གྲུབ་མཐའ་བཞིའི་འདོད་ཚུལ་སོགས་དྲིས་ལན་སྣ་ཚོགས་སྐོར།

[Full Size]

གྲུབ་མཐའ་བཞིའི་འདོད་ཚུལ་སོགས་དྲིས་ལན་སྣ་ཚོགས་ཀྱི་སྐོར་ཞལ་ལུང་བདུད་རྩིའི་ཐིགས་འཕྲེང་ཞེས་བྱ་བ་བཞུགས་སོ། །

[Full Size]

ཡེ་ཤེས་གཟིགས་པ་དག་པས་སྐལ་བ་བཞིན། །ཡོངས་སུ་བཀྲི་མཛད་སྟོན་པ་རྡོ་རྗེ་འཆང། །ལེགས་གསུང་དེ་འཛིན་ཚོགས་བཅས་ལ་བཏུད་ནས། །བསྟན་པའི་རིམ་པ་ཇི་བཞིན་དགོད་པར་བྱ། །དེའང་གྲུབ་མཐའ་བཞི་དང་མདོ་སྔགས་གཉིས་ལ་གོང་འོག་གི་རིམ་པ་དང་ཕན་ཚུན་འགལ་མེད་གྲོགས་སུ་འགྲོ་བར་ཡོངས་སུ་གྲགས་ཀྱང་རྣ་བར་བྱང་བ་ཙམ་ལས་དོན་དུ་དམན་མཆོག་གི་རིམ་པ་ཇི་ལྟར་ཡིན་ངེས་པ་གཏིང་ཚུགས་པ་དཀའ་བར་སྣང་སྟེ། གྲུབ་མཐའ་བཞི་གའང་ཁུངས་རྒྱལ་བའི་བཀའ་ལ་བརྟེན་པར་ཁྱད་མེད། རིགས་པས་ལེགས་པར་དཔྱད་དེ་འདི་ལས་དམན་ལྷག་ཏུ་སོང་ན་རྟག་ཆད་ཀྱི་མཐར་ལྟུང་བས། གཞི་ལམ་འབྲས་བུའི་གནས་ཚུལ་འདི་ཁོ་ནར་གནས་སོ་སྙམ་དུ་བློ་ངོར་ཐག་ཆོད་དེ་རང་གི་གྲུབ་པའི་མཐའ་བཞག་པ་དེ་ཁོ་

[Full Size]

ན་དབུ་མའི་ལམ་སྲོལ་དུ་འདོད་ཅིང། གཞན་རྣམས་མཐར་ལྷུང་ཚུལ་གྱི་དགག་པ་བྱེད་པའང་འདྲ་བས་གཞན་ཟེར་ཙམ་གྱི་རྗེས་སུ་འབྲང་ན་བཞི་ག་རང་ལུགས་སུ་ཁས་ལེན་པའམ། རེ་རེ་ལ་གཞན་གསུམ་གསུམ་གྱིས་དགག་པ་བརྗོད་པས་གང་ཡང་ཁས་ལེན་མི་རུང་བར་འགྱུར་རོ། །རྒྱལ་བའི་བཀའ་ལ་བརྟེན་ནས་དམན་མཆོག་འབྱེད་དོ་སྙམ་ན་དེར་གདུལ་བྱའི་དབང་གིས་སྣ་ཚོགས་གསུངས་ཏེ་གྲུབ་མཐའ་བཞིར་འགྲོ་བའང་དེའི་སྟོབས་ཀྱིས་ཡིན་པས། དེ་ཉིད་དྲང་ངེས་འབྱེད་པའི་གཞི་དང་བསྒྲུབ་བྱར་འགྱུར་གྱི་སྒྲུབ་བྱེད་དུ་མི་འགྱུར་རོ། །གཞན་དག་ན་རེ། རྒྱལ་བ་ཉིད་ཀྱི་བཀའ་ལ་དྲང་ངེས་འབྱེད་པར་ལུང་བསྟན་པ་ཞིག་གི་རྗེས་སུ་འབྲང་ངོ་སྙམ་ན་དེ་ལྟར་བྱེད་དགོས་མོད་ཀྱང་དེ་ལྟར་ལུང་བསྟན་པའི་ཤིང་རྟ་ཆེན་པོ་གཉིས་སུ་ཡོད་ལ་

[Full Size]

དེ་གཉིས་ཀྱིས་ཀྱང་དབུ་སེམས་ཀྱི་ལུགས་སོ་སོར་འགྲེལ་པས་གང་གི་རྗེས་སུ་འབྲང་། གལ་ཏེ་འཕགས་པ་ཐོགས་མེད་ཀྱི་སེམས་ཙམ་དུ་བཀྲལ་བ་གདུལ་བྱའི་དབང་ཡིན་གྱི་དགོངས་པ་ཀླུ་སྒྲུབ་དང་མཐུན་པས་དབུ་མའི་ལུགས་ལ་བརྟེན་ནོ་སྙམ་ན། འོ་ན་ཀླུ་སྒྲུབ་ཀྱིས་དབུ་མར་བཀྲལ་བ་གདུལ་བྱའི་དབང་ཡིན་གྱི་དགོངས་པ་སེམས་ཙམ་དུ་གནས་སོ་ཞེས་སྨྲས་ན་ཅིས་འགོག །བྱང་ཆུབ་སེམས་འགྲེལ་སོགས་སེམས་ཙམ་དུ་བཀྲལ་བ་མང་ལ། རྩ་ཤེ་དང་བཞི་བརྒྱ་པ་སོགས་ཀྱང་སེམས་ཙམ་པའི་ལུགས་སུ་དེའི་སློབ་དཔོན་ཕལ་ཆེར་བཞེད་དོ། །ཡང་གལ་ཏེ་ཤིང་རྟ་ཆེན་པོ་གཉི་ག་ལུང་བསྟན་མོད་ཀྱང་ཀླུ་སྒྲུབ་ཀྱིས་རྟག་ཆད་གཉི་གའི་མཐའ་མ་ལུས་པར་བཀག་སྟེ་བསྟན་པའི་སྙིང་པོ་མཐར་ཐུག་གསལ་བར་བྱེད་པར་མདོ་རྒྱུད་དུ་མ་ལས་ལུང་བསྟན་པ་ལྟ་བུ་འཕགས་པ་ཐོགས་མེད་ལ་མི་འབྱུང་ཞིང། རྒྱུད་བརྟག་གཉིས་སུ་བསྟན་པའི་རིམ་པར་མས་རིམ་ནས་སློབ་ཚུལ་གསུངས་པའི་ཚེ་དབུ་མ་པའི་ལུགས་གོང་མར་བྱས་པ་སོགས་ཀྱིས་དབུ་མ་པ་མཆོག་ཡིན་པར་འགྲུབ་བོ་ཞེ་ན་དེ་ཡིན་དུ་ཆུག་ཀྱང་གྲུབ་མཐའ་གཞན་གསུམ་གའི་གོ་རིམ་གང་གི་སྒོ་ནས་འབྱེད། དོན་སྨྲས་གཟུགས་ཤེས་གཉི་ག་བདེན་གྲུབ་ཏུ་འདོད་པ་འཁོར་ལོ་དང་པོ་དང་མཐུན་ཡང། སེམས་ཙམ་པས་ཤེས་པ་བདེན་གྲུབ་དང་ཕྱི་དོན་གཏན་མེད་དུ་འདོད་པ་རྟག་ཆད་གཉི་གའི་མཐར་ལྷུང་སྟེ་བདེན་པ་གཉིས་

[Full Size]

ཆར་ལས་ཉམས་པ་དང་། ཆོས་མངོན་པ་དང་ཤེར་མདོ་གཉི་གའི་དགོངས་པ་ལས་ཉམས་པར་འཕགས་པ་ལྷ་དང་ཟླ་བས་གསུངས། ལེགས་ལྡན་སོགས་ཀྱིས་ཀྱང་སེམས་ཙམ་པ་དང་སྒོ་མ་བསྟུན་པར་མདོ་སྡེ་པ་དང་སྒོ་བསྟུན་པས་སེམས་ཙམ་པ་ལས་དོན་སྨྲ་མཆོག་ཏུ་མི་འགྱུར་རམ་བྱེ་སྨྲས་རང་རིག་མི་འདོད་ལ། མདོ་སྡེ་པས་རང་གིས་རང་མྱོང་བའི་འཛིན་རྣམ་ཡན་གར་བ་ཞིག་བཞག་པ་ལྟ་བུ་སྐབས་དུ་མར་བྱེ་སྨྲའི་ལུགས་དེ་དོན་དང་མཐུན་པའང་མང་བས་དེ་གཉིས་ཀྱང་གང་མཆོག་ཏུ་བྱེད། སྐབས་འགར་གཅིག་ཤོས་ལས་དམན་ཡང་སྐབས་འགར་གཅིག་ཤོས་ལས་མཆོག་ཏུ་འགྲོ་བས་སྒོ་རེ་རེ་ཙམ་གྱིས་སྤྱིར་བཏང་གི་མཆོག་དམན་དབྱེ་མི་ནུས་ལ། ཟེར་ལུགས་ཙམ་འོག་མ་བཟང་ཡང་དོན་ལ་མཆོག་ཏུ་མ་སོང་བའང་ཡོད་དེ་འོག་ཏུ་འཆད་དོ། །འོན་ཏེ་བདག་མེད་ཀྱི་ལྟ་བའི་སྒོ་ནས་འབྱེད་དོ་སྙམ་ན་ལྟ་བའི་གོ་བ་གཏིང་ཚུགས་པ་ཞིག་ལ་དེ་ལྟར་ཡིན་མོད་ཀྱང་རང་ཅག་ལྟ་བུ་ལ་གང་གི་ལྟ་བ་མཆོག་ཡིན་པའང་གྲུབ་མཐའི་མཆོག་དམན་གྱི་སྒོ་ནས་ཚུར་བསྒྲུབ་དགོས་པས་སྒྲུབ་བྱེད་བསྒྲུབ་བྱ་དང་མཚུངས་སོ། །དེས་ན་དོན་ཕྲ་རགས་སྣ་ཚོགས་པ་ཞིག་གི་སྟེང་ནས་དཔྱད་ན་གཅིག་གིས་གཅིག་ལ་ངེས་པ་བསྐྱེད་ནས་སྤྱི་བབ་ཀྱི་དོན་རྟོགས་པ་ཞིག་འབྱུང་སྟེ། དཔེར་ན་བྱིས་པ་ཆུང་ངུ་ནར་སོན་པ་ན་བྱ་བ་མཐའ་དག་ལ་ཤུགས་གོང་འཕེལ་དུ་འགྲོ་བ་ཞིག་

[Full Size]

འབྱུང་གི །གཞན་རྣམས་ལ་རང་སོར་གནས་ནས་བྱ་བ་གཅིག་ཁོ་ནར་ཤུགས་རྒྱས་ལུགས་མེད་པ་བཞིན། ནང་གི་བློའི་མཐུ་འང་སྤྱོད་འཇུག་ལས། དེ་ལ་འཇིག་རྟེན་ཕལ་པ་ནི། །རྣལ་འབྱོར་འཇིག་རྟེན་གྱིས་གནོད་ཅིང། །རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །གསུངས་པ་བཞིན་རིམ་གྱིས་ཁྱད་ཞུགས་པ་ན་ཡུལ་གང་ལ་དཔྱོད་པ་ཞུགས་པའི་ཚེའང་གོང་མས་འོག་མ་ཟིལ་གྱིས་གནོན་པ་ཞིག་འབྱུང་ངོ་། །དམ་པ་གོང་མ་རྣམས་གྲུབ་མཐའི་རྣམ་གཞག་མཛད་པའང་འདི་གསུངས་པ་ཡིན་མོད་ཀྱང། ལུགས་རང་རང་གི་འདོད་ཚུལ་སོ་སོར་སྡེ་ཚན་དུ་བྱས་པ་ལས། གཞི་རེ་རེར་མཚོན་ཏེ་གྲུབ་མཐའ་སོ་སོའི་འཇོག་མཚམས་ཕྲ་རགས་དོད་ཚུལ་ལྷན་དུ་སྦྱར་ཏེ་མ་གསུངས་ལ། བློ་དམན་པས་རང་སྟོབས་ཀྱིས་གོང་འོག་ལྷུ་བསྒྲིག་དཀའ་བས། འདིར་གཞི་ལམ་འབྲས་བུའི་ཆ་སོ་སོར་གོང་འོག་གི་ལུགས་སྲོལ་ཤན་སྦྱར་ཏེ་གོ་བ་ཚོལ་ལུགས་ཀྱི་ཕྱོགས་ཙམ་བཤད་པར་བྱའོ། །བཅིང་གྲོལ་ཐམས་ཅད་ཀྱི་གཞི་བདག་ལ་བྱེད་དགོས་པས་དེར་ཕྱི་ནང་ཐམས་ཅད་མི་མཐུན་ཞིང། ལྷག་པར་ནང་པ་རྣམས་དེའི་འཇོག་མཚམས་སྒྲུབ་ཕྱོགས་ཐལ་ཆེས་ན་ཆོས་ཐམས་ཅད་བདག་མེད་པའི་ཕྱག་རྒྱར་འགལ་བ་དང་། དགག་ཕྱོགས་ཐལ་ཆེས་ན་ལས་འབྲས་ཀྱི་གཞི་སྟོར་བས་མངོན་མཐོའི་སྒོའང་ཁེགས་པར་འགྱུར་རོ་སྙམ་ནས་ཤིན་ཏུ་ཟོན་བྱས་ཏེ་རང་རང་གི་བློ་དང་འཚམ་པའི་འཇོག་མཚམས་རེ་བྱེད་དོ། །འདི་ཐམས་ཅད་ཀྱིས་གང་ཟག་འཇོག་ཚུལ་རྟེན་སའི་ཁུངས་

[Full Size]

ནི་མདོ་ལས། ཇི་ལྟར་ཡན་ལག་ཚོགས་རྣམས་ལ། །བརྟེན་ནས་ཤིང་རྟར་བརྗོད་པ་ལྟར། །དེ་བཞིན་ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཞེས་བྱ་འོ། །ཞེས་པ་འདི་ལ་བྱེད་པ་ཁྱད་མེད་ཀྱང་ཚིག་གི་ནུས་པ་འདོན་ལུགས་མི་འདྲ་སྟེ། དོན་སྨྲ་ཕལ་ཆེར་ཕུང་པོ་རྣམས་ཞེས་པ་ཡ་གྱལ་གྱི་ཕུང་པོ་ལྔ་ལ་བྱེད་དགོས་ཤིང། ཡ་གྱལ་ལ་བརྟེན་ནས་ཚོགས་པ་འཇོག་དགོས་པས་ལུང་གི་དོན་དེ་ལྟ་བུའི་ཕུང་པོའི་ཚོགས་ཙམ་དེ་ཉིད་གང་ཟག་ཏུ་འཇོག་དགོས་པ། ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཞེས་བྱ་ཞེས་པ་འདིས་གསལ་བར་བསྟན་ཟེར། སེམས་ཙམ་པ་རྣམས་གང་ཟག་གི་བཏགས་དོན་རྙེད་རྒྱུ་ཞིག་ཡོད་དགོས་ལ། ཕུང་པོ་ལས་ལོགས་སུ་ཡོད་ཚུལ་མི་སྲིད་པས་ཕུང་པོའི་ནང་འདི་ནས་ཚོལ་ཞིང་རྙེད་དགོས་པ། ཕུང་པོ་རྣམས་བརྟེན་ནས། །ཞེས་པའི་དོན་ཡིན་ལ། དེའི་ནང་ནས་བཙལ་བའི་ཚེ་གཞན་རྣམས་གང་ཟག་གི་མཚན་གཞིར་མི་རུང་བས། ཀུན་གཞི་ཁོ་ན་འཇོག་དགོས་པ་ལུང་དེའི་དོན་རིགས་པས་སྒྲུབ་ཚུལ་ཡིན་ཟེར། རང་རྒྱུད་པ་རྣམས་གང་ཟག་ཕུང་པོ་རྣམས་ལ་བརྟེན་ནས་འཇོག་པར་གསུངས་པས། འཇོག་བྱེད་གཞན་ཞིག་དགོས་པ་ཤུགས་ལ་ཐོན་ཅིང། དེ་གང་ལ་བྱེད་ན་རྟོག་པ་ཙམ་གྱིས་འཇོག་མི་ནུས་པས། ཡུལ་གྱི་རང་མཚན་ལ་མ་འཁྲུལ་བའི་བློ་གནོད་མེད་ཅིག་ལ་སྣང་བའི་དབང་གིས་འཇོག་དགོས། འོན་ཀྱང་དེར་སྣང་ཙམ་གྱིས་མི་ཆོག་པར་གདགས་གཞི་དེའི་ངོས་ནས་ཀྱང་

[Full Size]

གྲུབ་དགོས་ཏེ། དེའི་ངོས་ནས་གྲུབ་མ་གྲུབ་ལ་མི་ལྟོས་ན་མིའི་ཕུང་སོགས་འགྲོ་བ་གཞན་གྱི་གདགས་གཞིར་ཐལ་བའི་སྐྱོན་འབྱུང་བས། འདིར་ཕུང་པོ་རྣམས་བརྟེན་ཞེས་པ་དེ་ལ་དགག་ཕྱོགས་ནས་འཇོག་བྱེད་གཞན་ལ་ལྟོས་མེད་དུ་མ་གྲུབ་པ་དང། སྒྲུབ་ཕྱོགས་གདགས་གཞི་རང་གི་ངོས་ནས་ཀྱང་གྲུབ་དགོས་པས་གོ་དོན་གཉིས་ཡོད་ཅེས་ཟེར་རོ། །ཐལ་འགྱུར་བས་མདོ་ལུང་དེ་ཉིད་ཀྱི་སྒོ་ནས་དེ་ཐམས་ཅད་འགོག་པར་བྱེད་དེ། དེའང་དོན་སྨྲ་ལ། ཁྱོད་ཀྱིས་ཕུང་པོའི་ཚོགས་ཙམ་དེ་ཉིད་ཕུང་པོར་འཇོག་པ་མི་འཐད་པར་ཐལ། ཕུང་པོའི་ཚོགས་ཙམ་དེ་ལ་བརྟེན་ནས་གང་ཟག་འཇོག་དགོས་པའི་ཕྱིར། ཁྱབ་སྟེ། ལྷས་སྦྱིན་ལ་བརྟེན་ནས་ལྡང་བ་ལ་ལྷས་སྦྱིན་ལས་གཞན་ཞིག་དགོས་ཀྱི། རང་ཉིད་རང་ཉིད་ལ་བརྟེན་ནས་ལྡང་ཚུལ་མེད་པའི་ཕྱིར། ཕུང་པོ་ལ་བརྟེན་ནས་གང་ཟག་འཇོག་ཀྱང་ཕུང་པོའི་ཚོགས་ཙམ་ལ་བརྟེན་ནས་གང་ཟག་འཇོག་པར་མདོ་ལས་མ་གསུངས་ཟེར་ནའང་མི་འཐད་དེ། ཡན་ལག་ཚོགས་ཙམ་ལ་བརྟེན་ནས་ཤིང་རྟ་འཇོག་པར་མདོ་ལས་དངོས་སུ་གསུངས་པ་གང་ཞིག །དེ་གཉིས་དཔེ་དོན་འབྱོར་དགོས་པའི་ཕྱིར། གཞན་ཡང་ཤིང་རྟའི་ཡན་ལག་ཚོགས་ཙམ་ཤིང་རྟ་ཡིན་པར་ཐལ། ཕུང་པོའི་ཚོགས་ཙམ་གང་ཟག་ཡིན་པའི་ཕྱིར། འདོད་ན་བྱ་བྱེད་གཅིག་ཏུ་ཐལ་བའམ་མདོ་དང་དངོས་སུ་འགལ་བར་འགྱུར་རོ། །སེམས་ཙམ་པ་ལ། ཁྱོད་ཀྱིས་ཕུང་པོར་ཆ་ཕྱེ་སྟེ་ནང་ནས་རྣམ་ཤེས་གཅིག་པུ་གང་ཟག་གི་མཚན་གཞིར་འཇོག་པ་མི་རིགས་པར་ཐལ། མདོ་ལས་དེའི་མཚན་གཞི་སྟོན་པ་ན་ཆ་མ་ཕྱེ་བར་ཕུང་པོ་

[Full Size]

རྣམས་ཞེས་ཁྱད་མེད་དུ་གསུངས་པ་དང་འགལ་བའི་ཕྱིར། ཕུང་པོ་རྣམས་ཞེས་གསུངས་ཀྱང་དེའི་ནང་ནས་རིགས་པས་བཙལ་བ་ན་འོས་མེད་ཀྱིས་ཀུན་གཞིའི་སྟེང་དུ་འབབ་པས། སྤྱི་སྒྲ་བྱེ་བྲག་ལ་གཙོ་བོར་སྦྱར་ཏེ་ཀུན་གཞི་བསྟན་པ་ཡིན་ཟེར་ནའང་མདོ་དང་འགལ་ཏེ། མདོར། དེ་ཉིད་གང་ཟག་ཏུ་མ་གསུངས་པར་དེ་ལ་བརྟེན་ནས་གང་ཟག་འཇོག་པར་གསུངས་པའི་ཕྱིར། ཞེས་འགོག་གོ །རང་རྒྱུད་པ་ལ། ཁྱོད་ཀྱིས་གང་ཟག་གདགས་གཞིའི་ཕུང་པོ་རྣམས་ཀྱི་ངོས་ནས་གྲུབ་པར་འདོད་པ་མི་འཐད་པར་ཐལ། མདོ་ལས་གདགས་གཞིའི་ཕུང་པོ་རྣམས་ལ་བརྟེན་ནས་འཇོག་པར་གསུངས་པའི་ཕྱིར། ཁྱབ་སྟེ། གདགས་གཞིའི་ངོས་ནས་བཞག་ན་གདགས་གཞིའི་ཕྱོགས་སུ་གཏོགས་ཀྱི། བཏགས་ཆོས་སུ་མི་འགྲོ་བའི་ཕྱིར། དཔེར་ན་ཚུར་རི་ཕར་རི་ལ་ལྟོས་པས་ཕར་རིའི་ངོས་ནས་གྲུབ་ལུགས་མེད་པ་དང་། རིང་པོ་ཐུང་ངུ་ལ་ལྟོས་པས་ཐུང་ངུའི་ངོས་ནས་གྲུབ་ལུགས་མེད་པ་བཞིན་ཡིན་པའི་ཕྱིར། ༈ སྒྱུ་མའི་དཔེའང་མདོ་ལས་མང་དུ་འབྱུང་བས་གྲུབ་མཐའ་བཞི་ཀས་ཁས་ལེན་ཡང་དཔེར་བཀོད་ཚུལ་མི་འདྲ་སྟེ། བྱེ་སྨྲ་རྣམས་སྒྱུ་མའི་རྟ་གླང་སོགས་སྐབས་དེར་ཡོད་ཀྱང་སྤྲུལ་པ་བསྡུས་པ་ན་མེད་འགྲོ་བ་བཞིན། ཚེ་འདིའི་ལུས་ལོངས་སྤྱོད་རྣམས་འཆི་བའི་ཚེ་འདོར་བའི་མི་རྟག་པ་རགས་པའམ་རྒྱུན་གྱི་མི་རྟག་པའི་དཔེར་བྱེད། མདོ་སྡེ་པ་རྣམས་སྤྲུལ་པའི་བཀོད་པ་རྣམས་སྐད་ཅིག་སྐད་ཅིག་གིས་འགྱུར་བ་བཞིན་ཕྱིས་འབྱུང་གི་རྒྱུ་ལ་མི་ལྟོས་པར་སྐྱེས་ཙམ་ནས་འཇིག་

[Full Size]

པའི་ཆོས་ཅན་གྱི་སྐད་ཅིག་ལ་མི་རྟག་པའི་དཔེར་བྱེད། སེམས་ཙམ་པ་རྣམས་རྡེའུ་ཤིང་གི་ངོས་ནས་རྟ་གླང་དུ་མེད་ཀྱང་སྔགས་རྫས་ཀྱིས་བསླད་པའི་ཤེས་པའི་སྣང་ཆ་ཙམ་ཡིན་པ་ལྟར་ཕྱི་རོལ་དོན་གྱི་ངོས་ནས་མ་གྲུབ་པར་ནང་སེམས་ཀྱི་བདག་ཉིད་ཙམ་དུ་གནས་པའི་དཔེར་བྱེད། དབུ་མ་པ་རྣམས་བློ་ལ་སྣང་བའི་དབང་གིས་བཞག་པ་མ་གཏོགས་བདེན་པར་མ་གྲུབ་པའི་དཔེར་བྱེད། འོན་ཀྱང་རང་རྒྱུད་པས་ཆོས་རྣམས་གདགས་གཞིའི་ངོས་ནས་གྲུབ་པར་འདོད་པས་དཔེའི་སྐབས་སུ་སྒྱུ་མའི་རྟ་གླང་ཡང་སྤྲུལ་གཞིའི་ངོས་ནས་གྲུབ་པར་འདོད་དེ། དེ་སྤྲུལ་གཞིའི་ངོས་ནས་སྣང་མི་དགོས་ན་སྤྲུལ་གཞི་མེད་པར་སྔགས་རྫས་ཀྱིས་བསླད་པ་ཁོ་ནས་རྟ་གླང་དུ་སྣང་བར་ཐལ་བའི་སྐྱོན་འབྱུང་ཞེས་ཟེར་རོ། །ཐལ་འགྱུར་བས་དེ་ཉིད་རྟ་གླང་དུ་སྣང་བ་དེའི་ངོས་ནས་གྲུབ་པའི་དབང་གིས་མིན་གྱི། བློས་དེ་ལ་རྟ་གླང་དུ་བཏགས་མ་བཏགས་ཀྱི་དབང་གིས་ཡིན་ཏེ། དཔེར་ན་རི་བོང་རྭ་འཛིན་རྟོག་པས་རི་བོང་གི་རྭ་འཛིན་ཡང་མོ་གཤམ་གྱི་བུ་མི་འཛིན་པ་ཡུལ་ཡོད་མེད་ཀྱི་དབང་མ་ཡིན་པར་རྟོག་པས་དེར་བཏགས་མ་བཏགས་ཙམ་གྱི་དབང་གིས་ཡིན་པ་བཞིན་ནོ། །དེར་མ་ཟད་རྡེའུ་ཤིང་གི་ངོས་ནས་རྟར་སྣང་བ་སྐྱེད་པ་ཡིན་ན་མིག་མ་བསླད་ཀྱང་དེར་སྣང་དགོས་ལ། བསླད་པའི་ཚེའང་རྟ་ཁོ་ནར་སྣང་དགོས་ཀྱི་སྤྲུལ་གཞི་དེ་ཉིད་གླང་དུ་སྣང་བ་འབྱུང་མི་སྲིད་པར་འགྱུར་ཏེ། བློས་བཏགས་པ་ཁོ་ནས་མི་ཆོག་པར་སྤྲུལ་གཞི་ཁོ་རང་གི་ངོས་ནས་རྟར་སྣང་བའི་ཕྱིར་རོ། །སྒྲུབ་ཚུལ་འདི་དག་ནི་འཇུག་པར། དེ་ཉིད་དུ་འདི་ཇི་ལྟར་སྐྱེ་མེད་

[Full Size]

ཀྱང། །མོ་གཤམ་བུ་ལྟར་གང་ཕྱིར་འཇིག་རྟེན་གྱི། །མཐོང་བའི་ཡུལ་དུ་མི་འགྱུར་མ་ཡིན་པ། །དེ་ཡི་ཕྱིར་ན་སྨྲ་འདི་མ་ངེས་པའོ། །ཞེས་པའི་སྒྲུབ་ཚུལ་ཡིན་ནོ། །༈ གཞན་སྡེ་ལའང་མངོན་མཐོའི་ལམ་ཙམ་ཡོད་ལ། འོན་ཀྱང་དེའི་ནང་ནས་རྒྱང་འཕེན་ནི་ད་ལྟ་རང་ལ་དངོས་སུ་སྣང་བའི་མིའི་འགྲོ་བ་འདི་ཙམ་མ་གཏོགས་ཁམས་གོང་མ་དང་ལྷ་ལ་སོགས་པའི་མངོན་མཐོ་གཞན་དང་། སྐྱེ་བ་སྔ་ཕྱི་སོགས་དབང་པོའི་མངོན་སུམ་གྱི་ཡུལ་ལས་འདས་པ་རྣམས་མེད་དོ་ཞེས་སྐུར་བ་འདེབས་ལ། དེའི་རྒྱུ་མཚན་གྱིས་རྗེས་དཔག་ཚད་མའང་མི་འདོད་དོ། །དེས་ན་བློའི་མཐུ་ཤིན་ཏུ་ཞན་པས་གྲུབ་མཐའི་ཐ་ཤལ་དུ་རང་སྡེར་མ་ཟད་གཞན་སྡེ་ཕལ་ཆེར་ཡང་འདོད་དོ། །དེ་བཞིན་དུ་ནང་པའི་གྲུབ་མཐའ་བཞིས་ངེས་ལེགས་ཀྱི་ལམ་གཏན་ལ་འབེབས་པ་ཡིན་ཀྱང་བྱེ་སྨྲ་བློའི་མཐུ་ཤིན་ཏུ་ཞན་པས་ངེས་ལེགས་ཀྱི་ཡོན་ཏན་མཐར་ཐུག་པ་ཕལ་མོ་ཆེ་བློར་མ་ཤོང་བས་སྣང་ཚོད་ཙམ་གཙོ་བོར་བྱས་ཏེ་བསམ་གྱིས་མི་ཁྱབ་པའི་གནས་ཕལ་ཆེར་ལ་སྐུར་པ་འདེབས་པར་བྱེད་དོ། །དེའང་སྨོན་ལམ་དང་། ཏིང་ངེ་འཛིན་དང། དབང་འབྱོར་བའི་དབང་གིས་སྐྱེ་བ་ལེན་ཚུལ་རྣམས་དང་། མ་རིག་བག་ཆགས་ཀྱི་ས་དང། ཟག་མེད་ལས་ཀྱི་དབང་གིས་སྐྱེ་བ་ལེན་ཚུལ་སོགས་བློར་མ་ཤོང་བས་སྐྱེ་བ་ཞིག་ལེན་ཕྱིན་ལས་ཉོན་གྱི་དབང་གིས་སྐྱེ་དགོས་པར་འདོད། དེའི་རྒྱུ་མཚན་གྱིས་རྒྱལ་བུ་གཞོན་ནུ་དོན་གྲུབ་ལྟ་བུའང་སོ་སྐྱེར་འདོད་ལ། སངས་རྒྱས་ཀྱི་སྐུ་གཟུགས་ཀྱང་སྡུག་བདེན་དུ་

[Full Size]

འདོད་པ་དང་། ཕུང་པོའི་བདུད་བཅོམ་པ་ལ་ལྷག་མེད་དུ་འདའ་དགོས་པ་དང་། སྐྱེ་བ་ལེན་སའི་ཞིང་ཡང་ལས་ཉོན་གྱིས་བསྐྱེད་པ་ཁོ་ན་མ་གཏོགས་དག་ཞིང་མི་འདོད། རྒྱུ་མཚན་སྔ་མ་དང་ཕྱི་མཐའ་གཏུགས་པ་མེད་པར་བཞུགས་པ་བློས་མ་འཆུན་པའི་དབང་གིས་སངས་རྒྱས་དང་དགྲ་བཅོམ་རྣམས་ལྷག་མེད་དུ་འཕོས་པ་ན་བེམ་རིག་གཉི་ག་རྒྱུན་ཆད་པར་འདོད། གྲངས་མེད་གསུམ་དུ་ཚོགས་བསགས་པའི་འབྲས་བུ་ལོ་འགའ་ལས་མི་གནས་པ་རྒྱུ་འབྲས་གོ་ལོག་ཏུ་སོང་བ་ཡིན་ལ་སངས་རྒྱས་རང་ཉིད་མ་བཞུགས་ཀྱང་དེས་གདུལ་བྱ་གཞན་སྨིན་གྲོལ་ལ་བཀོད་པ་དང་། དེས་ཀྱང་གཞན་དང་གཞན་སྨིན་གྲོལ་ལ་བཀོད་པས་མཛད་པ་རྒྱུན་མི་འཆད་པ་ཡིན་ཞེས་སྐྱོན་སྤོང་ཞིག་བྱེད་མོད་ཀྱང་། ཕྱི་མ་ཕྱི་མས་རྒྱུ་གཞི་ནས་སྒྲུབ་དགོས་པས་སངས་རྒྱས་སྔ་མའི་མཛད་པ་ཉི་ཚེ་བ་ཙམ་དུ་ཐལ་བའི་སྐྱོན་སྤོང་མི་ནུས་པས་བསམ་མི་ཁྱབ་ཀྱི་གནས་ལ་སྐུར་འདེབས་སུ་སོང་བ་ཡིན། ཆོས་ཐམས་ཅད་དུས་གཅིག་ཏུ་བློ་གཅིག་གིས་རྟོགས་ཚུལ་བློས་མ་འཆུན་པས་རྣམ་མཁྱེན་མི་འདོད་ཅིང། འོ་ན་བདག་ཅག་གི་སྟོན་པ་ཐམས་ཅད་མཁྱེན་པ་མ་ཡིན་པར་ཐལ་ལོ་ཟེར་བ་ལ། མི་ཤེས་པའི་རྒྱུ་བཞི་སོགས་སྤངས་ཏེ་སྒྲིབ་བྱེད་མེད་པས་གང་ལ་དགོངས་པ་གཏད་ཀྱང་མཁྱེན་ཐུབ་པ་ཐམས་ཅད་མཁྱེན་པར་འགྲོ་ཚུལ་ཡིན་ཞེས་སྐྱོན་སྤོང་བྱེད་ཀྱང་། ཤེས་བྱ་མཐའ་ཡས་པ་ལ་སོ་སོར་རིམ་པ་བཞིན་དགོངས་པ་གཏད་དགོས་ན་ཐམས་ཅད་མཁྱེན་ཚུལ་ཞིག་མི་སྲིད་པའི་སྐྱོན་སོ་ན་གནས་སོ། །ཞིང་གཞན་གྱི་སྟོན་པ་རྣམས་ཕྱིའི་སྐྱེ་

[Full Size]

མཆེད་དུ་སྨྲ་བའང་སྐྱེ་བའི་བཀོད་པ་སྣ་ཚོགས་སུ་སྟོན་ཚུལ་བློས་མ་འཆུན་པའི་དབང་གིས་ཡིན་པས། དེ་ལྟར་ན་ཞིང་འདིའི་བདག་ཅག་གི་སྟོན་པ་གང་ཟག་ཏུ་ཁས་བླངས་པའང་ཞེན་ཕྱོགས་ཙམ་དུ་ཟད་དེ། ཞིང་གཞན་ན་ཡོད་པའི་བྱེ་སྨྲ་རྣམས་ཞིང་དེའི་སྟོན་པ་གང་ཟག་ཡིན་ལ། འདི་དག་ཕྱིའི་སྐྱེ་མཆེད་ཡིན་ཟེར་བས་དེ་གཉིས་ལ་བདེན་རྫུན་གྱི་ཁྱད་འོང་དོན་མེད་དོ། །མདོར་ན་ཀུན་སློང་སྐྱོན་ཅན་མ་ཡིན་པ་མ་གཏོགས་སངས་རྒྱས་ཀྱི་སྐུ་གསུང་ཐུགས་མཛད་པ་དང་བཅས་པ་རྒྱ་ཆེ་བའི་རིགས་བློར་མ་ཤོང་བས་འདོད་ཚུལ་ཕལ་ཆེར་སྐུར་འདེབས་ཁོ་ནར་འགྲོ། ༈ དོན་སྨྲས་ཕྱི་དོན་འདོད་ལ། སེམས་ཙམ་པས་མི་འདོད་པས་དེ་ལ་འོག་མའི་ལུགས་བཟང་བ་དང་། སེམས་ཙམ་པས་ཀུན་བཏགས་རྟོག་པས་བཏགས་ཙམ་དུ་འདོད་ལ་རང་རྒྱུད་པས་མི་འདོད་པས་དེའི་ཆ་ནས་སེམས་ཙམ་པའི་ལུགས་བཟང་བར་མི་འགྲོའམ་སྙམ་ན་མ་ཡིན་ཏེ། དོན་སྨྲ་དང་སེམས་ཙམ་གཉིས་ཕྱི་དོན་ཡོད་མེད་རྩོད་པའི་ཞེ་ཕུགས་ནི། བུམ་པ་ལྟ་བུ་སེམས་ཀྱི་བག་ཆགས་སྨིན་པ་སོགས་གང་ལའང་མ་ལྟོས་པར་རྡུལ་ཕྲ་རབ་བསགས་པའི་སྟེང་ནས་རྟོག་པའི་ཞེན་གཞིར་ཚུགས་ཐུབ་ཏུ་ཚུར་ལིང་ངེར་གྲུབ་རྒྱུ་ཡོད་པ་ཞིག་ལ་བསམས་པ་ཡིན་པས་དེ་ཐལ་འགྱུར་བའི་ལུགས་ལའང་མེད་པས་དོན་ལ་བསམ་ན་སེམས་ཙམ་པ་བདེན་ཞིང། སློབ་དཔོན་དབྱིག་གཉེན་ལྟ་བུ་མདོ་སྡེ་པ་ལས་སེམས་ཙམ་པར་གྱུར་པའི་ཚེ་དགག་བྱ་དེ་ཁེགས་ནས་བློ་ཁ་ཇེ་མཐོར་སོང་བ་ཡིན་ནོ། །སེམས་ཙམ་པས་ཀུན་བཏགས་

[Full Size]

རྟོག་པས་བཏགས་ཙམ་ཡིན་ཟེར་མོད་ཀྱང་། ཙམ་སྒྲས་རྒྱུ་ལས་སྐྱེས་པ་དང་འཕགས་པའི་མཉམ་གཞག་ཡེ་ཤེས་ཀྱི་ཡུལ་དུ་གྲུབ་པ་ཙམ་ཁེགས་པ་མ་གཏོགས་ཡུལ་སྟེང་ན་གྲུབ་རྒྱུ་ཞིག་ཡོད་པ་ཁེགས་པར་མ་གོ །རང་རྒྱུད་པས་ཙམ་སྒྲའི་ནུས་པ་ཡུལ་སྟེང་ན་གྲུབ་རྒྱུ་ཞིག་ཡོད་པ་ཁེགས་ཚུལ་ཤར་ཏེ་ཀུན་བཏགས་དེར་ཁས་མ་བླངས་པ་ཡིན་པས་དེ་གཉིས་ཀྱང་ཕྱི་མ་བློ་ཁ་མཐོ་བའི་རྟགས་ཡིན་ནོ། ། ༈ མདོ་སྔགས་ལ་གཞོལ་ཚུལ་དྲིས་པའི་ལན་ནི། དཔེར་ན་ཐང་དམའ་མོ་ནས་རི་རྩེར་འགྲོ་བའང་ཐང་སྟོད་ཇེ་མཐོ་དང་རི་ཞོལ་ཇེ་དམའ་དགོས་ཀྱི། དེ་མིན་ན་འགྲོ་ལུགས་མེད་པ་ལྟར། མདོ་སྔགས་ལ་གཞོལ་ཚུལ་ཡང་མདོའི་བཤད་པ་ཇེ་ཟབ་ཇེ་མཐོར་སོང་སྟེ། ཐེག་པ་འོག་མར་ཉོན་མོངས་ལམ་གྱི་གྲོགས་སུ་འགྲོ་བར་གསུངས་པ་མེད་ཀྱང་། ལྷག་བསམ་བསྐུལ་བར་བྱང་སེམས་ལ་དེ་གྲོགས་སུ་འགྲོ་བ་ཡོད་པར་གསུངས། ལུས་ངག་གི་བདུན་ཡང་གནང་སྟེ། སྔགས་ཀྱི་ཆགས་པ་ལམ་དུ་བྱེད་ཚུལ་དང་མངོན་སྤྱོད་ལྟ་བུ་མིན་ཡང་དེར་ཕྱོགས་པའི་རྟགས་ཡིན། མདོ་གཞན་ལ་སྦས་དོན་ཟེར་བ་མེད་ཀྱང་ཤེར་མདོར་ཡོད་པ་དེ་མདོའི་ཡང་རྩེ་ཡིན་པས་སྔགས་ཀྱི་ཚུལ་བཞི་སོགས་ལ་ཕྱོགས་པའི་རྟགས་ཡིན། ཚུལ་བཞིའང་དང་པོ་ཚིག་དོན་ནས་ཡར་འཁྲིད་པ་བྱིས་པ་ཆུང་ངུར་མཛུབ་རྩེ་བསྟན་ནས་མིག་ཁྲིད་དེ་ཟླ་བ་སྟོན་པ་དང་འདྲ་བར་གསུངས་པས། ཡིག་སྤྱི་གཉིས་མདོ་ལ་ཚང་ཡོད་པས་དེ་སྔགས་ལ་འཁྲིད་བྱེད་ཡིན་པ་དེས་ཀྱང་ཤེས། ཡང་སྔགས་ཀྱི་ཁྱད་ཆོས་གཙོ་བོ་ལྷའི་རྣལ་འབྱོར་དང་རླུང་འདུལ་ཐབས་གཉིས་ཡིན་ལ། མདོ་རྣམས་དེའི་

[Full Size]

སྔ་མར་གཞོལ་ཚུལ་བྱེ་སྨྲས་སངས་རྒྱས་ཀྱི་གཟུགས་སྐུ་བེམ་པོར་འདོད་ཅིང་ལྷག་མེད་ཀྱི་ཚེ་བེམ་རིག་རྒྱུན་ཆད་པས་ད་ལྟ་སྐྱབས་སུ་སོང་ཚེ་སྨོན་ལམ་གྱི་མཐུས་བྱིན་རླབས་འཇུག་པས། ཤི་བ་ལ་ཡང་བྱིན་རླབས་ཡོད། །ཅེས་པ་ལྟར་ཡིན་གྱི། ཡུལ་དངོས་དེ་མེད་པར་འདོད། མདོ་སྡེ་པས་གཟུགས་སྐུ་སངས་རྒྱས་སུ་འདོད་པས་སྔ་མ་ལས་དགའ་འང་སྐུ་དེ་བསྒོམ་པ་མ་བཤད། འོན་ཀྱང་འདུལ་བ་ལུང་ལས་སྟོན་པའི་སྐུ་བྲི་བར་གསུངས་པ་འདི་གཉི་གས་བྱེད་ལ། དེ་བསྒོམ་པའི་དམིགས་རྟེན་ཡིན་པས་རྟེན་འབྲེལ་གྱི་སྒོ་ཙམ་ཞིག་ཡོད། ཕར་ཕྱིན་ཐེག་པས། ཡེ་ཤེས་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །ཅེས་པ་དང་། གང་ཞིག་ཐུབ་པའི་ཟླ་བ་ཡིད་བྱེད་པ། །དེ་ཡི་མདུན་ན་ཐུབ་པ་རྟག་ཏུ་བཞུགས། །ཞེས་མདུན་དུ་བསྒོམ་པ་བཤད་ཀྱང་རང་དེར་བསྒོམ་པ་མ་བཤད། བྱ་རྒྱུད་ལ་བདག་བསྐྱེད་ཡོད་མེད་གཉིས་འབྱུང་བའང་མདོའི་གདུལ་བྱ་ཡར་ཁ་འདྲེན་ཐབས་ཡིན་ཏེ། བདག་བསྐྱེད་མེད་པ་དང་། ཡོད་ཀྱང་དམ་ཚིག་པ་ཙམ་བསྒོམ་པ་དང་། དེར་ཡེ་ཤེས་པ་བསྲེ་བ་རིམ་པ་བཞིན་རྟ་ལ་ཟན་སློབ་པ་ལྟར་བྱེད་དགོས་པས་མདོ་སྔགས་མཐུད་མཚམས་ལྟ་བུ་དེར་རིམ་པས་ཕྲ་སྦོམ་བཏང་བ་ཡིན། འདུལ་བ་ལུང་ལས་སྟོན་པའི་སྐུ་ལ་ཞབས་གདུབ་དང་རྣ་རྒྱན་མ་གཏོགས་པའི་རྒྱན་འབུལ་བར་གསུངས་པས་ཐེག་དམན་ལྟར་ནའང་ལྷའི་རྣམ་པར་སྒྱུར་རྒྱུའི་ཕྱོགས་ཙམ་ཡོད་ལ། ཕར་ཕྱིན་ཐེག་པར་ལོངས་སྐུའང་བཤད་པ་དང་། བྱ་རྒྱུད་ཀྱི་གཙོ་བོ་དམ་ཚིག་གསུམ་བཀོད་ཀྱི་

[Full Size]

དཀྱིལ་འཁོར་སོགས་སྔགས་སྤྱི་འགྲོ་ལྟར་ལ་གཙོ་བོ་སྤྲུལ་སྐུའི་རྣམ་པར་ཡོད་པ་དང་། རྣལ་འབྱོར་རྒྱུད་ཀྱི་ལྷ་སྣམ་ལ་རབ་བྱུང་གི་རྣམ་པ་ཅན་བཀོད་པ་སོགས་ཀྱང་སྔ་མ་སྔ་མའི་འགྲོས་དེ་ཡིན་ནོ། །སྤྱོད་རྒྱུད་ཀྱིས་ཡེ་ཤེས་པ་གཞུག་པའི་ཚུལ་གཙོ་བོ་དང་། རྣལ་འབྱོར་རྒྱུད་ཀྱིས་དེར་ཕྱག་རྒྱ་བཞིས་རྒྱས་འདེབས་པ་བཅས་ཇེ་ཟབ་ཏུ་བཏང་། བླ་མེད་ཀྱིས་བསྐྱེད་པ་ཙམ་དུ་མ་ཟད་སྐུ་གསུམ་ལམ་འཁྱེར་གྱི་ཚུལ་དུ་བསྐྱེད་ལ། དེ་ལས་ལྷག་པ་ལུས་སེམས་ཕྲ་རགས་ཕྱེ་སྟེ་ཡེ་ཤེས་ཀྱི་སྐུར་ལྡང་ཚུལ་གསུངས་སོ། །རླུང་གི་རྣལ་འབྱོར་ལ་མདོ་རྣམས་གཞོལ་ཚུལ་བྱེ་སྨྲས་དབུགས་འབྱུང་རྔུབ་སྒོམ་ཚུལ། བགྲང་བ་ལ་སོགས་རྣམ་པ་དྲུག །ཅེས་པ་ཙམ་ཞིག་ཡོད་ལ། མངོན་པ་གོང་མས་དེ་ལས་རྒྱས་སུ་བཏང་ཚུལ་བསམ་གཟུགས་ཆེན་མོ་ལྟར་ཡིན། དེ་ལས་ལྷག་པ་རླུང་དང་སྦྲགས་ཏེ་གཏོང་ལེན་གྱི་སྒོ་ནས་བདག་གཞན་མཉམ་བརྗེ་སྒོམ་ཚུལ་སྤྱོད་འཇུག་ཏུ་གསུངས་པ་དེ་སྔགས་དངོས་མིན་ཀྱང་སྔགས་ཀྱི་འབྲས་བུ་ལམ་བྱེད་དང་སྒོ་མཐུན་པའི་མན་ངག་ཡིན་པས་གསང་བའི་དམ་པ་ཞེས་གསུངས། རྒྱུད་སྡེ་འོག་མར་རླུང་ལ་བརྟེན་ནས་བདེ་དྲོད་བསྐྱེད་པ་དང་། དེའི་རང་གདངས་སྔགས་ཀྱི་སྒྲར་གྲག་པ་སོགས་གསུངས་ལ། བླ་མེད་ཀྱིས་དེའི་འབྱུང་འཇུག་གནས་གསུམ་སྔགས་སུ་བྱེད་པའི་རྡོར་བཟླས་ཀྱི་སྒོ་ནས་རླུང་དབུ་མར་གཞུག་པའི་མན་ངག་མཐར་ཐུག་པ་གསུངས་སོ། ། ༈ དེ་བཞིན་དུ་སངས་རྒྱས་རྗེས་སུ་དྲན་པའི་དོན་ཡང་གྲུབ་མཐའ་འོག་མས་ཡོན་ཏན་དང་བཀའ་དྲིན་རྗེས་སུ་དྲན་པ་ལ་བྱེད། ཐེག་ཆེན་ཐུན་མོང་བས་ཡེ་ཤེས་ཀྱི་

[Full Size]

སྤྱན་གྱིས་གཟིགས་བཞིན་པར་བཞུགས་པ་དཔང་པོའི་ཚུལ་གྱིས་ལྷ་རྗེས་སུ་དྲན་པ་ལ་བྱེད། གསང་སྔགས་ཀྱིས་རང་ལྷར་རྗེས་སུ་དྲན་ནས་ང་རྒྱལ་དང་གསལ་སྣང་བསྐྱེད་པ་ལ་བྱེད་དོ། །༈ སེམས་སེམས་བྱུང་རྫས་མཚུངས་ཞེས་པའི་དོན་གང་ཡིན་དྲིས་པའི་ལན་ནི། རྫས་མཚུངས་དེ་གཉིས་རྫས་རེ་རེ་བར་མཚུངས་ཞེས་པ་ཡིན་ལ། འདིར་ཉམས་ལེན་དང་འབྲེལ་བའི་གོ་རྒྱུ་ཆེན་པོ་ཞིག་ཡོད་དེ། སེམས་ཀྱི་ངོ་བོ་གསལ་རིག་ཙམ་ངོས་ཟིན་ཡང་། སེམས་བྱུང་སོ་སོ་ངོས་མ་ཟིན་ན་རྨུགས་པ་སོགས་གཏི་མུག་གི་ཆ་འགའ་ཞིག་ཏིང་འཛིན་དུ་འཁྲུལ་བ་དང། འདོད་ཆགས་ཀྱི་ཆར་གཏོགས་འགའ་ཞིག་བྱམས་སྙིང་རྗེ་དད་པ་སོགས་སུ་ནོར། ལྟ་ངན་ལ་ཤེས་རབ་ཏུ་ནོར་བ་སོགས་རྟོག་པ་འོག་འགྱུའི་དབང་གིས་རྒྱལ་ཁ་བློན་གྱིས་བསྒྱུར་བ་བཞིན་སེམས་དགེ་མི་དགེ་གང་དུ་སོང་ཡོད་ཤེས་དཀའ་བས་དམ་པ་རྣམས་ཉམས་ལེན་བྱེད་པ་ལ་ཀུན་བཏུས་སམ། མ་མཐའ་ཕུང་པོ་ལྔའི་རབ་བྱེད་ལྟ་བུ་རེར་སྦྱང་དགོས་པར་གསུང་ཞིང་སེམས་སེམས་བྱུང་གི་ངོས་འཛིན་མང་པོ་གསུངས་པའི་རྒྱུ་མཚན་དེ་ཡིན་ནོ། །བློན་པོའི་ནང་ནས་ཀྱང་སྐབས་དེར་ཕན་གནོད་གང་བྱེད་པའི་གཙོ་བོ་རང་དེ་ཤེས་ནས་ཐབས་བྱེད་དགོས་པ་ལྟར། སེམས་བྱུང་མང་པོ་ཡོད་ཀྱང་རང་སྟོབས་ཀྱིས་ཡུལ་མྱོང་བའི་ཆ་དེ་བྱེད་མཁས་ཚོར་བ་རྫས་གཅིག་པོ་དེ་ཁོ་ན་ཡིན། འདི་འདིའོ་ཞེས་སྤུ་རིས་འབྱེད་མཁན་འདུ་ཤེས་གཅིག་པུ་ཡིན་པ་ལྟ་བུ་མཛུབ་མོ་འཛུག་ས་གཅིག་དགོས་ལ། ཁྱད་པར་གནས་ལུགས་ལ་རྨོངས་ཏེ་

[Full Size]

འཁོར་རྩ་བྱེད་མཁན་དང་། གནས་ལུགས་རང་སྟོབས་ཀྱིས་རྟོགས་ཏེ་འཁོར་བ་ལས་གྲོལ་བྱེད་གང་ཡིན་རྩ་བར་བཅར་ནས་ངོས་ཟིན་པ་ཞིག་མེད་ན་སྤོང་གཉེན་ངོ་འཕྲོད་པའི་སྒོམ་ཚུལ་གནད་ཐོག་ཏུ་ཁེལ་བ་ཞིག་མི་འོང་ངོ་། །འཕགས་ཡུལ་གྱི་གྲུབ་མཐའ་སྨྲ་བ་རྣམས་ཀྱང་དགོས་དོན་འདི་ཐུགས་ལ་བཞག་པའི་དབང་གིས་སེམས་ཙམ་པ་ལུང་གི་རྗེས་འབྲང་རྣམས་གནས་ལུགས་སྒྲིབ་བྱེད་མ་རིག་པ་ལྟ་མིན་གྱི་དེ་ཁོ་ནར་ངེས་ཀྱི། ལྟ་བར་གྱུར་པ་གཅིག་སྟེ་མ་རིག་པ་གཉིས་བྱུང་ན་རྫས་མཚུངས་ཉམས་ཟེར་དོན། དཔེར་ན་མི་གཅིག་ལ་རྐུས་བཙུགས་ཡོད་པའི་ཚེ་ཡང་ཕྱོགས་གཞན་གྱི་མི་གཅིག་ལ་རྐུས་དེ་བཙུགས་ན་ངེས་མེད་དུ་འགྲོ་བ་བཞིན། སྲིད་རྩ་གང་ཡིན་བཙལ་བཙལ་ཏེ་ཐོག་ཅིག་མ་རིག་པར་ངོས་ཟིན་ཡོད་པ་དེ་གཏད་སོ་མེད་པར་འགྲོ་དོགས་པ་ཡིན། སེམས་ཙམ་པ་རིགས་པའི་རྗེས་འབྲང་དང་དབུ་མ་པ་སོགས་ཀྱིས་ལན་འདེབས་ཚུལ་ཡང། བྱ་བ་ཁྱད་མེད་པའི་མ་རིག་པ་གཉིས་སེམས་གཅིག་གི་འཁོར་དུ་བཞག་ན་རྫས་མཚུངས་ཉམས་པ་བདེན་ཡང་། འདིར་ལྟ་མིན་རང་སྟོབས་ཀྱིས་གནས་ལུགས་སྒྲིབ་པ་ཙམ་བྱེད། འཇིག་ལྟས་རང་སྟོབས་ཀྱིས་ཕྱིན་ཅི་ལོག་ཏུ་འཛིན་པས་བྱ་བ་མི་འདྲ་ཞིང་། དེའི་ནང་ནས་ཀྱང་སྐྱོན་ཆེ་ཤོས་འཇིག་ལྟས་བྱེད་པ་ཡིན་ཏེ། མུན་ཁྲོད་དུ་ཐག་པ་དཔྱིས་ཕྱིན་པར་མ་མཐོང་བ་ལས་ཀྱང་སྦྲུལ་དུ་མཐོང་བ་དེ་ཉིད་ཀྱིས་འཇིགས་སྐྲག་སྐྱེད་པ་བཞིན། རྨོངས་ཙམ་ལས་ཀྱང་འཇིག་ལྟ་དེ་ཉིད་ཆགས་སྡང་སོགས་ཀྱི་རྒྱུའི་གཙོ་བོ་ཡིན་པས། རྣམ་འགྲེལ་ལས། ལོག་པར་དམིགས་ཉིད་མ་རིག་པ། །གསུངས་

[Full Size]

ཤིང་འཇུག་པའི་དགོངས་པའང་དེ་དང་འདྲ་ལ། མདོ་སྡེ་རྒྱན་ལས། གང་ཕྱིར་ཡོད་པ་མི་མཐོང་མེད་མཐོང་བ། །དེ་འདྲའི་མུན་ནག་རྣམ་པ་དེ་གང་ཞིག །གསུངས་པའི་དཔེའི་ནུས་པའང་འདིས་ཐོན་ནོ། །འཕགས་ཡུལ་གྲུབ་མཐའ་བཞིའི་མཁས་པ་ཀུན་གྱིས་དཔྱད་པ་མང་པོ་མཛད་པའི་དགོས་དོན་གཙོ་བོ་འཁོར་རྩ་གཅོད་ཐབས་འདི་རང་ཡིན་པས་བློའི་ནུས་པའི་ཁྱད་ཀྱིས་རིམ་པ་བཞིན་ཇེ་ཞིབ་ཏུ་སོང་སྣང་སྟེ། བྱེ་སྨྲ་རྣམས་སྲེད་པས་ཡུལ་ལ་འཇུག་ཚུལ་ཙམ་མཐོང་ནས་དེ་འཁོར་རྩར་འཇོག་པ་མ་གཏོགས་བདག་འཛིན་གྱིས་འཁོར་རྩ་བྱེད་ལུགས་བློས་མ་འཆུན་ཞིང། སྲེད་པ་ནི་སྤང་བྱ་གཞི་བཅས་ཞེས་ཡུལ་འདོད་པའི་དངོས་པོ་དོན་དུ་ཡོད་པ་ཞིག་ལ་ཡིད་འོང་གི་རྣམ་པར་ཞེན་པ་ཡིན་པས། སྤང་བྱ་གཞི་མེད་བདག་འཛིན་ལྟ་བུ་འཛིན་སྟངས་དངོས་འགལ་དུ་ཞུགས་པའི་གཉེན་པོའི་སྒོ་ནས་ཞེན་ཡུལ་དྲུངས་ཕྱུང་སྟེ་སྤོང་ཚུལ་མེད། དེའི་སྟོབས་ཀྱིས་དགྲ་བཅོམ་ཐོབ་ནའང་ཡུལ་འདོད་པའི་དངོས་པོ་དང་ཕྲད་པའི་རྐྱེན་གྱིས་འབྲས་བུ་ལས་ཉམས་པའང་འཇོག་དགོས་བྱུང་བ་ཡིན། དེ་ལ་ཕ་རོལ་པོས་ཐར་པ་ལ་ཡིད་བརྟན་མེད་པར་ཐལ་བ་འཕང་བའི་ལན་དུ། འབྲས་ལས་ཉམས་པ་འཆི་བ་མེད། །ཅེས་སྐྱོན་སྤོང་ཞིག་བྱེད་མོད་ཀྱང་མི་འགྲིག་པའི་རྩ་བ་འཁོར་རྩ་ངོས་མ་ཟིན་པ་དེ་ཡིན། སྤང་བྱའི་གཙོ་བོ་ངོས་མ་ཟིན་པས་སྤོང་བྱེད་གཉེན་པོའང་ངེས་བཟུང་མེད་པར་སྦྱོར་ལམ་ཐ་མའི་ཚེ་མི་རྟག་སྡུག་བསྔལ་སོགས་གང་གཙོ་བོར་བསྒོམ་

[Full Size]

ནའང་མཐོང་ལམ་སྡུག་བསྔལ་ཆོས་བཟོད་དེ་དེའི་རྣམ་ལྡན་དུ་སྐྱེ་ཞེས་ཟེར། མདོ་སྡེ་པས་འཁོར་རྩ་ལ་བདག་འཛིན་དགོས་པའི་ཕྱོགས་ཤིག་ཤེས་ཀྱང་བདག་འཛིན་རགས་པ་ཙམ་ལས་ངོས་མ་ཟིན། དེ་བཞིན་དུ་གཉེན་པོའི་གཙོ་བོ་བདག་མེད་བསྒོམ་དགོས་པར་བསམས་ཀྱང་དེ་མངོན་སུམ་དུ་འཆར་ཚུལ་བློར་མ་བདེ་བས་ཆོས་བཟོད་ཀྱིས་མི་རྟག་སོགས་སྣང་ཡུལ་དུ་བྱས་པའི་ཤུགས་ལ་རྟོགས་ཟེར། སེམས་ཙམ་པས་དེའི་སྟེང་དུ་ཐེག་ཆེན་ལུགས་ཀྱི་སྤང་བྱ་ཁྱད་པར་ཞིག་ཡོད་དགོས་ཤིང་། དེའང་ཐམས་ཅད་མཁྱེན་པ་ཐོབ་པ་ལ་གེགས་བྱེད་པའི་ཤེས་སྒྲིབ་ཅེས་ཆོས་ཐམས་ཅད་ཀྱི་སྟེང་དུ་ལོག་པར་ཞུགས་ནས་སྒྲོ་འདོགས་མཁན་ཞིག་ཡོད་དགོས་པར་བསམས་ནས་ཆོས་ཀྱི་བདག་འཛིན་རགས་པ་ཞིག་བསྣན་ཏེ་གང་ཟག་གི་བདག་འཛིན་དང་དེ་གཉི་ག་འཁོར་བའི་རྩ་བར་འདོད། འདིས་མདོ་སྡེ་པ་ལྟར་ཆོས་བཟོད་ཀྱི་འཛིན་སྟངས་ལ་འདུས་བྱས་ཤིག་མ་བཞག་ཀྱང་རྗེས་བཟོད་ལ་བཞག་པ་འོག་མའི་ཤན་གྱིས་ད་དུང་གཏད་སོ་ཞིག་མ་བྱུང་བའི་རྟགས་སུ་སྣང་། རང་རྒྱུད་པས་བདེན་འཛིན་གྱིས་འཁོར་རྩ་བྱེད་པའི་ཕྱོགས་རྟོགས་ནའང་བདེན་འཛིན་ཕྲ་མོ་ངོས་མ་ཟིན་ཞིང། ཐེག་པ་གསུམ་ཤེས་རབ་ཀྱི་རྟོགས་རིགས་ཐ་དད་པ་དང་། དེའི་དབང་གིས་གྲུབ་མཐའ་འོག་མས་འདོད་པའི་བདག་འཛིན་དེ་ཚོའང་འཁོར་བའི་རྩ་བར་བཞག་སྟེ་གཅིག་ཆོད་ཅིག་བྱེད་མ་ཐུབ། ཐལ་འགྱུར་བས་ཐམས་ཅད་མཁྱེན་པ་འཐོབ་པ་ལ་གེགས་བྱེད་ཀྱི་ཤེས་སྒྲིབ་ཅིག་ཟུར་དུ་ཡོད་ནའང། ཐེག་པ་

[Full Size]

གསུམ་པོ་གང་གི་དབང་དུ་བྱས་རུང་ཐར་པ་ཐོབ་པ་ལ་གེགས་བྱེད་ཀྱི་གཙོ་བོ་འཁོར་བའི་རྩ་བ་བདེན་འཛིན་ཕྲ་མོས་བྱེད་པ་འདྲ་ཞིང་། དེ་གཅོད་བྱེད་བདེན་མེད་བསྒོམ་པའང་འདྲ་བས་ཞི་སྒོ་གཅིག་པུ་འདི་ཁོ་ན་ཡིན་ཞེས་འཇོག་ཐུབ་པ་བྱུང་སྟེ། རིམ་པ་བཞིན་རྐུན་མ་ངོས་འཛིན་པ་ལ་དང་པོ་ཕྱོགས་ཙམ་ཡང་མ་ཤེས་པ་དང་། ཕྱོགས་ཙམ་ཤེས་ཀྱང་གྲོང་ངོས་མ་ཟིན་པ་དང་། དེའི་ནང་ནས་མི་འགའ་ལ་དོགས་པ་སྐྱེས་པ་དང་། གཅིག་རང་ལ་མཛུབ་མོ་འཛུག་ཐུབ་པ་ལྟ་བུ་གནད་ལ་ཐག་ཇེ་ཉེར་འགྲོ་ཚུལ་གྱི་ཁྱད་ཞུགས་པ་འདི་མཐོང་ན་ཐམས་ཅད་ལ་དད་པ་སྐྱེ་ཞིང་། གྲུབ་མཐའི་གོ་རིམ་ལ་ངེས་པ་དང་གོང་མ་གོང་མ་ལ་ལྷག་པར་ཡིད་ཆེས་རྙེད་ཅིང། བཅོམ་ལྡན་འདས་ཀྱིས་གདུལ་བྱའི་རིམ་པ་གཟིགས་ཏེ་ཆོས་བསྟན་ཚུལ་ལ་དད་པ་ལྷག་པར་ཐོབ་པ་འབྱུང་ངོ་། །འཁོར་རྩ་འཇོག་ཚུལ་མ་འདྲ་བའི་དབང་གིས་ཐར་ལམ་སྒྲུབ་པའི་རྟེན་གྱི་རིགས་འཇོག་ཚུལ་ཡང་མི་འདྲ་སྟེ། བྱེ་སྨྲས་སྲེད་པ་འཁོར་རྩ་བྱས་པས་རིགས་ཀྱི་ངོ་བོ་འདོད་ཆུང་ཆོག་ཤེས་ལ་བཤད་དོ། །སེམས་ཙམ་པས་འཁོར་འདས་ཐམས་ཅད་ཀུན་གཞིའི་སྟེང་ནས་འབྱུང་དགོས་པས་རིགས་ཀྱང་དེའི་སྟེང་གི་ཟག་མེད་ཡེ་ཤེས་སྐྱེ་རུང་གི་ནུས་པ་ཞིག་བཞག་གོ །ཐལ་རང་གཉིས་སེམས་ཀྱི་གནས་ལུགས་བདེན་སྟོང་ལ་རིགས་སུ་འཇོག་པ་འདྲའང་དེ་མཐོང་སྒོམ་གྱི་སྤང་བྱའི་དྲི་མས་དག་པའི་ཆ་རིམ་པར་འགོག་བདེན་དུ་འགྲོ་ལུགས་དང་། འགོག་པ་དེ་ཉིད་རང་སྟེང་དུ་མཐོང་ཚུལ་སོགས་ཐལ་འགྱུར་བ་ལྟ་

[Full Size]

བུའི་འཇོག་ཚུལ་བདེ་མོ་ཞིག་མ་ཐུབ་པ་ཐེག་པ་གསུམ་གའི་ཤེས་རབ་ཀྱི་རྟོགས་རིགས་སོ་སོར་བཞག་པའི་དབང་གིས་ཡིན་ཏེ། ཆོས་ཀྱི་དབྱིངས་ལ་དབྱེར་མེད་ཕྱིར། །ཞེས་སོགས་ཀྱི་རྩོད་ལན་ཡང་ཐེག་པ་གསུམ་གས་སེམས་ཀྱི་ཆོས་ཉིད་དེ་ག་བསྒོམ་པར་འདྲའང་ཟིན་བྱེད་ཐབས་ཀྱི་ཆ་སོགས་མ་འདྲ་བས་སྟོབས་ཆེ་ཆུང་དང་མཆོག་དམན་བྱུང་བ་ཡིན་ཞེས་ལན་འདེབས་རྒྱུ་བཞག་ནས། ནམ་མཁས་གཟུགས་ཅན་ཀུན་ལ་གོ་འབྱེད་པ་ལྟར་སེམས་བདེན་སྟོང་དེས་ཀྱང་ཐེག་པ་གསུམ་གའི་ལམ་ལ་གོ་འབྱེད་པས་རྟེན་བྱེད་པར་འདྲའང་ལམ་རང་རང་གི་ངོ་བོ་མ་འདྲ་བ་ཡིན་ཞེས་ལན་འདེབས་ལ། ཐལ་འགྱུར་བས་གཞལ་ན་རྒྱུ་བྱེད་པའི་རིགས་སུ་འགྱུར་ཚུལ་ཞིག་མེད་པར་རྟེན་བྱེད་ཚུལ་དེ་ཙམ་ཞིག་ཡིན་ཚེ་ཉོན་མོངས་རྣམས་ཀྱང་སྐྱེ་བ་ལ་གོ་འབྱེད་པས་དེའི་འང་རྟེན་དུ་ཐལ་བ་སོགས་འབྲེལ་མེད་ཀྱི་སྐྱོན་འཇུག་གོ །རྒྱུ་མཚན་འདི་ལ་བརྟེན་ནས་འཕགས་པ་གྲོལ་སྡེས་ཉི་སྣང་རང་རྒྱུད་པའི་གཞུང་དུ་བྱས་ནས་མཛད་ཀྱང་རྩོད་ལན་གྱི་ཐད་འདི་དག་ཐལ་འགྱུར་བ་དང་སྒོ་བསྟུན་པ་ཡིན། བཞི་བརྒྱ་པར། ཆོས་ཀྱི་དབྱིངས་ལ་དབྱེར་མེད་ཕྱིར། །ཁྱེད་ལ་ཐེག་པའི་དབྱེ་བ་མེད། །གསུངས་པའང་ཆོས་དབྱིངས་སུ་རོ་གཅིག་པའི་གཏན་ཚིགས་ཀྱིས་མཐར་ཐུག་ཐེག་པ་སོ་སོ་བ་མེད་པར་བསྒྲུབས་པ་ཡིན་ན་འཁོར་འདས་ཀྱང་སོ་སོ་བ་མེད་པར་འགྱུར་བས། དེའི་དོན་གང་ལ་དམིགས་ནས་གཙོ་བོར་བསྒོམས་པས་དེའི་ངོ་བོར་དྲི་མ་ཟད་པའི་ཆོས་དབྱིངས་འདྲ་བའི་དོན་དུ་བྱེད་དགོས་ཏེ། དེ་ལྟར་བྱས་ན་མངོན་

[Full Size]

རྟོགས་རྒྱན་གྱི་དེ་དང་ཚིག་དོན་གཉི་ག་ཤིན་ཏུ་འདྲའོ། །སེམས་ཙམ་མན་ཆད་རིགས་བདེན་གྲུབ་ཏུ་འདོད་པའི་རྒྱུ་མཚན་གྱིས་མཐར་ཐུག་ཐེག་པ་གསུམ་དུ་བཞག་པ་ཡིན་ནོ། །དབུ་མ་པས་སེམས་དྲི་མས་བསླད་པའང་བདེན་གྲུབ་མ་ཡིན་པར་ལྟོས་གྲུབ་བཅོས་སུ་ཡོད་པའི་གནད་ཀྱིས་སེམས་ཅན་ཐམས་ཅད་སངས་རྒྱ་ངེས་སུ་བཞེད་ཅིང་། རྣམ་འགྲེལ་རྗེས་འབྲང་གི་སེམས་ཙམ་རྣམས། རྟག་ཉིད་ཕྱིར་རམ་ཐབས་མེད་ཕྱིར། །ཞེས་སོགས་མཐར་ཐུག་ཐེག་པ་གཅིག་ཏུ་བསྒྲུབས་པའང་དབུ་མ་པའི་རིགས་པའི་འགྲོས་འདི་ལ་གཞོལ་བ་ཡིན་ཏེ། དགག་བྱའི་ཁྱད་ཙམ་མ་གཏོགས། སྣ་ཚོགས་སྣང་ཅན་དོན་རྣམས་ལ། །ཞེས་སོགས་གཅིག་དུ་བྲལ་གྱི་རིགས་པ་དང། རེས་འགའ་བ་ཉིད་ཡིན་པས་ན། །ཞེས་སོགས་ལྟོས་གྲུབ་ཀྱི་རིགས་པས་སྒྲུབ་ཚུལ་རྩ་འཇུག་སོགས་དང་འགྲོས་མཐུན་པ་ཤིན་ཏུ་མང་ངོ་། །རིགས་འདོད་ཚུལ་མི་མཐུན་པ་འདིའང་ལེགས་པར་གོ་ན་ཉམས་ལེན་དུ་འཆར་ཚུལ་ཞིག་ཡོད་དེ། ལས་དང་པོ་བ་ལ་སེམས་བདེན་སྟོང་རིགས་ཡིན་ཟེར་བ་ལས་འདོད་ཆུང་ཆོག་ཤེས་འཕགས་པའི་རིགས་སུ་བསྟན་ཏེ། རིགས་ཞེས་པ་རྩ་བའི་རྒྱུའམ་ས་བོན་དང་ཁམས་ཀྱི་དོན་ཡིན་པས་ཐར་པའི་གོ་འཕང་ཞིག་འདོད་ན་འདོད་ཆུང་ཆོག་ཤེས་ལ་གནས་དགོས་ཀྱི། གཞི་དེ་མེད་པར་ཐར་ལམ་སྒྲུབ་ཚུལ་གཏན་མེད་ཅེས་བཤད་ན་བློ་འཁུལ་ཚབས་ཆེ་བས་དོན་དུ་འགྱུར་རོ། །འདི་ལ་དགོངས་ནས་པད་དཀར་དུའང་ཆོས་གོས་

[Full Size]

ངན་ངོན་ཙམ་གྱིས་ཆོག་ཤེས་པ་སོགས་བཞི་ལ་འཕགས་པའི་རིགས་སུ་གསུངས་སོ། །གཞན་ལྟ་ཅི། ཕུང་པོ་ལྔར་ཕྱེ་བ་དང་། གཟུགས་ཤེས་ལྡན་མིན་འདུ་བྱེད་གསུམ་དུ་བྱས་པ་ཚུན་ཆད་ཀྱི་སྟེང་ནའང་གྲུབ་མཐའ་གོང་འོག་ཕྲ་རགས་ཀྱི་ཁྱད་པར་ཞིག་དོད་ཡོད་པ་ཤེས་ཏེ། བྱེ་མདོ་གཉིས་ཕྱི་དོན་བེམ་པོའི་འཇོག་ཚུལ་འདི་གཙོ་བོར་བྱེད་ཅིང་བློར་བདེ་བས་དོན་སྨྲ་བ་ཞེས་ཟེར་ཏེ། བདེན་པ་གཉིས་ཀྱི་འཇོག་ཚུལ་ཡང་བུམ་པ་ལྟ་བུ་བཅོམ་གཞིག་བྱར་ཡོད་པ་དང་རྡུལ་ཕྲན་ལྟ་བུ་དེ་ལྟར་བྱེད་ཚུལ་མེད་པ་ལ་བྱེ་སྨྲས་བཤད་དོ། །སེམས་ཙམ་པས་ཕྱི་དོན་བེམ་པོ་བཀག་ནས་ནང་ཤེས་པའི་འཇོག་ཚུལ་གཙོ་བོར་བྱེད། འདུ་བྱེད་ཅེས་པ་དཔེར་ན་རི་ར་བ་ཁང་ཁྱིམ་མི་དང་ཕྱུགས་སོགས་དུ་མ་ཞིག་ཚོགས་ཙམ་ལ་རྒྱ་གར་ཞེས་བཏགས་པ་ལྟ་བུ་རིགས་མཐུན་མི་མཐུན་མང་པོ་ཞིག་འདུས་པའི་སྟེང་ནས་འཇོག་དགོས་པས་འདུ་བྱེད་དང་བཏགས་ཡོད་དུ་བཤད་ལ་དེ་གྲུབ་མཐའ་འོག་མ་རྣམས་ཀྱིས་ཁས་མི་ལེན་པ་མིན་ཡང་དོན་དབུ་མ་པས་བདེན་སྟོང་འཇོག་ལུགས་དང་ཤིན་ཏུ་འགྲིགས་ལ། རེའི་ནང་ནས་ཀྱང་ཐལ་འགྱུར་བས་རྟོག་པས་བཏགས་ཙམ་དུ་བཞག་པ་དང་ལྷག་པར་འགྲིག་གོ །གཞིའི་འཇོག་ཚུལ་གང་གི་སྐབས་སུའང་བློའི་འཇུག་པ་རྩིང་ཞིབ་ཀྱིས་མི་མཐུན་པ་ཤིན་ཏུ་མང་སྟེ། བྱེ་སྨྲ་རྣམས་ནམ་མཁའ་འཇོག་ཚུལ་ཡང་ཐོགས་རེག་བཀག་ཙམ་ལ་འཇོག་མ་ཤེས་པར་སྣང་མུན་གྱི་རྫས་ཤིག་ལ་འདོད། བོད་ཀྱི་དབུ་མ་པ་ཆེན་པོར་རློམ་པ་མང་པོས་

[Full Size]

ཀྱང་སྟོང་ཉིད་ཀྱི་ངོ་བོ་དགག་བྱ་བདེན་གྲུབ་བཀག་ཙམ་ལ་འཇོག་མ་ཐུབ་པར་སྒྲུབ་པའི་ཆ་རེ་ནན་གྱིས་བཙལ་ནས་བཞག་པ་ནི་བདེན་པར་མེད་ཙམ་དེ་ཡེ་མེད་ལྟ་བུ་ཞིག་ཏུ་སོང་སྟེ་འཛིན་རྒྱུ་མ་བྱུང་བ་མེད་དགག་གི་སྤྱི་མ་ཤར་བའི་སྐྱོན་བྱེ་སྨྲ་ལ་འབྱུང་རྒྱུ་དེ་བྱུང་བ་ཡིན་ནོ། །མདོ་སྡེ་པ་རྣམས་མེད་དགག་དང་སེལ་བ་ཙམ་ཞིག་འཇོག་ཐུབ་ཀྱང་དེ་དང་འདུས་བྱས་རྣམས་ཡོད་པར་འཇོག་ཚུལ་བློ་ངོར་འཆར་དཀའ་སླ་དང་ཉེ་རིང་གི་ཁྱད་ཆེན་པོ་ཞིག་གྱུར་ཏེ། འདུས་བྱས་རྣམས་མངོན་སུམ་གྱི་དངོས་ཡུལ་དང་མངོན་གྱུར་དུ་འདོད་ལ། འདུས་མ་བྱས་རྣམས་རྟོག་པའི་སྣང་ཆ་ཙམ་དུ་འདོད། མི་རྟག་པའང་བྱེ་སྨྲས་འཇིག་རྟེན་གྱི་གྲགས་ཚོད་ལྟར་བུམ་པ་ཐོ་བས་བཅོམ་པའམ། མི་ཚེ་འཕོས་པ་ལྟ་བུ་ལ་འཇིག་པར་འཇོག་ཅིང་སྐད་ཅིག་གིས་འཇིག་པ་འཇོག་ཚུལ་མ་ཤེས་ལ། འདུས་བྱས་ཐམས་ཅད་མི་རྟག་པར་འཇོག་དགོས་པས་ལོངས་སྐུ་དང་འོག་མིན་གྱི་ཞིང་ལྟ་བུ་འཁོར་བ་མ་སྟོངས་བར་དུ་རྒྱུན་གནས་པ་ཁས་ལེན་མ་ཐུབ་པ་ཡིན། མདོ་སྡེ་པས་འཇིག་པ་ཕྱིས་འབྱུང་གི་རྒྱུ་ལ་མི་ལྟོས་པའི་གཏན་ཚིགས་ཀྱིས་འདུས་བྱས་ཐམས་ཅད་སྐད་ཅིག་གིས་འཇིག་པར་འདོད་ཀྱང། གྲུབ་མཐའ་གོང་མས་བྱ་རྫོགས་ཀྱི་སྐད་ཅིག་མ་གཅིག་ལ་ཆ་སུམ་བརྒྱ་དང་དྲུག་ཅུ་རེ་ལྔ་འབྱེད་པར་ཕར་ཕྱིན་ལམ་སྒྲིག་ལས་གསུངས་པ་ལྟ་བུའི་དུས་ཀྱི་ཐུང་མཐའ་ཞིག་འཇོག་མི་ཐུབ་པས་དེའི་ཆ་ནས་ཀྱང་ཕྲ་རགས་ཡོད་ལ། མདོ་ལས་མི་རྟག་པའི་དོན་མེད་པ་དང་མ་

[Full Size]

མཆིས་པའི་དོན་དུ་གསུངས་པའི་སྟེང་ནས་དབུ་སེམས་གཉིས་ལའང་གོ་ཚུལ་ཕྲ་རགས་ཡོད་དོ། ། ༈ ཡང་སྒྲོན་གསལ་ལས། འོད་གསལ་བའི་ཡེ་ཤེས་ལས་བྱུང་བས་ན་ཡེ་ཤེས་ཀྱིས་བཏགས་པའོ། །འདིའི་དོན་ཐེག་པ་ཆེན་པོའི་མདོ་སྡེ་ལས་ཀྱང་དགོངས་པས་བཤད་པས་སྟོན་ཏེ། སྐྲ་ཙམ་ཁྱོན་གཅིག་ལ་ཡང་སངས་རྒྱས་ནི། །རྣམ་མང་གངྒཱའི་ཀླུང་གི་བྱེ་སྙེད་བཞུགས། །ཞེས་བྱ་བ་དང་། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །ཅེས་བྱ་བ་གསུངས་པར་ལྷའི་དེ་ཁོ་ན་ཉིད་སྟོན་པ་ཡིན་ཏེ་ངེས་པའི་དོན་ཏོ། །ཞེས་ལེའུ་དྲུག་པར་གསུངས་ཀྱང་། དེའི་དོན་མཆན་གྱིས་འགྲེལ་པའི་ཚེ། ཟུང་འཇུག་གི་སྐུ་འདི་ལ་དགོངས་པའི་གཞིར་བྱས་ནས་བཤད་པས་ཏེ་སྒྲ་གཞན་གྱིས་སྟོན་གྱི། དངོས་སུ་མ་ཡིན་ནོ། །ཞེས་དང་། ཡེ་ཤེས་རྡོ་རྗེ་ཀུན་ལས་བཏུས་ཀྱི་ཊཱིཀྐར་ཡང་། སྐྲ་ཙམ་ཁྱོན་ལ་ཞེས་སོགས་ཀྱི་མདོ་སྡེས་ཟུང་འཇུག་གི་སྐུ་བསྟན་པར་གསུངས་པའང་སྐྲ་རྩེ་ཙམ་གྱི་ཁྱོན་ན་སངས་རྒྱས་གངྒཱའི་ཀླུང་གི་བྱེ་མའི་གྲངས་དང་མཉམ་པར་བཞུགས་པ་རྣམས་ཟུང་འཇུག་གི་སྐུ་བརྙེས་པ་ལ་དགོངས་པ་ཡིན་གྱི། མདོ་དེས་ཟུང་འཇུག་གི་ལྷའི་སྐུ་བསྟན་པར་བཞེད་པ་མིན་ཏེ། ཞེས་གསུངས་ལ། འདི་དང་དབུ་མ་འཇུག་པར། ཐུབ་དབང་དུས་གཅིག་ཁོ་ནར་དེའི་རྒྱུ་མཐུན། །ཞེས་སོགས་ཕྱོགས་གཅིག་ཏུ་བྱས་པའི་དཔྱད་གཞི་ཆེ་བ་ཞིག་ཡོད་དམ་སྙམ་སྟེ། དགོངས་པ་རབ་གསལ་དུ་འབྲས་བུའི་ས་འཆད་སྐབས་སྐུའི་རྣམ་

[Full Size]

གཞག་ལ་ཆོས་སྐུ་ལོངས་སྐུ་རྒྱུ་མཐུན་པའི་སྐུ་གསུམ་དུ་བྱས་ནས་གསུངས་ཀྱང་། སྤྲུལ་སྐུའི་རྣམ་གཞག་འོག་ཏུ། སླར་ཡང་མི་གཡོ་སྐུ་མངའ་ཞེས་སོགས་ཀྱིས་སྟོན་པར་གསུངས་པས། འདིར་རྒྱུ་མཐུན་པའི་སྐུ་ཞེས་པ་དེ་སྐུ་གང་ལ་བྱེད་དཔྱད་དགོས་སོ། །འདིར་རྒྱུ་མཐུན་པའི་དོན་དགོངས་པ་རབ་གསལ་ལས། ཆོས་ལོངས་ཀྱི་རྒྱུ་མཐུན་པ་སྟེ་གསུངས་ཤིང། རང་འགྲེལ་དུའང། ཆོས་ཀྱི་སྐུ་ལས་བྱུང་བའམ་གཟུགས་ཀྱི་སྐུའི་མཐུ་ལས་བྱུང་ཡང་རུང་སྟེ། ཇི་སྐད་བཤད་པའི་སྐུ་ལས་གཞན་དུ་གྱུར་པ་རྒྱུ་མཐུན་པའི་སྐུ་ཞེས་གསུངས་པས། གོང་དུ་བཤད་མ་ཐག་པའི་ཆོས་སྐུ་ནི་ཡེ་ཤེས་ཀྱི་ཚོགས་དང་། གཟུགས་སྐུ་བསོད་ནམས་ཀྱི་ཚོགས་ཀྱི་འབྲས་བུ་ཡིན་ལ། ཚོགས་དེ་གཉིས་ཀྱང་ཡ་བྲལ་དུ་མ་སོང་བར་ཟུང་དུ་འཇུག་དགོས་ལ། དེ་དང་མཐུན་པར་འབྲས་བུ་ཆོས་གཟུགས་གཉིས་ཀྱང་སོ་སོར་སོང་བ་ཙམ་གྱིས་མི་ཆོག་པར་ཟུང་དུ་འཇུག་དགོས་པས་དེ་ལ་རྒྱུ་མཐུན་པའི་སྐུ་ཞེས་བཤད་དེ། སྔགས་ཀྱི་ཐེག་པ་བཞིན་སྐུ་ཐུགས་ཟུང་འཇུག་གི་ཐ་སྙད་དངོས་སུ་མ་སྦྱར་ཡང་དོན་དེའི་སྟེང་དུ་འབབ་པར་སྣང་ངོ་། །གོང་དུ་ཆོས་སྐུ་ལས་བྱུང་བའམ་ཞེས་གདམ་ངའི་ཚིག་ལྟ་བུ་གསུངས་པའང་གང་རུང་གི་དོན་མིན་གྱི། རྒྱུ་དེ་གཉི་གས་ཁྱད་མེད་དུ་བསྒྲུབ་པའི་དོན་ཡིན་ཞིང་། དངོས་ཟིན་སྐུ་གཉིས་ལས་འབྱུང་བར་གསུངས་པའང་སྐུ་གཉི་ག་འགྲུབ་བྱེད་ལས་འབྱུང་བའི་དོན་ནམ། ཡང་ན་ཚོགས་པ་འཇོག་པ་ཡ་གྱལ་ལ་བརྟེན་ནས་འབྱུང་བའམ་འཇོག་པའི་དོན་དུ་གོ་

[Full Size]

དགོས་སོ། །འཇུག་པའི་གསུང་ཚུལ་འདི་དག་སྒྲོན་གསལ་དུ་བཟང་སྤྱོད་ཀྱི་ལུང་དྲངས་པ་དེ་དང་ཤིན་ཏུ་མཚུངས་ཏེ། སངས་རྒྱས་བྱང་སེམས་ཀྱི་མཛད་པ་སྐྱེས་རབས་མཐའ་དག་བ་སྤུའི་ཁུང་བུ་གཅིག་དང་རྡུལ་ཕྲ་རབ་གཅིག་གི་གོ་སར་སྐད་ཅིག་མ་གཅིག་གི་ཡུན་ཚད་ལ་སྟོན་ཚུལ་གསུངས་པ་རྣམས། སྐྲ་ཙམ་ཁྱོན་ལ་དུས་གསུམ་ཚད་སྙེད། ཅེས་དང་། རྡུལ་གཅིག་སྟེང་ན་རྡུལ་སྙེད་ཞིང་རྣམས་ཞེས་སོགས་ཚིག་རིས་བཞིན་བཀོད་པར་སྣང་ངོ་། །དེ་ལྟར་འོངས་པའི་རྒྱུ་མཚན་ཡང་། དག་པ་འདི་ནི་བཞེད་པ་འཇུག་པ་ཡི། །རྡུལ་གཅིག་ཡུལ་ལ་མཐའ་གཏུགས་འཇིག་རྟེན་དང། །འཇིག་རྟེན་མཐའ་ཡས་ཕྱོགས་ཁྱབ་རྡུལ་སྟོན་མོད། །རྡུལ་རགས་མི་འགྱུར་འཇིག་རྟེན་ཕྲ་མི་འགྱུར། །གསུངས་ལ་ངེས་དོན་དགོངས་པ་རབ་གསལ་དུ། མཛད་པ་འདི་ནི་བཞེད་པ་ཙམ་གྱིས་འཇུག་པ་ཞེས་ཐུགས་ལ་དགོངས་པ་ཙམ་གྱིས་ཆོག་པར་གསུངས་པའི་རྒྱུ་མཚན། སློབ་པའི་དུས་ལྷན་སྐྱེས་ཀྱི་བདེ་བས་རླུང་སེམས་འདོད་དགུར་སྒྱུར་ཚུལ་ལ་གོམས་པ་མཐར་ཕྱིན་པའི་དབང་གིས་ཡིན་པས། ཡང་དག་མཐའ་དཔྱིས་ཕྱིན་པ་སྔགས་ལ་རག་ལས་པར་གསུངས་པ་ལས་ཀྱང། སེམས་ཅན་མཐའ་དག་གི་རེ་བ་ཅིག་ཅར་དུ་རྫོགས་པར་བྱེད་ནུས་པའི་ཐབས་རྣམ་པ་ཐམས་ཅད་པ་འདི་ངོ་བོ་ཙམ་མདོ་ལས་བཤད་ཀྱང་། འགྲུབ་ཚུལ་གྱི་གནད་དཔྱིས་ཕྱིན་པར་གོ་བ་སྔགས་ལ་རག་ལས་སོ། །རྨ་བྱའི་མདོངས་ནི་གཅིག་པུ་ཡི། །རྒྱུ་ཡི་དབྱེ་བ་སྣ་ཚོགས་པ། །ཀུན་མཁྱེན་མིན་པའི་ཤེས་བྱ་

[Full Size]

མིན། །དེ་ཤེས་པས་ནི་ཀུན་མཁྱེན་སྟོབས། །ཞེས་གསུངས་པའི་ཀུན་མཁྱེན་དེས་ཀྱང་དངོས་པོ་ལ་ཟུང་འཇུག་གི་སྐུ་བརྙེས་ཡོད་པ་ཁྱད་མེད་ཀྱང་འདིར་དེ་འདྲ་ཁུངས་སུ་མ་དྲངས་པར་སྔ་མ་དྲངས་པ་ནི། ཕར་ཕྱིན་ཐེག་པར་ཡང་ཆོས་སྐུ་དང་རྣམ་པ་མཐུན་པའི་ལམ་བསྒོམ་པ་ཡོད་པས་བརྟག་པ་མཐའ་བཟུང་གིས་དེ་རྐྱང་པ་བསྒོམས་ཏེ་གོམས་པ་མཐར་ཕྱིན་ན་ཆོས་ཐམས་ཅད་མཁྱེན་པ་ལ་གེགས་བྱེད་ཀྱི་སྒྲིབ་པ་ཟད་པ་འབྱུང་ཞིང་སྒྲིབ་བྱེད་མེད་ན་རྣམ་པ་ཐམས་ཅད་མཁྱེན་པ་དང་མཁྱེན་པས་ཤེས་བྱ་ཐམས་ཅད་ལ་ཁྱབ་པ་འབྱུང་མོད་ཀྱང། གཟུགས་སྐུས་ཐམས་ཅད་ལ་ཁྱབ་པ་དང་གང་འདོད་ཀྱི་བཀོད་པ་སྟོན་པ་ལ་གཟུགས་སྐུ་དང་རྣམ་པ་མཐུན་པའི་ལྷའི་རྣལ་འབྱོར་དང་། ཁྱད་པར་དུ་ཤིན་ཏུ་ཕྲ་བའི་རླུང་གི་ཉེར་ལེན་ལས་སྒྱུ་མའི་སྐུ་བསྒྲུབ་པ་འདི་མེད་པར་བརྟག་པ་མཐའ་བཟུང་གིས་ཀྱང་འབྱུང་ལུགས་མེད་པ་མདོ་ཕྱོགས་རང་གི་རིགས་པའི་འགྲོས་ཀྱིས་ཀྱང་འགྲུབ་པས། རྗེའི་མཆན་བུར་ཟུང་འཇུག་གི་སྐུ་ཐོབ་པ་ལ་དགོངས་གསུངས་པ་དེའང་དངོས་པོ་ལ་ཐོབ་ཡོད་པ་ཙམ་གྱི་དོན་མ་ཡིན་པར། ཞིབ་ཏུ་དཔྱད་ན་འབྲས་བུ་འདི་འདྲ་ཞིག་འབྱུང་བ་ལ་དེའི་རྒྱུ་མཐུན་འདི་འདྲ་ཞིག་སྔོན་དུ་འགྲོ་བ་མེད་མི་རུང་ཡིན་པར་འདུག་སྙམ་པའི་གོ་བ་སྐྱེད་ལུགས་ཁྱད་པར་བ་ཞིག་ཡོད་པར་མངོན་ནོ། །རང་རེས་དགེ་བ་གང་བྱེད་བློའི་མཐུ་ཆུང་ལ་མི་མཐུན་ཕྱོགས་སྟོབས་ཆེ་བས་སྒྱིད་ལུག་པར་ཡང་སངས་རྒྱས་ཀྱི་མཐུ་བསམ་གྱིས་མི་ཁྱབ་པས་མི་འགྲུབ་པ་ཅིའང་མི་སྲིད་

[Full Size]

ཚུལ་འདི་དང་། ཅི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །ཞེས་ཞལ་གྱིས་བཞེས་པ་སོགས་བསམ་ན་དེ་ལ་རྒྱབ་རྟེན་བྱར་ཡོད་པས་ཡིད་ཞུམ་མི་དགོས་པར་སྙིང་སྟོབས་དང་སྤྲོ་བ་འཕེལ་བར་འགྱུར་རོ། །དྲིས་ལན་འདི་རྣམས་བཀའ་དྲིན་མཚུངས་མེད་རྗེ་བཙུན་བླ་མ་འཇམ་པའི་དབྱངས་ཉིད་ཀྱི་ཞལ་སྔ་ནས་ལ་ཕྲན་སྔགས་རམས་པ་རཏྣ་ཨཱ་ནནྟ་བདག་གིས་གྲུབ་མཐའ་བཞིའི་འདོད་ཚུལ། སེམས་སེམས་བྱུང་གི་རྣམ་གཞག་མདོ་སྔགས་ལ་གཞོལ་ཚུལ་སོགས་ཀྱི་རྣམ་གཞག་བདག་ལྟ་བུའི་བློ་དམན་པ་དག་གི་བློ་ངོར་འདུམ་བདེ་ཞིང་འཆར་སླ་བའི་ལེགས་བཤད་ཅིག་ཅིས་ཀྱང་ཐུགས་རྗེས་གཟིགས་ཞེས་ཡང་ཡང་གསོལ་བ་བཏབ་པ་ལྟར་དགྱེས་བཞིན་དུ་ཐུགས་བརྩེ་བ་ཆེན་པོས་བཀའ་སྩལ་པ་རྣམས་གསུང་རིམ་བཞིན་ཐད་ཀ་ཐད་ཀར་ཟིན་རིས་སུ་བཏབ་པ། སླར་ཡང་གོང་འོག་བསྡེབས་ཏེ་ཡི་གེར་བཀོད་པ་འདིའང་ཚེ་རབས་ཀྱི་འཕྲེང་བར་རྗེ་བཙུན་བླ་མ་འཇམ་པའི་དབྱངས་ཀྱིས་འབྲལ་མེད་དགྱེས་བཞིན་རྗེས་སུ་འཛིན་པའི་རྒྱུར་གྱུར་ཅིག། །།༈ དེའང་ཐུན་རེ་བཞིན་ཀུན་སློང་གི་སྟེང་ནས་བསྟན་པ་ཡོངས་རྫོགས་ཀྱི་གནད་ཚང་བར་བྱེད་ཚུལ་དགོས་ཟེར་བ་ལ་གྲྭ་པ་ཐམས་ཅད་མ་ལུས་པར་འཚོགས་པ་ལ་གྲྭ་ཚང་ཡོངས་རྫོགས་ཟེར་བ་བཞིན་སོ་སོ་བར་སོང་ན་རྫོགས་མཐའ་མེད་པས་ཉམས་ལེན་སྣ་གཅིག་ལའང་ཐམས་ཅད་རྫོགས་པ་དགོས། འོ་ན་དམིགས་སྐོར་ཕྱི་མ་རྣམས་མི་དགོས་སམ་སྙམ་ན་མ་ཡིན་ཏེ། ཨ་གར་སོ་ལྔ་ཐུན་གཅིག་ལ་སྦྱོར་བ་སྣ་ཚང་

[Full Size]

ཡང་རླུང་ནད་ཚབས་ཅན་དེ་ཐུན་གཅིག་གིས་མི་སེལ་བར་མང་པོ་བསྟུད་ནས་འཐུང་དགོས་པ་དང་འདྲ། རེ་རེ་ལའང་ཐམས་ཅད་ཚང་དགོས་པའི་རྒྱུ་མཚན་ནི། བསྟན་པ་ཡོངས་སུ་རྫོགས་མ་རྫོགས་ཞེས་པ་གདུལ་བྱའི་སྐྱོན་མཐའ་དག་སྤོང་བའི་ཐབས་དང། ཡོན་ཏན་མཐའ་དག་སྒྲུབ་པའི་ཐབས་ཚང་མ་ཚང་ཡིན་ལ། སྐྱོན་ཀུན་ཟད་ཡོན་ཏན་ཀུན་རྫོགས་ནི་སངས་རྒྱས་ཁོ་ན་ཡིན་པས། སངས་རྒྱས་སྒྲུབ་པའི་ཐབས་རྣལ་མར་འགྲོ་བ་ལ་བསྟན་པ་ཡོངས་སུ་རྫོགས་དགོས་པ་ཡིན། བསམ་སྦྱོར་དེ་འདྲ་ཞིག་བྱུང་ན་དེ་ལ་རྣམ་ཀུན་རྫོགས་པའི་སྦྱོར་བ་ཟེར། འོ་ན་སངས་རྒྱས་ཐོབ་པར་བྱའོ་སྙམ་པ་རང་གིས་ཆོག་གམ་སྙམ་ན། དེ་བསམ་ཚུལ་ལ་ཐུག་ཡོད། རྒྱུའི་བསམ་མནོ་ཅི་ཡང་མེད་པར་འབྲས་བུ་སངས་རྒྱས་ཐོབ་ན་སྙམ་པས་མི་ཆོག །དབུས་སུ་འགྲོ་བར་ཐག་ཆོད་པ་ལ་ལམ་དང་ཆ་རྐྱེན་ལམ་གྲོགས་ཐམས་ཅད་ཀྱི་འདང་ཞིག་ཡོད་དགོས། སྐས་གདང་མང་པོ་འཛེག་པའི་དུས་མཐོ་དམན་གྱི་ཁྱད་ཡོད་ཀྱང་གོམ་པ་འདེགས་པའི་བྱ་བ་དང་། ཁང་ཐོག་ཏུ་འགྲོ་འདོད་ཀྱི་འཕེན་པ་ལ་ཁྱད་ཅི་ཡང་མེད་པ་བཞིན། དངོས་གཞིའི་དམིགས་སྐོར་ལ་གོ་རིམ་ཡོད་ཀྱང་ཀུན་སློང་གི་བསམ་སྦྱོར་སྣ་གཅིག་པོ་དེས་འཁྱོང་དགོས། ལྷའི་གོས་དེ་བསྒྲིལ་ན་སེན་མོའི་བར་དུ་ཚུད། ཁ་ཕྱེ་ན་ལུས་ཀུན་ཁེབས་པ་ཞིག་ཡོད་ཟེར་བ་བཞིན། སངས་རྒྱས་ཐོབ་པར་བྱ་སྙམ་པའི་ཀུན་སློང་དེའང་རྒྱས་བསྡུས་བྱེད་ཚུལ་ཤེས་དགོས་ཏེ། སངས་

[Full Size]

རྒྱས་ཐོབ་པར་བྱ་ཞེས་པ་ཡོན་ཏན་ཀུན་རྫོགས་པར་བྱ་ཞེས་པ་ཡིན་ལ། དེ་རྫོགས་པ་ལ་སྲང་མདའི་མཐོ་དམན་བཞིན་སྐྱོན་ཀུན་སྤོང་དགོས། སྐྱོན་ལ་སྒོ་གསུམ་དུ་ཡོད་ཅིང་། དེར་ཡང་ཕྲ་རགས་གཉིས་རེ་ཡོད་པས། རགས་པ་མདོས་སྦྱོང་ཞིང་། ཕྲ་བ་སྔགས་ཀྱིས་སྦྱོང་དགོས་ལ། རགས་པ་མ་སྦྱངས་པར་ཕྲ་བ་སྦྱོང་ཚུལ་མེད་པས་སྔོན་ལ་མདོ་དང་། ཕྲ་བ་སྔགས་ལ་མ་བརྟེན་པར་སྦྱང་མི་ནུས་པས་སྔགས་ཏེ་གཉི་ག་ཚང་དགོས་པ་དེ་ཡིན། རགས་པའང་ལུས་ངག་གི་ཉེས་སྤྱོད་གཙོ་བོར་སྦྱོང་ཞིང་སྡོམ་བྱེད་སོ་ཐར་ཡིན་ལ། དེའི་རྩ་བ་ཆུང་འབྲིང་གི་ལམ་གྱིས་འཁོར་བ་སྤྱི་བྱེ་བྲག་གི་སྡུག་བསྔལ་བསམས་ནས་ངེས་འབྱུང་རྣམ་དག་སྐྱེ་བ་ལ་ཐུག་ཡོད། ཡིད་ཀྱི་ཉེས་པའི་རྩ་བ་ངར་འཛིན་ཡིན། དེས་རྩ་བ་བྱས་ཏེ་རང་གཞན་སོ་སོར་བཅད་ནས་ཆགས་སྡང་གིས་བླང་དོར་གོ་ལོག་པས་ཕུང་ཁྲོལ་ཐམས་ཅད་བྱས་པ་ཡིན་པས་ངར་འཛིན་དེ་དོན་དམ་བྱང་ཆུབ་ཀྱི་སེམས་ཀྱིས་སྦྱོང་། བློ་ངན་ཕྱི་མ་ཐམས་ཅད་བྱམས་སྙིང་རྗེའི་རྩ་བ་ཅན་ཀུན་རྫོབ་བྱང་ཆུབ་ཀྱི་སེམས་ཀྱིས་སྦྱོང་བས་སྐྱེས་བུ་ཆེན་པོའི་ལམ་ཐུན་མོང་བ་དེར་ཚང། སྐྱོན་ཕྲ་མོ་སྤོང་བར་སྔགས་ཀྱིས་སྣོན་པ་འདེབས་དགོས་ལ། དེའང་མཚན་བཅས་ཀྱིས་ལུས་ངག་དང་། མཚན་མེད་ཀྱིས་ཡིད་ཀྱི་ཉེས་པ་སྦྱོང་ཚུལ་ཡང་ཤེས་དགོས་ལ། མཐར་གཏུགས་ན་ལུས་ཀྱི་ཉེས་པ་སྦྱོང་བྱེད་བསྐྱེད་རིམ་ཕྲ་རགས། ངག་གི་ཉེས་པ་སྦྱོང་བྱེད་ཀུན་རྫོབ་སྒྱུ་མའི་རྫོགས་རིམ། ཡིད་ཀྱི་ཉེས་པ་སྦྱོང་

[Full Size]

བྱེད་དོན་དམ་འོད་གསལ་གྱི་རྫོགས་རིམ་ཡིན། ཟུང་འཇུག་ནི་དེ་གཉིས་ཚོགས་པ་ལ་འཇོག་པས་ལོག་ན་མེད། དེ་ལྟར་སྒོ་གསུམ་གྱི་སྐྱོན་ཕྲ་རགས་ཟད་པར་སྤངས་ཏེ་སྐུ་གསུང་ཐུགས་རྡོ་རྗེ་གསུམ་གྱི་བདག་ཉིད་དུ་གྱུར་པ་ནི་སྐུ་གསུམ་དབྱེར་མི་ཕྱེད་པ་སངས་རྒྱས་ཀྱི་གོ་འཕང་ཡིན། འབྲས་བུ་དེ་འདྲ་བ་ཞིག་ཐོབ་པའི་ཕྱིར་དེ་དང་རྗེས་སུ་མཐུན་པའི་རྒྱུ་ཚོགས་ཀྱང་མ་ཚང་བ་མེད་པ་ཞིག་བྱའོ་སྙམ་དུ་མིག་རྒྱང་བསྲིངས། ཡིད་རྒྱ་བསྐྱེད་དེ། ཤིན་ཏུ་གོམས་པའི་ལམ་སྲང་ལ་བསམ་མནོ་བཏང་བ་བཞིན་དམིགས་འོག་ཏུ་རུག་གེ་ཚུད་པ་ཞིག་བྱུང་ན་ཀུན་སློང་རང་ལ་ལམ་རིམ་ཚང་བ་དང། བསྟན་པའི་གནད་རྫོགས་པ་བྱ་བ་དེ་བྱུང་བ་ཡིན་ནོ། །༈ ཡིག་ཆུང་སྐོར་ལ། བརྐྱང་ཕྱག་ནི་མདོ་སྡེ་རྣམས་སུ་སྡོང་པོ་རྩ་བ་ནས་བཅད་པ་བཞིན་ལུས་ཐམས་ཅད་ས་ལ་ཕབ་པའི་ཕྱག་བྱ་བར་གསུངས་པ་དེ་ཉིད་ཡིན་པས། ཅི་ནུས་སུ་ས་ལ་ལུས་བསྙལ་དུ་རུང་སྟེ། ཡོངས་འཛིན་རིན་པ་ཆེ་སོགས་ཀྱང་དེ་ལྟར་མཛད་ཀྱི་འདུག་ལ། སྔོན་བླ་མ་བྱམས་པ་རིན་པོ་ཆེས་ཀྱང་ཕྱག་གི་ཕན་ཡོན་ལུས་ཀྱིས་གང་ནོན་པའི་རྡུལ་གྲངས་དང་མཉམ་པ་འབྱུང་ཚུལ་འདི་ཚོ་ལ་བལྟས་ན་རྐང་ལག་ད་ལྟའི་འདི་ལས་རིང་ཙམ་ཡོད་ན་སྙམ་པ་འཆར་གསུང་གིན་ཡོད་འདུག་པས། ལག་པ་ཤིན་ཏུ་བརྐྱངས་ཏེ་ཐལ་མོ་སྦྱར་ན་རུང། འདི་ལ་ས་སྐྱའི་བཀའ་འབུམ་དུ་ཡན་ལག་བདུན་གྱི་ཕྱག་ཏུའང་གསུངས་སོ། །༈ སྤྱིར་སྟོང་མཆོད་དང་

[Full Size]

བརྒྱད་བརྒྱ་པའི་མཆོད་པ་སོགས་རྣམ་རྒྱལ་མའི་གཟུངས་མདོ་ན་གསལ་བས་གྲགས་ཆེ་ལ་ཕྱིས་སུ་ཐུའུ་བཀྭན་རིན་པོ་ཆེས་སྨན་བླར་སྦྱར་ཏེ་གསུངས་འདུག་པས། བདག་གིས་ཀྱང་ཐུགས་རྗེ་ཆེན་པོར་སྦྱོར་ཚུལ་དེ་ཉིད་བྲིས་པ་ཡིན། ལྷ་གཞན་ལའང་དེའི་རིགས་པ་སྦྱར་ན་ཚོགས་རྒྱ་ཆེན་གསོག་པའི་རྐྱེན་དུ་འགྲོ་བ་ལས་དགག་བྱ་ཡོད་དོན་མི་འདུག །འོན་ཀྱང་སྒྲོལ་མ་ལ་མཎྜལ་བཞི་པ་ལྟ་བུ་རང་རང་གི་ལུགས་ཀྱི་མཆོད་ཚུལ་མི་འདྲ་བ་ཡོད་པ་དེར་དེ་ཉིད་གཙོ་བོར་བྱས་ན་ཕྱག་བཞེས་ཀྱི་རྒྱུན་མི་ཉམས་ཤིང་དང་བ་འདྲེན་པའི་ཁྱད་ཡོད། ༈ སྨན་བླའི་མདོ་ཆོག་སྐབས་བུམ་ཆོག་མེད་པར་འོད་ཟེར་སྤྲོ་བསྡུས་རང་གཞན་གྱི་ཉེས་པ་ཐམས་ཅད་སྦྱངས་པའི་དམིགས་པ་བྱེད་པ་མདོ་ལུགས་ཤེར་ཕྱིན་གྱི་གླེང་གཞིའི་སྐབས་ལྟ་བུ་ཡིན་པས་འགལ་བ་མེད། ༈ ཉི་མ་སྦས་པའི་ལུགས་ཀྱི་སྒྲོལ་མའི་དབང་ངམ་རྗེས་གནང་ཐོབ་ཡོད་ན་ལུགས་གཉི་གའི་སེང་ལྡེང་ནགས་སྒྲོལ་གྱི་སྐུ་མདོག་ཕྱག་མཚན་སོགས་འདྲ་བས་དེ་གཞིར་བཞག་ལ་བསྙེན་པ་བླ་མེད་ལྟར་བྱས་ན་ལེགས། ༈ ཐ་མ་ཁའི་ཉེས་པ་སྦྱོང་ཐབས་རྟེན་ལ་བདུག་སྤོས་གང་ལེགས་འབུལ་བ། ཁྲུས་གསོལ་བྱེད་པ། ཡིག་བརྒྱ་དང་ཚུལ་ཁྲིམས་རྣམ་དག་གི་གཟུངས་བཟླ་བ་སོགས་བསམ་པ་དག་པས་བྱས་ན། གང་ཞིག་སྔོན་ཆད་བག་མེད་གྱུར་པ་ཡང། །ཕྱི་ནས་བག་དང་ལྡན་པ་ཉིད་གྱུར་ན། །ཟླ་བ་སྤྲིན་བྲལ་ལྟ་བུར་རྣམ་མཛེས། གསུངས་པ་དེ་ཡིན་པས་ཤིན་ཏུ་ལེགས་སོ། ། ༈ སྲིད་པའི་རྩ་བ་མ་རིག་ཞིང་

[Full Size]

པ་ཡིས། །ལས་ཀྱི་ས་བོན་རྣམ་ཤེས་ཞིང་དུ་བཏབ། །སྲེད་དང་ལེན་པའི་ཆུ་ལུད་ཀྱིས་གསོས་པས། །ས་བོན་སྟོབས་རྒྱས་སྲིད་པའི་ངོ་བོར་འཕོས། །དེ་ལས་སྐྱེ་བའི་རང་བཞིན་མིང་གཟུགས་ཀྱི། །མྱུ་གུ་འབུས་ཤིང་སྐྱེ་མཆེད་སྡོང་བུར་འདྲིལ། །རེག་པའི་མེ་ཏོག་ཚོར་བའི་འབྲས་སྨིན་ཡང། །རྒ་ཤིས་བརྔས་ཏེ་སླར་ཡང་སྲིད་པར་འདེབས། །ཇི་སྲིད་བདག་མེད་མེ་ཡིས་མ་བཅོམ་པ། །དེ་སྲིད་སྐྱེ་ཤིའི་འཁོར་ལོ་བསྐོར་དགོས་པས། །གནས་ལུགས་ཟབ་མོར་བག་ཆགས་ཅི་ཐེབས་ཀྱིས། །སྲིད་པའི་རྩ་བ་དྲུངས་ནས་འབྱིན་པར་ཤོག །འདིའང་མཚམས་ཀྱི་ཐུན་གསེང་ཞིག་ཏུ་རྟེན་འབྲེལ་ཡན་ལག་བཅུ་གཉིས་ཀྱི་རིམ་པས་འཁོར་བར་འཁོར་ཚུལ་ལས་འཕྲོས་ཏེ་ཐོལ་བྱུང་དུ་གསུངས་པ་ཕྲན་རཏྣ་ཨཱ་ནནྟ་བདག་གིས་འཕྲལ་དུ་ཡི་གེར་བཀོད་པའོ།། །། ༈ ན་མོ་གུ་རུ་རཏྣ་ཏྲ་ཡཱ་ཡ། ནངས་པར་མལ་ལས་ལྡང་བ་ན་མདང་མ་ཤི་བར་ལང་རྒྱུ་བྱུང་བ་བླ་མ་དཀོན་མཆོག་གི་ཐུགས་རྗེ་ཡིན། སྤྱིར་ཚེ་ལྷག་གང་ཡོད་དང་ཁྱད་པར་དེ་རིང་གི་ཉི་མ་འདིར་སྡིག་པས་མ་གོས་ཤིང་དགེ་བ་འབད་ནས་ཆུད་ཟོས་སུ་མ་སོང་བ་བྱེད་སྙམ་པའི་འཕེན་པ་དང་། དེ་ལྟར་འོངས་པ་དཀོན་མཆོག་མཁྱེན་སྙམ་དུ་གསོལ་བ་འདེབས། སྐྱབས་འགྲོ་བྱེད་པ་ལ་མདུན་གྱི་ནམ་མཁར་མཆོད་སྤྲིན་འཁྲིགས་པའི་དབུས་སུ་བསྟན་པའི་བདག་པོ་ཐུབ་པའི་དབང་པོ་དང་ངོ་བོ་དབྱེར་མ་མཆིས་པའི་འཇམ་མགོན་བླ་མ་ཙོང་ཁ་པ་ཆེན་པོ་ཕྱག་གཉིས་ཆོས་འཁོར་གྱི་ཕྱག་རྒྱས་པད་སྡོང་གི་སྟེང་དུ་གླེགས་རལ་

[Full Size]

བསྣམས་པ། ཆོས་གོས་རྣམ་གསུམ་དང་པཎ་ཞྭ་གསོལ་བའི་ཐུགས་ཀར་རྗེ་བཙུན་བྱམས་མགོན་གསེར་གྱི་མདོག་ཅན་ཆོས་འཁོར་གྱི་ཕྱག་རྒྱ་མཛད་པ། དབུའི་སྟེང་དུ་བླ་མ་ཐུབ་དབང་གི་ངོ་བོ་བྱང་ཆུབ་མཆོད་རྟེན་ཡོད་པ། རྗེ་བླ་མའི་མགྲིན་པར་སྤྱན་རས་གཟིགས་དང་ལྟེ་བར་རྗེ་བཙུན་སྒྲོལ་མ་མཐའ་སྐོར་དུ་དངོས་བརྒྱུད་ཀྱི་བླ་མ་ཡི་དམ་མཁའ་འགྲོ་ཆོས་སྲུང་དང་བཅས་པས་བསྐོར་ནས་བཞུགས་པ། ཐམས་ཅད་རང་ལ་དགྱེས་པའི་ཚུལ་གྱིས་གཟིགས་པར་བསམས། རང་གི་མཐའ་སྐོར་དུ་ཕ་མ་རིགས་དྲུག་གི་སེམས་ཅན་ཐམས་ཅད་གསལ་བཏབ་སྟེ་འཁོར་བ་སྤྱི་བྱེ་བྲག་གི་སྡུག་བསྔལ་ལ་འཇིགས་ཤིང་སྐྲག་པ་དང་། མདུན་གྱི་སྐྱབས་ཡུལ་རྣམས་ལ་དེ་ལས་སྐྱོབ་པའི་ནུས་པ་ཡོད་པར་ཡིད་ཆེས་ཤིང་། ད་རེས་སྐྱབས་ཁྱད་པར་ཅན་རྣམས་ཀྱི་ཞབས་ནས་ལན་གཅིག་ཟིན་པའི་དུས་འདིར་གཏན་གྱི་བདེ་བའི་བློ་གདེང་ཡོད་པ་ཞིག་བྱེད་དགོས་པར་འདུག་སྙམ་སྟེ་སྐྱབས་འགྲོ་བྱ། ལུས་ལོངས་སྤྱོད་དུས་གསུམ་གྱི་དགེ་ཚོགས་དང་བཅས་པ་ཐམས་ཅད་རི་རབ་གླིང་བཞི་མཁོ་དགུའི་དཔལ་འབྱོར་དང་བཅས་པའི་རྣམ་པར་སྤྲུལ་ཏེ་ཕུལ་བས་ཞིང་བདག་གིར་བཞེས་ནས་དེའི་སེམས་ཅན་ཐམས་ཅད་སྨིན་གྲོལ་ལ་བཀོད་པར་བསམས། ཕྱག་བསྐོར་སོགས་ཀྱི་ཚེའང་སྐྱབས་ཡུལ་ནམ་མཁའ་གང་བ་ལ་རང་དང་སེམས་ཅན་ཐམས་ཅད་ཀྱིས་ལྷན་དུ་བྱས་པར་བསམས་ན་དེའི་ཚོད་ཀྱི་འགྱུར་ཆེའོ། །མཇུག་ཏུ་སྐྱབས་ཡུལ་རྣམས་དབུས་ཀྱི་རྗེ་བླ་མ་ལ་བསྡུས་ཏེ་དེ་རྒྱལ་བ་ཀུན་གྱི་མཁྱེན་བརྩེ་ནུས་པའི་ངོ་བོ་རིགས་

[Full Size]

གསུམ་གཅིག་ཏུ་བསྡུས་པར་བལྟས་ལ་བདུད་རྩི་འབེབ་སྦྱང་གི་དམིགས་པ་དང་བཅས་དམིགས་བརྩེ་མ་འདོན། བྱམས་པས་དམ་བཅའི་གཟུངས་བཟླ་བའི་ཚེ་དེའི་ཐུགས་ཀའི་བྱམས་མགོན་གྱི་ཐུགས་ཀར་མཻཾ་ཡིག་ལ་གཟུངས་ཀྱིས་བསྐོར་བ་ལས་འོད་ཟེར་འཕྲོས། རང་གཞན་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ས་ལམ་གྱི་རྟོགས་པ་ཁྱད་པར་ཅན་སྐྱེ་བར་བྱིན་གྱིས་བརླབས་པར་བསམས་ལ་གཟུངས་བཟླ། མཇུག་ཏུ་འདི་ནས་འཕོ་བའི་ཚེ་བྱམས་མགོན་གྱི་དྲུང་དུ་སྐྱེ་བ་དང་། མ་འོངས་པ་ན་ཚེ་ལོ་བརྒྱད་ཁྲིའི་དུས་བྱམས་མགོན་འཇིག་རྟེན་དུ་བྱོན་པའི་ཚེ་སྲས་ཀྱི་ཐུ་བོར་འགྱུར་བའི་སྨོན་ལམ་དང་དེ་ལྟར་ཞལ་གྱིས་བཞེས་པའི་དམིགས་པ་བྱ། མ་ཎི་བཟླ་བའི་ཚེ་མགྲིན་པའི་སྤྱན་རས་གཟིགས་ཀྱི་ཐུགས་ཀར་ཧྲཱིཿ ཡིག་ལ་སྔགས་འཕྲེང་གིས་བསྐོར་བ་ལས་འོད་ཟེར་འཕྲོས་རིགས་དྲུག་སོ་སོའི་གནས་སུ་སོང་སྟེ་རང་རང་གི་སྡུག་བསྔལ་ལས་ཐར་པར་བྱས། འཕགས་པའི་གོ་འཕང་ལ་བཀོད་དེ་ཐམས་ཅད་ཀྱིས་མགྲིན་གཅིག་ཏུ་གཟུངས་འུར་འུར་སྒྲོགས་པར་བསམས་ལ་བཟླ། སྒྲོལ་མ་འདོན་ཚེ་ལྟེ་བར་བཞུགས་པའི་རྗེ་བཙུན་སྒྲོལ་མའི་ཐུགས་ཀར་ཏཾ་ཡིག་ལས་སྒྲོལ་མ་ཉེར་གཅིག་གི་ལྷ་ཚོགས་མར་མེའི་འཕྲེང་བ་ལྟར་བྱུང་ཞིང། གཞན་ཡང་སྤྲུལ་པའི་བཀོད་པ་དཔག་ཏུ་མེད་པ་མཁའ་ཁྱབ་ཏུ་སྤྲོས་ཏེ་རང་གཞན་སེམས་ཅན་ཐམས་ཅད་འཇིགས་པ་ཆེན་པོ་བརྒྱད་སོགས་ལས་བསྐྱབ། མཆོག་

[Full Size]

དང་ཐུན་མོང་གི་དངོས་གྲུབ་སྩལ་བར་བསམས་ལ་འདོན། ཁྱད་པར་དུ་ཤོ་ལོ་ཀ་རེ་རེའི་སྐབས་སྒྲོལ་མ་དེ་དང་དེས་ཐུན་མོང་མ་ཡིན་པར་བྱིན་གྱིས་བརླབས་པའི་དམིགས་པ་བྱ། རྒྱུན་དུའང་སྐྱབས་ཡུལ་དེ་རྣམས་ཡིད་ངོར་མ་བརྗེད་པར་བྱས་ལ་ཅི་ཟ་ཅི་འཐུང་གི་ཕུད་འབུལ་བ་སོགས་ཚོགས་གསོག་པའི་ཞིང་དང་སྒོ་གསུམ་བླང་དོར་གྱི་དཔང་པོར་བྱེད། ཚེ་གཟུངས་བཟླ་ན་སྤྱན་རས་གཟིགས་ཀྱི་རིགས་བདག་འོད་དཔག་མེད་དེ་ཚེ་དཔག་མེད་དུ་བསྒྱུར་བའི་ཐུགས་ཀའི་སྔགས་འཕྲེང་ལས་འཆི་མེད་ཚེའི་བདུད་རྩིའི་རྒྱུན་བབས་པར་བསམས་ནས་བཟླ། དགའ་ལྡན་ལྟ་བུར་ཡིད་སྨོན་བྱེད་ན་གང་དུ་སྡོད་པའི་གནས་དེ་དགའ་ལྡན་གྱི་ཞིང་ཡིན་སྙམ་པ་དང་། གང་དུ་འགྲོའང་དགའ་ལྡན་དུ་འགྲོ་སྙམ་པ་དང་། དགེ་བ་གང་བྱས་དེའི་རྒྱུར་བསྔོ་ལ་ཉལ་བའི་ཚེ་རྗེ་བླ་མའང་ཐུགས་ཀའི་བྱམས་མགོན་ལ་བསྡུས་ཏེ་དེའི་ཞབས་ལ་མགོ་གཏད་ནས་དད་པའི་ངང་དུ་གཉིད་ལ་འགྲོ་བ་བྱེད། བྱམས་མགོན་གྱི་འཕོ་བ་སྦྱོང་ན་རྗེ་བླ་མ་རང་གི་སྤྱི་བོར་བྱོན། རང་ཉིད་དེའི་ཐུགས་ཀའི་བྱམས་མགོན་ལ་ཡར་ཐིམ། དེ་དགའ་ལྡན་དུ་གཤེགས་པའི་ཐུགས་ཀ་ནས་ཕྱིར་ཐོན་ཏེ་པངྨའི་སྦུབས་སུ་སྐྱེས་པར་བསམས། བདེ་བ་ཅན་དུ་གཙོ་བོར་འཕེན་པ་གཏོང་ན་འགྲོ་འདུག་གི་དམིགས་པ་བསྔོ་བའི་ཁ་བསྒྱུར་སོགས་འདྲ་ལ། གཉིད་དུ་འགྲོ་ཁར་རྗེ་བླ་མ་མགྲིན་པའི་སྤྱན་རས་གཟིགས་ལ་ཐིམ། དེ་རིགས་བདག་འོད་དཔག་མེད་ལ་ཐིམ་པའི་ཞབས་ལ་མགོ་གཏད་པའམ། སྤྱན་རས་གཟིགས་ཀྱི་ཞབས་

[Full Size]

ལ་མགོ་གཏད་དེ་བདེ་བ་ཅན་དུ་འཁྲིད་པའི་ས་མཁན་མཛད་དུ་གསོལ་སྙམ་པའི་དད་གདུང་དྲག་པོ་བསམ་གཏན་ཉལ་སྒོམ་གྱི་མན་ངག་བཞིན་བྱ། དགེ་རྩ་གང་བྱས་ཀྱི་མཇུག་ཏུ། ཤེས་ཀྱི་ཁེ་འདོད་པ་དང་གྲགས་པ་དང། །ཞེས་སོགས་དོན་མེད་པའི་འཁོར་བའི་ཕུན་ཚོགས་ཀྱི་རྒྱུར་མི་འགྱུར་བའི་སྨོན་ལམ་དང་། འཇམ་དཔལ་དཔའ་བོས་ཞེས་སོགས་དང། དུས་གསུམ་གཤེགས་པའི་ཞེས་སོགས་རྒྱལ་བས་བསྔགས་པའི་སྨོན་གནས་ཀུན་གྱི་རྒྱུར་འགྲོ་བའི་སྨོན་ལམ་དང་། མཆོག་གསུམ་བསླུ་བ་མེད་པའི་ཐུགས་རྗེས་དེ་བཞིན་དུ་གྱུར་ཅིག་སྙམ་པས་བདེན་པ་བདར་བ་སོགས་བྱའོ། །བྱམས་མགོན་ཐུགས་ཀར་བསྒོམ་པ་བཀའ་གདམས་གླེགས་བམ་དང་ལྷོ་བྲག་པའི་གསུང་གིས་འགྲུབ་ལ། སྤྱན་རས་གཟིགས་མགྲིན་པར་བསྒོམ་པ་རིགས་གསུམ་སྤྱི་སྒྲུབ་ཀྱི་མན་ངག་དང། སྒྲོལ་མ་ལྟེ་བར་བསྒོམ་པ་བླ་མེད་ཀྱི་རྒྱུད་དུ་མའི་དགོངས་པ་ཡིན་པས་ཡིད་ཆེས་པའི་གནས་སུ་བྱའོ། །ཞེས་པ་འདི་ནི་དད་བརྩོན་ལྷག་བསམ་དང་ལྡན་པ་ཇ་སག་ཐུ་རྒྱལ་པོའི་སྲིང་མོ་དབང་ལྡན་དབང་མོ་བུ་ཁྲིད་ཀྱིས་འདི་རྣམས་འདོན་ཐབས། རྒྱུན་གྱི་ཉམས་ལེན། འགོ་མཇུག་ཏུ་ཀུན་སློང་འཆོས་ཚུལ་སོགས་ཚང་ཞིང་འཁྱེར་བདེ་བ་ཞིག་དགོས་ཚུལ་བསྐུལ་མ་བྱུང་བ་ལྟར། ༸བཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་སྨྲས་པའི་ཡི་གེ་པའང་སྔགས་རམས་པ་དཀོན་མཆོག་ཀུན་དགའོ།། །།༈ ལྕགས་སྦྲུལ་ཟླ་༡༡ཚེས་༧ལ་གུ་ཤྲི་སྐལ་

[Full Size]

བཟང་གིས་སྐུ་ཞབས་རིན་པོ་ཆེའི་འཁྲུངས་རབས་གསོལ་འདེབས་ཤིག་དབྱངས་ངེས་པ་བྱ་དཀའི་མཛེས་རྒྱན་གྱིས་བརྩམས་ཡོད་པ་གཟིགས་ནས་དེ་ལས་འཕྲོས་ཏེ་ཞལ་རྩེད་ཀྱི་ཚུལ་དུ། རྒྱལ་བས་ཡང་ཡང་བསྔགས་མཛད་གྲགས་པ་དང། །ཐལ་རང་ཐ་དད་མཛད་པ་སངས་རྒྱས་བསྐྱངས། །ཚད་མས་སྨྲ་ངན་ཚལ་རབ་ཕམ་མཛད་གླང། །མཐའ་བྲལ་ལྟ་བ་གསལ་མཛད་ཟླ་བ་གྲགས། །འཇམ་དབྱངས་ལྷག་ལྷར་མཛད་པ་དགྲ་ལས་རྒྱལ། །བཀའ་གདམས་བསྟན་པ་རྒྱས་མཛད་རཏྣ་གསལ། །འཇམ་དབྱངས་བླ་མར་གདམས་མཛད་པཉྩཱ་སྱ། །བསྟན་དགྲ་ཐལ་བར་རླག་མཛད་རྒྱལ་མཚན་ཞབས། །ལྷག་པར་ཟབ་གསང་གདམས་པ་རྒྱས་མཛད་འཕགས། །གཞན་ལ་ཕན་མཛད་རཏྣ་ས་ར་དང། །མཐའ་དག་བསྟན་ལ་མངའ་མཛད་འཇམ་དབྱངས་བཞད། །བདག་ཅག་ལྷག་པར་བསྐྱངས་མཛད་ཨ་བྷ་ཡ། །སླར་ཡང་རྒྱས་མཛད་ས་ར་ཞབས་པད་བརྟན། །རང་ཅག་རྣམས་ལ་ཟབ་རྒྱས་གདམས་པ་སྩལ། །སངས་རྒྱས་བསྟན་པ་ཕ་མཐར་རབ་རྒྱས་པས། །ལས་ཅན་དད་ལྡན་ཐམས་ཅད་ས་མ་ཛཿ །བླ་མ་རྣམས་ལ་བཅའ་ལག་གང་བཟང་བསྟབས། །གྲྭ་བ་ཐམས་ཅད་གྲྭ་ཇ་མང་ཇས་བརྒྱག །ཇ་མར་རྩམ་པ་མཐའ་དག་ཆར་ལྟར་བབས། །རྟག་བརྟན་རང་དབང་ལྡན་ན་དགའ་བ་ལ། །ཞེས་དང། ༈ ཡང་། ཟབ་རྒྱས་མན་ངག་མཐའ་ཡས་རྒྱ་གར་ནས། །གངས་ཅན་ས་ལ་སྤྱན་དྲངས་དར་མ་གྲགས། །འཇམ་

[Full Size]

དབྱངས་བླ་མས་བཀའ་ཕབ་གསང་སྔགས་བསྟན། །ཕ་མཐར་རྒྱས་མཛད་པྲཛྙ་པཉྩ་སྱ། །སླར་ཡང་འཇམ་དཔལ་དབྱངས་གང་ཨཱ་ས་ནར། །མངའ་མཛད་སངྒྷ་གཞན་ཕན་ཟླ་དང་བྲལ། །ཡང་དག་ལམ་བཟང་གདམས་པ་ཉམས་བླངས་ནས། །གཞན་ལ་གསལ་མཛད་ངག་དབང་བསྟན་རྒྱན་ཞབས། །ཁ་བཤད་མཁས་པས་རཏྣ་ཤཱ་ས་ན། །གཞན་ལ་གསལ་ཡང་རང་རྩ་གསལ་བར་དཀའ། །ངག་དབང་སྐལ་བཟང་དབྱངས་གཞན་སྤངས་བྱས་ནས། །འཇམ་དབྱངས་བླ་མར་རྣམ་ཐར་བརྩམས་པ་ལ། །བལྟས་ནས་སྨྲས་པ་བཤད་བྱ་གཞན་ཟབ་ཀྱང། །བཤད་ཐབས་འདྲ་ལ་མཁས་རྣམས་བལྟས་ན་གསལ། །ཐ་སྐད་གཏམ་ལ་གང་བྱས་ལས་སླ་ཡང། །ནང་ལ་སྦྱར་ན་ཐམས་ཅད་དཀའ་བར་སྣང། །སྒྲ་ཚད་སྙན་ངག་བཀའ་བསྟན་རབ་འབྱམས་ལ། །སྦྱངས་ཀྱང་ཐ་མལ་བསམ་པ་རང་སར་གནས། །དྷརྨས་མཱན་གང་ལ་དྷཱ་ར་ཡ། །མནྟྲས་མཱ་ན་ག་ཙམ་ཏ་ར་ཎཿ །ཞེས་པ་གཉིས་འཕྲལ་དུ་ལྗགས་རྩོམ་གནང། ༈ འཇམ་དབྱངས་བླ་མ་འགྲན་བྲལ་ཞལ་སྔ་ནས། །བཀྱལ་ཀ་བྱས་ནས་ཐལ་མར་བཀའ་སྩལ་པ། །གཞན་རྣམས་བསྐལ་པར་མཱ་ནར་བརྣག་ན་ཡང། །ཆ་ཤས་ཙམ་ཡང་འཆར་དཀའ་དཔྱད་ན་གསལ། །ཞེས་ཀྱང་སྨྲས་སོ། །༈ འཇམ་མགོན་སྨྲ་བའི་ཟླ་བར་ཕྱག་བགྱིས་ཏེ། །ཟླ་ཟེར་ཕོག་པས་རིན་ཆེན་འབྱུང་གནས་ནི། །

[Full Size]

འཕྱུར་བའི་ངོ་མཚར་རླབས་འཕྲེང་རྟོགས་འདོད་ན། །དང་པོ་ཡི་གེ་གཅིག་ལ་ལྕི་ཡང་ཟུང། །གཉིས་བཞི་གསུམ་བརྒྱད་བཞི་ལ་བཅུ་དྲུག་དང། །ལྔ་ལ་སོ་གཉིས་དྲུག་ལ་རེ་བཞི་སོགས། །ཉིས་འགྱུར་འཕེལ་ཞིང་དེ་སྙེད་ཚིག་རྐྱང་དང། །ཉིས་འགྱུར་བཞི་འགྱུར་ཚུལ་དུ་ལྕི་ཡང་དགོད། །གསུམ་གྱི་གྱེན་གཤར་གསུམ་པའི་འཕྲེད་གྲལ་བརྒྱད། །མ་ཡ་ར་ས་ཏ་ཛ་བྷ་ན་སྟེ། །བྷ་ཐོག་ཛ་དབུས་ས་མཐའ་མ་ཀུན་ལྕི། །ཡ་ཐོག་ར་དབུས་ཏ་མཐའ་ན་ཀུན་ཡང། །ཡར་བལྟས་ཐ་མ་ལྕི་ན་ཕྱེད་ཡན་དང། །གཉིས་ལྕི་དེའི་སྟོང་གསུམ་ལྕི་དེ་ཡིའང་སྟོད། །མཐའ་ཡས་སྨད་དེ་གཉིས་ཡང་དེ་ཡིའང་སྨད། །མཐའ་ཡང་གཉིས་ལྕི་སྨད་ཆའི་སྟོད་ལ་སོགས། །གནས་ཀྱི་རིམ་པར་ཡང་བས་གོང་ནས་ཕབ། །གནས་དེར་ལྕི་ན་བཏང་སྙོམས་ཉིད་དུ་འཇོག །དོན་འདི་མ་མཐོང་རི་མོའི་རྗེས་འདེད་པ། །མུན་ནང་རྩིག་པར་འཁྱུད་དེ་སོང་བ་འདྲ། །རེ་བཞི་པ་ལ་དོར་བྱའི་གནས་དྲུག་སྟེ། །སོ་གཉིས་བཅུ་དྲུག་བརྒྱད་བཞི་གཉིས་གཅིག་གོ །ཛ་སའི་མཐའ་ནི་སོ་གཉིས་གནས་ཡིན་ལ། །ལྕི་བས་སྟོད་དུ་ཤེས་ཀྱི་བགྲང་མི་དགོས། །དེ་གོང་གཉིས་པ་བཅུ་དྲུག་གསུམ་པ་བརྒྱད། །བཞི་པ་བཞི་ཡི་གནས་རྣམས་ཡང་བས་ན། །ཐུར་དུ་ཕབ་སྟེ་ཉེར་བརྒྱད་གོང་དུ་འཕུད། །གཉིས་གནས་ལྕི་བས་བཏང་སྙོམས་གཅིག་གི་གནས། །ཡང་བས་སྔ་མར་བསྣན་ནས་ཉེར་དགུ་པོ། །གོང་ཕུད་སུམ་ཅུ་པ་ཡི་སྟེང་དུ་འབབ། །མ་ཏའི་མཐའ་ནི་ཡང་བས་སུམ་ཅུ་གཉིས། །གོང་དུ་ཕུད་དེ་

[Full Size]

སྨད་ཀྱི་གྲངས་སུ་ཤེས། །དེ་གོང་བཅུ་དྲུག་ཡན་གྱི་གནས་ལྔ་པོ། །ལྕི་ཕྱིར་དོར་དུ་མེད་པས་སོ་གསུམ་མོ། །གལ་ཏེ་ཡ་ཏ་ཡིན་ན་གཅིག་གི་གནས། །ཡང་ཕྱིར་གོང་དུ་བསྣན་ཏེ་སོ་བཞིར་འགྱུར། །རེ་གཅིག་བྱེད་ན་གཅིག་དང་གཉིས་ཀྱི་གནས། །ལྕི་ཡི་གཞན་ཀུན་གོང་ཕུད་ཏ་ན་འོ། །པྲ་སྟཱར་ཅི་ཙམ་མང་ཡང་ཀུན་ལྕི་བའི། །སྔོན་རོལ་ཏ་ན་བྱུང་ན་རེ་གཅིག་དང། །མ་ཛའི་བརྒྱད་གནས་ཡང་བས་ཞེ་གཅིག་བྱེད། །བདུན་སོགས་རིམ་བཞིན་བརྒྱ་དང་ཉེར་བཞིའི་གནས། །ཉིས་བརྒྱ་ང་དྲུག་ལྔ་བརྒྱ་བཅུ་གཉིས་དང། །ཆིག་སྟོང་ཉེར་བཞི་ཉིས་སྟོང་ཞེ་བརྒྱད་ཀྱི། །གནས་སོགས་འདོར་ལེན་སྔ་མས་ཤེས་པར་བྱ། །སྡེབ་ལེགས་ཉུང་ངུའི་ཚིག་གིས་སྡེབ་སྦྱོར་ཀུན། །བསྡེབས་ཚུལ་ཤེས་འདི་རིགས་པའི་འཕྲུལ་གྱིས་བསྡེབས། །བསྡེབས་པའི་དགེ་བས་བློ་གསལ་ངང་མོ་བརྒྱ། །སྡེབས་གཅིག་རིག་གནས་རྒྱ་མཚོར་འཕུར་བར་ཤོག །ཅེས་དཀོན་མཆོག་བསྟན་སྒྲོན་གྱིས་འདི་སྐོར་བལྟ་མ་མྱོང་ཡང། ཡི་གེ་གསུམ་པའི་པྲསྟཱ་ར་ཞིག་གི་སྟེང་ནས་དཔྱད་དེ་བཀོད་པ་ཡིན་པས་ཐ་སྙད་མཁན་པོ་རྣམས་ཀྱིས་ཡང་དག་པར་མཛོད་ཅིག ། ༈ རཏྣཱ་ཀ་རས་པྲསྟཱ་ར། །འགོད་ཚུལ་མིང་སོགས་བཤད་པ་ཡི། །ཞར་ལ་ལྕི་ཡང་དཔེར་བརྗོད་ཀྱང། །བསྟན་ཕྱིར་ཡ་མཚན་ཆེ་ཞེས་གྲགས། །བོད་ཡིག་འདོགས་མེད་རྐྱང་པ་ཙམ། །མང་འདུས་དོན་སྟོན་མི་ནུས་ཀྱང། །སྔོན་རྗེས་འཇུག་ཅན་ལྕི་དང་གཞན། །ཡང་བར་བྱས་ཏེ་དཔེར་མཚོན་ན། །ཡིག་

[Full Size]

བདུན་མཐའ་ནས་གས་བརྒྱན་ཅིང། །གཞན་གཉིས་མས་མཚན་ཀུན་ལྕིར་བཞག །དེའི་མིང་དབྱར་རྔའི་མིང་ཞེས་བསྒྲགས། ། ༈ ན་ན་ལ་ནི་རེ་རེ་སྟེ། །དེ་ནི་རྔ་སྒྲ་ཆེ་རུ་སྨྲ། །མཐའ་ཡང་ཏ་སྟེ་ཐོག་ཡང་ཡ། །དེའི་མིང་རྫ་རྔ་ཞེས་བརྗོད་བྱ། ། ༈ རེ་རེ་ན་ཛ་དབུས་ལྕི་གའང་། །ཐ་མ་དེ་ལ་དབྱར་རྔ་གདགས། །ན་ཛ་ག་ཡི་དབུས་ལྕི་གང། །ཛ་སྟེ་ག་ནི་རྗེས་མ་ཡིན། །མཐའ་ཡང་དེ་རྗེས་གཉིས་མཉམ་ཏ་མ་ན། །དེའི་མིང་ཆུ་སྐྱེས་བཞད་པའི་གེ་ས་ར། ། ༈ ཐོག་ལྕི་ཐ་མ་ལྕི་གཉིས་བྷ་ས་དག །འདི་ལ་ཤ་བ་རྒྱ་བོའི་རྭ་ཅོ་ཟེར། ། ༈ ལྕི་ཡང་གོ་རིམ་དུ་སྤེལ་ཛ་ཏའང་ཛ། །དེའི་མིང་དྲི་ཟའི་བུ་མོའི་གླུ་དབྱངས་སོ། ། ༈ རྗེས་བཞི་ཡང་ཞིང་སྔོན་ལྕི་མ་ཏ་ན། །འཐུང་བའི་གཅོད་རྒན་ལག་གི་ཌཱ་མ་རུ། །ཀུན་ལྕི་འོ་མཐའ་མ་ལྕི་ཟུང་མས་དག །དཀར་གསལ་འོད་ཀྱི་རྩེ་དགའི་དྲ་བ་འགྱེད། །རྟོགས་པར་སླ་ཕྱིར་དོན་ཆེན་མིན། །མང་པོར་མཁོ་ཕྱིར་དོན་ཆུང་མིན། །བོད་སྐད་བྱས་ཕྱིར་རྒྱ་ལུགས་མིན། །སྡེབ་སྦྱོར་བྱས་ཕྱིར་བོད་ལུགས་མིན། །ཅི་ཡང་མིན་པའི་རོལ་རྩེད་འདི། །གང་ཡང་མིན་པའི་སྒོམ་པས་སྨྲས། །ཞེས་པའང་མཚམས་ཀྱི་ཐུན་གསེང་ཞིག་ཏུ་སྡེབ་སྦྱོར་གྱི་བརྗོད་བྱ་ཟབ་མི་ཟབ་ཀྱི་བཀའ་མཆིད་ཅིག་ལས་འཕྲོས་ཏེ་ཞལ་རྩེད་ཀྱི་ཚུལ་དུ་སྩལ་བ་ཕྲན་རཏྣ་ཨཱ་ནནྟས་བརྗེད་དུ་ཕངས་ནས་ཡི་གེར་བཀོད་པའོ།། །།