དམ་ཚིག་རྡོ་རྗེའི་སྒོམ་བཟླས་མདོར་བསྡུས།
ན་མོ་གུ་རུ་ས་མ་ཡ་བཛྲཱ་ཡ། བཅོམ་ལྡན་འདས་དམ་ཚིག་རྡོ་རྗེའི་སྒོམ་བཟླས་མདོར་བསྡུས་ནི། སྐྱབས་སེམས་སྔོན་ཏུ་སོང་ནས། རང་ཉིད་ཐ་མལ་སྤྱི་བོ་རུ། །པདྨ་ཉི་མའི་གདན་སྟེང་དུ། །ཁཾ་ལས་རལ་གྲི་ཁཾ་གིས་མཚན། །འོད་འཕྲོས་རྒྱལ་མཆོད་བྱིན་རླབས་བསྡུས། །སེམས་ཅན་སྒྲིབ་སྦྱངས་ཚུར་འདུས་ཏེ། །ཡོངས་གྱུར་བླ་མ་བཅོམ་ལྡན་འདས། །དམ་ཚིག་རྡོ་རྗེ་སྐུ་མདོག་ལྗང་། །ཞི་འཛུམ་རལ་པའི་ཐོར་ཚུགས་ཅན། །ཕྱག་གཡས་རལ་གྲི་ཐུགས་ཀར་བསྣམས། །གཡོན་པས་དྲིལ་བུ་དཀུ་ལ་བརྟེན། །ཡུ་བ་སྣ་ཚོགས་རྡོ་རྗེས་སྤྲས། །དར་དང་རིན་ཆེན་རུས་པས་བརྒྱན། །ཞབས་གཉིས་སེམས་དཔའི་སྤྱིལ་ཀྲུང་བཞུགས། །དམ་ཚིག་ཡེ་ཤེས་དབྱེར་མེད་གསལ། །གནས་གསུམ་འབྲུ་གསུམ་ཐུགས་ཀ་རུ། །ཉི་སྟེང་ཁཾ་མཐར་སྔགས་ཕྲེང་བསྐོར། །མོས་གུས་བཟླས་པས་ཐུགས་རྒྱུད་བསྐུལ། །ས་བོན་སྔགས་ཕྲེང་བཅས་པ་ལས། །བདུད་རྩིའི་རྒྱུན་བབས་སྐུ་ལུས་གང་། །ཞབས་ནས་བརྡོལ་ཏེ་སྤྱི་བོར་ཞུགས། །དམ་ཚིག་ཉམས་ཆགས་སྡིག་སྒྲིབ་ཀུན། །དག་ནས་རང་ལུས་འོད་ཕུང་གྱུར། །ཨོཾ་ཨཱཿཁཾ་ཧཱུྃ་ཕཊ་སྭཱ་ཧཱ། ཞེས་ཅི་ནུས་བཟླ། སྤྲོ་ན། ཨོཾ་ཀརྨ་སཏྭ་ས་མ་ཡ་སོགས་པས་རིགས་ཀྱི་ཡིག་བརྒྱའང་བཟླས་ལ་མཐར། བཅོམ་ལྡན་དམ་ཚིག་རྡོ་རྗེ་ཡིས། །བདག་གི་
དམ་ཚིག་ཉམས་ཆགས་ཀུན། །དག་ཅིང་དམ་ཚིག་གཙང་བ་དང་། །དམ་ཚིག་སེམས་དཔའ་མཆོག་སྒྲུབ་མཛོད། །མོས་གུས་དྲག་པོས་གསོལ་བཏབ་པས། །འོད་དུ་ཞུ་ནས་རང་ལ་ཐིམ། །རང་ཉིད་དམ་ཚིག་རྡོ་རྗེ་སེམས། །སྣང་ལ་རང་བཞིན་མེད་པར་གྱུར། །དགེ་བ་འདི་ཡིས་སོགས་བརྗོད། ཅེས་པའང་དགེ་བཤེས་ཀུན་དགའ་རྒྱལ་མཚན་ངོར་གུ་ས་སྤེལ་བ་དགེ་ལེགས་འཕེལ།། །།སརྦ་མངྒ་ལཾ།། །།