དབང་བཞི་མཆོག་གི་སྙིང་པོ།
ཕག་མོ་ནག་མོའི་ཟབ་ཐིག་ལས༔ དབང་བཞི་མཆོག་གི་སྙིང་པོ་བཞུགས༔ མཁའ་འགྲོའི་ཚོགས་ལ་ཕྱག་འཚལ་བསྟོད༔ དབེན་ཞིང་བཀྲ་ཤིས་གནས་མཆོག་ཏུ༔ སྟེགས་བུ་གྱེན་ཐུར་ཁྲུ་གང་པ༔ ཐིག་ཏུ་བཅད་ཅིང་ཆོས་འབྱུང་ལ༔ ཐོད་ར་མེ་རིས་བསྐོར་བ་བྲི༔ ཆོས་འབྱུང་དབུས་སུ་པད་འདབ་བཞི༔ ཕྱོགས་དང་མཐུན་པའི་ཚོན་གྱིས་བསྒྱུར༔ དབུས་སུ་མཚན་བཟང་བུམ་པའི་ནང་༔ བུམ་སྨན་མགུལ་ཆིངས་ལྡན་པ་བཤམས༔ དེ་སྟེང་བྷན་དྷར་བདུད་རྩི་ལ༔ ཡབ་ཡུམ་བྱང་སེམས་ཨ་མྲྀ་ཏ༔ བུ་རམ་བཅུད་ཀྱིས་རླན་པ་བཤམས༔ དེ་སྟེང་དཀར་དམར་དར་གྱིས་བཀབ༔ དེ་སྟེང་མེ་ལོང་དྲི་མེད་ལ༔ ཆང་གིས་བྱུག་ཅིང་སིན་དྷུར་བསྐུ༔ ཆོས་འབྱུང་ལྟེ་བར་རྩ་བསྙེན་བྲི༔ ཐ་མར་ཨཱ་ལི་ཀཱ་ལི་དང་༔ རྟེན་འབྲེལ་སྙིང་པོ་བྲི་བར་བྱ༔ དེ་སྟེང་མན་ཤེལ་དྲི་མེད་བཞག༔ གཞན་ཡང་སྨན་གཏོར་རཀྟ་བཤམས༔ ལས་ཀྱི་གཞུང་བསྲང་བསྙེན་ཁ་གསོ༔ ཚོགས་འཁོར་བསྐོར་ཞིང་བསྐང་བ་གྱེར༔ འོད་ཟེར་སྤྲོ་བསྡུས་བདག་འཇུག་བླངས༔ མན་ཤེལ་དྲི་མེད་ཤར་དུ་དགོད༔ བྷན་དྷ་བདུད་རྩི་ནུབ་ཏུ་དགོད༔ མེ་ལོང་ཆོས་འབྱུང་ལྷོ་རུ་བཞག༔ སྤོས་ལྡན་དཔལ་གཏོར་བྱང་དུ་བཤམས༔ བུམ་པར་ཁ་རྒྱན་གཟུངས་ཐག་སྤྲས༔ ལས་བུམ་སྟ་གོན་གཞན་མཐུན་ལྟར༔ དམ་ལྡན་སློབ་བུ་ལྔ་གསུམ་བདུན༔ རིན་ཆེན་ནོར་གྱི་མཎྜལ་ཐོགས༔ སྒོ་དྲུང་གསོལ་བ་འདི་ལྟར་གདབ༔ ཧཱུྃ༔ ལས་ཀྱི་སློབ་དཔོན་དགོངས་སུ་གསོལ༔ བདག་ཅག་སྐལ་ལྡན་འདིར་ཚོགས་རྣམས༔ ཕོ་བྲང་ནང་དུ་གཏོང་ནས་ཀྱང་༔ བླ་མེད་དབང་གི་སྨིན་གྲོལ་སྩོལ༔ ཅེས་ལན་གསུམ༔ ལན་སྦྱིན་པ༔ ཧོ༔ ཁྱེད་ཅག་འདིར་ཚོགས་བུ་རྣམས་ཉོན༔ བླ་མེད་དཀྱིལ་འཁོར་འཇུག་འདོད་ན༔ ལས་དང་སྐལ་བར་ལྡན་ལགས་སམ༔ དམ་ཚིག་ཚུལ་བཞིན་བསྲུང་ནུས་སམ༔ ཞེས་དྲིས་ལན་གསོལ་བ༔ ཀྱེ་དགོངས་ཤིག་ལས་ཀྱི་སློབ་དཔོན་དགོངས༔ བདག་ཅག་ལས་དང་སྐལ་བར་ལྡན༔ བླ་མ་ལྷ་དང་མཆེད་ལྕམ་གྱི༔ དམ་ཚིག་སྲོག་ལ་བབས་ཀྱང་བསྲུང་༔ དབང་བཞིའི་སྨིན་གྲོལ་མྱུར་དུ་སྩོལ༔ ཅེས་ཞུ༔ མིག་དར་དམར་པོ་བཀབ་ཅིང་༔ ལས་ཀྱི་སློབ་དཔོན་གྱིས་སྣ་ཁྲིད་དེ༔ བླ་མ་དང་དཀྱིལ་འཁོར་ལ་སྐོར་བ་ལན་གསུམ་བྱས་ཤིང་གྲལ་དུ་འཁོད༔ ཁྲུས་བྱས་བགེགས་བསྐྲད་གུ་གུལ་བདུག༔ མཎྜལ་དབུལ་ཞིང་གནས་གསུམ་དུ༔ བདུད་རྩི་ཆང་གིས་ཐིག་ལེ་བྱ༔ བླ་མས་དབང་བཞིའི་ཕན་ཡོན་དང་༔ ཕག་མོ་ནག་མོའི་ལོ་རྒྱུས་བཤད༔ དེ་ནས་གསོལ་བ་འདི་ལྟར་འདེབས༔ ཨེ་མ་བླ་མ་འགྲོ་བའི་མགོན༔ དུས་གསུམ་བདེ་གཤེགས་ཡུམ་གྱི་མཆོག༔ ཕག་གདོང་ཁྲོས་མ་ནག་མོ་ཡི༔ དབང་བཞིས་བདག་རྒྱུད་སྨིན་པར་ཞུ༔ ཞེས་ལན་གསུམ་བྱའོ༔ དེ་ནས་སྐྱབས་སེམས་འདི་ལྟར་འབོགས༔ ན་མོ་བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་བསྒོམ་བཟླས་བསྒྲུབ༔ ལན་གསུམ་བྱའོ༔ དེ་ནས་ཡན་ལག་བདུན་པ་ནི༔ ཧཱུྃ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆག་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདའ་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་འཐོབ་པར་ཤོག༔ དེ་ནས་སྡོམ་བཟུང་འདི་ལྟར་རོ༔ ཧཱུྃ༔ བླ་མ་ཡི་དམ་ལྷ་ཚོགས་དགོངས༔ ཕྱི་ནང་ཐེག་པའི་སྡོམ་པ་དང་༔ རྩ་གསུམ་དམ་ཚིག་ཡང་དག་བསྲུང་༔ སྔོན་གྱི་འགལ་འཁྲུལ་དམ་ཉམས་བཤགས༔ ཕྱིན་ཆད་མི་བགྱིད་གནོང་ངོ་འགྱོད༔ སེམས་ཅན་ཀུན་གྱི་དོན་བསྒྲུབ་ཕྱིར༔ བདག་གི་སྡོམ་པ་རྣམ་དག་ཤོག༔ ཅེས་བརྗོད་དམ་ཚིག་བདུད་རྩི་སྦྱིན༔ ཧཱུྃ༔ འདི་ནི་དམ་ཚིག་གསང་བའི་ཆུ༔ དམ་ཚིག་སྲུང་ན་དངོས་གྲུབ་འཐོབ༔ དམ་ཉམས་ལུས་སེམས་བརླག་པར་བྱེད༔ དེ་ཕྱིར་ཚུལ་བཞིན་དམ་ཚིག་སྲུངས༔ ས་མ་ཡ་ཨ་མྲྀ་ཏེ་ཧི་ཧོ་ཧཱུྃ༔ དེ་ནས་རྡོ་རྗེ་གནས་གསུམ་དུ་བཞག་ཅིང་༔ ཧཱུྃ༔ ང་ནི་བླ་མ་རྡོ་རྗེ་འཆང་༔ མཁའ་འགྲོ་ཁྲོས་མ་ནག་མོ་ཡི༔ གསང་བ་མཆོག་གི་སྨིན་གྲོལ་འདི༔ མ་དག་དམ་མེད་རྣམས་ལ་གསང་༔ ཚུལ་འདི་རལ་ན་དམ་ཚིག་ཉམས༔ དེ་བས་སྙིང་ལ་བྲོ་བོར་ཞིག༔ ཨེ་དན་ཏེ་ས་མ་ཡ་ཁ་ཐམ༔ དེ་ནས་ཡེ་ཤེས་པ་དབབ་སྟེ༔ ཁྱེད་རང་རྣམས་སྟོང་པའི་ངང་ལས་ཁྲོས་མ་ནག་མོར་གསལ་བའི་ཡན་ལག་བཞི་ལ་ཕག་མོ་རིགས་བཞི་བསྒོམ༔ སྤྱི་བོར་བླ་མ་རིགས་བདག་ཏུ་བསྐྱེད༔ རྐང་པར་གར་སྟབས་སུ་འཁྲབ་པའི་འོག་ཏུ་རླུང་གི་ད་ལ་ནག་པོ་གཞུའི་དབྱིབས་ཅན་ཞིག་བསྒོམ༔ སྙིང་གར་ཉི་དཀྱིལ་གྱི་སྟེང་དུ་ཡི་གེ་ཧཱུྃ་མཐིང་ནག་གིས་མཚན་པ་དང་༔ རིགས་བཞིའི་ཐུགས་ཀར་ཧ་རི་ནི་ས་བཞིས་མཚན་པ་ལས་འོད་ཟེར་འཕྲོས་པས༔ ནུབ་ཕྱོགས་ཨོ་རྒྱན་ཡུལ་གྱི་ཕོ་བྲང་ནས་ཐུགས་རྗེ་ཁྲོས་མ་ནག་མོ་འཁོར་གྱི་མཁའ་འགྲོ་འབུམ་ཕྲག་མང་པོ་དང་བཅས་པ་སྤྱན་དྲངས་ཏེ༔ དམ་ཚིག་ཡེ་ཤེས་གཉིས་སུ་མེད་པར་འདྲེས་པར་བསྒོམ་དུ་བཅུག༔ སློབ་མ་རྣམས་ལངས་ཏེ་ལག་པ་སྤྱི་བོར་ཆོས་འབྱུང་གི་ཕྱག་རྒྱ་བྱེད་དུ་འཇུག༔ རོལ་མོ་འཁྲོལ་ཞིང་སྤྱན་འདྲེན་དང་རྩ་སྔགས་ཨ་ཝེ་ཤ་ཡའི་སྔགས་ཅི་མང་བརྗོད༔ མེ་ཏོག་འཐོར་ཞིང་ཡེ་ཤེས་པ་བརྟན་པར་བྱ༔ དེ་ནས་མེ་ཏོག་འདོར་བ་ནི༔ ཧཱུྃ༔ བྱང་ཆུབ་སེམས་ཀྱི་མེ་ཏོག་འདི༔ དམ་པ་མཆོག་གི་ལྷ་ལ་འབུལ༔ ཚེ་རབས་ལྷ་ལ་བབ་པར་ཤོག༔ པུཥྤེ་པཱུ་ཙ་ཧོ༔ ཞེས་བརྗོད༔ མེ་ཏོག་ཤར་དུ་བབས་ན་རྡོ་རྗེ་དགྱེས་མ༔ ལྷོ་རུ་བབས་ན་རིན་ཆེན་བཞད་མ༔ ནུབ་ཏུ་བབས་ན་པདྨ་བདེ་ཆེན༔ བྱང་དུ་བབས་ན་ལས་རབ་སྒེག་མོ༔ ཤར་ལྷོར་དབང་གི་སེམས་མ༔ ལྷོ་ནུབ་དགྱེས་སྡེ་མཆོག་དགའ༔ ནུབ་བྱང་ཧ་ཧའི་ཅོད་པན༔ བྱང་ཤར་དྲག་མོ་དབང་ཕྱུག༔ དབུས་སུ་རབ་མཆོག་བདེ་མ་ལ་སོགས་གསང་མཚན་སྦྱིན༔ ཅོད་པན་ཐོགས་ཏེ་འདི་སྐད་དོ༔ ཧཱུྃ༔ སྣ་ཚོགས་དར་འདི་ཡེ་ཤེས་ཚོན༔ ལྔ་ལྡན་ཅོད་པཎ་མིང་གི་དབང་༔ སྐལ་ལྡན་རྣམས་ཀྱིས་ཐོབ་པར་ཤོག༔ པྲ་ཏི་གྷྲི་ཧ་ན་ཨ་བྷི་ཥཉྩ་ཧཱུྃ༔ ཞེས་དབང་བསྐུར་གསེར་ཐུར་ཐོགས་ཏེ་སློབ་མའི་སྤྱན་དབྱེ༔ ཧཱུྃ༔ མ་རིག་ལིང་ཏོག་ཆུ་བུར་རྣམས༔ ཐུགས་རྗེ་རིག་པའི་ཐུར་མས་བསལ༔ བུ་ཁྱོད་ཡི་དམ་ལྷ་ཞལ་ལྟོས༔ པྲ་ཝེ་ཤ་ཡ་ཧོ༔ ཞེས་བརྗོད༔ དཀྱིལ་འཁོར་བསྟན༔ ཧཱུྃ༔ རིགས་ཀྱི་བུ་རྣམས་དཀྱིལ་འཁོར་ལྟོས༔ འདི་ནི་ཐར་བ་མཆོག་གི་ཞིང་༔ ཆོས་ཀྱི་འབྱུང་གནས་ཨེ་ཡི་ཀློང་༔ མཁའ་དབྱིངས་དག་པ་བདེ་བ་ཆེ༔ འདི་མཐོང་སྡིག་སྒྲིབ་ཀུན་བྱང་ནས༔ མཆོག་གི་དངོས་གྲུབ་འཐོབ་པར་འགྱུར༔ ཞེས་མཎྜལ་འབུལ་ཞིང་ཕྱག་བྱེད་དུ་འཇུག༔ ས་མ་ཡ༔ རྒྱ་རྒྱ་རྒྱ༔ དེ་ནས་བུམ་པ་ཐོགས་ཏེ་སྤྱི་བོར་དབང་བསྐུར་ཞིང་འདི་སྐད་དོ༔ ཧཱུྃ༔ བུམ་པ་ཆོས་དབྱིངས་མཁའ་འགྲོའི་ཞིང་༔ བཅུད་ནི་ཕག་གདོང་ནག་མོའི་སྐུ༔ རིགས་ཀྱི་བུ་ལ་དབང་བསྐུར་བས༔ སྤྲོས་བཅས་བུམ་པའི་དབང་ཐོབ་ཤོག༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཀཱ་ཡ་ཨ་བྷི་ཥིཉྩ་ཧཱུྃ༔ དེ་ནས་བྷན་དྷ་ཐོགས་ཏེ༔ མགྲིན་པར་བསྐུར་ཞིང་༔ ཧཱུྃ༔ བྷན་དྷ་ལོངས་སྤྱོད་མཁའ་འགྲོའི་དབྱིངས༔ བཅུད་ནི་ཡབ་ཡུམ་བྱང་ཆུབ་སེམས༔ སྐལ་ལྡན་རྣམས་ལ་དབང་བསྐུར་བས༔ སྤྲོས་མེད་གསང་བའི་དབང་ཐོབ་ཤོག༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཝཱཀྐ་ཨ་བྷི་ཥིཉྩ་ཧཱུྃ༔ བདུད་རྩི་སྦྱིན༔ དེ་ནས་མེ་ལོང་ཐོགས་ཏེ་སྙིང་གར་བསྐུར༔ ཧཱུྃ༔ མེ་ལོང་འགྲོ་འདུལ་སྤྲུལ་སྐུའི་ཞིང་༔ སིན་དྷུར་ཕོ་བྲང་མཁའ་འགྲོ་ཡུམ༔ རིགས་ཀྱི་བུ་ལ་དབང་བསྐུར་བས༔ ཤིན་ཏུ་སྤྲོས་མེད་དབང་ཐོབ་ཤོག༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཙིཏྟ་ཨ་བྷི་ཥིཉྩ་ཧཱུྃ༔ སྙིང་གར་སིན་དྷུ་ར་ཡིས་ཐིག་ལེ་བྱ༔ དེ་ནས་ཤེལ་གོང་ཐོགས་ཏེ་ལག་ཏུ་སྦྱིན༔ ཧཱུྃ༔ དྲི་མ་མེད་པའི་ཤེལ་གོང་འདི༔ རང་སེམས་གདོད་ནས་དག་པའི་བརྡར༔ རིགས་ཀྱི་བུ་ལ་དབང་བསྐུར་བས༔ ཚིག་དབང་དོན་གྱི་དབང་ཐོབ་ནས༔ སྐད་ཅིག་རིག་པ་རང་གྲོལ་ཤོག༔ སརྦ་དྷརྨ་ཨ་ཨཱ༔ ཞེས་བརྗོད་གནས་ལུགས་ངོ་སྤྲོད་གདབ༔ བྷ་ལིང་ཐོགས་ཏེ་སྤྱི་བོར་བསྐུར༔ ཧཱུྃ༔ འབྲུ་བཅུད་སྙིང་པོ་བྷ་ལིང་ཏ༔ ཞལ་ཟས་མཆོག་འདི་དངོས་གྲུབ་རྫས༔ རྩ་བ་གསུམ་གྱི་ངོ་བོར་གསལ༔ རིགས་ཀྱི་བུ་ལ་དབང་བསྐུར་བས༔ རྒྱལ་ཚབས་སྤྱི་བླུགས་དབང་ཐོབ་ཤོག༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་སརྦ་བྷ་ལིང་ཏ་ཨ་བྷི་ཥིཉྩ་ཧཱུྃ༔ ཞེས་བརྗོད་གཏོར་མ་དངོས་གྲུབ་ཕུང་པོར་བསམ་ཞིང་དམ་རྫས་སུ་རོལ་ལོ༔ མཐའ་བརྟེན་བསྐུར་རམ་ཤིས་བརྗོད་བྱ༔ དབང་བཞི་མཆོག་གི་སྙིང་པོ་འདི༔ ལན་གཅིག་འབྲེལ་བའི་འགྲོ་བ་རྣམས༔ སྐྱེ་བ་གཅིག་གམ་བར་དོའམ༔ སྐྱེ་བ་གསུམ་པ་ཚུན་ཆད་དུ༔ མ་བསྒོམས་པར་ཡང་གྲོལ་བར་འགྱུར༔ ཕྱི་རབས་རྣམས་ཀྱིས་གཅེས་པར་གྱིས༔ དམ་མེད་རྣམས་ལ་ཨ་ཐམ་རྒྱ༔ སྲུང་མས་མེལ་ཚེ་གྱིས་ཤིག་རྒྱ༔ ས་མ་ཡཱ༔ རྗེས་ནི་ལས་བྱང་བཞིན་དུ་བྱ༔ གླུ་གར་བརྩེ་དང་ཚོགས་ལ་རོལ༔ མཎྜལ་འབུལ་ཞིང་དམ་ཚིག་བསྲུང་༔ བུད་མེད་རྣམས་ལ་དམོད་པ་སྤང་༔ བྱང་ཆུབ་སེམས་ནི་ཉམས་མི་བྱ༔ དེས་ནི་མཁའ་འགྲོ་སྤྲིན་བཞིན་འདུ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིརྟིས་ཕག་གདོང་ནག་མོའི་ཐུགས་ཀྱི་སྒྲུབ་གནས་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལམ།། །།