བླ་མའི་མཎྜལ།
ཛ་ཡ་སེ་ནཱ།
༄། །བླ་མའི་མཎྜལ་བཞུགས་སོ།། དཔལ་མཁའ་འགྲོ་རྒྱ་མཚོ་ལ་ཕྱག་འཚལ་ལོ། །བླ་མ་ཡོངས་སུ་མཉེས་པ་ལ། །དངོས་གྲུབ་མ་ལུས་འབྱུང་བའི་ཕྱིར། །རྒྱ་མཚོ་ཉིད་ནས་གསུངས་པ་ཡི། །བླ་མའི་མཎྜལ་བཤད་བར་བྱ། །དེ་ལ་ཐོག་མར་བླ་མའི་མདུན་དུའམ་གཞན་དུ་ཡང་རུང་སྟེ་ཆུ་དང་མེ་ཏོག་ལ་སོགས་པ་ཚོགས་པར་བྱས་ལ་རྐང་པ་བཀྲུས་ཏེ། ཨོཾ་ཧྲཱིཿ་སྭཱ་ཧཱ། ཞེས་བྱ་བས་ལག་པར་བཀྲུ་བ་དང༌། ཁ་བཤལ་བར་བྱའོ། །ཨོཾ་ཧཱུཾ་ཞེས་བྱ་བས་བདག་དང་གནས་དང་རྣལ་འབྱོར་བསྲུང་བར་བྱའོ། །དེ་ཉིད་ཀྱིས་སྟན་བྱིན་གྱིས་བརླབ་པ་ཡང་བྱའོ། །ཨོཾ་བཛྲ་བྷུ་མི་ཧཱུཾ་ཞེས་བྱ་བས་ས་གཟུང་བར་བྱའོ། །ཨོཾ་སརྦ་བིགྷྣན་ཨུཏ་ས་ར་ཡ་ཧཱུཾ་སྭཱ་ཧཱ། ཞེས་བྱ་བས་ཆུ་དང་ལྕི་བ་སྲོག་ཆགས་མེད་པས་བྱུག་པར་བྱའོ། །ཨོཾ་ཨཱཿ་བཛྲ་རེ་ཁེ་ཧཱུཾ་ཞེས་བྱ་བས་ལག་པ་གཡས་པས་མེ་ཏོག་གཡོན་པའི་རྒྱབ་ཏུ་བཞག་ལ་མཎྜལ་དུ་དོར་རོ། །ཨོཾ་སུ་རེ་ཁེ་སརྦ་ཏ་ཐཱ་ག་ཏ་ཨ་དྷི་ཏིཥྛ་ནྟུ་སྭཱ་ཧཱ། ཞེས་བྱ་བས་ལག་པ་བཀྲུ་བར་བྱའོ། །ཨོཾ་མ་ཎི་དྷ་རི་བཛྲ་ཎི་མ་ཧཱ་པྲ་ཏི་སཱ་རི་རཀྵ་རཀྵ་མཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བྱ་བས་རང་གི་མགོ་བོ་ལ་མེ་ཏོག་བཞག་པས་བདག་ཉིད་བསྲུང་བར་བྱའོ། །དེ་ནས་མཎྜལ་དེ་ཉིན་མོ་དང་མཚན་མོའི་དབྱེ་བས་ཉི་མ་དང་ཟླ་བར་བསམས་ཏེ། ཨོཾ་ཙནྡྲཱ་ར་ཀ་བི་མ་ལེ་སྭཱ་ཧཱ། ཞེས་བྱ་བས་བྱིན་གྱིས་བརླབ་པར་བྱའོ། །དེ་ནས་སྔར་གྱི་མེ་ཏོག་དེ་བསལ་ཏེ། ཨོཾ་བཛྲ་གུ་རུཿ་སྭཱ་ཧཱ། ཞེས་བྱ་བས་དབུས་སུ་མེ་ཏོག་གཅིག་བཞག་གོ །དེ་བཞིན་དུ་ཤར་དང་བྱང་དང་ནུབ་དང་ལྷོ་རྣམས་སུ་ཨོཾ་སབྲ་སུནད་རི་སྭཱ་ཧཱ། ཨོཾ་པྲི་ཡ་ཏ་ཨུཏྟ་མཾ་སྭཱ་ཧཱ། ཨོཾ་ད་ཡ་ཀཱ་ཏཱ་རཱ་སྭཱ་ཧཱ། ཨོཾ་བི་ལཱ་ས་བཛྲ་སྭཱ་ཧཱ། ཞེས་བྱ་བས་སོ། །མེ་དང་བདེན་བྲལ་དང་རླུང་དང་དབང་ལྡན་རྣམས་སུ། ཨོཾ་བུདྡྷ་ལོ་ཙཱ་ནི་སྭཱ་ཧཱ། ཨོཾ་མཱ་མ་ཀཱི་སྭཱ་ཧཱ། ཨོཾ་པཎྜ་རཱ་བཱ་སཱི་སྭཱ་ཧཱ། ཨོཾ་ཏཱ་རེ་སྭཱ་ཧཱ། ཞེས་བྱ་བས་མེ་ཏོག་དགོད་དོ། །དེ་ནས་
༄། །སྐད་ཅིག་གི་སྦྱོར་བས་དབུས་ཀྱི་མེ་ཏོག་གི་སྟེང་དུ་རྡོ་རྗེ་སེམས་དཔའི་རོལ་པས་བཞུགས་པའི་བླ་མ་བསྒོམ་པར་བྱའོ། །དེ་ནས་ཕྱོགས་བཞིར་རིམ་པ་བཞིན་དུ་སྔོ་བ་དང་ལྗང་བ་དང་དམར་བ་དང༌། སེར་བའི་ཁ་དོག་ཅན། ཐམས་ཅད་མཛེས་མ། དགའ་བའི་མཆོག་མ་དང༌། ཤིན་ཏུ་བརྩེ་མ་དང༌། རོལ་པའི་རྡོ་རྗེ་མ་སྟེ་ཐམས་ཅད་ཞལ་གཅིག་ཕྱག་གཉིས་མ་སྣ་ཚོགས་པའི་གོས་དང་རྒྱན་དང་ལྡན་པ་ལང་ཚོ་ལ་བབས་པ་ཀིམྦ་ཀའི་འབྲས་བུ་ཕྱེད་མར་བཀས་པ་ལྟ་བུའི་ནུ་མ་ཅན་ཆགས་པའི་སེམས་ཀྱིས་ཟུར་མིག་ཏུ་ལྟ་བ་ལག་ན་རིན་པོ་ཆེ་དང་སྣ་ཚོགས་པའི་མཆོད་པའི་སྙིམ་པས་གཙོ་བོ་ལ་སྟོབས་པར་བྱེད་པ་དང༌། མེ་ལ་སོགས་པའི་མཚམས་རྣམས་སུ་དཀར་བ་དང་སྔོ་བ་དད་དམར་པ་དང་ལྗང་བའི་ཁ་དོག་ཅན་གྱི། སངས་རྒྱས་སྤྱན་མ་དང༌། མཱ་མ་ཀཱི་དང༌། གོས་དཀར་མོ་དང༌། སྒྲོལ་མ་རྣམས་ཞལ་གཅིག་ཕྱག་གཉིས་མ། ཕྱག་གཡས་པ་རྣམས་ནི་རིམ་པ་བཞིན་དུ་འཁོར་ལོ་དང༌། རྡོ་རྗེ་དང༌། པདྨ་དང༌། ཨུཏྤལ་ཐོགས་པ། གཡོན་པ་རྣམས་ཀྱིས་མཆོད་པ་སྣ་ཚོགས་འཛིན་པས་གཙོ་བོ་ལ་སྟེར་བ་སྟེ་རྒྱན་ལ་སོགས་པ་ཐམས་ཅད་སྔར་དང་འདྲ་བ། ཐམས་ཅད་ཀྱང་སྒེག་ཅིང་རོལ་བའི་འདུག་སྟངས་ཅན་གསལ་བར་བསམས་ལ། ཨོཾ་བཛྲ་སཏྭ་གུ་རུ་པཱ་ཏེ་བྷྱཿ་སརྦ་སཏྭ་པ་ཀ་ར་ཎཱ་ཡ་སྭཱ་ཧཱ། ཞེས་བྱ་བས་ཕྱག་བྱས་ཏེ་དབུལ་བར་བྱའོ། །དེ་ནས་ལྷ་མོ་རྣམས་སློབ་དཔོན་ལ་ཐིམ་པས་ཐུགས་དགྱེས་པར་བསམས་ཏེ། ཨོཾ་ཨཱཿ་ཧཱུཾ་མུཿ་ཞེས་བརྗོད་པས་གཤེགས་སུ་གསོལ་བར་བྱའོ། །དེ་ནས་མེ་ཏོག་བསྡུས་ཏེ་རང་གི་མགོ་བོར་བཞག་ལ་ཇི་ལྟར་བདེ་པར་གནས་པར་བྱའོ། །དཔལ་ལྡན་མཁའ་འགྲོ་རྒྱ་མཚོ་ཡི། །རྒྱུད་རྒྱལ་མན་ངག་གིས་བསྲུངས་ནས། །མཎྜལ་རིན་ཆེན་ཕུལ་གང་དེས། །འགྲོ་ཀུན་ཆོས་རྒྱལ་འཁོར་སྒྱུར་ཤོག །རིན་པོ་ཆེ་མརྒད་མཁས་པ་ཛ་ཡ་སེ་ནའི་གསུང༌། དཔལ་ཡེ་ཤེས་རྡོ་རྗེས་བསྒྱུར་བ་རྫོགས་སོ།།