དག་སྣང་རིན་ཆེན་གསེར་གྱི་རྒྱ་གྲམ་རྡོ་རྗེའི་སྙིང་པོ།

དུས་ལྔ་བརྒྱ་ཡང་མཐའི་སྤྲང་བན་ཁམས་པ་ཉི་མ་གྲགས་པའི་དག་སྣང་རིན་ཆེན་གསེར་གྱི་རྒྱ་གྲམ་རྡོ་རྗེའི་སྙིང་པོ་བཞུགས་སོ། །ཨོཾ་ཨ་ཧཱུྃ་བཛྲ་གུ་རུ་པདྨ་སིདྡྷི་ཧཱུྃ། སངས་རྒྱས་ཀུན་གྱི་མངའ་བདག་འགྲོ་བའི་སྐྱབས། །རྒྱལ་བསྟན་རྩ་ལག་ཐུབ་པའི་རྒྱལ་ཚབ་པ། །བོད་ཀྱི་ཉི་མ་དཔལ་ལྡན་པདྨ་སྐྱེས། །བདག་གི་བླ་མ་ཨོ་རྒྱན་པདྨ་འབྱུང་། །དེང་ནས་བཟུང་ཞིང་ནམ་ཡང་མི་འབྲལ་ཞིང། །རིགས་ཀྱི་མགོན་པོ་ཁྱེད་དང་མི་འབྲལ་ཤོག །སྤྲང་བན་ཉི་མ་གྲགས་པ་ང་། །རང་ལོ་ཉེར་བདུན་ལ་སློབ་དཔོན་ཆེན་པོ་དང་རྗེ་བཙུན་གྱི་གནས་མཆོག་ལིང་ང་བྲག་དམར་རམ་སྲིན་བྲག་དམར་པོར་གཉགས་ཀྱི་ཆོས་རྗེ་རྒྱལ་ཐང་པ་ཆེན་པོར། རིགས་འཛིན་རྒོད་ཀྱི་ལྡེམ་འཕྲུ་ཅན་གྱི་གཏེར་ཁའི་དབང་ལུང་རྣམས་ཞུས་ཤིང་། རྫོགས་པ་ཆེན་པོ་དགོངས་པ་ཟང་ཐལ་གྱི་དབང་གི་རྨི་ལམ་བརྟགས་པའི་ནུབ་མོ་འཁྲུལ་སྣང་གི་རབ་རིབ་ལ་འདི་ལྟར་བྱུང་ངོ་། འདི་ཡིན་ཞེས་ཆ་མེད་པ་ཞིག་གི་ངང་ནས། གསེར་གྱི་རྡོ་རྗེ་རྒྱ་གྲམ་མི་བསྣོལ་བ་ཙམ་ཞིག་གི་སྟེང་ན་སླེབས་འདུག་མ་ཁད་བུད་མེད་བཞིས་རྭ་བཞི་ནས་བཏེགས་ཤིང་ནམ་མཁའ་ལ་འཕུར་སོང་། ཁོང་ཚོས་སྐུ་གསུམ་གསོལ་འདེབས་དང་། ཚིག་བདུན་མའི་གསོལ་འདེབས་འདོན་འདུག་པས། བདག་གིས་ཀྱང་རྗེས་ཟློས་འདྲ་བ་འགའ་རེ་བྱས། ཁོང་བཞི་ལ་བདག་གིས་སྨྲས་པ་ད་རང་རེ་རྣམས་གང་དུ་འགྲོ་རྒྱུ་ཡིན་ལགས་ཞུས་པས། བུ་ཁྱོད་རང་སློབ་དཔོན་ཆེན་པོར་གསོལ་བ་ཐོབ། རང་རེ་མིང་སྲིང་ཚོ་རྔ་ཡབ་པདྨ་འོད་དུ། བདེ་མཆོག་དབང་གི་འཁོར་ལོའི་དབང་སྒྲུབ་ཞུ་རུ་འགྲོ་རྒྱུ་ཡིན་གསུངས། ཡང་མདུན་ཕྱོགས་ཀྱི་བུ་མོ་དེ་ན་རེ། མིང་པོ་ལྟད་མོ་ལ་གཟིགས་ན་ཕྱི་ལྟས་ཤིག་མཛོད་དང་། བོད་ཡུལ་ཁ་བ་ཅན་གྱི་རི་རྣམས་ཡོལ་ལ་ཁད་དུ་ཡོད་གསུངས་པས། ཕྱི་མིག་ཅིག་བལྟས་ཙ་ན་རྫ་རི་བྲག་རི་གངས་རི་མང་པོའི་རྩེ་མོ་ཉུག་ཉུག་དུ་འདུག ནུབ་བྱང་ངོས་ཀྱི་གངས་རི་གཅིག་ལ། རི་ཕྲན་མང་པོའི་བསྐོར་བ་ཞིག་འདུག་ཚེ། ཕ་ཀི་གངས་རི་འདི་ཏེ་སེ་དཔལ་གྱི་གནས་མཆོག་རེད་དམ་ལགས་ཞུས་པས། བུ་མོ་སྔོན་མ་དེས་གངས་རི་ཏེ་སེ་ཕྱིར་ལུས་ཐལ། གངས་རིི་ཕ་ཀི་འདི་མཁའ་འགྲོ་ག་ཤའི་བྱང་ཕྱོགས་ཀྱི་རི་གཅིག་རེད་གསུངས། འོ་ན་རྒྱ་གར་རྡོ་རྗེ་གདན་གང་དུ་ཡོད་ཞུས་པས། རང་ཚོའི་གཡོན་ཕྱོགས་མ་ཀི་ན། ཐང་མནྜལ་ལྟ་བུའི་དཀྱིལ་དུ། ལྕགས་རི་མང་པོའི་བསྐོར་བའི་གྲོང་ཁྱེར་ལ་དབུས་ན་གཙུགས་ལག་ཁང གི་གྷཉྫི་ར་དང་། རྒྱ་ཕིབས་ཅན་མང་པོ་འདུག་པ་འདི་རྡོ་རྗེ་གདན་གྱི་ཕོ་བྲང་ཡིན་གསུངས། མཛད་པ་བཅུ་གཉིས་ཀྱི་བསྟོད་པ་ཞིག་མཛད་འདུག བདག་གི་ཡང་སྐྱབས་སུ་མཆི་སྙམ་པ་ཞིག་བྱུང་། འོ་ན་ནུབ་ཕྱོགས་ཨོ་རྒྱན་གྱི་ཡུལ་གང་དུ་ཡོད་ལགས་ཞུས་པས། རང་རེ་རྣམས་ཀྱི་གཡས་ཕྱོགས་ཕ་ཀི་ན། མཚོའི་འོད་གསལ་ཁྱམ་ཁྱམ་པ་ཞིག་འདུག་པ་འདི། སྔོན་ཚེ་སློབ་དཔོན་ཆེན་པོ་འཁྲུངས་པའི་ཡུལ་དྷ་ན་ཀཽ་ཤ་བྱ་བ་དེ་ཡིན། མཚོའི་ལྷོ་ཕྱོགས་ཕ་ཀི་ན་གྲོང་ཁྱེར་ཆེན་པོ་གཙུག་ལག་ཁང་དང་བཅས་ཏེ་འདུག་པ་ནི། ཨོ་རྒྱན་རྒྱལ་པོའི་ཕོ་བྲང་ཐོར་ཅོག་དགུ་ལྡན་བྱ་བ་དེ་ཡིན། རང་རེ་རྣམས་ཀྱི་གཡོན་ཕྱོགས་མ་ཀི་ན། ཐང་བདེ་ལ་ཡང ས་པ་ཞིག་གི་དཀྱིལ་ན། གྲོང་ཆེར་མང་པོ་ཞིག་འདུག་པ་ནི། ལྷོ་ཕྱོགས་བྷེ་ཏའི་ཡུལ་ཡིན། བྷེ་ཏའི་གྲོང་གི་ལྷོ་ཕྱོགས་ཤིང་ནགས་སྐྱེས་པའི་རི་བོ་མ་ཀི ལྷོ་ཕྱོགས་དཔལ་གྱི་རི་བོ་ཡིན། ད་ལྟ་ལྷོ་ཕྱོགས་དཔལ་གྱི་རི་བོ་ན། སྔོན་རིགས་འཛིན་པདྨ་འཕགས་ཡུལ་དུ་བཞུགས་དུས་ཀྱི་སློབ་མ་སློབ་དཔོན་དྷེ་ཝ་ཛྙཱ་ན་བྱ་བ་དེས། ཆོས་གཏེར་ལ་ལོངས་སྤྱོད་ནས་བསྟན་འགྲོ་བདེ་བ་ལ་འགོད་ཅིང་ཡོད་གསུངས། དེའི་རིགས་དང་མཚན་མ་གང་ལགས་ཞུས་པས། རིགས་རྗེ་རིགས་མཚན་ཛྙཱ་ན་བཛྲ་བྱ་བ་ཡིན་གསུངས། འོ་ན་ད་ལྟ་རྒྱ་གར་ན་གཞན་གྱི་གཏེར་སྟོན་ཡོད་དམ་ཞུས་པས། ད་ལྟ་ཁ་ཆེའི་ཡུལ་ན་སིདྡྷི་དྷོ་ཛ་བྱ་བའི་གཏེར་སྟོན་ཅིག་ཡོད། རྒྱ་གར་རྡོ་རྗེ་གདན་དུ་གུ་རུ་ཤྲཱི་སེངྷཱའི་རྣམ་སྤྲུལ། བྷོ་དྷི་ཡཀྵཱ་བྱ་བ་གཅིག་ཡོད། ཀ་མ་རུའི་གྲོང་ཁྱེར་ན། ན་ག་པུཎྱེ་ཟེར་བའི་གཏེར་སྟོན་ཅིག་ཡོད། གཞན་ཡང་སྤྲུལ་པ་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པ་ཡོད་གསུངས། འོ་ན་སངས་རྒྱས་ཤཱཀྱ་ཐུབ་པའི་བསྟན་པ་ནུབ་ཡོད་ཟེར་བས། ད་སོས་པའི་དུས་ཡོད་དམ་ཞུས་པས། སངས་རྒྱས་ཤཱཀྱ་ཐུབ་པའི་བསྟན་པ་ནུབ་པའི་དུས་ལ་བབ་པས་སོས་པར་དཀའ། ཐུབ་པའི་བསྟན་པ་མཐའ་འཁོབ་ནས་མཐའ་འཁོབ་དུ་དར་བའི་དུས་ཡིན་གསུངས། འོ་ན་བོད་ཡུལ་གྱི་སངས་རྒྱས་ཀྱི་བསྟན་པ་འདི། དངོས་གཞི་ཡིན་ནམ་ལགས་ཞུས་པས། ཁྱེད་བོད་ཡུལ་གྱི་སངས་རྒྱས་ཀྱི་བསྟན་པ་རྟག་འཛིན་ལ་ཐུག་སྟེ། ཆེས་ཆེར་གསལ་ཉམ་ཆེ་ཡང་ཆོས་ཀྱི་གང་ཟག་དཀོན་གསུངས ། ད་ཡང་མཐའ་འཁོབ་ཏུ་བསྟན་བའི་རྩས་འཕོ་ལ་ཉེ་གསུངས། དེ་ནས་གནམ་ཐང་ལ་ལྷུང་བ་ལྟ་བུ འི་ཆུ་གཅིག་མཐོང་བས་མ་ཀིའི་ཆུ་ཆེན་པོ་འདི་གང་ལགས་ཞུས་པས། ཆུ་ཆེན་པོ་འདི་མཐའི་རྒྱ་མཚོ་ཡང་ཟེར། རྔ་ཡབ་གླིང་དང་འཛམ་གླིང་གི་བར་གྱི་རྒྱ་མཚོ་ཡིན་གསུང། དེ་ནས་ཆུ་དེ་རྫོགས་པ་དང་། གླིང་གི་ཆགས་ཚུལ་གྲུ་གསུམ་པའི་ཉམས་ལ། ཁ་ཁྱེར་སྦོམ་པ་རི་རབས་ཀྱི་ངོས་ལ་བསྟན་པ་སྙམ་བྱེད་པ་འདྲ་བའི། ཤར་ནས་ལྷོ་རྒྱུད་འཁོར་བ་ལ། ཤིང་ནགས་མང་པོ་ཡོད་མདོག་ཁ་པོའི། རི་མདོག་ནག་རྔམ་མེ་བས་འཁོར་བ། ནུབ་བྱང་རྣམས་ནི་རྫ་དང་བྲག་དང་སྤང་རི་སྣ་ཚོགས་སུ་ཡོད་པ། རྒྱ་ཁྱོན་ཤིན་ཏུ་ཆེ་བའི་གླིང་། ཀླུང་མིག་གི་མི་མཐོང་བ་རྣམས་ཀྱང་། ཐང་བདེ་ལ་ཉམས་དྭངས་པ་དམར་སྨུག་གི་མདོག་ཅན་མང་པོར། མཚོ་ཆེ་ཆུང་སྣ་ཚོགས་སུ་ཡོད་པ་འགའ་གདའ་འོ། ད་རང་རེ་རྣམས་ཀྱི་ལྷོ་ནུབ་ཀྱི་ཕྱོགས་སུ་རི་བོ་ཕོ་བྲང་རྩེ་རྒྱན་ཅན་ཞིག་འདུག་པ་ཡ་ཀི། པདྨ་འོད་ཀྱི་གཞལ་ཡས་ཡིན། གསོལ་འདེབ་ལ་འབུངས་གསུངས་པ་དང་། སློབ་དཔོན་ཆེན་པོ་མཁྱེན་སྙམ་པའི་མོད་ལ། མཁའ་ནས་ཐང་ལ་ལྷུང་ཐབས་ཀྱིས་བབ་སོང་བས་རི་བརྗིད་ཆེ་ལ་མཐོ་བ། སྨད་བྲག་རི་རྒྱ་མཚོའི་འཁོར་བ། བྲག་རྣམས་ཀྱང་དུད་འགྲོའི་གློ་བའི་ཚུལ་དུ་ཡོད་པ། སྐེད་པ་ཡན་རྫ་རི་ལས་གྲུབ་པ། སྤང་ལང་ལོང་དུ་ཡོད་པ། དབྱིབས་གྲུ་གསུམ་པ། མཐོ་ཟང་ངེ་བ་གཅིག་གི་ཤར་ཕྱོགས་ན། བྲག་དཀར་པོ་ཐོག་སོ་གསུམ་ཙམ་གྱི་ཚད་ཡོད་པ། ཞལ་ཞལ་ལྟར་འཇམ་པའི་ངོས་ནས་ལམ་སྦྲུལ་ནག་འཁྱུག་པ་འདྲ་བ་གཅིག་གི་མདུན་དུ་སླེབས་འདུག་པ་དང་། བུད་མེད་རྣམས་ཀྱི་ནང་ནས་མདུན་ཕྱོགས་ཀྱི་བུད་མེད་དེ་བཞུགས་འདུག གཞན་གསུམ་པོའི་རྡོ་རྗེ་རྒྱ་གྲམ་དེ་བཏེགས་ནས། ཡ་ཀིའི་རི་རྩེར་མཁར་དམར་པོ་གསེར་གྱི་རྒྱ་ཕིབས་ཡོད་པ་གཅིག་འདུག་པའི་ནང་དུ། བར་སྣང་ལ་བསྐྱོད་སོང་། བུ་མེད་དེ་ན་རེ། བུ་བྲག་ཆེན་དཀར་པོ་འདི་ཕོ་བྲང་ཕྱི་ནང་གི་ལྕགས་རིའི་མཚམས་ཡིན། འདི་བརྒལ་བ་ཡིན་ཆད་པདྨ་འོད་ཀྱིས་སྤྲས་པའི་ཕོ་བྲང་ཡིན། རྒྱལ་ཐོ་ཡང་འདི་ཡར་བཅད་ལ་འཛུགས་པ་ཡིན། མ་ཀི་མགྲོན་པོ་མང་པོ་འདི་རྣམས། བདེ་མཆོག་དབང་གི་འཁོར་ལོའི་སྒྲུབ་ཆེན་དུ། ཚོགས་རྫས་འབུལ་དུ་ཡོང་པ་རེད། ངེད་རང་ཚོ་ལ་ཕོ་བྲང་ནས་གིང་པས་མཚམས་གཅོད་དང་ཐུན་བྲབ། རྡོ་རྗེ་ལས་པས་ཁྲུས་ཆུ་རྣམས་མ་བྱུང་གི་བར་དུ་བསྒྲོད་པའི་དབང་མེད་པས་དེ་བར་དུ་འདིར་ཤོག་དང་། གྷུ་རུ་རིན་པོ་ཆེའི་ཞབས་རྗེས་ཟླ་བ་ཚེས་འདྲ་དང་། ཕྱག་རྗེས་ཉི་མ་ཤར་འདྲ་ཡོད་པས། དེའི་དྲུང་ན་བཤགས་པ་སྨོན་ལམ་བྱེད་གསུངས་ནས། ཕྱོགས་ལྷོ་ངོས་ཀྱི་ཕར་ཙམ་ཕྱིན་པས། ཞབས་རྗེས་མི་རྐང་གཉིས་འགྱུར་ཙམ་ཞིག་དང་ཕྱག་རྗེས་དེ་མཉམ་ཙམ་གཉིས་འདུག་པས། ཕྱག་དང་བཤགས་པ་སྨོན་ལམ་བྱས་སོ། །བུད་མེད་དེ་ན་རེ་ང་ཡ་ཀི་ནས་བརྡ་བྱུང་བས་ང་རང་མ་བུ་འགྲོ་རན། བུ་ཁྱོད་ལིང་ང་བྲག་དམར་གྱི་དབང་སྒྲུབ་དུ་ཡོང་བས། མཚམས་གཅོད་དང་ཁྲུས་སོགས་མི་མཛད་པར་འདུག ང་སྔོན་ལ་འགྲོ་དང་བུ་རང་ཡང་མའི་གོས་མཐའ་ལ་ལག་པས་བཟུང་སྟེ་ཐེ་ཚོམ་མེད་པར་ཤོག་གསུངས་ཚེ། བདག་གི་ཡང་དེ་བཞིན་དུ་ཉན་ཏེ་ཕྱིན་པས། བྲག་ཆེན་དེ་ལ་ཐོགས་མེད་དུ་ཐ ར་ཞིང་རིམ་གྱིས་སོང་བས། རི་དེ་ཡང་ཀུན་ལས་མཐོ་བ་དང་། གཡས་གཡོན་ཐམས་ཅད་ནས་རི་ཀླུང་སྣ་ཚོགས་ཀྱིས་འཁོར་བ། བརྗིད་ད ང་ལྡན་པ་ཞིག་འདུག་གོ རི་དེའི་རྩེ་མོ་ན་ཕོ་བྲང་དེ་ཡང་ཁ་ཤར་ལྷོར་བསྟན་པ་ཞིག་གདའ་འོ། །ལྕགས་རི་ཆེན་པོ་གཅིག་གི་གྲུ་བཞི་པར་བསྐོར་འདུག་པའི་སྟེང་ན་མཆོད་རྟེན་གྱིས་བསྐོར་ཞིང་དྲིལ་བུའི་ཕྲེང་བས་ཡོངས་སུ་མཚན་པ་ཞིག་གདའ་འོ། །ལྕགས་རི་དེའི་ཕྱི་རོལ་མཚོ་ཆུ་ཞིང་འདོམ་བརྒྱད་པ་ཙམ་ཞིག་གི་ཁ་རྣམས་སུ་ཤིང་དང་། མེ་ཏོག་སྣ་ཚོགས་སྐྱེས་པ་ལ། བྱ་རིགས་མི་འདྲ་བ་མང་པོས་སྐད་སྒྲོག་པར་གདའ་འོ། །ལྕགས་རི་དེའི་ཤར་ཕྱོགས་ན་སྒོ་མོ་ཆེན་པོ་གཅིག་གི་སྟེང་དུ། མི་རོའི་རྒྱལ་མཚན་གསུམ་སྒྲིགས་གཅིག་འདུག་པའི་དབུས་མ་ཅུང་ཟད་མཐོ་བར་འདུག་གོ །སྒོ་དེའི་ནང་ནས་ཡར་སོང་བ་དང་བུད་མེད་དེས། ཕོ་བྲང་ཆེན་པོ་འདི་ལ་ང་རང་མ་བུ་གཉིས་སྐོར་བ་ལན་གསུམ་བརྒྱག་ནས་འགྲོ་གསུངས་པ་དང་བསྐོར་བ་ལ་སོང་བས། ཕོ་བྲང་གི་ཕྱི་རོལ་ལྕགས་རིའི་ནང་དུ། ཤར་ཕྱོགས་དེ་ན་མཚོ་མཐིང་ཕོར་ཆུས་བཀང་བ་འདྲ་བའི་ཁ་ན་མེ་ཏོག་དང་། ཤིང་སྣ་འགའ་སྐྱེས་པར་གདའ་འོ། ལྷོ་ཕྱོགས་ན་མེ་ཏོག་སྣ་ཚོགས་ཀྱི་ལྡུམ་ར་ཆེན་པོ་གཅིག་གི་ནང་དུ། སོ་ཕག་གི་རྡོ་ཆལ་ལ་སོ་ཕག་གི་ཁྲི་དམར་ཐམ་མེ་བ་གཅིག་ལ་གསེར་གྱི་གཉྫི་རས་བརྒྱན་པ་གཅིག་འདུག་གོ །ནུབ་ཕྱོགས་ན་བདེ་ཡངས་ཀྱི་བླ་དབྱེ་ཆེན་པོ་གཅིག་གི་དཀྱིལ་དུ། སོ་ཕག་གི་མཆོད་རྟེན་རྒྱ་ཆེ་ལ་དཔངས་མཐོ་བ། གཉྫི་རས་བརྒྱན་ཅིང་དྲིལ་བུའི་ཕྲེང་བ་ཕྱོགས་བཞིར་བྲེས་པ་གཅིག་འདུག་གོ །བྱང་ཕྱོགས་ན་མཁར་ཤིན་ཏུ་མཛེས་པའི་ཐོག་གསུམ་དང་ལྡན་པ་ལ། ཁང་པ་ཆེ་བ་གསུམ་སྦྲེལ་གཅིག་འདུག་གོ །མཁར་དེ་རྣམས་ཀྱི་ཐོག་ཏུ་མི་ལྤགས་ཀྱི་བ་དན་ལ་མི་མགོ་སྐམ་པོའི་ཏོག་གིས་བརྒྱན་པའི་བ་དན་བཞི་བཙུགས་འདུག་གོ དེ་ནས་ཕོ་བྲང་གི་ཕྱོགས་བཞིར་སྒོ་མོ་ཆེན་པོ་རེ་རེ་འདུག་པའི་སྟེང་ན་སྒོ་ཁང་དང་བཅས་བཀོད་པ་ཚད་མེད་པས་བརྒྱན་པར་འདུག་པའི། ཤར་སྒོའི་དྲུང་དུ་སླེབས་པ་དང་ཉི་མ་ཡང་ཤར་བྱུང་ང་ོ། ལྕགས་རིའི་ཕྱི་རོལ་གྱི་ཤར་ལྷོ་མཚམས་ཀྱི་སྒང་རྒྱུད་དུ་སྲིན་གྱི་གྲོང་ཁྱེར་ཅི་མང་ཞིག་འདུག་གོ །དེ་ནས་ཕོ་བྲང་གི་ཤར་སྒོ་ནས་ཡར་སོང་བས། འཁོར་ས་ཆེན་པོ་གཅིག་གིས་བསྐོར་བའི་དབུས་ན། ཕོ་བྲང་ལྟ་ན་སྡུག་པའི་གཞལ་ཡས་ཀྱི་ཁང་པ་ཆེན་པོ། འོད་དང་འོད་ཟེར་གྱི་དྲ་བ་འབྲེལ་བའི་རྩེ་མོར། རྒྱ་ཕིབས་དང་གཉྫི་ར་རྣམས་མི་མངོན་པ་སྙམ་བྱེད་པ་ཞིག་འདུག་པའི་ཐོག་གསུམ་པའི་དང་པོ་ལ། ཕྱོགས་བཞིའི་ལྟག་མགོ་ལ། ཤར་དུ་སེངྒེ། ལྷོར་འབྲུག ནུབ་ཏུ་ཁྱུང་ཆེན། བྱང་དུ་སྟག་སྟེ་སེམས་ཅན་བཞིའི་གཟུགས་བརྙན་གསེར་ལས་གྲུབ་པའི་སྤྱི་གཙུག་རྣམས་སུ་ནོར་བུ་གསུམ་སྒྲོམ་འོད་དཔུང་གིས་སྤྲས་པས་བརྒྱན་པའི། ལུས་ལ་རིན་པོ་ཆེ་མང་པོའི་ཕྲེང་བས་སྤྲས་པ་ལ། དར་གྱི་ཅོད་པན་རླུང་གིས་བསྐྱོད་པའི་ཚུལ་ཅན་འདུག་པའི་ཁ་རྣམས་ནས། དབང་པོ་དང་དོན་སྙིང ནང་རོལ་རྣམས་ཀྱི་ཕྲེང བས་བརྒྱན་པར་འདུག་པའི། རྟ་མགོ་བཞིར་མི་རོའི་རྒྱལ་མཚན་བཞི་གཙུག་ནས་འདུག་གོ །མཚམས་བཞིར་མི་ལྤགས་ཀྱི་བ་དན་ཟུར་གསུམ་པ་རེ་ལ་མི་སྐྲའི་ལན་ཚར་གྱི་རྔ་ཐུག་གི་རྩེ་ལ། མི་མགོ་སྐམ་པོའི་ཏོག་གིས་བརྒྱན་པ་རེ་གཙུགས་འདུག་ཅིང། མི་ལྤགས་ཀྱི་ཁ་བད་ཀྱི་འཁོར་བ་གཅིག་གདའ་འོ། །ཐོག་གཉིས་པའི་ཕྱོགས་མཚམས་ཀུན་ཏུ། གྱད་སྟོབས་པོ་ཆེ་མང་པོའི་གཟུགས་ལ། རྒྱན་ཕྲེང་དང་དར་དཔྱངས་འཕྱོ་བའི་བར་རྣམས་སུ་རིན་པོ་ཆེའི་དྲ་ཕྱེད་ཕྱི་ནང་མང་པོས་བརྒྱན་པའི་གདོང་བཞིར། གསེར་གྱི་རྒྱལ་མཚན་བཞི་དང་མཚམས་བཞིར་བ་དན་བཞིས་བརྒྱན་པར་འདུག་གོ །ཁ་བད་ནི་གསེར་ལས་གྲུབ་འདུག ཐོག་གསུམ་པའི་སྟེང་ན་རྒྱ་ཕིབས་གཉྫི་རས་མཚན་པའི་ཁ་བད་ཀྱི་འོག་ནས། སེངྒེའི་གཟུགས་མང་པོའི་ཁ་ནས་དྲིལ་བུའི་ཕྲེང་བ་ཚར་གསུམ་གསུམ་འབྲེལ་བ། ཕྱོགས་བཞིར་ལྕོག་གི་ཚུལ་ཅན་རེ་རེའི་སྟེང་དུ། གཉྫིའི་ར་ཆུང་བ་བཞིས་བརྒྱན་ཅིང་། མཚམས་བཞིར་ཁ་ཊཱཾ་ག་བཞི་ལ། དར་དཀར་སེར་དམར་ལྗང་གི་བ་དན་བསྐྱོན་པས་བརྒྱན་པར་འདུག་གོ །དེ་ནས་བུད་མེད་དེས་བདག་ལ་འདི་སྐད་གསུངས་སོ། །བུ་ཁྱོད་རིག་པ་མ་སྒྲིམ་རྨི་ལམ་གྱི་སྣང་བ་ཡིན། མངོན་སུམ་པདྨ་འོད་ཀྱི་བཀོད་པ་འདི་ཚོ་ཡིད་ལ་ཆོངས་ལ། དཀར་ཆགས་སུ་འཁོད་དོ་སྐལ་ལྡན་ལ་སྟོན་ཅིག ད་གཞལ་ཡས་ཁང་ཆེན་པོ་འདིའི་འོག་ཏུ། སྤྲུལ་སྐུའི་ལྷ་ཁང་ན། པདྨ་ཐོད་ཕྲེང་རྩལ་སྲིན་རྒྱལ་གྱི་ཚུལ་དུ་བཞུགས་ཡོད་པས། དད་མོས་ཀྱི་སྣང་བ་བསྐྱེད་ལ། འཇིགས་སྐྲག་གི་ཤེས་པ་སྤོངས་ཤིག མཇལ་རྟེན་དུ་འདི་ཁྱེར་གསུངས་ནས། ཀ་པཱ་ལ་ལྕང་ལོ་ཅན་ཞིག་ཆང་གི་གཏབས་པ་གཏད་བྱུང་ངོ་། །དེ་ནས་བུད་མེད་དེ་ནང་དུ་གཤེགས་སོང་བའི་ཕྱི་ལ། གོས་ནས་གཟུངས་བཞིན་སོང་བས། ཚོམས་ཤིན་ཏུ་ཆེ་བ་གཅིག་གི་དབུས་སུ། ཁྲི་སྨུག་པོ་གཅིག་གི་སྟེང་ན། ཉི་ཟླ་དང་པདྨ་རྣམས་ཀྱི་གདན་ལ། རང་འོད་ཀྱི་ཟེར་དུ་འབར་བའི་སྟེངདུ། རོ་གན་རྐྱལ་དང་ཁ་སྦུབས་བསྣོལ་བའི་ཁྲི་ལ། ཁྲོ་བོ་ཆེན་པོ་སྨུག་ནག་དབུ་དགུ་ཕྱག་བཅོ་བརྒྱད། ཞབས་བརྒྱད་ཕྱོགས་མཚམ་སུ་བགྲད་པ། འཇིགས་པའི་མཚོན་ཆ་དང་། སྙིང་དང་། མགོ་བོ་དང་། བྷན་དྷ་ཁྲག་གིས་བསྐང་བ་ལ་སོགས་ཐོགས་པ། ལུས་ལ་རང་འཁྲུངས་ཀྱི་གཤོགས་པ་བརྒྱངས་པ། ཞལ་གདངས་ཤིང་ལྗགས་འགྲིལ་བ། མཆེ་བ་གཙེགས་ཤིང་སྨ་ར་དང་སྨིན་མ་དམར་སེར་དུ་འབར་བ་ལ་མེ་སྟག་འཕྲོ་བའོ། །སྐྲ་ཁམ་སེར་གྱེན་དུ་གཟེངས་པ་ལ། ཐོད་སྐམ་དང་རྩེ་བྲན་གྱིས་བརྒྱན་པ། མི་མགོའི་དོ་ཤལ་མི་ལྤགསས་ཀྱི་གཡང་གཞི། མདོར་ན་ཁྲོ་བོའི་ཆས་ཐམས་ཅད་རྫོགས་པ། མེ་ཆེན་འུར་འུར་འབར་བའི་ཀློང་དུ་བཞུགས་པ། ཞལ་དེ་རྣམས་ནས་ཧ་ཧ་དང་། ཧཱུྃ་ཧཱུྃ། ཕཊ་ཕཊ། བྷྱོ་བྷྱོ། ཛ་ཛ་ཟེར་བ་ལྟ་བུའི་སྒྲ་སྣ་ཚོགས་སྒྲོགས་པ། འཁོར་གྱི་ཚོགས་ཀྱང་ཞལ་གསུམ་ཕྱག་དྲུག་པའི་རིགས་དང་། མགོ་བསྙན་སྣ་ཚོགས་ཀྱི་ཚུལ་མང་པོས། གར་བརྩེ་བ་འདྲ་བ་གིང་རྒྱུ ག་པ་འདྲ་བ་མང་པོ་བྱེད་འདུག ཁྱད་པར་གྱི་གཙོ་བོ་དེ་ཡང་ལྡེར་སོ་དང་འདྲ་འབག་བཞེངས་སྐུ་ལ་སོགས་གང་ཡང་མ་ཡིན་པར། མངོན་སུམ་གྱི་རང་ཞལ་ཅན། རླང་ཕྱུར་ཕྱུར་གར་ཉམས་སུ་ལིང་ལིང་གད་རྒྱང་དུ་ལྷང་ལྷང་འདུག་པའི་མདུན་དེ་ན་མི་རྐང་གསུམ་གྱེན་དུ་བཙུགས་པའི་རྩེ་ལ། མི་མགོ་གསུམ་གྱི་སྒྱེད་པུ་བྱས་པའི་སྟེང་ན། བྷན་དྷའི་དབྱིབས་ཅན་གྱི་སྣོད་གཅིག་གི་ནང་དུ། དཔལ་གྱི་གཏོར་མ་དམར་ནག་གི་མདོག་ཅན། མེ་ཤེལ་ལྟར་ཕྱི་ནང་གསལ་བ། རང་འོད་ཀྱི་མེ་ལྷབ་ལྷབ་འབར་བ་ལ་བམ་མང་པོ་གཙུགས་པ་གཅིག་གི གཡས་གཡོན་རྣམས་སུ་རོ་དང། ཤ་སྣ་བསམ་གྱིས་ཁྱབས་པ། ཆང་དང་ཁྲག་གི་ཚོགས་མང་པོ་བཀོད་པ་གཅིག་གདའ་འོ། །ཕྱོགས་ཐམས་ཅད་ནས་རོལ་མོའི་སྒྲ་སྣ་ཚོགས་དང་། འདོན་པའི་དབྱངས་འདྲ་བ་མང་པོ་འུར་སྒྲ་དང་བཅས་འདུག་ཀྱང་། དེ་རྣམས་མིག་གིས་མཐོང་བ་ནི་མ་བྱུང་ངོ་། །དེ་ནས་བདག་གི་ལག་ཏུ་ཡོད་པའི་བྷན་ཆང་དེ། མིའི་ལུས་ལ་མ་ཧེའི་མགོ་བརྙན་ཅན་ཞིག་གིས་ཁྱེར་སོང་ཚེ། གཙོ་བོ་ཆེན་པོ་དེའི་ཞལ་གྱི་ནང་དུ། གསེར་སྐྱེམས་མཆོད་པ་འདྲ་བ་ཞིག་བྱས་སོང་སྣང་བྱུང་། དེ་མ་ཐག་ཏུ་བུད་མེད་དེ་དང་ངེད་གཉིས་ཀྱི་ལག་ཏུ། སུས་བྱི ན་ཆ་མེད་པར་བྷན་ཆང་རེ་དང་ཤ་དུམ་རེ་བྱིན་འདུག་པས། བུད་མེད་དེས་མྱུར་དུ་ཟོ་དངོས་གྲུབ་ཀྱི་རྫས་རེད་གསུངས་བྱུང་བ་དང་། ཁམ་འགའ་རེ་ཟོས་སྣང་བཏུང་སྣང་བྱུང་ཚེ། བཟའ་བཏུང་གིས་རབ་ཏུ་ཚིམ་སྣང་ཆེན་པོ་བྱུང་ངོ་། །ལར་ཁང་པ་དེའི་ནང་དུ་གསུར་དུད་ལྟ་བུའི་དྲི་ཡ་ང་བ་དང་། རྐང་པ་གར་བརྒྱབ་ཐམས་ཅད་ཁྲག་གི་འཇམ་འཇིམ་དུ་ཡོད་པ་ལ། མེ་འོད་ཆེན་པོའི་ཚད་པ་ལྟ་བུས་ཚྭ་བ་དང་། གློག་གི་ཟེར་འཁྱུགས་པ་འདྲ་བ་མང་པོས་ལུས་ཕྱི་ནང་ཐམས་ཅད་ཚིགས་པ་སྙམ་བྱེད་པ་དང་། ཚ་བ་དང་གཡའ་བ་དང་། སྐྲ་གཟེང་ཅིང་སྐྱི་བུན་བྱེད་པར་འདུག་གོ བུད་མེད་དེའི་སྐུ་དྲིན་མིན་ན་སྐད་ཅིག་ཙམ་ཡང་བཟོད་མི་ཚུགས་པར་གདའ་འོ། །དེ་ནས་བུད་མེད་དེས་ངའི་ལག་པ་ནས་བཟུང་བཞིན་དུ། ཟངས་ཀྱི་སྒྲོམ་སྐས་ཆེན་པོ་གཅིག་འདུག་པ་དེ་ལ་ཁྲིད་སོང་བས། སྐས་མགོར་སླེབས་པ་དང་མོའི་ཕག་ནས་དངུལ་གྱི་མེ་ལོང་གཅིག་བདག་ལ་གཏད་དེ། བུ་སློབ་དཔོན་ཆེན་པོའི་མཇལ་རྟེན་དུ་འདི་ཁྱེར་གསུངས་པ་དང་། སྒོ་དམར་པོ་རྒྱབ་རལ་ཆེན་པོ་གཅིག་འདུག་པ་དེ་ཕྱེས་སོང་བའི་ནང་དུ། ཁང་པ་ཆེན་པོ་གྲུ་བཞི་པའི་ཕྱི་རོལ་ནས་སྐོར་ཁང་ཡོད་པ་ཞིག་གི་དབུས་ན། རྣམ་པ་མཆོད་རྟེན་གྱི་དབྱིབས་ལ། མཆོད་རྟེན་རང་ཡང་མ་ཡིན་པའི་འོད་འཕྲོ་བ་གཅིག་གི་ནང་ན། ཐུགས་རྗེ་ཆེན་པོ་སྐུ་མདོག་དམར་པོ་ཡུམ་དང་སྦྱོར་བ། གཡས་ན་སྲས་ནོརའཛིན་དང་། གཡོན་ན་སྲས་མོ་རིགས་སྔགས་འཛིན་པའི་སྐུ་གཉིས་དང་བཅས་པ་ལ། ཉེ་སྲས་བརྒྱད་ཀྱིས་བསྐོར་བའི་གཞལ་ཡས་ཁང་དེའི་སྤྱན་རས་གཟིགས་ཀྱི་སྐུ་མདུན་དུ། རིན་ཆེན་ཤེལ་གྱི་ཁྲི་རྐང་པ་བརྒྱད་པ་གཅིག་གི་སྟེང་ན། ཨོ་རྒྱན་གྱི་སློབ་དཔོན་ཆེན་པོ། པདྨ་འོད་འབར་གྱི་མངོན་རྟོགས་དང་ཆ་མཚུངས་པར་བཞུགས་འདུག སྐུ་དེའི་མདུན་དུ་སྒྲུབ་པའི་དཀྱིལ་འཁོར་རྒྱན་དང་བཀོད་པ་ཁྱད་པར་འཕགས་པ་གཅིག་བཤམས་འདུག ཕྱོགས་བཞིར་གདན་ཁྲུ་རེ་པའི་སྟེང་དུ། བུད་མེད་བཞི་གཟུངས་ཐག་འཐེན་འདུག གཟུངས་ཀྱི་ཐག་པ་བཞིའི་ཕྱི་རོལ་དུ་སྐྱེས་པ་དང་བུད་མེད་གཞོན་ལ་སྐྱེ་མཆེད་དངས་པ་རྣལ་འབྱོར་ཕོ་མོའི་ལུས་ཆས་ལ་རྒྱན་དྲུག་བཏགས་པ་བཅུ་དྲུག་གིས་འཛབ་དབྱངས་དང་། བྲོ་རྒྱུན་མི་ཆད་པར་བརྩོན་འདུག དཀྱིལ་འཁོར་ཆེན་པོ་དེའི་གཡས་གཡོན་ནས། རིགས་འཛིན་གྱི་གྲལ་བརྒྱད་འདུག་པ་རྣམས་ཀྱང་། སྔགས་ཆས་ལ་ཟ་བེར་དང་པད་ཞྭ་ཅན། གདན་འབོལ་རྩེགས་ཁྲུ་རེ་ལྷག་ཙམ་གྱི་སྟེང་དུ་བཞུགས་པ་ཁོ་ནར་འདུག གྲལ་དེ་རྣམས་ཀྱི་མཐའ་བསྐོར་ནས། སྲིན་པོ་ཕོ་མོ་མང་པོས་སྐོར་བ་དང་། འཛབ་དབྱངས་ལ་ནན་ཏན་དུ་བྱེད་པར་གདའ་འོ། །རིག་འཛིན་གྱི་གྲལ་དེ་རྣམས་ཀྱང་། འཕྲིན་ལས་རིགས་མི་འདྲ་བ་མང་པོའི་གཞུངས་བསྲང་པ་འདྲ་བ་ཞིག་འདུག དེ་ནས་བདག་གིས་དངུལ་གྱི་མེ་ལོང་དེ་ལག་པ་ཐལ་མོ་སྦྱར་བའི་བར་དུ་ཐོགས་ནས། སློབ་དཔོན་ཆེན་པོའི་མདུན་དུ་བཞག་ཅིང་ཕྱག་བཙལ་བས། བུད་མེད་དེས་གྷུ་རུ་རིན་པོ་ཆེ་ལ་འདི་སྐད་ཞུས་སོ། ཀྱཻ་གུ་རུ་རིན་པོ་ཆེ་བུ་དེ་འཁོན་ཀླུ་དབང་གི་སྐྱེ་བ་སྒྲུབ་ཆེན་འདིར་ཁྲིད་ཤོག་གསུངས་པ་དེ་ཡིན་པས། ཐུགས་རྗེས་གཟིགས་ནས་བྱིན་གྱིས་བརླབས་ཏུ་གསོལ། ཞེས་ཞུས་སོང་བས། གུ་རུ་རིན་པོ་ཆེས་བུ་ཁྱོད་གདན་དེའི་སྟེང་དུ་བསྡོད་ལ། མ་ཡེངས་པས་སྒྲུབ་པ་ལ་ཞུགས་ཤིག་གསུངས་པ་དང་། གྷུ་རུ་རིན་པོ་ཆེའི་སྐུ་མདུན་དེ་རུ་གདན་སྟོང་པ་གཅིག་གི་ཁར། ཟ་བེར་དང་པད་ཞུ་གཅིག་འདུག་པ་དེ། བུད་མེད་དེས་ཀ་བ་གཅིག་གི་ལོགས་ལ་བཀལ་ནས། ཁྱོད་རང་དེར་སྡོད་གསུངས་པ་དང་། བདག་ཀྱང་གདན་དེའི་ཁར་བསྡད་མ་ཐག་སློབ་དཔོན་ཆེན་པོས་བདག་ལ་འདི་སྐད་གསུངས་སོ། །བུ་ཁྱོད་ད་ལྟ་སླེབས་པ་ལེགས་འདུག གནས་འདིར་བདེ་མཆོག་དབང་གི་དཀྱིལ་འཁོར་ཞལ་ཕྱེས་ནས། དབང་བསྒྲུབ་ལ་ཞུགས་ཏེ་ཞག་སྔ་མ་གཅིག་སོང་ཞིང་། ད་ཞག་བདུན་གྱི་བར་དུ་སྒྲུབ་པ་ནན་ཏན་བྱེད་རྒྱུ་ཡིན་པས། མ་ཡེངས་པར་བརྩོན་འགྲུས་དྲག་པོས་ལག་ལེན་དང་བསྙེན་བསྒྲུབ་ཀྱི་ཐུན་འབུངས་ཤིག གནས་འདི་པདྨ་འོད་ཀྱི་སྤྲས་པའི་ཕོ་བྲང་ཡིན། བདག་ཉིད་རིགས་འཛིན་པདྨ་འབྱུང་གནས་ཡིན། ཁྱོད་ཀྱི་རོག་ལྡན་བྱེད་མཁན་དེ་བུད་མེད་ཡེ་ཤེས་མཚོ་རྒྱལ་ཡིན། གྲལ་གཡས་གཡོན་འདི་རྣམས་རིགས་འཛིན་ཉེར་ལྔ་དང་། ཁ་བ་ཅན་ན་གསང་སྔགས་ཟབ་མོ་ཉམས་སུ་བླངས་བའི་གང་ཟག་ས་ཐོབ་པ་རྣམས་ཡིན། དཀྱིལ་འཁོར་གཟུངས་མ་རྣམས་སྔོན་བོད་ཡུལ་ཁ་བ་ཅན་གྱི་གནས་མཆོག་བསམ་ཡས་མཆིམ་ཕུར། བདེ་མཆོག་དབང་གི་འཁོར་ལོའི་དཀྱིལ་འཁོར་དུ་སྨོན་ལམ་བཏབ་པའི་བུད་མེད་རྣམས་ཡིན། འཛབ་བྲོ་བའི་རྣལ་འབྱོར་པ་འདི་ཚོ་ཡང་། གཏེར་སྟོན་གླིང་ཆེན་བརྒྱད་དང་། བུད་མེད་རྣམས་དེ་དུས་ཀྱི་རིགས་མ་བརྒྱད་ཡིན། ཁྲོམ་དམར་ནག་འཛབ་སྐོར་ལ་འགྲོ་མཁན། སྲིན་ཡུལ་གྱི་སྐལ་ལྡན་ཕོ་མོ་རྣམས་ཡིན། དཀྱིལ་འཁོར་ཆེན་པོ་འདི་ཡང་སྒྲུབ་ཆེན་དབང་གི་བསྙེན་བསྒྲུབ་སྨན་དང་འབྲེལ་བ་ཡིན། བུ་ཁྱོད་ཀྱི་སྔོན་དུ་མཇལ་བའི་ཐོད་ཕྲེང་རྩལ་དེ། སྲིན་རྒྱལ་གྱི་གཟུགས་སྣང་གང་ལ་གང འདུལ་གྱི་སྐུར་སྤྲུལ་ནས། ཡུལ་ཕྱོགས་འདིའི་འགྲོ་བ་སྨིན་གྲོལ་ལ་འགོད་པའི་ཚུལ་སྣང་དུ་གྲུབ་པ་ཡིན། གཞལ་ཡས་ཁང་འདིའི་སྟེང་ན་ཆོས་སྐུའི་ལྷ་ཚོགས་ཡོད་པས། བོད་ཡུལ་དུ་འགྲོ་ཁ་སྨོན་ལམ་ཐོབ་ལ་སོང་གསུངས་པ་དང་། བདག་གི་ལུས་ངག་ཡིད་གསུམ་པོ་འདི། ཐ་མལ་གྱི་སྣང་ཤེས་སྐད་ཅིག་ཙམ་ཡང་མེད་པར། འདི་ལྟར་མངོན་གསུམ་དུ་ཨོ་རྒྱན་གྱི་སློབ་དཔོན་ཆེན་པོ། རིགས་འཛིན་གྱི་ཚོམ་བུ་དང་བཅས་པའི་གྲལ་དུ་འདུག་ཅིང་བསྙེན་སྒྲུབ་ལ་འཇུག་ཏེ། པདྨ་འོད་ཀྱི་ཞིང་ཁམས་སུ་སྡོད་རྒྱུ་ཡོད་པ་འདི། བསྐལ་བ་བཟང་ཞིང་ཚོགས་བསགས་བསམ་པ་གཅིག་གི་ངང་ལ། སངས་རྒྱས་ཐོབ་པ་ཙམ་གྱི་དགའ་བདེ་འཕེལ་བ་ཞིག་འདུགས་ཚེ། སློབ་དཔོན་རིན་པོ་ཆེ་ལ་འདི་སྐད་ཞུས་སོ། །གྷུ་རུ་རིནཔོ་ཆེ་བདག་ལ་ཐུགས་རྗེས་གཟིགས་ཤིག བདག་ངན་བུ་ལུས་ངན་ཤ་ཁྲག་གི་དྲ་བར་ཆུད་ནས། འཁོར་བར་འཁྱམས་ཀྱང། འདི་ལྟར་གནས་མཆོག་པདྨ་འོད་དུ་རིགས་འཛིན་གྱི་སློབ་དཔོན་ཆེན་པོ། ཚོམ་བུ་འབུམ་དང་བཅས་ཏེ་འཇལ་ནས། བསྒྲུབ་པའི་དཀྱིལ་འཁོར་དུ་འཇུག་པ་འདི་སྐལ་བ་བཟང་ཞིང་ཚོགས་རེ་བསགས་ལགས། བདག་ངན་བུ་ལ་ཐུགས་རྗེས་གཟིགས་ལ་བྱིན་གྱིས་རློབ་ཤིག་ཞུས་པས། སློབ་དཔོན་ཆེན་པོས་ད་བུ་ཁྱོད་བོད་ཡུལ་གུང་ཐང་སྲིན་བྲག་དམར་པོར་དབང་སྒྲུབ་ལ་ཞུགས་པའི་སྐབ་ནས་ཡོང་པས། སྟ་གོན་རྣམས་བཞག་པ་ཡིན། ད་ཁྱོད་རང་མི་དམིགས་པའི་ངང་ལས་དམིགས་པ་འདི་བཞིན་གྱིས་གསུངས་ནས། དཀྱིལ་འཁོར་གྱི་དབུས་སུ་ཕྱག་གཡས་པ་གདེངས་ཙམ་ཞིག་མཛད་སོང་བས། དཀྱིལ་འཁོར་གྱི་ཕོ་བྲང་ལ་མིག་གིས་ལྟས་ཙ་ན། དེ་སྔོན་སྟེགས་བུ་དང་ལྡེང་ཁྲི་རྡུལ་ཚོན་བུམ་པ་གཏོར་མ་རིགས་འཛིན་ཕོ་མོའི་ཚོགས་སུ་དངོས་སྣང་དུ་གསལ་བ་ཐམས་ཅད། སྐད་གཅིག་དེ་ལ་གནས་འགྱུར་ནས། གཞལ་ཡས་ཀྱི་ཁང་པ་གྲུ་བཞི་སྒོ་བཞི་རྒྱན་རྟ་བབས་ཁྱམས་གྲུ་ཆད་ལ་སོགས་བཀོད་པ་ཚད་མེད་པ་གཅིག་གི་དབུས་སུ། རིགས་འཛིན་འདུས་པའི་གཙོ་མཆོག་ཧེ་རུ་ཀ་དཔལ་ཆེན་པོ་ལ། འཁོར་དཔའ་བོ་དཔའ་མོ་རིག་འཛིན་གྱི་ཚོམ་བུ་དང་བཅས་པ་ཐམས་ཅད་སྣང་ལ་རང་བཞིན་མེད་པའི་སྐུ་དང་ཞིང་ཁམས་སུ་གྱུར་སོང་ཚེ། གཙོ་བོའི་ཐུགས་ཀ་ནས་འོད་ཟེར་གྱི་སྤྲོ་བསྡུ་ལན་གསུམ་མཛད་སོང་བས། ཞིང་ཁམས་ཕོ་བྲང་ལྷ་ཚོགས་དང་བཅས་པ་ཐམས་ཅད་ཀྱང་། ཆེས་ཆེར་རབ་དུ་གསལ་བ་གོ་མ་འགག་པ་གཅིག་ལ། མངོན་སུམ་དུ་ལྷ་མེ་ལྷང་ངེར་འདུག་ཚེ། བདག་གི་ལུས་པོ་ཡང་ཡོད་དུ་མིི་ཚོར་བ་ལ། སེམས་ཀྱི་རྒྱུ་རབ་ཏུ་བརྟན་ལ་གསལ་སྣང་དུ་ལྷམ་མེར་འདུས་པས། གཙོ་བོའི་སྐུ་ལས་འོད་ཀྱི་རང་བཞིན་ཅིག་བདག་གི་ལུས་ལ་ཕོག་པའི་སྣང་ཉམས་ཀྱི་ངང་ནས། བདག་རིགས་འཛིན་གྱི་གཙོ་བོའི་སྐུར་གྱུར་ཞིང་། སླར་ཡང་སྟེང་གི་ཆ་ལས། འོད་དམར་པོ་བུམ་པའི་དབྱིབས་ཅན་ཅིག་བདག་གི་སྤྱི་གཙུག་ཏུ་ཐིམ་པའི་སྣང་བ་ཤར་བས། ཞིང་ཁམས་ལྷ་ཚོགས་དང་བཅས་པ་ལ་གསལ་སྣང་ཐིབས་ཤིང་། སྣང་སྟོང་སྤྲོས་བྲལགྱི་ཉམས་ཁྱད་པར་ཅན་རྒྱུད་ལ་སྐྱེས། སྐད་གཅིག་དེ་ལ་གཙོ་བོའི་ཞལ་ནས། འོད་དམར་པོ་ཧཱུཾ་གི་དབྱིབས་ཅན་ཅིག གློག་འཁྱུག་པ་ལྟར་བདག་གི་མགྲིན་པར་ཐིམ་པའི་སྣང་བ་ཤར་བས། བདེ་སྟོང་འབའ་ཞིག་ཏུ་སོང་། དེ་མ་ཐག་ཏིང་ཏིང་ཤག་གི་སྐད་འདྲ་བ་ཅིག་བྱུང་བ་དང་། གཞལ་ཡས་ཁང་ལྷ་ཚོགས་དང་བཅས་པ་ཐམ་ཅད་འོད་སྔོན་པོ་ཞིག་ཏུ་འདྲིལ། དེ་བདག་ལ་ཐིམ། བདག་ཉིད་ཀྱང་སྣང་སེམས་ཀྱི་འཛིན་པ། འདི་ཡིན་དང་འདི་མིན་གྱི་བླང་དོར་ངོ་བོ་ཉིད་ཀྱི་སྟེང་ནས་སྤྲོས་དང་བྲལ་ཞིང་ཡང་དག་པའི་ཆོས་ཉིད་ཀྱི་ཉམས་དེའི་རང་བཞིན་ནི། ལྐུགས་པས་བུ་རམ་ཟོས་པའི་རོ་ཞིམ་པ་ཚོར་ཀྱང་། ཚིག་གི་སྨྲ་ཐབས་མེད་པ་ལྟར་མི་རྟོག་པའི་ཉམས་ཁྱད་པར་ཅན་དེ་འདྲ་རང་རྒྱུད་དུ་མྱོང་ཡང་། ཚིག་གི་མཚོན་མི་ཐུབ་པ་ཅིག་གདའ་འོ། །ཏིང་ངེ་འཛིན་དེའི་ངང་ལས་སྔ་མའི་མངོན་སྣང་ལས་གྲུབ་པའི་པདྨ་འོད་དང་དཀྱིལ་འཁོར། རིགས་འཛིན་པདྨ་འབྱུང་གནས་འཁོར་དཔའ་བོ་མཁའ་འགྲོའི་ཚོགས་དང་བཅས་པ་ཐམས་ཅད། སྔ་མའི་ཉམས་ལྟར་ཤར་ཞིང་ད་ལམ་གྱི་ཉམས་སྣང་དེ་རྣམས་རྨི་ལམ་གྱི་སྣང་བ་འདྲ་ཞིག་ཏུ་གྱུར་སོང་། དེ་ནས་སློབ་དཔོན་ཆེན་པོས་བདག་ལ་འདི་སྐད་གསུངས་སོ། །བུ་བདེ་སྡུག་འདི་འཁོར་འདས་ཀྱི་རྩ་བ་ཡིན། བླང་དོར་བྲལ་བ་ཞིག་ངེས་པར་དགོས། ཕ་ཡུལ་འདི་ཆགས་སྡང་གི་ཕུང་པོ་ཡིན། གར་སོང་ཆ་མེད་གཅིག་རང་ཐག་ཆོད། དགོན་ཆུང་འདི་ཆོས་བརྒྱད་ཀྱི་རྨིང་རྡོ་ཡིན། བདག་འཛིན་དང་བྲལ་བ་ཞིག་དམ་བཅའ་འཕོང་། ནོར་རྫས་འདི་བདུད་ཀྱི་ཕྱེ་གཏོར་ཡིན། གསོག་འཇོག་མེད་པ་ཞིག་གཏན་དུ་གྱིས། འཁོར་གཡོག་འདི་བར་ཆད་ཀྱི་གཞི་མ་ཡིན། གཅིག་པུར་གནས་ཡུལ་དང་དུར་ཁྲོད་འགྲིམས། ལར་ཀ་དག་འདི་ཆོས་ཉིད་ཀྱི་ལྟ་བ་ཡིན། འོད་གསལ་འདི་ཉམས་སྣང་གི་ལམ་སྟེགས་ཡིན། ཆོས་ཟད་འདི་སྐུ་བཞི་མངོན་གྱུར་ཏེ། བུ་ཞལ་གདམས་དེ་སྙིང་གི་དཀྱིལ་དུ་ཞོག ཞེས་གསུངས་པ་དང་མཁའ་འགྲོ་ཡེ་ཤེས་མཚོ་རྒྱལ་དེ། བདག་གི་གཡོན་ཕྱོགས་སུ་གདན་འབུལ་སུམ་རྩེགས་ཀྱི་ཁར་བཞུགས་འདུག་པས། བདག་ལ་འདི་སྐད་གསུངས་སོ། བུ་ཁམས་པ་ཉི་མ་གྲགས་པ་ད་ལྟ་ཁྱོད་རང་གི་སྒྲོ་འདོགས་ཅི་ཡོད་པ་གྷུ་རུ་རིན་པོ་ཆེའི་དྲུང་འདི་ནས་ཆོད་ཅིག རྗེས་སོར་བོད་ཡུལ་ནས་འགྱོད་དགོས་པ་མང་པོ་ཡོངས་གསུངས་པས། བདག་གི་ཡང་ཐུགས་བདེན་པ་བསམས་ཤིང་། ཤོག་སེར་འབྲི་འབེབས་འཆང་གསུམ་གྱི་རིམ་པ། ཆོས་བདག་དང་སྒྲུབ་པ་སོགས་ཀྱི་བསླབ་སྟོན་མང་པོ་ཞུས། དེ་དག་རྣམས་སློབ་དཔོན་ཆེན་པོས་ཞལ་བཀོད་ཞིབ་ཏུ་གནང་། དེ་ནས་སློབ་དཔོན་ཆེན་པོ་ལ་འདི་སྐད་ཞུས་སོ། །ད་ལྟ་ངེད་བོད་ཡུལ་དུ་དགེ་བཤེས་བློ་བཟང་གྲགས་པ་ཉེ་གནས་ལེགས་སྐར་གྱི་སྐྱེ་བ་ཡིན་ཞེས་ངོས་འཛིན་མཁན་མང་པོ་ཞིག་འདུ ག་པས། དེ་བདེན་ནམ་མི་བདེན་ལགས་ཞུས་པས། ཁྱོད་བོད་ཡུལ་གྱི་དགེ་བཤེས་བློ་བཟང་གྲགས་པ་དེ། རྒྱ་ནག་གི་ཡུལ་ནས་འཇམ་དབྱངས་དཔའ་བོ་རྡོ་རྗེས་བྱིན་གྱིས་བརླབ་པའི་གང་ཟག་གཅིག་ཚེ་འཕོས་པའི་སྐྱེ་བ་ཡིན་ཅིང་། དེའི་སློབ་མ་ལ་གྲགས་པ་དང་དབང་གི་མཐའ་ཅན་གྱི་མིང་འཛིན་པ་བཞི་ཡོད་པ་ནི། སྔོན་ཐུབ་པའི་སྤྱན་སྔར་སྨོན་ལམ་ལོག་པར་བཏབ་པའི་བདུད་སྤྲུལ་དུ་ཡོད་པས། བོད་འབངས་ཀྱི་བདེ་སྡུག་དབྱར་གྱི་ཉི་མ་ལྟར་སྟོན་གསུངས། འོ་ན་རྒྱལ་བ་ཐམས་ཅད་མཁྱེན་པས་དེང་སང་བོད་ཡུལ་གྱི་འགྲོ་བ་སྐྱོངས་ཤིང་ཡོད་པས། འདི་གང་འདྲ་ཞིག་ཡིན་ཞུས་པས། ཁྱེད་བོད་ཡུལ་གྱི་དགེ་བཤེས་ཐམས་ཅད་མཁྱེན་པ་དེ། རྒྱལ་པོ་སྲོང་བཙན་སྒམ་པོའི་སྐྱེ་བ་ངེས་པར་ཡིན་གསུངས། འོ་ན་དགེ་བཤེས་བློ་བཟང་གྲགས་པས་ཡི་དམ་གྱི་སྒྲུབ་པ་ལ་ཞུགས་ཚེ་སྡུག་འདྲེ་སྦ་བ་དགུ་བརྩེགས་ཀྱི་དབང་དུ་ཤོར་བ་ཡིན་ཟེར་མཁན་གདའ་བས། བདེན་ནམ་མི་བདེན་ལགས་ཞུས་པས། ཡི་དམ་གྱི་བསྙེན་བསྒྲུབ་ལ་སྒབ་འདྲེས་བར་ཆད་བརྩམས་ཀྱང་ལྟས་ངན་གཡང་དུ་ལེན་པས། སྡུག་འདྲེའི་སྤྲུལ་པ་མང་པོས་དགེ་བཤེས་བློ་བཟང་གྲགས་པའི་བསྟན་པ་ལ་ག་དར་དུ་བརྩོན་པ་མང་པོ་ཡོད་གསུངས། འོ་ན་ཇོ་བོ་ལ་སྲོག་ཞུ་ཕུལ་བ་དེ་མ་ལེགས་ཟེར་མཁན་གདའ་བས་བདེན་ནམ་ལགས་ཞུས་པས། སྲོག་ཞུ་ཕུལ་བ་དེ་བར་ཆད་ཀྱི་དབང་དུ་ཅུང་ཟད་ཤོར་སོང་བས། ཡེ་ཤེས་པ་ཅུང་ཞིག་ཉམས་གསུངས། འོ་ན་ལུང བསྟན་མང་པོ་ནས། དགེ་བཤེས་པདྨ་དཀར་པོས་མཁར་ཆུ ར་ལྷ་ཁང་བཞེངས་པས་བདུད་སྤྲུལ་ཡིན་ཞེས་གསུངས་འདུག་པ་དེ་བདེན་ནམ་ལགས་ཞུས་པས། སློབ་དཔོན་ཆེན་པོའི་ཞལ་ནས་དགེ་བཤེས་པདྨ་དཀར་པོ་དེ་རྒྱ་གར་གྱི་ཡུལ་ནས། ཐུགས་རྗེ་ཆེན་པོའི་སྔགས་སྒོམ་པ་ཞིག་ཚེ་འཕོས་པའི་སྐྱེ་བ་ཡིན་ཅིང་། མཁར་ཆུ་དཔལ་གྱི་རི་ལ་ལྷ་ཁང་བཞེངས་པ། སྦྱིན་བདག་གི་འདོད་པ་ལྟར་བཟོས་པས་གནས་ཀྱི་དབུ་རྩེ་ཉམས་པས་བོད་ཀྱི་རྟེན་འབྲེལ་འཆུག དེའི་སྦྱིན་བདག་དེ་བདུད་ཀྱི་སྤྲུལ་པ་ཡིན་གསུངས། འོ་ན་འབྲུག་པ་ངག་དབང་རྣམ་རྒྱལ་འདི་བདུད་སྤྲུལ་དུ་ངོས་བཟུང་མཁན་འགའ་རེ་སྣང་བས་བདེན་ནམ་ལགས་ཞུས་པས་སློབ་དཔོན་ཆེན་པོའི་ཞལ་ནས། སྔགས་བན་ངག་དབང་རྣམ་རྒྱལ་པ་དུར་ཁྲོད་ཆེན་པོ་བདེ་ཆེན་བརྩེགས་པར། བམ་རོའི་སྒྲུབ་པ་ལ་ཞུགས་པའི་རྣལ་འབྱོར་པ་ཞིག་ཚེ་འཕོས་པའི་སྐྱེ་བ་ཡིན། དེ་ཚེ་མགོན་པོ་ནག་པོའི་དྲག་སྔགསབཟླས་པས། སྒབ་འདྲེ་མ་མནན་པའི་རྟེ ན་འབྲེལ་གྱི། ད་ལྟ་ཁོང་གི་འཁོར་དུ་འགོང་པོ་དང་། བདུད་དང་ཐེའུ་རང་དང་རྒྱལ་འགོང་བཞིའི་སྤྲུལ་པ་མང་པོ་འཁོར་གཡོག་ཏུ་ཡོད་གསུངས། ཞིག་པོ་གླིང་པ་དང་མངའ་རིས་སྐུ་མཆེད་རྣམས། ཟོག་པོ་དང་བདུད་སྤྲུལ་གྱི་ལུང་བསྟན་བརྒྱག་རེས་བྱས་སོང་བ་དེ་གང་འདྲ་ཞིག་ཡིན་ལགས་ཞུས་པས། སློབ་དཔོན་ཆེན་པོའི་ཞལ་ནས། དེ་བདུད་ཡབ་བཞིར་ནག་པོ་དང་ཡབ་ཤུད་དམར་པོའི་སྤྲུལ་པའི་མི་གཉིས། རྒྱལ་པོའི་བཙུན་མོ་དམར་རྒྱན་མའི་སྤྲུལ་པའི་བུད་མེད་གཅིག་དང་། ཁོང་གསུམ་གྱི་བར་ཆད་ཀྱི་དབང་གིས་ཕུང་དཀྲུགས་པས། དམ་སེལ་ཞུགས་པ་ཡིན་གསུངས། འོ་ན་རྒྱལ་པོ་སྲོ ང་བཙན་སྒམ་པོའི་སྤྲུལ་པ། རྒྱལ་བ་ཐམས་ཅད་མཁྱེན་པའི་དྲུང་དུ། དག་མ་དག་གི་འཁོར་ཅི་འདྲ་ཡོད་ཞུས་པས། སློབ་དཔོན་ཆེན་པོའི་ཞལ་ནས། དག་པ་རིགས་གསུམ་མགོན་པོ་དང་ཉེ་སྲས་བརྒྱད་རྣམས་ཀྱི་སྤྲུལ་པ་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པ་ཡོད། མ་དག་པ་རྒྱ་འདྲེ་འགོངས་པོ་ཐེའུ་རང་བདུད་ལྷས་སྦྱིན་ལ་སོགས་པའི་སྤྲུལ་པ་མང་པོ་ཡོད་གསུངས། འོ་ན་ད་ལྟའི་བོད་ཡུལ་གྱི་བསྟན་པ་འདི་ཡུན་རིང་ཐུང་ཅི་འདྲ་གནས་ཞུས་པས། སློབ་དཔོན་ཆེན་པོའི་ཞལ་ནས་ཐབས་དང་རྟེན་འབྲེལ་གྱི་བསྟན་པ་གསོ་ཐབས་ལ་འབུངས་ན། ཡུན་རིང་དུ་གནས་ཤིང་དེ་མི ན་ན་དབང་ཕྱུགས་ཆེན་པོའི་སྤྲུལ་པ་གཅིག་གིས་བོད་ཡུལ་གྱི་རྒྱལ་པོ་བྱེད་གསུངས། འོ་ན་སློབ་དཔོན་ཆེན་པོ། བདག་ལ་ཚེ་འདི་ཕྱི་བར་གསུམ་དུ་ཐུགས་རྗེས་གཟིགས་ཤིག མཆོག་ཐུན་མོང་གི་དངོས་གྲུབ་སྩོལ་ཞིག བདག་གི་འབྲེལ་ཐོག་གི་འགྲོ་བ་ཐམས་ཅད། གྷུ་རུ་རིན་པོ་ཆེ་ཁྱེད་ཀྱི་གོ་འཕང་ཐོབ་པར་བྱིན་གྱིས་རློབས་ཤིག་ཞུས་པས། སློབ་དཔོན་ཆེན་པོའི་ཞལ་ནས། བུ་ཁྱོད་ལ་དབང་བཞི་ཡོངས་རྫོགས་རབ་འབྱམས་བཀའ་ཡི་དབང་མཆོག་དང་བཅས་པ་སྦྱིན་ཡོད་པས། ཁྱེད་རང་གི་རྟེན་འབྲེལ་རྣམ་མ་འཆུགས་པར་གྱིས་ལ་པདྨ་ང་ལ་གསོལ་བ་ཐོབ་དང་། བདག་གཞན་གྱི་དོན་ཆེན་པོ་ཡོང་གསུངས། དེ་ནས་ཞག་བདུན་གྱི་སྣང་ཉམས་རྫོགས་པ་དང་། དཀྱིལ་འཁོར་བསྡུ་ཆོག་དངོས་གྲུབ་ལེན་དབང་རྣམས་ཚར་བའི་མཇུག་ཏུ། རིགས་འཛིན་གྱི་རྣལ་འབྱོར་ཕོ་མོ་རྣམས་ལ། མར་མེ་སྨོན་ལམ་ཤིས་བརྗོད་གླུ་བྲོ་སོགས་གྱིས་ཤིག་པའི་ཞལ་བཀོད་གནང་སོང་ཞིང་། ཁྱད་པར་སློབ་དཔོན་ཆེན་པོས་མཚོ་རྒྱལ་ལ། ཁྱོད་ཀྱི་བུ་འདི་སྟེང་ཁང་བདེ་ཆེན་འོག་མིན་དུ་ཁྲིད་ལ། ཆོས་སྐུའི་ལྷ་ཚོགས་ལ་སྨོན་ལམ་འདེབས་ཆུགས། དེ་ནས་ཁྱོད་ཀྱི་ཐབས་ཤེས་ཀྱི་རྟེན་འབྲེལ་གྱི་ངང་ནས། བུ་འདི་བོད་ཡུ ལ་དུ་རྫོང་ཤིག་གསུངས་པ་དང་། མཁའ་འགྲོ་ཡེ་ཤེས་མཚོ་རྒྱལ་གྱིས་བུ་ཤོག་གསུངས་ཚེ། རྗེས་ལ་སོང་བས་སྐས་ཅིག་འཛེགས་པ་དང་། ཕོ་བྲང་པདྨ་འོད་ཀྱི་སྟེང་ཁང་དུ་སླེབ་འདུག འདི་རྟེན་གྱི་སྙན་དར་གྱིས་གསུངས་ནས་དར་སྔོ་ཁྲའི་རི་མོ་ཡོད་པ་གཅིག་གཏད་བྱུང་། སྒོ་དམར་པོ་རྒྱབ་རལ་གཅིག་ལ་གསེར་གྱི་གཡས་གཡོན་གྱི་རྒྱན་དུ་སྤྲས་པ་ཞིག་ཕྱེས་སོང་བའི་ནང་དུ། མཐིང་མདོག་ལྟ་བུའི་ངོས་ཞལ་ཡོད་སྙམས་ལ། འོད་དུ་ལམ་མལ་ས་གཅིག་འདུག མཐིང་ཞལ་དམར་པོ་འོད་དུ་འཚེར་བ་ཞིག་གི་ནང་དུ། གཙོ་བོ་ཚེ་དཔག་མེད་དམར་པོ་ཡབ་ཡུམ་སྦྱོར་བའི་སྤྱི་གཙུག་ཏུ། སྣང་བ་མཐའ་ཡས་ཀྱི་ཞལ་ཡོད་པ། ལོངས་སྤྱོད་རྫོགས་སྐུའི་ཆ་ལུགས་ཅན། ཚེ་ལྷ་རིགས་ལྔ་ཚེའི་མགྱོགས་མ་དང་བཅས་པ་རྣམས་བཞུགས་འདུག་པས་གསོལ་འདེབས་དང། མཎྜལ་ཕྱག་མཆོད་སོགས་ཕུལ། དེ་ནས་ཕོ་བྲང་དེའི་སྒོ་ཕྱིར་ཐོན་པ་དང་། བུད་མེད་མང་པོ་རུས་པའི་རྒྱན་གྱིས་སྤྲས་ནས། རོལ་མོ་དང་གདུག་དང་རྒྱལ་མཚན་དང་ཕྱེ་ཕུར་ལ་སོགས་སྤྱན་གཟིགས་རྣམས་ཐོགས་ཏེ། ཟངས་མདོག་དཔལ་རིའི་བྲག་ངོས་ལ་མར་འབྱོར་འདུ ག་པས། ཁོང་རྣམས་གར་འབྱོན་ཞུས་པས་མཚོ་རྒྱལ་གྱིས་ཁོང་རྣམས་མུ་ལེ་མཐིང་མཚོ་ལ་རྡུལ་ཚོན་སྐྱེལ་དུ་འབྱོན་པར་འདུག་གསུང་། མ་ཡེ་ཤེས་མཚོ་རྒྱལ་སྲིན་ཡུལ་གྱི་ཤར་ལྷོ་ནུབ་བྱང་གི་ལུང་པ་གྲོང་ཁྱེར་འདི་རྣམས་ཀྱི་མིང་བདག་ལ་གསུངས་དུ་གསོལ་ཞུས་པས། མ་མཚོ་རྒྱལ་གྱི་ཞལ་ནས། བུ་ཤར་ཕྱོགས་ཀྱི་ལུང་པ་མཚོ་སོགས་ཁ་འདྲ་བ་དང་བཅས་པ་འདི། སྲིན་ཡུལ་ཟོ་མ་པུ་རིའི་མཚོ་དང་ལུང་པ་ཟེར། གྲོང་ཁྱེར་གྱི་མིང་ལ་རྩུབ་འགྱུ ར་ཟེར་ཞིང་། ཤིང་ཆེན་པོ་མ་ཀི་ནི་སྲིན་གྱི་བླ་ཤིང་ཡིན། བུ་ཤར་ལྷོ་མ་ཀི་ལུང་པ་རྒྱ་ཆེ་བ་གཅིག་གི་ནང་དུ། གྲོང་ཁྱེར་ལྕགས་རི་ཅན་ཞི ག་གི་དཀྱིལ་ན། མཁར་དམར་པོ་ལ་རོའི་རྒྱལ་མཚན་མང་པོ་བཙུགས་པ་འདི། སྲིན་ཡུལ་ལང་ཀ་མགྲིན་བཅུའི་གྲོང་ཁྱེར་ཡིན། ལྷོ་དྲངས་པོའི་ཡུལ་གླིང་ཕ་ཀི་སྲིན་ཡུལ་རཀྴ་རྔམ་བྱེད་ཀྱི་ཡུལ་དང་གྲོང་ཁྱེར་ཡིན། ལྷོ་ནུབ་ན་ཐང་གཡང་གཞི་འདྲ་བའི་དཀྱིལ་དུ། གྲུ་གསུམ་པའི་མཚོ་ལ་བྲག་དམར་གྱིས་མཚན་པའི་སྟེང་དུ། གྲོང་ཁྱེར་ཕོ་བྲང་དང་བཅས་པ་ཕ་ཀི་སྲིན་ཡུལ་མ་ལ་ཡ་གནམ་ལྕགས་འབར་བ་ཟེར་བ་ཡིན། ཐང་དམར་པོ་ཆེ་ཞིང་རིང་བ་འདི་སྲིན་པོ་གྲོས་ལ་ཚོགས་ས་ཡིན། བུ་ནུབ་ཕྱོགས་ཀྱི་ཡུལ་མཚོན་ཆ་གཟེངས་པ་འདྲ་བ་དང་། གཞུ་བཀུག་པ་འདྲ་བའི་ལུང་པ་སྟོད་སྨད་ཀྱི་གྲོང་ཁྱེར་རྣམས་ལ། སྲིན་ཡུལ་ཚང་ཚིང་རབ་གཏུམ་བྱ་བ་ཡིན། ཕ་ཀི་ནུབ་བྱང་ན་རི་ཀླུང་གྲུ་གསུམ་པའི་རྣམ་པར་གསལ་བའི་མོད་ལ་བྲག་རི་མཚོན་ཆ་གཟེངས་པ་འདྲ་བའི་རྩ་བར། དུར་ཁྲོད་ལྕེ་སྤྱང་བྱ་རྒོད་མང་པོ་འཚུ བ་པ་འདི་སྲིན་གྱི་ཡུལ་ནལ་བྱའི་དུར་ཁྲོད་བྱ་བ་ཡིན། བུ་ཕ་ཀི་བྱང་གི་ཆུ་བོ་ཆེན་པོ། མཚོ་ཡུལ་གླིང་གྲོང་ཁྱེར་དང་བཅས་པ་ལ། སྲིན་ཡུལ་ཟོ་མར་ཀོ་ཐང་བྱ་བ་ཡིན། བྱང་ཤར་གྱི་ཆུ་བོ་གཉིས་འབྲེལ་དུ་འབབ་པའི་ཡུལ་གླིང་རྣམས་ལ། སྲིན་ཡུལ་རཀྴ་ཁམ་གླིང་ཟེར་བ་ཡིན། མ་ཀི་བྲག་བུམ་པ་འདྲ་བ་ན་བུད་མེད་བཞིས་གླུ་གྲོ་དང་བཀྲ་ཤིས་བརྗོད་པ་འདི། སྒྲུབ་ཆེན་གྱི་ཡན་ལག་བུམ་གཏེར་སྦ་བ་ཡིན་འདུག ཕོ་བྲང་གི་ཤར་ཕྱོགས་ན་ནམ་མཁའི་སྙིང་པོ་སོགས་ཀྱི་པཱུ་ཙ་གཏོང་བ་འདི། སྦྱིན་སྲེག་འདེབས་པ་ཡིན་འདུག ལྷོ་ཕྱོགས་ཀྱི་ཁྲི་བདུན་ན་འགྲོ་བ་མང་པོས་གླུ་བྲོ་བྱེད་པ་འདི། གྷུ་རུ་རིན་པོ་ཆེ་ལ་དབང་སྒྲུབ་ཟབ་མོ་གནང་བའི། གཏང་རག་གི་མཆོད་པ་འབུལ་བ་དང་སྐུ་དྲིན་ཁུར་བ་ཡིན་འདུག བུ་ཁྱོད་རང་མར་མེ་འདི་ཐོག་ལ། དབུ་རྩེ་འདིར་སྐོར་བ་གསུམ་རྒྱོབ་ལ་སྨོན་ལམ་ཐོབ་གསུངས་པ་དང་། དེ་བཞིན་དུ་བྱས་པས་ཅི་ཡིན་ཆ་མེད་པ་ཞིག་གི་ངང་ནས་གཉིད་སད་འདུག་ཚེ། ཉི་མ་ཡང་ཤར་དྲོས་ལ་འདུ ག དག་སྣང་རྣམས་གསལ་པོར་གདའ་བས། བརྗེད་ཀྱི་དོགས་ཏེ་མགྱོགས་བྲིས་སུ་ལིང་ང་བྲག་དམར་དུ། ཤོག་ཚར་གསུམ་གྱི་ཕྱི་ནང་ལ་བཏབས་ནས་རྗེས་སོར་གཏན་ལ་ཕབ་པའོ། ཕྱིས་ནང་རྨི་ལམ་བརྟགས་པ་དགོས་ཞེས་ཆོས་རྗེ་རིན་པོ་ཆེས་གསུངས་པ་དང་། ཡེ་ནས་མ་ཞུས་ན་ཡང་རྟེན་འབྲེལ་ཉམས་འགྲོ ཅི་བཞིན་ཞུས་ནས་ཀྱང་དགོས་ཆད་མི་ཡོང་བ་འདྲ་བསམ་ནས། རྨི་ལམ་དུ་བུད་མེད་བཞིས་རྡོ་རྗེ་རྒྱ་གྲམ་ལ་བཏེགས་ནས། ནམ་མཁའ་རབ་ཏུ་མཐོན་པོར་ཁྱེར་སོང་བས། རི་རབ་དང་ཟངས་མདོག་དཔལ་རི་སོགས་མཐོང་སྣང་བྱུང་ཞིང། གླིང་བཞི་ལ་སྐོར་བ་བརྒྱབ་པ་རྨིས་ཞུས་པས། ཐམས་ཅད་ཀྱི་རྨི་ལམ་སློབ་དཔོན་རིན་པོ་ཆེའི་དེས་གོ་ཆོད་པར་གདའ། ཤིན་ཏུ་བཟང་གསུངས། མངྒ་ལམ། དུས་མཐའི་སྤྲང་བན་ཉི་མ་གྲགས་པ་ང་། །གྷུ་རུས་རྗེས་སུ་བཟུངས་བས་སྐལ་བར་ལྡན། །སྨོན་ལམ་འབྲེལ་པའི་ཤུགས་ཀྱིས་ཟབ་གཏེར་ཐོན། །བྱིན་རླབས་དྲོད་རྟགས་འཛོམས་པས་དག་སྣང་ཐོབ།། མངྒ་ལམ།། བྷ་ཝནྟུ།། །།