རྒྱུད་བརྟག་པ་གཉིས་པའི་ཟིན་བྲིས།
རྒྱུད་བརྟག་པ་གཉིས་པའི་ཟིན་བྲིས་བཞུགས་སོ། །
བླ་མ་དང་དཔལ་ཀྱཻ་རྡོ་རྗེའི་ཞབས་ལ་གུས་པས་ཕྱག་འཚལ་ལོ། །རྒྱུད་བརྟག་པ་གཉིས་པ་འདི་ལ། རྒྱ་གར་དུ་རྒྱུད་རྒྱས་པ་ལས་བརྟག་པ་གཉིས་ཕྱུང་བར་འདོད་པ་དང་། རྒྱུད་ལོགས་པ་བསྡུས་རྒྱུད་དུ་འདོད་པ་གཉིས་བྱུང་སྟེ། མུ་ཏིག་ཕྲེང་བ་ལས། འདི་སྐད་བདག་གིས་ཐོས་པ་ཞེས་བྱ་བ་ལ་སོགས་པ་གླེང་གཞིའི་ཚིག་ནི། ཁ་ཅིག་ན་རེ། གང་གི་ཕྱིར་མདོར་བསྡུས་པའི་རྒྱུད་གཞན་ཡིན་ནོ་ཞེས་ཟེར་རོ། །གཞན་ན་རེ་རྒྱུད་ཆེན་པོ་ལས་བརྟག་པ་གཉིས་པ་འདི་བཏུས་ཏེ། དེར་ཇི་ལྟ་བ་བཞིན་དུ་བསྡུས་ཏེ་བཞག་པ་ཉིད་འདིར་གླེང་གཞིའི་ཚིག་དང་བཅས་ཏེ་བཏུས་སོ་ཞེས་ཟེར་རོ། ཞེས་གསུངས་ལ། རང་ལུགས་ཀྱི་འདི་འཐད་མ་གསུངས་སོ། །བྷ་བ་བྷ་དྲའི་འགྲེལ་པ་
ལས། དེ་ལ་དགྱེས་པའི་རྡོ་རྗེ་ཞེས་བྱ་བ་ནི། རྒྱུད་གཞན་ཉིད་དུ་གྱུར་པ་སྟེ། དགྱེས་པའི་རྡོ་རྗེ་ཆེན་པོ་ལས་ཕྱུང་བ་ནི་མ་ཡིན་ནོ། །ཞེས་འབྱུང་སྟེ་འདི་ཉིད་ལེགས་ཏེ་གུར་ནས་གསུངས་པ་ལྟར་གྱི་རྡོ་རྗེ་སྙིང་པོ་བྱང་ཆུབ་པ་དང་། སྒྱུ་འཕྲུལ་གྱི་བརྟག་པ་གཉིས་ལོགས་སུ་བཀོལ་བ་ཡིན་ན་ནི། གོང་དུ་བརྟག་པ་བཅུ་གཉིས་པར། ཞེས་གསུངས་པ་མི་རིགས་ལ། སྨད་ནས་ཕྱུང་བ་ཡིན་ནའང་མིང་མི་མཐུན་པས་གནོད་དོ། །དེས་ན་བརྟག་པ་སོ་གཉིས་པ་ལས་ཕྱུང་ཞེས་པའི་དོན་ནི། རྒྱུད་རྒྱས་པ་དེ་ལས་བསྡུས་ནས་གསུངས་པའི་བསྡུས་རྒྱུད་ཡིན་པ་ལ་དགོངས་སོ། །དེ་ལྟ་བུའི་རྒྱུད་འདི་ལ་བཤད་སྲོལ་གྱི་ལུགས་ཤིན་ཏུ་ཆེ་བ་གཉིས་ཏེ། རྡོ་རྗེ་སྙིང་པོའི་འགྲེལ་པ་དང་།
དེའི་རྗེས་འབྲང་གི་ལུགས་གཅིག་དང་། འགྲེལ་པ་སྐོར་གསུམ་རྒྱ་གར་དུ་མ་ཕེབས་པའི་གོང་དུ་བྱུང་བའི་རྒྱ་གར་བའི་བཤད་སྲོལ་ལོ། །ཕྱི་མ་ལ་བོད་དུ་འགྱུར་བའི་འགྲེལ་པ་མང་དུ་ཡོད་པ་ལས། འདིར་ནི་མཚོ་སྐྱེས་དང་ཊོམ་བི་ཧེ་རུ་ཀའི་བཤད་སྲོལ་འཛིན་པ་མི་ཐུབ་ཟླ་བའི་འགྲེལ་པ་ལ་ཤས་ཆེར་བརྟེན་པའི་ལུགས་སོ། །དེ་ལ་རྒྱུད་འདིའི་དེ་ཁོ་ན་ཉིད་ཀྱི་ལྟ་བ་ལ་འགྲེལ་ཚུལ་གཉིས་ལས། ཤཱནྟི་པ་རྗེས་འབྲང་དང་བཅས་པས། སེམས་ཙམ་དུ་བཀྲལ་བ་དང་། མཚོ་སྐྱེས། མི་ཐུབ་ཟླ་བ། བྷ་བ་བྷ་དྲ་སོགས་ཀྱིས་དབུ་མར་བཀྲལ་བ་གཉིས་ལས། འདིར་ནི་དབུ་མའི་ལུགས་སུ་བྱེད་ལ། དེ་ཉིད་རྒྱུད་ཀྱི་དགོངས་པ་ཡིན་ཏེ། རྩ་རྒྱུད་ལས། དེ་ཁོ་ན་ཉིད་སྟོན་པའི་སྐབས་ཐམས་ཅད་དུ། ཤེར་ཕྱིན་གྱི་མདོ་དང་། དེའི་དགོངས་འགྲེལ་ཀླུ་སྒྲུབ་ཀྱི་གཞུང་རྣམས་ལས་འབྱུང་བ་བཞིན་དུ། རྣམ་པར་མ་ཕྱེ་བར་ངོ་བོ་ཉིད་མེད་པར་གསུངས་ཤིང་དེའི་སྐབས་གང་དུའང་ངོ་བོ་ཉིད་གསུམ་དུ་ཕྱེ་ནས། ཀུན་བཏགས་ཙམ་རང་གི་མཚན་ཉིད་ཀྱིས་མེད་ལ། གཞན་གཉིས་རང་མཚན་གྱིས་ཡོད་པའི་ཕྱོགས་ཟུར་ཙམ་ཡང་མ་བྱུང་བའི་ཕྱིར་དང་། འདིའི་བཤད་རྒྱུད་གུར་ལས་ཀྱང་། ཀུན་རྫོབ་ཏུ་ནི་འཇིག་རྟེན་ཡོད། །དཔྱད་པས་གང་ནའང་འཇིག་རྟེན་ཅི། །རྟག་ཏུ་འཇིག་རྟེན་ལྡན་པར་འཇུག །བྱང་ཆུབ་ཚུལ་འདི་བསྟན་པའོ། ཞེས་བདེན་པ་གཉིས་སུ་ཡོད་མེད་ཀྱི་ཚུལ་ངོ་བོ་ཉིད་མེད་པར་སྨྲ་བའི་ལུགས་ཇི་ལྟ་བ་བཞིན་དུ་མཛད་པའི་ཕྱིར་དང་། འདིའི་གདུལ་བྱའི་གཙོ་བོ་ནི་ཕར་
ཕྱིན་ཐེག་པའི་གདུལ་བྱའི་གཙོ་བོ་ལས་ཀྱང་དབང་པོ་རྣོ་བའི་ཕྱིར་དང་། སེམས་ཙམ་ཡང་དྲང་བའི་དོན་དུ་བཞག་ནུས་པའི་ཕྱིར་རོ། །འོ་ན་འདིའི་ལུགས་དེ་ཐ་སྙད་དུ་ཕྱི་རོལ་གྱི་དོན་ཡོད་མེད་གཉིས་དང་། རྣམ་ཤེས་ཚོགས་བརྒྱད་དང་དྲུག་ཏུ་སྨྲ་བ་གང་གི་ལུགས་ཡིན་སྙམ་ན། འདི་ལ་མཚོ་སྐྱེས་དང་། མི་ཐུབ་ཟླ་བས་གསལ་བར་མ་བཤད་ལ། བྷ་བ་བྷ་དྲས་རྣལ་འབྱོར་སྤྱོད་པའི་དབུ་མ་བའི་ལུགས་སུ་འགྲེལ་ཏེ། མན་སྙེར་ཡང་དེ་བཞིན་དུ་འགྲེལ་ལོ། །འདི་ལ་གུར་གྱི་དྲུག་པ་ལས། རིན་ཆེན་སེམས་ལས་ཕྱིར་གྱུར་པ། །སངས་རྒྱས་མེད་ཅིང་སེམས་ཅན་མེད། །གནས་པའི་དོན་དང་རྣམ་ཤེས་དག །ཕྱི་རོལ་གྱུར་པ་འགའ་ཡང་མེད། ཁམས་གསུམ་ན་ནི་དབང་ཕྱུག་ཆེ། །སངས་རྒྱས་ཀུན་ཉིད་ཡིད་ཀྱིས་བྱེད། ཁམས་གསུམ་ན་ནི་རྒྱལ་ཆེན་པོ། །སེམས་ཉིད་གཅིག་པུས་འཐོབ་པར་འགྱུར། །གཟུགས་དང་སྒྲ་དང་དེ་བཞིན་དྲི། །རོ་དང་རེག་བྱར་སྐྱེས་པའི་དངོས། །རིན་ཆེན་སེམས་འདིར་བརྗོད་ཉིད་དེ། །ཆོས་དབྱིངས་མཆོག་ཏུ་ཞི་བའོ། །གཟུགས་དང་ཚོར་དང་འདུ་ཤེས་དང་། །འདུ་བྱེད་དང་ནི་རྣམ་ཤེས་ཉིད། །ཐམས་ཅད་སེམས་འདིའི་དངོས་པོ་ལས། །ཐུབ་པས་གཞན་དུ་མ་གསུངས་སོ། ཞེས་དང་། ཡུལ་དང་དབང་པོའི་རང་བཞིན་ནི། །སེམས་ལས་ཕྱི་རོལ་གྱུར་མེད་ཀྱང་། །གཟུགས་སོགས་སོ་སོར་སྣང་བ་རྣམས། །སེམས་ཉིད་ཁོ་ན་སྣང་བ་ཡིན། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་
གཤེགས་པ་རྣམས་ལ་ཞུས་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད། སྟོང་པ་མ་ཡིན་པའི་ཕྱི་རོལ་གྱི་དོན་དུ་སེམས་སྟོང་པ་དེ་ཇི་ལྟར་སྣང་བར་འགྱུར་བ་ལགས། དེ་བཞིན་གཤེགས་པ་རྣམས་ཀྱིས་གསུངས་པ། ཐོག་མ་མེད་པའི་སྲིད་རྒྱུན་ནས། ཕྱི་ཡི་དོན་དུ་བཏགས་པ་སྟེ། །ཐམས་ཅད་སེམས་ཀྱི་རྣམ་འཕྲུལ་ཞིང་། །སེམས་ཉིད་ཀུན་ཏུ་སོང་བའོ། །ཞེས་གསུངས་པ་རྣམས་ཀྱིས་ཕྱི་དོན་བཀག་ནས། སེམས་ཙམ་ཞིག་ཏུ་བཤད་པར་འདོད་པ་སྣང་མོད་ཀྱང་། གཞུང་གི་དོན་མིན་ཏེ། ལུང་ཕྱི་མའི་སྔོན་དུ། ཨེ་མ་ཧོ་ཆོས་ཀྱི་བསྟན་པ་ནི། །ཆོས་རྣམས་ཐམས་ཅད་སྟོང་པ་ལ། །ཡང་དག་དངོས་གྲུབ་རབ་གནས་གང་། །ཆུ་ཤིང་སྙིང་པོ་མེད་པ་ལ། །སྙིང་པོ་འབྲས་བུ་རོར་ལྡན་ཞིང་། །དེ་བཞིན་སྙིང་པོ་མེད་ལུས་ལ། །བདེ་བའི་འབྲས་སུ་དངོས་གྲུབ་གནས། །ནམ་མཁའ་འབྱུང་བ་ཐམས་ཅད་དང་། །ཆོས་རྣམས་ཀུན་གྱི་གཞིར་འགྱུར་བཞིན། །མཁའ་བཞིན་དག་པའི་སེམས་ཉིད་ཀྱང་། །བདེ་མཆོག་དག་པའི་སེམས་ཉིད་དེ། །ཡུལ་དང་དབང་པོའི་རང་བཞིན་ནི། །ཞེས་ནམ་མཁའ་སྟོང་པ་འབྱུང་བ་ལ་སོགས་པའི་ཆོས་ཀུན་གྱི་གནས་སུ་འགྱུར་བ་བཞིན་དུ། སེམས་རང་བཞིན་གྱིས་སྟོང་པའང་ཆོས་ཀུན་གྱི་གཞིར་གསུངས་པས། དེའི་ཆ་ནས་སེམས་ཆོས་ཀུན་གྱི་གཞིར་གསུངས་པ་དང་། ཡང་ཐ་སྙད་དུ་སེམས་འཁོར་འདས་ཀུན་གྱི་བྱེད་པ་པོ་ཡིན་པ་ལའང་དགོངས་ཏེ། ཐམས་ཅད་སེམས་ཀྱི་རྣམ་འཕྲུལ་ཞིང་། །སེམས་ཉིད་ཀུན་ཏུ་
སོང་བའོ། ཞེས་པས་ཤེས་སོ། །ལུང་སྔ་མའི་གོང་དུའང་། སྐྱེ་འདིར་སངས་རྒྱས་མཆོག་ཉིད་དུ། །སེམས་བསྒོམས་པས་ནི་སངས་རྒྱས་སོ། །རིན་ཆེན་སེམས་ལས་ཞེས་སོགས་གསུངས་པས། འཁོར་འདས་ཀུན་ལ་སེམས་གཙོ་བོར་བསྒྲུབ་པ་ཡིན་གྱི། ཕྱི་རོལ་འགོག་པ་མིན་ལ། ཐོག་མ་མེད་པ་ནས་ཕྱི་རོལ་ཏུ་མངོན་པར་ཞེན་པའི་དབང་གིས། སེམས་ལུས་ཅན་གྱིས་སྟོང་པ་དེ་ལུས་ཅན་གྱིས་མི་སྟོང་པའི་ཕྱི་རོལ་ཏུ་སྣང་བར་གསུངས་པ་ལ། མངོན་ཞེན་གྱི་བག་ཆགས་ཀྱི་དབང་གིས། མ་དག་པའི་སྣོད་བཅུད་དུ་སྣང་བ་འབྱུང་བ་ཕྱི་རོལ་ཡོད་པར་སྨྲ་བའི་ལུགས་ཀྱང་ཡིན་པས་ན་མི་གནོད་དོ། །སེམས་ཉིད་ཁོ་ན་སྣང་བ་ཡིན། ཞེས་གསུངས་པའང་དབང་ཤེས་ལ་གཟུགས་སོགས་སྣང་བ་ན། རྣམ་མེད་དུ་སྣང་བ་ལྟར་མི་སྣང་བར་རྣམ་བཅས་པ་ལྟར་སྣང་བར་སྟོན་པའོ། །གནས་པའི་དོན་དང་ཞེས་སོགས་ནི། སེམས་ཀྱིས་བཏགས་པ་ཙམ་ལས་ཕྱི་རོལ་ཏུ་གྱུར་པ་འགོག་གི །ཐ་སྙད་དུ་ཕྱི་རོལ་མི་འགོག་གོ །དེ་བཞིན་དུ་རྩ་རྒྱུད་ལས། སེམས་ནི་ཆེན་པོ་གཅིག་ཉིད་ལས་འབྱུང་བ་ལྟར་འཇོག །ཅེས་སོགས་གསུངས་པ་རྣམས་ཀྱང་སྔར་བཤད་པ་རྣམས་ཀྱིས་ཤེས་པར་བྱའོ། །དེ་ལྟར་ན་སེམས་ཀྱི་རང་བཞིན་སྟོང་པ་ཉིད་ལས་ཕྱི་རོལ་ཏུ་གྱུར་པ་མེད་པ་དང་། ཐ་སྙད་དུ་ཆོས་རྣམས་ཀྱི་བྱེད་པ་པོ་ལ་གཟུགས་སེམས་གཉིས་ཀྱི་ནང་ནས་སེམས་གཙོ་བོ་ཡིན་པ་དང་། སེམས་ཀྱིས་
བཏགས་པ་ཙམ་ལས་ཕྱི་རོལ་ཏུ་གྱུར་པ་མེད་པ་སོགས་ལ་བསམས་ནས་སེམས་ལས་ཕྱི་རོལ་ཏུ་གྱུར་པ་མེད་པ་དང་། གཟུགས་སོགས་སེམས་ཙམ་དུ་གསུངས་པའི་གསུང་རབ་རྣམས་ཀྱི་དོན་ཤེས་པར་བྱའོ། །རྒྱུད་ལ་མཚན་གྱི་དོན་དང་། མཚན་དེ་ལྡན་གྱི་གཞུང་གཉིས་སོ། །དེ་ལ་གཉིས། གླེང་གཞི་དང་། དེ་ལ་བརྟེན་ནས་འབྱུང་བའི་ཆོས་སོ། །དང་པོ་ལ་སྡུད་པ་པོ་དང་། སྟོན་པ་ངོ་བོ་ཐ་དད་ཀྱི་ཚུལ་དང་། ཐ་མི་དད་ཀྱི་ཚུལ་གྱིས་བཤད་པ་གཉིས་སོ། །དང་པོ་ནི། ཐོས་པས་ཁྱད་གཞིར་བྱའོ། །དེའི་ཁྱད་པར་གྱི་ཆོས་ལ་ལྔ་ལས། གང་ཐོས་པ་ནི་འདི་སྐད་ཀྱིས་སྟོན་ཏེ། དེ་བཞིན་ཞེས་པ་ནས་ཟེའུ་འབྲུ་ལ་ནི་ཨའི་རྣམ་པའོ་ཞེས་པའི་བར་ཏེ་ཁ་སྦྱོར་གྱི་དགོངས་པའོ། །ཡང་འདི་སྐད་ཅེས་པ་ཐོས་ཚུལ་ལའང་མང་པོ་བཤད་དེ། དོན་ནི་སྒྲོ་སྐུར་དང་བྲལ་བར་འོག་ནས་འབྱུང་བ་ལྟར་རོ། །བདག་གིས་ཞེས་པ་ནི་སྡུད་པ་པོ་སྟེ་འདི་རྡོ་རྗེ་སྙིང་པོ་ཡིན་པར་ཀུ་མུ་ཊི་དང་བྷ་བ་བྷ་དྲས་སོ། །གང་གི་ཚེ་ཐོས་པ་ནི། དུས་གཅིག་སྟེ། ཆོས་རྙེད་དཀའ་བ་དང་། སྡུད་པ་པོ་ཐོས་པ་མང་བ་དང་། བསམ་མི་ཁྱབ་ཀྱི་རྣམ་ཐར་ཐོབ་པར་སྟོན་པ་གསུམ་དུ་བཤད་དོ། །གང་ལ་ཐོས་ན། བཅོམ་ཞེས་པ་སྟེ། བྷ་ག་ཝན་གྱི་སྒྲ་སྔ་མ་སྐལ་བ་དྲུག་དང་། མི་མཐུན་ཕྱོགས་བཅོམ་པ་གཉིས་ལ་དྲང་དུ་རུང་ཞིང་། ལྡན་པ་ནི་དེ་གཉིས་དང་ལྡན་པའོ། །འདས་པ་ནི་བོད་ཀྱི་མཁས་པས་བསྣན་པའོ། །དེ་ལས་ཐོས་ཞེས་པའི་རྣམ་དབྱེ་ལྔ་པ་ལ། དེ་ལ་ཐོས་ཞེས་བདུན་པའི་
སྒྲའོ། །ཐོས་ཞེས་པ་ནི་རྒྱུད་དོན་ཐམས་ཅད་སྔོན་དུ་གྱུར་པ་གཅོད་ལ། བདག་གིས་སྟོན་པ་ལ་ཐོས་པར་བསྟན་པས། བརྒྱུད་ནས་འོངས་པའང་གཅོད་དོ། །གང་དུ་ཐོས་པ་ནི། གཞུང་ལྷག་མས་སྟོན་པའི་སྐུ་གསུང་ཐུགས་ཀྱི་ནི་རིགས་ལྔ་དང་། སྙིང་པོས་ནི་དེ་དག་གི་རྒྱུ་དང་མཆོག་ཏུ་གྱུར་པའི་དེ་བཞིན་གཤེགས་པ་དྲུག་པའོ། །དེ་ལྟར་དྲུག་གི་རིགས་ལྔའི་རྡོ་རྗེ་བཙུན་མོ་སྤྱན་སོགས་བཞི་དང་། བདག་མེད་མ་ལྔ་ནི་བཙུན་མོའོ། །བྷ་ག་ནི་གཙོ་བོ་དེ་རྣམས་ཀྱི་ལོངས་སྤྱོད་པའི་གནས་སམ། ཁྱིམ་སྟེ། བཤད་པ་དང་པོ་འདིར་གཞལ་ཡས་ཁང་གི་རྟེན་ཆོས་འབྱུང་ཡིན་ལ། དེའི་དབུས་ཀྱི་གཞལ་ཡས་ཁང་ན་བཞུགས་པ་ལ་ཐོས་སོ། །སྙིང་པོ་དང་བྷ་ག་རྣམས་ཞེས་ཀུ་མུ་ཊིར་ཡོད་ལ། མན་སྙེར་ཡང་སྟེ། དེར་སྙིང་པོའི་སྒྲ་དཔེ་ཁ་ཅིག་ལ་མེད་པ་མ་དག་པར་བཤད་ཅིང་། བྷ་བ་བྷ་དྲས་ཀྱང་མང་ཚིག་གི་དོན་བཤད་དོ། །སྡུད་པ་པོ་དང་སྟོན་པ་པོ་ཐ་མི་དད་ཀྱང་། སི་བྷུ་ཊི་ལས། འཆད་པ་པོ་དེ་ཞེས་སོགས་ཀྱིས་བཤད་དོ། །འདི་ལའང་གཞུང་ལྷག་མའི་དོན་ནི་སྔར་དང་འདྲ་ལ། སྡུད་པ་པོ་གཞན་མེད་པར་གསུངས་པ་ནི། རྒྱུད་གཞན་པ་དང་དམན་མཆོག་ཡོད་པ་འགོག་གི་སྡུད་པ་པོ་མེད་པར་སྟོན་འདོད་པ་ནི་གཏན་མིན་ནོ། །བཤད་པ་དེ་གཉིས་སྔོན་འབྱུང་རྣམ་འཕྲུལ་ལྟར་བཤད་པ་ཡིན་ལ། རྗེས་འཇུག་ཉམས་ལེན་ལ་ནི་བསྐྱེད་རིམ་སྟོན་པར་བོད་དག་འཆད་དེ། ཀུ་མུ་ཊི་དང་མཚོ་སྐྱེས་དང་།
བྷ་བ་བྷ་དྲ་སོགས་ཀྱིས་མ་བཤད་ཀྱང་རུང་ངོ་། །བཤད་པ་གཉིས་པ་ལ་ཨེ་ཡིག་ས་རུ་ཤེས་པར་བྱ། །ཞེས་སོགས་དྲངས་ཏེ་བཤད་པ་ནི། ཡི་གེ་དང་པོ་བཞིའི་བཤད་པ་ཡིན་ལ། རྫོགས་རིམ་དང་སྦྱར་ན་འཁོར་ལོ་བཞི་ལ་བརྟེན་པའི་གཏུམ་མོ་བསྒོམ་པ་ལ་བཤད་དུ་རུང་ངོ་། །དེའི་ཚེ་རྡོ་རྗེ་བཙུན་མོའི་བྷ་ག་ནི་རྩ་འཁོར་བཞི་ལ་བྱ། སྲ་བའི་ཆོས་ཀྱི་ས་ཉིད་དེ། །ཞེས་སོགས་དྲངས་པ་ནི་ལས་རྒྱའི་སྐབས་སོ། །སྟོན་པ་ནི་ཡི་གེ་བཞིའི་ངོ་བོ་ཉིད་བཅོམ་ལྡན་འདས་ཀྱི་ངོ་བོར་བཤད་པས་ཀུ་མུ་ཊིའི་དགོངས་པ་ལྷན་སྐྱེས་ལ་བཤད་ན་བདེའོ། །ཡང་ན་ཞེས་བཤད་པ་གསུམ་པ་ལ། ཁ་སྦྱོར་གྱི་ཨེ་ཝཾ་གཉིས་ཀྱི་དོན་བཤད་པ་དྲངས་པར། བུད་མེད་ལ་ནི་ཨེ་མཛེས་པ། །དེ་ནི་བཾ་གྱིས་རྣམ་པར་བརྒྱན། །ཅེས་དྲངས་པ་ནི། ད་ལྟར་འགྱུར་བ་ལ་མི་སྣང་ཞིང་། མན་སྙེར་ཡང་དེ་མི་འདོན་པས་དཔེ་ཁ་ཅིག་ལ་མེད་པར་གསལ་ལོ། །དེ་དག་གི་དོན་ནི་སྔར་གྱི་བཤད་པ་གཞན་དོར་ནས་རྩ་འཁོར་གཉིས་འཆད་པའོ། །གཉིས་གཉིས་སུ་ནི་བརྗོད་པ་ཉིད། །བདག་གིས་ཐོས་པས་འདོད་ཆགས་ཆེ། །མཚོན་འགྱུར་འདི་ལ་ཡང་དག་གནས། །ཞེས་དྲངས་པ་ནི་ད་ལྟ་འགྱུར་བ་ལ། བདག་གིས་ཐོས་པ་ཞེས་བྱ་བ་ནི། དེ་སྐད་དུ་འདོད་ཆགས་ཆེན་པོ་འདི་ལ་རྟག་ཏུ་གནས་པའོ། །ཤྲུ་ཞེས་བྱ་བ་ནི་འཛག་པར་གསུངས་པའོ། །ཏྲ་ཞེས་བྱ་བ་ནི་གང་ཡང་བདེ་བ་ཆེན་པོའི་མགོན་པོའོ། །ཞེས་པ་འདི་ཡིན་ལ། དེའི་དོན་ནི་མན་སྙེར་ཨེ་བཾ་གྱི་དོན་ལྷན་སྐྱེས་ཀྱི་ཆགས་ཆེན་གྱི་
རྒྱུད་ཀྱི་དབུ་ཞབས་ཐམས་ཅད་ཀྱི་དོན་དུ་གནས་པ་ལ་བཤད་དོ། །ཤྲུ་དང་ཏྲའི་དོན་བཤད་པ་ཀུ་མུ་ཊིར་མ་བྱུང་ཡང་། བཤད་པ་གསུམ་པའི་འཆད་ལུགས་ཡིན་པས་འདིར་བླང་ངོ་། །སྲ་བའི་ཆོས་ཀྱི་ཞེས་སོགས་ཀྱིས་ལས་རྒྱའང་བསྟན་པས། རྡོ་རྗེ་བཙུན་མོ་སྤྱན་སོགས་བཞིས་ནི་ནང་གི་རྩ་འཁོར་དང་། ཕྱིའི་ལས་རྒྱ་གཉིས་སྟོན་ནོ། །དུས་གཅིག་ན་ལ་གསུམ་བཤད་པའི་སྣ་ནི་མིའི་སྣ་སྟེ། སྐྱེས་པ་དང་བུད་མེད་ཀྱི་དྷཱུ་ཏཱིའི་མར་སྣ་དང་། དེར་འོ་མའི་རྒྱུན་བཞིན་དུ་འོང་བའི་བྱང་སེམས་འཛག་པ་བདེ་བའི་དུས་དང་། ཕྱི་རོལ་ཏུ་འཕོས་པ་ནི་འགྲོ་བ་སྟེ་གདུང་བར་བྱེད་པས་མེ་དང་འདྲ་བ་ལ་མན་སྙེར་བཤད་དོ། །མཚོ་སྐྱེས་ལྟར་ན་དེའི་འགྲེལ་པར། ཕྱི་དང་གསང་བ་དེ་བཞིན་ནང་། །དེ་བཞིན་ཉིད་དོན་རྣམ་པ་བཞིན། །དཀྱིལ་འཁོར་ལས་ཀྱི་ཕྱག་རྒྱ་དང་། །ལུས་དང་རང་བཞིན་མེད་རྣམས་སོ། །ཞེས་བྷ་ག་ལ་བཞི་གསུངས་པའི་ཕྱིའི་བྷ་གའི་དཀྱིལ་འཁོར་ལ་བཤད་པ་ནི་སྔོན་བྱུང་ལྟར་བཤད་པ་དང་དོན་འདྲའོ། །གསང་བ་ལས་ཀྱི་ཕྱག་རྒྱའི་བྷ་ག་ལ་བཤད་ན་ཐོས་པ་ནི་བཙུན་མོའི་བྷ་ག་ལས་འཛག་པའོ། །བི་ནི་སྣ་ཚོགས་པ་དང་། ཛ་ཧ་ར་ནི་འཕྲོག་པའི་དོན་དུ་བཤད་དོ། །ལས་རྒྱའི་བྷ་ག་ལ་བརྟེན་ནས་བྱང་སེམས་འཛག་པས། རྣམ་རྟོག་སྣ་ཚོགས་འཕྲོག་པའི་ལྷན་སྐྱེས་སྐྱེ་བ་ལ་བྱའོ། །བཤད་པ་དེ་ལ་ཨེ་བཾ་མ་ཡ་དང་། དུས་གཅིག་དང་། བཅོམ་ལྡན་འདས་ལ་བཤད་པ་མ་བྱུང་ཡང་།
གཞན་རྣམས་ནི་བཤད་རྒྱུད་སྔར་དྲངས་པས་ཤེས་པར་བྱ། སྟོན་པ་ནི་ཧ་རའི་དོན་དང་དོན་གཅིག་པར་བྱ་དགོས་པ་འདྲའོ། །བཤད་པ་གསུམ་པ་ནང་ལུས་ཀྱི་བྷ་ག་ལ་བཤད་ན། ཨེ་བཾ་མ་ཡ་ནི་འཁོར་ལོ་བཞི་དང་། ཤྲུ་ཏྲ་ནི་འཛག་པ་དང་འཁོར་ལོ་བཞི་ལ་བཞུགས་པར་བཤད་པ་ཙམ་ལས་མ་བྱུང་ཡང་། འཁོར་ལོ་བཞི་ལ་བརྟེན་པའི་གཏུམ་མོ་བསྒོམ་པ་སློབ་དཔོན་འདི་ཡིས་སྒྲུབ་ཐབས་སུ་བཤད་པ་ལྟར་བྱའོ། །བཤད་པ་བཞི་པ་ལ། ཨེ་བཾ་ནི་ཡང་དག་པར་སྦྱོར་བ་དང་། བདག་གིས་ནི་བདག་ཏུ་འཛིན་པ་དང་། ཐོས་པ་ནི་འཛག་པ་དང་། དུས་གཅིག་ནི་ཐམས་ཅད་ཀྱི་ཐུན་མོང་མ་ཡིན་པའི་སྐད་ཅིག་ལ་བཤད་པ་ཙམ་ལས་མ་བྱུང་ངོ་། །བཤད་པ་ལྔ་པ་ལ་འདི་སྐད་བདག་གིས་ནི་ཚངས་པའི་གནས་བཞི་ལས་སོ། །ཐོས་པ་ནི་བྱུང་བ་དང་། བཅོམ་ལྡན་འདས་ནི་བདེ་བ་ཆེན་པོ་དང་། བྷ་ག་ལ་བཞུགས་པ་ནི་སྟོང་པ་ཉིད་ཀྱིས་སོ། །ཞེས་བཤད་པའི་སྔ་མ་དེ་བཞིན་ཉིད་ལ་བཤད་པ་དང་། ཕྱི་མ་འབྲས་བུ་ལ་སྦྱོར་བ་ཡོད་ཀྱང་། མི་འབྱོར་བས་སྔ་མས་ནི་ཚངས་པའི་གནས་བཞིའི་ངོ་བོ་འཁོར་ལོ་བཞིར་གནས་པའི་ཨ་ཧཾ་ཡང་དག་པར་སྦྱར་བས། བྱང་སེམས་འཛག་པ་ལ་བརྟེན་ནས། བདེ་ཆེན་གྱི་ལྷན་ཅིག་སྐྱེས་པའི་བདེ་བ། སྟོང་ཉིད་ཀྱི་དོན་ལ་ཞུགས་པ་ཉིད་ཀྱིས་བཞུགས་པ་ནི་བསྒྲུབ་བྱར་བཞེད་པའི་དོན་ནོ། །དེ་ལྟར་བྱས་ན་བཤད་པ་དང་པོའི་དོན་གྱིས་རྒྱུད་སྨིན་པར་བྱས། དེ་ནས་ནང་གི་འཁོར་ལོ་བཞི་ལ་བརྟེན་པའི་
གཏུམ་མོ་བསྒོམ་པ་དང་། གསང་བ་ཕྱག་རྒྱ་ལ་བརྟེན་པ་གཉིས་ནི་སྒྲུབ་བྱེད་ཡིན་ལ། བསྒྲུབ་བྱ་ནི་ལྷན་སྐྱེས་ཀྱི་བདེ་སྟོང་སྦྱོར་བ་ཡིན་ནོ། །ཞེས་པར་འགྱུར་ཏེ་ཤིན་ཏུ་ལེགས་སོ། །བསྒྲུབ་བྱ་བདེ་སྟོང་སྦྱོར་བའི་རང་བཞིན་མེད་པའི་སྟོང་པ་ནི། ལེའུ་ལྔ་པར་གཟུགས་མེད་ནས་སེམས་ལས་བྱུང་བའང་མེད་ཅེས་པའི་བར་གྱིས་གསུངས་པ་ལྟར་ཡིན་ལ། དེའང་མཚོ་སྐྱེས་ཀྱིས་མཐོང་བ་པོ་ལ་སོགས་པས། མིག་ནས་ལུས་དབང་གི་བར་ལྔ་དང་། གང་ཟག་ཀྱང་མེད་པ་དང་། ཆོས་ཀྱི་སྐྱེ་མཆེད་ཀྱང་སྡུད་དོ། །མེད་ཚུལ་ནི་ངོ་བོས་མེད་པ་ལ་བཤད་དེ། གང་ཟག་དང་ཆོས་ལ་རང་བཞིན་གྱིས་གྲུབ་པ་མེད་དོ། །དེ་ལྟར་དབུ་མའི་ལྟ་བས་གཏན་ལ་ཕབ་པའི་སྟོང་ཉིད་དེའང་བསྒོམ་པ་ན། ལྷན་སྐྱེས་ཀྱི་བདེ་བ་ཆེན་པོས་བསྒོམ་དགོས་པས། བདེ་བ་དེ་འདྲེན་པའི་ཐབས་ནི། སྔར་བཤད་པའི་ནང་དང་གསང་བའི་སྒོ་ནས་ལུས་ལ་གནད་དུ་བསྣུན་པ་གཉིས་ཡིན་ནོ། །རྒྱུད་འདིར་རྩལ་དུ་བཏོན་ནས་འཆད་པ་ནི། ལྷན་སྐྱེས་ཀྱི་བདེ་སྟོང་སྦྱོར་བ་ཡིན་པར་གཞུང་གི་ཆ་དུ་མ་ཞིག་ལས་ཤེས་ལ། ཁྱད་པར་དུ་འཇིག་རྟེན་འདི་དང་ཕ་རོལ་ཏུ། །དེ་མེད་པས་ནི་དངོས་གྲུབ་མེད། །གང་གིས་མི་ཤེས་ཀྱཻ་རྡོ་རྗེ། །དེ་ཡི་ངལ་བ་དོན་མེད་འགྱུར། །ཞེས་གསུངས་པ་ལས་ཀྱང་ཤིན་ཏུ་གསལ་བས། བཅོམ་ལྡན་འདས་བྷ་ག་ལ་བཞུགས་པར་སྟོན་པའི་གླེང་གཞི་སྐབས་སུ།
བདེ་སྟོང་སྦྱོར་བ་ལ་ངེས་པ་ཆེན་པོ་སྟེར་བ་གྲུབ་ཆེན་མཚོ་སྐྱེས་ཀྱིས་བཤད་པ་འདི་འདྲ་ཞིག་ངེས་པར་དགོས་སོ། །འདིར་མུ་ཏིག་ཕྲེང་བ་ལས། གླེང་གཞིའི་ཚིག་གིས་གསང་ཆེན་བསྟན་པ་འགོག་པ་ལ། དང་པོར་བསྟན་པ་དང་། འོག་ཏུ་འཆད་པར་འགྱུར་བ་དང་། ཡི་གེའི་དོན་ལ་མ་ཞུགས་པའི་ཕྱིར། འཆད་འགྱུར་གྱི་དོན་གཞན་ལ། དོན་གཞན་གྱི་ཚིག་གིས་ནན་གྱིས་སྦྱོར་བ་ནི། རྨོངས་པ་ངོ་མཚར་བསྐྱེད་པའོ། །ཞེས་བཤད་པས་ནི་མཚོ་སྐྱེས་ཀྱིས་གླེང་གཞི་རྫོགས་རིམ་ལ་སྦྱོར་བ་འགོག་ཅེས་བོད་ཁ་ཅིག་སྨྲའོ། །རྒྱུད་འདིར་ཐོག་མར་བྱུང་བའི་གླེང་གཞིའི་ཚིག་རྣམས་རྒྱུད་རྒྱས་པ་ལས་བཀོལ་བའི་འགོར། རྒྱས་པའི་གླེང་གཞི་ཡང་བཀོལ་ནས་སྦྱར་བ་དང་། རྒྱུད་རྒྱས་པ་ལས་གཞན་པའི་བསྡུས་རྒྱུད་ཀྱི་འགོར་གླེང་གཞི་གསུངས་པར་འདོད་པ་དང་། གཞན་དག་ནི་འདི་གསང་ཆེན་མཆོག་གི་དོན་གཞན་ཡིན་ནོ། །ཞེས་ཟེར་རོ། །ཞེས་བཤད་པས་འདི་སྐད་བདག་ཐོས་སོགས་གླེང་གཞིའི་དོན་དུ་མི་འཆད་པར་རྫོགས་རིམ་སྟོན་པ་ལ་སྦྱོར་བ་འགོག་པར་འདུག་གོ །འོན་ཀྱང་རྒྱུ་མཚན་གསུམ་པོ་ལ་བརྟགས་ན། འདི་སྐད་སོགས་ཀྱི་དོན་ལ་རྫོགས་རིམ་གྱི་དོན་ལ་བཤད་པ་བྱེད་པའང་འགོག་པ་འདྲ་བ་ཞིག་འདུག་སྟེ་དགོངས་པ་གཞན་ཡོད་མཆིས་མེད་པར་དེ་ལྟར་བཞེད་ན་ནི་ཤིན་ཏུ་མི་རིགས་ཏེ། འདུས་པའི་གླེང་གཞི་ལ་དགོངས་པ་ལུང་སྟོན་དང་། རྡོ་རྗེ་ཕྲེང་བས་རྫོགས་རིམ་གྱི་དོན་དུ་མ་ཞིག་བཤད་པའི་ཕྱིར་དང་། ཁ་སྦྱོར་ལས་ཀྱང་དེ་ལྟར་
གསུངས་པའི་ཕྱིར་དང་། གསང་བ་གྲུབ་པ་དང་དེ་ཉིད་གསལ་བ་ལས་ཀྱང་རྫོགས་རིམ་ལ་སྦྱར་ནས་དུ་མ་ཞིག་བཤད་པའི་ཕྱིར་དང་། རྒྱུ་མཚན་གསུམ་པོ་ལའང་བཟློག་ན་གནོད་པ་ཅན་གྱི་ཚད་མ་མེད་པའི་མ་ངེས་པའི་རྟགས་སུ་འདུག་པའི་ཕྱིར་དང་། ཁྱད་པར་དུ་ཡི་གེའི་དོན་ལ་མ་ཞུགས་པས་གཞུང་དེའི་དོན་མིན་པ་དང་། དེ་ལྟར་འཆད་པ་རྨོངས་པ་ངོ་མཚར་བསྐྱེད་པར་སྨྲ་བ་ལྟར་ན། ཡེ་ཤེས་རྡོ་རྗེ་ཀུན་ལས་བཏུས་ནས་གསུངས་པའི་ཚུལ་བཞིའི་བཤད་པ་དང་། མཐའ་དྲུག་གི་དྲང་ངེས་གཉིས་དང་། སྒྲ་ཇི་བཞིན་མིན་པ་དང་། དགོངས་བཤད་ཐམས་ཅད་ཀྱང་དེ་ལྟར་ཐལ་བར་འགྱུར་རོ། །གཉིས་པ་དེ་ལ་བརྟེན་ནས་འབྱུང་བའི་ཆོས་ལ་བརྟག་པ་སྔ་ཕྱི་གཉིས་ཀྱི་དང་པོ་ལ། བརྟག་པ་སྔ་ཕྱི་གཉིས་ཀྱི་དང་པོའི་ལེའུ་དང་པོ་ལ་གཉིས་ཀྱི་ཞུ་བ་ནི། འདིར་མ་བྱུང་ཡང་དགོས་ཏེ། འོག་ནས་ལེགས་སོ་ལེགས་སོ་ཞེས་སོགས་ཀྱིས་ཤེས་སོ། །ཞེས་བོད་ཀྱི་བླ་མ་ཁ་ཅིག་གསུངས་ཏེ། ཀུ་མུ་ཊི་དང་མཐུན་ནོ། །ཇི་ལྟར་ཞུས་པ་ནི། རྡོ་རྗེ་སྙིང་པོས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་བ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡེ་ཤེས་ཀྱི་དབང་པོ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་རྗེ་བཙུན་གསང་བའི་ཡང་ཤིན་ཏུ་གསང་བའི་གླེང་གཞིའི་ཚིག་གསུངས་པ་ཉན་པར་འཚལ་ན། སྐུ་ནི་གང་གསུང་ནི་གང་ཐུགས་ནི་ཅི་ལགས། དེ་ཉིད་
གསང་བ་གསུམ་པོ་འདི་རྣམས་ཀྱིའང་སྙིང་པོ་ཤིན་ཏུ་ཆེས་གསང་བ་དེ་གང་ལགས། དེའི་ཕྱིར་བཅོམ་ལྡན་འདས་ཀྱིས་བཤད་པར་རིགས་ལགས་སོ། །ཞེས་པའི་ཚུལ་གྱིས་ཞུས་པར་ཀུ་མུ་ཊི་ལས་འབྱུང་ངོ་། །ལན་ལ་བཤད་པར་དམ་བཅའ་བ་དང་། དོན་དངོས་སོ། །དང་པོ་ནི། དེ་བཞིན་ནས་ཉོན་ཅིག་ཅེས་པའི་བར་རོ། །འདིར་པདྨ་ཅན། མུ་ཏིག་ཕྲེང་བ། བྷ་བ་བྷ་དྲའི་འགྲེལ་པ་རྣམས་ནས། དེར་དེ་བཞིན་གཤེགས་པ་ཐམས་ཅད་ཅེས་འབྱུང་གི །དེ་ནས་ཞེས་པ་མེད་ལ། ཀུ་མུ་ཊིར་དེ་ནས་དེ་བཞིན་གཤེགས་པ་ཞེས་འབྱུང་ངོ་། །དེར་ཞེས་པ་ལྟར་ན་བཀའ་སྩལ་པའི་གནས་སོ། །དེ་ནས་ཞེས་པ་ལྟར་ན་ཞུས་པའི་རྗེས་དེ་ནས་སོ། །གསང་བ་གཉིས་དང་རྗེ་བཙུན་ལ་ཀུ་མུ་ཊིར་བཤད་པ་མ་བྱུང་ལ། པདྨ་ཅན་ལས་གསང་བ་ནི་རྡོ་རྗེ་གསུམ་དང་། ཆེས་ཤིན་ཏུ་གསང་བ་ནི། གསང་བ་གསུམ་གྱི་སྙིང་པོ་རྡོ་རྗེ་སེམས་དཔའ་འབྲས་བུ་ཉིད་ལ་བཤད་དོ། །མུ་ཏིག་ཕྲེང་བར་གསང་བ་ནི་གསང་སྔགས་ཀྱི་ལྷ་རྣམས་ཀྱི་སྐུ་གསུང་ཐུགས་ཀྱི་རྡོ་རྗེ་ནི་དད་པར་དཀའ་བ་དང་། ཤིན་ཏུ་གསང་བ་ནི་དྲག་པོ་དང་ཆགས་པ་དང་ལྡན་པ་དང་། རྗེ་བཙུན་ནི་མཆོག་གི་ལྷ་དང་། ཨེ་མ་ཧོ་ནི་རྡོར་སྙིང་རྡོ་རྗེའི་རིགས་ཅན་ཡིན་པས་རིགས་དེ་རྙེད་དཀའ་བས་ངོ་མཚར་བ་དང་། གཞན་དོན་ལ་སེམས་དཔའི་སྙིང་རྗེ་ཆེན་པོ་དང་། རང་ལ་ཕན་པའི་བསམ་པ་ཅན་གྱི་བྱང་ཆུབ་སེམས་དཔའ་ནི་སྐྱེས་བུའི་མཆོག་ཏུ་གཟིགས་ནས་ལེགས་སོ་གཉིས་གསུངས་པར་བཤད་དོ། །ཞུ་བ་ལ་དགྱེས་པའི་དོན་དུ་མི་འཆད་དོ། །བྷ་བ་བྷ་དྲས་རྗེ་བཙུན་ནི་ཡི་དམ་འགྲོ་བ་ཀུན་གྱི་བླ་མར་གྱུར་པ་དང་།
གསང་བ་གཉིས་ནི་རིམ་པ་གཉིས་ལ་བཤད་དོ། །ཨེ་མ་ཧོ་ནི་ངོ་མཚར་བའོ། །ལེགས་སོ་གཉིས་ནི་ངོ་མཚར་བ་དང་རྩོད་པ་དང་ཞེས་སོགས་ལྟར་རོ། །སེམས་དཔའ་གསུམ་ནི་རིམ་པ་བཞིན་དུ་སྐུ་གསུང་ཐུགས་ཡིན་ལ། དེའང་རིམ་པ་བཞིན་དུ་ཕྱག་གཉིས་པ་དང་། ཕྱག་བཞི་པ་དང་། ཕྱག་དྲུག་པ་སྟེ། དེ་གསུམ་དང་འབྲས་བུ་སྙིང་པོ་ཉོན་ཅིག་ཅེས་བཤད་དེ། སྙིང་པོ་ཀྱཻ་རྡོ་རྗེ་ནི་ཕྱག་བཅུ་དྲུག་པའོ། །ལན་དངོས་ནི། སྐུ་གསུང་ཐུགས་ནི་རབ་ཏུ་གྲགས་པས་གྲུབ་པས། དེ་གསུམ་གྱི་སྒྲ་དོན་ལ་མ་ཞུས་པར། དེ་གསུམ་གྱི་མཚན་གཞན་གྱི་སྒྲ་དོན་ཞུས་པའི་སྒོ་ནས། ཡོན་ཏན་གྱི་ཁྱད་པར་ཤེས་པར་འདོད་ནས་ཞུས་པ་ནི། གང་ཕྱིར་ཞེས་པ་གསུམ་མོ། །དེ་དག་གི་ལན་སྟོན་པ་ནི་གཟུགས་བརྙན་ལ་སོགས་པ་ལྟར་རང་བཞིན་མེད་པའི་སྟོང་ཉིད་ནི། མཚན་འཛིན་གྱིས་མི་ཕྱེད་པའི་ཕྱིར་རྡོ་རྗེའོ། །ཡུལ་དེ་དང་གཉིས་སུ་མེད་པར་མཉམ་པ་ཉིད་དུ་ཞུགས་པའི་ངོ་བོས། སྲིད་པ་གསུམ་གྱི་དངོས་པོ་ཐམས་ཅད་གཅིག་པ་སྟེ་རོ་མཉམ་པ་ཉིད་དུ་གྱུར་པའི་ཡེ་ཤེས་ནི། སེམས་དཔའ་སྟེ་རྐང་པ་གཉིས་ཀྱི་སྐུ་རྡོ་རྗེ་ནི་རྡོ་རྗེ་སེམས་དཔར་གསུངས་སོ། །ཡེ་ཤེས་དང་ཆེན་པོ་གཞི་མཐུན་ཡིན་ལ། དེའང་ཡེ་ཤེས་ལྔ་རྣམས་སོ། །དེའི་ཕྱིར་སངས་རྒྱས་ལྔའོ། །རོ་ནི་ཁ་བ་སོགས་དྲུག་དང་། དེ་དང་ཡེ་ཤེས་ཆེན་པོ་གཉིས་ཀྱང་གཞི་མཐུན་པས་ཏེ་གུར་ལས། ཁ་བ་དང་ཚ་བ་གཉིས་རྡོ་རྗེ་མི་བསྐྱོད་པ་དང་། མངར་བ་རྣམ་སྣང་དང་། སྐྱུར་བ་རིན་འབྱུང་དང་། ལན་ཚྭ་འོད་དཔག་མེད་དང་། རོ་ཐམས་ཅད་དམ་
བསྐ་བ་ནི་དོན་གྲུབ་ཀྱི་རིགས་སུ་བཤད་ལ། རོ་ལོངས་སྤྱོད་པའི་གནས་ནི་མགྲིན་པ་ཡིན་པའི་ཕྱིར་རོ། །རོས་གང་བའི་གསུང་རྡོ་རྗེ་ནི་སེམས་དཔའ་ཆེན་པོར་གསུངས་སོ། །དམ་ཚིག་ནི་བསྐྱང་བར་བྱ་བ་སྟེ། དེ་ལའང་གཉིས་ལས་བསྲུང་བའི་དམ་ཚིག་བཞི་དང་། བཟའ་བའི་དམ་ཚིག་བཅུད་ལེན་ཏེ། བདུད་རྩི་ལྔ་བསྟེན་པ་ལ་འདྲིས་པ་དང་། གོམས་པར་བྱེད་པ་ནི། རྟག་ཏུ་དམ་ཚིག་ལ་སྤྱོད་པའོ། །དེའི་ཕྱིར་ཐུགས་རྡོ་རྗེ་ནི་དམ་ཚིག་སེམས་དཔའོ། །དམ་ཚིག་བཞི་ནི་རྣམ་ཤེས་ལྔ་ཡུལ་ལྔ་ལས་བསྲུངས་པ་དང་། ཕུང་པོ་ལྔ་འདུས་པ་དང་། ཁམས་བཞི་འདུས་པ་དང་། བྱང་ཆུབ་ཀྱི་སེམས་ལ་གོམས་པའི་དམ་ཚིག་ཏུ་ཀུ་མུ་ཊི་ལས་འཆད་དོ། །སེམས་དཔའ་གསུམ་གྱི་དྲིས་ལན་ནི། པདྨ་ཅན་དང་། མུ་ཏིག་ཕྲེང་བ་དང་། བྷ་བ་བྷ་དྲ་དང་། ནག་པོ་བའི་འགྲེལ་པ་རྣམས་སུ་རིམ་པ་བཞིན་དུ་ཆོས་སྐུ་དང་ལོངས་སྐུ་དང་སྤྲུལ་སྐུ་གསུམ་ལ་འཆད་པ་ཉིད་ལེགས་སོ། །ཤེས་རབ་འདི་ཡིས་རྡོ་རྗེ་སེམས་དཔར་བརྗོད་ཅེས་པའི་བཤད་པ་ནི། རིགས་པས་ཞེས་བྱ་སྟེ་ཆོས་ཀྱི་སྐུའོ། །ཡང་ན་ངེས་པར་འབྱེད་པ་འདིས་ཤེས་རབ་དང་རིག་པ་ནི་སྦྱོར་བ་སྟེ་སྙིང་རྗེའོ། །ཡེ་ཤེས་ནི་ཐབས་དང་ཤེས་རབ་ཀྱི་བདག་ཉིད་དོ། །དེའི་རོས་གང་བ་ནི་ལོངས་སྤྱོད་རྫོགས་སྐུའོ། །ཆེན་པོ་ནི་བྱང་སེམས་རྣམས་ཀྱིས་རྟོགས་པར་བྱ་བའོ། །དམ་ཚིག་ནི་ཡང་དག་པར་འགྲོ་བར་བྱེད་ཅིང་ཐོབ་པར་བྱེད་པ་སྟེ། གདུལ་བྱ་རྣམས་ཀྱི་དོན་གྱི་ཕྱིར་རབ་ཏུ་འཇུག་པའི་དམ་ཚིག་སེམས་དཔའ་ནི་སྤྲུལ་སྐུའོ་ཞེས་པདྨ་ཅན་ལའོ། །སྙིང་པོ་དྲིས་
ལན་གྱི་དྲི་བ་ལ། མཚན་བསྡུས་པའི་དོན་དྲིས་པ་ནི། མིང་ཞེས་པ་གཉིས་སོ། །ཀྱཻ་རྡོར་གྱི་མཚན་སོ་སོར་ཕྲལ་བའི་དོན་དྲིས་པ་ནི་ཧེའི་རྣམ་པས་ཞེས་པ་གཉིས་སོ། །འདིར་ཀུ་མུ་ཊི་ལས། སྔར་གྱི་སེམས་དཔའ་གསུམ་གྱི་སྐུ་གསུང་ཐུགས་གྲུབ་པས་དེ་ལས་གཞན་པའི་ཀྱཻ་རྡོ་རྗེ་ཞེས་པའི་མཚན་འཇུག་པའི་རྒྱུ་མཚན་གང་ཡིན་སྙམ་ནས་དྲིས་པ་དང་། དེའི་ལན་དུ་སེམས་ཅན་ཐམས་ཅད་ལ་སྙོམས་ཤིང་ཉི་ཚེ་བ་ལས་ཆེ་བས་སེམས་ཅན་ཐམས་ཅད་སྐྱོབ་པས་སྙིང་རྗེ་ཆེན་པོ་དང་། ངེས་པ་རྙེད་པས་ཐེ་ཚོམ་ཆོད་པའི་ཤེས་རབ་ནི་རྡོ་རྗེ་དང་ཧེའི་དོན་སྔར་བཤད་པ་ལ་བལྟོས་ནས་ཡང་གི་སྒྲ་སྦྱར་རོ། །དེ་འདྲ་བའི་ཤེས་རབ་དང་སྙིང་རྗེའང་སྐུ་གསུམ་ཙམ་དུ་འགྱུར་བས་དེ་ལས་གཞན་པའི་དེ་རྣམས་ཀྱི་སྙིང་པོ་མེད་པས་སྙིང་པོ་ཀྱཻ་རྡོ་རྗེ་ཉོན་ཅིག་ཅེས་པ་མི་འཐད་དེ། སྐུ་གསུམ་ལས་གཞན་པའི་སངས་རྒྱས་མེད་ཅིང་། སྐུ་གསུམ་འདུས་པ་ཙམ་ལ་སངས་རྒྱས་སུ་འཇོག་པའི་ཕྱིར་ཏེ། འདུས་པ་ལས། སྐུ་གསུང་ཐུགས་ནི་རྣམ་པ་གསུམ། །གསང་བ་ཞེས་ནི་མངོན་པར་བརྗོད། །སངས་རྒྱས་ཐམས་ཅད་ཅེས་བྱ་བ། །འདུས་པ་ཚོགས་པར་གསུངས་པ་ཉིད། ཅེས་བཤད་པའི་ཕྱིར་རོ་ཞེ་ན། དེ་ནི་མ་ཡིན་ཏེ། འདུས་པ་དེར་སྐུ་གསུམ་བསྡུས་པའི་ཕྱིར། ཐབས་ཀྱི་ཡན་ལག་འབའ་ཞིག་གསུངས་ཀྱི། ཤེས་རབ་ཀྱི་ཡན་ལག་ནི་མ་ཡིན་ནོ། །འདིར་ནི་ཐབས་དང་ལྡན་ཞིང་དམིགས་པ་མེད་པའི་ཕྱིར་སྐུ་གསུམ་ལས་འདས་པ་ཤེས་རབ་ཀྱི་ཡན་ལག་གི་སྙིང་པོ་གསུངས་སོ། །དེ་བས་ན། དེ་ཡི་ཡན་ལག་
གཉིས་སྟོན་པ། །ཀྱཻ་རྡོ་རྗེ་ཁྱོད་ཉོན་ཅིག །ཅེས་བྱ་བ་ནི་མཛེས་པའོ། །དེ་བཞིན་དུ་བཤད་པའི་རྒྱུད་དུ་སྙིང་རྗེ་ཤེས་རབ་དག་ནི་དམིགས་པ་མེད་པ་ཉིད་ལའང་གསུངས་པ། སྤྲོས་པ་མེད་པའི་རང་བཞིན་ཉིད། །ཤེས་རབ་ཅེས་ནི་ཡོངས་སུ་གྲགས། །ཡིད་བཞིན་ནོར་ལྟར་མ་ལུས་པའི། །སེམས་ཅན་དོན་མཛད་སྙིང་རྗེ་ཉིད། །དམིགས་མེད་གནས་སུ་ཤེས་རབ་དང་། །དམིགས་མེད་སྙིང་རྗེ་ཆེན་པོ་ཉིད། །བློ་དང་ལྷན་ཅིག་གཅིག་གྱུར་པ། །ནམ་མཁར་ནམ་མཁའ་ཇི་ལྟ་བའོ། །ཞེས་འཆད་དོ། །དེ་ལྟར་འཆད་པ་ནི་ཐབས་སྒྱུ་ལུས་དང་། ཤེས་རབ་ལྷན་སྐྱེས་གཉིས་ཀྱི་ནང་ནས་འདུས་པར་སྔ་མ་གཙོ་ཆེར་བསྟན་ལ། འདིར་ནི་ཕྱི་མ་གཙོ་ཆེར་བསྟན་པར་འདོད་ན་ནི་རུང་གི །དེ་ལྟར་མ་ཡིན་པར་འདུས་པར་ཐབས་ཙམ་དང་། འདིར་དེ་གཉིས་ཀ་བསྟན་པར་འདོད་ན་ནི་མི་རིགས་ཏེ། གསང་བ་འདུས་པ་རྣལ་འབྱོར་གྱི་རྒྱུད་ཅེས་པའི་རྣལ་འབྱོར་གྱི་དོན་བཤད་པ་ན། རྒྱུད་ཕྱི་མ་ལས། ཐབས་དང་ཤེས་རབ་སྙོམས་འཇུག་པ། །རྣལ་འབྱོར་ཞེས་ནི་བཤད་པ་ཡིན། །གང་ཞིག་དངོས་མེད་ཤེས་རབ་སྟེ། །ཐབས་ནི་དངོས་པོའི་མཚན་ཉིད་དོ། །ཞེས་གསུངས་པའི་ཕྱིར་དང་། གཉིས་སྣང་མེད་པའི་དམིགས་མེད་ཀྱི་ཤེས་རབ་ལ་འདོད་ན་ནི། འདུས་པར་སྟོང་པ་བཞིའི་སྒོ་ནས་གཉིས་སྣང་དག་ཚུལ་བཤད་པ་འདྲ་བ་འདིར་མེད་པའི་ཕྱིར་རོ། །དེས་ན་སེམས་དཔའ་གསུམ་སྐུ་གསུམ་དུ་བཤད་པ་དེ་ལས་ངོ་བོ་ཐ་དད་པའི་སྙིང་པོ་འདོད་ན་ནི་ཤིན་ཏུ་མི་རིགས་ཏེ། སངས་རྒྱས་ཀྱི་སྐུ་གསུང་ཐུགས་གསུམ་ག་ལས་ངོ་བོ་ཐ་དད་པའི་སངས་རྒྱས་མི་སྲིད་པའི་ཕྱིར་དང་།
སྐུ་བཞི་པར་འཇོག་པ་ཡང་ལྡོག་པ་ཐ་དད་པའི་སྒོ་ནས་འཇོག་གི །ཆོས་སྐུ་སོགས་ལས་ངོ་བོ་ཐ་དད་མིན་པའི་ཕྱིར་དང་། ཧེ་བཛྲའི་དོན་ཡང་སྔར་བཤད་པའི་རྡོ་རྗེ་སེམས་དཔའ་ལས་ངོ་བོ་ཐ་དད་དུ་འདོད་ན། སྔར་གྱི་བཤད་པ་དང་འགལ་བར་འགྱུར་བའི་ཕྱིར་རོ། །དེས་ན་སྔར་བཤད་པའི་སྐུ་གསུང་ཐུགས་ཀྱི་གསང་བ་གསུམ་དང་། སེམས་དཔའ་གསུམ་དང་། སྐུ་གསུམ་ལས་ངོ་བོ་ཐ་དད་པའི་སྙིང་པོ་ཀྱཻ་རྡོ་རྗེ་ཞེས་པའི་བཞི་པ་མེད་ཀྱང་། རྒྱུད་འདིའི་བརྗོད་བྱའི་གཙོ་བོ་རྩལ་དུ་བཏོན་ནས་འཆད་རྒྱུ་ནི། རྗེ་བཙུན་གསང་བ་ལས་ཀྱང་ཆེས་གསང་བ་ཞེས་པ་དང་། སྙིང་པོ་ཀྱཻ་རྡོ་རྗེ་ཞེས་པ་འདི་ཡིན་ལ། དེའི་སྟོང་པ་དང་སྙིང་རྗེའི་སྟོང་པ་ནི་བདག་མེད་པའི་དེ་ཁོ་ན་ཉིད་མཐར་ཐུག་པའི་ཡུལ་ལམ་དེ་རྟོགས་པའི་ཤེས་རབ་ཡིན་ལ། དེ་ཙམ་ཞིག་ནི་ཕར་ཕྱིན་ཐེག་པ་དང་། རྒྱུད་སྡེ་འོག་མ་དང་ཡང་ཐུན་མོང་བའོ། །སྙིང་རྗེ་ཞེས་པ་སེམས་ཅན་སྡུག་བསྔལ་བ་ལ་དམིགས་ནས། སྡུག་བསྔལ་ཐམས་ཅད་དང་འབྲལ་བར་འདོད་པའི་རྣམ་པ་ཅན་ཡང་དེ་དང་འདྲ་ལ། ཡང་སྙིང་རྗེའི་ཡུལ་ཅན་ཡེ་ཤེས་ཀྱིས་བྱས་ནས་དེ་དང་ཡུལ་སྟོང་ཉིད་གཉིས། ཆུ་ལ་ཆུ་བཞག་པ་བཞིན་དུ་སོང་བའི་ནམ་མཁའ་ལྟ་བུའང་། ལམ་གཞན་དེ་དག་ཏུ་དུ་མ་ཞིག་བྱུང་བས། དེ་གཙོ་བོར་སྟོན་པ་སྤྱིར་བླ་མེད་ཀྱི་རྒྱུད་རྣམས་དང་། བྱེ་བྲག་ཏུ་རྒྱུད་འདིའི་ཁྱད་ཆོས་ག་ལ་ཡིན། དེས་ན་ཡུལ་སྟོང་ཉིད་དང་ཡུལ་ཅན་ཡེ་ཤེས་རོ་གཅིག་ཏུ་སོང་བ་ནི། སྔར་རྡོ་རྗེ་སེམས་དཔའི་དོན་དུ་བཤད་པ་དེ་ཡིན་
ལ། དེ་ཉིད་ལོངས་སྤྱོད་རྫོགས་པ་དང་སྤྲུལ་པའི་སྐུར་སྣང་བའི་སེམས་དཔའ་ཆེན་པོ་དང་། དམ་ཚིག་སེམས་དཔའང་ཡིན་པས་འདིར་བཤད་རྒྱུ་དེ་ལས་མ་བྱུང་ན། སྙིང་པོ་ཀྱཻ་རྡོ་རྗེ་ལ་འབུར་དུ་དོད་པའི་བཤད་པ་མ་བྱུང་བ་ཡིན་ནོ། །དེས་ན་པདྨ་ཅན་ལས། བསྒྲུབ་བྱའི་དོན་ཞུས་པ་ནི། ཧེ་བཛྲ་ཞེས་པ་སྟེ། ཐབས་བདེ་བས་སེམས་ཅན་རྣམས་སྐྱོབ་པར་བྱེད་པས། སྙིང་རྗེ་ཆེན་པོའམ་ཡང་ན་མཧཱ་ཀཾ་ཞེས་བྱ་བ་སྟེ། མ་ཧཱ་ནི་ཆེན་པོའོ། །ཀཾ་ནི་བདེ་བ་སྟེ། བདེ་བ་ཆེན་པོ་བསྡུས་པ་ཞེས་བྱ་བའོ། །དེ་པས་ཤེས་རབ་དང་ཐབས་ཀྱི་བདག་ཉིད་ཀྱི་རྒྱུད་ཅེས་པ། རྒྱུད་ནི་གཉིས་སུ་མེད་པའི་བདག་ཉིད་ཀྱི་སྦྱོར་བའོ། །ཞེས་གསུངས་པ་ལྟར་ཤེས་དགོས་སོ། །དེ་ལ་སྙིང་རྗེ་ཆེན་པོའི་སྐད་དོད་མ་ཧཱ་ཀ་རུ་ཎ་ཞེས་པའི་མ་དང་ཀ་དང་ཎ་ཕྱིས། རུའི་ཁོང་གི་ཨུ་ཡིག་ཨེར་བྱས་ནས་ཧ་ལ་སྦྱར་བས། ཧེ་ཞེས་པར་སོང་བ་ཤཱནྟི་པ་བཞེད་པ་ལྟར་ཡིན་པས། ཧེའི་ཡི་གེས་ནི། མཧཱ་ཀ་རུ་ཎ་ཤེས་དགོས་སོ། །དེའི་ཚེ་མཧཱ་ནི་ཆེན་པོ་དང་། ཀཾ་ནི་བདེ་བ་དང་། རུ་ཎ་བསྡུས་པ་སྟེ། བདེ་བ་ཆེན་པོ་བསྡུས་པ་ཞེས་པ་ལྷན་ཅིག་སྐྱེས་པའི་ཡེ་ཤེས་ཀྱི་བདེ་བ་ཆེན་པོ་ཡིན་གྱི། བདེ་བ་གཞན་མིན་ནོ། །བདེ་སྟོང་སྦྱར་བ་ནི་བདེ་བ་དེས་བདག་མེད་པའི་དེ་ཁོ་ན་ཉིད་མཐར་ཐུག་པ་ཇི་ལྟ་བ་བཞིན་དུ་རྟོགས་པའི་ཚུལ་གྱིས་ཡུལ་ཡུལ་ཅན་དུ་སྦྱོར་བའམ། ཡང་ན་སྟོང་ཉིད་རྟོགས་པའི་བློ་དེ་བདེ་ཆེན་དེའི་ངོ་བོར་གྲུབ་བདེ་གཅིག་ཏུ་སྐྱེས་པ་ལ་བྱ་ཡི། བདེ་སྟོང་ཆེན་པོ་དང་ཆོས་ཉིད་ཡིན་པ་ཙམ་ལ།
ཕན་ཚུན་རྒྱས་བཏབ་པ་ཙམ་ནི་དེའི་དོན་མིན་ནོ། །དེ་ལྟར་ན་བདེ་སྟོང་སྦྱོར་ཚུལ་ཐུན་མོང་མ་ཡིན་པའི་དོན་ནི་མཚན་བསྡུས་པའི་དོན་དྲིས་པའི་ལན་ཡིན་ལ། ཕྲལ་ནས་ཞུས་པའི་དོན་ནི་དེ་གཉིས་ཀྱི་རེ་རེའོ། །སྔར་རྡོ་རྗེ་སེམས་དཔའི་དོན་བཤད་པ་ན། སྤྱིར་སྟོང་ཉིད་དང་ཡུལ་ཡུལ་ཅན་རོ་གཅིག་པ་ཙམ་ཞིག་བཤད་ཀྱི། ཡུལ་ཅན་ཁྱད་པར་ཅན་གྱི་སྟེང་ནས་རོ་གཅིག་ཏུ་བཤད་པ་མེད་ལ། འདིར་ནི་བདེ་སྟོང་སྦྱོར་བ་དེ་སྙིང་པོ་ཀྱཻ་རྡོ་རྗེའི་དོན་དུ་འཆད་པས་ཁྱད་པར་ཤིན་ཏུ་ཆེ་སྟེ། དེས་ནི་གསང་བ་དང་ཆེས་གསང་བའི་དོན་ཡང་ཤེས་པར་ནུས་སོ། །དེ་ནི་དཔེར་ན་བྱས་པ་མི་རྟག་པ་ཡིན་ཡང་། བྱས་པའི་དོན་ལྡོག་ཐུན་མོང་མ་ཡིན་པ་ངེས་པའི་བློ་དེས་མི་རྟག་པ་ངེས་པ་མིན་པ་དང་། བྱས་པ་བརྗོད་པའི་སྒྲས་ཀྱང་མི་རྟག་པ་མ་བརྗོད་པ་བཞིན་དུ། སྙིང་པོ་ཀྱཻ་རྡོ་རྗེ་སེམས་དཔའི་སྒྲའི་དོན་བཤད་པའི་སྐབས་ཀྱི་ཡུལ་ཡུལ་ཅན་རོ་གཅིག་པ་ཡིན་ཡང་། སྙིང་པོ་ཀྱཻ་རྡོ་རྗེ་འདིར་བདེ་སྟོང་སྦྱོར་བ་བརྗོད་པའི་དོན་ངེས་པའི་བློ་དང་། དེ་བརྗོད་པ་དང་། སྔར་གྱི་རྡོ་རྗེ་སེམས་དཔའི་དོན་བཤད་པའི་སྒྲ་བློས་བརྗོད་ཚུལ་དང་ངེས་ཚུལ་ནི་ཤིན་ཏུ་ཁྱད་པར་ཆེའོ། །དེ་ལྟར་མ་བྱས་པར་སྔར་གྱི་སྐུ་གསུམ་དབྱེར་མེད་ཙམ་ལ་བཤད་པ་དང་། དེ་ཉིད་ཞལ་བརྒྱད་ཕྱག་བཅུ་དྲུག་པ་སོགས་སུ་སྣང་བའི་སྐུར་ཤར་བའི་སྟེང་ནས་དག་པ་རྒྱས་པར་ཡོད་པར་གོ་བས་ནི། སྙིང་པོ་ཀྱཻ་རྡོ་རྗེ་ཞེས་སྔ་མ་གསུམ་ལས་ཟུར་དུ་བཤད་པའི་དོན་མི་རྙེད་པས། རྒྱུད་འདིའི་བརྗོད་བྱའི་གཙོ་བོ་ངོས་མི་ཟིན་པའི་ཕྱིར་རོ། །གང་གིས་མི་ཤེས་ཀྱཻ་རྡོ་རྗེ། །དེ་ཡི་
ངལ་བ་དོན་མེད་འགྱུར། །ཞེས་པ་དེར་འགྱུར་རོ། །དེ་ནི་བདག་གིས་བཤད་ཀྱིས་ཉོན། །ཞེས་པའི་བཤད་བྱའང་ཤཱནྟི་པས་རྒྱུ་རྒྱུད་དང་འབྲས་རྒྱུད་ཀྱི་ཀྱཻ་རྡོ་རྗེ་སྔར་བསྟན་ཟིན་པས། འདིར་ཐབས་རྒྱུད་ཀྱི་ཀྱཻ་རྡོ་རྗེར་འཆད་གསུངས་ཀྱང་། པདྨ་ཅན་ལས་བཤད་པ་ལྟར་སྔར་བཤད་པའི་བདེ་སྟོང་སྦྱར་བ་དེ་ཉིད་བཤད་པ་ལ་སྦྱར་ཏེ། གཙོ་བོའི་དོན་ངེས་ན་འོག་ནས་འཆད་པའི་དོན་གཞན་རྣམས་དེ་ངེས་པའི་ཡན་ལག་ཏུ་གོ་བར་འགྱུར་བས་སོ། དེ་ལྟར་བྱས་ན་རྡོ་རྗེ་སྙིང་པོས་ཞུས་པའང་། སྙིང་པོ་ཀྱཻ་རྡོར་ཞུས་པ་ཡིན་ལ། དེ་ནས་བཀའ་སྩལ་ཞེས་པ་དང་། ཉོན་ཅིག་ཅེས་པ་དང་། མིང་དོན་དྲིས་པའི་ལན་གྱིས་ཀྱང་གཙོ་བོར་སྙིང་པོའི་དོན་ཉིད་འཆད་པས། གཞན་རྣམས་ནི་དེའི་ཡན་ལག་ཏུ་དྲིས་པ་དང་། བཤད་པར་ཟུངས་ཤིག །འཆད་པར་ཞལ་གྱིས་བཞེས་ནས་འཆད་པ་ན། ལྟ་སྟངས་ཞེས་པ་བརྒྱད་གསུངས་པ་ནི། བརྟག་པ་དང་པོའི་ལུས་རྣམ་གཞག་ཏུ་བླ་མ་དག་འཆད་དེ་བྷ་བ་བྷ་དྲ་དང་མཐུན་ནོ། །དེ་ལ་ལྟ་སྟངས་ནི་འཆད་པར་འགྱུར་བ་བཞིའོ། །དགུག་པ་ནི་དགའ་བཟང་མ་སོགས་དགུག་པའོ། །བརྡ་ཆེན་ནི་བདུན་པར་འཆད་པ་རྣམས་སོ། །དོན་བྱེད་པ་མང་པོ་ནི་ཆར་དབབ་པ་དང་སྤྲིན་བྲལ་བ་སོགས་སོ། །རེངས་པ་ནི་སྟོབས་ཅན་ལ་སོགས་པ་གནས་ནས་མི་གཡོ་བའོ། །སྐྲོད་པ་སོགས་གསུམ་ནི་སླའོ། །སྡེ་རེངས་ནི་དཔུང་རེངས་པ་སྟེ་སྔ་མ་དང་མི་འདྲའོ། །བསྐྱེད་པ་ནི་གང་དུ་བསྐྱེད་པའི་ཁ་དོག་དང་། དབྱིབས་སོགས་ཀྱི་མཚན་མའོ། །གནས་ནི་གཞལ་ཡས་ཁང་ངོ་། །བྱེད་རྒྱུ་ནི་མངོན་བྱང་ངོ་། །དོན་བྱེད་ནི་ནུས་པ་ཞེས་པར་ཡང་བསྒྱུར་ལ། དོན་ནི་བཟླས་
སྒོམ་ལས་བྱུང་བའི་མཐུའོ། །ཡེ་ཤེས་ནི་དེ་ཁོ་ན་ཉིད་ལ་པདྨ་ཅན་དང་། མུ་ཏིག་ཕྲེང་བར་སྐར་མའི་རྩིས་ལ་སོགས་པ་ལ་བཤད་དོ། །རྣམ་ཤེས་ནི་སྔ་མར་རྡོ་རྗེ་མེ་ལ་སོགས་པ་དང་། ཕྱི་མར་སློབ་དཔོན་གྱི་ལས་ཐམས་ཅད་ཤེས་པ་ལ་བཤད་དོ། །ལྷ་རྣམས་ཇི་ལྟར་འབྱུང་བ་ནི་ཕྱག་གཉིས་པ་ལ་སོགས་པའི་རྣལ་འབྱོར་ལ་པདྨ་ཅན་ལས་སོ། །ཧེ་རུ་ཀ་ཞེས་སོགས་ཀྱིས་རེ་ཞིག་དམིགས་པ་དང་བཅས་པའི་ཐབས་གསུངས་སོ། །དེ་ལ་ཧེ་རུ་ཀ་བསྐྱེད་པའི་རྒྱུ་ནི། དེ་འབྱུང་བའི་ཕུན་ཚོགས་ཀྱི་རྒྱུ་རྩའི་འཁོར་ལོ་དང་། བསྐྱེད་རིམ་མོ། །དང་པོར་རེ་ཞིག་གཅིག་ཡིན་ནོ་ཞེས་འབྱུང་ངོ་། །གྲོལ་འདོད་སྲིད་པ་ལ་ཞེ་སྡང་བ་རྣམས། ཧེ་རུ་ཀ་བསྐྱེད་པའི་རྒྱུ་དང་། ཧེ་རུ་ཀས་ཀྱང་ཅི་ཞིག་བྱ་སྙམ་པ་ལ་དངོས་པོ་ཞེས་པ་གཅིག་གསུངས་ཏེ། གྲོལ་བ་ཐོབ་པའི་ཚེའང་ཕུང་སོགས་ཀྱི་དངོས་པོ་དང་བཅས་པས་ཡིན་གྱི་ཕུང་སོགས་ཀྱི་དངོས་པོ་མེད་པས་ནི་མ་ཡིན་ཏེ། ཉིད་ཀྱི་དོན་ནི་དེ་ལྟར་བྱའོ། །འདིར་དོགས་པ་སྐྱེ་མཁན་ནི་ཉན་ཐོས་སྡེ་པ་ཡིན་ལ། དེས་ལྷག་མེད་ཀྱི་དུས་སུ་འདུས་བྱས་རྒྱུན་ཆད་པར་འདོད་དོ། །དེ་ལ་ནི་འབྲས་བུ་མཐར་པའི་སྐབས་སུ་ཧེ་རུ་ཀའི་གཟུགས་ཀྱིས་ཅི་བྱ་སྙམ་པ་འོང་ཡང་། ལམ་གྱི་སྐབས་སུ་དངོས་པོ་ཅི་བྱ་སྙམ་པ་མི་འཐད་དོ་སྙམ་ན། ལམ་གྱི་སྐབས་སུ་དངོས་པོ་བསྒོམ་པ་འབྲས་བུའི་སྐབས་སུ་རིགས་འདྲ་འཇུག་པ་ལ་བསམས་པའོ། །གལ་ཏེ་གྲོལ་བའི་སྐབས་སུའང་ཕུང་སོགས་འོང་ན། སེམས་ཅན་རྣམས་གང་གིས་འཆིང་སྙམ་པ་ལ། དངོས་པོའི་འཆིང་བས་ཞེས་པ་གཅིག་སྟེ་དངོས་པོ་ལ་བདེན་པར་ཞེན་པས་འཆིང་ངོ་། །དོགས་པ་དེ་ནི་
ཕུང་སོགས་ཡོད་པ་དེ་སྲིད་དུ་ཟག་བཅས་ཡོད་པས་གང་བཅིངས་པའི་སྡུག་བསྔལ་ཡོད་པ་ལ་བསམས་པའོ། །བདེན་ཞེན་གྱིས་བཅིངས་ན་ནམ་ཡང་མི་གྲོལ་ལོ་སྙམ་པའི་དོགས་པ་ནི་འཛིན་པ་དེ་ནམ་ཡང་མི་ལྡོག་གོ་སྙམ་པའོ། །དེ་ཡོངས་ཞེས་པ་གཅིག་སྟེ་ཕུང་སོགས་ཀྱི་རང་བཞིན་ཤེས་པས་གྲོལ་བར་འགྱུར་རོ། །དེ་ཇི་ལྟར་ཤེས་སྙམ་པ་ལ་དངོས་པོ་སྒོམ་འགྱུར་ཞེས་པ་གཉིས་སོ། །ཕུང་སོགས་གཅིག་དང་དུ་བྲལ་གྱི་རིགས་པས་རང་བཞིན་མེད་པར་ཡོངས་སུ་ཤེས་ནས། ལྷ་ལ་སོགས་པའི་དངོས་པོ་བསྒོམ་དགོས་ལ། དེ་ལྟ་ན་ཕུང་སོགས་ཀྱི་དངོས་པོའི་དངོས་མེད་རང་བཞིན་མེད་པའང་བསྒོམ་དགོས་ཀྱི་དངོས་པོ་འབའ་ཞིག་བསྒོམ་པ་མིན་ནོ། །དེ་ལྟ་ན་སྟོང་ཉིད་ཙམ་བསྒོམ་པར་བྱ་ཡི། །ལྷའི་དངོས་པོ་བསྒོམས་པས་ཅི་བྱ་སྙམ་ན། གུར་ནས་གསུངས་པའི། གལ་ཏེ་སྟོང་པ་ཐབས་ཡིན་ན། །སོགས་དྲངས་ཏེ། མི་འདྲ་བའི་རྒྱུས་བསྒྲུབ་མི་ནུས་པར་བཤད་དེ། ཀུ་མུ་ཊིའི་བཤད་པའོ། །རྒྱུད་ཀྱི་དང་པོར་གཅིག་སྟེ་གཉིས་སུ་མེད་པའི་ཡེ་ཤེས་བཤད་པ་ཡིན་ནོ། །དེ་བསྒོམ་པའང་དངོས་པོའི་ཡང་དག་པ་ཉིད་བསམས་པས་གྲོལ་གྱི་གཞན་དུ་མིན་པས་ཉིད་ཅེས་སོ། །གང་གིས་འཆིང་ན་དངོས་པོ་ལ་བདེན་པར་ཞེན་པའི་ཆགས་པས་སོ། །འཆིང་བྱེད་དེ་ནི་དངོས་མེད་ཡོངས་སུ་ཤེས་པའི་གཉིས་སུ་མེད་པའི་ཡེ་ཤེས་ཀྱིས་བཅད་པའི་སྒོ་ནས་གྲོལ་བར་འགྱུར་རོ། །དངོས་པོ་མེད་པ་ཤེས་པའི་ཡུལ་དེ་ཉིད་ཀྱང་བདེན་པ་མེད་པར་ཤེས་ཏེ། ཕུང་སོགས་ཀྱི་དངོས་པོ་དང་། དེ་བདེན་ཡོད་ཀྱིས་སྟོང་པ་གཉིས་ཀ་བདེན་པ་དང་བྲལ་བའི་དེ་གཉིས་ཀྱི་རང་བཞིན་དང་དབྱེར་མེད་པའི་ཧེ་རུ་ཀ་
སྔར་བཤད་པ་དེ་ལྟར་བསྒོམ་པར་བྱའོ། ཞེས་པ་ནི་པདྨ་ཅན་གྱི་དགོངས་པ་བཞིན་ནོ། །དེར་དང་པོ་དངོས་པོ་བསྒོམས་པར་གསུངས་པས་བསྐྱེད་རིམ་ཐོག་མར་བསྒོམས་པའང་དགོངས་པའོ། །མདོར་བསྡུ་ན་གཞུང་འདིའི་དོན་ནི་འདི་ཡིན་ཏེ། སྔར་བཤད་པའི་བཛྲའི་དོན་སྟོང་ཉིད་ཀྱི་ཤེས་རབ་དགོས་པའི་རྒྱུ་མཚན་དང་། དེ་ལྷའི་རྣལ་འབྱོར་དང་སྦྱར་བ་ནི། སྔར་སེམས་དཔའ་གསུམ་གྱི་སྐབས་སུ་གཉིས་སུ་མེད་པའི་ཡེ་ཤེས་ཉིད་སྐུ་གཉིས་སུ་ཤར་བར་བཤད་ལ། དེའང་རང་དང་རྗེས་མཐུན་གྱི་རྒྱུས་བསྒྲུབ་དགོས་པར་གུར་གྱི་ལེའུ་དང་པོ་དང་། བཅུ་བཞི་པ་ནས་འབྱུང་བས། དེ་བཞིན་དུ་སྒྲུབ་པ་དེ་ཤེས་པར་བྱེད་ལ། སྟོང་ཉིད་ཀྱི་ཤེས་རབ་དེའང་ལྷན་སྐྱེས་ཀྱི་བདེ་བ་ཆེན་པོའི་ངོ་བོར་བསྐྱེད་པ་ནི་ལེའུ་དང་པོའི་གཞུང་ལྷག་མས་སྟོན་ནོ། །གཟུགས་སྐུའི་རྣམ་པ་ཅན་གྱི་ལམ་གྱིས་རིགས་མཐུན་གྱི་འབྲས་བུ་བསྒྲུབ་པ་ལ། གྲོལ་བའི་སྐབས་སུ་ཕུང་པོ་རྒྱུན་ཆད་འགོག་པ་ནི། དངོས་པོ་ཉིད་ཀྱིས་ཞེས་པས་བསྟན་ཏེ། འགོག་བྱེད་ཀྱི་རིགས་པ་ནི། རིག་པ་རྒྱུན་མི་འཆད་པར་བསྒྲུབ་པའི་རིགས་པས་བྱའོ། །ཐེག་ཆེན་པ་གཉིས་འབྲས་བུའི་སྐབས་སུ་གཟུགས་སྐུ་ཡོད་པར་མཐུན་ཡང་། རྒྱུ་ལ་མི་མཐུན་པས། དེ་ལས་ཁྱད་པར་དུ་བྱ་བའི་ཕྱིར་དུ་ལྷའི་སྐུའི་དངོས་པོ་བསྒོམ་དགོས་པར་གསུངས་སོ། །དེ་ལའང་རིམ་པ་གཉིས་ཀྱི་སྐབས་གཉིས་དང་སྦྱར་ནས་གཟུགས་སྐུ་གྲུབ་ལུགས་ཤེས་པར་བྱའོ། །ལུས་ལ་སོགས་ལེའུ་དང་པོའི་གཞུང་ལྷག་མ་རྣམས་ཀྱིས། གཙོ་བོར་ཧེའི་ཡི་གེའི་དོན་སྟོན་ནོ། །ལུས་
རྟེན་དང་བདེ་བ་བརྟེན་པའི་རྣམ་དབྱེ་སྟོན་པ་ནི། ལུས་ཞེས་པ་བཞིའོ། །ལུས་མེད་པར་ཡེ་ཤེས་མི་གནས་པས། དེའི་རྟེན་དུ་ལུས་བླང་བར་བྱ་སྟེ། ཁ་སྦྱོར་ལས། རང་གི་ལུས་ནི་སངས་རྒྱས་ཉིད། །ལུས་ལས་གཞན་དུ་སངས་རྒྱས་ཉིད། །གཞན་ནི་གར་ཡང་མི་གནས་ཏེ། །མི་ཤེས་པ་ཡི་སྒྲིབ་པར་བརྗོད། །ཅེས་དྲངས་ནས་ཡེ་ཤེས་དེ་ཕྱོགས་གཅིག་པ་སྤང་བའི་ཕྱིར་རྐང་པ་གསུམ་པ་སྨོས་པར་བཤད་དོ། །ལུང་དེ་རྣམས་ཀྱི་དོན་མན་སྙེར་ཉན་ཐོས་སྡེ་པས་སངས་རྒྱས་ཀྱི་མྱང་འདས་ཀྱང་ཕུང་པོ་ལྔ་ཟད་པ་ལ་འདོད་པ་འགོག་པར་འཆད་དོ། །པདྨ་ཅན་ལས། ཡེ་ཤེས་ཆེན་པོ་ནི་བདེ་ཆེན་གྱི་ཡེ་ཤེས་སོ། །ཀུན་རྟོག་ཐམས་ཅད་སྤངས་པ་ནི་དམིགས་པ་མེད་པའི་ཡེ་ཤེས་ཏེ། དེས་ཀུན་རྟོག་འཇོམས་པའོ། །ལུས་ལ་བརྟགས་པ་ཡིན་ཡང་ལུས་ལས་མ་སྐྱེས་པས། ཁྱབ་པར་བྱེད་པ་དང་སྐྱེ་འགག་མེད་པ་སོགས་ཡིན་ནོ། །ཞེས་བཤད་པས། ཧེ་རུ་ཀ་གང་དུ་བསྒོམ་པར་བྱ་བའི་གནས་སྟོན་པར་མཛད་དོ། །རྐང་པ་གསུམ་པའི་དོན་ནི། ཡེ་ཤེས་དེ་དངོས་པོ་ཀུན་གྱི་དེ་ཁོ་ན་ཉིད་ལ་རྗེས་སུ་ཞུགས་པའི་དོན་ནོ། །ལུས་ལ་གནས་ཀྱང་ལུས་སྐྱེས་མིན་པའི་དོན་ཡང་། གང་ལ་ཁྱབ་པའི་དེ་བཞིན་ཉིད་ལ་བཤད་པ་གཅིག་དང་། གང་གིས་ཁྱབ་པའི་ཡེ་ཤེས་ལ་བྱས་པ་གཉིས་ལས། དང་པོ་ནི། སྐྱེ་འགག་མེད་པའི་མ་སྐྱེས་པའོ། །གཉིས་པ་ནི། ལུས་ཀྱི་ཉེར་ལེན་གྱི་རྒྱུ་བྱས་ནས་སྐྱེས་པ་མིན་པའོ། །དོན་བསྡུས་ན་དང་པོས་ལུས་ལ་གནད་དུ་བསྣུན་པ་ལས། བདེ་ཆེན་བསྐྱེད་དགོས་པར་བསྟན། གཉིས་པས་མཚན་མར་འཛིན་པའི་ཀུན་རྟོག་ཐམས་ཅད་
འཇོམས་འགྲོ་བར་བསྟན། གསུམ་པས་ནི་དེ་ལྟར་འཇོམས་པའང་དངོས་པོ་ཀུན་གྱི་དེ་ཁོ་ན་ཉིད་ལ་རོ་མཉམ་པའི་ཚུལ་གྱིས་འཇུག་པར་བསྟན། བཞི་པས་ལུས་ལས་སྐྱེའང་ལྷན་ཅིག་བྱེད་རྐྱེན་དུ་འགྲོ་བར་བསྟན་ཏོ། །གང་ལ་གནད་དུ་བསྣུན་པའི་གནས་འདྲི་བ་ནི། ཀྱཻ་བཅོམ་ལྡན་འདས་ཞེས་བོས་ནས། རྡོ་རྗེའི་ལུས་ལ་རྩའི་གཙོ་བོ་དུ་ཞེས་པའོ། །ལན་སོ་གཉིས་ཏེ་ཞེས་པའོ། །སོ་གཉིས་ཏེ་ཞེས་པ་ནི་གཙོ་བོའི་དབང་དུ་བྱས་པ་ཡིན་ལ། གཙོ་བོར་འཇོག་པའང་བྱང་ཆུབ་ཀྱི་སེམས་འབབ་པའི་སྒོ་ནས་ཏེ། ཁ་སྦྱོར་ལས། འཁོར་ལོ་བཞི་ཡི་རབ་དབྱེ་བས། །བརྒྱ་དང་ཉི་ཤུ་ལྷག་པ་ཉིད། །བྱང་ཆུབ་སེམས་ཀྱི་རང་བཞིན་གྱིས། །རྩ་ནི་སུམ་ཅུ་རྩ་གཉིས་མཆོག །ཅེས་གསུངས་པ་ལྟར་རོ། །ཟག་བཅས་ཀྱི་ཡུལ་ལས་བྱུང་བའི་བདེ་བ་རྣམས་ལས་ཆེ་བ་ནི་བདེ་ཆེན་ནོ། །དེའི་གནས་ནི་ལྟེ་བའི་དཀྱིལ་འཁོར་རོ། །ཤཱནྟི་པས་བདེ་ཆེན་གྱི་གནས་ལས་འཛག་པ་ལ་གནས་སུ་འཛག་ཅེས་པ་ནི། ལྔ་པའི་དོན་ལ་བདུན་པར་འཆད་དོ། །མཆོག་རྣམས་ཀྱིའང་མཆོག་གསུམ་དུ་གསུངས་པ་ནི། དེ་རྣམས་ཀྱི་ནང་ནས་ཞེས་པ་ནས། ཀུན་འདར་མའོ་ཞེས་པའི་བར་རོ། །གཙོ་མོར་འཇོག་པའི་རྒྱུ་མཚན་ནི་རྐྱང་མ་ཞེས་པ་བཞིའོ། །དང་པོ་གཉིས་ཀྱི་དོན་ནི་ཐབས་ཤེས་ཀྱི་ངོ་བོས་ལེགས་པའི་ཐུན་མོང་མ་ཡིན་པའི་རྒྱུའོ། །ཕྱི་མ་གཉིས་ཀྱི་དོན་ནི་ཀུན་འདར་མ་འབྲས་བུར་གྱུར་པ་གཉིས་སུ་མེད་པ་སྟེ། མ་ནིང་གི་ཕྱིར་དང་། མཐའ་གཉིས་དང་བྲལ་བ་དང་གཟུང་འཛིན་སྤངས་པའོ། །དེ་རྣམས་ནས་གང་འབབ་པའི་དབྱེ་བ་ནི་རྐྱང་མ་ཞེས་པ་བཞིའོ། །ཁ་སྦྱོར་
ལས། བྱང་སེམས་སུམ་ཅུ་རྩ་གཉིས་ཀྱིས། །གང་ཚེ་འདིར་ནི་གང་གྱུར་པ། །དབང་པོ་ཕུང་པོ་ལྔ་འབྱུང་བ། །སངས་རྒྱས་དེ་ཡིས་དེ་མ་ཐག །ཅེས་སོ། །པདྨ་ཅན་ལས། ལུས་ལ་ཇི་ལྟར་བརྟག་པར་བྱ། །སྙམ་པའི་སྒོ་ནས་ཞུས་པ་ནི། །ཀྱེ་ཞེས་སོ། །བསྒྲུབ་བྱ་སོ་སོར་རྟོག་པའི་ཕྱིར་དུ་དེ་རྣམས་ཞེས་སོགས་གསུངས་ཏེ། ཐབས་ཤེས་སོ་སོ་བ་དང་དེ་གཉིས་དབྱེར་མེད་པའི་རྩ་གསུམ་གསུངས་པར་འཆད་དོ། །ཀུ་མུ་ཊི་ལས། རྡོ་རྗེའི་ལུས་ནི་ཀྱཻ་རྡོ་རྗེའི་ལུས་ལ་སྟེ་ཞེས་པ་ནི་འགྱུར་འཁྲུགས་པ་སྟེ། ཀྱཻ་ཞེས་པ་ནི་བོད་པའི་དོན་ཡིན་པའི་ཕྱིར་དང་། སྒྲུབ་པ་པོའི་ལུས་ལ་འཆད་པའི་སྐབས་ཡིན་པའི་ཕྱིར་རོ། །ཤཱནྟི་པས་ཤེས་རབ་རང་བཞིན་གྱིས་ཞེས་པ་གཙོ་བོར་ཟླ་བ་བརྒྱུ་བ་དང་། ཐབས་ཀྱི་ཞེས་པ་ནི་ཐབས་ཀྱི་ངོ་བོ་ཁྲག་བརྒྱུ་བ་དང་། རྣམ་རྟོག་བཏང་བས་ཨ་བ་དྷཱུ་ཏཱི་ནི་གཟུང་འཛིན་སྤངས་པ་སྟེ། གཉིས་སུ་མེད་པའི་བྱང་ཆུབ་ཀྱི་སེམས་ཙམ་འབབ་པ་དང་། ལཱ་ལ་ན་དང་ར་ས་ན་གཉིས་མགྲིན་པ་ནས་བཟུང་ནས་ལྟེ་བའི་ནང་གི་མཐའི་བར་གྱི་གཡོན་གཡས་ཀྱི་རྩ་ནི་ཟླ་བ་དང་ཉི་མ་ཞེས་བྱའོ། །ལྟེ་བའི་འོག་གི་སྐྱེ་གནས་ཀྱི་རྩ་གཉིས་ནི་ལ་ལ་ན་དང་ར་ས་ན་སྟེ། དང་པོ་ནས་མི་བསྐྱོད་པ་དང་། གཉིས་པ་ནས་གཙོ་བོར་ཁྲག་བརྒྱུའོ། །ཞེས་འཆད་དོ། །གཡས་གཡོན་གྱི་རྩ་གཉིས་རྒྱུར་བཤད་པ་ནི། དེ་གཉིས་སུ་རླུང་བརྒྱུ་བ་བཀག་པ་ནི་ལེགས་པའི་རྒྱུའོ། །དྷཱུ་ཏཱི་འབྲས་བུར་བཤད་པ་ནི་སྔ་མ་གཉིས་སུ་བཀག་པའི་སྟོབས་ཀྱིས་དྷཱུ་ཏཱིར་རླུང་ཚུད་པར་འབྲས་བུ་ཡིན་པའི་དོན་ཏེ། གཉིས་སུ་མེད་པའང་དེའོ། །མ་ནིང་གི་དོན་ནི། རྩ་གཞན་གཉིས་སྐྱེས་པ་དང་བུད་མེད་དུ་གྱུར་པའི་རླུང་གཉིས་
འདྲེས་པ་སྟེ། མཐའ་གཉིས་དང་བྲལ་བའང་དེ་ཡིན་ལ། ཐབས་ཤེས་གཉིས་དབྱེར་མེད་ཀྱི་རྩར་བཤད་པའི་དོན་ཡང་དེ་ཡིན་ནོ། །དེ་ལྟར་ན་བྱང་སེམས་འཛག་པས་རྩ་སོ་གཉིས་འགེངས་པ་ལས་ལྷན་སྐྱེས་ཀྱི་བདེ་བ་ཆེན་པོ་སྐྱེ་ལ། དེའང་རོ་རྐྱང་ལས་བརྒྱུ་བའི་རླུང་བཀག་པའི་སྟོབས་ཀྱིས་དྷཱི་ཏཱིར་ཆུད་པ་ལས་གཏུམ་མོ་འབར་ཏེ་བྱང་སེམས་བཞུས་པ་ལས་འབྱུང་བར་སྟོན་པས། ཧེ་ཡིག་གི་དོན་རྒྱུད་ལ་བསྐྱེད་ཚུལ་ཐུན་མོང་མ་ཡིན་པ་སྟོན་པའི་དོན་དུ་གཟུང་ཞིག །མི་ཕྱེད་མ་ལ་སོགས་པ་སོ་གཉིས་ལ་རྐྱང་མ་སོགས་གསུམ་ནི་དེ་རྣམས་ཀྱི་ནང་ནས་གཙོ་མོ་གསུམ་དུ་བསྟན་ཅིང་། དབུས་དང་གཡས་གཡོན་དུ་གནས་པར་བཤད་པས། འཁོར་ལོ་བཞི་གང་གིའང་རྩ་འདབ་མིན་པས་འདིའི་བརྒྱད་ཚན་རེ་འཁོར་ལོ་རེ་རེའི་རྩ་འདབ་ཏུ་འདོད་པ་དང་། སྤྱི་བོའི་རྩ་འདབ་སོ་གཉིས་སུ་འདོད་པ་ནི་མི་རིགས་སོ། །སུམ་སྐོར་མ་ལ་སོགས་པ་ལྔ་ནི་སྙིང་གའི་དབུས་དང་ཕྱོགས་ན་གནས་པར་ཤཱནྟི་པ། ཨ་བྷྱ་ཀ་ར། བྷ་བ་བྷ་དྲ། རཏྣ་རཀྴི་ཏ་རྣམས་བཞེད་པ་ལྟར་ལེགས་སོ། །དེའི་ལྷག་མ་ཉེར་བཞི་ནི་ཡུལ་ཉེར་བཞིའི་རྩ་ཡིན་ནོ། །དེ་ལ་རྩ་རྣམས་ཀྱི་བྱ་བ་ནི། པུ་ལི་ར་མ་ལ་ཡ་ལ་སོགས་པར་བྱང་སེམས་འབབ་པར་བྱེད་པ་ནི་ཐུན་མོང་དང་། སོ་དང་སེན་མོ་འབབ་པ་སོགས་ནི་ཐུན་མོང་མ་ཡིན་པའོ། །མིང་ནི་མི་ཕྱེད་མ་སོགས་སོ། །ར་ནི་སྲིད་གསུམ་ཡོངས་གྱུར་ཅེས་པའི་དོན་ནོ། །སྲིད་པ་གསུམ་ནི་སྐུ་གསུམ་སྟེ་དེའི་གཟུགས་ཀྱི་གནས་པའི་རྩ་གསུམ་མོ། །ཐམས་ཅད་ནི་རྩ་སོ་གཉིས་སོ། །དེ་གསུམ་ཡོངས་སུ་གྱུར་པས་གནས་པ་ནི་སྐུ་གསུམ་ལ་
བྱ་སྟེ། ཐམས་ཅད་ཀྱང་ལུས་ངག་ཡིད་གསུམ་གྱི་ངོ་བོར་གནས་པའོ། །དོན་དམ་པ་ལས་ནི་དྷཱུ་ཏཱི་རང་བཞིན་ཏེ་དེས་ན་གཟུང་འཛིན་སྤངས་པའོ། །ཞེས་པདྨ་ཅན་ལས་བཤད་པ་ནི་ལྷག་མ་སོ་གཅིག་པོ་ཐམས་ཅད་ཀྱི་རླུང་དང་བྱང་སེམས་དྷཱུ་ཏཱིར་སྡུད་པ་ལ་དགོངས་སོ། །ཡང་ན་ཞེས་པ་ནི་དོན་དམ་པའི་ཚུལ་དེ་ལས་གཞན་དུ་ཡིད་ལ་བྱ་ཚུལ་སྟོན་ཏེ། ཐམས་ཅད་ཐབས་ཀྱི་ནི་ཞེས་པདྨ་ཅན་དུ་བསྒྱུར་བའི་སྟེང་ནས་བཤད་དེ། ཐམས་ཅད་ནི་རྩ་རྣམས་སོ། །ལྷ་མོ་བཅོ་ལྔའི་དངོས་པོའི་མཚན་ཉིད་དུ་བརྟག་པ་སྟེ་བསྒོམ་པར་བྱའོ། །ཐབས་ཀྱི་ཞེས་པ་ནི་སྔ་མའི་ངེས་དོན་ལ་བལྟོས་པའི་དྲང་དོན་ནོ། །ཅི་རྩ་འཁོར་འདི་ཁོ་ན་ཧེ་རུ་ཀ་བསྐྱེད་པའི་རྒྱུ་ཡིན་ནམ། འོན་ཏེ་རྒྱུ་གཞན་ཡང་ཡོད་ཅེ་ན། རྩ་འཁོར་ཙམ་དུ་མ་ཟད་སྡོམ་པའང་བཤད་པར་བྱའོ། །སྡོམ་པ་ལ་འདིས་སྡོམ་པའི་སྡོམ་ཐབས་དང་། འདིས་སྡོམ་པའི་སྡོམ་གཞི་གཉིས་ལས། ཕྱི་མ་ནི་རྡོ་རྗེའི་ལུས་སོ། །དེའི་དབྱེ་བ་ནི་ཁྱད་པར་ཏེ། འཆད་འགྱུར་གྱི་ལུས་ཡན་ལག་དང་ཉིང་ལག་གོ །སྡོམ་པའི་སྐད་དོད་སཾ་བྷ་ར་ལ་སཾ་མཾ་ཤཾ་ནི་བདེ་བ་དང་། བ་ར་ནི་མཆོག་ཡིན་པས། དེ་ལ་བསམས་ནས་ཀུ་མུ་ཊིར། སངས་རྒྱས་ཀུན་གྱི་བདེ་མཆོག་གི །བདེ་བ་སྡོམ་ཞེས་རྣམ་པར་བཤད། །སྒྱུ་མ་ཀུན་གྱི་སྦྱོར་བ་ཡིས། །སྡོམ་པ་དེས་ན་སྡོམ་པ་ཉིད། ཅེས་པ་དང་། །རྡོ་རྗེ་སྐྱེ་བ་མི་འདའ་བའི། །སྡོམ་པ་དམ་ཚིག་ཉིད་དུ་བརྗོད། །ཅེས་དྲངས་ཏེ། ཕྱི་མ་ནི་སྡོམ་པ་དམ་ཚིག་ཏུ་བྱས་ཏེ་སྒྲའི་དོན་བཤད་པའོ། །འདིར་གང་དུ་དང་གང་གིས་དང་གང་དང་ཇི་ལྟར་སྡོམ་པ་བཞི་དང་། སྡོམ་པ་རང་གི་ངོ་བོ་དང་ལྔས་ཤེས་པར་བྱའོ། །དེའི་དང་པོ་ནི་བཤད་ཟིན་ཏོ། །
གཉིས་པ་ནི་འཆད་པར་འགྱུར་རོ། །གང་སྡོམ་པ་ལ་མང་དུ་ཡོད་པའི་ཐོག་མ་ཨཱ་ལི་ཞེས་སོགས་ལ། མུ་ཏིག་ཕྲེང་བར་ཉི་ཟླའང་ཡོད་ལ། ཀུ་མུ་ཊི་དང་། པདྨ་ཅན་དང་། བྷ་བ་བྷ་དྲའི་འགྲེལ་པར་དེ་གཉིས་མ་བྱུང་ངོ་། །ཨཱ་ལི་བཅོ་ལྔ་བསྡུས་པ་ལྟེ་བའི་ཨ་དང་། ཀཱ་ལི་སོ་བཞི་བསྡུས་པ་སྙིང་གའི་ཧཱུཾ་ནོར་བུའི་རྩེར་སོང་བ་སྟེ། རིམ་པ་བཞིན་ཟླ་ཉི་དང་། ཤེས་རབ་དང་། ཐབས་དང་། བདག་མེད་མ་དང་། ཧེ་རུ་ཀའི་རང་བཞིན་ནོ། །ཞེས་མུ་ཏིག་ཕྲེང་བར་བཤད་ཀྱང་། པདྨ་ཅན་ལས་ཨཱ་ལི་ཀཱ་ལི་ཉིད་ཐབས་དང་ཤེས་རབ་དག་སྟེ། དེ་དག་ཀྱང་ལ་ལ་ན་དང་ར་ས་ནའམ། ཡང་ན་ཙཎྜ་ལཱི་དང་གཞོམ་དུ་མེད་པ་དག་གོ །ཞེས་གསུངས་པ་ལྟར་རྩ་གཉིས་དང་ལྟེ་བའི་གཏུམ་མོ་དང་། སྤྱི་བོའི་ཧཾ་ཡིག་གིས་མཚོན་པའི་དོན་དཀར་དམར་གཉིས་སོ། །རྩ་གཉིས་སྡོམ་རྒྱུར་བཤད་པ་ལྟར་ན་སྡོམ་གཞི་ནི་དྷཱུ་ཏཱི་དང་སྡོམ་རྒྱུ་ནི་པདྨ་ཅན་ལས་ཟླ་བ་དང་ཉི་མ་དག་གི །སྣའི་བུ་ག་གཡས་དང་གཡོན་པ་དག་གི་རླུང་ངོ་། །དེ་ཉིད་ཨཱ་ལི་དང་ཀཱ་ལི་དག་སྟེ། ཞེས་གསུངས་པའི་རྩ་གཉིས་ནས་བརྒྱུ་བའི་རླུང་གཉིས་ལ་བྱའོ། །འདིར་སྡོམ་ཐབས་ནི་སྔར་བཤད་པའི་འཁོར་ལོ་བཞི་ལ་བརྟེན་པའི་གཏུམ་མོ་བསྒོམ་པ་སོགས་ལུས་ལ་གནད་དུ་བསྣུན་པའི་ཐབས་རྣམས་སོ། །ཇི་ལྟར་སྡོམ་པ་ནི་རྩ་གཡས་གཡོན་ལ་རླུང་རྒྱུ་བ་བཀག་ནས་དྷཱུ་ཏཱིར་འཛུད་པའོ། སྡོམ་པའི་ངོ་བོ་ནི་རླུང་གཉིས་དབུ་མར་དང་པོར་རོ་གཅིག་ཏུ་བྱས་པ་དང་དེ་ནས་སྣ་བུག་ཏུ་འབྱུང་འཇུག་མི་བྱེད་པར་དེར་གནས་པར་བྱ་བ་དང་མཐར་རླུང་དེ་གཉིས་ཐིམ་པའོ། །འདིས་ནི། ཐབས་ཤེས་དབྱེར་མེད་ཀྱི་རྩ་དང་མ་ནིང་དང་། མཐའ་གཉིས་སྤངས་པ་སོགས་
ཀྱང་ཤེས་པར་བྱའོ། །དེ་ལྟར་བཤད་པ་ནི་རླུང་གི་དབང་དུ་བྱས་པའི་སྡོམ་པ་ཡིན་ལ། ཐིག་ལེའི་དབང་དུ་བྱས་པའི་སྡོམ་པ་ནི་རྩ་གཞན་ནས་བརྒྱུ་བའི་ཐིག་ལེ་གཉིས་དྷཱུ་ཏཱིར་བསྡུས་པ་དང་ལྟེ་བ་དང་སྤྱི་བོའི་དཀར་དམར་གཉིས་འདྲེས་པ་རྣམས་གསང་གནས་ཀྱི་རྩེར་འདུས་པ་སྟེ། འདི་བཤད་རྒྱུད་རྡོ་རྗེ་ཕྲེང་བ་ལས་འདུས་པའི་དོན་འདྲེས་པར་གསུངས་པ་དང་འདྲའོ། །ཆོས་དང་ཞེས་པ་ནས་སུམ་ཅུ་རྩ་གཉིས་སོ་ཞེས་པའི་བར་གྱིས་ནི། སྡོམ་གཞིའི་དབང་དུ་བྱས་པ་ཤས་ཆེ་ལ། འཁོར་ལོ་བཞི་ལ་བརྟེན་པའི་གཏུམ་མོ་བསྒོམ་པའི་སྒོ་ནས་བཤད་ན། སྡོམ་ཐབས་སུའང་འགྱུར་རོ། །འཁོར་ལོའི་གྲངས་ཀྱིས་བཞག་པའི་སྐད་ཅིག་མ་བཞི་དང་། དགའ་བ་བཞི་ནི་བསྡམས་པ་ལ་བརྟེན་ནས་འབྱུང་བའི་བདེ་བ་སྟེ། སྐད་ཅིག་མའི་ངོས་འཛིན་འོག་ནས་བཤད་པ་ལྟར་ན། རླུང་གཉིས་དྷཱུ་ཏཱིར་བསྡམས་པ་ལས་བྱུང་མ་བྱུང་ཅི་རིགས་སུ་ཡོད་ལ། དགའ་བ་བཞི་ལ་ནི་དེར་བསྡམས་པ་ལས་བྱུང་བ་ཤས་ཆེའོ། །སྐད་ཅིག་མ་བཞི་དང་དགའ་བཞི་འཁོར་ལོ་བཞི་ལ་མས་རིམ་གྱིས་བཞག་པ་ནི་མས་བརྟན་གྱི་དབང་དུ་བྱས་སོ། །བདེན་པ་བཞི་དང་དེ་ཁོ་ན་ཉིད་བཞི་དང་། སྡེ་པ་བཞི་འཁོར་ལོ་བཞི་ལ་བཞག་པ་ནི་ཕྱི་མ་ནི་འཁོར་ལོ་བཞི་དང་ཆོས་མཐུན་ཡོད་པས་མིང་བཏགས་པར་འོག་ནས་འཆད་ལ། དེ་ལྟར་བཤད་པའི་དགོས་པ་ནི། བདེན་པ་བཞི་ཡོན་ཏན་སྐྱེ་བའི་རྟེན་ཡིན་པ་བཞིན་དུ། འཁོར་ལོ་བཞིའང་དེ་ལྟར་གོ་བའི་ཕྱིར་དུ་ཡིན་ཏེ། ཐེག་པ་གཞན་གྱི་ཡོན་ཏན་ཐམས་ཅད་ལམ་འདི་ལ་འདུ་བ་ཤེས་པའི་ཕྱིར་དུའོ། །བདེན་པ་བཞི་ནི་ཡུལ་ཙམ་མིན་གྱི་ཤེས་སྤོང་མངོན་དུ་བྱེད་སྒོམ་པ་དེ་འཁོར་ལོ་
བཞི་ལ་བཞག་པའང་སྔ་མ་དང་འདྲའོ། །དེ་ཁོ་ན་ཉིད་བཞིར་འཇོག་ཚུལ་ནི། པདྨ་ཅན་ལས་ཐུགས་རྡོ་རྗེ་དེ་ཉིད་བདག་གི་རང་བཞིན་དང་། ལྷའི་རྣམ་པ་ལོངས་སྐུ་སྒྱུ་མ་ལྟ་བུའི་རང་བཞིན་དང་། དེ་ཉིད་ཤེས་པ་དང་འགྲོ་བ་སྐྱོབ་པའི་རང་བཞིན་དང་། གཉིས་མེད་ཀྱི་བདེ་བ་ཆེན་པོ་རང་རིག་པའི་ཚུལ་གྱིས་རིམ་པ་བཞིན་དེ་ཁོ་ན་ཉིད་བཞི་དང་། དེ་ཉིད་ཆུང་འབྲིང་ཆེན་པོ་ཆེན་པོ་ཆེན་པོའི་ཆེན་པོའི་དབྱེ་བས་དགའ་བཞིར་བཤད་ལ། ཐུགས་རྡོ་རྗེ་དེ་ཉིད་སྡུག་བསྔལ་ལ་སོགས་པའི་ཚུལ་གྱིས་ཤེས་པར་བྱའོ། །ཞེས་གསུངས་པ་ནི་དེ་ཉིད་སྡུག་བསྔལ་ཤེས་པ་སོགས་སུའང་འཇོག་པའི་དོན་ནོ། །བདེན་བཞི་མས་རིམ་ནས་བཞག་པའང་བདེན་བཞིའི་རིམ་པ་དང་། མས་བརྟན་གྱི་རིམ་པ་གཉིས་འདྲ་བ་ཙམ་མོ། །དེ་ཉིད་བཞི་མས་རིམ་ནས་བཞག་པའང་དེ་དང་འདྲ་བར་བྱའོ། །དེ་ལྟར་ཐམས་ཅད་བཞིའོ་ཞེས་པ་ནི་སྔར་བཤད་པ་སོགས་ཀྱི་བཞི་ཚན་རྣམས་འཁོར་ལོ་བཞི་ལ་འཇོག་པའི་དོན་ཡིན་ལ། སྐབས་ནི་དགེ་འདུན་ཕལ་ཆེན་པ་ཞེས་པའི་མཇུག་ཐོགས་སུ་འཇོག་པར་མུ་ཏིག་ཕྲེང་བ་ལས་འཆད་པ་ལྟར་རམ། ཡང་ན་དབྱུ་གུ་དང་ཐུན་ཚོད་དང་འཕོ་བ་དང་ཆུ་ཚོད་ཀྱི་རླུང་བརྒྱུ་བ་རྣམས་འཁོར་ལོ་བཞི་ལ་མས་རིམ་ནས་སྦྱར་རོ། །ཟླ་ཉི་ཞེས་སོགས་བཞི་དང་། ཐབས་ཤེས་ཞེས་པ་འདི་རྣམས་སྐབས་ཐོབ་ཀྱིས་དོན་དུ་མ་ཞིག་ལ་འགྲོ་མོད་ཀྱང་། སྡོམ་པའི་དབྱེ་བའི་སྐབས་འདིར་ནི་རྩ་གཉིས་དང་དེ་ནས་བརྒྱུ་བའི་རླུང་གཉིས་དང་། ཁམས་དཀར་དམར་གཉིས་ལ་ཅི་རིགས་པར་བཤད་དགོས་ལ། སྐབས་འདིར་ནི་རྩ་དང་རླུང་ངོ་། །སྣ་སྒོར་བརྒྱུ་
བའི་ཉིན་ཞག་གཅིག་གི་རླུང་ལ། ཉིན་མཚན་གཉིས་ཀྱི་རེ་རེ་ལ་ཐུན་བཞི་བཞི་སྟེ་ཐུན་བརྒྱད་དང་། དེ་ཕྱེད་མར་བྱས་པའི་འཕོ་བ་བཅུ་དྲུག་དང་། དེ་ཉིས་འགྱུར་གྱི་ཆུ་ཚོད་སོ་གཉིས་དང་། དེ་ཉིས་འགྱུར་གྱི་དབྱུ་གུ་རེ་བཞིར་བཤད་དེ་འཁོར་ལོ་བཞིའི་རྩ་འདབ་ནས་བརྒྱུ་བའི་རླུང་གི་གྲངས་དང་ཡང་སྦྱར་རོ། །འདིར་རླུང་བཤད་པ་ལ་ཉམས་ལེན་བྱ་ཐབས་ནི། མུ་ཏིག་ཕྲེང་བ་ལས་མཛོད་འགྲེལ་ནས་བཤད་པ་ལྟར་གྱི་བགྲང་བ་སོགས་བྱས་ནས། རླུང་ལས་རྒྱལ་བར་བྱེད་པ་ལ་བཤད་དོ། །འདི་འདྲ་བའི་བཤད་པ་རྣམས་ནི་ཡུལ་ཅན་ཁྱད་པར་ཅན་ལྷན་སྐྱེས་ཀྱི་བདེ་བས་དེ་ཁོ་ན་ཉིད་བསྒོམ་པ་ལམ་འདིའི་གཞན་ལ་མེད་པའི་ཁྱད་ཆོས་སུ་འགྲོ་བའི་ཚུལ་གྱིས་བཤད་སྲོལ་ལ་མ་བརྟེན་པའི་རྒྱུ་མཚན་གྱིས་བྱུང་བའོ། །དེ་ནས་འདིར་རླུང་བཤད་པ་ལ་ཉམས་ལེན་ཇི་ལྟར་བྱེད་པ་ནི་ལྟ་སྟངས་ཀྱི་ལེའུར་དབྱུང་བ་སོགས་བཞི་བཤད་པ་དང་། བཤད་པའི་རྒྱུད་སཾ་བྷུ་ཊི་ལས། འཕོ་བའི་སྐབས་སུ་བུམ་པ་ཅན་བཤད་པ་ལྟར་དང་། དེར་རླུང་བཞི་བཤད་པ་ལ་བརྟེན་ནས་རྡོར་བཟླས་བྱེད་པར་མན་སྙེར་བཤད་པ་ལྟར་ཤེས་དགོས་ཏེ། འདིར་རླུང་བསྒོམ་པ་ནི་ལྷན་སྐྱེས་ཀྱི་བདེ་ཆེན་འདྲེན་པའི་ཕྱིར་ཡིན་ལ། ཐེག་པ་ཐུན་མོང་གི་རླུང་བགྲང་བ་སོགས་ལ་ནི་ཅི་ཙམ་ཞིག་འབད་ཀྱང་། བདེ་གསལ་མི་རྟོག་པ་ཞེས་གྲགས་པའི་སེམས་གནས་ཐུན་མོང་བ་ཙམ་ལས་བསྐྱེད་མི་ནུས་པའི་ཕྱིར་རོ། །སྡོམ་པའི་དབྱེ་བ་ལ་པདྨ་ཅན་ལས། དེ་ཉིད་བདེ་བ་ཆེན་པོའི་མཆོག་གི་དབྱེ་བ་བཤད་པར་བྱ་བ་ནི། དབྱེ་བའི་མཚན་ཉིད་དོ་ཞེས་གསུངས་པས། སྡོམ་གཞི་རྡོ་རྗེའི་ལུས་ཁོ་ན་ལ་མི་གཟུང་བར་ལྷན་
སྐྱེས་ཀྱི་བདེ་ཆེན་ཡང་སྡོམ་གཞི་དང་སྡོམ་པའི་ངོ་བོ་གཉིས་ཀ་ལ་བཤད་དེ། ཀུ་མུ་ཊིར་སྡོམ་པ་བདེ་ཆེན་ལ་མཛད་པའི་ཁུངས་དྲངས་པ་དང་ཡང་འདྲའོ། །སྡོམ་གཞི་དེར་གང་སྡོམ་པ་ནི་སྐད་ཅིག་མ་བཞི་ལ་སོགས་པ་སྔར་པདྨ་ཅན་ལས་བཤད་པ་ལྟར་སྡོམ་པ་སྟེ། འཁོར་ལོ་བཞི་ཙམ་ཞིག་སྡོམ་གཞིར་མི་གཟུང་ངོ་། །བླ་མ་འགའ་ཞིག་གིས་བཤད་པ་ལ་འདིའི་སྡོམ་པའི་དབྱེ་བ་བཤད་པའི་དགོས་པ་དངོས་གཞི་ནི་ཇི་སྙེད་ཡོད་པའི་ཆོས་ཐམས་ཅད་རྩ་དང་འཁོར་ལོ་ལ་སོགས་པར་བསྡུས་པའི་སྤྲོས་པ་བཅད་པས་ལམ་ལ་ཐེ་ཚོམ་སེལ་ལོ་ཞེས་པ་དང་། ཡང་འགའ་ཞིག་སྡོམ་པའི་དབྱེ་བ་སྟོན་པའི་གཞུང་རྣམས་ཀྱིས་འཁོར་འདས་ཀྱི་ཆོས་ཐམས་ཅད་རྣལ་འབྱོར་པ་རང་གི་ལུས་སེམས་གཉིས་ལ་ཚང་བར་བསྟན་ནས་དེ་ཤེས་པའི་ཆེད་ཡིན་ལ། ཤེས་ནས་ཀྱང་ཨཾ་ནས་པ་དང་རྫོགས་ཆེན་གྱི་ལྟ་བའི་དོན་དེ་ཤེས་ནས་ཅིའང་བྱ་མི་དགོས་ཟེར་བ་ལྟར་དང་། རང་ལ་དེ་རྣམས་ཚང་བས་ཅིའང་བྱ་མི་དགོས་པར་སྟོན་པ་མིན་གྱི། ཚང་བའི་རྒྱུ་མཚན་གྱིས་བསྒོམ་དུ་བཏུབ་པ་ཡིན་ཟེར་མོད་ཀྱང་། སྔར་བཤད་པ་ལྟར་གྱི་དྷཱུ་ཏཱིར་སྡོམ་ལུགས་དེ་ཧེ་ཡིག་གིས་མཚོན་པའི་དོན་སྙིང་རྗེ་ཆེན་པོ། ལུས་ལ་ཡེ་ཤེས་ཆེན་པོ་གནས། །ཞེས་པས། ཡེ་ཤེས་དེ་ལུས་ལ་གནད་དུ་བསྣུན་པ་ལས་སྐྱེ་བར་བཤད་པའི་དོན་ཉིད། སྡོམ་པའི་དབྱེ་བས་འཆད་པ། གནད་ཀྱི་དོན་མ་ཤེས་པ་ཡིན་པས། སྐབས་ཀྱི་དོན་སྟོར་བའི་བཤད་པའོ། །དེ་ནས་བདུད་རྩི་འོད་ལས། རྣལ་འབྱོར་མ་ནི་བདག་མེད་མའི། །སྡོམ་པའི་དབྱེ་བ་བཤད་པར་
བྱ། །ལྟེ་བར་ཕྱག་རྒྱ་ཆེན་པོ་གནས། །རྟག་ཏུ་བདེ་བ་ཆེན་པོ་འཛག །རྣོ་ཕྱིར་མེ་ཡི་གཟུགས་སུ་ནི། །འབར་བཅས་རྣམས་ལ་མ་མོ་ཁྱོད། །དང་པོ་དབྱངས་ཡིག་རང་བཞིན་ཏེ། །བློར་ནི་མཁས་པ་རྣམས་ཀྱིས་བརྟགས། །འཇིག་རྟེན་གསུམ་དུ་ཁྱབ་པ་ནའང་། །སོ་སོའི་སྐྱེ་བོས་མི་ཤེས་སོ། །བདག་མེད་ལུས་ཀྱི་ནང་གནས་པ། །གཞོམ་མེད་ཁ་ནི་འོག་ཏུའོ། །རྟག་ཏུ་བྱང་ཆུབ་སེམས་ཉིད་ཀྱི། །རྒྱུན་མི་འཆད་པའི་སྦྱོར་བས་འཛག །དེ་ཕྱིར་ལུས་ལ་རྩ་རྣམ་གསུམ། ཞེས་གསུངས་ཤིང་། དེ་ནས་རྐྱང་མ་ཤེས་རབ་རང་བཞིན་གྱིས། །ཞེས་སོགས་གསུངས་པའི་མཐར། ཉིན་མཚན་ཀུན་ཏུ་ལྷན་སྐྱེས་སྐྱེ་བ་དེ་བཟའ་བ་སྟེ་ལོངས་སྤྱོད་པར་གསུངས་པས། སྡོམ་ཐབས་ནི་གཏུམ་མོ་བསྒོམ་པ་ཡིན་ལ། སྡོམ་ལུགས་ནི་དེ་བསྒོམས་པས་རླུང་གཉིས་དྷཱུ་ཏཱིར་སྡོམ་པ་འདིའི་གནད་དུ་བཟུང་དགོས་སོ། །ལྟེ་བར་གཏུམ་མོ་ཞེས་སོགས་ཀྱིས་ནི། སྔར་བཤད་པ་ལྟར་རླུང་གཉིས་དྷཱུ་ཏཱིར་བསྡམས་པ་ན། ལྟེ་བའི་གཏུམ་མོ་འབར་ནས་སྤྱི་བོའི་ཧཾ་ལས་རི་བོང་ཅན་ཀུནྡ་ལྟ་བུའི་བྱང་སེམས་འཛག་པར་གསུངས་ཏེ། དེ་གསང་གནས་ཀྱི་རྩེར་ཕབ་པ་མི་འཕོ་བར་བཅིངས་པ་ལས། ཧེ་ཡིག་གི་དོན་ལྷན་སྐྱེས་ཀྱི་དགའ་བ་སྐྱེས་པ་བསྒོམ་པ་ནི། དངོས་སུ་མེད་ཀྱང་ཤུགས་ཀྱིས་ཤེས་ནུས་ལ། དེའང་བདག་མེད་པའི་དེ་ཁོ་ན་ཉིད་ཕུ་ཐག་ཆོད་པར་ངེས་པའི་ལྟ་བ་དང་སྦྱར་ནས་བསྒོམ་དགོས་པ་ནི། སྔར་གྱི་བཛྲའི་དོན་དུ་བཤད་པ་དང་། མཚན་བསྡུས་པའི་དོན་དྲིས་པའི་ལན་གྱིས་དང་། དངོས་པོའི་འཆིང་བས་འཆིང་བ་དང་།
དེ་ཡོངས་སུ་ཤེས་པས་གྲོལ་བར་གསུངས་པས་ཤེས་དགོས་སོ། །གཞུང་འདིས་ནི་གསང་བ་ལས་རྒྱ་དང་། ནང་ལུས་ཀྱི་བྷ་ག་ལ་བརྟེན་པའི་ལུས་ལ་གནད་དུ་བསྣུན་པའི་ཐབས་གང་བྱས་ཀྱང་བདེ་བ་སྐྱེ་ལུགས་ནི། ལྟེ་བའི་གཏུམ་མོ་འབར་བའི་མཐུས་སྤྱི་བོ་ནས་བྱང་སེམས་ཕབ་པ་ལས་ཡིན་པར་སྟོན་ལ། འོན་ཀྱང་འདི་ལ་བརྟེན་ནས་ནང་ལུས་ཀྱི་རྡོ་རྗེ་བཙུན་མོའི་བྷ་ག་རྩ་འཁོར་བཞི་ལ་བརྟེན་པའི་གཏུམ་མོ་བསྒོམ་པར་སྟོན་པ་ཡང་། ཌོམ་བི་པ་དང་མི་ཐུབ་ཟླ་བས་བཤད་པས་དེའང་ཤེས་དགོས་སོ། །ཀུ་མུ་ཊི་ལས་ཚིག་དོན་མ་བཤད་ལ། པདྨ་ཅན་ལས་གཏུམ་པ་ནི་ཉོན་མོངས་རྩད་ནས་འབྱིན་པའོ། །འབར་བ་ནི་མཆེད་པས་ཏེ་སྣང་བར་བྱེད་པའི་བར་དུའོ། །ཨཱ་ལི་ཞེས་པ་ནི་རི་མོའོ། །འདི་རྒྱ་དཔེ་ལ་ཙཎྜ་ལཱི་ཞེས་ཡོད་པའི་དོན་ཡིན་ཞེས་བོད་ཁ་ཅིག་ཟེར་བ་ལྟར་ཡིན་ནོ། །དེ་ལྟར་ན་སྔར་གཏུམ་མོའི་དོན་བཤད་པ་ནི་བྱེད་ལས་ཀྱི་སྒོ་ནས་ཡིན་ལ། འདིར་ནི་ཁྲག་རྡུལ་གྱི་རི་མོ་སྟེ་རང་གི་ངོ་བོའི་སྒོ་ནས་སོ། །ལྟེ་བ་ནི་བདེ་ཆེན་གྱི་པདྨའི་ལྟེ་བ་ལ་བཤད་པ་ནི། གང་ནས་འབར་བའི་ལྟེ་བ་ནི་གྲགས་པ་ལྟར་གྱི་ལྟེ་བ་ཡིན་ཡང་། དེར་ཡོད་པའི་རྡུལ་གྱི་རི་མོ་དེ་ཇེ་ཆེར་འཕེལ་བ་སྟེང་དུ་རིམ་གྱིས་གྱེན་དུ་སོང་བ་ཧཾ་ཡིག་གི་གནས་སུ་སླེབ་དགོས་པས། དེ་ལ་དགོངས་པའམ་ཡང་ན་ལྟེ་བ་ཞེས་པ་ཧཾ་འཛག་པའི་གནས་ལ་སྦྱོར་བའོ། །བསྲེགས་པ་ནི་ངོ་བོ་ཉིད་མེད་པར་བྱས་པ་ཡིན་ལ། དེའང་གཤེགས་པ་ཕུང་པོ་ལྔ་དང་། སྤྱན་སོགས་འབྱུང་བ་བཞིའོ། །གང་དུ་བསྲེགས་ན་
བདག་བསྲེགས་པ་སྟེ་བདག་ཏུ་འཛིན་པ་བསྲེགས་པའི་ཚེ་ནའོ། །ཞེས་བཤད་དེ། བསྲེགས་པའི་དོན་ནི་ཕུང་ཁམས་ཀྱི་རྟོག་པ་དང་བདག་འཛིན་བཅོམ་པའོ། །དེ་ལྟར་ན་ཞུས་པའི་གཙོ་བོའི་དོན་རྗེ་བཙུན་ཆེས་ཤིན་ཏུ་གསང་བ་སྐུ་གསུང་ཐུགས་ཀྱི་སྙིང་པོའི་དོན་ཡིན་ལ། དེ་ཉིད་ནི་ཧེ་དང་བཛྲ་སོ་སོར་ཕྲལ་ནས་ཞུས་པའི་དོན་གཉིས་མེད་དུ་སྦྱོར་བ་མིང་བསྡུས་པའི་དོན་དྲིས་པའི་ལན་ཡིན་ཞིང་དེ་ཉིད་བཤད་བྱར་ཞལ་གྱིས་བཞེས་པའི་དོན་འཆད་པ་ན། ལྟ་སྟངས་ཞེས་སོགས་ཀྱི་བརྟག་པ་དང་པོའི་དོན་མདོར་བསྟན། ཧེ་རུ་ཀ་ནི། ཞེས་པ་ནས་ཧེ་རུ་ཀ་བསྒོམ་བྱ། ཞེས་པའི་བར་གྱིས་བཛྲའི་དོན་མེད་ན་འཁོར་བ་ལས་འདའ་མི་ནུས་པས་དེ་ངེས་པར་བསྒོམ་དགོས་པར་བསྟན། དེ་ནས་དོན་དེ་ཧེའི་དོན་ལྷན་སྐྱེས་ཀྱི་བདེ་བའི་ཡེ་ཤེས་ཆེན་པོས་མ་བསྒོམས་ན་དོན་སྔ་མ་ཙམ་ཞིག་བསྒོམས་ཀྱང་སྲིད་པ་ལས་གྲོལ་བ་ཙམ་དང་། ཡང་ཐེག་པ་འདིར་བཤད་པའི་ལྷའི་འཁོར་ལོ་དང་། ཐེག་པ་གཞན་ནས་སྦྱིན་སོགས་ཀྱི་ཐབས་རྒྱ་ཆེན་པོ་དང་བཅས་པར་བསྒོམས་ཀྱང་ཚེ་གཅིག་གིས་བླ་མེད་ཀྱི་བྱང་ཆུབ་མི་འགྲུབ་པས་བདེ་སྟོང་སྦྱར་དགོས་ལ། དེའི་བདེ་ཆེན་ལུས་ལ་གནད་དུ་བསྣུན་པ་ལས་བསྐྱེད་དགོས་པར་ལུས་ལ་ཞེས་སོགས་ཀྱིས་བསྟན་ཏོ། །དེ་ནས་ལུས་ལ་གནད་དུ་བསྣུན་པ་ཞུས་པའི་ལན་དུ་དེའི་གཙོ་བོ་རྩ་སོ་གཉིས་དང་དེའི་ནང་ནས་གཙོ་མོ་གསུམ་དང་། དེ་ལས་ཀྱང་གཙོ་མོ་མཐར་ཐུག་པ་ཞིག་བསྟན་པས་དྷཱུ་ཏཱི་ལ་བརྟེན་ནས་ལྷན་སྐྱེས་འཆར་དགོས་པར་བསྟན། དེ་ནས་རྩ་སོ་གཉིས་ཀྱི་མིང་དང་རྩ་རྣམས་
ཀྱི་དོན་ཡིད་ལ་བྱ་ཚུལ་གཉིས་བསྟན། དེ་ནས་དྷཱུ་ཏཱིར་གནད་དུ་བསྣུན་པས་ལྷན་སྐྱེས་འཆར་བ་ལ། དེར་སྡོམ་ཚུལ་འཕྲོས་དང་བཅས་པ་བསྟན། དྷཱུ་ཏཱིར་གཡས་གཡོན་གྱི་སྲོག་བཅིངས་པ་ལ་བརྟེན་ནས་བདེ་བ་བསྐྱེད་ཚུལ་ནི། ལྟེ་བ་ཞེས་སོགས་ཀྱིས་བསྟན་ལ། འདིར་དངོས་སུ་འབར་འཛག་ལས་མ་བཤད་ཀྱང་དེ་ལ་བརྟེན་ནས་ཡས་བབས་ཀྱི་དགའ་བཞི་དང་། མས་བརྟན་གྱི་དགའ་བཞི་བསྐྱེད་ཚུལ་ནི། བཤད་རྒྱུད་ཕྱག་ཆེན་ཐིག་ལེ་ལས་ཤིན་ཏུ་གསལ་བར་བསྟན་ལ། དེ་འདྲ་བའི་ཡས་མར་གྱི་ལྷན་སྐྱེས་ཀྱི་དུས་སུ་བདེ་སྟོང་སྦྱར་ནས་སྙིང་པོ་ཀྱཻ་རྡོ་རྗེའི་དོན་བསྒོམ་དགོས་པ་འདི་དང་། རོ་རྐྱང་གི་རླུང་དྷཱུ་ཏཱིར་སྡོམ་པའི་ཐབས་མང་དུ་ཡོད་ཀྱང་། ལུགས་འདི་ལ་ལམ་འདིས་གྲུབ་པ་བརྙེས་པའི་བདག་ཉིད་ཆེན་པོ་ཡན་ལག་མེད་པའི་རྡོ་རྗེ་དང་ཌོ་བི་ཧེ་རུ་ཀ་དང་། མཚོ་སྐྱེས་རྡོ་རྗེ་སོགས་ཀྱིས་གཏུམ་མོའི་སྒོམ་རིམ་གཙོ་བོར་བཤད་པ་འདིའི་གནད་ལ་ངེས་པ་རྙེད་པ་ནི་ཀྱཻ་རྡོ་རྗེའི་ལེའུ་དང་པོར་བརྟག་པ་སྔ་ཕྱིའི་གནད་བསྡུས་ནས་བསྟན་པ་གཞུང་ལྷག་མའི་བཤད་པ་རྣམས་ཀྱི་མི་འཕྱུགས་པའི་གཟེར་འདེབས་ཡིན་པས། ལེགས་པར་བཤད་པའི་སྙིང་པོ་བསྡུས་པར་ཤེས་པར་གྱིས་ཤིག །རྡོ་རྗེ་ནི་རྡོ་རྗེ་སེམས་དཔའ་ལྷན་སྐྱེས་ཀྱི་ཧེ་རུ་ཀའོ། །དེའི་རིགས་ནི་དེ་བསྐྱེད་པའི་གནས་ཏེ་རྒྱུ་ཡིན་ལ། དེའང་གཞུང་འདི་ཡིས་གསལ་བར་བྱེད་པ་ལ་ལེའུ་ཞེས་བྱ་སྟེ་ཡོངས་སུ་བཅད་པའོ། །དང་པོ་ནི། གཉིས་པ་སོགས་ལ་ལྟོས་ནས་སོ། །དེ་ནི་པདྨ་ཅན་གྱི་
དགོངས་པའོ། །ཀུ་མུ་ཊིར་རྡོ་རྗེ་ནི་བདེ་སྟོང་སྦྱར་བའི་བྱང་ཆུབ་ཀྱི་སེམས་དང་། རིགས་ནི་དང་པོའི་རུས་ཏེ། ཨཱ་ལི་དང་ཀཱ་ལི་ཞེས་བཤད་པ་ནི་ཨཱ་ལི་བསྡུས་པའི་ཨ་ཐུང་གི་ངོ་བོ་གཏུམ་མོ་དང་། ཀཱ་ལི་བསྡུས་པའི་ཧཾ་ཡིག་གི་ངོ་བོ་ཀུནྡ་ལྟ་བུའི་འབར་འཛག་སྟེ། དེ་ནི་སྔ་མའི་རྒྱུའོ། །ལེའུ་ནི་བཤད་པའི་གཞུང་ལས་བཤད་དོ། །སྔགས་ཀྱི་ལེའུ་སྟོན་པའི་འགྲེལ་པ་ནི་ཀུ་མུ་ཊིར། གླེང་གཞིའི་ཡི་གེ་བཞིས་མཚོན་པའི་རྩའི་འཁོར་ལོ་རྟོགས་པའི་ཕྱིར་དུ་གསུངས་པར་བཤད་དེ། རྩ་འཁོར་ལ་དགོད་པའི་སྔགས་བསྟན་པར་འདོད་པའི་ལུགས་སོ། །ལེའུ་དང་པོར་བཤད་པའི་ཐུགས་རྡོ་རྗེ་དེ་ཉིད་སྔགས་ཀྱི་གཟུགས་ཀྱིས། སྣ་ཚོགས་པའི་དོན་བྱེད་པར་ནུས་སོ། ཞེས་བསྟན་པའི་ཕྱིར་དུ་གསུངས་པར་པདྨ་ཅན་ལས་སོ། །འདིར་བཤད་རྒྱུད་ཀྱི་དོན་ནག་པོ་སྤྱོད་པས། སྔགས་བཏུ་བ་རྫོགས་རིམ་དང་སྦྱར་བ་གསུངས་པས་དེ་ལྟར་བྱེད་ན། ཀུ་མུ་ཊིར་དྲངས་པ་ལས། ཨཱ་ལི་ཀཱ་ལི་གཉིས་ནི་སྔགས། །ཡང་ན་དེ་ལས་གང་བཏུས་པ། །ཞེས་པ་ལྟར་སྔགས་བཏུ་བའི་གཞི་དབྱངས་གསལ་དང་། དེ་ལས་བཏུས་པ་གཉིས་སོ། །དེའང་རྩ་འཁོར་གྱི་དབུས་ཀྱི་ཡི་གེ་བཞི་དང་། འདབ་མ་ལ་བཀོད་པའི་ཡི་གེ་སྟེ། གཏུམ་མོ་བསྒོམ་པ་ལ་སྦྱར་རོ། །བཏུས་པའི་བཟླས་པའི་སྔགས་རྣམས་ཀྱི་ངེས་དོན་གྱི་དབང་དུ་བྱས་ནས། རྡོ་རྗེའི་བཟླས་པ་ལའང་སྦྱར་རོ། །དེ་དག་གི་ནང་ནས་ཀྱང་གཙོ་བོ་ནི་ཨ་ཐུང་ཡིན་ལ། དེའང་ལྟེ་བའི་དབུས་སུ་གནས་པ་ལ་སཾ་བྷུ་ཊི་ལས་བཤད་ཅིང་དེ་ལ་བསྔགས་པ་མང་དུ་མཛད་དོ། །པདྨ་ཅན་ལས་ཀྱང་། ལྷ་ཡི་དང་། སྔགས་
ཀྱི་དང་། རིགས་ཀྱི་ལེའུ་གསུམ་གྱིས་དབྱིབས་དང་། སྔགས་དང་ཆོས་ཀྱི་རྣལ་འབྱོར་གསུམ་བསྟན་པར་བཤད་ལ། བར་བ་ནི་རྡོར་བཟླས་ལ་མཛད་པ་མང་ངོ་། །མུ་ཏིག་ཕྲེང་བ་སོགས་སུ་དོན་བྱེད་རྣམ་མང་དང་། རེངས་པ་ནས་མངོན་སྤྱོད་ཀྱི་བར་རྣམས་འཆད་པར་བཤད་དོ། །སྔགས་ནི་སྙན་གསན་འབེབས་པ་དང་། དེ་ཁོ་ན་ཉིད་བསྐུལ་བ་ཡིན་ལ། དེ་ལས་ལྷ་བསྒོམ་པ་དང་མཆོད་པ་དང་རབ་གནས་དང་སྦྱིན་སྲེག་དང་དཀྱིལ་འཁོར་དང་ལས་ཚོགས་ཀུན་ལ་གཏོར་མ་སྔོན་དུ་འགྲོ་བས་ཐོག་མར་གཏོར་སྔགས་གསུངས་སོ། །ༀ་ནི་བཀྲ་ཤིས་པ་དང་དམ་བཅའ་བ་སོགས་ཀྱི་དོན་ནོ། །ཨ་ཀ་རའི་ཀ་ར་ནི་ཡི་གེ་ལའང་འཇུག་པའི་དབྱངས་ཡིག་གོ །མུ་ཁཾ་ནི། ཁ་དང་གདོང་དང་སྒོ་ལའང་འཇུག་པ་ལས། འདིར་སྒོ་སྟེ་དང་པོའི་སྒོའོ། །ཨ་ཡིག་དེ་ལས་ཡི་གེ་ཐམས་ཅད་འབྱུང་བས་ཡི་གེ་རྣམས་ཀྱི་སྒོའོ། །དེའི་ཕྱིར་མཆོག་ཏུ་གསུངས་ཏེ། ཨ་ནི་ཡིག་འབྲུ་ཀུན་གྱི་མཆོག །དོན་ཆེན་སྡེ་ཚན་འདྲེན་པ་ཉིད། །ལུས་ཅན་རྣམས་ཀྱི་སྔགས་ཀུན་ནི། །དེ་ཉིད་ལས་ནི་ཡང་དག་འབྱུང་། །ཞེས་སོ། །དེ་ལས་ཡི་གེ་གཞན་རྣམས་འབྱུང་དུ་ཆུག་ཀྱང་། ཇི་ལྟར་དང་པོ་ཡིན་ཞེ་ན། སརྦ་སོགས་ཀྱིས་གཏན་ཚིགས་སྟོན་ཏེ། སརྦ་དྷརྨཱ་ཎཱཾ་ནི་ཆོས་ཐམས་ཅད་དོ། །ཨ་དྱཱ་ནུད་པནྣ་ཏྭཱ་ད་ནི་གདོད་མ་ནས་སྐྱེ་བ་མེད་པ་ཉིད་དོ། །ཞེས་པས་ཏེ། ཨས་ནི་སྐྱེ་བ་མེད་པ་མཚོན་ཏེ། དེ་ཕྱིར་དེ་འགྲུབ་བྱེད་པའི་སྔགས། །ངེས་པར་གང་ཡང་ཡོད་མ་ཡིན། །སྐྱེ་བ་མེད་པའི་རང་བཞིན་ཕྱིར། །སྔགས་ཀྱི་
སྡེ་ཚན་དབང་ཕྱུག་མཆོག །ཅེས་སོ། །འབྱུང་བོ་ནི་འགྲོ་བ་དྲུག་དང་། གཏོར་མ་ནི་མཆོད་པ་དང་དེ་བྱིན་གྱིས་རློབ་པའི་སྔགས་སུ་ཀུ་མུ་ཊིར་བཤད་དོ། །པདྨ་ཅན་ལས་སྐྱེ་མེད་དང་དབྱེར་མེད་པའི་བདེ་ཆེན་གྱི་ངོ་བོར་མོས་ནས་རྨི་ལམ་དང་སྒྱུ་མ་ལྟ་བུའི་སེམས་ཅན་རྣམས་ཚིམ་པར་བྱ་བའི་ཕྱིར་དུ་གཏོར་མ་སྦྱིན་པར་གསུངས་པས། གཏོར་མ་འབུལ་སྔགས་སུའང་བྱའོ། །ཡི་གེ་གསུམ་གྱིས་ནི། སྒོ་གསུམ་བྱིན་གྱིས་བརླབ་པར་བཤད་པ་ནི་རང་དང་མགྲོན་གཉིས་ཀྱིའོ། །ཕཊ་ནི་གདུག་པ་ཅན་ཟློག་པར་བྱེད་པ་དང་། སྭཱཧཱ་ནི་སྒོ་གསུམ་དེ་ཁོ་ན་ཉིད་དུ་ཞི་བར་བྱེད་པར་བཤད་དོ། །མུ་ཏིག་ཕྲེང་བར། འབྱུང་བོ་ནི་དབང་པོ་ལ་སོགས་པ་འཁོར་བཅས་དང་། སརྦ་དྷརྨཱ་ཎཱཾ་ནི་མཆོད་བྱེད་སོགས་ཀྱི་འཁོར་གསུམ་དང་། ཡི་གེ་གསུམ་གྱིས་རང་དང་མགྲོན་གྱི་སྒོ་གསུམ་དེ་བཞིན་གཤེགས་པའི་སྐུ་གསུང་ཐུགས་དང་མཉམ་པ་ཉིད་དུ་བྱེད་པ་ལ་བཤད་དོ། །དེ་བཞིན་གཤེགས་པ་ལ་རིགས་མཐའ་ཡས་ཀྱང་རིགས་ཐམས་ཅད་སྡུད་པ་ནི། རྣམ་སྣང་ལ་སོགས་པ་ལྔ་ཡིན་ལ། དེ་དག་གི་ས་བོན་བྷྲཱུཾ་ལ་སོགས་པ་ནི། དེ་དག་སྟོན་པ་དང་བསྐྱེད་པའི་སྔགས་སོ། །གཏོར་མའི་རྗེས་སུ་བྷྲཱུཾ་ལ་སོགས་པ་བསྟན་པ་ནི། གཏོར་མའི་རྫས་རྣམས་བི་ར་ཤུ་མ་མུའི་དོན་གྱིས་བདག་ཉིད་ལྔར་བྱ་བའི་དོན་དུ་བྷ་བས་བཤད་དེ། སྐབས་དུ་མ་ཞིག་ལ་འཁྱེར་དགོས་སོ། །རྒྱུད་འདི་ལ་ཕྱག་བཅུ་དྲུག་པ་གཙོ་བོ་ཡིན་པས། འདིའི་སྔགས་སྔོན་དུ་གསུངས་པ་དེ་བ་ནི་རོལ་པ་དང་ལྷའོ། །པི་ཙུ་ནི་ཕུལ་དུ་བྱུང་བའི་འདབ་བལ་ཏེ། ཐམས་ཅད་རྗེས་
སུ་འཛིན་པས་བལ་ཤིན་ཏུ་འཇམ་པོས་རྩྭ་ལ་སོགས་པ་འཛིན་པ་དང་ཆོས་མཐུན་པས་པི་ཙུའོ། །བཛྲ་ནི་གདུག་པ་ཅན་འཇོམས་པ་ལ་རྡོ་རྗེ་དང་འདྲ་བར་བཤད་དོ། །ལྷག་མ་ནི་སྔར་བཞིན་ནོ། །སྔགས་ཐམས་ཅད་ཀྱི་རྐང་པ་ཞེས་པ་ལ་པཱ་ད་ཞེས་པ་རྐང་པ་དང་གནས་དང་ཚིག་ལའང་འཇུག་པས་སྔགས་ཐམས་ཅད་ཀྱི་ཚིག་ལ་ཞེས་འགྲེལ་པར་བསྒྱུར་པ་ཤིན་ཏུ་བདེའོ། །ཧཱུཾ་ཕཊ་ཀྱི་རྣམ་པ་ནང་དུ་གཞུག་པ་ནི། སྭཱཧཱའི་སྔོན་དུ་འཇུག་པའོ། །ཕཊ་དང་སྤེལ་ཞེས་ཀྱང་འབྱུང་ངོ་། །དེ་འདྲ་བ་དེ་འདིའི་སྔགས་གང་ལ་སྦྱོར་བ་ནི། ཀུ་མུ་ཊིར་ཁྱད་པར་མ་བསྟན་པའི་དེ་བཞིན་གཤེགས་པ་ཐམས་ཅད་ཀྱི་སྔགས་དང་། ལྷ་མོ་ཐམས་ཅད་ཀྱི་སྔགས་དང་གྲོང་ཁྱེར་དཀྲུག་པ་ལ་སྦྱར་གྱི་གཞན་ཁྱད་པར་བསྟན་པ་རྣམས་ལ་ནི་མ་ཡིན་ནོ། །སྦྱར་ཚུལ་ནི་ༀ་ཨཱཿ བྲུཾ་ཧཱུཾ་ཕཊ་སྭཱཧཱ། ཞེས་སོགས་དང་། ༀ་ཨཱཿ ཨ་ཨཱ། ཞེས་སོགས་དང་། ༀ་ཨཱཿ ཨ་ཀ་ཙ་ཊ་ཏ་པ་ཡ་ཤ་ཧཱུཾ་ཕཊ་སཱཧཱ། ཞེས་པ་དང་། ཏྲཻ་དང་ཏྲི་ནི་གསུམ་མོ། །ལོཀྱ་ནི་འཇིག་རྟེན་ནོ། །ཀྵེ་པ་ནི་སྡུད་པས་ཏེ་ཁམས་གསུམ་བདེ་བ་ཆེན་པོའི་རང་བཞིན་དུ་སྡུད་པ་ཞེས་བཅོམ་ལྡན་འདས་ལ་བོད་པའོ། །ཛྭ་ལ་གཉིས་ནི་འབར་བ་སྟེ། དངོས་པོ་ཐམས་ཅད་བདེ་ཆེན་གྱི་རང་བཞིན་དུ་འབར་བར་གྱིས་ཤིག་པའོ། །བྷྱོ་ནི་བཅོམ་ལྡན་འདས་ཞེས་པའོ། །ཀི་ཊི་གཉིས་ནི་ཆོས་ཐམས་ཅད་དང་བདུད་ཐམས་ཅད་ཆོམས་ཤིག་པ་དང་། བཛྲ་ནི་ཀྱཻ་རྡོར་རོ། །མུ་ཏིག་ཕྲེང་བར་ཚངས་པ་དབང་པོ་ཁྱབ་འཇུག་དྲག་པོ་
སོགས་འཇིག་རྟེན་གྱི་ལྷ་གཙོ་བོ་རྣམས་ནི་ཏྲཻ་ལོཀྱའོ། །ཀྵེ་པ་ནི་ཚར་གཅོད་པའོ། །ཛྭ་ལ་ནི་འབར་བའོ། །བྷྱོ་ནི་གདུག་པ་རྣམས་བསྲེག་པའི་ཕྱིར་ཞེས་བཤད་དེ། བྷྱོའི་སྒྲ་རྣམས་ལ་འཇུག་པའི་སྟེང་ནས་སོ། །ཡང་ན་ཆེད་དུ་ཞེས་པའི་དོན་དུ་བྱས་པའོ། །ཀི་ཊི་སྐད་ཀྱི་བྱིངས་ནི་འགྲོ་བའི་དོན་ཏེ་སེམས་ཅན་ཐམས་ཅད་རྗེས་སུ་འཛིན་པའོ། །བཛྲ་ནི་གདུག་པ་ཆད་པས་གཅོད་པ་ལ་བཤད་དོ། ཨ་ཕུའི་ཕུ་ནི་ཀླུ་སྤྱིའི་ས་བོན་ཡིན་ལ། ཨ་མཐའ་ཡས་ཀྱི་མིང་ཡིག་དང་པོའོ། །ཨ་ཕུ་ནི་ལན་བརྒྱད་འདོན་པ་དང་། དེ་ལ་མཐའ་ཡས་བསྐྱེད་པ་སོགས་ལ་བཤད་དོ། །ཨ་ནནྡ་ནས་པ་ཏ་ཡེ་ཞེས་པ་ནི་བོད་པའོ། །ཧེ་ནི་སྤྱན་དྲངས་པའོ། །ཧེ་རུ་ཀ་ནི་མིང་ངོ་། །འདིར་ཧེ་རུ་ཀའི་སྒྲ་གཉིས་པ་མེད་ཀྱང་དེ་གཉིས་ལན་གཉིས་སུ་བྱེད་པར་གཞན་དག་འདོད་ཅེས་འཆད་དོ། །བཟློག་ལུགས་ནི་སཱཧཱ། ཞེས་སོགས་ཀྱི་ཚུལ་གྱིས་སོ། །ཨརྫ་ག་ནི་པ་ན་ས་སྟེ་དེའང་སྡོང་བུ་དཀར་པོ་ཉི་འོད་ཀྱིས་རེག་པ་ཙམ་གྱིས་རྣམ་པ་དུ་མར་འགས་པ་ཞིག་ཡོད་པ་དེ་བཞིན་དུ་འགས་པ་ལ་བཤད་དོ། །ཁ་ཊི་ཀ་ནི་པདྨ་ཅན་དང་མུ་ཏིག་ཕྲེང་བར་རྡོ་རྒྱུས་སུ་བསྒྱུར་ཏོ། །ཀུ་ཐ་ར་ནི་སྟ་རེ་དང་། ཙྪིནྣ་ནི་གཅོད་པ་སྟེ་རྫས་ཤིག་གི་མིང་ངོ་། །གྲུབ་རྟགས་བྱུང་བ་ན་རྡོ་རྒྱུས་ཀྱིས་སྤྱི་བླུགས་ཀྱི་མགྲིན་པ་ལ་རི་མོ་བཏོད་ན་དགྲའི་མགྲིན་པའང་དེ་བཞིན་དུ་འོང་ལ། དེས་དཀོན་མཆོག་གསུམ་ལ་གནོད་པ་བྱེད་པ་སོགས་ལ་ལྡོག་ན་ལེགས་ལ། མི་ལྡོག་ན་བསྐོར་ནས་བཅད་དོ། །ཚངས་པ་ནི་བླཀྵ་ལ་བཤད་ལ། བོད་དག་རྒྱ་སྐྱེགས་ཀྱི་ཤིང་ལ་འདོད་དོ།
ཙི་ཊ་ཀ་སེན་རྩི་ཡིན་ཞེས་བོད་དག་ཟེར་རོ། །ཆང་སྐྱུག་པའི་སྔགས་པདྨ་ཅན་ལས་འབྱུང་ངོ་། །མྱ་ངན་མེད་པའི་བརྒྱད་ཀྱང་དཔྱིད་ཟླ་ར་བའི་ཚེས་བརྒྱད་དང་། མྱོས་བྱེད་ཀྱི་འབྲས་བུ་སོ་སོ་འཆའ་དང་། ཀ་ཀ་མ་ཙི་ཀའི་ཁུ་བ་ནི་རྒྱ་སྐྱེགས་ཀྱི་ཁུ་བ་དང་། དུས་མ་ཡིན་པའི་དུས་ནི་མར་ངོ་ལ་ཁ་ཅིག་འཆད་དོ། །ཟླ་བ་འཛིན་པ་དང་ན་གྲའི་སྔགས་ལྷག་མའང་པདྨ་ཅན་ལས་སོ། །ལྷག་མ་དང་ལེའུའི་མཚན་དོན་ནི་སླའོ། །ལེའུ་གཉིས་པས་གསུང་སྔགས་བརྗོད་ནས་གསུམ་པས་ལུས་སྐུ་བརྗོད་པའི་ཕྱིར་ལྷའི་ལེའུ་ཞེས་གསུངས་སོ། །སོ་སོ་སྐྱེ་བོ་བླ་མ་ལ་མ་བལྟོས་པར་འཇུག་པ་རྣམས་རྨོངས་པར་བྱ་བའི་ཕྱིར། ལྷའི་མངོན་རྟོགས་ཀྱི་རིམ་པ་འདིར་གསུངས་པས་ན། རྒྱུད་ནས་བཤད་པའི་སྒྲ་ཇི་བཞིན་པ་ནི་སྤངས་ཏེ་འཁྲུགས་པ་བསྡེབ་པར་བྱའོ། །རྣལ་འབྱོར་དང་རྗེས་སུ་མཐུན་པའི་གནས་སུ་སྟན་བདེ་བ་ལ་འདུག་ནས། རྣལ་འབྱོར་པས་རང་གི་སྙིང་གར་བཾ་དམར་པོ་ལས་བྱུང་བའི་པདྨ་དམར་པོ་དང་། རཾ་དམར་པོ་ལས་བྱུང་བའི་ཉི་མ་ལ་ཧཱུཾ་ཡིག་བསྒོམས་པ་ལས། རང་གི་སྙིང་གར་རེ་ཕ་བསྒོམ། །ཞེས་པ་ནས་རང་བཞིན་ཅན་ཞེས་པའི་བར་རོ། །དེ་ནས་མྱུ་གུའི་ལྷན་ཅིག་བྱེད་རྐྱེན་ས་ཆུ་སོགས་དང་འདྲ་བའི་བསོད་ནམས་ཀྱི་ཚོགས་བསགས་པ་ནི། ནམ་མཁར་རྗེ་བཙུན་བལྟས་ནས་ནི། ཞེས་པ་ནས། གཡུང་མོས་སྐུ་ལ་འཁྱུད་པ་ཉིད། ཅེས་པའི་བར་རོ། །དེ་ནས་རྒྱུད་འདིར་མེད་ཀྱང་བཤད་རྒྱུད་གུར་དུ་མཐོང་བ་བླང་བ་ནི། སྡིག་བཤགས་
ཡི་རང་སྐྱབས་འགྲོ་སེམས་བསྐྱེད་དོ། །དེ་ནས་ཚད་མེད་བཞི་བསྒོམ་པ་ནི་དང་པོར་བྱམས་པ་ཞེས་པ་བཞིའོ། །དེ་ནས་སྟོང་ཉིད་བསྒོམ་པ་ནི། སྟོང་ཉིད་བྱང་ཆུབ་ཅེས་ཏེ། དེ་ཁོ་ན་ཉིད་རྟོགས་པའི་སེམས་ནི་འབྲས་བུའི་བྱང་ཆུབ་ཀྱི་རྒྱུད་དང་། དེ་ཁོ་ན་ཉིད་ཀྱི་ངོ་བོ་ཡིན་པས་བྱང་ཆུབ་ཀྱི་སེམས་སོ། །ཡང་ནི་གོང་དུ་བྱང་ཆུབ་ཏུ་སེམས་བསྐྱེད་པ་དོན་གྱིས་ཡོད་པ་ལ་ལྟོས་ནས་འདིར་ཡང་བྱང་ཆུབ་ཀྱི་སེམས་བསྒོམ་པ་བྱུང་བའོ། །བྱང་ཆུབ་ཀྱི་སེམས་སྟོང་པ་ཙམ་བསྒོམ་མམ་སྙམ་ན། ཡན་ལག་བཞི་བསྒོམ་དགོས་པ་ནི། གཉིས་པ་ལ་ནི་ཞེས་པ་གསུམ་གྱིས་སྟོན་ནོ། །སྟོང་པར་བསྒོམ་པ་ལས་ཡན་ལག་ལྷག་མ་གསུམ་དུ་འགྱུར་ཚུལ་ནི། རེ་ཕས་ཞེས་པ་གཉིས་ཏེ། བཾ་དང་རཾ་དམར་པོ་གཉིས་ལས་མདུན་དུ་པདྨ་དམར་པོ་དང་ཉི་མའི་སྟེང་དུ་ཧཱུཾ་ནི་ས་བོན་དང་། བསྐྱེད་པ་ནི་བསྡུ་ཞེས་པའི་དོན་ཏེ་ཡན་ལག་གཉིས་པའོ། །དེ་ལ་སྣ་ཚོགས་རྡོ་རྗེ་བསྐྱེད་པ་ནི་གཟུགས་བརྙན་དང་ཕྱག་རྒྱ་དང་། མཚན་མ་རྫོགས་པ་སྟེ། ཡན་ལག་གསུམ་པའོ། །དེ་ལྟེ་བ་ལ་ཧཱུཾ་ཡིག་གིས་མཚན་པ་ནི་ཡིག་འབྲུ་དགོད་པ་སྟེ་ཡན་ལག་བཞི་པའོ། །དེ་བསྒོམ་པས་ཅི་ཞིག་བྱ་སྙམ་ན། སྣ་ཚོགས་རྡོ་རྗེ་ས་བོན་དང་བཅས་པ་དེ་ཉིད་ཀྱིས་ནི་རྡོ་རྗེའི་ར་བ་དང་གུར་བྱ་སྟེ། ཡང་གིས་ས་གཞི་དང་བླ་བྲེའང་བསྡུའོ། །དེ་དག་གིས་ནི་རོ་གང་དུ་བསྒོམ་པའི་གདན་མ་བསྟན་ལ། གདན་ཡང་དགོས་ན་དེ་གང་ཞེ་ན། བླ་མ་ལ་ཞུ་བའམ་བཤད་རྒྱུད་དུ་བཙལ་དགོས་ཏེ། བཤད་རྒྱུད་ལས། ནམ་མཁའི་ཁམས་ནི་པདྨ་ལ། །ཉི་མའི་དཀྱིལ་
འཁོར་བསམ་པར་བྱ། །དེ་ལ་ཧཱུཾ་སྐྱེས་སྔོན་པོ་ནི། །བརྟུལ་ཞུགས་ཅན་གྱིས་ཕྱག་གཉིས་བསྒོམ། །ཞེས་གསུངས་པའི་ནམ་མཁའི་ཁམས་སུ་པདྨ་དམར་པོ་དང་། དེའི་སྟེང་དུ་ཉི་མ། དེའི་ཁར་རོ་བསྒོམ་པ་ནི་དང་པོར་རོ་ནི་ཞེས་པ་བཞིའོ། །རོའི་སྙིང་གར་མངོན་བྱང་ལྔ་བསྒོམ་པ་ལས། བཅོམ་ལྡན་འདས་བཞེངས་པ་བསྒོམ་པ་ནི། ཨཱ་ལི་ཞེས་པ་བཞིའོ། །ནང་དུ་ནི་ཟླ་ཉིའི་བར་དུའོ། །དེ་ཉིད་ནི་ས་བོན་ཧཱུཾ་ཡིག་གོ །རྡོར་སེམས་སུ་འཇོག་པའི་རྒྱུ་མཚན་ནི་མཆོག་ཏུ་དགའ་བའི་རང་བཞིན་ཡིན་པའི་ཕྱིར་རོ། །འདི་ནི་མུ་ཏིག་ཕྲེང་བར་ས་བོན་སྦྱོར་བ་དང་། ཕྱག་མཚན་དངོས་གཞི་དང་། མཚན་པའི་ས་བོན་ནི་རྗེས་ཀྱི་བདེ་བ་དང་། ཟླ་ཉི་འདུས་པ་ལས་བདེ་བ་སྐྱེ་བར་བཤད་པ་ལྟར་བྱས་ན་ལེགས་སོ། །ས་བོན་བསྐྱེད་པའི་འོག་ཏུ་ཇི་ལྟར་བྱ་བ་ནི། ཧཱུཾ་ལས་བྱུང་བའི་རྡོ་རྗེ་ནི། ཞེས་པ་བཅུའོ། །སྔོན་པོ་དང་སྔོ་དམར་དུ་བསྒོམ་པ་གདམ་ང་ཅན་དུ་སྟོན་པ་ནི། དད་པས་བསྒོམ་ཞེས་པས་བསྟན་ཏེ། གང་ལ་དད་པ་ལྟར་བསྒོམ་པའོ། །གཙོ་བོ་བསྐྱེད་ཚུལ་དེ་ལྟར་ཡིན་ན་འཁོར་གྱི་ལྷ་མོ་རྣམས་ཇི་ལྟར་བྱ་སྙམ་པ་ལ། རང་གི་ལུས་མཚུངས་རྣམ་པར་སྤྲོ། །ཞེས་སོགས་ཀྱིས་བསྟན་ཏེ་གོ་སླའོ་ཞེས་ཀུ་མུ་ཊིར་བཤད་ལ། བསྡུས་ནས་སྙིང་གར་བཀུག་པ་ན་རྣལ་འབྱོར་པ་ཞེ་སྡང་རྡོ་རྗེར་འགྱུར་ཚུལ་ཡང་མ་བཤད་དེ། ལུགས་འདི་ལ་མ་བཤད་པ་དེ་རྣམས་ཀྱང་དཀའ་བར་སྣང་ལ། སྔོ་དང་ཉི་མ་མཚུངས་པའི་མདོག །ཅེས་
པའང་སྔར་ཡང་དེ་ལྟར་བཤད་པས་ལན་གཉིས་སྨོས་པའི་རྒྱུ་མཚན་ཡང་དཀའོ། །དེ་འདྲ་བའི་བཅོམ་ལྡན་འདས་གང་དུ་ཅི་ཞིག་མཛད་སྙམ་ན། དུར་ཁྲོད་དུ་ནི་རྣམ་པར་རོལ། །ཞེས་སོགས་སྨོས་སོ། །དུར་ཁྲོད་ནི་གཉིས་ཏེ། ཡི་དྭགས་ཀྱི་གནས་དང་ལུས་སོ། །དང་པོ་ནི་ཤིང་བརྒྱད་ཀྱི་རྩ་བར་ཕྱོགས་སྐྱོང་བརྒྱད་གནས་པའི་གནས་ཏེ། དེ་ནི་ཕྱི་རོལ་གྱི་དུར་ཁྲོད་ཡི་དྭགས་ཀྱི་གནས་སུ་གྲགས་སོ། །འོ་ན་ལུས་ཇི་ལྟར་དུར་ཁྲོད་ཡིན་སྙམ་པ་ལ། དབུགས་བརྒྱུ་བ་དང་སྲོག་ནི་དུར་ཁྲོད་དེ་ཧེ་རུ་ཀའི་ལུས་སོ། །ཕྱག་གཉིས་པའི་བསྐྱེད་ཚུལ་ཇི་ལྟ་བར་ཕྱག་བཞི་པ་དང་། ཕྱག་དྲུག་པའང་དེ་བཞིན་ཏེ། ཁྱད་པར་ནི་ཕྱི་མ་གཉིས་ཤེས་རབ་མ་དང་བཅས་པའོ། །ཞེས་པ་ནི་ཀུ་མུ་ཊིའི་བཤད་པའོ། །ལེའུ་འདིར་སྒྲས་ཟིན་ཚོད་ལ་ལྷའི་རྣལ་འབྱོར་མི་འདྲ་བ་མང་དུ་གསུངས་པ་རྣམས་རྟོགས་དཀའ་བས། པདྨ་ཅན་ལྟར་བཤད་ན། སྔགས་དང་དབྱིབས་དང་ཆོས་བདག་ཉིད། །སྦྱོར་བ་རྣམ་པ་གསུམ་དུ་འདོད། །ཅེས་གསུངས་པའི་རིགས་པས་སྔགས་དང་ཆོས་གཉིས་སྔར་བརྗོད་ནས། འདིར་དབྱིབས་ཀྱི་རྣལ་འབྱོར་སྟོན་ལ། དེའང་ཆོས་ཐམས་ཅད་ཀྱི་རང་བཞིན་དང་དབྱེར་མེད་པའི་བདེ་བ་ཆེན་པོའི་ཚུལ་གྱིས་རོལ་བས་ལྷའོ། །དེ་གཏན་ལ་འབེབས་པ་ནི་དེའི་ལེའུ་སྟེ་དེ་བཤད་པར་བྱའོ། །བྱམས་སོགས་བསྐྱེད་པའི་རྣལ་འབྱོར་པས་བྱང་ཆུབ་ཀྱི་སེམས་བསྐྱེད་པ་ནི། རང་གཞན་གྱི་དོན་གྲུབ་པར་བྱེད་པས་ན། ཚད་མེད་བསྒོམ་པ་ལ་འཇུག་པར་བྱའོ་ཞེས་སྟོན་པ་ནི་དང་པོར་ཞེས་
པ་བཞིའོ། །བྱམས་སོགས་བཞི་སྤྱི་ལྟར་རམ་ཁྱད་པར་དུ་ན་དགའ་བས་བསྡུས་པའི་རང་བཞིན་མཉམ་པ་ཉིད་ལ་གནས་པ་ནི་བྱམས་པ་དང་། སྙིང་རྗེའི་སྐད་དོད་ཀ་རུ་ཎའི་ཀ་ནི་བདེ་ཆེན་དང་རུ་ནི་སྡུད་པས་ཏེ། གཉིས་མེད་ཀྱི་བདེ་ཆེན་ལ་བརྩོན་པ་ནི་སྙིང་རྗེ་དང་། ལྷན་སྐྱེས་རྗེས་སུ་མྱོང་བས་མཆོག་ཏུ་དགའ་བ་ནི་དགའ་བ་དང་། དེ་ཉིད་དུ་ཉོན་མོངས་པ་ལ་བཏང་སྙོམས་པ་སྟེ་དཔྱོད་པར་མི་བྱེད་པ་ནི་བཏང་སྙོམས་སོ། །སྟོང་པའི་བྱང་ཆུབ་སེམས་ཞེས་པ་ལ་ངོ་བོ་ཉིད་དང་བྲལ་བ་ནི་སྟོང་པས་ཏེ་དེས་རྣམ་ཐར་གཞན་གཉིས་ཀྱང་བསྡུས་སོ། །དེ་འདྲ་བའི་ཆོས་ཐམས་ཅད་ཀྱི་དོན་དམ་པ་རྟོགས་པ་ནི་བྱང་ཆུབ་ཀྱི་སེམས་ཏེ། ཤེར་ཕྱིན་ལྷན་སྐྱེས་ཀྱི་གནས་སྐབས་སོ། །ཡན་ལག་བཞི་གསུངས་པའི་གཉིས་པ་ལ་ནི་ས་བོན་བསྡུ། ཞེས་པའི་ས་བོན་ནི་ཧཱུཾ་ཡིག་ལ་སོགས་པ་དང་། དེ་ལས་བསྐྱེད་པ་ནི་བསྡུས་པའོ། །ཡང་ན་ས་བོན་གྱིས་བསྡུས་པ་ཞེས་པ་སྟེ་བྱང་ཆུབ་པ་བཞི་པ་བྱ་བ་བསྒྲུབ་པའོ། །དེ་ནས་གཟུགས་རྫོགས་པ་དང་ཡི་གེ་དགོད་པ་གཉིས་སོ། །ཡན་ལག་བཞི་པོ་དེ་ནི་སྤྱིར་བསྟན་པའོ། །སྟོང་ཉིད་བསྒོམ་པའི་འོག་ཏུ་ཡན་ལག་ལྷག་མ་གསུམ་བསྒོམ་ཚུལ་ནི་རེ་ཕས་ཞེས་པ་རཾ་ལ་ཞེས་བསྒྱུར་ཏོ། །དེ་ཉིད་ཀྱི་ནི་ཞེས་པ་ལ་བཤད་པ་མི་གསལ་ཡང་། སྣ་ཚོགས་རྡོ་རྗེ་ཧཱུཾ་གིས་མཚན་པ་དེ་ཉིད་ལས་སྤྲོས་པའི་འོད་ཟེར་གྱི་ར་བ་སོགས་བསྒོམ་སྟེ། འོག་དང་སྟེང་དུ་ཚངས་པའི་གནས་ལ་ཐུག་པ་དང་། རྒྱ་འཇིག་རྟེན་གྱི་
ཁམས་ལ་སོགས་པའི་ཚད་ར་བ་གྲུ་བཞི་པ་སྣ་ཚོགས་རྡོ་རྗེ་འཕྲོ་བ་བསྒོམ་མོ། །ཡང་གི་སྒྲས་འོག་ཏུ་རྡོ་རྗེའི་སའོ། །ར་བའི་དབུས་སུ་པདྨ་འདབ་བརྒྱད་ཀྱི་ལྟེ་བར་ཆོས་ཐམས་ཅད་བདག་མེད་པའི་ཕྱག་རྒྱའི་རང་བཞིན་མཚོན་པའི་རོ་བསྒོམ་པ་ནི། དང་པོར་ཞེས་པ་བཞིའོ། །རང་ཞེས་པ་ནི་དེ་མ་ཐག་ཏུ་བཤད་པའི་རོའོ། །དེའི་སྙིང་གར་ཉི་མ་ལ་ཧཱུཾ་དང་ཕྱག་མཚན་དེས་མཚན་པ་དང་། དེ་ལས་ལྷར་བསྒོམ་པ་ནི་རང་གི་ཞེས་པ་ནས་རྣམ་པར་བསྒོམ་ཞེས་པའི་བར་རོ། །ཞེ་སྡང་བདག་ཉིད་ནི་ཞེ་སྡང་རྣམ་པར་དག་པས་ཏེ། དེ་དག་གིས་ནི་དཔའ་བོ་གཅིག་ཏུ་བསྒོམ་པ་བསྟན་ཏོ། །ཡང་ན་དང་པོར་ལྷ་མོ་བརྒྱད་ཀྱིས་ཚོགས་ཞིང་ལ་མཆོད་པ་སྔོན་དུ་མ་བཏང་བར་བྱམས་སོགས་བསྒོམ་པ་ལས་གཞན་མཆོད་པ་སྔོན་དུ་བཏང་ནས་བྱམས་སོགས་བསྒོམ་པའི་ཚུལ་སྟོན་ཏེ། ཚུལ་དེས་ལྷ་མོ་བརྒྱད་ཀྱིས་བསྐོར་བའི་མངོན་བྱང་ལྔ་བསྐྱེད་སྟོན་ནོ། །རྗེ་བཙུན་ནི་གང་ལ་དད་པ་སྒྲོལ་བའམ། མཆོག་གི་འདོད་པའི་ལྷ་ཀྱཻ་རྡོ་རྗེ་སོགས་སོ། །དེ་ནམ་མཁར་བལྟས་པ་ནི་འོད་ཀྱིས་སྤྱན་དྲངས་ཏེ། ནམ་མཁར་བཞུགས་པ་བསྒོམ་པའོ། །རྡོ་རྗེ་སྐྱེ་བ་ནི་བདེ་སྟོང་དབྱེར་མེད་ལས་བྱུང་བ་དང་། རྡོ་རྗེ་རྩེ་ལྔ་པ་ལས་བསྐྱེད་པ་གཉིས་སོ། །དཀར་མོ་དང་། གཽ་རཱི་དང་། རི་སྲས་དང་། ཨུ་མ་ནི་དབང་ཕྱུག་གི་ཆུང་མའི་མིང་གི་རྣམ་གྲངས་ཡིན་ལ། དེའི་མིང་གིས་ལྷ་མོ་འདི་ལ་བཏགས་པ་ཙམ་སྟེ། ཁ་དོག་གི་སྒོ་ནས་བཏགས་པ་ནི་མིན་ནོ། །རི་དྭགས་མཚན་མ་ནི་ཟླ་བ་སྟེ་དེའང་བྱང་སེམས་དཀར་པོའོ། །བདུད་
ལས་རྒྱལ་བ་ནི་ཉི་མ་སྟེ་དེའང་རཀྟའོ། །ཆུ་ནི་དྲི་ཆུའོ། །སྨན་ནི་མར་མེ་ལྔ་ཞེས་ཏེ་སྒྲོན་མེ་ལྔ་ཞེས་གྲགས་པའི་ཤ་ལྔའོ། །རྡོ་རྗེ་ནི་དྲི་ཆེན་ནོ། །རོ་ནི་སྦྲང་རྩིའོ། །དེའི་རྗེས་སུ་བྱམས་སོགས་དང་སྟོང་ཉིད་བསྒོམ་པའི་འོག་ཏུ་རེ་ཕས་ཞེས་པ་བཞི་ནི་སྔར་བཞིན་ལ། ཕྱི་ནས་དུར་ཁྲོད་བརྒྱད་ཀྱིས་བསྐོར་ཅིང་། དབུས་སུ་པདྨ་འདབ་བརྒྱད་ཀྱི་ལྟེ་བར་རོ་དང་། དེའི་སྙིང་གར་ཨཱ་ལི་ཀཱ་ལིའི་ཟླ་ཉི་དང་། དེར་ས་བོན་ཧཱུཾ་ལས་ཕྱག་མཚན་དང་། དེའི་དབུས་སུ་སྟེ་ལྟེ་བར་ས་བོན་ནོ། །དབུས་སུ་ས་བོན་ཞེས་འདོན་གྱི་ནང་དུ་ཞེས་མི་འདོན་ནོ། །ས་བོན་དེར་རྡོར་སེམས་སུ་འཇོག་པ་ནི་མཆོག་ཏུ་ཞེས་པའོ། །ཧཱུཾ་དེ་ལས་ཀྱི་རྡོ་རྗེའི་སྐུ་ལྟ་བུ་དང་། རྣལ་འབྱོར་མ་རྣམས་ཀྱི་སྐུ་ལྟ་བུའི་འོད་ཟེར་སྤྲོས་ཏེ་མཛད་པ་མཛད་ནས། ཚུར་བསྡུས་པ་ནི་སྙིང་ག་སྟེ་ཧཱུཾ་ལ་གཞུག་སྟེ་བྱ་བ་བསྒྲུབ་པའི་ཡེ་ཤེས་སོ། །སྙིང་གར་འགོད་པའི་ཧཱུཾ་ལ་སྙིང་ག་ཞེས་བཏགས་སོ། །ཡོ་གི་སྟེ་རྣལ་འབྱོར་པ་ཤིན་ཏུ་དག་པའི་ཆོས་དབྱིངས་ཡེ་ཤེས་ཀྱི་ངོ་བོ་ཞེ་སྡང་དག་པའི་ཀྱཻ་རྡོར་དུ་གྱུར་པ་ནི་མངོན་བྱང་ལྔ་པའོ། །སྔོ་དམར་ནི་ཐབས་ཤེས་དག་པའོ། །མཚོ་སྐྱེས་ཀྱི་སྒྲུབ་ཐབས་སུ་དབྱངས་གསལ་ལས་ཟླ་ཉི་བསྐྱེད་པ་མི་གསལ་ཡང་། བྱ་དགོས་པ་ནི་འདིར་བཤད་པས་ཤེས་ལ། འཁོར་གྱི་ལྷ་མོ་བརྒྱད་བསྐྱེད་ཚུལ་མི་གསལ་ཡང་། སྒྲུབ་ཐབས་བཞིན་བྱ་དགོས་པས། རྒྱུ་འབྲས་གཉིས་ཀའི་ཧེ་རུ་ཀའི་སྐོར་རྣམས་ཚུལ་འདི་ལའང་བྱ་དགོས་པ་འདྲ་སྟེ་དཔྱད་པར་བྱའོ། །མགོན་
པོ་རོལ་ཞེས་པའི་རོལ་བའི་དོན་རང་གི་ཤེས་རབ་དང་ལྷན་ཅིག་ཏུ་གཉིས་སུ་མེད་པར་སྦྱོར་བས་དགྱེས་པ་ལ་བཤད་པས། ཕྱག་གཉིས་པ་ལའང་ཡུམ་བཞེད་དོ། །ཡུམ་ནི་མུ་ཏིག་ཕྲེང་བར་ཁ་ཅིག་གཡུང་མོ་ལ་འདོད་པ་ཡོད་ཀྱང་། དེ་མཆོད་པའི་ལྷ་མོ་ཡིན་པས་འདིའི་ཡུམ་ཡང་བདག་མེད་མ་ལ་བྱ་གསུངས་པ་ལྟར་ལེགས་སོ། །དུར་ཁྲོད་ལ་ཡི་དྭགས་དང་རོ་ལ་སོགས་པའི་གནས་དང་ནང་གི་ལུས་གཉིས་ལ་བྱས་ནའང་དུར་ཁྲོད་དུ་འཇོག་པའི་རྒྱུ་མཚན་ནི་པདྨ་ཅན་དང་ཀུ་མུ་ཊི་གཉིས་སུ་མི་གསལ་བས་མུ་ཏིག་ཕྲེང་བ་ལས། དེ་ལྟར་འདིའང་ཤྭ་ནི་སྟེ་རོའོ། །ས་ཏི་ནི་བ་ས་ཏི་སྟེ་གནས་སོ། །དེས་ན་ཤྭ་ས་ཏི་སྟེ་རོའི་གནས་སོ། །དེ་ལྟར་དོན་སྦྱར་བས་དུར་ཁྲོད་དུ་བརྗོད་དོ། །དུར་ཁྲོད་ནི་སྨ་ཤྭ་ནི་ཞེས་བྱ་བ་སྟེ། འདིར་ཤྭ་ས་ཏིའི་ཚིག་གི་དོན་རྣམ་པར་སྦྱར་བས་སོ། །དེ་ལ་ཚིག་རྣམ་པར་སྦྱར་བ་ནི། བ་སནྟ་སྨིན་ཞེས་པ་ནི་དེར་གནས་པར་བྱེད་པ་སྟེ། གནས་ཞེས་བྱ་བའི་དོན་ནོ། །དེའང་ཤ་བ་རྣམ་བ་སན་ཞེས་བྱ་བ་ལ། ཚིག་གོང་མ་ལ་འོག་གི་བ་མར་བསྒྱུར་ཏེ་བཏགས་ན་སྨའོ། །ཚིག་ཕྱི་མ་ལ་བ་ཨར་བསྒྱུར་ཏེ། ས་འོག་མ་ལ་བཏགས་ན་ས་རིང་པོར་བྱས་པས། ས་བ་བ་ས་ན་སྨ་སཱ་ནར་བསྒྱུར་ཏེ། ཞེས་ཤྭ་ས་ཏི་ལ་ཤྭ་བ་ནི་རོ་དང་། བ་ས་ཏི་ནི་གནས་ཡིན་པ་རོ་གནས་པའི་དུར་ཁྲོད་དང་། ཤྭ་བ་ནམ་བ་ས་ན་ཞེས་པའི་བ་གོང་མ་མར་བསྒྱུར་ནས་ཤ་ལ་བཏགས་པ་དང་། བ་འོག་མའི་ཨ་བཏོན་ནས་ས་ལ་བྱིན་པས་ས་རིང་པོར་བྱས་པ་སྨ་སན་ཞེས་པ་དུར་ཁྲོད་ཀྱི་སྐད་དོད་དུ་
བཤད་པས། དབུགས་རྒྱུའི་སྐད་དོད་ཤྭ་ས་ཏིའི་སྟེང་ནས་བཤད་དགོས་ལ། ནང་གི་ལུས་ལ་སྦྱོར་ན་དེ་དང་འདྲ་བར་བདག་དང་བདག་གི་བས་སྟོང་པའི་དོན་ཏེ། སྣོད་བཅུད་ཐམས་ཅད་རང་གི་ངོ་བོ་ཉིད་ཀྱིས་སྟོང་པ་ལ་དམིགས་པའི་བདེ་བ་ཆེན་པོས་གནས་པ་ནི། དུར་ཁྲོད་དུ་རོལ་བའི་དོན་དུ་མན་སྙེ་ལས་བཤད་དོ། །དུར་ཁྲོད་ནི་མུ་ཏིག་ཕྲེང་བ་དང་མན་སྙེ་ལས་རྡོ་རྗེ་ར་བའི་ནང་དུ་བཤད་ལ། རྡོ་རྗེ་ར་བའི་ཕྱི་རོལ་ཏུ་བྱེད་པ་དང་ཚུལ་གཉིས་ཡོད་དོ། །དེ་ལྟར་ན་ཧེ་རུ་ཀ་གསུམ་གྱི་བསྐྱེད་ཚུལ་རིམ་པ་གཅིག་ཏུ་བྱས་ནས། ལྷ་མོའི་འཁོར་གྱིས་བསྐོར་བ་ཉིད་ལ་འཆད་པ་ཀུ་མུ་ཊིའི་ལུགས་དང་། ཧེ་རུ་ཀ་རྣམས་ལ་དཔའ་བོ་གཅིག་པ་དང་། རྣལ་འབྱོར་མའི་འཁོར་གྱིས་བསྐོར་བའི་བསྐྱེད་ཆོག་གཉིས་བྱས་ནས་དང་པོ་ནི་ཆོ་ག་གསུམ་བསྐྱེད་དང་། ཕྱི་མ་ནི་མངོན་བྱང་ལྔ་བསྐྱེད་ལ་འཆད་པ་པདྨ་ཅན་གྱི་ལུགས་ཏེ། འདིའི་ལུགས་ཀྱི་ཡན་ལག་བཞི་ནི་ལྷ་བསྐྱེད་ཚུལ་སྤྱི་ལ་སྦྱོར་གྱི། དེ་གཉིས་ལས་ལོགས་པ་མི་བྱེད་དེ། ཤཱནྟི་པས་ཡན་ལག་བཞི་བསྐྱེད་ཚུལ་ཟུར་བ་ཞིག་དང་དེ་ནས་ཆོ་ག་གསུམ་བསྐྱེད་ཅིག་དང་། དེ་ནས་མངོན་བྱང་ལྔ་བསྐྱེད་ལ་ལྷ་མོའི་འཁོར་ཡོད་མེད་གཉིས་བྱས་ནས་བསྐྱེད་ཚུལ་བཞིར་འཆད་དོ། །དེ་ལྟར་མང་དུ་ཡོད་ཀྱང་པདྨ་ཅན་ལྟར་ལེགས་སོ། །བསྐྱེད་ཚུལ་སྔར་བཤད་པ་དེ་ཕྱག་བཞི་པ་ལ་སྦྱོར་བ་ནི། གོང་དུ་ཞེས་སོགས་ཏེ་མདོག་གཟུགས་གཉིས་ཁ་དོག་དབྱིབས་སོ། །ཡུམ་རྡོ་རྗེ་ཕག་མོ་
ཡང་། འོག་མ་ལྟར་གྲི་ཐོད་ཅན་དུ་ཁ་ཅིག་འཆད་དོ། །ཕྱག་དྲུག་པ་ལ་སྦྱོར་བ་ནི། གོང་དུ་ཞེས་སོགས་ཏེ། ཕྱག་མཚན་ནི་སཾ་བྷུ་ཊིར། ཐོད་པ་ཕྱག་གིས་བཟུང་བ་དང་། །གཞུ་དང་མདའ་ནི་འཛིན་པ་ཉིད། །དེ་བཞིན་རྡོ་རྗེ་དྲིལ་བུ་ཉིད། །དང་པོར་རྡོ་རྗེ་འབར་བ་དང་། །གསུམ་པར་དེ་བཞིན་རྩེ་གསུམ་པ། །དཔལ་ལྡན་ཤེས་རབ་འཁྱུད་པ་དང་། །ཞེས་གསུངས་པའི་དོན་མན་སྙེར། གཡས་ཀྱི་གསུམ་ན་རིམ་པ་བཞིན་དུ་རྡོ་རྗེ་དང་མདའ་དང་། རྩེ་གསུམ་དང་གཡོན་གྱི་གསུམ་ན། དྲིལ་བུ་དང་གཞུ་དང་ཐོད་པ་དང་། ཕྱག་དང་པོ་གཉིས་ཀྱིས་འཁྱུད་པར་བཤད་དེ། གཞུང་འདི་དང་མི་མཐུན་ནོ། །ཧེ་རུ་ཀ་རྫོགས་པ་ནི་དབང་བསྐུར་ནས་རིགས་བདག་གིས་རྒྱས་བཏབ་པའི་བར་གྱིས་ཡིན་ལ། འདིར་ཐུན་གསུམ་དང་གུར་ལས་ཐུན་བཞིར་བཤད་དོ། །ལྷ་གསུངས་ནས་དེའི་རིགས་བརྗོད་པའི་ཕྱིར། དེ་ནས་ཞེས་གསུངས་སོ། །དེ་ཁོ་ན་ཉིད་ནི་དེའི་དངོས་པོ་སྟེ་ཕྱག་རྒྱ་རིགས་ལྔའོ། །དེ་གང་དུ་སྟོན་པ་ནི་དེ་ཁོ་ན་ཉིད་ཀྱི་ལེའུའོ། །དེ་རྟོགས་པའི་ཕྱིར་ངོ་བོས་ཞེས་གསུངས་ཏེ། ཡུལ་དྲུག་དང་དབང་པོ་དྲུག་དང་། སེམས་ཀུན་ནི་རྣམ་ཤེས་ཀྱང་ཡང་དག་པ་མ་ཡིན་པའི་ཕྱིར། གཟུང་བ་གཟུགས་སོགས་དང་། འཛིན་པ་མིག་ཤེས་སོགས་དོན་དམ་པར་མེད་དོ། །དེ་འདྲ་བའི་དེ་ཁོ་ན་ཉིད་དེ་གང་དུ་མཚོན་པར་བྱ་སྙམ་ན་སྐྱེད་བྱེད་ཅེས་གསུངས་ཏེ། མ་ནི་གསང་དབང་བསྐུར་བའི་བླ་མའི་ཡུམ་མོ། །སྲིང་མོ་ནི་བླ་མ་ལས་ལྷན་ཅིག་ཏུ་ཉན་པ་མོའོ། །མཆོད་པ་ནི་མཉེས་པ་བསྐྱེད་པའོ། །རྣལ་འབྱོར་
རིག་པ་ནི་མཉམ་པར་སྦྱོར་བའི་བསྟན་བཅོས་ཤེས་པའོ། །མ་སྲིང་གང་ཡིན་སྙམ་པ་ལ། གར་མ་ཞེས་སོགས་གསུངས་སོ། །བཤད་རྒྱུད་ལས་མ་ནི་བྲམ་ཟེ་མོ་དང་། བུ་མོ་གཡུང་མོ་དང་། མནའ་མ་གདོལ་བ་མོ་དང་། སྲིང་མོ་གར་མ་དང་། སྲིང་མོའི་བུ་མོ་ཚོས་མའོ། །ཞེས་བརྡའི་སྐད་དུ་གསུངས་སོ། །དེ་ཁོ་ན་ཉིད་ཤེས་པར་འདོད་པས་རིགས་ལྔའི་ཕྱག་རྒྱ་འདི་རྣམས་ཐབས་རང་དང་། ཤེས་རབ་རིག་མའི་ཆོ་ག་ཤེས་པའི་སྒོ་ནས་མཆོད་པར་བྱ་བ་ཀུ་མུ་ཊི་ལས་བཤད་དོ། །འདི་ནི་དཀའ་བའི་གནས་གལ་ཆེ་བ་ཡིན་ལ། དེའང་པདྨ་ཅན་ལྟར་ཤེས་དགོས་པས་དེའི་ལུགས་ནི། སྔར་གསུངས་པའི་སྔགས་དང་ལྷའི་དེ་ཁོ་ན་ཉིད་འཆད་པའི་འབྲེལ་གྱིས་ཆོས་ཐམས་ཅད་ཀྱི་དེ་ཁོ་ན་ཉིད་གསུངས་པ་ནི་ངོ་བོས་ཞེས་སོགས་རྐང་པ་དྲུག་གོ །དེ་ལ་གཟུགས་སྒྲ་དྲི་རོ་རེག་བྱ་ལྔ་དང་། མཐོང་བ་པོ་ནས་རེག་པ་པོའི་བར་ལྔས་ནི་མིག་སོགས་ཀྱི་དབང་པོ་ལྔ་སྟེ། ཕུང་པོའི་ནང་ནས་གཟུགས་ཕུང་དང་། སྐྱེ་མཆེད་ཀྱི་དབང་དུ་བྱས་ནས་གཟུགས་ཅན་བཅུ་མེད་ཅེས་བཀག་གོ །སེམས་ནི་རྣམ་ཤེས་ཀྱི་ཕུང་པོ་དང་ཡིད་དོ། །སེམས་བྱུང་ནི་ཕུང་པོ་བར་མ་གསུམ་དང་། ཡིད་ཀྱི་དམིགས་ཡུལ་ཆོས་སྟོན་ནོ། །ཕུང་པོ་གཞི་མེད་ཅེས་པས་ནི་ཆོས་ཀྱི་སྐྱེ་མཆེད་ངོ་བོ་ཉིད་མེད་པར་བསྟན་ཏོ། །ཡང་ལྟ་བ་པོ་ལ་སོགས་པའི་ཚིག་ལྔས་བདག་དང་གང་ཟག་ལ་སོགས་པའང་འཛིན་པས། མདོར་ན་གང་ཟག་དང་ཆོས་རྣམས་མེད་པའོ། །མེད་
ཚུལ་ནི་ངོ་བོས་མེད་ཅེས་པས་སྟོན་ཏེ། པདྨ་ཅན་ལས། ཇི་ལྟར་མེད་སྙམ་པ་ལ་ངོ་བོ་ཉིད་ཀྱིས་གཟུགས་ལ་སོགས་པའི་རང་བཞིན་མེད་དེ། ངོ་བོ་མེད་ཅེས་པའི་དོན་ནོ། །ཞེས་གསུངས་ཏེ། དགག་བྱ་ལ་ཁྱད་པར་སྦྱར་བའོ། །འདིར་ནི་རང་བཞིན་གྱིས་དང་རང་གི་མཚན་ཉིད་ཀྱིས་མེད་ཅེས་གསུང་རབ་ལས་མང་དུ་འབྱུང་བ་རྣམས་ཀྱི་དོན་ཡིན་ཏེ། འཆད་ཚུལ་དེ་ནི་གང་ཟག་དང་ཆོས་ཀྱི་བདག་མེད་གཉིས་གཏན་ལ་འབེབས་པའོ། །གཞན་ཡང་པདྨ་ཅན་ལས། ཡང་མེད་ཅེས་པ་ནི་ངེས་པར་མེད་པ་སྟེ། གཟོད་མ་ནས་ཆོས་ཐམས་ཅད་སྐྱེ་བ་མེད་པར་དགག་པ་ནི་དངོས་པོར་མངོན་པར་ཞེན་པ་དགག་པའི་ཕྱིར་རོ། །ཞེས་གསུངས་པ་ནི་གང་ཟག་དང་ཆོས་ལ་རང་གི་ངོ་བོ་ཉིད་ཀྱིས་གྲུབ་པ་དགག་པ་དེའང་། བདག་གཉིས་ཀྱི་དངོས་པོར་མངོན་པར་ཞེན་པས་འཆིང་བས་དེ་བཟློག་པའི་ཕྱིར་དུ་ཡིན་པར་བཤད་དེ། ལྟ་བ་གཏན་ལ་ཕབ་པའི་དགོས་པའོ། །གུར་ལས། བདག་ཏུ་འཛིན་པ་བཟློག་པའི་ཕྱིར། །སྟོང་པ་རྒྱལ་བ་རྣམས་ཀྱིས་བསྟན། །ཞེས་གསུངས་པའི་དོན་ནོ། །ཡང་པདྨ་ཅན་ལས། དངོས་པོ་མེད་པ་ནི་ཡུལ་དང་དུས་ངེས་པ་མེད་པ་ཉིད་ཀྱི་དངོས་པོ་མེད་པའོ། །རྣམ་པ་ཐམས་ཅད་ཀྱི་ཐམས་ཅད་དུ་དངོས་པོ་མེད་པ་ལ་ནི་དེ་བཞིན་དུ་དགག་པའི་སྦྱོར་བ་མེད་པའོ། །ཞེས་གསུངས་ལ་འདི་ལ་དཔེ་ཁ་ཅིག་ལས། ཡུལ་དང་དུས་ངེས་པ་ཉིད་ལ་དངོས་པོ་མེད་པའོ་ཞེས་འབྱུང་བ་ནི་མ་དག་སྟེ། རང་གི་ངོ་བོ་ཉིད་ཀྱིས་གྲུབ་པའི་དངོས་པོའམ་རང་བཞིན་མེད་པ་ནི་ཡུལ་དུས་མ་ངེས་པར་ཐམས་ཅད་ལ་དང་།
ཐམས་ཅད་དུ་ཡོད་དགོས་པའི་ཕྱིར་རོ། །དེ་ལྟར་ཡིན་ཡང་ཐམས་ཅད་ཀྱི་ཐམས་ཅད་དུ་མེད་པ་ནི་མིན་ཏེ། ཡིན་ན་ནི་འགོག་མཁན་དང་དེའི་སྒྲུབ་བྱེད་སོགས་ཀྱང་མེད་པས་འགོག་མི་ནུས་པའི་དོན་ནོ། །དེའི་འོག་ཏུ་པདྨ་ཅན་ལས། འོ་ན་དེ་ལྟར་ན་དེ་ཁོ་ན་ཉིད་བསྒོམ་པ་ཇི་ལྟ་བུ་གང་དུ་ཉེ་བར་བརྟག་པར་བྱ་སྙམ་པ་ལ། མ་དང་ཞེས་བྱ་བ་ལ་སོགས་པ་གསུངས་ཏེ། མཆོད་པར་བྱ་ཞེས་པ་ནི་དགའ་བ་ལ་སོགས་པའི་སྐད་ཅིག་བསྐྱེད་པར་བྱའོ། །སྦྱོར་བ་རིག་པས་ཞེས་བྱ་བ་ནི། ཐབས་དང་ཤེས་རབ་གཉིས་སུ་མེད་པའི་སྦྱོར་བ་ཤེས་པའོ། །རྟག་ཏུ་ཞེས་པ་ནི། སྐད་ཅིག་ཀྱང་གཞན་དུ་སེམས་མ་ཡེངས་པའོ། །ཞེས་གསུངས་པའི་དོན་ཡང་ཤིན་ཏུ་གལ་ཆེ་ལ་དཀའ་བས་ཞིབ་ཏུ་བཤད་ན། སྔར་བཤད་པ་དེ་ལྟར་དེ་ཁོ་ན་ཉིད་གཏན་ལ་ཕེབས་ན། དེ་ཁོ་ན་ཉིད་དེ་ཇི་ལྟར་བསྒོམ་པར་བྱ། གང་དུ་ཉེ་བར་བརྟག་པ་སྟེ་བསྒོམ་པར་བྱ་བའི་གནས། རྟེན་གང་ལ་བརྟེན་ནས་བསྒོམ་པར་བྱ་ཞེས་པའི་ལན་དུ། མ་དང་ཞེས་པའི་རྐང་པ་གཉིས་ཀྱིས་དོན་དེ་སྟོན་ཏེ། མ་དང་སྲིང་མོ་སྔ་མ་དང་འདྲའོ། །རྟེན་དེ་མཆོད་པ་སྟེ་སྙོམས་འཇུག་གིས་མཉེས་པར་བྱས་པ་ལས་དགའ་བ་བཞི་བསྐྱེད་དེ་བསྒོམ་པ་ནི་དྲི་བ་གཉིས་པའི་ལན་ནོ། །དེ་ལས་བསྐྱེད་པའི་ལྷན་སྐྱེས་སྐྱེས་པ་དང་། ཐབས་ཤེས་ཀྱི་བདེ་སྟོང་གཉིས་མེད་དུ་སྦྱོར་ཤེས་པས་ཡུལ་ཡུལ་ཅན་གཉིས་མེད་དུ་སྦྱར་ཏེ་མ་ཡེངས་པར་རྟག་ཏུ་བསྒོམ་པ་ནི་དྲི་བ་དང་པོའི་ལན་ནོ། །
དེ་ཁོ་ན་ཉིད་ཀྱི་བསྒོམ་ཚུལ་འདྲི་བའི་ཚིག་གི་ནུས་པས་ནི། བདག་མེད་ཀྱི་ལྟ་བའི་གོ་བ་བསྐྱེད་པ་ལ་ཕར་ཕྱིན་གྱི་དབུ་མ་དང་ཐེག་པ་འདི་གཉིས་འདྲ་བས། དེ་བསྐྱེད་པའི་འོག་ཏུ་བསྒོམ་པ་ན་ཡུལ་ཅན་ཅི་འདྲ་བས་བསྒོམ་པའི་ཚུལ་ཤིན་ཏུ་མི་འདྲ་བས། དེ་དྲིས་ནས་ལན་སྟོན་པ་ན། ཨ་ཧཾ་གི་འབར་འཛག་གི་མཐུས་དྲངས་པའི་བདེ་ཆེན་གྱིས་བསྒོམ་དགོས་པ་སྟོན་པར་བཞེད་ནས། རིམ་པ་འདི་ལྟར་དུ་གསུངས་པའི་དོན་གྲུབ་ཆེན་གྱིས་བཀྲལ་བ་ལ་ངེས་པ་རྙེད་པ་གལ་ཆེའོ། །དེ་ལྟར་ན་ཧེ་དང་བཛྲའི་དོན་སྦྱོར་བའི་སྙིང་པོའི་དོན་ལེའུ་དང་པོར་བཤད་པ་ན། ཤེས་རབ་མེད་ན་འཆིང་བ་གཅོད་མི་ནུས་པ་དང་། དེའང་ཕུང་སོགས་ཀྱི་དངོས་མེད་རང་བཞིན་མེད་པར་ཤེས་པར་བསྟན་པ་ཟུར་ཙམ་ལས་མ་བྱུང་བ་ལ་འདིར། གང་ཟག་དང་ཆོས་ཀྱི་ཤེས་བྱ་མཐའ་དག་གི་སྟེང་དུ་རང་གི་ངོ་བོ་ཉིད་ཀྱིས་མེད་པའི་རང་བཞིན་མེད་པར་ཤེས་པ་དང་དགག་བྱ་ལ་ཁྱད་པར་སྦྱར་བའི་ནུས་པས་གང་ཡང་ཡོད་པ་མིན་པའི་ཆད་སྟོང་དུ་མ་སོང་བར་བྱ་བྱེད་ཀྱི་རྟེན་འབྲེལ་ཤིན་ཏུ་འཐད་པའི་ཚུལ་གཉིས་ཀྱིས། སྔ་མས་རྟག་ལྟ་དང་ཕྱི་མས་ཆད་པ་བཀག་པའི་རྟག་ཆད་དང་བྲལ་བའི་སྟོང་ཉིད་རྟོགས་པའི་ཤེས་རབ་བཛྲའི་དོན་ལེགས་པར་བཤད་དེ། དེ་ནི་ཐེག་པ་ཆེན་པོ་གཉིས་ཐུན་མོང་བ་ལྟར་དུ་གཏན་ལ་དབབ། དེ་གཏན་ལ་ཕེབས་ནས་བསྒོམ་པའི་དུས་སུ་སྲོག་དྷཱུ་ཏཱིར་བཙུད་པའི་མཐུས་གཏུམ་མོ་འབར་བས་བཞུས་པའི་བདེ་ཆེན་ཧེ་ཡིག་གི་དོན་སྔར་བཤད་པ། དེའི་ཐབས་ནི་གཉིས་ཏེ། །ཕྱིའི་ཐབས་ཤེས་
རབ་མ་ལ་བརྟེན་པ་དང་། ནང་གི་ཐབས་རྩ་འཁོར་དུ་དམིགས་ནས་བསྒོམ་པའི་ཚུལ་གཉིས་ལས། འདིར་སྔ་མ་བསྟན་པ་ནི་སྔར་གླེང་གཞིའི་སྐབས་སུ་བཤད་པའི་བཤད་པ་གཅིག་གི་དོན་ནོ། །རིམ་པ་ནི་སྔོན་དུ་ནང་གི་ཐབས་ཀྱིས་བྱེད་ལ། དེའི་འོག་ཏུ་འདིར་བསྟན་པ་བཞིན་བྱེད་དེ། དམིགས་བསལ་ནི་ཡོད་དོ། །མ་སྲིང་ཁོ་ནར་མ་ཟད་གཞན་ལའང་མཆོད་པ་ནི་གར་མ་ཞེས་པ་བཞིའོ། །བསྟེན་ཚུལ་ནི་ཇི་ལྟར་ཞེས་པ་གཉིས་ཏེ། བྱེ་བ་ནི་གཉིས་སུ་བྱེ་བ་དང་། སྣོད་མིན་གྱིས་ཤེས་པའོ། །སཾ་བྷུ་ཊིར་ཇི་ལྟར་རྟོགས་པར་མི་འགྱུར་བར། །ཞེས་ཀྱང་འབྱུང་ངོ་། །མ་གསངས་པར་བསྟེན་པའི་ཉེས་དམིགས་ནི་མ་གསངས་ཞེས་པ་གཉིས་ཏེ། མ་མཐོང་བ་ཕྱི་མའི་ཉེས་དམིགས་ནི་ངན་འགྲོར་འགྲོ་བའོ། །དེ་ཁོ་ན་ཉིད་ལ་ཆགས་པ་ལ་གར་མ་སོགས་འདིས་ཅི་ཞིག་བྱ་སྙམ་པ་ལ་ཐར་པ་ནི་མི་གནས་པའི་མྱང་འདས་ལྷན་སྐྱེས་ཀྱི་བདེ་བ་ཆེན་པོའི་གོ་འཕང་ཡིན་ལ། དེ་ལ་རིགས་མཐུན་གྱི་རྒྱུ་བསྒོམ་པ་མྱུར་ཞིང་དེའི་རྒྱུར་ཕྱག་རྒྱ་ལྔ་པོ་འདི་རྣམས་དགོས་སོ། །བུད་མེད་རྣམས་ནི་རིགས་ཡིན་མོད་ཕྱག་རྒྱ་ཇི་ལྟར་ཡིན་སྙམ་པ་ལ། རྣལ་འབྱོར་པའི་གསང་བའི་རྡོ་རྗེ་འདིས་ནི་གང་ལ་བཏབ་པ་དང་། བསྐྱོད་པའི་ཕྱིར་ན་བུད་མེད་ནི་ཕྱག་རྒྱ་སྟེ། དེའང་གང་ལ་གསང་རྡོར་གསང་གནས་སུ་ཞུགས་པའི་གནས་ཀྱིས་ཡིན་གྱི། ཕྱག་རྒྱས་བཏབ་པ་དང་མཚན་མས་ནི་མིན་ནོ། །ཞེས་ཀུ་མུ་ཊིར་རོ། །པདྨ་ཅན་ལས། རྡོ་རྗེ་འདིས་ཞེས་པ་འདི་བ་ལ་གྲགས་པའི་
གསང་རྡོར་རམ། དེ་བཞིན་གཤེགས་པ་ལྔའི་རིགས་སམ། གཉིས་མེད་ཀྱི་ཡེ་ཤེས་ཀྱི་རྡོ་རྗེ་འདིས་ཕྱག་རྒྱས་བཏབ་པས་ན་གར་མ་སོགས་ཀྱང་ཕྱག་རྒྱའོ། །ཡང་ན་དེ་རྣམས་ལ་རིགས་ལྔའི་ངོ་བོར་བལྟས་པས་དེ་ཁོ་ན་ཉིད་བསྒོམ་པས་ན། འབྲས་བུ་དེ་ཁོ་ན་ཉིད་ཀྱིས་ཕྱག་རྒྱའི་རྒྱུ་ལ་འབྲས་བུའི་མིང་གིས་བཏགས་པར་འཆད་དོ། །ཕྱག་རྒྱ་ལ་འདེབས་བྱེད་དང་གདབ་བྱ་དང་། བཏབ་པ་གསུམ་ཡོད་པ་ལས། སྔ་མ་ལྟར་ན་གདབ་གནས་དེ་དང་། ཕྱི་མ་ལྟར་ན་དང་པོ་གཉིས་ཅི་རིགས་སུ་སྦྱར་རོ། །ཕྱག་རྒྱ་དེ་རྣམས་ཀྱི་མིང་ཅི་སྙམ་པ་ལ། རྡོ་རྗེ་ཞེས་པ་བཞིའོ། །སྙིང་རྗེ་ཆེན་པོ་དམ་པ་ཡིས། །ཞེས་པ་ནི་རིགས་མང་དུ་ཟིན་ཀྱང་། ལྔ་པོ་འདི་རིགས་མཐའ་ཡས་པ་སྡུད་བྱེད་ཡིན་པས་མཆོག་གོ་ཞེས་པའི་དོན་ཏེ། དམ་པ་ནི་མཆོག་གི་དོན་ནོ། །གར་མ་སོགས་དེ་རྣམས་གང་དང་གང་གི་རིགས་ཡིན་སྙམ་ན། རྡོ་རྗེའི་ཕྱག་རྒྱ་ཞེས་པ་ནས། མདོར་བསྡུས་པས་ནི་བརྗོད་པར་བྱ། །ཞེས་པའི་བར་རོ། །དེ་བཞིན་གཤེགས་པ་ཞེས་སྨོས་པའི་དོན་གང་སྙམ་ན། དཔལ་གྱི་ཚོགས་གཉིས་ཀྱིས་སོ། །ཡེ་ཤེས་ཀྱི་ཚོགས་ཀྱིས་ནི་དེ་བཞིན་ཉིད་དུ་གཤེགས་པ་དང་། བསོད་ནམས་ཀྱི་ཚོགས་ཀྱིས་སླར་ཡང་འཁོར་བར་འོངས་པ་ནི་སླར་གཤེགས་ཏེ། མི་གནས་པའི་མྱང་འདས་སོ། །སྔར་ཕྱག་རྒྱ་མའི་རིགས་བཤད་ལ། འདིར་དེ་བཞིན་གཤེགས་པའི་རིགས་ཀྱི་དབྱེ་བ་སྟོན་པ་ནི། རིགས་ནི་ཞེས་པ་བཞིའོ། །ལྔ་རུ་འཇོག་ཚུལ་ནི། རིགས་ནི་ཞེས་པ་གཉིས་སོ། །གྲངས་དང་
བགྲང་བྱ་ལ་མུ་ཏིག་ཕྲེང་བར་བསྔོས་དང་བགྲངས་པ་ཞེས་བྱ་འདིས། །ཞེས་པ་ཡོད་དེ། རིགས་མཐའ་ཡས་པ་རྣམས་འདིར་བསྡུས་པས་རིགས་སོ། །པདྨ་ཅན་ལས། དགའ་བ་ལ་སོགས་པའི་དབྱེ་བས་གྲངས་སུ་བྱས་པའི་ལྷན་སྐྱེས་ནི་རིགས་སུ་བརྗོད་པར་བཤད་དོ། །སྒོམ་པ་པོ་མེད་ཅེས་པ་གཉིས་ཀྱིས་སྔགས་དང་ལྷའི་དེ་ཁོ་ན་ཉིད་སྟོན་ཏེ། ཡེ་ཤེས་ཆེན་པོའི་ངོར་དེ་དག་མེད་པའོ། །དེ་ལྟར་ན་ངལ་བ་དོན་མེད་དོ་སྙམ་པ་ལ། སྔགས་དང་ལྷ་ཡོད་པར་བསྟན་ཏོ། །ཡོད་ན་རྟག་ལྟར་འགྱུར་རོ་སྙམ་པ་ལ་སྤྲོས་པ་མེད་ཅེས་ཏེ། གནས་པ་མེད་པའི་སྦྱོར་བས་ལྷན་སྐྱེས་སུ་གནས་པའོ། །དེ་བཞིན་གཤེགས་པ་རྣམས་ཀྱི་མིང་ནི་ཅི་རིགས་དྲུག་ནི་གང་སྙམ་པ་ལ། སྣང་མཛད་ཅེས་པ་གཉིས་སོ། །འདི་དག་མིང་གཞན་གྱིས་རྟོགས་པར་བྱ་བའི་ཕྱིར་དུ་མིང་གསུངས་པ་ནི། ཚངས་པ་ཞེས་པ་གཉིས་སོ། །མིང་གི་དོན་འཆད་པ་ནི། ཚངས་པ་ཞེས་པ་དྲུག་གོ །དེ་ལ་སངས་རྒྱས་ནི་རྣམ་སྣང་ངོ་། །ཁྱབ་པ་ནི་ཆོས་དབྱིངས་ཀྱིས་ཏེ་མི་བསྐྱོད་པའོ། །བྱ་བ་གྲུབ་པའི་རང་བཞིན་གྱིས་སེམས་ཅན་ཐམས་ཅད་ལ་འཇིག་རྟེན་དང་དེ་ལས་འདས་པའི་དགེ་བ་སྟེར་བས་ཞི་བ་ནི་དོན་གྲུབ་བོ། །མཉམ་ཉིད་ཡེ་ཤེས་ཀྱིས་ཆོས་ཐམས་ཅད་མཉམ་པས་ཐམས་ཅད་ནི་རིན་འབྱུང་ངོ་། །སོར་རྟོག་ཡེ་ཤེས་ཀྱིས་དེ་ཁོ་ན་ཉིད་རྟོགས་པའི་བདེ་ཆེན་ནམ་མཁའ་ལྟ་བུར་གྱུར་པས་དེ་ཉིད་ནི་འོད་དཔག་མེད་དོ། །
ལྷན་སྐྱེས་ཀྱི་བདེ་ཆེན་རྟོགས་པའི་གནས་སྐབས་ཀྱི། རྣམ་པར་སངས་རྒྱས་ནི་རྡོར་སེམས་སོ། །རིགས་ཐམས་ཅད་བསྡུ་ན་དེར་འདུ་བས་རྣམ་པར་ནི་ཁྱད་པར་དུ་འཕགས་པའི་སངས་རྒྱས་སོ། །ཡང་ན་བདེ་སྟོང་སྦྱར་བའི་ལྷན་སྐྱེས་ཉིད། སྔགས་དང་ལྷ་དང་། རྣམ་སྣང་སོགས་དྲུག་དང་། ཚངས་པ་སོགས་དྲུག་ཏུ་བཤད་དོ། །ལྷར་གསུངས་པའི་དོན་ལུས་ལས་ཞེས་པ་གཉིས་ཀྱིས་ཏེ། དྷེ་ཧ་སཾ་བྷ་བ་ཞེས་པའི་ཧ་དང་སཾ་བྷ་ཕྱིས་པའི་དྷེ་བ་ནི་ལྷ་དང་། ཡི་གེ་ཚང་བའི་དོན་ལུས་ལས་འབྱུང་བའོ། །བཅོམ་ལྡན་འདས་སུ་འཇོག་པའི་ཚུལ་གཉིས་ནི་སྔར་བཤད་ཟིན་ཏོ། །བདེ་ཆེན་གྱི་ཤེས་རབ་ཀྱིས་འགྲོ་བ་བསྐྱེད་པས་ནི་བརྟན་གཡོ་ཐམས་ཅད་དེའི་བདག་ཉིད་དུ་བྱུང་བའོ། །དགའ་བ་སོགས་འབྱེད་ཅིང་སྟོན་པར་བྱེད་པ་དང་། ཆགས་ཆེན་གྱི་དགའ་བར་བྱེད་པ་དང་། སངས་རྒྱས་ཐམས་ཅད་ཀྱི་ཡོན་ཏན་འཇོ་བ་དང་། འདྲེན་པ་དང་། ཆོས་ཐམས་ཅད་ཀྱི་རང་བཞིན་དུ་གར་བྱེད་པ་དང་། མི་གནས་པས་གཡོ་བ་དང་། རྣམ་རྟོག་ལས་བྱུང་བའི་ཉོན་མོངས་ཐམས་ཅད་ཀྱིས་རེག་ཏུ་མེད་པས་མ་ལ་སོགས་པར་བརྗོད་དོ། །ཧེ་རུ་ཀའི་རྣལ་འབྱོར་པ་རྣམས་ཀྱི་སྒོ་གསུམ་གྱི་བྱ་བ་ཐམས་ཅད་ཕྱག་རྒྱ་དང་སྔགས་དང་ཏིང་ངེ་འཛིན་དུ་སྟོན་པ་ནི། ཨཱ་ལི་སོགས་སོ། །རྐང་པའི་རྗེས་ཞེས་པ་གཉིས་ནི། བརྟེན་པ་ཧེ་རུ་ཀས་མནན་པའི་གཞི་དེ་རྟེན་གྱི་དཀྱིལ་འཁོར་དུ་འཇོག་པ་བཞིན་དུ་དཀྱིལ་འཁོར་དུ་སྟོན་པས་ཏེ། ཉེད་ཕྱིར་ནི་མནན་པས་ཞེས་བསྒྱུར་བའི་
དོན་ནོ། །ཕ་ལས་བདེ་བ་ཐོབ་པ་ནི་བླ་མས་མན་ངག་བསྟན་པ་དང་། དེ་ལས་དབང་དུས་སུ་ཐོབ་པའོ། །འཆི་བ་ནི་ཀུན་རྟོག་བཅད་པའི་དོན་ནོ། །ལེའུའི་དོན་བསྡུ་ན་དེ་ཁོ་ན་ཉིད་ཀྱི་ལྟ་བ་བཙལ་རྙེད་པ་ན་གསངས་ཏེ། ལས་རྒྱ་ལ་བརྟེན་ནས་རྟག་ཏུ་བདེ་སྟོང་སྦྱར་ཏེ་བསྒོམ། དེ་ལྟར་བྱེད་པའང་འབྲས་བུའི་སའི་གནད་ཀྱིས་དང་། ཡུལ་དེ་རྣམས་ཕྱག་རྒྱར་འཇོག་པའི་གནད་ཀྱིས་ཡིན། ཕྱག་རྒྱ་བསྟེན་པ་ལ་སོ་སོའི་རིགས་བསྔགས་པས་རིགས་ངོ་ཤེས་པར་བྱེད་དོ། །དེ་བཞིན་གཤེགས་པ་རིགས་དྲུག་དང་ལྔ་དང་གསུམ་དུ་གསུངས་པའི་ངེས་དོན་གྱི་རིགས་ཀྱང་ཕྱག་རྒྱ་ལ་བརྟེན་ནས་བསྐྱེད་པའི་ཡེ་ཤེས་དེ་ཉིད་ལ་འཇོག་པ་ལ་ཕྱིའི་འཇོག་ཚུལ་དང་། སོ་སོའི་འཇོག་ཚུལ་གཉིས་དང་། ངེས་དོན་གྱི་ཕྱག་རྒྱ་ཤེས་རབ་མའང་། ཡེ་ཤེས་དེ་ལ་འཇོག་ཚུལ་དང་། ཡེ་ཤེས་དེ་ལྡན་གྱི་རྣལ་འབྱོར་པའི་བསྔགས་པ་སྟོན་པར་འདུའོ། །ལེའུ་དྲུག་པ་ལ་མཚམས་སྦྱོར་ནི། དེ་ནས་ཞེས་སོགས་ཏེ། རྒྱལ་ཚབ་ཀྱི་གནས་དབང་དུ་བྱས་པ་དེ་ཁོ་ན་ཉིད་རིག་པའི་རྣལ་འབྱོར་པས། སེམས་ཅན་རྗེས་སུ་བཟུང་བ་དང་དེ་ཁོ་ནའི་དོན་ལ་ངེས་པར་སེམས་པའི་ཕྱིར་དུ་། སྤྱོད་པའི་ལེའུ་བཤད་པར་བྱའོ། །དེ་ཁོ་ན་ཉིད་བཤད་པ་དེས་ན་དེར་མ་ཟད་དོན་གཞན་ཡང་བཤད་དོ། སྤྱོད་པ་ནི་གནས་དང་ཉེ་བའི་གནས་སུ་བརྒྱུ་ཞིང་འགྲོ་བའོ། །ཕ་རོལ་ཕྱིན་པ་ནི་སོ་སྐྱེ་གཞན་ལས་ཤིན་ཏུ་འདས་པའོ། །མཆོག་ནི་སྒྲུབ་པོའི་དམ་ཚིག་
གི་ཚོགས་སོ། །འོ་ན་དགོས་པ་སྔ་མ་གཉིས་ཀྱི་ཕྱིར་ཐབས་མང་དུ་ཡོད་ན། ཀུན་ཏུ་རྒྱུ་བས་ཁམས་ཟད་པར་བྱེད་པའི་སྤྱོད་པ་འདི་ཅིའི་ཕྱིར་གསུངས་སྙམ་ན། སྤྱོད་པ་གང་གི་རྒྱུད་འདིར་གསུངས་པའི་གྲུབ་པའི་གནས་བཅུ་གཉིས་ཀྱི་མཐར་ཐུག་པར་འགྲོ་བའམ། གནས་དེར་བཞུགས་པའི་རྣལ་འབྱོར་ཕོ་མོ་རྣམས་དང་ཉེ་བར་འགྲོ་བའོ། །དེར་འགྲོ་བའང་ཅིའི་ཕྱིར་སྙམ་པ་ལ། ཀྱེ་རྡོ་རྗེའི་དངོས་གྲུབ་ནི་སངས་རྒྱས་ཡིན་ལ། དེའི་རྒྱུ་ནི་རྣལ་འབྱོར་མ་སྟེ་དེ་དང་ལྷན་ཅིག་ཏུ་འདུས་པས་གོ་འཕང་དེ་འཐོབ་པའི་ཕྱིར་རོ། །རྒྱལ་ཚབ་དེའི་རྒྱན་ནི། སྒོམ་པ་པོ་ཡི་རྣམ་འཛིན་པ། །ཞེས་པ་ནས་སྟག་གི་པགས་པ་ཉིད་ཀྱི་བར་རོ། །ཁ་ཟས་ནི་བདུད་རྩི་ལྔའོ། །ཧེ་རུ་ཀ་ཞེས་པ་དྲུག་ལ་བཤད་པ་མ་བྱུང་ངོ་། །རྒྱལ་ཚབ་དེའི་བསྒོམ་པའི་གནས་ནི། ཤིང་གཅིག་ལ་སོགས་པ་ལྔ་ནི་རིམ་པ་བཞིན། ཤིང་གཉིས་པ་མེད་པ་དང་། སྲོག་སོང་བའི་གནས་དང་། ཚངས་མ་སོགས་མ་མོ་བདུན་གྱི་གནས་དང་། སྐྱེ་བོ་མང་པོ་སྤངས་པ་དང་། ལམ་རིང་པོའོ། །མཚན་མོ་ནི་དུས་མ་ཡིན་པའོ། །གནས་ཀྱི་བཤད་པ་གཉིས་ནི། རང་བཞིན་འོད་གསལ་གྱི་ཡེ་ཤེས་ནི་ཤིང་གཅིག་སྟེ་དེ་དང་འདྲ་བའོ། །ཇི་ལྟར་ན་ཤིང་གཞན་མེད་པ་བཞིན་སྤྲོས་པའི་ཆོས་གཞན་མི་དམིགས་པ་དང་། འབྲས་བུ་ལ་སོགས་པས་སེམས་ཅན་ལ་ཕན་པ་བཞིན་དུ། དངོས་གྲུབ་གསུམ་གྱིས་རྒྱུ་བྱས་ནས་ཕན་འདོགས་པའོ། །རྣལ་འབྱོར་མ་བཅོ་བརྒྱད་ཀྱི་མ་མོ་རྣམས་ཀྱི་ཁྱིམ་རྩའི་འཁོར་ལོ་དང་། དུར་ཁྲོད་ནི་
དབུགས་རྒྱུ་ཞེས་པའི་རིགས་པས་རང་གི་ལུས་སོ། །ཡང་ན་རུས་པའི་དུམ་བུ་ལ་སོགས་པའི་གནས་ཡིན་པས་དུར་ཁྲོད་དོ། །དབེན་པ་ནི་སྐྱེ་བོས་ཏེ་རྟོག་པ་ལས་རྒྱལ་བའོ། །བས་མཐའ་ནི་བདེ་ཆེན་འཁོར་ལོའི་འོག་གི་འཁོར་ལོ་གསུམ་གྱི་ནང་གི་ལམ་ཞེས་ཏེ་དྷཱུ་ཏཱིའོ། །སྒོམ་པ་བཟང་བ་ནི་ཡིད་དེར་རོ་གཅིག་པའོ། །དྲོད་ཐོབ་པ་ནི་སྒོམ་པ་ཅུང་ཟད་ཐོབ་པའོ། །གལ་ཏེ་ཞེས་པ་ནི་སྤྱོད་པ་བྱ་བར་ངེས་པ་མེད་པའོ། །ཤེས་རབ་མ་མེད་པར་སྤྱོད་པ་སྤྱད་པ་མ་ཡིན་ཞེས་སྟོན་པ་ནི་ཤིན་ཏུ་བཞིན་བཟང་སོགས་སོ། །རྗེས་སུ་ཆགས་པར་བྱ་བའི་ཕྱིར་དགའ་རྩེད་ཀྱི་རྐྱེན་གསུངས་པ་ནི། གལ་ཏེ་གླུ་བླང་ཞེས་སོགས་ཏེ། དགའ་བ་ནི་རྣལ་འབྱོར་མ་དགའ་བར་བྱ་བའི་ཕྱིར་རོ། །རྡོ་རྗེ་ལྡན་པ་ནི་གླུ་ལེན་པ་རྡོ་རྗེའི་ཚིག་དང་ལྡན་པར་བྱེད་པའོ། །འདོད་པའི་རྩེད་མོའི་ལོངས་སྤྱོད་ནི། སྨན་ནི་ཞེས་སོགས་གསུངས་པའི་སྨན་ནི་ཙནྡན་དམར་པོའོ། །ཆུ་ནི་རི་དྭགས་ལས་སྐྱེས་པའི་ཆང་ངོ་། །ཞེས་ཏེ་ཀུ་མུ་ཊིའི་བཤད་པའོ། །སྔར་བཤད་པའི་དེ་ཁོ་ན་ཉིད་ཀྱི་རྣལ་འབྱོར་གྱིས། དྲོད་ཐོབ་པའི་རྣལ་འབྱོར་པ་རྣམས་ཀྱིས་སྤྱོད་པ་བྱ་བ་ནི། དེ་ནས་ཞེས་པས་བསྟན་ཏོ། །སྤྱོད་པ་མ་ལུས་པའི་ཕ་རོལ་ཏུ་ཕྱིན་པ་སྟེ། མཆོག་ཏུ་གྱུར་པ་གཙོ་བོའི་སྤྱོད་པ་བཤད་པར་བྱའོ། །གང་ལ་ན། འཆད་པའི་སྤྱོད་པ་གང་གིས་གྲུབ་པའི་མཐའ་རྣལ་འབྱོར་པ་རྣམས་ཀྱིས་སྤྱོད་པའི་གཞུང་ལུགས་དེར་འགྲོ་བ་སྟེ་དོན་དུ་གཉེར་བ་ལས་སོ། །དགོས་པ་ནི་ཀྱཻ་རྡོར་གྱི་རྒྱུད་དུ་གསུངས་པའི་
དངོས་གྲུབ་ཀྱི་རྒྱུ་སྟེ་མཚན་མ་བྱུང་བར་ཤེས་པ་དང་། སྤྱོད་པ་སྤྱད་པའི་ཕྱིར་རོ། །དེ་ནི་གཉིས་མེད་ཀྱི་དེ་ཁོ་ན་ཉིད་བསྒོམ་པའི་སྲས་ཀྱི་ཐུ་བོ་རྒྱལ་ཚབ་ཀྱིས་ཆོས་ཀྱི་རྒྱལ་སྲིད་སྐྱོང་བའི་དབང་དུ་བྱས་ཏེ། རྒྱལ་ཚབ་ཀྱིས་རྒྱན་རྣམ་པར་འཛིན་པར་བཤད་པ་ནི། རྣ་བ་དག་ལ་ཞེས་སོགས་གསུངས་སོ། །ཧེ་ནི་རྒྱུ་སོགས་སྟོང་པ་སྟེ་ཞེས་སོགས་ཀྱི་ཚུལ་གྱི་བདག་ཉིད་དུ་སྦྱོར་བ་ནི་ཧེ་རུ་ཀའི་སྦྱོར་བའོ། །དེས་ཁ་དོག་ལྔ་ལ་གནས་པའི་ལྔ་ནི། བྲམ་ཟེ་ལ་སོགས་པ་དང་། རྡོ་རྗེའི་རིགས་ལ་སོགས་པའི་མཐར་ཐུག་པའི་ཐ་མ་རྣམས་སོ། །དེ་རྣམས་ལ་མཉམ་པར་གནས་ཏེ་སྤྱོད་པ་ནི་རིགས་ངན་མའང་གྲོགས་སུ་སློང་བ་དང་། ལུས་ལ་རེག་པ་སོགས་བྱེད་པ་སྟེ། རིགས་གཅིག་ཏུ་བརྟག་པའང་དེའོ། །ཡང་ན་རིགས་སམ་ཁ་དོག་ལྔ་ནི་སངས་རྒྱས་ལྔའི་བདག་ཉིད་ཀྱི་ཕུང་པོ་ལྔའོ། །དེ་ལ་མཉམ་པར་སྤྱོད་པ་ནི། དེ་ལྔ་ག་དེ་བཞིན་ཉིད་དུ་བསྡུས་ནས་རིགས་གཅིག་པ་སྟེ་རོ་གཅིག་ཏུ་བརྟག་པ་སྟེ་བསམ་པར་བྱའོ། །དེ་ལྟར་བྱ་དགོས་པའི་རྒྱུ་མཚན་ནི་དོན་དམ་པར་ན་ཁ་དོག་རིགས་ལྔའི་དབྱེ་བ་སྣ་ཚོགས་པ་མི་དམིགས་པའི་ཕྱིར་རོ། །སྤྱོད་པ་བྱེད་པའི་གནས་ནི་ཤིང་གཅིག་ཅེས་སོགས་ཀྱིས་སྟོན་པའི་ཤིང་གཅིག་ནི་གནོད་སྦྱིན་ལ་སོགས་པས་བྱིན་གྱིས་བརླབས་པའོ། །མ་མོའི་གནས་སྔར་དང་འདྲ། མཚན་མོ་ནི་ཤེས་རབ་ཡིན་ལ། དེའང་རྣལ་འབྱོར་མའི་གནས་དང་ཞིང་ལ་སོགས་པའོ། །ནང་བཤད་ནི་ལག་རྐང་ལ་སོགས་པའི་ཡལ་ག་
དང་ལྡན་པའི་ལུས་ནི། བདེ་ཆེན་འབྲས་བུ་སྨིན་པ་བསྐྱེད་པས་ཤིང་དང་དབུགས་ཕྱུང་བས་དུར་ཁྲོད་དུ་བཤད་དེ། དུར་ཁྲོད་ལའང་འཇུག་པའི་ཤྭ་ས་ཏིར་དབུགས་ཕྱུང་གིས་འཇོག་པའོ། །མ་མོ་ནི་སྔར་དང་འདྲ། མཚན་མོ་ནི་ཤེས་རབ་ཀྱིས་ཆགས་སོགས་འགོག་པའོ། །དབེན་པ་ནི་སྙིང་སྟོབས་ལ་སོགས་པའི་རྟོག་པ་དང་བྲལ་བའོ། །བས་མཐའ་ནི་འཁོར་ལོ་བཞིའི་ནང་དྷཱུ་ཏཱིའི་ལམ་སྟེ། འདི་ནི་བགྲོད་དཀའ་བ་དང་ལམ་རིང་བའི་ཕྱིར་རོ། །སྤྱོད་པ་བྱེད་རན་པའི་དུས་ནི། དྲོད་ཅུང་ཟད་ཐོབ་ནས་ཞེས་ཏེ་དྲོད་ནི་མཐུའམ་ནུས་པ་སྟེ། དེའང་མུ་ཏིག་ཕྲེང་བར་མི་དང་མི་མ་ཡིན་དང་། བཀྲེས་སྐོམ་དང་གྲང་དྲོའི་གནོད་པས་མི་བརྫི་བ་ལ་བཤད་པ་ལྟར་ཡིན་པས། དྲོད་ནི་ནུས་པ་ལ་བསྒྱུར་བ་ལྟར་ལེགས་ཀྱི། སྦྱོར་ལམ་དྲོད་ཐོབ་པར་སྟོན་པ་ནི་མིན་ནོ། །གལ་ཏེ་དོན་ནི་སྔར་དང་འདྲ་བས། ཚེ་འདིར་མཆོག་ཐོབ་པར་འདོད་ན་ངེས་པར་སྤྱོད་པ་བྱ་དགོས་ལ་གཞན་ལ་མ་ངེས་སོ། །རང་གཅིག་པུས་མིན་པར་གྲོགས་ཁྱད་པར་ཅན་དགོས་པ་ནི། ཤིན་ཏུ་བཞིན་བཟང་ནས་གཟུང་བར་བྱ་བའི་བར་གྱིས་སོ། །རྡོ་རྗེའི་རིགས་ཀྱི་ཕྱག་རྒྱ་མ་མ་རྙེད་ན་རང་གི་ཡི་དམ་ལྷའི་རིགས་ཀྱི་ཤེས་རབ་མས་བྱ་བ་ནི་རང་འདོད་ཅེས་པའོ། །བྱང་ཆུབ་ཀྱི་ས་བོན་གདབ་པ་ནི། བྱང་ཆུབ་ཀྱི་སེམས་བསྐྱེད་པའོ། །སྦྱང་བ་ནི་དབང་བསྐུར་བའོ། །གླུ་ལེན་པའི་ཚེ་རྡོ་རྗེའི་ཚིག་དེ་ཁོ་ན་ཉིད་སྟོན་པར་བྱེད་པ་མཆོག་དང་ལྡན་པས་
བྱའི། གྲོང་བའི་གླུ་ཕལ་བ་ནི་མིན་ནོ། །རྒྱན་ལྔའི་དག་པ་སླ་ལ། ཤེས་རབ་ནི་སྟོང་པ་ཉིད་ཀྱིའོ། །ཐབས་ནི་བདེ་ཆེན་ནོ། །ཞེ་སྡང་དག་པ་ནི་ཀྱཻ་རྡོར་གྱི་གཟུགས་སོ། །སྨན་ནི་དྲི་ཆེན་དང་། ཆུ་ནི་དྲི་ཆུའོ། །རྟག་པ་ཞེས་པ་དུས་ཅི་ཙམ་དུ་བྱ་བ་སྟོན་པས་བཟའ་བ་མི་འཆི་བཅུ་ཕྱེད་དང་མི་ཟློས་སོ། །དེ་ཟོས་པའི་ཕན་ཡོན་ནི་རྒ་ཤི་ཞེས་པ་གཉིས་ཀྱིས་སོ། །ཧུཾ་བྱུང་ནི་ཀྱཻ་རྡོར་ཏེ་དེ་ལས་རུས་པའི་རྒྱན་སྦྱར་བའམ། རང་ཉིད་དང་དེ་གཉིས་བསྒོམས་པས་སྦྱར་བར་བྱའོ། །སྐྲའི་སྐུད་པ་ནི་རྐུན་མའི་སྟེ། རྐུན་མ་མཚོན་གྱིས་བསད་པ་དང་། འགགས་ཏེ་ཤི་བ་སོགས་སོ། །རུས་པའི་སྐ་རགས་ཡོད་ཀྱང་སྐྲས་སྐ་རགས་བྱ་བར་བཤད་པའི་རིགས་པ་ནི། རིན་པོ་ཆེ་དང་རུས་རྒྱན་ལ་སོགས་པའི་སྐབས་གཞན་ཁ་ཅིག་ཏུའང་ཤེས་པར་བྱའོ། །རྡོ་རྗེ་ཐོད་པ་ནི་ཀྱཻ་རྡོར་ཏེ་ཞེས་པ་ནི་རྡོ་རྗེ་ནི་བཛྲ་དང་། ཐོད་པ་ནི་ཀ་པཱ་ལ་བདེ་བ་སྐྱོང་བ་ཧེའི་དོན་ནོ། །བརྐམ་པ་ནི་འདོད་ཆགས་དུག་གསུམ་དང་། འབྱུང་བོ་ལ་འཇིགས་པ་དང་། ངོ་ཚ་བ་ནི་ཞུམ་ནས་འཛེམ་པ་སོགས་ཏེ། འདི་རྣམས་ཀྱིས་ཧ་ཅང་མི་གནོད་པའོ། །གཉིད་སྤོང་བ་ནི་དེས་ལམ་གྱི་བར་ཆད་དུ་འགྱུར་བའོ། །བདག་ཉིད་ཀྱང་སྤང་ཞེས་ཁུའི་འགྱུར་ལ་ཡོད་པའི་དོན་ནི་བདག་ལྟ་རྩད་ནས་དབྱུང་བའོ། །ལུས་སྦྱིན་པར་གཏོང་བ་ནི་སེམས་ཙམ་གྱིས་ཡིན་ལ། དེའང་རྡོ་རྗེ་རྣལ་འབྱོར་མ་རྣམས་དང་སེམས་ཅན་ཐམས་ཅད་ཀྱི་ཕྱིར་རོ། །སྐལ་དང་སྐལ་མིན་སོགས་ཀྱི་དོན་གཅིག་དང་དུ་མའི་སྦྱོར་བ་དང་བྲལ་བས།
སྦྱིན་བྱ་དང་སྦྱིན་བྱེད་དོན་དམ་པར་མི་དམིགས་པའི་ཕྱིར། དོན་དམ་པར་ལུས་སྦྱིན་པར་མི་བྱ་ཞེས་པ་ནི། སྐལ་བ་ཞེས་པ་མུ་ཏིག་ཕྲེང་བར་ཆ་དང་ཆ་མིན་ཞེས་པར་ཡང་བསྒྱུར་བས་ཆོག་ལ། དེའི་ཚེ་ཆ་བཅས་སམ་ཟླ་བཅས་ནི་དུ་མ་དང་། ཆ་མེད་དེ་ཟླ་མེད་ནི་གཅིག་ཡིན་པ་དང་། བདེན་པར་བཟུང་ནས་མི་སྦྱིན་པ་ནི་དོན་དམ་པར་མི་སྦྱིན་པའི་དོན་ནོ། །བཟའ་བཅའ་ཞེས་པ་ནས། རྣམ་རྟོག་ཉིད་དུ་མི་བྱའོ། །ཞེས་པའི་བར་གྱིས་ཞེན་པར་དང་། རྣམ་པར་རྟོག་པར་མི་བྱ་བའང་བདེན་འཛིན་མེད་པར་དེ་རྣམས་སྤྱད་པར་བྱ་བའི་དོན་ནོ། །སྤྱོད་པའི་སྐབས་འདིར་སྐུ་གཟུགས་སོགས་ལ་ཕྱག་བྱེད་པ་བཀག་ཡོད་པས། དེ་ལྟ་ན་བླ་མ་ལའང་ཕྱག་བྱ་མི་དགོས་སམ་སྙམ་ན། དངོས་གྲུབ་ཐོབ་པའི་སློབ་མ་གང་ཞེས་པ་བཞིས། ཕྱག་མ་བྱས་ན་མནར་མེད་དུ་ལྟུང་བས་ཕྱག་བྱ་དགོས་སོ། །ཞེས་གསུངས་པས་རྡོ་རྗེ་སློབ་དཔོན་གྱི་ཞིང་ནི་ཤིན་ཏུ་གཉན་ནོ། །ལུས་ལ་སོགས་པའི་འཇུག་ལྡོག་གི་བྱ་བ་ངེས་པ་ནི་བསླབ་པའོ། །དཀྱིལ་འཁོར་དུ་འཇུག་པ་ནི་དབང་ངོ་། །དབང་ནི་ཆོ་གར་ཡང་བསྒྱུར་ཏོ། །ངོ་ཚ་བ་ནི་འཛེམ་པ་སྟེ་ཁྲེལ་ཡོད་པའོ། །དེ་ནི་འདིར་རྡོ་རྗེ་ཐེག་པ་རང་གི་རིགས་ཀྱིས་བྱ་བ་བཟའ་མིན་ཟ་བ་དང་། བགྲོད་མིན་ལ་བགྲོད་པ་མ་འཛེམ་པའོ། །དེ་འགོག་པ་ནི་དེ་བཞིན་ཞེས་པ་སྟེ་དེ་ལས་ཀྱང་གྲོལ་ཞེས་པའོ། །ཕུང་པོ་ལྔའི་དངོས་པོ་ཐམས་ཅད་ཀྱི་རང་བཞིན་སྟོང་ཉིད་དང་། སྙིང་རྗེ་ཆེན་པོ་ནི་
ལྷན་སྐྱེས་ཀྱི་བདེ་བ་ཡིན་ལ། དེ་འདྲ་བའི་སྟོང་པ་དང་སྙིང་རྗེ་དབྱེར་མེད་དུ་སྦྱོར་བའི་སྐུ་ཡིས་གནས་ཞེས་པའོ། །རྣམ་དཔྱད་ནི་དེ་གཉིས་སྦྱོར་བའོ། །སྦྱིན་སྲེག་སོགས་ནི་ཕྱིའི་དབང་དུ་བྱས་ལ། དེ་བྱས་ནས་ནང་དུ་བདེ་སྟོང་ལ་སྦྱར་ཏེ་བསྒོམ་པ་ལ་གནོད་པ་རྣམས་མི་བྱེད་པའོ། །འཇིགས་པར་མི་བྱེད་པའི་ཚུལ་ནི། འཇིགས་པའི་རྒྱུ་མཐོང་ན་རང་དང་གཉིས་སུ་མེད་པར་དམིགས་ནས་སེམས་ཞུམ་པར་མི་བྱེད་པའོ། །སྙིང་རྗེ་ནི་བདེ་ཆེན་ནོ། །དེའི་རྒྱུར་བཏུང་བ་ནི་ཨ་ཝ་དྷཱུ་ཏཱི་བཞོས་ནས་ཏེ། དེར་ཀུན་ད་ལྟ་བུ་ཕབ་ནས་འཐུངས་པས་རྟག་ཏུ་བདེ་ཆེན་བསྐྱེད་པའོ། །རྣལ་འབྱོར་པ་བཏུང་བ་དེ་ལ་ཤིན་ཏུ་དགའ་བས་ནི། ཕྱི་རོལ་གྱི་བཏུང་བའི་རོ་ལ་ཆགས་ཤིང་དགའ་བར་མི་བྱའོ། །ཞེས་བཤད་པ་རྣམས་ནི་པདྨ་ཅན་གྱི་ལུགས་དེ་ལེགས་པར་སྣང་ངོ་། །དོན་བསྡུ་ན་ཕྱི་ནང་གི་ལྷན་སྐྱེས་འདྲེན་ཐབས་ཀྱིས་བདེ་ཆེན་དྲངས་ཏེ། དེ་ཁོ་ན་ཉིད་བསྒོམས་པ་ལ་བརྟེན་ནས། སྔར་བཤད་པ་ལྟར་གྱི་མཐུ་ཐོབ་པ་ནི། རིག་མ་མཚན་ལྡན་ཁྲིད། དུར་ཁྲོད་ཀྱི་ཆས་ཀྱིས་བརྒྱན་ཏེ། གནས་དང་ཞིང་ལ་སོགས་པའི་གནས་རྣམས་སུ་བྱོན་ནས། ཕྱག་རྒྱ་ལ་བརྟེན་ཏེ། ལྷན་སྐྱེས་ཀྱི་བདེ་སྟོང་ཉིད་སྐྱོང་བ་དང་། བདུད་རྩི་ལྔ་རྟག་ཏུ་བསྟེན་པར་བྱེད་དེ་འདི་ནི་ཁམས་རྒྱས་པའི་ཡང་རྒྱུ་ཆེན་པོའོ། །དེ་ལྟར་ན་རིག་མའི་འདོད་ཡོན་ལ་རང་བཞིན་ཡོངས་སུ་ཤེས་པའི་བདེ་ཆེན་གྱིས་སྤྱོད་པ་ནི། སྤྱོད་པའི་དོན་ཡིན་ལ། དེ་ལའང་སྤྲོས་བཅས་སོགས་གསུམ་གསུངས་པ་ལས།
འདིར་གསུངས་ཚོད་ནི་སྤྲོས་མེད་རྒྱས་འབྲིང་བསྡུས་གསུམ་གྱིས་བསྡུས་པ་ཡིན་མོད་ཀྱང་། དེས་མཚོན་ནས་གཞན་རྣམས་ཀྱང་ཤེས་པར་བྱའོ། །ལེའུ་བདུན་པ་ལ་མཚམས་སྦྱར་བ་ནི། སྤྱོད་པའི་ལེའུ་གསུངས་པའི་རྗེས་དེ་ནས། ཙྪམྨ་སྟེ་བརྡའི་ལེའུ་བཤད་དེ། སྤྱོད་པ་བྱེད་པའི་ཚེ་གཞན་ནམ་རང་གིས་དམ་ཚིག་ལ་གནས་པའི་རྡོ་རྗེ་རྣལ་འབྱོར་མ་ལ་སོགས་པ་མཐོང་བ་ན། བརྡ་དང་བརྡའི་ལན་མ་ཤེས་ན། དེ་དག་དང་ཉེ་བར་འདུ་བའི་སྐལ་བ་མེད་པས། དེ་ཤེས་པའི་རྒྱུ་ཕྱག་རྒྱ་གསུངས་སོ། །ལེའུའི་དོན་དངོས་ལ་ནི་བརྡ་དང་བརྡ་ལན་ཤེས་པ་གང་གིས་རང་གི་དམ་ཚིག་ལ་གནས་པའི་རྡོ་རྗེ་སྤུན་དང་། སྲིང་མོར་ཐེ་ཚོམ་མེད་པར་ཤེས་པར་འགྱུར་བ་ནི་བཤད་དོ། །འདིར་ཕྱག་རྒྱ་རྣམས་ནི་ལག་པ་གཡོན་པས་བྱ་བར་མུ་ཏིག་ཕྲེང་བ་སོགས་ལས་བཤད་པས། རྣལ་འབྱོར་མ་གང་ཞིག་གི་སོར་མོ་གཅིག་སྟོན་པ་ནི། ལེགས་པར་འོངས་སམ། ཞེས་འདྲི་བ་ཡིན་ལ། རང་གི་སོར་མོ་གཉིས་བསྟན་པས་ནི། ཤིན་ཏུ་ལེགས་པར་འོངས་སོ་ཞེས་ལན་འདེབས་པའོ། །གཅིག་ནི་མཛུབ་མོ་དང་གཉིས་ནི་གུང་མཛུབ་དང་། མཛུབ་མོའི་བརྡས་ནི་ཤེས་རབ་ཀྱི་པདྨ་བསྐུལ་བ་དང་། ལེགས་པར་འོངས་སོ་ཞེས་པའི་བརྡས་ནི། སོར་མོའི་སྦྱོར་བས་བསྐུལ་བས་ཤུ་ཀྲ་བཀུག་པའི་དོན་དང་། སྙུན་གྱི་ཕྱག་རྒྱས་ནི་གཡོན་པ་ཤེས་རབ་ཀྱི་པདྨ་དང་། མཐེ་བོ་ནི་རྡོ་རྗེ་དང་བཅངས་པ་ནི་འབབ་པའི་དུས་སུ་ཤིན་ཏུ་བཙིར་བར་སྦྱོར་ཕྲེང་ལས་སོ། །སྙུན་གྱི་ཕྱག་རྒྱའི་ལན་སོར་མོ་གཅིག་སྟོན་པ་ལ་
བྷ་བས་སོ། །དེའི་ཞེས་པ་རྣམས་ནི་དེའི་ལན་དུ་ཞེས་པའོ། །གོས་སྟོན་ཞེས་པ་ནི་པདྨ་ཅན་དང་མུ་ཏིག་ཕྲེང་བ་སོགས་སུ། གུང་མཛུབ་གཉིས་དཔྲལ་བར་ཐོད་ལྟར་འཕྲེང་ལ་འཛིན་པ་ལ་བཤད་ཅིང་། ཕྱི་མར་ཐོད་སྟོན་པ་འབྱུང་གི །གོས་ཞེས་པ་མེད་ལ་བྷ་བའི་འགྲེལ་པར་བྱུང་ངོ་། །ས་ནི་སྤྲུལ་པའི་འཁོར་ལོ་དང་། ཁ་མི་སྨོས་པར་འཁོར་ལོ་ཞེས་སྟོན་ནས། དེའི་དོན་སྙིང་གའི་འཁོར་ལོ་ལ་སྦྱོར་ཕྲེང་ལས་བཤད་ཅིང་། བྷ་བས་འཁོར་ལོའི་དོན་མཐེབ་མཛུབ་གཉིས་རྩེ་སྦྱར་ཏེ། སོར་མོ་གསུམ་དགྲོལ་བ་སྔོན་དུ་འགྲོ་བས་ཟླུམ་པོར་འཆང་བ་ལ་བཤད་དོ། །ལྟོ་བས་ཞེས་པ་ལ་ནི་མུ་ཏིག་ཕྲེང་བར་ལྟ་བའི་དགའ་བས་བརྩེ་བར་བྱ། །ཞེས་འབྱུང་ལ། པདྨ་ཅན་ལས་ཕོ་ལོང་ཞེས་པ་ནི་བཙུན་མོ་དང་རྩེ་བའི་རྒྱུས་པགས་པ་ལ་སོགས་པའི་རིལ་བུ་གྱེན་དུ་འཕེན་པར་སྟོན་ཞེས་བཤད་དོ། །རྩེ་གསུམ་ནི་མཐེ་བོས་མཐེའུ་ཆུང་མནན་ནས་ལྷག་མ་གསུམ་བསྒྲེང་བའོ། །མཚམས་ནི་སྐྲ་མཚམས་སོ། །དམ་ཚིག་གིས་ནི་སྟེ་བརྡས་དབྱེ་བ་སྟེ་གསལ་བར་བྱའོ། །ཕྲེང་བ་བཏང་བ། ཕྲེང་བ་ལན་སྟོན་གྱི་བརྡས་ལན་དེ་དེ་ལྟར་བྱ་བར་སྟོན་པའོ། །བརྟུལ་ཞུགས་བཟང་ཞེས་བོས་ནས་དམ་ཚིག་ལ་གནས་པར་གྱིས་ཤིག་པའོ། །བཟང་པོའི་སྤྱོད་ཡུལ་ནི་ཞིང་དང་གནས་ལ་སོགས་པ་བཟང་པོར་རོ། །གང་དུ་འདུ་བའི་གནས་ཀྱི་གྲངས་ཞུས་པ་ནི། ཀྱཻ་བཅོམ་ལྡན་འདས་ཞེས་སོགས་སོ། །ལན་ནི་གནས་ཞེས་པ་ནས་བརྗོད་མི་བྱ་ཞེས་པའི་བར་རོ། །ས་བཅུ་གཉིས་ནི། རབ་དགའ་སོགས་བཅུ་ནི་སཾ་བྷུ་ཊི་ལས་བཤད་ལ།
ལྷག་མ་གཉིས་ནི་མོས་སྤྱོད་ཀྱི་ས་དང་། བཅུ་གཅིག་ཀུན་ཏུ་འོད་ཀྱི་ས་ལ། མུ་ཏིག་ཕྲེང་བ་དང་། མན་སྙེ་དང་བྷ་བས་བཤད་དོ། །སཾ་བྷུ་ཊིར་གནས་ནས་ཉེ་ཞིང་གི་བར་བཞི། རབ་དགའ་ནས་འོད་འཕྲོའི་བར་བཞི་དང་། ཙྪནྡྷོ་མངོན་དུ་གྱུར་པ་དང་ཉེ་བའི་ཙྪནྡོ་སྦྱང་དཀའ་བ་དང་། འདུ་བ་གཉིས་དང་དུར་ཁྲོད་གཉིས་ནི་རིང་དུ་སོང་བ་ནས་ཆོས་ཀྱི་སྤྲིན་གྱི་བར་ལ་བཤད་པའི་མཐར། ཕ་རོལ་ཕྱིན་བཅུ་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད། །ཅེས་གསུངས་སོ། །དེའི་ཤུགས་ཀྱིས་ནི་འཐུང་གཅོད་མོས་སྤྱོད་དང་། ཉེ་བའི་འཐུང་གཅོད་ཀུན་ཏུ་འོད་ལ་བྱ་དགོས་སོ། །ས་རྣམས་ཀྱི་བདག་པོ་ལ། རབ་དགའ་སོགས་ས་བཅུའི་དབང་ཕྱུག་ནི་བྱང་སེམས་དང་། མགོན་པོ་ནི་སངས་རྒྱས་སོ། །དེ་རྣམས་ས་དེ་དག་ལས་གཞན་དུ་མེད་པ་ནི་རྐང་པ་ཐ་མས་སྟོན་ནོ། །གང་འདྲ་བ་ཞིག་གནས་ལ་སོགས་པ་ལགས་ཞེས་དྲིས་པ་དང་ལན་ནི་ཉེ་བའི་དུར་ཁྲོད་བརྗོད་པར་བྱ་ཞེས་པའི་བར་རོ། །མན་སྙེར་ཀོལླ་གི་རི་དང་ཨུརྞ་གི་རི་དང་། པུ་ལི་ར་མ་ལ་ཡ་དང་། རྡོ་རྗེའི་གནས་ཞེས་པ་རྣམས་རྣམ་གྲངས་སུ་བཤད་པས། ཀོལླ་གི་རི་ནི་པུ་ལི་རའོ། །བྱེད་པའི་བྲང་དང་པགས་པའི་བྲང་ཞེས་པ་གཉིས་ནི་མན་སྙེར། ཀ་རཱཎྜ་པ་ཌཀ་དང་། ཀརྨ་ར་པ་ཊ་ཀ་ཞེས་མ་བསྒྱུར་བར་བཞག་པ་ལྟར་བྱས་ན་དག་གོ །བའི་མཆོད་སྦྱིན་དང་ཁ་བའི་རི་ནི་གོ་ཏ་བ་རི་དང་། ཧི་མ་ལ་ཡ་གཉིས་བསྒྱུར་བའོ། །ཙྪནྡྷོ་ཧ་ནི་འདུན་རྟོག་ཅེས་པར་བསྒྱུར་ཏོ། །གྲོང་ཁྱེར་ནི་པ་ཊ་ལི་པུ་ཊར་དང་།
ལན་ཚྭའི་རྒྱ་མཚོའི་དབུས་སུ་སོན་པ་ནི་ཧ་རི་ཀེ་ལའི་ཁྱད་པར་དུ་མུ་ཏིག་ཕྲེང་བར་རོ། །བིནྡྷ་ནི་མན་སྙེར་འབིགས་བྱེད་དུ་བཤད་དོ། །འཐུང་གཅོད་ལ་གྲོང་དང་གྲོང་ཁྱེར་གྱི་ས་གཞི་གཉིས་གཅིག་ཏུ་བྱས་པ་ནས་གཞོན་ནུའི་གྲོང་ཁྱེར་གྱི་བར་ལྔར་བྱས་ཤིང་། ཉེ་བའི་འཐུང་གཅོད་ཀྱང་དེ་དང་ཉེ་བ་ལྔར་བཤད་དོ། །དུར་ཁྲོད་ལ་རབ་སོང་གི་ས་གཞི་དང་། རྒྱ་མཚོའི་འགྲམ་གཉིས་སུ་བྱེད་པར་བརྟག་གཉིས་ཀྱི་ལུགས་སུ་མན་སྙེ་བཤད་པས་དགེ་འདུན་ཞེས་པ་འགྱུར་སྐྱོན་ནོ། །ཀྱཻ་རྡོར་དུ་འདུ་བ་དང་ཉེ་བའི་འདུ་བ་གོང་དུ་སྨོས་ནས། སྐབས་འདིར་མ་བཤད་པ་ནི་ཕྱག་ཆེན་ཐིག་ལེར། ཞིང་ལ་མུ་མུ་ཎི་དང་། དེ་ཝི་ཀོ་ཊི་གཉིས་སུ་བྱས་ནས། འདུ་བ་ལ་ཀརྨ་ར་པཱ་ཊ་ཀ་དང་། གསེར་གླིང་གཉིས་དང་། ཉེ་བའི་ཞིང་ལ་ཀུ་ལུ་ཏ་དང་ཨར་བུ་ཏ་གཉིས་དང་། འཐུང་གཅོད་ལ་ཁ་ཆེ་དང་ཀི་ར་ཏི་གཉིས་སུ་བྱས་ནས། ཉེ་བའི་འདུ་བ་ལ་ཀོང་ཀ་ན་དང་འབིགས་བྱེད་གཉིས་སུ་བྱས་པ་ལྟར་བྱས་ན་འཐད་པ་འདྲ་སྟེ་དཔྱད་དོ། །མན་སྙེར་ཨར་བུ་ཏ་སཾ་བྷུ་ཊིར་གནས་དང་། ཀྱཻ་རྡོར་དུ་ཉེ་བའི་ཞིང་དུ་བྱས་པ་དང་། གོ་ར་བ་ཏི་ནི་སཾ་བྷུ་ཊིར་ཉེ་བའི་གནས་དང་། ཀྱཻ་རྡོར་དུ་ཉེ་བའི་ཞིང་དང་། ཕྱག་ཆེན་ཐིག་ལེར་ཙྪནྡྷོ་ཧར་བཤད་པ་རྣམས་མི་འགལ་ཏེ། གནས་དང་ཞིང་གཉིས་དང་། ཙྪནྡྷོ་ཧ་རྣམས་ཚ་གྲང་བཞིན་དུ་མི་འགལ་བའི་ཕྱིར་དང་། དོན་གཅིག་ལའང་མིང་སྣ་ཚོགས་འཇུག་པའི་ཕྱིར་དང་། གདུལ་བྱའི་དབང་གིས་སྣ་ཚོགས་སྟོན་པ་མི་འགལ་བའི་ཕྱིར་རོ། །ཞེས་གསུངས་སོ། །ཙྪནྡོ་ཧ་ནག་པོ་སོགས་དྲུག་བསྒོམ་པ་ནི་མཉམ་པ་ཉིད་ཀྱི་
དོན་ལ་ཁ་དོག་ཏུ་ཞེན་པའི་སྐྱོན་སྤོང་བའི་ཕྱིར་དུ་ཡིན་པར་པདྨ་ཅན་ལས་གསུངས་ཏེ། བསྒོམ་ལུགས་ནི་མཚོ་སྐྱེས་ཀྱི་སྒྲུབ་ཐབས་ཀྱི་འགྲེལ་པ་ལས། གཙོ་བོའི་ཐུགས་ཀའི་ཧཱུཾ་ཡིག་ནག་པོ་དང་། དེ་ལས་ཐིག་ལེའོ། །དེའི་འོད་ཟེར་གཙོ་བོའི་བ་སྤུའི་བུ་ག་ལས་ཐོན་ནས། རྟེན་དང་བརྟེན་པ་ཐམས་ཅད་ནག་པོར་བྱས་པར་སེམས་ཤིང་། དེ་བཞིན་དུ་ཁ་དོག་གཞན་ལའང་བྱེད་པར་བཤད་པ་ལྟར་རོ། །དེའི་མཐར་ཁ་དོག་བཤིག་ནས་འོད་གསལ་དུ་འཇུག་ཚུལ་ཡང་འགྲེལ་པ་དེ་ཉིད་ལས། ཐུགས་ཀའི་ཟླ་ཉིའི་བར་གྱི་ཧཱུཾ་ཡིག་ལས། ཨཱ་ལི་ཀཱ་ལི་འཕྲོས་པ་དབུགས་འབྱུང་བའི་ལམ་ནས་ཐོན་པའི་འོད་ཟེར་གྱིས་འཇིག་རྟེན་གསུམ་པོ་གཅིག་ཏུ་བསྡུས་ནས་དཀྱིལ་འཁོར་ལ་བསྡུས་ཤིང་། རིམ་པ་བཞིན་དུ་ལྷ་མོ་བརྒྱད་ཞལ་བརྒྱད་དང་། ཡུམ་ཡང་ཡབ་ལ་བསྡུས་པའི་མཐར། ཉི་ཟླ་ཁ་སྦྱོར་གྱི་བར་གྱི་ས་བོན་གནས་པའི་ཚེ་ཐོག་མ་ཐ་མ་ཞེས་སོགས་ཀྱི་དོན་རིག་པར་བྱས་ནས། གཙོ་བོ་ཡང་འོད་གསལ་དུ་འཇུག་སྟེ། ཡི་གེ་དང་ཟླ་ཉི་གསུམ་འདྲེས་པ་ནི་སྣང་མཆེད་ཐོབ་གསུམ་གྱི་ཡི་གེ་དག་པ་དང་། བདུད་རྩིའི་རང་བཞིན་འོད་གསལ་དང་མར་མེའི་རྩེ་མོ་ནུབ་ནས་འགྲོ་བ་བཞིན་དུ་འོད་ཟེར་གྱི་ཕུང་པོའི་རྣམ་པ་རྣམས་གཅིག་ལ་གཅིག་ཐིམ་ནས་རྣམ་ཤེས་ནམ་མཁའ་དང་འདྲ་བའི་འོད་གསལ་ལ་ཐིམ་ཞིང་དེ་ནས་སླར་ཡང་ལྡང་བའི་རིམ་པ་བཤད་དོ། །དེ་ལྟར་ན་དགའ་བྲལ་མཐར་ཡང་ཞེས་པའི་དོན་ནི། དགའ་བྲལ་གྱི་དོན་ནི་ལྷན་སྐྱེས་ཡིན་ལ་འང་གི་སྒྲས་ནག་པོ་
སོགས་བསྒོམ་པར་མ་ཟད་ལྷན་སྐྱེས་ཀྱང་བསྒོམ་ཞེས་པའི་དོན་ནོ། །ཡང་ན་དགའ་བྲལ་ཞེས་མི་འདོན་པར་རྣམ་པར་དགའ་བ་ཞེས་འདོན་ཏེ། ཁྱད་པར་དུ་འཕགས་པའི་དགའ་བ་ཡིན་ལ་དེའི་མཐའ་ནི་སྔར་དང་འདྲའོ། །དེ་བཞིན་ཞེས་པ་ནི་ཁ་དོག་བཤིག་པའི་མཐར་ལྷན་སྐྱེས་བསྒོམ་པར་མ་ཟད། སྐབས་གཞན་དུའང་སྔ་མ་བཞིན་དུ་བསྒོམ་པར་བྱ་ཞེས་པ་ནི་པདྨ་ཅན་གྱི་དགོངས་པ་སྟེ། མཐར་ཞེས་པ་སྐབས་གང་དུ་བསྒོམ་པ་སྟོན་པ་མིན་གྱི། བསྒོམ་བྱ་སྟོན་པའོ། །དཔལ་ཡན་ལག་མེད་པའི་རྡོ་རྗེས་ནི་སྤྲུལ་པའི་འཁོར་ལོ་ཨཾ་ཡིག་ནག་པོ་འོད་དང་བཅས་པ་བསྒོམ། དེ་གྱུར་པ་ལས་མར་མེའི་འོད་ལྟར་འབར་བའི་འོད་ཟེར་བ་སྤུའི་བུ་ག་ནས་བྱུང་སྟེ། གཽ་རཱི་སོགས་སྣང་བར་བྱས་ནས་རྟེན་དང་བརྟེན་པའི་དཀྱིལ་འཁོར་ཐམས་ཅད་མིག་སྨན་བཅག་པའི་མདོག་ལྟར་བསྒོམ་སྟེ། རིམ་པ་དེས་དཀར་པོའི་བར་ཡན་ལག་དྲུག་བསྒོམ་པར་བྱའོ། །ཕྱི་ནས་དགའ་བྲལ་མཐར་ཡང་དེ་བཞིན་ནོ། །ཞེས་པ་ལྷ་མོ་བརྒྱད་རང་རང་གི་ཕྱོགས་ཀྱི་ཞལ་བརྒྱད་དུ་ཞུགས་ནས། རང་གི་ས་བོན་ལ་གནས་པར་བྱའོ། །དེ་ནས་ཡུམ་ཡང་ཡབ་ཀྱི་ཐུགས་ཀར་ཞུགས་པར་བསམ་མོ། །དེ་ནས་གཙོ་བོའང་སྔར་ལུས་ལ་བཀོད་པའི་རྩ་འཁོར་བཞི་ལས་འོད་ཟེར་འཕྲོས་པས། འོད་ཀྱི་རང་བཞིན་དུ་བྱས་ཏེ་ཐུགས་ཀའི་ས་བོན་ལ་གཞུག་གོ །ས་བོན་གྱི་གདན་ཉི་མའང་ས་བོན་ལ་དང་། ས་བོན་ཧཱུཾ་ཡང་ཐིག་ལེར་གྱུར་ནས་ཐིག་ལེ་དང་བཅས་པའི་འཁོར་ལོ་གསུམ་ནི། བདེ་ཆེན་གྱི་རང་བཞིན་འོད་ཟེར་དཀར་པོའི་རྣམ་པར་བསྒོམ་མོ། །དེའང་རིམ་གྱིས་རང་གི་བདག་
ཉིད་དུ་ཞུ་ནས་མི་དམིགས་པར་བསམ་མོ། །ཞེས་བཤད་དོ། །འདིའི་ལུགས་ཀྱིས་ཀྱང་ཡན་ལག་དྲུག་བསྒོམ་པའི་མཐར་ལྷན་སྐྱེས་ལ་འཇུག་ཚུལ་སྔ་མ་དང་འདྲ་ལ། ཌ໋་བི་བས། ཕྱི་ནས་ཁ་དོག་རྣམ་པར་དག །ཅེས་པའི་དོན་ཡང་དེ་དང་འདྲའོ། །ཡན་ལག་དྲུག་པ་ལས། ཡན་ལག་དྲུག་གིས་བསྐྱེད་པ་ནི། །དང་པོ་སྤྲིན་དང་འདྲ་བར་མཐོང་། །ཞེས་སོགས་གསུངས་པའི་ཡན་ལག་དྲུག་ཀྱང་། བདུད་རྩི་འོད་ལས་ནག་པོ་སོགས་བསྒོམ་པ་ལ་ཡན་ལག་དྲུག་ཏུ་གསུངས་པ་དང་འདྲའོ། །ཀུན་ལས་ཀྱང་། ཕོ་བྲང་བསྐྱེད་པ་སོགས་ཀྱི་ཡན་ལག་དྲུག་རྫོགས་པའི་མཐར་དེ་ནས་ཡན་ལག་དྲུག་བསྒོམས་ཏེ། རང་ཡང་རང་བྱིན་བརླབ་པ་ཡིས། །བྱིན་གྱིས་བརླབ་པར་བྱ་བ་ཡིན། །ཆོ་གའི་གོ་རིམ་རྣམ་པ་ཡིས། །དེ་ནས་མཚན་མོ་མཚོན་པར་བྱ། །དང་པོ་སྤྲིན་གྱི་རྣམ་པ་སྟེ། །ཞེས་སོགས་གསུངས་པས། ཀྱཻ་རྡོར་གྱི་ལུགས་ལ་ཡན་ལག་དྲུག་ལ་འཆད་ཚུལ་གཉིས་ཡོད་དོ། །སེམས་འགྲེལ་གྱི་སྐོར་ནས། ཡན་ལག་དྲུག་བསྒོམ་རྣལ་འབྱོར་པས། །ཞེས་པའི་དོན་སོར་སྡུད་ལ་སོགས་པ་དྲུག་ལ་བཤད་པའང་ཡོད་དེ། རྡོ་རྗེའི་ཚིག་གཅིག་ལ་དོན་དུ་མ་ཡོད་པ་མི་འགལ་བས། ལུགས་རེ་རེ་ཁོ་ན་བཟུང་ནས་ལུགས་གཞན་འགོག་པར་མི་བྱའོ། །སྟོན་པས་བདེན་གཉིས་ཀྱི་དབྱེ་བས་རིམ་པ་གཉིས་གསུངས་པ་ལ། ནམ་མཁའི་ཁམས་སུ་བྷ་ག་བསམས་ཞེས་སོགས་ཀྱིས་ནི་བསྐྱེད་པའི་ཆའམ་རིམ་པ་ལྔར་བཤད་པས། དེ་དག་གི་དོན་གཉིས་
པ་རྫོགས་རིམ་གྱི་ཆ་བཤད་པ་ནི། ནམ་མཁའི་ཞེས་སོགས་སོ། །ནམ་མཁའི་ཁམས་དག་པའི་པདྨ་ནི་ནམ་མཁའོ། །བྷ་ག་ནི་བྱང་ཆུབ་ཀྱི་སེམས་སོ། །དབུས་སུ་བསྒོམ་པར་བྱ་བ་ནི་ཐབས་ཤེས་སྙོམས་པར་འཇུག་པའོ། །དེ་ལས་བྱུང་བའི་བདེ་ཆེན་ནི་འཁོར་ལོ་སྟེ་ལྷ་རྣམས་འདུས་པའི་ཕྱིར་རོ། །ཇི་ལྟར་རིགས་པ་ནི། དེའང་བདེ་བ་སྟེ་རིགས་པའི་སྟོབས་ཉིད་ཀྱིས་རང་རིག་པ་བདག་དང་གང་ཟག་ལ་སོགས་པ་མེད་པའོ་ཞེས་གསུངས་ཏེ། བདེ་བ་དེས་རང་གི་དེ་ཁོ་ན་ཉིད་བདག་མེད་རིག་པའི་དོན་ཏོ། །ལྷ་རྣམས་ཇི་ལྟར་འབྱུང་བ་ཞེས་པའི་ལྷ་ནི། བྱང་ཆུབ་ཀྱི་སེམས་སྟོང་ཉིད་དང་སྙིང་རྗེ་དབྱེར་མེད་པའི་ལྷ་བདག་མེད་པའོ་ཞེས་བཤད་པ་ནི་སྔར་གྱི་རང་རིག་པ་གསལ་དུ་བཏང་བའོ། །ཇི་ལྟར་རྫས་ནི་འབྱུང་འགྱུར་བ་ཞེས་པ་ནི། དེ་ལས་འབྱུང་བའི་རིམ་པ་ལས་འདའ་བ་མེད་པའི་མཚན་ཉིད་དོ། །འདི་ནི་སྙོམས་པར་ཞུགས་པ་ལས་ཀུནྡ་ལྟ་བུ་འབྱུང་། དེ་ལས་བདེ་བ་དང་དེས་བདག་མེད་པ་རིག་པའི་རིམ་པ་ལས་མི་འདའ་བའོ། འདིར་བཤད་པའི་རྫས་ཁུ་བ་ནི་ཡབ་ཀྱི་དབང་དུ་བྱས་ལ། བྷ་ག་ཡེ་ཤེས་སམ་བྱང་ཆུབ་ཀྱི་སེམས་སུ་བཤད་པ་ནི་ཡུམ་གྱི་དབང་དུ་བྱས་པའོ། །དེ་ལྟར་ན་ནམ་མཁའ་ནི་པདྨའི་དབུས་ཀྱི་ནམ་མཁའ་དང་། བྷ་ག་ནི་བྱང་ཆུབ་ཀྱི་སེམས་འཛིན་པའི་རྟེན་སྐྱེ་གནས་ཀྱི་གཟུགས་དང་། དེའི་དབུས་སུ་བསྒོམ་རྒྱུའི་འབྱུང་བ་ནས་རྟེན་གྱི་དཀྱིལ་འཁོར་གྱི་བར་བསྒོམ་པ་ནི་བྷ་ག་དེར་རྡོ་རྗེ་ཞུགས་པའི་སྙོམས་འཇུག་དང་། འཁོར་ལོ་ནི་དེ་ལས་བྱུང་བའི་བདེ་བ་འདུས་པ་དང་། དེས་དེ་ཉིད་རིག་པ་ནི་ཇི་ལྟར་རིགས་
པ་དང་། བདེ་སྟོང་དབྱེར་མེད་ནི་ལྷ་དང་དེ་རྣམས་ཀྱི་འབྱུང་རིམ་ལས་མི་འདའ་བར་བྱ་བ་ནི་ཇི་ལྟར་འབྱུང་བས་བསྟན་ཏོ། །འདི་རྫོགས་རིམ་གྱི་བདེ་བ་ལ་བཤད་པས་སྙོམས་འཇུག་གི་ཐབས་ཀྱིས་རླུང་དྷཱུ་ཏཱིར་བཙུད་པ་ལས་ལྷན་སྐྱེས་འདྲེན་པའོ། །ཚུལ་དེ་ལ་ལྷན་སྐྱེས་གཉིས་སུ་བྱེད་པ་ནི་ལྷན་ཅིག་གོ་ཞེས་པ་ཞིག་གོ །དེ་གཉིས་གནས་པའི་རྟེན་ལ་ཕོ་མོ་གཉིས་སུ་བྱེད་པ་ནི། རེ་ཞིག་ཅེས་པ་གཉིས་ཏེ། འདིས་ནི་སྔར་སྙོམས་འཇུག་པ་ཞེས་གསུངས་པའི་རྟེན་གཉིས་བསྟན་ཏོ། །བདེན་གཉིས་ཀྱི་དབྱེ་བ་ལས་སླར་ཡང་ལྷན་སྐྱེས་ལ་གཉིས་སུ་འབྱེད་པ་ནི་ཀུན་རྫོབ་ཅེས་པ་གཉིས་སོ། །དེའི་འབྱེད་ཚུལ་ལ་རྟེན་གྱི་སྒོ་ནས་འབྱེད་པ་ནི། རེ་ཞིག་ཅེས་པ་གཉིས་སོ། །དེ་རྟེན་གཞན་ལའང་སྦྱོར་བ་ནི་སྐྱེས་བུ་ཇི་བཞིན་ཞེས་པ་གཉིས་སོ། །རྟེན་ཁུ་བ་ལ་ལྷན་སྐྱེས་སུ་བཞག་པ་ནི། ཀུན་རྫོབ་ཀུནྡ་ལྟ་བུ་སྟེ། །ཞེས་པའོ། །བརྟེན་པ་བདེ་བ་ལ་བཞག་པ་ནི། དོན་དམ་བདེན་པའི་གཟུགས་ཅན་ནོ། །ཞེས་པའོ། །གཞན་ཡང་བདེ་ཆེན་གྱི་ཆ་དང་། སྟོང་ཉིད་རྟོགས་པའི་ཆ་ནས་ཀྱང་། ལྷན་སྐྱེས་ལ་ཀུན་རྫོབ་དང་། དོན་དམ་པའི་དབྱེ་བ་གཉིས་སུ་བྱ་དགོས་སོ། །དེ་ཉིད་ཕྱིར་ན་དགའ་བ་ཡང་། །དབྱེ་བ་ཡང་ནི་རྣམ་པ་བཞི། །ཞེས་འདོན་ཏེ། དེའི་རྒྱུ་མཚན་ནི་གང་ཕྱིར་ལྷན་ཅིག་སྐྱེས་རྣམ་བཞི། ཞེས་འདོན་ཏེ། འདི་ལྟར་གྱི་དོན་ནི་གང་གི་ཕྱིར་གྱི་དོན་ནོ། །ལྷན་སྐྱེས་ཉིད་ཆུང་འབྲིང་ལ་སོགས་པའི་དབྱེ་བས་དགའ་བ་བཞིའི་རྗེས་སུ་འཇུག་པས། ལྷན་སྐྱེས་ཀྱི་དགའ་བ་ཉིད་ལ་དགའ་བ་བཞིར་འབྱེད་པ་ཡིན་ལ། ཚུལ་དེ་
བསྐྱེད་རིམ་ལ་མེད་པས་རྫོགས་པའི་རིམ་པའི་ཕྱོགས་ལ་ཞེས་གསུངས་སོ། །དེ་ཉིད་ཕྱིར་ན་ཞེས་པ་ནི་རྟེན་གྱི་སྒོ་ནས་བཞིར་འབྱེད་པའང་ལྷན་སྐྱེས་ཁོ་ནའི་སྒོ་ནས་འཇོག་པ་དེའི་ཕྱིར་ན་ཞེས་པའི་དོན་ནོ། །བསྐྱེད་རིམ་པའི་དགའ་བཞི་ལ་ལྷན་སྐྱེས་རྗེས་སུ་མི་འགྲོ་བ་ལ། གནས་ངེས་པ་ཉིད་དོ་ཞེས་གསུངས་པ་ནི། བཞི་པོ་དེ་ངོ་བོ་སོ་སོར་ངེས་པའམ། ཡང་ན་དྷཱུ་ཏཱིར་ཞུགས་པ་མིན་པའི་འབར་འཛག་ལས་སྐྱེ་བའི་དོན་ནོ། །དེ་དག་གིས་ནི་བསྐྱེད་རིམ་པའི་དགའ་བཞི་ལྷན་སྐྱེས་ལ་མི་འབྱེད་པར་ངེས་ཀྱང་། རྫོགས་རིམ་པའི་དགའ་བཞི་ཐམས་ཅད་ལྷན་སྐྱེས་ལ་འབྱེད་པར་སྟོན་པ་མིན་གྱི། རྟེན་དེ་ལ་མཚམས་ཤིག་ནས་དེ་ལྟར་ཡོད་པར་སྟོན་པའོ། །ལེའུ་དགུ་པ་ནི་བརྒྱད་པར་གསུངས་པའི་བདག་མེད་མའི་དཀྱིལ་འཁོར་དང་ཕྱག་བཅུ་དྲུག་པའི་རྣམ་དག་སྟོན་པས། དེ་ནས་ཞེས་སོ། །རྣམ་དག་ལ་གཉིས་ལས་མཆོག་ནི་དེ་བཞིན་ཉིད་ཀྱི་དང་། ཕལ་བ་ནི་ལྷའི་རྣམ་དག་གོ །དང་པོ་ནི། ཕུང་སོགས་ཀྱི་དངོས་པོ་ཐམས་ཅད་ཀྱི་དག་པ་ནི་དེ་རྣམས་རང་གི་ངོ་བོ་ཉིད་ཀྱིས་གྲུབ་པས་སྟོང་པའི་དེ་བཞིན་ཉིད་དུ་བརྗོད་དོ། །འདི་ལ་དངོས་པོ་རྣམས་གདོད་མས་དེ་ལྟར་གནས་པ་ནི་ཡུལ་གྱི་རྣམ་དག་ཡིན་ལ། དེ་རྟོགས་པས་དྲི་མ་སྦྱོང་བ་ནི་ཁྱད་པར་གྱི་རྣམ་དག་སྟེ། བྷ་བས་བཤད་པ་ལྟར་གཉིས་སུ་བྱའོ། །ཕྱི་ནས་ཞེས་པ་གཉིས་ནི་ཕུང་སོགས་ལྷ་སོ་སོར་དག་པར་སྟོན་པའོ། །དག་པ་སྔ་མ་སྟོན་པ་ནི་ཕུང་པོ་ཞེས་སོགས་ཏེ་སྐྱེ་མཆེད་དྲུག་ནི་ཕྱིའི་ཡུལ་དྲུག་གོ །དེ་རྣམས་རང་བཞིན་གྱིས་དག་པ་ནི་དེ་བཞིན་ཉིད་ཀྱི་བདག་ཉིད་ཀྱི་ངོ་བོ་ཉིད་ཀྱིས་དག་པར་
བཤད་པ་ལྟར་རང་བཞིན་གྱིས་གྲུབ་པས་སྟོང་པ་ནི། དེ་བཞིན་ཉིད་ཡིན་ལ་ཕུང་སོགས་རྣམས་སྟོང་པ་དེའི་ངོ་བོར་གནས་པའི་དོན་ནོ། །གལ་ཏེ་དེ་ལྟར་དག་ན་ལམ་གྱིས་དག་པར་བྱ་ཅི་དགོས་སྙམ་པ་ལ། ཉོན་མོངས་ཞེས་པ་ཞིག་སྟེ། རང་བཞིན་རྣམ་དག་ཀྱང་ཕུང་སོགས་ཀྱི་རང་བཞིན་ལོག་པར་ཞུགས་པའི་གློ་བུར་གྱི་ཉོན་མོངས་ཀྱིས་བསྒྲིབས་པས། དེའི་རང་བཞིན་རྟོགས་པར་བྱ་བའི་སྒོ་ནས་སྦྱོང་བར་བྱེད་དོ། །ཕུང་སོགས་གྱི་རང་བཞིན་དྲི་མས་བསླད་པ་མེད་ཀྱང་། སེམས་དྲི་མས་བསླད་ལ། དྲི་མའང་སེམས་ཀྱི་རང་བཞིན་མ་ཤེས་པའི་མ་རིག་པའི་དབང་གིས་འབྱུང་བས། དེའི་རང་བཞིན་ཤེས་པར་བྱས་པ་དེ་ཉིད་བསྒོམ་སྟེ་སྦྱོང་བའི་དོན་ནོ། །རང་རིག་བདག་ཉིད་དག་པ་ཡིས། །ཞེས་འདོན་པ་ལྟར་ན་དེས་དག་པར་འགྱུར་གྱི་དག་པ་གཞན་གྱིས་རྣམ་པར་གྲོལ་བས་སངས་རྒྱས་འཐོབ་པ་མིན་ཞེས་པའོ། །དག་པ་གཞན་ནི་ཕ་རོལ་ཏུ་ཕྱིན་པའི་ཚུལ་གྱིས་དེ་བཞིན་ཉིད་ཀྱི་དག་པ་བཤད་པ་ཡིན་ལ། འདིར་ནི་རྫོགས་པའི་བྱང་ཆུབ་ཀྱི་ལམ་གྱི་ཚུལ་རང་གི་རིག་པའི་བདེ་བ་ཆེན་པོ་མཆོག་གིས་དེ་བཞིན་ཉིད་རྟོགས་པའི་རྣམ་དག་གོ །འདིས་ནི་ཡུལ་ཅན་གྱི་སྒོ་ནས་དེ་བཞིན་ཉིད་ཀྱི་རྣམ་དག་ཁྱད་པར་ཅན་སྟོན་པས། དེ་བཞིན་ཉིད་ཀྱི་རྣམ་དག་ལ་ཐེག་པ་འདི་དང་ཕར་ཕྱིན་གྱི་ཚུལ་གཉིས་སྟོན་པ་པདྨ་ཅན་གྱི་ལུགས་ལྟར་བྱའོ། །འགྲེལ་པ་གཞན་གྱིས་རང་གི་རིག་པའི་དག་པ་དེ་བཞིན་ཉིད་རྟོགས་པ་ཙམ་དང་། དག་པ་གཞན་ནི་དེ་བཞིན་ཉིད་མ་རྟོགས་པ་སྟེ། དེས་མ་གྲོལ་ཞེས་འཆད་པ་རྒྱུད་ཀྱི་དོན་མིན་ཏེ། རང་གི་རིག་པའི་
བདེ་བ་མཆོག །ཅེས་པ་དང་། འདོད་ཡོན་ལ་ཆགས་པ་ལམ་དུ་བྱེད་པ་ངེས་པར་བསྟེན་པར་གསུངས་པས་སོ། །དེས་ན་གཞན་གྱིས་རྣམ་གྲོལ་མིན་ཞེས་པ་ནི། བདེ་སྟོང་སྦྱོར་བ་སྒོམ་པ་མེད་པའི་ལམ་རྣམས་ལའང་། མཐར་ལམ་འདི་མ་བསྣན་པར་འཚང་མི་རྒྱ་བའི་དོན་ནོ། །དེ་ལྟར་བྱས་ན་དེ་བཞིན་ཉིད་ཀྱི་དག་པ་དང་ལྷའི་རྣམ་དག་གཉིས་ཀྱི་དང་པོ་ལ། ཐུན་མོང་བ་དང་ཐུན་མོང་མ་ཡིན་པ་གཉིས་སུ་ཡོད་པས་རྣམ་དག་གཉིས་སུ་བྱའོ། །རང་རིག་པའི་དག་པ་དང་། དེ་བཞིན་ཉིད་ཀྱི་དག་པ་གཉིས། སོ་སོར་བྱེད་པ་དོན་མིན་ཏེ། རང་རིག་པས་དག་པ་ལ་དེ་བཞིན་ཉིད་ཀྱི་དག་པས་ཁྱབ་པའི་ཕྱིར་རོ། །ཡུལ་གྱི་དངོས་པོ་དག་པའི་དོན་པདྨ་ཅན་ལས་མ་བཀྲལ་ཡང་། གཟུགས་སོགས་ཀྱི་ཡུལ་གྱི་དངོས་པོ་རང་བཞིན་གྱིས་དག་པ་བླ་ན་མེད་པ་དང་ཕར་ཕྱིན་པ་གཉིས་ཐུན་མོང་བ་ཡིན་པའི་ཕྱིར་དང་། ཐུན་མོང་མ་ཡིན་པའི་དག་པ་ཞིག་ཀྱང་འདིར་ཡོད་པས་ན། རང་གི་རིག་པའི་དག་པ་ཞེས་སྔར་བཤད་པ་ནི་ཡུལ་ཅན་ཁྱད་པར་ཅན་བདེ་བ་ཆེན་པོ་ཡིན་ལ། དེ་དང་དེ་བཞིན་ཉིད་ཀྱི་སྦྱོར་བ་ནི་གཞན་གྱི་དག་པ་ལས་མཆོག་གོ་ཞེས་སྦྱར་རོ། །གཟུགས་སོགས་ཀྱི་ཡུལ་དང་གཞན་ཡང་ཕུང་སོགས་རྣལ་འབྱོར་པས་གང་མཐོང་བ་རྣམས་ཀྱི་རང་བཞིན་རྣམ་དག་གི་ཚུལ་དང་། སངས་རྒྱས་ཀྱི་རང་བཞིན་དག་ལུགས་གཉིས་དབྱེར་མེད་པས། འགྲོ་བའི་དེ་ཉིད་སངས་རྒྱས་རྡོ་རྗེ་འཛིན་པའི་རང་བཞིན་དང་། དེ་ལྟར་རྟོགས་པས་འགྲོ་བ་སངས་རྒྱས་སུ་འགྱུར་རོ། །ཀྱེ་ཞེས་འདྲི་བ་ནི་འདི་ཐམས་ཅད་རང་བཞིན་གྱིས་དག་ན། མ་དག་པ་མི་འདུག་པ་སྙམ་ནས་འདྲི་བའོ། །དེའི་ལན་དུ་གཟུགས་
སོགས་སོ་ཞེས་གསུངས་པ་ནས། དེ་ལས་དག་པ་ཡིན་ན་རང་བཞིན་གྱིས་དག་པར་བཤད་པ་དང་འགལ་སྙམ་པ་ལ། མ་དག་པར་འཇོག་ལུགས་འཆད་པ་ནི། ཅིའི་སླད་དུ་ནས་ཕྱིར་རོ་ཞེས་པའི་བར་རོ། །གཟུང་འཛིན་དུ་འགྲོ་ལུགས་དྲིས་ནས་ལན་མཛད་པ་ནི། ཀྱེ་ཞེས་པ་ནས། ཡིད་ཀྱི་བདེ་སོགས་འཐོབ་པ་ནི། །ཞེས་པའི་བར་ཏེ་གཟུང་འཛིན་ལ་བདེན་པར་ཞེན་པས་མ་དག་པར་འཇོག་ལ། གཟུགས་སོགས་ལ་བདེན་འཛིན་གྱིས་འཆིང་བ་དང་། གཟུགས་སོགས་ངོ་བོ་ཉིད་ཀྱིས་གྲུབ་པས་སྟོང་པའི་ངོ་བོར་གནས་པ་ལ་འགལ་བ་མེད་པ། རང་བཞིན་གྱིས་དག་པར་བཤད་པ་དང་མི་འགལ་ལོ། །གཞན་ཡང་གཟུགས་སོགས་ཡུལ་ཡིད་དུ་འོང་བ་ལ་སྲེད་ནས། དེ་དག་ལོངས་སྤྱད་པའི་རྐྱེན་གྱིས་ཀྱང་ངན་འགྲོར་འཁྲིད་པ་སོགས་བྱེད་པའང་མ་དག་པའོ། །འོ་ན་བདེན་འཛིན་འབད་པ་ཀུན་གྱིས་མི་བསྐྱེད་པར་དགག་དགོས་པ་བཞིན་དུ། འདོད་ཡོན་ལ་སྲེད་པའང་དེ་ལྟར་བྱ་དགོས་ཏེ། དེ་གཉིས་ཀའང་འཆིང་བྱེད་ཀྱི་མ་དག་པར་མཚུངས་པའི་ཕྱིར་རོ། །དེས་ན་ཕྱག་རྒྱ་ལ་བརྟེན་པའི་ཞུ་བ་དེས་དེ་ཁོ་ན་ཉིད་བསྒོམ་པ་ཐེག་པ་གཞན་ལས་ཁྱད་པར་དུ་འཕགས་པའི་ལམ་དུ་མི་འགྱུར་རོ་སྙམ་ན། བདེ་ཆེན་བསྐྱེད་པ་ནི་བདེན་མེད་ཀྱི་དེ་ཁོ་ན་ཉིད་བསྒོམ་པའི་ཕྱིར་ཡིན་ལ། དེ་ལྟར་བྱེད་པས་ནི་བདེན་འཛིན་གྱི་འཛིན་སྟངས་ཀྱི་དངོས་གཉེན་རྒྱུན་དུ་བསྟེན་པ་ཡིན་པས། བདེན་འཛིན་དེ་འབད་པས་དགག་དགོས་སོ། །སྲེད་ལྡན་གྱི་ལས་རྒྱ་ཆེད་དུ་བྱས་ནས་བསྟེན་པ་ན་འདོད་ཡོན་ལ་སྲེད་པ་འདྲེན་པར་བྱེད་ཀྱི། དེའི་འཛིན་
སྟངས་ཀྱི་བཟློག་ཕྱོགས་མི་བསྟེན་པས་མི་མཚུངས་སོ། །བདེན་འཛིན་གྱི་འཛིན་སྟངས་ཀྱི་བཟློག་ཕྱོགས་རྒྱུན་ལྡན་དུ་བསྟེན་ཀྱང་། རེ་ཞིག་གི་བར་དུ་སྲེད་པ་མི་ལྡོག་ལ། མཐར་བདེན་འཛིན་ཟད་པ་ན་སྲེད་པ་ལྡོག་ཀྱང་དེ་མི་འདོད་པ་མིན་པས་འགལ་བའི་སྐྱོན་མེད་དོ། །དེས་ན་བདེ་ཆེན་གྱིས་དེ་ཁོ་ན་ཉིད་ཤེས་པས་དག་པས། འདོད་ཡོན་ལ་སྲེད་པས་ངན་འགྲོར་འཁྲིད་པ་དང་། ལམ་གྱི་གེགས་བྱེད་པའི་དུག་རྣམས་མེད་པར་བྱེད་པས། དེ་ལྟར་བྱས་ནས་འདོད་ཡོན་འདི་དག་ངེས་པར་བསྟེན་པར་བྱའོ། །མདོར་ན་རིག་མའི་འདོད་ཡོན་ལ་ཆགས་པ་གང་ཟག་ཕལ་མོ་ཆེ་ལ་དུག་ཏུ་འགྱུར་ཡང་། གང་ཟག་གི་ཁྱད་པར་འགའ་ཞིག་ལ་དུག་ཏུ་མི་འགྱུར་བའི་སྟེང་དུ་མྱུར་དུ་གྲོལ་བའི་ལམ་དུ་འགྱུར་བ་ལྟར། བདེན་འཛིན་འཆིང་རྒྱུར་འགྲོ་མི་འགྲོ་གཉིས་མེད་པའི་དོན་ནོ། །ལྷའི་རྣམ་དག་སྟོན་པ་ནི་གཟུགས་ཕུང་ནས་ཕུང་པོ་སྦྱང་བར་བྱ་ཞེས་པའི་བར་ཏེ་སླའོ། །འཇིག་རྟེན་བཅིངས་པ་ནི་ཕུང་པོ་དང་ཆགས་སོགས་སུ་བཤད་དོ། །འདི་དག་གི་བཟློག་ཕྱོགས་དེ་ཉིད་ཤེས་པས་གྲོལ་བ་ནི་བདག་མེད་ཤེས་པ་ཙམ་མིན་གྱི་ཡུལ་ཅན་ཁྱད་པར་ཅན་གྱིས་ཤེས་པའི་དོན་བསྒོམ་པའོ། །དེའི་ཕྱིར་དྲི་མེད་ཅེས་སོགས་ནི་ལྔ་པ་ལྟར་གཏན་ལ་དབབ་བོ། །དེ་ཉིད་ཤེས་པ་ཁྱད་པར་ཅན་ལ་ནི་དབང་མ་བསྐུར་ན་ཉན་པ་སོགས་བྱར་མེད་ལ། དབང་བསྐུར་བའང་དཀྱིལ་འཁོར་མེད་པར་མིན་པས། དཀྱིལ་འཁོར་ཇི་ལྟར་བྲི་བའི་རིམ་པ་བཤད་པར་བྱ་ཞེས་པ་ནི། དེ་ནས་ཞེས་པ་གཉིས་སོ། །དེ་ནས་གཉིས་ཀྱིས་ནི་དབང་བསྐུར་བའི་ཆོ་ག་བཤད་པར་དམ་འཆའ་བའོ། །
ས་སྦྱང་བ་དང་ལེའུ་གསུམ་པ་ལས་གསུངས་པ་ལྟར་སྲུང་འཁོར་བྱ་བ་ནི་དང་པོར་ཞེས་པ་བཞིའོ། །དཀྱིལ་འཁོར་བྱ་བའི་གནས་ནི་ཚལ་དང་ཞེས་པ་བཞི་སྟེ། བྱང་སེམས་ཀྱི་ཁྱིམ་ནི་ལྷ་ཁང་ངོ་། །དམ་པའི་ཚོན་ནི་རིན་ཆེན་ཞེས་པས་བསྟན་ཏོ། །བདག་མེད་མའི་དཀྱིལ་འཁོར་ལ་ཁྲུ་གསུམ་དང་མཐེབ་སོར་གསུམ་ལྷག་པར་བྱ་བའི་ནང་བཤད་ནི་ཀུ་མུ་ཊི་ལས། ལས་རྒྱའི་པདྨ་ཟུར་གསུམ་པ་དང་ཐབས་ཀྱི་རྡོ་རྗེ་སྦྱོར་བ་ལ་བཤད་དོ། །དཀྱིལ་འཁོར་གྱི་མཚན་ཉིད་ནི་འོག་ནས་སྟོན་པ་འདིར་བླང་ངོ་། །དེར་ནི་རིགས་ལྔ་ཞེས་སོགས་ནི། ས་ཆོག་དང་སྟ་གོན་དང་དཀྱིལ་འཁོར་བྲི་སྒྲུབ་དང་། གཞུག་པ་དང་ཞུགས་པ་ལ་སློབ་དཔོན་གྱི་དབང་གི་བར་བསྐུར་བའི་རྗེས་སུ། གསང་བ་དང་ཤེས་རབ་ཡེ་ཤེས་ཀྱི་དབང་བསྐུར་བའི་དབང་དུ་བྱས་པའོ། །འདིའི་རིག་མ་ལ་བཅུ་གཉིས་ནས་ཉེར་ལྔའི་བར་གཞན་དུ་གསུངས་ལ། དེར་མ་ཟད་ཇི་སྲིད་ཅེས་པ་གཉིས་ཀྱིས་ཕྱག་རྒྱ་ལ་བྱང་སེམས་དཀར་པོ་ཇི་སྲིད་འཛག་པ་དེ་སྲིད་ཀྱི་བར་དུ་དབང་གི་ཕྱག་རྒྱར་བསྟེན་པ་འདིར་གསུངས་སོ། །གདོང་གཉིས་མིག་དར་གྱིས་འཆིང་བ་ནི། གསང་དབང་ལ་ཐེ་ཚོམ་ཟ་བ་སྲིད་པས་ཞེས་གསུངས་ཀྱང་། གསུམ་པ་ལའང་ངོ་ཚས་བཅིངས་ན་བདེ་ཆེན་ངོས་མི་ཟིན་པ་སྤང་བའི་ཕྱིར་ཡིན་ནོ། །བསྟེན་པ་ཞེས་པ་གཉིས་ནི་གསང་དབང་བསྐུར་བའོ། །རོ་མཉམ་ཞེས་པ་བྷ་བའི་འགྲེལ་པར་དེ་ཉིད་ལ་ཞེས་པའི་འོག་ན་ཡོད་པ་ལྟར་བྱའོ། །ཤེས་རབ་ཡེ་ཤེས་བསྐུར་བ་ནི་དེ་ཉིད་ལའང་བྱ་བ་ཉིད་ཅེས་འདོན་པའོ། །དེ་ཉིད་ནི་དཀྱིལ་འཁོར་གྱིས་དེ་
ཉིད་དམ་རིག་མ་དེ་ཉིད་དོ། །ཡང་གི་སྒྲས་ནི་རིག་མ་གཞན་ལའང་བྱའོ། །དབང་དེ་བསྐུར་བ་ལས་རོ་མཉམ་གྱི་དེ་ཉིད་སློབ་མའི་སྤྱོད་ཡུལ་དུ་མཚོན་པར་བྱའོ། །ཤེས་རབ་ཡེ་ཤེས་ཀྱི་དབང་ནི་རང་རིག་ཅེས་སོགས་ཀྱིས་སྟོན་པར་པདྨ་ཅན་ལས་གསུངས་ལ། ཀུ་མུ་ཊིར་དབང་བཞི་པ་སྟོན་པར་བཤད་དོ། །རང་རིག་ཡེ་ཤེས་སུ་འགྱུར་ཚུལ་ནི་རང་དང་གཞན་དུ་སྣང་བའི་གཉིས་སྣང་རགས་པ་སྤངས་པའོ། །མཁའ་མཉམ་ནི་ནམ་མཁའ་དང་འདྲ་བའོ། །རྡུལ་བྲལ་ནི་ཉོན་མོངས་པ་དང་མ་འདྲེས་པའོ། །སྟོང་པ་ནི་དེ་ལ་ཞུགས་པའོ། །དངོས་དང་ཞེས་པ་གཅིག་གི་དོན་ནི་ཐབས་ཤེས་འདྲེས་པས་བསྟན་ཏེ། དེ་ལྟར་རམ་ཡང་ན་ཡུལ་རྟེན་གཉིས་ཀུན་ཏུ་དགའ་བར་མཚུངས་པས་མཉམ་པ་ཉིད་ཀྱི་སེམས་ཐོབ་པའོ། །ཆགས་དང་ཆགས་བྲལ་ནི་མཆོག་དགའ་དང་དགའ་བྲལ་གཉིས་འདྲེས་པ་སྟེ། འདིའི་དོན་ནི་ལྷན་སྐྱེས་ཀྱི་དུས་སུ་དེ་གཉིས་དངོས་སུ་འདྲེས་པ་མེད་ཀྱང་དེ་གཉིས་སོ་སོར་མ་དམིགས་པ་ཉིད་ཀྱི་དོན་ལ་མན་སྙེར་བཤད་དོ། །ཤེས་རབ་ཡེ་ཤེས་ཀྱི་དབང་གི་གཙོ་བོ་ནི་གསང་གནས་ཀྱི་རྩེར་བྱང་སེམས་ཕབ་པ་ཕྱིར་མ་འཕོས་པ་ལས་སྐྱེས་པའི་ལྷན་སྐྱེས་ཀྱི་བདེ་བ་དང་སྟོང་པ་གཉིས་ཡུལ་ཡུལ་ཅན་དུ་དབྱེར་མེད་པར་སྦྱར་བ་ཡིན་པར་གཞུང་སྔ་མ་རྣམས་ཀྱིས་གསལ་བར་བསྟན་ཏོ། །ཡེ་ཤེས་དེ་ཐམས་ཅད་དུ་སོང་བ་མཚོན་པའི་ཕྱིར་དུ་གསུངས་པ་ནི། དེ་ཉིད་སྲོག་ཆགས་རྣམས་ཀྱི་སྲོག །ཅེས་པ་ནས་ཡང་དག་གནས་ཞེས་པའི་བར་རོ། །སྲོག་ནི་དེ་ཉིད་དེ་མི་གནས་ན་འཆི་བར་འགྱུར་བའོ། །ཡི་གེ་ནི་འགྱུར་མེད་དུ་བསྒྱུར་ཏོ། །
རང་བཞིན་དེ་མ་ཤེས་པས་མིང་གཞན་ནམ་ངོ་བོ་ཉིད་ཀྱི་གཞན་གྱིས་བཏགས་པ་རྣམས་དོན་དམ་པར་ནི་ལྷན་སྐྱེས་ཉིད་དོ། །དེ་དང་དེའི་རྣམ་པར་གར་བྱེད་དེ། ཞེས་བཤད་པས་ཐ་སྙད་མང་དུ་བཏགས་པ་རྣམས་ཀྱི་གཞི་ལ་དཔྱད་ན་ལྷན་སྐྱེས་ཀྱི་རང་བཞིན་ལས་མི་འདའ་བའི་དོན་ནོ། །འདིར་མུ་ཏིག་ཕྲེང་བ་ལས། རིག་བྱེད་ཀྱི་མཐའ་བ་ན་རེ་ཐམས་ཅད་རྣམ་པར་ཤེས་པའོ་ཞེས་ཟེར་རོ། །གྲངས་ཅན་ན་རེ། སེམས་ལ་སྐྱེས་བུ་ཞེས་ཟེར་རོ། །གང་ཟག་ཏུ་སྨྲ་བ་རྣམས་ན་རེ་ཡང་ནས་ཡང་དུ་འགྲོ་ཞིང་ཐིམ་པས་གང་ཟག་ཅེས་ཟེར་རོ། །དབང་ཕྱུག་ཏུ་སྨྲ་བ་རྣམས་ན་རེ། བདག་རྟག་པ་ཤེས་པ་རྟག་པ་དང་ལྡན་པ་ནི་དབང་ཕྱུག་གོ་ཞེས་ཟེར་རོ། །བདག་ཏུ་སྨྲ་བ་རྣམས་ན་རེ་བདག་ཉིད་སྐྱེ་བ་དང་འཚོ་བར་བྱེད་པ་དང་། འཆི་བར་བྱེད་པ་དང་། འཆིང་བར་བྱེད་པ་དང་གྲོལ་བར་བྱེད་པའོ་ཞེས་ཟེར་རོ། །དེ་བཞིན་དུ་གཅེར་བུ་བ་རྣམས་ན་རེ་འཚོ་བ་ཞེས་ཟེར་རོ། །དེ་བཞིན་དུ་སེམས་ཅན་དུ་སྨྲ་བ་རྣམས་ན་རེ་སེམས་ཅན་ཞེས་ཟེར་རོ། །དུས་སུ་སྨྲ་བ་རྣམས་ན་རེ་སྐྱེ་དགུ་འདི་དག་དུས་ཀྱིས་བསྡུས་སོ་ཞེས་ཟེར་རོ། །གང་ཟག་ཏུ་སྨྲ་བ་ཁ་ཅིག་ན་རེ་ལས་ཀྱིས་གང་ཞིང་དེ་རྣམས་འགྲོ་བར་ཟག་པར་བྱེད་པ་ཉིད་ཀྱིས་གང་ཟག་ཅེས་ཟེར་རོ། །ཞེས་གསུངས་པས་གསོ་བ་ནི་འཚོ་བ་ཞེས་བསྒྱུར་ལ་དོན་ཡང་དེ་ལྟར་བཤད་དོ། །དེ་ལྟར་ལྷན་སྐྱེས་བཤད་ནས་དགའ་བཞི་སོ་སོར་སྟོན་པ་ནི་དང་པོར་ཞེས་པ་བཞིའོ། །དགའ་བ་དང་པོ་གཉིས་ལྷན་སྐྱེས་བསྐྱེད་པའི་ཐབས་སུ་འགྱུར་ལ།
དགའ་བྲལ་ནི་ཐབས་སུ་མི་འདོད་དོ། །ལྷན་སྐྱེས་བསྐྱེད་པའི་རིམ་པ་དེ་དྲན་པར་བྱེད་པ་ཙམ་ཡིན་པས། གསུམ་པོ་དེ་དག་ལ་མཚན་ཉིད་དང་བྲལ་བ་ལྷན་སྐྱེས་ནི་བཞི་པ་སྟེ། བཞི་པའི་གྲངས་རྫོགས་པ་ཡིན་གྱི་གསུམ་པའི་བར་མེད་པར་གནས་པ་ནི་མ་ཡིན་ནོ། །ཞེས་ལྷན་སྐྱེས་ཀྱི་མཆོག་དགའི་རྗེས་དང་། བྲལ་དགའི་གོང་དུ་སྐྱེ་བར་བཤད་དོ། །བརྟག་པ་ཕྱི་མ་ལས་ཀྱང་། བདག་གིས་བདེ་བ་ཟོས་པ་ཡི། །གྲོས་ནི་རྣམ་པར་ཉིད་པར་བརྗོད། །ཅེས་དང་། རྣམ་ཉེད་དགའ་བྲལ་དགའ་བ་ཉིད། །ཅེས་སྔར་དགའ་བ་གསུམ་རིམ་གྱིས་བསྐྱེད་པ་རྣམས་དྲན་པ་ལ་བྱས་སོ། །འོན་ཀྱང་བྱང་སེམས་ནོར་བུའི་རྩེར་རྫོགས་ནས་ཕྱིར་མ་འཕོས་པའི་ཚེ་ལྷན་སྐྱེས་སྐྱེ་བ་ལ་ནི་མཐུན་པར་སྣང་ངོ་། དགའ་བ་དང་པོ་སོགས་བཞི་ནི་ལྷན་སྐྱེས་ཤིན་ཏུ་ཕུལ་དུ་བྱུང་བ་དེ། སྟོན་པས་གསལ་བར་མཛད་དོ་ཞེས་པའི་དོན་ནོ། །འགྲོ་བ་ནི་གོང་མ་དང་བཅས་པའོ། །སྟོན་པས་རྣམ་པ་གཞན་གྱིས་ཀྱང་གསལ་བར་བྱེད་པ་ནི་འདོད་ཆགས་ཞེས་པ་བཞིའོ། །དེའི་དོན་ནི་ཐོག་མཐའ་ལ་བལྟོས་ནས་དབུ་མར་འཇོག་པ་ལ་དེ་གཉིས་མེད་པས་དབུ་མའང་མེད་དོ། །ཐོག་མ་དང་དབུས་དང་མཐའ་སྟོང་པའོ། །ཡང་ན་ཆགས་པ་དང་ཆགས་བྲལ་ལ་ལྷན་སྐྱེས་མེད་ན་དེ་གང་ལ་ཡོད་སྙམ་ན། གསུམ་པོ་ལས་གྲོལ་བ་ལ་ལྷན་སྐྱེས་འཇོག་སྟེ། དེའང་དམིགས་སུ་མེད་ཅིང་མི་འགྱུར་བའོ། །ཞེས་གསུངས་ཏེ་ལྷན་སྐྱེས་དམིགས་སུ་མེད་པའོ་ཞེས་འབྱུང་ངོ་། །གལ་ཏེ་དེ་ལྟ་ན་ལྷན་སྐྱེས་འཇིག་རྟེན་པའི་ཡུལ་མིན་པས། རྟོགས་པ་དང་འཐོབ་
པ་མེད་དོ་སྙམ་ན། དགའ་བྲལ་གྱི་དང་པོར་མཚོན་པར་བྱ་བའི་ལྷན་སྐྱེས་དེའང་། བླ་མའི་མན་ངག་བསྒོམ་པའི་སྟོབས་ལས་གསལ་བར་འགྱུར་རོ་ཞེས་ཁ་བསྐང་ངོ་། །དེ་ལས་གསལ་བར་འགྱུར་བའི་རིམ་པ་སྟོན་པ་ན། དང་པོ་སྤྲིན་ཞེས་པ་རྣམས་གསུངས་སོ། །རེ་ཞིག་ལ་སྤྲིན་གྱིས་བསྒྲིབས་པ་ལྟ་བུར་སྣང་ངོ་། །དེ་ནས་ཅུང་ཟད་གསལ་ཏེ་སྒྱུ་མ་ལྟ་བུར་རོ། ཞེས་བཤད་དོ། །བློ་ངོར། ངོ་བོ་ཉིད་གསལ་བ་སྙམ་བྱེད་ཀྱང་དེ་ལྟར་དུ་མི་གནས་པའོ། །དེ་ནས་བསྒོམ་བྱའི་དོན་དེ་ཤིན་ཏུ་གསལ་ཏེ་རྨི་ལམ་ལྟ་བུར་རོ། །སྔོན་སད་དུས་སུ་མཐོང་བ་དེ་ཉིད་རྨི་ལམ་དུ་གསལ་བར་མཐོང་བ་བཞིན་དུའོ། །དེ་ནས་ཀྱང་ཤིན་ཏུ་བསྒོམས་པས་རྨི་ལམ་དང་སད་པ་དབྱེར་མེད་པ་ལྟར་གནས་སྐབས་ཐམས་ཅད་མཉམ་པར་གསལ་བའི་ཚུལ་གྱིས་སོ། །ཡུལ་དང་ཡུལ་ཅན་དབྱེར་མེད་པ་དངོས་སུ་སྣང་བའི་ཕྱག་རྒྱ་ཆེན་པོའི་དངོས་གྲུབ་ཏུ་འགྱུར་རོ། །སྟོན་པ་ཞེས་པ་ནས་གསུངས་པ་ཉིད་ཀྱི་བར་ནི་སླ་ལ། རྣམ་རྒྱལ་ཤར་དུ་སྦྱིན་པ་ནི་ཤར་སྒོའི་གཡས་སུ་བཞག་པའོ། །ཇི་ལྟར་བསམ་གཏན་ཞེས་པ་གཉིས་ནི། སྔར་ལྷའི་ལེའུ་ལས་གསུངས་པའི་སྲུང་འཁོར་ལྟར་བྱ་བ་སྟེ། སྔར་འབད་པས་ཧཱུཾ་ལས་ཞེས་པས་གསལ་དུ་བཏང་བའོ། །རང་གི་ཞེས་པ་རང་གི་ཡི་དམ་གྱི་ལྷའི་དཀྱིལ་འཁོར་དུའོ། །མཆོད་དང་ཞེས་པ་གཉིས་ནི་ཚོགས་ཞིང་གི་སྐབས་སུ་བྱ་བ་བཞིན་དུ་འདིར་ཡང་བྱ་བའི་དོན་ནོ། །སྟེང་འོག་གི་མཚན་མ་ནི་རིམ་པ་བཞིན་དུ་ཕྱིའི་གཽ་རཱི་དང་།
རོ་ལངས་མའི་མཚན་མ་དང་ཉེ་བར་བྱ་བ་ནི་མན་ངག་ཏུ་བཤད་དོ། །རྡོ་རྗེ་སེམས་དཔའ་ཞེས་པ་དགུ་ནི་སྔར་གྱི་ས་ཆོག་གི་སྐབས་སུ་དྲངས་སོ། །སློབ་མ་དབང་བསྐུར་བའི་ཕྱི་ནས་དེ་ཉིད་བཤད་དོ། །རྣམ་དག་ཡེ་ཤེས་རང་བཞིན་གྱིས་ཞེས་པ་ནི་ལྷན་སྐྱེས་ཀྱི་རང་བཞིན་གྱིས་སོ། །འཁོར་ལ་རྣམ་པར་བྱང་བ་ཞེས་པ་ལྟར་བྱ་ལ། དོན་དམ་པར་སྲིད་ཞི་གཉིས་མ་གྲུབ་པས་ཁྱད་པར་མེད་པའོ། །དེ་ལྟའི་སྲིད་པ་ཞེས་པ་ཉིད་མྱ་ངན་ལས་འདས་པའི་ཞེས་པའོ། །མཆོག་དགའ་ཞེས་སོགས་ནི་དོན་གྱི་ལྷན་སྐྱེས་ཀྱི་ངོར་བསྒོམ་བྱ་དང་སྒོམ་པ་པོ་གཟུང་འཛིན་དུ་གྱུར་པ་མེད་ཅིང་། ལུས་མེད་པས་ཤ་ལ་སོགས་པའང་མེད་དོ། །ཡང་ན་བསྒོམ་བྱ་ནི་རྟེན་གྱི་དཀྱིལ་འཁོར་དང་། སྒོམ་པ་པོ་ནི་བརྟེན་པའི་དཀྱིལ་འཁོར་རོ། །ལུས་ཀྱང་མེད་པ་ནི་ཕུང་པོ་ལྔ་ལྷར་དག་པའོ། །གཟུང་བ་གཟུགས་སོགས་དང་འཛིན་པ་མིག་སོགས་མེད་པ་ནི་གཽ་རཱི་དང་གཏི་མུག་རྡོ་རྗེའི་དག་པའོ། །ཤ་སོགས་མེད་པ་ནི་པུ་ཀ་སི་སོགས་དང་། སྐྱུག་བྲོ་བ་མེད་པ་ནི་སྙིང་རྗེ་ལ་སོགས་པའི་དག་པ་སྟེ། སྤྱན་ལ་སོགས་པའང་དེ་ཉིད་ཀྱི་རང་བཞིན་ནོ། །འདོད་ཆགས་མེད་ཅེས་སོགས་དྲུག་འཁོར་ལོ་སྒྱུར་བ་དྲུག་གོ །སྒོམ་པ་དང་སྒོམ་པ་པོ་མེད་པ་ནི་རིམ་པ་བཞིན་དུ་སེམས་དང་གང་ཟག་དང་སེམས་པ་སོགས་སོ། །གྲོགས་སངས་རྒྱས་ཀྱི་ཡོན་ཏན་འབྱུང་བྱེད་དང་། དགྲ་ནི་ཉོན་མོངས་ཏེ་འདི་ཐམས་ཅད་དམིགས་སུ་མེད་པའོ། །དེའི་རྒྱུ་མཚན་ནི་བྱེ་བྲག་དུ་མར་རྟོག་པ་ཞི་བས་ལྷན་སྐྱེས་ལ་དེ་དག་མི་རྟོག་པ་ནི་རློམ་སེམས་
མེད་པའི་དོན་ནོ། །སྣ་ཚོགས་ཉིད་ནི་དེ་སྤངས་པའོ། །གཟོད་ནས་ཞེས་པ་གསུམ་གྱིས་ཞུས་པ་དང་ལན་གྱི་རྐང་པ་གཉིས་ཀྱི་དོན་ནི། མཚོན་བྱ་དང་མཚོན་བྱེད་ཀྱི་ལྷན་སྐྱེས་ཀྱི་དབྱེ་བ་ཤེས་པར་འདོད་ནས་ཞུས་པ་སྟེ། ལྷན་སྐྱེས་ཐམས་ཅད་ལས་དབེན་པ་སྔར་བཤད་པ་ལྟར་ཡིན་ན། འབྱུང་བའི་ལུས་ཀྱི་བདག་ཉིད་དུ་འགྱུར་བ་འགལ་སྙམ་པའོ། །ལན་ནི་མི་འགལ་ཏེ་རང་བཞིན་ལ་དགོངས་ནས་དེ་རྣམས་ཀྱི་བདག་ཉིད་དུ་བཤད་ཅེས་པའོ། །ཀྱེ་ཞེས་པ་ནི་ཅིའི་སྟེ་གང་གི་སླད་དུ་འབྱུང་བའི་ཕུང་པོ་རྣམས་སུ་འགྱུར་ཞེས་དྲིས་སོ། །དེའི་ལན་དུ་མཚོན་བྱེད་དཔེའི་ལྷན་སྐྱེས་ནི། དང་པོར་ཕྱག་རྒྱ་ལས་བསྐྱེད་དགོས་ལ་དེ་བསྐྱེད་པ་ན། སྲ་གཤེར་སོགས་ཀྱི་འབྱུང་བ་ལས་སྐྱེ་བར་འགྱུར་ཏེ། མཚན་ནི་རྡོ་རྗེ་དང་པདྨ་སྦྱོར་བ་ན། རེག་པ་སྲ་བའི་ཆོས་དམིགས་དགོས་པ་དང་། བྱང་སེམས་ཞུ་བ་དགོས་ལ་ཆུའི་ཁམས་དང་བསྐྱོད་པ་དགོས་ལ། དེ་ལས་མེ་སྐྱེ་བ་དང་བྱང་སེམས་ཞུ་བ་དེ་གསང་གནས་ཀྱི་རྩེའི་བར་དུ་འགྲོ་དགོས་ལ། དེའི་གསོ་བ་ནི་རླུང་ཡིན་ལ་དེ་བཞི་ཚོགས་པ་ལས་སྐྱེ་བའི་བདེ་བ་ནི། ནམ་མཁའི་ཁམས་ཡིན་པས། ལྔ་པོ་རྣམས་ཀྱིས་བསྐོར་བ་སྟེ་ལྔ་པོ་ཚོགས་པ་ལས་མཚོན་བྱེད་དེ་འཇོག་དགོས་པའི་ཕྱིར་རོ། །དེ་འདྲ་བའི་འབྱུང་བ་ཆེན་པོས་བསྐྱེད་པའི་བདེ་བ་ཡིན་པ་དེའི་ཕྱིར་དེ་འདྲ་བའི་བདེ་བ་ནི། དོན་ལྷན་སྐྱེས་ཀྱི་དེ་ཉིད་ཡིན་ནོ། །བདེ་སྟོང་གི་ཐབས་ཤེས་ལྷན་ཅིག་ཏུ་སྦྱར་ཏེ་བསྒོམས་པ་ལས། གང་སྐྱེས་
པའི་དེ་ཁོ་ན་ཉིད་མངོན་སུམ་དུ་རྟོགས་པ་ནི་དོན་དམ་གྱི་ལྷན་སྐྱེས་ཞེས་བྱ་སྟེ། དེའང་གང་སྙམ་ན་དངོས་པོ་རྣམས་ཀྱི་རང་གི་དོན་དམ་པའི་ངང་ཚུལ་དང་རོ་གཅིག་པ་ཉིད་དུ་སྐྱེས་པར་བརྗོད་པའོ། །དེ་ནས་ཕྱི་རོལ་གྱི་ཡུལ་ལ་སོགས་པ་ལ་དངོས་སུ་བལྟོས་པ་འབྱུང་བ་ཆེན་པོའི་བདག་ཉིད་ནི། རང་བཞིན་ལྷན་སྐྱེས་སུ་ཇི་ལྟར་འོས། བདེ་ཆེན་དེ་ནི་ཆོས་ཀྱི་རྣམ་པ་ཐམས་ཅད་དེ་ཁོ་ན་ཉིད་དུ་སྡོམ་པ་སྟེ་རོ་གཅིག་ཏུ་སྡུད་པའོ། །དེ་འདྲ་བའི་ཡོ་གི་རྣལ་འབྱོར་པའི་ཕྱག་རྒྱ་ནི་རང་རྒྱུད་ཀྱི་ཤེས་རབ་སྟེ། དེའང་དོན་དམ་པར་རྒྱུའི་སྦྱོར་བ་དང་བྲལ་བས་རང་བཞིན་གྱིས་སྐྱེ་བ་མེད་པའི་དེ་ཉིད་རྟོགས་པའོ། །དེ་དང་སྙིང་རྗེ་བདེ་ཆེན་གཉིས་དབྱེར་མེད་དུ་སྦྱོར་བ་ནི་བྱང་ཆུབ་ཀྱི་སེམས་སོ། །སྔགས་བཟླས་སོགས་མེད་པ་ནི་ཕྱིའི་འོ། །དོན་དམ་པའི་བྱང་ཆུབ་ཀྱི་སེམས་དེ་ཉིད་ཤེས་པ་དང་། འགྲོ་བ་སྐྱོབ་པ་དང་། ཡང་དང་ཡང་དུ་བྱེད་པས་སྔགས་བཟླས་སོ། །དེ་ཉིད་ཁ་ན་མ་ཐོ་བ་ཐམས་ཅད་འགོག་པས་དཀའ་ཐུབ་སྟེ་བརྟུལ་ཞུགས་སོ། །ཉོན་མོངས་དང་ཕུང་པོའི་སྲེག་རྫས་འཇོམས་པས་སྦྱིན་སྲེག་དང་ངེས་དོན་རྡོ་རྗེ་རྣལ་འབྱོར་མ་དང་ཧེ་རུ་ཀ་འདུས་པས་དཀྱིལ་འཁོར་བ་དང་། ཆོས་ཐམས་ཅད་ཀྱི་སྙིང་པོ་ཡིན་པས་དཀྱིལ་འཁོར་རོ། །མང་དུ་སྨྲས་པས་ཅི་ཞིག་བྱ་སྟེ་མདོར་བསྡུས་ན། དེ་ཉིད་ཆོས་ཐམས་ཅད་འདུས་པའི་ཚུལ་ཅན་ཏེ། ཆོས་ཐམས་ཅད་ཀྱི་བདག་ཉིད་ཅན་ཏེ། དེའི་ཕྱིར་དེ་ཉིད་བསྐྱེད་པར་བྱ་སྟེ། དེ་ཉིད་ཀྱིས་འདོད་དོན་ཐམས་ཅད་འགྲུབ་པར་འགྱུར་རོ། །ཞེས་པདྨ་ཅན་ལས་གསུངས་སོ། །དེས་ན་
སེམས་ནི་འདུན་པའི་ཚུལ་ཅན་དུ་གསུངས་པའི་དོན་ནི། ཆོས་ཐམས་ཅད་ཀྱི་བདག་ཉིད་ཅན་ཁོ་ན་ལ་མི་བཟུང་བར། དེ་ཉིད་སྔགས་བཟླས་ནི་དཀྱིལ་འཁོར་དེ་ཉིད་དོ། །ཞེས་པ་ལམ་གཞན་རྣམས་འདིར་འདུས་པར་བཤད་དགོས་སོ། །ལམ་གཞན་གྱི་གནས་སྐབས་དང་མཐའི་དོན་གང་འགྲུབ་ཐམས་ཅད་ལམ་འདིར་མ་ཚང་བ་མེད་པ་དང་། རིང་པོར་མི་ཐོགས་པ་དང་། ལམ་བདེ་བས་འགྲུབ་པའི་ཚུལ་བྱེད་ལས་ཀྱི་སྒོ་ནས་ལམ་ཐམས་ཅད་འདིར་འདུ་བའི་ཚུལ་ཤེས་ནས་ཐ་ན་མོས་པའི་ཡིད་བྱེད་ཀྱིས་ཀྱང་བདེ་སྟོང་སྦྱོར་བ་ལ་རྒྱུན་མི་འཆད་དུ་གོམས་པར་བྱའོ། །དབང་བསྐུར་བ་སོགས་ཀྱིས་སློབ་དཔོན་གྱི་གོ་འཕང་ཐོབ་པས་ཆོས་བསྟན་ནས། སེམས་ཅན་གྱི་དོན་བྱེད་པའི་རྒྱུ་སེམས་ཅན་གདུལ་དཀའ་བ་བསྟན་པ་ལ་འཇུག་པར་བྱེད་པའི་ཐབས་གསུངས་པ་ནི་མཉམ་པར་ཞེས་གསུངས་སོ། །འདིར་ལྟ་སྟངས་བཞི་ལས་ལྟུང་བ་དང་རེངས་པར་བྱེད་པ་གཉིས་ནི་གཡས་གཡོན་ལ་མི་བལྟ་བར་དབུས་སུ་བལྟ་བ་ཡིན་པ་ནི། མཉམ་པར་དང་དབུ་མར་ཞེས་པས་སྟོན་ལ། ཁྱད་པར་ལ་དང་པོ་ནི་དཔྲལ་བའི་ཕྱོགས་ཀྱི་སྟེང་དུ་ཅུང་ཟད་བལྟ་བ་དང་། གཉིས་པ་ནི་སྣ་རྩེའི་དབུས་སུ་བལྟ་བའོ། །མ་རུངས་པ་ནི་ཁྲོས་པའི་སེམས་ཀྱི་དང་། གཉིས་ནི་མིག་འབྲས་གཉིས་སོ། །དབང་ལ་གཡོན་ན་གནས་ཞེས་པ་ནི་གཡོན་དུ་བལྟ་བ་དང་། གཟུགས་བརྙན་ཞེས་པ་ནི་འབྲས་བུར་མང་པོས་བསྒྱུར་བ་ལེགས་པས། མིག་འབྲས་གཉིས་ཀས་གཡོན་དུ་
བལྟ་བའོ། །དགུག་པ་ནི་གཡས་པའི་ཆ་སྟེ་ཕྱོགས་སུ་དང་། དེའང་མིག་འབྲས་གཉིས་དང་པོའི་སྟེང་དུ་བཟློག་སྟེ་དེ་ནས་གཡས་སུའོ། །རླུང་གི་རྣལ་འབྱོར་གང་གིས་ལྟ་སྟངས་གང་བསྒྲུབ་སྙམ་པ་ལ། འབྱུང་བ་ཞེས་སོགས་ཏེ་རླུང་ཕྱིར་འབྱིན་པ་དང་ནང་དུ་བརྔུབ་པ་དང་། ནང་དུ་དགང་བ་དང་། ནང་དུ་ཞི་བར་བྱེད་པ་བཞིན་བསྒྲུབ་སྟེ། འདི་རྣམས་ལ་ལྷའི་རྣལ་འབྱོར་དང་སྔགས་བཟླས་པ་ནི་སྔར་བཤད་ཟིན་པ་ལྟར་རོ། །དེ་ལྟར་བྱེད་པ་དེས་དང་པོར་གང་ལ་བསླབ་པ་ནི་ཤིང་རློན་པའི་འབྲས་བུ་མ་སྨིན་པ་ལྟུང་བ་དང་། རྒྱང་རིང་པོའི་མེ་ཏོག་རང་གི་དྲུང་དུ་བསྡུ་བ་དང་། མཁྲེགས་པའི་ཤིང་གྱེན་དུ་འགྲེང་བ་ཐུར་དུ་དགུག་པ་དང་། རླུང་དྲག་པོས་བཏབ་པའི་རྩ་རྣམས་མི་གཡོ་བར་བྱེད་པ་ལ་བསླབ་སྟེ། དེ་བྱུང་ན་ལས་བཞི་པོ་དེ་འགྲུབ་བོ། །ཡུན་ཅི་ཙམ་གྱིས་འགྲུབ་པ་ནི་ཟླ་བ་དྲུག་གིས་ཡིན་ལ། དེ་ལ་འཁྲུལ་བ་སྟེ་ཐེ་ཚོམ་མི་བྱ་བ་ནི། འདི་ལ་ཞེས་པ་གཉིས་སོ། །དགང་བ་བུམ་པ་ཅན་ལ་མུ་ཏིག་ཕྲེང་བར་བཤད་པས། དེ་རྣམས་ཀྱིས་རྡོར་བཟླས་དང་། བུམ་པ་ཅན་གྱི་རླུང་སྦྱོར་གཉིས་བསྟན་པར་བྱ་ལ། དེས་ནི་ལེའུ་གཉིས་པར་རླུང་གི་རྣམ་དབྱེ་མང་དུ་གསུངས་པ་ལ་བརྟེན་ནས། རླུང་ལ་ཉམས་ལེན་བྱ་ཚུལ་བསྟན་པར་ཡང་བཟུང་ངོ་། །བསད་ལས་བྱས་ན་དམ་ཚིག་ཉམས་པས་མི་བྱ་བར་གསུངས་པ་ནི། བསད་གསོ་ནུས་པ་སོགས་ཀྱི་མཚན་ཉིད་དང་མི་ལྡན་པས་བྱས་པ་ལ་དགོངས་ཀྱི། རྣམ་པ་ཐམས་ཅད་དུ་འགོག་པ་མིན་ཏེ། དེས་ནི་སེམས་ཅན་བསླུ་བ་སྟེ་གནོད་
པའི་སྦྱོར་བ་མ་གཏོགས་ཞེས་བཤད་པའང་རིག་པར་བྱའོ། །ན་དང་ག་དང་ཧ་ཡིག་མིང་གི་ཐོག་མར་འོང་བ་ནི། མི་དང་བ་ལང་གླང་པོ་ཆེའི་དབང་དུ་བྱས་ལ། བར་བ་ནི་ག་ཝི་ཞེས་པ་བ་ལང་གི་མིང་དུ་བྱས་པའི་ལུགས་སོ། །ཤྭ་ཡིག་མིང་གི་མཐར་འོང་བ་ནི་རྟ་ལ་ཨ་ཤྭ་ཟེར་བའོ། །ཤྭ་ཡིག་དང་དང་པོ་འོང་བ་ནི་ཁྱི་ལ་ཤྭ་ན་ཞེས་པའི་དབང་དུ་བྱས་སོ། དགའ་བྲལ་ལ་སྨོད་པ་ནི་རྣམ་རྟོག་སུན་འབྱིན་ཞིང་། ལྷན་སྐྱེས་ལ་དགའ་བ་སྟེ་དེས་འགྲུབ་པའོ། །པདྨ་ཅན་ལས་སྔར་བསྟན་ཅེས་བཏོན་ནས་སྔར་ལེའུ་གཉིས་པར་ཀུ་རུ་ཀུལླཻའི་སྔགས་གསུངས་པ་ལ་འཆད་པ་ལྟར་ན། གོང་དུ་ཞེས་པ་གཉིས་ད་ལྟའི་འགྱུར་ལ་འདུག་པ་བཞིན། ཡོད་མེད་གཉིས་རྒྱ་དཔེ་ལ་ཡོད་པར་གསལ་ལོ། །བྱེ་བས་ཕྱུགས་ཞེས་པ་ནི་དུད་འགྲོའི་བྱེ་བྲག་ཀླུ་དང་། གནོད་སྦྱིན་ཞེས་པ་ལ་གླེགས་བམ་ཁ་ཅིག་ལ་བཀྵ་ནི་ཞེས་པ་ཡོད་ཀྱང་། ཡཀྵ་ནི་ཞེས་ཡོད་པ་དག་པར་འགྲེལ་པ་ཁ་ཅིག་ལས་བཤད་དོ། །འདི་ལ་ལེའུའི་མིང་འདོགས་གསལ་བར་མ་བྱུང་ཡང་ལྟ་སྟངས་ཀྱི་ལེའུ་ཞེས་པ་དོན་གྱིས་འཐོབ་བོ། །རྡོར་སྙིང་མངོན་པར་བྱང་ཆུབ་པ་ནི་དེ་སངས་རྒྱས་པའོ། །མིང་དེ་ནི་སྔར་གྱི་ལེའུ་བཅུ་གཅིག་པོའི་སྤྱི་མིང་ངོ་། །དབང་བསྐུར་བ་སོགས་ལས་སློབ་དཔོན་གྱི་གནས་ཐོབ་པས་རབ་གནས་བྱེད་པས་དེ་སྟོན་པ་ནི་རྡོ་རྗེ་སོགས་སོ། །རྡོ་རྗེ་ནི་སངས་རྒྱས་ཉིད་ཀྱི་སྐུ་གསུང་ཐུགས་རྡོ་རྗེ་དང་། དེའི་སྙིང་པོ་ནི་རྡོ་རྗེ་སེམས་དཔའ་ཡིན་ལ་ཞུ་བ་པོའང་དེའི་ངོ་བོ་
ཉིད་ཡིན་པས། སངས་རྒྱས་ཐམས་ཅད་གཅིག་ཏུ་བསྡུས་པའོ། །ཅི་གསུངས་ཞེས་པ་ནི་ཇི་ལྟར་རྙེད་པས་སྦྱིན་སྲེག་བྱ་ཞེས་བསྒྱུར་ལ། དེའི་དོན་ཇི་ལྟར་འབྱོར་བས་བྱ་བར་པདྨ་ཅན་ལས་གསུངས་སོ། །འདིའི་སྦྱིན་སྲེག་ནི་རབ་གནས་ཀྱི་སྟ་གོན་གྱི་སྐབས་སུ་བྱའོ། །དཀྱིལ་འཁོར་ཞེས་པ་གཅིག་ནི་རབ་གནས་རྒྱས་པའི་དབང་དུ་བྱས་པ་སྟེ། རབ་གནས་ཀྱི་ལྷ་ལ་དབང་བསྐུར་བ་མི་བྱེད་ན་དཀྱིལ་འཁོར་བཞེངས་མི་དགོས་པའི་ཕྱིར་རོ། །འདི་ལ་ས་ཆོག་ནི་སྔར་བཤད་པ་བཞིན་བྱ་ལ། སྔ་བར་སྐུ་གཟུགས་སྦྱོང་བ་ནི། སྟ་གོན་ཞེས་པ་གཅིག་ནི་འོག་ཏུ་གདོན་ནོ། །སྟ་གོན་ལ་བུམ་པ་དང་ལྷ་དང་སྔ་བར་ནི་ནང་པར་ཞེས་པར་བསྒྱུར་ལ། མཚན་མོ་སྟ་གོན་བྱ་བ་ལ་བུམ་པ་སྟ་གོན་བྱས་པའི་འོག་ཏུ་སྦྱང་བ་བྱ་བ་དང་། ཆུ་དང་ཁྲུས་ཆལ་གྱིས་བཀྲུ། དེ་ནས་ལྷ་རྣམས་སྤྱན་དྲངས་ཏེ་མཆོད་ནས་སྙན་གསན་དབབ། དེ་ནས་ནམ་མཁར་བཞུགས་པའི་སངས་རྒྱས་རྣམས་སྐུ་གཟུགས་སོགས་ལ་གཞུག་ལ་བཀྲུ་བ་དང་། མཆོད་པ་སོགས་བྱ་སྟེ་སླར་ཡང་མཆོད་ནས་ཡེ་ཤེས་པ་གཤེགས་སུ་གསོལ་ཏེ་ལྷ་སྟ་གོན་ནོ། །པདྨ་ཅན་ལས་དབང་བསྐུར་བ་མ་བཤད་ཀྱང་དཀྱིལ་འཁོར་བཞེངས་ན་དགོས་སོ། །སྣ་ཚོགས་ཧཱུཾ་ལས་སྐྱེས་པ་ཞེས་བསྒྱུར་བ་དང་། དེའི་དོན་ཡང་མེ་ཏོག་སོགས་དེ་ལས་སྐྱེས་པར་བཤད་དོ། །རྒྱུད་ཕྱི་མ་དེ་ཉིད་བསྡུས་པ་དང་། རྒྱུད་སྔ་མ་འདུས་པ་ལ་བཤད་དེ། རྒྱུད་རྒྱས་པ་ལ་དགོས་སོ། །ཐབ་རྣམས་ལ་སྟེང་ནི་རྒྱ་དང་འོག་ནི་དཔངས་ཚད་དོ། །འདི་ཉིད་ལ་ལྷག་མ་སྒྲུབ་པ་ནི་
དབང་དགུག་དང་དབྱེ་བསྐྲད་སོགས་མ་བཤད་དོ། །ༀ་ཨག་ནྱ་ནས་བྷི་ཏེ་བྷ་བའི་བར་ནི་མེ་ལྷ་ཐབ་ཀྱི་ཤར་ལྷོར་བཞུགས་སུ་གསོལ་བའི་སྔགས་དང་། སྭ་ཨརྠན། སོགས་ནི་གཤེགས་སུ་གསོལ་སྔགས་དང་། ༀ་བཛྲ་ཨ་ན་ལ་ནས། ཛཿ ཧཱུཾ་བཾཧོཿ ས་མ་ཡ་སྟྭཾ་ཞེས་པའི་བར་ནི་སྤྱན་འདྲེན་པའི་སྔགས་སུ་དང་། ༀ་ཛཿ ཧཱུཾ་སོགས་ནི་ཁ་ཁྱེར་ལ་བཞུགས་པའི་དུས་སུ་ཆུ་འབུལ་བའི་སྔགས་སུ་པདྨ་ཅན་ལས་ཏེ། འགྲེལ་པ་གཞན་ལས་མེ་ལྷ་ཉིད་ཀྱི་མཆོད་ཡོན་གྱི་སྔགས་སུ་བཤད་དོ། །སྦྱིན་སྲེག་གི་སྐབས་སུ་ནང་ངེས་དོན་གྱི་སྦྱིན་སྲེག་ཀྱང་པདྨ་ཅན་ལས་གསུངས་སོ། །ལེའུ་བཅུ་པའི་འབྲེལ་ནི་སྔར་ཐབས་མང་དུ་གསུངས་ཀྱང་ངེས་པར་གཟུང་བའི་ཕྱིར་དུ་ཞུས་པ་པདྨ་ཅན་དང་། གང་ཞིག་བསོད་ནམས་འདོད་པ་དང་། སྲིད་པའི་ལོངས་སྤྱོད་འདོད་པ་རྣམས་ནི། དཀྱིལ་འཁོར་དང་རབ་གནས་ཀྱིས་ཆོག་པར་འཛིན་ལ། སངས་རྒྱས་ཉིད་ངེས་པར་འདོད་པ་རྣམས་ཀྱི་དོན་དུ། དེའི་དངོས་གྲུབ་ཀྱི་རྒྱུ་གཏན་ལ་དབབ་པའི་ཕྱིར་དུ་ལེའུ་འདི་གསུངས་པར་ཀུ་མུ་ཊིར་བཤད་དོ། །ནམ་མཁའ་ལྟར་མཐའ་ཡས་པའི་ཕུང་ཁམས་སྐྱེ་མཆེད་ཀྱི་འཁོར་བའི་ཆོས་ལ་བྱིང་བར་གྱུར་པ། རྒྱ་མཚོ་ཆེན་པོར་ཀུ་བ་ལྷུང་བ་ལྟ་བུར་འཕྱོ་བའི་སེམས་ཅན་རྣམས། ཇི་ལྟར་ན་འདོད་པའི་ལྷའི་གཟུགས་འགྲུབ་པར་འགྱུར། ཞེས་ཞུས་པ་སྟེ། དེའང་ཧེ་རུ་ཀ་བཞི་དང་། བདག་མེད་མ་དང་། ཀུ་རུ་ཀུ་ལླཻའི་ལྷ་མང་དུ་གསུངས་པའི་ནང་ནས། ལྷ་གང་གི་རྣལ་འབྱོར་གྱིས་
འགྲུབ་པར་འགྱུར་ཞེས་ཞུས་པར་ཀུ་མུ་ཊིར་རོ། །ཆོས་རྣམས་ནམ་མཁའ་ལྟར་མཐའ་ཡས་པའི་ཕྱིར། རང་བཞིན་མེད་པའི་ངོ་བོ་དྲི་མ་མེད་པའི་ངོ་བོ་དེས། ཇི་ལྟར་རྒྱ་མཚོར་ཀུ་བ་ལྷུང་བ་ཆུང་བ་དང་ངེས་པ་མེད་པར་འགྲོ་བ་དེ་བཞིན་དུ། སེམས་ཅན་ངེས་པ་མེད་པར་འཕྱོ་བ་དང་། དགེ་རྩ་ཅུང་ཟད་པར་ངེས་པ་རྣམས་ཐབས་གང་གིས་འགྲུབ་པར་འགྱུར། ཞེས་ཞུས་པའི་ལན་དུ་བདག་མེད་མའི་རིམ་གཉིས་ཀྱི་རྣལ་འབྱོར་དང་ལྡན་པའམ། ཡང་ན་ཧེ་རུ་ཀའི་རིམ་གཉིས་ལ་བརྩོན་པས་འགྲུབ་བོ། །ཀུ་མུ་ཊིར་ཤེས་རབ་ཀྱི་རྣལ་འབྱོར་བྱེད་ན་བདག་མེད་མས་བྱའི་ཀུ་རུ་ཀུལླཻས་མིན་པ་དང་། ཐབས་ཀྱི་རྣལ་འབྱོར་གྱིས་བྱེད་ན་ཕྱག་བཅུ་དྲུག་པའི་ཧེ་རུ་ཀས་བྱེད་ཀྱི། ཧེ་རུ་ཀ་གཞན་གསུམ་ནི་དཔལ་ཞེས་པ་གཅོད་དེ། འབྲས་བུ་འབྱུང་བ་མེད་པའི་ཕྱིར་དཔལ་གྱི་འོས་མ་ཡིན་པའི་ཕྱིར་ཞེས་བཤད་དོ། །རྫོགས་རིམ་གྱི་རྟོགས་པ་རྫོགས་པར་སྐྱེ་བའི་རྒྱུད་སྨིན་བྱེད་དུ་འགྲོ་བའི་བསྐྱེད་རིམ་ལ། བདག་མེད་མ་དང་ཧེ་རུ་ཀས་གཙོ་བོ་བྱས་པའི་དཀྱིལ་འཁོར་གྱི་འཁོར་ལོ་དགོས་པ་ལ་དགོངས་ནས་དེ་གཉིས་གསུངས་ཀྱང་། ཧེ་རུ་ཀ་གཞན་གསུམ་གྱིས་དཀྱིལ་འཁོར་གྱི་གཙོ་བོ་བྱེད་ན་ནི་ཤིན་ཏུའང་རུང་བས། ཕྱག་བཅུ་དྲུག་པ་གཙོ་བོར་གྱུར་པ་ལ་འགྲེལ་པ་མཁན་གྱིས་བསམས་པར་མངོན་ནོ། །རྣལ་འབྱོར་དེ་གཉིས་ལ་བརྩོན་པར་བྱེད་ཚུལ་ནི། གཞན་པས་ཞེས་པ་གཉིས་ཏེ། སྐད་ཅིག་ཀྱང་གཞན་སེམས་མེད་པས་ཞེས་བསྒྱུར་བ་ལྟར། གུས་སྦྱོར་དང་རྟག་སྦྱོར་གཉིས་ཀྱིས་བསྒོམ་པ་ཡིན་ལ། སྐད་ཅིག་ཀྱང་
ཞེས་པའི་དོན་གཞན་ནི་འཆད་པར་འགྱུར་རོ། །དང་པོར་ཞེས་པ་བཞིས་ནི་བརྟན་པ་མ་ཐོབ་པ། གསར་དུ་གོམས་པར་བྱེད་པའི་གནས་དམིགས་ཀྱིས་བཀར་བ་ཡིན་ལ། རང་གི་ཁྱིམ་དུ་མཚན་དུས་ཞེས་པ་བཞིས་ནི། གཞན་གྱིས་མ་ཚོར་བར་བསྒོམ་དགོས་ཤིང་། དེ་ལ་ནི་མཚན་མོའི་དུས་བསྔགས་པས་དེར་མཉམ་པར་བཞག་པའི་རྣལ་འབྱོར་གྱིས་བསྒོམ་པའོ། །ཤེས་རབ་ཅན་ཞེས་པ་ནི་མཆོག་འགྲུབ་པ་ལ་རྫོགས་རིམ་དང་། དེའི་རྒྱུར་བསྐྱེད་རིམ་དགོས་པར་ཤེས་ནས་དེ་གཉིས་གང་རུང་བསྒོམ་པ་ནི་རྣམ་དཔྱོད་དང་ལྡན་པའི་སྔགས་པ་ཡིན་གྱི། མཆོག་བསྒྲུབ་པ་ལ་བསྐྱེད་རིམ་འདོར་བ་ནི་ཤེས་རབ་མེད་པར་སྟོན་པའོ། །བདག་ཉིད་ཅེས་པ་ནི་དངོས་གྲུབ་བདག་ཉིད་སེམས་དཔའ་ཡིས། །ཞེས་པར་བསྒྱུར་ལ་དོན་ནི་བདག་ནི་རང་བཞིན་གྱིས་དག་པའོ་སྙམ་པའི་ང་རྒྱལ་དང་ལྡན་པ་ལ་པདྨ་ཅན་ལས་སོ། །རྐང་པ་འཁྲུ་དང་ཞེས་པ་ནས་རྣལ་འབྱོར་མ་ནི་རྣམ་པར་བསྒོམ། །ཞེས་པའི་བར་གྱིས་ནི་ཉིན་མོ་མཉམ་པར་མ་བཞག་པའི་དུས་ཀུན་ཏུ་ལྷ་ཡིད་ལ་བྱ་བ་དང་མི་འབྲལ་བར་མུ་ཏིག་ཕྲེང་བར་རོ། །བཅོམ་ལྡན་འདས་མ་བསྟན་པར་བྱ་བ་ནི་བསྒོམ་པར་བྱ་བ་དང་སྦྱར་རོ། །ལམ་ལེགས་པར་ཤེས་པའི་ཤེས་རབ་དང་སྔགས་ཀྱི་ཀུན་སྤྱོད་ཇི་ལྟར་གསུངས་པ་ལས་མི་འདའ་བའི་བརྟུལ་ཞུགས་དང་ལྡན་པ་ཉིད་ཀྱིས་རྣལ་འབྱོར་མ་བསྒོམ་པ་ནི་མཚོན་པ་སྟེ་ཧེ་རུ་ཀའང་ངོ་། །གཞན་ཞེས་པ་ནི་རང་དང་ལྷ་དབྱེར་མེད་དུ་བྱས་པ་ལས་གཞན་དུ་
བྱེད་པ་སྟེ། ཐ་མལ་བའི་བློས་སྔ་མའི་འདུ་བྱེད་ཉམས་པའོ། །དེ་ལ་ནི་སྒྲུབ་པ་པོ་མཁས་པས་འབད་པ་དྲག་པོས་སྐད་ཅིག་ཀྱང་གནས་པར་མི་བྱའོ། །ལྷ་དང་དབྱེར་མེད་དུ་དྲན་པའི་འདུ་བྱེད་ཉམས་ནས་སོ་སོར་ཕྱེ་བ་ནི་མ་རིག་གདུག་པའི་སེམས་ཏེ། དེས་གནས་པར་བྱ་བ་མིན་ཞེས་སེམས་དེ་སུན་འབྱིན་ནོ། །བསམ་གཏན་སྡིག་པ་དུག་འཇིག་པ་ནི། བག་ཆགས་དང་བཅས་པའི་སྒྲིབ་པ་འཇིག་པར་བྱེད་པའོ། །བསྒོམས་པས་སྔོན་བསགས་པའི་སྡིག་པ་འདག་པ་དང་། ཉོན་མོངས་ཅུང་ཟད་ཕྲ་བར་གྱུར་པ་ན་དུར་ཁྲོད་ལ་སོགས་པར་དང་པོར་ནག་པོ་རབ་ཏུ་བསྒོམས། ཞེས་པའི་ཚུལ་གྱིས་ཟླ་བ་ཕྱེད་དུ་བསྒོམས་པས་དངོས་གྲུབ་ཀྱི་མཚན་མ་སྟེ་ནུས་པ་འབྱུང་བར་བྷ་བས་སོ། །རྩེ་བ་ནི་རིག་མ་ལ་རོལ་བའི་སྒོ་ནས་བསྒོམ་པའོ། །བསམ་པ་ཐམས་ཅད་ཅེས་པ་གཅིག་ནི་སྔར་བཤད་པའི་གཞན་དུ་སྐད་ཅིག་ཀྱང་མི་གནས་པའོ། །ལྷའི་གཟུགས་སུ་སེམས་པ་ནི་དེའི་རང་བཞིན་དུ་སེམས་པ་ཡིན་ལ། དེ་ལ་ནི་ལྷན་སྐྱེས་དང་ལྷའི་རྣམ་པ་བསྒོམ་པ་གཉིས་སོ། །ཚུལ་དེས་ཟླ་ཕྱེད་བསྒོམས་པའི་མཐར་ཉི་མ་གཅིག་ཏུ་བར་མ་ཆད་པར་བསྒོམས་པས་ཡོངས་སུ་བརྟག་པར་གྱིས་ཤིག་དང་། སྔར་བཤད་པའི་དྲོད་ཅེས་པ་མཐུ་ཁྱད་པར་ཅན་ཐོབ་པར་འགྱུར་རོ། །འཁོར་བ་ན་རང་གཞན་གྱི་དོན་བསྒྲུབ་པའི་ཐབས། གོང་དུ་བཤད་པའི་རིག་མ་ལ་བརྟེན་ནས་བསྒོམ་པ་ལས་གཞན་ཏེ། མཆོག་ཏུ་གྱུར་པ་མེད་པས། རིག་མ་དང་ལྷན་ཅིག་གོམས་པར་བྱས་པས་འཕྲལ་དུ་སྟེ་རིང་པོར་མི་ཐོགས་པར་འདོད་དོན་མངོན་དུ་
བྱེད་དོ། །དེ་ལྟར་བསྒོམས་པའི་ཕན་ཡོན་ནི་འཇིགས་ཞེས་སོགས་བཞིས་སྟོན་པ་ལ་འཇིགས་པ་ནི་སྐྲག་པའོ། །སྨྱོ་བ་ནི་སེམས་རྣམ་པར་འཁོར་བ་སྟེ་རྣམ་པར་འཁྲུལ་བའོ། །འབྲས་ལ་སོགས་པའི་སྡུག་བསྔལ་གྱིས་མྱ་ངན་དུ་འགྱུར་བ་ནི་ཡིད་གདུང་བའོ། །འཚེ་བ་ནི་གཞན་གྱིས་འཆིང་བ་དང་སྡོམ་པ་སོགས་སོ། །ཉོན་མོངས་པ་ཆེན་པོས་ཉོན་མི་མོངས་པ་ནི། གནོད་པ་དེ་རྣམས་ཀྱིས་ཟིལ་གྱིས་མི་ནོན་པའོ། །རང་གི་ལམ་གྱི་ཕན་ཡོན་དང་། དེ་ལས་གཞན་དུ་གཡེངས་པའི་སྤྱོད་པ་ལས། གནོད་པའི་འབྲས་བུ་འབྱུང་བར་ཤེས་ནས་ནི། རྣལ་འབྱོར་པ་དེ་ནི་སྐད་ཅིག་ཀྱང་དོན་མེད་དུ་ཇི་ལྟར་གནས་ཏེ་མི་གནས་སོ། །དེ་བཞིན་དུ་ངུ་འབོད་དེ་སྡུག་བསྔལ་དྲག་པོ་དང་། རྣམ་རྟོག་ལ་སོགས་པས་དཀྲུགས་པའི་འཁོར་བར་ཇི་ལྟར་གནས་ཏེ་མི་གནས་ཚུལ་ནི་སྔར་བཞིན་ནོ། །དེ་ལྟར་ཡིན་ན་བསོད་ནམས་ཀྱི་ལས་བྱེད་པ་རྣམས་འདིར་འཇུག་ལ། སྡིག་པའི་ལས་བྱེད་པ་རྣམས་མི་འཇུག་སྟེ། ཞུགས་ཀྱང་འབྲས་བུ་མི་འཐོབ་པོ་སྙམ་ནས། མཚམས་མེད་ཅེས་པ་དྲུག་གོ །རྨོངས་པ་ནི་བག་མེད་པར་གྱུར་པའོ། །མ་རུངས་པའི་ལས་ནི་ཉེ་བའི་མཚམས་མེད་སོགས་སོ། །དེ་དག་གིས་ཀྱང་ལམ་འདི་བསྒོམས་ན། སྡིག་པ་དེ་རྣམས་བཅོམ་ནས་ཚོགས་གཉིས་བསགས་པའི་མཐུས་སྣོད་དུ་འགྱུར་བའོ། །འདིའང་གཙོ་བོར་མཚན་ཉིད་དང་ལྡན་པའི་བཤེས་གཉེན་ལས་དབང་གི་དུས་ནས་ཀྱང་། བདེ་སྟོང་གི་
ཏིང་ངེ་འཛིན་བསྐྱེད་ནུས་པའི་དབང་དུ་བྱས་སོ། །དེ་རྣམས་ཀྱིས་ཀྱང་འགྲུབ་པ་ཡོད་ན་ཆོས་ལྡན་གྱི་གང་ཟག་གིས་ངེས་པར་འགྲུབ་པ་ནི། དགེ་བཅུ་ཞེས་པ་བཞིའོ། །རེ་ཞིག་ནི་རིམ་པ་སྟོན་པ་སྟེ་དང་པོར་འགྲུབ་པའི་དོན་ནོ། །དེ་ལྟར་རྒྱུན་དུ་བསྒོམས་པས་དངོས་གྲུབ་སྟེ་ནུས་པ་ཅུང་ཟད་འཐོབ་བོ། །ཟླ་བ་གཅིག་ཏུ་གསངས་ཏེ་སྤྱོད་པ་བྱེད་ཅེས་པའི་སྤྱོད་པའི་དོན་ནི་རྒྱུ་བར་བྱེད་པའོ། །གསང་བ་ནི་ཅུང་ཟད་ཀྱང་མི་བསྟན་པ་དང་། གཞན་གྱིས་མི་རྟོགས་པར་བྱ་བ་ལ་བཤད་དེ། སྤྱོད་པ་ཀུན་གྱི་མངོན་གྱུར་དུ་མི་བྱེད་པ་སྟེ་དེའང་ལུང་བསྟན་སོགས་མ་རྙེད་ཀྱི་བར་དུའོ། །ཟླ་བ་གཅིག་ནས་ནི། ལུང་བསྟན་རྣལ་འབྱོར་མ་ལས་རྙེད་དོ། །དེའང་ག་པུར་དང་ལྡན་པ། དགོས་པ་ནི་དེ་དང་མི་ལྡན་ན་སྤོང་བའོ། །དེའི་རྒྱུ་སྦྱོང་བ་ནི་བྱང་ཆུབ་ཅེས་པ་གསུམ་མོ། །ལྷའི་གཟུགས་གཅིག་པ་ནི་ཀྱཻ་རྡོར་ལྟ་བུར་ལྷའི་རྣལ་འབྱོར་གཅིག་པའོ། །སེམས་ཀྱང་གཅིག་པ་ནི་ཕྱག་རྒྱ་ཆེན་པོའི་དོན་དུ་བྱེད་པར་གཅིག་པའོ། །སྐལ་བ་ནི་དབང་ཕྱུག་ལ་སོགས་པའི་ཡོན་ཏན་དྲུག་གོ །མཆོག་རྙེད་ཅེས་པར་བསྒྱུར་ནས་དེའི་དོན་རྣལ་འབྱོར་མས་བསྟན་པ་རྙེད་པ་ལ་བཤད་དོ། །དེ་ལྟར་ན་མཆོག་གིས་བསྟན་པའི་བུད་མེད་རྙེད་ཅེས་པའམ་ཡང་ན་བུད་མེད་མཆོག་རྙེད་པ་ཞེས་པའོ། །དེའི་ཕྱིར་རྟོག་པ་ཐམས་ཅད་སྤངས་པར་བཤད་པ་ནི་དེ་ལ་བརྟེན་ནས་རྟོག་པ་ཟད་པར་གྱུར་པའོ། །བདག་གི་དམ་པ་མངོན་དུའི་ཕྱིར་ཞེས་པ་ནི་བདག་ཉིད་བརྟན་པའི་རྐྱེན་དུའོ། །ཞེས་པདྨ་ཅན་ལས་འབྱུང་ལ་དོན་ནི་རང་ཉིད་སྡུག་བསྔལ་ལ་སོགས་པའི་
འཇིག་རྟེན་གྱི་ཆོས་བརྒྱད་ཀྱིས་མི་འཕྲོགས་པ་དེ་འཐོབ་པར་བྱ་བའི་དོན་དུ་བཤད་དོ། །གོང་དུ་གང་བཤད་པའི་སྤྱོད་པ་འཇིགས་པའི་ཚུལ་དེ་ཐམས་ཅད་སེམས་རྩེ་གཅིག་པའི་དཀའ་སྤྱད་ཀྱིས་སྤྱོད་པ་དེ། འདོད་པ་ལ་ཆགས་པའི་དབང་གིས་ལོངས་སྤྱོད་པའི་ཕྱིར་མ་གསུངས་སོ། །བརྟན་པའི་རྐྱེན་དུའོ། ཞེས་འཆད་པ་ནི་སེམས་ནི་ཞེས་པ་གཉིས་ཀྱིས་སོ། །རྡོར་སྙིང་གིས་ཕྱག་རྒྱ་ཉིད་ཅེས་ཇི་ལྟར་བརྗོད། །ཅེས་པ་ནི། སྔར་བཤད་པའི་ལྷའི་རྣལ་འབྱོར་དང་ལྡན་པས་ཕྱག་རྒྱའི་རྣལ་འབྱོར་གྱིས་དངོས་གྲུབ་བསྒྲུབ་དགོས་ན། འོ་ན་བདག་མེད་མ་བསྒོམས་པའི་རྣལ་འབྱོར་པ་དེས་ཕྱག་རྒྱ་མ་གཞན་དང་ཐབས་ཤེས་སྦྱོར་བ་མེད་པས་ཕྱག་རྒྱའི་དངོས་གྲུབ་ཇི་ལྟར་འཐོབ་ཅེས་དྲིས་པའོ། །འདིའི་ལན་དུ་བུད་མེད་གཟུགས་ནི་སྤངས་ནས་ཞེས་སོགས་གསུངས་སོ། །སྔར་བདག་མེད་མར་བསྐྱེད་པའི་རྣལ་འབྱོར་གྱིས་འགྲུབ་པར་གསུངས་པ་ནི། རྟེན་ཕོ་མོ་གཉིས་ཀའི་དབང་དུ་བྱས་ཀྱི་བུད་མེད་ལ་དགོངས་པ་མིན་ནོ། །དེ་བཞིན་དུ་ཧེ་རུ་ཀའི་རྣལ་འབྱོར་ཡང་ཡིན་ནོ། །འོན་ཀྱང་སྔ་མ་སྒོམ་པ་ཉིད་ལ་འདྲི་བར་རྒྱུད་ཉིད་དང་པདྨ་ཅན་དང་། མུ་ཏིག་ཕྲེང་བ་དང་། བྷ་བས་བཤད་དོ། །དེས་ན་རྟེན་གྱི་སྒོ་ནས་མིན་གྱི་རང་ལྷ་མོར་བསྒོམ་པའི་དོགས་གཅོད་ཡིན་ཏེ། སྒོམ་མཁན་སྐྱེས་པ་ལའང་འདྲའོ། །དེ་ལྟར་མིན་པར་རྟེན་གྱི་སྒོ་ནས་ཡིན་ན་ནི། བུད་མེད་ཀྱིས་ཧེ་རུ་ཀ་བསྒོམ་པ་ལའང་ཞུ་བ་འདི་བྱ་དགོས་སོ། །དེ་ལྟར་ན། བུད་མེད་གཟུགས་ནི་
སྤངས་ནས་གཞན། །བཅོམ་ལྡན་འདས་ཀྱི་གཟུགས་སུ་བྱ། །ཞེས་གསུངས་པའི་དོན་ནི་བདག་མེད་མར་བསྒོམ་པའི་གཟུགས་ཡིན་ལ། སྤོང་ཚུལ་ནི་དམིགས་པ་བསྒྱུར་ནས་སྤོང་བ་ཡིན་གྱི་བུད་མེད་ཀྱི་རྟེན་སྐྱེས་པར་བསྒྱུར་བ་མིན་ནོ། །དེའང་ཞལ་གཅིག་ཕྱག་གཉིས་པ་དང་། སྐུ་མདོག་ནག་པོ་དང་། གྲི་ཐོད་འཛིན་པ་སྤོང་བ་མིན་གྱི། ལྷ་མོར་འཇོག་པའི་རྟགས་ཐུན་མོང་མ་ཡིན་པ་ནུ་མ་རྒྱས་པ་དང་། པདྨའི་རྣམ་པ་བསྒྱུར་བའོ། །ཇི་ལྟར་ན་ནུ་མ་གཉིས་ཀྱི་དམིགས་པ་བསྒྱུར་ནས་རྡོ་རྗེ་བྱེད། པདྨའི་འགྲམ་གཉིས་ཀྱི་དམིགས་པ་བསྒྱུར་ནས་དྲིལ་བུ་སྟེ་འབྲས་བུའི་རྣམ་པར་བྱེད། རྡོ་རྗེ་དེའང་པདྨའི་ཟེའུ་འབྲུ་གང་དུ་གནས་པའི་གནས་དེར་བྱེད་པས། ཟེའུ་འབྲུའི་དམིགས་པ་བསྒྱུར་ནས་རྡོ་རྗེ་གནས་དེར་བསྒོམ་པའོ། །དམིགས་པས་བསྒྱུར་བ་ནི་བྷ་བས་གསལ་བར་བཤད་ཅིང་། ལ་ལས་ནི་བུད་མེད་སྤངས་ཏེ་སྐྱེས་བུ་ཉིད་སྐད་ཅིག་ཙམ་གྱིས་མངོན་དུ་བྱེད་པའི་ནུས་པ་རྙེད་ནས་སྤྱོད་པ་བྱེད་པར་འདོད་པའི་གཞན་ལུགས་བཀོད་དོ། །བོད་ཁ་ཅིག་ཀྱང་ཐབས་ཀྱི་རྐྱེན་གྱིས་ཤེས་རབ་གྲོལ་གྱི། དེ་ལས་ཟློག་པས་མི་གྲོལ་བ་སྤྱིར་བཏང་བ་ཡིན་ལ། དམིགས་བསལ་དུ་རང་དང་རྟོགས་པ་མཉམ་པའི་ཐབས་རྙེད་ན་རྒྱུད་གཉིས་ཅིག་ཅར་གྲོལ་བར་འགྱུར་ལ། དེ་མ་རྙེད་ན་བུད་མེད་ཀྱི་རྟེན་དོན་ལ་བསྒྱུར་བར་བྱ། ལན་གྱི་གཞུང་གིས་བསྟན་པར་འདོད་པ་ནི་དོན་མིན་ནོ། །ལྷག་མ་བདག་ཉིད་ཆེན་པོ་ཉིད། །ཅེས་སོགས་ཀྱི་དོན་ནི་ཕྱག་གཉིས་པའི་ཧེ་རུ་ཀ་ལ་དེའང་ཕྱག་མཚན་གྲི་
ཐོད་ཅན་དུ་བྱ་སྟེ། དེ་ལྟ་མ་ཡིན་ན་བདག་མེད་མར་མི་འགྱུར་རོ། །ཡང་ན་ནུ་མ་རྒྱས་པ་དང་པདྨ་སྤངས་པ་མ་གཏོགས་པ་བདག་མེད་མའི་སྒོམ་པ་འབའ་ཞིག་གིས་བྱའོ་ཞེས་བྷ་བས་བཤད་དོ། །བདག་མེད་མའི་རྣམ་པ་ཅན་གྱིས་བྱ་དགོས་པ་ནི། སྔར་བདག་མེད་མའི་རྣལ་འབྱོར་གྱིས་འགྲུབ་པར་གསུངས་པས་ཤེས་ལ། འོན་ཀྱང་ལྷ་ཕོའི་རྣམ་པ་ཅན་དུ་བསྒོམས་པ་ལ་ཧེ་རུ་ཀ་ཞེས་བྱའོ། །བྷ་བའི་འགྲེལ་པར་སྐྱེས་བུར་འགྱུར་གྱི་དོད་ལ་འགྲུབ་པར་འགྱུར་ཞེས་འབྱུང་བ་ལེགས་ཏེ། སྐྱེས་བུར་འགྱུར་བ་ནི་སྐྱེས་བུ་ཉིད་ཅེས་པ་ལ་བསྟན་ཟིན་པས། དེ་འདྲ་བའི་རྣལ་འབྱོར་གྱིས་རིང་དུ་འབད་པ་མེད་པར་བདེ་བླག་ཏུ་དངོས་གྲུབ་འགྲུབ་པའི་དོན་ནོ། །དེ་ལྟར་བདག་མེད་མའི་རྣམ་པ་ཅན་ལྷ་ཕོར་བསྒོམ་པའང་སྙོམས་འཇུག་གི་བྱ་བ་དགོས་པའི་སྐབས་སུ་བྱེད་ཀྱི། སྐབས་གཞན་དུ་ནི་ལྷ་མོ་ཉིད་དུ་བསྒོམ་པར་བྱའོ། །སློང་མོས་རྒྱུ་བ་དུ་མ་ཞིག་ཕྱག་རྒྱ་མ་དང་ལྡན་པར་མཐོང་ཡང་འགྲུབ་པར་མ་མཐོང་བས། སྤྱོད་པ་ལ་མི་དད་པའི་སེམས་ཅན་རྣམས་ཀྱིས་འཕགས་པའི་སྤྱོད་པ་འདིས་ཆོག་གོ་སྙམ་པ་ལ། གསལ་བར་ཞེས་པ་གཉིས་ཏེ། ནུས་མཐུ་རྫོགས་པའི་རྣལ་འབྱོར་པ་གསལ་བ་སྟེ་མངོན་དུ་གྱུར་པ་དེའི་ཕྱིར་དུ་སྤྱོད་པ་གསུངས་ཀྱི། ལྟོ་འཚོལ་བའི་ཆེད་དུ་སྤྱོད་པ་བྱེད་པ་ལྟར་འཆོས་པའི་ཕྱིར་དུ་མིན་ཞེས་ཀུ་མུ་ཊིར་རོ། །པདྨ་ཅན་ལས། ནུས་མཐུ་གསལ་བར་སྐྱེས་པའི་རྣལ་འབྱོར་པས་སྤྱོད་པ་བྱའི། ནུས་པ་སྲིད་པ་ཙམ་གཞན་གྱི་དབང་དུ་བྱས་པ་
ནི་མིན་ཞེས་སོ། །ཕྱག་རྒྱ་ཅན་གྱི་རྣལ་འབྱོར་པ་དང་ཕྱག་རྒྱ་གཉིས་གཞན་གྱིས་མི་ཕྱེད་པས་ལྷན་ཅིག་འགྲུབ་ཀྱི་གཅིག་པུས་ནི་མིན་ཏེ། གུར་ལས། མི་ཡི་ཕྱག་རྒྱ་བླངས་ནས་ནི། །དེ་ལ་ཆོས་ནི་རབ་ཏུ་དབྱེ། །དེ་དང་ལྷན་ཅིག་དངོས་གྲུབ་འགྱུར། །ཕྱག་རྒྱའི་དངོས་གྲུབ་རབ་ཏུ་བསྒྲགས། །མི་ཕྱེད་མཚན་ཉིད་ཕྱག་རྒྱ་ཡི། །དངོས་གྲུབ་ཡོ་གི་ཁྱད་པར་འཕགས། །ཞེས་གསུངས་པ་ཀུ་མུ་ཊིར་དྲངས་སོ། །ལྷན་ཅིག་ཅེས་པས་ནི་གཉིས་ཀས་འགྲུབ་པར་སྟོན་ཏེ། ཡུམ་ལ་བརྟེན་ནས་ཡབ་ལ་ལྷན་སྐྱེས་སྐྱེ་བ་ལྟར། ཡབ་ལ་བརྟེན་ནས་ཀྱང་ཡུམ་ལ་ངེས་པར་ལྷན་སྐྱེས་སྐྱེ་བའི་ཕྱིར་ཏེ། འདི་ནི་པདྨ་སུ་ཁ་དྷ་ར་སོགས་ཀྱི་གནད་ཤེས་པ་དང་། རྩ་འཚོལ་བའི་གནད་ལེགས་པར་ཤེས་པ་ལ་རག་ལས་སོ། །འདི་རྣམས་ལེགས་པར་མ་ཤེས་པས་སྔར་གྱི་གཞུང་རྣམས་མ་ཤེས་པར་སྣང་ངོ་། །ད་ནི་ཕྱག་རྒྱ་ཆེན་པོའི་དངོས་གྲུབ་ཐོབ་པའི་རྣལ་འབྱོར་པའི་སྐྱེ་བ་དང་འཆི་བ་དགག་པའི་ཕྱིར་གསུངས་པ་ནི་ཆགས་དང་ཞེས་སོགས། པདྨ་ཅན་ལས། སྐྱེ་བ་དང་ནི་འཇིག་པས་ཀྱང་། །ཞེས་འབྱུང་ངོ་། །ཐབས་ཤེས་དབྱེར་མེད་ཀྱི་བྱང་ཆུབ་ཀྱི་སེམས་མཐར་སོན་པ་གང་། དེ་ཇི་ལྟར་སྐྱེ་འཆིས་འཆིང་བར་འགྱུར། རྒྱུ་མཚན་གང་གིས་ཕྱིར་ན། ཐབས་ཀྱི་སྟོབས་ཀྱིས་ནི་འབྱུང་བ་སྟེ་བལྟམས་པ་དང་། བྱང་ཆུབ་པ་དང་ཆོས་ཀྱི་འཁོར་ལོ་བསྐོར་བ་སོགས་བྱེད་ལ། ཤེས་རབ་ཀྱིས་ནི་སྲིད་པའི་བག་ཆགས་མ་ལུས་པ་སྦྱངས་ཏེ་མཐར་ཕྱིན་པར་བྱེད་དོ། །ཤེས་རབ་ཀྱིས་ནི་སྲིད་མཐར་བྱེད། །ཅེས་པར་བྱའོ། །དེ་འདྲ་
བའི་ཐབས་ཤེས་དེ་ལ་རབ་ཏུ་འཇིག་པ་སྟེ་འཆི་བ་དང་། ཆགས་པས་ཏེ་སྐྱེ་བ་ལེན་པ་མེད་པ་ནི་དོན་དམ་པ་སྟེ་གནས་དོན་ནོ། །འོན་ཀྱང་བལྟམས་པ་དང་མྱ་ངན་ལས་འདས་པ་སྟོན་པ་ནི། ཀུན་རྫོབ་ཏུ་སྟེ་གཞན་དུའོ། །ལ་ལ་སྟེ་སེམས་ཅན་རྣམས་འཚོ་བའི་རྒྱུ་སྲོག་དང་བྲལ་བས་འཆི་མོད་ཀྱང་། གང་ནམ་མཁའ་ཇི་སྲིད་པར་བཞུགས་པའི་རྒྱུ་མཚན་མ་ཚང་བ་མེད་པ་དེ་ལ། འཇིག་པ་དངོས་མེད་ཟད་པའི་འཆི་བ་མེད་དོ། །ཀུ་མུ་ཊིར་འབྱུང་བ་ནི་སྐྱེ་བ་དང་ཟད་པ་སྤངས་པ་དང་འཇིག་པ་ནི་རྟོག་པ་ཐམས་ཅད་འཇིག་པ་དང་། ཤེས་རབ་ནི་བདེ་ཆེན་ལ་བཤད་དོ། །འབྲས་བུ་དེ་དོན་དུ་གཉེར་བ་འདི་འདྲ་བའི་དངོས་གྲུབ་གང་དུ་འགྱུར་ཞེས་དོགས་པ་ལ། བསྐྱེད་པ་ཞེས་པ་བཞི་སྟེ་དང་པོར་སྤྲོས་པ་བསྐྱེད་རིམ་དང་དེ་ནས་རྨི་ལམ་ལྟ་བུར་བྱས་ནས་སྤྲོས་མེད་བསྒོམ་པའོ། །ཇི་ལྟར་ཞེས་པ་བཞིས་ནི། དཀྱིལ་འཁོར་དཔེ་དེ་གསུམ་དང་ཁྱད་པར་དུ་བར་སྲིད་བཞིན་དུ་བསྒོམ་པར་གསུངས་ཏེ། འདི་ལ་ནི་བདག་བྱིན་གྱིས་བརླབ་པའི་སྒྱུ་ལུས་ཤེས་དགོས་སོ། །དཀྱིལ་འཁོར་སྤྲོས་མེད་དུ་འགྱུར་ཚུལ་ཕྱག་རྒྱ་ཆེན་པོ་ཞེས་སོགས་ཀྱིས་སྟོན་པར་ཀུ་མུ་ཊིར་བཤད་དོ། །འོན་ཀྱང་ཕྱག་ཆེན་ལྷན་སྐྱེས་མཚོན་པའི་ཕྱིར་དུ་དབང་གསུམ་པའི་སྐབས་དེར། ཇི་ལྟར་ཤེས་ཤིང་ཉམས་སུ་མྱོང་བའི་བདེ་ཆེན་དེ་ཡིས། རང་གི་སེམས་འདི་ནི་བྱིན་གྱིས་བརླབས་ཏེ་བསྒོམ་པ་ལས་བར་སྲིད་སོགས་དང་འདྲ་བའི་དཀྱིལ་འཁོར་དེ་འབྱུང་གི་དེ་དོར་བའི་རྒྱུ་གཞན་ལས་ནི་དེ་མི་འབྱུང་ངོ་། །བདེ་བ་ཆེན་པོ་དེས་
ཀུན་ལ་ཁྱབ་པར་སྟོན་པ་ནི། བདེ་བར་བརྣག་ཅིང་ནས། བདེ་བར་བརྗོད་ཀྱི་བར་རོ། །རྫོགས་རིམ་སྟོན་པ་ནི་རྡོ་རྗེ་ཞེས་སོགས་ཀྱི་དྲིས་ལན་ནོ། །འདིར་བསྐྱེད་རིམ་བསྒོམ་མི་དགོས་ཞེས་བརྩད་པའི་ལན་དུ། ལུས་ཀྱི་ཞེས་སོགས་ལན་དུ་འགྱུར་ཚུལ་ནི། བདེ་བ་ལ་གཞི་ལམ་འབྲས་གསུམ་གང་གི་སྐབས་སུའང་རྟེན་དུ་གྱུར་པ་དག་པའི་ལུས་ཤིག་དགོས་ལ་འབྲས་བུ་གཟུགས་སྐུའི་ལུས་བསྒྲུབ་པ་ལ་ནི། དེ་དང་རྣམ་པ་རྗེས་སུ་མཐུན་པ་བསྒྲུབ་དགོས་པའི་ཕྱིར་དང་། རྫོགས་རིམ་གྱི་བདེ་ཆེན་བསྐྱེད་པ་ལའང་ཕྱིའི་ཐབས་ལ་ནི་ལྷར་བསྒོམ་པ་ངེས་པར་དགོས་ལ། ནང་གི་ཐབས་ལའང་ལུས་ལྷར་བསྐྱེད་པའི་སྒོ་ནས་བྱ་དགོས་པའི་ཕྱིར་རོ། །དངོས་དང་དངོས་པོ་ང་མ་ཡིན། །ཞེས་པ་དང་། དངོས་པོ་དང་ནི་དངོས་མེད་ང་། ཞེས་པ་གཉིས་དོན་འདྲ་བས་སྔ་མ་ལྟར་ན། དངོས་པོ་དང་དངོས་མེད་ཀྱི་སྐུ་རེ་རེ་བས་སངས་རྒྱས་སུ་མི་འཇོག་པ་དང་། ཕྱི་མ་ལྟར་ན་གཉིས་ཀ་ཚོགས་པས་འཇོག་པ་སྟེ་ཐབས་ཤེས་ཀྱི་སྒོ་ནས་ཀྱང་སྦྱར་རོ། །དངོས་པོ་རྟོགས་ཕྱིར་ཞེས་པ་གསུམ་གྱི་དང་པོ་ནི། བུ་དྡྷའི་སྒྲའི་དོན་དང་མཐུན་པ་ཡིན་ལ། ཕྱི་མ་གཉིས་ནི་ཤེས་རབ་ཆུང་ཞིང་ལེ་ལོ་ཆེ་བས་ང་གོང་ལྟར་ཡིན་པ་མི་ཤེས་ཞེས་པའོ། །འཆད་པ་པོ་ནི་ལོངས་སྐུ་དང་། ཆོས་ནི་ཆོས་སྐུ་དང་། ཉན་པ་ནི་སྤྲུལ་སྐུ་དང་། འཇིག་རྟེན་སྟོན་པ་ནི་གཟུགས་སྐུ་གཉིས་དང་། བསྒྲུབ་བྱ་ནི་ལྷན་སྐྱེས་ཀྱི་ཆོས་སྐུའོ། །འཇིག་རྟེན་ཞེས་པ་གཅིག་ནི་སྔར་ཁྱབ་པར་བསྟན་པ་ལྟར་རོ། །ལྷན་སྐྱེས་ཀྱི་རང་བཞིན་ང་ནི་བདེ་ཆེན་དུ་སྟོན་པའོ། །
དེ་རིགས་མཐུན་གྱི་རྒྱུས་བསྒྲུབ་པ་ནི། མཆོག་མཐའ་ཞེས་པ་གསུམ་མོ། །བཙུན་མོའི་ཞེས་པ་བཞིའི་དང་པོ་ནི་སྐུ་གཉིས་ཀྱི་གནས་བཞིའོ། །དེ་ནས་གཉིས་ནི་ལོངས་སྐུ་དང་། དེ་ནས་གཅིག་གིས་ནི་ཁུ་བ་དང་བདེ་བས་སྐུ་གཞན་གཉིས་མཚོན་ནོ། །དེ་མེད་ཅེས་པ་གཅིག་ནི་ཞུ་བ་མེད་ན་བདེ་བ་མེད་པ་དང་། བདེ་བ་ཞེས་པ་གཅིག་ནི་བདེ་བ་འབྱུང་རུང་དུ་མེད་ན་ཁམས་དྲུག་པའི་ཞུ་བ་མེད་པར་འགྱུར་རོ། །རྟེན་ཞུ་བ་དང་བརྟེན་པ་བདེ་བ་གཉིས་རེ་རེ་རྐྱང་བར་གནས་མི་ནུས་པས་ཕན་ཚུན་བལྟོས་པ་དང་བཅས་པ་ནི། གཞི་ལམ་གྱི་དུས་སུ་ཁམས་དྲུག་པ་ལ་ཡིན་ལ། འབྲས་བུའི་སྐབས་སུ་ནི་དག་པའི་ལུས་མེད་ན་བདེ་བ་མེད་པར་བཤད་དོ། །དེས་ན་ལྷའི་རྣལ་འབྱོར་ལས་བདེ་བར་འགྱུར་བས་དེ་བསྒོམ་པར་བྱའོ། །དེའི་ཕྱིར་ཞེས་པ་གཉིས་ནི་སྔར་བཤད་པ་དང་འདྲའོ། །ཞལ་ཕྱག་ཅེས་པ་གཅིག་ནི་སྔར་དངོས་པོ་ཞེས་པ་དེ་ཡིན་ལ། མཆོག་ཅེས་པ་ནི་དངོས་མེད་ཅེས་པའོ། །འགྲོ་ཀུན་ལྷན་སྐྱེས་དང་དེའང་རང་བཞིན་ལ་དགོངས་པར་བརྗོད་དེ། འགྲོ་བ་རྣམས་རེ་རེའི་རང་བཞིན་དང་དབྱེར་མེད་པའོ། །རྣམ་དག་ཅེས་པས་ནི་སྔ་མ་དེ་གསལ་དུ་བཏང་བའོ། །སངས་རྒྱས་དང་མིའི་ལུས་གཉིས་ཕུང་པོ་ལྔ་པ་ཉིད་དུའང་འདྲ་བ་དང་། ཤ་ལ་སོགས་པ་བུ་ཀ་སི་སོགས་ཀྱི་རྣམ་པར་དག་པའང་འདྲ་བ་ནི་བཞིན་ལག་ཅན་གྱི་ལྷའི་གཟུགས་དང་ལྡན་པའོ། །དེ་ལྟར་བྱེ་བྲག་མེད་ན་སེམས་ཅན་རྣམས་ཅིའི་ཕྱིར་འཁོར་སྙམ་པ་ལ། འོན་ཀྱང་རང་བཞིན་བག་ཆགས་ཀྱིས། །ཞེས་འབྱུང་སྟེ།
ཐོག་མེད་ཀྱི་མ་རིག་པའི་བག་ཆགས་ཀྱི་དབང་གིས་འཁོར་བའོ། །དུག་གི་ཞེས་སོགས་ཀྱིས་ནི་སྔར་བཤད་པའི་འདོད་ཡོན་ལ་ཆགས་པ་ལམ་དུ་བྱེད་པ་ལ་སྐྱོན་མེད་པའི་ཚུལ་སྟོན་ནོ། །མུ་ཏིག་ཕྲེང་བར་ལྷའི་སྐུ་བསྒོམས་པས་ཐ་མལ་གྱི་ལུས་ལྡོག་པའི་དཔེར། དཔེ་མང་པོ་གསུངས་པར་བཤད་དེ། དེ་ལ་དཔེ་སྔ་མ་གཉིས་ཀྱིས་ནི་རིགས་མཐུན་གྱི་གཉེན་པོ་བསྟེན་པས་སྔར་གྱི་དུག་དང་རླུང་ནད་མི་འཕེལ་བར་ཟད་པར་བྱེད་ཅིང་། གཉེན་པོ་གཉིས་ཀྱིས་ཀྱང་མི་འདོད་པ་མི་བསྐྱེད་པ་དེ་བཞིན་དུ། ཆགས་པ་ལམ་དུ་བྱེད་པ་ལའང་ངོ་། །དེ་ཁོ་ན་ཉིད་ལ་སོ་སོར་རྟོག་པའི་རྣམ་རྟོག་གིས་མི་རྟོག་ཡེ་ཤེས་འདྲེན་པ་དང་། སྲིད་པ་སྟེ་འཇིག་རྟེན་པ་ཚོགས་སྦྱོར་གྱི་ལམ་གྱིས། སྲིད་པ་དག་པའི་འཇིག་རྟེན་ལས་འདས་པ་ཟག་མེད་ཀྱི་ཡེ་ཤེས་བསྐྱེད་པ་དང་། དངོས་པོའི་རྣམ་རྟོག་ནི་ཐ་མལ་གྱི་རྟོག་པ་དང་། རྣམ་པར་ངེས་པ་ནི་རྣམ་སྣང་སོགས་སུ་བསྒོམ་པ་དང་། སྦྱོང་བྱེད་ཀྱི་ཆགས་པ་རྣམས་དེ་ཁོ་ན་ཉིད་ལ་ཆགས་པ་དང་། མི་བཟད་པའི་ལས་ཀྱི་གྲོལ་བ་ནི་མངོན་སྤྱོད་ཁྱད་པར་བ་བྱེད་པ་ལ་མུ་ཏིག་ཕྲེང་བར་རོ། །དེ་ལྟར་བཤད་པའི་མེའི་བར་ནི་རིགས་མཐུན་གྱི་གཉེན་པོ་བསྟེན་པར་འོས་པའི་དཔེ་ཡིན་ལ། དོན་ནི་སྐྱེ་བོ་ཞེས་པ་བཞིས་སྤྱིར་བསྟན་ཏོ། །བྱེ་བྲག་ཏུ་བཤད་ནས་འཆིང་རྒྱུ་འདོད་ཆགས་དང་། དེས་གྲོལ་བར་བསྟན་པ་ནི། སྔར་བཤད་པ་ལྟར་འཆིང་རྒྱུ་གཞན་ལ་མི་འཛིན་པར་བྱེ་བྲག་པ་ཆགས་པ་ཡིན་པར་བསྟན་པར་བཞེད་ནས་སོ། །རིགས་མཐུན་བསྟེན་ཚུལ་ནི། འདོད་ཆགས་ལ་མི་སྡུག་པ་བསྒོམ་པའི་རིགས་
མི་མཐུན་མི་བསྟེན་པར་ཐབས་མཁས་གཞན་དང་འབྲེལ་བར་དེ་སྟོན་པའོ། །ཆགས་པས་གྲོལ་ཞེས་པའི་ཆགས་པ་ནི་གང་ཟག་གཞན་ལ་འཆིང་རྒྱུར་བཤད་པའི་ཆགས་པ་ཡིན་པས། དེ་ཁོ་ན་ཉིད་ཀྱི་དོན་རྟོགས་པ་ལ་བཤད་དུ་མི་རུང་ངོ་། །འོ་ན་ཅི་འདྲ་བ་ཞིག་ཡིན་ཞེ་ན། འདོད་ཡོན་ལ་ཆགས་པས་དྲངས་པའི་བདེ་བ་ཆེན་པོས་དེ་ཁོ་ན་ཉིད་ཀྱི་དོན་བསྒོམས་པས། མཐར་ཆགས་སོགས་ཀྱི་ཉོན་མོངས་ཐམས་ཅད་ཟད་པར་བྱེད་པའི་དོན་ཡིན་པས། དེ་ལྟར་བརྒྱུད་པ་མིན་པར་ཆགས་པ་དེ་དེ་ལས་གཞན་པའི་ཆགས་སོགས་ཀྱི་ཉོན་མོངས་ཀྱི་གཉེན་པོར་སྟོན་པ་མིན་ནོ། །དེས་ན་གུར་ལས། འདོད་ཆགས་ཀྱིས་བསྐྱེད་འཇིག་རྟེན་རྣམས། །འདོད་ཆགས་སྤངས་པས་བརླག་པར་འགྱུར། ཞེས་པ་དང་། ཆགས་དང་བྲལ་བའི་བྱང་ཆུབ་ནི། །ཆགས་པ་མཆོག་ལྡན་རྣམས་ཀྱི་སླད། ཅེས་གསུངས་པ་སོགས་ཀྱི་དོན་ནི། འདོད་ཡོན་ལ་ཆགས་པ་ལམ་དུ་བྱས་ནས་དྲངས་པའི་བདེ་ཆེན་གྱི་སྟོང་ཉིད་བསྒོམས་པ་འདྲ་བའི་ནུས་པ་ལམ་གཞན་གང་ལའང་མེད་པའི་གནད་ལ་དགོངས་སོ། །གསུང་རབ་གཞན་ནས་ཆགས་པ་ལ་རང་གི་འཛིན་སྟངས་ཀྱི་ཟློག་ཕྱོགས་འཛིན་པའི་གཉེན་པོ་བསྟེན་པ་ལས་བཟློག་ནས་རིགས་མཐུན་བསྟེན་པའི་བསྒོམ་ཚུལ་འདི། ལམ་འདི་ལ་གཞོལ་བའི་གང་ཟག་ལས་གཞན་པའི་རང་གི་སྡེ་པ་དང་། གཞན་སྡེ་ཐམས་ཅད་ཀྱིས་མི་ཤེས་པར་གསུངས་པས། ཕ་རོལ་ཏུ་ཕྱིན་པ་དང་རྒྱུད་སྡེ་འོག་མ་ནས་
རྟེན་ཁྱད་པར་ཅན་ལ་འདོད་པ་སྤྱོད་ལ་ཐབས་མཁས་དང་ཞེས་སོགས་ཀྱི་ཚུལ་དེ་ཉེས་མེད་དུ་བཤད་པ་ཡོད་ཀྱང་། སྔར་བཤད་པ་དང་གཏན་མི་འདྲ་བའི་ཚུལ་རྣམས་ཞིབ་ཏུ་ཤེས་པར་བྱའོ། །འབྱུང་བ་ལྔའི་ཞེས་པ་ནས་མཆོག་དགའ་བའི་རིགས་ལས་བྱུང་བ་རྣམས་ཞེས་པའི་བར་གྱིས་རྣམ་སྣང་ལ་སོགས་པའི་རིགས་ཇི་སྙེད་པ་ཐམས་ཅད་ལྷན་སྐྱེས་ལས་བྱུང་བར་བསྟན་པའི་དོན་ནི། འདི་ཡིན་ཏེ། ལྷན་སྐྱེས་ཀྱི་བདེ་སྟོང་སྦྱར་བའི་སྟོང་པ་ནི་ཆོས་ཐམས་ཅད་ཀྱི་ཡིན་ལུགས་ཇི་ལྟར་ཡིན་པ་བརྟགས་པ་ན་རང་གི་ངོ་བོ་ཉིད་ཀྱིས་གྲུབ་པའི་རང་བཞིན་མེད་པ་དེར་ཐམས་ཅད་རོ་གཅིག་ཏུ་འགྱུར་བས། ཆོས་ཅན་མི་འདྲ་བ་མཐའ་ཡས་ཀྱང་དེའི་རིགས་ལས་མི་འདའ་བའི་ཚུལ་ཞིག་སྟེ་འདི་ནི་རྒྱུད་སྡེ་གཞན་དང་ཐེག་པ་གཞན་དང་ཡང་ཐུན་མོང་ངོ་། །དེ་ལྟར་སྟོང་པ་ལ་གང་ཟག་གི་བདག་མེད་ཕྲ་རགས་གཉིས་དང་། དབུ་སེམས་ཀྱི་དབྱེ་བས་ཆོས་ཀྱི་བདག་མེད་ལ་ཕྲ་རགས་གཉིས་ལ་སོགས་པའི་རིམ་པ་དུ་མ་ཞིག་བཤད་ཀྱང་མཐར་ཐུག་པར་གཏུགས་ན་ནི་སྔར་བཤད་པའི་སྟོང་པ་དེའི་ངོ་བོར། ཆོས་ཅན་ཐམས་ཅད་གནས་དགོས་པ་བཞིན་དུ། སྟོང་ཉིད་དེ་བསྒོམ་པ་ལའང་ཐབས་རྒྱ་ཤིན་ཏུ་ཆུང་བ་ཐེག་དམན་པ་དང་། ཤིན་ཏུ་རྒྱ་ཆེ་བ་ཕར་ཕྱིན་གྱི་ཐེག་ཆེན་དང་། སྔགས་དང་ཕྱག་རྒྱ་དང་ལྷའི་རྣལ་འབྱོར་དང་། གནས་སྐབས་ཀྱི་དངོས་གྲུབ་རིགས་མི་འདྲ་བ་དུ་མ་ལ་བརྟེན་ནས་སྒོམ་པའི་རིགས་ཇི་སྙེད་ཅིག་གསུངས་ཀྱང་། ལྷན་སྐྱེས་ཀྱི་བདེ་ཆེན་བསྐྱེད་ཐབས་གསལ་བར་མ་བསྟན་པ་ཐམས་ཅད་དུ། སྟོང་ཉིད་
བསྒོམ་པའི་ཡུལ་ཅན་ཁྱད་པར་ཅན་གདུལ་བྱའི་དབང་གིས་མ་བསྟན་པར་སྦས་པ་ཡིན་ལ། རྣལ་འབྱོར་བླ་མེད་ཀྱི་རྒྱུད་དུ་ནི་དེའང་གསལ་བར་སྟོན་པས་སྟོང་ཉིད་བསྒོམ་པའི་ཡུལ་ཡུལ་ཅན་གཉིས་ཀ་ཚང་བར་གསལ་བར་བཤད་པ་ནི། འདི་ཁོ་ནར་ངེས་པས་དེ་བསྒོམ་པའི་ཡུལ་ཅན་མཐར་གཏུགས་པ་ནའང་བདེ་བ་ཆེན་པོ་ཉིད་ཡིན་པས། དེ་བཞིན་གཤེགས་པ་རྣམས་གང་ལས་སྐྱེ་བའི་རིགས་སྤྱི་དང་བྱེ་བྲག་མཐའ་ཡས་པ་ཐམས་ཅད་ཀྱི་གནས་ནི་དེར་ངེས་སོ། །རིགས་དེས་ཁྱབ་ཚུལ་ལ་སྟོང་པའི་ཕྱོགས་ཀྱིས་ནི་སེམས་ཅན་ཐམས་ཅད་ལ་དངོས་སུ་ཁྱབ་ལ། བདེ་བས་ནི་དངོས་དང་འབྱུང་རུང་ཅི་རིགས་སུ་ཁྱབ་པའོ། །དེས་ན་གོང་དུ་ཆགས་པ་ལམ་བྱེད་བཤད་པ་དཔེ་མང་པོས་བསྒྲུབས་ཤིང་། དེས་ན་རྣམ་སྣང་སོགས་ཀྱི་བསྐྱེད་རིམ་སྟོན་པ་ན། རྡོ་རྗེ་དང་པདྨ་སྦྱར་ནས་ལྷན་སྐྱེས་ཀྱི་དགའ་བ་བསྐྱེད་པའི་ཚུལ་བསྟན་ཏོ། །ལེའུ་གསུམ་པའི་འབྲེལ་ནི་སྔར་བཤད་པའི་དངོས་གྲུབ་ཀྱི་ཐབས་ནི་འདུས་པ་ལ་སོགས་པའི་ཐབས་རྒྱུད་ཐམས་ཅད་ཀྱི་གླེང་གཞི་ཞེས་གྲགས་པའི་དོན་འདིས་སྟོན་པ་དང་། གླེང་གཞིའི་སྐད་དོད་ཀྱི་སྟེང་ནས་ངེས་པ་ལ་འཇུག་པ་ཡོད་པས། དེ་རྣམས་ལ་ངེས་པ་སྟེར་བའམ། དེ་རྣམས་ཀྱི་ངེས་པར་ཀུ་མུ་ཊིར་རོ། །རྒྱུད་ཀྱི་གླེང་གཞིའི་དོན་གང་གི་རྒྱུད་ཐམས་ཅད་ལ་འཇུག་པའི་ཐབས་དང་། ཐབས་དེས་དངོས་གྲུབ་འགྲུབ་པའི་ཐབས་སུ་པདྨ་ཅན་ལས་སོ། །ཐབས་དེ་མདོར་བསྟན་པ་ནི་སྡོམ་པ་དང་དབང་དང་། བརྡའི་སྐད་ཀྱི་དོན་དང་། དགའ་བ་དང་
སྐད་ཅིག་མའི་དབྱེ་བ་དང་། བཟའ་བ་ལ་སོགས་པའོ། །སྡོམ་པ་ནི་ཤམ་པར་བདེ་བའི་མཆོག་དང་། ཆོས་ཐམས་ཅད་འོད་གསལ་དུ་སྡུད་པའོ། །དབྱེ་བ་ནི་གཉིས་ཏེ་ཐབས་སངས་རྒྱས་ཀྱི་སྡོམ་པ་དང་། ཤེས་རབ་རྣལ་འབྱོར་མའི་སྡོམ་པ་སྟེ་དེ་གཉིས་ནི་སངས་རྒྱས་ཀུན་གྱིས་ཞེས་པ་བཞི་དང་། ཨེའི་ཆ་བྱད་ཅེས་པ་བཞིས་བསྟན་ཏོ། །འདིར་རྒྱུད་ཐམས་ཅད་ནི་སཾབྷུ་ཊི་ལས། རྒྱུད་ཐམས་ཅད་ཀྱི་གླེང་གཞི་ཞེས་པ་ལ། རྒྱུད་ཐམས་ཅད་ནི་འདུས་པ་ལ་སོགས་པའོ། །ཞེས་གསུངས་པ་ལྟར་ཡིན་ལ། གླེང་གཞི་ཞེས་གྲགས་པའི་མིང་གི་དོན་དུ་གྱུར་པའི་ཐབས་ནི། དོན་དེ་རྟོགས་པས་འདུས་པ་སོགས་ཀྱི་རྒྱུད་ཐམས་ཅད་ཀྱི་གནད་དོན་རྟོགས་པ་ལ་འཇུག་པའི་ཐབས་དང་། ཚེ་འདིར་མཆོག་འགྲུབ་པའི་ཐབས་སོ། །དེ་ནི་སྤྱིར་གསུང་རབ་ཐམས་ཅད་དང་། ཁྱད་པར་དུ་རྣལ་འབྱོར་བླ་མེད་ཀྱི་དོན་གྱི་གཙོ་བོའི་གནད་ཐམས་ཅད་གླེང་གཞིའི་སྐབས་སུ་འབྱུང་བའི་ཨེ་བཾ་གྱི་དོན་དུ་འདུ་བར་རྒྱུད་མང་པོ་ལས་གསུངས་པས། འདིར་དེ་བཞིན་དུ་ཤེས་དགོས་སོ། །དེ་ལྟར་ན་ཨེ་བཾ་གྱི་དོན་ལ་གསུམ་དུ་དབྱེ་སྟེ། ཐོབ་བྱ་འབྲས་བུའི་ཨེ་བཾ་དང་། ཐོབ་བྱེད་ལམ་གྱི་ཨེ་བཾ་དང་། དེ་འདྲེན་བྱེད་རྟགས་ཀྱི་ཨེ་ཝཾ་མོ། །དེའི་དང་པོ་ནི་རྡོ་རྗེ་བཙུན་མོ་ཞེས་པ་བཞི་དང་། བཙུན་མོའི་བྷ་ག་བདེ་ཆེན་དུ། །སྟོན་པ་སུམ་ཅུ་རྩ་གཉིས་མཚན། །ཞེས་པ་བཞིས་བསྟན་ཏེ། ཆོས་འབྱུང་དང་དེའི་ནང་གི་གཞལ་ཡས་ཁང་ནི་རྟེན་གྱི་དོན་ཨེ་དང་། དེར་བཞུགས་པའི་རྒྱུད་འཆད་པ་པོ་ནི་བརྟེན་པའི་དོན་བཾ་མོ། །ཡང་
ཆོས་གཟུགས་གཉིས་སམ་འབྲས་བུའི་བདེ་སྟོང་གཉིས་ལའང་སྦྱར་རོ། །གཉིས་པ་ནི། ཨེ་བཾ་རྣམ་པའི་བདེ་ཆེན་པོ། །ཞེས་སོགས་ཀྱིས་བསྟན་ཏོ། །གསུམ་པ་ནི། སངས་རྒྱས་ཞེས་པའི་རྐང་པ་དང་པོ་དང་། རྐང་པ་གསུམ་པ་སྦྱར་བ་དེ་གང་དུ་གནས་པའི་གཞི་རྐང་པ་གཉིས་པས་བསྟན་པ་དང་། །མཁའ་འགྲོ་མའི་སྡོམ་པའི་སྐབས་ཀྱི་ཨེ་བཾ་གྱིས་སྟོན་ནོ། །ཀུ་མུ་ཊིར་རབ་ཏུ་གནས་པའི་དོན་འབྱུང་བའི་གནས་ཏེ། དེ་ལས་བདེ་ཆེན་སྐྱེ་བ་ལ་བཤད་ལ། པདྨ་ཅན་ལས་ཀྱང་། ཨེ་དང་བཾ་ལས་དབང་བསྐུར་བས་ཤེས་པར་བྱེད་པའོ། ཞེས་སོ། །དབང་ལས་ཤེས་པས་བདེ་ཆེན་དེས་དྲི་མ་འཁྲུད་པས་ཡང་དག་ཏུ་བཤད་པས། ཡང་དག་བདེ་ཆེན་གྱི་ཁྱད་པར་དུ་བྱའོ། །དབང་ལས་བདེ་ཆེན་ཤེས་པར་བྱ་བའི་དོན་དེ་གསལ་བར་བྱེད་པ་ནི། དེ་ནས་ཞེས་སོགས་སོ། །ཨེའི་ཆ་བྱད་ནི་དེའི་དབྱིབས་ཅན་གྱི་ཤེས་རབ་བོ། །གང་ཞེས་པ་ནི་སྤྱིར་བསྟན་པ་དང་། བཟང་པོ་ནི་དེར་བཅོས་ལྡན་འདས་བདེ་ཆེན་རོལ་པ་དང་། བཾ་ནི་ཐབས་དང་། དབུས་སུ་ནི་ཟེའུ་འབྲུ་ལ་དེས་བརྒྱན་པར་བྱས་པ་དང་། རིགས་ལྔ་པོ་ཐམས་ཅད་ཀྱི་བདེ་བའི་གནས་ཏེ་གཞི་དང་། སངས་རྒྱས་ནི་རྣམ་སྣང་སོགས་དང་། དེ་ཉིད་ཀྱི་ཁྱད་པར་དུ་འཕགས་པ་རིན་ཆེན་དང་། ཟ་མ་ཏོག་ནི་དེའི་གནས་སུ་ཀུ་མུ་ཊིར་བཤད་ཅིང་། པདྨ་ཅན་ལས་ཨེ་བཾ་ནི་ཐབས་དང་ཤེས་རབ་ལ་བཤད་པའི་དོན་ནི། ཐབས་སྒྲུབ་པ་པོ་དང་། ཤེས་རབ་རིག་མ་དང་། དེ་གཉིས་ཀྱི་རྟགས་གཉིས་ལའང་སྦྱར་རོ། །
ནང་གི་ལུས་ལ་སྦྱར་བ་ནི་སཾ་བྷུ་ཊིར་རྩ་འཁོར་བཞིའི་གཉིས་ཨེ་དང་། གཉིས་བཾ་གྱི་རྣམ་པར་གནས་པར་བཤད་པའོ། །འོ་ན་མཁའ་འགྲོ་མའི་སྡོམ་པ་ཤེས་པ་དང་། མི་ཤེས་པ་སྤྱོད་པ་འདིས་ཅི་ཞིག་བྱ་སྙམ་པ་ལ། སྐད་ཅིག་མ་བཞིའི་དབྱེ་བས་ཕྱེ་བའི་དགའ་བ་བཞི་པོ་ནི་མཁའ་འགྲོ་མའི་སྡོམ་པར་བཤད་པའི་ཨེ་ཝཾ་དེ་ལས་སྐྱེ་བར་འགྱུར་བས་དེ་ཤེས་དགོས་སོ། དེ་ལྟར་ན་སངས་རྒྱས་སྡོམ་པའི་ཨེ་ཝཾ་གྱི་བདེ་སྟོང་སྦྱར་བ་ནི་བསྐྱེད་བྱ་ཡིན་ལ། མཁའ་འགྲོ་མའི་སྡོམ་པའི་ཨེ་ཝཾ་ཐབས་ཤེས་གཉིས་ནི། སྔ་མ་དེ་སྐྱེད་པ་པོ་དང་། རྟགས་ཀྱི་ཨེ་ཝཾ་གཉིས་སྡོམ་པ་སྟེ་འདུས་པ་ནི་བསྐྱེད་ཐབས་དང་། དེའང་ཐོག་མར་དབང་གསུམ་པ་བསྐུར་ནས་མཚོན་དགོས་པར་བསྟན་ཏོ། །གླེང་གཞིའི་དོན་འདི་ལྟར་བཤད་པ་འདི་ནི། བླ་མེད་ཀྱི་རྒྱུད་ཐམས་ཅད་ལ་འཇུག་པ་དང་མཆོག་འགྲུབ་པའི་ཐབས་སོ། །སྐད་ཅིག་གི་དབྱེ་བ་བཞི་ཡོངས་སུ་ཤེས་ན། ཨེ་བཾ་སྡོམ་པའི་གཞིར་རབ་ཏུ་གནས་པའི་བདེ་ཆེན་ཤེས་པར་འགྱུར་རོ། །སྐད་ཅིག་མའི་མིང་གིས་དབྱེ་བ་ནི་སྣ་ཚོགས་ཞེས་པ་བཞིའོ། །དེ་ལྟར་ཞེས་པ་ནི་ཨེ་བཾ་གྱི་སྡོམ་པར་ཤེས་པར་བྱེད་པའོ། །འཁྱུད་དང་ཞེས་པ་བརྒྱད་ཀྱིས་དེ་བཞིའི་མཚན་ཉིད་བསྟན་ཏོ། །འདིའི་སྐབས་སུ་པདྨ་ཅན་དང་ཀུ་མུ་ཊི་གཉིས་ཀ་ནས། རྣམ་པ་སྣ་ཚོགས་སྣ་ཚོགས་དགའ། །འོ་དང་འཁྱུད་པ་ལ་སོགས་པའོ། །རྡོ་རྗེ་པདྨ་མཉམ་སྦྱོར་བས། །རྣམ་པར་སྨིན་པ་ཡེ་ཤེས་མཆོག །རྣམ་ཉེད་ཕྱག་རྒྱ་ཉེད་པའོ། །མཚན་ཉིད་བྲལ་བ་ངེས་བརྟག་བྱ། །ཞེས་དྲངས་པ་ནི་
ད་ལྟ་གཞུང་ན་འདུག་པ་དང་ཅུང་མི་འདྲ་ལ། མུ་ཏིག་ཕྲེང་བར་གཞུང་གི་འགྱུར་གཞན་ལ་བཤད་པ་མཛད་དོ། །སྐད་ཅིག་མ་དང་དགའ་བ་སྦྱོར་བ་ནི་སྣ་ཚོགས་དང་པོའི་དགའ་བ་ཞེས་པ་བཞིའོ། །དགའ་བ་རྣམས་སྐད་ཅིག་མ་དང་སྦྱོར་བ་ནི་དགའ་བ་ཤེས་པས། སྐལ་བ་དང་ལྡན་པར་བྱེད་པའི་རྒྱུ་ནི་དབང་སྟེ་དེ་ནི། སློབ་དཔོན་ཞེས་པ་བཞིས་སྟོན་ནོ། །གང་ལས་གང་དུ་ཇི་ལྟར་བསྒྲུབ་པར་བྱ་བ་བརྟག་སྙམ་པ་ལ། སློབ་དཔོན་ཞེས་སོགས་གསུངས་པར་བཤད་དེ། དགའ་བ་རྣམས་གང་ལས་བརྟག་པ་ནི་དབང་བསྐུར་བ་ལས་སོ། །དབང་གང་གི་སྐབས་སུ་བརྟག་པ་ནི་གསུམ་པར་རོ། །ཇི་ལྟར་བརྟག་པ་ནི་སློབ་མས་བླ་མ་ལ་མཆོད་བསྟོད་སྔོན་དུ་བཏང་བ་དང་། དེ་ལ་བླ་མས་རིག་མ་གཏོད་པ་སོགས་མཛད་པའོ། །དེ་ནས་དེ་ལྟར་བཞི་པའང་ཞེས་ལ། དེ་ནས་ནི་གང་བསྒྲུབ་པར་བྱ་བའི་བདེ་བའོ། །དེ་བཞིན་དཔེའི་བདེ་བ་ལས་འདས་པའོ། །ཡང་ནི་ཕྱིས་སྨྲ་བར་བྱ་བའོ། དེ་བཞིན་གྱིས་ནི་དཔེ་དང་ཆོས་མཐུན་པར་མན་ངག་གིས་སྟོན་པ་མུ་ཏིག་ཕྲེང་བར་རོ། །དབང་གི་གྲངས་ཀྱི་དགའ་བ་སོགས་ཤེས་པར་བྱེད་ཚུལ་ནི་རྒོད་པ་དག་པ་ཞེས་སོགས་བཞིས་སྟོན་པར་ཀུ་མུ་ཊིར་རོ། །པདྨ་ཅན་ལས་སློབ་དཔོན་གྱི་དབང་གིས་ནི། ཆུ་ལ་སོགས་པ་ཀུན་བསྡུས་ཏེ་དེས་སྐུ་དག་པ་དང་། གསང་དབང་གིས་གསུང་དག་པ་དང་། གསུམ་པས་ཐུགས་དག་པས་བསྒྲུབ་བྱ་བཞི་པ་བསྒྲུབ་པར་བྱའོ། །དབང་གསུམ་པ་བསྐུར་བ་གཅིག་པུར་དབང་
བསྐུར་བཞི་འོང་ཚུལ་ནི། རྒོད་པ་ཞེས་པ་བཞིའོ། །རྒོད་པ་དང་སྨྲ་བ་སོགས་དག་པ་དང་། གསང་གནས་སུ་བསྟ་བ་དང་། ལག་པས་འཁྱུད་པ་དང་། ཕན་ཚུན་དུ་འདུས་ནས་འཁྱུད་པ་ཐབས་ཤེས་དབྱེར་མེད་ཀྱི་ཡེ་ཤེས་དེར་གནས་པར་བཤད་དོ། །རྒོད་པ་ནི་གཉིས་ཀས་དགའ་བ་འདོད་ནས་རྩོམ་ཞིང་སྤྱོད་པ་དང་། བལྟ་བ་ནི་མཚན་མ་སྦྱོར་བ་དང་། ལག་བཅངས་ནི། ཤེས་རབ་ཀྱིས་ཀུན་ཏུ་འཁྱུད་པས་ཕུལ་དུ་བྱུང་བའི་ཡེ་ཤེས་བསྐྱེད་པ་དང་། གཉིས་གཉིས་འཁྱུད་ནི་སྦྱོར་བའི་དགའ་བ་སྐྱེས་པ་ལ་མུ་ཏིག་ཕྲེང་བར་རོ། །གཏོར་ཞེས་པ་ལ་པདྨ་ཅན་དང་མུ་ཏིག་ཕྲེང་བར་བཀྲུས་ཞེས་འབྱུང་ངོ་། །བླུགས་པ་ནི་ནི་ཥི་ཏ་ཞེས་པས་ལུགས་སུ་བླུག་པའི་རྣམ་པར་བྱེད་པའོ། །གསང་དབང་སྔར་བཤད་ཀྱང་མཐེབ་སྲིན་གྱིས་སྟེར་བ་མ་བཤད་པ་འདིར་བཤད་དོ། །སློབ་མ་ཤེས་པ་ནི་གསུམ་པ་དངོས་དབང་དུ་བསྐུར་བའི་སྐལ་ལྡན་དུ་ཤེས་པའོ། །གཅིག་བཞེད་ནི་གཅིག་ཏུ་གུས་དང་གཅིག་ཏུ་བརྩོན། ཞེས་བསྒྱུར་ཏོ། །མཆོག་ཏུ་ནི་ཕྱི་ནས་སློབ་མས་མཆོག་ཏུ་དགའ་བ་ཐོབ་པའོ། །དབང་གཞན་གསུམ་བསྐུར་ནས་བཞི་པ་ནི་འདི་ཉིད་ཅེས་པ་ལྔས་སྟོན་པར་པདྨ་ཅན་ལས་སོ། །དེའང་ཐམས་ཅད་དུ་ཁྱབ་པར་བྱེད་པ་དང་གཉིས་སུ་མེད་པ་དང་། སྟོང་ཉིད་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་དང་། གཉིས་སུ་གཟུགས་དང་མི་ལྡན་པའི་དེ་ཁོ་ན་ཉིད་ཅེས་བཤད་དོ། །རྣལ་འབྱོར་མའི་རྒྱུད་དུ་ནི་དོན་གྱི་བཞི་པ་བདེ་སྟོང་ལ་བྱེད་པ་མང་ཡང་། ཡན་ལག་བདུན་ལྡན་དུ་བཤད་པས་ཁ་བསྐང་
ན་ལེགས་སོ། །ཡེ་ཤེས་དེ་ཐབས་གང་གིས་འགྲུབ་པ་ནི། དཀྱིལ་འཁོར་འཁོར་ལོ་སོགས་ཐབས་ཀྱིས། ཞེས་པདྨ་ཅན་དང་མུ་ཏིག་ཕྲེང་བར་རོ། །སོགས་ཀྱི་དོན་མུ་ཏིག་ཕྲེང་བར་དཔའ་བོ་གཅིག་ཕུ་བསྒོམ་པ་ལ་བཤད་ཀྱང་། རང་བྱིན་རླབས་ལ་བཤད་ན་འོག་ནས་འབྱུང་བ་དང་མཐུན་ནོ། །རྣལ་འབྱོར་མ་རྣམས་ལ་བཟོད་པར་གསོལ་བ་ནི། རྣལ་འབྱོར་མའི་བདག་ཉིད་ཆེན་པོ་སྟོན་པ་ལ་ཡིན་པར་མུ་ཏིག་ཕྲེང་བར་རོ། །འཁྲུལ་བ་ནི་ཐེ་ཚོམ་སྐྱེས་པའི་དོན་ནོ། །དཀྱིལ་ནི་སྙིང་པོ་དང་། དེའང་བྱང་ཆུབ་སེམས་ནི་བདེ་ཆེན་པོ། ཞེས་པ་ལ་ཀུ་མུ་ཊིར་ཀུན་རྫོབ་དང་དོན་དམ་གཉིས་བཤད་དེ་འོག་ནས་འཆད་པ་ལྟར་བྱའོ། །མཎྜ་ལའི་ལ་ཡིག་ནི་གསུང་ལེན་པའི་དོན་ཏེ། བྱང་ཆུབ་ཀྱི་སེམས་གཉིས་པོ་དེ་ཐོབ་པར་བྱེད་པ་ཡིན་ལ། དེའང་ཞེས་པ་གཉིས་ཀྱིས་བསྟན་ཏོ། །བྱང་ཆུབ་ཀྱི་སེམས་ནི་ལྷ་རྣམས་འདུས་པས་ན། བསྟན་པའི་དཀྱིལ་འཁོར་གྱི་སྒྲས་བསྟན་ཏོ། །དེས་དཀྱིལ་འཁོར་བཤད་ནས་འཁོར་ལོའི་དོན་ནི། གཟུགས་སྒྲ་སོགས་ཀྱི་ཡུལ་ཡོངས་སུ་སྦྱོར་བ་སྟེ་མི་མཐུན་ཕྱོགས་གཅོད་པས་སོ། །དེའང་ནམ་མཁའ་དང་འདྲ་བའི་སྟོང་ཉིད་རྟོགས་པའོ། །བྷོ་ལ་ཞེས་པ་གཉིས་ཀྱིས་ནི་དཀྱིལ་གྱི་དོན་དུ་བཤད་པ་དེ་འཐོབ་པར་བྱེད་པའི་ཐབས་བསྟན་པའོ། །དེ་ལྟར་ན་ཐབས་ཤེས་ཀྱི་རྟེན་གཉིས་མཉམ་པར་སྦྱར་བ་ལས་སྙིང་པོའི་ཕྱོགས་གཅིག་ཀུནྡ་ལྟ་བུ་བླངས་པ་ལ་བརྟེན་ནས་སྙིང་པོའི་ཕྱོགས་གཅིག་བདེ་ཆེན་
བསྐྱེད་ལ། དེ་དང་འཁོར་ལོའི་དོན་སྟོང་ཉིད་གཉིས་སྦྱར་བས་མ་དག་པ་སྦྱོང་བར་བྱེད་པ་དེ་གོམས་པས་དོན་གྱི་དབང་བཞི་པ། འདི་ཉིད་ཡེ་ཤེས་ཆེན་པོ་ཉིད་ཅེས་སོགས་ཀྱི་དོན་སྐྱེད་པར་བྱེད་དོ། །དབང་ཐོབ་པ་དེས་སྡོམ་པ་དང་དམ་ཚིག་ཇི་འདྲ་བ་ཞིག་གིས་གནས་པར་བྱ་བ་ནི། སྲོག་ཆགས་གསོད་པ་སོགས་བཞིའོ། །དེ་ལ་དྲང་ངེས་ཀྱི་དམ་ཚིག་གཉིས་ལས། དྲང་དོན་རྟོགས་སླ་བས། ངེས་དོན་བཤད་པ་ནི། སེམས་གཅིག་ཅེས་པ་དྲུག་གོ །རྣམ་པར་རྟོག་པའི་སེམས་བསྡུས་ནས་དེ་བཞིན་ཉིད་དུ་རོ་གཅིག་པར་བྱེད་པ་ནི་གསོད་པ་ཡིན་ཏེ། རྒྱུ་མཚན་གང་གིས་ཕྱིར་ན། སྲོག་ཆགས་སམ་སེམས་ཅན་དུ་ཐ་སྙད་འདོགས་པའི་གཞི་ནི་སེམས་ཡིན་པས་ན་དེ་སྡུད་པ་ནི་གསོད་པའོ། །འཇིག་རྟེན་ཞེས་པ་རྫུན་ཚིག་ཏུ་འགྲོ་ཚུལ་ནི། བསྒྲལ་བྱའི་བདག་མ་དམིགས་པ་དང་། ཐ་སྙད་དུ་སེམས་ཅན་ནམ་མཁའ་ལྟར་མཐའ་ཡས་པས་དེ་སྒྲོལ་མི་ནུས་པའོ། །ཕ་རོལ་གྱི་བུད་མེད་ནི་རང་དང་སྐལ་བ་མཚུངས་པའི་མཛེས་མ་ཡིན་ལ། དེ་བསྟེན་པ་ནི་དེ་དང་འདུ་བའོ། །དེའི་ཚེ་བཙུན་མོའི་ཁུ་བ་དེས་མ་བྱིན་པར་ཚུར་ལེན་པ་ནི་མ་བྱིན་པར་ལེན་པའོ། །འདིས་ནི་རིག་མའི་དམར་ཆ་ཚུར་འདྲེན་པར་འདོད་པ་བཀག་ལ། དཀར་ཆ་འདྲེན་ལུགས་ནི་རྩ་བཙལ་ཏེ་རྙེད་པ་ན་ཇི་ལྟར་བྱ་བ་ཤེས་པ་ལ་རག་ལུས་སོ། །བུད་མེད་བསྟེན་པ་སྒྲ་ཇི་བཞིན་མ་ཡིན་པའི་བཤད་པ་ནི་སྟོང་ཉིད་བསྒོམ་པ་ལ་བཤད་པ་མང་ངོ་། །དེ་ནས་ཞེས་སོགས་ཀྱིས་ནི་སྔར་ཡུལ་རྣམས་སྦྱོང་བར་བྱེད་པ་འདྲི་བར་
འདོད་ནས་དྲིས་ལ། དྲི་བའི་དོན་ནི་སྦྱང་གཞི་ཕུང་ཁམས་སྐྱེ་མཆེད་དང་དེའི་རང་བཞིན་རྟོགས་ནས་སྦྱོང་བའི་རང་བཞིན་ཇི་ལྟར་ཡིན་ཞེས་ཞུས་སོ། །དྲི་བ་སྔ་མའི་ལན་ནི། ཡུལ་དྲུག་གི་ནི་ཞེས་པ་ནས་བཅོ་བརྒྱད་རྣམས་སུ་བཤད་ཅེས་པའི་བར་རོ། །གཉིས་པའི་ལན་ནི། རང་བཞིན་ཞེས་པ་བཞིའོ། །འདོད་པས་ཞེས་པ་ནི་བྱང་ཆུབ་འདོད་པས་རྣལ་འབྱོར་མ་ཞེས་པའོ། །དེ་ནི་རིགས་པ་དྲུག་ཅུ་པ་ལས་རྒྱུ་རྐྱེན་ལས་སྐྱེས་པ་རྣམས་རང་གི་རང་བཞིན་གྱིས་མ་སྐྱེས་པར་གསུངས་པ་ཀུ་མུ་ཊིར་དྲངས་ཤིང་། གཅིག་དང་དུ་བྲལ་གྱིས་བསྒྲུབ་པའང་བཤད་དོ། །རང་བཞིན་གྱིས་མ་སྐྱེས་པ་ལ་རྒྱུ་རྐྱེན་ལ་བརྟེན་ནས་སྐྱེ་བ་མི་འགལ་བ་ནི། འདི་ལྟ་སྟེ་ཞེས་སོགས་ཀྱིས་སྟོན་པ་ནི་པདྨ་ཅན་དང་ཀུ་མུ་ཊི་གཉིས་ཀའི་དགོངས་པའོ། །ཀུན་རྫོབ་པའི་བུམ་པ་ལྟར་བདེན་པ་མིན་པ་དང་། རི་བོང་གི་རྭ་ལྟར་རྫུན་པ་མིན་པར་ཀུ་མུ་ཊིར་རོ། །རྒྱུད་གཉིས་ལས། བཙལ་ན་གཅིག་ནའང་ཡོད་པ་མིན་པ་རྒྱུ་མཚན་དུ་བྱས་ནས་མེ་དེ་བདེན་པ་མིན་པར་བསྒྲུབས་པས་ན། གོང་དུ་རྐྱེན་གསུམ་ཚོགས་པ་ལས་མེ་འབྱུང་བར་བསྟན་པ་རྒྱུ་མཚན་དུ་བྱས་ལ། རྫུན་པ་མིན་པར་ཤེས་པར་བྱའོ། །དེ་ནི་གུར་ལས། ཀུན་རྫོབ་ཏུ་ནི་འཇིག་རྟེན་ཡོད། །དཔྱད་པས་གང་ནའང་འཇིག་རྟེན་ཅི། །ཞེས་འབྱུང་བ་དང་འདྲ་སྟེ་གནད་ཤིན་ཏུ་ཆེའོ། །སྔོན་བྱུང་ལ་རྣལ་འབྱོར་མ་རྣམས་ཀྱིས་དེ་ལྟར་རྟོགས་པའི་རྗེས་སུ། སྟོན་པ་ལ་བདེ་བ་བསྐྱེད་པའི་གསང་མཆོད་ཀྱིས་མཆོད་པ་ནི།
རྗེས་འཇུག་ལ་དེ་ཁོ་ན་ཉིད་ཀྱི་ལྟ་བ་གཏན་ལ་འབེབས་པའི་འོག་ཏུ། བདེ་ཆེན་བསྐྱེད་ནས་བསྒོམ་དགོས་པར་སྟོན་ནོ། །སྔར་མདོར་བསྟན་ཏུ། གཞན་ཡང་བཟའ་བ་ལ་སོགས་པ། །ཞེས་གསུངས་པའི་དོན་བཤད་པར་བཞེད་ནས་བཤད་པར་ཞལ་གྱིས་བཞེས་པ་ནི། དེ་ནས་བཅོམ་ལྡན་འདས་དགྱེས་ནས་ཞེས་པ་ནས་ཉོན་ཞེས་པའི་བར་རོ། །བཤད་པ་དངོས་ནི་བཟའ་བཏུང་ཞེས་པ་ནས། མགོ་སྐྱེས་ལེགས་པར་བཅིང་བར་བྱ། །ཞེས་པའི་བར་རོ། །དེས་ན་དེ་འདྲ་བའི་སྟོང་ཉིད་ནམ་མཁའི་ཁམས་ལྟ་བུ་རྟོགས་པའི་བློས་མ་དག་པ་སྦྱང་བར་བྱའོ་ཞེས་གོ་བར་བྱའོ། །དེ་ལ་བཟའ་བ་ནི་ཤ་ལྔ་ལ་སོགས་པ་དང་། བཏུང་བ་ནི་བྱང་ཆུབ་ཀྱི་སེམས་ལ་སོགས་པ་དང་། བགྲོད་བྱ་ནི་ཡུལ་ལས་བྱུང་བའི་བདེ་བ་དང་། བགྲོད་མིན་ནི་ཡུལ་ལས་འདས་པ་དང་། གཙང་སྦྲ་ནི་དག་པར་རྟོགས་པ་སྟེ་ཆོས་ཀྱི་དབྱིངས་རྟོགས་པ་ལས་ལྷག་པའི་གཙང་སྦྲ་མི་བྱེད་པ་དང་། གྲོང་གི་ཆོས་ནི་བདེ་བ་སྟེ་དེ་ཤེས་ནས་མི་སྤོང་བ་སྟེ། གྲོང་གི་ཆོས་ནི་སྤོང་མི་བྱེད་ཅེས་པར་བསྒྱུར་ཏོ། །རྣལ་འབྱོར་གྱི་གཉིད་མི་སྤོང་བ་དང་། མིག་གཏི་མུག་རྡོ་རྗེ་ལ་སོགས་པའི་རྣམ་པར་བསྒོམས་ནས་དབང་པོས་ཡུལ་གྱི་རོ་མྱང་བར་བྱེད་པ་མི་འགོག་གོ །དགྲ་གཉེན་ལ་ཁྲོ་ཆགས་མི་བྱེད་པ་དང་། ལྷ་རྣམས་ལ་ཕྱག་མི་བྱེད་པ་ནི། དེ་དག་དང་བདག་ལ་སོ་སོར་འབྱེད་པའི་བློ་མི་བསྐྱེད་པའོ། །གཡུང་མོ་སོགས་ལའང་བདག་གི་ལུས་ཧེ་རུ་ཀའི་སྐུ་ལྟ་བུར་བྱས་ནས་རེག་པའོ། །རེག་རིང་ཞེས་འདོན་པ་ལྟར་ན་རེག་པ་ཡུན་རིང་དུ་བྱེད་པའོ། །བུ་རམ་ནི་ཁྲག་
དང་། ཆང་ནི་རྐང་མར་དང་། དུག་ནི་ཞག་དང་། ནིམ་པ་ནི་པགས་པ་སྟེ། དེའང་བུ་བཙས་ཏེ་བུ་བཙས་པ་ལས་བྱུང་བའོ། །དྲི་ང་སོགས་ནི་རུལ་བ་ཆང་དང་ཆུ་དང་ཁྲག་དང་ཞེས་པར་བསྒྱུར་ནས་རིམ་པ་བཞིན་དུ་དོན་གྲུབ་དང་རྣམ་སྣང་མི་བསྐྱོད་པ་དང་། རིན་འབྱུང་དུ་བཤད་དེ། སྣང་མཐའ་བྱང་སེམས་དཀར་པོའང་དགོས་སོ། །མེ་ཏོག་རབ་སོང་ནི་སྲོག་སོང་བའི་རོ་ལ་གཏོར་བའི་མེ་ཏོག་གོ །སྔར་ལེའུ་དགུ་པར་དབང་པོའི་རྣམ་དག་མི་གསལ་བ་འདིར་ཞུས་པ་དང་ལན་ནི། །དེ་ནས་རྡོ་རྗེ་སྙིང་པོ་ཞེས་པ་ནས། སེམས་དཔའ་ཆེ་ཞེས་པའི་བར་རོ། །མདོར་བསྟན་དུ་དགོངས་པའི་སྐད་ཅེས་པ་འཆད་པ་ནི། དགོངས་པའི་སྐད་ནི་ཞེས་པ་ནས། གུས་པས་བཟུང་ཞེས་པའི་བར་རོ། །རྒྱུད་རྣམ་པ་བཞིར་མ་བསྒྲགས་པའི་དགོངས་པའི་སྐད་འདིར་གསུང་པར་ཞུས་པས། ཀྱཻ་རྡོར་རྒྱུད་སྡེ་ལྔ་པར་བྱ་དགོས་ཞེས་སྨྲ་བ་ནི་དོན་མིན་ཏེ། གཞན་དུ་ན་རྒྱུད་འདི་གཉིས་སྦྱོར་གྱི་རྒྱུད་མིན་དགོས་ལ། དེ་ལྟ་ན་ཐབས་ཤེས་མཉམ་པར་སྦྱར་བ་ལས། ཧེའི་དོན་ལྷན་སྐྱེས་ཀྱི་བདེ་ཆེན་དྲངས་ཏེ། བཛྲའི་དོན་སྟོང་པ་ཉིད་ཀྱི་ཤེས་རབ་དང་། དབྱེར་མེད་དུ་སྦྱར་བའི་སྙིང་པོ་ཀྱཻ་རྡོ་རྗེའི་དོན་གཙོ་བོར་སྟོན་པའི་རྒྱུད་མིན་པར་འགྱུར་བའི་ཕྱིར་དང་། བླ་མེད་ཀྱི་རྒྱུད་གཞན་གཉིས་སྦྱོར་གྱི་རྒྱུད་ཡིན་པ་དང་། རྒྱུད་འདི་དེ་མིན་པའི་ཁྱད་པར་འབྱེད་པའི་གཏན་ཚིགས་ཅུང་ཟད་ཀྱང་མེད་པའི་ཕྱིར་རོ། །དེས་ན་གཉིས་སྦྱོར་གྱི་རྒྱུད་ཡིན་ཡང་འདིར་བཤད་པ་ལྟར། བརྡའི་སྐད་མ་བཤད་
པ་མང་པོ་ཡོད་པས། དེ་ལ་དགོངས་ཀྱི་གཉིས་སྦྱོར་གྱི་རྒྱུད་གང་ཡིན་དུ་མ་བཤད་པ་མིན་ནོ། །ཀྱཻ་རྡོ་རྗེ་ནས་ཁྲོ་བར་བྱེད་ཅེས་པའི་བར་གྱིས། ཚོགས་འཁོར་ལ་སོགས་པའི་དུས་སུ་དེ་ལྟར་དེ་མི་སྨྲ་བའི་ཉེས་དམིགས་སྟོན་ནོ། །གནས་བཞི་ལས་སྐྱེས་པའི་གསུམ་ནི་ལྷན་སྐྱེས་དང་སྔགས་སྐྱེས་དང་ཞིང་སྐྱེས་ཡིན་ལ་བཞི་པ་ནི་ཤ་ཟ་མོ་ལས་སྐྱེས་པ་ལ་བོད་ཁ་ཅིག་འཆད་དོ། །ཕྱག་རྒྱའི་ལེའུ་ནི་སྔར་གསུངས་པའི་དོན་ལ་ཐེ་ཚོམ་ཞུགས་པར་ཞུ་བ་སྟེ། དེའང་སྤྱོད་པའི་ལེའུ་ལས། གལ་ཏེ་དགའ་བས་གླུ་བླངས་ཏེ། །དེ་ཚེ་རྡོ་རྗེ་མཆོག་ལྡན་ནོ། །ཞེས་སོགས་ཀྱི་སྐབས་སུ་གླུ་གར་གྱི་དངོས་གྲུབ་འགྲུབ་པར་གསུངས་པའི་འགྲུབ་ལུགས་དང་། གླུ་གར་ཇི་ལྟར་བྱེད་པ་འདྲི་བའོ། །ལྷ་དབང་བསྐུར་བའི་ལེའུ་ལས། རིགས་ཀྱི་ཕྱག་རྒྱས་རྒྱས་འདེབས་པར་གསུངས་པ་ལ། གང་ནི་སྟེ་གདབ་བྱ་དང་། ཕྱག་རྒྱ་ནི་འདེབས་བྱེད་དེ། དེ་ཅི་འདྲ་བ་ཞིག་ཅེས་པའོ། །སྔགས་ལེ་ལས། ཨཱ་ལི་རྣམས་རྣལ་འབྱོར་མ་རྣམས་ཀྱི་ས་བོན་དུ་གསུངས་པ་ལ། རྣལ་འབྱོར་མ་གང་གི་དང་། དབྱངས་ཀྱི་ནང་ནས་གང་ས་བོན་དུ་འགྲོ་བ་དང་། རིགས་ལེ་ལས་རྩ་སོ་གཉིས་བཤད་པ་དེ་རྣལ་འབྱོར་མ་གང་གི་རྣམ་དག་ཏུ་འཇོག་ཚུལ་འདྲི་བའོ། །དྲི་བ་དང་པོའི་ལན་ལ་གཉིས་ལས། གླུའི་ལན་ནི་ཀོ་ལ་ནས་བཛྫ་ཨ་ཨི་ཞེས་པའི་བར་རོ། །ཀོལླ་གོ་རི་ནི་གནས་སོ། །ཨི་ཏི་ནི་བོད་པ་སྟེ་ཀྱེ་ཧོའོ། །ཊྛི་ཨ་ནི་གནས་པའོ། །བོ་ལ་ནི་རྡོ་རྗེ་སྟེ། བསྡུ་ན་ཀོ་ལའི་རི་གནས་རྡོ་རྗེ་དང་། ཞེས་པའོ། །
དེ་ལ་གནས་པའི་སྦྱོར་བས་བོ་ལ་ནི་རྣལ་འབྱོར་པའི་རྡོ་རྗེའོ་ཞེས་བཤད་དོ། །མུམྨུ་ཎི་ཞིང་ངོ་། ཀ་ཀོ་ལ་ནི་ཞིང་དེ་ལ་གནས་པའི་རྣལ་འབྱོར་མའི་པདྨ་སྟེ། རྐང་པ་དེ་གཉིས་ཀྱིས་ནི་གནས་ལ་སོགས་པ་ན་ཞུགས་པའི་རྣལ་འབྱོར་ཕོ་མོ་འདུས་པ་གསུངས་ཏེ། བསྡུ་ན་མུ་མྨུའི་པདྨ་འདུས་པ་ཡི། །ཞེས་སོ། །དེ་ལྟར་ན་རེ་ནི་འདུས་པའི་དོན་ཡིན་ལ། བོད་ཁ་ཅིག་ནི་རེ་ཞེས་བོད་པའི་དོན་དུ་འདོད། མུ་ཏིག་ཕྲེང་བར་ཀོ་ལ་ཞེས་སོགས་འདི་ལ། ཚིག་རྐང་བཞི་པའི་ཚིགས་བཅད་བཞི་ཡོད་པའི་རྐང་པ་གཉིས་དུམ་བུ་ཁྲིགས་སུ་སྦྱར་བ་དང་། ཚིགས་བཅད་བཞི་ཆར་གྱི་མཐར་ཐ་མ་གཉིས་སྦྱར་བཤད་པའི་དོན་རྐང་པ་གཉིས་གཉིས་ཀྱི་མཐར་ཐ་མ་གཉིས་སྦྱོར་བ་ལ་མཁས་པ་དག་བཞེད་དོ། །གྷ་ན་ཀི་བི་ཌཱ་ཧོ་བཱཛྫ་ཨི་ཞེས་པའི་གྷ་ན་ནི་ཚོགས་ལ་འཇུག་མོད་ཀྱང་རྒྱུན་དུ་ཞེས་པ་ལའང་འགྲོ་བས་འདིར་ཕྱི་མའོ། །ཀི་བི་ཊ་ནི་རྔེའུ་ཆུང་ངོ་། །ཧོ་ལ་སོགས་པ་ནི་བརྡུང་བར་བྱ་བ་སྟེ། རྒྱུན་དུ་རྔེའུ་ཆུང་སྒྲ་སྒྲོགས་ཤིང་། །ཞེས་བསྒྱུར་ཏོ། །ཆོས་ཐམས་ཅད་སྒྲ་བརྙན་ལྟ་བུར་གསུངས་པའི་དོན་མངོན་དུ་བྱས་ཏེ། གླུ་གར་བྱ་ཞེས་པའོ། །མུ་ཏིག་ཕྲེང་བར་ཧེའི་དོན་ནི་ཀྱེ་ཞེས་བོད་པ་ལ་བཤད་དོ། །ཀ་རུ་ཎེ་ཀི་ཨ་ཨི་ཎཱ་རོ་ལིའི་རོ་ལ་ནི། རྩོད་པ་དང་། ཀུ་ཅོ་དང་། འཐབ་པའོ། །དེ་མེད་པས་བཀག་པ་མི་བྱ་བ་དང་། ཀ་རུ་ཎེ་ཀི་ནི་སྙིང་རྗེའི་དབང་གིས་ཞེས་པ་སྟེ། སྙིང་རྗེས་ཀུ་ཅོ་མི་བྱེད་ལ་ཞེས་བསྒྱུར་ཏོ། །ཀུ་མུ་ཊིར་ཨ་ཨི་ཎཱ་ནི་མི་བྱེད་
ཅེས་པ་ལ་བཤད་དོ། །བསྡུ་ན་ཕན་ཚུན་བྱམས་པར་བྱ་ཞིང་སེམས་ཅན་ཐམས་ཅད་ལའང་སྙིང་བརྩེ་བར་བྱའོ། ཞེས་པའོ། །ཏ་ཧཱིཾ་བཱ་ལ་ཁཱཛྫ་ཨིའི་ཏ་ཧཱིཾ་ནི་དེར་ཡང་ངོ་། །བཱ་ལ་ནི་ཤའོ། །ཁཱཛྫ་ཨི་ནི་བཟའ་བར་བྱ་བའོ། དེར་ནི་བསྒྲིམས་ཏེ་ཤ་ཟ་བ། །ཞེས་པར་བསྒྱུར་བ་ལྟར་ན། ཁཱ་སོགས་ཀྱི་དོན་ནི་བསྒྲིམས་ཏེ་ཞེས་པའོ། །གྷ་ཌྷ໊་མ་ཨ་ཎཱ་བིཛྫ་ཨ་ཨའི་ག་ཌྷ໋་མ་ནི་ཤིན་ཏུ་ཞེས་པའོ། །ཨ་ཎཱ་ནི་ཆང་ངོ་། །བིཛྫ་ཨི་ནི་བཏུང་བར་བྱའོ། ཤིན་ཏུ་དགའ་བ་སྐྱེད་པའི་ཆང་ཞེས་པའོ། །ཉིན་མཚན་ཆང་ནི་བཏུང་བ་ཡིན། །ཞེས་བསྒྱུར་བ་ལྟར་ན། དང་པོ་ཉིན་མཚན་ལའང་འཇུག་གོ །ཧླེ་ཀ་ལིཉྫ་ར་པ་ནི་ཨ་ཨིའི་དང་པོ་ཧླེ་ནི་ཀྱེ་ཞེས་རྣལ་འབྱོར་མ་རྣམས་ལ་བོད་པའོ། །ཀ་ལིན་ནི་སྐལ་ལྡན་དང་། ཛ་ར་སོགས་ནི་གཞུག་པར་བྱ་སྟེ་རྣལ་འབྱོར་དང་། རྣལ་འབྱོར་མ་སྐལ་ལྡན་ནོ། །དུ་དུ་ར་བཛྫ་ཨ་ཨིའི་དུ་དུ་ར་ནི་སྐལ་མེད་དམ་དམ་ཚིག་དང་མི་ལྡན་པ་སྟེ། དབང་མ་བསྐུར་ཅིང་ཐེ་ཚོམ་ཟ་བའོ། །ལྷག་མའི་དོན་ནི་སྤང་བར་བྱ་བའོ། །དམ་ཚིག་མི་ལྡན་སྤང་བར་བྱ། །ཞེས་བསྒྱུར་ཏོ། །ཙ་ཨུ་ས་མ་ཀ་ཀ་སྠུ་རི་སི་ཧླ་ཞེས་པ་ལ། ཙ་ཏུར་ཞེས་ཀྱང་འབྱུང་བས་དེ་བཞིའོ། །ས་མ་ནི་མཉམ་པའོ། །ཀསྠུ་ར་ལ་ཨི་ཨ་ཞེས་པ་དང་། རྐང་པ་སྔ་མ་ནི། བཞི་མཉམ་དང་ནི་གླ་རྩི་དང་། །སི་ཧླ་ག་པུར་བྱུག་པ་ཡི། །ཞེས་བསྒྱུར་ཏོ། །དེ་ལྟར་ན་ཨ་མན་ཆད་ཀྱི་དོན་བྱུག་པའོ། །པདྨ་ཅན་ལས། ཙ་ཨུ་པ་མ་སི་ཧླ་ཀ་པུར་ལ་ཞེས་འབྱུང་ལ། སྔར་བཤང་བ་ཙ་ཏུར་ས་མཾ་བརྗོད།
གཅི་བ་ཀསྠུ་རི་ཞེས་བརྗོད། །ཅེས་བཤད་དོ། །པདྨ་ཅན་ལས། དྲི་ཆེན་དང་ཁུ་ཁྲག་གསུམ་གྱིས་བྱུག་པར་བཤད་ཀྱང་དྲི་ཆུའང་དགོས་སོ། །ཨི་ར་ཨི་ཞེས་ཀྱང་འབྱུང་ངོ་། །མ་ལ་ཨིནྡྷ་ན་ཤ་ལེཾ་ཛ་ལ། ཚོད་མ་མཱ་ལ་ཏིནྦྷ་ནཾ་ཞེས་པ་ལྟར་པདྨ་ཅན་ལས་ཀྱང་བཤད། ས་ལེཾ་ཛའི་དོན་ནི་པདྨ་ཅན་ལས་ཚོད་མ་རྣམས་དང་ཤ་ཆེན་ཁྱད་པར་གྱིས་དེར་བཟའ་བའོ་ཞེས་བཤད་ལ། ཤ་ཆེན་གྱི་ཚོད་མ་ཁྱད་པར་དུ་ཟ་བའོ། མུ་ཏིག་ཕྲེང་བར་པཱ་ལི་ལས་སྐྱེས་པ་ལས་བཤད་དེ། །ཛ་ནི་སྐྱེས་པའོ། །ཏེ་ཧིཾ་བྷ་རུ་ཁ་ཨི་ཨ་ཨིའི་ཏ་ཧཾ་ནི་དེར་རོ། །ལྷག་མའི་དོན་ནི་རྒྱུན་དུ་བཟའ་བར་བྱ་བའོ། །རྐང་པ་གཉིས་པ་དེ་ནི། ཤཱ་ལ་ལས་སྐྱེས་བཙོས་སྦྱར་བ། །དེར་ནི་རྒྱུན་དུ་ཟ་བ་ཡི། ཞེས་བསྒྱུར་ཏོ། །དེས་མ་ལ་ཨ་ཨིཎྷ་ཎ་ཤ་ལི་ཨ་ཞེས་ཟེར་རོ། །ཕྲེཾ་ཁ་ཎ་ཁེ་ཊ་ཀརྣྟེ་ནི་སྔར་འགྲོ་བ་ཁེ་ཊ་ཞེས་དང་། འོང་བ་ཕྲ໊་ཁ་ཎ་རུ་བརྗོད་ཅེས་པ་ལྟར་བྱ་ལ། ལྷག་མའི་དོན་ནི་བྱེད་པའོ། །ཕྲ໊་ཞེས་ཀྱང་འབྱུང་ངོ་། །ཤུདྡྷ་ནི་དག་པ་དང་། ཨ་ཤུདྡྷ་ནི་མ་དག་པའོ། །ན་མ་ནི་ཞེས་བྱ་བའོ། །དེར་ཡིད་ལ་མི་བྱེད་པ་ནི་ཎི་ཨ་ཨིའོ། །ནི་རཾ་ཤུ་ཨཾ་ག་ཙ་ཊ་བི་ལ། ནི་རངྴུ་ནི་རུས་རྒྱན་ནོ། །ཨརྒ་ནི་ཡན་ལག་གོ །བི་ནི་རྣམ་པ་ལའོ། །ཙ་ཊ་ནི་གདགས་པའོ། །ཏ་ཧཱིཾ་ཛ་པ་ར་བ་པ་ནི་ཨ་ཨི་ལ་ཤ་ར་བ་ནི་རོ་དང་། པ་ནི་ཨ་ཨི་ནི་གཞུག་པར་བྱ་བར་མུ་ཏིག་ཕྲེང་བར་རོ། །དུས་དེར་སྐྱེས་པའི་རོ་འབུལ་བའི་དོན་ནོ། །མ་ལ་ཨ་ཛེའི་མ་ལ་ཨ་ཛ་ནི་འདུ་བའོ།
ཀུནྡྷུ་རུ་ནི་དབང་པོ་གཉིས་སྦྱོར་ཀུནྡྷུ་རུ་ཞེས་པ་ལྟར་རོ། །པ་ཌ་ཨི་ནི་དེ་བྱེད་པའོ། །ཌིཎྜི་མེ་ཏ་ཧཱིཾ་ཎ་བཛྫི་ཨ་ཨི་སྔ་མ་ནི་རིགས་ངན་པའོ། །པཛྫི་ཨ་ཨི་ནི་སྤོང་བ་ལ་བཤད་པས། འདིར་ཎས་བཀག་པས་མི་སྤང་བར་བསྟེན་པའོ། །དེ་རྣམས་ནི་སྒྲ་ཇི་བཞིན་པའི་བཤད་པ་སྟེ། ཚོགས་ལ་འདུས་པ་སོགས་ཀྱི་སྐབས་སུའོ། །ཡང་དེའི་དོན་ནང་གི་ལུས་ལ་གནད་དུ་བསྣུན་པའི་ཚུལ་ལྟར་བཤད་ན། ཀོལླ་ཨི་རི་ནི་མགོ་བོ་ལའོ། །ཊཱི་ཨ་ནི་དེ་ལ་གནས་པའོ། །བོ་ལ་ནི་རྡོ་རྗེ་འཛིན་པ་གཞོམ་མེད་ཀྱི་ཧཾ་ངོ་། །མུམྨུ་ཎི་རེ་ནི་ལྟེ་བའི་པདྨར་རོ། །ཀ་ཀོ་ལ་ནི་དེར་ཤེས་རབ་ཙནྜ་ལིའི་རྣམ་པར་གནས་པའོ། །གྷན་ནི་དགའ་བྲལ་མེད་པའི་དགའ་བ་རྒྱུན་ལྡན་པའོ། །ཀི་པི་ཊ་ནི་གཞོམ་མེད་ཀྱི་ལྷན་སྐྱེས་སོ། །བཛྫ་ཨི་ནི་ཀུནྡ་ཆར་ལྟར་འབབ་པའོ། ཀ་རུ་སོགས་ནི་བདེ་ཆེན་གྱི་ཡེ་ཤེས་ཀྱིས་རྣམ་རྟོག་གི་རྩོད་པ་མི་བྱ་བའོ། །ཏ་ཧིཾ་སོགས་ནི་ཆར་འབབ་པ་དེར་ཐ་མལ་བའི་ཤ་སྟེ་ཕུང་སོགས་སྣང་མེད་དུ་བྱེད་པའོ། །གཱ་ཌེཾ་མ་སོགས་ནི་སྙིང་རྗེ་བདེ་བ་ཆེན་པོའི་རོ་ཤིན་ཏུ་འཐུང་བའོ། །ཧྥེ་སོགས་ནི་རྡོར་སེམས་ཀྱི་རང་བཞིན་བདེ་ཆེན་བསྒོམ་པར་བྱ་བར་རོ། །དུ་དུ་ར་སོགས་ནི་རྣམ་རྟོག་ཐམས་ཅད་དུ་སྤང་བར་བྱ་བའོ། །ཙ་ཨུ་སོགས་ནི་བདེ་ཆེན་དེ་ལ། རྣམ་སྣང་སོགས་ཞུགས་པའོ། །མ་ལ་སོགས་མ་ནི་ས་དང་། ལ་ནི་ཆུ་དང་། ཨིནྡྷ་ནི་མེ་དང་། ཤ་ལེཾ་ཛ་ནི་རླུང་དང་། དེ་རྣམས་ཏ་ཧིཾ་སོགས་ཀྱིས་ཤིན་ཏུ་སྣང་མེད་དུ་བྱ་བར་སྟོན་ནོ། །ཕྲེཾ་སོགས་ནི་ཤེས་རབ་ཀྱི་འགྲོ་འོང་བྱེད་པ་དང་། ཤུདྡྷ་སོགས་ནི། དེ་གཉིས་ཡིད་ལ་མི་བྱེད་
པར་བདེ་ཆེན་དུ་རྩེ་གཅིག་པའོ། །ནི་རཾ་ནས་བ་པ་ནི་ཨ་ཨི་བར་གྱི་དོན་ནི། བྱང་སེམས་དཀར་པོ་ཡན་ལག་རྣམས་ལ་བཞག་ནས་ལུས་ཐམས་ཅད་ལ་ཁྱབ་པར་བྱེད་པས་གཞུག་པར་བྱའོ། །མ་ལ་སོགས་ཀྱི་དོན་ནི་སྔར་དང་འདྲ། ཌིཎྜི་མ་སོགས་ནི་རྣམ་རྟོག་གིས་རེག་རྒྱུ་ལྷན་སྐྱེས་བསྟེན་པའོ། །བཤད་ཚུལ་དེས་གཏུམ་མོ་སྒོམ་པ་རྒྱས་པར་ནི་བྷ་བས་བཤད་དོ། །རབ་ལ་དབང་བསྐུར་བའི་དབང་དུ་བྱས་ན། ཀོ་ནས་ལའི་བར་ནི་ཐབས་ཀྱི་ལྟེ་བའི་འོག་དང་། དེར་གནས་པའི་རྡོ་རྗེ་དང་། མཱུ་ན་ལའི་བར་ནི་ཤེས་རབ་ཀྱི་ལྟེ་བའི་འོག་དང་། དེར་གནས་པའི་པདྨ་དང་། གྷ་ན་སོགས་ནི་པདྨ་དེ་ལ་རྡོ་རྗེའི་རང་བཞིན་གྱི་ཀྲི་པི་ཏ་རྡུང་བ་ནི་སྐྱོད་པར་བྱེད་པའོ། ཀ་རུ་སོགས་ནི་བདེ་ཆེན་འབྱུང་བས་རྩོད་པ་མི་བྱེད་ཅིང་བརྟན་པས་རྒྱུན་དུ་བདེ་བའི་མཆོག་བསྟེན་པའོ། །ཏ་ཧིཾ་སོགས་ནི་དེའི་ཚེ་རྣམ་རྟོག་ཟ་བའམ། དགའ་བ་བྱུང་བ་ཟ་བའོ། །ཀ་སོགས་ནི་ཡང་ཡང་བཏུང་བའོ། །ཀ་ལིཉྫ་སོགས་ནི་ལྷན་སྐྱེས་བསྒོམས་པས་གཞུག་པའོ། །དུ་དུ་སོགས་ནི་དགའ་བྲལ་སྤང་བའོ། །ཙ་ཨུ་སོགས་ལྷག་མའི་དོན་ནི་སྔར་བཞིན་ནོ། །ཞེས་པདྨ་ཅན་ལས་སོ། །གར་འཆད་པ་ལ་ཧེ་རུ་ཀ་གཟུགས་ནི་ཀྱེ་རྡོར་གྱི་ང་རྒྱལ་གྱིས་སོ། །ཆགས་བྲལ་ནི་མ་ཞི་བ་སྟེ་དེ་མིན་པར་དེ་ཁོ་ན་ཉིད་གོམས་པའོ། །རྡོ་རྗེ་ཆོས་ནི་དེའི་བདག་ཉིད་ཀྱི་གླུ་ཞེས་པའམ། ཡང་ན་དེའི་རྣལ་འབྱོར་ཅན་གྱིས་སོ། །སངས་རྒྱས་ཀྱང་རྣམ་སྣང་གི་བདག་ཉིད་ཅན་གྱི་གར་རམ། དེའི་རྣལ་འབྱོར་དང་ལྡན་པའོ། །
མ་མོ་ལ་སོགས་པའི་རྣལ་འབྱོར་མ་རྣམས་ཀྱིས་སམ། ཡང་ན་གཽ་རཱི་སོགས་ཀྱིས་བསྐོར་བ་རྣམས་ཀྱིས་དེ་ལྟར་བྱའོ། །སྔ་མ་ནི་གར་མ་སོགས་ལ་འཆད་དོ། །གླུ་གར་བྱས་པའི་དགོས་པ་ནི། འདི་ཉིད་ཅེས་པ་སྟེ་རང་དང་གཞན་འཇིགས་པ་ལས་བསྲུང་བ་དང་། གཞན་དབང་དུ་བྱེད་པ་དང་སྔགས་ཀྱི་བཟླས་པར་འགྱུར་བའོ། །གང་དུ་གུས་པ་དང་རྒྱུན་གྱི་སྦྱོར་བས་གླུ་གར་བྱེད་པ་དེ། ཚོགས་ཀྱི་བདག་པོ་དཔལ་ཧེ་རུ་ཀ་མདུན་དུ་སྟེ་མངོན་དུ་བྱས་ནས་སོ། །ཚོགས་ཀྱི་བདག་པོ་མདུན་བྱས་ཞེས་འབྱུང་ངོ་། །གླུ་གར་བྱས་པ་དེ་ལ་དེའི་བྱིན་རླབས་མཚོན་པར་བྱ་བ་ལ། དྲིས་མཚོན་པ་ནི་སྒོག་པ་ཞེས་སོགས་གསུམ་སྟེ། མ་ལ་ཡའི་དྲི་ནི་ཙནྡན་གྱི་དྲིའོ། །སྒྲས་མཚོན་པ་ནི་ངང་བ་ཞེས་པ་ཞིག་དང་། བ་ལང་ཞེས་པ་ཞིག་དང་། གང་དུ་ཐོས་པ་ནི་ཕྱི་རོལ་ཚལ་དུའང་ཞེས་འབྱུང་བས་ཕྱི་ནང་གཉིས་གང་རུང་དུའོ། དེ་མཉན་པའི་དུས་ནི་གླུ་བླངས་པའི་རྗེས་ནས་སོ། །དྲི་ནི་གར་དང་སྒྲ་ནི་གླུའི་བྱིན་རླབས་སུ་བྷ་བས་སོ། །རྣལ་འབྱོར་མའི་འཁོར་ལོ་བསྒོམས་པ་ལས་དེ་འབའ་ཞིག་མངོན་དུ་འགྱུར་ན། རྒྱས་འདེབས་ཀྱི་ཕྱག་རྒྱས་ཅི་ཞིག་བྱ་ཞེས་དོགས་པ་ལ་རིགས་འཆོལ་བ་སྟེ་འཁྲུགས་པ་དང་། རིགས་ལ་ལྟོས་པ་མེད་པར་རིགས་བདག་གི་རྒྱལ་བས་སྟོང་པ་བསྒོམས་པ་ལས་མངོན་དུ་འགྱུར་ནའང་། གཟུགས་བརྙན་ལྟ་བུར་འདོད་དོན་བསྒྲུབ་པའི་ནུས་པས་སྟོང་པས་དངོས་གྲུབ་མེད་པའོ། །རང་གི་རིགས་གང་ཡིན་མི་ཤེས་པས་བསྒྲུབ་བྱ་མི་ཤེས་པའི་ཕྱིར་སྒྲུབ་པ་པོའང་མེད་དོ། །
མི་བསྐྱོད་པ་རྣམ་སྣང་རིན་འབྱུང་སྣང་མཐའ་དོན་གྲུབ་ལྔས། རིམ་པ་བཞིན་དུ་བདག་མེད་མ་ནས་རྡོ་རྗེ་མཁའ་འགྲོ་མའི་བར་དང་། ཡང་དང་པོ་བཞི་རིམ་པ་བཞིན་དུ། པུ་ཀ་སི་དང་གཽ་རཱི་དང་། ཤ་བ་རི་དང་རཽ་རི་དང་། ཙཎྜ་ལི་དང་། བི་ཏ་ལི་དང་། གཡུང་མོ་དང་གྷསྨ་རི་ལ་དང་། རྣམ་སྣང་གིས་ས་སྤྱོད་མ་དང་། སྣང་མཐས་མཁའ་སྤྱོད་མ་ལ་རྒྱས་གདབ་བོ། །དབྱངས་གང་ལྷ་མོ་གང་གི་ས་བོན་ཡིན་པ་ནི། ཨཱ་ལི་དང་པོ་ཞེས་སོགས་ཀྱིས་སྟོན་པ་ལ་ས་བོན་ཐམས་ཅད་ཟླ་ཕྱེད་ཐིག་ལེ་དང་བཅས་པས་མཚན་པར་བྷ་བས་སོ། །ལྔ་གཉིས་ནི་དབྱངས་བཅུ་པའོ། རྩ་སོ་གཉིས་ལ་རྩ་གང་ལྷ་མོ་གང་དུ་སྟོན་པ་ལ། མི་ཕྱེད་མ་ལ་སོགས་པ་གཉིས་གཉིས་འཁོར་གྱི་ལྷ་མོ་རེ་རེ་དང་། རོ་རྐྱང་དྷཱུ་ཏཱི་གསུམ་གཙོ་མོར་སྟོན་པ་ནི་རིགས་ཀྱི་ཞེས་པ་དྲུག་གོ །དེ་ལྟར་ན་རྩ་སོ་གཉིས་ཀྱི་ལྷག་མ་གཅིག་ལུས་པས། ལྷ་མོ་རྣམས་ཀྱིས་རྩ་སོ་གཉིས་མ་བསྡུས་པར་འགྱུར་རོ་ཞེ་ན། འབད་པས་ཞེས་པ་གཅིག་གོ །དེ་སྤོང་བའི་གཏན་ཚིགས་ནི། གང་ཕྱིར་ཞེས་པ་གཅིག་གོ །གལ་ཏེ་བཅུ་དྲུག་གི་ཆ་མེད་པ་དང་། ལྷག་མ་སྤང་ཞེས་པ་གཉིས་འགལ་བས་བཅུ་དྲུག་གི་ཆ་ཡོད་དོ་ཞེ་ན། ཅིའི་སླད་དུ་ཞེས་སོགས་གསུངས་སོ། །དོན་དེ་དགོས་པ་བསྒྲུབ་པའི་དངོས་པོའི་བྱ་བ་སྟེ་སྐྱེད་པར་བྱེད་པའི་བཅུ་དྲུག་གི་ཆ་མེད་པས། བཅུ་དྲུག་ཆ་མེད་པས་ཞེས་གསུངས་ཏེ། དཔེར་ན་བུ་ཡོད་ཀྱང་བུའི་བྱ་བ་མི་བྱེད་པ་ན་བུ་མེད་ཅེས་བརྗོད་པ་བཞིན་ནོ། །དེའི་ཕྱིར་ཆ་བཅོ་ལྔ་པ་ཉིད་དུ་གྲུབ་ཅིང་། ཆ་
བཅུ་དྲུག་པ་མ་ཡིན་པ་དེ་ཉིད་གསལ་བར་ནི་ཟླ་བ་ཞེས་སོགས་བཞིས་བྱེད་པ་ནི་ཀུ་མུ་ཊིར་རོ། །དེའི་དགོངས་པ་ནི་ཨཱ་ལིས་བདེ་ཆེན་མཚོན་ལ། ཕྱི་ནང་གི་དཀར་ཆ་འཕེལ་བའི་ཆ་བཅོ་ལྔས། ཕྱི་ནང་གི་ཟླ་བའི་དཀར་ཕྱོགས་རྫོགས་པའི་ཕྱིར་དང་། རྣལ་འབྱོར་མ་རྣམས་དཀར་ཆ་མཚོན་པའི་ཨཱ་ལིའི་ཆ་རེ་རེ་ཡིན་པའི་ཕྱིར་ན། བཅུ་དྲུག་པའི་ཆ་མེད་དེ་བཅུ་དྲུག་པ་ནི་ནག་ཕྱོགས་ཡིན་པའི་ཕྱིར་རོ་སྙམ་དུ་བསམས་སོ། །འདི་ནི་དབྱངས་ཡིག་བཅུ་དྲུག་པ་འདོར་བའི་རྒྱུ་མཚན་དུ་སྣང་ཡང་། དེའི་སྒོ་ནས་རྩའི་ལྷག་མ་བདུད་བྲལ་མ་འདོར་བའི་རྒྱུ་མཚན་དུའང་བྱ་སྟེ། དེའང་གཞི་དང་ལམ་གྱི་སྐབས་མཐོན་པོར་མ་སླེབས་བར་དུ་རྩ་དེར་བྱང་སེམས་དཀར་པོ་མི་འབབ་པར་མན་སྙེར་བཤད་པས་ཤེས་དགོས་སོ། །པདྨ་ཅན་ལས། རྩ་དང་དབྱངས་རྣམས་ལྷ་མོ་རྣམས་དང་སྦྱོར་བ་ན། བདུད་འཇོམས་མའི་རྣམ་དག་ལྷ་མོ་རྣམས་ལ་མ་གསུངས་པ་དང་། ཨཱ་ལིའི་གཟུགས་ཅན་བྱང་ཆུབ་ཀྱི་སེམས་ཀྱི་ཟླ་བ་དང་ཆ་བཅུ་དྲུག་གི་ཆའི་རང་བཞིན་ས་བོན་ཨཿ མ་གསུངས་པས། རྩ་སོ་གཉིས་དང་དབྱངས་བཅུ་དྲུག་པོ་ལྷ་མོས་མ་བསྡུས་སོ་སྙམ་པ་ལ། ཀུན་གྱི་ཐ་མ་སྤོང་བའི་རྒྱུ་མཚན་གང་གི་ཕྱིར་བཅུ་དྲུག་ཅེས་གསུངས་སོ། །དེའི་རྒྱུ་མཚན་ཡང་དོན་གྱི་བྱ་བ་ཞེས་པ་གཅིག་གོ །དེའི་དོན་ནི་ཆའང་ཆ་མེད་པ་དང་། དོན་གྱི་བྱ་བ་སྦྱོར་བ་མེད་པས་ཏེ་ཆོས་ཀྱི་དབྱིངས་ཀྱི་རང་བཞིན་གྱིས་སོ། །ལྷ་མོའི་རྣམ་དག་ལྷ་མོ་བཅོ་ལྔ་བསྒོམ་པའི་གནས་སྐབས་སུ་འདུས་པ་དང་། དོན་གྱི་བྱ་བ་
མི་བྱེད་པ་དང་། གང་དུ་ཅིའི་ཕྱིར་བསྒོམ་པའང་དོན་གྱི་བྱ་བ་བསྒྲུབ་བྱ་དེ་ཉིད་ཡིན་ཞེས་གསུངས་སོ། །དེའི་དོན་ནི་རྩ་གཉིས་གཉིས་པ་བཅུ་དྲུག་བྱས་པ་དང་། ཡི་གེ་བཅུ་དྲུག་གི་ཆ་བཅུ་དྲུག་པ་ཡིན་ཡང་། དོན་གྱི་བྱ་བ་སྦྱོར་བའི་ཆ་མེད་དོ། །ཡི་གེ་བཅོ་ལྔས་བྱང་སེམས་ཀྱི་ཟླ་བ་འཕེལ་བའི་ཆ་བཅོ་ལྔ་རྫོགས་པས། བཅུ་དྲུག་པ་ནི་བདེ་བ་ལ་མིན་གྱི་ཆོས་ཀྱི་དབྱིངས་ཀྱི་རང་བཞིན་སྟོང་པ་ཉིད་མཚོན་པའི་དོན་ཡིན་པའི་ཕྱིར་རོ། །དེས་ན་ལྷ་མོ་བཅོ་ལྔ་བསྒོམ་པའི་གསེབ་ཏུ་འདུས་པ་ནི་བདེ་སྟོང་སྦྱོར་བའི་སྒོ་ནས་སོ། །དོན་གྱི་བྱ་བ་མི་བྱེད་པ་ནི་བྱང་སེམས་ཀྱི་ཟླ་བ་མཚོན་པའི་བྱ་བ་གཙོ་བོར་མི་བྱེད་པའོ། རྩ་གང་ལྷ་མོ་གང་དུ་དགོས་པ་ཅིའི་ཕྱིར་དུ་བསྒོམས་པའི་དགོས་པ་ནི། དོན་གྱི་བྱ་བ་བྱེད་པའི་བསྒྲུབ་བྱ་དེ་ཉིད་ཡིན་པའི་ཕྱིར་ཞེས་པའི་དོན་ནོ། །བྷ་བས་བདུད་འཇོམས་མ་འདོར་བ་ནི། ཀུན་གྱི་ལྷག་མ་སྤང་ཞེས་པའོ། དེའི་རྒྱུ་མཚན་ནི་གང་ཕྱིར་ཞེས་པ་གཅིག་གོ །དེ་བསྒྲུབ་པ་ནི་དོན་གྱི་ཞེས་གསུངས་པའི་ཆ་ནི་རྩ་གཉིས་གཉིས་ཡིན་ན། བདུད་འཇོམས་མ་ནི་རྩ་གཅིག་ཡིན་པས་ཇི་ལྟར་བྱེད་ཅེས་འཆད་དེ། དོན་དུ་མ་མཐོང་ངོ་། །མུ་ཏིག་ཕྲེང་བར་རྩ་སོ་གཉིས་ཀྱི་ཕྱེད་ཀྱི་ཆ་ཨཱ་ལི་བཅུ་དྲུག་ཡིན་ན། ཅིའི་ཕྱིར་ཆ་བཅུ་དྲུག་པ་སྤང་སྙམ་པ་ལ། དབྱངས་ཐམས་ཅད་ཀྱི་ལྷག་མ་བཅུ་དྲུག་པ་སྤོང་བའོ། །རྒྱུ་མཚན་ནི་བཅུ་དྲུག་ཅེས་སོགས་ཀྱིས་བསྟན་ཏེ་བྱ་བ་མི་བྱེད་པའོ། །ཇི་ལྟར་དང་པོའི་རྣལ་འབྱོར་མ་རྩ་གསུམ་ཡིན་པ་བཞིན་དུ། ཐ་མའི་
རྣལ་འབྱོར་མའང་རྩ་གསུམ་མོ་ཞེས་ཤུགས་ཀྱིས་བསྟན་ཏེ། དེ་ལྟར་མ་ཡིན་ན་རྣལ་འབྱོར་མ་རེ་རེས་རྩ་གཉིས་གཉིས་བསྡུས་པར་བསྟན་པས་རྩ་སོ་གཉིས་མ་བསྡུས་པར་འགྱུར་རོ་ཞེས་འཆད་དོ། །འདིར་དོགས་གཅོད་ནི་རྩ་དང་ཡི་གེ་གཉིས་ཀ་ལ་དགོས་ཏེ། ཡི་གེ་ལ་བཅུ་དྲུག་པ་དངོས་སུ་ཡོད་པས། དེའི་རྒྱུ་མཚན་འདྲི་དགོས་པའི་ཕྱིར་དང་། རྩ་ལའང་གཙོ་མོ་ལ་གསུམ་དང་། གཞན་བཅུ་བཞི་ལ་གཉིས་གཉིས་སྦྱོར་བར་གསུངས་པས་ན། རྩ་གཅིག་ལྷག་མར་ལུས་ལ། དེའི་རྒྱུ་མཚན་དྲི་དགོས་པ་སྔ་མ་ལའང་མཚུངས་པའི་ཕྱིར་ན། པདྨ་ཅན་ལས་གསུངས་པ་ལྟར་རྩ་ཡིག་གཉིས་ཀ་ལ་དོགས་པ་བཀོད་ནས་བཅད་དགོས་སོ། །དེ་ལྟར་བྱས་ན་དབྱངས་བཅོ་ལྔ་དང་སྦྱོར་བ་དང་། བཅུ་དྲུག་པ་དང་མི་སྦྱོར་བའི་རྒྱུ་མཚན་གསལ་བར་ནི་ཀུ་མུ་ཊིར་བཤད་པ་ལྟར་བཅོ་ལྔའི་ཞེས་པ་བཞིས་སྟོན་ནོ། །དབྱངས་ཡིག་བཅུ་དྲུག་པ་སྤོང་བའི་རྒྱུ་མཚན་དུ་ནི། དེས་སྟོང་པ་མཚོན་པ་ཡིན་ལ། དེའང་དབྱངས་བཅོ་ལྔའི་མཚོན་དོན་དུ་འདུ་བས་བདེ་བ་མཚོན་པའི་གསེབ་ཏུ་བགྲང་མི་དགོས་པ། མཚོ་སྐྱེས་ཀྱི་བཞེད་པ་ལྟར་ལེགས་ཏེ། ཀུ་མུ་ཊིའི་ལུགས་ཀྱང་དེ་དང་འདྲ་བར་བྱས་ན་ལེགས་སོ། གལ་ཏེ་རྒྱུ་མཚན་དེས་བདུད་འཇོམས་མ་འདོར་བ་ཇི་ལྟར་ཤེས་སྙམ་ན། འདི་ནི་མན་སྙེ་ལྟར་བྱས་ན་ལེགས་སོ། །ཁ་ཅིག་ཤཱནྟི་པའི་ལུགས་དེ་རྩ་སོ་གཉིས་ལྷ་མོ་བཅོ་ལྔས་སྦྱོང་ན་འགལ་བ་གཉིས་ཏེ། རེ་ཞིག་གཞུང་དང་འགལ་བ་ནི། ཀུན་ཞེས་པའི་རྩ་དང་འཕོ་བ་ཡི་གེ་ལ་སོགས་པ་ཀུན་ཞེས་བཤད་དགོས་པས།
རྩ་འབའ་ཞིག་ལ་སྦྱོར་ན་ཀུན་གྱི་ཞེས་པའི་ཚིག་སྦྱོར་དུ་མི་རུང་བ་དང་། མཁའ་སྤྱོད་མས་རྩ་གསུམ་བསྡུས་ན། ལྷག་མ་ཞེས་པའི་ཚིག་མི་རུང་སྟེ། ལྷག་མ་མི་གནས་པའི་ཕྱིར་རོ། །དོན་དང་འགལ་བ་ནི་ལྷ་མོ་ནི་སྟོང་ཉིད་ཡིན་ལ། ་བདུད་བྲལ་མ་ཡང་སྤྲོས་བྲལ་གྱི་ཆ་སྟོང་ཉིད་ཡིན་པས། སྟོང་པས་སྟོང་པ་སྦྱང་བར་མི་ནུས་པའི་ཕྱིར་ཏེ། ནམ་མཁའི་མེ་ཏོག་གིས་རི་བོང་གི་རྭ་མཛེས་མི་ནུས་པ་བཞིན་ནོ། །ཟུང་འཇུག་གི་ལམ་མི་རུང་སྟེ། བདེ་ཆེན་གྱི་ངོ་བོ་ཡབ་ཀྱིས་སྟོང་པའི་ངོ་བོ་བདུད་བྲལ་མ་སྦྱངས་ན་ཟུང་འཇུག་ཏུ་འགྱུར་བ་ལ། ཁྱེད་ལྟར་ན་དེ་མི་རུང་སྟེ། སྟོང་པས་སྟོང་པ་སྦྱོང་བའི་ཕྱིར་ཞེས་འགོག་པ་ནི་མི་རིགས་ཏེ། དགག་པ་ལྟར་སྣང་འབའ་ཞིག་ཏུ་འདུག་པའི་ཕྱིར་རོ། །ཇི་ལྟར་ཞེ་ན། མུ་ཏིག་ཕྲེང་བར་ནི། རྩ་ཡིག་གཉིས་ཀྱི་ནང་ནས་ཡི་གེའི་ལྷག་མ་སྤོང་བ་ཁོ་ན་ལ་སྦྱོར་གྱི། རྩའི་ལྷག་མ་སྤོང་བ་ལ་སྦྱོར་བ་མིན་ཏེ། རྩ་ཐ་མ་གསུམ་ལྷ་མོས་སྡུད་པར་བྱེད་པས་རྩ་ལ་ལྷག་མ་ལུས་པ་མི་འདོད་པའི་ཕྱིར་དང་། རྩ་འབའ་ཞིག་ལ་སྦྱོར་ན་ཞེས་པ་ཕྱོགས་སྔ་མའི་འདོད་པ་མ་གོ་བའི་ཚིག་ཡིན་པའི་ཕྱིར་རོ། །མཁའ་སྤྱོད་མས་རྩ་ཐ་མ་གསུམ་བསྡུས་ན་ལྷག་མ་ཞེས་པའི་དོན་མེད་ཅེས་པའི་དོན་མེད་ཅེས་པའང་ཕ་རོལ་པོས་རྩ་ལ་ཡིན་ན་འདོད་པ་ཡིན་ལ། ཡི་གེ་ལ་ཟེར་ན་ཁྱབ་པ་མ་ངེས་པའི་འབྲེལ་མེད་དུ་འགྱུར་རོ། །ཞེས་སྨྲ་བར་འགྱུར་བའི་ཕྱིར་རོ། །ཀུན་ཅེས་པའང་དབྱངས་ཀུན་གྱི་ཞེས་པའི་དོན་ཡིན་ཞེས་སྨྲ་བ་ན། ཀུན་ཅེས་པའི་དོན་དུ་རྩ་གནས་
དགོས་པ་ལ་རྒྱུ་མཚན་ཡང་དག་པ་ཅིའང་མེད་པར་དམ་བཅའ་བ་ཙམ་དུ་སྣང་བའི་ཕྱིར་རོ། །གཞན་ཡང་བཅོ་ལྔ་པོ་རྣམས་ནི་ཐབས་སྤྲོས་པའི་ཆ་བདེ་ཆེན་གྱི་ཡབ་ཡིན་ལ། བཅུ་དྲུག་པའི་ཆ་རྣམས་ནི། ཤེས་རབ་སྤྲོས་པ་དང་བྲལ་པའི་སྟོང་ཉིད་ཀྱི་ངོ་བོ་ཡུམ་ཡིན་ཞེས་འདོད་བཞིན་དུ། སྔར་བཤད་པ་བཞིན་སྨྲ་བ་ནི་ཤིན་ཏུ་མི་རིགས་ཏེ། དེ་ལྟ་ཡིན་ན་ལྷ་མོ་རྣམས་ཆ་ལྔར་འཇོག་པ་ལ། ཐབས་ཀྱིས་ཐབས་སྦྱོང་བ་མི་འཐད་པས་ཟུང་འཇུག་མི་རུང་བ་དང་། ལྷ་མོ་རྣམས་ཆ་བཅོ་ལྔ་ཡིན་ཞིང་དེ་ཐབས་ཀྱི་ཆ་ཡིན་པས། དེས་བདུད་བྲལ་མ་སྦྱོང་བ་དེ་སྟོང་པས་སྟོང་པ་སྦྱོང་བ་མིན་པར་འདོད་དགོས་སོ། །དེས་ན་ཀུན་དང་ཐམས་ཅད་ཅེས་པ་བརྗོད་འདོད་ཀྱི་དབང་གིས་ཕྱོགས་རེ་བ་ལ་འཇུག་པའང་མི་འགལ་ཏེ། དཔེར་ན། ལྷ་མོ་ཐམས་ཅད་ཁ་དོག་ནག །ཅེས་འབྱུང་ཡང་ལྷ་མོ་ཡིན་ཚད་ལ་བྱ་མི་དགོས་པ་བཞིན་ནོ། །རྡོར་སྙིང་གིས། ག་པུར་ཞེས་པ་འདི་ལ་པདྨ་ཅན་ལས། ག་པུར་ངེས་པར་ཅིས་མི་འབྱུང་། །ཞེས་འབྱུང་ལ། དེའི་དོན་ནི་ངེས་པའི་སྒྲ་ནི་བཟོད་པ་མ་ཡིན་པ་སྟེ། ཅིས་མི་འབྱུང་སྟེ། འོན་ཀྱང་གང་བསྐྱེད་པར་བྱ་ཞེས་བྱ་བའི་དོན་ཏེ། ཞེས་གསུངས་པས་ག་པུར་འབྱུང་བ་སྟེ་བསྐྱེད་པར་མི་བྱེད་པ་ནི་མི་བཟོད་པས། ངེས་པར་བསྐྱེད་དགོས་ཞེས་ཏེ། སྔར་བདེ་བ་ཆེན་པོ་ཨཱ་ལིའི་གཟུགས་ཞེས་གསུངས་པའི་དགོངས་པར་ཤེས་ནས་ཞུས་པའོ། །ཇི་སྐད་སྨྲས་པ་ཞེས་སོགས་འོག་མ་རྣམས་ཀྱིས་ག་པུར་དབྱུང་ཐབས་སྟོན་པར་སྣང་བ་དང་འགྲིག་གོ །ཀུ་མུ་ཊིར། ག་པུར་ངེས་པར་ཅིས་མི་སྤོང་། །ཞེས་འབྱུང་ལ། དེའི་དོན་ཡང་
ཅིས་ཞེས་བྱ་བ་ནི་མགོ་སྤྲུག་པའོ། །མི་ཞེས་བྱ་བ་ནི་ག་པུར་ཉིད་མི་སྤོང་བ་སྟེ། ཞེས་བཤད་པས་ག་པུར་ནི་ངེས་པར་ཅི་ལ་བབ་ཀྱང་། ཕྱི་རོལ་ཏུ་མི་སྤོང་ཞེས་པའི་དོན་ཡིན་ལ། སྔ་མ་ནི་སྤྱི་བོ་ལ་སོགས་པའི་ལུས་ཀྱི། གནས་ནས་ནང་དུ་འབྱིན་པའོ། །རྣལ་འབྱོར་མ་རྣམས་ཡང་དག་འབྱུང་། ཞེས་པ་ལྟར་ཡིན་པས་རྣལ་འབྱོར་མ་ཀུན་གང་ལས་འབྱུང་བ་ནི་ལྷན་སྐྱེས་སོ། །དེའང་འགྲིབ་མེད་དེ་ཟད་མེད་མི་འཇིག་པ་དང་། བཏུང་མཆོག་ནི་རྒྱས་པར་བསྒྱུར་བས་རྒྱུན་རྒྱས་པའོ། །དེ་གང་ལས་འབྱུང་བའི་ཀུན་རྫོབ་ཀུནྡ་ལྟ་བུ་ནི་བྱ་གདོང་མ་དྷཱུ་ཏཱིར་འོངས་པ་ཤེས་རབ་ཀྱི་པདྨར་གནས་པ་ནི་ནམ་མཁའི་དོན་ནོ། །འབྲས་བུ་བྱང་སེམས་གཅིག་ཉིད་བསྐྱེད་པ་ལ་རྒྱུ་གཉིས་བྱུང་བ་ནི་རྒྱུ་སྔ་མས་འབྲས་བུ་སྔ་མ་དང་། རྒྱུ་ཕྱི་མས་འབྲས་བུ་ཕྱི་མ་བསྐྱེད་པ་གཉིས་སུ་བྱ་བར་ཀུ་མུ་ཊིར་རོ། །པདྨ་ཅན་ལས། དཀྱིལ་འཁོར་འཁོར་ལོ་སོགས་ཐབས་ཤེས་འབྱུང་བའི་སོགས་ཀྱིས་ནི། ནང་གི་སྦྱོར་བ་བསྡུས་པས་བསྐྱེད་རྫོགས་ཀྱི་རིམ་པས་དོན་དམ་པའི་བྱང་ཆུབ་ཀྱི་སེམས་བསྐྱེད་པར་བྱ་བ་དང་། བདག་བྱིན་རླབས་ཞེས་པ་ཐབས་ཤེས་ཀྱི་སྦྱོར་བས། ལས་རྒྱ་བྱིན་གྱིས་བརླབས་ནས་ཀུན་རྫོབ་ཀྱི་སེམས་བསྐྱེད་པར་བྱ་བ་དང་། སེམས་དེ་གཉིས་ཀའང་ཤེས་རབ་ཀྱི་པདྨར་བསྐྱེད་པ་ནི། བུད་མེད་ཅེས་པ་དྲུག་གིས་སྟོན་པར་བཤད་དེ། སྔར་དཀྱིལ་འཁོར་གྱི་འཁོར་ལོ་ལས་རྒྱ་དང་སྦྱོར་བ་ལ་བཤད་པ་ནི་སྒྲ་ཇི་བཞིན་མ་ཡིན་པའི་བཤད་པ་དང་། འདིར་བསྐྱེད་རིམ་ལ་
བཤད་པ་ནི་སྒྲ་ཇི་བཞིན་པའི་བཤད་པའོ། །གུར་ལས་རང་གི་སྙིང་གར་མི་ཤིགས་པ་དང་། འོག་སྒོར་ཕྲ་མོ་བསྒོམ་པའང་རང་བྱིན་རླབས་སུ་བཤད་པས་རེ་རེ་བར་མི་བཟུང་ངོ་། །འདི་ཉིད་ཅེས་པ་གཉིས་ནི་ཞུ་བདེའི་བྱང་ཆུབ་ཀྱི་སེམས་འདི་ཉིད་ཐབས་དང་བྲལ་མ་བྲལ་གྱི་དབང་གིས་འཁོར་འདས་གཉིས་སུ་སྟོན་ཏེ། འདི་ཉིད་བཤད་མ་ཐག་པའི་དོན་ལ་འདི་ཉིད་ཅེས་ཉེ་བའི་ཚིག་གིས་གསུངས་པ་ལ་འགྲིག་གོ །འཁོར་བ་ཞེས་པ་གཉིས་ནི་ཞུ་བདེའི་འཁོར་བ་ལམ་དུ་བྱེད་པ་སྤངས་ཞེས་པ་སྟེ། མྱང་འདས་ནི་དེ་ཐོབ་པ་སྟེ་དེའང་སངས་རྒྱས་ཀྱི་མྱང་འདས་སོ། །འཁོར་བ་གཟུགས་དང་ཞེས་པ་བཞིས་འཁོར་བ་གང་ཡིན་པ་བསྟན་ལ། འདི་རྣམས་ཆོས་ཞེས་པས་ནི་འཁོར་བར་བཤད་པ་འདི་རྣམས་ཀྱི་ཆོས་གང་ཁོ་ན་ལས་མྱང་འདས་སུ་འགྱུར་བ་དེ་གཏི་མུག་ལས་འཁོར་བར་འགྱུར་རོ། །དེ་ལ་ནི་ཚུལ་གཉིས་ཏེ། ཞུ་བདེར་བཞག་པ་དེ་ཐབས་དང་བྲལ་ནས་ལམ་དུ་བྱེད་མ་ཤེས་པ་དེ་ཉིད་ཤེས་ན་མྱང་འདས་སུ་འགྱུར་བ་དང་། ཕུང་སོགས་ཀྱི་དེ་ཁོ་ན་ཉིད་ཀྱི་ཆོས་གང་རྟོགས་པས་མྱང་འདས་སུ་འགྱུར་བ་དེ་མ་ཤེས་པའི་དབང་གིས་འཁོར་བ་ཡིན་གྱི། འཁོར་འདས་ལ་གནས་ལུགས་སོ་སོ་བ་མེད་པའི་དོན་ནོ། །དེས་ན་ཐར་འདོད་རྣམས་ཀྱིས་ཕུང་སོགས་ཀྱི་དངོས་པོ་གཏན་ཟད་དུའང་མི་སྤང་ཞིང་གཏི་མུག་ཀྱང་འབད་པས་སྤང་བྱར་སྟོན་པ་ནི་རྨོངས་ཕྱིར་ཞེས་པ་བཞིའོ། །ཅི་མྱ་ངན་ལས་འདས་པ་དེ་ཐེག་དམན་གྱི་ལྟར་རམ་སྙམ་ན། བྱང་ཆུབ་ཅེས་པ་གཉིས་ཏེ། སྟོང་ཉིད་དང་སྙིང་རྗེ་དབྱེར་མེད་པའི་ལྷན་སྐྱེས་ཀྱི་གནས་སྐབས་ཉིད་ལ་མཐའི་
མྱང་འདས་སུ་འཇོག་གི །གཞན་དུ་མ་ཡིན་པའོ། །འདིའི་ཀུན་རྫོབ་དོན་དམ་ནི་ཞུ་བདེ་མིན་གྱི་བདེ་བ་དང་སྟོང་ཉིད་རྟོགས་པ་ལ་བྱའོ། །ཀུན་རྫོབ་ཀུནྡ་ལྟ་བུའི་བྱང་སེམས་བསྐྱེད་པའི་རིམ་པ་ནི། ཤིན་ཏུ་ནས་མཁས་པས་མི་སྤང་ཞེས་པའི་བར་རོ། །ཀུན་རྫོབ་ལེན་པའི་ཚུལ་ནི་དེ་ནི་ཞེས་པ་བཞི་སྟེ། ལྷན་སྐྱེས་མཚོན་ཟིན་ནས་ཀུནྡ་ལྟ་བུ་ཅུང་ཟད་པདྨར་འཕོས་པའོ། །ངེས་པའི་སྟོབས་ཞེས་འབྱུང་ལ། དེའི་དོན་སྟོབས་བཅུའི་སྟོབས་རྒྱས་པའི་ཕྱིར་དུ་ལེན་པར་ཀུ་མུ་ཊིར་རོ། །པདྨ་ཅན་ལས། བཟློག་པས་སྟོབས་ཞེས་པར་བྱས་ནས་བཟློག་པས་ཞེས་པ་ནི་བསྲུང་བའི་ཕྱིར་རོ། །སྟོབས་ནི་ནུས་པའོ་ཞེས་ནུས་པ་ཡོད་ན། གསང་གནས་ཀྱི་རྩེ་ནས་གྱེན་དུ་བཟློག་སྟེ། དེའང་འཛག་པ་བསྲུང་བའི་ཕྱིར་རོ། །ཀུ་མུ་ཊིར། ཞུ་བའི་སེམས་འདི་མཆོག་ཏུ་འགྱུར་རམ་ཞེ་ན། ཞེས་པའི་ལན་དུ། ག་པུར་ཞེས་པ་གཅིག་གིས་བསྐྱེད་རིམ་ལ་ཞུ་བདེ་བདག་མེད་མ་དང་། རྫོགས་རིམ་ལ་བདེ་བ་ཉིད་བདག་མེད་མ་ཡིན་པས། ཞུ་བའང་མཆོག་མིན་པར་མི་འགྱུར་བར་བཤད་དེ། དེའི་རྒྱུར་དགོས་པ་ལ་བསམས་སོ། །དབྱིབས་ལ་སོགས་པ་ནི། ལྟེ་བ་ནས་བྱེད་པ་ཅན་གྱི་བར་གྱིས་བསྟན་པར་འཆད་དོ། །པདྨ་ཅན་ལས། སྔར་བྱང་ཆུབ་སེམས་ནི་མྱ་ངན་འདས། །ཞེས་པ་འབའ་ཞིག་གིས་བྱང་ཆུབ་ཀྱི་སེམས་བསྐྱེད་པའི་རིམ་པ་ལ་སོགས་པ་བསྟན་པ་ནི་ག་པུར་ཞེས་པ་གསུམ་མོ། །ག་པུར་ནི་བྱང་སེམས་དང་བདག་མེད་མ་ནི་དེའི་རྟེན་ཨ་བ་དྷཱུ་ཏཱི་དང་། དེར་བཞུགས་པའི་ག་པུར་ལས་སྐྱེས་པའི་བདེ་
བའང་བདག་མེད་མའི་ཚུལ་ཅན་དང་། དེའང་ཆོས་ཐམས་ཅད་བདག་མེད་མའི་རང་བཞིན་ལ་བཞུགས་པའི་བདེ་བ་ནི་ཕྱག་རྒྱ་ཆེན་པོ་སྟེ། དེ་བསྒོམས་པས་མཐར་ཤིན་ཏུ་གསལ་བར་གྱུར་པ་ན་ཕྱག་རྒྱ་ཆེན་པོའི་དངོས་གྲུབ་བོ། །བདེ་བ་ཆེན་པོ་དེ་གང་དུ་གནས་སྙམ་པ་ལ། སྤྱི་བོ་བདེ་ཆེན་གྱི་འཁོར་ལོར་བདེ་ཆེན་སྡུད་བྱེད་གཞོམ་མེད་ཀྱི་ཚུལ་གྱིས་གནས་སོ་ཞེས་ཏེ་ཧཾ་ཡིག་གོ །དེ་ལ་འཁྱུད་པ་དེའི་རང་བཞིན་གྱིས་གནས་པ་དེ་ལས་བྱུང་བའི་བདེ་ཆེན། དེའང་དང་པོའི་དབྱངས་ཡིག་ཨ་ཐུང་གིས་མཚོན་པའི་རང་བཞིན་གྱིས་སྐྱེ་བ་མེད་པའི་རང་བཞིན་དང་། ཡུལ་ཡུལ་ཅན་དབྱེར་མེད་པའི་ངོ་བོ་ཉིད་ཀྱི་ཆོས་ཐམས་ཅད་ཀྱི་རང་བཞིན་ཏེ། དེ་དང་ངོ་བོ་གཅིག་པའི་རྣམ་པ་ཅན་ནོ། །དེ་ཉིད་བློ་སྟེ་རང་རིག་བདེ་བ་ཆེན་པོར་སངས་རྒྱས་རྣམས་ཀྱིས་བརྟག་པ་སྟེ་བརྗོད་དོ། །ལྟེ་བའི་ཨ་ཐུང་ལ་གཏུམ་མོ་བདེ་ཆེན་གྱི་གནས་སུ་འཆད་ནའང་། སྔར་ལྟར་བཤད་པའང་དགོས་པ་ནི། རྫོགས་པའི་རིམ་པའི་རྣལ་འབྱོར་པ་སྟེ་དེའི་དབང་དུ་བྱས་ནས་བཤད་པའོ། །དེའི་དབང་དུ་བྱས་ནས་ཨ་ཐུང་དེ་ཉིད་སྐལ་བ་དྲུག་དང་ལྡན་པ་དང་བདུད་འཇོམས་པའི་ཤེས་རབ་ཡིན་པས་ཤེས་རབ་མར་བཤད་དོ། གཟུགས་སུ་མི་གནས་པ་ནི་དེ་ནི་ཞེས་པ་བཞིའོ། །དེ་ལས་ཞེས་པ་ནི་པདྨ་ཅན་དུ་དེ་ཉིད་རྣལ་འབྱོར་པས་བསྐྱེད་བྱ་ཞེས་འབྱུང་ལ། རྣལ་འབྱོར་པས་དེ་བསྐྱེད་པ་སྟེ་རྫོགས་པར་བྱ་ཞིང་བདེ་བ་མི་ཟད་པའི་ཚུལ་གྱིས་ལོངས་སྤྱད་པར་བྱའོ། །དེའི་ཕྱིར་ཡང་ཤེས་རབ་ཀྱི་གཟུགས་དང་ཆོས་ཀྱི་དབྱིངས་ཀྱི་ཚུལ་གྱིས་རྣལ་འབྱོར་པས་སྤྱོད་པར་བྱེད་དོ་ཞེས་
འཆད་ལ་ཀུ་མུ་ཊིར་དོན་དམ་པའི་ལྷན་སྐྱེས་གཟུགས་སོགས་ལྔ་ལས་འདས་པར་བཤད་པ་ལ་དེ་རྣམས་མེད་པའི་ཕྱིར། ཡུལ་རྣམས་ལོངས་མ་སྤྱད་པས་བདེ་བ་མིན་པས་བདེ་བ་སྦྱིན་པའི་དངོས་གྲུབ་མེད་དོ་སྙམ་ན། གཟུགས་སྒྲ་ཞེས་པ་བཞི་སྟེ། ཡུལ་རེ་རེ་ལོངས་སྤྱད་པས་ཀྱང་བདེ་བར་འགྱུར་ན། བཅོམ་ལྡན་འདས་མ་ཤེས་རབ་མ་ཡུལ་ཐམས་ཅད་ཀྱི་རང་བཞིན་ལ་ལོངས་སྤྱོད་པའི་རྣལ་འབྱོར་པ་ཇི་ལྟར་བདེ་བས་ཕོངས་པར་འགྱུར། དེ་བས་ན་བདེ་བ་སྦྱིན་པས་འགྲུབ་སྟེ་དེ་ཉིད་ཅེས་པ་ཞིག་གིས་ཀྱང་དེ་སྟོན་ནོ། །དེ་ཉིད་དཀྱིལ་འཁོར་གྱི་དཔའ་བོ་དང་དཔའ་མོའི་དབང་ཕྱུག་མ་ཐམས་ཅད་སྡུད་པ་དང་། དེ་ཉིད་ཆོས་ཐམས་ཅད་གཟུགས་བརྙན་ལྟ་བུར་མཐོང་བའི་ཡེ་ཤེས་ལ་སོགས་པ་འབྱུང་བ་དང་། བདེ་བ་ཆེན་པོའི་ཚུལ་གྱིས་ཡུལ་ལ་ཁྱབ་པར་བྱེད་པས་སྡུད་པ་དང་། གཉིས་མེད་ཀྱི་བདེ་ཆེན་ལས་ཡང་དག་པར་རིག་པར་འབྱུང་བ་དང་། དེ་ལས་འགྲོ་བའི་དོན་བྱ་བ་འབྱུང་བའི་ཆོས་དབྱིངས་ཤིན་ཏུ་དག་པའི་ངོ་བོ་ཉིད་ཀྱི་ཕྱིར་རིམ་པ་བཞིན་དུ་ཡེ་ཤེས་ལྔའོ། །ལེའུ་དང་པོར་གསུངས་པའི་སྡོམ་པའང་བཤད་དུ་གསོལ་ཞེས་པ་ནི། འཁོར་ལོ་བཞི་ལ་སྡེ་པ་བཞི་ལ་སོགས་པ་སྡོམ་ཚུལ་དྲིས་པའོ། །དེའི་ལན་དུ་རྣལ་འབྱོར་མ་ཞེས་པ་གཉིས་ཀྱིས་ནི། བདག་མེད་རྣལ་འབྱོར་མའི་ས་བོན་ཨ་ལུས་ཀྱི་དབུས་ན་གནས་པ་དེ་ཉིད་སྡོམ་པའི་གནས་སུ་གསུངས་ཏེ། ལེའུ་དང་པོར་ཨ་ཐུང་སྡོམ་གནས་སུ་མ་གསུངས་པ་འདིར་བཤད་པ་ནི་ཇི་ལྟར་ཕྱི་རོལ་གྱི་དཀྱིལ་འཁོར་དུ་ཨ་ཡོངས་སུ་གྱུར་པ་ལས་བསྐྱེད་པའི་བདག་མེད་མ་ནི། རང་ལ་ལྷན་སྐྱེས་འདྲེན་པའི་དོན་དུ་ཡིན་པ་དེ་
བཞིན་དུ། ནང་གི་ལྟེ་བའི་གཏུམ་མོ་ཨ་ཐུང་ཡང་ལྷན་སྐྱེས་ཀྱི་བདེ་བ་འདྲེན་པའི་ཐབས་ཡིན་པས་དེའི་དོན་དུ་བཤད་དོ། །དེའང་རྡོ་རྗེ་སྟེ་ཐབས་ཀྱི་ཤེས་རབ་མ་དང་ལྷན་ཅིག་སྦྱོར་བ་ན་འབྱུང་བའི་བདེ་བ་ནི་ཕྱག་རྒྱ་ཆེན་པོ་བདེ་བའི་ཤེས་རབ་བོ། །རྡོ་རྗེ་ནི་ཐབས་རང་ཉིད་ཀྱཻ་རྡོ་རྗེར་བསྐྱེད་པའོ། །དེའི་བདེ་བ་གང་ལས་སྐྱེ་ཞིང་མཆེད་པར་འགྱུར་བའི་ཐབས་ནི། ས་བོན་ཏེ་ཨ་ཧཾ་ངོ་། ནང་གི་ཨ་ཧཾ་བསྟན་པ་འདིས་ནི་ཕྱི་རོལ་གྱི་གཉིས་སྦྱོར་བསྟན་པ་མིན་གྱི་གསང་བའི་སྙོམས་འཇུག་སྟོན་ཏེ། འདི་ལ་ནི་རོ་རྐྱང་གི་རླུང་དྷཱུ་ཏཱིར་སྡོམ་པ་སྔར་བཤད་པ་ལྟར་དགོས་པས། སྡོམ་གནས་འདིར་གང་སྡོམ་པའི་གཙོ་བོའོ། །གཞན་ཡང་ཇི་ལྟར་ཕྱི་རོལ་དེ་བཞིན་དུ། ནང་དུ་སྡོམ་ཚུལ་གཞན་ཡང་མང་དུ་སྟོན་པ་ལས་རེ་ཞིག་བདེ་ཆེན་གྱི་སྐུ་དང་བཅས་པའི་སྐུ་བཞི་ནང་དུ་འཁོར་ལོ་བཞིར་སྡོམ་པ་ནི། བདེ་ཆེན་གང་གིས་སྤྲུལ་ཞིང་བསྐྱེད་པ་ནི་ལྟེ་བའི་འཁོར་ལོར་གནས་པའི་ཙཎྜ་ལི་ཡིན་པ་དང་། བདེ་ཆེན་གྱི་རྟེན་ཀུནྡ་ལྟ་བུ་ལུས་ཀུན་ལ་གནས་ཀྱང་གཙོ་བོ་ནི་སྤྱི་བོ་ཡིན་ལ། དེ་ནི་བསྐྱེད་བྱ་ཡིན་པ་དང་གཏུམ་མོ་འབར་བས་སྤྱི་བོའི་བདེ་བའི་རྟེན་ཞུ་བ་ན། སེམས་ལ་ཆོས་སྐུ་ལྟ་བུའི་ཉམས་མྱོང་སྐྱེ་ཞིང་། སེམས་རྟེན་ཡང་སྙིང་གར་གནས་པ་དང་། དེ་རྣམས་ཀྱི་མཐུས་ཆོས་ཀྱི་རོ་ལ་རྫོགས་པར་ལོངས་སྤྱོད་པ་ལོངས་སྐུ་ཡིན་ལ། དེ་དང་མགྲིན་པའི་གནས་གཉིས་ཆོས་མཐུན་པའི་ཕྱིར། རིམ་པ་བཞིན་དུ་སྐུ་བཞིར་འཇོག་པ་ཤེས་པའི་ཕྱིར་ཡིན་ནོ། །འབྲས་བུ་བཞི་འཁོར་ལོ་བཞིར་སྡོམ་པ་ལ། ལས་ཆུང་འབྲས་བུ་ཆེ་བ་ཞེས་རྣམ་སྨིན་ལ་གསུངས་པས། ལྟེ་བར་ནི་ཆེ་ཆུང་རིགས་མཐུན་དགོས་པར་མངོན་ཏེ། འཁོར་ལོ་བཞིར་མས་བརྟན་གྱི་ཚུལ་གྱིས་དགའ་
བ་ཉམས་སུ་མྱོང་བ་དང་སྦྱར་དགོས་པ་འདྲ་སྟེ་དཔྱད་དོ། །སྡེ་པ་བཞི་འཁོར་ལོ་བཞིར་སྡོམ་པ་ནི། བདེ་བ་སྐྱེ་བ་ནི་ཞུ་བ་ལ་རག་ལུས་ལ། དེའི་གནས་ཏེ་རྒྱུ་ནི་འབར་བ་ཡིན་ཞིང་དེ་དེར་རྒྱུན་དུ་གནས་པའི་ཕྱིར་དང་། ཆོས་སྨྲ་བའི་ཀུན་སློང་ནི་སེམས་ཡིན་ལ། དེའི་གནས་སྙིང་ག་དང་ལྟེ་བར་འབར་བ་ལ་སོགས་པའི་ཐབས་མང་པོས་བཀུར་བ་སྟེ་གོང་མར་བྱས་པ་དང་། སྤྱི་བོ་ན་བདེ་བའི་རྟེན་ཤས་ཆེར་གནས་པའོ། །སྡེ་པ་ནི་མངལ་ན་གནས་པའི་ལུས་སོ། །དེའི་གནས་ནི་མའི་ལྟོ་བའོ། །ཟླ་བ་རྫོགས་པ་ན་མངལ་དུ་གནས་པ་ལ་མི་འདོད་པ་སྐྱེས་ནས་ཕྱིར་འབྱུང་བར་འདོད་པ་ནི་ཆགས་བྲལ་ལོ། །འདི་དག་ཅེས་པ་གཉིས་ནི་སྔགས་འདོན་པའི་དགེ་སློང་དང་ཆོས་མཐུན་ཡོད་པ་ཙམ་ལ་བྱེད་ན་ནི། ཧ་ཅང་ཐལ་བས་ལམ་བསྒོམས་ན་སངས་རྒྱས་འཐོབ་པའི་གནད་ཤིན་ཏུ་ངོ་མཚར་བ་ཡོད་པར་གསལ་བས་དེ་གང་ཡིན་ཞེ་ན། མན་སྙེར་མངལ་གྱི་ཟླ་བ་བཅུ་ས་བཅུར་བཤད་པས། དེའི་སྔར་ཚོགས་སྦྱོར་གཉིས་དང་བཙས་པའི་གནས་སྐབས་མི་སློབ་ལམ་དང་སྦྱོར་བ་སྟེ། དེའང་བསྐྱེད་རིམ་ལ་སྦྱར་ན། སྦྱོར་བ་ཚོགས་བསག་ནི་ཚོགས་ལམ་དང་། སྟོང་ཉིད་བསྒོམ་པ་ནས་བར་དོ་མཚོན་པའི་ཡི་གེ་མ་ཞུགས་ཚུན་ཆོད་སྦྱོར་ལམ་དང་། དེ་ཞུགས་ཏེ་ཞུ་བ་ནས་བརྩམས་ཏེ། འབྲས་བུ་ཧེ་རུ་ཀ་མ་རྫོགས་ཀྱི་བར་ནི་མཐོང་སྒོམ་དང་། རྫོགས་པ་ཕྱིན་ཆད་མི་སློབ་ལམ་དང་སྦྱར་རོ། །དེའི་སྟེང་དུ་སྔགས་འདོན་པའི་དགེ་སློང་གི་རྣམ་པ་ཅན་དུ་བྱུང་བས་ན། སྔགས་བསྒྲུབ་པའི་རྟེན་དགེ་སློང་མཆོག་ཏུ་གསུངས་པ་མཚོན་ནོ། །ཨ་དང་ཧཾ་གི་སྔགས་འདོན་པས་ནི། ལྟེ་བའི་གཏུམ་མོ་དང་སྤྱི་བོའི་བྱང་སེམས་ཀྱི་འབར་འཛག་ལ་ཡང་དང་ཡང་དུ་གོམས་པར་བྱ་བ་མཚོན་ནོ། །མངལ་དུ་ཟླ་བ་བཅུ་བསྡད་པས་ནི། འཆི་སྲིད་དང་འདྲ་བའི་
འོད་གསལ་དང་། བར་སྲིད་དང་འདྲ་བའི་དེའི་ངང་ནས་ལྷ་སྐུར་ལངས་པའི་རྣལ་འབྱོར་གྱིས་མངལ་དུ་ཟླ་བ་བཅུར་གནས་པ་དང་འདྲ་བར་ས་བཅུས་བགྲོད་པར་བྱེད་པ་སྟོན་པའོ། །དེས་ན་དོན་དེ་རྟོགས་ནས་དེ་ལྟར་ཉམས་སུ་བླངས་ན་སངས་རྒྱས་འཐོབ་པར་ཐེ་ཚོམ་མེད་པར་གསུངས་སོ། །སེམས་ཞེས་སོགས་ཀྱི་རང་བཞིན་རྣམ་དག་གི་ངོས་ནས་སངས་རྒྱས་དང་། སངས་རྒྱས་པ་ནི་གློ་བུར་གྱི་དྲི་མ་བསལ་བ་ལ་རག་ལས་པར་བསྟན་ཅིང་། དེ་ལ་བདེན་རྫུན་མེད་པ་ནི་ཕྱོགས་རེ་དང་སྦྱར་རོ། །གང་གིས་ཞེས་པའི་དཔེ་དོན་རྣམས་ཀྱིས་ཀྱང་། གཞི་ལ་གནས་པའི་ཞུ་བདེ་ལམ་དུ་བྱས་པས་འགྲུབ་སླ་བར་སྟོན་ནོ། །ཐབས་དང་བྲལ་མ་བྲལ་གྱིས་འཆིང་གྲོལ་བྱེད་པ་ནི་གང་གིས་ཞེས་པ་བརྒྱད་དོ། །རང་ནི་རང་གི་དེ་ཁོ་ན་ཉིད་དོ། །རང་གིས་རྟོགས་པ་ནི་དེ་ལྷན་སྐྱེས་ཀྱི་བདེ་བས་རྟོགས་པའོ། །དེ་ལས་སངས་རྒྱས་མིན་པའི་སེམས་ཅན་མེད་པ་ནི། རང་བཞིན་ལྷན་སྐྱེས་ཤེས་པ་ལས་ལྷག་པའི་དོན་མེད་ཅེས་གསུངས་སོ། །འོན་ཀྱང་བདེ་སྟོང་གི་དེ་ཉིད་ལས་ལོགས་པའི་སེམས་ཅན་མེད་པར་སྟོན་པ་དང་། དམྱལ་བ་ཞེས་སོགས་ཀྱིས་ནི་དེ་ཁོ་ན་ཉིད་ལས་ཕྱི་རོལ་ཏུ་གྱུར་པ་མེད་པར་སྟོན་ནོ། །པུ་ཀ་སི་དང་ཤ་བ་རི་གཉིས་ཀྱི་རྒྱས་འདེབས་ལ་དོགས་གཅོད་ཀྱིས་ནི། ལམ་གྱི་སྐབས་སུའང་ལུས་ལྷའི་སྐུ་དང་སེམས་དེ་ཉིད་ལ་ཞུགས་པ་མི་འབྲལ་བར་ཉམས་སུ་ལེན་དགོས་པར་སྟོན་ཏེ། དེ་ནི་འབྲས་དུས་སུའང་ཆོས་གཟུགས་གཉིས་འབྲལ་མེད་དུ་སྟོན་ནོ། །ཙཎྜ་ལིའི་རྒྱས་འདེབས་ཀྱིས་ནི། ཁུ་ཁྲག་གི་འབར་འཛག་གཉིས་ཚོགས་དགོས་པར་སྟོན་ཏེ། འོག་ནས་གདོལ་བ་མོ་ཁུ་བར་བཤད་པའི་ཕྱིར་དང་། དེའང་དྲོད་ཀྱི་རང་བཞིན་གྱི་ཕྱིར་རོ། །གཡུང་མོའི་རྒྱས་འདེབས་ཀྱིས་ནི། ཕྲག་དོག་གི་སྐད་ཀྱི་དབྱིངས་ལས། འགྲོ་བའི་དོན་
དུ་འདྲེན་ཞིང་། དེའང་སྔར་བྱང་སེམས་འགྲོ་བ་ལ་བཤད་པས། བྱང་སེམས་ཞུ་ནས་འགྲོ་འོང་བྱེད་པ་ནི་ཆགས་པ་ཆེན་པོའི་མེའི་ཁམས་ལ་བལྟོས་པར་བསྟན་པའི་ཕྱིར་རོ། །དཀར་མོ་ལ་མི་བསྐྱོད་པས་རྒྱས་གདབ་པ་ནི། དཀར་མོ་གཟུགས་ཕུང་ཡིན་པས་པུ་ཀ་སི་དང་འདྲའོ། །ཙཽ་རི་ལ་རྣམ་སྣང་གིས་རྒྱས་འདེབས་པ་ནི་སེམས་ལ་ལུས་ཀྱི་རྒྱས་འདེབས་བྱེད་པ་སྟེ། ཙཽ་རི་ཚོར་བ་ཡིན་པ་ལ་དགོངས་སམ་བརྟག་གོ །རོ་ལངས་མ་ལ་རིན་འབྱུང་གིས་རྒྱས་འདེབས་པ་ནི། འདུ་ཤེས་མེའི་ཁམས་སུ་དང་། རིན་འབྱུང་ཁྲག་ཏུ་བཤད་པའི་གནད་ཀྱིས་དང་། །གྷ་སྨ་རི་ལ་སྣང་མཐས་རྒྱས་འདེབས་པ་ནི། འདོད་ཆགས་རྒྱུར་མེད་པར་ཕྲག་དོག་མི་སྐྱེ་བས། འབྲས་བུ་ལ་རྒྱུའི་རྒྱ་ཟེར་ཏེ་དཔྱད་པར་བྱའོ། །ཛཀཁ་ལ་ཛཀྵ་ཞེས་འབྱུང་ལ། ཨུ་ལ་བ་ཡུ་ཞེས་དང་། བྷཱུཉྫ་ལ་པུཥྤ་ཞེས་ཀྱང་འབྱུང་ངོ་། །སྟེང་ཞལ་ཞེས་སོགས་འགྱུར་འཁྲུགས་པས། བྷ་བའི་འགྲེལ་པར་འོག་ཞལ་སྐུའི་རྡོ་རྗེ་མ་ཞེས་དང་། སྟེང་ཞལ་གསུང་གི་རྡོ་རྗེ། ཞེས་བསྒྱུར་བ་ལྟར་བྱའོ། །རིགས་གསུམ་དུ་སྡུད་པ་ན་སེར་སྣ་དང་ཕྲག་དོག་གཉིས་འདོད་ཆགས་སུ་དང་། རིགས་གཅིག་ཏུ་བྱེད་ན་གཏི་མུག་དང་འདོད་ཆགས་གཉིས་ཀྱང་ཞེ་སྡང་དུ་བསྡུས་པ་དང་། མི་བསྐྱོད་པའང་རྡོར་སེམས་ཀྱི་ནང་དུ་ཞུགས་པ་གཉིས་སོ། །རིགས་ལྔར་བྱེད་པ་ན་རྡོར་སེམས་མི་བསྐྱོད་པའི་ནང་དུ་བསྡུའོ། །ལེའུ་ལྔ་པ་ནི། སྔར་ལྷའི་ལེའུར་ཧེ་རུ་ཀ་གསུམ་བཤད་ཅིང་དཀྱིལ་འཁོར་མ་བཤད་ལ། ལེའུ་བརྒྱད་པར་བདག་མེད་མའི་རྟེན་དང་། བརྟེན་པའི་དཀྱིལ་འཁོར་བཤད་ཀྱང་ཕྱག་བཅུ་དྲུག་པའི་དཀྱིལ་འཁོར་མ་བཤད་པས། དེ་བཤད་པར་ཞུས་པ་ལས། གང་ལ་ཞུས་པ་ནི། ཕྱག་ནི་ཞེས་པ་ལྔའོ། །གང་གིས་ཞུས་པ་ནི། བདག་
མེད་མ་ཞེས་པ་གཅིག་གོ །ཇི་ལྟར་ཞུས་པ་ནི་བཅོ་ལྔ་ཞེས་པ་བཞི་སྟེ། བཅོ་ལྔ་ནི་གང་ལ་དང་། གང་གིས་བསྐོར་བ་སོ་སོར་མ་ཕྱེ་བའི་དབང་དུ་བྱས་པའོ། །དེའི་ལན་བཤད་པར་བཞེད་པ་ནི། བདག་མེད་ཅེས་པ་བཞི་སྟེ། ཐོད་པ་ནི་བདེ་བ་སྐྱོང་བའི་ཕྱིར་ཡུམ་གྱི་པདྨའོ། །སྟ་ནཾ་ནི་དཀར་འཛིན་ནོ། །བཤད་པ་དངོས་ནི་དཀྱིལ་འཁོར་ཞེས་སོགས་ཏེ། རྐང་པ་བཞིས་བདག་མེད་མའི་རྟེན་གྱི་དཀྱིལ་འཁོར་རོ། །བསྐྱེད་ཚུལ་ཇི་ལྟར་བཤད་པ་འདིའང་ཡིན་པ་དང་། དཀྱིལ་འཁོར་གྱི་མཚན་ཉིད་མདོར་བསྡུས་ནས་བསྟན་ཏེ། འོག་གི་བྲི་བའི་སྐབས་སུའང་འཆད་དོ། །སྒྲུབ་ཐབས་ཀྱི་རིམ་པ་ནི་ཐོག་མར་ཚོགས་ཞིང་སྤྱན་དྲངས་ཏེ། ལྷ་མོ་བརྒྱད་ཀྱིས་མཆོད་པ་དང་། དེ་ནས་ཚད་མེད་བཞི་བསྒོམ་པ་དང་། ཡང་ནི་སྟོང་པ་ཞེས་སོགས་བཞི་དང་། ཤྲཱི་ནི་ཞེས་པ་བཞི་དང་། ཧེ་ནི་ཞེས་པ་གཉིས་ཀྱི་མཐར། འདིས་ནི་ཤེས་རབ་རིགས་པ་ཡིས། །ཀྱཻ་རྡོ་རྗེ་ཡང་དག་དགོད། །ཅེས་བཏོན་ནས་ཤཱུ་ནྱ་ཏཱས་སྟོང་པར་བསྒོམ་པ་དང་། ལྷའི་ལེའུར་བཤད་པའི་སྲུང་འཁོར་དང་། ནམ་མཁའི་ཁམས་ལ་བྷ་ག་བསམ། །ཞེས་སོགས་དང་། ནང་དུ་པདྨ་འདབ་བརྒྱད་དང་། དེ་ཡི་དབུས་སུ་ཟླ་བ་དང་། དེ་ཡི་སྟེང་དུ་ས་བོན་དང་། དེ་ནས་ཉི་མ་བསྒོམ་པ་སོགས་ཀྱི་མངོན་བྱང་ལྔ་ལས་གཟུགས་རྫོགས་པ་དང་། དེའི་འོག་ཏུ། ང་ཡི་དབུས་སུ་གནས་པ་ཡང་། །བཞིན་བཟང་ཁྱོད་དང་ལྷན་ཅིག་ཏུ། །ལྷན་ཅིག་སྐྱེས་དགའི་རང་བཞིན་གྱིས། །འདོད་ཆགས་ཆེན་པོས་རྗེས་སུ་ཆགས། །ཞལ་བརྒྱད་པ་ལ་ཞབས་བཞི་པ། །ཕྱག་ནི་བཅུ་དྲུག་དག་གིས་བརྒྱན། །བདུད་བཞི་པོ་ནི་མཉམ་པར་མནན། །འཇིགས་པ་ཡང་ནི་འཇིགས་པར་བྱེད། །ཅེས་བྱ་བ་ལ་སོགས་པ་རེ་ཞིག་ཇི་སྲིད་གླུ་བླངས་པའི་བར་རོ། །དེའི་འོག་ཏུ་བདག་པོ་དགའ་མའི་ས་བོན་གཉིས། །ཨ་ཧཱུཾ་འབར་མ་
འཇིགས་སུ་རུང་། །ཨ་དང་ཧཱུཾ་ནི་སྔོན་པོ་ལས། །རྡོ་རྗེ་འཛིན་པ་ཆེན་པོ་བཞེངས། །ཞབས་བཞི་པ་ལ་མནན་པ་ཡིས། །ལྷ་དང་ལྷ་མིན་སྲེག་པར་བྱེད། །གླང་པོ་རྟ་དང་བོང་བུ་གླང་ནས། གར་གྱི་རོ་ནི་དགུ་དང་ལྡན། །རྣལ་འབྱོར་མ་ནི་བརྒྱད་ཀྱིས་བསྐོར། །དུར་ཁྲོད་དུ་ནི་མགོན་པོ་རོལ། །ཞེས་སྟོན་ནས། དེ་ནས་མིག་སོགས་དང་། སྐུ་གསུང་ཐུགས་བྱིན་རླབས་དང་། ཡེ་ཤེས་པ་གཞུག་པ་དང་། དབང་བསྐུར་རྒྱས་འདེབས་དང་། མཆོད་བསྟོད་དང་བདུད་རྩི་མྱང་བ་དང་། དག་པ་དྲན་པའི་མཐར། དེ་ནས་གཽ་རཱི་སོགས་ལྷ་མོ། །རང་ཕྱོགས་ཁ་བལྟས་གཞུག་པར་བྱ། །ལྷ་མོའི་སྙིང་གར་གྲི་གུག་གནས། །ༀ་དང་ལྷན་ཅིག་ཞུ་གྱུར་ནས། །བཅོམ་ལྡན་སྙིང་གར་ཡང་དག་བཞུགས། །རང་སྙིང་ཉི་མ་ལ་གནས་ཧཱུཾ། །བཅོམ་ལྡན་འདས་དང་ལྷན་ཅིག་ཏུ། །གཅིག་ཏུ་གྱུར་པར་རྣམ་པར་བསམ། །ཉི་ཟླ་ཁ་སྦྱོར་ནང་ས་བོན། །གནས་སྐབས་ཀྱིས་ནི་ཀུན་ཏུ་གནས། །གནས་སྐབས་དེར་ནི་ཚིགས་བཤད་འདིས། །ཐོག་མ་མེད་སོགས་དྲན་པར་བྱ། །དེ་ཡི་ས་བོན་ཉི་ཟླ་དག །འདྲེས་པར་གྱུར་པའི་རིམ་པ་ཡིས། །མར་མེའི་ཚུལ་གྱིས་དགའ་བ་ཆེ། །བྱང་ཆུབ་སེམས་ཀྱི་རང་བཞིན་ཅན། །དམིགས་པ་མེད་པར་བསམ་པར་བྱ། །ཇི་སྲིད་ཤིན་ཏུ་སྟོང་པ་ཉིད། །འདི་དང་འདི་ལྟར་བརྟག་བྱ་སྟེ། །དཀྱིལ་འཁོར་རིམ་པ་སྤྲོ་བར་བྱ། །སྔགས་ནི་སྙིང་ག་ལས་རྡོ་རྗེ། །ལམ་ནས་བདེ་བའི་གཟུགས་ཀྱིས་སུ། །ལྷ་མོའི་པདྨར་སོང་དེ་ལས། །ལྷ་མོ་ཡི་ནི་ཁར་ཕྱུང་སྟེ། །རང་གི་ཁར་ནི་གཞུག་པར་བྱ། །ཡང་ནི་དེ་ཉིད་ཀྱིས་ཕྱུང་སྟེ། །ཞེས་པདྨ་ཅན་ལས་འཆད་དོ། །དཀྱིལ་འཁོར་རིམ་པར་སྤྲོ་བར་བྱ་བ་ནི། འོད་གསལ་ལས་སླར་ཡང་ལྡང་བའི་རིམ་པའོ། །དེ་འདྲ་བའི་
སྡུད་རིམ་གྱིས་འོད་གསལ་དུ་འཇུག་པ་འདི་ནི། མགོན་པོ་ཀླུ་སྒྲུབ་ཀྱིས་རྗེས་གཞིག་གི་བསམ་གཏན་གྱིས་འོད་གསལ་དུ་འཇུག་པར་བཤད་པ་དེ་ཡིན་ལ། འདིའང་མཚོ་སྐྱེས་ཀྱིས་མཛད་པའི་སྒྲུབ་ཐབས་ཀྱི་འགྲེལ་པ་དཔལ་ཛ་ལནྡྷ་རི་པས་མཛད་པ་ལས་གསལ་བར་བཤད་དེ། འདི་ནི་གྲུབ་ཆེན་ཡན་ལག་མེད་པའི་རྡོ་རྗེའི་གཞུང་ལ་བརྟེན་ནས་མཛད་པར་སྣང་སྟེ། ཌ໋་བི་བས། ཡན་ལག་དྲུག་བསྒོམ་རྣལ་འབྱོར་པས། །ཕྱི་ནས་ཁ་དོག་རྣམ་པར་སྤོང་། །ཞེས་པའི་ཡང་དོན་ཡིན་ལ། དེ་རྣམས་ཀྱང་བཤད་པའི་རྒྱུད་གུར་ལས། དེ་ནས་ཡན་ལག་དྲུག་བསྒོམས་ཏེ། །རང་ཡང་རང་བྱིན་བརླབ་པ་ཡིས། །བྱིན་གྱིས་བརླབ་པར་བྱ་བ་ཡིན། །ཆོ་གའི་གོ་རིམ་རིམ་པ་ཡིས། །དེ་ནས་མཚན་མ་མཚོན་པར་བྱ། །དང་པོ་སྤྲིན་གྱི་རྣམ་པ་སྟེ། །གཉིས་པ་དུ་བ་ལྟ་བུའོ། །གསུམ་པ་སྲིན་བུ་མེ་ཁྱེར་དངོས། །བཞི་པ་མར་མེ་གསལ་འབར་བའོ། །ལྔ་པ་རྟག་ཏུ་སྣང་བ་ནི། །སྤྲིན་མེད་ནམ་མཁའ་ལྟ་བུའོ། །ཐམས་ཅད་མཁྱེན་པའི་རྒྱུ་དེ་སྟེ། །དངོས་གྲུབ་ངེས་འཇུག་ཉེ་བ་ཡིན། །ཞེས་བསྟན་པའི་བདག་བྱིན་བརླབ་ཅེས་པ་དེ་ཡིན་ནོ། །འདི་བདེ་མཆོག་སྟོད་འགྲེལ་སོགས་ལས། སོ་སོར་སྡུད་པའི་ཡན་ལག་དྲུག་ལ་སྦྱར་ནས་ཀྱང་འཆད་ལ། རྒྱུད་ཀྱི་རྡོ་རྗེའི་ཚིག་རེ་རེ་ལ་བསྐྱེད་རྫོགས་གཉིས་དང་། རྫོགས་རིམ་གྱི་དོན་དུ་མ་ལ་དྲངས་ཏེ་བཤད་པས་ཆོག་པས་ཚུལ་གཉིས་ཀ་ཤེས་པར་བྱའོ། །གུར་གྱི་ལེའུ་བཞི་པར་བཤད་པའི་རང་བྱིན་རླབས་བསྒོམ་ཚུལ་གསལ་བར་ནི། གུར་གྱི་ལེའུ་བཅུ་བཞི་པ་ལས་གསུངས་ཏེ། དེ་ནས་བཅོམ་ལྡན་འདས་དཔའ་བོ་ཆེན་པོ་རང་བྱིན་གྱིས་བརླབ་པའི་ཐེག་པ་ལ་ཞུགས་ཏེ། རང་བྱིན་བརླབ་པའི་སྦྱོར་བ་རུ། །དེ་ཉིད་ཕྱིར་ན་གསུངས་པ་སྟེ། །སྙིང་གའི་དབུས་
སུ་ཟླ་བ་གནས། །ཟླ་བའི་གཟུགས་ལ་མི་ཤིགས་པ། །སྣ་ཚོགས་འོད་ཀྱི་རྣམ་འཁྲིགས་ལྡན། །དེས་ནི་རྡོ་རྗེ་རྣལ་འབྱོར་བསྒོམ། །རྡོ་རྗེ་བདག་མེད་མ་མཁའ་འགྲོ། །བསྐུལ་བའི་ཆོ་གས་བསྒོམ་པར་བྱའོ། །མཁའ་འགྲོ་མ་ཡི་སྣ་རྩེར་ནི། །ཡུངས་ཀར་གནས་པ་རྣམ་པར་བསྒོམ། །ཁམས་གསུམ་བརྒྱུ་དང་མི་བརྒྱུ་བའི། །འགྲོ་བ་མ་ལུས་ཡུངས་ཀར་དུའོ། །ཞེས་པས་སྙིང་གར་མི་ཤིགས་པ་དང་། འོག་སྒོར་ཕྲ་མོ་བསྒོམ་པའི་རང་བྱིན་རླབས་གཉིས་གསུངས་སོ། །དེ་གཉིས་བསྒོམས་པ་ལས་ལྷན་སྐྱེས་ཀྱི་བདེ་བ་ཆེན་པོ་འདྲེན་པའང་དེ་ཉིད་ལས། དེ་ལྟ་བུར་ནི་བསྒོམས་གྱུར་ན། །རང་བྱིན་བརླབ་པར་རབ་ཏུ་འགྲུབ། གཟུགས་དང་སྒྲ་དང་དེ་བཞིན་དྲི། །རོ་དང་རེག་བྱ་མངོན་ལྡན་ཞིང་། །རྣལ་འབྱོར་ཉིད་ཀྱིས་དེར་བསམས་ནས། །དེ་ནས་བདག་དང་གཞན་མེད་པར། །རྡོ་རྗེ་པདྨ་ལས་བྱུང་བཞིན། །ཡང་དག་བདེ་བ་དངོས་མཆོག་དེ། །རྦ་རླབས་མེད་ཅིང་སྣང་བ་མེད། །རྣམ་པར་རྟོག་མེད་འགྱུར་བ་མེད། །ཉུང་ཟད་ཆང་ལ་རབ་ཞུགས་ཏེ། །བདག་མེད་མ་ལ་རང་རིག་བཞག །བྲལ་བའི་དགའ་བ་དག་གི་མཐའ། །རྟོག་པའི་དྲ་བ་རྣམ་བྲལ་ཞིང་། །མི་གཡོ་རྣམ་པར་འཁྲུལ་བ་མེད། །ཅེས་གསལ་བར་གསུངས་སོ། །ལེའུ་བཞི་པར། དངོས་གྲུབ་ངེས་འཇུག་ཉེ་བ་ཡིན་གྱི་མཇུག་ཐོགས་སུ། ཕྱི་ནས་སྒྱུ་མའི་རྣམ་པ་ལྟར། །རྨི་ལམ་རྣམ་པ་སྐད་ཅིག་འགྱུར། །ཁམས་གསུམ་བརྒྱུ་དང་མི་བརྒྱུ་བ། །མ་ལུས་ལུས་པ་མེད་པར་འགྲུབ། །ཅེས་འོད་གསལ་ལྷན་ཅིག་སྐྱེས་པའི་རྗེས་ནས་སྒྱུ་མའི་ལུས་འགྲུབ་པ་གསལ་བར་གསུངས་པའི་དོན་ནི། འོད་གསལ་ལས་ལྡང་བའི་རིམ་པ་བཤད་པ་དེ་ཡིན་ནོ། །ལེའུ་བཅུ་བཞི་པར། སྔར་ལྟར་བཤད་པའི་སྐབས་སུ་ཡང་། ཆུ་རྒྱུས་དྲ་བ་དང་བཅས་
བཞིན། །ཡན་ལག་ཀུན་ལྡན་བུ་ག་ཅན། །ལུས་དེ་མེད་པར་སྣང་བར་འགྱུར། །དེ་ཡི་སྐད་ཅིག་དེ་ཉིད་ལ། །དགྱེས་པའི་རྡོ་རྗེའི་སྐུ་འཛིན་འགྱུར། །ནམ་མཁའ་ཇི་བཞིན་དམིགས་མེད་བཞིན། །མཚན་མ་མེད་ཅིང་སྐྱེ་བ་མེད། །སྣ་ཚོགས་རྣམ་བྲལ་སྒྲིབ་ལྔ་སྤངས། །སངས་རྒྱས་དངོས་རྣམས་དང་བྲལ་བ། །མེ་ལོང་གཟུགས་བརྙན་ཇི་བཞིན་དུ། །དེ་ཡི་བདག་ཉིད་དུ་སྣང་བར། །ཧེ་རུ་ཀ་ཡི་དངོས་པོར་གསལ། །ཞེས་རྣམ་སྨིན་གྱི་ལུས་རགས་པ་འདི་དང་བྲལ་ནས། མེ་ལོང་གི་གཟུགས་བརྙན་ལྟ་བུའི་ཀྱཻ་རྡོ་རྗེའི་སྐུར་འགྱུར་བར་གསུངས་པས་ནི། སྔར་ཕྱི་ནས་སྒྱུ་མའི་རྣམ་པ་ལྟར། ཞེས་པ་གསལ་བར་བསྟན་པ་ཡིན་ཏེ། རིམ་ལྔ་ལས། མེ་ལོང་ནང་གི་གཟུགས་བརྙན་གྱིས། །སྒྱུ་མའི་ལུས་ནི་ཤེས་པར་བྱ། ཞེས་གསུངས་པ་ལྟར་རོ། །འདིའང་ཀྱཻ་རྡོར་རྩ་རྒྱུད་ལས། ཇི་ལྟར་སྒྱུ་མ་རྨི་ལམ་དང་། །ཇི་ལྟར་བར་མའི་སྲིད་ཡིན་པ། །རྟག་ཏུ་གོམས་པའི་སྦྱོར་བ་ཡིས། །དཀྱིལ་འཁོར་ཉིད་ནི་དེ་བཞིན་འདོད། །ཕྱག་རྒྱ་ཆེན་པོའི་དབང་སྐུར་བར། །ཇི་ལྟར་ཤེས་པའི་བདེ་ཆེན་པོ། །དེ་ཡི་འདི་ནི་བྱིན་བརླབས་ཡིན། །གཞན་ལས་དཀྱིལ་འཁོར་འབྱུང་བ་མེད། །ཅེས་གསུངས་པ་ལས་ཀྱང་ཤེས་ཏེ། གསུམ་པ་དངོས་དབང་དུ་བསྐུར་བ་ལས་མཚོན་པའི་ལྷན་སྐྱེས་ཀྱི་བདེ་ཆེན་དང་། སྟོང་པ་སྦྱར་བ་གོམས་པ་ལས། དཔེ་གསུམ་པོ་དང་འདྲ་བའི་དཀྱིལ་འཁོར་བྱུང་གི་དེ་ལས་གཞན་ལས་མི་འབྱུང་བར་གསུངས་པ་ན། སྣང་ལ་རང་བཞིན་མེད་པར་རྟོགས་པའི་ལྷ་སྐུ་ལ་བྱེད་ན་ནི། རྒྱུད་སྡེ་འོག་མ་གསུམ་དུའང་དུ་མ་ཞིག་འབྱུང་བས། གཞན་ལས་འབྱུང་བ་མེད་ཅེས་པ་མི་འཐད་ཅིང་། བར་སྲིད་དཔེར་བླངས་པའང་དོན་མེད་དོ། །དེས་ན་འཆི་བའི་འོད་གསལ་ལས་རླུང་སེམས་ཙམ་ལས་བར་དོའི་ལུས་འགྲུབ་པ་དང་འདྲ་བར། ལྷན་སྐྱེས་བདེ་ཆེན་གྱི་འོད་གསལ་ཐམས་ཅད་སྟོང་
པ་ལས། རླུང་སེམས་ཙམ་ལས་སྒྱུ་མ་ལྷའི་སྐུ་འཛིན་པ་བསྟན་པ་ཡིན་ལ། དེའང་སྲོག་དྷཱུ་ཏཱིར་ཞུགས་གནས་ཐིམ་གསུམ་བྱས་པ་ལས་བྱུང་བའི་ལྷན་སྐྱེས་ཐམས་ཅད་འཆི་རིམ་དང་མཐུན་མོད་ཀྱང་། སྙིང་གར་རླུང་སེམས་བསྡུས་པ་ལས་འོད་གསལ་དུ་ཞུགས་པ་འདྲ་བ་གཞན་གང་ལའང་མེད་པས། སྙིང་གའི་སྡུད་རིམ་གནད་ཆེ་མོད་ཀྱང་། རྟོགས་དཀའ་བས་བཤད་པ་དེ་ཙམ་དུ་མ་ཐོན་སྣང་ངོ་། །འདི་རྣམས་ཀྱི་གནད་ཤེས་ན་བཤད་རྒྱུད་ལས་བསྐྱེད་རིམ་གྱི་སྐབས་སུ། བར་དོ་དང་དངོས་སུ་སྦྱར་བའི་ཤུགས་ཀྱིས་འཆི་བ་དང་སྐྱེ་བ་གཉིས་དང་སྦྱར་བའང་སྟོན་པ་དང་། ཡང་དེ་ལས་སངས་རྒྱས་ཀྱི་གཟུགས་སྐུ་རིགས་མཐུན་གྱི་རྒྱུ་ལྷའི་རྣལ་འབྱོར་གྱིས་བསྒྲུབ་དགོས་པར་བསྟན་པའི་གནད་ཀྱི་གཙོ་བོ་དང་། རྩ་རྒྱུད་ལས། བདེ་བ་གང་གིས་འཆི་བ་འདིར། །དེ་ཡི་བདེ་བ་བསམ་གཏན་བརྗོད། །ཅེས་གསུངས་པ་རྣམས་ཀྱི་དོན་རྣམས་ཤེས་པར་འགྱུར་རོ། །ལེའུ་འདིར་རྒྱུ་དང་འབྲས་བུའི་ཧེ་རུ་ཀ་གཉིས་ཀ་སྐུ་མདོག་ནག་པོར་གསུངས་ཤིང་། བརྟག་པ་དང་པོའི་ལེའུ་བརྒྱད་པར་རྒྱུའི་ཧེ་རུ་ཀ་དཀར་པོར་ཡང་གསུངས་པས་རྒྱུ་འབྲས་གཉིས་གཞན་རྣམས་མཐུན་ལ། སྐུ་མདོག་མཐུན་མི་མཐུན་གཉིས་ཡོད་དོ། །འདི་ཡིས་ས་བོན་ཕྱུང་བ་དང་། ཞེས་པ་ནི་ཀུ་མུ་ཊིར་ས་བོན་བརྒྱད་ལས་ལྷ་མོ་བརྒྱད་བསྐྱེད་པ་དང་། དེ་བརྒྱད་ཀྱིས་ལྷ་མོ་བརྒྱད་འབྱིན་པར་གསུངས་པ་ལྟར་བྱ་སྟེ། དེས་ལྷ་མོ་འབྱིན་པ་མང་པོ་ལས་གསུངས་སོ། །གདོལ་བ་མོའི་ས་བོན་ལ་ལཾ་ཞེས་པ་ཤིན་ཏུ་མང་ལ། ཁ་ཅིག་ལས་ཙམ་ཞེས་ཀྱང་འབྱུང་སྟེ། དེ་ནི་ལྷ་མོ་དེའི་མཚན་ལ་ཙཎྜ་ལི་ཞེས་འབྱུང་བ་དང་མཐུན། ལཾ་ཞེས་པའང་དེའི་མཚན་གྱི་རྣམ་གྲངས་གཞན་གྱི་དབང་དུ་བྱས་སོ། །རྡོ་རྗེ་སྙིང་པོ་དབང་སྦྱིན་ཕྱིར། །ཞེས་
པ་གཉིས་ཀྱིས་ནི། ལམ་གཞན་གྱི་མཐར་ཡང་ལས་རྒྱ་ལ་བརྟེན་ནས་ལྷན་སྐྱེས་བསྐྱེད་པ་བསྟན་པར་མན་སྙེར་རོ། །བུམ་པ་བརྒྱད་ཅེས་པས་རྣམ་རྒྱལ་དང་ལས་བུམ་གཉིས་ལོགས་སུ་སྟོན་ནོ། །དགའ་བྲལ་བཞི་པར་སྐྱེ་བར་འདོད་པ་ལྟར་ན་གཞུང་དོན་སླ་ལ། དེ་ལས་གཞན་དུ་སྨྲ་བ་ལྟར་ན། མཆོག་མཐའ་དགའ་བྲལ་སྔོན་མ་ཅན་གྱི་དོན་དུ་འདོད་དོ། །ཐམས་ཅད་རྒྱུད་དུ་སྦས་པ་ནི་རྒྱུད་སྡེ་འོག་མར་ལྷན་སྐྱེས་མ་བསྟན་པ་དང་། བླ་མེད་ཀྱི་རྒྱུད་གཞན་དུ་ལྷན་སྐྱེས་གསུམ་པར་སྐྱེ་བ་མ་བསྟན་པར། མཐར་ཐུག་པའི་རྒྱུད་འདིར་བསྟན་པ་ལ་སྦྱོར་བ་གཉིས་སོ། །ལོངས་སྤྱོད་ཀྱིས་ནི་ཞེས་པ་བཞིའི་སྒྲས་ཟིན་ལྟར་མིན་པར་དོན་གཞན་དུ་ལས་རྒྱ་ལ་བརྟེན་པ་ལ་འཆད་པ་དང་སྒྲས་ཟིན་ལའང་བཙན་ཐབས་སུ་གྲགས་པ་ལྟར་དང་། ཡེ་རྒྱ་ལ་བརྟེན་ནས་དབང་བསྐུར་བ་ལ་བཤད་པ་གསུམ་མོ། །སྟོང་དང་སྟོང་མིན་ནི་བདེ་སྟོང་རེ་རེ་བ་མིན་པར་དབྱེར་མེད་དུ་བྱས་པ་དང་། ལེའུ་དྲུག་པ་ནི་སྔར་སོ་སོའི་རྣམ་དག་བཤད་པའི་ཕྱག་རྒྱ་ལྔ་འཛིན་པའི་དགོས་པ་དང་། ལྷའི་དམིགས་པ་གསལ་བའི་དོན་དུ་བྲིས་སྐུ་སྟོན་ལ། མར་གྱི་བཅུ་བཞིས་ནི་དེའི་བརྒྱད་ཀྱང་མཚོན་ཏེ། དུས་ཁྱད་པར་བ་གསུངས་ཀྱི་དུས་གཞན་ལ་བྲིར་མི་རུང་བ་མིན་ནོ། །ལེའུ་བདུན་པར། སྦྲང་ཆེན་ཞེས་པ་ནི་མིའི་ཞུན་གྱི་མར་མེའི་དུད་པ་ལ་སྣག་ཚ་བྱེད་པའོ། །དུར་ཁྲོད་སོགས་ལ་ནང་བཤད་ཀྱང་ཡོད་དེ་སླའོ། །བརྒྱད་པ་ཀུན་རྫོབ་རྣམ་པའི་གཟུགས་ཀྱི་ཕྱག་ཆེན་གསུངས་པ་ནི། མཱ་མ་ཀཱའི་རིགས་ཅན་གྱི་ཕྱག་རྒྱའོ། །ཡབ་ལ་བདེ་བ་སྦྱིན་པ་ཞེས་པ་ནི་ཐབས་ཤེས་སྦྱོར་བ་ན་ཤེས་རབ་ཀྱི་རྐྱེན་གྱིས་ཐབས་ལ་དགའ་བཞི་བསྐྱེད་པ་བཞིན་དུ། ཐབས་ཀྱི་རྐྱེན་གྱིས་ཀྱང་ཤེས་རབ་ཀྱི་རྒྱུད་ལ་དགའ་བཞི་བསྐྱེད་པའི་དོན་ནོ། །ཕལ་བས་པདྨ་ཅན་དུ་བརྗོད་པ་ནི། འདོད་པའི་བསྟན་བཅོས་ལས་དེ་ལྟར་བརྗོད་
པར་པདྨ་ཅན་ལས་བཤད་པ་ནི། པདྨ་ཅན་ལ་སོགས་པའི་བུད་མེད་རིགས་བཞི་ག་བསྟན་བཅོས་དེ་ནས་བཤད་པ་ལྟར་རོ། །འོན་ཀྱང་ལག་སྨིས་རྩ་འཚོལ་བའང་བསྟན་བཅོས་དེ་ནས་བཤད་ཅེས་པ་ནི་གཏན་མིན་ཏེ། འདི་ནི་བླ་མེད་ཀྱི་ཁྱད་ཆོས་སུ་བཤད་པའི་ཕྱིར་རོ། །སྨྱོ་མེད་ནི་སྨྱོ་བཤད་ཕྱིན་ཅི་ལོག་ཏུ་མི་བྱེད་པར་ཇི་ལྟ་བ་བཞིན་འཆད་པ་ལ་ནཱ་རོ་གསུང་ཟེར་ཞེས་པ་ལས་འབྱུང་ངོ་། །བཙུན་མོའི་ཤུ་གྲ་ཟ་བ་དང་། སྔར་བཤད་པའི་བཙུན་མོའི་ཁུ་བ་མ་བྱིན་པར་ལེན་པར་བཤད་པ་གཉིས་དོན་གཅིག་ལ། དེའི་དོན་ནི་ཤེས་རབ་ཀྱི་དྷཱུ་ཏཱིའི་མར་སྣ་ནས་དེའི་དཀར་ཆ་རྡོ་རྗེའི་བུ་གའི་རྩར་འཇུག་པའོ། །མཉམ་ཟས་ཅན་གྱིས་ཕར་ལའང་འཇུག་པར་བསྟན་ཏེ། ཀ་ཀཱ་མུ་ཁ་ཨེ་ཀ་ར་སོ་ཞེས་པའི་དོན་གོ་ན་ཚུལ་དེ་ཤེས་སོ། །སྐལ་མེད་ཅེས་པའི་ཚིག་ལ་བརྟེན་ནས་འདིར་བཤད་པ་ནི། ཅིག་ཅར་འཇུག་པའི་སྐལ་བ་མེད་པ་རིམ་གྱིས་འཇུག་པ་ཡིན་པས་སྐལ་ལྡན་ཅིག་ཅར་དུ་འཇུག་པ་དང་བཅས་པའི་འཇུག་རིམ་གཉིས་ཡོད་པར་བོད་ཀྱི་རྒྱུད་པ་སོ་སོ་བ་རྣམས་འཆད་མོད་ཀྱང་། རྒྱུད་འདིའི་འགྲེལ་པ་ཁུངས་ཐུབ་གང་ནས་ཀྱང་དེ་ལྟར་བཤད་པ་མེད་ལ། རྒྱུད་དང་བསྟན་བཅོས་ཁུངས་ཐུབ་གཞན་གང་ནས་ཀྱང་ཅིག་ཅར་དུ་འཇུག་རིམ་མ་བཤད་ཅིང་། སྤྱོད་བསྡུས་ལས། དམིགས་ཀྱིས་ཕུག་ནས་བཀག་པའི་ཕྱིར་ལེགས་པ་མ་ཡིན་ནོ། །དེས་ན་འགྲེལ་པའི་འགྱུར་འགའ་ཞིག་ལས། སེམས་ཅན་གདུག་པ་འདུལ་དཀའ་བ་ཞེས་འབྱུང་བ་ལེགས་ཏེ། འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་པའི་ཕྱིར་དང་། ཚེ་འདིར་མཆོག་འགྲུབ་པ་ལ་དབང་པོ་ཤིན་ཏུ་རྣོན་པོ་དགོས་པས། བྱེ་བྲག་ཏུ་སྨྲ་བ་སོགས་ཀྱི་བདག་མེད་ཀྱི་ལྟ་བ་ལ་རིམ་གྱིས་མ་ཁྲིད་པར། དང་པོ་ནས་དབུ་མ་བསྟན་
ན་མི་གོ་བ་ཡིན་པའི་ཕྱིར་དང་། སྐལ་མེད་ཀྱི་རིམ་འཇུག་ཡིན་ན་དེ་ལྟར་བྱ་དགོས་པའི་ཕྱིར་རོ། །དེས་ན་སེམས་ཅན་གདུག་པ་ནི་སྙིགས་མ་ལྔ་བདོ་བའི་དུས་ཀྱི་ཉོན་མོངས་ཤས་ཆེ་བའོ། །འདུལ་དཀའ་བ་ནི་ཀུན་སྤྱོད་ལས། །དུས་མཐར་གཞན་གྱིས་མི་འགྲུབ་སྟེ། །ཞེས་གསུངས་པ་ལྟར་ལམ་འདི་ལས་གཞན་པའི་ལམ་གྱིས་མི་འདུལ་བའོ། །དེ་འདྲ་བའི་གང་ཟག་ཚེ་འདིར་མཆོག་འགྲུབ་པའི་རིན་པོ་ཆེ་ལྟ་བུ་ལ་ནི། མང་དུ་ཐོས་པའི་ཕ་རོལ་ཏུ་སོན་པ་དགོས་པར་སྒྲོན་གསལ་ལས་གསུངས་ཤིང་། དེ་ལ་ནི་མདོ་རྒྱུད་གཉིས་ཅར་གྱི་མང་དུ་ཐོས་པ་ཕུན་སུམ་ཚོགས་པ་དགོས་པས། དེས་གང་ལ་སྦྱོང་བའི་གཞི་གསུངས་ཏེ། དེའང་དབུ་མའི་བར་གྱིས་ནི་མདོ་སྡེའི་ཕྱོགས་ཀྱི་ཐེག་པ་ཆེ་ཆུང་ལ་མཁས་པར་བྱ་བ་དང་། དེ་ནས་གཉིས་ཀྱིས་ནི་སྔགས་ཀྱི་ཕྱོགས་ལ་མཁས་པར་བྱ་བ་བསྟན་ཏེ། དེ་ལ་སྔགས་པ་ཁྱིམ་པ་དང་རབ་བྱུང་གི་རྟེན་ཅན་གཉིས་ལས། དང་པོ་ནི་གསོ་སྦྱོང་ཞེས་པས་སྟོན་ཏེ། བསྙེན་གནས་ནི་དགེ་བསྙེན་གྱི་གསོ་སྦྱོང་ཡིན་པ་དང་། བསྙེན་གནས་ཚེ་ཇི་སྲིད་དུ་བསྲུང་བ་ནི་གོ་མིའི་དགེ་བསྙེན་དུ་གསུངས་སོ། །བསླབ་པའི་གནས་བཅུས་ནི་དགེ་ཚུལ་གྱི་སྡོམ་པ་བསྟན་ལ། དེས་ནི་བསྙེན་རྫོགས་ཀྱི་སྡོམ་པའང་མཚོན་ནོ། །སྐབས་ཀྱི་སྟོབས་ཀྱིས་བྱང་སེམས་ཀྱི་སྡོམ་པ་འཛིན་པའང་བཟུང་ངོ་། །གྲུབ་མཐའ་བཞི་སྟོན་པ་ནི། གཙོ་བོར་བདག་མེད་པའི་ལྟ་བ་གཏན་ལ་འབེབས་པའི་ཆེད་ཡིན་ཏེ། བླ་མེད་ཀྱི་རྒྱུད་སྡེར་ལྷན་སྐྱེས་ཀྱི་བདེ་བ་བསྐྱེད་པའི་ཐབས་ཐུན་མོང་མ་ཡིན་པའི་གནད་དུ་མ་གསུངས་པ་ནི། དེས་བདག་མེད་པའི་དེ་ཁོ་ན་ཉིད་བསྒོམ་པའི་ཕྱིར་ཡིན་ལ། དེ་ཁོ་ན་ཉིད་ཀྱི་དོན་ཡང་། གྲུབ་མཐའ་སྨྲ་བ་གཞན་གསུམ་གྱིས་ཇི་ལྟར་གཏན་ལ་ཕབ་པ་མཐའ་དག་པར་མ་ཤེས་པར་དབུ་མའི་དོན་ཇི་ལྟ་བ་བཞིན་མི་རྟོགས་པའི་ཕྱིར་དང་། དེའི་དོན་མ་རྟོགས་བར་དུ་བདེ་སྟོང་སྦྱོར་བའི་སྟོང་
ཉིད་ཀྱི་ལྟ་བ་མི་རྙེད་པའི་ཕྱིར་རོ། །བྱེ་བྲག་ཏུ་སྨྲ་བ་ཞེས་པའི་དོན་ནི། བྱེ་བྲག་ཏུ་བཤད་མཚོ་ཞེས་པའི་གཞུང་ལ་ཚད་མར་བྱས་ནས་དེས་རྩེ་ཞིང་རོལ་བའོ། །འདིར་ཁ་ཆེ་བྱེ་བྲག་ཏུ་སྨྲ་བས་གནས་མ་བུ་ལ་སོགས་པ་གང་ཟག་རྫས་ཡོད་དུ་སྨྲ་བ་ལྟར་ཁས་མི་ལེན་ཡང་། ལྡན་མིན་འདུ་བྱེད་རྣམས་རྫས་སུ་གྲུབ་པར་སྨྲ་བས་དེའི་གནད་ཀྱིས་བྱེ་བྲག་ཏུ་སྨྲ་བ་དང་། མདོ་སྡེ་པ་གཉིས་ཀྱི་སློབ་ཚུལ་སོ་སོར་བཤད་པ་འདྲ་སྟེ་དཔྱད་དོ། །གང་ཟག་གི་བདག་མེད་ཀྱི་དབང་དུ་མ་བྱས་པའི་གཞི་ལྔ་འདོད་ཚུལ་རྣམས་ཀྱི་དབང་དུ་བྱས་པ་མིན་ཏེ། མཐའ་ཡས་པའི་ཕྱིར་དང་། ཚུལ་སྔ་མ་རྟོགས་ན་དེས་དགོས་པ་འགྲུབ་པའི་ཕྱིར་རོ། །མདོ་སྡེ་པ་ཞེས་པའི་མདོ་སྡེ་ནི་མཛོད་འགྲེལ་སྐོར་བཅས་ལྟར་ན། བསྟན་བཅོས་དང་འགལ་བ་ནི་བླའི། མདོ་དང་འགལ་བ་ནི་དེ་ལྟ་མིན་ནོ། །ཞེས་བཤད་པ་ལྟར། ཉན་ཐོས་པའི་སྡེ་པ་མངོན་པ་སྡེ་བདུན་ཚད་མར་མི་བྱེད་ཀྱི། སངས་རྒྱས་ཀྱི་མདོ་ཉིད་ཚད་མར་བྱེད་པས། ཐེག་དམན་གྱི་མདོ་སྡེ་རྩོད་མེད་རྣམས་སོ། །པདྨ་ཅན་ལས་ཐེག་ཆེན་གྱི་མདོ་སྡེ་ལས་བཤད་པ་ནི། མུ་ཏིག་ཕྲེང་བར་མདོ་སྡེ་ཞེས་པ་ནི་ཐེག་པ་ཆེན་པོའི་མདོའི་སྡེ་ཤིན་ཏུ་ཟབ་པ་མ་ཡིན་པ་རྣམས་ཏེ། དེའང་ཚིགས་སུ་བཅད་པ་གཅིག་པ་ཞེས་བྱ་བ་དང་། ཚིགས་སུ་བཅད་པ་བཞི་པ་ཞེས་བྱ་བ་དང་། ཚིགས་སུ་བཅད་པ་གཉིས་པའི་གཟུངས་ཞེས་བྱ་བ་དང་། སྒོ་དྲུག་པ་ཞེས་བྱ་བ་དང་། བཟང་པོ་སྤྱོད་པ་དང་། ཆོས་བཞི་པ་དང་། རྒྱ་ཆེར་རོལ་བ་དང་། ས་བཅུའི་མདོ་ལ་སོགས་པ་རྣམས་སོ། །ཞེས་མདོ་དེ་རྣམས་ལ་ཚད་མར་བྱེད་པའི་ཉན་ཐོས་སྡེ་པ་མདོ་སྡེ་པར་བཤད་དེ། ཚུལ་གཉིས་ཡོད་དོ། །རྣལ་འབྱོར་སྤྱོད་པ་ནི། མདོ་ལས་རྣལ་འབྱོར་སྤྱོད་པའི་དགེ་སློང་ཞེས་མང་དུ་འབྱུང་བ་ལྟར་ན། ནང་གི་རྣལ་འབྱོར་བསྒོམ་པ་ལ་བརྩོན་པ་སྤྱི་ལ་ཡིན་ཅིང་། རྣལ་འབྱོར་སྤྱོད་པ་བཞི་
བརྒྱ་པ་ཞེས་ཀྱང་འབྱུང་བས། རྣལ་འབྱོར་སྤྱོད་པ་གང་ཡིན་སེམས་ཙམ་པ་མིན་ལ། འདིར་བཤད་པ་འདི་འདྲ་བ་རྣམས་ནི་སེམས་ཙམ་པའི་མིང་ངོ་། །དེའང་ས་སྡེ་ལ་རྣལ་འབྱོར་སྤྱོད་པའི་ས་ཞེས་འབྱུང་ལ། གཞུང་དེའི་ལུགས་ལྟར་དུ་གྲུབ་པའི་མཐའ་ཁས་ལེན་པ་རྣམས་སོ། །དེའང་ཕྱི་རོལ་གྱི་དོན་མེད་པ་དང་སེམས་བདེན་པར་འདོད་པའོ། །སྤྱིར་སེམས་ཙམ་པས་རང་གི་ལྟ་བ་དེ་ཉིད་དབུ་མ་པའི་དོན་དུའང་འདོད་པས། དེ་གཉིས་ལ་མཆོག་དམན་མི་འདོད་ཀྱང་། རྒྱུད་འདི་ནས་གང་གསུངས་པ་བཞིན་དུ་དེ་གཉིས་སོ་སོར་གསུངས་པའི་དོན་འཆད་པ་ལ། མུ་ཏིག་ཕྲེང་བ་ལས། བག་ཆགས་ཀྱི་སྟོབས་ཀྱིས་སེམས་ཉིད་དོན་མེད་བཞིན་དུ་དེར་སྣང་བས་ན། སྣ་ཚོགས་པ་འདི་དག་སེམས་ཙམ་དུ་སྨྲ་བའི་ཆ་ནས་རྣལ་འབྱོར་སྤྱོད་པ་དང་། སེམས་དེ་གཟུང་འཛིན་གཉིས་ཀྱི་ངོ་བོར་ཡོད་པ་མིན་པ་དང་། གཉིས་སྟོང་གི་ངོ་བོར་མེད་པའང་མིན་པས་དབུ་མ་པར་བཤད་དེ། སྔ་མ་དང་ཕྱི་མ་གཉིས་གཞི་མཐུན་དུ་འདོད་པའི་ལུགས་སོ། །སེམས་ཙམ་རྣམ་རྫུན་པ་ཁ་ཅིག་ནི་རྣམ་བདེན་པ་སེམས་ཙམ་པ་དང་། རྣམ་རྫུན་པ་དབུ་མ་པར་འདོད་དོ། །པདྨ་ཅན་དང་། བྷ་བ་དང་། ནག་པོ་བས་ཡོངས་སུ་གྲགས་པ་ལྟར་གྱི་སེམས་ཙམ་པ་དང་། དབུ་མ་པ་ལ་བཤད་དོ། །ཤཱནྟི་པས་སྔགས་ཀྱི་རིམ་པ་ཀུན་གྱི་བྱ་སྤྱོད་དང་། རྣལ་འབྱོར་དང་། རྣལ་འབྱོར་མ་དང་། རྣལ་འབྱོར་བླ་མེད་དང་ལྔར་བྱེད་ལ། ཀུན་ཤེས་པ་ནི་རྣམ་པ་མ་ལུས་པ་ཡིན་གྱི། རྫས་ནི་མིན་ཏེ་མཐའ་ཡས་པས་སོ་ཞེས་དང་། དེ་རྗེས་ཞེས་པ་སྔགས་ཀྱི་རིམ་པ་ཀུན་ལ་སྦྱར་རོ། །འདི་ལ་པཎྜི་ཏ་ཁ་ཅིག་བཞི་པ་ནི། འདུས་པ་སོགས་དང་། ལྔ་པ་ནི་རྣལ་འབྱོར་མའི་རྒྱུད་ལ་འདོད་པ་ཡོད་པས། དེའི་ལུགས་ཀྱིས་ཕ་རྒྱུད་ཀྱི་གོང་ན་མ་རྒྱུད་ཡོད་པའི་རྒྱུད་སྡེའི་རིམ་པའི་མཆོག་དམན་འདོད་ན་ནི་ཤིན་ཏུ་མི་རིགས་ཏེ། དགྲ་ནག་ལས། རྒྱུད་ཀྱི་མཐར་ཐུག་འདུས་པ་སྟེ། །མ་བྱུང་འབྱུང་བར་མི་འགྱུར་རོ། །
ཞེས་དང་། ཞལ་ལུང་ལས། གོང་ན་མེད་པའི་ལུང་ཆེན་པོ། །ཞེས་པ་དང་། གསང་བ་གྲུབ་པར། དཔལ་ལྡན་འདུས་ལས་མཆོག་གཞན་མེད། །ཅེས་སོགས་དུ་མ་དང་འགལ་བའི་ཕྱིར་རོ། །དེས་ན་པདྨ་ཅན་ལས། བྱ་བ་དང་། སྤྱོད་པ་དང་། རྣལ་འབྱོར་དང་། རྣལ་འབྱོར་བླ་མ་དང་། རྣལ་འབྱོར་མའི་ཚུལ་ལོ། །ཞེས་ཐམས་ཅད་སྔགས་ཀྱི་ཚུལ་ཞེས་པའི་དོན་དུ་འཆད་པ་ནི། གསུམ་པར་བཤད་པའི་རྣལ་འབྱོར་གྱི་རྒྱུད་ལས་དབྱེ་བའི་ཕྱིར་རྣལ་འབྱོར་བླ་མ་ཞེས་བསྟན་ལ། དེ་ལ་དབྱེ་བའི་རྣལ་འབྱོར་ཕ་རྒྱུད་དང་། མ་རྒྱུད་གཉིས་སྟོན་པས་གཉིས་ཀའང་གུར་ལས། རྣལ་འབྱོར་བླ་མེད་དེ་ལྟག་ལའོ། །ཞེས་གསུམ་པའི་ལྟག་མ་སྟེ་གོང་མ་ལ་རྣལ་འབྱོར་བླ་མེད་དུ་བཤད་པ་ལྟར་བྱའི། འདུས་པ་སོགས་རྣལ་འབྱོར་བླ་མེད་ཀྱི་རྒྱུད་ལས་གཞན་དུ་མི་བྱའོ། །གལ་ཏེ་སྔགས་ཀྱི་རིམ་པ་ཀུན་ཤེས་པས་རྒྱུད་སྡེ་བཞི་འཛིན་ན། དེའི་རྗེས་སུ་ཀྱེ་རྡོར་སྟོན་པ་འགལ་ཏེ། དེའང་བླ་མེད་ཀྱི་རྒྱུད་ཡིན་པའི་ཕྱིར་རོ་སྙམ་ན། སྐྱོན་མེད་དེ་ཀྱཻ་རྡོར་བླ་མེད་ཀྱི་རྒྱུད་ཡིན་ཀྱང་། དེ་དེའི་རྗེས་སུ་བསྟན་པར་གསུངས་པ་ནི། བླ་མེད་ཀྱི་རྒྱུད་གཞན་རྣམས་བསྟན་པའི་རྗེས་སུ་སྟོན་པ་སྟེ། རྒྱུད་གཞན་གྱི་རྫོགས་རིམ་གྱི་བདེ་སྟོང་སྦྱོར་བའང་། འདི་ནས་ཤིན་ཏུ་གསལ་བར་བཤད་པ་ལྟར་ཤེས་དགོས་སོ། ཞེས་བསྟན་པའི་ཕྱིར་ཡིན་པས་སོ། །དེས་མཚོན་ནས་འདུས་པ་བསྟན་པས་ནི་རྫོགས་རིམ་གྱི་གནད་སྒྱུ་ལུས་དང་། འོད་གསལ་དང་ཟུང་འཇུག་རྣམས་གཞན་དུ་མི་གསལ་བ་ངེས་པའི་ཕྱིར་ཡིན་ཏེ། གཞན་རྣམས་ལའང་དེའི་རིགས་པ་སྦྱར་ཤེས་དགོས་སོ། །ལེའུ་དགུ་པ་ལས། སྔར་གསུངས་པའི་བསད་པའི་སྔགས་དང་སྦྱིན་སྲེག་སོགས་ནི་སྤྱིར་བཏང་ལ་ཅུང་ཟད་ཀྱང་མི་བྱ་སྟེ། འོན་ཀྱང་དམིགས་བསལ་དུ་ནུས་པ་ཁྱད་པར་ཅན་ཐོབ་པས། བླ་མ་ལ་འཁུ་
བ་དང་། བསྟན་པ་ལ་གནོད་པ་བྱེད་པ་རྣམས་བྱ་བ་དེ་ལས་བཟློག་པའི་ཐབས་གཞན་བྱས་ཀྱང་མ་བཟློག་ན། དེའི་ཚེ་སྙིང་རྗེ་ཆེན་པོས་ལུས་ཀྱི་ཁ་སྦྱོར་དབྱེ་བ་ནི། དེ་ནས་ཞེས་པ་གཉིས་སོ། །དངོས་གྲུབ་ནི་ལས་དེ་འགྲུབ་པའམ། མི་བསྐྱོད་པའི་ཞིང་དུ་སྐྱེ་བའོ། །བསམ་གཏན་གྱི་ལག་པས་བསྒྲུབ་བྱའི་ལྟེ་བའི་རྩ་བ་ནས་དབྱུང་བར་བྱའོ། ཞེས་པདྨ་ཅན་ལས་ཏེ། བཤང་ལམ་དུ་མེ་འབར་བའི་གཟུགས་ཅན་གྱི་ཁབ་བཅུག་ནས། ༀ་གྷཱུ་སཱཧཱ། ཞེས་བརྗོད་ནས་ལྟེ་བའི་རྩ་བར་དབྱུང་བ་ནག་པོ་བས་བཤད་པ་དེ་ཡིན་པ་འདྲའོ། །ཇི་ལྟར་ཕྱུགས་ཀྱི་གཟུགས། ཞེས་པ་ལ། ཇི་ལྟ་བའི་གཟུགས་སུ་བལྟས་ཞེས་མུ་ཏིག་ཕྲེང་བར་འབྱུང་སྟེ། བསྒྲུབ་བྱའི་རང་གཟུགས་ཀྱིས་བལྟས་པ་སྟེ་དྲན་པར་བྱས་པ་ལ་བཤད་དོ། །ཁ་ནི་འོག་ཏུ་ཞེས་པ་ནི་ལྷ་དང་སོ་སོར་ཕྱེ་ནས་ཁྲག་སྐྱུག་པ་ནས་ཁ་འོག་ཏུ་བལྟས་པའི་བར་དུ་བསྒོམ་མོ། །རིན་ཆེན་ནི་ཡིད་བཞིན་གྱི་ནོར་བུའོ། །འདིར་དཔེ་དོན་འདི་གཉིས་སྟོན་པ་ནི། ཧེ་རུ་ཀའི་རྣམ་དག་འཆད་པ་ལ། ཆོས་ཐམས་ཅད་ཀྱི་རྣམ་དག་དེ་བཞིན་ཉིད་དང་། རང་རིག་པའི་དག་པ་ཁྱད་པར་ཅན་བསྟན་པའི་ཕྱིར་དུའོ། །དམར་པོའི་སྐད་དོད་ནི་ཆགས་པ་ལའང་འཇུག་པས་དེའི་དབང་དུ་བྱས་སོ། །བྱམས་པའི་ཐུགས་ལས་གཞན་དུ་མི་འགྱུར་བ་ནི་ནག་པོས་སོ། །བྱམས་སྙིང་རྗེས་ཀུན་ནས་བསླངས་ནས་སེམས་ཅན་གྱི་དོན་བྱེད་པ་ནི་བསྡུ་བཞིའོ། །གུག་སྐྱེད་ཅེས་པ་ལ། ཕྱག་རྒྱ་ལྔས་ནི་སངས་རྒྱས་ཉིད། །ཅེས་པར་ཡང་བསྒྱུར་ཏེ། ཕྱག་རྒྱ་ལྔ་ནི་འཁོར་ལོ་སོགས་ལྔའོ། །དེས་ནི་སངས་རྒྱས་ལྔ་མཚོན་པའོ། །སྔགས་བཏུ་བའི་སྔགས་ནི་འདིར་བཤད་པ་ལ་རྩ་སྔགས་མ་གཏོགས་པ་རྣམས་སོ། །བཏུས་པའི་དགོས་པ་ནི་དག་པར་བྱ་བའི་ཕྱིར་རོ། །བཏུ་གཞི་ནི་དབྱངས་གསལ་གཉིས་ཡིན་ལ། དབྱངས་ནི་རྣལ་འབྱོར་མ་རྣམས་ཀྱི་
བརྡས་བསྟན་ཏེ། དབྱངས་དང་པོ་བཅོ་ལྔ་དང་། ལྷ་མོ་བཅོ་ལྔ་རིམ་པ་བཞིན་དུ་སྦྱར་བའི་སྟེང་ནས་བྱའོ། །གསལ་བྱེད་ནི་དང་པོ་ནས་ལྔའི་བར་གྱི་གསུངས་པ་ནི། ཀ་ཙ་ཊ་ཏ་པའི་སྡེ་ཚན་ནོ། །མཐར་གནས་ནི་ཡ་སོགས་བཞི་དང་། ཨུསྨ་ཎ་དྲོ་བའི་སྡེ་ཚན་ཤ་སོགས་བཞིའོ། །འཐུ་བའི་རིམ་པ་ནི། སྔགས་ལེར་རེངས་པ་ནས་ཀུ་རུ་ཀུ་ལླཻའི་བར་གྱིས་སྔགས་ཚན་བརྒྱད་གསུངས་པའི་རིམ་པ་བཞིན་དུ་འདིའང་འཐུ་བ་ལ། སྟོང་པ་ཞེས་པ་ནི་ཐམས་ཅད་དུ་ཐིག་ལེ་ལ་བྱའོ། །མདོག་དཀར་ནི་རེངས་པའི་སྔགས་ཀྱི་ཁ་དོག་ལ་བྷ་བ་དང་ནག་པོ་བས་བཤད་ལ། རྒྱུད་གཞན་དུ་སེར་པོར་བཤད་དོ། །སྣང་མཛད་ཡི་གེའི་བདག་པོ་དང་། དབང་ཕྱུག་དང་ཐུ་བོ་དང་། གཏི་མུག་གི་རིགས་ནི་ༀ་ཡིག་གོ །རིག་བྱེད་ཀྱི་དང་པོ་ནི་ཨོ་ཡིག་ཡིན་ཡང་འདིར་ༀ་ཡིག་གོ །མཐར་གནས་པའི་གསུམ་པ་ལ། །ཡང་ནི་དེ་ཉིད་ཡང་དག་ལྡན། ཞེས་པ་ནི། ལ་ཉིས་བརྩེགས་བྱེད་པའི་དོན་ནོ། །དེ་ནས་དེ་བ་པི་ཙུ་དང་། ཧེ་རུ་ཀ་གསུམ་གྱི་སྔགས་ཀྱང་སྔགས་ཀྱི་ལེའུར་བཤད་པའི་སྔགས་དང་སྦྱར་ལ་བཏུའོ། །ཕྱག་གཉིས་པའི་སྐབས་སུ་དང་པོ་ནི་དང་པོ་ལ་ཞེས་པ་གསུམ་གྱི་ནི། ཡ་ཀའི་ཡ་སྟར་དང་། ཨ་དེའི་སྲོག་ཏུ་སྟེར་བ་སྟོན་པས། ཨ་གྲལ་དུ་མི་བྲིའོ། །རྡོ་རྗེ་མའི་མཐའ་རུ་ཧཱུཾ། ཞེས་པ་ལ། ཀུ་མུ་ཊིར་རྡོ་རྗེ་མ་ནི་ཨཱའོ། །དབྱངས་ཀྱི་ཡི་གེའི་མཐའ། ཞེས་བྱ་བ་ནི་ཨཿ སྟེ་དེ་དང་ལྡན་པའོ། །ཞེས་གསུངས་པས། རྡོ་རྗེ་མའི་དབྱངས་ལ། མཐའི་ཚེག་དྲག་སྦྱར་བ་དགོས་སོ། །སརྦ་འཐུ་བ་ན་ཨུསྨ་ཎ་ཡི་གསུམ་པ་དང་། །མཐར་གནས་པ་ཡི་བཞི་པ་ནི། །སྟེང་དུ་མེ་ཡིས་རྣམ་པར་བརྒྱན། །ཞེས་མཐར་གནས་ཀྱི་བཞི་པ་བཏུས་ཀྱང་། རྒྱ་གར་གྱི་ཡི་གེ་ལ་བ་དང་། ཝ་གཉིས་གཟུགས་གཅིག་པ་དང་། ཝི་ཀྲྀ་ཏཱ་ན་ན་ལ་དུས་འཁོར་འགྲེལ་བར་བི་དང་།
རྟོག་བདུན་གྱི་སྔགས་བཏུ་བར་ཝི་ཐུ་བ་བྱུང་བས་གང་བྱས་ཀྱང་འདྲ་བར་མངོན་ནོ། །ལེའུ་བཅུ་པ་ནི་གོ་སླ་ལ། བཅུ་གཅིག་པ་ལ་ལག་པའི་རི་མོ་དང་ཤ་མདོག་གིས་རིགས་སྟོན་པ་ནི། ཐབས་ཤེས་རིགས་མཐུན་བྱུང་ན་དགའ་བས་དེའི་ཆེད་ཡིན་ལ། རིགས་ངོ་ཤེས་ནས་འདུ་བའི་ཚེ་ཇི་ལྟར་བྱ་བ་ནི། ཚལ་དང་ཞེས་སོགས་ཀྱིས་སྟོན་ནོ། །འདི་ནི་དགོས་པ་ལྷན་སྐྱེས་མཚན་ཉིད་རྫོགས་པར་སྐྱེ་བའི་ཕྱིར་དུ། སྒྱུ་རྩལ་དྲུག་ཅུ་རྩ་བཞི་བྱེད་པའི་ཚུལ་སྟོན་ཏེ། རྡོ་རྗེ་མཁའ་འགྲོ་རྩ་འགྲེལ་ལས་ངེས་པར་ཤེས་དགོས་སོ། །ཤིན་ཏུ་བཀལ་བ་ནི་ཤིན་ཏུ་བརྐྱང་བ་ཞེས་པར་བྱ་དགོས་སོ། །འདི་ནི་སྔར་ལས་ཀྱི་ཕྱག་རྒྱ་ལ་བརྟེན་པར་མང་དུ་བཤད་པ་ཐམས་ཅད་ལ་གོ་དགོས་སོ། །ལེའུ་བཅུ་གཉིས་པ་ལ་རྡོ་རྗེ་རབ་གནས་ནི་རྡོ་རྗེ་འཆང་དུ་བསྐྱེད་ནས་གནས་པའོ། །དགའ་བའི་གནས་སྟེར་བ་ནི། དེས་ཐབས་ཀྱི་ཀུནྡ་ལྟ་བུ་ཞུ་བར་བྱེད་པའོ། །ཡེ་ཤེས་འདི་ནི་ཞེས་པ་ནི་དབང་བཞི་པ་ཡིའོ། །ཆེས་ཕྲ་བ་ནི་བློ་རགས་པས་མི་ཤེས་པའོ། །རྡོ་རྗེའི་དཀྱིལ་ནི་མཁའ་འདྲ་བ། །ཞེས་བསྒྱུར་བས། སྐུ་གསུང་ཐུགས་ཀྱི་རྡོ་རྗེ་གསུམ་གྱི་དཀྱིལ་འཁོར་ནི་སྙིང་པོ་སྟེ་སྔར་བཤད་པའི་སྙིང་པོ་ཀྱཻ་རྡོ་རྗེའོ། །ནམ་མཁའ་འདྲ་བ་ནི་གཉིས་སྣང་མེད་པའོ། །རྡུལ་བྲལ་ནི་ཉོན་མོངས་མེད་པའོ། །མཐར་སྦྱིན་ཞེས་པ་ནི་འགྲེལ་པ་མང་པོས་མཐར་ཕྱིན་གྱི་དོན་དུ་བཤད་པ་ལྟར་བྱ་དགོས་ཏེ། ཐར་པ་མི་གནས་པའི་མྱང་འདས་སྟེར་བའོ། །ཞི་བ་ནི་ཉེར་འཚེ་ཞི་བའོ། །བཞི་པ་ལ་ཁྱོད་རང་གི་ནི་ཕ་ནི་ཁྱོད། ཅེས་འབྱུང་ལ། ཁྱོད་རང་གི་ཕ་ནི་རྡོ་རྗེ་འཛིན་པའོ། །ཁྱོད་ཅེས་པ་ནི་ཡེ་ཤེས་དེ་རྙེད་པས་དེའི་རང་བཞིན་དུ་གནས་པའོ། །ཞེས་པདྨ་ཅན་ལས་བཤད་དེ། ལྷན་སྐྱེས་ཀྱི་བདེ་སྟོང་ཁྱད་པར་བ་ནི་ཁྱོད་རང་གི་འདོད་དོན་བསྐྱེད་པས་པ་དང་། ཡེ་ཤེས་དེ་རྙེད་པ་ན་རང་གི་གནས་ལུགས་ཀྱང་། དེའི་རང་བཞིན་དུ་རྟོགས་པའི་དོན་ནོ། །རྡོར་པད་བྱིན་གྱིས་བརླབ་པ་འདི་ནི་གཙོ་བོར་ནི་ལས་རྒྱ་དང་སྦྱོར་བའི་དུས་
ཡིན་ལ་ཡེ་རྒྱ་དང་སྦྱོར་བ་ནའང་བྱ་དགོས་སོ། །སྔགས་འདི་གཉིས་ཀའི་མཐར་ཀརྻཾ་ཀུ་རུ་ཤ་མེ་ཞེས་བདག་གི་བྱ་བ་མཛོད་ཅིག་ཅེས་འབྱུང་བའི་བྱ་བ་ནི། དགའ་བཞི་བསྐྱེད་པའི་བྱ་བ་ཡིན་པ་ནི། ཙ་ཏུར་ཨཱནནྡཞེས་པ་གཉིས་ཀྱིས་སྟོན་ནོ། །དེ་ལ་ལས་རྒྱ་དང་སྦྱོར་བ་ན་པདྨ་བྱིན་རློབ་ཐབས་ཀྱིས་དང་། རྡོ་རྗེ་བྱིན་རློབ་ཤེས་རབ་ཀྱིས་བྱེད་པར་བོད་ཁ་ཅིག་སྨྲ་བས་ན། རང་ལ་གྲོགས་ཀྱི་བྱ་བ་དེ་མཛོད་ཅིག་ཅེས་བསྐུལ་བའོ། །མཧཱ་རཱ་ག་སུ་ཁད་དྷ་ཞེས་པ་ནི། ཆགས་པ་ཆེན་པོའི་བདེ་བ་སྦྱིན་པའི་ཚུལ་གྱིས་མཛོད་ཅིག་ཅེས་པའོ། །པདྨ་སུ་ཁ་དྷ་རའི་པདྨ་དང་བྷ་ག་ནི་དོན་གཅིག་ལ། བདེ་བ་འཛིན་པ་ནི་པདྨའི་རྩེར་ཕྱིར་མི་འཕོ་བར་བྱང་སེམས་འཛིན་པ་དང་། པི་ཤྭ་ནི་སྣ་ཚོགས་པ་སྟེ། བྷ་གར་རྩོལ་བའི་བྱ་བ་སྣ་ཚོགས་པ་དགའ་བའི་བསྟན་བཅོས་ལས་བཤད་པ་སྟེ། ཐབས་དེས་སོ། །ཧཱུཾ་ནི་སྐུལ་བར་བྱེད་པ་སྟེ། །གསུམ་ནི་ནན་ཏན་དུ་བྱེད་པའོ། །ཤེས་རབ་ཀྱིས་རྡོ་རྗེ་བྱིན་གྱིས་བརླབ་པ་ནི། བཛྲ་མཧཱ་དྭེ་ཥ་ནི་ཞེ་སྡང་ཆེན་པོའི་རྡོ་རྗེ་སྟེ། ཧེ་རུ་ཀར་བྱས་པའི་རྡོ་རྗེའོ། །ཙ་ཏུར་ཨཱནནྟ་ད་ཡ་ནི་དགའ་བཞི་སྦྱིན་པ་སྟེ་དེ་དང་ཀརྻཾ་ཞེས་པ་གཉིས་སྦྱར་རོ། །དེ་ལྟར་ཐབས་ཤེས་གཉིས་ཀྱིས་ཕན་ཚུན་དུ་དགའ་བ་བཞི་བཞི་སྟེར་བའི་ཚུལ་ནི། ཀ་ཀཱ་མུ་ཁ་ཨེ་ཀ་ར་སོ་ནཱ་ཐ། ཞེས་པས་སྟོན་པའི་ཀ་ཀཱ་ནི་བྱ་རོག་གོ །མུ་ཁ་ནི་གདོང་སྟེ་བྱ་རོག་གདོང་མ་དང་། མཁའ་འགྲོ་གདོང་ཞེས་གྲགས་པ་སྟེ། གཉིས་ཀའི་དྷཱུ་ཏཱིའི་མར་སྣའོ། །ཨེ་ཀ་ནི་གཅིག་པ་སྟེ། དེ་འདར་སོ་ཞེས་པས་རོ་གཅིག་པའོ། །དེའི་དོན་ནི་རྩ་གཉིས་པོ་ཕན་ཚུན་ཕྲད་པས་དམ་དུ་བཅིངས་ཏེ་གཅིག་ཏུ་བྱས་པའི་མཐུ་ལས་ནཱ་ཐ་སྟེ། མགོན་པོ་བདེ་ཆེན་བསྐྱེད་པའོ། །ཟེའུ་འབྲུ་ཞེས་པ་ནི་མགྲིན་པའི་པདྨའི་ལྟེ་བའོ། །དེའང་གཉིས་ཀའི་ལུས་ཀྱི་གནས་གསུམ་དུ་འགོད་པ་དང་། རྡོར་པད་བྱིན་གྱིས་བརླབ་པའི་སྔོན་དུ་ཧཱུཾ་ལས་རྡོ་རྗེ་དང་། ༀ་ལས་ནོར་བུ་བསྐྱེད་པ་དང་། ཨ་ལས་པདྨ་
བསྐྱེད་པའང་བསྟན་ཏོ། །རྒྱུད་ཀྱི་ཐོག་མའི་ཨི་ཡིག་གི་ཨ་དང་། མཐའི་ཨ་གཉིས་ཀྱི་བར་དུ་རྒྱུད་གཞན་ཐམས་ཅད་ཚུད་པར་བྱས་པ་ནི། ཨའི་མཚོན་དོན་རང་བཞིན་སྐྱེ་མེད་ཀྱི་སྟོང་པ་དང་། ཨས་བསྐྱེད་པའི་པདྨས་བསྐྱེད་པའི་བདེ་ཆེན་གཉིས་ཀྱིས་རྒྱུད་ཀྱི་དོན་བཅིངས་པར་བསྟན་པའི་བདེ་བ་ཆེན་པོ་ལ་ཤིན་ཏུ་གུས་པར་བྱའོ། །སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་མངྒ་ལཾ། །