ཁྲོས་མའི་སྒྲུབ་ཐབས་ཆོ་ག་དངོས་གྲུབ་གཏེར་མཛོད་ལས་སྨད་ལས་དགྲ་བགེགས་ཚར་གཅོད་གནམ་ལྕགས་ཐོལ་མདེལ།

[Full Size]

ཁྲོས་མའི་སྒྲུབ་ཐབས་ཆོ་ག་དངོས་གྲུབ་གཏེར་མཛོད་ལས་སྨད་ལས་དགྲ་བགེགས་ཚར་གཅོད་གནམ་ལྕགས་ཐོལ་མདེལ་བཞུགས་སོ༔

[Full Size]

མ་གཅིག་ཁྲོས་མ་ནག་མོ་ལ་ཕྱག་འཚལ་ལོ༔ ཚོགས་ཕུད་གྷ་ན་ཙཀྲ་སོགས་ཡིག་བརྒྱ་སོང་བའི་རྗེས་སུ་འདིར་གཏོར་ཟློག་བྱེད་པར་འདོད་ན༔ ལྕགས་སམ་དྲག་པོའི་སྣོད་ནང་དུ༔ མདོས་གདན་གྲུ་བཞི་གཉིས་བརྩེགས་སྟེང་༔ གཙོ་མོའི་གཏོར་མ་ཟུར་གསུམ་ཆེ་བ་ཕག་མགོས་མཚན་པ་ལ༔ རྩོང་ཉེར་གཅིག་གམ་དབུ་ཕྱག་གི་གྲངས་དང་ལིང་དང་ཤ་ཁྲག་གིས་བརྒྱན་པ༔ ནང་གི་གྲུ་བཞི་ལ་བཞི༔ གཉིས་པ་ལ་བཞི་དང་གཙོ་འཁོར་དགུའམ་བཅུ་གང་ཡིན་མཐར་མཐེབ་སྐུ་ཤ་དུམ་དང་རྩང་ཉེར་བརྒྱད་ཀྱིས་བསྐོར༔ སྟེང་དུ་དར་ནག་གི་གདུགས་ཕུབ་ལ་བཤམས་ཁྲག་གི་ཨགྷཾ་སོགས་ཀྱི་མཆོད་པ་སྣ་བདུན་བཤམས༔ མཁའ་འགྲོ་འབུམ་བསྐུལ་གཏོར་ཆུང་བར༔ མདུན་དུ་ལྕགས་སྣོད་ནང་དུ་ལིངྒ་ཆེ་བ་གཅིག་དང་༔ ཕུར་པ་

[Full Size]

གྲི་གུག་ཐུན་རྫས་རྣམས་དང་༔ བསྒྲལ་ཆས་དང་ཉེར་མཁོའི་ཡོ་བྱད་བཤམས་ལ༔ ཆུ་གཙང་གིས་བྲན༔ རྐང་གླིང་དང་རོལ་མོ་རྣམས་སྒྲོག་ལ་འདི་སྐད་དོ༔ ཕཊཿ རང་ཉིད་ཁྲོས་མར་གསལ་བའི་མདུན་དུ༔ ཨེ་ལས་ལྕགས་ཁང་ནག་པོ་ཁ་རུབ་ལ་གཏིང་ཟབ་པ༔ བང་རིམ་གསུམ་པ༔ ཁྲག་མཚོ་ཁོལ་ཞིང་མཚོན་ཆའི་ཆར་འབེབས་པ༔ ཕོ་ཉ་དྲེགས་པ་ཅན་རྡུལ་ལྟར་འཚུབ༔ དེའི་དབུས་སུ་ནིཾཏྲིའི་འཕྲོ་འདུ་ལས༔ དམ་ཉམས་པའི་དགྲ་བགེགས་གཟུགས་ཕུང་མྱ་ངན་ལུས་ཁམས་ཡོངས་སུ་སྨྲེ་སྔགས་འདོན༔ སྐུ་གཟེང་བ༔ ཡན་ལག་བཅིང་ཞིང་སྡོམ་པ་ཞིག་ཏུ་གྱུར༔ དེ་ནས་འགུགས་གཞུག་བྱ་བ་

[Full Size]

ནི༔ ཛཿ ན་མོ༔ དཀོན་མཆོག་གསུམ་དང་རྩ་བ་གསུམ༔ ཐུགས་རྗེ་ཁྲོས་མའི་ལྷ་ཚོགས་བདེན་པའི་མཐུས༔ བསྟན་པའི་སྤྱི་དགྲ་རྣལ་འབྱོར་སྒོས་དགྲ་དང་༔ བདག་དང་བསྲུང་བྱ་ལ་གནོད་དགྲ་དང་བགེགས༔ ཕོ་གདོན་མོ་འདྲེ་གསོན་བདུད་ཤི་གཤེད་དང་༔ ལྟས་ངན་མ་རུངས་ཐན་ལྟས་གཏོང་བ་རྣམས༔ གནོད་བྱེད་འདྲེ་གདོན་སྲི་ཡི་རིགས་རྣམས་ཀུན༔ ལིང་ག་འདི་ལ་ཛཿཧཱུྃ་བྃ་ཧོཿས་ཁུག༔ དེ་ནས་ཚོགས་ལིང་ཡིན་ན་ཚོགས་དུམ་ཤ་ཁྲག་གིས་སྦག་ལ༔ ཧཱུ་བྷྱོ༔ མ་ཁྲག་འཐུང་ཁྲོས་མའི་ཐུགས་ཀ་ནས༔ ལས་ཀྱི་ཌཱཀྐིས་སྟོང་གསུམ་གང་༔ གནོད་ཅིང་འཚེ་བའི་དགྲ་བགེགས་ཚོགས༔ གུང་ལ་བྱ་བ་ཁྱོད་ཀྱིས་ཤེས༔ ཁུག་ཅིག་རྡོ་རྗེ་ལྕགས་ཀྱུ་མ༔ ཆིངས་ཤིག་རྡོ་རྗེ་ཞགས་པ་མ༔ སྡོམས་ཤིག་རྡོ་རྗེ་ལྕགས་སྒྲོག་མ༔ མྱོས་པར་གྱིས་ཤིག་དྲིལ་བུ་མ། ལྷ་དང་ཕྲོལ་ཅིག་ཕྲ་མེན་མ༔ བདུད་དང་སྤྱོད་ཅིག་ཤ་ཟ་མ༔ དབུགས་དང་ཕྲོལ་ཅིག་དབུགས་ལེན་མ༔ རྣམ་ཤེས་སྤོར་ཅིག་ཌཱཀྐི་མ༔ ཤ་རུས་ཕྱེས་ཤིག་ཞིང་སྐྱོང་མ༔ དྲག་པོའི་ཕྲིན་ལས་མྱུར་འགྲུབ་མཛོད༔ དེ་ནས་གྲི་གུག་ཐོགས་ལ༔ ཧཱུྃ་བྷྱོ༔ ང་ནི་ཁྲོས་མ་ནག་མོའི་སྐུ༔ ཕྱག་ན་སྲོག་གཅོད་

[Full Size]

གྲི་གུག་བསྣམས༔ ཡར་རྩེ་རྡོ་རྗེ་རྩེ་ལྔ་ནི༔ ཡེ་ཤེས་ལྔ་ལྡན་དུག་ལྔ་སྒོལ༔ ཆང་བཟུང་ཆུ་སྲིན་རྒྱ་མདུད་འདི༔ འཁོར་འདས་གཅིག་ཏུ་འདུ་འཁོར་འདས་གཅིག་ཏུ་འདུས་པ་ཡིན༔ མར་གྱི་ཟངས་གྲི་འབར་བ་འདི༔ སྲིད་པའི་འདྲེ་གདོན་སྐྱེ་ཤི་གཅོད༔ བཏབ་ན་ལྷ་ཡང་རླག་པར་བྱེད༔ དགྲ་དང་བགེགས་ལ་སྨོས་ཅི་དགོས༔ ཡེ་ཤེས་ཌཱཀྐིའི་བཀའ་བྱུང་གིས༔ ལས་ཀྱི་མཁའ་འགྲོས་ལས་མཛོད་ཅིག༔ དགྲ་བགེགས་སྲོག་ལ་མཱ་ར་ཡ༔ ཨོཾ་བཛྲ་བྷ་ར་ཧི་ཀྲོ་ཏི་ཀཱི་ལི་ཧ་རི་ནི་ས་ལོ་ཀ་ཌཱཀྐི་ནཱི་བཛྲ་ཀཱི་ལི་ཀཱི་ལ་ཡ་དགྲ་བགེགས་མཱ་ར་ཡ་ཧཱུྃ་ཕཊཿ ཅེས་ཕུར་པ་བཏབ་ལ་ལིང་རོ་ཤ་དུམ་བྷནྡྷའི་སྣོད་དུ་བླུགས་ལ་གཏོར་མར་བསྟབ༔ ཧཱུྃ་བྷྱོཿ འཇིགས་བྱེད་ཁྲོས་མའི་ལྷ་ཚོགས་རྣམས༔ གནམ་ས་ཙམ་གྱི་ཞལ་ཕྱེས་ལ༔ གངས་རི་ཙམ་གྱི་མཆེ་བ་གཙིགས༔ གློག་དམར་ཙམ་གྱི་ལྗགས་བརྐྱང་ལ༔ བདག་ལ་སྡང་བའི་དགྲ་དང་བགེགས༔ ཚོགས་སུ་རོལ་ཅིག་ཁྲོས་མའི་ཚོགས༔ བཞེས་ཤིག་རོལ་ཅིག་མཁའ་འགྲོ་མ༔ རྣམ་ཤེས་མཁའ་སྤྱོད་གནས་སུ་དྲོངས༔ འཁྲུལ་མེད་མངོན་སངས་རྒྱས་པར་མཛོད༔ ཨོཾ་བཛྲ་བྷ་ར་ཧི་ཀྲོ་ཏི་ཀ་ལི་ཧ་རི་ནི་ས་ཌཱཀྐི་ནི་དགྲ་བགེགས་ཀྱི་ཤ་ཁྲག་ལ་ཁཱ་ཧི་ཁཱ་ཧི༔ ཞེས་

[Full Size]

ལིང་རོས་ཟློག་གཏོར་གསོས་ལ་བདུད་རྩིས་བྲན༔ སྨན་རཀྟ་གཏོར་མར་བྲན་ལ་སྤྲོ་ན་མཁའ་འགྲོ་འབུམ་བསྐུལ་བྱ་སྟེ༔ མཁའ་འགྲོ་འབུམ་བསྐུལ་ནི་འདི་སྐད་དོ༔ ཧཱུྃ་བྷྱོཿ ཕྱོགས་ཕྱོགས་དེ་ནི་ཕ་ཀི་ན༔ རི་བོ་ཆེན་པོའི་བྱང་གི་ཕྱོགས༔ དབུས་འགྱུར་ཚལ་གྱི་ནུབ་བྱང་མ༔ རི་བོ་ཐམས་ཅད་རུས་པའི་རི༔ ཆུ་ཀླུང་ཐམས་ཅད་ཁྲག་དང་རྣག༔ རྩི་ཤིང་ཐམས་ཅད་མདའ་དང་མདུང་༔ སྒྲ་སྐད་ཐམས་ཅད་སོད་དང་རྒྱོབ༔ རིགས་ལྔའི་སངས་རྒྱས་སྐྲག་པའི་གནས༔ ཕྱག་ན་རྡོ་རྗེ་འཇིགས་པའི་ས༔ ཁྲོ་བཅུ་རྒྱུ་བར་མི་ནུས་པའི༔ རབ་ཏུ་འཇིགས་པའི་གནས་མཆོག་དེར༔ གཙོ་མཆོག་ཁྲོས་མ་དེ་ན་བཞུགས༔ ཁྲོས་མ་རིགས་ལྔ་དེ་ན་བཞུགས༔ མཁའ་འགྲོ་སྡེ་བརྒྱད་དེ་ན་བཞུགས༔ ཧཱུྃ༔ རྟོག་མེད་ཕག་མོའི་ཞལ་ལས་བྱུང་བ་ཡི༔ དོན་དམ་སྟོང་ཉིད་རྟོགས་པའི་མཁའ་འགྲོ་འབུམ༔ དབུ་སྐྲ་དམར་ནག་སྤྲིན་ལྟར་གཏིབས་པ་ལ༔ ཐུགས་རྗེ་ཆར་ལྟར་འབེབས་པའི་མཁའ་འགྲོ་འབུམ༔ ཐོད་སྐམ་ལྔ་ཡིས་དབུ་ལ་བརྒྱན་པ་ནི༔ རིགས་ལྔས་འགྲོ་དོན་མཛད་པའི་མཁའ་འགྲོ་འབུམ༔ སྤྱན་གསུམ་སྡང་མིག་རབ་ཏུ་གཟིགས་པ་ལ༔ དུག་གསུམ་རྩད་ནས་གཅོད་པའི་མཁའ་འགྲོ་འབུམ་

[Full Size]

ཞལ་གྱི་ཁྲོ་གཉེར་ལྔ་དང་ལྡན་པ་ལ༔ དུག་ལྔ་རང་སར་གྲོལ་བའི་མཁའ་འགྲོ་འབུམ༔ ཞལ་གདངས་ལྗགས་ཀྱང་རབ་ཏུ་བསྐྱོད་པ་ལ༔ སྤྲུལ་པ་གློག་ལྟར་འཁྱུག་པའི་མཁའ་འགྲོ་འབུམ༔ འཇིགས་པའི་མཆེ་བ་རབ་ཏུ་གཙིགས་པ་ཡི༔ སྐྱེ་ཤི་རྩད་ནས་གཅོད་པའི་མཁའ་འགྲོ་འབུམ༔ དགྱེས་པའི་གད་མོ་ཧི་ཧི་བཞད་པ་ལ༔ འཁོར་བ་སྐམ་སར་འདོན་པའི་མཁའ་འགྲོ་འབུམ༔ ཁྲོས་པའི་གད་མོ་ཧ་ཧི་སྒྲོག་པ་ལ༔ བདུད་སྲིན་ཐལ་བར་བརླག་པའི་མཁའ་འགྲོ་འབུམ༔ གཡས་ཀྱི་གྲི་གུག་རབ་ཏུ་འབར་བ་ལ༔ སྲོག་གཅོད་དབུགས་ལེན་བྱེད་པའི་མཁའ་འགྲོ་འབུམ༔ གཡོན་གྱི་ཐོད་ཁྲག་དམར་པོ་གསོལ་བ་ལ༔ དམ་ཉམས་སྙིང་ཁྲག་འཇིབ་པའི་མཁའ་འགྲོ་འབུམ༔ ཁ་ཊྭཱཾ་ག་ནི་རྩེ་གསུམ་བསྣམས་པ་ལ༔ དུག་གསུམ་རྩད་ནས་གཅོད་པའི་མཁའ་འགྲོ་འབུམ༔ ཐོད་པ་སྐམ་རློན་གསུམ་གྱིས་བརྒྱན་པ་ལ༔ ཁམས་གསུམ་དབང་དུ་སྡུད་པའི་མཁའ་འགྲོ་འབུམ༔ མཐིང་ནག་དར་གྱི་ཅོད་པན་འཕུར་བ་ལ༔ སྲིད་གསུམ་ཟིལ་གྱིས་གནོན་པའི་མཁའ་འགྲོ་འབུམ༔ ཌཱ་རུ་གསེར་གྱི་རྡེའུ་ཆུང་འཁྲོལ་བ་ལ༔ སྙན་བརྒྱུད་གསང་བ་

[Full Size]

འཛིན་པའི་མཁའ་འགྲོ་འབུམ༔ དྲང་ཞིང་ཡུ་བ་དཀར་པོ་འདྲིལ་བ་ལ༔ ལྷ་མིན་གཡུལ་ངོ་ཟློག་པའི་མཁའ་འགྲོ་འབུམ༔ སྙན་ཆ་མགུལ་ཆུན་རབ་ཏུ་མཛེས་པ་ལ༔ ཡབ་ལ་བསྙེན་བཀུར་བྱེད་པའི་མཁའ་འགྲོ་འབུམ༔ ཕྱག་རྒྱ་དྲུག་གིས་རབ་ཏུ་བརྒྱན་པ་ལ༔ ཕ་རོལ་ཕྱིན་དྲུག་རྫོགས་པའི་མཁའ་འགྲོ་འབུམ༔ གདུག་པ་སྦྲུལ་གྱི་ག་ཤལ་མཛེས་པ་ལ༔ མཛེ་ནད་ཁྲག་སྐྱུག་གཏོང་བའི་མཁའ་འགྲོ་འབུམ༔ ཐོད་རློན་ལྔ་བཅུའི་དོ་ཤལ་བྱས་པ་ལ༔ འདུ་བྱེད་ལྔ་བཅུ་དག་པའི་མཁའ་འགྲོ་འབུམ༔ ང་རྒྱལ་སྟག་གི་ཤམ་ཐབས་བྱེད་པ་ལ༔ སྡིག་ཅན་ཟིལ་གྱིས་གནོན་པའི་མཁའ་འགྲོ་འབུམ༔ གཅེར་བུ་སྐྲ་གྲོལ་གར་གྱིས་བཞུགས་པ་ལ༔ ལེགས་ཉེས་ཞལ་ལྕེ་གཅོད་པའི་མཁའ་འགྲོ་འབུམ༔ གཡས་བསྐུམ་གཡོན་བརྐྱང་ཚུལ་གྱིས་བཞུགས་པ་ལ༔ རྟོག་མེད་ཉམས་དང་ལྡན་པའི་མཁའ་འགྲོ་འབུམ༔ མེ་རི་མེ་དཔུང་དབུས་ན་བཞུགས་པ་ལ༔ ཐ་དད་རྟོག་པ་སྲེག་པའི་མཁའ་འགྲོ་འབུམ༔ རྟོག་མེད་རོ་ཡི་གདན་ལ་བཞུགས་པ་ལ༔ དུར་ཁྲོད་ཤ་ལ་རོལ་བའི་མཁའ་འགྲོ་འབུམ༔ སྐུ་མདོག་མཐིང་ག་རབ་ཏུ་རྔམས་པ་ལ༔ གཏི་མུག་རྩད་ནས་གཅོད་པའི་

[Full Size]

མཁའ་འགྲོ་འབུམ༔ སྐུ་སྤྲུལ་མཁའ་འགྲོ་འབུམ་ཚོ་ཉི་ཤུ་དྲུག༔ མཁའ་འགྲོའི་བརྡ་སྐད་ཏི་རི་རི༔ དམར་གྱི་གཏོར་མ་འདི་བཞེས་ལ༔ དོ་ནུབ་སྡང་བའི་དགྲ་ལ་ཕ༔ བར་ཆད་བྱེད་པའི་བགེགས་ལ་ཡ༔ སྐུ་མདོག་དཀར་མོ་རབ་ཏུ་འཚེར་བ་ལོས༔ ཞེ་སྡང་རྩད་ནས་གཅོད་པའི་མཁའ་འགྲོ་འབུམ༔ སྐུ་མདོག་སེར་མོ་རབ་ཏུ་མཛེས་པ་ལ༔ ང་རྒྱལ་རྩད་ནས་གཅོད་པའི་མཁའ་འགྲོ་འབུམ༔ སྐུ་མདོག་དམར་མོ་མདངས་དང་ལྡན་པ་ལ༔ འདོད་ཆགས་རང་སར་གྲོལ་བའི་མཁའ་འགྲོ་འབུམ༔ སྐུ་མདོག་ལྗང་མོ་རབ་ཏུ་བརྗིད་པ་ལ༔ ཕྲག་དོག་རྩད་ནས་གཅོད་པའི་མཁའ་འགྲོ་འབུམ༔ ཤར་གྱི་ཕྱོགས་ཀྱི་དུར་ཁྲོད་ནི༔ རྡོ་རྗེ་རིགས་ཀྱི་མཁའ་འགྲོ་འབུམ༔ ་ལྷོ་ཡི་ཕྱོགས་ཀྱི་དུར་ཁྲོད་ན༔ རིན་ཆེན་རིགས་ཀྱི་མཁའ་འགྲོ་འབུམ༔ ནུབ་ཀྱི་ཕྱོགས་ཀྱི་དུར་ཁྲོད་ན༔ པདྨ་རིགས་ཀྱི་མཁའ་འགྲོ་འབུམ༔ བྱང་གི་ཕྱོགས་ཀྱི་དུར་ཁྲོད་ན༔ ལས་ཀྱི་རིགས་ཀྱི་མཁའ་འགྲོ་འབུམ༔ ཤར་ལྷོའི་ཕྱོགས་ཀྱི་དུར་ཁྲོད་ན༔ དམ་ཚིག་རིགས་ཀྱི་མཁའ་འགྲོ་འབུམ༔ ལྷོ་ནུབ་ཕྱོགས་ཀྱི་དུར་ཁྲོད་ན༔ སྣ་ཚོགས་རིགས་ཀྱི་མཁའ་འགྲོ་འབུམ༔ ནུབ་

[Full Size]

བྱང་ཕྱོགས་ཀྱི་དུར་ཁྲོད་ན༔ ཐམས་ཅད་རིགས་ཀྱི་མཁའ་འགྲོ་འབུམ༔ བྱང་ཤར་ཕྱོགས་ཀྱི་དུར་ཁྲོད་ན༔ འཇིག་རྟེན་རིགས་ཀྱི་མཁའ་འགྲོ་འབུམ༔ མཁའ་འགྲོའི་བརྡ་སྐད་དི་རི་རི༔ དམར་གྱི་གཏོར་མ་འདི་བཞེས་ལ༔ དོ་ནུབ་སྡང་བའི་དགྲ་ལ་ཡ༔ བར་ཆད་བྱེད་པའི་བགེགས་ལ་ཡ༔ དམ་ཉམས་དགྲ་བོ་བསྒྲལ་བའི་དུས་ལ་བབ༔ བར་ཆད་བགེགས་རྣམས་བཟློག་པའི་དུས་ལ་བབ༔ ཅེས་བསྐུལ༔ གཏོར་ཆུང་བརྒྱད་མདོས་སུ་ཕུལ༔ དེ་ནས་བཟློག་པ་ནི༔ མཁའ་འགྲོ་ཐམས་ཅད་དགྲ་བོའི་སྟེང་དུ་ཆས་པར་བསམས་ལ༔ དགྲ་བགེགས་བྱད་མ་ལྟས་ངན་ཐམས་ཅད་བཟློག་པར་བསམས་ལ་འདི་སྐད་དོ༔ ཧཱུྃ་བྷོ༔ ནུབ་ཕྱོགས་ཨོ་རྒྱན་སྤྲུལ་པའི་ཞིང་ཁམས་ནས༔ རབ་འཇིགས་དུར་ཁྲོད་བརྒྱད་ཀྱིས་བསྐོར་བའི་དབུས༔ རིན་ཆེན་སྣ་ལྔ་ཐོད་པའི་གཞལ་ཡས་ནས༔ ཆོས་འབྱུང་རུ་ཏྲ་བམ་ཆེན་བསྣོལ་བའི་སྟེང་༔ རྒྱལ་བའི་བསྐྱེད་ཡུམ་རྡོ་རྗེ་རྣལ་འབྱོར་མ༔ སྐུ་མདོག་མཐིང་ནག་ཆར་སྤྲིན་གཏིབས་པ་འདྲ༔ མ་རིག་འཁོར་བའི་བག་ཆགས་བཟློག་ཏུ་གསོལ༔ ཟིལ་གནོན་ཕག་ཞལ་ནག་མོ་ངུར་པ་ཡིས༔ ཁྲོ་བོ་ཁྲོ་མོའི་ཟིལ་གནོན་བཟློག་ཏུ་གསོལ༔ སྤྱན་གསུམ་བསྐལ་པའི་མེ་ལྟར་འབར་བ་

[Full Size]

ཡིས༔ སྲིད་གསུམ་ལྷ་འདྲེའི་གནོད་པ་བཟློག་ཏུ་གསོལ༔ ཞལ་གདངས་ལྗགས་འདྲིལ་མཆེ་བ་གཙིགས་པ་ནི༔ བར་ཆད་བདུད་ཀྱི་དམག་དཔུང་བཟློག་ཏུ་གསོལ༔ རལ་པའི་གསེབ་ནས་ཁྲོ་ཆུང་ཕྱོགས་བཅུར་འགྱེད༔ ཕྱོགས་སྐྱོང་བཅུ་ཡི་གདོན་ཚོགས་བཟློག་ཏུ་གསོལ༔ ཐོད་སྐམ་ལྔ་ཡིས་དབུ་ལ་བརྒྱན་པ་ནི༔ ཉོན་མོངས་དུག་ལྔའི་དམག་དཔུང་བཟློག་ཏུ་གསོལ༔ ཐོད་རློན་ལྔ་བཅུས་དོ་ཤལ་བྱས་པ་ལས༔ ལྟས་ངན་བརྒྱད་ཅུ་རྩ་བརྒྱད་བཟློག་ཏུ་གསོལ༔ སྦྲུལ་རིགས་ལྔ་ཡིས་སྐུ་ལ་བརྒྱན་པ་ནི༔ ཀླུ་དང་ས་བདག་གནོད་པ་བཟློག་ཏུ་གསོལ༔ གླང་ཀོ་ཞིང་ལྤགས་སྟག་ཤམ་བརྒྱན་པ་ནི༔ ལས་ཀྱི་གཤིན་རྗེའི་ཕོ་ཉ་བཟློག་ཏུ་གསོལ༔ རུས་པའི་རྒྱན་དྲུག་སྐུ་ལ་གསོལ་བ་ནི༔ མ་མོ་མཁའ་འགྲོའི་གནོད་པ་བཟློག་ཏུ་གསོལ༔ ཕྱག་གཡས་རྡོ་རྗེའི་གྲི་གུག་ཕྱར་བ་ཡིས༔ གཟའ་དང་རྒྱུ་སྐར་གནོད་པ་བཟློག་ཏུ་གསོལ༔ ཕྱག་གཡོན་ཐོད་ཁྲག་ཐུགས་ཀར་བསྣམས་པ་ནི༔ མ་མོ་མཁའ་འགྲོའི་ཁྲག་ནད་དལ་ཡམས་ཟློག༔ ཁ་ཊྭཱཾ་རྩེ་གསུམ་མཆན་དུ་བསྒྲེང་བ་ནི༔ ཕོ་རྒྱུད་རྣམས་ཀྱི་གནོད་པ་བཟློག་ཏུ་གསོལ༔ དར་ནག་སྟོད་

[Full Size]

གཡོགས་སྨད་དཀྲིས་བྱས་པ་ནི༔ ནག་མོ་བདུད་ཀྱི་དམག་དཔུང་བཟློག་ཏུ་གསོལ༔ བདུད་ཀྱི་ཁྲམ་ཤིང་མཆན་དུ་བཅུག་པ་ནི༔ བདུད་དང་གཤིན་རྗེའི་ཁྲམ་ཁ་བཟློག་ཏུ་གསོལ༔ རིན་ཆེན་དབུ་རྒྱན་ཕྱག་གདུབ་བྱས་པ་ནི༔ དཀོར་བདག་འགོང་པོའི་གནོད་པ་བཟློག་ཏུ་གསོལ༔ ཞབས་གཉིས་བརྐྱང་བསྐུམ་གར་སྟབས་བསྐྲད་པ་ནི༔ འཇིག་རྟེན་མཁའ་འགྲོའི་སུན་མ་བཟློག་ཏུ་གསོལ༔ ཡེ་ཤེས་མེ་དཔུང་དབུས་ན་བཞུགས་པ་ནི༔ ངན་སྔགས་བྱད་སྟེམས་ཐམས་ཅད་བཟློག་ཏུ་གསོལ༔ བྷྱོཿ སྐུ་ཡི་སྤྲུལ་པ་བདེ་ཆེན་དཀར་མོ་ལ༔ གཏི་མུག་རྩད་གཅོད་ཁྲོ་མོ་དཀར་མོ་འབུམ༔ གཟུགས་སྣང་མཁའ་འགྲོ་འབུམ་ཕྲག་དབང་དུ་སྡུད༔ དམ་ཉམས་དགྲ་བགེགས་ཤ་ཁྲག་འདི་ལ་རོལ༔ སྲིད་པའི་འདྲེ་གདོན་དགྲ་ལ་བཟློག་ཏུ་གསོལ༔ ཡོན་ཏན་སྤྲུལ་པ་སེར་མོ་དོན་གྲུབ་ལ༔ ང་རྒྱལ་རྩད་གཅོད་ཁྲོ་མོ་སེར་མོ་འབུམ༔ རྫུ་འཕྲུལ་མཁའ་འགྲོ་འབུམ་ཕྲག་དབང་དུ་སྡུད༔ དམ་ཉམས་དགྲ་བགེགས་ཤ་ཁྲག་འདི་ལ་རོལ༔ སྲིད་པའི་འདྲེ་གདོན་དགྲ་ལ་བཟློག་ཏུ་གསོལ༔ གསུང་གི་སྤྲུལ་པ་དམར་མོ་སྒྲ་སྒྲོག་མ༔ འདོད་ཆགས་རྩད་གཅོད་ཁྲོ་མོ་དམར་

[Full Size]

མོ་འབུམ༔ སྐད་སྒྲོག་མཁའ་འགྲོ་འབུམ་ཕྲག་དབང་དུ་སྡུད༔ དམ་ཉམས་དགྲ་བགེགས་ཤ་ཁྲག་འདི་ལ་རོལ༔ སྲིད་པའི་འདྲེ་གདོན་དགྲ་ལ་བཟློག་ཏུ་གསོལ༔ ཕྲིན་ལས་སྤྲུལ་པ་སྣ་ཚོགས་མཐར་ཕྱིན་མ་ཕྲག་དོག་རྩད་གཅོད་ཁྲོ་མོ་ནག་མོ་འབུམ༔ བརྟུལ་ཞུགས་མཁའ་འགྲོ་འབུམ་ཕྲག་དབང་དུ་སྡུད༔ དམ་ཉམས་དགྲ་བགེགས་ཤ་ཁྲག་འདི་ལ་རོལ༔ སྲིད་པའི་འདྲེ་གདོན་དགྲ་ལ་བཟློག་ཏུ་གསོལ༔ ཧཱུྃ༔ ནུབ་ཕྱོགས་ཨོ་རྒྱན་དུར་ཁྲོད་ནས༔ བདེ་གཤེགས་རྡོ་རྗེ་ཕག་མོ་ཡིས༔ མ་མོ་མཁའ་འགྲོའི་རིམས་ཁ་སྡང་བའི་དགྲ་ལ་ཟློག༔ བྷྱོཿ ཤར་ཕྱོགས་གཏུམ་དྲག་དུར་ཁྲོད་ནས༔ རྡོ་རྗེ་མཁའ་འགྲོ་འཇིགས་ཚུལ་ཅན༔ གིང་གི་ཐན་ལྟས་དགྲ་ལ་ཟློག༔ ལྷོ་ཕྱོགས་གད་རྒྱངས་དུར་ཁྲོད་ནས༔ རིན་ཆེན་མཁའ་འགྲོ་གཟི་བརྗིད་ཅན༔ གཤིན་རྗེའི་ལྟས་ངན་དགྲ་ལ་ཟློག༔ ནུབ་ཕྱོགས་པདྨ་འཁྱིལ་བའི་དུར་ཁྲོད་ནས༔ པདྨ་མཁའ་འགྲོ་དྲི་མེད་མ༔ བཙན་གྱི་ལྟས་ངན་དགྲ་ལ་ཟློག༔ བྱང་ཕྱོགས་ཀཱི་ལ་སྒྲོག་པའི་དུར་ཁྲོད་ནས༔ ལས་ཀྱི་མཁའ་འགྲོ་བདེ་བ་ཅན༔ གནོད་སྦྱིན་ལྟས་ངན་དགྲ་ལ་ཟློག༔ ཤར་ལྷོ་རབ་།

[Full Size]

འཇིགས་དུར་ཁྲོད་ནས༔ དམ་ཚིག་མཁའ་འགྲོ་དམིགས་པ་ཅིན༔ ཀླུ་ཡི་ལྟས་ངན་དགྲ་ལ་ཟློག༔ ལྷོ་ནུབ་གཏུམ་པོའི་དུར་ཁྲོད་ནས༔ སྣ་ཚོགས་མཁའ་འགྲོ་མི་ཐུབ་མས༔ གཟའ་ཡི་ལྟས་ངན་དགྲ་ལ་ཟློག༔ ནུབ་བྱང་རབ་གཏུམ་དུར་ཁྲོད་ནས༔ ཐམས་ཅད་མཁའ་འགྲོ་ཀུན་རྒྱུ་མས༔ སྲིན་པོའི་ལྟས་ངན་དགྲ་ལ་ཟློག༔ བྱང་ཤར་རྒྱུག་བྱེད་དུར་ཁྲོད་ནས༔ རྒྱུད་འཛིན་འཇིག་རྟེན་མཁའ་འགྲོ་མས༔ མ་མོའི་ལྟས་ངན་དགྲ་ལ་ཟློག༔ བྷྱོཿ ཤར་གྱི་སྒོ་མ་ཁ་གདོང་མས༔ འགུགས་བྱེད་མ་ཚོགས་དབང་སྡུད་ལ༔ ལྕགས་ཀྱུ་ཅན་གྱི་གནོད་པ་དགྲ་ལ་ཟློག༔ ལྷོ་ཡི་སྒོ་མ་ཕག་གདོང་མས༔ འཆིང་བྱེད་མ་ཚོགས་དབང་སྡུད་ལ༔ ཞགས་པ་ཅན་གྱི་ཕོ་ཉ་དགྲ་ལ་ཟློག༔ ནུབ་ཀྱི་སྒོ་མ་ཁྱི་གདོང་མ༔ སྡོམ་བྱེད་མ་ཚོགས་དབང་སྡུད་ལ༔ ལྕགས་སྒྲོག་ཅན་གྱི་བྱད་ཁ་དགྲ་ལ་ཟློག༔ བྱང་གི་སྒོ་མ་འུག་གདོང་མ༔ དབྱེན་བྱེད་མ་ཚོགས་དབང་སྡུད་ལ༔ དྲིལ་བུ་ཅན་གྱི་ཆོ་འཕྲུལ་དགྲ་ལ་ཟློག༔ ལས་ཀྱི་མཁའ་འགྲོ་ནག་མོ་འབུམ༔ འདུ་བ་རྣམ་བཞི་དགྲ་ལ་ཟློག༔ བད་ཀན་དཀར་སྨུག་དགྲ་ལ་ཟློག༔ མཁྲིས་པ་བཤལ་ཡ་དགྲ་ལ་ཟློག༔ རླུང་

[Full Size]

སྨྱོ་འབོག་པ་དགྲ་ལ་ཟློག༔ ཁྲག་ནད་དམར་བཤལ་དགྲ་ལ་ཟློག༔ བྷྱོཿ ལས་ཀྱི་མཁའ་འགྲོ་དཀར་མོ་འབུམ༔ སྨྱོ་བ་ཉེར་ལྔ་དགྲ་ལ་ཟློག༔ སྨྱོ་འབོག་བརྒྱལ་ནད་དགྲ་ལ་ཟློག༔ ལྐུགས་དང་འདར་བུ་དགྲ་ལ་ཟློག༔ རླུང་སྨྱོ་ཆེན་པོ་དགྲ་ལ་ཟློག༔ བྷྱོཿ ལས་ཀྱི་མཁའ་འགྲོ་སེར་མོ་འབུམ༔ མཛེ་རིགས་བཅོ་བརྒྱད་དགྲ་ལ་ཟློག༔ མཛེ་ནད་འབྲུམ་ནད་དགྲ་ལ་ཟློག༔ སིབ་དང་བས་ལྡག་དགྲ་ལ་ཟློག༔ དྲེགས་དང་གྲུམ་བུ་དགྲ་ལ་ཟློག༔ ལྷོག་པ་འབྲས་ཆེན་དགྲ་ལ་ཟློག༔ སྐེམ་པ་གཡེམ་པ་དགྲ་ལ་ཟློག༔ ཤུ་བ་རྒྱ་ཐོར་དགྲ་ལ་ཟློག༔ རླུང་སྐམ་འབྲས་ཆེན་དགྲ་ལ་ཟློག༔ ཕོལ་མིག་རྐང་ནད་དགྲ་ལ་ཟློག༔ ཚ་བ་གྲང་བ་དགྲ་ལ་ཟློག༔ བྷྱོཿ ལས་ཀྱི་མཁའ་འགྲོ་དམར་མོ་འབུམ༔ རིམས་ནད་དལ་ཡམས་དགྲ་ལ་ཟློག༔ གློ་སྙིང་མཆིན་གཟེར་དགྲ་ལ་ཟློག༔ རྒྱུ་གཟེར་ཁྲག་ནད་དགྲ་ལ་ཟློག༔ དམར་བཤལ་སྐྱ་བཤལ་དགྲ་ལ་ཟློག༔ བྷྱོཿ ལས་ཀྱི་མཁའ་འགྲོ་ལྗང་མོ་འབུམ༔ མཚོན་འཁྲུག་སྣ་བདུན་དགྲ་ལ་ཟློག༔ མདའ་མདུང་རལ་གྲི་དགྲ་ལ་ཟློག༔ ཁ་ཊྭཱཾ་ཏྲི་ཤུལ་དགྲ་ལ་ཟློག༔ སྒྱོགས་དང་འཁྲུལ་

[Full Size]

འཁོར་དགྲ་ལ་ཟློག༔ དགྲ་སྟ་ཐོ་བ་དགྲ་ལ་ཟློག༔ གྲི་སྟོང་བེར་དབྱུག་དགྲ་ལ་ཟློག༔ གཏུན་ཤིང་མདུང་སྟོང་དགྲ་ལ་ཟློག༔ སོག་ལེ་འཁོར་ལོ་དགྲ་ལ་ཟློག་མཚོན་གྱི་བསྐལ་པ་དགྲ་ལ་ཟློག༔ སརྦ་ཌཱཀྐི་ནི་བྷོ་བྷོ་ཟློག་ཟློག༔ དེ་ནས་བཟློག་བསྒྱུར་ནི༔ བྷྱོཿ གཞན་ཡང་བཟློག་ཅིང་བསྒྱུར་བ་ནི༔ ཆག་ཆེན་ཉམ་ང་དགྲ་ལ་སྒྱུར༔ ལོ་སྐག་ཟླ་སྐག་དགྲ་ལ་སྒྱུར༔ ཟ་མའི་བདུན་ཟུར་སྐག་རྣམས་སྒྱུར༔ ཟོད་གཏོང་རྦད་འདྲེ་དགྲ་ལ་སྒྱུར༔ འབྱུང་བའི་གཙུག་ལག་ངན་པ་སྒྱུར༔ ལོ་དང་རྟེན་འབྲེལ་ངན་པ་དགྲ་ལ་སྒྱུར་རྨིས་ལྟས་མཚན་མ་ངན་པ་དགྲ་ལ་སྒྱུར༔ ཐན་དང་ལྟས་ངན་ཆོ་འཕྲུལ་དགྲ་ལ་སྒྱུར༔ ཡས་ཀྱི་བདུད་གཡོས་དགྲ་ལ་སྒྱུར༔ མས་ཀྱི་སྲི་ལངས་དགྲ་ལ་སྒྱུར༔ བར་གྱི་བཙན་ཁྲོས་དགྲ་ལ་སྒྱུར༔ ཕ་ཚན་རྒྱབ་འདྲེ་དགྲ་ལ་སྒྱུར༔ དར་ཚན་སྟོང་འདྲེ་དགྲ་ལ་སྒྱུར༔ མ་བུའི་བྱུར་འདྲེ་དགྲ་ལ་སྒྱུར༔ ཕུ་ནུས་རུས་འདྲེ་དགྲ་ལ་སྒྱུར༔ ཕྱུགས་ཀྱི་གོད་འདྲེ་དགྲ་ལ་སྒྱུར༔ ཆེ་སྲི་ཆུང་སྲི་དགྲ་ལ་སྒྱུར༔ ཟ་འདྲེ་ཤི་གཤེད་དགྲ་ལ་སྒྱུར༔ ལྟག་པའི་བདུད་བབས་དགྲ་ལ་སྒྱུར༔ དཔྲལ་བའི་གཤེད་འཁོར་དགྲ་ལ་སྒྱུར༔ ཕོ་བདུད་དལ་

[Full Size]

ཁ་གཡས་སུ་སྒྱུར༔ མོ་བདུད་དལ་ཁ་གཡོན་དུ་སྒྱུར༔ སྤྱི་བདུད་དལ་ཁ་མཁའ་ལ་སྒྱུར༔ སྔགས་པའི་བྱད་ཟོར་ཕུར་ཁ་དགྲ་ལ་སྒྱུར༔ བནྡེའི་གཏོར་ཟོར་དགྲ་ལ་སྒྱུར༔ བོན་གྱི་བྱད་ཁ་གཏད་མནན་དགྲ་ལ་སྒྱུར༔ ཕུར་པའི་དབལ་ཟོར་དགྲ་ལ་སྒྱུར༔ དྲང་སྲོང་དམོད་མོ་དགྲ་ལ་སྒྱུར༔ རང་གཤེད་རང་འཁོར་དགྲ་ལ་སྒྱུར༔ མི་ནད་ཕྱུགས་ནད་ཐམས་ཅད་དགྲ་ལ་སྒྱུར༔ ནད་རིགས་བཞི་བརྒྱ་རྩ་བརྒྱད་དགྲ་ལ་སྒྱུར༔ བགེགས་རིགས་སྟོང་ཕྲག་བརྒྱད་ཅུ་དགྲ་ལ་སྒྱུར༔ ཡེ་འདྲོག་སུམ་བརྒྱ་དྲུག་ཅུ་དགྲ་ལ་སྒྱུར༔ བྱིས་པའི་གདོན་ཆེན་བཅོ་ལྔ་དགྲ་ལ་སྒྱུར་རྟ་ནད་འཚེར་རྩུབ་ཐམས་ཅད་དགྲ་ལ་སྒྱུར༔ ཕྱུགས་ཀྱི་གོད་ཡམས་ཐམས་ཅད་དགྲ་ལ་སྒྱུར༔ ཕྱུགས་ལ་ལྟས་ངན་ཁྲིད་པ་དགྲ་ལ་སྒྱུར༔ བསེ་རིག་སྲིས་ལ་རྐུ་བ་དགྲ་ལ་སྒྱུར༔ གློ་བུར་བརྒྱད་ཅུ་རྩ་གཅིག་དགྲ་ལ་སྒྱུར༔ སྐག་རིགས་བདུན་བརྒྱ་ཉི་ཤུ་དགྲ་ལ་སྒྱུར༔ དུས་མིན་འཆི་བ་བཅོ་བརྒྱད་དགྲ་ལ་སྒྱུར༔ རླུང་གི་སེམས་ཀྱི་ཕུང་ཤིང་དགྲ་ལ་སྒྱུར༔ སིལ་གྱི་ཕུང་ཤིག་ཐམས་ཅད་དགྲ་ལ་སྒྱུར༔ ལྟས་ངན་ཉི་ཁྲི་ཆིག་སྟོང་དགྲ་ལ་སྒྱུར༔ མི་མཐུན་ཕྱོགས་རྣམས་

[Full Size]

ཐམས་ཅད་དགྲ་ལ་སྒྱུར༔ བཟློག་གོ་ཆག་ཆེན་ཉམ་ང་ཟློག༔ བསྒྱུར་རོ་ལྟས་ངན་དགྲ་ལ་སྒྱུར༔ སྡང་དགྲའི་གནོད་བྱེད་ཀྱི་སྟེང་དུ་བྷྱོ་བྷྱོ༔ ཟློག་ཟློག༔ སྒྱུར་སྒྱུར༔ མཱ་ར་ཡ་དགྲ་བོ་བྱད་མ་གནོད་བྱེད་བྷྱོཿབྷྱོཿཟློག་ཟློག༔ ཨོཾ་ཧ་དྷེ་མོ་ཧ་ཧྲཱིཿཏ་ཡ༔ སི་ཏི་ཧ་རི་ཏ་ཡཱ་ཟློག་ཟློག༔ ཁ་ལིང་ཏ་ཡཱ༔ མཱ་ར་ཡ་ནན༔ ཧཱུྃ་ཧཱུྃ༔ ཕཊཿཕཊཿ བྷྱོཿབྷྱོཿ ས་མ་ཡ་ཟློག་ཟློག༔ ཨ་ལ་ལ་པྲ་མོ་ཧེ་བྷྱོ་བྷྱོཿ ཨ་ཏི་ཀྲ་མ་ཟློག་ཟློག༔ རྦད་འདྲེ་རྦོད་གཏོང་ཐམས་ཅད་ཟློག་ཟློག༔ ཅེས་ཟློག་སྔགས་ཅི་མང་བཟླས༔ ཐལ་མོ་བརྡབ༔ དེ་ནས་རྩང་གྱེར་རྒྱས་བསྡུས་གང་ལྕོགས་འདོན་དུ་རུང་ངོ་༔ འདིའི་ལུགས་ཀྱི་བསྡུས་པ་ཁོ་ནས་ཆོག༔ སྟོང་ཉིད་ཁྲོས་མ་ནག་མོའི་རྩང་གྱེར་བསྡུས་པ་ཐན་ཟློག་ནི༔ ཧཱུྃ༔ ཤར་ཕྱོགས་རྡོ་རྗེ་མ་བདུན་ནི༔ མིང་པོ་ཚངས་པ་ལ་སོགས་ཏེ༔ རྣལ་འབྱོར་ཀུན་གྱི་ཡུམ་གཅིག་མ༔ ཁྱད་པར་རྣལ་འབྱོར་ཀུན་གྱི་ཡུམ༔ གདུག་པའི་རྩང་ལ་སྤྱན་འདྲེན་གཤེགས་སུ་གསོལ༔ གདུག་པའི་རྩང་དང་གཉིས་སུ་མེད༔ དགྲ་བོའི་སྲོག་གི་ཤན་པ་མཛོད༔ ཧཱུྃ༔ ལྷོ་ཕྱོགས་རིན་ཆེན་མ་བདུན་ནི༔ མིང་པོ་གཤིན་རྗེ་ལ་སོགས་ཏེ༔ རྣལ་འབྱོར་ཀུན་གྱི་སྲིང་གཅིག་མ༔ ཁྱད་པར་རྣལ་

[Full Size]

འབྱོར་བདག་གི་སྲིང་༔ གདུག་པའི་རྩང་ལ་སྤྱན་འདྲེན་གཤེགས་སུ་གསོལ༔ གདུག་པའི་རྩང་དང་གཉིས་སུ་མེད༔ དགྲ་བོའི་སྲོག་གི་ཤན་པ་མཛོད༔ ཧཱུྃ༔ ནུབ་ཕྱོགས་པད་མའི་མ་བདུན་ནི༔ མིང་པོ་ཀླུ་དབང་ལ་སོགས་ཏེ༔ རྣལ་འབྱོར་ཀུན་གྱི་གྲོགས་གཅིག་མ༔ ཁྱད་པར་རྣལ་འབྱོར་བདག་གི་གྲོགས༔ གདུག་པའི་རྩང་ལ་སྤྱན་འདྲེན་གཤེགས་སུ་གསོལ༔ གདུག་པའི་རྩང་དང་གཉིས་སུ་མེད༔ དགྲ་བོའི་སྲོག་གི་ཤན་པ་མཛོད༔ ཧཱུྃ༔ བྱང་ཕྱོགས་ལས་ཀྱི་མ་བདུན་ནི༔ མིང་པོ་གནོད་སྦྱིན་ལ་སོགས་ཏེ༔ རྣལ་འབྱོར་ཀུན་གྱི་བྲན་གཅིག་མ༔ ཁྱད་པར་རྣལ་འབྱོར་བདག་གི་བྲན༔ གདུག་པའི་རྩང་ལ་སྤྱན་འདྲེན་གཤེགས་སུ་གསོལ༔ གདུག་པའི་རྩང་དང་གཉིས་སུ་མེད༔ དགྲ་བོའི་སྲོག་གི་ཤན་པ་མཛོད༔ ཧཱུྃ༔ དབང་ཕྱུག་ཆེན་མོ་ཉི་ཤུ་བརྒྱད༔ བུད་མེད་ལུས་ལ་མགོ་བརྙན་ཅན༔ གཅེར་བུ་ལུས་ལ་དུར་ཁྲོད་ཆས༔ ལག་ན་མཚོན་ཆ་སྣ་ཚོགས་ཐོགས༔ གདུག་པའི་རྩང་ལ་སྤྱན་འདྲེན་གཤེགས་སུ་གསོལ༔ གདུག་པའི་རྩང་དང་གཉིས་སུ་མེད༔ དགྲ་བོའི་སྲོག་གི་ཤན་པ་མཛོད༔ ཧཱུྃ༔ ཤར་གྱི་ཕྱོགས་

[Full Size]

ནས་ཆུང་འཛུགས་པ༔ རྡོ་རྗེ་མཁའ་འགྲོ་སྒྲུབ་པའི་རྩང་༔ དཀར་མོ་ཞི་བའི་ལས་བྱེད་བདུན༔ སྐེད་པ་རྒྱ་མདུད་ཧཱུྃ་ལས་སྐྱེས༔ ཡར་གྱི་རྩེ་ལ་བྱ་རྒོད་ལྡིང་༔ མར་གྱི་རྩེ་ལ་སྟག་གཟིག་རྔམ༔ རྩང་གི་དྲ་མིག་ཐམས་ཅད་ལ༔ གདུག་པའི་ཁྲོ་མོ་འབུམ་འབུམ་འཕྲོ༔ དགྲ་བོ་མ་ཤོར་ཀཱི་ལ་ཡ༔ ཧཱུྃ༔ ལྷོ་ཡི་ཕྱོགས་ནས་རྩང་འཛུགས་པ༔ རིན་ཆེན་མཁའ་འགྲོ་སྒྲུབ་པའི་རྩང་༔ སེར་མོ་རྒྱས་པའི་ལས་བྱེད་བདུན༔ སྐེད་པ་རྒྱ་མདུད་ལམ་ལས་སྐྱེས༔ ཡར་གྱི་རྩེ་ལ་འུག་པ་གྲག༔ མར་གྱི་རྩེ་ལ་དྲེད་མོང་རྔམ༔ རྩང་གི་དྲ་མིག་ཐམས་ཅད་ལ༔ གདུག་པའི་ཁྲོ་མོ་འབུམ་འབུམ་འཕྲོ༔ དགྲ་བོ་མ་ཤོར་ཀཱི་ལ་ཡ༔ ཧཱུྃ༔ ནུབ་ཀྱི་ཕྱོགས་ནས་རྩང་འཛུགས་པ༔ པདྨ་མཁའ་འགྲོ་སྒྲུབ་པའི་རྩང་༔ དམར་མོ་དབང་གི་ལས་བྱེད་བདུན༔ སྐེད་པ་རྒྱ་མདུད་ལམ་ལས་སྐྱེས༔ ཡར་གྱི་རྩེ་ལ་ཉ་མོ་འཕྱོ༔ མར་གྱི་རྩེ་ལ་ཆུ་སྲིན་རྔམ༔ རྩང་གི་དྲ་མིག་ཐམས་ཅད་ལ༔ གདུག་པའི་ཁྲོ་མོ་འབུམ་འབུམ་འཕྲོ༔ དགྲ་བོ་མ་ཤོར་ཀཱི་ལ་ཡ༔ ཧཱུྃ༔ བྱང་གི་ཕྱོགས་ནས་རྩང་འཛུགས་པ༔ ལས་ཀྱི་མཁའ་འགྲོའི་སྒྲུབ་པའི་རྩང་༔ མཐིང་ནག་དྲག་པོའི་ལས་

[Full Size]

བྱེད་བདུན༔ སྐེད་པ་རྒྱ་མདུད་ཧཱུྃ་ལས་སྐྱེས༔ ཡར་གྱི་རྩེ་ལ་ཁྲག་གི་བྱ་རྒོད་ལྡིང་༔ མར་གྱི་རྩེ་ལ་ལྕགས་ཀྱི་སྦྲང་མ་འཚུབ༔ རྩང་གི་དྲ་མིག་ཐམས་ཅད་ལ༔ གདུག་པའི་ཁྲོ་མོ་འབུམ་འབུམ་འཕྲོ༔ དགྲ་བོ་མ་ཤོར་ཀཱི་ལ་ཡ༔ རྩང་ལ་གནས་པའི་མཁའ་འགྲོ་རྣམས༔ རྫུ་འཕྲུལ་མྱུར་མགྱོགས་གློག་ལྟར་འཁྱུག༔ དགྲ་བོ་མ་ཤོར་ཀཱི་ལ་ཡ༔ བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ ང་ནི་ཁྲོས་མ་ནག་མོའི་སྐུ༔ སྐུ་ཡི་མངའ་བདག་འགྲོ་བའི་མགོན༔ དུས་གསུམ་སངས་རྒྱས་ཀུན་གྱི་ཡུམ༔ གསུང་གི་དབང་ཕྱུག་འགྲོ་བའི་མགོན༔ བཀའ་ལ་མི་གནས་གང་ཡང་མེད༔ ཐུགས་ནི་སྣོད་བཅུད་ཀུན་ལ་ཁྱབ༔ ང་ཡིས་མི་འདུལ་གང་ཡང་མེད༔ འབྱུང་བ་ལྔ་དང་སྣང་སྲིད་དང་༔ ཕྱི་ནང་སྣོད་བཅུད་དྲེགས་པ་ཀུན༔ ང་ཡིས་མི་འདུལ་གང་ཡང་མེད༔ ཟློག་པས་མི་ཟློག་གང་ཡང་མེད༔ སྣང་སྲིད་ལྷ་འདྲེའི་དྲག་ཤུལ་ཟློག༔ སྔོ་དམར་སྣལ་མས་དཀྲིས་པ་འདིས༔ མི་ནད་ཕྱུགས་ནད་ཡམས་ནད་ཟློག༔ བྱད་ཁ་རྦོད་གཏོང་ཐམས་ཅད་ཟློག༔ ཆག་ཆེན་ཉམ་ང་ཐམས་ཅད་ཟློག༔ དྲག་པོ་རྩང་གི་ཕྲིན་ལས་མཛོད༔ དགྲ་

[Full Size]

བགེགས་བསྒྲལ་བའི་དུས་ལ་བབ༔ བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ་བྷྱོཿ མདོས་ཟོར་ཤ་ཁྲག་གཏོར་མ་དང་༔ དྲག་པོ་རྩང་གི་ཕུར་པ་འདིས༔ ད་ལྟ་རྣལ་འབྱོར་བདག་ཅག་ལ་སྡེ་བརྒྱུད་ཆད་པ་བྱུང་བ་ཟློག༔ བྱད་ཟོར་ཕུར་ཁ་ཐམས་ཅད་ཟློག༔ བནེའི་སྔགས་ཟོར་འདུས་པ་ཟློག༔ མུ་སྟེགས་བོན་པོའི་ཟོ་དམར་ཟློག༔ ལྷ་འདྲེའི་ཟ་ཁ་ཟུག་པ་ཟློག༔ རྒྱལ་པོ་ལོ་ཡི་བདུན་ཟུར་ཟློག༔ བློན་པོ་ཟླ་བའི་དབང་བཙན་ཟློག༔ དམག་མི་ཞག་གི་དཔུང་དགྲ་ཟློག༔ མཚོན་ཆ་དུས་ཀྱི་རྣོ་ངར་ཟློག༔ སྤར་ཁའི་སྐྱ་མདའ་ཟུག་པ་ཟློག༔ སྨེ་བ་དུར་དུ་ཚུད་པ་ཟློག༔ ས་བདག་ཀོ་ལོང་སྡོམ་པ་ཟློག༔ འབྱུང་བའི་དགྲ་གཤེད་འཐབ་པ་ཟློག༔ གཟའ་སྐར་དུས་ཚོད་ངན་པ་ཟློག༔ ལོ་ཟླ་ཞག་དུས་བབ་པ་ཟློག༔ ཁྲམ་དང་བྱད་དུ་བཅུག་པ་ཟློག༔ ཧོམ་དང་པར་བུ་སྐོར་བ་ཟློག༔ དགྲ་ཇག་བདུད་དུ་བབ་པ་ཟློག༔ ལྟས་ངན་གློ་བུར་ཡེ་འདྲོག་ཟློག༔ དུས་མིན་འཆི་བ་རྣམ་བརྒྱད་ཟློག༔ མི་ཁ་བྲ་མཆུ་ཐམས་ཅད་ཟློག༔ ཆག་ཆེན་ཉམ་ང་ཐམས་ཅད་ཟློག༔ སྔོན་བསྒྲིག་ཕྱིས་ནས་དེད་པ་ཟློག༔ དགྲ་སྣ་ཕུང་སྣ་གྱོད་སྣ་ཟློག །

[Full Size]

ནད་སྣ་ཡམས་སྣ་རིམས་སྣ་ཟློག༔ དགྲ་སྲི་རྨི་ལམ་ངན་པ་ཟློག༔ ཆེ་སྲི་ཆུང་སྲི་དགྲ་སྲི་ཟློག༔ གཞོན་སྲི་དར་སྲི་གོད་སྲི་ཟློག༔ དགྲ་སྲི་ནད་སྲི་མཚོན་སྲི་ཟློག༔ མདོར་ན་སྲིད་པའི་ཆག་སྒོ་ཟློག༔ བདག་ལ་གནོད་པའི་དགྲ་འདྲེ་རྣམས༔ སྡང་བྱེད་དགྲ་བོའི་སྟེང་དུ་ཟློག༔ གནོད་བྱེད་བགེགས་ཀྱི་སྟེང་དུ་བྷྱོཿ བར་ཆད་བགེགས་ཀྱི་སྟེང་དུ་བྷྱོཿ ཟ་འདྲེ་ཕུང་སྲིའི་སྟེང་དུ་སྒྱུར༔ དམ་ཉམས་བྱད་མའི་སྟེང་དུ་བྷྱོཿ ཟློག་ཅིག་སྒྱུར་ཅིག་བདེན་པའི་བཀའ༔ ད་ནི་བཟློག་བསྒྱུར་དུས་ལ་བབ༔ དགྲ་བགེགས་འདུལ་བའི་དུས་ལ་བབ༔ དེ་ནས་ཐན་ཟློག་ནི༔ ཧཱུྃ་བྷྱོཿ གདུག་རྩུབ་དྲག་པོའི་རྩང་ཕུར་འདིས༔ ད་ནི་བཟློག་བསྒྱུར་དུས་ལ་བབ༔ སྟེང་ཕྱོགས་ལྷ་ཡི་གདུག་པ་ཡང་༔ དམར་ནག་རྩང་གི་བཟློག་ཏུ་གསོལ༔ འོག་ཕྱོགས་ཀླུ་ཡི་གདུག་པ་ཡང་༔ དམར་ནག་རྩང་གིས་བཟློག་ཏུ་གསོལ༔ བར་སྣང་གཉན་གྱི་གདུག་རྩུབ་རྣམས༔ དམར་ནག་རྩང་གིས་བཟློག་ཏུ་གསོལ༔ གནམ་ལོ་རྒྱལ་པོའི་སྐེག་བབ་དེ༔ དམར་ནག་རྩང་གིས་བཟློག་ཏུ་གསོལ༔ ཟླ་བ་བློན་པོའི་རྩིས་མཚལ་ཡང་༔ དམར་ནག་རྩང་གིས་བཟློག་ཏུ་

[Full Size]

གསོལ༔ ཞག་གི་དམག་མའི་སྣ་དྲང་ཡང་༔ དམར་ནག་རྩང་གིས་བཟློག་ཏུ་གསོལ༔ དུས་ཚོད་མཚོན་ཆའི་བདུད་གཅོད་ཀྱང་༔ དམར་ནག་རྩང་གིས་བཟློག་ཏུ་གསོལ༔ སྤར་ཁ་རུས་པའི་སྟེང་ཆགས་ཀྱང་༔ དམར་ནག་རྩང་གིས་བཟློག་ཏུ་གསོལ༔ སྨེ་བ་ཤ་ཡི་རྒྱ་རལ་ཡང་༔ དམར་ནག་རྩང་གིས་བཟློག་ཏུ་གསོལ༔ དར་རྒུད་ལྤགས་པ་རལ་བ་ཡང་༔ དམར་ནག་རྩང་གིས་བཟློག་ཏུ་གསོལ༔ ཤ་ངུར་འབྱུང་བ་ལྔ་ཡི་ས་བདག་ཡང་༔ དམར་ནག་རྩང་གིས་བཟློག་ཏུ་གསོལ༔ སྣང་སྲིད་ལྷ་འདྲེ་ཐམས་ཅད་ཀྱི༔ བསམ་སྦྱོར་གདུག་རྩུབ་ངན་པ་རྣམས༔ དམར་ནག་རྩང་གིས་བཟློག་ཏུ་གསོལ༔ ནད་རིགས་བཞི་བརྒྱ་རྩ་བཞི་ཡང་༔ དམར་ནག་རྩང་གིས་བཟློག་ཏུ་གསོལ༔ བགེགས་རིགས་སྟོང་ཕྲག་བརྒྱད་ཅུ་ཡང་༔ དམར་ནག་རྩང་གིསབཟློག་ཏུ་གསོལ༔ ཡེ་འདྲོག་སུམ་བརྒྱ་དྲུག་ཅུ་ཡང་༔ དམར་ནག་རྩང་གིས་བཟློག་ཏུ་གསོལ༔ དགྲ་འདྲེ་བྱུར་གསུམ་མི་ཁ་ཡང་དམར་ནག་རྩང་གིས་བཟློག་ཏུ་གསོལ༔ སྲེ་མོང་བྱི་རོ་ཁྱེར་བ་དེ༔ ནལ་ཕྲུག་ཡོང་བའི་ལྟས་ངན་ཡིན༔ དམར་ནག་རྩང་གིས་བཟློག་ཏུ་གསོལ༔ རྨོས་གླང་རོལ་ནས་འཁུན་པ་

[Full Size]

དེ༔ ས་བདག་གནོད་པའི་ལྟས་ངན་ཡིན་དམར་ནག་རྩང་གིས་བཟློག་ཏུ་གསོལ༔ སྦྲ་ཡི་གུང་ཤིང་ཆག་པ་དེ༔ ལྷ་འདྲེ་འཁྲུག་པའི་ལྟས་ངན་ཡིན༔ དམར་ནག་རྩང་གིས་བཟློག་ཏུ་གསོལ༔ རི་དྭགས་ཁྱིམ་སྒོར་འོང་བ་དེ༔ མ་དང་བུ་མོའི་བཙོག་ནལ་ཡིན༔ དམར་ནག་རྩང་གིས་བཟློག་ཏུ་གསོལ༔ ར་ལུག་བཤའ་རྒྱུད་ཁྱེར་བ་དེ༔ ཡུལ་བུད་སོང་བའི་ལྟས་ངན་ཡིན༔ དམར་ནག་རྩང་གིས་བཟློག་ཏུ་གསོལ༔ སྦལ་སྦྲུལ་ཁྱིམ་དུ་འོང་བ་དེ༔ བུ་སྲིང་བྱེ་ཡུགས་འོང་བའི་ལྟས་ངན་ཡིན༔ དམར་ནག་རྩང་གིས་བཟློག་ཏུ་གསོལ༔ དྲེལ་རྟས་རྔ་རྔོག་འཆའ་བ་དེ༔ མཚོན་ཆ་འཁྲུག་པའི་ལྟས་ངན་ཡིན༔ དམར་ནག་རྩང་གིས་བཟློག་ཏུ་གསོལ༔ ལུག་ཤ་ལག་འགྲམ་ངན་པ་དེ༔ ར་ལུག་ཤི་ཆད་འོང་བའི་ལྟས་ངན་ཡིན༔ དམར་ནག་རྩང་གིས་བཟློག་ཏུ་གསོལ༔ སོག་པའི་མེ་ལོང་རྡོལ་བ་དེ༔ རིམས་ནད་འོང་བའི་ལྟས་ངན་ཡིན༔ དམར་ནག་རྩང་གིས་བཟློག་ཏུ་གསོལ༔ ཕ་སྤུན་ཟེར་ཁ་མང་བ་དེ༔ བྱེ་བྲལ་འོང་བའི་ལྟས་ངན་ཡིན༔ དམར་ནག་རྩང་གིས་བཟློག་ཏུ་གསོལ༔ འུག་པ་སྒོ་ནས་རྒོད་པ་དང་༔ སྲིན་

[Full Size]

བྱས་ཉིན་པར་ཀུས་འདེབས་དེ༔ བྱེ་བྲལ་ཁྱིམ་ཕུགས་ཤོར་བའི་ལྟས་ངན་ཡིན༔ དམར་ནག་རྩང་གིས་བཟློག་ཏུ་གསོལ༔ སྒོ་ཁྱི་ངུ་ཟུག་བྱེད་པ་དེ༔ བུ་ཚ་ད་ཕྲུག་འོང་བའི་ལྟས་ངན་ཡིན༔ དམར་ནག་ཆུང་གིས་བཟློག་ཏུ་གསོལ༔ བྱི་ལོང་ལམ་ཁར་ལོང་བ་དང་༔ བུད་མེད་ནག་མོའི་ཅོ་འཛིང་ནི༔ ཉེ་བ་ཀུན་གྱི་ལྟས་ངན་ཡིན༔ དམར་ནག་རྩང་གིས་བཟློག་ཏུ་གསོལ༔ ལྟས་ངན་ཐམས་ཅད་རྩང་གིས་བཟློག་ཏུ་གསོལ༔ སྐྱེས་པ་ཕོ་ཡི་རུས་འདྲེ་བཟློག་ཏུ་གསོལ༔ ཟ་མ་མོ་ཡི་སྐག་འདྲེ་བཟློག་ཏུ་གསོལ༔ རྐྱེན་ཕྱོགས་རྐྱེན་འདྲེ་འཁོར་བ་བཟློག་ཏུ་གསོལ༔ ཕ་མྱེས་བསྒྲེན་འདྲེ་ཐམས་ཅད་བཟློག་ཏུ་གསོལ༔ ལྟས་ངན་ཆེ་དགུ་ཐམས་ཅད་བཟློག་ཏུ་གསོལ༔ ཁང་ཁྱིམ་བཀྲག་མདངས་ཤོར་བ་བཟློག་ཏུ་གསོལ༔ དུར་ས་ཝ་མོ་བརྒྱལ་བ་བཟློག་ཏུ་གསོལ༔ རྟ་ཕོ་སྲོད་ལ་འཚེར་བ་བཟློག་ཏུ་གསོལ༔ ཐོ་རངས་སྒོ་ཁྱི་དུ་བ་བཟློག་ཏུ་གསོལ༔ ཕུ་ཡི་ཤ་ཕོ་རུ་འཛིང་བཟློག་ཏུ་གསོལ༔ མདའ་ཡི་ཉ་མོ་རྫ་འཛིང་བཟློག་ཏུ་གསོལ༔ བར་གྱི་རྒོད་པོ་སྡེར་འཛིང་བཟློག་ཏུ་གསོལ༔་ཁང་ཁྱིམ་འུག་པ་རྒོད་པ་བཟློག་ཏུ་གསོལ༔ སྲིན་བྱས་ཕུང་ཕུང་ཟེར་བ་

[Full Size]

བཟློག་ཏུ་གསོལ༔ སྦྲུལ་ནག་ལམ་ཁར་ཉལ་བ་བཟློག་ཏུ་གསོལ༔ ཕྱུགས་ཀྱི་འགྲམ་འཁྲུགས་ངན་པ་བཟློག་ཏུ་གསོལ༔ མཚེ་མ་བུ་ཕུང་ངན་པ་བཟློག་ཏུ་གསོལ༔ ཁང་ཁྱིམ་སྲིན་བྱས་ཚང་བཅས་བཟློག་ཏུ་གསོལ༔ དེ་ལ་སོགས་པའི་སྐག་ཆེན་རྣམས༔ ལྟས་ངན་སྣ་ཚོགས་བསྒྱུར་དུ་གསོལ༔ བཟློག་བསྒྱུར་ཆེན་པོའི་དུས་ལ་བབ༔ ས་མ་ཡཱ༔ གྷོ་གྷོ༔ ཟློག་ཟློག༔ སྒྱུར་སྒྱུར༔ མཱ་ར་ཡ་དགྲ་བོ་བྱད་མ་གནོད་བྱེད་ཀྱི་སྟེང་དུ་བྷྱོ་བྷྱོ་ཟློག་ཟློག༔ ཨོཾ་ཧ་དྷེ་མོ་ཧཱ་ཧྲི་ཏཱ་ཡ༔ སི་ཏི་ཧཱ་རི་ཏ་ཡ༔ ལིཾ་ཏ་ཡ་མཱ་ར་ཡ་ནན༔ ཧཱུྃ་ཧཱུྃ་ཕཊ་ཕཊཿབྷྱོ་བྷྱོཿ ས་མ་ཡ་ཟློག་ཟློག༔ ཨ་ལི་ལ་པྲ་མོ་ཧེ་བྷྱོ་བྷྱོ༔ ཨ་ཏི་པྲ་མ་ན་ཟློག༔ ཆོད་འདྲེ་རྦོད་གཏོང་ཐམས་ཅད་ཟློག༔ ཐབས་ཤེས་རྫས་རྣམས་དྲངས་ཤིང་། ཀྱི། དཔའ་བོ་ཆེན་པོ་སོགས་གོང་ནས་དྲངས། སུ་ཁ་མར་གྱི་ལོངས་སྤྱོད་ལྷག་མ་གོང་ལྟར་ཕུལ། ན་མོ་དཀོན་མཆོག་གསུམ་དང་སོགས་ནས་ཤ་ཁྲག་ལ་ཁཱ་ཧི། བསྐུལ་པ་ནི། ཧཱུྃ༔ རང་བཞིན་གདོད་ནས་སོགས་ནས་འགྲུབ་པར་མཛོད་བར་བྱའོ། །དེ་ནས་གསེར་སྐྱེམས་དང་སྒོ་དབྱེ་བྱ་བ་ནི༔ གསེར་སྐྱེམས་བྱིན་གྱིས་བརླབས་ལ་ཕྱོགས་ཐམས་ཅད་དུ་མཆོད་བཅུག་ལ་འདི་སྐད་དོ༔ ཀྱེ༔

[Full Size]

འཇིག་རྟེན་འཛམ་གླིང་སྟེང་དང་འོག༔ ཕྱོགས་བཅུ་ཀུན་ན་བཞུགས་པ་ཡི༔ སྣང་སྲིད་ལྷ་འདྲེ་ཐམས་ཅད་ཀུན༔ ཐམས་ཅད་བདག་ལ་སྙན་གསོན་འཚལ༔ རིན་ཆེན་ལས་གྲུབ་སྣོད་མཆོག་ཏུ༔ རོ་བཅུད་ཟས་དང་འབྲུ་བཅུད་ཆང་༔ ས་ཡི་སྙིང་པོ་རིན་ཆེན་གསེར༔ རྡོ་ཡི་སྙིང་པོ་རིན་ཆེན་དངུལ༔ བཀྲག་མདངས་རྒྱས་པ་མཚོ་རོ་གཡུ༔ སྔོན་མོ་འཕེལ་ཆེན་འབྲུ་བཅུད་ནས༔ གཉིས་སུ་སྦྱར་བའི་གསེར་སྐྱེམས་འདི༔ བླ་མ་ཡི་དམ་མཁའ་འགྲོ་དང་༔ ཆོས་སྐྱོང་དཔལ་མགོན་རྣམས་ལ་འབུལ༔ རྣལ་འབྱོར་བདག་གིས་རྒྱབ་རྟེན་མཛོད༔ གཏོར་མདོས་དགྲ་ཡུལ་བསྐྱོད་པའི་ཚེ༔ དགྲ་དང་བགེགས་ལ་ཟོར་འཕེན་ན༔ ཕྱོགས་བཅུའི་ཀུན་ལ་གནས་པ་དང་༔ མདོས་གཏོར་གཏོང་ཕྱོགས་གནས་པ་ཡི༔ ཕྱོགས་སྐྱོང་སྡེ་བརྒྱད་དྲེགས་པའི་ཚོགས༔ རྒྱལ་པོ་བཙུན་མོ་བློན་པོ་དང་༔ ནང་མི་དམག་དཔུང་སྡེ་དང་བཅས༔ འབྱུང་པོའི་ཚོགས་རྣམས་མ་ལུས་ཀུན༔ གསེར་སྐྱེམས་བདུད་རྩི་འདི་བཞེས་ལ༔ ཉམས་པའི་མགོན་སྐྱབས་མ་མཛད་པར༔ རྣལ་འབྱོར་བདག་གི་སྡོང་གྲོགས་མཛོད༔ ཐུན་ཟོར་མདོས་ཀྱི་ལམ་ཕྱེས་ཤིག༔ གང་ཞིག་བསྒོ་བ་

[Full Size]

མ་ཉན་པར༔ ཉམས་པའི་གྲིབ་ཀྱིས་ཉེས་བྱུང་ན༔ ང་ནི་མ་ཉེས་མ་ལན་ཅིང་༔ ཉེས་ལན་དགྲ་དང་བགེགས་ལ་ཕོབ༔ ཕྱི་ནང་གསང་བའི་ལྷ་མ་སྲིན༔ ལོ་ཟླ་ཞག་དུས་འབྱུང་བའི་བདག༔ ཡུལ་ལྷ་གཞི་བདག་མཐུ་ཆེན་རྣམས༔ གསེར་སྐྱེམས་མཆོད་གཏོར་འདི་བཞེས་ལ༔ རྣལ་འབྱོར་བདག་གི་སྡོང་གྲོགས་མཛོད༔ ཁྱད་པར་ཡུལ་དང་གྲོང་གི་བདག༔ གཉུག་མར་གནས་པ་མ་ལུས་པ༔ གཏོར་ལམ་གནས་པའི་འབྱུང་པོའི་ཚོགས༔ གསེར་སྐྱེམས་གཏོར་མ་འདི་བཞེས་ལ༔ མཐོ་བ་རྣམས་ཀྱི་ཞབས་ཡར་སྐུམས༔ དམའ་བ་རྣམས་ཀྱི་དབུ་མར་ཁུག༔ བར་པ་རྣམས་ཀྱི་སྐུ་གཟུར་ལ༔ ཡས་ལམ་ཕྱེས་ལ་གཏོར་ལམ་ཕྱེས༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་གསེར་སྐྱེམས་ཕུལ༔ དེ་ནས་སྒོ་དབྱེ་བྱ་བ་ནི༔ ཧཱུྃ་བྷྱོ༔ དཀྱིལ་འཁོར་ཡོངས་ཀྱི་ཕྱི་ཡི་སྒོ་སྐྱོང་མ༔ རྒྱལ་ཆེན་སྡེ་བཞི་ཕྱོགས་སྐྱོང་བཅུ༔ གསེར་སྐྱེམས་མཆོད་པ་འདི་བཞེས་ལ༔ སྐུ་སྤྱན་གཡོལ་དམག་དཔུང་བསྐྱེད༔ སྡང་དགྲ་གནོད་བྱེད་སྟེང་དུ་བྷོ༔ ཧཱུྃ་བྷྱོཿ ཕྱོགས་བཞི་སྒོ་མ་ཆེན་མོ་བཞི༔ ཕྱག་མཚན་བཞི་ཡི་ཕྱག་རྒྱ་ཡིས༔ དཀྱིལ་འཁོར་

[Full Size]

ཕྱོགས་བཞིའི་སྒོ་རྣམས་ཕྱེས༔ གསེར་སྐྱེམས་གཉན་པོ་འདི་གསོལ་ལ༔ གཏོར་མའི་ཟོར་ལམ་དགྲ་ལ་སྟོན༔ བཛྲ་རཏྣ་པདྨ་ཀརྨ་པྲ་ཝེ་ཤ་ཡ་ཕཊཿ ཅེས་གསེར་སྐྱེམས་མདོས་ཀྱི་ཕྱོགས་བཞི་ལ་མཆོད༔ ཨོཾ་བཛྲ་བྷ་ར་ཧི་ཀྲོ་ཏི་ཀ་ལི་མཎྜལ་ལ་སྤ་ར་ཎ་ཧཱུྃ༔ མདོས་ཀྱི་རྟེན་པ་དང་བརྟེན་པར་བཅས་པའི་ལྷ་ཚོགས་ཐམས་ཅད་མདུན་གྱི་ནམ་མཁར་བཛྲ་ས་མ་ཡཱ་ཛ་ཛཿ ལྷ་ཚོགས་ཐམས་ཅད་མདུན་གྱི་ནམ་མཁར་བཏེག་ལ་བར་སྣང་གང་བར་བསྒོམ༔ དེ་ནས་འགྲིགས་རིམ་བཞིན་དུ་བཤམས་ལ༔ མདོས་ཐོག་ཙཀླུ་བླངས་ལ་ཞལ་བསྒྱུར་དང་དམག་འགྱེད་བྱ་བ་ནི༔ ཧཱུྃ་བྷྱོ༔ ད་ནི་ཟློག་མདོས་ཞལ་བསྒྱུར་རོ༔ ཁྲོས་མ་ནག་མོ་ཞལ་བསྒྱུར་རོ༔ སྡང་བའི་དགྲ་ལ་ཞལ་བསྒྱུར་རོ༔ མཁའ་འགྲོའི་དམག་དཔུང་བྱེ་བའི་ཚོགས༔ སྡང་བའི་དགྲ་ལ་ཞལ་བསྒྱུར་རོ༔ ལྷ་སྲིན་སྡེ་བརྒྱད་ཚོགས་དང་བཅས༔ སྡང་བའི་དགྲ་ལ་ཞལ་བསྒྱུར་རོ༔ སྣང་སྲིད་ལྷ་འདྲེའི་དམག་དང་བཅས༔ སྡང་བའི་དགྲ་ལ་ཞལ་བསྒྱུར་རོ༔ ཆིབས་ཁ་དགྲ་ཡི་ཡུལ་དུ་སྒྱུར༔ དམག་སྣ་དགྲ་ཡི་ཡུལ་དུ་དྲོངས༔ དམག་དཔུང་དགྲ་ཡི་ཡུལ་དུ་ཆོས༔ སྦྲ་ནག་དགྲ་ཡི་སྒོ་ཁར་ཕུབ༔ རུ་དར་དགྲ་ཡི་ཁྱིམ་དུ་ཚུགས༔ མདུང་དར་དགྲ་ཡི་ཡུལ་དུ་

[Full Size]

སྒྱུར༔ མཚོན་ཆས་དགྲ་ཡི་ལུས་སྲོག་ཕྲོལ༔ བདུད་ཞགས་དགྲ་ཡི་མགུལ་དུ་ཐོབ༔ ཁྲམ་བམ་སྡང་མིག་དགྲ་ལ་རྒྱོབས༔ དུག་གཟེར་དགྲ་བོའི་ཁོང་དུ་ཐོངས༔ ཟས་སུ་དགྲ་བོའི་ཤ་ལ་ཟོ༔ སྐོམ་དུ་དགྲ་བོའི་ཁྲག་ལ་འཐུང་༔ སྔོན་གྱི་དམ་བཅའ་མ་གཡེལ་བར༔ བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ་བྷྱོཿ ཤར་གྱི་ཕྱོགས་སུ་དམག་འདྲེན་ན༔ དམག་དཔོན་རྡོ་རྗེ་མཁའ་འགྲོས་མཛོད༔ དམག་སྣ་དཔལ་ལྡན་ལྷ་མོས་གྱིས༔ དམག་གཏིང་ཡུལ་འཁོར་སྲུང་གིས་སྐྱོངས༔ དམག་འདི་དགྲ་ཡི་སྟེང་དུ་བྷྱོ༔ ཧཱུྃ་བྷྱོ༔ ལྷོ་ཡི་ཕྱོགས་སུ་དམག་འདྲེན་ན༔ དམག་དཔོན་རིན་ཆེན་མཁའ་འགྲོས་མཛོད༔ དམག་སྣ་རེ་མ་ཏི་ཡིས་དྲོངས༔ དམག་གཏིང་འཕགས་སྐྱེས་པོ་ཡི་སྐྱོངས༔ དམག་འདི་དགྲ་ཡི་སྟེང་དུ་བྷྱོ་ཧཱུྃ་བྷྱོ༔ ནུབ་ཀྱི་ཕྱོགས་སུ་དམག་འདྲེན་ནི༔ དམག་དཔོན་པདྨ་མཁའ་འགྲོས་མཛོད༔ དམག་སྣ་སྲིད་པའི་རྒྱལ་མོས་དྲོངས༔ དམག་གཏིང་སྤྱན་མི་བཟང་གིས་སྐྱོངས༔ དམག་འདི་དགྲ་ཡི་སྟེང་དུ་བྷོ༔ ཧཱུྃ་བྷྱོ༔ བྱང་གི་ཕྱོགས་སུ་དམག་འདྲེན་ན༔ དམག་དཔོན་ལས་ཀྱི་མཁའ་འགྲོས་མཛོད༔ དམག་

[Full Size]

སྣ་མ་མོ་ཡོངས་ཀྱིས་དྲོངས༔ དམག་གཏིང་རྣམ་ཐོས་སྲས་ཀྱིས་སྐྱོངས༔ དམག་འདི་དགྲ་ཡི་སྟེང་དུ་བྷྱོ༔ རིགས་བཞི་མཁའ་འགྲོ་དམག་ལ་ཆོས༔ རྒྱལ་ཆེན་སྡེ་བཞིས་དམག་གཏིང་སྐྱོངས༔ སྣང་སྲིད་མ་མོས་དམག་སྣ་དྲོངས༔ སངས་རྒྱས་བསྟན་པ་རིན་ཆེན་སྲུངས༔ རྣལ་འབྱོར་བདག་གི་སྡོང་གྲོགས་མཛོད༔ དགྲ་བགེགས་འདུལ་བའི་ཕྲིན་ལས་མཛོད༔ དམ་ཉམས་དགྲ་བོ་ཁྲམ་ལ་ཐོབ༔ དགྲ་བགེགས་ཡུལ་དུ་དམག་ལ་ཆོས༔ ཐུལ་ཅིག་སྡང་དགྲ་གནོད་བྱེད་བགེགས༔ ཟློག་ཅིག་ལྷ་འདྲེའི་དམག་ཟློག༔ རང་ཉིད་ཁྲོས་མ་ནག་མོ་ཞལ་སྲིད་གསུམ་རྩེ་ནས་ཕྱིར་གཟིགས་ནས་སྲིད་གསུམ་ཟིལ་གྱིས་མནན་པར་བསམ༔ དེ་ནས་མཁའ་འགྲོའི་དམག་ཚོགས་རྣམས་དགྲ་བགེགས་ཀྱི་སྟེང་དུ་ཆས་པར་བསམ་ལ་མེ་རླུང་འཚུབ་མ་ལྟར་སོང་བར་བསམ་ལ་འདི་སྐད་དོ༔ ཧཱུྃ་བྷྱོ༔ ད་ནི་ཟློག་མདོས་སྐྱོད་རེ་རན༔ ཁྲོས་མ་ནག་མོ་སྐུ་སྐྱོད་འཚལ༔ འཁོར་གྱི་མཁའ་འགྲོ་སྐུ་སྐྱོད་འཚལ༔ ལས་ཀྱི་ཕོ་ཉ་སྐུ་སྐྱོད་འཚལ༔ ལྷ་སྲིན་དམག་ཚོགས་སྐུ་སྐྱོད་ཅིག༔ དགྲ་བགེགས་ཡུལ་དུ་སྐུ་སྐྱོད་ཅིག༔ ཆིབས་ཁ་དགྲ་ཡི་ཡུལ་དུ་སྒྱུར༔ དགྲ་བོའི་ཡུལ་ཁམས་དམག་གིས་ཁེངས༔ སྡང་བའི་དགྲ་ལ་སྐུ་ཟུར་སྟོན༔ ཐུན་ཟོར་

[Full Size]

སྡང་བའི་དགྲ་ལ་རྒྱོབས༔ དགྲ་བོའི་མི་ནོར་ཆམ་ལ་ཕོབ༔ དགྲ་བགེགས་ཡུལ་ཁམས་རྡུལ་དུ་རློགས༔ བཅོལ་བའི་ཕྲིན་ལས་འགྲུབ་པར་མཛོད༔ ཕྱི་རོལ་གོམ་པ་བདུན་ཅུའི་སར་ཁྱེར་ལ་གསེར་སྐྱེམས་དང་དཀར་གཏོར་བྲན་ལ༔ གསེར་སྐྱེམས་འཐོར་ཞིང་འདི་སྐད་དོ༔ ཧཱུྃ་བྷྱོ༔ སྣང་ཞིང་སྲིད་པའི་ལྷ་འདྲེ་རྣམས༔ ཐམས་ཅད་བདག་ལ་སྙན་གསོན་འཚལ༔ རིན་ཆེན་ལྔ་དང་འབྲུ་བཅུད་ཆང་༔ མཉམ་དུ་སྦྱར་བའི་གསེར་སྐྱེམས་འདི༔ བླ་མ་ཡི་དམ་མཁའ་འགྲོ་དང་༔ ཆོས་སྐྱོང་དཔལ་མགོན་རྣམས་ལ་འབུལ༔ རྣལ་འབྱོར་བདག་གི་རྒྱབ་རྟེན་མཛོད༔ ཕྱི་ནང་གསང་བའི་ལྷ་མ་སྲིན༔ ལོ་ཟླ་ཞག་དུས་འབྱུང་བའི་བདག༔ ཡུལ་ལྷ་གཞི་བདག་མཐུ་ཆེན་རྣམས༔ གསེར་སྐྱེམས་མཆོད་གཏོར་འདི་བཞེས་ལ་རྣལ་འབྱོར་བདག་གི་སྡོང་གྲོགས་མཛོད༔ ཁྱད་པར་ཡུལ་དང་གྲོང་གི་བདག༔ གཉུག་མར་གནས་པ་མ་ལུས་དང་༔ གཏོར་ལམ་འདིར་གནས་འབྱུང་པོའི་ཚོགས༔ གསེར་སྐྱེམས་གཏོར་མ་འདི་བཞེས་ལ་མཐོ་བ་རྣམས་ཀྱི་ཞབས་ཡར་སྐུམས༔ དམའ་བ་རྣམས་ཀྱི་དབུ་མར་ཁུག༔ བར་པ་རྣམས་ཀྱི་སྐུ་བཟུར་ཅིག༔ ཡས་ལམ་ཕྱེས་ལ་གཏོར་ལམ་

[Full Size]

ཕྱེས༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་གསེར་སྐྱེམས་དཀར་གཏོར་ཕུལ༔ དེ་ནས་ཟ་ལམ་ལ་དཔལ་འབར་བཙུགས་གོམ་པ་བདུན་ཅུ་འདས་པའི་སར་ཁྱེར་ལ༔ བདུད་རྩི་ས་བྲན་ལ་ཟ་ལམ་བྱའོ༔ དེ་ནས་གཏོར་ཟོར་རྣམས་ཀྱི་བསྐུལ་པ་ནི༔ ཧཱུྃ་བྷྱོ༔ མ་གཡེལ་མ་གཡེལ་རིག་འཛིན་ཚོགས༔ མ་གཡེལ་མ་གཡེལ་ཡི་དམ་ཚོགས༔ མ་གཡེལ་མ་གཡེལ་མཁའ་འགྲོའི་ཚོགས༔ ཐམས་ཅད་ཐུགས་དམ་གནད་ནས་སྐུལ༔ རང་རང་གནས་ནས་སྐུ་བཞེངས་འཚལ༔ དམར་ཆེན་གཏོར་མ་འདི་བཞེས་ལ༔ དེ་རིང་བདག་གི་དཔུང་གྲོགས་མཛོད༔ ཁྱེད་རྣམས་ཐུགས་དམ་དུས་ལ་བབ༔ ཧཱུྃ༔ མཚན་མོ་སྒྲ་སྒྲོག་གཅེར་བུའི་ལུས༔ གར་མཛད་དགྱེས་པའི་གད་རྒྱངས་ཅན༔ བདུད་འཇོམས་དྲག་མོའི་ཆ་ལུགས་ཅན༔ དབང་བསྒྱུར་མཁའ་འགྲོའི་སྐུ་ལ་བསྟོད༔ ཧཱུྃ༔ བསྐུལ་ལོ་མ་མོ་མཁའ་འགྲོའི་ཚོགས༔ རྦད་དོ་ཤ་ཟ་ཌཀྐི་མ༔ བཅོལ་བའི་ཕྲིན་ལས་འགྲུབ་པར་མཛོད༔ དེ་ནས་ཟོར་འཕེན་པ་ནི༔ ཧཱུྃ་བྷྱོཿ དམར་གྱི་གཏོར་མ་ཆེན་པོ་འདི༔ མཁའ་འགྲོ་དམ་ཅན་མཆོད་པའི་རྫས༔ དགྲ་བགེགས་དམ་ཉམས་བསྒྲལ་བའི་མཚོན༔ ནད་དང་རིམས་ཀྱི་ན་བུན་འཐུལ་དུག་

[Full Size]

དང་མཚོན་གྱི་ཆར་པ་འབེབས༔ བསྟན་པ་བཤིག་པའི་དགྲ་བགེགས་ལ༔ མཚོན་གྱི་ཆར་པ་དེ་ལ་ཕོབ༔ དུག་དང་ནད་རིམས་དེ་ལ་ཕོབ༔ ཐུན་ཟོར་སྔགས་ཟོར་དེ་ལ་རྒྱོབས༔ སྡང་དགྲ་བགེགས་ལ་གཏོར་ཟོར་རྒྱོབས་གནོད་བྱེད་འདྲེ་ལ་གཏོར་ཟོར་རྒྱོབས༔ བར་ཆད་བདུད་ལ་གཏོར་ཟོར་རྒྱོབས༔ ཕུང་བའི་སྲི་ལ་གཏོར་ཟོར་རྒྱོབས༔ ཟ་བའི་འདྲེ་ལ་གཏོར་ཟོར་རྒྱོབས༔ དགྲ་བགེགས་ཐལ་བ་རྡུལ་དུ་རློགས༔ ཨོཾ་བཛྲ་བྷ་ར་ཧི་ཀྲོ་ཏི་ཀ་ལི་ཧ་རི་ནི་ས་ཌཱཀྐི་ནི་དགྲ་བགེགས་མཱ་ར་ཡ་ཕཊཿ ཅེས་ཟོར་དུ་འཕང་བའམ་དམིགས་པའི་ཕྱོགས་སུ་བསྐྱལ་ལོ༔ དེ་ནས་གཏོར་མདོས་བསྐུལ་ཞིང་ལག་ཏུ་ཐོགས་ལ༔ ཧཱུྃ་བྷྱོ༔ ནུབ་ཕྱོགས་པདྨ་དབང་གི་དཀྱིལ་འཁོར་ནས༔ དཔལ་ཆེན་རྟ་མགྲིན་ཡབ་ཡུམ་དགྲ་ལ་བྷྱོ༔ དུར་ཁྲོད་སོ་ས་གླིང་གི་དཀྱིལ་འཁོར་ནས༔ ཐུགས་རྗེ་ཁྲོས་མ་ནག་མོ་དགྲ་ལ་བྷོ༔ ཞེ་སྡང་མེ་ལྟར་འབར་བའི་ཀློང་དཀྱིལ་ནས༔ རྡོ་རྗེ་མཁའ་འགྲོའི་དམག་ཚོགས་དགྲ་ལ་བྷོ༔ ང་རྒྱལ་རི་ལྟར་ཉིལ་བའི་ཀློང་དཀྱིལ་ནས༔ རིན་ཆེན་མཁའ་འགྲོའི་དམག་ཚོགས་དགྲ་ལ་བྷོ༔ འདོད་ཆགས་ཆུ་ལྟར་ཁོལ་བའི་ཀློང་དཀྱིལ་ནས༔ པདྨ་མཁའ་འགྲོའི་

[Full Size]

དམག་ཚོགས་དགྲ་ལ་བྷོ༔ ཕྲག་དོག་རླུང་ལྟར་འཚུབ་པའི་ཀློང་དཀྱིལ་ནས༔ ལས་ཀྱི་མཁའ་འགྲོའི་དམག་ཚོགས་དགྲ་ལ་བྷྱོ༔ གཏི་མུག་མུན་ལྟར་གཏིབས་པའི་ཀློང་དཀྱིལ་ནས༔ སངས་རྒྱས་མཁའ་འགྲོའི་དམག་ཚོགས་དགྲ་ལ་བྷྱོ༔ བསིལ་བ་ཚལ་གྱི་དུར་ཁྲོད་ཆེན་པོ་ནས༔ དཔལ་ལྡན་ནག་པོ་ཆེན་པོ་དགྲ་ལ་བྷྱོ༔ ཐོད་མཁར་མེ་རླུང་འཚུབ་པའི་ཀློང་དཀྱིལ་ནས། དཔལ་ལྡན་ལྷ་མོ་ཆེན་མོ་དགྲ་ལ་བྷོ༔ བྱང་ཕྱོགས་ལྕང་ལོ་ཅན་གྱི་ཕོ་བྲང་ནས༔ ཆོས་སྐྱོང་རྣམ་སྲས་འཁོར་བཅས་དགྲ་ལ་བྷྱོ༔ ཟངས་རི་འཁྱིལ་པའི་ཕོ་བྲང་དམ་པ་ནས༔ འབར་བ་བཙན་རྒོད་སྤུན་བདུན་དགྲ་ལ་བྷྱོ༔ ཨོ་རྒྱན་སྨུག་ནག་འཁྱིལ་བའི་ཀློང་དཀྱིལ་ནས༔ བསྟན་སྲུང་མ་མོ་མཆེད་གསུམ་དགྲ་ལ་བྷྱོ༔ ཉོན་མོངས་ཆུ་ལྟར་ཁོལ་བའི་ཀློང་དཀྱིལ་ནས༔ གནས་པོ་ལྷ་སྲིན་སྡེ་བརྒྱད་དགྲ་ལ་བྷོ༔ བར་སྣང་གློག་མདའ་འབྲུག་གིས་བསྐུལ་བ་བཞིན༔ རྫུ་འཕྲུལ་རྩལ་དང་བཅས་པ་ད་རྒྱུག་ཅིག་ཅེས་ཤིན་ཏུ་གཉན་པས་གལ་ཆེ་བ་མ་གཏོགས་གར་ཐོད་ཐོད་དུ་མི་བྱ༔ མཁའ་འགྲོའི་བཀའ་ཆད་འོང་༔ རྒྱུན་ཁྱེར་ནི༔ རྗེ་དགུ་པས་མཛད་པའི་མཁའ་འགྲོ་ཆོས་སྐྱོང་སྤྱིའི་བསྐུལ་པ་ནི༔ ཧཱུྃ་བྷྱོ༔ མཁའ་འགྲོ་ཆོས་སྐྱོང་ཡེ་

[Full Size]

ཤེས་སྤྱན་ལྡན་པ༔ ལེགས་ཉེས་ཤན་ཕྱེས་ཉམས་པའི་སྲོག་གཅོད་པ༔ མྱུར་མགྱོགས་རྫུ་འཕྲུལ་མཐུ་ལྡན་ཁྱེད་རྣམས་ཀྱིས༔ བདག་ལ་སྡང་བའི་དགྲ་བགེགས་བྱད་མ་རྣམས༔ ལྷག་མ་རྗེས་ཤུལ་ཙམ་ཡང་མེད་པར་མཛོད༔ མ་གཡེལ་མ་གཡེལ་བཀའ་སྡོད་རྒྱ་མཚོའི་ཚོགས༔ འབོད་དོ་སྙན་མ་སྲ་ལ་རྒྱང་མ་རིང་༔ བཅོམ་ལྡན་སྤྱན་སྔར་ཞལ་བཞེས་མ་གཡེལ་བ༔ དགྲ་བགེགས་མྱུར་དུ་བསྒྲལ་བའི་ལས་མཛོད་ཅིག༔ ཅེས་གཏོར་མ་བསྐུལ་ལ་རྒྱབ་བོ༔ སླར་སྤྲོ་ན་གཏོར་གཞོང་ཆུས་བཤལ་ལ་བརྟན་མར་ཕུལ༔ ཨོཾ་ཨཱཿཧཱུྃ་བཛྲ་ཨ་མྲྀ་ཏ་ཧཱུྃ་ཧྲཱི་ཋཱ༔ ཞེས་བདུད་རྩིར་བྱིན་གྱིས་བརླབ་ཅིང་བརྟན་མ་མཆོད༔ དེ་ནས་གཏོར་གཞོང་ཁ་སྦུབས་ལ་གཏོར་བྲོ་ནི༔ ཧཱུྃ་བྷྱོ༔ ཐུགས་རྗེ་ཁྲོས་མའི་གཟི་བརྗིད་ཀྱིས༔ བགེགས་དང་དམ་སྲི་བར་ཆད་རྣམས༔ རི་རབ་ཆེན་པོའི་འོག་ཏུ་མནན༔ ཌཱཀྐི་སྡེ་ལྔའི་བྲོ་ར་བཙུགས༔ དཔའ་བོའི་བྲོ་རྡུང་ཁྲིགས་སེ་ཁྲིག༔ དཔའ་མོས་གར་བྱེད་ཁྱུགས་སེ་ཁྱུག༔ ཡེ་ཤེས་ལྔ་ཡི་བྲོ་བརྡུངས་བས༔ དུག་ལྔའི་ཕུང་པོ་གཏན་ནས་བརླག༔ བདུད་དགྲ་ཐལ་བ་རྡུལ་དུ་རློགས༔ ཨོཾ་ལཾ་ཨ་ལཾ་ཧཱུྃ་ལཾ་སྟྭཾ་བྷ་ཡ་ནན༔ དེ་ནས་རྗེས་ཆོག་བྱ་བ་ནི༔ ཧཱུྃ༔ ཐུགས་རྗེ་ཁྲོས་

[Full Size]

མའི་ལྷ་ཚོགས་འཁོར་བཅས་ལ༔ དངོས་འབྱོར་ཡིད་སྤྲུལ་ཕྱི་ནང་གསང་མཆོད་འབུལ༔ ཨརྒྷཾ་སོགས། བསྟོད་དབྱངས་ཡན་ལག་རྒྱ་མཚོས་རབ་ཏུ་བསྟོད༔ ཆོ་ག་ལྷག་ཆད་འགལ་འཁྲུལ་བཟོད་པར་བཞེས༔ ཡིག་བརྒྱ་བརྗོད། ཨོཾ་ཁྱེད་ཀྱིས་སེམས་ཅན་དོན་ཀུན་མཛད༔ སོགས་ནས། བཛྲ་མུཿ རང་གནས་གཤེགས་སམ་རྟེན་ལ་བརྟན་པར་བཞུགས༔ མདུན་བསྐྱེད་དམ་ཚིག་རང་ལ་ཐིམ༔ རང་ཉིད་ཀྱང་མཐའ་ནས་དབུས་སུ་ཡལ༔ མི་དམིགས་སྟོང་ཉིད་དུ་གྱུར༔ དགེ་བས་མཆོག་ཐུན་དངོས་གྲུབ་ཐོབ་པར་ཤོག༔ བདེ་ལེགས་ཕུན་སུམ་ཚོགས་པའི་བཀྲ་ཤིས་ཤོག༔ ཧཱུྃ༔ བཀའ་བརྒྱུད་བླ་མ་རྣམས་ཀྱི་བཀྲ་ཤིས་ཤོག༔ ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག༔ སྟོང་ཉིད་སྙིང་རྗེའི་ངང་ལས་ཐུགས་རྗེའི་སྐུ༔ རྒྱལ་བའི་བསྐྱེད་ཡུམ་རྡོ་རྗེ་རྣལ་འབྱོར་མ༔ བྱིན་རླབས་དངོས་གྲུབ་ཐམས་ཅད་འབྱུང་བའི་གནས༔ ཐུགས་རྗེ་ཁྲོས་མའི་ལྷ་ཚོགས་བཀྲ་ཤིས་ཤོག༔ ཞི་རྒྱས་དབང་དྲག་ལས་རྣམས་སྒྲུབ་མཛད་མ༔ མཁའ་འགྲོ་སྡེ་བཞི་ལྷ་ཚོགས་བཀྲ་ཤིས་ཤོག༔ དཔའ་བོ་མཁའ་འགྲོ་རྣམས་ཀྱི་བཀྲ་ཤིས་ཤོག༔ ཆོས་སྐྱོང་སྲུང་མ་

[Full Size]

རྣམས་ཀྱི་བཀྲ་ཤིས་ཤོག༔ ནོར་ལྷ་གཏེར་བདག་རྣམས་ཀྱི་བཀྲ་ཤིས་ཤོག༔ དཀར་ཕྱོགས་སྐྱོང་བའི་རྣམས་ཀྱི་བཀྲ་ཤིས་ཤོག༔ གནས་པོ་དགེ་བསྙེན་རྣམས་ཀྱི་བཀྲ་ཤིས་ཤོག༔ གནས་འདིར་ཉིན་མོ་བདེ་ལེགས་མཚན་བདེ་ལེགས༔ ཉི་མའི་གུང་ཡང་བདེ་ལེགས་ཤིང་༔ ཉི་མཚན་རྟག་ཏུ་བདེ་ལེགས་པ༔ དཀོན་མཆོག་གསུམ་གྱི་བཀྲ་ཤིས་ཤོག༔ ཕྱག་འཚལ་བ་དང་མཆོད་ཅིང་བཤགས་པ་དང་༔ རྗེས་སུ་ཡི་རང་བསྐུལ་ཞིང་གསོལ་བ་ཡི༔ དགེ་བ་ཅུང་ཟད་བདག་གིས་ཅི་བསགས་པ༔ ཐམས་ཅད་རྫོ་གས་པའི་བྱང་ཆུབ་ཕྱིར་བསྔོ་འོ༔ དགེ་བ་འདི་ཡིས་མྱུར་དུ་བདག༔ གཅོད་ཡུལ་ཕྱག་རྒྱ་ཆེན་པོ་འགྲུབ་གྱུར་ནས༔ འགྲོ་བ་སེམས་ཅན་གཅིག་ཀྱང་མ་ལུས་པ༔ ཐམས་ཅད་དེ་ཡི་ས་ལ་འགོད་པར་ཤོག༔ ཅེས་ཉང་ལུགས་ལྷ་གྲངས་བཅུ་གསུམ་ཡིན༔ སེར་མ་སྒྱུར་བ་ཇོ་མོ་ལུགས༔ དམ་པ་ཨོ་རྒྱན་གཉིས་པོས་བསྒྱུར་བ་ཡིན༔ ཐམས་ཅད་འདོན་པ་རྒྱས་པ་སྟེ༔ དང་པོ་མཆེད་བཞི་ནས་ཀྱང་བཟུང་༔ བསྟོད་པ་གཞན་དག་འབུམ་བསྐུལ་སྒྱུར༔ དེ་ནི་འབྲིང་པོའི་འདོན་ལུགས་ཡིན༔ བདག་བསྐྱེད་ཁོ་ན་བསྐུལ་པ་སྟེ༔ དེ་ལ་ཚོགས་འཁོར་བྱ་ཡང་རུང་༔ ཡི་དམ་གཞན་གྱིས་ཁོག་ཕུབ་ནས༔ བདུད་རྩི་བྱིན་རླབས་སྔོན་དུ་འགྱུར༔ རྒྱུན་དུ་

[Full Size]

གཏོར་འབུལ་མེད་ཀྱང་རུང་༔ བསྙེན་དུས་བདག་བསྐྱེད་གཏོར་བསྔོས་སྦྱར་སྒྲུབ་དུས་མདུན་བསྐྱེད་བསྙེན་པ་བྱ༔ དུས་བཟང་མཆོད་པ་ཚོགས་འཁོར་བྱས༔ བསྐུལ་དང་གཏོར་ཟློག་ཟོར་ལས་བྱས༔ ཚིག་ཉུང་དོན་འཐུས་ཁྱེར་བདེ་འདི༔ གཅོད་ཡུལ་ཉམས་ལེན་བྱེད་རྣམས་ལ༔ ཕན་པར་བསམས་ནས་འབད་པས་བྲིས༔ ཉེས་འགལ་ཆོས་བདག་རྣམས་ལ་བཤགས༔ དགེ་བས་ནམ་ཞིག་འཕོ་བའི་ཚེ༔ མཁའ་འགྲོས་བདེ་ཆེན་ཞིང་ཁྲིད་ཤོག༔ ཅེས་པ་འདི་རཱ་ག་ཨ་སྱས་བསྒྲིགས་པའོ༔ ཡུམ་ཆེན་ཌཱཀིའི་གོ་འཕང་མྱུར་ཐོབ་ཤོག༔ སརྦ་མངྒ་ལཾ༔ དགེའོ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།