ཟབ་མོ་ནཱ་རོའི་ཆོས་དྲུག་གི་ཉམས་ལེན་ཐུན་ཆོས་བདུད་རྩིའི་ཉིང་ཁུ་ཞེས་བྱ་བ་སྒྲུབ་བརྒྱུད་ཀརྨ་ཀཾ་ཚང་གི་དོན་ཁྲིད།
ཟབ་མོ་ནཱ་རོའི་ཆོས་དྲུག་གི་ཉམས་ལེན་ཐུན་ཆོས་བདུད་རྩིའི་ཉིང་ཁུ་ཞེས་བྱ་བ་སྒྲུབ་བརྒྱུད་ཀརྨ་ཀཾ་ཚང་གི་དོན་ཁྲིད་བཞུགས་སོ། །
བླ་མ་དང་ཡི་དམ་ལྷན་ཅིག་སྐྱེས་མའི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །དགོངས་པ་དགྲོལ་བ་དང་རྗེས་སུ་གནང་བར་མཛད་དུ་གསོལ། སྒྲུབ་བརྒྱུད་རིན་པོ་ཆེ་ཀརྨ་ཀཾ་ཚང་གི་ཕྱག་བཞེས་རྫོགས་རིམ་ཟབ་མོ་ནཱ་རོའི་ཆོས་དྲུག་མདོར་བསྡུས་ཏེ་ཉམས་སུ་བླང་བར་འདོད་པས། ལེན་ཚུལ་སྦྱོར་དངོས་རྗེས་གསུམ་ལས། དང་པོ་ནི་བླ་མ་མཚན་ཉིད་དང་ལྡན་པ་ལས། བླ་མེད་བདེ་དགྱེས་ལྟ་བུའི་དཀྱིལ་འཁོར་དུ་དབང་ལེགས་པར་བླངས་བ་སྔོན་དུ་སོང་ནས། བསམ་གཏན་གྱི་ཚེར་མ་
མེད་པའི་གནས་སུ། དལ་འབྱོར་རྙེད་དཀའ་སོགས་ཐུན་མོང་གི་སྔོན་འགྲོ་ལ་བློ་སྦྱངས། སེམས་ཅན་ལ་བཟོད་གླགས་མེད་པའི་སྙིང་རྗེ་བསྐྱེད་པས་རྒྱུད་བསྐུལ་ཏེ། སྐྱབས་འགྲོ་སེམས་བསྐྱེད་སྔོན་དུ་བཏང་ནས་རང་གི་སྤྱི་བོར་ཟླ་གདན་གྱི་སྟེང་འོད་ཀྱི་གུར་ཁང་དབུས་སུ་བླ་མ་རྡོ་རྗེ་སེམས་དཔའ་འོད་ཀྱི་སྐུ་ཅན། ཁ་དོག་དཀར་བ། ཞལ་གཅིག་ཕྱག་གཉིས། གཡས་ཀྱིས་རྡོ་རྗེ་རྩེ་ལྔ་པ་ཐུགས་ཀར་འཛིན་ཅིང་། གཡོན་པས་དྲིལ་བུ་དཀུར་བརྟེན་པ། འགྱིང་བ་དང་བཅས་པས་བཞུགས་པ་ལ་མོས་གུས་དུང་
བྱས་པས། དེའི་སྐུ་ལས་བདུད་རྩིའི་རྒྱུན་འོ་མ་ལྟ་བུ་བྱུང་རང་གི་ཚངས་བུག་ནས་ཞུགས། ལུས་ཐམས་ཅད་གང་བས་རྣམ་སྨིན་གྱི་ཕུང་པོ་གདོས་བཅས་ཀྱི་ཆ་སྦྲུལ་གྱི་ཤུན་པ་བརྗེས་པ་ལྟར་སོང་། ལུས་ཕྱི་ནང་སྒྲིབ་མེད་ཤེལ་སྒོང་ཕྱིས་པ་ལྟར་གྱུར། ཐོག་མེད་ནས་བསགས་པའི་སྡིག་སྒྲིབ་ཐམས་ཅད་དག་པར་མོས་ལ། ངག་ཏུ། སྤྱི་བོར་ཟླ་གདན་འོད་ཀྱི་གུར་ཁང་དབུས་། །བླ་མ་རྡོ་རྗེ་སེམས་དཔའ་རབ་དཀར་བ། །དེ་ལ་མོས་གུས་བྱས་པས་བདུད་རྩི་བབས། །རྣམ་སྨིན་ལུས་སྦྱངས་སྡིག་སྒྲིབ་དག་པར་གྱུར། ཅེས་བརྗོད་པས་གསལ་བཏབ་ནས་ཡི་གེ་བརྒྱ་པ་མང་དུ་འདོན། མཐར་རྡོ་རྗེ་སེམས་དཔའ་རང་ཉིད་ལ་ཐིམ་པར་མོས་ཏེ་ཐུན་བསྡུའོ། ༡ དེ་ནས་བྱིན་རླབས་མྱུར་དུ་འཇུག་པའི་ཕྱིར་བླ་མའི་རྣལ་འབྱོར་བསྒོམ་པ་ནི། རྟེན་མེད་པའི་ནམ་མཁར་ཨ་ཧཾ་ཞེས་སྟོང་པའི་སྒྲ་གྲགས་པའི་རྐྱེན་གྱིས་སྣོད་བཅུད་ཞུ། སླར་སྣང་ལ་རང་བཞིན་མེད་པའི་གཞལ་ཡས་ཁང་གི་དབུས་སུ་རང་ཉིད་བཅོམ་ལྡན་འདས་ཧེ་རུ་ཀ་སྐུ་མདོག་མཐིང་ག་ཞལ་
གཅིག་ཕྱག་གཉིས་ཀྱིས་རྡོ་རྗེ་དྲིལ་བུ་འཛིན་པས་ཡུམ་རྡོ་རྗེ་རྣལ་འབྱོར་མ་དམར་མོ་གྲི་ཐོད་འཛིན་པ་གཡོན་བརྐྱངས་གཡས་བསྐུམ་གྱིས་འཁྲིལ་བ་ལ་འཁྱུད་པ་རལ་པའི་ཐོར་ཚུགས་རིན་པོ་ཆེ་དང་སྣ་ཚོགས་རྡོ་རྗེ་དང་ཟླ་བ་ཕྱེད་པས་སྤྲས་པ། ཐོད་སྐམ་ལྔའི་དབུ་རྒྱན་རིན་པོ་ཆེའི་རྩེ་བྲན་རློན་པ་ལྔ་བཅུའི་དོ་ཤལ་འཕྱང་བ། གཡས་བརྐྱངས་ཀྱིས་བཞུགས་པའི་སྤྱིབོར་བླ་མ་རྡོ་རྗེ་འཆང་སྔོན་པོ་རྡོ་རྗེ་སྐྱིལ་ཀྲུང་གིས་བཞུགས་པ་རྡོ་རྗེ་དང་དྲིལ་བུ་འཛིན་པ་ལ་ཡུམ་རྡོ་རྗེ་ཕག་མོ་དམར་མོ་གྲི་ཐོད་འཛིན་པས་པདྨའི་འདུག་སྟངས་ཀྱིས་འཁྱུད་པ། འོད་ཟེར་འབར་བའི་ཀློང་ན་པདྨ་དང་ཟླ་བའི་གདན་ལ་གནས་པར་བསམ། དེ་ནས་རང་གི་ལུས་ལས་འོད་འཕྲོས། སེམས་ཅན་ཐམས་ཅད་མཆོད་པའི་ལྷ་མོར་གྱུར་པས་མཆོད་པར་བསམས་ནས། དེ་རྣམས་གསལ་གདབ་པའི་ཕྱིར་ངག་ཏུ། མཁའ་ལས་ཨ་ཧཾ་སྟོང་པའི་སྒྲ་གྲགས་པས། །རང་ཉིད་ཧེ་རུ་ཀར་གསལ་སྤྱི་གཙུག་ན། །བླ་མ་ཡུམ་བཅས་དགྱེས་པར་བཞུགས་པ་ལ། འགྲོ་ཀུན་
མཆོད་ལྷར་གྱུར་པས་མཆོད་པ་བྱས། །ཞེས་གསལ་བཏབ་ནས་ངག་ཏུ། སངས་རྒྱས་ཀུན་འདུས་བླ་མའི་དྲུང་། །གླིང་བཞི་རི་རབ་བཅས་པ་དང་། །ཞེས་པ་ནས། མོས་བློས་གོང་མ་རྣམས་ལ་འབུལ། །འགྲོ་ཚོགས་སྒོ་གསུམ་ལོངས་སྤྱོད་དང་། །དགེ་ཚོགས་འབུལ་གྱིས་བཞེས་སུ་གསོལ། །ཕྱི་ཡི་མཆོད་པ་སྣ་ཚོགས་དང་། །སྟོང་ཆེན་རྟོགས་པར་བྱེད་པའི་རོ། །དྲི་ཆུ་དྲི་ཆེན་རཀྟ་དང་། ཁུ་ཀླད་བདེ་ཆེན་འབར་བའི་རོ། །མི་རྟ་ཁྱི་བ་གླང་པོའི་ཤ །ཡེ་ཤེས་བདུད་རྩི་དག་པ་ཅན། །དཔལ་ལྡན་བླ་མ་མཆོག་ལ་འབུལ། །བྱིན་གྱིས་བརླབ་པར་མཛད་དུ་གསོལ། །མཆོད་ལྷ་བླ་མའི་ཡུམ་ལ་ཐིམ། །ཡབ་ཡུམ་གཉིས་མེད་སྦྱོར་བ་ཡིས། །གསང་བ་བདེ་སྟོང་མཆོད་པས་དགྱེས། །མཚར་སྡུག་འོད་དུ་འབར་བར་གྱུར། ཞེས་འདོན་བསྒོམ་བྱས་ནས། དབང་བསྐུར་བའི་དོན་དུ། ཨེ་མ་ཧོ་ཨེ་མ་ཧོ་ཆོས། །ཨེ་མ་ཧོ་ཆོས་ཀྱི་དོན་འབྱུང་བ། །ཆོས་དོན་དག་པ་བདག་མེད་པ། །རྡོ་རྗེ་རྒྱལ་པོར་ཕྱག་འཚལ་འདུད། །ནམ་མཁའི་རྡོ་རྗེ་དེང་བདག་སྩོལ། །ཞེས་གསོལ་
བ་བཏབ་པས་བླ་མ་ཡབ་ཡུམ་སྙོམས་འཇུག་གི་སྒྲས་ཕྱོག་བཅུའི་སངས་རྒྱས་ཐམས་ཅད་བསྐུལ་ཏེ། འདུས་པ་བླ་མའི་ཐུགས་ཀར་བཞུགས། བྱང་ཆུབ་ཀྱི་སེམས་སུ་ཞུ་བ་རྡོ་རྗེའི་ལམ་ནས་ཡུམ་གྱི་པདྨར་སྤྲོས་ཏེ་ཡུམ་གྱི་སྐུའི་དཀྱིལ་འཁོར་པ་ཐམས་ཅད་མཆོད། སླར་རྡོ་རྗེ་བུང་བས་ཡུམ་གྱི་སྐུའི་དཀྱིལ་འཁོར་པ་ཐམས་ཅད་བདུད་རྩིའི་ངོ་བོར་བཞུས་པའི་སྦྲང་རྩི་ལེགས་པར་བཏུང་བ་སྦྱོར་མཚམས་ནས་བབས། བདག་གི་ཚངས་བུག་ནས་ཞུགས་རྩ་དབུ་མའི་ནང་ནས་ཞུགས། རྩ་སྟོང་ཕྲག་བདུན་ཅུ་རྩ་གཉིས་ཀྱི་བར་ཁྱབ་པར་སྤྲོས་པས་བུམ་དབང་ཐོབ། རྩ་དག་པ་སྐུ་རྡོ་རྗེ་མངོན་དུ་བྱས། བདུད་རྩིའི་ཆུ་ཞབས་ཡར་འཁྱིལ་བས་བླ་མ་ཡབ་ཡུམ་སྔར་བས་མཚར་སྡུག་འོད་དུ་ཆགས་པར་གྱུར། དེ་ནས་བླ་མ་ཡབ་ཡུམ་འོ་བྱེད་པ་དང་། འཁྱུད་པ་དང་། དཀུ་རྩ་འཚིར་བ་དང་། རྡོ་རྗེ་དང་པདྨ་དྲག་ཏུ་སྲུབ་པའི་སྦྱོར་བས་བྱང་ཆུབ་ཀྱི་སེམས་དཀར་དམར་ཆུ་བོའི་རྒྱུན་ལྟ་བུ་བྱུང་། བདག་ཉིད་ཀྱི་ལྕེ་རྡོ་རྗེ་རྩེ་གསུམ་པ་ནས་བྱོན།
མགྲིན་པའི་ཡི་གེ་ཡ་ར་ལ་ཝ་ནས་བརྒྱུད་རླུང་བཅུས་བསྡུས་པའི་ཉི་ཁྲི་ཆིག་སྟོང་གི་བར་ཁྱབ་པར་སྤྲོས་པས་གསང་དབང་ཐོབ། རླུང་དག་པ་གསུམ་རྡོ་རྗེ་མངོན་དུ་བྱས། དེ་ནས་བླ་མའི་ཡུམ་ལས་ཕག་མོ་གཉིས་པ་ཆད། བདག་ཉིད་ཧེ་རུ་ཀར་གནས་པའི་ཡུམ་ལ་ཐིམ། ཧེ་རུ་ཀ་ཡབ་ཡུམ་སྦྱོར་བ་མཛད་པས་བྱང་སེམས་སྤྱི་གཙུག་ནས་མགྲིན་པའི་བར་བབས་པས་དགའ་བ། དེ་ནས་རྡོ་རྗེས་པདྨ་དཔྱིས་ཕྱིན་པར་ཕུག་པས་བྱང་སེམས་སྙིང་གར་བབས་པས་མཆོག་དགའ། དེ་ནས་འོག་རླུང་བསྡམས་པས་འཛག་པ་བཅིང་ཞིང་བྱང་སེམས་ལྟེ་བར་བབས་པས་ཁྱད་དགའ། དེ་ནས་རྡོ་རྗེས་དལ་བུས་པདྨའི་ཟེའུ་འབྲུ་ལེགས་པར་འཇིབས་པས་ཁམས་དྭངས་མ་ཞུ་བ་འཛིན་ཞིང་བྱང་སེམས་གསང་བའི་རྩེ་མོའི་བར་ཁྱབ་པར་སྤྲོས་པས་ལྷན་སྐྱེས་ཀྱི་དགའ་བ་མྱོང་། ཤེས་རབ་ཡེ་ཤེས་ཀྱི་དབང་ཐོབ། ཐིག་ལེ་དག་པ་ཐུགས་རྡོ་རྗེ་མངོན་དུ་བྱས། དེ་ནས་བདག་ཉིད་ཀྱི་རྒྱུད་ལ་སྐྱེས་པའི་བདེ་བ་ཆེན་པོའི་ཡེ་ཤེས་ཆོས་ཉིད་བརྗོད་མེད་རྟོག་བྲལ་གྱི་
མྱོང་བ་དང་། བླ་མ་རྡོ་རྗེ་འཆང་ཡབ་ཡུམ་གྱི་ཐུགས་གཉིས་སུ་མེད་པའི་བདེ་བ་ཆེན་པོར་ཡེ་ཤེས་གཉིས་སྤྲོས་བྲལ་རོ་གཅིག་ཏུ་བསྲེ། ལམ་གྱི་རྣམ་པར་མི་རྟོག་པའི་ཡེ་ཤེས་འབྲས་བུ་མི་རྟོག་ཡེ་ཤེས་ཀྱི་ངོ་བོར་བརྒྱུད། བརྟན་གཡོའི་ཡེ་ཤེས་ཀྱི་བར་ཁྱབ་པར་སྤྲོས་པས་དབང་བཞི་པ་ཐོབ། རྣམ་ཤེས་དག་པ་བདེ་ཆེན་གྱི་སྐུ་མངོན་དུ་བྱས། དེ་ནས་བླ་མ་ཡབ་ཡུམ་གྱི་རྡོ་རྗེ་ཐུགས་ཀྱི་དམ་ཚིག་སྤྱི་བོ་དང་སྙིང་གར་བརྟན། དྲིལ་བུ་གསུམ་གི་དམ་ཚིག་མགྲིན་པ་དང་གསང་བར་བརྟན། ཕྱག་རྒྱ་སྐུའི་དམ་ཚིག་དབུ་མ་རྣམ་དག་ཏུ་བརྟན་པས་རྡོ་རྗེ་སློབ་དཔོན་བདག་པོ་ཆེན་པོའི་དབང་ཐོབ། ཕྲིན་ལས་རབ་འབྱམས་བསྒྲུབ་པ་ལ་འཁོར་བ་ཇི་སྲིད་པ་དེ་སྲིད་དུ་སྡོད་པའི་ང་རྒྱལ་བྱས་ནས། དེ་རྣམས་གསལ་གདབ་པའི་ཕྱིར་ངག་ཏུ། བླ་མ་ཡབ་ཡུམ་སྙོམས་ཞུགས་བདུད་རྩི་ཡིས། །རྩ་གང་བྱང་སེམས་རྒྱུན་གྱིས་རླུང་རྣམས་སྦྱངས། མཉམ་སྦྱོར་དགའ་བཞི་མྱོང་ནས་ཆོས་ཉིད་རྟོགས། །དམ་ཚིག་གསུམ་བརྟན་དབང་ཐོབ་སློབ་དཔོན་གྱུར།
ཞེས་བརྗོད་པས་གསལ་གདབ་ཅིང་བསྒོམས་ནས། སྐྱེ་བ་ཀུན་ཏུ་རིགས་བདག་མི་འཆོལ་ཞིང་། །བཅོམ་ལྡན་དྲག་པོའི་དཀྱིལ་འཁོར་འཛིན་བཞིན་དུ། །ཤེས་རབ་པདྨའི་བདུད་རྩི་འཐུང་བྱེད་ཅིང་། །བྱང་ཆུབ་སྙིང་པོར་སྲིད་པ་དག་བགྱིད་ཤོག །ཅེས་སྨོན་ལམ་བྱའོ། །དེ་དག་ནི་སྦྱོར་བའམ་སྔོན་འགྲོའི་མན་ངག་གོ ༢ །གཉིས་པ་དངོས་གཞིའི་རྣལ་འབྱོར་ལ་གཏུམ་མོ་སོགས་དྲུག་ལས། དང་པོ་ལ། །མ་ཟིན་པ་ཟིན་པར་བྱེད་པ། ཟིན་པ་བརྟན་པར་བྱེད་པ། །བརྟན་པ་བོགས་དབྱུང་བ་གསུམ་གྱི་དང་པོ་ལ། ཐོག་མར་སྟོང་ར་སྦྱོང་བ་ནི། ལུས་གནད་བདེ་བའི་སྟན་ལ་རྐང་པ་རེ་མིག་ལྟར་བསྣོལ། ལག་པ་མཉམ་བཞག་གི་ཕྱག་རྒྱ་བཙིར། སྒལ་ཚིག་མདའ་ལྟར་བསྲང་སྟེ། ལག་པའི་གྲུ་མོ་ནང་དུ་ཕུལ། དཔུང་པའི་འཕེལ་ཀ་ཕྱིར་སྐྱེད་པའི་གནད་ཀྱིས་དཔུང་པ་རྒོད་གཤོག་ལྟར་བརྒྱང་། མགྲིན་པ་ཡུད་ཙམ་དགུག །མིག་སྣ་རྩེར་གཏད། ལྕེ་མཆུ་རང་བབ་ཏུ་བཞག །ལུས་བསྲང་བའི་ཕྱིར་སྒོམ་ཐག་པུས་འོག་ནས་དྲངས་ཏེ་ཕྲག་པ་ལ་བཀོན་
ནས། བླ་མ་ལ་མོས་གུས་ཀྱིས་གསོལ་བ་གདབ། དེ་ནས། ༀ་ཨཱཿཧཱུྃ་ཀཱ་ཡ་ཝཱཀྩིཏྟ་ཛྙཱ་ན་བཛྲ་སྭ་བྷཱ་ཝ་ཨདྨ་ཀོ྅ཧཾ། ཞེས་བརྗོད་པས་ཁམས་གསུམ་པོའི་སྣོད་བཅུད་ཐམས་ཅད་ཡེ་ཤེས་ཀྱི་འཁོར་ལོའི་རྟེན་བརྟེན་པར་གྱུར་པའི་དབུས་ན་བདག་ཉིད་བཅོམ་ལྡན་འདས་རྡོ་རྗེ་རྣལ་འབྱོར་མ་སྐུ་མདོག་དམར་མོ་ལང་ཚོ་རྒྱས་པ་སྐུ་ཡི་གནས་མཐོ་བ་རྣམས་རྒྱ་སྐྱེགས་ཀྱིས་ཁ་བཀུག་པ་ལྟར་སྨུག་པ། མཆེ་བ་ཅུང་ཟད་གཙིགས་པའི་ཞལ་གཅིག་ཕྱག་གཉིས་ཀྱི་གཡས་ཀྱིས་གྲི་གུག་ཕྱར་བ། གཡོན་པས་ཐོད་པ་ཁྲག་བཅས་འཛིན་པ། ཧེ་རུ་ཀའི་ངོ་བོའི་ཁ་ཊྭཱཾ་ག་གྲུ་ུམོར་བརྟེན་པ། དབུ་སྐྲ་སུམ་ཆ་བཅིངས་ཤིང་ལྷག་མ་གྲོལ་བ། མི་མགོའི་ཕྲེང་བ་སེ་རལ་ཁ་བྱས་པ། ནུ་མ་དང་བྷ་ག་རྒྱས་ཤིང་སྦེད་པ། ཡེ་ཤེས་ཀྱི་མེ་དཔུང་འབར་བའི་དབུས་ན་པད་ཉི་དང་རོ་སེར་པོའི་སྟེང་དུ་གར་སྟབས་ཀྱིས་རོལ་པའི་སྐུའི་ནང་གསལ་དྭངས་རྙོག་པ་དང་བྲལ་བ་ནམ་མཁའི་ངོས་ལ་སྟོང་པའི་རི་མོས་བར་མ་ཆོད་པ་ལྟར་དམིགས་ཏེ། ངག་ཏུ། རང་ལུས་རྡོ་
རྗེ་རྣལ་འབྱོར་མ་ཡི་སྐུ། །དམར་ལ་སྨུག་པའི་མདངས་ཆགས་གྲི་ཐོད་འཛིན། །བྷ་ག་ནུ་མ་རབ་རྒྱས་གར་སྟབས་ཅན། །གསལ་དྭངས་རྙོག་པ་ཀུན་དང་བྲལ་བའོ། །ཞེས་འདོན་བསྒོམ་བྱའོ། ༣ དེ་ལྟར་སྣང་བརྙན་གྱི་སྐུ་སྒྲུབ་པའི་ཕྱིར་སྟོང་ར་ལེགས་པར་བསྒོམས་ནས། ད་ནི་རིགས་ལྡན་གྱི་གཞི་བཟུང་བ་རྩ་སྦྱང་བ་ནི། ལུས་གནད་གོང་ལྟར་ལ་དམིགས་པའང་རང་ཉིད་རྡོ་རྗེ་རྣལ་འབྱོར་མ་གོང་ལྟར་བསྐྱེད་པའི་སྐུའི་ནང་གི་དབུས་སུ་རྩ་དབུ་མ་སྔོན་པོ་ཤིན་ཏུ་དྲང་བ། ཡར་སྣ་སྣ་ཚོགས་རྡོ་རྗེའི་རྩི བས་ཅན་གྱི་འཁོར་ལོས་སྤྲས་པའི་ཚངས་བུག་གི་བར་དང་། མར་སྣ་གསང་བའི་པདྨར་ཟེའུ་འབྲུའི་ཚུལ་དུ་གནས་པ་གྲོ་སོག་འབྲིང་པོ་ཙམ་པ་གཡས་རོ་མ་དམར་པོ་དང་། གཡོན་རྐྱང་མ་དཀར་མོ་གཉིས་ཀྱང་དབུ་མའི་རང་ཚད་དང་མཉམ་པ་གྲོ་སོག་ཕྲ་ཤོས་ཙམ་པ། གསུམ་གའང་གཅིག་ལ་གཅིག་མ་རེག་པ་ཁང་སྟོང་དུ་ཀ་བ་བཙུག་པ་ལྟ་བུ་བསམ་མོ། །ལོང་སྐབས་ཆེ་བ་དང་དམིགས་པའི་གནད་དཀའ་བ་ལ་འདིར་ཐུན་གཅིག་བྱེད་པའམ་གཞན་དུ་མ་བྱས་ཀྱང་རུང་། མཆན།
དེ་ནས་ལྟེ་བའི་འཁོར་ལོ་རྩ་འདབ་རེ་བཞི་དམར་པོ་ཁ་གྱེན་བསྟན་གྲུ་གསུམ་ཨེ་ཡིག་གི་དབྱིབས་ཅན། སྙིང་གའི་འཁོར་ལོ་རྩ་འདབ་བརྒྱད་ཁ་འོག་བསྟན་དཀར་པོ་ཟླུམ་པོ་ཝཾ་ཡིག་གི་དབྱིབས་ཅན། མགྲིན་པའི་རྩ་འདབ་བཅུ་དྲུག་དམར་པོ་ཁ་གྱེན་བསྟན་གྲུ་གསུམ་ཨེ་ཡིག་གི་དབྱིབས་ཅན། སྤྱི་བོའི་འཁོར་ལོ་རྩ་འདབ་སོ་གཉིས་ཁ་འོག་བསྟན་དཀར་པོ་ཟླུམ་པོ་ཝཾ་ཡིག་དབྱིབས་ཅན། དེ་རྣམས་ཀྱི་རྩ་སྣེ་གཡོགས་བཅས་སྒྲིབ་མེད་ཕྲ་སྦོམ་རོ་རྐྱང་ཙམ་པ་རོ་རྐྱང་དང་མ་འབྲེལ་བར་བསྒོམས་ཏེ། དེ་གསལ་གདབ་པའི་ཕྱིར་ངག་ཏུ། ལུས་ཀྱི་ནང་དབུས་དྷཱུ་ཏི་མཐིང་གསལ་དྲང་། །གསང་བའི་གནས་ནས་ཚངས་པའི་ཡུལ་སར་སླེབས། །རོ་རྐྱང་དེ་ཚད་དམར་དང་དཀར་བའི་མདོག །འཁོར་ལོ་བཞི་དང་བཅས་པ་ཤིན་ཏུ་གསལ། །ཞེས་འདོན་བསྒོམ་བྱ། ༤ །དེ་ནས་རླུང་སྦྱང་བའི་ཕྱིར་སྣ་བུག་གཉིས་ནས་རླུང་རང་འགྲོས་དྲན་རྩོལ་ཅུང་ཟད་ཆེ་ཙམ་གྱིས་ནང་དུ་བསྡུས་ནས་རྫོགས་པའི་མོད་དེ་ཉིད་དུ་ཐོག་མར་དལ་ཙམ་ལ་དེ་ནས་
ཤུགས་དྲག་པོས་རླུང་ལྷག་མ་མ་ལུས་པར་སངས་ཀྱིས་བུས། རྒྱ་མཚོ་རི་རབ་ལ་སྦྱར་ཏེ་དེའི་དུས། ཚེ་རབས་ཐོག་མ་མེད་པ་ནས་བསགས་པའི་སྡིབ་སྒྲིབ་ཐམས་ཅད་སྣ་བུག་གཉིས་དང་། གཞན་ཡང་ལུས་ཀྱི་བ་སྤུའི་བུ་ག་ཐམས་ཅད་ཁྲོལ་ཚགས་ལྟར་སེང་ངེ་ཡོད་པ་ནས་ཐོན་པས་སངས་ཀྱིས་དག། ལུས་ཤིན་ཏུ་དག་པ་མེ་ཤེལ་དྲི་མ་མེད་པ་ལྟ་བུ་ལ་སེམས་བཞག །དེ་ནས་ཡང་དལ་ལ་རིང་བར་བརྔུབས་ཏེ་མཆིལ་མ་ཞིག་མིད་པ་དང་མཉམ་དུ་ལྟེ་བར་མནན། སྲིན་ཞལ་ནང་དུ་སྡོམ་པའི་ཚུལ་གྱིས་འོག་རླུང་འཐེན་ནས། སྟེང་འོག་གི་རླུང་ལྷན་ཅིག་ལྟོ་བའི་སྨད་ཆ་ཐེར་བྱས་ལ་དགང་། གནོན་མི་བདེ་ཙ་ན་ལྟེ་བར་ཧྲིལ་བྱས་པ་དེ་ལུས་ཀྱི་ནང་རང་གནས་སུ་ཅུང་ཟད་ལྷོད་བྱས་ལ། བ་སྤུའི་བུ་ག་ཐམས་ཅད་ནས་སྔོ་སིབ་སིབ་སོང་བར་བསམས་ནས་གཞིལ། གནོན་མི་ཐུབ་སྙམ་ཙ་ན་སྤྱི་བཙུག་མདའ་ལྟར་འཕང་བ་སྟེ་ཐུན་མགོ་ལ་རེ་རེ་ཙམ་བྱེད་ཅིང་། གཞན་སྣ་བུག་ནས་སངས་བུས་ཏེ་སྤོས་རིང་དུད་པ་ལྟ་བུར་ཕྱིར་ཐོན། སོར་བཅུ་དྲུག་ཙམ་གྱི་
ནམ་མཁའ་ལ་ཡལ་བར་བསམ། ཡང་སྡུད་དུས་འོད་ཀྱི་སྐུད་པ་འདྲ་བའི་རླུང་སོར་བཅུ་དྲུག་གི་ཐད་ཀྱི་ནམ་མཁའ་རང་ལས་བྱུང་། ནང་དུ་སྙིང་གའི་ཐད་ཀྱི་དབུ་མར་ཐིམ་པར་བསམ། ཕྱི་མ་འདི་ལ་རང་བཞིན་མདའ་ལྟར་འཕང་བའང་ཟེར། ཡང་གོང་གི་གཞིལ་བའི་སྐབས་སུ་ནང་གཞིལ་བྱེད་ན། རོ་རྐྱང་གི་རླུང་དྷཱུ་ཏིར་བཅུག །ཡུར་བ་ལ་ཆུ་དྲངས་པ་ལྟ་བུར་ལྟེ་སྙིང་གི་བར་གྱི་ཐད་ཙམ་དུ་སླེབ་པ་དང་ཡལ་བར་བསམས་ནས། དབུ་མའི་ནང་སྟོང་སང་ངེ་བ་ལ་སེམས་གཏད། འདི་ནི་གཞིལ་ཚུལ་མཆོག་ཡིན་ཡང་། ལས་དང་པོ་པ་ལ་རླུང་ཁུག་རིང་བ་ལ་ནི་སྔ་མ་ཕན་གི་འདུག་ཅིང་། ཕུགས་ཀྱི་ཡོན་ཏན་འོག་མ་འདི་ཆེ་སྟེ། དེ་ལྟར་རྔུབ། དགང་། གཞིལ། མདའ་ལྟར་འཕང་བ་བཞི་པོ་ལ་སྦྱོར་བ་བཞི་ལྡན་ཞེས་ཟེར་ཞིང་། འདིར་འདོན་བསྒོམ་སྦྲགས་མ་མི་བདེ་ཡང་། ཡིད་ཡུལ་དུ་གསལ་གདབ་པའི་ཕྱིར། རླུང་རོ་བསལ་བས་སྡིག་སྒྲིབ་ནད་གདོན་དག །དལ་བར་བརྔུབས་ཏེ་སྟེང་འོག་ཁ་སྦྱར་དགང་། །གནོན་པར་མི་བདེ་
ཚེ་ན་གཞིལ་བ་དང་། མི་ནོན་པ་ན་མདའ་ལྟར་འཕང་བའོ། །ཞེས་པའི་དོན་ངེས་པར་སྦྱང་སྟེ། དེ་ལ་གསང་གསུམ་གྱི་འགྲོས་རླུང་སྦྱང་བ་ཞེས་ཐ་སྙད་མཛད་དོ། ༥ །དེ་ནས་ཆུ་ཟླའི་གར་བསྒྱུར་བ་ཐིག་ལེ་སྦྱང་བ་ནི། སྟོང་ར་རྩ་གསལ་གདབ་ལ་སོགས་སྔོན་བཞིན་ལ་དབུ་མའི་ཡར་སྣ་ཚངས་བུག་ནས་སྨིན་མཚམས་ཀྱི་བར་སྣེ་བསྲིངས་ཏེ་གནས་པའི་སྨིན་མཚམས་རུས་པ་གྲུ་གསུམ་གྱི་ནང་དབུ་མའི་རྩ་སྣེར་རླུང་སེམས་ཀྱི་ངོ་བོ་ཐིག་ལེ་དཀར་ལ་འཚེར་བ་སྣུམ་ལ་འདྲིལ་བ་བདེ་བ་དང་ལྡན་པ་ཞིག་བསྒོམ་ཞིང་རླུང་སྦྱོར་དང་ལྡན་པས་གསལ་བཏབ། གསལ་ཐེབས་པ་དང་། རང་བཞིན་མདའ་ལྟར་འཕང་བའི་སྦྱོར་བ་དང་བསྟུན། ཐིག་ལེ་ཚངས་བུག་གི་ཐད་ཀྱི་དབུ་མའི་ནང་སེང་སྒྲ་དང་བཅས་ཤིང་བདེ་བའི་ཚོར་བ་དང་ལྡན་པར་སོང་ནས། དེར་གནས་པ་ལ་སེམས་བཞག །ཡང་རྔུབ་པའི་སྦྱོར་བ་དང་བསྟུན་ནས་ཐིག་ལེ་དབུ་མའི་ནང་དུ་མར་བྱུང་། དགང་བ་དང་བསྟུན། གསང་བའི་རྩེ་མོར་བདེ་ཕྲི་ལེ་གནས་པར་བསྒོམ། ཡང་རང་བཞིན་
མདའ་ལྟར་འཕང་བ་དང་བསྟུན་སྤྱི་གཙུག་ཏུ་སོང་། རྔུབ་པ་དང་བསྟུན། སྨིན་མཚམས་སུ་གནས་པར་བསམ། དེ་ལྟར་འཁོར་མར་སྦྱང་ཞིང་ཐུན་འཇོག་པའི་ཚེ་སྨིན་མཚམས་སུ་ཐིག་ལེ་བསྡུས་ནས་འཇོག་སྟེ། དེ་ཉིད་གསལ་གདབ་པའི་ཕྱིར། སྨིན་མཚམས་ཐིག་ལེ་དཀར་འཚེར་སྣུམ་ལ་འདྲིལ། །རང་བཞིན་མདའ་ལྟར་འཕང་བས་སྤྱི་བོར་བཀོད། །བརྔུབས་པས་དྷཱུ་ཏིའི་ལམ་ནས་གསང་བར་སླེབས། །དེ་ལྟར་འབྱུང་ལྡོག་བྱས་པས་བདེ་བ་སྐྱེས། །ཞེས་གསལ་བཏབ་ནས་ཉམས་སུ་བླང་ངོ་། ༦ །དེ་ལྟར་མ་ཟིན་པ་ཟིན་བྱེད་ཀྱི་ཐབས་བསྟན་ནས། གཉིས་པ་ཟིན་པ་བརྟན་པར་བྱེད་པ་ལ་ལུས་གནད་སྔར་ལྟར་རླུང་སྦྱང་ཡན་ཆད་སྔོན་དུ་བཏང་། རང་ཉིད་ཀྱི་ལུས་ལྷ་སྐུ་གསལ་དྭངས་སུ་གོང་ལྟར་གསལ་བའི་ལུས་ཀྱི་ནང་དུ་རྩ་གསུམ་ལེགས་པར་གསལ་བཏབ་པའི་ལྟེ་འོག་སོར་བཞི་ཙམ་མན་ཆད་གསུམ་ག་ནང་གཅིག་ཏུ་གྱུར་པའི་ལྟེ་བའི་འོག་གསང་བའི་སྟེང་རྒྱུ་ཞབས་གཉེར་མཚམས་ཀྱི་ཐད་ཀྱི་དྷཱུ་ཏིའི་ནང་དུ་མེའི་ཆོས་
འབྱུང་གི་དབུས་སུ་ཡེ་ཤེས་ཀྱི་གཏུམ་མོ་ཐིག་ལེའི་རྣམ་པ་ཁ་དོག་དམར་བ། རེག་བྱ་ཚ་བ། ངོ་བོ་མི་དམིགས་པ། རྣམ་པ་བདེ་བ་སྟེ་མཚན་ཉིད་བཞི་ལྡན་ཙ་ན་ཀའི་འབྲས་བུའི་ཚད་ཙམ། ཆེས་ཤིན་ཏུ་ཕྲ་བ་ཞིག་བསམས་ནས་བུམ་ཅན་གྱི་སྦྱོར་བ་བྱས་པས་མེ་ཤེད་སྐྱེས་ཤིང་། བདེ་བ་དང་ལྡན་པར་བསྒོམ། ༧ དེ་ལ་སེམས་ཟིན་པ་དང་། རླུང་སྦྱོར་གྱིས་མེ་ཤེད་ཇེ་ཆེར་བསྐྱེད་ནས་སྲན་མའི་རྡོག་པོ་ཙམ་པ། གཅན་གཟན་གྱི་སྤུ་ཙམ་གྱི་རྩེ་མོ་སུམ་འཁྱོག་ཏུ་ཡོད་པ་ལ་སེམས་གཏད། ༠ དེ་ལ་བརྟན་ནས་ཁབ་ཙམ་པ་སུམ་འཁྱོག་སྐད་ཅིག་ཀྱང་མི་སྡོད་པར་གཡོ་བ་དང་། ༠ དེ་འདྲ་བ་སོར་གཉིས་དང་། ༠ བཞི་ཙམ་པ་ལ་སེམས་སྦྱང་སྟེ། ཐིག་ལེའི་རྟགས་ཡོད་པ་འདི་རྣམས་ཐུན་སོ་སོའམ་དམིགས་ཐུན་བདུན་པར་བསྡུས་ཀྱང་རུང་ངོ་། །མེ་དེ་དག་ཀྱང་དམར་བ་ལ་སོགས་པ་མཚན་ཉིད་བཞི་ལྡན་རྩ་བ་སྡོམ་ལ་བརྟན་པ། རྩེ་མོ་ཕྲ་ཞིང་གཡོ་བ། དྷཱུ་ཏིའི་ནང་དུ་ཉུག་ཉུག་པ་ལ་སེམས་བཟུང་ངོ་། །འཁྲུལ་འཁོར་དྲུག་པ་བྱ་སྟེ། སྐེད་པ་གཡས་
བསྐོར་གཡོན་བསྐོར་གྱིས། །ལྟེ་བའི་རྩ་མ དུད་འགྲོལ་བ་ཡིན། །རོ་སྟོད་གཡས་གཡོན་གཅུད་པ་ཡིས། །སྙིང་གའི་རྩ་མདུད་འགྲོལ་བ་ཡིན། །མགྲིན་པ་བསྐོར་ཞིང་དགྱེ་དགུ་ཡིས། །སྤྱི་བོ་མགྲིན་པའི་རྩ་མདུད་འགྲོལ། །རྐང་ལག་བརྐྱང་བསྐུམ་བྱས་པ་ཡིས། །ཚིགས་ཀྱི་རྩ་མདུད་འགྲོལ་བ་ཡིན། །ལུས་སྤྲུགས་འཕུར་བསྲུབ་བྱས་པ་ཡིས། །རྩ་རྣམས་ཐམས་ཅད་འདུལ་བ་ཡིན། །ཞེས་སོ། །དམིགས་པ་དེ་དག་གསལ་གདབ་པའི་ཕྱིར། རྩ་གསུམ་འདུས་མདོར་མེ་ཡི་ཆོས་འབྱུང་དབུས། །ཡེ་ཤེས་གཏུམ་མོ་ཐིག་ལེ་ཤིན་ཏུ་ཕྲ། འདིར། ཡེ་ཤེས་གཏུམ་མོ་རྣོ་ལྡན་སྲན་མ་ཙམ། །ཞེས་དང་། ཡེ་ཤེས་གཏུམ་མོ་གསུམ་འཁྱོག་མོ་ཁབ་ཙམ། །ཞེས་དང་། ཡེ་ཤེས་གཏུམ་མོ་གསུམ་འཁྱོག་སོར་གཉིས་པ། །ཞེས་དང་། ཡེ་ཤེས་གཏུམ་མོ་གསུམ་འཁྱོག་སོར་བཞི་པ། །ཞེས་དམིགས་པ་དག་བསྟུན་ནས་འདོན་པ་བསྒྱུར། །ཁ་དོག་དམར་ལ་རེག་བྱ་རབ་ཏུ་ཚ། །ངོ་བོ་སྟོང་ཉིད་རྣམ་པ་བདེ་ཞིང་གསལ། །ཞེས་གསལ་གདབ་ཅིང་བསྒོམ།
དེ་ནི་ཟིན་པ་བརྟན་བྱེད་ཀྱི་མན་ངག་གོ །གསུམ་པ་བརྟན་པ་བོགས་དབྱུང་བ་ལ། དྲོད་ཀྱི་བོགས་དབྱུང་བ། བདེ་བའི་བོགས་དབྱུང་བ། མི་རྟོག་པའི་བོགས་དབྱུང་བ་གསུམ་གྱི་དང་པོ་ནི། དེ་ལྟར་གོང་དུ་བསྟན་པ་རྣམས་བསྒོམས་ཀྱང་མེ་དམིགས་སོགས་མི་གསལ་བའམ། གསལ་ཡང་བོགས་དབྱུང་བའི་ཕྱིར། ལུས་གནད་སྔར་ལྟར་རམ། ཡང་ན་རྐང་པའི་ལོང་བུ་གཉིས་བསྣོལ་ལ་པུས་མོ་སོ་སོར་བསླང་། ལག་གཉིས་བསྣོལ་བའི་གྲུ་མོ་པུས་སྟེང་དུ་བཙུག །ལག་མཐིལ་དཔུང་པ་གཡས་གཡོན་གྱི་སྟེང་དུ་སྦྱར་ཏེ། པུས་འཁྱུད་ཀྱིས་བཅིངས་པས་རྐང་པ་ལ་ཐབ་འགལ་གྲུ་གསུམ་གཉིས། ལག་པ་ལ་བཞི་སྟེ་དྲུག །ནང་དང་གསང་བའི་ཡང་དེ་ལྟར་དྲུག་ཡོད་པས་ཐབ་འགལ་གྱི་ཕྱག་རྒྱ་བཅོ་བ རྒྱད་བཅའ། དམིགས་པའི་གནད་རང་ཉིད་ལྷ་སྐུ་གསལ་དྭངས་རྩ་གསུམ་འཁོར་ལོ་བཞི་དང་བཅས་པ་སྔར་ལྟར་ལ། གཙུག་ཏོར་གྱི་སར་རྩ་གསུམ་ཡར་སྣེ་བསྲིངས་པའི་རྩེ་མོར་གཙུག་གྱི་འཁོར་ལོ་རྩ་འདབ་དགུ་པ། གསང་བའི་འཁོར་ལོ་
རྩ་འདབ་སོ་གཉིས་པ། ཚིགས་ཆེན་གྱི་འཁོར་ལོ་བཅུ་གཉིས་ལ་རྩ་འདབ་བརྒྱད་རེ། ཚིགས་ཕྲན་གྱི་འཁོར་ལོ་རྣམས་ལ་རྩ་འདབ་བཞི་རེ་ཡོད་པར་བསྒོམས་པའི་རྩ་གསུམ་འདུས་མདོར་ཡེ་ཤེས་ཀྱི་གཏུམ་མོ་ཐིག་ལེའི་རྣམ་པ་གསལ་ཞིང་འབར་བའི་རྩེ་མོ་དྷཱུ་ཏིའི་ནང་དུ་ཞུགས་པར་བསམ་ཞིང་རླུང་སྦྱོར་གྱིས་གནད་དུ་བསྣུན་པས་དེ་ལས་མེ་དྲག་ཏུ་འབར། ལྟེ་བའི་འཁོར་ལོ་མན་ཆད་ཁྱབ་པར་བསྒོམ། དྲུག་སྐོར་གྱི་ཕོ་བ་གཡས་བསྐོར་གཡོན་བསྐོར་བྱ། དེ་བརྟན་ནས་སྙིང་ག་མན་ཆད་ཁྱབ་པར་བསྒོམ། རོ་སྟོད་གཡས་གཡོན་གཅུད་པར་བྱ། དེ་བརྟན་ནས་མགྲིན་པ་དང་སྤྱི་བོ་མན་ཆད་ཁྱབ་པར་བསྒོམ། མགྲིན་པ་བསྐོར་ཞིང་དགྱེ་དགུ་བྱ། དེ་བརྟན་ནས་ཡན་ལག་གི་འཁོར་ལོ་རྣམས་ཁྱབ་པར་བསྒོམ། ཡན་ལག་བརྐྱང་བསྐུམ་བྱ། དེ་བརྟན་ནས་རྩ་སྟོང་ཕྲག་བདུན་ཅུ་རྩ་གཉིས་སོགས་བ་སྤུའི་མཐར་ཐུག་པ་ཁྱབ་པར་བསྒོམ། ལུས་སྤྲུགས་འཕུར་བསྲུབ་བྱ། དེ་ལྟར་ཡེ་ཤེས་ཀྱི་མེ་འབར་བས་འཁོར་བའི་རྟེན་བྱེད་པའི་རྩ་
རྣམས་དང་རྩ་མདུད་བརྟེན་པར་བྱེད་པའི་ཆ་ཐམས་ཅད་བསྲེགས། མཆོག་གི་དབུ་མ་མ་གཏོགས་ཕྱི་འཁོར་བའི་སྲོག་གི་རྟེན་བྱེད་པའི་དབུ་མའང་བསྲེགས་པར་མོས་ཏེ། གསལ་གདབ་པའི་ཕྱིར། རྩ་གསུམ་འཁོར་ལོ་དྲུག་དང་འཁོར་ཕྲན་བཅས། །གསལ་བའི་འདུས་མདོའི་གཏུམ་མོ་རབ་ཏུ་འབར། །གཙོ་མོ་གསུམ་གང་འཁོར་ལོ་རྣམས་ཀྱང་གང་། །བ་སྤུའི་བར་ཁྱབ་སླར་ཡང་འདུས་མདོར་བསྡུས། ཞེས་ཐུན་མཐར་འདུས་མདོའི་གཞིའི་གཏུམ་མོ་ལ་མེ་རྣམས་བསྡུས་ཏེ་མཉམ་པར་བཞག །སྐབས་འདིར་བོགས་འདོན་གྱི་ལུས་སྦྱངས་སོ་བདུན་མ་བྱ་བ་ནི། ས་གནོན་བྱས་ལ་ཕོ་བ་ནི། །གཡས་གཡོན་གསུམ་གསུམ་བསྐོར་བས་དྲུག །པུས་མོ་གཡས་པར་འཇུས་ནས་ནི། །དེ་བཞིན་དྲུག་དང་གཡོན་ལའང་དྲུག །མཐེ་བོས་སྲིན་རྩ་མནན་ནས་ཀྱང་། །གཡས་གཡོན་ཁུ་ཚུར་ཞགས་འཕེན་དྲུག །གཡས་གཡོན་མདའ་འགེངས་བྱེད་པ་དྲུག །གཡས་གཡོན་ལག་པའི་ནང་ཤེད་དྲུག །ལུས་ཀུན་སྤྲུགས་དང་སོ་བདུན་ནོ། །ཞེས་པ་ལྟར་རོ། ༨ །དེ་ནས་
བདེ་བའི་བོགས་དབྱུང་བའི་ཕྱིར། ལུས་གནད་དང་སྟོང་ར་རྩ་འཁོར་སྔ་མ་ལྟར་གསལ་བའི་བདེ་ཆེན་འཁོར་ལོའི་དབུས་དྷཱུ་ཏིའི་ནང་དུ་བདུད་རྩི་ཟླ་བ་བྱང་ཆུབ་ཀྱི་སེམས་དཀར་ཆའི་དཀྱིལ་འཁོར་ཟླ་བ་དྲི་མ་དང་བྲལ་བ་ལྟ་བུའི་ལྟེ་བར་ཧཾ་ཡིག་དཀར་པོས་མཚན་པ། ལྟེ་འཁོར་གྱི་དབུས་དྷཱུ་ཏིའི་ནང་དུ་ཙཎྜ་ལི་ཕྲ་ཞིང་ཕྲ་བ་གོང་བུའི་རྣམ་པ་ཅན་མཚན་ཉིད་བཞི་ལྡན་གསལ་བ་ལ་རླུང་སྦྱོར་གྱིས་གནད་དུ་བསྣུན་པས། དེ་ལས་སོར་གང་ལྷག་ཙམ་གྱི་མེ་འབར་བས་དེ་ཡིས་རེག་པས་སྤྱི་བོའི་ཧཾ་ཡིག་ཟླ་བ་དང་བཅས་པ་གཡོས། ཧཾ་ཡིག་ལས་བྱང་ཆུབ་སེམས་ཧཾ་ཡིག་མགོ་ཐུར་བསྟན་གྱི་རྣམ་པར་འཛག་པར་རྩོམ་པ་ན། ཡང་རླུང་རབ་ཏུ་དགང་ཞིང་མེ་སོར་གཉིས་ཙམ་དུ་འབར་བས་བྱང་སེམས་ཧཾ་ཡིག་མགོ་ཐུར་བསྟན་གྱི་རྣམ་པར་ཟག་པ་དེ་ཉིད་བྱང་ཐིག་དཀར་པོ་ཉུངས་ཀར་ཙམ་པ་བྱས་ཏེ། ཆབ་རོམ་ལས་ཐིགས་པ་ཟག་པ་བཞིན་དྷཱུ་ཏིའི་ནང་ནས་བརྒྱུད་དེ་མགྲིན་པའི་བར་བབས། དེ་ནས་སྙིང་ག་ནས་མེ་སོར་བརྒྱད་ཙམ་
འབར་བས་ཐིག་ལེ་མར་བབས་ནས་དེ་དང་གཏུམ་མོ་གཉིས་མེད་དུ་འདྲེས་མ་ཐག་ཐིག་ལེ་དཀར་ལ་དམར་བའི་མདངས་ཆགས་པའི་བྱང་ཐིག་གིས་ལུས་ཐམས་ཅད་གང་བར་བསམ་ཞིང་སེམས་གཟུང་བདེ་བ་སྐྱེས་པ་དང་རྟོག་མེད་དུ་ཆམ་གྱིས་བཞག་སྟེ། ངག་ཏུ། རླུང་གི་སྦྱོར་བས་གཏུམ་མོ་སྦར་བའི་མཐུས། །སྤྱི་བོའི་ཟླ་བ་ཧཾ་ཡིག་བཅས་པ་ལས། །དཀར་ཆ་འཛག་པ་ཐིག་ལེའི་གཟུགས་སུ་བྱོན། །དཀར་དམར་འདྲེས་པའི་ཐིག་ལེས་ལུས་ཀུན་གང་། །དགའ་དང་བདེ་དང་སིམ་པ་སྐྱེད་པར་གྱུར། །ཅེས་བརྗོད་དེ་བསྒོམ་། ༩ །ཡང་འབྲོས་འདེད་ཀྱི་དམིགས་པ་ནི། གཞན་སྔར་ལྟར་ལ་རླུང་སྦྱོར་བྱས་པས་གཏུམ་མོ་ལས་མེ་དབུ་མའི་ནང་དུ་ཡར་ནར་གྱིས་སོང་། ཧྃ་ཡིག་ལ་རེག་མ་ཐག་ཐིག་ལེ་དམར་པོས་ལུས་ཐམས་ཅད་གང་བདེ་མེར་གྱིས་གྱུར། སླར་ཧྃ་ཡིག་ལས་ཐིག་ལེ་དཀར་པོ་ཆད། མེ་ལྕེ་ལ་རེག་པས་མེ་ལྕེ་དེ་ཇེ་དམར་སོང་ནས་སོར་བཞི་ཙམ་དུ་གནས་པའི་ཚེ་ལུས་ཐམས་ཅད་བྱང་ཐིག་དཀར་པོས་གང་བས་བདེ་བ་རྒྱས་པར་
བསམས་ལ། ངག་ཏུ། རླུང་གི་སྦྱོར་བས་གཏུམ་མོ་ནར་གྱིས་འབར། །ཧྃ་ལ་རེག་འཕྲལ་ཐིག་ལེ་དམར་པོས་གང་། །ཧྃ་ལས་ཐིག་ལེ་ཆད་པས་མེ་ཕྱིར་ལོག །ལུས་ཀུན་ཐིག་ལེ་དཀར་པོས་གང་བར་གྱུར། །ཅེས་བསྒོམ་མོ། ༡༠ །དེས་ཀྱང་བདེ་བ་རབ་ཚད་དུ་མ་སྐྱེས་ན་བ་འཇོའི་དམིགས་པ་ནི། པུས་མོ་གཉིས་སྦྱར་ཞིང་རྐང་མགོ་ཕྱིར་བསྐྱེད་སྤྱི་བོའི་ཧྃ་ལས་དཀར་ཆའི་རང་བཞིན་ཧཱུྃ་དཀར་པོ་ཞིག་བདེ་ཕྲིལ་གྱིས་དབུ་མའི་ནང་ནས་མར་ཆད། གསང་བའི་རྩེ་མོར་བདེ་ཕྲིལ་ལེ་གནས་པར་བསམ་ཞིང་འོག་རླུང་འཐེན་འཕུལ་བྱ། བདེ་བ་མི་ཐུབ་པ་སྙམ་ཙ་ན་ཧཱུྃ་དེ་སྤྱི་གཙུག་ཏུ་རྒྱངས་ཀྱིས་སོང་ཧྃ་ལ་ཐིམ། ཚངས་བུག་རྡོ་རྗེ་དཀར་པོ་རྩེ་ལྔ་པ་རྒྱ་གྲམ་གྱིས་བཀག་པར་བསམས་ལ་རྟོག་མེད་དུ་བཞག །ངག་ཏུ། སྤྱི་བོའི་ཧྃ་ལས་ཐིག་ལེ་དཀར་པོ་ཟག །དྷཱུ་ཏིའི་ལམ་བརྒྱུད་གསང་བའི་རྩེ་མོར་གནས། །བདེ་བ་རབ་རྒྱས་སླར་ཡང་སྟེང་དུ་སོང་། །ཧྃ་ལ་ཐིམ་ཞིང་ཚངས་བུག་རྡོ་རྗེས་བཀག །ཅེས་བསྒོམ། ༡༡ དེ་ནས་མི་རྟོག་པའི་བོགས་
དབྱུང་བའི་ཕྱིར། ལུས་གནད་སྤང་ལ་བེ་ཕུར་བཏབ་པ་བཞིན་མི་གཡོ་བར་བཅའ། ལྟ་སྟངས་ནམ་མཁའི་དབྱིངས་སུ་མི་གཡོ་བར་བལྟ། འཇམ་རླུང་ཅུང་ཟད་བཟུང་ལ་བདེ་བའི་རྟོག་པའམ་དྲོ་བའི་རྟོག་པའམ། མདོར་ན་ཡིད་ཀྱི་ཡུལ་དུ་རྣམ་པར་རྟོག་པ་གང་ཤར་བ་དེ་ཀའི་ངོ་བོ་ལ་བཅོས་བསླད་མེད་པར་མཉམ་པར་བཞག །ཐི་བ་ཚང་དུ་འཇུག་པ་ལྟར་ཆོན་ནེ་བཞག །སྦྲང་མ་གར་སྦྱིན་ལ་འབྱར་བ་ལྟར་མི་གཡོ་བ་ལྷན་ནེ་བཞག །བྱ་བ་ཟིན་པའི་སྐྱེས་བུ་ལྟར་རྩོལ་སྒྲུབ་མེད་པར་བཞག །སོག་ཕོན་མདུད་པ་བཤིག་པ་ལྟར་གློད་ལ་བཞག །དེ་ལྟར་བཞག་པས་ཡང་རྣམ་རྟོག་ཅིག་སྐྱེས་ན་དེའི་ངོ་བོ་ལ་སྔར་ལྟར་ཅེར་གྱིས་བལྟས་ཏེ་བཞག་གོ །ཆུ་རྙོག་མ་དང་བྲལ་བ་ལྟར་དྭངས་སང་ངེ་བ། དེ་རླབས་ཀྱིས་མ་བསྐྱོད་པ་ལྟ་བུ་ལྷན་ནེ་བར་བཞག །ངག་ཏུ། གཉུག་མའི་ཤེས་པ་གསལ་དྭངས་རྙོགས་པ་མེད། །ངོས་བཟུང་མེད་ཅིང་འཕྲོ་གནས་འགྲོ་འོང་མེད། །བཅས་བཅོས་བྱར་མེད་རང་གར་ཀློད་ལ་བཞག །གློད་པའི་སེམས་ཉིད་ནམ་མཁའ་ལྟ་
བུའོ། །ཞེས་བསྒོམ་མོ། ༡༢ །དེ་ལྟར་བརྟན་པ་བོགས་དབྱུང་བའི་ཡན་ལག་སྟེ། དེ་རྣམས་ཀྱིས་གཏུམ་མོའི་ཉམས་ལེན་གྱི་ཐུན་དམིགས་སྨོས་ཟིན་ཏོ། ༈ །གཉིས་པ་སྒྱུ་ལུས་ཉམས་སུ་བླང་བ་ལ། མ་དག་པ་སྦྱང་བ་དང་། དག་པ་སྦྱང་བ་དང་། ཐུན་མོང་མིན་པ་སྦྱོང་བ་གསུམ་། དང་པོ་ལ་མ་ཟིན་པ་ཟིན་བྱེད་སོགས་གསུམ་ལས། དང་པོ་ནི། ལུས་གནས་སྔར་བཞིན་རྣམ་སྣང་གི་ཆོས་བདུན་བཅའ། ཡུལ་གནད་སྣང་བ་སྣ་ཚོགས། དུས་གནས་ཉིན་པར་ཤས་ཆེ། དམིགས་པ་ལ་དང་པོར་འདུས་བྱས་ཀྱི་ཆོས་རྣམས་མི་རྟག །སྒོམ་སུ་འགྲོ་བའི་ཚེ་སྲོག་མི་རྟག །བུ་དང་ཆུང་མ་གཉེན་ནོར་རྫས་སོགས་ཀྱང་སྙིང་པོ་མེད་དེ། མདོར་ན་ཆོས་ཤིག་མ་གཏོགས་གང་གིས་ཀྱང་མི་འཚེངས་མི་ཕན། སྐྱེས་པའི་ཐ་མ་འཆི། བསགས་པའི་ཐ་མ་འཛད། འགྲོགས་པའི་ཐ་མ་འབྲལ། མཛའ་བའི་ཐ་མ་འཁོན། གསོས་པའི་ལུས་ནི་འཇིག །རྒྱུ་བའི་དབུགས་ནི་ཆད། ཉེ་འབྲེལ་ཤུལ་དུ་ལུས། ནོར་རྫས་གཞན་གྱིས་སྤྱོད། ཕུང་པོ་རོ་རུ་སོང་། རང་
དབང་རང་ལ་མེད། མདོར་ན་གང་ལའང་སྙིང་པོ་མེད། ཅིས་ཀྱང་དགོས་པ་མེད་སྙམ་དུ་བསམ་ཞིང་སྐྱོ་བ་བསྐྱེད་པས་བློ་སྦྱང་བ་སྔོན་དུ་བཏང་ནས། འདི་སྙམ་དུ་གཟུགས་སོགས་ཕྱི་རོལ་གྱི་སྣང་བ་འདི་ཐམས་ཅད་དེ་སྔ་བདེན་པར་བཟུང་བས་འཁོར་བར་འཁྱམས་པ་ཡིན་པར་འདུག །འདི་ཐམས་ཅད་བརྟགས་ཤིང་དཔྱད་ན་མེད་བཞིན་དུ་སྣང་བ་རྨི་ལམ་དང་སྒྱུ་མ་ལྟ་བུ་དང་། རྐྱེན་ལས་བྱུང་བ་བྲག་ཆ་དང་རྔའི་སྒྲ་ལྟ་བུ་། མི་རྟག་པ་གློག་དང་ཆུ་བུར་ལྟ་བུ། སྣང་ཡང་རང་བཞིན་མེད་པ་སྨིག་སྒྱུ་དང་ཆུ་ཟླ་ལྟ་བུའོ། །སྙམ་དུ་ལེགས་པར་བསྒོམས་ཏེ། ངག་ཏུ། གཟུགས་སྒྲ་དྲི་རོ་རྟ་གླང་ཁང་ཁྱིམ་སོགས། །སྣང་བ་འདི་ཀུན་མེད་བཞིན་སྣང་བ་སྟེ། །རྐྱེན་ལས་བྱུང་ཞིང་མི་རྟག་རང་བཞིན་མེད། །རྨི་ལམ་སྒྱུ་མ་ལྟ་བུར་བདེན་པས་སྟོང་། །ཞེས་འདོན་བསྒོམ་བྱ་ཞིང་མཉམ་རྗེས་ཐམས་ཅད་དུ་དེ་ལྟར་བསམ། ༡ གཉིས་པ་ཟིན་པ་བརྟན་བྱེད་ནི། རང་གི་གཟུགས་མེ་ལོང་ལ་འཆར་དུ་བཅུག་སྟེ། དེ་ལ་རྒྱན་བཏགས་པ། རྡེག་འཚོག་བྱེད་པ། བསྟོད་
སྨད་བྱེད་པ་ཁྱད་མེད་པ་ལྟར། རང་གི་ལུས་ཀྱང་དེ་དང་འདྲ། ངག་བྲག་ཆ་དང་འདྲ། ཡིད་རྟོག་སྨིག་སྒྱུ་ལ་ཆུར་འཛིན་པ་དང་འདྲ་བར་བསམ་ཞིང་། ངག་ཏུ། མེ་ལོང་གཟུགས་བརྙན་འདི་ལ་དགའ་དང་གདུང་། །མཛེས་དང་མི་མཛེས་སྙན་དང་མི་སྙན་མེད། །རང་གི་ལུས་ཀྱང་དེ་དང་འདྲ་བ་སྟེ། །ངག་དང་ཡིད་ཀྱང་བྲག་ཆ་སྨིག་སྒྱུ་བཞིན། །ཞེས་འདོན་བསྒོམ་བྱ། ༢ གསུམ་པ་བོགས་དབྱུང་བ་ནི། དེ་ལྟར་བྱས་པས་རང་ལ་སྟོད་སྨད་ཀྱི་དགའ་གདུང་སོགས་མགོ་ནོན་ཞིང་བརྟན་པ་ནི། ཐོག་མར་བླ་མའམ་མཆེད་གྲོགས་ལྟ་བུ་རྒྱུས་ཡོད་པ་ཞིག་ལ་བསྟོད་སྨད་སྣ་ཚོགས་བྱེད་དུ་བཅུག །དེ་ནས་ཚོང་དུས་སོགས་སྐྱེ་བོ་མང་པོའི་སར་སོང་ནས་སྤྱོད་པ་མ ཐོ་དམན་སྣ་ཚོགས་ཤིག་བྱས་པས་མི་གཞན་གྱིས་བསྟོད་སྨད་རྡེག་འཚོག་དགའ་མི་དགའ་སོགས་བྱས་པ་ལ་ཁྱད་པར་ཨི་འདུག་བལྟ། འདུག་ན་སླར་ཡང་དབེན་པར་སོང་ལ་བླ་མ་དཀོན་མཆོག་ལ་གསོལ་བ་དྲག་ཏུ་གདབ་ཅིང་སླར་ཡང་བསྒོམས་ཏེ། མཚམས་སུ་གསལ་གདབ་
པའི་ཕྱིར། སྐྱེས་པ་བུད་མེད་འདི་ཀུན་རྨི་ལམ་བཞིན། །བསྟོད་དང་སྨད་པའི་ཚིག་འདི་བྲག་ཆ་བཞིན། །མཐོང་ཐོས་མྱོང་བའི་སེམས་འདི་རི་དྭགས་ཀྱིས། །སྨིག་སྒྱུ་ཆུ་རུ་འཁྲུལ་དང་མི་མཚུངས་སམ། །ཞེས་འདོན་བསྒོམ་བྱའོ། ༣ །གཉིས་པ་དག་པ་ནི། མེ་ལོང་གི་ནང་དུ་ཡི་དམ་གྱི་སྐུའི་གཟུགས་བརྙན་འཆར་དུ་བཅུག་ལ། དེ་ཅི་འདྲ་བ་བཞིན་དུ་རང་གི་ལུས་ཀྱང་ལྷ་སྐུ་སྟོང་ཞིང་རང་བཞིན་མེད་པ་སྣང་ཡང་བདེན་པར་མ་གྲུབ་པ་ཡིན་ལ་སེམས་ཅན་ཐམས་ཅད་ཀྱང་ལྷ་སྐུ་སྣང་ལ་རང་བཞིན་མེད་པ་འབའ་ཞིག་ཡིན། སྣོད་ཀྱི་འཇིག་རྟེན་ཐམས་ཅད་ཀྱང་གཞལ་ཡས་ཀྱི་ཁང་པ་སྣང་ལ་རང་བཞིན་མེད་པ། ངག་སྔགས་ཀྱི་སྒྲ་བྲག་ཆ་ལྟ་བུ། ཡིད་གཡོ་བ་སྨིག་སྒྱུ་ཙམ་འདི་བདེ་བ་ཆེན་པོ་རང་གྲོལ་ཡིན་པས། གནས་གཞལ་ཡས་ཁང་ལ་སྐྱིད་མི་སྐྱིད། བཅུད་ལྷ་སྐུ་ལ་ཆགས་སྡང་དང་བསྟོད་སྨད། སྔགས་ཀྱི་སྒྲ་ལ་དགའ་གདུང་འབྱུང་བའི་ཡུལ་ཅི་ལ་ཡོད། ཅེས་བསམ་ཞིང་། ངག་ཏུ། རང་ལུས་ལ་སོགས་གཟུགས་སྣང་འདི་ཐམས་ཅད། །ལྷ་
སྐུ་སྣང་སྟོང་ཟུང་འཇུག་གཟུགས་བརྙན་ལྟར། །དེས་ན་ཆགས་སྡང་བསྟོད་སྨད་དགའ་གདུང་གི །རྟོག་པ་སྐྱེས་བའི་ཡུལ་དེ་གང་དུ་སོང་། །ཞེས་འདོན་སྒོམ་བྱ། ༤ སྒྱུ་ལུས་གནད་ཀྱི་དམིགས་པ་འདི་དག་ལ། རྒྱས་པར་ནི་གོང་དུ་ཟིན་པ་བརྟན་བྱེད་ཀྱི་སྐབས་སུ་ལུས་གཟུགས་བརྙན་ལྟར་སྒོམ་པ་ལ་ཐུན་གཅིག །བྲག་ཆ་ཡོད་པའི་སར་སོང་ནས་ངག་བྲག་ཆ་ལྟར་སྒོམ་པ་ལ་ཐུན་གཅིག །སྨིག་སྒྱུ་ཡོད་པའི་སར་སོང་ནས་ཡིད་སྨིག་སྒྱུ་ལྟར་སྒོམ་པ་ལ་ཐུན་གཅིག་སྟེ་གསུམ་བྱས་པས་ཡོངས་སྒྲིལ་དྲུག་གམ། འདི་ཀ་ལྟར་བཞི་བྱས་པས་ཀྱང་དོན་འཐུས། གསུམ་པ་ཐུན་མོང་མ་ཡིན་པ་ཤིན་ཏུ་ཕྲ་བའི་རླུང་ཐིག་སྒྱུ་ལུས་ཀྱི་སྐུར་སྒྲུབ་པ་འདི། གསེར་ཞུན་རྩ་བར་སྤས་དོན་དུ་མཛད་ཀྱང་། རྗེ་བརྒྱད་པའི་དགོངས་པས་གཉིས། དངོས་པོ་དང་། སྤོགས་ཆོག་གོ །དང་པོ་ནི། རང་བཞིན་ལྷུན་གྱིས་གྲུབ་པའི་དབེན་གསུམ་གྱིས། །གཉུག་མའི་སྒོ་གསུམ་བཅོས་བསླད་མེད་པར་བཞག །རླུང་སེམས་ཟིན་པས་སྣང་སེམས་ལུགས་འབྱུང་
ལས། །ལུགས་ལྡོག་སྒྱུ་མའི་སྐུ་རུ་ལྡང་བར་བྱ། །ཞེས་གསལ་བཏབ་ནས་རྐང་པ་རྡོར་གདན། སྒལ་ཚིག་མདའ་ལྟར་བསྲང་། མིག་འབྱེད་འཛུམ་གྱི་སྤྲོས་པ་མེད་པར་ཧྲིག་གེར་བལྟ། དབུགས་དབྱུང་རྔུབ་མེད་པར་ངག་གསུང་པ་ཡང་མ་ཡིན། མི་གསུང་པ་ཡང་མ་ཡིན། ལྕེ་མཆུ་མ་འབྱར་བ་རང་བཞིན་ལྷུན་གྲུབ་ཀྱི་རྡོར་བཟླས། ལག་པ་མཉམ་གཞག་མི་གཡོ། མདོར་ན་རང་བཞིན་ལྷུན་གྲུབ་ཀྱི་ལུས་རྣམ་པར་དབེན་པ་གཡོ་མེད་རང་སོར་བཞག །དེའི་ངང་ལས་རང་བཞིན་ལྷུན་གྲུབ་ཀྱི་སེམས་དབེན། དུས་གསུམ་གྱི་ཡིད་བྱེད་ཐམས་ཅད་ཆམ་གྱིས་བཞག །ཡོད་མེད་སྟོང་མི་སྟོང་བསྒོམ་བྱ་སྒོམ་བྱེད་བསྒོམ་མི་སྒོམ་སོགས་ཅིར་ཡང་མི་སེམས་པར་བཞག །དེའི་ངང་ནས་རྣམ་རྟོག་གི་འཆར་སྒོ་བྱུང་ན་མུ་མཐུད་དུ་མི་གཞུག་པར་རྟོག་པ་ཁ་རྒྱུ་འོག་རྒྱུ་ུཐམས་ཅད་རྟོག་མེད་ཡེངས་མེད་དུ་གཟུང་། བྱིང་རྨུག་བྱུང་ན་ལྟ་སྟངས་སྟོད། རིག་པ་ངར་ཕྱུངས། འཕྲོ་རྒོད་བྱུང་ན་ལྟ་སྟངས་སྨད། ཤེས་པ་ཁོང་གློད། བྱིང་རྒོད་མེད་ན་མཉམ་པར་བསྐྱང་།
དེ་ཡང་ཐུན་མགོ་ལ་བཟང་ཞིང་ཐུན་གཤམ་ལ་ངན་ནམ། སྔ་ཐུན་ལ་བཟངཞིང་ཕྱི་ཐུན་ལ་ངན་ན། ཆུ་ཟད་པའི་རྫིང་ལྟར་ཁམས་གཏུགས་པ་ཡིན་པས་ཁམས་གསོ་ཞིང་ཤེས་པ་གློད་ནས་བསྒོམ། ཐུན་མགོ་ལ་ངན་ཞིང་ཐུན་གཤམ་ལ་བཟང་ངམ། སྔ་ཐུན་ལ་ངན་ཞིང་ཕྱི་ཐུན་ལ་བཟང་ན། ཡུར་བས་རྫིང་གི་ཆུ་མ་འདྲོངས་པ་ལྟར་སྦྱོར་བ་རྩོལ་བ་ཆུང་བ་ཡིན་པས་ཧུར་བཏོན་ཏེ་བསྒོམ། དེ་ལྟར་བསྒོམ་ཞིང་བླ་མ་ལ་ཆོས་སྐུའི་མོས་གུས་བྱ། ཕྱི་ནང་གསང་གསུམ་གྱི་ལུས་ལོངས་སྤྱོད་བདོག་པ་ཐམས་ཅད་ཕུལ་ཅིང་མཆོད་པས་བྱིན་རླབས་ཀྱི་མཐུ་དང་། ཉམས་ལེན་གྱི་སྟོབས་ཀྱིས་ཕྱག་ཆེན་དུ་སེམས་ཟིན། དེ་ཟིན་པས་རླུང་ཟིན། དེ་ལས་ཉམས་སྐྱེ་སྟེ། ས་ཆུ་ལ་ཐིམ་པས་སྨིག་སྒྱུ་འོད་ཟེར་ལྔ་དང་ལྡན་པ་སྔོ་མེར་མེར་བ་དང་། སྔོ་ཧྲིབ་ཧྲིབ་པ་དང་། ཆུ་གཡོ་བའི་རྣམ་པ་ལྟ་བུ་འབྱུང་། ཆུ་མེ་ལ་ཐིམ་པས་དུ་བ་ལྟ་བུ་ཕྱུར་བ་དང་དུ་ཐང་ཆག་པ་ལྟ་བུ་འབྱུང་། མེ་རླུང་ལ་ཐིམ་པས་སྲིན་བུ་མེ་ཁྱེར་ལྟ་བུ་དམར་ཚེག་ཚེག་བ་དང་། དམར་ཕྲ་
ཕྲ་བ་འབྱུང་། རླུང་སེམས་ལ་ཐིམ་པས་མར་མེ་ལྟ་བུ་འབྱུང་། སེམས་སེམས་བྱུང་ལ་ཐིམ་པའི་དུས་སུ་ཟླ་བའི་སྣང་བ་ལྟ་བུ། སེམས་བྱུང་མ་རིག་པ་ལ་ཐིམ་པའི་དུས་སུ་ཉི་མ་ལྟ་བུ། མ་རིག་པ་ཐམས་ཅད་སྟོང་པར་ཐིམ་པའི་དུས་སུ་སྒྲ་གཅན་ནམ་མུན་ནག་ལྟ་བུ། དེའི་དུས་སུ་ཐམས་ཅད་སྟོང་པ་སྤྲིན་མེད་པའི་ནམ་མཁའ་ཆོས་སྐུ་ཡིན་གསུངས། ལྟ་བུ་འཆར། དེ་ནས་སྣང་གསུམ་ལུགས་ལྡོག་ཏུ་འཆར་ཏེ། ཐམས་ཅད་སྟོང་པ་ལས་མ་རིག་པ། དེ་ལས་སེམས་བྱུང་། དེ་ལས་སེམས། སེམས་གསུམ་རླུང་དང་བཅས་པ་ལས་སྒྱུ་མའི་སྐུ་མཚན་དཔེས་བརྒྱན་པ། སྒྱུ་མའི་དཔེ་བཅུ་གཉིས་ཀྱིས་མཚོན་པར་བྱས་པ་སོ་སོ་རང་གི་རིག་པའི་ཡེ་ཤེས་ཀྱི་ངོར་མངོན་སུམ་དུ་སྤྲུལ་སྐུ་ཡིན་གསུངས། འཆར་ལ། དེར་མ་ཟད་དུས་གསུམ་གྱི་བརྟན་གཡོ་དག་པའི་སྣང་བ་དང་། མ་དག་པ་ཁམས་གསུམ་པོ་ཐམས་ཅད་ཀྱང་སྒྲིབ་པ་དང་བྲལ་བ་སྐྱུ་རུ་ར་ལག་མཐིལ་དུ་བཞག་པ་ལྟར་མཐོང་བ་སྙམ་བྱེད་དེ། འདི་ནི་དབེན་གསུམ་རང་སོར་བཞག་པ་ལས་སྐྱེས་པའི་སྒྱུ་
ལུས་བསྒོམ་ཚུལ་མདོར་བསྡུས་པའོ། །འདི་ཕྱག་རྒྱ་དང་པོ་གསུམ་གྱིས་སྒྲུབ་པའི་ཚུལ་སོགས་ཡོད་ཀྱང་མ་སྨོས་སོ། ༥ །གཉིས་པ་སྤོགས་ཆོག་ནི། དེ་ལྟར་བསྒོམས་ཀྱང་ཉམས་མ་སྐྱེས་པའམ། སྟོང་པ་ལས་སྒྱུ་མའི་སྐུ་འགྲུབ་པ་མི་འཐད་སྙམ་ན། ཡིད་ཆེས་པར་བྱ་བའི་ཕྱིར། མུན་ཁང་དང་། རྒྱ་སྐྱེགས་ཀྱི་ཆུ་དང་། རལ་གྲི་དང་། མེ་ལོང་གི་སྦྱོར་བས་སྤོགས་ཆོག་བྱ་སྟེ། ཞིབ་པར་རླུང་སེམས་གཉིས་མེད་ལ་སོགས་པའི་མན་ངག་ཏུ་གསལ་བས་རྡོ་རྗེ་སློབ་དཔོན་གྱི་ཞབས་ཀྱི་པདྨར་བསྙེན་ནས་གསོལ་བ་གདབ་པར་བྱའོ། ༈ །གསུམ་པ་རྨི་ལམ་འཁྲུལ་པ་རང་སངས་ཀྱི་གདམས་པ་ལ་གསུམ། གཟུང་བ། སྦྱང་བ། དེ་ཁོ་ན་ཉིད་སྒོམ་པའོ། །དང་པོ་ལ་ཉིན་པར་དྲན་པ་རྒྱུན་ཆགས་བྱ་བ་དང་། མཚན་མོ་གདམས་ངག་བཙན་ཐབས་ཀྱིས་གཟུང་བ་གཉིས་ཀྱི་དང་པོ་ནི། དབེན་པའི་གནས་སུ་མཚམས་དམ་པར་བཅད་ལ། འཁོར་བའི་བྱ་བ་ལ་སྙིང་པོ་མེད་པར་བསམ། ཆོས་ཐམས་ཅད་སྒྱུ་མ་ལྟ་བུ་ཡིན་པ་ལ། དེ་ལྟར་མ་ཤེས་
པས་མ་རྒན་སེམས་ཅན་རྣམས་འཁོར་བར་འཁྱམས་པ་ཡིན་ཨང་སྙམ་དུ་སྙིང་རྗེ་ཆེན་པོ་བསྐྱེད། སྤྱོད་ལམ་རྣམ་བཞི་ཐམས་ཅད་དུའང་། ཨེ་མ་སྣང་བ་འདི་ཐམས་ཅད་སྒྱུ་མ་ལྟ་བུ་རྨི་ལམ་ལྟ་བུ་ཡིན། དེ་ཡིན་པ་ལ་ཡིན་པར་བདག་གིས་ཤེས་པར་བྱ། ཁྱད་པར་དུ་དོ་ནུབ་རྨི་ལམ་རྨི་བར་བྱ། དེ་རྨི་ལམ་དུ་ངོ་ཤེས་པར་བྱ་སྙམ་དུ་དྲན་འདུན་ཡང་ཡང་བཏང་ངོ་། ༡ །གཉིས་པ་ནི། སྟན་བདེ་བ་ལ་སེང་གེའི་ཉལ་སྟབས་ཀྱིས་འདུག་ནས་ཉལ་ཁར་བླ་མ་སྤྱི་བོར་བསྒོམ། མོས་གུས་དྲག་ཏུ་བྱ། གསོལ་བ་སྙིང་ཐག་པ་ནས་གདབ་སྟེ། རྗེ་སྐྱབས་གསུམ་གྱི་ངོ་བོ་བླ་མ་རྗེ། །ཕ་རྟོགས་ལྡན་གྱི་རྒྱལ་པོ་དགོངས་སུ་གསོལ། །གཉིད་འོད་གསལ་དུ་ཐིམ་པར་བྱིན་གྱིས་རློབས། །རྨི་ལམ་སྒྱུ་ལུས་སུ་འཆར་བར་བྱིན་གྱིས་རློབས། །ཞེས་གསོལ་བ་ལན་མང་དུ་བཏབ། དོ་ནུབ་གཉིད་འོད་གསལ་དུ་འཛིན། རྨི་ལམ་སྒྱུ་ལུས་སུ་ལྡང་། དེའི་ལྡང་གཞི་རྨི་ལམ་ཡང་མང་པོ་རྨི་ཞིང་གསལ་པོར་རྨི་བར་བྱའོ། །བཟང་པོར་རྨི་བར་བྱའོ། །ཅིས་ཀྱང་རྨི་ལམ་ཟིན་པར་བྱ།
རྨི་ལམ་རྨི་ལམ་དུ་ངོ་ཤེས་པར་བྱ། ཞེས་འདུན་པ་དྲག་པོ་བཏང་། རང་རྡོ་རྗེ་རྣལ་འབྱོར་མ་གཏུམ་མོའི་སྐབས་ལྟར་གསལ་བའི་མགྲིན་པར་སྣ་ཚོགས་པདྨ་འདབ་མ་བཞི་པ་ཟེའུ་འབྲུ་དང་བཅས་པའི་དབུས་སུ་ༀ་དཀར་པོ། མདུན་དུ་ཨ་སྔོན་པོ། གཡས་སུ་ནུ་སེར་པོ། རྒྱབ་ཏུ་ཏ་དམར་པོ། གཡོན་དུ་ར་ལྗང་གུ་རྣམས་གསལ་བར་བསྒོམས་ནས། ངག་ཏུ། བདག་གིས་རྨི་ལམ་ཅིས་ཀྱང་ཟིན་པར་བྱ། །རྨི་ལམ་རྨི་ལམ་ཡིན་པར་ཤེས་པར་བྱ། །མགྲིན་པར་སྣ་ཚོགས་པདྨ་འདབ་བཞིའི་སྟེང་། །ༀ་དང་ཨ་ནུ་ཏ་རའི་ཡི་གེ་ལྔ། །དཀར་སྔོ་སེར་དང་དམར་ལྗང་མདོག་ཅན་གསལ། །ཞེས་ཐོག་མར་སྤྱིར་གསལ་བཏབ་ཅིང་། དེའི་ནང་ནས་ཨ་ལ་སེམས་བཟུང་། དེ་ནས་གཉིད་འོང་འདོད་པ་དང་ནུ་ལ། དེ་ནས་གཉིད་ཟི་བ་དང་ཏ་ལ། དེ་ནས་གཉིད་ཁྲི་བ་དང་ར་ལ། དེ་ནས་ༀ་ལ་སེམས་བཟུང་ནས་གཉིད་འཐུག་འོད་ལ་བཞག་པས་རྨི་ལམ་འཆར་བ་དང་བསྟུན་ནས་ཟིན་འོང་བས་རྨི་ལམ་ལྷ་སྐུར་སྒོམ་པ་སོགས་ཅི་ཟིན་བྱའོ། །ལན་
དང་པོར་མ་ཟིན་ཀྱང་རྨི་ལམ་འདི་འདུན་པ་རང་གཙོ་བས་འདུན་པ་དྲག་ཏུ་བཏང་། བླ་མ་མཁའ་འགྲོ་ལ་གསོལ་བ་རྩེ་གཅིག་ཏུ་བཏབ་ཅིང་བསྐྱར་བས་ཟིན་ཏོ། ༢ །གཉིས་པ་སྦྱང་བ་ལ། སྤེལ་བསྒྱུར་ལ་སྦྱང་བ། སྒྱུ་མར་སྦྱང་བ། སྒྱུ་མའི་རྣམ་ཐར་ལ་སྦྱང་བའོ། །དང་པོ་ནི། རྨི་ལམ་ཟིན་པ་ཁོ་ནས་མི་ཆོག་པས། བདག་གིས་དོ་ནུབ་རྨི་ལམ་ཟིན་ཞིང་ཟིན་ནས་ཀྱང་གཅིག་ལས་དུ་མ་སོགས་སྤེལ་བ་དང་། ངན་པ་ལས་བཟང་པོ་དང་། ལྷ་སྐུར་བསྒྱུར་བ་སོགས་བྱའོ་སྙམ་དུ་འདུན་པ་བཏང་ལ་ཉལ། རྨི་ལམ་ཟིན་པ་དང་། རྨི་ལམ་བདེན་པར་མ་གྲུབ་ཅི་བྱས་བཏུབ་སྙམ་པས། རང་མིར་འདུག་པ་མཁའ་ལྡིང་དུ་སྒྱུར་བ་སོགས་དང་། ངན་པ་རྨིས་པ་བཟང་པོར་སྒྱུར་བ་དང་། རང་ལུས་ལྷ་སྐུ་སྒྱུ་མར་བསྒོམ་ཞིང་བདེ་དགྱེས་སོགས་གང་འདོད་དུ་སྒྱུར་བ་དང་། ཞལ་ཕྱག་སོགས་ཐ་དད་པ་མང་པོ་དང་། གཅིག་ལས་དུ་མ་དང་དུ་མ་ལས་གཅིག་ཏུ་སྤྲུལ་ཞིང་སྒྱུར་བ་ལ་སྦྱང་ངོ་། །དེ་ལྟར་སྦྱང་བའི་ཕྱིར་གཉིད་ཁར་གསལ་གདབ་པ་ནི། རྨི་ལམ་བདེན་
པར་མ་གྲུབ་སྒྱུ་མ་ཉིད། །དེས་ན་བདག་གིས་རྨི་ལམ་བཟུང་ནས་ཀྱང་། །གཅིག་དང་དུ་མ་ལྷ་སྐུ་སྣ་ཚོགས་སོགས། །གང་འདོད་སྤྲུལ་བསྒྱུར་གཏན་ལ་དབབ་པར་བྱ། །ཞེས་འདུན་པ་གསལ་བཏབ་སྟེ་བྱའོ། ༣ །གཉིས་པ་ནི། རྨི་ལམ་དུ་མེ་དང་། ཆུ་ཆེན་པོ་དང་། གཡང་ས་དང་། དགྲ་དང་། གཅན་གཟན་སོགས་འཇིགས་པའི་རྣམ་པ་མཐོང་ན་དེ་ལ་ཡ་ང་སྤང་ནས་སྒྱུ་མར་སྦྱང་དགོས་པས་རྨི་ལམ་ནི་མེད་བཞིན་སྣང་བ་བདེན་པར་མ་གྲུབ་པ་ཡིན་ནོ། །དེའི་མེས་སུ་འཚིག །ཆུས་སུ་ཁྱེར། དགྲས་སུ་ལ་གནོད་པ་བྱེད། གཅན་གཟན་གྱིས་སུ་ཞིག་ཟ། གཡང་དུ་སུ་ཞིག་ལྷུང་སྟེ། བདེན་པར་མ་གྲུབ་པ་སྒྱུ་མ་ལྟ་བུ་ཡིན་པས་བདག་གིས་རྨི་ལམ་གྱི་སྣང་བ་ཐམས་ཅད་ལ་སྒྱུ་མར་ཤེས་པས་ཡ་ང་བ་སྤང་ཞིང་སྦྱང་ངོ་སྙམ་དུ་འདུན་པ་བཏང་། ངག་ཏུ། རྨི་ལམ་ཡུལ་སྣང་མེ་ཆུ་དུག་མཚོན་སོགས། །ཐམས་ཅད་དེ་དང་དེ་རུ་གྲུབ་པ་མེད། །ཐམས་ཅད་སྒྱུ་མ་ཉིད་དེ་བདེན་པས་སྟོང་། །དེ་ཕྱིར་བདག་གིས་ཡ་ང་འཇིགས་པ་སྤང་། །ཞེས་
གསལ་བཏབ་ནས་ཉལ་ཏེ་ཟིན་པ་དང་། མེ་ལྟ་བུ་རྨིས་ན། རྨི་ལམ་གྱི་མེས་སུ་འཚིག་སྙམ་དུ་ཐོག་བརྫིས་བྱ། ཆུ་ལའང་གོམ་པ་སྤོ་ཞིང་འགྲོ། རྨི་ལམ་གྱི་གཡང་ལ་སུ་ཞིག་འབྲུལ་སྙམ་དུ་བྱ་ལྟར་ལྡིང་ཞིང་འཕུར་བ་སོགས་བྱའོ། ༤ །གསུམ་པ་ལ། འཇིག་རྟེན་པའི་རྣམ་ཐར་ལ་བསླབ་པ་དང་། འཇིག་རྟེན་ལས་འདས་པའི་རྣམ་ཐར་ལ་བསླབ་པ་གཉིས། དང་པོ་ནི། གཉིད་ཁར། རྨི་ལམ་ལུས་ལ་ཅི་ཡང་རུང་བས་ན། །བདག་གིས་ལྷ་ཡི་ཡུལ་དང་སྒྲ་མི་སྙན། །སྐྱོ་བ་བསྐྱེད་སླད་ངན་སོང་ལ་སོགས་པའི། །གནས་ཀྱི་ཁྱད་པར་མང་དུ་བལྟ་བར་བྱ། །ཞེས་འདུན་པ་གཏད་ནས་ཉལ་ཏེ། ཟིན་པ་དང་། ཉི་ཟེར་ལ་བཟུང་ནས་སོང་སྟེ་ལྷ་ཡུལ་བལྟ་བ་དང་། གླིང་གཞན་དང་། ངན་སོང་སོགས་དང་རྒྱ་གར་སོགས་བལྟ་བ་ལ་སྦྱང་ངོ་། །གཉིས་པ་འདས་པའི་རྣམ་ཐར་ལ་སྦྱང་བ་ལ། ཉིན་མོ་འདུན་པ་ལ་གོམས་པ་གལ་ཆེ་བས། དབེན་པའི་གནས་སུ་ལུས་གནད་གཏུམ་མོ་ལྟར་བཅས་ལ་དམིགས་པ་རང་ཡི་དམ་དུ་གསལ་བའི་སྙིང་གར་ཡེ་ཤེས་སེམས་
དཔའ་ཚོན་གང་བ་ཞིག་གསལ་བཏབ་ནས། ད་ནི་བདག་གི་ལུས་ལས་ཐོན་ཏེ་སངས་རྒྱས་ཀྱི་ཞིང་དུ་འགྲོའོ་སྙམ་པའི་འདུན་པས་བསྐུལ་ཏེ། རང་ལུས་དམ་ཚིག་སེམས་དཔའ་ལས་རང་སེམས་ཡེ་ཤེས་སེམས་དཔའ་དེ་ཚངས་བུག་ནས་ཐོན་ཏེ། སྟེང་ཕྱོགས་མཐོན་པོར་ཕྱིན་པས་སྟུག་པོ་བཀོད་པའི་ཞིང་དུ་སླེབ། བཅོམ་ལྡན་འདས་རྣམ་པར་སྣང་མཛད་སེང་གེའི་ཁྲི་ལ་བཞུགས་ནས་ཆོས་སྟོན་པ་དང་མཇལ་ཏེ་ཕྱག་འཚལ་བསྙུན་གསོལ། གདམས་པ་དང་ལུང་བསྟན་ནོད་དེ། ད་བདག་གིས་དགོས་པ་འགྲུབ་པས་སླར་བདག་གི་ལུས་དམ་ཚིག་པ་ལ་འཇུག་པར་བྱ་སྙམ་པས་དམ་ཚིག་སེམས་དཔའ་ལ་ཡེ་ཤེས་སེམས་དཔའ་བཅུག་པའི་ཚུལ་གྱིས་འཇུག་པར་བྱ་སྟེ། འདི་ལ་ཐོག་མར་བྱང་བ་གལ་ཆེ་བས། ངག་ཏུ། རང་ལུས་ཡི་དམ་དམ་ཚིག་སེམས་དཔའ་ལས། རང་རིག་ཡེ་ཤེས་སེམས་དཔའ་ཐོན་ནས་ཀྱང་། །དག་པའི་ཞིང་དུ་སངས་རྒྱས་རྣམས་དང་མཇལ། །གདམས་པ་ནོན་ནས་སླར་ཡང་ལུས་ལ་ཞུགས། །ཞེས་གསལ་
བཏབ་ཅིང་། དེ་བཞིན་དུ་ཤར་ཕྱོགས་ཀྱི་སངས་རྒྱས་ཀྱི་ཞིང་སོགས་ལ་སྦྱོང་ངོ་། ༦ །དེ་ལྟར་ཉིན་མོ་སྦྱངས་བ་ཇི་ལྟ་བར་མཚན་མོ་ཉལ་ཁར། དོ་ནུབ་བདག་གིས་རྨི་ལམ་བཟུང་སྟེ། སངས་རྒྱས་རྣམ་པར་སྣང་མཛད་ཀྱི་ཞིང་བལྟ་ཞིང་སྦྱང་ངོ་སྙམ་པ་སོགས་འདུན་པ་ལན་མང་དུ་བཏང་ཞིང་ངག་ཏུ། བདག་གི་རྨི་ལམ་ལེགས་པར་བཟུང་ནས་ཀྱང་། །སྒྱུ་མའི་ལུས་ཀྱིས་སངས་རྒྱས་ཞིང་རྣམས་སུ། །བདེ་བར་གཤེགས་པ་རྣམས་ལ་བལྟ་བ་དང་། །ལུང་བསྟན་གདམས་པ་ཉན་ཅིང་ནོད་པར་བྱ། །ཞེས་གསལ་བཏབ་ལྟེ། ༀ་ལ་སེམས་བཟུང་ནས་རྣམ་པར་སྣང་མཛད་ཀྱི་ཞིང་སྦྱང་། ཨ་ལ་སེམས་བཟུང་ནས་མི་བསྐྱོད་པ་དང་། ནུ་ལ་རིན་འབྱུང་དང་། ཏ་ལ་འོད་དཔག་མེད། ར་ལ་དོན་གྲུབ་ཀྱི་ཞིང་སྦྱང་བ་དང་། དེ་བཞིན་དུ་ཡུལ་ཉེར་བཞིར་མཁའ་འགྲོ་མའི་ཚོགས་གྲལ་དུ་འགྲོ་བ་དང་། ཨོ་རྒྱན་དང་ཤམྦྷ་ལ་སོགས་གང་འགྲོ་འདོད་པར་དེ་དང་དེའི་འདུན་པ་སྔོན་དུ་བཏང་ནས་སྦྱང་ངོ་། །དེ་ལྟར་བྱས་པས་དང་པོ་འོལ་སྤྱི་ཙམ་དང་། དེ་ནས་ཇེ་
གསལ་དུ་གྱུར་ཏེ། མཐར་ཇི་ལྟ་བར་མཐོང་ཞིང་འབྱོངས་པར་འགྱུར་རོ། །གསུམ་པ་རྨི་ལམ་གྱི་དེ་ཁོ་ན་ཉིད་བསྒོམ་པ་ནི། ཆོས་ཐམས་ཅད་ཡེ་ནས་རྨི་ལམ་སྒྱུ་མ་ལྟ་བུ་ཡིན། སྦྱང་གཞི་སྦྱོང་བྱེད་སྦྱང་བྱ་སོགས་ཀྱང་ཐ་དད་དུ་ུབདེན་པར་མེད་པས། རང་སེམས་གསལ་ལ་མི་རྟོག་པ་སྒྱུ་མ་ལྟ་བུའི་ངང་ལ་མཉམ་པར་བཞག་པ་སྟེ། ངག་ཏུ། ཆོས་རྣམས་གཟོད་ནས་རྨི་ལམ་སྒྱུ་མ་ལྟར། །སྦྱང་བྱ་སྦྱོང་བྱེད་སྦྱང་གཞི་བདེན་པར་མེད། །ཐམས་ཅད་སེམས་སྣང་ཙམ་སྟེ་སེམས་འདི་ཡང་། གསལ་ལ་ངོས་བཟུང་བྲལ་བ་སྒྱུ་མའི་དབྱིངས། ཞེས་འདོན་བསྒོམ་བྱའོ། །དེ་རྣམས་ཀྱིས་རྨི་ལམ་གྱི་ཉམས་ལེན་མདོར་བསྡུས་སྨོས་ཟིན་ཏོ། ༈ །བཞི་པ་འོད་གསལ་མ་རིག་མུན་སེལ་གྱི་གདམས་པ་ལ། ཉིན་སྣང་འོད་གསལ་དུ་འཁྱེར་བ་དང་། མཚན་མོའི་གཉིད་འཐུག་འོད་གསལ་དུ་གཞུག་པ་གཉིས་ཀྱི་དང་པོ་ནི། ལུས་གནད་གཏུམ་མོ་ལྟར་བཅས། སྒོམ་ཤིང་སྒོམ་ཐག་གིས་བསྲང་ལ། ལྟ་སྟངས་མཛོད་སྤུའམ་ནམ་མཁར་གཏད་ནས་མི་རྟོག་པ་
བསྒོམ། དེ་ལ་མི་གནས་ན་རང་ཉིད་རྡོ་རྗེ་རྣལ་འབྱོར་མར་གསལ་བའི་སྙིང་གར་པདྨ་དང་ཉི་མའི་སྟེང་དུ་ཧཱུྃ་སྔོན་པོ་ཞིག་བསམ། དེ་ལས་འོད་ཟེར་འཕྲོས་པས་སྣོད་ཀྱི་འཇིག་རྟེན་ཐམས་ཅད་བཅུད་ཀྱི་སེམས་ཅན་ལ་ཐིམ། དེ་རྣམས་ཀྱང་རང་ཉིད་ལ་ཐིམ། རང་ཉིད་ལྷར་གསལ་བ་དེ་ཡང་གཙུག་ཏོར་ནམ་མས་དང་། རྐང་མཐིལ་ནས་ཡས་ཞུ་སྟེ་ཧཱུྃ་ལ་ཐིམ། ཧཱུྃ་གི་ཞབས་ཀྱུ་ཧ་ལ། དེ་མགོ་བོ་ལ། དེ་ཟླ་ཚེས། དེ་ཐིག་ལེ། དེ་ནཱ་ད་ལ་ཐིམ་པར་བསམ་ཞིང་རླུང་བུམ་པ་ཅན་བཟུང་ཞིང་རྣམ་པར་མི་རྟོག་པའི་ངང་ལ་མཉམ་པར་གཞག །དེ་ལ་བྱིང་ངམ་འཕྲོ་ཡང་སྔར་ལྟར་རང་ཡི་དམ་དུ་བསྒོམ་པ་ནས་ནཱ་དར་བསྡུ་བའི་བར་ཡང་ཡང་བསྐྱར་ཞིང་བྱས་ཏེ་བསྒོམས་པས་ཟླ་ཉི་སྒྲ་གཅན་གྱི་རླུང་སྙིང་གར་ཟིན་ནས། སྣང་གསུམ་གྱི་མཐར་འོད་གསལ་ཟིན་པས་ནན་ཏན་བྱ་ཞིང་། ངག་ཏུ། རང་ཉིད་རྣལ་འབྱོར་མར་གསལ་སྙིང་ག་ནས། །པད་ཉིའི་སྟེང་དུ་ཧཱུྃ་ཡིག་སྔོན་པོ་ཞིག །གནས་པའི་འོད་ཀྱིས་སྣོད་བཅུད་རང་ལ་ཐིམ། །རང་ཡང་ཧཱུྃ་དང་ནཱ་དའི་
བར་དུ་བསྡུ། །ཞེས་གསལ་བཏབ་ཅིང་བསྒོམ་མོ། །གཉིས་པ་མཚན་མོའི་གཉིད་འཐུག་འོད་གསལ་དུ་གཞུག་པ་ནི། དབེན་པའི་གནས་སུ་སྔར་བཤད་པའི་ཉིན་མོའི་སྦྱོང་ཐབས་རྣམས་ལེགས་པར་སྦྱངས་ཤིང་གོམས་པར་བྱས་ལ། སྒོ་གསུམ་དལ་དུ་གཞུག །རེ་ཞིག་བྱ་བ་གཞན་སྤང་། ནུབ་གཉིས་གསུམ་གཉིད་བཅག་ལ་དགེ་སྦྱོར་ཅི་ནུས་བྱ། ཟས་བཅུད་ཅན་བརྟེན་ཅིང་ལུས་ལ་བསྐུ་མཉེ་བྱ། བླ་མ་ཡི་དམ་མཁའ་འགྲོ་ལ་མི་ཤས་བརྒྱན་པའི་གཏོར་མ་འབུལ། གཉིད་ཀྱི་འོད་གསལ་ཅིས་ཀྱང་ཟིན་པར་བྱའོ། །སྙམ་པའི་འདུན་པ་ཉེར་གཅིག་ཙམ་ཅི་མང་བཏང་ལ་ལུས་གནད་མགོ་བྱང་དུ་བསྟན་པའི་སེང་གེའི་ཉལ་སྟབས་ཀྱིས་ཅི་བདེ་བར་ཉལ། དམིགས་པ་རང་ཡི་དམ་དུ་གསལ་བའི་སྙིང་གར་དྷཱུ་ཏིའི་ནང་དུ་པདྨ་སྔོན་པོ་འདབ་མ་བཞི་པ། དེའི་དབུས་ཀྱི་གེ་སར་ལ་ཧཱུྃ་སྔོན་པོ། འདབ་མ་བཞིའི་མདུན་དུ་ཨ་དཀར་པོ། གཡས་སུ་ནུ་སེར་པོ། རྒྱབ་ཏུ་ཏ་དམར་པོ། གཡོན་དུ་ར་ལྗང་གུ་རྣམས་གསལ་བར་བལྟས་ལ། ངག་ཏུ། རང་
ཉིད་ལྷན་ཅིག་སྐྱེས་མར་གསལ་བ་བ་ཡི། སྙིང་གར་དྷཱུ་ཏིའི་ནང་དུ་པདྨའི་སྟེང་། །ཧཱུྃ་དང་ཨ་ནུ་ཏ་ར་སྔོ་དཀར་སེར། །དམར་དང་ལྗང་བའི་མདོག་ཅན་ཤིན་ཏུ་གསལ། །ཞེས་གསལ་གདབ་ནས་བུམ་ཅན་འཇམ་པོར་བཟུང་། དང་པོ་མདུན་གྱི་ཨ་དྲན་པ་ཙམ་བྱ། དེ་ནས་སྣང་བ་ལ་འདུན་པ་ཅུང་ཟད་ཕྱོགས་པའི་དུས་སུ་ནུ། སྣང་བ་མཆེད་པའི་འདུན་པ་ཆེར་ཕྱོགས་པའི་དུས་སུ་ཏ། ཕྱིའི་སྣང་བ་ཞི་ནས་སྟོང་པར་ཐིམ་པ་སྣང་བ་ཐོབ་པའི་དུས་སུ་ར། དེ་ནས་སྟོང་པ་བཞིའི་རྟོག་པའི་སྣ་ཅི་ཟིན་བྱས་ལ། མངོན་བྱང་ལྔ་པ་ཐམས་ཅད་སྟོང་པའི་རྟགས་འཆར་བར་མགོ་བརྩམ་པ་ན་དབུས་ཀྱི་ཧཱུྃ་ཡིག་ལ་སེམས་གཏད་དེ། མཆོག་མི་འགྱུར་བའི་འོད་གསལ་ངོས་ཅི་ཟིན་བྱས་ལ་ཟིན་པ་དང་མཉམ་པར་བཞག་གོ །འདི་ལྟ་བུ་བཀའ་བརྒྱུད་ཀརྨ་ཀཾ་ཚང་གི་གདམས་པ་བླ་ན་མེད་པ་ཡིན་ཀྱང་ལས་དང་པོ་པ་ལྟ་བུ་མངོན་བྱང་དང་དེའི་རྟགས་ཀྱི་གོ་བ་འཆར་བར་དཀའ་ན། གཉིད་ཉལ་ཁར་དོ་ནུབ་གཉིད་ཀྱི་འོད་གསལ་ཟིན་པར་བྱ་སྙམ་པའི་འདུན་པ་ཡང་ཡང་
བཏང་ལ། གོང་དུ་བཤད་པའི་ཉིན་གྱི་རྣལ་འབྱོར་ཇི་ལྟ་བར། རང་ཡི་དམ་དུ་གསལ་བ་ནས་ཧཱུྃ་ལ་བསྡུ་བའི་བར་བྱས་ལ། ཧཱུྃ་དེ་ཐིག་ལེ་སྔོན་པོ་སྲན་མ་ཙམ་ཞིག་ལ་བསྡུས་ཏེ་སེམས་བཟུང་ནས་ཉལ་བས། ད་ལྟའི་སྣང་བ་ནུབ་ཅིང་རྨི་ལམ་གྱི་སྣང་བ་མ་ཤར་གྱི་བར་དེར་གསལ་ལ་རྟོག་པ་མེད་པ་གཉིད་འཐུག་པོ་རང་ཡང་མིན་པ་ཞིག་འབྱུང་སྟེ། གྲོགས་ཀྱིས་ཀྱང་བསྐུལ་བརྡ་བྱས་ཤིང་ཨེ་ཟིན་བལྟ། ཟིན་པ་དང་གསལ་སྟོང་དང་བདེ་སྟོང་འདྲེས་པ་ཞིག་འོང་བ་དེ་ཀ་ལ་མཉམ་པར་གཞག་སྟེ། གོང་གི་རང་ཉིད་རྣལ་འབྱོར་མར་གསལ་ཞེས་པ་ནས། རང་ཡང་ཧཱུྃ་དང་ཐིག་ལེའི་བར་དུ་བསྡུ། ཞེས་གསལ་བཏབ། ཡང་གཉིད་འཐུག་འོད་གསལ་ཟིན་པར་འདོད་ན། ནོར་བུའི་ནང་དུ་ཐིག་ལེ་སྔོན་པོ་ལ་སེམས་གཟུང་། གཉིད་སྲབ་མོའི་འོད་གསལ་ཟིན་པར་འདོད་ན། དབུ་མའི་ཡར་སྣེ་སྨིན་མཚམས་སུ་ཡོད་པར་བསྒོམས་ལ། དེར་ཐིག་ལེ་ནག་པོ་རིལ་མ་ཙམ་ལ་སེམས་བཟུང་བས་ཟིན་པར་སླའོ། །དེ་དག་ནི་མ་ཟིན་པ་ཟིན་པར་
བྱེད་པའི་ཐབས་སོ། །ཟིན་ནས་བརྟན་པར་བྱ་བ་དང་། ཁྱད་པར་རྗེ་དབྱངས་ཅན་ཞབས་ཀྱི་དགོངས་པས་གོང་གི་ཙཎྜ་ལཱིའི་རྣལ་འབྱོར་གྱི་དྷཱུ་ཏིའི་ནང་གི་གཏུམ་མོ་འབར་སྟོབས་ཀྱིས་བྱང་སེམས་ཞུ་བ་ལ་བདེ་སྟོང་གི་རྟོགས་པ་སྣང་གསུམ་འོད་གསལ་དང་བཅས་པའི་རླུང་སེམས་ཀྱི་རྟགས་སྣང་ཁྱད་པར་ཅན་སྒྱུ་མའི་སྐུར་ཤར་བ་དེ་ཉིད་དོན་གྱི་འོད་གསལ་མངོན་དུ་བྱེད་པའི་ཕྱིར་རླུང་སེམས་ཤིང་ཏུ་ཕྲ་བ་འོད་གསལ་དུ་གཞུག་པའི་ཐབས་རིལ་འཛིན་དང་རྗེས་གཞིག་གཉིས་ལས། དང་པོ་ནི། བདག་དང་སེམས་ཅན་ཐམས་ཅད་ཀྱི་ལུས་ངག་ཡིད་གསུམ་དབྱེར་མེད་དུ་བྱས་ལ། ལུས་ཀྱི་ཆ་རྣམ་སྣང་། ངག་གི་ཆ་འོད་དཔག་མེད། ཡིད་ཀྱི་ཆ་མི་བསྐྱོད་པར་བསྒོམ་པར་དམ་ཚིག་སེམས་དཔའ། དེ་གསུམ་གྱི་ཐུགས་ཀར་རིམ་བཞིན་ༀ་ཨཱཿཧཱུྃ་བསམ་པ་ཡེ་ཤེས་སེམས་དཔའ། ཡི་གེ་གསུམ་གྱི་ཐིག་ལེའི་ནང་དུ་ཨ་ཐུང་གཞོམ་མེད་ཀྱི་སྒྲ་དང་བཅས་པ་སྒོམ། དེ་ནས་ཐུགས་ཀའི་ས་བོན་ༀ་ཨཱཿཧཱུྃ་ལས་འོད་འཕྲོས་དམ་ཚིག་སེམས་དཔའི་སྤྱི་བོ་
ནས་ཡས་རིམ་དང་། རྐང་མཐིལ་ནས་མས་རིམ་གྱི་སྙིང་གའི་ཡེ་ཤེས་སེམས་དཔའ་ལ་བསྡུ། དེ་རྣམས་ཀྱང་རིམ་གྱིས་ཏིང་ངེ་འཛིན་སེམས་དཔའ་མི་ཤིགས་པའི་ཐིག་ལེ་ཨ་ཐུང་སྒྲ་བཅས་ལ་བསྡུ། དེ་ཡང་འོད་གསལ་ཐིག་ལེར་བསྡུས་ནས་སེམས་གཡོ་མེད་དུ་བཞག་སྟེ། འདི་དམིགས་པ་གསལ་བ་ལ་ཐུན་གཅིག་དང་མི་གསལ་ན་སྐུ་གསུང་ཐུགས་ཀྱི་རིལ་འཛིན་གསུམ་མོ། །དེ་ནས་ངག་ཏུ། བདག་དང་འགྲོ་ཀུན་སྒོ་གསུམ་དབྱེར་མེད་ཀྱི། །ལུས་ཀྱི་ཆ་སོགས་རྣམ་སྣང་སོགས་སུ་གསལ། །དེ་ཡི་ཐུགས་ཀར་ༀ་སོགས་གནས་པའི་ནང། །ཨ་ཐུང་སྒྲ་བཅས་གསལ་ལས་འོད་འཕྲོས་པས། །ཕྱི་ནས་རིམ་གྱིས་འདུས་ཏེ་ཐིག་ལེར་ཐིམ། ཞེས་དང་། སོ་སོར་བྱེད་དུས་རྐང་པ་གཉིས་པར། ལུས་ཀྱི་ཆ་ནི་རྣམ་སྣང་ཉིད་དུ་གསལ། །གསུམ་པར། དེ་ཡི་ཐུགས་ཀར་ༀ་ཡིག་ཅེས་དང་། གསུང་གི་དུས། ངག་གི་ཆ་ནི་འོད་དཔག་མེད་དུ་གསལ། དེ་ཡི་ཐུགས་ཀར་ཨ་ཡིག་ཅེས་དང་། ཐུགས་ཀྱི་དུས། ཡིད་ཀྱི་ཆ་ནི་མི་བསྐྱོད་རྡོ་རྗེར་
གསལ། །དེ་ཡི་ཐུགས་ཀར་ཧཱུྃ་ཡིག་ཅེས་འདོན་པ་བསྒྱུར། གཉིས་པ་རྗེས་གཞིག་ནི། རང་གི་སྙིང་གའི་ས་བོན་གྱི་འོད་ཀྱིས་སྣོད་བཅུད་བཞུ་བའི་འོད་ཕུང་རང་ལ་བསྡུ། དེ་ནས་སེམས་དཔའ་གསུམ་བསྡུ་བ་རིལ་འཛིན་བཞིན་ནོ། །ཡང་དེ་ཉིད་ལས་རླུང་སེམས་དབྱེར་མེད་ཀྱི་ལྷ་སྐུར་ལྡང་བར་བྱ་ཞིང་། དེ་ནས་འོད་གསལ་ལས་སྒྱུ་ལུས་སུ་ལྡང་བ་ཞེས་བྱའོ། །འདི་གསལ་གདབ་པའི་ཕྱིར་ངག་ཏུ། སྙིང་གའི་ས་བོན་འོད་ཀྱིས་སྣོད་བཅུད་བཞུ། །འོད་ཀྱི་རྣམ་པར་རང་ལ་ཐིམ་པ་ནས། །རང་གི་སྒོ་གསུམ་དམ་ཚིག་སེམས་དཔའ་ཡང་། །རིམ་གྱིས་འོད་ཀྱི་ཐིག་ལེའི་བར་དུ་བསྡུ། །ཞེས་སོ། དེ་དག་གིས་འོད་གསལ་གྱི་དམིགས་རིམ་སྨོས་ཟིན་ཏོ། ༈ །ལྔ་པ་བར་དོ་ཆོས་ཉིད་རང་གྲོལ་གྱི་གདམས་པ་ལ། བར་དོ་དང་པོ་ཆོས་སྐུ་མངོན་དུ་བྱ་བ། བར་དོ་གཉིས་པ་སྒྱུ་ལུས་ལྷ་སྐུར་ལྡང་བ། བར་དོ་གསུམ་པ་འགྲོ་དྲུག་གི་སྐྱེ་སྒོ་དགག་པ་གསུམ། དང་པོ་ནི། རྣལ་འབྱོར་པ་རང་ཉིད་འཆི་བའི་ཉམས་ཁོང་དུ་ཆུད་པ་ན་འདི་ལྟར་བསམ་པར་བྱ་སྟེ།
གལ་ཏེ་དངོས་པོ་རྣམས་ཡང་དག་པར་བདེན་ན་འཆི་མི་སྲིད་ལ། འཆི་བ་དང་འཇིག་པ་མཐོང་བའི་ཕྱིར་བདེན་པར་མ་གྲུབ་སྟེ། དེས་ན་འཆི་བ་ཉིད་ཀྱང་དོན་དུ་གྲུབ་པ་མེད་བཞིན་དུ་སྣང་བའོ། །སྙམ་པས་འཆི་བ་ལ་ཇི་མི་སྙམ་དུ་བཟུང་ནས། རྫས་དང་ཡོ་བྱད་རྣམས་དཀོན་མཆོག་གི་ཕྱོགས་སུ་བཏང་། བཤེས་གཉེན་གྱི་གདུང་སེམས་སོགས་ཏིང་འཛིན་གཡེང་བའི་རྒྱུ་རྣམས་སྤང་། ནུས་ན་ལུས་གནད་གཏུམ་མོ་ལྟར་དང་། མི་ནུས་ན་སེང་གེའི་ཉལ་སྟབས་བྱས་ལ། བླ་མ་དཀོན་མཆོག་ཡིད་ཡུལ་དུ་བྱས་ལ། སྙིང་ཁུང་རུས་པའི་གཏིང་ནས་དད་པ་བསྐྱེད། སྐྱབས་འགྲོ་ཁྱད་པར་ཅན་བྱ། བདག་འཆི་བ་དེ་ཁོ་ན་ཉིད་འོད་གསལ་དོན་དམ་པའི་བདེན་པ་རྟོགས་པར་བྱས་ལ། སེམས་ཅན་ཐམས་ཅད་ཀྱི་དོན་དུ་སྲིད་པ་བར་དོར་ཟུང་འཇུག་ཕྱག་རྒྱ་ཆེན་པོའི་གོ་འཕང་མངོན་དུ་བྱའོ་སྙམ་དུ་སེམས་ཡང་ཡང་བསྐྱེད། འཕེན་པ་དྲག་པོ་བྱ། དེ་ནས་འཆི་བའི་ཚེ་མིག་གི་སྣང་བ་ཐིམ་པས་གཟུགས་མི་གསལ། རྣ་བའི་སྣང་བ་ཐིམ་པས་
སྒྲ་མི་ཐོས། སྣའི་སྣང་བ་ཐིམ་པས་དྲི་མི་ཚོར། ལྕེའི་སྣང་བ་ཐིམ་པས་རོ་མི་མྱོང་། ལུས་ཀྱི་སྣང་བ་ཐིམ་པས་ཚོར་བ་བརྟུལ། ས་ཆུ་ལ་ཐིམ་པས་ལུས་ཀྱི་ཟུང་མི་ཐུབ། ཆུ་མེ་ལ་ཐིམ་པས་ཁ་སྣ་སྐམ། མེ་རླུང་ལ་ཐིམ་པས་ལུས་ཀྱི་དྲོད་རྣམས་སྡུད། རླུང་རྣམ་པར་ཤེས་པ་ལ་ཐིམ་པས་ཕྱི་དབུགས་ཆད་ནས་ནང་དབུགས་ཅུང་ཟད་མི་ཆད། དེའི་ཚེ་སྐད་ཅིག་དང་པོ་སྣང་བའི་དུས་སུ་ནང་རྟགས་དུ་བ་ལྟ་བུ། ཕྱི་རྟགས་ཟླ་བ་ཤར་བ་ལྟ་བུ། གཉིས་པ་མཆེད་པའི་དུས་ན། ནང་རྟགས་སྲིན་བུ་མེ་ཁྱེར་ལྟ་བུ། ཕྱི་རྟགས་ཉི་མ་ཤར་བ་ལྟ་བུ། གསུམ་པ་ཐོབ་པའི་ཚེ། ནང་རྟགས་མར་མེ་ལྟ་བུ། ཕྱི་རྟགས་མུན་པ་ལྟ་བུ་འཆར། དེ་ནས་སྐད་ཅིག་བཞི་པར་ཐོབ་པ་འོད་གསལ་ལ་ཐིམ་སྟེ། ཕྱི་རྟགས་སྐྱ་རེངས་ཤར་བ་ལྟ་བུ། ནང་རྟགས་ཤེས་པ་ནམ་མཁའ་སྤྲིན་དང་བྲལ་བ་ལྟ་བུ། མི་རྟོག་པ་བློ་ལས་འདས་པའི་འོད་གསལ་མཐའ་དབུས་མེད་པ་ཞིག་འཆར། དུས་དེར་ད་ལྟ་སྒོམ་པའི་འོད་གསལ་དང་། རང་བཞིན་གྱི་འོད་གསལ་གཉིས་བུ་དང་མ་འཕྲད་པའི་ཚུལ་
ཅན་དེའི་སྟེང་དུ་གནས་པས་རྟོག་བཅས་རང་བཞིན་བརྒྱད་ཅུ་འགག་ནས་རྟོག་མེད་འོད་གསལ་སྤྲོས་བྲལ་ཆོས་སྐུ་མངོན་དུ་གྱུར། དེ་ལས་སྒྱུ་མའི་སྐུར་ལྡང་བས་སློབ་པའི་ཟུང་འཇུག་ཏུ་འགྱུར་བ་ཡིན་པས། དེ་དང་པོ་གསལ་གདབ་པའི་ངག་ཏུ། རིགས་དྲུག་མ་རྒན་ཡོངས་ཀྱི་དོན་སླད་དུ། །འཆི་ཚེ་སྣང་མཆེད་ཐོབ་གསུམ་ཐིམ་པའི་མཐར། །བདག་གིས་འོད་གསལ་མ་བུ་འཕྲད་པའི་སེམས། །མི་རྟོག་ཆོས་སྐུའི་རང་ཞལ་མཐོང་བར་བྱ། །ཞེས་འདུན་པ་དྲག་པོ་དང་བཅས་འདོན་བསྒོམ་ཡང་ཡང་སྔོན་དུ་བཏང་ངོ་། །གཉིས་པ་ནི། དེ་ཁོ་ནས་གྲོལ་བར་མ་ནུས་ཏེ། བར་དོ་གཉིས་པ་འཇུག་པ་དང་། ཡང་ཀུན་རྟོག་གི་གཞོན་པའི་རླུང་གཡོས་པའི་རྐྱེན་བྱས་ནས་འོད་གསལ་གྱི་ངང་ལས་ཉེར་ཐོབ་རང་བཞིན་བདུན་དང་བཅས་པ་འབྱུང་། དེ་ལས་མཆེད་པ། དེ་ལས་སྣང་བ། དེ་ལས་རླུང་མེ་ཆུ་ས། དེ་ལས་དབང་པོ་ཀུན་ཚང་ཐོགས་མེད་རྒྱུ་བའི་བར་སྲིད་ཀྱི་ལུས་གྲུབ་པས། དེས་ན་གོང་གི་འོད་གསལ་ལ་ཅི་གནས་སུ་བཞག་ནས། སྣང་
གསུམ་ལུགས་ལྡོག་ཏུ་འཆར་བར་རྩོམ་པའི་ཚེ་བར་དོ་སྒྱུ་ལུས་སུ་ལྡང་བའི་འཕེན་པ་གཏོང་སྟེ། དེ་ད་ལྟ་ནས་གསལ་གདབ་པའི་ཕྱིར། ངག་ཏུ། བར་དོ་དང་པོའི་འོད་གསལ་ལས་འདས་ཏེ། གལ་ཏེ་གཉིས་པའི་སྣང་བ་འཆར་བ་ན། །དེ་ཚེ་བདག་གིས་བར་དོ་སྒྱུ་མའི་ལུས། །ལྷག་པའི་ལྷ་ཡི་སྐུ་རུ་ལྡང་བར་བྱ། །ཞེས་པའི་འཕེན་པ་ད་ལྟ་ནས་ཀྱང་བཏང་ཞིང་སྣང་གསུམ་ལུགས་ལྡོག་རྫོགས་ཏེ་བར་དོ་གཉིས་པ་གྲུབ་པ་དེའི་ཚེ། རང་ཉིད་རྡོ་རྗེ་རྣལ་འབྱོར་མ་སྒྱུ་མའི་སྐུར་ལྡང་། ཡང་དེ་དོན་དམ་འོད་གསལ་གྱིས་སྦྱང་བ་སོགས་ནས་སླར་སྡང་བ་ན་ལུགས་ལྡོག་སྣང་གསུམ་ཡེ་ཤེས་ཀྱི་རླུང་དང་བཅས་པ་མི་སློབ་པའི་ཟུང་འཇུག་གི་སྐུར་ལྡང་ངོ་། །གསུམ་པ་ནི། རྣལ་འབྱོར་དེ་དག་ཁོ་ནས་མཆོག་གི་གོ་འཕང་མཐར་མ་ཕྱིན་ཏེ། བར་དོ་གསུམ་པ་མངལ་གྱི་སྣང་བ་སོགས་འཆར་བ་དེའི་ཚེ་སྐྱེ་བ་ཕྱི་མའི་མ་དེ་རྡོ་རྗེ་རྣལ་འབྱོར་མ་དང་། ཕ་ཡབ་ཧེ་རུ་ཀར་བསྒོམས་ཏེ་ཆགས་པ་བཟློག་པས་མངལ་སྒོ་ཁེགས་ནས་སྔགས་ཀྱི་རིག་པ་འཛིན་པའི་རྣལ་
འབྱོར་ཡབ་ཡུམ་རང་གི་བླ་མར་བཟུང་ཆོག་པ་ཞིང་གི་མངལ་གདམ་ནས། དེར་སྐྱེ་བའི་ཚེ་བླ་མ་ཡབ་ཡུམ་ལ་དབང་གོང་མ་བསྐུར་བར་གསོལ་བ་བཏབ་པས་བླ་མ་ཡབ་ཡུམ་གྱི་བྱང་སེམས་དང་འདྲེས་པའི་ཚེ་བདེ་སྟོང་གི་ཉམས་སྐྱེས་པ་ན་གསང་དབང་གི་རྟོག་པ་ངོས་ཟིན་པར་བྱས་ལ་ཡབ་ཡུམ་ཡི་དམ་དུ་ཤེས་པ་དང་། མངོན་བྱང་ལྔའི་རྟོགས་པ་དང་མ་བྲལ་བར་ཡེ་ཤེས་ཀྱི་རྒྱུ་ལས་ཡེ་ཤེས་སྒྱུ་མ་ལྟ་བུ་བསྐྱེད་ནས་མིག་འཕྲུལ་ཙམ་དུ་སྐྱེ་བ་སྤྲུལ་སྐུ་ཡིན་ནོ། །སྙམ་པའི་མཉམ་བཞག་གི་སྒོ་ནས་མངལ་བཟུང་ངོ་། །དེ་ད་ལྟ་ནས་འཕེན་པ་བཏང་བའི་ཕྱིར། གལ་ཏེ་བར་དོ་གཉིས་པར་ཟུང་འཇུག་སྐུ། །འགྲུབ་པར་མ་གྱུར་དེ་ཚེ་ཕྱི་མ་ཡི། །ཕ་མ་ལྷ་རུ་བལྟས་པས་ཆགས་སྤང་སྟེ། །མངལ་གདམ་ཤེས་བཞིན་སྐྱེ་བ་འཛིན་པར་བྱ། །ཞེས་འདོན་བསྒོམ་ཡང་ཡང་བྱ། །དེ་དག་གིས་བར་དོའི་ཉམས་ལེན་ཁོངས་ཀྱི་དམིགས་རིམ་མདོ་ཙམ་བརྗོད་ནས། དེ་གསུམ་གལ་ཏེ་གནད་དུ་མ་སོང་ན། དགེ་བ་བསྔོ་ཞིང་སྨོན་ལམ་གྱིས་རྒྱས་བཏབ་པས་སྐྱེ་
བ་དག་པ་འཛིན་དགོས་པས། དེ་ད་ལྟ་ནས་འཕེན་པ་བཏང་བའི་ཕྱིར། གལ་ཏེ་བར་དོ་གསུམ་པར་སྐུ་གསུམ་གྱི། །ཉམས་ལེན་འབྲས་བུ་སྟེང་དུ་མ་ཕྱིན་ན། །དུས་གསུམ་དགེ་བ་བསྡོམས་ཏེ་བསྔོ་བ་དང་། །སྨོན་ལམ་བཟང་པོས་སྐྱེ་བ་དག་པར་བྱ། །ཞེས་འཕེན་པ་བཏང་ཞིང་མངལ་གདམ་པར་མ་ནུས་པ་དེའི་ཚེ་བདག་གིས་ཚུལ་ཁྲིམས་བསྲུང་བ་ལ་སོགས་པའི་དགེ་བའི་རྩ་བ་བྱས་སོ་ཅོག་ཡིད་ཀྱིས་གསལ་བཏབ་ཅིང་བསྡུས་ཏེ། དེ་དག་གི་མཐུས་དམ་པའི་ཆོས་གསང་སྔགས་ཀྱི་བསྟན་པ་སྒྲུབ་ཏུ་རུང་ཞིང་སྒྲུབ་པའི་སྐལ་པ་ཅན་གྱི་ལུས་ལེན་པར་གྱུར་ཅིག་པའི་སྨོན་ལམ་དང་བསྔོ་བས་མཚམས་སྦྱར་རོ། །དེ་དག་གིས་བར་དོའི་ཉམས་ལེན་སྨོས་ཟིན་ཏོ། ༈ །དྲུག་པ་འདའ་ཀ་འཕོ་བ་གསེར་འགྱུར་གྱི་གདམས་པ་ལ། རབ་འོད་གསལ་དུ་འཕོ་བ་དང་། འབྲིང་སྒྱུ་ལུས་སུ་འཕོ་བ་གཉིས། སྔར་བཤད་ཟིན་ཏོ། །ད་ཐ་མ་ལྷ་སྐུ་འཕོ་བ་ལ་སྦྱངས་ཏེ་འཕོ་བ། ལུས་བཅོས་ཏེ་འཕོ་བ། བཙན་ཐབས་སུ་འཕོ་བ་གསུམ། དང་པོ་ལ་སྦྱང་བ་དང་། ལས་
ལ་སྦྱོར་བ་གཉིས་ཀྱི་དང་པོ་ནི། ལུས་གནད་རྐང་པ་རྡོར་སྐྱིལ། སྒལ་པ་བསྲང་། ལག་པ་གཉིས་བརླའི་སྟེང་དུ་བཞག་ལ་དམིགས་པ་རང་ཉིད་རྡོ་རྗེ་རྣལ་འབྱོར་མར་གསལ་བ། ཁ་དང་། ཆུ་ལམ། བཤང་ལམ། སྣ་བུག་གཉིས་དང་། རྣ་བའི་བུ་ག་གཉིས། མིག་གཉིས། ལྟེ་བ་རྣམས་ཧྲཱིཿཡིག་དམར་པོ་རེས་བཀག་པར་བསམ། ལུས་ཀྱི་དབུས་སུ་རྩ་དབུ་མ་གྲོ་སོག་ཙམ་པ། མར་སྣ་ལྟེ་འོག་ཏུ་ཕུག་རྡུགས། ཡར་སྣ་ཚངས་བུག་ཏུ་ཟང་ཐལ་དུ་ཡོད་པའི་སྟོད་ཆའི་ཐད་དུ་རྩ་བའི་བླ་མ་རྡོ་རྗེ་འཆང་ཡབ་ཡུམ་སྔོན་འགྲོའི་སྐབས་ལྟར་བསྐྱེད་ནས་མཆོད་བསྟོད་བྱ། ཉེས་ལྷུང་བཤགས། དབང་རྫོགས་པར་བླངས་ནས། ཐུན་མོང་མ་ཡིན་པའི་དད་པས་འདི་སྐད་དུ། བླ་མ་དམ་པ། བླ་མ་དམ་པ། བདག་གི་འཆི་བ་ཆོས་སྐུ། བར་དོ་ལོངས་སྐུ། སྐྱེ་བ་སྤྲུལ་སྐུར་འཆར་བར་བྱིན་གྱིས་བརླབ་ཏུ་གསོལ། །དེ་འཆར་བའི་ཆེད་དུ་མཁའ་སྤྱོད་ཀྱི་གནས་སུ་རིག་པ་འཛིན་པའི་འཁོར་ལོས་སྒྱུར་བའི་ལུས་ཁྱད་པར་ཅན་དུ་སྐྱེ་བར་བྱིན་གྱིས་བརླབ་ཏུ་
གསོལ། དེར་སྐྱེས་ནས་མཁའ་ཁྱབ་ཀྱི་སེམས་ཅན་གསང་སྔགས་ཀྱི་ཐེག་པ་ཆེན་པོར་བདག་ཁོ་ནས་འཇོག་ནུས་པར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་བཏབ་པས། ལྟེ་འོག་དྷཱུ་ཏིའི་ནང་དུ་པདྨ་འདབ་མ་བཞིའི་ཟེའུ་འབྲུར་སེམས་ཀྱི་ངོ་བོ་ཨ་སྔོན་པོ་འདབ་མ་བཞིར་ཡྃ་ཡིག་རེ་གསལ་བཏབ་ནས། རླུང་བརྔུབ་པས་དྷཱུ་ཏི་སྒྲིབ་མེད་ཀྱི་ནང་དུ་སིབ་སིབ་སོང་། ལྟེ་འོག་དྷཱུ་ཏིའི་ནང་དུ་དགང་བས་ཡྃ་ཡིག་བཞི་རབ་ཏུ་གཡོས་པ་ལས། རླུང་བྱུང་བས་ཨ་ཡིག་བཏེག་པ་དང་ལྷན་ཅིག་ཧིཀ་བདུན་བརྗོད་པས་ལྟེ་བར་འཕར། ཡང་བདུན་བརྗོད་པས་སྙིང་ག །དེ་ནས་བདུན་བརྗོད་པས་སངས་ཀྱིས་འཕར་སོང་བླ་མའི་ཞབས་ལ་རེག་རེག་བྱ། ཡང་རླུང་གཞིལ་ཅིང་ཀ་ཧིཀ་ཉེར་གཅིག་བརྗོད་པས་ཨ་ལྟེ་འོག་གི་པདྨར་བབས་པར་བསམ་སྟེ། གསལ་གདབ་པའི་ཕྱིར། རང་ལུས་ལྷར་གསལ་དྷཱུ་ཏིའི་མར་སྣེའི་ནང་། །པདྨའི་སྟེང་དུ་རང་སེམས་ཨ་ཡིག་ཚུལ། །རླུང་གིས་བཏེག་པས་སྤྱི་བོའི་བླ་མར་རེག །རླུང་གཞིལ་སླར་ཡང་ལྟེ་འོག་པདྨར་
བབ། ཅེས་གསལ་བཏབ་ཅིང་། སྤྱི་བོ་ཟ། སྐྲངས། ཆུ་སེར་ཕྲུམ་པ་སོགས་རྟགས་མ་བྱུང་གི་བར་སྦྱང་ངོ་། །གཉིས་པ་ལས་སྦྱོར་ནི། འཆི་ལྟས་རྣམས་ཤར་ནའང་། ཟློག་པའི་ཐབས་ཡོད་པ་རྣམས་ཅི་ནུས་སུ་ཟློག །ཅིས་ཀྱང་བཟློག་བར་མི་ནུས་པ་དེའི་ཚེ། སྡོམ་པ་དང་དམ་ཚིག་ཉམས་ཆགས་ལ་ཕྱིར་བཅོས་བྱ། རྫས་དང་ཡོ་བྱད་དཀོན་མཆོག་ལ་འབུལ། དམ་ལྡན་གྱི་གྲོགས་ལ་ཚོགས་ཀྱི་འཁོར་ལོ་སོགས་ཅི་འབྱོར་བྱ། ཡི་དམ་གྱི་སྐུ་མདུན་དུ་བཤམ། མཆོད་པའི་བཀོད་པས་མཆོད། དམིགས་པ་སྔར་ལྟར་ལ་ཡྃ་ཡིག་བཞི་པོ་རླུང་གི་དཀྱིལ་འཁོར་གཞུ་ཡི་དབྱིབས་ཅན་དུ་བསམ་པས་ཡི་གེ་བཏེག །སྔར་ལྟར་འཕངས་པས་བླ་མ་རྡོ་རྗེ་འཆང་གི་ཐུགས་ཀར་ཐིམ་པར་བསམས་པ་ལ། ཚིག་ཐོག་མ་གཉིས་སྔ་མ་ལྟར་ལ། རླུང་གིས་བཏེག་པས་སྤྱི་བོའི་བླ་མ་ཡི། །ཐུགས་ཀར་ཐིམ་པས་གཉིས་མེད་རོ་གཅིག་གྱུར། །ཞེས་འདོན་པ་བསྒྱུར་བས་གསལ་བཏབ་སྟེ། དེ་ལ་སྤྲུལ་སྐུ་བླ་མའི་འཕོ་བ་ཟེར། ཡང་དམིགས་པ་གཞན་དེ་ཉིད་ལ། བླ་
མ་རྡོ་རྗེ་རྣལ་འབྱོར་མར་བསྒོམ་པའི་ཐུགས་ཀར་ཡེ་ཤེས་སེམས་དཔའ་ཚོན་གང་བ་དེའི་ཐུགས་ཀར་ཏིང་ངེ་འཛིན་སེམས་དཔའ་ཧྲཱིཿཡིག་དམར་པོ་གསལ་བ་ལ་འཕོ་བ་ནི་ལོངས་སྐུ་ཡི་དམ་གྱི་འཕོ་བ་དང་། ཨ་ཡིག་དམིགས་མེད་དུ་བཏང་བ་ལ་ཆོས་སྐུ་འོད་གསལ་གྱི་འཕོ་བར་འདོགས་པ་ཡིད་ནོ། །གཉིས་པ་ལུས་བཅོས་ཏེ་འཕོ་བ་ནི། སེང་གེའི་ཉལ་སྟབས་མགོ་བྱང་དུ་བསྟན་བྱས། རང་ཡི་དམ་དུ་གསལ་བའི་མགྲིན་པར་ༀ། སྙིང་གར་ཧཱུྃ། ལྟེ་བར་ཨཱཿསེམས་ཀྱི་ངོ་བོར་བསྒོམས་ཏེ། ཨཱ ཿཧཱུྃ་ལ། ཧཱུྃ་ༀ་ལ། ༀ་སྣ་བུག་གཡོན་ནས་ཐོན། ཡི་དམ་གྱི་སྐུ་ལ་ཐིམ་པར་བསམ་མོ། །གསུམ་པ་བཙན་ཐབས་ཀྱི་འཕོ་བ་ནི་འདིར་མ་སྨོས་སོ། །དེ་དག་གིས་འཕོ་བའི་ཉམས་ལེན་མདོ་ཙམ་སྨོས་ཟིན་ཏོ། །གསུམ་པ་འཇུག་གམ་རྗེས་ལ་གེགས་བསལ་བ། བོགས་འདོན་པ། ལམ་བགྲོད་ཚུལ། འབྲས་བུ་ཇི་ལྟར་ཐོབ་པ་བཞི་ལས། དང་པོ་ནི། རླུང་གནད་ཀྱི་དུས་སུ་རླུང་སྦྱོར་ཧ་ཅང་དྲགས་པ་དང་། ཡུལ་གནད་དུས་གནད་མ་ཤེས་པའི་དབང་གིས་སྲོག་
རླུང་ལོག་པ་སོགས་གེགས་ཀྱི་རྣམ་པ་བྱུང་ན། བླ་མའི་ཞལ་ལས་དྲིས་ཤིང་བཅོས། སྣོད་འཁྲུད་པ་ན་དྲི་མ་ལྡང་བ་ལྟར་དུག་ལྔ་དང་རིགས་དྲུག་གི་འབྲས་བུ་ངན་པ་ལན་གྲངས་གཞན་ལ་མྱོང་འགྱུར་འདིར་ལྡངས་བས་ལུས་ཀྱི་ན་ཚ་དང་། སེམས་ཀྱི་ཉོན་མོངས་སོགས་ཆེར་ཤར་བ་ན་སྒྱུ་ལུས་དང་སྟོང་ཉིད་བསྒོམ། གཟེར་ལྔ་ལ་སོགས་པའི་ཉམས་ལེན་གྱིས་ལམ་དུ་བསྒྱུར། ཁྱད་པར་ཐབས་ལམ་སྒོམ་པ་འདི་ལ་ཡོན་ཏན་ལ་ང་རྒྱལ་གྱི་བདུད་འཇུག་པ་མང་བས། སངས་རྒྱས་ཀྱི་ཐུགས་ལའང་འདི་ལས་མེད་སྙམ་པ་བྱུང་རུང་སྤྲོས་མེད་དུ་བཞག །རོ་སྙོམས་སུ་བསྲེ། གཞན་དོན་མ་སྔས་པ་བྱ། མདོར་ན་གཏུམ་མོ་ཨ་ཐུང་གི་གདམས་པ་སྒྱུ་ལུས་ལ་སོགས་པའི་ཆ་ལག་དང་བཅས་པ་འདི་ལ་གེགས་མང་ཞིང་ཤེས་པ་སྤང་བར་དཀའ་སྟེ། རྩ་མདུད་དུ་རླུང་ཟིན་པ་དང་། ལུས་ཀྱི་གནས་གཞན་དུ་རླུང་ཟིན་པས་ཉམས་ལ་མི་འཆར་བྱ་བ་མི་འོང་། དེ་ཚོ་ལ་སྡུག་བསྔལ་དང་རློམ་སེམས་རེ་དོགས་སྐྱེས་ན་གེགས་སུ་འགྱུར། དེ་བས་ན་
བླ་མ་དམ་པའི་ཞལ་གྱི་བདུད་རྩི་ལ་བརྟེན་ནས་གེགས་ཀྱི་དབང་དུ་མི་འགྲོ་བར་བྱ་སྟེ་འདིར་བསྡུས་སོ། །གཉིས་པ་བོགས་འདོན་པ་ལ། སྤྱིར་བླ་མ་ལ་དད་པ། སེམས་ཅན་ལ་སྙིང་རྗེ། ལེ་ལོ་མེད་པའི་བརྩོན་འགྲུས། ཐབས་ལམ་ལ་མ་རྨོང་པའི་ཤེས་རབ། དབེན་པ་བརྟེན་པའི་སྒོམ་ཚུགས་སོགས་ཆུ་བོའི་རྒྱུན་ལྟ་བུར་བྱ། བརྟན་པ་མ་ཐོབ་བར་བླ་མའི་ཞལ་ལ་བསྟེན། དབང་པོ་རྟུལ་འབྲིང་དཔེ་ཡི་ཕྱག་རྒྱས་བདེ་བ་སྒྲུབ་པ་རྣམས། རིག་མ་མཚན་ལྡན་ལས་རྒྱ་དང་། ཡིད་ཀྱིས་བསམ་པའི་རྒྱ་ལ་བརྟེན་ནས་བོགས་འདོན། དྲོད་དང་བསྟུན་པའི་བརྟུལ་ཞུགས་ལ་སྤྱོད། དབང་པོ་རྣོན་པོ་རྣམ་ལྡན་སྟོང་ཉིད་ཕྱག་རྒྱར་བྱེད་ནུས་པ་སོགས་ཀྱིས་བྷུ་སུ་ཀུའི་སྤྱོད་པ་དང་། ཕྱག་ཆེན་གྱི་བོགས་འདོན། མདོར་ན་ཕ་རྒྱུད་ནས་བཤད་པའི་སྤྱོད་པ་གསུམ་དང་། མ་རྒྱུད་ནས་བཤད་པའི་སྤྱོད་པ་སོ་སོའི་སྐབས་དང་བསྟུན་ཏེ་བོགས་འདོན། སྤྱིར་ཡོན་ཏན་གསང་ནས་བོགས་འདོན། བླ་འདོད་དང་འགྲོ་དོན་དུ་མིང་བཏགས་མ་སྔས་པ་བྱ། ཞིབ་པར་བླ་མའི་
ཞལ་ལས་ཤེས། གསུམ་པ་ལམ་བགྲོད་ཚུལ་ནི། མ་དག་པའི་ལུས་ཀྱི་གནས་ལྔར་ཉོན་མོངས་ལྔའི་ས་བོན། གཏུམ་མོ་ཡེ་ཤེས་ཀྱི་མེས་བསྲེགས་པས་གཞན་ལ་མྱོང་འགྱུར་གྱི་འབྲས་བུ་འབྱིན་པའི་ཉོན་མོངས་རྣམ་རྟོག་སློང་བའི་ཚོགས་ལམ་དང་པོ། དེ་འདྲ་བའི་འབྲས་བུ་ནད་གདོན་སློང་བའི་ཚོགས་ལམ་གཉིས་པ། ཁམས་གསུམ་གྱི་སྐྱེ་རྒྱུན་སློང་ཞིང་གཅོད་པའི་ཚོགས་ལམ་གསུམ་པ། ཟག་བཅས་ཀྱི་བདེ་གསལ་མི་རྟོག་སྟོང་པ་དང་བཅས་ལམ་དུ་སློང་བའི་ཚོགས་ལམ་བཞི་པ་རྣམས་བགྲོད། དེ་ནས་འཁོར་ལོ་ལྔར་རླུང་སེམས་འདུས་པ་ལམ་དུ་སྦྱོང་བའི་སྦྱོར་ལམ་དང་པོ། རྩ་གནས་གྲངས་མེད་དུ་རླུང་སེམས་ཟིན་པ་སློང་བའི་སྦྱོར་ལམ་གཉིས་པ། ཟག་མེད་ཀྱི་བདེ་གསལ་མི་རྟོག་པ་སློང་བས་བདེན་པ་དང་པོར་མཚམས་སྦྱོར་བའི་སྦྱོར་ལམ་གསུམ་པ། འབྱུང་ལྔའི་རླུང་ཟག་མེད་ཡེ་ཤེས་ཀྱི་རླུང་དུ་ཟིན་པའི་སྦྱོར་ལམ་བཞི་པ། བདེ་ཆེན་དང་སྟོང་ཆེན་རེས་འཇོག་ཏུ་འཆར་བའི་སྦྱོར་ལམ་ལྔ་པ་རྣམས་བགྲོད། དེ་ནས་སྔར་མ་
མཐོང་བའི་བདེ་སྟོང་རོ་གཅིག་གི་དོན་དང་པོར་མཐོང་བའི་མཐོང་ལམ་ས་དང་པོ་རབ་ཏུ་དགའ་བ་བགྲོད་དོ། །དེ་ནས་དྭངས་མ་ལྔ་ཡེ་བྱོན་གྱི་འགྲོས་སོགས་དང་མཐུན་པར་སྒོམ་ལམ་དང་པོ་ནས་བཟུང་སྟེ་བཅུ་གཉིས་མ་ཆགས་པདྨའི་སའི་བར་དུ་བགྲོད་པས་རྒྱུན་མཐའ་ཐོབ་བོ། །བཞི་པ་འབྲས་བུ་གཏན་ལ་དབབ་པ་ནི། ཐུན་མོང་གི་དངོས་གྲུབ་བམ་འབྲས་བུ་འབྱུང་བ་ལྔའི་རླུང་དབུ་མར་འགག་པས། དུ་བ་ལ་སོགས་པའི་རྟགས་ལྔ་དང་བཅུ་སོགས་འཆར། གཞན་ཡང་སྒོ་གསུམ་ལ་ཡོན་ཏན་དཔག་མེད་འབྱུང་། ཕྲིན་ལས་བཞི་གྲུབ་ཆེན་བརྒྱད་སོགས་ཐུན་མོང་གི་གྲུབ་པ་ཐོབ། དེ་ལྟར་འཇིག་རྟེན་པའི་དངོས་གྲུབ་ཐོབ་ཅིང་དབང་དུ་འདུས་ལ་བོགས་ཐོན། ལམ་ཚད་དུ་ཕྱིན་པས་མཆོག་གི་དངོས་གྲུབ་བཅུ་གསུམ་རྡོ་རྗེ་འཛིན་པའི་ས་བརྙེས། རྡོ་རྗེ་འཆང་ཆེན་པོའི་གོ་འཕང་ཐོབ། ཁ་སྦྱོར་བདུན་ལྡན་ལོངས་སྤྱོད་རྫོགས་སྐུར་བཞེངས། སྒྱུ་འཕྲུལ་དྲ་བའི་སྤྲུལ་པ་བསམ་ཡས་བརྗོད་ཀྱིས་མི་ལོངས་པའི་གར་བསྒྱུར། བྱང་ཆུབ་སྙིང་པོར་སྲིད་པ་
དག །མདོར་ན་ཐུན་མོང་མིན་པའི་སངས་རྒྱས་རྡོ་རྗེ་སེམས་དཔའ་རིགས་ཐམས་ཅད་ཀྱི་ཁྱབ་བདག་ཆེན་པོའི་གོ་འཕང་མངོན་དུ་བྱེད་པར་འགྱུར་རོ། །དེ་རྣམས་ཀྱིས་དཔལ་ནཱ་རོའི་ཆོས་དྲུག་གི་དམིགས་ཐུན་མདོ་ཙམ་སྨོས་ཟིན་ཏོ། །འདིར་སྨྲས་པ། བདག་ལ་སྒོམ་པའི་མྱོང་བ་མ་མཆིས་པས། །དེ་སླད་གཞན་ལ་ལམ་ཚུལ་སྟོན་པ་དཀའ། །འོན་ཀྱང་ཡོངས་འཛིན་རྣམས་ཀྱི་ལེགས་བཤད་དང་། སྒྲུབ་བརྒྱུད་ཟླ་མེད་ཀརྨ་ཀཾ་ཚང་ལ། །ངེས་ཤེས་རྙེད་པས་ཚུལ་འདི་ཅུང་ཟད་ཙམ། །གོ་ཞིང་རྟོགས་པས་མདོར་བསྡུས་བཀོད་པ་ཡིན། །སྦྱོང་གཞི་རང་ལུས་ལ་བརྟེན་དྲི་མ་ཙམ། །སྦྱང་བའི་ཐབས་ལ་རྫོགས་རིམ་ཙཎྜ་ལཱི། །མཐར་ཐུག་ཡིན་པར་འཁྲུལ་ནས་ཁ་འཆལ་གྱི། །བརྗོད་པ་མང་པོ་བོད་ཀྱི་ཡུལ་འདིར་བྱུང་། །དེ་ཚེ་ཡོངས་འཛིན་འཁྲུལ་མེད་ཀརྨ་པ། །དབྱངས་ཅན་བཞད་པའི་བཀའ་མཆིད་སྒྲོན་མེ་ཡིས། །དོན་དང་དོན་མིན་ལེགས་པར་ཕྱེ་བ་ལ། །ཤེས་བྱའི་ཁོང་ནས་རྒོལ་བ་རྩོམ་པ་སུ། །ཐུགས་རྗེའི་ནུས་པ་གཏུགས་མེད་བླ་མ་
མཆོག །དབང་ཕྱུག་རྡོ་རྗེ་ལྟ་བུའི་ཞབས་སེན་ལ། །མགོ་བོས་མངོན་བསྟོད་བརྒྱུད་པའི་རྗེས་འབྲང་ན། །ངེས་དོན་དོན་སྤྱིར་མ་ལུས་མངོན་སུམ་འཆར། །འདི་བྲིས་གསང་བ་བསྒྲགས་པའི་ནོངས་མཆིས་ན། །མཁའ་འགྲོའི་ཚོགས་ཀྱིས་བཟོད་པར་མཛད་འཚལ་ཞིང་། །དགེ་བས་འགྲོ་ཀུན་སྙིང་པོའི་བསྟན་པ་ལ། །ཞུགས་ནས་མཆོག་ཏུ་མི་འགྱུར་འགྲུབ་གྱུར་ཅིག །ཅེ ས་པ་འདི་སྔགས་ཀྱི་ཚུལ་ལ་རབ་འབྱམས་སྨྲ་བ་ཀརྨ་དབང་ཕྱུག་གིས་བསྐུལ་བ་དོན་ཡོད་པར་བྱ་བའི་ཕྱིར་ཤཱཀྱའི་དགེ་སློང་ཆོས་ཀྱི་དབང་ཕྱུག་གིས་མཁའ་འགྲོ་ལ་གནང་བར་གསོལ་བ་བཏབ་ཅིང་རྗེ་བཙུན་ཀརྨ་པ་ཆེན་པོ་སྤྱི་བོའི་རྒྱན་དུ་བཀོད་དེ། རང་ལོ་ཉེར་དྲུག་པ་ལ་ཁྱུང་རྫོང་རྒྱལ་བའི་ཕོ་བྲང་དུ་ལེགས་པར་བྲིས་པའོ། །མངྒ་ལཾ། ༈ མར་པའི་ཞལ་གདམས་ལས། ཉམས་ཁྲིད་རྫོགས་པར་མ་ཐོབ་པར། །གལ་ཏེ་འདི་ཉིད་བསྟན་གྱུར་ན། །ནག་པོ་ཆེ་དང་ཟ་བྱེད་ཚོགས། །མཁའ་འགྲོ་རྣམས་ཀྱིས་མགོ་བོ་ཁོས། །ཞེས་གསུངས་པ་ལྟར་རྣལ་འབྱོར་པ་རང་ཉིད་ཀྱང་དམ་ཚིག་
གནས་བཞིན་པར་ཉམས་སུ་ལེན་ཅིང་གཞན་དམ་ལྡན་དམ་མིན་ཚུལ་བཞིན་ཤེས་པ་མ་གཏོགས་གསང་རྒྱས་གདབ་པ་གལ་ཆེའོ། །ཨེ་ཀ་པ་རི་པྲི ཙྪ་བི་ཤུདྦྷ་ཛ་ཡནྟུ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།