་བ་ནི། ཧཱུྃ། ཆོས་སྐུ་སྐྱེ་བ་མེད་པའི་རང་བཞིན་ལས། ། གཟུགས་སྐུ་སྒྱུ་མར་སྐྱེ་བའི་སྐུར་སྟོན་ཅིང༌། ། ཐུགས་རྗེས་ཀུན་ལ་ཁྱབ་པར་དོན་བྱེད་པ། ། བཅོམ་ལྡན་འཇམ་པའི་དབྱངས་ལ་ཕྱག་འཚལ་ལོ། ། ཨ་ཏི་པཱུ་ཧོཿ པྲ་ཏཱིཙྪ་ཧོཿམཆོད་པ་འབུལ་བ་ནི། ཧཱུྃ། བདེ་བར་གཤེགས་སོ་བཅོམ་ལྡན་འདས། ། རྒྱལ་
བ་རྒྱ་མཚོའི་ཡེ་ཤེས་ཀྱིས། ། སྲིད་པ་རྒྱ་མཚོ་མཐའ་ཡས་ཀུན། ། ཀུན་བཟང་མཆོད་སྤྲིན་མཆོག་ཏུ་རོལ། ། ཨོཾ་ཨ་ནུཏྟ་ར་སརྦ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཧཱུྃ། ཤིན་ཏུ་སྒེག་པའི་གཟི་བརྗིད་འབར། ། ཡིད་བཞིན་རིན་ཆེན་ཕྲེང་བ་འབར། ། དབྱངས་གསལ་ཡིད་འཕྲོག་གཟི་ལྡན་འབར། ། གཟུགས་མཛེས་བསྐྱོད་པ་ཕྱོགས་བཅུར་གཡོ། ། ཀུན་ཏུ་ཚིམ་བྱེད་དྲི་བསུང་ཐིམ། ། བལྟ་མཛེས་རིན་ཆེན་ཕུང་པོར་འཕྲོ། ། འོད་གསལ་འཚེར་བས་ཀུན་ཏུ་གསལ། ། བདུད་རྩི་བསིལ་དྲོ་འཇམ་པའི་དབྱིངས། ། རིག་པའི་རླབས་ལས་བྱུང་བ་ཡི། ། ལྷ་མོའི་ཚོགས་ཀྱི་མཆོད་པ་འདི། ། གར་དང་དབྱངས་སུ་བཅས་ནས་འབུལ། ། སྦྱོར་ཆེན་ཚུལ་གྱིས་བཞེས་སུ་གསོལ། ། ཨོཾ་ཤྲཱི་བཛྲ་ར་ག་ལཱ་སྱེ་ཧཱུྃ། མ་ལེ་ཏྲྃ། གིརྟི་ཧྲཱིཿ ནིརྟི་ཨཱཿདྷུཔྤེ་དྷུ། པུཔྤེ་པུ། ཨ་ལོ་ཀེ་ཧྲཱིཿ གནྡྷེ་གན། པུ་ཙ་མེ་གྷ་ས་མ་ཡ་ཧོཿ ཧཱུྃ། སྲིད་རྩ་དབྱིངས་སུ་ཤར་བའི་མཆོད་རྫས་ཏེ། ། དེ་ཉིད་མ་བཅོས་ཡུམ་གྱི་ཐིག་ལེར་ཤར། ། ཆགས་ཡུལ་བདེ་བའི་འོད་ཕུང་དམར་ལ་འཁྱིལ། ། ཉོན་མོངས་དབྱིངས་སུ་བསྟིམ་ཕྱིར་ཨརྒྷཾ་བཞེས། ། འབྱུང་བ་ལྔ་ཉིད་ཡེ་ཤེས་བཅུད་ཤར་བ། ། སྣང་སྲིད་མདངས་ལྡན་རང་རིག་མི་རྟོག་གསལ། ། གཉིས་མེད་ངང་ལས་ཁ་དོག་ཅིར་ཡང་འཆར། ། འབྲས་བུའི་བཅུད་ལྡན་མེ་ཏོག་འོད་ཕུང་འབུལ། ། མ་བཅོས་རང་བྱུང་དམ་རྫས་སྤོས་མཆོག་ནི། ། ཁ་དོག་དབྱིབས་གསལ་དབང་པོ་ཚིམ་བྱེད་པ། ། སྟོང་གསུམ་དྲི་བསུང་གང་བའི་བདུད་རྩི་འདི། ། འབར་བའི་ཤངས་ལ་མཆོད་པས་མཉེས་གྱུར་ཅིག། སྣོད་བཅུད་གཉིས་མེད་
ཡབ་ཡུམ་དག་པ་ལས། ། འབྲས་བུ་རང་བྱུང་ཡེ་ཤེས་མེར་ཤར་བ། ། མཐའ་དབུས་མེད་པར་གསལ་བའི་འོད་འབར་ནི། ། འཁོར་བའི་མུན་ཁང་གཞོམ་ཕྱིར་བཞེས་སུ་གསོལ། ། གཉིས་མེད་མཁའ་དབྱིངས་དག་པའི་ཕོ་བྲང་དུ། ། ཉོན་མོངས་སྐྱོན་བྲལ་དག་པ་བྱང་ཆུབ་སེམས། ། ཅིར་ཡང་འཆར་ཕྱིར་དྲི་ཡི་འོད་ཕུང་འབུལ། ། ཞལ་གྱི་དབྱིངས་སུ་ཐིམ་ནས་མཉེས་གྱུར་ཅིག། ནམ་མཁའ་ཀུན་བཟང་དབྱིངས་ནས་ཅིར་ཡང་འབྱུང༌། ། འབྱུང་བའི་འབྲས་བུ་འདོད་པའི་ཡོན་ཏན་ལྔ། ། ལྷ་བཤོས་ཡིད་བཞིན་རིན་ཆེན་ལོངས་སྤྱོད་འདི། ། སྐུ་གསུང་ཐུགས་ཀྱི་ངང་དུ་ཐིམ་པར་འབུལ། ། སྒྲ་ཡི་དངོས་པོར་སྣང་བ་ཡང༌། ། ཡོད་པ་མ་ཡིན་ཀུན་ཏུ་གྲགས། ། སྒྲ་ཡིས་རབ་ཏུ་ཚིམ་གྱུར་ཀྱང༌། ། སྒྲ་ཉིད་རང་བཞིན་གང་ཡང་མེད། ། སྒྲ་འབྱུང་རང་བཞིན་མཆོད་པར་འབུལ། ། སྐུ་གསུང་ཐུགས་ཀྱི་དངོས་གྲུབ་སྩོལ། ། གཞན་ཡང་ཐབས་ཚུལ་མཐའ་ཡས་པའི། ། མཆོད་སྤྲིན་བླ་མེད་ཕྱོགས་བཅུར་འབུལ། ། ཐུགས་དམ་ཐུགས་རྗེས་རྗེས་དགོངས་ཏེ། ། དཀྱིལ་འཁོར་རྒྱན་དུ་བཞེས་སུ་གསོལ། ། མཆོད་པའི་ཕྱག་རྒྱ་ཆེན་པོ་ནི། ། སེམས་ཀྱི་ཡིད་བཞིན་སྤྲིན་ཚོགས་ཀྱིས། ། ཕྱོགས་བཅུ་ཐམས་ཅད་སངས་རྒྱས་ཞིང༌། ། མཉེན་འཇམ་རེག་ན་བདེ་བ་ཡི། ། སྣ་ཚོགས་རིན་པོ་ཆེ་ཡི་གཞི། ། མཛེས་པར་བྲེས་ཤིང་སྤྲས་པ་དང༌། ། ཀུན་འབྱུང་རིན་ཆེན་ཕུང་པོར་འབར། ། དབྱིབས་ལེགས་རྫིང་བུ་བྲོ་མཆོག་བསིལ། ། རིན་ཆེན་ཁང་པ་སྣ་ཚོགས་དང༌། ། རྒྱན་དང་དཔག་བསམ་ལྗོན་པའི་ཚལ། ། གླུ་དབྱངས་ཚིགས་སུ་བཅད་པའི་སྒྲ།
བླ་རེ་རྒྱལ་མཚན་ན་བཟའ་གདུགས། ། དོ་ཤལ་དཔུང་རྒྱན་སེ་མོ་དོ། ། བཟའ་དང་བཏུང་བའི་མཆོག་རྣམས་དང༌། ། རང་ལ་མཛེས་པར་བརྒྱན་པ་ཡི། ། ལྷ་དང་ལྷ་མོ་རྡུལ་སྙེད་ཀྱི། ། བྲོ་གར་ལ་སོགས་བསམ་ཡས་ཀྱིས། ། ཕྱོགས་བཅུ་ནམ་མཁའི་ཁམས་བཀང་ནས། ། དཀྱིལ་འཁོར་ཀུན་ལ་རྒྱས་པར་འབུལ། ། ཐུགས་རྗེས་བརྩེར་དགོངས་བཞེས་སུ་གསོལ། ། བཛྲ་མ་ཧཱ་པཱུ་ཙ་ཧོཿ ཧཱུྃ། རང་བྱུང་གདོད་ནས་དག་པ་ཡི། ། རྩ་བརྒྱད་སྟོང་ལ་སྦྱར་བའི་སྨན། ། ར་ས་ཡཱ་ན་ལ་སོགས་རྫས། ། རིགས་ལྔ་དམ་ཚིག་ལྔ་ཡི་དངོས། ། ཡེ་ཤེས་ལྔ་རྫོགས་སྒྲུབ་པའིརྫས། ། རྒྱུད་དྲུག་སེམས་ཅན་ཀུན་སྒྲོལ་བ། ། དུག་ལྔ་སེལ་བའི་བདུད་རྩི་འདི། ། དཀྱིལ་འཁོར་ལྷ་ཚོགས་ཀུན་ལ་འབུལ། ། བདེ་གཤེགས་རིགས་ལྔའི་བདུད་རྩི་བྱང་ཆུབ་སེམས། ། འཁོར་བའི་དུག་སེལ་ཞི་ཁྲོ་མཆོད་པའི་མཆོག། སེམས་རྒྱུད་དག་པས་མཉམ་ཉིད་དབྱིངས་སུ་བསྡུས། ། རྩ་བརྒྱུད་བླ་མ་ཡི་དམ་ལྷ་ཚོགས་ལ། ། རྣམ་དག་བདུད་རྩིའི་དམ་རྫས་མཉེས་མཆོད་འབུལ། ། ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། ། ཨོཾ་ཨཱཿཧཱུྃ་བཛྲ་ཨ་མྲྀ་ཏ་ཁ་རཾ་ཁཱ་ཧི། ཧཱུྃ། རྡོ་རྗེ་བྷནྡྷ་སྟོང་གསུམ་ཁོར་ཡུག་ནང༌། ། ཞིང་བཅུ་བསྒྲལ་བ་རཀྟའི་རྒྱ་མཚོར་བསྐྱིལ། ། ཆགས་མེད་ཆགས་པ་ཆེན་པོའི་མཆོད་པ་འདི། ། མཆོག་དང་ཐུན་མོང་དངོས་གྲུབ་སྩོལ་ཕྱིར་འབུལ། ། ཨོཾ་མ་ཧཱ་རཀྟ་ཁཱ་ཧི། ཧཱུྃ། དུར་ཁྲོད་གསང་བ་མཆོག་གི་དཀྱིལ་འཁོར་དུ། ། འབྲས་བུ་ལྔ་བསྒྲལ་ཤ་ཁྲག་རུས་པའི་ཚོགས། ། རྨད་བྱུང་དམ་རྫས་དཔལ་གྱི་གཏོར་མ་ནི། ། འདོད་ཡོན་ལྷ་
མོའི་ཚོགས་དང་བཅས་ཏེ་འབུལ། ། ཨོཾ་མ་ཧཱ་བ་ལིང་ཏ་ཁཱ་ཧི། ཧཱུྃ། ཤེས་རབ་དབྱིངས་མ་ཡུམ་གྱི་གཞལ་ཡས་སུ། ། རྒྱལ་བའི་དཀྱིལ་འཁོར་མ་ལུས་མཆོག་བཀོད་དེ། ། ཐབས་དང་ཤེས་རབ་ལྡན་པའི་སྦྱོར་མཆོད་ཀྱིས། ། འཕགས་པ་ཐམས་ཅད་མཉེས་པའི་མཆོད་པ་འབུལ། ། ཨོཾ་ཨ་ནུ་ར་ག་ཎ་པཱུ་ཙ་ཧོཿ ཧཱུྃ། མཉམ་ཉིད་མི་གཡོ་མཉམ་ཉིད་སངས་རྒྱས་པའི། ། ངན་རྟོག་མཚན་མའི་སྤྱོད་ཡུལ་ངང་གིས་མེད། ། གཟུང་འཛིན་མཚན་མ་ཀུན་ལས་འདས་པ་ཡི། ། མཉམ་པ་ཆེན་པོའི་མཆོད་པ་རྣམ་པར་རོལ། ། ཨོཾ་བཛྲ་ཛྙཱ་ན་དྷརྨ་དྷ་ཏུ་ཧོཿ དེ་ནས་ཚོགས་ཕུད་དང་པོ་མཆོད་པ་ནི། ། ཧཱུྃ། བླ་མེད་མཆོག་གི་མཆོད་པ་དམ་པ་ནི། ། ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། ། འདོད་པའི་ཡོན་ཏན་ལྔ་ཡིས་རབ་བརྒྱན་པ། ། དམ་ཚིག་བཞིན་དུ་ཇི་བདེར་བཞེས་སུ་གསོལ། ། གཟུགས་སྒྲ་དྲི་རོ་རེག་ཆོས་མཆོད་པ་འབུལ། ། བྷ་ལིང་དར་གྱི་རྒྱན་ལྡན་མཆོད་པ་འབུལ། ། འཆི་མེད་སྨན་རག་བདུད་རྩིའི་མཆོད་པ་འབུལ། ། བདེ་ཆེན་རིག་མ་དགའ་བདེའི་མཆོད་པ་འབུལ། ། འོད་གསལ་ཏིང་འཛིན་རྩེ་གཅིག་མཆོད་པ་འབུལ། ། ཐམས་ཅད་མཉམ་ཉིད་ཀུན་བཟང་ཡངས་པའི་ཀློང༌། ། བདེ་སྟོང་རྡོ་རྗེ་བཀོད་པའི་མཆོད་སྤྲིན་འབུལ། ། མཆོད་བཞེས་དམ་སྐོང་དབང་དང་དངོས་གྲུབ་སྩོལ། ། ཨོཾ་ཨ་ར་པ་ཙ་ན་དྷཱིཿ ན་མཿསརྦ་བུདྡྷ་བོ་དྷི་ས་ཏྭ་གུ་རུ་དེ་བ་ཌཱཀྐི་ཎི་དྷརྨཱ་པཱ་ལ་སརྦ་མཎྜ་ལ་ག་ཎ་ཙཀྲ་པཱུ་ཙ་ཧོཿ བར་པ་བཤགས་པ་ནི། ཧོཿ སེམས་ཉིད་ཡེ་ནས་ཆོས་སྐུར་དག་པ་ལ། ། མ་རིག་དབང་གིས་སྒྲོ་དང་སྐུར་བཏབ་སྟེ། ། དེ་བཟློག་
དོན་ཕྱིར་རྒྱལ་བའི་དམ་མནོས་ནས། ། མི་འདའ་རྡོ་རྗེའི་ཡལ་གམ་བླང་བ་ལས། ། ཉམས་དང་ཐོག་མེད་ནས་བསགས་སྡིག་ལྟུང་ཀུན། ། ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། ། མ་རིག་བདག་ཅག་ལུས་དང་ངག་སེམས་ཀྱིས། ། བག་མེད་ཚུལ་གྱིས་དམ་ལས་འགལ་གྱུར་ཏེ། ། རྒྱལ་བ་འཁོར་བཅས་ཐུགས་དང་ཇི་འགལ་བ། ། ཐོགས་མེད་ཐུགས་རྗེ་ཅན་ལ་བཟོད་པར་གསོལ། ། རབ་འབྱམས་རྩ་གསུམ་ལྷ་ཡི་སྤྱན་སྔ་རུ། ། ག་ཎ་ཚོགས་ཀྱི་འཁོར་ལོ་ལ་བརྟེན་ནས། ། གནོང་ཞིང་འགྱོད་པ་དྲག་པོའི་ཚུལ་གྱིས་ནི། ། སྐུ་ཡི་དམ་ཚིག་ཉམས་པ་མཐོལ་ལོ་བཤགས། ། གསུང་གི་དམ༴ ། ཐུགས་ཀྱི་དམ་ཚིག་ཉམས༴ ཡོན་ཏན་དམ་ཚིག༴ ཕྲིན་ལས་དམ༴ རྩ་བའི་དམ༴ ཡན་ལག་དམ་ཚིག་ཉམས་པ་མཐོལ་ལོ་བཤགས། ། ཉམས་ཤིང་འགལ་བར་གྱུར་པ་ཅི་མཆིས་ཀུན། ། བཤགས་སོ་འགྱུར་མེད་ཚངས་པའི་དངོས་གྲུབ་སྩོལ། ། བཛྲ་ས་མ་ཡཱ། ཨོཾ་ཨ་ར་པ་ཙ་ན་དྷཱིཿ ཨོཾ་བཛྲ་ས་ཏྭ་ས་མ་ཡ་སོགས། ཡིག་བརྒྱ་བཟླ། ཐ་མ་བསྒྲལ་བ་ནི། ཧཱུྃ། ཨེ་ལས་གྲུ་གསུམ་ཐར་མེད་བྲུབས་ཁུང་ནང༌། ། ནྲྀ་ཏྲི་ལས་གྱུར་དགྲ་བགེགས་གདུག་པ་ཀུན། ། མངོན་སུམ་བཞིན་གསལ་ཕོ་ཉས་དགུག་ཅིང་བསྟིམ། ། ཡེ་ཤེས་ཁྲོས་པའི་ཐུགས་རྗེས་བསྒྲལ་བར་བྱ། ། ཧཱུྃ། ཤིན་ཏུ་གདུག་ཅིང་གཏུམ་པ་ལ། ། ཞི་བས་ཕན་པར་མི་འགྱུར་ཏེ། ། ཤེས་རབ་ཐབས་ཀྱི་རྣལ་འབྱོར་ལས། ། ཁྲོ་བོར་དེ་བཞིན་གཤེགས་ཀུན་མཛད། ། ཁྲོ་བོའི་ཚུལ་ཆེན་ཁྲོས་པས་ཀྱང༌། ། འཇིག་རྟེན་གསུམ་དག་སྲེག་བྱེད་ན། ། སངས་རྒྱས་ཐམས་ཅད་ཁྲོས་པ་ཡིས། །
ཁམས་གསུམ་མ་ལུས་སྨྲོས་ཅི་དགོས། ། ང་ནི་ཟ་བྱེད་ཆེན་པོ་སྟེ། ། ཁམས་གསུམ་མ་ལུས་བསྒྲལ་བ་དང༌། ། གདུལ་དཀའ་མ་ལུས་གདུལ་བའི་ཕྱིར། ། ཤ་རུས་ལ་སོགས་བཟའ་བར་བྱེད། ། འཇམ་དཔལ་རྣོན་པོའི་རལ་གྲི་ནི། ། ཡེ་ཤེས་མེ་ཡི་ཟེར་འཕྲོ་བས། ། མ་རིག་རྨོངས་པའི་དྲྭ་བ་འདྲལ། ། བདག་རྟོག་སྲོག་རྩ་དབྱིངས་སུ་གཅོད། ། སྙིང་རྗེས་བསྒྲལ་བའི་དམ་ཚིག་ནི། ། བསད་ཅིང་མནན་པ་མ་ཡིན་ཏེ། ། ཕུང་པོ་རྡོ་རྗེས་གཏམ་བྱས་ནས། ། རྣམ་པར་ཤེས་པ་རྡོ་རྗེར་བསྒོམ། ། ཨེ་མ་བདག་ཉིད་ཆེན་པོ་སྟེ། ། བསད་པས་སངས་རྒྱས་བྱང་ཆུབ་ཐོབ། ། སླར་ཡང་བརྩེ་བས་སེམས་ཅན་རྣམས། ། གསད་པར་བྱ་བས་བསད་པར་བྱ། ། ཡེ་ཤེས་འོད་ལྔ་འབར་བས་དུག་ལྔ་བསྲེག། རྣམ་པར་ཤེས་པ་མི་བསྐྱོད་དབྱིངས་སུ་བསྟིམ། ། ཡེ་ཤེས་མཚོན་གྱིས་ཕུང་པོ་རྡུལ་དུ་གཏུབ། ། ཁམས་གསུམ་སྲིད་པ་དབྱིངས་སུ་བསྒྲལ་བར་བྱ། ། ཧཱུྃ་ཧཱུྃ། ཧ་ཧཱ་ཧི་ཧཱི་ཧེ་ཧཻ་ཧོ་ཧཽ། ནྲྀ་ཏྲི་ཤ་ཏྲུྃ་མཱ་ར་ཡ་རྦད། དེ་ནས་ཞལ་དུ་བསྟབ་པ་ནི། ། ཧཱུྃ། འདོད་ཆགས་ཁྲག་གིརྒྱ་མཚོ་ཆེ། ། ཞེ་སྡང་རུས་པའི་ཕུང་པོ་དང༌། ། གཏི་མུག་ཤ་ཡི་རི་བོ་སྟེ། ། ཁམས་གསུམ་སེམས་ཅན་ཐམས་ཅད་ཀྱི། ། དུག་གསུམ་མཆོད་པ་བླ་ན་མེད། ། སྐུ་གསུང་ཐུགས་ཀྱི་དམ་སྐོང་ཕྱིར། ། དགྱེས་པའི་ཞལ་དུ་སྟོབ་ལགས་ན། ། དགྱེས་པ་ཆེན་པོར་བཞེས་སུ་གསོལ། ། སྡུག་བསྔལ་མང་པོས་གཟིར་བའི་འགྲོ་བ་ལ། ། ཐུགས་རྗེའི་ཤུགས་ཀྱིས་སྡུག་བསྔལ་བཟློག་པའི་ཕྱིར། ། ཉོན་མོངས་ཀུན་བསལ་རྒྱུད་དྲུག་ལམ་བཀག་ནས། ། བྱང་ཆུབ་བགྲོད་ཕྱིར་འཕགས་ལམ་
རྣམ་ཐར་བསྟན། ། དམ་རྫས་བདུད་རྩི་ལྔ་དང་ཞལ་ཟས་ལྔ། ། སྐུ་ལྔ་ཆོས་ལྔ་དབྱེར་མེད་རང་བཞིན་མཉམ། ། དེ་ཕྱིར་དག་པས་དག་པ་ཉིད་མཆོད་དེ། ། ཆོས་ཉིད་ལ་ནི་ཆོས་ཉིད་ཐིམ་པར་མཆོད། ། དཀྱིལ་འཁོར་ལ་ནི་དཀྱིལ་འཁོར་ཐིམ་པར་མཆོད། ། དམ་ཚིག་མཆོག་གི་མཆོད་པ་དམ་པ་འདིས། ། ཡི་དམ་དཀྱིལ་འཁོར་ཕྱག་བརྙན་གཏུམ་རྔམས་ཚོགས། ། རྣལ་འབྱོར་གྲུབ་པའི་ཚོགས་བཅས་མཉེས་གྱུར་ཅིག། མ་ཧཱ་མཾ་ས་རཀྟ་ཀིཾ་ནི་རི་ཏི་ཁ་རཾ་ཁཱ་ཧི། ཨ་ལི་ཨུ་ལི་ཏཱ་ལི་ཏ་པཱ་ལི་དཾཥྟ་གོ་ནཱ་རཽ་དྲི་ཁ་རམ་ཡོ་གི་ནཱི་ཁཱ་ཧི་ཧོཿ དེ་ནས་རྡོ་རྗེ་བརྡ་ཡི་གླུ་དང་གླུ་ལེན་གྱིས་ཚོགས་ཀྱི་རྫས་རྣམས་རྣལ་འབྱོར་པའི་ནང་གི་སྦྱིན་སྲེག་གི་ཚུལ་དུ་རོལ་ཞིང་རྩ་ཁམས་རྒྱས་པར་བྱས་ནས་རྩ་གནས་ཀྱི་དཔའ་བོ་མཁའ་འགྲོ་ཡབ་ཡུམ་མཉམ་པར་སྦྱོར་བའི་བདེ་སྟོང་གི་ཉམས་མྱོང་དང་བཅས་ཏེ་རྡོརྗེའི་གླུུ་དང་གར་བྱ་བ་ནི། རྡོ་རྗེ་དང་དྲིལ་བུ་ཐོགས་ལ། ཨོཾ༔ ས་གསུམ་དག་ན་འབར་བའི་སྐུ་མངའ་རྗེས་སུ་ཆགས་མཛད་འདུལ་ལྡན་པས། ། ཉི་མ་སྟོང་ཕྲག་བཅུ་བས་རྣོ་བའི་འོད་ཟེར་སྟོང་དང་ལྡན་པ་པོས། ། རྣམ་མང་ཆ་བྱད་གཟུགས་ཀྱིས་སེམས་ཅན་འགྲོ་ལ་རྗེས་སུ་ཆགས་མཛད་པ། ། འཇམ་པའི་རྡོ་རྗེ་དབང་ཕྱུག་དམ་པ་མཛེས་པའི་སྟོབས་ལྡན་གར་མཛད་གསོལ། ། ཏེ་ན་ཧཱུྃ་ཏེ་ན་ཧཱུྃ། ཏེ་ན་ཏེ་ཏེ་ཧཱུྃ། བདེ་བ་ལས་འཁྲུངས་རྡོ་རྗེ་འཆང་བ་ཡི། ། དངོས་པོ་དངོས་མེད་འབྱུང་གནས་ཆེན་པོར་མཁྱེན། ། དང་པོ་གང་དུ་རྣམ་པར་སྣང་མཛད་ཉིད། ། དག་ཅིང་དྲི་མེད་བློས་ནི་ཨོཾ་དུ་སྤྲུལ། ། གཟུགས་མང་ཚུལ་གྱིས་ཕྲེང་བས་བསྐོར་བ་ཡི། ། སྒྱུ་འཕྲུལ་དྲྭ་བ་ཁྱོད་ལ་ཕྱག་འཚལ་ལོ། ། གསུང་སྙན་ཡི་གེས་ཀུན་ལ་ཁྱབ་པ་ཡི། །
སྤྲོས་མེད་གསུང་དུ་འཇིག་རྟེན་དབང་ཕྱུག་བཞུགས། ། མིག་གསུམ་ལྷ་མོ་དང་བཅས་འདུལ་མཛད་པས། ། རྫུ་འཕྲུལ་ཚུལ་མང་ལྡན་པ་འགར་མ་མཆིས། ། གང་དུ་བདེ་ཆེན་རང་བཞིན་རྗེས་ཆགས་པས། ། ན་ཆུང་དག་དང་ལྷན་ཅིག་བཞད་མཛད་དེ། ། གཡས་ཀྱི་ཕྱག་གིས་རྡོ་རྗེ་གསོར་ནས་ཀྱང༌། ། གཡོན་པ་ཡིས་ནི་དྲིལ་བུའི་སྒྲ་སྙན་སྒྲོགས། ། ལྷ་མོ་མཐའ་དག་བཙུན་མོར་གྱུར་པ་ཡིས། ། དམ་ཚིག་རྣམས་ཀྱི་བྱ་བ་བྱས་པར་གྱུར། ། གཅིག་གི་ལག་པས་ཀུན་ནས་འཁྱུད་པ་སྟེ། ། གཉིས་པ་རྗེས་སུ་ཆགས་ཕྱིར་བདེ་བའི་མཐུ། ། གསུམ་པ་མི་བཟོད་མེ་ཏོག་ཕྲེང་བ་འཐོར། ། བཞི་པ་བདེ་བ་ཡི་ནི་མདའ་ཡང་འཕེན། ། གང་ཞིག་གླུ་འདི་ལེན་པར་བྱེད་པ་ནི། ། བདེ་བ་རྡོ་རྗེ་ཅན་དང་མཉམ་པར་འགྱུར། ། རྡོརྗེར་གསོར་བ་སྙིང་རྗེ་ཆེན་པོ་ཡི། ། དྲིལ་བུ་བསིལ་བ་ཤེས་རབ་སྟོང་པ་ཉིད། ། གར་གྱིས་ཞི་གནས་ལྷག་མཐོང་ཟུང་དུ་འབྲེལ། ། བདེ་ཆེན་རོལ་པ་ཆེ་ལ་དགོངས་སུ་གསོལ། ། བཛྲ་དྷཱ་ཏུ་ཧོཿ གཞན་ཡང་སྤྲོ་ན་རིག་སྟོང་གི་གདངས་མི་གཡོ་བའི་ངང་ནས། ཨེ་མ་ཀི་རི་ལ་སོགས་པའི་གླུ་དང་རྡོ་རྗེའི་གད་མོ་བཅུ་གཉིས་ངོ་མཚར་བའི་ཚིག་ཆེན་བརྒྱད་ལ་སོགས་པ་རྡོ་རྗེའི་གླུ་ཡི་ཉམས་བསྐྱང་བར་བྱ་ཞིང༌། བསྟོད་པ་ནི། མཉམ་མེད་མི་གཡོ་མཉམ་ཉིད་མཆོག་གི་ཆོས་ཉིད་ཅན། ། ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། ། ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། ། དྲི་མེད་མི་གཡོ་མཉམ་མེད་དམ་པའི་མཆོག་ཆོས་ཅན། ། ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། ། དཔེ་ནི་ནམ་མཁའ་དང་ཡང་བསྒྲུན་དུ་ཡོད་མ་
ཡིན། ། དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། ། སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། ། རྟག་ཏུ་དྲི་མ་མེད་པ་ཐུགས་རྗེའི་ཤུགས་ལས་བྱུང༌། ། སྨོན་ལམ་གྲུབ་པ་འགོག་པ་མེད་པའི་ཆོས་ཉིད་ཅན། ། འགྲོ་བའི་དོན་སྒྲུབ་རབ་ཏུ་བརྩོན་པ་མཐའ་ཡས་པ། ། ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང༌། ། ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡི། ། བདེ་བར་གཤེགས་པའི་གོ་འཕང་དམ་པ་བརྙེས་གྱུར་ཀྱང༌། ། ཁམས་གསུམ་རྣམས་ལ་དངོས་གྲུབ་མཆོག་སྩོལ་མཛད་པ་ཡི། ། ཐུགས་རྗེའི་སྤྱོད་པ་མི་གཡོ་འགགས་པར་ཡོངས་མི་འགྱུར། ། ཨེ་མའོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། ། མཆོག་སྦྱིན་རྣམས་ཀྱི་ནང་ན་གོ་འཕང་མཆོག་བརྙེས་པས། ། ཁམས་གསུམ་ཀུན་ལ་རྟག་ཏུ་དངོས་གྲུབ་མཆོག་སྩོལ་མཛད། ། མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པ། ། དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། ། ཞེས་དཀྱིལ་འཁོར་གྱི་ལྷ་ལ་དབྱེར་མེད་རྟོགས་པའི་ངང་ནས་འདུད་ཅིང་སྨོན་ལམ་ཅི་རིགས་པ་གདབ། རྗེས་སུ་ཚོགས་ཀྱི་ལྷག་མ་བྱིན་གྱིས་བརླབས་ནས་རྐང་གླིང་བཤུག་པའི་བརྡས་བསྐུལ་ཏེ་སྲིན་མོའི་ཟ་ལམ་དུ་བསྐྱལ་ལ། ཧཱུྃ། སྔོན་ཚེ་དཔལ་ཆེན་ཧེ་རུ་ཀཿ ཤིན་ཏུ་གདུག་ཅིང་གཏུམ་བག་ཅན། ། ཐམས་ཅད་མ་ལུས་འདུལ་མཛད་པའི། ། དབང་དང་བྱིན་རླབས་རྨད་པོ་ཆེ། ། ལྷ་ཆེན་ལ་སོགས་དབང་དུ་བསྡུས། ། འཁོར་རྣམས་དབང་ཕྱུག་སླས་སུ་བྱས། ། སོ་སོའི་ལས་རྣམས་བསྐོས་པ་དེ། ། ཇི་ལྟར་དམ་བཅས་ཁས་བླངས་པ། ། མ་ཐོགས་མྱུར་དུ་མངོན་པར་
ཕྱུངས། ། དམ་བཅས་བཞིན་དུ་མ་བྱས་ན། ། ཇི་ལྟར་དམ་བཅས་མནའ་བོར་བའི། ། སྡོམ་བཅས་དེ་ལས་འདའ་བར་འགྱུར། ། དམ་ཚིག་དེ་ལས་འདས་གྱུར་ན། ། མགོ་ལུས་སྙིང་ཡང་ཚལ་པ་བརྒྱར། ། ཡཀྴ་ཁྲོ་བོས་གཏུབ་པར་འགྱུར། ། དེ་བས་རྣལ་འབྱོར་སྔགས་འཆང་གིས། ། ཇི་ལྟར་བཅོལ་བ་བཞིན་དུ་བྱོས། ། ལས་དེ་མངོན་དུ་མ་བྱས་ན། ། རང་གིས་མནའ་བོར་ཁས་བླངས་པས། ། རུལ་མྱག་ཚིག་ནས་དམྱལ་བར་འགྲོ། ། རྣལ་འབྱོར་དམ་ལ་གནས་གྱུར་པའི། ། ལས་རྣམས་ཡོངས་སུ་བྱ་བ་དང༌། ། འཁོར་རྣམས་བུ་གཅིག་བཞིན་དུ་སྐྱོངས། ། ཕྲ་མེན་མ་ཡང་དངོས་གྲུབ་ཐོབ། ། དེ་ཕྱིར་བཅོལ་བའི་ལས་རྣམས་མངོན་དུ་བྱས། ། དཀྱིལ་འཁོར་ཆེན་པོའི་མུ་རན་སྐྱོང་བ་ཡི། ། དཔལ་གྱི་ཕོ་ཉ་མཁའ་འགྲོ་དབང་ཕྱུག་དང༌། ། གིང་དང་ལངྐ་དུར་ཁྲོད་གནས་ཡུལ་བདག། མ་སྲིང་འབར་མ་སྤོར་མ་ལས་བྱེད་སོགས། ། བཀའ་ཡི་ཕམ་ཕབ་གཏོར་མ་འདི་ལོངས་ལ། ། སྔོན་ཚེ་ཞལ་བཞེས་དམ་བཅས་ཇི་བཞིན་དུ། ། བཅོལ་བའི་ཕྲིན་ལས་མྱུར་དུ་འགྲུབ་པར་མཛོད། ། ཨོཾ་ཨུཥྩི་ཊ་བ་ལིངྟ་ཁཱ་ཧི། དེ་ནས་གཏོར་གཞོང་འབྲུ་སྨན་བཤོས་བུ་ཤ་ཁྲག་གིས་བཀང་ནས་སྨན་རག་བྲན་ལ་བྱིན་གྱིས་བརླབས་ནས་ཆད་བསྒྲགས་པ་ནི། ཧཱུྃ་ཧྲཱིཿ འོག་མིན་ཆོས་དབྱིངས་ཆོས་སྐུའི་ཞིང་ཁམས་དང༌། ། ལྔ་ལྡན་ལོངས་སྤྱོད་རྫོགས་པ་ཆེན་པོའི་གནས། ། མ་ངེས་འགྲོ་འདུལ་སྤྲུལ་སྐུའི་ཞིང་རྣམས་སུ། ། སྐུ་གསུམ་སྟོན་པ་བརྒྱུད་པར་བཅས་རྣམས་དང༌། ། རབ་འབྱམས་རྒྱལ་བའི་སྤྱི་གཟུགས་སྤྲུལ་པའི་སྐུ། ། དཔལ་ལྡན་རྫོགས་པའི་སངས་རྒྱས་པདྨ་སྐྱེས། ། འཇམ་དཔལ་དཔའ་
བོ་བློ་ལྡན་མཆོག་སྲེད་ཀྱི། ། སྤྱན་སྔར་ཞལ་བཞེས་ཆོས་སྐྱོང་སྲུང་མའི་ཚོགས། ། ཁྱད་པར་འཆི་བདག་ལས་ཀྱི་གཤིན་རྗེ་དང༌། ། མ་མགོན་དམ་ཅན་གཟའ་བདུད་སྡེ་བརྒྱད་དཔུང༌། ། བོད་སྐྱོང་བརྟན་མ་ཆེན་པོ་བཅུ་གཉིས་སོགས། ། རྒྱུད་གསུམ་སྲུང་མ་དྲེགས་པའི་ཚོགས་རྣམས་ཀྱིས། ། བསྟན་པ་བསྲུངས་ཤིང་བསྟན་འཛིན་སྐྱོང་བ་ཡི། ། ཞལ་བཞེས་རྡོ་རྗེའི་ཐ་ཚིག་དགོངས་མཛོད་ལ། ། ཇི་ལྟར་མ་བྱམས་བུ་ལ་གདུང་བ་བཞིན། ། དམ་ཚིག་ཅན་ལ་དུང་དུང་གདུང་བར་གྱིས། ། གང་དུ་སྲིང་བྱམས་མིང་ལ་གདུང་བ་བཞིན། ། ཡལ་གམ་ཅན་ལ་ལྷང་ལྷང་བརྩེ་བར་གྱིས། ། མཛའ་མོ་གྲོགས་ལ་ཇི་ལྟར་འདུད་ཚུལ་བཞིན། ། རྣལ་འབྱོར་ཅན་ལ་ཀྲིལ་ཀྲིལ་བརྩེ་བར་གྱིས། ། ཇི་ལྟར་གཡོག་བྱམས་དཔོན་ལ་སྙིང་བརྩེ་བཞིན། ། དམ་པ་རྣམས་ལ་ངེས་པར་ཉེ་བར་གྱིས། ། དམ་རྫས་དཔལ་གྱི་གཏོར་མ་འདི་བཞེས་ནས། ། རྣལ་འབྱོར་བཅོལ་པའི་ཕྲིན་ལས་འགྲུབ་པར་མཛོད། ། ཨོཾ་ཤྲཱི་དྷརྨཱ་པཱ་ལ་མ་ཧཱ་བ་ལིངྟ་ཁཱ་ཧི། དེ་ནས་གཏོར་གཞོང་གི་འོག་ཏུ་དགྲ་བགེགས་དམ་སྲི་འགུག་བསྟིམ་བྱས་ནས་རྡོ་རྗེ་བྲོ་ཡི་ཆོ་གས་མནན་གཟིར་ལྡང་མེད་ཀྱི་ལས་བྱ་སྟེ། ཧཱུྃ། ལས་བཞི་ལྷུན་གྲུབ་དཀྱིལ་འཁོར་མཆོག། ལུ་གུ་རྒྱུད་དུ་སྦྲེལ་བསྡམས་ནས། ། བཅིངས་གྱུར་བསྐྱོད་ནས་ཕྱོགས་བཅུར་གཡོ། ། ཐམས་ཅད་ཐམས་ཅད་ལྷུན་གྱིས་གྲུབ། ། ཧཱུྃ། སྣོད་ཀྱི་འཇིག་རྟེན་གཞལ་ཡས་ཁང༌། ། བཅུད་ཀྱི་སེམས་ཅན་དཀྱིལ་འཁོར་ལྷ། ། ཐམས་ཅད་ཐམས་ཅད་ཕྱག་རྒྱ་ཆེ། ། རྡོ་རྗེའི་བྲོ་གར་ཁྲིགས་སེ་ཁྲིག། དམ་སྲི་འབྱུང་པོའི་ལུས་སྲོག་སྙིང༌། ། ཚལ་པ་ཚལ་པ་ཕྱེ་མར་
གཏུབ། ། ནམ་ཡང་ལྡང་བ་མེད་པར་མནན། ། དག་པར་མ་གྱུར་གང་ཡང་མེད། ། རྡོ་རྗེ་མཚོན་གྱིས་གང་བསད་པ། ། སྲོག་ནི་ལོག་རྟོག་རྡོ་རྗེར་ཤི། ། ནམ་ཡང་ལྡང་བའི་དུས་མེད་པས། ། སླར་སྐྱེ་བ་དག་ག་ལ་ཡོད། ། སྟོང་པ་དབྱིངས་ཀྱི་བྲོ་ར་རུ། ། རིག་པ་ཡེ་ཤེས་བྲོ་བརྡུང་བས། ། དབྱིངས་རིག་འདུ་འབྲལ་མེད་པའི་གཟིས། ། ཐམས་ཅད་ཐམས་ཅད་རྡོ་རྗེར་གྱུར། ། ཨོཾ་ས་མ་ཡ། ཨཱཿས་མ་ཡ། ཧཱུྃ་ས་མ་ཡ། དམ་སྲི་འབྱུང་པོ་སྟྭམྦྷ་ཡ་ལམ་ནན། མཱ་ར་ཡ་རྦད༔ གཏོར་གཞོང་ཁ་གྱེན་དུ་བསྟན་ནས་མེ་ཏོག་འཐོར། སྣོད་བཅུད་ལྷར་སྣང་གཉུག་མའི་དབྱིངས་སུ་ཐིམ། ། སླར་ཡང་ཟུང་འཇུག་སྒྱུ་མའི་ལྷ་སྐུར་ལྡང༌། ། དགེ་བ་བསྔོ་ཞིང་སྨོན་ལམ་རྒྱ་ཡིས་གདབ། ། ཤིས་པར་བརྗོད་པས་ཕྱོགས་ཀུན་བདེ་ལེགས་བྱ། ། ཞེས་པ་འདི་ཡང་རྒྱུད་སྡེ་རིན་པོ་ཆེའི་དགོངས་པ་ཇི་ལྟ་བ་བཞིན། རྡོ་རྗེའི་ཚིག་གི་ཕྲེང་བ་ཉིད་དུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོས་ལྕགས་འབྲུག་ལོར་བསྡེབ་བ་དགེ་ལེགས་མཆོག་ཏུ་གྱུར་ཅིག། ། ། ༄༅། ། ཚོགས་བྱིན་རླབས་ནི། རཾ་ཡཾ་ཁཾ། ཚོགས་གཞོང་ཆོས་ཀྱི་དབྱིངས་དང་མཉམ་པ་པདྨ་བྷཉྫ་ཡངས་པའི་ནང་དུ་ཚོགས་རྫས་ཤ་ལྔ་བདུད་རྩི་ལྔ་ལ་སོགས་པ་དམ་ཚིག་གི་རྫས་རྣམས་ངོ་བོ་ཟག་མེད་བདེ་ཆེན་ཡེ་ཤེས་ཀྱི་བདུད་རྩི་ལ། ། རྣམ་པ་འདོད་དགུ་རབ་འབྱམས་ཀྱི་སྤྲིན་ཕུང་མི་ཟད་པ། ཀུན་ཏུ་བཟང་པོའི་སྒྱུ་འཕྲུལ་དྲྭ་བ་ཆེན་པོའི་རང་བཞིན་དུ་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་བརླབས་སོ། ། ༈ ཚོགས་བསྡུས་ནི། ཚོགས་རྫས་རྣམས། ཨོཾ་ཨཱཿཧཱུྃ་ཧོཿ ས་བྱིན་གྱིས་བརླབ་ལ། རྡོར་སེམས་ལྷ་ཚོགས། རྩ་གསུམ་ལྷ་ཚོགས་ཚོགས་ལ་སྤྱན་འདྲེན་གཤེགས། ། ཕྱི་ནང་གསང་བའི་བདེ་ཆེན་ཚོགས་མཆོད་འབུལ། ། དམ་ཚིག་ཉམས་ཆགས་ཐམས་ཅད་མཐོལ་ལོ་བཤགས། ། གཉིས་འཛིན་དགྲ་བགེགས་ཆོས་ཀྱི་དབྱིངས་སུ་སྒྲོལ། ། མཉམ་ཉིད་
བདེ་བ་ཆེན་པོར་ཐུགས་དམ་བསྐང༌། ། མཆོག་དང་ཐུན་མོང་དངོས་གྲུབ་སྩལ་དུ་གསོལ། ། ཞེས་པའང་ཚོགས་གྲངས་བསགས་པ་སོགས་ལ་མཁོ་བའི་ཚོགས་བསྡུས་འཇམ་དཔལ་རྡོ་རྗེས་སོ། ། དགེ་ལེགས་འཕེལ། ། ༄༅། ། སྟོང་པའི་ངང་ལས་ང་མེ་ཐོད་པའི་སྐྱེད་བུ་གསུམ་གྱི་སྟེང་དུ་ཀཱ་པ་ལའི་སྣོད་དུ་ཚོགས་རྫས་ཤ་ལྔ་དང་བདུད་རྩི་ལྔ་ཞུ་ཞིང་ཁོལ་བ་ཉིད་ཡོངས་སུ་དག་ཅིང་ཁ་དོག་དྲི་རོ་ནུས་བཅུད་ཕུན་སུམ་ཚོགས་པ་ཟག་མེད་ཡེ་ཤེས་ཀྱི་བདུད་རྩིའིརྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧོ། ཞེས་བྱིན་གྱིས་བརླབས་ནས། ཚོགས་ཞིང་རྣམས་མདུན་གྱི་ནམ་མཁར་བཛྲ་ས་མཱ་ཛཿ ཞེས་སྤྱན་དྲངས་ལ། འདོད་ཡོན་ལྷ་མོའི་ཚོགས་ཀྱིས་མཆོད་པར་བསམ་ལ། ཚོགས་རྫས་ཞེས་བཞག་ན་བདུད་རྩི་ལག་མཆོད་བསྡུས་པ་འདིས་ཆོག་གཏོར་མ་ཞེས་བསྒྱུར་ན་གཏོར་མ་འབུལ་བ་ཐམས་ཅད་ལ་འདིས་ཆོགདམིགས་བསལ་ཡི་དམ་ཆོས་སྐྱོང་གང་འདོད་ཀྱི་མཚན་འཇུག་པས་ཆོག་གོ ། ན་མོ་དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། བདེ་གཤེགས་སྒྲུབ་པ་བཀའ་བརྒྱད་ཞི་བ་རྡོརྗེ་དབྱིངས། ཁྲག་འཐུང་འབར་བ་ཆེན་པོའི་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཿཧཱུྃ། བཅོམ་ལྡན་འདས་དཔལ་དུས་ཀྱི་འཁོར་ལོའི་དཀྱིལ་འཁོར༴འཁོར་ལོ་བདེ་མཆོག་ཀྱེ་རྡོ་རྗེ་གསང་བ་འདུས་པ་རྡོ་རྗེ་འཇིགས་བྱེད་ལ་སོགས་པའི་རྒྱུད་སྡེ་བཞི་དང་དྲུག་གིས་བསྡུས་པའི་ཡི་དམ་ལྷ་ཚོགས་མ་ལུས་པའི་དཀྱིལ་འཁོར༴ གནས་གསུམ་གྱི་དཔའ་བོ་མཁའ་འགྲོ་མ་ཐམས་ཅད་ཀྱི་ཞལ་དུ༴ བཀའ་སྲུང་དམ་ཅན་རྒྱ་མཚོའི་ཞལ་དུ་ཨོཾ་ཨཱཿཧཱུྃ། མཁའ་ཁྱབ་ཀྱི་སེམས་ཅན་ཐམས་
ཅད་དཔལ་ལྡན་རྡོ་རྗེ་སེམས་དཔའི་ངོ་བོར་དག་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཞེས་མཆོད་ནས། བདག་ལུས་རྡོ་རྗེ་གསུམ་གྱི་རང་བཞིན་གྱི། ། དཀྱིལ་འཁོར་ལྷ་ཚོགས་རྒྱལ་བ་རྒྱ་མཚོའི་ཚོགས། ། བདེ་ཆེན་བདུད་རྩི་ཚོགས་ཀྱི་འཁོར་ལོ་ཡིས། ། བདེ་མཆོག་མཉམ་པ་ཉིད་དུ་དགྱེས་གྱུར་ཅིག། མ་ཧཱ་སུ་ཁ་ཨ་ལ་ལ་ཧོ། ཞེས་བརྗོད་ཅིང་བསམ་ལ་རོལ། ལྷག་མ། ཨོཾ་ཨཱཿཧཱུྃ་ཨུཥྩི་ཊ་བ་ལིངྟ་ཁཱ་ཧི། བསྔོ། མཁའ་ཁྱབ་རྒྱལ་བའི་དཀྱིལ་འཁོར་དུ། ། ཚོགས་ཀྱི༴ བདག་གཞན༴ དཀྱིལ་འཁོར་གཅིག་ཏུ་འགྲུབ་པར་ཤོག། རྩ་བརྒྱུད་བླ་མའི་བྱིན་བརླབས་སོགས་བརྗོད་དོ། ། ཚོགས་འཁོར་བསྡུས་པ་འདི་དུས་སུ་ཚོགས་ཀྱི་འཁོར་ལོ་ཆག་མེད་དགོས་ཤིང་མང་པོ་མི་ནུས་པའི་དོན་དུ་གསར་རྙིང་གང་གིའང་ཚོགས་མཆོད་མདོར་བསྡུས་ཀྱི་གོ་ཆོད་པ་ཡིན་ནོ། ། མེ་རྟ་ཟླ་༨ཚེས་༢༥ལ་མི་ཕམ་པས་སོ། ། ༄༅། ། ཨོཾ་ཨཱཿཧཱུྃ། ཧཱུྃ། ཕྱོགས་དུས་རྒྱལ་བ་ཀུན་གྱི་ཡེ་ཤེས་སྐུ། ། དཔལ་ལྡན་རྫོགས་པའི་སངས་རྒྱས་པདྨ་སྐྱེས། ། མ་ཧཱ་གུ་རུ་བློ་ལྡན་མཆོག་སྲིད་རྩལ། ། འཇམ་དཔལ་རྡོ་རྗེ་རྣོན་པོའི་དཀྱིལ་འཁོར་ལྷ། ། མ་ལུས་མཆོག་གསུམ་རྩ་གསུམ་ཀུན་འདུས་པ། ། ཏིལ་གྱི་གང་བུ་ཕྱེ་བ་བཞིན་བཞུགས་པའི། ། སྐྱབས་གནས་བསླུ་མེད་མཆོག་གི་བདག་ཉིད་ལ། ། བདག་གཞན་སྒོ་གསུམ་དགེ་ཚོགས་ལོངས་སྤྱོད་བཅས། ། མ་ལུས་གཅིག་ཏུ་བློ་ཡིས་ཡོངས་བསྡོམ་ནས། ། བླ་མེད་གསང་བ་མཆོག་གི་མཆོད་པ་ནི། ། ཀུན་ཏུ་བཟང་པོའི་རྣམ་རོལ་བདེ་བ་ཆེ། ། ཆོས་དབྱིངས་ཀུན་ཁྱབ་ཡེ་ཤེས་བདུད་རྩིའི་སྤྲིན། ། ཕྱི་ནང་གསང་བ་བླ་མེད་ཚོགས་མཆོད་ཉིད། ། མི་ཟད་རྒྱན་གྱི་འཁོར་ལོ་ཆེན་པོ་འདི། ། གུས་པས་འབུལ་ལོ་ཐུགས་རྗེས་བཞེས་ནས་ཀྱང༌། ། རྡོ་རྗེའི་ཐུགས་དམ་དགོངས་པས་བཟུང་དུ་གསོལ། ། བྱང་ཆུབ་བར་དུ་འབྲལ་མེད་རྗེས་འཛིན་ཅིང༌། ཕྱི་ནང་གསང་བའི་བར་ཆད་དབྱིངས་སུ་སོལ། ། ཇི་ལྟར་བསམ་པ་ཡིད་བཞིན་གྲུབ་པ་དང༌། ། མཆོག་དང་ཐུན་མོང་དངོས་གྲུབ་ཆར་ལྟར་ཕོབ། ། མཁའ་ཁྱབ་འགྲོ་བ་ཀུན་གྱི་ཕན་བདེའི་གཏེར། ། འཇམ་དཔལ་སྒྱུ་འཕྲུལ་དྲྭ་བའི་ཡེ་ཤེས་སྐུར། ། འདུ་འབྲལ་མེད་པར་མངོན་པར་བྱང་ཆུབ་ནས། ། དོན་གཉིས་ལྷུན་གྱིས་གྲུབ་པར་མཛད་དུ་གསོལ། ། དྷཱིཿམིང་པས་སོ། །